﻿ማዝሙረ.
8.
ዛማረታ ሀላቃስ ፃፈትዳ ዳዊታ ማዝሙረ ሱሱልኤን የፀትያ ማዝሙረ አቤት ጎዳዉ ኑ ፆሳዉ፥ ነ ሱንꬃይ ቢታ ኡባን ዋንድ ቦንቸትደ! ኔኒ ነ ቦንቹዋ ሳሎፐ ቦላራ ꬎቁ ꬎቁ ኦꬃዳሳ። 
ኔኒ ነ ሞርከታ ግሾ ነ ሞርክያነ ነና ማንደይሳ ስእ ኦꬃናዉ፥ ጉꬃ ናይታ ዶናን ꬋምያ ናይታ ዶናን ጋላታ ኩንꬃዳሳ። 
ኔኒ ነ ብራን መꬍዳ ነ ሳሎታ፥ እያ በሳን በሳን ኔኒ ዎꬅዳ አጌናነ ፆልንቶታ ታኒ በእያ ዎደ፥ 
ኔኒ አሳባ ቆፓናዉ አስ አይቤ? ዎይኮ ኔኒ እያ ፆሞሳናዉ እ አይቤ? 
እያ ነ ኔፐ ጉꬃራ ጉꬃዳሳ፤ ቦንቾነ ግታተꬃ ካላቻ እያ ሁጰን ዎꬃዳሳ። 
ነ መꬍዳ መተꬃ ኡባ፥ ሃራና መላ ነ እያ ሹማዳሳ፤ ኡባ እያ ቶሁዋፐ ጋርሳራ ዎꬃዳሳ። 
ዶርሳታነ መሄታ፥ ዎራ ዶአታ ኡባ፥ 
ሳሎ ካፎታ፥ አባ ሞሎታነ ሃꬃ ጋርሳን ቃፅያ ኡባ እያዉ ሃርሳዳሳ። 
አቤት ጎዳዉ ኑ ፆሳዉ፥ ነ ሱንꬃይ ቢታ ኡባን ዋንድ ቦንቸትደ! 
