﻿እዮባ.
10.
ታና ዱስ ሻትስ! ሄሳ ግሾ፥ ታ ዙዙማናፐ አትሽን፥ ስእ ጊከ፤ ታ ሸምፑዋ ሴላ ከሳና። 
ታኒ ፆሳኮ ሀይሳዳ ጋና፤ ታ ባላ ታዉ ኦዳፐ አትሽን፥ ታ ቦላ ፕርዶፋ። 
ኔኒ ኢታታ ቆፋ ኡፋይሳን ኤካሸ፥ ታና ኡንኤꬃናዉ በሲ? ነ ኩሸን መꬍዳ ኡራ ካይስ ዎጌ? 
ነ አይፈይ አሳ አይፈ መለዬ? ኔኒ አስ ፄለይሳዳ ፄላዬ? 
ነ ደኦ ላይꬃይ አሳ ደኦ ላይꬃ መለዬ? 
ያትን፥ ታ ባላ አይስ ኮያይ? ታ ናጋራ አይስ ካላይ? 
ታኒ ባላ ግዶናይሳነ ነ ኩሸፐ ታና ኦንካ አሻናዉ ዳንዳኦናይሳ ነ ኤራሳ። 
ታና ነ ኩሸይ ጊግስድ መꬍስ፤ ሽን ሀእ ሄ ኩሸይ ስሚድ ታና መንꬄስ። 
ኔኒ ታና ቢታፈ መꬍዳይሳ ሀሳያ ያትን፥ ሀእ ታና ዛራዳ ባና ኦꬃናዉ ኮያይ? 
ታና ማꬃዳ ታ አየ ኡሎን ትግዳይነ መቃ ማꬃዳ እርክስዳይ ነና ግድኪ? 
ኔኒ ታና አሾነ ጎጋ ማይዛዳሳ፤ ሻያንነ መቀꬃን ዋፃዳሳ። 
ኔኒ ታዉ ደኦነ መርና ሲቆ እማዳሳ፤ ነ ናጎይ ታና ፓፃ ዎꬅስ። 
ሽን ኔኒ ሄ ዎደፐ ዶማዳ ነ ዎዛናን ታና ቆሀናዉ ቆፓዳ ደኤይሳ ታ ኤራይስ። 
ታ ናቁዋ ነ በኣሳ፤ ታ ናጋራ ኦꬅኮ ሴሮና አꬋካ። 
ታኒ ባልኮካ ታና አየ! ታ ፅሎ ግድኮካ ጬቀታናዉ ዳንዳእከ። ነ ታና ዬላ ማይዛዳሳ፤ ዋየን ዎꬃዳሳ። 
ታ ኦቶርኮ ታና ጋሞዳ ሻንካታዳ ኦይካሳ፤ ታና ቆሀናዉ ነ ማላልስያ ዎልቃ ዛራ ዛራ በሳሳ። 
ኔኒ ታ ቦላ ኦራꬃ ማርካታ ኤሃሳ፤ ነ ሀንቁዋ ታ ቦላ ዳርሳሳ፤ ታና ኦላናዉ ኦራꬃ ኦላንቾታ ጊግሳሳ። 
ያትን፥ ታና ታ አየ ኡሎፐ አይስ ከሳዲ? ኦንካ ታና በኦና ሀይቅዳኮ ታው ሎኦሽን! 
ታኒ መቶና አትዳኮ፥ ዎይኮ ታ አየ ኡሎፐ ከያሸ ዱፎ ገልዳኮ ሎኦሽን! 
ታ ጉꬃ ደኦ ላይꬃይ ዉሬስ ግደነዬ? ሀ ጉꬃ ላይꬃን ኡፋይታና መላ ታና አጋርክ! 
ታ ስሞና በሳ ቦና ደእሽን፥ ሌልዳ ꬉማ ቢታ ጋኮና ደእሽን፥ 
እያ ፖኦይ ꬉማ ግድዳ በሳነ ሀይቆይ ካዎትዳ በሳ፥ ማር ባይና በሳነ ሌልዳ ꬉማ ቢታ ቦና ደእሽን፥ ታና አጋርክ!” 
