﻿መተꬅ.
19.
ናምኡ ኪታንቾት ኦማርስሽን ሶዶመ ካታማ ጋክዶሶና። ሄ ዎደ ሎፀይ ሄ ካታማ ፐንገን ኡትስ። ሎፀይ ኤንታ በእድ ሞካናዉ ደንድድ ኤንታኮ ብስ። ባ ሶምኡዋ ሳአ ጋꬅድ ኤንታዉ ዝግስ። 
እ ኤንታኮ፥ “ታ ጎዳቶ፥ ህንተ አይልያ ሶ ገለርከት፥ ህንተ ቶሁዋ ሜጨትድ ቃማ ሀይሳን አቅተ፤ ዎንታ ጉራ ህንተ ብያ በሲ ቢተ” ያግስ። ኤንቲ፥ “አካይ፥ ኑኒ ሀ ካታማ ዳባባን አቃና” ያግድ ዛርዶሶና። 
ሽን እ ኤንታ ምንꬅ ዎስዳ ግሾ ብድ እያ ሶ ገልዶሶና። እ ኤንታዉ ኡይꬅ ኡክድ አꬅን ምዶሶና። 
ኤንቲ ዝንአና ሀንሽን ሶዶመ ካታማ አደ አሳ ኡባይ ናአተꬅነ ዶንꬒ እሶይካ አቶና ይድ ኬꬃ ዩይ አꬍዶሶና። 
ኤንቲ ሎፀ ፄግድ፥ “ሀች ኦማርስ ነ ሶ ገልዳ አደ አሳት አዉን ደኦና? ኑኒ ኤንታራ ጋሄታና መላ ኤንታ ኑኮ ካረ ከሳ” ያግዶሶና። 
ያትን ሎፀይ ኤንታራ ኦደታናዉ ካረ ከይሸ ፐንግያ ጉየራ ጎርድድ፥ 
ኤንታኮ፥ “ታ ዳቦቶ፥ ሀያና ሀ ኢታ ኦሱዋ ኦꬆፍተ። 
ታዉ አደ ኤሮና ናምኡ ጌላኦት ደኦሶና። ታኒ ኤንታ ህንተዉ ካረ ከስኮ ህንተ ኮይዳባ ኦꬅተ። ሽን ሀይሳቲ ታ እማ ግድያ ግሾ ታ ካራፐ ጋርሳን ደኦሶና፤ ሀ አሳታ ቦላ አይብባካ ኦꬆፍተ” ያግስ። 
አሳት፥ “ኑ ስንꬃፈ ገደ ክቻ” ያግዶሶና። ቃስ፥ “ሀ አደይ ባዉ በተ አስ ሽን፥ ኑ ቦላ ፕርዳናዉ ኮዬስ? ኑኒ ኤንታ ቦላ ኦꬃናዉ ኮይዳ ኢታፐ አꬅድ ነ ቦላ ኦꬃና” ያግዶሶና። ኤንቲ ሎፀ ጉየ ሱግ የግድ ፐንግያ መንꬃናዉ ሺቅዶሶና። 
ሽን ናምኡ አሳት ባንታ ኩሽያ ካረ የድድ ሎፀ ሶ ጎች ገልስድ ፐንግያ ጎርድዶሶና። 
ሄሳፈ ጉየ፥ ኤንቲ ኬꬃ ፐንገይ ደእያሱዋ ደሞና መላ ጉꬃፈ ግታ ጋካናዉ ቆቅስዶሶና። 
ሄ ናምኡ አሳት ሎፀኮ፥ “ነዉ ሀይሳን አደ ናእ ዎይኮ ማጫ ናእ፥ ነ ማጫ ናይታ ኦይችዳይ ዎይኮ ሀራ ዳቦይ ሀ ካታማን ደኢ? ደእኮ ኤንታና ሀይሳፈ ከሳ። 
አይስ ጊኮ፥ ኑ ሀ ካታማ ꬋይሳናዉ ሀኖስ። ኤንታ ቦላ ዋስያ ዋሶይ ጎዳ ስንꬃን ግታ ግድያ ግሾ ሀ ካታማ ꬋይሳና መላ ጎዳይ ኑና ኪትስ” ያግዶሶና። 
ያትን ሎፀይ ባ ማጫ ናይታ ኦይችዳይሳታኮ ብድ፥ “ጎዳይ፥ ሀ ካታማ ꬋይሳና ሀንያ ግሾ ኤለስድ ሀ በሳፈ ከይተ” ያግስ። ሽን እያ ማጫ ናይታ ኦይችዳይሳት እ ቀልቅሴስ ግድ ቆፕዶሶና። 
ሳእ ዎንታናዉ ጎንተይ ዞእያ ዎደ ሄ ኪታንቾት ሎፀኮ፥ “ደንዳ፥ ነ ማችዉነ ሀይሳን ደእያ ነ ናምኡ ናይታ ኤካዳ ኤለሳዳ ከያ። አካይ ጊኮ፥ ሀ ካታማይ ፕርደትያ ዎደ ነካ ꬋያሳ” ያግ ድርግስዶሶና። 
ሽን ሎፀይ ከያናዉ ጋምእን፥ ጎዳይ እያዉ ቃትዳ ግሾ፥ ሄ ኪታንቾት እያ ኩሽያ፥ እያ ማቸ ኩሽያነ ናምኡ ናይታ ኩሽያ ኦይክድ ሄ ካታማፐ ከስዶሶና። 
ኪታንቾት ኤንታ ከስዳ መላ ሄ ኪታንቾታፐ እሶይ፥ “ህንተ ሸምፑዋ ኤክድ ባቃትተ! ጉየ ፄሎፍተ! ሀ ሄራን አዉንካ ኤቆፍተ! ህንተ ꬋዮና መላ ዙማኮ ባቃትተ” ያግስ። 
ሽን ሎፀይ ኤንታኮ፥ “ሀይ ታ ጎዳቶ፥ ያጎፕተ። 
ታኒ ህንተ አይለይ ህንተ ስንꬃን ሳባ ደምዳ ግሾ ታና አሻናዉ ታዉ ዳሮ ቃትደታ። ሽን ታኒ ዙማኮ ባቃታናዉ ዳንዳእከ፤ ሀ ꬋዮይ ጋክድ ታና ꬋይሳና። 
ሄኮ፥ ሀይሳን እስ ካታም ደኤስ፤ ያ ዎፅድ ባናዉ ማታነ ጉꬃ ካታማ። ታ ሸምፑዋ አሻናዉ ታ ያ ባቃቶ? እ ዳሮ ጉꬃ ካታማ ግደኔ?” ያግስ። 
ኪታንቾይ፥ “ሎኦ! ታኒ ነ ዎሳ ኤካስ፤ ሄ ነ ኦድዳ ካታማ ꬋይስከ። 
ሄ ካታማኮ ኤለሳዳ ባቃታ፤ ነ ያ ጋካናዉ ታ አይብባካ ኦꬅከ” ያግስ። ሄሳ ግሾ፥ ሄ ካታማ ሱንꬃይ ዞኣረ ጌተትስ። 
ሎፀይ ዞኣረ ጋክያ ዎደ ቡሮ ፃልቀይ ጫረስ። 
ጎዳይ ሄ ዎደ ሳሎፐ ታማነ ፁግያ ዲነ ሶዶመ ቦላነ ጋሞራ ቦላ ቡክስስ። 
ሄሳዳ ኦꬅድ ጎዳይ ሄ ካታማታ፥ ሄራ ኡባ፥ ካታማታን ደእያባ ኡባ ሄ ቢታን ደእያ ምꬃነ ማታ ꬋይስስ። 
ሽን ሎፀ ማችያ ጉየ ስማ ፄላዳ ማፅነ ሹቹ ግዳሱ። 
ዎንተꬃ ጋላስ ዎንታ ጉራ አብራሃመይ ደንድድ ካሰ እ ጎዳ ስንꬃን ኤቅዳ በሳ ብስ። 
እ ሶዶመነ ጋሞራ፥ ሄ ሄራን ደእያ ቢታ ኡባ ዱገ ፄልያ ዎደ ፁሳ ታማዳ ጩያይ ቢታፈ ደንደይሳ በእስ። 
ፆሳይ ሄ ሄራን ደእያ ካታማታ ꬋይስያ ዎደ አብራሃመ ቆፕድ፥ ሎፀይ ደእያ ካታማታ ꬋይስድ፥ ሎፀ ꬋዮፐ አሽስ። 
ሎፀይ ዞኣረን ዳናዉ ያሸትዳ ግሾ፥ ያፐ ደንድድ ባ ማጫ ናይታ ናምአታራ ዙማ ቦላ ከይስ። ያን ጎንጎሎ ግዶን ባ ናምኡ ማጫ ናይታራ ደእስ። 
እስ ጋላስ ባይራ ናእያ ባ ካሎ ምቸኮ፥ “ኑ አዋይ ጭምስ፥ ቢታ ኡባን ደእያ ዎጋꬆ ኑራ አቃናዉ እስ አደይ ሀይሳን ባዋ። 
ያንያ ግሾ፥ ሃያ! ኑ አዋ ኡሹ ኡሽድ፥ እያራ አቅድ፥ ኑ አዋፐ ኑስ ኮቸ አሾስ” ያጋሱ። 
ሄ ዎደ ቃማ ባንታ አዋ ኡሹ ኡሽዶሶና። ባይራ ናእያ ገላዳ እያራ አቃሱ። እያ እያራ አቅያ ዎደነ ደንድያ ዎደ እ ኤርቤና። 
ዎንተꬃ ዎደ ባይርያ ካልዉ፥ “ዝነ ቃማ ታኒ ታ አዋራ አቃስ፤ ሀች ቃማካ እያ ኡሹ ኡሽኮ፥ ነካ ገላዳ እያራ አቃ። ያትድ ኑኒ ኑ አዋፐ ኮቸ አሾስ” ያጋሱ። 
ሄ ዎደ ቃማ ባንታ አዋ ኡሹ ኡሽዶሶና። ካሎ ናእያ ገላዳ እያራ አቃሱ። ሀእካ እያ እያራ አቅያ ዎደነ ደንድያ ዎደ እ ኤርቤና። 
ያትድ ሎፀ ማጫ ናይት ናምአይ ባንታ አዋፐ ቃንꬃትዶሶና። 
ባይርያ አደ ናአ የላሱ፤ እያ ሱንꬃ ሞአበ ጋዳ ሱንꬃሱ። እ ሀች ጋካናዉ ሞአበታ ማይዛ። 
ካልያካ አደ ናአ የላሱ፤ እያ ሱንꬃ በንኣማ ጋዳ ሱንꬃሱ። እ ሀች ጋካናዉ አሞነታ ማይዛ። 
