﻿ማዝሙረ.
5.
ዛማረታ ሀላቃስ ፃፈትዳ ዳዊታ ማዝሙረ ሱሱልኤን የፀትያ ማዝሙረ አቤት ጎዳዉ፥ ታ ቃላ ስአ፤ ታ ኦልያ ቆፓ። 
ታ ካዋዉ፥ ታ ፆሳዉ ታ ዋሱዋ ስአ፤ ታ ማደ ኮያዳ ዎስያ ዎሳ ሀይዛ። 
አቤት ጎዳዉ፥ ዎንታ ዎንታ ታ ቃላ ስኣሳ። ዎንታ ዎንታ ታ ዎሳ ነ ስን ሺሻይስ፤ ታ ነ ዛሩዋ ናጋይስ። 
ኔኒ ኢታተꬃን ኡፋይቶና ፆሰ፤ ኢታባይ ኔራ ዴና። 
ኦቶራንቾት ነ ስንꬃን ኤቆኮና፤ ኢታባ ኦꬅያ ኡባ ነ እፃሳ። 
ዎርዶ ኦደተይሳታ ነ ꬋይሳሳ፤ ጎዳይ ሱꬁ ጉሰይሳታነ ጭመይሳታ እፄስ። 
ሽን ታ ነ ግታ ማሮተꬃን ነ ኬꬃ ገላና፤ ነ ጌሻ በሳኮ ስማዳ ነና ቦንቾን ጎይናና። 
አቤት ጎዳዉ፥ ታ ሞርከታ ግሾ ጋዳ፥ ታና ነ ፅሎተꬃን ካለꬃ፤ ነ ኦግያ ታ ስንꬃን ሱርሳ። 
ኤንታ መተርሻን ቱም ባዋ፤ ኤንታ ዎዛናን ꬋይሶይ ኩምስ። ኤንታ ዶናይ ዶየትዳ ዱፎ መላ፤ ኤንቲ ባንታ እንፃርሳን ጭሞሶና። 
ኤንቲ ነ ቦላ ማካልዳ ግሾ፥ አቤት ፆሳዉ፥ ኤንታ ፕርዳ፤ ኤንታ ቶባይ ኤንታ ኤክድ ቦ፤ ኤንታ ዳሮ ናጋራ ግሾ ኤንታ የደꬃ። 
ሽን ኔኮ ባቃትድ አትዳ ኡባይ ኡፋይቶ፤ ኤንቲ መርናዉ ኡፋይሳን የፆ። ነ ሱንꬃ ዶስያ ኡባይ ነናን ኡፋይታና መላ፤ ኔኒ ኤንታ መርናዉ ናጋ። 
አቤት ጎዳዉ፥ ኔኒ ፅሎታ አንጃሳ፤ ጎንዳለን አሸይሳዳ ነ ኬሀተꬃን እያ አሻ። 
