﻿እዮባ.
19.
እዮብ ዛሪድ ሀይሳዳ ያግስ፤ 
ህንተ ታና አዉደ ጋካናዉ ማዱንፅሴቲ? አዉደ ጋካናዉ ህንተ ቃላን ታና ጫደቲ? 
ህንተ ታና ታሙ ቶሆ ጫይደታ፤ ታና ካዉሽሸ ዬላተከታ። 
ቱማ ታ ባልዳባ ግድኮ፥ ታ ባላይ ታና ኦይቻና። 
ህንተ ህንተና ꬎቁ ꬎቁ ኦꬅድ፥ ታ ካዉሻ ታና ሞታናዉ ጎኤትኮ፥ 
ሀ መቱዋ ታ ቦላ ኤህዳይ ፆሰ ግደይሳነ ባ ግትያን ታና ገልስዳይ እያ ግደይሳ ኤርተ። 
ታ ቆሄታስ ጋዳ ዋስን፥ ታና አለይ ባዋ፤ ታ ቃላ ꬎቁ ኦꬃዳ ዋስንካ ታና ስኤይ ባዋ። 
ታ ካንꬃዳ ቦናዳ ፆሳይ ታ ኦግያ ድርስ፤ ታ ሄመትያ ኦግያ ꬉማን ጎርድስ። 
ታ ቦንቹዋ ታፐ ቃርስ፤ ታ ካላቻ ታ ሁጰፐ ኤክስ። 
እ ታና መንረꬅ የግስ፤ ታ ኡፋይሳ ፃጶራ ሾደትዳ ምꬃ መላ ኦꬅስ። 
እያ ሀንቆይ ታ ቦላ ኤፅ ከይስ፤ እ ታና ሞርከዳ ታይቤስ። 
ታና ኦላናዉ ባ ቶራንቾታ ኪቴስ፤ ኤንቲ ታና ኦላናዉ ሚፃ ኬፅድ፥ ታ ዱንካንያ ዩሹዋን ኡትዶሶና። 
ፆሳይ ታ እሻታ ታፐ ሃስስ፤ ታና ኤረይሳት ታዉ አላጋ ግድዶሶና። 
ታ ዳቦት ታፐ ሃክዶሶና፤ ታ ላገት ታና ዶግዶሶና። 
ታ ሶን ሞከትያ እማꬃት ታና ዶግዶሶና፤ ታ ማጫ አይለት ታና ኦገ አሳዳ ፄልዶሶና። 
ታ አይልያ ታ ፄግን ታዉ ኮየና፤ ታ ዎስን ታዉ ኤሮ ጌና። 
ታ ማችያ ታ ዶና ፔኑዋ ሻተታሱ፤ ታ እሻት ታና ኡፍዶሶና። 
ሀር አቶሽን ጉꬃ ናይት ታና ካꬎኦሶና፤ ታና በእድ ለቆሶና። 
ታ ማታ ላገት ኡባይ ታና ኡፎሶና፤ ታ ዶሰይሳት ታዉ ዞኮ ዛርዶሶና። 
ታ መቀꬃይ ታ ጎጋራ ኦይከትስ፤ ታኒ ሀይቃ ክቻዳ አታስ። 
ታ ላገቶ፥ ፆሳ ኩሸይ ታና ደችዳ ግሾ፥ ታዉ ቃተርከት። 
ፆሳይ ታና የደይሳዳ፥ ህንተ ታና አይስ የደꬄቲ? ሀእ ጋካናዉ ህንተ ታና ዋይስዳይስ ግደኔ? 
“ሀእ ጋካናዉ ታ ኦደትዳ ቃላይ ማዝጋበትዳኮ፥ ማፃፋን ፃፈትዳኮ ታ ዶሳይስ ሽን። 
መርናዉ ዳና መላ ማርሳንነ እርሳሰን ዛላ ቦላ ዎጨትድ ፃፈትዳ ግዴረነ! 
ታና ዎዝዳይስ ደኦን ደኤይሳነ ዉርሰꬃን ቢታ ቦላ እ ኤቃናይሳ ታ ኤራይስ። 
ታ ጎጋይ ሜተትድ ዉርኮካ፥ ታኒ ታ አሹዋፐ ሻከታዳ ፆሳ በአናይሳ ኤራይስ። 
ሀራ አስ ግዶና ታኒ ታ ሁጰን፥ ታ አይፈን እያ በአና፤ ታ ዎዛናይ ሄ ቃማ ላሞቴስ። 
“ሀ መቱዋስ ጋሶይ እያ፥ ኑ እያ ዋት የደꬅኖ ግድ ህንተ ቆፕያባ ግድኮ፥ 
ማሻስ ያይተ! ፆሳ ሀንቆይ ማሻራ ያና፤ ፕርድ ደኤይሳ ኤርተ” ያግስ። 
