﻿እዮባ.
14.
“ማጫሳፐ የለትዳ አሳስ ላይꬅ ቃንꬅ፤ እካ ቃስ መቶን ኩምስ። 
ጪሻዳ በንትድ ኤለስድ ቆቆፈቴስ፤ ኩያዳ ጋምኦና ኤሶን አꬌስ። 
ያትን፥ ኔኒ ሄሳ መላ አስ ካላዬ? ፕርዳስ ነ ስን ሺሻዬ? 
ቱናባፐ ጌሻባ ከሳናዉ ዳንዳኤይ ኦኔ? ኦንካ ባዋ። 
አስ ዳና ላይꬃስ ዛው ደኤስ፤ እ ዳና አጌና ኔኒ ታይባ ዎꬃዳሳ፤ ኔኒ ዎꬅዳ ዛዋፐ አይ ኦንካ ባዋ። 
ኡነ ኦꬅያ አስ ባ ኦሱዋ ፖልድ ሸምፐይሳዳ፥ እ ሸምፓና መላ ነ አይፍያ እያፐ ደንꬃዳ እያ አጋጋ። 
ቃንፀትዳ ምꬃስ ኡፋይስ ደኤስ፤ ዛሪድ አጬስ፤ ኦራꬃ ታሸ ከስድ ድጬስ። 
ምꬃ ፃጶይ ቢታ ጋርሳን ጭምኮካ፥ ዱሩማይ ቢታን ዎቅኮካ፥ 
ሃ ደምድ አጬስ፤ ኦራꬃ ዶላዳ ታሸ ከሴስ። 
ሽን አስ ሀይቄስ፤ ሄስ እያዉ ዉርሰꬅ፤ እያ ሸምፖይ ከያፐ ጉየ እ አዉን ደኢ? 
አባ ሃꬅ መለይሳዳ፥ ሻፋ ሃꬅ ዉረይሳዳ፥ 
ሄሳዳ አስካ ሀይቄስ፤ ስሚድ ደንደና፤ ሳሎት አꬋና ጋካናዉ አስ ባርከና፤ ባ ꬍስኩዋፈካ ደንደና። 
ኔኒ ታና ዱፎን ገንꬅዳኮ አይበ! ነ ሀንቆይ አꬋና ጋካናዉ ቆትዳኮ አይበ! ነ ታዉ ቃሚዳ ሄ ጋላስ ታና ሀሳይዳኮ አይበ! 
አስ ሀይቅኮ ስሚድ ደኦን ዳኔ? ታ ሸምፕያ ዎደይ ያና ጋካናዉ፥ ሀ መቶ ዎደ ኡባ ዳንዳአን ናጋና። 
ሄ ዎደ ነ ታና ፄጋና ታካ ኮያና፤ ነ መꬍዳ ታና በአናዉ ላሞትያ ዎደይ ያና። 
ሄ ዎደ ኔኒ ቱማ ታ ታንጉዋ ዎቻና፤ ሽን ታ ናጋራ ካላካ። 
ታ ባላይ ኦጎሮን ዪጨታና፤ ታ ናጋራ ኔኒ ካማና። 
ዙም ዎደይሳዳ፥ ዛል ꬎቃለተይሳዳ፥ 
ሃꬅ ሹቻ ፃጶ ቦከይሳዳ፥ ድኦይ ቢታ ሜጭድ ኤፈይሳዳ፥ ኔኒ አሳ ኡፋይስ ꬋይሳሳ። 
ኔኒ እያ መርናዉ ፆናሳ፤ እ ስመና፤ እያ ማላ ላማዳ ነ ስንꬃፈ ድጋሳ። 
እያ ናይት ቦንቸትኮ እ ኤረና፤ ኤንቲ ካዉይኮ እ በኤና። 
ሽን እያ አሳተꬃ ሴላይ እያ ፃላላስ ስኤቴስ፤ እ ባ ፃላላስ ዬኬስ” ያግስ። 
