﻿እዮባ.
31.
“ጌላኦ ፄላዳ አሞቶና መላ፥ ታኒ ታ አይፍያራ ጫቀታስ። 
ቦላን ደእያ ፆሳ ማታፐ አሳስ እመትዳ ቃዳይ አይቤ? ሳሎን ደእያ ኡባ ዳንዳእያ ፆሳይ አሳስ እምያ ግሾይ አይቤ? 
ኢታታ ቦላ ቦሽ፥ ባላ ኦይሳታ ቦላ ጋዶይ ጋካናይስ ኤረትዳባ ግደነዬ? 
ፆሳይ ታ ኦግያ ኡባ በኤነዬ? ታ ታንጉዋ ኡባ ታይበነዬ? 
“ታኒ ዎርዶን ደእዳባ ግድኮ፥ አሰ ጭምዳባ ግድኮ፥ 
ፆሳይ ታና ልከ ምዛነን ማዛኖ፤ ያትድ ታ ፅሎ ግደይሳ በኦ። 
ታ ሄመꬃይ ኦገፐ ከይዳባ ግድኮ፥ ታ ዎዛናይ ታ አይፈይ ፄልዳባ አሞትዳባ ግድኮ፥ ታ ኩሸይ ናጋራን ቱንዳባ ግድኮ፥ 
ታ ዶላይ ሾደትድ ꬋዮ፤ ታ ዘርዳይሳ ሀር ሞ። 
“ታ ዎዛናይ ሀራ ማጫስ አሞትዳባ ግድኮ፥ ዎይኮ ታኒ ታ ሾሩዋ ማችዉ ጌድዳባ ግድኮ፥ 
ታ ማችያ ሀራ አሳስ ጋጮ፤ ኢራ ሀራ አደይ አቆ። 
ሄስ ዬላይያ ናጋራስ ኮሽያ ግታ ፕርዳ። 
ሀ ናጋራይ ታማዳ ፁግያባ ግድያ ግሾ፥ ታ አቁዋ ኡባ ꬋይሳናሽን። 
“ታ አደ ዎይኮ ታ ማጫ አይለት አቤት ግን፥ ኤንታዉ ፕርዶና እፅዳባ ግድኮ፥ 
ፆሳ ስንꬃን ታ ፕርዳስ ሺቅያ ዎደ ዋናኔ? እ ታና ኦይችያ ዎደ ታኒ ዎይጋ ዛራኔ? 
ታና መꬍዳ ፆሳይ ኤንታ እ መꬍበነዬ? ኑና ኡባ ኑ አየ ኡሎን መꬍዳይ እስ እያ ግደነዬ? 
“ታኒ ማንቆት ዎስዳባ ድግዳባ ግድኮ፥ ዎይኮ አምኤታ ምንꬆና አግዳባ ግድኮ፥ 
ይኦ ናይት መላ አቅያ ዎደ በአሸ፥ ታኒ ታርካ ምዳባ ግድኮ፥ 
ታኒ ኤንታ ታ ናአተꬃፈ ዶማዳ ኤንታ አዋዳ ድቻስ፤ ታ የለቶሶፐ ዶማዳ አምኤታ ማዳስ። 
ማኦይ ꬋይን ሜጎይ ዎꬍያ ኡራ፥ ዎይኮ ካሎ ደእያ መቶታንቹዋ በአዳ፥ 
ታ ዶርሳታ እክሰፐ ኦሰትዳ ማኦ ማይዝን፥ ታና አንጆና ብዳይ ደእኮ፥ 
ታኒ ሞቶን ኤንታ ሻትማናይሳ ኤራዳ፥ ይኦ ናይታ ናቅዳባ ግድኮ፥ 
ታ ቀሰይ ኩርያፐ መኦ፤ ታ ኩሸይ ሀሽያፐ ካረት ዎꬎ። 
ፆሳ ሀንቁዋ ያይዳ ግሾ ሄሳ ኦꬃናዉ ዳንዳእከ። 
“ታኒ ዎርቃን አማነትዳባ ግድኮ፥ ዎይኮ ዋላህ ባይና ዎርቃ ‘ታ ጬቆይ ነና’ ግዳባ ግድኮ፥ 
ታ ዱረተꬃ ዳሮተꬃን፥ ታ ኩሸይ ደምዳ ዎን ኡፋይትዳባ ግድኮ፥ 
አዋ ጶለꬅ በአዳ፥ ዎይኮ አጌና ሎኦተꬅ ፄላዳ፥ 
ታ ዎዛናይ ጌማን ኤንታ ናሽቤና፥ ዎይኮ ታ ኤንታ ዬራዳ ጎይናብከ። 
ሄስ ፕርዳ ኤህያ ናጋራ ግድያ ግሾ ፆሳ ካዳስ ጉሱ። 
“ታ ሞርከታ ኩንደꬃን ኡፋይታብከ፤ ኤንታ ጋክዳ መቱዋን ሀሹ ጋብከ። 
‘ታ ሞርከይ ꬋዮ’ ያጋ ባዳዳ፥ ናጋራ ኦꬃብከ። 
ታ ሶ አሳይ፥ ‘እያ ሶን ካꬅ ምድ ካሎናይ ኦኔ?’ ያግድ ማርካቶሶና። 
ታ ሶይ ኡባ ዎደ ዶያ ግድያ ግሾ፥ ኦገ አስ ካረን አቅ ኤረና። 
ሀራት ኦይሳዳ፥ ታ ናጋራ ታ ዎዛናን ገንꬃብከ። 
አሳ ፖኮስ ያያዳ፥ ኤንታ ቦርያስ ዳጋማዳ፥ ሶ ገላዳ ቆሰትዳ ዎደይ ዴና። 
“ታና ስእያ አስ ደኤረነሽን፥ ታ ኦዳይ ቱማ ግደይሳ ፓራማይስ፤ ኡባ ዳንዳእያ ፆሳይ ታዉ ዛሮ እሞ ታ ሞርከይ ባ ሞቱዋ ፃፍድ ሺሽን ታ በአርክናሽን። 
በእያኮ ዎይቶዳ ቆን አꬃዳ ማአናሽን፥ ካላቻዳ ታ ሁጰን ዎꬃናሽን! 
ታኒ ማት ደእያ አሳዳ ፆሳኮ ሺቃዳ፥ ታ ኦꬅዳባ ኡባ እያዉ ቆንጭሳናሽን! 
“ታ ጎሻ ቢታይ ታ ቦላ ዋስዳባ ግድኮ፥ ዳሳትካ አፉꬃን ላክዳባ ግድኮ፥ 
ሄ ቢታን ካፅዳባ ሚሸ ቃንፆና ኤክዳባ ግድኮ፥ ዎይኮ ሄ ቢታ ኦይሳታ ኮሻን ዎꬍዳባ ግድኮ፥ 
ታዉ ሄ ቢታን ግስተ ግሾ አጉንꬅ፥ ባንጋ ግሾ ሻራፍ ዶሎ” ያግስ። እዮባ ኦዳይ ሄሳን ፖለትስ። 
