﻿እዮባ.
17.
ታ ሸምፖይ ከዬስ፤ ታ ላይꬃይ ቃምስ፤ ታዉ ዱፎይ ጊግስ። 
ታ ቦላ ቀልቅሰይሳት ታ ዩሹዋን ደኦሶና፤ ኤንቲ ታና ይሎይዳ መላ አይስዶሶና። 
አቤት ፆሳዉ፥ ኔፐ ሀር ታና ማደይ ባይና ግሾ፥ ነ ታዉ ዋሰ ግዳ። 
ኤንቲ አኬኮና መላ ኤንታ ቆፋ ጎርዳዳሳ፤ ሄሳ ግሾ፥ ነ ኤንታዉ ፆኖ እሞፋ። 
ሚሸ ደማና ግድ፥ ባ ላገታ አꬅድ እምያ ኡራ ናይታ አይፈይ ቆቃና። 
ፆሳይ ታና አሳስ ሚቻስ አግስ፤ አስ ጩትሸ አꬍያ አስ ግዳስ። 
ታ ዳሮ ካዮትዳ ግሾ ታ አይፈይ ኤይስ፤ ታ አሳተꬃይ ላፍድ ኤሾ ግድስ። 
ኬሀ አሳት ታና በእድ ዳጋምዶሶና፤ ሱረት ፆሳ አማኖናይሳታ ቦላ ይሎትዶሶና። 
ግዶሽን ፅሎት ባንታ ኦግያፐ ደሾኮና፤ ሱረት ዎልቃ ጉጅ ጉጅ ቦሶና። 
ሽን ዛሪድ ኡባይ ታኮ ሃ ዪተ! ታ ህንተ ግዶፈ እስ ጭንጫ አስ ደምከ። 
ታ ደኦ ላይꬃይ ዉርስ፤ ታ ሀልቾይ ሀዳ ግድስ፤ ታ ዎዛና አሞይ ጮ አትስ። 
ታ ላገት ቃማ ጋላስ ጎሶና፤ ꬉማ በእሸ ‘ፖአና ሀኔስ’ ያጎሶና። 
ታ ኡፋይሳን ናግያ ኬꬃይ ዱፎ፤ ታ ሂፃ ꬉማን ሂፃይስ። 
ዱፎኮ፥ ‘ነ ታ አዋ’ ያጋና፤ ጉፁነኮ፥ ‘ነ ታ አዮ ዎይኮ ታ ምቾ’ ያጋና። 
ያትን፥ ታዉ አይ ኡፋይስ ደኢ? ታዉ ኡፋይስ ግድያባ ኦን ደማናይ? 
ታ ኡፋይሳይ ታራ ዱፎ ባንዴ? ኑ እስፈ ቢታን ዱገ ገላኔ?” ያግስ። 
