﻿2 ሳሜላ ማፃፋ.
1.
ሳኦል ሀይቅዳፐ ጉየ፥ ዳዊቲ አማለቃታ ፆን ስሚድ ፅቅላጋን ናምኡ ጋላስ ጋምእስ። 
ሄꬓንꬆ ጋላስ እስ አደይ ባ ማኡዋ ዳክድ፥ ባ ሁጰን ባና ቆልድ፥ ሳኦል ዱንካንዳ ጉታፐ ይስ። እ ዳዊታኮ ይድ ሳአን ጉፋንድ ዝግስ። 
ዳዊቲ፥ “ኔኒ አዋፐ ያዲ?” ያግድ ኦይችስ። እ ዛሪድ፥ “ታኒ እስራኤለት ዱንካንዳ ጉታፐ ከሳ ኤካዳ ያስ” ያግስ። 
ዳዊቲ፥ “አነ ሀንዳባ ታዉ ኦዳ” ያግስ። እ ዛሪድ፥ “ኑ ኦላንቾት ኦላፐ ባቃትዶሶና፤ ኑ አሳፐ ዳሮት ሀይቅዶሶና፤ ሳኦልነ እያ ናአይ ዮናታን ሀይቅዶሶና” ያግስ። 
ዳዊቲ እያዉ ኦድዳ ፓንꬃ፥ “ሳኦልነ እያ ናኣ ዮናታን ሀይቅዳይሳ ኔኒ አይብን ኤራይ?” ያግድ ኦይችስ። 
ፓንꬃይ፥ “ታኒ ግልቦአ ደርያ ቦላ ደእሽን፥ ሳኦል ባ ቶራ ጉፈትድ ኤቅዳይሳ በአስ፤ ፓራ ጋረትነ ፓራ አሳት ሳኦላኮ ማታትዶሶና። 
ሄ ዎደ ሳኦል ጉየ ስሚድ ታና ደምድ ፄግስ። ታኒ፥ ‘ዬ’ ያጋዳ ኮያስ። 
ሳኦል፥ ‘ኔኒ ኦኔ?’ ያግድ ኦይችን፥ ‘ታኒ አማለቃ አስ’ ያጋዳ ዛራስ። 
ሄሳፈ ጉየ ሳኦል፥ ‘ታኒ ማዱንፃዳ፥ ሀይቆስ ጋካስ፤ ኔኒ ታ ቦላ ከይያ ኤቃዳ ታና ዎꬋ’ ያግስ። 
እ ኩንድዳፐ ጉየ ሀይቆፐ አቶናይሳ ኤርዳ ግሾ ታኒ እያ ቦላ ከያ ኤቃዳ እያ ዎꬋስ። እያ ሁጰን ደእያ ካላቻነ እያ ቀሰን ደእያ አምባርያ ኤካዳ ኔኮ ታ ጎዳኮ ያስ” ያግስ። 
ዳዊቲነ ዳዊታ አሳይ ካዮትድ፥ ባንታ ማኡዋ ዳክዶሶና። 
ኤንቲ ሳኦል፥ ዮናታን፥ ጎዳ ኦላንቾትነ እስራኤለ አሳይ ኦላን ዉርዳ ግሾ ኦማርስ ጋካናዉ ካዮትዶሶና፤ ዬክዶሶና፤ ፆምዶሶና። 
ዳዊቲ ሄሳ ኤንታዉ ኤህዳ ፓንꬃ፥ “ነ አዉፐ ያዲ?” ያግድ ኦይችስ። እ ዛሪድ፥ “ታኒ በተ አስ ግድድ ደእያ አማለቃ አድያ ናአ” ያግስ። 
ዳዊቲ፥ “ጎዳይ ትይዳ ካዋ ዎꬋናዉ ነ ኩሽያ ደንꬃሸ ዋናዳ ያያብኪ?” ያግስ። 
ዳዊቲ ባ አሳታፐ እሱዋ ፄግድ፥ “እያ ዎꬋ” ያግን፥ እ አማለቃ ፓንꬃ ጫድድ ዎꬍስ። 
ዳዊቲ አማለቃ አድያኮ፥ “ጎዳይ ትይዳ ካዋ ታኒ ዎꬋስ” ያጋዳ “ኔኒ ነ ዶናን ማርካትዳ ግሾ ነ ሱꬃ ጎመይ ነና ኦይኮ” ያግስ። 
ዳዊቲ ሳኦላስነ እያ ናኣ ዮናታናስ ሀይሳዳ ያግድ ዘሌልስ። 
ይሁዳ አሳይ፥ “ዶንገ ዬሆ” ጌተትያ ሀ ዘለልሳ ታማራና መላ ኪትስ፤ ሀ ዘለልሳይ ያሻራ ማፃፋን ፃፈትስ። 
“ነኖ እስራኤለ፥ ነ ሀላቃት፥ ꬎቃ በሳን ሀይቅዶሶና። ዎልቃማት ዋንድ ኩንድዶና! 
ፍልስፄመ ማጫ ናይት ሄሳ ስእድ ኡፋይቶና መላ፥ ቃፃረትቦና አሳ ማጫ ናይት ሀሹ ጎና መላ፥ ሀይሳ ጋተ ካታማን ኦዶፕተ አስቃሎና ኦገታን አዋጆፍተ። 
ህንተኖ ግልቦአ ደረቶ፥ ህንተ ቦላ እር ቡኮፎ፤ አክ ዎꬎፎ። ሄ በሳን ዎልቃማታ ጎንዳለይ ቱንዳ ግሾ፥ ሳኦላ ጎንዳለይ ዛይተን ቁሸትቦና ግሾ፥ ሄ ጋድያን ካꬅ ዶሎፖ። 
ጎይረትዳይሳታ ሱꬃፈ፥ ዎልቃማታ ሞꬉዋፈ፥ ዮናታና ዶንገይ ጉየ ግቤና፤ ሳኦላ ማሻይ ካሎና ስምቤና። 
ሳኦልነ ዮናታን ዶሰተይሳታ፤ ሀይቆንነ ፓፃን ሻከትቦኮና። ኤንቲ አርጋንꬃፈ አꬍድ ኤሶ፤ ጋሞፈ አꬍድ ምኖ። 
ህንተኖ እስራኤለ ማጫሳዉ፥ ዞኦነ አሌቆ ማኦ ማይዝዳይሳስ፥ ህንተ ማኡዋ ዎርቃን አሌቅስዳ ሳኦላስ ዬክተ። 
ዎልቃማት ኦላን ዋንድ ኩንድዶና? ዮናታን ꬎቃ በሳን ሀይቅስ። 
ታ እሻ ዮናታና፥ ታ ነዉ አዛናይስ፤ ነ ታዉ ዳሮ አልኦ። ኔኒ ታና ዶስያ ዶሶይ ማላልሴስ፤ ማጫ ሲቆፐካ አꬌስ። 
ዎልቃማት ዋንድ ኩንድዶና? ኦላ ሚሸይካ ዋንድ ꬋይዴ?” ያግድ ዳዊቲ ዘሌልስ። 
