﻿ማዝሙረ.
25.
ዳዊታ ማዝሙረ አቤት ጎዳዉ፥ ሸምፖፈ ታ ነና ዎሳይስ። 
አቤት ታ ፆሳዉ፥ ታ ነናን አማነታይስ፤ ታና ዬላዮፓ፤ ታ ሞርከታስ ታና አꬃዳ እሞፋ። 
ነናን ኡፋይስ ኦይሳት ዬላቶኮና፤ ሽን ጋሶይ ባይና ገነይሳት ዬላታና። 
አቤት ጎዳዉ፥ ታና ነ ኦግያ በሳ፤ ነ ጌዶ ታና ካለꬃ። 
ታና አሽያ ፆሳይ ነና ግድያ ግሾ፥ ነ ቱማተꬃ ታና ካለꬃነ ታማርሳ፤ ጋላስ ኩመꬃ ታ ነናን ኡፋይስ ኦꬃይስ። 
አቤት ጎዳዉ፥ በንፐ ደእያ ነ ቃꬍያነ ነ ኬሀተꬃ ሀሳያ። 
ታ ናአተꬃ ናጋራነ ኢታባ ሀሳዮፓ፤ አቤት ጎዳዉ፥ ነ ኬሀተꬃነ ሎኦተꬃ ሀሳያ። 
ጎዳይ ኬሀነ ሱረ ግድያ ግሾ፤ ናጋራንቾታ ባ ኦግያ ታማርሴስ። 
አሽከታ ሱረተꬃን ካለꬄስ፤ ኤንታና ባ ኦግያ ታማርሴስ። 
ጎዳ ጫቁዋነ እያ ኪታ ናገይሳታስ እያ ኦገ ኡባይ ቱማነ ኬሀ። 
አቤት ጎዳዉ፥ ታ ናጋራይ ዳሮ፤ ግዶሽን ነ ሱንꬃ ግሾ ታው አቶ ጋ። 
ጎዳ ያይያ አስ ኦኔ? እ ካላናዉ በሲያ ኦግያ ጎዳይ እያ ታማርሳና። 
እ ኡባ ዎደ ዱረተꬃን ዳና፤ እያ ናይት ቢታ ላታና። 
ጎዳይ ያየይሳታስ ባ ፁራ ገንና፤ እ ኤንታዉ ባ ጫቁዋ ኤርሴስ። 
ጎዳይ ታ ቶሁዋ ፅሄፐ ናግያ ግሾ፥ ታ አይፈይ ማዶ ኤካናዉ ኡባ ዎደ እያኮ ፄሌስ። 
ጎዳዉ፥ ታኒ ብዛነ መቶትዳ አስ ግድያ ግሾ፥ ታኮ ስማ፤ ነ ማሮተꬃ ታና በሳ። 
ታዉ ህርግ ዳርስ፤ ታ መቱዋፐ ታና ነ አሻ። 
ታ መቱዋነ ታ ዋይያ በአ፤ ታ ናጋራ ኡባ አቶ ጋ። 
ታ ሞርከት አይ መላ ዳርዳኮ በአ፤ ኤንቲ ታና አይ መላ እፅያኮ ፄላ። 
ነ ታና ናጋ፤ ነ ታና አሻ፤ ታ ኔኮ ባቃትያ ግሾ ታና ዬላዮፓ። 
ታ ነናን ኡፋይስ ኦꬅዳ ግሾ፥ ሱረተꬅነ ቱማተꬅ ታና ናጎ። 
አቤት ፆሳዉ፥ እስራኤለ አሳ ኤንታ መቶ ኡባፈ ነ ዎዛ። 
