﻿እዮባ.
23.
እዮብ ሀይሳዳ ያግድ ዛርስ፤ 
ሀችካ ታ ጫመታዳ ዙዙማይስ፤ ታ ኦለይ ምኖ ግድኮካ እያ ኩሸይ ታ ቦላ ዴፀይሳ አግቤና። 
እያ ደማና በሳ ታ ኤርዳ ግዳርክና፤ እ ደእያ በሳ ታ ጋካርክና! 
ታኒ ታ መቱዋ እያ ስንꬃን ዎꬃናሽን! ታ ዶና ሞቶን ኩንꬃናሽን! 
እ ታዉ ዛራናይ አይበኮ ኤራናሽን፥ እ አይ ግያኮ በአናሽን! 
እ ባ ግታ ዎልቃን ታራ ኤቀታነሻ? አካይ፥ እ ታና ስአና። 
ያን ሱረ አስ እያራ ሞተታናዉ ዳንዳኤስ፤ ታ ዳይናይ ታና መርናዉ ሻትንꬃና። 
ሽን ታኒ ዶሎሀ ቢኮ እ ያን ዴና፤ ታኒ ዉሎሀ ቢኮ እያ ያን ደምከ። 
እ ፑደሀን ኦꬅያ ዎደ ታኒ እያ በእከ፤ ዱገሀ ባጋ ስምያ ዎደ ታኒ እያ ደምከ። 
ሽን እ ታ ታንጉዋ ኡባ ኤሬስ፤ እ ታና ፓጭያ ዎደ ታኒ ዎርቃዳ ጌያዳ ከያና። 
ታ ቶሆይ እያ ታንጉዋ ካልድ ቤስ፤ እያ ኦግያፐ ሀድርስ ኡሻች ስማብከ። 
እያ ዶናፐ ከይያ ኪታፐ ታኒ ሻከታብከ፤ እያ ቃላ ታ ዎዛናን ዎꬃስ። 
ፆሳይ ላመተና፤ እያራ ኤቀታናይ ባዋ፥ እ ኮይዳባ ኦꬄስ። 
እ ታ ቦላ ቆፕዳይሳ ፖልስ፤ ሄሳ መላ ሀራ ዳሮ ሀልቾት እያዉ ደኦሶና። 
ሄሳ ግሾ፥ እያ ስንꬃን ኤቃናዉ ዳሮ ያሼስ፤ ሄሳ ኡባ ቆፕያ ዎደ ኮኮራይስ። 
ፆሳይ ታ ዎዛናይ ዶጫና መላ ኦꬅስ፤ ኡባ ዳንዳእያ ፆሳይ ታና ዳጋንꬅስ። 
ሳካና ꬉማይ ታ ሶምኡዋ ጎዝኮካ፥ ታና ሄ ꬉማይ ሃሳያ ድግቤና። 
