﻿ማዝሙረ.
17.
ዳዊታ ዎሳ አቤት ጎዳዉ፥ ታ ፅሎ ማጋኑዋ ስአ፤ ታኒ ኔኮ ዋስያ ዋሱዋ ሀይዛ። ጭሞን ግዶናሽን ቱማን፥ ዎስያ ዎሳ ዛራ። 
ነ ፅሎ ፕርዳይ ታዉ ቆንጮ፤ ነ አይፈይ ቱማ ፄሎ። 
ኔኒ ቃማ ታና ፆሞሳዳሳ፤ ታ ዎዛና ፓጫዳሳ። ሽን ፓጫዳካ ታ ቦላ አይኮካ ደማባካ፤ ታ እንፃርሳይካ ባለትቤና። 
ታኒ ሀራ አሳታዳ ኢታባ ሃሳይከ፤ ታኒ ነ ቃላ ናግያ ግሾ፥ ገነ ኦግያ ካላብከ። 
ታ ቶሆይ ꬉበቶና መላ፥ ታ ታንጎይ ነ ኦግያፐ ጋፃ ከይቤና። 
አቤት ፆሳዉ ታ ዎሳ ነ ስእያ ግሾ፥ ታኒ ነና ዎሳይስ። ነ ሀይꬃ ታኮ ዛራዳ፥ ታ ቃላ ስአ። 
ባንታ ሞርከታፐ ባቃተይሳታ፥ ነ ኡሻቻ ኩሸን ቆታዳ አሸይሶ፥ ነ ኬሀተꬃ ማላልስያ ኦገን በሳ። 
ነ አይፈ ናኤ መላ ታና ናጋ፤ ነ ቀፍያ ጋርሳን ታና ቆሳ። 
ታና ኡንኤꬅያ ኢታታፐ፤ ተቅድ ኦይክዳ ሞርከታፐ አሻ። 
ኤንታዉ ቃይ ባዋ፤ ኦቶሮን ሃሳዮሶና። 
ታና ጎድድ ኦይክዶሶና፤ ተቅዶሶና፤ ታና ቢታን ሆልድ የጋናዉ ፄሎሶና። 
ኤንቲ ምያባ ኮይያ ጋሞ መላ፤ ቆሰትድ ናግያ ዎዳላ ጋሞ መላ። 
ጎዳዉ፥ ደንዳ፤ ታ ሞርከታራ ኤቀታዳ ኤንታ ሳአን የጋ፤ ነ ማሻን ኢታታ ኩሸፐ ታና አሻ። 
ጎዳዉ፥ ሀይሳ መላ አሳፐ ታና ቆሳ፤ ኤንታ ቃዳይ ሳአባ ግድዳ አሳፐ ነ ኩሸን ታና አሻ። ነ ምንጅዳ ሴራን ኤንታ ካልሳ፤ ሄ ሴራይ ኤንታ ናይታስ ግድድ፥ ኤንታ ናይታ ናይታስ ፓላሆ። 
ሽን ታኒ ፅሎተꬃን ነ ሶምኡዋ በአና፤ ታ ባርክያ ዎደ ነ ማላ በአዳ ኡፋይታና። 
