﻿እዮባ.
13.
ሀ ኡባ ታ አይፈይ በእስ፤ ታ ሀይꬃይ ስእድ አኬክስ። 
ህንተ ኤረይሳ ታካ ኤራይስ፤ ታኒ ህንተፈ ጉፅከ። 
ሽን ታኒ ኡባ ዳንዳእያ ፆሳራ ኦደታናዉ ኮያይስ፤ ታኒ ታ መቱዋባ እያራ ሞተታናዉ አሞታይስ። 
ሽን ህንተ ዎርዶን ካመይሳታ፤ ህንተ ኡባይካ ፓꬆና አክመታ። 
ህንተ ስእ ግዳባ ግድያኮ፥ ጭንጫ ግድ በንታናሽን! 
ሀእ ታ ሞቱዋ ስእተ፤ ታ ዶናፐ ከያ ፓላማ ሀይዝተ። 
ህንተ ፆሳ ግሾ ዎርዶ ኦደቴቲ? እያ ግሾ ግድ ጭሞን ኦደቴቲ? 
ህንተ እያ ማድያባይ ደኢ? ዎይኮ እያዉ ፃባቃ ኤቅድ ሞተተቲ? 
እ ህንተና ፕልግ ፄልያኮ ህንተፈ ሎኦባ ደማኔ? ህንተ አሰ ጭመይሳዳ እያ ጭማናዉ ዳንዳኤቲ? 
ህንተ ጌማን አሳ ሶምኦ በእድ ማድኮ፥ እ ቱማ ህንተና ሴራና። 
እያ ቦንቾይ ህንተና ዳጋንኔ? እያ ቴማይ ህንተና ያሸኔ? 
ህንተ ኦድዳ ሌምሶይ ብድንꬃ መላ ፓꬆናባ፤ ህንተ ሞቶይ ቢታፈ መትዳ ጎንዳለ መላ። 
አነ ስእ ጊተ፤ ታ ኦደታና፤ ህዛፐ ሀንዳባይ ሀኖ። 
ታኒ ታናተꬃ አይስ መቶን የግያና? ታ ደኡዋ አይስ ታ ኩሸን ኦይክያና? 
ፆሳይ ታና ዎꬍኮካ ታኒ እያ ዳንዳአን ናጋና፤ ታኒ ታ መቱዋ እያ ስን ሺሻና። 
ናጋራንቾ አስ እያ ስን ሺቃናዉ ዳንዳኦና ግሾ፤ ኦን ኤር ታ ፃላተꬃይ አቶተꬃስ ጋሶ ግዳናዉ ዳንዳኤስ። 
ታ ሃሳያ አኬክድ ስእተ፤ ታ ኦዳይ ህንተ ሀይꬃን ገሎ። 
ሀእ ታኒ ታ መቱዋ ኤካ ሺቃስ፤ እ ታዉ ፕርዳናይሳ ኤራይስ። 
ታና ሞታና አስ ደኢ? ደእኮ ታኒ ስእ ጋዳ ሀይቃና። 
ፆሳዉ ነ ታዉ ሀ ናምኡባታ ኦꬃ፤ ያትኮ ታ ነ ስንꬃፈ ጌምከ። 
ነ ሴራ ኩሽያ ታፐ ደንꬃ፤ ታና ዳጋንይሳ አጋ። 
ሄሳፈ ጉየ፥ ታና ፄጋ፤ ታ ኮያና፤ ዎይኮ ታ ኦዳና፥ ነ ታዉ ዛራ። 
ታ ባላይነ ናጋራይ አፑኔ? አነ ታ ናቁዋነ ታ ናጋራ ታና በሳ። 
ኔኒ አይስ ነ ሶምኡዋ ታፐ ገንꬃይ? ነ ሞርከዳ አይስ ታና ታይባይ? 
ጫርኮይ ኤፍያ ካልያ አይስ ኡንኤꬃይ? መልዳ ፑኑዋ አይስ የደꬃይ? 
ኔኒ ታ ቦላ ፃፍዳ ሞቶይ ጫሞ፤ ታ ናአተꬃ ባላካ አጋባካ። 
ኔኒ ታ ቶሁዋ ዱፃዳሳ፤ ታ ታንጉዋ ኡባ ዎቻሳ፤ ታ ቶሆይ የꬍያሱዋ ካላሳ። 
ሄሳ ግሾ፥ ታኒ ዎቅዳ ምꬃዳ፤ ብል ምዳ አፍላዳ ዉራይስ። 
