﻿ታይቦ ማፃፋ.
1.
እስራኤለ አሳይ ግብፀ ቢታፈ ከይዳ ናምአንꬆ ላይꬃን፥ ናምአንꬆ አጌናን፥ ሄ አጌና ኮይሮ ጋላሳን፥ ጎዳይ ሲና መላ ቢታን ጌሻ ዱንካንያን ሙሰኮ ሀይሳዳ ያግስ፤ 
“ኔራነ አሮናራ እስራኤለ አሳ ኡባ ኤንታ ኮቻን ኮቻን፥ ቃስ ኤንታ ሶ አሳን አሳን ታይባድ፥ አደ አሳ ሱንꬃ ፃፍተ። 
ላይꬅ ላታማነ እያፐ ቦላ ግድዳ፥ ኦለታናዉ ዳንዳእያ እስራኤለ አሳ ኡባ ታይብተ። 
ኮቻፐ ኮቻፐ እስ እስ አስ ባ ሶ አሳስ ሀላቃ ግድድ ህንተና ማዶ። 
ህንተና ማዳና አሳ ሱንꬃይ ሀይሳፈ ካልድ ፃፈትዳይሳ። ሮቤላፐ፥ ሻደኡራ ናኣ ኤልፁራ፤ 
ስሞናፐ ሱርሳዳያ ናአ ሳሉምኤላ፤ 
ይሁዳፐ አምናዳበ ናኣ ናአሶና፤ 
ይሳኮራፐ ዙአራ ናኣ ናትናኤላ፤ 
ዛብሎናፐ ሄሎና ናኣ ኤልኣባ፤ 
ዮሰፋ ናይታፐ፥ ኤፍሬማፐ አምሁዳ ናኣ ኤልሻማአ፤ ምናሰፐ ፓዳዙራ ናኣ ጋማልኤላ፤ 
ብንያመፐ ጋድዮና ናኣ አብዳና፤ 
ዳናፐ አምሳዳያ ናኣ አክኤዘራ፤ 
አሴራፐ ኦክራና ናኣ ፓግኤላ፤ 
ጋዳፐ ራጉኤላ ናኣ ኤልያሳፋ፤ 
ንፍታለመፐ ኤናና ናአ አክራ፤ 
ሀ አሳይ ባንታ አዋታ ኬꬃ አሳፐ ካለꬃናዉ ዶረትዳ እስራኤለ ያራታ ሀላቃታ” ያግስ። 
ያትን ሙሰይነ አሮን ሄ ዶረትዳ አሳታ ኤክድ፥ 
ናምአንꬆ አጌናን ኮይሮ ጋላሳን ኩመꬃ ማባራ ፄግድ ሺሽዶሶና። አሳይ ባንታ ኮቻን ኮቻን፥ ቃስ ባንታ ሶ አሳን አሳን ላታሙ ላይꬅነ እያፐ ቦላ ግድዳ አደ ኡባይ ፃፈትስ። 
ጎዳይ እያ ኪትዳይሳዳ ሙሰይ ኤንታ ሲና መላ ቢታን ታይብስ። 
ኦለታናዉ ዳንዳእያ አደ ኡባይ፥ ላታሙ ላይꬅነ እያፐ ቦላ ግድዳ አደ ኡባይ ታይበትድ ሁጰን ሁጰን ፃፈትዶሶና። ኤንቲ ባንታ ኮቻን ኮቻንነ ባንታ ሶ አሳን ሻከትድ ሀይሳፈ ካልድ ደእያ ታይቦ ማራን ማዝጋበትዶሶና። ባይራ ናኣ ሮቤላፐ 46,500 
ስሞናፐ 59,300 
ጋዳፐ 45,650 
ይሁዳፐ 74,600 
ይሳኮራፐ 54,400 
ዛብሎናፐ 57,400 
ዮሰፋ ናኣ ኤፍሬማፐ 40,500 
ዮሰፋ ናኣ ምናሰፐ 32,200 
ብንያመፐ 35,400 
ዳነፐ 62,700 
አሴራፐ 41,500 
ንፍታለመፐ 53,400 
ሙሰይ፥ አሮንነ ባንታ ሶ አሳፐ አሳፐ ዶረትዳ ታማነ ናምኡ እስራኤለ ኮቻ ሀላቃት ታይብዳ አሳይ ሀይሳታ። 
ኦለታናዉ ዳንዳእያ አደ ኡባይ፥ ላታሙ ላይꬅነ እያፐ ቦላ ግድዳ አሳይ ባንታ ሶ አሳን አሳን ታይበትዶሶና። 
ኩመꬃ አሳ ታይቦይ 603,550. 
ሽን ሌወ ኮቻት ታይበትቦኮና። 
ጋሶይካ ካሰ ጎዳይ ሙሰኮ ሀይሳዳ ያግስ፤ 
“ሌወ ኮቻታ ታይቦፓ፤ ኤንታ አትዳ እስራኤለ አሳ ታይቦን ገልሶፋ። 
ሌወታ፥ ጌሻ ዱንካንያንነ እያን ደእያ ሚሸታ ኡባ ቦላ ሀላቃ ኦꬃዳ ሹማ። ኤንቲ ዱንካንያነ እያን ደእያ ሚሸታ ቶካና፤ እያ ግዶን ኦꬃናነ እያ ዩሾን ዱንካናና። 
ጌሻ ዱንካነይ ሾደትያ ዎደ ሌወት ሾዶ፤ ጌሻ ዱንካነይ ኤቅያ ዎደ ሌወት ኤሶ፤ ኤንታፈ ሀር ኦንካ እያኮ ሺቅኮ ሀይቆ። 
ሀንኮ እስራኤለ አሳይ ባንታ ሄራንነ ባንታ ጩጋን ጩጋን ሻከትድ፥ ባንታ ዱንካንያ ዱንካኖና። 
ሽን ጎዳ ሀንቆይ እስራኤለ ማባራ ቦላ ዎꬎና መላ ሌወት ዱንካንያ ዩሹዋን ባንታ ዱንካንያ ዱንካንድ ናጎ” ያግስ። 
እስራኤለ አሳይ ጎዳይ ሙሰ ኪትዳ ኡባ ኦꬅዶሶና። 
