MAT 1:1 ሃይሳፌ ካሊዲ ፃፌቲዳይሲ ዳዊቴ ናዓ ኣብራሃሜ ናዓ ጊዲዳ ዬሱስ ኪሪስቶሳ ዬሌቴꬃ።
MAT 1:2 ኣብራሃሜይ ዪሳቃ ዬሊስ፤ ዪሳቂ ያይቆባ ዬሊስ፤ ያይቆቢ ዪሁዳኔ ኢያ ኢሻታ ዬሊስ፤
MAT 1:3 ዪሁዲ ቲዒማሪፔ ፋሬሴኔ ዛራ ዬሊስ፤ ፋሬሲ ኣስሮሜ ዬሊስ፤ ኣስሮሜይ ራሜ ዬሊስ፤
MAT 1:4 ራሜይ ኣሚናዳቤ ዬሊስ፤ ኣሚናዳቤይ ናዓሶና ዬሊስ፤ ናዓሶኔይ ሳልሞና ዬሊስ፤
MAT 1:5 ሳልሞኔይ ራዓቢፔ ቦዔዛ ዬሊስ፤ ቦዔዚ ኡሩቲፔ ኢዮቤዴ ዬሊስ፤ ኢዮቤዲ ኢሴዬ ዬሊስ፤
MAT 1:6 ኢሴዬይ ካዉዋ ዳዊቴ ዬሊስ፤ ዳዊቴይ ኦሪዮ ማቼፌ ሶሎሞኔ ዬሊስ፤
MAT 1:7 ሶሎሞኔይ ሮቢዓማ ዬሊስ፤ ሮቢዓሜይ ኣቢያ ዬሊስ፤ ኣቢዬይ ኣሳፌ ዬሊስ፤
MAT 1:8 ኣሳፊ ኢዮሳፌፄ ዬሊስ፤ ኢዮሳፊፄይ ኢዮራሜ ዬሊስ፤ ኢዮራሜይ ኦዚያኔ ዬሊስ፤
MAT 1:9 ኦዚያኔይ ኢዮዓታሜ ዬሊስ፤ ኢዮዓታሜይ ኣካዛ ዬሊስ፤ ኣካዚ ሂዚቂያሳ ዬሊስ፤
MAT 1:10 ሂዚቂያሲ ሚናሴ ዬሊስ፤ ሚናሴይ ኣሞና ዬሊስ፤ ኣሞኒ ኢዮሲያሳ ዬሊስ፤
MAT 1:11 ኢስራዔሌ ኣሳይ ዲዔቲዲ ባቢሎኔ ቢታ ቢዳ ዎዴ ኢዮሲያሲ ኢኮኒያናኔ ኢያ ኢሻታ ዬሊስ።
MAT 1:12 ባቢሎኔ ቢታ ኢስራዔሌ ኣሳይ ዲዔቲዲ ቢዳፔ ጉዬ ኢኮኒያኒ ሳላቲያሌ ዬሊስ። ሳላቲያሌይ ዜሩባቤላ ዬሊስ፤
MAT 1:13 ዜሩባቤሊ ኣብዲዩ ዬሊስ፤ ኣብዲዩይ ኤሊያቄሜ ዬሊስ፤ ኤሊያቄሜይ ኣዛራ ዬሊስ፤
MAT 1:14 ኣዛሪ ሳዶቄ ዬሊስ፤ ሳዶቄይ ኣኪሜ ዬሊስ፤ ኣኪሜይ ኤሊዩዳ ዬሊስ፤
MAT 1:15 ኤሊዩዲ ኣላዛራ ዬሊስ፤ ኣላዛሪ ማታኔ ዬሊስ፤ ማታኔይ ያይቆባ ዬሊስ፤
MAT 1:16 ያይቆቢ ዮሴፋ ዬሊስ፤ ዮሴፊ ኪሪስቶሳ ጊያ ዬሱሳ ዬሊዳ ማይራሚ ኣዚና።
MAT 1:17 ሂዛ፥ ዬሌቴꬃይ ኣብራሃሜፔ ዳዊቴ ጋካናው ታማኔ ኦይዳ። ዳዊቴፔ ቢዲ ባቢሎኔ ዲዑዋ ጋካናው ታማኔ ኦይዳ። ባቢሎኔ ዲዑዋፔ ቢዲ ኪሪስቶሳ ጋካናው ታማኔ ኦይዱ ዬሌቴꬂ ጊዴስ።
MAT 1:18 ዬሱስ ኪሪስቶሳ ዬሌቴꬃ ታሪኬይ ሃይሳፌ ካሌይሳ። ኢያ ኣያ ማይራማ ዮሴፋስ ኦይሼታ ዴዓሼ ዮሴፋራ ጋሄቶና ጌሻ ኣያናፔ ቃንꬃታሱ።
MAT 1:19 ዮሴፊ ፂሎ ኣሲ ጊዲዳ ጊሾ ኢዮ ኣሳን ኬሳናው ኮዪቤና። ያኒያ ጊሾ ቆሳን ኢዮ ኣጋናው ቆፒስ።
MAT 1:20 ኢ ሄ ቆፋን ዴዒሺን ፆሳ ኪታንቾይ ኣሙሆን ቆንጪዲ፥ «ዳዊቴ ናዓው፥ ዮሴፋ፥ ማይራማ ቃንꬃቲዳይ ጌሻ ኣያናፔ ጊዲያ ጊሾ ኢዮ ኤካናው ያዮፋ» ያጊስ።
MAT 1:21 ኢያ ኣዴ ናዓ ዬላና፥ ኢ ባ ዴሪያ ኤንታ ናጋራፔ ኣሺያ ጊሾ ኢያ ሱንꬃ ኔ ዬሱሳ ጋዳ ፄጋና።
MAT 1:22 ጎዳይ ናቢያ ኢሳያሳ ዶናን፥
MAT 1:23 «ሄኮ ጌላዒያ ቃንꬃታና፤ ኣዴ ናዓካ ዬላና፤ ኢያ ሱንꬃይ ኣማኑዔላ ጌቴታና» ጎይሲ ፖሌታና ሜላ ሃ ኡባይ ሃኒስ። ኣማኑዔላ ጌይሳስ ቢርሼꬃይ «ፆሳይ ኑራ ዴዔስ» ጉሱ።
MAT 1:24 ዮሴፊ ꬊስኮፌ ባርኪዲ ጎዳ ኪታንቾይ ኪቲዳይሳ ሜላ ማይራሞ ባ ሶ ኤፊስ።
MAT 1:25 ሺን ባ ባይራ ናዓ ዬላና ጋካናው ኢዮ ቦቺቤና፤ ዬሌቲዳ ናዓካ ዬሱሳ ጊዲ ፄጊስ።
MAT 2:1 ካዉዋ ሄሮዲሳ ዎዴን ዬሱሲ ዪሁዳ ቢታን ቤቴሌሜ ካታማን ዬሌቲዳይሳፌ ጉዬ ፆሊንቶ ታይቢያ ኣሳቲ ዶሎሃፔ ዬሩሳላሜ ዪዲ፥
MAT 2:2 «ዬሌቲዳ ኣይሁዴ ካዎይ ኣዉን ዴዒ? ኑኒ ዶሎሃ ባጋራ ኬዪዳ ኢያ ፆሊንቱዋ ቤዒዲ ኢያው ጎይናናው ዪዳ» ያጊዲ ኦይቺዶሶና።
MAT 2:3 ካዎይ ሄሮዲሲ ሄሳ ሲዒዳ ዎዴ ዳጋሚስ። ዬሩሳላሜን ዴዒያ ኣሳይ ኡባይካ ዳጋሚዶሶና።
MAT 2:4 ሄሮዲሲ ካሂኔ ሃላቃታኔ ሂጌ ኣስታማሬታ ባኮ ፄጊዲ፥ «ኪሪስቶሲ ኣዉን ዬሌታንዴሻ?» ያጊዲ ኤንታ ኦይቺስ።
MAT 2:5 ኤንቲካ፥ «ዪሁዳ ቤቴሌሜና፤ ናቤይ፥
MAT 2:6 ‹ዪሁዳን ዴዒያ ቤቴሌሜ፥ ዪሁዳን ዴዒያ ጎባ ካታማታፔ፥ ኔኒ ኣይቢንካ ጉፃካ። ታ ዴሪያ ኢስራዔሌ ኣይሳናይሲ፥ ኔፔ ኬያና› ጊዲ ፃፊስ» ያጊዶሶና።
MAT 2:7 ሄሳፌ ጉዬ፥ ሄሮዲሲ ዶሎሃፔ ዪዳ ኣሳታ ጌማን ፄጊዲ፥ ፆሊንቱዋ ኤንቲ ቤዒዳ ዎዲያ ኤንታፌ ጌሺዲ ኤሪስ።
MAT 2:8 ኢ ኤንታና ቤቴሌሜ ዬዲሼ፥ «ቢዲ ዬሌቲዳ ናዓ ሚንꬂዲ ኮዪቴ፤ ኢያ ሂንቴ ዴሚዳ ዎዴ ታካ ባዳ ኢያው ጎይናና ሜላ ሲሚዲ ዪሼ ታው ኦዲቴ» ያጊስ።
MAT 2:9 ኤንቲካ ካዎይ ሄሮዲሲ ጊዳይሳ ሲዒዲ ቢዶሶና። ኤንቲ ዶሎሃ ባጋራ ቤዒዳ ፆሊንቶይ ኤንታና ካሌꬂሼ ናዓይ ዴዒያሱዋ ጋካናው ኤፊስ።
MAT 2:10 ኤንቲ ሄ ፆሊንቱዋ ቤዒዳ ዎዴ ጊታ ኡፋይሲ ኡፋይቲዶሶና።
MAT 2:11 ሶ ጌሊዲ ናዓ ባ ኣዬ ማይራሚራ ዴዔይሳ ቤዒዶሶና። ኢያው ጉልባቲዲ ጎይኒዶሶና። ባንታ ሳፂኒያ ዶዪዲ ዎርቃ፥ ኢፃኔኔ ካርቤ ኢያው ኢሚዶሶና።
MAT 2:12 ኤንቲ ሄሮዲሳኮ ጉዬ ሲሞና ሜላ ፆሳይ ኣሙሆን ኤንታው ኦዲን፥ ሃራ ኦጌራ ባንታ ቢታ ሲሚዶሶና።
MAT 2:13 ዶሎሃ ባጋፌ ዪዳ ኣሳቲ ቢዳፔ ጉዬ፥ ጎዳ ኪታንቾይ ዮሴፋስ ኣሙሆን ቆንጪዲ፥ «ሄሮዲሲ ናዓ ዎꬋናው ኮያ ጊሾ ዴንዳ፤ ኤሌሳዳ ናዓኔ ናዓ ኣዪው ኤካዳ ጊብፄ ቢታ ባ። ኔ ሲማና ዎዲያ ታ ኔው ኦዳና ጋካናው ያን ጋምዓ» ያጊስ።
MAT 2:14 ሄሳ ጊሾ፥ ዮሴፊ ሄ ቃማን ዴንዲዲ፥ ናዓኔ ናዓ ኣዪው ኤኪዲ ጊብፄ ቢስ።
MAT 2:15 ናቢያ ዶናን ፆሳይ፥ «ታኒ፥ ታ ናዓ፥ ጊብፄ ቢታፌ ፄጋስ» ጌቴቲዳ ቃላይ ፖሌታና ሜላ ሄሮዲሲ ሃይቃና ጋካናው ኢ ያን ዴዒስ።
MAT 2:16 ሄሳፌ ጉዬ፥ ዶሎሃ ባጋፌ ዪዳ ኣሳቲ ኢያ ጪሚዳይሳ ኤሪዳ ዎዴ ዳሮ ዪሎቲስ። ኢ ካሴ ኤንታፌ ሲዒዳይሳዳ ቤቴሌሜኒኔ ሄ ሄራን ዴዒያ ናምዑ ላይꬂ ኩሚዳይሳታኔ ናምዑ ላይꬃፌ ጋርሳን ዴዒያ ኣዴ ናይታ ኡባ ባ ዎታዳሬታ ዬዲዲ ዎꬊሲስ።
MAT 2:17 ናቢያ ኤርሚያሳ ዶናን፥ «ዬሆይኔ ዜሌልሲ፥ ራማ ካታማን ሲዔቲስ። ራሄላ ባ ናይታስ ዬካዉሱ፤ ኤንቲ ሃይቂዳ ጊሾ ሚኔታናው ዳንዳዓቡኩ» ጊዲ ኦዲዳይሲ ፖሌቲስ።
MAT 2:19 ሄሮዲሲ ሃይቂዳፔ ጉዬ ጊብፄን ጎዳ ኪታንቾይ ዮሴፋስ ኣሙሆን ቆንጪዲ፥
MAT 2:20 «ናዓ ዎꬋናው ኮያ ኣሳቲ ሃይቂዳ ጊሾ ዴንዳዳ ናዓኔ ናዓ ኣዪው ኤካዳ ኢስራዔሌ ቢታ ሲማ» ያጊስ።
MAT 2:21 ዮሴፊ ዴንዲዲ ናዓኔ ናዓ ኣዪው ኤኪዲ ኢስራዔሌ ቢታ ሲሚስ።
MAT 2:22 ሺን ኣርኬሊዮሲ ዪሁዳን ባ ኣዋ ሄሮዲሳ ቤሳን ካዎቲዳይሳ ሲዒዳ ዎዴ ያ ባናው ያዪስ። ፆሳይ ኣሙሆን ኢያው ቆንጪሲን ጋሊላ ቢታ ቢስ።
MAT 2:23 ናቤታ ዶናን፥ «ናዚሬቴ ኣሲ ጌቴታና» ጊዲ ኦዴቲዳይሲ ፖሌታና ሜላ ናዚሬቴ ካታማ ቢዲ ያን ዴዒስ።
MAT 3:1 ሄ ዎዴ ፃማቂያ ዮሃኒሲ፥ «ፆሳ ካዎቴꬃይ ማታቲዳ ጊሾ ሂንቴ ናጋራፔ ሲሚቴ» ያጊዲ ሳባኪሼ ዪሁዳ ባዞ ቢታ ቢስ።
MAT 3:3 ናቢያ ኢሳያሲ ዮሃኒሳባ ኦዲዳይሳ ሜላ፥ «ባዞ ቢታን፥ ኢሶይ ባ ቃላ ꬎቁ ኦꬂዲ፥ ‹ጎዳ ኦጊያ ጊጊሲቴ። ኢያ ሆሮጋ ፒዲ ኦꬂቴ› ጊስ» ያጌቲዳይ ኢያሳ ያጊስ።
MAT 3:4 ዮሃኒሲ ጊማሌ ኢኪሴፔ ኦሴቲዳ ኣፊላ ማዔስ። ባ ፄሳን ዳፎ ዳንጬስ። ኢ ሚያ ካꬃይካ ቦሌኔ ዴጌራ ኤሲ።
MAT 3:5 ኣሳይ ሄ ዎዴ ዬሩሳላሜ ካታማፔ፥ ዪሁዳ ቢታ ኡባፌኔ ዮርዳኖሴ ሻፋ ሄራፔ ኢያኮ ዮሶና።
MAT 3:6 ባንታ ናጋራ ፓፂዲ ዮርዳኖሴ ሻፋን ዮሃኒሳ ኩሼን ፃማቄቶሶና።
MAT 3:7 ዮሃኒሲ፥ ዳሮ ፋሪሳዌቲኔ ሳዱቃዌቲ ፃማቄታናው ባኮ ዬይሳታ ቤዒዲ፥ ኤንታኮ፥ «ሃ ኢታ ሾሻቶ፥ ያና ፆሳ ሃንቁዋፌ ባቃታና ሜላ ሂንቴና ኦኔ ዞሪዳይ?
MAT 3:8 ሂዛ፥ ሂንቴ፥ ሂንቴ ናጋራፔ ሲሚዳይሳ ኤሪሲያባ ኦꬂቴ።
MAT 3:9 ሂንቴ፥ ሂንቴ ዎዛናን፥ ‹ኣብራሃሜይ፥ ኑ ኣዋይ ዴዔስ› ጊዲ ቆፖፊቴ። ሎይꬂ ሲዒቴ! ፆሳይ ሃ ሹቻታፔ ኣብራሃሜስ ናዓ ኬሳናው ዳንዳዔስ።
MAT 3:10 ቤፄይ ሚꬃ ፃጱዋን ጊጊዲ ኡቲስ፤ ሎዖ ኣይፌ ኣይፎና ሚꬃ ኡባይ ቃንፄቲዲ ታማን ዬጌታና።
MAT 3:11 «ሂንቴ፥ ሂንቴ ናጋራፔ ሲሚዳይሳ ኤሪሳናው ታኒ ሂንቴና ሃꬃን ፃማቃይስ። ሺን ታፔ ጉዬራ ዬይሲ ሂንቴና ጌሻ ኣያናኒኔ ታማን ፃማቃና። ኢ ታፔ ዳሮ ዎልቃሜስ፤ ታኒ ሃሪ ኣቶሺን ኢያ ጫማ ቶካናዉካ ቤሲኬ።
MAT 3:12 ካꬃ ጌሺያ ፒꬄይ ኢያ ኩሼን ዴዔስ። ካꬃ ሎይꬂ ጌሼስ፤ ጊስቲያ ባ ሻሊያን ቆላና፥ ሺን ፑኑዋ ቶዖና ታማን ፁጋና» ያጊስ።
MAT 3:13 ሄ ዎዴ ዬሱሲ ዮሃኒሳ ኩሼን ፃማቄታናው ጋሊላፔ ዮርዳኖሴ ሻፋ ቢስ።
MAT 3:14 ሺን ዮሃኒሲ ኢያ ዲጋናው ኮዪድ፥ «ታኒ ኔናን ፃማቄታናው ኮሺሺን ኔኒ ታኮ ያይ?» ያጊስ።
MAT 3:15 ሺን ዬሱሲ ዛሪዲ፥ «ፆሳይ ኑፔ ኮያባ ኡባ ኑ ፖላናው ቤሲያ ጊሾ ሃዒ ታው ኤሮ ጋ» ያጊስ። ዮሃኒሲ ኢያው ኤሮ ጊዲ ኤኪስ።
MAT 3:16 ዬሱሲ ፃማቄቲዳ ሜላ ሃꬃፌ ኬዪስ። ኢራካ ሳሎይ ዶዬቲን ፆሳ ኣያናይ ሆሌዳ ዪሺን ቃሲ ባ ቦላ ዎልዓሚዲ ዎꬊሺን ቤዒስ።
MAT 3:17 ሄ ዎዴ «ታ ዶሲያ፥ ኢያን ታና ኡፋይሲያ ታ ናዓይ ሃይሳ» ያጊያ ቃላይ ሳሎፔ ዪስ።
MAT 4:1 ሄሳፌ ጉዬ፥ ፃላሄይ ዬሱሳ ፓጫና ሜላ ጌሻ ኣያናይ ዬሱሳ ባዞ ቢታ ኤፊስ።
MAT 4:2 ኦይታሙ ቃማኔ ኦይታሙ ጋላስ ፆሚዳፔ ጉዬ ኮሻቲስ።
MAT 4:3 ፃላሄይ ዬሱሳኮ ዪዲ «ኔኒ ፆሳ ናዓ ጊዲኮ፥ ኣኔ ሃ ሹቻቲ ኡይꬂ ጊዳና ሜላ ኪታ» ያጊስ።
MAT 4:4 ዬሱሲ ዛሪዲ፥ « ‹ኣሲ ፆሳ ዶናፔ ኬያ ቃላ ኡባን ዳናፔ ኣቲን ኡይꬃ ፃላላን ዴዔና› ጌቴቲዲ ፆሳ ቃላን ፃፌቲስ» ያጊስ።
MAT 4:5 ካሊዲካ፥ ፃላሄይ ዬሱሳ ጌሻ ካታማ ኤፊዲ፥ ፆሳ ኬꬃ ሁዒያ ኬሲዲ፥
MAT 4:6 «ኔኒ ፆሳ ናዓ ጊዲኮ፥ ኣኔ ዱጌ ሳዓን ኩንዳ። ኣይስ ጊኮ፥ ‹ኔ ቶሆይ ሹቻን ꬉቤቲ ዴሼቶና ሜላ፥ ባንታ ኩሺያን ኔና ዴንꬃና ሜላ፥ ፆሳይ ባ ኪታንቾታ ኔ ጊሾ ኪታና› ጌቴቲዲ ፆሳ ቃላን ፃፌቲስ» ያጊስ።
MAT 4:7 ዬሱሲ ኢያኮ፥ «ቃሲካ፥ ‹ፆሳ ቃላን ኔ ጎዳ፥ ኔ ፆሳ ፓጮፋ› ያጌቲዲ ፃፌቲስ» ጊዲ ዛሪስ።
MAT 4:8 ዉርሴꬃን ፃላሄይ ዬሱሳ ኢሲ ዎልቃማ ዴሪያ ሁዔ ኬሲዲ ኣላሚያ ካዎቴꬃታ ኤንታ ቦንቹዋራ ኢሲፌ ቤሲዲ፥
MAT 4:9 «ኔ ታው ኩንዳዳ ጎይኒኮ ታ ኔው ሃ ኡባ ኢማና» ያጊስ።
MAT 4:10 ዬሱሲ ዛሪዲ፥ «ሃ ፃላሂያው፥ ታፔ ሃካ! ‹ኔ ጎዳ፥ ኔ ፆሳ ጎይና፥ ኢያ ፃላላ ሃጋዛ› ጌቴቲዲ ፆሳ ቃላን ፃፌቲስ» ያጊስ።
MAT 4:11 ሄሳፌ ጉዬ፥ ፃላሄይ ኣጊዲ ቢስ፤ ኪታንቾቲ ዪዲ ኢያ ሃጋዚዶሶና።
MAT 4:12 ዬሱሲ፥ ዮሃኒሲ ቃሼቶይሳ ሲዒዳ ዎዴ ጋሊላ ቢታ ቢስ።
MAT 4:13 ናዚሬቴ ካታማ ኣጊዲ ዛቢሎናኒኔ ኒፍታሌሜ ሄራን፥ ኣባ ማታን ዴዒያ ቂፊርናሆሜ ካታማ ቢዲ ያን ዴዒስ።
MAT 4:14 ሄሲ ሃኒዳይ ናቢያ ኢሳያሳ ዶናን፥
MAT 4:15 «ዛቢሎኔ ቢታን፥ ኒፍታሌሜ ቢታን፥ ዮርዳኖሴ ሻፋፔ ሄፊንꬃን፥ ኣባ ኦጊያ ጋፃን ዴዒያ፥ ኣይሁዴ ጊዶና ዴሬይ ዴዒያ ጋሊላን፥
MAT 4:16 ꬉማን ዴዒያ ዴሬይ፥ ዎልቃማ ፖዖ ቤዒስ። ሃይቆ ኩያ ቢታን፥ ዴዔይሳታስ ፖዖይ ኬዪስ» ያጊዲ ኦዴቲዳ ቃላይ ፖሌታና ሜላሳ።
MAT 4:17 ሄ ዎዴፔ ዶሚዲ ዬሱሲ፥ «ፆሳ ካዎቴꬃይ ማታቲዳ ጊሾ ሂንቴ ናጋራፔ ሲሚቴ» ያጊዲ ቃላ ሳባኬስ።
MAT 4:18 ዬሱሲ ጋሊላ ኣባ ማታራ ኣꬊሼ ናምዑ ኢሻታ፥ ጴፂሮሳ ጌቴቲያ ሲሞናኔ ኢያ ኢሻ ኢንዲሪያሳ ቤዒስ። ኤንቲ ሞሎ ኦይኬይሳታ ጊዲዳ ጊሾ ባንታ ጊቲያ ኣባን ዬጎሶና።
MAT 4:19 ዬሱሲ ኤንታና፥ «ሃ ዪቴ፤ ታና ካሊቴ! ሞሎ ኦይꬂ ኣቶሺን፥ ታ ሂንቴና ኣሴ ኦይꬂ ታማርሳና» ያጊስ።
MAT 4:20 ኤንቲካ፥ ኤሌሲዲ ባንታ ጊቲያ ዬጊ ኣጊዲ ዬሱሳ ካሊዶሶና።
MAT 4:21 ዬሱሲ ያፔ ቡሮ ጌዴ ሲንꬄ ኣꬊሼ ሃራ ናምዑ ኢሻታ፥ ዛብዲዮሳ ናይታ፥ ያይቆባኔ ዮሃኒሳ ቤዒስ። ባንታ ኣዋ ዛብዲዮሳራ ኢሲፌ ዎጎሉዋ ጊዶን ባንታ ጊቲያ ጊጊሴይሳታ ፄጊስ።
MAT 4:22 ኤንቲካ፥ ኤሌሲዲ ባንታ ዎጎሉዋኔ ባንታ ኣዋ ኣጊዲ ዬሱሳ ካሊዶሶና።
MAT 4:23 ዬሱሲ ኣይሁዴ ዎሳ ኬꬃታን ታማርሲሼ፥ ሳሎ ካዎቴꬃ ዎንጌላ ኦዲሼኔ ዱማ ዱማ ሃርጊያፌ ኣሳ ፓꬂሼ ጋሊላ ቢታ ኡባን ዩዪስ።
MAT 4:24 ሄሳፌ ዴንዶይሳን ኢያ ሱንꬃይ ሶሪያ ቢታ ኡባን ኬዪስ። ዱማ ዱማ ሃርጌን ኦይኬቲዳይሳታኔ ዋዬቴይሳታ፥ ቱና ኣያናን ኦይኬቲዳይሳታ፥ ሾጪ ዬጊያ ሃርጌን ኦይኬቲዳይሳታኔ፥ ጉንዳታ ኢያኮ ኤሂዶሶና፤ ኢካ ኤንታና ፓꬂስ።
MAT 4:25 ኣሳይ ጋሊላፔ፥ ታሙ ካታማታፔ፥ ዬሩሳላሜፔ፥ ዪሁዳፔኔ ዮርዳኖሴ ሻፋ ሄፊንꬃን ዴዒያ ቢታፌ ዪዳ ዳሮ ኣሳይ ኢያ ካሊዶሶና።
MAT 5:1 ዳሮ ዴሬይ ሺቂዳይሳ ዬሱሲ ቤዒዳ ዎዴ ዴሪያ ቦላ ኬዪዲ ኡቲስ። ኢያ ታማሬቲ ኢያኮ ሺቂን፥
MAT 5:2 ሃይሳዳ ያጊዲ ታማርሲስ፡
MAT 5:3 «ባንታ ኣያናን ማንቆቲ ኣንጄቲዳይሳታ፥ ሳሎ ካዎቴꬃይ ኤንታሳ።
MAT 5:4 ዬኬይሳቲ ኣንጄቲዳይሳታ፥ ኤንቲ ሚንꬄꬆ ዴማና።
MAT 5:5 ባንታ ዎዛናን ኣሽኬቲ ኣንጄቲዳይሳታ፥ ኤንቲ ሳዓ ላታና።
MAT 5:6 ፂሎባ ኦꬃናው ኮሻቴይሳቲኔ ሳሞቴይሳቲ ኣንጄቲዳይሳታ፥ ኤንቲ ካላና።
MAT 5:7 ማሬይሳቲ ኣንጄቲዳይሳታ፥ ኤንቲ ማሮቴꬂ ዴማና።
MAT 5:8 ዎዛና ጌሻቲ ኣንጄቲዳይሳታ፥ ኤንቲ ፆሳ ቤዓና።
MAT 5:9 ሲጌꬄይሳቲ ኣንጄቲዳይሳታ፥ ኤንቲ ፆሳ ናይታ ጌቴቲ ፄጌታና።
MAT 5:10 ፂሎባ ኦꬂያ ጊሾ ጊዲ፥ ጎዴቴይሳቲ ኣንጄቲዳይሳታ፥ ሳሎ ካዎቴꬃይ ኤንታሳ።
MAT 5:11 «ኣሳይ ሂንቴና ታ ጊሾ ጊዲ ጫያ ዎዴ ጎዲያ ዎዴኔ ሂንቴ ቦላ ኢታባ ኡባ ዎርዶን ኦዲሲያ ዎዴ ሂንቴ ኣንጄቲዳይሳታ።
MAT 5:12 ሂንቴ ዎይቶይ ሳሎን ጊታ ጊዲያ ጊሾ ኡፋይቲቴ፥ ሃሹ ጊቴ። ሂንቴፌ ካሴ ዴዒያ ናቤታ ሄሳዳ ጎዲዶሶና።
MAT 5:13 «ሂንቴ ቢታስ ማፂኔ፤ ማፂኔይ ባ ማፂኔቴꬃ ኣጊኮ፥ ባ ማልዖቴꬃ ዋቲ ዛሪ ዴማኔ? ካሬ ሆሊን ኣሳን ዬꬌታናፔ ኣቲን ኣይቢስካ ማዴና።
MAT 5:14 «ሂንቴ ቢታስ ፖዖ፤ ዴሬ ቦላ ዴዒያ ካታሚያ ቆሴታናው ዳንዳዑኩ።
MAT 5:15 ፆምፔ ኦይꬂዲ ሶን ዴዒያ ኣሳ ኡባስ ፖዓና ሜላ ꬎቃ ሶን ዎꬄሲፔ ኣቲን ዳሎ ጊዶን ዎꬄይ ባዋ።
MAT 5:16 ሄሳ ሜላ ኣሳይ ሂንቴ ሎዖ ኦሱዋ ቤዒዲ፥ ሳሎን ዴዒያ ሂንቴ ኣዋ ቦንቻና ሜላ ሂንቴ ፖዖይ ኣሳ ሲንꬃን ፖዖ።
MAT 5:17 «ታኒ ሙሴ ሂጊያኔ ናቤታ ቃላ ሻራናው ዪዳ ሂንቴው ዳኖፖ። ታኒ፥ ኤንቲ ኦዲዳይሲ ቱማ ጊዴይሳ ቆንጪሳናው ያሲፔ ኣቲን ሻራናው ያቢኬ።
MAT 5:18 ታ ሂንቴው ቱማ ኦዳይስ፤ ሳሎይኔ ሳዓይ ኣꬋና ጋካናው ሂጌ ኡባይ ፖሌታናፔ ኣቲን ሂጊያፌ ኢሲ ቃላይ ዎይኮ ፒዳሌይ ኣꬌና።
MAT 5:19 ሄሳ ጊሾ፥ ሃ ኪታታፔ ጉፂያ ኢሲ ኪታ ሜንꬂያ ኦኒካ ቃሲ ሃራታ ሄሳꬆ ኦꬃና ሜላ ታማርሴይ ኦኒካ ሳሎ ካዎቴꬃን ኡባፌ ጉꬃ ጊዳና። ሺን ሃ ኪታ ፖሌይሲኔ ሃራታካ ፖላና ሜላ ታማርሴይ ሳሎ ካዎቴꬃን ጊታ ጊዳና።
MAT 5:20 ታ ሂንቴው ኦዳይስ፤ ሂንቴ ፂሎቴꬃይ ፋሪሳዌታ ፂሎቴꬃፌኔ ሂጌ ኣስታማሬታ ፂሎቴꬃፌ ኣꬎና ኢፂኮ፥ ሳሎ ካዎቴꬃ ጌሌኬታ።
MAT 5:21 «ሂንቴ ማይዛታስ፥ ‹ዎꬎፒቴ፤ ሼምፖ ዎꬊዳ ኦኒካ ፒርዴታና› ጌቴቶይሳ ሲዒዴታ።
MAT 5:22 ሺን ታ ሂንቴው ኦዳይስ፤ ባ ኢሻ ሃንቄቲያ ኡባይ ፒርዴታና። ባ ኢሻ ጫያ ኦኒካ ዳይና ሲንꬂ ፒርዳስ ሺቃና። ባ ኢሻኮ፥ ‹ኤያይ› ጊያ ኦኒካ ቃሲ ጋናሜ ታማን ፒርዴታና።
MAT 5:23 «ሄሳ ጊሾ፥ ኔኒ ኔ ያርሹዋ ያርሺያ ዎዴ ኔ ኢሻ ቆሂዳባይ ኔው ኣኬኬቲኮ፥
MAT 5:24 ኔ ያርሹዋ ሄ ቤሳን ኣጋዳ ባ፤ ኮይሮታ ባዳ ኔ ኢሻራ ጊጋ፤ ያታ ሲማዳ፥ ኔ ያርሹዋ ፆሳስ ያርሻ።
MAT 5:25 «ኔና ሞቴይሳራ ፒርዳ ኬꬂ ባሼ ኦጌ ቦላ ኢያራ ጊጋ። ሄሲ ኣቶ ጊኮ ኢ ኔና ዳይና ሲንꬂ ኤፋና። ዳይናይ ኔና ቃቼይሳስ ኣꬂ ኢማና፤ ኢ ኔና ዎይኔን ዬጋና።
MAT 5:26 ታ ቱማ ኦዳይስ፤ ኔ ቦላ ፒርዴቲዳ ኣጩዋ ኢሲ ሳንቲሜይ ኣቶና ጪጋ ኦንጋና ጋካናው ቃሾ ኬꬃፌ ኬያካ።
MAT 5:27 «ሃይሳፌ ካሴ፥ ‹ላይማቶፒቴ› ጌቴቶይሳ ሲዒዴታ።
MAT 5:28 ሺን ታ ሂንቴው ኦዳይስ፥ ማጫስ ፄሊዲ፥ ኣሞቲዳ ኡባይ ባ ዎዛናን ኢራ ላይማቴስ።
MAT 5:29 ኔ ኡሻቻ ኣይፌይ ኔው ናጋራስ ጋሶ ጊዲኮ፥ ኬሳ ሆላ። ኔ ኣሳቴꬃይ ኩሜꬂ ጋናሜ ታማን ዎꬋናፔ ኔ ኣሳቴꬃፌ ኢሶይ ꬋዪኮ ኔው ሎዖ።
MAT 5:30 ኔ ኡሻቻ ኩሼይ ኔው ናጋራስ ጋሶ ጊዲኮ፥ ኢያ ቃንፃ ሆላ። ኔ ኣሳቴꬃይ ኩሜꬂ ጋናሜ ታማን ዎꬋናፔ ኔ ኣሳቴꬃፌ ኢሶይ ꬋዪኮ፥ ኔው ሎዖ።
MAT 5:31 « ‹ባ ማቺው ዬዲያ ኦኒካ ኣንጆ ዋርቃቲያ ኢሞ› ጌቴቲስ።
MAT 5:32 ሺን ታ ሂንቴው ኦዳይስ፤ ባ ማቺያ ላይማቶና ዴዒሺን ቢሊያ ኦኒካ ኢያ ላይማታና ሜላ ኦꬄስ። ሄሳዳካ፥ ኣንጄቲዳ ማጫሲው ኤኪያ ኡባይ ላይማቴስ።
MAT 5:33 «ሂንቴ ማይዛታኮ፥ ‹ዎርዶን ጫቆፊቴ፤ ሂንቴ ፆሳ ሲንꬃን ጫቂዳይሳ ፖሊቴ› ጌቴቲዳይሳ ሲዒዴታ።
MAT 5:34 ሺን ታ ሂንቴው ኦዳይስ፤ ኡባራካ ጫቆፊቴ። ፆሳይ ኡቲያ ኣራታ ጊዲያ ጊሾ ሳሎን ጫቆፊቴ።
MAT 5:35 ኢያ ቶሆይ ዬꬊያ ሶ ጊዲያ ጊሾ ሳዓንካ ጫቆፊቴ። ጊታ ካዉዋ ካታማ ጊዲያ ጊሾ ዬሩሳላሜንካ ጫቆፊቴ።
MAT 5:36 ሂንቴ ቢናናፔ ኢሱዋካ ቦꬂ ዎይኮ ካሬꬂ ኦꬃናው ዳንዳዖና ጊሾ ሂንቴ ሂንቴ ሁዔንካ ጫቆፊቴ።
MAT 5:37 ሄሳ ጊሾ፥ ሂንቴ ቃላይ፥ ‹ኤ› ዎይኮ ‹ኣካይ› ጊዶ። ሄሳፌ ካሬ ኬዬይ ፃላሄፔ ዬስ።
MAT 5:38 « ‹ኣይፌ ጊሾ ኣይፌ፤ ኣቻ ጊሾ ኣቼ› ጌቴቲዳይሳ ሲዒዴታ።
MAT 5:39 ሺን ታ ሂንቴው ኦዳይስ፤ ሂንቴ ቦላ ኢታባ ኦꬂያ ኡራራ ኤቄቶፊቴ። ኦኒካ ኔ ኡሻቻ ሻካላ ባቂኮ ኔ ሃዲርሳ ሻካላካ ቤሳ።
MAT 5:40 ኢሲ ኣሲ ኔ ሻሚዚያ ኤካናው ኔና ሞቲኮ፥ ኔ ኮቲያ ጉጃዳ ኢማ።
MAT 5:41 ኢሲ ኣሲ ኔና ዎልቃን ባባ ቶሲዲ ኢሲ ሳቴ ኦጌ ባራ ባና ሜላ ኔና ኡንዔꬂኮ፥ ኢያራ ናምዑ ሳቴ ኦጌ ባ።
MAT 5:42 ዎሲያ ኦዴስካ ኢማ፤ ኔፔ ታልዓናው ኮያ ኦናካ ዲጎፋ።
MAT 5:43 « ‹ኔና ዶሴይሳ ዶሳ፤ ኔና ኢፄይሳ ኢፃ› ጌቴቶይሳ ሲዒዴታ።
MAT 5:44 ሺን ታ ሂንቴው ኦዳይስ፤ ሂንቴ ሞርኬታ ዶሲቴ፤ ሂንቴና ቆሄይሳታስ ዎሲቴ።
MAT 5:45 ሄሳꬆ ሂንቴ ኦꬂኮ፥ ሳሎን ዴዒያ ሂንቴ ኣዋስ ሂንቴ ናይታ ጊዳና። ኢ ኢታታሲኔ ሎዖታስ ኣዋ ኬሴስ፤ ፂሎታሲኔ ናጋራንቾታስ ባ ኢራ ቡኪሴስ።
MAT 5:46 ሂንቴና ዶሲያ ኣሳ ፃላላ ሂንቴ ዶሲኮ፥ ሂንቴው ኣይ ዎይቶይ ዴዒ? ሃሪ ኣቶሺን፥ ቃራፃ ቃንፂሴይሳቲካ ሄሳ ኦꬆሶና።
MAT 5:47 ሂንቴ፥ ሂንቴ ኢሻታ ፃላላ ሳሮꬂኮ፥ ሃራታፔ ኣይ ሃራ ኣꬊያባ ኦꬂዴቲ? ሃሪ ኣቶሺን፥ ፆሳ ኣማኖና ኣሳይካ ሄሳ ኦꬆሶና።
MAT 5:48 ሂዛ፥ ሳሎን ዴዒያ ሂንቴ ኣዋይ ፖሎ ጊዶይሳዳ ሂንቴካ ፖሎ ጊዲቴ።
MAT 6:1 «ኣሲ ቤዖ ጊዲ ሂንቴ ሎዖ ኦሱዋ ኣሳ ሲንꬃን ኦꬆናዳ ናጌቲቴ። ሄሳꬆ ሃኖና ኢፂኮ ሳሎን ዴዒያ ሂንቴ ኣዋፔ ዎይቶ ዴሜኬታ።
MAT 6:2 «ሂንቴ ማንቆታስ ኢሚያ ዎዴ ኣሳ ሲንꬃን ቦንቼታናው ጊዲ ጩቦቲ ኦጊያ ዶናኒኔ ኣይሁዴ ዎሳ ኬꬃታን ኦꬄይሳዳ ኣሲ ቤዖ ጊዲ ኦꬆፊቴ። ታ ሂንቴው ቱማ ኦዳይስ፤ ኤንቲ ባንታ ኩሜꬃ ዎይቱዋ ኤኪዶሶና።
MAT 6:3 ሺን ሂንቴ ማንቆታስ ኢሚያ ዎዴ ሂንቴ ኡሻቻ ኩሼይ ኦꬄይሳ ሂንቴ ሃዲርሳ ኩሼይ ኤሮፖ፤
MAT 6:4 ሂንቴ ኢሞይ ጌማን ጊዶ። ጌማን ኦꬄይሳ ቤዒያ ሂንቴ ኣዋይ ሂንቴው ዎይቱዋ ቆንጬን ኢማና።
MAT 6:5 «ዎሳ ዎሲሼ ጩቦታꬆ ሃኖፒቴ። ኤንቲ፥ ባንታና ኣሲ ቤዖ ጊዲ ኣይሁዴ ዎሳ ኬꬃኒኔ ኦጊያ ዶናን ኤቂዲ ዎሴይሳ ዶሶሶና። ታ ሂንቴው ቱማ ኦዳይስ፤ ኤንቲ ባንታ ኩሜꬃ ዎይቱዋ ኤኪዶሶና።
MAT 6:6 ሺን ኔኒ ዎሲያ ዎዴ ኔ ሶ ጌላ፥ ዉላ ጎርዳዳ ጌማን ዴዒያ ኔ ኣዋኮ ዎሳ፤ ጌማን ኦሴቲዳይሳ ቤዒያ ኔ ኣዋይ ኔው ዎይቱዋ ኢማና።
MAT 6:7 ሂንቴ ዎሲያ ዎዴ ኣማኖና ኣሳꬆ ጮ ቃላ ዳርሲዲ ዎሶፊቴ። ኤንቲ ኣዱሲ ዎሲን ፆሳይ ሲዔስ ጊዲ ቆፖሶና።
MAT 6:8 ሄሳ ጊሾ፥ ኤንታይሳዳ ሃኖፒቴ። ኣይስ ጊኮ፥ ሂንቴ ኣዋይ ሂንቴው ኣይ ኮሺያኮ ሂንቴ ዎሳናፔ ሲንꬃቲዲ ኤሬስ።
MAT 6:9 «ሂዛ፥ ሂንቴ ያጊዲ ዎሲቴ፡ ‹ሳሎን ዴዒያ ኑ ኣዋው፥ ኔ ጌሻ ሱንꬃይ ኣንጄቶ።
MAT 6:10 ኔ ካዎቴꬃይ ዮ፥ ኔ ሼኔይ ሳሎን ሃኒዳይሳዳ ሳዓንካ ሃኖ።
MAT 6:11 ጋላሳ ካꬃ ሃቺ ሃቺ ኑስ ኢማ።
MAT 6:12 ኑኒ ኑና ቆሂዳይሳታ፥ ኣቶ ጌይሳዳ፥ ኑስካ ኑ ቆሁዋ ኣቶ ጋ።
MAT 6:13 ኑና ኢታፔ ኣሻፌ ኣቲን ፓጬን ጌልሶፋ። [ካዎቴꬃይ፥ ዎልቃይኔ ቦንቾይ ሜሪናው ኔሳ። ኣሚንዒ።]›
MAT 6:14 «ሂንቴ ሂንቴና ቆሂዳይሳታ ኣቶ ጊኮ፥ ሳሎን ዴዒያ ሂንቴ ኣዋይ ሂንቴ ቆሁዋካ ኣቶ ጋና።
MAT 6:15 ሺን ሂንቴ ሃራ ኣሳ ናጋራ ኣቶ ጎና ኢፂኮ ሂንቴ ኣዋይ ሂንቴ ናጋራ ኣቶ ጌና።
MAT 6:16 «ሂንቴ ፆሚያ ዎዴ ጩቦታꬆ ካዮቶፊቴ። ኣይስ ጊኮ፥ ኤንቲ ፆሜይሳ ኣሲ ኤራና ሜላ ባንታ ሶምዑዋ ቂታዮሶና። ታ ቱማ ኦዳይስ፤ ኤንቲ ባንታ ዎይቱዋ ኤኪዶሶና።
MAT 6:17 «ሺን ኔኒ ፆሚያ ዎዴ ኔ ሶምዑዋ ሜጫ፥ ኔ ሁዒያ ቲዬታ።
MAT 6:18 ሄሳዳ ኔ ኦꬂኮ ኔ ፆሚያ ፆማይ ኣሳፔ ጌሚዳይሳ፥ ሺን ጌማን ዴዒያ ኔ ኣዋይ ኤሪያ ፆማ ጊዳና። ጌማን ኦሴቲዳይሳ ቤዒያ ኔ ኣዋይ ኔው ዎይቱዋ ኢማና።
MAT 6:19 «ቢሊ ሚያሶን፥ ቢራቲ ሺዒያሶን፥ ካይሶይ ቦኪዲ ኤኪያሶን፥ ሃ ሳዓን፥ ሂንቴው ሻሎ ሺሾፒቴ።
MAT 6:20 ሺን ቢሊ ሞናሶን፥ ቢራቲ ሺዖናሶን፥ ካይሶይ ቦኪዲ ኤኮናሶን ሳሎን ሂንቴው ሻሎ ሺሺቴ።
MAT 6:21 ኔ ሻሎይ ዴዒያሱዋን ኔ ዎዛናይ ዴዓና።
MAT 6:22 «ኣይፌይ ኣሳቴꬃስ ፆምፔ። ሄሳ ጊሾ፥ ኔ ኣይፌይ ፓፃ ጊዲኮ ኔ ኩሜꬃ ኣሳቴꬃይ ፖዖ ጊዴስ።
MAT 6:23 ኔ ኣይፌይ ሃርጋንቾ ጊዲኮ ኔ ኩሜꬃ ኣሳቴꬃይ ꬉማ ጊዴስ። ሂዛ፥ ኔናን ዴዒያ ፖዖይ ꬉማ ጊዲኮ፥ ꬉማይ ኣይ ሜላ ኣꬊዲ ꬉማንዴሻ!
MAT 6:24 «ኢሲ ኣሲ ናምዑ ጎዳስ ሃሬታናው ዳንዳዔና። ኢሱዋ ዶሲኮ ሃንኩዋ ኢፄስ፤ ዎይኮ ኢሱዋ ቦንቺኮ ሃንኩዋ ካꬌስ። ፆሳሲኔ ሚሼስ ሃሬታናው ዳንዳዔኬታ።
MAT 6:25 «ሂዛ፥ ሲዒቴ! ሂንቴ ዴዖን ዳናው፥ ‹ኣይ ማኔ? ኣይ ኡያኔ? ኣይ ማዓኔ?› ጊዲ ኡንዔቶፊቴ፤ ዴዖይ ካꬃፌ ዎይኮ ማዖፔ ኣꬌኔ?
MAT 6:26 ሳሎ ካፎታ ፄሊቴ፤ ኤንቲ ዜሮኮና፥ ቡጮኮና፥ ሻሌን ዬጎኮና፥ ሺን ሂንቴ ሳሎ ኣዋይ ኤንታ ሙዜስ። ሂንቴ ኤንታፌ ኬሂ ኣꬌኬቲ?
MAT 6:27 ሂንቴ ጊዶፌ ዳሮ ኡንዔቲዲ ባ ላይꬃ ቦላ ኢሲ ጋላስ ጉጃናው ዳንዳዔይ ዴዒ?
MAT 6:28 «ቃሲ ሂንቴ ማዒያባስ ኣይስ ኡንዔቴቲ? ኣኔ ጪሻታ ቤዒቴ፥ ኦሶን ዳቡሮኮና ዎይኮ ሱቆኮና።
MAT 6:29 ሲዒቴ! ሃሪ ኣቶሺን፥ ካዉዋ ሶሎሞኔይ ባ ቦንቾ ኡባን ሃ ጪሻታፔ ኢሱዋ ሜላካ ማዒቤና።
MAT 6:30 ሂንቴኖ፥ ኣማኖይ ፓጪዳይሳቶ፥ ፆሳይ ሃቺ ቤንቲዲ ዎንቶ ታማን ዎꬋናው ዴዒያ ማታ ያቲዲ ማይዚያባ ጊዲኮ፥ ሂንቴና ኤንታፌ ኣꬂዲ ዋቲ ማይዜኔ?
MAT 6:31 ሄሳ ጊሾ፥ ‹ኣይ ማኔ? ኣይ ኡያኔ? ኣይ ማዓኔ?› ጊዲ ኡንዔቶፊቴ።
MAT 6:32 ሄ ኡባ ፆሳ ኣማኖና ኣሳይ ዳርሲዲ ዴማናው ኡንዔቶሶና። ሂንቴ ሳሎ ኣዋይ ሄ ኡባይ ሂንቴው ኮሼይሳ ኤሬስ።
MAT 6:33 ሺን ኡባፌ ሲንꬄ ፆሳ ካዎቴꬃኔ ኢያ ፂሎቴꬃ ኮዪቴ፤ ሄ ኡባይ ሂንቴው ጉጂ ኢሜታና።
MAT 6:34 ሄሳ ጊሾ፥ ዎንቶስ ቆፒሼ ኡንዔቶፊቴ። ዎንቶይሲ ዎንቶስ ኣቆ፤ ኢሲ ኢሲ ጋላሳይ ባው ጊዲያ ሜቶራ ዴዔስ።
MAT 7:1 «ሂንቴ ቦላ ፒርዴቶና ሜላ ሃራታ ቦላ ፒርዶፊቴ።
MAT 7:2 ኣይስ ጊኮ፥ ሃራታ ቦላ ሂንቴ ፒርዴይሳዳ ሂንቴ ቦላ ፒርዴታና፤ ሂንቴ ሃራታስ ማኪዳባን ሂንቴው ዛሪ ማኬታና።
MAT 7:3 ኔ ኣይፌን ዴዒያ ቱሱ ዳኔይሳ ቤዖና ኔ ኢሻ ኣይፌን ዴዒያ ቡሪያ ኣይስ ቤዓይ?
MAT 7:4 ኔ ኣይፌን ቱሲ ዴዒሺን ኔ ኢሻ ኣይፌን ዴዒያ ቡሪያ ኬሶ ጋናው ዋና ዳንዳዓይ?
MAT 7:5 ኔኖ ጩቡዋው፥ ኮይሮታዳ ኔ ኣይፌን ዴዒያ ቱሲ ዳኔይሳ ኬሳ። ኢያፔ ጉዬ፥ ኔ ኢሻ ኣይፌን ዴዒያ ቡሪያ ኬሳናው ኔ ጌሻ ፄላና።
MAT 7:6 «ጉዬ ሲሚዲ ሂንቴና ሳፆና ሜላ ጌሻባ ካናታስ ዬጎፊቴ። ባንታ ቶሁዋን ዬꬊዲ ኢሶና ሜላ ሂንቴ ኣልዖ ኢንቁዋ ጉዱንꬆታ ሲንꬃን ዬጎፊቴ።
MAT 7:7 «ዎሲቴ ሂንቴው ኢሜታና፥ ኮዪቴ ሂንቴ ዴማና፥ ካሬ ዪዲ ፄጊቴ ሂንቴው ዶዬታና።
MAT 7:8 ዎሲያ ኦዴስካ ኢሜታና፥ ኮያ ኦዴስካ ቤንታና፥ ካሬ ዪዲ ፄጊያ ኦዴስካ ዶዬታና።
MAT 7:9 «ሂንቴ ጊዶፌ ባ ናዒ ኡይꬂ ዎሲኮ ሹቺ ኢሜይ ኦኔ?
MAT 7:10 ዎይኮ ሞሎ ዎሲኮ ሾሺ ኢሜይ ዴዒ?
MAT 7:11 ያቲን ሂንቴ ኢታ ጊዲሼ ሂንቴ ናይታስ ሎዖባ ኢሞ ኤሪኮ፥ ሂንቴ ሳሎ ኣዋይ ባና ዎሴይሳታስ ሎዖባ ዋቲ ዳርሲዲ ኢሜኔ?
MAT 7:12 ሃራቲ ሂንቴው ኦꬃና ሜላ ሂንቴ ኮያባ ኡባ ሂንቴካ ሃራታስ ኦꬂቴ። ኣይስ ጊኮ፥ ሙሴ ሂጌይኔ ናቤቲ ታማርሴይ ሃይሳ።
MAT 7:13 «ፁንꬃ ዉላራ ጌሊቴ፤ ኣይስ ጊኮ፥ ꬋዮስ ኤፊያ ኦጌይ ዎጋ፥ ዉላይካ ዳልጋ። ኢያራ ጌሊያ ኣሳይካ ዳሮ።
MAT 7:14 ሺን ዴዑዋኮ ኤፊያ ኦጌይኔ ዉላይ ፁንꬁ፤ ያ ጌሊያ ኣሳይካ ጉꬃ።
MAT 7:15 «ቦላ ባጋራ ዶርሴ ዳኒዲ ባንታ ጋꬃን ሱꬉሜ ጊዲዲ ሂንቴ ጊዶ ጌሊያ ዎርዳንቾ ናቤታፔ ናጌቲቴ።
MAT 7:16 ሂንቴ ኤንታ፥ ኤንታ ኣይፊያፔ ኤራና፤ ኣጉንꬃፌ ዎይኔይ፥ ኪንቾቴፔ ላዴይ ማፄቴና።
MAT 7:17 ሄሳ ሜላ ሎዖ ሚꬂ ኡባይ ሎዖ ኣይፌ ኣይፌስ፤ ኢታ ሚꬂ ኢታ ኣይፌ ኣይፌስ።
MAT 7:18 ሎዖ ሚꬂ ኢታ ኣይፌ ኣይፌና፥ ቃሲ ኢታ ሚꬂ ሎዖ ኣይፌ ኣይፋናው ዳንዳዔና።
MAT 7:19 ሎዖ ኣይፌ ኣይፎና ሚꬂ ኡባይ ቃንፄቲዲ ታማን ፁጌታና።
MAT 7:20 ሄሳ ጊሾ፥ ሂንቴ ኤንታ፥ ኤንታ ኣይፊያን ኤራና።
MAT 7:21 «ሳሎን ዴዒያ ታ ኣዋ ሼኒያ ኦꬂያ ኡራይ ሳሎ ካዎቴꬂ ጌላናፔ ኣቲን ጮ ታና ‹ጎዳው፥ ጎዳው› ጊያ ኡባይ ሳሎ ካዎቴꬂ ጌሌና።
MAT 7:22 ፒርዳ ጋላስ ዳሮቲ፥ ‹ጎዳው፥ ጎዳው፥ ኔ ሱንꬃን ቲንቢቴ ኦዲቦኮ? ኔ ሱንꬃን ቱና ኣያናታ ኬሲቦኮ? ኔ ሱንꬃን ማላታታ ኦꬂቦኮ?› ያጋና።
MAT 7:23 ሄ ዎዴ ታኒ፥ ‹ታ ሂንቴና ኡባራካ ኤሪኬ፥ ሂንቴ ኢታ ኦꬄይሳቲ ታፔ ሃኪቴ› ያጋና።
MAT 7:24 «ሂዛ፥ ሃ ታ ቃላ ሲዒዲ ኦꬂያ ኦኒካ ባ ኬꬃ ሹቻ ቦላ ኬፂዳ ዎዛናማ ኣሳ ሜላ።
MAT 7:25 ኢራይ ቡኪስ፥ ዲዖይ ዲዒስ፥ ጫርኮይካ ጫርኪዲ ሄ ኬꬃ ሱጊስ። ሺን ኬꬃይ ሹቻ ባሶ ቦላ ኬፄቲዳ ጊሾ ኩንዲቤና።
MAT 7:26 ሃ ታ ቃላ ሲዒዲ ኦꬆና ኦኒካ ባ ኬꬃ ሻፌ ቦላ ኬፂዳ ኤያ ኡራ ሜላ።
MAT 7:27 ኢራይ ቡኪዲ፥ ዲዖይ ዲዒዲ፥ ጫርኮይካ ጫርኪዲ፥ ሄ ኬꬃ ሱጊን፥ ሄ ኬꬃይ ኩንዲስ፤ ኢያ ኩንዴꬃይካ ዎልቃማ» ያጊስ።
MAT 7:28 ዬሱሲ ባ ኦዳ ኦንጊዳ ዎዴ ኢያ ቲሚርቴይ ሂጌ ኣስታማሬታ ሜላ ጊዶና ማታራ ጊዲያ ጊሾ ኣሳይ ኢያ ቲሚርቲያን ማላሌቲዶሶና።
MAT 8:1 ዬሱሲ ዴሪያፔ ዎꬊያ ዎዴ ዳሮ ኣሳይ ኢያ ካሊዶሶና።
MAT 8:2 ሄኮ ኢሲ ባሮ ሃርጋንቾይ ኢያኮ ሺቂዲ፥ ኢያ ሲንꬃን ጉልባቲዲ፥ «ጎዳው፥ ኔ ሼኔ ጊዲኮ ታና ጌሻዳ ፓꬃናው ዳንዳዓሳ» ያጊስ።
MAT 8:3 ዬሱሲ ባ ኩሺያ ዬዲዲ ኢያ ቦቺዲ፥ «ኤ፥ ታ ሼኔ፥ ፓፃ» ያጊስ። ኡራይ ኢራካ ጌዪ ኣጊስ።
MAT 8:4 ዬሱሲ ኢያኮ፥ «ኔ ፓፁዋ ኦዴስካ ኦዶፓ። ሺን ባዳ ኔ ጌያዳ ፓፆይሳ ካሂኔ ቤሳ። ኔ ፓፁዋስ ማርካ ጊዳና ሜላ ባዳ ሙሴይ ኪቲዳ ያርሹዋ ያርሻ» ያጊስ።
MAT 8:5 ዬሱሲ ቂፊርናሆሜ ካታማ ጋኪዳ ዎዴ ኢሲ ማቶ ሃላቃይ ኢያኮ ሺቂዲ፥
MAT 8:6 «ጎዳው፥ ታ ኣይሌይ ኣሳቴꬃይ ጉንዲን ዳሮ ሃርጌቲዲ፥ ሶን ዚንዒዲ ዴዔስ» ያጊዲ ዎሲስ።
MAT 8:7 ዬሱሲ ዛሪዲ፥ «ታኒ ባዳ ኢያ ፓꬃና» ያጊስ።
MAT 8:8 ሺን ማቶ ሃላቃይ ዛሪዲ፥ «ጎዳው፥ ኔ ታ ሶ ጌላናው ቤሲያ ኣሲ ጊዲኬ፥ ሺን ኔ ሃን ኡታዳ ቃላ ፃላላ ኦዳ፥ ታ ኣይሌይ ፓፃና።
MAT 8:9 ኣይስ ጊኮ፥ ታፔ ቦላራ ታ ኪቴቲያ ኣሳቲ ዴዖሶና፥ ቃሲ ታፔ ጋርሳራ ታው ኪቴቴይሳቲ ዴዖሶና። ኤንታፌ ኢሱዋ፥ ‹ባ› ጊያዴ ቤስ፤ ሃንኩዋ ቃሲ ‹ሃያ!› ጊያዴ ዬስ። ታ ኣይሊያ፥ ‹ሃይሳ ኦꬃ› ጊያዴ ኦꬄስ» ያጊስ።
MAT 8:10 ዬሱሲ ሄሳ ሲዒዳ ዎዴ ማላሌቲዲ፥ ባና ካሊያ ኣሳኮ፥ «ታ ሂንቴው ቱማ ኦዳይስ፤ ታኒ ሃይሳ ሜላ ኣማኖ ኢስራዔሌ ኣሳንካ ቤዓቢኬ።
MAT 8:11 ታ ሂንቴው ኦዳይስ፤ ዳሮቲ ዶሎሃፔኔ ዉሎሃፔ ዪዲ፥ ሳሎ ካዎቴꬃን ኣብራሃሜራ፥ ዪሳቃራኔ ያይቆባራ ኢሲፌ ኢማቶ ቦላ ኡታና።
MAT 8:12 ሺን ሳሎ ካዎቴꬃ ላታናው ቤሲሺን ኣቲዳይሳቲ ካሬ ꬉማን ሆሌታና። ያን ኤንታው ዬሆኔ ኣቻ ጋርጬꬂ ጊዳና» ያጊስ።
MAT 8:13 ዬሱሲ ማቶ ሃላቃኮ፥ «ኔ ሶ ባ፥ ኔ ኣማኑዋꬆ ኔው ሃኖ» ያጊስ። ኢያ ኣይሌይ ሶሁዋራ ፓፂ ኣጊስ።
MAT 8:14 ዬሱሲ ጴፂሮሳ ሶ ጌሊያ ዎዴ ጴፂሮሳ ማቼ ኣያ ቆፆ ሚሻ ሃርጌን ሳኬታዳ ዚንዒዳሮ ቤዒስ።
MAT 8:15 ዬሱሲ ኢ ኩሺያ ቦቺዳ ዎዴ ቆፆይኔ ሚሻይ ኣጊ ኣጊስ። ፓፃ ዴንዳዳ ኢያ ሞካሱ።
MAT 8:16 ሄ ዎዴ ኦማርሲ ቱና ኣያናን ኦይኬቲዳ ዳሮ ኣሳታ፥ ኣሳይ ዬሱሳኮ ኤሂዶሶና። ኢካ ቱና ኣያናታ ባ ቃላን ኬሲስ፥ ሃርጋንቾታ ኡባ ፓꬂስ።
MAT 8:17 ሄሳንካ ናቢያ ኢሳያሲ፥ «ኢ ኑ ሃርጊያ ባው ኤኪስ፥ ኢ ኑ ሃርጊያ ቶኪስ» ጊዳ ቃላይ ፖሌቲስ።
MAT 8:18 ዬሱሲ ዳሮ ኣሳይ ኢያ ዩሹዋን ኤቂዳይሳ ቤዒዲ፥ ኣባፌ ሄፊንꬂ ፒናና ሜላ ባ ታማሬታ ኪቲስ።
MAT 8:19 ሂጌ ኣስታማሬታፔ ኢሶይ፥ «ኣስታማሪያው፥ ኔ ቢያሶ ኡባ ታ ካላና» ያጊስ።
MAT 8:20 ዬሱሲ ኢያኮ «ዎርካናታስ ኦሊ ዴዔስ፥ ሳሎ ካፎታስ ኬꬂ ዴዔስ። ሺን ኣሳ ናዓስ ባ ሁዒያ ሼምፒሲያ ቤሲ ባዋ» ያጊስ።
MAT 8:21 ዬሱሳ ካሊያ ኣሳታፔ ኢሶይ፥ «ጎዳው፥ ታኒ ሲንꬃታ ባዳ ታ ኣዋ ሞጋዳ ያና» ያጊስ።
MAT 8:22 ሺን ዬሱሲ፥ «ሃይቂዳይሳቲ ባንታ ሃይቆታ ሞጎ፤ ኔኒ ታና ካላ» ያጊስ።
MAT 8:23 ዬሱሲ ባናው ዎጎሉዋን ጌሊዳ ዎዴ ኢያ ታማሬቲካ ኢያራ ባናው ጌሊዶሶና።
MAT 8:24 ኤንቲ ቆፖና ዴዒሺን፥ ዎልቃማ ሆቤይ ሃꬃ ቦላ ዴንዲን ዎጎሎይ ሚቴታናው ጋኪስ። ሺን ዬሱሲ ꬊስኪስ።
MAT 8:25 ኢያ ታማሬቲ ኢያኮ ሺቂዲ ኢያ ባርኬꬂዲ፥ «ጎዳው፥ ኑ ꬋዮስ ኑና ኣሻርኪ» ያጊዶሶና።
MAT 8:26 ዬሱሲ ኤንታኮ፥ «ሂንቴኖ፥ ኣማኖይ ፓጪዳይሳቶ፥ ኣይስ ያዬቲ?» ያጊስ። ዴንዲዲ፥ ሆቢያኔ ጎቲያ ኤሲስ። ኤሌሲዲ ኡባባይ ሲዒ ጊስ።
MAT 8:27 ኢያ ታማሬቲ ማላሌቲዲ፥ «ሃይሲ፥ ሃሪ ኣቶሺን፥ ሆቤይኔ ጎቴይ ኪቴቴይሲ ዋኒዳ ኣሴ?» ያጊዶሶና።
MAT 8:28 ዬሱሲ ኣባፌ ሄፊንꬃን ዴዒያ ጌርጌሶኔ ጊያ ቢታ ጋኪዳ ዎዴ ቱና ኣያናይ ኦይኪዳ ናምዑ ኣሳቲ ዱፎፔ ኬዪዲ ኢያራ ጋሄቲዶሶና። ኤንቲ ዳሮ ኢታኔ ያሺያ ኣሳታ ጊዲያ ጊሾ ኣሲ ሄ ቤሳራ ኣꬋናው ዳንዳዔና።
MAT 8:29 ኤንቲካ፥ «ፆሳ ናዓው፥ ኑናኔ ኔና ኣይቤ ጋꬄይ? ዎዴይ ጋኮና ዴዒሺን ኑና ፒርዳናው ያዲ?» ጊዲ ዋሲዶሶና።
MAT 8:30 ኤንታፌ ዳሮ ሃኮና ጉዱንꬆ ዉዴይ ሄሜቴስ።
MAT 8:31 ቱና ኣያናቲ ዬሱሳ፥ «ኔ ኑና ኬሳናባ ጊዲኮ፥ ሂኒ ጉዱንꬆ ዉዲያ ጊዶ ዬዳርኪ» ያጊዲ ዎሲዶሶና።
MAT 8:32 ዬሱሲ፥ «ቢቴ» ያጊስ። ቱና ኣያናቲ ኣሳታፔ ኬዪዲ ጉዱንꬆታን ጌሊዶሶና። ጉዱንꬆቲ ኡባይ ኣፎ ዶናራ ዲርጊዲ ቢዲ ኣባን ሚቴቲዲ ሃይቂዶሶና።
MAT 8:33 ጉዱንꬆ ዉዲያ ሄሜይሳቲ ባቃቲዲ ካታማ ቢዲ፥ ሃኒዳባኔ ቱና ኣያናይ ኦይኪዳ ኣሳታ ቦላ ኦሴቲዳባ ኡባ ኦዲዶሶና።
MAT 8:34 ያቲን፥ ካታማን ዴዒያ ኣሳ ኡባይ ዬሱሳ ቤዓናው ኬዪዶሶና። ኤንቲ ዬሱሳ ቤዒዳ ዎዴ ባንታ ቢታፌ ኬዪዲ ባና ሜላ ዎሲዶሶና።
MAT 9:1 ሄሳፌ ጉዬ፥ ዬሱሲ ዎጎሉዋን ጌሊዲ፥ ኣባ ፒኒዲ ባ ካታማ ቢስ።
MAT 9:2 ሃኒዳ ጉꬃ ኣሳቲ ኢሲ ጉንዳ ኡራ ኣልጋራ ቶኪዲ ዬሱሳኮ ኤሂዶሶና። ዬሱሲ ኤንታ ኣማኑዋ ቤዒዲ፥ ጉንዳ ኡራ፥ «ታ ናዓው፥ ያዮፋ! ኔ ናጋራይ ኣቶ ጌቴቲስ» ያጊስ።
MAT 9:3 ሄ ሳቲያን፥ ኣይሁዴ ሂጌ ኣስታማሬታፔ ኢሶቲ ኢሶቲ፥ «ሃይሲ ፆሳ ጫሼ ጊዴኔ» ያጊዲ ባንታ ዎዛናን ቆፒዶሶና።
MAT 9:4 ዬሱሲ ኤንታ ቆፋ ኤሪዲ፥ «ኢታባ ሂንቴ ዎዛናን ኣይስ ቆፔቲ?
MAT 9:5 ሃኖሺን፥ ‹ኔ ናጋራይ ኣቶ ጌቴቲስ› ጌይሳፌኔ ‹ዴንዳ ኤቃዳ ባ› ጌይሳፌ ኣዉሲ ካዉዪ?
MAT 9:6 ሺን ሳዓ ቦላ ናጋራ ኣቶ ጋናው ኣሳ ናዓስ ማቲ ዴዔይሳ ታ ሂንቴና ኤሪሳና» ያጊዲ፥ ጉንዳ ኣዲያኮ፥ «ዴንዳ ኤቃ፥ ኔ ኣልጋ ቶካዳ፥ ኔ ሶ ባ» ያጊስ።
MAT 9:7 ጉንዳ ኡራይ ዴንዲዲ ባ ሶ ቢስ።
MAT 9:8 ዴሬይ ሄሳ ቤዒዲ ማላሌቲዶሶና። ሄሳ ሜላ ማታ ኣሳስ ኢሚዳ ፆሳ ጋላቲዶሶና።
MAT 9:9 ዬሱሲ ያፔ ዴንዲዲ ቢሼ ማቶሳ ጌይሳ ቃራፃ ቃንፂሲያ ቤሳን ኡቲዳሺን ቤዒዲ፥ «ታና ካላ» ያጊስ። ኢካ ዴንዲዲ ካሊስ።
MAT 9:10 ዬሱሲ ማቶሳ ሶን ጋይታ ቦላ ኡቲዳሺን፥ ቃራፃ ቃንፂሲያ ዳሮ ኣሳቲኔ ናጋራንቾቲ ዪዲ ኢያራኔ ኢያ ታማሬታራ ኢሲፌ ማናው ኡቲዶሶና።
MAT 9:11 ኢሲ ኢሲ ፋሪሳዌቲ ሄሳ ቤዒዲ፥ ዬሱሳ ታማሬታ፥ «ሂንቴ ኣስታማሬይ ቃራፃ ቃንፂሴይሳታራኔ ናጋራንቾታራ ኣይስ ሚ?» ያጊዶሶና።
MAT 9:12 ዬሱሲ ሄሳ ሲዒዲ፥ «ꬋሌ ኮሼይ ሃራጋንቾታሳፌ ኣቲን ፓፃታሳ ጊዴና።
MAT 9:13 ሺን ሂንቴ ቢዲ፥ ‹ታኒ ሂንቴ ያርሹዋ ጊዶናሺን ሂንቴ ሃራታ ማራና ሜላ ኮያይስ› ጌቴቲዲ ፃፌቲዳይሲ ዎይ ጉሴኮ ኤሪቴ። ኣይስ ጊኮ፥ ታኒ ናጋራንቾታ ፄጋናው ያሲፔ ኣቲን ፂሎታ ፄጋናው ያቢኬ» ያጊስ።
MAT 9:14 ሄ ዎዴ ዮሃኒሳ ታማሬቲ ዬሱሳኮ ሺቂዲ፥ «ኑኔ ፋሪሳዌቲ ፆሞስ፥ ሺን ኔ ታማሬቲ ኣይስ ፆሞኮና?» ያጊዲ ኦይቺዶሶና።
MAT 9:15 ዬሱሲ ዛሪዲ ኤንታኮ፥ «ሙሹራይ ኤንታራ ዴዒሺን ፄጌቲዲ ዪዳ ኣሳይ ካዮታናው ዳንዳዖና? ሙሹራይ ኤንታ ማታፔ ኤኬታና ዎዴይ ያና፥ ኤንቲ ሄ ዎዴ ፆማና።
MAT 9:16 «ኦራꬃ ማዖፔ ፔꬊዲ ጋልዓ ማዖ ቦላ ሲኬይ ኦኒካ ባዋ። ሄሳꬆ ኦꬂኮ ኦራꬃይ ጋልዓ ፔꬌስ። ፔꬌꬃይካ ጉጂ ዳልጌስ።
MAT 9:17 ኦራꬃ ዎይኔ ጋልዓ ኦጎሮን ቆሊያ ኦኒካ ባዋ። ሄሳꬆ ኦꬂኮ ኦራꬃ ዎይኔይ ጋልዓ ኦጎሩዋ ꬉሴስ ዎይኔይካ ጉኬስ፤ ኦጎሮይካ ናምዓንꬆ ማዶናባ ጊዴስ። ሺን ኦራꬃ ዎይኔይ ኦራꬃ ኦጎሮን ቆሌታናው ቤሴስ። ሄሳꬆ ኦሴቲኮ ናምዓይካ ኢቶና ናጌቶሶና» ያጊስ።
MAT 9:18 ዬሱሲ ሄሳ ኦዶ ቦላ ዴዒሺን፥ ኣይሁዴ ሃላቃታፔ ኢሶይ ኢያኮ ዪዲ፥ ኢያ ሲንꬃን ጉልባቲዲ፥ «ታ ናዒያ ሃዒ ሃይቃሱ፥ ሺን ኢያ ፓፃና ሜላ ኔኒ ያዳ ኔ ኩሺያ ኢ ቦላ ዎꬃርኪ» ጊዲ ዎሲስ።
MAT 9:19 ዬሱሲ ዴንዲዲ ኢያራ ቢስ፤ ኢያ ታማሬቲካ ካሊዶሶና።
MAT 9:20 ኢ ቢሺን ታማኔ ናምዑ ላይꬂ ኩሜꬂ ሱꬂ ጎጊዲ ዋይሲያ ኢሲ ማጫሲያ ጉዬራ ሺቃዳ ዬሱሳ ኣፊላ ማጫራ ቦቻሱ።
MAT 9:21 ኢያ ባ ዎዛናን፥ «ታ ኢያ ኣፊላ ማጫራ ፃላላ ቦቺያኮ ፓፃና» ያጋዳ ቆፓሱ።
MAT 9:22 ዬሱሲ ጉዬ ሲሚ ኢዮ ፄሊዲ፥ «ታ ናቴ፥ ያዮፋ! ኔና ኔ ኣማኖይ ፓꬂስ» ያጊስ። ማጫሲያ ሶሁዋራ ፓፃ ኣጋሱ።
MAT 9:23 ዬሱሲ ኣይሁዴ ሃላቃ ሶ ጋኪያ ዎዴ ዛዬ ፑኔይሳታኔ ዬኬይሳታ ቤዒዲ፥
MAT 9:24 «ኣኔ ኪቺቴ፤ ጉꬃ ናዒያ ꬊስካሱፔ ኣቲን ሃይቃቡኩ» ያጊስ። ሺን ኣሳይ ኢያ ቦላ ሚጪዶሶና።
MAT 9:25 ኣሳ ካሬ ኬሲዳፔ ጉዬ ሶ ጌሊዲ፥ ናዔ ኩሺያ ኦይኪስ፥ ናዒያ ዴንዳ ኤቃሱ።
MAT 9:26 ሄ ዎሬይ ሄ ቢታ ኡባ ጋኪስ።
MAT 9:27 ዬሱሲ ያፔ ዴንዲዲ ጌዴ ሲንꬄ ቢያ ዎዴ ናምዑ ቆቄቲ ባንታ ቃላ ꬎቁ ኦꬂዲ፥ «ዳዊቴ ናዓው፥ ኑና ማራርኪ» ያጊሼ ኢያ ካሊዶሶና።
MAT 9:28 ዬሱሲ ሶ ጌሊዳ ዎዴ ቆቄቲ ኢያ ካሊዲ ዪዶሶና። ዬሱሲ ኤንታኮ፥ «ታኒ ሄሳ ኦꬃናው ዳንዳዔይሳ ሂንቴ ኣማኔቲ?» ያጊስ። ኤንቲካ፥ «ኤ፥ ጎዳው» ያጊዲ ዛሪዶሶና።
MAT 9:29 ሄሳፌ ጉዬ፥ ዬሱሲ ኤንታ ኣይፊያ ቦቺዲ ኤንታኮ፥ «ሂንቴው፥ ሂንቴ ኣማኑዋꬆ ሃኖ» ያጊስ።
MAT 9:30 ኤንታ ኣይፌይካ ዶዬቲስ። ዬሱሲ ኤንታኮ፥ «ሃይሳ ኦዴስካ ኦዶፒቴ» ያጊዲ ሚንꬂ ኦዲስ።
MAT 9:31 ሺን ኣሳቲ ቢዲ ዬሱሳባ ሄ ቢታ ኡባን ኦዲዶሶና።
MAT 9:32 ኤንቲ ያፔ ኬያ ዎዴ ኣሳይ ቱና ኣያናይ ኦይኪዲ ሙሚሲዳ ኢሲ ኣሲ ዬሱሳኮ ኤሂዶሶና።
MAT 9:33 ቱና ኣያናይ ኬዪዳፔ ጉዬ ሙሜ ኡራይ ኦዴቲስ። ዴሬይካ ማላሌቲዲ፥ «ሃይሳ ሜላ ኦራꬃባይ ኢስራዔሌ ቢታን ሃኒቤና» ያጊዶሶና።
MAT 9:34 ሺን ፋሪሳዌቲ፥ «ቱና ኣያናታ ሃላቃን ቱና ኣያናታ ኬሴስ» ያጊዶሶና።
MAT 9:35 ዬሱሲ ኣይሁዴ ዎሳ ኬꬃታን ታማርሲሼ፥ ሳሎ ካዎቴꬃ ዎንጌላ ሳባኪሼ፥ ኣሳ ሃርጌ ኡባፌ ፓꬂሼ ካታማታኒኔ ጉታ ኡባን ዩዪስ።
MAT 9:36 ዳሮ ዴሬይ፥ ሄሚያ ኣሲ ባይና ዶርሳዳ ኤንታና ቤዒያ ኣሲ ꬋዪን ኡንዔቲዲ ዴዔይሳታ ቤዒዲ ኤንታው ቃꬌቲስ።
MAT 9:37 ባ ታማሬታኮ፥ «ሺቃና ካꬃይ ዳሮ፥ ሺን ካꬃ ሺሺያ ኣሳይ ጉꬃ።
MAT 9:38 ሄሳ ጊሾ፥ ጎዳይ ካꬃ ሺሺያ ኦሳንቾታ ዬዳና ሜላ ዎሲቴ» ያጊስ።
MAT 10:1 ዬሱሲ ታማኔ ናምዑ ታማሬታ ባኮ ፄጊዲ፥ ቱና ኣያናታ ኬሳና ሜላኔ ሃርጌ ኡባ ፓꬃና ሜላ ኤንታው ማታ ኢሚስ።
MAT 10:2 ዬሱሲ ኪቲዳ ታማኔ ናምዑ ሃዋሬታ ሱንꬃይ፡ ኮይሮይ ጴፂሮሳ ጊያ ሲሞናኔ ኢያ ኢሻ ኢንዲሪያሳ፥ ዛብዲዮሳ ናዓ ያይቆባኔ ኢያ ኢሻ ዮሃኒሳ፥
MAT 10:3 ፊልጶሳኔ ባርቶሎሚዮሳ፥ ቶማሳኔ ቃራፃ ቃንፂሲያ ማቶሳ፥ ኢልፊዮሳ ናዓ ያይቆባ፥ ታዲዮሳ፥
MAT 10:4 ባ ቢታስ ሚሼቲያ ሲሞናኔ ዬሱሳ ኣꬂ ኢሚዳ ኣስቆሮታ ዪሁዳ።
MAT 10:5 ሄ ታማኔ ናምዓታ ዬሱሲ ኪቲዲ ዬዲሼ፥ «ኣይሁዴ ጊዶና ዴሪያኮ ቦፒቴ፥ ቃሲ ሳማሬታ ካታማካ ጌሎፒቴ።
MAT 10:6 ሺን ኢስራዔሌ ኬꬃፌ ጊዲዳ ሂኒ ꬋዪዳ ዶርሳታኮ ቢቴ።
MAT 10:7 ያ ቢዲ፥ ‹ሳሎ ካዎቴꬃይ ማታቲስ› ጊዲ ኦዲቴ።
MAT 10:8 ሃርጋንቾታ ፓꬂቴ፥ ሃይቂዳይሳታ ሃይቆፔ ዴንꬂቴ፥ ባሮ ሃርጋንቾታ ጌሺ ፓꬂቴ፥ ቱና ኣያናታ ኬሲቴ። ሂንቴ ጮ ኤኪዳይሳ ጮ ኢሚቴ።
MAT 10:9 ሂንቴ ኪሴን ዎርቃ፥ ዎይኮ ቢራ ሳንቲሜ ኦይኮፊቴ።
MAT 10:10 ሂንቴ ኦጊያስ ካርፂቶ፥ ናምዑ ኣፊላ፥ ዎይኮ ጫማ ዎይኮ ፃምዓ ኦይኮፊቴ፤ ኦሳንቹዋስ ጋላሳ ካꬂ ኮሼስ።
MAT 10:11 «ሂንቴ ኢሲ ካታማ ዎይኮ ጉታ ጌሊያ ዎዴ ሂንቴና ሞኪዲ ኤካናው ኡፋይቲያ ኡራ ኮዪዲ ኢያ ሶን ሼምፒቴ፤ ሂንቴ ባና ጋካናው ያን ጋምዒቴ።
MAT 10:12 ቃሲ ኦዴ ሶካ ጌሊሼ ሳሮꬂቴ።
MAT 10:13 ሄ ኬꬃይ ሂንቴና ሞኪኮ ሂንቴ ሳሮꬂዳ ሳሮይ ኤንታና ጋኮ፥ ሺን ኤንቲ ሞኮና ኢፂኮ ሂንቴ ሳሮꬂዳ ሳሮይ ሂንቴው ጉዬ ሲሞ።
MAT 10:14 ኦኒካ ሂንቴና ሞኮናኔ ሂንቴ ኦዲያባ ሲዖና ኢፂኮ ሄ ኬꬃፌ ዎይኮ ሄ ካታማፔ ኬዪሼ ሂንቴ ቶሁዋን ዴዒያ ባና ፒቲዲ ኬዪቴ።
MAT 10:15 ታ ሂንቴው ቱማ ኦዳይስ፤ ፆሳ ፒርዳ ጋላሳን ሄ ካታማፔ ሶዶሜሲኔ ጋሞራ ካታማታስ ፒርዳይ ካዉያና።
MAT 10:16 «ታ ሂንቴና ዶርሳታዳ ሱꬉሜታ ጊዶ ዬዳና። ሄሳ ጊሾ፥ ሾሻዳ ጪንጫታ፥ ሆሌዳ ኣዳታ ጊዲቴ።
MAT 10:17 ኣሳይ ሂንቴና ፒርዳ ዳይናታስ ኣꬂ ኢማና፥ ቃሲ ኣይሁዴ ዎሳ ኬꬃን ሂንቴና ጋራፋና። ሄሳ ጊሾ፥ ኤንታፌ ናጌቲቴ።
MAT 10:18 ታ ጊሾ ጊዲ ሂንቴና ዴሪያ ሃሬይሳታ ሲንꬄኔ ካዎታ ሲንꬄ ኤፋና። ኤንታ ሲንꬃኒኔ ኣይሁዴ ጊዶና ዴሪያ ሲንꬃን ኤቂዲ ሂንቴ ታባ ማርካታና።
MAT 10:19 ሺን ሂንቴና ፒርዳስ ኣꬂ ኢሚያ ዎዴ ዎይጊዲ ዛሪኖ ጊዲ ኡንዔቶፊቴ፤ ሄ ሳቲያን ሂንቴ ጋናባ ፆሳይ ሂንቴው ኢማና።
MAT 10:20 ኣይስ ጊኮ፥ ሂንቴናን ሃሳዬይ ሂንቴ ኣዋ ጌሻ ኣያናፔ ኣቲን ሂንቴና ጊዴኬታ።
MAT 10:21 «ኢሻይ ባ ኢሻ፥ ኣዋይ ባ ናዓ፥ ሃይቆስ ኣꬂ ኢማና፥ ናይቲ ባንታና ዬሊዳይሳታ ቦላ ዴንዲዲ ኤንታና ዎꬊሳና።
MAT 10:22 ታ ጊሾ ጊዲ ኣሳ ኡባይ ሂንቴና ኢፃና፥ ሺን ዉርሴꬂ ጋካናው ሚኒዳይ ኣታና።
MAT 10:23 ኢሲ ሄራፔ ሂንቴና ኤንቲ ጎዲኮ ሃራ ካታማ ባቃቲቴ። ታኒ ሂንቴው ቱማ ኦዳይስ፤ ኣሳ ናዓይ ያና ጋካናው፥ ሂንቴ ኢስራዔሌ ካታማ ኡባ ካንꬄኬታ።
MAT 10:24 «ታማሬይ ባ ኣስታማሪያፔ፥ ኣይሌይ ባ ጎዳፔ ኣꬌና።
MAT 10:25 ታማሬይ ባ ኣስታማሪያ፥ ኣይሌይ ባ ጎዳ ዳኒኮ ኢያው ጊዳና። ኬꬃዋ ቢዔልዜቡላ ጊኮ ኢያ ሶ ኣሳ ዋኒዲ ኢሲዲ ፄጌኔ?
MAT 10:26 «ሂዛ፥ ኣሳስ ያዮፊቴ። ካሜቲዳባይ ቆንጮና፥ ቆሴቲዳባይ ጌሺ ኬዮና ኣቴና።
MAT 10:27 ታኒ ሂንቴው ꬉማን ኦዲያባ ሂንቴ ፖዖን ኦዲቴ፤ ታ ሂንቴው ሃይꬃን ካልካሺዳባ ዳባባን ኣዋጂቴ።
MAT 10:28 ኣሾፔ ኣቲን ሼምፖ ዎꬋናው ዳንዳዖናይሳታስ ያዮፊቴ። ሺን ሼምፑዋኔ ኣሹዋ ጋናሜን ꬋይሳናው ዳንዳዒያ ፆሳስ ያዪቴ።
MAT 10:29 ናምዑ ቡቤቲ ኢሲ ሳንቲሜን ባይዜቶኮናዬ? ሃኖፔ ኣቲን፥ ኤንታፌ ኢሲናካ ሂንቴ ፆሳይ ጎና ዴዒሺን ሳዓን ዎꬉኩ።
MAT 10:30 ሃሪ ኣቶሺን፥ ሂንቴ ሁዔ ቢናናይካ ፓይዴቲዲ ዴዔስ።
MAT 10:31 ሂዛ፥ ዳሮ ቡቤታፔ ሂንቴ ኣꬊያ ጊሾ ያዮፊቴ።
MAT 10:32 «ኣሳ ሲንꬃን ታው ማርካቲያ ኡባስ ታኒካ ሳሉዋን ዴዒያ ታ ኣዋ ሲንꬃን ማርካታና።
MAT 10:33 ሺን ኣሳ ሲንꬃን ታና ካዴይሳ ታኒካ ሳሎን ዴዒያ ታ ኣዋ ሲንꬃን ካዳና።
MAT 10:34 «ታኒ ሳዓን ሳሮ ኤሃናው ዪዳ ሂንቴው ዳኖፖ። ታኒ ቶራፔ ኣቲን ሳሮቴꬂ ኤሃናው ያቢኬ።
MAT 10:35 ታኒ ዪዳይ፥ ‹ናዓ ኣዋፔ ማጫ ናዒው ኣዬፔ ናዓ ማቺው ኣዚና ኣዬፔ ሻካናሳ።
MAT 10:36 ኣሳስ ሞርኬቲ ኢያ ሶ ኣሳታ ጊዳና።›
MAT 10:37 «ታፔ ኣꬂዲ ባ ኣዋ ዎይኮ ባ ኣዪው ዶሴይ፥ ታባ ጊዳናው ቤሴና። ባ ኣዴ ናዓ ዎይኮ ባ ማጫ ናዒው ታፔ ኣꬂዲ ዶሴይ፥ ታባ ጊዳናው ቤሴና።
MAT 10:38 ባ ማስቃሊያ ቶኪዲ ታና ካሎና ኦኒካ ታባ ጊዳናው ቤሴና።
MAT 10:39 ባ ሼምፑዋ ኣሻናው ኮዬይ ꬋይሳና፥ ሺን ባ ሼምፑዋ ታ ጊሾ ኣꬂ ኢሜይ ኣሻና።
MAT 10:40 «ሂንቴና ሞኬይ ታና ሞኬስ፥ ታና ሞኬይ ቃሲ ታና ኪቲዳይሳ ሞኬስ።
MAT 10:41 ናቢያ ናቤ ሱንꬃን ሞኬይ፥ ናቢያꬆ ዎይቴታና፤ ቃሲ ፂሉዋ ፂሎ ሱንꬃን ሞኬይ፥ ፂሉዋꬆ ዎይቴታና።
MAT 10:42 ታ ሂንቴው ቱማ ኦዳይስ፤ ሃ ታ ታማሬታፔ ጉፂያ ኢሱዋስ ታና ካሊያ ጊሾ ሃሪ ኣቶሺን ጉꬃ ኢርፃ ሃꬂ ኢሚኮ ኢያ ዎይቶይ ꬋዬና» ያጊስ።
MAT 11:1 ዬሱሲ ታማኔ ናምዑ ታማሬታ ኪታ ኦንጊዳፔ ጉዬ ያፔ ዴንዲዲ ታማርሳናዉኔ ሳባካናው ጋሊላ ካታማታ ቢስ።
MAT 11:2 ዮሃኒሲ ቃሾ ኬꬃን ዴዒሼ ኪሪስቶሲ ኦꬂያባታ ሲዒዲ፥ ባ ታማሬታፔ ኢያኮ ኪቲዲ፥
MAT 11:3 «ያና ጌቴቲዳይ ኔኔዬ? ዎይኮ ኑኒ ሃራ ናጊኖ?» ያጊዲ ኦይቺስ።
MAT 11:4 ዬሱሲ ኤንታኮ ዛሪዲ፥ «ቢዲ ሂንቴ ሲዒያባኔ ሂንቴ ቤዒያባ ዮሃኒሳስ ኦዲቴ።
MAT 11:5 ቆቄቲ ፄሎሶና፥ ዎቤቲ ሃሙቶሶና፥ ባሮ ሃርጋንቾቲ ፓፆሶና፥ ቱሌቲ ሲዖሶና፥ ሃይቂዳይሳቲ ሃይቆፔ ዴንዶሶና፤ ማንቆታስ ዎንጌላይ ሳባኬቴስ።
MAT 11:6 ታናን ꬉቤቶናይ ኣንጄቲዳይሳ» ያጊስ።
MAT 11:7 ዮሃኒሳ ታማሬቲ ጉዬ ሲሚዲ ቢን፥ ዬሱሲ ዴሪያስ ዮሃኒሳባ ኦዲሼ፥ «ሃ ባዙዋ ኣይ ቤዓናው ኬዪዴቲ? ጫርኮይ ቃꬂያ ማቃ ቤዓናው ዪዴቲዬ?
MAT 11:8 ያቲን፥ ኣይ ቤዓናው ኬዪዴቲ? ኪቴ ማዖ ማዒዳ ኣሴ ቤዓናሴዬ? ኪቴ ማዖ ማዒዳይሳቲ ካዎታ ኬꬃን ዴዖሶና።
MAT 11:9 ያቲን፥ ኣይ ቤዓናው ኬዪዴቲ? ናቤ ቤዓናሴዬ? ሄኮ፥ ሂንቴ ናቤፔካ ኣꬌይሳ ቤዔታ።
MAT 11:10 «ኔ ኦጊያ ኔ ሲንꬃን ጊጊሲያ ታ ኪታንቹዋ ኔፔ ሲንꬄ ኪታና» ጌቴቲዲ ፃፌቲዳይ ኢያሳ።
MAT 11:11 ታ ሂንቴው ቱማ ኦዳይስ፤ ማጫሳፔ ዬሌቲዳይሳታ ጊዶፌ ዮሃኒሳፔ ኣꬌይ ኦኒካ ባዋ፤ ሳሎ ካዎቴꬃን ኡባፌ ጉፄይ ኢ፥ ኢያፔ ኣꬋና።
MAT 11:12 ፃማቂያ ዮሃኒሳ ዎዲያፔ ዶሚዲ ሃቺ ጋካናው ሳሎ ካዎቴꬃይ ዳሮ ናቄቴስ፥ ሚኒዳ ኣሳቲ ዎልቃን ያ ጌላና።
MAT 11:13 ናቤቲ ኡባይኔ ሙሴ ሂጌይ ዮሃኒሳ ዎዴ ጋካናው ሳሎ ካዎቴꬃባ ቲንቢቴ ኦዲዶሶና።
MAT 11:14 ሂዛ፥ ሂንቴ ኤንታ ኪታ ኣማናና ጊዲኮ፥ ያና ጌቴቲዳ ኤሊያሲ፥ ኢ ዮሃኒሳ።
MAT 11:15 ሂዛ፥ ሲዒያ ሃይꬂ ዴዔይ ሲዖ።
MAT 11:16 «ሂዛ፥ ሃ ዎዲያ ዬሌቴꬃ ኣይቢራ ዳኒሶ? ጊያ ጊዶን ኡቲዲ ዎሊ ፄጊዲ፥
MAT 11:17 ‹ኑ ሂንቴው ሱሱልዔ ፑኒን፤ ሂንቴ ዬፄኬታ። ኑ ሳቢዲ ዜሌሊን፤ ሂንቴ ዬኬኬታ› ያጊያ ናይታ ዳኖሶና።
MAT 11:18 ፃማቂያ ዮሃኒሲ ሞናኔ ኡዮና ዪን፥ ‹ቱና ኣያኒ ዴዔስ› ያጊዴታ።
MAT 11:19 ኣሳ ናዓይ ሚሼኔ ኡዪሼ ዪን፥ ‹ያራምባኔ ኡሻንቾ፥ ቃራፃ ቃንፂሴይሳታኔ ናጋራንቾታ ዳቦ› ያጊዴታ። ሂዛ፥ ጪንጫቴꬃ ቱማቴꬃይ ኢያ ኦሱዋን ቆንጬስ» ያጊስ።
MAT 11:20 ሄሳፌ ጉዬ፥ ዬሱሲ ዳሮ ማላታታ ኦꬂዳ ካታማታን ዴዒያ ኣሳቲ ባንታ ናጋራፔ ሲሚዲ ማሮታን ጌሎና ኢፂዳ ጊሾ ኤንታና፥
MAT 11:21 «ኣዬ ኮራዚኔ ካታማው፥ ኣዬ ቤቴሳይዳ ካታማው፥ ኣይስ ጊኮ፥ ሂንቴ ጊዶን ኦሴቲዳ ማላታቲ ፂሮሳኒኔ ሲዶናን ኦሴቲዳ ጊዲያኮ፥ ኤንቲ ቤኒ ቢዶ ቲዬቲዲ፥ ካሌ ማዒዲ ባንታ ናጋራፔ ሲሚ ኣጋና።
MAT 11:22 ሺን ታ ሂንቴው ኦዳይስ፤ ፒርዳ ጋላስ ሂንቴፌ ኣꬂዲ ፂሮሳሲኔ ሲዶናስ ፒርዳይ ካዉያና።
MAT 11:23 ቃሲ፥ ቂፊርናሆሜ፥ ኔኒ ፑዴ ሳሎ ኬያናው ኮያይ? ሃኔና! ኔኒ ሲዖሌን ዬጌታና። ኣይስ ጊኮ፥ ኔ ጊዶን ኦሴቲዳ ማላታቲ ሶዶሜን ኦሴቲዳባ ጊዲያኮ፥ ሶዶሜይ ሃቺ ጋካናው ዴዓናሺን።
MAT 11:24 ሺን ታ ኔው ኦዳይስ፤ ፒርዳ ጋላስ ኔፔ ኣꬂዲ ሶዶሜስ ፒርዳይ ካዉያና» ያጊዲ ሃንቄቲስ።
MAT 11:25 ሄ ዎዴ ዬሱሲ፥ «ኣዋው፥ ሳሉዋኔ ሳዓ ጎዳው፥ ኔኒ ሃይሳ ኤራንቾታፔኔ ጪንጫታፔ ጌንꬃዳ ናይታስ ቆንጪሲዳ ጊሾ ኔና ጋላታይስ።
MAT 11:26 ኤ፥ ታ ኣዋው፥ ሃይሲ ኔ ሎዖ ሼኒያዳ ሃኒስ።
MAT 11:27 «ኡባይ ታው ታ ኣዋፔ ኢሜቲስ። ኣዋፔ ሃሪ ናዓ ኤሬይ ባዋ፥ ናዓፔኔ ኢ ኤንታው ቆንጪሳናው ኮዬይሳታፔ ሃሪ ኣዋ ኤራናው ዳንዳዔይ ባዋ።
MAT 11:28 «ሂንቴኖ፥ ዳቡራንቾቶ፥ ቶሆይ ዴፂዳ ኡባይ ታኮ ሃ ዪቴ፤ ታኒ ሂንቴና ሼምፒሳና።
MAT 11:29 ታኒ ታ ዎዛናን ኣሽኬኔ ኣዳ ጊዲያ ጊሾ ታ ቃምባራን ጌሊቴ፥ ታፔ ታማሪቴ፤ ሂንቴ፥ ሂንቴ ሼምፑዋስ ሼምፖ ዴማና።
MAT 11:30 ታ ቃምባራይ ሊቆ፥ ቃሲ ታ ቶሆይካ ካዉሼ» ያጊስ።
MAT 12:1 ሄሳፌ ጉዬ፥ ሳምባታ ጋላስ፥ ዬሱሲ ጋዴ ጊዶራ ኣꬌስ። ዬሱሳ ታማሬቲ ኮሻቲዳ ጊሾ ቲያ ባንጋ ሺሪኪዲ ሞሶና።
MAT 12:2 ሺን ፋሪሳዌቲ ሄሳ ቤዒዲ ዬሱሳኮ፥ «ሄኮ፥ ኔ ታማሬቲ ሳምባታ ጋላስ ኦꬃናው ቤሶናባ ኦꬆሶና» ያጊዶሶና።
MAT 12:3 ዬሱሲ ኤንታኮ ዛሪዲ፥ «ዳዊቴይ ኮሻቲዳ ዎዴ ኢያራ ዴዔይሳታራ ኣይ ኦꬂዳኮ ናባቢቤኬቲ?
MAT 12:4 ዳዊቴይ ፆሳ ኬꬂ ጌሊዲ ካሂኔታ ፃላላፔ ኣቲን ኢኔ ኢያራ ዴዔይሳታስ ቤሶና ጌሻ ዳቡዋ ሚስ።
MAT 12:5 ዎይኮ ካሂኔቲ ሳምባታ ዎጋ ሻሪዲ ፆሳ ኬꬃን ሳምባታ ጋላስ ኦሶ ኦꬂኮ ኤንታው ባላ ጊዶናይሳ ሙሴ ሂጊያን ናባቢቤኬቲ?
MAT 12:6 ሺን ሲዒቴ! ፆሳ ኬꬃፌ ኣꬌይ ሃይሳን ዴዔስ።
MAT 12:7 ‹ታኒ ሂንቴ ያርሹዋ ጊዶናሺን ሂንቴ ሃራታ ማራና ሜላ ኮያይስ› ጊያ ቃላይ ዎይ ጉሴኮ ሂንቴ ኤሪዳኮ ፂሎ ኣሳ ቦላ ፒርዴኬታ።
MAT 12:8 ኣሳ ናዓይ ሳምባታ ጎዳ» ያጊስ።
MAT 12:9 ዬሱሲ ያፔ ቢዲ ኣይሁዴ ዎሳ ኬꬂ ጌሊስ።
MAT 12:10 ያን ኩሼይ ጉንዲዳ ኢሲ ኡራይ ዴዔስ። ዬሱሳ ሞታናው ጋሶ ኮያ ኣሳቲ፥ «ሳምባታ ጋላስ ፓꬃናው ቤሲ ቤሴኔ?» ያጊዲ ኦይቺዶሶና።
MAT 12:11 ኢ ኤንታኮ፥ «ሂንቴ ጊዶፌ ኢሱዋስ ዶርሲ ሳምባታ ጋላስ ኣፎን ዉሊኮ፥ ጎቺዲ ኬሶናይ ኦኔ?
MAT 12:12 ያቲን ኣሲ ዶርሳፌ ዋኒዲ ዳሮ ኣꬌኔ? ሄሳ ጊሾ፥ ሳምባታ ጋላስ ሎዖባ ኦሶይ ቤሴስ» ያጊስ።
MAT 12:13 ሄሳፌ ጉዬ፥ ዬሱሲ ኣዲያኮ፥ «ኔ ኩሺያ ፒዲ ኦꬃ» ያጊን፥ ኡራይ ፒዲ ኦꬂስ። ኢያ ኩሼይ ፓፂዲ ሃንኮ ኩሺያዳ ሃኒስ።
MAT 12:14 ሺን ፋሪሳዌቲ ያፔ ካሬ ኬዪዲ፥ ዬሱሳ ዋቲ ዎꬋኔኮ ማቄቲዶሶና።
MAT 12:15 ዬሱሲ ኤንታ ቆፋ ኤሪዲ ሄ ቤሳ ኣጊዲ ሃራ ሶ ቢስ። ዳሮ ኣሳይ ኢያ ካሊዲ ቢዶሶና፥ ሃርጋንቾታ ኡባ ፓꬂስ።
MAT 12:16 ዬሱሲ፥ «ታባ ሃራ ኦዴስካ ኦዶፒቴ» ያጊዲ ሚንꬂ ኦዲስ።
MAT 12:17 ሄሲካ ናቢያ ኢሳያሲ፥
MAT 12:18 «ሄኮ ታ ዶሪዳ ኣይሌይ፥ ታ ዶሴይሲ፥ ታና ኡፋይሴይሲ፥ ታኒ ታ ኣያና፥ ኢያ ቦላ ሼምፒሳና፤ ኢ፥ ኣይሁዴ ጊዶና ዴሪያስ ሱሬ ፒርዳባ ኣዋጃና።
MAT 12:19 ኢ ፓላሜና ዎይኮ ካጬና፤ ባ ቃላካ ዴንባን ጮ ሲሴና።
MAT 12:20 ሱሬ ፒርዳን ፆኖ ዴማና ጋካናው፥ ዲንጬቲዳ ማቃ ሜንꬄና፥ ጩዪያ ሙቃዳ ቶይሴና።
MAT 12:21 ኣይሁዴ ጊዶና ዴሬይ ኡባይ ኢያን ኡፋይሲ ዎꬃና» ያጊዲ ፃፊዳይሲ ፖሌታና ሜላሳ።
MAT 12:22 ሄሳፌ ጉዬ፥ ቱና ኣያናን ኦይኬቲዳ ቆቄኔ ሙሜ ኣሴ ዴዔይሳ ኢያኮ ኤሂዶሶና። ዬሱሲ ኡራ ፓꬂን፥ ኡራይ ቤዒሲኔ ኦዴቲስ።
MAT 12:23 ኣሳ ኡባይ ማላሌቲዲ፥ «ሃይሲ ዳዊቴ ናዓ ጊዳንዴሻ?» ያጊዶሶና።
MAT 12:24 ሺን ፋሪሳዌቲ ሄሳ ሲዒዲ፥ «ሃ ኡራይ ቱና ኣያናታ ኬሴይ ቱና ኣያናታ ሃላቃ ቢዔልዜቡላ ዎልቃና» ያጊዶሶና።
MAT 12:25 ዬሱሲ ኤንታ ቆፋ ኤሪዲ፥ «ዎሊ ጊዶን ሻኬቲያ ካዎቴꬃ ኡባይ ኩንዳና፤ ቃሲ ዎሊ ጊዶን ሻኬቲያ ካታማይ ዎይኮ ኬꬃይ ሚኒዲ ኤቄና።
MAT 12:26 ፃላሄይ ፃላሄ ኬሲያባ ጊዲኮ ባ ጊዶን ሻኬቲስ ጉሱ። ሄሳꬆ ሃኒያባ ጊዲኮ ኢያ ካዎቴꬃይ ዋኒዲ ሚኒዲ ኤቃናው ዳንዳዒ?
MAT 12:27 ታኒ ቱና ኣያና ኬሴይ ቢዔልዜቡላ ዎልቃን ጊዲኮ ሂንቴና ካሊያ ኣሳቲ ኦዴ ዎልቃን ኬሳኔ? ሄሳ ጊሾ፥ ሂንቴና ካሊያ ኣሳቲ ሂንቴና ፒርዳና።
MAT 12:28 ሺን ታኒ ቱና ኣያናታ ኬሴይ ፆሳ ኣያናን ጊዲኮ፥ ፆሳ ካዎቴꬃይ ሂንቴኮ ዪስ።
MAT 12:29 «ዎይኮ ኢሲ ኣሲ ዎልቃማ ኣሳ ሶ ጌሊዲ ኢያ ሻሉዋ ቦንቃናው ኮይኮ ኮይሮቲዲ ሄ ኡራ ቃቾና ኢፂኮ ዋቲዲ ዳንዳዒ? ያቲኮ ኢያ ሻሉዋ ቦንቃናው ዳንዳዔስ።
MAT 12:30 «ታራ ጊዶናይ ኦኒካ ታራ ኤቄቴስ፤ ቃሲ ታራ ኢሲፌ ሺሾና ኡባይ ላሌስ።
MAT 12:31 ሄሳ ጊሾ፥ ሲዒቴ፤ ኣሳይ ኦꬂያ ኣይ ናጋሪኔ ጫሻ ቃሊ ኡባይ ኣቶ ጌቴታና፥ ሺን ጌሻ ኣያና ጫያ ኦዴስካ ኢያ ናጋራይ ኣቶ ጌቴቴና።
MAT 12:32 ኦኒካ ኣሳ ናዓ ቦላ ኢታባ ኦዴቲኮ ኢያው ኣቶ ጌቴታና፥ ሺን ጌሻ ኣያና ቦላ ኢታባ ኦዴቲያ ኦዴስካ ሃ ሳዓን ጊዲን ያና ኣላሚያን ኢያ ናጋራይ ኣቶ ጌቴቴና።
MAT 12:33 «ሎዖ ሚꬃይ ሎዖ ኣይፌ ኣይፌስ፤ ቃሲ ኢታ ሚꬃይ ኢታ ኣይፌስ። ሂዛ፥ ሚꬃይ ኤሬቴይ ባ ኣይፊያና።
MAT 12:34 ሂንቴኖ፥ ሾሻ ናይቶ፥ ሂንቴ ኢታ ጊዲሼ ዋኒዲ ሎዖባ ኦዴታናው ዳንዳዔቲ? ኣሲ ባ ዎዛናን ኩሚዳባፔ ዶናን ኦዴቴስ።
MAT 12:35 ሎዖ ኣሲ ባ ዎዛናን ዎꬂዳ ሎዖባፔ፥ ሎዖባ ኬሴስ፤ ኢታ ኣሲ ባ ዎዛናን ዎꬂዳ ኢታባፔ፥ ኢታባ ኬሴስ።
MAT 12:36 ሺን ሲዒቴ፥ ኣሳይ ኦዴቲያ ጮ ኦዳ ኡባስ ፒርዳ ጋላስ ዛሮ ኢማና።
MAT 12:37 ኣይስ ጊኮ፥ ኔ ኦዴቲያ ኔ ቃላን ፂላና፤ ኔ ኦዴቲያ ኔ ቃላይ ኔ ቦላ ፒርዳና» ያጊስ።
MAT 12:38 ሄሳፌ ጉዬ፥ ኢሲ ኢሲ ፋሪሳዌቲኔ ሂጌ ኣስታማሬቲ ዬሱሳኮ፥ «ኣስታማሪያው፥ ኔኒ ማላታ ኦꬃዳ ኑና ቤሳ» ያጊዶሶና።
MAT 12:39 ሺን ዬሱሲ ዛሪዲ፥ «ኣማኔቶናኔ ኢታ ዬሌቴꬃይ ማላታ ኮዬስ። ሺን ናቢያ ዮናሳ ማላታፔ ሃራ ማላቲ ኢያው ኢሜቴና።
MAT 12:40 ዮናሲ ጊታ ሞሎ ኡሎን ሄꬑ ጋላሲኔ ሄꬑ ቃማ ጋምዒዳይሳ ሜላ ኣሳ ናዓይ ሄꬑ ጋላሲኔ ሄꬑ ቃማ ቢታ ጋርሳን ጋምዓና።
MAT 12:41 ናናዌ ኣሳይ ፒርዳ ጋላስ ዴንዲዲ ሃ ዬሌቴꬃ ቦላ ፒርዳና፤ ኣይስ ጊኮ፥ ኤንቲ ዮናሳ ሲብካቲያ ሲዒዲ ባንታ ናጋራፔ ሲሚዶሶና። ሄኮ፥ ዮናሳፔ ኣꬌይሲ ሃይሳን ዴዔስ።
MAT 12:42 ፒርዳ ጋላስ ዱጌሃ ካዊያ ዴንዳዳ ሃ ዬሌቴꬃ ቦላ ፒርዳና፤ ኣይስ ጊኮ፥ ኢያ ሶሎሞኔ ጪንጫቴꬃ ሲዓናው ቢታ ጋፃፔ ያሱ። ሄኮ፥ ሶሎሞኔፔ ኣꬌይ ሃይሳን ዴዔስ።
MAT 12:43 «ቱና ኣያናይ ኣሳፔ ኬዪዳፔ ጉዬ ባው ሼምፒያሶ ኮዪዲ ሃꬂ ባይና ሜላ ቤሳን ዳቡሬስ፥ ሺን ባ ኮያ ሼምፑዋ ዴሜና።
MAT 12:44 ያኒን፥ ‹ታ ኣጋ ኬዪዳ ኬꬃ ሲማዳ ባና› ያጌስ። ኢ ሲሚያ ዎዴ ኬꬃይ ካይሲ ጊዴይሳኔ ፒቴቲዲ ጊጊ ኡቲዳይሳ ዴሜስ።
MAT 12:45 ሂዛ፥ ሲሚ ቢዲ፥ ባፔ ኢቲያ ሃራ ላፑን ኢታ ኣያናታ ኤኪዲ ዬስ፤ ኤንቲካ ኡራ ጊዶ ጌሊዲ ዴዖሶና። ሄ ኡራስ ካሴይሳፌ ጉዬይሲ ዳሮ ኢቴስ። ሃ ኢታ ዬሌቴꬃ ቦላ ሄሳ ሜላ ሃናና» ያጊስ።
MAT 12:46 ዬሱሲ ዴሪያስ ኦዳ ቦላ ዴዒሺን ኢያ ኣያኔ ኢያ ኢሻቲ ኢያ ኦዲሳናው ኮዪዲ ካሬን ኤቂዶሶና።
MAT 12:47 ኢሲ ኣሲ ኢያኮ፥ «ኔ ኣያኔ ኔ ኢሻቲ ኔና ኦዲሳናው ኮዪዲ ካሬን ኤቂዶሶና» ያጊስ።
MAT 12:48 ዬሱሲ ዛሪዲ፥ «ታ ኣያ ኦኔ? ታ ኢሻቲካ ኦናንቴ?» ያጊስ።
MAT 12:49 ባ ኩሺያራ ታማሬታ ማሊሼ፥ «ቤዒቴ፥ ታ ኣያኔ ታ ኢሻቲ ሃይሳታ።
MAT 12:50 ሳሎን ዴዒያ ታ ኣዋ ሼኒያ ኦꬂያ ኡባይ ታ ኢሻ፥ ታ ሚቾኔ ታ ኣዮ» ያጊስ።
MAT 13:1 ሄ ጋላስ ዬሱሲ ሶፔ ኬዪዲ ኣባ ጋፃን ኡቲስ።
MAT 13:2 ዳሮ ዴሬይ ኢያ ዩሹዋን ሺቂን ኣሳ ኣባ ጋፃን ኣጋጊዲ ዎጎሎን ጌሊዲ ኡቲስ።
MAT 13:3 ኣሳስ ዳሮባ ሌሚሶን ያጊዲ ኦዲስ፡ «ኢሲ ጎሻንቾይ ዜሬꬂ ዜራናው ኬዪስ።
MAT 13:4 ኢ ዜሪያ ዎዴ ኢሲ ኢሲ ዜሬꬃቲ ኦጌ ጋፃን ዎꬊዶሶና፤ ኤንታካ ካፎቲ ዪዲ ማፂ ሚዶሶና።
MAT 13:5 ኢሲ ኢሲ ዜሬꬃቲ ጋርሳን ሻሎይ ዴዒያ ቢታ ቦላ ዎꬊዶሶና። ዳሮ ቢቲ ባይና ጊሾ ኤሌሲዲ ዶሊስ።
MAT 13:6 ሺን ኣዋይ ኬዪን ሹሊስ፤ ፃጶይ ባይና ጊሾ ሜሊስ።
MAT 13:7 ኢሲ ኢሲ ዜሬꬃይ ኣጉንꬃ ጊዶን ዎꬊስ፤ ኣጉንꬃይ ዲጪዲ ሄ ዶላ ጩሊስ።
MAT 13:8 ሃራቲ ቃሲ ኣራዳ ቢታ ቦላ ዎꬊስ፤ ዶሊዲ ኣይፌ ኣይፊስ። ኢሶይ ፄታ፥ ኢሶይ ኡሱፑን ታማ፥ ኢሶይ ቃሲ ሃስታማ ኣይፊስ።
MAT 13:9 ሲዒያ ሃይꬂ ዴዒያ ኡራይ ሲዖ» ያጊስ።
MAT 13:10 ዬሱሳ ታማሬቲ ኢያኮ ሺቂዲ፥ «ኣይስ ኔኒ ዴሪያስ ሌሚሶን ኦዳይ?» ያጊዲ ኦይቺዶሶና።
MAT 13:11 ኢ ዛሪዲ፥ «ሂንቴው ሳሎ ካዎቴꬃ ፁራ ኤራይ ኢሜቲስ፥ ሺን ኤንታው ኢሜቲቤና።
MAT 13:12 ዴዒያ ኡባስ ጉዤታና፥ ኢያው ዳራና፥ ሺን ባይናይሳፌ ሃሪ ኣቶሺን ኢያው ዴዒያራካ ኤኬታና።
MAT 13:13 ሄሳ ጊሾ፥ ታኒ ኤንቲ፥ ፄሊሼ ዴሞና ሜላ፥ ሲዒሼ ሲዖና ሜላ ዎይኮ ኣኬኮና ሜላ ኤንታው ሌሚሶን ኦዳይስ።
MAT 13:14 «ኢሳያሲ ባ ማፃፋን ኦዲዳይሲ ኤንታ ቦላ ፖሌቲስ። ኢ ኦዲሼ፥ ‹ሂንቴ ሲሳ ሲዔታ፥ ሺን ኣኬኬኬታ፤ ሂንቴ ፄሌታ፥ ሺን ቤዔኬታ።
MAT 13:15 ኣይስ ጊኮ፥ ሃ ኣሳ ዎዛናይ ዜልዑሚስ፤ ባንታ ሃይꬃ ኤሪሼ ቱሊሲዶሶና፥ ባንታ ኣይፊያ ጎዚዶሶና። ሄሲ ባይኔኮ ኤንቲ ባንታ ኣይፊያን ቤዒዲ፥ ባንታ ሃይꬃን ሲዒዲ፥ ባንታ ዎዛናን ኣኬኪዲ፥ ታኮ ሲማና፥ ታካ ኤንታ ፓꬃናሺን› ያጊስ።
MAT 13:16 «ሺን ሂንቴ ኣይፌቲ ቤዒያ ጊሾኔ ሂንቴ ሃይꬃቲ ሲዒያ ጊሾ ሂንቴ ኣንጄቲዳይሳታ።
MAT 13:17 ታ ሂንቴው ቱማ ኦዳይስ፤ ዳሮ ናቤቲኔ ፂሎ ኣሳቲ ሂንቴ ቤዔይሳ ቤዓናዉኔ ሂንቴ ሲዔይሳ ሲዓናው ኣሞቲዶሶና፥ ሺን ኤንታው ሃኒቤና።
MAT 13:18 «ሂዛ፥ ሃ ዜሬꬃ ዜሪያ ኡራ ሌሚሱዋ ሲዒቴ።
MAT 13:19 ኦጌ ጋፃን ዎꬊዳ ዜሬꬃ ሌሚሶይ ሃይሳ፡ ሳሎ ካዎቴꬃ ቃላ ሲዒዲ ኣኬኮና ኡራ ዎዛናፔ ፃላሄይ ዪዲ ኢያ ዎዛናን ዴዒያ ዜሬꬃ ማፂ ዲጌስ።
MAT 13:20 ሻሎይ ጋርሳን ዴዒያ ቢታ ቦላ ዜሬቲዳይሲ ቃላ ሲዒዲ ኤሌሲዲ ኡፋይሳን ኤኬይሳታ።
MAT 13:21 ሺን ፃጶ ዬዳናው ዳንዳዖና ጊሾ ዳሮ ጋምዖኮና። ቃላ ጋሶን ሜቶይ ዎይኮ ጎዴቴꬂ ያ ዎዴ ኤሌሲ ꬉቤቶሶና።
MAT 13:22 ኣጉንꬃ ጋꬃን ዜሬቲዳይሲ ቃላ ሲዒስ፥ ሺን ሃ ኣላሚያ ዱሳ ሂርጋይኔ ዱሬቴꬃ ቆፋይ ቃላ ጩሊያ ጊሾ ኣይፌ ኣይፎና ኣቴስ።
MAT 13:23 ሺን ኣራዳ ቢታን ዜሬቲዳ ዜሬꬃይ ኣኬካን ቃላ ሲዒያ ኡራ። ኢ ኣይፌ ኣይፌስ፤ ኢሶይ ፄታ፥ ኢሶይ ኡሱፑን ታማ ኢሶይ ቃሲ ሃስታማ ኣይፌስ» ያጊስ።
MAT 13:24 ዬሱሲ ኤንታው ሃራ ሌሚሶ ኦዲስ፥ «ፆሳ ካዎቴꬃይ ባ ጎሻን ሎዖ ዜሬꬂ ዜሪዳ ኡራ ዳኔስ።
MAT 13:25 ሺን ኣሲ ኡባይ ꬊስኪን ኢያ ሞርኬይ ዪዲ ጊስቲያ ጊዶን ሌሾ ዜሪዲ ቢስ።
MAT 13:26 ጊስቴይ ዲጪዲ ኣይፊያ ዎዴ ሌሾይ ኢያ ጊዶን ቤንቲስ።
MAT 13:27 «ጋዲያ ጎዳ ኣይሌቲ ጎዳኮ ቢዲ፥ ‹ጎዳው፥ ኔ ጎሻን ኔ ሎዖ ዜሬꬂ ዜራቢኪሾ? ያቲን፥ ሌሾይ ኣዉፔ ዪዴ?› ያጊዶሶና።
MAT 13:28 «ኢ ኤንታኮ፥ ‹ሄሳ ሞርኬይ ኦꬂስ› ያጊስ። «ኣይሌቲ ጎዳኮ፥ ‹ኑ ቢዲ ሌሹዋ ሾዳና ሜላ ኮያይ?› ያጊዶሶና።
MAT 13:29 «ሺን ኢ፥ ‹ኣቶ ቦቾፊቴ፤ ሂንቴ ሌሹዋ ሾዳይስ ጊሺን ጊስቴይ ሾዴታና።
MAT 13:30 ቦቾፊቴ፤ ጫካ ዎዴይ ጋካናው ኢሲፌ ዲጮ። ሄ ዎዴ ጫኪያ ኣሳታ ሌሹዋ ሲንꬃቲዲ ማፂዲ ታማን ፁጋናው ሚርቄን ሚርቄን ቃቺቴ። ሺን ጊስቲያ ሺሺዲ ታ ሻሊያን ቆሊቴ› ያጋና» ያጊስ።
MAT 13:31 ቃሲ ሃራ ሌሚሶ ያጊዲ ኦዲስ፤ «ሳሎ ካዎቴꬃይ ኢሲ ኣሲ ባ ጎሻን ባኪዳ ጉꬃ ሚꬄ ኣይፌ ዳኔስ።
MAT 13:32 ሄ ሚꬄ ኣይፌይ ሃራ ሚꬃ ኣይፌታፔ ጉꬃ፥ ሺን ኢያ ዶላ ዲጪዳ ሃራ ሚꬃታ ኡባፌ ኣꬋ ጊታታዉሱ። ኢ ታሺያን ካፎቲ ኬፂዲ ኡታና ጋካናው ዎልቃማ ሚꬂ ጊዳዉሱ» ያጊስ።
MAT 13:33 ካሊዲካ፥ ዬሱሲ ሃራ ሌሚሶ ኦዲስ፤ «ሳሎ ካዎቴꬃይ ኢሲ ማጫሲ ሄꬑ ጋባቴ ꬊሌ ኤካ ሙኑቃዳ፥ ሙኑቃይ ዴንዳና ሜላ ኢያን ጉጂዳ ኢርሾ ዳኔስ» ያጊስ።
MAT 13:34 ዬሱሲ ዴሪያስ ሄ ሌሚሱዋ ኡባ ኦዲስ። ሌሚሶይ ባይና ኢሲባካ ኦዲቤና።
MAT 13:35 ናቤይ ባ ማፃፋን፥ «ታኒ ታ ዶና፥ ሌሚሶን ዶያና፤ ሳሎይኔ ሳዓይ ሜꬌቶሳፔ፥ ጌሚዳይሳ ኦዳይስ» ያጊዲ ኦዲዳይሲ ሄሳን ፖሌቲስ።
MAT 13:36 ዬሱሲ ዴሪያ ሞይዚዲ ሶ ጌሊስ። ኢያ ታማሬቲ ኢያኮ ሺቂዲ፥ «ጎሻን ዴዒያ ሌሹዋ ቢርሼꬃ ኑስ ኦዳ» ያጊዶሶና።
MAT 13:37 ኢ ዛሪዲ፥ «ሎዖ ዜሬꬃ ዜሪዳይ ኣሳ ናዓ።
MAT 13:38 ጎሻይ ሃ ኣላሚያ። ሎዖ ዜሬꬃይ ሳሎ ካዎቴꬃ ናይታ። ሌሾይ ፃላሄ ናይታ።
MAT 13:39 ሌሹዋ ዜሪዳይ ሞርኪያ ፃላሄ። ጫካ ዎዴይ፥ ዎዲያ ዉርሴꬃ። ጫኬይሳቲ ኪታንቾታ።
MAT 13:40 «ሌሾይ ማፄቲዲ ታማን ፁጌቴይሳ ሜላ ዎዲያ ዉርሴꬃን ሄሳዳ ሃናና።
MAT 13:41 ኣሳ ናዓይ ባ ኪታንቾታ ኪታና። ኤንቲ ናጋራስ ጋሶ ጊዴይሳታኔ ኢታ ኦꬂያ ኡባ ማፂዲ ኢያ ካዎቴꬃፌ ኬሳና።
MAT 13:42 ማፂ ሺሺዲ ዬሆይኔ ኣቻ ጋርጬꬂ ዴዒያ ቶዖና ታማን ዬጋና።
MAT 13:43 ሄ ዎዴ ፂሎቲ ባንታ ኣዋ ካዎቴꬃን ኣዋዳ ፖዓና። ሲዒያ ሃይꬂ ዴዔይ ሲዖ!
MAT 13:44 «ፆሳ ካዎቴꬃይ ጎሻን ሞጌቲዳ ሚሼ ዳኔስ። ኢሲ ኣሲ ሄ ሚሺያ ዴሚዲ ዛሪ ሞጊስ። ዳሮ ኡፋይቲዲ ቢዲ ባው ዴዒያባ ኡባ ባይዚዲ ሄ ጎሻ ጋዲያ ሻሚስ።
MAT 13:45 «ሄሳዳካ፥ ቃሲ ሳሎ ካዎቴꬃይ ኢንቆ ጊያ ኣልዖ ሹቻታ ኮያ ዛልዓንቾ ዳኔስ።
MAT 13:46 ዳሮ ኣልዖ ኢንቁዋ ዴሚዲ ቢዲ ባው ዴዒያባ ኡባ ባይዚዲ ኢያ ሻሚስ።
MAT 13:47 «ቃሲ ፆሳ ካዎቴꬃይ ኣባን ዬጌቲዳ ዱማ ዱማ ቆሞ ሞሎ ኦይኪያ ጊቲያ ዳኔስ።
MAT 13:48 ሞሎ ኦይኪያ ኣሳቲ ሞሎይ ጊቲያን ኩሚን ኣባፌ ጋፃ ኬሲዶሶና። ያን ኡቲዲ ሎዑዋ ቆሪ ቆሪ ዳቾን ዬጊዶሶና፥ ሺን ኢታ ሞሎታ ዎራ ሆሊዶሶና።
MAT 13:49 ዎዲያ ዉርሴꬃን ሄሳꬆ ሃናና። ኪታንቾቲ ዪዲ ናጋራንቾታ ፂሎታፔ ሻኪዲ፥
MAT 13:50 ዬሆይኔ ኣቻ ጋርጬꬂ ዴዒያ ቶዖና ታማን ዬጋና።
MAT 13:51 «ሃ ኡባይ ሂንቴው ጌሊዴ?» ያጊዲ ኤንታ ኦይቺስ። ኤንቲ ዛሪዲ፥ «ኤ» ያጊዶሶና።
MAT 13:52 ዬሱሲ፥ «ሂዛ፥ ሳሎ ካዎቴꬃ ኤራ ኤኪዲ ሂጊያ ታማርሲያ ኡባይ፥ ባ ሚንጂዳ ሻሉዋፔ ኦራꬃኔ ጋልዓ ኬሲያ ኣሴ ዳኔስ» ያጊስ።
MAT 13:53 ዬሱሲ ሃ ሌሚሱዋ ኦዲ ዉርሲዳፔ ጉዬ ያፔ ዴንዲዲ ቢስ።
MAT 13:54 ባ ዬሌቲዳ ቢታ ቢዲ ኣይሁዴ ዎሳ ኬꬃን ዴሪያ ታማርሲስ። ኤንቲ ማላሌቲዲ፥ «ሃ ኡራይ ሃ ጪንጫቴꬃኔ ሃ ማላታታ ኦꬂያ ዎልቃ ኣዉፔ ኤኪዴ?
MAT 13:55 ሃይሲ ኣናፂያ ናዓ ጊዴኔዬ? ኢያ ኣዬ ሱንꬃይ ማይራሞ ጊዴኔ? ኢያ ኢሻቲ ያይቆባ፥ ዮሴፋ፥ ሲሞናኔ ዪሁዳ ጊዶኮናዬ?
MAT 13:56 ኢያ ሚቼቲ ኑራ ዴዖሶና ጊዶኮና? ያቲን፥ ሃ ኡራይ ሃ ኡባ ኣዉፔ ኤኪዴ?» ያጊዶሶና።
MAT 13:57 ሄሳ ጊሾ፥ ኢ ጊያባ ኤኮና ኢፂዶሶና። ሺን ዬሱሲ፥ «ናቤይ ባ ዬሌቲዳ ቢታኒኔ ባ ሶ ኣሳ ማታን ቦንቼቴና» ያጊስ።
MAT 13:58 ኤንቲ ኣማኖና ኢፂዳ ጊሾ ዳሮ ማላታታ ሄ ቤሳን ኦꬂቤና።
MAT 14:1 ሄ ዎዴ ጋሊላ ኣይሲያ ሄሮዲሲ ዬሱሳባ ሲዒስ።
MAT 14:2 ባ ኣይሌታኮ፥ «ሃይሲ ፃማቂያ ዮሃኒሳ፤ ኢ ሃይቆፔ ዴንዲስ። ያኒዳ ጊሾ ሃ ኡባ ማላታታ ኢ ኦꬄስ» ያጊስ።
MAT 14:3 ኢ ሄሳ ጊዳይ ሄሮዲሲ ባ ኢሻ ፊልጶሳ ማቼ ሄሮዲያዲ ጋሶን ዮሃኒሳ ቃሾ ኬꬂ ጌልሲዳ ጊሾሳ።
MAT 14:4 ዮሃኒሲ ሄሮዲሳ፥ «ኔ ኢዮ ኤካናው ዎጋ ጊዴና» ያጊስ።
MAT 14:5 ሄሮዲሲ ዮሃኒሳ ዎꬋናው ኮዪስ፥ ሺን ዴሬይ ዮሃኒሳ ናቤ ኦꬂዲ ቤዒያ ጊሾ ያሼቲስ።
MAT 14:6 ሄሮዲሲ ባ ዬሌቲዳ ጋላሳ ቦንቺያ ዎዴ ሄሮዲያዳ ናዒያ ኣሳ ሲንꬃን ዬꬃን ዱራዳ ኢያ ኡፋይሳሱ።
MAT 14:7 ያቲን፥ ኢ፥ «ኢያ ኮያባ ኡባ ኢማና ጊዲ» ጫቂስ።
MAT 14:8 ናዒያ ባ ኣዬ ዞሪያ ሲዓዳ ሄሮዲሳኮ፥ «ፃማቂያ ዮሃኒሳ ሁዒያ ኬሬን ዎꬃዳ ታው ኢማ» ያጋሱ።
MAT 14:9 ኢያ ያጊን ካዎይ ቂሮቲስ፥ ሺን ባ ጫቁዋ ጊሾኔ ባራ ዴዒያ ኢማꬃታ ጊሾ ጊዲ ኢ ኦይሻይ ፖሌታና ሜላ ኪቲስ።
MAT 14:10 ካዎይ ኣሴ ኪቲዲ ዮሃኒሲ ቃሾ ኬꬃን ዴዒሺን ኢያ ቆꬊያ ጎይሪሲስ።
MAT 14:11 ሁዒያ ኬሬን ዎꬂ ኤሂዲ ናዔስ ኢሚዶሶና፤ ናዒያካ ኤካዳ ባ ኣዬስ ኤፋሱ።
MAT 14:12 ዮሃኒሳ ታማሬቲ ዪዲ ኢያ ኣሃ ኤፊዲ ሞጊዶሶና። ኢያፔ ጉዬ ሃኒዳባ ኡባ ቢዲ ዬሱሳስ ኦዲዶሶና።
MAT 14:13 ዬሱሲ ሃኒዳባ ሲዒዳ ዎዴ ዎጎሉዋን ጌሊዲ ሄ ቤሳፌ ኢሲ ጌሚያ ሶ ባርካ ቢስ። ኣሳይ ሄሳ ሲዒዲ ካታማታፔ ዴንዲዲ ቶሆን ኢያ ካሊዶሶና።
MAT 14:14 ዬሱሲ ዎጎሉዋፔ ዎꬊዲ ዳሮ ኣሳ ቤዒዲ ኤንታው ቃꬌቲስ። ኤንታ ጊዶን ዴዒያ ሃርጋንቾታ ፓꬂስ።
MAT 14:15 ሳዓይ ኦማርሲሼ ቢያ ዎዴ ዬሱሳ ታማሬቲ ኢያኮ ሺቂዲ፥ «ሃ ቤሳይ ኣሲ ባይና ቤሲ፥ ሳዓይካ ቃሚስ። ያኒያ ጊሾ፥ ሄራን ዴዒያ ጉታታ ቢዲ ባንታው ሻሚዲ ማና ሜላ ዴሪያ ዬዳ» ያጊዶሶና።
MAT 14:16 ሺን ዬሱሲ ኤንታኮ፥ «ዴሬይ ሞና ባናው ኮሼና፤ ኤንቲ ማናባ ሂንቴ ኢሚቴ» ያጊስ።
MAT 14:17 ኤንቲ ዛሪዲ፥ «ኑስ ሃይሳን ኢቻሹ ኡይꬃፌኔ ናምዑ ሞሎፔ ሃሪ ባዋ» ያጊዶሶና።
MAT 14:18 ኢካ፥ «ኣኔ ኤንታ ሃ ኤሂቴ» ያጊስ።
MAT 14:19 ካሊዲካ፥ ዴሬይ ማታን ኡታና ሜላ ኦዲስ። ኢቻሹ ኡይꬃኔ ናምዑ ሞሎታ ኤኪዲ፥ ሳሎ ፄሊዲ ጋላቲ ሲሚዲ፥ ኡይꬃ ሜንꬂዲ ባ ታማሬታስ ኢሚስ፤ ኤንቲ ቃሲ ዴሪያስ ኢሚዶሶና።
MAT 14:20 ኡባይ ሚዲ ካሊዶሶና። ዬሱሳ ታማሬቲ ሚሺን ኣቲዳይሳ ታማኔ ናምዑ ጋይታ ዴንꬂዶሶና።
MAT 14:21 ካꬃ ሚዳ ኣሳይ ማጫሳይኔ ናይቲ ኣቲን ኢቻሹ ሙኩሉ ጊዴስ።
MAT 14:22 ዬሱሲ ባ ታማሬቲ ዎጎሉዋን ጌሊዲ ባፔ ሲንꬃቲዲ ኣባፌ ሄ ፊንꬂ ፒናና ሜላ ኪቲዲ ባው ዴሪያ ሞይዛናው ጉዬ ኣቲስ።
MAT 14:23 ዴሪያ ሞይዚ ሲሚዲ ባርካ ዎሳናው ኢሲ ዴሪያ ቦላ ኬዪስ። ሳዓይ ቃሚንካ ኢ ባርካ ያን ጋምዒስ።
MAT 14:24 ሄ ዎዴ ዎጎሎይ ኣባ ቦላ ቢሺን ሲንꬃ ባጋራ ጫርኮይ ዴንዲን ሆቤይ ዎጎሉዋ ኡንዔꬂስ።
MAT 14:25 ዎንቲማꬃ ቦላ ዬሱሲ ኣባ ቦላ ሃሙቲሼ ባ ታማሬታኮ ዪስ።
MAT 14:26 ኢያ ታማሬቲ፥ ኢ ኣባ ቦላ ሃሙቲሼ ባንታኮ ዬይሳ ቤዒዲ ያዪዶሶና። ኤንቲካ፥ «ሃይሲ ሞይቲሌ» ጊዲ ያዪዲ ዋሲዶሶና።
MAT 14:27 ሺን ዬሱሲ ኤሌሲዲ፥ «ኣይኮይ ባዋ! ያዮፊቴ! ታናባይ» ያጊስ።
MAT 14:28 ጴፂሮሲ ኢያኮ፥ «ጎዳው፥ ኔና ጊዲኮ፥ ታኒ ሃꬃ ቦላራ ሃሙታዳ ኔኮ ባና ሜላ ታና ኪታ» ያጊስ።
MAT 14:29 ዬሱሲ ጴፂሮሳኮ፥ «ሃያ» ያጊስ። ጴፂሮሲ ዎጎሉዋፔ ዎꬊዲ ሃꬃ ቦላራ ሃሙቲሼ ዬሱሳኮ ቡሱ ኦይኪስ።
MAT 14:30 ሺን ዎልቃማ ጫርኩዋ ቤዒዲ ያዪስ። ሃꬃን ሚቴቴꬂ ኦይኪዳ ዎዴ «ጎዳው፥ ታና ኣሻርኪ» ያጊዲ ዋሲስ።
MAT 14:31 ዬሱሲ ኤሌሲዲ ባ ኩሺያ ዬዲ ኢያ ኦይኪዲ፥ «ኔኖ፥ ኣማኖይ ፓጪዳይሶ ኣይስ ሲꬋይ» ያጊስ።
MAT 14:32 ዬሱሳራኔ ጴፂሮሳራ ዎጎሉዋን ጌሊዳ ዎዴ ጫርኮይ ሲዒ ጊስ።
MAT 14:33 ዎጎሉዋ ጊዶን ዴዒያ ኢያ ታማሬቲ፥ «ኔኒ ቱማካ ፆሳ ናዓ» ጊዲ ጎይኒዶሶና።
MAT 14:34 ኤንቲ ኣባ ፒኒዲ ጌንሳሬፄ ቢታ ጋኪዶሶና።
MAT 14:35 ሄ ቢታን ዴዒያ ኣሳይ ዬሱሳ ኤሪዳ ዎዴ ባንታ ሄራን ዴዒያ ጉታ ኡባ ኪታ ዬዲዶሶና። ኣሳይ ሃርጋንቾታ ኡባ ኢያኮ ኤሂዶሶና።
MAT 14:36 ሃርጋንቾቲ ኢያ ኣፊላ ማጫራ ፃላላ ቦቻና ሜላ ዎሲዶሶና። ቦቺዳ ኡባይካ ፓፂዶሶና።
MAT 15:1 ሄሳፌ ጉዬ፥ ኢሲ ኢሲ ፋሪሳዌቲኔ ሂጌ ኣስታማሬቲ ዬሩሳላሜፔ ዬሱሳኮ ዪዲ፥
MAT 15:2 «ኔ ታማሬቲ ኣይስ ኑ ኣዋታ ዎጋ ሜንꬆና? ኤንቲ ካꬂ ማናፔ ሲንꬄ ባንታ ኩሺያ ሜጬቶኮና» ያጊዲ ኦይቺዶሶና።
MAT 15:3 ዬሱሲ ዛሪዲ፥ «ሂንቴ፥ ሂንቴ ዎጋ ጊሾ ፆሳ ኪታ ፖሌይሳ ኣይስ ኢፄቲ?
MAT 15:4 ኣይስ ጊኮ፥ ፆሳይ፥ ‹ኔ ኣዋኔ ኔ ኣዪው ቦንቻ። ኢ ባ ኣዋ ዎይኮ ባ ኣዪው ጫዬይሲ ሃይቆ ጊቤኔ?› ያጊስ።
MAT 15:5 ሺን ሂንቴ፥ ኢሲ ኣሲ ባ ኣዋ ዎይኮ ባ ኣዪው ማዳናባይ ዴዒሺን፥ ‹ሃይሳ ታ ፆሳስ ያርሻስ ጊኮ፥
MAT 15:6 ባ ኣዋ ዎይኮ ባ ኣዪው ቦንቻናው ቤሴና› ያጌታ። ያቲዲ ሂንቴ፥ ሂንቴ ዎጋ ፖላናው ፆሳ ቃላ ሜንꬄታ።
MAT 15:7 ሂንቴኖ፥ ጩቦቶ፥ ኢሳያሲ ሂንቴባ ሊኬ ኦዲስ፥
MAT 15:8 « ‹ሃ ኣሳይ ታና ባንታ ዶናን ቦንቼስ፥ ሺን ኤንታ ዎዛናይ ታፔ ሃሆን ዴዔስ።
MAT 15:9 ኣሳይ ታና ጮ ጎይኖሶና፤ ኤንቲ ኣሲ ሜꬊዳ ኪታ ፆሳ ሂጌ ዳኒሲዲ ታማርሶሶና› ጊስ» ያጊስ።
MAT 15:10 ዬሱሲ ዳሮ ኣሳ ባኮ ፄጊዲ፥ «ሲዒቴ! ኣኬኪቴ!
MAT 15:11 ኣሴ ቱኒሲያባይ ዶናራ ጌሊያባ ጊዶናሺን ዶናፔ ኬያባ» ያጊስ።
MAT 15:12 ሄሳፌ ጉዬ፥ ዬሱሳ ታማሬቲ ኢያኮ ዪዲ፥ «ፋሪሳዌቲ ኔኒ ጊዳይሳ ሲዒዲ ꬉቤቲዳይሳ ኣኬካይ?» ያጊዶሶና።
MAT 15:13 ሺን ዬሱሲ ኤንታው ዛሪዲ፥ «ሳሉዋን ዴዒያ ታ ኣዋይ ቶኪቦና ሚꬃይ ኡባይ ሾዴታና።
MAT 15:14 ኤንታባ ሂርጎፊቴ፤ ኤንቲ ቆቄ ካሌꬂያ ቆቄታ። ቆቄይ ቆቄ ካሌꬂኮ፥ ናምዓይካ ኦላን ኩንዳና» ያጊስ።
MAT 15:15 ጴፂሮሲ ዛሪዲ፥ «ሃ ሌሚሱዋ ቢርሼꬃ ኑስ ኦዳርኪ» ያጊስ።
MAT 15:16 ዬሱሲ ኤንታኮ፥ «ሂንቴዉካ ሃዒ ጋካናው ጌሊቤኔ?
MAT 15:17 ዶናራ ጌሊያባ ኡባይ ኡሎ ጌሊዲ ካሬ ኬዬይሳ ኤሬኬቲ?
MAT 15:18 ሺን ዶናራ ኬያባይ ዎዛናፔ ኬዬስ። ኣሴ ቱኒሲያባቲ ሄሳታ።
MAT 15:19 ኤንቲካ ኣሳ ዎዛና ጊዶፌ ኬያ ኢታ ቆፋ፥ ዎꬎ፥ ላይማቴꬂ፥ ኢታ ኦሶ፥ ካይሶ፥ ዎርዶ ማርካቴꬂ፥ ጫሼ።
MAT 15:20 ሄሳ ዳኒያባቲ ኣሴ ቱኒሴሲፔ ኣቲን ሜጬቶና ኩሼራ ሜይሲ ቱኒሴና» ያጊስ።
MAT 15:21 ሄሳፌ ጉዬ፥ ዬሱሲ ያፔ ኬዪዲ ፂሮሳኔ ሲዶና ካታማቲ ዴዒያ ቢታ ቢስ።
MAT 15:22 ኢሲ ካናኔ ቢታ ማጫስ ዬሱሳኮ ያዳ፥ ባ ቃላ ꬎቁ ኦꬃዳ፥ «ጎዳው፥ ዳዊቴ ናዓው፥ ታው ቃꬌታርኪ፤ ታ ናዒው ቱና ኣያናይ ኦይኪዲ ኢታ ዋይሴስ» ያጋሱ።
MAT 15:23 ሺን ዬሱሲ ኢሲ ቃላካ ዛሮና ሲዒ ጊስ። ዬሱሳ ታማሬቲ ኢያኮ ዪዲ፥ «ሃ ማጫሲያ ኑ ጌዶ ካላ ካላዳ፥ ዎሳዉሱ። ሄሳ ጊሾ፥ ኔኒ ኢዮ ሞይዛርኪ» ያጊዲ ዎሲዶሶና።
MAT 15:24 ዬሱሲ ዛሪዲ፥ «ታኒ ዉዴፔ ꬋዪዳ ዶርሳዳ ኢስራዔሌ ኬꬃፌ ꬋዪዳ ኣሳታ ፃላላስ ኪቴታስ» ያጊስ።
MAT 15:25 ሺን ኢያ፥ ኢያ ሲንꬃን ኩንዳዳ፥ «ጎዳው፥ ታና ማዳርኪ?» ያጋሱ።
MAT 15:26 ኢ ዛሪዲ፥ «ናይታ ካꬂ ኤኪዲ ካናታስ ዬጌይሲ ሎዖ ጊዴና» ያጊስ።
MAT 15:27 ማጫሲያካ፥ «ጎዳው፥ ሄሲ ቱማ፥ ሺን ሃሪ ኣቶሺን ካናቲ ባንታ ጎዳቲ ሚሺን፥ ጋይታፔ ዎꬊያ ቲፊያ ሞሶና» ያጋሱ።
MAT 15:28 ዬሱሲ ዛሪዲ፥ «ሃ ማጫሴቴ፥ ኔ ኣማኖይ ጊታ፤ ኔ ኮዪዳይሳዳ ኔው ሃኖ» ያጊስ። ኢ ናዒያ ኢራካ ፓፃ ኣጋሱ።
MAT 15:29 ዬሱሲ ያፔ ዴንዲዲ ጋሊላ ኣባ ማቲ ቢስ። ኢሲ ዴሬ ቦላ ኬዪዲ፥ ያን ኡቲስ።
MAT 15:30 ዳሮ ኣሳይ ባንታራ፥ ዎቤታ፥ ቆቄታ፥ ኩናታ፥ ዶና ሙሜታኔ፥ ሃራ ዳሮ ሃርጋንቾታ ኤኪዲ፥ ኢያኮ ኤሂዲ ኢያ ሲንꬃን ዎꬂዶሶና። ዬሱሲ ኤንታና ፓꬂስ።
MAT 15:31 ሄሳ ጊሾ፥ ሙሜቲ ኦዴቲሺን፥ ኩናቲ ፒዲ ጊሺን፥ ዎቤቲ ሃሙቲሺን፥ ቆቄቲ ፄሊሺን ኣሳይ ቤዒዲ ማላሌቲዲ፥ ኢስራዔሌ ፆሳ ጋላቲዶሶና።
MAT 15:32 ዬሱሲ ባ ታማሬታ ባኮ ፄጊዲ፥ «ሃ ዳሮ ኣሳይ ታራ ሄꬑ ጋላስ ጋምዒዳ ጊሾኔ ኤንታው ሃዒ ሚያባይ ባይና ጊሾ ታኒ ኤንታው ቃꬌታይስ። ኤንቲ ኦጌን ዳቡሪዲ ኩንዶና ሜላ ኣይኮ ሙዞና ኤንታ ሜላ ዬዳናው ኮዪኬ» ያጊስ።
MAT 15:33 ኢያ ታማሬቲ ዛሪዲ፥ «ኑኒ ሃ ባዙዋን ሃይሳ ኬና ኣሳስ ጊዲያ ካꬂ ኣዉፔ ዴማኔ?» ያጊዶሶና።
MAT 15:34 ዬሱሲ ኤንታኮ፥ «ሂንቴው ኣፑን ኡይꬂ ዴዒ?» ያጊዲ ኦይቺስ። ኤንቲ ዛሪዲ፥ «ላፑን ኡይꬂኔ ላፋ ሞሎታፔ ጉꬂ ዴዔስ» ያጊዶሶና።
MAT 15:35 ዬሱሲ ዴሪያ ሳዓን ኡቲቴ ያጊዲ ኪቲስ።
MAT 15:36 ሄሳፌ ጉዬ፥ ሄ ላፑን ኡይꬃኔ ሞሉዋ ኤኪዲ ፆሳ ጋላቲስ። ሜንꬂዲ ባ ታማሬታስ ኢሚስ። ኢያ ታማሬቲ ኣሳስ ጊሺዶሶና።
MAT 15:37 ኣሳይ ኡባይ ሚዲ ካሊዶሶና። ኢያ ታማሬቲ፥ ሚሺን ኣቲዳ ቲፊያ ላፑን ጊታ ጋይታ ኩሜꬂ ዴንꬂዶሶና።
MAT 15:38 ሚዳ ኣሳይ ማጫሲኔ ናዓ ፓይዶና ኣዴ ፃላሊ ኦይዱ ሙኩሉ።
MAT 15:39 ዬሱሲ ዴሪያ ዬዲዳፔ ጉዬ ዎጎሉዋን ጌሊዲ ማጌዶና ጊያ ቢታ ቢስ።
MAT 16:1 ፋሪሳዌቲኔ ሳዱቃዌቲ ዬሱሳኮ ዪዶሶና። ኢያ ፓጫናው ኮዪዲ፥ ባንታና ሳሎፔ ማላታ ቤሶ ጊዲ ኦይቺዶሶና።
MAT 16:2 ሺን ኢ ኤንታኮ፥ «ሳዒ ኦማርሲያ ዎዴ ‹ሳሎይ ዞዒዳ ጊሾ ዎንቶ ቦቃላና› ያጌታ።
MAT 16:3 ዎንቲያ ዎዴ፥ ‹ሳሎይ ዞዒዲ ሻራቲዳ ጊሾ ኢራይ ቡካና› ያጌታ። ያቲን ሂንቴ ሳሎ ማላ ቤዒዲ ኤሬታ፥ ሺን ዎዲያ ማላ ኤራናው ዳንዳዒቤኬታ።
MAT 16:4 ኢታኔ ኣማኖና ዬሌቴꬃይ ማላታ ኮዬስ። ሺን ኢያው ዮናሳ ማላታፔ ሃራ ማላቲ ኢሜቴና» ያጊስ። ሄሳፌ ጉዬ፥ ኤንታና ያን ኣጊዲ ሃራ ሶ ቢስ።
MAT 16:5 ኤንቲ ኣባፌ ሄፊንꬂ ፒኒዳ ዎዴ ዳቦ ኤኪዲ ያናይሳ ዶጊዶሶና።
MAT 16:6 ዬሱሲ ኤንታኮ፥ «ፋሪሳዌታፔኔ ሳዱቃዌታ ኢርሹዋፌ ናጌቲቴ» ያጊስ።
MAT 16:7 ኤንቲካ ባንታ ጋርሳን፥ «ኢ ሄሳ ጊዳይ ኑ ዳቦ ኤኪዲ ዮና ጊሾሳ ጊዳና» ያጊዶሶና።
MAT 16:8 ዬሱስ ኤንታ ቆፋ ኤሪዲ፥ «ሂንቴኖ፥ ኣማኖይ ፓጪዳይሳቶ! ዳቦ ኤኮና ዪዳ ጊሾ ዎሊ ጊዶን ኣይስ ኦዴቴቲ?
MAT 16:9 ሃዒካ ሂንቴ ኣኬኬቲ? ኢቻሹ ሙኩሉ ኣሳስ ኢቻሹ ኡይꬃ ጊሺዳይሳኔ ኤንቲ ሚዲ ካሊን ሂንቴ ኣፑን ጋይታ ኩሜꬂ ዴንꬂዳኮ ዶጊዴቲ?
MAT 16:10 ሄሳዳካ፥ ላፑን ኡይꬃ ኦይዱ ሙኩሉ ኣሳስ ጊሺዳይሳኔ ኤንቲ ሚዲ ካሊን፥ ሂንቴ ኣፑን ጊታ ጋይታ ኩሜꬂ ዴንꬂዳኮ ኣኬኬኬቲ?
MAT 16:11 ሂዛ፥ ታኒ ፋሪሳዌታኔ ሳዱቃዌታ ኢርሹዋፌ ናጌቲቴ ጋዳ ኦዴይሲ ዳቦባ ጊዶናይሳ ኣኬኬኬቲ?» ያጊስ።
MAT 16:12 ያቲን፥ ኢያ ታማሬቲ ዬሱሲ ኦዴይ ሙኑቃ ዴንꬃናው ዬጌቲያ ኢርሾባ ጊዶናሺን ፋሪሳዌታኔ ሳዱቃዌታ ቲሚርቲያፌ ናጌታናይሳ ጊዴይሳ ኣኬኪዶሶና።
MAT 16:13 ዬሱሲ ቂሳሪያ ፊልጶሳ ቢታ ጋኪዳ ዎዴ ባ ታማሬታኮ፥ «ኣሳይ፥ ኣሳ ናዓ ኦና ጎና?» ያጊዲ ኦይቺስ።
MAT 16:14 ኤንቲካ፥ «ኢሶቲ ኢሶቲ ፃማቂያ ዮሃኒሳ፥ ሃራቲ ኤሊያሳ ቃሲ ሃንኮቲ ኤርሚያሳ ዎይኮ ናቤታፔ ኢሱዋ ጎሶና» ያጊዶሶና።
MAT 16:15 ዬሱሲ ዛሪዲ፥ «ያቲን፥ ሂንቴ ታና ኦና ጌቲ» ጊዲ ኤንታ ኦይቺስ።
MAT 16:16 ሲሞና ጴፂሮሲ ዛሪዲ፥ «ኔኒ ኪሪስቶሳ፥ ዴዖ ፆሳ ናዓ» ያጊስ።
MAT 16:17 ዬሱሲ ጴፂሮሳኮ፥ «ዮና ናዓ ሲሞና፥ ኔኒ ኣንጄቲዳይሳ! ሃይሳ ኔው ቆንጪሲዳይ ሳሉዋን ዴዒያ ታ ኣዋፔ ኣቲን ኣሴ ጊዴና።
MAT 16:18 ታ ኔው ኦዳይስ ጴፂሮሳ፥ ኔኒ ዛላ! ታኒ ሃ ዛላ ቦላ ታ ዎሳ ኬꬃ ኬፃና። ሃይቆ ዎልቃቲካ ኢዮ ፆኖኮና።
MAT 16:19 ሳሎ ካዎቴꬃ ቁልፔታ ታ ኔው ኢማና። ሳዓን ኔኒ ዲጊያባይ ኡባይ ሳሎን ፆሳ ማታን ዲጌቲዳባ ጊዳና። ሳዓን ኔኒ ሃኖ ጊያባይ ኡባይ ሳሎን ፆሳ ማታን ሃኒዳባ ጊዳና» ያጊስ።
MAT 16:20 ሄሳፌ ጉዬ፥ ኢ፥ ኪሪስቶሳ ጊዴይሳ ኦዴስካ ኦዶና ሜላ ባ ታማሬታ ሚንꬂዲ ኪቲስ።
MAT 16:21 ሄ ዎዲያፔ ዶሚዲ ዬሱሲ ባ ታማሬታስ፥ «ታኒ ዬሩሳላሜ ባናው ቤሴስ። ያን ዴሪያ ጪማታን፥ ካሂኔ ሃላቃታኔ ሂጌ ኣስታማሬታ ኩሼን ዋዬ ኤካናው ቤሴስ። ኤንቲ ታና ዎꬋና፥ ሺን ታኒ ሄꬓንꬆ ጋላስ ሃይቆፔ ዴንዳና» ያጊዲ ቆንጪሲስ።
MAT 16:22 ጴፂሮሲ ዬሱሳ ጋፃ ኬሲዲ፥ «ጎዳው፥ ሄሲ ሃኔና! ሄሳ ሜላባይ ኔና ኡባራካ ጋኮፎ!» ያጊዲ ሃንቄቲስ።
MAT 16:23 ዬሱሲ ጴፂሮሳኮ ጉዬ ሲሚዲ፥ «ሃ ፃላሂያው፥ ታፔ ሃካ! ኔኒ ኣሳ ቆፋ ቆፓሳፔ ኣቲን ፆሳ ቆፋ ቆፖና ጊሾ ታው ꬉቤ ጊዳሳ» ያጊስ።
MAT 16:24 ሄሳፌ ጉዬ፥ ዬሱሲ ባ ታማሬታኮ፥ «ኦኒካ ታና ካላናው ኮያባ ጊዲኮ ባና ካዶ፥ ባ ማስቃሊያ ቶኪዲ ታና ካሎ።
MAT 16:25 ባ ዴዑዋ ኣሻናው ኮያ ኡባይ ꬋይሴስ። ሺን ባ ዴዑዋ ታ ጊሾ ጊዲ ኣꬂ ኢሜይሲ ኣሼስ።
MAT 16:26 ኣሲ ኣላሜ ኩሜꬃ ባባ ኦꬂዲ፥ ጊዶሺን ባ ሼምፑዋ ꬋይሲኮ ኢያ ኣይ ማዲ? ዎይኮ ኣሲ ባ ሼምፑዋ ላሜ ኣይ ኢማናው ዳንዳዒ?
MAT 16:27 ኣሳ ናዓይ ባ ኣዋ ቦንቹዋን ባ ኪታንቾታራ ያና። ሄ ዎዴ ኢሲ ኢሲ ኡራስ ኢያ ኦሱዋዳ ኢማና።
MAT 16:28 ታ ቱማ ኦዳይስ፤ ኣሳ ናዓይ ካዎ ጊዲዲ ሲሜይሳ ቤዓና ጋካናው ሃይሳን ኤቂዳ ኣሳፔ ሃይቆናይሳቲ ዴዖሶና» ያጊስ።
MAT 17:1 ኡሱፑን ጋላሳፔ ጉዬ ዬሱሲ፥ ጴፂሮሳ፥ ያይቆባኔ ኢያ ኢሻ ዮሃኒሳ ባራ ኤኪዲ ባንታርካ ጊዳናው ዴሪያ ቦላ ኬዪስ።
MAT 17:2 ያን ኤንታ ሲንꬃን ዬሱሳ ማላይ ኩሜꬂ ላሜቲስ፤ ኢያ ሶምዖይካ ኣዋዳ ፆልቂስ። ኢያ ማዖይካ ዳሮ ቦፂስ።
MAT 17:3 ሄኮ፥ ሙሴይኔ ኤሊያሲ ኢያራ ኦዴቲሺን ቤዒዶሶና።
MAT 17:4 ጴፂሮሲ ዬሱሳኮ፥ «ኑኒ ሃይሳ ሃሹ ዪዳ። ኔ ኮይኮ ኢሲኖ ኔው፥ ኢሲኖ ሙሴስ፥ ኢሲኖ ኤሊያሳስ ሃይሳን ሄꬑ ሻቃራ ሻቃራና» ያጊስ።
MAT 17:5 ጴፂሮሲ ሄሳ ቡሮ ኦዲሺን ቦꬃ ሻራይ ኤንታና ካሚስ። ሻራ ጊዶራ፥ «ታና ኡፋይሲያ፥ ታ ዶሲያ ናዓይ ሃይሳ፥ ኢያ ሲዒቴ!» ያጊያ ቃላይ ዪስ።
MAT 17:6 ዬሱሳ ታማሬቲ ሄሳ ሲዒዳ ዎዴ ዳጋሚዲ ባንታ ሶምዑዋራ ሳዓን ኩንዲዶሶና።
MAT 17:7 ሺን ዬሱሲ ኤንታኮ ሺቂዲ ኤንታ ቦቺዲ፥ «ዴንዲቴ፥ ያዮፊቴ!» ያጊስ።
MAT 17:8 ኤንቲ ꬎቁ ጊዲ ቤዒያ ዎዴ ዬሱሳፔ ሃራ ኦናካ ቤዒቦኮና።
MAT 17:9 ኤንቲ ዴሪያፔ ዎꬊሺን ዬሱሲ ኤንታኮ፥ «ኣሳ ናዓይ ሃይቆፔ ዴንዳና ጋካናው ሃ ሂንቴ ቤዒዳባ ኦዴስካ ኦዶፒቴ» ጊዲ ኪቲስ።
MAT 17:10 ዬሱሳ ታማሬቲ፥ «ያቲን፥ ሂጌ ኣስታማሬቲ ኤሊያሲ ኪሪስቶሳፔ ካሴቲዲ ያና ጊዳይ ኣይቢሴ?» ያጊዲ ኦይቺዶሶና።
MAT 17:11 ዬሱሲ ዛሪዲ፥ «ኤ! ኤሊያሲ ካሴቲ ዪዲ ኡባባ ጊጊሳና።
MAT 17:12 ሺን ታ ሂንቴው ቱማ ኦዳይስ፤ ኤሊያሲ ካሴቲዲ ዪስ። ኤንቲካ ኢያ ቦላ ኮዪዳባ ኦꬂዶሶናፔ ኣቲን ኢያ ሻኪ ኤሪቦኮና። ሄሳዳ ኣሳ ናዓይ ኤንታ ኩሼን ዋዬታና» ያጊስ።
MAT 17:13 ሄ ዎዴ ዬሱሲ ጊዳይ ፃማቂያ ዮሃኒሳባ ጊዴይሳ ኣኬኪዶሶና።
MAT 17:14 ኤንቲ ዴሪያፔ ኣሳኮ ሲሚያ ዎዴ ኢሲ ኣሲ ዬሱሳ ሲንꬃን ጉልባቲዲ፥
MAT 17:15 «ጎዳው፥ ሃያና ታ ናዓስ ቃꬌታርኪ፤ ኢያ ሾጪዲ ዬጊያ ሃርጌይ ዳሮ ኡንዔꬂዲ ታማኒኔ ሃꬃን ዬጌስ።
MAT 17:16 ኔ ታማሬታኮ ኤሃስ፥ ሺን ኤንቲ ፓꬃናው ዳንዳዒቦኮና» ያጊስ።
MAT 17:17 ዬሱሲ ዛሪዲ፥ «ሂንቴኖ፥ ኣማኖና ጌላ ዬሌቴꬃው ኣዉዴ ጋካናው ታ ሂንቴራ ዳኔ? ኣዉዴ ጋካናው ታ ሂንቴና ዳንዳዓኔ? ኣኔ ናዓ ሃ ኤኪ ዪቴ» ያጊስ።
MAT 17:18 ዬሱሲ ቱና ኣያና ሃንቂን፥ ቱና ኣያናይ ናዓፔ ኬዪስ፤ ሄ ሳቴንካ ናዓይ ፓፂስ።
MAT 17:19 ሄሳፌ ጉዬ፥ ዬሱሳ ታማሬቲ ባንታርካ ኢያኮ ሺቂዲ፥ «ኑኒ ቱና ኣያና ኬሳናው ዳንዳዒቦናይ ኣይቢሴ?» ያጊዲ ኦይቺዶሶና።
MAT 17:20 ኢ ኤንታኮ፥ «ሂንቴው ኣማኖይ ላፊዳ ጊሾሳ። ታ ሂንቴው ቱማ ኦዳይስ፤ ጋሼ ኣይፌ ሜላ ኣማኖይ ሂንቴው ዴዒኮ ‹ሃ ዴሪያ ሃይሳፌ ዴንዳዳ ጌዴ ኣꬋ› ጊኮ ሂንቴው ኪቴታና። ሂንቴው ዳንዳዔቶናባይ ዴና።
MAT 17:21 [ሺን ሄሳ ሜላይ ዎሳፔኔ ፆማፔ ኣቲን ሃራን ኬዬና]» ያጊስ።
MAT 17:22 ዬሱሳ ታማሬቲ ጋሊላን ሺቂዲ ዴዒሺን ዬሱሲ ኤንታኮ፥ «ኣሳ ናዓይ ኣሳ ኩሼን ኣꬊዲ ኢሜታና።
MAT 17:23 ኤንቲ ኢያ ዎꬋና፥ ሺን ኢ ሄꬓንꬆ ጋላስ ሃይቆፔ ዴንዳና» ያጊስ። ኢያ ታማሬቲካ ዳሮ ቂሮቲዶሶና።
MAT 17:24 ዬሱሳራኔ ኢያ ታማሬታራ ቂፊርናሆሜ ካታማ ጋኪዳ ዎዴ ፆሳ ኬꬃ ጊራ ቃንፂሴይሳቲ ጴፂሮሳኮ ዪዲ፥ «ሂንቴ ኣስታማሬይ ፆሳ ኬꬃ ጊራ ጊሪ?» ያጊዲ ኦይቺዶሶና።
MAT 17:25 ጴፂሮሲ ዛሪዲ፥ «ጊሬስ» ያጊስ። ጴፂሮሲ ሶ ጌሊያ ዎዴ ዬሱሲ ካሴቲዲ፥ «ጴፂሮሳ፥ ኔው ኣይ ዳኒ? ሃ ሳዓ ካዎቴꬃቲ ቃራፃኔ ጊራ ኦፔ ኤኮና? ጋዴ ኣሳፔዬ ዎይኮ ኣሳ ጋዴ ኣሳፔ?» ያጊዲ ኦይቺስ።
MAT 17:26 ጴፂሮሲ «ኣሳ ጋዴ ኣሳፔ» ጊዲ ዛሪስ። ዬሱሲ ዛሪዲ፥ «ጋዴ ኣሳይ ጊራ ጊሮኮና ጉሱ።
MAT 17:27 ሺን ኤንቲ ꬉቤቶና ሜላ ኣባ ባዳ ሞሉዋ ኦይኪያ ማንፃቆ ዬጋ። ኮይሮ ኔ ኦይኪያ ሞሉዋ ዶና ዶያዳ ጊራስ ጊዲያ ሚሺያ ኔ ጊሾኔ ታ ጊሾ ኤፋዳ ጊራ» ያጊስ።
MAT 18:1 ሄ ዎዴ ዬሱሳ ታማሬቲ ዪዲ፥ «ሳሎ ካዎቴꬃን ኡባፌ ኣꬌይ ኦኔ?» ያጊዲ ኦይቺዶሶና።
MAT 18:2 ዬሱሲ ኢሲ ጉꬃ ናዓ ፄጊዲ ኤንታ ጊዶን ኤሲዲ ሃይሳዳ ያጊስ።
MAT 18:3 «ታኒ ሂንቴው ቱማ ኦዳይስ፤ ሂንቴ ላሜቶናኔ ጉꬃ ናይታዳ ሃኖና ኢፂኮ ሳሎ ካዎቴꬃ ኡባራካ ጌላናው ዳንዳዔኬታ።
MAT 18:4 ሂዛ፥ ሃ ጉꬃ ናዓዳ ባና ካዉሺያ ኦኒካ ሳሎ ካዎቴꬃን ኡባፌ ኣꬌይሳ ጊዳና።
MAT 18:5 ሃይሳ ሜላ ናዓ ታ ሱንꬃን ሞኪያ ኦኒካ ታና ሞኬስ።
MAT 18:6 «ሺን ታናን ኣማኒያ ሃ ጉꬃታፔ ኢሱዋ ናጋራ ኦꬃና ሜላ ꬉቤ ጊዲያ ኦኒካ ጊታ ጋቻ ዎፃ ባ ቆꬌን ቃቺዲ ጪሞ ኣባን ሚቴቲኮ ኢያው ሎዖ።
MAT 18:7 ኣላሜን ኣሳይ ናጋራ ኦꬃና ሜላ ኦꬂያባቲ ዴዒያ ጊሾ ኣላሚያ ኣዬ። ሄሳ ሜላባቲ ዮና ኣቴና፥ ሺን ꬉቤይ ኢያ ጋሶን ያ ኡራ ኣዬ።
MAT 18:8 «ኔ ኩሼይ ዎይኮ ኔ ቶሆይ ኔና ባሌꬂኮ ኔፔ ቃንፃ ዬጋ። ኔኒ ናምዑ ኩሼራ ዎይኮ ናምዑ ቶሆራ ሜሪና ታማን ዬጌታናይሳፌ ኩሼ ዎይኮ ቶሆ ዱፃ ጊዳዳ ሜሪና ዴዖ ዴሜይሲ ኔው ሎዖ።
MAT 18:9 ቃሲ ኔ ኣይፌይ ኔና ባሌꬂኮ ኢዮ ዎጫ ኬሳዳ ዎራ ሆላ። ኔኒ ናምዑ ኣይፌራ ጋናሜ ታማን ዬጌቴይሳፌ ኢሲ ኣይፌራ ሜሪና ዴዑዋ ጌሌይሲ ኔው ሎዖ።
MAT 18:10 «ታ ሂንቴው ኦዳይስ፤ ሳሎን ዴዒያ ኤንታ ናጊያ ኪታንቾቲ ኡባ ዎዴ ሳሎን ዴዒያ ታ ኣዋ ሲንꬃን ዴዒያ ጊሾ ሂንቴ ሃ ጉꬃታፔ ኢሱዋካ ካꬎና ሜላ ናጌቲቴ።
MAT 18:11 ኣሳ ናዓይ ꬋይዳይሳታ ኣሻናው ዪስ» ያጊስ።
MAT 18:12 ቃሲ ዬሱሲ፥ «ሂንቴው ኣይ ዳኒ? ኢሲ ኡራስ ፄቱ ዶርሳቲ ዴዔይሳታፔ ኢሶይ ꬋዪኮ ኡዱፉን ታማኔ ኡዱፉናታ ዴሪያ ቦላ ዬጊ ኣጊዲ ሄ ꬋዪዳይሳ ኮያናው ቤኔ?
MAT 18:13 ታ ቱማ ኦዳይስ፤ ኢ ዴሚዳ ዎዴ ኡዱፉን ታማኔ ኡዱፉናታፔ ኣꬂዲ ꬋዪዲ ቤንቲዳ ኢሲ ዶርሳን ኡፋይቴስ።
MAT 18:14 ሄሳዳካ፥ ሳሎን ዴዒያ ሂንቴ ኣዋይ ሃ ጉꬃታፔ ኢሶይ ꬋያና ሜላ ኮዬና።
MAT 18:15 «ኔ ኢሻይ ኔና ቆሂኮ ኔርካ ኢያኮ ባዳ ኢያ ባላ ኢያው ኦዳ። ኢ ኔና ሲዒኮ ኔ ኢሻ ኔው ኢሻ ኦꬃ።
MAT 18:16 ሺን ኢ ኔና ሲዖና ኢፂኮ፥ ናምዑ ዎይኮ ሄꬑ ኣሳ ማርካን ሞቶይ ላሴቲያ ጊሾ ኢሲ ዎይኮ ናምዑ ኣሲ ኤካዳ ኢያኮ ባ።
MAT 18:17 ኢ ኤንታና ሲዖና ኢፂኮ፥ ዎሳ ኬꬃስ ኦዳ። ዎሳ ኬꬂ ጊያባ ሲዖና ኢፂኮ ኣማኖና ኣሳዳ ዎይኮ ቃራፃ ቃንፂሲያ ኣሳዳ ኢያ ፓይዳ።
MAT 18:18 «ታ ሂንቴው ቱማ ኦዳይስ፤ ሳዓን ሂንቴ ዲጊያባቲ ኡባይ ሳሎን ፆሳ ማታን ዲጌቲዳባ ጊዳና። ሳዓን ሂንቴ ሃኖ ጊያባቲ ኡባይ ሳሎን ፆሳ ማታን ሃኒዳባ ጊዳና።
MAT 18:19 «ቃሲካ ታ ሂንቴው ኦዳይስ፤ ሳዓን ሂንቴፌ ናምዓይ ባንታ ዎሲያባስ ኢሲ ዎዛናን ጊዲዲ ፆሳ ዎሲያባ ጊዲኮ ሳሎን ዴዒያ ታ ኣዋይ ሂንቴው ኦꬃና።
MAT 18:20 ታና ካሌይሳታፔ ናምዓ ዎይኮ ሄꬓ ጊዲዲ ሺቂያ ቤሳን ታኒ ኤንታ ጊዶን ቤንታና» ያጊስ።
MAT 18:21 ሄ ዎዴ ጴፂሮሲ ዬሱሳኮ ዪዲ፥ «ጎዳው፥ ታ ኢሻይ ታና ቆሂኮ ኣፑን ቶሆ ታኒ ኣቶ ጋናው ቤሲ? ላፑን ቶሆ ጋካናሴዬ?» ጊዲ ኦይቺስ።
MAT 18:22 ዬሱሲ ዛሪዲ፥ «ጊዴና፥ ላፑን ታሙ ቶሆ ላፑናፔ ኣቲን ላፑን ቶሆ ጊዴና።
MAT 18:23 «ሄሳ ጊሾ፥ ፆሳ ካዎቴꬃይ ባ ኦሳንቾታራ ባ ሚሼይ ፓጪዳኮኔ ፓላሂዳኮ ቤዓናው ቆፒዳ ካዉዋ ዳኔስ።
MAT 18:24 ሄ ካዎይ ሚሼይ ፓጪዳኮኔ ፓላሂዳኮ ቤዒያ ዎዴ ዳሮ ጊንዲጊንዳ ኣጮይ ዴዒያ ኢሲ ኡራ ኢያኮ ኤሂዶሶና።
MAT 18:25 ሺን ሄ ኣይሌይ ኣጩዋ ቃንፃናው ፆኔቲን ኢያራ፥ ኢያ ማቼራ፥ ኢያ ናይቲኔ ኢያው ዴዒያባይ ኡባይ ባይዜቲዲ ኣጮይ ጪጌታና ሜላ ኢያ ጎዳይ ኪቲስ።
MAT 18:26 ያቲን ኣይሌይ ባ ጎዳ ቶሁዋ ቦላ ጉልባቲዲ፥ ‹ታ ጎዳው፥ ሃያና ጉꬃ ዎዴ ታካርኪ፥ ታ ኣጩዋ ኡባ ታ ጪጋና› ያጊዲ ዎሲስ።
MAT 18:27 ካዎይ ኢያው ቃꬌቲዲ፥ ዬዲ ኣጊስ፤ ኢያ ኣጩዋ ማሪስ።
MAT 18:28 «ሺን ሄ ኣይሌይ ኬዪ ቢዲ ባ ላጌ ኦሳንቾታፔ ኢሶይ ባፔ ዳሮ ጉꬃ ሚሼ ታልዒዳይሳ፥ ‹ኔ ቦላ ዴዒያ ታ ሚሺያ ታው ጪጋ› ጊዲ ቆꬌ ኦይኪስ።
MAT 18:29 «ሄ ኢያ ላጌ ኣይሌይ ኢያ ሲንꬃን ጉልባቲዲ፥ ‹ሃያና ጉꬃ ዎዴ ታካርኪ ታኒ ታ ኣጩዋ ኡባ ጪጋና› ያጊዲ ዎሲስ።
MAT 18:30 «ሺን ኢፂዲ ኤኪ ኤፊዲ ባ ላጌይ ኣጩዋ ቃንፃና ጋካናው ቃሾ ኬꬂ ጌልሲስ።
MAT 18:31 ሄሳ ጊሾ፥ ሃራ ላጌ ኦሳንቾቲ ሄሳ ቤዒዳ ዎዴ ዳሮ ዪሎቲዲ፥ ቢዲ ባንታ ጎዳስ ኢ ኦꬂዳባ ኡባ ኦዲዶሶና።
MAT 18:32 «ያቲን ካዎይ ሄ ኣይሊያ ፄጊሲዲ፥ ‹ሃ ኢታ ኣይሊያው፥ ኔኒ ታና ዎሲዳ ጊሾ ታ ኔ ኣጩዋ ኡባ ኔው ማራስ።
MAT 18:33 ያቲን፥ ታኒ ኔ ኣጩዋ ማሪዳይሳዳ ኔኒ ኔ ላጌ ኣይሊያ ኣጩዋ ማራናው ኔው ቤሴኔ?› ያጊስ።
MAT 18:34 ሄሳ ጊሾ፥ ካዎይ ዳሮ ዪሎቲዲ፥ ኢ ባ ኣጩዋ ኡባ ጪጋና ጋካናው ፓፃ ካዔታና ሜላ ቃሾ ኬꬃን ዬጊስ።
MAT 18:35 «ሄሳዳካ፥ ሂንቴ ኢሶይ ኢሶይ ሂንቴ ኢሻ ዎዛናፔ ማሮና ኢፂኮ ሳሎን ዴዒያ ታ ኣዋይ ሂንቴና ሄሳዳ ኦꬃና» ያጊስ።
MAT 19:1 ዬሱሲ ሄሳ ኦዲ ኦንጊዳፔ ጉዬ ጋሊላፔ ዴንዲዲ ዮርዳኖሴ ሻፋፔ ሄፊንꬃን ዴዒያ ዪሁዳ ቢታ ቢስ።
MAT 19:2 ዳሮ ኣሳይ ኢያ ካሊዲ ቢን ኤንታ ጊዶፌ ሃርጋንቾታ ፓꬂስ።
MAT 19:3 ፋሪሳዌቲ ኢያ ፓጫናው ኮዪዲ ኢያኮ ዪዲ፥ «ኢሲ ኣሲ ኣይ ጋሶንካ ባ ማቺው ዬዳናው ቤሲ?» ያጊዲ ኦይቺዶሶና።
MAT 19:4 ዬሱሲ ዛሪዲ፥ «ፆሳይ ኮይሮ ኣዴኔ ማጫስ ኦꬂ ሜꬊዳይሳ ሂንቴ ናባቢቤኬቲ?
MAT 19:5 ‹ሄሳ ጊሾ፥ ኢሲ ኣሲ ባ ኣዋኔ ባ ኣዪው ኣጊዲ ባ ማቼራ ኢሲኖ ጊዴስ፥ ናምዓይካ ኢሲ ኣሾ ጊዶሶና።›
MAT 19:6 ሄሳ ጊሾ፥ ኤንቲ ኢሲ ኣሾ ጊዶሶናፔ ኣቲን ናምዓ ጊዶኮና። ሂዛ፥ ፆሲ ቃቺዳይሳ ኣሲ ሻኮፎ» ያጊስ።
MAT 19:7 ፋሪሳዌቲ፥ «ያቲን፥ ሙሴይ ኢሲ ኣሲ ኣንጆ ዎርቃቴ ኢሚዲ ዬዳና ሜላ ኣይስ ኪቲዴ?» ያጊዲ ኦይቺዶሶና።
MAT 19:8 ዬሱሲ ዛሪዲ፥ «ሂንቴ፥ ሂንቴ ማቼታ ዬዳና ሜላ ሙሴይ ሂንቴና ኪቲዳይ፥ ሂንቴ ዎዛና ሚኖቴꬃ ጊሾፔ ኣቲን ኮይሮፔ ሄሳ ሜላ ጊዴና።
MAT 19:9 ታ ሂንቴው ኦዳይስ፤ ባ ማቺያ ላይማቶና ዴዒሺን ዬዲዲ ሃራ ኤኪያ ኦኒካ ላሜስ» ያጊስ።
MAT 19:10 ኢያ ታማሬቲ ኢያኮ፥ «ኣዚናባይኔ ማቺባይ ሄሳ ሜላ ጊዲኮ ኤኮ ጌሎይ ኣቲኮ ሎዖ» ያጊዶሶና።
MAT 19:11 ዬሱሲ ዛሪዲ፥ «ሄሳ ሜላ ቲሚርቴይ ፆሳይ ዳንዳዓ ኢሚዳይሳታሳፌ ኣቲን ኣሳ ኡባሳ ጊዴና።
MAT 19:12 ሂዛ፥ ዬሌቲሼ ሹፋ ጊዲዲ ዬሌቲዳይሳቲ ዴዖሶና፥ ቃሲ ኣሲ ቃራቲዳይሳቲ ዴዖሶና፥ ቃሲ ሳሎ ካዎቴꬃ ጊሾ ጊዲ ባንታና ሹፋይዳይሳቲ ዴዖሶና። ሄሳ ጊሾ፥ ሃይሳ ኤካናው ዳንዳዒያ ኦኒካ ኤኮ» ያጊስ።
MAT 19:13 ዬሱሲ ባ ኩሺያ ጉꬃ ናይታ ቦላ ዎꬂዲ ኤንታው ዎሳና ሜላ ኢሲ ኢሲ ኣሳይ ናይታ ኢያኮ ኤሂዶሶና። ሺን ኢያ ታማሬቲ ኣሳ ሃንቄቲዶሶና።
MAT 19:14 ሺን ዬሱሲ፥ «ፆሳ ካዎቴꬃይ ሃይሳታ ሜላሳ ጊዲያ ጊሾ ጉꬃ ናይቲ ታኮ ዬይሳ ዲጎፊቴ፤ ዮ ጊቴ» ያጊስ።
MAT 19:15 ባ ኩሺያ ኤንታ ቦላ ዎꬂዳፔ ጉዬ ሄ ቤሳፌ ኣጊዲ ቢስ።
MAT 19:16 ኢሲ ጋላስ ኢሲ ኡራይ ዬሱሳኮ ዪዲ፥ «ኣስታማሪያው፥ ታኒ ሜሪና ዴዖ ዴማናው ኣይ ሎዖባ ኦꬆ?» ያጊስ።
MAT 19:17 ዬሱሲ ኢያኮ፥ «ሎዖባ ኔ ታና ኣይስ ኦይቻይ? ኢሲ ፆሳፌ ኣቲን ሃሪ ሎዖይ ባዋ። ሺን ኔኒ ሜሪና ዴዑዋ ኤካናው ኮይኮ ኪታታ ናጋ» ያጊስ።
MAT 19:18 ኡራይ ዛሪዲ፥ «ኣዉሳ ኪታታ» ያጊዲ ኦይቺስ። ዬሱሲ ዛሪዲ፥ «ዎꬎፓ፥ ላይማቶፓ፥ ካይሶቶፓ፥ ዎርዶ ማርካቶፋ፥
MAT 19:19 ኔ ኣዋኔ ኔ ኣዪው ቦንቻ፥ ኔ ሾሩዋ ኔ ሁዒያꬆ ዶሳ» ያጊስ።
MAT 19:20 ሄ ናዓቴꬃይ፥ «ታኒ ሃይሳታ ኡባ ናዓቴꬃፌ ዶማዳ ናጋስ። ያቲን፥ ሃሪ ታው ፓጪያባይ ኣይቤ?» ያጊዲ ኦይቺስ።
MAT 19:21 ዬሱሲ ዛሪዲ፥ «ኔኒ ፖሎ ጊዳናው ኮይኮ ባዳ ኔው ዴዒያባ ባይዛዳ ማንቆታስ ኢማ፤ ኔኒ ሳሎን ዱሬታና። ያታ ሲማ ያዳ ታና ካላ» ያጊስ።
MAT 19:22 ሺን ሄ ናቴꬃ ኡራይ ዳሮ ዱሬ ጊዲያ ጊሾ ሄሳ ሲዒዳ ዎዴ ኣዛኒሼ ኣጊዲ ቢስ።
MAT 19:23 ሄሳፌ ጉዬ፥ ዬሱሲ ባ ታማሬታ፥ «ታኒ ሂንቴው ቱማ ኦዳይስ፤ ዱሬይ ሳሎ ካዎቴꬂ ጌላናይሲ ዳሮ ሜቶ።
MAT 19:24 ዱሬ ኣሲ ፆሳ ካዎቴꬃ ጌላናይሳፌ ጊማሌይ ማርፔ ሉሆራ ኣꬌይሲ ካዉዬስ» ያጊስ።
MAT 19:25 ዬሱሳ ታማሬቲ ሄሳ ሲዒዲ ማላሌቲዲ፥ «ያቲን፥ ኦኒ ኣታናው ዳንዳዒ?» ያጊዲ ኦይቺዶሶና።
MAT 19:26 ዬሱሲ ኤንታ ጫዲ ፄሊዲ፥ «ሃይሲ ኣሳስ ዳንዳዔቴና፥ ሺን ፆሳስ ኡባይ ዳንዳዔቴስ» ያጊስ።
MAT 19:27 ጴፂሮሲ ዛሪዲ፥ «ኑኒ ኡባባ ኣጊዲ ኔና ካሊዳ። ያቲን፥ ኑኒ ኣይ ዴማኔ?» ያጊስ።
MAT 19:28 ዬሱሲ ኤንታኮ ሃይሳዳ ያጊስ፡ «ታኒ ሂንቴው ቱማ ኦዳይስ፤ ኣሳ ናዓይ ያና ኣላሚያን ባ ቦንቾ ኣራታን ኡቲያ ዎዴ ሂንቴ ታማኔ ናምዓቲ፥ ታና ካሊዳይሳቲ፥ ታማኔ ናምዑ ኣራታን ኡቲዲ ታማኔ ናምዑ ኢስራዔሌ ዜሬꬃታ ቦላ ፒርዳና።
MAT 19:29 ታ ሱንꬃ ጊሾ ኬꬄ ዎይኮ ኢሻታ ዎይኮ ሚቼታ ዎይኮ ኣዋ ዎይኮ ኣዪው ዎይኮ ናይታ ዎይኮ ጋዲያ ኣጊዳይ ኦኒካ ፄቱ ኩሼ ኤካና። ቃሲ ሜሪና ዴዑዋካ ኤካና።
MAT 19:30 ሺን ዳሮቲ ሃዒ ዴꬃን ሲንꬄ ጊዲዳይሳቲ ጉዬ ጊዳና፥ ቃሲ ጉዬ ጊዲዳይሳቲ ሲንꬄ ጊዳና» ያጊስ።
MAT 20:1 «ፆሳ ካዎቴꬃይ ባ ዎይኒያ ጊዶን ኦሳንቾታ ኬራ ኦሲሳናው ዎንታ ጉራ ኬዪዳ ኬꬃዋ ዳኔስ።
MAT 20:2 ኢ ሄ ኦሳንቾታስ ሃቺ ሃቺ ኢሲ ዲናሬ ቃንፃናው ኤንታራ ጊጊዲ፥ ኤንታ ባ ዎይኒያ ጊዶ ዬዲስ።
MAT 20:3 «ቃሲ ዎንታፌ ሄꬑ ሳቴ ጊዲሺን ኬዪዲ ኦሶ ꬋዪዲ ጊያ ቦላ ኤቂዳ ሃራ ኣሳታ ዴሚስ።
MAT 20:4 ኢ ኤንታኮ፥ ‹ሂንቴካ ታ ዎይኒያ ጊዶ ቢዲ ኦꬂቴ፥ ታኒ ሂንቴው ቤሲያ ጋቲያ ቃንፃና› ያጊስ።
MAT 20:5 ኤንቲካ ቢዶሶና። ቃሲካ ኢ ኡሱፑን ሳቴኒኔ ኡዱፉን ሳቴን ኬዪዲ ሄሳዳ ኦꬂስ።
MAT 20:6 ታማኔ ኢሲ ሳቴ ጊዲሺን ኢ ኬያ ዎዴ ሃራቲ ያን ኤቂዳይሳታ ዴሚዲ፥ ‹ሂንቴ ኦሶ ኦꬆና ጋላስ ኩሜꬂ ሃይሳን ኣይስ ኤቂዲ ፔዒዴቲ?› ያጊስ።
MAT 20:7 «ኤንቲ ዛሪዲ፥ ‹ኑና ኬራ ኦሲሲያ ኣሲ ꬋዪዳ ጊሾሳ› ያጊዶሶና። «ኢካ፥ ‹ሂንቴካ ታ ዎይኒያ ጊዶ ቢዲ ኦꬂቴ› ያጊስ።
MAT 20:8 «ሳዒ ኦማርሲን፥ ዎይኒያ ጎዳይ ኦሳንቾታ ሃላቃኮ፥ ‹ኦሳንቾታ ፄጋዳ ዉርሴꬃን ኦሶ ጌሊዳይሳታፔ ዶማዳ ኮይሮ ጌሊዳይሳታ ጋካናው ኤንታ ጋቲያ ቃንፃ› ያጊስ።
MAT 20:9 ታማኔ ኢሲ ሳቴን ኦሶ ኦይኪዳይሳቲ ዪዲ፥ ሁዔን ሁዔን ኢሲ ኢሲ ዲናሬ ኤኪዶሶና።
MAT 20:10 ኮይሮ ኦሶ ኦይኪዳይሳቲ ዪዲ፥ ባንታው ዳሮ ኢሜታና ጊዲ ቆፒዶሶና። ሺን ኤንቲካ ሁዔን ሁዔን ኢሲ ኢሲ ዲናሬ ኤኪዶሶና።
MAT 20:11 ባንታ ሚሺያ ኤኪ ሲሚዲ ኬꬃዋ ቦላ ዙዙሚዶሶና።
MAT 20:12 ‹ሃይሳቲ ጉዬፔ ዪዲ ኢሲ ሳቴ ፃላላ ኦꬂዶሶና። ሺን ጋላስ ኩሜꬂ ኣዋ ሱላን ዳቡሪዲ ፔዒዳ ኑራ ኤንቲ ዋኒዲ ኢሲኖ ጊዶና› ያጊዶሶና።
MAT 20:13 «ዎይኒያ ኬꬃዋይ ኦሳንቾታፔ ኢሱዋኮ፥ ‹ታ ኢሻው፥ ታኒ ኔና ቆሃቢኬ፤ ኔ ታራ ጊጊዳይ ኢሲ ዲናሬሳ ጊዴኔ?
MAT 20:14 ኔ ሚሺያ ኤካዳ ኔ ሶ ባ። ታ ኦማርሲ ዪዳይሳስካ ኔይሳ ሜላ ኢማናው ኮያይስ።
MAT 20:15 ታኒ ታ ሚሺያን ኮዪዳባ ኦꬃናው ታው ማቲ ባዌ? ዎይኮ ታኒ ኬሃ ጊዲዳ ጊሾ ኔኒ ቃናታይ?› ያጊስ።
MAT 20:16 «ሄሳዳ ሃዒ ዴꬃን ጉዬ ጊዲዳይሳቲ ሲንꬃታና፥ ሲንꬃቲዳይሳቲ ቃሲ ጉዬታና» ያጊስ።
MAT 20:17 ዬሱሲ ዬሩሳላሜ ቢሼ፥ ታማኔ ናምዑ ታማሬታ ዱማ ጋፃ ኬሲዲ ኤንታኮ ያጊስ፡
MAT 20:18 «ሄኮ፥ ኑኒ ሃዒ ዬሩሳላሜ ቡሳ ቦላ ዴዖስ። ያን ኣሳ ናዓይ ካሂኔ ሃላቃታሲኔ ሂጌ ኣስታማሬታስ ኣꬊ ኢሜታና። ኤንቲካ ኢያ ቦላ ሃይቆ ፒርዳ ፒርዳና።
MAT 20:19 ኢያ ኣይሁዴ ጊዶና ዴሪያስ ኣꬂ ኢማና። ኤንቲ ኢያ ካዉሻና፥ ጋራፋና፥ ያቲዲ ኢያ ማስቃሊያ ቦላ ካቃና። ሺን ኢ ሄꬓንꬆ ጋላስ ሃይቆፔ ዴንዳና» ያጊስ።
MAT 20:20 ሄ ዎዴ ዛብዲዮሳ ማቺያ ባ ናምዑ ኣዴ ናይታራ ዬሱሳኮ ያዳ፥ ኢያ ሲንꬃን ጉልባታዳ ኢሲባ ኢያ ዎሳሱ።
MAT 20:21 ዬሱሲ ኢኮ፥ «ኔ ኣይ ኮያይ?» ያጊስ። ኢያ ዛራዳ፥ «ኔ ካዎቴꬃን ሃ ታ ናምዑ ናይቲ ኢሶይ ኔ ኡሻቻን ኢሶይ ኔ ሃዲርሳን ኡቶ ጋርኪ!» ያጋሱ።
MAT 20:22 ሺን ዬሱሲ ናይታኮ ዛሪዲ፥ «ሂንቴ ኣይ ዎሲያኮ ኤሬኬታ፤ ታኒ ኡያናው ዴዒያ ዋዬ ፁዓ ኡያናው ዳንዳዔቲ?» ያጊስ። ኤንቲካ፥ «ኤ ዳንዳዖስ» ያጊዶሶና።
MAT 20:23 ዬሱሲ፥ «ቱማካ ታኒ ኡያናው ዴዒያ ፁዓፔ ሂንቴ ኡያና። ሺን ታ ኡሻቻኒኔ ሃዲርሳን ኡታናይሳታ ዶሬይ ታና ጊዲኬ። ሄ ቤሳይ ኢሜቴይ፥ ታ ኣዋይ ኢማናው ጊጊሲዳ ኣሳታሳ» ያጊስ።
MAT 20:24 ኣቲዳ ታሙ ኢያ ታማሬቲ ሄሳ ሲዒዳ ዎዴ ናምዑ ኢሻታ ቦላ ሃንቄቲዶሶና።
MAT 20:25 ሺን ዬሱሲ ኤንታ ኡባ ፄጊዲ ሃይሳዳ ያጊስ። «ኣይሁዴ ጊዶና ኣሳ ሃሬይሳቲ ባንታ ኣሳ ቦላ ጎዳቴይሳኔ ኤንታ ካሌꬄይሳቲ ዎልቃን ሃሬይሳ ሂንቴ ኤሬታ።
MAT 20:26 ሺን ሂንቴ ጊዶን ሄሳዳ ጊዶፖ። ሂንቴፌ ጊታታናው ኮያ ኦኒካ ሂንቴው ኣይሌ ጊዶ።
MAT 20:27 ሂንቴ ጊዶን ኡባፌ ቦላ ጊዳናው ኮያ ኦኒካ ሂንቴው ኣይሌ ጊዳናው ቤሴስ።
MAT 20:28 ሄሳዳካ፥ ኣሳ ናዓይ ኣሴ ሃጋዛናዉኔ ዳሮ ኣሳ ዎዛናው ባ ሼምፑዋ ኢማናው ዪሲፔ ኣቲን ኣሳን ሃጋዜታናው ዪቤና» ያጊስ።
MAT 20:29 ሄሳፌ ጉዬ፥ ዬሱሲ ባ ታማሬታራ ኢያርኮፌ ኬዪዲ ቢሺን፥ ዳሮ ኣሳይ ኤንታና ካሊዶሶና።
MAT 20:30 ኦጌ ጋፃን ኡቲዳ ናምዑ ቆቄቲ ዬሱሲ ያራ ኣꬌይሳ ሲዒዲ፥ «ጎዳው፥ ዳዊቴ ናዓው፥ ኑስ ቃꬌታርኪ» ያጊዲ ዋሲዶሶና።
MAT 20:31 ዳሮ ኣሳይ ኤንታና፥ «ሃይዚቴ» ያጊዲ ካጪዶሶና። ሺን ኤንቲ፥ «ጎዳው፥ ዳዊቴ ናዓው፥ ኑስ ቃꬌታርኪ» ጊዲ ጉጂ ዋሲዶሶና።
MAT 20:32 ዬሱሲ ኤቂዲ፥ ኤንታ ፄጊዲ፥ «ታ ሂንቴው ኣይ ኦꬃና ሜላ ኮዬቲ?» ያጊዲ ኦይቺስ።
MAT 20:33 ኤንቲካ፥ «ጎዳው፥ ኑ ኣይፌይ ፄላና ሜላ ኮዮስ» ያጊዶሶና።
MAT 20:34 ዬሱሲ ኤንታው ቃꬌቲዲ፥ ኤንታ ኣይፊያ ቦቺስ። ኤሌሲዲ ኤንታ ኣይፌይ ፄሊስ፤ ኤንቲ ኢያ ካሊዲ ቢዶሶና።
MAT 21:1 ዬሱሳራኔ ኢያ ታማሬታራ ዬሩሳላሜ ማቲዲ፥ ሻማሆ ዴሪያ ቦላ ዴዒያ ቤቴፋጌ ጊያ ጉታ ጋኪሼ፥ ዬሱሲ ባ ታማሬታፔ ናምዓታ ባፔ ሲንꬄ ያጊዲ ኪቲስ፡
MAT 21:2 «ሂንቴፌ ሲንꬃን ዴዒያ ጉታ ቢቴ። ያን ኢሲ ሃሬይ ቃሾን ዴዒያሮ ኢ ማራራ ሂንቴ ሶሁዋራ ዴማና። ኤንታ ቢሊዲ ሃ ኤኪ ዪቴ።
MAT 21:3 ኦኒካ ሂንቴና ኦይቺኮ፥ ‹ጎዳይ ኤንታና ኮዬስ› ያጊቴ። ኢ ኤንታና ኢራካ ዬዲ ኣጋና» ያጊስ።
MAT 21:4 ሄሲካ ናቤይ፥
MAT 21:5 «ፂዮኔ ካታማስ፥ ‹ሄኮ፥ ኔ ካዎይ ኣሽኬ ጊዲዲ፥ ሃሬ ቦላኔ ሃሬ ማራ ቦላ ኡቲዲ፥ ኔኮ ዬስ› ያጊቴ» ያጊዲ ፃፊዳይሲ ፖሌታና ሜላ ሄሲ ሃኒስ።
MAT 21:6 ኢያ ታማሬቲ ቢዲ ዬሱሲ ኤንታ ኪቲዳይሳዳ ኦꬂዶሶና።
MAT 21:7 ሃሪዉኔ ሃሬ ማራ ኤሂዲ ቦላራ ማዒዳ ባንታ ማዑዋ ኤንታ ዞኮን ዬጊዶሶና። ዬሱሲ ማዖታ ቦላ ኡቲስ።
MAT 21:8 ዳሮ ኣሳይ ባንታ ማዑዋ ኦጊያን ሂፂዶሶና። ሃራቲ ቦንጮ ታሺዲ ኦጊያ ቦላ ዬጊዶሶና።
MAT 21:9 ዬሱሳፔ ሲንꬃራ ሃሙቴይሳቲኔ ኢያፔ ጉዬራ ካሊያ ዳሮ ኣሳይ፥ «ሆሳና! ዳዊቴ ናዓይ ጋላቴቶ! ጎዳ ሱንꬃን ዬይሲ ኣንጄቲዳይሳ! ቦንቾይ ኡባፌ ꬎቃ ሳሉዋን ፆሳስ ጊዶ!» ያጊዲ ዋሲዶሶና።
MAT 21:10 ዬሱሲ ዬሩሳላሜ ካታማ ጌሊዳ ዎዴ ሄ ካታማን ዴዒያ ኣሳ ኡባይ፥ «ሃይሲ ኦኔ?» ያጊዲ ያርኪዶሶና።
MAT 21:11 ኣሳይ፥ «ሃይሲ ጋሊላን ዴዒያ ናዚሬቴ ካታማፔ ዪዳ ናቢያ ዬሱሳ» ያጊዶሶና።
MAT 21:12 ዬሱሲ ፆሳ ኬꬂ ጌሊዲ፥ ያን ባይዜይሳታኔ ሻሜይሳታ ኡባ ካሬ ጎዲስ። ሚሼ ላሜይሳታ ፃርጴዛታኔ ሆሌታ ባይዚያ ኦይዴታ ሺሪ ዬጊስ።
MAT 21:13 ኢካ ኤንታኮ፥ «ፆሳ ቃላን፥ ‹ታ ኬꬃይ ፆሳ ዎሲያ ኬꬂ ጌቴታና› ጌቴቲ ፃፌቲስ። ሺን ሂንቴ ፓንጋቲ ቆሴቲያ ጎንጎሎ ኦꬂዴታ» ያጊስ።
MAT 21:14 ዬሱሲ ፆሳ ኬꬃን ዴዒሺን ቆቄቲኔ ጉንዳቲ ኢያኮ ዪን ኤንታ ፓꬂስ።
MAT 21:15 ሺን ካሂኔ ሃላቃቲኔ ሂጌ ኣስታማሬቲ ዬሱሲ ኦꬂዳ ማላሊሲያባታ ቤዒዳይሳሲኔ ጉꬃ ናይቲ ፆሳ ኬꬃን፥ «ዳዊቴ ናዓይ፥ ጋላቴቶ» ያጊዲ ዋሴይሳ ሲዒዲ ሃንቄቲዶሶና።
MAT 21:16 ኤንቲ ዬሱሳኮ፥ «ሃይሳቲ ጌይሳ ኔ ሲዓይ?» ያጊዶሶና። ዬሱሲ፥ «ኤ ሲዓይስ፥ ፆሳ ቃላን፥ ‹ጉꬃ ናይታ ዶናኒኔ ꬋሚያ ናይታ ዶናን ጋላታ ዎꬃዳሳ› ጌቴቲዲ ፃፌቲዳይሳ ሂንቴ ናባቢቤኬቲ?» ያጊስ።
MAT 21:17 ኤንታና ያን ኣጊዲ ቢታኒያ ካታማ ቢዲ ኣቂስ።
MAT 21:18 ዬሱሲ ዎንታ ጉራ ካታማ ሲሚዲ ዪሼ ኮሻቲስ።
MAT 21:19 ኦጌ ጋፃን ኢሲ ባላሴ ሚꬂ ቤዒዲ ኢኮ ቢስ። ሺን ሃይꬃፌ ኣቲን ሃራ ኣይኮካ ዴሚቤና። ሄሳ ጊሾ፥ ኢዮ፥ «ሂዛፔ ናምዓንꬆ ኣይፌ ኣይፎፓ!» ያጊስ። ሄ ባላሴ ሚꬂያ ኤሌሳዳ ሜላ ኣጋሱ።
MAT 21:20 ኢያ ታማሬቲ ሄሳ ቤዒዲ፥ «ሃ ባላሲያ ዋናዳ ኤሌሳ ሜላዴ?» ያጊዲ ማላሌቲዶሶና።
MAT 21:21 ዬሱሲ ዛሪዲ፥ «ታኒ ሂንቴው ቱማ ኦዳይስ፤ ሂንቴው ኣማኖይ ዴዒኮ፥ ቃሲ ሂንቴ ሲꬎና ኢፂኮ ባላሴ ቦላ ታኒ ኦꬂዳይሳ ሜላ ፃላላ ኦꬄኬታ፥ ሺን ‹ሃ ዴሪያ ሾዴታዳ ኣባን ዎꬋ› ያጊኮ ሃናና።
MAT 21:22 ኣማኒዲ ሂንቴ ዎሲያባ ኣይቢባ ጊዲኮካ ሂንቴ ኤካና» ያጊስ።
MAT 21:23 ዬሱሲ ፆሳ ኬꬃ ጌሊዲ ታማርሲሺን፥ ካሂኔ ሃላቃቲኔ ኣይሁዴ ጪማቲ ኢያኮ ዪዲ፥ «ኔኒ ሃይሳ ኦꬃና ሜላ ኔው ኣይ ማቲ ዴዒ? ኔው ሃ ማታ ኢሚዳይ ኦኔ?» ያጊዲ ኦይቺዶሶና።
MAT 21:24 ዬሱሲ ኤንታኮ፥ «ታኒካ ሂንቴና ኢሲባ ኦይቻይስ፤ ሂንቴ ታው ሄሳ ዛሪኮ፥ ታኒ ኣይ ማታን ኦꬂያኮ ሂንቴው ኦዳና።
MAT 21:25 ዮሃኒሲ ፃማቃና ሜላ ማታይ ኣዉፔ ኢሜቲዴ? ፆሳፌዬ ኣሳፔ?» ያጊስ። ኤንቲ ባንታ ጊዶን ዞሬቲዲ፥ «ኑኒ፥ ‹ፆሳፌ› ጊኮ፥ ኢ ኑና፥ ‹ያቲን ኣይስ ኣማኒቤኬቲ?› ያጋና።
MAT 21:26 ኑኒ፥ ‹ኣሳፔ› ጊኮ፥ ኣሳ ኡባይ ዮሃኒሳ ናቤ ኦꬂ ፄሊያ ጊሾ ኣሳ ያዮስ» ያጊዶሶና።
MAT 21:27 ሄሳ ጊሾ፥ «ኑኒ ኤሮኮ» ያጊዲ ዛሪዶሶና። ኢካ፥ «ሂዛ፥ ታኒካ ሃይሳ ኣይ ማታን ኦꬂያኮ ሂንቴው ኦዲኬ» ያጊስ።
MAT 21:28 «ዬሱሲ ካሊዲካ ሃይሳዳ ያጊስ፡ ናምዑ ኣዴ ናይቲ ዴዒያ ኢሲ ኡራይ ዴዔስ። ሄ ኡራይ ባይራ ናዓኮ ቢዲ፥ ‹ታ ናዓው፥ ሃቺ ዎይኒያ ጊዶ ባዳ ኦꬃ› ያጊስ።
MAT 21:29 ናዓይ ዛሪዲ፥ ‹ኣቶ ቢኬ› ያጊስ። ሺን ጉዬፔ ባ ዎዛናን ቆፒ ኤኪዲ ኦꬃናው ቢስ።
MAT 21:30 ኣዋይ ባ ካሎ ናዓኮ ቢዲ፥ ባ ባይራ ናዓኮ ጊዳይሳዳ ኪቲስ። ኢካ፥ ‹ኤሮ፥ ታ ኣዋው› ያጊስ። ሺን ቢቤንና።
MAT 21:31 ሃ ናምዑ ናይታፔ ባ ኣዋስ ኪቴቲዳይሲ ኣዉሴ?» ያጊስ። ኤንቲካ፥ «ባይራ» ያጊዶሶና። ዬሱሲ ኤንታኮ፥ «ታ ሂንቴው ቱማ ኦዳይስ፤ ቃራፃ ቃንፂሴይሳቲኔ ላይማቴይሳቲ ሂንቴፌ ሲንꬃቲዲ ፆሳ ካዎቴꬃ ጌላና።
MAT 21:32 ፃማቂያ ዮሃኒሲ ሱሬ ኦጊያ ታማርሲሼ ዪን ኢ ጌይሳ ኣማኒቤኬታ። ሺን ቃራፃ ቃንፂሴይሳቲኔ ላይማቴይሳቲ ኣማኒዶሶና። ሂንቴ ሃሪ ኣቶሺን፥ ኤንታ ቤዒዲካ ሂንቴ ናጋራፔ ሲሚዲ ኣማኒቤኬታ» ያጊስ።
MAT 21:33 ቃሲካ ዬሱሲ ሃይሳዳ ያጊስ፤ «ሃራ ሌሚሶ ሲዒቴ፥ ዎይኔ ቶኪዳ ኢሲ ኡራይ ዴዔስ። ሄ ዎይኒያ ዩሹዋ ዲሪስ። ዎይኒያ ጉምዒያ ኦላካ ቦኪስ። ዎይኒያ ናጋናው ሻኮካ ሻኪስ። ሄሳፌ ጉዬ፥ ጋዲያ ኮꬄ ኢሚዲ ሃራ ቢታ ቢስ።
MAT 21:34 ዎይኔ ኣይፊያ ማፂያ ዎዴይ ጋኪን ባና ጋኪያ ባጋ ኤኪዲ ያና ሜላ ባ ኣይሌታ ኤንታኮ ዬዲስ።
MAT 21:35 ኮꬄ ኣዋቲ ኢያ ኣይሌታ ኦይኪዲ ኢሱዋ ዋꬊዶሶና፥ ሃንኩዋ ዎꬊዶሶና ቃሲ ኣቲዳይሳ ሹቻን ጫዲዶሶና።
MAT 21:36 ዎይኔ ኣታኪልቲያ ጎዳይ ካሴይሳታፔ ዳሪያ ሃራ ኣይሌታ ኪቲስ። ኮꬄ ኣዋቲ ኤንታ ቦላካ ሃንኮይሳታ ቦላ ኦꬂዳይሳዳ ኦꬂዶሶና።
MAT 21:37 ዉርሴꬃን ኢ፥ ‹ታ ናዓ ኤንቲ ቦንቻና!› ያጊዲ ባ ናዓ ኤንታኮ ኪቲስ።
MAT 21:38 «ሺን ኮꬄ ኣዋቲ ናዓ ቤዒዲ ባንታ ጊዶን ‹ጋዲያ ላታናይሲ ሃይሳ፥ ኢያ ዎꬊዲ ጋዲያ ኑኒ ላቶስ!› ያጊዶሶና።
MAT 21:39 ናዓ ኦይኪዲ ዎይኒያ ጊዶፌ ጋፃ ኪሲዲ ዎꬊዶሶና።
MAT 21:40 «ሂዛ፥ ዎይኔ ኣታኪልቲያ ጎዳይ ያ ዎዴ ሄ ኮꬄ ኣዋታ ዋታኔ?» ያጊዲ ኦይቺስ።
MAT 21:41 ኤንቲ ዛሪዲ፥ «ኢ ሄ ኢታ ኣሳታ ኢታ ዎꬎ ዎꬊዲ፥ ዎይኔይ ኣይፊያ ዎዴ ኢያ ጋኪያ ባጋ ዎዴን ዎዴን ኢሚያ ሃራ ኮꬄ ኣዋታስ ኢማና» ያጊዶሶና።
MAT 21:42 ዬሱሲ ዛሪዲ ኤንታኮ፥ ፆሳ ቃላን፥ « ‹ጊምቤይሳቲ ቦሪዲ ኢፂዳ ሹቻይ፥ ጎዳ ፃጱዋ ሚንꬂያ፥ ኡባፌ ኣꬊያ ሹቻ ጊዲስ። ሃይሲ ጎዳይ ኦꬂዳባ፤ ኑ ኣይፊያስ ማላሊሲያባ› ጌቴቲዲ ፃፌቲዳይሳ ናባቢቤኬቲ?
MAT 21:43 «ሄሳ ጊሾ፥ ታኒ ሂንቴው ኦዳይስ፤ ፆሳ ካዎቴꬃይ ሂንቴፌ ኤኬቲዲ ሎዖ ኣይፌ ኣይፊያ ኣሳታስ ኢሜታና።
MAT 21:44 [ሃ ሹቻ ቦላ ኩንዲያ ኡባይ ሜቄሬታና። ቃሲ ሄ ሹቻይ ኢያ ቦላ ዎꬊያ ኡራይካ ጋጬታና]» ያጊስ።
MAT 21:45 ካሂኔ ሃላቃቲኔ ፋሪሳዌቲ ዬሱሲ ኦዲዳ ሌሚሱዋን ባንታና ኦዲዳይሳ ኤሪዶሶና።
MAT 21:46 ኤንቲ ዬሱሳ ኦይካናው ኮዪዶሶና፥ ሺን ኣሳይ ዬሱሳ ናቤ ኦꬂዲ ፄሊያ ጊሾ ኣሳስ ያዪዶሶና።
MAT 22:1 ዬሱሲ ኣሳስ ዛሪዲ ሃይሳዳ ያጊዲ ሌሚሶ ኦዲስ።
MAT 22:2 «ፆሳ ካዎቴꬃይ ባ ናዓስ ያጋኖ ጊጊሲዳ ካዉዋ ዳኔስ።
MAT 22:3 ሄ ካዎይ ያጋኖ ያና ሜላ ኦዲ ዎꬂዳ ኣሳታ ፄጋናው ባ ኣይሌታ ኪቲስ። ሺን ኣሳቲ ያናው ኮዪቦኮና።
MAT 22:4 ቃሲ ሃራ ኣይሌታ ፄጊዲ፥ ፄጌቲዳ ኣሳታኮ ቢዲ፥ ‹ታኒ ታ ሳንጋታኔ ሞꬊዳ ጋታርሜንꬆታ ሹካስ፤ ኡባባይ ጊጊስ። ታ ያጋኑዋ ሃ ዪቴ ያጊቴ› ያጊዲ ኪቲስ።
MAT 22:5 ሺን ፄጌቲዳይሳቲ ፄሳ ኢፂዲ፥ ባንታ ኦሶስ ኦሶስ ቢዶሶና። ኢሶይ ባ ጎሻስ፥ ሃንኮይ ባ ዛልዒያስ ቢስ።
MAT 22:6 ሃራቲ ቃሲ ካዉዋ ኣይሌታ ኦይኪዲ፥ ካዉሺ ዋꬊዲ ዎꬊዶሶና።
MAT 22:7 «ካዎይ ዳሮ ዪሎቲዲ፥ ባ ዎታዳሬታ ዬዲዲ ሼምፖ ዎꬊዳይሳታ ዎꬊሲስ፥ ኤንታ ካታማካ ፁጊስ።
MAT 22:8 ሄሳፌ ጉዬ፥ ባ ኣይሌታኮ፥ ‹ያጋኖይ ጊጊስ፥ ሺን ፄጌቲዳይሳቲ ያጋኑዋስ ቤሲያ ኣሲ ጊዶኮና።
MAT 22:9 ሄሳ ጊሾ፥ ዎጋ ኦጌታ ቢዲ፥ ዴሚዳ ኣሲ ኡባ ያጋኑዋ ያና ሜላ ፄጊቴ› ያጊስ።
MAT 22:10 ኣይሌቲ ኦጊያ ቦላ ቢዲ ባንታ ዴሚዳ ኣሲ ኡባ ሎዖታኔ ኢታታ ኤሂዲ ያጋኖ ሻቃራ ጌልሲዲ ኩንꬂዶሶና።
MAT 22:11 «ሺን ካዎይ ካꬃ ማናው ኡቲዳ ኣሳ ቤዓናው ጌሊዳ ዎዴ ያጋኖ ማዖ ማዒቦና ኢሲ ኣሲ ዴሚስ።
MAT 22:12 ኢያኮ፥ ‹ላ፥ ኔ ያጋኖ ማዖ ማዖና ዋናዳ ሃይሳ ጌላዲ?› ያጊስ። ሺን ኡራይ ሲዒ ጊስ።
MAT 22:13 «ካዎይ ባ ኣይሌታኮ፥ ‹ሃ ኡራ ኩሺያኔ ቶሁዋ ቃቺዲ፥ ካሬ ꬉማ ኬሲ ዬጊቴ። ያን ኢያው ዬሆኔ ኣቻ ጋርጬꬂ ጊዳና› ያጊስ።
MAT 22:14 «ሄሳዳካ፥ ፆሳ ካዎቴꬃስ ፄጌቲዳይሳቲ ዳሮ ሺን ዶሬቲዳይሳቲ ጉꬃ» ያጊስ።
MAT 22:15 ሄሳፌ ጉዬ፥ ፋሪሳዌቲ ቢዲ፥ ዬሱሳ ዋቲ ኦዳን ኦይካኔኮ ዞሬቲዶሶና።
MAT 22:16 ባንታ ታማሬታኔ ሄሮዲሳ ባጋታፔ ኢሶታ ኢሶታ ኪቲዶሶና። ኤንቲካ፥ «ኣስታማሪያው፥ ኔ ቱማ ኦዴይሳ ኑ ኤሮስ። ኔኒ ኣሳፔ ኣሴ ሻካካ፥ ኣሳ ዎይጋንዴስ ጋዳ ኣይኮካ ኦꬃካ፥ ፆሳ ኦጊያ ቱማቴꬃን ታማርሳሳ።
MAT 22:17 ኣኔ ኑስ ኦዳ፥ ኑኒ ሮሜ ካዉዋስ ጊራ ጊራናው ቤሲ ቤሴኔ?» ያጊዶሶና።
MAT 22:18 ሺን ዬሱሲ ኤንታ ኢታ ቆፋ ኤሪዲ፥ «ሃ ጩቦቶ፥ ታና ኣይስ ፓጬቲ?
MAT 22:19 ጊራ ጊሪያ ሚሺያ ታና ቤሲቴ» ያጊስ። ኤንቲካ ኢያው ሳንቲሜ ኤሂዶሶና።
MAT 22:20 ኢ፥ «ሃ ሱንꬃይኔ ማላይ ኦዴባዬ?» ያጊስ።
MAT 22:21 ኤንቲ፥ «ሮሜ ካዉዋይሳ» ያጊዶሶና። ያቲን ዬሱሲ ኤንታኮ፥ «ሂዛ፥ ካዉዋስ ቤሴይሳ ካዉዋስ፥ ፆሳስ ቤሴይሳ ፆሳስ ኢሚቴ» ያጊስ።
MAT 22:22 ኤንቲ ሄሳ ሲዒዳ ዎዴ ማላሌቲዲ ኢያ ማታፔ ኣጊዲ ቢዶሶና።
MAT 22:23 ሄ ጋላስ ሃይቆፔ ዴንዶይ ባዋ ያጊያ ሳዱቃዌቲ ዬሱሳኮ ዪዲ፥ ያጊዲ ኢያ ኦይቺዶሶና።
MAT 22:24 «ኣስታማሪያው፥ ‹ሙሴይ፥ ኢሲ ኣሲ ናዓ ዬሎና ሃይቂኮ፥ ሄ ሃይቂዳይሳ ኢሻይ ኢያ ማቺው ኤኪዲ፥ ባ ኢሻስ ናዓ ዬሎ› ያጊዲ ኪቲስ።
MAT 22:25 ኑ ኤሪያ ላፑን ኢሻቲ ዴዖሶና። ባይራይ ማቾ ኤኪዲ ናዓ ዬሎና ሃይቂስ። ኢያ ማቺው ኢያ ካሎ ኢሻይ ኤኪስ።
MAT 22:26 ሄሳዳካ፥ ሄ ማጫሲው ኤኪዳ ናምዓንꬆይካ፥ ሄꬓንꬆይካ፥ ቢዲ ላፑናቲ ዉራና ጋካናው ኡባይ ሃይቂዶሶና።
MAT 22:27 ኡባፌ ጉዬ ሄ ማጫሲያ ሃይቃሱ።
MAT 22:28 ያቲን፥ ላፑናቲ ኡባይ ኢዮ ኤኪዳ ጊሾ ሃይቆፔ ዴንዲያ ጋላስ፥ ሄ ማጫሲያ ላፑናታፔ ኣዉሳስ ማቾ ጊዳኔ?» ያጊዶሶና።
MAT 22:29 ዬሱሲ ዛሪዲ፥ «ሂንቴ ፆሳ ቃላይ ታማርሲያባ ዎይኮ ኢያ ዎልቃ ኤሮና ጊሾ ባሌታ።
MAT 22:30 ኣሳይ ሃይቆፔ ዴንዲያ ዎዴ ሳሎን ዴዒያ ኪታንቾታ ሜላ ጊዳናፔ ኣቲን ኤኮኮና ጌሎኮና።
MAT 22:31 ቃሲ ሃይቂዳ ኣሳቲ ሃይቆፔ ዴንዳናባ ፆሳይ ሂንቴው ኦዲዳይሳ ናባቢቤኬቲ?
MAT 22:32 ፆሳይ፥ ‹ታኒ ኣብራሃሜ ፆሳ፥ ዪሳቃ ፆሳ፥ ያይቆባ ፆሳ› ያጊስ። ሄሳ ጊሾ፥ ፆሳይ ፓፃ ዴዔይሳታ ፆሳፌ ኣቲን ሃይቂዳይሳታ ፆሳ ጊዴና» ያጊስ።
MAT 22:33 ዳሮ ኣሳይ ሄሳ ሲዒዲ፥ ኢያ ቲሚርቲያን ማላሌቲዶሶና።
MAT 22:34 ዬሱሲ ሳዱቃዌታስ ጋናባ ꬋይሲዳይሳ ፋሪሳዌቲ ሲዒዳ ዎዴ ኢሲፌ ሺቂዶሶና።
MAT 22:35 ኤንታ ጊዶፌ ኢሲ ሂጌ ኣስታማሬይ ዬሱሳ ፓጬ ኦይሾ ኦይቺስ።
MAT 22:36 «ኣስታማሪያው፥ ሂጌ ኡባፌ ኣꬌይሲ ኣዉሴ?» ያጊዲ ኦይቺስ።
MAT 22:37 ዬሱሲ ዛሪዲ፥ « ‹ኔ ጎዳ፥ ኔ ፆሳ፥ ኔ ኩሜꬃ ዎዛናፔ፥ ኔ ኩሜꬃ ሼምፑዋፌ፥ ኔ ኩሜꬃ ቆፋፔ ዶሳ።
MAT 22:38 ኡባፌ ኣꬌይሲኔ ባይራ ኪታይ ሃይሳ።
MAT 22:39 ናምዓንꬆ ኡባፌ ኣꬊያ ኪታይ፥ ኣሴ ኡባ ኔ ሁዒያ ኔ ዶሴይሳዳ ዶሳ› ያጌይሳ።
MAT 22:40 ሙሴ ሂጌይኔ ናቤታ ቲሚርቴይ ኡባይ ሃ ኪታታ ቦላ ካቶሶና» ያጊስ።
MAT 22:41 ፋሪሳዌቲ ኢሲ ቦላ ሺቂዲ ዴዒሺን፥ ዬሱሲ ኤንታና፥
MAT 22:42 «ኪሪስቶሳባ ሂንቴ ዎይጌቲ? ኢ ኦዴ ናዔ?» ያጊዲ ኦይቺስ። ኤንቲ፥ «ኢ ካዉዋ ዳዊቴ ናዓ» ያጊዲ ዛሪዶሶና።
MAT 22:43 ዬሱሲ ኤንታኮ፥ «ያቲን፥ ዳዊቴይ ጌሻ ኣያናን ጊዲዲ ዋቲዲ ኪሪስቶሳ፥ ‹ጎዳ› ጊዲ ፄጊ? ዳዊቴይ ጊሼ፥
MAT 22:44 ‹ጎዳ ፆሳይ፥ ታ ጎዳኮ፥ ኔ ሞርኬታ ኔ ቶሆይ ዬꬊያሶ ኦꬃና ጋካናው፥ ሃይሳን ታፔ ኡሻቻ ባጋን ኡታ› ጊስ።
MAT 22:45 ሂዛ፥ ዳዊቴይ ኪሪስቶሳ ጎዳ ጊዲ ፄጊኮ፥ ዋኒዲ ኪሪስቶሲ ዳዊቴ ናዓ ጊዲ?» ያጊስ።
MAT 22:46 ዬሱሳስ ኢሲ ቃላ ዛራናው ዳንዳዒዳ ኣሲ ኦኒካ ባዋ። ቃሲ ሄ ጋላሳፔ ዶሚዲ ሃራ ኦይሻ ኦይቻናው ኦኒካ ዳንዳዒቤና።
MAT 23:1 ሄሳፌ ጉዬ፥ ዬሱሲ ሺቂዳ ኣሳሲኔ ባ ታማሬታስ ሃይሳዳ ያጊስ።
MAT 23:2 «ሂጌ ኣስታማሬቲኔ ፋሪሳዌቲ ሙሴ ሂጊያ ቢላናው ማታራ ዴዖሶና።
MAT 23:3 ሄሳ ጊሾ፥ ኤንቲ ሂንቴና ኪቲያ ኡባ ኦꬂቴኔ ናጊቴ። ሺን ኤንቲ ኦꬄይሳዳ ኦꬆፊቴ። ኣይስ ጊኮ፥ ኤንቲ ኦዴይሳዳ ኦꬆኮና።
MAT 23:4 ኤንቲ ቶካናው ዳንዳዔቶና ቶሆ ቃቺዲ ኣሳ ቶሶሶና። ሺን ባንታው ሃሪ ኣቶሺን፥ ሄ ቶሁዋ ኣሳይ ቶኪያ ዎዴ ቢራꬌ ፄራን ቦቻናው ኮዮኮና።
MAT 23:5 «ሺን ኤንቲ ባንታ ኦሶ ኡባ ኣሲ ቤዓና ሜላ ኦꬆሶና። ባንታ ሶምዖኒኔ ቄሴን ቃቺያ ማፃፋ ፂቂሴይ ዴዒያ ኪታፌ ዳልጊሶሶና፥ ባንታ ማዑዋ ማጫራካ ኣዱሶሶና።
MAT 23:6 ሞኬቲያ ቤሳን ቦንቾ ቤሲኔ ኣይሁዴ ዎሳ ኬꬃታን ዳሮ ሎዒያ ኦይዴ ዶሶሶና።
MAT 23:7 ኣሳይ ጊያን ኤንታና ቦንቾን ሳሮꬃናይሳኔ ‹ኣስታማሪያው› ጊዲ ፄጋናይሳ ኮዮሶና።
MAT 23:8 «ሺን ሂንቴ ኣስታማሬይ ኢሱዋ ፃላላ ጊዲዳ ጊሾኔ ሂንቴ ኡባይ ኢሻታ ጊዲዳ ጊሾ ‹ኣስታማሪያው› ጌቴቲዲ ፄጌቶፊቴ።
MAT 23:9 ሂንቴው ሳሎን ኢሲ ኣዋ ፃላሊ ዴዒያ ጊሾ ሃ ሳዓን ኦናካ ‹ኣዋው› ጊዲ ፄጎፒቴ።
MAT 23:10 ሂንቴው ኢሲ ጎዳይ ኪሪስቶሳ ፃላሊ ዴዒያ ጊሾ ‹ጎዳው› ጌቴቲ ፄጌቶፊቴ።
MAT 23:11 ሂንቴ ጊዶን ባይራቴይ ሂንቴ ኣይሌ ጊዶ።
MAT 23:12 ባና ጊታያ ኦኒካ ካዉያና፤ ባና ካዉሺያ ኦኒካ ጊታታና።
MAT 23:13 «ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ኣሳ ሲንꬃን ሳሎ ካዎቴꬃ ጎርዴይሳቶ ሂንቴና ኣዬ። ሂንቴ፥ ሂንቴ ሁዔን ጌሌኬታ ቃሲ ሃራታካ ጌልሴኬታ።
MAT 23:14 [«ሂንቴኖ ጩቦቶ፥ ሂጌ ኣስታማሬቶኔ፥ ፋሪሳዌቶ፥ ኣምዔታ ኬꬃ ሂንቴ ቦንቂሼ፥ ኣሲ ቤዖ ጊዲ ዎሳ ኣዱሴታ። ሄሳ ጊሾ፥ ሂንቴና ኣዬ። ኡባፌ ኣꬊያ ፒርዳይ ሂንቴና ናጌስ።]
MAT 23:15 «ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴ ኢሲ ኡራ ኣማንꬃናው ኣባራኔ ሳዓራ ዩዬታ። ሺን ሂንቴ ኢያ ኣማንꬂዳ ዎዴ ሄ ኡራ ሂንቴፌ ኣꬂዲ ጋናሜስ ጊጌቲዳይሳ ኦꬂያ ጊሾ ሂንቴና ኣዬ።
MAT 23:16 «ኦኒካ ፆሳ ኬꬃን ጫቂኮ ኣይኮይካ ባዋ። ሺን ፆሳ ኬꬃን ዴዒያ ዎርቃን ጫቂኮ፥ ሄ ጫቆይ ኢያ ጎማና ጊያ ቆቄቶ፥ ሂንቴው ቆቂዲ ሃራታ ካሌꬄይሳቶ፥ ሂንቴና ኣዬ።
MAT 23:17 ሂንቴኖ፥ ኤያቶ፥ ቆቄቶ፥ ዎርቃይ ኣꬊዬ? ዎርቂያ ፆሳስ ዱማያ ፆሳ ኬꬃይ ኣꬊ?
MAT 23:18 ቃሲ ‹ኦኒካ ያርሾ ያርሺያ ቤሳን ጫቂኮ፥ ኣይኮይካ ባዋ። ሺን ኦኒካ ኢያ ቦላ ዴዒያ ያርሹዋን ጫቂኮ፥ ሄ ጫቆይ ኢያ ጎማና› ያጊዲ ታማርሴታ።
MAT 23:19 ሂንቴኖ፥ ቆቄቶ፥ ያርሾይ ኣꬊዬ? ያርሹዋ ፆሳስ ዱማያ ቤሳይ ኣꬊ?
MAT 23:20 ሄሳ ጊሾ፥ ያርሾ ቤሳን ጫቂያ ኡራይ፥ ሄ ያርሾ ቤሳኒኔ ኢያ ቦላ ዴዒያ ኡባባን ጫቄስ።
MAT 23:21 ፆሳ ኬꬃን ጫቂያ ኡራይ፥ ሄ ፆሳ ኬꬃኒኔ ኢያን ዴዒያ ፆሳን ጫቄስ።
MAT 23:22 ሳሎን ጫቂያ ኡራይ ፆሳ ኣራታኒኔ ሄ ኣራታ ቦላ ኡቲያ ፆሳን ጫቄስ።
MAT 23:23 «ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ሂንቴ ካሬꬃ ሳዎፔ፥ ናቲሮፔኔ ኦካሼፔ ኣስራታ ኬሴታ። ሺን ሂጊያን ዴዒያ ኣꬊ ኮሼይሳታ ኣጊዴታ። ሄሲካ ሱሬ ፒርዳ፥ ቃꬌቴꬂኔ ኡባባን ኣማኔቴꬂ። ሃራታካ ኣጎናሺን ሃይሳታ ሂንቴ ኦꬃናው ቤሴስ።
MAT 23:24 ሂንቴው ቆቂዲ ሃራ ኣሲ ካሌꬄይሳቶ፥ ሂንቴ ኡሻፌ ኡዱንፄ ኬሲዲ ጊማሌ ሚቴታ።
MAT 23:25 «ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ሂንቴ ሻቲያሲኔ ኬሪያስ ቦላ ባጋ ጌሼታ። ሺን ኤንታው ጋርሳን ቦንቄይኔ ኡዜቴꬂ ኩሚ ኡቲስ።
MAT 23:26 ኔኖ ቆቄ ፋሪሳዊያው፥ ሻቲያሲኔ ኬሪያስ ጋርሳ ካሴታዳ ጌሻ። ሄሳፌ ጉዬ፥ ቦላ ባጋይካ ጌሺ ጊዳና።
MAT 23:27 «ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ካሬ ባጋራ ቃላሜ ቲዬቲዲ ሎዒዲ፥ ጊዶን ሜቄꬂኔ ዎቂዳባይ ኩሚዳ ዱፎታ ዳኔታ።
MAT 23:28 ሄሳዳካ፥ ቦላ ባጋራ ኣሳስ ሎዖ ዳኔታ። ሺን ሂንቴ ጋርሳን ጩቦቴꬂኔ ኢታቴꬂ ኩሚስ።
MAT 23:29 «ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ሂንቴ ናቤታስ ዱፎ ኬፄታ፥ ቃሲ ፂሎታ ዱፉዋካ ሎይꬄታ።
MAT 23:30 ቃሲ ሂንቴ፥ ‹ኑኒ ቤኒ ኑ ኣዋታ ዎዴ ዴዒዳባ ጊዲያኮ፥ ኤንታራ ኢሲፌ ናቤታ ሱꬃ ጉሶኮሺን› ያጌታ።
MAT 23:31 ሄሳ ጊሾ፥ ሂንቴ ናቤታ ዎꬊዳ ኣሳ ናይታ ጊዴይሳ ሂንቴ ሂንቴ ሁዔን ማርካቴታ።
MAT 23:32 ሂዛ፥ ሂንቴ ኣዋቲ ዶሚዳይሳ ሂንቴ ፖሊቴ።
MAT 23:33 «ሃ ሾሻቶ፥ ሾሻ ናይቶ፥ ሂንቴ ጋናሜ ፒርዳፌ ዋኒዲ ኣታኔ?
MAT 23:34 ሄሳ ጊሾ፥ ታ ኦዴይሳ ሲዒቴ፤ ታኒ ናቤታ፥ ጪንጫ ኣሳታኔ ኣስታማሬታ ሂንቴኮ ኪታና። ኤንታፌ ኢሶታ ኢሶታ ሂንቴ ዎꬋናኔ ማስቃሊያ ቦላ ካቃና። ባጋታ ኣይሁዴ ዎሳ ኬꬃታን ሊሶን ጋራፋናኔ ካታማፔ ካታማ ጎዳና።
MAT 23:35 ሄሳ ጊሾ፥ ፂሉዋ ኣቤላ ዎꬊዳ ዎዲያፔ ዶሚዲ፥ ፆሳ ኬꬃሲኔ ያርሾ ቤሳፌ ጊዶን ሂንቴ ዎꬊዳ ባራኪያ ናዓ ዛካሪያሳ ዎዴ ጋካናው ሃይቂዳ ፂሎ ኣሳ ኡባ ጊሾ ሂንቴ ሴሬታና።
MAT 23:36 ታኒ ሂንቴው ቱማ ኦዳይስ፤ ሂንቴኔ ሂንቴ ኣዋቲ ኦꬂዳ ባላስ ሃ ፒርዳ ኡባይ ሃ ዬሌቴꬃ ቦላ ጋካና።
MAT 23:37 «ዬሩሳላሜ፥ ዬሩሳላሜ፥ ናቤታ ዎꬊያሬ! ፆሳይ ኔኮ ኪቲዳይሳታ ሹቻን ጫዲያሬ! ኩቶይ ባ ናይታ ባ ቄፌን ሃጴይሳዳ ታኒ ኔ ኣሳ ታ ቄሲያን ጌቻናው ኣፑን ቶሆ ኮያዲና! ሺን ታና ዲጋዳሳ።
MAT 23:38 ሂዛ፥ ሂንቴ ፆሳ ኬꬃይ ካይሲ ጊዳና።
MAT 23:39 ታኒ ሂንቴው ኦዳይስ፤ ‹ጎዳ ሱንꬃን ዬይሲ ኣንጄቲዳይሳ› ሂንቴ ጋና ጋካናው ናምዓንꬆ ታና ቤዔኬታ» ያጊስ።
MAT 24:1 ዬሱሲ ፆሳ ኬꬃፌ ኬዪዲ ቢሺን፥ ኢያ ታማሬቲ ኢያኮ ዪዲ፥ ማላሌቲዲ ፆሳ ኬꬃ ጊምቢያ ቤሲዶሶና።
MAT 24:2 ዬሱሲ ኤንታኮ ዛሪዲ፥ «ኤ! ሃይሳ ኡባ ቤዔቲ? ታኒ ሂንቴው ቱማ ኦዳይስ፤ ሹቺ ሹቻ ቦላ ጊምቤቲዳ ሜላ ላሌቶና ኣቴና» ያጊስ።
MAT 24:3 ዬሱሲ ሻማሆ ዴሪያ ቦላ ኡቲዳሺን፥ ኢያ ታማሬቲ ባንታርካ ኢያኮ ዪዲ፥ «ሄሲ ኣዉዴ ሃናኔኮ ኑስ ኦዳ። ቃሲ ኔ ዩሳሲኔ ዎዲያ ዉርሴꬃስ ማላታይ ኣይቤ?» ያጊዲ ኦይቺዶሶና።
MAT 24:4 ዬሱሲ ዛሪዲ፥ «ሂንቴና ኦኒካ ባሌꬆና ሜላ ናጌቲቴ!
MAT 24:5 ኣይስ ጊኮ፥ ዳሮ ኣሳቲ ታ ሱንꬃን፥ ‹ታኒ ኪሪስቶሳ፥ ፆሳይ ኣሳ ኣሻናው ኪቲዳይሳ› ያጊሼ ዪዲ ዳሮ ኣሳ ባሌꬃና።
MAT 24:6 ማታን ዴዒያ ኦላ ጊርሳ፥ ሃሆን ዴዒያ ኦላ ዎሬ ሲዓናው ዴዔታ። ሄሳ ሜላባይ ሃናናው ቤሲያ ጊሾ ሂርጎፊቴ። ሺን ዉርሴꬃይ ቡሮና።
MAT 24:7 ዴሬይ ዴሪያራ፥ ኢሲ ካዎቴꬃይ ሃራ ካዎቴꬃራ ኦሌታና። ኮሻይኔ ቢታ ቃፆይ ኡባ ቤሳን ሃናና።
MAT 24:8 ሄሲ ኡባይ ዬሎ ኢቄꬃስ ዞኬ ሜላ።
MAT 24:9 «ሄ ዎዴ ኣሳይ ሂንቴና ዋዬስ ኣꬂ ኢማና፥ ቃቻናኔ ዎꬋና። ታ ሱንꬃ ጊሾ ኣሳ ኡባይ ሂንቴና ኢፃና።
MAT 24:10 ሄ ዎዴ ዳሮቲ ኣማኖ ኣጋና። ባንታ ጊዶን ኢሶይ ኢሱዋ ኣꬂዲ ኢማና፥ ኢሶይ ኢሱዋ ኢፃና።
MAT 24:11 ቃሲ ዳሮ ዎርዶ ናቤቲ ዴንዲዲ ዳሮታ ባሌꬃና።
MAT 24:12 ጌላቴꬂ ዳሪያ ጊሾ ዳሮ ኣሳ ሲቆይ ኢርፃና።
MAT 24:13 ሺን ዉርሴꬂ ጋካናው ጌንጪያ ኡራይ ኣታና።
MAT 24:14 ኣሳ ኡባስ ማርካ ጊዳና ሜላ ፆሳ ካዎቴꬃ ዎንጌላይ ቢታ ኡባን ኦዴታና። ሄሳፌ ጉዬ፥ ዉርሴꬃይ ያና።
MAT 24:15 «ሄሳ ጊሾ፥ ናቢያ ዳኔሊ ኦዲዳ ባሻ ቱናቴꬃይ ጌሻ ቤሳን ኤቂዳይሳ ሂንቴ ቤዓና። (ኣኬኪሶ፡ ሄሲ ዎይ ጉሴኮ ናባቤይሲ ኣኬኮ!)
MAT 24:16 ሄ ዎዴ ዪሁዳ ቢታን ዴዔይሳቲ ዴሪያኮ ባቃቶ።
MAT 24:17 ኬꬃ ሁዔን ዴዒያ ኡራይ ባ ሶን ዴዒያባ ኤካናው ሶ ጌሎና ባቃቶ።
MAT 24:18 ጋዴን ዴዔይሲ ባ ማዑዋ ኤካናው ጉዬ ሲሞፎ።
MAT 24:19 ሄ ዎዴ ቃንꬃ ማጫሳታሲኔ ꬋንꬂያ ማጫሳታስ ዳሮ ኡንዓ ጊዳና።
MAT 24:20 ባልጎን ዎይኮ ሳምባታን ሂንቴ ባቃቶይ ጊዶና ሜላ ፆሳ ዎሲቴ።
MAT 24:21 ኣይስ ጊኮ፥ ሳዒ ሜꬌቶሳፔ ሃቺ ጋካናው ሃኖናባይ፥ ቃሲ ሲንꬃፌካ ኡባራካ ሃኖና ዋዬይ ሄ ዎዴ ሃናና።
MAT 24:22 ፆሳይ ሄ ጋላሳታ ታይቡዋ ጉꬆናኮ ኣሴ ጊዲዳ ኦኒካ ኣቴና። ሺን ኢ ባ ዶሪዳ ኣሳታ ጊሾ ሄ ጋላሳታ ታይቡዋ ጉꬃና።
MAT 24:23 «ሄ ዎዴ ኦኒካ ሂንቴና፥ ‹ሄኮ፥ ኪሪስቶሲ ሃይሳን› ዎይኮ ‹ሂኒን ዴዔስ› ያጊኮ ኣማኖፒቴ።
MAT 24:24 ኣይስ ጊኮ፥ ዎርዶ ኪሪስቶሳቲኔ ዎርዶ ናቤቲ ዴንዳና። ኤንታው ዳንዳዔቲኮ፥ ሃሪ ኣቶሺን ፆሳይ ዶሪዳይሳታካ ባሌꬃናው ጊታ ማላታታኔ ማላሊሲያባታ ኦꬃና።
MAT 24:25 ኣኬኪቴ፥ ታኒ ሂንቴው ሃይሳ ካሴታዳ ኦዳስ።
MAT 24:26 «ሄሳ ጊሾ፥ ኣሳይ ሂንቴኮ፥ ‹ሄኮ፥ ኪሪስቶሲ ባዞን ዴዔስ› ጊኮ፥ ያ ቦፒቴ። ዎይኮ ሂንቴኮ፥ ‹ሄኮ፥ ቆልዓን ዴዔስ› ጊኮ፥ ኤንታባ ኣማኖፒቴ።
MAT 24:27 ኣይስ ጊኮ፥ ዎልዓንꬂ ሳሎን ዎልዓሚዲ፥ ዶሎሃፔ ዉሎሃ ጋካናው ቤንቴይሳዳ፥ ኣሳ ናዓ ዩሳይ ሄሳዳ ሃናና።
MAT 24:28 «ባዉቲ ዴዒይሶን ኣንኮቲ ሺቃና።
MAT 24:29 «ሄ ዎዴ ሄ ዋዬ ጋላሳታፔ ጉዬ፥ ሶሁዋራ ኣዋይ ꬉማና፥ ኣጌናይ ባ ፖዑዋ ዲጋና። ፆሊንቶቲ ሳሎፔ ዎꬋና፥ ቃሲ ሳሎን ዴዒያ ዎልቃቲ ቡቄታና።
MAT 24:30 ሄ ዎዴ ኣሳ ናዓ ዩሳ ማላይ ሳሉዋ ቦላ ቤንታና። ሳዓን ዴዒያ ኣሲ ኡባይ ዬካና። ቃሲ ኣሳ ናዓይ፥ ዎልቃራኔ ጊታ ቦንቹዋራ ሳሉዋ ሻራ ጊዶራ ዪሺን ኤንቲ ቤዓና።
MAT 24:31 ኢ ባ ኪታንቾታ ጊታ ፑኒያ ሞይዜራ ኪታና። ኤንቲ ሳዓ ኦይዱ ባጋ ቢዲ፥ ሃ ጋፃፔ ያ ጋፃ ጋካናው ዴዒያ ኢያው ዶሬቲዳይሳታ ሺሻና።
MAT 24:32 «ባላሴ ሚꬃፌ ታማሪቴ። ኢ ኣጪዲ ሃይፂያ ዎዴ ቶርቼይ ማታቲዳይሳ ሂንቴ ኤሬታ።
MAT 24:33 ሄሳዳካ፥ ሂንቴ ሃ ኡባባ ቤዒያ ዎዴ ዬሱሲ ማቲዲ ፔንጌን ዴዔይሳ ኤሪቴ።
MAT 24:34 ታኒ ሂንቴው ቱማ ኦዳይስ፤ ሃ ኡባባይ ፖሌታና ጋካናው፥ ሃ ዬሌቴꬃይ ኣꬌና።
MAT 24:35 ሳሎይኔ ሳዓይ ኣꬋና፥ ሺን ታ ቃላይ ኡባካ ኣꬌና።
MAT 24:36 «ሄ ጋላሳኔ ሄ ሳቲያ ሳሎን ዴዒያ ታ ኣዋፔ ኣቲን ሃሪ ሳሎ ኪታንቾታ ጊዲን ዎይኮ ናዓ ጊዲን ኦኒካ ኤሬና።
MAT 24:37 ኣሳ ናዓ ዩሳይ፥ ኖሄ ዎዴ ሃኒዳይሳ ሜላ ጊዳና።
MAT 24:38 ሄ ዎዴ ꬋዮ ሃꬃይ ያናፔ ሲንꬄ ኖሄይ ማርካቢያን ጌሊዳ ጋላሳ ጋካናው፥ ኣሳይ ሚሼኔ ኡዪሼ፥ ኤኪሼኔ ጌሊሼ ጋምዒስ።
MAT 24:39 ባሻ ሃꬃይ ዪዲ፥ ኤንታ ኡባ ꬋይሳና ጋካናው ኣኬኪቦኮና። ኣሳ ናዓ ዩሳይካ ሄሳዳ ሃናና።
MAT 24:40 «ሄ ዎዴ ናምዑ ኣሳቲ ጋዴን ኦꬃና። ኤንታፌ ኢሶይ ኤኬታና፥ ሃንኮይ ኣታና።
MAT 24:41 ናምዑ ማጫሳቲ ኢሲፌ ጋጫና። ኤንታፌ ኢሲኒያ ኤኬታና ሃንኪያ ኣታና።
MAT 24:42 «ሂዛ፥ ሂንቴ ጎዳይ ኣይ ጋላስ ያኔኮ ሂንቴ ኤሮና ጊሾ ሚኒዲ ናጊቴ።
MAT 24:43 ሺን ካይሶይ ቃማፌ ኣይ ሳቴን ያኔኮ ኬꬃዋይ ኤሪያኮ፥ ባ ኬꬃይ ቦኬቶና ሜላ ባርኪዲ ናጋናሺን።
MAT 24:44 ሄሳዳካ፥ ኣሳ ናዓይ ሂንቴ ቆፖና ሳቴን ያና ጊሾ ሂንቴካ ጊጊዲ ዴዒቴ።
MAT 24:45 «ያቲን፥ ባ ሶ ኣሳስ ካꬃ ኮሺያ ዎዲያን ኢማና ሜላ ኢያ ጎዳይ ዶሪዳ ኣማንꬄይሲኔ ዎዛናማ ኣይሌይ ኦኔ?
MAT 24:46 ኢ ባ ጎዳይ ኪቲዳይሳ ኦꬂሺን ኢያ ጎዳይ ዪዲ ዴሚያ ኣይሌይ ኣንጄቲዳይሳ።
MAT 24:47 ታኒ ሂንቴው ቱማ ኦዳይስ፤ ጎዳይ ሄ ኣይሊያ ባባ ኡባ ቦላ ሹማና።
MAT 24:48 ሺን ሄ ኣይሌይ ኢታ ጊዲኮ፥ ‹ታ ጎዳይ ጋምዒዲ ያና› ያጊዲ ባ ዎዛናን ቆፒዲ፥
MAT 24:49 ባ ላጌ ኦሳንቾታ ዋꬎ ዶሚኮ፥ ማꬆቴይሳታራ ሚኮኔ ኡዪኮ፥
MAT 24:50 ሄ ኣይሊያ ጎዳይ ኢ ቆፖና ጋላሲኔ ኢ ኤሮና ሳቴን፥
MAT 24:51 ዪዲ ኢያ ቃንፄሬꬃና። ኢያ ቃዳ ጩቦታራ ኦꬃና። ሄ ቤሳን ኢያው ዬሆኔ ኣቼ ጋርጬꬂ ጊዳና።
MAT 25:1 «ሄ ዎዴ ሳሎ ካዎቴꬃይ ባንታ ኩራዚያ ኦይኪዲ፥ ማቾ ኤሃናው ቢዳ ኣዲያ ሞካናው ኬዪዳ ታሙ ጌላዖታ ዳኔስ።
MAT 25:2 ኤንታፌ ኢቻሻቲ ኤያ፥ ቃሲ ኢቻሻቲ ጪንጫ።
MAT 25:3 ኤያቲ ኩራዜ ኦይኪዶሶና፥ ሺን ሃራ ላምባ ኦይኪቦኮና።
MAT 25:4 ሺን ጪንጫቲ ባንታ ኩራዚያኔ ሃራ ጉዣ ላምባ ኦይኪዶሶና።
MAT 25:5 ማቺው ኤኬይሲ ጋምዒን፥ ሄ ጌላዖቲ ባንታና ꬊስኮይ ኦይኪን ꬊስኪዶሶና።
MAT 25:6 «ጊዲ ቢላሄ ጊዲያ ዎዴ ‹ሄኮ፥ ማቺው ኤሄይሲ ጋኪስ፥ ኢያ ሞካናው ኬዪቴ› ያጊያ ጊታ ጫቦይ ሲዔቲስ።
MAT 25:7 «ሄ ዎዴ ሄ ጌላዖቲ ኡባይ ባርኪዲ፥ ባንታ ኩራዚያ ጊጊሲዶሶና።
MAT 25:8 ኤያቲ ጪንጫታኮ፥ ‹ኑ ኩራዜይ ቶዓና ሃኒያ ጊሾ ሂንቴ ላምባፌ ኑስ ኢሜርኬቲ› ያጊዶሶና።
MAT 25:9 «ሺን ጪንጫቲ ኤንታኮ ዛሪዲ፥ ‹ኣካይ፥ ኑሲኔ ሂንቴስ ጊዲያ ላምቢ ባዋ። ሄሳ ጊሾ፥ ሂንቴው ቢዲ ሻሚዲ ኤኪቴ› ያጊዶሶና።
MAT 25:10 ኤያ ጌላዖቲ ላምባ ሻማናው ቢን፥ ማቺው ኤኬይሲ ፑቱ ጊስ። ጊጌቲ ኡቲዳ ኢቻሹ ጌላዖቲ ኢያራ ኢሲፌ ያጋኖ ኬꬃ ጌሊዶሶና፤ ካሬይካ ጎርዴቲ ኣጊስ።
MAT 25:11 «ጉዬፔ ሃንኮ ጌላዖቲ ዪዲ፥ ‹ጎዳው፥ ጎዳው፥ ኑስ ዶያርኪ› ያጊዶሶና።
MAT 25:12 «ሺን ኢ ኤንታኮ ዛሪዲ፥ ‹ታኒ ሂንቴው ቱማ ኦዳይስ፤ ታ ሂንቴና ኤሪኬ!›
MAT 25:13 «ሂዛ፥ ኣሳ ናዓይ ያና ጋላሳ ዎይኮ ሳቲያ ሂንቴ ኤሮና ጊሾ ባርኪዲ ናጊቴ።
MAT 25:14 «ፆሳ ካዎቴꬃይ ባ ኦሳንቾታ ፄጊዲ ባው ዴዒያባ ኤንታው ሼꬊዲ ኦጌ ባናው ኬዪዳ ኡራ ዳኔስ።
MAT 25:15 ኤንታው ሁዔን ሁዔን ኤንታ ዎልቃ ሜላ ኢሱዋስ ኢቻሹ ካርፂቴ ቢራ፥ ኢሱዋስ ናምዑ ካርፂቴ ቢራ ቃሲ ኢሱዋስ ኢሲ ካርፂቴ ቢራ ኢሚዲ ባ ኦጊያ ቢስ።
MAT 25:16 ኢቻሹ ካርፂቴ ቢራ ኤኪዳ ኣይሌይ ሶሁዋራ ቢዲ ዛልዒዲ፥ ሃራ ኢቻሹ ካርፂቴ ቢራ ዎꬊሲስ።
MAT 25:17 ሄሳዳካ፥ ቃሲ ናምዑ ካርፂቴ ቢራ ኤኪዳ ኣይሌይ ሃራ ናምዑ ካርፂቴ ቢራ ዎꬊሲስ።
MAT 25:18 ሺን ኢሲ ካርፂቴ ቢራ ኤኪዳይሲ ቢዲ፥ ኦላ ቦኪዲ፥ ባ ጎዳ ሚሺያ ሞጊስ።
MAT 25:19 «ዳሮ ዎዴፔ ጉዬ ሄ ኣይሌታ ጎዳይ ዪዲ፥ ባ ሚሺያ ኤንታራ ሳላዒስ።
MAT 25:20 ኢቻሹ ካርፂቴ ቢራ ኤኪዳ ኣይሌይ ዪዲ፥ ሃራ ኢቻሹ ካርፂቴ ቢራ ኤሂዲ፥ ‹ታ ጎዳው፥ ኔኒ ታው ኢቻሹ ካርፂቴ ቢራ ኢማዳሳ። ሺን ታኒ ሃራ ኢቻሹ ካርፂቴ ቢራ ዎꬊሳስ› ያጊስ።
MAT 25:21 ኢያ ጎዳይ፥ ‹ዛምቦይ! ኔኒ ሎዖኔ ኣማንꬂያ ኣይሌ፤ ኔኒ ጉꬃባን ኣማኔታዳሳ። ታኒ ኔና ዳሮባ ቦላ ሹማና፤ ሃ ጌላዳ ኔ ጎዳራ ኡፋይታ› ያጊስ።
MAT 25:22 «ቃሲ ናምዑ ካርፂቴ ቢራ ኤኪዳይሲ ዪዲ፥ ‹ታ ጎዳው፥ ኔኒ ታው ናምዑ ካርፂቴ ቢራ ኢማዳሳ። ሺን ታኒ ሃራ ናምዑ ካርፂቴ ቢራ ዎꬊሳስ› ያጊስ።
MAT 25:23 ኢያ ጎዳይ፥ ‹ዛምቦይ! ኔኒ ሎዖኔ ኣማንꬂያ ኣይሌ፤ ኔኒ ጉꬃባን ኣማኔታዳሳ። ታኒ ኔና ዳሮባ ቦላ ሹማና፤ ሃ ጌላዳ ኔ ጎዳራ ኡፋይታ› ያጊስ።
MAT 25:24 «ቃሲ ኢሲ ካርፂቴ ቢራ ኤኪዳይሲ ዪዲ፥ ‹ታ ጎዳው፥ ኔኒ ዜሮና ቤሳፌ ጫኬይሳኔ ꬋርጮና ቤሳፌ ማፂያ ኢታ ኣሲ ጊዴይሳ ታኒ ኤራይስ።
MAT 25:25 ሄሳ ጊሾ፥ ያያዳ ኔ ቢራ ቢታን ሞጋስ። ኔ ሚሼይ ሃይሲሽ› ያጊስ።
MAT 25:26 «ኢያ ጎዳይ ዛሪዲ፥ ‹ሃ ኢታ ኣዛላ ኣይሊያው፥ ታኒ ዜሮና ቤሳፌ ጫኬይሳኔ ꬋርጮና ቤሳፌ ማፂያ ኣሲ ጊዴይሳ ኤራዳሳ።
MAT 25:27 ያቲን፥ ኔኒ ታ ሚሺያ ባንኬን ዎꬂዳባ ጊዲያኮ፥ ታኒ ሲሚያ ዎዴ ታ ሚሺያ ዎꬌራ ኤካናይሳ ዲጋዳሳ።
MAT 25:28 ሄሳ ጊሾ፥ ሚሺያ ኢያፔ ኤኪዲ፥ ታሙ ካርፂቴ ቢሪ ዴዔይሳስ ኢሚቴ።
MAT 25:29 ኣይስ ጊኮ፥ ዴዒያ ኡባስ ጉዤታናኔ ዳራና። ሺን ባይናይሳፌ ሃሪ ኣቶሺን፥ ሄ ኢያው ዴዒያ ጉꬂያካ ኤኬታና።
MAT 25:30 ሃ ማዶና ኣይሊያ ካሬ ꬉማ ኬሲ ዬጊቴ። ያን ኢያው ዬሆኔ ኣቼ ጋርጬꬂ ጊዳና› ያጊስ።
MAT 25:31 «ኣሳ ናዓይ፥ ኪታንቾ ኡባታራ፥ ባ ቦንቹዋራ ያ ዎዴ ኢ ባ ቦንቾ ካዎታ ኣራታ ቦላ ኡታና።
MAT 25:32 ቢታን ዴዒያ ኣሲ ኡባይ ኢያ ሲንꬄ ሺቃና። ሄንꬃንቾይ ዶርሳታ ዴሻታፔ ሻኬይሳዳ ኢ ሄ ኣሳ ናምዓን ሻካና።
MAT 25:33 ቃሲ ዶርሳታ ኡሻቻ ባጋራ ዴሻታ ሃዲርሳ ባጋራ ኤሳና።
MAT 25:34 «ሄሳፌ ጉዬ፥ ካዎይ ኡሻቻ ባጋራ ዴዔይሳታኮ ሃይሳዳ ያጋና፡ ‹ታ ኣዋይ ኣንጂዳይሳቶ፥ ሃ ዪዲ ሳዓይ ሜꬌቲያ ዎዴ ሂንቴው ጊጊዳ ካዎቴꬃ ላቲቴ።
MAT 25:35 ኣይስ ጊኮ፥ ታኒ ኮሻቲን ሙዚዴታ፥ ሳሞቲን ኡሺዴታ፥ ኤሬቶና ኢማꬃ ኣሲ ጊዳዳ ቢን ሞኪዴታ፥
MAT 25:36 ካሎቲን ማይዚዴታ፥ ሃርጌቲን ሃርጊሲዴታ፥ ቃሼቲን ታና ኦይቺዴታ› ያጋና።
MAT 25:37 «ሄሳፌ ጉዬ፥ ፂሎቲ ዛሪዲ፥ ‹ጎዳው፥ ኔኒ ኮሻቲን ኣዉዴ ቤዒዲ ሙዚዶ? ዎይኮ ኔኒ ሳሞቲን ኣዉዴ ቤዒዲ ኡሺዶ?
MAT 25:38 ኔኒ ኢማꬄ ጊዳዳ ዪን ኣዉዴ ቤዒዲ ሞኪዶ? ዎይኮ ኔኒ ካሎቲን ኣዉዴ ማይዚዶ?
MAT 25:39 ኔኒ ሃርጊን ዎይኮ ቃሼቲን ኔኮ ቢዲ ኔና ኣዉዴ ኦይቺዶ?› ያጋና።
MAT 25:40 ካዎይ ዛሪዲ፥ ‹ታኒ ሂንቴው ቱማ ኦዳይስ፤ ሂንቴ ታና ካሊያ ሃ ኡባፌ ጉፄይሳስ ኦꬂዳይሳ ታው ኦꬂዴታ› ያጋና።
MAT 25:41 «ሄ ዎዴ ሃዲርሳ ባጋራ ዴዔይሳታኮ፥ ‹ሃ ቃንጌቲዳይሳቶ፥ ታ ማታፔ ሃኪቴ። ፃላሄሲኔ ኢያ ኪታንቾታስ ጊጊዳ ሜሪና ታማን ቢቴ።
MAT 25:42 ኣይስ ጊኮ፥ ኮሻቲን ታና ሙዚቤኬታ፤ ሳሞቲን ኡሺቤኬታ።
MAT 25:43 ታኒ ኢማꬄ ጊዳዳ ቢን ታና ሞኪቤኬታ፥ ካሎቲን ማይዚቤኬታ፥ ሃርጊኒኔ ቃሼቲን ታና ኦይቺቤኬታ› ያጋና።
MAT 25:44 «ሄ ዎዴ ኤንቲ፥ ‹ጎዳው፥ ኔኒ ኮሻቲን ዎይኮ ሳሞቲን ዎይኮ ኢማꬄ ጊዳዳ ቢን ዎይኮ ካሎቲን ዎይኮ ሃርጊን ዎይኮ ቃሼቲን ቤዒዲ ኔና ኣዉዴ ማዶና ኢፂዶ?› ያጊዲ ዛራና።
MAT 25:45 «ሄ ዎዴ ካዎይ ዛሪዲ ኤንታኮ፥ ‹ታኒ ሂንቴው ቱማ ኦዳይስ፤ ሂንቴ ታና ካሊያ ሃ ኡባፌ ጉፄይሳ ማዶና ኢፂዳይሲ፥ ታና ማዶና ኢፂዳይሳ› ያጋና።
MAT 25:46 ሄሳ ጊሾ፥ ሄ ኣሳቲ ሜሪና ፒርዳስ ቃሲ ፂሎቲ ሜሪና ዴዑዋስ ባና» ያጊስ።
MAT 26:1 ዬሱሲ ሃ ቲሚርቲያ ኡባ ዉርሲዳ ዎዴ ባ ታማሬታኮ፥
MAT 26:2 «ናምዑ ጋላሳፔ ጉዬ፥ ፓሲካ ባሌ ቦንቺያ ጋላስ ጊዴይሳ ኤሬታ። ሄ ጋላስ ኣሳ ናዓይ ማስቃሊያ ቦላ ካቄታናው ኣሳ ኩሼን ኣꬊ ኢሜታና» ያጊስ።
MAT 26:3 ሄ ዎዴ ካሂኔ ሃላቃቲኔ ጪማቲ፥ ቃያፋ ጊያ ካሂኔ ሃላቃ ኬꬃን ሺቂዲ፥
MAT 26:4 ኣሲ ኤሮና ዬሱሳ ኦይኪዲ፥ ዎꬋናው ማቄቲዶሶና።
MAT 26:5 ሺን ኤንቲ፥ «ኣሳይ ኦሺ ኬሶና ሜላ ጊዲ፥ ፓሲካ ቦንቺያ ጋላስ ሄሳ ኦꬆኮ» ያጊዶሶና።
MAT 26:6 ዬሱሲ ቢታኒያ ካታማን ባሮ ሃርጊዳ ሲሞና ሶን ዴዔስ።
MAT 26:7 ዬሱሲ ኢማቱዋ ቦላ ዴዒሺን ኢሲ ማጫሲያ ኣልባስፂሮሴ ጲልቃፄ ኩሜꬃ ዳሮ ኣልዖ ሺቶ ኤካ ያዳ ዬሱሳ ሁዔን ቲጋሱ።
MAT 26:8 ሺን ዬሱሳ ታማሬቲ ሄሳ ቤዒዲ ሃንቄቲዲ፥ «ሃ ሺቶይ ጮ ኢቴይ ኣይቢሴ?
MAT 26:9 ሃ ሺቶይ ኣልዖ ጋቴን ባይዜቲዲ፥ ሚሼይ ማንቆታስ ኢሜታናው ዳንዳዔቴስ» ያጊዶሶና።
MAT 26:10 ዬሱሲ ኤንቲ ጌይሳ ኤሪዲ፥ ኤንታኮ፥ «ሃ ማጫሲው ኣይስ ዋይሴቲ? ኢያ ታው ሎዖባ ኦꬃሱ።
MAT 26:11 ማንቆቲ ኡባ ዎዴ ሂንቴራ ዳና። ሺን ታኒ ሂንቴራ ኡባ ዎዴ ዴዒኬ።
MAT 26:12 ኢያ ሃ ሺቱዋ ታ ቦላ ቲጊዳይሲ ታና ሞጋናው ጊጊሳናሳ።
MAT 26:13 ታኒ ሂንቴው ቱማ ኦዳይስ፤ ቢታ ኡባን ሃ ዎንጌላይ ሳባኬቲያ ቤሳን ኣዉንካ፥ ኣሳይ ኢዮ ሃሳያና ሜላ ኢያ ኦꬂዳይሲ ኦዴታና» ያጊስ።
MAT 26:14 ሄ ዎዴ ታማኔ ናምዑ ዬሱሳ ታማሬታፔ ኢሶይ፥ ኣስቆሮታ ዪሁዳ ጌቴቴይሲ ካሂኔ ሃላቃታኮ፥
MAT 26:15 ቢዲ፥ «ታኒ ሂንቴው ዬሱሳ ኣꬃ ኢሚኮ፥ ሂንቴ ታው ኣይ ኢማኔ?» ያጊዲ ኤንታ ኦይቺስ። ኤንቲ ዞሬቲዲ ሃስታሙ ቢራ ሳንቲሜ ኢሚዶሶና።
MAT 26:16 ሄሳፌ ጉዬ፥ ዪሁዲ ዬሱሳ ኣꬂዲ ኢማናው ኢንጄቲያ ዎዴ ዎቼስ።
MAT 26:17 ኡይꬃ ባሌ ቦንቺያ ኮይሮ ጋላስ፥ ዬሱሳ ታማሬቲ ኢያኮ ዪዲ፥ «ፓሲካ ቦንቺያ ጋላስ ኔኒ ማና ካꬂ ኑኒ ኣዉን ጊጊሲኖ?» ያጊዶሶና።
MAT 26:18 ዬሱሲ ኤንታኮ፥ «ካታማን ዴዒያ ኣዲያኮ ቢዲ፥ ‹ኣስታማሬይ፥ ታው ዎዴይ ጋኪዳ ጊሾ ታ ታማሬታራ ፓሲካ ቦንቺያ ጋላሳ ኔ ሶን ኣꬃና ያጌስ› ያጊቴ» ያጊስ።
MAT 26:19 ኢያ ታማሬቲ ዬሱሲ ባንታና ኪቲዳይሳዳ ኦꬂዲ፥ ፓሲካ ባሌ ጋላስ ማና ካꬃ ጊጊሲዶሶና።
MAT 26:20 ሳዓይ ኦማርሲያ ዎዴ ዬሱሲ ታማኔ ናምዑ ሃዋሬታራ ካꬂ ማናው ኡቲስ።
MAT 26:21 ኤንቲ ሚሺን፥ ዬሱሲ ኤንታኮ፥ «ታኒ ሂንቴው ቱማ ኦዳይስ፤ ሂንቴፌ ኢሲ ኡራይ ታና ኣꬂዲ ኢማና» ያጊስ።
MAT 26:22 ኤንቲ ዳሮ ዳጋሚዲ፥ ሁዔን ሁዔን፥ «ጎዳው፥ ቱማ ታኔሻ?» ጊዲ ኢያ ኦይቺዶሶና።
MAT 26:23 ዬሱሲ ዛሪዲ፥ «ባ ኩሺያ ታራ ኢሲፌ ሻቲያን ዬዴይሲ ኢ ታና ኣꬂዲ ኢማና።
MAT 26:24 ኣሳ ናዓይ፥ ፆሳ ቃላን ኢያው ፃፌቲዳይሳዳ ሃይቃና። ሺን ኣሳ ናዓ ኣꬂዲ ኢሚያ ኡራ ኣዬ፤ ሄ ኡራይ ዬሌቶና ኣቲዳኮ ኢያው ሎዖሺን» ያጊስ።
MAT 26:25 ኢያ ኣꬂ ኢማናው ዴዒያ ዪሁዲ ዛሪዲ፥ «ኣስታማሪያው፥ ኔኒ ጌይ ታኔዬ?» ያጊስ። ዬሱሲ ዛሪዲ፥ «ኔኒ ኔ ሁዔን ጋዳሳ» ያጊስ።
MAT 26:26 ኤንቲ ሚሺን፥ ዬሱሲ ኡይꬃ ኤኪዲ ፆሳ ጋላቲስ። ሄ ኡይꬃ ሜንꬂዲ ባ ታማሬታስ ኢሚዲ፥ «ሄዒቴ፥ ሚቴ፥ ሃይሲ ታ ኣሹዋ» ያጊስ።
MAT 26:27 ፁዓ ኤኪዲ፥ ፆሳ ጋላቲስ። ኤንታው ኢሚዲ፥ «ኡባይ ሃይሳፌ ኡዪቴ።
MAT 26:28 ሃይሲ ዳሮ ኣሳ ናጋራይ ኣቶ ጌቴታና ሜላ ጉኪያ ታ ሱꬃ። ሃ ሱꬃይ ፆሳይ ሂንቴራ ጌሊያ ጫቁዋ ሚንꬄይሳ።
MAT 26:29 ሺን ታኒ ሂንቴው ኦዳይስ፤ ታኒ ታ ኣዋ ካዎቴꬃን ኦራꬃ ዎይኔ ኡሻ ሂንቴራ ኡያና ጋላሳ ጋካናው ናምዓንꬆ ሃ ዎይኔ ኡሻ ኡዪኬ» ያጊስ።
MAT 26:30 ጋላታ ማዝሙሬ ዬፂዳይሳፌ ጉዬ ሻማሆ ዴሪያ ቢዶሶና።
MAT 26:31 ሄ ዎዴ ዬሱሲ ኤንታኮ፥ « ‹ፆሳይ ሄንꬃንቹዋ ሾጫና ዶርሳቲካ ላሌታና› ጌቴቲዲ ፆሳ ቃላን ፃፌቲዳይሳ ሜላ ሃቺ ቃማ ሂንቴ ኡባይ ታና ኣጊዲ ባቃታና።
MAT 26:32 ሺን ታኒ ሃይቆፔ ዴንዲዳፔ ጉዬ ሂንቴፌ ሲንꬃታዳ ጋሊላ ባና» ያጊስ።
MAT 26:33 ጴፂሮሲ ዛሪዲ፥ «ኤንቲ ኡባይ ኔና ኣጊዲ ባቃቲኮካ፥ ታኒ ኔና ኣጊኬ» ያጊስ።
MAT 26:34 ዬሱሲ ጴፂሮሳኮ፥ «ታኒ ኔው ቱማ ኦዳይስ፤ ሃቺ ቃማ ኩቶይ ዋሳናፔ ሲንꬄ ኔኒ ታና ሄꬑ ቶሆ ካዳና» ያጊስ።
MAT 26:35 ጴፂሮሲ ዛሪዲ፥ «ታኒ ኔራ ኢሲፌ ሃይቆፔ ኣቲን ኔና ኡባካ ካዲኬ» ያጊስ። ሃንኮ ኢያ ታማሬቲ ኡባይካ ሄሳዳ ጊዶሶና።
MAT 26:36 ያቲዲ፥ ዬሱሲ ባ ታማሬታራ ጌቴሴማኔ ጊያ ቤሳ ቢዲ፥ ኤንታኮ፥ «ታኒ ሂኒ ባዳ ፆሳ ዎሳሻና፥ ሂንቴ ሃይሳን ኡቲቴ» ያጊስ።
MAT 26:37 ጴፂሮሳኔ ዛብዲዮሳ ናይታ ናምዓታ ባራ ኤኪ ቢዲ ዳሮ ኣዛኖኔ ኡንዔቴꬂ ዶሚስ።
MAT 26:38 ቃሲካ ኤንታኮ፥ «ታኒ ሃይቆስ ጋꬂያ ኡንዓ ኡንዔታስ። ሃይሳን ታራ ጋምዒቴኔ ሚኒዲ ናጊቴ» ያጊስ።
MAT 26:39 ጉꬂ ሲንꬄ ቢዲ ቢታን ጉፋኒዲ፥ «ታ ኣዋው፥ ዳንዳዔቲያባ ጊዲኮ ሃ ዋዬ ፁዓ ታፔ ዲጋ። ሺን ኔ ሼኔይ ሃኖፔ ኣቲን ታ ሼኔይ ሃኖፖ» ያጊዲ ፆሳ ዎሲስ።
MAT 26:40 ዬሱሲ ባ ታማሬታኮ ሲሚ ዪዲ ኤንቲ ꬊስኪዳሺን ዴሚስ። ጴፂሮሳኮ፥ «ሂንቴ ኢሲ ሳቴኮኔ ꬊስኮና ታራ ሚናናው ዳንዳዒቤኬቲ?
MAT 26:41 ፓጬን ሂንቴ ጌሎና ሜላ ባርኪዲ ናጊቴኔ ፆሳ ዎሲቴ። ሂንቴው ሎዖ ኣሞይ ዴዔስ፥ ሺን ሂንቴ ዳቡራንቾ ኣሲ» ያጊስ።
MAT 26:42 ዬሱሲ ቃሲ ናምዓንꬆ ቢዲ፥ «ታ ኣዋው፥ ታኒ ሃ ዋዬ ፁዓፔ ኡዮና ዴዒሼ ኣꬋናው ዳንዳዔቶናባ ጊዲኮ ኔ ሼኔይ ሃኖ» ያጊዲ ፆሳ ዎሲስ።
MAT 26:43 ቃሲካ ሲሚ ያ ዎዴ ኢያ ታማሬታ ኣይፊያ ꬊስኮይ ጎዚን፥ ዚንዒዳሺን ዴሚስ።
MAT 26:44 ቃሲካ ኤንታ ኣጊ ቢዲ፥ ካሴ ቃላ ዛሪ ሄꬓንꬆ ዎሲስ።
MAT 26:45 ሄሳፌ ጉዬ፥ ባ ታማሬታኮ ዪዲ፥ «ሃዒ ጋካናው ꬊስኬቲኔ ሼምፔቲ? ሄኮ፥ ኣሳ ናዓይ፥ ናጋራንቾታ ኩሼን ኣꬊ ኢሜቲያ ሳቴይ ጋኪስ።
MAT 26:46 ዴንዲዲ ዬꬊቴ፥ ታና ኣꬂዲ ኢሜይሲ ሃይሲሽ ጋኪስ» ያጊስ።
MAT 26:47 ዬሱሲ ቡሮ ሄሳ ሃሳዪሺን፥ ታማኔ ናምዑ ታማሬታፔ ኢሶይ፥ ዪሁዲ ጋኪ ዎꬊስ። ካሂኔ ሃላቃቲኔ ዴሪያ ጪማቲ ኪቲዳ ዳሮ ኣሳቲ ማሼኔ ፃምዓ ኦይኪዲ ኢያራ ኢሲፌ ዪዶሶና።
MAT 26:48 ዬሱሳ ኣꬂ ኢሚያ ዪሁዲ ሄ ዳሮ ኣሳኮ፥ «ታኒ ዬሬይሲ ሂንቴ ኮዬይሲ ኢያ፥ ኢያ ኦይኪቴ» ያጊዲ ማላ ኢሚ ዎꬂስ።
MAT 26:49 ኢራካ ዬሱሳኮ ሺቂዲ፥ «ኣስታማሪያው፥ ሳሮ ዴዓይ» ያጊዲ ኢያ ዬሪስ።
MAT 26:50 ዬሱሲ ኢያኮ፥ «ታ ላጊያው፥ ኔኒ ኦꬃናባ ኦꬃ ኣጋ» ያጊስ። ሄሳፌ ጉዬ፥ ሺቂዲ፥ ዬሱሳ ኦይኪዶሶና።
MAT 26:51 ዬሱሳራ ዴዔይሳታፔ ኢሶይ ባ ማሻ ሾዲዲ ካሂኔ ሃላቃ ኣይሊያ ሾጪዲ፥ ኢያ ሃይꬃ ቃንፂዲ ዬጊስ።
MAT 26:52 ሺን ዬሱሲ፥ «ኔ ማሻ ጉዬ ሾሁዋን ዛራ። ኣይስ ጊኮ፥ ማሻ ሾዲያ ኡባይ ማሻን ሃይቃና።
MAT 26:53 ታ፥ ታ ኣዋ ዎሲያኮ ዳሮ ሙኩሉን ታይቤቲያ ኪታንቾታ ዬዳናው ዳንዳዖናባ ኔው ዳኒ?
MAT 26:54 ያቲን፥ ፆሳ ቃላን ሄሳዳ ሃናናው ቤሴስ ጌቴቲዳይሲ ዋኒዲ ፖሌታኔ?» ያጊስ።
MAT 26:55 ሄ ሳቲያን፥ ዬሱሲ ሄ ሺቂዳ ዳሮ ኣሳኮ፥ «ታና ፓንጋ ኦꬂዲ ኦይካናው ማሼኔ ፃምዓ ኦይኪዲ ዪዴቲ? ታኒ ፆሳ ኬꬃን ጋላስ ጋላስ ታማርሳሼ ሂንቴራ ዴዒያ ዎዴ ታና ኦይኪቤኬታ።
MAT 26:56 ሺን ሃይሲ ኡባይ ሃኒዳይሲ ናቤቲ ፆሳ ቃላን ፃፊዳይሲ ፖሌታና ሜላሳ» ያጊስ። ሄ ዎዴ ኢያ ታማሬቲ ኡባይ ኢያ ኣጊዲ ባቃቲዶሶና።
MAT 26:57 ዬሱሳ ኦይኪዳይሳቲ ካሂኔ ሃላቃ ቃያፋኮ ኢያ ኤፊዶሶና። ያን ሂጌ ኣስታማሬቲኔ ቢታ ጪማቲ ሺቂዲ ዴዖሶና።
MAT 26:58 ሺን ጴፂሮሲ ካሂኔ ሃላቃ ዛባ ጋካናው ሃሆን ኢያ ካሊስ። ኢያ ዉርሴꬃይ ሻኬታና ጋካናው ዛባ ጌሊዲ ናጌይሳታራ ኡቲስ።
MAT 26:59 ካሂኔ ሃላቃቲኔ ሺቂዳ ኣሳ ኡባይ ዬሱሳ ዎꬋናው ኢያ ቦላ ዎርዶ ማርካ ኮዪዶሶና።
MAT 26:60 ዳሮቲ ዪዲ ኢያ ቦላ ዎርዶ ማርካ ማርካቲዶሶና፥ ሺን ኣይኮካ ዴሚቦኮና። ጉዬፔ ናምዑ ኣሳቲ ዪዲ፥
MAT 26:61 «ሃ ኡራይ፥ ‹ታኒ ፆሳ ኬꬃ ላላዳ ሄꬑ ጋላሳን ዛራ ኬፃናው ዳንዳዓይስ› ያጊስ» ያጊዶሶና።
MAT 26:62 ካሂኔታ ሃላቃይ ዴንዲ ኤቂዲ ዬሱሳኮ፥ «ሃይሳቲ ኔና ሞቲያ ሞቶዋስ ኔኒ ዛሪያባይ ባዌ?» ያጊስ።
MAT 26:63 ሺን ዬሱሲ ሲዒ ጊስ። ቃሲካ ካሂኔ ሃላቃይ፥ «ታኒ ኔና ዴዖ ፆሳ ሱንꬃን ኦይካይስ፤ ኔኒ ፆሳ ናዓ ኪሪስቶሳ ጊዲኮ ኑስ ኦዳ» ያጊስ።
MAT 26:64 ዬሱሲ ዛሪዲ፥ «ኔኒ ኔ ሁዔንካ ጋዳሳ። ሺን ታኒ ሂንቴው ኦዳይስ፤ ሂዛፔ ጉዬ፥ ኣሳ ናዓይ ዎልቃማ ፆሳ ኡሻቻ ባጋን ኡቲዳሺን፥ ቃሲ ሳሎ ሻራራ ዪሺን ሂንቴ ቤዓና» ያጊስ።
MAT 26:65 ሄ ዎዴ ካሂኔ ሃላቃይ ዳሮ ዪሎቲዲ ባ ማዑዋ ፔꬊዲ፥ «ሃይሳ ቤዒቴ ፆሳ ጫዪስ! ኑና ሃራ ማርካ ኣይ ኮሺ? ኢ ሃዒ ጫዪዳይሳ ሂንቴ ሲዒዴታ።
MAT 26:66 ሂንቴ ቆፋይ ኣይቤ?» ያጊስ። ኤንቲካ፥ «ኢያው ሃይቆ ቤሴስ» ያጊዲ ዛሪዶሶና።
MAT 26:67 ያቲን፥ ኤንቲ ኢያ ሶምዖን ጩቲዲ ዴቺዶሶና። ሃራቲ ኢያ ባቂዲ፥
MAT 26:68 «ኪሪስቶሳ! ኔና ዴቺዳይ ኦኔ? ኣኔ ኑስ ኦዳ» ያጊዶሶና።
MAT 26:69 ጴፂሮሲ ዛባን ኡቲዳሺን፥ ኢሲ ኣይሊያ ኢያኮ ያዳ፥ «ኔኒካ ጋሊላ ዬሱሳራ ኢሲፌ ዴዓሳ» ያጋሱ።
MAT 26:70 ሺን ኢ ኤንታ ኡባ ሲንꬃን ሄ ኣይሌኮ፥ «ኔኒ ጊያባይ ኣይቤኮ ታኒ ኤሪኬ» ያጊዲ ካዲስ።
MAT 26:71 ቃሲ ቢዲ ዲርሳ ፔንጌኮ ጋኪሺን ሃራ ኣይሊያ ኢያ ቤዓዳ፥ ያን ዴዒያ ኣሳኮ፥ «ሃ ኡራይ ናዚሬቴ ዬሱሳራ ዴዔስ» ያጋሱ።
MAT 26:72 ጴፂሮሲ ናምዓንꬆ ጫቂዲ፥ «ታኒ ሄ ኡራ ኤሪኬ!» ያጊስ።
MAT 26:73 ጉꬁ ጋምዒሺን፥ ያን ኤቂዳ ኣሳቲ ጴፂሮሳኮ ዪዲ፥ «ኔካ ቱማ ኤንታራ ኢሲፌ ዴዓሳ፤ ኔኒ ኔ ሃሳያን ኤሬታሳ» ያጊዶሶና።
MAT 26:74 ሄሳፌ ጉዬ፥ ጴፂሮሲ፥ «ታኒ ሄ ኡራ ኤሪኬ!» ያጊዲ፥ ባና ቃንጌꬂኔ ጫቆ ዶሚስ። ሄ ዎዴ ኢራካ ኩቶይ ዋሲ ኣጊስ።
MAT 26:75 ዬሱሲ ኢያኮ፥ «ኔኒ ኩቶይ ዋሳናፔ ሲንꬄ ታና ሄꬑ ቶሆ ካዳና» ጊዳይሳ ጴፂሮሲ ኣኬኪዲ፥ ካሬ ኬዪዲ ኢታ ዬሆ ዬኪስ።
MAT 27:1 ዎንታ ጉራ ካሂኔ ሃላቃቲኔ ቢታ ጪማቲ ኡባይ ዬሱሳ ዎꬊሳናው ማቄቲዶሶና።
MAT 27:2 ኤንቲ ዬሱሳ ቃቺ ኤፊዲ ዴሪያ ሃሪያ ጲላፆሳስ ኣꬂዲ ኢሚዶሶና።
MAT 27:3 ሄ ዎዴ ዬሱሳ ኦይꬂዳ ዪሁዲ፥ ጲላፆሲ ዬሱሳ ቦላ ፒርዲዳይሳ ቤዒዲ፥ ቂሮቲዲ፥ ሄ ሃስታሙ ቢራ ሳንቲሚያ ካሂኔ ሃላቃታሲኔ ዴሪያ ጪማታስ ጉዬ ዛሪስ።
MAT 27:4 «ታኒ ፂሎ ኣሲ ሃይቆስ ኣꬃ ኢማዳ ናጋራ ኦꬃስ» ያጊስ። ሺን ኤንቲ፥ «ሄሲ ኑ ሜቶ ጊዴና ኔ ሜቶ» ያጊዶሶና።
MAT 27:5 ዪሁዲ ሚሺያ ፆሳ ኬꬃን ዬጊ ኣጊዲ ኤንታ ማታፔ ቢዲ፥ ሱሌቲ ሃይቂስ።
MAT 27:6 ካሂኔ ሃላቃቲ ሚሺያ ኤኪዲ፥ «ሃ ሚሼይ ሱꬃ ሚሼ ጊዲያ ጊሾ ኑኒ ፆሳ ኬꬃ ሚሺያራ ጋꬄይሲ ዎጋ ጊዴና» ያጊዶሶና።
MAT 27:7 ሄሳፌ ጉዬ፥ ኢሲፌ ዞሬቲዲ፥ ቤቴ ኣሲ ሞጋናው ማና ቢታ ሻሚዶሶና።
MAT 27:8 ሄሳ ጊሾ፥ ሄ ጋዴይ ሃቺ ጋካናው ሱꬃ ቢታ ጌቴቲ ፄጌቴስ።
MAT 27:9 ናቢያ ኤርሚያሲ፥ «ኢስራዔሌ ኣሳይ ኢያው ቃንፃናው ጋማቲዳ ሃስታሙ ቢራ ሳንቲሜ ኤኪዶሶና።
MAT 27:10 ጎዳይ ታና ኪቲዳይሳዳ ማና ቢታ ሻማናው ኢሚዶሶና» ጊዳይሲ ሄ ዎዴ ፖሌቲስ።
MAT 27:11 ዬሱሲ ዴሪያ ሃሪያ ጲላፆሳ ሲንꬄ ሺቂን፥ ጲላፆሲ ኢያኮ፥ «ኔኒ ኣይሁዴ ካዎ?» ያጊዲ ኦይቺስ። ዬሱሲ ዛሪዲ፥ «ኔ ጋዳሳ» ያጊስ።
MAT 27:12 ካሂኔ ሃላቃቲኔ ቢታ ጪማቲ ኢያ ሞቲያ ዎዴ ኤንታው ኣይቢ ዛሮካ ኢሚቤና።
MAT 27:13 ሄ ዎዴ ጲላፆሲ ዬሱሳኮ፥ «ሃይሳቲ ኔና ሞቲያ ሞቱዋ ኡባ ሲዒኪ?» ያጊስ።
MAT 27:14 ዬሱሲ ሃሪ ኣቶሺን፥ ኢሲ ቃላካ ዛሮና ኢፂን፥ ዴሪያ ሃሬይሲ ዳሮ ማላሌቲስ።
MAT 27:15 ዴሪያ ሃሬይሲ ላይꬃን ላይꬃን ፓሲካ ባሌ ቦንቺያ ጋላሳን፥ ኣሳይ ኮያ ኢሲ ኣሲ ቃሾፔ ቢርሺያ ዎጊ ዴዔስ።
MAT 27:16 ሄ ዎዴ ኢሲ ባርባና ዬሱሳ ጊያ ዳሮ ኤሬቲዳ ኢታ ኣሲ ቃሾ ኬꬃን ዴዔስ።
MAT 27:17 ሄሳ ጊሾ፥ ዳሮ ኣሳይ ሺቂዲ ዴዒሺን ጲላፆሲ፥ «ታኒ ሂንቴው ባርባና ዬሱሳ ቢርሾዬ፥ ዎይኮ ዬሱሳ ጊያ ኪሪስቶሳ ቢርሾ?» ያጊዲ ኣሳ ኦይቺስ።
MAT 27:18 ኢ ሄሳ ጊዳይ ኤንቲ ቃናቲዲ ዬሱሳ ኦይꬂዳይሳ ኤሪያ ጊሾሳ።
MAT 27:19 ጲላፆሲ ፒርዳ ኬꬃን ኡቲዳሺን፥ ኢያ ማቺያ፥ «ታኒ ሃቺ ቃማ ኣሙሆን ኢያባ ዳሮ ዋዬታሼ ኣቂዳ ጊሾ ሄ ፂሎ ኡራ ቦላ ኣይቢባካ ኦꬆፋ» ያጋዳ ኪታሱ።
MAT 27:20 ሺን ካሂኔ ሃላቃቲኔ ዴሪያ ጪማቲ ጲላፆሲ ባርባና ቢርሺዲ፥ ዬሱሳ ዎꬋና ሜላ፥ ኣሳይ ኢያ ዎሳና ሜላ፥ ኣሳ ጪሚዶሶና።
MAT 27:21 ጲላፆሲ ዛሪዲ ኤንታኮ፥ «ታኒ ኤንታ ናምዓፌ ሂንቴው ኦና ቢላና ሜላ ኮዬቲ?» ያጊዲ ኦይቺስ። ኤንቲ፥ «ባርባና ቢላና ሜላ ኮዮስ» ያጊዶሶና።
MAT 27:22 ጲላፆሲ፥ «ያቲን፥ ዬሱሳ ጊያ ኪሪስቶሳ ዋቶ?» ያጊዲ ኤንታ ኦይቺስ። ኡባይ ዛሪዲ፥ «ማስቃሊያ ቦላ ኢያ ካቃ» ያጊዶሶና።
MAT 27:23 ጲላፆሲ ኣሳኮ፥ «ኣይስ? ኢ ኣይ ኢታባ ኦꬂዴ?» ያጊዲ ኦይቺስ። ሺን ኣሳይ ካሴይሳፌ ኣꬂዲ፥ «ማስቃሊያ ቦላ ኢያ ካቃ» ጊዲ ዋሲዶሶና።
MAT 27:24 ኦሺ ዴንꬄꬆፌ ሃራ ኣይቢባካ ኦꬃናው ዳንዳዔቶናይሳ ጲላፆሲ ቤዒዲ፥ ሃꬄ ኤኪዲ፥ «ሃ ኡራ ሃይቁዋን ታኒ ዴዒኬ። ሄሳ ኦꬄይ ሂንቴና» ያጊዲ ኣሳ ሲንꬃን ባ ኩሺያ ሜጬቲስ።
MAT 27:25 ኣሳ ኡባይ ዛሪዲ፥ «ኢያ ሱꬃ ጎሜይ ኑናኔ ኑ ናይታ ጋኮ» ያጊዶሶና።
MAT 27:26 ያቲን፥ ጲላፆሲ ባርባና ኤንታው ቢሊዲ፥ ዬሱሳ ሊሶን ጋራፊዲ፥ ማስቃሊያ ቦላ ካቄቲዲ ሃይቃና ሜላ ኤንታው ኣꬂዲ ኢሚስ።
MAT 27:27 ሄሳፌ ጉዬ፥ ጲላፆሳ ዎታዳሬቲ ዬሱሳ ዴሪያ ሃሬይሳ ሶ ኤኪ ኤፊን፥ ዎታዳሬቲ ኡባይ ኢያ ዩሹዋን ኤቂዶሶና።
MAT 27:28 ኢያ ኣፊላ ቃሪ ኤኪዲ ዞዖ ኣፊላ ማይዚዶሶና።
MAT 27:29 ቃሲ ኣጉንꬃ ካላቻ ጊጊሲዲ፥ ኢያ ሁዔን ዎꬂዶሶና። ኢያ ኡሻቻ ኩሺያን ማይሬ ፃምዓ ኦይꬂዲ፥ ኢያ ሲንꬃን ጉልባቲዲ፥ «ኣይሁዴ ካዋው፥ ሙኩሉ ላይꬂ ካዎታ!» ያጊዲ፥ ኢያ ቦላ ቄልቂሲዶሶና።
MAT 27:30 ኢያ ቦላ ጩቲዶሶና። ሄ ማይሬ ፃምዓ ኤኪዲ፥ ኢያ ሁዔን ሾጪዶሶና።
MAT 27:31 ኤንቲ ኢያ ቦላ ቄልቂሲዳይሳፌ ጉዬ ዞዖ ኣፊላ ኢያፔ ቃሪ ኤኪዲ፥ ኢያ ኣፊላ ኢያ ማይዚዶሶና። ማስቃሊያ ቦላ ኢያ ካቃናው ኤኪ ኤፊዶሶና።
MAT 27:32 ኤንቲ ካሬ ኬዪዲ፥ ኢሲ ሲሞና ጊያ ቄሬና ቢታ ኣሲ ዴሚዲ፥ ዬሱሳ ማስቃሊያ ዎልቃን ቶሲዶሶና።
MAT 27:33 ጎልጎታ ጊያ ቤሲ ጋኪዶሶና። «ጎልጎታ» ጉሳይ «ጉጌ ቤሲ» ጉሱ።
MAT 27:34 ሄሳን ኤንቲ ጪዬ ዋላኬቲዳ ዎይኔ ኡሻ ኡዮ ጊዲ ኢያው ኢሚዶሶና። ሺን ኢ ሄሳ ጋንፂ ኤኪዲ፥ ኡዮና ኢፂስ።
MAT 27:35 ኤንቲ ማስቃሊያ ቦላ ኢያ ካቂዳይሳፌ ጉዬ ኢያ ኣፊላ ሻኪዲ፥ ሳማ ዬጊዲ ኤኪዶሶና።
MAT 27:36 ሄሳፌ ጉዬ፥ ያን ኡቲዲ ኢያ ናጊዶሶና።
MAT 27:37 ቃሲ፥ «ሃይሲ ኣይሁዴ ካዉዋ ዬሱሳ» ያጊያ ሞቶ ፁፊያ ኢያ ሁዔ ሶን ዎꬂዶሶና።
MAT 27:38 ዬሱሳራ ሄ ዎዴ ናምዑ ፓንጋታ ኢሱዋ ኢያፔ ኡሻቻ ባጋን፥ ሃንኩዋ ኢያፔ ሃዲርሳ ባጋራ፥ ማስቃሊያ ቦላ ካቂዶሶና።
MAT 27:39 ኦጊያራ ኣꬊያ ኣሳይ ዬሱሳ ቦሪዲ፥ ኢያ ቦላ ጩቲሼ፥
MAT 27:40 «ፆሳ ኬꬃ ላላዳ ሄꬑ ጋላሳ ጊዶን ኬፄይሶ፥ ኔና ኣሻ። ኔኒ ፆሳ ናዓ ጊዲኮ፥ ኣኔ ማስቃሊያ ቦላፌ ዎꬋ» ያጊዶሶና።
MAT 27:41 ሄሳዳካ፥ ካሂኔ ሃላቃቲ፥ ሂጌ ኣስታማሬቲኔ ቢታ ጪማቲ ኢሲፌ ዬሱሳ ቦላ ቄልቂሲዶሶና። ሃይሳዳ ያጊዶሶና፡
MAT 27:42 «ሃራታ ኣሺስ፥ ሺን ባና ኣሻናው ዳንዳዒቤና። ኢ ኢስራዔሌ ካዎ ጊዲኮ፥ ኣኔ ማስቃሊያ ቦላፌ ሃዒ ዎꬎ፥ ኑካ ኢያ ኣማናና።
MAT 27:43 ፆሳን ኢ ኣማኔቴስ፥ ፆሳይ ኢያ ኣሻናው ኮይኮ ኣኔ ኣሾ። ኣይስ ጊኮ፥ ኢ ባና፥ ‹ታኒ ፆሳ ናዓ› ጌስ» ያጊዶሶና።
MAT 27:44 ቃሲ ሃሪ ኣቶሺን፥ ኢያራ ማስቃሊያ ቦላ ካቄቲዳ ፓንጋቲካ ሄሳዳ ጊዲ ኢያ ቦላ ቄልቂሲዶሶና።
MAT 27:45 ኡሱፑን ሳቴፔ ቢዲ፥ ኡዱፉን ሳቴ ጋካናው ቢታ ኡባይ ꬉሚስ።
MAT 27:46 ኡዱፉን ሳቴ ጊዲያ ዎዴ ዬሱሲ፥ «ኤሎሄ፥ ኤሎሄ፥ ላማ ሳባቂታኒ?» ጊዲ ጊታ ዋሶ ዋሲስ። «ኤሎሄ፥ ኤሎሄ፥ ላማ ሳባቂታኒ?» ጌይሳ ቢርሼꬃይ «ታ ፆሳው፥ ታ ፆሳው፥ ታና ኣይስ ኣጋዲ?» ጉሱ።
MAT 27:47 ሄሳን ኤቂዳ ኣሳፔ ኢሶቲ ኢሶቲ ሄሳ ሲዒዲ፥ «ሃ ኡራይ ኤሊያሳ ፄጌስ» ያጊዶሶና።
MAT 27:48 ኢራ ኤንታፌ ኢሶይ ዎፂ ቢዲ፥ ኢስፖንጄ ኤኪዲ፥ ጫላ ዎይኔ ኡሻ ኩንꬂስ። ሄሳ ማይሬ ፃምዓ ፄራን ዎꬂዲ ኡሻናው ኢያ ዶናኮ ሺሺስ።
MAT 27:49 ሺን ሃንኮቲ፥ «ናጋ፥ ኤሊያሲ ኢያ ኣሻናው ያኔኮ ኣኔ ቤዖስ» ያጊዶሶና።
MAT 27:50 ዬሱሲ ናምዓንꬆ ጊታ ዋሶ ዋሲዲ፥ ሃይቂ ኣጊስ።
MAT 27:51 ሄ ሳቴን ፆሳ ኬꬃን ካቄቲዳ ማጋራጆይ ቆሞፌ ዱጌ ጋካናው ናምዑ ኬዪዲ፥ ፔꬌቲ ዎꬊስ። ቢታይ ቃፂስ፥ ዛላይካ ጳልቄቲስ።
MAT 27:52 ዱፎቲ ዶዬቲን ፆሳ ኣሳታፔ ዳሮቲ ሃይቆፔ ዴንዲዶሶና።
MAT 27:53 ኤንቲ ዱፎፔ ኬዪዲ፥ ዬሱሲ ሃይቆፔ ዴንዲዳይሳፌ ጉዬ ጌሻ ካታማ ቢዶሶና፤ ያን ኤንቲ ዳሮ ኣሳስ ቤንቲዶሶና።
MAT 27:54 ማቶ ሃላቃይኔ ኢያራ ዬሱሳ ናጊያ ዎታዳሬቲ ቢታይ ቃፂዳይሳኔ ሄሳን ሃኒዳባ ቤዒዳ ዎዴ ዳሮ ያዪዲ «ቱማ ሃይሲ ፆሳ ናዓ» ያጊዶሶና።
MAT 27:55 ሄሳን ዳሮ ማጫሳቲ፥ ጋሊላፔ ዶሚዲ ዬሱሳ ሃጋዚሼ ካሊዳይሳቲ ሃሆን ኤቂዲ ፄሎሶና።
MAT 27:56 ኤንታ ጊዶን ማግዴላ ማይራማ፥ ያይቆባኔ ዮሴፋ ኣያ ማይራማኔ ዛብዲዮሳ ማቺያ ዴዖሶና።
MAT 27:57 ሳዓይ ኦማርሲያ ዎዴ ዮሴፋ ጊያ ኢሲ ዱሬ ኡራይ፥ ኣርማቲያሳ ካታማፔ ዪስ። ኢ ባ ሁዔንካ ዬሱሳ ካሊያ ኣሲ።
MAT 27:58 ዮሴፊ ጲላፆሳኮ ቢዲ፥ ዬሱሳ ኣሃ ኤካናው ዎሲስ። ጲላፆሲ ኣሃይ ዮሴፋስ ኢሜታና ሜላ ኪቲስ።
MAT 27:59 ዬሱሳ ኣሃ ኤኪዲ፥ ጌሻ ሞጎ ኣፊላን ፃፂስ።
MAT 27:60 ባው ሞጌታናው ሹቻፌ ዎጪዳ ኦራꬃ ጎንጎሎን ኢያ ኣሃ ዎꬂስ። ቃሲ ሄ ጎንጎሉዋ ዶናን ጊታ ሹቻ ጎንዶርሲ ዎꬂዲ ኣጊ ቢስ።
MAT 27:61 ማግዴላ ማይራማኔ ሃንኮ ማይራማ ሄ ጎንጎሉዋኮ ሲሚዲ ኡቲዶሶና።
MAT 27:62 ዎንቴꬄ ሳምባታ ጋላስ፥ ካሂኔ ሃላቃቲኔ ፋሪሳዌቲ ጲላፆሳኮ ዪዲ፥ ሃይሳዳ ያጊዶሶና፡
MAT 27:63 «ጎዳው፥ ሃ ዎርዳንቾይ ፓፃ ዴዒሼ፥ ‹ታኒ ሄꬑ ጋላሳፔ ጉዬ ሃይቆፔ ዴንዳና› ያጊዳይሲ ኑስ ሃሳዬቲስ።
MAT 27:64 ሄሳ ጊሾ፥ ኢ ሞጌቲዳ ጎንጎሉዋ ሄꬑ ጋላስ ጋካናው፥ ሚንꬂ ናጋና ሜላ ኪታርኪ። ሄሲ ሃኖና ኢፂኮ፥ ኢያ ታማሬቲ ቢዲ ኢያ ኣሃ ካይሲ ꬋይሲዲ፥ ‹ሃይቆፔ ዴንዲስ› ያጊዲ ኣሳስ ኦዲኮ ናምዓንꬆ ባሌሶይ ኮይሮይሳፌ ኡባ ሃ ኢታና» ያጊዶሶና።
MAT 27:65 ጲላፆሲ ኤንታኮ፥ «ሂንቴው ናጌይሳቲ ዴዖሶና፤ ቢዲ ሂንቴው ዳንዳዔቲዳ ሜላ ናጊሲቴ» ያጊስ።
MAT 27:66 ሄሳ ጊሾ፥ ኤንቲ ቢዲ ዱፎይ ቦሼቶና ሜላ ሹቻ ቦላ ማታሜ ዎꬂዲ ዎታዳሬታን ናጊሲዶሶና።
MAT 28:1 ሳምባቲ ኣꬊን ዎጋ ዎዴ ዎንታ ጉራ፥ ማግዴላ ማይራማኔ ሃንኮ ማይራማ ዬሱሲ ሞጌቲዳ ጎንጎሉዋ ቤዓናው ቢዶሶና።
MAT 28:2 ቆፖና ዎልቃማ ቢታ ቃፆይ ሃኒስ። ጎዳ ኪታንቾይ ሳሎፔ ዎꬊዲ ዱፉዋ ዶናን ዴዒያ ሹቻ ጎንዶርሲዲ ኢያ ቦላ ኡቲስ።
MAT 28:3 ኢያ ማላይ ዎልዓንꬂ ዳኔስ። ኢያ ማዖይካ ሻቻዳ ቦꬂ።
MAT 28:4 ናጌይሳቲ ኪታንቹዋ ቤዒዲ፥ ያሻን ኮኮሪዲ፥ ሃይቂዳ ኣሳዳ ሃኒዶሶና።
MAT 28:5 ኪታንቾይ ማጫሳታኮ፥ «ሂንቴ ማስቃሊያ ቦላ ካቄቲዳ ዬሱሳ ኮዬይሳ ታኒ ኤሪያ ጊሾ ያዮፊቴ።
MAT 28:6 ኢ ካሴ ኦዲዳይሳ ሜላ ሃይቆፔ ዴንዲስ፤ ሃይሳን ዴና። ሃ ዪዲ ኢያ ዚንዒሲዳ ቤሳ ቤዒቴ።
MAT 28:7 ሂንቴ ሃዒ ኤሌሲ ቢዲ፥ ኢያ ታማሬታስ፥ ‹ዬሱሲ ሃይቆፔ ዴንዲስ። ቃሲ ኢ ሂንቴፌ ሲንꬃቲዲ ጋሊላ ባና፤ ሂንቴ ኢያ ያን ቤዓና› ያጊዲ ኦዲቴ። ታኒ ሂንቴው ሃይሳ ኦዳናው ያስ» ያጊስ።
MAT 28:8 ኤንቲ ያዪሼኔ ዳሮ ኡፋይቲሼ፥ ዱፉዋ ማታፔ ኤሌሲዲ ቢዲ፥ ኢያ ታማሬታስ ኦዳናው ዎፂዶሶና።
MAT 28:9 ቆፖና ዬሱሲ ኤንታራ ጋሄቲዲ ኤንታኮ፥ «ሳሮይ ሂንቴው ጊዶ» ያጊስ። ኤንቲ ኢያኮ ሺቂዲ፥ ኢያ ቶሁዋ ኦይኪዲ ኢያው ጎይኒዶሶና።
MAT 28:10 ሄ ዎዴ ዬሱሲ ኤንታኮ፥ «ያዮፊቴ፤ ቢዲ ታ ታማሬቲ ጋሊላ ባና ሜላ ኤንታው ኦዲቴ። ኤንቲ ያን ታና ቤዓና» ያጊስ።
MAT 28:11 ሄ ማጫሳቲ ቢሺን፥ ዱፉዋ ናጊያ ዎታዳሬታፔ ባጋቲ ካታማ ቢዲ፥ ሃኒዳባ ኡባ ካሂኔ ሃላቃታስ ኦዲዶሶና።
MAT 28:12 ካሂኔ ሃላቃቲኔ ጪማቲ ሺቂዲ ዞሬቲዲ፥ ዎታዳሬታስ ዳሮ ሚሼ ኢሚዲ፥
MAT 28:13 « ‹ኑኒ ꬊስኪዳሺን ኢያ ታማሬቲ ቃማ ዪዲ፥ ኢያ ኣሃ ካይሲዶሶና› ያጊቴ።
MAT 28:14 ሃ ኦዳ ዴሪያ ሃሬይሲ ሲዒኮ፥ ሄሲ ሂንቴ ባላ ጊዶናይሳ ኑኒ ኢያ ኦዲ ኣማንꬃና። ሂንቴና ኣይቢካ ሂርጊሶፖ» ያጊዶሶና።
MAT 28:15 ዎታዳሬቲ ሚሺያ ኤኪዲ፥ ኪቴቲዳይሳዳ ኦꬂዶሶና። ሃ ኦዳይ ኣይሁዴ ማታን ሃቺ ጋካናው ኦዴቲሼ ዴዔስ።
MAT 28:16 ታማኔ ኢሲ ኢያ ታማሬቲ ዬሱሲ ባንታና ቢቴ ጊዳ ጋሊላ ዴሪያ ቦላ ቢዶሶና።
MAT 28:17 ያን ኤንቲ ኢያ ቤዒዳ ዎዴ ኢያው ጎይኒዶሶና፥ ሺን ኤንታፌ ኢሶቲ ኢሶቲ ሲꬊዶሶና።
MAT 28:18 ዬሱሲ ኤንታኮ ሺቂዲ፥ «ሳሎኒኔ ሳዓን ማቲ ኡባይ ታው ኢሜቲስ።
MAT 28:19 ሂዛ፥ ሂንቴ ኡባ ቤሲ ቢዲ፥ ኣዋ፥ ናዓ፥ ጌሻ ኣያና ሱንꬃን ኣሴ ኡባ ፃማቂዲ ታና ካሌይሳታ ኦꬂቴ።
MAT 28:20 ታኒ ሂንቴና ኪቲዳባ ኡባ ኤንቲ ናጋና ሜላ ኤንታ ታማርሲቴ። ታኒ ዎዲያ ዉርሴꬃ ጋካናው ኡባ ዎዴ ሂንቴራ ዴዓይስ» ያጊስ።
MAR 1:1 ሃይሲ ፆሳ ናዓ ዬሱስ ኪሪስቶሳ ዎንጌላ ዶሜꬃ።
MAR 1:2 ናቢያ ኢሳያሲ ፃፊዳ ማፃፋን ፆሳይ፥ «ሄኮ፥ ታኒ ታ ኪታንቹዋ ኔፔ ሲንꬄ ዬዳና። ኢ ኔ ኦጊያ ጊጊሳና።
MAR 1:3 ኢሶይ ባዞ ጊዶን ባ ቃላ ꬎቁ ኦꬂዲ፥ ‹ጎዳ ኦጊያ ጊጊሲቴ፤ ኢ ሃሙታና ሆሮጋ ኢያው ሱሪሲቴ ጊስ› » ያጌስ።
MAR 1:4 ፃማቂያ ዮሃኒሲ ኣሳ ፃማቂሼ፥ «ሂንቴ ናጋራፔ ሲሚዲ ፃማቄቲቴ፤ ፆሳይ ሂንቴ ናጋራ ኣቶ ጋና» ያጊዲ ቃላ ኦዲሼ ባዞ ቢታፌ ዪስ።
MAR 1:5 ዪሁዳ ቢታን ዴዒያ ኣሳይ ኡባይኔ ዬሩሳላሜ ካታማ ኣሳ ኡባይ ዮሃኒሳኮ ዮሶና። ባንታ ናጋራ ፓፂን፥ ዮሃኒሲ ኤንታ ዮርዳኖሴ ሻፋን ፃማቄስ።
MAR 1:6 ዮሃኒሲ ጊማሌ ኢኪሴፔ ዳዴቲዳ ኣፊላ ማዔስ። ባ ፄሳን ዳፎ ዳንጬስ፤ ቃሲ ቦሌኔ ዴጌራ ኤሲ ሜስ።
MAR 1:7 ዮሃኒሲ ቃላ ኦዲሼ፥ «ታፔ ጉዬራ ዳሮ ሚኔይሲ ዬስ። ሃሪ ኣቶሺን፥ ታኒ ኢያ ጫማ ዎዶሩዋ ሆካዳ ቢላናው ቤሲኬ።
MAR 1:8 ታኒ ሂንቴና ሃꬃን ፃማቃይስ፥ ሺን ኢ ሂንቴና ጌሻ ኣያናን ፃማቃና» ያጊስ።
MAR 1:9 ዬሱሲ ሄ ዎዴ ጋሊላ ቢታን ዴዒያ ናዚሬቴ ካታማፔ ዪን፥ ዮሃኒሲ ዮርዳኖሴ ሻፋን ኢያ ፃማቂስ።
MAR 1:10 ዬሱሲ ሃꬃፌ ኬያ ዎዴ ሳሎይ ዶዬቲን፥ ጌሻ ኣያናይ ባ ቦላ ሆሌዳ ዎꬊሺን ቤዒስ።
MAR 1:11 ቃሲ ሳሎፔ፥ «ታኒ ዶሲያ ታ ናዓይ ኔና፤ ታ ኔናን ኡፋይታይስ» ያጊያ ቃላይ ዪስ።
MAR 1:12 ኢራ ጌሻ ኣያናይ ዬሱሳ ባዞ ቢታ ኤፊስ።
MAR 1:13 ዬሱሲ ባዞ ቢታን ፃላሄን ፓጬቲሼ ኦይታሙ ጋላስ ጋምዒስ። ዶዓታራ ዴዒስ፥ ሺን ኪታንቾቲ ዪዲ ኢያ ማዲዶሶና።
MAR 1:14 ዮሃኒሲ ቃሼቲዳፔ ጉዬ ዬሱሲ ፆሳ ካዎቴꬃ ዎንጌላ ኦዲሼ ጋሊላ ቢታ ቢስ።
MAR 1:15 ያን፥ «ዎዴይ ጋኪስ፤ ፆሳ ካዎቴꬃይ ማታቲስ። ሂንቴ ናጋራፔ ሲሚዲ፥ ዎንጌላን ኣማኒቴ» ያጊስ።
MAR 1:16 ዬሱሲ ጋሊላ ኣባ ማታራ ኣꬊሼ፥ ሞሎ ኦይኪያ፥ ሲሞናኔ ኢያ ኢሻ ኢንዲሪያሳ፥ ባንታ ጊቲያ ኣባን ዬጌይሳታ ቤዒስ።
MAR 1:17 ኤንታኮ፥ «ታና ካሊቴ፤ ታኒ ሂንቴና ኣሴ ኦይꬁ ታማርሳና» ያጊስ።
MAR 1:18 ኤንቲ ሶሁዋራ ባንታ ጊቲያ ዬጊ ኣጊዲ ዬሱሳ ካሊዶሶና።
MAR 1:19 ዬሱሲ ጉꬂ ሲንꬄ ቢዲ፥ ናምዑ ኢሻታ ዛብዲዮሳ ናይታ፥ ያይቆባኔ ዮሃኒሳ ዎጎሉዋ ጊዶን ባንታ ጊቲያ ጊጊሴይሳታ ቤዒስ።
MAR 1:20 ኢ ኤንታ ቤዒዳ ሜላ ፄጊስ። ኤንቲ ባንታ ኣዋ ዛብዲዮሳ፥ ኢያ ኦሳንቾታራ ዎጎሉዋ ጊዶን ዬጊ ኣጊዲ ዬሱሳ ካሊዲ ቢዶሶና።
MAR 1:21 ኤንቲ ቂፊርናሆሜ ካታማ ጌሊዶሶና። ሳምባቲ ጌሊዳ ሜላ ዬሱሲ ኤሌሲዲ ኣይሁዴ ዎሳ ኬꬂ ጌሊዲ ታማርሶ ኦይኪስ።
MAR 1:22 ማታራ ዴዒያ ኣሳዳ ታማርሴሲፔ ኣቲን ሂጌ ኣስታማሬታꬆ ታማርሶና ጊሾ ኣሳይ ኢያ ቲሚርቲያን ማላሌቲዶሶና።
MAR 1:23 ሄ ዎዴ ቱና ኣያናይ ኦይኪዳ ኢሲ ኡራይ ኣይሁዴ ዎሳ ኬꬂ ጌሊዲ ባ ቃላ ꬎቁ ኦꬂዲ፥
MAR 1:24 «ናዚሬቴ ዬሱሳ፥ ኔኒ ኑፔ ኣይ ኮያይ? ኑና ꬋይሳናው ያዲ? ኔኒ ኦኔኮ ታ ኤራይስ፤ ኔኒ ፆሳ ጌሻ ጊዲኪ?» ያጊስ።
MAR 1:25 ዬሱሲ ሄ ቱና ኣያና፥ «ሃይዛ፥ ሃ ኣዲያፌ ኬያ» ጊዲ ኪቲስ።
MAR 1:26 ቱና ኣያናይ ኡራ ዳፌሬꬂዲ፥ ዋሲዲ ኢያፔ ኬዪስ።
MAR 1:27 ኣሳይ ኡባይ ማላሌቲዲ፥ «ሃይሲ ኣይቤ? ሃ ኡራይ ባ ማታን ሃሪ ኣቶሺን ቱና ኣያናታካ ኪቴስ። ኤንቲ ኢያው ኪቴቶሶና፤ ሃይሲ ኣይቢ ኦራꬃ ቲሚርቴ?» ጊዲ፥ ባንታ ጊዶን ኢሶይ ኢሱዋ ኦይቺዶሶና።
MAR 1:28 ዬሱሳ ሱንꬃይ ኤሌሲዲ ጋሊላ ቢታን ዴዒያ ሄራ ኡባን ኬዪስ።
MAR 1:29 ዬሱሲ ኣይሁዴ ዎሳ ኬꬃፌ ኬዪዲ፥ ያይቆባራኔ ዮሃኒሳራ ሲሞና ሶኔ ኢንዲሪያሳ ሶ ቢስ።
MAR 1:30 ሲሞና ማቼ ኣያ ቆፆ ሚሻ ሃርጋዳ ዚንዒዳሮ ዬሱሲ ያ ጋኪያ ዎዴ ኢያው ኦዲዶሶና።
MAR 1:31 ኢ ኢኮ ሺቂዲ፥ ኢ ኩሺያ ኦይኪዲ፥ ኢዮ ዴንꬂ ኤሲስ። ቆፆይኔ ሚሻይ ኣጊን ኢያ ኤንታ ሞካሱ።
MAR 1:32 ሃርጊዳ ኣሳ ኡባኔ ቱና ኣያናቲ ኦይኪዳ ኣሳ ኡባ ኦማርሲ ኣዋይ ዉሊዳፔ ጉዬ ኢያኮ ኤሂዶሶና።
MAR 1:33 ካታማን ዴዒያ ኣሳ ኡባይ ሄ ኬꬃ ካሬ ሺቂዶሶና።
MAR 1:34 ዬሱሲ ዱማ ዱማ ሃርጌን ኦይኬቲዳ ዳሮ ኣሳ ፓꬂዲ፥ ዳሮ ቱና ኣያናታ ኬሲስ። ኢ ኦኔኮ ቱና ኣያናቲ ኤሪዳ ጊሾ ኤንታ ኦዲሶና ዲጊስ።
MAR 1:35 ዬሱሲ ዎንታ ጉራ ዴንዲዲ፥ ኣሲ ባይና ቤሲ ቢዲ፥ ያን ፆሳ ዎሲስ።
MAR 1:36 ሲሞኒኔ ኢያራ ዴዔይሳቲ ኢያ ኮዪሼ ቢዶሶና።
MAR 1:37 ኤንቲ ኢያ ዴሚዲ፥ «ኣሳይ ኡባይ ኔና ኮዬስ» ያጊዶሶና።
MAR 1:38 ዬሱሲ ቃሲ ኤንታ፥ «ሄ ሄራን ዴዒያ ሃራ ካታማታ ዬꬊቴ። ታኒ ዪዳይ ዎንጌላ ኦዳናው ጊዲያ ጊሾ ያንካ ቃላ ኦዳናው ቤሴስ» ያጊስ።
MAR 1:39 ኣይሁዴ ዎሳ ኬꬃታን ቃላ ኦዲሼኔ ቱና ኣያናታ ኬሲሼ፥ ጋሊላ ቢታ ኡባን ዩዪስ።
MAR 1:40 ባሮይ ኦይኪዳ ኢሲ ኡራይ ዬሱሳኮ ዪዲ፥ ኢያ ሲንꬃን ጉልባቲዲ፥ «ኔኒ ኮይኮ ታና ጌሻናው ዳንዳዓሳ» ያጊዲ ዎሲስ።
MAR 1:41 ዬሱሲ ኢያው ቃꬌቲዲ፥ ባ ኩሺያ ዬዲዲ ኢያ ቦቺዲ፥ «ታኒ ኮያይስ፥ ጌያ» ያጊስ።
MAR 1:42 ሶሁዋራ ባሮይ ኡራ ዬዲን ኡራይ ፓፂስ።
MAR 1:43 ዬሱሲ ኡራ ሚንꬂ ናጊሲዲ ኬሲ ዬዲስ።
MAR 1:44 ዬሱሲ ኢያ፥ «ኔና ኤራ፥ ሃይሳ ኦዴስካ ኦዶፓ። ሺን ባዳ ኔ ኣሳቴꬃ ካሂኔ ቤሳ። ኔኒ ሃዒ ጌሺ ጊዲዳይሳ ኣሳ ኤሪሳናው፥ ሙሴይ ኪቲዳ ያርሹዋ ያርሻ» ያጊስ።
MAR 1:45 ሺን ኡራይ ቢዲ፥ ጉታ ኡባን ኣሳ ኡባስ ኦዲስ። ሄሳ ጊሾ፥ ዬሱሲ ቆንጬ ኬዪዲ፥ ካታማ ጌላናው ዳንዳዒቤና። ሺን ኣሲ ባይናሶን ጋፃን ዴዒስ፤ ቃሲ ኣሳይ ኡባ ቤሳፌ ኢያኮ ዮሶና።
MAR 2:1 ጉꬃ ጋላሳፔ ጉዬ ዬሱሲ ቂፊርናሆሜ ሲሚዲ፥ ሶን ዴዔስ ጊያ ኦዳይ ሲዔቲስ።
MAR 2:2 ኣሳ ኬꬃይ ኤኮና ኢፂን፥ ሃሪ ኣቶሺን ካሬይካ ፁማና ጋካናው ዳሮ ኣሳይ ሺቂን፥ ዬሱሲ ቃላ ታማርሲስ።
MAR 2:3 ኦይዱ ኣሳቲ ኢሲ ጉንዳ ኡራ ቶኪዲ ኢያኮ ኤሂዶሶና።
MAR 2:4 ኣሳይ ዳሪዳ ጊሾ ኡራ ዬሱሳኮ ሺሻናው ኤንታው ዳንዳዔቶና ኢፂን፥ ዬሱሲ ዴዒያ ጊናራ ኬꬃ ቃሪዲ፥ ካራ ቃዉፂዲ ኡራ ኢ ዚንዒዳ ኣልጋራ ዱጌ ዬዲዲ ዬሱሳ ሲንꬃን ዎꬊሲዶሶና።
MAR 2:5 ዬሱሲ ኤንታ ኣማኑዋ ቤዒዲ፥ ሄ ጉንዳ ኡራ፥ «ታ ናዓው፥ ኔ ናጋራይ ኣቶ ጌቴቲስ» ያጊስ።
MAR 2:6 ሂጌ ኣስታማሬታፔ ሄ ቤሳን ኡቲዳ ኢሶቲ ኢሶቲ ባንታ ዎዛናን፥
MAR 2:7 «ላ ሃ ኡራይ ሃይሳ ሜላ ኢታባ ፆሳ ቦላ ኣይስ ኦዴቲ? ፆሳ ፃላላፔ ኣቲን ሃሪ ኦኒ ናጋራ ኣቶ ጋናው ዳንዳዒ?» ጊዲ ቆፒዶሶና።
MAR 2:8 ኤንቲ ባንታ ዎዛናን ሄሳዳ ቆፒዳይሳ ዬሱሲ ሶሁዋራ ባ ኣያናን ኤሪዲ፥ ኤንታኮ፥ «ሂንቴ ሂንቴ ዎዛናን ኣይስ ሄሳዳ ቆፔቲ?
MAR 2:9 ጉንዳ ኡራ፥ ‹ኔ ናጋራይ ኣቶ ጌቴቲስ› ጌይሲ ማቴዬ? ዎይኮ፥ ‹ዴንዳ ኤቃዳ ኔ ኣልጋ ቶካዳ ባ› ጌይሲ ማቴ?
MAR 2:10 ሺን ታው፥ ኣሳ ናዓስ፥ ሳዓ ቦላ ናጋራ ኣቶ ጋናው ማቲ ዴዔይሳ ሂንቴ ኤራና ሜላ» ጊዲ ሄ ጉንዳ ኡራኮ፥
MAR 2:11 «ኔና ጋይስ፥ ዴንዳ ኤቃዳ ኔ ኣልጋ ቶካዳ ኔ ሶ ባ» ያጊስ።
MAR 2:12 ኡራይ ኤሌሲ ዴንዲ ኤቂዲ፥ ባ ኣልጋ ቶኪዲ ኣሳ ኡባይ ቤዒሺን ቢስ። ኣሳይ ኡባይ ማላሌቲዲ፥ «ኑኒ ሃይሳ ሜላ ማላሊሲያባ ቤዒ ኤሮኮ» ያጊዲ ፆሳ ጋላቲዶሶና።
MAR 2:13 ዬሱሲ ቃሲ ጋሊላ ኣባ ዶና ሲሚ ቢዲ፥ ባኮ ዪዳ ኣሳ ኡባ ታማርሲስ።
MAR 2:14 ያራ ኣꬊሼ፥ ኢልፊዮሳ ናዓ ሌዌ ጌቴቴይሲ ቃራፃ ቃንፂሲያ ቤሳን ኡቲዳይሳ ቤዒዲ፥ «ታና ካላ» ያጊስ። ሌዌይ ዴንዲ ኤቂዲ ኢያ ካሊስ።
MAR 2:15 ዬሱሲ ካꬂ ማናው ሌዌ ሶን ኡቲስ። ኢያ ካሊያ ኣሳይ ዳሮ ጊዲያ ጊሾ ቃራፃ ቃንፂሲያ ዳሮ ኣሳይኔ ናጋራንቾቲ ኢያራኔ ኢያ ታማሬታራ ኢሲፌ ኡቲዶሶና።
MAR 2:16 ሂጌ ኣስታማሬ ጊዲዳ ኢሲ ኢሲ ፋሪሳዌቲ ዬሱሲ ናጋራንቾታራኔ ቃራፃ ቃንፂሴይሳታራ ካꬂ ሚሺን ቤዒዲ፥ «ኢ ኣይስ ናጋራንቾታራኔ ቃራፃ ቃንፂሴይሳታራ ካꬂ ሚ?» ያጊዲ፥ ኢያ ታማሬታ ኦይቺዶሶና።
MAR 2:17 ዬሱሲ ኤንቲ ጌይሳ ሲዒዲ፥ «ሃርጋንቾታፔ ኣቲን ፓፃታስ ኣኪሜ ኮሼና። ታኒ ናጋራንቾታ ፄጋናው ያሲፔ ኣቲን ፂሎታ ፄጋናው ያቢኬ» ያጊዲ ኤንታው ዛሪስ።
MAR 2:18 ፃማቂያ ዮሃኒሳ ታማሬቲኔ ፋሪሳዌቲ ፆሞሶና። ኢሲ ኢሲ ኣሳቲ ዬሱሳኮ ዪዲ፥ «ዮሃኒሳ ታማሬቲኔ ፋሪሳዌታ ታማሬቲ ፆሞሶና፥ ሺን ኔ ታማሬቲ ኣይስ ፆሞኮና?» ያጊዶሶና።
MAR 2:19 ዬሱሲ ኤንታኮ፥ «ያጋኑዋ ዪዳ ኣሳቲ ማቺው ኤኬይሲ ኤንታራ ዴዒሺን፥ ፆማናው ዳንዳዖና? ማቺው ኤኬይሲ ኤንታራ ዴዒሺን፥ ፆማናው ዳንዳዖኮና።
MAR 2:20 ሺን ማቺው ኤኬይሲ ኤንታ ማታፔ ኤኬታና ዎዴይ ያና፥ ኤንቲ ሄ ዎዴ ፆማና።
MAR 2:21 «ጬጋ ማዖ ቦላ ኦራꬃ ዎꬂዲ ሲኪያ ኣሲ ባዋ። ዎꬂዲ ሲኪኮ፥ ኦራꬃይ ጬጋ ማዑዋ ዳኬስ፤ ዳኬꬃይካ ካሴይሳፌ ዳሬስ።
MAR 2:22 ቃሲ ማልዓንቶ ዎይኔ ጬጋ ኦጎሮን ቆሊያ ኣሲ ባዋ። ሺን ቆሊኮ፥ ሄ ዎይኔይ ኦጎሩዋ ዳኬስ፥ ባዉካ ጉኬስ፥ ኦጎሮይካ ኢቴስ። ሺን ማልዓንቶ ዎይኔይ ኦራꬃ ኦጎሮን ቆሌቴስ» ያጊስ።
MAR 2:23 ዬሱሲ ኢሲ ሳምባታ ጋላስ ባንጋ ጋዴ ጊዶራ ኣꬊሺን፥ ኢያ ታማሬቲ ኢያራ ቢሼ ባንጋ ቲያ ሺርኪዲ ሞሶና።
MAR 2:24 ፋሪሳዌቲ ዬሱሳኮ፥ «ሄኮ፥ ኔ ታማሬቲ ሳምባታ ጋላስ ዎጋ ጊዶናባ ኣይስ ኦꬆና?» ያጊዶሶና።
MAR 2:25 ዬሱሲ ኤንታኮ፥ «ዳዊቴይ ኮሻቲዲ፥ ሚያባ ኮዪዳ ዎዴ ባራ ዴዔይሳታራ ኦꬂዳይሳ ናባቢቤኬቲ?
MAR 2:26 ኣቢያታሪ ካሂኔ ሃላቃ ጊዲዲ ዴዒያ ዎዴ ዳዊቴይ ፆሳ ኬꬂ ጌሊዲ፥ ካሂኔታ ፃላሊ ማናፔ ኣቲን ኦኒካ ማናው ዎጋ ጊዶናይሳ ጎዳ ሲንꬃን ዎꬂዳ ዳቡዋ ሚስ፥ ባራ ዴዔይስታስካ ኢሚስ» ያጊስ።
MAR 2:27 ቃሲካ ዬሱሲ ኤንታኮ፥ «ሳምባቲ ኣሳ ናዓ ጎዓስ ሜꬌቲሲፔ ኣቲን ኣሲ ሳምባታስ ሜꬌቲቤና።
MAR 2:28 ሄሳ ጊሾ፥ ኣሳ ናዓይ፥ ሃሪ ኣቶሺን ሳምባታስካ ጎዳ» ያጊስ።
MAR 3:1 ዬሱሲ ኣይሁዴ ዎሳ ኬꬂ ሲሚ ጌሊስ። ያን ኩሼይ ጉንዲዳ ኢሲ ኡራይ ዴዔስ።
MAR 3:2 ኢሲ ኢሲ ኣሳይ ዬሱሳ ሞታናው ኮዪዲ፥ ኩሼይ ጉንዲዳ ኡራ ሳምባታ ጋላስ ኢ ፓꬂኮኔ ኣጊኮ ቤዓናው ኮዪዲ ሚንꬂዲ ናጎሶና።
MAR 3:3 ዬሱሲ ኩሼይ ጉንዲዳ ኡራ፥ «ዴንዳ ኤቃዳ ሃ ሲንꬄ ያ» ያጊስ።
MAR 3:4 ሄሳፌ ጉዬ፥ ኣሳኮ፥ «ሳምባታ ጋላስ ሎዖባ ኦꬄይሲ ዎጌዬ ኢታባ ኦꬄይሲ ዎጌ? ኣሳ ሼምፖ ኣሾዬ ዎይኮ ዎꬎ?» ያጊዲ ኦይቺስ። ሺን ኣሳይ ሲዒ ጊስ።
MAR 3:5 ዬሱሲ ሃንቄቲዲ፥ ኤንታ ዩሺ ኣꬂ ፄሊዲ፥ ኤንቲ ኦዲን ሲዖናይሳታ ጊዲያ ጊሾ ኤንታ ቦላ ዳሮ ኣዛኒስ። ሄ ኣዲያኮ፥ «ኔ ኩሺያ ፒዲ ኦꬃ» ያጊስ። ኡራይ ፒዲ ኦꬂን ኢያ ኩሼይ ፓፂስ።
MAR 3:6 ኤሌሲዲ ፋሪሳዌቲ ኣይሁዴ ዎሳ ኬꬃፌ ካሬ ኬዪዲ፥ ዬሱሳ ዋቲ ዎꬋኔኮ ማቄታናው ሄሮዲሳ ባጋታራ ኢሲ ሶ ሺቂዶሶና።
MAR 3:7 ዬሱሲ ባ ታማሬታራ ጋሊላ ኣባኮ ቢስ። ጋሊላፔኔ ዪሁዳፔ ዪዳ ዳሮ ኣሳይ ኢያ ካሊዶሶና።
MAR 3:8 ቃሲካ ዬሩሳላሜፔ፥ ኢዱሚያሳፔ፥ ዮርዳኖሴ ሻፋ ፒንꬃፌ፥ ፂሮሳ ካታማፔኔ ሲዶና ካታማፔ ዬሱሲ ኦꬂዳባ ሲዒዲ፥ ዳሮ ኣሳይ ኢያኮ ዪዶሶና።
MAR 3:9 ኣሳ ዳሮቴꬃፌ ዴንዶይሳን ኢያ ኡንዔꬆና ሜላ ኢያ ታማሬቲ ዎጎሎ ኢያው ጊጊሳና ሜላ ኪቲስ።
MAR 3:10 ዳሮ ኣሳ ኢ ፓꬂዳ ጊሾ ሃርጊያ ኣሳ ኡባይ ኢያ ቦቻናው ሱጌቶሶና።
MAR 3:11 ቱና ኣያናይ ኦይኪዳ ኣሳቲ ኢያ ቤዒዳ ዎዴ ኢያ ሲንꬃን ኩንዲዲ፥ ባንታ ቃላ ꬎቁ ኦꬂዲ፥ «ኔኒ ፆሳ ናዓ ጊዲኪ?» ያጎሶና።
MAR 3:12 ዬሱሲ ሄ ቱና ኣያናቲ ባናቴꬃ ኦዴስካ ቆንጪሶና ሜላ ኤንታ ሚንꬂዲ ሃንቄቲስ።
MAR 3:13 ዬሱሲ ዴሪያ ቦላ ኬዪዲ፥ ባ ኮዪዳ ኣሳታ ባኮ ፄጊስ፤ ኤንቲካ ኢያኮ ቢዶሶና።
MAR 3:14 ኤንቲ ባራ ዳና ሜላኔ ቃላ ታማርሳና ሜላ ታማኔ ናምዓታ ዶሪዲ፥ ኤንታ፥ «ሃዋሬታ» ጊዲ ሱንꬂስ።
MAR 3:15 ቱና ኣያናታካ ኬሳና ሜላ ኤንታው ማታ ኢሚስ።
MAR 3:16 ኢ ዶሪዳ ታማኔ ናምዓቲ ሃይሳታ፡ ጴፂሮሳ ያጊዲ ሱንꬂዳ ሲሞና፥
MAR 3:17 ቦዓኔርጌስ (ዳዳ ዳኒያ ኣሳታ) ያጊዲ ሱንꬂዳይሳታ፥ ዛብዲዮሳ ናይታ ያይቆባኔ ያይቆባ ኢሻ ዮሃኒሳ፥
MAR 3:18 ኢንዲሪያሳ፥ ፊልጶሳ፥ ባርቶሎሚዮሳ፥ ማቶሳ፥ ቶማሳ፥ ኢልፊዮሳ ናዓ ያይቆባ፥ ታዲዮሳ፥ ባ ቢታስ ሚሼቲያ ሲሞናኔ፥
MAR 3:19 ዬሱሳ ኣꬂ ኢሚዳ ኣስቆሮታ ዪሁዳ።
MAR 3:20 ሄሳፌ ጉዬ፥ ዬሱሲ ሶ ቢስ። ቃሲ ዳሮ ኣሳይ ሺቂን፥ ኢኔ ኢያ ታማሬቲ ሃሪ ኣቶሺን ካꬂ ማናዉካ ዳንዳዒቦኮና።
MAR 3:21 ኣሳይ ኢያ፥ «ጎዬስ» ጊያ ጊሾ ኢያ ዳቦቲ ሄሳ ሲዒዲ ኢያ ኤካናው ቢዶሶና።
MAR 3:22 ሂጌ ኣስታማሬታፔ ኢሶቲ ኢሶቲ ዬሩሳላሜፔ ዪዲ፥ «ኢያ ቦላ ቢዔልዜቡሊ ዴዔስ»፥ ኢ፥ «ፃላሄይ ዎልቃን ቱና ኣያናታ ኬሴስ» ያጊዲ ኦዴቲዶሶና።
MAR 3:23 ዬሱሲ ኣሳ ባኮ ፄጊዲ ሌሚሶ ኦዲስ። «ፃላሄይ ፃላሄ ዋቲ ኬሳናው ዳንዳዒ?
MAR 3:24 ኢሲ ካዎቴꬃይ ባ ጊዶን ሻኬቲኮ ሄ ካዎቴꬃይ ኤቃናው ዳንዳዔና።
MAR 3:25 ሄሳዳካ፥ ኢሲ ኬꬃ ኣሳይ ባንታ ጊዶን ሻኬቲኮ ꬋያናፔ ኣቲን ዳናው ዳንዳዖኮና።
MAR 3:26 ሂዛ፥ ፃላሄይ ባራ ካጬቲዲ ሻኬቲኮ ꬋዮፔ ኣቲን ዳናው ዳንዳዔና።
MAR 3:27 «ሺን ኮይሮቲዲ ዎልቃማ ኡራ ቃቾና ዴዒሼ ኢያ ኬꬃ ጌሊዲ፥ ኢያ ሚሺያ ቦንቃናው ዳንዳዒያ ኣሲ ባዋ። ቃቺ ሲሚዲ ኢያ ኬꬃ ቦንቃናው ዳንዳዔስ።
MAR 3:28 «ታኒ ሂንቴው ቱማ ኦዳይስ፤ ፆሳይ ኣሳ ናይታስ ናጋራ ኡባኔ ኤንቲ ጫያ ጫሼ ኡባ ኣቶ ጋና።
MAR 3:29 ሺን ጌሻ ኣያና ቦላ ኢታባ ኦዴቲያ ኦዴስካ ሜሪና ናጋራ ጊዳናፔ ኣቲን ፆሳይ ኡባራካ ኢያ ማሬና» ያጊስ።
MAR 3:30 ዬሱሲ ሄሳ ጊዳይ፥ ኢሲ ኢሲ ኣሳቲ፥ «ኢያ ቦላ ቱና ኣያናይ ዴዔስ» ያጊዳ ጊሾሳ።
MAR 3:31 ኢያ ኣያኔ ኢያ ኢሻቲ ዪዲ ካሬን ኤቂዲ፥ ኢያኮ ኣሴ ኪቲዲ ኢያ ፄጊዶሶና።
MAR 3:32 ኢያ ማታን ኡቲዳ ዳሮ ኣሳቲ፥ «ሄኮ፥ ኔ ኣዬራኔ ኔ ኢሻታራ ካሬን ኤቂዲ ኔና ኮዮሶና» ያጊዶሶና።
MAR 3:33 ዬሱሲ ዛሪዲ፥ «ታ ኣያ ኦኔ? ቃሲ ታ ኢሻቲ ኦናንቴ?» ያጊስ።
MAR 3:34 ባ ማታን ኡቲዳ ኣሳ ዩሺ ኣꬂ ፄሊዲ፥ «ሄኮ፥ ታ ኣያኣኔ ታ ኢሻቲ ሃይሳታ።
MAR 3:35 ፆሳይ ሼኒያ ኦꬂያ ኡባይ ታ ኢሻ፥ ታ ሚቾኔ ታ ኣዮ» ያጊስ።
MAR 4:1 ዬሱሲ ዛሪዲ ጋሊላ ኣባ ማታን ታማርሴስ። ዳሮ ኣሳይ ኢያ ዩሹዋን ሺቂን፥ ኣባን ዴዒያ ዎጎሉዋ ጊዶ ጌሊዲ ኡቲስ፥ ኣሳ ኡባይ ኣባ ማታን ዴዔስ።
MAR 4:2 ኢ ኤንታ ዳሮባ ሌሚሶን ታማርሲስ። ታማርሲሼ ሃይሳዳ ያጊስ፡
MAR 4:3 «ሲዒቴ! ኢሲ ኡራይ ዜሬꬂ ዜራናው ኬዪስ።
MAR 4:4 ኢ ዜሪሺን፥ ኢሲ ኢሲ ዜሬꬃይ ኦጌ ጋፃን ዎꬊስ፤ ካፎቲ ዪዲ ሚዶሶና።
MAR 4:5 ኢሲ ኢሲ ዜሬꬃይ ጋርሳን ሻሎይ ዴዒያ ቢታ ቦላ ዎꬊስ። ዳሮ ቢቲ ባይና ጊሾ ሄ ዜሬꬃይ ኤሌሲዲ ዶሊስ።
MAR 4:6 ሺን ኣዊ ኬዪዳ ዎዴ ሹሊስ። ሎይꬂዲ ፃጶ ዬዲቦና ጊሾ ኤሌሲ ሜሊስ።
MAR 4:7 ኢሲ ኢሲ ዜሬꬃይ ኣጉንꬃ ጊዶን ዎꬊስ። ዶሊዳይሳ ኣጉንꬃይ ዲጪዲ ጩሊዳ ጊሾ ኣይፌ ኣይፎና ኣቲስ።
MAR 4:8 ኢሲ ኢሲ ዜሬꬃይ ኣራዳ ቢታን ዎꬊዲ ዶሊስ። ዲጪዲ ኢሶይ ሃስታማ፥ ኢሶይ ኡሱፑን ታማ ኢሶይ ፄታ ኣይፊስ» ያጊስ።
MAR 4:9 «ሲዒያ ሃይꬂ ዴዒያ ኦኒካ ሲዖ» ያጊስ።
MAR 4:10 ዬሱሲ ኦዲዳይሳ ሲዒዳ ኢሲ ኢሲ ኣሳቲኔ ታማኔ ናምዑ ታማሬቲ ዬሱሲ ባርካ ዴዒሺን፥ ኢያኮ ሺቂዲ ሄ ሌሚሱዋ ቢርሼꬃ ኦይቺዶሶና።
MAR 4:11 ዬሱሲ ኤንታኮ ሃይሳዳ ያጊስ፡ «ሂንቴው ፆሳ ካዎቴꬃ ፁራ ኤሮይ ኢሜቲስ። ሺን ሃራታስ ካዎቴꬃፌ ካሬን ዴዔይሳታስ ኡባባይ ሌሚሶን ኦዴቴስ።
MAR 4:12 ጋሶይካ፥ ‹ኤንቲ ፄሎሶና፥ ሺን ዴሞኮና። ሲዖሶና፥ ሺን ኣኬኮኮና። ኤንቲ ዴሚያኮኔ ኣኬኪያኮ፥ ፆሳኮ ሲማና ኢካ ኤንታ ማራናሺን› » ያጊስ።
MAR 4:13 ዬሱሲ ኤንታኮ፥ «ሃ ሌሚሶይ ሂንቴው ጌሌኔ? ያቲን፥ ሌሚሶ ኡባ ሂንቴ ዋቲ ኣኬካኔ?
MAR 4:14 ዜሬይሲ ፆሳ ቃላ ዜሬስ።
MAR 4:15 ቃላይ ዜሬቲያ ዎዴ ኦጌ ጋፃን ዎꬊዳይሳቲ ቃላ ሲዒዳይሳታ። ሺን ፃላሄይ ሶሁዋራ ዪዲ፥ ኤንታ ዎዛናን ዜሬቲዳ ቃላ ማፂ ዲጌስ።
MAR 4:16 ሄሳዳካ፥ ጋርሳን ሻሎይ ዴዒያ ቢታን ዜሬቲዳይሲ ቃላ ሲዒዲ፥ ኤሌሲዲ ኡፋይሳን ኤኬይሳ።
MAR 4:17 ሺን ኤንታው ሚኖ ፃጶይ ባይና ጊሾ ሃዒሳፌ ኣቲን ጋምዖኮና። ጉꬃ ዎዴፔ ጉዬ ቃላ ጋሶን ዋዬይ ዎይኮ ጎዲ ጋኪያ ዎዴ ኤሌሲዲ ꬉቤቶሶና።
MAR 4:18 ኣጉንꬃ ጊዶን ዜሬቲዳይሲ ቃላ ሲዔይሳታ።
MAR 4:19 ሺን ሃ ሳዓ ዴዑዋስ ሂርጎይ፥ ዱሬቴꬃ ዶሶይኔ ሃራባ ኣሞቴይሲ ኢያ ዎዛናን ጌሊዲ ቃላ ጩሊያ ጊሾ ኣይፌ ኣይፎና ኣቲስ።
MAR 4:20 ሺን ኣራዳ ቢታን ዜሬቲዳይሳቲ ቃላ ሲዒዲ ኤኬይሳታ። ኤንቲ ኢሶይ ሃስታማ፥ ኢሶይ ኡሱፑን ታማ ኢሶይ ፄታ ኣይፊስ» ያጊስ።
MAR 4:21 ዬሱሲ ጉጂዲ፥ «ፆምፔ ኤኪዲ፥ ዳቾፌ ዎይኮ ኣልጋፌ ጋርሳን ዎꬂያ ኣሲ ዴዒ? ꬎቃ ቤሳን ዎꬄኔዬ?
MAR 4:22 ሂዛ፥ ቆሴቲዳባይ ኡባይ ቆንጬ ኬያና፤ ጌሚዳባይ ኡባይ ኤሬቶና ኣቴና።
MAR 4:23 ሲዒያ ሃይꬂ ዴዒያ ኦኒካ ሲዖ» ያጊስ።
MAR 4:24 ቃሲ ኤንታኮ፥ «ሂንቴ ሲዒያባ ኣኬኪዲ ሲዒቴ! ፆሳ ቃላ ሂንቴ ሲዔይሳ ሜላ ኢ ሂንቴው ኣኬካ ኢማና። ኡባካ ሂንቴው ዳርሲዲ ኢማና።
MAR 4:25 ኢሲባይ ዴዒያ ኡራስ ጉጂ ኢሜታና፥ ባይናይሳፌ ሃሪ ኣቶሺን፥ ኢያው ዴዒያ ሄ ጉꬂያካ ኤኬታና» ያጊስ።
MAR 4:26 ዬሱሲ ዛሪዲ፥ «ፆሳ ካዎቴꬃይ ባ ጋዴን ዜሬꬂ ዜሪያ ኣሳ ሜላ።
MAR 4:27 ሄ ኡራይ ቃማ ꬊስኬስ፤ ዎንታ ዴንዴስ። ኢ ባ ሁዔን ዋኒያኮ ኤሮና ዴዒሺን ሄ ዜሬꬃይ ዶሌሲኔ ዲጬስ።
MAR 4:28 ቢታይ ካꬂ ባርካ ኢሜስ። ኮይሮ ዶሊዲ ዲጬስ፥ ካሊዲ ኣይፋናው ጋምቡፄስ፥ ዉርሴꬃን ኩሜꬃ ኣይፌ ኣይፌስ።
MAR 4:29 ሺን ካꬃይ ጋኪያ ዎዴ ኡራይ ሶሁዋራ ባጫራ ጌሊ ኣጌስ» ያጊስ።
MAR 4:30 ዬሱሲ፥ «ኑኒ ፆሳ ካዎቴꬃ ኣይ ዳኔስ ጋኔ? ዎይኮ ኣይቢራ ሌሚሳኔ?
MAR 4:31 ፆሳ ካዎቴꬃይ ኣይፌ ጉꬃ ሚꬂ ዳኔስ። ሄ ሚꬃ ኣይፊያ ዜሪያ ዎዴ ሳዓን ዴዒያ ሚꬃ ኣይፌ ኡባፌ ጉፄስ።
MAR 4:32 ዜሪን ዶሊዲ ኣታኪልቴ ኡባፌ ጊታቴስ፤ ዳሮ ዳሺ ዳዬስ። ካፎቲ ኢያ ታሺያ ቦላ ኬፂዲ ኡታና ጋካናው ዳዬስ» ያጊስ።
MAR 4:33 ዬሱሲ ሃይሳ ሜላ ዳሮ ሌሚሶን ኣሳይ ኣኬካናው ዳንዳዔይሳ ሜላ ቃላ ኦዲስ።
MAR 4:34 ኣሳስ ሌሚሶይ ባይና ኦዴና። ሺን ዬሱሲ ባ ታማሬታ ፃላላራ ዴዒያ ዎዴ ኤንታው ኡባባ ቢርሺዲ ኦዲስ።
MAR 4:35 ሄ ጋላስ ሳዓይ ኦማርሲን፥ ዬሱሲ ባ ታማሬታኮ፥ «ኣባፌ ሄፊንꬂ ፒኖስ» ያጊስ።
MAR 4:36 ኢያ ታማሬቲ ዳሮ ኣሳ ዬጊ ኣጊዲ፥ ዬሱሲ ካሴ ጌሊ ኡቲዳ ዎጎሉዋን ጌሊዲ ዬሱሳ ባንታራ ኤፊዶሶና። ሃራ ዎጎሎቲካ ያን ዴዖሶና።
MAR 4:37 ዎልቃማ ጎቴይ ዴንዲዲ፥ ሆቤይ ዎጎሉዋ ሾጪን፥ ኩማና ጋካናው ዎጎሉዋ ጊዶ ሃꬂ ጌሊስ።
MAR 4:38 ሄ ዎዴ ዬሱሲ ዎጎሉዋን ጉዬ ባጋራ ቦርኮቲዲ ꬊስኪስ። ኢያ ታማሬቲ ኢያ ዴንꬂዲ፥ «ኣስታማሪያው፥ ኑኒ ꬋያ ዎዴ ኔ ሲዒ ጋዳ ፄላይ?» ያጊዶሶና።
MAR 4:39 ያቲን፥ ኢ ባርኪዲ ጎቲያ፥ «ሲዒ ጋ» ጊዲ፥ ኣባካ፥ «ዎፑ ጋ» ጊስ። ጎቴይካ ሲዒ ጊን ኡባባይ ዎፑ ጊስ።
MAR 4:40 ዬሱሲ ባ ታማሬታኮ፥ «ኣይስ ሃይሳዳ ባቤቲ? ሂንቴው ኣማኖይ ዋኒዲ ꬋዪዴ?» ያጊስ።
MAR 4:41 ኤንቲ ዳሮ ባቢዲ ባንታ ጊዶን፥ «ሃይሲ ሃሪ ኣቶሺን፥ ጎቴይኔ ኣባይ ኪቴቴይሲ ኦኔ?» ያጊዶሶና።
MAR 5:1 ዬሱሲኔ ኢያ ታማሬቲ ኣባ ፒኒዲ፥ ጌርጌሶኔ ጊያ ቢታ ጋኪዶሶና።
MAR 5:2 ዬሱሲ ዎጎሉዋፔ ዎꬊያ ዎዴ ቱና ኣያናይ ኦይኪዳ ኢሲ ኡራይ ዱፎፔ ኬዪዲ ኢያራ ጋሄቲስ።
MAR 5:3 ሄ ኡራይ ዱፉዋን ኣቂ ፔዒዲ ዴዔስ። ኢያ ኦኒካ ሳንꬃላታን ቃቻናው ዳንዳዔና።
MAR 5:4 ኢ ዳሮ ቶሆ ዱꬃኒኔ ሳንꬃላታን ቃሼቲዲ ዴዔስ። ሺን ሳንꬃላታ ዱሴሬꬄስ፥ ዱꬃ ሜንꬄሬꬄስ። ኢያ ቴቃናው ዳንዳዒያ ኦኒካ ባዋ።
MAR 5:5 ኢ ቃማኔ ጋላስ ሄ ዱፉዋኒኔ ዴሬ ቦላ ዋሴስ፥ ባ ቦላካ ሹቻን ጋሬስ።
MAR 5:6 ዬሱሳ ሃሆን ቤዒዳ ዎዴ ዎፂ ቢዲ ኢያ ሲንꬃን ጉልባቲስ።
MAR 5:7 ሄ ኡራይ ባ ቃላ ꬎቁ ኦꬂዲ፥ «ኡባፌ ቦላ ፆሳ ናዓው ዬሱሳ፥ ኔናኔ ታና ኣይቤ ጋꬄይ? ታና ꬋይሶና ሜላ ታኒ ኔና ፆሳ ሱንꬃን ዎሳይስ» ያጊስ።
MAR 5:8 ኢ ሄሳ ጊዳይ ዬሱሲ ኢያ፥ «ላ ሃ ቱና ኣያናው፥ ሃ ኣዲያፌ ኬያ» ያጊዳ ጊሾሳ።
MAR 5:9 ዬሱሲ ኢያኮ፥ «ኔ ሱንꬃይ ኦኔ?» ያጊዲ ኦይቺስ። ኢ፥ «ኑኒ ዳሮ ጊዲያ ጊሾ ታ ሱንꬃይ ሌጊዮና» ያጊስ።
MAR 5:10 ቱና ኣያናቲ ባንታና ሄ ቢታፌ ኬሲ ዬዶና ሜላ ዬሱሳ ሚንꬂዲ ዎሲዶሶና።
MAR 5:11 ሄ ዴሪያ ቦላ ዳሮ ጉዱንꬆ ዉዴይ ሃሙቴስ።
MAR 5:12 ቱና ኣያናቲ ዬሱሳኮ፥ «ኑና ሂኒ ጉዱንꬆ ዉዲያኮ ዬዳርኪ፥ ኤንታን ቢዲ ጌሎስ» ያጊዲ ዎሲዶሶና።
MAR 5:13 ዬሱሲ ኤንታኮ፥ «ቢቴ» ያጊስ። ያቲን ቱና ኣያናቲ ኣዲያፌ ኬዪዲ ጉዱንꬆታን ጌሊዶሶና። ናምዑ ሙኩሉ ጊዲያ ጉዱንꬆ ዉዴይ ኣፎ ዶናራ ዲርጊዲ ቢዲ ኣባን ጌሊዲ ሚቴቲዶሶና።
MAR 5:14 ጉዱንꬆ ዉዲያ ሄሜይሳቲ ባቃቲ ቢዲ ሃኒዳባ ካታማኒኔ ጋፃሪያን ኦዲዶሶና። ያቲን ኣሳይ ሃኒዳባ ቤዓናው ኬዪዶሶና።
MAR 5:15 ኣሳይ ዬሱሳኮ ያ ዎዴ ቱና ኣያናን ኦይኬቲዳ ኡራ ቤዒዶሶና። ኢ ባ ዎዛናኮ ሲሚዲ፥ ማዖ ማዒዲ፥ ያን ኡቲዳይሳ ቤዒዳ ዎዴ ኡባይ ያዪዶሶና።
MAR 5:16 ሄሳ ቤዒዳ ኣሳቲ ቱና ኣያናቲ ኦይኪዳ ኡራ ቦላኔ ጉዱንꬆታ ቦላ ሃኒዳባ ኡባ ኣሳስ ኦዲዶሶና።
MAR 5:17 ሄሳ ጊሾ፥ ኣሳይ ባንታ ቢታፌ ዬሱሲ ባና ሜላ ዎሲዶሶና።
MAR 5:18 ዬሱሲ ዎጎሉዋን ጌሊያ ዎዴ ካሴ ቱና ኣያናይ ኦይኪዲ ዬዲዳ ኡራይ፥ ዬሱሳ ካላናው ኢያ ዎሲስ።
MAR 5:19 ሺን ዬሱሲ ኢፂዲ ኢያኮ፥ «ኔ ሶ ሲማዳ፥ ጎዳይ ኔው ኣይ ሜላ ጊታባ ኦꬂዳኮኔ ኔው ኣይ ሜላ ኬሂዳኮ ኔ ሶ ኣሳስ ኦዳ» ያጊስ።
MAR 5:20 ኡራይ ቢዲ ታሙ ካታማ ጊያሶን ዩዪዲ፥ ዬሱሲ ባው ኣይ ሜላ ጊታባ ኦꬂዳኮ ኦዲስ። ኢ ኦዲዳይሳ ሲዒዳ ኣሳ ኡባይ ማላሌቲዶሶና።
MAR 5:21 ዬሱሲ ሲሚዲ፥ ዎጎሉዋን ጌሊዲ፥ ኣባ ፒኒዳፔ ጉዬ ዳሮ ኣሳይ ኣባ ጋፃን ኢያ ዩሹዋን ሺቂዶሶና።
MAR 5:22 ኢያሮሳ ጊያ ኣይሁዴ ዎሳ ኬꬃ ሃላቃታፔ ኢሶይ፥ ዬሱሳ ቤዒዳ ዎዴ ኢያኮ ዪዲ ኢያ ቶሁዋ ቦላ
MAR 5:23 ኩንዲዲ፥ «ታ ናዒያ ሃርጋዳ ሃይቃና ሃናውሱ። ኢያ ፓፃዳ ዴዓና ሜላ ያዳ ኔ ኩሺያ ኢ ቦላ ዎꬃርኪ» ያጊዲ ዬሱሳ ሚንꬂዲ ዎሲስ።
MAR 5:24 ዬሱሲ ኢያሮሳራ ቢስ። ኢ ቢሺን ዳሮ ኣሳይ ኢያ ካሊዲ ኡንዔꬂዶሶና።
MAR 5:25 ታማኔ ናምዑ ላይꬂ ኢ ቦላፌ ሱꬂ ጎጊያ ኢሲ ማጫሲያ ዴዓዉሱ።
MAR 5:26 ዳሮ ኣኪሜቲ ኢዮ ኣኪሚዶሶና፥ ሺን ኢያ ፓፃ ካዔታሱ። ኢያ ባ ሚሺያ ኡባ ዉርሲንካ ኢው ሃ ኢቲስፔ ኣቲን ኣይኮካ ማዲቤና።
MAR 5:27 ሄ ማጫሲያ ዬሱሳባ ሲዓዳ፥ ኣሳ ካንꬃዳ ዬሱሳ ጉዬራ ያዳ ኢያ ማዑዋ ቦቻሱ።
MAR 5:28 ኢያ፥ «ታኒ ሃሪ ኣቶሺን ኢያ ማዑዋ ቦቺያኮ ፓፃና» ጋዳ ቆፓሱ።
MAR 5:29 ኢፔ ጎጊያ ሱꬃይ ሶሁዋራ ኤቂ ኣጊስ። ኢያ ባ ዋያፔ ፓፂዳይሳ ባ ኣሳቴꬃን ኤራሱ።
MAR 5:30 ዬሱሲ ባፔ ዎልቂ ኬዪዳይሳ ባ ሁዔን ኤሪዲ፥ ኤሌሲዲ ዳሮ ኣሳ ጊዶን ጉዬ ሲሚዲ፥ «ታ ማዑዋ ቦቺዳይ ኦኔ?» ያጊስ።
MAR 5:31 ኢያ ታማሬቲ፥ «ኣሳይ ኔና ሱጌይሳ ቤዓሼ፥ ‹ዎይጋዳ ታና ኦኔ ቦቺዳይ ያጋይ?› » ያጊዶሶና።
MAR 5:32 ዬሱሲ ሄሳ ኦኒ ኦꬂዳኮ ቤዓናው ዩሺ ኣꬂ ፄሊስ።
MAR 5:33 ሺን ማጫሲያ ባው ሃኒዳባ ኤራዳ፥ ያሻን ኮኮራሼ ያዳ ዬሱሳ ሲንꬃን ጉፋናሱ፤ ቃሲ ሃኒዳባ ኡባ ቱማ ኢያው ኦዳሱ።
MAR 5:34 ያኒን፥ ዬሱሲ ኢኮ፥ «ታ ናቴ፥ ኔና ኔ ኣማኖይ ፓꬂስ፥ ሳሮን ባ፥ ኔ ዋያፔካ ፓፃ» ያጊስ።
MAR 5:35 ዬሱሲ ቡሮ ሄሳ ኦዲሺን፥ ኣይሁዴ ዎሳ ኬꬃ ሃላቃ ሶፔ ኪቴቲዳ ኣሳቲ ዪዲ፥ «ኔ ናዒያ ሃይቃሱ፥ ኣስታማሪያ ኣይስ ዳቡሪሳይ?» ያጊዶሶና።
MAR 5:36 ሺን ዬሱሲ ኤንቲ ጌይሳ ሲዒዲ፥ ኣይሁዴ ዎሳ ኬꬃ ሃላቃኮ፥ «ኣማኖ ፃላላ ኣማናፔ ኣቲን ባቦፋ» ያጊስ።
MAR 5:37 ዬሱሲ ጴፂሮሳፔ፥ ያይቆባፔኔ ያይቆባ ኢሻ ዮሃኒሳፔ ሃሪ ኦኒካ ባና ካሎና ሜላ ዲጊስ።
MAR 5:38 ኤንቲ ኣይሁዴ ዎሳ ኬꬃ ሃላቃ ሶ ጋኪያ ዎዴ ዬሱሲ ኣሳይ ካሃ ꬋዪዲ ዬኬይሳኔ ዜሌሌይሳ ቤዒስ።
MAR 5:39 ጌሊዲ ኣሳኮ፥ «ኣይስ ካሃ ꬋዪዲ ዬኬቲ? ናዒያ ꬊስካሱፔ ኣቲን ሃይቃቡኩ» ያጊስ።
MAR 5:40 ኣሳይ ኢያ ቦላ ሚጪስ። ሺን ኣሳ ኡባ ካሬ ኬሲዲ፥ ናዔ ኣዋ፥ ኣዪዉኔ ሄꬑ ታማሬታ ባራ ኤኪዲ ናዒያ ዴዒያሱዋ ጌሊስ።
MAR 5:41 ዬሱሲ ናዔ ኩሺያ ኦይኪዲ፥ «ፃሊታ፥ ቁሚ» (ጉꬃ ናቴ፥ ኔና ጋይስ ዴንዳ) ያጊስ።
MAR 5:42 ናዒያ ሶሁዋራ ዴንዳ ኤቃዳ ሃሙታሱ። ኢያ ታማኔ ናምዑ ላይꬃ ናዓ። ሄሳን ኣሳይ ዳሮ ማላሌቲዶሶና።
MAR 5:43 ዬሱሲ ሄሳ ኤንቲ ኦዴስካ ኦዶና ሜላ ኤንታ ሚንꬂ ኪቲስ። ኤንቲ ኢው ሚያባ ኢማና ሜላ ኦዲስ።
MAR 6:1 ዬሱሲ ያፔ ኬዪዲ፥ ባ ታማሬታ ካሌꬂዲ፥ ባ ካታማ ናዚሬቴ ቢስ።
MAR 6:2 ሳምባታ ጋላስ ኣይሁዴ ዎሳ ኬꬃን ታማርሶ ኦይኪስ። ኢ ታማርሴይሳ ሲዒዳ ዳሮ ኣሳይ ማላሌቲዲ፥ «ሃይሲ ሃ ኡባ ኣዉፔ ዴሚዴ? ሃ ጪንጫቴꬃ ኢ ኣዉፔ ኤኪዴ? ሃ ማላታታ ኦꬂያ ማታ ኢ ኣዉፔ ዴሚዴ?
MAR 6:3 ሃይሲ ኣናፂያ ጊዴኔ? ማይራሚ ናዓ፥ ያይቆባ፥ ዮሳ፥ ዪሁዳኔ ሲሞና ኢሻ ጊዴኔዬ? ኢያ ሚቼቲ ኑራ ሃይሳን ዴዖኮናዬ?» ያጊዲ፥ ኢ ጊያባ ኤኮና ኢፂዶሶና።
MAR 6:4 ዬሱሲ ሄ ኣሳኮ፥ «ናቤይ ባ ቢታን፥ ባ ዳቦታኒኔ ባ ሶ ኣሳን ቦንቼቴናፌ ኣቲን ሃራታ ማታን ቦንቼቴስ» ያጊስ።
MAR 6:5 ኢ ሄ ቤሳን ባ ኩሺያ ጉꬃ ኣሳ ቦላ ዎꬂዲ ፓꬂዳይሳፌ ኣቲን ሃራ ማላታታ ኦꬃናው ዳንዳዒቤና።
MAR 6:6 ኣሳይ ኣማኒቦና ጊሾ ዳሮ ማላሌቲስ። ሄሳፌ ጉዬ፥ ዬሱሲ ሄ ሄራን ዴዒያ ጉታታን ኣሳ ታማርሴስ።
MAR 6:7 ዬሱሲ ታማኔ ናምዑ ታማሬታ ባኮ ፄጊዲ፥ ናምዓ ናምዓ ጋꬂዲ ኪቲስ። ኤንታው ቱና ኣያናታ ኬሲያ ዎልቃ ኢሚስ።
MAR 6:8 ኤንታ፥ «ኦጌ ፃምዓፌ ኣቲን ካꬂ፥ ካርፂታ፥ ሂንቴ ኪሴን ሚሼ ኣይቢባካ ኦይኮፊቴ።
MAR 6:9 ሂንቴ ቶሁዋን ጫማ ኣꬂቴ፥ ሺን ናምዑ ኣፊላ ኦይኮፊቴ» ያጊስ።
MAR 6:10 ቃሲካ፥ «ሂንቴና ኣሲ ሞኪዳ ሶ ኣዉንካ ጊዲን ሄ ቤሳ ዬዲዲ ባና ጋካናው ሄ ኬꬃን ጋምዒቴ።
MAR 6:11 ሂንቴና ኣሲ ሞኮናሱዋ ዎይኮ ሂንቴ ኦዲያባ ሲዖናሱዋ ኣዉን ጊዲኮካ፥ ሄ ቢታን ዴዒያ ኣሳስ ሄሲ ናጊሶ ማርካ ጊዳና ሜላ ሄ ቤሳፌ ኬዪሼ፥ ሂንቴ ቶሁዋፔ ባና ፒቲቴ» ያጊስ።
MAR 6:12 ታማኔ ናምዑ ታማሬቲ ቢዲ፥ ኣሳይ ባንታ ናጋራፔ ሲማናዳ ቃላ ኦዲዶሶና።
MAR 6:13 ኤንቲ ኣሳፔ ዳሮ ቱና ኣያናታ ኬሲዶሶና። ዳሮ ሃርጋንቾታ ዛይቴ ቲዪዲ ፓꬂዶሶና።
MAR 6:14 ዬሱሳ ሱንꬃይ ኡባ ቤሳን ኬዪዳ ጊሾ ካዎይ ሄሮዲሲ ኢያባ ሲዒስ። ኢሲ ኢሲ ኣሳይ፥ «ፃማቂያ ዮሃኒሲ ሃይቆፔ ዴንዲስ፥ ሄሳ ጊሾ ሃ ማላታታ ኦꬄይ ኢያ» ያጊዶሶና።
MAR 6:15 ባጋቲ፥ «ሃይሲ ኤሊያሳ ጊዴኔ?» ያጊዶሶና። ሃራቲ ቃሲ፥ «ሃይሲ ቤኒ ዎዴ ናቤታፕ ኢሱዋ ጊዶና ኣጌና» ያጊዶሶና።
MAR 6:16 ሺን ሄሮዲሲ ሄሳ ሲዒዳ ዎዴ «ሃይሲ ታኒ ቆꬊያ ቃንፂሲዳ ፃማቂያ ዮሃኒሳ ጊዴኔ? ኢ ሃይቆፔ ዴንዲስ» ያጊስ።
MAR 6:17 ሄሮዲሲ ባ ኢሻ ፊልጶሳ ማቺው ሄሮዲያዳ ኤኪዳ ጊሾ ኢ ጋሶን ዮሃኒሳ ኦይꬂዲ ቃሺሲስ።
MAR 6:18 ዮሃኒሲ ሄሮዲሳ፥ «ኔኒ ኔ ኢሻ ማቺው ኤካናው ቤሴና» ያጊስ።
MAR 6:19 ሄሮዲያዳ ዮሃኒሳ ባ ኡሎን ሞርካዳ ኢያ ዎꬊሳናው ኮያሱ፥ ሺን ዳንዳዓቡኩ።
MAR 6:20 ዮሃኒሲ ፂሎኔ ጌሻ ኣሲ ጊዲዳይሳ ሄሮዲሲ ኤሪዳ ጊሾ ኢያው ባቢዲ ሎይꬂ ናጊሴስ። ሄሮዲሲ ዮሃኒሲ ጊያባ ሲዓናው ዶሲኮካ ኢ ጊያባ ሲዒያ ዎዴ ዳሮ ዳጋሜስ።
MAR 6:21 ሄሮዲሲ ባ ዬሌቲዳ ጋላሳ ቦንቻናው ዴሪያ ሃሬይሳታስ፥ ሻላቃታሲኔ ጋሊላን ዴዒያ ጊታ ኣሳስ ኢማቶ ጊጊሲስ። ሄሲ ሄሮዲያዳስ ኢንጄ ጋላስ ጊዲስ።
MAR 6:22 ሄሮዲያዳ ናዒያ ኢማꬃይ ሞኬቲያ ቤሳ ጌላ ዱራዳ፥ ሄሮዲሳኔ ኢያ ኢማꬃታ ኡፋይሳሱ። ካዎይ ናዒው፥ «ኔ ኮያባ ኣይባ ጊዲኮካ ታና ኦይቻ፥ ታኒ ኔው ኢማና» ያጊስ።
MAR 6:23 ቃሲ ኢው ጫቂዲ፥ «ኔኒ ኦይቺያባ ኣይባ ጊዲኮካ፥ ታኒ ኔው ኢማና። ሃሪ ኣቶሺን፥ ታ ካዎቴꬃ ባጋ ጊዲኮካ ታኒ ኔው ኢማና» ያጊስ።
MAR 6:24 ናዒያ ካሬ ኬያዳ ባ ኣዬኮ፥ «ኣይ ኢማ ጎ?» ጋዳ ኦይቻሱ። ኢ ኣያ፥ «ፃማቂያ ዮሃኒሳ ሁዒያ ኢማ ጋ» ያጋሱ።
MAR 6:25 ናዒያ ኤላሳዳ ካዉዋኮ ባዳ፥ «ፃማቂያ ዮሃኒሳ ሁዒያ ሳኔን ዎꬃዳ ሃዒ ታው ኢማና ሜላ ኮያይስ» ያጋሱ።
MAR 6:26 ያኒን ካዎይ ዳሮ ቂሮቲስ፥ ሺን ባ ኢማꬃታ ጊሾ ኢው ጫቂዳ ባ ጫቁዋ ሜንꬃናው ኮዪቤና።
MAR 6:27 ሄሳ ጊሾ፥ ኤሌሲዲ ናጌይሳ ዮሃኒሳ ሁዒያ ኤሃና ሜላ ኪቲስ። ናጌይሲ ቃሾ ኬꬂ ቢዲ ዮሃኒሳ ቆꬊያ ቃንፂስ።
MAR 6:28 ሄ ቃንፄቲዳ ሁዒያ ሳኔን ዎꬂ ኤሂዲ ናዔስ ኢሚስ። ናዒያ ቃሲ ባ ኣዬስ ኢማሱ።
MAR 6:29 ዮሃኒሳ ታማሬቲ ሄሳ ሲዒዳ ዎዴ ቢዲ ኢያ ኣሃ ኤኪ ኤፊዲ ሞጊዶሶና።
MAR 6:30 ታማኔ ናምዑ ሃዋሬቲ ሲሚ ዪዲ ኤንቲ ኦꬂዳባኔ ታማርሲዳባ ኡባ ዬሱሳስ ኦዲዶሶና።
MAR 6:31 ኤንታኮ ያ ኣሳይኔ ቢያ ኣሳይ ዳሪዳ ጊሾ ዬሱሳራኔ ኢያ ታማሬታራ፥ ሃሪ ኣቶሺን ካꬂ ማናዉካ ኤንታ ጋꬆና ኢፂስ። ያኒን፥ ዬሱሲ ኤንታኮ፥ «ኑርካ ጉꬂ ሼምፒ ኤካናው ኣሲ ባይና ቤሲ ዬꬊቴ» ያጊስ።
MAR 6:32 ሄሳ ጊሾ፥ ኤንቲ ባንታርካ ዎጎሎን ጌሊዲ ኣሲ ባይና ቤሲ ቢዶሶና።
MAR 6:33 ኤንቲ ቢሺን ዳሮ ኣሳይ ኤንታ ቤዒዲ ኤሪዶሶና። ያቲን፥ ካታማ ኡባፌ ኣሳይ ቶሆራ ዎፂ ቢዲ ኤንቲ ቢያሱዋ ኤንታፌ ሲንꬄ ጋኪዶሶና።
MAR 6:34 ዬሱሲ ዎጎሉዋፔ ዎꬊዲ ዳሮ ኣሳ ቤዒስ። ኣሳይ ሄሚያ ኣሲ ባይና ዶርሳ ሜላ ጊዲዳይሳ ቤዒዲ ኤንታው ቃꬌቲዲ ኤንታ ዳሮባ ታማርሲስ።
MAR 6:35 ሳዓይ ኦማርሲያ ዎዴ ዬሱሳ ታማሬቲ ኢያኮ ዪዲ፥ «ሃይሲ ቤሳይ ኣሲ ባይና ቤሲ፤ ሃዒ ሳዓይካ ቃሚስ።
MAR 6:36 ኣሳይ ጉታታኔ ካታማታ ቢዲ ባንታው ሚያባ ሻማና ሜላ ኣሳ ዬዳ» ያጊዶሶና።
MAR 6:37 ሺን ዬሱሲ ዛሪዲ ኤንታኮ፥ «ኣሳስ ሚያባ ሂንቴ ኢሚቴ» ያጊስ። ኤንቲ፥ «ኑኒ ቢዲ ናምዑ ፄቱ ዲናሬን ኡይꬁ ሻሚዲ ኣሳ ሙዛና ሜላ ኮያይ?» ያጊዲ ኦይቺዶሶና።
MAR 6:38 ዬሱሲ ኤንታኮ፥ «ሂንቴው ኣፑን ኡይꬂ ዴዒ? ኣኔ ቢዲ ቤዒቴ» ያጊስ። ኤንቲ ቤዒዲ፥ «ኢቻሹ ኡይꬁኔ ናምዑ ሞሎ» ያጊዶሶና።
MAR 6:39 ዬሱሲ ባ ታማሬታ ኣሳ ኡባ ጩጋን ጩጋን ሻኪዲ ማታን ኡቲሳና ሜላ ኪቲስ።
MAR 6:40 ኣሳይ ባጋይ ፄታ፥ ባጋይ ኢሻታማ ጊዲዲ ጩጋን ጩጋን ሻኬቲዲ ኡቲዶሶና።
MAR 6:41 ዬሱሲ ኢቻሹ ኡይꬃኔ ናምዑ ሞሎታ ኤኪዲ፥ ፑዴ ሳሎ ፄሊዲ ፆሳ ጋላቲስ። ኡይꬃ ሜንꬂዲ ኣሳስ ጊሻና ሜላ ባ ታማሬታስ ኢሚስ። ቃሲ ናምዑ ሞሎታ ኤንታ ኡባስ ሻኪስ።
MAR 6:42 ኣሳ ኡባይ ሚዲ ካሊዶሶና።
MAR 6:43 ኣቲዳ ኡይꬃ ቲፊያኔ ሞሎታ ቲፊያ፥ ኢያ ታማሬቲ ታማኔ ናምዑ ጋይታ ኩሜꬂ ዴንꬂዶሶና።
MAR 6:44 ኡይꬃ ሚዳ ኣዴ ኣሳ ታይቦይ ኢቻሹ ሙኩሉ።
MAR 6:45 ኤሌሲዲ ዬሱሲ ባ ታማሬቲ ዎጎሉዋን ጌሊዲ፥ ኣባፌ ሄፊንꬃን ዴዒያ ቤቴሳይዳ ባፔ ሲንꬃቲዲ ባና ሜላ ኪቲስ። ሺን ባው ኣሳ ሞይዛናው ጉዬ ኣቲስ።
MAR 6:46 ኣሳ ሞይዚዳፔ ጉዬ ፆሳ ዎሳናው ዴሪያ ቦላ ኬዪስ።
MAR 6:47 ሳዓይ ቃሚያ ዎዴ ዎጎሎይ ኣባ ጊዶን ዴዔስ፥ ሺን ዬሱሲ ኣባፌ ጋፃን ባርካ ዴዔስ።
MAR 6:48 ጫርኮይ ኢያ ታማሬታኮ ጫርኪያ ጊሾ ኣባ ፒꬎይ ዋይሴይሳ ዬሱሲ ቤዒስ። ዎንቲማꬄ ሳዓይ ጌያና ሃኒያ ዎዴ ኢ ኣባ ቦላ ሃሙቲሼ ኤንታኮ ዪዲ፥ ኤንታ ዬጊዲ ኣꬋናው ኮዪስ።
MAR 6:49 ሺን ኢ ኣባ ቦላ ሃሙቲሺን፥ ኤንቲ ቤዒዲ፥ ኤንታው ሞይቲሌ ዳኒን ዋሲዶሶና።
MAR 6:50 ኤንቲ ኡባይ ኢያ ቤዒዲ፥ ያሻን ኮኮሪዶሶና። ሺን ዬሱሲ ኤሌሲዲ ኤንታኮ፥ «ታና፥ ኣይኮይ ባዋ፤ ያዮፊቴ» ያጊስ።
MAR 6:51 ዬሱሲ ዎጎሉዋን ጌሊዲ ኤንታራ ኢሲፌ ኡቲን ጫርኮይ ዎፑ ጊስ። ኤንቲ ዳሮ ማላሌቲዶሶና።
MAR 6:52 ኤንታ ዎዛናይ ዜልዑሚዳ ጊሾ ኤንቲ ኡይꬃባ ኣኬኪቦኮና።
MAR 6:53 ኤንቲ ኣባ ፒኒዲ፥ ጌንሳሬፄ ቢታ ጋኪዲ፥ ዎጎሉዋ ጋፃ ሺሺዲ ቃቺዶሶና።
MAR 6:54 ኤንቲ ዎጎሉዋፔ ዎꬊያ ዎዴ ኣሳይ ኤሌሲዲ ዬሱሳ ኤሪዶሶና።
MAR 6:55 ኤንቲ ሄራን ዴዒያ ቢታ ኡባን ዎፄሬቲዲ ሃርጋንቾታ ሃላን ቶኪዲ፥ «ዬሱሲ ዴዔስ» ጊን ሲዒዳ ቤሳ ኤሂዶሶና።
MAR 6:56 ኣሳይ ኢ ቢዳ ሶ ኡባን፥ ጋፃሪያን ጊዲን፥ ካታማን፥ ዴዒያ ሃርጋንቾታ ዳባባ ኤፎሶና። ሃርጋንቾቲ ኢያ ኣፊላ ማጫራ ጊዲኮካ ቦቻና ሜላ ኣሳይ ኢያ ዎሲዶሶና። ቦቺዳ ኡባይ ፓፂስ።
MAR 7:1 ዬሩሳላሜፔ ዪዳ ጉꬃ ፋሪሳዌቲኔ ሂጌ ኣስታማሬቲ ዬሱሳ ማታን ሺቂዶሶና።
MAR 7:2 ዬሱሳ ታማሬታፔ ኢሶቲ ኢሶቲ ጌዮና ኩሺያን፥ ሄሲካ ኩሼ ሜጬቶና ካꬂ ሜይሳታ ቤዒዶሶና።
MAR 7:3 ፋሪሳዌቲኔ ኣይሁዴ ኣሳ ኡባይ ባንታ ኣዋታ ዎጋꬆ ባንታ ኩሺያ ሜጬቶና ሞኮና።
MAR 7:4 ሄሳዳካ፥ ኤንቲ ጊያፔ ሻሜቲዳባ ሜጮና ዴዒሼ ሞኮና። ቃሲ ኤንቲ ባንታ ኣዋታፔ ኤኪዳ ሃራ ዳሮ ዎጊ ዴዔስ፡ ሄሲካ ሲኒያ፥ ኬሪያ፥ ቢራታ ሚሼታኔ ኣርሳ ሜጪያ ዎጋ ናጌይሳ።
MAR 7:5 ፋሪሳዌቲኔ ሂጌ ኣስታማሬቲ ዬሱሳ፥ «ኔ ታማሬቲ ኣይስ ኣዋታ ዎጋ ሜንꬂዲ ባንታ ኩሺያ ሜጬቶና ካꬂ ሞና?» ያጊዲ ኦይቺዶሶና።
MAR 7:6 ዬሱሲ ኤንታኮ፥ «ኢሳያሲ ሂንቴና ጩቦታ፥ ‹ሃይሲ ኣሳይ ታና ባ ኢንፃርሳ ፃላላን ቦንቼስ፥ ሺን ኤንታ ዎዛናይ ታፔ ሃሆን ዴዔስ።
MAR 7:7 ኣሲ ሜꬊዳ ዎጋ ፆሳ ሂጌ ዳኒሲዲ ታማርሲያ ጊሾ ኤንቲ ታና ሜላ ጎይኖሶና› » ጊዲ ፃፊዳይሲ ቱማ።
MAR 7:8 «ሂንቴ ፆሳ ኪታ ኣጊዲ ኣሳ ዎጋ ሚንꬂዲ ናጌታ» ያጊስ።
MAR 7:9 ቃሲካ ዬሱሲ፥ «ሂንቴ ሂንቴ ዎጋ ናጊዲ ፆሳ ኪታ ዬጊ ኣጋናው ሎዖ ኦጌ ዴሚዴታ።
MAR 7:10 ሙሴይ፥ ‹ኔ ኣዋኔ ኔ ኣዪው ቦንቻ›፥ ቃሲ ‹ባ ኣዋኔ ባ ኣዪው ጫዬይሲ ሃይቃናው ቤሴስ› ያጊስ።
MAR 7:11 ሺን ኢሲ ኣሲ ባ ኣዋ ዎይኮ ባ ኣዪው ማዳናይሳ ኣጊዲ፥ ‹ሄሲ ፆሳ ያርሾ› ጊኮ፥
MAR 7:12 ኢ ባ ኣዋ ዎይኮ ባ ኣዪው ማዶና ሜላ ኦꬄታ።
MAR 7:13 ሄሳዳካ፥ ሂንቴ ሃራታ ታማርሲዳ ሂንቴ ዎጋን ፆሳ ቃላ ካꬊዴታ። ሄሳ ሜላ ሃራ ዳሮባ ኦꬄታ» ያጊስ።
MAR 7:14 ዬሱሲ ዳሮ ኣሳ ቃሲካ ባኮ ፄጊዲ፥ «ኡባይ ታኒ ኦዴይሳ ሲዒቴኔ ኣኬኪቴ።
MAR 7:15 ኣሳ ዎዛናፔ ኬያባይ ኣሴ ቱኒሴሲፔ ኣቲን ካሬፔ ኣሳ ኡሎ ጌሊዲ ኣሴ ቱኒሲያባይ ኣይቢካ ባዋ።
MAR 7:16 ሲዒያ ሃይꬂ ዴዒያ ኦኒካ ሲዖ» ያጊስ።
MAR 7:17 ዬሱሲ ዳሮ ኣሳ ዬጊ ኣጊዲ ሶ ጌሊን ኢያ ታማሬቲ ሄ ሌሚሱዋባ ኢያ ኦይቺዶሶና።
MAR 7:18 ኢ ኤንታኮ፥ «ሂንቴዉካ ቃሲ ጌሊቤኔ? ካሬፔ ኣሳ ዎዛናን ጌሊያባይ ኣይቢካ ኣሴ ቱኒሳናው ዳንዳዖናይሳ ኣኬኬቲ?
MAR 7:19 ኣይስ ጊኮ፥ ካꬂ ኣሳ ኡሎ ጊዶ ጌሊዲ ካንꬂዲ ኣꬌሲፔ ኣቲን ኣሳ ዎዛና ጊዶ ጌሌና» ያጊስ። ሄሳን ዬሱሲ ካꬂ ኡባይ ጌሺ ጊዴይሳ ኤሪሲስ።
MAR 7:20 ካሊዲካ፥ ዬሱሲ፥ «ኣሳ ቱኒሲያባይ ኣሳ ዎዛና ጊዶፌ ኬያባ።
MAR 7:21 ኣሳ ዎዛና ጊዶፌ ኬያባይ ኢታ ቆፋ፥ ላይማቴꬂ፥ ካይሶ፥ ኣሴ ዎꬎ፥ ላሜ፥
MAR 7:22 ኢታ ኣሞ፥ ኢታቴꬂ፥ ጌኔ፥ ቃይፄ፥ ጪሞ፥ ቃናቴ፥ ጫሼ፥ ኦቶሮኔ ቦዛቴꬂ።
MAR 7:23 ሃ ኢታባይ ኡባይካ ኣሳ ዎዛና ጊዶፌ ኬዪዲ ኣሴ ቱኒሴስ» ያጊስ።
MAR 7:24 ዬሱሲ ያፔ ኬዪዲ፥ ፂሮሳ ካታማ ማታን ዴዒያ ቢታ ቢስ። ኢ ኢሲ ኬꬂ ጌሊዲ ያን ዴዔይሳ ኦኒካ ኤራና ሜላ ኮዪቤና። ሺን ቆሴቲዲ ጋምዓናው ዳንዳዒቤና።
MAR 7:25 ሺን ኢ ጉꬃ ናዒው ቱና ኣያናይ ኦይኪዳ ኢሲ ማጫሲያ ዬሱሳባ ሲዓዳ ኤሌሳ ኢያኮ ያዳ ኢያ ቶሁዋ ቦላ ኩንዳሱ።
MAR 7:26 ኢያ ኣይሁዴ ማጫሲ ጊዱኩ፤ ኢያ ዬሌቲዳይ ሲሮፊንቄ ጊያ ቢታና። ኢያ፥ ባ ናዔፔ ቱና ኣያና ኬሳና ሜላ ዬሱሳ ዎሳሱ።
MAR 7:27 ሺን ዬሱሲ ዛሪዲ፥ «ናይቲ ኮይሮቲዲ ካꬃ ካሎ፤ ናይታ ካꬃ ኤኪዲ ካናታስ ዬጌይሲ ሎዖ ጊዴና» ያጊስ።
MAR 7:28 ማጫሲያ ዛራዳ፥ «ታ ጎዳው ሄሲ ቱማ፥ ሺን ጋይታ ማታን ዴዒያ ካናቲ ናይታፔ ዎꬊያ ቲፊያ ሞሶና» ያጋሱ።
MAR 7:29 ዬሱሲ ቃሲ ኢኮ፥ «ሃ ኔ ቃላ ጊሾ ኔ ሶ ባ፤ ቱና ኣያናይ ኔ ናዔፔ ኬይስ» ያጊስ።
MAR 7:30 ማጫሲያ ባ ሶ ቢያ ዎዴ ቱና ኣያናይ ኢፔ ኬዪን ሂፃን ዚንዒዳሮ ዴማሱ።
MAR 7:31 ዬሱሲ ፂሮሳ ካታማፔ ኬዪዲ፥ ሲዶናራኔ ታሙ ካታማታ ጊያ ቢታራ ካንꬂዲ ጋሊላ ኣባኮ ቢስ።
MAR 7:32 ኣሳይ ቱሌኔ ዋዪዲ ኦዴቲያ ኣሲ ዬሱሳኮ ኤሂዲ፥ ባ ኩሺያ ኢያ ቦላ ዎꬃና ሜላ ኢያ ዎሲዶሶና።
MAR 7:33 ዬሱሲ ባርካ ሄ ኡራ ዳሮ ኣሳፔ ጋፃ ኬሲዲ፥ ባ ቢራꬊያ ኢያ ሃይꬃን ዬዲስ። ቃሲ ጩቺ ጩቲዲ ኢያ ኢንፃርሳ ቦቺስ።
MAR 7:34 ሳሎ ፑዴ ፄሊዲ፥ ቶኪ ሼምፒዲ፥ «ኤፍታህ» ጊስ። ቢርሼꬃይካ «ዶዬታ» ጉሱ።
MAR 7:35 ኡራ ሃይꬃይ ኤሌሲዲ ዶዬቲስ፥ ቃሼቲዳ ኢንፃርሳይካ ቢርሼቲስ፥ ኡራይ ጌሺዲ ኦዴቲስ።
MAR 7:36 ዬሱሲ ኣሳኮ፥ «ሃይሳ ኦዴስካ ኦዶፒቴ» ያጊስ። ሺን ኢ ዳሮ ሚንꬂዲ ኦዶፒቴ ጊን፥ ኣሳይ ኦዳ ያ ዳርሲስ።
MAR 7:37 ሄሳ ሲዒዳ ኣሳ ኡባይ ዳሮ ማላሌቲዲ፥ «ኡባባ ኢ ሎይꬂ ኦꬄስ። ሃሪ ኣቶሺን፥ ቱሊያ ሲሴስ፥ ሙሚያ ኦዲሴስ» ያጊዶሶና።
MAR 8:1 ጉꬃ ዎዴፔ ጉዬ፥ ዳሮ ኣሳይ ዬሱሳኮ ሺቂዶሶና። ኣሳስ ሚያባይ ꬋዪን ዬሱሲ ባ ታማሬታ ባኮ ፄጊዲ፥
MAR 8:2 «ሃ ኣሳይ ታራ ሄꬑ ጋላስ ጋካናው ጋምዒዲ፥ ኣይኮካ ሚያባ ዴሚቦና ጊሾ ታና ኣሳይ ቃꬌꬄስ።
MAR 8:3 ታኒ ኣሳ ኮሻራ ሶ ዬዲኮ ኣሳይ ቢሼ ኦጌን ዳቡሪዲ ኩንዳና፥ ባጋ ኣሳይ ሃሆሶፔ ዪዶሶና» ያጊስ።
MAR 8:4 ዬሱሳ ታማሬቲ ዛሪዲ፥ «ሃ ባዞ ቢታን ሃ ኣሳ ኡባ ሙዛናው ጊዲያ ካꬂ ዴማናው ዳንዳዔይ ኦኔ?» ያጊዶሶና።
MAR 8:5 ዬሱሲ ኤንታኮ፥ «ሂንቴው ኣፑን ኡይꬂ ዴዒ?» ያጊዲ ኦይቺስ። ኤንቲ ዛሪዲ፥ «ላፑን ኡይꬂ ዴዔስ» ያጊዶሶና።
MAR 8:6 ዬሱሲ ኣሳይ ሳዓን ኡታና ሜላ ኪቲስ። ያቲዲ፥ ላፑን ኡይꬃ ኤኪዲ ፆሳ ጋላቲ ሲሚዲ ሄ ኡይꬃ ሜንꬂዲ፥ ኣሳስ ጊሻና ሜላ ባ ታማሬታስ ኢሚስ። ኢያ ታማሬቲ ኣሳስ ጊሺዶሶና።
MAR 8:7 ኤንታው ቃሲ ጉꬃ ላፋ ሞሎቲ ዴዖሶና። ዬሱሲ ሄ ሞሎታ ጊሾ ፆሳ ጋላቲዲ፥ ኣሳስ ጊሻና ሜላ ባ ታማሬታ ኪቲስ።
MAR 8:8 ኣሳይ ኡባይ ሚዲ ካሊዶሶና። ኢያ ታማሬቲ ኣቲዳ ቲፊያ ላፑን ጋይታ ኩሜꬂ ዴንꬂዶሶና።
MAR 8:9 ካꬃ ሚዳ ኣሳ ታይቦይ ኦይዱ ሙኩሉ ጊዳና። ሄሳፌ ጉዬ፥ ዬሱሲ ኣሳ ዬዲስ።
MAR 8:10 ኢ ቃሲ ባ ታማሬታራ ኤሌሲ ዎጎሎን ጌሊዲ ዳልማኑታ ጊያ ቢታ ቢስ።
MAR 8:11 ፋሪሳዌቲ ዪዲ ዬሱሳ ፓጫናው ኮዪዲ፥ ሳሎፔ ባንታና ማላታ ቤሳና ሜላ ዬሱሳራ ፓላማ ኦይኪዶሶና።
MAR 8:12 ዬሱሲ ቶኪ ሼምፒዲ፥ «ሃ ዎዲያ ኣሳይ ኣይስ ማላታ ኮዪ? ታኒ ሂንቴው ቱማ ኦዳይስ፤ ሃ ዎዲያ ኣሳስ ኣይ ማላቲካ ኢሜቴና» ያጊስ።
MAR 8:13 ኢ ኤንታ ያን ዬጊ ኣጊዲ ዛሪ ዎጎሎን ጌሊዲ ኣባፌ ሄፊንꬂ ፒኒስ።
MAR 8:14 ኢያ ታማሬቲ ካꬂ ኤፋናይሳ ዶጊዶሶና፤ ኤንታው ዎጎሉዋ ጊዶን ኢሲ ኡይꬃፌ ሃሪ ባዋ።
MAR 8:15 ዬሱሲ ኤንታኮ፥ «ሂንቴና ኤሪቴ። ፋሪሳዌታ ኢርሹዋፌኔ ሄሮዲሳ ኢርሹዋፌ ናጌቲቴ» ያጊዲ ኪቲስ።
MAR 8:16 ኤንቲ ባንታ ጊዶን፥ «ኢ ሃይሳ ጌይ ኑስ ኡይꬂ ባይና ጊሾሳ» ያጊዶሶና።
MAR 8:17 ዬሱሲ ኤንቲ ጌይሳ ኤሪዲ ኤንታኮ፥ «ሂንቴው ኡይꬂ ባይና ጊሾ ኣይስ ኦዴቴቲ? ሃዒካ ኤሬኬቲ? ዎይኮ ኣኬኬኬቲ? ሂንቴ ዎዛናይ ዶጪዴ?
MAR 8:18 ሂንቴው ኣይፌይ ዴዒሺን ቤዔኬቲ? ሃይꬂ ዴዒሺን ሲዔኬቲ? ሂንቴ ኣኬኬቲ?
MAR 8:19 ታኒ ኢቻሹ ኡይꬃ ኢቻሹ ሙኩሉ ኣሳስ ባꬂዳ ዎዴ ኣፑን ጋይታ ኩሜꬂ ቲፌ ዴንꬂዴቲ?» ያጊስ። ኤንቲካ፥ «ታማኔ ናምዑ ጋይታ ኩሜꬂ» ያጊዶሶና።
MAR 8:20 «ሄሳዳካ፥ ታኒ ላፑን ኡይꬃ ኦይዱ ሙኩሉ ኣሳስ ባꬂዳ ዎዴ ኣፑን ጋይታ ኩሜꬃ ቲፌ ዴንꬂዴቲ?» ያጊስ። ኤንቲ፥ «ላፑን ጋይታ ኩሜꬂ ዴንꬂዳ» ያጊዶሶና።
MAR 8:21 ያቲን፥ «ሃዒካ ኣኬኪቤኬቲ?» ያጊስ።
MAR 8:22 ኤንቲ ቤቴሳይዳ ካታማ ቢዶሶና። ጉꬃ ኣሳቲ ቆቄ ኡራ ዬሱሳኮ ኤሂዲ ሄ ኡራ ቦቻና ሜላ ኢያ ዎሲዶሶና።
MAR 8:23 ዬሱሲ ቆቄ ኡራ ኩሺያ ኦይኪዲ ካታማፔ ጋፃ ኬሲስ። ኢያ ኣይፊያን ጩቲዲ ባ ኩሺያ ኢያ ቦላ ዎꬂዲ፥ «ኔው ኣይኮይ ቤንቲ?» ያጊዲ ኦይቺስ።
MAR 8:24 ኡራይ ꬎቁ ጊዲ ፄሊዲ፥ «ታው ኣሳይ ቤንቴስ፥ ሺን ኣሳይ ሃሙቲሼ ሚꬂ ዳኔስ» ያጊስ።
MAR 8:25 ሄሳፌ ጉዬ፥ ዬሱሲ ዛሪዲ፥ ኡራ ኣይፊያን ባ ኩሺያ ዎꬂስ። ኡራይ ሎይꬂ ፄሊስ፥ ኢያ ኣይፌይ ፓፂስ፥ ኡባባ ጌሺዲ ቤዒስ።
MAR 8:26 ዬሱሲ ኣዲያኮ፥ «ኔ ሶ ባ፥ ሺን ጉታ ጌሎፓ» ያጊዲ ኪቲስ።
MAR 8:27 ዬሱሲ ባ ታማሬታራ ቂሳሪያ ፊልጶሳ ማታን ዴዒያ ጉታ ቢስ። ኤንቲ ቢሺን ኦጌ ቦላ ዬሱሲ፥ «ታና ኣሳይ ኦና ጎና?» ያጊዲ ባ ታማሬታ ኦይቺስ።
MAR 8:28 ኢያ ታማሬቲ፥ «ኢሲ ኢሲ ኣሳይ ኔና፥ ‹ፃማቂያ ዮሃኒሳ› ጎሶና፤ ሃራቲ፥ ‹ኤሊያሳ ጎሶና› ቃሲ ሃራቲ፥ ‹ናቤታፔ ኢሱዋ› ጎሶና» ያጊዶሶና።
MAR 8:29 ዬሱሲ ኤንታኮ፥ «ያቲን ሂንቴ ታና ኦና ጌቲ?» ያጊዲ ኦይቺስ። ጴፂሮሲ፥ «ኔኒ ኪሪስቶሳ» ያጊዲ ዛሪስ።
MAR 8:30 ዬሱሲ፥ «ታባ ኦዴስካ ኦዶፒቴ» ያጊዲ ኤንታ ኪቲስ።
MAR 8:31 ዬሱሲ ባ ታማሬታኮ፥ «ኣሳ ናዓይ፥ ዳሮ ሜቶ ኤካናው ቤሴስ፤ ጪማቲ፥ ካሂኔ ሃላቃቲኔ ሂጌ ኣስታማሬቲ ኢያ ኢፃናው ቤሴስ። ኤንቲ ኢያ ዎꬋናዉኔ ሄꬑ ጋላሳፔ ጉዬ፥ ኢ ሃይቆፔ ዴንዳናው ቤሴስ» ያጊዲ ኤንታ ታማርሲስ።
MAR 8:32 ኢ ሄሳ ኤንታው ጌሺዲ ኦዲስ። ጴፂሮሲ ኢያ ኢሲ ባጋ ዛሪዲ ሃንቂስ።
MAR 8:33 ሺን ዬሱሲ ጉዬ ሲሚዲ፥ ባ ታማሬታ ፄሊዲ፥ ጴፂሮሳ ሃንቄቲዲ፥ «ሃ ፃላሂያው፥ ታፔ ሃካ። ኔኒ ኣሲ ዶሲያባ ቆፓሳፔ ኣቲን ፆሳይ ዶሲያባ ቆፓካ» ያጊስ።
MAR 8:34 ቃሲካ ዬሱሲ ዳሮ ኣሳኔ ባ ታማሬታ ባኮ ፄጊዲ፥ «ታና ካላናው ኮያ ኦኒካ ባና ካዶ፤ ባ ማስቃሊያ ቶኪዲ ታና ካሎ።
MAR 8:35 ባ ሼምፑዋ ኣሻናው ኮያ ኡራይ ꬋይሳና። ሺን ታ ጊሾኔ ዎንጌላ ጊሾ ባ ሼምፑዋ ꬋይሲያ ኡራይ ኣሻና።
MAR 8:36 ኢሲ ኣሲ ሳዓን ዴዒያ ኡባባ ባው ሺሺዲ፥ ባ ሼምፑዋ ꬋይሲኮ ኢያ ኣይ ማዳኔ?
MAR 8:37 ኢሲ ኣሲ ባ ሼምፑዋ ዎዛናው ኣይ ኢማናው ዳንዳዒ?
MAR 8:38 ፆሳ ኣማኖና ሃ ኢታ ዬሌቴꬃን፥ ኢሲ ኣሲ ታናኒኔ ታ ቃላን ዬላቲኮ፥ ኣሳ ናዓይ፥ ቃሲ ባ ኣዋ ቦንቾን ጌሻ ኪታንቾታራ ያ ዎዴ ኢያን ዬላታና» ያጊስ።
MAR 9:1 ዬሱሲ ኤንታኮ፥ «ታኒ ሂንቴው ቱማ ኦዳይስ፤ ፆሳ ካዎቴꬃይ ዎልቃራ ዬይሳ ቤዖና ሃይቆና ኢሲ ኢሲ ኣሳቲ ሃይሳን ዴዖሶና» ያጊስ።
MAR 9:2 ዬሱሲ ኡሱፑን ጋላሳፔ ጉዬ፥ ባራ ጴፂሮሳ፥ ያይቆባኔ ዮሃኒሳ ኤኪዲ፥ ኤንታ ፃላላ ጊታ ዴሪያ ቦላ ኬሲዲ ኤንታ ሲንꬃን ላሜቲስ።
MAR 9:3 ኢያ ማዖይካ ጶሊስ፤ ሳዓን ማዖ ሜጪያ ኦኒካ ጌሻናው ዳንዳዖናይሳ ሜላ ዳሮ ቦፂስ።
MAR 9:4 ሄ ሄꬑ ታማሬቲ፥ ኤሊያሲኔ ሙሴይ ዬሱሳራ ኦዴቲሺን ቤዒዶሶና።
MAR 9:5 ጴፂሮሲ ዬሱሳ፥ «ኣስታማሪያው፥ ኑኒ ሃይሳን ዴዔይሲ ኑስ ሎዖ፤ ኑ ሄꬑ ሻቃራታ ኢሱዋ ኔው፥ ኢሱዋ ሙሴስ፥ ቃሲ ኢሱዋ ኤሊያሳስ ሻቃራና» ያጊስ።
MAR 9:6 ኢያራኔ ሃንኮታራ ዳሮ ያዪዳ ጊሾ ኢ ኣይ ጊያኮካ ኤሪቤና።
MAR 9:7 ሄሳፌ ጉዬ፥ ሻራይ ዪዲ ኤንታ ካሚን ሻራፔ፥ «ሃይሲ ታ ዶሲያ፥ ታ ናዓ፥ ኢ ጌይሳ ሲዒቴ» ጊያ ቃላይ ዪስ።
MAR 9:8 ኤሌሲዲ ኤንቲ ዩሺ ኣꬂ ፄሊያ ዎዴ ዬሱሳፔ ኣቲን ሃራ ኦናካ ባንታ ማታን ቤዒቦኮና።
MAR 9:9 ኤንቲ ዴሪያፔ ዎꬊሺን፥ ዬሱሲ ኤንታኮ፥ «ኣሳ ናዓይ፥ ሃይቆፔ ዴንዳና ጋካናው፥ ሂንቴ ቤዒዳባ ኦዴስካ ኦዶፒቴ» ያጊዲ ኪቲስ።
MAR 9:10 ኢ ኪቲዳይሳ ኤንቲ፥ «ኤሮ» ጊዲ፥ «ሃ ሃይቆፔ ዴንዶ ጌይሲ ዎይጉሴ» ጊዲ፥ ባንታ ጊዶን ኦዴቲዶሶና።
MAR 9:11 ኤንቲ ዛሪዲ፥ «ሂጌ ኣስታማሬቲ፥ ‹ኤሊያሲ ኮይሮቲዲ ያናው ቤሴስ› ኣይስ ጎና?» ያጊዲ ኦይቺዶሶና።
MAR 9:12 ዬሱሲ ዛሪዲ «ኤሊያሲ ኮይሮቲዲ ዪዲ፥ ኡባባ ጊጊሴስ፤ ያቲን፥ ኣይስ ጌሻ ማፃፋይ፥ ‹ኣሳ ናዓይ ዳሮ ዋዬታና ኢፄታና› ያጊ ጊዲ ኦይቺስ።
MAR 9:13 ሺን ታኒ ሂንቴው ኦዳይስ፤ ኤሊያሲ ዪስ፤ ቃሲ ኢያባይ ጌሻ ማፃፋን ፃፌቲዳይሳዳ፥ ኣሳይ ኢያ ቦላ ባንታ ኮዪዳባ ኦꬂዶሶና» ያጊስ።
MAR 9:14 ዬሱሲ፥ ጴፂሮሲ፥ ያይቆቢኔ ዮሃኒሲ ሃንኮ ኢያ ታማሬታኮ ሲሚዲ ያ ዎዴ ዳሮ ኣሳይ ኤንታ ዩሹዋን ኤቂዳይሳታኔ ሂጌ ኣስታማሬ ጊዲዳ ጉꬃ ኣሳቲ ኤንታራ ፓላሜይሳ ቤዒዶሶና።
MAR 9:15 ሄ ዳሮ ኣሳይ ዬሱሳ ቤዒዳ ዎዴ ማላሌቲዲ፥ ኤሌሲዲ ኢያኮ ዎፂ ዪዲ፥ ኢያ ሳሮꬂዶሶና።
MAR 9:16 ዬሱሲ ባ ታማሬታኮ፥ «ኤንታራ ኣይ ፓላሜቲ?» ያጊዲ ኦይቺስ።
MAR 9:17 ሄ ዳሮ ኣሳ ጊዶፌ ኢሲ ኡራይ ዛሪዲ፥ «ኣስታማሪያው፥ ታ ናዓ ቦላ ኦዴቴꬂ ዲጊያ ቱና ኣያናይ ዴዒያ ጊሾ ኢያ ኔኮ ኤካዳ ያስ።
MAR 9:18 ሃ ቱና ኣያናይ ኢያ ኦይኪያ ዎዴ ኡባን፥ ኢያ ሾጪ ዬጌስ፤ ኢያ ዶናራ ጎፖንቶይ ዬስ፤ ቃሲ ኣቼ ጋርጪሴስ፤ ኣሳቴꬃካ ሚኔስ። ኢያፔ ሃ ቱና ኣያና ኬሳና ሜላ፥ ኔ ታማሬታስ ኦዳስ፥ ሺን ኬሳናው ዳንዳዒቦኮና» ያጊስ።
MAR 9:19 ዬሱሲ ዛሪዲ ኤንታኮ፥ «ኣማኖና ሃ ዎዲያ ኣሳው! ታኒ ሂንቴራ ኣዉዴ ጋካናው ዳኔ? ቃሲ ሂንቴና ኣዉዴ ጋካናው ዳንዳዓኔ? ናዓ ታኮ ሃ ኤኪ ዪቴ» ያጊስ።
MAR 9:20 ኤንቲ ናዓ ኢያኮ ኤሂዶሶና፤ ሄ ቱና ኣያናይ ዬሱሳ ቤዒዳ ሜላ ናዓ ኮኮርሲስ፤ ናዓይ ሳዓን ኩንዲዲ፥ ዶናራ ጎፖንቶይ ቶፉ ጊሺን ጎንዶሬቲስ።
MAR 9:21 ዬሱሲ ሄ ናዓ ኣዋኮ፥ «ሃይሲ ኔ ናዓ ኦይኮሳፔ ኣይ ሜላ ዎዴ ጊዳኔ?» ያጊዲ ኦይቺስ። ናዓ ኣዋይ፥ «ኢ ጉꬃን ዴዒሺን ኦይኪስ።
MAR 9:22 ኢያ ዎꬋናው ዳሮ ዎዴ ታማኒኔ ሃꬃን ዬጌስ፥ ሺን ኔ ዳንዳዒኮ፥ ኑስ ቃꬌታርኪ፥ ኑና ማዳርኪ» ያጊስ።
MAR 9:23 ዬሱሲ ኢያ፥ « ‹ኔኒ ዳንዳዒኮ ጋይ?› ኣማኒያ ኦዴስካ ኡባባይ ዳንዳዔቴስ» ያጊስ።
MAR 9:24 ኤሌሲዲ ናዓ ኣዋይ ባ ቃላ ꬎቁ ኦꬂዲ፥ «ታኒ ኣማናይስ፥ ሺን ጉጃ ኣማናናዳ ታና ማዳርኪ» ያጊስ።
MAR 9:25 ዬሱሲ ኣሳይ ዳሪ ዳሪ ቤይሳ ቤዒዲ፥ ቱና ኣያና፥ «ሃ ቱሌኔ ሙሜ ኣያናው፥ ሃ ናዓፔ ኬያ ጋዳ ኔና ታ ኪታይስ፤ ቃሲ ናምዓንꬆ ኢያን ጌሎፓ» ያጊስ።
MAR 9:26 ሄ ቱና ኣያናይ ዋሲዲ፥ ናዓ ዳሮ ኮኮርሲዲ፥ ኢያፔ ኬዪስ። ናዓይ ሃይቂዳ ዳኒን፥ ዳሮ ኣሳይ፥ «ናዓይ ሃይቂስ» ያጊዶሶና።
MAR 9:27 ሺን ዬሱሲ ናዓ ኩሺያ ኦይኪዲ ዴንꬂን፥ ናዓይ ዴንዲ ኤቂስ።
MAR 9:28 ዬሱሲ ሶ ጌሊዳይሳፌ ጉዬ ኢያ ታማሬቲ፥ «ኑኒ ሄ ቱና ኣያና ኬሳናው ኣይስ ዳንዳዒቦኮ?» ያጊዲ ዬሱሳ ዱማ ኦይቺዶሶና።
MAR 9:29 ዬሱሲ ዛሪዲ፥ «ሄሳ ሜላይ ዎሳፔኔ ፆማፔ ኣቲን ሃራባን ኬያናው ዳንዳዔና» ያጊስ።
MAR 9:30 ኤንቲ ሄ ቤሳፌ ዴንዲዲ፥ ጋሊላራ ኣꬊዲ ቢዶሶና፤ ዬሱሲ ባ ዴዒያሱዋ ኦኒካ ኤራና ሜላ ኮዪቤና።
MAR 9:31 ኢ ባ ታማሬታኮ፥ «ኣሳ ናዓ፥ ኣሲ ኣሳስ ኣꬂ ኢማናኔ ዎꬋና፤ ኢ ሄꬑ ጋላሳፔ ጉዬ፥ ሃይቆፔ ዴንዳና» ያጊዲ ታማርሴስ።
MAR 9:32 ሺን ኤንታው ኢ ጌይሲ ጌሊቤና፤ ቃሲ ኢያ ኦይቻናዉካ ያዪዶሶና።
MAR 9:33 ኤንቲ ቂፊርናሆሜ ካታማ ቢዲ ሶ ጌሊዳይሳፌ ጉዬ ዬሱሲ ኤንታኮ፥ «ኦጌን ኣይ ኦዴቴቲ?» ያጊዲ ኦይቺስ።
MAR 9:34 ሺን ኤንቲ፥ «ኑ ጊዶን ኡባፌ ኣꬋናይ ኦኔ?» ያጊዲ ፓላሚዳ ጊሾ ሲዒ ጊዶሶና።
MAR 9:35 ዬሱሲ ኡቲዲ፥ ታማኔ ናምዑ ታማሬታ ፄጊዲ፥ «ኦኒካ ሲንꬄ ኣꬋናው ኮይኮ፥ ኡባፌ ጉዬ ኣꬊዲ፥ ኡባስ ኣይሌ ጊዳናው ቤሴስ» ያጊስ።
MAR 9:36 ኢሲ ጉꬃ ናዓ ኤኪዲ፥ ኤንታ ጊዶን ኤሲስ፤ ሄ ጉꬃ ናዓ ኢዲሚዲ ኤንታኮ፥
MAR 9:37 «ሃይሳ ሜላ ጉꬃ ናይታፔ ኢሱዋ ታ ሱንꬃን ሞኪያ ኦኒካ ታና ሞኬስ፤ ቃሲ ታና ሞኪያ ኦኒካ ታና ኪቲዳይሳካ ሞኬሲፔ ኣቲን ታ ፃላላ ሞኬና» ያጊስ።
MAR 9:38 ዮሃኒሲ፥ «ኣስታማሪያው፥ ኢሲ ኣሲ ኔ ሱንꬃን ቱና ኣያናታ ኬሲሺን ኑኒ ቤዒዲ፥ ኑ ባጋ ጊዶና ጊሾ ኢያ ዲጊዳ» ያጊስ።
MAR 9:39 ሺን ዬሱሲ፥ «ኦኒካ ታ ሱንꬃን ፆሳይ ኦꬂያ ማላታታ ኦꬂዲ፥ ኤሌሲዲ ታ ቦላ ኢታባ ኦዴታናው ዳንዳዔይ ባይና ጊሾ ዲጎፊቴ።
MAR 9:40 ኑባ ኢፆና ኡራይ ኑ ባጋ።
MAR 9:41 ታኒ ሂንቴው ቱማ ኦዳይስ፤ ሂንቴ ታይሳታ ጊዲያ ጊሾ ኦኒካ ሂንቴው ታ ሱንꬃን ሃሎ ሃꬂ ኡያናው ኢሚኮካ፥ ባ ዎይቱዋ ኤካና።
MAR 9:42 «ታና ኣማኒያ ሃ ጉꬃታፔ ኢሱዋ ባሌꬂያ ኦኒካ፥ ጋቻ ዎጋ ዎፃ ባ ቆꬌን ቃቺዲ፥ ኣባን ዉሊያኮ ኢያው ሎዖ።
MAR 9:43 ኔ ኩሼይ ኔና ባሌꬂኮ፥ ቃንፃ ሆላ። ኔኒ ናምዑ ኩሼራ ቶዖና ጋናሜ ታማን ዬጌቴይሳፌ፥ ዱፃ ኩሼራ ዴዑዋ ጌሎይ ኔው ሎዖ።
MAR 9:45 ኔ ቶሆይ ኔና ባሌꬂኮ፥ ቃንፃ ሆላ። ኔኒ ናምዑ ቶሁዋራ ጋናሜ ታማን ዬጌቴይሳፌ፥ ዎቤ ጊዳዳ ዴዑዋ ጌሌይሲ ኔው ሎዖ።
MAR 9:47 ኔ ኣይፌይ ኔና ባሌꬂኮ፥ ዎጫ ኬሳ ሆላ። ኔኒ ናምዑ ኣይፊያራ ጋናሜ ታማን ዬጌቴይሳፌ፥ ኢሲ ኣይፊያራ ፆሳ ካዎቴꬃ ጌሌይሲ ኔው ሎዖ።
MAR 9:48 ያን ኤንታ ሚያ ጉፁኔይ ሃይቄና፥ ታማይካ ቶዔና።
MAR 9:49 «ያርሾይ ማፂኔን ጌዬይሳ ሜላ ኣሲ ኡባይ ታማን ሃርቄታና።
MAR 9:50 ማፂኔይ ሎዖ፥ ሺን ኢ ማልዖና ኢፂኮ፥ ዛሪዲ ዋቲ ማልዔꬃኔ? ሂንቴናን ማፂኔይ ዴዖ። ያኒዲ ኢሶይ ኢሱዋራ ሳሮቴꬃን ዴዒቴ» ያጊስ።
MAR 10:1 ዬሱሲ ሄሳፌ ዴንዲዲ፥ ዪሁዳ ቢታ ቢዲ ዮርዳኖሴ ሻፋ ፒኒስ። ዳሮ ኣሳይ ዛሪዲ ኢያኮ ሺቂን፥ ካሴይሳዳካ ሄ ኣሳ ታማርሲስ።
MAR 10:2 ኢሲ ኢሲ ፋሪሳዌቲ ፓጫናው ኮዪዲ ዬሱሳ፥ «ኢሲ ኣሲ ባ ማቺው ዬዳና ሜላ ሙሴ ሂጌይ ኪቲ?» ያጊዲ ኢያ ኦይቺዶሶና።
MAR 10:3 ኢ ዛሪዲ፥ «ሙሴይ ሂንቴና ዎይጊዲ ኪቲዴ?» ያጊስ።
MAR 10:4 ኤንቲ፥ «ሙሴይ፥ ‹ኢሲ ኣሲ ባ ማቼስ ኣንጆ ዎርቃቴ ኢሚዲ ዬዶ› ጊስ» ያጊዶሶና።
MAR 10:5 ዬሱሲ ዛሪዲ፥ ኤንታ «ሂንቴ ኦዲን ሲዖናይሳታ ጊዲያ ጊሾ ሙሴይ ሃ ኪታ ሂንቴው ፃፊስ።
MAR 10:6 ሺን ፆሳይ ኮይሮ ሜꬊያ ዎዴ ኣዴኔ ማጫ ኦꬂዲ፥ ኤንታ ሜꬊስ።
MAR 10:7 ሄሳ ጊሾ፥ ኢሲ ኣሲ ባ ኣዋኔ ባ ኣዪው ኣጊዲ፥ ባ ማቼራ ኢሲፌ ዴዔስ።
MAR 10:8 ኤንቲ ናምዓይ ኢሲ ኣሴ ጊዶሶና፤ ሂዛፔ፥ ኤንቲ ኢሲ ኣሴ ጊዶሶናፔ ኣቲን ናምዑ ኣሲ ጊዶኮና።
MAR 10:9 ሄሳ ጊሾ፥ ፆሳይ ኢሲፌ ቃቺዳይሳ ኣሲ ሻኮፎ» ያጊስ።
MAR 10:10 ኤንቲ ሶ ሲሚዳ ዎዴ ኢያ ታማሬቲ ሃ ኦዳባ ዬሱሳ ናምዓንꬆ ኦይቺዶሶና።
MAR 10:11 ዬሱሲ ኤንታኮ፥ «ባ ማቺው ዬዲዲ ሃራ ኤኪያ ኦኒካ ላይማቴስ።
MAR 10:12 ቃሲ ማጫሲያካ ባ ኣዚናፔ ኬያዳ ሃራ ኣዚና ጌሊኮ ላይማታዉሱ» ያጊስ።
MAR 10:13 ዬሱሲ ጉꬃ ናይታ ቦቻና ሜላ፥ ኢሲ ኢሲ ኣሳይ ናይታ ኢያኮ ኤሆሶና፥ ሺን ኢያ ታማሬቲ ሄ ኣሳ ሃንቄቲዶሶና።
MAR 10:14 ዬሱሲ ሄሳ ቤዒዲ፥ ባ ታማሬታ ሃንቄቲዲ፤ ኤንታኮ፥ «ጉꬃ ናይቲ ታኮ ዬይሳ ዲጎፊቴ፤ ፆሳ ካዎቴꬃይ ሃይሳታ ሜላሳ።
MAR 10:15 ታኒ ሂንቴው ቱማ ኦዳይስ፤ ፆሳ ካዎቴꬃ ጉꬃ ናዓዳ ኤኮና ኡራይ ኦኒካ ሄ ካዎቴꬃ ኡባራካ ጌሌና» ያጊስ።
MAR 10:16 ጉꬃ ናይታ ኢዲሚዲ፥ ባ ኩሺያ ኤንታ ኢሱዋ ኢሱዋ ቦላ ዎꬂዲ ኣንጂስ።
MAR 10:17 ዬሱሲ ባናው ኬዪዳ ዎዴ ኢሲ ኡራይ ዎፂ ዪዲ፥ ኢያ ሲንꬃን ጉልባቲዲ፥ «ኬሃ ኣስታማሪያው፥ ሜሪና ዴዑዋ ላታናው ታኒ ኣይ ኦꬆ?» ያጊዲ ኦይቺስ።
MAR 10:18 ዬሱሲ፥ «ኣይስ ታና ኬሃው ጋዳ ፄጋይ? ፆሳ ፃላላፔ ኣቲን ሃሪ ኬሂ ኦኒካ ባዋ።
MAR 10:19 ፆሳ ኪታ፥ ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ ኢንፃርሳን ጪሞፋ፤ ኔ ኣዋኔ ኔ ኣዪው ቦንቻ ያጌይሳ ኤራሳ» ያጊስ።
MAR 10:20 ኡራይ፥ «ኣስታማሪያው፥ ታኒ ሄሳ ኡባ ናዓቴꬃፌ ዶማዳ ሃዒ ጋካናው ናጋይስ» ያጊስ።
MAR 10:21 ዬሱሲ ኡራ ቲሺ ኦꬂ ፄሊዲ ዶሲስ፤ «ኔው ኢሲባይ ፓጬስ፤ ባዳ ኔው ዴዒያባ ኡባ ባይዛዳ፥ ሄ ሚሺያ ማንቆታስ ኢማ፤ ኔኒ ሳሎን ዱሬታና። ያታ ሲማዳ ታና ካላ» ያጊስ።
MAR 10:22 ሺን ኡራይ ሄሳ ሲዒዲ፥ ኢ ዳሮ ዱሬ ጊዲያ ጊሾ ባ ሶምዑዋ ካሬꬂስ፥ ኡፋይቶና ኣጊዲ ቢስ።
MAR 10:23 ዬሱሲ ባ ታማሬታ ዩሺ ኣꬂ ፄሊዲ፥ «ዱሬ ኣሲ ፆሳ ካዎቴꬃ ጌላናይሲ ዋኒዲ ሜታንዴሻ!» ያጊስ።
MAR 10:24 ኢያ ታማሬቲ ኢያ ቲሚርቲያ ሲዒዲ ማላሌቲዶሶና። ሺን ዬሱሲ ቃሲካ ኤንታኮ፥ «ናይቶ፥ ፆሳ ካዎቴꬃ ጌላናይሲ ዋኒዲ ሜታንዴሻ!
MAR 10:25 ዱሬ ኣሲ ፆሳ ካዎቴꬃ ጌላናይሳፌ፥ ጊማሌይ ናርፔ ሉሆራ ኣꬌይሲ ካዉዬስ» ያጊስ።
MAR 10:26 ኢያ ታማሬቲ ማላሌቲዲ፥ «ያቲን፥ ኦኒ ኣታኔ?» ያጊዲ፥ ኢሶይ ኢሱዋ ኦይቺዶሶና።
MAR 10:27 ዬሱሲ ኤንታ ቲሺ ኦꬂ ፄሊዲ፥ «ሃይሲ ፆሳስ ዳንዳዔቴስፔ ኣቲን ኣሳስ ዳንዳዔቴና፤ ፆሳስ ኡባባይ ዳንዳዔቴስ» ያጊስ።
MAR 10:28 ጴፂሮሲ ዬሱሳኮ፥ «ሄኮ፤ ኑኒ ኑባ ኡባ ኣጊዲ፥ ኔና ካሊዳ» ያጊስ።
MAR 10:29 ዬሱሲ «ታኒ ሂንቴው ቱማ ኦዳይስ፤ ታ ጊሾኔ ዎንጌላ ጊሾ ኬꬃ ዎይኮ ኢሻታ ዎይኮ ሚቼታ ዎይኮ ኣዋ ዎይኮ ኣዪው ዎይኮ ማቺው ዎይኮ ናይታ ዎይኮ ጋዲያ ኣጊዳይ ኦኒካ፥
MAR 10:30 ሃዒ ሃ ዎዲያን ፄቱ ኩሼ ኬꬃ፥ ኢሻታ፥ ሚቼታ፥ ኣዬታ፥ ናይታ፥ ጋዲያ፥ ጎዴቴꬃራ ኢሲፌ ኤካና። ሲንꬃፌ ያና ዎዲያንካ ሜሪና ዴዑዋ ኤካና።
MAR 10:31 ሺን ዳሮቲ ሃዒ ዴꬃን ሲንꬄ ጊዲዳይሳቲ ጉዬ ጊዳና፥ ቃሲ ዳሮቲ ሃዒ ጉዬ ጊዲዳይሳቲ ሲንꬄ ጊዳና» ያጊስ።
MAR 10:32 ዬሱሳራኔ ኢያ ታማሬታራ ዬሩሳላሜ ቢሺን፥ ዬሱሲ ባ ታማሬታ ሲንꬃን ሃሙቴስ። ኤንቲ ማላሌቲዶሶና። ኢያ ካሌይሳቲካ ያዪዶሶና። ናምዓንꬆ፥ ታማኔ ናምዑ ታማሬታ ጋፃ ኬሲዲ፥ ባና ጋካናባ ዱማ ኤንታው ሃይሳዳ ያጊዲ ኦዲስ።
MAR 10:33 «ሄኮ፥ ኑኒ ዬሩሳላሜ ሃዒ ኬዮስ። ያን ኣሳ ናዓይ፥ ካሂኔ ሃላቃታሲኔ ሂጌ ኣስታማሬታስ ኣꬂ ኢሜታና። ኤንቲ ኢያ ቦላ ሃይቆ ፒርዳ ፒርዳና፤ ቃሲ ኣይሁዴ ጊዶና ዴሪያስ ኢያ ኣꬂ ኢማና።
MAR 10:34 ሄ ኣይሁዴ ጊዶና ዴሬይ ኢያ ቶቻና፥ ኢያ ቦላ ጩታና፥ ሊሶን ጋራፋናኔ ዎꬋና። ኢ ሄꬑ ጋላሳፔ ጉዬ፥ ሃይቆፔ ዴንዳና» ያጊስ።
MAR 10:35 ዛብዲዮሳ ናይቲ ያይቆቢኔ ዮሃኒሲ ዬሱሳኮ ዪዲ፥ «ኣስታማሪያው፥ ኑኒ ኔና ዎሲያ ኢሲባ ኑስ ኦꬃርኪ» ያጊዶሶና።
MAR 10:36 ዬሱሲ ኤንታኮ፥ «ታኒ ሂንቴው ኣይ ኦꬆ?» ያጊስ።
MAR 10:37 ኤንቲ፥ «ኔኒ ኔ ቦንቾ ካዎቴꬃን ኡቲያ ዎዴ ኑፔ ኢሱዋ ኡሻቻ ባጋራ ቃሲ ኢሱዋ ሃዲርሳ ባጋራ ኡቲሳርኪ» ያጊዶሶና።
MAR 10:38 ሺን ዬሱሲ ኤንታኮ፥ «ሂንቴ ኣይ ዎሲያኮ ኤሬኬታ፥ ታ ኡያናው ዴዒያ ፁዓ ኡያናው ዳንዳዔቲ? ቃሲ ታኒ ፃማቄታናው ዴዒያ ፂንቃቲያ ፃማቄታናው ዳንዳዔቲ?» ያጊስ።
MAR 10:39 ኤንቲ ዛሪዲ፥ «ኤ ዳንዳዖስ» ያጊዶሶና። ዬሱሲ ቃሲ፥ «ቱማካ ታ ኡያናው ዴዒያ ፁዓ ሂንቴ ኡያና፥ ታኒ ፃማቄታናው ዴዒያ ፂንቃቲያ ሂንቴ ፃማቄታና።
MAR 10:40 ሺን ታፔ ኡሻቻ ባጋራኔ ሃዲርሳ ባጋራ ኡታናይሳታ ዶራናው ታው ማቲ ባዋ፥ ሺን ሄ ቤሳይ ፆሳይ ኢማናው ጊጊሲ ዎꬂዳይሳታሳ» ያጊስ።
MAR 10:41 ሃንኮ ታሙ ታማሬቲ ሄሳ ሲዒዳ ዎዴ ያይቆባኔ ዮሃኒሳ ሃንቄቲዶሶና።
MAR 10:42 ዬሱሲ ኤንታ ኡባ ባኮ ፄጊዲ፥ «ኣይሁዴ ጊዶና ኣሳ ሃላቃቲ ዴሪያ ሃሬይሳታ ጌቴቲዲ ፄጌቴይሳኔ ሃሬይሳታስ ዴሪያ ቦላ ማቲ ዴዔይሳ ሂንቴ ኤሬታ።
MAR 10:43 ሺን ሂንቴ ጊዶን ሄሳ ሜላ ጊዴና፤ ሂንቴ ጊዶን ጊታታናው ኮዬይ ኦኒካ ሂንቴው ኣይሌ ጊዳናው ቤሴስ።
MAR 10:44 ቃሲ ሂንቴ ጊዶን ኡባፌ ቦላ ጊዳናው ኮዬይ ኦኒካ ሂንቴ ኡባስ ኣይሌ ጊዳናው ቤሴስ።
MAR 10:45 ሃሪ ኣቶሺን፥ ኣሳ ናዓይካ፥ ኣሳስ ኦꬃናዉኔ ዳሮታ ዎዛናው ባ ሼምፑዋ ኣꬂ ኢማናው ዪሲፔ ኣቲን ኣሲ ኢያው ኦꬃና ሜላ ዪቤና» ያጊስ።
MAR 10:46 ኤንቲ ኢያርኮ ካታማ ቢዶሶና። ዬሱሲ ባ ታማሬታራኔ ዳሮ ኣሳራ ኢያርኮፌ ኬዪሺን፥ ፂሞሳ ናዓይ፥ ቆቄይ፥ ባርፂሞሳ ጌቴቴይሲ፥ ኦጌ ጋፃን ዎሲሼ ኡቲስ።
MAR 10:47 ባርፂሞሲ፥ ያራ ኣꬌይ ናዚሬቴ ዬሱሳ ጊዲዳይሳ ሲዒዳ ዎዴ ባ ቃላ ꬎቁ ኦꬂዲ፥ «ዳዊቴ ናዓ ዬሱሳ፥ ታና ማራርኪ!» ያጉሱ ኦይኪስ።
MAR 10:48 ዳሮ ኣሳይ ኢያ፥ «ሃይዛ!» ጊዲ ሃንቄቲዶሶና። ሺን፥ ኢ ባ ቃላ ካሴይሳፌ ዳሮ ꬎቁ ኦꬂዲ፥ «ዳዊቴ ናዓው፥ ታና ማራርኪ!» ያጊስ።
MAR 10:49 ዬሱሲ ኤቂዲ፥ «ኢያ ሃ ፄጊቴ» ያጊስ። ኤንቲ ቆቂያኮ፥ «ኣይኮይ ባዋ፥ ዴንዳ ኤቃ፥ ኔና ፄጌስ» ያጊዶሶና።
MAR 10:50 ቆቄይ ባ ማዑዋ ሆሊ ዬጊዲ፥ ጉፒ ዴንዲ ኤቂዲ፥ ዬሱሳኮ ቢስ።
MAR 10:51 ዬሱሲ፥ «ታኒ ኔው ኣይ ኦꬃና ሜላ ኮያይ?» ያጊስ። ቆቄይ፥ «ኣስታማሪያው፥ ታ ፄላናው ኮያይስ» ያጊስ።
MAR 10:52 ዬሱሲ ኢያ፥ «ባ፥ ኔ ኣማኖይ ኔና ፓꬂስ» ያጊስ። ሶሁዋራካ ኢያ ኣይፌይ ፄሊን፥ ዬሱሳ ካሊስ።
MAR 11:1 ኤንቲ ዬሩሳላሜ ማቲሼ፥ ሻማሆ ዴሪያ ማታን ዴዒያ ቤቴፋጌኔ ቢታኒያ ካታማታ ጋኪዶሶና። ዬሱሲ ባ ታማሬታፔ ናምዓታ ሲንꬄ ኪቲዲ፥
MAR 11:2 «ሂንቴፌ ሲንꬃን ዴዒያ ጉታ ቢቴ፤ ያ ጌሊዳ ሜላ ኦኒካ ቶጊቦና ቃሾን ዴዒያ ሃሬ ማሪ ሂንቴ ዴማና፥ ኢያ ቢሊዲ፥ ሃ ኤኪ ዪቴ።
MAR 11:3 ኦኒካ ሂንቴና፥ ‹ሃይሳ ኣይስ ኦꬄቲ?› ያጊዲ ኦይቺኮ፥ ‹ጎዳይ ኢያ ኮዬስ፥ ኤሌሲዲ ሃ ዬዳና› ያጊቴ» ያጊስ።
MAR 11:4 ኤንቲ ቢዲ፥ ሃሬ ማሪ ካሬ ቦላ ኦጌ ማታን ቃሼቲዲ ዴዔይሳ ዴሚዲ ቢሊዶሶና።
MAR 11:5 ሄ ቤሳን ኤቂዳ ኢሲ ኢሲ ኣሳቲ ኤንታኮ፥ «ሃሬ ማራ ዋታናው ቢሌቲ?» ያጊዶሶና።
MAR 11:6 ኢያ ታማሬቲ ዬሱሲ ባንታና ኪቲዳይሳ ኦዲን፥ ኣሳቲ ዬዲ ኣጊዶሶና።
MAR 11:7 ኤንቲ ሃሬ ማራ ዬሱሳኮ ኤሂዲ፥ ባንታ ማዑዋ ኢያ ዞኮን ሂፂን ዬሱሲ ሄ ሃሬ ማራ ቶጊስ።
MAR 11:8 ዳሮ ኣሳይ ባንታ ማዑዋ ኦጊያን ሂፂዶሶና፤ ቃሲ ሃራቲ ሚꬃ ታሼ ታሺዲ፥ ኦጌን ሂፂዶሶና።
MAR 11:9 ዬሱሳፔ ሲንꬃራ ሃሙቲያ ኣሳይኔ ኢያ ካሊያ ኣሳይ ባንታ ቃላ ꬎቁ ኦꬂዲ፥ «ሆሳና! ፆሳይ ጋላቴቶ! ጎዳ ሱንꬃን ዬይሲ ኣንጄቲዳይሳ።
MAR 11:10 ጎዳ ሱንꬃን ያ ኑ ኣዋ ዳዊቴ ካዎቴꬃይ ኣንጄቲዳይሳ። ኡባፌ ቦላ ሳሉዋን ዴዒያ ፆሳይ ጋላቴቶ» ያጊዶሶና።
MAR 11:11 ዬሱሲ ዬሩሳላሜ ቢዲ፥ ፆሳ ኬꬃ ጌሊስ። ቃሲ ኡባባ ዩዪ ፄሊዳፔ ጉዬ፥ ሳዓይ ቃሚያ ጊሾ ታማኔ ናምዑ ታማሬታራ ቢታኒያ ካታማ ቢስ።
MAR 11:12 ዎንቴꬃ ጋላስ ኤንቲ ቢታኒያፔ ኬዪዲ ቢሺን፥ ዬሱሲ ኮሻቲስ።
MAR 11:13 ሃሆን ኢሲ ባላሴ ሚꬂው ሃይꬃ ፃላላ ማዓ ኡቲዳሮ ቤዒዲ፥ ኢ ቦላ ኣይፌይ ቤቲኮ ጊዲ፥ ቤዓናው ኢኮ ቢስ፥ ሺን ኢኮ ኢ ቢያ ዎዴ ሃይꬃ ፃላላፔ ኣቲን ኢሲ ኣይፌካ ዴሚቤና፤ ኣይስ ጊኮ፥ ባላሴይ ኣይፊያ ዎዴይ ጋኪቤና።
MAR 11:14 ዬሱሲ ሄ ባላሲው፥ «ሂዛ፥ ኔፔ ሜሪናው ኣሲ ኣይፌ ሞፖ» ያጊስ። ኢያ ታማሬቲ ኢ ጌይሳ ሲዒዶሶና።
MAR 11:15 ኤንቲ ዬሩሳላሜ ቢዶሶና፤ ዬሱሲ ፆሳ ኬꬃ ጌሊዲ፥ ያን ባይዜይሳታኔ ሻሜይሳታ ካሬ ጎዶ ኦይኪስ፤ ቃሲ ሚሼ ላሜይሳታ ፃርጴዛኔ ሆሌ ባይዜይሳታ ኦይዲያ ኣꬂ ዬጊዲ፥
MAR 11:16 ኣሲ ኣይቢባካ ቶኪዲ፥ ፆሳ ኬꬃ ጊዶራ ኣꬎና ሜላ ዲጊስ።
MAR 11:17 ዬሱሲ ኣሳ ሃይሳዳ ያጊዲ ታማርሲስ፡ «ጌሻ ማፃፋን፥ ‹ታ ኬꬃይ ኣሲ ኡባይ ፆሳ ዎሲያ ኬꬂ ጊዳና› ጌቴቲዲ ፃፌቲስ። ሺን ሂንቴ ኢያ ፓንጋቲ ቆሴቲያ ጎንጎሎ ኦꬂዴታ» ያጊስ።
MAR 11:18 ካሂኔ ሃላቃቲኔ ሂጌ ኣስታማሬቲ ሄሳ ሲዒዲ፥ ኢያ ዎꬋናው ኦጌ ኮሺ ኦይኪዶሶና። ሺን ዳሮ ኣሳይ ኢያ ቲሚርቲያን ማላሌቲያ ጊሾ ኢያው ያዪዶሶና።
MAR 11:19 ሳዓይ ኦማርሲያ ዎዴ ዬሱሲኔ ኢያ ታማሬቲ ካታማፔ ጋፃ ኬዪዶሶና።
MAR 11:20 ኤንቲ ዎንቴꬃ ጋላስ ሄ ኦጊያራ ኣꬊሼ፥ ሄ ባላሲያ ፃጶራ ሜሊዳሮ ቤዒዶሶና።
MAR 11:21 ጴፂሮሲ ኣኬኪዲ፥ «ኣስታማሪያው፥ ሄኮ፥ ኔኒ ቃንጊዳ ባላሲያ ሜላሱ» ያጊስ።
MAR 11:22 ዬሱሲ ዛሪዲ፥ «ፆሳ ኣማኒቴ።
MAR 11:23 ታኒ ሂንቴው ቱማ ኦዳይስ፤ ኦኒካ ባ ዎዛናን ሲꬎና ጊዳባይ ሃናናይሳ ኣማኒዲ፥ ሃ ዴሪያ፥ ‹ዴንዳዳ ኣባን ኩንዳ› ያጊኮ ኢያው ሃናና።
MAR 11:24 ሄሳ ጊሾ፥ ታኒ ሂንቴው ኦዳይስ፤ ፆሳ ሂንቴ ዎሲያባኔ ኦይቺያባ ኣይባ ጊዲኮካ ኤኪዳዳ ኣማኒቴ፥ ሂንቴ ኤካና።
MAR 11:25 ፆሳ ዎሳናው ሂንቴ ኤቂያ ዎዴ ሳሎን ዴዒያ ሂንቴ ኣዋይ ሂንቴ ናጋራ ኣቶ ጋና ሜላ፥ ኦኒካ ሂንቴና ናቂዳባይ ዴዒኮ፥ ኢያው ኣቶ ጊቴ።
MAR 11:26 ሺን ኣሳ ናጋራ ሂንቴ ኣቶ ጎና ኢፂኮ፥ ሳሎን ዴዒያ ሂንቴ ኣዋይካ ሂንቴ ናጋራ ሂንቴው ኣቶ ጌና» ያጊስ።
MAR 11:27 ኤንቲ ዛሪዲ ዬሩሳላሜ ቢዶሶና። ዬሱሲ ፆሳ ኬꬃን ሃሙቲሺን፥ ካሂኔ ሃላቃቲ፥ ሂጌ ኣስታማሬቲኔ ጪማቲ ኢያኮ ዪዲ፥
MAR 11:28 «ኔኒ ሃይሳ ኦꬃናው ኔው ኣይ ማቲ ዴዒ? ዎይኮ ኔው ሃ ማታ ኢሚዳይ ኦኔ?» ያጊዶሶና።
MAR 11:29 ዬሱሲ ዛሪዲ ኤንታኮ፥ «ታ ሂንቴና ኢሲባ ኦይቻና፥ ታው ኦዲቴ። ታ ቃሲ ሃይሳ ኣይ ማታን ኦꬂያኮ፥ ሂንቴው ኦዳና።
MAR 11:30 ዮሃኒሳ ፂንቃቴይ ፆሳፌዬ ዎይኮ ኣሳፔ? ታው ኦዲቴ» ያጊስ።
MAR 11:31 ኤንቲ ባንታ ጊዶን ፓላማ ዶሚዲ፥ «ኑኒ፥ ‹ፆሳፌ› ጊኮ፥ ኢ ኑኮ፥ ‹ያቲን፥ ዮሃኒሲ ኦዲዳይሳ ኣይስ ኣማኒቤኬቲ?› ያጋና።
MAR 11:32 ‹ኣሳፔ ጊኮ› ኣሳ ኡባይ ዮሃኒሲ ናቤ ጊዴይሳ ኤሮሶና።» ያኒያ ጊሾ ኣሳስ ያዪዶሶና።
MAR 11:33 ሄሳ ጊሾ፥ ኤንቲ ዬሱሳኮ፥ «ኑኒ ኤሮኮ» ያጊዲ ዛሪዶሶና፤ ዬሱሲ፥ «ታኒካ ሃይሳ ኣይ ማታን ኦꬂያኮ፥ ሂንቴው ኦዲኬ» ያጊስ።
MAR 12:1 ዬሱሲ ኤንታው ሌሚሶን ያጊዲ ኦዲስ፤ «ኢሲ ኡራይ ዎይኔ ኣታኪልቴ ቶኪዲ፥ ዩሺ ኣꬂዲ ዲርሲ ዲሪስ። ቃሲ ሄ ዎይኒያ ጉምዒያ ኦላካ ቦኪስ። ኢያ ናጋናው ኣዱሳ ሻኮ ሻኪስ። ሄሳፌ ጉዬ፥ ኮꬄ ኦꬂያ ኣሳስ ኢሚዲ፥ ሃራ ቢታ ቢስ።
MAR 12:2 ዎይኔ ኣይፊያ ማፂያ ዎዴይ ጋኪን፥ ባና ጋኬይሳ ኤኪዲ ያና ሜላ፥ ኢሲ ባ ኣይሊያ ኮꬄ ኣዋታኮ ኪቲስ።
MAR 12:3 ኮꬄ ኣዋቲ ኢያ ኣይሊያ ኦይኪዲ ዋꬊዲ፥ ሜላ ኩሼ ዬዲዶሶና።
MAR 12:4 ናምዓንꬆ ሃራ ኣይሌ ኤንታኮ ኪቲን፥ ኤንቲ ሄ ኣይሊያስ ሁዒያ ቆዒዲ ካዉሺዲ ዬዲዶሶና።
MAR 12:5 ዎይኔ ኣታኪልቲያ ጎዳይ ቃሲካ ሃራ ኣይሌ ኪቲስ። ሄ ኣይሊያ ዎꬊዶሶና፥ ቃሲ ሃራ ዳሮታ ሄሳዳ ኦꬂዶሶና፥ ኢሶታ ኢሶታ ዋꬊዲ፥ ሃራታ ዎꬊዶሶና።
MAR 12:6 «ዎይኔ ኣታኪልቲያ ጎዳስ ኪታናው ኡባፌ ዉርሴꬃን ኢ ዳሮ ዶሲያ ባ ናዓ ፃላሊ ኣቲስ። ኢ፥ «ኤንቲ ታ ናዓ ቦንቾና ኣጎኮና» ጊዲ፥ ባ ናዓ ኤንታኮ ኪቲስ።
MAR 12:7 «ሺን ኮꬄ ኣዋቲ ባንታ ጊዶን፥ ‹ላታናይሲ ሃይሳ፤ ዬꬊቴ ኢያ ዎꬎስ፤ ኢያ ላታይ ኑባ ጊዳና!› ያጊዶሶና።
MAR 12:8 ናዓ ኦይኪዲ ዎꬊዲ፥ ኢያ ኣሃ ዎይኔ ኣታኪልቲያ ጊዶፌ ጋፃ ኬሲ ሆሊዶሶና።
MAR 12:9 «ሂዛ፥ ዎይኔ ኣታኪልቲያ ጎዳይ ዋታኔ? ዪዲ ሄ ኮꬄ ኣዋታ ዎꬊ ኦንጊዲ፥ ዎይኒያ ኮꬄ ኦꬂያ ሃራ ኣሳስ ኢማና።
MAR 12:10 ‹ጊምቤይሳቲ ቦሪዲ ኢፂዳ ሹቻይ ጎዳ ፃጱዋ ሚንꬂያ፥ ኡባፌ ኣꬊያ ሹቹ ጊዲስ። ሃይሲ ጎዳይ ኦꬂዳባ፤ ቃሲ ኑ ኣይፊያስካ ማላሊሲያባ› ያጌይሳ ጌሻ ማፃፋፔ ናባቢቤኬቲ?» ያጊስ።
MAR 12:12 ካሂኔ ሃላቃቲ፥ ሂጌ ኣስታማሬቲኔ ጪማቲ ዬሱሲ ሄ ሌሚሱዋ ባንታ ቦላ ሌሚሲዳይሳ ኤሪዳ ጊሾ ኢያ ኦይካናው ኮዪዶሶና፥ ሺን ኣሳስ ያዪዲ፥ ኣጊ ቢዶሶና።
MAR 12:13 ቃሲ ኢያ ኦዳፔ ባላ ዴሚዲ፥ ኢያ ኦይካና ሜላ፥ ፋሪሳዌታፔኔ ሄሮዲሳ ባጋታፔ ጉꬃ ኣሳታ ኢያኮ ኪቲዶሶና።
MAR 12:14 ኤንቲ ኢያኮ ዪዲ፥ «ኣስታማሪያው፥ ኔኒ ቱማ ኦዴቴይሳኔ ኣሳፔ ኣሴ ሻኮናይሳ ኑኒ ኤሮስ። ኔኒ ኣሴ ዱማያካ፤ ቃሲ ፆሳ ኦጊያ ቱማቴꬃን ታማርሳሳ። ኑኒ ሮሜ ቢታ ካዉዋ ቄሳሬስ ጊራ ጊሬይሲ ዎጌዬ ዎጋ ጊዴኔ? ጊራ ጊራኔ ኣጋኔ?» ያጊዶሶና።
MAR 12:15 ሺን ኤንታ ጩቦቴꬃ ዬሱሲ ኤሪዲ፥ «ታና ኣይስ ፓጬቲ? ኣኔ ኢሲ ሳንቲሜ ታና ቤሲቴ» ያጊስ።
MAR 12:16 ኤንቲ ኢያው ኤሂዶሶና፥ «ሃ ማላይኔ ሱንꬃይ ኦዴይሴ?» ያጊዲ ኤንታ ኦይቺስ። ኤንቲ፥ «ሮሜ ካዉዋ ቄሳሬይሳ» ያጊዶሶና።
MAR 12:17 ዬሱሲ ዛሪዲ፥ «ያቲኮ፥ ቄሳሬይሳ ቄሳሬስ፥ ፆሳይሳ ፆሳስ ኢሚቴ» ያጊን ኤንቲ ኢያባ ማላሌቲዶሶና።
MAR 12:18 ሃይቂዳ ኣሲ ዴንዴና ጊያ ሳዱቃዌታፔ ኢሲ ኢሲ ኣሳቲ ዬሱሳኮ ዪዲ፥ ሃይሳዳ ያጊዲ፥ ኢያ ኦይቺዶሶና።
MAR 12:19 «ኣስታማሪያው፥ ሙሴይ ኑስ ሂጊያ ፃፊሼ፥ ‹ማቾ ኤኪዳ ኣሲ ናዓ ዬሎና ሃይቂኮ፥ ሄ ሃይቂዳይሳ ኢሻይ ኢያ ማቺው ኤኪዲ፥ ባ ኢሻስ ናዓ ዬላናው ቤሴስ› ያጌይሳ ፃፊስ።
MAR 12:20 ቤኒ ዎዴ ላፑን ኢሻቲ ዴዔይሳታፔ ባይራይ ማቾ ኤኪዲ፥ ናዓ ዬሎና ሃይቂስ።
MAR 12:21 ናምዓንꬆይ ኢዮ ኤኪስ፥ ኢካ ናዓ ዬሎና ሃይቂስ። ሄꬓንꬆይካ ሄሳዳ ሃኒስ።
MAR 12:22 ላፑናቲካ ሄሳꬆ ኢዮ ኤኪዲ፥ ናዓ ዬሎና ሃይቂዶሶና። ኡባፌ ጉዬ፥ ቃሲ ሄ ማጫሲያ ሃይቃሱ።
MAR 12:23 ያቲን፥ ላፑናቲ ኢዮ ኤኪዳ ጊሾ ሃይቂዳ ኣሳይ ሃይቆፔ ዴንዲያ ጋላስ፥ ኢያ ኤንታፌ ኣዉሳስ ማቾ ጊዳኔ?» ያጊዶሶና።
MAR 12:24 ዬሱሲ ዛሪዲ፥ «ሂንቴ ባሌይ፥ ጌሻ ማፃፋታ ዎይኮ ፆሳ ዎልቃ ኤሮና ጊሾሳ!
MAR 12:25 ሃይቂዳ ኣሳይ ሃይቆፔ ዴንዲያ ጋላስ፥ ሳሎን ዴዒያ ኪታንቾታ ሜላ ጊዳናፔ ኣቲን ኣዴ ኣሳይ ኤኮኮና፤ ማጫ ኣሳይ ጌሌኮና።
MAR 12:26 ሺን ሃይቂዳይሳታ ዴንዱዋባ ጊዲኮ፥ ሙሴ ማፃፋን ፃፌቲዳ ፁጌቲያ ቡሪያባ ኦዲያ ቤሳን፥ ፆሳይ ሙሴኮ፥ ‹ታኒ፥ ኣብራሃሜ ፆሳ፥ ዪሳቃ ፆሳ፥ ያይቆባ ፆሳ› ጊዳይሳ ናባቢቤኬቲ?
MAR 12:27 ሄሳ ጊሾ፥ ኢ፥ ፓፃ ዴዔይሳታ ፆሳፌ ኣቲን ሃይቂዳይሳታ ፆሴ ጊዴና። ሂንቴ ዳሮ ባሊዴታ» ያጊስ።
MAR 12:28 ሂጌ ኣስታማሬታፔ ኢሶይ ኤንቲ ፓላሜይሳ ሺቂዲ ሲዒስ። ቃሲ ዬሱሲ ኤንታው ሎይꬂ ዛሪዳይሳ ሲዒዲ፥ «ኪታ ኡባፌ ኣꬊያ ኪታይ ኣዉሴ?» ያጊዲ ዬሱሳ ኦይቺስ።
MAR 12:29 ዬሱሲ ዛሪዲ፥ ኢያ ሃይሳዳ ያጊስ፡ «ኪታ ኡባፌ ኣꬊያ ኪታ ሲዒቴ፤ ‹ኢስራዔሌ ኣሳው፥ ጎዳይ ኑ ፆሳይ ኢሲ ጎዳ።
MAR 12:30 ኔ ጎዳ ኔ ፆሳ ኔ ኩሜꬃ ዎዛናፔ፥ ኔ ኩሜꬃ ሼምፑዋፌ፥ ኔ ኩሜꬃ ቆፋፔ፥ ኔ ኩሜꬃ ዎልቃፌ ዶሳ› ያጌስ።
MAR 12:31 ቃሲ ኪታ ኡባፌ ኣꬊያ ናምዓንꬆ ኪታይ ሃይሳ፤ ‹ኣሴ ኡባ ኔ ሁዒያዳ ዶሳ› ያጌይሳ፤ ሃይሳታፔ ኣꬊያ ሃራ ኪቲ ባዋ» ያጊስ።
MAR 12:32 ሂጌ ኣስታማሬይ ዬሱሳኮ፥ «ኣስታማሪያው፥ ቱማ ጋዳሳ፤ ኔኒ ‹ፆሳይ ኢሲ ፆሳ ፃላላ። ኢያፔ ኣቲን ሃሪ ባዋ› ጊዳይሲ ቱማ።
MAR 12:33 ፆሳ ኩሜꬃ ዎዛናፔ፥ ኩሜꬃ ቆፋፔኔ ኩሜꬃ ዎልቃፌ ዶሴይሲኔ ቃሲ ኣሴ ኡባ ባ ሁዒያዳ ዶሴይሲ፥ ፁጊያ ያርሹዋፌኔ ሃራ ያርሾ ኡባፌ ኣꬌስ» ያጊስ።
MAR 12:34 ዬሱሲ ሂጌ ኣስታማሪያ ዛሮይ ኣꬊዳ ኤራንቾ ኣሳ ዛሮ ጊዲዳይሳ ቤዒዲ፥ «ኔኒ ፆሳ ካዎቴꬃፌ ሃካባካ» ያጊስ፤ ሄሳፌ ጉዬ፥ ዬሱሳ ሃራባ ኦይቻናው ኦኒካ ሚኒቤና።
MAR 12:35 ዬሱሲ ፆሳ ኬꬃን ታማርሲሼ፥ ሃይሳዳ ያጊስ፡ «ሂጌ ኣስታማሬቲ ኪሪስቶሳ ዎይጊዲ ዳዊቴ ናዓ ጎና?
MAR 12:36 ዳዊቴይ ጌሻ ኣያናን ኩሚዲ፥ ‹ጎዳይ፥ ታ ጎዳ፥ «ታኒ ኔ ሞርኬታ ኔ ቶሆይ ዬꬊያሶ ኦꬃና ጋካናው፥ ሃይሳን ታፔ ኡሻቻ ባጋራ ኡታ» ጊስ› ያጊስ።
MAR 12:37 ዳዊቴይ ባ ሁዔን ኪሪስቶሳ፥ ‹ጎዳ› ጊዲ ፄጊኮ፥ ያቲን፥ ኪሪስቶሲ ዋኒዲ፥ ዳዊቴ ናዓ ጊዲ» ያጊስ። ዳሮ ኣሳይ ዬሱሲ ጌይሳ ኡፋይሳን ሲዒዶሶና።
MAR 12:38 ዬሱሲ ታማርሲሼ፥ ሃይሳዳ ያጊስ፡ «ሂጌ ኣስታማሬታፔ ናጌቲቴ፤ ኤንቲ ኣዱሳ ማዖ ማዒዲ ዩዬይሳኔ ጊያንካ ኣሳይ ኤንታ ቦንቺዲ ሳሮꬄይሳ ዶሶሶና።
MAR 12:39 ኤንቲ ኣይሁዴ ዎሳ ኬꬃታን ዳሮ ሎዖ ኦይዴ ዶሶሶና፤ ቃሲ ኣሲ ባንታና ሞኪያ ቤሳን ቦንቾ ቤሲ ዶሶሶና።
MAR 12:40 ኤንቲ ኣምዔታ ኬꬃ ቦንቂዲ፥ ባንታው ሎዖ ዳናናው ዎሳ ኣዱሶሶና፤ ኤንቲ ኡባፌ ኣꬊያ ፒርዳ ኤካና» ያጊስ።
MAR 12:41 ዬሱሲ ፆሳ ኬꬃን ሙፃታ ዬጊያ ሳፂኒያ ማታን ኡቲዲ፥ ኣሳይ ባ ሚሺያ ሄ ሳፂኒያን ዬጌይሳ ቤዒስ፤ ዳሮ ዱሬ ኣሳይ ዳሮ ሚሺያ ሄ ሳፂኒያን ዬጎሶና።
MAR 12:42 ኢሲ ማንቆ ኣምዒያ ያዳ፥ ናምዑ ባካናታ ሄ ሳፂኒያን ዬጋሱ።
MAR 12:43 ዬሱሲ ባ ታማሬታ ፄጊዲ፥ «ታኒ ሂንቴው ቱማ ኦዳይስ፤ ሙፃታ ሳፂኒያን ዬጊዳ ኣሳ ኡባፌ ሃ ማንቆ ኣምዒያ ዳርሳዳ ዬጋሱ።
MAR 12:44 ኣይስ ጊኮ፥ ሃራቲ ኡባይ ባንታው ፓላሂዳ ሚሺያፔ ዬጊዶሶና። ሺን ኢያ ባ ፓጪያፌ፥ ባው ዴዒያ ኣቁዋ ኩሜꬂ ኢማሱ» ያጊስ።
MAR 13:1 ዬሱሲ ፆሳ ኬꬃፌ ኬዪሺን፥ ኢያ ታማሬታፔ ኢሶይ፥ «ኣስታማሪያው፥ ሃ ሎዖ ሹቻኔ ሃ ሎዖ ሹቻ ኬꬃ ቤዓይ!» ያጊስ።
MAR 13:2 ዬሱሲ ዛሪዲ፥ «ሃ ጊታ ሹቻ ኬꬃ ቤዓይ? ሃ ኬꬃይ ሹቺ ሹቻ ቦላ ጊምቤቲዳ ሜላ ላሌቶና ኣቴና፤ ኢሲ ሹቺካ ኣቶና ኡባይ ላሌታና» ያጊስ።
MAR 13:3 ዬሱሲ ፆሳ ኬꬃፌ ሂኒ ባጋራ ሻማሆ ዴሪያ ቦላ ኡቲዳሺን፥ ጴፂሮሲ፥ ያይቆቢ፥ ዮሃኒሲኔ ኢንዲሪያሲ ባንታርካ ኢያኮ ዪዲ፥
MAR 13:4 «ሃይሲ ኣዉዴ ሃናኔኮ፥ ኑስ ኦዳ፤ ሃ ኡባይ ፖሌታና ዎዲያ ኤሪሲያ ማላታይ ኣይቤ?» ያጊዲ ኦይቺዶሶና።
MAR 13:5 ዬሱሲ ቃሲ ኤንታው ሃይሳዳ ያጊዲ ኦዲስ፡ «ሂንቴና ኦኒካ ባሌꬆና ሜላ ናጌቲቴ።
MAR 13:6 ዳሮ ኣሳቲ ታ ሱንꬃን፥ ‹ታኒ ኪሪስቶሳ› ያጊዲ ታማርሲሼ ዪዲ፥ ዳሮ ኣሳ ባሌꬃና።
MAR 13:7 ማታን ዴዒያ ኦላኔ ሃሆን ዴዒያ ኦላ ዎሬ ሂንቴ ሲዒያ ዎዴ ሂርጎፊቴ። ሄሳ ሜላባይ ሃናናው ቤሴስ፥ ሺን ዉርሴꬃይ ቡሮና።
MAR 13:8 ኢሲ ቢታ ኣሳይ ሃራ ቢታ ኣሳራ ኦሌታና፤ ቃሲ ኢሲ ካዎቴꬃይ ሃራ ካዎቴꬃታራ ኦሌታና፤ ቢታ ቃፆይ ኡባ ቤሳን ሃናና፤ ኮሻይ ዳና፥ ሺን ሄሲ ኡባይ ዬሎ ኢቄꬃስ ዞኬ ሜላ።
MAR 13:9 «ሺን ሂንቴ፥ ሂንቴ ሁዔን ናጌቲቴ። ኣይስ ጊኮ፥ ኣሲ ሂንቴና ኦይኪዲ፥ ፒርዳ ኬꬃስ ኣꬂ ኢማና፤ ቃሲ ኣይሁዴ ዎሳ ኬꬃታንካ ሂንቴና ሊሶን ጋራፋና፤ ዴሪያ ሃሬይሳታ ሲንꬃኒኔ ካዎታ ሲንꬃን ታ ጊሾ ሂንቴ ማርካታናው ኤቃና።
MAR 13:10 ዉርሴꬃይ ጋካናፔ ሲንꬄ ዎንጌላይ ኮይሮ ዴሬ ኡባስ ኦዴታናው ቤሴስ።
MAR 13:11 ኤንቲ ሂንቴና ፒርዳ ኬꬂ ኤሂያ ዎዴኔ ኣꬂ ኢሚያ ዎዴ ዎይጊዲ ኦዳኔኮ ኮይሮ ሂርጎፊቴ፤ ሄ ሳቲያን ፆሳይ ሂንቴው ኢሚያባ ኦዲቴ። ሂንቴናን ጌሻ ኣያናይ ኦዴቴሲፔ ኣቲን ሂንቴና ጊዴኬታ።
MAR 13:12 «ኢሻይ ባ ኢሻ፥ ኣዋይ ባ ናዓ ዎꬊሳና። ናይቲ ባንታና ዬሊዳይሳታ ቦላ ዴንዲዲ፥ ኤንታ ዎꬊሳና።
MAR 13:13 ኣሳይ ኡባይ ሂንቴና ታ ሱንꬃ ጊሾ ኢፃና፥ ሺን ዉርሴꬂ ጋካናው ሚኒዳይ ኣታና።
MAR 13:14 «ሺን ባሻ ቱናቴꬃይ ኤቃናው ቤሶና ቤሳን ኤቂዳሺን ሂንቴ ቤዓና።» (ኣኬኪሶ፡ ሄሲ ዎይ ጉሴኮ ናባቤይሲ ኣኬኮ!) «ዪሁዳ ቢታን ሄ ዎዴ ዴዔይሳቲ ዴሪያኮ ባቃቶ።
MAR 13:15 ኬꬃ ሁዔን ዴዒያ ኡራይካ ኢሲባ ኤካናው ዱጌ ዎꬊዲ፥ ባ ሶ ጌሎፖ።
MAR 13:16 ጋዴን ዴዔይሲ ባ ማዑዋ ኤካናው ጉዬ ሲሞፎ።
MAR 13:17 ሄ ዎዴ ቃንꬃቲዳ ማጫሳታሲኔ ꬋንꬂያ ማጫሳታስ ዳሮ ኡንዓ ጊዳና።
MAR 13:18 ሺን ሃይሲ ኡባይ ሃኒያ ዎዴይ ባልጎ ጊዶና ሜላ፥ ፆሳ ዎሲቴ።
MAR 13:19 ኣይስ ጊኮ፥ ፆሳይ ኣላሚያ ሜꬊዳ ዎዲያፔ ዶሚዲ፥ ሃዒ ጋካናው ሃኒቦና ሜቶይኔ ሲንꬃፌካ ሃኖና ሜቶይ ኣሳ ቦላ ሄ ዎዴ ሃናና።
MAR 13:20 ጎዳይ ሄ ጋላሳታ ታይቡዋ ጉꬆናኮ፥ ኣሴ ጊዲዳይ ኦኒካ ኣቴና። ሺን ኢ ባ ዶሪዳ ኣሳ ጊሾ ሄ ጋላሳታ ታይቡዋ ጉꬄስ።
MAR 13:21 «ሄ ዎዴ ኦኒካ ሂንቴና፥ ‹ሄኮ፥ ኪሪስቶሲ ሃይሳን ዴዔስ ዎይኮ ኪሪስቶሲ ሂኒን ዴዔስ› ያጊኮ፥ ሄሳ ኣማኖፒቴ።
MAR 13:22 ዎርዳንቾ ኪሪስቶሳቲኔ ዎርዶ ናቤቲ ዴንዲዲ ባንታው ዳንዳዔቲኮ፥ ሃሪ ኣቶሺን ፆሳይ ዶሪዳይሳታካ ባሌꬃናው ማላታታኔ ማላሊሲያባታ ቤሳና።
MAR 13:23 ሺን ሂንቴ ናጌቲቴ፤ ታኒ ሂንቴው ኡባባ ካሴታዳ ኦዳስ።
MAR 13:24 «ሺን ሄ ዎዴ ሄ ዋያፔ ጉዬ፥ ኣዋይ ꬉማና፤ ኣጌናይ ፖዑዋ ኣጋና፤
MAR 13:25 ፆሊንቶቲ ሳሎፔ ኩንዳና፤ ቃሲ ሳሎን ዴዒያ ዎልቃቲካ ቃፃና።
MAR 13:26 ሄ ዎዴ ኣሳ ናዓይ፥ ጊታ ዎልቃራኔ ቦንቹዋራ ሻራ ጊዶራ ዪሺን ኤንቲ ቤዓና።
MAR 13:27 ሄ ዎዴ ታኒ ኪታንቾታ ሳዓ ኦይዱ ባጋ ኪታና፤ ሳዓ ጋፃፔ ሳሉዋ ጋፃ ጋካናው፥ ፆሳይ ዶሪዳ ኣሳ ሺሻና።
MAR 13:28 «ሌሚሱዋ ባላሴ ሚꬃፌ ኣኬኪቴ፤ ባላሲያ ኣጪያ ዎዴኔ ኢ ሃይꬃይ ጪልዒያ ዎዴ ቶርቼይ ማታቲዳይሳ ሂንቴ ኤሬታ።
MAR 13:29 ሄሳዳካ፥ ሂንቴ ሄ ኡባባይ ሃኔይሳ ቤዒያ ዎዴ ኢ ማቲዲ ፔንጌ ጋኪዳይሳ ኤሪቴ።
MAR 13:30 ታኒ ሂንቴው ቱማ ኦዳይስ፤ ሃ ኡባባይ ሃናና ጋካናው ሃይሳን ዴዒያ ኣሳ ኡባይ ሃይቄና።
MAR 13:31 ሳሎይኔ ሳዓይ ኣꬋና፥ ሺን ታ ቃላይ ኡባራካ ኣꬌና።
MAR 13:32 «ሺን ሄ ጋላሳኔ ሄ ሳቲያ ኣዋ ፃላላፔ ኣቲን ሃሪ ኣቶሺን ሳሎን ዴዒያ ኪታንቾታ ጊዲን ዎይኮ ናዓ ጊዲን ኦኒካ ኤሬይ ባዋ።
MAR 13:33 ሄ ዎዴይ ኣዉዴ ጊዳኔኮ፥ ሂንቴ ኤሮና ጊሾ ናጌቲቴኔ ሚኒቴ።
MAR 13:34 ታ ዩሳይ ባ ኬꬃ ኣጊዲ፥ ኦጌ ቢያ ኡራ ሜላ። ኡራይ ባ ኣይሌታ ሁዔን ሁዔን ኦሱዋ ኢሚዲ ኤንታ ባ ኦሱዋስ ኣዋ ኦꬂስ፤ ቃሲ ናጌይሲካ ሚንꬂዲ ናጋና ሜላ ኪቲስ።
MAR 13:35 «ሄሳ ጊሾ፥ ሚኒቴ። ኣይስ ጊኮ፥ ኬꬃዋይ ኦማርሲ ጊዲን ዎይኮ ጊዲ ቢላሄ ጊዲን ዎይኮ ኩቶ ዋሶ ጊዲን ዎይኮ ዎንታ ጉራ ጊዲን ኣዉዴ ያኔኮ፥ ሂንቴ ኤሬኬታ።
MAR 13:36 ሂንቴ ኣኬኮና ኢ ዪዲ ሂንቴና ꬊስኪዲ ዴዒሺን ዴሞና ሜላ ሚኒቴ።
MAR 13:37 ታኒ ሂንቴው ኦዴይሳ ኣሳ ኡባስ ኦዳይስ፤ ሚኒቴ» ያጊስ።
MAR 14:1 ፓሲካ ባሌ ቦንቺያ ጋላሳይኔ ኡይꬃ ባሌ ቦንቺያ ጋላሳይ ጋካናው ናምዑ ጋላሲ ኣቲስ። ካሂኔ ሃላቃቲኔ ሂጌ ኣስታማሬቲ ኣሲ ኤሮና ዬሱሳ ኦይኪዲ ዎꬊያ ኦጌ ኮዮሶና።
MAR 14:2 «ኣሳይ ኦሺ ኬሶና ሜላ ፓሲካ ቦንቺያ ጋላሳን ሄሳ ኦꬆኮ» ያጊዶሶና።
MAR 14:3 ዬሱሲ ቢታኒያ ካታማን ባሮ ሃርጋንቹዋ ሲሞና ሶን ጊቢራ ቦላ ኡቲዳሺን፥ ኢሲ ማጫሲያ ኣልባስፂሮሴ ጊያ ሹቻፌ ኦሴቲዳ ጲልቃፄ ኩሜꬃ ናርዶሴ ጊያ ዳሮ ኣልዖ ሺቶ ኤካዳ ያሱ። ሄ ጲልቃፂያ ሜንꬃዳ ሺቱዋ ዬሱሳ ሁዒያን ቲጋሱ።
MAR 14:4 ሄ ቤሳን ዴዒያ ኣሳፔ ኢሶይ ኢሶይ ሃንቄቲዲ፥ «ሃ ሺቶይ ሜላ ጮ ኢቴይ ኣይቢሴ?
MAR 14:5 ሃ ሺቱዋ ሄꬑ ፄቱ ዲናሬን ባይዚዲ፥ ሚሺያ ማንቆታስ ኢማናው ዳንዳዔቴስ» ያጊዲ ባንታ ጊዶን ኦዴቲዶሶና። ያቲዲ፥ ሄ ማጫሲው ዳሮ ቦሪዶሶና።
MAR 14:6 ሺን ዬሱሲ «ሃ ማጫሲው ኣይኮካ ጎፒቴ፤ ኢዮ ኣይስ ዋይሴቲ? ኢያ ታው ሎዖባ ኦꬃሱ።
MAR 14:7 ማንቆቲ ኡባ ዎዴ ሂንቴራ ዴዖሶና። ሂንቴ ኮዪዳ ዎዴ ኣዉዴካ ሂንቴ ኤንታ ማዳናው ዳንዳዔታ፥ ሺን ታኒ ኡባ ዎዴ ሂንቴራ ዴዒኬ።
MAR 14:8 ኢያ ባ ዳንዳዒዳይሳ ኦꬃሱ፤ ቃሲ ታና ሞጎስ ጊጊሳናው ካሴታዳ ሺቶ ቲያሱ።
MAR 14:9 ታኒ ሂንቴው ቱማ ኦዳይስ፤ ሳዓ ኡባን ዎንጌላ ኦዲያሶን ኣዉንካ፥ ኣሳይ ኢዮ ኣኬካና ሜላ ሃ ኢያ ኦꬂዳይሲ ኦዴታና» ያጊስ።
MAR 14:10 ታማኔ ናምዑ ታማሬታፔ ኢሶይ ኣስቆሮታ ዪሁዳ ጌቴቴይሲ ዬሱሳ ካሂኔ ሃላቃታስ ኣꬂ ኢማናው ኤንታኮ ቢስ።
MAR 14:11 ኤንቲ ሄሳ ሲዒዳ ዎዴ ኡፋይቲዲ፥ «ኑኒ ኔው ሚሼ ኢማና» ያጊዶሶና፤ ዪሁዲ ዬሱሳ ኣꬂ ኢማናው ኢንጄ ዎዴ ኮዬስ።
MAR 14:12 ኡይꬃ ባሌይ ቦንቼቲያ ኮይሮ ጋላስ፥ ፓሲካ ካꬃ ማናው ማራዜ ሹኪያ ዎዴ ዬሱሳ ታማሬቲ ኢያኮ፥ «ፓሲካ ቦንቺያ ጋላስ ኔኒ ማና ካꬃ ኑኒ ኣው ቢዲ ጊጊሲኖ?» ጊዲ ኦይቺዶሶና።
MAR 14:13 ዬሱሲ ባ ታማሬታፔ ናምዓታ ሃይሳዳ ያጊዲ ኪቲስ፡ «ካታማ ቢቴ፤ ሂንቴ ቢሺን፥ ኦቶራ ሃꬄ ቶኪዳ ኢሲ ኡራይ ሂንቴራ ጋሄታና፤ ኢያ ካሊቴ።
MAR 14:14 ኢ ቢዲ ጌሊያ ኬꬃዋ፥ ‹ኣስታማሬይ ኔኮ፥ «ታኒ ታ ታማሬታራ ፓሲካ ማናው ኢማꬃ ኪፊሌይ ኣዉኔ?» ያጌስ› ያጊቴ።
MAR 14:15 ኬꬃዋይ ሂንቴና ፖቂያ ቦላ ዴዒያ ጊጊ ኡቲዳ ዳልጋ ኪፊሌ ቤሳና፤ ሄሳን ጊጊሲቴ» ያጊስ።
MAR 14:16 ሄ ናምዑ ታማሬቲ ኬዪዲ፥ ካታማ ቢዶሶና፤ ዬሱሲ ኤንታው ኦዲዳይሳዳ ዴሚዲ፥ ፓሲካ ካꬃ ጊጊሲዶሶና።
MAR 14:17 ሳዓይ ኦማርሲያ ዎዴ ዬሱሲ ታማኔ ናምዑ ታማሬታራ ያ ቢስ።
MAR 14:18 ኤንቲ ኡቲዲ ካꬂ ሚሺን፥ ዬሱሲ ኤንታኮ፥ «ታኒ ሂንቴው ቱማ ኦዳይስ፤ ሂንቴፌ ኢሶይ ታራ ሜይሲ፥ ታና ኣꬂ ኢማና» ያጊስ።
MAR 14:19 ኢያ ታማሬቲ ዳጋሚዲ፥ ባንታ ሁዔን ሁዔን፥ «ቱማ ታኔሻ?» ያጊዲ ኢያ ኦይቺዶሶና።
MAR 14:20 ዬሱሲ ዛሪዲ፥ «ሄ ኡራይ ሂንቴ ታማኔ ናምዓታፔ ኢሱዋ፤ ኢ ታራ ኢሲፌ ቱሻናው ባ ኡይꬃ ሻቲያን ዬዴይሳ።
MAR 14:21 ኣሳ ናዓይ፥ ጌሻ ማፃፋይ ሃይቃና ጊዳይሳዳ ሃይቃና፥ ሺን ኣሳ ናዓ፥ ኣꬂ ኢሚያ ኡራ ኣዬ። ሄ ኡራይ ዬሌቶና ኣቲዳኮ ኢያው ሎዖሺን» ያጊስ።
MAR 14:22 ኤንቲ ሚሺን፥ ዬሱሲ ኡይꬃ ኤኪዲ፥ ፆሳ ጋላቲስ፤ ሄ ኡይꬃ ሜንꬂዲ፥ ባ ታማሬታስ ኢሚሼ፥ «ሄዒቴ፥ ሃይሲ ታ ኣሹዋ» ያጊስ።
MAR 14:23 ፁዓ ኤኪዲ፥ ፆሳ ጋላቲዲ፥ ኤንታው ኢሚን ኡባይካ ሄ ፁዓፔ ኡዪዶሶና።
MAR 14:24 ዬሱሲ፥ «ሃይሲ ኦራꬃ ጫቁዋን ዳሮ ኣሳ ጊሾ ጉኪያ ታ ሱꬃ።
MAR 14:25 ታኒ ሂንቴው ቱማ ኦዳይስ፤ ታኒ ፆሳ ካዎቴꬃን ኦራꬃ ዎይኒያ ኡያና ጋላሳይ ጋካናው ዛራዳ ሃ ዎይኒያፔ ኡዪኬ» ያጊስ።
MAR 14:26 ማዝሙሬ ዬፂዳፔ ጉዬ ሻማሆ ዴሪያ ቦላ ቢዶሶና።
MAR 14:27 ዬሱሲ ኤንታኮ፥ «ሂንቴ ኡባይ ታና ዬጊ ኣጊዲ ባቃታና፤ ጌሻ ማፃፋይ፥ ‹ፆሳይ ዶርሳ ሄሜይሳ ዎꬋና፥ ዶርሳቲ ኡባይ ላሌታና› ያጌስ።
MAR 14:28 ሺን ታኒ ሃይቆፔ ዴንዲዳፔ ጉዬ ሂንቴፌ ካሴታዳ ጋሊላ ባና» ያጊስ።
MAR 14:29 ጴፂሮሲ ዛሪዲ፥ «ኤንቲ ኡባይ ኔና ዬጊ ኣጊዲ ባቃቲኮካ፥ ታ ኔና ኣጊኬ» ያጊስ።
MAR 14:30 ዬሱሲ ጴፂሮሳኮ፥ «ታኒ ኔው ቱማ ኦዳይስ፤ ሃቺ ቃማ ኩቶይ ናምዑ ቶሆ ዋሳናፔ ሲንꬄ ኔኒ ታና ሄꬑ ቶሆ ካዳና» ያጊስ።
MAR 14:31 ሺን ጴፂሮሲ ካሴይሳፌ ሚንꬂዲ፥ «ታኒ ሃሪ ኣቶሺን፥ ኔራ ኢሲፌ ሃይቂያኮካ፥ ኔና ካዲኬ» ያጊስ። ቃሲ ሃራቲ ኡባቲካ ሄሳዳ ጊዶሶና።
MAR 14:32 ጌቴሴማኔ ጊያ ቤሳ ቢዶሶና፤ ዬሱሲ ባ ታማሬታኮ፥ «ታኒ ፆሳ ዎሳዳ ሲማና ጋካናው ሂንቴ ሃይሳን ኡቲሺቴ» ያጊስ።
MAR 14:33 ዬሱሲ ጴፂሮሳ፥ ያይቆባኔ ዮሃኒሳ ባራ ኤኪዲ ቢስ፤ ዳሮ ዋዬቲሲኔ ኡንዔቲስ።
MAR 14:34 ቃሲ ኤንታኮ፥ «ታኒ ሃይቃና ጋካናው ኣዛናስ፥ ሃይሳን ጋምዒሺቴ፤ ꬊስኮፊቴ» ያጊስ።
MAR 14:35 ጉꬂ ሲንꬄ ሺቂዲ፥ ሳዓን ጉፋኒዲ፥ ዳንዳዔቲያባ ጊዲኮ፥ ሄ ዋያ ሳቴይ ባፔ ኣꬋና ሜላ፥ ፆሳ ዎሲስ።
MAR 14:36 ቃሲ፥ «ኣባ፥ ታ ኣዋው፥ ኡባባይ ኔው ዳንዳዔቴስ፥ ሃ ዋዬ ፁዓ ታፔ ዲጋ። ሺን ኔ ሼኔይ ሃኖፔ ኣቲን ታ ሼኔይ ሃኖፖ» ያጊስ።
MAR 14:37 ዬሱሲ ባ ታማሬታኮ ሲሚ ዪዲ፥ ኤንቲ ꬊስኪዳሺን ዴሚዲ፥ ጴፂሮሳኮ፥ «ሲሞና፥ ꬊስካዲ? ኔኒ ኢሲ ሳቴካ ባርካዳ ናጋናው ዳንዳዓቢኪ?
MAR 14:38 ፓጬን ሂንቴ ጌሎና ሜላ ባርኪዲ ናጊቴኔ ፆሳ ዎሲቴ። ሂንቴው ሎዖ ኣሞይ ዴዔስ፥ ሺን ሂንቴ ዳቡራንቾ ኣሲ» ያጊስ።
MAR 14:39 ቃሲካ ቢዲ ካሴይሳዳካ ፆሳ ዎሲስ።
MAR 14:40 ባ ታማሬታኮ ጉዬ ሲሚዲ ያ ዎዴ ꬊስኪዳሺን ዴሚስ። ኤንታ ኣይፊያ ꬊስኮይ ጎዚ ዎꬂዳ ጊሾ ኢያኮ ኣይ ኦዴቲያኮካ ኤሮኮና።
MAR 14:41 ሄꬓንꬆ ኤንታኮ ዪዲ፥ «ሃዒ ጋካናዉካ ꬊስኬቲኔ ሼምፔቲ? ሂዛ፥ ጊዳና፤ ሳቴይ ጋኪስ፤ ቤዒቴ! ኣሳ ናዓይ፥ ናጋራንቾ ኣሳታስ ኣꬊ ኢሜታና ዎዴይ ጋኪስ።
MAR 14:42 ዴንዲዲ ዬꬊቴ፤ ቤዒቴ፥ ታና ኣꬂ ኢማናይሲ ጋኪስ» ያጊስ።
MAR 14:43 ዬሱሲ ሄሳ ቡሮ ኦዲሺን፥ ታማኔ ናምዑ ኢያ ታማሬታፔ ኢሶይ፥ ዪሁዲ፥ ኤሌሲዲ ጋኪ ዎꬊስ። ቃሲ ካሂኔ ሃላቃቲ፥ ሂጌ ኣስታማሬቲኔ ጪማቲ ኪቲን፥ ማሼኔ ፃምዓ ኦይኪዳ ዳሮ ኣሳይ ኢያራ ኢሲፌ ዪዶሶና።
MAR 14:44 ዬሱሳ ኣꬂ ኢማናይሲ ሄ ዳሮ ኣሳስ፥ «ታኒ ዬሬይ ኢያ፤ ኢያ ኦይኪዲ፥ ሎይꬂ ናጊዲ፥ ኤኪ ኤፊቴ» ያጊዲ ማላ ኦዲ ዎꬂስ።
MAR 14:45 ዪሁዲ ጋኪ ዎꬊዳ ሜላ ዬሱሳኮ ሺቂዲ፥ «ኣስታማሪያው» ያጊዲ ዬሱሳ ዬሪ ኤኪስ።
MAR 14:46 ሄ ዳሮ ኣሳይ ዬሱሳ ኦይኪዶሶና።
MAR 14:47 ሺን ማታን ኤቂዳይሳታፔ ኢሶይ ባ ማሻ ሾዲዲ ካሂኔ ሃላቃ ኣይሊያ ሾጪዲ፥ ኢያ ሃይꬃ ቃንፂዲ ሆሊስ።
MAR 14:48 ዬሱሲ ዛሪዲ፥ ሄ ሺቂዳ ዳሮ ኣሳኮ፥ «ታና ፓንጋ ኬሲዲ፥ ፓንጋ ኦይኬይሳዳ ኦይካናው ማሼኔ ፃምዓ ኦይኪዲ ዪዴቲ?
MAR 14:49 ታኒ ፆሳ ኬꬃን ታማርሳሼ፥ ጋላስ ጋላስ ሂንቴራ ዴዒያ ዎዴ ታና ኦይኪቤኬታ፥ ሺን ጌሻ ማፃፋይ ጊዳይሲ ፖሌታናው ቤሴስ» ያጊስ።
MAR 14:50 ኢያ ታማሬቲ ኡባይ ኢያ ዬጊ ኣጊዲ ባቃቲዶሶና።
MAR 14:51 ላፃና ፃላላ ማዒዳ ኢሲ ናቴꬃ ኡራይ ዬሱሳ ካሌይሳ ኣሳይ ኦይኪስ።
MAR 14:52 ሺን ሄ ኡራይ ላፃና ዬጊ ኣጊዲ፥ ፂሬ ካሎ ባቃቲስ።
MAR 14:53 ኣሳይ ዬሱሳ ካሂኔ ሃላቃ ሶ ኤፊዶሶና። ያን ካሂኔ ሃላቃቲ፥ ጪማቲኔ ሂጌ ኣስታማሬቲ ሺቂዲ ዴዖሶና።
MAR 14:54 ጴፂሮሲ ካሂኔ ሃላቃ ዛባ ጋካናው ሃሆን ኢያ ካሊ ቢዲ ያን ናጌይሳታራ ኡቲዲ ታማ ካዬስ።
MAR 14:55 ካሂኔ ሃላቃቲኔ ሺቂዳ ኣሳ ኡባይ ዬሱሳ ዎꬋናው ኢያ ቦላ ማርካ ኮዪዶሶና፥ ሺን ኣይኮካ ዴሚቦኮና።
MAR 14:56 ዳሮ ኣሳቲ ኢያ ቦላ ዎርዶ ማርካቲዶሶና፥ ሺን ኤንታ ማርካቴꬃይ ኢሲኖ ጊዴና።
MAR 14:57 ኢሲ ኢሲ ኣሳቲ ዴንዲ ኤቂዲ ዬሱሳ ቦላ፥ «ኢ፥ ‹ታኒ ኣሲ ኬፂዳ ሃ ፆሳ ኬꬃ ላላዳ፥ ኣሳ ኩሼን ኬፄቲቦና ሃራ ፆሳ ኬꬃ ሄꬑ ጋላሳ ጊዶን ኬፃና› ጊሺን ኑኒ ሲዒዳ» ያጊዲ ዎርዶ ማርካቲዶሶና።
MAR 14:59 ጊዶሺን፥ ኤንታ ማርካቴꬃይ ሄሳንካ ኢሲኖ ጊዴና።
MAR 14:60 ካሂኔ ሃላቃይ ኣሳ ኡባ ሲንꬃን ዴንዲ ኤቂዲ፥ «ሃይሳቲ ኔና ሞቲያ ሞቱዋስ ኔ ዛሪያባይ ባዌ?» ያጊዲ ዬሱሳ ኦይቺስ።
MAR 14:61 ሺን ዬሱሲ ሲዒ ጊስ፤ ኣይኮካ ዛሪቤና። ካሂኔ ሃላቃይ፥ «ኣንጄቲዳ ፆሳ ናዓይ፥ ኪሪስቶሲ ኔኔዬ?» ያጊዲ ዛሪ ኦይቺስ።
MAR 14:62 ዬሱሲ ዛሪዲ፥ «ኤ ታና፥ ሂንቴ ኣሳ ናዓይ፥ ዎልቃማ ፆሳፌ ኡሻቻ ባጋራ ኡቲዳሺን ቃሲ ሳሉዋ ሻራራ ዪሺን ቤዓና» ያጊስ።
MAR 14:63 ካሂኔ ሃላቃይ ባ ማዑዋ ፔꬊዲ፥ «ኑና ሃራ ማርካ ኣይ ኮሺ?
MAR 14:64 ሂንቴ ኢያ ጫሻ ሲዒዴታ፤ ሂንቴ ቆፋይ ኣይቤ?» ያጊስ። ኤንቲ ኡባይ፥ «ኢ ሃይቃናው ቤሴስ» ያጊዲ ኢያ ቦላ ፒርዲዶሶና።
MAR 14:65 ኤንታፌ ኢሶቲ ኢሶቲ ኢያ ቦላ ጩቴꬂ ኦይኪዶሶና። ኢያ ኣይፊያ ጎዚዲ ባቂሼ፥ «ኔና ዴቺዳይ ኦኔ? ኣኔ ኑስ ኦዳ!» ያጊዶሶና። ናጌይሳቲ ኢያ ኤኪ ኤፊዲ ጋራፊዶሶና።
MAR 14:66 ጴፂሮሲ ካሂኔ ሃላቃ ዛባን ጋርሳ ባጋራ ዴዒሺን፥ ካሂኔ ሃላቃ ማጫ ኣይሌታፔ ኢሲኒያ ያ ያሱ።
MAR 14:67 ጴፂሮሲ ታማ ካዬይሳ ቤዓዳ፥ ቲሺ ኦꬃ ፄላዳ፥ «ኔኒካ ናዚሬቴ ዬሱሳራ ዴዓሳ» ያጋሱ።
MAR 14:68 ሺን ጴፂሮሲ፥ «ኔ ጌይሲ ኣይቤኮ ታ ኤሪኬ፥ ታው ኣኬኬቴና» ያጊዲ ካዲስ። ያጊ ሲሚዲ ዛጎ ኬያ ዎዴ ሶሁዋራ ኩቶይ ዋሲስ።
MAR 14:69 ሄ ኣይሊያ ጴፂሮሳ ቤዓዳ፥ ኢያ ማታን ኤቂዳ ኣሳታኮ፥ «ሃ ኡራይካ ኤንታራ ዴዔስ» ጋዳ ዛራ ኦዳሱ።
MAR 14:70 ሺን ጴፂሮሲ ቃሲካ ካዲስ። ጉꬂ ጋምዒሺን፥ ማታን ኤቂዳ ኣሳቲ ናምዓንꬆ ጴፂሮሳኮ፥ «ኔኒ ጋሊላ ቢታ ኣሲ ጊዲያ ጊሾ ቱማ ኤንታራ ዴዓሳ» ያጊዶሶና።
MAR 14:71 ሺን ጴፂሮሲ፥ «ታኒ ሂንቴ ጊያ ኡራ ኤሪኬ!» ያጊዲ ባና ቃንጌꬂኔ ጫቆ ኦይኪስ።
MAR 14:72 ሶሁዋራ ኩቶይ ናምዓንꬆ ዋሲ ኣጊስ። ጴፂሮሲ ዬሱሲ ኢያኮ፥ «ኔኒ ኩቶይ ናምዑ ቶሆ ዋሳናፔ ሲንꬄ ሄꬑ ቶሆ ታና ካዳና» ኢያኮ ጊዳይሳ ኣኬኪዲ ዳሮ ዬኪስ።
MAR 15:1 ዎንታ ጉራ ኤሌሲዲ ካሂኔ ሃላቃቲ፥ ጪማቲ፥ ሂጌ ኣስታማሬቲኔ ኣይሁዴ ሻንጎቲ ኡባይ ሺቂዲ ማቄቲዶሶና። ኤንቲ ዬሱሳ ቃቺ ኤፊዲ ጲላፆሳስ ኣꬂ ኢሚዶሶና።
MAR 15:2 ጲላፆሲ ኢያኮ፥ «ኔኒ ኣይሁዴታ ካዎ?» ያጊዲ ኦይቺስ። ዬሱሲ ዛሪዲ፥ «ኔ ጋዳሳ» ያጊስ።
MAR 15:3 ካሂኔ ሃላቃቲ ዬሱሳ ዳሮባን ሞቲዶሶና።
MAR 15:4 ሺን ጲላፆሲ ዛሪዲ ዬሱሳኮ፥ «ኔው ዛሪያባይ ባዌ? ኤንቲ ኔ ቦላ ኣይ ሜላ ሞቱዋ ኤሂያኮ ቤዒኪ?» ያጊስ።
MAR 15:5 ሺን ዬሱሲ ሃራባ ዛሮና ኢፂን፥ ጲላፆሲ ማላሌቲስ።
MAR 15:6 ጲላፆሳስ ፓሲካ ባሌ ቦንቺያ ጋላሳን ኣሳይ ኮያ ኢሲ ኡራ ቃሾፔ ቢሊያ ሜዜይ ዴዔስ።
MAR 15:7 ሄ ዎዴ ኢሲ ባርባና ጊያ ኡራይ ኦሹ ኬሲዲ ሼምፖ ዎꬊዳ ኣሳታራ ኢሲፌ ቃሾ ኬꬃን ዴዔስ።
MAR 15:8 ሺቂዳ ዳሮ ኣሳይ ጲላፆሲ ካሴይሳዳ ኦꬃና ሜላ ኢያ ኦይቺዶሶና።
MAR 15:9 ጲላፆሲ ኣሳ ዛሪዲ፥ «ታኒ ሂንቴው ኣይሁዴታ ካዉዋ ቢላናይሳ ኮዬቲ?» ያጊዲ ኦይቺስ።
MAR 15:10 ሄሳ ኢ ጊዳይ፥ ካሂኔ ሃላቃቲ ዬሱሳ ቃናቲዲ ኣꬂ ኢሚዳይሳ ኤሪያ ጊሾሳ።
MAR 15:11 ሺን ካሂኔ ሃላቃቲ ዬሱሳ ጊሾ ባርባና ቢላናዳ፥ ሄ ሺቂዳ ኣሳይ ጲላፆሳ ዎሳና ሜላ ኣሳ ማቂዶሶና።
MAR 15:12 ጲላፆሲ ዛሪዲ፥ «ያቲን፥ ሃ ሂንቴ ኣይሁዴ ካዎ ጌይሳ ዋቶ?» ያጊስ።
MAR 15:13 ኣሳይ ጲላፆሳ ቦላ ዋሲዲ፥ «ማስቃሊያ ቦላ ኢያ ካቃ» ያጊዶሶና።
MAR 15:14 ጲላፆሲ ኣሳኮ፥ «ኣይስ? ኢ ኣይ ኢታባ ኦꬂዴ?» ያጊስ። ሺን ኣሳይ ካሴይሳፌ ጉጂ ዋሲዲ፥ «ማስቃሊያ ቦላ ኢያ ካቃ» ያጊዶሶና።
MAR 15:15 ጲላፆሲ ኣሳ ኡፋይሳናው ኮዪዲ፥ ባርባና ኣሳስ ቢሊስ፤ ያቲዲ ሊሶን ዬሱሳ ጋራፊዲ፥ ማስቃሊያ ቦላ ካቃና ሜላ ኤንታው ኣꬂ ኢሚስ።
MAR 15:16 ሄሳፌ ጉዬ፥ ዎታዳሬቲ ዬሱሳ ዴሪያ ሃሬይሳ ኦሶ ኬꬃ ኤኪ ኤፊዲ፥ ሃራ ዎታዳሬታ ኡባ ኢሲፌ ፄጊዶሶና።
MAR 15:17 ቃሲ ዞዖ ኣፊላ ኢያ ማይዚዶሶና፤ ኣጉንꬃ ካላቻ ጊጊሲዲ፥ ኢያ ሁዔን ዎꬂዶሶና።
MAR 15:18 ሄሳፌ ጉዬ፥ ኢያኮ፥ «ኣይሁዴታ ካዉዋው ሚሪናው ካዎታ» ያጊዲ፥ ኢያው ዚጊዶሶና።
MAR 15:19 ኢያ ሁዒያ ፃምዓን ሾጪዶሶና፤ ቃሲ ኢያ ቦላ ጩቲዶሶና፤ ጉልባቲዲ ኢያው ጎይኒዶሶና።
MAR 15:20 ኢያ ቶቺዳይሳፌ ጉዬ ዞዖ ኣፊላ ኢያፔ ቃሪ ኤኪዲ፥ ኢያ ኣፊላ ኢያ ማይዚዲ ማስቃሊያ ቦላ ኢያ ካቃናው ኤኪ ኤፊዶሶና።
MAR 15:21 ኤንቲ ቢሼ፥ ኢስኪንዲሬኔ ሩፎሳ ኣዋ፥ ሲሞና ጊያ ቄሬና ቢታ ኣሲ፥ ጋፃሬፔ ካታማ ዬይሳራ ጋሄቲዲ፥ ዬሱሳ ማስቃሊያ ዎልቃን ቶሲዶሶና።
MAR 15:22 ያቲዲ ጎልጎታ ጊያ ቤሳ ዬሱሳ ኤፊዶሶና። «ጎልጎታ» ጉሳይ «ሁዔ ጉጌ» ጉሱ።
MAR 15:23 ሳኮይ ሲዔቶና ሜላ ካርቤ ጊያ ꬋሌይ ዋላኬቲዳ ዎይኔ ኡዮ ጊዲ ኢያው ኢሚዶሶና። ሺን ኢ ኡዮና ኢፂስ።
MAR 15:24 ኤንቲ ማስቃሊያ ቦላ ኢያ ካቂዶሶና። ኦና ኣይቢ ጋካኔኮ ጊዲ ኢያ ኣፊላ ሻኪዲ ሳማ ዬጊዶሶና።
MAR 15:25 ኤንቲ ማስቃሊያ ቦላ ኢያ ካቂያ ዎዴ ዎንታፌ ሄꬑ ሳቴ።
MAR 15:26 ኤንቲ፥ «ኣይሁዴታ ካዉዋ» ያጊዲ ኢያ ሞቲያ ፁፌ ፃፊዲ ዎꬂዶሶና።
MAR 15:27 ዬሱሳራ ናምዑ ፓንጋታ ኢሱዋ ኢያፔ ኡሻቻ ባጋራ ሃንኩዋ ኢያፔ ሃዲርሳ ባጋራ ማስቃሊያ ቦላ ካቂዶሶና።
MAR 15:28 ጌሻ ማፃፋይ፥ «ኢታባ ኦꬂዳ ኣሳታራ ኢ ፓይዴቲስ» ጌቴቲዳይሲ ፖሌቲስ።
MAR 15:29 ኦጊያራ ኣꬊያ ኣሳይ ዬሱሳ ካꬊዲ፥ ባንታ ሁዒያ ቃꬂዲ ጫዪዶሶና፤ «ሄኮ! ፆሳ ኬꬃ ላላዳ ሄꬑ ጋላሳ ጊዶን ኬፄይሶ፥ ኔ ሁዒያ ኣሻ፤
MAR 15:30 ኣኔ ማስቃሊያ ቦላፌ ዎꬋ» ያጊዶሶና።
MAR 15:31 ሄሳዳካ፥ ካሂኔ ሃላቃቲ ሂጊያ ታማርሴይሳታራ ኢሲፌ ዬሱሳ ቶቺዲ፥ «ሃራታ ኣሺስ፥ ሺን ባና ኣሻናው ዳንዳዔና፤
MAR 15:32 ኑኒ ቤዒዲ ኣማናና ሜላ ኪሪስቶሲ፥ ኢስራዔሌ ካዎይ፥ ኣኔ ማስቃሊያ ቦላፌ ሃዒ ዎꬎ» ያጊዶሶና። ቃሲ ሃሪ ኣቶሺን፥ ኢያራ ማስቃሊያ ቦላ ካቄቲዳይሳቲካ ኢያ ቶቺዶሶና።
MAR 15:33 ኡሱፑን ሳቴፔ ዶሚዲ፥ ኡዱፉን ሳቴ ጋካናው ቢታ ኡባይ ꬉሚስ።
MAR 15:34 ኡዱፉን ሳቲያን ዬሱሲ ባ ቃላ ꬎቁ ኦꬂዲ፥ «ኤሎሄ፥ ኤሎሄ፥ ላማ ሳባቂታኒ?» ያጊስ። ሄሳ ጉሳይ፥ «ታ ፆሳው፥ ታ ፆሳው፥ ታና ኣይስ ኣጋዲ?» ጉሱ።
MAR 15:35 ሄሳን ኤቂዳ ኣሳፔ ኢሶይ ኢሶይ ሄሳ ሲዒዲ፥ «ሄኮ፥ ኤሊያሳ ፄጌስ» ያጊስ።
MAR 15:36 ሄ ኣሳፔ ኢሶይ ዎፂዲ፥ ኢስፖንጄን ጫላ ዎይኔ ኩንꬂስ፤ ሄሳ ፃምዓ ፄራን ዎꬂዲ፥ «ናጊቴ፤ ኤሊያሲ ማስቃሊያፔ ኢያ ዎꬊሳናው ያኔኮ ኣኔ ቤዖስ» ያጊዲ ዬሱሳ ዶናኮ ኡሻናው ሺሺስ።
MAR 15:37 ዬሱሲ ባ ቃላ ꬎቁ ኦꬂ ዋሲዲ፥ ሃይቂስ።
MAR 15:38 ፆሳ ኬꬃን ካቄቲዳ ማጋራጆይ ቆሞፌ ዱጌ ጋካናው፥ ናምዑ ኬዪዲ ዳኬቲ ዎꬊስ።
MAR 15:39 ማስቃሊያፔ ሲንꬃ ባጋራ ያን ኤቂዳ ኢሲ ማቶ ሃላቃይ፥ ዬሱሲ ዋኒዲ ሃይቂዳኮ ቤዒዳ ዎዴ «ሃ ኡራይ ቱማ ፆሳ ናዓ» ያጊስ።
MAR 15:40 ሄሳ ሃሆን ኤቂዲ ቤዒያ ጉꬃ ማጫሳቲ ዴዖሶና። ኤንታ ጊዶን ማግዴላ ማይራማ፥ ካሉዋ ያይቆባኔ ዮሳ ኣያ ማይራማኔ ሳሎማ ዴዖሶና።
MAR 15:41 ሄ ማጫ ኣሳቲ ዬሱሲ ጋሊላን ዴዒያ ዎዴ ኢያ ካሊዳይሳታኔ ኢያ ሞኪዳይሳታ ቃሲ ዬሱሳራ ኢሲፌ ዬሩሳላሜ ቢዳ ሃራ ዳሮ ማጫ ኣሳቲ ያን ዴዖሶና።
MAR 15:42 ሳዓይ ኦማርሲዳ ዎዴ ሺቂዳ ኣሳን ቦንቼቲዳ ኣይሁዴ ሻንጎታፔ ኢሶይ፥ ዮሴፋ ጊያ ኡራይ፥ ፆሳ ካዎቴꬃይ ያናይሳ ናጊሼ ዴዔይሲ፥ ኣርማቲያሳ ካታማ ኣሲ ዴዔይሲ ዪስ። ዎንቴꬄ ሳምባታስ ጊጌቲያ ጋላስ ጊዲዳ ጊሾ ዮሴፊ ሚኒዲ ጲላፆሳኮ ቢዲ፥ ዬሱሳ ኣሃ ኤካናው ዎሲስ።
MAR 15:44 ጲላፆሲ ዬሱሲ ሃይቂዳይሳ ሲዒዳ ዎዴ ማላሌቲስ፤ ማቶ ሃላቃ ፄጊዲ፥ «ኢ ሃይቂዲ ጋምዒዴ?» ያጊዲ ኦይቺስ።
MAR 15:45 ጲላፆሲ ዬሱሲ ሃይቂዳይሳ ማቶ ሃላቃፔ ሲዒዲ ኢያ ኣሃ ዮሴፋስ ኢሚስ።
MAR 15:46 ዮሴፊ ሞጎ ኣፊላ ሻሚስ፤ ዬሱሳ ኣሃ ማስቃሊያፔ ዎꬂዲ፥ ኣፊላን ፃፂዲ፥ ሹቻፌ ዎጬቲዳ ዱፎ ጊዶን ኢያ ኣሃ ሞጊስ። ቃሲ ሄ ዱፉዋ ዶናን ጊታ ሹቹ ጎንዶርሲዲ ዎꬂስ።
MAR 15:47 ማግዴላ ማይራማኔ ዮሳ ኣያ ማይራማ ዬሱሳ ኣሃ ኤንቲ ኣዉን ዎꬂያኮ ቤዖሶና።
MAR 16:1 ሳምባታይ ኣꬊዳፔ ጉዬ ማግዴላ ማይራማ፥ ያይቆባ ኣያ ማይራማኔ ሳሎማ ቢዲ፥ ዬሱሳ ኣሃ ቲያናው ሺቶ ሻሚዶሶና።
MAR 16:2 ዎጋ ዎዴ ዎንታ ዳሮ ጉራ ፃልቄይ ጫርሺን፥ ዱፉዋ ቢዶሶና።
MAR 16:3 ኤንቲ ባንታ ጊዶን ኢሶይ ኢሱዋራ፥ «ዱፉዋ ዶናፔ ኑስ ሹቻ ኦኔ ጎንዶርሲዲ ዲጋናይ?» ያጊዲ ኦዴቲዶሶና።
MAR 16:4 ኤንቲ ፄሊያ ዎዴ ሄ ዳሮ ጊታ ሹቻይ ጎንዶሬቲዲ ኪቺዳይሳ ቤዒዶሶና።
MAR 16:5 ዬሱሲ ሞጌቲዳ ዱፉዋ ጊዶ ጌሊያ ዎዴ ኢሲ ፓንꬃ ኣዴይ ቦꬃ ማዖ ማዒዲ፥ ኡሻቻ ባጋራ ኡቲዳይሳ ቤዒዲ ዳጋሚዶሶና።
MAR 16:6 ሺን ኢ ኤንታኮ፥ «ዳጋሞፊቴ፤ ማስቃሊያ ቦላ ካቄቲዳ፥ ናዚሬቴ ዬሱሳ ሂንቴ ኮዬይሳ ታኒ ኤራይስ። ኢ ሃይሳን ዴና፥ ሃይቆፔ ዴንዲስ። ኤንቲ ኢያ ሞጊዳ ቤሳ ሃይሳ ቤዒቴ።
MAR 16:7 ሃዒ ቢዲ ዬሱሳ ታማሬታሲኔ ጴፂሮሳስ፥ ‹ዬሱሲ ሂንቴፌ ሲንꬃቲዲ ጋሊላ ቤስ። ኢ ሂንቴው ኦዲዳይሳዳ ሂንቴ ኢያ ያን ቤዓና› ያጊዲ ኦዲቴ» ያጊስ።
MAR 16:8 ማጫሳቲ ያሻን ኮኮሪሼ ዱፉዋፔ ኬዪዲ ባቃቲዶሶና። ቃሲ ኤንቲ ያዪዳ ጊሾ ሄሳ ኦዴስካ ኣይኮካ ኦዲቦኮና።
MAR 16:9 ዬሱሲ ሃይቆፔ ዴንዲዳፔ ጉዬ ዎጋ ጋላስ ዎንታ፥ ላፑን ቱና ኣያናታ ኬሲዳ ማግዴላ ማይራሚስ ኮይሮቲዲ ቤንቲስ።
MAR 16:10 ኢያ ባዳ ካሴ ኢያራ ዴዔይሳታስ፥ ኤንቲ ኣዛኒሼኔ ዬኪሼ ዴዒሺን ኦዳሱ።
MAR 16:11 ሺን ዬሱሲ ፓፃ ዴዔይሳኔ ኢው ቤንቲዳይሳ ኤንቲ ሲዒዳ ዎዴ ኢያ ጌይሳ ኣማኒቦኮና።
MAR 16:12 ሄሳፌ ጉዬ፥ ኤንታፌ ናምዓቲ ካታማፔ ኬዪዲ ቢሺን፥ ኦጌ ቦላ ዬሱሲ ካሴይሳፌ ዱማቲዲ ኤንታው ቤንቲስ።
MAR 16:13 ኤንቲ ጉዬ ሲሚዲ፥ ሃራታስ ኦዲዶሶና፥ ሺን ሃራቲካ ኤንታ ኦዳ ቱማ ጊቦኮና።
MAR 16:14 ጉዬፔ ታማኔ ኢሲ ኢያ ታማሬቲ ካꬂ ሚሺን፥ ዬሱሲ ኤንታው ቤንቲስ። ኤንታው ኣማኖይ ባይና ጊሾኔ ሃይቆፔ ኢ ዴንዲዳይሳ ቤዒዳ ኣሳይ ኦዲን ኤንቲ ኣማኖና ኢፂዳ ጊሾ ኢ ኤንታ ቦሪስ።
MAR 16:15 ኢ ኤንታኮ፥ «ቢታ ኡባ ቢዲ ኣሳ ኡባስ ዎንጌላ ኦዲቴ።
MAR 16:16 ኣማኔይኔ ፃማቄቴይ ኣታና፥ ሺን ኣማኖናይ ፒርዴታና።
MAR 16:17 ኣማኔይሳታስ ሃ ማላታቲ ኢሜታና። ኤንቲ ታ ሱንꬃን ቱና ኣያናታ ኬሳና፥ ኦራꬃ ዶናን ኦዴታና።
MAR 16:18 ኤንቲ ሾሹ ኦይኪኮካ ዎይኮ ዎꬊያባ ኡዪኮካ ኤንታ ቆሄና። ቃሲ ኤንቲ ባንታ ኩሺያ ሃርጋንቾታ ቦላ ዎꬂዲ ኤንታ ፓꬃና» ያጊስ።
MAR 16:19 ጎዳይ ዬሱሲ ታማሬታራ ኦዴቲዳፔ ጉዬ ፑዴ ሳሎ ኬዪስ፤ ፆሳፌ ኡሻቻ ባጋራ ኡቲስ።
MAR 16:20 ኢያ ታማሬቲ ቢዳሶ ኡባን ቃላ ኦዲዶሶና። ጎዳይካ ኤንታራ ኢሲፌ ኦꬄስ። ኤንቲ ኦዲያ ቃላይ ቱማ ጊዲዳይሳ ፆሳይ ኤንታው ኢሚያ ማላታታን ኤሪሲስ።
LUK 1:1 ቦንቾ ቴዎፊሎሳ፥ ኑ ጊዶን ፖሌቲዳባስ ዳሮቲ፥ ባንታው ዳንዳዔቲዳ ሜላ ፃፊዶሶና።
LUK 1:2 ሄ ታሪኪያ ኤንቲ ፃፊዳይ ኮይሮፔ ዶሚዲ ኣይፌ ማርካቲኔ ቃላ ሃጋዜይሳቲ ኑስ ኦዲዳይሳ።
LUK 1:3 ታካ ታ ባጋራ ኮይሮፔ ኣኬካ ፄሊዳፔ ጉዬ ሄ ታሪኪያ ሃኖታ ማራያዳ ኔው ፃፎይ ታው ሎዖ ጊዲ ቤንቲስ።
LUK 1:4 ሄሲካ፥ ኔ ታማሪዳባይ ቱማ ጊዴይሳ ኤሪሳናሳ።
LUK 1:5 ዪሁዳ ካዉዋ ሄሮዲሳ ዎዴ ኣቢያ ያራፔ ጊዲዳ ዛካሪያሳ ጊያ ኣይሁዴ ካሂኔይ ዴዔስ። ኢያ ማቺያካ ኣሮና ሼሻፔ። ኢ ሱንꬃይካ ኤልሳቤፆ።
LUK 1:6 ናምዓይካ ጎዳ ዎጋኔ ኪታ ኡባ ናጊዲ ቦሬይ ባይና ፆሳ ሲንꬃን ፂሎቴꬃን ዴዒዶሶና።
LUK 1:7 ሃኖፔ ኣቲን ኤልሳቤፃ ማይንꬂ ጊዲዳ ጊሾ ኤንታው ናዒ ባዋ። ናምዓይካ ቃሲ ጪሚዶሶና።
LUK 1:8 ኢሲ ጋላስ ዛካሪያሲ ባ ጊሹዋ ማራን ፆሳ ሲንꬃን ካሂኔቴꬃን ሃጋዜስ።
LUK 1:9 ካሂኔቴꬃ ዎጋን ፆሳ ኬꬂ ጌሊዲ ኢፃኔ ጩዪሳናው ኢያ ሳሚ ጋኪስ።
LUK 1:10 ኢፃኔይ ጩያ ዎዴ ኣሳይ ካሬን ዎሴስ።
LUK 1:11 ጎዳ ኪታንቾይ ያርሹዋ ያርሺያ ቤሳፌ ኡሻቻ ባጋራ ኤቂዲ ቤንቲስ።
LUK 1:12 ዛካሪያሲ ኢያ ቤዒዳ ዎዴ ዳጋሚዲ ዳሮ ያዪስ።
LUK 1:13 ሺን ኪታንቾይ ኢያኮ፥ «ዛካሪያሳ ያዮፋ፤ ኔ ዎሳይ ሲዔቲስ። ኔ ማቺያ ኤልሳቤፃ ኣዴ ናዓ ዬላና፥ ኢያ ዮሃኒሳ ጋዳ ኔ ሱንꬃና።
LUK 1:14 ኢ ኔው ኢንጄኔ ኡፋይሲ ጊዳና፤ ዳሮቲ ኢያ ዬሌቴꬃን ኡፋይታና።
LUK 1:15 ጎዳ ሲንꬃን ኢ ጊታ ጊዳና፤ ዎይኔ ኡሻ ጊዲን ሃራ ማꬆያ ኡሻ ኡዬና። ባ ኣዬ ኡሎን ዴዒሼ ጌሻ ኣያናን ኩማና።
LUK 1:16 ኢስራዔሌ ኣሳታፔ ዳሮታ ባንታ ጎዳ፥ ፆሳኮ ዛራና።
LUK 1:17 ኣዋታ ዎዛና ናይታኮ ዛራና፥ ኪቴቶናይሳታ ፂሎታ ጪንጫቴꬃኮ ዛራና ሜላ፥ ጎዳስ ቤሲያ ዴሬ ጊጊሳናው ኤሊያሳ ኣያናኒኔ ዎልቃን ጎዳ ሲንꬃን ባና» ያጊስ።
LUK 1:18 ዛካሪያሲ ኪታንቹዋኮ፥ «ታ ሄሳ ኣይቢን ኤራኔ? ታራኔ ታ ማቼራ ጪሚዳ» ያጊስ።
LUK 1:19 ኪታንቾይ ዛሪዲ፥ «ታኒ ፆሳ ሲንꬃን ኤቂያ ጋብሬሌ። ሃ ሚሺራቹዋ ኔው ኦዳናው ፆሳፌ ኪቴታስ።
LUK 1:20 ሄኮ፥ ዎዲያ ናጊዲ ፖሌቲያ ታ ቃላ ኔ ኣማኖና ኢፂዳ ጊሾ ሃይሲ ፖሌታና ጋካናው ኔኒ ሙሜ ጊዳና፥ ኦዴታናዉካ ዳንዳዓካ» ያጊስ።
LUK 1:21 ሄ ዎዴ ዛካሪያሲ ፆሳ ኬꬂ ጌሊዲ ጋምዒዳ ጊሾ ኣይቢ ሃኒዴ ጊዲ ኣሳይ ካሬን ናጊሼ ጋምዒስ።
LUK 1:22 ኢ ካሬ ኬዪዲ ኤንታና ኦዲሳናው ዳንዳዒቤና። ማሊ ቤሶፔ ኣቲን ኦዴታናው ዳንዳዖናይሳ ቤዒዳ ዎዴ ቆንጬꬂ ቤዒዳይሳ ኤሪዶሶና።
LUK 1:23 ዛካሪያሲ ሃጋዞ ዎዲያ ፖሊዲ ባ ሶ ሲሚስ።
LUK 1:24 ሄሳፌ ጉዬ፥ ኢያ ማቺያ ኤልሳቤፃ ቃንꬃታሱ። ኢቻሹ ኣጌና ኩሜꬂ ባና ጌንꬃዳ ጋምዓሱ።
LUK 1:25 ኢያ፥ «ጎዳይ ባ ማሮታን ታ ቦሪያ ኣሳ ጊዶፌ ዲጋናው ቤዒዲ ሃ ዎዲያን ሃይሳ ኦꬂስ» ያጋሱ።
LUK 1:26 ኤልሳቤፃ ቃንꬃቲን ኡሱፑንꬃ ኣጌናን፥ ፆሳይ ኪታንቹዋ ጋብሬሌ ጋሊላ ቢታን ዴዒያ ናዚሬቴ ካታማ ኪቲስ።
LUK 1:27 ካዉዋ ዳዊቴ ሼሻፔ ጊዲዳ ዮሴፋ ጊያ ኡራስ ኦይሼቲዳ ጌላዔኮ ኪቲስ። ሄ ጌላዒያ ማይራሞ ጌቴታዉሱ።
LUK 1:28 ኪታንቾይ ኢኮ ቢዲ፥ «ዳሮ ዶሴቲዳሬ፥ ሳሮይ ኔው ጊዶ፥ ፆሳይ ኔራ ዴዔስ» ያጊስ።
LUK 1:29 ማይራማ ኢያ ኦዳን ዳሮ ዳጋማዳ፥ «ሃይሲ ኣይቢ ሳሮꬆ» ጋዳ ሄታሱ።
LUK 1:30 ኪታንቾይ ዛሪዲ፥ «ማይራሜ፥ ባቦፋ፤ ኔኒ ፆሳ ሲንꬃን ሳባ ዴማዳሳ።
LUK 1:31 ሄኮ ኔኒ ቃንꬃታና ኣዴ ናዓ ዬላና፥ ኢያ ሱንꬃካ ዬሱሳ ጋዳ ሱንꬃና።
LUK 1:32 ኢ ጊታ ጊዳና፥ ኡባፌ ቦላ ፆሳ ናዓ ጌቴቲ ፄጌታና። ጎዳ ፆሳይ ኢያ ኣዋ ዳዊቴ ኣራታ ኢያው ኢማና።
LUK 1:33 ኢ ያይቆባ ሼሻ ቦላ ሜሪናው ካዎታና፤ ኢያ ካዎቴꬃስ ዛዊ ባዋ» ያጊስ።
LUK 1:34 ማይራማ ኪታንቹዋኮ፥ «ሄሲ ዋኒዲ ሃናኔ? ታ ኣዴ ኤሪኬ» ያጋሱ።
LUK 1:35 ኪታንቾይ ዛሪዲ፥ «ጌሻ ኣያናይ ኔ ቦላ ዎꬋና፥ ኡባፌ ቦላ ፆሳ ዎልቃይ ኔ ቦላ ኩያታና። ሄሳ ጊሾ፥ ዬሌቲያ ጌሻ ናዓይ ፆሳ ናዓ ጌቴታና።
LUK 1:36 ሄኮ፥ ኔ ዳቢያ ኤልሳቤፃ ባ ጪማቴꬃ ላይꬃን ኣዴ ናዓ ቃንꬃታሱ። ኢያ ማይንꬂ ጌቴቲዳሮ፥ ሺን ሃዒ ኡሱፑንꬃ ኣጌና ኦይካሱ።
LUK 1:37 ፆሳ ፆኒያባይ ባዋ» ያጊስ።
LUK 1:38 ማይራማ፥ «ሄኮ፥ ታኒ ጎዳ ኣይሊው፥ ኔ ቃላዳ ታው ሃኖ» ያጋሱ። ሄሳፌ ጉዬ፥ ኪታንቾይ ኢፔ ሻኬቲስ።
LUK 1:39 ማይራማ ሄ ሳሚንታን ዴንዳዳ ዪሁዳ ቢታን ዴዒያ ኢሲ ጌዜ ካታማ ባሱ።
LUK 1:40 ዛካሪያሳ ሶ ጌላዳ ኤልሳቤፆ ሳሮꬃሱ።
LUK 1:41 ኤልሳቤፃ ማይራሚ ሳሮꬁዋ ሲዒዳ ዎዴ ኢ ኡሉዋን ዴዒያ ናዓይ ኡፋይሳን ጉፒስ። ኤልሳቤፃ ጌሻ ኣያናን ኩማዳ፥
LUK 1:42 ባ ቃላ ꬎቁ ኦꬃዳ፥ «ኔኒ ማጫሳ ጊዶፌ ኣንጄቲዳሮ፥ ኔ ቃንꬃቲዳ ናዓይካ ኣንጄቲዳይሳ።
LUK 1:43 ሃኖሺን፥ ታ ጎዳ ኣዬ፥ ኔኒ ታኮ ያና ሜላ ታኒ ኦኔ?
LUK 1:44 ሄኮ ኔ ሳሮꬁዋ ታ ሲዒዳ ዎዴ ታ ኡሉዋን ዴዒያ ናዓይ ኡፋይሳን ጉፒስ።
LUK 1:45 ጎዳይ ፖላና ጊዲ ኢሚዳ ቃላ ኣማኒዳራ፥ ኢያ ኣንጄቲዳሮ» ያጋሱ።
LUK 1:46 ማይራማ ሃይሳዳ ያጋሱ፡ «ታ ሼምፒያ ጎዳ ቦንቻዉሱ፥
LUK 1:47 ታ ኣያናይ ꬋሊያ ፆሳን ኡፋይቴስ።
LUK 1:48 ኢ ባ ኣይሌ ካዉሻቴꬃ ቤዒስ። ሃቺፌ ዶሚዲ ዬሌቴꬂ ኡባይ ታና ኣንጄቲዳሮ ጋና።
LUK 1:49 ኣይስ ጊኮ፥ ዎልቃማ ጊዲዳ ኢ፥ ታው ጊታባ ኦꬂስ። ኢያ ሱንꬃይ ጌሻ።
LUK 1:50 ኢያ ቦንቼይሳታ ቦላ፥ ኢያ ማሮቴꬃይ ሜሪናፔ ሜሪና ጋካናሳ።
LUK 1:51 ባ ቄሲያን ሚኖባ ኦꬂስ፥ ባንታ ዎዛናን ኦቶርቴይሳታ ላሊስ።
LUK 1:52 ዎልቃማ ካዎታ ኣራታፔ ካዉሺስ፤ ባንታና ካዉሺዳይሳታ ካቦይስ።
LUK 1:53 ኮሻቲዳይሳታ ሎዖባን ካልሲስ፥ ሺን ዱሬታ ሜላ ኩሼ ዬዲስ።
LUK 1:54 ባ ማሮታ ቆፒዲ፥ ባ ኣይሊያ ኢስራዔሌ ማዲስ።
LUK 1:55 ሄሲካ ኑ ኣዋታስ ኦዲዳ ቃላ፥ ኣብራሃሜሲኔ ኢያ ሼሻስ ጊዳይሳ ሜሪናው ፖላናሳ» ያጋሱ።
LUK 1:56 ማይራማ ኤልሳቤፂ ማታን ሄꬑ ኣጌና ሜላ ጋምዓዳ ባ ሶ ሲማሱ።
LUK 1:57 ኤልሳቤፂስ ዬሎ ቃማይ ጋኪን ኣዴ ናዓ ዬላሱ።
LUK 1:58 ኢ ሾሮቲኔ ኢ ዳቦቲ ጎዳይ ጊታ ማሮታ ኦꬂዳይሳ ሲዒዲ፥ ኢራ ኢሲፌ ኡፋይቲዶሶና።
LUK 1:59 ሆስፑንꬃ ጋላሳን ዮጋ ናዓ ቃፃራናው ዪዶሶና። ኢያ ኣዋ ሱንꬃን ዛካሪያሳ ጊዲ ሱንꬃናው ኮዪዶሶና።
LUK 1:60 ሺን ኣያ፥ «ኣካይ፥ ዮሃኒሳ ጌቴታናው ቤሴስ» ያጋሱ።
LUK 1:61 ኤንቲካ፥ «ኔ ዳቦታፔ ሃ ሱንꬃን ፄጌቲዳይ ኦኒካ ባዋ» ያጊዶሶና።
LUK 1:62 ኢያ ኣዋይ ኦና ጊዲ ሱንꬃኔኮ ኤራናው ኮዪዲ ኢያ ማላ ኦይቺዶሶና።
LUK 1:63 ኢ ፃፊያባ ኦይቺ ኤኪዲ፥ «ኢያ ሱንꬃይ ዮሃኒሳ» ጊዲ ፃፊስ። ኡባይ ኢ ፃፊዳይሳ ቤዒዲ ማላሌቲዶሶና።
LUK 1:64 ኢራ ዛካሪያሳ ኢንፃርሳይ ቢሌቲስ፥ ፆሳ ጋላቲሼ ኦዴቴꬂ ኦይኪስ።
LUK 1:65 ሾሮቲ ኡባይ ያሻን ኩሚዶሶና። ሃ ሃኒዳባይ ጌዜ ዪሁዳ ቢታን ኦዴቲስ።
LUK 1:66 ሄሳ ሲዒዳ ኡባይ፥ «ሃ ናዓይ ኣይ ሃናንዴሻ» ጊዲ ባንታ ጊዶን ኦዴቲዶሶና። ጎዳ ኩሼይ ኢያራ ዴዔስ።
LUK 1:67 ዮሃኒሳ ኣዋይ ዛካሪያሲ ጌሻ ኣያናን ኩሚዲ ሃይሳዳ ያጊዲ ቲንቢቴ ኦዲስ።
LUK 1:68 «ኢስራዔሊያ ጎዳይ ጋላቴቶ፥ ዪዲ ባ ኣሳ ዎዚስ።
LUK 1:69 ባ ኣይሊያ ዳዊቴ ኬꬃን ኣቶቴꬃ ካጪያ ዴንꬂስ።
LUK 1:70 ሄሲካ ቤኒ ዎዴ ጌሻ ናቤታ ዶናን ኦዴቲዳይሳ ሜላ፥
LUK 1:71 ኢያ ኣሾይ ኑ ሞርኬታፔኔ ኑራ ኤቄቲያ ኡባ ኩሺያፔ።
LUK 1:72 ሄሳ ኢ ኦꬂዳይ ኑ ኣዋታስ ባ ማሮታ ቤሳናሲኔ፥ ባ ጌሻ ጫቁዋ ናጋናሳ።
LUK 1:73 ኑ ኣዋ ኣብራሃሜስ ጫቂዳ ጫቁዋ ቆፓናሲኔ
LUK 1:74 ኑ ሞርኬታ ኩሼፔ ኬሲዲ ያሺ ባይና ኢያ ሃጋዛና ሜላሳ።
LUK 1:75 ኑ ላይꬃ ኡባን ጌሻቴꬃኒኔ ፂሎቴꬃን ባ ሲንꬃን ኑና ኤሳናሳ።
LUK 1:76 ቃሲ ላ ናዓው፥ ኔኒ ኡባፌ ቦላ ፆሳ ናቤ ጌቴታና። ጎዳ ኦጊያ ሎይꬃናው ኔ ኢያ ሲንꬃን ባና።
LUK 1:77 ኤንታ ናጋራይ ቁሼቲን፥ ኤንቲ ኣቶቴꬂ ዴማናይሳ ኔ ጎዳ ዴሪያስ ኦዳና።
LUK 1:78 ኑ ፆሳ ሎዖ ማሮቴꬃፌ ዴንዶይሳን ዎንታ ፃልቄይ ኑስ ሳሉዋፔ ኬዪስ።
LUK 1:79 ሄሲካ ꬉማኒኔ፥ ሃይቆ ኩያ ጋርሳን ዴዔይሳታስ ፖዒሳናሳ፥ ኑ ቶሁዋካ ሳሮ ኦጊያኮ ዛራናሳ» ያጊስ።
LUK 1:80 ናዓይ ዲጪስ፥ ኣያናን ሚኒስ፥ ኢስራዔሌ ኣሳስ ቆንጫና ጋካናው ባዞ ቢታን ዴዒስ።
LUK 2:1 ሄ ዎዴ ሮሜ ቢታን ዴዒያ ኣሳ ኡባይ ታይቤታና ሜላኔ ሱንꬃይ ፃፌታና ሜላ ካዎይ ኣዉጊስፆሲ ኪቲስ።
LUK 2:2 ሄሲካ ቄሬኖሲ ሶሬ ቢታ ኣይሲያ ዎዴ ኦሴቲዳ ኮይሮ ታይቡዋ።
LUK 2:3 ሄሳ ጊሾ፥ ኢሲ ኢሲ ኣሲ ባ ሱንꬃ ፃፌታናው ባ ዬሌቲዳ ቢታ ቢስ።
LUK 2:4 ዮሴፊካ ዳዊቴ ኬꬃፌኔ ያራፔ ጊዲዳ ጊሾ ጋሊላ ናዚሬቴ ካታማፔ ዴንዲዲ ዳዊቴ ካታማ ጊዲዳ ዪሁዳ ቤቴሌሜ ቢስ።
LUK 2:5 ቢሼ፥ ዬላናው ዎዴይ ዉሪዳ ኢ ኦይቺ ዎꬂዳ፥ ማይራሚራ ዎላ ፃፌታናው ቢስ።
LUK 2:6 ኤንቲ ያን ዴዒሺን ኢው ዬሎ ዎዴይ ጋኪስ።
LUK 2:7 ባ ባይራ ናዓ ዬላሱ። ጩርቃራ ፃፃዳ ኢማꬂ ኣቂያሶን ቤሲ ꬋዪዳ ጊሾ ዳራን ሜሄ ሙዚያ ጎንጌን ዚንዒሳሱ።
LUK 2:8 ሄ ጋዲያን ቃማ ዶርሳ ዉዲያ ናጊሼ ካሬን ኣቂያ ሄንꬃንቾቲ ዴዖሶና።
LUK 2:9 ጎዳ ኪታንቾይ ሃሳዮና ዪዲ ኤንታ ማታን ኤቂስ። ጎዳ ቦንቾይ ኤንታ ዩሹዋን ፖዒስ፤ ኤንቲካ ዎልቃማ ያሺ ያዪዶሶና።
LUK 2:10 ሺን ኪታንቾይ፥ «ያዮፊቴ! ሄኮ፥ ኣሳ ኡባስ ጊዲያ ጊታ ኡፋይሳ ሚሺራቹዋ ኤካዳ ያስ።
LUK 2:11 ሄሲካ፥ ዳዊቴ ካታማን ኣሼይሲ ሂንቴው ሃቺ ዬሌቲስ። ኢ ጎዳ ኪሪስቶሳ።
LUK 2:12 ዞቃሌ ናዓይ ጩርቃራ ፃፄቲዲ ጎንጌን ዚንዒዳይሳ ሂንቴ ዴማና፤ ሄሲካ ሂንቴው ማላ ጊዶ» ያጊስ።
LUK 2:13 ቆፖና ዳሮ ሳሎ ኪታንቾቲ ኪታንቹዉራ ኢሲፌ ቆንጪዲ፥
LUK 2:14 «ቦንቾይ ፆሳስ ꬎቃ ሳሉዋን፥ ሳሮይ ቢታ ቦላ ፆሳይ ዶሲያ ኣሳስ ጊዶ» ያጊዲ ጋላቲዶሶና።
LUK 2:15 ኪታንቾቲ ኤንታፌ ሻኬቲዲ ሳሉዋ ኬዪዳፔ ጉዬ ሄንꬃንቾቲ፥ «ኣኔ ጎዳይ ኑስ ቆንጪሲዳባኔ ሃኒዳባ ቤዓናው ቤቴሌሜ ቦስ» ያጊዶሶና።
LUK 2:16 ኤንቲካ ኤሌሲዲ ቢዶሶና። ማይራሞ፥ ዮሴፋኔ ዞቃሌ ናዓ ጎንጌን ዚንዒዳይሳ ቤዒዶሶና።
LUK 2:17 ቤዒ ሲሚዲ ናዓባ ኤንታው ኦዴቶይሳ፥ ቆንጪሲዲ ሄ ቤሳን ዴዒያ ኣሳስ ማርካቲዶሶና።
LUK 2:18 ሄሳ ሲዒዳ ኡባይ ሄንꬃንቾቲ ኦዲዳይሳን ማላሌቲዶሶና።
LUK 2:19 ማይራማ ሃኒዳባ ኡባ ባ ዎዛናን ቆፓሼ ዴዓሱ።
LUK 2:20 ሄንꬃንቾቲ ኤንታው ኦዴቲዳይሳዳ ሃኒን ቤዒዶሶና። ሄሳ ጊሾ፥ ባንታ ሲዒዳባሲኔ ቤዒዳባ ኡባስ ፆሳ ቦንቺሼኔ ጋላቲሼ ሲሚዶሶና።
LUK 2:21 ሆስፑንꬃ ቃማን፥ ቃፃሮ ዎዴይ ጋኪን፥ ኢ ቃንꬃታናፔ ሲንꬄ ኪታንቾይ ዎꬂዳ ሱንꬃን ዬሱሳ ጌቴቲስ።
LUK 2:22 ሙሴ ዎጋ ሜላ ኤንታ ጌሻቴꬃ ዎዴይ ፖሌቲዳፔ ጉዬ ዮሴፋራኔ ማይራሚራ ዮጋ ናዓ ባንታ ጎዳስ ኢማናው ዬሩሳላሜ ቢዶሶና።
LUK 2:23 ሄሲካ፥ ጎዳ ዎጋን፥ «ኣዴ ጊዲዳ ባይራ ናዒ ኡባይ ጎዳስ ዱማቲዳይሳ ጊዶ» ጌቴቲዲ ፃፌቲዳይሳ ፖላናሳ።
LUK 2:24 ቃሲ ጎዳ ዎጋን፥ ናምዑ ኩራቾ ዎይኮ ሆሌ ያርሻናው ኤፊዶሶና።
LUK 2:25 ሄ ዎዴ ጌሺኔ ኣማኖራ ሚኖ ጊዲዳ ሲሞና ጌቴቲያ ኣሲ ዬሩሳላሜን ዴዔስ። ኢ ኢስራዔሌታ ኣቶቴꬃ ናጊሼ ዴዔስ። ጌሻ ኣያናይካ ኢያ ቦላ ዴዔስ።
LUK 2:26 ቃሲ ኪሪስቶሳ ቤዖና ሃይቆናይሳ ጌሻ ኣያናይ ኢያው ቆንጪሲን ኤሪዲ ዴዔስ።
LUK 2:27 ኢ ሄ ጋላስ ኣያናይ ካሌꬂን ፆሳ ኬꬂ ቢስ። ናዓ ኣዬራኔ ኣዋራ ዎጋ ፖላናው ዮጋ ናዓ ዬሱሳ ኤኪዲ ጌሊዳ ዎዴ
LUK 2:28 ሲሞኒ ሞኪ ኤኪዲ ናዓ ኢዲሚዲ፥
LUK 2:29 «ጎዳው ኔ ታው ጌሊዳ ቃላ ሜላ፥ ሃዒ ኔ ኣይሊያ ሳሮን ሞይዛ።
LUK 2:30 ታ ኣይፌይ ኣሳ ኡባ ሲንꬃን ኔ ጊጊሲዳ፥
LUK 2:31 ኔ ኣሹዋ ቤዒስ።
LUK 2:32 ሄሲካ ካዎቴꬃታ ኡባስ፥ ፆሳ ኦጊያ ቆንጪሲያ ፖዖ፥ ኔ ኣሳ ኢስራዔሌስካ ቦንቾ» ያጊዲ ፆሳ ጋላቲስ።
LUK 2:33 ዮሴፋራኔ ማይራሚራ ኢያው ኦዴቲዳባን ማላሌቲዶሶና።
LUK 2:34 ሲሞኒ ኤንታ ኣንጂስ። ኣዬ ማይራሚኮ፥ «ሄኮ ዳሮ ኣሳ ዎዛና ቆፋይ ቆንጫና ሜላ፥ ኢስራዔሌን ዴዒያ ዳሮታስ ኤንታ ኩንዴꬃሲኔ ዴንዱዋስ ፆሳን ዶሬቲስ።
LUK 2:35 ቃሲ ኤቄቴይሳታስ ማላ ጊዳና። ኔ ሼምፑዋራካ ቃሲ ማሺ ኣꬋና» ያጊስ።
LUK 2:36 ቃሲ ኣሴሬ ያራፔ ጊዲዳ ፋኑዔላ ናዒያ ሃና ጌቴቲያ ናቤይ ዴዓዉሱ። ኢያ ዳሮ ጪማሱ፤ ኢያ ባ ኮይሮ ኣዚናራ ላፑን ላይꬂ ዴዓሱ።
LUK 2:37 ኢ ኣዚናይ ሃይቂን ሆስፑን ታማኔ ኦይዱ ላይꬂ ጊዳና ጋካናው ቃማኔ ጋላስ ፓጬይ ባይና ዎሳኒኔ ፆማን ፆሳ ኬꬃን ሃጋዛሱ።
LUK 2:38 ኢያ ሄ ሳቲያን ባዳ ፆሳ ጋላታሱ፤ ዬሩሳላሜ ዎዜቴꬃ ናጊያ ኡባስ ዮጋ ናዓባ ማርካታሱ።
LUK 2:39 ዮሴፋራኔ ማይራሚራ ጎዳ ሂጊያን ኪቴቲዳ ዎጋ ኡባ ፖሊዳፔ ጉዬ ጋሊላ ቢታን ዴዒያ ባንታ ካታማ ናዚሬቴ ሲሚዶሶና።
LUK 2:40 ናዓይ ዲጪሼኔ ሚኒሼ ቢስ። ጪንጫቴꬃን ኩሚስ፤ ፆሳ ኣꬎ ኬሃቴꬃይ ኢያ ቦላ ዴዔስ።
LUK 2:41 ዮሴፋራኔ ማይራሚራ ፋሲካ ባሌ ቦንቻናው ላይꬃን ላይꬃን ዬሩሳላሜ ቦሶና።
LUK 2:42 ዬሱሳስ ታማኔ ናምዑ ላይꬂ ጊዲያ ዎዴ ካሴ ሜዜቲዳይሳዳ ባሊያ ቦንቻናው ቢዶሶና።
LUK 2:43 ባሊያ ቦንቺዳፔ ጉዬ ሶ ሲሚያ ዎዴ ናዓይ ዬሱሲ ዬሩሳላሜን ኣቲስ። ሺን ዮሴፋራኔ ማይራሚራ ኢ ዬሩሳላሜን ኣቶይሳ ኤሪቦኮና።
LUK 2:44 ኢ ሶ ሲሚያ ኣሳራ ዎላ ዴዒያ ዳኒን ኤንቲ ኢሲ ጋላሳ ኦጌ ቢዶሶና። ኢ ባይናይሳ ኤሪዳፔ ጉዬ ባንታ ዳቦታኔ ላጌታ ማታን ኮዪዶሶና።
LUK 2:45 ኢ ያን ꬋዪን ኮዪሼ ጉዬ ዬሩሳላሜ ጋካናው ቢዶሶና።
LUK 2:46 ሄꬑ ጋላሳፔ ጉዬ ፆሳ ኬꬃን ኣስታማሬታ ጊዶን ኡቲዲ ኤንታባ ሲዒሼኔ ኤንታ ኦይቺሼ ዴዒሺን ዴሚዶሶና።
LUK 2:47 ኢያ ሲዒያ ኡባይ ኢያ ኣኬካኒኔ ዛሩዋን ማላሌቲዶሶና።
LUK 2:48 ሶ ኣሳይ ኢያ ዴሚዳ ዎዴ ማላሌቲዶሶና። ኢያ ኣያካ፥ «ታ ናዓው፥ ኣይስ ኑና ሃይሳዳ ኦꬃዲ? ኔ ኣዋራኔ ታራ ኔና ኮዪሼ ኡንዔቲዳ» ያጋሱ።
LUK 2:49 ዬሱሲ ኤንታኮ፥ «ታና ኣይስ ኮዬቲ? ታ፥ ታ ኣዋ ኬꬃን ዳናው ቤሴይሳ ኤሬኬቲ» ያጊስ።
LUK 2:50 ሺን ኢ ኤንታኮ ጊዳባ ኤንቲ ኣኬኪቦኮና።
LUK 2:51 ሄሳፌ ጉዬ፥ ኤንታራ ኢሲፌ ናዚሬቴ ካታማ ቢስ። ኤንታው ኪቴቲሼ ዴዒስ። ኢያ ኣያ ሄ ኡባ ባ ዎዛናን ዎꬃዳ ናጋሱ።
LUK 2:52 ዬሱሲ፥ ጪንጫቴꬃን፥ ጌሳኒኔ ቴማን ፆሳ ሲንꬃኒኔ ኣሳ ሲንꬃን ዲጪስ።
LUK 3:1 ካዎይ ፂባርዮሲ ሮሜ ቢታን ካዎቲን፥ ታማኔ ኢቻሻንꬆ ላይꬃን፥ ጴንፄ ጲላፆሲ ዪሁዳ ሃሪያ ዎዴ ሄሮዲሲ ጋሊላ ሃሪያ ዎዴ ኢያ ኢሻ ፊልጶሲ ኢፁሪያሳኔ ፂራኮንዶሳ ሃሪያ ዎዴ ሊሳኒዮሲ ኣብላኒሳ ሃሪያ ዎዴ
LUK 3:2 ሃናራኔ ቃያፋራ ካሂኔ ሃላቃ ጊዲ ዴዒሺን፥ ፆሳ ቃላይ ዛካሪያሳ ናዓ ዮሃኒሳኮ ባዞ ቢታ ዪስ።
LUK 3:3 ዮሃኒሲ፥ «ሂንቴ ናጋራፔ ሲሚቴኔ ፃማቄቲቴ። ፆሳይ ሂንቴ ናጋራ ኣቶ ጋና» ያጊዲ ታማርሲሼ ዮርዳኖሴ ሻፋ ሄራን ዴዒያ ቢታ ኡባ ቢስ።
LUK 3:4 ሄሲካ ናቤይ ኢሳያሲ ባ ማፃፋን፥ «ባዞ ጊዶን ባ ቃላ ꬎቁ ኦꬂዲ፥ ዋሲያ ኡራ ቃላይ፥ ‹ጎዳ ኦጊያ ጊጊሲቴ፥ ሆሮጋካ ፒዲ ኦꬂቴ።
LUK 3:5 ኣፎ ኡባይ ኩማና፥ ዙማይኔ ዴሬይ ዚቂ ጋና። ዎቤ ኦጌይ ሉላና፥ ጊጎና ሆሮጋይ ቂንፂ ጋና።
LUK 3:6 ኣሾ ማዒዳ ኡባይ፥ ፆሳ ኣሹዋ ቤዓና› » ጊዲ ፃፊዳይሳዳ ሃኒስ።
LUK 3:7 ዮሃኒሲ፥ ባ ኩሼን ፃማቄታናው ዪዳ ኣሳኮ፥ «ሂንቴኖ፥ ሾሻ ናይቶ ያናው ዴዒያ ሃንቁዋፌ ኣታና ሜላ ሂንቴና ዞሪዳይ ኦኔ?
LUK 3:8 ሂዛ፥ ሂንቴ ሲሙዋ ቆንጪሲያ ሎዖ ኦሶ ኦꬂቴ፥ ሂንቴ ዎዛናን፥ ‹ኑስ፥ ኑ ኣዋይ ኣብራሃሜይ ዴዔስ ጊዲ ጬቄቶፊቴ።› ሃ ሲዒቴ፥ ሃ ሹቻታፔ ፆሳይ ኣብራሃሜስ ናዓ ኬሳናው ዳንዳዔስ።
LUK 3:9 ሄኮ፥ ቤፄይ ሚꬃ ፃጶን ዴዔስ። ሂዛ፥ ሎዖ ኣይፌ ኣይፎና ሚꬃ ኡባይ ቃንፄቲዲ ታማን ዬጌታና» ያጊስ።
LUK 3:10 ኣሳይ፥ «ያቲን ኑኒ ኣይ ኦꬂኖ?» ያጊዲ ኦይቺዶሶና።
LUK 3:11 ዮሃኒሲ ዛሪዲ፥ «ናምዑ ኣፊሊ ዴዒያ ኣሲ ባይናይሳስ ኢሞ። ካꬂ ዴዔይሲ ባይናይሳስ ኢሞ» ያጊስ።
LUK 3:12 ቃራፃ ቃንፂሴይሳቲ ፃማቄታናው ዪዲ፥ «ኣስታማሪያው፥ ኑኒ ኣይ ኦꬂኖ?» ያጊዶሶና።
LUK 3:13 ኢ ዛሪዲ፥ «ሂንቴ ቃንፂሳናው ኪቴቶይሳፌ ኣꬂዲ ኤኮፊቴ» ያጊስ።
LUK 3:14 ቃሲ ዎታዳሬቲ ዪዲ፥ «ኑኒ ኣይ ኦꬂኖ» ያጊዲ ኦይቺዶሶና። ዮሃኒሲ፥ «ኦዴባካ ዎልቃን ዳፊዲ ኤኮፊቴ፥ ኦናካ ዎርዶን ሞቶፒቴ፥ ሂንቴ ዳሞዜይ ሂንቴው ጊዶ፤ ኡፋይቲዲ ዴዒቴ» ያጊስ።
LUK 3:15 ኣሳይ ኪሪስቶሳ ናጊሼ ዴዒያ ጊሾ ዮሃኒሳ፥ «ኢ ኪሪስቶሳ ጊዳንዴሻ?» ጊዲ ቆፒዶሶና።
LUK 3:16 ዮሃኒሲ ኡባስ ዛሪዲ፥ «ታኒ ሂንቴና ሃꬃን ፃማቃይስ፥ ሺን ታፔ ኣꬊዲ ዎልቃሜይሲ ያና። ታኒ ኢያ ጫማ ዎዶሩዋ ቢላናው ቤሶና ኣሲ። ኢ ሂንቴና ጌሻ ኣያናኒኔ ታማን ፃማቃና።
LUK 3:17 ዉዱማን ዴዒያ ካꬃ ፖሎ ጌሻናው ፒꬄይ ኢያ ኩሼን ዴዔስ። ጌሻ ካꬃ ባ ሻሊያን ቆላና፤ ካሊያ ꬋዮና ታማን ፁጋና» ያጊስ።
LUK 3:18 ቃሲ ዮሃኒሲ ኣሳ ዳሮ ዞሬ ዞሪዲ ዎንጌላ ኦዲስ።
LUK 3:19 ሺን ዮሃኒሲ ሄሮዲሲ ባ ኢሻ ማቺው፥ ሄሮዲያዳ፥ ኤኪዳ ጊሾኔ ሃራ ኢታ ኦሶታ ጊሾ ካጪዳ ዎዴ
LUK 3:20 ሄሮዲሲ ካሴይሳ ቦላ ሃራባ ኡባ ጉጂዲ ዮሃኒሳ ዎይኔ ጌልሲስ።
LUK 3:21 ዮሃኒሲ ቃሼታናፔ ሲንꬄ ኣሳ ኡባ ፃማቂዲ ሲሚን፥ ዬሱሲካ ቃሲ ፃማቄቲስ። ኢ ዎሲሺን ሳሎይ ዶዬቲስ።
LUK 3:22 ጌሻ ኣያናይ ሆሌዳ ቤንቲሼ ኢያ ቦላ ኡቲስ። ሳሎፔ «ታኒ ዶሲያ ናዓይ ኔና፤ ኔ ታና ኡፋይሳሳ ያጊያ» ቃላይ ዪስ።
LUK 3:23 ዬሱሲ ታማርሶ ኦይኪያ ዎዴ ኢያው ሃስታሙ ላይꬂ ጊዲሺን፥ ኣሳይ ኢያ ዮሴፋ ናዓ ጊዲ ቆፒስ። ዮሴፊ ኤሌ ናዓ፥
LUK 3:24 ኤሌይ ማቴ ናዓ፥ ማቴይ ሌዌ ናዓ፥ ሌዌይ ማልካ ናዓ፥ ማልኬይ ዮና ናዓ፥ ዮኒ ዮሴፋ ናዓ፥
LUK 3:25 ዮሴፊ ማታቴ ናዓ፥ ማታቴይ ኣሞፄ ናዓ፥ ኣሞፄይ ናሆሜ ናዓ፥ ናሆሜይ ኣሲሊሜ ናዓ፥ ኣሲሊሜይ ናጌ ናዓ፥
LUK 3:26 ናጌይ ማዓቴ ናዓ፥ ማዓቴይ ማታቲዬ ናዓ፥ ማታቲዬይ ሳማዬ ናዓ፥
LUK 3:27 ሳማዬይ ዪሁዳ ናዓ፥ ዪሁዲ ዮናኔ ናዓ፥ ዮናኔይ ራሴ ናዓ፥ ራሴይ ዜሩባቤላ ናዓ፥ ዜሩባቤሌይ ሳላቲያሌ ናዓ፥ ሳላቲያሌይ ኔሬ ናዓ፥
LUK 3:28 ኔሬይ ማልካ ናዓ፥ ማልኬይ ሃዴ ናዓ፥ ሃዴይ ቆሳሜ ናዓ፥ ቆሳሜይ ኤልሞዳኔ ናዓ፥ ኤልሞዳኔይ ኤሬ ናዓ፥
LUK 3:29 ኤሬይ ዮሴዔ ናዓ፥ ዮሴዔይ ኣላዛራ ናዓ፥ ኣላዛሪ ዮራሜ ናዓ፥ ዮራሜይ ማቴ ናዓ፥ ማቴይ ሌዌ ናዓ፥
LUK 3:30 ሌዌይ ሲሞና ናዓ፥ ሲሞኒ ዪሁዳ ናዓ፥ ዪሁዲ ዮሴፋ ናዓ፥ ዮሴፊ ዮናኔ ናዓ፥ ዮናኔይ ኤሊያቄሜ ናዓ፥
LUK 3:31 ኤሊያቄሜይ ማሊዬ ናዓ፥ ማሊዬይ ማይናኔ ናዓ፥ ማይናኔይ ማቴ ናዓ፥ ማቴይ ናታኔ ናዓ፥ ናታኔይ ዳዊቴ ናዓ፥
LUK 3:32 ዳዊቴይ ኢሴዬ ናዓ፥ ኢሴዬይ ኢዮቤዴ ናዓ፥ ኢዮቤዴይ ቦዔዛ ናዓ፥ ቦዔዚ ሳልሞና ናዓ፥ ሳልሞኔይ ናዓሶና ናዓ፥
LUK 3:33 ናዓሶኔይ ኣሚናዳቤ ናዓ፥ ኣሚናዳቤይ ራሜ ናዓ፥ ራሜይ ኣርኔ ናዓ፥ ኣርኔይ ኣስሮሜ ናዓ፥
LUK 3:34 ኣስሮሜይ ፋሬሴ ናዓ፥ ፋሬሴይ ዪሁዳ ናዓ፥ ዪሁዲ ያይቆባ ናዓ፥ ያይቆቢ ዪሳቃ ናዓ፥ ዪሳቂ ኣብራሃሜ ናዓ፥ ኣብራሃሜይ ታራ ናዓ፥
LUK 3:35 ታሪ ናኮሬ ናዓ፥ ናኮሬይ ሳሩጌ ናዓ፥ ሳሩጌይ ሬሁ ናዓ፥ ሬሁይ ፋሌቄ ናዓ፥ ፋሌቄይ ኤቤራ ናዓ፥ ኤቤሮይ ሴላ ናዓ፥
LUK 3:36 ሴሊ ቃይናሜ ናዓ፥ ቃይናሜይ ኣርፋኪሳዳ ናዓ፥ ኣርፋኪሳዴይ ሴሜ ናዓ፥ ሴሜይ ኖሄ ናዓ፥ ኖሄይ ላሜሄ ናዓ፥
LUK 3:37 ላሜሄይ ማቱሳላ ናዓ፥ ማቱሳሊ ሄኖኬ ናዓ፥ ሄኖኬይ ያሬዴ ናዓ፥ ያሬዴይ ማላልዔላ ናዓ፥ ማላልዔሊ ቃይናኔ ናዓ፥
LUK 3:38 ቃይናኔይ ሄኖሳ ናዓ፥ ሄኖሴይ ሴታ ናዓ፥ ሴቴይ ኣዳሜ ናዓ፥ ኣዳሜይ ፆሳ ናዓ።
LUK 4:1 ዬሱሲ ጌሻ ኣያናን ኩሚዲ ዮርዳኖሴ ሻፋፔ ሲሚዳ ሜላ ኣያናይ ኢያ ባዞ ኤፊስ።
LUK 4:2 ያን ኦይታሙ ጋላሲኔ ቃማ ፃላሄን ፓጬቲስ። ሄ ጋላሳታን ኣይኮካ ሞና ጋምዒዳ ጊሾ ዉርሴꬃን ኮሻቲስ።
LUK 4:3 ፃላሄይ ኢያኮ፥ «ኔኒ ፆሳ ናዓ ጊዲኮ ኣኔ ሃይሲ ሹቻይ ኡይꬁ ጊዶ ጋዳ ኪታ» ያጊስ።
LUK 4:4 ዬሱሲ ዛሪዲ፥ «ኣሲ ኡይꬃ ፃላላን ዴና ጌቴቲዲ ፃፌቲስ» ያጊስ።
LUK 4:5 ሄሳፌ ጉዬ፥ ፃላሄይ ዬሱሳ ኣዱሳ ዴሬ ቦላ ኬሲዲ ሃ ኣላሚያ ካዎቴꬃታ ኣይፌ ቂጲ ዛራናው ቤሲስ።
LUK 4:6 ፃላሄይ፥ «ሃ ኡባስ ማታይኔ ቦንቾይ ታው ኢሜቲስ። ታኒ ዶሲዳ ኦዴስካ ኢሚያ ጊሾ ኔው ኢማና።
LUK 4:7 ሄሳ ጊሾ፥ ኔኒ ታው ጎይኒኮ ኡባይ ኔው ጊዳና» ያጊስ።
LUK 4:8 ዬሱሲ ዛሪዲ፥ «ኔ ጎዳ፥ ኔ ፆሳ፥ ኢያ ፃላላ ጎይና ጌቴቲዲ ፃፌቲስ» ያጊስ።
LUK 4:9 ዉርሴꬃን ፃላሄይ ዬሱሳ ዬሩሳላሜ ኤፊዲ ፆሳ ኬꬃስ ሁዒያ ቦላ ኤሲዲ፥ «ኔኒ ፆሳ ናዓ ጊዲኮ ኣኔ ዱጌ ሳዓን ኔና ዬጋ።
LUK 4:10 ኣይስ ጊኮ፥ ‹ኔና ናጊያ ኪታንቾታ ፆሳይ ኔ ጊሾ ኪታና።
LUK 4:11 ኤንቲ ኔ ቶሆይ ሹቻን ꬉቤቶና ሜላ፥ ባንታ ኩሺያን ꬎቁ ኦꬂዲ ኔና ዴንꬃና› ጌቴቲዲ ፃፌቲስ» ያጊስ።
LUK 4:12 ዬሱሲ ዛሪዲ፥ «ኔ ጎዳ ፆሳ ፓጮፋ ጌቴቲዲ ፃፌቲስ» ያጊስ።
LUK 4:13 ፃላሄይ ዬሱሳ ፓጪያ ዉርሲዳፔ ጉዬ ሃራ ኢንጄ ዎዴ ዴማና ጋካናው ኢያፔ ሻኬቲስ።
LUK 4:14 ዬሱሲ ኣያና ዎልቃን ኩሚዲ ጋሊላ ሲሚስ። ኢያ ሱንꬃይ ሄራን ዴዒያ ቢታ ኡባን ኬዪስ።
LUK 4:15 ኢ ኣይሁዴ ዎሳ ኬꬂ ጌሊዲ ታማርሲስ፤ ኣሳ ኡባይ ኢያ ጋላቲዶሶና።
LUK 4:16 ያፔ ኢ ዲጪዳ ካታማ ናዚሬቴ ዪስ። ካሴ ሜዜቲዳይሳዳ ሳምባታ ጋላስ ኣይሁዴ ዎሳ ኬꬂ ጌሊስ። ናባባናዉካ ዴንዲ ኤቂስ።
LUK 4:17 ናቢያ ኢሳያሳ ማፃፋይ ኢያው ኢሜቲን፥ ዶዪዲ፥ ሃይሳዳ ያጊዲ ፃፌቲዳይሳ ዴሚስ፡
LUK 4:18 «ጎዳ ኣያናይ ታ ቦላ ዴዔስ፥ ማንቆታስ ዎንጌላ ኦዳና ሜላ ፆሳይ ታና ዶሪስ። ቃሼቲዳይሳታስ ቢሌቴꬂ፥ ቆቂዳይሳታ ፄሊሳናሲኔ ኡንዔቲዳይሳታ ቢርሻና ሜላ፥
LUK 4:19 ፆሳይ ኬሃናው ቆፒዳ ላይꬃ ኦዳና ሜላ ታና ኪቲስ» ያጊስ።
LUK 4:20 ሄሳፌ ጉዬ፥ ማፃፋ ፃፂዲ ሃጋዜይሳስ ኢሚዲ ታማርሳናው ኡቲስ። ኣይሁዴ ዎሳ ኬꬃን ዴዒያ ኣሳቲ ኡባይ ጫዲ ፄሎሶና።
LUK 4:21 ኢ፥ «ሃይሲ ሂንቴ ሃይꬃን ሂንቴ ሲዒያ ሃ ማፃፋ ቃላይ ሃቺ ፖሌቲስ» ያጊስ።
LUK 4:22 ኡባይ ኢያባ ዳርሲዲ ኦዴቶሶና። ቃሲ ኢያ ዶናፔ ኬያ ኣꬎ ኬሃቴꬃን ኩሚዳ ቃላን ማላሌቲሼ፥ «ሃይሲ ዮሴፋ ናዓ ጊዴኔዬ?» ያጊዶሶና።
LUK 4:23 ኢ፥ « ‹ኔኖ ꬋሌ ኣዋው ኔና ኣሻ፥ ቂፊርናሆሜን ኔ ኦꬂዳባ ኑ ሲዖይሳ ቃሲ ሃይሳን ኔ ካታማን ኦꬃ› ያጊያ ሌሚሱዋን ሂንቴ ታና ጋናይሳስ ሲꬌይ ባዋ» ያጊስ።
LUK 4:24 ቃሲ፥ «ቱማ ኦዳይስ፤ ናቤይ ባ ዬሌቲዳ ቢታን ቦንቼቴና።
LUK 4:25 «ታ ሂንቴው ቱማ ኦዳይስ፤ ሳሎይ ሄꬑ ላይꬂኔ ባጋ ጎርዴቲን ሚኖ ኮሺ ቢታ ኡባን ዴዒያ ኤሊያሳ ዎዴ ዳሮ ኣምዔቲ ኢስራዔሌን ዴዖሶና።
LUK 4:26 ኤሊያሲ ኤንታፌ ኢሲኔኮካ ኪቴቲቤና። ሺን ሳራፕታን ዴዒያ ኣምዔኮ ኪቴቲስ።
LUK 4:27 ናቢያ ኤልሳዔ ዎዴ ኢስራዔሌን ዳሮ ባሮ ሃርጋንቾቲ ዴዖሶና። ሺን ሶሬ ኡራ ኒዒማኔፔ ኣቲን ኦኒካ ፓፂቤና» ያጊስ።
LUK 4:28 ኣይሁዴ ዎሳ ኬꬃን ዴዒያ ኣሳ ኡባይ ሄሳ ሲዒዳ ዎዴ ዳሮ ዪሎቲዶሶና።
LUK 4:29 ባንታ ኡቲዳ ቤሳፌ ዴንዲዲ ዙማ ቦላ ኬፄቲዳ ካታማፔ ጋፃ ኬሲዲ ሱጊ ዬዳናው ኣፎ ዶና ኤፊዶሶና።
LUK 4:30 ሺን ኢ ኤንታ ጊዶራ ካንꬂዲ ኣꬊስ።
LUK 4:31 ያፔ ጋሊላ ቢታን ዴዒያ ቂፊርናሆሜ ካታማ ቢስ። ያን ሳምባታ ጋላስ ኣሳ ታማርሲስ።
LUK 4:32 ኢ ታማርሴይ ማታራ ጊዲያ ጊሾ ኡባይ ኢያ ቲሚርቲያን ማላሌቲዶሶና።
LUK 4:33 ኣይሁዴ ዎሳ ኬꬃን ቱና ኣያናይ ኦይኪዳ ኡራይ ዴዔስ።
LUK 4:34 ኢ፥ «ናዚሬቴ ዬሱሳ ኑና ኣይስ ዋይሳይ ኑፔ ሃካ፤ ኔኒ ዪዳይ ኑና ꬋይሳናሴዬ? ኔኒ ኦኔኮ ታኒ ኤራይስ። ኔኒ ፆሳፌ ዪዳ ጌሻ» ያጊዲ ዋሲስ።
LUK 4:35 ዬሱሲ ቱና ኣያናኮ፥ «ሲዒ ጋዳ ሃ ኡራፔ ኬያ» ያጊዲ ሃንቂስ። ቱና ኣያናይ ኡራ ኣሳ ኡባ ሲንꬃን ሆሊ ዬጊዲ ኣይኮካ ቆሆና ዬዲዲ ኬዪስ።
LUK 4:36 ኣሳ ኡባይ ማላሌቲዶሶና። ዎሊኮ፥ «ሃኖስ፥ ሃይሲ ኣይቢ ቲሚርቴ? ቱና ኣያናታ ማታኒኔ ዎልቃን ኪቴስ፤ ኤንቲካ ኬዮሶና» ያጊዶሶና።
LUK 4:37 ኢያ ሱንꬃይ ሄራ ኡባን ኬዪስ።
LUK 4:38 ሄሳፌ ጉዬ፥ ዬሱሲ ኣይሁዴ ዎሳ ኬꬃፌ ኬዪዲ ሲሞና ሶ ጌሊስ። ሲሞና ማቼ ኣያ ሚኖ ቆፆ ሚሻ ሃርጌን ሳኬታሱ። ኢዮ ፓꬃና ሜላ ዬሱሳ ዎሲዶሶና።
LUK 4:39 ኢ ሂፃኮ ሺቂ ሆኪዲ ኢ ሃርጊያ ሃንቂስ። ሚሻይ ኣጊን ኤሌሳ ዴንዳዳ ኤንታ ሞካሱ።
LUK 4:40 ኣዋይ ዉላና ሃኒሺን ዱማ ዱማ ሃርጊያን ኦይኬቲዳ ኣሳ ኢያኮ ኤሂዶሶና። ኢ ኢሱዋ ኢሱዋ ቦላ ባ ኩሺያ ዎꬂዲ ፓꬂስ።
LUK 4:41 ቱና ኣያናቲ ቃሲ፥ «ኔኒ፥ ፆሳ ናዓ» ጊዲ ዋሲሼ ዳሮ ኣሳፔ ኬዪዶሶና። ሺን ኢ ኤንታና ሃንቂስ። ኢ ኪሪስቶሳ ጊዴይሳ ኤንቲ ኤሪያ ጊሾ ኢሲባካ ኦዴቶና ሜላ ዲጊስ።
LUK 4:42 ቡሮ ዎንቲያ ዎዴ ዬሱሲ ኢሲ ጌማ ቤሲ ቢስ። ኣሳይ ኮዪሼ ኢ ዴዒያ ቤሳ ዪዶሶና። ኤንታፌ ኢ ሻኬቲዲ ቦና ሜላ ቡቴቲዶሶና።
LUK 4:43 ሺን ኢ፥ «ታኒ ሃራ ካታማታ ባዳ ፆሳ ካዎቴꬃ ዎንጌላ ማርካታናው ቤሴስ። ታ ኪቴቲዳይ ሄሳሳ» ያጊስ።
LUK 4:44 ዪሁዳ ቢታን ዴዒያ ኣይሁዴ ዎሳ ኬꬃን ሳባኪስ።
LUK 5:1 ኢሲ ጋላስ ዬሱሲ ጌንሳሬፄ ኣባ ማታን ኤቂዳሺን ዳሮ ኣሳይ ኢያ ዩሹዋ ኡንዔꬂዲ፥ ኢ ታማርሲያ ፆሳ ቃላ ሲዖሶና።
LUK 5:2 ያን ሃꬃ ጋፃን ዴዒያ ናምዑ ዎጎሎታ ቤዒስ። ሞሎ ኦይኪያ ኣሳቲ ዎጎሎታፔ ዎꬊዲ ባንታ ጊቲያ ሜጮሶና።
LUK 5:3 ሄ ዎጎሎታፔ ሲሞናይሳን ጌሊዲ ቢታፌ ጉꬂ ጊዶ ሺሻና ሜላ ኦይቺስ። ያቲዲ፥ ሄ ዎጎሉዋ ቦላ ኡቲዲ ኣሳ ታማርሲስ።
LUK 5:4 ባ ታማርሱዋ ኦንጊዳፔ ጉዬ ሲሞናኮ፥ «ጌዴ ጪሙዋኮ ሺሻዳ ሞሉዋ ኦይካናው ሂንቴ ጊቲያ ዬጊቴ» ያጊስ።
LUK 5:5 ሲሞኒ ዛሪዲ፥ «ኣስታማሪያው፥ ቃማ ኩሜꬃ ዳቡሪሼ ኣቂዲ ኣይኮካ ኦይኪቦኮ፥ ሺን ኔ ጊኮ ጊቲያ ዬጋና» ያጊስ።
LUK 5:6 ኤንቲ ጊቲያ ዬጊዳ ዎዴ ጊቴይ ዳኬታና ጋካናው ዳሮ ሞሎ ኦይኪዶሶና።
LUK 5:7 ሃራ ዎጎሉዋን ዴዒያ ባንታ ላጌቲ ዪዲ፥ ባንታና ማዳና ሜላ ዉቲዲ ፄጊዶሶና። ኤንቲ ዪዲ ናምዑ ዎጎሎታ፥ ሃꬃን ሚቴታና ጋካናው ሞሎን ኩንꬂዶሶና።
LUK 5:8 ሲሞን ጴፂሮሲ ሄሳ ቤዒዳ ዎዴ ዬሱሳ ሲንꬃን ኩንዲዲ፥ «ጎዳው፥ ታኒ ናጋራንቾ ኣሲ ጊዲያ ጊሾ ታፔ ሻኬታ» ያጊስ።
LUK 5:9 ሄሳ ኢ ጊዳይ ኢኔ ኢያራ ዴዔይሳቲ ኦይኪዳ ሞሉዋ ዳሮቴꬃን ማላሌቲዳ ጊሾሳ።
LUK 5:10 ቃሲ ሲሞና ላጌ ጊዲዳ ዛብዲዮሳ ናይቲ ያይቆባራኔ ዮሃኒሳራ ማላሌቲዶሶና። ዬሱሲ ሲሞናኮ፥ «ባቦፋ! ሂዛፔ ኔኒ ኣሴ ኦይኪያ ኣሲ ጊዳና» ያጊስ።
LUK 5:11 ኤንቲ ዎጎሎታ ጋፃ ሺሺዳፔ ጉዬ ኡባ ኣጊዲ ዬሱሳ ካሊዶሶና።
LUK 5:12 ዬሱሲ ካታማታፔ ኢሱዋን ዴዒሺን ኢሲ ባሮ ሃርጌን ኦይኬቲዳ ኣሲ ሄ ካታማን ዴዔስ። ሄ ኡራይ ዬሱሳ ቤዒዲ ኢያ ሲንꬃን ጉፋኒዲ፥ «ጎዳው፥ ኔ ሼኔ ጊዲኮ ታና ጌሻናው ዳንዳዓሳ» ጊዲ ዎሲስ።
LUK 5:13 ዬሱሲ ባ ኩሺያ ዬዲ ቦቺዲ፥ «ኤ፥ ታ ሼኔ፤ ጌያ» ያጊስ። ኢራ ባሮ ሃርጌይ ኡራፔ ኪቺስ።
LUK 5:14 ዬሱሲ፥ «ሃይሳ ኦዴስካ ኦዶፓ፥ ሺን ባዳ ኔናቴꬃ ኣይሁዴ ካሂኒያ ቤሳ። ኔ ጌዪዳይሳስ ማርካ ጊዳና ሜላ ሙሴይ ኪቲዳ ያርሹዋ ያርሻ» ጊዲ ኪቲስ።
LUK 5:15 ጊዶሺን፥ ኢያ ሱንꬃይ ካሴፔ ኣꬊዲ ዳልጊሼ ቢስ። ዳሮ ኣሳይ ኢ ኦዲያባ ሲዓናዉኔ ባንታ ሃርጊያፌ ፓፃናው ዮሶና።
LUK 5:16 ሺን ዬሱሲ ዳሮ ዎዴ ጌማ ቤሲ ቢዲ ዎሴስ።
LUK 5:17 ኢሲ ጋላስ ዬሱሲ ታማርሲሺን ጋሊላፔኔ ዪሁዳ ሄራ ኡባፌ ቃሲ ዬሩሳላሜፔካ ዪዳ ፋሪሳዌቲኔ ሂጌ ኣስታማሬቲ ያን ኡቲዶሶና። ኣሳ ፓꬂያ ጎዳ ዎልቃይካ ኢያራ ዴዔስ።
LUK 5:18 ሄ ዎዴ ኣሳይ ኢሲ ጉንዳ ኣሲ ሃላራ ቶኪዲ ኤሂዶሶና። ሶ ጌልሲዲ ኢያ ሲንꬃን ዎꬃናው ቆፒዶሶና።
LUK 5:19 ሺን ኣሳ ዳሮቴꬃፌ ዴንዶይሳን ሶ ጌልሳናው ፆኔቲዲ ኬꬃ ቦላ ኬዪዲ፥ ካራ ቃዉፂዲ፥ ሃርጋንቹዋ ሃላራ ኣሳ ሻኪዲ ዬሱሳ ሲንꬃን ዬጊዶሶና።
LUK 5:20 ዬሱሲ ኤንታ ኣማኑዋ ቤዒዲ፥ «ላ ኣዲያው፥ ኔ ናጋራይ ቁሼቲስ» ያጊስ።
LUK 5:21 ሂጌ ኣስታማሬቲኔ ፋሪሳዌቲ፥ «ሃይሲ ፆሳ ቦላ ያጊዲ ኦዴቴይ ኦኔ? ኢሲ ፆሳፌ ኣቲን ሃሪ ናጋራ ቁቻናው ዳንዳዔይ ኦኔ?» ያጊዲ ቆፒዶሶና።
LUK 5:22 ዬሱሲ ኤንታ ቆፋ ኤሪዳ ጊሾ ኤንታኮ፥ «ሂንቴ ዎዛናን ሄሳꬆ ኣይስ ቆፔቲ?
LUK 5:23 ‹ኔ ናጋራይ ቁሼቲስ ጌይሳፌኔ ዴንዳዳ ባ ጌይሳፌ ኣዉሲ ካዉዪ?›
LUK 5:24 ሺን ታ ሄሳ ጊዳይ ኣሳ ናዓይ ሳዓ ቦላ ናጋራ ቁቻናው ማቲ ዴዔይሳ ሂንቴ ኤራና ሜላሳ።» ሄሳፌ ካሊዲ፥ ጉንዳ ኡራኮ፥ «ዴንዳ፤ ኔ ኣልጋ ቶካዳ ኔ ሶ ባ» ያጊስ።
LUK 5:25 ኢ ኤሌሲ ዴንዲዲ ኤንታ ሲንꬃን ኤቂስ፤ ኢ ቶኬቲዲ ዪዳ ኣልጋ ቶኪዲ ፆሳ ጋላቲሼ ባ ሶ ቢስ።
LUK 5:26 ሄ ዎዴ ኡባይካ ማላሌቲዶሶና። ፆሳ ጋላቲሼ፥ «ሃቺ ጊታ ማላታ ቤዒዳ» ያጊዲ ያሼቲዶሶና።
LUK 5:27 ሄሳፌ ጉዬ፥ ዬሱሲ ያፔ ኬዪዲ ቢስ። ሌዌ ጌቴቲያ ኢሲ ቃራፃ ቃንፂሴይሲ ቃራፃ ቃንፂሲያ ቤሳን ኡቲዳይሳ ቤዒዲ፥ «ታና ካላ» ያጊስ።
LUK 5:28 ኢ ኡባባ ኣጊ ዴንዲዲ ኢያ ካሊስ።
LUK 5:29 ሄ ሌዌይ ባ ሶን ጊታ ጊቢራ ጊጊሲስ። ዳሮ ቃራፃ ቃንፂሴይሳቲኔ ሃራ ኣሳቲ ካꬃ ማናው ኡቲዶሶና።
LUK 5:30 ፋሪሳዌቲኔ ሂጌ ኣስታማሬቲ፥ «ቃራፃ ቃንፄይሳታራኔ ናጋራንቾታራ ኣይስ ሜቲኔ ኡዬቲ?» ያጊዲ ዬሱሳ ታማሬታ ቦላ ዙዙሚዶሶና።
LUK 5:31 ዬሱሲ ኤንታኮ፥ «ሃርጋንቾታሳፌ ኣቲን ፓፃታስ ኣኪሜ ኮሼና።
LUK 5:32 ታኒ ናጋራንቾታ ማሮታኮ ዛራናሳፌ ኣቲን ጌሻታ ፄጋናው ያቢኬ» ያጊዲ ዛሪስ።
LUK 5:33 ኤንቲ ዬሱሳኮ፥ «ዮሃኒሳ ታማሬቲ ዳሮ ዎዴ ፆሞሶና፥ ዎሶሶና፤ ቃሲ ፋሪሳዌታ ታማሬቲካ ሄሳꬆ ኦꬆሶና። ሺን ኔይሳቲ ኡባ ዎዴ ሞሶናኔ ኡዮሶና» ያጊዶሶና።
LUK 5:34 ዬሱሲ ኤንታኮ፥ «ሙሹራይ ኤንታራ ዴዒሺን ፄጌቲዳ ኣሳይ ፆማና ሜላ ኦꬃናው ዳንዳዔቲ?
LUK 5:35 ሺን ሙሹራይ ኤንታፌ ሻኬታና ጋላሳይ ያና፥ ሄ ዎዴ ኤንቲ ፆማና።»
LUK 5:36 ቃሲ ያጊዲ ሌሚሶ ኦዲስ፤ «ኦራꬃ ማዖፔ ፔꬊዲ ጋልዓ ማዖ ቦላ ሲኬይ ኦኒካ ባዋ። ሄሳꬆ ኦꬂኮ ኦራꬃ ማዑዋ ፔꬌስ፥ ኦራꬃይ ጋልዓስ ጊጌና።
LUK 5:37 ማልዓንቶ ዎይኒያ ጋልዓ ኦጎሮን ቆሊያ ኦኒካ ባዋ። ሄሳ ኦꬂኮ፥ ኦራꬃ ዎይኔይ ጋልዓ ኦጎሩዋ ꬉሴስ፤ ዎይኔይ ጉኬስ ኦጎሮይካ ማዶናባ ጊዴስ።
LUK 5:38 ሄሳ ጊሾ፥ ኦራꬃ ዎይኔይ ኦራꬃ ኦጎሮን ቆሌታናው ቤሴስ።
LUK 5:39 ሂዛ፥ ጫላይ ሎዖ ጊያ ጊሾ ጫላ ዎይኔ ኡዪ ሲሚዲ ማልዓንቶ ኮዬይ ኦኒካ ባዋ» ያጊስ።
LUK 6:1 ኢሲ ሳምባታ ጋላስ ዬሱሲ ጊስቴ ጋዴ ጊዶራ ኣꬌስ። ዬሱሳ ታማሬቲ ቲያ ባንጋ ዱꬂዲ ባንታ ኩሼን ሺርኪዲ ሞሶና።
LUK 6:2 ሺን ፋሪሳዌታ ጊዶፌ ኢሶቲ ኢሶቲ፥ «ሳምባታ ጋላስ ኦꬃናው ቤሶናባ ኣይስ ኦꬄቲ?» ያጊዶሶና።
LUK 6:3 ዬሱሲ ኤንታኮ ዛሪዲ፥ «ዳዊቴይ ኮሻቲዳ ዎዴ ባራ ዴዔይሳታራ ኢሲፌ ኦꬆይሳ ናባቢቤኬቲ?
LUK 6:4 ፆሳ ኬꬂ ጌሊዲ ኣይሁዴ ካሂኔታ ፃላላስ ቤሲያ ዳቡዋ ሚስ፤ ባራ ዴዔይሳታስካ ኢሚስ» ያጊስ።
LUK 6:5 ቃሲ ዬሱሲ፥ «ኣሳ ናዓይ ሳምባታ ጎዳ» ያጊስ።
LUK 6:6 ሃራ ሳምባታ ጋላስ ዬሱሲ ኣይሁዴ ዎሳ ኬꬂ ጌሊዲ ታማርሴስ። ሄ ቤሳን ኡሻቻ ኩሼይ ጉንዲዳ ኢሲ ኣሲ ዴዔስ።
LUK 6:7 ሂጌ ኣስታማሬቲኔ ፋሪሳዌቲ ኢያ ሞታናው ጋሶ ኮዪዲ ሳምባታ ጋላስ ፓꬂኮ ቤዓና ጊዲ ናጎሶና።
LUK 6:8 ሺን ዬሱሲ ኤንታ ቆፋ ኤሪዲ ኩሼይ ጉንዲዳ ኡራኮ፥ «ዴንዳዳ ኣሳ ጊዱዋን ኤቃ» ያጊስ። ኡራይካ ዴንዲ ኤቂስ።
LUK 6:9 ዬሱሲ፥ «ኣኔ ታ ሂንቴና ኢሲባ ኦይቻይስ፤ ሳምባታ ጋላስ ኦꬃናው ቤሴይ ሎዖባዬዬ ኢታባዬ? ሼምፖ ኣሾዬ ዎይኮ ꬋይሶ?» ያጊስ።
LUK 6:10 ቃሲ ዬሱሲ ኢያ ዩሹዋን ዴዒያ ኣሳ ዩሺ ፄሊዲ ኡራኮ፥ «ኔ ኩሺያ ፒዲ ኦꬃ» ያጊስ። ኡራይካ ኢ ጊዳይሳዳ ኦꬂን ኩሼይ ፓፂስ።
LUK 6:11 ሺን ሂጌ ኣስታማሬቲኔ ፋሪሳዌቲ ዳሮ ዪሎቲዶሶና። ዬሱሳ ቦላ ኣይ ኦꬂኖ ጊዲ ባንታ ጊዶን ማቄቲዶሶና።
LUK 6:12 ሄ ዎዴ ጋላሳታፔ ኢሱዋን ዬሱሲ ዎሳናው ዴሪያ ቦላ ኬዪስ። ቃማ ኩሜꬃ ፆሳ ዎሲሼ ኣቂስ።
LUK 6:13 ዎንቴꬄ ባ ታማሬታ ፄጊዲ ኤንታ ጊዶፌ ታማኔ ናምዓታ ዶሪዲ፥ ኤንታና፥ «ሃዋሬታ» ጊዲ ሱንꬂስ።
LUK 6:14 ኤንቲካ፥ ጴፂሮሳ ጊዲ ሱንꬂዳ ሲሞና፥ ኢያ ኢሻ ኢንዲሪያሳ፥ ያይቆባ፥ ዮሃኒሳ፥ ፊልጶሳ፥ ባርቶሎሚዮሳ፥
LUK 6:15 ማቶሳ፥ ቶማሳ፥ ኢልፊዮሳ ናዓ ያይቆባ፥ ባ ቢታስ ሚሼቲያ ሲሞና፥
LUK 6:16 ያይቆባ ናዓ ዪሁዳኔ ዬሱሳ ኣꬂ ኢሚዳ ኣስቆሮታ ዪሁዳ።
LUK 6:17 ዬሱሲ ኤንታራ ኢሲፌ ዴሪያፔ ዎꬊዲ ዴንባ ቤሳን ኤቂስ። ኢያ ታማሬታፔ ዳሮቲ ሄ ቤሳን ዴዖሶና ዪሁዳ ቢታ ኡባፌ ዬሩሳላሜፔ፥ ፂሮሳፔኔ ሲዶና ኣባ ጋፃፔ ዪዳ ዳሮ ኣሳይ ዴዔስ።
LUK 6:18 ኤንቲ ዪዳይ ኢ ታማርሲያባ ሲዓናዉኔ ባንታ ሃርጊያፌ ፓፃናሳ። ቱና ኣያናን ዋዬቲያ ኣሳቲካ ፓፂዶሶና።
LUK 6:19 ዎልቃይ ኢያፔ ኬዪዲ ኣሳ ኡባ ፓꬂያ ጊሾ ኣሳይ ኢያ ቦቻናው ኮዮሶና።
LUK 6:20 ባ ታማሬታኮ ፄሊዲ ሃይሳዳ ያጊስ፡ «ሂንቴኖ፥ ማንቆቶ፥ ሂንቴ ኣንጄቲዳይሳታ፤ ፆሳ ካዎቴꬃይ ሂንቴሳ።
LUK 6:21 ሂንቴ ሃዒ ኮሻቴይሳቲ ኣንጄቲዳይሳታ፥ ሂንቴ ካላና። ሂንቴ ሃዒ ዬኬይሳቲ ኣንጄቲዳይሳታ ሂንቴ ሚጫና።
LUK 6:22 ኣሳይ ሂንቴና ኣሳ ናዓ ጊሾ ኢፂያ ዎዴ ሂንቴና ሂሊያ ዎዴ ሂንቴና ኤንቲ ቶቺያ ዎዴኔ፥ ኢታ ሱንꬂ ኤንቲ ሂንቴው ኢሚያ ዎዴ ሂንቴ ኣንጄቲዳይሳታ።
LUK 6:23 «ሄኮ፥ ሂንቴ ዎይቶይ ሳሎን ጊታ ጊዲያ ጊሾ ሄ ዎዴ ኡፋይሳን ጉፒቴ። ኣይስ ጊኮ፥ ቤኒ ኤንታ ኣዋቲ ናቤታ ቦላ ሄሳዳ ኦꬂዶሶና።»
LUK 6:24 «ሺን ዱሬቶ ሂንቴና ኣዬ፤ ሂንቴ ሃዒ ሎዖ ዱሳ ኤኪዴታ።
LUK 6:25 ሃዒ ካሊዳይሳቶ ሂንቴና ኣዬ፤ ሂንቴ ኮሻታና። ሃዒ ሚጬይሳቶ ሂንቴኖሾ ሂንቴ ካዮታናኔ ዬካና።
LUK 6:26 ኣሲ ኡባይ ሂንቴ ሎዖቴꬃ ፃላላ ኦዲያ ዎዴ ሂንቴና ኣዬ። ኤንታ ኣዋቲ ቤኒ ዎርዳንቾ ናቤታ ቦላ ሄሳዳ ኦꬂዶሶና።
LUK 6:27 «ሺን ታና ሲዒያ ሂንቴስ ታ ኦዳይስ፤ ሂንቴ ሞርኬታ ሲቂቴ፤ ሂንቴና ኢፄይሳታስ ሎዖባ ኦꬂቴ።
LUK 6:28 ሂንቴና ቃንጌይሳታ ኣንጂቴ፥ ሂንቴና ናቄይሳታስ ዎሲቴ።
LUK 6:29 ኢሲ ባጋ ሻካላ ባቄይሳስ ሃንኮ ባጋካ ቤሳ። ኔ ላፃና ኤካና ጌይሳስ ኔ ሻሚዚያካ ጉጃዳ ኢማ።
LUK 6:30 ኔና ዎሲያ ኡባስ ኢማ፤ ኔፔ ኤኪዳ ኦናካ ዛሮ ጋዳ ኦይቾፋ።
LUK 6:31 ኣሳይ ሂንቴው ኦꬃና ሜላ ሂንቴ ኮያባ ኡባ ሂንቴካ ኣሳስ ኦꬂቴ።
LUK 6:32 «ሂንቴ ሂንቴና ዶሲያ ኣሳታ ፃላላ ዶሲኮ፥ ኣይ ጋላቲ ሂንቴው ዴዒ? ሃሪ ኣቶሺን፥ ናጋራንቾቲካ ባንታና ሲቄይሳታ ሲቆሶና።
LUK 6:33 ሂንቴው ሎዖባ ኦꬄይሳታ ፃላላስ ሎዖባ ኦꬂኮ ሂንቴው ኣይ ጋላቲ ዴዒ? ናጋራንቾቲካ ሄሳዳ ኦꬆሶና።
LUK 6:34 ታልዔ ዛራና ኣሳ ፃላላስ ሂንቴ ታልዒኮ ኣይ ዱማ ጋላቴቴቲ? ናጋራንቾቲካ ጉዬ ዛራና ኣሲ ቤዒዲ ታልዖሶና።»
LUK 6:35 «ሺን ሂንቴ ሞርኬታ ሲቂቴ፤ ኤንታው ሎዖባ ኦꬂቴ። ጉዬ ኤካናው ቆፖና ታልዒቴ። ሄሳን ሂንቴ ኤካና ዎይቶይ ጊታ ጊዳና። ሂንቴ ኡባፌ ቦላ ፆሳ ናይታ ጊዳና። ኢ ባና ጋላቶናይሳታሲኔ ኢታታስ ኬሃ።
LUK 6:36 ሂንቴ ኣዋይ ኬሃ ጊዶይሳዳ ሂንቴካ ኬሃ ጊዲቴ።
LUK 6:37 «ኣሳ ቦላ ፒርዶፊቴ፤ ሂንቴ ቦላ ፒርዴቴና። ሂንቴ ቦሬቶና ሜላ ኦናካ ቦሮፒቴ። ኣቶ ጊቴ፤ ፆሳይ ሂንቴው ኣቶ ጋና።
LUK 6:38 ኢሚቴ፤ ሂንቴው ኢሜታና። ሂንቴ ማኪዳባን ሂንቴው ዛሪ ማኬታና፥ ኡባራካ ሎዖ ማኪያባን ባቂዲ፥ ሱዲ ኩንꬂዲ፥ ላሌታና ጋካናው ሂንቴው ማኬቲ ኢሜታና» ያጊስ።
LUK 6:39 ቃሲካ ዬሱሲ ያጊዲ ኤንታው ሌሚሶ ኦዲስ፤ «ቆቄይ ቆቄ ካሌꬃናው ዳንዳዒ? ካሌꬂኮ ናምዓይካ ዎሊ ኤኪዲ ኣፎን ዉሎኮናዬ?
LUK 6:40 ታማሬይ ኣስታማሬፔ ኣꬌና። ሺን ሎይꬂ ታማሪዳ ኡራይ ባ ኣስታማሪያꬆ ሃኔስ።
LUK 6:41 «ኔ ኢሻ ኣይፊያን ዴዒያ ቡሪያ ኣይስ ቤዓይ? ኔ ኣይፊያን ዴዒያ ቱሲ ዳኔይሳ ኣይስ ቤዒኪ?
LUK 6:42 ኔ ኣይፊያን ዴዒያ ቱሲ ዳኔይሳ ቤዖና ኔ ኢሻኮ፥ ‹ታ ኢሻው ኔ ኣይፊያን ዴዒያ ቡሪያ ኬሶ› ጋናው ዋና ዳንዳዓይ? ኔኖ ጩቡዋው፥ ኮይሮታዳ ኔ ኣይፊያን ዴዒያ ቱሲ ዳኔይሳ ኬሳ። ሄሳፌ ጉዬ፥ ኔ ኢሻ ኣይፊያን ዴዒያ ቡሪያ ኬሳናው ጌሻዳ ፄላና።
LUK 6:43 «ሎዖ ሚꬂ ኢታ ኣይፌ ኣይፌና፤ ሄሳዳካ ኢታ ሚꬂ ሎዖ ኣይፌ ኣይፌና።
LUK 6:44 ኣይፌ ኣይፊያ ሚꬂ ኡባይ ባ ኣይፊያን ኤሬቴስ። ኣጉንꬃፌ ባላሴ ሚꬃ ኣይፌይ ማፄቴና ቃሲ ላዴፔ ዎይኔ ኣይፌይ ማፄቴና።
LUK 6:45 ሎዖ ኣሲ ባ ዎዛናን ኩሚዳ ሎዖባፔ ሎዖባ ኬሴስ። ኢታ ኣሲ ባ ዎዛናን ኩሚዳ ኢታባፔ ኢታባ ኬሴስ። ኣሲ ባ ዎዛናን ኩሚዲ ፓላሂዳባፔ ባ ዶናን ሃሳዬስ።
LUK 6:46 «ታ ጌይሳ ኦꬄኬታ፥ ሺን ያቲን ኣይስ ታና፥ ‹ጎዳው፥ ጎዳው፥ ጌቲ?›
LUK 6:47 ታኮ ዬይኔ ታ ቃላ ሲዒዲ ፖሊያ ኡባይ ኦና ዳኒያኮ ታ ሂንቴና ቤሳና።
LUK 6:48 ኢ ኬꬄ ኬፃናው ዚቂ ኦꬂ፥ ኦላ ቦኪዲ፥ ጋርሳን ዴዒያ ዛላ ቦላ ኬꬃ ኤሲዳ ጪንጫ ኡራ ዳኔስ። ዲዖይ ዲዒዲ ሄ ኬꬃ ሱጊስ፥ ሺን ሚንꬂዲ ኬፂዳ ጊሾ ቃፃናው ዳንዳዒቤና።
LUK 6:49 ሺን ታ ቃላ ሲዒዲ ኦꬆናይ ባ ኬꬃ ሻፌ ቢታ ቦላ ኬፂዳ ኡራ ዳኔስ። ዲዖይ ዲዒዲ ሄ ኬꬃ ሱጊዳ ዎዴ ኤሌሲዲ ኩንዲስ። ሄ ኬꬃይ ዎልቃማ ኩንዴꬂ ኩንዲስ» ያጊስ።
LUK 7:1 ዬሱሲ ሄሳ ኡባ ኣሳ ሲንꬃን ታማርሲዲ ኦንጊዳፔ ጉዬ፥ ቂፊርናሆሜ ካታማ ቢስ።
LUK 7:2 ሄ ቤሳን ኢሲ ማቶ ሃላቃይ ዴዔስ። ኢ ዳሮ ዶሲያ ኣይሌይ ሃርጌቲዲ ሃይቆስ ጋኪስ።
LUK 7:3 ኢ ዬሱሳባ ሲዒዳ ዎዴ ባ ኣይሊያ ፓꬃና ሜላ ኢያ ዎሶ ጊዲ ኢሲ ኢሲ ኣይሁዴ ጪማታ ዬሱሳኮ ኪቲስ።
LUK 7:4 ኪቴቲዳይሳቲ፥ ዬሱሳኮ ቢዲ፥ «ኔ ኢያው ሃይሳ ኦꬃናው ቤሴስ።
LUK 7:5 ኣይስ ጊኮ፥ ሃ ኡራይ ኑ ኣሳ ዶሴስ፥ ኣይሁዴ ዎሳ ኬꬃካ ኬፂስ» ጊዲ ሚንꬂ ዎሲዶሶና
LUK 7:6 ዬሱሲካ ኤንታራ ቢስ። ማቶ ሃላቃ ሶኮ ማቲያ ዎዴ ባ ላጌታ ኢያኮ ኪቲዲ፥ «ጎዳው፥ ታ ካራፔ ጋርሳን ኔ ጌላናው ታ ቤሶና ጊሾ ዳቡሮፓ።
LUK 7:7 ታካ ታና ኔ ሲንꬄ ሺቃናው ቤሲያ ኣሲ ጋዳ ቆፒኬ። ሺን ኔ ኢሲ ቃላ ኦዳ፤ ታ ኣይሌይ ፓፃና።
LUK 7:8 ታው ታፔ ቦላራ ሃላቃይ ዴዔስ፥ ታፔ ጋርሳን ታ ኪቲያ ዎታዳሬቲ ዴዖሶና። ኢሱዋ፥ ‹ባ› ጊኮ ቤስ፥ ሃንኩዋ፥ ‹ሃያ› ጊኮ ዬስ። ታ ኣይሊያኮ፥ ‹ሃኖ ኦꬃ› ጊኮ ኦꬄስ» ያጊስ።
LUK 7:9 ዬሱሲ ሄሳ ሲዒዳ ዎዴ ማላሌቲስ። ጉዬ ሲሚዲ ባራ ያ ኣሳኮ፥ «ታኒ ሂንቴው ቱማ ኦዳይስ፤ ሃሪ ኣቶሺን ኢስራዔሌንካ ሃይሳ ሜላ ጊታ ኣማኖ ዴማቢኬ» ያጊስ።
LUK 7:10 ኪቴቲዳይሳቲ ሶ ሲሚያ ዎዴ ኣይሌይ ፓፂን ዴሚዶሶና።
LUK 7:11 ጉꬃ ዎዴፔ ጉዬ ዬሱሲ ናይኔ ካታማ ቢስ። ኢያ ታማሬታራኔ ሃራ ዳሮ ኣሳቲ ኢያራ ቢዶሶና።
LUK 7:12 ኢ ካታማ ጌላና ሃኒያ ዎዴ ኣሃ ቶኪዳ ዳሮ ኣሳቲ ካታማፔ ኬዮሶና። ሃይቂዳ ናዓይ ባ ኣዬስ ኢሱዋ፥ ኢያካ ኣምዖ ጊዳዳ ዳዓዉሱ። ካታማ ኣሳፔ ዳሮቲ ኢራ ዴዖሶና።
LUK 7:13 ጎዳይ ኢዮ ቤዒዳ ዎዴ ቃꬌቲዲ፥ «ዬኮፋ» ያጊስ።
LUK 7:14 ሺቂዲ ሃላ ቦቺን ቶኪዳ ኣሳቲ ኤቂዶሶና። ዬሱሲ፥ «ላ፥ ያላጋው ዴንዳ» ያጊስ።
LUK 7:15 ሃይቂዳይሲ ዴንዲ ኡቲዲ ኦዳ ኦይኪስ። ዬሱሲ ናዓ ኤኪዲ ኣዬስ ኢሚስ።
LUK 7:16 ኣሳ ኡባይ ያሼቲዲ፥ «ጊታ ናቤይ ኑ ጊዶን ዴንዲስ፤ ፆሳይ ባ ኣሳ ቤዒስ» ያጊዲ ፆሳ ጋላቲዶሶና።
LUK 7:17 ኢያ ሱንꬃይ ዪሁዳኒኔ ሄ ሄራን ዴዒያ ቢታ ኡባን ሲዔቲስ።
LUK 7:18 ፃማቂያ ዮሃኒሳ ታማሬቲ ሄሳ ኡባ ዮሃኒሳስ ኦዲዶሶና። ኢ ኤንታ ጊዶፌ ናምዓታ ፄጊዲ፥
LUK 7:19 «ያና ጌቴቲዳይ ኔኔዬ? ዎይኮ ሃራ ናጊኖ?» ያጊዲ ኦይቺቴ ጊዲ ጎዳኮ ኪቲስ።
LUK 7:20 ኣሳቲ ዬሱሳኮ ቢዲ፥ ፃማቂያ ዮሃኒሲ፥ «ያና ጌቴቲዳይ ኔኔዬ? ዎይኮ ሃራ ናጊኖ?» ጊቴ ጊዲ ኑና ኔኮ ኪቲስ ያጊዶሶና።
LUK 7:21 ሄ ሳቴንካ ዬሱሲ ዳሮ ኣሳ ሃርጊያፌ ፓꬂስ። ቱና ኣያናታ ኬሲስ፥ ቆቂዳ ኣይፊያካ ፄሊሲስ።
LUK 7:22 ዮሃኒሳ ማታፔ ኪቴቲዲ ዪዳይሳታኮ፥ «ቢዲ ሂንቴ ቤዒዳይሳኔ ሲዒዳይሳ ዮሃኒሳስ ኦዲቴ። ኣይፌ ቆቄቲ ፄሎሶና፥ ጉንዳቲ ቢርሼቲዲ ሃሙቶሶና፥ ባሮ ሃርጋንቾቲ ጌዮሶና፥ ቱሌቲ ሲዖሶና፥ ሃይቂዳይሳቲ ሃይቆፔ ዴንዶሶና፥ ማንቆታስ ዎንጌላይ ሳባኬቴስ።
LUK 7:23 ታናን ꬉቤቶና ኦኒካ ኣንጄቲዳይሳ።»
LUK 7:24 ዮሃኒሲ ኪቲዳይሳቲ ቢዳፔ ጉዬ ዬሱሲ ኣሳስ ዮሃኒሳባ ያጊዲ ኦዲስ፡ «ሂንቴ ኣይ ቤዓናው ባዞ ቢታ ኬዪዴቲ? ጫርኮይ ቃꬂያ ማታ ቤዓናሴዬ?
LUK 7:25 ያቲን፥ ኣይ ቤዓናው ኬዪዴቲ? ኮይሴ ማዖ ማዒዳ ኣሳ ቤዓናሴዬ? ኮይሴ ማዖ ማዒዳይሳቲኔ ሳዒ ኢንጄቲዳ ኣሳይ ካዎ ኬꬃን ዴዖሶና።
LUK 7:26 ያቲን፥ ኣይ ቤዓናው ኬዪዴቲ? ናቢያ ቤዓናሴዬ? ኤ፥ ታ ያጋይስ፡ ሂንቴ ቤዓናው ኬዪዳይ ናቤፔ ኣꬌይሳ።
LUK 7:27 ‹ኔ ኦጊያ ኔ ሲንꬃን ጊጊሲያ ታ ኪታንቹዋ ኔፔ ሲንꬄ ታ ኪታና› ጌቴቲዲ ፃፌቲዳይ ኢያሳ።
LUK 7:28 ታ ሂንቴው ኦዳይስ፤ ማጫሳፔ ዬሌቲዳይሳታ ጊዶፌ ዮሃኒሳፔ ኣꬌይ ባዋ። ፆሳ ካዎቴꬃን ኡባፌ ጉፄይሲ፥ ኢ ኡባፌ ጊታ ጊዳና» ያጊስ።
LUK 7:29 ሃሪ ኣቶሺን፥ ዬሱሳ ቃላ ሲዒዳ ቃራፃ ቃንፂሴይሳቲ ኡባይ ዮሃኒሳ ኩሼን ፃማቄቲዲ ፆሳይ ፂሎ ጊዴይሳ ቆንጪሲዶሶና።
LUK 7:30 ሺን ፋሪሳዌቲኔ ሂጌ ኣስታማሬቲ ዮሃኒሳ ኩሼን ፃማቄቶና ኢፂዲ ፆሳ ዞሪያ ሌቂሲዶሶና።
LUK 7:31 ዬሱሲ ካሊዲ ሃይሳዳ ያጊስ፡ «ሂዛ፥ ሃ ዎዲያ ዬሌቴꬃ ኣይቢራ ዳኒሶ? ኤንቲካ ኦና ዳኖና?
LUK 7:32 ጊያ ጊዶን ኡቲዲ ዎሊ ፄጊዲ፥ ‹ኑ ሂንቴው ሱሱልዔ ፑኒን፥ ሂንቴ ዬፄኬታ። ኑ ሳቢዲ ዜሌሊን፥ ሂንቴ ዬኬኬታ› ያጊያ ናይታ ዳኖሶና።
LUK 7:33 ፃማቂያ ዮሃኒሲ ሞናኔ ኡዮና ዪን፥ ‹ኢታ ኣያናራ ዴዔስ ጊዴታ።›
LUK 7:34 ኣሳ ናዓይ ሚሼኔ ኡዪሼ ዪን፥ ‹ያራምባኔ ኡሻንቾ፥ ቃራፃ ቃንፂሴይሳታኔ ናጋራንቾታ ዳቦ› ጊዴታ።
LUK 7:35 ሂዛ፥ ጪንጫቴꬃ ቱማቴꬃይ ኢያ ናይታ ኡባ ማታን ኤሬቲስ» ያጊስ።
LUK 7:36 ኢሲ ፋሪሳዌይ ዬሱሳ ካꬂ ሙዛናው ባ ሶ ፄጊስ። ኢ ፋሪሳዊያ ሶ ቢዲ ጋይታ ቦላ ኡቲስ።
LUK 7:37 ሄ ካታማን ኢሲ ናጋራንቾ ማጫሲ ዴዒያራ ዬሱሲ ፋሪሳዊያ ሶን ጊቢራ ቦላ ዴዔይሳ ሲዒዳ ዎዴ ዳሮ ኣልዖ ጲልቃፄ ሺቶ ኤካዳ ያሱ።
LUK 7:38 ዬሱሳስ ጉዬ ባጋራ፥ ኢያ ቶሁዋ ማታን ኤቃዳ ዬካሼ ኢያ ቶሁዋ ባ ኣፉꬃራ ላኬꬃውሱ። ባ ቢናናራ ኢያ ቶሁዋ ቁቻሼኔ ዬራሼ ሺቶ ቲያሱ።
LUK 7:39 ጊቢራ ጊጊሲዳ ፋሪሳዌይ ሄሳ ቤዒዳ ዎዴ ባ ዎዛናን፥ «ሃይሲ ናቤ ጊዲያኮ ሃ ማጫሲያ ኢያ ቦቺያራ ኦኔኮ ቃሲ ኢያ ናጋራንቾ ጊዴይሳካ ኢ ኤራናሺን» ያጊስ።
LUK 7:40 ዬሱሲ፥ «ሲሞና፥ ታ ኔው ኦዲያባይ ዴዔስ» ያጊስ። ኢ፥ «ኣስታማሪያው፥ ታው ኦዳ» ያጊስ።
LUK 7:41 ዬሱሲ ኢያኮ፥ «ናምዑ ኣሳቲ ኢሲ ኡራፔ ሚሼ ታልዒዶሶና። ኢሶይ ኢቻሹ ፄቱ ቢራ ሃንኮይ ቃሲ ኢሻታሙ ቢራ ታልዒዶሶና።
LUK 7:42 ናምዓይካ ታልዒያ ጪጋናው ፆኔቲን፥ ናምዓታስካ ታልዒያ ማሪስ። ሂዛ፥ ሃ ናምዓታፔ ሄ ኡራ ዳሮ ዶሳናይ ኔው ኣዉሳ ዳኒ» ያጊስ።
LUK 7:43 ሲሞኒ፥ «ዳሮ ኣጮይ ማሬቲዳ ኡራይ ዳሮ ዶሳና ዳኔስ» ያጊስ። ዬሱሲ፥ «ኔ ቱማ ፒርዳዳሳ» ያጊስ።
LUK 7:44 ሄሳፌ ጉዬ፥ ዬሱሲ ማጫሴኮ ሲሚ ፄሊዲ፥ ሲሞናኮ፥ «ሃኖ ማጫሲው ቤዓይ? ታኒ ኔ ሶ ጌሊን ሃሪ ኣቲን ኔ ታው ቶሆ ሃꬄ ኢማባካ፥ ሺን ኢያ ታ ቶሁዋ ባ ኣፉꬃን ላኮꬃዳ ባ ቢናናን ቁቻሱ።
LUK 7:45 ኔኒ ታና ዬራ ኤካባካ፥ ሺን ኢያ ታ ኔ ሶ ጌሎዴፔ ዶማዳ ታ ቶሁዋ ዬሮ ኣጋቡኩ።
LUK 7:46 ኔኒ ታ ሁዒያን ዛይቴ ቲያባካ፥ ሺን ኢያ ታ ቶሁዋ ሺቶ ቲያዉሱ።
LUK 7:47 ኢያ ታና ዳሮ ዶሲዳ ጊሾ ኢ ዳሮ ናጋራይ ኣቶ ጌቴቲስ። ኢያ ጉꬃ ናጋራይ ኣቶ ጌቴቲዳይ ጉꬃራ ዶሴስ።»
LUK 7:48 ዬሱሲ ማጫሴኮ፥ «ኔ ናጋራይ ኣቶ ጌቴቲስ» ያጊስ።
LUK 7:49 ኢያራ ኢሲፌ ጋይታን ኡቲዲ ሚያ ኢማꬃቲ፥ «ናጋራ ኣቶ ያጌይ፥ ኢ ሃይሲ ኦኔ?» ያጊዲ ባንታ ዎዛናን ቆፒዶሶና።
LUK 7:50 ዬሱሲ ማጫሴኮ፥ «ኔ ኣማኖይ ኔና ኣሺስ፤ ሳሮ ባ» ያጊስ።
LUK 8:1 ሄሳፌ ጉዬ፥ ዬሱሲ ፆሳ ካዎቴꬃ ዎንጌላ ሳባኪሼ ካታማራኔ ጉታራ ኣꬊስ። ሄ ዎዴ ታማኔ ናምዑ ሃዋሬቲ ኢያራ ዴዖሶና።
LUK 8:2 ቃሲ ቱና ኣያናፔኔ ዱማ ዱማ ሃርጊያፌ ፓፂዳ ኢሲ ኢሲ ማጫሳቲ ኢያራ ዴዖሶና። ኤንቲካ፥ ላፑን ቱና ኣያናቲ ኬዪዳ ማግዴላ ማይራሞ፥
LUK 8:3 ሄሮዲሳ ሹማ ኩዛ ማቺው ዮሃና፥ ሶሲናራኔ ቃሲ ሃራ ዳሮቲ ኤንታና ሚሼን ማዴይሳቲ ዴዖሶና።
LUK 8:4 ዳሮ ኣሳይ ዱማ ዱማ ካታማፔ ኢያኮ ሺቂን ሌሚሶን ኤንታው ኦዲስ።
LUK 8:5 «ኢሲ ጎሻንቾይ ዜሬꬂ ዜራናው ኬዪስ። ኢ ዜሪሺን ኢሲ ኢሲ ዜሬꬃይ ኦጌ ጋፃን ዎꬊዲ ዬꬌቲስ፥ ሳሎ ካፎቲ ማፂዶሶና።
LUK 8:6 ሃራቲ ሻሎይ ጋርሳን ዴዒያ ቢታ ቦላ ዎꬊዶሶና። ቡሮ ዶሊዳ ሜላ ቢታን ላሆይ ባይና ጊሾ ሚጪዶሶና።
LUK 8:7 ሃራ ዜሬꬃይ ቃሲ ኣጉንꬃ ጊዶን ዎꬊስ። ኣጉንꬃራ ዎላ ዲጪዳ ጊሾ ኣጉንꬃይ ጩሊዲ ቤሳን ኣሺስ።
LUK 8:8 ሃራቲ ሎዖ ቢታ ቦላ ዎꬊዶሶና። ዶሊዳ ዎዴ ፄቱ ኩሼ ኣይፊዶሶና።» ሄሳ ኦዲ ኦንጊዲ፥ ባ ቃላ ꬎቁ ኦꬂዲ፥ «ሲዒያ ሃይꬂ ዴዒያ ኡባይ ሲዖ» ያጊስ።
LUK 8:9 ኢያ ታማሬቲ፥ «ሃ ሌሚሱዋ ቢርሼꬃይ ኣይቤ?» ያጊዲ ኦይቺዶሶና
LUK 8:10 ኢ፥ «ፆሳ ካዎቴꬃ ፁራ ኤራና ሜላ ሂንቴው ኢሜቲስ። ሺን ሃራቲ ቤዒሼ ዴሞና ሜላ፥ ሲዒሼ ኣኬኮና ሜላ ሌሚሶን ኦዳይስ።
LUK 8:11 «ሂዛ፥ ሃ ሌሚሱዋ ቢርሼꬃይ ሃይሳ፡ ዜሬꬂ ያጌቲዳይ ፆሳ ቃላ።
LUK 8:12 ኦጌ ጋፃን ዎꬊዳ ዜሬꬃይ ቃላ ሲዔይሳታ። ጊዶሺን፥ ኤንቲ ኣማኒዲ ኣቶና ሜላ ፃላሄይ ቃላ ኤንታ ዎዛናፔ ማፂ ዲጌስ።
LUK 8:13 ሻሎይ ጋርሳን ዴዒያ ቢታ ቦላ ዎꬊዳ ዜሬꬃይ ቃላ ሲዒዲ ኡፋይሳን ኤኬይሳታ። ኤንቲ ሃዒስ ኣማኖሶናፔ ኣቲን ፃጶይ ባይና ጊሾ ፓጬይ ጋኪያ ዎዴ ኤሌሲዲ ካዶሶና።
LUK 8:14 ኣጉንꬃ ጊዶን ዜሬቲዳይሳቲ ቃላ ሲዔይሳታ። ኤንቲካ ኣላሚያ ቆፋን፥ ዱሬቴꬃኒኔ ሳዓ ዱሳ ሚኮቴꬃን ጩሌቲዲ ቤሴይሳዳ ኣይፊቦኮና።
LUK 8:15 ሎዖ ቢታን ዎꬊዳ ዜሬꬃይ ሎዖ ዎዛናን ቃላ ሲዒዲ ናጌይሳታኔ ዳንዳዓን ሚኒዲ ኣይፌ ኣይፌይሳታ።
LUK 8:16 «ፆምፔ ፆምፒዲ፥ ዳቾ ካሜይ ዎይኮ ኣርሳፌ ጋርሳን ዎꬄይ ዴና። ጌሊያ ኣሲ ቤዓና ሜላ ꬎቃ ቤሳን ዎꬄስ።
LUK 8:17 «ሄሳ ጊሾ፥ ቆንጬ ኬዮና ቆሴቲዲ ኣቲያባይ፥ ኤሬቶና ጌሚዲ ኣቲያባይ ዴና።
LUK 8:18 «ሂዛ፥ ሂንቴ ቃላ ዋቲ ሲዒያኮ ኣኬኪቴ። ዴዒያ ኡባስ ጉዤቲዲ ኢሜታና፥ ባይናይሳስ ሃሪ ኣቶሺን ኢያው ዴዒያ ጉꬂያካ ኢያፔ ኤኬታና» ያጊስ።
LUK 8:19 ዬሱሳ ኣዬራኔ ኢሻታራ ኢያኮ ዪዶሶና። ሺን ኣሳ ዳሮቴꬃፌ ዴንዶይሳን ኢያ ዴማናው ዳንዳዒቦኮና።
LUK 8:20 ኢሲ ኣሲ ዬሱሳኮ፥ «ኔ ኣዬራኔ ኔ ኢሻታራ ኔና ኮዪዲ ካሬን ናጎሶና» ያጊስ።
LUK 8:21 ዬሱሲ ዛሪዲ፥ «ፆሳ ቃላ ሲዒዲ ኦሶን ፔሼይሳቲ ኡባይ ታው ኣዮኔ ታው ኢሻ» ያጊስ።
LUK 8:22 ኢሲ ጋላስ ዬሱሳራኔ ኢያ ታማሬታራ ኢሲፌ ዎጎሎን ጌሊዲ፥ «ኣባ ፒኖስ» ያጊስ። ኤንቲካ ባናው ዴንዲዶሶና።
LUK 8:23 ኣባ ቦላራ ኤንቲ ፒናናው ቢሺን ዬሱሲ ꬊስኪስ። ቆፖና ሚኖ ጫርኮይ ኣባ ቦላ ዴንዲስ። ሃꬃይ ዎጎሉዋን ጌሊን ዎጎሎይ ሚቴቴꬂ ኦይኪያ ዎዴ ኡባይ ባቢዶሶና።
LUK 8:24 ኢያ ታማሬቲ ኢያኮ ሺቂዲ፥ «ኑ ጎዳው፥ ኑ ጎዳው፥ ኑ ꬋዮስ ያጊዲ» ዬሱሳ ዴንꬂዶሶና። ዬሱሲ ዴንዲዲ ጫርኩዋኔ ጎቲያ ሴሪስ። ኤሌሲዲ ጫርኮይኔ ጎቴይ ዎፑ ጊስ። ሳሮቴꬃይካ ሲሚስ።
LUK 8:25 ዬሱሲ ባ ታማሬታኮ፥ «ሂንቴ ኣማኖይ ኣዉኔ» ያጊስ። ኤንቲካ፥ ያዪሼኔ ማላሌቲሼ ኢሶይ ኢሱዋኮ፥ «ጫርኮይኔ ሃꬃይ ኪቴቴይሲ፥ ኢ ሃይሲ ኦኔ» ያጊዶሶና።
LUK 8:26 ኣባ ፒኒዲ ጋሊላ ባጋራ ዴዒያ ጌርጌሶኔ ቢታ ጋኪዶሶና።
LUK 8:27 ዬሱሲ ዎጎሉዋፔ ኬዪዲ ሳዓን ዎꬊሺን ቱና ኣያናን ኦይኬቲዳ ኡራይ ካታማፔ ኬዪዲ ኢያራ ጋሄቲስ። ዳሮ ላይꬂ ኣፊሊ ማዖና ካሎ ዱፎን ዴዔሲፔ ኣቲን ሶ ጌሌና።
LUK 8:28 ዬሱሳ ቤዒዳ ዎዴ ኢያ ሲንꬃን ጉፋኒዲ፥ ባ ቃላ ꬎቁ ኦꬂዲ፥ «ኡባፌ ቦላ ፆሳ ናዓው ዬሱሳ ኔራ ታው ኣይቢ ኢሲፌቴꬂ ዴዒ? ሃያና ታና ሃዒ ኡንዔꬆፋርኪ» ያጊስ።
LUK 8:29 ሄሳ ኢ ጊዳይ፥ ቱና ኣያናይ ኡራፔ ኬያና ሜላ ዬሱሲ ሃንቄቲዳ ጊሾሳ። ዳሮ ዎዴ ቱና ኣያናይ ኢያ ሃሪዳ ጊሾ ሳንꬃላታኒኔ ቶሆ ቃቺያ ቢራታን ቃሼቲዲ ናጌቴስ። ሺን ቃሹዋ ዱꬂዲ ቱና ኣያናን ላጌቲዲ ባዞ ጌሊስ።
LUK 8:30 ዬሱሲ፥ «ኔ ሱንꬃይ ኦኔ» ያጊዲ ኦይቺስ። ኢ፥ ዳሮ ቱና ኣያናቲ ኢያ ኦይኪዲ ጊሾ ባና፥ «ሌጊዮና» ጊስ።
LUK 8:31 ቱና ኣያናቲ ባንታና ሲዖሌ ኪቶና ሜላ ዎሲዶሶና።
LUK 8:32 ሄ ቤሳን ዞዜ ቦላ ሚያ ጉዱንꬆ ዉዴይ ሃሙቴስ። ሂኒ ጉዱንꬆታን ጌሊኖ ጊዲ ዎሲዶሶና፥ ኢካ «ጌሊቴ» ጊስ።
LUK 8:33 ቱና ኣያናቲ ኡራፔ ኬዪዲ ጉዱንꬆታን ጌሊዶሶና። ዉዴይ ዴሪያፔ ዱጌ ጉርጉፂዲ ኣባን ጌሊስ።
LUK 8:34 ሄንꬃንቾቲ ሃኒዳይሳ ቤዒዳ ዎዴ ዎፂ ቢዲ፥ ካታማኒኔ ጉታ ኡባን ኦዲዶሶና።
LUK 8:35 ኣሳይ ሃኒዳባ ቤዓናው ኬዪዲ ዬሱሳኮ ዪዶሶና። ቱና ኣያናይ ኬዪዳ ኡራይ ማዖ ማዒዲ፥ ኢያ ዎዛናይ ሲሚን፥ ዬሱሳ ቶሆ ማታን ኡቲዳይሳ ዴሚዲ ያዪዶሶና።
LUK 8:36 ኢያ ቤዒዳ ኣሳይ ቱና ኣያናን ኦይኬቲዳ ኡራይ ዋኒዲ ፓፂዳኮ ኦዲዶሶና።
LUK 8:37 ጌርጌሶኔ ዩሹዋን ዴዒያ ኣሳይ ጊታ ያሺ ያሼቲዲ ዬሱሲ ባንታ ማታፔ ባና ሜላ ዎሲዶሶና። ኢ ዎጎሉዋን ጌሊዲ ጉዬ ሲሚስ።
LUK 8:38 ቱና ኣያናይ ኬዪዳ ኡራይ ዬሱሳራ ዳናው ዎሲስ።
LUK 8:39 ሺን ዬሱሲ ኢያኮ፥ «ኔ ሶ ሲማ፥ ፆሳይ ኣይ ሜላ ጊታባ ኔው ኦꬂዳኮ ኦዳ» ያጊዲ ሞይዚስ። ኡራይካ ዬሱሲ ኣይ ሜላ ጊታባ ኢያው ኦꬂዳኮ ካታማ ኡባን ማርካቲሼ ቢስ።
LUK 8:40 ኣሳይ ናጊዲ ጋምዒዳ ጊሾ ዬሱሲ ሲሚያ ዎዴ ሞኪ ኤኪዶሶና።
LUK 8:41 ኣይሁዴ ዎሳ ኬꬃ ሃላቃ ጊዲዳ ኢያሮሳ ጊያ ኡራይ ባ ሶ ያና ሜላ ዬሱሳ ቶሁዋ ቦላ ዎꬊዲ ዎሲስ።
LUK 8:42 ኢያው ታማኔ ናምዑ ላይꬂ ጊዲዳ ማጫ ናዓ ዴዒያራ ሳኬታዳ ሃይቆስ ጋካዳ ዴዓዉሱ። ዬሱሲ ቢያ ዎዴ ኣሳይ ኢያ ኡንዔꬄስ።
LUK 8:43 ታማኔ ናምዑ ላይꬂ ሱꬂ ጎጊሼ ጋምዒዳ ማጫሲ ዴዒያራ ዴዓዉሱ። ኢያ ባው ዴዒያ ሚሺያ ኣኪሜታስ ኢማዳ ኦንጋሱ። ሺን ፓፃናው ዳንዳዓቡኩ።
LUK 8:44 ኢያ ዬሱሳስ ጉዬ ባጋራ ሺቃዳ፥ ኢያ ኣፊላ ማጫራ ቦቻሱ፥ ሶሁዋራ ጎጊያ ሱꬃይ ኤቂ ኣጊስ።
LUK 8:45 ዬሱሲ፥ «ታና ቦቺዳይ ኦኔ?» ያጊስ። ኡባይ «ኑ ቦቺቦኮ» ያጊን፥ ጴፂሮሲ፥ «ኣስታማሪያው፥ ዳሮ ኣሳይ ካሊሺኒኔ ኡንዔꬂሺን ቤዓሼ ዋናዳ፥ ‹ታና ቦቺዳይ ኦኔ?› ጋይ» ያጊስ።
LUK 8:46 ሺን ዬሱሲ፥ «ኢሲ ኣሲ ታና ቦቺስ፤ ኣይስ ጊኮ፥ ዎልቂ ታፔ ኬዮይሲ ታው ኤሬቲስ» ያጊስ።
LUK 8:47 ማጫሲያ፥ ኢባይ ቆንጪዳይሳ ኤሪዳ ዎዴ ኮኮራሼ ያዳ ዬሱሳ ቶሁዋ ቦላ ኩንዳሱ። ኣይስ ቦቺዳኮኔ ዋናዳ ኤሌሳዳ ፓፂዳኮ ኣሳ ኡባ ሲንꬃን ማርካታሱ።
LUK 8:48 ኢ፥ «ታ ናቴ፥ ኔ ኣማኖይ ኔና ፓꬂስ፤ ሳሮን ባ» ያጊስ።
LUK 8:49 ዬሱሲ ኦዳ ኦንጎና ዴዒሺን፥ ኣይሁዴ ዎሳ ኬꬃ ሃላቃ፥ ኢያሮሳ ሶፔ ኢሲ ኣሲ ዪዲ፥ «ኢያሮሳ፥ ኔ ናዒያ ሃይቃሱ፤ ኣስታማሪያ ሜላ ዳቡሪሶፋ» ያጊስ።
LUK 8:50 ሺን ዬሱሲ ሄሳ ሲዒዲ ኢያሮሳኮ፥ «ባቦፋ! ኣማና፥ ኔ ናዒያ ፓፃና» ያጊስ።
LUK 8:51 ዬሱሲ ኢያሮሳ ሶ ጋኪዳ ዎዴ ጴፂሮሳፔ፥ ዮሃኒሳፔ፥ ያይቆባፔ፥ ናዔ ኣዋፔኔ ኣዬፔ ኣቲን ሃሪ ጌላና ሜላ ኮዪቤና።
LUK 8:52 ሄ ቤሳን ዴዒያ ኣሳ ኡባይ ናዔስ ሚሼቲዲ ዬኪሺን፥ ዬሱሲ፥ «ዬኮፊቴ! ናዒያ ꬊስካሱፔ ኣቲን ሃይቃቡኩ» ያጊስ።
LUK 8:53 ኣሳይ ናዒያ ሃይቂዳይሳ ኤሪያ ጊሾ ኢያ ኦዳ ሌቂዲ ሚጪዶሶና።
LUK 8:54 ሺን ዬሱሲ ናዔ ኩሺያ ኦይኪዲ፥ «ናቴ ዴንዳ» ያጊስ።
LUK 8:55 ናዔስ ሼምፖይ ሲሚን ዴንዳ ኤቃሱ። ዬሱሲ ኤንታኮ፥ «ኢዉ ሚያባ ኢሚቴ» ያጊስ።
LUK 8:56 ናዔ ኣዋራኔ ኣዬራ ማላሌቲዶሶና። ሺን ዬሱሲ ሃይሳ፥ «ኦዴስካ ኦዶፒቴ» ያጊስ።
LUK 9:1 ዬሱሲ ታማኔ ናምዑ ሃዋሬታ ባኮ ፄጊዲ፥ ቱና ኣያናታ ኬሳና ሜላኔ ሃርጌ ኡባ ፓꬃና ሜላ ዎልቃኔ ማታ ኢሚስ።
LUK 9:2 ፆሳ ካዎቴꬃባ ማርካታናዳኔ ሃርጋንቾታ ፓꬃናዳ ኪቲስ።
LUK 9:3 ኢ ኤንታኮ፥ «ፃምዓ ጊዲን ኦጎሮ ጊዲን ካꬂ ጊዲን ሚሼ ጊዲን ላሚ ማዒያ ኣፊላ ጊዲን ኦጌስ ጊዲ ኣይኮካ ኦይኮፊቴ።
LUK 9:4 ሄ ካታማፔ ሂንቴ ኬያና ጋካናው ኢማꬃቴꬃን ሂንቴ ጌሊዳሱዋን ጋምዒቴ።
LUK 9:5 ኦኒካ ሂንቴና ሞኮና ኢፂኮ ሄ ካታማፔ ኬዪሼ ኤንታው ማርካ ጊዳና ሜላ ሂንቴ ቶሁዋን ዴዒያ ባና ፒቲዲ ኬዪቴ።»
LUK 9:6 ኤንቲካ ኪቴቲዳይሳዳ ኬዪዲ ዎንጌላ ኦዲሼኔ ዱማ ዱማ ጉታታን ሃርጋንቾታ ፓꬂሼ ኣꬊዶሶና።
LUK 9:7 ጋሊላ ቢታ ሃሪያ ሄሮዲሲ ዬሱሲ ኦꬂዳባ ኡባ ሲዒዳ ዎዴ ዳጋሚስ። ኣይስ ጊኮ፥ ኢሲ ኢሲ ኣሳቲ ዮሃኒሲ ሃይቆፔ ዴንዶና ኣጌና ያጎሶና።
LUK 9:8 ባጋቲ፥ «ኤሊያሲ ቆንጪስ» ጎሶና፤ ሃራቲ ቃሲ፥ «ቤኒ ናቤታፔ ኢሶይ ሃይቆፔ ዴንዲስ» ያጊዲ ኦዴቶሶና።
LUK 9:9 ሺን ሄሮዲሲ፥ «ዮሃኒሳ ቆꬊያ ታ ቃንፂሳዳ ዎꬋስ። ያቲን፥ ሃይሳꬆ ያጌቲዲ ኢያባ ኦዴቴይ፥ ኢ ኦኔ?» ያጊዲ ባ ኣይፌን ቤዓናው ኮዬስ።
LUK 9:10 ታማኔ ናምዑ ሃዋሬቲ ጉዬ ሲሚ ዪዲ፥ ኤንቲ ኦꬂዳባ ኡባ ዬሱሳስ ኦዲዶሶና። ኢ ኤንታና ኤኪዲ ቤቴሳይዳ ካታማፔ ጋፃ ኤፊስ።
LUK 9:11 ሺን ዳሮ ኣሳይ ዬሱሳ ጊዴይሳ ኤሪዲ ኢያ ካሊዶሶና። ኢ ኤንታ ሞኪ ኤኪዲ ፆሳ ካዎቴꬃባ ታማርሲስ፤ ፓፃናው ኮዬይሳታካ ፓꬂስ።
LUK 9:12 ሳዒ ኦማርሲያ ዎዴ ታማኔ ናምዑ ሃዋሬቲ ኢያኮ ሺቂዲ፥ «ኑ ዴዔይ ባዞ ቢታ ጊዲያ ጊሾ ኣሳይ ዱማ ዱማ ጉታታኔ ካታማታ ቢዲ፥ ካꬂኔ ኣቂያሶ ኮያና ሜላ ኣሳ ሞይዛ» ያጊዶሶና።
LUK 9:13 ሺን ኢ፥ «ኤንታው ሚያባ ሂንቴ ኢሚቴ» ያጊስ። ኤንቲ፥ «ኑስ ዴዔይ ኢቻሹ ኡይꬂኔ ናምዑ ሞሎ ጊዲያ ጊሾ ሃ ኣሳስ ጊዲያ ካꬂ ኑኒ ቢዲ ሻሞና ኢፂኮ ጊዴና» ያጊዶሶና።
LUK 9:14 ሄ ቤሳን ኢቻሹ ሙኩሉ ጊዲያ ኣዴቲ ዴዖሶና። ዬሱሲ ባ ታማሬታኮ፥ «ኢሻታማን ኢሻታማን ሻኪ ሻኪ ኣሳ ኡቲሲቴ» ያጊስ።
LUK 9:15 ኢያ ታማሬቲ፥ ኢ ኪቲዳይሳዳ ኣሳ ኡቲሲዶሶና።
LUK 9:16 ኢ ኢቻሹ ኡይꬃኔ ናምዑ ሞሎታ ኤኪዲ፥ ሳሎ ፄሊዲ፥ ፆሳ ጋላቲዲ፥ ሜንꬂዲ ኣሳ ኡባ ጋꬃና ሜላ ባ ታማሬታስ ኢሚስ።
LUK 9:17 ኡባይ ሚዲ ካሊዶሶና። ኤንታፌ ኣቲዳ ቲፌይ ታማኔ ናምዑ ጋይታ ኩሜꬂ ጊዲስ።
LUK 9:18 ዬሱሲ ባ ፃላላ ዎሲሺን፥ ኢያ ታማሬቲ ኢያኮ ዪዶሶና። ኢ፥ «ኣሳይ ታና ኦና ጎና?» ጊዲ ኦይቺስ።
LUK 9:19 ኤንቲ ዛሪዲ «ኢሶቲ ኢሶቲ፥ ‹ፃማቂያ ዮሃኒሳ፥ ባጋቲ ኤሊያሳ፥ ሃራቲ ቃሲ፥ ቤኒ ናቤታፔ ኢሶይ ሃይቆፔ ዴንዲስ› ያጎሶና» ያጊዶሶና።
LUK 9:20 ኢ ዛሪዲ፥ «ያቲን ሂንቴ ታና ኦና ጌቲ» ያጊስ። ጴፂሮሲ፥ «ኔኒ ፆሳፌ ኪቴቲዳ ኪሪስቶሳ» ያጊዲ ዛሪስ።
LUK 9:21 ዬሱሲ ሃይሳ ኦዴስካ ኦዶፒቴ ጊዲ ሚንꬂዲ ኦዲስ።
LUK 9:22 ቃሲካ ዬሱሲ፥ «ኣሳ ናዓይ ዳሮ ሜቱዋ ኤካና። ቢታ ጪማታን፥ ካሂኔ ሃላቃታን፥ ሂጌ ኣስታማሬታን ኣꬊ ኢሜታና። ኤንቲ ኢያ ዎꬋና፥ ሺን ኢ ሄꬓንꬆ ጋላስ ሃይቆፔ ዴንዳና» ያጊስ።
LUK 9:23 ዬሱሲ ኣሳ ኡባኮ፥ «ታና ካላናው ኮዬይ ኦኒካ ዴዒኮ ባና ካዶ፥ ባ ማስቃሊያ ጋላስ ጋላስ ቶኪዲ ታና ካሎ።
LUK 9:24 ባ ሼምፒው ኣሻናው ኮያ ኡባይ ኢዮ ꬋይሴስ፥ ባ ሼምፒው ታ ጊሾ ጊዲ ꬋይሲያ ኦኒካ ኢዮ ኣሼስ።
LUK 9:25 ኣሲ ኣላሜ ኡባ ሃሪዲ፥ ጊዶሺን ባ ሼምፒው ꬋይሲያባ ዎይኮ ቆሂያባ ጊዲኮ ኢያ ኣይ ማዲ?
LUK 9:26 ኦኒካ ታናኒኔ ታ ቃላን ዬላቲኮ ኣሳ ናዓይ ባ ቦንቹዋራ ሄሳዳካ ኣዋ ቦንቹዋራኔ ጌሻ ኪታንቾታ ቦንቹዋራ ያ ዎዴ ኢያን ዬላታና።
LUK 9:27 ታ ሂንቴው ቱማ ኦዳይስ፤ ሃይሳን ኤቂዳይሳታ ጊዶፌ ፆሳ ካዎቴꬃ ቤዖናሺን ሃይቆና ኣሳቲ ዴዖሶና» ያጊስ።
LUK 9:28 ዬሱሲ ሄ ኦዳ ኦዲን፥ ሆስፑን ጋላሳፔ ጉዬ ጴፂሮሳ፥ ያይቆባኔ ዮሃኒሳ ባራ ኤኪዲ ዎሳናው ዴሪያ ቦላ ኬዪስ።
LUK 9:29 ኢ ዎሳ ቦላ ዴዒሺን ኢያ ኣይፌ ካሬይ ላሜቲስ፤ ኣፊላይካ ኣዋ ሜላ ጶሊዲ ቦፂስ።
LUK 9:30 ናምዑ ኣሳቲ፥ ኤንቲካ ሙሴራኔ ኤሊያሳራ ቦንቾን ቆንጪዲ፥
LUK 9:31 ዬሩሳላሜን ፖሌታናው ዴዒያባ፥ ሄሲካ፥ ኢ ሃ ኣላሚያፔ ሻኬታናባ ኢያራ ኦዴቶሶና።
LUK 9:32 ጴፂሮሳኔ ኢያራ ዴዔይሳታ ꬊስኮይ ኤፊን፥ ኤንቲ ꬊስኮፌ ባርኪያ ዎዴ ኢያ ቦንቹዋኔ ኢያራ ኤቂዳ ናምዑ ኣሳታ ቤዒዶሶና።
LUK 9:33 ኣሳቲ ዬሱሳፔ ሻኬቲዲ ባና ሃኒሺን፥ ጴፂሮሲ ዬሱሳኮ፥ «ጎዳው፥ ሃይሳን ጊዴይሲ ኑስ ኣይ ሜላ ሎዖ! ኢሲኖ ኔው፥ ኢሲኖ ሙሴስ፥ ኢሲኖ ኤሊያሳስ ኦꬂዲ ሄꬑ ሻቃራ ሻቃሮስ» ያጊስ። ሺን ኢ ኣይ ጊዳኮ ኤሬና።
LUK 9:34 ኢ ያጊዲ ኦዴቲሺን ሻራይ ዪዲ ኤንታና ካሚስ። ኤንቲ ሄ ሻራ ጊዶ ጌሊሼ ባቢዶሶና።
LUK 9:35 ሻራ ጊዶፌ፥ «ታ ዶሪዳ ናዓይ ሃይሳ ኢያ ሲዒቴ» ያጊያ ቃላይ ሲዔቲስ።
LUK 9:36 ሄ ቃላይ ሲዔቲዳፔ ጉዬ ዬሱሲ ባርካ ዴዒሼ ቤንቲስ። ሄ ዎዴ ኤንቲ ቤዒዳባ ኦዴስካ ኦዶና፥ ባንታ ዎዛናን ኦይኪዲ ሲዒ ጊዶሶና።
LUK 9:37 ዎንቴꬄ ኤንቲ ዴሪያፔ ዎꬊያ ዎዴ ዳሮ ኣሳይ ዪዲ ኢያራ ጋሄቲዶሶና።
LUK 9:38 ሄ ዎዴ ኣሳ ጊዶፌ ኢሲ ኣሲ፥ «ኣስታማሪያው፥ ታ ኢሲ ናዓ ያዳ ቤዓርኪ።
LUK 9:39 ቱና ኣያናይ ቆፖና ኦይኪዲ ዋሲሴስ፤ ጎፖንቶ ዬጊሲዲ ቃኬሬꬄስ፥ ኣሳቴꬃ ቆሂዲ ኡንዔꬂዲ ዬዴስ።
LUK 9:40 ኔ ታማሬቲ ኬሳና ሜላ ዎሳስ፥ ሺን ኤንቲ ዳንዳዒቦኮና» ያጊዲ ዎሲስ።
LUK 9:41 ዬሱሲ፥ «ኣማኖይ ባይና ጌላ ዬሌቴꬃቶ፥ ኣዉዴ ጋካናው ታ ሂንቴራ ዳኔ፥ ሂንቴና ዳንዳዓኔ? ኔ ናዓ ባዳ ሃ ኤካያ» ያጊስ።
LUK 9:42 ናዓ ኤኪዲ ያ ዎዴ ቱና ኣያናይ ሳዓን ሆሊ ዬጊዲ ኮኮርሲስ። ሺን ዬሱሲ ቱና ኣያና ሃንቂዲ ናዓፔ ኬሲስ። ናዓካ ናዓ ኣዋስ ኢሚስ።
LUK 9:43 ኣሳይ ኡባይ ፆሳ ጊታ ዎልቃን ማላሌቲዶሶና። ኤንቲ ኢ ኦꬂዳባን ማላሌቲሺን፥ ዬሱሲ ባ ታማሬታኮ፥
LUK 9:44 «ሃይሳ ታ ሂንቴው ኦዴይሳ ሎይꬂ ሲዒቴ፤ ኣሳ ናዓይ ሞርኬታ ኩሼን ኣꬊ ኢሜታና» ያጊስ።
LUK 9:45 ሺን ኢ ጊዳባይ ኤንታፌ ጌሚዳ ጊሾ ኣኬኪቦኮና። ሄሳ ጊሾ፥ ዛሪዲ ኦይቻናው ባቢዶሶና።
LUK 9:46 ዬሱሳ ታማሬቲ፥ «ኑ ጊዶን ጊታ ጊዳናይ ኦኔ?» ጊዲ ፓላማ ኦይኪዶሶና።
LUK 9:47 ዬሱሲ ኤንታ ዎዛና ቆፋ ኤሪዲ ዮጋ ናዓ ባ ማታን ኤሲዲ፥
LUK 9:48 «ሃ ዮጋ ናዓ ታ ሱንꬃን ሞኪያ ኦኒካ ታና ሞኬስ፥ ታና ሞኬይ ታና ኪቲዳይሳ ሞኬስ፥ ሂንቴ ኡባፌ ጉፄይሲ፥ ኢ ጊታ ጊዳና» ያጊስ።
LUK 9:49 ዮሃኒሲ፥ «ጎዳው፥ ኢሲ ኣሲ ኔ ሱንꬃን ቱና ኣያናታ ኬሲሺን ቤዒዲ ኢ ኑራ ጊዶና ጊሾ ዲጊዳ» ያጊስ።
LUK 9:50 ዬሱሲ ዛሪዲ፥ «ሂንቴራ ኤቄቶናይሲ፥ ኢ ሂንቴ ባጋ። ሄሳ ጊሾ፥ ኢያ ዲጎፊቴ» ያጊስ።
LUK 9:51 ዬሱሲ ሳሎ ቢያ ዎዴይ ማታቲዳ ጊሾ ዬሩሳላሜ ባናው ቃንፂዲ ዴንዲስ።
LUK 9:52 ሳማሬ ቢታን ዴዒያ ኢሲ ጉታ ቢዲ፥ ኡባባ ኢያው ጊጊሳና ሜላ ኣሴ ያ ኪቲስ።
LUK 9:53 ሺን ኢ ቤይ ዬሩሳላሜ ጊዲያ ጊሾ ኤንቲ ኢያ ሞኪ ኤኪቦኮና።
LUK 9:54 ዬሱሳ ታማሬቲ ያይቆባራኔ ዮሃኒሳራ ሄሳ ቤዒዲ፥ «ጎዳው፥ ሳሎፔ ታሚ ዎꬊዲ ኤንታ ሞ ጋና ሜላ ኔ ኮያይ» ያጊዶሶና።
LUK 9:55 ሺን ዬሱሲ ጉዬ ሲሚ ኤንታ ሃንቄቲዲ፥ «ሂንቴ ጋርሳን ኣይቢ ኣያኒ ዴዒያኮ ሂንቴ ኤሬኬታ። ኣሳ ናዓይ ኣሴ ኣሻናው ዪሲፔ ኣቲን ꬋይሳናሳ ጊዴና» ያጊስ።
LUK 9:56 ያፔ ዴንዲዲ ሃራ ጉታ ቢዶሶና።
LUK 9:57 ኤንቲ ኦጊያራ ቢሺን፥ ኢሲ ኣሲ፥ «ኔ ቢያሶ ኡባ ታ ካላና» ያጊስ።
LUK 9:58 ዬሱሲ ዛሪዲ፥ «ዎርካናታስ ኦሊ፥ ሳሎ ካፎታስ ኬꬂ ዴዔስ፥ ሺን ኣሳ ናዓይ ባ ሁዒያ ሼምፒሲያሶይ ባዋ» ያጊስ።
LUK 9:59 ሃንኩዋኮ፥ «ኔኒ ታና ካላ» ያጊስ። ሺን ኡራይ፥ «ጎዳው፥ ኮይሮታዳ ታ ኣዋ ሞጋዳ ያና» ያጊስ።
LUK 9:60 ሺን ዬሱሲ፥ «ሃይቂዳይሳቲ ሃይቂዳይሳታ ሞጋና ሜላ ኤንታው ኣጋጋ፤ ኔኒ ባዳ ፆሳ ካዎቴꬃ ሳባካ» ያጊስ።
LUK 9:61 ቃሲ ሃራ ኣሲ፥ «ጎዳው፥ ታ ኔና ካላና፥ ሺን ኮይሮታዳ ታ ሶ ኣሳ ሳሮꬃዳ ያና» ያጊስ።
LUK 9:62 ዬሱሲ ዛሪዲ፥ «ኮፄ ኦይኪዲ ጉዬ ፄሊያ ኦኒካ ፆሳ ካዎቴꬃስ ቤሴና» ያጊስ።
LUK 10:1 ሄሳፌ ጉዬ፥ ጎዳይ ሃራ ላፑን ታማኔ ናምዑ ኣሳታ ዶሪስ። ኢ ባናው ቆፒዳ ካታማኔ ጉታ ኡባ ሲንꬃቲዲ ባናዳ ናምዓ ናምዓ ኦꬂዲ ኪቲስ።
LUK 10:2 ዬሱሲ ኤንታኮ፥ «ሄኮ ሺቃና ካꬃይ ዳሮ ሺን ኦሳንቾቲ ጉꬃ። ያኒያ ጊሾ፥ ካꬃ ጎዳይ ኦሳንቾታ ኪታና ሜላ ዎሲቴ።
LUK 10:3 ሂዛ፥ ቢቴ፥ ዶርሳታዳ ሱꬉሜታ ጊዶ ሂንቴና ታኒ ዬዳና።
LUK 10:4 ሂንቴ ቢያ ኦጊያስ ኣይኮካ ኦይኮፊቴ፥ ሚሼ ጊዲን ካꬂ ጊዲን ጫማ ኦይኮፊቴ። ኦጌ ቦላ ኦናካ ሳሮꬆፊቴ።
LUK 10:5 ሂንቴ ጌሊያ ኬꬃ ኡባ ኮይሮቲዲ፥ ‹ሳሮይ ሃ ኬꬃስ ጊዶ› ያጊቴ።
LUK 10:6 ሳሮ ዶሲያ ኣሲ ሄ ቤሳን ዴዒኮ፥ ሂንቴ ሳሮይ ያን ሼምፓና፤ ኢፃስ ጊኮ ሂንቴ ሳሮይ ሂንቴው ሲማና።
LUK 10:7 ኦሳንቾስ ዳሞዜ ቤሲያ ጊሾ ሂንቴ ጌሊዳ ኬꬃን ሂንቴው ሺሺዳባ ኡባ ሚሼኔ ኡዪሼ ያን ጋምዒቴ። ኢሱዋ ሶፔ ኢሱዋ ሶ ዩዮፒቴ።
LUK 10:8 ኣይ ካታማካ ሂንቴ ጌሊያ ዎዴ ኣሳይ ሂንቴና ሞኪዲ፥ ሂንቴው ሺሺዳባ ኡባ ሚቴ።
LUK 10:9 ሄ ካታማን ዴዒያ ሃርጋንቾታ ፓꬂሼ፥ ‹ፆሳ ካዎቴꬃይ ሂንቴኮ ማቲስ› ያጊዲ ኦዲቴ።
LUK 10:10 ሺን ኢሲ ካታማ ጌሊያ ዎዴ ኣሳይ ሂንቴና ሞኮና ኢፂኮ ዳባባ ኬዪዲ ሃይሳዳ ጊቴ፡
LUK 10:11 ‹ኑ ቶሁዋ ቦላ ዴዒያ ሂንቴ ካታማ ባና ፒቶስ፥ ሺን ፆሳ ካዎቴꬃይ ሂንቴኮ ማታቲዳይሳ ኤሪቴ።›
LUK 10:12 ፒርዳ ጋላሳን ሃ ካታማፔ ሶዶሜ ካታማስ ፒርዳይ ካዉሼ ጊዳናይሳ ታ ሂንቴው ኦዳይስ» ያጊስ።
LUK 10:13 ካሊዲካ፥ ዬሱሲ፥ «ኔኖ ኮራዚኔ፥ ኔኖ ቤቴሳይዳ፥ ኣዬ፥ ሂንቴናን ኦሴቲዳ ማላታቲ ፂሮሳኒኔ ሲዶናን ኦሴቲዳኮ ያን ዴዒያ ኣሳይ ካሌ ማዒዲ፥ ቢዲንꬃ ቦላ ኡቲዲ ቤኒ ማሮታን ጌሊ ኣጋናሺን።
LUK 10:14 ሄሳ ጊሾ፥ ሂንቴፌ ኣꬂዲ ፂሮሳሲኔ ሲዶናስ ፆሳ ፒርዳይ ካዉያና።
LUK 10:15 ኔካ ቂፊርናሆሜ፥ ሳሎ ጋካናው ኔና ꬎቁ ኦꬃናው ኮያይ? ኔ ዱጌ ሲዖሌ ሆሌታና» ያጊስ።
LUK 10:16 ቃሲካ ዬሱሲ ባ ታማሬታኮ፥ «ሂንቴና ሲዔይ ታና ሲዔስ፥ ሂንቴና ኤኮናይ ታና ኤኬና፥ ታና ኤኮናይ ታና ኪቲዳይሳ ኤኬና» ያጊስ።
LUK 10:17 ላፑን ታማኔ ናምዑ ታማሬቲ ኪቴቲዳ ቤሳፌ ኬሂ ኡፋይቲሼ ሲሚዶሶና። ዬሱሳኮ ሺቂዲ፥ «ጎዳው፥ ኔ ሱንꬃን ቱና ኣያናቲካ ኑስ ኪቴቲዶሶና» ያጊዶሶና።
LUK 10:18 ዬሱሲ ኤንታኮ፥ «ፃላሄይ ሳሎፔ ዎልዓንꬃዳ ዎꬊሺን ታ ቤዓስ።
LUK 10:19 ሄኮ፥ ሾሻኔ ኮርኔ ዬꬋና ሜላኔ ሞርኪያ ዎልቃ ዛራና ሜላ ማታ ሂንቴው ኢማስ። ሂንቴና ቆሃናባይ ኣይኮይካ ዴና።
LUK 10:20 ጊዶሺን፥ ሂንቴ ሱንꬃይ ሳሎ ማዝጋባን ፃፌቲዳ ጊሾ ኡፋይቲቴፔ ኣቲን ቱና ኣያናቲ ኪቴቲዳ ጊሾ ኡፋይቶፊቴ» ያጊስ።
LUK 10:21 ሄ ዎዴ ዬሱሲ ጌሻ ኣያናን ኡፋይቲዲ፥ «ሳሉዋ ሳዓ ጎዳው፥ ሃይሳ ጪንጫታፔኔ ኤራንቾታፔ ጌንꬃዳ ያላጋታስ ቆንጪሲዳ ጊሾ ጋላቴታ። ኤ ታ ኣዋው፥ ሄሳ ኔ ኦꬃናው ሎዖ ሼኔ ጊዲስ።
LUK 10:22 «ኡባባይ ታ ኣዋፔ ታው ኢሜቲስ። ናዓይ ኦኔኮ ኣዋፔ ኣቲን ሃሪ ዎይኮ ናዓይ ቆንጪሳናው ኮዬይሳፌ ሃሪ ኦኒካ ኣዋ ኤሬይ ባዋ» ያጊስ።
LUK 10:23 ካሊዲካ፥ ዬሱሲ ዱማ ባ ታማሬታኮ፥ «ሂንቴ ቤዔይሳ ቤዔይሳቲ ኣንጄቲዳይሳታ።
LUK 10:24 ቱማ ዳሮ ናቤቲኔ ካዎቲ ሂንቴ ቤዔይሳኔ ሲዔይሳ ቤዓናዉኔ ሲዓናው ኣሞቲዶሶና፥ ሺን ቤዒቦኮና፥ ሲዒቦኮና» ያጊስ።
LUK 10:25 ሄኮ፥ ኢሲ ጋላስ ሙሴ ዎጋ ኤሪያ ኢሲ ኡራይ ዴንዲዲ ዬሱሳ ያጊዲ ፓጬ ኦይሾ ኦይቺስ። «ኣስታማሪያው፥ ሜሪና ዴዑዋ ላታናው ታኒ ኣይ ኦꬆ?» ያጊስ።
LUK 10:26 ዬሱሲ፥ «ሙሴ ማፃፋን ፃፌቲዳይ ዎይጊ? ኔ ዋታ ናባባይ?» ያጊስ።
LUK 10:27 ኣዴይ ዛሪዲ፥ « ‹ኔ ጎዳ ኔ ፆሳ፥ ኔ ኩሜꬃ ዎዛናፔ፥ ኔ ኩሜꬃ ሼምፑዋፌ፥ ኔ ኩሜꬃ ዎልቃፌኔ ኔ ኩሜꬃ ቆፋፔ ዶሳ። ቃሲ ኣሴ ኔ ሾሩዋ ኔ ሁዒያዳ ዶሳ› ያጌስ» ያጊስ።
LUK 10:28 ዬሱሲ ኢያኮ፥ «ኔኒ ሊኬ ዛራዳሳ፥ ኔካ ሄሳዳ ኦꬃ። ኔኒ ሜሪናው ዴዖን ዳና» ያጊስ።
LUK 10:29 ሺን ኡራይ ባና ፂሎ ኦꬃናው ኮዪዲ፥ «ሃኖስ ኢ ታ ሾሮይ ኦኔ?» ያጊስ።
LUK 10:30 ኢያ ኦይሻስ ዬሱሲ ያጊዲ ዛሮ ኢሚስ፥ «ኢሲ ኣሴ ዴዔይሲ ዬሩሳላሜ ካታማፔ ዱጌ ኢያርኮ ካታማ ቢሺን ኦጌ ቦላ ፓንጋቲ ኬዪዲ ሾጪዶሶና። ኢያ ማዑዋ ቃሪ ኤኪዲ ሃይቆፔኔ ፓፃፔ ጊዶን ዬጊዲ ቢዶሶና።
LUK 10:31 ጉዬፔ፥ ኣይሁዴ ካሂኔ ኢሶይ ሄ ኦጊያራ ባ ቡሱ ቢሼ ኡራ ቤዒዲ ዴሺ ጊዲ ኣꬊስ።
LUK 10:32 ቃሲ ኢሲ ሌዌ ዴዔይሲ ሄ ቤሳ ጋኪሼ ኡራ ቤዒዲ ሃራሶራ ኣꬊዲ ቢስ።
LUK 10:33 ሺን፥ ኢሲ ሳማሬ ቢታ ኣሴ ዴዔይሲ ሄ ኦጊያራ ዪሼ ኡራ ቤዒዲ ኢያው ቃꬌቲስ
LUK 10:34 ኢያኮ ሺቂዲ፥ ኢያ ማዱንꬃ ቦላ ዛይቴኔ ዎይኔ ቲጊዲ ቃቺስ። ባ ሃሪያ ቦላ ኡቲሲዲ ኢማꬂ ኣቂያ ኬꬂ ኤፊስ። ሄ ቤሳን ኢያው ኮሺያባ ኡባ ኦꬂስ።
LUK 10:35 ዎንቴꬄ ናምዑ ዲናሬ ኬሲዲ ኢማꬃ ኬꬃዋስ ኢሚዲ፥ ‹ሃያና ሃ ኡራ ሎይꬃ ፄላ። ታኒ ኔው ኢሚዳይሳፌ ቦላራ ኔ ኬሲያባ ኡባ ታ ኔው ጪጋና› ያጊስ።
LUK 10:36 «ሂዛ፥ ሃ ሄꬑ ኣሳታፔ ፓንጋቲ ሾጪዳ ኡራስ ሾሮቴይ ኔው ኦና ዳኒ?»
LUK 10:37 ኡራይ ዛሪዲ፥ «ኢያው ቃꬌቲዳይሳካ» ያጊስ። ዬሱሲ፥ «ኔካ ባዳ ሄሳዳ ኦꬃ» ያጊስ።
LUK 10:38 ዬሱሲ ባ ታማሬታራ ኦጌ ቢሼ ኢሲ ጉታ ጋኪስ። ያን ማርታ ጌቴቲያ ኢሲ ማጫሲያ ኢያ ባ ሶን ሞካሱ።
LUK 10:39 ኢዉካ ማይራሞ ጊያ ሚቺያ ዴዓዉሱ፥ ማይራማ ቃላ ሲዓሼ ጎዳ ቶሁዋ ማታን ኡታሱ።
LUK 10:40 ሺን ማርታ ዳሮ ኦሶን ኡንዔታዳ ዬሱሳኮ ሺቃዳ፥ «ጎዳው፥ ታ ሚቺያ ኦሱዋ ታ ፃላላስ ዬጋዳ ኡታ ኣጊን ታ ዳቡሪያ ዎዴ ኔኒ ቤዓሼ ሲዒ ጋይ? ኢያ ታና ማዳና ሜላ ኦዲኪ» ያጋሱ።
LUK 10:41 ሺን ጎዳይ ሃይሳዳ ጊዲ ዛሪስ፥ «ማርታ፥ ማርታ፥ ኔኒ ዳሮባን ኡንዔታሳኔ ሜቶታሳ።
LUK 10:42 ጊዶሺን፥ ኮዬቴይ ኢሲባ ፃላላ። ማይራማ ሎዖባ ዶራሱ፥ ሄሲካ ኢፔ ኤኬቴና» ያጊስ።
LUK 11:1 ኢሲ ጋላስ ዬሱሲ ኢሲ ቤሳን ዎሴስ። ዎሳ ዉርሲዳ ዎዴ ኢያ ታማሬታፔ ኢሶይ፥ «ጎዳው፥ ዮሃኒሲ ባ ታማሬታ ዎሳ ታማርሲዳ ሜላ ኔካ ኑና ዎሳ ታማርሳ» ያጊስ።
LUK 11:2 ዬሱሲ፥ «ሃይሳዳ ያጊዲ ዎሲቴ፡ ‹ሳሉዋን ዴዒያ ኑ ኣዋው ኔ ጌሻ ሱንꬃይ ኣንጄቶ፤ ኔ ካዎቴꬃይ ዮ።
LUK 11:3 ኑ ጋላሳ ካꬃ ሃቺ ሃቺ ኑስ ኢማ።
LUK 11:4 ኑና ቆሄይሳታ ኑኒ ኣቶ ጌይሳዳ፥ ኑ ናጋራ ኣቶ ጋ፤ ፓጬን ኑና ጌልሶፋ› ያጊቴ» ያጊስ።
LUK 11:5 ካሊዲካ፥ ዬሱሲ ባ ታማሬታኮ ያጊስ፡ «ሌሚሶስ ሂንቴፌ ኢሱዋስ ላጌይ ዴዔስ። ኢ ጊዲ ቢላሄ ባ ላጊያ ሶ ቢዲ፥ ‹ታ ላጊያው፥ ሄꬑ ሶሎ ታው ታልዓርኪ።
LUK 11:6 ታው ላጌ ጊዲዳ ኢሲ ኣሲ ኦጌፔ ዪን፥ ኢያው ኣꬂያባ ꬋያስ› ያጊኮ፥
LUK 11:7 «ኢያ ላጌይ ኬꬃ ጊዶን ጊዲዲ፥ ‹ሃያና ታና ዋይሶፓ፥ ዉላይ ጎርዴቲስ። ታ ናይቲካ ታራ ኣርሳ ቦላ ዚንዒዶሶና። ያኒያ ጊሾ፥ ዴንዳዳ ኔ ኮያባ ኢማናው ዳንዳዒኬ› ያጊዬ?
LUK 11:8 ታ ሂንቴው ኦዳይስ፤ ላጌቴꬃ ጊሾ ዴንዲዲ ኢማናው ኮዮና ኢፂኮካ ዎሳን ሳሌꬂዳ ጊሾ ዴንዲዲ ኮሺያባ ኡባ ኢሜስ።
LUK 11:9 «ሄሳ ጊሾ፥ ታኒ ሂንቴው ኦዳይስ፤ ዎሲቴ ሂንቴው ኢሜታና፤ ኮዪቴ ሂንቴ ዴማና፤ ካሬ ዪዲ ፄጊቴ ሂንቴው ዶዬታና።
LUK 11:10 ጋሶይካ ዎሲያ ኡባይ ኤኬስ፤ ኮዬይ ዴሜስ፤ ካሬ ዪዲ ፄጌይሳስ ዶዬቴስ።
LUK 11:11 «ሂንቴኖ፥ ኣዋቶ ሂንቴ ጊዶፌ ናዒ ኡይꬂ ዎሲን ሹቹ ኢሜይ ኦኔ? ሞሎ ዎሲን ሾሺ ኢሜይ ኦኔ?
LUK 11:12 ዎይኮ ጱጱሌ ዎሲኮ ኮርኔ ኢሚ?
LUK 11:13 ሂንቴ ኢታታ ጊዲሼ ሂንቴ ናይታስ ሎዖባ ኢሞ ኤሪኮ፥ ሳሎን ዴዒያ ሂንቴ ኣዋይ ዎሴይሳታስ ጌሻ ኣያና ዋቲ ኣꬂ ኢሜኔ?» ያጊስ።
LUK 11:14 ኢሲ ጋላስ ዬሱሲ ዶና ሙሚሲዳ ቱና ኣያና ኢሲ ኡራፔ ኬሲስ። ቱና ኣያናይ ኬዪዳ ሜላ ሙሜ ኡራይ ኦዴቲስ። ኣሳይካ ማላሌቲስ።
LUK 11:15 ሺን ኢሶቲ ኢሶቲ፥ «ቱና ኣያና ሃላቃ፥ ቢዔልዜቡላ ዎልቃን ቱና ኣያናታ ኬሴስ» ያጊዶሶና።
LUK 11:16 ሃራቲ ቃሲ ፓጬስ ሳሎፔ ማላ ቤሳና ሜላ ኮዪዶሶና።
LUK 11:17 ሺን ዬሱሲ ኤንታ ቆፋ ኤሪዲ ኤንታኮ፥ «ዎሊ ጊዶን ሻኬቲያ ካዎቴꬂ ኡባይ ꬋዬስ፤ ዎሊ ጊዶን ሻኬቲያ ኬꬂ ኩንዴስ።
LUK 11:18 ፃላሄይ ዎሊ ጊዶን ሻኬቲኮ ኢያ ካዎቴꬃይ ዋኒዲ ሚኒዲ ኤቃኔ? ሂንቴ ታና፥ ‹ኢ ቱና ኣያናታ ቢዔልዜቡላ ዎልቃን ኬሴስ› ያጌታ።
LUK 11:19 ሂዛ፥ ታኒ ቱና ኣያና ቢዔልዜቡላ ዎልቃን ኬሲያባ ጊዲኮ ሂንቴ ናይቲ ኦዴ ዎልቃን ኬሶናሻ? ሄሳ ጊሾ፥ ኤንቲ ሂንቴ ቦላ ፒርዴይሳታ ጊዳና።
LUK 11:20 ሺን ታኒ ቱና ኣያናታ ፆሳ ቢራꬌን ኬሲያባ ጊዲኮ ሂዛ ፆሳ ካዎቴꬃይ ሂንቴኮ ማቲዳይሳ ኤሪቴ።
LUK 11:21 «ሚኖ ኣሲ ዳንጬቲዲ ባ ኬꬃ ናጊያባ ጊዲኮ፥ ኢያ ሻሎይ ቦሼቴና።
LUK 11:22 ሃኖሺን፥ ኢያፔ ኣꬊ ሚኖ ጊዲዳ ኣሲ ዪዲ፥ ኢያ ቆሂዲ ፆኒኮ ኣማኔቲዲ ዳንጪዳ ዳንጩዋ ቢሊሲዲ፥ ኢያ ሻሉዋ ቦንቂዲ ሃራስ ሻኬስ።
LUK 11:23 «ታራ ጊዶናይሲ ታና ኢፄስ፤ ታራ ሺሾናይሲካ ላሌስ።
LUK 11:24 «ቱና ኣያናይ ኣሳፔ ኬዪዳ ዎዴ ሼምፒያሶ ኮዪዲ ሃꬂ ባይናሶራ ዩዬስ። ሼምፒያሶ ꬋዪዳ ዎዴ ‹ታ ኬዪዳሱዋ ሲማና› ያጌስ።
LUK 11:25 ኢ ሲሚያ ዎዴ ኬꬃይ ፒቴቲዲ ሎዒዲ ዴዒሺን ዴሚስ።
LUK 11:26 ሄሳፌ ጉዬ፥ ቢዲ ኢያፔ ኣꬊዲ ኢቲዳ ሃራ ላፑን ቱና ኣያናታ ኤኪዲ ዬስ። ኢያን ጌሊዲ ዱሱ ኦይኬስ። ሄ ኡራስ ኮይሮይሳፌ ጉዬይሲ ኣꬊዲ ኢታ ጊዴስ» ያጊስ።
LUK 11:27 ዬሱሲ ሄሳ ኦዳ ቦላ ዴዒሺን ኢሲ ማጫሲ ኣሳ ጋꬃፌ ዴንዳዳ፥ ባ ቃላ ꬎቁ ኦꬃዳ፥ «ኔና ቶኪዳ ኡሎይኔ ኔኒ ꬋሚዳ ꬋንꬃቲ ኣንጄቲዶሶና» ያጋሱ።
LUK 11:28 ሺን ኢ፥ «ኣንጄቲዳይሳቲ ፆሳ ቃላ ሲዒዲ ኪቴቴይሳታ» ያጊስ።
LUK 11:29 ዳሮ ኣሳይ ሺቂዳ ዎዴ ዬሱሲ፥ «ሃ ዬሌቴꬃይ ኢታ፤ ኦራꬃ ማላ ኮዬስ። ሺን ዮናሳ ማላታፔ ኣቲን ሃሪ ኤንታው ኢሜቴና።
LUK 11:30 ዮናሲ ናናዌ ኣሳስ ማላ ጊዲዳ ሜላ ኣሳ ናዓይካ ሃ ዬሌቴꬃስ ማላ ጊዳና።
LUK 11:31 ዱጌሃ ካዊያ ፒርዳ ጋላስ ሃ ዬሌቴꬃራ ዴንዳዳ ፒርዳና። ጋሶይካ፥ ኢያ ሶሎሞኔ ጪንጫቴꬃ ሲዓናው ቢታ ጋፃፔ ዴንዳዳ ያሱ። ሄኮ ሶሎሞኔፔ ኣꬌይሲ ሃይሳን ዴዔስ
LUK 11:32 ናናዌ ኣሳቲ ፒርዳ ጋላስ ሃ ዬሌቴꬃራ ዴንዲዲ ኤንታ ቦላ ፒርዳና። ጋሶይካ ዮናሳ ሲብካቲያን ማሮታ ጌሊዶሶና። ሄኮ፥ ዮናሳፔ ኣꬌይ ሃይሳን ዴዔስ» ያጊስ።
LUK 11:33 «ፆምፔ ፆምፒዲ ቆሳ ቤሳን ዎይኮ ኦቶ ጊዶን ዎꬂያ ኣሲ ዴና። ኣሲ ፖዑዋ ቤዓና ሜላ ꬎቃ ቤሳን ዎꬄስ።
LUK 11:34 ኔ ኣሳቴꬃስ ፖዖይ ኔ ኣይፊያ። ኔ ኣይፌይ ሎዖ ጊዲኮ፥ ኔ ኩሜꬃ ኣሳቴꬃይ ፖዔስ። ኔና ኣይፌይ ሳኪኮ ኔ ኣሳቴꬃይ ኡባይ ꬉሜስ።
LUK 11:35 ሄሳ ጊሾ፥ ኔ ጋርሳን ዴዒያ ፖዖይ ꬉሞና ሜላ ናጌታ።
LUK 11:36 ሂዛ፥ ኔ ኩሜꬃ ኣሳቴꬃይ ፖዖ ጊዲኮ፥ ኔ ኣሳቴꬃንካ ሃሪ ꬉማ ቤሲ ꬋዪኮ፥ ኔ ኣሳቴꬃ ኩሜꬃይ ዎሊሌ ፖዖ ሜላ ጊዴስ» ያጊስ።
LUK 11:37 ዬሱሲ ባ ኦዳ ኦንጊዳ ሜላ ኢሲ ፋሪሳዌይ ባራ ካꬂ ማና ሜላ ፄጊስ። ኢ ኢያራ ኢሲፌ ጌሊዲ ጊቢራ ቦላ ኡቲስ።
LUK 11:38 ፋሪሳዌይ ዬሱሲ ካꬂ ማናፔ ሲንꬄ ኩሼ ሜጮናይሳ ቤዒዲ ማላሌቲስ።
LUK 11:39 ጎዳይ ኢያኮ፥ «ሂንቴ ፋሪሳዌቲ ቁሊያኔ ሻቲያ ቦላ ባጋ ሜጬታ። ሺን ሂንቴ ጋꬃይ ኡዜቴꬃኒኔ ኢታቴꬃን ኩሚስ።
LUK 11:40 ሂንቴኖ፥ ኤያቶ፥ ካሬ ባጋ ሜꬊዳይሲ ጋꬃ ሜꬊዳይ ኢያ ጊዴኔዬ?
LUK 11:41 ሺን ቁሊያኒኔ ሻቲያን ዴዔይሳ ማንቆታስ ኢሚቴ። ሄ ዎዴ ሂንቴው ኡባባይ ጌሺ ጊዳና።
LUK 11:42 «ፋሪሳዌቶ ሂንቴና ኣዬ፥ ሳዎፔ፥ ፃሎቴፔ፥ ሄሳ ሜላባፔ ኣስራታ ኬሴታ። ሺን ፂሎቴꬂኔ ፆሳ ዶሶይ ሂንቴናን ባዋ። ሃራታ ኣጎና ሃይሳታካ ኦꬃናው ቤሴስ፥ ሺን ኣጊዴታ።
LUK 11:43 «ፋሪሳዌቶ ሂንቴና ኣዬ፥ ኣይሁዴ ዎሳ ኬꬃን ቦንቾ ኦይዴ፥ ጊያ ጊዶን ቦንቾ ሳሮꬆ ዶሴታ።
LUK 11:44 «ማላይ ꬋዪን ኣሳይ ኤሮና ቦላራ ቢያ ዱፎ ዳኔይሳቶ ሂንቴና ኣዬ» ያጊስ።
LUK 11:45 ሂጌ ኣስታማሬይ ዛሪዲ፥ «ኣስታማሪያው፥ ኔ ሄሳ ጋሼ ኑና ጫያሳ» ያጊስ።
LUK 11:46 ዬሱሲ፥ «ሂንቴኖ፥ ሂጌ ኣስታማሬቶ፥ ሂንቴናካ ኣዬ፥ ኣሳይ ቶካናው ዳንዳዖና ዴፆ ቶሆ ቶሴታ፥ ሺን ሂንቴ ሂንቴ ሁዔስ ሃሪ ኣቶሺን ቢራꬌ ፄራንካ ቦቼኬታ።
LUK 11:47 «ሂንቴ ኣዋቲ ዎꬊዳ ናቤታ ዱፉዋ ሂንቴ ጊጊሲያ ጊሾ ሂንቴና ኣዬ።
LUK 11:48 ሂዛ፥ ሂንቴ ኣዋታ ኦሱዋ ሚንꬃናው ኤንቲ ዎꬊዳ ናቤታ ዱፉዋ ሂንቴ ሎይꬂያ ጊሾ ኤንታ ኢታ ኦሱዋስ ሂንቴ ማርካ።
LUK 11:49 ሄሳ ጊሾ፥ ፆሳይ ባ ጪንጫቴꬃን፥ ‹ናቤታኔ ሃዋሬታ ታ ሂንቴው ኪታና፥ ሺን ሂንቴ ባጋታ ዎꬋና፤ ሃራታ ጎዳና› ያጊስ።
LUK 11:50 ሄሳ ጊሾ፥ ሃ ዬሌቴꬃይ ኣላሜይ ሜꬌቶሳፔ ሃኖ ጋካናው ጉኪዳ ናቤታ ኡባ ሱꬃስ ኦይሼታና።
LUK 11:51 ኣቤላፔ ዶሚዲ ያርሾ ቤሳሲኔ ፆሳ ኬꬃፌ ጊዱዋን ጉኪዳ ዛካሪያሳ ሱꬃ ጊሾ ሃ ዬሌቴꬃይ ኦይሼታና።
LUK 11:52 «ሂጌ ኣስታማሬቶ፥ ሂንቴና ኣዬ፥ ኤራቴꬃ ቁልፒያ ሂንቴ ኩሼን ኦይኪዴታ፥ ሺን ሂንቴው ጌሌኬታ ሃራታካ ጌልሴኬታ።» ያጊስ።
LUK 11:53 ዬሱሲ ያፔ ባናው ኬያ ዎዴ ሂጌ ኣስታማሬቲኔ ፋሪሳዌቲ ኢያራ ኤቄቲዲ ኦይሾን ዋይሶሶና።
LUK 11:54 ኢያ ዶናፔ ኬያ ቃላን ኢያ ኦይካናው ኮዪዲ ሄሳ ኦꬂዶሶና።
LUK 12:1 ሄ ዎዴ ዳሮ ሙኩሉን ታይቤቲያ ኣሳይ ዎሊ ቦላ ዬꬌታና ጋካናው ኣሲ ኣሳ ቦላ ሺቂዲ ዴዒሺን፥ ዬሱሲ ባ ታማሬታኮ፥ «ፋሪሳዌታ ኢርሹዋፌ ናጌቲቴ። ሄሲካ ኤንታ ጩቦቴꬃ።
LUK 12:2 ቆንጮና ቆሴቲዲ፥ ኤሬቶና ጌሚዲ ኣቲያባይ ኣይኮይካ ባዋ።
LUK 12:3 ሂዛ፥ ሂንቴ ꬉማን ኦዲዳባይ ኡባይ ፖዖን ሲዔታና፥ ቆልዓ ጋꬃን ካልካሺዳባይ ዳባባን ኦዴታና።
LUK 12:4 «ታ ባጋቶ፥ ታ ኦዴይሳ ሲዒቴ፤ ኣሹዋ ዎꬎሶናፔ ኣቲን ሃራ ኣይኮካ ኦꬃናው ዳንዳዖናይሳታስ ባቦፊቴ።
LUK 12:5 ሃኖሺን፥ ሂንቴ ባባናው ቤሴይሳ ታ ሂንቴው ቆንጪሳና። ሄሲካ ዎꬊዳፔ ጉዬ ጋናሜን ዬጋናው ዎልቃይ ዴዔይሳስ ኢያው ባቢቴ። ኤ፥ ቱማ ጋይስ፤ ኢያው ባቢቴ።
LUK 12:6 ኢቻሹ ቡቤቲ ኢሲ ሳንቲሜስ ባይዜቶኮናዬ? ሃኖፔ ኣቲን ኤንታፌ ኢሲናካ ፆሳ ሲንꬃን ዶጌቱኩ።
LUK 12:7 ሃሪ ኣቶሺን፥ ሂንቴ ሁዔ ቢናናይካ ፓይዴቲዲ ዴዔስ። ሂዛ፥ ባቦፊቴ፤ ዳሮ ቡቤታፔ ሂንቴ ኣꬌታ።
LUK 12:8 «ታ ኦዴይሳ ሲዒቴ፤ ኣሳ ሲንꬃን ታው ማርካቲያ ኡባስ ኣሳ ናዓይ ፆሳ ኪታንቾታ ሲንꬃን ማርካታና።
LUK 12:9 ኣሳ ሲንꬃን ታና ካዴይሳስ ፆሳ ኪታንቾታ ሲንꬃን ታ ኢያ ካዳና።
LUK 12:10 ኣሳ ናዓ ቦላ ካꬌ ቃላ ሃሳያ ኡባይ ማሮታ ዴማና፥ ሺን ጌሻ ኣያና ቦላ ካꬌ ቃላ ኦዴቴይሲ ማሬቴና።
LUK 12:11 «ኣሲ ሂንቴና ኦይኪዲ ኣይሁዴ ዎሳ ኬꬃን፥ ዳይናታ ሲንꬃኒኔ ካዎታ ሲንꬃን ጎሼቺያ ዎዴ ኣይ ኦዳኔኮኔ ዎይጊ ዛራኔኮ ሂርጎፊቴ።
LUK 12:12 ሄ ዎዴ ሂንቴ ኦዳናባ ጌሻ ኣያናይ ሂንቴና ታማርሳና» ያጊስ።
LUK 12:13 ኣሳ ጊዶፌ ኢሲ ኣሲ ዬሱሳኮ ዪዲ፥ «ታ ኢሻይ ታው ኑ ኣዋ ላታፔ ሻካና ሜላ ኢያው ኦዳ» ያጊስ።
LUK 12:14 ዬሱሲ ዛሪዲ፥ «ላ ኣዲያው፥ ሂንቴ ቦላ ታና ዳይናኔ ላታ ሻኪያ ጪማ ኦꬂዳይ ኦኔ?» ያጊስ።
LUK 12:15 ቃሲካ ዬሱሲ፥ «ኣሳ ዴዖይ ሻሎ ዳሮቴꬃን ጊዶና ጊሾ ያሬ ኣጊዲ ሚንꬂዲ ሂንቴና ናጊቴ» ያጊስ።
LUK 12:16 ካሊዲካ ሌሚሶን፥ «ጋዴይ ዳሮ ካꬂ ኢሚያ ኢሲ ዱሬ ኡራይ ዴዔስ።
LUK 12:17 ሄ ኡራይ፥ ‹ታ ካꬃ ታኒ ሺሻናው ቤሲ ጉፂዳ ጊሾ ኣይ ኦꬆ?› ያጊዲ ባ ዎዛናን ቆፒስ።
LUK 12:18 ሂዛፔ ያታና፤ ካሴ ዴዒያ ሻሌታ ላላዳ ሃራ ዳልጋ ሻሌታ ኬፃና። ካꬃኔ ታው ዴዒያባ ኡባ ኢያን ዬጋና።
LUK 12:19 ባ ሼምፔኮ፥ ‹ታ ሼምፔቴ፥ ዳሮ ላይꬃስ ኔው ጊዲያ ሻሎ ሺሻስ። ሂዛ፥ ሼምፓዳ ማ፥ ኡያ፥ ኡፋይታ› ያጋና።
LUK 12:20 «ሺን ፆሳይ፥ ‹ላ፥ ኤያ ኣዲያው፥ ሃቺ ቃማ ኔ ሼምፒያ ኔፔ ኤኬታዉሱ። ሂዛ፥ ኔ ሺሺዳባይ ኦዴስ ጊዳኔ?› ያጊስ።
LUK 12:21 «ሄሳ ጊሾ፥ ባው ዱሬቴꬂ ሳዓን ሺሺያ ኣሳስ፥ ፆሳ ማታን ዱሬ ጊዶና ኣሳስ ዉርሴꬃይ ሃ ኡራይሳ ሜላ» ያጊስ።
LUK 12:22 ሄሳፌ ጉዬ፥ ዬሱሲ ባ ታማሬታኮ፥ «ሂዛ፥ ታ ኦዲያባ ሲዒቴ፥ ሂንቴ ሼምፑዋስ ኣይ ሚኖ ሂንቴ ቦላስ ኣይ ማዒኖ ያጊዲ ኡንዔቶፊቴ።
LUK 12:23 ሼምፖይ ካꬃፌ ቦሊ ኣፊላፔ ኣꬌስ።
LUK 12:24 ካፎታ ቤዒቴ ዜሮኮና፥ ኪሾኮና፥ ኤሌይካ ሻሌይካ ባዋ። ሺን ፆሳይ ኤንታና ሙዜስ። ሂንቴ ካፎታፔ ዳሮ ኣꬌታ።
LUK 12:25 ሃኖሺን፥ ሂንቴፌ ኡንዔቲዲ ባ ላይꬃ ቦላ ኢሲ ቃማ ጉጃናው ዳንዳዔይ ኦኔ?
LUK 12:26 ሂዛ፥ ሃ ጉꬃባ ኦꬃናው ዳንዳዖና ሂንቴ ሃራባስ ኣይስ ኡንዔቴቲ?
LUK 12:27 ኣኔ ጪሻቲ ዋኒዲ ዲጪያኮ ቤዒቴ። ዋዮኮናኔ ሱቆኮና። ሃሪ ኣቶሺን፥ ሶሎሞኔይ ባ ዴዒያ ቦንቾ ኡባን ኤንታፌ ኢሱዋ ሜላካ ማዒቤና።
LUK 12:28 ሂንቴኖ፥ ኣማኖይ ፓጪዳይሳቶ፥ ሂዛ፥ ፆሳይ ሃቺ ቤንቲዲ ዎንቶ ታማን ዬጌታና ጪሻታ ሃይሳዳ ማይዚኮ፥ ሂንቴና ዋቲ ኣꬂ ማይዜኔ?
LUK 12:29 ሄሳ ጊሾ፥ ኣይ ሚኖ ዎይኮ ኣይ ኡዪኖ ጊዲ ኡንዔቶፊቴ።
LUK 12:30 ሄ ኡባስ ፆሳ ኣማኖና ኣሳቲ ኡንዔቶሶና። ሺን ሂንቴ ኣዋይ ፆሳይ ሄሲ ኡባይ ሂንቴው ኮሼይሳ ኤሬስ።
LUK 12:31 ኡባፌ ኣꬂዲ ፆሳ ካዎቴꬃ ኮዪቴ ሄሲ ኡባይ ሂንቴው ጉጂ ኢሜታና።
LUK 12:32 «ሂንቴኖ፥ ጉꬃ ዴሬቶ፥ ያዮፊቴ፤ ሂንቴ ኣዋ ፆሳይ ካዎቴꬃ ሂንቴው ኢማናው ኡፋይቴስ።
LUK 12:33 ሂንቴው ዴዒያባ ባይዚዲ ማንቆታስ ኢሚቴ። ካይሶይ ኤኮናሶን፥ ቢሊ ሞናሶን፥ ጪሞና ካርፂታን፥ ዉሮና ሻሉዋ ሳሉዋን ሺሺቴ።
LUK 12:34 ሂንቴ ዎዛናይ ሂንቴ ሻሎይ ዴዒያሱዋን ጊዳና።
LUK 12:35 «ቃንꬃን ዳንጪዲ ጊጌቲቴ፤ ሂንቴ ፆምፔይ ፖዒዳይሳ ጊዶ።
LUK 12:36 ባንታ ጎዳይ ያጋኖፔ ሲማና ጋካናው ባርኪዲ ናጌይሳታዳ፥ ጎዳይ ዪዲ ፄጊያ ዎዴ ኤሌሲዲ ዶያናው ጊጊዳ ኣሳታ ዳኒቴ።
LUK 12:37 ባንታ ጎዳይ ሲሚያ ዎዴ ꬊስኮና ዴዒሼ ናጌይሳቲ ኣንጄቲዳይሳታ። ቱማ ጋይስ፤ ጎዳይ ቃንꬃን ዳንጪዲ ጋይታ ዩሹዋን ኡቲሲዲ ሞኬስ።
LUK 12:38 ጎዳይ ላዴ ጊዲን ጊዲ ቢላሄ ጊዲን ዎይኮ ዎንቲማꬄ ጊዲን ዪዲ፥ ሄሳ ሜላ ꬊስኮና ናጊሺን ዴሚያ ሄ ኣይሌቲ ኣንጄቲዳይሳታ።
LUK 12:39 ሺን ሃይሳ ኤሪቴ፤ ካይሶይ ኣዉዴ ያኔኮ ኬꬃዋይ ኤሪያኮ ኬꬃይ ቦኬቲያ ዎዴ ሲዒ ጊዲ ቤዔና።
LUK 12:40 ሂንቴካ ጊጊዲ ናጊቴ፤ ኣሳ ናዓይ ሂንቴ ቆፖና ዎዴ ያና» ያጊስ።
LUK 12:41 ጴፂሮሲካ፥ «ጎዳው ሃ ሌሚሱዋ ኑ ፃላላስ ኦዳዬ ዎይኮ ኣሳ ኡባሴ?» ያጊስ።
LUK 12:42 ጎዳይ ዛሪዲ፥ «ሂዛ፥ ካꬃ ሙዛናው ቤሲያ ዎዲያን ኢማና ሜላ ጎዳይ ባ ኣይሌታ ቦላ ሹሚዳ ኣማንꬄይሲኔ ዎዛናማ ሃላቃይ ኦኔ?
LUK 12:43 ጎዳይ ሲሚያ ዎዴ ሄሳ ሜላ ኦꬂሼ ቤንቲያ ኣይሌይ ኢ ኣንጄቲዳይሳ
LUK 12:44 ታ ሂንቴው ቱማ ኦዳይስ፤ ባ ጎዳስ ዴዒያ ሻሎ ኡባ ቦላ ኢ ሹሜታና።
LUK 12:45 ሺን ሄ ኣይሌይ፥ ‹ታ ጎዳይ ኤሌ ዬና› ያጊዲ ባ ዎዛናን ቆፒዲ፥ ማጫ ኣይሌታኔ ኣዴ ኣይሌታ ዋꬊኮ፥ ቃሲ ባው ኮዪዳ ሜላ ሚሼኔ ኡዪሼ ማꬆቲኮ፥
LUK 12:46 ሄ ኣይሊያ ጎዳይ ኢ ቆፖና ጋላሳኒኔ ሂርጎና ዎዴ ያና። ዪዲ ኢያ ቃንፄሬꬂዲ፥ ኢያ ቃዳ ኣማኖና ኣሳታራ ኦꬃና።
LUK 12:47 «ጎዳ ሼኒያዳ ጊጎናይሲኔ ኢያ ጎዳይ ኣይ ዶሲያኮ ኤሪሼ ኦꬆና ኣይሌይ ዳሮ ጋራፌታና።
LUK 12:48 ሺን ባ ጎዳ ሼኒያ ኤሮና ኣቲዲ ጋራፌታናው ቤሴይሳ ኦꬂዳይ ጉꬃራ ጋራፌታና። ጋሶይካ ዳሮ ኢሜቲዳይሳፌ ዳሮ ኮዬቴስ፥ ዳሮ ሃዳራ ኤኪዳይሳፌካ ዳሮ ኢማና ጊዲ ናጌቴስ።
LUK 12:49 «ታኒ ዪዳይ ቢታ ቦላ ታማ ኦይꬃናሳ። ሃዒ ታማይ ኦይኪያኮ ታና ዋቲ ኡፋይሳንዴሻ!
LUK 12:50 ሃኖሺን፥ ታ ሃዒ ፃማቄቲያ ፂንቃቴይ ዴዔስ። ኢ ፖሌታና ጋካናው ታ ዳሮ ኡንዔታይስ።
LUK 12:51 ሳዓ ቦላ ሳሮቴꬂ ኤሃናው ዪዳ ሂንቴው ዳኒ? ጊዴና፥ ታ ዪዳይ ሻካናሳ።
LUK 12:52 ሃዒፌ ዶሚዲ ዎሊ ጊዶን ሻኬቲዳ ኢቻሹ ኬꬃ ኣሳቲ ኢሲፌ ዴዖሶና። ናምዓቲ ሄꬓታ ቦላ፥ ሄꬓቲካ ናምዓታ ቦላ፥ ዴንዲዲ ሻኬቶሶና።
LUK 12:53 ኣዋይ ናዓ ቦላ፥ ናዓይካ ኣዋ ቦላ፥ ኣያ ናዔ ቦላ፥ ናዒያ ኣዬ ቦላ፥ ኣዚና ኣያ ናዓ ማቼ ቦላ፥ ናዓ ማቺያ ኣዚና ኣዬ ቦላ፥ ዴንዲዲ ሻኬታና።»
LUK 12:54 ቃሲካ ኣሳኮ፥ «ዉሎሃ ባጋራ ሳሎይ ሻራቲያ ዎዴ ቤዒዲ፥ ኤሌሲዲ፥ ‹ኢሪ ያና› ያጌታ፥ ሄሳዳካ ሃኔስ።
LUK 12:55 ዱጌሃ ጫርኮይ ጫርኪያ ዎዴ ‹ሳዓይ ኣዋና› ያጌታ፥ ሄሳዳካ ሃኔስ» ያጊስ።
LUK 12:56 ሂንቴኖ፥ ጩቦቶ፥ ሳሎባኔ ሳዓባ ሻኪ ኤሬታሺን ሃ ዎዲያ ሻኪ ኤሮይ ሂንቴና ዋኒዲ ፆኒዴ?
LUK 12:57 «ያቲን፥ ሂንቴ ሁዔስ ኣይስ ቱማ ፒርዴኬቲ?
LUK 12:58 ኔ ሞርኪያራ ዎላ ዳይና ሲንꬃን ኤቃናው ባሼ ኦጌ ቦላ ጊጋናው ኮያ። ኔ ጊጎና ኢፂኮ ጎሼቺዲ ዳይና ሲንꬂ ኔና ኤፋና። ዳይናይ ኔና ፖሊሴስ ኣꬂ ኢማና። ኢ ኔና ዎይኔን ዬጋና።
LUK 12:59 ሲዒቴ፥ ኢሲ ባካኒ ኣቶና ጪጋ ኦንጋና ጋካናው ኔ ያፔ ኬዮናይሳ ኤራ» ያጊስ።
LUK 13:1 ሄ ዎዴ ዬሱሳኮ ኣሳይ ዪዲ ጲላፆሲ ዎꬊዲ ኤንታ ሱꬃራ ኤንታ ያርሹዋ ዋላኪዳ ጋሊላ ኣሳባ ኦዲዳ ኣሳቲ ሄ ቤሳን ዴዖሶና።
LUK 13:2 ኢ ሃይሳዳ ያጊዲ ዛሪስ፤ «ያቲን ሄ ጋሊላ ኣሳቲ ሄ ኢታ ሃይቆ ሃይቂዳ ጊሾ ጋሊላን ዴዒያ ኣሳ ኡባፌ ኣꬊዳ ናጋራንቾ ዳኖና?
LUK 13:3 ጊዴና! ጊዶሺን፥ ሂንቴካ ማሮታን ሲሞና ኢፂኮ፥ ኡባይ ሄሳዳ ꬋያና።
LUK 13:4 ዎይኮ ቃሲ ሳሊሆሜ ጊያ ቤሳን ጊምቤይ ዎዲዲ ዎꬊዳ ታማኔ ሆስፑን ኣሳይ ዬሩሳላሜን ዴዒያ ኣሳ ኡባፌ ኣꬊዳ ናጋራንቾ ዳኖና?
LUK 13:5 ጊዴና! ሺን ሂንቴካ ማሮታን ሲሞና ኢፂኮ ኡባይ ሄሳዳ ꬋያና።»
LUK 13:6 ቃሲካ ዬሱሲ ሃይሳዳ ጊዲ ሌሚሶ ኦዲስ፡ «ኢሲ ኡራስ ዎይኔ ጋዴን ቶኬቲዳ ባላሴ ሚꬂያ ዴዓዉሱ። ኢ ኢፔ ኣይፌ ኮዪ ዪዲ ኣይኮካ ዴሚቤና።
LUK 13:7 ጋዲያ ጎዳይ ዎይኔ ኦሳንቹዋኮ፥ ‹ኣይፌ ዴማናው ኮያዳ ሄꬑ ላይꬂ ሲሜሬታዳ ኣይኮካ ዴማቢኬ። ሄሳ ጊሾ፥ ቃንፃ ዲጋ፤ ኣይስ ቢታ ሜሊሳይ?› ያጊስ።
LUK 13:8 «ሺን ኦሳንቾይ፥ ‹ጎዳው፥ ኢ ዩሹዋ ኦꬃዳ ኦሻ ዬጋና ጋካናው ሃ ላይꬃስ ኣጋርኪ።
LUK 13:9 ሃ ላይꬂ ኣይፊኮ ሎዖ፥ ኢፂኮ ቃንፃ ኣጋ› » ያጊዲ ዛሪስ።
LUK 13:10 ዬሱሲ ሳምባታ ጋላስ ኣይሁዴ ዎሳ ኬꬃን ታማርሴስ።
LUK 13:11 ሄ ቤሳን ታማኔ ሆስፑን ላይꬂ ቱና ኣያኒ ዞኮ ኩኒሲዳ ኢሲ ማጫሲያ ዴዓዉሱ። ኢያ ኩናፔ ዴንዶይሳን ሱሬ ኤቃናው ዳንዳዑኩ።
LUK 13:12 ዬሱሲ ኢዮ ቤዒዳ ዎዴ ፄጊዲ፥ «ሃ ማጫሴቴ፥ ኔ ሃርጊያፌ ፓፃዳሳ» ያጊስ።
LUK 13:13 ባ ኩሺያ ኢ ቦላ ዎꬂን፥ ኢያ ሶሁዋራ ሱራዳ ኤቃሱ። ፆሳካ ጋላታሱ።
LUK 13:14 ሺን ኣይሁዴ ዎሳ ኬꬃ ሃላቃይ ዪሎቲዲ ኣሳኮ፥ «ኦሶ ኦꬂያ ኡሱፑን ጋላሳቲ ዴዖሶና። ሄሳ ጊሾ፥ ሄ ጋላሳታን ዪዲ ፓፂቴፔ ኣቲን ሳምባታ ጋላስ ጊዴና» ያጊስ።
LUK 13:15 ጎዳይ፥ «ጩቦቶ፥ ሂንቴ ጊዶፌ ቦሪ ዎይኮ ሃሬ ሳምባታ ጋላስ ዛዳሎፔ ቢሊዲ ሃꬄ ኡሻናው ኤፎናይ ኦኔ?
LUK 13:16 ያቲን፥ ሃ ማጫሲያ ኣብራሃሜ ናዓ ጊዳሼ ፃላሄን ቃሼታዳ ታማኔ ሆስፑን ላይꬂ ኩሜꬂ ዴዒዳሪስ ሳምባታ ጋላስ ቢርሼቴꬂ ኮሼኔ?» ያጊዲ ኦይቺስ።
LUK 13:17 ኢ ሄሳ ኦዲዳ ዎዴ ኤቄቴይሳቲ ኡባይ ዬላቲዶሶና። ሺን ኣሳ ኡባይ ኢ ኦꬂዳ ማላሊሲያ ኦሶ ኡባን ኡፋይቲዶሶና።
LUK 13:18 ሄሳፌ ጉዬ፥ ዬሱሲ ሃይሳዳ ያጊስ፥ «ፆሳ ካዎቴꬃይ ኣይ ዳኒ? ኢያ ኣይቢራ ዳኒሶ?
LUK 13:19 ፆሳ ካዎቴꬃይ ኢሲ ኣሲ ባ ጎሻን ቶኪዳ ዎላ ኣይፌ ሜላ። ኢ ዲጪዲ ሚꬂ ጊዲስ። ሳሎ ካፎቲ ኢያ ታሺያ ቦላ ሼምፒዶሶና።
LUK 13:20 ቃሲ፥ «ፆሳ ካዎቴꬃ ኣይቢራ ዳኒሶ?
LUK 13:21 ኢሲ ማጫሲያ ዳሮ ꬊሌራ ዋላካዳ ሙኑቂዳ ጉꬃ ኢርሾ ዳኔስ» ያጊስ።
LUK 13:22 ሄሳፌ ጉዬ፥ ዬሱሲ ዬሩሳላሜ ቢሼ ኢ ካንꬂያ ኦጊያን ዴዒያ ካታማታኒኔ ጉታታን ታማርሲሼ ኣꬊስ።
LUK 13:23 ኢሲ ኣሲ ዬሱሳኮ፥ «ጎዳው፥ ኣታናይ ጉꬃ ኣሳ ፃላሌ?» ያጊዲ ኦይቺስ። ዬሱሲ ኤንታኮ፥
LUK 13:24 «ሲዒቴ፥ ፁንꬃ ዉላራ ጌላናው ባፄቲቴ። ዳሮቲ ጌላናው ኮዮሶና ሺን ኤንታው ሃኔና።
LUK 13:25 ኬꬃዋይ ዴንዲዲ ዉላ ጎርዲዳፔ ጉዬ ‹ኑስ ዶያርኪ› ያጊሼ ካሬን ኤቂዲ ፄሲ ኦይኬታ። ሺን ኢ፥ ‹ሂንቴ ኦኔኮኔ ኣዉፔ ዪዳኮ ታ ኤሪኬ› ጊዲ ዛራና።
LUK 13:26 ሄ ዎዴ ሂንቴ፥ ‹ኔራ ዎላ ሚዳ፥ ኡዪዳ፥ ኑ ዳባባንካ ታማርሳዳሳ› ያጋና።
LUK 13:27 «ኢ ዛሪዲ፥ ‹ሂንቴ ኦኔኮኔ ኣዉፔ ዪዳኮ ኤሪኬ። ሂንቴኖ፥ ጌላቶ ታፔ ሃኪቴ› ያጋና።
LUK 13:28 ኣብራሃሜ፥ ዪሳቃ፥ ያይቆባኔ ናቤታ ኡባ ፆሳ ካዎቴꬃን ቤዓና፥ ሺን ሂንቴ ካሬን ዎꬊዲ ኣቲያ ዎዴ ሂንቴው ዬሆኔ ኣቼ ጋርጬꬂ ጊዳና።
LUK 13:29 ኣሳይ ዶሎሃፔ፥ ዉሎሃፔ፥ ፑዴሃፔኔ ዱጌሃፔ ዪዲ ፆሳ ካዎቴꬃን ጊቢራ ቦላ ኡታና።
LUK 13:30 ሄሳ ጊሾ፥ ሃዒ ዴꬃን ጉዬ ጊዲዳይሳታፔ ሲንꬄ ጊዳናይሳቲ፥ ሲንꬄ ጊዲዳይሳታፔ ጉዬ ጊዳናይሳቲ ዴዖሶና» ያጊስ።
LUK 13:31 ሄ ዎዴ ፋሪሳዌታፔ ኢሶቲ ኢሶቲ ዪዲ፥ «ሄሮዲሲ ኔና ዎꬋናው ኮያ ጊሾ ሃ ቤሳፌ ዴንዳዳ ባ ጊዶሶና።
LUK 13:32 ኢ ዛሪዲ፥ «ቢዲ፥ ሄ ዎርካናስ ሄኮ፥ ‹ሃቺኔ ዎንቶ ቱና ኣያናታ ኬሳና፥ ሃርጋንቾታ ፓꬃና፥ ሄꬓንꬆ ጋላሳን ኩሻ ቦላ ጋካና› ያጊስ ጊቴ።
LUK 13:33 ሃኖፔ ኣቲን፥ ናቤይ ዬሩሳላሜፔ ካሬን ሃይቃናው ቤሴና። ሄሳ ጊሾ፥ ሃቺ፥ ዎንቶኔ ዎንቲ ፔዒን ሄ ቤሳ ባናው ዴንዳስ።
LUK 13:34 «ዬሩሳላሜ፥ ዬሩሳላሜ፥ ናቤታ ዎꬊያሬ፥ ኔኮ ኪቴቲዳይሳታ ሹቻን ጫዲያሬ፥ ኩቶይ ባ ናይታ ባ ቄፊያፔ ጋርሳን ሺሺያዳ ኔ ናይታ ታ ቄሲያፔ ጋርሳን ኣፑን ቶሆ ሺሻናው ኮያዲና፥ ሺን ሂንቴ ኢፃስ ጊዴታ።
LUK 13:35 ታ ሂንቴው ኦዳይስ፤ ሂንቴ ኬꬃይ ካይሳታና። ጎዳ ሱንꬃን ዬይሲ ኣንጄቲዳይሳ ሂንቴ ጋና ጋካናው ታና ዴሜኬታ» ያጊስ።
LUK 14:1 ኢሲ ሳምባታ ጋላስ ዬሱሲ ኢሲ ፋሪሳዌታ ሃላቃ ሶ ካꬂ ማናው ጌሊያ ዎዴ ኣሳይ ጫዲ ፄሎሶና።
LUK 14:2 ሄ ቤሳን ሻዉሄ ሃርጌን ዋዬቲያ ኢሲ ኣሲ ኢያው ሲንꬃ ባጋራ ዚንዒስ።
LUK 14:3 ዬሱሲ ፋሪሳዌታኮኔ ሂጌ ኣስታማሬታኮ፥ «ሳምባታ ጋላስ ሃርጋንቾ ፓሶይ ዎጌዬ ዎጋ ጊዴኔ?» ያጊዲ ኦይቺስ።
LUK 14:4 ኤንቲ ሲዒ ጊዶሶና። ዬሱሲ ሃርጌቲያ ኡራ ቦቺ ፓꬂዲ ሞይዚስ።
LUK 14:5 «ቃሲካ ሂንቴፌ ኢሱዋስ ናዒ ዎይኮ ቦሪ ሳምባታ ጋላስ ኣፎን ዉሊኮ ኤሌሲዲ ኬሶናይ ኦኔ?» ያጊዲ ኦይቺስ።
LUK 14:6 ኤንቲ ኢሲባካ ዛራናው ዳንዳዒቦኮና።
LUK 14:7 ዬሱሲ ኢማቱዋስ ፄጌቲዳይሳቲ ቦንቾ ቤሲ ዶሪሺን ቤዒዲ፥ ሃ ሌሚሱዋ ኦዲስ፡
LUK 14:8 «ኢሲ ኣሲ ኔና ያጋኖ ፄጊኮ ቦንቾ ቤሳን ኡቶፋ። ኔፔ ኣꬊ ቦንቼቲያ ኣሲ ፄጌታናው ዳንዳዔስ።
LUK 14:9 ሂንቴና ናምዓታካ ፄጊዳይሲ ዪዲ፥ ‹ኔ ቤሳ ሃ ኢማꬃስ ዬዳ› ያጊያ ዎዴ ኔኒ ዬላታሼ ዚቃ ቤሲ ዎꬋሳ።
LUK 14:10 ጊዶሺን፥ ኔ ፄጌቲዳ ዎዴ ኮይሮታዳ ዚቃ ቤሲ ቤዓዳ ኡታ። ፄጎይሲ ዪዲ፥ ‹ታ ላጊያው፥ ሃ ቦንቾ ቤሳን ኡታ› ያጋና። ሄ ዎዴ ኔራ ኢሲፌ ፄጌቲዳ ኣሳ ኡባ ሲንꬃን ኔ ቦንቼታና።
LUK 14:11 ባና ꬎቁ ꬎቁ ኦꬂያ ኡባይ ካዉያና፤ ባና ዚቂ ዚቂ ኦꬂያ ኡባይ ꬎቁ ꬎቁ ጋና።»
LUK 14:12 ቃሲ ዬሱሲ ኢያ ሞኪዳ ኬꬃ ኣዋኮ፥ «ቁማ ዎይኮ ካሆ ኢማቶ ፄጊያ ዎዴ ኔኒ ኩሼ ዛሮ ፄጎና ሜላ ኔ ላጌታ ዎይኮ ኔ ኢሻታ ዎይኮ ኔ ዳቦታ ዎይኮ ኔ ዱሬ ሾሮታ ኢማቶ ፄጎፓ።
LUK 14:13 ጊዶሺን፥ ኔ ኢማቶ ጊጊሲዳ ዎዴ ማንቆታ፥ ዎቤታ፥ ጉንዳታኔ ቆቄታ ፄጋ፤ ኔኒ ኣንጄታና።
LUK 14:14 ሃይሳቲ ኩሼ ዛራናው ዳንዳዖና ጊሾ ኩሼ ዛሮይ ጌሻታ ዴንዶ ጋላሳን ኔው ሲማና» ያጊስ።
LUK 14:15 ዬሱሳራ ዎላ ኢማቶ ቦላ ኡቶይሳታ ጊዶፌ ኢሶይ ሄሳ ሲዒዲ፥ «ፆሳ ካዎቴꬃን ኢማቶ ቦላ ኡቴይሲ ኣንጄቲዳይሳ» ያጊስ።
LUK 14:16 ዬሱሲ፥ «ኢሲ ኣሲ ጊታ ኢማቶ ጊጊሲዲ ዳሮ ኣሳታ ፄጊስ።
LUK 14:17 ኢማቶይ ሞኬቲያ ሳቴይ ጋኪያ ዎዴ ፄጌቲዳ ኢማꬃታ፥ ‹ሄኮ ኡባባይ ጊጊስ፥ ሃ ዪቴ› ያጊዲ ፄጋናዳ ባ ኣይሊያ ኪቲስ።
LUK 14:18 «ሺን ኡባይካ ባንታ ጋሶ ጋሶ ሜꬊዶሶና። ኢሶይ፥ ‹ሃዒ ቡሮ ጋዴ ሻሚዳ ጊሾ ባዳ ቤዓናው ኮሼስ ሃያና ታና ኣጋርኪ ያጋ› ያጊስ።
LUK 14:19 ሃንኮይ፥ ‹ኢቻሹ ዋꬃ ቦሪ ሻማስ ኤንታና ዋፃ ቤዓና ጊሾ ሃያና ታና ላንጮፋ› ያጊስ።
LUK 14:20 ቃሲ ሃራይ፥ ‹ታኒ ቡሮ ሜዳን ዴዒያ ጊሾ ያናው ዳንዳዒኬ› ያጊስ።
LUK 14:21 «ኣይሌይ ሲሚ ዪዲ ሄ ኡባ ባ ጎዳስ ኦዲስ። ሄ ዎዴ ያጋኖ ኣዋይ ሃንቄቲዲ ኣይሊያኮ፥ ‹ኤሌሳዳ ካታማን ዴዒያ ዎጋ ኦጌታኔ ዳጋላታ ባዳ፥ ማንቆታ፥ ዎቤታ፥ ቆቄታኔ ጉንዳታ ሃ ኤሃ› ያጊስ።
LUK 14:22 «ኣይሌይ፥ ‹ታ ጎዳው፥ ኔ ኪቲዳይሲ ኡባይ ፖሌቲስ፥ ሺን ሃዒካ ቤሲ ዴዔስ› ያጊስ።
LUK 14:23 «ጎዳይ ኣይሊያኮ፥ ‹ሆሮጋታ ቦላኔ፥ ጋዴ ጊዶ ኦጌታ ኬያ፥ ታ ኬꬃይ ኩማና ጋካናው ዴሚዳ ኡባ ያና ሜላ ኦꬃ።
LUK 14:24 ታ ሂንቴው ኦዳይስ፤ ኢማቶቲዳይሳታፔ ኦኒካ ታ ጊቢራፔ ሞናይሳ ኤሪቴ› ጊስ» ያጊስ።
LUK 14:25 ዳሮ ኣሳይ ኢያራ ዎላ ቢሺን ዬሱሲ ኤንታኮ ጉዬ ሲሚዲ፥
LUK 14:26 «ታኮ ያ ኡባይ ባ ኣዋኔ ባ ኣዪው፥ ባ ማቺዉኔ ባ ናይታ፥ ባ ኢሻታኔ ባ ሚቼታ፥ ሃሪ ኣቶሺን ባ ዴዑዋ ኢፆናይ ታ ታማሬ ጊዳናው ዳንዳዔና።
LUK 14:27 ባ ማስቃሊያ ቶኪዲ ታና ካሎናይ ታ ታማሬ ጊዳናው ዳንዳዔና።
LUK 14:28 «ሂንቴፌ ኢሲ ኣሲ ሹቻ ኬꬂ ኬፃናው ኮይኮ፥ ኬꬃ ኬፂዲ ኦንጋናው ኣይ ሜላ ሚሼ ኮሺያኮ ኮይሮቲዲ ኤራናው ቆፒ ቤዖናይ ኦኔ?
LUK 14:29 ሄሳ ጊዶና ኢፂኮ፥ ሃ ኡራይ ባሶ ሹቻ ሂፂን ቁስቴꬂ ፆኒኮ፥
LUK 14:30 ቤዒያ ኡባይ፥ ‹ሃ ኡራይ ጊምቤꬂ ኦይኪን ቁስታናው ኢያ ፆኒስ› ያጊዲ ቦሮሶና።
LUK 14:31 «ዎይኮ ኢሲ ካዎይ ሃራ ካዎራ ኦሌታናው ዴንዲሼ ላታሙ ሙኩሉ ኦላንቾታ ኤኪ ያ ካዉዋራ ታሙ ሙኩሉ ኦላንቾታራ ኤቄታናው ዳንዳዓናይሳኔ ዳንዳዖናይሳ ኡቲዲ ዞሬቶናይ ኦኔ?
LUK 14:32 ኤቄታናው ዳንዳዔቶናባ ጊዲኮ፥ ሄ ሃራ ካዉዋራ ሃሆን ዴዒሺን ጊጋናው ኮይሮቲዲ ጪማ ዬዲዲ ኦይቼስ።
LUK 14:33 ሄሳዳካ፥ ሂንቴፌ ኦኒካ ባው ዴዒያባ ኡባ ኣጎና ኢፂኮ ታ ታማሬ ጊዳናው ዳንዳዔና።
LUK 14:34 «ማፂኔይ ሎዖ፥ ሺን ማፂኔይ ባ ማልዑዋ ኣጊኮ፥ ዋኒዲ ማፂኔ ጌቴታናው ዳንዳዒ?
LUK 14:35 ቢታቴꬃስካ ኣራዳቴꬃስካ ማዶናባ ጊዲያ ጊሾ ዎራ ዬጌቴስ። ሂዛ፥ ሲዒያ ሃይꬂ ዴዒያ ኣሲ ሲዖ» ያጊስ።
LUK 15:1 ኢሲ ጋላስ ቃራፃ ቃንፄይሳቲኔ ናጋራንቾቲ ዬሱሳ ቲሚርቲያ ሲዓናው ኢያ ዩሹዋን ሺቂዶሶና።
LUK 15:2 ሺን ፋሪሳዌቲኔ ሂጌ ኣስታማሬቲ፥ «ሃይሲ ኡራይ ናጋራንቾታ ሺሺዲ ኤኬስ፥ ኤንታራ ኢሲፌ ሜስ» ያጊዲ ዙዙሚዶሶና።
LUK 15:3 ዬሱሲ ያጊዲ ሃይሳ ሌሚሶ ኤንታው ኦዲስ፡
LUK 15:4 «ሂንቴ ጊዶፌ ኢሱዋስ ፄቱ ዶርሳቲ ዴዒያባ ጊዲኮ ኤንታፌ ኢሶይ ꬋዪኮ ኡዱፉን ታማኔ ኡዱፉናታ ባዞን ኣጊዲ ꬋዮይሳ ዴማና ጋካናው ኮዮናይ ኦኔ?
LUK 15:5 ዴሚዳ ዎዴ ኡፋይቲዲ ባ ጋናን ቶኪዲ፥
LUK 15:6 ባ ሶ ሲሜስ። ባ ላጌታኔ ሾሮታ ኢሲፌ ፄጊዲ፥ ‹ꬋዪዳ ታ ዶርሳ ዴማስ፥ ታራ ኢሲፌ ኡፋይቲቴ› ያጌስ።
LUK 15:7 ሄሳዳካ፥ ማሮቲ ኮሾና ኡዱፉን ታማኔ ኡዱፉን ፂሎታፔ ኣꬂዲ ማሮታን ጌሊያ ኢሲ ናጋራንቹዋ ጋሶን ሳሎን ጊታ ኡፋይሲ ጊዴስ።
LUK 15:8 «ዎይኮ ታሙ ቢሪ ዴዒያ ኢሲ ማጫሲያ ታማፌ ኢሲያ ꬋዪኮ ዴማና ጋካናው ፆምፔ ኦይꬃዳ ኬꬃ ፒታዳ ሚንꬃ ኮዮናራ ኦኔ?
LUK 15:9 ዴሚዳ ዎዴ ባ ላጌታኔ ባ ሾሮታ ፄጋዳ ‹ꬋዪዳ ታ ኢሲ ቢራ ዴሚዳ ጊሾ ታራ ኡፋይቲቴ› ያጋዉሱ።
LUK 15:10 ሲዒቴ፥ ሄሳ ሜላ ኢሲ ማሮቴꬃን ጌሊያ ናጋራንቹዋን ፆሳ ኪታንቾታ ሲንꬃን ኡፋይሲ ጊዴስ» ያጊስ።
LUK 15:11 ዛሪዲ ዬሱሲ፥ «ኢሲ ኡራስ ናምዑ ናይቲ ዴዖሶና።
LUK 15:12 ኤንታፌ ካሎ ናዓይ ባ ኣዋኮ፥ ‹ታ ኣዋው፥ ኔ ሻሉዋፔ ታ ጊሹዋ ታው ኢማ› ያጊስ። ኣዋይ ባ ሻሉዋ ባ ናይታስ ሻኪስ።
LUK 15:13 ጉꬃ ጋላሳፔ ጉዬ ካሎ ናዓይ ባ ጊሹዋ ኡባ ቃቺ ኤኪዲ ሃሆ ቢታ ቢስ። ያን ኣልታጫን ሻሉዋ ቶቺዲ ኦንጊስ።
LUK 15:14 ኢ ባው ዴዒያባ ኡባ ዉርሲዳፔ ጉዬ ሄ ቢታ ኡባን ሚኖ ኮሺ ኬዪን ሜቶቲስ።
LUK 15:15 ሄሳ ጊሾ፥ ሄ ቢታ ኣሳፔ ኢሱዋ ሶ ጋታ ጌሊስ። ኡራይ ኢያ ጉዱንꬆ ሄማና ሜላ ባ ሞꬃ ዬዲስ።
LUK 15:16 ጉዱንꬆቲ ሚያ ሃርቁዋፌ ማናው ኣሞቲስ፥ ሺን ኢዮካ ኢያው ኢሚያ ኣሲ ቤንቲቤና።
LUK 15:17 ዎዛኒ ሲሚን፥ ‹ኣፑን ታ ኣዋ ኣይሌታስ ካꬂ ዎራ ዎꬊን ታ ሃይሳን ኮሻራ ሃይቃናው ጋካዲና?›
LUK 15:18 ዴንዳዳ ታ ኣዋኮ ባዳ፥ ‹ታ ኣዋው፥ ሳሎን ፆሳ፥ ሳዓን ኔና ቆሃስ።
LUK 15:19 ሂዛፔ ኔ ናዓ ጌቴታዳ ፄጌታናው ታው ቤሶና ጊሾ ኔ ሶን ዴዒያ ኣይሌታፔ ኢሱዋዳ ታና ፓይዳ› ያጋና» ያጊስ።
LUK 15:20 ሄሳ ጊሾ፥ ዴንዲዲ ባ ኣዋኮ ቢስ። «ሃኖሺን፥ ኢ ቡሮ ሃሆን ዴዒሺን ኣዋይ ቃꬌቲዲ፥ ኢያኮ ዎፂ ቢዲ ኢዲሚዲ ዬሪስ።
LUK 15:21 ናዓይካ፥ ‹ታ ኣዋው ሳሎን ፆሳ፥ ሳዓን ኔና ታ ቆሃስ። ሂዛፔ ኔ ናዓ ጌቴታዳ ፄጌታናው ቤሲኬ› ያጊስ።
LUK 15:22 «ኢያ ኣዋይ ኣይሌታ ፄጊዲ፥ ‹ኤሌሲዲ ኡባፌ ሎዖ ጊዲዳ ማዖ ኤሂዲ ኢያ ማይዚቴ፤ ኢያ ቢራꬌን ሳጋዮ፥ ኢያ ቶሁዋን ጫማ ኣꬂቴ።
LUK 15:23 ሞꬎ ጋታርሜንꬆ ኤሂዲ ሹኪቴ፥ ሞስ፥ ኡፋይቶስ።
LUK 15:24 ታ ናዓይ ሃይሲ ሃይቂስ፥ ሺን ሃዒ ፓፂስ፤ ꬋይስ፥ ሺን ቤንቲስ› ያጊስ። ሄሳፌ ጉዬ፥ ኡፋዬቴꬂ ኦይኪዶሶና።
LUK 15:25 «ሄ ዎዴ ባይራ ናዓይ ጎሻ ጋዴን ዴዔስ። ያፔ ዪሼ ሶ ማቲሺን ዬꬂኔ ጉፋ ጊርሲ ሲዒስ።
LUK 15:26 ኢ፥ ኣይሌታፔ ኢሱዋ ፄጊዲ ሃኒያባይ ኣይቤኮ ኤራናው ኦይቺስ።
LUK 15:27 ኣይሌይ፥ ‹ኔ ኢሻይ ሳሮ ዪዳ ጊሾ ኔ ኣዋይ ሞꬎ ጋታርሜንꬆ ኢያው ሹኪስ› ያጊስ።
LUK 15:28 «ባይራ ኢሻይ ዪሎቲዲ ሶ ጌላናዉካ ኮዪቤና። ኣዋይ ካሬ ኬዪዲ ሶ ጌላና ሜላ ኢያ ዎሲስ።
LUK 15:29 ሺን ኢ ባ ኣዋኮ፥ ‹ሄኮ፥ ሃይሳ ሜላ ላይꬂ ታ ኔው ኣይሌታዳ ኔ ኪታፔ ኢሱዋካ ፓጪሶና ኔው ኪቴቲን ታ ታ ላጌታራ ኡፋይታና ሜላ ሃሪ ኣቶሺን ኢሲ ላቃ ዴሼ ኢማባካ።
LUK 15:30 ሃኖሺን፥ ሃይሲ ኔ ናዓይ ኔ ሻሉዋ ላይማታራ ዶሚሲዲ ዪን ሞꬎ ጋታርሜንꬆ ሹካዳሳ› » ያጊስ።
LUK 15:31 «ኣዋይካ፥ ‹ታ ናዓው፥ ኔኒ ኡባ ዎዴ ታራ ዴዓሳ፥ ታባይ ኡባይ ኔሳ።
LUK 15:32 ሃይሲ ኔ ኢሻይ ሃይቂስ፥ ሺን ፓፂስ፤ ꬋይስ፥ ሺን ቤንቲስ። ሄሳ ጊሾ፥ ዳሮ ኡፋይታናው ቤሴስ› ያጋና» ያጊስ።
LUK 16:1 ዬሱሲ ባ ታማሬታኮ፥ «ኢሲ ዱሬ ኡራስ ኢያፔ ጋርሳራ ኢሲ ሹማይ ዴዔስ። ሄ ሹማይ ባ ጎዳ ሻሉዋ ቶቼስ ያጊያ ዎሬይ ኬꬃዋ ጋኪስ።
LUK 16:2 ኬꬃዋይ ሹማ ፄጊሲዲ፥ ‹ታኒ ዎይጊያባ ሲዓዲና? ሂዛፔ ኔኒ ታ ኬꬃስ ሹማ ጊዳዳ ኦꬃናው ዳንዳዖና ጊሾ ታ ሻሉዋ ታው ሼꬋ› ያጊስ።
LUK 16:3 «ሄ ሹማይካ ባ ዎዛናን ሃይሳዳ ያጊዲ ቆፒስ። ‹ታ ጎዳይ ታና ሹማቴꬃፌ ዎꬃና ሃኔስ፥ ጎያ ኣቃናው ዎልቂ ባዋ፥ ዎሳ ማናው ዬላዬስ፤ ያቲን ታ ዋኖ?
LUK 16:4 ሹማቴꬃፌ ታ ዎꬊያ ዎዴ ኣሳይ ታና ሞካና ሜላ ኦꬃናባ ታ ኤራይስ› ያጊስ።
LUK 16:5 «ሄሳ ጊሾ፥ ኢያ ጎዳ ኣጮይ ዴዒያ ኣሳ ኢሱዋ ኢሱዋ ፄጊ ኤሂዲ ኮይሮ ኡራኮ፥ ‹ኔ ቦላ ታ ጎዳ ኣጮይ ኣይ ሜሊ ዴዒ?› ያጊዲ ኦይቺስ።
LUK 16:6 «ኢ፥ ‹ላታሙ ባርሜሌ ዛይቴ ኣጮይ ዴዔስ› ያጊስ። «ሹማይ፥ ‹ዉሌ ዋርቃቲያ ሄዔ፥ ኤሌሳዳ፥ ታሙ ባርሜሌ ዛይቴ ኣጮይ ዴዔስ ጋዳ ፃፋ› ያጊስ።
LUK 16:7 «ሄሳፌ ካሊዲ ናምዓንꬁዋኮ፥ ‹ኔው ኣፑኒ ዴዒ?› ያጊስ። «ኢ፥ ‹370 ኩንታሌ ጊስቴ ኣጮይ ዴዔስ› ያጊስ። «ሹማይ፥ ‹ኔ ዉሌ ዋርቃቲያ ሄዔ፥ ኤሌሳዳ፥ 296 ኩንታሌ ያጋዳ ፃፋ› ያጊስ።
LUK 16:8 ኬꬃዋይ ኣማኔቲቦና ሹማ ኢያ ቢላማቴꬃስ ናሺስ። ሃ ኣላሚያ ናይቲ ኣሴ ኦይꬃን ፖዖ ናይታፔ ኣꬊዳ ዎዛናማታ።
LUK 16:9 «ሄሳ ጊሾ፥ ታ ሂንቴው ኦዳይስ፤ ሃ ኣላሚያ ሚሼይ ዉሪያ ዎዴ ሜሪና ኬꬃን ሞኬታና ሜላ ሃ ሚሺያራ ሂንቴው ላጌታ ሻሚቴ።
LUK 16:10 ኡባፌ ጉꬃባን ኣማኔቲዳይ ዳሮባን ኣማኔቲዳይሳ ጊዴስ። ቃሲ ኡባፌ ጉꬃባን ኣማኔቶናይሲ ዳሮባን ኣማኔቴና።
LUK 16:11 ሂዛ፥ ሃ ኣላሚያ ሚሼን ሂንቴ ኣማኔቶና ኢፂኮ ቱማ ሚሼ ሂንቴው ኦኒ ሃዳራ ኢማኔ?
LUK 16:12 ሂንቴ ሃራ ኣሳ ሚሼን ኣማኔቶና ኢፂኮ፥ ሂንቴ ቡዞ ሚሼ ሂንቴው ኦኒ ኢማኔ?
LUK 16:13 «ኢሲ ኣይሌይ ናምዑ ጎዳታስ ሃሬታናው ዳንዳዔና። ኢሱዋ ኢፂኮ ሃንኩዋ ዶሴስ ዎይኮ ኢሱዋኮ ሺቂኮ ሃንኩዋ ካꬌስ። ሄሳዳካ፥ ሂንቴ ፆሳሲኔ ሚሼስ ሃሬታናው ዳንዳዔኬታ።»
LUK 16:14 ሚሼ ዶሲያ ፋሪሳዌቲ ሄሳ ሲዒዳ ዎዴ ዬሱሳ ቄልቂሲዶሶና።
LUK 16:15 ኢ፥ «ሂንቴ ሂንቴና ኣሳ ሲንꬃን ፂሊሴታ፥ ሺን ፆሳይ ሂንቴ ዎዛና ኤሬስ። ኣሳ ሲንꬃን ቦንቼቲዳይሲ ፆሳ ሲንꬃን ቦሬቲዳይሳ።
LUK 16:16 «ሙሴ ሂጌይኔ ናቤታ ኪታይ ዮሃኒሳ ጋካናው ሂንቴው ኦዴቲሼ ጋምዒስ። ሄሳፌ ጉዬ፥ ፆሳ ካዎቴꬃ ዎንጌላይ ሳባኬቲሼ ጋምዒስ። ኣሲ ኡባይ ያ ጌላናው ዳፌቴስ።
LUK 16:17 ጊዶሺን፥ ሂጊያፌ ኢሲ ላፋ ፒዳሌይ ኣታናፔ ሳሎይኔ ሳዓይ ኣꬌይሲ ካዉዬስ።
LUK 16:18 «ባ ማቺው ዬዲዲ ሃራ ኤኪያ ኡባይ ላሜስ። ባ ኣዚናፔ ኣንጄቲዳሮ ኤኬይሲካ ላሜስ» ያጊስ።
LUK 16:19 «ኣልዖኔ ኣሌቆ ኣፊላ ማዒያ፥ ሳዒ ኢንጄቲን ጋላስ ጋላስ ኡፋይሳን ዴዒያ ኢሲ ዱሬ ኣሲ ዴዔስ።
LUK 16:20 ሃሪ ቃሲ ኣሳቴꬃይ ኩሜꬂ ማዱንፂዳ ኢሲ ኣላዛራ ጌቴቲያ ማንቆይ ሄ ዱሬ ኡራ ካሬን ዬጌቲዲ ኣቲዳይሲ ዴዔስ።
LUK 16:21 ኮሻፔ ዴንዶይሳን ዱሬ ኡራ ጋይታፔ ዎꬊያ ቲፊያ ማናው ኣሞቲሼ ዴዔስ። ሃሪ ኣቶሺን፥ ካናቲ ዪዲ ኢያ ማዱንꬃ ላጮሶና።
LUK 16:22 «ሄ ማንቆይ ሃይቂስ፤ ኪታንቾቲ ኢያ ኣብራሃሜ ኪዑዋ ኤፊዶሶና። ቃሲ ዱሬ ኡራይካ ሃይቂዲ ሞጌቲስ።
LUK 16:23 ሲዖሌን ኡንዔቲዲ ዴዒሼ ꬎቁ ጊዲ ሃሆን ኣብራሃሜኔ ኢያ ኪዖን ዴዒያ ኣላዛራ ቤዒስ።
LUK 16:24 ኢ፥ ‹ኣዋው ኣብራሃሜ፥ ታው ቃꬌታርኪ፤ ሃ ላጮ ታማን ኡንዔታዳ ዴዒያ ጊሾ ኣላዛሪ ባ ቢራꬊያ ሃꬃን ዬዲዲ ታ ኢንፃርሳ ላኮꬃና ሜላ ሃያና ኢያ ዬዳርኪ› ያጊዲ ዋሲስ።
LUK 16:25 «ሺን ኣብራሃሜይ ኢያኮ፥ ‹ታ ናዓው፥ ኔ ሳዓን ዴዒያ ዎዴ ሎዖባታ ኤኪዳይሳ፥ ቃሲ ኣላዛሪ ኢታባታ ኤኪዳይሳ ኣኬካ። ሺን ሃዒ ኢ ሃይሳን ኡፋይቴስ፥ ቃሲ ኔኒ ዋዬታሼ ዴዓሳ› ያጊስ።
LUK 16:26 ሃ ኡባፌ ኣꬊዲ፥ ‹ሃፔ ሂንቴኮ፥ ሂኒፔ ሃ ኑኮ ኣꬋናው ኮዬይሳቲ ፒኖና ሜላ ኑሲኔ ሂንቴስ ጊዶን ጊታ ኣፎይ ዴዔስ› ያጊስ።
LUK 16:27 «ዱሬ ኡራይ፥ ‹ኣዋው፥ ያኮ ኣላዛራ ታ ኣዋ ሶ ኪታና ሜላ ታ ኔና ዎሳይስ።
LUK 16:28 ታው ኢቻሹ ኢሻቲ ዴዒዶሶና፥ ኤንቲካ ሃ ዋዬ ቤሳ ዮና ሜላ ኤንታው ቢዲ ማርካቶ› ያጊስ።
LUK 16:29 «ሺን ኣብራሃሜይ፥ ‹ኤንታው ሙሴራኔ ናቤታራ ዴዖሶና፤ ኤንቲ ኦዲያባ ሲዖና› ያጊስ።
LUK 16:30 «ዱሬ ኡራይ፥ ‹ኣዋው ኣብራሃሜ፥ ሄሳꬆ ጊዴና፤ ኢሲ ኣሲ ሃይቆፔ ዴንዲዲ ቢኮ ኤንቲ ማሮታን ጌላና› ያጊስ።
LUK 16:31 «ኣብራሃሜይ፥ ‹ሙሴኔ ናቤታ ሲዖና ኢፂኮ፥ ሃሪ ኣቶሺን ሃይቆፔ ኢሲ ኣሲ ዴንዲ ኦዲኮካ ኣማኖኮና› ያጊስ።»
LUK 17:1 ዬሱሲ ባ ታማሬታኮ፥ «ኣሴ ꬉቤꬂዲ ናጋራን ጌልሲያባይ ዮና ኣጌና። ጊዶሺን፥ ናጋራን ጌላና ሜላ ኦꬂያ ኡራ ኣዬ» ያጊስ።
LUK 17:2 ሄ ኡራይ ካሎታፔ ኢሱዋ ባሌꬃናፔ ዎፃ ባ ቆꬌን ቃቺዲ ኣባን ዉሊኮ ኢያው ሎዖ።
LUK 17:3 ሄሳ ጊሾ ናጌቲቴ። «ኔ ኢሻይ ናጋራ ኦꬂኮ ሃንቄታ፤ ቂሮቲዲ ማሮቴꬃን ሲሚኮ፥ ኢያው ኣቶ ያጋ።
LUK 17:4 ኢሲ ጋላሳን ላፑን ቶሆ ቆሂዲ፥ ላፑን ቶሆ፥ ‹ታኒ ታ ባላ ኤራስ ታና ማራ› ያጊዲ ኔኮ ዪኮ ኢያው ኣቶ ጋ።»
LUK 17:5 ሃዋሬቲ ጎዳኮ፥ «ኣማኖ ኑስ ጉጃርኪ» ያጊዶሶና።
LUK 17:6 ጎዳይ፥ «ጋሼ ኣይፌ ሜላ ኣማኖይ ሂንቴው ዴዒኮ ‹ሃይሳ ዎላ ሾዴታዳ ኣባ ጊዶን ቶኬታ› ያጊኮ ሂንቴው ኪቴታና» ያጊስ።
LUK 17:7 ጉጂዲካ ዬሱሲ፥ «ሂንቴ ጊዶፌ ኢሱዋስ ጎሻንቾይ ዎይኮ ዶርሴ ሄሚያ ኣይሌይ ዴዒኮ ኦሶ ጋዴፔ ዎይኮ ዉዴፔ ሶ ሲሚያ ዎዴ ‹ኤሌ ሃያዳ ካꬂ ማናው ኡታ› ያጌይ ዴዒ?
LUK 17:8 ዴና፥ ‹ታው ካሆ ጊጊሳ፤ ታኒ ማዳ፥ ኡያዳ ኣጋና ጋካናው ኤቃዳ ሙዛ። ሄሳፌ ጉዬ፥ ኔኒ ቃሲ ማሳኔ ኡያሳ› ያጌኔዬ?
LUK 17:9 ሂዛ፥ ጎዳይ፥ ኣይሌይ ኪታ ፖሊዳ ጊሾ ኣንጂዬ?
LUK 17:10 ሄሳ ጊሾ፥ ሂንቴካ ኪቴቶይሳ ኡባ ፖሊዳ ዎዴ ‹ኑ ፓꬆና ኣይሌታ፤ ኦꬃናው ቤሲያ ኦሱዋ ፖሊዳ› ያጊቴ» ያጊስ።
LUK 17:11 ዬሱሲ ዬሩሳላሜ ቢሼ ሳማሪሲኔ ጋሊላ ቢታስ ጊዶራ ካንꬂዲ ኣꬊስ።
LUK 17:12 ኢሲ ጉታ ጌሊያ ዎዴ ባሮ ሃርጌን ኦይኬቲዳ ታሙ ኣሳቲ ኢያ ዴሚዶሶና። ኤንቲካ ሃሆን ኤቂዲ፥
LUK 17:13 «ጎዳ ዬሱሳ፥ ኑስ ቃꬌታርኪ» ያጊዲ ዋሲዶሶና።
LUK 17:14 ኢ ኤንታ ቤዒዳ ዎዴ «ቢዲ ሂንቴናቴꬃ ኣይሁዴ ካሂኔ ቤሲቴ» ያጊስ። ኤንቲ ኦጊያ ቦላ ቢሼ ፓፂዶሶና።
LUK 17:15 ኤንታፌ ኢሶይ ባ ፓፁዋ ቤዒዳ ዎዴ ꬎቁ ጊዳ ቃላን ፆሳ ቦንቺሼ ዬሱሳኮ ሲሚስ።
LUK 17:16 ኢ ሳማሬ ቢታ ኣሲ፥ ሺን ዬሱሳ ቶሁዋ ቦላ ጉፋኒዲ ኢያ ጋላቲስ።
LUK 17:17 ዬሱሲ፥ «ፓፂዳይ ታሙ ኣሳታ ጊዶኮናዬ? ያቲን፥ ኡዱፉናቲ ኣው ቢዶና?
LUK 17:18 ሃ ኣላጋ ኡራፔ ኣቲን ሃሪ ሲሚዲ ፆሳ ጋላቴይ ዴና ጉሴዬ?» ያጊዲ ኦይቺስ።
LUK 17:19 ኡራኮ፥ «ኔ ኣማኖይ ኔና ፓꬂስ፤ ዴንዳዳ ባ» ያጊስ።
LUK 17:20 ፋሪሳዌቲ፥ «ፆሳ ካዎቴꬃይ ኣዉዴ ያኔ?» ጊዲ ዬሱሳ ኦይቺዶሶና። ኢ፥ «ፆሳ ካዎቴꬃይ ቤንቲያ ማላን ዬና።
LUK 17:21 ቃሲካ ኢዮ፥ ‹ሃኒና ዎይኮ ሂኒና ያጋናው ዳንዳዔና። ኣይስ ጊኮ፥ ፆሳ ካዎቴꬃይ ሂንቴ ጊዶን ዴዔስ› » ያጊዲ ዛሪስ።
LUK 17:22 ዬሱሲ ባ ታማሬታኮ፥ «ኣሳ ናዓ ጋላሳታፔ ኢሱዋ ቤዓናው ሂንቴ ኣሞቲያ ዎዴይ ያና፥ ሺን ሂንቴ ቤዔኬታ።
LUK 17:23 ኣሳይ፥ ‹ኢ ያን ዴዔስ› ዎይኮ፥ ‹ሃይሳን ዴዔስ› ያጋና፥ ሺን ኤንታና ካሊዲ ቦፒቴ።
LUK 17:24 ዎልዓንꬂ ዎልዓሚዲ ሳሉዋ ጋፃፔ ጋፃ ፖዒሲያ ሜላ ኣሳ ናዓ ዩሳ ጋላሳይ ሄሳዳ ሃናና።
LUK 17:25 ሺን ሄሲ ሃናናፔ ሲንꬄ ኣሳ ናዓይ ዳሮ ዋያናዉኔ ሃ ዬሌቴꬃን ኢፄታናው ቤሴስ።
LUK 17:26 ኖሄ ዎዴ ሃኒዳይሳ ሜላ ኣሳ ናዓ ዎዲያንካ ሄሳዳ ሃናና።
LUK 17:27 ኖሄይ ማርካቢያን ጌሊዳ ቃማ ጋካናው ኣሳይ ሚሼኔ ኡዪሼ፥ ኤኪሼኔ ጌሊሼ ዴዒሺን ꬋዮ ሃꬃይ ዪዲ ኡባ ꬋይሲስ።
LUK 17:28 ሎፄ ላይꬃንካ ሄሳꬆ ሃኒስ። ኣሳይ ሚሼኔ ኡዪሼ፥ ሻሚሼኔ ባይዚሼ፥ ቶኪሼኔ ኬፂሼ፥ ጋምዒዶሶና።
LUK 17:29 ሎፄይ ሶዶሜፔ ኬዪዳ ጋላስ ዲኔ ጌቴቲያ ፁጊያባይ ሳሎፔ ቡኪዲ ኡባ ꬋይሲስ።
LUK 17:30 ኣሳ ናዓይ ቆንጪያ ዎዴካ ሄሳዳ ሃናና።
LUK 17:31 «ሄ ጋላሳን ኦኒካ ካሬን ዴዔይ ኬꬃ ጊዶን ዴዒያባ ኤካናው ሶ ጌሎፖ። ሄሳዳካ፥ ጋዴን ዴዒያ ኣሲ ኣይኮስካ ሶ ሲሞፎ።
LUK 17:32 ሎፄ ማቺው ኣኬኪቴ፤
LUK 17:33 ባ ሼምፒው ኣሻናው ኮያ ኣሲ ኦኒካ ꬋይሳና፤ ባ ሼምፒው ኣꬂ ኢሚያ ኦኒካ ኢ ኣሻና።
LUK 17:34 ታ ሂንቴው ኦዳይስ፤ ሄ ጋላሳን ናምዑ ኣሳቲ ኢሲ ኣርሳን ዚንዓና። ኢሶይ ኤኬታና፥ ሃንኮይ ኣታና።
LUK 17:35 ናምዑ ማጫሳቲ ዎላ ጋጪሺን ኢሲያ ኤኬታና፥ ሃንኪያ ኣታና።
LUK 17:36 ናምዑ ኣሳቲ ዎላ ጋዴን ጎዬይሳታፔ ኢሶይ ኤኬታና፥ ሃንኮይ ኣታና» ያጊስ።
LUK 17:37 ኤንቲ፥ «ጎዳው ኣው ኤኬታኔ?» ያጊዲ ኦይቺዶሶና። ኢ፥ «ባዉቲ ዴዒያ ቤሳን ኣንኮቲ ሺቆሶና» ያጊስ።
LUK 18:1 ዬሱሲ ባ ታማሬታ ኣዛሎና ኡባ ዎዴ ዎሳና ሜላ ታማርሳናው ኮዪዲ ያጊዲ ሌሚሶ ኦዲስ፡
LUK 18:2 «ኢሲ ካታማን ፆሳስ ያሼቶና ኣሳስካ ዬላቶና ኢሲ ዳይኒ ዴዔስ
LUK 18:3 ሄ ካታማን ኢሲ ኣምዒያ ዳዓዉሱ። ኢያካ፥ ‹ታዉኔ ታ ሞርኪያስ ጊዶን ዴዒያ ሞቱዋ ፒርዳ› ያጋዳ ኡባ ዎዴ ሄ ዳይናኮ ሲሜሬታዉሱ።
LUK 18:4 ዳይናይ ጉꬃ ዎዴስ ኢ ኦዳ ሲዖና ኢፂስ፥ ሺን ጉዬፔ ባ ዎዛናን፥ ‹ታኒ ፆሳስ ያዮና፥ ኣሳስ ዬላቶና ኢፂኮካ፥
LUK 18:5 ሃ ኣምዒያ ታና ዋይሲያ ጊሾ ኢው ፒርዳና፤ ያቶና ኢፂኮ ኡባ ዎዴ ያዳ ታና ሳሌꬃና› ያጊዲ ቆፒስ» ያጊስ።
LUK 18:6 ጎዳይካ፥ «ጌላ ዳይናይ ጊዳይሳ ሲዒዴታ፤
LUK 18:7 ፆሳይ ቃማኔ ጋላስ ኢያኮ ዋሲያ ባ ዶሪዳይሳታስ ፒርዴኔዬ? ኤንታና ማዳናው ጋምዒዬ?
LUK 18:8 ታ ሂንቴው ኦዴይሳ ሲዒቴ፥ ኤሌሲዲ ፒርዳና። ጊዶሺን፥ ኣሳ ናዓይ ያ ዎዴ ሳዓ ቦላ ኣማኖ ዴማንዴሻ?» ያጊስ።
LUK 18:9 ቃሲ ዛሪዲ፥ ዬሱሲ፥ ባንታና ፂሎ ኣሳዳ ኦꬂዲ ጬቄቴይሳታሲኔ ሃራታ ካꬌይሳታስ ሃይሳዳ ያጊዲ ሌሚሶ ኦዲስ፡
LUK 18:10 «ናምዑ ኣሳቲ ዎሳናው ፆሳ ኬꬂ ቢዶሶና። ኢሶይ ፋሪሳዌ ሃንኮይ ቃሲ ቃራፃ ቃንፂሲያ ኣሲ።
LUK 18:11 ፋሪሳዌይ ኤቂዲ ባው ዎሲሼ፥ ‹ፆሳው ታኒ ሃራታ ሜላ ቦንቃንቾ፥ ጌላኔ ላይማቲያ ኣሲ፥ ኣꬊዳ ቃሲ ሃ ቃራፃ ቃንፂሲያ ኡራ ሜላ ጊዶና ጊሾ ኔና ጋላታይስ።
LUK 18:12 ሳሚንታፌ ናምዑ ቶሆ ፆማይስ፥ ታ ዴሚያባ ኡባፌ ኣሲራታ ኬሳይስ› ያጊስ።
LUK 18:13 «ሺን ቃራፃ ቃንፂሴይሲ ቃሲ ሃሆን ኤቂዲ ሃሪ ኣቶሺን ሳሎ ꬎቁ ጊዲ ፄላናዉካ ያዪዲ ባ ቲራ ኢጪሼ ‹ፆሳው፥ ታና ናጋራንቹዋ ማራርኪ› ጊዲ ዎሲስ።
LUK 18:14 ታ ሂንቴው ኦዴይሳ ሲዒቴ፤ ፋሪሳዊያፔ ሃይሲ ቃራፃ ቃንፂሴይሲ ፆሳ ሲንꬃን ፂሎ ጊዲዲ ባ ሶ ሲሚስ። ኣይስ ጊኮ፥ ባና ꬎቁ ꬎቁ ኦꬂያ ኣሲ ካዉያና፥ ባና ካዉሺያ ኣሲ ꬎቁ ꬎቁ ጋና» ያጊስ።
LUK 18:15 ዬሱሲ ዮጋ ናይታ ቦላ ባ ኩሺያ ዎꬂዲ ኣንጃና ሜላ ኣሳይ ኢያኮ ኤሆሶና። ዬሱሳ ታማሬቲ ሄሳ ቤዒዲ ኣይስ ዬሱሳኮ ኤሄቲ ያጊዲ ካጪዶሶና።
LUK 18:16 ሺን ዬሱሲ ናይታ ባኮ ፄጊዲ፥ «ዮጋ ናይቲ ታኮ ያናይሳ ዲጎፊቴ፤ ዮ ጊቴ። ኣይስ ጊኮ፥ ፆሳ ካዎቴꬃይ ኤንታዳ ሃኒዳይሳታሳ።
LUK 18:17 ታኒ ሂንቴው ቱማ ኦዳይስ፤ ፆሳ ካዎቴꬃ ዮጋ ናይታꬆ ኤኮናይ ኦኒካ ያ ጌሌና» ያጊስ።
LUK 18:18 ኣይሁዴ ሃላቃታፔ ኢሶይ፥ «ኬሃ ኣስታማሪያው፥ ሜሪና ዴዑዋ ዴማናው ኣይ ኦꬆ?» ያጊዲ ኦይቺስ።
LUK 18:19 ዬሱሲ ኢያኮ፥ «ኣይስ ታና ኬሃው ያጋዳ ፄጋይ? ኢሲ ፆሳፌ ኣቲን ሃሪ ኬሂ ባዋ።
LUK 18:20 ላሞፋ፥ ዎꬎፓ፥ ካይሶቶፓ፥ ዎርዶ ማርካቶፋ፥ ኔ ኣዋኔ ኔ ኣዪው ቦንቻ ያጊያ ኪታ ኤራይ» ያጊዲ ኦይቺስ።
LUK 18:21 ኡራይካ፥ «ሄሳታ ኡባ ታኒ ናዓቴꬃፌ ዶማዳ ናጋሼ ጋምዓስ» ያጊስ።
LUK 18:22 ዬሱሲ ሄሳ ሲዒዳ ዎዴ «ሂዛ፥ ኔው ኢሲባይ ፓጬስ፤ ኔው ዴዒያባ ኡባ ባይዛዳ ማንቆታስ ኢማ፤ ሳሎን ኔና ሻሎይ ናጌስ። ያታ ሲማዳ ታና ካላ» ያጊስ።
LUK 18:23 ሺን ኡራይ ሄሳ ሲዒዳ ዎዴ ኢያው ዳሮ ሻሎይ ዴዒያ ጊሾ ዳሮ ቂሮቲስ።
LUK 18:24 ዬሱሲ ኡራ ቤዒዲ፥ «ዱሬ ኣሳስ ፆሳ ካዎቴꬃ ጌሎይ ዋኒዲ ኡንዓንዴሻ?
LUK 18:25 ዱሬይ ፆሳ ካዎቴꬃ ጌላናይሳፌ ጊማሌይ ናርፔ ሉሆራ ካንꬄይሲ ካዉዬስ» ያጊስ።
LUK 18:26 ሄሳ ሲዒዳ ኣሳይ፥ «ሄሳ ጊዲኮ ኦኒ ኣታኔ?» ያጊዶሶና።
LUK 18:27 ዬሱሲ፥ «ኣሳስ ዳንዳዔቶናባይ ፆሳስ ዳንዳዔቴስ» ያጊስ።
LUK 18:28 ጴፂሮሲ፥ «ሄኮ ኑኒ ኑባ ኡባ ኣጊዲ ኔና ካሊዳ» ያጊስ።
LUK 18:29 «ዬሱሲ ቱማ ታ ሂንቴው ኦዳይስ፤ ፆሳ ካዎቴꬃስ ጊዲ ባ ኬꬃ ዎይኮ ባ ማቺው ዎይኮ ባ ኢሻታ ዎይኮ ባ ኣዋኔ ባ ኣዪው ዎይኮ ባ ናይታ ኣጊዳይ፤
LUK 18:30 ሃ ዎዲያን ዳኮ ዳሮ፥ ያና ኣላሚያን ሜሪና ዴዑዋ ኤኮናይ ኦኒካ ባዋ» ያጊስ።
LUK 18:31 ዬሱሲ ታማኔ ናምዓታ ባኮ ፄጊዲ፥ «ኣኔ ዬሩሳላሜ ቦስ፥ ናቤቲ ኣሳ ናዓባ ፃፊዳባ ኡባይ ያን ፖሌታና።
LUK 18:32 ኢ ኣይሁዴ ጊዶና ኣሳስ ኣꬊዲ ኢሜታና። ኤንቲ ኢያ ቶቻና፥ ጫያናኔ ኢያ ቦላ ጩታና።
LUK 18:33 ኢያ ጋራፊዳፔ ጉዬ ዎꬋና፥ ሺን ሄꬓንꬆ ጋላሳን ኢ ሃይቆፔ ዴንዳና» ያጊስ።
LUK 18:34 ሺን ኢያ ታማሬቲ ሄሳ ኡባፌ ኢሲባካ ኣኬኪቦኮና። ኢያ ፁራይ ኤንታው ቆሴቲዳ ጊሾ ኢ ዎይጊዳኮ ኤሪቦኮና።
LUK 18:35 ዬሱሲ ኢያርኮ ማታቲያ ዎዴ ኢሲ ቆቄ ኡራይ ኦጌ ጋፃን ኡቲዲ ዎሴስ።
LUK 18:36 ቆቄ ኡራይ ኣሳይ ሄ ቤሳራ ኣꬊሺን ሲዒዲ፥ «ኢ ኣይቤ?» ጊዲ ኦይቺስ።
LUK 18:37 ኤንቲ፥ «ናዚሬቴ ዬሱሲ ሃይሳራ ኣꬌስ» ያጊዶሶና።
LUK 18:38 ኢ፥ «ዳዊቴ ናዓው፥ ዬሱሳ፥ ታና ማራርኪ» ያጊዲ ዋሲስ።
LUK 18:39 ሲንꬄ ሲንꬄ ቢያ ኣሳቲ፥ «ሲዒ ጋ» ጊዲ ሃንቄቲዶሶና። ሺን ኢ፥ «ዳዊቴ ናዓው፥ ታና ማራ» ያጊዲ ዳርሲ ዋሲስ።
LUK 18:40 ዬሱሲ ኤቂዲ ኡራ ባኮ ኤሃና ሜላ ኪቲስ። ኡራይካ፥ ኢያኮ ሺቂን፥
LUK 18:41 «ታ ኔው ኣይ ኦꬃና ሜላ ኮያይ?» ያጊዲ ኦይቺስ። ቆቄይ፥ «ጎዳው ታ ፄላናው ኮያይስ» ያጊስ።
LUK 18:42 ዬሱሲ፥ «ፄላ፥ ኔ ኣማኖይ ኔና ፓꬂስ» ያጊስ።
LUK 18:43 ኡራይ ሶሁዋራ ፄሊ ኣጊስ። ፆሳ ቦንቺሼ ዬሱሳ ካሊስ። ኣሳ ኡባይ ሄሳ ቤዒዲ ፆሳ ጋላቲዶሶና።
LUK 19:1 ዬሱሲ ኢያርኮ ጌሊዲ ኣꬌስ።
LUK 19:2 ያን ዛኪዮሳ ጌቴቲያ ቃራፃ ቃንፂሴይሳታ ሃላቃይ ዴዔስ። ኢ ዳሮ ዱሬ።
LUK 19:3 ኢ ዬሱሲ ኦኔኮ ቤዓናው ኮዪስ። ኢ ቃንꬂ ጊዲያ ጊሾ ኣሳ ዳሮቴꬃፌ ዴንዶይሳን ዬሱሳ ቤዓናው ዳንዳዒቤና።
LUK 19:4 ዬሱሳ ቤዓናው ኮዪዲ ኢ ቢያ ኦጊያስ ሲንꬄ ዎፂ ቢዲ ኢሲ ቦባ ሚꬃ ቦላ ኬዪስ።
LUK 19:5 ዬሱሲ ሄ ቤሳ ጋኪሼ ꬎቁ ጊዲ ቤዒዲ፥ «ዛኪዮሳ፥ ሃቺ ታ ኔ ሶን ፔዓናው ቤሲያ ጊሾ ኤሌ ዎꬋ» ያጊስ።
LUK 19:6 ኢ ኤሌሲ ዎꬊዲ ኡፋይሳን ዬሱሳ ሞኪስ።
LUK 19:7 ሄ ቤሳን ዴዒያ ኣሳ ኡባይ ሄሳ ቤዒዲ፥ «ናጋራንቹዋ ሶ ጌሊዲ ሞኬታንው ሃኔስ» ያጊዲ ዙዙሚዶሶና።
LUK 19:8 ጊዶሺን፥ ዛኪዮሲ ኤቂዲ ጎዳኮ፥ «ጎዳው፥ ሄኮ ታው ዴዒያ ሻሎ ኡባፌ ባጋ ማንቆታስ ኢማና። ኣሳፔ ኣይባካ ዎርዶን ባሌꬃዳ ኤኪዳባ ጊዲኮ ኦይዱ ኩሼ ዛራና» ያጊስ።
LUK 19:9 ዬሱሲ ቃሲ፥ «ሃ ኡራይ ኣብራሃሜ ናዓ ጊዲዳ ጊሾ ሃቺ ኣቶቴꬃይ ሃ ሶ ዪስ።
LUK 19:10 ኣሳ ናዓይ ዪዳይ ꬋዪዳይሳ ኮያናሳኔ ኣሻናሳ» ያጊስ።
LUK 19:11 ኣሳይ ሄሳ ሲዒያ ዎዴ ዬሱሲ ዬሩሳላሜ ማታቲዳ ጊሾኔ ፆሳ ካዎቴꬃይ ሃዒ ማታራ ቆንጫና ዳኒዳ ጊሾ ኤንታው ሌሚሶ ኦዲስ።
LUK 19:12 ሄሳ ጊሾ፥ ዬሱሲ፥ «ኢሲ ጊታ ኣሲ ዴዔይሲ ባው ካዎቴꬂ ኤኪዲ ያናው ሃራ ቢታ ቢስ።
LUK 19:13 ኢያው ኦꬂያ ኣይሌታፔ ታማታ ፄጊዲ ኢሱዋስ ኢሱዋስ ታሙ ሚናኔ ኢሚዲ ‹ታ ሲማዳ ያና ጋካናው ሃ ሚሺያራ ዛልዒቴ› ያጊስ።
LUK 19:14 «ሄ ቢታ ኣሳይ ኢያ ኢፂያ ጊሾ ሃ ኡራይ ኑ ቦላ ካዎታና ሜላ ኑ ኮዮኮ ያጊዲ ኣሴ ኢያ ጉዬራ ኪቲዶሶና።
LUK 19:15 «ጊዶሺን፥ ሄ ኡራይ ካዎ ጊዲዲ ባ ቢታ ሲሚስ። ሄ ታሙ ኣይሌቲ ኢ ኢሚዳ ሚሺያን ኣይ ሜላ ዛልዒዲ ዎꬊሲዳኮ ኤራናው ኮዪዲ ኤንታና ፄጊሲስ።
LUK 19:16 «ኮይሮይሲ ዪዲ፥ ‹ጎዳው፥ ኔ ታው ኢሚዳ ሚሼይ ሃራ ታማ ዎꬊስ› ያጊስ።
LUK 19:17 «ኢያ ጎዳይ፥ ‹ኔኖ ኣማኔቲዳ ኣይሊያው ሎዖ ኦꬃዳሳ። ኔኒ ጉꬃባን ኣማኔቲዳ ጊሾ ኔው ታሙ ካታማታ ቦላ ማታ ኢማስ› ያጊስ።
LUK 19:18 «ናምዓንꬆይካ ዪዲ፥ ‹ጎዳው፥ ኔ ታው ኢሚዳ ሚሼይ ሃራ ኢቻሻ ዎꬊስ› ያጊስ።
LUK 19:19 «ጎዳይ ኢያኮ፥ ‹ኔዉካ ቃሲ ኢቻሹ ካታማታ ቦላ ማታ ኢማስ› ያጊስ።
LUK 19:20 «ሄኮ ሄꬓንꬆይ ዪዲ፥ ‹ጎዳው፥ ታ ጩርቃን ፃፃዳ ናጊዳ ኔ ሚሺያ ሃናሹ።
LUK 19:21 ኣይስ ጊኮ፥ ኔኒ ኔባ ጊዶናባ ኤኬይሳኔ ኔ ዜሮናባ ቡጪያ ኢታ ኣሲ ጊዲያ ጊሾ ኔው ያያስ› ያጊስ።
LUK 19:22 «ኢያ ጎዳይ ዛሪዲ፥ ‹ኔኖ ኢታ ኣይሊያው ኔ ዶናꬆ ታ ኔና ፒርዳና። ታ ዎꬆናባ ኤኬይሳኔ ዜሮናባ ቡጪያ ኣሲ ጊዴይሳ ኔ ኤሪኮ፥
LUK 19:23 ታ ያዳ ታ ሚሺያ ዎꬌራ ኤካና ሜላ ዛልዒያ ኣሳስ ኣይስ ኢማቢኪ?›
LUK 19:24 «ኢያ ጎዳይ ሄ ቤሳን ኤቂዳይሳታኮ፥ ‹ኢያራ ዴዒያ ሚሺያ ኤኪዲ ታማ ዎꬊሲዳይሳስ ኢሚቴ› ያጊስ።
LUK 19:25 «ኤንቲ፥ ‹ጎዳው፥ ኢያው ካሴካ ታሙ ሚናኔይ ዴዔስ› ያጊዶሶና።
LUK 19:26 «ጎዳይ፥ ታ ሂንቴው ኦዳይስ፤ ‹ዴዒያ ኡባስ ሃሪ ጉዤታና፥ ሺን ባይናይሳፌ ሃራይ ኣቶ ኢያው ዴዒያራካ ኤኬታና።
LUK 19:27 ጊዶሺን፥ ታ ኤንታ ቦላ ካዎቶና ሜላ ኮዪዳይሳታ ሄ ታ ሞርኬታ ሃ ታ ሲንꬄ ኤሂዲ ጎይሪቴ› ጊስ» ያጊስ።
LUK 19:28 ዬሱሲ ሄሳ ኦዲዳይሳፌ ጉዬ ኤንታፌ ሲንꬄ ኣꬊ ሃሙቲዲ ዬሩሳላሜ ቢስ።
LUK 19:29 ሻማሆ ዴሪያ ቦላ ዴዒያ ቤቴፋጌኔ ቢታኒያ ማታቲዳ ዎዴ ባ ታማሬታፔ ናምዓታ ያጊዲ ኪቲስ፡
LUK 19:30 «ሂንቴ ሲንꬃን ዴዒያ ጉታ ቢቴ፥ ሂንቴ ያ ጋኪያ ዎዴ ኦኒካ ቶጎና ቃሼቲዲ ዴዒያ ሃሬ ማሪ ዴማና። ኢያ ቢሊዲ ሃ ኤኪ ዪቴ።
LUK 19:31 ኦኒካ፥ ‹ኣይስ ቢሌቲ?› ጊዲ ኦይቺኮ፥ ‹ጎዳይ ኢያ ኮዬስ› ያጊቴ» ያጊስ።
LUK 19:32 ኪቴቲዳይሳቲ ቢዲ ኢ ጊዳይሳዳ ሃኒን ቤዒዶሶና።
LUK 19:33 ኤንቲ ሃሬ ማራ ቢሊሺን ጎዳቲ ቤዒዲ፥ «ሃሬ ማራ ኣይስ ቢሌቲ?» ያጊዶሶና።
LUK 19:34 ኤንቲ ዛሪዲ፥ «ጎዳይ ኢያ ኮዬስ» ያጊዶሶና።
LUK 19:35 ያፔ ሃሬ ማራ ዬሱሳኮ ኤሂዶሶና። ባንታ ማዑዋ ሃሬ ማራ ዞኮን ዬጊዲ ዬሱሳ ሃሬ ማራ ቦላ ኡቲሲዶሶና።
LUK 19:36 ኣሳይካ ኢ ቢያ ኦጊያ ቦላ ባንታ ማዑዋ ሂፂዶሶና።
LUK 19:37 ሻማሆ ዴሪያ ዱጌꬃ ዎꬊሲያ ኦጊያኮ ማቲያ ዎዴ ታይቦን ኬሂ ዳሮ ኣሳይ ኤንቲ ቤዒዳ ማላሊሲያባን ኡፋይቲዲ ባንታ ቃላ ꬎቁ ኦꬂዲ፥
LUK 19:38 «ጎዳ ሱንꬃን ያ ካዎይ ኣንጄቲዳይሳ ሳሉዋን ሳሮይ ኡባፌ ꬎቃ ሳሉዋን ቦንቾይ ፆሳስ ጊዶ።» ያጊዲ ፆሳ ጋላቲዶሶና።
LUK 19:39 ኣሳ ጊዶፌ ኢሲ ኢሲ ፋሪሳዌቲ ዬሱሳኮ፥ «ኣስታማሪያው፥ ኔ ታማሬታ ሃይዚቴ ጋዳ ሃንቄታ» ያጊዶሶና።
LUK 19:40 ኢ ኤንታኮ፥ «ኤንቲ ሲዒ ጊኮ ሹቻቲ ዋሳና» ያጊስ።
LUK 19:41 ዬሱሲ ዬሩሳላሜ ማቲሼ ካታማ ቤዒዲ ኢያው ዬኪስ።
LUK 19:42 «ኔው ሳሮ ጊዳናይሳ ሃቺ ኔ ኤሪዳባ ጊዲያኮሺን፥ ሃዒ ኔ ኣይፊያፔ ጌሚስ።
LUK 19:43 ኔ ሞርኬቲ ኔ ዩሹዋ ዲሪዲ ዱማ ዱማ ኦጊያራ ኔና ቴቂዲ ኡንዔꬂያ ዎዴይ ያና።
LUK 19:44 ኔናኔ ኔ ዲርሳ ጋርሳን ዴዒያ ኔ ናይታ ꬋይሳና። ኢሲ ኢሲ ሹቹ ዴንꬂዲ ላላና፥ ኣይስ ጊኮ ፆሳይ ኔና ኣሻናው ያ ዎዲያ ኤራባካ» ያጊዲ ኢው ዬኪስ።
LUK 19:45 ሄሳፌ ጉዬ፥ ዬሱሲ ፆሳ ኬꬂ ጌሊዲ ዛልዔይሳታ ያፔ ጎዲስ።
LUK 19:46 ቃሲ፥ « ‹ታ ኬꬃይ ፆሳ ዎሲያ ኬꬂ ጊዳና› ጊዲ ፃፌቲስ፥ ሺን ሂንቴ ታ ኬꬃ ፓንጋታ ጎንጎሎ ኦꬂዴታ» ያጊስ።
LUK 19:47 ጋላስ ጋላስ ፆሳ ኬꬃን ታማርሴስ። ካሂኔታ ሃላቃቲ፥ ሂጌ ኣስታማሬቲኔ ዴሪያ ጪማቲ ኢያ ዎꬋናው ኦጌ ኮዮሶና።
LUK 19:48 ጊዶሺን፥ ኣሳ ኡባይ ኢያ ቲሚርቲያ ባንታ ዎዛና ዬጊዲ ሲዒያ ጊሾ ኤንታው ኦꬃናባይ ꬋይስ።
LUK 20:1 ኢሲ ጋላስ ዬሱሲ ፆሳ ኬꬃን ኣሳ ታማርሲሺኒኔ ዎንጌላ ማርካቲሺን፥ ካሂኔ ሃላቃቲ፥ ሂጌ ኣስታማሬቲኔ ዴሪያ ጪማቲ ኢሲፌ ኢያኮ ዪዲ፥
LUK 20:2 «ኔኒ ሃይሳታ ኣይቢ ማታን ኦꬂያኮ ኑስ ኦዳ። ሃ ማታ ኔው ኢሚዳይ ኦኔ?» ያጊዲ ኦይቺዶሶና።
LUK 20:3 ኢ ኤንታኮ፥ «ታካ ሂንቴና ኢሲባ ኦይቻና፥ ኣኔ ታው ዛሪቴ።
LUK 20:4 ፃማቂያ ዮሃኒሳ ፂንቃቴይ ፆሳፌዬ ኣሳፔ?» ያጊስ።
LUK 20:5 ኤንቲ ዎሊ ጊዶን ያጊዲ ዞሬቲዶሶና፡ «ፆሳፌ ጊኮ ያቲን፥ ኣይስ ኣማኒቤኬቲ?» ያጋና።
LUK 20:6 «ኣሳፔ ጊኮ፥ ኣሳ ኡባይ ዮሃኒሲ ናቤ ጊዴይሳ ኣማኒያ ጊሾ ኑና ሹቻን ጫዳና።»
LUK 20:7 ያኒያ ጊሾ፥ «ኣዉፔኮ ኑ ኤሮኮ» ያጊዲ ዛሪዶሶና።
LUK 20:8 ዬሱሲ ዛሪዲ፥ «ሂዛ፥ ታካ ኣይ ማታን ሃይሳታ ኦꬂያኮ ሂንቴው ኦዲኬ» ያጊስ።
LUK 20:9 ሄሳፌ ጉዬ፥ ዬሱሲ ያጊዲ ሃ ሌሚሱዋ ኣሳስ ኦዲስ፡ «ኢሲ ኣሲ ዎይኔ ቶኪስ። ጎሻንቾታስ ኬራ ኢሚዲ ዳሮ ዎዴ ጋምዒዲ ያናው ሃራ ቢታ ቢስ።
LUK 20:10 ዎይኔ ኣይፊያ ማፂያ ዎዴይ ጋኪን ዎይኒያ ኣይፊያፔ ኢያው ዬዳና ሜላ ጎሻንቾታኮ ባ ኣይሊያ ኪቲስ። ሺን ጎሻንቾቲ ሄ ኣይሊያ ኦይኪዲ ዋꬊዲ ሜላ ኩሼ ዬዲዶሶና።
LUK 20:11 ካሊዲካ ሃራ ኣይሊያ ኪቲስ። ቃሲ ጎሻንቾቲ ኢያ ዋꬊዲ፥ ካዉሺዲ ሜላ ኩሼ ዬዲዶሶና።
LUK 20:12 ሃዒካ ዛሪዲ ሄꬓንꬆ ኣይሊያ ኪቲስ። ጎሻንቾቲ ኢያካ ማዱንፂሲዲ ዎይኒያ ጊዶፌ ጋፃ ኬሲዲ ዬጊዶሶና።
LUK 20:13 «ዎይኒያ ጎዳይ፥ ‹ያቲን ታ ኣይ ኦꬆ? ኣኔ ቃሲ ታ ዶሲያ ታ ናዓ ዬዳና፤ ኦኒ ኤሪ ኤንቲ ኢያ ቦንቾና ኣጎኮና› ያጊስ።
LUK 20:14 «ሺን ጎሻንቾቲ ኡራ ናዓ ቤዒዳ ዎዴ ‹ሃይሲ ኢያ ላቴይሳ፥ ሃ ዪቴ ኢያ ዎꬋና፥ ያቲኮ ላታይ ኑስ ጊዳና› ያጊዲ ዞሬቲዶሶና።
LUK 20:15 ዎይኒያ ጊዶፌ ጋፃ ኬሲዲ ዎꬊዶሶና። «ያቲን፥ ዎይኒያ ጎዳይ ሄ ኣሳታ ዋታኔ?
LUK 20:16 ዪዲ ሄ ጎሻንቾታ ꬋይሳና፥ ዎይኒያ ቤሳ ሃራ ኣሳታስ ኢማና። ኣሳይ ሄሳ ሲዒዳ ዎዴ ‹ሺንቻሌ ሄሳ ሜላባ ኤሆፖ› ያጊዶሶና።
LUK 20:17 ዬሱሲ ኤንታ ጫዲ ፄሊዲ፥ «ያቲን ‹ጊምቤ ኬፂያ ኣሳቲ ቦሪዳ ሹቻይ፥ ኬꬃስ ማላኔ ሚኖቴꬂ ኢሚያ ኡባፌ ኣꬊያ ሹቺ ጊዲስ› ጌቴቲዲ ፃፌቲዳይሳ ቢርሼꬃይ ኣይቤ?
LUK 20:18 ሄ ሹቻ ቦላ ኩንዲያ ኡባይ ቆፄታና፥ ሹቻይ ኢያ ቦላ ዎꬊያ ኡባይ ሊቃና» ያጊስ።
LUK 20:19 ሂጌ ኣስታማሬቲኔ ካሂኔ ሃላቃቲ ሃ ሌሚሶይ ኦዴቲዳይ ኤንታ ቦላ ጊዴይሳ ኤሪዲ ሄ ዎዴ ኢያ ኦይካናው ኮዪዶሶና፥ ሺን ኣሳስ ባቢዶሶና።
LUK 20:20 ሄሳ ጊሾ፥ ዬሱሳ ዴሪያ ሃሪያ ሮሜ ካዉዋ ማታስ ኣꬂ ኢማናው ኮዪዲ ኢያ ዶናፔ ባላ ቃላ ናጎሶና። ሄሳ ፖሊሳናው ፂሎ ዳኒዲ ጪሚያ ኣሳታ ኢያኮ ኪቲዶሶና።
LUK 20:21 ኪቴቲዲ ቢዳ ኣሳቲ፥ «ኣስታማሪያው፥ ኔኒ ኦዴይሲኔ ታማርሴይሲ ሊኬ ጊዴይሳ፥ ቃሲ ፆሳ ኦጊያ ቱማቴꬃን ታማርሴይሳኔ ኦናካ ሻኮናይሳ ኑ ኤሮስ።
LUK 20:22 ሃኖሺን፥ ሮሜ ካዉዋስ ጊራ ጊራናው ቤሲ ቤሴኔ?» ያጊዲ ኢያ ኦይቺዶሶና።
LUK 20:23 ሺን ኢ ኤንታ ዎዛና ኢታቴꬃ ኤሪዳ ጊሾ
LUK 20:24 «ኣኔ ታና ኢሲ ሳንቲሜ ቤሲቴ፥ ኢያ ቦላ ዴዒያ ሚሲሌይኔ ሱንꬃይ ኦዴባዬ?» ያጊስ። ኤንቲ ዛሪዲ፥ «ሮሜ ካዉዋ ቄሳሬይሳ» ያጊዶሶና።
LUK 20:25 ኢ ዛሪዲ፥ «ያቲኮ፥ ቄሳሬይሳ ቄሳሬስ፥ ፆሳይሳ ፆሳስ ኢሚቴ» ያጊስ።
LUK 20:26 ሄሳ ጊሾ፥ ኢ ዛሪዳ ዛሩዋን ኣሳ ሲንꬃን ባላ ዴማናው ዳንዳዒቦኮና። ኢያ ዛሩዋን ማላሌቲዲ ሲዒ ጊዶሶና።
LUK 20:27 ሃይቆፔ ዴንዶይ ባዋ ያጊያ ሳዱቃዌታፔ ኢሶቲ ኢሶቲ ዬሱሳኮ ዪዲ፥
LUK 20:28 «ኣስታማሪያው፥ ኢሲ ኣሲ ማቾ ኤኪዲ ናዓ ዬሎና ሃይቂኮ፥ ኢያ ኢሻይ ሄ ማጫሲው ኤኪዲ ናይታ ዬሊዲ ባ ኢሻስ ዜሬꬂ ኣሻና ሜላ ሙሴይ ፃፊስ።
LUK 20:29 ሄኮ ላፑን ኢሻቲ ዴዖሶና። ኮይሮይሲ ማቾ ኤኪዲ ናዓ ዬሎና ሃይቂስ።
LUK 20:30 ናምዓንꬆይ ኢዮ ኤኪዲ ናዓ ዬሎና ሃይቂስ።
LUK 20:31 ሄꬓንꬆይካ ሄሳꬆ ሃኒስ። ላፑናቲ ኡባይ ሄሳዳ ሃኒዲ ኢዮ ኤኪዶሶና፥ ሺን ናዓ ዬሎና ሃይቂዶሶና።
LUK 20:32 ዉርሴꬃን ማጫሲያ ሃይቃሱ።
LUK 20:33 ሂዛ፥ ላፑን ኣዴይ ኢዮ ኤኪዳ ጊሾ ሃይቆፔ ዴንዲያ ዎዴ ኢያ ኦዴ ማቾ ጊዳኔ?» ያጊዲ ኦይቺዶሶና።
LUK 20:34 ዬሱሲ ዛሪዲ፥ «ኣሳይ ሃ ዎዲያን ኤኮሶናኔ ጌሎሶና።
LUK 20:35 ሺን ሃይቆፔ ዴንዲዲ ያና ኣላሚያን ዳናው ቤሴይሳቲ ኤኮኮናኔ ጌሎኮና።
LUK 20:36 ኤንቲ ኪታንቾ ሜላ ጊዲያ ጊሾ ሲንꬃፌ ሃይቆኮና። ሃይቆፔ ዴንዲዳ ጊሾ ኤንቲ ፆሳ ናይታ።
LUK 20:37 ሙሴይ ጎዳ፥ ‹ኣብራሃሜ ጎዳ፥ ዪሳቃ ጎዳ፥ ያይቆባ ጎዳ› ጊዲ ቱሺያ ጊዶን ፁጌቲያ ታማ ታሪኪያ ፃፊዳይሳን ሃይቂዳ ኣሳይ ዴንዴይሳ ቤሴስ።
LUK 20:38 ኡባይ ኢያው ዴዖን ዴዔይሳታ ጊዲያ ጊሾ ኢ ዴዖን ዴዔይሳታ ጎዳፔ ኣቲን ሃይቂዳይሳታ ጎዳ ጊዴና» ያጊዲ ዛሪስ።
LUK 20:39 ሂጌ ኣስታማሬታፔ ኢሶቲ ኢሶቲ፥ «ኣስታማሪያው፥ ሎዖባ ኦዳዳሳ» ያጊዶሶና።
LUK 20:40 ሄሳፌ ጉዬ፥ ሃራ ኦይሾ ኦይቻናው ያዪዶሶና።
LUK 20:41 ኢያፔ ካሊዲ ዬሱሲ ኤንታኮ፥ «ኣሳይ ኪሪስቶሳ ዋቲዲ ዳዊቴ ናዓ ያጎና?
LUK 20:42 ኣይስ ጊኮ፥ ዳዊቴይ ባ ሁዔን ባ ማፃፋን፥ ‹ፆሳይ ታ ጎዳኮ «ታ ኔ ሞርኬታ ኔ ቶሆይ ዬꬊያሶ ኦꬃና ጋካናው ታፔ ኡሻቻ ባጋን ኡታ» ጊስ› ያጊስ።
LUK 20:44 «ሂዛ፥ ዳዊቴይ ኪሪስቶሳ፥ ‹ጎዳ ጊዲ ፄጊሼ ኢያው ናዓ ዋኒዲ ጊዲ?› » ያጊስ።
LUK 20:45 ዴሬይ ኡባይ ሲዒሺን ባ ታማሬታኮ፥
LUK 20:46 «ኣዱሳ ማዖ ማዒዲ ዩሼ ዶሴይሳታፔ፥ ጊያን ቦንቾ ሳሮꬆ፥ ኣይሁዴ ዎሳ ኬꬃን ቦንቾ ኦይዴ፥ ሞኬቲያ ሶንካ ቦንቾ ቤሲ ኮያ ሂጌ ኣስታማሬታፔ ናጌቲቴ።
LUK 20:47 ኤንቲ ኣምዔታ ኬꬃ ካሎዮሶና፥ ፂሎ ኣሲ ዳኒዲ ዎሳ ኣዱሶሶና። ኤንቲ ኢታ ፒርዳ ኤካና» ያጊስ።
LUK 21:1 ዱሬ ኣሳይ ፆሳ ኬꬃን ሙፃታ ሳፂኒያን ዬጊሺን ዬሱሲ ꬎቁ ጊዲ ኣሳ ቤዒስ።
LUK 21:2 ቃሲ ኢሲ ማንቆ ኣምዒያ ናምዑ ሲኪና ዬጊሺን ቤዒዲ፥
LUK 21:3 «ታ ሂንቴው ቱማ ኦዳይስ፤ ሃ ማንቆ ኣምዒያ ኡባፌ ኣꬃዳ ኢማሱ።
LUK 21:4 ኣይስ ጊኮ፥ ሃ ኣሳ ኡባይ ባንታው ዴዒያባፔ ኢሚዶሶና፥ ሺን ኢያ ባ ፓጪያፔ፥ ባው ዴዒያ ኣቁዋ ኡባ ኢማሱ» ያጊስ።
LUK 21:5 ዬሱሳ ታማሬታፔ ኢሶቲ ኢሶቲ ፆሳ ኬꬃይ ዳሮ ሎዒያ ሹቻኒኔ ኣሳይ ፆሳስ ኢሚዳ ኢሞታን ሎዒዳይሳ ኦዴቶሶና።
LUK 21:6 ሺን ዬሱሲ፥ «ሃ ሂንቴ ቤዒያባይ ኡባይ ላሌቶና፥ ሹቺ ሹቻ ቦላ ጊምቤቲዳ ሜላ ኣቶና ዎዴይ ያና» ያጊስ።
LUK 21:7 ኤንቲካ፥ «ኣስታማሪያው፥ ሃ ኡባይ ሃናናይ ኣዉዴ? ቃሲ ሃይሲ ሃናናይሳስ ማላታይ ኣይቤ?» ያጊዲ ኦይቺዶሶና።
LUK 21:8 ዬሱሲ ያጊዲ ኤንታው ዛሮ ኢሚስ፡ «ባሌቶና ሜላ ናጌቲቴ። ዳሮቲ፥ ‹ታኒ ኪሪስቶሳ፥ ዎዴይ ማታቲስ› ያጊሼ ታ ሱንꬃን ያና፥ ሺን ሂንቴ ኤንታ ካሎፊቴ።
LUK 21:9 ሂንቴ ኦላባኔ ኣሳ ጌላቴꬃ ሲዒያ ዎዴ ዳጋሞፊቴ። ሄሲ ሲንꬃቲዲ ሃናናይሲ ኣቶናባ ጊዲያ ጊሾ ዎዲያ ዉርሴꬃይ ኤሌሲዲ ዬና» ያጊስ።
LUK 21:10 ካሊዲካ፥ «ዴሬይ ዴሪያ ቦላ፥ ካዎቴꬃይ ካዎቴꬃ ቦላ ዴንዳና።
LUK 21:11 ጊታ ቢታ ቃፆይ ሃናና፥ ኮሻይኔ ጋዶይ ዱማ ዱማ ቤሳን ዳራና፥ ያሺያባይኔ ጊታ ማላታቲ ሳሎፔ ቆንጫና።
LUK 21:12 ሺን ሃ ኡባይ ሃናናፔ ሲንꬄ ታ ሱንꬃ ጊሾ ጊዲ ኣሳይ ሂንቴና ጎዳናኔ ኦይካና። ኣይሁዴ ዎሳ ኬꬃኒኔ ቃሾ ኬꬃን ሂንቴና ዬጋና። ካዎታ ሲንꬄኔ ዴሪያ ሃሬይሳታ ሲንꬄ ሂንቴና ኤፋና።
LUK 21:13 ሄሲካ ታባ ሂንቴ ኤንታው ማርካታናው ሎዖ ኦጌ ጊዳና።
LUK 21:14 ሄሳ ጊሾ፥ ሂንቴ ኦይሼቲያ ዎዴ ዎይጊዲ ዛሮ ኢማኔ ጊዲ ሂንቴ ዎዛናን ኡንዔቶና ሜላ ኣኬኪቴ።
LUK 21:15 ኣይስ ጊኮ፥ ሂንቴ ሞርኬቲ ሂንቴራ ኤቄታናዉኔ ፓላማናው ዳንዳዖና ዶናኔ ጪንጫቴꬂ ታ ሂንቴው ኢማና።
LUK 21:16 ሃሪ ኣቶሺን፥ ሂንቴና ዬሊዳይሳቲ፥ ሂንቴ ኢሻቲ፥ ሂንቴ ዳቦቲኔ ላጌቲ ሂንቴና ኣꬂ ኢማና። ሂንቴ ጊዶፌ ኢሶታ ኢሶታ ዎꬋና።
LUK 21:17 ታ ሱንꬃ ጊሾ ኣሳ ኡባ ሲንꬃን ሂንቴ ኢፄቲዳይሳታ ጊዳና።
LUK 21:18 ሺን ሃሪ ኣቶሺን፥ ሂንቴ ቢናናፔ ኢሶይካ ꬋዬና።
LUK 21:19 ፖሎ ዳንዳዓን ሂንቴ፥ ሂንቴ ሼምፑዋ ኣሻና።»
LUK 21:20 «ዬሩሳላሜ ካታማይ ዎታዳሬን ዲሬቲዲ ኡቲዳሺን ሂንቴ ቤዒኮ ኢያው ꬋዮይ ማታቲዳይሳ ኤሪቴ።
LUK 21:21 ሄ ዎዴ ዪሁዳን ዴዒያ ኡባይ ዴሪያኮ ባቃቶ፥ ካታማን ዴዔይሳቲ ያፔ ኬዮ፥ ጋፃሪያን ዴዔይሳቲ ካታማ ጌሎፖ።
LUK 21:22 ኣይስ ጊኮ፥ ሃ ፃፌቲዳባይ ፖሌታና ሜላ ሄሲ ፆሳይ ኩሼ ዛሪያ ዎዴ።
LUK 21:23 ሳዓ ቦላ ጊታ ሜቶይ ያና፥ ሄሳንካ ኣሳ ቦላ ፆሳ ሃንቆይ ያና። ሄሳ ጊሾ፥ ቃንꬃቲዳይሳታኔ ꬋንꬄይሳታ ኣዬ።
LUK 21:24 ኤንቲ ማሻን ሃይቃና፥ ኣሳ ኡባይ ኣላጋ ቢታ ዲዔታና። ኣይሁዴ ጊዶና ኣሳ ዎዴይ ፖሌታና ጋካናው ዬሩሳላሜይ ኤንታናን ዬꬌቲዳይሳ ጊዳና።
LUK 21:25 «ኣዋን፥ ኣጌናኒኔ፥ ፆሊንቶታ ቦላ ማላታቲ ሃኒዲ ቤንታና። ኣባፌኔ ዙሊያ ዴሹዋፔ ዴንዶይሳን ቢታን ዴዒያ ኣሳይ ኡንዔታናኔ ያርካና።
LUK 21:26 ሳሉዋ ዎልቃቲ ቡቄታና ጊሾ ኣሳይ ያሻኒኔ ቢታ ቦላ ኣይቢ ሃናንዴሻ ጊዲ ናጎን ባንታና ባሌታና።
LUK 21:27 ሄ ዎዴ ኣሳ ናዓይ ዎልቃኒኔ ጊታ ቦንቹዋን ሻራራ ዪሺን ኤንቲ ቤዓና።
LUK 21:28 ሂንቴ ኣቶቴꬃይ ማታቲዳ ጊሾ ሃ ሃኖቲ ፖሌቴꬂ ኦይኪያ ዎዴ ጊጌቲ ኤቂቴ፥ ሂንቴ ሁዒያ ꬎቁ ኦꬂዲ ፄሊቴ» ያጊስ።
LUK 21:29 ካሊዲካ፥ ሃይሳዳ ጊዲ ሌሚሶ ኦዲስ፡ «ባላሴ ሚꬃኔ ሃራ ሚꬃታ ኡባ ቤዒቴ።
LUK 21:30 ኤንቲ ኣጪያ ዎዴ ቶርቼይ ማታቲዳይሳ ሂንቴ ኤሬታ።
LUK 21:31 ሄሳዳ ሃ ሃኖቲ ፖሌቲሺን ሂንቴ ቤዒኮ ፆሳ ካዎቴꬃይ ማታቲዳይሳ ኤሪቴ።
LUK 21:32 «ታ ሂንቴው ቱማ ኦዳይስ፤ ሃ ኡባይ ፖሌታና ጋካናው ሃ ዬሌቴꬃይ ኣꬌና።
LUK 21:33 ሳሎይኔ ሳዓይ ኣꬋና፥ ሺን ታ ቃላይ ኣꬌና።
LUK 21:34 «ሂዛ፥ ꬋሲ ባይና ዴዖን፥ ኡሻ ዳሮኒኔ ዱሳባስ ኡንዔቴꬃን ሂንቴ ዎዛናይ ኦይኬቶና ሜላኔ ሄ ቃማይ ኣኬኮና ፂሄዳ ሂንቴ ቦላ ጋኮና ሜላ ናጌቲቴ።
LUK 21:35 ሄ ቃማይ ቢታ ኩሜꬃን ዴዒያ ኡባ ቦላ ጋካና።
LUK 21:36 ሄሳ ጊሾ፥ ያ ኢታፔ ኣታናዉኔ ኣሳ ናዓ ሲንꬃን ኤቃናው ዳንዳዓና ሜላ ኡባ ዎዴ ሚኒዲ ዎሲቴ» ያጊስ።
LUK 21:37 ጋላስ ጋላስ ዬሱሲ ፆሳ ኬꬃን ታማርሲሼ፥ ቃማ ቃማ ሻማሆ ዴሪያ ቦላ ኬዪዲ ኣቄስ።
LUK 21:38 ኣሳይ ኡባይ ኢያ ሲዓናው ዎንታ ጉራ ኢያኮ ፆሳ ኬꬂ ዮሶና።
LUK 22:1 ሄ ዎዴ ‹ፋሲካ› ያጊያ ኡይꬃ ባሌይ ማቲስ።
LUK 22:2 ካሂኔ ሃላቃቲኔ ሂጌ ኣስታማሬቲ ኣሳስ ያዪዳ ጊሾ ዋቲዲ ዬሱሳ ባንታ ጊዶፌ ꬋይሳኔኮ ኦጌ ኮዮሶና።
LUK 22:3 ፃላሄይ ታማኔ ናምዓታፔ ኢሱዋ ጊዲዳ ኣስቆሮታ ዪሁዳ ጌቴቴይሳ ጊዶ ጌሊስ።
LUK 22:4 ዪሁዲ ካሂኔ ሃላቃታኮኔ ፆሳ ኬꬃ ናጌይሳታ ሃላቃታኮ ቢዲ ዬሱሳ ዋቲ ኣꬂ ኢማኔኮ ኤንታራ ማቄቲስ።
LUK 22:5 ኤንቲካ ሄሳን ኡፋይቲዲ ሚሼ ኢማናው ኢያራ ዞሬቲዶሶና።
LUK 22:6 ኢካ ዞሬቴꬃን ጊጊስ። ኣꬂ ኤንታው ኢማናው ኣሲ ባይና ኢንጄ ዎዴ ናጊሼ ዴዔስ።
LUK 22:7 ሄሳፌ ጉዬ፥ ፋሲካ ዶርሳይ ሹኬቲያ ኡይꬃ ባሌይ ጋኪስ።
LUK 22:8 ዬሱሲ፥ «ፋሲካ ካሁዋ ማና ሜላ ቢዲ ኑስ ጊጊሲቴ» ያጊዲ ጴፂሮሳኔ ዮሃኒሳ ኪቲስ።
LUK 22:9 ኤንቲ፥ «ኑ ኣዉን ጊጊሳና ሜላ ኔ ኮያይ» ያጊዲ ኦይቺዶሶና።
LUK 22:10 ኢ ኤንታኮ፥ «ሄኮ ሂንቴ ካታማ ጌሊሺን ሃꬃ ኦቶ ቶኪዳ ኣዴይ ሂንቴራ ጋሄታና። ኢ ቢዲ ጌሊያ ኬꬃ ኢያ ካሊዲ ጌሊቴ።
LUK 22:11 ኬꬃዋኮ ኣስታማሬይ፥ ‹ታ ታ ታማሬታራ ዎላ ፋሲካ ካሁዋ ማናው ኢማꬃ ኬꬂ ኣዉኔ? ያጊስ› ጊቴ።
LUK 22:12 ኢ ፖቂያ ቦላ ሂፄቲዲ ጊጊዲ ዴዒያ ዳልጋ ኪፊሌ ሂንቴና ቤሳና፥ ያን ጊጊሲቴ» ያጊስ።
LUK 22:13 ኤንቲ ቢዲ ዬሱሲ ጊዳይሳዳ ሃኒን ዴሚዶሶና። ፋሲካ ባሌ ካሁዋ ያን ጊጊሲዶሶና።
LUK 22:14 ሳቴይካ ጋኪዳ ዎዴ ዬሱሲ ሃዋሬታራ ዎላ ካሁዋ ቦላ ኡቲስ።
LUK 22:15 ኢ ኤንታኮ፥ «ታ ዋዬ ኤካናፔ ሲንꬄ ሃ ካሁዋ ሂንቴራ ማናው ዳሮ ኣሞታስ።
LUK 22:16 ሂዛ፥ ሲዒቴ! ፆሳ ካዎቴꬃን ሃይሳስ ቢርሼꬃይ ፖሌታና ጋካናው ሃ ካሁዋ ዛራዳ ሚኬ» ያጊስ።
LUK 22:17 ኡሻ ኤኪዲ ጋላቲ ሲሚዲ፥ «ሄዒቴ ሃይሳ ሂንቴ ጊዶን ሻኬቲቴ።
LUK 22:18 ሲዒቴ! ፆሳ ካዎቴꬃይ ያና ጋካናው ሃቺፌ ዶማዳ ሃ ዎይኔ ኡሻፌ ዛራዳ ኡዪኬ» ያጊስ።
LUK 22:19 ኡይꬃ ኤኪዲ፥ ጋላቲ ሲሚዲ፥ «ሃይሲ ሂንቴው ኢሜቲያ ታ ኣሹዋ። ሃይሳ ኦꬂሼ ታና ቆፒቴ» ያጊዲ ሜንꬂዲ ኤንታው ኢሚስ።
LUK 22:20 ሄሳዳካ፥ ካሁዋፔ ጉዬ ኡሻ ኤኪዲ፥ «ሃ ኡሻይ ሂንቴው ጉኪዳ ታ ሱꬃን ጊዲያ ኦራꬃ ጫቁዋ።
LUK 22:21 ጊዶሺን፥ ታና ኣꬂ ኢማና ኡራ ኩሼይ ታራ ኢሲፌ ጋይታና።
LUK 22:22 ኣሳ ናዓይ ኢያው ጌቴቶይሳ ሜላ ሃይቃናው ዴዔስ፥ ሺን ኢያ ኣꬂ ኢሚያ ኡራ ኣዬ» ያጊስ።
LUK 22:23 ኤንቲ ባንታ ጊዶን፥ «ሃይሳ ኦኒ ኦꬃኔ» ጊዲ ዎሊ ኦይቺዶሶና።
LUK 22:24 ቃሲ ኤንታ ጊዶን ጊታ ጊዳናይ ኦኔ ጊያ ፓላሚ ሜꬌቲስ።
LUK 22:25 ዬሱሲ ኤንታኮ፥ «ዴሪያ ካዎቲ ባንታ ኣሳ ዎልቃን ሃሮሶና፤ ባንታ ዴሪያ ቦላ ጎዳቴይሳታስካ ባንታና፥ ‹ሎዖ ኦꬄይሳታ› ያጊዲ ፄጎሶና።
LUK 22:26 ሺን ሂንቴ ጊዶን ሄሳ ሜላ ጊዶፖ። ሂንቴ ጊዶን ባይራቴይ ካሎዳ ሃኖ፤ ካሌꬄይሲ ካሌይሳዳ ሃኖ።
LUK 22:27 ሃኖሺን፥ ሞኬይሳፌኔ ሞኬቴይሳፌ ኣዉሲ ኣꬊ? ሞኬቴይሳ ጊዴኔዬ? ሺን ታኒ ሂንቴ ጊዶን ሞኬይሳ ሜላ።
LUK 22:28 «ሂንቴካ ታ ሜቱዋን ታፔ ሻኬቶና ታራ ሚኒዲ ኤቂዳይሳታ።
LUK 22:29 ሂንቴ ታ ጋይታፔ ማና ሜላ፥ ኡያና ሜላኔ ኣራታታ ቦላ ኡቲዲ ታማኔ ናምዑ ኢስራዔሌ ሼሻታ ቦላ ፒርዳና ሜላ ታ ኣዋይ ታና ሹሚዳይሳዳ ታካ ሂንቴና ታ ካዎቴꬃን ሹማና» ያጊስ።
LUK 22:31 ካሊዲካ ዬሱሲ፥ «ሲሞና፥ ሲሞና፥ ፃላሄይ ሂንቴና ጊስቴዳ ሃርቃናው ዎሲስ።
LUK 22:32 ሺን ታኒ ኔ ኣማኖይ ꬋዮና ሜላ ኔው ጋናታስ። ኔካ ሲሚዳ ዎዴ ኔ ኢሻታ ሚንꬃ» ያጊስ።
LUK 22:33 ሲሞኒ፥ «ጎዳው፥ ታኒ ኔራ ቃሼታናዉኔ ሃይቃናው ጊጌታስ» ያጊስ።
LUK 22:34 ዬሱሲ ጴፂሮሳኮ፥ «ታ ኔው ኦዳይስ፤ ሃቺ ኩቶይ ዋሳናፔ ሲንꬄ ኔ ታና ሄꬑ ቶሆ ካዳና» ያጊስ።
LUK 22:35 ካሊዲካ፥ ዬሱሲ ኤንታኮ፥ «ታኒ ሂንቴና ኮሮጆይ፥ ካርፂቴይኔ ጫሚ ባይና ኪቲዳ ዎዴ ሂንቴው ፓጪዳባይ ዴዒ?» ያጊዲ ኦይቺስ። ኤንቲ ዛሪዲ፥ «ኣይኮይካ ፓጪቤና» ያጊዶሶና።
LUK 22:36 ኢ ኤንታኮ፥ «ሃዒ ኮሮጆይኔ ካርፂቴይ ዴዔይ ኦይኮ፤ ማሺ ባይናይ ባ ኣፊላ ባይዚዲ ማሻ ሻሞ።
LUK 22:37 ሃ ሲዒቴ! ‹ጌላታራ ታይቤቲስ› ጌቴቲዲ ፃፌቲዳይሲ ታናን ፖሌታናው ቤሴስ። ኤ፥ ታ ጊሾ ፃፌቲዳባይ ፖሌቴይሲ ቱማቲስ» ያጊስ።
LUK 22:38 ኢያ ታማሬቲ፥ «ጎዳው ሃይሳን ናምዑ ማሺ ዴዔስ» ያጊዶሶና። ኢ፥ «ጊዳና» ያጊስ።
LUK 22:39 ዬሱሲ ካሴ ሜዜቲዳይሳዳ ዴንዲዲ ሻማሆ ዴሪያ ቦላ ኬዪስ። ኢያ ታማሬቲ ኢያ ካሊዶሶና።
LUK 22:40 ሄ ቤሳ ጋኪዳ ዎዴ «ፓጬን ጌሎና ሜላ ዎሲቴ» ያጊስ።
LUK 22:41 ኤንታፌ ሹቺ ሆሊን ጋኪያ ሶ ሜላ ሃኪዲ ጉልባቲዲ ዎሲስ።
LUK 22:42 «ታ ኣዋው፥ ኔ ሼኔ ጊዲኮ ሃ ሜቱዋ ታፔ ኣꬃ። ሺን ታ ሼኔ ጊዶፖ ኔ ሼኔይ ሃኖ» ያጊዲ ዎሲስ።
LUK 22:43 ኪታንቾይ ሳሎፔ ቆንጪዲ ሚንꬂስ።
LUK 22:44 ዳሮ ኡንዔቲዲ ሚንꬂዲ ዎሴስ። ኢያ ጫዋይካ ሱꬂ ፆኪያዳ ሳዓን ፆኬስ።
LUK 22:45 ዬሱሲ ዎሳ ዉርሲዲ ባ ታማሬታኮ ዪስ። ኤንቲ፥ ኣዛኒያፔ ዴንዶይሳን ዳቡሪዲ ꬊስኪዳሺን ዴሚዲ፥
LUK 22:46 «ኣይስ ꬊስኬቲ? ፓጬን ጌሎና ሜላ ዴንዲዲ ዎሲቴ» ያጊስ።
LUK 22:47 ኢ ቡሮ ኦዳ ቦላ ዴዒሺን ዳሮ ኣሳቲ ዪዶሶና። ታማኔ ናምዓታፔ ኢሶይ ዪሁዳ ጌቴቴይሲ ኤንታና ካሌꬄስ። ኢ ዬሱሳ ዬራናው ማቲ ሺቂስ።
LUK 22:48 ሺን ዬሱሲ፥ «ዪሁዳ፥ ኣሳ ናዓ ዬራዳ ኣꬃ ኢማኔ?» ያጊስ።
LUK 22:49 ዬሱሳ ታማሬቲ ሄ ሃኑዋ ቤዒዲ፥ «ጎዳው ማሻን ሾጪኖ?» ያጊዶሶና።
LUK 22:50 ኤንታ ጊዶፌ ኢሶይ ካሂኔ ሃላቃ ኦሳንቹዋ ሾጪዲ ኡሻቻ ሃይꬃ ቃንፂዲ ዬጊስ።
LUK 22:51 ሺን ዬሱሲ፥ «ኣጋ! ዲጎፊቴ» ያጊስ። ኡራ ሃይꬃ ቦቺዲ ፓꬂስ።
LUK 22:52 ሄሳፌ ጉዬ፥ ዬሱሲ ባና ኦይካናው ዪዳ ካሂኔ ሃላቃታኮ፥ ፆሳ ኬꬃ ናጌይሳታ ሹማታኮኔ ጪማታኮ፥ «ፓኖ ኦይኪያ ኣሳዳ ማሼኔ ፃምዓ ኦይኪዲ ዪዴቲ?
LUK 22:53 ኡባ ጋላስ ፆሳ ኬꬃን ታ ሂንቴራ ዴዒያ ዎዴ ታ ቦላ ኩሼ ዎꬂቤኬታ። ሺን ሃይሲ ꬉማ ካዎቴꬃይ ሃሪዳ ዎዴኔ ሂንቴ ዎዴ» ያጊስ።
LUK 22:54 ሄሳፌ ጉዬ፥ ዬሱሳ ኦይኪዲ ካሂኔ ሃላቃ ዛባ ኤፊዶሶና። ጴፂሮሲ ሃሆን ዬሱሳ ካሌስ።
LUK 22:55 ኣሳቲ ካሂኔ ሃላቃ ዛባን ታማ ኤꬂዲ ዎላ ኡቲዳሺን ጴፂሮሲ ኤንታራ ኢሲፌ ኡቲስ።
LUK 22:56 ኢሲ ኣይሊያ ጴፂሮሲ ታማ ማታን ኡቲዳይሳ ጫዳ ፄላዳ፥ «ሃ ኡራይ ኢያራ ዴዔስ» ያጋሱ።
LUK 22:57 ሺን ጴፂሮሲ፥ «ሃ ማጫሴቴ ታ ሄ ኡራ ኤሪኬ» ያጊዲ ካዲስ።
LUK 22:58 ጉꬃ ዎዴፔ ጉዬ ኢሲ ሃራ ኣዴይ ኢያ ቤዒዲ፥ «ኔካ ኤንታፌ ኢሱዋ» ያጊስ። ሺን ጴፂሮሲ፥ «ሃ ኣዲያው ታና ጊዲኬ» ያጊስ።
LUK 22:59 ኢሲ ሳቴ ሜላ ጋምዒዳፔ ጉዬ ኢሲ ሃራ ኣዴይ ቲሊሲዲ፥ «ሃ ኡራይ ጋሊላፔ ጊዲያ ጊሾ ሲꬌይ ባይና ኢያራ ዴዔስ» ያጊስ።
LUK 22:60 ሺን ጴፂሮሲ፥ «ሃ ኣዲያው፥ ኔ ጌይሳ ታ ኤሪኬ» ያጊስ። ኢ ሄ ኦዳ ኦንጎና ዴዒሺን ኩቶይ ዋሲስ።
LUK 22:61 ጎዳይ ጉዬ ሲሚዲ ጴፂሮሳ ፄሊስ። ጴፂሮሲ፥ «ሃቺ ኩቶይ ዋሳናፔ ሲንꬄ ኔ ታና ሄꬑ ቶሆ ካዳና» ያጊዲ፥ ጎዳይ ኦዲዳ ቃላ ኣኬኪስ።
LUK 22:62 ጴፂሮሲ ካሬ ኬዪዲ ዳሮ ኮኮሪዲ ዬኪስ።
LUK 22:63 ዬሱሳ ናጊያ ኣሳቲ ኢያ ሌቂሶኔ ዴሼꬂ ኦይኪዶሶና።
LUK 22:64 ኢያ ኣይፊያ ጎዚዲ «ኣኔ ቲንቢቴ ኦዳ፤ ኔና ዴቺዳይ ኦኔ?» ያጊዲ ኦይቾሶና።
LUK 22:65 ሃራ ዳሮ ጫሼ ጫዪዲ ካዉሾሶና።
LUK 22:66 ሳዒ ዎንቲያ ዎዴ ኣይሁዴ ቢታ ጪማቲ፥ ካሂኔ ሃላቃቲኔ ሂጌ ኣስታማሬቲ ሺቂዲ፥ ዬሱሳ ባንታ ሲንꬄ ሺሺዶሶና።
LUK 22:67 ኤንቲ፥ «ኔኒ ኪሪስቶሴ? ኣኔ ኑስ ኦዳ?» ያጊዲ ኦይቺዶሶና። ዬሱሲ፥ «ታ ኦዲያኮ ኣማኔኬታ።
LUK 22:68 ታ ኦይቺያኮ ዛሬኬታ።
LUK 22:69 ሺን ኣሳ ናዓይ ሃይሳፌ ጌዴ ባጋን ዎልቃማ ፆሳ ኡሻቻ ባጋን ኡታና» ያጊስ።
LUK 22:70 ሄ ዎዴ ኡባይ፥ «ያቲን፥ ኔኒ ፆሳ ናዔ?» ያጊዶሶና። ኢ፥ «ታ ፆሳ ናዓ ጊዴይሳ ሂንቴ ጊዴታ» ያጊስ።
LUK 22:71 ኤንቲ፥ «ሂዛ፥ ሃራ ማርካ ኣይ ኮሺ? ኢ ባ ኢንፃርሳን ኦዲሺን ኑ ሲዒዳ» ያጊዶሶና።
LUK 23:1 ሄ ቤሳን ሺቂዳ ሻንጎቲ ኡባይ ዴንዲዲ ዬሱሳ ጲላፆሳኮ ኤፊዶሶና።
LUK 23:2 «ሃ ኡራይ ኑ ኣሳ ባሌꬂሺን፥ ካዉዋስ ጊራ ጊሮና ሜላ ዲጊሺኒኔ ቃሲ፥ ‹ታኒ ኪሪስቶሳ ሂንቴ ካዉዋ› ያጊሺን ዴሚዳ» ያጊዲ ሞቲዶሶና።
LUK 23:3 ጲላፆሲ ዬሱሳ፥ «ኔኒ ኣይሁዴታ ካዎዬ?» ያጊዲ ኦይቺስ። ዬሱሲ፥ «ኤ፥ ኔ ጊዳይሳ ሜላ» ያጊስ።
LUK 23:4 ጲላፆሲ ካሂኔ ሃላቃታኮኔ ኣሳኮ፥ «ሃ ኡራ ቦላ ታኒ ኢሲ ባላካ ዴማቢኬ» ያጊስ።
LUK 23:5 ሺን ኤንቲ፥ «ሃ ኡራይ ጋሊላፔ ዶሚዲ ሃይሳ ጋካናው ዪሁዳ ኩሜꬃ ኢታባስ ዴንꬄꬄስ» ያጊዲ ሚንꬂ ኦዲዶሶና።
LUK 23:6 ጲላፆሲ ሄሳ ሲዒዳ ዎዴ ዬሱሲ ጋሊላ ኣሴኮ ኤራናው ኮዪዲ ኢያ ኦይቺስ።
LUK 23:7 ዬሱሲ ሄሮዲሳ ቢታፌ ዪዳ ኣሲ ጊዴይሳ ጲላፆሲ ኤሪዳ ዎዴ ሄሮዲሲ ሄ ዎዴ ዬሩሳላሜን ዴዒያ ጊሾ ኢያኮ ዬዲስ።
LUK 23:8 ሄሮዲሲ ዬሱሳ ቤዓናው ዳሮ ዎዴፔ ኮዪሼ ዴዒያ ጊሾ ኢያ ቤዒዳ ዎዴ ዳሮ ኡፋይቲስ። ኣይስ ጊኮ፥ ኢያባ ሲዒዳ ጊሾ ማላሊሲያባ ኦꬂን ቤዓናው ኣሞቲሼ ዴዔስ።
LUK 23:9 ሄሮዲሲ ዬሱሳ ዳሮ ኦይሾታ ኦይቺስ፥ ሺን ኢ ኣይኮካ ዛሪቤና።
LUK 23:10 ካሂኔታ ሃላቃቲኔ ሂጌ ኣስታማሬቲ ያን ኤቂዲ ሚንꬂዲ ኢያ ሞቶሶና።
LUK 23:11 ሄሮዲሳራኔ ኢያ ዎታዳሬታራ ዬሱሳ ካꬊዶሶናኔ ሌቂሲዶሶና። ቦንቾ ኣፊላ ማይዚዲ ጲላፆሳኮ ዛሪዲ ዬዲዶሶና።
LUK 23:12 ሄሮዲሳራኔ ጲላፆሳራ ካሴ ሞርኬሺን ሄ ጋላስ ዎላ ጊጊዶሶና።
LUK 23:13 ጲላፆሲ ካሂኔ ሃላቃታ፥ ኣሳ ሃሬይሳታኔ ኣሳ ፄጊዲ፥
LUK 23:14 « ‹ሃ ኡራይ ኣሳ ጌላቴꬃስ ዴንꬄꬄስ› ጊዲ ታኮ ኤሂዴታ። ታካ ሂንቴ ሲንꬃን ፒልጋዳ ሂንቴ ሺሺዳ ሞቱዋስ ኣይቢ ባላካ ዴማቢኬ።
LUK 23:15 ሄሮዲሲ፥ ሄሳꬆ ኣይቢ ባላካ ኢያ ቦላ ዴሚቦና ጊሾ ኑኮ ዬዲስ። ቱማካ ሃ ኡራይ ሃይቆስ ጋꬂያ ኣይቢ ባላካ ኦꬂቤና።
LUK 23:16 ሄሳ ጊሾ፥ ኢያ ጋራፋዳ ቢላ ዬዳና» ያጊስ።
LUK 23:17 ሄሳ ኢ ጊዳይ ፋሲካ ባሌ ዎዴ ኢሲ ኣሲ ኤንታው ቢላናይሲ ኢያው ኣቶናባ ጊዲያ ጊሾሳ።
LUK 23:18 ዴሬይ ኡባይ ኢሲ ቦላ፥ «ሃ ኡራ ጌዴ ዲጋ፥ ኑስ ባርባና ቢላ» ያጊዲ ዋሲዶሶና።
LUK 23:19 ባርባኒ ካታማ ጊዶን ኣሳ ኢታባስ ዴንꬄꬂዲ ኣሴ ዎꬊዲ ቃሼቲዳ ኣሲ።
LUK 23:20 ጲላፆሲ ዬሱሳ ቢላናው ኮዪዲ ኣሳስ ዛሪ ኦዲስ።
LUK 23:21 ጊዶሺን፥ ኣሳይ፥ «ካቃ! ካቃ!» ያጊዲ ዋሲዶሶና።
LUK 23:22 ጲላፆሲ ሄꬓንꬆ፥ «ሃ ኡራይ ቆሂዳባይ ኣይቤ? ዎꬎስ ጋꬂያ ባላ ታ ዴማቢኬ። ሄሳ ጊሾ፥ ጋራፋዳ ዬዳ ኣጋና» ያጊስ።
LUK 23:23 ኤንቲ ባንታ ቃላ ꬎቁ ኦꬂዲ፥ «ካቄታናው ቤሴስ» ጊዲ ሚንꬂ ዋሲዶሶና። ኤንታ ዋሶይካ ፆኒስ።
LUK 23:24 ኤንታ ኦይሻ ጊሾ ጊዲ ጲላፆሲ ኢያ ቦላ ፒርዲስ።
LUK 23:25 ኣሳ ኢታባስ ዴንꬄꬄይሳኔ ኣሴ ዎꬊዲ ቃሼቲዳይሳ ቢላና ሜላ ዎሲዳ፥ ሄ ኡራ ኤንታው ቢሊስ። ሺን ዬሱሳ ኤንቲ ኮዪዳባ ኦꬃና ሜላ ኤንታው ኣꬂ ኢሚስ።
LUK 23:26 ዬሱሳ ኦይኪዲ ኤፊሺን ሲሞና ጊያ ቄሬና ቢታ ኣዴይ ጋፃሬፔ ዪሺን፥ ዴሚዲ ማስቃሊያ ቶሲዲ ዬሱሳ ካሊዲ ባና ሜላ ኡንዔꬂዶሶና።
LUK 23:27 ዳሮ ኣሳይኔ ባንታ ቲራ ኢጪሼ ዬኪያ ማጫሳቲ ኢያ ጉዪያራ ካሎሶና።
LUK 23:28 ሺን ዬሱሲ ኤንታኮ ጉዬ ሲሚዲ፥ «ሂንቴኖ፥ ዬሩሳላሜ ማጫሳቶ፥ ሂንቴ ሁዔሲኔ ሂንቴ ናይታስ ዬኪቴፔ ኣቲን ታው ዬኮፊቴ።
LUK 23:29 ‹ሄኮ ማይንꬃቲ፥ ዬሎና ኡሎቲኔ ꬋንꬆና ꬋንꬃቲ ኣንጄቲዶሶና› ሂንቴ ያጋና ጋላሳይ ያና።
LUK 23:30 ሄ ዎዴ ዴሬታ፥ ‹ኑ ቦላ ኩንዲቴ›፥ ዙማታካ፥ ‹ኑና ካሚቴ› ያጋና።
LUK 23:31 ሂዛ፥ ቃዬ ሚꬃ ሄሳꬆ ኦꬂኮ ሜላ ሚꬃ ዋታንዴሻ?» ያጊስ።
LUK 23:32 ኢያራ ዎꬋናው ሃራ ናምዑ ዎራንꬖታ ኤፊዶሶና።
LUK 23:33 ቄራኒዮ ጌቴቲያ ቤሳ ጋꬂዲ ካቂዶሶና። ዎራንꬖታፔ ኢሱዋ ኡሻቻ ባጋራ ሃንኩዋ ሃዲርሳ ባጋራ ካቂዶሶና።
LUK 23:34 ዬሱሲ፥ «ታ ኣዋው፥ ኤንቲ ኣይ ኦꬂያኮ ኤሮና ጊሾ ኔኒ ኤንታው ኣቶ ያጋ» ያጊስ። ኤንቲ ኢያ ኣፊላ ቦላ ሳማ ዬጊዲ ሻኬቲዲ ኤኪዶሶና።
LUK 23:35 ኣሳይ ኤቂዲ ፄሎሶና፥ ሺን ዴሪያ ሃሬይሳቲ፥ «ሃራታ ኣሺስ፤ ፆሳይ ዶሪዳ ኪሪስቶሲ ኢያ ጊዲኮ ኣኔ ባና ኣሾ» ያጊዲ ሌቂሲዶሶና።
LUK 23:36 ዎታዳሬቲ ኢያኮ ሺቂዲ፥ ጫላ ዎይኔ ኡሻ ኢሚዶሶና።
LUK 23:37 ያቲዲ፥ «ኔኒ ኣይሁዴታ ካዎ ጊዲኮ ኔ ሁዒያ ኣሻ» ያጊዲ ሌቂሲዶሶና።
LUK 23:38 ኢያው ሁዔ ባጋራ፥ «ሃይሲ ኣይሁዴታ ካዎ» ያጊያ ፁፌይ ዴዔስ።
LUK 23:39 ካቄቲዳ ዎራንꬖታፔ ኢሶይ ጫሼ ሳዓራ ጎቺሼ፥ «ኣኔ ኔኒ ኪሪስቶሳ ጊዲኮ፥ ኔናካ ኑናካ ኣሻ» ያጊስ።
LUK 23:40 ሺን ሃንኮ ዎራንꬖይ፥ «ኔኒ ሃይሳ ሜላ ፒርዳን ዴዓሼ ሃሪ ኣቶሺን፥ ፆሳስ ያዪኪ?
LUK 23:41 ኑኒ ኑ ባላስ ቤሲያ ፒርዳ ኤኮስ፥ ሺን ሃ ኡራይ ኢሲ ኢታባካ ኦꬂቤና» ያጊዲ ሃንቄቲስ።
LUK 23:42 ቃሲካ፥ «ዬሱሳ፥ ኔ ኔ ካዎቴꬃራ ያ ዎዴ ታና ቆፓ» ያጊስ።
LUK 23:43 ዬሱሲ፥ «ታ ኔው ቱማ ኦዳይስ፤ ሃቺ ኔኒ ታራ ጋናቴን ጊዳና» ያጊስ።
LUK 23:44 ሄ ጋላስ ኡሱፑን ሳቴፔ ቢዲ ኡዱፉን ሳቴ ጋካናው ኣዋይ ፖዑዋ ዲጊዳ ጊሾ ቢታ ኡባ ቦላ ꬉማ ጊዲስ። ፆሳ ኬꬃ ማጋራጆይ ዳኬቲዲ ናምዓን ሻኬቲስ።
LUK 23:46 ዬሱሲ፥ ቃላ ꬎቁ ኦꬂዲ፥ «ታ ኣዋው፥ ታ ታ ሼምፒው ኔ ኩሼን ሼꬋይስ» ያጊዲ ሃይቂስ።
LUK 23:47 ማቶ ሃላቃይ፥ ሃኒዳይሳ ቤዒዲ፥ «ሃይሲ ኡራይ ቱማካ ፂሎ» ያጊዲ ፆሳ ጋላቲስ።
LUK 23:48 ሃ ሃኒያባ ቤዓናው ሄ ቤሳ ሺቂዳ ኣሳ ኡባይ ሃኒዳባ ቤዒዳ ዎዴ ባንታ ቲራ ኢጪሼ ባንታ ሶ ሲሚዶሶና።
LUK 23:49 ጊዶሺን፥ ዬሱሳ ማታን ኤሪያ ኣሳ ኡባይ፥ ሄሳዳካ ጋሊላፔ ካሊዲ ዪዳ ማጫሳቲ ሄሳ ቤዒሼ ሃሆን ኤቂዶሶና።
LUK 23:50 ኣይሁዴ ሻንጎታፔ ኢሶይ፥ ዮሴፋ ጌቴቲያ ኡራይ ዴዔስ። ኢ ኣርማቲያሳ ጌቴቲያ ዪሁዳ ካታማፔ ዪስ። ኢ ሎዖኔ ፂሎ ኣሲ ጊዲያ ጊሾ ፆሳ ካዎቴꬃ ዩሳ ናጌስ። ሻንጎታፔ ኢሱዋ ጊዲሼ ኤንታ ዞሬቴꬃኒኔ ኦሱዋን ዴና።
LUK 23:52 ሄ ኡራይ ጲላፆሳኮ ቢዲ፥ ዬሱሳ ኣሃ ሞጋናው ታው ኢማ ጊዲ ዎሲስ።
LUK 23:53 ጲላፆሲ ኤካ ያጊን፥ ዬሱሳ ኣሃ ዎꬊሲዲ ኣፊላራ ፃፂስ። ዛላፌ ዎጪዲ ኬሲዳ ሃራ ኣሲ ሞጌቶና ኦራꬃ ዱፎን ዎꬂስ።
LUK 23:54 ሳምባቲ ጌላና ሃኒያ ጊሾ ሄ ጋላሳይ ጊጌቴꬃ ቃማ።
LUK 23:55 ጋሊላፔ ዴንዲዲ ዬሱሳ ካሊዲ ዪዳ ማጫሳቲ ዮሴፋራ ቢዲ ኢያ ኣሃ ዋቲ ሞጊያኮ ዱፉዋ ኣኬኪዲ ቤዒዶሶና።
LUK 23:56 ያፔ ሲሚዲ ሺቶኔ ቂባቲያ ጊጊሲዶሶና። ሂጌይ ኪቴይሳ ሜላ ሳምባታ ጋላስ ሼምፒ ፔዒዶሶና።
LUK 24:1 ሳሚንታፌ ኮይሮ ጋላስ፥ ዎጋ ዎዴ ዎንታ ዳሮ ጉራ፥ ማጫሳቲ ባንታ ጊጊሲዳ ሺቱዋ ኤኪዲ ዱፉዋ ቢዶሶና።
LUK 24:2 ኤንቲ ያ ጋኪያ ዎዴ ዱፉዋ ዶናን ዴዒያ ሹቻይ ጎንዴሬቲዲ ኪቾይሳ ዴሚዶሶና።
LUK 24:3 ኤንቲ ዱፉዋ ጋꬂ ጌሊዶሶና፥ ሺን ጎዳ ዬሱሳ ኣሃ ዴሚቦኮና።
LUK 24:4 ኤንቲ ያን ኤቂዲ ኣይቢ ሃኒዴ ጊዲ ቆፒሺን ኣኬኮና ዳሮ ጶሊያ ኣፊላ ማዒዳ ናምዑ ኣሳቲ ኤንታ ማታን ኤቂዶሶና።
LUK 24:5 ማጫሳቲ ያሼቲዲ ባንታ ሁዒያ ሳዓን ዚቂ ኦꬂዲ ዴዒሺን፥ ኣሳቲ ኤንታኮ፥ «ዴዖን ዴዔይሳ ሃይቆታ ጊዶን ኣይስ ኮዬቲ?
LUK 24:6 ኢ ሃይሳን ዴና፤ ሃይቆፔ ዴንዲስ፥ ‹ኣሳ ናዓይ ናጋራንቾታ ኩሼን ኣꬊ ኢሜታና፤ ኤንቲካ ኢያ ካቃና። ኢ ሄꬓንꬆ ቃማን ሃይቆፔ ዴንዳና› ያጊዲ፥ ኢ ሂንቴራ ጋሊላን ዴዒሼ ሂንቴው ኦዲዳ ቃላ ቆፒቴ» ያጊስ።
LUK 24:8 ማጫሳቲ ሄ ዎዴ ኢያ ቃላ ቆፒዶሶና።
LUK 24:9 ማጫሳቲ ዱፉዋፔ ሲሚዲ ሃኒዳባ ኡባ ታማኔ ኢሶታሲኔ ሃራታሲካ ኦዲዶሶና።
LUK 24:10 ሄሳ ሃዋሬታስ ኦዲዳይ ማግዴላ ማይራሞ፥ ዮሃና፥ ያይቆባ ኣዪው ማይራሞኔ ኤንታራ ዴዒያ ሃራ ማጫሳታ።
LUK 24:11 ሺን ኤንታው ማጫሳቲ ኦዲዳይሲ ኤልሞ ዳኒን ኣማኒቦኮና።
LUK 24:12 ሺን ጴፂሮሲ ዴንዲ ዎፂዲ ዱፎ ቢስ። ሄ ቤሳ ጋኪዲ ሆኪ ጋꬂ ፄሊያ ዎዴ ሞጎ ኣፊላ ፃላላ ቤዒስ። ሃኒዳባን ማላሌቲሼ ባ ሶ ሲሚስ።
LUK 24:13 ሄ ጋላስ ካሊያ ታማሬታፔ ናምዓቲ ዬሩሳላሜፔ ታማኔ ኢሲ ኪሎ ሚቲሬ ሃኪያ ኤማሁሴ ጉታ ቦሶና።
LUK 24:14 ኤንቲ ዎላ ሃኒዳባ ኡባ ኦዴቶሶና።
LUK 24:15 ኤንቲ ሄ ሃኖታባ ቆፒሼኔ ኦዴቲሼ ቢያ ዎዴ ዬሱሲ ባ ሁዔን ሺቂዲ ኤንታራ ቤስ።
LUK 24:16 ሃኖሺን፥ ኤንቲ ኢያ ኤሮና ሜላ ኤንታ ኣይፌይ ኦይኬቲስ።
LUK 24:17 ኢ፥ «ሂንቴ ዎላ ኦጌ ቦላ ዴዒሼ ኦዴቴይሲ ኣይቤ?» ያጊስ። ኤንቲ ኣዛኒዲ ሲዒ ጊዲ ኤቂዶሶና።
LUK 24:18 ኤንታፌ ኢሶይ ቄሊዮጳ ጌቴቴይሲ፥ «ሃ ቃማታ ጊዶን ዬሩሳላሜን ሃኒዳባ ኤሮናይሲ፥ ኔ ቢታስ ኢማꬄዬ?» ያጊስ።
LUK 24:19 ኢ ዛሪዲ፥ «ኢ ሃኒዳይሲ ኣይቤ?» ያጊዲ ኦይቺስ። ኤንቲ፥ «ፆሳ ሲንꬃኒኔ ኣሳ ሲንꬃን ኦሶኒኔ ኦዳን ሚኖ ናቤ ጊዲዳ ናዚሬቴ ዬሱሳባ።
LUK 24:20 ኢያ ካሂኔ ሃላቃቲኔ ኑና ሃሬይሳቲ ሃይቆ ፒርዳስ ኣꬂ ኢሚዲ፥ ካቂዶሶና።
LUK 24:21 ኑኒ ኢስራዔሌ ኣሳ ዎዛንዴ ጊዲ ኡፋይቲዲ ናጊዳሺን ሃይሲ ሃኒን ሃቺ ሄꬓንꬆ ቃማ።
LUK 24:22 ቃሲ ኑ ጊዶፌ ኢሲ ኢሲ ማጫሳቲ ኑና ማላሊሲዶሶና። ኤንቲ ሃቺ ዎንታ ጉራ ዱፉዋ ቢዶሶና።
LUK 24:23 ኢያ ኣሃ ꬋዪዳ ዎዴ ሲሚ ዪዲ፥ ‹ኢ ፓፃ ዴዔስ› ያጊያ ኪታንቾቲ ቆንጪን ቤዒዳ ያጊዲ ኦዲዶሶና።
LUK 24:24 ኑ ጊዶፌካ ኢሶቲ ኢሶቲ ዱፉዋ ቢዲ ማጫሳቲ ኦዲዳይሳꬆ ሃኒን ቤዒዶሶና፥ ሺን ኢያ ቤዒቦኮና» ያጊስ።
LUK 24:25 ኢ ኤንታኮ፥ «ሂንቴኖ፥ ኣኬኮና ኣሳው፥ ሂንቴ ዎዛናይ ናቤቲ ኦዲዳባ ኡባ ኣማናናው ጋምዔይሳቶ፥
LUK 24:26 ኪሪስቶሲ ሃ ሜቱዋ ኤካናዉኔ ባ ቦንቹዋን ጌላናው ቤሴኔ?» ያጊስ።
LUK 24:27 ሙሴፔኔ ናቤታ ኡባፌ ዴንዲዲ ጌሻ ማፃፋን ኢያባይ ፃፌቲዳይሳ ኡባ ኤንታው ቆንጪሲስ።
LUK 24:28 ኤንቲ ቢያ ጉታኮ ማታቲዳ ዎዴ ዬሱሲ ኣꬊዲ ሃሆ ሶ ቢያ ዳኒን፥
LUK 24:29 ኤንቲ፥ «ሳዓይ ቃሚዳ ጊሾ ኑራ ኣቃ» ያጊዲ ሚንꬂዲ ዎሲዶሶና። ሄሳ ጊሾ፥ ኤንታራ ኣቃናው ጌሊስ።
LUK 24:30 ኤንታራ ኢሲፌ ጋይታ ቦላ ኡቲዲ፥ ኡይꬃ ዴንꬂዲ፥ ሜንꬂ ኣንጂዲ ኤንታው ኢሚስ።
LUK 24:31 ሄ ዎዴ ኤንቲ ኤራና ሜላ ኤንታ ኣይፌይ ዶዬቲስ። ኤንቲካ ኤሪዶሶና። ሺን ኢ ኤንታፌ ጌሚስ።
LUK 24:32 ኤንቲ፥ «ኑ ኦጊያ ቦላ ዴዒሺን ኢ ኑስ ጌሻ ማፃፋ ቢርሺሺኒኔ ኑና ሃሳዪሲሺን ኑ ዎዛናይ ፁጌቲቤኔ?» ያጊዶሶና።
LUK 24:33 ሄ ዎዴ ዴንዲዲ ጉዬ ዬሩሳላሜ ዪዶሶና። ታማኔ ኢሶቲኔ ሃራቲ ኢሲ ቦላ ሺቂዲ ዴዒሺን ዴሚዶሶና።
LUK 24:34 ኤንቲ፥ «ጎዳይ ቱማ ዴንዲስ፤ ሲሞናስ ቆንጪስ» ያጊዶሶና።
LUK 24:35 ሄ ናምዑ ታማሬቲ ኤማሁሴ ኦጊያ ቦላ ዴዒሺን ሃኒዳይሳኔ ኡይꬃ ሜንꬂዳ ዎዴ ዋቲ ኢያ ኤሪዳኮ ኤንታው ኦዲዶሶና።
LUK 24:36 ናምዑ ታማሬቲ ሄሳ ኦዳ ቦላ ዴዒሺን፥ ዬሱሲ ኤንታ ጊዶን ኤቂዲ፥ «ሳሮይ ሂንቴው ጊዶ» ያጊስ።
LUK 24:37 ጊዶሺን፥ ኤንቲ ዳጋሚዲ፥ ሞይቲሌ ቤዒዳ ዳኒን ያዪዶሶና።
LUK 24:38 ኢ ኤንታኮ፥ «ኣይስ ባቢዴቲ? ኣይስ ሲꬌይ ሂንቴ ዎዛናን ጌሊዴ?
LUK 24:39 ታ ኩሺያኔ ታ ቶሁዋ ቤዒቴ፤ ታኒ ታና። ቃሲ ኦይኪዲ ቤዒቴ፤ ታናን ሂንቴ ቤዔይሳዳ፥ ሞይቲሌስ ኣሾይኔ ሜቄꬂ ባዋ» ያጊስ።
LUK 24:40 ያጊዲ፥ ባ ቶሁዋኔ ባ ኩሺያ ኤንታ ቤሲስ።
LUK 24:41 ኤንቲ ኡፋይሳፌ ዴንዶይሳን ኣማኖና ማላሌቴꬃን ዴዒሺን፥ ዬሱሲ ኤንታኮ፥ «ሃይሳን ሂንቴው ሚያባይ ዴዒ?» ያጊስ።
LUK 24:42 ኤንቲ ኢሲ ጫጬቲዳ ሞሎ ኢያው ኢሚዶሶና።
LUK 24:43 ኢ ኤኪዲ ኤንታ ሲንꬃን ሚስ።
LUK 24:44 ኢ፥ «ታ ሂንቴራ ጋምዒዳ ዎዴ ኡባን ሙሴ ማፃፋታን፥ ናቤታ ማፃፋታኒኔ ማዝሙሬ ማፃፋታን፥ ታ ጊሾ ፃፌቲዳባይ ኡባይ ፖሌታናው ቤሴስ ያጋዳ ታ ሂንቴው ኦዲዳ ቃላይ ሃይሳ» ያጊስ።
LUK 24:45 ሄ ዎዴ ጌሻ ማፃፋታ ኣኬካና ሜላ ዎዛና ኤንታ ዶዪስ።
LUK 24:46 ሄሳዳካ፥ «ኪሪስቶሲ ዋዬ ኤካና፥ ሄꬓንꬆ ቃማን ሃይቆፔ ዴንዳና ያጊዲ ፃፌቲስ።
LUK 24:47 ዬሩሳላሜፔ ዴንዲዲ ኣሳ ኡባስ ናጋራፔ ማሮቴꬃይኔ ኣቶቴꬃይ ኢያ ሱንꬃን ማርካታና።
LUK 24:48 ሂንቴ ሄሳስ ማርካታ።
LUK 24:49 ሄኮ፥ ታካ ታ ኣዋይ ኢሚዳ ኡፋይሳ ሂንቴው ዬዳና። ሂንቴ ሳሎፔ ዎልቃ ማዓና ጋካናው ዬሩሳላሜ ካታማን ጋምዒቴ» ያጊስ።
LUK 24:50 ሄሳፌ ጉዬ፥ ቢታኒያ ካታማ ኤንታና ኤኪዲ ቢስ። ባ ኩሺያ ዴንꬂዲ ኣንጂስ።
LUK 24:51 ኤንታና ኣንጂሼ ኤንታፌ ሻኬቲዲ ፑዴ ሳሎ ኤኬቲስ።
LUK 24:52 ኤንቲ ዚጊ ጎይኒዲ ዳሮ ኡፋይሳን ዬሩሳላሜ ሲሚዶሶና።
LUK 24:53 ፆሳ ኡባ ዎዴ ጋላቲሼ ፆሳ ኬꬃን ጋምዒዶሶና።
JOH 1:1 ቃላይ ኮይሮ ዴዔስ። ቃላይካ ፆሳራ ዴዔስ፤ ሄ ቃላይ ፆሳ።
JOH 1:2 ኮይሮፔ ቃላይ ፆሳራ ዴዔስ።
JOH 1:3 ፆሳይ ኡባባ ቃላ ባጋራ ሜꬊስ። ሜꬌቲዳባፔ ኢሶይካ ኢያ ባጋራ ሜꬌቶናባይ ባዋ።
JOH 1:4 ኢያን ዴዖይ ዴዔስ፤ ሄ ዴዖይ ኣሳስ ፖዖ።
JOH 1:5 ፖዖይ ꬉማን ፖዔስ፤ ꬉማይ ፖዑዋ ፆኒቤና።
JOH 1:6 ፆሳይ ኪቲዳ፥ ኢሲ ዮሃኒሳ ጊያ ኣሲ ዴዔስ።
JOH 1:7 ኣሳ ኡባይ ፖዑዋን ኣማናና ሜላ ኢ ፖዖስ ማርካ ጊዲዲ ዪስ።
JOH 1:8 ኢ ፖዑዋባ ማርካታናው ዪሲፔ ኣቲን ባ ሁዔን ፖዖ ጊዴና።
JOH 1:9 ኣሳ ኡባስ ፖዒሲያ ቱማ ፖዖይ ኣላሚያ ዬስ።
JOH 1:10 ቃላይ ኣላሜን ዴዒስ። ፆሳይ ቃላን ኣላሚያ ሜꬊስ፥ ሺን ኣላሜይ ኢያ ኤሪቤና።
JOH 1:11 ኢ ባይሳታኮ ዪስ፥ ሺን ኢያይሳቲ ኢያ ኤኪቦኮና።
JOH 1:12 ሺን ኢ ባና ኤኪዳይሳታሲኔ ኢያ ሱንꬃን ኣማኒዳይሳታስ ፆሳ ናይታ ጊዳና ሜላ ማታ ኢሚስ።
JOH 1:13 ኤንቲ ፆሳፌ ዬሌቲዶሶናፔ ኣቲን ኣሲ ዬሌቲያ ዎጋን ዎይኮ ኣዴ ሼኔን ዎይኮ ኣሳ ኣሞን ዬሌቲቦኮና። ፆሳይ ኢ ኤንታ ኣዋ።
JOH 1:14 ቃላይ ኣሴ ጊዲስ፤ ኣꬎ ኬሃቴꬃኔ ቱማ ኩሚዲ ኑ ጊዶን ዴዒስ። ኢ ኣዋስ ኢሲ ናዓ ጊዲዲ ኤኪዳ ኢያ ቦንቹዋ ኑኒ ቤዒዳ።
JOH 1:15 ዮሃኒሲ ኢያባ ማርካቲስ። ባ ቃላ ꬎቁ ኦꬂዲ፥ «ታኒ፥ ‹ታፔ ጉዬራ ዬይሲ ታፔ ካሴ ዴዒያ ጊሾ ታፔ ኣꬌስ› ጋዳ ማርካቲዳይሲ ሃይሳ» ያጊስ።
JOH 1:16 ኑኒ ኡባይ ኢያ ኣꬎ ኬሃቴꬃ ኩሜꬃፌ ኣንጆ ቦላ ኣንጆ ኤኪዳ።
JOH 1:17 ፆሳይ ሂጊያ ሙሴ ባጋራ ኢሚስ፥ ሺን ኣꬎ ኬሃቴꬃይኔ ቱማቴꬃይ ዬሱስ ኪሪስቶሳ ባጋራ ዪስ።
JOH 1:18 ፆሳ ቤዒዳ ኣሲ ኦኒካ ባዋ፤ ባ ኣዋ ማታን ዴዒያ ኢሲ ናዓ ፃላሊ ባው ፆሴ ጊዲዳይሲ ኢያ ቆንጪሲስ።
JOH 1:19 ዬሩሳላሜን ዴዒያ ኣይሁዴ ሃላቃቲ፥ ካሂኔታኔ ሌዌታ፥ «ኔኒ ኦኔ?» ጊዲ፥ ዮሃኒሳ ኦይቻና ሜላ ኢያኮ ኪቲን፥ ዮሃኒሲ ኤንታው ማርካቲዳ ማርካቴꬃይ ሃይሳ።
JOH 1:20 ዮሃኒሲ፥ «ታኒ ኪሪስቶሳ ጊዲኬ» ያጊዲ፥ ጌሺዲ ማርካቲሲፔ ኣቲን ካዲቤና።
JOH 1:21 ኤንቲ፥ «ያቲን፥ ኔኒ ኦኔ? ኔኒ ኤሊያሴዬ?» ያጊዲ ኦይቺዶሶና። ዮሃኒሲ፥ «ኣካይ ጊዲኬ» ያጊስ። ቃሲ ኤንቲ፥ «ኔኒ ያና ጌቴቲዳ ናቢያዬ?» ያጊዲ ኦይቺዶሶና። ዮሃኒሲ፥ «ኣካይ» ጊዲ ዛሪስ።
JOH 1:22 ያቲን፥ «ኔኒ ኦኔ? ኑኒ ኑና ኪቲዳይሳታስ ኦዳና ሜላ ኔኒ ኔና ኦና ጋይ?» ያጊዶሶና።
JOH 1:23 ዮሃኒሲ ዛሪዲ፥ «ናቢያ ኢሳያሲ ጊዳይሳዳ፥ ‹ጎዳ ኦጊያ ሱሪሲቴ!› ጊዲ ባዞ ቢታን ዋሲያ ኡራ ቃላይ ታና» ያጊስ።
JOH 1:24 ቃሲ ፋሪሳዌቲ ኪቲዳ ኣሳቲ
JOH 1:25 ዮሃኒሳኮ፥ «ኔኒ ኪሪስቶሳ ዎይኮ ኤሊያሳ ዎይኮ ናቤ ጊዶና ኢፂኮ፥ ያቲን ኣይስ ፃማቃይ?» ጊዲ ኦይቺዶሶና።
JOH 1:26 ዮሃኒሲ ዛሪዲ፥ «ታኒ ሃꬃን ፃማቃይስ፥ ሺን ሂንቴ ኤሮና ኣሲ ሂንቴ ጊዶን ኤቂስ።
JOH 1:27 ኢ ታፔ ጉዬራ ዬስ። ታኒ ሃሪ ኣቶሺን ኢያ ጫማ ዎዶሩዋ ቢላናው ቤሲኬ» ያጊስ።
JOH 1:28 ሄሲ ኡባይ ዮርዳኖሴ ሻፋፔ ሄፊንꬃን፥ ቢታኒያ ካታማን፥ ዮሃኒሲ ፃማቂያ ቤሳን ሃኒስ።
JOH 1:29 ዮሃኒሲ ዎንቴꬃ ጋላስ ዬሱሲ ባኮ ዪሺን ቤዒዲ፥ «ኣላሚያ ናጋራ ቁቺያ ፆሳ ዶርሳይ ሃይሳ!
JOH 1:30 ታኒ፥ ‹ታፔ ጉዬራ ኢሲ ኣሲ ያና። ኢ ታፔ ካሴ ዴዒያ ጊሾ ታፔ ኣꬌስ› ጋዳ ኦዲዳይሲ ሃይሳ።
JOH 1:31 ኢ ኦኔኮ ታኒ ኤሪኬ። ሺን ኢስራዔሌ ኣሳስ ኢያ ቆንጪሳናው ሃꬃን ፃማቃሼ ያስ» ያጊስ።
JOH 1:32 ዮሃኒሲ ሃይሳዳ ያጊዲ ማርካቲስ፡ «ጌሻ ኣያናይ ሳሎፔ ሆሌዳ ዎꬊሺኒኔ ኢያራ ዴዒሺን ቤዓስ።
JOH 1:33 ሄሲ ሃናናፔ ካሴ ታኒ ኢያ ኤሪኬ። ሺን ሃꬃን ፃማቃናው ታና ኪቲዳ ፆሳይ፥ ‹ጌሻ ኣያናይ ዎꬊዲ ኢያራ ዴዒሺን ኔኒ ቤዓናይሲኔ ጌሻ ኣያናን ፃማቃናይሲ ኢያ› ያጊዲ ታው ኦዲስ።
JOH 1:34 ታኒ ሄሲ ሃኒሺን ቤዓዳ፥ ኢ ፆሳ ናዓ ጊዲዳይሳ ማርካታይስ» ያጊስ።
JOH 1:35 ቃሲ ዎንቴꬃ ጋላስ ዮሃኒሲ ባ ታማሬታፔ ናምዓታራ ኢሲፌ ኤቂስ።
JOH 1:36 ዬሱሲ ኣꬊሺን ዮሃኒሲ ቤዒዲ፥ «ፆሳ ዶርሳይ ሃይሲሽ!» ያጊስ።
JOH 1:37 ናምዑ ዮሃኒሳ ታማሬቲ ዮሃኒሲ ጌይሳ ሲዒዲ ዬሱሳ ካሊዶሶና።
JOH 1:38 ዬሱሲ ባና ካሌይሳታ ጉዬ ሲሚ ቤዒዲ፥ «ኣይ ኮዬቲ?» ያጊዲ ኦይቺስ። ኤንቲ ዛሪዲ፥ «ኣስታማሪያው፥ ኔኒ ኣዉን ዴዓይ?» ያጊዶሶና።
JOH 1:39 ዬሱሲ ኤንታኮ፥ «ሃ ዪዲ ቤዒቴ» ያጊስ። ኤንቲ ቢዲ ኢ ዴዒያሱዋ ቤዒዶሶና። ሄ ጋላስ ሳዓይ ታሙ ሳቴ ሄራ ጊዲያ ጊሾ ኢያ ማታን ፔዒዶሶና።
JOH 1:40 ዮሃኒሲ ጊዳይሳ ሲዒዲ፥ ዬሱሳ ካሊዳ ናምዑ ታማሬታፔ ኢሶይ፥ ሲሞን ጴፂሮሳ ኢሻ ኢንዲሪያሳ።
JOH 1:41 ኢንዲሪያሲ ኮይሮ ባ ኢሻ ሲሞናራ ጋሄቲዲ፥ «ኑኒ ኪሪስቶሳ ዴሚዳ» ያጊስ።
JOH 1:42 ኢንዲሪያሲ ሲሞና ዬሱሳኮ ኤሂስ። ዬሱሲ ሲሞና ቤዒዲ፥ «ኔኒ ዮና ናዓ ሲሞና፤ ኔ ሱንꬃይ ኬፋ ጊዲ ፄጌታና» ያጊስ።
JOH 1:43 ዎንቴꬃ ጋላስ ዬሱሲ ጋሊላ ቢታ ባናው ቆፋ ቃቺስ። ኢ ፊልጶሳራ ጋሄቲዲ፥ «ታና ካላ!» ያጊስ።
JOH 1:44 ፊልጶሲ፥ ኢንዲሪያሲኔ ጴፂሮሲ ዴዒዳ ቤቴሳይዳ ካታማፔ ዪዳ ኣሴ።
JOH 1:45 ፊልጶሲ ናቲናዔላራ ጋሄቲዲ፥ «ሙሴይ ሂጌ ማፃፋን፥ ቃሲ ናቤቲካ ኢያባ ፃፊዳ ዮሴፋ ናዓ ናዚሬቴ ዬሱሳ ኑኒ ዴሚዳ» ያጊስ።
JOH 1:46 ናቲናዔሊ ዛሪዲ፥ «ናዚሬቴ ካታማፔ ሎዖባይ ኬያናው ዳንዳዒ?» ያጊስ። ፊልጶሲ፥ «ያዳ ቤዓ» ያጊስ።
JOH 1:47 ናቲናዔሊ ባኮ ዬይሳ ዬሱሲ ቤዒዲ፥ «ጌኔይ ባይና ቱማ ኢስራዔሌ ኣሲ ሃይሳ!» ያጊስ።
JOH 1:48 ናቲናዔሊ ዬሱሳኮ፥ «ኔኒ ታና ኣዉን ኤራይ?» ያጊስ። ዬሱሲ ዛሪዲ፥ «ፊልጶሲ ኔና ፄጋናፔ ሲንꬄ፥ ኔኒ ባላሴ ሚꬃ ጋርሳን ዴዒሺን ታኒ ኔና ቤዓስ» ያጊስ።
JOH 1:49 ናቲናዔሊ ዛሪዲ፥ «ኣስታማሪያው፥ ኔኒ ፆሳ ናዓ! ኔኒ ኢስራዔሌ ካዎ!» ያጊስ።
JOH 1:50 ዬሱሲ ኢያኮ፥ «ታኒ ኔና ባላሴ ሚꬃ ጋርሳን ቤዓስ ጊዳ ጊሾ ኣማናይ? ኔኒ ሃይሳፌ ኣꬊያባ ቤዓና!» ያጊስ።
JOH 1:51 ቃሲ ዬሱሲ፥ «ታኒ ሂንቴው ቱማ ኦዳይስ፤ ሳሎይ ዶዬቲን፥ ፆሳ ኪታንቾቲ ኣሳ ናዓ ቦላ ኬዪሺኒኔ ዎꬊሺን ሂንቴ ቤዓና» ያጊስ።
JOH 2:1 ሄꬓንꬆ ጋላስ ጋሊላ ቢታን ቃና ካታማን ያጋኖይ ያጋኔቲስ። ዬሱሳ ኣያ ሄ ያጋኑዋን ዴዓዉሱ።
JOH 2:2 ዬሱሲካ ባ ታማሬታራ ኢሲፌ ሄ ያጋኑዋ ፄጌቲስ።
JOH 2:3 ዎይኔ ኡሻይ ዉሪን፥ ዬሱሳ ኣያ ዬሱሳኮ፥ «ኤንታው ዎይኔ ኡሻይ ዉሪስ» ያጋሱ።
JOH 2:4 ዬሱሲ ዛሪዲ፥ «ታ ኣዬ፥ ኔ ሃይሳን ጌሎፓ? ታ ዎዴይ ቡሮ ጋኪቤና» ያጊስ።
JOH 2:5 ዬሱሳ ኣያ ኦሳንቾታኮ፥ «ኢ ሂንቴው ኦዲያባ ኣይቢባ ጊዲኮካ ኦꬂቴ» ያጋሱ።
JOH 2:6 ኣይሁዴቲ ባንታ ጌሾ ዎጋስ ጎዔቲያ ኡሱፑን ሹቻ ባꬃቲ ሄ ቤሳን ዴዖሶና። ኢሲ ኢሲ ባꬃይ ናምዑ ዎይኮ ሄꬑ ፁጋ ኦይኬስ።
JOH 2:7 ዬሱሲ ኦሳንቾታኮ፥ «ባꬃታን ሃꬄ ኩንꬂቴ» ያጊስ። ኤንቲ ባꬃታስ ዶና ጋካናው ሃꬄ ኩንꬂዶሶና።
JOH 2:8 ዬሱሲ ኤንታኮ፥ «ሃዒ ዱቂዲ ያጋኑዋ ኣዋቴꬃን ፖሊሴይሳስ ኢሚቴ» ያጊስ። ኤንቲ ኢያው ኤፊዲ ኢሚዶሶና።
JOH 2:9 ያጋኑዋ ኣዋቴꬃን ፖሊሴይሲ ዎይኔ ኡሺ ላሜቲዳ ሃꬃ ጋንፂ ኤኪዲ ኣዉፔ ዪዳኮ ኤሪቤና፥ ሺን ሃꬃ ኩንꬂዳ ኦሳንቾቲ ኤሮሶና። ያጋኑዋ ኣዋቴꬃን ፖሊሴይሲ ማቺው ኤኬይሳ ፄጊዲ፥
JOH 2:10 «ኦኒካ ሎዖ ዎይኔ ኡሻ ኣሳ ኮይሮቲዲ ኡሼስ። ያቲዲ ኣሳይ ኡዪ ካሊዳፔ ጉዬ ቂራሪያ ኢሜስ። ሺን ኔኒ ሎዖ ዎይኔ ኡሻ ሃኖ ጋካናው ዎꬃ ኣጋዳሳ» ያጊስ።
JOH 2:11 ዬሱሲ ሃ ኮይሮ ማላታ ጋሊላ ቢታን ቃና ካታማን ኦꬂስ፤ ሄሳን ባ ጊታቴꬃ ቤሲስ። ኢያ ታማሬቲ ኢያ ኣማኒዶሶና።
JOH 2:12 ሄሳፌ ጉዬ፥ ዬሱሲ ባ ኣዬራ፥ ባ ኢሻታራኔ ባ ታማሬታራ ኢሲፌ ቂፊርናሆሜ ካታማ ቢዲ ጉꬃ ጋላስ ጋምዒስ።
JOH 2:13 ኣይሁዴቲ ቦንቺያ ፓሲካ ባሌ ጋላሳይ ማታቲን ዬሱሲ ዬሩሳላሜ ቢስ።
JOH 2:14 ቢዲ ፆሳ ኬꬃን ቦራታ፥ ሚዛታ፥ ዶርሳታኔ ሆሌታ ባይዜይሳታኔ ባንታ ኦይዲያን ኡቲዲ ሚሼ ላሜይሳታ ዴሚስ።
JOH 2:15 ኢ ፁርቃፌ ዶቂዲ ኣሳ ኡባ ኤንታ ሜሄታራ ፆሳ ኬꬃፌ ጎዲዲ ካሬ ኬሲስ። ሚሼ ላሜይሳታ ፃርጴዛታካ ኣꬂ ዬጊዲ ኤንታ ሚሺያ ላሊስ።
JOH 2:16 ሆሌ ባይዜይሳታ፥ «ሃ ሆሌታ ሃይሳፌ ኬሲቴ፤ ታ ኣዋ ኬꬃ ጊያ ኦꬆፊቴ» ያጊስ።
JOH 2:17 ኢያ ታማሬቲ ጌሻ ማፃፋን፥ «ታኒ ኔ ኬꬃስ ሚሼቲያ ሚሻይ ታና ታማዳ ፁጌስ» ጌቴቲዲ ፃፌቲዳይሳ ኣኬኪዶሶና።
JOH 2:18 ሄሳፌ ጉዬ፥ ኣይሁዴቲ ዛሪዲ፥ «ኔ ሃይሳ ኦꬃናው ኔው ማቲ ዴዔይሳስ ኑና ኣይ ማላታ ኦꬃዳ ቤሳኔ?» ያጊዶሶና።
JOH 2:19 ዬሱሲ፥ «ሃ ፆሳ ኬꬃ ላሊቴ፤ ታኒ ሄꬑ ጋላሳን ዛራዳ ኬፃና» ያጊስ።
JOH 2:20 ቃሲካ ኣይሁዴቲ፥ «ሃ ፆሳ ኬꬃ ኬፃናው ኦይታማኔ ኡሱፑን ላይꬂ ኤኪስ፥ ሺን ኔኒ ሄꬑ ጋላሳን ኬፃኔ?» ያጊዶሶና።
JOH 2:21 ሺን ዬሱሲ ኦዲያ ፆሳ ኬꬃይ ባ ኣሳቴꬃባ።
JOH 2:22 ሄሳ ጊሾ፥ ዬሱሲ ሃይቆፔ ዴንዲዳፔ ጉዬ ኢያ ታማሬቲ ኢ ሄሳ ጊዳይሳ ኣኬኪዶሶና። ቃሲ ኤንቲ ጌሻ ማፃፋን ፃፌቲዳይሳኔ ዬሱሲ ኦዲዳይሳ ኣማኒዶሶና።
JOH 2:23 ዬሱሲ ፓሲካ ቦንቺያ ቤሳን ዬሩሳላሜን ዴዒሺን፥ ኢ ኦꬂዳ ማላታታ ቤዒዲ ዳሮ ኣሳይ ኢያ ኣማኒዶሶና።
JOH 2:24 ሺን ዬሱሲ ኣሳ ኡባ ኤሪያ ጊሾ ኤንታ ኣማኒቤና።
JOH 2:25 ኣሳ ዎዛናን ዴዒያባ ኢ ባ ሁዔን ኤሪያ ጊሾ ኣሳባ ኦኒካ ኢያው ኦዳና ሜላ ኮሺቤና።
JOH 3:1 ፋሪሳዌታ ያራፔ ጊዲዳ፥ ኣይሁዴታ ሃላቃይ፥ ኒቆዲሞሳ ጊያ ኢሲ ኣዴይ ዴዔስ።
JOH 3:2 ኒቆዲሞሲ ቃማ ዬሱሳኮ ዪዲ፥ «ኣስታማሪያው፥ ኔኒ ፆሳይ ኪቲዳ ኣስታማሬ ጊዴይሳ ኑኒ ኤሮስ። ኣይስ ጊኮ፥ ፆሳይ ኢያራ ዶና ኢፂኮ ሃ ኔኒ ኦꬂያ ማላታ ኦꬃናው ዳንዳዒያ ኣሲ ባዋ» ያጊስ።
JOH 3:3 ዬሱሲ ዛሪዲ፥ «ታኒ ኔው ቱማ ኦዳይስ፤ ኦኒካ ዛሪ ዬሌቶና ኢፂኮ ፆሳ ካዎቴꬃ ቤዓናው ዳንዳዔና» ያጊስ።
JOH 3:4 ኒቆዲሞሲ፥ «ጬጋ ኣሲ ዋኒዲ ዛሪ ዬሌታናው ዳንዳዒ? ባ ኣዬ ኡሎ ሲሚ ጌሊዲ ዛሪ ዬሌታናው ዳንዳዒ?» ያጊስ።
JOH 3:5 ዬሱሲ ዛሪዲ፥ «ታኒ ኔው ቱማ ኦዳይስ፤ ኦኒካ ሃꬃፌኔ ጌሻ ኣያናፔ ዬሌቶና ኢፂኮ፥ ፆሳ ካዎቴꬃ ጌላናው ዳንዳዔና።
JOH 3:6 ኣሾ ናዓቴꬂ ኣዉፔኔ ኣዪፔ ዬስ፤ ፆሳ ናዓቴꬂ ጌሻ ኣያናፔ ኢሜቴስ።
JOH 3:7 ታኒ፥ ‹ሂንቴ ዛሪ ዬሌታናው ቤሴስ› ጋዳ ሂንቴው ኦዲዳ ጊሾ ኔኒ ማላሌቶፋ።
JOH 3:8 ጫርኮይ ባ ኮዪዳ ቤሲ ጫርኬስ። ኔኒ ኢያ ኮሺንቻ ሲዓሳፔ ኣቲን ኢ ኣዉፔ ያኮ ዎይኮ ኣው ቢያኮ ኤራካ። ኣያናፔ ዬሌቲዳ ኡባይ ሄሳ ሜላ» ያጊስ።
JOH 3:9 ያቲን ኒቆዲሞሲ፥ «ሄሲ ዋኒዲ ሃናናው ዳንዳዒ?» ያጊዲ ኦይቺስ።
JOH 3:10 ዬሱሲ ዛሪዲ፥ «ኔኒ ኢስራዔላታ ኣስታማሬ ጊዳሼ ሃይሳ ኤሪኪ?
JOH 3:11 ታኒ ኔው ቱማ ኦዳይስ፤ ኑ ኤሪያባ ኦዶሲኔ ቤዒዳባ ማርካቶስ፥ ሺን ኑ ማርካቴꬃ ሂንቴ ኤኬኬታ።
JOH 3:12 ታኒ ሂንቴው ሳዓባ ኦዲን ሂንቴ ኣማኖናባ ጊዲኮ ሳሎባ ኦዲን ዋቲ ኣማናኔ?
JOH 3:13 ሳሎፔ ዎꬊዳ ኣሳ ናዓፔ ኣቲን ሳሎ ኬዪዳይ ኦኒካ ባዋ፤ [ሳሎን ዴዒያ ኣሳ ናዓይ ታና]» ያጊስ።
JOH 3:14 ሙሴይ ባዞ ቢታን ቢራታ ሾሺ ካቂዳይሳዳ ታና ኣማኒዳ ኡባይ ሜሪና ዴዑዋ ኤካና ሜላ ኣሳ ናዓይ ꬎቁ ጋናው ቤሴስ።
JOH 3:16 ፆሳ ናዓ ኣማኒያ ኡባይ ሜሪና ዴዑዋ ላታናፔ ኣቲን ꬋዮና ሜላ ፆሳይ ሃ ኣላሚያ ዳሮ ዶሲዳ ጊሾ ባ ኢሲ ናዓ ኢሚስ።
JOH 3:17 ፆሳይ ባ ናዓ ሃ ኣላሚያ ኪቲዳይ ኣላሚያ ፒርዳናው ጊዶናሺን ኣላሚያ ኢያ ባጋራ ኣሻናሳ።
JOH 3:18 ናዓ ኣማኒያ ኦኒካ ፒርዴቴና፥ ሺን ናዓ ኣማኖና ኦኒካ ኢሲ ፆሳ ናዓ ኣማኒቦና ጊሾ ሃዒ ፒርዴቲስ።
JOH 3:19 ፒርዳይካ ሃይሳ፡ ፖዖይ ኣላሚያ ዪስ፥ ሺን ኣሳ ኦሶይ ኢታ ጊዲያ ጊሾ ኣሳይ ፖዑዋፔ ኣꬂዲ ꬉማ ዶሴስ።
JOH 3:20 ኢታባ ኦꬂያ ኦኒካ ፖዖ ኢፄስ። ኣይስ ጊኮ፥ ባ ኦሶይ ቆንጮና ሜላ ፖዑዋኮ ዬና።
JOH 3:21 ሺን ቱማ ኦꬂያ ኦኒካ ፆሳይ ኪቲዳይሳዳ ኢ ኦꬂዳይሳ ፖዖይ ቆንጪሳና ሜላ ፖዑዋኮ ዬስ።
JOH 3:22 ሄሳፌ ጉዬ፥ ዬሱሲኔ ኢያ ታማሬቲ ዪሁዳ ቢታ ቢዶሶና። ዬሱሲ ያን ፃማቂሼ ኤንታራ ጉꬃ ዎዴ ኡቲስ።
JOH 3:23 ቃሲ ዮሃኒሲ ሳሌሜ ማታን ዴዒያ ሄኖና ጊያሶን ጊዲያ ሃꬂ ዴዒያ ጊሾ ኣሳ ያን ፃማቄስ። ኣሳይካ ያ ቢዲ ፃማቄቶሶና።
JOH 3:24 ሄ ዎዴ ዮሃኒሲ ቡሮ ቃሼቲቤና።
JOH 3:25 ሄሳፌ ጉዬ፥ ዮሃኒሳ ታማሬቲኔ ኢሲ ኣይሁዴ ኣዴይ ጌሾ ዎጋባ ፓላሚዶሶና።
JOH 3:26 ኤንቲ ዮሃኒሳኮ ቢዲ፥ «ኣስታማሪያው፥ ዮርዳኖሴ ሻፋፔ ሄፊንꬃን ኔራ ዴዔይሲ፥ ኔኒ ኢያባ ማርካቲዳይሲ፥ ሄኮ ፃማቄስ። ኣሳይ ኡባይካ ኢያኮ ቦሶና» ያጊዶሶና።
JOH 3:27 ዮሃኒሲ ዛሪዲ፥ «ፆሳይ ኢሞና ኣሲ ኣይቢባካ ኤካናው ዳንዳዔና።
JOH 3:28 ‹ታኒ ኪሪስቶሳ ጊዲኬ፥ ሺን ኢያፔ ሲንꬄ ኪቴታስ› ጊዳይሳስ ሂንቴ፥ ሂንቴ ሁዔን ታው ማርካ።
JOH 3:29 ጌሎስ ጊጊዳራ ኤኬናው ጊጊዳይሳሳ። ኤኬይሳ ላጌይ ኢያ ማታን ኤቂዲ ኢ ጌይሳ ሲዒያ ዎዴ ዳሮ ኡፋይቴስ። ሄሳ ጊሾ፥ ሃይሲ ታ ኡፋይሳይ ፖሌቲስ።
JOH 3:30 ኢ ጊታታናው ታኒ ጉፃናው ቤሴስ» ያጊስ።
JOH 3:31 ቦላፌ ዬይሲ ኡባፌ ቦላ። ሳዓፔ ቤንቲዳይሲ ሳዓባ። ኢ ሳዓባ ኦዴስ። ሳሎፔ ዬይሲ ኡባፌ ቦላ።
JOH 3:32 ኢ ባ ቤዒዳባኔ ሲዒዳባ ማርካቴስ፥ ሺን ኢያ ማርካቴꬃ ኤኬይ ባዋ።
JOH 3:33 ኢያ ማርካቴꬃ ኤኪያ ኦኒካ ፆሳይ ቱማ ጊዴይሳ ቆንጪሴስ።
JOH 3:34 ፆሳይ ባ ጌሻ ኣያና ኢያው ኩሜꬂ ኢሚያ ጊሾ ፆሳይ ኪቲዳይሲ ፆሳ ቃላ ኦዴስ።
JOH 3:35 ኣዋይ ባ ናዓ ዶሲዲ ኡባባ ኢያ ኩሼን ዎꬂስ።
JOH 3:36 ናዓ ኣማኒያ ኡራስ ሜሪና ዴዖይ ዴዔስ። ሺን ናዓ ኣማኖናይሳ ቦላ ፆሳ ሃንቆይ ዴዔሲፔ ኣቲን ኢ ዴዖ ዴሜና።
JOH 4:1 ዬሱሲ ዮሃኒሳይሳፌ ዳሪያ ካሌይሳታ ባኮ ሺሼይሳኔ ፃማቄይሳ ፋሪሳዌቲ ሲዒዶሶና።
JOH 4:2 ጊዲኮካ ዬሱሳ ታማሬቲ ፃማቂዶሶናፔ ኣቲን ዬሱሲ ኦናካ ፃማቂቤና።
JOH 4:3 ዬሱሲ ኣሳይ ኢያባ ጌይሳ ሲዒዳ ዎዴ ዪሁዳፔ ዴንዲዲ ጋሊላ ቢስ።
JOH 4:4 ጋሊላ ቢሼ ሳማሬራ ኣꬋናይሲ ኢያው ኣቶናባ ጊዲስ።
JOH 4:5 ሄሳ ጊሾ፥ ያይቆቢ ባ ናዓ ዮሴፋስ ኢሚዳ ጋዲያ ማታን ዴዒያ ሲካሬ ጊያ ሳማሬ ካታማ ቢስ።
JOH 4:6 ሄ ቤሳን ያይቆባ ሃꬃ ኦላይ ዴዔስ። ዬሱሲ ሃሙꬃን ዳቡሪዲ ሄ ሃꬃ ኦላ ማታን ኡቲስ። ሄ ዎዴ ሳዓይ ኡሱፑን ሳቴ ሄራ።
JOH 4:7 ኢሲ ሳማሬ ካታማ ማጫስ ሄ ኦላፌ ሃꬄ ቲካናው ያሱ። ዬሱሲ ሄ ማጫሴኮ፥ «ታና ሃꬄ ኡሻርኪ» ያጊስ።
JOH 4:8 ሄ ዎዴ ዬሱሳ ታማሬቲ ካꬂ ሻማናው ካታማ ቢዶሶናሺን።
JOH 4:9 ሄ ማጫሲያ ዛራዳ፥ «ኔኒ ኣይሁዴ ኣሴ ጊዳሼ፥ ሳማሬ ማጫስ ጊዲያ ታና ዋናዳ ሃꬄ ኡሻ ጋይ?» ያጋሱ። ሄሳ ኢያ ጊዳይ ኣይሁዴቲ ሳማሬታራ ጋሄቶና ጊሾሳ።
JOH 4:10 ዬሱሲ ዛሪዲ፥ «ኔኒ ፆሳ ኢሞታኔ ሃꬄ ታና ኡሻ ጌይሲ ኦኔኮ ኤሪዳባ ጊዲያኮ ኢያ ኔ ዎሳና፤ ኢካ ኔው ዴዖ ኢሚያ ሃꬂ ኢማናሺን» ያጊስ።
JOH 4:11 ማጫሲያ ዛራዳ፥ «ጎዳው፥ ኔው ዱቂያባይ ባዋ፤ ኦላይካ ዚቃ። ያቲን፥ ዴዖ ኢሚያ ሃꬂ ኔ ኣዉፔ ኤካኔ?
JOH 4:12 ኑስ ሃ ሃꬃ ኦላ ኢሚዳ ኑ ኣዋ ያይቆባፔ ኔኒ ኣꬋይ? ኢ፥ ኢያ ናይቲኔ ኢያ ሜሄይ ሃ ኦላፌ ኡዪዶሶና» ያጋሱ።
JOH 4:13 ዬሱሲ፥ «ሃ ሃꬃፌ ኡዪዳ ኦኒካ ዛሪ ሳሞታና።
JOH 4:14 ሺን ታኒ ኢማና ሃꬃ ኡያ ኦኒካ ኡባካ ሳሞቴና። ታኒ ኢማና ሃꬃይ ኢያ ጊዶን ሜሪና ዴዖ ኢሚያ ጎጊያ ፑልቶ ጊዳና» ያጊስ።
JOH 4:15 ማጫሲያ ዛራዳ፥ «ጎዳው፥ ታኒ ሳሞቶና ሜላኔ ሃꬄ ቲካናው ሃ ቤሳ ዮና ሜላ ታው ሄ ሃꬃ ኢማ» ያጋሱ።
JOH 4:16 ዬሱሲ ኢኮ፥ «ባዳ ኔ ኣዚና ፄጋዳ ያ» ያጊስ።
JOH 4:17 ማጫሲያ ዛራዳ፥ «ታው ኣዚኒ ባዋ» ያጋሱ። ዬሱሲ ኢኮ፥ «ታው ኣዚኒ ባዋ ጉሳን ባላባካ።
JOH 4:18 ኔው ካሴ ኢቻሹ ኣዚናቲ ዴዖሶና። ሃዒ ኔራ ዴዒያ ኣዴይ ኔ ኣዚና ጊዴና። ኔኒ ሃዒ ቱማ ኦዳዳሳ» ያጊስ።
JOH 4:19 ማጫሲያ ዛራዳ፥ «ጎዳው፥ ኔኒ ናቤ ጊዴይሳ ታኒ ኤራስ።
JOH 4:20 ኑ ኣዋቲ ሃ ዴሪያ ቦላ ፆሳ ጎይኒዶሶና። ሺን ሂንቴ ኣይሁዴቲ ኣሲ ፆሴ ጎይናናው ቤሲያ ቤሳይ ዬሩሳላሜና ጌታ» ያጋሱ።
JOH 4:21 ዬሱሲ፥ «ሃ ማጫሴቴ ታና ኣማና፤ ሃ ዴሪያ ቦላ ዎይኮ ዬሩሳላሜን ኣዋ ሂንቴ ጎይኖና ዎዴይ ያና።
JOH 4:22 ሂንቴ ሳማሬቲ ኤሮናይሳ ጎይኔታ። ሺን ኑኒ ኣቶቴꬃይ ኣይሁዴፔ ያ ጊሾ ኑ ኤሬይሳ ጎይኖስ።
JOH 4:23 ሺን ኣዋ ቱማን ጎይኔይሳቲ ኣያናኒኔ ቱማቴꬃን ጎይናና ዎዴይ ማታቲስ፤ ሃዒካ ጋኪስ። ሂዛ፥ ኣዋይ ኮዬይ ሃይሳ ሜላ ኦጊያን ጎይኔይሳታ።
JOH 4:24 ፆሳይ ኣያና፤ ኢያው ጎይኔይሳቲ ኣያናኒኔ ቱማቴꬃን ጎይናናው ቤሴስ» ያጊስ።
JOH 4:25 ማጫሲያ ዛራዳ፥ «ኪሪስቶሲ ያናይሳ ታኒ ኤራይስ። ኢ ያ ዎዴ ኑስ ኡባባ ኦዳና» ያጋሱ።
JOH 4:26 ዬሱሲ፥ «ሃ ኔራ ኦዴቴይ ታኒ ኢያ» ያጊስ።
JOH 4:27 ኤንቲ ኦዴቲሺን፥ ዬሱሳ ታማሬቲ ቢዳ ቤሳፌ ሲሚዶሶና። ዬሱሲ ማጫሳራ ኦዴቲሺን ኤንቲ ቤዒዲ ዳሮ ማላሌቲዶሶና። ሺን ማጫሴኮ፥ «ኣይ ኮያይ?» ዎይኮ ዬሱሳኮ፥ «ኢራ ኣይስ ኦዴታይ?» ጊዳይ ኦኒካ ባዋ።
JOH 4:28 ሄሳፌ ጉዬ፥ ማጫሲያ ባ ሃꬃ ኦቱዋ ኣጋዳ ጉዬ ካታማ ባዳ ኣሳኮ፥
JOH 4:29 «ታኒ ኦꬂዳባ ኡባ ታው ኦዲዳ ኣዲያ ቤዓናው ዬꬊቴ። ኢ ኪሪስቶሳ ጊዳንዴሻ?» ያጋሱ።
JOH 4:30 ኣሳይ ካታማፔ ኬዪዲ ዬሱሳኮ ቢዶሶና።
JOH 4:31 ሄሲ ሃኒሺን፥ ኢያ ታማሬቲ ዬሱሳኮ፥ «ጉꬃባ ማርኪ» ያጊዲ ዎሲዶሶና።
JOH 4:32 ሺን ኢ፥ «ታው ሂንቴ ኤሮና ካꬂ ታ ሜይሲ ዴዔስ» ያጊስ።
JOH 4:33 ሄሳ ጊሾ፥ ኢያ ታማሬቲ ባንታ ጊዶን፥ «ኢያው ሚያባ ኣሲ ኤሆና ኣጌና?» ያጊዶሶና።
JOH 4:34 ዬሱሲ ኤንታኮ፥ «ታ ካꬃይ ታና ኪቲዳይሳ ሼኒያ ኦꬃናይሳኔ ኢያ ኦሱዋ ፖላናይሳ።
JOH 4:35 ሂንቴ፥ ‹ኦይዱ ኣጌናፔ ጉዬ ካꬃይ ጫኬታና› ጌኬቲዬ? ሺን ታኒ ሂንቴው ኦዳይስ፤ ካꬃይ ካፂዲ ሺሾስ ጋኪዳይሳ ሎይꬂ ፄሊቴ።
JOH 4:36 ዜሬይሲኔ ጫኬይሲ ኢሲፌ ኡፋይታና ሜላ ጫኬይሲ ዳሞዜ ኤኬስ ቃሲ ካꬃ ሜሪና ዴዖስ ሺሼስ።
JOH 4:37 ሂዛ፥ ‹ኢሶይ ዜሬስ፤ ሃንኮይ ቃሲ ጫኬስ› ጊያ ኦዳይ ቱማ።
JOH 4:38 ሂንቴ ዳቡሪቦናይሳ ሺሻና ሜላ ታኒ ሂንቴና ኪታስ። ሃራቲ ኦꬂ ዳቡሪዳሱዋን ጌሊዲ ሂንቴ ኤንታ ዳቡራ ኣይፊያ ኤኪዴታ» ያጊስ።
JOH 4:39 ማጫሲያ፥ «ኢ፥ ታኒ ኦꬂዳ ኡባባ ኦዲስ» ጋዳ ማርካቲዳ ጊሾ ሄ ካታማን ዴዒያ ሳማሬ ኣሳፔ ዳሮቲ ዬሱሳ ኣማኒዶሶና።
JOH 4:40 ሳማሬ ኣሳይ ዬሱሳኮ ዪዲ፥ ባንታ ማታን ጋምዓና ሜላ ዬሱሳ ዎሲን ኢ ያን ናምዑ ጋላስ ኡቲስ።
JOH 4:41 ኢ ኦዲያ ቃላ ጊሾ ካሴይሳፌ ዳሮ ኣሳይ ኣማኒዶሶና።
JOH 4:42 ቃሲ ኤንቲ ማጫሴኮ፥ «ሃዒ ኑ ኣማኔይ ኑ ሁዔን ኢ ጌይሳ ሲዒዳ ጊሾሳፌ ኣቲን ኔኒ ማርካቲዳ ጊሾሳ ጊዴና። ቃሲ ኢ ቱማ ሃ ኣላሚያ ኣሼይሳ ጊዴይሳ ኑኒ ኤሪዳ» ያጊዶሶና።
JOH 4:43 ናምዑ ጋላሳፔ ጉዬ፥ ዬሱሲ ያፔ ኬዪዲ ጋሊላ ቢታ ቢስ።
JOH 4:44 ዬሱሲ ባ ሁዔን፥ «ናቤይ ባ ቢታን ቦንቼቴና» ያጊዲ ካሴቲዲ ኦዲስ።
JOH 4:45 ዬሱሲ ጋሊላ ጋኪዳ ዎዴ ጋሊላ ኣሳይ ኢያ ሞኪዶሶና። ኣይስ ጊኮ፥ ፓሲካ ባሌ ቦንቺያ ጋላስ ኤንቲ ዬሩሳላሜን ዴዒያ ጊሾ ኢ ኦꬂዳባ ኡባ ቤዒዶሶና።
JOH 4:46 ዬሱሲ ሃꬃ ዎይኔ ኡሺ ላሚዳ ቤሳ፥ ጋሊላን ዴዒያ ቃና ካታማ ቢስ። ቂፊርናሆሜን ካዎ ኬꬃን ኦꬂያ ኢሲ ሹማስ ናዓይ ሃርጌቲስ።
JOH 4:47 ዬሱሲ ዪሁዳፔ ጋሊላ ዪዳይሳ ሄ ሹማይ ሲዒዲ ኢያኮ ዪስ። ሃይቃናው ማቲዳ ባ ናዓ ቢዲ ፓꬃና ሜላ ዬሱሳ ዎሲስ።
JOH 4:48 ዬሱሲ ሹማኮ፥ «ፆሳይ ኦꬂያ ማላታታኔ ኦራꬃባታ ቤዖና ዴዒሼ ሂንቴ ኡባራካ ኣማኔኬታ» ያጊስ።
JOH 4:49 ሹማይ ዛሪዲ፥ «ጎዳው፥ ታ ናዓይ ሃይቆና ዴዒሺን ታራ ዬꬋርኪ» ያጊስ።
JOH 4:50 ዬሱሲ፥ «ኔ ሶ ባ፤ ኔ ናዓይ ፓፃና» ያጊስ። ሄ ሹማይ ዬሱሲ ጊዳይሳ ኣማኒዲ ባ ሶ ቢስ።
JOH 4:51 ኢ ባ ሶ ቢሺን ኢያ ኣይሌቲ ኢያኮ ዪሼ ኢያራ ኦጌን ጋሄቲዲ፥ «ኔ ናዓይ ፓፂስ» ጊዶሶና።
JOH 4:52 ኢ ባ ኣይሌታ ባ ናዓስ ኣይ ሳቴን ሎዒዳኮ ኦይቺስ። ኤንቲ ዛሪዲ፥ «ዚኔ ላፑን ሳቴን ሚሻይ ኣጊስ» ያጊዶሶና።
JOH 4:53 ናዓ ኣዋይ ዬሱሲ ባኮ፥ «ኔ ናዓይ ፓፃና» ጊዳይ ሄ ሳቲያን ጊዴይሳ ኣኬኪስ። ሄሳ ጊሾ፥ ኢኔ ኢያ ሶ ኣሳ ኡባይ ኣማኒዶሶና።
JOH 4:54 ሄሲ ዬሱሲ ዪሁዳፔ ጋሊላ ዪዲ ኦꬂዳ ናምዓንꬆ ማላታ።
JOH 5:1 ሄሳፌ ጉዬ፥ ዬሱሲ ኣይሁዴቲ ቦንቺያ ባሊያስ ዬሩሳላሜ ቢስ።
JOH 5:2 ዬሩሳላሜን ዶርሳ ፔንጊያ ማታን ኢብራይስፄ ዶናን ቤቴሳይዳ ጊያ ቴቄቲዳ ሃꬂ ዴዔስ። ሄ ቴቄቲ ኡቲዳ ሃꬃ ማታን ኢቻሹ ሼምፒያ ቤሳቲ ዴዖሶና።
JOH 5:3 [ሄሳን ሃꬃይ ቃፃናይሳ ናጊያ] ዳሮ ሃርጋንቾቲ፥ ቆቄቲ፥ ዎቤቲኔ ጉንዳቲ ዚንዒዶሶና።
JOH 5:4 [ኣይስ ጊኮ፥ ኢሲ ኢሲ ቶሆ ጎዳ ኪታንቾይ ቴቄቲዳ ሃꬃን ዎꬊዲ ሃꬃ ቃꬄስ። ሃꬃይ ቃፂያ ዎዴ ኮይሮ ጌሊዳ ኡራይ ባና ኦይኪዳ ኣይ ሃርጌፌካ ፓፄስ።]
JOH 5:5 ሄ ቤሳን ሃስታማኔ ሆስፑን ላይꬂ ሃርጌቲዳ ኢሲ ኣዴይ ዴዔስ።
JOH 5:6 ዬሱሲ ያን ዚንዒዳ ኣዲያ ቤዒዲ፥ ቃሲ ዳሮ ዎዴ ሃርጌቲዳይሳ ኤሪዲ ኣዲያኮ፥ «ፓፃናው ኮያይ?» ያጊስ።
JOH 5:7 ሃርጋንቾይ ዛሪዲ፥ «ጎዳው፥ ሃꬃይ ቃፂያ ዎዴ ታና ሃꬃን ዬጊያ ኣሲ ባዋ። ታኒ ጌላና ሃኒያ ዎዴ ሃራይ ታፔ ሲንꬃቲዲ ጌሊ ኪቼስ» ያጊስ።
JOH 5:8 ዬሱሲ ኢያኮ፥ «ዴንዳ ኤቃ፤ ኔ ኣልጋ ቶካዳ ባ» ያጊስ።
JOH 5:9 ኣዴይ ሶሁዋራካ ፓፂስ፤ ባ ኣልጋ ቶኪዲ ቢስ። ሄሲ ሳምባታ ጋላሳን ሃኒስ።
JOH 5:10 ሄሳ ጊሾ፥ ኣይሁዴቲ ፓፂዳ ኣዲያኮ፥ «ሃቺ ሳዓይ ሳምባታ፤ ኔኒ ኔ ኣልጋ ቶኬይሲ ዎጋ ጊዴና» ያጊዶሶና።
JOH 5:11 ሺን ኣዴይ፥ «ታና ፓꬂዳይሲ፥ ኔ ኣልጋ ቶካዳ ባ ጊስ» ያጊዲ ዛሪስ።
JOH 5:12 ኤንቲ ኢያኮ፥ «ኔና፥ ኔ ኣልጋ ቶካዳ ባ ጊዳይ ኢ ኦኔ?» ያጊዲ ኦይቺዶሶና።
JOH 5:13 ሺን ዬሱሲ ሄ ቤሳን ዳሮ ኣሳ ጊዶራ ኤሪሶና ካንꬂዲ ቢዳ ጊሾ ኣዴይ ባና ፓꬂዳይ ኦኔኮ ኤሬና።
JOH 5:14 ዬሱሲ ጉዬፔ ሄ ኣዲያ ፆሳ ኬꬃን ዴሚዲ፥ «ሄኮ፥ ኔኒ ፓፃዳሳ፤ ሃይሳፌ ኢታባይ ኔና ጋኮና ሜላ ዛራዳ ናጋራ ኦꬆፋ» ያጊስ።
JOH 5:15 ሄሳፌ ጉዬ፥ ኣዴይ ቢዲ ባና ፓꬂዳይሲ ዬሱሳ ጊዲዳይሳ ኣይሁዴታስ ኦዲስ።
JOH 5:16 ዬሱሲ ሄሳ ሳምባታ ጋላስ ኦꬂዳ ጊሾ ኣይሁዴቲ ዬሱሳ ጎዳ ኦይኪዶሶና።
JOH 5:17 ዬሱሲ ዛሪዲ፥ «ታ ኣዋይ ኡባ ዎዴ ኦꬄስ፤ ታካ ኦꬃናው ቤሴስ» ያጊስ።
JOH 5:18 ዬሱሲ ሳምባታ ቦንቾና ጊሾ ፃላላስ ጊዶናሺን ፆሳይ ባ ኣዋ ጊዲ ባና ፆሳራ ጊጊሲዳ ጊሾ ኣይሁዴቲ ኢያ ዎꬋናው ካሴፔ ሚንꬂዲ ኮዪዶሶና።
JOH 5:19 ዬሱሲ ዛሪዲ፥ «ታኒ ሂንቴው ቱማ ኦዳይስ፤ ናዓይ ባርካ ኣይኮካ ኦꬃናው ዳንዳዔና። ኢ ባ ኣዋይ ኦꬂሺን ቤዖይሳ ፃላላ ኦꬄስ። ኣዋይ ኦꬄይሳ ናዓይካ ኦꬄስ።
JOH 5:20 ኣዋይ ባ ናዓ ዶሲያ ጊሾ ኢ ኦꬂያ ኦሶ ኡባ ባ ናዓ ቤሴስ። ሂንቴ ማላሌታና ሜላ ኢ ሃይሳፌ ኣꬊያ ኦሶ ባ ናዓ ቤሳና።
JOH 5:21 ኣዋይ ሃይቂዳይሳታ ሃይቆፔ ዴንꬂዲ ኤንታው ዴዖ ኢሜይሳዳ ናዓይካ ባ ኮዬይሳታስ ዴዖ ኢሜስ።
JOH 5:22 ኣዋይ ናዓስ ፒርዳ ማታ ኡባ ኢሚስፔ ኣቲን ኢ ኦናካ ፒርዴና።
JOH 5:23 ኣሳይ ኡባይ ኣዋ ቦንቼይሳዳ ናዓካ ቦንቻና። ናዓ ቦንቾና ኦኒካ ናዓ ኪቲዳ ኣዋካ ቦንቼና።
JOH 5:24 «ታኒ ሂንቴው ቱማ ኦዳይስ፤ ታ ቃላ ሲዔይሳሲኔ ታና ኪቲዳይሳ ኣማኔይሳስ ሜሪና ዴዖይ ዴዔስ። ኢ ሃይቆፔ ዴዖን ፒኒዳ ጊሾ ፒርዴቴና።
JOH 5:25 ታኒ ሂንቴው ቱማ ኦዳይስ፤ ሃይቂዳ ኣሳይ ፆሳ ናዓ ቃላ ሲዒያ ዎዴይ ያና፤ ሄሲካ ሃዒ። ሄ ቃላ ሲዔይ ዴዖን ዳና።
JOH 5:26 ኣዋይ ዴዖስ ፑልቶ ጊዲዳይሳዳ ናዓካ ዴዖስ ፑልቶ ኦꬂስ።
JOH 5:27 ናዓይ ኣሳ ናዓ ጊዲያ ጊሾ ኣዋይ ናዓስ ፒርዳ ማታ ኢሚስ።
JOH 5:28 «ዱፎን ዴዔይሳቲ ኢያ ቃላ ሲዒዲ ዴንዲያ ዎዴይ ያና ጊሾ ሃይሳን ማላሌቶፊቴ።
JOH 5:29 ሎዖ ኦꬂዳይሳቲ ዴዖን ዳናው ቃሲ ኢታ ኦꬂዳይሳቲ ፒርዳ ኤካናው ዱፎፔ ዴንዳና።
JOH 5:30 «ታኒ ታ ማታን ኣይቢባካ ኦꬃናው ዳንዳዒኬ። ፆሳይ ታው ኦዲዳይሳዳ ፒርዳይስ። ታኒ ታና ኪቲዳይሲ ኮያባ ኦꬃይሲፔ ኣቲን ታ ኮያባ ኦꬆና ጊሾ ታ ፒርዳይ ቱማ።
JOH 5:31 «ታኒ ታባ ማርካቲኮ ታ ማርካቴꬃይ ቱማ ጊዴና።
JOH 5:32 ታባ ማርካቲያ ሃሪ ዴዔስ፤ ኢ ታባ ማርካቴይሲ ቱማ ጊዴይሳ ታኒ ኤራይስ።
JOH 5:33 «ሂንቴ ዮሃኒሳኮ ኣሴ ኪቲን ኢ ቱማስ ማርካቲስ።
JOH 5:34 ታኒ ሄሳ ሂንቴው ኦዴይ፥ ሂንቴ ኣታና ሜላ ጋዳፔ ኣቲን ኣሳ ማርካቴꬂ ታው ኮሺን ጊዴና።
JOH 5:35 ዮሃኒሲ ሙቃዳዳ ኤፂሼ ፖዒስ። ሂንቴ ጉꬃ ዎዴ ኢያ ፖዑዋን ኡፋይቲዴታ።
JOH 5:36 «ሺን ታው ዮሃኒሳፔ ኣꬊያ ማርኪ ዴዔስ። ታኒ ኦꬃና ሜላ ታ ኣዋይ ታው ኢሚዳ ኦሶቲ ታባ ማርካቶሶና፤ ኣዋይ ታና ኪቲዳይሳ ቆንጪሶሶና።
JOH 5:37 «ቃሲ ታና ኪቲዳ ኣዋይካ ባ ሁዔን ታባ ማርካቴስ። ሂንቴ ኢያ ቃላ ኡባራካ ሲዒቤኬታ ዎይኮ ኢያ ማላ ቤዒቤኬታ።
JOH 5:38 ኢ ኪቲዳይሳ ሂንቴ ኣማኖና ጊሾ ኢያ ቃላይ ሂንቴ ዎዛናን ባዋ።
JOH 5:39 «ጌሻ ማፃፋታፔ ሜሪና ዴዖ ዴማናባ ሂንቴው ዳኒን ኤንታ ፒልጌታ፤ ኤንቲ ታባ ማርካቶሶና።
JOH 5:40 ሺን ሂንቴ ዴዖ ዴማናው ታኮ ያናው ኮዬኬታ።
JOH 5:41 «ኣሳፔ ታኒ ቦንቾ ኮዪኬ።
JOH 5:42 ሺን ታኒ ሂንቴ ዎዛናን ፆሳ ሲቆይ ባይናይሳ ኤራይስ።
JOH 5:43 ታኒ ታ ኣዋ ማታን ያስ፥ ሺን ታና ሞኪቤኬታ። ሃራይ ባ ማታን ያ ዎዴ ኢያ ሞኬታ።
JOH 5:44 ሂንቴ ኢሶይ ኢሱዋፌ ቦንቾ ኮዬይሳቲ፥ ኢሲ ፆሳፌ ያ ጋላታ ኤካናው ኮዮናይሳቲ፥ ዋኒዲ ታና ኣማናናው ዳንዳዔቲ?
JOH 5:45 «ታኒ ታ ኣዋ ሲንꬃን ሂንቴና ሞቲያባ ሂንቴው ዳኖፖ። ሂንቴና ሞታናይ ሂንቴ ኡፋይሳን ናጊያ ሙሴ።
JOH 5:46 ሂንቴ ሙሴ ኣማኒዳባ ጊዲያኮ ኢ ታባ ፃፊዳ ጊሾ ታናካ ኣማናናሺን።
JOH 5:47 ሺን ሂንቴ ኢ ፃፊዳይሳ ኣማኖና ኢፂኮ ታ ቃላ ዋቲዲ ኣማናኔ?» ያጊስ።
JOH 6:1 ሄሳፌ ጉዬ፥ ዬሱሲ ፂባርዮሳ ጊያ ጋሊላ ኣባፌ ሄፊንꬂ ፒኒስ።
JOH 6:2 ኢ ሃርጋንቾታ ፓሶን ኦꬂዳ ማላታ ቤዒዳ ጊሾ ዳሮ ኣሳይ ኢያ ካሊዶሶና።
JOH 6:3 ዬሱሲ ዴሪያ ቦላ ኬዪዲ፥ ያን ባ ታማሬታራ ኢሲፌ ኡቲስ።
JOH 6:4 ኣይሁዴቲ ቦንቺያ ፓሲካ ባሌ ጋላሳይ ጋኪስ።
JOH 6:5 ዬሱሲ ዳሮ ኣሳይ ባኮ ዬይሳ ቤዒዲ ፊልጶሳኮ፥ «ሃ ኣሳ ኡባ ሙዛናው ጊዲያ ካꬂ ኣዉፔ ሻማኔ?» ያጊስ።
JOH 6:6 ኢ ሄሳ ፊልጶሳ ፓጫናው ጊሲፔ ኣቲን ኢ ባ ሁዔን ኣይ ኦꬃኔኮ ኤሬስ።
JOH 6:7 ፊልጶሲ ዛሪዲ ዬሱሳኮ፥ «ሃሪ ኣቶሺን፥ ሁዔን ሁዔን፥ ኢሲ ኢሲ ባርሲ ጋꬃናው፥ ናምዑ ፄቱ ዲናሬን ኡይꬁ ሻሚንካ ጊዴና» ያጊስ።
JOH 6:8 ቃሲ ዬሱሳ ታማሬታፔ ኢሶይ፥ ሲሞን ጴፂሮሳ ኢሻይ ኢንዲሪያሲ፥
JOH 6:9 «ኢቻሹ ባንጋ ሶሎኔ ናምዑ ሞሎ ኦይኪዳ ኢሲ ናዓይ ሃይሳን ዴዔስ፥ ሺን ሃ ኣሳ ኡባስ ሄሲ ኣይ ማዳኔ?» ያጊስ።
JOH 6:10 ዬሱሲ ባ ታማሬታኮ፥ «ኣሳ ኡቲሲቴ» ያጊስ። ሄ ቤሳን ዳሮ ማቲ ዴዔስ፤ ኣሳ ኡባይ ኡቲስ። ኣዴ ኣሳ ታይቦይ ኢቻሹ ሙኩሉ ጊዳና።
JOH 6:11 ዬሱሲ ኡይꬃ ኤኪዲ ፆሳ ጋላቲ ሲሚዲ ያን ኡቲዳ ኣሳስ ጊሺስ። ሞሉዋካ ኤኪዲ ሄሳዳ ኦꬂዲ ኢሚን፥ ኣሳይ ባ ኮዪዳይሳ ሜላ ሚስ።
JOH 6:12 ኤንቲ ኡባይ ካሊዳፔ ጉዬ ዬሱሲ ባ ታማሬታኮ፥ «ኢሲባይካ ኢቶና ሜላ ኣቲዳ ቲፊያ ሺሺቴ» ያጊስ።
JOH 6:13 ሄሳ ጊሾ፥ ኤንቲ ኡባ ሺሺዶሶና። ኣሳይ ሚን ኣቲዳ ባንጋ ሶሎ ቲፊያ ሺሺዲ ታማኔ ናምዑ ጋይታ ኩንꬂዶሶና።
JOH 6:14 ኣሳይ ዬሱሲ ኦꬂዳ ማላታታ ቤዒዳ ዎዴ «ሃይሲ ቱማ ሃ ኣላሚያ ያና ጌቴቲዳ ናቢያ» ያጊዶሶና።
JOH 6:15 ዬሱሲ ኤንቲ ኢያ ኦይኪዲ ዎልቃን ካዎ ኦꬃናው ሃኔይሳ ኤሪዲ፥ ባርካ ዴሪያ ቦላ ዛሪ ኬዪስ።
JOH 6:16 ሳዓይ ኦማርሲዳ ዎዴ ዬሱሳ ታማሬቲ ኣባኮ ዎꬊዶሶና።
JOH 6:17 ሳዓይ ቃሚዳ ጊሾኔ ዬሱሲ ቡሮ ኤንታኮ ዪቦና ጊሾ ኢያ ታማሬቲ ዎጎሎን ጌሊዲ ኣባ ፒኒዲ ቂፊርናሆሜ ባናው ዴንዲዶሶና።
JOH 6:18 ዎልቃማ ጫርኮይ ጫርኪዳ ጊሾ ኣባይ ቃፄስ።
JOH 6:19 ኢቻሹ ዎይኮ ኡሱፑን ኪሎ ሚቲሬ ጊዴይሳ ሜላ ኤንቲ ኣባ ፒꬊዲ ቢዳፔ ጉዬ ዬሱሲ ኣባ ቦላራ ሃሙቲሼ ዬይሳ ቤዒዲ ያዪዶሶና።
JOH 6:20 ሺን ኢ፥ «ባቦፊቴ፥ ታና» ያጊስ።
JOH 6:21 ኤንቲ ኡፋይቲዲ ኢያ ዎጎሉዋን ጌልሲዶሶና፤ ኢራካ ዎጎሎይ ኤንቲ ቢያ ኣባ ጋፃ ጋኪስ።
JOH 6:22 ዎንቴꬃ ጋላስ ኣባፌ ሄፊንꬃን ኣቲዳ ዳሮ ኣሳይ ኢሲ ዎጎሎ ፃላሊ ዴዔይሳ ቤዒዶሶና። ዬሱሲ ባ ታማሬታራ ዎጎሉዋን ጌሊዲ፥ ኤንታራ ቦናይሳኔ ኤንቲ ባንታርካ ቢዳይሳ ኣኬኪዶሶና።
JOH 6:23 ሺን ፂባርዮሳፔ ሃራ ዎጎሎቲ ዬሱሲ ፆሳ ጋላቲን፥ ኣሳይ ኡይꬃ ሚዳ ቤሳ ዪዶሶና።
JOH 6:24 ኣሳይ ዬሱሲ ዎይኮ ኢያ ታማሬቲ ያን ባይናይሳ ቤዒዲ፥ ዬሱሳ ኮያናው ዎጎሎታን ጌሊዲ ቂፊርናሆሜ ቢዶሶና።
JOH 6:25 ኣሳይ ዬሱሳ ኣባፌ ሄፊንꬃን ዴሚዳ ዎዴ «ኣስታማሪያው፥ ሃ ኣዉዴ ያዲ?» ያጊስ።
JOH 6:26 ዬሱሲ ዛሪዲ፥ «ታኒ ሂንቴው ቱማ ኦዳይስ፤ ሂንቴ ታና ኮዬይ ኡይꬂ ሚዲ ካሊዳ ጊሾሳፌ ኣቲን ማላታ ቤዒዳ ጊሾሳ ጊዴና።
JOH 6:27 ሳሚያ ካꬃስ ኦꬆፊቴ፥ ሺን ሜሪና ዴዖ ኢሚያ ካꬃስ ኦꬂቴ። ፆሳ ኣዋይ ኢ ኦꬃና ሜላ ኢያው ማታ ኢሚዳ ጊሾ ሄ ካꬃ ኣሳ ናዓይ ሂንቴው ኢማና» ያጊስ።
JOH 6:28 ያቲን ኤንቲ፥ «ኑኒ ፆሳ ኦሱዋ ኦꬃናው ኣይ ኦꬃኔ?» ያጊዲ ዬሱሳ ኦይቺዶሶና።
JOH 6:29 ዬሱሲ ዛሪዲ፥ «ሂንቴ ኦꬃና ሜላ ፆሳይ ኮያ ኦሶይ ሃይሳ፡ ኢ ኪቲዳይሳ ኣማኒቴ» ያጊስ።
JOH 6:30 ኤንቲ ዛሪዲ፥ «ኑኒ ቤዒዲ፥ ኔና ኣማናና ሜላ ኣይ ማላታ ኔ ቤሳኔ? ኔ ኣይ ኦꬃኔ?
JOH 6:31 ጌሻ ማፃፋን፥ ‹ኤንቲ ማና ሜላ ኡይꬁ ሳሎፔ ኢሚስ› ጌቴቲ ፃፌቲዳይሳዳ ኑ ኣዋቲ ባዞ ቢታን ማና ሚዶሶና» ያጊዶሶና።
JOH 6:32 ዬሱሲ፥ «ታኒ ሂንቴው ቱማ ኦዳይስ፤ ሂንቴው ሳሎፔ ቱማ ኡይꬃ ኢሚዳይ ታ ኣዋፔ ኣቲን ሙሴ ጊዴና።
JOH 6:33 ሂዛ፥ ፆሳይ ኢሚያ ኡይꬃይ ሳሎፔ ዎꬊዳይሲ ኣላሚያስ ዴዖ ኢሜይሳ» ያጊስ።
JOH 6:34 ኤንቲ ዛሪዲ፥ «ጎዳው፥ ኑስ ሄ ኡይꬃ ኡባ ዎዴ ኢማ» ያጊዶሶና።
JOH 6:35 ዬሱሲ፥ «ታኒ ዴዖ ኢሚያ ኡይꬃ፤ ታኮ ያ ኦኒካ ኡባራካ ኮሻቴና። ቃሲ ታና ኣማኒያ ኡራይ ኡባራካ ሳሞቴና።
JOH 6:36 ሺን ታኒ ሂንቴው ኦዳስ፤ ሂንቴ ታና ቤዒዴታ፥ ሺን ኣማኔኬታ።
JOH 6:37 ታ ኣዋይ ታው ኢሚያ ኡባይ ታኮ ያና፤ ቃሲ ታኮ ያ ኦናካ ካሬ ዬዲኬ።
JOH 6:38 ታኒ ታ ኮያባ ኦꬃናው ጊዶናሺን ታና ኪቲዳይሲ ኮያባ ኦꬃናው ሳሎፔ ያስ።
JOH 6:39 ታና ኪቲዳይሲ ኮዬይ ሃይሳ፡ ታኒ ኢ ታው ኢሚዳ ኡባታካ ዉርሴꬃ ጋላስ ሃይቆፔ ዴንꬃና ሜላፔ ኣቲን ኢሱዋካ ꬋይሳና ሜላ ኮዬና።
JOH 6:40 ሂዛ፥ ታ ኣዋይ ኮዬይ ሄሳ፡ ናዓ ቤዒዲ ኣማኒያ ኡባይ ሜሪና ዴዑዋ ኤካና፤ ታኒ ሄ ኡባ ዉርሴꬃ ጋላስ ሜሪና ዴዖስ ሃይቆፔ ዴንꬃና» ያጊስ።
JOH 6:41 ዬሱሲ፥ «ታኒ ሳሎፔ ዎꬊዳ ኡይꬃ» ጊዳ ጊሾ ኣይሁዴቲ ኢያ ቦላ ዙዙሚዶሶና።
JOH 6:42 ኤንቲ፥ «ሃይሲ ኑኒ ኢያ ኣዋኔ ኢያ ኣዪው ኤሪያ ዮሴፋ ናዓ ዬሱሳ ጊዴኔ? ያቲን፥ ኢ ዋኒዲ፥ ‹ታኒ ሳሎፔ ዎꬋስ› ጋናው ዳንዳዒ?» ያጊዶሶና።
JOH 6:43 ዬሱሲ ዛሪዲ፥ «ኢሶይ ኢሱዋራ ዙዙሜይሳ ኣጊቴ።
JOH 6:44 ታና ኪቲዳ ታ ኣዋይ ታኮ ኤሂያ ኣሳፔ ኣቲን ታኮ ያናው ዳንዳዒያ ኦኒካ ባዋ። ታኒ ዉርሴꬃ ጋላስ ኢያ ሜሪና ዴዖስ ሃይቆፔ ዴንꬃና።
JOH 6:45 ናቤቲ፥ ‹ፆሳይ ኣሳ ኡባ ታማርሳና› ያጊዲ ፃፊዶሶና። ኣዋ ሲዔይሲኔ ኢያፔ ታማሪያ ኦኒካ ታኮ ዬስ።
JOH 6:46 ፆሳ ማታፔ ዪዳይሳፌ ኣቲን ኣዋ ቤዒዳይ ኦኒካ ባዋ፤ ኢያ ፃላሊ ኣዋ ቤዒስ።
JOH 6:47 «ታኒ ሂንቴው ቱማ ኦዳይስ፤ ታና ኣማኒያ ኦዴስካ ሜሪና ዴዖይ ዴዔስ።
JOH 6:48 ታኒ ዴዖ ኢሚያ ኡይꬃ።
JOH 6:49 ሂንቴ ኣዋቲ ባዞን ማና ሚዶሶና፥ ሺን ሃይቂዶሶና።
JOH 6:50 ሳሎፔ ያ ኡይꬃይ ሃይሳ፤ ሄ ኡይꬃ ሚያ ኦኒካ ሃይቄና።
JOH 6:51 ሳሎፔ ዪዳ ዴዖ ኡይꬃይ ታና። ኦኒካ ሃ ኡይꬃ ሚኮ ሜሪናው ዳና። ቃሲ ሃ ኣላሜይ ዴዖን ዳና ሜላ ታኒ ሂንቴው ኢማና ኡይꬃይ ታ ኣሹዋ» ያጊስ።
JOH 6:52 ኣይሁዴቲ፥ «ሃ ኣዴይ ባ ኣሹዋ ኑ ማና ሜላ ኑስ ዋቲዲ ኢማናው ዳንዳዒ?» ያጊዲ ባንታ ጊዶን ፓላሚዶሶና።
JOH 6:53 ሄሳ ጊሾ፥ ዬሱሲ ኤንታኮ፥ «ታኒ ሂንቴው ቱማ ኦዳይስ፤ ኣሳ ናዓ ኣሹዋ፥ ሂንቴ ሞና ኢፂኮ፥ ቃሲ ኢያ ሱꬃ ሂንቴ ኡዮና ኢፂኮ፥ ሂንቴው ዴዖይ ባዋ።
JOH 6:54 ታ ኣሹዋ ሚያ ኡራሲኔ ታ ሱꬃ ኡያ ኡራስ ሜሪና ዴዖይ ዴዔስ። ታኒ ዉርሴꬃ ጋላስ ኢያ ሃይቆፔ ዴንꬃና።
JOH 6:55 ታ ኣሾይ ቱማ ካꬂ፤ ታ ሱꬃይካ ቱማ ኡሹ።
JOH 6:56 ታ ኣሹዋ ሚያ ኡራይኔ ታ ሱꬃ ኡያ ኡራይ ታናን ዴዔስ፤ ታካ ኢያን ዴዓይስ።
JOH 6:57 ዴዖ ኣዋይ ታና ኪቲን፥ ታኒ ኢያ ባጋራ ዴዖን ዴዔይሳዳ፥ ታና ሚያ ኡራይካ ታ ጋሶን ዴዖን ዳና።
JOH 6:58 ሳሎፔ ዎꬊዳ ኡይꬃይ ሃይሳ፡ ሂንቴ ኣዋቲ ሚዲ ሃይቂዳ ማና ሜላ ጊዴና፤ ሃ ኡይꬃ ሚያ ኡራይ ሜሪናው ዳና» ያጊስ።
JOH 6:59 ዬሱሲ ቂፊርናሆሜ ካታማን ኣይሁዴ ዎሳ ኬꬃን ሃይሳ ታማርሲስ።
JOH 6:60 ዬሱሳ ታማሬታፔ ዳሪያ ባጋይ ሄሳ ሲዒዳ ዎዴ «ሃይሲ ጌሎና ቲሚርቴ፤ ሃይሲ ኦዴስ ጌሊ?» ያጊዶሶና።
JOH 6:61 ዬሱሲ ባ ታማሬቲ ሄሳስ ዙዙሚዳይሳ ኤሪዲ፥ «ሃይሲ ሂንቴና ꬉቢ?
JOH 6:62 ያቲን፥ ኣሳ ናዓይ ካሴ ዴዒያሱዋ ፑዴ ኬዪሺን ሂንቴ ቤዒዲ ዎይጋንዴቲ?
JOH 6:63 ጌሻ ኣያናይ ዴዖ ኢሜስ፤ ኣሳ ዎልቂ ኣይኮካ ማዴና። ታ ሂንቴው ኦዲያ ቃላይ ዴዖ ኢሚያ ጌሻ ኣያናፔ ዬስ።
JOH 6:64 ሺን ሂንቴ ጊዶን ኣማኖናይሳቲ ዴዖሶና» ያጊስ። ኣማኖናይሳቲ ኦናንቴኮ ዬሱሲ ኮይሮፔ ዶሚዲ ኤሬስ። ቃሲ ባና ኣꬂ ኢማናይ ኦኔኮ ኤሬስ።
JOH 6:65 ቃሲካ ዬሱሲ፥ «ኣዋይ ባ ጎና ኦኒካ ታኮ ያናው ዳንዳዔና ጋዳ ታኒ ኦዲዳይ ሄሳ ጊሾሳ» ያጊስ።
JOH 6:66 ሄሳ ጋሶን፥ ዬሱሳ ካሌይሳታፔ ዳሮቲ ኢያ ኣጊዲ ጉዬ ሲሚዶሶና፤ ዛሪ ኢያ ካሊቦኮና።
JOH 6:67 ዬሱሲ ታማኔ ናምዑ ባ ታማሬታ፥ «ሂንቴካ ኣጊዲ ባናው ኮዬቲ?» ያጊዲ ኦይቺስ።
JOH 6:68 ሲሞን ጴፂሮሲ ዛሪዲ፥ «ጎዳው፥ ኑኒ ኦዴኮ ባኔ? ኔው ሜሪና ዴዖ ኢሚያ ቃላይ ዴዔስ።
JOH 6:69 ኔኒ ፆሳ ጌሻ ጊዴይሳ ኑኒ ኣማኖሲኔ ኤሮስ» ያጊስ።
JOH 6:70 ዬሱሲ ኤንታኮ፥ «ታኒ ሂንቴና ታማኔ ናምዓታ ዶራቢኪና? ሺን ሂንቴፌ ኢሶይ ፃላሄ» ያጊስ።
JOH 6:71 ዬሱሲ ሄሳ ጊዳይ ሲሞና ናዓ ኣስቆሮታ ዪሁዳሳ። ዪሁዲ ዬሱሳ ኣꬂ ኢማናው ዴዒያ ታማኔ ናምዑ ታማሬታፔ ኢሱዋ።
JOH 7:1 ሄሳፌ ጉዬ፥ ኣይሁዴቲ ዬሱሳ ዎꬋናው ኮያ ጊሾ ኢ ዪሁዳ ኣጊዲ ጋሊላን ሲሜሬቴስ።
JOH 7:2 ኣይሁዴቲ ቦንቺያ ሻቃራ ባሌይ ቦንቼታናው ማቲስ።
JOH 7:3 ሄሳ ጊሾ፥ ዬሱሳ ኢሻቲ፥ «ኔ ታማሬቲ ኔኒ ኦꬂያ ማላታታ ቤዓና ሜላ ሃይሳፌ ዴንዳዳ ዪሁዳ ቢታ ባ።
JOH 7:4 ባው ኤሬታናው ኮያ ኣሲ ኦኒካ ባ ኦሱዋ ጌንꬄና። ኔኒ ሃይሳታ ኦꬃዳ ኔባ ኣላሚያ ኤሪሳ» ያጊዶሶና።
JOH 7:5 ኢያ ኢሻቲ ሄሳ ጊዳይ ኢያን ኣማኒቦና ጊሾሳ።
JOH 7:6 ዬሱሲ ኤንታኮ፥ «ታው ኢንጄ ዎዴይ ጋኪቤና፥ ሺን ሂንቴው ኡባ ዎዴይ ኢንጄቴስ።
JOH 7:7 ኣላሜይ ሂንቴና ኢፃናው ዳንዳዔና፥ ሺን ታኒ ኣላሚያ ኦሶይ ኢታ ጊዴይሳ ማርካቲያ ጊሾ ታና ኢፄስ።
JOH 7:8 ሂንቴ ባሊያ ቢቴ፤ ታ ዎዴይ ጋኪቦና ጊሾ ታኒ ባሊያ ቢኬ» ያጊስ።
JOH 7:9 ኢ ሄሳ ጊዲ ጋሊላን ኣቲስ።
JOH 7:10 ኢያ ኢሻቲ ባሊያ ቦንቻናው ቢዳፔ ጉዬ ዬሱሲ ኦናካ ኤሪሶና ቆሳን ሄ ቤሳ ቢስ።
JOH 7:11 ኣይሁዴቲ ባሊያ ቦንቺያ ቤሳን፥ «ኢ ኣዉን ዴዒ?» ያጊዲ ኢያ ኮዪዶሶና።
JOH 7:12 ኣሳይ ካልካሺዲ ኢያባ ኦዴቶሶና። ባጋይ፥ «ኢ ሎዖ ኣሲ» ጊያ ዎዴ ሃራቲ ቃሲ፥ «ኣካይ፥ ኢ ኣሳ ባሌꬄስ» ያጎሶና።
JOH 7:13 ሺን ኣይሁዴ ሃላቃታስ ያዪዳ ጊሾ ኦኒካ ኢያባ ቆንጬን ኦዴቴና።
JOH 7:14 ባሊያ ቦንቺዲ ጊዶ ጋꬂያ ዎዴ ዬሱሲ ፆሳ ኬꬂ ቢዲ ታማርሶ ኦይኪስ።
JOH 7:15 ኣይሁዴቲ፥ «ሃ ኣዴይ ቲሚርቴ ታማሮና ሃይሳ ኡባ ዋቲ ኤሪዴ?» ያጊዲ ማላሌቲዶሶና።
JOH 7:16 ዬሱሲ ዛሪዲ፥ «ታ ታማርሲያ ቲሚርቴይ ታና ኪቲዳ ፆሳ ማታፔ ያ ቲሚርቴፌ ኣቲን ታባ ጊዴና።
JOH 7:17 ፆሳ ሼኒያ ኦꬃናው ኮያ ኦኒካ ሃ ቲሚርቴይ ፆሳ ማታፔ ዪያኮኔ ዎይኮ ታኒ ታፔ ኦዲያኮ ኤራና።
JOH 7:18 ባባ ኦዲያ ኦኒካ ባ ሁዔ ቦንቾ ኮዬስ። ሺን ባና ኪቲዳይሳ ቦንቹዋ ኮያ ኦኒካ ኢ ቱማንቾ፤ ኢያን ዎርዶይ ባዋ።
JOH 7:19 ሙሴይ ሂንቴው ሂጊያ ኢሚስ፥ ሺን ሂንቴፌ ኦኒካ ሂጊያ ናጊቤና። ያቲን ኣይስ ታና ዎꬋናው ኮዬቲ?» ያጊስ።
JOH 7:20 ኣሳይ ዛሪዲ፥ «ኔና ፃላሄይ ኦይኪስ፤ ኔና ዎꬋናው ኦኔ ኮዬይ?» ያጊዶሶና።
JOH 7:21 ዬሱሲ፥ «ታኒ ኢሲ ማላታ ኦꬂን ሂንቴ ኡባይ ማላሌቲዴታ።
JOH 7:22 ሂንቴ፥ ሂንቴ ናይታ ቃፃራና ሜላ ሙሴይ ኪቲስ። ሺን ቃፃሮ ሂንቴ ማይዛቲ ዶሚዶሶናፔ ኣቲን ሙሴ ጊዴና። ሄሳ ጊሾ፥ ሂንቴ ሳምባታ ጋላስ ኣዴ ናይታ ቃፃሬታ።
JOH 7:23 ሙሴ ሂጌይ ኪቲዳ ጊሾ ሂንቴ ሳምባታ ጋላስ ቃፃሪያባ ጊዲኮ፥ ታኒ ኢሲ ኣሳ ኩሜꬃ ኣሳቴꬃ ፓꬂዳ ጊሾ ታራ ኣይስ ካጬቲ?
JOH 7:24 ቱማ ፒርዳ ፒርዲቴፔ ኣቲን ኣሳ ሶምዖ ቤዒዲ ፒርዶፊቴ» ያጊስ።
JOH 7:25 ዬሩሳላሜ ኣሳፔ ኢሶቲ ኢሶቲ፥ «ኤንቲ ዎꬋናው ኮያ ኡራይ ሃይሳ ጊዴኔ?
JOH 7:26 ሄኮ፥ ኢ ቆንጬን ኦዴስ፤ ኤንቲ ኢያ ኣይኮካ ጎኮና። ኢ ኪሪስቶሳ ጊዴይሳ ኣይሁዴ ሃላቃቲ ቱማ ኤሪዶናሻ?
JOH 7:27 ኪሪስቶሲ ያ ዎዴ ኢ ኣዉፔ ያኮ ኦኒካ ኤሬና፥ ሺን ኢ ኣዉፔ ዪዳኮ ኑ ኤሮስ» ያጊዶሶና።
JOH 7:28 ዬሱሲ ፆሳ ኬꬃን ታማርሲሼ ባ ቃላ ꬎቁ ኦꬂዲ፥ «ቱማ ሂንቴ ታኒ ኦኔኮኔ ታ ኣዉፔ ዪዳኮ ኤሬቲ? ታኒ ታ ማታን ያቢኬ፥ ሺን ታና ኪቲዳይሲ ቱማንቾ፤ ሂንቴ ኢያ ኤሬኬታ።
JOH 7:29 ሺን ታኒ ኢ ኪቲን ኢያ ማታፔ ዪዳ ጊሾ ኢያ ኤራይስ» ያጊስ።
JOH 7:30 ሄሳ ጊሾ፥ ኤንቲ ኢያ ኦይካናው ኮዪዶሶና። ሺን ኢያ ዎዴይ ቡሮ ጋኪቦና ጊሾ ኦኒካ ኢያ ቦላ ኩሼ ዎꬂቤና።
JOH 7:31 ሺን ዳሮ ኣሳይ ዬሱሳ ኣማኒዲ፥ «ኪሪስቶሲ ያ ዎዴ ሃ ኡራይ ኦꬂዳ ማላታታፔ ዳሪያ ማላታ ኦꬃኔዬ?» ያጊዶሶና።
JOH 7:32 ፋሪሳዌቲ ዳሮ ኣሳይ ዬሱሳባ ካልካሼይሳ ሲዒዶሶና። ካሂኔ ሃላቃቲኔ ፋሪሳዌቲ ኢያ ኦይꬂዲ ቃሺሳናው ፆሳ ኬꬂ ናጌይሳታ ኪቲዶሶና።
JOH 7:33 ዬሱሲ፥ «ታኒ ሂንቴራ ጉꬃ ዎዴ ጋምዓና፤ ሄሳፌ ጉዬ ታና ኪቲዳይሳኮ ባና።
JOH 7:34 ሂንቴ ታና ኮያና፥ ሺን ዴሜኬታ። ታኒ ዴዒያሱዋ ሂንቴ ያናው ዳንዳዔኬታ» ያጊስ።
JOH 7:35 ኣይሁዴቲ ኢሶይ ኢሱዋራ፥ «ሃይሲ ኑኒ ዴሞናሶ ኣው ባና ሃኒ? ጊሪኬ ካታማን ዴዒያ ኣይሁዴታኮ ቢዲ ጊሪኬታ ታማርሳናው ሃኒዬ?
JOH 7:36 ‹ሂንቴ ታና ኮያና፥ ሺን ዴሜኬታ› ቃሲ፥ ‹ታኒ ዴዒያሱዋ ሂንቴ ያናው ዳንዳዔኬታ› ጉሳይ ኣይ ጉሴ?» ያጊዶሶና።
JOH 7:37 ባሊያ ቦንቺያ ጋላሳታፔ ዎልቃማኔ ዉርሴꬃ ጋላሳን ዬሱሲ ዴንዲዲ፥ ባ ቃላ ꬎቁ ኦꬂዲ፥ «ሳሞቲዳ ኦኒካ ታኮ ዪዲ ኡዮ።
JOH 7:38 ታና ኣማኒያ ኦኒካ ጌሻ ማፃፋይ ጊዳይሳዳ ዴዖ ኢሚያ ፑልቶ ሃꬃይ ኢያፔ ጎጋና» ያጊስ።
JOH 7:39 ኢ ሄሳ ጊዳይ ኢያ ኣማኒዳይሳቲ ኤካናው ዴዒያ ጌሻ ኣያናባ። ዬሱሲ ቡሮ ቦንቼቲቦና ጊሾ ሄ ዎዴ ጌሻ ኣያናይ ኢሜቲቤና።
JOH 7:40 ሄ ኣሳፔ ዳሮቲ ኢ ጌይሳ ሲዒዲ፥ «ቱማ ሃይሲ ናቢያ» ያጊዶሶና።
JOH 7:41 ሃራቲ ቃሲ፥ «ሃይሲ ኪሪስቶሳ» ያጊዶሶና። ሺን ሃራቲ ቃሲ፥ «ኪሪስቶሲ ጋሊላፔ ዋኒዲ ኬዪ?
JOH 7:42 ጌሻ ማፃፋይ፥ ‹ኪሪስቶሲ ዳዊቴ ሼሻፔ ዳዊቴይ ዴዒዳ ቤቴሌሜ ካታማፔ ያና› ያጌኔዬ?» ያጊዶሶና።
JOH 7:43 ሄሳ ጊሾ፥ ዬሱሳ ጋሶን ኣሳይ ባንታ ጊዶን ሻኬቲዶሶና።
JOH 7:44 ሄ ኣሳፔ ኢሶቲ ኢሶቲ ኢያ ኦይካናው ኮዪዶሶና፥ ሺን ኦኒካ ኢያ ቦላ ኩሼ ዎꬂቤና።
JOH 7:45 ፆሳ ኬꬃ ናጌይሳቲ ካሂኔ ሃላቃታኮኔ ፋሪሳዌታኮ ጉዬ ሲሚ ዪን ኤንቲ፥ «ኣይስ ኢያ ኤሂቤኬቲ?» ያጊዲ ኦይቺዶሶና።
JOH 7:46 ፆሳ ኬꬃ ናጌይሳቲ ኤንታኮ፥ «ሃ ኣዴይ ኦዴቴይሳꬆ ኦኒካ ኦዴቴና» ያጊዲ ዛሪዶሶና።
JOH 7:47 ፋሪሳዌቲ ዛሪዲ፥ «ኢ ሂንቴናካ ባሌꬂዴ?
JOH 7:48 ኣይሁዴ ሃላቃታፔ ዎይኮ ፋሪሳዌቴፔ ኢያ ኣማኒዳ ኣሲ ዴዒ?
JOH 7:49 ሙሴ ሂጊያ ኤሮና ሃ ኣሳይ ቃንጌቲዳባ» ያጊዶሶና።
JOH 7:50 ፋሪሳዌታፔ ኢሶይ ቃማ ዬሱሳኮ ቢዳ ኒቆዲሞሲ ኤንታኮ፥
JOH 7:51 «ኢሲ ኣሲ ጊያባ ሲዖና ዎይኮ ኢ ኣይ ኦꬂዳኮ ኤሮና ዴዒሼ ኮይሮቲዲ ኢያ ቦላ ፒርዴይሲ ኑ ሂጊያን ዴዒ?» ያጊስ።
JOH 7:52 ኤንቲ ዛሪዲ፥ «ኔኒካ ቃሲ ጋሊላ ቢታ ኣሴ? ጋሊላ ቢታፌ ናቤይ ኬዮናይሳ ጌሻ ማፃፋፔ ፒልጋዳ ዴማ» ያጊዶሶና።
JOH 8:1 ኢሶይ ኢሶይ ኣጊዲ ባ ሶ ባ ሶ ቢስ፥ ሺን ዬሱሲ ሻማሆ ዴሪያ ቦላ ቢስ።
JOH 8:2 ቃሲ ዎንቴꬃ ጋላስ ጉራ ፆሳ ኬꬂ ሲሚስ። ዳሮ ኣሳይ ኢያኮ ዪን ኡቲዲ ኤንታ ታማርሲስ።
JOH 8:3 ሂጌ ኣስታማሬቲኔ ፋሪሳዌቲ ላይማቲሺን ኦይኪዳ ኢሲ ማጫሲው ኢያኮ ኤሂዶሶና። ኤንቲ ኣሳ ኡባ ሲንꬃን ኢዮ ኤሲዲ፥
JOH 8:4 «ኣስታማሪያው፥ ሃ ማጫሲያ ላይማቲሺን ኑ ኦይኪዳ።
JOH 8:5 ሙሴ ሂጌይ ሃኒ ሜላ ማጫስ ሹቻን ጫዴታ ሃይቃና ሜላ ኪቴስ። ያቲን፥ ኔኒ ዎይጋይ?» ያጊዶሶና።
JOH 8:6 ኤንቲ ሄሳ ጊዳይ ዬሱሳ ፓጪዲ ኢያ ሞቲያባ ዴማናሳ። ሺን ዬሱሲ ሆኪዲ ባ ቢራꬌን ቢታ ቦላ ፃፊስ።
JOH 8:7 ኤንቲ ኢያ ዛሪ ዛሪ ኦይቺዲ ኣጎና ኢፂን፥ ፑዴ ꬎቁ ጊዲ፥ «ሂንቴ ጊዶን ናጋራ ኦꬂቦና ኣሲ ኮይሮቲዲ ኢዮ ሹቻን ጫዶ» ያጊስ።
JOH 8:8 ቃሲካ ሆኪዲ ቢታ ቦላ ፃፊስ።
JOH 8:9 ኤንቲ ሄሳ ሲዒዳ ዎዴ ጪማታፔ ዶሚዲ ኢሶይ ኢሶይ ኬዪሼ ዉሪዶሶና። ዬሱሳ ፃላሊ ሄ ቤሳን ኤቂዳ ማጫሴራ ኣቲስ።
JOH 8:10 ኢ ፑዴ ꬎቁ ጊዲ ማጫሴኮ፥ «ማጫሴቴ፥ ኣሳቲ ኣው ቢዶና? ኔ ቦላ ፒርዲዳይ ኦኒካ ባዌ?» ያጊስ።
JOH 8:11 ማጫሲያ፥ «ጎዳው፥ ኦኒካ ባዋ» ያጋሱ። ዬሱሲ ዛሪዲ፥ «ታኒካ ኔ ቦላ ፒርዲኬ። ባ፤ ዛራዳ ናጋራ ኦꬆፋ» ያጊስ።
JOH 8:12 ቃሲካ ዬሱሲ ኣሳኮ፥ «ታኒ ኣላሚያስ ፖዖ። ታና ካሊያ ኦኒካ ዴዖ ኢሚያ ፖዑዋ ኤካናፔ ኣቲን ꬉማን ሲሜሬቴና» ያጊዲ ኦዲስ።
JOH 8:13 ፋሪሳዌቲ፥ «ኔ ኔባ ማርካታሳ፥ ሺን ኔ ማርካቴꬃይ ቱማ ጊዴና» ያጊዶሶና።
JOH 8:14 ዬሱሲ ዛሪዲ፥ «ታኒ ታባ ማርካቲኮካ ታ ማርካቴꬃይ ቱማ። ኣይስ ጊኮ፥ ታኒ ኣዉፔ ዪዳኮ ቃሲ ኣው ቢያኮ ኤራይስ፥ ሺን ሂንቴ ኤሬኬታ።
JOH 8:15 ሂንቴ ኣሳ ቆፋን ፒርዴታ፤ ታኒ ኢሲ ኣሳ ቦላካ ፒርዲኬ።
JOH 8:16 ታኒ ፒርዲያባ ጊዲኮካ ታ ፒርዳይ ቱማ። ኣይስ ጊኮ፥ ታና ኪቲዳ ታ ኣዋይ ታራ ዴዔሲፔ ኣቲን ታኒ ታርካ ዴዒኬ።
JOH 8:17 ናምዑ ኣሳ ማርካቴꬂ ቱማ ጊዴይሲ ሂንቴ ሂጊያን ፃፌቲስ።
JOH 8:18 ታኒ ታባ ታ ሁዔን ማርካታይስ፤ ቃሲ ታና ኪቲዳ ታ ኣዋይካ ታባ ማርካቴስ» ያጊስ።
JOH 8:19 ኤንቲ፥ «ኔ ኣዋይ ኣዉን ዴዒ?» ያጊዲ ኢያ ኦይቺዶሶና። ዬሱሲ ዛሪዲ፥ «ሂንቴ ታና ዎይኮ ታ ኣዋ ኤሬኬታ። ታና ኤሪዳባ ጊዲያኮ፥ ሂንቴ ታ ኣዋካ ኤራናሺን» ያጊስ።
JOH 8:20 ዬሱሲ ፆሳ ኬꬃን ሙፃታ ሚሺያ ዬጊያ ሳፂኔይ ዴዒያ ቤሳን ሄሳ ታማርሲስ። ኢያ ቃማይ ቡሮ ጋኪቦና ጊሾ ኦኒካ ኢያ ኦይኪቤና።
JOH 8:21 ቃሲካ ዬሱሲ ኤንታኮ፥ «ታኒ ባና፤ ሂንቴ ታና ኮያና፥ ሺን ሂንቴ ኣቶቴꬂ ዴሞና ሂንቴ ናጋራን ሃይቃና። ታኒ ቢያሱዋ ባናው ሂንቴ ዳንዳዔኬታ» ያጊስ።
JOH 8:22 ኣይሁዴ ሃላቃቲ፥ «ኢ፥ ‹ታኒ ቢያሱዋ ሂንቴ ባናው ዳንዳዔኬታ› ያጌስ። ኢ ባና ባርካ ዎꬋኔዬ?» ያጊዶሶና።
JOH 8:23 ዬሱሲ ዛሪዲ፥ «ሂንቴ ጋርሳፌ፤ ታኒ ቦላፌ። ሂንቴ ሃ ኣላሚያፔ፥ ታኒ ሃ ኣላሚያፔ ጊዲኬ።
JOH 8:24 ሂንቴ ኣቶቴꬂ ዴሞና ሂንቴ ናጋራን ሃይቃና ጋዳ ታኒ ሂንቴው ኦዲዳይ ሄሳሳ። ታኒ ታና ጊዴይሳ ሂንቴ ኣማኖና ኢፂኮ ሂንቴ ኣቶቴꬂ ዴሞና ሂንቴ ናጋራን ሃይቃና» ያጊስ።
JOH 8:25 ኤንቲ፥ «ኔኒ ኦኔ?» ያጊዲ ኦይቺዶሶና። ዬሱሲ ዛሪዲ፥ «ታኒ፥ ኮይሮፔ ሂንቴው ኦዲዳ ታና።
JOH 8:26 ታኒ ሂንቴባ ኦዳዳ ፒርዲያባይ ዳሮባይ ዴዔስ። ሺን ታና ኪቲዳይሲ ቱማንቾ፤ ቃሲ ታኒ ኢያፔ ሲዒዳይሳ ፃላላ ኣላሚያስ ኦዳይስ» ያጊስ።
JOH 8:27 ዬሱሲ ባ ኣዋባ ኦዴይሳ ኤንቲ ኣኬኪቦኮና።
JOH 8:28 ሄሳ ጊሾ፥ ዬሱሲ ኤንታኮ፥ «ሂንቴ ኣሳ ናዓ ፑዴ ꬎቁ ኦꬂያ ዎዴ ታኒ ታና ጊዴይሳ ሂንቴ ኤራና። ቃሲካ ታኒ ታ ማታን ኣይኮካ ኦꬆናይሳኔ ታ ኣዋይ ታና ታማርሲዳይሳ ኦዴይሳ ሂንቴ ኤራና።
JOH 8:29 ታና ኪቲዳይሲ ታራ ዴዔስ። ታኒ ኡባ ዎዴ ኢያ ኡፋይሲያባ ኦꬂያ ጊሾ ኢ ታና ታ ፃላላ ኣጊቤና» ያጊስ።
JOH 8:30 ዬሱሲ ሄሳ ኦዲሺን ሲዒዳ ዳሮ ኣሳይ ኢያ ኣማኒዶሶና።
JOH 8:31 ዬሱሲ ባና ኣማኒዳ ኣሳታኮ፥ «ሂንቴ ታ ቲሚርቲያስ ኪቴቲኮ ቱማ ታና ካሌይሳታ።
JOH 8:32 ሂንቴ ቱማ ኤራና፤ ቱማይካ ሂንቴና ኣይሌቴꬃፌ ኬሳና» ያጊስ።
JOH 8:33 ኤንቲ ዛሪዲ፥ «ኑኒ ኣብራሃሜ ሼሺ፤ ኑኒ ኦዴስካ ኣይሌቲቦኮ። ኔኒ ዎይጋዳ፥ ‹ሂንቴ ኣይሌቴꬃፌ ኬያና› ጋይ?» ያጊዶሶና።
JOH 8:34 ዬሱሲ ዛሪዲ፥ «ታኒ ሂንቴው ቱማ ኦዳይስ፤ ናጋራ ኦꬂያ ኦኒካ ናጋራ ኣይሌ።
JOH 8:35 ኣይሌይ ሜሪናው ሶ ኣሳራ ዴና፥ ሺን ናዓይ ሜሪናው ሶ ኣሳራ ዴዔስ።
JOH 8:36 ናዓይ ሂንቴና ኣይሌቴꬃፌ ኬሲኮ ሂንቴ ኣይሌቴꬃፌ ቱማ ኬያና።
JOH 8:37 ሂንቴ ኣብራሃሜ ሼሺ ጊዴይሳ ታኒ ኤራይስ። ሺን ታ ቃላይ ሂንቴ ዎዛናን ባይና ጊሾ ታና ዎꬋናው ኮዬታ።
JOH 8:38 ታኒ ታ ኣዋይ ታና ቤሲዳይሳ ኦዳይስ፥ ሺን ሂንቴካ ሂንቴ ኣዋፔ ሲዒዳይሳ ኦꬄታ» ያጊስ።
JOH 8:39 ኤንቲ ዛሪዲ፥ «ኑ ኣዋይ ኣብራሃሜ» ያጊዶሶና። ዬሱሲ ኤንታኮ፥ «ሂንቴ ኣብራሃሜ ናይታ ጊዲያኮ ኢ ኦꬂዳይሳ ኦꬃና።
JOH 8:40 ሺን ፆሳፌ ሲዒዳ ቱማ ኦዲዳ ታና ሂንቴ ዎꬋናው ኮዬታ። ኣብራሃሜይ ሄሳዳ ኦꬂቤና።
JOH 8:41 ሂንቴ፥ ሂንቴ ኣዋይ ኦꬂዳይሳ ኦꬄታ» ያጊስ። ኤንቲ ዛሪዲ፥ «ኑኒ ቱማ ፆሳ ናይታ፤ ኑስ ኢሲ ኣዋይ ፆሳ ፃላሊ ዴዔስ» ያጊዶሶና።
JOH 8:42 ዬሱሲ ኤንታኮ፥ «ፆሳይ ቱማ ሂንቴ ኣዋ ጊዲያኮ ሂንቴ ታና ዶሳና፤ ኣይስ ጊኮ፥ ታኒ ፆሳ ማታፔ ያዳ ሃይሳን ዴዓይስ። ታና ኢ ኪቲስፔ ኣቲን ታኒ ታ ማታን ያቢኬ።
JOH 8:43 ታኒ ጌይሳ ሂንቴ ሲዓናው ኮዮና ጊሾ ታ ጊያባይ ሂንቴው ጌሌና።
JOH 8:44 ሂንቴ፥ ሂንቴ ኣዋ ፃላሄ ናይታ። ቃሲ ሂንቴ፥ ሂንቴ ኣዋይ ኣሞቲያባ ኦꬃናው ኮዬታ። ኢ ኮይሮፔ ዶሚዲ ሼምፖ ዎꬌይሳ። ቱሚ ኢያን ባይና ጊሾ ኢ ቱማ ኢፄስ። ዎርዶይ ኢያው ሜꬎ ጊዲዳ ጊሾኔ ኢ ዎርዶ ኣዋ ጊዲያ ጊሾ ዎርዶ ኦዴቲሼ ባፔ ኦዴቴስ።
JOH 8:45 ታኒ ቱማ ሃሳያይስ፥ ሺን ሂንቴ ታና ኣማኔኬታ።
JOH 8:46 ሂንቴፌ፥ ‹ኔኒ ናጋራ ኦꬂሺን ታ ቤዓስ› ጋናው ዳንዳዔይ ኦኔ? ታኒ ቱማ ኦዴቲያባ ጊዲኮ ታና ኣይስ ኣማኔኬቲ?
JOH 8:47 ፆሳ ኣሲ ፆሳይ ጊያባ ሲዔስ። ሂንቴ ፆሳ ኣሲ ጊዶና ጊሾ ፆሳይ ጊያባ ሲዔኬታ» ያጊስ።
JOH 8:48 ኣይሁዴቲ ዛሪዲ፥ « ‹ኔኒ ሳማሬ ኣሲ፤ ኔናን ቱና ኣያናይ ዴዔስ› ጊሼ ሊኬ ጊዶኮ?» ያጊዶሶና።
JOH 8:49 ዬሱሲ ኤንታኮ «ታ ቦላ ቱና ኣያኒ ባዋ። ታኒ ታ ኣዋ ቦንቻይስ፥ ሺን ሂንቴ ታና ካዉሼታ።
JOH 8:50 ታኒ ታ ሁዔ ቦንቾ ኮዪኬ፤ ታኒ ቦንቼታና ሜላ ኮዬይሲኔ ታው ፒርዴይሲ ዴዔስ።
JOH 8:51 ታኒ ሂንቴው ቱማ ኦዳይስ፤ ታ ቃላ ናጊያ ኦኒካ ሃይቄና» ያጊስ።
JOH 8:52 ኣይሁዴቲ ዛሪዲ፥ «ኔ ቦላ ቱና ኣያናይ ዴዔይሳ ኑኒ ሃዒ ኤሪዳ። ኣብራሃሜይ ሃይቂስ፤ ናቤቲካ ሃይቂዶሶና። ሺን ኔኒ፥ ‹ታ ቃላ ናጊያ ኦኒካ ሃይቄና› ያጋሳ።
JOH 8:53 ኔኒ ሃይቂዳ ኑ ኣዋ ኣብራሃሜፔ ኣꬋዬ? ናቤቲካ ቃሲ ሃይቂዶሶና። ኔኒ ኔና ኦና ጋዳ ቆፓይ?» ያጊዶሶና።
JOH 8:54 ዬሱሲ፥ «ታኒ ታና ቦንቺኮ ታ ቦንቾይ ሃዳ። ሂንቴ፥ ‹ኑ ፆሳ› ጊያ ታ ኣዋይ ኢ ታና ቦንቼስ።
JOH 8:55 ሂንቴ ኢያ ኤሮና ኢፂኮ ታኒ ኢያ ኤራይስ። ታኒ ኢያ ኤሪኬ ጊኮ ሂንቴ ሜላ ዎርዶታይስ። ሺን ታኒ ኢያ ኤራይስ፤ ቃሲ ኢያ ቃላካ ናጋይስ።
JOH 8:56 ሂንቴ ኣዋይ ኣብራሃሜይ ታ ዩሳ ጋላሳ ቤዒዲ ኡፋይታናው ኣሞቲስ፤ ቤዒዲካ ኡፋይቲስ» ያጊስ።
JOH 8:57 ኣይሁዴቲ ዛሪዲ፥ «ሃሪ ኣቶሺን፥ ኔው ኢሻታሙ ላይꬂ ኩሚቤናሺን ዋናዳ ኣብራሃሜ ቤዓስ ጋይ?» ያጊዶሶና።
JOH 8:58 ዬሱሲ ኤንታኮ፥ «ታኒ ሂንቴው ቱማ ኦዳይስ፤ ኣብራሃሜይ ዬሌታናፔ ካሴ ታኒ ታና » ያጊስ።
JOH 8:59 ሄሳ ጊሾ፥ ኤንቲ ዬሱሳ ጫዳናው ሹቺ ኤኪዶሶና። ሺን ዬሱሲ ኤንታፌ ጌሚዲ ፆሳ ኬꬃፌ ኬዪዲ ቢስ።
JOH 9:1 ዬሱሲ ቢሼ ዬሌቶሳፔ ቆቄ ጊዲዲ ዴዒያ ኢሲ ኣዲያ ቤዒስ።
JOH 9:2 ኢያ ታማሬቲ፥ «ኣስታማሪያው፥ ሃ ኣዴይ ቆቄ ጊዲዲ ዬሌታና ሜላ ናጋራ ኦꬂዳይ ኦኔ? ኢ ኦꬂዴዬ ዎይኮ ኢያ ዬሊዳይሳቲ ኦꬂዶና?» ያጊዲ ኦይቺዶሶና።
JOH 9:3 ዬሱሲ፥ «ፆሳ ኦሶይ ኢያ ቦላ ቆንጫና ሜላፔ ኣቲን ኢ ዎይኮ ኢያ ዬሊዳይሳቲ ናጋራ ኦꬂዳ ጊሾ ጊዴና።
JOH 9:4 ሳዒ ጋላስ ዴዒሺን ታና ኪቲዳይሳ ኦሱዋ ኑ ኦꬃናው ቤሴስ። ኦኒካ ኦꬃናው ዳንዳዖና ቃማይ ዬስ።
JOH 9:5 ታኒ ኣላሚያን ዴዓሼ ኣላሚያስ ፖዖ» ያጊስ።
JOH 9:6 ዬሱሲ ሄሳ ጊዲ ሳዓን ጩቲስ። ባ ጩቻን ጉꬃ ቢታ ላኮꬂዲ ሄ ኡርቃን ቆቄ ኣዲያ ኣይፊያ ቲዪስ።
JOH 9:7 ያቲዲ፥ «ባዳ ሳሊሆሜ (ሳሊሆሜ ጉሳይ ኪቴቲዳይሳ ጉሱ) ጊያ ቴቄቲዳ ሃꬃን ኔ ኣይፊያ ሜጬታ» ያጊስ። ሄሳ ጊሾ፥ ኣዴይ ቢዲ ባ ኣይፊያ ሜጬቲዲ ፄሊሼ ሲሚስ።
JOH 9:8 ኣዲያ ሾሮቲኔ ኣዴይ ካሴ ዎሲሺን ቤዒዳ ኣሳይ፥ «ሃይሲ ኡቲዲ ዎሲያ ኣዲያ ጊዴኔዬ?» ያጊዶሶና።
JOH 9:9 ኢሲ ኢሲ ኣሳይ፥ «ሃይሲ ኢያ» ያጊዶሶና። ሃራቲ ቃሲ፥ «ኣካይ፥ ሃይሲ ኢያ ዳኔሲፔ ኣቲን ኢያ ጊዴና» ያጊዶሶና። ሺን ኣዴይ፥ «ኤ፥ ታና» ያጊስ።
JOH 9:10 ኤንቲ ኢያኮ፥ «ያቲን ኔ ኣይፌይ ዋኒዲ ፄሊዴ?» ያጊዲ ኦይቺዶሶና።
JOH 9:11 ኢ ዛሪዲ፥ «ዬሱሳ ጊያ ኣዴይ ጉꬃ ኡርቃ ላኮꬂዲ ታ ኣይፊያ ቲዪዲ፥ ‹ሳሊሆሜ ባዳ ኔ ኣይፊያ ሜጬታ› ያጊን፥ ታኒ ባዳ ሜጬታዳ ፄላ ኣጋስ» ያጊስ።
JOH 9:12 ኤንቲ ኢያኮ፥ «ኢ ኣዉን ዴዒ?» ያጊዲ ኦይቺዶሶና። ኣዴይ፥ «ታኒ ኤሪኬ» ያጊስ።
JOH 9:13 ኤንቲ ካሴ ቆቄ፥ ሺን ሃዒ ፄሊዳ ኣዲያ ፋሪሳዌታኮ ኤፊዶሶና።
JOH 9:14 ዬሱሲ ኡርቃ ላኮꬂዲ ኣዲያ ኣይፊያ ፓꬂዳ ጋላሳይ ሳምባታ ጋላስ።
JOH 9:15 ሄሳ ጊሾ፥ ኣዴይ ዋኒዲ ፄሊዳኮ ፋሪሳዌቲ ኢያ ዛሪ ኦይቺዶሶና። ኣዴይ ኤንታኮ፥ «ኢ ታ ኣይፊያን ጉꬃ ኡርቃ ቲዪስ። ታ ኣይፊያ ሜጬታዳ ሃዒ ፄላይስ» ያጊስ።
JOH 9:16 ፋሪሳዌታፔ ኢሶቲ ኢሶቲ፥ «ሃይሳ ኦꬂዳ ኣዴይ ሳምባታ ሂጊያ ናጎና ጊሾ ፆሳ ማታፔ ዪቤና» ያጊዶሶና። ሺን ሃራቲ፥ «ናጋራንቾ ኣሲ ሃይሳ ሜላ ማላታ ዋቲ ኦꬃናው ዳንዳዒ?» ያጊዲ ባንታ ጊዶን ሻኬቲዶሶና።
JOH 9:17 ሄሳ ጊሾ፥ ፋሪሳዌቲ ኣዲያኮ፥ «ኢ ኔ ኣይፊያ ፄሊሲዳ ጊሾ ኔ ኢያባ ዎይጋይ?» ያጊዶሶና። ኣዴይ፥ «ኢ ናቤ» ያጊስ።
JOH 9:18 ኣይሁዴ ሃላቃቲ፥ ኢያ ኣዪዉኔ ኣዋ ፄጊዲ ኦይቻና ጋካናው፥ ኣዴይ ካሴ ቆቄ ጊዲዳይሳኔ ሃዒ ኢ ፄሌይሳ ኣማኒቦኮና።
JOH 9:19 ኤንቲ ኢያ ኣዪዉኔ ኢያ ኣዋኮ፥ «ሂንቴ ‹ቆቄ ጊዲዲ ዬሌቲስ› ጊያ ሂንቴ ናዓይ ሃይሴ? ያቲን፥ ሃዒ ዋኒዲ ፄሊዴ?» ያጊዲ ኦይቺዶሶና።
JOH 9:20 ኢያ ዬሊዳይሳቲ፥ «ሃይሲ ኑ ናዓ ጊዲዳይሳኔ ቆቄ ጊዲዲ ኢ ዬሌቲዳይሳ ኑ ኤሮስ።
JOH 9:21 ሺን ሃዒ ኢ ዋኒዲ ፄሊዳኮ ቃሲ ኢያ ኣይፊያ ኦኒ ፓꬂዳኮ ኑኒ ኤሮኮ። ኢያ ኦይቺቴ። ኢ ባና ኤሪዳ ኣሲ ጊዲያ ጊሾ ባባ ኦዳናው ዳንዳዔስ» ያጊዶሶና።
JOH 9:22 ኢያ ዬሊዳይሳቲ ሄሳ ጊዳይ ኣይሁዴታስ ያዪዳ ጊሾሳ። ኣይስ ጊኮ፥ ኣይሁዴቲ፥ ዬሱሲ ኢ ኪሪስቶሳ ያጊዲ ማርካቲያ ኣሲ ዴዒኮ ሄ ኡራ ኣይሁዴ ዎሳ ኬꬃፌ ሂላናው ኮይሮቲዲ ዞሬ ቃቺዶሶና።
JOH 9:23 ኢያ ዬሊዳይሳቲ፥ «ኢ ባና ኤሪዳ ኣሲ፤ ኢያ ኦይቺቴ» ያጊዳይ ሄሳሳ።
JOH 9:24 ሄሳ ጊሾ፥ ቆቄ ጊዲዲ ዬሌቲዳ ኣዲያ ኤንቲ ዛሪ ፄጊዲ፥ «ቱማ ኦዳናው ፆሳን ጫቃ፤ ሃ ኣዴይ ናጋራንቾ ጊዴይሳ ኑ ኤሮስ» ያጊዶሶና።
JOH 9:25 ኣዴይ ዛሪዲ፥ «ኢ ናጋራንቾ ጊዲን፥ ጊዶና ኢፂን ታ ኤሪኬ። ታኒ ቆቄ ጊዴይሳኔ ሃዒ ፄሌይሳ ሄ ኢሲባ ኤራይስ» ያጊስ።
JOH 9:26 ኤንቲ ዛሪዲ፥ «ኢ ኔው ኣይ ኦꬂዴ? ኢ ኔ ኣይፊያ ዋቲ ፓꬂዴ?» ያጊዶሶና።
JOH 9:27 ኢ ኤንታኮ፥ «ታኒ ሂንቴው ኦዳስ፥ ሺን ሲዒቤኬታ። ኣይስ ዛሪ ሲዓናው ኮዬቲ? ሂንቴካ ኢያ ታማሬ ጊዳናው ኮዬቲዬ?» ያጊስ።
JOH 9:28 ኤንቲ ኢያ ጫዪዲ፥ «ኔ ሄ ኡራ ታማሬ ጊዳ፤ ኑኒ ሙሴ ታማሬ።
JOH 9:29 ፆሳይ ሙሴስ ኦዲዳይሳ ኑኒ ኤሮስ፥ ሺን ሃ ኡራይ ኢ ኣዉፔ ዪዳኮካ ኑ ኤሮኮ» ያጊዶሶና።
JOH 9:30 ኣዴይ ኤንታኮ፥ «ኢ ኣዉፔ ዪዳኮ ሂንቴ ኤሮናይሲ ማላሊሲያባ፥ ሺን ኢ ታ ኣይፊያ ፓꬂስ።
JOH 9:31 ፆሳ ቦንቼይሳኔ ኢ ኮያባ ኦꬂያ ኡራ ፆሳይ ሲዔሲፔ ኣቲን ናጋራንቾታ ሲዔና።
JOH 9:32 ሳሎይ ሳዒ ሜꬌቶሳፔ ቆቄ ጊዲዲ ዬሌቲዳ ኣሳ ኣይፌ ፓꬂዳይ ኦኒካ ባዋ።
JOH 9:33 ሃ ኣዴይ ፆሳፌ ኪቴቲቦናባ ጊዲያኮ ኢሲባካ ኦꬃናው ዳንዳዔና» ያጊስ።
JOH 9:34 ኤንቲ ዛሪዲ፥ «ኔኒ ናጋራን ዬሌታዳ ዲጪዳይሲ ኑና ታማርሳናው ኮያይ?» ያጊዶሶና። ኢያ ኣይሁዴ ዎሳ ኬꬃፌ ሂሊዶሶና።
JOH 9:35 ዬሱሲ ኤንቲ ኣዲያ ኬሲዳይሳ ሲዒዳ ዎዴ ኢያ ዴሚዲ፥ «ኣሳ ናዓ ኣማናይ?» ያጊዲ ኦይቺስ።
JOH 9:36 ኣዴይ ዬሱሳኮ፥ «ጎዳው፥ ታኒ ኢያ ኣማናና ሜላ ኢ ኦኔ? ታው ኦዳርኪ?» ያጊስ።
JOH 9:37 ዬሱሲ ኣዲያኮ፥ «ኔኒ ኢያ ቤዓዳሳ፤ ሃ ኔራ ኦዴቴይሲ ኢያ» ያጊስ።
JOH 9:38 ኣዴይ ዛሪዲ፥ «ጎዳው፥ ኣማናይስ» ያጊዲ ዬሱሳስ ጎይኒስ።
JOH 9:39 ዬሱሲ፥ «ቆቄቲ ፄላና ሜላኔ ፄሌይሳቲ ቆቃና ሜላ ታኒ ፒርዳናው ሃ ኣላሚያ ያስ» ያጊስ።
JOH 9:40 ኢያራ ዴዒያ ጉꬃ ፋሪሳዌቲ ሄሳ ሲዒዲ፥ «ኑ ቆቄዬ?» ያጊዲ ኦይቺዶሶና።
JOH 9:41 ዬሱሲ፥ «ሂንቴ ቆቄ ጊዲያኮ ሂንቴው ናጋራ ጊዴና። ሺን ሃዒ ሂንቴ ፄሎስ ጊያ ጊሾ ሂንቴ፥ ሂንቴ ናጋራን ዴዔታ» ያጊስ።
JOH 10:1 ዬሱሲ፥ «ታኒ ሂንቴው ቱማ ኦዳይስ፤ ዶርሳ ጊርቤ ጊዶ ፔንጌራ ጊዶና ሃራሶራ ጌሊያ ኦኒካ ካይሶኔ ፓንጋ።
JOH 10:2 ሺን ፔንጌራ ጌሌይሲ ዶርሳታ ሄሜይሳ።
JOH 10:3 ፔንጊያ ናጌይሲ ኢያው ፔንጊያ ዶዬስ፤ ዶርሳቲካ ኢያ ቃላ ሲዖሶና። ኢ ባ ዶርሳታ ኤንታ ሱንꬃን ሱንꬃን ፄጌስ፤ ኤንታ ካሌꬂዲ ካሬ ኬሴስ።
JOH 10:4 ኢ ባይሳታ ካሬ ኬሲዳፔ ጉዬ ኤንታ ሲንꬃን ሃሙቴስ። ኤንቲ ኢያ ቃላ ኤሪያ ጊሾ ኢያ ካሎሶና።
JOH 10:5 ሃራ ኡራ ቃላ ኤንቲ ኤሮና ጊሾ ኢያፔ ባቃቶሶናፔ ኣቲን ኢያ ጌዶ ካሎኮና» ያጊስ።
JOH 10:6 ዬሱሲ ኤንታው ሃ ሌሚሱዋ ኦዲስ፥ ሺን ኢ ኣይ ጊዳኮ ኤንቲ ኣኬኪቦኮና።
JOH 10:7 ዛሪዲ ዬሱሲ ኤንታኮ፥ «ታኒ ሂንቴው ቱማ ኦዳይስ፤ ታኒ ዶርሳታስ ፔንጌ።
JOH 10:8 ታፔ ሲንꬄ ዪዳ ኡባይ ካይሶኔ ፓንጋ፥ ሺን ዶርሳቲ ኤንታ ሲዒቦኮና።
JOH 10:9 ፔንጌይ ታና፤ ታ ባጋራ ጌሊያ ኦኒካ ኣታና። ኢ ታ ባጋራ ጌላናኔ ኬያና፤ ሎዖ ሄሜቲያ ቤሲ ዴማና።
JOH 10:10 ካይሶይ ካይሶታናው፥ ሹካናዉኔ ꬋይሳናው ዬሲፔ ኣቲን ሃራባስ ዬና። ታኒ ኤንታው ዴዖይ ዳና ሜላኔ ኩሚዲ ፓላሃና ሜላ ያስ።
JOH 10:11 «ታኒ ሎዖ ሄንꬃንቾ፤ ሎዖ ሄንꬃንቾይ ባ ዶርሳታ ጊሾ ባ ሼምፑዋ ኣꬂ ኢሜስ።
JOH 10:12 ኬራ ሄሚያ ኣሲ ዶርሳታ ጎዳኔ ሄንꬃንቾ ጊዶና ጊሾ ሱꬉሜይ ያ ዎዴ ቤዒዲ ዶርሳታ ኣጊዲ ቤስ። ሄሳ ጊሾ፥ ሱꬉሜይ ዶርሳታ ኦይኪዲ ላሌስ።
JOH 10:13 ኬራ ሄሜይሲ ሚሼስ ሄሚያ ጊሾኔ ዶርሳታባይ ኢያ ቆፊሶና ጊሾ ዶርሳታ ኣጊዲ ባቃቴስ።
JOH 10:14 «ታኒ ሎዖ ሄንꬃንቾ። ታ ኣዋይ ታና ኤሬይሳዳ ታኒካ ታ ኣዋ ኤራይስ። ሄሳዳካ፥ ታኒ ታ ዶርሳታ ኤራይስ፤ ታ ዶርሳቲካ ታና ኤሮሶና። ታኒ ታ ዶርሳታ ጊሾ ታ ሼምፑዋ ኣꬃ ኢማይስ።
JOH 10:16 ሃ ዉዲያን ባይና ሃራ ዶርሳቲ ታው ዴዖሶና። ታኒ ኤንታካ ኤሃናው ቤሴስ። ኤንቲ ታ ቃላ ሲዓና፤ ኤንቲ ኢሲ ዉዴ ጊዳና፤ ሄንꬃንቾይካ ኢሱዋ።
JOH 10:17 «ታኒ ታ ሼምፑዋ ኣꬃ ኢማዳ ዛራ ኤኪያ ጊሾ ታ ኣዋይ ታና ዶሴስ።
JOH 10:18 ታ ዶሳዳ ታ ሼምፑዋ ኣꬃ ኢማይሲፔ ኣቲን ታፔ ኦኒካ ኤኬና። ታ ታ ሼምፑዋ ኣꬃ ኢማናዉኔ ዛራ ኤካናው ማቲ ታው ዴዔስ። ታኒ ኦꬃና ሜላ ታ ኣዋይ ታና ኪቲዳይሲ ሃይሳ» ያጊስ።
JOH 10:19 ሄሳ ኢ ጊዳ ጊሾ ኣይሁዴታ ጊዶን ቃሲካ ሻኬቴꬂ ሜꬌቲስ።
JOH 10:20 ኤንታፌ ዳሪያ ባጋይ፥ «ኢያን ቱና ኣያኒ ዴዔስ! ኢ ጎዬስ! ኢ ጊያባ ኣይስ ሲዔቲ?» ያጊዶሶና።
JOH 10:21 ሃራቲ ቃሲ፥ «ፃላሄይ ኦይኪዳ ኣሲ ሃይሳዳ ኦዴቴና። ቱና ኣያኒ ቆቄ ኣይፌ ፄሊሳናው ዳንዳዒዬ?» ያጊዶሶና።
JOH 10:22 ዬሩሳላሜን ፆሳ ኬꬃ ኣንጂሲዳ ጋላሳታ ቦንቺያ ባሌይ ጋኪስ፤ ሄ ዎዴ ሳዒ ባልጎ።
JOH 10:23 ዬሱሲ ፆሳ ኬꬃን ሶሎሞኔ ባራንዳን ሲሜሬቴስ።
JOH 10:24 ኣይሁዴቲ ዬሱሳ ዩሾን ሺቂ ኤቂዲ፥ «ኔኒ ኑና ኣዉዴ ጋካናው ሲꬌራ ዎꬃኔ? ኔኒ ኪሪስቶሳ ጊዲኮ ኣኔ ኑስ ጌሻዳ ኦዳ» ያጊዶሶና።
JOH 10:25 ዬሱሲ ዛሪዲ ኤንታኮ፥ «ታኒ ሂንቴው ኦዳስ፤ ሺን ታና ኣማኔኬታ። ታኒ ታ ኣዋይ ታው ኢሚዳ ማታን ኦꬂያ ኦሶይ ታባ ማርካቴስ።
JOH 10:26 ሺን ታኒ ሂንቴው ኦዲዳይሳዳ ሂንቴ ታ ዶርሴ ጊዶና ጊሾ ኣማኔኬታ።
JOH 10:27 ታ ዶርሳቲ ታ ቃላ ሲዖሶና። ታኒ ኤንታ ኤራይስ፤ ኤንቲካ ታና ካሎሶና።
JOH 10:28 ታኒ ኤንታው ሜሪና ዴዑዋ ኢማይስ፤ ኤንቲ ኡባራካ ꬋዮኮና። ኦኒካ ታ ኩሼፔ ኤንታ ቦንቂ ኤካናው ዳንዳዔና።
JOH 10:29 ኤንታ ታው ኢሚዳ ታ ኣዋይ ኡባፌ ኣꬌስ ኦኒካ ታ ኣዋ ኩሼፔ ኤንታ ቦንቂ ኤካናው ዳንዳዔና።
JOH 10:30 ታኔ ታ ኣዋይ ኢሲኖ» ያጊስ።
JOH 10:31 ኣይሁዴቲ ዬሱሳ ጫዳናው ቃሲካ ሹቺ ዴንꬂዶሶና።
JOH 10:32 ዬሱሲ ኤንታኮ፥ «ታኒ ኦꬃና ሜላ ታ ኣዋይ ታው ኢሚዳ ዳሮ ሎዖ ኦሶታ ሂንቴና ኦꬃ ቤሳስ። ሄሳታፔ ኣዉሳ ጊሾ ታና ሹቻን ጫዳናው ኮዬቲ?» ያጊስ።
JOH 10:33 ኣይሁዴቲ ዛሪዲ፥ «ኑኒ ኔና ኔ ሎዖ ኦሶ ጊሾ ሹቻን ጫዳናው ኮዮኮ። ሺን ኔኒ ፆሳ ጫያ ጊሾኔ ኣሴ ጊዳሼ ኔ ኔና ፆሴ ጊያ ጊሾሳ» ያጊዶሶና።
JOH 10:34 ዬሱሲ ዛሪዲ፥ «ጌሻ ማፃፋን ፆሳይ፥ ‹ሂንቴ ፆሳታ› ጊዳይሲ ፃፌቲቤኔ?
JOH 10:35 ጌሻ ማፃፋይ ሜሪናው ላሜቴና። ፆሳይ ባ ቃላ ኢሚዳ ኣሳታ፥ ‹ፆሳታ› ጊዲ ፄጊኮ፥
JOH 10:36 ኣዋይ ዶሪዲ ሃ ኣላሚያ ኪቲዳ ታና ፆሳ ናዓ ዋቲዲ ‹ፆሳ ጫያሳ› ያጌቲ?
JOH 10:37 ታኒ ታ ኣዋይ ኦꬄይሳ ኦꬆና ኢፂኮ ታና ኣማኖፒቴ።
JOH 10:38 ሺን ታኒ ኦꬂያባ ጊዲኮ ሂንቴ ታና ኣማኖና ኢፂኮካ፥ ታ ኣዋይ ታናን ዴዔይሳኔ ታካ ታ ኣዋን ዴዔይሳ ሂንቴ ኤራና ሜላ ታ ኦሱዋ ኣማኒቴ» ያጊስ።
JOH 10:39 ቃሲካ ኤንቲ ኢያ ኦይካናው ኮዪዶሶና፥ ሺን ኢ ኤንታፌ ኬሲ ኤኪስ።
JOH 10:40 ዮሃኒሲ ካሴ ፃማቂያ ቤሳ፥ ዮርዳኖሴ ሻፋፔ ሄፊንꬂ ዬሱሲ ፒኒዲ ያን ዴዒስ።
JOH 10:41 ዳሮ ኣሳይ ዬሱሳኮ ዪዲ፥ «ዮሃኒሲ ማላታ ኦꬂቤና፥ ሺን ኢ ሃ ኣዲያባ ኦዲዳባይ ኡባይ ቱማ» ያጊዶሶና።
JOH 10:42 ያን ዳሮ ኣሳይ ዬሱሳ ኣማኒዶሶና።
JOH 11:1 ቢታኒያ ጉታን ኣላዛራ ጊያ ኢሲ ኣዴይ ሃርጌቲስ። ቢታኔይ ማይራማኔ ኢ ሚቺያ ማርታ ዴዒያ ጉታ።
JOH 11:2 ማይራማ ጎዳ ቶሁዋ ሺቶ ቲያዳ ባ ቢናናን ኢያ ቶሁዋ ቁቺዳሮ። ሃርጌቲዳይ ኢ ኢሻ ኣላዛራ።
JOH 11:3 ሄሳ ጊሾ፥ ሚቼቲ፥ «ጎዳው፥ ኔ ዶሴይሲ ሃርጌቲስ» ጊዲ ዬሱሳኮ ኪቲዶሶና።
JOH 11:4 ዬሱሲ ሄሳ ሲዒዳ ዎዴ «ሃ ሃርጌይ፥ ፆሳይኔ ኢያ ናዓይ ቦንቼታና ሜላፔ ኣቲን ሃይቆስ ጋꬂያ ሃርጌ ጊዴና» ያጊስ።
JOH 11:5 ዬሱሲ ማርታ፥ ኢ ሚቺዉኔ ኣላዛራ ዶሴስ።
JOH 11:6 ሺን ኣላዛሪ ሃርጊዳይሳ ዬሱሲ ሲዒዲ ባ ዴዒያ ቤሳን ናምዑ ጋላስ ጋምዒስ።
JOH 11:7 ሄሳፌ ጉዬ፥ ዬሱሲ ባ ታማሬታኮ፥ «ዛሪዲ ዪሁዳ ቢታ ቦስ» ያጊስ።
JOH 11:8 ኢያ ታማሬቲ ዛሪዲ፥ «ኣስታማሪያው፥ ጉꬃ ዎዴፔ ካሴ ኣይሁዴቲ ኔና ሹቻን ጫዲዲ ዎꬋናው ኮዪዶሶና፤ ሃዒካ ያ ባኔ?» ያጊዶሶና።
JOH 11:9 ዬሱሲ፥ «ኢሲ ጋላሳን ታማኔ ናምዑ ሳቴይ ዴዔስ ጊዴኔዬ? ጋላስ ሃሙቲያ ኣሲ ሃ ኣላሚያ ፖዑዋ ቤዒያ ጊሾ ꬉቤቴና።
JOH 11:10 ሺን ቃማ ሃሙቲያ ኦኒካ ፖዖይ ባይና ጊሾ ꬉቤቴስ» ያጊስ።
JOH 11:11 ዬሱሲ ሄሳ ጊዳፔ ጉዬ ኤንታኮ፥ «ኑ ዶሲያ ኣላዛሪ ꬊስኪስ፥ ሺን ኢያ ዴንꬃናው ታኒ ባና» ያጊስ።
JOH 11:12 ኢያ ታማሬቲ ዛሪዲ፥ «ጎዳው፥ ኢ ꬊስኪዳባ ጊዲኮ ኢያው ሎዓና» ያጊዶሶና።
JOH 11:13 ዬሱሲ ኣላዛሪ ሃይቂዳይሳ ኦዲስ፥ ሺን ኤንታው ጮ ꬊስኮ ዳኒስ።
JOH 11:14 ሄሳ ጊሾ፥ ዬሱሲ ጌሺዲ ኤንታኮ፥ «ኣላዛሪ ሃይቂስ።
JOH 11:15 ሂንቴ ኣማናና ሜላ ታኒ ሄ ቤሳን ዴዖናይሳስ ሂንቴ ጊሾ ኡፋይታይስ። ኣኔ ዬꬊቴ፤ ኢያኮ ቦስ» ያጊስ።
JOH 11:16 ሄሳፌ ጉዬ፥ ዲዲሞሳ ጌቴቲያ ቶማሲ ባ ላጌ ታማሬታኮ፥ «ኣስታማሪያራ ሃይቃናው ኑካ ቦስ» ያጊስ።
JOH 11:17 ዬሱሲ ጋኪያ ዎዴ ኣላዛሪ ሞጌቲን ኦይዱ ጋላስ ጊዲስ።
JOH 11:18 ቢታኔይ ዬሩሳላሜፔ ሄꬑ ኪሎ ሚቲሬ ሜላ ሃኬስ።
JOH 11:19 ዳሮ ኣይሁዴቲ ማርታኔ ማይራሞ ኤንታ ኢሻይ ሃይቂዳይሳስ ሚንꬄꬃናው ዪዶሶና።
JOH 11:20 ማርታ ዬሱሲ ዪዳይሳ ሲዓዳ ኢያ ሞካናው ኬያሱ፥ ሺን ማይራማ ሶን ኣታሱ።
JOH 11:21 ማርታ ዬሱሳኮ፥ «ጎዳው፥ ኔኒ ሃይሳን ዴዒዳባ ጊዲያኮ ታ ኢሻይ ሃይቄና።
JOH 11:22 ሺን ሃዒ ጊዲኮካ ኔኒ ዎሲያባ ፆሳይ ኔው ኢማናይሳ ታኒ ኤራይስ» ያጋሱ።
JOH 11:23 ዬሱሲ፥ «ኔ ኢሻይ ሃይቆፔ ዴንዳና» ያጊስ።
JOH 11:24 ማርታ ኢያኮ፥ «ዉርሴꬃ ጋላስ ኢ ሃይቆፔ ዴንዳናይሳ ኤራይስ» ያጋሱ።
JOH 11:25 ዬሱሲ ኢኮ፥ «ታኒ ዴንዶኔ ዴዖ፤ ታና ኣማኒያ ኦኒካ ሃይቂኮካ ዴዖን ዳና።
JOH 11:26 ቃሲ ዴዖን ዴዔይኔ ታና ኣማኒያ ኦኒካ ሃይቄና። ሄሳ ኔኒ ኣማናይ?» ያጊስ።
JOH 11:27 ማርታ ዛራዳ፥ «ጎዳው፥ ኤ ታኒ ኣማናይስ! ኔኒ ፆሳ ናዓ፥ ኣላሚያ ያናው ዴዒያ ኪሪስቶሳ ጊዴይሳ ታኒ ኣማናይስ» ያጋሱ።
JOH 11:28 ማርታ ሄሳ ጊዳፔ ጉዬ፥ ባዳ ባ ሚቺው ጌማን ፄጋዳ፥ «ኣስታማሬይ ዪዲ ኔና ኮዬስ» ያጋሱ።
JOH 11:29 ማይራማ ሄሳ ሲዒዳ ዎዴ ኤሌሳ ዴንዳ ኤቃዳ ዬሱሳኮ ባሱ።
JOH 11:30 ሄ ዎዴ ዬሱሲ ማርታራ ጋሄቲዳ ቤሳን ዴዔስ፤ ቡሮ ጉታ ጋኪቤና።
JOH 11:31 ማይራሞ ሚንꬄꬂሼ ኢራ ሶን ዴዒያ ኣይሁዴቲ፥ ኢያ ዴንዳ ኤቃዳ ኤሌሳዳ ካሬ ኬዪዳይሳ ቤዒዲ፥ ዱፎ ባዳ ዬካናው ሃኒያ ዳኒን ኢዮ ካሊዲ ኬዪዶሶና።
JOH 11:32 ማይራማ ዬሱሲ ዴዒያሱዋ ባዳ ኢያ ቤዒዳ ዎዴ ኢያ ቶሁዋ ቦላ ኩንዳዳ፥ «ጎዳው፥ ኔኒ ሃይሳን ዴዒዳባ ጊዲያኮ ታ ኢሻይ ሃይቄናሺን» ያጋሱ።
JOH 11:33 ዬሱሲ ማይራማኔ ኢራ ዴዒያ፥ ኣይሁዴቲ ዬኬይሳ ቤዒዲ፥ ባ ዎዛናን ዳሮ ሴሌቲዲ፥
JOH 11:34 «ኣዉን ሞጊዴቲ?» ያጊዲ ኦይቺን፥ «ጎዳው፥ ያዳ ቤዓ» ያጊዲ ዛሪዶሶና።
JOH 11:35 ዬሱሲ ኣፉፂስ።
JOH 11:36 ሄሳ ጊሾ፥ ኣይሁዴቲ፥ «ኢ ኣላዛራ ኣይ ሜላ ዶሲያኮ ቤዒቴ» ያጊዶሶና።
JOH 11:37 ሺን ኤንታፌ ኢሶቲ ኢሶቲ፥ «ሃይሲ ቆቂያ ፄሊሲዳይሲ ሃ ኣዴይ ሃይቆና ሜላ ኦꬃናው ዳንዳዔኔሺን?» ያጊዶሶና።
JOH 11:38 ቃሲካ ዬሱሲ ሴሌቲዲ፥ ኣላዛሪ ሞጌቲዳ ዱፉዋ ቢስ። ሄ ዱፎይ ሹቻን ጎርዴቲዳ ጎንጎሎ።
JOH 11:39 ዬሱሲ፥ «ሹቻ ዴንꬂቴ» ያጊዲ ኪቲስ። ማርታ፥ «ጎዳው፥ ኢ ሃይቆሳፔ ኦይዱ ጋላስ ጊዲዳ ጊሾ ሃዒ ፂንቃና» ያጋሱ።
JOH 11:40 ዬሱሲ ማርታኮ፥ «ኔ ኣማኒያባ ጊዲኮ ፆሳ ቦንቹዋ ቤዓናይሳ ታኒ ኔው ኦዳቢኪና?» ያጊስ።
JOH 11:41 ኤንቲ ሹቻ ዴንꬂን ዬሱሲ ሳሎ ፑዴ ፄሊዲ፥ «ኣዋው፥ ታና ኔ ሲዒዳ ጊሾ ኔና ጋላታይስ።
JOH 11:42 ኔ ኡባ ዎዴ ታና ሲዔይሳ ታኒ ኤራይስ። ሺን ሃይሳን ኤቂዳ ኣሳይ ኔኒ ታና ኪቲዳይሳ ኣማናና ሜላ ታኒ ኤንታ ጊሾ ሃይሳ ጋይስ» ያጊስ።
JOH 11:43 ዬሱሲ ሄሳ ጊዳፔ ጉዬ፥ ባ ቃላ ꬎቁ ኦꬂዲ፥ «ኣላዛራ፥ ሃ ኬያ!» ያጊስ።
JOH 11:44 ሃይቂዳ ኣዴይ ዚꬌቲዳ ሜላ ኩሼይኔ ቶሆይ ሻሎን ቃሼቲዲ ዴዒሺን ኢያ ኣይፌ ካሬይ ጎዜቲዳ ሜላ ዱፉዋፔ ኬዪስ። ዬሱሲ ኤንታ፥ «ቢርሺቴ! ቦ ጊቴ!» ያጊስ።
JOH 11:45 ሄሳ ጊሾ፥ ማይራሚኮ ዪዳ ኣይሁዴታፔ ዳሮቲ ዬሱሲ ኦꬂዳይሳ ቤዒዲ ኢያ ኣማኒዶሶና።
JOH 11:46 ሺን ኤንታፌ ኢሶቲ ኢሶቲ ፋሪሳዌታኮ ቢዲ ዬሱሲ ኦꬂዳይሳ ኤንታው ኦዲዶሶና።
JOH 11:47 ሄሳፌ ጉዬ፥ ካሂኔ ሃላቃቲኔ ፋሪሳዌቲ ሻንጉዋ ሺሺዲ፥ «ሃ ኣዴይ ዳሮ ማላታታ ኦꬂያ ጊሾ ኑ ኣይ ኦꬂኖ?
JOH 11:48 ኑኒ ኢያ ሲዒ ጊዲ ኣጊኮ ኣሳ ኡባይ ኢያ ኣማናና። ቃሲ ሮሜ ቢታ ኣሳቲ ዪዲ ኑ ፆሳ ኬꬃኔ ኑ ዴሪያ ꬋይሳና» ያጊዶሶና።
JOH 11:49 ኤንታፌ ኢሶይ ቃያፋ ጌይሲ፥ ሄ ላይꬂ ካሂኔ ሃላቃ ጊዲዳይሲ፥ «ሂንቴ ኣይኮካ ኤሬኬታ!
JOH 11:50 ኣሳይ ኡባይ ꬋዬይሳፌ ኣሳ ኡባ ጊሾ ኢሲ ኣሲ ሃይቄይሲ ሎዖ ጊዴይሳ ኤሬኬቲ?» ያጊስ።
JOH 11:51 ኢ ሄሳ ባፔ ጊቤና። ሺን ሄ ላይꬂ ካሂኔ ሃላቃ ጊዲያ ጊሾ ዬሱሲ ኣይሁዴ ኣሳ ጊሾ ሃይቃናው ቤሴይሳ ቲንቢቴ ኦዲስ።
JOH 11:52 ቃሲ ዬሱሲ ኣይሁዴ ኣሳ ፃላላስ ጊዶናሺን ላሌቲዲ ዴዒያ ፆሳ ኣሳ ኡባ ኢሲፌ ሺሻናዉኔ ኢሲ ኣሲ ኦꬃናው ሃይቃና።
JOH 11:53 ሄ ጋላሳፔ ዶሚዲ ኤንቲ ኢያ ዎꬋናው ማቄቲዶሶና።
JOH 11:54 ሄሳ ጊሾ፥ ዬሱሲ ኣይሁዴታ ጊዶን ቆንጬን ሲሜሬቲቤና። ሺን ባዞ ቢታ ማታን ዴዒያ ኤፍሬሜ ጉታ ቢስ። ባ ታማሬታራ ሄ ቤሳን ጋምዒስ።
JOH 11:55 ኣይሁዴቲ ቦንቺያ ፓሲካ ጋላሳይ ማቲስ። ቃሲ ዳሮ ኣሳይ ባንታና ጌሻናው ፓሲካ ቦንቺያ ጋላሳይ ጋካናፔ ሲንꬄ ሄ ቢታፌ ዬሩሳላሜ ቢዶሶና።
JOH 11:56 ኤንቲ ፆሳ ኬꬃን ኤቂዲ ዬሱሳ ዩሳ ናጊያ ጊሾ «ኣይ ቆፔቲ? ዬሱሲ ባሊያ ቦንቻናው ዬኔ?» ያጊዲ ኢሶይ ኢሱዋ ኦይቺዶሶና።
JOH 11:57 ካሂኔ ሃላቃቲኔ ፋሪሳዌቲ ዬሱሳ ኦይካናው፥ ኢ ዴዒያሱዋ ኤሪያ ኦኒካ ባንታው ኦዳና ሜላ ኪቲዶሶና።
JOH 12:1 ፓሲካ ቦንቺያ ጋላሳፔ ኡሱፑን ጋላስ ሲንꬃቲዲ፥ ዬሱሲ ሃይቆፔ ዴንꬂዳ ኣላዛሪ ዴዒያ ጉታ፥ ቢታኒያ ቢስ።
JOH 12:2 ሄ ቤሳን ኤንቲ ኢያው ካሆ ጊጊሲዶሶና። ኣላዛሪ ዬሱሳራ ኢሲፌ ጋይታ ቦላ ኡቲዳሺን ማርታ ኤንታና ሞካዉሱ።
JOH 12:3 ማይራማ ናርዶሴ ጊያ ዳሮ ኣልዖ ጌሻ ሺቶ ኤሃዳ ዬሱሳ ቶሁዋ ቲያሱ። ባ ቢናናን ኢያ ቶሁዋ ቁቻሱ፤ ኬꬃ ኡባይ ሺቶ ሳዎን ቶንጉ ጊስ።
JOH 12:4 ሺን ዬሱሳ ታማሬታፔ ኢሶይ፥ ዬሱሳ ኣꬂ ኢማናይሲ፥ ኣስቆሮታ ዪሁዲ፥
JOH 12:5 «ኣይስ ሃ ሺቶይ ሄꬑ ፄቱ ዲናሬን ባይዜቲዲ፥ ሚሼይ ማንቆታስ ኢሜቴኔ?» ያጊስ።
JOH 12:6 ኢ ካይሶ ጊዲዳ ጊሾ ሄሳ ጊሲፔ ኣቲን ማንቆታስ ቃꬌቲዲ ጊቤና። ኢ ሚሼ ካርፂታ ኦይኬይሳ ጊዲያ ጊሾ ኡባ ዎዴ ኢያፔ ባው ኤኬስ።
JOH 12:7 ዬሱሲ፥ «ኢያ ባው ዴዒያባ ታ ሞጎ ጋላሳስ ሚንጂዳ ጊሾ ኢዮ ኣጋጊቴ።
JOH 12:8 ማንቆቲ ኡባ ዎዴ ሂንቴራ ዳና፥ ሺን ታኒ ኡባ ዎዴ ሂንቴራ ዴዒኬ» ያጊስ።
JOH 12:9 ሄ ዎዴ ዳሮ ኣሳይ ዬሱሲ ቢታኒያን ዴዔይሳ ሲዒዲ ያ ቢዶሶና። ኤንቲ ዬሱሳ ፃላላ ጊዶናሺን ኢ ሃይቆፔ ዴንꬂዳ ኣላዛራካ ቤዓናው ቢዶሶና።
JOH 12:10 ሄሳ ጊሾ፥ ካሂኔ ሃላቃቲ ኣላዛራካ ቃሲ ዎꬋናው ማቄቲዶሶና።
JOH 12:11 ኣይስ ጊኮ፥ ኣላዛራ ጋሶን ዳሮ ኣይሁዴቲ ኤንታና ኢፂዲ ዬሱሳ ኣማኖሶና።
JOH 12:12 ዎንቴꬃ ጋላስ ፓሲካ ቦንቺያ ቤሳ ዪዳ ዳሮ ኣሳይ ዬሱሲ ዬሩሳላሜ ቤይሳ ሲዒዲ፥
JOH 12:13 ዛምባ ሃይꬂ ኤኪዲ ኢያ ሞካናው ኬዪዶሶና። ባንታ ቃላ ꬎቁ ኦꬂዲ፥ «ሆሳና! ፆሳይ ጋላቴቶ! ጎዳ ሱንꬃን ዬይሲ ኣንጄቶ! ፆሳይ ኢስራዔሌ ካዉዋ ኣንጆ!» ያጊዶሶና።
JOH 12:14 ጌሻ ማፃፋን፥ «ፂዮኔ ካታማው፥ ባቦፋ! ሄኮ፥ ኔ ካዎይ ሃሬ ማራ ቦላ ኡቲዲ ዬስ» ጌቴቲዳይሳዳ ዬሱሲ ሃሬ ማሪ ዴሚዲ ኢያ ቶጊስ።
JOH 12:16 ዬሱሳ ታማሬቲ ሄሳ ካሴ ኣኬኪቦኮና። ሺን ዬሱሲ ቦንቼቲዳፔ ጉዬ ኤንቲ ሄሳ ኡባ ኣኬኪዶሶና። ሄሲ ኡባይ ጌሻ ማፃፋይ ጊዳይሳዳ ሃኒስ።
JOH 12:17 ዬሱሲ ኣላዛራ ዱፎፔ ፄጊዲ፥ ሃይቆፔ ዴንꬂዳ ዎዴ ኢያራ ዴዒያ ዳሮ ኣሳይ ዬሱሳባ ማርካቲዶሶና።
JOH 12:18 ዳሮ ኣሳይ ኢያ ሞካናው ኬዪዳይ፥ ኢ ሄ ማላታታ ኦꬂዳይስሳ ሲዒዳ ጊሾሳ።
JOH 12:19 ሄሳ ጊሾ፥ ፋሪሳዌቲ ኢሶይ ኢሱዋኮ፥ «ኑ ኣይኮካ ኦꬃናው ዳንዳዖናይሳ ቤዒቴ፤ ዴሬ ኡባይ ኢያ ካሌስ» ያጊዶሶና።
JOH 12:20 ፓሲካ ቦንቺያ ጋላስ ጎይናናው ዬሩሳላሜ ቢዳይሳታ ጊዶን ኢሲ ኢሲ ጊሪኬ ኣሳቲ ዴዖሶና።
JOH 12:21 ኤንቲ ጋሊላ ቢታን ቤቴሳይዳ ካታማፔ ዪዳ ፊልጶሳኮ ቢዲ፥ «ጎዳው፥ ኑኒ ዬሱሳ ቤዓናው ኮዮስ» ያጊዲ ዎሲዶሶና።
JOH 12:22 ፊልጶሲ ቢዲ ኢንዲሪያሳስ ኦዲን ናምዓይ ቢዲ፥ ዬሱሳስ ኦዲዶሶና።
JOH 12:23 ዬሱሲ ኤንታኮ፥ «ኣሳ ናዓይ፥ ቦንቼቲያ ዎዴይ ጋኪስ።
JOH 12:24 ታኒ ሂንቴው ቱማ ኦዳይስ፤ ኢሲ ጊስቴ ኣይፌይ ቢታን ዎꬊዲ ዎቆና ኢፂኮ ባርካ ኣቴስ። ሺን ሄ ጊስቴ ኣይፌይ ዎቂኮ ዳሮ ኣይፌ ኣይፌስ።
JOH 12:25 ባ ሼምፑዋ ዶሲያ ኦኒካ ꬋይሴስ፤ ባ ሼምፑዋ ሃ ኣላሚያን ኢፂያ ኦኒካ ሜሪና ዴዖስ ኣሼስ።
JOH 12:26 ታኒ ዴዒያሱዋን ታራ ዳና ሜላ ታው ኦꬃናው ኮያ ኦኒካ ታና ካላናው ቤሴስ። ታው ኦꬂያ ኦናካ ታ ኣዋይ ቦንቻና።
JOH 12:27 «ሃዒ ታ ሼምፖይ ዳሮ ኡንዔቲስ፤ ያቲን ዎይጎ? ‹ታ ኣዋው፥ ታና ሃ ሳቴፔ ኣሻርኪ› ያጎ? ኣካይ፥ ታኒ ዪዳይ ዋዬ ኤካናሳ።
JOH 12:28 ታ ኣዋው፥ ኔ ሱንꬃ ቦንቻ» ያጊስ። ሄ ዎዴ ሳሎፔ፥ «ታኒ ታ ሱንꬃ ቦንቻስ፤ ዛራዳካ ቦንቻና» ያጊያ ቃላይ ዪስ።
JOH 12:29 ሄ ቤሳን ኤቂዳ ዳሮ ኣሳይ ሄ ቃላ ሲዒዲ፥ «ሄሲ ዳዳ» ያጊዶሶና። ሃራቲ ቃሲ፥ «ኪታንቾይ ኢያው ኦዲስ» ያጊዶሶና።
JOH 12:30 ዬሱሲ ዛሪዲ ኤንታኮ፥ «ሃ ቃላይ ሂንቴ ጊሾ ዪሲፔ ኣቲን ታ ጊሾ ጊዴና።
JOH 12:31 ሃ ኣላሜይ ፒርዴቲያ ዎዴይ ሃዒ፤ ሃ ኣላሚያ ሃሬይሲ ሃዒ ካሬ ሆሌታና።
JOH 12:32 ቃሲ ታኒ ሳዓፔ ꬎቁ ኦሴቲዳ ዎዴ ኣሳ ኡባ ታኮ ኤሃና» ያጊስ።
JOH 12:33 ኢ ሄሳ ጊዳይ ኣይ ሜላ ሃይቆ ሃይቃኔኮ ኤንታው ቆንጪሳናሳ።
JOH 12:34 ዳሮ ኣሳይ ዛሪዲ፥ «ኑ ሂጌይ ኪሪስቶሲ ሜሪናው ዴዔይሳ ኦዴስ። ያቲን፥ ኔኒ ዎይጋዳ፥ ‹ኣሳ ናዓይ ꬎቁ ጋናው ቤሴስ› ጋይ? ‹ኢ፥ ኣሳ ናዓይ ኦኔ?› » ያጊዶሶና።
JOH 12:35 ዬሱሲ፥ «ፖዖይ ሂንቴራ ጉꬃ ዎዴ ጋምዓና። ሂንቴው ꬉሞና ሜላ ፖዖይ ዴዒሺን፥ ፖዑዋን ሃሙቲቴ። ꬉማን ሃሙቲያ ኣሲ ኣው ቢያኮ ኤሬና።
JOH 12:36 ፖዖ ናይታ ጊዳና ሜላ ፖዖይ ዴዒሺን ፖዑዋ ኣማኒቴ» ያጊስ። ዬሱሲ ሄሳ ኦዲዳፔ ጉዬ ቢዲ ኤንታፌ ጌሚስ።
JOH 12:37 ኢ ሄሳ ሜላ ማላታታ ኤንታ ሲንꬃን ኦꬂንካ ኣማኒቦኮና።
JOH 12:38 ናቢያ ኢሳያሲ፥ «ጎዳው፥ ኑ ማርካቴꬃ ኦኒ ኣማኒዴ? ጎዳይ ባ ዎልቃ ኦዴስ ቆንጪሲዴ?» ጊዳይሲ ቱማ ጊዳና ሜላ ኤንቲ ኢያ ኣማኒቦኮና።
JOH 12:39 ቃሲካ ኢሳያሲ፥ «ኤንታ ኣይፌይ ፄሎና ሜላ፥ ኤንታ ዎዛናይ ኣኬኮና ሜላ፥ ኤንቲ ፆሳኮ ሲሚን፥ ኢ ኤንታ ፓꬆና ሜላ፥ ፆሳይ ኤንታ ኣይፊያ ቆቂሲስ። ኤንታ ዎዛና ሚንꬂስ» ጊዳ ጊሾ ኤንቲ ኣማናናው ዳንዳዒቦኮና።
JOH 12:41 ኢሳያሲ ሄሳ ጊዳይ፥ ዬሱሳ ቦንቹዋ ቤዒዳ ጊሾኔ ኢያባ ኦዲዳ ጊሾሳ።
JOH 12:42 ጊዲኮካ፥ ኣይሁዴታ ሃላቃታፔካ ዳሮቲ ዬሱሳ ኣማኒዶሶና። ሺን ፋሪሳዌቲ ባንታና ኣይሁዴታ ዎሳ ኬꬃፌ ኬሶሶና ጊዲ ያዪዳ ጊሾ ኣማኒዳ ጊዲ ቆንጬን ማርካቲቦኮና።
JOH 12:43 ሄሳ ኤንቲ ኦꬂዳይ፥ ፆሳን ኤሬታናይሳፌ ኣꬂዲ ኣሳን ኤሬታናይሳ ዶሲዳ ጊሾሳ።
JOH 12:44 ዬሱሲ ባ ቃላ ꬎቁ ኦꬂዲ፥ «ታና ኣማኒያ ኦኒካ ታና ኪቲዳይሳካ ኣማኔስፔ ኣቲን ታ ፃላላ ኣማኔና።
JOH 12:45 ታና ቤዒያ ኦኒካ ታና ኪቲዳይሳካ ቤዔስ።
JOH 12:46 ታና ኣማኒያ ኡባይ ꬉማን ዶና ሜላ ታኒ ፖዖ ጊዳዳ ኣላሚያ ያስ።
JOH 12:47 ታ ቃላ ሲዒዲ ኪቴቶና ኦናካ ታኒ ፒርዲኬ። ኣይስ ጊኮ፥ ታኒ ኣላሚያ ኣሻናው ያሲፔ ኣቲን ፒርዳናው ያቢኬ።
JOH 12:48 ታና ኢፄይሳኔ ታ ቃላ ኤኮና ኦናካ ፒርዴይሲ ዴዔስ። ታኒ ኦዲዳ ቃላይ ዉርሴꬃ ጋላስ ሄ ኡራ ፒርዳና።
JOH 12:49 ኣይስ ጊኮ፥ ታኒ ሄሳ ታፔ ኦዲኬ፥ ሺን ታና ኪቲዳ ታ ኣዋይ ታኒ ጋናይሳኔ ኦዳናይሳ ኪቲስ።
JOH 12:50 ቃሲ ኢያ ኪታይ ሜሪና ዴዖ ጊዴይሳ ታኒ ኤራይስ። ሄሳ ጊሾ፥ ታኒ ኦዴይሲ ታ ኣዋይ ታና ኦዳ ጊዳይሳ» ያጊስ።
JOH 13:1 ፓሲካ ቦንቺያ ጋላሳይ ጋካናፔ ሲንꬃቲዲ ሃ ኣላሚያ ኣጊዲ ኣዋኮ ቢያ ዎዴይ ጋኪዳይሳ ዬሱሲ ኤሪስ። ሃ ኣላሚያን ዴዒያ ባይሳታ ኡባ ዎዴ ዶሲስ፤ ዉርሴꬂ ጋካናዉካ ኤንታ ዶሲስ።
JOH 13:2 ዬሱሳራኔ ኢያ ታማሬታራ ኢሲፌ ካሆ ሞሶና። ሄሳፌ ካሴ ፃላሄይ ሲሞና ናዓ ኣስቆሮታ ዪሁዲ ዬሱሳ ኣꬂ ኢማናዳ ኢያ ዎዛናን ኢታ ቆፋ ዎꬂስ።
JOH 13:3 ዬሱሲ ኣዋይ ኡባባ ኢያ ኩሼን ዎꬂዳይሳ፥ ኢ ፆሳ ማታፔ ዪዳይሳኔ ሲሚዲ ኢያኮ ባናይሳ ኤሪስ።
JOH 13:4 ዬሱሲ ጋይታ ቦላፌ ዴንዲዲ ቦላ ባጋ ማዑዋ ቃሪ ዎꬂዲ፥ ፖፃ ኤኪዲ ባ ፄሳን ማርፃፊስ።
JOH 13:5 ሄሳፌ ጉዬ፥ ሃꬄ ሜቻ ሚሼን ቲጊዲ፥ ባ ታማሬታ ቶሁዋ ሜጪስ፤ ቃሲ ባ ፄሳን ዳንጪዳ ፖፃን ቁቺስ።
JOH 13:6 ዬሱሲ ሲሞን ጴፂሮሳኮ ያ ዎዴ ጴፂሮሲ፥ «ጎዳው፥ ኔ ታ ቶሁዋ ሜጫኔ?» ያጊስ።
JOH 13:7 ዬሱሲ ዛሪዲ ኢያኮ፥ «ታኒ ኦꬄይሳ ኔ ሃዒ ኤራካ፥ ሺን ጉዬፔ ኣኬካና» ያጊስ።
JOH 13:8 ያቲን፥ ጴፂሮሲ፥ «ኔ ታ ቶሁዋ ኡባራካ ሜጫካ» ያጊስ። ዬሱሲ ኢያኮ፥ «ታኒ ኔ ቶሁዋ ሜጮና ኢፂኮ ኔዉኔ ታው ኢሲፌቴꬂ ባዋ» ያጊስ።
JOH 13:9 ጴፂሮሲ ዬሱሳኮ፥ «ጎዳው፥ ያቲኮ፥ ታ ቶሁዋ ፃላላ ጊዶናሺን ታ ኩሺያኔ ታ ሁዒያ ሜጫ» ያጊስ።
JOH 13:10 ዬሱሲ ዛሪዲ፥ «ቦላ ሜጬቲዳ ኦኒካ ቶሆፔ ሃራባ ሜጬታናው ኮሼና፤ ኢያው ኡባሶይ ጌሺ። ሂንቴ ጌሺ፥ ሺን ኡባይ ጌሺ ጊዴኬታ» ያጊስ።
JOH 13:11 ዬሱሲ ባና ኣꬂ ኢማና ኡራይ ኦኔኮ ኤሪያ ጊሾ «ሂንቴ ኡባይ ጌሺ ጊዴኬታ» ያጊስ።
JOH 13:12 ኤንታ ቶሁዋ ሜጪዳፔ ጉዬ ዬሱሲ ባ ማዑዋ ዛሪ ማዒስ። ሲሚ ጋይታ ቦላ ኡቲዲ ኤንታኮ፥ «ታኒ ሂንቴው ኦꬂዳይሳ ኣኬኬቲ?
JOH 13:13 ሂንቴ ታና ኣስታማሬኔ ጎዳ ጌታ፤ ታኒ ሂንቴ ጌይሳ ጊዲያ ጊሾ ሎዖ ጊዴታ።
JOH 13:14 ታኒ ሂንቴው ጎዳኔ ኣስታማሬ ጊዳሼ ሂንቴ ቶሁዋ ሜጪኮ ሂንቴካ ኢሶይ ኢሱዋስ ሄሳዳ ኦꬃናው ቤሴስ።
JOH 13:15 ሂዛ፥ ታኒ ሂንቴው ኦꬂዳይሳዳ ሂንቴካ ኦꬃና ሜላ ሂንቴው ሌሚሶ ጊዳስ።
JOH 13:16 ታኒ ሂንቴው ቱማ ኦዳይስ፤ ኣይሌይ ባ ጎዳፔ፥ ኪቴቲዳይሲ ኪቲዳይሳፌ ኣꬌና።
JOH 13:17 ሂንቴ ሄሳ ኤሪዲ ኦꬂያባ ጊዲኮ ኣንጄቲዳይሳታ።
JOH 13:18 «ታኒ ሂንቴና ኡባ ጊኬ፤ ታኒ ዶሪዳይሳታ ኤራይስ። ሺን ጌሻ ማፃፋን፥ ‹ታ ባርሲዳይሲ ታ ኩሺያ ሳፂስ› ጌቴቲዳይሲ ቱማ ጊዳናው ቤሴስ።
JOH 13:19 ታኒ ታና ጊዴይሳ ሂንቴ ኣማናና ሜላ ሄሲ ሃናናፔ ሲንꬃታዳ ሂንቴው ኦዳይስ።
JOH 13:20 ታኒ ሂንቴው ቱማ ኦዳይስ፤ ታኒ ኪቲዳ ኦናካ ሞኪያ ኡራይ ታና ሞኬስ። ታና ሞኪያ ኦኒካ ታና ኪቲዳይሳ ሞኬስ» ያጊስ።
JOH 13:21 ዬሱሲ ሄሳ ኦዲዳፔ ጉዬ ባ ዎዛናን ዳሮ ኡንዔቲዲ፥ «ታኒ ሂንቴው ቱማ ኦዳይስ፤ ታና ሂንቴፌ ኢሶይ ኣꬂ ኢማና» ጊዲ ቆንጪሲዲ ኦዲስ።
JOH 13:22 ኢ ኦዴባ ኦዲያኮ ኢያ ታማሬታስ ኤሬቶና ኢፂን ኢሶይ ኢሱዋ ፄሊዶሶና።
JOH 13:23 ኢያ ታማሬታፔ ኢሶይ፥ ዬሱሲ ዶሴይሲ፥ ዬሱሳ ማታን ኡቲስ።
JOH 13:24 ሄሳ ጊሾ፥ ሲሞን ጴፂሮሲ ኢያ ቃምዖቲዲ፥ «ኢ ኦና ጊያኮ ኣኔ ኦይቻ» ያጊስ።
JOH 13:25 ሄሳ ጊሾ፥ ሄ ታማሬይ ዬሱሳኮ ሺቂዲ ሃይꬃን፥ «ጎዳው፥ ኢ ኦኔ?» ያጊስ።
JOH 13:26 ዬሱሲ ዛሪዲ፥ «ታኒ ኡይꬃ ዎፄን ቱሻዳ ባርሴይሳ» ያጊስ። ቃሲ ኡይꬃ ሜንꬂ ኤኪዲ፥ ዎፄን ቱሺዲ፥ ሲሞና ናዓ ኣስቆሮታ ዪሁዳ ባርሲስ።
JOH 13:27 ዪሁዲ ኡይꬃ ባሪዳፔ ጉዬ ፃላሄይ ሶሁዋራ ዪሁዳን ጌሊስ። ዬሱሲ ኢያኮ፥ «ኔኒ ኦꬃናው ቆፒዳባ ኤሌሳዳ ኦꬃ» ያጊስ።
JOH 13:28 ሺን ጋይታ ቦላ ኡቲዳይሳታፔ ኦኒካ ዬሱሲ ሄሳ ኣይስ ኢያኮ ጊዳኮ ኤሪቤና።
JOH 13:29 ዪሁዲ ሚሼ ኦይኪያ ጊሾ ኢያ ታማሬታፔ ኢሶቲ ኢሶቲ ዬሱሲ ኢያ፥ «ፓሲካ ቦንቺያ ጋላሳስ ባንታው ኮሺያባ ሻማ ዎይኮ ማንቆታስ ሙፃታ ኢማ ጊስ» ያጊዲ ቆፒዶሶና።
JOH 13:30 ዪሁዲ ኡይꬃ ባሪዳ ሜላ ሶሁዋራ ካሬ ኬዪስ። ሄ ዎዴ ሳዒ ቃማ።
JOH 13:31 ዪሁዲ ካሬ ኬዪዳፔ ጉዬ፥ ዬሱሲ፥ «ሃዒ ኣሳ ናዓይ ቦንቼቲስ፤ ፆሳይካ ኢያ ባጋራ ቦንቼቲስ።
JOH 13:32 ፆሳይ ኢያ ባጋራ ቦንቼቲኮ ኢ ባ ሁዔን ኣሳ ናዓ ቦንቻና፤ ቃሲ ኢ ሄሳ ኤሌሲዲ ኦꬃና።
JOH 13:33 ታ ናይቶ፥ ታኒ ሂንቴራ ዳሮ ዎዴ ጋምዒኬ። ሂንቴ ታና ኮያና፥ ሺን ታኒ ኣይሁዴታስ ኦዲዳይሳ ሜላ፥ ‹ሂንቴ ታኒ ቢያሱዋ ባናው ዳንዳዔኬታ።›
JOH 13:34 ታኒ ሂንቴው ኢሚያ ኦራꬃ ኪታይ ሃይሳ፤ ኢሶይ ኢሱዋ ዶሲቴ። ታኒ ሂንቴና ዶሲዳይሳዳ ሂንቴ ኢሶይ ኢሱዋ ዶሳናው ቤሴስ።
JOH 13:35 ሂንቴ ኢሶይ ኢሱዋራ ዶሴቲኮ ሂንቴ ታ ታማሬ ጊዴይሳ ኣሳ ኡባይ ኤራና» ያጊስ።
JOH 13:36 ሲሞን ጴፂሮሲ ዬሱሳኮ፥ «ጎዳው፥ ኔኒ ኣው ባይ?» ያጊስ። ዬሱሲ ዛሪዲ፥ «ታኒ ቢያሱዋ ኔኒ ሃዒ ካላናው ዳንዳዓካ፥ ሺን ጉዬፔ ታና ካላና» ያጊስ።
JOH 13:37 ጴፂሮሲ፥ «ጎዳው፥ ታኒ ኔና ሃዒ ካላናው ኣይስ ዳንዳዒኪና? ታኒ ኔ ጊሾ ሃይቃናዉካ ጊጋ ኡታስ» ያጊስ።
JOH 13:38 ዬሱሲ ዛሪዲ፥ «ታ ጊሾ ሃይቃናው ቱማ ጊጋ ኡታዲ? ታኒ ኔው ቱማ ኦዳይስ፤ ኩቶይ ዋሳናፔ ሲንꬄ ኔኒ ታና ሄꬑ ቶሆ ካዳና» ያጊስ።
JOH 14:1 ዬሱሲ ባ ታማሬታኮ፥ «ሂንቴ ዎዛናይ ኡንዔቶፎ፥ ፆሳ ኣማኒቴ፥ ታናካ ኣማኒቴ።
JOH 14:2 ታ ኣዋ ኬꬃን ዳሮ ቤሲ ዴዔስ። ታኒ ሂንቴው ቤሴ ጊጊሳናው ባይስ። ሄሳ ጊዶናኮ ታኒ ሂንቴው ኦዲኬሺን።
JOH 14:3 ታኒ ባዳ ቤሴ ጊጊሲዳፔ ጉዬ ታኒ ዴዒያሱዋን ሂንቴ ዳና ሜላ ሲማ ያዳ ሂንቴና ታኮ ኤፋና።
JOH 14:4 ሂንቴ ታኒ ቢያሱዋ ኤፊያ ኦጊያ ኤሬታ» ያጊስ።
JOH 14:5 ያቲን፥ ቶማሲ፥ «ጎዳው፥ ኔኒ ቢያሱዋ ኑኒ ኤሮኮ፤ ኦጊያ ዋቲዲ ኤራናው ዳንዳዓኔ?» ያጊስ።
JOH 14:6 ዬሱሲ ዛሪዲ፥ «ኦጌይ፥ ቱማይኔ ዴዖይ ታና። ታ ባጋራ ጊዶና ኢፂኮ ኦኒካ ታ ኣዋኮ ባናው ዳንዳዔና።
JOH 14:7 ሂንቴ ታና ኤሪያባ ጊዲያኮ፥ ታ ኣዋካ ኤራና። ሺን ሂዛፔ ዶሚዲ ሂንቴ ኢያ ኤሬታኔ ኢያ ቤዒዴታ» ያጊስ።
JOH 14:8 ፊልጶሲ ዬሱሳኮ፥ «ጎዳው፥ ኣዋ ኑና ቤሳ፤ ሄሲ ኑስ ጊዳና» ያጊስ።
JOH 14:9 ዬሱሲ ዛሪዲ፥ «ታኒ ሃይሳ ሜላ ዎዴ ሂንቴራ ዴዒንካ ታና ኤሪኪ? ታና ቤዒዳ ኡራይ ኣዋካ ቤዒስ። ያቲን፥ ኔኒ ዎይጋዳ፥ ‹ኣዋ ኑና ቤሳ› ጋይ?
JOH 14:10 ታኒ ኣዋራ ኢሲኖ ጊዴይሳኔ ኣዋይካ ታራ ኢሲኖ ጊዴይሳ ኔኒ ኣማኒኪዬ? ታኒ ሂንቴው ኦዲያ ቃላ ታኒ ታፔ ኦዲኬ፥ ሺን ታናን ዴዒያ ኣዋይ ባ ኦሱዋ ኦꬄስ።
JOH 14:11 ታኒ ኣዋን ዴዔይሳኔ ኣዋይካ ታናን ዴዔይሳ ኣማኒቴ። ሄሳ ኣማኖና ኢፂኮ ታ ኦꬂያባታን ታና ኣማኒቴ።
JOH 14:12 «ታኒ ሂንቴው ቱማ ኦዳይስ፤ ታና ኣማኒያ ኡራይ ታኒ ኦꬂያ ኦሱዋፔ ኣꬊያ ኦሶ ኦꬃና። ታኒ ኣዋኮ ቢያ ጊሾ ታና ኣማኒያ ኦኒካ ሃይሳፌ ኣꬊያ ኦሶ ኦꬃና።
JOH 14:13 ኣዋይ ናዓ ባጋራ ቦንቼታና ሜላ ታ ሱንꬃን ሂንቴ ዎሲያ ኡባ ታ ሂንቴው ኦꬃና።
JOH 14:14 ታ ሱንꬃን ኣይቢባካ ሂንቴ ኦይቺኮ ታ ሂንቴው ኦꬃና።
JOH 14:15 «ሂንቴ ታና ዶሲኮ ታ ኪታ ናጋና።
JOH 14:16 ታኒ ኣዋ ዎሳና፤ ሂንቴራ ሜሪናው ዳና ሜላ ሚንꬄꬄይሳ ሂንቴው ኢማና።
JOH 14:17 ሄ ኣያናይ ፆሳ ቱማ ቆንጪሴስ። ሃ ኣላሚያ ኣሳይ ኢያ ቤዖና ጊሾኔ ኤሮና ጊሾ ኢያ ኤካናው ዳንዳዖኮና። ሺን ኢ ሂንቴራ ዴዒያ ጊሾኔ ሂንቴ ጊዶን ዳና ጊሾ ሂንቴ ኢያ ኤሬታ።
JOH 14:18 «ታኒ ሂንቴና ኣያ ኣዉ ባይና ናዓዳ ሂንቴ ፃላላ ኣጊኬ፤ ሲማዳ ሂንቴኮ ያና።
JOH 14:19 ጉꬃ ዎዴፔ ጉዬ ኣላሜይ ታና ዛሪ ቤዔና፥ ሺን ሂንቴ ቤዓና። ታኒ ዴዖን ዴዒያ ጊሾ ሂንቴካ ዴዖን ዴዓና።
JOH 14:20 ታኒ ታ ኣዋን፥ ሂንቴ ታናን፥ ቃሲ ታኒ ሂንቴናን ዴዔይሳ ሂንቴ ሄ ጋላስ ኤራና።
JOH 14:21 «ታ ኪታ ኤኪዲ ናጌይ ታና ዶሴስ። ታና ዶሴይሳ ታ ኣዋይካ ዶሴስ፤ ታኒካ ኢያ ዶሳይስ፤ ታኒ ኢያው ቆንጫና» ያጊስ።
JOH 14:22 ኣስቆሮታ ዪሁዳ ጊዶና ዪሁዲ ዬሱሳኮ፥ «ጎዳው፥ ኔኒ ዋታዳ ኣላሚያስ ጊዶናሺን ኑስ ኔና ቆንጪሳኔ?» ያጊስ።
JOH 14:23 ዬሱሲ ዛሪዲ፥ «ታና ዶሲያ ኦኒካ ታ ቃላስ ኪቴታና። ታ ኣዋይ ኢያ ዶሳና። ቃሲ ታ ኣዋይኔ ታኒ ኢያኮ ዪዲ ኢያራ ዳና።
JOH 14:24 ታና ዶሶና ኦኒካ ታ ቃላስ ኪቴቴና። ሂንቴ ሲዒያ ቃላይ ታና ኪቲዳ ኣዋባፔ ኣቲን ታባ ጊዴና።
JOH 14:25 «ታኒ ሂንቴራ ሃዒ ዴዓሼ ሄሳ ሂንቴው ኦዳስ።
JOH 14:26 ሺን ኣዋይ ታ ሱንꬃን ኪታና ሚንꬄꬂያ ጌሻ ኣያናይ፥ ሂንቴና ኡባባ ታማርሳና። ታኒ ሂንቴው ኦዲዳ ኡባ ኢ ሂንቴና ሃሳዪሳና።
JOH 14:27 «ሳሮቴꬂ ሂንቴው ኢማና። ታኒ ታ ሳሮቴꬃ ሂንቴው ኢማና። ታ ኢሚያ ሳሮቴꬃይ ኣላሜይ ኢሚያ ሳሮቴꬃ ሜላ ጊዴና። ሄሳ ጊሾ፥ ኡንዔቶፊቴ፥ ያዮፊቴ።
JOH 14:28 ‹ታኒ ባና፥ ሺን ሲማዳ ሂንቴኮ ያና› ጊዳይሳ ሲዒዴታ። ሂንቴ ታና ቱማ ዶሲያባ ጊዲያኮ ታ ኣዋይ ታፔ ኣꬊያ ጊሾ ታኒ ኢያኮ ቤይሳን ሂንቴ ኡፋይታና።
JOH 14:29 ሄሲ ሃኒያ ዎዴ ሂንቴ ኣማናና ሜላ ሄሲ ሃኖና ዴዒሺን ሲንꬃታዳ ታኒ ሂንቴው ኦዳስ።
JOH 14:30 «ሃ ኣላሚያ ሃሬይሲ ያ ጊሾ ሂዛፔ ጉዬ ሂንቴራ ዳሮ ኦዴቲኬ። ታና ኢ ኣይኮካ ኦꬃናው ዳንዳዔና።
JOH 14:31 ሺን ታኒ ኣዋ ዶሴይሳ ኣላሜይ ኤራና ሜላ ታ ኣዋይ ታና ኪቲዳይሳ ኡባ ኦꬃይስ። ዴንዲቴ፤ ሃይሳፌ ቦስ።
JOH 15:1 «ታኒ ዎይኒያ ቱማ ኡባ። ጎሻንቾይ ታ ኣዋ።
JOH 15:2 ታ ቦላ ዴዒያ ኣይፌ ኣይፎና ታሺያ ኡባ ኢ ካሬስ። ኣይፊያ ታሺያ ካሴይሳፌ ኣꬊ ኣይፋና ሜላ ሄ ታሺያ ኢ ጊጊሳና።
JOH 15:3 ታኒ ሂንቴው ኦዲዳ ቃላ ጊሾ ሂንቴ ጌሺ።
JOH 15:4 ታናን ዴዒቴ፤ ታኒካ ሂንቴናን ዴዓና። ዎይኒያ ታሼይ ኡባራ ዴዖና ኢፂኮ ሄ ታሼይ ባርካ ኣይፌ ኣይፋናው ዳንዳዔና። ሄሳዳካ፥ ሂንቴካ ታናን ዴዖና ኢፂኮ ኣይፌ ኣይፋናው ዳንዳዔኬታ።
JOH 15:5 «ታኒ ዎይኒያ ኡባ፤ ሂንቴ ታሼታ። ታናን ዴዔይሲኔ ታኒ ኢያን ዴዔይሲ፥ ኢ ዳሮ ኣይፌ ኣይፋና። ታ ባይና ሂንቴ ፃላላ ኣይኮካ ኦꬃናው ዳንዳዔኬታ።
JOH 15:6 ታናን ዶና ኡራይ ታሼዳ ካሬን ዬጊቲዲ ሜላና። ሄሳ ሜላ ታሼቲ ሺቂዲ ታማን ዬጌታና፥ ፁጌታና።
JOH 15:7 ሂንቴ ታናን ዴዒኮ፥ ታ ቃላይካ ሂንቴናን ዴዒኮ፥ ሂንቴ ኮያባይ ኣይባ ጊዲኮካ ዎሲቴ፤ ሂንቴ ኤካና።
JOH 15:8 ሂንቴ ዳሮ ኣይፌ ኣይፊያ ታ ታማሬ ጊዲኮ፥ ሄሳን ታ ኣዋይ ቦንቼታና።
JOH 15:9 ኣዋይ ታና ዶሴይሳዳ ታኒካ ሂንቴና ዶሳይስ፤ ታ ሲቁዋን ዴዒቴ።
JOH 15:10 ታኒ ታ ኣዋ ኪታ ናጋዳ ኢያ ሲቁዋን ዴዒዳይሳዳ ሂንቴካ ታ ኪታ ናጊኮ ታ ሲቁዋን ዳና።
JOH 15:11 «ታ ኡፋይሳይ ሂንቴናን ጊዳና ሜላኔ ሂንቴ ኡፋይሳይ ፖሎ ጊዳና ሜላ ታኒ ሂንቴው ሄሳ ኦዳስ።
JOH 15:12 ታ ኪታይ ሃይሳ፤ ታኒ ሂንቴና ዶሲዳይሳዳ ሂንቴካ ኢሶይ ኢሱዋ ዶሲቴ።
JOH 15:13 ባ ሼምፑዋ ባ ላጊያስ ኣꬂዲ ኢሜይሳፌ ኣꬊያ ጊታ ሲቆይ ባዋ።
JOH 15:14 ታኒ ሂንቴና ኪቲዳባ ኡባ ኦꬂኮ ሂንቴ ዶሴቲዳይሳታ።
JOH 15:15 «ኣይሌይ ባ ጎዳይ ኦꬂያባ ኤሮና ጊሾ ታኒ ሂንቴና ሂዛፔ ጉዬ ኣይሌታ ጊኬ። ሺን ታ ኣዋፔ ሲዒዳ ኡባ ታኒ ሂንቴው ኦዲዳ ጊሾ ሂንቴና ዶሴቲዳይሳታ ጋስ።
JOH 15:16 ታኒ ሂንቴና ዶራሲፔ ኣቲን ሂንቴ ታና ዶሪቤኬታ። ሂንቴ ቢዲ ꬋዮና ኣይፌ ኣይፋና ሜላ ታኒ ሂንቴና ሹማስ። ያኒኮ ታ ኣዋይ ሂንቴ ታ ሱንꬃን ዎሲዳባ ኡባ ኢማና።
JOH 15:17 ታ ኪታይ ሃይሳ፡ ኢሶይ ኢሱዋ ዶሲቴ።
JOH 15:18 «ኣላሜይ ሂንቴና ኢፂኮ ኮይሮቲዲ ታና ኢፂዳይሳ ኣኬኪቴ።
JOH 15:19 ሂንቴ ኣላሚያባ ጊዲያኮ ኣላሜይ ባባዳ ሂንቴና ዶሳና። ሺን ታኒ ሂንቴና ኣላሜፔ ዶሪዳ ጊሾኔ ሂንቴ ኣላሚያባ ጊዶና ጊሾ ኣላሜይ ሂንቴና ኢፄስ።
JOH 15:20 ‹ኣይሌይ ባ ጎዳፔ ኣꬌና› ጋዳ ታኒ ሂንቴው ኦዲዳይሳ ኣኬኪቴ። ኤንቲ ታና ጎዲዳባ ጊዲኮ ሂንቴናካ ጎዳና። ኤንቲ ታ ቃላ ናጊዳባ ጊዲኮ ሂንቴ ቃላካ ናጋና።
JOH 15:21 ሺን ኤንቲ ታና ኪቲዳይሳ ኤሮና ጊሾ ሃ ኡባ ታ ጋሶን ሂንቴ ቦላ ኦꬃና።
JOH 15:22 ታኒ ያዳ ኦዶናባ ጊዲያኮ ኤንታው ናጋራ ጊዴና። ሺን ሃዒ ኤንቲ ኦꬂዳ ናጋራስ ጋሶያባይ ባዋ።
JOH 15:23 ታና ኢፄይሲ ታ ኣዋካ ኢፄስ።
JOH 15:24 ኦኒካ ኦꬂቦና ኦሶ ታ ኤንታ ጊዶን ኦꬃቦናባ ጊዲያኮ ኤንታው ናጋራ ጊዶና ኣታና። ሺን ሃዒ ኤንቲ ታኒ ኦꬂዳ ኦሱዋ ቤዒዲ ታናካ ታ ኣዋካ ኢፂዶሶና።
JOH 15:25 ሺን ኤንታ ሂጊያን፥ ‹ታና ጮ ኢፂዶሶና› ጌቴቲዲ ፃፌቲዳይሲ ፖሌታና ሜላ ሄሲ ሃኒስ።
JOH 15:26 «ኣዋፔ ያ ቱማ ቆንጪሲያ ኣያና ታ ሂንቴው ኪታና። ኢ ሂንቴና ሚንꬄꬃና፥ ታባ ማርካታና።
JOH 15:27 ሂንቴካ ኮይሮፔ ዶሚዲ ታራ ዴዒያ ጊሾ ታባ ማርካታና።
JOH 16:1 «ታኒ ሄሳ ሂንቴ ኣማኖይ ꬋዮና ሜላ ሂንቴው ኦዳስ።
JOH 16:2 ኤንቲ ሂንቴና ኣይሁዴ ዎሳ ኬꬃታፔ ኬሲ ዬዳና። ሄሳዳካ፥ ሂንቴና ዎꬊያ ኦኒካ ፆሲ ኮያባ ኦꬂያ ዳኒያ ዎዴይ ያና።
JOH 16:3 ኤንቲ ሄሳ ሂንቴ ቦላ ኦꬄይ ታና ዎይኮ ኣዋ ኤሮና ጊሾሳ።
JOH 16:4 ሺን ኤንቲ ሄሳ ሂንቴ ቦላ ኦꬂያ ዎዴይ ጋኪያ ዎዴ ታኒ ሂንቴው ኦዲዲዳይሳ ሂንቴ ኣኬካና ሜላ ታኒ ሂንቴው ሃይሳ ኦዳስ። «ሲንꬃታዳ ታኒ ሃይሳ ሂንቴው ኦዶና ጋምዒዳይ ታ ሂንቴራ ዴዒያ ጊሾሳ።
JOH 16:5 ሺን ሃዒ ታኒ ታና ኪቲዳይሳኮ ባይስ፤ ሂንቴፌ ኦኒካ፥ ‹ኣዉ ባይ?› ጊዲ ታና ኦይቼይ ባዋ።
JOH 16:6 ሺን ታኒ ሄሳ ኦዲዳ ጊሾ ሂንቴ ዎዛናን ዳሮ ኣዛኖይ ዴዔስ።
JOH 16:7 ሺን ታኒ ሂንቴው ቱማ ኦዳይስ፤ ታኒ ቢኮ ሂንቴው ሎዖ። ኣይስ ጊኮ፥ ታኒ ቦና ኢፂኮ ሚንꬄꬄይሲ ሂንቴኮ ዬና። ሺን ታኒ ቢኮ ኢያ ሂንቴኮ ዬዳና።
JOH 16:8 ሚንꬄꬄይሲ ዪዲ፥ ናጋራባ፥ ፂሎቴꬃባኔ ፒርዳባ ሃ ኣላሚያ ኣሳ ኤሪሳና።
JOH 16:9 ናጋራባይ፥ ኣሳይ ታና ኣማኖና ጊሾሳ።
JOH 16:10 ፂሎቴꬃባይ፥ ታኒ ኣዋኮ ቢያ ጊሾኔ ሂንቴ ታና ዛሪ ቤዖና ጊሾሳ።
JOH 16:11 ፒርዳባይ፥ ቃሲ ኣላሚያ ሃሬይሲ ፒርዴቲዳ ጊሾሳ።
JOH 16:12 «ታኒ ሂንቴው ኦዲያባይ ዳሮባይ ዴዔስ፥ ሺን ሃዒ ሂንቴው ጌሌና።
JOH 16:13 ቱማ ኣያናይ ያ ዎዴ ሂንቴና ቱማቴꬃ ኡባኮ ካሌꬃና። ኢ ሲዒዳባ ኦዴሲፔ ኣቲን ባፔ ኣይቢባካ ኦዴና። ቃሲ ሲንꬃፌ ያናባ ሂንቴው ኢ ኦዳና።
JOH 16:14 ኢ ታው ዴዔይሳፌ ኤኪዲ ሂንቴው ኦዲያ ጊሾ ኢ ታና ቦንቻና።
JOH 16:15 ኣዋስ ዴዒያባ ኡባይ ታባ፤ ‹ሚንꬄꬄይሲ ታው ዴዔይሳፌ ኤኪዲ ሂንቴው ኦዳና› ታኒ ጊዳይ ሄሳሳ።
JOH 16:16 «ጉꬃ ዎዴፔ ጉዬ ታና ቤዔኬታ፤ ቃሲ ጉꬃ ዎዴፔ ጉዬ ሂንቴ ታና ቤዓና» ያጊስ።
JOH 16:17 ኢያ ታማሬታፔ ኢሶቲ ኢሶቲ ባንታ ጊዶን፥ «ጉꬃ ዎዴፔ ጉዬ ሂንቴ ታና ቤዔኬታ፤ ቃሲ ጉꬃ ዎዴፔ ጉዬ ሂንቴ ታና ቤዓና፤ ቃሲካ ታኒ ኣዋኮ ባይስ ጉሳይ ዎይ ጉሴ?» ያጊዶሶና።
JOH 16:18 «ጉꬃ ዎዴፔ ጉዬ ጌይሲ ዎይ ጉሴ? ኢ ኣይ ኦዴቲያኮ ኑስ ኤሬቴና» ያጊዶሶና።
JOH 16:19 ኤንቲ ባና ኦይቻናው ኮዬይሳ ዬሱሲ ኤሪዲ፥ «ታኒ፥ ‹ጉꬃ ዎዴፔ ጉዬ ታና ቤዔኬታ፤ ቃሲ ጉꬃ ዎዴፔ ጉዬ ሂንቴ ታና ቤዓና› ጊዳይሳስ ሂንቴ ኢሶይ ኢሱዋ ኦይቼቲ?
JOH 16:20 ታኒ ሂንቴው ቱማ ኦዳይስ፤ ሂንቴ ዬካናኔ ኣፉፃና፥ ሺን ሃ ኣላሜይ ኡፋይታና። ሃዒ ሂንቴ ኣዛናና፥ ሺን ሂንቴ ኣዛኖይ ኡፋይሳን ላሜታና።
JOH 16:21 ኢሲ ማጫሲያ ናዓ ዬላና ሃኒያ ዎዴ ባ ዬሎ ዎዴይ ጋኪዳ ጊሾ ሂርጋዉሱ። ሺን ናዓ ዬሊዳፔ ጉዬ ናዒ ሃ ኣላሚያን ዬሌቲዳ ኡፋይሳ ጊሾ ባ ኡንዓ ዶጋዉሱ።
JOH 16:22 ሄሳዳካ፥ ሂንቴካ ሂንቴ ዎዛናን ኣዛኔታ፥ ሺን ታኒ ሂንቴና ዛራዳ ቤዓና። ሂንቴ ዎዛናይ ዳሮ ኡፋይታና፤ ሄ ኡፋይሳ ኦኒካ ሂንቴፌ ኤኬና።
JOH 16:23 «ሄ ጋላስ ሂንቴ ታና ኣይቢባካ ዎሴኬታ። ታኒ ሂንቴው ቱማ ኦዳይስ፤ ሂንቴ ታ ሱንꬃን ዎሲያባ ኡባ ኣዋይ ሂንቴው ኢማና።
JOH 16:24 ሃዒ ጋካናው ታ ሱንꬃን ኣይቢባካ ዎሲቤኬታ። ሂንቴ ኡፋይሳይ ፖሎ ጊዳና ሜላ ፆሳ ዎሲቴ፤ ሂንቴ ኤካና።
JOH 16:25 «ታኒ ሃዒ ጋካናው ሂንቴው ሌሚሶን ኦዳስ፥ ሂዛፔ ታኒ ሌሚሶን ኦዶና ዎዴይ ያና። ሺን ኣዋባ ታኒ ሂንቴው ቆንጬን ኦዳና።
JOH 16:26 ሄ ጋላስ ሂንቴ ታ ሱንꬃን ኣዋ ዎሳና፤ ሂንቴ ጊሾ ታኒ ኣዋ ዎሲኬ።
JOH 16:27 ኣይስ ጊኮ፥ ኣዋይ ባ ሁዔን ሂንቴና ዶሴስ። ሂንቴ ታና ዶሲያ ጊሾኔ ታኒ ኣዋ ማታፔ ዪዳይሳ ኣማኒዳ ጊሾ ኢ ሂንቴና ዶሴስ።
JOH 16:28 ታኒ ኣዋ ማታፔ ሃ ኣላሚያ ያስ፤ ቃሲ ኣላሚያ ኣጋዳ ኣዋኮ ባና» ያጊስ።
JOH 16:29 ኢያ ታማሬቲ ዛሪዲ፥ «ሄኮ፥ ሃዒ ኔኒ ቆንጬን ኦዳሳ፤ ሌሚሶን ኣይኮካ ኦዳካ።
JOH 16:30 ኔኒ ኡባባ ኤሬይሳ ኑኒ ሃዒ ኤሮስ፤ ቃሲ ኔና ኦኒካ ኦይቻና ሜላ ኔኒ ኮያካ። ሄሲ ኑና ኔኒ ፆሳፌ ኪቴቲዳይሳ ኣማንꬄስ» ያጊዶሶና።
JOH 16:31 ያቲን፥ ዬሱሲ ዛሪዲ ኤንታኮ፥ «ሃዒ ኣማኔቲ?
JOH 16:32 ሄኮ፥ ሂንቴ፥ ሂንቴ ሶ ሂንቴ ሶ ላሌቲያ ዎዴይኔ ታ ፃላላ ዬጊ ኣጊዲ ባቃቲያ ዎዴይ ያና፤ ሃዒካ ዪኪቺስ። ሺን ኣዋይ ታራ ዴዒያ ጊሾ ታ ታ ፃላላ ጊዲኬ።
JOH 16:33 ሂንቴ ታራ ዴዒሼ ሳሮይ ሂንቴው ዳና ሜላ ታኒ ሄሳ ኦዳስ። ኣላሜን ዴዒሼ ሂንቴ ዋዬታና። ሺን ሚኒቴ፤ ታኒ ኣላሚያ ፆናስ» ያጊስ።
JOH 17:1 ዬሱሲ ሄሳ ኦዲዳፔ ጉዬ ፑዴ ሳሎ ፄሊዲ፥ ሃይሳዳ ያጊስ፡ «ኣዋው፥ ሳቴይ ጋኪስ፤ ኔ ናዓይ ኔና ቦንቻና ሜላ ኔኒ ኔ ናዓ ቦንቻ።
JOH 17:2 ኔኒ ኢያው ኢሚዳ ኡባስ ኢ ሜሪና ዴዑዋ ኢማና ሜላ ኣሳ ኡባ ቦላ ኢያው ማታ ኢማዳሳ።
JOH 17:3 ሜሪና ዴዖይ፥ ኔና፥ ኢሲ ቱማ ፆሳኔ ኔ ኪቲዳ ዬሱስ ኪሪስቶሳ ኤሮ።
JOH 17:4 ኔኒ ታ ኦꬃና ሜላ ኢሚዳ ኦሱዋ ፖላዳ ኔና ሳዓን ቦንቻስ።
JOH 17:5 ሃዒካ፥ ኣዋው፥ ኣላሜይ ሜꬌታናፔ ሲንꬄ ኔ ማታን ታው ዴዒያ ቦንቹዋን ታና ቦንቻ።
JOH 17:6 «ኣላሚያ ኣሳፔ ኔኒ ታው ኢሚዳይሳታ ኔና ኤሪሳስ። ኤንቲ ኔይሳታ፤ ኔኒ ኤንታ ታው ኢማዳሳ። ኤንቲ ኔ ቃላስካ ኪቴቲዶሶና።
JOH 17:7 ኔኒ ታው ኢሚዳ ኡባባይ ኔፔ ዪዳይሳ ኤንቲ ሃዒ ኤሮሶና።
JOH 17:8 ኔኒ ታው ኢሚዳ ቃላ ታኒ ኤንታው ኢማስ፤ ኤንቲካ ሄ ቃላ ኤኪዶሶና። ታኒ ኔ ማታፔ ዪዳይሲ ቱማ ጊዴይሳ ኤሪዲ ኔኒ ታና ኪቲዳይሳካ ኣማኒዶሶና።
JOH 17:9 «ታኒ ኤንታው ዎሳይስ። ኤንቲ ኔይሳታ ጊዲያ ጊሾ ኔኒ ታው ኢሚዳ ኣሳስ ዎሳይሲፔ ኣቲን ኣላሚያስ ዎሲኬ።
JOH 17:10 ታው ዴዒያ ኡባባይ ኔባ፤ ኔው ዴዒያ ኡባይካ ታባ። ታኒ ኤንታ ባጋራ ቦንቼታስ።
JOH 17:11 ታኒ ሂዛፔ ጉዬ ኣላሜን ዴዒኬ፤ ኤንቲ ኣላሜን ዴዖሶና። ታኒ ሃዒ ኔኮ ባይስ። ጌሻ ኣዋው፥ ሃ ኔኒ ታው ኢሚዳይሳቲ ኔራኔ ታራ ኢሲኖ ጊዲዳይሳዳ ኤንቲ ኢሲኖ ጊዳና ሜላ ኤንታ ኔ ታው ኢሚዳ ኔ ሱንꬃን ናጋ።
JOH 17:12 ታኒ ኤንታራ ሳዓን ዴዓሼ፥ ኔ ታው ኢሚዳ ኔ ሱንꬃ ዎልቃን ኤንታ ናጋስ። ጌሻ ማፃፋይ ጊዳይሲ ፖሌታና ሜላ ꬋዮይ ቤሲያ ኡራፔ ኣቲን ኤንታፌ ሃሪ ኦኒካ ꬋዪቤና።
JOH 17:13 «ሃዒ ታኒ ኔኮ ባይስ። ታ ኡፋይሳይ ኤንታ ዎዛናን ፖሎ ጊዳና ሜላ ሃይሳ ታኒ ኣላሜን ዴዓሼ ኦዳይስ።
JOH 17:14 ታኒ ኤንታው ኔ ቃላ ኢማስ። ታኒ ኣላሜፔ ጊዶናይሳዳ፥ ኤንቲካ ኣላሜፔ ጊዶና ጊሾ ኣላሜይ ኤንታ ኢፂስ።
JOH 17:15 ኔኒ ፃላሄፔ ኤንታ ናጋና ሜላፔ ኣቲን ኣላሜፔ ኬሳና ሜላ ዎሲኬ።
JOH 17:16 ታኒ ኣላሜፔ ጊዶናይሳዳ ኤንቲካ ኣላሜፔ ጊዶኮና።
JOH 17:17 ኔኒ ኔ ቱማቴꬃን ኤንታ ኔባ ኦꬃ፤ ኔ ቃላይካ ቱማ።
JOH 17:18 ኔኒ ታና ኣላሚያ ኪቲዳይሳዳ ታኒካ ኤንታ ኣላሚያ ኪታስ።
JOH 17:19 ቃሲ ኤንቲ ቱማ ኔባ ጊዳና ሜላ ኤንታ ጊሾ ታኒ ታ ሁዒያ ኔው ኢማይስ።
JOH 17:20 «ታኒ ኤንታ ፃላላስ ጊዶናሺን ኤንቲ ቃላ ኦዲን፥ ታና ኣማናናይሳታስካ ዎሳይስ።
JOH 17:21 ኤንቲ ኡባይ ኢሲኖ ጊዳና ሜላ ታኒ ዎሳይስ። ኣዋው፥ ኔ ታናን ዴዔይሳዳ፥ ቃሲ ታ ኔናን ዴዔይሳዳ ኤንቲ ኑናን ዳና ሜላ ዎሳይስ። ሄ ዎዴ ኔኒ ታና ኪቲዳይሳ ኣላሜይ ኣማናና።
JOH 17:22 ኔኒኔ ታኒ ኢሲኖ ጊዴይሳዳ፥ ኤንቲ ኢሲኖ ጊዳና ሜላ፥ ኔኒ ታና ቦንቺዳይሳዳ፥ ታኒካ ኤንታ ቦንቻስ።
JOH 17:23 ታኒ ኤንታን፥ ኔኒ ታናን ዴዔይሳዳ ኤንቲ ፖሎ ኢሲኖ ጊዳና ሜላ ኔና ዎሳይስ። ሄሲካ፥ ኔ ታና ኪቲዳይሳኔ ኔ ታና ዶሲዳ ዶሱዋን ኤንታ ዶሲዳይሳ ኣላሜይ ኤራን ሜላሳ።
JOH 17:24 «ኣዋው፥ ኔኒ ታው ኢሚዳይሳቲ ታኒ ዴዒያሱዋን ታራ ዳና ሜላ ኮያይስ። ኣላሜይ ሜꬌታናፔ ሲንꬄ ኔኒ ታና ዶሲዳ ጊሾ ታው ኢሚዳ ታ ቦንቹዋ ኤንቲ ቤዓና።
JOH 17:25 «ጌሻ ኣዋው፥ ኣላሜይ ኔና ኤሬና፥ ሺን ታኒ ኤራይስ። ቃሲ ኔኒ ታና ኪቲዳይሳ ሃይሳቲ ኤሮሶና።
JOH 17:26 ኔኒ ታና ሲቂዳ ሲቆይ ኤንታናን ዳና ሜላ፥ ቃሲ ታኒ ኤንታናን ጊዳና ሜላ፥ ታኒ ኔ ሱንꬃ ኤንታ ኤሪሳስ፤ ሲንꬃስካ ኤሪሳና» ያጊስ።
JOH 18:1 ዬሱሲ ዎሳ ኦንጊዳፔ ጉዬ ባ ታማሬታራ ቄዲሮና ዛንጋራ ፒኒዲ፥ ሄ ቤሳን ዴዒያ ኣታኪልቲያ ጊዶ ጌሊዶሶና።
JOH 18:2 ዬሱሲ ኡባ ዎዴ ባ ታማሬታራ ያን ሺቂያ ጊሾ ዬሱሳ ኣꬂ ኢሚዳ ዪሁዲ ሄ ቤሳ ኤሬስ።
JOH 18:3 ሄሳ ጊሾ፥ ዪሁዲ ፓኖሴ፥ ፆምፔ፥ ቶራኔ ጎንዳሌ ኦይኪዳ ዳሮ ዎታዳሬታ፥ ካሂኔ ሃላቃቲኔ ፋሪሳዌቲ ኪቲዳ ፆሳ ኬꬃ ናጊያ ፖሊሴታ ካሌꬂ ኤኪዲ፥ ሄ ቤሳ ቢስ።
JOH 18:4 ዬሱሲ ባና ጋካና ሃኒያባ ኡባ ኤሪዲ፥ ጋፃ ኬዪዲ፥ «ኦና ኮዬቲ?» ያጊስ።
JOH 18:5 ኤንቲ ዛሪዲ፥ «ናዚሬቴ ዬሱሳ ኮዮስ» ያጊዶሶና። ኢ ዛሪዲ፥ «ታኒ ዬሱሳ» ያጊስ። ዬሱሳ ኣꬂ ኢሚዳ ዪሁዲ ያን ኤንታራ ኤቂስ።
JOH 18:6 ኢ፥ «ታኒ ዬሱሳ» ጊዳ ዎዴ ኤንቲ ጉዬ ሺቂዲ፥ ሳዓን ኩንዲዶሶና።
JOH 18:7 ዬሱሲ ቃሲካ፥ «ኦና ኮዬቲ?» ያጊዲ ኦይቺስ። ኤንቲ፥ «ናዚሬቴ ዬሱሳ ኮዮስ» ያጊዶሶና።
JOH 18:8 ኢ ዛሪዲ፥ «ታኒ ዬሱሳ ጊዴይሳ ሂንቴው ኦዳስ። ሂዛ፥ ሂንቴ ታና ኮያባ ጊዲኮ ሃይሳታ ዬዲቴ» ያጊስ።
JOH 18:9 ኢ ሄሳ ጊዳይ፥ «ኣዋው፥ ኔኒ ታው ኢሚዳይሳታፔ ሃሪ ኣቶሺን ኢሱዋካ ꬋይሳቢኬ» ጊዳይሲ ፖሌታና ሜላሳ።
JOH 18:10 ሲሞን ጴፂሮሳስ ማሺ ዴዔስ። ኢ ሄ ማሻ ሾዲዲ ካሂኔ ሃላቃ ኣይሊያስ ኡሻቻ ሃይꬃ ሾጪዲ፥ ቃንፂ ዬጊስ። ሄ ኣይሊያ ሱንꬃይ ማልኮሳ።
JOH 18:11 ዬሱሲ ጴፂሮሳኮ፥ «ኔ ማሻ ሾሁዋን ዛራ። ታ ኣዋይ ታው ኢሚዳ ፁዓፔ ታኒ ኡዮናባ ኔው ዳኒ?» ያጊስ።
JOH 18:12 ሮሜ ዎታዳሬቲኔ ኤንታ ሃላቃይ ፆሳ ኬꬃ ናጊያ ፖሊሴታራ ኢሲፌ ዬሱሳ ኦይኪዲ ቃቺዶሶና።
JOH 18:13 ኮይሮ ዬሱሳ ሃናኮ ኤፊዶሶና። ሃኒ ሄ ላይꬂ ካሂኔ ሃላቃ ጊዲያ ቃያፋ ቦሎ።
JOH 18:14 ቃያፊ፥ «ኣሳ ኡባ ጊሾ ኢሲ ኣሲ ሃይቂኮ ሎዖ» ጊዲ ካሴ ኣይሁዴታ ዞሪዳይሳ።
JOH 18:15 ሲሞን ጴፂሮሲኔ ሃራ ኢሲ ታማሬይ ዬሱሳ ካሊዲ ቢዶሶና። ካሂኔ ሃላቃይ ሄ ሃራ ታማሪያ ሎይꬂ ኤሬስ። ሄሳ ጊሾ፥ ኢ ዬሱሳራ ካሂኔ ሃላቃ ዛባ ጌሊስ።
JOH 18:16 ሺን ጴፂሮሲ ካሬራ ዲርሳ ፔንጌን ኤቂስ። ካሂኔ ሃላቃይ ኤሪያ ሃራ ታማሬይ ካሬ ኬዪዲ፥ ፔንጊያ ናጊያ ናዔስ ኦዲዲ፥ ጴፂሮሳ ጋꬂ ጌልሲስ።
JOH 18:17 ፔንጊያ ናጊያ ናዒያ ጴፂሮሳኮ፥ «ኔኒ፥ ሄ ኣዲያ ታማሬታፔ ኢሱዋ ጊዲኪ?» ያጋሱ። ጴፂሮሲ ዛሪዲ፥ «ኣካይ፥ ታኒ ጊዲኬ» ያጊስ።
JOH 18:18 ሳዓይ ሜጊያ ጊሾ ኣይሌቲኔ ናጌይሳቲ ፂፋ ታማ ኤꬂዲ፥ ዩዪ ኣꬊ ኤቂዲ ካዮሶና። ጴፂሮሲካ ኤንታራ ኤቂዲ ታማ ካዬስ።
JOH 18:19 ካሂኔ ሃላቃይ ዬሱሳ፥ ኢያ ታማሬታባኔ ኢያ ቲሚርቲያባ ኦይቺስ።
JOH 18:20 ዬሱሲ ዛሪዲ፥ «ታኒ ኣሳ ኡባስ ቆንጬን ኦዳስ። ታኒ ኣይሁዴ ኡባይ ሺቂያ ኣይሁዴ ዎሳ ኬꬃኒኔ ፆሳ ኬꬃን ኡባ ዎዴ ታማርሳስ። ጌማን ኣይኮካ ኦዳቢኬ።
JOH 18:21 ያቲን፥ ኔኒ ታና ኣይስ ኦይቻይ? ታ ኦዲሺን ሲዒዳ ኣሳ ኦይቻ። ሄ ኣሳይ ታኒ ኦዲዲዳይሳ ኤሮሶና» ያጊስ።
JOH 18:22 ዬሱሲ ሄሳ ጊዳ ዎዴ ሄ ቤሳን ኤቂዳ ዎታዳሬታፔ ኢሶይ ዬሱሳ ባቂዲ፥ «ካሂኔ ሃላቃስ ሃይሳዳ ዛራይ?» ያጊስ።
JOH 18:23 ዬሱሲ ዛሪዲ፥ «ታኒ ኢታባ ኦዲዳባ ጊዲኮ ሃይሳን ዴዒያ ኣሳ ኡባ ሲንꬃን ኦዳ። ሺን ታኒ ቱማ ኦዲዳባ ጊዲኮ ታና ኣይስ ባቃይ?» ያጊስ።
JOH 18:24 ሄሳ ጊሾ፥ ሃኒ፥ ዬሱሲ ቃሼቲዳ ሜላ ካሂኔ ሃላቃ ቃያፋኮ ዬዲስ።
JOH 18:25 ጴፂሮሲ ያን ኤቂዲ፥ ታማ ካዪሺን፥ ሃራቲ ኢያኮ፥ «ኔኒ ሃ ኣዲያ ታማሬታፔ ኢሱዋ ጊዲኪ?» ያጊስ። ጴፂሮሲ ዛሪዲ፥ «ኣካይ፥ ታኒ ጊዲኬ» ያጊዲ ካዲስ።
JOH 18:26 ካሂኔ ሃላቃ ኣይሌታፔ ኢሶይ፥ ጴፂሮሲ ሃይꬃ ቃንፂዳ ኣዲያ ዳቦይ፥ ጴፂሮሳኮ፥ «ታኒ ኔና ኢያራ ኣታኪልቲያ ጊዶን ቤዓቢኪና?» ያጊዲ ኦይቺስ።
JOH 18:27 ጴፂሮሲ ቃሲካ ካዲስ። ሶሁዋራ ኩቶይ ዋሲ ኣጊስ።
JOH 18:28 ዎንታ ጉራ፥ ኤንቲ ዬሱሳ ቃያፋ ሶፔ ዴሪያ ሃሬይሳ ኦሶ ኬꬂ ኤፊዶሶና። ኣይሁዴቲ ፓሲካ ባሌ ካꬃ ማናው ባንታና ቱኒሶና ሜላ ዴሪያ ሃሬይሳ ኦሶ ኬꬃ ጌሊቦኮና።
JOH 18:29 ሄሳ ጊሾ፥ ጲላፆሲ ኤንታኮ ካሬ ኬዪዲ፥ «ሃ ኣዲያ ኣይስ ሞቴቲ?» ያጊስ።
JOH 18:30 ኤንቲ፥ «ኢ ኢታ ኦꬆናባ ጊዲያኮ ኑኒ ኢያ ኔኮ ኤሆኮ» ያጊዶሶና።
JOH 18:31 ጲላፆሲ ዛሪዲ፥ «ሂንቴ ኢያ ኤኪ ኤፊዲ፥ ሂንቴ ሂጌይ ጌይሳዳ ኢያ ቦላ ፒርዲቴ» ያጊስ። ኣይሁዴቲ፥ «ኦናካ ዎꬊያ ማቲ ኑስ ባዋ» ያጊዶሶና፤
JOH 18:32 ሄሲ ሃኒዳይ ዬሱሲ ኣይ ሜላ ሃይቆ ሃይቃኔኮ ኤሪሳናው ኦዲዳይሲ ፖሌታናሳ።
JOH 18:33 ጲላፆሲ ባ ኦሶ ኬꬃ ዛሪ ጌሊዲ፥ ዬሱሳ ፄጊዲ፥ «ኔኒ ኣይሁዴ ካዎ?» ያጊዲ ኦይቺስ።
JOH 18:34 ዬሱሲ ጲላፆሳ፥ «ሃ ኦይሻ ኔኒ ኔፔ ኦይቻዬ ዎይኮ ሃራ ኣሲ ኔው ታባ ኦዲዴ?» ያጊስ።
JOH 18:35 ጲላፆሲ ዛሪዲ፥ «ታ ኣይሁዴ ኣሴ? ኔ ኣሳይኔ ካሂኔ ሃላቃቲ ኔና ታው ኣꬂ ኢሚዶሶና። ኔ ኣይ ኦꬃዲ?» ያጊስ።
JOH 18:36 ዬሱሲ፥ «ታ ካዎቴꬃይ ሃ ኣላሚያና ጊዴና። ኢ ሃይሳን ጊዲያኮ ታ ኣይሁዴታ ሃላቃታስ ኣꬋ ኢሜቶና ሜላ ታ ኣይሌቲ ታው ኦሌታና። ሺን ታ ካዎቴꬃይ ሃ ኣላሚያና ጊዴና» ያጊስ።
JOH 18:37 ሄሳ ጊሾ፥ ጲላፆሲ ዬሱሳኮ፥ «ያቲን፥ ኔኒ ካዎዬ?» ያጊዲ ኦይቺስ። ዬሱሲ ዛሪዲ፥ «ቱማ ታ ካዎ ጊዴይሳ ኔ ጋዳሳ። ታኒ ዬሌቲዳይኔ ሃ ኣላሚያ ዪዳይ ቱማቴꬃስ ማርካታናሳ። ቱማ ባጋ ጊዲዳ ኦኒካ ታኒ ጌይሳ ሲዔስ» ያጊስ።
JOH 18:38 ጲላፆሲ፥ «ቱሚ ኣይቤ?» ያጊስ። ጲላፆሲ ሄሳ ጊዳፔ ጉዬ ኣይሁዴታኮ ካሬ ኬዪዲ፥ «ታኒ ኢያፔ ኣይ ኢታካ ዴማቢኬ።
JOH 18:39 ሺን ፓሲካ ባሌ ጋላስ፥ ኢሲ ኣሴ ሂንቴው ቃሾፔ ቢሊያ ሜዜይ ዴዔስ። ታኒ ሂንቴው ኣይሁዴታ ካዉዋ ቢላና ሜላ ኮዬቲ?» ያጊስ።
JOH 18:40 ኤንቲ ዛሪዲ፥ ባንታ ቃላ ꬎቁ ኦꬂዲ፥ «ባርባና ቢላፌ ኣቲን ኢያ ጊዴና» ያጊዶሶና። ሺን ባርባኒ ፓንጋ።
JOH 19:1 ሄሳፌ ጉዬ፥ ጲላፆሲ ዬሱሳ ጋራፊሲስ።
JOH 19:2 ዎታዳሬቲ ኣጉንꬃ ካላቻ ሜꬊዲ ኢያ ሁዔን ዎꬂዶሶና። ቃሲ ዞዖ ማዖ ኢያ ማይዚዶሶና።
JOH 19:3 ኢያኮ ሺቂዲ፥ «ኣይሁዴ ካዉዋው፥ ሜሪናው ካዎታ» ያጊዲ ኢያ ባቂዶሶና።
JOH 19:4 ጲላፆሲ ቃሲካ ካሬ ኬዪዲ፥ ኣይሁዴታኮ፥ «ሄኮ፥ ታኒ ኢያፔ ኣይ ኢታካ ዴማቦናይሳ ሂንቴ ኤራና ሜላ ኢያ ሂንቴኮ ካሬ ኬሳና» ያጊስ።
JOH 19:5 ሄሳፌ ጉዬ፥ ዬሱሲ ኣጉንꬃ ካላቻ ባ ሁዔን ዎꬂዲ፥ ዞዖ ማዖ ማዒዲ፥ ካሬ ኬዪስ። ጲላፆሲ ኣይሁዴታኮ፥ «ኡራ ሃይሳ ቤዒቴ» ያጊስ።
JOH 19:6 ካሂኔ ሃላቃቲኔ ፆሳ ኬꬃ ናጌይሳቲ ኢያ ቤዒዳ ዎዴ ባንታ ቃላ ꬎቁ ኦꬂዲ፥ «ማስቃሊያ ቦላ ካቃ! ካቃ!» ያጊዶሶና። ጲላፆሲ ኤንታኮ፥ «ሂንቴ ኢያ ኤፊዲ፥ ማስቃሊያ ቦላ ካቂቴ። ታኒ ኢያፔ ኣይ ኢታካ ዴማቢኬ» ያጊስ።
JOH 19:7 ኣይሁዴቲ ዛሪዲ፥ «ኑስ ሂጌይ ዴዔስ። ኢ ባና ፆሳ ናዓ ኦꬂዳ ጊሾ ኑ ሂጊያꬆ ኢ ሃይቃናው ቤሴስ» ያጊዶሶና።
JOH 19:8 ጲላፆሲ ሄሳ ሲዒዳ ዎዴ ካሴይሳፌ ዳሮ ያዪስ።
JOH 19:9 ቃሲካ ጲላፆሲ ባ ኦሶ ኬꬂ ሲሚ ጌሊዲ ዬሱሳኮ፥ «ኔኒ ኣዉፔ ያዲ?» ያጊዲ ኦይቺስ። ሺን ዬሱሲ ኢያው ኣይኮካ ዛሪቤና።
JOH 19:10 ሄሳ ጊሾ፥ ጲላፆሲ፥ «ታው ኦዲኪ? ኔና ቢላናው ዎይኮ ማስቃሊያ ቦላ ካቃናው ታው ማቲ ዴዔይሳ ኤሪኪ?» ያጊስ።
JOH 19:11 ዬሱሲ፥ «ፆሳይ ኔው ማታ ኢሚቦናባ ጊዲያኮ ታ ቦላ ማቲ ኔው ዴናሺን። ሄሳ ጊሾ፥ ታና ኔው ኣꬂ ኢሚዳይስ ኣꬊያ ናጋራ ኦꬂስ» ያጊስ።
JOH 19:12 ጲላፆሲ ሄሳ ሲዒዳ ዎዴ ዬሱሳ ቢላናው ኦጌ ኮዪስ። ሺን ኣይሁዴቲ ባንታ ቃላ ꬎቁ ኦꬂዲ፥ «ኔኒ ኢያ ቢሊያባ ጊዲኮ ካዉዋ ቄሳሬ ባጋ ጊዳካ። ባና ካዎ ጊያ ኦኒካ ቄሳሬ ሞርኬ» ያጊዶሶና።
JOH 19:13 ጲላፆሲ ሄሳ ሲዒዲ ዬሱሳ ካሬ ኬሲስ። ያቲዲ፥ «ሎቼ ሹቺ» ጊያሶን ፒርዳ ኦይዲያን ኡቲስ። ኢብራይስፄ ቃላን ሄ ቤሳይ «ጋባታ» ጉሱ።
JOH 19:14 ሄ ጋላሳይ ፓሲካ ባሌ ቦንቻናው ጊጌቴꬃ ጋላስ። ሄ ዎዴ ሳዒ ኡሱፑን ሳቴ ሄራ። ጲላፆሲ ኣይሁዴታኮ፥ «ሂንቴ ካዉዋ ሃይሳ ቤዒቴ» ያጊስ።
JOH 19:15 ኣይሁዴቲ ባንታ ቃላ ꬎቁ ኦꬂዲ፥ «ዲጋ! ዲጋ! ማስቃሊያ ቦላ ካቃ» ያጊዶሶና። ጲላፆሲ ዛሪዲ፥ «ሂንቴ ካዉዋ ታኒ ማስቃሊያ ቦላ ካቃናይሳ ኮዬቲ?» ያጊዲ ኦይቺስ። ካሂኔ ሃላቃቲ፥ «ቄሳሬፔ ሃራ ካዎይ ኑስ ባዋ» ያጊዶሶና።
JOH 19:16 ሄሳፌ ጉዬ፥ ኤንቲ ዬሱሳ ማስቃሊያ ቦላ ካቃና ሜላ ጲላፆሲ ኤንታው ኣꬂ ኢሚስ። ኤንቲ ዬሱሳ ኦይኪዲ ኤፊዶሶና።
JOH 19:17 ዬሱሲ ባ ማስቃሊያ ቶኪዲ፥ «ሁዔ ጉጌ» ጊያ ቤሳ ቢስ። «ሁዔ ጉጌ» ጉሳይ ኢብራይስፄ ቃላን «ጎልጎታ» ጉሱ።
JOH 19:18 ኤንቲ ሄ ቤሳን ማስቃሊያ ቦላ ዬሱሳ ካቂዶሶና። ቃሲ ኢያራ ሃራ ናምዑ ኣሳታ፥ ኢሱዋ ያ ባጋራ ሃንኩዋ ሃ ባጋራ ማስቃሊያ ቦላ ካቂዶሶና።
JOH 19:19 ጲላፆሲ፥ «ኣይሁዴታ ካዉዋ፥ ናዚሬቴ ዬሱሳ» ያጊያ ፁፌ ፃፊዲ ማስቃሊያ ቦላ ዎꬂስ።
JOH 19:20 ዬሱሲ ማስቃሊያ ቦላ ካቄቲዳ ቤሳይ ካታማስ ማታን ዴዒያ ጊሾ ዳሮ ኣይሁዴቲ ሄ ፁፊያ ናባቢዶሶና። ፁፌይ ፃፌቲዳይ ኢብራይስፄ ዶናን፥ ላቲኔ ዶናኒኔ ጊሪኬ ዶናና።
JOH 19:21 ሄሳ ጊሾ፥ ካሂኔ ሃላቃቲ ጲላፆሳኮ፥ « ‹ሃ ኣዴይ ባና ኣይሁዴ ካዎ ያጊስ› ጋዳ ፃፋፔ ኣቲን ‹ኣይሁዴ ካዎ› ጋዳ ፃፎፓ» ያጊዶሶና።
JOH 19:22 ያቲን፥ ጲላፆሲ፥ «ታ ፃፊዳይሳ ፃፋስ» ያጊዲ ዛሪስ።
JOH 19:23 ዎታዳሬቲ ማስቃሊያ ቦላ ኢያ ካቂዳፔ ጉዬ ኢያ ማዑዋ ኤኪዲ፥ ኦይዱ ቤሳን ሻኪዲ፥ ኢሶ ኢሶ ኤኪዶሶና። ዬዳ ማዔቲያ ኢያ ኣዱሳ ማዑዋ ኤኪዶሶና።
JOH 19:24 ዎታዳሬቲ፥ «ኦና ጋካኔኮ፥ ሳማ ዬጋናፔ ኣቲን ማዑዋ ፔꬎኮ» ያጊዶሶና። ሄሲ ሃኒዳይ ጌሻ ማፃፋን፥ «ታ ማዑዋ ሻኪ ኤኪዶሶና፤ ታ ኣዱሳ ማዑዋ ቦላካ ሳማ ዬጊዶሶና» ጌቴቲዳይሲ ፖሌታና ሜላሳ። ሄሳ ጊሾ፥ ዎታዳሬቲ ሄሳ ኦꬂዶሶና።
JOH 19:25 ሺን ዬሱሳ ማስቃሊያ ማታን ኢያ ኣያ፥ ኢያ ኣዬ ሚቺያ፥ ቄሊዮጴ ማቺያ ማይራማኔ ማግዴላ ማይራማ ኤቂዶሶና።
JOH 19:26 ዬሱሲ ባ ኣዪዉኔ ኢ ዶሲያ ታማሬይ ያን ኤቂዳይሳታ ቤዒዲ፥ ባ ኣዬኮ፥ «ታ ኣዬ፥ ኔ ናዓ ሃይሳ ቤዓ» ያጊስ።
JOH 19:27 ሄሳፌ ጉዬ፥ ሄ ታማሪያኮ፥ «ኔ ኣዪው ሃኖ ቤዓ» ያጊስ። ሄ ታማሬይ ኢዮ ሄ ዎዴፔ ዶሚዲ ባራ ዳና ሜላ ሶ ኤፊስ።
JOH 19:28 ሄሳፌ ጉዬ፥ ዬሱሲ ኡባይ ሃዒ ፖሌቲዳይሳ ኤሪዲ፥ ጌሻ ማፃፋን ፃፌቲዳይሲ ፖሌታና ሜላ «ታና ሳሜስ» ያጊስ።
JOH 19:29 ሄ ቤሳን ኢሲ ፁጋ ኩሜꬃ ጫላ ዎይኔይ ዴዔስ። ኤንቲ ኢስፖንጄ ሄ ዎይኒያን ዬጊዲ፥ ሂሶጴ ሚꬃ ፄራን ዎꬂዲ፥ ዬሱሳ ዶናኮ ሺሺዶሶና።
JOH 19:30 ዬሱሲ ዎይኒያ ጋንፂ ቤዒዲ፥ «ፖሌቲስ» ያጊስ። ሄሳፌ ጉዬ፥ ባ ሁዒያ ዚቂ ኦꬂዲ ባ ሼምፑዋ ኢሚስ።
JOH 19:31 ሄ ጋላሳይ ጊጌቴꬃ ጋላስ ጊዲያ ጊሾኔ ዎንቴꬃ ጋላሳይ ቦንቾ ሳምባታ ጊዲያ ጊሾ ኣሳታ ኣሃይ ማስቃሊያ ቦላ ሳምባታ ጋላስ ፔዖና ሜላ ኤንታ ቶሁዋ ሜንꬂዲ፥ ማስቃሊያፔ ዎꬊሳና ሜላ ኣይሁዴቲ ጲላፆሳ ዎሲዶሶና።
JOH 19:32 ሄሳ ጊሾ፥ ዎታዳሬቲ ቢዲ፥ ዬሱሳራ ካቄቲዳ ናምዑ ኣሳታ ቶሁዋ ሜንꬂዶሶና።
JOH 19:33 ሺን ዬሱሳኮ ዪዳ ዎዴ ኢ ሃይቂዳይሳ ቤዒዲ፥ ኢያ ቶሁዋ ሜንꬂቦኮና።
JOH 19:34 ሺን ዎታዳሬታፔ ኢሶይ ኢያ ሚያ ቶራን ጫዲን ሶሁዋራ ሱꬂኔ ሃꬂ ጎጊስ።
JOH 19:35 ሂንቴ ኣማናና ሜላ ሄሳ ቤዒዳይሲ ማርካቲስ። ኢያ ማርካቴꬃይካ ቱማ። ቃሲ ኢ ኦዴይሲ ቱማ ጊዴይሳ ኤሬስ።
JOH 19:36 ሄሲ ሃኒዳይ ጌሻ ማፃፋይ፥ «ኢያ ሜቄꬃታፔ ኢሶይካ ሜቄና» ጊዳይሲ ፖሌታና ሜላሳ።
JOH 19:37 ቃሲካ ጌሻ ማፃፋይ ሃራ ቤሳን፥ «ኤንቲ ባንታ ጫዲዳይሳ ቤዓና» ያጌስ።
JOH 19:38 ሄሳፌ ጉዬ፥ ኣርማቲያሳ ካታማፔ ዪዳ ዮሴፊ ዬሱሳ ኣሃ ኤካናው ጲላፆሳ ዎሲስ። ዮሴፊ ኣይሁዴታስ ያዪዳ ጊሾ ቆሳን ዬሱሳ ካሌይሳ። ጲላፆሲ፥ «ኤካ» ያጊስ። ሄሳ ጊሾ፥ ዮሴፊ ቢዲ ዬሱሳ ኣሃ ኤኪስ።
JOH 19:39 ቃሲ ኒቆዲሞሲ፥ ሃይሳፌ ካሴ ዬሱሳኮ ቃማ ዪዳይሲ፥ ካርቤኔ ጎዳሬ ኡꬃራ ዋላኬቲዳ ሃስታማኔ ኢሲ ኪሎ ጊራሜ ጊዲያ ሺቶ ኤኪዲ ዮሴፋራ ዪስ።
JOH 19:40 ሄ ናምዑ ኣሳቲ ዬሱሳ ኣሃ ኤኪዲ፥ ኣይሁዴቲ ኣሃ ፃፂያ ማራን፥ ሺቶራ፥ ሞጎ ኣፊላን ፃፂዶሶና።
JOH 19:41 ዬሱሲ ማስቃሊያ ቦላ ካቄቲዳ ቤሳን ዳሮ ኣታኪልቴይ ዴዔስ። ሄ ኣታኪልቲያ ጊዶን ሹቻፌ ዎጬቲዲ ኦሴቲዳ ቡሮ ኦኒካ ሞጌቲቦና ኦራꬃ ዱፎይ ዴዔስ።
JOH 19:42 ሄ ጎንጎሎይ ማታን ዴዒያ ጊሾኔ ኣይሁዴቲ ሳምባታስ ጊጌቲያ ጋላስ ጊዲያ ጊሾ ዬሱሳ ኣሃ ያን ሞጊዶሶና።
JOH 20:1 ዎጋ ዎዴ ዎንታ ቡሮ ጌዮና ዴዒሺን፥ ማግዴላ ማይራማ፥ ዬሱሲ ሞጌቲዳ ዱፉዋ ባዳ ሹቻይ ሄ ዱፉዋ ዶናፔ ዴንዲዳይሳ ቤዓሱ።
JOH 20:2 ሲሞን ጴፂሮሳኮኔ ዬሱሲ ዶሲያ ሃንኮ ታማሪያኮ ዎፃ ባዳ፥ «ዱፉዋፔ ጎዳ ኤፊዶሶና፤ ኢያ ኣዉን ዎꬂዳኮ ኑ ኤሮኮ» ያጋሱ።
JOH 20:3 ሄሳ ጊሾ፥ ጴፂሮሲኔ ሃንኮ ታማሬይ ኬዪዲ ዱፉዋ ቢዶሶና።
JOH 20:4 ናምዓይካ ኢሲፌ ዎፂዶሶና፥ ሺን ሃንኮ ታማሬይ ጴፂሮሳፔ ኣꬊዲ ሲንꬃቲዲ ዱፉዋ ጋኪስ።
JOH 20:5 ሄ ታማሬይ ሆኪዲ፥ ሞጎ ኣፊላ ቤዒስ፥ ሺን ዱፉዋን ዎꬊቤና።
JOH 20:6 ሲሞን ጴፂሮሲ ኢያ ካሊ ዪዲ፥ ዱፉዋን ዎꬊዲ ሞጎ ኣፊላይ ያን ዴዔይሳ ቤዒስ።
JOH 20:7 ቃሲ ዬሱሳ ሁዔን ፃፄቲዳ ኣፊላይ ፃፄቲዳ ሜላ ዱማ ኢሲ ቤሳን ዴዔይሳ ቤዒስ። ሄ ኣፊላይ ዱማ ዴዔሲፔ ኣቲን ሞጎ ኣፊላራ ኢሲፌ ዴና።
JOH 20:8 ሄ ዎዴ ሲንꬃቲዲ ዱፉዋ ጋኪዳ ሃንኮ ታማሬይ ጌሊ ቤዒዲ ኣማኒስ።
JOH 20:9 ዬሱሲ ሃይቆፔ ዴንዳናው ቤሴይሳ ኦዲያ ጌሻ ማፃፋ ቃላ ኤንቲ ቡሮ ኣኬኪቦኮና።
JOH 20:10 ሄሳፌ ጉዬ፥ ኢያ ታማሬቲ ባንታ ሶ ሲሚዲ ቢዶሶና።
JOH 20:11 ሺን ማይራማ ሄ ዱፉዋ ዶናን ኤቃዳ ዬካሼ ሆካዳ ዱፉዋ ጊዶ ፄላሱ።
JOH 20:12 ቦꬃ ማዖ ማዒዳ ናምዑ ኪታንቾቲ ዬሱሳ ኣሃይ ዚንዒዳሱዋን ኢሶይ ሁዔሶራ ሃንኮይ ቶሆሶራ ኡቲዳሺን ቤዓሱ።
JOH 20:13 ኤንቲ ኢኮ፥ «ማጫሴቴ፥ ኣይስ ዬካይ?» ያጊዲ ኦይቺዶሶና። ኢያ፥ «ኤንቲ ታ ጎዳ ኤፊዶሶና፤ ኤንቲ ኣዉን ዎꬂዳኮ ታኒ ኤሪኬ» ያጋሱ።
JOH 20:14 ሄሳ ጊዳፔ ጉዬ፥ ኢያ ጉዬ ሲማ ፄሊያ ዎዴ ዬሱሲ ያን ኤቂዳይሳ ቤዓሱ። ሺን ኢ ዬሱሳ ጊዲዳይሳ ኤራቡኩ።
JOH 20:15 ዬሱሲ ኢኮ፥ «ማጫሴቴ፥ ኣይስ ዬካይ? ኦና ኮያይ?» ያጊዲ ኦይቺስ። ማይራማ ኣታኪልቴ ኦሳንቹዋ ዳኒን፥ «ጎዳው፥ ኔ ኤኪዳባ ጊዲኮ፥ ኢያ ኣዉን ዎꬂዳኮ ታው ኦዳርኪ። ታኒ ኢያ ኤካና» ያጋሱ።
JOH 20:16 ዬሱሲ ኢኮ፥ «ማይራሜ» ያጊስ። ኢያ ኢያኮ ሲማዳ፥ ኢብራይስፄ ዶናን «ሬቡኒ» ያጋሱ። ሄሳስ ቢርሼꬃይ «ኣስታማሪያው» ጉሱ።
JOH 20:17 ዬሱሲ ኢኮ፥ «ታኒ ቡሮ ታ ኣዋኮ ቦና ጊሾ ታና ኦይካዳ ኣሻናው ኮዮፓ። ሺን ታ ኢሻታኮ ባዳ፥ ‹ታኒ ታ ኣዋኮኔ ሂንቴ ኣዋኮ፥ ታ ፆሳኮኔ ሂንቴ ፆሳኮ፥ ሲማና ጊስ› ጋዳ ኤንታው ኦዳ» ያጊስ።
JOH 20:18 ማግዴላ ማይራማ ጎዳ ቤዒዳይሳኔ ኢው ሄሳ ኢ ኦዲዲዳይሳ ባዳ ኢያ ታማሬታስ ኦዳሱ።
JOH 20:19 ዎጋ ዎዴ ኦማርሲ፥ ኢያ ታማሬቲ ኣይሁዴታስ ያዪዲ ካሪያ ጎርዲዲ ሺቂ ኡቲዳሺን፥ ዬሱሲ ዪዲ፥ ኤንታ ጊዶን ኤቂዲ፥ «ሳሮይ ሂንቴው ጊዶ» ያጊስ።
JOH 20:20 ሄሳ ጊዲ ሲሚዲ ባ ኩሺያኔ ባ ሚያ ኤንታ ቤሲስ። ኢያ ታማሬቲ ጎዳ ቤዒዳ ዎዴ ዳሮ ኡፋይቲዶሶና።
JOH 20:21 ዬሱሲ ዛሪዲ ኤንታኮ፥ «ሳሮይ ሂንቴው ጊዶ፤ ታ ኣዋይ ታና ኪቲዳይሳዳ ታኒካ ሂንቴና ኪታይስ» ያጊስ።
JOH 20:22 ሄሳ ጊዳፔ ጉዬ፥ ኤንታ ቦላ ኡፉ ጊዲ ፑኒስ። ቃሲ፥ «ጌሻ ኣያና ኤኪቴ።
JOH 20:23 ሂንቴ ኣቶ ጊዳ ኣሳ ናጋራይ ኣቶ ጌቴታና። ሂንቴ ኣቶ ጎናይሳታ ናጋራይ ኣቶ ጌቴቴና» ያጊስ።
JOH 20:24 ሺን ታማኔ ናምዑ ታማሬታፔ ኢሶይ፥ ዲዲሞሳ ጌቴቲያ ቶማሲ፥ ዬሱሲ ዪዳ ዎዴ ኤንታራ ዴና።
JOH 20:25 ሄሳ ጊሾ፥ ሃንኮ ኢያ ታማሬቲ ቶማሳኮ፥ «ኑኒ ጎዳ ቤዒዳ» ያጊዶሶና። ሺን ቶማሲ ኤንታኮ፥ «ሚሲማሬን ኢ ጫዴቲዳ ኢያ ኩሺያን ዴዒያ ቤታ ቤዖናኔ ሄ ቤታ ታ ቢራꬌን ቦቾና፥ ቃሲ ታ ኩሺያ ኢያ ሚያን ዬዳ ቤዖና ኣማኒኬ» ያጊስ።
JOH 20:26 ሳሚንታፌ ጉዬ፥ ዬሱሳ ታማሬቲ ቃሲካ ሶን ሺቂዲ ኡቲዶሶና፤ ቶማሲካ ኤንታራ ዴዔስ። ካሬይ ጎርዴቲዲ ዴዒሺን ዬሱሲ ዪዲ፥ ኤንታ ጊዶን ኤቂዲ፥ «ሳሮይ ሂንቴው ጊዶ» ያጊስ።
JOH 20:27 ሄሳፌ ጉዬ፥ ዬሱሲ ቶማሳኮ፥ «ታ ኩሺያ ኔ ቢራꬊያን ቦቻዳ ቤዓ። ቃሲ ኔ ኩሺያ ታ ሚያን ዬዳዳ ቤዓ፤ ሲꬎፓ፥ ኣማና» ያጊስ።
JOH 20:28 ቶማሲ ዛሪዲ፥ «ታ ጎዳው፥ ታ ፆሳው» ያጊስ።
JOH 20:29 ያቲን ዬሱሲ፥ «ኔኒ ታና ቤዒዳ ጊሾ ኣማናዳሳ፥ ሺን ታና ቤዖና ኣማኒዳይሳቲ ኣንጄቲዳይሳታ» ያጊስ።
JOH 20:30 ዬሱሲ ሃ ማፃፋን ፃፌቲቦና ሃራ ዳሮ ማላታታ ባ ታማሬታ ሲንꬃን ኦꬂስ።
JOH 20:31 ሺን ዬሱሲ ኢ ኪሪስቶሳ፥ ፆሳ ናዓ ጊዴይሳ ሂንቴ ኣማናና ሜላኔ ኣማኒዲ ኢያ ሱንꬃን ዴዖ ዴማና ሜላ ሄሲ ፃፌቲስ።
JOH 21:1 ሄሳፌ ጉዬ፥ ዬሱሲ ፂባርዮሳ ኣባ ማታን ባ ታማሬታስ ዛሪ ቆንጪስ። ኢ ኤንታው ሃይሳፌ ካሊዲ ዴዒያ ሃኖታን ቆንጪስ።
JOH 21:2 ሲሞን ጴፂሮሲ፥ ሜንቴ ጌቴቲያ ቶማሲ፥ ቃና ጋሊላፔ ዪዳ ናቲናዔሊ፥ ዛብዲዮሳ ናይቲኔ ዬሱሳ ታማሬታፔ ሃራ ናምዓቲ ኢሲፌ ዴዖሶና።
JOH 21:3 ሲሞን ጴፂሮሲ ኤንታኮ፥ «ታኒ ሞሎ ኦይካናው ባይስ» ያጊስ። ኤንቲ፥ «ኑካ ኔራ ባና» ያጊዲ፥ ዎጎሉዋ ጊዶ ጌሊዶሶና። ሺን ኤንቲ ሄ ቃማን ኣይቢ ሞሎካ ኦይኪቦኮና።
JOH 21:4 ዎንታ ጉራ ፃልቄይ ዶላናፔ ሲንꬄ፥ ዬሱሲ ኣባ ጋፃን ኤቂስ፥ ሺን ኢያ ታማሬቲ ዬሱሳ ጊዲዳይሳ ኤርቦኮና።
JOH 21:5 ዬሱሲ ኤንታኮ፥ «ታ ላጌቶ፥ ሞሎ ኦይኪቤኬቲ?» ያጊስ። ኤንቲ ዛሪዲ፥ «ኣይኮካ ኦይኪቦኮ» ያጊዶሶና።
JOH 21:6 ኢ ዛሪዲ፥ «ሂንቴ ጊቲያ ዎጎሉዋፔ ኡሻቻ ባጋራ ዬጊቴ፤ ጉꬃ ሞሎ ሂንቴ ኦይካና» ያጊስ። ሄሳ ጊሾ፥ ጊቲያ ኡሻቻ ባጋራ ዬጊዶሶና። ሞሎይ ዳሪዳ ጊሾ ጎቺዲ ኬሳናው ፆኔቲዶሶና።
JOH 21:7 ዬሱሲ ዶሲያ ታማሬይ ጴፂሮሳኮ፥ «ሃይሲ ጎዳ!» ያጊስ። ሲሞን ጴፂሮሲ ኢ ጎዳ ጊዳይሳ ሲዒዳ ዎዴ ካሎ ዴዒያ ጊሾ ባ ማዑዋ ማዒዲ ኣባ ጊዶ ጉፒ ጌሊስ።
JOH 21:8 ሺን ዎጎሉዋን ኣቲዳ ሃንኮ ታማሬቲ ሞሎይ ኩሚዳ ጊቲያ ጎቺዲ፥ ኣባፌ ጋፃ ኬዪዶሶና። ኤንቲ ኣባፌ ናምዑ ፄቱ ዋꬋ ሜላ ሃኮሶና።
JOH 21:9 ኤንቲ ኣባፌ ጋፃ ኬዪዳ ዎዴ ፂፋ ቦንቆን ሞሎይ ዴዔይሳኔ ኡይꬂ ቤዒዶሶና።
JOH 21:10 ዬሱሲ ኤንታኮ፥ «ሃዒ ሂንቴ ኦይኪዳ ሞሉዋፔ ጉꬃራ ሃሚቴ» ያጊስ።
JOH 21:11 ሲሞን ጴፂሮሲ ዎጎሉዋን ጌሊዲ፥ ፄታኔ ኢሻታማኔ ሄꬑ ዎጋ ሞሎቲ ኩሚዳ ጊቲያ ጎቺዲ ኣባፌ ጋፃ ኬሲስ። ሞሎይ ሄሳ ሜላ ዳሮ ጊዲን ጊቴይ ዳኬቲቤና።
JOH 21:12 ዬሱሲ ኤንታኮ፥ «ሃ ዪዲ ሚቴ» ያጊስ። ኢ ጎዳ ጊዴይሳ ኤንቲ ኤሪዳ ጊሾ ኢያ ታማሬታፔ ኢሶይካ፥ «ኔኒ ኦኔ?» ጊዲ ኢያ ኦይቻናው ሚኒዳይ ባዋ።
JOH 21:13 ዬሱሲ ዪዲ፥ ኡይꬃ ኤኪዲ ኤንታው ኢሚስ፤ ሞሉዋካ ሄሳዳ ኢሚስ።
JOH 21:14 ዬሱሲ ሃይቆፔ ዴንዲዲ ባ ታማሬታስ ቆንጪሺን ሃይሲ ሄꬓንꬆ።
JOH 21:15 ኤንቲ ሚዳፔ ጉዬ፥ ዬሱሲ ሲሞን ጴፂሮሳኮ፥ «ዮና ናዓው ሲሞና፥ ታና ሃይሳታፔ ኣꬃዳ ዶሳይ?» ያጊስ። ሲሞን ጴፂሮሲ፥ «ኤ ጎዳው፥ ታኒ ኔና ዶሴይሳ ኔ ኤራሳ» ያጊስ። ዬሱሲ ኢያኮ፥ «ታ ዶርሳ ማራታ ሄማ» ያጊስ።
JOH 21:16 ዬሱሲ ቃሲካ፥ «ዮና ናዓው ሲሞና፥ ታና ዶሳይ?» ያጊስ። ሲሞን ጴፂሮሲ፥ «ኤ ጎዳው፥ ታኒ ኔና ዶሴይሳ ኔ ኤራሳ» ያጊስ። ዬሱሲ፥ «ታ ዶርሳታ ሄማ» ያጊስ።
JOH 21:17 ዬሱሲ ሄꬓንꬆ፥ «ዮና ናዓው ሲሞና፥ ታና ዶሳይ?» ያጊስ። ዬሱሲ ሄꬓንꬆ ሲሞን ጴፂሮሳኮ፥ «ታና ዶሳይ?» ያጊዲ ኦይቺዳ ጊሾ ጴፂሮሲ ኣዛኒዲ፥ «ጎዳው፥ ኔኒ ኡባባ ኤራሳ፤ ታኒ ኔና ዶሴይሳ ኔ ኤራሳ» ያጊስ። ዬሱሲ፥ «ታ ዶርሳታ ሄማ።
JOH 21:18 ታኒ ኔው ቱማ ኦዳይስ፤ ኔኒ ናዓቴꬃን ዴዒያ ዎዴ ኔርካ ዳንጬታዳ፥ ኔ ኮዪዳ ሶ ባሳ። ሺን ኔ ጪሚዳ ዎዴ ኔ ኩሺያ ሚጫ ቤሳና። ሃሪ ዳንጪሳና፤ ኔ ዶሶና ሶ ኤፋና» ያጊስ።
JOH 21:19 ዬሱሲ ሄሳ ጴፂሮሲ ኣይ ሜላ ሃይቆ ሃይቂዲ፥ ፆሳ ቦንቺሳኔኮ ኤሪሳናው ጊስ። ሄሳ ጊዳፔ ጉዬ፥ ዬሱሲ ጴፂሮሳኮ፥ «ታና ካላ» ያጊስ።
JOH 21:20 ጴፂሮሲ ጉዬ ሲሚዲ፥ ዬሱሲ ዶሲያ ታማሬይ ባፔ ጉዬራ ዬይሳ ቤዒስ። ሄ ታማሬይ፥ ካሆ ሚያሶን ዬሱሳኮ ሺቂዲ፥ «ጎዳው፥ ኔና ኣꬂ ኢማናይ ኦኔ?» ጊዳይሳ።
JOH 21:21 ጴፂሮሲ ሄ ታማሪያ ቤዒዲ፥ «ጎዳው፥ ሃ ኣዴይ ቃሲ ዋናኔ?» ያጊዲ ዬሱሳ ኦይቺስ።
JOH 21:22 ዬሱሲ ኢያኮ፥ «ታኒ ያና ጋካናው ኢ ዳና ሜላ ታኒ ኮይኮ፥ ሄሲ ኔና ኣይ ሜቲዴ? ኔኒ ታና ካላ» ያጊስ።
JOH 21:23 ሄሳ ጊሾ፥ ሄ ታማሬይ ሃይቄና ጊያ ኦዳይ ኢሻታ ኡባ ጋኪስ። ሺን ዬሱሲ፥ «ታኒ ያና ጋካናው፥ ኢ ዳና ሜላ ታኒ ኮይኮ ኔና ኣይ ሜቲዴ?» ያጊሲፔ ኣቲን «ሃይቄና» ጊቤና።
JOH 21:24 ሃ ኦዳባ ማርካቲዳይኔ ሃይሳ ፃፊዳይ ሄ ታማሪያ። ኢያ ማርካቴꬃይ ቱማ ጊዴይሳ ኑኒ ኤሮስ።
JOH 21:25 ዬሱሲ ኦꬂዳ ሃራ ዳሮባይ ዴዔስ። ታ ቆፒን፥ ኡባባይ ሁዔን ሁዔን ፃፌቲዳኮ፥ ፃፌቲያ ማፃፋታስ ኩሜꬃ ኣላሜይ ዎꬃንው ጊዳናባ ዳኔና።
ACT 1:1 ቴዎፊሎሳ፥ ዬሱሲ ባ ኦሱዋ ኦይኪዳ ዎዴፔ ሳሎ ቢዳ ጋላሳ ጋካናው፥ ኦꬂዳባኔ ታማርሲዳባ ኡባ ታኒ ታ ኮይሮ ማፃፋን ፃፋስ። ሳሎ ባናፔ ሲንꬄ ኢ ባ ዶሪዳ ሃዋሬታ ጌሻ ኣያናን ኪቲስ።
ACT 1:3 ኢ ባ ዋያፔ ጉዬ ሃይቆፔ ዴንዲዳይሳ ሲꬌይ ባይና ቆንጪሲዲ ኤንታው ባና ቤሲስ። ኦይታሙ ጋላስ ኤንታው ቆንጪዲ ፆሳ ካዎቴꬃባ ኤንታ ታማርሲስ።
ACT 1:4 ኢሲ ዎዴ ኤንታራ ኢሲፌ ሚሼ ኤንታ ሃይሳዳ ያጊዲ ኪቲስ፡ «ታ ሂንቴው ኦዲዳ፥ ታ ኣዋይ ኢማና ጊዳ ኡፋይሳ ቃላ ናጊቴፔ ኣቲን ዬሩሳላሜፔ ኬዮፒቴ።
ACT 1:5 ኣይስ ጊኮ፥ ዮሃኒሲ ሃꬃን ፃማቂስ፥ ሺን ጉꬃ ዎዴፔ ጉዬ ጌሻ ኣያናን ሂንቴ ፃማቄታና» ያጊስ።
ACT 1:6 ሃዋሬቲ ዬሱሳራ ጋሄቲዳ ዎዴ ኢያኮ፥ «ጎዳው፥ ኢስራዔሌታስ ኔ ካዎቴꬃ ዛራና ዎዴይ ሃይሴ?» ያጊዲ ኦይቺዶሶና።
ACT 1:7 ዬሱሲ ኤንታኮ፥ «ታ ኣዋይ ባ ማታን ኦꬂያ ዎዲያኔ ላይꬃ ሂንቴ ኤራናው ዳንዳዔኬታ።
ACT 1:8 ሺን ጌሻ ኣያናይ ሂንቴ ቦላ ዎꬊያ ዎዴ ሂንቴ ዎልቃን ኩማና። ያኒ ሲሚዲ፥ ዬሩሳላሜን፥ ዪሁዳ ቢታ ኡባን፥ ሳማሬኒኔ ሳዓ ጋፃ ጋካናው ታው ማርካታ ጊዳና» ያጊስ።
ACT 1:9 ሄሳ ጊዳይሳፌ ጉዬ ኤንቲ ፄሊሺን፥ ꬎቁ ꬎቁ ጊዲ፥ ሳሉዋ ቢን ሻራይካ ኢያ ኤንታ ኣይፊያፔ ጌንꬂስ።
ACT 1:10 ዬሱሲ ቢያ ዎዴ ኤንቲ ሳሎ ቲሺ ኦꬂዲ ፄሊሺን፥ ቦꬃ ማዖ ማዒዳ ናምዑ ኣሳቲ ኣኬኮና ኤንታ ማታን ኤቂዲ፥
ACT 1:11 «ጋሊላ ኣሳው፥ ሳሎ ፄሊሼ፥ ሂንቴ ኣይስ ኤቂዴቲ? ሃ ሂንቴ ቤዒሺን ሳሎ ቢዳ ዬሱሲ ሄሳዳካ ሲሚዲ ያና» ያጊዶሶና።
ACT 1:12 ሄሳፌ ጉዬ፥ ሃዋሬቲ ሻማሆ ዴሪያፔ ዬሩሳላሜ ሲሚዶሶና። ሻማሆ ዴሬይ ዬሩሳላሜስ ማታን ዴዔስ።
ACT 1:13 ኤንቲ ዬሩሳላሜ ጌሊዲ፥ ባንታ ዴዒያ ቤሳ ፖቂያ ቦላ ኬዪዶሶና። ኤንቲካ፡ ጴፂሮሳ፥ ዮሃኒሳ፥ ያይቆባ፥ ኢንዲሪያሳ፥ ፊልጶሳ፥ ቶማሳ፥ ባርቶሎሚዮሳ፥ ማቶሳ፥ ኢልፊዮሳ ናዓ ያይቆባ፥ ባ ቢታስ ሚሼቲያ ሲሞናኔ ያይቆባ ናዓ ዪሁዳ።
ACT 1:14 ሃይሳቲ ኡባይ ማጫሳታራ፥ ዬሱሳ ኣዬ ማይራሚራኔ ዬሱሳ ኢሻታራ ኡባይ ኢሲ ዎዛናን ጊዲዲ ሚንꬂዲ ዎሶሶና።
ACT 1:15 ሄ ዎዴ ጴፂሮሲ ፄታኔ ላታማ ጊዲያ ኣማኒያ ኣሳይ ሺቂዳ ቤሳን ዴንዲ ኤቂዲ፥ ሃይሳዳ ያጊስ፡
ACT 1:16 «ኣሳው፥ ዬሱሳ ኦይኪዳይሳታ ካሌꬂዳ ዪሁዳባ ጌሻ ኣያናይ ካሴ ዳዊቴ ዶናን ኦዲዳ ፆሳ ቃላይ ፖሌታናው ቤሴስ።
ACT 1:17 ዪሁዲ ኑራ ኢሲፌ ሃ ኦሱዋ ኦꬃናው ዶሬቲዳ ኣሲ።»
ACT 1:18 ሺን ዪሁዲ ባ ኢታ ኦሱዋን ዴሚዳ ሚሼን ጋዴ ሻሚስ። ኢ ጉፋኒዲ ኩንዲን፥ ኢያ ኡሎይ ዳኬቲስ፤ ኢያ ማራጬይ ኡባይ ካሬ ኬዪስ።
ACT 1:19 ዪሁዳ ቦላ ሃኒዳባ ዬሩሳላሜን ዴዒያ ኣሳ ኡባይ ሲዒስ። ሄሳ ጊሾ፥ ሄ ጋዲያ ባንታ ቃላን ኣኬልዳማ (ሱꬃ ጋዴ) ጊዲ ፄጊዶሶና።
ACT 1:20 «ሄሲካ ማዝሙሬ ማፃፋን፥ ‹ኢያ ኬꬃይ ካሎ ኣቶ፤ ኦኒካ ኢያን ዴዖፖ። ቃሲ ኢያ ሹማቴꬃ ሃሪ ኤኮ› ጌቴቲ ፃፌቲስ።
ACT 1:21 «ሄሳ ጊሾ፥ ጎዳ ዬሱሲ ኑ ጊዶን ሲሜሬቲዳ ዎዴ ኡባን ኑራ ዴዔይሳታፔ፥
ACT 1:22 ቃሲ ፃማቂያ ዮሃኒሳ ዎዲያፔ ዶሚዲ ጎዳ ዬሱሲ ሳሎ ቢዳ ጋላስ ጋካናው ኑራ ዴዔይሳታፔ ኢሲ ኣሲ ኢያ ዴንዱዋስ ኑራ ማርካ ጊዳናው ቤሴስ» ያጊስ።
ACT 1:23 ሄሳ ጊሾ፥ ኣሳይ ዶሩዋስ ዮስፆሳ ጊያ ባርሳባሳ ጌቴቲያ ዮሴፋኔ ማቲያሳ ናምዓ ሺሺዶሶና።
ACT 1:24 ሄሳፌ ጉዬ፥ ፆሳ ዎሲሼ፥ «ኣሳ ኡባ ዎዛና ኤሪያ ጎዳው፥ ሃ ናምዓታፔ ኔ ኦና ዶሪዳኮ ኑና ቤሳ።
ACT 1:25 ዪሁዲ ባ ቤሳ ቢዲ፥ ኣጊዳ ኦሱዋኔ ሃዋሬቴꬃ ኦሱዋ ኤካና ሜላ ሃይሳታፔ ኑስ ቆንጪሳ» ያጊዶሶና።
ACT 1:26 ኤንታ ቦላ ሳማ ዬጊዶሶና። ሳማይ ማቲያሳ ቦላ ዎꬊን ማቲያሲ ታማኔ ኢሲ ሃዋሬታ ቦላ ጉዤቲስ።
ACT 2:1 ጴንፄቆስፄ ጊያ ጋላሳይ ጋኪዳ ዎዴ ኣማኒያ ኣሳ ኡባይ ኢሲፌ ኢሲ ቤሳን ሺቂዲ ዴዖሶና።
ACT 2:2 ቆፖና ዎልቃማ ጎቴዳ ጉሚያ ጉንꬃይ ኣኬኮና ሳሎፔ ዪዲ ኤንቲ ዴዒያ ኬꬃ ኩሚስ።
ACT 2:3 ቃሲ ታማ ላጮ ዳኒያ ኢንፃርሳቲ ኤንታው ቤንቲሼ፥ ሻኬቲ ሻኬቲ ኤንታ ኡባ ቦላ ዎꬊዶሶና።
ACT 2:4 ኤንቲ ኡባይ ጌሻ ኣያናን ኩሚዲ ዱማ ዱማ ዶናን ኦዴታና ሜላ ጌሻ ኣያናይ ኤንታ ዳንዳዒሲን ሃሳያ ዶሚዶሶና።
ACT 2:5 ሄ ዎዴ ቢታ ኡባፌ ዪዳ ፆሳ ያያ ኣይሁዴቲ ዬሩሳላሜን ዴዖሶና።
ACT 2:6 ሄ ጉንꬃ ሲዒዳ ዎዴ ዳሮ ኣሳይ ሺቂዶሶና። ኣማኒያ ኣሳይ ኤንታ ቃላን ኦዴቲሺን ሲዒዳ ጊሾ
ACT 2:7 ማላሌቲዲ፥ «ሃ ኦዴቲያ ኣሳ ኡባይ ጋሊላ ኣሴ ጊዶኮናዬ?
ACT 2:8 ያቲን፥ ኑኒ፥ ኑ ዬሌቲዳ ቢታ ዶናን ኤንቲ ኦዴቲሺን ዋኒዲ ሲዓናው ዳንዳዒዶ?
ACT 2:9 ኑኒ ጳርፄን፥ ሜዶናን፥ ኤላሜን፥ ናምዑ ሻፋታፔ ጊዶን ዴዔይሳቲ፥ ዪሁዳን፥ ቃጳዶቂያን፥ ጳንፆሳን፥ ኢሲያን፥
ACT 2:10 ጲርጌን፥ ጲንፊሌን፥ ጊብፄን፥ ቃሬና ማታን ዴዒያ ሊቢያን ዴዔይሳታ። ኑፔ ባጋቲካ ሮሜፔ ዪዳ ኣሳታ።
ACT 2:11 ኣይሁዴቲኔ ኣይሁዴቴꬃ ኣማኖ ጌሊዳ ኣሳቲ፥ ቃርፄሳኔ ኣራቤ ኣሳቲ፥ ፆሳይ ኦꬂዳ ጊታ ኦሱዋ ኑ ቃላን ኦዴቲሺን ሲዖስ» ያጊዶሶና።
ACT 2:12 ኡባይ ማላሌቲዲ፥ ጋናባ ꬋዪዲ ዎሊኮ፥ «ላ ሃይሲ ኣይ ጉሴ?» ያጊዶሶና።
ACT 2:13 ሺን ሃራቲ፥ «ሃይሳቲ ኡዪዲ ማꬆቲዶሶና» ያጊዲ ቄልቂሲዶሶና።
ACT 2:14 ሺን ጴፂሮሲ፥ ታማኔ ኢሲ ሃዋሬታራ ዴንዲ ኤቂዲ፥ ባ ቃላ ꬎቁ ኦꬂዲ፥ ኤንታው ሃይሳዳ ያጊዲ ኦዲስ፡ «ኣይሁዴቶ፥ ዬሩሳላሜን ዴዒያ ኡባቶ፥ ታኒ ኦዴይሳ ሲዒቴ።
ACT 2:15 ዎንታፌ ሄꬑ ሳቴ ጊዲያ ጊሾ ሂንቴ ቆፔይሳዳ ሃ ኣሳቲ ማꬆቲቦኮና፤ ሄሲ ሂንቴው ኤሬቶ።
ACT 2:16 ሺን ሃይሲ ሃኒዳይ ናቢያ ኢዩዔሊ ኦዲዳይሲ ፖሌታና ሜላሳ።
ACT 2:17 « ‹ፆሳይ፥ ዎዲያ ዉርሴꬃን ሃይሳዳ ሃናና ያጌስ፡ ታኒ ኣሳ ኡባ ቦላ ታ ኣያና ጉሳና። ሂንቴ ኣዴ ናይቲኔ ማጫ ናይቲ፥ ቲንቢቴ ኦዳና። ሂንቴ ያላጋቲ ቆንጬꬂ ቤዓና፤ ሂንቴ ጪማቲ ኣሙሆ ኣሙሃና።
ACT 2:18 ሄ ጋላሳታን ታና ኣማኒያ ኣዴ ኣይሌታ ቦላኔ ማጫ ኣይሌታ ቦላ ታኒ ታ ኣያና ጉሳና፤ ኤንቲ ቲንቢቴ ኦዳና።
ACT 2:19 ቃሲ ታኒ ቦላ ሳሉዋን ኦራꬃባ፥ ጋርሳ ሳዓንካ ማላ ቤሳና። ሱꬂ፥ ታሚኔ ዎልቃማ ጫጋኒ ቤንታና።
ACT 2:20 ጊታኔ ቦንቾ ጊዲዳ ጎዳ ጋላሳይ ጋካናፔ ሲንꬄ ኣዋይ ꬉማና፤ ኣጌናይካ ሱꬂ ዳናና።
ACT 2:21 ሄ ዎዴ ሄሳዳ ሃናና፤ ጎዳ ሱንꬃ ፄጊያ ኦኒካ ኣታና› ያጊስ።
ACT 2:22 «ኢስራዔሌ ኣሳው፥ ሃ ቃላ ሲዒቴ። ናዚሬቴ ዬሱሳ ኦናቴꬃይ፥ ፆሳይ ሂንቴ ጊዶን ኦꬂዳ ዎልቃማ ኦሱዋኒኔ ማላታታን ሂንቴው ቆንጮይሳ ሂንቴ፥ ሂንቴ ሁዔን ኤሬታ።
ACT 2:23 ፆሳ ካሴ ኤራኒኔ ኢያ ሼኒያን ዬሱሲ ሂንቴው ኣꬊ ኢሜቲስ። ሂንቴ ኢያ ናጋራንቾቲ ማስቃሊያ ቦላ ካቂዲ ዎꬋና ሜላ ኣꬂ ኢሚዴታ።
ACT 2:24 ሺን ፆሳይ ሃይቆ ዎልቃ ዲጊዲ ኢያ ዴንꬂስ። ሄሳ ጊሾ፥ ሃይቆይ ኢያ ኦይካናው ዳንዳዒቤና።
ACT 2:25 ዳዊቴይ ኢያባ ኦዲሼ፥ ‹ታኒ ያርኮና ሜላ፥ ጎዳይ ታ ኡሻቻን ዴዔስ። ጎዳ ኡባ ዎዴ ታ ማታን ቤዓይስ።
ACT 2:26 ሄሳ ጊሾ፥ ታ ዎዛናይ ኡፋይቲስ፤ ታ ኢንፃርሳን ኡፋይሲ ኩሚስ፤ ሃይቂያ ታ ኣሳቴꬃይ ኡፋይሳን ዳና።
ACT 2:27 ኣይስ ጊኮ፥ ታ ሼምፑዋ ሲዖሌን ኣጋካ። ቃሲ ኔ ጌሻ ናዓ ኣሃ ዎቂሳካ።
ACT 2:28 ኔኒ ታና ዴዖ ኦጊያ ኤሪሳዳሳ። ኔኒ ታራ ዴዔይሳን ታ ኡፋይሳይ ኩሜꬂ ጊዴስ› ያጊስ።
ACT 2:29 «ኣሳው፥ ኑ ኣዋ ዳዊቴባ ታ ሂንቴው ጌሻዳ ኦዳና። ዳዊቴይ ሃይቂዲ ሞጌቲስ፤ ኢያ ዱፎይ ሃቺ ጋካናው ኑ ማታን ዴዔስ።
ACT 2:30 ዳዊቴይ ናቤ ጊዲዳ ጊሾ ፆሳይ ኢያ ሼሻፔ ኢሱዋ ኢያ ካዎቴꬃ ኣራታ ቦላ ኡቲሳናው ኢያው ጫቂዳ ጫቁዋ ኤሬስ።
ACT 2:31 ሄሳ ጊሾ፥ ኪሪስቶሳ ዴንዱዋ ሲንꬄ ፄሊዲ፥ ‹ኢያ ሼምፖይ ሲዖሌን ኣቲቤና፤ ኢያ ኣሳቴꬃይካ ዎቂቤና› ጊዲ ኦዲስ።
ACT 2:32 «ፆሳይ፥ ሃ ዬሱሳ ሃይቁዋፔ ዴንꬂዳይሳስ ኑኒ ኡባይ ማርካ።
ACT 2:33 ሄሳ ጊሾ፥ ፆሳይ ባራ ሃራና ሜላ ባፔ ኡሻቻ ባጋራ ኢያ ꬎቁ ꬎቁ ኦꬂዲ፥ ኢያው ኢማና ጌቴቲዳ ጌሻ ኣያና ኤኪዲ፥ ሃይሳ ሂንቴ ሃዒ ቤዔይሳኔ ሲዔይሳ ኑ ቦላ ጉሲስ።
ACT 2:34 ጋሶይካ፥ ዳዊቴይ ባ ሁዔን ሳሎ ቢቤናሺን ያጊስ፡ ‹ጎዳይ፥ ታ ጎዳ፥ «ታኒ ኔ ሞርኬታ ኔ ቶሆይ ዬꬊያሶ ኦꬃና ጋካናው ሃይሳን ታፔ ኡሻቻ ባጋን ኡታ» ጊስ› ያጊስ።
ACT 2:36 «ሄሳ ጊሾ፥ ሃ ሂንቴ ማስቃሊያ ቦላ ካቂዳ ዬሱሳ፥ ፆሳይ ጎዳኔ ኪሪስቶሳ ኦꬂዳይሳ ኢስራዔሌ ኣሳ ኡባይ ቱማ ኤሮ» ያጊስ።
ACT 2:37 ኣሳይ ጴፂሮሲ ጊዳይሳ ሲዒዳ ዎዴ ባንታ ዎዛናን ቦሼቲዲ ጴፂሮሳኔ ሃንኮ ሃዋሬታኮ፥ «ኢሻቶ፥ ያቲን ኑኒ ኣይ ኦꬂኖ?» ያጊዶሶና።
ACT 2:38 ጴፂሮሲ ኤንታኮ፥ «ሂንቴ ናጋራይ ኣቶ ጌቴታና ሜላ ናጋራፔ ሲሚዲ፥ ሂንቴ ኢሶይ ኢሶይ ዬሱስ ኪሪስቶሳ ሱንꬃን ፃማቄቲቴ። ፆሳይ ኢሚያ ጌሻ ኣያና ሂንቴ ኤካና።
ACT 2:39 ጋሶይካ ፆሳይ ኢማና ጊዳ ኡፋይሳ ቃላይ ሂንቴስ፥ ሂንቴ ናይታሲኔ ጎዳይ ኑ ፆሳይ ባኮ ፄጊያ ሃሆን ዴዒያ ኡባሳ» ያጊስ።
ACT 2:40 ጴፂሮሲ ኤንታው ሃራ ቃላካ ጉጂ ማርካቲዲ፥ «ሃ ዎዲያ ጌላ ኣሳ ቦላ ያናው ዴዒያ ፒርዳፌ ሂንቴ ሁዒያ ኣሺቴ» ያጊዲ ዞሪስ።
ACT 2:41 ጴፂሮሲ ኦዲዳይሳ ኤኪዳይሳቲ ፃማቄቲዶሶና። ሄ ጋላስ ሄꬑ ሙኩሉ ጊዲያ ኣሳይ ኣማኒዶሶና።
ACT 2:42 ኤንቲ ሃዋሬታ ቲሚርቲያን፥ ኢሲፌቴꬃን፥ ኡይꬃ ሙሳኒኔ ፆሳ ዎሳን ሚኖሶና።
ACT 2:43 ሃዋሬታ ኩሼን ዳሮ ኦራꬃባይኔ ማላቲ ኦሴቲያ ጊሾ ኣሳ ኡባይ ያዪዶሶና።
ACT 2:44 ኣማኒዳ ኡባይ ኢሲፌ ዴዖሶና፤ ባንታው ዴዒያባ ኡባ ኢሲፌ ሻኬቶሶና።
ACT 2:45 ኤንቲ ባንታው ዴዒያባ ባይዚዲ ሚሺያ ኢሱዋስ ኢሱዋስ ኮሺዳ ሜላ ሻኮሶና።
ACT 2:46 ኡባ ጋላስ ኢሲ ዎዛናን ጊዲዲ ፆሳ ኬꬃን ሺቆሶና። ባንታ ኬꬃን ኢሶይ ኢሱዋ ፄጊዲ ኡፋይሳኒኔ ኣሽኬ ዎዛናን ካꬃ ሞሶና።
ACT 2:47 ፆሳ ጋላቲሼ ኣሳ ኡባን ሳቤቲዶሶና። ጎዳይ ኣቴይሳታ ጋላስ ጋላስ ኤንታ ቦላ ጉጄስ።
ACT 3:1 ኢሲ ጋላስ ጴፂሮሲኔ ዮሃኒሲ ፆሳ ዎሳናው ኡዱፉን ሳቴን ፆሳ ኬꬂ ቢዶሶና።
ACT 3:2 ዬሌቶሶፔ ዶሚዲ ዎቤ ጊዲዳ ኢሲ ኣዴይ ፆሳ ኬꬂ ጌሊያ ኣሳፔ ሚሼ ዎሳና ሜላ ኡባ ዎዴ ሎዖ ጊያ ፆሳ ኬꬃ ፔንጊያን ኤሂዲ ዎꬆሶና።
ACT 3:3 ሄ ዎቤ ኣዴይ ጴፂሮሲኔ ዮሃኒሲ ፆሳ ኬꬂ ጌላና ሃኒሺን ቤዒዲ ኤንታ ሚሼ ዎሲስ።
ACT 3:4 ኤንቲካ ኢያ ጫዲ ፄሊዲ፥ «ኑኮ ሃ ፄላ» ያጊዶሶና።
ACT 3:5 ዎቤ ኣዴይ ኤንታፌ ኣይኮ ኤካና ዳኒን ኤንታኮ ፄሊስ።
ACT 3:6 ሺን ጴፂሮሲ ኢያኮ፥ «ታው ሚሼይ ባዋ፥ ሺን ታው ዴዒያባ ታኒ ኔው ኢማና። ናዚሬቴ ዬሱስ ኪሪስቶሳ ሱንꬃን ዴንዳዳ ሃሙታ» ያጊስ።
ACT 3:7 ሄሳፌ ጉዬ፥ ዎቤ ኣዲያ ኡሻቻ ኩሺያ ኦይኪዲ ዴንꬂስ። ኤሌሲዲ ኢያ ቶሆይኔ ቂንጫፊሌይ ሚኒ ኣጊስ።
ACT 3:8 ኣዴይ ጉፒዲ ዴንዲ ኤቂስ። ጌዴኔ ሃ ሃሙꬂ ዶሚስ። ሄሳፌ ጉዬ፥ ሃሙቲሼ፥ ጉፒሼኔ ፆሳ ጋላቲሼ ኤንታራ ኢሲፌ ፆሳ ኬꬂ ጌሊስ።
ACT 3:9 ኢ ሃሙቲሺኒኔ ፆሳ ጋላቲሺን ኣሳ ኡባይ ኢያ ቤዒዶሶና።
ACT 3:10 ቤዒዳ ኡባይ ሚሼ ዎሳናው ሎዖ ጊያ ፆሳ ኬꬃ ፔንጌን ኡቲዳይሲ ኢያ ጊዲዳይሳ ኤሪዶሶና፤ ኢ ሃኒዳባ ቤዒዲ ማላሌቲዶሶና።
ACT 3:11 ኣዴይ ጴፂሮሳፔኔ ዮሃኒሳፔ ዱፂኬ ጊዲ ኦይኪዲ ዴዒሺን ኣሳ ኡባይ ማላሌቲዲ፥ ሶሎሞኔ ባራንዳ ጊያሶን ኢሲፌ ኤንታኮ ዎፂዶሶና።
ACT 3:12 ጴፂሮሲ ኣሳ ቤዒዳ ዎዴ ኣሳኮ፥ «ኢስራዔሌ ኣሳው፥ ኣይስ ሃይሳን ማላሌቴቲ? ዎይኮ ኣይስ ኑና ጫዲ ፄሌቲ? ኑኒ ኑ ዎልቃን ዎይኮ ኑ ፂሎቴꬃን ሃ ኣዲያ ሃሙꬂዳባ ሂንቴው ዳኒ?
ACT 3:13 ኣብራሃሜ፥ ዪሳቃ፥ ያይቆባ ፆሳይ፥ ኑ ኣዋታ ፆሳይ፥ ባ ናዓ ዬሱሳ ቦንቺስ። ሺን ሂንቴ ሃይቆስ ኣꬂ ኢሚዳይሳ ጲላፆሲ ቢላናው ኮዪንካ ሂንቴ ኢያ ሲንꬃን፥ ‹ኑኒ ኢያ ኤሮኮ› ያጊዴታ።
ACT 3:14 ሂንቴ ጌሻኔ ፂሉዋ፥ ‹ኑኒ ኢያ ኤሮኮ› ጊዲ፥ ሼምፖ ዎꬊዳይሳ ሂንቴው ቢላና ሜላ ጲላፆሳ ዎሲዴታ።
ACT 3:15 ዴዑዋ ኢሜይሳ ሂንቴ ዎꬊዴታ፥ ሺን ፆሳይ ሃይቆፔ ኢያ ዴንꬂስ። ሄሳስ ኑኒ ማርካ።
ACT 3:16 ሃ ሂንቴ ቤዔይሲኔ ኤሪያ ኣዴይ ፓፂዲ ሚኒዳይ ዬሱሳ ሱንꬃን ኣማኒዳይሳና። ሃ ሂንቴ ኡባ ሲንꬃን ኢያ ሃይሳዳ ፓꬂዳይ ኢ ዬሱሳ ኣማኒዳ ጊሾሳ።
ACT 3:17 «ሃዒካ ታ ኢሻቶ፥ ሂንቴካ ሂንቴና ካሌꬄይሳታዳ፥ ኤሮና ኦꬂዳይሳ ታኒ ኤራይስ።
ACT 3:18 ሺን ፆሳይ ቤኒ ናቤታ ኡባ ዶናን፥ ‹ኪሪስቶሲ ዋዬ ኤካናው ቤሴስ› ያጊዳይሲ ሃይሳዳ ፖሌታና ሜላ ኦꬂስ።
ACT 3:19 ሂዛ፥ ፆሳይ ሂንቴ ናጋራ ኣቶ ጋና ሜላ ጎዳኮ ሲሚቴ።
ACT 3:20 ጎዳ ማታፔ ሚንꬄꬆ ዎዴይ ሂንቴው ያና። ፆሳይ ኪሪስቶሳ ጊዳና ሜላ ሲንꬃቲዲ ዶሪዳ ዬሱሳ ሂንቴው ዬዳና።
ACT 3:21 ፆሳይ ባ ጌሻ ናቤታ ዶናን ቤኒ ኦዲዳይሳ ሜላ ኡባባይ ኦራፂያ ዎዴይ ጋካናው ዬሱሲ ሳሎን ጋምዓናው ቤሴስ።
ACT 3:22 ሙሴይ፥ ‹ጎዳ ፆሳይ ታና ዴንꬂዳይሳ ሜላ ሂንቴ ጊዶፌ ሂንቴው ናቤ ዴንꬃና። ሂንቴ ኢ ጌይሳ ኡባ ሲዒቴ።
ACT 3:23 ሄ ናቤይ ኦዴይሳ ሲዖና ኣሲ ኦኒካ ኣሳ ጊዶፌ ሻኬቲዲ ꬋዮ› ያጊስ።
ACT 3:24 «ቃሲ ሳሙዔላፔ ዶሚዲ ዴዒያ ናቤቲ ኡባይ ሃ ዎዲያባ ኦዲዶሶና።
ACT 3:25 ሂንቴ ናቤታ ናይታ፤ ቃሲ ፆሳይ ኣብራሃሜስ፥ ‹ሳዓን ዴዒያ ኣሳ ኡባ ታኒ ኔ ሼሻ ባጋራ ኣንጃና› ያጊዲ ኑ ኣዋታስ ጌሊዳ ቃላ ላቲያ ናይታ።
ACT 3:26 ፆሳይ ሂንቴና ኡባ ሂንቴ ኢታ ኦጊያፔ ዛሪዲ ኣንጃና ሜላ ባ ናዓ ዴንꬂዲ ሂንቴው ኮይሮ ዬዲስ» ያጊስ።
ACT 4:1 ጴፂሮሲኔ ዮሃኒሲ ኣሳስ ኦዲሺን ካሂኔ ሃላቃቲ፥ ፆሳ ኬꬃ ናጌይሳታ ሃላቃይኔ ሳዱቃዌቲ ኤንታኮ ዪዶሶና።
ACT 4:2 ኤንቲ ዬሱሲ ሃይቆፔ ዴንዶይሳኔ ኢያ ጋሶን ሃይቆፔ ዴንዶይ ዴዔይሳ ኣሳ ታማርሲዳ ጊሾ ዪሎቲዶሶና።
ACT 4:3 ሄሳ ጊሾ፥ ኤንታ ኦይኪዲ ሳዓይ ኦማርሲዳ ጊሾ ዎንታና ጋካናው ቃሾ ኬꬂ ጌልሲዶሶና።
ACT 4:4 ሺን ቃላ ሲዒዳይሳታፔ ዳሮቲ ኣማኒዶሶና። ኣማኒዳ ኣዴ ኣሳ ታይቦይ ኢቻሹ ሙኩሉኮ ቢስ።
ACT 4:5 ዎንቴꬃ ጋላስ ዴሪያ ሃሬይሳቲ፥ ጪማቲኔ፥ ሂጌ ኣስታማሬቲ ዬሩሳላሜን ሺቂዶሶና።
ACT 4:6 ሄ ኣሳ ጊዶን ካሂኔ ሃላቃይ ሃኒ፥ ቃያፊ፥ ዮሃኒሲ፥ ኢስኪንዲሬይኔ ካሂኔ ሃላቃ ሶ ኣሳቲ ኡባይ ዴዖሶና።
ACT 4:7 ሃዋሬታ ባንታ ሲንꬃን ኤሲዲ፥ «ኣይቢ ዎልቃን ዎይኮ ኦዴ ሱንꬃን ሃይሳ ሂንቴ ኦꬂዴቲ?» ያጊዲ ኦይቺዶሶና።
ACT 4:8 ሄ ዎዴ ጴፂሮሲ ጌሻ ኣያናን ኩሚዲ፥ «ዴሪያ ሃሬይሳቶ፥ ጪማቶ፥
ACT 4:9 ሃቺ ሃ ዎቤ ኣዲያስ ኦሴቲዳ ሎዖ ኦሱዋሲኔ ኢ ዋኒዲ ፓፂዳኮ ሂንቴ ኑና ኦይቺኮ፥
ACT 4:10 ማስቃሊያ ቦላ ሂንቴ ካቂን፥ ፆሳይ ሃይቆፔ ዴንꬂዳ ናዚሬቴ ዬሱስ ኪሪስቶሳ ሱንꬃን ሃ ኣዴይ ፓፂዲ ሂንቴ ሲንꬃን ኤቂዳይሲ ሂንቴዉኔ ኢስራዔሌ ኣሳ ኡባስ ኤሬቶ።
ACT 4:11 ‹ጊምቤይሳቲ ቦሪዲ ኢፂዳ ሹቻይ፥ ጎዳ ፃጱዋ ሚንꬂያ፥ ኡባፌ ኣꬊያ ሹቹ ጊዲስ፤ ሄ ሹቻይ ዬሱሳ።›
ACT 4:12 ሄሳ ጊሾ፥ ኣቶቴꬂ ኢያ ባጋራፔ ኣቲን ሃራ ኦዴ ባጋራካ ባዋ። ኑኒ ኢያ ሱንꬃን ኣታና ሜላ ኣሳ ኡባስ ፆሳይ ሳሎፔ ጋርሳን ኢሚዳ ሃራ ሱንꬂ ባዋ» ያጊስ።
ACT 4:13 ሺቂዳ ኣሳይ ጴፂሮሲኔ ዮሃኒሲ ሚኒዳ ሚኖቴꬃ ቤዒዳ ዎዴ ኤንቲ ታማሪቦና ጮ ኣሲ ጊዲዳይሳ ኣኬኪዲ ማላሌቲዶሶና፤ ኤንቲ ዬሱሳራ ዴዔይሳ ኤሪዶሶና።
ACT 4:14 ቃሲ ፓፂዳ ኣዴይ ጴፂሮሳራኔ ዮሃኒሳራ ኤቂዳይሳ ኣሳይ ቤዒዲ ጊያባ ꬋዪዶሶና።
ACT 4:15 ሺን ጴፂሮሳኔ ዮሃኒሳ ካሬ ኬያና ሜላ ኦꬂዲ ባንታ ጊዶን፥
ACT 4:16 «ሃ ኣሳታ ኑ ኣይ ኦꬂኖ? ኤንታ ኩሼን ኦሴቲዳ ጊታ ማላታይ ዬሩሳላሜን ዴዒያ ኡባስ ቤንቴስ። ኑኒ ሄሳ ኤሮኮ ጋናው ዳንዳዖኮ።
ACT 4:17 ሺን ሃ ኦዳይ ኣሳ ጊዶን ላሌቶና ሜላ ሂዛፔ ጉዬ ሃ ኣሳቲ ዬሱሳ ሱንꬃን ኦዴስካ ኦዶና ሜላ ሚንꬂዲ ናጊሳና» ያጊዲ ዞሬቲዶሶና።
ACT 4:18 ኤንታ ፄጊዲ፥ ዬሱሳ ሱንꬃን ሂዛፔ ኦዶና ሜላ ዎይኮ ታማርሶና ሜላ ኪቲዶሶና።
ACT 4:19 ሺን ጴፂሮሲኔ ዮሃኒሲ ኤንታኮ ዛሪዲ፥ «ፆሳስ ኪቴታናይሳፌኔ ሂንቴው ኪቴታናይሳፌ ፆሳ ሲንꬃን ኣዉሲ ሎዖኮ ኣኔ ሂንቴ ፒርዲቴ።
ACT 4:20 ኑኒ ቤዒዳባኔ ሲዒዳባ ኦዶና ኣጋናው ዳንዳዖኮ» ያጊዶሶና።
ACT 4:21 ቢታ ጪማቲኔ ዴሪያ ሃሬይሳቲ ካሴፔ ሚንꬂ ናጊሲዲ ኤንታ ዬዲ ኣጊዶሶና። ኣሳይ ሃኒዳባስ ፆሳ ጋላቲያ ጊሾ ኤንታ ሴራናው ዳንዳዒቦኮና።
ACT 4:22 ሄ ማላታን ሃርጊያፌ ፓꬂዳ ኣዲያስ ላይꬃይ ኦይታማፔ ኣꬊስ።
ACT 4:23 ጴፂሮሲኔ ዮሃኒሲ ቢርሼቲዲ ባንታ ዳቦታኮ ቢዲ፥ ካሂኔ ሃላቃቲኔ ጪማቲ ባንታኮ ጊዳባ ኡባ ኤንታው ኦዲዶሶና።
ACT 4:24 ኤንቲ ሄሳ ሲዒዳ ዎዴ ኢሲ ዎዛናን ጊዲዲ ፆሳ ሃይሳዳ ያጊዲ ዎሲዶሶና፡ «ኡባ ሃሪያ ጎዳው፥ ሳሉዋ፥ ሳዓ፥ ኣባኔ ኤንታ ጊዶን ዴዒያ ኡባባ ሜꬊዳይሶ፥
ACT 4:25 ኔኒ ኔ ኣይሊያ፥ ኑ ኣዋ ዳዊቴ ዶናን ጌሻ ኣያናን፥ ‹ዴሬይ ኣይስ ዪሎቲዶና? ኣሳይ ኣይስ ጮ ማቄቲዶና?
ACT 4:26 ሳዓ ካዎቲኔ ዴሪያ ሃሬይሳቲ ኢሲፌ ጎዳ ቦላኔ ኪሪስቶሳ ቦላ ዴንዲዶሶና› ያጋዳሳ።
ACT 4:27 «ቱማካ፥ ሄሮዲሲኔ ጴንፄ ጲላፆሲ ኣይሁዴ ጊዶና ኣሳራኔ ኢስራዔሌ ኣሳራ ኔ ዶሪዳ ኔ ጌሻ ናዓ ዬሱሳ ቦላ ዴንዳናው ሃ ካታማን ሺቂዶሶና።
ACT 4:28 ቃሲ ኔኒ ኔ ዎልቃኒኔ ኔ ሼኒያን ኦꬃና ጋዳ ቆፓ ኡቲዳባ ኡባ ፖሊዶሶና።
ACT 4:29 ሃዒካ ጎዳው፥ ኤንታ ማንዴꬃ ቤዓ፤ ኑኒ ኔ ኣይሌቲ ኔ ቃላ ኩሜꬃ ዎዛናን ኦዳና ሜላ ኑና ዳንዳዒሳ።
ACT 4:30 ኔ ጌሻ ናዓ ዬሱሳ ሱንꬃን ሃርጋንቾታ ፓꬃናው፥ ኦራꬃባይኔ ማላታቲ ኦሴታና ሜላ ኔ ኩሺያ ሚጫ» ጊዲ ዎሲዶሶና።
ACT 4:31 ኤንቲ ፆሳ ዎሲዳፔ ጉዬ ሄ ኤንቲ ሺቂዳሶይ ቃፂስ። ኤንታ ኡባን ጌሻ ኣያኒ ኩሚን ፆሳ ቃላ ሚኖቴꬃን ኦዲዶሶና።
ACT 4:32 ኣማኔይሳቲ ኡባይ ቆፋኒኔ ዎዛናን ኢሲኖ ጊዲዶሶና። ኤንቲ ባንታው ዴዒያባ ታባ ጎናሺን ኢሲፌ ሻኬቶሶና።
ACT 4:33 ሃዋርቲ ጎዳ ዬሱሲ ሃይቆፔ ዴንዲዳይሳ ጊታ ዎልቃን ማርካቶሶና። ፆሳይ ኤንታ ኡባስ ኣꬎ ኬሃቴꬃ ዳርሲዲ ኢሚስ።
ACT 4:34 ቢቲ ዎይኮ ኬꬂ ዴዔይሳቲ ኡባይ ባይዚ ኤኪዳ ሚሺያ ኤሂያ ጊሾ ኣማኔይሳታ ጊዶን ሜቶታንቾይ ኢሶይካ ባዋ።
ACT 4:35 ሚሺያ ኤሂዲ ሃዋሬታስ ኢሞሶና፤ ሄ ሚሺያ ኢሱዋስ ኢሱዋስ ኮሼይሳዳ ሻኪ ሻኪ ኢሜስ።
ACT 4:36 ቆጲሮሳ ጊያ ቤሳን ዬሌቲዳ ዮሴፋ ጊያ ሌዌ ሼሻፔ ጊዲዳ ኢሶይ ዴዔስ። ኢያ ሱንꬃ ሃዋሬቲ ባርናባሳ (ሚንꬄꬆ ናዓ) ጊዶሶና።
ACT 4:37 ባርናባሲ ባው ዴዒያ ቢታ ባይዚዲ ሚሺያ ኤሂዲ ሃዋሬታስ ኢሚስ።
ACT 5:1 ኢሲ ሃናኒያ ጊያ ኣዴይ ባ ማቼ ሳጲሪራ ጋዴ ባይዚስ።
ACT 5:2 ሄ ባይዚዳ ሚሺያፔ ባ ማቺያ ኤሪሺን ባጋ ኣሺዲ፥ ኣቲዳይሳ ኤሂዲ ሃዋሬታስ ኢሚስ።
ACT 5:3 ሺን ጴፂሮሲ ሃናኒያኮ፥ «ኔኒ ጌሻ ኣያና ጪማና ሜላኔ ጋዲያ ባይዚዳ ሚሺያፔ ሻካዳ ኣሻና ሜላ ፃላሄይ ኔ ዎዛናን ኣይስ ጌሊዴ?
ACT 5:4 ኔኒ ባይዛናፔ ካሴ ጋዴይ ኔባ ጊዴኔዬ? ቃሲ ኔኒ ባይዛ ሲሚንካ ሚሼይ ኔባ ጊዴኔዬ? ያቲን፥ ሄሳ ሜላባ ኦꬃናው ኣይስ ኔ ዎዛናን ቆፓዲ? ኔኒ ፆሳ ቦላ ዎርዶታዳሳፔ ኣቲን ኣሳ ቦላ ዎርዶታባካ» ያጊስ።
ACT 5:5 ሃናኔይ ሄ ቃላ ሲዒዳ ሜላ ኩንዲዲ ሃይቂስ፤ ሄሳ ሲዒዳ ኡባይ ዳሮ ያዪስ።
ACT 5:6 ናዓቴꬃ ኣሳቲ ሶ ጌሊዲ ኢያ ኣሃ ፃፂዲ ኤፊዲ ሞጊዶሶና።
ACT 5:7 ሄꬑ ሳቴፔ ጉዬ ሃናኒያ ማቺያ ሄሳ ኤሮና ዴዓሼ ጴፂሮሲ ዴዒያሱዋ ጌላሱ።
ACT 5:8 ጴፂሮሲ ኢኮ፥ «ሂንቴ ጋዲያ ሃይሳ ሜላ ሚሼስ ባይዚዴቲ? ኣኔ ታው ኦዳ» ያጊስ። ኢያካ፥ «ኤ፥ ሃይሳ ሜላ ሚሼስ ባይዚዳ» ያጋሱ።
ACT 5:9 ጴፂሮሲ ማጫሲው፥ «ኔራኔ ኔ ኣዚናራ ጎዳ ኣያና ፓጫናው ኣይስ ዞሬቲዴቲ? ሄኮ፥ ኔ ኣዚና ሞጊዳ ኣሳቲ ካሬን ዴዖሶና፤ ኔናካ ኤንቲ ካሬ ኬሳና» ያጊስ።
ACT 5:10 ማጫሲያ ኢራካ ጴፂሮሳ ቶሁዋ ማታን ኩንዳዳ ሃይቃ ኣጋሱ፤ ናዓቴꬃቲ ጌሊያ ዎዴ ሃይቂዳሮ ዴሚዲ ካሬ ኬሲዲ፥ ኢ ኣዚና ማታን ሞጊዶሶና።
ACT 5:11 ኩሜꬃ ዎሳ ኬꬃይኔ ሄሳ ሲዒዳ ሃራ ኣሳ ኡባይ ዳሮ ያዪዶሶና።
ACT 5:12 ሃዋሬቲ ዳሮ ማላታታኔ ኦራꬃባታ ኣሳ ጊዶን ኦꬆሶና። ኣማኒያ ኡባይ ሶሎሞኔ ባራንዳን ኢሲፌ ሺቆሶና።
ACT 5:13 ሃራ ኣሳፔ ኤንታራ ጋሄታናው ኢሲ ኣሲካ ሚኒቤና፥ ሺን ኣሳይ ኤንታ ቦንቼስ።
ACT 5:14 ኣማኒያ ኣዴታኔ ማጫሳታ ታይቦይ ካሴይሳፌ ዳሪሼ ቢስ።
ACT 5:15 ሄሳ ጊሾ፥ ኣሳይ ሃርጋንቾታ ሃላኒኔ ኣልጋን ቶኪዲ ጴፂሮሲ ኣꬊያ ዎዴ ኢያ ኩያይ ኤንታፌ ኢሶታ ኢሶታ ቦላ ሼምፓና ሜላ ኦጌ ዶናን ኬሲዲ ዎꬆሶና።
ACT 5:16 ቃሲ ዳሮ ኣሳይ ዬሩሳላሜ ማታን ዴዒያ ካታማታፔ ሃርጋንቾታኔ ቱና ኣያኒ ዋይሲያ ኣሳታ ኤኪዲ ዮሶና፤ ኡባይካ ፓፂዶሶና።
ACT 5:17 ካሂኔ ሃላቃይኔ ኢያራ ዴዒያ ሳዱቃዌቲ ኡባይ ቃናቴን ኩሚዲ ሃዋሬታ ቦላ ዴንዲዶሶና።
ACT 5:18 ሃዋሬታ ኦይኪዲ ዴሪያ ቃሾ ኬꬃን ዬጊዶሶና።
ACT 5:19 ሺን ጎዳ ኪታንቾይ ቃማ ቃሾ ኬꬃ ፔንጊያ ዶዪዲ ሃዋሬታ ካሬ ኬሲዲ፥
ACT 5:20 «ቢዲ፥ ፆሳ ኬꬃን ኤቂዲ ሃ ኦራꬃ ዴዖ ቃላ ኣሳ ኡባስ ኦዲቴ» ያጊስ።
ACT 5:21 ሃዋሬቲ ሄሳ ሲዒዳ ዎዴ ዎንታ ጉራ ፆሳ ኬꬂ ጌሊዲ ታማርሶ ዶሚዶሶና። ካሂኔታ ሃላቃይኔ ኢያራ ዴዔይሳቲ ዪዲ፥ ኢስራዔሌ ጪማታ ኡባ ፄጊ ሺሺዲ ሃዋሬታ ባንታ ሲንꬄ ኤሃና ሜላ ዎታዳሬታ ቃሾ ኬꬂ ኪቲዶሶና።
ACT 5:22 ሺን ዎታዳሬቲ ቃሾ ኬꬂ ቢዲ ሃዋሬታ ዴሚቦኮና። ጉዬ ሲሚ ዪዲ ዴሪያስ፥
ACT 5:23 «ኑኒ ቢያ ዎዴ ቃሾ ኬꬃ ፔንጌይ ሚንꬂ ጎርዴቲን፥ ናጌይሳቲ ፔንጌን ኤቂዳይሳታ ዴሚዳ። ሺን ኑኒ ካሪያ ዶያ ዎዴ ጊዶን ሃሪ ኣቶሺን ኢሲ ኣሲካ ባዋ» ያጊዶሶና።
ACT 5:24 ሄሳ ጊሾ፥ ፆሳ ኬꬃ ዎታዳሬታ ኪቴይሲኔ ካሂኔ ሃላቃቲ ሄሳ ሲዒዳ ዎዴ «ሃዋሬታ ቦላ ኣይቢ ሃኒዴ?» ያጊዲ ሂርጊዶሶና።
ACT 5:25 ሄ ዎዴ ኢሲ ኣዴይ ኤንታኮ ዪዲ፥ «ሄኮ፥ ቃሾ ኬꬂ ሂንቴ ጌልሲዳ ኣሳቲ ፆሳ ኬꬃን ኤቂዲ ኣሳ ታማርሶሶና» ያጊዲ ኤንታው ኦዲስ።
ACT 5:26 ፆሳ ኬꬃ ዎታዳሬታ ኪቴይሲ ባ ዎታዳሬታራ ቢዲ ሃዋሬታ ኤሂስ። ሺን ኤንቲ ባንታና ኣሳይ ሹቻን ጫዳና ጊዲ ያዪዳ ጊሾ ኤንታ ኣዳሺዲ ኤሂዶሶና።
ACT 5:27 ኤንቲ ሃዋሬታ ኤሂዲ፥ ሺቂዳ ሻንጉዋ ሲንꬃን ኤሲን ካሂኔ ሃላቃይ ኤንታኮ፥
ACT 5:28 «ሂንቴና ኑኒ ሄ ኡራ ሱንꬃን ታማርሶና ሜላ ሚንꬂዲ ኪቲቦኮ? ሄኮ፥ ሂንቴ ቲሚርቲያ ዬሩሳላሜ ካታማ ኡባ ጋꬂዴታ። ሄ ኡራ ሼምፑዋስ ኑና ኦይꬃናው ቆፔቲ?» ያጊዲ ኦይቺስ።
ACT 5:29 ጴፂሮሳራኔ ሃንኮ ሃዋሬታራ ኤንታው ዛሪሼ፥ «ኑኒ ኣሳስ ኪቴታናፔ ፆሳስ ኪቴታናው ቤሴስ።
ACT 5:30 ማስቃሊያ ቦላ ሂንቴ ካቂዲ ዎꬊዳ ዬሱሳ ኑ ኣዋታ ፆሳይ ሃይቆፔ ዴንꬂስ።
ACT 5:31 ኢስራዔሌቲ ናጋራፔ ሲማና ሜላኔ ኤንታ ናጋራይ ኣቶ ጌቴታና ሜላ ፆሳይ ዬሱሳ ሃሬይሳኔ ኣሼይሳ ኦꬂዲ ቦንቾን ባፔ ኡሻቻ ባጋን ኡቲሲስ።
ACT 5:32 ሄሳስ ኑኒ ማርካ፤ ቃሲ ፆሳይ ባና ኣማኔይሳታስ ኢሚዳ ጌሻ ኣያናይካ ማርካ» ያጊዶሶና።
ACT 5:33 ሺቂዳ ኣሳይ ሄሳ ሲዒዳ ዎዴ ዳሮ ዪሎቲዲ፥ ሃዋሬታ ዎꬋናው ቆፒዶሶና።
ACT 5:34 ሺን ኣሳ ኡባን ዳሮ ቦንቼቲዳ፥ ሂጌ ኣስታማሬይ፥ ጋማሊያሌ ጊያ ኢሲ ፋሪሳዌይ ዴንዲ ኤቂዲ ሃዋሬታ ጉꬃ ዎዴስ ካሬ ኬሳና ሜላ ኪቲስ።
ACT 5:35 ሄሳፌ ጉዬ፥ ሺቂዳ ኣሳኮ፥ «ኢስራዔሌ ኣሳው፥ ሃ ኣሳታ ቦላ ሂንቴ ኦꬃናው ቆፒያባፔ ናጌቲቴ።
ACT 5:36 ኣይስ ጊኮ፥ ሃይሳፌ ካሴ ቴዎዳሲ ባና፥ ‹ታኒ ጊታ› ጊዲ ዴንዲን፥ ኦይዱ ፄቱ ጊዲያ ኣሳቲ ኢያራ ኢሲፊዶሶና። ሺን ኢያ ዎꬊን ኢያ ካሊዳ ኡባይ ላሌቲን ፓꬆና ኣሲ ጊዲዲ ኣቲዶሶና።
ACT 5:37 ሄሳፌ ጉዬ፥ ኣሳይ ታይቤቲያ ዎዴ ጋሊላ ዪሁዲ ዴንዲዲ ዳሮ ኣሳ ፓንጋዪዲ ካሌꬂስ፥ ሺን ኢያካ ዎꬊን ኢያ ካሊዳ ኣሳ ኡባይ ላሌቲስ።
ACT 5:38 ሃዒካ ታ ሂንቴው ኦዳይስ፤ ሃ ኣሳታፔ ሻኬቲቴ፤ ኤንታ ቦቾፊቴ። ኣይስ ጊኮ፥ ሃ ቆፋኔ ሃ ኦሱዋ ኣሲ ኦꬂያባ ጊዲኮ ꬋያና።
ACT 5:39 ሺን ሃ ቆፋይኔ ሃ ኦሶይ ፆሳፌ ዪዳባ ጊዲኮ፥ ሂንቴ ኤንታ ꬋይሳናው ዳንዳዔኬታ። ጌላዳ ያኒሼ ሂንቴ ፆሳራ ካጬታና» ያጊዲ ኦዲስ። ሄሳ ጊሾ፥ ሺቂዳ ኣሳይ ጋማሊያሌ ዞሪያ ኤኪዶሶና።
ACT 5:40 ሃዋሬታ ሶ ፄጊዲ ሊሶን ጋራፊሲስ። ሄሳፌ ጉዬ፥ ኤንታኮ፥ «ዬሱሳ ሱንꬃ ናምዓንꬆ ዴንꬆፊቴ» ጊዲ ቢርሺ ዬዲዶሶና።
ACT 5:41 ዬሱሳ ሱንꬃ ጊሾ ኤንቲ ካዉያናይሲ ቤሲያባ ጊዴይሳ ኤሪዳ ጊሾ ሻንጉዋ ሲንꬃፌ ኡፋይቲሼ ኬዪዶሶና።
ACT 5:42 ኤንቲ ኡባ ዎዴ ፆሳ ኬꬃኒኔ ኣሳ ሶን ዬሱሲ ኢ ኪሪስቶሳ ጊዴይሳ ታማርሶኔ ሳባኮ ኣጊቦኮና።
ACT 6:1 ሄ ዎዴ ካሌይሳታ ታይቦይ ዳሪ ዳሪ ቢሺን፥ ጊሪኬ ዶና ኦዴቲያ ኣይሁዴቲ ዪሁዳን ዬሌቲዲ ዴዒያ ኣይሁዴታ ቦላ ዙዙሚዶሶና። ኣይስ ጊኮ፥ ጊሪኬ ዶና ኦዴቲያ ኣይሁዴቲ፥ «ጋላስ ጋላስ ኢሜቲያ ካꬃን ኑ ኣምዔቲ ናቄቶሶና» ያጊዶሶና።
ACT 6:2 ታማኔ ናምዑ ሃዋሬቲ ዎሳ ኬꬃ ኣሳ ኡባ ፄጊዲ፥ «ኑኒ ፆሳ ቃላ ኦዴይሳ ኣጊዲ ካꬂ ጊሻናው ኑስ ቤሴና።
ACT 6:3 ሂዛ፥ ኢሻቶ፥ ሎዖ ኣሳታ፥ ጌሻ ኣያናኒኔ ጪንጫቴꬃን ኩሚዳ ላፑን ኣሳታ ሂንቴ ጊዶፌ ዶሪቴ፤ ኑኒ ኤንታ ሃ ኦሱዋስ ሹማና።
ACT 6:4 ሺን ኑኒ፥ ኑ ኩሜꬃ ዎዲያ ፆሳ ዎሳኒኔ ቃላ ታማርሶን ፔሻና» ያጊዶሶና።
ACT 6:5 ሃዋሬቲ ኦዲዳ ኦዳይ ኣሳ ኡባ ኡፋይሲስ። ሄሳ ጊሾ፥ ኣማኖይኔ ጌሻ ኣያኒ ኩሚዳ ኢስፂፋኖሴ፥ ፊልጶሳ፥ ጲሮኮሮሳ፥ ኒቃሮኔ፥ ፂሞና፥ ጳርሜናኔ ኣይሁዴ ኣማኖ ጌሊ ሲሚዳ ኣንፆኪያ ኒቆላዎሳ ዶሪዶሶና።
ACT 6:6 ኤንታ ሃዋሬታ ሲንꬃን ኤሲን፥ ሃዋሬቲ ኤንታ ቦላ ኩሼ ዎꬂዲ ፆሳ ዎሲዶሶና።
ACT 6:7 ፆሳ ቃላይ ዳልጊ ዳልጊ ቢስ። ዬሩሳላሜን ዴዒያ ኣማኔይሳታ ታይቦይ ዳሪ ዳሪ ቢስ፤ ዳሮ ካሂኔቲካ ኣማኒዶሶና።
ACT 6:8 ኢስፂፋኖሴይ ኣꬎ ኬሃቴꬃኒኔ ዎልቃን ኩሚዲ ኣሳ ጊዶን ኦራꬃባታኔ ማላታታ ኦꬄስ።
ACT 6:9 ኣይሌቴꬃፌ ኬዪዳ ኣይሁዴ ዎሳ ኬꬃ ኣሳይ ቄሬናፔኔ ኢስኪንዲሪያፔ ኪልቂያፌኔ ኢሲያፔ ዪዳ ኢሲ ኢሲ ኣሳቲ ዴንዲዲ ኢስፂፋኖሴራ ፓላሚዶሶና።
ACT 6:10 ሺን ኢስፂፋኖሴይ ኣያና ዎልቃን ኦዴቲያ ጪንጫቴꬃ ኤንቲ ኤቄታናው ዳንዳዒቦኮና።
ACT 6:11 ሄ ዎዴ ኤንቲ፥ «ሙሴኔ ፆሳ ኢ ጫዪሺን ሲዒዳ» ጊያ ዎርዶ ኣሳታ ሻሚዶሶና።
ACT 6:12 ሄሳዳ ኦꬂዲ ቢታ ጪማታኔ ሂጌ ኣስታማሬታ ኢያ ቦላ ዴንꬂዶሶና። ኢስፂፋኖሴ ኦይኪዲ ሻንጉዋ ሲንꬄ ኤፊዶሶና።
ACT 6:13 ኢያ ቦላ ፓይዲዳ ዎርዶ ማርካቲ፥ «ሃ ኡራይ ሃ ፆሳ ኬꬃኔ ሙሴ ሂጊያ ዛሪ ዛሪ ጫዬስ።
ACT 6:14 ኢ፥ ‹ሃይሲ ናዚሬቴ ዬሱሲ፥ ሃ ፆሳ ኬꬃ ላላና፤ ቃሲ ሙሴይ ኑስ ኢሚዳ ሂጊያ ላማና› ያጊሺን ኑኒ ሲዒዳ» ያጊዶሶና።
ACT 6:15 ሻንጎ ሺቆን ኡቲዳ ኣሳ ኡባይ ኢስፂፋኖሴ ሎይꬂዲ ፄሊያ ዎዴ ኢያ ሶምዖይ ኪታንቾ ሶምዖ ዳኔስ።
ACT 7:1 ካሂኔታ ሃላቃይ ኢስፂፋኖሴኮ፥ «ሃይሲ ቱሜ?» ያጊዲ ኦይቺስ።
ACT 7:2 ኢስፂፋኖሴይ፥ «ታ ኢሻቶ፥ ታ ኣዋቶ፥ ሲዒቴ! ኑ ኣዋ ኣብራሃሜይ ካራኔን ዳናው ባናፔ ሲንꬄ ማሴጴፆሚያን ዴዒሺን፥ ቦንቾ ፆሳይ ኢያው ቆንጪዲ፥
ACT 7:3 ‹ኔ ቢታፌኔ ኔ ዳቦታፔ ሻኬታዳ ታኒ ኔና ቤሲያ ቢታ ባ› ያጊስ።
ACT 7:4 ሄ ዎዴ ኣብራሃሜይ ካልዳዌታ ቢታፌ ኬዪዲ ካራኔን ዳናው ቢስ። ኢያ ኣዋይ ሃይቂዳፔ ጉዬ ፆሳይ ኢያ ሃ ቢታ ሃዒ ሂንቴ ዴዒያ ቤሳ ኤሂስ።
ACT 7:5 ኢ ሃ ቢታፌ ሃሪ ኣቶሺን ቶሆይ ዬꬊያ ቤሲካ ኣብራሃሜስ ኢሚቤና። ሺን ናዒ ኢያው ባይና ዎዴ ፆሳይ ሃ ቢታ ኢያዉኔ ኢያ ሼሻስ ላታ ኦꬂዲ ኢማናይሳ ቃላ ጌሊስ።
ACT 7:6 ፆሳይ ኣብራሃሜኮ፥ ‹ኔ ሼሻይ ሃራ ቢታን ኢማꬃቴꬃን ዳና፤ ያን ኦይዱ ፄቱ ላይꬂ ኤንቲ ኣይሌቴꬃን ሃሬታና።
ACT 7:7 ሺን ታኒ ኔ ሼሻ ሃሪያ ዴሪያ ቦላ ፒርዳና። ሄሳፌ ጉዬ፥ ኤንቲ ሄ ቢታፌ ኬዪዲ ሃይሳን ታው ጎይናና› ያጊስ።
ACT 7:8 ፆሳይ ኣብራሃሜ ሼሻይ ቃፃሬታና ሜላ ኢያራ ጫቂን፥ ዪሳቂ ዬሌቲዳ ሆስፑንꬃ ጋላሳን ቃፃሪስ። ዪሳቂ ያይቆባ ቃፃሪስ፤ ቃሲ ያይቆቢ ታማኔ ናምዑ ባ ናይታ፥ ኑ ኣዋታ ማይዛታ ቃፃሪስ።
ACT 7:9 «ያይቆባ ናይቲ ዮሴፋ ቃናቲዲ ጊብፄ ቢታን ኣይሌቴꬃስ ባይዚዶሶና፥ ሺን ፆሳይ ኢያራ ዴዔስ።
ACT 7:10 ኢያ፥ ኢያ ዋዬ ኡባፌ ኬሲስ። ጊብፄ ካዉዋ ሲንꬃን ሳባኔ ጪንጫቴꬂ ኢያው ኢሚስ። ጊብፄ ካዎይ ዮሴፋስ ጊብፄ ቢታኔ ባ ኬꬃ ኡባ ኣይሳናዳ ሃላቃቴꬂ ኢሚስ።
ACT 7:11 «ጊብፄ ቢታኒኔ ካናኔ ቢታ ኡባን ኮሺ ጌሊዲ ዳሮ ኣሳ ኡንዔꬂስ። ሄ ዎዴ ኑ ማይዛቲ ካꬂ ዴማናው ዳንዳዒቦኮና።
ACT 7:12 ያይቆቢ ጊብፄ ቢታን ካꬂ ዴዔይሳ ሲዒዲ ኑ ኣዋታ ኮይሮ ያ ዬዲስ።
ACT 7:13 ናምዓንꬆ ቡሳን ዮሴፊ ባ ኢሻታስ ባናቴꬃ ኤሪሲስ። ጊብፄ ካዎይካ ዮሴፋ ሼሻ ኤሪስ።
ACT 7:14 ዮሴፊ ባ ኣዋ ያይቆባኔ ባ ዳቦ ኡባ፥ ላፑን ታማኔ ኢቻሹ ኣሳ ባኮ ያና ሜላ ኪቲዲ ኤሂሲስ።
ACT 7:15 ያይቆቢ ጊብፄ ቢታ ዎꬊስ፤ ኢኔ ኢያ ናይቲ ያን ሃይቂዶሶና።
ACT 7:16 ኤንታ ኣሃይ ሄ ቤሳፌ ሴኬሜ ቢታ ቶኬቲዲ ቢዲ፥ ያን ኣብራሃሜይ ሃሞሬ ናይታፔ ዳሮ ቢራን ሻሚዳ ዱፎን ሞጌቲስ።
ACT 7:17 «ሺን ፆሳይ ኣብራሃሜስ ኢማና ጊዳይሳ ፖሊያ ዎዴይ ጋካናው ማቲዳ ዎዴ ጊብፄ ቢታን ዴዒያ ኑ ኣሳይ ዳሪ ዳሪ ቢስ።
ACT 7:18 ሄሳፌ ጉዬ፥ ዮሴፋ ኤሮና ሃራ ካዎይ ጊብፄ ቢታን ካዎቲስ።
ACT 7:19 ሄ ካዎይ ኑ ዜሬꬃ ጌኒዲ ጉꬃ ናይቲ ሃይቃና ሜላ ኤንታ ካሬ ኬሲ ዬጋና ሜላ ኑ ኣዋታ ኡንዔꬂስ።
ACT 7:20 «ሄ ዎዴ ሙሴይ ዬሌቲስ፤ ኢ ፆሳ ሲንꬃን ዳሮ ሎዖ ናዓ። ባ ኣዋ ኬꬃን ሄꬑ ኣጌና ጋካናው ዲጪስ።
ACT 7:21 ሙሴይ ዎራ ሆሌቲዳ ዎዴ ጊብፄ ካዉዋ ናዒያ ዴማ ኤካዳ ባ ናዓ ኦꬃዳ ኢያ ዲቻሱ።
ACT 7:22 ሙሴይ ጊብፄታ ጪንጫቴꬃ ኡባ ታማሪዲ ኦዳኒኔ ኦሶን ሚኖ ኣሲ ጊዲስ።
ACT 7:23 «ሙሴስ ላይꬃይ ኦይታማ ኩሚዳ ዎዴ ባ ኢሻታ፥ ኢስራዔሌታ ቤዓናው ባ ዎዛናን ቆፒስ።
ACT 7:24 ኢስራዔላታፔ ኢሱዋ ጊብፄ ኢሶይ ቆሂሺን ቤዒዲ ሄ ኢስራዔሌ ኡራ ማዲዲ፥ ሄ ቆሂዳ ጊብፄ ኡራ ዎꬊዲ ኩሼ ዛሪስ።
ACT 7:25 ሙሴይ ባ ኢሻታ ባ ባጋራ ፆሳይ ኣሻናው ሃኔይሳ ኤንቲ ኣኬካና ጊዲ ቆፒስ፥ ሺን ኤንቲ ኣኬኪቦኮና።
ACT 7:26 «ዎንቴꬃ ጋላስ ናምዑ ኢስራዔሌ ኣሳቲ ኢሶይ ኢሱዋራ ዋꬌቲሺን ዴሚዲ ኤንታ ሲጌꬃናው ኮዪዲ፥ ‹ኣሳቶ፥ ሂንቴ ኢሻንታ፤ ኣይስ ኢሶይ ኢሱዋ ቆሄቲ?› ያጊስ።
ACT 7:27 «ሺን ባ ላጊያ ቆሄይሲ ሙሴኮ፥ ‹ኔና ኑ ቦላ ሃሬይሳኔ ዳይና ኦꬂዳይ ኦኔ?
ACT 7:28 ኔኒ ዚኔ ጊብፄ ኡራ ዎꬊዳይሳዳ ታና ዎꬋናው ኮያይ?› ያጊዲ ሙሴ ሱጊ ዬዲስ።
ACT 7:29 ሙሴይ ሄሳ ሲዒዳ ዎዴ ጊብፄፌ ቤቲዲ ሚዲያሜ ቢታን ቤቴ ኣሲ ጊዲዲ ዴዒሼ ናምዑ ኣዴ ናይታ ዬሊስ።
ACT 7:30 «ጎዳ ኪታንቾይ ኦይታሙ ላይꬃፌ ጉዬ ሲና ዴሪያ ማታን ዴዒያ ባዞ ቱሺያ ጊዶን ኤፂያ ታማ ላጮ ጊዶን ሙሴስ ቤንቲስ።
ACT 7:31 ሙሴይ ባ ቤዒዳይሳን ማላሌቲዲ፥ ሎይꬂ ቤዓናው ቱሺያ ማቲ ሺቂዲ ዴዒሺን፥ ጎዳ ቃላይ፥
ACT 7:32 ‹ታኒ ኔ ኣዋታ፥ ኣብራሃሜ ፆሳ፥ ዪሳቃ ፆሳ፥ ያይቆባ ፆሳ› ያጊሼ ሙሴኮ ዪስ። ሙሴይ ያሻን ኮኮሪዲ ፄላናው ዳንዳዒቤና።
ACT 7:33 «ጎዳይ ሙሴኮ፥ ‹ኔኒ ኤቂዳ ቢታይ ጌሺ ጊዲያ ጊሾ ኔ ቶሁዋን ዴዒያ ጫማ ኬሳ።
ACT 7:34 ታኒ ጊብፄን ዴዒያ ታ ኣሳ ኡንዔቴꬃ ቤዓስ። ኤንታ ዋሱዋ ሲዓዳ ኤንታ ኣሻናው ዎꬋስ። ሃዒ ሃያ! ታኒ ኔና ጊብፄ ኪታና› ያጊስ።
ACT 7:35 «ኢስራዔሌቲ ሙሴ፥ ‹ኔና ኑና ሃሬይሳኔ ዳይና ኦꬂዳይ ኦኔ?› ያጊዲ ኢፂዳይሳ ቱሺያ ጊዶን ኢያው ቤንቲዳ ኪታንቹዋ ባጋራ ሃሬይሳኔ ኣሼይሳ ኦꬂዲ ፆሳይ ኪቲስ።
ACT 7:36 ሙሴይ ኢስራዔሌታ ጊብፄፌ ኬሲዲ ማላሊሲያባታኔ ኦራꬃባታ ጊብፄ ቢታኒኔ ዞዖ ኣባን ኦꬂዲ ኤንታ ኦይታሙ ላይꬂ ባዞ ቢታን ካሌꬂስ።
ACT 7:37 «ኢስራዔሌ ኣሳኮ፥ ‹ፆሳይ ታና ዴንꬂዳይሳዳ ሂንቴ ሼሻ ጊዶፌ ታ ሜላ ናቤ ሂንቴው ዴንꬃና› ያጊዳይ ሄ ሙሴ።
ACT 7:38 ባዞ ቢታን ሺቂዳ ኢስራዔሌ ኣሳራ ዴዒዳይሲ፥ ኑ ኣዋታራኔ ሲና ዴሪያ ቦላ ኢያው ኦዲዳ ኪታንቹዋራ ዴዒዳ ሙሴይ ኢያ። ያቲዲ፥ ፆሳ ዴዖ ቃላ ኑስ ኢማናው ኤኪስ።
ACT 7:39 «ሺን ኑ ማይዛቲ ሙሴስ ኪቴታናው ዶሲቦኮና፤ ኢያ ኢፂዲ ጉዬ ጊብፄ ሲማናው ኣሞቲዶሶና።
ACT 7:40 ቃሲ ኣሮናኮ፥ ‹ኑና ካሌꬂያ ፆሳታ ኑስ ኦꬃ። ኣይስ ጊኮ፥ ሃይሲ ኑና ጊብፄፌ ኤሂዳ ሙሴይ፥ ዋኒዳኮ ኑኒ ኤሮኮ› ያጊዶሶና።
ACT 7:41 ሄ ዎዴ ማሪ ዳኒሲዲ ኤቃ ኦꬂዶሶና። ሄ ኤቃስ ያርሾ ያርሺዲ ባንታ ኩሼን ኦꬂዳ ኦሱዋን ኡፋይቲዶሶና።
ACT 7:42 ሺን ፆሳይ ኤንታው ዞኮ ዛሪስ። ኤንቲ ሳሎ ፆሊንቶታ ጎይናና ሜላ ኤንታ ዬጊ ኣጊስ። ናቤታ ማፃፋን፥ ‹ኢስራዔሌ ኣሳው፥ ኦይታሙ ላይꬂ ኩሜꬂ ባዞ ቢታን ሹኪዳ ሜሂያኔ ያርሺዳ ያርሹዋ ታው ያርሺዴቲ?
ACT 7:43 ሂንቴ፥ ሂንቴው ጎይናናው ኬሲዳ ኤቃኔ ሞሎኬ ዱንካኒያ ሬፋና ጊያ ሂንቴ ፆሳ ፆሊንቶ ሚሲሊያ ቶኪዴታ። ታኒ ሂንቴና ባቢሎኔፔ ሂኒ ባጋ ዬዳና› ጌቴቲዲ ፃፌቲስ።
ACT 7:44 «ኑ ኣዋታስ ባዞ ቢታን ማርካ ዱንካኔይ ዴዔስ። ኢያካ ፆሳይ ሙሴ ኪቲዳይሳዳኔ ኢያ ቤሲዳይሳዳ ኦꬂስ።
ACT 7:45 ቃሲ ኑ ኣዋቲ ሄ ዱንካኒያ ባንታ ኣዋታፔ ኤኪዲ ፆሳይ ካሴ ዬዴꬂዳ ኣይሁዴ ጊዶና ኣሳ ቢታ ኦይኪዳ ዎዴ ኢያሱራ ያ ኤኪዲ ጌሊዶሶና። ሄ ዱንካኔይ ዳዊቴ ዎዴ ጋካናዉካ ሄ ቤሳን ዴዒስ።
ACT 7:46 ዳዊቴይ ፆሳን ሳቤቲስ። ቃሲ ያይቆባ ጎዳይ ዴዓና ኬꬃ ኬፃናው ፆሳ ዎሲስ።
ACT 7:47 ሺን ኢያው ኬꬃ ኬፂዳይ ሶሎሞኔ።
ACT 7:48 «ሃኖሺን፥ ኡባፌ ቦላ ፆሳይ ኣሲ ኬፂዳ ኬꬃን ዴና። ናቤይ ጊዳይሳ ሜላ፥
ACT 7:49 ‹ሳሎይ ታ ኣራታ፥ ሳዓይካ ታ ቶሆይ ዬꬊያሶ። ያቲን፥ ታው ሂንቴ ኣይ ሜላ ኬꬂ ኬፃኔ? ዎይኮ ታኒ ሼምፒያሶይ ኣዉኔ?
ACT 7:50 ሃ ኡባ ታ ኩሺያን ኦꬃቢኪና?› ያጌስ ጎዳይ።
ACT 7:51 «ሂንቴ ዋኒዳ ሲዖና ኣሴ? ሂንቴ ዎዛናይ ፆሳ ቃላ ኤካናው ኣይስ ኢፂዴ? ሂንቴ ሃይꬃይ ኣይስ ቱሊዴ? ሂንቴ፥ ሂንቴ ኣዋታꬆ ኡባ ዎዴ ጌሻ ኣያናራ ኤቄቴታ።
ACT 7:52 ናቤታ ጊዶፌ ሂንቴ ኣዋቲ ጎዶናይ ኦኔ? ፆሳ ናዓይ፥ ፂሎይ ያናይሳ ካሴቲዲ ኦዲዳይሳታ ዎꬊዶሶና። ሃዒ ሂንቴ ኢያ ኣꬂ ኢሚዲ ዎꬊዴታ።
ACT 7:53 ሂንቴ ኪታንቹዋ ኩሼፔ ፆሳ ሂጊያ ኤኪዴታ፥ ሺን ኪቴቲቤኬታ» ያጊስ።
ACT 7:54 ኤንቲ ሄሳ ሲዒዳ ዎዴ ባንታ ዎዛናን ኢስፂፋኖሴ ቦላ ዳሮ ዪሎቲዲ፥ ባንታ ሜቴርሻ ሳፂዲ ማንዲዶሶና።
ACT 7:55 ሺን ኢስፂፋኖሴይ ጌሻ ኣያናን ኩሚዲ፥ ሳሎ ፑዴ ፄሊዲ፥ ፆሳ ቦንቹዋኔ ዬሱሳ ፆሳ ኡሻቻ ባጋን ኤቂዳይሳ ቤዒስ።
ACT 7:56 «ሄኮ፥ ታኒ ሳሎይ ዶዬቲን፥ ኣሳ ናዓይ፥ ፆሳ ኡሻቻ ባጋን ኤቂዳይሳ ቤዓይስ» ያጊስ።
ACT 7:57 ቃላ ꬎቁ ኦꬂዲ ዋሲሼ፥ ባንታ ሃይꬃ ኦይኪዲ ኢሲፌ ኢያኮ ዎፂዶሶና
ACT 7:58 ኢያ ካታማፔ ጋፃ ኬሲዲ፥ ሹቻን ጫዲዶሶና። ማርካቲ ባንታ ማዑዋ ኢሲ ሳዖላ ጊያ ናዓቴꬃ ማታን ዎꬂዶሶና።
ACT 7:59 ኢስፂፋኖሴይ፥ «ታ ጎዳ ዬሱሳ፥ ታ ሼምፑዋ ኤካ» ያጊዲ ፄጊሺን ኤንቲ ኢያ ሹቻን ጫዶሶና።
ACT 7:60 ጉልባቲዲ፥ ባ ቃላ ꬎቁ ኦꬂዲ፥ «ታ ጎዳው፥ ሃ ናጋራ ኤንታው ኣቶ ጋ» ያጊስ። ሄሳ ያጊዲ ሲሚዳ ሜላ ሃይቂ ኣጊስ።
ACT 8:1 ሳዖሊ ኢስፂፋኖሴ ሃይቁዋን ኡፋይቲስ። ሄ ጋላስ ዬሩሳላሜን ዴዒያ ዎሳ ኬꬃን ጊታ ጎዲ ዴንዲስ። ሃዋሬቲ ኣቲን ኣማኔይሳቲ ኡባይ ዪሁዳ ቢታኒኔ ሳማሬ ቢታን ላሌቲዶሶና።
ACT 8:2 ኢሲ ኢሲ ፆሳ ኣሳቲ ኢስፂፋኖሴ ሞጊዶሶና፤ ቃሲ ኢያው ዳሮ ዬኪዶሶና።
ACT 8:3 ሺን ሳዖሊ ዎሳ ኬꬃ ꬋይሳናው ኮዬስ። ሶ ሶ ዩዪ ጌሊዲ፥ ኣማኒያ ኣዴታኔ ማጫሳታ ጎቺ ጎቺ ኬሲዲ ቃሾ ኬꬂ ጌልሴስ።
ACT 8:4 ላሌቲዳ ኣማኔይሳቲ ቢዳ ቤሳ ኡባን ቃላ ኦዲዶሶና።
ACT 8:5 ፊልጶሲ ሳማሬ ካታማ ቢዲ ኪሪስቶሳባ ኣሳስ ኦዲስ።
ACT 8:6 ዳሮ ኣሳይ ፊልጶሲ ጊዳይሳ ሲዒዳ ዎዴኔ ኢ ኦꬂያ ማላታታ ቤዒዳ ዎዴ ኢያ ኣኬኪዲ ሲዒዶሶና።
ACT 8:7 ቱና ኣያናቲ ዋሲዲ ዳሮ ኣሳፔ ኬዪዶሶና፤ ቃሲ ዳሮ ጉንዳቲኔ ዎቤቲ ቢሌቲዶሶና።
ACT 8:8 ሄ ካታማን ዴዒያ ኣሳይ ዳሮ ኡፋይቲዶሶና።
ACT 8:9 ሺን ሲሞና ጊያ ኢሲ ኡራይ ሄ ካታማን ዴዔስ። ኢ፥ ‹ባና ጊታ› ጊዲ ሳማሬ ኣሳ ማሮቴꬃን ማላሊሲሼ ጋምዒስ።
ACT 8:10 ጉꬃፌ ጊታ ጋካናው ዴዒያ ኣሳ ኡባይ፥ «ጊታ ፆሳ ዎልቃይ ሃይሳ» ጊዲ ኢያባ ሲዖሶና።
ACT 8:11 ዳሮ ዎዴፔ ዶሚዲ ማሮቲሼ ሳማሬ ኣሳ ማላሊሲዳ ጊሾ ኣሳይ ኢያባ ሲዖሶና።
ACT 8:12 ሺን ፊልጶሲ ፆሳ ካዎቴꬃባኔ ዬሱስ ኪሪስቶሳ ሱንꬃባ ኣዴታሲኔ ማጫታስ ኦዲን፥ ኤንቲ ኢያባ ኣማኒዲ ፃማቄቲዶሶና።
ACT 8:13 ቃሲ ሲሞኒካ ባ ሁዔን ኣማኒዲ ፃማቄቲስ። ፊልጶሳራ ኢሲፌ ቢዳ ቤሳ ኡባን ኦሴቲያ ጊታ ማላታታ ቤዒዲ ማላሌቲስ።
ACT 8:14 ዬሩሳላሜን ዴዒያ ሃዋሬቲ ሳማሬ ኣሳይ ፆሳ ቃላ ኤኪዳይሳ ሲዒዳ ዎዴ ጴፂሮሳኔ ዮሃኒሳ ኤንታኮ ዬዲዶሶና።
ACT 8:15 ጴፂሮሲኔ ዮሃኒሲ ቢዲ፥ ኣማኔይሳቲ ጌሻ ኣያና ኤካና ሜላ ኤንታው ፆሳ ዎሲዶሶና።
ACT 8:16 ኣይስ ጊኮ፥ ሳማሬ ኣሳቲ ጎዳ ዬሱሳ ሱንꬃ ፃላላን ፃማቄቲዶሶናፔ ኣቲን ኤንታፌ ኢሱዋ ቦላካ ጌሻ ኣያኒ ዎꬊቤና።
ACT 8:17 ሄ ዎዴ ጴፂሮሲኔ ዮሃኒሲ ባንታ ኩሺያ ኤንታ ቦላ ዎꬂን፥ ኤንቲ ጌሻ ኣያና ኤኪዶሶና።
ACT 8:18 ሃዋሬቲ ባንታ ኩሺያ ኤንታ ቦላ ዎꬂን፥ ኤንታው ጌሻ ኣያናይ ኢሜቲዳይሳ ሲሞኒ ቤዒዳ ዎዴ ጴፂሮሳሲኔ ዮሃኒሳስ ሚሼ ኤሂዲ፥
ACT 8:19 «ታኒካ ታ ኩሺያ ዎꬂያ ኡባይ ጌሻ ኣያና ኤካና ሜላ ሃ ማታ ታዉካ ኢሜርኬቲ» ያጊስ።
ACT 8:20 ሺን ጴፂሮሲ ኢያኮ፥ «ኔኒ ፆሳ ኢሞታ ሚሼን ሻማናው ቆፒዳ ጊሾ ኔ ሚሼይ ኔራ ꬋዮ።
ACT 8:21 ኔ ዎዛናይ ፆሳ ሲንꬃን ሱሬ ጊዶና ጊሾ ኔው ሃይሳን ጊሾይ ዎይኮ ቃዲ ባዋ።
ACT 8:22 ሂዛ፥ ሃ ኔ ዎዛና ኢታቴꬃ ጊሾ ናጋራፔ ሲማ። ኔ ዎዛናን ዴዒያ ኢታ ቆፋ ፆሳይ ኣቶ ጋና ሜላ ፆሳ ዎሳ።
ACT 8:23 ጋሶይካ፥ ኔኒ ኢታ ቃናቴኒኔ ናጋራ ቃሹዋን ዴዔይሳ ታኒ ቤዓይስ» ያጊስ።
ACT 8:24 ሲሞኒ ዛሪዲ፥ «ሂንቴ ጊዳይሳፌ ኢሶይካ ታና ጋኮና ሜላ ታው ፆሳ ዎሲቴ» ያጊስ።
ACT 8:25 ጴፂሮሲኔ ዮሃኒሲ ማርካቲዳፔኔ ጎዳ ቃላ ኦዲዳፔ ጉዬ ዬሩሳላሜ ሲሚዶሶና። ሳማሬን ዴዒያ ዳሮ ጉታታን ዎንጌላ ኦዲዶሶና።
ACT 8:26 ጎዳ ኪታንቾይ ፊልጶሳኮ፥ «ዴንዳዳ ዬሩሳላሜፔ ጋዛ ኤፊያ ባዞ ቢታ ኦጊያኮ ባ። ሄ ኦጌይ ዱጌሃ ባጋራ ዴዔስ» ያጊስ።
ACT 8:27 ፊልጶሲ ዴንዲዲ ቢስ። ሂንዴኬ ጊያ ቶጲያ ካዌስ ኢ ሚሼ ኡባ ናጊያ ቶጲያ ኣሲ ዴዔስ። ኢካ ጎይናናው ዬሩሳላሜ ቢስ።
ACT 8:28 ፓራ ጋሪያን ኡቲዲ፥ ዬሩሳላሜፔ ባ ቢታ ሲሚሼ ናቢያ ኢሳያሳ ማፃፋ ናባቤስ።
ACT 8:29 ጌሻ ኣያናይ ፊልጶሳኮ፥ «ሄ ጋሪያኮ ባዳ ኢያ ማቲ ሺቃ» ያጊስ።
ACT 8:30 ያቲን ፊልጶሲ ዎፂ ቢዲ ጋኪያ ዎዴ ሞሪናይ ናቢያ ኢሳያሳ ማፃፋፔ ናባቢሺን ሲዒዲ፥ «ኔ ናባቤያሲ ኔው ጌሊ?» ያጊስ።
ACT 8:31 ሞሪናይ፥ «ታው ኦዲ ጌልሲያ ኣሲ ባይና ዋኒዲ ጌላኔ?» ያጊስ። ባራ ጋሪያን ኬዪዲ ኡታና ሜላ ፊልጶሳ ዎሲስ።
ACT 8:32 ሞሪናይ ናባቢያ ማፃፋ ኪፊሌይ፥ «ኢ ዶርሳዳ ሹኬታናው ላጌቲስ፤ ዶርሳ ማሪ ባ ኢኪሲያ ሜዴይሳታ ሲንꬃን ሲዒ ጌይሳዳ፥ ኢካ ባ ዶና ዶዪቤና።
ACT 8:33 ኢ ካዉዪስ፤ ኢያው ፂሎ ፒርዲ ꬋይስ። ኢያ ዴዖይ ሃ ሳዓፔ ቃንፄቲዳ ጊሾ ኢያ ሼሻባ ኦኔ ኦዳናይ?» ያጌስ።
ACT 8:34 ሞሪናይ ዛሪዲ ፊልጶሳኮ፥ «ናቤይ ኦዴባ ኦዲ? ባባ ኦዲዬ ዎይኮ ሃራ ኣሳባ ኦዲ? ታው ኦዳርኪ» ያጊስ።
ACT 8:35 ፊልጶሲ ዛሪዲ፥ ፆሳ ቃላ ሄ ቤሳፌ ዶሚዲ፥ ዬሱሳባ ኦዲያ ዎንጌላ ኢያው ኦዲስ።
ACT 8:36 ኤንቲ ቢሼ ሃꬂ ዴዒያሶ ጋኪዶሶና። ሞሪናይ፥ «ሃꬄ ሃይሳ ቤዓ፤ ታ ፃማቄቶና ሜላ ኣይቢ ዲጊ?» ያጊስ።
ACT 8:37 ፊልጶሲ ኢያኮ፥ «ኔኒ ኔ ኩሜꬃ ዎዛናፔ ኣማኒኮ ዳንዳዓሳ» ያጊስ። ኢ ዛሪዲ፥ «ዬሱስ ኪሪስቶሲ ፆሳ ናዓ ጊዴይሳ ታኒ ኣማናይስ» ያጊስ።
ACT 8:38 ጋሬይ ኤቃና ሜላ ሞሪናይ ኪቲን፥ ናምዓይ ዎꬊዲ ሃꬃን ጌሊዶሶና፤ ፊልጶሲ ኢያ ፃማቂስ።
ACT 8:39 ኤንቲ ሃꬃፌ ጋፃ ኬዪዳ ዎዴ ጎዳ ኣያናይ ፊልጶሳ ቆፖና ኤኪስ። ናምዓንꬆ ሞሪናይ ፊልጶሳ ቤዒቤና፥ ሺን ባ ኦጊያ ኡፋይቲሼ ቢስ።
ACT 8:40 ፊልጶሲ ኣዛፆናን ባና ዴሚስ። ቃሲ ቂሳሪያ ያና ጋካናው ካታማታን ዩዪዲ ዎንጌላ ማርካቲስ።
ACT 9:1 ሄ ዎዴ ሳዖሊ ጎዳ ካሌይሳታ ዎꬋናው ማንዲዲ ካሂኔ ሃላቃኮ ቢስ።
ACT 9:2 ጎዳ ኦጊያ ካሊያ ኣዴታኔ ማጫታ ዴሚኮ፥ ቃቺሼ ዬሩሳላሜ ኤሃናው፥ ዳማስቆን ዴዒያ ኣይሁዴ ዎሳ ኬꬃታስ ዳብዳቤይ ፃፌታና ሜላ ኢያ ዎሲስ።
ACT 9:3 ኢ ቢዲ፥ ዳማስቆ ካታማ ጋካናው ማቲሺን፥ ቆፖና ሳሎፔ ዎልቃማ ፖዖይ ኢያ ዩሹዋን ፖዒስ።
ACT 9:4 ኢ ሳዓን ኩንዲዳሺን፥ «ሳዖላ፥ ሳዖላ፥ ኣይስ ታና ጎዳይ?» ጊያ ቃላ ሲዒስ።
ACT 9:5 ሳዖሊ፥ «ጎዳው፥ ኔኒ ኦኔ?» ያጊዲ ኦይቺስ። «ታኒ፥ ኔኒ ጎዲያ ዬሱሳ» ያጊስ።
ACT 9:6 ሺን ሳዖሊ ኮኮሪሼኔ ማላሌቲሼ፥ «ጎዳው፥ ታኒ ኣይ ኦꬃና ሜላ ኮያይ?» ያጊስ። ጎዳይ ኢያኮ፥ «ዴንዳዳ ካታማ ጌላ፤ ኔኒ ኦꬃናው ቤሲያባይ ያን ኔው ኦዴታና» ያጊስ።
ACT 9:7 ሳዖላራ ኦጊያ ቢያ ኣሳቲ ኣይኮካ ኦዴቶና ኤቂ ኣቲዶሶና። ቃላ ሲዖሶና፥ ሺን ኦናካ ቤዒቦኮና።
ACT 9:8 ሳዖሊ ኩንዲዳ ቤሳፌ ዴንዲዲ ፄሊያ ዎዴ ኢያ ኣይፌይ ዴሞና ኢፂስ። ሄሳ ጊሾ፥ ኤንቲ ኢያ ኩሺያ ኦይኪዲ ካሌꬂዲ ዳማስቆ ጌልሲዶሶና።
ACT 9:9 ሄꬑ ጋላስ ጋካናው ኢ ፄላናው ዳንዳዒቤና፤ ኣይኮካ ሚቤና፤ ኡዪቤና።
ACT 9:10 ዳማስቆን ኢሲ ሃናኒያ ጊያ ዬሱሳ ታማሬይ ዴዔስ። ጎዳይ ቆንጬꬃን፥ «ሃናኒያ» ያጊዲ ፄጊስ። ሃናኔይ ዛሪዲ፥ «ታ ጎዳው፥ ሃይሳን ዴዓይስ» ያጊስ።
ACT 9:11 ጎዳይ ኢያኮ፥ «ዴንዳዳ ሱሬ ጌቴቲያ ኦጊያ ባዳ፥ ዪሁዳ ሶን ሳዖላ ጊያ ቴርሴሴፔ ዪዳ ኡራ ኮያ፤ ሳዖሊ ዎሴስ።
ACT 9:12 ቃሲ ሃናኔይ ጌሊዲ፥ ሳዖሊ ናምዓንꬆ ፄላና ሜላ ባ ኩሺያ ኢያ ቦላ ዎꬂሺን ቆንጬꬃን ቤዒስ» ያጊስ።
ACT 9:13 ሃናኔይ ዛሪዲ፥ «ጎዳው፥ ዬሩሳላሜን ኔ ጌሻ ኣሳ ቦላ ሄ ኡራይ ኣይ ሜላ ኢታባ ኦꬂዳኮ ታኒ ዳሮ ኣሳፔ ሲዓስ።
ACT 9:14 ቃሲ ዳማስቆን ኔ ሱንꬃ ፄጌይሳታ ኡባ ቃቻናው፥ ካሂኔ ሃላቃቲ ኢያው ማታ ኢሚዶሶና» ያጊስ።
ACT 9:15 ሺን ጎዳይ ኢያኮ፥ «ሳዖሊ ኣይሁዴ ጊዶና ኣሳ ሲንꬃን፥ ካዎታ ሲንꬃኒኔ ኢስራዔሌ ኣሳ ሲንꬃን፥ ታ ሱንꬃ ኤሪሳናዉኔ ታው ኦꬃናው ዶሬቲዳ ሚሼ ጊዲያ ጊሾ ኔኒ ኢያኮ ባ።
ACT 9:16 ኣይስ ጊኮ፥ ታ ሱንꬃ ጊሾ ኢ ኣይ ሜላ ዋዬ ኤካናው ቤሲያኮ ታኒ ኢያ ቤሳና» ያጊስ።
ACT 9:17 ሃናኔይ ቢዲ፥ ሶ ጌሊዲ፥ ባ ኩሺያ ሳዖላ ቦላ ዎꬂዲ፥ «ታ ኢሻ ሳዖላ፥ ኔኒ ያ ኦጊያን ኔው ቤንቲዳ ጎዳ ዬሱሲ፥ ኔኒ ፄላና ሜላኔ ጌሻ ኣያናን ኩማና ሜላ ታና ኪቲስ» ያጊስ።
ACT 9:18 ኤሌሲዲ፥ ሳዖላ ኣይፊያፔ ኢሲ ፖቆ ሜላባይ ዎꬊን፥ ሳዖሊ ናምዓንꬆ ፄሊስ። ቃሲ ዴንዲዲ ፃማቄቲስ።
ACT 9:19 ካꬂ ሚዲ ፃሊዲ፥ ዳማስቆን ዴዒያ ኣማኔይሳታራ ጉꬃ ጋላስ ጋምዒስ።
ACT 9:20 ኤሌሲዲ ሳዖሊ፥ «ዬሱሲ ፆሳ ናዓ» ያጊዲ ዳማስቆን ዴዒያ ኣይሁዴ ዎሳ ኬꬃታን ቃላ ታማርሲስ።
ACT 9:21 ሄሳ ሲዒዳ ኡባይ ማላሌቲዲ፥ «ሃይሲ ዬሩሳላሜን ዬሱሳ ሱንꬃ ፄጌይሳታ ቃቼይሳ ጊዴኔዬ? ቃሲ ሃ ዪዳይ ኤንታ ቃቺዲ፥ ካሂኔ ሃላቃታ ሲንꬄ ኤፋናሳ ጊዴኔ?» ያጊዶሶና።
ACT 9:22 ሺን ሳዖሊ ቃላ ኦዶን ሚኒ ሚኒ ቢስ። ዬሱሲ፥ ኢ ኪሪስቶሳ ጊዴይሳ ቆንጪሲዲ ኦዲዳ ጊሾ ዳማስቆን ዴዒያ ኣይሁዴቲ ኢያው ዛሪያባ ꬋዪዶሶና።
ACT 9:23 ዳሮ ጋላሳፔ ጉዬ ኣይሁዴቲ ሺቂዲ፥ ሳዖላ ዎꬋናው ዞሬቲዶሶና።
ACT 9:24 ሺን ኣይሁዴቲ ባና ዎꬋናው ቆፒዳይሳ ሳዖሊ ሲዒስ። ኤንቲ ኢያ ዎꬋናው ቃማኔ ጋላስ ካታማ ፔንጊያን ናጎሶና።
ACT 9:25 ሺን ኢያ ታማሬቲ ኢያ ቃማ ኤፊዲ፥ ጊምቤ ዲርሳ ማስኮቲያራ ዳቾራ ዎꬊሲዶሶና።
ACT 9:26 ሳዖሊ ዬሩሳላሜ ጋኪዳ ዎዴ ኣማኔይሳታራ ጋሄታናው ኮዪስ። ሺን ኢ ኪሪስቶሳ ኣማኒዳይሲ ኤንታው ቱማ ዳኖና ኢፂን ኢያው ያዪዶሶና።
ACT 9:27 ሺን ባርናባሲ ሳዖላ ሃዋሬታኮ ኤፊስ። ኦጌን ጎዳይ ዋኒዲ ቆንጪዳኮኔ ሃሳዪሲዳኮ፥ ቃሲ ሳዖሊ ዳማስቆን ዬሱሳ ሱንꬃን ያዮና ዋቲዲ ቃላ ኦዲዳኮ ኤንታው ጌሺዲ ኦዲስ።
ACT 9:28 ሳዖሊ ዬሩሳላሜን ዩዪዲ ጎዳ ሱንꬃን ያዮና ቃላ ኦዲሼ፥ ሃዋሬታራ ኢሲፌ ዴዒስ።
ACT 9:29 ቃሲ ሳዖሊ ጊሪኬ ቃላ ሃሳያ ኣይሁዴታራ ኦዴቲሼ ፓላሜስ። ሺን ኤንቲ ኢያ ዎꬋናው ኮዪዶሶና።
ACT 9:30 ኣማኒያ ኣሳቲ ሄሳ ሲዒዲ፥ ሳዖላ ቂሳሪያ ኤፊዲ ቴርሴሴ ዬዲዶሶና።
ACT 9:31 ዪሁዳን፥ ጋሊላኒኔ ሳማሬ ኡባን ዴዒያ ዎሳ ኬꬃቲ ሳሮቴꬃን ዴዒዶሶና። ቃሲ ሚኒዶሶና፤ ጎዳስ ያዪሼ ጌሻ ኣያና ሚንꬄꬁዋን ዳሪ ዳሪ ቢዶሶና።
ACT 9:32 ጴፂሮሲ ቢታ ኡባ ዩዪሼ ሊዳን ዴዒያ ኣማኒያ ኣሳታኮ ጋኪስ።
ACT 9:33 ያን ሆስፑን ላይꬂ ኩሜꬂ ጉንዲዲ ኣርሳን ዚንዒዲ ዴዒያ ኤኒያ ጊያ ኣዲያ ዴሚስ።
ACT 9:34 ጴፂሮሲ፥ «ኤኒያ፥ ዬሱስ ኪሪስቶሲ ኔና ፓꬃና፤ ዴንዳዳ ኔ ሂፃ ዴንꬃ» ያጊስ። ኢካ ኤሌሲዲ ዴንዲ ኤቂስ።
ACT 9:35 ሊዳኒኔ ሳሮናን ዴዒያ ኣሳ ኡባይ ኤኒያ ቤዒዲ፥ ጎዳኮ ሲሚዶሶና።
ACT 9:36 ዮጴ ካታማን ኢሲ ፃቢቶ ጊያ ኣማኒያራ ዴዓዉሱ። (ፃቢቶ ጉሳይ ጌንዔ ጉሱ) ኢያ ባ ዴዒዳ ዎዴ ኡባን ሎዖባ ኦꬃሼኔ ማንቆታ ማዳሼ ዴዓሱ።
ACT 9:37 ሄ ዎዴ ኢያ ሃርጋዳ ሃይቂን፥ ኣሳይ ኢ ኣሃ ሜጪዲ፥ ፖቂያ ቦላ ኬሲዲ ዚንዒሲዶሶና።
ACT 9:38 ሊዲ ዮጴስ ማታ። ኣማኔይሳቲ ጴፂሮሲ ሊዳን ዴዔይሳ ሲዒዲ፥ «ሃያና ኑኮ ኤሌሳዳ ያ» ያጊያ ኪታ ናምዑ ኣሳታ ቦላ ኢያኮ ኪቲዶሶና።
ACT 9:39 ሄሳ ጊሾ፥ ጴፂሮሲ ዴንዲዲ፥ ኤንታራ ቢስ። ያ ጋኪን፥ ፖቂያ ቦላ ዴዒያ ኪፊሊያ ኢያ ጌልሲዶሶና። ኣምዔቲ ጴፂሮሳ ዩሹዋን ኤቂዲ ዬኪሼ ዶርቃ ኤንታራ ፓፃ ዴዓሼ ኦꬂዳ ቃሚሴታኔ ኣፊላታ ኡባ ጴፂሮሳ ቤሲዶሶና።
ACT 9:40 ጴፂሮሲ ኤንታ ኡባ ካሬ ኬሲዲ፥ ጉልባቲዲ ፆሳ ዎሲስ። ቃሲ ኣሃኮ ሲሚዲ፥ «ፃቢቴ፥ ዴንዳ» ያጊስ። ፃቢታ ባ ኣይፊያ ዶያዳ ጴፂሮሳ ቤዓዳ፥ ዴንዳ ኡታሱ።
ACT 9:41 ጴፂሮሲ ኢዮ ባ ኩሺያን ማዲዲ ዴንꬂ ኤሲስ። ሄሳፌ ጉዬ፥ ኣማኔይሳታኔ ኣምዔታ ፄጊዲ፥ ዴንዲዳሮ ኤንታ ሲንꬄ ሺሺስ።
ACT 9:42 ሃ ኦዳይ ዮጴ ካታማ ኡባ ጋኪስ። ዳሮ ኣሳይ ጎዳ ኣማኒዶሶና።
ACT 9:43 ጴፂሮሲ ዮጴን ሲሞና ጊያ ጋልባ ሃሼይሳ ሶን ዳሮ ጋላስ ጋምዒስ።
ACT 10:1 ቂሳሪያን፥ «ፃሌ ኦላ ኣሳታ» ጌቴቲያ ኦላንቾታ ጊዶን ኢሲ ቆርኔሊዮሳ ጌቴቲያ ማቶ ሃላቃይ ዴዔስ።
ACT 10:2 ቆርኔሊዮሲ ባ ሶ ኣሳራ ፆሳ ሚንꬂ ኣማኒያ ኣሲኔ ፆሳ ጎይኒያ ኣሲ። ኣይሁዴ ማንቆታካ ዳሮ ማዴስ፥ ቃሲ ፆሳ ኡባ ዎዴ ዎሴስ።
ACT 10:3 ኢሲ ጋላስ ኡዱፉን ሳቴ ሄራን ፆሳ ኪታንቾይ ኢያኮ ዪዲ፥ «ቆርኔሊዮሳ» ጊዲ ፄጊሺን ኢ ቆንጬꬃን ጌሺዲ ቤዒስ።
ACT 10:4 ቆርኔሊዮሲ ዳጋሚዲ ኪታንቹዋ ቲሺ ኦꬂ ፄሊዲ፥ «ጎዳው፥ ኢ ኣይቤ?» ያጊስ። ኪታንቾይ ዛሪዲ፥ «ኔ ዎሳይኔ ማንቆታ ኔ ማዴይሲ ፆሳ ሲንꬃን ሃሳዬቲስ።
ACT 10:5 ሃዒ ዮጴ ኣሴ ኪታዳ፥ ጴፂሮሳ ጊያ ሲሞና ኤሂሳ።
ACT 10:6 ጴፂሮሲ ኣባ ዶናን ጋልባ ሃሺያ ሲሞና ሶን ኢማꬃቴꬂ ሲራቲስ» ያጊስ።
ACT 10:7 ቆርኔሊዮሲ ባው ኦዲዳ ኪታንቾይ ቢን፥ ባ ኣይሌታፔ ናምዓታኔ ፆሳ ጎይኒያ ባ ማታ ዎታዳሬታፔ ኢሱዋ ፄጊዲ፥
ACT 10:8 ኤንታው ኡባባ ኦዲዲ ዮጴ ኪቲስ።
ACT 10:9 ዎንቴꬃ ጋላስ ኤንቲ ቢዲ፥ ዮጴ ካታማ ማቲሺን ኡሱፑን ሳቴ ሄራን ፆሳ ዎሳናው ጴፂሮሲ ፖቄ ቦላ ኬይስ።
ACT 10:10 ኢ ኮሻቲዲ ካꬂ ማናው ኮዪስ፥ ሺን ካꬂ ካፂሺን ኢ ቆንጬꬂ ቤዒስ።
ACT 10:11 ሳሎይ ዶዬቲን፥ ጊታ ኣፊላ ዳኒያባይ ኦይዱ ባጋራ ኦይኬቲዲ ዎꬊሺን ኢ ቤዒስ።
ACT 10:12 ኢያን ኦይዱ ቶሆራ ዴዒያ ሜሄቲ፥ ዎራ ዶዓቲ፥ ኡሎራ ጎሼቲያ ሜꬌቴꬃቲኔ ሳሎ ካፎቲ ኡባይ ዴዔስ።
ACT 10:13 ሄ ዎዴ «ጴፂሮሳ፥ ዴንዳ ኤቃዳ ሹካዳ ማ» ጊያ ቃሊ ኢያኮ ዪስ።
ACT 10:14 ሺን ጴፂሮሲ፥ «ጎዳው፥ ኣካይ! ታ ቱናባ ኡባራካ ማ ኤሪኬ» ያጊስ።
ACT 10:15 ቃሲ፥ «ፆሳይ ጌሺዳይሳ ኔኒ ቱና ጎፓ» ጊያ ቃሊ ናምዓንꬆ ኢያኮ ዪስ።
ACT 10:16 ሄሲካ፥ ሄꬑ ቶሆ ሃኒዳፔ ጉዬ ሄ ጊታ ኣፊላ ዳኔይሲ ኤሌሲዲ ፑዴ ሳሎ ኤኬቲስ።
ACT 10:17 ጴፂሮሲ ባ ቤዒዳ ቆንጬꬃ ቢርሼꬃይ፥ «ኣይ ጊዳንዴሻ?» ጊዲ ባ ዎዛናን ቆፒሺን፥ ቆርኔሊዮሲ ኪቲዳ ኣሳቲ ሲሞና ሶ ኦይቺ ዴሚዲ ካሬን ኤቂዶሶና።
ACT 10:18 ባንታ ቃላ ꬎቁ ኦꬂዲ፥ «ጴፂሮሳ ጊያ ሲሞኒ ኢማꬃቴꬃን ዴዔይ ሃይሳኔ?» ያጊዲ ኦይቺዶሶና።
ACT 10:19 ጴፂሮሲ ቆንጬꬃን ቤዒዳባ ቆፋ ቦላ ዴዒሺን፥ ጌሻ ኣያኒ ኢያኮ፥ «ሄኮ፥ ሄꬑ ኣሳቲ ኔና ኮዮሶና።
ACT 10:20 ዴንዳዳ ዎꬋ፥ ታኒ ኤንታ ኪቲዳ ጊሾ ሲꬎና ኤንታራ ባ» ያጊስ።
ACT 10:21 ጴፂሮሲ ኣሳታኮ ዎꬊዲ፥ «ሂንቴ ኮዬይ ታና፤ ኣይስ ዪዴቲ?» ያጊስ።
ACT 10:22 ኤንቲ ዛሪዲ፥ «ኑና ማቶ ሃላቃይ ቆርኔሊዮሲ ኪቲስ። ኢ ፂሎ፥ ፆሳ ጎይኒያ ኣሲኔ ኣይሁዴ ኣሳ ኡባን ዳሮ ቦንቼቲዳ ኣሲ። ቆርኔሊዮሲ፥ ኔና ባ ሶ ኤሂሲዲ ቃላ ኔፔ ሲዓና ሜላ ጌሻ ኪታንቾይ ኢያው ኦዲስ» ያጊዶሶና።
ACT 10:23 ጴፂሮሲ ኣሳታ ሶ ጌልሲዲ ሞኪስ። ዎንቴꬃ ጋላስ፥ ዴንዲዲ ኤንታራ ቢስ። ዮጴ ካታማን ዴዒያ ኣማኔይሳታፔ ኢሶቲ ኢሶቲ ኢያራ ኢሲፌ ቢዶሶና።
ACT 10:24 ዎንቴꬃ ጋላስ፥ ቂሳሪያ ጋኪዶሶና። ቆርኔሊዮሲ ባ ዳቦታኔ ባ ማታ ላጌታ ኢሲፌ ፄጊ ሺሺዲ፥ ጴፂሮሳ ናጌስ።
ACT 10:25 ጴፂሮሲ ሶ ጌላና ሃኒሺን፥ ቆርኔሊዮሲ ኢያራ ጋሄቲዲ ኢያ ሲንꬃን ኩንዲዲ ኢያው ጎይናናው ኮዪስ።
ACT 10:26 ሺን ጴፂሮሲ፥ «ዴንዳ፥ ታካ ታ ሁዔን ኔ ሜላ ኣሴ» ያጊዲ ኢያ ዴንꬂስ።
ACT 10:27 ጴፂሮሲ ቆርኔሊዮሳራ ኦዴቲሼ ሶ ጌሊያ ዎዴ ዳሮ ኣሳይ ሺቂዳይሳ ዴሚስ።
ACT 10:28 ኢ ኣሳኮ፥ «ኣይሁዴ ኣሲ ሃራ ዴሬራ ኢሲፋናው ዎይኮ ጋሄታናው ዎጋ ጊዶናይሳ ሂንቴ ኤሬታ። ሺን ታኒ ኦናካ ቱና ዎይኮ ጌሺ ጊዴና ጎና ሜላ ፆሳይ ታና ቤሲስ።
ACT 10:29 ሄሳ ጊሾ፥ ሂንቴ ታኮ ኪቲን ኢፆይ ባይና ያስ። ሃዒ ታና ኣይስ ፄጊሲዳኮ ታው ኦዲቴ» ያጊስ።
ACT 10:30 ቆርኔሊዮሲ፥ «ታኒ ሃቺ ኦይዱ ጋላሳፔ ካሴ ሃኖዴ ኡዱፉን ሳቴ ዎሳ ዎሲሺን፥ ጶሊያ ማዖ ማዒዳ ኣሲ ታ ሲንꬃን ኤቂስ።
ACT 10:31 ኢ ታኮ፥ ‹ቆርኔሊዮሳ፥ ፆሳይ ኔ ዎሳ ሲዒስ፥ ኔኒ ማንቆታ ማዲዳይሳካ ሃሳይስ።
ACT 10:32 ሂዛ፥ ኣሴ ዮጴ ኪታዳ፥ ሲሞን ጴፂሮሳ ጌይሳ ፄጊሳ። ኢ፥ ሲሞና ጊያ ጋልባ ሃሺያ ኡራ ሶን ኣባ ዶናን ሲራቲስ› ያጊስ።
ACT 10:33 ሄሳ ጊሾ፥ ታኒ ኔኮ ኤሌሳዳ ኪታስ፤ ኔ ሎዖ ያዳሳ። ሂዛ፥ ፆሳይ ኔና ኪቲዳባ ኡባ ሲዓናው ሃዒ ኑኒ ኡባይ ሃይሳን ጎዳ ሲንꬃን ዴዖስ» ያጊስ።
ACT 10:34 ካሊዲካ፥ ጴፂሮሲ፥ «ፆሳይ ኣሳ ሶምዖ ቤዒዲ ኣሴ ኣሳፔ ሻኬና።
ACT 10:35 ሺን ኣሴ ኡባ ኦና ጊዲኮካ ባው ያዬይሳኔ ፂሎ ኦሶ ኦꬄይሳን ፆሳይ ኡፋይቴይሳ ታኒ ቱማ ኣኬካስ።
ACT 10:36 ፆሳይ፥ ኡባ ጎዳ ጊዲዳ ዬሱስ ኪሪስቶሳ ባጋራ ሳሮቴꬃ ኦዲሼ ሃ ዎንጌላ ኢስራዔሌ ኣሳስ ኪቲዳይሳ ሂንቴ ኤሬታ።
ACT 10:37 ዮሃኒሲ ፂንቃቴባ ጋሊላን ሳባኪዳ ዎዲያፔ ዶሚዲ ዪሁዳ ቢታ ኡባ ጋካናው ሃኒዳባ ሂንቴ ኤሬታ።
ACT 10:38 ፆሳይ ናዚሬቴ ዬሱሳስ ጌሻ ኣያናኔ ዎልቃ ኢሚስ። ፆሳይ ኢያራ ዴዒያ ጊሾ ሎዖባ ኢ ኦꬂሼ ፃላሄ ኩሼን ሃሬቲዳ ኡባ ፓꬂሼ ዩዪስ።
ACT 10:39 «ኣይሁዴ ቢታኒኔ ዬሩሳላሜን ኢ ኦꬂዳ ኡባባስ ኑኒ ማርካታ። ኤንቲ ማስቃሊያ ቦላ ካቂዲ ኢያ ዎꬊዶሶና።
ACT 10:40 ሺን ፆሳይ ሄꬓንꬆ ጋላሳን ሃይቆፔ ኢያ ዴንꬂዲ ኣሳስ ቆንጫና ሜላ ኦꬂስ።
ACT 10:41 ሄ ቆንጬꬃይ ፆሳይ ኮይሮ ዶሪዳ ማርካታሳፌ ኣቲን ኣሳ ኡባስ ጊዴና። ኢ ሃይቆፔ ዴንዲዳፔ ጉዬ ኢያራ ሚዳኔ ኡዪዳ።
ACT 10:42 ኑኒ ዎንጌላ ኣሳስ ኦዳና ሜላኔ ፓፃ ዴዔይሳታ ቦላኔ ሃይቂዳይሳታ ቦላ ፒርዳናው ፆሳይ ሹሚዳይ ዬሱሳ ጊዴይሳ ማርካታና ሜላ ኑና ኪቲስ።
ACT 10:43 ፆሳይ ኢያ ኣማኒያ ኡባ ናጋራይ፥ ኢያ ሱንꬃን ኣቶ ጌቴቴይሳ ናቤቲ ማርካቶሶና» ያጊስ።
ACT 10:44 ጴፂሮሲ ቡሮ ሄ ኦዳ ኦንጎናሺን ቃላ ሲዒያ ኡባ ቦላ ጌሻ ኣያኒ ዎꬊስ።
ACT 10:45 ጴፂሮሳራ ዮጴፌ ዪዳ ኣማኒያ ቃፃሬቲዳ ኣይሁዴ ኡባይ፥ ኣይሁዴ ጊዶናይሳታ ቦላ ጌሻ ኣያኒ ጉኪዳ ጊሾ ማላሌቲዶሶና።
ACT 10:46 ጋሶይካ፥ ኤንቲ ዱማ ዱማ ዶናን ሃሳዪሺኒኔ ፆሳ ጊታቴꬃ ሳቢሺን ሲዒዶሶና። ሄ ዎዴ ጴፂሮሲ ዛሪዲ፥
ACT 10:47 «ሃይሳቲ ቃሲ ኑ ሜላ ጌሻ ኣያና ኤኪዳይሳቲ ፃማቄቶና ሜላ ሃꬄ ዲጋናይ ኦኔ?» ያጊስ።
ACT 10:48 ኤንቲ ዬሱስ ኪሪስቶሳ ሱንꬃን ፃማቄታና ሜላ ኤንታ ኪቲስ። ሄሳፌ ጉዬ፥ ኤንቲ ባንታራ ጉꬃ ጋላስ ኡታና ሜላ ጴፂሮሳ ዎሲዶሶና።
ACT 11:1 ሃዋሬቲኔ ዪሁዳ ኡባን ዴዒያ ኣማኔይሳቲ፥ ኣይሁዴ ጊዶናይሳቲካ ፆሳ ቃላ ኤኪዳይሳ ሲዒዶሶና።
ACT 11:2 ጴፂሮሲ ዬሩሳላሜ ቢዳ ዎዴ ቃፃሬቲዳ ኣማኔይሳቲ፥
ACT 11:3 ኢያኮ፥ «ኔኒ ቃፃሬቲቦናይሳታኮ ጌላዳ ኤንታራ ካꬂ ኣይስ ማዲ?» ያጊዶሶና።
ACT 11:4 ሺን ጴፂሮሲ ሃኒዳባ ኮይሮፔ ዶሚዲ ማራን ማራን ኦዲስ፡
ACT 11:5 «ታኒ ዮጴ ካታማን ፆሳ ዎሳሼ ቆንጬꬂ ቤዓስ። ጊታ ኣፊላ ዳኒያባይ ኦይዱ ባጋራ ኦይኬቲዲ ሳሎፔ ዎꬊሼ ታኮ ዪስ።
ACT 11:6 ታኒ ቲሺ ኦꬃ ኢያ ጊዶ ፄሊያ ዎዴ ኦይዱ ቶሆራ ዴዒያ ሜሄታ፥ ዎራ ዶዓታ፥ ኡሎራ ጎሼቲያ ሜꬌቴꬃታኔ ሳሎ ካፎታ ቤዓስ።
ACT 11:7 ‹ጴፂሮሳ፥ ዴንዳ፥ ሹካዳ ማ› ጊያ ቃላ ሲዓስ።
ACT 11:8 «ሺን ታኒ፥ ‹ጎዳው፥ ኣካይ፥ ቱናባይ ዎይኮ ጌዮናባይ ኡባካ ታ ዶናኮ ሺቂ ኤሬና› ያጋስ።
ACT 11:9 « ‹ፆሳይ ጌሺዳይሳ ኔኒ ቱና ጎፓ› ያጊያ ቃሊ ናምዓንꬆ ሳሎፔ ዪስ።
ACT 11:10 «ሄሲ ሄꬑ ቶሆ ሃኒን፥ ዉርሴꬃን ኡባባይ ሳሎ ፑዴ ኤኬቲስ።
ACT 11:11 ሄ ሳቴንካ ሄꬑ ኣሳቲ ቂሳሪያፔ ታኮ ኪቴቲዲ ታኒ ዴዒያ ኬꬃ ጋኪ ኣጊዶሶና።
ACT 11:12 ሲꬎና ኤንታራ ባና ሜላ ኣያናኢ ታው ኦዲስ። ቃሲ ሃ ኡሱፑን ኢሻቲ ዮጴፌ ታራ ቂሳሪያ ቢዳይሳታራ ቆርኔሊዮሳ ሶ ጌሊዳ።
ACT 11:13 ኪታንቾይ ኢያ ሶን ኤቂዲ፥ ‹ዮጴ ኪታዳ ጴፂሮሳ ጌቴቲያ ሲሞና ፄጊሳ።
ACT 11:14 ኔናኔ ኔ ሶ ኣሳ ኡባ ኣሺያ ቃላ ኢ ኔው ኦዳና› ጊዳይሳ ቆርኔሊዮስ ኑስ ኦዲስ።
ACT 11:15 «ታኒ ሃሳያ ዶሚያ ዎዴ ጌሻ ኣያናይ ኮይሮ ኑ ቦላ ዎꬊዳይሳዳ ኤንታ ቦላካ ዎꬊ ኣጊስ።
ACT 11:16 ሄ ዎዴ ‹ዮሃኒሲ ሃꬃን ፃማቂስ፥ ሺን ሂንቴ ጌሻ ኣያናን ፃማቄታና› ያጊዳ ጎዳ ቃላይ ታው ቆፌቲስ።
ACT 11:17 ፆሳይ ኑስ ጎዳ ዬሱስ ኪሪስቶሳ ኣማኒዳይሳታስ ኢሚዳ ኢሞታ ኣይሁዴ ጊዶናይሳታስካ ኢሚኮ፥ ያቲን ፆሳ ዲጋናው ታኒ ኦኔ?» ያጊስ።
ACT 11:18 ኤንቲ ሄሳ ሲዒዳ ዎዴ ባንታ ፓላማ ኣጊዲ፥ «ሄሳ ጊዲኮ፥ ፆሳይ ኣይሁዴ ጊዶናይሳቲካ ናጋራፔ ሲሚዲ ዴዖን ዳናዳ ቃዳ ኢሚስ» ያጊዲ ፆሳ ጋላቲዶሶና።
ACT 11:19 ኢስፂፋኖሴ ሃይቆስ ጋꬂዳ ጎዳ ጋሶን ላሌቲዳ ኣማኔይሳቲ ቃላ ኣይሁዴታ ፃላላስ ኦዲሼ ሲሮፊንቄ፥ ቆጲሮሳኔ ኣንፆኪያ ጋካናው ዩዪዶሶና።
ACT 11:20 ሺን ቆጲሮሳፔኔ ቄሬናፔ ዪዳ ኢሲ ኢሲ ኣማኒያ ኣሳቲ ኣንፆኪያ ቢዲ፥ ጎዳ ዬሱሳ ዎንጌላ ጊሪኬ ኣሳስካ ኦዲዶሶና።
ACT 11:21 ጎዳ ዎልቃይ ኤንታራ ዴዔስ፤ ቃሲ ዳሮ ኣሳይ ኣማኒዲ ጎዳኮ ሲሚዶሶና።
ACT 11:22 ሄ ኦዳ ዬሩሳላሜን ዴዒያ ዎሳ ኬꬃይ ሲዒዳ ጊሾ ባርናባሳ ኣንፆኪያ ኪቲስ።
ACT 11:23 ባርናባሲ ኣንፆኪያ ቢዳ ዎዴ ፆሳ ኣꬎ ኬሃቴꬃ ኦሱዋ ቤዒዲ ኡፋይቲስ። ኤንቲ ኡባይ ባንታ ኩሜꬃ ዎዛናን ጎዳን ሚኒዲ ዳና ሜላ ኤንታ ዞሪስ።
ACT 11:24 ባርናባሲ ጌሻ ኣያናይኔ ኣማኖይ ኩሚዳ ሎዖ ኣሲ ጊዲያ ጊሾ ዳሮ ኣሳይ ጎዳ ኣማኒዶሶና።
ACT 11:25 ሄሳፌ ጉዬ፥ ባርናባሲ ሳዖላ ኮያናው ቴርሴሴ ቢስ።
ACT 11:26 ያን ሳዖላ ዴሚዳ ዎዴ ኣንፆኪያ ኤኪዲ ዪስ። ባርናባሲኔ ሳዖሊ ዎሳ ኬꬃ ኣሳራ ላይꬂ ኩሜꬂ ኡቲዲ ዳሮ ኣሳ ታማርሲዶሶና። ኣማኔይሳቲ ኣንፆኪያን «ኪሪስታኔ» ጌቴቲዲ ኮይሮ ፄጌቲዶሶና።
ACT 11:27 ሄ ዎዴ ኢሲ ኢሲ ናቤቲ ዬሩሳላሜፔ ኣንፆኪያ ዎꬊዶሶና።
ACT 11:28 ኤንታ ጊዶፌ ኣጋቦሳ ጌይሲ ዴንዲዲ ቢታ ኡባን ጊታ ኮሺ ኬያናይሳ ኣያና ዎልቃን ቲንቢቴ ኦዲስ። ሄሲ ሃኒዳይ ሮሜ ካዉዋ ቃላዉዲዮሳ ዎዴና።
ACT 11:29 ኣማኔይሳቲ ሁዔን ሁዔን ባንታ ዎልቃ ሜላ ሚሼ ኬሲዲ ዪሁዳን ዴዒያ ኣማኔይሳታስ ማዴ ዬዳናው ቆፋ ቃቺዶሶና።
ACT 11:30 ኤንቲ ሄሳዳ ኦꬂዲ፥ ሚሺያ ባርናባሳ ቦላኔ ሳዖላ ቦላ ዎሳ ኬꬃ ጪማታስ ዬዲዶሶና።
ACT 12:1 ሄ ዎዴ ካዎይ ሄሮዲሲ ዎሳ ኬꬃ ኣሳፔ ባጋ ጎዳ ዶሚስ።
ACT 12:2 ዮሃኒሳ ኢሻ ያይቆባ ማሻን ዎꬊሲስ።
ACT 12:3 ሄሲ ኣይሁዴታ ኡፋይሲዳይሳ ቤዒዲ፥ ጉጂዲ ጴፂሮሳካ ኦይꬂስ። ሄሲ ሃኒዳይ ፓሲካ ባሌ ቦንቺያ ጋላሳታና።
ACT 12:4 ጴፂሮሳ ኦይኪዲ ቃቺስ። ፓሲካ ቦንቺያ ጋላሳታፔ ጉዬ ዴሪያ ሲንꬄ ኣꬃናው ቆፒዲ፥ ኦይዱ ኦይዱ ዎታዳሬቲ ኢያ ናጋና ሜላ ታማኔ ኡሱፑን ዎታዳሬታስ ኣꬂ ኢሚስ።
ACT 12:5 ሄሳ ጊሾ፥ ጴፂሮሲ ቃሾ ኬꬃን ናጌቴስ። ሺን ዎሳ ኬꬃ ኣሳይ ኢያው ሚንꬂዲ ፆሳ ዎሶሶና።
ACT 12:6 ሄሮዲሲ ጴፂሮሳ ኣሳ ሲንꬄ ሺሻናፔ ካሴ ቃማ ጴፂሮሲ ናምዑ ባጋራ ናምዑ ዎታዳሬታራ ሳንꬃላታን ቃሼቲዲ ኤንታ ጊዶን ꬊስኪስ። ናጌይሳቲ ቃሾ ኬꬃ ፔንጌታን ኤቂዲ ናጎሶና።
ACT 12:7 ኣኬኮና ዴዒሺን ጎዳ ኪታንቾይ ቆንጪስ። ቃሾ ኬꬃን ፖዖይ ፖዒስ። ኪታንቾይ ጴፂሮሳ ሚያ ቦቺ ባርኪሲዲ፥ «ኤሌ ዴንዳ» ያጊስ። ኢራካ ሳንꬃላታይ ኢያ ኩሺያፔ ዎꬊ ኣጊስ።
ACT 12:8 ኪታንቾይ ኢያኮ፥ «ኔ ማዑዋ ማዓ፥ ኔ ጫማካ ኣꬃ» ያጊስ። ጴፂሮሲ ሄሳዳ ኦꬂስ፤ ኪታንቾይ፥ «ኔ ላፃና ማዓዳ ታና ካላ» ያጊስ።
ACT 12:9 ጴፂሮሲ ቃሾ ኬꬃፌ ኬዪዲ ኪታንቹዋ ካሊስ። ኢያው ቆንጬꬂ ቤዒያባ ዳኒሲፔ ኣቲን ኪታንቾይ ኦꬂያባይ ቱማ ዳኒቤና።
ACT 12:10 ኪታንቾይኔ ጴፂሮሲ ኮይሩዋኔ ናምዓንꬆ ዎታዳሪያ ኣꬊዲ ካታማ ኤፊያ ቢራታ ፔንጊያኮ ጋኪዶሶና። ፔንጌይ ኤንታው ባርካ ዶዬቲ ኣጊስ። ኤንቲ ኬዪዲ ኢሲ ኦጊያራ ቢሺን ኪታንቾይ ኣኬኮና ጴፂሮሳፔ ሻኬቲ ኣጊስ።
ACT 12:11 ጴፂሮሳስ ዎዛኒ ሲሚን፥ «ታና ጎዳይ ባ ኪታንቹዋ ኪቲዲ፥ ሄሮዲሳ ኩሼፔኔ ናጊዲ ኡቲዳ ኣይሁዴ ኣሳ ኡባፌ ኣሺዳይሳ ሃዒ ቱማ ኤራስ» ያጊስ።
ACT 12:12 ኢ ሄሳ ኣኬኪዳ ዎዴ ዳሮ ኣሳይ ኢሲፌ ሺቂዲ ፆሳ ዎሲያ ቤሳ፥ ማርቆሳ ጊያ ዮሃኒሳ ኣዬ ማይራሚ ሶ ቢስ።
ACT 12:13 ያን ካሬን ኤቂዲ ፄጊስ። ኢሲ ሮዳ ጊያ ኦሳንቺያ ፔንጊያ ዶያናው ያሱ።
ACT 12:14 ሮዳ ጴፂሮሳ ቃላ ጊዲዳይሳ ኤሪዳ ዎዴ ኡፋይሳን ኩማዳ ካሪያ ዶዬና ጉዬ ዎፃ ባዳ፥ «ጴፂሮሲ ካሬን ኤቂስ» ያጋዳ ኣሳስ ኦዳሱ።
ACT 12:15 ኣሳይ ኢኮ፥ «ኔኒ ጎያይ!» ያጊዶሶና። ሮዳ ጴፂሮሳ ጊዲዳይሳ ጌሻዳ ኦዳሱ። ኤንቲ፥ «ሄሲ ኢያ ናጊያ ኪታንቹዋ» ያጊዶሶና።
ACT 12:16 ሺን ጴፂሮሲ ካሬን ኤቂዲ ፄጊዲ ኣጎና ኢፂን ኣሳይ ካሪያ ዶዪዲ ኢያ ቤዒዲ ማላሌቲዶሶና።
ACT 12:17 ሺን ኤንቲ ሲዒ ጋና ሜላ ጴፂሮሲ ባ ኩሺያን ማሊዲ ጎዳይ ቃሾ ኬꬃፌ ኢያ ዋቲ ኬሲዳኮ ኤንታው ቆንጪሲ ኦዲዲ፥ «ሃይሳ ያይቆባሲኔ ኣማኒያ ኣሳታስ ኦዲቴ» ጊዲ ያፔ ኬዪዲ ሃራሶ ቢስ።
ACT 12:18 ሳዒ ዎንቲያ ዎዴ «ጴፂሮሲ ኣው ቢዴ» ጊዲ ዎታዳሬቲ ዎሊ ጊዶን ዳሮ ካጪዶሶና።
ACT 12:19 ሄሮዲሲ ጴፂሮሳ ኮዪሲን፥ ኢ ꬋዪዳ ዎዴ ናጌይሳታ ቆሪዲ፥ ኤንታ ዎꬋና ሜላ ኪቲስ። ሄሳፌ ጉዬ፥ ሄሮዲሲ ዪሁዳፔ ቂሳሪያ ዎꬊዲ ያን ጉꬃ ዎዴ ኡቲስ።
ACT 12:20 ሄሮዲሲ ፂሮሳ ኣሳ ቦላኔ ሲዶና ኣሳ ቦላ ዳሮ ሃንቄቲስ። ኤንታ ቢታይ ካꬂ ሄሮዲሳ ቢታፌ ዴሚያ ጊሾ ኤንቲ ኢሲፌ ጊዲዲ ኢያ ሞሪና ቢላስፆሳ ባንታው ጪማ ኦꬂዲ ጊጋናው ሄሮዲሳኮ ቢዶሶና።
ACT 12:21 ሄሮዲሲ ሱንꬂዳ ጋላሳን ባ ካዎቴꬃ ኣፊላ ማዒዲ፥ ኣራታ ቦላ ኡቲዲ ኣሳስ ኦዲስ።
ACT 12:22 ኣሳይ፥ «ሄሲ ፆሳ ቃላ፥ ኣሳ ቃላ ጊዴና» ያጊዲ ዋሲዶሶና።
ACT 12:23 ሄሮዲሲ ፆሳ ቦንቺቦና ጊሾ ኢራካ ጎዳ ኪታንቾይ ኢያ ዴቺን ጉፁኔን ሜቴቲዲ ሃይቂስ።
ACT 12:24 ሺን ፆሳ ቃላይ ዲጪሼኔ ዳልጊሼ ቤስ።
ACT 12:25 ባርናባሲኔ ሳዖሊ ባንታ ኦሱዋ ፖሊዲ ማርቆሳ ጊያ ዮሃኒሳ ባንታራ ኤኪዲ ዬሩሳላሜፔ ሲሚዶሶና።
ACT 13:1 ኣንፆኪያን ዴዒያ ዎሳ ኬꬃን ናቤቲኔ ኣስታማሬቲ ዴዖሶና። ኤንቲ ባርናባሳ፥ ካሬꬂ ጌቴቲያ ሲሞና፥ ቄሬናፔ ዪዳ ሉኪዮሳ፥ ካዉዋ ሄሮዲሳራ ዲጪዳ ሚናሄኔ ሳዖላ።
ACT 13:2 ኤንቲ ጎዳ ጎይኒሺኒኔ ፆሚሺን ጌሻ ኣያናይ፥ «ታኒ ፄጊዳ ኦሱዋስ ባርናባሳኔ ሳዖላ ታው ዱማዪቴ» ያጊስ።
ACT 13:3 ሄሳ ጊሾ፥ ኤንቲ ፆሚዳፔኔ ዎሲዳፔ ጉዬ ባንታ ኩሺያ ኤንታ ቦላ ዎꬂዲ ዬዲዶሶና።
ACT 13:4 ሄሳ ጊሾ፥ ጌሻ ኣያኒ ኤንታ ኪቲስ። ሴሌዉቄ ቢዶሶና፤ ያፔ ማርካቤን ጌሊዲ ቆጲሮሳ ሃꬃን ቴቄቲዳ ቢታ ቢዶሶና።
ACT 13:5 ኤንቲ ሲልማና ጋኪዲ ኣይሁዴ ዎሳ ኬꬃታን ፆሳ ቃላ ኦዲዶሶና። ዮሃኒሲ ማዲሼ ኤንታራ ዴዔስ።
ACT 13:6 ኤንቲ ቆጲሮሳ ሃꬃን ቴቄቲዳ ቢታ ካንꬂዲ ጳፉ ጋኪያ ዎዴ ኢሲ ዎርዳንቾ ናቢያ ባር-ዬሱሳ ጊያ ኣይሁዴ ማሩዋ ዴሚዶሶና።
ACT 13:7 ሄ ማሮይ ዴሪያ ኣይሲያ ሳርጊዮስ ጳዉሎሳ ጊያ ኣኬካንቾ ኣዲያራ ዴዔስ። ሳርጊዮስ ጳዉሎሲ ባርናባሳኔ ሳዖላ ባኮ ፄጊዲ ፆሳ ቃላ ሲዓናው ኮዪስ።
ACT 13:8 ሺን ጊሪኬ ዶናን ማሩዋ ሱንꬃይ «ኤልማሳ» ጌቴቴስ። ኢ ዴሪያ ሃሬይሲ ኣማኖና ሜላ ዲጋናው ኮዪዲ ባርናባሳራኔ ጳዉሎሳራ ኤቄቲስ።
ACT 13:9 ሺን ጳዉሎሳ ጊያ ሳዖሊ ጌሻ ኣያናን ኩሚዲ ማሩዋ ጫዲ ፄሊዲ፥
ACT 13:10 «ላ፥ ፃላሄ ናዓው፥ ኢታቴꬂ ኡባይ ኩሚዳይሶ፥ ፂሎቴꬃ ኡባስ ሞርኪያው፥ ሱሬ ጎዳ ኦጊያ ሚርቄይሳ ኣጊኪ?
ACT 13:11 ሄኮ፥ ሃዒ ጎዳ ኩሼይ ኔ ቦላ ዴዔስ። ኔኒ ቆቄ ጊዳና፤ ጉꬃ ዎዴስ ኣዋ ፖዖ ቤዓካ» ያጊስ። ኢራ ጫጋናይኔ ꬉማይ ኢያ ኣይፊያ ጎዚን፥ ባ ኩሺያ ኦይኪዲ ካሌꬂያ ኣሲ ኮዪሼ ዩዪስ።
ACT 13:12 ዴሪያ ሃሬይሲ ሄሳ ቤዒዳ ዎዴ ጎዳባ ታማርሴይሳን ማላሌቲዲ ኣማኒስ።
ACT 13:13 ጳዉሎሲኔ ኢያራ ዴዔይሳቲ ጳፉፔ ዴንዲዲ፥ ጲንፊሊያን ዴዒያ ጴርጌ ማርካቤራ ቢዶሶና። ዮሃኒሲ ኤንታፌ ሻኬቲዲ ዬሩሳላሜ ሲሚስ።
ACT 13:14 ሺን ኤንቲ ጴርጌፌ ኣꬊዲ ጲሲዲያን ዴዒያ ኣንፆኪያ ጋኪዶሶና። ሳምባታ ጋላስ ኣይሁዴ ዎሳ ኬꬂ ጌሊዲ ኡቲዶሶና።
ACT 13:15 ሙሴ ሂጌይኔ ናቤታ ማፃፋይ ናባቤቲዳፔ ጉዬ ኣይሁዴ ዎሳ ኬꬃ ሃላቃቲ፥ «ኑ ኢሻቶ፥ ኣሳ ሚንꬄꬂያ ቃሊ ሂንቴው ዴዒያኮ ኣሳስ ኦዴርኬቲ» ያጊዲ ኤንታኮ ኪቲዶሶና።
ACT 13:16 ጳዉሎሲ ዴንዲ ኤቂዲ ባ ኩሼ ማሊዲ፥ «ኢስራዔሌ ኣሳታው፥ ቃሲ ፆሳ ጎይኒያ ኣይሁዴ ጊዶና ኣሳው፥ ሲዒቴ።
ACT 13:17 ሃ ኢስራዔሌ ኣሳ ፆሳይ፥ ኑ ማይዛታ ዶሪስ። ጊብፄ ቢታን ኢማꬃቴꬃን ኤንቲ ዴዒሺን፥ ኤንታ ዳርሲዲ ባ ጊታ ዎልቃን ጊብፄ ቢታፌ ኤንታ ኬሲስ።
ACT 13:18 ባዞ ቢታን ኦይታሙ ላይꬃ ሜላ ኤንታ ዳንዳዒስ።
ACT 13:19 ካናኔ ቢታን ኣይሁዴ ጊዶና ላፑን ካዎቴꬃታ ዲጊዲ ኤንታ ቢታ ባ ኣሳ ላቲሲስ።
ACT 13:20 ሄሳፌ ጉዬ፥ ናቢያ ሳሙዔላ ዎዴ ጋካናው ኦይዱ ፄታኔ ኢሻታሙ ላይꬃ ሜላ ኣይሲያ ዳይናታ ኤንታው ኢሚስ።
ACT 13:21 ሄሳፌ ጉዬ፥ ኤንቲ ባንታው ካዎ ኢማና ሜላ ዎሲን፥ ፆሳይ ቢኒያሜ ሼሻፔ ቂሴ ናዓ፥ ሳዖላ ኦይታሙ ላይꬂ ካዎታና ሜላ ኤንታው ኢሚስ።
ACT 13:22 ፆሳይ ሳዖላ ሻሪዳፔ ጉዬ ኤንታ ቦላ ዳዊቴ ካዎꬂስ። ፆሳይ ዳዊቴባ ማርካቲሼ፥ ‹ታኒ ኮያ ኡባ ታ ዎዛና ሜላ ኦꬂያ ኢሴዬ ናዓ ዳዊቴ ዴማስ› ያጊስ።
ACT 13:23 «ፆሳይ፥ ‹ታኒ ዳዊቴ ሼሻፔ ኢስራዔሌ ዴሪያ ኣሼይሳ ኤሃና› ጊዳይሳ ሜላ ዬሱሳ ኤሂስ።
ACT 13:24 ዬሱሲ ያናፔ ሲንꬄ ኢስራዔሌ ኣሳ ኡባይ ባንታ ናጋራፔ ሲሚዲ ፃማቄታና ሜላ ዮሃኒሲ ቃላ ኦዲስ።
ACT 13:25 ቃሲ ዮሃኒሲ ባ ኦሱዋ ዉርሳና ሃኒሼ ኣሳኮ፥ ‹ታና ኦና ጊዲ ቆፔቲ? ታኒ ሂንቴ ናጊያ ኪሪስቶሳ ጊዲኬ፥ ሺን ታኒ ኢያ ጫማ ቢርሻናው ታው ቤሶናይሲ ታፔ ጉዬራ ዬስ› ያጊስ።
ACT 13:26 «ኢሻቶ፥ ኣብራሃሜ ሼሻቶ፥ ቃሲ ሃይሳን ኣይሁዴ ጊዶናሺን ፆሳስ ያዬይሳቶ፥ ሃ ኣቶቴꬃ ቃላይ ኑስ ኪቴቲስ።
ACT 13:27 ኣይስ ጊኮ፥ ዬሩሳላሜን ዴዒያ ኣሳይኔ ኤንታ ሃላቃቲ ዬሱሳ ኤሪቦኮና። ሳምባታ ኡባን ናባቤቲያ ናቤታ ቃላ ኣኬኪቦና ጊሾ ኢያ ቦላ ፒርዲዲ ናቤቲ ኦዲዳ ቃላ ፖሊዶሶና።
ACT 13:28 ዬሱሳ ዎꬊሳናው ኢሲ ጋሶይካ ꬋዪን ጲላፆሲ ኢያ ዎꬋና ሜላ ዎሲዶሶና።
ACT 13:29 ኤንቲ ዬሱሳባይ ጌሻ ማፃፋን ፃፌቲዳባ ኡባ ፖሊዳ ዎዴ ማስቃሊያፔ ኢያ ዎꬊሲዲ ሞጊዶሶና።
ACT 13:30 ሺን ፆሳይ ሃይቆፔ ዬሱሳ ዴንꬂስ።
ACT 13:31 ሄሳፌ ጉዬ፥ ኢ ባራ ጋሊላፔ ዬሩሳላሜ ዪዳይሳታስ ዳሮ ቶሆ ቤንቲስ። ኤንቲ ሃዒ ኢያባ ኣሳስ ማርካቶሶና።
ACT 13:32 «ፆሳይ ኑ ኣዋታስ ኢማና ጊዳ ዎንጌላ ኑኒ ሂንቴው ኦዶስ።
ACT 13:33 ዳዊቴይ ባ ማዝሙሬ ማፃፋን ናምዓንꬆ ሼምፑዋን፥ ‹ኔኒ፥ ታ ናዓ፥ ታኒ ሃቺ ኔና ዬላስ› ጌቴቲዲ ፃፌቲዳ ዬሱሳ፥ ፆሳይ ሃይቆፔ ዴንꬂዲ ኑ ማይዛታስ ኢማና ጊዳይሳ ኑስ ኤንታ ናይታስ ፖሊስ።
ACT 13:34 ኢ ዎቆና ሜላ ፆሳይ ሃይቆፔ ኢያ ዴንꬆን ኤሪሳናው፥ ‹ታኒ ዳዊቴስ ኢማና ጊዳ ኣማኔቲዳ ጌሻ ኣንጁዋ ሂንቴው ኢማና› ያጊዲ ኦዲስ።
ACT 13:35 ሄሳ ጊሾ፥ ማዝሙሬ ማፃፋን ሃራሶን ቃሲ፥ ‹ኔ ጌሻ ናዓ ኣሃ ዎቂሳካ› ያጌስ።
ACT 13:36 «ዳዊቴይ ባ ዎዴ ፆሳ ቆፋ ፖሊዳፔ ጉዬ ሃይቂዲ ባ ኣዋታራ ሞጌቲዲ ዎቂስ።
ACT 13:37 ሺን ፆሳይ ሃይቆፔ ዴንꬂዳይሲ ዎቂቤና።
ACT 13:38 «ሄሳ ጊሾ፥ ታ ኢሻቶ፥ ናጋራ ኣቶቴꬃይ ዬሱሳ ባጋራ ካሴቲዲ ሂንቴው ኦዴቲዳይሳ ኤሪቴ። ሙሴ ሂጌይ ናጋራፔ ፂሊሳናው ዳንዳዔና።
ACT 13:39 ሺን ዬሱሳ ኣማኒያ ኡባይ ናጋራፔ ፂሌስ።
ACT 13:40 ሄሳ ጊሾ፥ ናቤቲ ጊዳይሲ ሂንቴ ቦላ ጋኮና ሜላ ናጌቲቴ።
ACT 13:41 ‹ፆሳይ ጊዳባ ሌቂሴይሳቶ! ቤዒቴ! ማላሌቲቴ! ꬋዪቴ! ኦኒካ ኦዲን፥ ሂንቴ ኣማኖና ኦሱዋ ታኒ ሂንቴ ዎዲያን ኦꬃና› » ያጊስ።
ACT 13:42 ጳዉሎሲኔ ባርናባሲ ኣይሁዴ ዎሳ ኬꬃፌ ኬዪሺን፥ ካሊያ ሳምባታን ሄሳ ጉጂዲ ኦዳና ሜላ ኣሳይ ኤንታና ዎሲዶሶና።
ACT 13:43 ሺቆይ ላሌቲዳፔ ጉዬ ዳሮ ኣይሁዴቲኔ ኣይሁዴታ ኣማኑዋን ጌሊዲ ፆሳ ጎይኒያ ዳሮቲ ጳዉሎሳኔ ባርናባሳ ካሊዶሶና። ኣማኒዳይሳቲ ፆሳ ኣꬎ ኬሃቴꬃን ሚኒዲ ዳና ሜላ ኤንታ ዞሪዶሶና።
ACT 13:44 ካሊያ ሳምባታን ካታማን ዴዒያ ኣሳፔ ዳሮቲ ፆሳ ቃላ ሲዓናው ሺቂዶሶና።
ACT 13:45 ሺን ኣይሁዴቲ ዳሮ ኣሳ ቤዒዳ ዎዴ ጳዉሎሳ ቃናቲዲ ኢያ ሃሳያ ኢፂዲ ኢያ ጫዪዶሶና።
ACT 13:46 ጳዉሎሲኔ ባርናባሲ ያዮና፥ «ፆሳ ቃላይ ኮይሮቲዲ ሂንቴው ኦዴታናው ኮሼስ። ሺን ሂንቴ ቃላ ኢፂዲ ሜሪና ዴዑዋ ኤካናው ኑስ ቤሴና ጊዲ ሂንቴ፥ ሂንቴ ሁዔን ፒርዲዳ ጊሾ ሂዛ ኑኒ ኣይሁዴ ጊዶናይሳታኮ ሲሞስ።
ACT 13:47 ጋሶይካ ጎዳይ፥ ‹ኣላሜ ኩሜꬃይ ኔ ባጋራ ኣታና ሜላ፥ ታኒ ኔና ኣይሁዴ ጊዶና ዴሪያስ ፖዖ ኦꬃስ› ያጊዲ ኑና ኪቲስ» ያጊዶሶና።
ACT 13:48 ኣይሁዴ ጊዶናይሳቲ ሄሳ ሲዒዳ ዎዴ ኡፋይቲዲ ፆሳ ቃላ ቦንቺዶሶና። ቃሲ ሜሪና ዴዑዋስ ዶሬቲዳ ኡባይ ኣማኒዶሶና።
ACT 13:49 ጎዳ ቃላይ ሄ ቢታ ኡባ ጋኪስ።
ACT 13:50 ሺን ኣይሁዴቲ፥ ኣይሁዴ ጊዶና ፆሴ ጎይኒያ ዱሬ ማጫሳታኔ ካታማን ዴዒያ ጊታ ኣሳታ ጳዉሎሳ ቦላኔ ባርናባሳ ቦላ ዴንꬄꬂዶሶና። ሄ ኣሳቲ ኤንታ ጎዳ ዶሚዲ ባንታ ቢታፌ ኬሲዶሶና።
ACT 13:51 ሺን ጳዉሎሳራኔ ባርናባሳራ ኢፄይሳታስ ማላ ጊዳና ሜላ ባንታ ቶሁዋፔ ባና ፒቲዲ ኢቆኒዮኔ ካታማ ቢዶሶና።
ACT 13:52 ቃሲ ኣንፆኪያን ዴዒያ ኣማኔይሳቲ ጌሻ ኣያናኒኔ ኡፋይሳን ኩሚዶሶና።
ACT 14:1 ካሴይሳዳካ፥ ጳዉሎሲኔ ባርናባሲ ኢቆኒዮኔን ኣይሁዴታ ዎሳ ኬꬂ ጌሊዲ ዳሮ ኣይሁዴቲኔ ኣይሁዴ ጊዶናይሳቲ ኣማናና ጋካናው ቃላ ኦዲዶሶና።
ACT 14:2 ሺን ኣማኒቦና ኣይሁዴቲ፥ ኣይሁዴ ጊዶናይሳታ ዎዛና ላሚዲ ኢሻታ ቦላ ዴንꬄꬂዶሶና።
ACT 14:3 ሃዋሬቲ ያን ዳሮ ዎዴ ጋምዒዶሶና። ኤንቲ ያዮና ጎዳባ ኦዲዶሶና። ጎዳይ ማላታታኔ ኦራꬃባ ኤንቲ ኦꬃና ሜላ ኤንታው ማታ ኢሚዲ ባ ኣꬎ ኬሃቴꬃ ቃላይ ቱማ ጊዴይሳ ቆንጪሲስ።
ACT 14:4 ሺን ሄ ካታማ ኣሳይ ሻኬቲዲ፥ ባጋይ ኣይሁዴታራ ባጋይ ቃሲ ሃዋሬታራ ጊዲስ።
ACT 14:5 ኣይሁዴ ጊዶናይሳቲኔ ኣይሁዴቲ ባንታ ሃላቃታራ ኢሲፌ ጊዲዲ ሃዋሬታ ቆሃናዉኔ ሹቻን ጫዳናው ኮዪዶሶና።
ACT 14:6 ሃዋሬቲ ሄሳ ኤሪዲ፥ ሊስፂራኔ ዳርቤ ጊያ ሊቃዖኒያ ካታማታኔ ኤንታ ሄራን ዴዒያ ቢታ ባቃቲዶሶና።
ACT 14:7 ያን ዎንጌላ ኦዲዶሶና።
ACT 14:8 ዬሌቶሳፔ ዶሚዲ ናምዑ ቶሆይ ዎቢን ሃሙቲ ኤሮና ኢሲ ኣዴይ ሊስፂራን ዴዔስ።
ACT 14:9 ሄ ኣዴይ ጳዉሎሲ ኦዲሺን ኡቲዲ ሲዔስ። ጳዉሎሲ ኢያ ጫዲዲ ፄሊያ ዎዴ ፓፃናው ኢያው ኣማኖይ ዴዔይሳ ቤዒዲ፥
ACT 14:10 ባ ቃላ ꬎቁ ኦꬂዲ፥ «ሲቲ ጋዳ ኔ ቶሁዋን ኤቃ» ያጊስ። ያቲን፥ ጉፒ ዴንዲ ኤቂዲ ሃሙꬂ ዶሚስ።
ACT 14:11 ጳዉሎሲ ኦꬂዳይሳ ኣሳይ ቤዒዲ ባንታ ቃላ ꬎቁ ኦꬂዲ ሊቃዖኒያ ዶናን፥ «ፆሳቲ ኣሴ ዳኒዲ ኑኮ ዎꬊዶሶና» ያጊዶሶና።
ACT 14:12 ባርናባሳ፥ «ዲያ» ጊዲ፥ ጳዉሎሲ ሃሳያን ዋናቲያ ጊሾ ኢያ፥ «ሄርሜሳ» ጊዲ ሱንꬂዶሶና።
ACT 14:13 ካታማፔ ጋፃን ዴዒያ ኤቃ ዲያ ኬꬃ ካሂኔይኔ ኣሳይ ኮርማታኔ ኣሌቆ ጪሻታ ሃዋሬታስ ያርሻናው ኮዪዲ ካታማ ፔንጌ ኤሂዶሶና።
ACT 14:14 ሺን ባርናባሲኔ ጳዉሎሲ ሄሳ ሲዒዳ ዎዴ ኤንቲ ኦꬃናው ቆፒዳይሳ ኢፂዲ ባንታ ማዑዋ ፔꬊዶሶና። ኣሳ ጊዶ ዎፂ ጌሊዲ፥
ACT 14:15 ባንታ ቃላ ꬎቁ ኦꬂዲ፥ «ኣሳው፥ ሃይሳ ኣይስ ኦꬄቲ? ኑካ ሂንቴ ሜላ ኣሴ። ሃ ፓꬆናባፔ ሳሉዋኔ ሳዓ፥ ኣባኔ ኤንታ ጊዶን ዴዒያ ኡባባ ሜꬊዳ ዴዖ ፆሳኮ ሂንቴ ሲማና ሜላ ሂንቴው ኑኒ ዎንጌላ ኦዶስ።
ACT 14:16 ኢ ቤኒ ኣሳ ባንታ ኦጊያ ባና ሜላ ዬዲ ኣጊስ።
ACT 14:17 ሺን ኢራ ሳሉዋፔ ቡኪሲስ፥ ካꬃካ ዎዴን ዎዴን ኢሚስ፥ ካꬂ ኢሚዲ ሂንቴና ዳሮ ኡፋይሲስ፥ ያቲዲ ሂንቴው ሎዖባ ኦꬂዲ ባው ማርካ ꬋይሲቤና» ያጊዶሶና።
ACT 14:18 ሃዋሬቲ ሄሳ ጊዲ ባንታው ኣሳይ ያርሾና ሜላ ዋዪዲ ዲጊዶሶና።
ACT 14:19 ኣንፆኪያፔኔ ኢቆኒዮኔፔ ዪዳ ኣይሁዴቲ፥ ኣሳ ባንታ ባጋ ዛሪዲ ሹቻን ጳዉሎሳ ጫዲዶሶና። ኤንታው ኢ ሃይቂዳባ ዳኒን ካታማፔ ጋፃ ጎቺ ኤፊዲ ዬጊዶሶና።
ACT 14:20 ሺን ኣማኔይሳቲ ዪዲ፥ ኢያ ዩሹዋን ኤቂዳሺን ኢ ዴንዲዲ ካታማ ጌሊስ። ዎንቴꬃ ጋላስ ባርናባሳራ ኢሲፌ ዳርቤ ቢስ።
ACT 14:21 ኤንቲ ዳርቤ ካታማን ዎንጌላ ኦዲዲ ዳሮታ ኣማንꬂዳፔ ጉዬ ሊስፂራ፥ ኢቆኒዮኔኔ ጲሲዲያ ኣንፆኪያ ሲሚዶሶና።
ACT 14:22 ያን ኣማኔይሳታ ሚንꬄꬂሼኔ ኤንቲ ኣማኖን ሚኒዲ ዴዓና ሜላ ዞሪሼ፥ «ፆሳ ካዎቴꬃ ጌላናው ኑኒ ዳሮ ዋዬ ኤካናው ቤሴስ» ያጊዲ ታማርሲዶሶና።
ACT 14:23 ቃሲ ዎሳ ኬꬃታስ ሁዔን ሁዔን ጪማታ ዶሪዶሶና። ፆሚዳፔኔ ዎሲዳፔ ጉዬ ኤንቲ ኣማኒዳ ጎዳስ ኤንታ ሃዳራ ኢሚዶሶና።
ACT 14:24 ጲሲዲያ ቢታ ካንꬂዲ ኣꬊዲ ጲንፊሊያ ቢዶሶና።
ACT 14:25 ጴርጌን ቃላ ኦዲዳፔ ጉዬ ኣፃሊያ ቢዶሶና።
ACT 14:26 ያፔ ኤንቲ ባንታ ፖሊዳ ኦሱዋስ ፆሳ ኣꬎ ኬሃቴꬃስ ኤንታ ሃዳራ ኢሚዳ ኣንፆኪያ ማርካቤራ ሲሚዶሶና።
ACT 14:27 ኣንፆኪያ ጋኪዳ ዎዴ ዎሳ ኬꬃ ኣሳ ሺሺዲ ፆሳይ ኤንታራ ኦꬂዳ ኦሱዋ ኡባኔ ኣይሁዴ ጊዶና ኣሳይ ኣማናና ሜላ ኤንታው ዋቲ ፔንጌ ዶዪዳኮ ኦዲዶሶና።
ACT 14:28 ሄሳን ኣማኔይሳታራ ዳሮ ዎዴ ጋምዒዶሶና።
ACT 15:1 ኢሲ ኢሲ ኣሳቲ ዪሁዳፔ ኣንፆኪያ ቢዲ፥ «ሙሴ ዎጋꬆ ሂንቴ ቃፃሬቶና ኢፂኮ ኣታናው ዳንዳዔኬታ» ጊዲ ኣማኔይሳታ ታማርሶ ዶሚዶሶና።
ACT 15:2 ሄሲ ጳዉሎሳኔ ባርናባሳ ኤንታራ ዳሮ ፓላማናዳኔ ካጫናዳ ኦꬂስ። ሄሳ ጊሾ፥ ኣንፆኪያን ዴዒያ ኢሲ ኢሲ ኣሳቲ ጳዉሎሳራኔ ባርናባሳራ ዬሩሳላሜ ቢዲ ሃዋሬታራኔ ጪማታራ ጋሄቲዲ ሄ ኦዳ ቢላና ሜላ ቆፋ ቃቺዶሶና።
ACT 15:3 ዎሳ ኬꬃይ ኤንታ ኪቲን ቢዶሶና። ኤንቲ ሲሮፊንቄ ሳማሬራ ኣꬊሼ ኣይሁዴ ጊዶናይሳቲ ፆሳኮ ዋኒዲ ሲሚዳኮ ኦዲዶሶና። ሄሲ ኣማኔይሳታ ኡባ ዳሮ ኡፋይሲስ።
ACT 15:4 ኤንቲ ዬሩሳላሜ ጋኪዳ ዎዴ ዎሳ ኬꬃይ፥ ሃዋሬቲኔ ጪማቲ ኤንታ ሞኪዶሶና። ፆሳይ ባንታራ ኦꬂዳባ ኡባ ኦዲዶሶና።
ACT 15:5 ሺን ፋሪሳዌታ ባጋፌ ኣማኒዳ ኢሲ ኢሲ ኣሳቲ ዴንዲ ኤቂዲ፥ «ኣይሁዴ ጊዶናሺን ኣማኒዳ ኣሳቲ ቃፃሬታናዉኔ ሙሴ ሂጊያ ናጋናው ቤሴስ» ያጊዶሶና።
ACT 15:6 ሃዋሬቲኔ ጪማቲ ሄሳ ዞሬታናው ሺቂዶሶና።
ACT 15:7 ዳሮ ሃሳዪዳፔ ጉዬ፥ ጴፂሮሲ ዴንዲ ኤቂዲ፥ «ታ ኢሻቶ፥ ኣይሁዴ ጊዶናይሳቲ ዎንጌላ ቃላ ታ ዶናፔ ሲዒዲ ኣማናና ሜላ ካሴቲዲ ታና ፆሳይ ሂንቴ ጊዶፌ ዶሪዳይሳ ሂንቴ ኤሬታ።
ACT 15:8 ኣሳ ዎዛና ኤሪያ ፆሳይ ጌሻ ኣያና ኑስ ኢሚዳይሳዳ ኤንታዉካ ኢሚዲ ቱማይስ።
ACT 15:9 ኣማኖን ኤንታ ዎዛና ጌሺዳ ጊሾ ኑ ጊዶኒኔ ኤንታ ጊዶን ዱማቴꬂ ዎꬂቤና።
ACT 15:10 ሄሳ ጊሾ፥ ኑ ኣዋቲኔ ኑኒ ቶካናው ዳንዳዒቦና ቃምባራ ኣማኔይሳታ ሞርጌን ዎꬂዲ ሃዒ ኣይስ ፆሳ ፓጬቲ?
ACT 15:11 ጎዳ ዬሱስ ኪሪስቶሳ ኣꬎ ኬሃቴꬃን ኤንቲ ኣቲዳይሳዳ ኑካ ኣቲዳይሳ ኣማኖስ» ያጊስ።
ACT 15:12 ኣሳይ ሲዒ ጊዲ፥ ባርናባሲኔ ጳዉሎሲ ኣይሁዴ ጊዶና ኣሳ ጊዶን ባንታ ባጋራ ፆሳይ ኦꬂዳ ማላታታኔ ኦራꬃባ ኡባ ኦዲሺን ሲዖሶና።
ACT 15:13 ኤንቲ ሃሳያ ኦንጊዳፔ ጉዬ ያይቆቢ፥ «ኢሻቶ፥ ታ ጌይሳ ሲዒቴ።
ACT 15:14 ፆሳይ ኣይሁዴ ጊዶናይሳታ ጊዶፌ ባ ኣሴ ዶራናው ኮዪዲ ኤንታና ኮይሮ ዋቲዲ ቆፒዳኮ ሲሞኒ ኦዲስ።
ACT 15:15 ናቤታ ቃላይ ሃይሳራ ጊኔስ። ጌሻ ማፃፋን፥
ACT 15:16 ‹ሃይሳፌ ጉዬ፥ ታኒ ሲማና፥ ኩንዲዳ ዳዊቴ ካዎቴꬃ ዴንꬃና። ላሌቲዳ ኬꬃካ ዛራ ኤሳና።
ACT 15:17 ኣቲዳ ኣሳ ኡባይ ታኮ ያና፥ ታኒ ፄጊዳ ኣይሁዴ ጊዶና ኣሳ ኡባይ ታና ኮያና።
ACT 15:18 ቤኒፔ ዶማዳ ሄሲ ኤሬታና ሜላ ኦꬂዳ ፆሳይ፥ ታኒ ያጋይስ› ያጌስ።
ACT 15:19 «ሄሳ ጊሾ፥ ታ ቆፋይ ፆሳኮ ሲሚያ ኣይሁዴ ጊዶናይሳታ ኑኒ ዋይሶናኮ ሎዖ።
ACT 15:20 ሺን ኤንቲ ኤቃስ ያርሼቲዲ ቱኒዳባ ሞና ሜላ፥ ላይማቶና ሜላ፥ ባዉታ ሞና ሜላኔ ሱꬂ ኡዮና ሜላ ኤንታው ኑኒ ዳብዳቤ ፃፋናው ኮሼስ።
ACT 15:21 ሙሴ ሂጌይ ቤኒፔ ዶሚዲ ሳምባታን ሳምባታን ኣይሁዴ ዎሳ ኬꬃታን ናባቤቲሼ ካታማ ኡባን ሳባኬቴስ» ያጊስ።
ACT 15:22 ሄሳፌ ጉዬ፥ ሃዋሬቲኔ ጪማቲ ዎሳ ኬꬃ ኣሳ ኡባራ ኢሲፌ ባንታ ጊዶፌ ጉꬃ ኣሳታ ዶሪዲ ጳዉሎሳራኔ ባርናባሳራ ኣንፆኪያ ዬዳናው ቆፋ ቃቺዶሶና። ኤንቲ ዳሮ ቦንቼቲዳ ናምዑ ኣሳታ ባርሳባሳ ጌቴቲያ ዪሁዳኔ ሲላሴ ዶሪዶሶና።
ACT 15:23 ሃይሳዳ ጌቴቲ ፃፌቲዳ ዳብዳቢያ ኤንታ ቦላ ዬዲዶሶና፡ «ኑኒ ሃዋሬቲኔ ጪማቲ ሂንቴ ኢሻቲ፥ ኣንፆኪያን፥ ሶሪያኒኔ ኪልቂያን ዴዒያ ኣይሁዴ ጊዶና ኢሻታስ ኑ ሳሮꬁዋ ኪቶስ።
ACT 15:24 «ኑኒ ኪቶና ኣሳቲ ኑ ጊዶፌ ቢዲ፥ ‹ሂንቴ ቃፃሬታናዉኔ ሂጊያ ናጋናው ቤሴስ› ጊዲ፥ ሂንቴና ዋይሲዳይሳኔ ዪሎዪዳይሳ ሲዒዳ።
ACT 15:25 ኑኒ ዶሲያ ባርናባሳኔ ጳዉሎሳ ዶሬቲዳ ኣሳታራ ኢሲፌ ሂንቴኮ ኪታናው ኢሲ ዎዛናን ኑ ቆፋ ቃቺዳ።
ACT 15:26 ኤንቲ ኑ ጎዳ ዬሱስ ኪሪስቶሳ ጊሾ ባንታ ዴዑዋ ኣꬂ ኢሚዶሶና።
ACT 15:27 ሄሳ ጊሾ፥ ኑኒ ፃፊዳይሳ ኤንቲ ባንታ ዶናን ጉጂዲ ሂንቴው ኦዳና ሜላ ዪሁዳኔ ሲላሴ ኪቲዳ።
ACT 15:28 «ሃ ኮሼይሳታፔ ኣቲን ሃራ ቶሆ ሂንቴና ቶሶና ሜላ ኑኔ ጌሻ ኣያናይ ኦዳ ቃቺዳ።
ACT 15:29 ኤቃስ ያርሼቲዲ ቱኒዳባ ሞፒቴ፥ ሱꬁ ኡዮፒቴ፥ ባዉታ ሞፒቴ፥ ላይማቶፒቴ። ሃ ኡባፌ ሂንቴ፥ ሂንቴ ሁዒያ ናጊኮ ሎዖባ ኦꬄታ» ያጊዶሶና።
ACT 15:30 ሄሳ ጊሾ፥ ኪቴቲዳይሳቲ ሞይዜቲዲ ኣንፆኪያ ቢዲ ኣማኒያ ኣሳ ሺሺዲ፥ ዳብዳቤ ኢሚዶሶና።
ACT 15:31 ኤንቲ ሄ ሚንꬄꬂያ ዳብዳቢያ ናባቢዳ ዎዴ ኡፋይቲዶሶና።
ACT 15:32 ቃሲ ዪሁዲኔ ሲላሴይ ባንታ ሁዔን ናቤ ጊዲያ ጊሾ ኣማኔይሳታ ሎይꬂ ዞሪዲ ሚንꬄꬂዶሶና።
ACT 15:33 ኤንቲ ኣንፆኪያን ጉꬃ ጋላስ ኡቲዳፔ ጉዬ ኢሻቲ ሎዖራ ሞይዚን ባንታና ኪቲዳይሳታኮ ሲሚዶሶና።
ACT 15:34 [ሺን ሲላሴይ ያን ኣታናው ኮዪስ።]
ACT 15:35 ቃሲ ጳዉሎሲኔ ባርናባሲ ሃራ ዳሮ ኣሳታራ ኢሲፌ ጎዳ ቃላ ታማርሲሼኔ ዎንጌላ ኦዲሼ ኣንፆኪያን ጋምዒዶሶና።
ACT 15:36 ጉꬃ ጋላሳፔ ጉዬ ጳዉሎሲ ባርናባሳኮ፥ «ኑኒ ጎዳ ቃላ ኦዲዳ ካታማ ኡባን ኣማኔይሳቲ ዋኒዲ ዴዒያኮ ጉዬ ሲሚሼ ፆሞሳና» ያጊስ።
ACT 15:37 ባርናባሲ ማርቆሳ ጌቴቲያ ዮሃኒሳ ባንታራ ኤፋናው ኮዪስ።
ACT 15:38 ሺን ጳዉሎሲ ማርቆሳ ባንታራ ኤፋናው ኮዪቤና። ጋሶይካ፥ ኢ ጲንፊሊያን ሻኬቲዲ ኤንታራ ኦꬃናው ቢቤና።
ACT 15:39 ኤንታ ጊዶን ኢታ ኦሺ ኬዪን ኢሶይ ኢሱዋፌ ሻኬቲዶሶና። ባርናባሲ ማርቆሳ ኤኪዲ ማርካቤራ ቆጲሮሳ ቢስ።
ACT 15:40 ሺን ጳዉሎሲ ሲላሴ ዶሪስ፤ ኣማኔይሳቲ ጳዉሎሳ ፆሳ ኣꬎ ኬሃቴꬃስ ሃዳራ ኢሚዳፔ ጉዬ ኢ ኬዪዲ ቢስ።
ACT 15:41 ያቲዲ፥ ዎሳ ኬꬃታ ሚንꬄꬂሼ ሶሪያራኔ ኪልቂያራ ኣꬊስ።
ACT 16:1 ጳዉሎሲ ዳርቤኔ ሊስፂራ ቢስ። ያን ፂሞቲዮሳ ጊያ ኣማኒያ ኣሲ ዴዔስ። ኢያ ኣያ ኣማኒያ ኣይሁዴ ማጫስ፥ ኢያ ኣዋይ ጊሪኬ ኣሲ።
ACT 16:2 ሊስፂራኒኔ ኢቆኒዮኔን ዴዒያ ኣማኔይሳቲ ፂሞቲዮሳባ ሎይꬂዲ ማርካቲዶሶና።
ACT 16:3 ጳዉሎሲ ፂሞቲዮሳ ባራ ኤፋናው ኮዪዲ፥ ኢያ ኣዋይ ጊሪኬ ኣሲ ጊዲዳይሳ ሄ ቤሳን ዴዒያ ኣይሁዴ ኡባይ ኤሪያ ጊሾ ኢያ ቃፃሪስ።
ACT 16:4 ኤንቲ ካታማታራ ቢሼ ዬሩሳላሜን ዴዒያ ሃዋሬቲኔ ጪማቲ ዎꬂዳ ሂጊያ ኣማኔይሳቲ ናጋና ሜላ ኤንታው ኦዲሼ ኣꬊዶሶና።
ACT 16:5 ሄሳ ጊሾ፥ ዎሳ ኬꬃቲ ኣማኖን ሚኒሼ፥ ታይቦንካ ጋላስ ጋላስ ዳሪ ዳሪ ቢዶሶና።
ACT 16:6 ኢሲያን ቃላ ኦዶና ሜላ ጌሻ ኣያናይ ኤንታ ዲጊዳ ጊሾ ጲርጌራኔ ጋላቲያ ቢታራ ኣꬊዶሶና።
ACT 16:7 ኤንቲ ሚሲያ ዛዋ ጋኪዳ ዎዴ ቢቲኒያ ባናው ኮዪዶሶና። ሺን ዬሱሳ ኣያናይ ኤንታ ዲጊስ።
ACT 16:8 ሄሳ ጊሾ፥ ኤንቲ ሚሲያ ማታራ ኣꬊሼ ፂሮዓዳ ዎꬊዶሶና።
ACT 16:9 ጳዉሎሲ ቃማ ቆንጬꬃን ኢሲ ማቄዶኒያ ኣሲ ባኮ፥ «ማቄዶኒያ ፒናዳ ኑና ማዳርኪ» ያጊሼ ኤቂዲ ዎሲሺን ቤዒስ።
ACT 16:10 ቆንጬꬃ ኢ ቤዒዳፔ ጉዬ ኤሌሲዲ ኑኒ ማቄዶኒያ ባናው ኮዪዳ። ሄሲካ፥ ዎንጌላ ያን ዴዒያ ኣሳስ ኦዳናው ፆሳይ ኑና ፄጊዳይሳ ኤሪዳ ጊሾሳ።
ACT 16:11 ፂሮዓዳፔ ዴንዲዲ ማርካቤን ጌሊዲ ሳሞቲራቄ ቢዳ፥ ዎንቴꬃ ጋላስ ናጱሌ ቢዳ።
ACT 16:12 ያፔ ዴንዲዲ ማቄዶኒያ ቢታን ዴዒያ ፊልጲሲዩሳ ጊያ ኮይሮ ካታማ ቢዳ። ቃሲ ፊልጲሲዩሲ ሮሜ ኣሳይ ዴዒያ ካታማ። ኑኒ ሄ ካታማን ጉꬃ ጋላስ ኡቲዳ።
ACT 16:13 ሳምባታ ጋላስ ካታማፔ ጋፃን ሻፋ ዶናን ኣይሁዴቲ ፆሳ ዎሲያ ቤሲ ዴዔይሳ ኤሪዲ ያ ቢዳ። ሄ ቤሳን ሺቂዳ ማጫሳስ ቃላ ኦዲዳ።
ACT 16:14 ኑና ሲዒያ ኣሳፔ ኢሲ ሊዲያ ጌቴቲያ ቲያቲሮና ካታማፔ ዪዳ፥ ፆሳ ኣማኒዳ ዞዖ ኣፊላ ዛልዒያ፥ ማጫሲያ ዴዓዉሱ። ጳዉሎሲ ኦዴይሳ ኢያ ሲዓና ሜላ ፆሳይ ኢ ዎዛና ዶዪስ።
ACT 16:15 ሊዲያ ባ ሶ ኣሳራ ኢሲፌ ፃማቄቲዳፔ ጉዬ ኑኮ፥ «ሂንቴ ታና ጎዳ ቱማ ኣማናሱ ጊኮ ታ ሶ ዬꬊቴ» ጋዳ ሚንꬃዳ ዎሳሱ።
ACT 16:16 ኑኒ ፆሳ ዎሲያ ቤሳ ቢሺን ኢታ ኣያኒ ኢ ቦላ ዴዒዲ ካይሲያ ኢሲ ጌላዖ ኣይሌይ ኑራ ጋሄታሱ። ኢያ ካያዳ ዳሮ ሚሼ ባ ጎዳታስ ኤሃዉሱ።
ACT 16:17 ጳዉሎሳኔ ኑና ካላዳ፥ «ሃይሳቲ ኡባፌ ቦላ ፆሳ ኣይሌታ! ኤንቲ ሂንቴ ኣታና ኦጊያ ኦዴይሳታ» ጋዳ ዋሳሱ።
ACT 16:18 ኡባ ጋላስ ሄሳዳ ጋዉሱ። ሺን ጳዉሎሲ ዪሎቲዲ ጉዬ ሲሚዲ፥ ሄ ኣያና፥ «ዬሱስ ኪሪስቶሳ ሱንꬃን ኢፔ ኬያ» ጊዲ ኪቲስ። ኢራካ ኢታ ኣያናይ ኢፔ ኬዪ ኣጊስ።
ACT 16:19 ሺን ኢ ጎዳቲ ባንታው ሚሼ ዴሚያ ኦጌይ ꬋዪዳይሳ ቤዒዲ፥ ጳዉሎሳኔ ሲላሴ ኦይኪዲ፥ ዳባባ ዳይናታ ሲንꬄ ጎቺ ኤፊዶሶና።
ACT 16:20 ዳይናታ ሲንꬄ ኤንታ ኤፊዲ፥ «ሃይሳቲ ኣይሁዴ ኣሲ ጊዲሼ ኑ ካታማ ኣሳ ዳሮ ዋይሶሶና።
ACT 16:21 ኑኒ ሮሜ ቢታ ኣሲ ጊዲሼ ኤካናዉኔ ኦꬃናው ዎጋ ጊዶናባ ታማርሶሶና» ያጊዶሶና።
ACT 16:22 ኣሳይ ኢሲ ባጋ ጊዲዲ፥ ጳዉሎሳ ቦላኔ ሲላሴ ቦላ ዴንዲዶሶና። ዳይናቲ ኤንታ ማዑዋ ቃሪዲ ፃምዓን ኤንታ ሾጫና ሜላ ኪቲዶሶና።
ACT 16:23 ኤንታ ዳሮ ዋꬊዳፔ ጉዬ ቃሾ ኬꬂ ጌልሲዶሶና። ቃሾ ኬꬃ ናጌይሲ ኤንታ ሚንꬂ ናጋና ሜላ ኪቲዶሶና።
ACT 16:24 ቃሾ ኬꬃ ናጌይሲ ሄ ኪታ ኤኪዲ፥ ጳዉሎሳኔ ሲላሴ ቃሾ ኬꬃስ ቆልዓ ጌልሲስ። ኤንታ ቶሁዋ ዱፂስ
ACT 16:25 ሺን ጊዲ ቢላሄ ጊዲያ ዎዴ ጳዉሎሳራኔ ሲላሴራ ዎሲሼኔ ማዝሙሬ ዬፂሼ ፆሳ ጋላቶሶና። ቃሾ ኬꬃን ዴዒያ ሃራ ኣሳቲካ ኤንቲ ጊያባ ሲዖሶና።
ACT 16:26 ቆፖና ቃሾ ኬꬃ ባሶይ ቃፃና ጋካናው ቢታ ቃፆይ ሃኒስ። ሄ ሳቴንካ ፔንጌ ኡባይ ዶዬቲ ኣጊስ፤ ቃሼቲዳ ኣሳ ኡባ ሳንꬃላታይ ቢርሼቲ ዎꬊስ።
ACT 16:27 ቃሾ ኬꬃ ናጌይሲ ꬊስኮፌ ባርኪዳ ዎዴ ቃሾ ኬꬃ ፔንጌ ኡባይ ዶዬቲዳይሳ ቤዒዲ ቃሾ ኣሳይ ኬሲ ኤኪ ቢዳባ ዳኒን ባና ዎꬋናው ማሼ ኤኪስ።
ACT 16:28 ሺን ጳዉሎሲ ቃላ ꬎቁ ኦꬂዲ «ኑ ኡባይ ሃይሳን ዴዒያ ጊሾ ኔኒ ኔና ቆሆፓ» ያጊስ።
ACT 16:29 ቃሾ ኬꬃ ናጌይሲ ፆምፔ ዎሲ ኤኪዲ ኤሌሲዲ ጋꬂ ዎፂስ። ኮኮሪሼ ጳዉሎሳ ሲንꬃኒኔ ሲላሴ ሲንꬃን ጉፋኒስ።
ACT 16:30 ኤንታ ካሬ ኬሲዲ፥ «ታ ጎዳቶ፥ ታኒ ኣታናው ኣይ ኦꬃናው ቤሲ?» ያጊስ።
ACT 16:31 ጳዉሎሳራኔ ሲላሴራ ኢያኮ፥ «ጎዳ ዬሱስ ኪሪስቶሳ ኣማና፤ ኔራኔ ኔ ሶ ኣሳራ ኣታና» ያጊዶሶና።
ACT 16:32 ኤንቲ ኢያሲኔ ኢያ ሶን ዴዒያ ኡባስ ጎዳ ቃላ ኦዲዶሶና።
ACT 16:33 ቃማ ሄ ሳቴንካ ቃሾ ኬꬃ ናጌይሲ ኤንታ ኤፊዲ ኤንታ ማዱንꬃ ሜጪስ። ኤሌሲዲ ባ ሶ ኣሳ ኡባራ ፃማቄቲስ።
ACT 16:34 ጳዉሎሳኔ ሲላሴ ባ ሶ ኤፊዲ ኤንታው ካꬂ ኣꬂስ። ኢ ባ ሶ ኣሳ ኡባራ ፆሳ ኣማኒዳ ጊሾ ኡፋይቲስ።
ACT 16:35 ሳዓይ ዎንቲን ዳይናቲ፥ «ሄ ኣሳታ ቢላ» ያጊዲ ፖሊሴ ሃላቃታ ኢያኮ ኪቲዶሶና።
ACT 16:36 ቃሾ ኬꬃ ናጌይሲ፥ «ሂንቴ ቢሌታና ሜላ ዳይናቲ ኪቲዶሶና። ሂዛ፥ ኬዪዲ ሳሮ ቢቴ» ያጊዲ ሄ ኪታ ጳዉሎሳስ ኦዲስ።
ACT 16:37 ሺን ጳዉሎሲ ሄ ፖሊሴ ሃላቃታኮ፥ «ኑኒ ሮሜ ኣሲ ጊዲሺን ኤንቲ ኑና ፒርዲ ባይና ኣሳ ሲንꬃን ዋꬊዲ፥ ቃሾ ኬꬃን ዬጊዶሶና። ሃዒ ኑና ጌማን ኬዪዲ ቦ ጎና? ሃኔና፥ ኤንቲ ባንታ ሁዔን ዪዲ ኑና ኬሶ» ያጊስ።
ACT 16:38 ፖሊሴ ሃላቃቲ ዳይናታስ ሄሳ ኦዲን፥ ጳዉሎሳራኔ ሲላሴራ ሮሜ ቢታ ኣሲ ጊዲዳይሳ ሲዒዳ ዎዴ ያዪዶሶና።
ACT 16:39 ሄሳ ጊሾ፥ ዳይናቲ ዪዲ ኤንታኮ፥ «ኑኒ ሂንቴና ቆሂዳ» ጊዶሶና። ቃሾ ኬꬃፌ ካሬ ኤንታ ኬሲዲ፥ ካታማፔ ኬዪዲ ባና ሜላ ዎሲዶሶና።
ACT 16:40 ጳዉሎሳራኔ ሲላሴራ ቃሾ ኬꬃፌ ኬዪዲ ሊዲያ ሶ ቢዶሶና። ያን ኣማኔይሳታራ ጋሄቲዲ ኤንታ ሚንꬄꬂዲ ኬዪዲ ቢዶሶና።
ACT 17:1 ጳዉሎሳራኔ ሲላሴራ ኣምፊጶሊሳራኔ ኣጶሎኒያራ ኣꬊዲ ቴሴሎንቄ ቢዶሶና። ያን ኣይሁዴ ዎሳ ኬꬂ ዴዔስ።
ACT 17:2 ጳዉሎሲ ካሴይሳዳ ያ ጌሊስ። ያን ሄꬑ ሳሚንታ ፆሳ ቃላፔ ኣሳስ ኦዲስ።
ACT 17:3 ኪሪስቶሲ ዋዬ ኤካናዉኔ ሃይቆፔ ዴንዳናው ቤሴይሳ ኤንታው ቆንጪሲዲ ኦዲሼ፥ «ዬሱሲ ሃ ታኒ ሂንቴው ኦዴይሲ ኪሪስቶሳ» ያጊስ።
ACT 17:4 ኤንታፌ ኢሶቲ ኢሶቲ ኦዳይ ቱማ ጊዴይሳ ማዒዲ ጳዉሎሳራኔ ሲላሴራ ኢሲፊዶሶና። ሄሳዳካ፥ ፆሳ ጎይኒያ ዳሮ ጊሪኬ ኣሳይኔ ዳሮ ቦንቼቲዳ ማጫሳቲካ ኤንታራ ኢሲፊዶሶና።
ACT 17:5 ሺን ኣይሁዴቲ ቃናቲዲ ኢሲ ኢሲ ኦሶይ ባይና ኢታ ኣሳታ ኦጌፔ ሺሺዶሶና። ካታማን ቡቄꬂ ኬሲዶሶና፤ ጳዉሎሳኔ ሲላሴ ኣሳስ ኣꬂ ኢማናው ኮዪዲ ያሶና ኬꬃ ቴቂዶሶና።
ACT 17:6 ጳዉሎሲኔ ሲላሲ ኤንታው ቤንቶና ኢፂን፥ ያሶናኔ ኢሲ ኢሲ ኣማኔይሳታ ካታማ ሃላቃታኮ ጎቺ ኤፊዲ፥ «ሃይሳቲ ቢታ ኡባ ቡቄይሳቲ ሃዒ ኑኮ ዪዶሶና።
ACT 17:7 ያሶኒ ኤንታ ባ ሶን ዎꬂስ። ሃይሳቲ፥ ‹ዬሱሳ ጊያ ሃራ ካዎይ ዴዔስ› ጊዲ ቄሳሬ ኪታ ሜንꬆሶና» ያጊዲ ꬎቁ ጊዳ ቃላን ኦዲዶሶና።
ACT 17:8 ሺቂዳ ኣሳይኔ ካታማ ሃላቃቲ ሄሳ ሲዒዲ ሃናናባ ꬋዪዶሶና።
ACT 17:9 ሃላቃቲ ያሶናኔ ሃራታ ዋሴን ቢርሺዶሶና።
ACT 17:10 ኣማኔይሳቲ ጳዉሎሳኔ ሲላሴ ቃማራ ቤሪያ ዬዲዶሶና። ቤሪያ ጋኪዲ፥ ኣይሁዴ ዎሳ ኬꬂ ጌሊዶሶና።
ACT 17:11 ቤሪያ ኣሳቲ ቴሴሎንቄ ኣሳታፔ ኣꬊዳ ሱሬታ። ኤንቲ ቃላ ኩሜꬃ ዎዛናፔ ኤኪዶሶና፤ ጳዉሎሲ ጊዳይሲ ቱማ ጊዴይሳ ሻኪ ኤራናው ጋላስ ጋላስ ጌሻ ማፃፋታ ፃናዖሶና።
ACT 17:12 ሄሳ ጊሾ፥ ኤንታፌ ዳሮቲ፥ ጊሪኬታፔካ ቦንቼቲዳ ዳሮ ማጫሳቲኔ ዳሮ ኣዴቲ ኣማኒዶሶና።
ACT 17:13 ሺን ቴሴሎንቄን ዴዒያ ኣይሁዴቲ ጳዉሎሲ ፆሳ ቃላ ቤሪያንካ ኦዲዳይሳ ሲዒዳ ዎዴ ቤሪያ ዪዲ ኣሳ ቡቂዶሶና።
ACT 17:14 ሄሳፌ ጉዬ፥ ኣማኔይሳቲ ኤሌሲዲ ጳዉሎሳ ኣባ ማቲ ዬዲዶሶና። ሺን ሲላሴይኔ ፂሞቲዮሲ ቤሪያን ኣቲዶሶና።
ACT 17:15 ጳዉሎሳ ሞይዚዳ ኣሳቲ ኣቴና ጋꬂዶሶና። ሄ ኣሳቲ ሲላሴይኔ ፂሞቲዮሲ ባንታው ዳንዳዔቲዳ ሜላ ኤሌሲዲ ባኮ ያና ሜላ ጳዉሎሲ ኪቲዳ ኪታ ኤኪዲ ቤሪያ ሲሚዶሶና።
ACT 17:16 ጳዉሎሲ ኣቴናን ሲላሴኔ ፂሞቲዮሳ ናጊሼ፥ ካታማን ኤቂ ኩሚዳይሳ ቤዒዲ ዪሎቲስ።
ACT 17:17 ሄሳ ጊሾ፥ ኣይሁዴ ዎሳ ኬꬃን ኣይሁዴታራኔ ፆሳ ጎይኒያ ኣይሁዴ ጊዶና ኣሳታራ ቃሲ ባራ ጋሄቲያ ኣሳታራ ኡባ ዎዴ ፓላሜስ።
ACT 17:18 ኤጲቆሮሳኔ ኢስቶይኬ ጌቴቲያ ጩጋታፔ ኢሲ ኢሲ ኤራንቾቲ ጳዉሎሳራ ፓላሚዶሶና። ኤንታፌ ኢሶቲ ኢሶቲ፥ «ሃ ዮያማይ ኣይ ኦዳናው ኮዪ?» ያጊዶሶና። ሃራቲ ጳዉሎሲ ዬሱሳባኔ ሃይቆፔ ኢ ዴንዲዳይሳ ባንታው ኦዲዳ ጊሾ «ኦራꬃ ፆሳታባ ኦዲያ ዳኔስ» ያጊዶሶና።
ACT 17:19 ጳዉሎሳ ኦይኪዲ ኣርዮስፓጎሳ ጊያ ሺቆ ቤሳ ኤፊዲ፥ «ሃ ኔኒ ታማርሲያ ኦራꬃባይ ኣይቤኮ ኑና ኤሪሲኪ?
ACT 17:20 ኣይስ ጊኮ፥ ኔኒ ኑስ ኦራꬃባ ኦዳሳ፤ ሂዛ ሄሲ ኣይቤኮ ኑኒ ኤራናው ኮዮስ» ያጊዶሶና።
ACT 17:21 ኣቴና ኣሳ ኡባይኔ ያን ዴዒያ ኢማꬃቲ ኦራꬃባ ኦዴቶናኔ ሲዖና ፔዖኮና።
ACT 17:22 ጳዉሎሲ ኣርዮስፓጎሳን ሺቂዳ ኣሳ ሲንꬃን ኤቂዲ፥ «ኣቴና ኣሳው፥ ሂንቴ ፆሳታስ ኡባባን ዳሮ ያዬይሳ ታኒ ቤዓይስ።
ACT 17:23 ታኒ ሂንቴ ካታማራ ዩያሼ ሂንቴ ጎይኒያ ቤሳታ ቤዒያ ዎዴ ‹ኤሬቶና ፆሳስ› ጌቴቲ ፃፌቲዳ ያርሾ ቤሳ ዴማስ። ሃ ሂንቴ ኤሮናሺን ጎይኔይሳ ታኒ ሂንቴው ኦዳይስ።
ACT 17:24 ሳዓኔ ሳዓን ዴዒያ ኡባባ ሜꬊዳ ፆሳይ፥ ሳሉዋኔ ሳዓ ጎዳይ፥ ኣሲ ኬፂዳ ኬꬃን ዴና።
ACT 17:25 ኢ ዴዖ፥ ሼምፖኔ ኡባባ ኣሳ ኡባስ ኢሚያ ጊሾ ፓጪ ዴዒያ ኣሳዳ ኣሳ ማዴ ኮዬና።
ACT 17:26 ፆሳይ ኣሳ ዜሬꬂ ኡባ ኢሲ ኣዲያፌ ሜꬊዲ ቢታ ኡባን ዎꬂስ። ያቲዲ ኤንቲ ዴዓና ዎዲያሲኔ ቤሳስ ዛዋ ኢሚስ።
ACT 17:27 ኢ ሄሳ ኦꬂዳይ ኣሲ ኢያ ኮያና ሜላኔ ፒልጊዲ ዴማና ሜላሳ። ሃኒኮካ ኢ ኑፔ ጌሚቤና።
ACT 17:28 ሂንቴፌ ኢሲ ኢሲ ዬፄይሳቲ፥ ‹ኑኒ ኢያ ናይታ› ጊዳይሳዳ፥ ‹ኑኒ ኢያን ፓፃ ዴዖስ፥ ቃፆስ።›
ACT 17:29 ሂዛ፥ ኑኒ ፆሳ ናይታ ጊዲያ ጊሾ ‹ፆሳይ ኣሳ ሂላቴꬃኒኔ ቆፋን ዎርቃፌ ዎይኮ ቢራፔ ዎይኮ ሹቻፌ ኦሴቲዳባ ዳኔስ› ያጊዲ ቆፓናው ቤሴና።
ACT 17:30 ሄሳ ጊሾ፥ ፆሳይ ካሴ ዎዴ ኣሳይ ኤሮና ኦꬂዳይሳ ኣጊዲ ኣꬊስ፥ ሺን ሃዒ ኡባሶን ዴዒያ ኣሲ ኡባይ ናጋራፔ ሲማና ሜላ ኪቴስ።
ACT 17:31 ኣይስ ጊኮ፥ ፆሳይ ባ ዶሪዳ ኣዲያን ሳዓን ዴዒያ ኣሳ ኡባ ቦላ ፂሎ ፒርዳ ፒርዳናው ቃማ ጊጊሲ ዎꬂስ። ኢያ ሃይቆፔ ዴንꬂዲ ሄሳ ኣሳ ኡባስ ቱማዪስ» ያጊስ።
ACT 17:32 ኤንታፌ ኢሲ ኢሲ ኣሳቲ ሃይቆፔ ዴንዶባ ጳዉሎሳፔ ሲዒዲ፥ ኢያ ቦላ ቄልቂሲዶሶና። ሺን ሃራቲ፥ «ኑኒ ሄሳ ኔፔ ጉጂዲ ሲዓናው ኮዮስ» ያጊዶሶና።
ACT 17:33 ሄሳ ጊሾ፥ ጳዉሎሲ ኤንታ ጊዶፌ ኬዪስ።
ACT 17:34 ሺን ኢሲ ኢሲ ኣዴቲ ጳዉሎሳራ ጋሄቲዲ ኣማኒዶሶና። ኤንታ ጊዶፌ ኣርዮስፓጎሳን ሺቁዋን ዴዒያ ዲዮናስዮሳ ጊያ ኣዴይ፥ ዳማርሶ ጊያ ኢሲ ማጫሲያኔ ሃራቲ ዴዖሶና።
ACT 18:1 ሄሳፌ ጉዬ፥ ጳዉሎሲ ኣቴናፔ ኬዪዲ፥ ቆሮንቶሳ ቢስ።
ACT 18:2 ያን ኣቂላ ጊያ ጳንፆሳን ዬሌቲዳ ኢሲ ኣይሁዴ ኣሲ ዴሚስ። ኣይሁዴ ኣሳ ኡባይ ሮሜፔ ኬያና ሜላ ካዎይ ቃላዉዲዮሲ ኪቲዳ ጊሾ ጉꬃ ዎዴፔ ካሴ ኢ ባ ማቼ ጲሪስቂላራ ፃሌፔ ዪስ። ጳዉሎሲ ኤንታራ ጋሄታናው ቢስ።
ACT 18:3 ኢያ ኦሶይ ኤንታይሳዳ ዱንካኔ ሲኮ ጊዲያ ጊሾ ኤንታራ ኡቲዲ ኢሲፌ ኦꬂስ።
ACT 18:4 ጳዉሎሲ ሳምባታ ኡባን ኣይሁዴታኔ ጊሪኬታ ኣማንꬃናው ኣይሁዴ ዎሳ ኬꬃን ፓላሜስ።
ACT 18:5 ሲላሴይኔ ፂሞቲዮሲ ማቄዶኒያፔ ዪዳ ዎዴ ጳዉሎሲ ባ ኩሜꬃ ዎዲያ ኢሚዲ ኣይሁዴታስ ዬሱሲ ኢ፥ ኪሪስቶሳ ጊዲ ቃላ ኦዲስ።
ACT 18:6 ሺን ኤንቲ ጳዉሎሳ ኢፂዲ ኢያ ጫዪን ጳዉሎሲ ባ ማዑዋፔ ባና ቆቆፊሼ፥ «ሂንቴ ጎሜይ ሂንቴና ኦይኮ፤ ታኒ ሄሳን ዴዒኬ። ሂዛፔ ጉዬ፥ ታኒ ኣይሁዴ ጊዶና ኣሳኮ ባይስ» ያጊስ።
ACT 18:7 ያፔ ኬዪዲ ፆሳ ጎይኒያ ቲቶስ ዮስፆሳ ጊያ ኡራ ሶ ቢስ። ዮስፆሳ ኬꬃይ ኣይሁዴ ዎሳ ኬꬃ ማታን ዴዔስ።
ACT 18:8 ኣይሁዴ ዎሳ ኬꬃ ሃላቃይ ቃሪስጶሲ ባ ሶ ኣሳ ኡባራ ጎዳ ኣማኒስ። ቆሮንቶሳ ኣሳታፔካ ዳሮቲ ፆሳ ቃላ ሲዒዳ ዎዴ ኣማኒዲ ፃማቄቲዶሶና።
ACT 18:9 ጎዳይ ኢሲ ቃማ ጳዉሎሳስ ቆንጪዲ፥ «ያዮፋ፤ ኦዳ፥ ሲዒ ጎፓ።
ACT 18:10 ታኒ ኔራ ዴዓይስ። ታው ሃ ካታማን ዳሮ ኣሲ ዴዒያ ጊሾ ኔና ቆሂዲ ኢታባን ዬጋና ኣሲ ኦኒካ ባዋ» ያጊስ።
ACT 18:11 ሄሳ ጊሾ፥ ጳዉሎሲ ፆሳ ቃላ ኣሳ ታማርሲሼ ኢሲ ላይꬂኔ ኡሱፑን ኣጌና ኤንታራ ኡቲስ።
ACT 18:12 ጋሊዮሲ ኣካያ ቢታ ኣይሲያ ዎዴ ኣይሁዴቲ ኢሲፌ ጳዉሎሳ ቦላ ዴንዲዲ ፒርዳ ኬꬂ ኢያ ኤፊዲ፥
ACT 18:13 «ሃ ኣዴይ ሂጊያ ኢፂዲ፥ ኣሳይ ፆሳ ጎይናና ሜላ ኦꬄስ» ያጊዶሶና።
ACT 18:14 ጳዉሎሲ ሃሳያና ሃኒሺን፥ ጋሊዮሲ ኣይሁዴታኮ፥ «ኣይሁዴቶ፥ ሄሲ ኢታ ኦሶ ዎይኮ ናቆ ጊዲያኮ ታኒ ሂንቴባ ዳንዳዓዳ ሲዓናው ቤሴስ።
ACT 18:15 ሺን ቃላስ፥ ሱንꬃሲኔ ሂንቴ ሂጊያስ ሂንቴ ፓላሚያባ ጊዲኮ ሂንቴ፥ ሂንቴው ቢሊቴ፤ ሄሳ ታኒ ፒርዲኬ» ያጊስ።
ACT 18:16 ያቲዲ፥ ኤንታ ፒርዳ ኬꬃፌ ካሬ ኬሲስ።
ACT 18:17 ሄሳፌ ጉዬ፥ ጊሪኬ ኣሳ ኡባይ ኣይሁዴ ዎሳ ኬꬃ ሃላቃ ሶስቴኒሳ ኦይኪዲ ፒርዳ ኬꬃ ሲንꬃን ዋꬊዶሶና። ሺን ጋሊዮሲ ሄሳ ፓፃባ ጊቤና።
ACT 18:18 ጳዉሎሲ ዳሮ ጋላስ ቆሮንቶሳን ኡቲዳፔ ጉዬ ኣማኒያ ኣሳ ሳሮꬂዲ፥ ጲሪስቂሊራኔ ኣቂላራ ማርካቤራ ሶሪያ ቢስ። ሺን ኢ ባናፔ ሲንꬄ ባው ጋሶይ ዴዒያ ጊሾ ኪንኪሪያ ካታማን ባ ሁዒያ ቡሉሴቲስ።
ACT 18:19 ኤንቲ ኤፌሶና ጋኪዳ ዎዴ ጳዉሎሲ ጲሪስቂሎኔ ኣቂላ ያን ኣጊስ። ሺን ባው ኣይሁዴ ዎሳ ኬꬂ ጌሊዲ ኣይሁዴታራ ኦዴቲስ።
ACT 18:20 ኤንቲ ባንታራ ዳሮ ዎዴ ኡታና ሜላ ጳዉሎሳ ዎሲዶሶና ሺን ኢ ኢፂስ።
ACT 18:21 ኤንታፌ ሻኬቲሼ፥ «ታኒ ያ ባሊያ ዬሩሳላሜን ቦንቻናው ቤሴስ። ሺን ፆሲ ጊኮ ሂንቴኮ ሲማዳ ያና» ያጊዲ ኤፌሶናፔ ማርካቤራ ቢስ።
ACT 18:22 ቂሳሪያ ጋኪዳ ዎዴ ዬሩሳላሜ ቢዲ ዎሳ ኬꬃ ኣሳ ሳሮꬂዳፔ ጉዬ ኣንፆኪያ ቢስ።
ACT 18:23 ያን ጉꬃ ዎዴ ጋምዒዳፔ ጉዬ ኣማኒያ ኣሳታ ኡባ ሚንꬄꬂሼ ጋላቲያራኔ ጲርጌራ ኣꬊስ።
ACT 18:24 ኢስኪንዲሪያን ዬሌቲዳ ኢሲ ኣጲሎሳ ጊያ ኣይሁዴ ኣሲ ኤፌሶና ቢስ። ኢ ኦዳ ኤሪያ ኣሲኔ ፆሳ ቃላ ዳሮ ኤሪያ ኣሲ።
ACT 18:25 ኢ ጎዳ ኦጊያ ታማሪዲ፥ ኣያናን ፁጌቲዲ ዬሱሳባ ሱሬ ታማርሴስ። ጊዶሺን፥ ዮሃኒሳ ፂንቃቲያ ፃላላ ኤሬስ።
ACT 18:26 ኢ ኣይሁዴ ዎሳ ኬꬃን ያዮና ታማርሴስ። ጲሪስቂሊኔ ኣቂሊ ኢ ኦዴይሳ ሲዒዳ ዎዴ ኢያ ባንታራ ሶ ኤፊዲ ፆሳ ኦጊያ ካሴይሳፌ ጌሺዲ ኢያው ኦዲዶሶና።
ACT 18:27 ኣጲሎሲ ኣካያ ባናው ኮዪን ኤፌሶናን ዴዒያ ኣማኒያ ኣሳይ ኢያ ቆፋ ኤኪዲ ኣካያን ዴዒያ ኣማኔይሳቲ ኢያ ሞካና ሜላ ኤንታው ዳብዳቤ ፃፊዶሶና። ኢ ያ ጋኪዳ ዎዴ ፆሳ ኣꬎ ኬሃቴꬃ ባጋራ ዬሱስ ኪሪስቶሳ ኣማኒዳይሳታ ዳሮ ማዲስ።
ACT 18:28 ኣይስ ጊኮ፥ ዬሱሲ ኢ ኪሪስቶሳ ጊዴይሳ ኣይሁዴታስ ፆሳ ቃላፔ ቆንጪሲዲ ዴሪያ ሲንꬃን ሚንꬂ ኦዲዲ ኤንታ ላꬂስ።
ACT 19:1 ኣጲሎሲ ቆሮንቶሳን ዴዒሺን፥ ጳዉሎሲ ቆሞ ባጋራ ኣꬊዲ ኤፌሶና ቢስ። ያን ኢሲ ኢሲ ኣማኒያ ኣሳታ ዴሚስ።
ACT 19:2 ኤንታኮ፥ «ሂንቴ ኣማኒዳ ዎዴ ጌሻ ኣያና ኤኪዴቲ?» ያጊዲ ኦይቺስ። ኤንቲ፥ «ኣካይ፥ ኤኪቦኮ፤ ሃሪ ኣቶሺን፥ ጌሻ ኣያኒ ዴዒያባካ ሲዒቦኮ» ያጊዶሶና።
ACT 19:3 ጳዉሎሲ ኤንታኮ፥ «ያቲን፥ ኣይቢን ፃማቄቲዴቲ?» ያጊስ። ኤንቲ፥ «ኑኒ ዮሃኒሳ ፂንቃቲያን ፃማቄቲዳ» ያጊዲ ዛሪዶሶና።
ACT 19:4 ጳዉሎሲ፥ «ዮሃኒሲ ባፔ ጉዬራ ያ ዬሱስ ኪሪስቶሳን ኣሳይ ኣማናና ሜላ ኣሳስ ኦዲሼ፥ ናጋራፔ ሲሞ ቤሲያ ፂንቃቲያን ፃማቂስ» ያጊስ።
ACT 19:5 ኤንቲ ሄሳ ሲዒዳ ዎዴ ጎዳ ዬሱስ ኪሪስቶሳ ታማሬ ጊዳናው ፃማቄቲዶሶና።
ACT 19:6 ጳዉሎሲ ባ ኩሺያ ኤንታ ቦላ ዎꬂዳ ዎዴ ጌሻ ኣያኒ ኤንታ ቦላ ዎꬊን፥ ዱማ ዱማ ዶናን ኦዴቲዶሶና፤ ቃሲ ቲንቢቴ ኦዲዶሶና።
ACT 19:7 ሄ ቤሳን ታማኔ ናምዓ ጊዲያ ኣሳቲ ዴዖሶና።
ACT 19:8 ጳዉሎሲ ኣይሁዴ ዎሳ ኬꬃ ጌሊዲ፥ ፆሳ ካዎቴꬃባ ያዮና ፓላሚሼኔ ሎይꬂ ቆንጪሲሼ ኤንታራ ሄꬑ ኣጌና ጋካናው ጋምዒስ።
ACT 19:9 ሺን ኤንታፌ ኢሶቲ ኢሶቲ ꬉቤ ጊዲዲ ዳሮ ኣሳ ሲንꬃን ጎዳ ኦጊያ ጫዪዲ ኣማኖና ኢፂዶሶና። ጳዉሎሲ ኣማኔይሳታ ኤንታፌ ሻኪ ኤኪዲ ፂራኖሳ ጊያ ቲሚርቴ ኬꬃን ኡባ ዎዴ ኤንታ ታማርሲስ።
ACT 19:10 ጳዉሎሲ ናምዑ ላይꬂ ጋካናው ቃላ ኦዲስ። ሄሳ ጊሾ፥ ኢሲያን ዴዒያ ኣሳ ኡባይ፥ ኣይሁዴቲኔ ኣይሁዴ ጊዶናይሳቲ ጎዳ ቃላ ሲዒዶሶና።
ACT 19:11 ፆሳይ ጳዉሎሳ ኩሼን ዎልቃማ ማላታታ ኦꬂስ።
ACT 19:12 ሄሳ ጊሾ፥ ኣሳይ ኢያ ቦላ ቦቺዳ ማራቢያ ዎይኮ ማዑዋ ሃርጋንቾታስ ኤፎሶና። ኤንቲካ ፓፆሶና፤ ቱና ኣያናቲካ ኤንታፌ ኬዮሶና።
ACT 19:13 ቱና ኣያናታ ኬሲሼ ዩያ ኣይሁዴታፔ ኢሶቲ ኢሶቲ፥ «ጳዉሎሲ ሳባኪያ ዬሱሳ ሱንꬃን ኬዪቴ ጊዲ ሂንቴና ኪቶስ» ያጊዲ፥ ቱና ኣያናቲ ኦይኪዳ ኣሳታ ቦላ ጎዳ ዬሱሳ ሱንꬃ ፄጊዶሶና
ACT 19:14 ካሂኔ ሃላቃ ኣስቄዌ ጊያ ኢሲ ኣይሁዴ ኣዲያስ ሄሳ ኦꬂያ ላፑን ናይቲ ዴዖሶና።
ACT 19:15 ሺን ቱና ኣያናይ ኤንታኮ፥ «ታኒ ዬሱሳካ ጳዉሎሳካ ኤራይስ፥ ሺን ሂንቴ ኦናንቴ?» ያጊስ።
ACT 19:16 ቱና ኣያናይ ኦይኪዳ ኣዴይ ኤንታ ቦላ ጉፒ ዎꬊዲ፥ ኤንታ ማዱንፂሲዲ፥ ሄ ኬꬃፌ ካሎ ባቃታና ጋካናው ዎልቃሚስ።
ACT 19:17 ኤፌሶናን ዴዒያ ኣይሁዴቲኔ ኣይሁዴ ጊዶናይሳቲ ኡባይ ሄሳ ሲዒዲ ዳሮ ያዪዶሶና። ጎዳ ዬሱሳ ሱንꬃይ ዳሮ ቦንቼቲስ።
ACT 19:18 ኣማኔይሳታፔ ዳሮቲ ባንታ ኦꬂዳ ኢታ ኦሱዋ ፓፂሼኔ ቆንጬን ኦዲሼ ዮሶና።
ACT 19:19 ቢቴይሳታፔ ዳሮቲ ባንታ ማፃፋታ ሺሺዲ ኣሳ ኡባ ሲንꬃን ፁጊዶሶና። ሄ ማፃፋታ ጋቲያ ቆዳይ ኢሻታሙ ሙኩሉ ቢራ ሳንቲሜ ጊዲስ።
ACT 19:20 ሄሳዳ ሃኒዲ ፆሳ ቃላይ ዲጪሼኔ ዳልጊሼ ቢስ።
ACT 19:21 ሄሲ ፖሌቲዳፔ ጉዬ ጳዉሎሲ፥ «ታኒ ዬሩሳላሜ ባ ሲማዳ ሮሜካ ባናው ቤሴስ» ያጊዲ ማቄዶኒያራኔ ኣካያራ ኣꬊዲ ዬሩሳላሜ ባናው ቆፋ ቃቺስ።
ACT 19:22 ቃሲ ባና ማዴይሳታፔ ናምዓታ ፂሞቲዮሳኔ ኤራስፆሳ ማቄዶኒያ ኪቲዲ፥ ባው ኢሲያን ጉꬃ ዎዴ ጋምዒስ።
ACT 19:23 ሄ ዎዴ ጎዳ ኦጊያ ጊሾ ኤፌሶናን ዎልቃማ ካቺ ኬዪስ።
ACT 19:24 ኢሲ ቢራ ኦꬂያ ዲሜፂሮሳ ጊያ ኡራይ ኣርፄሚሲ ኤቃ ኬꬃ ሚሲሊያ ቢራፔ ኦꬂዲ ዳሮ ዎꬌ ዴሜስ።
ACT 19:25 ሄሳ ጊሾ፥ ሄሳ ሜላ ኦሶ ኦꬄይሳታ ኢሲፌ ሺሺዲ፥ «ኣሳው፥ ኑ ዱሬቴꬃይ ሃ ኦሱዋን ጊዴይሳ ሂንቴ ኤሬታ።
ACT 19:26 ሃይሲ ጳዉሎሲ፥ ‹ኣሳ ኩሼን ኦሴቲዳይሳቲ ፆሳታ ጊዶኮና› ያጊዲ፥ ኤፌሶናኒኔ ጉꬃ ቢታታፔ ኣቲን ኩሜꬃ ኢሲያ ኡባን ዴዒያ ዳሮ ኣሳ ኦዲ ኣማንꬂዳይሳኔ ባሌꬂዳይሳ ሂንቴ ቤዒዴታኔ ሲዒዴታ።
ACT 19:27 ሜቶ ጊዲዳይ፥ ኑ ኦሶይ ካꬌቴይሳ ፃላላ ጊዶናሺን ኢሲያኒኔ ቢታ ኡባን ዴዒያ ኣሲ ጎይኒያ ጊታ ፆሴ ኣርፄሚሲ ኬꬃይ ቦንቼቶና ኣቴይሳኔ ኢ ጊታቴꬃይካ ኩንዳናይሳ» ያጊስ።
ACT 19:28 ኣሳይ ሄሳ ሲዒዳ ዎዴ ሼኔን ፁጌቲዲ፥ «ኤፌሶና ኣርፄሚሳ ጊታ» ያጊዲ ዋሲዶሶና።
ACT 19:29 ሄ ዋሶይ ካታማ ኡባ ጋኪስ። ጳዉሎሳራ ሃሙቲያ ማቄዶኒያ ኣሳታ፥ ጋዮሳኔ ኣርስፂሮኮሳ ኦይኪዲ ጎቺሼ ካሳ ቤሳ ዎፂዶሶና።
ACT 19:30 ጳዉሎሲካ ኣሳይ ሺቂዳሱዋ ጌላናው ኮዪስ፥ ሺን ኣማኔይሳቲ ኢያ ዲጊዶሶና።
ACT 19:31 ኢሲያ ቢታ ሃላቃታፔ ጳዉሎሳ ላጌ ጊዲዳ ኢሶቲ ኢሶቲ ጳዉሎሳኮ ኪቲዲ፥ «ካሳ ቤሳ ቆንጬን ኬያዳ ቤንቶፋ» ጊዲ ኢያ ዎሲዶሶና።
ACT 19:32 ሺቂዳ ኣሳስ ሃናናባይ ꬋይስ፤ ዳሪያ ባጋ ኣሳይ ሃሪ ኣቶሺን ኣይስ ሺቂዳኮ ኤሮና ጊሾ ኢሶይ ኢሲባስ ዋሲያ ዎዴ ሃንኮይ ሃራባስ ዋሴስ።
ACT 19:33 ኣይሁዴቲ ኢስኪንዲሬ ጊያ ኣዲያ ኣꬂ ቤሲን፥ ኢሲ ኢሲ ኣሳይ ኢ ጋናባ ኦዲዲ ኢያ ሲንꬄ ኣꬂዶሶና። ኢ ኣሳይ ሲዒ ጋና ሜላ ባ ኩሺያን ማሊ ቤሲዲ፥ ኣሳስ ሞቴታናው ኤቂስ።
ACT 19:34 ሺን ኢስኪንዲሬይ ኣይሁዴ ኣሲ ጊዲዳይሳ ኣሳይ ኤሪዳ ዎዴ ናምዑ ሳቴ ጊዳናይሳ ሜላ ኡባይ ኢሲ ቃላን፥ «ኤፌሶና ኣርፄሚሳ ጊታ» ያጊዲ ዋሲዶሶና።
ACT 19:35 ዉርሴꬃን ካታማ ፃፌይ ኣሳ ሲዒ ኦꬂዲ፥ «ኤፌሶና ኣሳው! ኤፌሶና ካታማይ ጊታ ኣርፄሚሲ ኤቃ ኬꬃኔ ሳሎፔ ዎꬊዳ፥ ኢ ሹቻ ሚሲሊያ ናጌይሳ ጊዴይሳ ኤሮና ኣሲ ባዋ።
ACT 19:36 ሃይሳ ካሺ ጊያ ኣሲ ባይና ጊሾ ሂንቴ ሲዒ ጋናዉኔ ዲርጊዲ ኣይኮ ኦꬆና ኣጋናው ቤሴስ።
ACT 19:37 ሂንቴ ሃ ኣሳታ፥ ኤቃ ኬꬃ ሚሼ ካይሶቲቦናይሳታኔ ኑ ፆሳታ ጫይቦናይሳታ ኤሂዴታ።
ACT 19:38 ሄሳ ጊሾ፥ ዲሜፂሮሲኔ ኢያራ ዴዒያ ኦሳንቾቲ ኣሳ ሞታናው ኮይኮ፥ ፒርዳ ኬꬃይ ዶያ ዴዔስ፤ ዳይናቲካ ዴዖሶና፤ ኤንቲ ሞታናው ዳንዳዖሶና።
ACT 19:39 ሺን ሂንቴ ሃራ ኦዳ ኮይኮ፥ ሻንጎ ሺቆን ኦዳይ ቤዔቶ።
ACT 19:40 ሄሳ ጊዶና ኢፂኮ ሃቺ ሃኒዳባስ ሮሜ ካዎቴꬃይ ኑና ኦይቻና። ሃ ቡቄꬃስ ጋሶይ ባይና ጊሾ ኑኒ ጋሶ ኦዳናው ዳንዳዖኮ»
ACT 19:41 ያጊዲ ሺቁዋ ላሊስ።
ACT 20:1 ዋሶይ ዴጪዳፔ ጉዬ ጳዉሎሲ ኣማኒያ ኣሳታ ፄጊሲዲ ኤንታ ዞሪዳፔ ጉዬ ሳሮꬂዲ ማቄዶኒያ ባናው ኬዪስ።
ACT 20:2 ኢ ኣꬊያ ቢታታን ዴዒያ ኣማኒያ ኣሳ ቃላ ኦዲዲ ሚንꬄꬂዳፔ ጉዬ ጊሪኬ ቢታ ቢስ።
ACT 20:3 ኢ ያን ሄꬑ ኣጌና ኡቲዲ፥ ማርካቤራ ሶሪያ ባናው ቆፒዲ ዴዒሺን፥ ኣይሁዴቲ ባና ዎꬋናው ኮዬይሳ ኤሪዲ ማቄዶኒያራ ጉዬ ሲማናው ኮዪስ።
ACT 20:4 ጳዉሎሳ ሞይዚዳይሳቲ ቤሪያፔ ጳርሁሳ ናዓ ሶጳፂሮሳ፥ ቴሴሎንቄፌ ኣርስፂሮኮሳኔ ሲኮንዱሳ፥ ዴርቤፌ ጋዮሳ፥ ኢሲያፔ ቲኪቆሳ፥ ፂሮፊሞሳኔ ፂሞቲዮሳ።
ACT 20:5 ሄሳቲ ሲንꬄ ቢዲ ኑና ፂሮዓዳን ናጎሶና።
ACT 20:6 ኑኒ ኡይꬃ ባሊያ ቦንቺዳፔ ጉዬ ፊልጲሲዩሳፔ ማርካቤራ ዴንዲዲ፥ ኢቻሻንꬆ ጋላሳን ኤንታ ፂሮዓዳን ጋኪዲ ያን ላፑን ጋላስ ጋምዒዳ።
ACT 20:7 ሳሚንታፌ ኮይሮ ጋላሳን ኑኒ ኡይꬃ ሜንꬃናው ሺቂዲ ዴዒሺን፥ ጳዉሎሲ ዎንቴꬄ ባናው ቆፒዳ ጊሾ ኤንታው ቃላ ኦዲሼ ጊዲ ቢላሄ ጋካናው ኦዳ ኣዱሲስ።
ACT 20:8 ኑኒ ሺቂዲ ኡቲዳ ፖቂያን ዳሮ ፖዖይ ዴዔስ።
ACT 20:9 ኤዉፂኮሳ ጊያ ኢሲ ናዓቴꬃይ ማስኮቴ ቦላ ኡቲዲ፥ ባና ዶጊዲ ꬊስኪስ። ጳዉሎሲ ኦዳ ኣዱሲዳ ዎዴ ኤዉፂኮሲ ꬊስኮ ኤዪዲ ሄꬓንꬆ ፖቂያፔ ኩንዲዲ ሃይቂዳይሳ ኣሳይ ዴንꬂስ።
ACT 20:10 ሺን ጳዉሎሲ ዎꬊዲ፥ ኢያ ቦላ ጉፋኒስ። ኢያ ኢዲሚዲ፥ «ኢ ሃይቂቤና፥ ሂርጎፊቴ» ያጊስ።
ACT 20:11 ሄሳፌ ጉዬ፥ ፑዴ ፖቂያ ቦላ ኬዪዲ ኡይꬃ ሜንꬂዲ ሚስ። ሳዒ ዎንታና ጋካናው ኣሳስ ኦዲዳፔ ጉዬ ዴንዲዲ ቢስ።
ACT 20:12 ሄ ፓፂዳ ናቴꬃ ሶ ኤፊዲ ዳሮ ኡፋይቲዶሶና።
ACT 20:13 ሺን ጳዉሎሲ ባና ያፔ ሞካና ሜላ ኑስ ኦዲዳ ጊሾ ካሴቲዲ ማርካቢያኮ ቢዲ፥ ኣሶሳ ባናው ዴንዲዳ። ኣይስ ጊኮ፥ ኢ ቶሆን ባናው ቆፒዳ ጊሾ ኑና ሄሳꬆ ኪቲስ።
ACT 20:14 ኢ ኑራ ኣሶሳን ጋሄቲን ማርካቢያን ኢያ ኤኪዲ ሚፂሊኔ ቢዳ።
ACT 20:15 ዎንቴꬃ ጋላስ ያፔ ዴንዲዲ ማርካቤራ ኪዮሳ ሲንꬄን ዴዒያ ቤሳ ጋኪዳ፤ ቃሲ ዎንቴꬃ ጋላስ ሳሞሳ ፒኒዲ ካሊያ ጋላስ ሚሊፄ ጋኪዳ።
ACT 20:16 ጳዉሎሲ ኢሲያን ዳሮ ጋምዖና ኤፌሶና ማታራ ኣꬋናው ቆፒስ። ባው ዳንዳዔቲኮ ጴንፄቆስፄ ባሊያ ጋላስ ዬሩሳላሜ ጋካናው ኤሶቴስ።
ACT 20:17 ጳዉሎሲ ሚሊፄፔ ኤፌሶና ኪቲዲ ዎሳ ኬꬃ ጪማታ ፄጊሲስ።
ACT 20:18 ዎሳ ኬꬃ ጪማቲ ኢያኮ ዪን፥ ኤንታኮ ሃይሳዳ ያጊስ፡ «ታኒ ኢሲያ ጌሊዳ ኮይሮ ጋላሳፔ ዶሚዳ ሂንቴራ ዴዒዳ ዎዴ ኡባን ዋና ዴዒዳኮ ሂንቴ ኤሬታ።
ACT 20:19 ኣይሁዴቲ ዱላቲዲ ታ ቦላ ሜቶ ጋꬂኮካ ታኒ ኣሽኬቴꬃኒኔ ዳሮ ኣፉꬃን ጎዳስ ኦꬃስ።
ACT 20:20 ዳባባንካ ሂንቴ ኬꬃን ኬꬃን ሂንቴና ታማርሲሼ ሂንቴና ማዲያባፔ ኢሲባካ ፓጪሳቢኬ።
ACT 20:21 ታኒ ኣይሁዴታሲኔ ኣይሁዴ ጊዶናይሳታስ ናጋራፔ ፆሳኮ ሲማና ሜላኔ ኑ ጎዳ ዬሱሳ ኣማናና ሜላ ማርካታስ።
ACT 20:22 «ያን ታና ኣይቢ ጋካኔኮ ኤሪኬ፥ ሺን ሃዒ ታኒ ጌሻ ኣያናስ ኪቴታዳ ዬሩሳላሜ ባይስ።
ACT 20:23 ጌሻ ኣያናይ ቃሾይኔ ዋዬይ ታና ናጌይሳ ካታማ ኡባን ታው ማርካቲስ።
ACT 20:24 ሺን ታ ዎꬃ ፖላናዉኔ ጎዳ ዬሱስ ኪሪስቶሳፔ ኤኪዳ ኦሱዋ፥ ፆሳ ኣꬎ ኬሃቴꬃ ዎንጌላ ማርካቴይሳ ፖላናው ታ ሼምፒው ፓꬆናባዳ ቆዳይስ።
ACT 20:25 «ታኒ ሃዒካ ፆሳ ካዎቴꬃ ማርካታሼ ሂንቴ ኡባ ጊዶን ዩያስ። ሂዛፔ ጉዬ ሂንቴፌ ኦኒካ ታና ቤዖናይሳ ኤራይስ።
ACT 20:26 ሄሳ ጊሾ፥ ሂንቴፌ ኢሲ ኡራይ ꬋዪኮካ ታ ኦይሼቶናይሳ ሃቺ ሂንቴው ጌሻዳ ኦዳይስ።
ACT 20:27 ኣይስ ጊኮ፥ ፆሳይ ኦꬃናው ቆፒዳባ ኡባ ሂንቴው ኣይቢባካ ኣሾና ኦዳስ።
ACT 20:28 «ባ ናዓ ሱꬃን ዎዚዳ ፆሳ ዎሳ ኬꬃ ናጊቴ። ጌሻ ኣያናይ ሂንቴና ሃላቃ ኦꬂዲ ዶሪዳ ዉዲያሲኔ ሂንቴ ሁዒያስ ናጌቲቴ።
ACT 20:29 ታኒ ቢዳፔ ጉዬ፥ ዉዲያስ ቃꬌቶና ኢታ ሱꬉሜቲ ሂንቴ ጊዶ ጌላናይሳ ታ ኤራይስ።
ACT 20:30 ኣማኔይሳታ ባንታ ጌዶ ካሌꬃናው ዎርዶ ታማርሲያ ኣሳቲ ሂንቴ ጊዶፌ ዴንዳና።
ACT 20:31 ሄሳ ጊሾ፥ ታኒ ሄꬑ ላይꬂ ቃማኔ ጋላስ ኣፉꬃን ሂንቴና ሁዔን ሁዔን ሚንꬄꬂዳይሳ ቆፒሼ ናጌቲቴ።
ACT 20:32 «ሃዒካ ሂንቴና ሚንꬃናዉኔ ጌሻ ኣሳራ ላቲሳናው ዳንዳዒያ ፆሳሲኔ ኢያ ኣꬎ ኬሃቴꬃ ቃላስ ሂንቴና ሃዳራ ኢማይስ።
ACT 20:33 «ታኒ ኦፔካ ቢራ ዎይኮ ዎርቃ ዎይኮ ኣፊላ ኣሞታቢኬ።
ACT 20:34 ታኒ ታ ኩሼን ኦꬃዳ ታናኔ ታራ ዴዔይሳታ ኮሺዳባ ማዲዳይሳ ሂንቴ፥ ሂንቴ ሁዔን ኤሬታ።
ACT 20:35 ሂንቴ ሃይሳዳ ዳቡሪዲ ኦꬂሼ ዳቡራንቾታ ማዳናይሳኔ ጎዳ ዬሱሲ፥ ‹ኤኬይሳፌ ኢሜይሲ ኣንጄቲዳይሳ› ጊዳ ቃላ ሂንቴ ቆፓናው ቤሴይሳ ታኒ ሂንቴና ኡባባን ቤሳስ» ያጊስ።
ACT 20:36 ጳዉሎሲ ሄሳ ኦዲ ኦንጊዲ ኤንታ ኡባራ ጉልባቲዲ ፆሳ ዎሲስ።
ACT 20:37 ኤንቲ ኡባይካ ጳዉሎሳ ኢዲሚዲ ዬኪዲ ዬሪዶሶና።
ACT 20:38 ኢ ዛሪዲ፥ «ታና ቤዔኬታ» ያጊዳ ቃላይ ኤንታ ዳሮ ኣዛንꬂስ። ኤንቲ ማርካቢያ ጋካናው ኢያ ሞይዚዶሶና።
ACT 21:1 ኑኒ ኤፌሶና ጪማታፔ ሻኬቲዳ ሜላ ቆሴ ቢዳ። ዎንቴꬃ ጋላስ ሮዳ ጋኪዲ ያፔ ጳፃራ ቢዳ።
ACT 21:2 ሲሮፊንቄ ፒኒያ ማርካቤ ዴሚዲ ኢያን ጌሊዲ ባናው ዴንዲዳ።
ACT 21:3 ኑኒ ቆጲሮሳ ቤዓናው ዳንዳዒያ ሶ ዪዲ፥ ቆጲሮሳ ሃዲርሳ ባጋ ኣጊዲ ሶሪያ ቢዳ። ማርካቤይ ባ ጫና ያን ዎꬃናው ኮዪዳ ጊሾ ፂሮሳ ቢዳ።
ACT 21:4 ያን ኣማኒያ ኣሳታ ዴሚዲ ኤንታራ ላፑን ጋላስ ኡቲዳ። ጳዉሎሲ ዬሩሳላሜ ቦና ሜላ ኤንቲ ኢያው ኣያናን ኦዲዶሶና።
ACT 21:5 ኑኒ ኤንታራ ኡቲያ ዎዴይ ዉሪን ኬዪዲ ቢዳ። ኤንቲ ኡባይ ባንታ ማጫሳታራኔ ባንታ ናይታራ ኢሲፌ ካታማፔ ካሬ ኬሲዲ ኑና ሞይዚዶሶና። ኑኒ ኣባ ዶናን ጉልባቲዲ ፆሳ ዎሲዳ።
ACT 21:6 ሄሳፌ ጉዬ፥ ዎሊ ሳሮꬂዲ ኑ ማርካቢያን ጌሊዳ፤ ኤንቲ ባንታ ሶ ሲሚዶሶና።
ACT 21:7 ኑኒ ኣባ ኦጊያ ኦንጊዲ፥ ፂሮሳፔ ጴፄሌማይሳ ጋኪዳ። ያን ኣማኒያ ኣሳታ ሳሮꬂዲ፥ ኤንታ ማታን ኢሲ ጋላስ ፔዒዳ።
ACT 21:8 ዎንቴꬃ ጋላስ ኬዪዲ፥ ቂሳሪያ ቢዳ። ሳባኪያ ፊልጶሳ ሶ ጋኪዲ ኢያ ማታን ኡቲዳ። ኢ ዬሩሳላሜን ካሴ ዶሬቲዳ ላፑናታፔ ኢሱዋ።
ACT 21:9 ፊልጶሳስ ናቤ ጊዲዳ ኦይዱ ጌላዖ ናይቲ ዴዖሶና።
ACT 21:10 ኑኒ ኡንዴና ጋላስ ያን ኡቲዲ ዴዒሺን ኣጋቦሳ ጊያ ናቤይ ዪሁዳፔ ቂሳሪያ ዪስ።
ACT 21:11 ኑኮ ዪዲ ጳዉሎሳ ሳቂያ ኤኪዲ ባ ኩሺያኔ ባ ቶሁዋ ቃቺዲ፥ «ጌሻ ኣያናይ ሃ ሳቂያ ጎዳ፥ ዬሩሳላሜን ኣይሁዴቲ ሃይሳዳ ቃቺዲ፥ ኣይሁዴ ጊዶና ኣሳስ ኣꬂዲ ኢማና ያጌስ» ያጊስ።
ACT 21:12 ኑኒ ሄሳ ሲዒዳ ዎዴ ኑኔ ያን ዴዒያ ኣሳቲ ጳዉሎሲ ዬሩሳላሜ ቦና ሜላ ዎሲዳ።
ACT 21:13 ሺን ጳዉሎሲ ዛሪዲ፥ «ሂንቴ ሃይሳዳ ዬኪሼ ኣይስ ታ ዎዛና ሹጊሴቲ? ታኒ፥ ጎዳ ዬሱሳ ሱንꬃ ጊሾ ቃሼቴꬃ ፃላላ ጊዶናሺን ዬሩሳላሜን ሃይቃናዉካ ጊጌታስ» ያጊስ።
ACT 21:14 ኑ ዞሪያ ኢ ኤኮና ኢፂን፥ «ጎዳ ሼኔይ ሃኖ» ያጊዲ ሲዒ ጊዳ።
ACT 21:15 ያን ጉꬃ ዎዴ ጋምዒዳፔ ጉዬ ጊጌቲዲ ዬሩሳላሜ ባናው ኬዪዳ።
ACT 21:16 ቂሳሪያን ዴዒያ ኣማኒያ ኣሳታፔ ጉꬃቲ ኑራ ቢዶሶና። ኤንቲ ኑኒ ሼምፓናሱዋ ሚናሶና ጊያ ቆጲሮሳ ኣዲያ ሶ ኤፊዶሶና። ሚናሶኒ ኮይሮ ኣማኒዳ ኣሳፔ ኢሱዋ።
ACT 21:17 ኑኒ ዬሩሳላሜ ጋኪዳ ዎዴ ኣማኒያ ኣሳቲ ኑና ኡፋይሳን ሞኪዶሶና።
ACT 21:18 ዎንቴꬃ ጋላስ ጳዉሎሲኔ ኑኒ ያይቆባራ ጋሄታናው ቢዳ። ዎሳ ኬꬃ ጪማቲ ኡባቲካ ያን ዴዖሶና።
ACT 21:19 ጳዉሎሲ ኤንታ ሳሮꬂዳፔ ጉዬ ኣይሁዴ ጊዶና ኣሳ ጊዶን ባ ባጋራ ፆሳይ ኦꬂዳባ ኡባ ኤንታው ኦዲስ።
ACT 21:20 ኤንቲ ሄሳ ሲዒዳ ዎዴ ፆሳ ጋላቲዲ ጳዉሎሳኮ ሃይሳዳ ያጊዶሶና፡ «ኑ ኢሻው፥ ኣይሁዴታ ጊዶን ኣፑን ሙኩላቲ ፆሳ ኣማኒዳኮ ኔ ቤዓሳ፤ ኤንቲ ኡባይካ ሂጊያ ሚንꬂ ናጎሶና።
ACT 21:21 ኔኒ ኣይሁዴ ጊዶናይሳታ ቢታን ዴዒያ ኣይሁዴ ኡባይ ባንታ ናይታ ቃፃሮና ሜላ፥ ኣይሁዴታ ዎጋ ካሎና ሜላኔ ሙሴ ሂጊያ ኢፃና ሜላ ኔኒ ታማርሴይሳ ዬሩሳላሜን ዴዒያ ኣይሁዴቲ ሲዒዶሶና።
ACT 21:22 ያቲን ኣይቢ ሎዖ? ኔኒ ዪዳይሳ ዳሮቲ ሲዓና።
ACT 21:23 «ሄሳ ጊሾ፥ ኑኒ ኔው ኦዴይሳ ሲዓ፤ ጋሶይ ዴዒያ ኦይዱ ኣሳቲ ኑ ማታን ዴዖሶና።
ACT 21:24 ኤንታ ኤካዳ ኤንታራ ጌያ፤ ቃሲ ኤንቲ ባንታ ሁዒያ ሜዴታና ሜላ ኤንታው ሚሼ ኢማ። ኤንቲ ካሴ ኔባ ሲዒዳይሲ ቱማ ጊዶናይሳኔ ኔኒ ኔ ሁዔንካ ሂጌ ናጊያ ኣሲ ጊዴይሳ ኡባይ ኤራና።
ACT 21:25 «ሺን ኣማኒዳ ኣይሁዴ ጊዶና ኣሳታ ጊዲኮ፥ ኤንቲ ኤቃስ ያርሼቲዳባ ሞና ሜላ፥ ሱꬁ ኡዮና ሜላ፥ ባዉታ ሞና ሜላኔ ላይማቶና ሜላ፥ ኑኒ ኦዳ ቃቺዲ፥ ኤንታው ዳብዳቤ ፃፊዳ» ያጊዶሶና።
ACT 21:26 ሄሳፌ ጉዬ፥ ጳዉሎሲ ዎንቴꬃ ጋላስ ኣሳታ ኤኪዲ፥ ኤንታራ ጌዪስ። ኢ ባንታ ጌያ ጋላሳይ ኣዉዴ ፖሌቲያኮ ኤሪሳናዉኔ ባንታ ያርሹዋ ኣዉዴ ያርሻኔኮ ኤሪሳናው ፆሳ ኬꬂ ጌሊስ።
ACT 21:27 ላፑን ጋላሳይ ዉራና ሃኒሺን፥ ኢሲያፔ ዪዳ ኣይሁዴቲ ፆሳ ኬꬃን ጳዉሎሳ ቤዒዲ፥ ኣሳ ኡባ ዴንꬄꬂዲ ጳዉሎሳ ኦይኪዶሶና።
ACT 21:28 «ኢስራዔሌ ኣሳው፥ ኑና ማዲቴ፤ ሃ ኡራይ፥ ኑ ዴሪያ፥ ኑ ሂጊያኔ ሃ ፆሳ ኬꬃ ኢፃና ሜላ ኣሳ ኡባ ታማርሴስ። ሄሲካ ጊዶና ኢፂን ኣይሁዴ ጊዶናይሳታ ፆሳ ኬꬂ ጌልሲዲ፥ ሃ ጌሻ ቤሳ ቱኒሲስ» ያጊዲ ዋሲዶሶና።
ACT 21:29 ኤንቲ ሄሳ ጊዳይ ካሴ ኤፌሶና ፂሮፊሞሳ ጳዉሎሳራ ካታማን ቤዒዳ ጊሾ ሃዒ ጳዉሎሲ ፆሳ ኬꬂ ኢያ ኤኪ ጌሊዳባ ኤንታው ዳኒስ።
ACT 21:30 ካታማ ኡባይ ቡቄቲስ፤ ኣሳ ኡባይ ሺቂዲ ጳዉሎሳ ኦይኪዲ ፆሳ ኬꬃፌ ካሬ ጎቺዶሶና። ፆሳ ኬꬃ ፔንጌቲ ኤሌሲዲ ጎርዴቲዶሶና።
ACT 21:31 ኣሳይ ጳዉሎሳ ዎꬋና ሃኒሺን፥ «ዬሩሳላሜ ካታማይ ኩሜꬂ ቡቄቲስ» ጊያ ኦዳይ ሮሜ ሻላቃኮ ጋኪስ።
ACT 21:32 ሻላቃይ ዎታዳሬታኔ ማቶ ሃላቃታ ኤኪዲ ዎፂሼ ዪስ። ኣሳይ ሻላቃኔ ዎታዳሬታ ቤዒዳ ዎዴ ጳዉሎሳ ዋꬌይሳ ኣጋጊዶሶና።
ACT 21:33 ሄ ዎዴ ሻላቃይ ሺቂዲ፥ ጳዉሎሳ ኦይኪዲ፥ ናምዑ ሳንꬃላታን ቃሼታና ሜላ ኪቲስ። ያቲዲ፥ ኢ ኦኔኮኔ ኣይ ኦꬂዳኮ ኣሳ ኦይቺስ።
ACT 21:34 ኣሳፔ ባጋይ ኢሲባ ጊዲ ዋሲያ ዎዴ ሃራቲ ሃራባ ጊዲ ዋሴስ። ዋሶይ ዳሪዳ ጊሾ ሻላቃይ ቱማ ሻካንው ዳንዳዔቶና ኢፂን፥ ዎታዳሬቲ ጳዉሎሳ ባንታ ዴዒያሶ ኤፋና ሜላ ኪቲስ።
ACT 21:35 ጳዉሎሲ ዬꬊ ኬያ ዴꬃ ጋኪያ ዎዴ ኣሳ ሱጌꬃ ጊሾ ዎታዳሬቲ ኢያ ቶኪዶሶና።
ACT 21:36 ዳሮ ኣሳይ፥ «ኢ ሃይቆ!» ያጊዲ ዋሲሼ ካሎሶና።
ACT 21:37 ዎታዳሬቲ ጳዉሎሳ ባንታ ዴዒያሱዋ ጌልሳና ሃኒሺን፥ ጳዉሎሲ ሻላቃኮ፥ «ታኒ ኔው ኢሲባ ኦዶ?» ያጊስ። ኢ ጳዉሎሳኮ፥ «ኔኒ ጊሪኬ ዶና ኤራይ?
ACT 21:38 ኔኒ ሃይሳፌ ሲንꬄ ቡቄꬂ ሜꬊዲ ሼምፖ ዎꬊዳ ኦይዱ ሙኩሉ ኣሳታ ኤኪዲ ባዞ ጌሊዳ ጊብፄ ኡራ ጊዲኪ?» ያጊስ።
ACT 21:39 ሺን ጳዉሎሲ፥ «ታኒ፥ ኪልቂያን ዴዒያ ኤሬቲዳ ቴርሴሴ ካታማን ዬሌቲዳ ኣይሁዴ ኣሲ። ሃያና ታና ኦዲሳርኪ?» ያጊስ።
ACT 21:40 ሻላቃይ ኢያኮ፥ «ኦዳ» ያጊን ጳዉሎሲ ዴꬃ ቦላ ኤቂዲ፥ ኣሳይ ሲዒ ጋና ሜላ ባ ኩሺያን ማሊስ። ኣሳይ ሲዒ ጊን ኢብራይስፄ ዶናን ሃይሳዳ ያጊስ፡
ACT 22:1 «ታ ኢሻቶ፥ ታ ኣዋቶ፥ ታኒ ሃዒ ሂንቴው ኢሚያ ዛሩዋ ሲዒቴ።»
ACT 22:2 ጳዉሎሲ ኤንታው ኢብራይስፄ ዶናን ኦዴይሳ ሲዒዲ ካሴይሳፌ ኣꬂዲ ሲዒ ጊዶሶና። ኢ ካሊዲ፥
ACT 22:3 «ታኒ ኪልቂያን ዴዒያ ቴርሴሴን ዬሌታዳ ሃ ካታማን ዲጫስ። ታ ኣስታማሬይካ ጋማሊያሌ፤ ታኒ ኑ ኣዋታ ሂጊያ ሚንꬃ ታማሪዳ፥ ሃቺ ሂንቴ ኡባይ ሃኔይሳዳ ፆሳስ ሚሼቲያ ኣይሁዴ ኣሲ።
ACT 22:4 ታኒ ሃ ኦጊያ ካሊያ ማጫታኔ ኣዴታ ኦይካዳ ቃሾ ኬꬃን ዬጋሼን ኤንታ ዎꬊሳና ጋካናው ዋዬ ቤሲዳ ኣሲ።
ACT 22:5 ሄሳዳካ፥ ካሂኔ ሃላቃይኔ ሻንጎ ኡባይ ታባ ማርካታናው ዳንዳዔስ። ታኒ ዳማስቆን ዴዒያ ኤንታ ኢሻታስ ኤንታፌ ዳብዳቤ ኤካዳ ያን ዴዒያ ኣሳቲ ቃሼቲዲ ሴሬታና ሜላ ዬሩሳላሜ ኤንታ ኤሃናው ያ ባስ።
ACT 22:6 «ታኒ ባዳ ዳማስቆ ማቲዳ ዎዴ ሴታ ጋላስ ቆፖና ሳሎፔ ጊታ ፖዖይ ታ ዩሹዋን ፖዒስ።
ACT 22:7 ታኒ ሳዓን ኩንዳ ዴዒሺን፥ ‹ሳዖላ፥ ሳዖላ፥ ታና ኣይስ ጎዳይ?› ጊያ ቃላ ሲዓስ።
ACT 22:8 ታኒ ዛራዳ፥ ‹ጎዳው፥ ኔኒ ኦኔ?› ያጋስ። ኢ ዛሪዲ፥ ‹ታኒ፥ ኔኒ ጎዲያ ናዚሬቴ ዬሱሳ› ያጊስ።
ACT 22:9 ታራ ዴዔይሳቲ ፖዑዋ ቤዒዶሶናፔ ኣቲን ታው ኦዴይሳ ቃላ ኣኬኪቦኮና።
ACT 22:10 «ታኒ፥ ‹ጎዳው፥ ታ ኣይ ኦꬆ?› ያጋስ። «ጎዳይ ታኮ፥ ‹ዴንዳዳ ዳማስቆ ባ። ኔኒ ኦꬃና ሜላ ፆሳይ ቆፒዳባ ኡባይ ያን ኔው ኦዴታና› ያጊስ።
ACT 22:11 ሄ ዎልቃማ ፖዑዋ ጋሶን ታ ኣይፌይ ቆቂን፥ ታራ ዴዒያ ኣሳቲ ታ ኩሺያ ኦይኪዲ፥ ታና ጎቺን ዳማስቆ ጋካስ።
ACT 22:12 «ዳማስቆን ዴዒያ ኣይሁዴ ኡባይ ዳሮ ቦንቺያ ኢሲ ሃናኒያ ጊያ ኣዴይ፥ ኑ ሂጊያ ቦንቼይሲኔ ፆሳ ሚንꬂ ዎሴይሲ ዴዔስ።
ACT 22:13 ሃናኔይ ታኮ ዪዲ፥ ታ ማታን ኤቂዲ፥ ‹ታ ኢሻው ሳዖላ፥ ፄላ› ያጊስ። ኤሌሳዳ ታኒ ኢያ ፄላ ኣጋስ።
ACT 22:14 «ኢ ታኮ፥ ‹ኑ ኣዋታ ፆሳይ ኔኒ ኢያ ሼኒያ ኤራና ሜላ፥ ኢያ ፂሎ ናዓ ቤዓና ሜላኔ ኢያ ዶናፔ ቃላ ሲዓና ሜላ ካሴቲዲ ኔና ዶሪስ።
ACT 22:15 ኔኒ ቤዒዳባኔ ሲዒዳባ ኣሳ ኡባ ሲንꬃን ኢያው ማርካታና።
ACT 22:16 ሃዒ ኣይስ ጋምዓይ? ዴንዳዳ ፃማቄታ፤ ኢያ ሱንꬃ ፄጋዳ ኔ ናጋራፔ ሜጬታ› ያጊስ።
ACT 22:17 «ታኒ ጉዬ ዬሩሳላሜ ሲማዳ ፆሳ ኬꬃን ዎሲሺን፥ ታው ቆንጬꬂ ቤንቲስ።
ACT 22:18 ቆንጬꬃን ጎዳይ ታኮ፥ ‹ኔ ታው ማርካቲያ ማርካቴꬃ ኣሳይ ኤኮና ጊሾ ኤሌሳዳ ዬሩሳላሜፔ ኬያ› ያጊሺን ቤዓስ።
ACT 22:19 «ታኒ፥ ‹ጎዳው፥ ኣይሁዴ ዎሳ ኬꬃ ኡባን ኔና ኣማኔይሳታ ኦይካዳ ዋꬊዳይሳኔ ቃሾ ኬꬃን ዬጊዳይሳ ኤንቲ ኤሮሶና።
ACT 22:20 ኤንቲ ኔ ማርካ ኢስፂፋኖሴ ዎꬊያ ዎዴ ታኒ ሄ ኦዳን ኢሲፋስ። ቃሲ ኤንታ ማታን ኤቃዳ ኢያ ዎꬌይሳታ ማዑዋ ናጋይስ› ያጊስ።
ACT 22:21 «ጎዳይ ታኮ፥ ‹ታኒ ኔና ኣይሁዴ ጊዶና ኣሳኮ ሃሆሶ ኪቲያ ጊሾ ዴንዳዳ ባ› » ያጊስ።
ACT 22:22 ጳዉሎሲ ሄ ቃላ ኦዲዲ ኦንጋና ጋካናው ኣሳይ ኢ ጌይሳ ሲዖሶና። ሄሳፌ ጉዬ፥ ባንታ ቃላ ꬎቁ ኦꬂዲ፥ «ሃይሳ ቢታፌ ꬋይሳ! ኢ ዳናው ቤሴና» ያጊዶሶና።
ACT 22:23 ኤንቲ ዎጫሚሺን፥ ባንታ ማዑዋ ቦላ ሆሊሺኒኔ ባና ቦላ ላሊሺን፤
ACT 22:24 ሻላቃይ ቤዒዲ ዎታዳሬቲ ጳዉሎሳ ባንታ ዴዒያሱዋ ኤፋና ሜላ ኪቲስ። ቃሲ ኣሳይ ኣይስ ሄሳዳ ዎጫሚዳኮ ኤራናው ኮዪዲ ጳዉሎሳ ሊሶን ጋራፊዲ ፒልጋና ሜላ ኤንታ ኪቲስ።
ACT 22:25 ሺን ዎታዳሬቲ ጳዉሎሳ ዳፎን ሚንꬂ ቃቺዲ ጋራፋና ሃኒያ ዎዴ ጳዉሎሲ ባ ማታን ኤቂዳ ማቶ ሃላቃኮ፥ «ሮሜ ኣሲ ፒርዲ ባይና ጋራፌይሲ ሂንቴው ዎጌ?» ያጊስ።
ACT 22:26 ማቶ ሃላቃይ ሄሳ ሲዒዳ ዎዴ ሻላቃኮ ቢዲ፥ «ሃ ኣዴይ ሮሜ ኣሲ። ኔኒ ኣይ ኦꬃናው ቆፓይ?» ያጊዲ ኦይቺስ።
ACT 22:27 ሻላቃይ ጳዉሎሳኮ ሺቂዲ፥ «ኔኒ ሮሜ ኣሴ? ኣኔ ታው ኦዳ» ያጊስ። ጳዉሎሲ፥ «ኤ» ያጊስ።
ACT 22:28 ሻላቃይ ዛሪዲ፥ «ታኒ ሃ ጋዴቴꬃ ዳሮ ሚሼን ሻማስ» ያጊስ። ሺን ጳዉሎሲ፥ «ታ ሃ ጋዴቴꬃ ዬሌቴꬃን ዴማ ኤካስ» ያጊስ።
ACT 22:29 ሄሳ ጊሾ፥ ጳዉሎሳ ፒልጋናው ቆፒዳይሳቲ ኢራ ኢያፔ ሻኬቲዶሶና። ሻላቃይ ሮሜ ኣሲ ሳንꬃላታን ቃቺዳይሳ ኤሪዳ ዎዴ ያዪስ።
ACT 22:30 ዎንቴꬃ ጋላስ ሻላቃይ፥ ኣይሁዴቲ ጳዉሎሳ ኣይስ ሞቲዳኮ ጌሺ ኤራናው ኮዪስ። ካሂኔ ሃላቃቲኔ ሻንጎ ኡባይ ሺቃና ሜላ ኪቲስ፤ ቃሲ ጳዉሎሳ ቃሾፔ ቢሊሲዲ ኤንታ ሲንꬃን ኤሲስ።
ACT 23:1 ጳዉሎሲ ሺቁዋ ጫዲ ፄሊዲ፥ «ታ ኢሻቶ፥ ታኒ ሃቺ ጋካናው ፆሳ ሲንꬃን ታ ዴዖ ኡባን ሎዖ ዎዛናን ዴዓስ» ያጊስ።
ACT 23:2 ካሂኔ ሃላቃይ ሃናኔይ፥ ጳዉሎሳ ዶናን ባቃና ሜላ ኢያ ማታን ኤቂዳይሳታ ኪቲስ።
ACT 23:3 ሄ ዎዴ ጳዉሎሲ ኢያኮ፥ «ላ ኔ ቦቂንቴ ቲዪዳ ጎዳ ዳኔይሶ፥ ፆሳይ ኔና ባቃና። ኔኒ ታ ቦላ ሂጊያꬆ ፒርዳናው ኡታዳ ዴዓሼ ሂጌይ ባይና ታና ባቃና ሜላ ኪታይ?» ያጊስ።
ACT 23:4 ጳዉሎሳ ማታን ኤቂዳይሳቲ ኢያኮ፥ «ኔ ፆሳ ካሂኔ ሃላቃ ጫያይ?» ያጊዶሶና።
ACT 23:5 ጳዉሎሲ፥ «ታ ኢሻቶ፥ ኢ ካሂኔ ሃላቃ ጊዲዳይሳ ታኒ ኤራቢኬ፤ ኣይስ ጊኮ ፆሳ ቃላን፥ ‹ኔ ዴሪያ ኣይሴይሳ ቦላ ኢታ ቃላ ሃሳዮፓ› ጌቴቲ ፃፌቲስ» ያጊስ።
ACT 23:6 ሺን ጳዉሎሲ ሄ ቤሳን ዴዒያ ኣሳፔ ባጋቲ ሳዱቃዌታ፥ ባጋቲ ፋሪሳዌታ ጊዴይሳ ቤዒዲ፥ «ታ ኢሻቶ፥ ታኒ ፋሪሳዌኔ ፋሪሳዌ ናዓ፤ ‹ሃይቂዳይሳቲ ሃይቆፔ ዴንዳና› ጋዳ ታኒ ኡፋይሳን ናጊያ ጊሾ ኤንቲ ታ ቦላ ፒርዶሶና» ያጊዲ ኦዲስ።
ACT 23:7 ጳዉሎሲ ሄሳ ጊዳ ዎዴ ፋሪሳዌታ ጊዶኒኔ ሳዱቃዌታ ጊዶን ኦሺ ኬዪን ሻኬቲዶሶና።
ACT 23:8 ኣይስ ጊኮ፥ ሳዱቃዌቲ፥ «ሃይቂዳ ኣሲ ዴንዴና፤ ኪታንቾይካ ኣያኒካ ባዋ» ያጎሶና። ሺን ፋሪሳዌቲ ናምዓይካ ዴዔይሳ ኣማኖሶና።
ACT 23:9 ጊታ ካቺ ኬዪስ፤ ፋሪሳዌታ ባጋ ጊዲዳ ሂጌ ኣስታማሬቲ ዴንዲ ኤቂዲ፥ «ሃ ኡራ ቦላ ኣይቢ ባላካ ዴሚቦኮ፤ ኢያው ኣያኒ ዎይኮ ኪታንቾይ ሃሳዮና ኣጌና» ያጊዲ ፓላሚዶሶና።
ACT 23:10 ኦሻይ ዳሪን ኣሳይ ጳዉሎሳ ሻቄሬꬆና ሜላ ጊዲ፥ ሻላቃይ ባ ዎታዳሬቲ ዎꬊዲ ኤንታ ጊዶፌ ኢያ ኤሌሲ ኬሲዲ ባንታ ዴዒያሱዋ ኤፋና ሜላ ኪቲስ።
ACT 23:11 ሄ ቃማ ጎዳይ ጳዉሎሳ ማታን ኤቂዲ፥ «ጳውሎሳ፥ ኔኒ ታው ዬሩሳላሜን ማርካቲዳይሳዳ ሮሜንካ ማርካታናው ቤሴስ፤ ሚና፤ ኣይኮይ ባዋ» ያጊስ።
ACT 23:12 ዎንቴꬃ ጋላስ ኣይሁዴቲ፥ «ጳዉሎሳ ዎꬎና ዴዒሼ ሞኮ ኡዮኮ» ጊዲ ጫቂዶሶና።
ACT 23:13 ጳዉሎሳ ቦላ ሄሳ ማቄቲዳ ኣሳቲ ኦይታማፔ ዳሮሶና።
ACT 23:14 ኤንቲ ካሂኔ ሃላቃታኮኔ ዴሪያ ጪማታኮ ቢዲ፥ «ኑኒ ጳዉሎሳ ዎꬎና ዴዒሼ ካꬂ ጊያባ ሞኮ ጊዲ ጫቂዳ።
ACT 23:15 ሂዛ፥ ሂንቴኔ ሻንጎይ ኢያባ ጌሺዲ ፒልጊያባይ ዴዒያ ዳኒሲዲ፥ ጳዉሎሳ ሂንቴኮ ኤሃና ሜላ ሻላቃ ኦይቺቴ። ኑኒ ኢ ሃ ሺቁዋ ጋካናፔ ሲንꬄ ኢያ ዎꬋናው ጊጊዲ ኡቲዳ» ያጊዶሶና።
ACT 23:16 ሺን ጳዉሎሳ ሚቼ ናዓይ ሄ ማቁዋ ሲዒዳ ዎዴ ቢዲ ዎታዳሬቲ ዴዒያሱዋ ጌሊዲ፥ ጳዉሎሳስ ኦዲስ።
ACT 23:17 ጳዉሎሲ ማቶ ሃላቃታፔ ኢሱዋ ፄጊዲ፥ «ሃ ናዓይ ሻላቃስ ኦዲያባይ ዴዒያ ጊሾ ኢያ ሻላቃኮ ኤፋ» ያጊስ።
ACT 23:18 ማቶ ሃላቃይ ናዓ ሻላቃኮ ኤፊዲ፥ «ቃሾ ኬꬃን ዴዒያ ጳዉሎሲ ታና ባኮ ፄጊዲ፥ ሃ ናዓይ ኔው ኦዲያባይ ዴዒያ ጊሾ ኢያ ኔኮ ኤሃና ሜላ ታና ዎሲስ» ያጊስ።
ACT 23:19 ሻላቃይ ናዓ ኩሺያ ኦይኪዲ፥ ዱማ ካሬ ኬሲዲ፥ «ኔኒ ታው ኦዳናባይ ኣይቤ?» ያጊዲ ኦይቺስ።
ACT 23:20 ናዓይ ሻላቃኮ፥ «ኣይሁዴቲ ጳዉሎሳባ ካሴፔ ሚንꬂ ፒልጋናው ኮዪዳባ ዳኒሲዲ ኔኒ ዎንቶ ኢያ ሺቁዋ ኤሃና ሜላ ኔና ዎሳናው ዞሬታ ቃቺዶሶና።
ACT 23:21 ሺን ኔኒ ኤንቲ ጊያባ ሲዖፓ። ኣይስ ጊኮ፥ ኦይታማፔ ዳሪያ ኣሳቲ ጳዉሎሳ ዎꬎና ዴዒሼ ‹ካꬂ ሞኮ፥ ሃꬄ ኡዮኮ› ጊዲ ጫቂዲ፥ ቆሴቲዲ ኢያ ናጎሶና። ሃዒ ኔ ጊያባ ፃላላ ሲዓናው ናጎሶና» ያጊስ።
ACT 23:22 ሻላቃይ ዛሪዲ፥ «ሃ ኦዳ ኔ ታው ኦዲዳይሳ ሃራ ኦዴስካ ኦዶፓ» ያጊዲ ናዓ ጉዬ ዬዲስ።
ACT 23:23 ሻላቃይ ማቶ ሃላቃታፔ ናምዓታ ፄጊዲ፥ «ቃማፌ ሄꬑ ሳቴን ቂሳሪያ ባናው፥ ናምዑ ፄቱ ዎታዳሬታ፥ ላፑን ታሙ ፓራ ኣሳታኔ ናምዑ ፄቱ ቶራንቾታ ጊጊሲቴ።
ACT 23:24 ዴሪያ ኣይሲያ ፊልኪሳኮ ጳዉሎሳ ሳሮ ጋꬃናው ቶጋ ሜሄ ጊጊሲቴ» ያጊዲ ኤንታ ኪቲስ።
ACT 23:25 ሻላቃይ ፊልኪሳስ ሃይሳዳ ጊያ ዳብዳቤ ፃፊስ፡
ACT 23:26 «ቃላዉዲዮሳ ሉሲዮሳፔ ዴሪያ ኣይሲያ ቦንቾ ፊልኪሳስ፥ ሳሮይ ኔው ጊዶ።
ACT 23:27 ኣይሁዴቲ ሃ ኡራ ኦይኪዲ ዎꬋና ሃኒሺን፥ ኢ ሮሜ ቢታ ኣሲ ጊዶይሳ ኤራዳ ዎታዳሬታራ ጋካዳ ኢያ ኣሻስ።
ACT 23:28 ኤንቲ ኢያ ኣይስ ሞቲያኮ ኤራናው ኮያዳ ኤንታ ሺቁዋን ኢያ ሺሻስ።
ACT 23:29 ኤንቲ ባንታ ሂጊያስ ኢያ ሞቲዳይሳፌ ኣቲን ኢያ ዎꬊሲያባ ዎይኮ ቃሺሲያባ ጊዶናይሳ ታ ዴማስ።
ACT 23:30 ኤንቲ ሃ ኡራ ቦላ ማቄቲዳ ዚጊርሳይ ታና ጋኪን፥ ታኒ ኤሌሳዳ ኢያ ኔኮ ዬዳስ። ኢያ ሞቴይሳቲ ኔ ሲንꬃን ቢዲ ሞታና ሜላ ኪታስ» ያጊስ።
ACT 23:31 ሄሳ ጊሾ፥ ዎታዳሬቲ ኪቴቲዳይሳዳ ጳዉሎሳ ኤኪዲ፥ ቃማ ኣንቲጳፂሪሳ ጋꬂዶሶና።
ACT 23:32 ዎንቴꬃ ጋላስ ፓራ ኣሳቲ ኢያራ ባና ሜላ ኦꬂዲ ቶሆ ኣሳቲ ጉዬ ሲሚዶሶና።
ACT 23:33 ቶጋይ ቂሳሪያ ጋኪዲ ዳብዳቢያ ዴሪያ ኣይሴይሳስ ኢሚዲ፥ ጳዉሎሳ ኢያ ሲንꬄ ኣꬂዶሶና።
ACT 23:34 ዴሪያ ኣይሴይሲ ዳብዳቢያ ናባቢዳፔ ጉዬ «ጳዉሎሳ፥ ኔ ኣው ኣዉራጃ ኣሴ?» ጊዲ ኢያ ኦይቺስ። ኢ ኪልቂያ ኣሲ ጊዶይሳ ኤሪዳ ዎዴ
ACT 23:35 «ታኒ ኔባ ኔና ሞቴይሳቲ ያ ዎዴ ሲዓና» ያጊስ። ዎታዳሬቲ ጳዉሎሳ ሄሮዲሳ ኬꬃን ናጋና ሜላ ኪቲስ።
ACT 24:1 ኢቻሹ ጋላሳፔ ጉዬ ካሂኔ ሃላቃይ፥ ሃናኔይ፥ ጪማታራኔ ፄርፄሉሳ ጊያ ኢሲ ፃባቃራ ቂሳሪያ ቢስ። ኤንቲ ዴሪያ ኣይሴይሳ ቦላ ጳዉሎሳ ሞቲዶሶና።
ACT 24:2 ጳዉሎሲ ፄጌቲዲ ጌሊዳ ዎዴ ፄርፄሉሲ ኢያ ሃይሳዳ ያጊዲ ሞቲስ፡ «ቦንቾ ፊልኪሳ፥ ኑኒ ኔ ባጋራ ዳሮ ሳሮቴꬃ ዴሚዳ፥ ኔ ሎዖ ኣይሱዋን ኑ ቢታይ ዳሮ ላሜቲስ።
ACT 24:3 ቦንቾ ፊልኪሳ፥ ኑኒ ኣዉንካ ኣዉዴ ጊዲን ዳሮ ጋላታን ሄሳ ኤኮስ።
ACT 24:4 ታኒ ኔና ጋምዒሶናሺን ኔኒ ኔ ኬሃቴꬃን ኑባ ቃንꬃን ሲዓና ሜላ ኔና ዎሳይስ።
ACT 24:5 ሃ ኡራይ ꬉቤ ጊዲዲ ቢታ ኡባን ዴዒያ ኣይሁዴታ ጊዶን ቡቄꬂ ሜꬊዲ ናዚራዌታ ባጋ ኣሳ ካሌꬄይሳ ጊዶይሳ ኤሪዳ።
ACT 24:6 ሃሪ ኣቶሺን፥ ፆሳ ኬꬃ ቱኒሳና ሃኒሺን ኑኒ ኢያ ኦይኪዳ፤ ኑ ሂጊያዳ ኢያ ቦላ ፒርዳናው ቆፒዳ።
ACT 24:7 ሺን ሻላቃ ሉሲዮሲ ዪዲ፥ ዎልቃን ኑ ኩሼፔ ኢያ ዎꬂ ኤኪስ።
ACT 24:8 ኢያ ሞቴይሳቲካ ኔኮ ያና ሜላ ኪቲስ። ኔኒ ኔ ሁዔን ሃ ኡራ ፒልጋዳ ኑኒ ኢያ ሞቲያ ሞቱዋ ኡባ ኤራናው ዳንዳዓሳ» ያጊስ።
ACT 24:9 ኣይሁዴቲካ፥ «ሃ ኦዳይ ቱማ» ጊዲ ኢያ ቆፋ ማዒዶሶና።
ACT 24:10 ዴሪያ ኣይሴይሲ ጳዉሎሳ ኦዳ ጊዲ ማሊስ። ጳዉሎሲ ሃይሳዳ ጊዲ ዛሪስ፡ «ኔኒ ዳሮ ዎዴፔ ዶማዳ፥ ሃ ኣሳስ ፒርዳሼ ዴዔይሳ ኤራዳ ታ ኦዳስ ኡፋይሳን ዛሮ ኢማይስ።
ACT 24:11 ታኒ ጎይናናው ዬሩሳላሜ ኬዪን ታማኔ ናምዑ ጋላሳፔ ኣꬎናይሳ ኔኒ ኔ ሁዔን ኤራናው ዳንዳዓሳ።
ACT 24:12 ኣይሁዴቲ ታና ፆሳ ኬꬃን ጊዲን ኣይሁዴ ዎሳ ኬꬃን ጊዲን ካታማን ጊዲን ኦዴራካ ፓላሚሺን ዎይኮ ኣሴ ሺሻዳ ማቂሺን ኢሲ ኣሲካ ዴሚቤና።
ACT 24:13 ሃዒካ ኤንቲ ታና ሞቲያባስ ማርካ ዴማናው ዳንዳዖኮና።
ACT 24:14 «ሺን ታኒ ኢሲባ ኣማናይስ፤ ታኒ ሂጌን ዴዒያባኔ ናቤቲ ፃፊዳ ኡባባ ኣማናዳ፥ ኑ ኣዋታ ፆሳ፥ ኤንቲ ዎርዶ ጊያ ኦጊያን ጎይናይስ።
ACT 24:15 ኤንቲ ባንታ ሁዔን ኣማኔይሳ ሜላ ፂሎቲኔ ናጋራንቾቲ ሃይቆፔ ዴንዳናይሳ ታካ ኣማናይስ።
ACT 24:16 ሄሳ ጊሾ፥ ታኒ ፆሳ ሲንꬃኒኔ ኣሳ ሲንꬃን ኡባ ዎዴ ሎዖ ካሂ ታው ዳና ሜላ ሚናይስ።
ACT 24:17 «ታኒ ዬሩሳላሜፔ ኬዮሳፔ ዳሮ ላይꬃፌ ጉዬ ታ ቢታ ማንቆታስ ማዴ ኢማናዉኔ ያርሾ ያርሻናው ዬሩሳላሜ ባስ።
ACT 24:18 ታኒ ፆሳ ኬꬃን ሄሳ ኦꬃዳ ጌሻ ዎጋ ፖላ ሲሚን ታና ዴሚዶሶና። ሄ ዎዴ ታራ ኣሲ ባዋ፥ ኦሺካ ኬዪቤና።
ACT 24:19 ሺን ኢሲያፔ ዪዳ ኢሲ ኢሲ ኣይሁዴቲ ያን ዴዖሶና፤ ኤንቲ ታ ቦላ ኦዳ ኮይኮ ዪዲ ታና ኔ ቦላ ሞታናው ዳንዳዖሶና።
ACT 24:20 ዎይኮ ታኒ ሻንጉዋ ሲንꬄ ሺቂዳ ዎዴ ኦꬂዳ ባሊ ዴዒኮ ሃይሳቲ ኔ ሲንꬃን ዴዔይሳቲ ኦዶና።
ACT 24:21 ታኒ ኤንታ ጊዶን ኤቃዳ፥ ‹ሃይቂዳይሳቲ ዴንዳና ጋዳ ዋሳዳ ኦዲዳ ጊሾ ሃቺ ሂንቴ ሲንꬃን ታ ቦላ ፒርዶሶና› ጋስ፤ ሄሳፌ ሃራባ ኦꬃቢኬ» ያጊስ።
ACT 24:22 ሺን ፊልኪሲ ፆሳ ኦጊያባ ጌሺ ኤሪዳ ጊሾ «ታኒ ሂንቴ ኦዳ ሻላቃ ሉሲዮሲ ያ ዎዴ ፒርዳና» ያጊዲ ሞይዚስ።
ACT 24:23 ፊልኪሲ ቃሲ ጳዉሎሳ ቃቾና ናጋና ሜላኔ ኢያ ዳቦታፔ ኦኒካ ኢያ ኦይቻናው ዪሺን ዲጎና ሜላ ማቶ ሃላቃስ ኦዲስ።
ACT 24:24 ጉꬃ ጋላሳፔ ጉዬ፥ ፊልኪሲ ኣይሁዴ ባጋ ጊዲዳ ባ ማቼ ዲሩሲላራ ዪዲ ጳዉሎሳ ኪቲ ኤሂሲዲ ዬሱስ ኪሪስቶሳን ኣማኖባ ኢያፔ ሲዒስ።
ACT 24:25 ጳዉሎሲ ፂሎቴꬃባ፥ ባ ሁዔ ሃሮባኔ ያናው ዴዒያ ፒርዳባ ኦዲሺን፥ ፊልኪሲ ያዪዲ፥ «ኔኒ ሃዒስ ባ፤ ታው ኢንጄቲዳ ዎዴ ኔና ፄጊሳና» ያጊስ።
ACT 24:26 ሄ ዎዴ ጳዉሎሳፔ ጉቦ ኤካናው ቆፒዲ ኢያ ዛሪ ዛሪ ፄጊሲዲ ኢያራ ኦዴቴስ።
ACT 24:27 ናምዑ ላይꬃፌ ጉዬ፥ ፊልኪሳ ቤሳ ጶርቂዮስ ፊስፆሲ ኤኪስ። ፊልኪሲ ኣይሁዴታ ኡፋይሳናው ኮዪዲ ጳዉሎሳ ቢሎና ኣጋጊስ።
ACT 25:1 ፊስፆሲ ካዎቲዳ ሄꬑ ጋላሳፔ ጉዬ ቂሳሪያፔ ዬሩሳላሜ ቢስ።
ACT 25:2 ያን ካሂኔ ሃላቃቲኔ ኣይሁዴታ ካሌꬄይሳቲ ጳዉሎሳ ሞቲዶሶና።
ACT 25:3 ጳዉሎሳ ዬሩሳላሜ ኤሂሺን ኦጌን ቆሴቲዲ ኢያ ዎꬋናው ኤንታው ኢንጄታና ሜላ ባንታና ማዶ ጊዲ ፊስፆሳ ዎሲዶሶና።
ACT 25:4 ፊስፆሲ ኤንታኮ፥ «ጳዉሎሲ፥ ቂሳሪያን ቃሾ ኬꬃን ዴዔስ፤ ታኒ ታ ሁዔንካ ኤሌሳዳ ጉዬ ሲማና ሃናይስ።
ACT 25:5 ኢ ባሊዳባይ ዴዒኮ ሂንቴ ጊዶን ኣዋቴይሳቲ ታራ ቂሳሪያ ቢዲ ኢያ ሞቶና» ያጊዲ ዛሪስ።
ACT 25:6 ፊስፆሲ ኤንታ ማታን ሆስፑን ዎይኮ ታሙ ጋላሳ ሜላ ጋምዒዳፔ ጉዬ ቂሳሪያ ቢስ። ዎንቴꬃ ጋላስ ፒርዳ ኦይዲያን ኡቲዲ ጳዉሎሳ ኤሃና ሜላ ኪቲስ።
ACT 25:7 ኢ ዪን ዬሩሳላሜፔ ዪዳ ኣይሁዴቲ ኢያ ዩሹዋን ኤቂዲ ኤንቲ ላꬃናው ዳንዳዖና ዳሮ ዴፆ ሞቶ ኢያ ቦላ ሺሺዶሶና።
ACT 25:8 ጳዉሎሲ ዛሪዲ፥ «ታኒ ኣይሁዴ ሂጊያ ጊዲን ፆሳ ኬꬃ ዎይኮ ሮሜ ካዉዋ ቄሳሬ ናቃቢኬ» ያጊስ።
ACT 25:9 ሺን ፊስፆሲ ኣይሁዴታ ኡፋይሳናው ኮዪዲ ጳዉሎሳኮ፥ «ዬሩሳላሜ ባዳ ሃ ሞቱዋባ ያን ታ ሲንꬃን ፒርዴታናው ኮያይ?» ያጊዲ ኦይቺስ።
ACT 25:10 ሺን ጳዉሎሲ፥ «ታኒ ፒርዴታናው ቤሲያ ቄሳሬ ፒርዳ ኬꬃን ኤቃ ኪቻስ። ኔኒ ሎይꬃ ኤሬይሳዳ ታኒ ኣይሁዴታ ኣይቢንካ ናቃቢኬ።
ACT 25:11 ሂዛ፥ ታኒ ናቂዳባይ ዎይኮ ሃይቆስ ጋꬂያባ ኦꬂዳባ ጊዲኮ ሃይቆፔ ታና ኣሻ ጊኬ። ሺን ኤንቲ ታና ሞቲያ ሞቶይ ጮ ጊዳፔ ጉዬ ኦኒካ ታና ኤንታው ኣꬂ ኢማናው ዳንዳዔና። ቄሳሬይ ታባ ፒርዶ ጋዳ ኦይቻይስ» ያጊስ።
ACT 25:12 ሄ ዎዴ ፊስፆሲ ባ ዞራንቾታራ ዞሬቲዲ፥ «ኔኒ ቄሳሬይ ታባ ፒርዶ ጋዳ ኦይቻዳሳ፤ ቄሳሬኮ ባሳ» ያጊዲ ዛሪስ።
ACT 25:13 ጉꬃ ጋላሳፔ ጉዬ ካዎይ ኣጊርጲኔ ባርኒቄይ ፊስፆሳ ሳሮꬃናው ቂሳሪያ ቢዶሶና።
ACT 25:14 ያን ኤንቲ ዳሮ ጋላስ ጋምዒን፥ ፊስፆሲ ካዉዋስ ጳዉሎሳባ ሃይሳዳ ያጊዲ ኦዲስ፤ «ፊልኪሲ ቢሎና ኣጊዲ ቢዳ ኢሲ ኣዴይ ሃይሳን ዴዔስ።
ACT 25:15 ታኒ ዬሩሳላሜ ቢዳ ዎዴ ካሂኔ ሃላቃቲኔ ኣይሁዴ ጪማቲ ኢያ ቦላ ፒርዳና ሜላ ታና ዎሲዲ ኢያባ ታው ኦዲዶሶና።
ACT 25:16 ታኒ፥ ‹ሞቴቲዳ ኡራይ ባና ሞቴይሳታ ሲንꬃን ኤቂዲ ባ ሞቲዳባስ ዛሮ ኢሞናሺን፥ ኦና ጊዲኮካ ኣꬊዲ ኢሜቴይሲ ሮሜ ሂጌ ጊዴና› ያጋዳ ኤንታው ዛራስ።
ACT 25:17 «ሄሳ ጊሾ፥ ኤንቲ ሃይሳን ሺቂዳ ዎዴ ታኒ ጋምዖና ዎንቴꬃ ጋላስ ፒርዳ ኬꬃ ጌላዳ ጳዉሎሳ ኤሃና ሜላ ኪታስ።
ACT 25:18 ኢያ ሞቴይሳቲ ኢያ ማታን ኤቂዲ፥ ኢታባን ኢያ ሞቶና ኣጎኮና ጋዳ ታኒ ቆፒዳይሳ ሜላ ኢያ ሞቲቦኮና።
ACT 25:19 ሺን ኤንቲ ባንታ ኣማኖባኔ ጳዉሎሲ፥ ‹ፓፃ ዴዔስ› ጊያ ኢሲ ሃይቂዳ ዬሱሳ ጌቴቲያ ኣዲያባ ኢያራ ፓላሞሶና።
ACT 25:20 ሃ ኦዳይ ታና ሻካናው ሜቲዳ ጊሾ ጳዉሎሲ ዬሩሳላሜ ቢዲ፥ ያን ፒርዴታናው ኮያኮ ጋዳ ኢያ ኦይቻስ።
ACT 25:21 ሺን ጳዉሎሲ ባ ኦዳ ቄሳሬይ ቤዓና ጋካናው ቃሾ ኬꬃን ጋምዓናው ኦይቺስ። ታኒ ኢያ ቄሳሬኮ ዬዳና ጋካናው ኢ ቃሼታና ሜላ ኪታስ» ያጊስ።
ACT 25:22 ሄሳ ጊሾ፥ ኣጊርጲ ፊስፆሳኮ፥ «ታኒ ታ ሁዔንካ ሄ ኡራይ ጊያባ ሲዓናው ኮያይስ» ያጊስ። ፊስፆሲ ኢያኮ፥ «ኔኒ ዎንቶ ኢ ጊያባ ሲዓና» ያጊስ።
ACT 25:23 ዎንቴꬃ ጋላስ ኣጊርጲኔ ባርኒቄይ ጊታ ቦንቾን ሻላቃታራኔ ካታማን ዴዒያ ጊታ ኣሳታራ ዪዲ ፒርዳ ኬꬂ ጌሊዶሶና። ፊስፆሲ ጳዉሎሳ ፄጊሲዲ ኤሂስ።
ACT 25:24 ፊስፆሲ፥ «ካዋው ኣጊርጳ፥ ሃይሳን ኑራ ዴዒያ ኣሳው፥ ኣይሁዴቲ ዬሩሳላሜንካ ሃይሳንካ ዋሲዲ፥ ‹ኢ ሂዛፔ ጉዬ ፓፃ ዳናው ቤሴና› ያጊዲ፥ ታና ዎሲዳ ኡራ ሃይሳ ቤዔታ።
ACT 25:25 ሺን ኢያ ሃይቆስ ጋꬂያባ ኣይቢባካ ታኒ ዴማቢኬ። ኢ ባ ሁዔን፥ ‹ቄሳሬይ ታባ ፒርዶ ያጋዳ ኦይቻይስ› ጊዳ ጊሾ ቄሳሬኮ ኢያ ዬዳናው ቆፋ ቃቻስ።
ACT 25:26 ታኒ ኢያባ ታ ጎዳ ቄሳሬስ ፃፋናው ጊዲያ ጋሶይ ኣይቢካ ባዋ። ሄሳ ጊሾ፥ ኢያባ ሂንቴ ቤዒኮ ታ ፃፊያባይ ቤንታኔኮ ጋዳ ሂንቴ ሲንꬄ ኡባራካ ካዋው፥ ኣጊርጳ፥ ኔ ሲንꬄ ኢያ ኤሃስ።
ACT 25:27 ኣይስ ጊኮ፥ ቃሼቲዳ ኣሲ ቦላ ዳይናስ ኣꬂያ ዎዴ ኢ ኣይስ ሞቴቲዳኮ ቆንጪሶና ኣጌይሲ ታው ኤያቴꬂ ዳኔስ» ያጊስ።
ACT 26:1 ኣጊርጲ ጳዉሎሳኮ፥ «ኔኒ ኔባ ኦዳናው ዳንዳዓሳ» ያጊስ። ሄ ዎዴ ጳዉሎሲ ባ ኩሺያ ዴንꬂዲ ሃይሳዳ ያጊስ፡
ACT 26:2 «ካዋው፥ ኣጊርጳ፥ ኣይሁዴቲ ታና ሞቲዳባስ ዛሮ ኢማናው ሃቺ ኔ ሲንꬃን ኤቃሼ ታ ቃዳይ ሎዖ ጋዳ ቆፓይስ።
ACT 26:3 ኔኒ ኣይሁዴ ዎጋኔ ፓላማ ሎይꬃዳ ኤሪያ ጊሾ ታና ሳሌቶና ሲዓና ሜላ ዎሳይስ።
ACT 26:4 «ታኒ ናዓቴꬃፌ ዶማዳ ታ ኣሳ ጊዶኒኔ ዬሩሳላሜን ዴዒዳ ታ ዴዑዋ ኣይሁዴ ኡባይ ኤሮሶና።
ACT 26:5 ታኒ ኮይሮፔ ዶማዳ፥ ኑ ኣማኖ ሂጊያ ሚንꬂዲ ናጊያ ፋሪሳዌታ ያራፔ ጊዴይሳ ኤንቲ ማርካታናው ኮይኮ ኤሮሶና።
ACT 26:6 ሃዒካ ታኒ ፆሳይ ኑ ኣዋታስ ኢማና ጊዳ ኡፋይሳ ናጊያ ጊሾ ሞቴታዳ ሃይሳን ኤቃስ።
ACT 26:7 ቃሲ ታማኔ ናምዑ ኑ ኣዋታ ሼሻይ ፆሳ ቃማኔ ጋላስ ሚንꬂዲ ጎይኒሼ ፆሳይ ኢማና ጊዳይሳ ኤካናው ኡፋይሳን ናጎሶና። ካዋው ኣጊርጳ፥ ኣይሁዴቲ ታና ሞቴይ ታኒ ኡፋይሳን ሄሳ ናጊያ ጊሾሳ።
ACT 26:8 ኣይሁዴቶ፥ ፆሳይ ሃይቂዳይሳታ ዴንꬄይሳ ኣይስ ኣማኔኬቲ?
ACT 26:9 «ካሴ ታኒ ታ ሁዔንካ ናዚሬቴ ዬሱሳ ሱንꬃ ቴቃናው ዳንዳዔቲዳባ ኡባ ኦꬃናው ቤሴስ ጋዳ ቆፓስ።
ACT 26:10 ታኒ ዬሩሳላሜን ኦꬂዳይ ሃይሳ። ካሂኔ ሃላቃታፔ ማታ ኤካዳ ፆሳ ኣሳታፔ ዳሮታ ቃሺሳስ። ኤንታ ዎꬊያ ዎዴካ ኤንታ ሃይቁዋ ዶሳስ።
ACT 26:11 ዳሮ ዎዴ ኣይሁዴ ዎሳ ኬꬃ ኡባን ኤንቲ ሴሬታና ሜላኔ ዬሱሳ ጫዪዲ ካዳና ሜላ ኡንዔꬃስ። ታኒ ዎጊ ባይና ኤንታ ሃንቄታዳ ሃሪ ኣቶሺን፥ ሃራ ቢታ ካታማታ ጋካናው ኤንታ ጎዳስ።
ACT 26:12 «ታኒ ሃ ኦዳስ ካሂኔ ሃላቃታፔ ማታኔ ኪታ ኤካዳ ዳማስቆ ባይስ።
ACT 26:13 ካዋው፥ ታኒ ሴታ ጋላስ ኦጊያን ዴዒሺን ኣዋ ፖዖፔ ዳሮ ኣꬊያ ፖዖይ ታ ዩሹዋኒኔ ታራ ቤይሳታ ዩሹዋን ሳሎፔ ፖዒስ።
ACT 26:14 ኑኒ ኡባይካ ሳዓን ኩንዲዳ ዎዴ ኢብራይስፄ ዶናን፥ ‹ሳዖላ፥ ሳዖላ፥ ታና ኣይስ ጎዳይ? ኔኒ ኔና ጫዲያ ፃምዓ ቃኪኮ ኔና ቆሃሳ› ያጊዲ ታው ኦዲሺን ሲዓስ።
ACT 26:15 «ታኒ፥ ‹ጎዳው፥ ኔኒ ኦኔ?› ያጋስ። «ጎዳይ፥ ‹ታኒ፥ ኔኒ ጎዲያ ዬሱሳ፤
ACT 26:16 ሺን ዴንዳ ኤቃ። ሃቺ ኔኒ ታና ቤዒዳይሳኒኔ ሲንꬃፌ ታ ኔና ቤሳኝሳ ሃራታስ ማርካታና ሜላ ታ ኦሳንቾ ኦꬃዳ ኔና ሹማናው ኔው ቤንታስ።
ACT 26:17 ኢስራዔሌ ኣሳታፔኔ ታኒ ኔና ኤንታኮ ኪቲያ ኣይሁዴ ጊዶናይሳታፔ ኔና ኣሻና።
ACT 26:18 ኔኒ ኤንታ ኣይፊያ ዶያና፥ ꬉማፔ ፖዖኮ፥ ፃላሄ ኩሼፔ ፆሳኮ ኤንታ ዛራና። ኤንቲ ታናን ኣማኒዲ ናጋራ ኣቶቴꬃ ኤካና። ፆሳይ ዶሪዳ ኣሳ ጊዶን ባንታ ላታ ዴማና› ያጊስ።
ACT 26:19 «ካዋው ኣጊርጳ፥ ሄሳ ጊሾ፥ ታው ሳሎፔ ቤንቲዳ ቆንጬꬃስ ኪቴታናይሳ ኢፃቢኬ።
ACT 26:20 ሺን ታኒ ኮይሮታዳ ዳማስቆን ሄሳፌ ጉዬ ዬሩሳላሜኒኔ ዪሁዳ ቢታ ኡባን ዴዔይሳቲኔ ኣይሁዴ ጊዶናይሳቲ ባንታ ናጋራፔ ፆሳኮ ሲማና ሜላኔ ናጋራፔ ሲሙዋ ቤሲያ ኦሶ ኦꬃና ሜላ ቃላ ኦዳስ።
ACT 26:21 ሄሳ ጊሾ፥ ኣይሁዴቲ ታና ፆሳ ኬꬃን ኦይኪዲ ዎꬋናው ኮዪዶሶና።
ACT 26:22 ሃቺ ጋካናው ፆሳ ማዴይ ታፔ ሻኬቲቤና፤ ያኒያ ጊሾ፥ ጉꬃሲኔ ጊታስ ማርካታሼ ሃይሳን ኤቃስ። ናቤቲኔ ሙሴይ ሃናና ጊዲ ኦዲዳይሳፌ ሃራ ኢሲባካ ታኒ ኦዲዳባይ ባዋ።
ACT 26:23 ሄሲካ፥ ‹ኪሪስቶሲ ዋዬ ኤካናው ቤሴስ፤ ቃሲ ሃይቆፔ ኮይሮ ዴንዲዲ ኣይሁዴታሲኔ ኣይሁዴ ጊዶናይሳታስ ኣቶቴꬃ ፖዖ ኦዳናው ቤሴስ› ጊዳይሳ» ያጊስ።
ACT 26:24 ጳዉሎሲ ሄሳ ያጊዲ ዛሪሺን፥ ፊስፆሲ ባ ቃላ ꬎቁ ኦꬂዲ፥ «ጳውሎሳ፥ ኔ ጎያዳሳ፤ ኔ ዳሮ ቲሚርቴይ ኔና ጎሻስ ጋꬂስ» ያጊስ።
ACT 26:25 ሺን ጳዉሎሲ፥ «ቦንቾ ፊስፆሳ፥ ታኒ ቱማባኔ ቤሲያባ ኦዳይሲፔ ኣቲን ጎያቢኬ።
ACT 26:26 ታኒ ቆንጬን ኦዲያ ኦዳ ካዎይ ኤሬስ። ሃ ኦዳይ ጌማን ኦሴቲቦና ጊሾ ኢሶይካ ኢያፔ ጌሞናይሳ ታኒ ጌሻዳ ኤራይስ።
ACT 26:27 «ካዋው ኣጊርጳ፥ ኔኒ ናቤታ ኣማናሳ ጊዲኪ? ኔኒ ኣማኔይሳ ታኒ ኤራይስ» ያጊስ።
ACT 26:28 ካዎይ ኣጊርጲ፥ ጳዉሎሳኮ፥ «ሃ ጉꬃ ሳቴን ታና ኣማንꬃናው ኮያይ?» ያጊስ።
ACT 26:29 ጳዉሎሲ፥ «ዳሮ ዎዴ ጊዲን ጉꬃ ዎዴ ኔ ፃላላ ጊዶናሺን ሃቺ ታና ሲዒያ ኡባይ ሃ ቃሹዋፔ ኣቲን ታ ሜላ ጊዳና ሜላ ፆሳ ዎሳይስ» ያጊስ።
ACT 26:30 ሄሳፌ ጉዬ፥ ካዎይ ፊስፆሲ፥ ባርኒቄይኔ ኤንታራ ኡቲዳ ኡባይካ ዴንዲዶሶና።
ACT 26:31 ያፔ ኬዪዲ ቢሼ ኢሶይ ኢሱዋራ፥ «ሃ ኡራይ ሃይቆስ ዎይኮ ቃሾስ ጋꬂያባ ኣይኮካ ኦꬂቤና» ያጊዲ ኦዴቲዶሶና።
ACT 26:32 ኣጊርጲ ፊስፆሳኮ፥ «ሃ ኡራይ ‹ቄሳሬይ ታባ ፒርዶ› ጎናኮ ቢሌታናው ዳንዳዔስ፥ ሺን ኣቲስ» ያጊስ።
ACT 27:1 ኑኒ ማርካቤራ ፃሌ ባናው ቃቺዳ ዎዴ ኣዉጊስፆሳ ዎታዳሬታ ጌቴቴይሳታፔ ኢሲ ዩሊዮሳ ጊያ ማቶ ሃላቃስ ጳዉሎሳኔ ሃራ ጉꬃ ቃሾ ኣሳታ ኢሚዶሶና።
ACT 27:2 ኢሲያ ጋፃን ዴዒያ ቢታታ ቢያ ኣዲራሚፂዮኔ ማርካቤን ጌሊዲ ዴንዲዳ። ማቄዶኒያ ኣሲ ጊዲዳ ቴሴሎንቄ ኣርስፂሮኮሲ ኑራ ዴዔስ።
ACT 27:3 ዎንቴꬃ ጋላስ ኑኒ ሲዶና ጋኪሺን፥ ዩሊዮሲ ጳዉሎሳስ ኬሂዲ ባ ላጌታኮ ቢዲ ኮሺያባን ማዴታና ሜላ ኤንታኮ ዬዲስ።
ACT 27:4 ያፔ ዴንዲዲ ሲንꬃራ ኑ ቦላ ጫርኪያ ጊሾ ሃꬃን ቴቄቲዳ ቢታ፥ ቆጲሮሳን ዜምፒዲ ኣꬊዳ።
ACT 27:5 ኪልቂያኔ ጲንፊሊያ ማታን ዴዒያ ኣባ ፒኒዲ ሊቂያን ዴዒያ ሙራ ጋኪዳ።
ACT 27:6 ያን ማቶ ሃላቃይ ፃሌ ቢያ ኢስኪንዲሪያ ማርካቤ ዴሚዲ፥ ኢያን ኑና ጌልሲስ።
ACT 27:7 ኑኒ ዳሮ ጋላስ ሎዳራ ቢዲ፥ ዳሮ ሜቶን ቃንዶሳ ካታማ ማታ ጋኪዳ። ያራ ባናው ኑና ጫርኮይ ዲጊን ሳልሞናራ ኣꬊዲ ሃꬃን ቴቄቲዳ ቢታ፥ ቃርፄሳን ዜምፒዲ ኣꬊዳ።
ACT 27:8 ዳሮ ሜቶን ጋፃ ጋፃ ኦይኪዲ ላሲያ ካታማ ማታን ዴዒያ ኣባ ዶናን «ማርካቤይ ዎፑ ጊዲ ሼምፒያሶ» ጊያ ቤሳ ጋኪዳ።
ACT 27:9 ኑኒ ያን ዳሮ ዎዲያ ጋምዒዳፔ ጉዬ ፆሚ ቢሌቲን፥ ማርካቤራ ቡሲ ሜቲያ ጊሾ ጳዉሎሲ ኤንታ ዞሪስ።
ACT 27:10 «ኣሳው፥ ኑ ቡሳን ጊታ ቦሺኔ ዳሮ ቆሆይ ዴዔይሲ ታው ቤንቴስ፤ ቆሆይ ጫና ቦላኔ ማርካቢያ ቦላ ፃላላ ጊዶናሺን ኑ ዴዑዋ ቦላካ ጋካና» ያጊስ።
ACT 27:11 ሺን ማቶ ሃላቃይ ጳዉሎሲ ጊዳይሳፌ ኣꬂዲ ማርካቢያ ላጌይሲኔ ማርካቢያ ጎዳይ ጌይሳ ኣማኒስ።
ACT 27:12 ሄ ኣባ ዶናን ዴዒያ ካታማይ ባልጎ ኣጌና ኣꬃናው ኤንታው ኢንጄቶና ጊሾ ዳሪያ ኣሳቲ ባንታው ዳንዳዔቲኮ ፊንቄ ካታማ ጋኪዲ ባልጎ ኣጌና ያን ኣꬃናው ዞሬቲዶሶና። ፊንቄይ ፑዴሃ-ዉሎሃፔኔ ዱጌሃ-ዉሎሃፔ ጊዶን ኣባ ዶናን ዴዒያ ካታማ።
ACT 27:13 ካዉሻ ዱጌሃ ጫርኮይ ሎዳራ ጫርኪዳ ዎዴ ባንታ ቆፒዳይሳዳ ሃኒዳባ ዳኒን ዴንዲዲ፥ ማርካቤይ ቃፆና ሜላ ኦይኪያ ቢራታ ፑዴ ኤኪዲ ቃርፄሳ ማታራ ኣꬊዶሶና።
ACT 27:14 ሺን ዳሮ ጋምዖና «ኣዉራቂስ» ጊያ ዎልቃማ ጎቴይ ሃꬃን ቴቄቲዳ ቢታፌ ዱጌ ኤንታ ቦላ ዴንዲስ።
ACT 27:15 ሄ ጎቴይ ማርካቢያ ሱጊዲ ኤፎና ዲጊዳ ጊሾ ጫርኮይ ማርካቢያ ባ ዶሲዳ ሶ ኤፊስ።
ACT 27:16 ኑኒ ቄዳ ጊያ ሃꬃን ቴቄቲዳ ቢታ ዜምፒዲ ቢሼ ዳሮ ሜቶቴቲዲ ማርካቢያ ዎጎሉዋ ኣሻናው ዳንዳዒዳ።
ACT 27:17 ኤንቲ ዎጎሉዋ ፑዴ ኬሲዳፔ ጉዬ ዎዶሩዋን ማርካቢያ ቦላ ፃፂዲ፥ ሚንꬂ ቃቺዶሶና። ሱርቲሳ ጊያ ሻፊያን ባንታና ዶምዔꬃና ጊዲ ሂርጊዲ፥ ማርካቢያ ሻራ ዎꬊሲዲ ማርካቢያ ጮ ዬዲ ኣጊዶሶና።
ACT 27:18 ጎቴይ ዎልቃሚሼ ቢን ዎንቴꬃ ጋላስ ጫናፔ ባጋ ኣባን ሆሎ ኦይኪዶሶና።
ACT 27:19 ሄꬓንꬆ ጋላስ ማርካቢያ ሚሺያ ኤኪዲ ባንታ ኩሼን ሆሊዶሶና።
ACT 27:20 ኑኒ ዳሮ ጋላስ ኣዋ ኣይፌኔ ፆሊንቶ ቤዖና ጊሾኔ ዎልቃማ ኡሾይ ኑ ቦላ ኡሺዳ ጊሾ ሲንꬃፌ ሼምፖራ ኣታና ጊዲ ቆፒቦኮ።
ACT 27:21 ሄ ዎዴ ኤንቲ ዳሮ ጋላስ ካꬂ ሞና ጋምዒዳ ጊሾ ጳዉሎሲ ኤንታ ጊዶን ዴንዲ ኤቂዲ፥ «ኣሳው፥ ሂንቴ ታ ዞሪያ ኤኪዲ ቃርፄሳፔ ዴንዶና ኣጊዳኮ ሃ ሜቶይኔ ቆሆይ ኑና ጋኬና።
ACT 27:22 ሺን ታኒ ሂንቴና ያዮፊቴ ጋዳ ዞራይስ፤ ኣይስ ጊኮ፥ ሃ ማርካቤይ ꬋያናፔ ኣቲን ሂንቴፌ ኢሲ ኣሳ ሼምፖይካ ꬋዬና።
ACT 27:23 ዚኔ ቃማ ታ ኢያባ ጊዲዳይሲኔ ታ ጎይኒያ ፆሳይ ኪቲዳ ኪታንቾይ ታ ማታን ኤቂዲ፥
ACT 27:24 ‹ጳዉሎሳ፥ ያዮፋ፤ ኔኒ ሮሜ ካዉዋ ቄሳሬ ሲንꬃን ኤቃናው ቤሴስ። ሄኮ ፆሳይ ኔ ጊሾ ኔራ ቢያ ኣሳ ኡባ ሼምፑዋ ኣሺስ› ያጊስ።
ACT 27:25 ሄሳ ጊሾ፥ ኣሳው፥ ያዮፊቴ። ሄ ኪታንቾይ ታው ኦዲዳይሲ ሃናናይሳ ታኒ ኣማናይስ።
ACT 27:26 ሺን ጫርኮይ ኑና ኤፊዲ ኢሲ ሃꬃን ቴቄቲዳ ቢታ ጋፃን ሆላና» ያጊስ።
ACT 27:27 ታማኔ ኦይዳንꬆ ቃማን ሜዲቲራኔ ኣባን ኑና ጫርኮይ ጌዴኔ ሃ ሱጊሺን፥ ጊዲ ቢላሄ ጊዲያ ዎዴ ማርካቢያን ኦꬄይሳታስ ቢታኮ ማቲዳባ ዳኒስ።
ACT 27:28 ኤንቲ ጪሞቴꬃ ኤራናው ኮዪዲ ዎዶሮ ፄራን ዴፂያባ ቃቺዲ ኣባን ዬጊን፥ ኣባይ ሆስፑን ታሙ ዋꬋ ጊዲስ። ጉꬂ ጋምዒዲ፥ ዛሪ ዬጊን ኡሱፑን ታሙ ዋꬋ ጊዲስ።
ACT 27:29 ኤንቲ ኣባ ጋፃን ዴዒያ ሹቻን ዶምዔቶና ሜላ ያዪዲ፥ ማርካቤይ ቦና ሜላ ኦይኪያ ኦይዱ ቢራታታ ማርካቢያፔ ጉዬራ ኣባን ዬጊዲ፥ ሳዓይ ዎንታና ሜላ ፆሳ ዎሶሶና።
ACT 27:30 ማርካቢያን ኦꬄይሳቲ ማርካቢያፔ ባቃታናው ኮዪዲ፥ ማርካቤይ ቦና ሜላ ኦይኪያ ቢራታታ ማርካቢያፔ ሲንꬃ ባጋራ ኣባን ዬጊያ ዳኒን ዎጎሉዋ ኣባን ዬጊዶሶና።
ACT 27:31 ጳዉሎሲ ማቶ ሃላቃኮኔ ዎታዳሬታኮ፥ «ሃይሳቲ ማርካቢያን ሼምፒ ኡቶና ኢፂኮ ሂንቴ ኣታናው ዳንዳዔኬታ» ያጊስ።
ACT 27:32 ሄሳ ጊሾ፥ ዎታዳሬቲ ዎጎሎይ ቃሼቲዳ ዎዶሩዋ ቃንፂዲ ዬዲ ኣጊዶሶና።
ACT 27:33 ሳዒ ዎንታና ሃኒሺን ኡባይ ካꬂ ማና ሜላ ጳዉሎሲ ኣሳኮ፥ «ሂንቴ ካꬂ ሞና ናጊሼ ሃቺራ ታማኔ ኦይዱ ጋላስ ጋምዒዴታ።
ACT 27:34 ሄሳ ጊሾ፥ ጉꬃ ካꬂ ሂንቴ ማና ሜላ ታኒ ሂንቴና ዎሳይስ። ሂንቴ ጋሽታና ሜላ ጉꬃ ካꬂ ማናው ኮሼስ፤ ሃሪ ኣቶሺን ሂንቴ ሁዔ ቢናናፔ ኢሶይካ ꬋዬና» ያጊስ።
ACT 27:35 ጳዉሎሲ ሄሳ ጊዲ ኡይꬂ ኤኪዲ ኡባ ሲንꬃን ፆሳ ጋላቲስ፤ ኡይꬃ ሜንꬂዲ ሙሱ ዶሚስ።
ACT 27:36 ኡባይ ሚኔቲዲ ባንታው ካꬂ ኤኪዲ ሚዶሶና።
ACT 27:37 ኑኒ ማርካቢያን ዴዔይሳቲ ናምዑ ፄታኔ ላፑን ታማኔ ኡሱፑና።
ACT 27:38 ኤንቲ ሚዲ ካሊዳ ዎዴ ጫና ጊስቲያ ኣባን ዬጊዲ ማርካቢያ ዴፁዋ ካዉሺዶሶና።
ACT 27:39 ሳዒ ዎንቲዳ ዎዴ ማርካቢያ ኦሳንቾቲ ኣው ቢታ ጋኪዳኮ ኤሮናሺን፥ ኣባ ጋፃን ዴዒያ ሻፌኔ ሲሊሞ ቤዒዶሶና። ባንታው ዳንዳዔቲኮ ማርካቢያ ሄ ሻፊያኮ ሺሻናው ቆፒዶሶና።
ACT 27:40 ያቲዲ፥ ማርካቤይ ቦና ሜላ ኦይኪያ ቢራታታ ቢርሺዲ ኣባን ዬጊዶሶና። ሄ ዎዴ ላጊያ ሚꬃ ቃቺያ ዎዶሩዋ ቢርሺዶሶና። ሄሳፌ ጉዬ፥ ጫርኮይ ማርካቢያ ሲንꬄ ሱጋና ሜላ ማርካቢያ ኤፊያ ሻራ ሲንꬃ ባጋራ ꬎቁ ኦꬂዲ ቡሱ ዶሚዶሶና።
ACT 27:41 ሺን ማርካቤይ ሻፌ ዶሬን ዶምዔቲዲ ሚቴቲስ። ማርካቢያስ ሲንꬃ ባጋይ ፁጉኒዲ ሻፊያ ጫዲ ኦይኪዲ ቃፆና ኢፂን፥ ጉዬ ባጋይ ዙሊያ ሱጌꬃን ሜቄሬቴꬂ ኦይኪስ።
ACT 27:42 ዎታዳሬቲ ቃሾ ኣሳፔ ኢሶይካ ሃꬃ ዋꬊዲ ኬሲ ኤኮና ሜላ ኤንታ ዎꬋናው ዞሬቲዶሶና።
ACT 27:43 ሺን ማቶ ሃላቃይ ጳዉሎሳ ኣሻናው ኮዪዲ ዎታዳሬታ ዞሬታ ኢፂስ። ሃꬄ ዋꬎ ኤሪያ ኡባይ ማርካቢያፔ ሃꬃን ጉፒ ጉፒ ዎꬊዲ ካሴቲዲ ጋፃ ኬያና ሜላ ኪቲስ።
ACT 27:44 ኣቲዳይሳቲ ሳንቃ ቦላኔ፥ ማርካቢያ ሜዑዋ ቦላ ኬያና ሜላ ኪቲስ። ሄሳዳ ሃኒዲ ኡባይ ጋፃ ሳሮራ ኬዪዶሶና።
ACT 28:1 ኑኒ ጋፃ ሳሮ ኬዪዳ ዎዴ ጋኪዳ ሃꬃን ቴቄቲዳ ቢታይ ማልታ ጌቴቴይሳ ኤሪዳ።
ACT 28:2 ማልታ ኣሳይ ኑስ ዳሮ ኬሃ ኬሂዶሶና። ኢሪ ቡኪያ ጊሾኔ ሜጊያ ጊሾ ታማ ኤꬂዲ ኑና ኡባ ሞኪዶሶና።
ACT 28:3 ጳዉሎሲ ዳሮ ኣፊራ ሺሺዲ ታማን ዎꬂሺን፥ ሾሺ ሴላ ጊሾ ኬዪዲ ኢያ ኩሺያ ቦላ ፃፄቲዲ ኢያ ዱኪስ።
ACT 28:4 ማልታ ኣሳይ ሾሺ ጳዉሎሳ ኩሼን ፃፄቲዳይሳ ቤዒዳ ዎዴ ኢሶይ ኢሱዋኮ፥ «ቱማ ሃ ኡራይ ሼምፖ ዎꬊዳ ኣሲ፤ ሃሪ ኣቶሺን ኣባፌ ኢ ኣቲንካ ፆሳ ፒርዳፌ ኣቲዲ ፓፃ ዳናው ዳንዳዒቤና» ያጊዶሶና።
ACT 28:5 ሺን ጳዉሎሲ ባ ኩሺያፔ ሾሻ ዉፃርኪዲ፥ ታማን ዬጊስ፤ ኢያ ኣይኮካ ቆሂቤና።
ACT 28:6 ኤንቲ፥ «ኢያ ኣሳቴꬃይ ኪፄስ፥ ዎይኮ ኣኬኮና ኩንዲዲ ሃይቄስ» ጊዲ ናጎሶና። ሺን ዳሮ ዎዴ ናጊዲ ኢያ ኣሳቴꬃን ኣይቢካ ዱማቲዳባይ ꬋዪን፥ «ሃይሲ ፆሴ» ያጊዲ ባንታ ቆፋ ላሚዶሶና።
ACT 28:7 ሄ ሄራን ሃꬃን ቴቄቲዳ ቢታ ሃላቃ፥ ፑፕሊዮሳ ጌይሳስ ጋዴይ ዴዔስ፤ ሄꬑ ጋላስ ጋካናው ኢ ኑና ሲቆን ሞኪስ።
ACT 28:8 ፑፕሊዮሳ ኣዋይ ቆፆ፥ ሚሻኔ ኡሎ ኡቲሶን ሃርጌቲዲ ዚንዒዲ ዴዔስ። ጳዉሎሲ ኢያ ሶ ጌሊዲ ኢያው ፆሳ ዎሲስ፤ ባ ኩሺያ ኢያ ቦላ ዎꬂዲ ፓꬂስ።
ACT 28:9 ሄሳፌ ጉዬ፥ ማልታን ዴዒያ ሃርጊያ ሃራ ኣሳቲካ ዪዲ ፓፂዶሶና።
ACT 28:10 ኤንቲ ኑና ዳሮ ቦንቺዶሶና፤ ኑኒ ማርካቤራ ባናው ዴንዲዳ ዎዴ ኦጌስ ኮሺያባ ኑስ ኢሚዶሶና።
ACT 28:11 ሄꬑ ኣጌናፔ ጉዬ፥ ማልታን ባልጎ ኣꬂዲ ኢስኪንዲሪያ ማርካቤራ ባናው ዴንዲዳ። ሄ ማርካቢያ ቦላ ዲዮስቆሮሳ ጊያ ሜንቴ ኤቃታ ሚሲሌይ ዴዔስ።
ACT 28:12 ሲራኩሴ ካታማ ጌሊዲ ያን ሄꬑ ጋላስ ኡቲዳ።
ACT 28:13 ያፔ ዴንዲዲ ሬጊዩሜ ካታማ ጋኪዳ። ኢሲ ጋላሳፔ ጉዬ፥ ዱጌሃ ባጋ ጫርኮይ ጫርኪን፥ ዎንቴꬃ ጋላስ ፑቲዮሌ ካታማ ጋኪዳ።
ACT 28:14 ያን ኑኒ ኢሲ ኢሲ ኣማኒያ ኣሳታ ዴሚን፥ ባንታራ ሳሚንታ ጋምዓና ሜላ ኑና ዎሲዶሶና። ሄሳፌ ጉዬ፥ ሮሜ ቢዳ።
ACT 28:15 ሮሜን ዴዒያ ኣማኒያ ኣሳቲ ኑባ ሲዒዲ፥ ኣፊዮሳ ጊያን፥ ሄꬑ ኣቂያሶ ጊያ ቤሳ ጋካናው ኑና ሞካናው ዪዶሶና። ጳዉሎሲ ኤንታ ቤዒዳ ዎዴ ፆሳ ጋላቲዲ ሚኔቲስ።
ACT 28:16 ኑኒ ሮሜ ጌሊዳ ዎዴ ጳዉሎሲ ባና ናጊያ ዎታዳሪያራ ባርካ ዴዖ ጌቴቲስ።
ACT 28:17 ሄꬑ ጋላሳፔ ጉዬ፥ ጳዉሎሲ ኣይሁዴታ ሃላቃታ ባኮ ፄጊሲስ። ኤንቲ ሺቂዳ ዎዴ ኤንታኮ፥ «ታ ኢሻቶ፥ ታኒ ኑ ኣሳ ዎይኮ ኑ ኣዋታ ዎጋ ቦላ ኣይቢ ቆሆካ ኦꬃቢኬ፥ ሺን ታና ዬሩሳላሜን ቃቺዲ ሮሜ ኣሳስ ኣꬂዲ ኢሚዶሶና።
ACT 28:18 ኤንቲ ታ ሞቱዋ ቤዒዲ ሃይቆስ ጋꬂያባ ታ ቦላ ኣይቢባካ ዴሚቦና ጊሾ ታና ቢላናው ቆፒዶሶና።
ACT 28:19 ሺን ኣይሁዴቲ ሄሳ ኢፂዳ ዎዴ ‹ታባ ቄሳሬይ ፒርዶ› ያጋሲፔ ኣቲን ታኒ ታ ዴሪያ ሞቲያባይ ዴዒን ጊዴና።
ACT 28:20 ታኒ ሂንቴና ፄጊሲዳይ ሂንቴና ቤዓናዉኔ ሂንቴው ሃይሳ ኦዳናሳ። ታኒ ሃ ሳንꬃላታን ቃሼቲዳይ ኢስራዔሌ ኣሳይ ናጊያ ኡፋይሳ ጊሾሳ» ያጊስ።
ACT 28:21 ኣይሁዴ ሃላቃቲ ጳዉሎሳኮ፥ «ኑስ ዪሁዳፔ ኔባ ፃፌቲዳ ዳብዳቤይ ጋኪቤና። ያፔ ዪዳ ኣሳታፔ ኢሶይካ ኔባ ኢታ ኦዲዳይ ባዋ።
ACT 28:22 ሺን ሃ ኔ ካሊያ ኣማኑዋ ዱማ ዱማ ቤሳን ኣሳይ ኢፄይሳ ኑኒ ኤሪያ ጊሾ ኔ ቆፋ ሲዓናው ኮዮስ» ያጊዶሶና።
ACT 28:23 ኤንቲ ባንታ ያና ጋላስ ጳዉሎሳስ ቃፃሪዲ፥ ሄ ጋላስ ዳሪዲ ኢ ዴዒያሱዋ ዪዶሶና። ኢ ዎንታፌ ኦማርሲ ጋካናው ፆሳ ካዎቴꬃባ ኤንታው ማርካቲስ። ቃሲ ኤንቲ ዬሱሳባ ኣማናና ሜላ ሙሴ ሂጊያፌኔ ናቤታ ማፃፋፔ ቆንጪሲዲ ኤንታ ታማርሲስ።
ACT 28:24 ኢሶቲ ኢሶቲ ጳዉሎሲ ጊዳይሳ ኣማኒዶሶና፥ ሺን ሃራቲ ኣማኒቦኮና።
ACT 28:25 ኤንቲ ባንታ ጊዶን ኦዳ ማዖና ኢፂዳ ዎዴ ጳዉሎሲ ኢሲባ ጊዳፔ ጉዬ ቢዶሶና። ኢ ሃይሳዳ ያጊስ፡ «ጌሻ ኣያናይ ኑ ኣዋታስ ናቢያ ኢሳያሳ ዶናን ኦዲዳይሲ ቱማ።
ACT 28:26 ‹ኔኒ ሄ ኣሳኮ ባዳ፥ ሂንቴ ሲሳ ሲዔታ፥ ሺን ሂንቴው ጌሌና፤ ሂንቴ ቤዖ ቤዔታ፥ ሺን ዴሜኬታ።
ACT 28:27 ሃ ኣሳ ዎዛናይ ሙሚስ፤ ኤንታ ሃይꬃይ ቱሊስ፤ ኤንታ ኣይፌይካ ጎዜቲስ። ሄሲ ባይኔኮ፥ ኤንቲ ባንታ ኣይፊያን ቤዒዲ፥ ባንታ ሃይꬃን ሲዒዲ፥ ባንታ ዎዛናን ኣኬኪዲ፥ ኤንቲ ታኮ ሲማና፤ ታካ ኤንታ ፓꬃናሺን› ያጋ» ያጊስ።
ACT 28:28 «ሂዛ፥ ሃይሲ ፆሳ ኣቶቴꬃ ኪታይ ኣይሁዴ ጊዶናይሳታስ ጊዴይሳ ኤሬታ። ኤንቲካ ሲዓና» ያጊስ።
ACT 28:29 ጳዉሎሲ ሄሳ ጊዳፔ ጉዬ ኣይሁዴቲ ባንታ ጊዶን ዳሮ ፓላሚሼ ኬዪዲ ቢዶሶና።
ACT 28:30 ጳዉሎሲ ኬራ ኬꬃን ናምዑ ላይꬂ ኩሜꬂ ዴዒስ፤ ያን ዴዒሼ ባኮ ያ ኡባ ሞኬስ።
ACT 28:31 ያሺ ባይናኔ ኦኒካ ዲጎናሺን ፆሳ ካዎቴꬃባ ሳባኪስ፤ ጎዳ ዬሱስ ኪሪስቶሳባ ቆንጪሲዲ ታማርሴስ።
ROM 1:1 ዬሱስ ኪሪስቶሳ ኣይሌ ጊዲዳ፥ ሃዋሬ ጊዳና ሜላ ፄጌቲዳይሳፌኔ ፆሳ ዎንጌላ ሳባካና ሜላ ዶሬቲዳ ጳዉሎሲ ኪቲዳ ኪታ።
ROM 1:2 ፆሳይ ዳሮ ዎዴፔ ሲንꬄ ባ ናቤታ ባጋራ ኢማና ያጊዳ ፆሳ ዎንጌላይ ጌሻ ማፃፋታን ፃፌቲስ።
ROM 1:3 ሄ ዎንጌላይ ኣሾን ዳዊቴ ሼሻፔ ዬሌቲዳ፥ ፆሳ ናዓ፥ ኑ ጎዳ ዬሱስ ኪሪስቶሳባ።
ROM 1:4 ቃሲ ኢ ባ ጌሻ ኣያናን ሃይቆፔ ዴንዲዲ፥ ፆሳ ናዓ ጊዴይሳ ጊታ ዎልቃን ቤሲስ።
ROM 1:5 ኢያ ባጋራ ኣይሁዴ ጊዶና ኣሳ ኡባይ፥ ኣማኒዲ ኪቴታና ሜላ ኪሪስቶሳ ሱንꬃ ጊሾ ፆሳይ ኣꬎ ኬሃቴꬂኔ ሃዋሬቴꬃ ማታ ኑስ ኢሚስ።
ROM 1:6 ዬሱስ ኪሪስቶሳስ ጊዳና ሜላ ፄጌቲዳ ኣሳታፔ ባጋቲ ሂንቴና።
ROM 1:7 ሮሜን ዴዒያ፥ ፆሳይ ሲቄይሳታሲኔ ኢያ ጌሻ ዴሬ ጊዳና ሜላ ዶሪዳይሳታስ። ፆሳ ኑ ኣዋፔኔ ጎዳ ዬሱስ ኪሪስቶሳፔ ኣꬎ ኬሃቴꬃይኔ ሳሮቴꬃይ ሂንቴው ጊዶ።
ROM 1:8 ኡባፌ ኮይሮታዳ፥ ሂንቴ ኣማኖይ ቢታ ኡባን ሲዔቲዳ ጊሾ ዬሱስ ኪሪስቶሳ ባጋራ ሂንቴ ጊሾ ታ ፆሳ ጋላታይስ።
ROM 1:9 ታኒ ኢያ ናዓ ዎንጌላባ ኩሜꬃ ዎዛናን ኦዲያ ፆሳይ፥ ታኒ ታ ዎሳን ኡባ ዎዴ ሂንቴና ቆፔይሳስ ኢ ማርካ።
ROM 1:10 ዉርሴꬃን፥ ፆሳ ሼኔ ጊዲኮ፥ ታኒ ሂንቴኮ ባናው ኦጌይ ታው ኢንጄታና ሜላ ኡባ ዎዴ ዎሳይስ።
ROM 1:11 ታኒ ሂንቴው ኣያና ኢሙዋ ሻካናዉኔ ሂንቴና ቤዓናው ላሞታይስ።
ROM 1:12 ሄሲካ፥ ታኒ ሂንቴ ኣማኑዋን፥ ቃሲ ሂንቴ ታ ኣማኑዋን ሚኔታና ሜላሳ።
ROM 1:13 ታ ኢሻቶ፥ ታኒ ኣይሁዴ ጊዶና ኣሳፔ ኣይፌ ዴሚዳይሳዳ፥ ሂንቴፌካ ኣይፌ ዴማናው ሂንቴኮ ባናው ቆፓስ፥ ሺን ዲጌታስ።
ROM 1:14 ታማሪዳ ኣሳሲኔ ታማሪቦና ኣሳስ ቃሲ ጪንጫታሲኔ ኤያታስ ታው ኣጮይ ዴዔስ።
ROM 1:15 ሄሳ ጊሾ፥ ሮሜን ዴዒያ ሂንቴዉካ ዎንጌላ ኦዳናው ኣሞታይስ።
ROM 1:16 ኢያ ኣማኒያ ኡባ፥ ኮይሮቲዲ ኣይሁዴታ፥ ካሊዲ ኣይሁዴ ጊዶናይሳታ ኣሻናው ዎንጌላይ ፆሳ ዎልቃ ጊዲያ ጊሾ ታ ዎንጌላን ዬላቲኬ።
ROM 1:17 ፂሎይ ኣማኖን ዴዖን ዳና ጌቴቲዲ ጌሻ ማፃፋን ፃፌቲስ። ዎንጌላን ፆሳ ፂሎቴꬃይ ቆንጪስ፤ ኮይሮፔ ዉርሴꬂ ጋካናው ኣሳይ ፂሌይ ኣማኖና።
ROM 1:18 ቱማይ ኤሬቶና ሜላ ባንታ ኢታ ኦሶን ካሚያ ኣሳ ቦላኔ ናጋራ ኡባ ቦላ፥ ፆሳ ሃንቆይ ሳሎፔ ዎꬌስ።
ROM 1:19 ፆሳይ ኤንታው ቆንጫናው ቤሲያባ ቆንጪሲዳ ጊሾ ኤንቲ ፆሳባ ኤሮሶና።
ROM 1:20 ኣላሜይ ሜꬌቶሳፔ ዶሚዲ፥ ኣሳስ ቤንቶና ፆሳ ካንዶይ፥ ሄሲካ ኢያ ሜሪና ዎልቃይኔ ፆሳቴꬃይ ኢያ ሜꬌቴꬃን ቆንጪዲ ዴዒያ ጊሾ ኣሳይ ባንታ ኢታቴꬃስ ጋሶያባይ ባዋ።
ROM 1:21 ኤንቲ ፆሳ ኤሪሼ፥ ኢያ ቦንቺቦኮናኔ ጋላቲቦኮና። ኤንታ ቆፋይ ማዶናባ ጊዲስ፤ ኤንታ ኣኬኮና ዎዛናይ ꬉሚስ።
ROM 1:22 ኤንቲ ባንታና ጪንጫታ ጎሶና፥ ሺን ኤያታ።
ROM 1:23 ኤንቲ ሃይቆና ፆሳ ጎይናናይሳ ኣጊዲ፥ ሃይቂያ ኣሳ ሜꬎን፥ ካፎታ ሜꬎን፥ ዶዓታ ሜꬎኒኔ ኡሎራ ጎሼቲያባታ ዳኒሲዲ ኦꬂዳ ሚሲሌታ ጎይኒዶሶና።
ROM 1:24 ሄሳ ጊሾ፥ ኤንቲ ኢሶይ ኢሱዋራ ቦርሶባ ኦꬂዲ፥ ባንታ ኣሳቴꬃ ካዉሻና ሜላ ፆሳይ ኤንታ ዎዛናይ ኣሞቲያ ቱና ኦሶስ ኤንታ ዬጊ ኣጊስ።
ROM 1:25 ሄሲ ሃኒዳይ ኤንቲ ፆሳ ቱማ ዎርዶን ላሚዳ ጊሾኔ ሜꬊዳ ፆሳ ኣጊዲ፥ ሜꬌቴꬂ ጎይኒዳ ጊሾሳ። ፆሳይ ሜሪናው ጋላቴቲዳይሳ። ኣሚንዒ።
ROM 1:26 ሄሳ ጊሾ፥ ፆሳይ ኤንታና ኤንታ ቦርሶ ኣሙዋስ ዬጊ ኣጊስ። ኤንታ ማጫሳይ ባንታው ቤሲያ ኣዴራ ጋሄቴꬂ ኣጊዲ፥ ቤሶናባ ሃኒዲ ማጫሲ ማጫሳራ ጋሄቲዶሶና።
ROM 1:27 ሄሳዳካ፥ ኣዴቲ ባንታው ቤሲያ ማጫሳራ ጋይቴꬂ ኣጊዲ፥ ኣዴይ ኣዴራ ጋሄቲዶሶና። ኣዴቲ ኢሶይ ኢሱዋራ ኣሞን ፁጌቲዲ፥ ቦርሶባ ኦꬂዶሶና። ባንታ ኦꬂዳ ባላስ ቤሲያ ፒርዳ ኤኪዶሶና።
ROM 1:28 ኤንቲ ፆሳ ኤሪሼ፥ ሃሪ ኣቶሺን ኢያባ ቆፓናው ኮዮና ኢፂዳ ጊሾ ቤሶናባ ኦꬃና ሜላ ፆሳይ ኤንታና ፓꬆና ቆፋስ ኣꬂ ኢሚስ።
ROM 1:29 ኤንታን ጌላቴꬂ፥ ኢታቴꬂ፥ ዪቄይ፥ ጌኔይ፥ ቃናቴይ፥ ሼምፖ ዎꬎይ፥ ፓላሚ፥ ጪሞይኔ ኢታ ኣሞይ ኩሚስ። ኤንቲ ዚጊሬይሳታ፥
ROM 1:30 ኣሳ ሱንꬂ ኢሴይሳታ፥ ፆሳ ኢፄይሳታ፥ ጫዬይሳታ፥ ኦቶሬይሳታ፥ ጬቄቴይሳታ፥ ኢታባ ኦꬃናው ኮዬይሳታኔ ባንታ ኣዬሲኔ ኣዋስ ኪቴቶናይሳታ፥
ROM 1:31 ኣኬኮናይሳታ፥ ጫቆ ሜንꬄይሳታ፥ ሲቆይ ባይናይሳታ፥ ቃꬌይ ባይናይሳታ።
ROM 1:32 ሃይሳታ ሜላ ኦꬄይሳታስ ሃይቆይ ቤሴስ ጊያ ፆሳ ሂጊያ ኤሪሼ፥ ሃይሳታ ኦꬆሶና። ኤንቲ ባንታው ኦሶ ፃላላ ጊዶናሺን ኦꬂያ ሃራታካ ናሾሶና።
ROM 2:1 ሄሳ ጊሾ፥ ኔኖ ሃራታ ቦላ ፒርዴይሶ፥ ኔኒ ጋሶያባይ ባዋ። ኔኒ ሃራታ ቦላ ፒርዳሼ፥ ሄ ኔኒ ፒርዲያ ኡራ ሜላ ኦꬂኮ፥ ኔ፥ ኔ ቦላ ፒርዳሳ።
ROM 2:2 ሄሳ ሜላ ኦሶ ኦꬄይሳታ ቦላ ፆሳይ ፂሎ ፒርዳ ፒርዴይሳ ኑ ኤሮስ።
ROM 2:3 ኔኖ፥ ሄሳ ሜላ ኦሶ ኦꬄይሳታ ቦላ ፒርዴይሶ፥ ኤንቲ ኦꬄይሳ ሜላ ኦꬄይሶ፥ ኔኒ ፆሳ ፒርዳፌ ኣታናባ ዳኒ?
ROM 2:4 ዎይኮ ፆሳ ኬሃቴꬃ፥ ጌንጫኔ ዳንዳዓ ዳሮቴꬃ ካꬋዬ? ፆሳይ ኔው ኬሂዳይ ኔና ናጋራፔ ዛራናው ጊዴይሳ ኤሪኪዬ?
ROM 2:5 ሺን ሂንቴው ሹቻ ዎዛኒኔ ሲዖና ሃይꬂ ዴዔስ። ሄሳ ጊሾ፥ ፆሳ ሃንቆይኔ ፂሎ ፒርዳይ ቆንጪያ ጋላስ፥ ኔ ቦላ ፒርዳይ ዳራና ሜላ ኦꬃሳ።
ROM 2:6 ፆሳይ ኢሱዋስ ኢሱዋስ ኢያ ኦሱዋ ሜላ ኢማና።
ROM 2:7 ሎዖ ኦሶን ሚኒዲ፥ ጋላታ፥ ቦንቾኔ ꬋዮና ዴዑዋ ኮዬይሳታስ ፆሳይ ሜሪና ዴዑዋ ኢማና።
ROM 2:8 ሺን ባንታና ሲቄይሳታ፥ ቱማ ኢፄይሳታኔ ኢታባ ኦꬃናው ኮዬይሳታ ቦላ ፆሳ ሃንቆይኔ ፒርዳይ ያና።
ROM 2:9 ኢታባ ኦꬂያ ኣሳ ኡባ፥ ኮይሮቲዲ ኣይሁዴታ፥ ካሊዲ ኣይሁዴ ጊዶና ኣሳ ሜቶይኔ ዋዬይ ጋካና።
ROM 2:10 ሺን ፆሳይ ሎዖ ኦሶ ኦꬂያ ኡባስ፥ ኮይሮቲዲ ኣይሁዴታስ፥ ካሊዲ ኣይሁዴ ጊዶናይሳታስ ጋላታ፥ ቦንቾኔ ሳሮቴꬃ ኢማና።
ROM 2:11 ፆሳይ ሶምዖ ቤዒዲ ኣሴ ሻኬና።
ROM 2:12 ሂጌይ ባይና ናጋራ ኦꬂዳ ኡባይ ሂጌይ ባይና ꬋያና። ሂጌይ ዴዒሺን፥ ናጋራ ኦꬂዳ ኡባይ ሂጌን ፒርዴታና።
ROM 2:13 ፆሳ ሲንꬃን ፂሌይሳቲ ሂጌ ናጌይሳታፔ ኣቲን ሂጌ ሲሳ ፃላላ ሲዔይሳታ ጊዶኮና።
ROM 2:14 ሂጌይ ባይና ኣይሁዴ ጊዶና ኣሳይ ሜꬎን ሂጌይ ኪቴይሳ ኦꬆሶና። ኤንታው ፃፌቲዳ ሂጌይ ባይና ኢፂኮካ ኤንቲ ባንታ ዎዛናን ሂጊያ ኤሮሶና።
ROM 2:15 ኤንታ ሃኖታይ፥ ሂጌ ኪታይ ኤንታ ዎዛናን ፃፌቲዳይሳ ቤሴስ። ቃሲ ኤንታ ካሃይ ኤንታ ቦላ ማርካቴስ። ኤንታ ቆፋይ ኢሲ ኢሲ ቶሆ ኤንታና ባላ ጌስ፤ ኢሲ ኢሲ ቶሆ ኤንታና ሊኬ ጌስ።
ROM 2:16 ታ ታማርሲዳ ዎንጌላ ሜላ ፆሳይ ዬሱስ ኪሪስቶሳ ባጋራ ኣሳ ዎዛናን ጌሚዳ ቆፋ ፒርዲያ ዎዴ ሄሲ ኤሬታና።
ROM 2:17 ሺን ኔ ኔና ኣይሁዴ ጋሳ፤ ሂጌን ዜምፓሳ፤ ፆሳን ጬቃሳ።
ROM 2:18 ኔ ኦꬃና ሜላ ፆሳይ ኮያባይ ኣይቤኮ ኤራሳ። ሂጊያ ታማሪዳ ጊሾ ቱማ ጊዲያባ ዶራናው ኤራሳ።
ROM 2:19 ኔኒ ቆቄታ ካሌꬄይሳ፥ ቃሲ ꬉማን ዴዔይሳታስ ፖዖ ጊዴይሳ ሻካ ኤራሳ።
ROM 2:20 ኔኒ ሂጊያፌ ዴሚዳ ኤራቴꬃኒኔ ቱማቴꬃን ኤያታ ኤሪሴይሳኔ ዮጋታ ታማርሴይሳ ጊዴይሳ ኤራሳ።
ROM 2:21 ያቲን፥ ኔ ሃራታ ታማርሴይሲ ኔ ኔና ኣይስ ታማርሲኪ? ኔኒ፥ «ካይሶቶፓ» ጋሼ፥ ኔኒ ኔ ሁዔን ካይሶታዬ?
ROM 2:22 ኔኒ፥ «ላሞፋ» ጋሼ፥ ኔኒ ኔ ሁዔን ላማዬ? ኔኒ ኤቃ ኢፃሼ፥ ኤቃይ ዴዒያ ኬꬃ ቦንቃዬ?
ROM 2:23 ኔኒ ፆሳ ሂጊያን ጬቄታሳ፥ ሺን ሂጊያስ ኪቴቶና ኢፃዳ ፆሳ ዬላያይ?
ROM 2:24 ጌሻ ማፃፋን፥ «ሂንቴ ጋሶን ፆሳ ሱንꬃይ ኣይሁዴ ጊዶና ኣሳታን ጫዬቴስ» ጌቴቲዲ ፃፌቲስ።
ROM 2:25 ኔ ሂጌስ ኪቴቲኮ፥ ኔ ቃፃሬቴꬃስ ማዴይ ዴዔስ፥ ሺን ኔኒ ሂጊያስ ኪቴቶና ኢፂኮ ኔ ቃፃሬቴꬃይ ቃፃሬቲቦና ሜላ ጊዴስ።
ROM 2:26 ኣይሁዴ ጊዶና ኣሲ ቃፃሬቶና ዴዒሼ፥ ሂጊያስ ኪቴቲኮ፥ ፆሳይ ኢያ ቃፃሬቲዳ ሜላ ታይቤኔ?
ROM 2:27 ሂንቴ፥ ኣይሁዴ ኣሳቲ፥ ሂንቴው ፃፌቲዳ ሂጌይኔ ቃፃሮይ ዴዒሺን፥ ሂንቴ ሂጌስ ኪቴቶና ኢፂኮ፥ ኣይሁዴ ጊዶና ኣሳይ ቃፃሬቶና ኢፂኮካ ሂጌስ ኪቴቲዲ፥ ሂንቴ ቦላ ፒርዳና።
ROM 2:28 ሂዛ፥ ሱንꬃን ኣይሁዴ ጊዲዳ ኡባይ ቱማ ኣይሁዴ ጊዴና። ቃሲ ካሬ ኣሳቴꬃ ቃፃሮይ ቱማ ቃፃሮ ጊዴና።
ROM 2:29 ሺን ቱማ ኣይሁዴቴꬂ ጋꬃ ባጋን ኣይሁዴ ጊዴይሳ። ቱማ ቃፃሬቴꬂ ፆሳ ኣያናን ኦሴቲያ ዎዛና ቃፃሬቴꬃፌ ኣቲን ፃፌቲዳ ሂጊያን ኦሴቲያ ኣሳቴꬃ ቃፃሮ ጊዴና። ሄ ኡራይ ጋላታ ፆሳፌ ኤኬሲፔ ኣቲን ኣሳፔ ጊዴና።
ROM 3:1 ያቲን፥ ኣይሁዴ ጊዶን ኣይ ዱማቴꬂ ዴዒ? ዎይኮ ቃፃሬቴꬃን ኣይ ማዴይ ዴዒ?
ROM 3:2 ቱማካ ኣይሁዴ ጊዶይ ዳሮ ኦጌራ ማዴስ። ኡባፌ ሲንꬄ ፆሳይ ባ ቃላ ሃዳራ ኣይሁዴታስ ኢሚስ።
ROM 3:3 ያቲን፥ ኤንታፌ ኢሶቲ ኢሶቲ ቃላ ኣማኖና ኢፂኮ፥ ኤንታ ኢፆይ ፆሳ ኣማኔቴꬃ ዲጊዬ?
ROM 3:4 ዲጌና! ኣሳ ኡባይ ዎርዳንቾ ጊዲኮካ ፆሳይ ቱማ ጊዶ። ጌሻ ማፃፋን፥ «ኔ ቃላን ኔ ፂላሳ፤ ኔና ሞቴይሳ ፒርዳን ላꬃሳ» ጌቴቲዲ ፃፌቲስ።
ROM 3:5 ያቲን፥ ኑ ናጋራይ ፆሳይ ፂሎ ጊዴይሳ ቤሲያባ ጊዲኮ፥ ኑ ዎይጋኔ? ፆሳይ ኑ ናጋራ ጊሾ ኑ ቦላ ፒርዲኮ፥ ሊኬ ጊዴኔዬ? ሃይሳ ታኒ ኣሳ ቆፋꬆ ጋይስ።
ROM 3:6 ሄሲ ኡባራካ ሃኔና። ሄሳዳ ሃኒኮ፥ ፆሳይ ሃ ኣላሚያ ቦላ ዋቲ ፒርዳኔ?
ROM 3:7 ሺን ታ ዎርዶቴꬃይ ፆሳ ቱማ ቆንጪሲዲ፥ ኢያ ቦንቹዋ ዳርሲ ቤሲያባ ጊዲኮ፥ ያቲን፥ ኣይስ ታ ቦላ ናጋራንቾዳ ፒርዴቲ?
ROM 3:8 ኢሲ ኢሲ ኣሳይ፥ «ሎዖይ ያና ሜላ ኢታ ኦꬆስ» ያጊዲ ታማርሲያዳ ኦꬂዲ ታና ሞቶሶና። ሄሳ ሜላ ኣሳ ቦላ ያ ፆሳ ፒርዳይ ሊኬ።
ROM 3:9 ያቲን፥ ኑኒ ዎይጋኔ? ኑ ኣይሁዴቲ፥ ኣይሁዴ ጊዶናይሳታፔ ኣꬎናዬ? ጊዴና! ኣይሁዴ ጊዲን፥ ኣይሁዴ ጊዶና ኢፂን ኡባይ ናጋራንቾ ጊዴይሳ ታኒ ካሴታዳ ሂንቴው ኦዳስ።
ROM 3:10 ጌሻ ማፃፋን፥ «ፂሎ ኣሲ ኢሶይካ ባዋ።
ROM 3:11 ኣኬኪያ ኣሲ ባዋ፥ ፆሳ ኮያ ኦኒካ ባዋ።
ROM 3:12 ኣሳ ኡባይ ፆሳስ ዞኮ ዛሪዶሶና፤ ኡባይ ኢሲፌ ፓꬆናባ ጊዲዶሶና። ሎዖ ኦꬂያ ኦኒካ ባዋ፤ ኢሲ ኣሲካ ባዋ።
ROM 3:13 ኤንታ ዶናፔ ኬያ ቃላይ፥ ዶዬቲዳ ዱፎፔ ኬያ ፂንቆ ሜላ፤ ባንታ ኢንፃርሳን ጪሞሶና። ኤንታ ዶናፔ ኣሴ ዎꬊያ፥ ሾሻ ማርዜይ ኬዬስ።
ROM 3:14 ኤንታ ዶናን ጫሞ ኦዳይኔ ባዴꬂ ኩሚስ።
ROM 3:15 ኤንቲ ሱꬂ ጉሳናው ኤሌሶሶና።
ROM 3:16 ኤንታ ኦጊያን ꬋዮይኔ ቆሆይ ዴዔስ።
ROM 3:17 ኤንቲ ሳሮቴꬃ ኦጊያ ኤሮኮና።
ROM 3:18 ባንታ ዴዑዋን ፆሳስ ያዮኮና» ጌቴቲዲ ፃፌቲስ።
ROM 3:19 ኣሴ ኡባ ዶና ኦይꬃናዉኔ ኩሜꬃ ኣላሚያ ፆሳ ፒርዳፌ ጋርሳን ሺሻናው፥ ሂጌይ ኢሜቲዳይ ሂጌፌ ጋርሳን ኣቄይሳታስ ጊዴይሳ ኑ ኤሮስ።
ROM 3:20 ሄሳ ጊሾ፥ ኦኒካ ሂጌስ ኪቴቲዲ ፆሳ ሲንꬃን ፂላናው ዳንዳዔና። ሂጌይ ኣሲ ኡባይ ናጋራንቾ ጊዴይሳ ቤሴስ።
ROM 3:21 ሺን ሃዒ ፆሳይ ኣሲ ሂጌይ ባይናሺን ፂሊያ ኦጌ ቆንጪሲስ። ሄ ኦጊያ ሙሴ ሂጌይኔ ናቤቲ ማርካቲዶሶና።
ROM 3:22 ሃ ፂሎቴꬃ፥ ፆሳይ ዬሱስ ኪሪስቶሳ ባጋራ ኣሳ ኡባስ ሻኮይ ባይና ኢሜስ።
ROM 3:23 ኣሳ ኡባይ ናጋራ ኦꬂዶሶና፤ ፆሳይ ኤንታው ኢሚዳ ቦንቹዋፌ ሃኪዲ ኣቲዶሶና።
ROM 3:24 ሺን ኤንቲ ፆሳ ኣꬎ ኬሃቴꬃን፥ ዎዚያ ኪሪስቶስ ዬሱሳ ባጋራ ጮ ፂሊዶሶና።
ROM 3:25 ፆሳይ ዬሱስ ኪሪስቶሳ ያርሾ ኦꬂዲ ኢሚዳይ፥ ኢያ ኣማኒያ ኡባይ ኢያ ሱꬃን ናጋራ ማሮቴꬂ ዴማና ሜላሳ። ፆሳይ ሄሳ ኦꬂዳይ ባ ዳንዳዓን ካሴ ናጋራ ታይቦና ኣጊዲ፥ ባ ፂሎቴꬃ ቤሳናሳ።
ROM 3:26 ሃዒ ዎዲያን ዬሱሳ ኣማኒያ ኡባ ፂሊሲዲ፥ ፆሳይ ባ ሁዔን ፂሎ ጊዴይሳ ቤሴስ።
ROM 3:27 ያቲን፥ ኑ ጬቄቲያባይ ኣይቢ ዴዒ? ኣይቢካ ባዋ። ኑኒ ጬቄቴይ ሂጌስ ኪቴቲያ ጊሾዬ? ኣካይ! ኣማኖ ጊሾሳ።
ROM 3:28 ፆሳይ ኣሴ ፂሊሴይ ኣማኖናፔ ኣቲን ሂጌስ ኪቴቴꬃን ጊዶናይሳ ኑ ኣኬኮስ።
ROM 3:29 ዎይኮ ፆሳይ ኣይሁዴታ ፃላላ ፆሴዬ? ኣይሁዴ ጊዶናይሳታስ ፆሴ ጊዴኔዬ? ቱማ፥ ኣይሁዴ ጊዶናይሳታስካ ኢ ፆሴ።
ROM 3:30 ፆሳይ ኢሶ፤ ኣይሁዴታኔ ኣይሁዴ ጊዶናይሳታ ኣማኖን ፂሊሴይ ኢያ።
ROM 3:31 ያቲን፥ ኑኒ ሂጊያ ኣማኖ ጊሾ ሻሮስ ጉሴዬ? ጊዴና! ሂጊያ ሚንꬆሲፔ ኣቲን።
ROM 4:1 ያቲን፥ ኑ ማይዛይ ኣብራሃሜይ ኣይ ዴሚዴ?
ROM 4:2 ኣብራሃሜይ ኦሶን ፂሊዳባ ጊዲያኮ፥ ኢ ጬቄቲያባይ ዴዔስ፥ ጊዶሺን፥ ፆሳ ሲንꬃን ጬቄታናው ዳንዳዔና።
ROM 4:3 ጌሻ ማፃፋይ፥ «ኣብራሃሜይ ፆሳ ኣማኒስ፤ ፆሳይ ሄሳ ኢያው ፂሎቴꬂ ኦꬂዲ ኤኪስ» ያጌስ።
ROM 4:4 ኦꬂያ ኡራይ ኤኪያ ዳሞዜይ፥ ኢያ ኦሶ ዎልቃስ ጪጌቲያ ጋቴፔ ኣቲን ኢያው ኢሞታ ጊዴና።
ROM 4:5 ሺን ኦሶ ኦꬆና ኦኒካ ናጋራንቹዋ ፂሊሲያ ፆሳ ኣማኒኮ፥ ኢያ ኣማኖይ ኢያው ፂሎቴꬂ ጊዲዲ ታይቤቴስ።
ROM 4:6 ጌሻ ማፃፋን ዳዊቴይ፥ ኦሶይ ባይና ፆሳይ ፂሊሲያ ኣሳቲ ኣይ ሜላ ኣንጄቲዳኮ ሃይሳዳ ያጊዲ ቆንጪሴስ፡
ROM 4:7 «ኤንታ ባላይ ኣቶ ጌቴቲዳይሳቲኔ ኤንታ ናጋራይ ካሜቲዳይሳቲ ኣንጄቲዳይሳታ።
ROM 4:8 ጎዳይ ኢያ ናጋራ ታይቦና ኣሲ ኣንጄቲዳይሳ» ያጌስ።
ROM 4:9 ያቲን፥ ዳዊቴይ ኦዲዳ ኣንጆይ ቃፃሬቲዳ ኣሳ ፃላላሴዬ? ዎይኮ ቃፃሬቲቦና ኣሳሴ? ኑኒ፥ «ጌሻ ማፃፋይ፥ ‹ኣብራሃሜይ ፆሳ ኣማኒስ፤ ፆሳይ ሄሳ ኢያው ፂሎቴꬂ ኦꬂዲ ኤኪስ› ያጌስ» ጊዳ።
ROM 4:10 ያቲን፥ ሄሲ ኣዉዴ ሃኒዴ? ኣብራሃሜይ ቃፃሬቲኔዬ? ዎይኮ ቃፃሬቶና ዴዒሺኔ? ቃፃሬታናፔ ሲንꬄ ሃኒሲፔ ኣቲን ጉዬ ጊዴና።
ROM 4:11 ኣብራሃሜይ ቃፃሬታናፔ ሲንꬄ ኢያ ኣማኖይ ኢያው ፂሎቴꬂ ጊዲዲ ታይቤቲዳይሳ ኤሪሳናው፥ ኢያ ቃፃሮይ ማላታ ጊዲስ። ሄሳ ጊሾ፥ ኣብራሃሜይ ቃፃሬቶና ኣማኔይሳታሲኔ ኣማኖን ፂሌይሳታ ኡባስ ኣዋ ጊዲስ።
ROM 4:12 ኢ ቃፃሬቲዳይሳታስካ ኣዋ። ኣብራሃሜይ ኤንታው ኣዋ ጊዲዳይ ኤንቲ ቃፃሬቲዳ ጊሾ ፃላላስ ጊዶናሺን ኢ ቃፃሬታናፔ ሲንꬄ ኣማኒዳ ኣማኑዋ ኤንቲ ካሊዳ ጊሾሳ።
ROM 4:13 ኣብራሃሜሲኔ ኢያ ሼሻስ፥ «ኣላሚያ ታ ሂንቴው ኢማና» ያጊዳ ኡፋይሳይ፥ ኣብራሃሜይ ኣማኖን ፂሊዳ ጊሾሳፌ ኣቲን ሂጌ ናጊዲ ፖሊዳ ጊሾ ጊዴና።
ROM 4:14 ሂጌስ ኪቴቲዳይሳቲ ፆሳይ ኢማና ጊዳ ኡፋይሳ ላታኤይሳታ ጊዲኮ፥ ኣሳ ኣማኖይ ማዴና፤ ፆሳ ኡፋይሳይካ ሃዳ ጊዲስ።
ROM 4:15 ሂጌ ሜንꬆይ ፆሳ ሃንቆ ኤሄስ፥ ሺን ሂጌይ ባይናሶን ሂጌ ሜንꬆይ ባዋ።
ROM 4:16 ሄሳ ጊሾ፥ ፆሳይ ኢሚዳ ኡፋይሳይ ኣማኖን ኤኬቴስ። ሃ ኡፋይሳይ ኣብራሃሜ ሼሻ ኡባስ ፆሳ ኣꬎ ኬሃቴꬃ ባጋራ ኢሜቲዳይሳ ቆንጪሴስ። ሄሲካ ሂጌ ናጌይሳታ ፃላላስ ጊዶናሺን ኣብራሃሜዳ ኣማኒዳ ኡባሳ። ኣብራሃሜይ ኑ ኡባስ ኣዋ።
ROM 4:17 ጌሻ ማፃፋን፥ «ታ ኔና ዳሮ ካዎቴꬃታስ ኣዋ ኦꬃስ» ጌቴቲዲ ኣብራሃሜ ጊሾ ፃፌቲስ። ሃ ኡፋይሳይ ኣብራሃሜስ ኢሜቲዳይ ሃይቂዳይሳታስ ዴዖ ኢሜይሲኔ ኦራꬃባ ኦꬂያ ፆሳይ ኢያ ጊዴይሳ ኢ ኣማኒዳ ጊሾሳ።
ROM 4:18 ፆሳይ ኣብራሃሜስ ዳሮ ዜሬꬂ ኢማናይሳ ጫቂስ። ኡፋይሲ ኦꬃናው ኣይኮካ ዳንዳዔቶና ዎዴ ኣብራሃሜይ ፆሳን ኣማኒዳ ጊሾኔ ኡፋይሲ ኦꬂዳ ጊሾ ዳሮ ካዎቴꬃታስ ኣዋ ጊዲስ።
ROM 4:19 ኣብራሃሜስ ፄቱ ላይꬂ ኩማና ሃኒኮካ፥ ባ ዳቡሪዳ ኣሳቴꬃኔ ሳራ ናዓ ዬላናው ዳንዳዖናይሳ ኤሪሼ ባ ኣማኑዋን ዳቡሪቤና።
ROM 4:20 ጊዶሺን፥ ኢ ባ ኣማኑዋን ሚኒዲ ፆሳስ ቦንቾ ኢሚስፔ ኣቲን ፆሳይ ኢሚዳ ኡፋይሳ ኣማኖና ኢፂዲ፥ ሲꬊቤና።
ROM 4:21 ኣብራሃሜይ፥ ፆሳይ ጫቂዳ ጫቁዋ ፖላናይሳ ባ ኩሜꬃ ዎዛናን ኣማኒስ።
ROM 4:22 ሄሳ ጊሾ፥ ፆሳይ ኢያ ኣማኑዋ ፂሎቴꬃን ታይቢስ።
ROM 4:23 ሺን፥ «ኢያው ፂሎቴꬃን ታይቢስ» ጊያ ቃላይ ኣብራሃሜ ፃላላስ ፃፌቲቤና።
ROM 4:24 ሄ ቃላይ ኑ ጎዳ ዬሱሳ ሃይቆፔ ዴንꬂዳ ፆሳ ኣማኒያ ኑስካ ኑ ኣማኖይ ፂሎቴꬃን ታይቤታና ሜላ ፃፌቲስ።
ROM 4:25 ፆሳይ ኢያ ኑ ናጋራ ጊሾ ሃይቆስ ኣꬂዲ ኢሚስ፤ ኢ ኑና ፂሊሳናው ሃይቆፔ ዴንዲስ።
ROM 5:1 ሂዛ፥ ኑ ኣማኖን ፂሊዳ ጊሾ ኑ ጎዳ ዬሱስ ኪሪስቶሳ ባጋራ ፆሳራ ኑስ ሳሮቴꬂ ዴዔስ።
ROM 5:2 ኑኒ ኢያ ባጋራ ሃዒ ኑ ኤቂዳ ኣꬎ ኬሃቴꬃ ጊዶ ኣማኖን ጌሊዳ። ሄሳ ጊሾ፥ ኑ ፆሳ ቦንቹዋ ሻኬታናው ዴዒያ ኡፋይሳን ጬቄቶስ።
ROM 5:3 ሄሳ ፃላላ ጊዶናሺን ሜቶይ ዳንዳዓ ኤሄይሳ ኑ ኤሪያ ጊሾ ኑ ሜቱዋንካ ጬቄቶስ።
ROM 5:4 ቃሲ ዳንዳዓይ ጌንጫ፥ ጌንጫይ ኡፋይሲ ኢሜይሳ ኑ ኤሮስ።
ROM 5:5 ኑስ ኢሚዳ ጌሻ ኣያና ባጋራ ፆሳይ ባ ሲቁዋ ኑ ዎዛናን ጉሲዳ ጊሾ ሄ ኡፋይሳይ ኑና ዬላዬና።
ROM 5:6 ኑኒ ቡሮ ዳቡራንቾታ ጊዲዲ ዴዒሺን፥ ፆሳ ዎዴይ ጋኪን፥ ኪሪስቶሲ ናጋራንቾታ ጊሾ ሃይቂስ።
ROM 5:7 ፂሎ ኣሳ ጊሾ ሃይቃና ኣሲ ዴማናይሲ ዳሮ ሜቶ፥ ሺን ኬሃ ኣሳ ጊሾ ሃይቃና ኣሲ ኦኒ ኤሪ ቤንቶና ኣጌና።
ROM 5:8 ሺን ኑኒ ቡሮ ናጋራንቾ ጊዲዲ ዴዒሺን፥ ኪሪስቶሲ ኑ ጊሾ ሃይቂስ። ሄሲ ፆሳይ ኑና ኣይ ሜላ ሲቂያኮ ኢያ ሲቁዋ ቤሴስ።
ROM 5:9 ሂዛ፥ ኑኒ ኪሪስቶሳ ሱꬃን ፂሊዳባ ጊዲኮ፥ ኡባፌ ኣꬂዲ ኢያ ባጋራ ፆሳ ሃንቁዋፌ ኣታና።
ROM 5:10 ኑኒ ፆሳራ ካሴ ሞርኬ፥ ሺን ኢያ ናዓ ሃይቁዋን ኢያራ ሲጌቲዳ። ሄሳፌ ኣꬂዲ፥ ሃዒ ኑኒ ፆሳራ ሲጌቲዳፔ ጉዬ ኢያ ናዓ ዴዑዋ ጋሶን ኑኒ ኣታና።
ROM 5:11 ሄሳ ፃላላ ጊዶናሺን ሃዒ ኑና ፆሳራ ሲጌꬂዳ ኑ ጎዳ ዬሱስ ኪሪስቶሳ ባጋራ ኑ ፆሳን ጬቄቶስ።
ROM 5:12 ኣዳሜ ባጋራ ናጋሪ ሃ ኣላሚያ ጌሊስ። ሄ ናጋራ ባጋራ ሃይቆይ ዪስ። ኣሲ ኡባይ ናጋራ ኦꬂዳ ጊሾ ሃይቆይ ኣሳ ዛሬ ኡባ ጋኪስ።
ROM 5:13 ሂጌይ ኢሜታናፔ ሲንꬄ ኣላሜን ናጋሪ ዴዔስ፥ ሺን ሂጌይ ባይና ዎዴ ናጋሪ ናጋራ ጊዲዲ ታይቤቴና።
ROM 5:14 ሺን ኣዳሜፔ ሙሴ ጋካናው ሃይቆይ ኣሳ ኡባ ሃሪስ። ሃሪ ኣቶሺን፥ ኣዳሜዳ ሂጌስ ኪቴቶና ኢፂዲ፥ ናጋራ ኦꬂቦናይሳታ ቦላካ ሃይቆይ ካዎቲስ። ኣዳሜይ ያና ዬሱሳስ ሌሚሶ።
ROM 5:15 ሺን ፆሳ ኣꬎ ኬሃቴꬃይ ኣዳሜ ናጋራ ሜላ ጊዴና። ኢሲ ኣሳ ናጋራ ባጋራ ዳሮ ኣሳይ ሃይቂስ። ሺን ዬሱስ ኪሪስቶሳ ባጋራ ፆሳ ኣꬎ ኬሃቴꬃይ ኣሳ ኡባስ ዳሪዲ ኢሜቲስ።
ROM 5:16 ኣዳሜ ናጋራ ጊዶኒኔ ፆሳ ኢሞታ ጊዶን ዳሮ ዱማቴꬂ ዴዔስ። ኢሲ ኣሳ ናጋራ ጋሶን ፆሳይ ኢያ ቦላ ፒርዲስ። ሺን ኣሳይ ዳሮ ናጋራ ኦꬂንካ ፆሳ ኣꬎ ኬሃቴꬃይ ፂሎቴꬃ ኤሂስ።
ROM 5:17 ኢሲ ኣሳ ናጋራ ጋሶን ሃይቆይ ኣሳ ኡባ ቦላ ካዎቲስ። ሺን ዬሱስ ኪሪስቶሳ ባጋራ ፆሳ ኣꬎ ኬሃቴꬃኔ ፂሎቴꬃ ኢሞታ ኤኪያ ኡባይ፥ ፆኖ ዴዖን ዴዖሶና።
ROM 5:18 ሂዛ፥ ኢሲ ኣሲ ናጋራ ኦꬂዳ ጋሶን ኣሳ ኡባ ቦላ ፒርዲ ዪዳይሳዳ ኢሲ ኣሲ ፂሎ ኦꬂዳ ጋሶን፥ ፆሳይ ኣሴ ኡባ ፂሊሲዲ ኤንታው ዴዖ ኢሜስ።
ROM 5:19 ኢሲ ኣሲ ኪቴቶና ኢፂዳ ጋሶን፥ ዳሮ ኣሳይ ናጋራንቾ ጊዲዳይሳዳ ኢሲ ኣሳ ኪቴቴꬃን ዳሮ ኣሳይ ፂላና።
ROM 5:20 ኣሳይ ናጋራ ዎልቃ ኤራና ሜላ ሂጌይ ዪስ፥ ሺን ናጋራ ዎልቃይ ዳሪዳ ዎዴ ፆሳ ኣꬎ ኬሃቴꬃይ ኣꬊዲ ዳሪስ።
ROM 5:21 ናጋሪ ሃይቆ ዎልቃን ካዎቲዳይሳ ሜላ ፆሳ ኣꬎ ኬሃቴꬃይ ፂሎቴꬃ ዎልቃን ካዎቲዲ፥ ኑ ጎዳ ዬሱስ ኪሪስቶሳ ባጋራ ኑና ሜሪና ዴዑዋኮ ካሌꬄስ።
ROM 6:1 ያቲን፥ ኑኒ ዎይጋኔ? ፆሳ ኣꬎ ኬሃቴꬃይ ዳራና ሜላ ናጋራን ሚኒዲ ዴዒኖ?
ROM 6:2 ኣካይ፥ ኑኒ ናጋራስ ሃይቂዳባ ጊዲኮ፥ ያቲን፥ ኑኒ ሂዛፔ ዋኒዲ ናጋራን ዳኔ?
ROM 6:3 ኑ ኡባይ ኪሪስቶስ ዬሱሳራ ኢሲፋናው ፃማቄቲዳ ዎዴ ኢያ ሃይቁዋን ኢያራ ኢሲፋናው ፃማቄቲዳይሳ ኤሬኬቲዬ?
ROM 6:4 ኑ ፃማቄቲዳ ዎዴ ኪሪስቶሳራ ሃይቂዳኔ ሞጌቲዳ። ኪሪስቶሲ ፆሳ ኣዋ ቦንቾ ዎልቃን ሃይቆፔ ዴንዲዳይሳ ሜላ ኑካ ኦራꬃ ዴዖን ዳና።
ROM 6:5 ኑ ኢያ ሃይቁዋን ኢያራ ኢሲኖ ጊዲኮ፥ ሄሳዳካ፥ ኢያ ዴንዱዋን ኢያራ ኢሲኖ ጊዳና።
ROM 6:6 ኑ ሂዛፔ ናጋራስ ኣይሌ ጊዶና ሜላኔ ኑ ናጋራንቾ ኣሳቴꬃ ዎልቃይ ꬋያና ሜላ ኑ ጪማ ኣሳቴꬃይ ኪሪስቶሳራ ካቄቲዳይሳ ኤሮስ።
ROM 6:7 ኢሲ ኣሲ ኪሪስቶሳን ሃይቂዳባ ጊዲኮ፥ ኢ ናጋራ ዎልቃፌ ላዓ ኬዪስ።
ROM 6:8 ኑኒ ኪሪስቶሳራ ሃይቂኮ፥ ኢያራ ዴዖን ዳናይሳ ኣማኖስ።
ROM 6:9 ኪሪስቶሲ ሃይቆፔ ዴንዲዳ ጊሾ ዛሪ ኢ ሃይቆናይሳኔ ሃይቆይ ሲንꬃፌ ኢያ ሃሮናይሳ ኑ ኤሮስ።
ROM 6:10 ኢ ሃይቂዳ ዎዴ ናጋራስ ኢሲ ቶሆ ዉርሴꬂ ጋካናው ሃይቂስ፥ ሺን ሃዒ ዴዖን ፆሳስ ዴዔስ።
ROM 6:11 ሄሳዳካ፥ ሂንቴ ናጋራስ ሃይቂዲ፥ ጎዳ ኪሪስቶስ ዬሱሳ ባጋራ ፆሳስ ዴዖን ዴዔይሳ ቆፒቴ።
ROM 6:12 ሄሳ ጊሾ፥ ሂንቴ፥ ሂንቴ ኣሳቴꬃ ኣሙዋስ ኪቴቶና ሜላ ሃይቂያ ሂንቴ ኣሳቴꬃ ናጋሪ ሃሮፖ።
ROM 6:13 ቃሲ ሂንቴ ኣሳቴꬃ ናጋራ ኦꬃናው ጌላቴꬃ ሚሼ ኦꬂዲ ኢሞፊቴ። ሺን ሂንቴ ሃይቆፔ ዴንዲዲ፥ ዴዖን ዴዒያ ኣሳዳ ሂንቴ ኣሳቴꬃ ፆሳስ ኢሚቴ። ቃሲ ሂንቴ ኩሜꬃ ኣሳቴꬃ ፂሎ ኦሶ ኦꬃናው ፆሳስ ኣꬂ ኢሚቴ።
ROM 6:14 ሂንቴ ፆሳ ኣꬎ ኬሃቴꬃ ጋርሳን ዴዔታፔ ኣቲን ሂጌፌ ጋርሳን ዴዖና ጊሾ ናጋሪ ሂንቴና ሃራናው ቤሴና።
ROM 6:15 ያቲን፥ ኑ ዎይጋኔ? ሂጌፌ ጋርሳን ጊዶናሺን ፆሳ ኣꬎ ኬሃቴꬃ ጋርሳን ዴዒያ ጊሾ ናጋራ ኦꬃኔዬ? ኣካይ!
ROM 6:16 ሂንቴ ኢሲ ኣሳስ ኪቴታናው ሂንቴና ኣይሌ ኦꬂዲ ኢሚያ ዎዴ ሄ ሂንቴ ኪቴቴይሳስ ኣይሌ ጊዴይሳ ኤሬታ። ሄሳዳካ፥ ሂንቴ ናጋራስ ኪቴቲኮ፥ ሂንቴው ሃይቆ ኤሂያ ናጋራስ ኣይሌ ጊዴታ። ዎይኮ ሂንቴ ፆሳስ ኪቴቲኮ ፂሎቴꬂ ኤሂያ ፆሳስ ኣይሌ ጊዴታ።
ROM 6:17 ካሴ ሂንቴ ናጋራስ ኣይሌ፥ ሺን ሃዒ ሂንቴ ኤኪዳ ቱማ ቲሚርቲያስ ኩሜꬃ ዎዛናፔ ኪቴቲዳ ጊሾ ፆሳስ ጋላቲ ጊዶ።
ROM 6:18 ሂንቴ ናጋራ ኣይሌቴꬃ ቃሾፔ ቢሌቲዲ ፂሎቴꬃ ኣይሌ ጊዲዴታ።
ROM 6:19 ሂንቴ ሂንቴ ቆፋን ዳቡራንቾ ጊዲያ ጊሾ ታኒ ኦዴስካ ጌሊያ ኦጌን ኦዳይስ። ካሴ ሂንቴ፥ ሂንቴ ኣሳቴꬃ ቱናኔ ኢታባ ኦꬃናው ኣይሌ ኦꬂዲ ኢሚዳይሳ ሜላ ሃዒ ሂንቴ ኣሳቴꬃ ጌሺ ጊዳና ሜላ ፂሎቴꬃ ኣይሌ ኦꬂዲ ኢሚቴ።
ROM 6:20 ሂንቴ ናጋራስ ኣይሌቲዲ ዴዒያ ዎዴ ፂሎቴꬃስ ሃሬቴኬታ።
ROM 6:21 ሂንቴና ሃዒ ዬላያ ቤኒ ሂንቴ ኢታ ኦሱዋፔ ኣይ ማዴ ዴሚዴቲ? ሄ ኦሶታ ዉርሴꬃይ ሃይቆ።
ROM 6:22 ሺን ሂንቴ ናጋራ ኣይሌቴꬃ ቃሾፔ ቢሌቲዲ፥ ፆሳስ ኣይሌ ጊዲዴታ። ሄሲ ሂንቴና ጌሺ ኦꬂዲ ሜሪና ዴዑዋኮ ካሌꬄስ።
ROM 6:23 ናጋራ ጋቴይ ሃይቆ። ሺን ፆሳይ፥ ኑ ጎዳ ኪሪስቶስ ዬሱሳ ባጋራ ኢሚያ ኢሞታይ ሜሪና ዴዖ።
ROM 7:1 ታ ኢሻቶ፥ ታኒ ኦዴይ ሂጌ ኤሪያ ኣሳታሳ። ሂጌይ ኢሲ ኣሲ ፓፃ ዴዒያ ዎዴ ኡባን ኢያ ሃሬስ።
ROM 7:2 ሌሚሶስ፥ ኣዚና ጌሊዳ ማጫሲያ ኢ ኣዚናይ ፓፃ ዴዒያ ዎዴ ሂጌን ኢያራ ቃሼታሱ። ሺን ኢ ኣዚናይ ሃይቂኮ ኢያራ ኢያ ጫቂዳ ጫቆይ ኢዮ ሃሬና።
ROM 7:3 ሄሳ ጊሾ፥ ኢያ ባ ኣዚናይ ፓፃ ዴዒሺን፥ ሃራ ኣዴ ጌሊኮ፥ ኢያ ላሚዳሮ ጌቴታዉሱ። ሺን ኢ ኣዚናይ ሃይቂኮ፥ ጫቆይ ኢዮ ሃሮና ጊሾ ኢያ ሃራ ኣዚና ጌሊኮ፥ ኢያ ላሚዳሮ ጌቴቱኩ።
ROM 7:4 ሄሳ ጊሾ፥ ታ ኢሻቶ፥ ሂንቴ ኪሪስቶሳ ኣሳቴꬃ ባጋራ ሂጌ ዎልቃስ ሃይቂዲ፥ ፆሳስ ኣይፌ ኣይፋናው ሃይቆፔ ዴንዲዳ ኪሪስቶሳስ ጊዲዴታ።
ROM 7:5 ኑ ኣሾ ኣሞይ ኑና ሃሪን፥ ኑ ዴዒያ ዎዴ ሂጌይ ጉጂ ናጋራ ኦꬃና ሜላ ኑና ዴንꬄꬄስ። ኑ ኣሳቴꬃ ጊዶን ኢታ ኣሞቴꬂ ዴዒያ ጊሾ ኑኒ ሃይቆ ኣይፌ ኣይፋና ሜላ ኦꬂስ።
ROM 7:6 ሺን ሃዒ ኑኒ ኑና ቃቺዳ ሂጊያስ ሃይቂዳ ጊሾ ኑኒ ሂጌ ቃሾፔ ቢሌቲዳ። ሄሳ ጊሾ፥ ጌሻ ኣያና ኦጌን ፆሳስ ኪቴቶሲፔ ኣቲን ፃፌቲዳ ጪማ ሂጊያስ ኪቴቶኮ።
ROM 7:7 ያቲን፥ ኑኒ ዎይጋኔ? ሂጌይ ባ ሁዔን ናጋሬ? ጊዴና! ሺን ሂጌይ ናጋሪ ኣይቤኮ ታና ኤሪሲስ። ሂጌይ፥ «ኣሞቶፋ» ጎናኮ፥ ኣሞቴꬂ ኣይቤኮ ታኒ ኤሪኬ።
ROM 7:8 ሺን ታ ኡባባ ኣሞታና ሜላ ናጋሪ ሂጌ ባጋራ ታናን ኦጌ ዴሚስ። ሂጌይ ባይኔኮ ናጋሪ ሃይቂዳይሳ።
ROM 7:9 ካሴ ሂጌይ ባይና ዎዴ ታ ፓፃ፥ ሺን ሂጌይ ኢሜቲዳ ዎዴ ናጋሪ ፓፂን ታ ቃሲ ሃይቃስ።
ROM 7:10 ታኒ ዴዖን ዳና ሜላ ፆሳይ ኢሚዳ ሂጌይ ታው ሃይቆ ኤሂስ።
ROM 7:11 ናጋሪ ሂጌ ባጋራ ታና ጪሚያ ኦጌ ዴሚዲ፥ ዎꬊስ።
ROM 7:12 ሄሳ ጊሾ፥ ሂጌይ ጌሺ፤ ኢያን ፃፌቲዳ ኪታይካ ጌሺ፥ ፂሎኔ ሎዖ።
ROM 7:13 ያቲን፥ ሎዖ ጊዲዳባይ ታ ቦላ ሃይቆ ኤሂዴዬ? ጊዴና! ሺን ናጋሪ ናጋራ ጊዴይሲ ቆንጫና ሜላ ሎዖባን ማዴቲዲ ታው ሃይቆ ኤሂስ። ሄሳ ጊሾ፥ ናጋራ ናጋራቴꬃይ ሂጌ ባጋራ ኣꬊዲ ኤሬቲስ።
ROM 7:14 ኑኒ ሂጌይ ኣያናባ ጊዴይሳ ኤሮስ። ሺን ታኒ ናጋራስ ባይዜቲዳ ኣሾ ኣሲ።
ROM 7:15 ታኒ ኦꬂያባ ኣኬኪኬ፤ ታኒ ዶሲያባ ኦꬃናይሳ ኣጋዳ ታ ኢፂያባ ኦꬃይስ።
ROM 7:16 ታኒ ኢፂያባ ኦꬂያባ ጊዲኮ፥ ሂጌይ ሎዖ ጊዴይሳ ማዓይስ።
ROM 7:17 ሄሳ ጊዲኮ፥ ሄ ኦሱዋ ታናን ዴዒያ ናጋራይ ኦꬃይሲፔ ኣቲን ታ ኦꬂኬ።
ROM 7:18 ታናን፥ ሄሲካ ታ ኣሹዋን ሎዖባይ ባይናይሳ ኤራይስ። ሎዖባ ኦꬂያ ኣሞቴꬂ ታናን ዴዔስ፥ ሺን ሎዖባ ኦꬃናው ዳንዳዒኬ።
ROM 7:19 ታኒ ኢፂያ ኢታባ ኦꬃይሲፔ ኣቲን ታ ዶሲያ ሎዖባ ኦꬂኬ።
ROM 7:20 ታኒ ኢፂያባ ኦꬂያባ ጊዲኮ፥ ሄሳ ታናን ዴዒያ ናጋራይ ኦꬄሲፔ ኣቲን ኦꬄይ ታና ጊዲኬ።
ROM 7:21 ሂዛ፥ ታ ሎዖባ ኦꬃናው ዶሲሺን፥ ኢታባ ኦሶይ ዎጋ ጊዴይሳ ዴማስ።
ROM 7:22 ታኒ ታ ዎዛናን ፆሳ ሂጊያን ኡፋይታይስ።
ROM 7:23 ሺን ታ ኣሳቴꬃ ጊዶን ዴዒያ ታ ቆፋ ሂጊያራ ኦሌቲያ ዱማ ሂጌ ቤዓይስ። ሄ ሂጌይ ታ ኣሳቴꬃ ጊዶን ኦꬂያ ናጋራ ሂጊያስ ታና ኣይሌ ኦꬂዲ ኢሚስ።
ROM 7:24 ታኒ ዋኒዳ ዪባታ ኣሴ? ሃይቆስ ኤፊያ ሃ ኣሳቴꬃፌ ታና ኣሻናይ ኦኔ?
ROM 7:25 ኑ ጎዳ ዬሱስ ኪሪስቶሳ ባጋራ ታና ኣሺያ ፆሳስ ጋላቲ ጊዶ። ሂዛ፥ ታኒ ታ ቆፋን ፆሳ ሂጊያስ ሃሬታይስ፤ ሺን ታ ኣሳቴꬃን ታና ናጋራ ኦሲሲያ ሂጊያስ ሃሬታይስ።
ROM 8:1 ሄሳ ጊሾ፥ ኪሪስቶስ ዬሱሳን ዴዔይሳቲ ሃዒ ፒርዴቶኮና።
ROM 8:2 ኪሪስቶስ ዬሱሳ ባጋራ ኑስ ዴዖ ኢሚያ ጌሻ ኣያና ሂጌይ፥ ታና ናጋራኔ ሃይቆ ሂጌ ኣይሌቴꬃፌ ኬሲስ።
ROM 8:3 ኑ ናጋራ ኣሳቴꬃ ጋሶን፥ ሂጌይ ዳቡራንቾ ጊዲያ ጊሾ ኑና ኣሻናው ዳንዳዒቤና። ፆሳይ ባ ናዓ ናጋራንቾ ኣሳ ሌሚሶን ናጋራስ ያርሾ ጊዳና ሜላ ኪቲዲ ሄሳ ኦꬂስ። ያቲዲ፥ ፆሳይ ኪሪስቶሳ ኣሹዋ ባጋራ ናጋራ፥ ናጋራንቾ ኣሳ ጊዶን ፒርዲስ።
ROM 8:4 ፆሳይ ሄሳ ኦꬂዳይ፥ ኑ ኣሾ ኣሞይ ኮዬይሳዳ ጊዶናሺን ጌሻ ኣያናይ ኮዬይሳዳ ዴዒያ ኑ ቦላ ሂጊያ ፂሎ ኪታይ ፖሌታና ሜላሳ።
ROM 8:5 ባንታ ኣሾ ኣሙዋ ካሊዲ ዴዔይሳቲ ባንታና ኡፋይሲያባ ቆፖሶና። ሺን ጌሻ ኣያና ሼኔን ዴዔይሳቲ ጌሻ ኣያና ኡፋይሲያባ ቆፖሶና።
ROM 8:6 ኑ ቆፋይ ኣሾ ኣሞስ ሃሬቲኮ ሃይቆ ኤሄስ፥ ሺን ኣያና ኣሞስ ሃሬቲኮ ዴዖኔ ሳሮቴꬂ ኤሄስ።
ROM 8:7 ኣሾ ኣሞስ ሃሬቲያ ኣሲ ፆሳ ሂጊያስ ኪቴታናው ኮዮና ጊሾኔ ኪቴታናው ዳንዳዖና ጊሾ ፆሳራ ሞርኬ።
ROM 8:8 ባንታ ኣሾ ኣሙዋስ ሃሬቴይሳቲ ፆሳ ኡፋይሳናው ዳንዳዖኮና።
ROM 8:9 ሺን ፆሳ ኣያናይ ሂንቴናን ዴዒኮኔ ሂንቴና ሃሪኮ፥ ሂንቴ ኣያና ሼኔን ዴዔታፔ ኣቲን ሂንቴ ኣሾ ኣሙዋስ ሃሬቴኬታ። ኪሪስቶሳ ኣያናይ ባይና ኦኒካ ኪሪስቶሳባ ጊዴና።
ROM 8:10 ሺን ኪሪስቶሲ ሂንቴናን ዴዒኮ፥ ሂንቴ ኣሳቴꬃይ ናጋራ ጋሶን ሃይቂዳይሳ። ሺን ሂንቴ ኣያናይ ፂሎቴꬃ ጋሶን ዴዖን ዴዔስ።
ROM 8:11 ሺን ዬሱሳ ሃይቆፔ ዴንꬂዳ ፆሳ ኣያናይ ሂንቴናን ዴዒኮ፥ ኪሪስቶሳ ሃይቆፔ ዴንꬂዳ ፆሳይ፥ ሂንቴናን ዴዒያ ባ ጌሻ ኣያናን ሃይቂያ ሂንቴ ኣሳቴꬃስ ዴዖ ኢማና።
ROM 8:12 ሂዛ፥ ታ ኢሻቶ፥ ኑኒ ኑ ኣሾ ኣሙዋ ካሊዲ ዳናው ቤሴና።
ROM 8:13 ሂንቴ፥ ሂንቴ ኣሾ ኣሙዋስ ዴዒኮ ሃይቃና፥ ሺን ጌሻ ኣያና ዎልቃን ናጋራ ኦሱዋ ዎꬊኮ ሂንቴ ዴዖን ዳና።
ROM 8:14 ፆሳ ኣያናይ ካሌꬂያ ኡባይ ፆሳ ናይታ።
ROM 8:15 ኑኒ፥ «ኣባ፥ ታ ኣዋው» ያጊዲ ፄጊያ፥ ፆሳ ናይታ ኦꬂያ ጌሻ ኣያና ኤኪዳፔ ኣቲን ዛሪዲ ያሻን ዳናው ኣይሌ ኦꬂያ ኣያና ኤኪቦኮ።
ROM 8:16 ፆሳ ኣያናይ ኑ ኣያናራ ጊዲዲ ኑኒ ፆሳ ናይታ ጊዴይሳ ማርካቴስ።
ROM 8:17 ኑኒ ኢያ ናይታ ጊዲኮ ፆሳ ኣንጁዋ ላታና፤ ኪሪስቶሳራ ዎላ ሄ ኣንጁዋ ላታና። ቃሲ ኑኒ ኪሪስቶሳራ ሜቱዋ ኤኪኮ ኢያራ ዎላ ኢያ ቦንቹዋን ሻኬታና።
ROM 8:18 ኑኒ ሃዒ ዋዬቲያ ዋያ፥ ሲንꬃፌ ኑስ ቆንጫና ቦንቹዋራ ጋꬂ ቤዒኮ፥ ጊኒሳናው ዳንዳዔቴና ጋዳ ቆፓይስ።
ROM 8:19 ሜꬌቴꬃ ኡባይ ፆሳ ናይታ ቆንጬꬃ ዳሮ ላሞቲዲ ናጎሶና።
ROM 8:20 ሜꬌቴꬃ ኡባይ ሃዳ ጊዲስ፤ ሄሲካ፥ ሜꬌቴꬃ ዶሮን ጊዶናሺን ኡፋይሳን ናጋና ሜላ ኦꬂዳ ፆሳ ሼኔን ሃኒስ።
ROM 8:21 ሜꬌቴꬃይ ባ ሁዔን ꬋዮ ኣይሌቴꬃፌ ዎዜቲዲ፥ ፆሳ ናይታራ ዎላ ቦንቾ ላዓ ሻኬታና።
ROM 8:22 ሜꬌቴꬃይ ኢሲፌ ሃኖ ጋካናው ሚፆይ ኦይኪዳ ማጫሳዳ ኦሌኒኔ ኡንዓን ዴዔይሳ ኑ ኤሮስ።
ROM 8:23 ቃሲ ሄሳ ሜꬌቴꬃ ፃላላ ጊዶናሺን ጌሻ ኣያና ባይራ ኢሞታዳ ኤኪዳ ኑኒ፥ ኑ ሁዔን ኑ ኣሳቴꬃስ ዎዞ ጊዲዳ ፆሳ ናይታ ጊዳና ኡፋይሳ ናጊሼ ኑ ኣሳቴꬃን ኦሎስ።
ROM 8:24 ሃ ኡፋይሳን ኑኒ ኣቲዳ። ሺን ኑኒ ኡፋይሲ ኦꬂያባይ ቤንቲያ ጊዲኮ ሄሳ ኦኒ ኡፋይሲ ኦꬂ?
ROM 8:25 ሺን ኑ ቤዖናባ ዴማና ጊዲ ኡፋይሳን ናጊኮ ሄሳ ዳንዳዓን ናጎስ።
ROM 8:26 ሄሳዳ ጌሻ ኣያናይ ኑ ዳቡራን ማዴስ። ኑኒ ፆሳ ዋቲ ዎሳናው ቤሲያኮ ኤሮኮ፥ ሺን ጌሻ ኣያናይ ባ ሁዔን፥ ኣሲ ኦዳናው ዳንዳዔቶና ቃላን ኑስ ጋናቴስ።
ROM 8:27 ቃሲ ኣሳ ዎዛና ኤሪያ ፆሳይ ጌሻ ኣያና ቆፋይ ኣይቤኮ ኤሬስ። ጌሻ ኣያናይ ፆሳ ሼኒያዳ ጌሻታስ ጋናቴስ።
ROM 8:28 ፆሳ ሲቄይሳታሲኔ ኢያ ሼኒያዳ ፄጌቲዳይሳታስ ፆሳይ ኡባ ሎዖስ ኦꬄይሳ ኤሮስ።
ROM 8:29 ፆሳይ ኮይሮቲዲ ኤሪዳይሳቲ ባ ናዓ ዳናና ሜላኔ ናዓይካ ኣማኔይሳታ ጊዶን ባይራ ጊዳና ሜላ ኤንታ ዱማዪዲ ዎꬂስ።
ROM 8:30 ፆሳይ ኮይሮቲዲ ዱማዪዳይሳታ ፄጊስ፤ ሄ ፄጊዳይሳታ ፂሊሲስ፤ ሄ ፂሊሲዳይሳታ ቃሲ ቦንቺስ።
ROM 8:31 ያቲን፥ ኑ ሃ ኡባስ ዎይጋኔ? ፆሳይ ኑ ባጋ ጊዲኮ ኑራ ኦኔ ኤቄታናይ?
ROM 8:32 ኢ ሃሪ ኣቶሺን፥ ባ ናዓስ ቃꬌቶናሺን፥ ኑ ጊሾ ኣꬂ ኢሚስ። ያቲን፥ ባ ናዓ ኑስ ኣꬂ ኢሚዳይሲ ዋኒዲ ኡባባ ጮ ኢሜኔ?
ROM 8:33 ፆሳይ ኤንታና ፂሊሲዳ ጊሾ ኢ ዶሪዳይሳታ ኦኔ ሞታናይ?
ROM 8:34 ያቲን፥ ኤንታ ቦላ ፒርዳናው ዳንዳዔይ ኦኔ? ኦኒካ ባዋ። ሃይቆፔ ዴንዲዲ ፆሳ ኡሻቻን ኡቲዳ፥ ኪሪስቶስ ዬሱሲ፥ ኢ ኑስ ጋናቴስ።
ROM 8:35 ሂዛ፥ ኑና ኪሪስቶሳ ሲቁዋፔ ሻካናይ ኦኔ? ዋዬዬ ዎይኮ ሜቶዬ ዎይኮ ጎዴዬ ዎይኮ ኮሼዬ ዎይኮ ካሎቴꬄዬ ዎይኮ ያሼዬ ዎይኮ ኦሌዬ?
ROM 8:36 ጌሻ ማፃፋን፥ «ኑኒ ኔ ጊሾ ጋላሳ ኩሜꬃ ሃይቆስ፤ ሹካስ ኤፊያ ዶርሳዳ ታይቤቲዳ» ጌቴቲዲ ፃፌቲዳይሳ ሜላ ጊዲስ።
ROM 8:37 ሺን ኑኒ፥ ኑና ሲቂዳ ኪሪስቶሳን ሃ ኡባ ፖሎ ፆኖስ።
ROM 8:38 ሄሳ ጊሾ፥ ሃይቆ ጊዲን ዴዖ ጊዲን ኪታንቾታ ጊዲን ሃሬይሳታ ጊዲን ሃዒ ዴዔይሳ ጊዲን ሲንꬃፌ ያናይሳ ጊዲን ዎልቃማታ ጊዲን፥
ROM 8:39 ሳሎ ዎልቃ ጊዲን ሳዓ ዎልቃ ጊዲን ኣይ ሜꬌቴꬂ ጊዲን ኑ ጎዳ፥ ኪሪስቶስ ዬሱሳን ዴዒያ ፆሳ ሲቁዋፔ ኑና ሻካናው ዳንዳዖናይሳ ታኒ ኤራስ።
ROM 9:1 ታኒ ኪሪስቶሳን ቱማ ኦዳይስ፥ ዎርዶቲኬ። ጌሻ ኣያናይ ካሌꬂያ ታ ካሃይ ታኒ ዎርዶቶናይሳ ታው ማርካቴስ።
ROM 9:2 ታ ዎዛናን ኢስራዔሌታስ ዳሮ ቃꬌታይሲኔ ቃማ ጋላስ ቆፓይስ።
ROM 9:3 ታኒ፥ ታ ኢሻታ ጊሾ ኪሪስቶሳፔ ሻኬታዳ ፆሳ ቃንጌꬃፌ ጋርሳን ዴዒዳኮ ዶሳይሲሺን።
ROM 9:4 ኤንቲ ኢስራዔሌታ፥ ፆሳይ ኤንታ ባ ናይታ ኦꬂስ፥ ባ ቦንቹዋ ኤንታው ቆንጪሲስ። ኤንታራ ጫቂስ፤ ሂጊያ ኤንታው ኢሚስ። ኤንቲ ፆሳ ጎይናና ቱማ ኦጊያ ቤሲስ፤ ፆሳይ ኡፋይሳ ቃላ ኤንታው ኢሚስ።
ROM 9:5 ኤንቲ ዬሌቴꬃን ማይዛታ ዛሬ፤ ቃሲ ኪሪስቶሲ ኣሾን ኤንታ ዛሬ ጊዲዲ ዪስ። ኡባፌ ቦላ ጊዲዳ ፆሳይ ሜሪናው ጋላቴቶ። ኣሚንዒ!
ROM 9:6 ጊዶሺን፥ ፆሳይ ጌሊዳ ቃላይ ፖሌቶና ኣቲስ ጉሱ ጊዴና። ኢስራዔሌ ኣሳ ኡባይ ፆሳ ኣሲ ጊዶኮና።
ROM 9:7 ቃሲ ኣብራሃሜ ዛሬ ኡባይ ኣብራሃሜ ናይታ ጊዶኮና። ፆሳይ ኣብራሃሜስ፥ «ኔ ዜሬꬃይ ዪሳቃ ባጋራ ፄጌታና» ያጊስ።
ROM 9:8 ሄሳ ጉሳይ ኣሾን ዬሌቲዳ ናይቲ ኡባይ ፆሳ ናይታ ጊዶኮና። ሺን ቱማ ኢስራዔሌ ናይቲ ፆሳይ ኣብራሃሜስ ጌሊዳ ቃላዳ ዬሌቲዳ ናይታ።
ROM 9:9 ፆሳይ ኢማና ጊዲ ጌሊዳ ቃላይ፥ «ታኒ ዎንቶ ላይꬂ ሃኖዴ ያና፤ ሳራካ ኣዴ ናዓ ዬላና» ያጌይሳ።
ROM 9:10 ሄሳ ፃላላ ጊዶናሺን ኢርቢቂኔ ዪሳቂ ዬሊዳ ሜንቴ ኣዴ ናይታባ ኣኬኪቴ።
ROM 9:11 ኤንቲ ዬሌታናፔ ዎይኮ ኢታ ዎይኮ ሎዖ ኦꬃናፔ ሲንꬄ ፆሳ ዶሮይ ኦሶን ጊዶናሺን ፄሳን ጊዴይሳ ቆንጪሳናው፥
ROM 9:12 «ባይራይ ካሉዋስ ኪቴታና» ያጊዲ ጎዳይ ኢርቢቃስ ኦዲስ።
ROM 9:13 ሄሲካ ጌሻ ማፃፋን፥ «ያይቆባ ዶሳስ፥ ኤሳዌ ኢፃስ» ጌቴቲዲ ፃፌቲስ።
ROM 9:14 ያቲን፥ ኑኒ ዎይጋኔ? ፆሳይ ኣሴ ኣሳፔ ሻኪዬ? ጊዴና።
ROM 9:15 ጎዳይ ሙሴኮ፥ «ታ ማራናው ኮዪዳይሳታ ማራና፤ ታ ቃꬌታናው ኮዪዳይሳታስ ቃꬌታና» ያጊስ።
ROM 9:16 ሂዛ፥ ፆሳ ዶሮይ ኣሳ ሼኔን ዎይኮ ኦሶን ጊዶናሺን ኢያ ማሮቴꬃና።
ROM 9:17 ጌሻ ማፃፋን፥ ጊብፄ ካዉዋኮ፥ «ታኒ፥ ታ ዎልቃ ኔናን ቤሳናዉኔ ታ ሱንꬃይ ኣላሜ ኡባን ኤሬታና ሜላ ሄሳስ ኔና ካዎꬃስ» ጌቴቲዲ ፃፌቲስ።
ROM 9:18 ሂዛ፥ ፆሳይ ማራናው ኮዬይሳ ማሬስ፤ ዎዛና ሙሚሳናው ኮዬይሳ ዎዛና ሙሚሴስ።
ROM 9:19 ሂንቴፌ ኢሶይ፥ «ያቲን፥ ፆሳይ ኣሴ ኢታ ኦሶ ጊሾ ኣይስ ቦሪ? ፆሳ ሼኒያ ኢፃስ ጋናይ ኦኔ?» ያጊዲ ኦይቻናው ዳንዳዔስ።
ROM 9:20 ሺን ታ ኢሻው፥ ፆሳራ ፓላማናው ኔኒ ኦኔ? ኡርቃፌ ሜꬌቲዳ ሚሼይ ባና ሜꬊዳይሳ፥ «ታና ሃይሳዳ ኦꬃዳ ኣይስ ሜꬋዲ?» ጊዲ ኦይቻናው ዳንዳዒ?
ROM 9:21 ዎይኮ ኡርቃ ሜꬌይሲ ኢሲ ኡርቃፌ ኢሱዋ ቦንቾ ሚሼ፥ ሃንኩዋ ቃሲ ቶሼ ሚሼ ኦꬂዲ ሜꬋናው ማቲ ባዌ?
ROM 9:22 ፆሳይ ባ ሃንቁዋ ቤሳናዉኔ ባ ዎልቃ ኤሪሳናው ኮዪዲ፥ ፒርዳስ ጊጊዳ ሃንቆ ናይታ ዳሮ ጌንጫን ዳንዳዒዳኮ ኔ ኣይ ኤራይ?
ROM 9:23 ሄሳ ኢ ኦꬂዳይ ኮይሮቲዲ ቦንቾስ ጊጊሲዳ፥ ባ ዶሪዳ ናይታስ ባ ቦንቹዋ ቆንጪሳናሳ።
ROM 9:24 ኣይሁዴ ጊዲን፥ ዎይኮ ኣይሁዴ ጊዶና ኣሳ ኡባይ ፆሳን ዶሬቲዳ።
ROM 9:25 ናቢያ ሆሴዔ ማፃፋን፥ «ታ ኣሴ ጊዶናይሳታ፥ ‹ታ ኣሴ› ጋዳ ፄጋና። ታ ሲቃቦና ዴሪያ፥ ‹ሲቄቲዳይሳታ› ጋዳ ፄጋና።
ROM 9:26 ኤንቲ፥ ‹ታ ኣሴ ጊዴኬታ› ጌቴቲ ፄጌቲዳ ቤሳን፥ ‹ዴዖ ፆሳ ናይታ› ጌቴቲዲ ፄጌታና» ያጌስ።
ROM 9:27 ናቢያ ኢሳያሲ ኢስራዔሌ ኣሳባ፥ «ኢስራዔሌ ኣሳይ ኣባ ጋፃን ዴዒያ ሻፊያዳ ዳሪኮካ፥ ኤንታፌ ጉꬃ ኣሳ ፃላሊ ኣታና።
ROM 9:28 ጎዳይ ኣላሚያ ኡባ ቦላ ኤሌሲዲ ፖሎ ፒርዳ ፒርዳና።»
ROM 9:29 ቃሲካ ኢሳያሲ፥ «ኡባፌ ዎልቃማ ጎዳይ ኑስ ጉꬃ ዜሬꬂ ኣሾናባ ጊዲያኮ፥ ኑኒ ሶዶሜኔ ጋሞራ ካታማዳ ꬋያናሺን» ያጊዲ ኮይሮቲዲ ኦዲስ።
ROM 9:30 ያቲን፥ ኑ ዎይጋኔ? ፂሎቴꬃ ኮዪቦና ኣይሁዴ ጊዶና ኣሳይ ኣማኖን ፂሎቴꬂ ዴሚዶሶና።
ROM 9:31 ሺን ፂሎቴꬃኮ ጋꬂያ ሂጌይ ዴዒያ ኢስራዔሌ ኣሳይ ፂሎቴꬂ ዴሚቦኮና።
ROM 9:32 ኣይስ ዴሚቦኮና? ኤንቲ ፂሎቴꬃ ኣማኖን ጊዶናሺን ኦሶን ኤካናው ኮዪዳ ጊሾሳ። ያኒያ ጊሾ፥ ኤንቲ፥ «ꬉቢያ ሹቻን» ꬉቤቲዶሶና።
ROM 9:33 ጌሻ ማፃፋን፥ «ታኒ ፂዮኔን ꬉቢ ኩንዲሲያ ሹቻ ዎꬃና። ኢያን ኣማኒያ ኦኒካ ዬላቴና» ጌቴቲዲ ፃፌቲስ።
ROM 10:1 ታ ኢሻቶ፥ ታ ኩሜꬃ ዎዛናን ታ ኣሞቴይኔ ፆሳ ዎሴይ ኢስራዔሌይ ኣታና ሜላሳ።
ROM 10:2 ኤንቲ ፆሳስ ሚሼቶሶናሺን፥ ቱማ ኤራቴꬃን ሚሼቶናይሳ ታ ማርካታይስ።
ROM 10:3 ኤንቲ ፆሳ ፂሎቴꬃ ኦጊያ ኤሮና ኢፂዲ፥ ባንታ ሁዔ ፂሎቴꬃ ካሊዶሶናፔ ኣቲን ፆሳ ፂሎቴꬃ ኮዪቦኮና።
ROM 10:4 ኣሲ ኡባይ ኣማኖን ፂላና ሜላ ኪሪስቶሲ ሂጊያ ፖሊስ።
ROM 10:5 ኣሲ ሂጌ ናጊዲ ኤኪያ ፂሎቴꬃባ ሙሴይ ፃፊሼ፥ «ሂጌ ናጊያ ኦኒካ ሄ ሂጊያ ናጊዳ ሜላ ዴዔስ» ያጊስ።
ROM 10:6 ሺን ኣማኖን ኤኪያ ፂሎቴꬃባ ጌቴቲዳይ ሃይሳ፡ «ኔ ዎዛናን፥ ‹ኦኒ ሳሎ ኬያኔ?› ያጎፓ፤ ሄሲ ኪሪስቶሳ ዎꬊሳናሳ።
ROM 10:7 ዎይኮ፥ ‹ዱጌ ሳዓ ጋርሲ ዎꬋናይ ኦኔ?› ጎፓ፤ ሄሲ ኪሪስቶሳ ዱፎፔ ኬሳናሳ።
ROM 10:8 ሺን ያጊዲ ፃፌቲስ፡ ‹ፆሳ ቃላይ ኔ ማታና፤ ኔ ዶናኒኔ ኔ ዎዛናን ዴዔስ› ኑኒ ሂንቴው ኦዲያ ኣማኖ ቃላይ ሃይሳ።
ROM 10:9 «ዬሱሲ ጎዳ» ጋዳ ኔ ዶናን ማርካቲኮኔ ፆሳይ ኢያ ሃይቆፔ ዴንꬂዳይሳ ኔ ዎዛናን ኣማኒኮ፥ ኔ ኣታና።
ROM 10:10 ኣሲ ባ ዎዛናን ኣማኒዲ ፂሌስ፤ ባ ዶናን ማርካቲዲ ኣቴስ።
ROM 10:11 ጌሻ ማፃፋይ፥ «ኢያን ኣማኒያ ኦኒካ ዬላቴና» ያጌስ።
ROM 10:12 ኢሲ ፆሳይ ኡባ ጎዳ ጊዲያ ጊሾ ኣይሁዴታ ጊዶኒኔ ኣይሁዴ ጊዶና ኣሳ ጊዶን ዱማቴꬂ ባዋ። ኢ ባና ፄጊያ ኡባስ ዳሮ ኬሃ።
ROM 10:13 ጌሻ ማፃፋይ፥ «ጎዳ ሱንꬃ ፄጊያ ኦኒካ ኣታና» ያጌስ።
ROM 10:14 ያቲን፥ ኤንቲ ኣማኖና ዴዒሼ ዋኒዲ ኢያ ፄጋናው ዳንዳዖና? ኤንቲ ኢያባ ሲዖና ዴዒሼ ዋቲዲ ኢያ ኣማናናው ዳንዳዖና? ቃሲ ኤንታው ቃላ ኦዲያ ኣሲ ባይና ዴዒሺን፥ ዋኒዲ ሲዓናው ዳንዳዖና?
ROM 10:15 ኪቴቲዳ ኣሲ ባይና ዴዒሺን፥ ቃላይ ዋኒዲ ኦዴታናው ዳንዳዒ? ጌሻ ማፃፋን፥ «ኡፋይሳ ዎንጌላ ኦዲያ ኣሳ ቶሆቲ ዋኒዲ ሎዖና!» ያጊዲ ፃፌቲስ።
ROM 10:16 ሺን ኢሳያሲ፥ «ጎዳው፥ ኑ ማርካቴꬃ ኦኒ ኣማኒዴ?» ያጊዳይሳዳ፥ ኡባይ ዎንጌላ ኣማኒቦኮና።
ROM 10:17 ሄሳ ጊሾ፥ ኣማኖይ ሲሳፌ ዬስ፤ ሲሲ ኪሪስቶሳ ቃላፔ ዬስ።
ROM 10:18 ጊዶሺን፥ ኢስራዔሌ ኣሳይ ቃላ ሲዒቦኮና ጉሴዬ? ኣካይ ሲዒዶሶና። ጌሻ ማፃፋን፥ «ኤንታ ቃላይ ቢታ ኡባን ሲዔቲስ፥ ኤንታ ኦዳይ ሳዓ ጋፃ ጋኪስ» ያጌቲስ።
ROM 10:19 ሺን ኢስራዔሌ ኣሳይ ኤሪቦኮና ጉሴዬ? ሙሴይ ካሴ፥ «ታኒ ሂንቴና ሌቄቲዳ ኣሳን ቂሮይሳና፤ ቃሲ ኤያ ኣሳን ሂንቴና ዪሎያና» ያጊስ።
ROM 10:20 ቃሲ ኢሳያሲ፥ «ታና ኮዪቦና ኣሳስ ቤንታስ፤ ታና ኦይቺቦና ኣሳስ ቆንጫስ» ያጊዲ ያዮና ኦዲስ።
ROM 10:21 ሺን ኢሳያሲ ኢስራዔሌታባ ኦዲሼ፥ «ኡባ ዎዴ ኪቴቶና ኣሳሲኔ ታና ኢፂያ ኣሳስ ታ ኩሺያ ሚጫስ» ያጌስ።
ROM 11:1 ኣኔ ታ ኦይቻይስ፡ ያቲን፥ ፆሳይ ባ ኣሳ ኣጊዴዬ? ኣጊቤና! ታኒ ታ ሁዔን ኢስራዔሌ፤ ኣብራሃሜ ሼሺ፤ ቢኒያሜ ዛሬ።
ROM 11:2 ፆሳይ ኮይሮ ዶሪዳ ባ ኣሳታ ዬጌና። ጌሻ ማፃፋን፥ ኤሊያሲ ኢስራዔላታ ፆሳ ሲንꬃን ዋቲ ሞቲዳኮ፥ ሂንቴ ኤሬኬቲ?
ROM 11:3 ኤሊያሲ፥ «ጎዳው፥ ኤንቲ ኔ ናቤታ ዎꬊዶሶና፥ ኔ ያርሾ ቤሳካ ላሊዶሶና። ታ ታርካ ኣታስ፤ ኤንቲ ታናካ ዎꬋናው ኮዮሶና» ያጊስ።
ROM 11:4 ፆሳይ ኢያው ዎይጊ ዛሪዴ? «ባዓሌ ኤቃስ ጎይኒቦና ላፑን ሙኩሉ ኣሳ ታው ኣሻስ» ያጊስ።
ROM 11:5 ሄሳዳካ፥ ሃ ዎዲያን ፆሳይ ባ ኣꬎ ኬሃቴꬃን ዶሪዳ ጉꬃ ኢስራዔሌቲ ዴዖሶና።
ROM 11:6 ኢ ኤንታ ዶሪዳይ ባ ኣꬎ ኬሃቴꬃናፔ ኣቲን ኤንታ ኦሶን ጊዴና። ዶሮይ ኦሶን ጊዲኮ፥ ኢያ ኣꬎ ኬሃቴꬃይ ቱማ ኣꬎ ኬሃቴꬂ ጊዴና።
ROM 11:7 ያቲን፥ ዋኒዴ? ኢስራዔሌቲ ባንታ ኮያባ ዴሚቦኮና፥ ሺን ፆሳይ ዶሪዳ ጉꬃቲ ዴሚዶሶና። ኣቲዳይሳቲ ባንታ ዎዛና ሙሚሲዶሶና።
ROM 11:8 ሄሲካ፥ ጌሻ ማፃፋን፥ «ኤንቲ ባንታ ኣይፊያን ቤዖናዳ ባንታ ሃይꬃን ሲዖናዳ፥ ሃኖ ጋካናው ኤንታው ፆሳይ ኣዛላ ኣያና ኢሚስ» ጌቴቲዲ ፃፌቲዳይሳዳ ሃኒስ።
ROM 11:9 ቃሲ ዳዊቴይ፥ «ኤንቲ ሚያ ጋይታይ ኤንታ ፂሄዳ ኦይኮ፤ ኤንታ ጉፋንꬂያ ኣፎ ጊዶ፤ ኤንታ ኢታቴꬃይ ኤንታ ቦላ ጋኮ።
ROM 11:10 ኤንቲ ፄሎናዳ ኤንታ ኣይፌይ ጎዜቶ፤ ኡባ ዎዴ ሜቶን ኤንቲ ኩኒዲ ዴዖ» ያጊስ።
ROM 11:11 ያቲን፥ ኣይሁዴቲ ዛሪ ዴንዶና ሜላ ኩንዲዶናዬ? ጊዴና! ኤንታ ኩንዴꬃይ ኣይሁዴ ጊዶና ኣሳይ ኣታና ሜላ ጋሶ ጊዲስ። ሄሲካ ኣይሁዴቲ ኤንታ ቦላ ቃናታናዳ ኦꬂስ።
ROM 11:12 ኣይሁዴታ ናጋራይ ኣላሚያስ ዳሮ ኣንጆ ኤሂስ፤ ቃሲ ኤንታ ኩንዴꬃይ ኣይሁዴ ጊዶና ኣሳስ ዳሮ ኣንጆ ጊዲስ። ያቲን፥ ዶሬቲዳ ኣይሁዴቲ ኩሜꬂ ኣቲያ ዎዴ ኣንጆይ ኣይ ሜላ ዳራንዴሻ!
ROM 11:13 ታኒ፥ ሃዒ ሂንቴው ኣይሁዴ ጊዶና ኣሳስ ኦዳይስ። ኣይሁዴ ጊዶና ኣሳስ ሃዋሬ ጊዳዳ ኦꬄይሳን ታኒ ዳሮ ጬቄታይስ።
ROM 11:14 ታ ሄሳ ኦꬂዳይ ታው ኣሾን ዛሬ ጊዲዳ ኢስራዔሌታ ቂሮያዳ ኤንታፌ ጉꬃታ ኣሻናሳ።
ROM 11:15 ፆሳይ ኤንታ ዬጊዳ ዎዴ ሃ ኣላሜይ ፆሳራ ሲጌቲስ። ፆሳይ ኤንታ ሺሺ ኤኪያ ዎዴ ሃይቂዳ ኣሲ ሃይቆፔ ዴንዲዳ ሜላ ጊዴስ።
ROM 11:16 ኮይሮ ሜንꬂዳ ባሶ ኡይꬃይ ፆሳስ ያርሼቲዲ ጌሺ ጊዲኮ፥ ሙሜ ኡይꬃይካ ጌሺ። ሚꬃስ ፃጶይ ጌሺ ጊዲኮ፥ ታሼይካ ጌሺ።
ROM 11:17 ጋዴን ቶኪዳ ሻማሆ ታሼ ጊዲዳ ኣይሁዴቲ ካሬቲን፥ ሂንቴ ባዞን ዶሊዳ ሻማሆ ታሼ ጊዲዳ ኣይሁዴ ጊዶናይሳቲ ኤንታ ቤሳን ꬋንꬄቲዲ ኤንታ ኣንጁዋኔ ዱሬቴꬃ ሻኬቲዴታ።
ROM 11:18 ሂዛ፥ ሂንቴ ታሼዳ ካሬቲ ዎꬊዳ ኣይሁዴታ ቦላ ኦቶርቶፊቴ። ሂንቴ ኦቶርቲያባ ጊዲኮ፥ ፃጶይ ሂንቴና ቶኬሲፔ ኣቲን ሂንቴ ፃጱዋ ቶኮናይሳ ኣኬኪቴ።
ROM 11:19 ኔኒ፥ «ሄ ታሼቲ ካሬቲዳይ፥ ታ ኤንታ ቤሳን ꬋንꬄታና ሜላሳ» ጋናው ዳንዳዓሳ።
ROM 11:20 ሄሲ ቱማ። ኤንቲ ኣማኒቦና ጊሾ ካሬቲዶሶና። ኔኒ ኣማኒዳ ጊሾ ሄ ቤሳን ኤቃዳሳ። ኔኒ ያያናው ቤሴስፔ ኣቲን ኦቶራናው ቤሴና።
ROM 11:21 ፆሳይ ሜꬎን ታሼ ጊዲዳ ኣይሁዴታስ ቃꬌቶና ኢፂኮ ሂንቴዉካ ቃꬌቴና።
ROM 11:22 ሂዛ፥ ፆሳይ ኣይ ሜላ ኬሄኮኔ ኣይ ሜላ ያሺያኮ ቤዓ። ኢ ያሼይ ኪቴቶናይሳታ፥ ቃሲ ኢ ኬሄይ ኢያ ኣማኒዲ ሚኒዲ ኤቂዳይሳታሳ። ሚኒዲ ኤቆና ኢፂኮ ሂንቴካ ካሬታና።
ROM 11:23 ኣይሁዴቲ ኣማኒኮ፥ ካሴ ኤንቲ ዴዒያ ቤሳ ሲማና። ፆሳይ ኤንታ ዛሪዲ፥ ዎꬃናው ዳንዳዔስ።
ROM 11:24 ሂንቴና ባዞን ዴዒያ ሻማሆ ጊዲዳ ኣይሁዴ ጊዶናይሳታ ቃንፂዲ፥ ጋዴን ቶኬቲዳ ሻማሁዋ ቦላ ሂንቴና ቶኪኮ፥ ሜꬎን ጋዴ ሻማሆ ጊዲዳ ኣይሁዴታ ባንታ ኮይሮ ቤሳን ዛሪ ቶካናው ዋኒዲ ዳንዳዔቴኔ?
ROM 11:25 ታ ኢሻቶ፥ ሂንቴ ሂንቴና ኤራንቾ ጊዲ ጬቄቶፊቴ። ታ ሂንቴው ኦዲያ ኢሲ ፁሪ ዴዔስ። ሄሲካ ኢስራዔሌታፔ ባጋይ ሲዖና ኢፂዳይ ዉርሴꬂ ጋካናው ጊዶናሺን ኣታናው ዴዒያ ኣይሁዴ ጊዶና ኣሳይ ኩሜꬂ ፆሳኮ ያና ጋካናሳ።
ROM 11:26 ሄሳዳካ፥ ኢስራዔሌ ኣሳ ኡባይ ኣታና። ጌሻ ማፃፋን፥ «ኑና ኣሼይሲ ፂዮኔፔ ያና፤ ያይቆባ ዜሬꬃፌ ኢታ ኡባ ዲጋና።
ROM 11:27 ታኒ ኤንታ ናጋራ ኣቶ ጊያ ዎዴ ኤንታራ ጫቃና ጫቆይ ሃይሳ» ጌቴቲዲ ፃፌቲስ።
ROM 11:28 ኣይሁዴቲ ዎንጌላ ኤኮና ኢፂዲ፥ ሂንቴ ጊሾ ፆሳራ ሞርኬ ጊዲዶሶና። ጊዶሺን፥ ሃዒካ ኤንቲ ዶሬቲዳይሳታ፥ ፆሳይ ኤንታ ኣዋታ ጊሾ ኤንታ ዶሴስ።
ROM 11:29 ፆሳይ ባ ኢሙዋኒኔ ባ ፄሳን ቂሮቴና።
ROM 11:30 ሂንቴ ኣይሁዴ ጊዶናይሳቲ ካሴ ፆሳስ ኪቴቲቤኬታ። ሺን ሃዒ ኣይሁዴቲ ኪቴቶና ኢፂን፥ ሂንቴ ፆሳ ማሮቴꬃ ኤኪዴታ።
ROM 11:31 ሄሳዳካ፥ ሂንቴ ኤኪዳ ማሮቴꬃ ኣይሁዴቲ ኤካና ሜላ ሃዒ ፆሳስ ኪቴቶና ኢፂዶሶና።
ROM 11:32 ፆሳይ ኣሳ ኡባ ባ ማሮቴꬃ ቤሳናው ኮዪዲ፥ ኣሲ ኡባይ ኪቴቶና ኢፃና ሜላ ኦꬂስ።
ROM 11:33 ፆሳ ዱሬቴꬃ፥ ጪንጫቴꬃኔ ኤራቴꬃ ኣኬኪዲ ኦዳናይ ኦኔ? ኢያ ፒርዳይ ፒልጌቴና፥ ኢያ ኦጌይ ኤሬቴና።
ROM 11:34 ጌሻ ማፃፋን፥ «ጎዳ ቆፋ ኤሬይ ኦኔ? ኢያ ዞራናው ዳንዳዔይ ኦኔ?
ROM 11:35 ፆሳስ ታልዔይኔ ታልዒያ ዛሪዲ ኤኬይ ኦኔ?» ያጌስ።
ROM 11:36 ኡባ ኢ ሜꬊስ፤ ኡባይ ኢያን ዴዔስ፤ ኡባይ ኢያ ቦንቾሳ። ፆሳስ ሜሪናው ቦንቾይ ጊዶ። ኣሚንዒ።
ROM 12:1 ሂዛ፥ ታ ኢሻቶ፥ ሂንቴ፥ ሂንቴ ኣሳቴꬃ ፆሳ ኡፋይሲያ፥ ዴዖኔ ጌሻ ያርሾ ኦꬂዲ፥ ኢማና ሜላ ታኒ ሂንቴና ፆሳ ማሮቴꬃን ዎሳይስ። ፆሳ ሂንቴ ጎይናናው ቤሲያ ቱማ ኦጌይ ሄሳ።
ROM 12:2 ሎዖ፥ ኡፋይሴይሳኔ ፖሎ ጊዲዳ ፆሳ ሼኒያ ሂንቴ ሻኪ ኤራናው ሂንቴ ቆፋን ላሜቲቴፔ ኣቲን ሃ ኣላሚያ ዳኖፒቴ።
ROM 12:3 ፆሳይ ሂንቴ ኢሱዋስ ኢሱዋስ ኢሚዳ ኣማኑዋ ሜላ ዎዛናማ ኣሳዳ ቆፒቴ። ቆፓናው ቤሴይሳፌ ኣꬂዲ ሂንቴና ዱማዪዲ፥ ኦቶሮን ቆፖፊቴ ጋዳ ታው ኢሜቲዳ ኣꬎ ኬሃቴꬃን ሂንቴው ኦዳይስ።
ROM 12:4 ኑ ኢሲ ኣሳቴꬃ ጊዶን ዱማ ዱማ ኪፊሌቲ ዴዖሶና፤ ሄ ዱማ ዱማ ኪፊሌታስ ዱማ ዱማ ኦሶይ ዴዔስ።
ROM 12:5 ሄሳዳ፥ ኑኒ ዳሮ ኣሲ ጊዲኮካ ኪሪስቶሳን ኢሲ ኣሳቴꬂ ጊዲዳ። ኑኒ ኢሲ ኣሳቴꬂ ጊዲዲ ዱማ ዱማ ኪፊሌቲ ኢሶይ ኢሱዋራ ኦይኬቲዳ።
ROM 12:6 ኑስ ኢሜቲዳ ኣꬎ ኬሃቴꬃን ዱማ ዱማ ኢሞታቲ ዴዖሶና። ኑ ኢሞይ ቲንቢት ኦዶ ጊዲኮ፥ ኑስ ዴዒያ ኣማኑዋ ሜላ ኦዳናው ቤሴስ።
ROM 12:7 ኑ ኢሞይ ሃራታ ማዴ ጊዲኮ፥ ሄ ኦሱዋን ሚናናው ቤሴስ፤ ታማርሶ ጊዲኮ፥ ሄ ታማርሱዋን ሚናናው ቤሴስ።
ROM 12:8 ኑ ኢሞይ ሃራታ ሚንꬄꬆ ጊዲኮ፥ ሚኒዲ ሚንꬄꬃናው ቤሴስ። ኑ ኢሞይ ኑስ ዴዒያባፔ ሃራታስ ኢሞ ጊዲኮ፥ ዎዛናፔ ኢማናው ቤሴስ። ኑ ኢሞይ ኣይሶ ጊዲኮ፥ ሚኒዲ ኣይሳናው ቤሴስ። ኑ ኢሞይ ሃራታስ ኬሆ ጊዲኮ፥ ኡፋይሳን ኬሃናው ቤሴስ።
ROM 12:9 ሂንቴ ሲቆይ ቆꬌፔ ቆሞን ጊዳናው ቤሴና። ኢታባ ኢፂቴ፤ ሎዖባ ሚንꬂዲ ኦይኪቴ።
ROM 12:10 ኢሶይ ኢሱዋራ ኢሻዳ ሲቄቲቴ፤ ኢሶይ ኢሱዋ ቦንቺቴ።
ROM 12:11 ኣዛሎፊቴ፤ ሂንቴ ኣያናን ሚኒዲ ጎዳስ ኦꬂቴ።
ROM 12:12 ፆሳይ ኢሚዳ ኡፋይሳን ኡፋይቲቴ፤ ሜቱዋ ዳንዳዒቴ፤ ኡባ ዎዴ ፆሳ ዎሲቴ።
ROM 12:13 ኣማኒያ ጌሻታ ኮሺያባን ማዲቴ፤ ኢማꬃታ ሞኪቴ።
ROM 12:14 ሂንቴና ጎዴይሳታ ኣንጂቴ፤ ኣንጂቴፔ ኣቲን ባዶፊቴ።
ROM 12:15 ኡፋይቴሳታራ ኡፋይቲቴ፤ ዬኬይሳታራ ዬኪቴ።
ROM 12:16 ኢሶይ ኢሱዋራ ኢሲ ቆፋን ዴዒቴ። ኦቶሮ ቆፋ ኣጊዲ፥ ሂንቴና ካዉሺዲ፥ ካዉሻ ኦሶ ኦꬂቴ። ሂንቴ ሂንቴና ጪንጫ ጊዲ ቆፖፊቴ።
ROM 12:17 ኦኒካ ሂንቴው ኢታባ ኦꬂኮ፥ ሄ ኡራስ ኢታ ዛሮፒቴ። ኣሳ ኡባ ሲንꬃን ናሺሲያ ሎዖ ኦሶ ኦꬂቴ።
ROM 12:18 ኣሳ ኡባራ ሳሮን ዳናው ሂንቴው ዳንዳዔቲያ ኡባ ኦꬂቴ።
ROM 12:19 ታ ኢሻቶ፥ ሂንቴ፥ ሂንቴ ሁዔን ኣሳስ ሃሎ ኬዮፒቴ። ፆሳይ ሃሎ ኬያና ሜላ ኢያው ኣጋጊቴ። ጌሻ ማፃፋን፥ «ታኒ ሃሎ ኬያና፤ ታኒ ኩሼ ዛራና» ያጌስ ጎዳይ፥ ጌቴቲዲ ፃፌቲስ።
ROM 12:20 ሺን ጌሻ ማፃፋን፥ «ኔ ሞርኬይ ኮሻቲኮ ሙዛ፤ ኢ ሳሞቲኮ ኡሻ። ኔኒ ሄሳ ኦꬂኮ ኢያ ሁዔን ዬላ ታማ ቦንቆ ቆላሳ» ጌቴቲዲ ፃፌቲስ።
ROM 12:21 ኢታ ሎዖን ፆናፔ ኣቲን ኢታን ፆኔቶፋ።
ROM 13:1 ፆሳ ሼኔ ጊዶናሺን ማቲ ኢሜቶና ጊሾኔ ሃዒ ዴዒያ ሹማቲካ ፆሳ ሼኔን ሹሜቲዳ ጊሾ ኣሲ ኡባይ ዴሪያ ኣይሴይሳታስ ኪቴታናው ቤሴስ።
ROM 13:2 ሄሳ ጊሾ፥ ማታራ ዴዔይሳታስ ኪቴቶና ኢፂያ ኦኒካ ፆሳ ኪታ ኢፄስ። ኪቴቶና ኢፂያ ኦኒካ ባ ቦላ ፒርዳ ኤሄስ።
ROM 13:3 ኣይሴይሳቲ ኢታ ኦꬄይሳታፔ ኣቲን ሎዖ ኦꬄይሳታ ያሾኮና። ኣይሴይሳታስ ያዮና ኣጋናው ኮያይ? ያኮ ሎዖ ኦꬃ፤ ኤንቲ ኔና ጋላታና።
ROM 13:4 ኤንቲ ኔው ሎዖባ ኦꬃናው ሹሜቲዳ ፆሳ ኣይሌ። ሺን ኔኒ ኢታባ ኦꬂኮ፥ ኤንቲ ኢታባ ኦꬂዳይሳ ሴሪያ ጊሾ ኢያው ያያ። ኤንቲ ኢታ ኦꬄይሳታ ሴሪዲ፥ ፆሳ ሃንቁዋ ቆንጪሲያ ፆሳ ኣይሌ።
ROM 13:5 ሄሳ ጊሾ፥ ፆሳ ሃንቁዋ ፃላላስ ጊዶናሺን ሂንቴ ካሃይ ማርካቲያ ጊሾ ዴሪያ ኣይሴይሳታስ ኪቴታናው ቤሴስ።
ROM 13:6 ሂንቴ ጊራ ጊሬይካ ሄሳሳ። ዴሪያ ኣይሴይሳቲ ሄ ኦሱዋ ኦꬄይ፥ ኤንቲ ፆሳ ኣይሌታ ጊዲዳ ጊሾሳ።
ROM 13:7 ኢሱዋስ ኢሱዋስ ቤሴይሳ ኢሚቴ። ጊራ ጊራናው ቤሴይሳስ ጊሪቴ፤ ቃራፃ ቃንፃናው ቤሴይሳስ ቃራፃ ቃንፂቴ፤ ያያናው ቤሴይሳስ ያዪቴ፤ ቦንቾይ ቤሴይሳ ቦንቺቴ።
ROM 13:8 ኢሶይ ኢሱዋራ ሲቄቲቴ። ሲቆ ኣጮፔ ኣቲን ሂንቴ ቦላ ሃራ ኣጮይ ዶፖ። ኣሴ ሲቂያ ኦኒካ ሂጌይ ጌይሳ ፖሊስ።
ROM 13:9 «ላሞፋ፤ ዎꬎፓ፤ ካይሶቶፓ፤ ኣሞቶፋ» ጊያ ኪታይኔ ሃራ ኪታ ኡባይ፥ «ኣሴ ኔ ሁዔዳ ዶሳ» ጊያ ኪታን ቃሼቲስ።
ROM 13:10 ኣሴ ሲቂያ ኦኒካ ኢያ ቦላ ኢታባ ኦꬄና። ሄሳ ጊሾ፥ ኣሴ ሲቄይሲ ሂጌ ኪታ ፖሊስ።
ROM 13:11 ꬊስኮፌ ሂንቴ ባርኪያ ዎዴይ ሃዒ ጊዴይሳ ኣኬኪዲ ሄሳ ኦꬂቴ። ኑ ኣታና ዎዴይ ኮይሮ ኑ ኣማኒዳ ዎዲያፔ ሃዒ ኑኮ ማቲስ።
ROM 13:12 ꬉማ ዎዴይ ኣꬋናው ሃኔስ፤ ዎንታይ ማቲስ። ሂዛ፥ ኑኒ ꬉማ ኦሶ ኣጊዲ ፖዖ ኦላ ሚሼ ኦይኮስ።
ROM 13:13 ኣኔ ጋላስ ፖዖን ዴዒያ ኣሳዳ ማራን ዴዖስ። ማꬆኒኔ ላይማቴꬃራ ጋሄቲያ ዱማ ዱማ ቱና ኦሶታን፥ ፓላማኒኔ ቃናቴን ጊዶፖ።
ROM 13:14 ጎዳ ዬሱስ ኪሪስቶሳ ካንዱዋ ማዒቴ፤ ሂንቴ ናጋራንቾ ኣሳቴꬃይ ባ ኣሙዋ ፖላና ሜላ ኢያው ቆፖፊቴ።
ROM 14:1 ኣማኖን ዳቡሪዳ ኦናካ ሺሺ ኤኪቴፔ ኣቲን ኢያ ቆፋ ቦላ ፒርዶፊቴ።
ROM 14:2 ሌሚሶስ፥ ኣማኖን ሚኒዳ ኢሲ ኣሲ ኣይ ካꬂካ ማናው ዳንዳዔስ። ሺን ኣማኖን ዳቡሪያ ኣሲ ኣታኪልቴ ፃላላ ሜስ።
ROM 14:3 ኡባባ ሚያ ኣሲ ሞና ኡራ ካꬎፖ። ኡባባ ሞና ኣሲ ሚያ ኡራ ቦላ ፒርዶፎ። ፆሳይ ኡባ ሚያ ኡራ ሺሺ ኤኪስ።
ROM 14:4 ሃራ ኣሳ ኣይሌ ቦላ ፒርዴይ ኔኒ ኦኔ? ኢ ዳቡሪን ዎይኮ ሚኒን ባ ጎዳሳ። ጎዳይ ኢያ ኤሳናው ዳንዳዒያ ጊሾ ኢ ሚኒዲ ኤቃና።
ROM 14:5 ቃሲ «ኢሲ ጋላሳይ ሃራ ጋላሳፔ ኣꬌስ» ያጊዲ ቆፒያ ኣሲ ዴዔስ። ሃራይ ቃሲ፥ «ጋላሳቲ ኡባይ ኢሲ ሜላ» ጊዲ ቆፔስ። ሺን ኢሶይ ኢሶይ ባ ቆፋ ኣኬኪዲ ቃቾ።
ROM 14:6 ኢሲ ጋላሳ ሃራ ጋላሳታፔ ኣꬂዲ ቦንቺያ ኦኒካ ጎዳ ቦንቾስ ጊዲ ኦꬄስ። ኡባ ካꬂ ሚያ ኣሲ ጎዳ ቦንቾስ ጊዲ ሜስ። ኢ ሚያ ሄ ካꬃ ጊሾ ፆሳ ጋላቴስ። ኡባ ካꬂ ሞና ኣሲ ጎዳ ቦንቾስ ሞና ኣጌስ፤ ቃሲ ሞና ኣጎን ፆሳ ጋላቴስ።
ROM 14:7 ኑፔ ኦኒካ ባው ዴና፤ ቃሲ ኑ ጊዶፌ ኦኒካ ባው ሃይቄና።
ROM 14:8 ኑ ዴዖን ዴዒኮ ጎዳስ ዴዖስ፤ ቃሲ ሃይቂኮካ ጎዳስ ሃይቆስ። ሂዛ፥ ኑ ዴዖን ዴዒን ዎይኮ ሃይቂን ጎዳሳ።
ROM 14:9 ኪሪስቶሲ ሃይቂዲ ሃይቆፔ ዴንዲዳይ፥ ዴዖን ዴዔይሳታሲኔ ሃይቂዳይሳታስ ጎዳ ጊዳናሳ።
ROM 14:10 ያቲን፥ ኔኒ ኔ ኢሻ ቦላ ኣይስ ፒርዳይ? ዎይኮ ኔኒ ኔ ኢሻ ኣይስ ካꬋይ? ኑኒ ኡባይ ፆሳ ፒርዳ ኣራታ ሲንꬃን ኤቃና።
ROM 14:11 ጌሻ ማፃፋን ጎዳይ፥ «ታኒ ዴዖን ዴዓይስ፤ ኣሳ ኡባይ ታ ሲንꬃን ጉልባታና፤ ታኒ ፆሴ ጊዴይሳ ማርካታና» ያጌስ።
ROM 14:12 ሂዛ፥ ኑ ኦꬂዳባስ ኑ ሁዔን ሁዔን ፆሳ ሲንꬃን ሺቂዲ ዛሮ ኢማና።
ROM 14:13 ሄሳ ጊሾ፥ ኑኒ ኢሶይ ኢሱዋ ቦላ ፒርዴይሳ ኣጎስ። ሺን ሂንቴ ኢሻ ꬉብሲዲ ዎይኮ ቃፂዲ ናጋራን ጌልሲያባ ኦꬆናዳ ናጌቲቴ።
ROM 14:14 ጎዳ ዬሱሳ ኣማኒያ ኣሳዳ፥ ባ ሁዔን ቱና ጊዲዳ ካꬂ ባይናይሳ ታኒ ጌሻዳ ኤራይስ። ሺን ኢሲ ኣሲ ኢሲባ ቱና ጊዲ ቆፒኮ ሄሲ ኢያው ቱና ጊዴስ።
ROM 14:15 ኔ ሚያ ካꬃ ጊሾ ኔ ኢሻ ꬉቢያባ ጊዲኮ፥ ኪሪስቶሳን ዴዒያ ኔ ኢሻ ሲቃካ። ኪሪስቶሲ ኢያ ጊሾ ሃይቂዳ ኡራ ኔ ሚያ ካꬃን ኢያ ኣያና ዴዑዋ ꬋይሶፋ።
ROM 14:16 ሂዛ፥ ሂንቴው ዴዒያ ላዓቴꬃ ሃራቲ ቦራና ሜላ ኦꬆፊቴ።
ROM 14:17 ፆሳ ካዎቴꬃይ ጌሻ ኣያናን ቤንቲያ ፂሎቴꬂ፥ ሳሮቴꬂኔ ቱማ ኡፋይሲፌ ኣቲን ሙሳባኔ ኡሻባ ጊዴና።
ROM 14:18 ሄሳዳ ኪሪስቶሳስ ኦꬂያ ኣሲ ፆሳ ኡፋይሴስ፤ ኣሳንካ ኣንጄቴስ።
ROM 14:19 ሄሳ ጊሾ፥ ኣኔ ኑኒ ሳሮቴꬂ ቤንቲያ ኦጊያኔ ኢሱዋ ኢሱዋ ኣማኖን ሚንꬂያ ኦጊያ ኮዮስ።
ROM 14:20 ካꬃ ጊሾ ጋዳ ፆሳ ኦሱዋ ꬋይስሶፋ። ኡባ ካꬂ ሜቴቴስ፥ ሺን ሃራ ኣሲ ናጋራን ꬉብሲያ ካꬂ ሙሲ ኢታ።
ROM 14:21 ኔ ኢሻይ ꬉቤቶና ሜላ ኣሾ ሞና ዎይኮ ኡሹ ኡዮና ዎይኮ ኔ ኢሻ ꬉቢያ ሃራባ ኦꬆና ኣጎይ ሎዖ።
ROM 14:22 ሂዛ፥ ሃ ኔ ኣማኑዋ ኔ ጊዶኒኔ ኔ ፆሳ ጊዶን ናጋ። ሊኬ ጊዲ ቆፒዳባ ኦꬂያ ዎዴ ኢያ ካሃይ ሞቶና ኡራይ ኣንጄቲዳይሳ።
ROM 14:23 ሺን ሲꬊሼ ሚያ ኡራስ ኢያ ሙሳይ ኣማኖን ጊዶና ጊሾ ፒርዴቴስ። ኣማኖይ ባይና ኦሴቲዳ ኦሶ ኡባይ ናጋራ።
ROM 15:1 ኑኒ ኣማኖን ሚኒዳይሳቲ ዳቡራንቾታ ቶሁዋ ቶካናው ቤሴስ። ኑኒ ኑና ኡፋይሳናው ቤሴና።
ROM 15:2 ኑኒ ኑ ኢሻ ኣማኖን ሚንꬃናው ኢያ ማዳናዉኔ ኡፋይሳናው ቤሴስ።
ROM 15:3 ኪሪስቶሲ ባና ኡፋይሲቤና። ሺን ጌሻ ማፃፋን፥ «ኣሳይ ኔና ጫዪዳ ጫሻይ ታና ጋኪስ» ጌቴቲ ፃፌቲዳይሳዳ ሃኒስ።
ROM 15:4 ጌሻ ማፃፋይ ኢሚያ ጌንጫኒኔ ሚንꬄꬁዋን ኑ ኡፋይሳ ኤካና ሜላ ጌሻ ማፃፋን ፃፌቲዳ ኡባይ ኑና ታማርሳናው ፃፌቲስ።
ROM 15:5 ጌንጫኔ ሚኖቴꬂ ኢሚያ ጎዳይ ሂንቴ ኪሪስቶስ ዬሱሳ ካሊያ ዎዴ ኢሲፌቴꬂ ሂንቴው ኢሞ።
ROM 15:6 ሄሲካ፥ ኑ ጎዳ ዬሱስ ኪሪስቶሳ ኣዋ፥ ፆሳ፥ ኢሲ ዎዛናኒኔ ኢሲ ቃላን ሂንቴ ቦንቻና ሜላሳ።
ROM 15:7 ኪሪስቶሲ ሂንቴና ኤኪዳይሳዳ ፆሳ ቦንቾስ ኢሶይ ኢሱዋ ኤኪቴ።
ROM 15:8 ፆሳይ ቤኒ ኣዋታስ ኢሚዳ ኡፋይሳይ ፖሌታና ሜላኔ ኢያ ቱማቴꬃይ ኤሬታና ሜላ ኪሪስቶሲ ኣይሁዴታ ኣይሌ ጊዲዲ ዪዳይሳ ታ ሂንቴው ኦዳይስ።
ROM 15:9 ኪሪስቶሲ ኣይሁዴታ ኣይሌ ጊዲዳ ሃራ ጋሶይ ቃሲ ኣይሁዴ ጊዶና ኣሳቲ ፆሳ ኢያ ማሮቴꬃ ጊሾ ጋላታና ሜላሳ። ጌሻ ማፃፋን፥ «ታ ኔና ኣይሁዴ ጊዶና ኣሳ ጊዶን ጋላታና፤ ኔ ሱንꬃ ሳባና» ጌቴቲዲ ፃፌቲዳይሳዳ ሃኒስ።
ROM 15:10 ቃሲ፥ «ኣይሁዴ ጊዶና ኣሳው፥ ፆሳ ዴሪያራ ኡፋይቲቴ» ያጌቲስ።
ROM 15:11 ቃሲ ዛሪዲ፥ «ኣይሁዴ ጊዶና ኣሳው፥ ጎዳ ጋላቲቴ፤ ካዎቴꬃ ኡባይ ኢያ ሳቢቴ» ያጌቲስ።
ROM 15:12 ሄሳዳ ኢሳያሲ፥ «ኢሴዬ ዛሬፔ ዬሌቲያ ኢሶይ ያና፤ ኢ ካዎቴꬃ ኡባ ሃራና። ኤንቲ ባንታ ኡፋይሳ ኢያ ቦላ ዎꬃና» ያጌስ።
ROM 15:13 ጌሻ ኣያና ዎልቃን ሂንቴ ዲጫና ሜላ ኡፋይሲ ኢሚያ ፆሳይ፥ ሂንቴ ኣማኑዋ ጋሶን ሂንቴው ኡፋይሲኔ ሳሮቴꬂ ኩሜꬂ ኢሞ።
ROM 15:14 ታ ኢሻቶ፥ ሂንቴናን ሎዖቴꬂኔ ኤራቴꬂ ኩሚዳይሳ ቃሲ ኢሶይ ኢሱዋ ዞራናው ዳንዳዔይሳ ታ ጌሻዳ ኤራይስ።
ROM 15:15 ታኒ ሂንቴና ኢሲ ኢሲባ ጉጃ ኣኬኪሳናው ኮያዳ ያዮና ሃ ዳብዳቢያ ሂንቴው ፃፋስ።
ROM 15:16 ታኒ ኪሪስቶስ ዬሱሳ ኣይሌ ጊዳዳ፥ ኣይሁዴ ጊዶና ኣሳስ ካሂኔዳ ኦꬃዳ፥ ዎንጌላ ኦዳና ሜላ ፆሳይ ታው ኣꬎ ኬሃቴꬃ ኢሚስ። ኣይሁዴ ጊዶና ኣሳይ ጌሻ ኣያናን ጌዪዲ፥ ፆሳ ኡፋይሲያ ያርሾ ጊዳና ሜላ ፆሳይ ሄሳ ኦꬂስ።
ROM 15:17 ታኒ ኪሪስቶስ ዬሱሳን ጊዳዳ ፆሳስ ኦꬂያ ኦሱዋን ጬቄታይስ።
ROM 15:18 ኣይሁዴ ጊዶና ኣሳይ ፆሳስ ኪቴታናዳ፥ ኪሪስቶሲ ታ ቃላኔ ታ ኦሱዋ ባጋራ ኦꬂዳ ኦሱዋፔ ኣቲን ሃሪ ታ ጬቄቲያባይ ባዋ።
ROM 15:19 ፆሳይ ሄሳ ማላታኒኔ ጌሻ ኣያና ዎልቃን ዋቲ ኦꬂዳኮ ታ ሂንቴው ኦዳና። ታኒ ዬሩሳላሜፔ ዶማዳ፥ ኢሊዋርቆኔ ጋካናው ኪሪስቶሳ ዎንጌላ ሳባካስ።
ROM 15:20 ታኒ ሃራ ኣሲ ባሲዳ ቤሳን ኬፃናው ኮዪኬ። ኪሪስቶሳ ሱንꬃይ ፄጌቲቦና ቤሳን ዎንጌላ ኦዳናው ኣሞታይስ።
ROM 15:21 ጌሻ ማፃፋን፥ «ኢያባይ ኦዴቲቦና ኣሳቲ ኢያ ቤዓና፤ ኢያባ ሲዒቦና ኣሳቲ ኣኬካና» ጌቴቲዲ ፃፌቲስ።
ROM 15:22 ሄሳ ጋሶን፥ ታኒ ሂንቴኮ ያናው ዳንዳዓቢኬ።
ROM 15:23 ሺን ታኒ ሃዒ ሃ ሄራን ታ ኦሱዋ ኦንጊዳ ጊሾኔ ዳሮ ላይꬃፌ ዶማዳ ሂንቴና ቤዓናው ላሞቲዳ ጊሾ
ROM 15:24 ታኒ ኢስፔኔ ባሼ ሂንቴና ቤዓናው ቆፓስ። ቃሲ ጉꬃ ዎዴ ሂንቴራ ኡፋይቲዳፔ ጉዬ ኢስፔኔ ቢያ ዎዴ ሂንቴ ታ ኦጊያስ ታና ማዳና ሜላ ኮያይስ።
ROM 15:25 ሺን ሃዒ ታኒ ፆሳ ኣሳታ ማዳናው ዬሩሳላሜ ባይስ።
ROM 15:26 ማቄዶኒያኔ ኣካያን ዴዒያ ፆሳ ኣሳቲ፥ ዬሩሳላሜን ዴዒያ ማንቆታ ሚሼን ማዳናው ኮዪዳ ጊሾሳ።
ROM 15:27 ኤንቲ ማንቆታ ማዳናይሲ ኤንታው ኣቶናባ ጊዲዳ ጊሾ ባንታ ሁዔን ሄሳ ኦꬃናው ቆፋ ቃቺዶሶና። ኣይሁዴቲ ኣይሁዴ ጊዶናይሳታራ ኣያና ኣንጁዋ ሻኬቲኮ፥ ኤንቲ ቃሲ ባንታው ዴዒያባን ኣይሁዴታ ማዳናው ቤሴስ።
ROM 15:28 ሄሳ ጊሾ፥ ታኒ ሄ ሺቂዳ ሚሺያ ኤንታው ኢሚዳፔ ጉዬ ኢስፔኔ ባሼ ሂንቴ ማታራ ኣꬋና።
ROM 15:29 ታኒ ሂንቴኮ ቢያ ዎዴ ኪሪስቶሳ ኣንጁዋን ኩማዳ ባናይሳ ኤራይስ።
ROM 15:30 ታ ኢሻቶ፥ ታው ፆሳ ዎሲሼ ታ ባፂያን ታራ ኤቃና ሜላ ጎዳ ዬሱስ ኪሪስቶሳኒኔ ጌሻ ኣያና ሲቁዋን ሂንቴና ዎሳይስ።
ROM 15:31 ፆሳይ ታና ዪሁዳን ዴዒያ ኣማኖና ኣሳታፔ ኣሻናዳኔ ዬሩሳላሜን ታ ኦꬃና ኦሶይ ፆሳ ኣሳታ ማታን ኤኬታና ሜላ ታው ዎሲቴ።
ROM 15:32 ቃሲ ፆሲ ጊኮ፥ ታኒ ሂንቴኮ ባዳ ኡፋይሳን ሂንቴራ ሼምፓና ሜላ ታው ዎሲቴ።
ROM 15:33 ሳሮቴꬃ ፆሳይ ሂንቴ ኡባራ ጊዶ። ኣሚንዒ።
ROM 16:1 ኪንኪሪያ ካታማን ዴዒያ ዎሳ ኬꬃን ኦꬂያ ኑ ሚቺያ ፌባ ሎዖ ማጫስ ጊዴይሳ ሂንቴ ኤራና ሜላ ኮያይስ።
ROM 16:2 ሂንቴ ኢዮ ኣማኒያ ኣሳቲ ጎዳ ሱንꬃን ሞካናው ቤሲያ ኣማኒያ ኣሳታፔ ኢሱዋዳ ሞኪቴ። ኢያ ሂንቴፌ ኮያባ ኡባ ኢዮ ማዲቴ። ኢያ ባ ሁዔን ዳሮ ኣሳ ማዳሱ፤ ቃሲ ታና ታ ሁዔንካ ዳሮ ማዳሱ።
ROM 16:3 ኪሪስቶስ ዬሱሳ ኦሱዋ ታራ ኢሲፌ ኦꬂያ ጲሪስቂላኔ ኣቂላ ሳሮ ጊቴ።
ROM 16:4 ኤንቲ ታ ጊሾ ባንታ ሼምፑዋ ኣꬂ ኢሚዶሶና። ታ ፃላላ ጊዶናሺን ኣይሁዴ ጊዶና ኣሳ ዎሳ ኬꬃ ኡባይ ኤንታ ጋላቴስ።
ROM 16:5 ኤንታ ሶን ሺቂያ ኣማኒያ ኣሳ ሳሮ ጊቴ። ኢሲያ ቢታን ኪሪስቶሳ ኮይሮ ኣማኒዳ፥ ታ ዶሲያ ኤጳኔፆሳስ ታ ሳሮꬁዋ ኦዲቴ።
ROM 16:6 ሂንቴ ጊሾ ኦሶን ዳሮ ዳቡሪዳ ማይራሞ ሳሮ ጊቴ።
ROM 16:7 ታራ ቃሾ ኬꬃን ኣꬂዳ ታ ኣይሁዴ ላጌታ ኣንዲሮኒቆሳኔ ዩኒያሳ ሳሮ ጊቴ። ኤንቲ ዬሱሳ ሃዋሬታ ጊዶን ኤሬቲዳይሳታ። ቃሲ ኤንቲ ኪሪስቶሳ ታፔ ሲንꬄ ኣማኒዶሶና።
ROM 16:8 ጎዳን ኣማኒያ ታ ሲቆ ላጊያ፥ ኣምጲሊያፆሳ ሳሮ ጊቴ።
ROM 16:9 ኪሪስቶሳ ኦሱዋ ኑራ ኢሲፌ ኦꬂያ ኡርባኖሴኔ ታ ዶሲያ ኢስታኩሳ ሳሮ ጊቴ።
ROM 16:10 ኪሪስቶሳን ኣማንꬂያ ኣይሊያ ኣጴሊሳስ ታ ሳሮꬁዋ ኦዲቴ። ኣርስፆቡሎሳ ሶ ኣሳስ ታ ሳሮꬁዋ ኦዲቴ።
ROM 16:11 ታ ኣይሁዴ ላጊያ ሄሮዲዮና ሳሮ ጊቴ። ናርሲሳኔ ኢያ ሶ ኣሳፔ ኪሪስቶሳ ኣማኒዳይሳታ ሳሮ ጊቴ።
ROM 16:12 ጎዳ ኦሱዋን ዳቡሪያ ቲሩፋይናኔ ቲሩፎሳ ሳሮ ጊቴ። ቃሲ ጎዳስ ዳሮ ዳቡራዳ ኦꬂያ፥ ታ ዶሲያ ጴርሲሶ ሳሮ ጊቴ።
ROM 16:13 ጎዳ ኦሱዋን ዳሮ ኤሬቲዳ ሩፎሳሲኔ ታና ባ ናዓዳ ቤዒያ ኢያ ኣዬስ ታ ሳሮꬁዋ ኦዲቴ።
ROM 16:14 ኣሲኒኪርቶሳስ፥ ፊሌጎናስ፥ ሄርሜሳስ፥ ፓቲሮባሳሲኔ ኤንታራ ዴዒያ ኣማኒያ ኢሻታ ኡባስ ታ ሳሮꬁዋ ኦዲቴ።
ROM 16:15 ፊሎሎጉሳ፥ ዩሊያ፥ ኔሪያ፥ ኢያ ሚቺው፥ ኦሉምፖሳኔ ኤንታራ ዴዒያ ኣማኒያ ኣሳ ኡባ ሳሮ ጊቴ።
ROM 16:16 ጌሻ ዬሬቴꬂ ዬሬቲሼ፥ ኢሶይ ኢሱዋ ሳሮꬂቴ። ኪሪስቶሳ ዎሳ ኬꬃ ኡባይ ሂንቴና ሳሮ ያጎሶና።
ROM 16:17 ታ ኢሻቶ፥ ሂንቴ ታማሪዳ ቲሚርቲያ ኢፂዲ፥ ሂንቴ ጊዶን ሻኬቴꬂኔ ሜቶ ሜꬊያ ኣሳታፔ ናጌቲቴ። ኤንታፌ ሃኪቴ።
ROM 16:18 ሄሳ ሜላ ኣሳቲ ባንታው ኦꬆሶናፔ ኣቲን ኑ ጎዳ ኪሪስቶሳስ ኦꬆኮና። ባንታ ማልዒያ ዶናኒኔ ሳጶꬂያ ቃላን ኣይኮ ኤሮና ኣሳ ዎዛና ባሌꬆሶና።
ROM 16:19 ዎንጌላስ ሂንቴ ኪቴቲዳይሳ ኣሳ ኡባይ ሲዒዳይሲ ታና ኡፋይሴስ። ሺን ሂንቴ ሎዖባ ኤራና ሜላኔ ኢታባፔ ሃካና ሜላ ታ ኮያይስ።
ROM 16:20 ሳሮቴꬃ ፆሳይ ፃላሂያ ሂንቴ ቶሁዋፔ ጋርሳን ጋጪ ዬጋና። ኑ ጎዳ ዬሱስ ኪሪስቶሳ ኣꬎ ኬሃቴꬃይ ሂንቴራ ጊዶ።
ROM 16:21 ታራ ኦꬂያ ፂሞቲዮሲ ሂንቴና ሳሮ ያጌስ። ሄሳዳካ፥ ታ ዳቦቲ ሉቂዮሲ፥ ያሶኒኔ ሶስጳፂሮሲ ሂንቴና ሳሮ ያጎሶና።
ROM 16:22 ሃ ዳብዳቢያ ጳዉሎሳስ ፃፊዳ ታኒ፥ ፃርፂዮሲ፥ ሂንቴና ጎዳ ሱንꬃን ሳሮ ያጋይስ።
ROM 16:23 ታና ሞኪዳይኔ ዎሳ ኬꬃ ኡባይ ኢያ ሶን ሺቂያ ጋዮሲ፥ ሂንቴና ሳሮ ያጌስ። ካታማ ሚሺያ ኦይኪያ ኤራስፆሲኔ ኑ ኢሻ ቃርፆሲ ሂንቴና ሳሮ ያጎሶና። [
ROM 16:24 ኑ ጎዳ ዬሱስ ኪሪስቶሳ ኣꬎ ኬሃቴꬃይ ሂንቴ ኡባራ ጊዶ። ኣሚንዒ።]
ROM 16:25 ፆሳስ ጋላቲ ጊዶ። ታኒ፥ ዬሱስ ኪሪስቶሳባ ኦዲያ ዎንጌላ ቃላኒኔ ዳሮ ዎዴፔ ቆሴቲዲ ጋምዒዳ ቱማቴꬃን፥ ፆሳይ ሂንቴና ኣማኖን ሚንꬂዲ ኤሳናው ዳንዳዔስ።
ROM 16:26 ሺን ሃዒ ሄ ቱማይ ቆንጪስ። ካዎቴꬃ ኡባይ ኣማኒዲ ኪቴታና ሜላ ሜሪና ፆሳ ኪታን ናቤቲ ሄ ቱማባ ፃፊዶሶና።
ROM 16:27 ዬሱስ ኪሪስቶሳ ባጋራ ጪንጫቴꬂ ኢያ ፃላላስ ዴዒያ፥ ኢሲ ፆሳስ ሜሪናው ቦንቾይ ጊዶ። ኣሚንዒ።
1CO 1:1 ፆሳ ሼኒያን ዬሱስ ኪሪስቶሳ ሃዋሬ ጊዳናው ፄጌቲዳ ጳዉሎሲኔ፥ ኑ ኢሻ ሶስቴኒሲ፥
1CO 1:2 ቆሮንቶሳን ዴዒያ ፆሳ ዎሳ ኬꬃስ፥ ዬሱስ ኪሪስቶሳን ጌዪዳይሳታሲኔ ጌሺ ጊዳና ሜላ ፄጌቲዳይሳታስ፤ ቃሲ ኤንታሲኔ ኑስ ጎዳ ጊዲያ ኑ ጎዳ ዬሱስ ኪሪስቶሳ ሱንꬃ ኡባ ቤሳን ፄጊያ ኡባስ፤
1CO 1:3 ፆሳይ፥ ኑ ኣዋይኔ ጎዳይ ዬሱስ ኪሪስቶሲ ሂንቴው ኣꬎ ኬሃቴꬃኔ ሳሮቴꬃ ኢሞ።
1CO 1:4 ፆሳይ ኪሪስቶስ ዬሱሳ ባጋራ ሂንቴው ኢሚዳ ኣꬎ ኬሃቴꬃ ጊሾ ታኒ ኡባ ዎዴ ፆሳ ጋላታይስ።
1CO 1:5 ኢያን ኦዳኒኔ ኤራቴꬃ ኡባን ሂንቴ ዱሬቲዴታ።
1CO 1:6 ታኒ ኪሪስቶሳባ ማርካቲዳይሲ ቱማ ጊዴይሳ ሄሲ ቆንጪሴስ።
1CO 1:7 ሄሳ ጊሾ፥ ሂንቴ ኑ ጎዳ ዬሱስ ኪሪስቶሳ ዩሳ ናጊሼ ዴዒሺን፥ ኣይ ኣያና ኢሞይካ ሂንቴው ፓጬና።
1CO 1:8 ኑ ጎዳ ዬሱስ ኪሪስቶሲ ሲሚያ ዎዴ ሂንቴ ቦሬቶናይሳታ ጊዳና ሜላ ኢ ዉርሴꬂ ጋካናው ሂንቴና ሚንꬃና።
1CO 1:9 ባ ናዓ፥ ኑ ጎዳ ዬሱስ ኪሪስቶሳራ ኢሲፌቴꬃይ ዳና ሜላ ሂንቴና ፄጊዳ ፆሳይ ኣማኔቲዳይሳ።
1CO 1:10 ታ ኢሻቶ፥ ሂንቴ ጊዶን ሻኬቴꬂ ዶናዳ ሂንቴ ኢሲ ዎዛናኒኔ ኢሲ ቆፋን ኢሶ ጊዲዲ፥ ዳና ሜላ ኑ ጎዳ ዬሱስ ኪሪስቶሳ ሱንꬃን ታ ሂንቴና ዎሳይስ።
1CO 1:11 ታ ኢሻቶ፥ ቄሎዔ ሶ ኣሳይ ሂንቴ ጊዶን ኦሺ ዴዔይሳ ታው ኦዲዶሶና።
1CO 1:12 ሂንቴፌ ኢሶቲ ኢሶቲ፥ «ታኒ ጳዉሎሳሳ፤ ታኒ ኣጲሎሳሳ፤ ታኒ ጴፂሮሳሳ፤ ታኒ ኪሪስቶሳሳ» ያጌታ።
1CO 1:13 ኪሪስቶሲ ሻኬቲዴዬ? ሂንቴ ጊሾ ማስቃሊያ ቦላ ካቄቲዳይ ጳዉሎሴዬ? ዎይኮ ሂንቴ ጳዉሎሳ ሱንꬃን ፃማቄቲዴቲዬ?
1CO 1:14 ታኒ ቃሪስጶሲኔ ጋዮሲ ኣቲን ሂንቴፌ ኦናካ ፃማቃቦና ጊሾ ፆሳ ጋላታይስ።
1CO 1:15 ሄሳ ጊሾ፥ ኦኒካ ሂንቴና ታ ሱንꬃን ፃማቄቲዴታ ጋናው ዳንዳዔና። [
1CO 1:16 ቃሲ ኢስፂፋኖሴ ሶ ኣሳካ ታ ፃማቂዳይሳ ኣኬካይስ፥ ሺን ሃራ ኦና ፃማቂዳኮ ሃሳዪኬ።]
1CO 1:17 ኪሪስቶሲ ታና ኪቲዳይ ዎንጌላ ኦዳና ሜላሳፌ ኣቲን ፃማቃና ሜላ ጊዴና። ኪሪስቶሲ ማስቃሊያ ቦላ ሃይቂዳይሲ ሃዳ ጊዶና ሜላ ታኒ ኣሳ ጪንጫቴꬃ ቃላን ኦዲኬ።
1CO 1:18 ኪሪስቶሲ ማስቃሊያ ቦላ ሃይቂዳይሳ ኦዲያ ቃላይ ꬋዬይሳታስ ኤያቴꬂ፥ ሺን ኑስ ኣቴይሳታስ ፆሳ ዎልቃ።
1CO 1:19 ጌሻ ማፃፋን፥ «ታኒ ጪንጫታ ጪንጫቴꬃ ꬋይሳና፤ ኣኬካንቾታ ኣኬካ ባሌꬃና» ያጌስ።
1CO 1:20 ያቲን፥ ጪንጪ ኣዉን ዴዒ? ሂጌ ኣስታማሬይ ኣዉን ዴዒ? ዎይኮ ሃ ሳዓ ኤራንቾይ ኣዉን ዴዒ? ፆሳይ ሃ ሳዓ ጪንጫቴꬃ ኤያቴꬂ ኦꬂቤኔ?
1CO 1:21 ሃ ሳዓ ኣሳይ ባንታ ጪንጫቴꬃን ፆሳ ኤሮና ሜላ ባ ጪንጫቴꬃን ዲጊዲ፥ ኤያቴꬃን ታይቤቲያ፥ ኑኒ ኦዲያ ቃላን ኣማኔይሳታ ኣሻናው ፆሳ ሼኔ ጊዲስ።
1CO 1:22 ኣይሁዴቲ ማላታ ቤዓናው ኮዮሶና፤ ቃሲ ጊሪኬቲ ጪንጫቴꬂ ኮዮሶና።
1CO 1:23 ሺን ኑኒ ማስቃሊያ ቦላ ካቄቲዳ ኪሪስቶሳ ሳባኮስ። ሄሲ ኣይሁዳታስ ꬉቤ፤ ቃሲ ጊሪኬታስ ኤያቴꬂ።
1CO 1:24 ሺን ፆሳይ ፄጊዳይሳታስ፥ ኣይሁዴ ጊዲን፥ ጊሪኬ ጊዲን ኪሪስቶሲ ፆሳ ዎልቃኔ ኢያ ጪንጫቴꬃ።
1CO 1:25 ፆሳ ኤያቴꬃይ ኣሳ ጪንጫቴꬃፌ ኣꬌስ፤ ቃሲ ፆሳ ዳቡራይ ኣሳ ሚኖቴꬃፌ ሚኔስ።
1CO 1:26 ሂዛ፥ ታ ኢሻቶ፥ ፆሳይ ሂንቴና ፄጊያ ዎዴ ሂንቴ ኣይ ሜላ ኣሴኮ ቆፒቴ። ኣሳ ቆፋን ሂንቴ ጊዶን ጪንጫቲ፥ ዎልቃማቲኔ ꬎቃ ዛሬቲ ዶኮና።
1CO 1:27 ሺን ፆሳይ ጪንጫታ ዬላያናው ኣላሜን ዴዒያ ኤያታ ዶሪስ፤ ቃሲ ሚኖታ ዬላያናው ኣላሜን ዴዒያ ዳቡራንቾታ ዶሪስ።
1CO 1:28 ፆሳይ ሃ ኣላሚያን ጊታ ጌቴቲዳባ ꬋይሳናው፥ ሃ ሳዓ ካዉሻባ፥ ካꬌቲዳባኔ ፓꬆናባ ዶሪስ።
1CO 1:29 ኦኒካ ፆሳ ሲንꬃን ጬቄቶና ሜላ ሄሳ ኦꬂስ።
1CO 1:30 ሺን ፆሳይ ሂንቴው ኪሪስቶስ ዬሱሳራ ኢሲፌቴꬂ ዳና ሜላ ኦꬂስ። ኢ ኑስ ፆሳፌ ጪንጫቴꬂ፥ ፂሎቴꬂ፥ ጌሻቴꬂኔ ኣቶቴꬂ ጊዲስ።
1CO 1:31 ሄሳ ጊሾ፥ ጌሻ ማፃፋን፥ «ጬቄቲያ ኦኒካ ጎዳን ጬቆ» ያጌስ።
1CO 2:1 ታ ኢሻቶ፥ ታኒ ኮይሮ ፆሳ ቃላ ሂንቴው ኦዳሼ ዪዳ ዎዴ ዶና ቢላቴꬃኒኔ ጪንጫቴꬃን ያቢኬ።
1CO 2:2 ታኒ ሂንቴራ ዴዒያ ዎዴ ማስቃሊያ ቦላ ካቄቲዳ ዬሱስ ኪሪስቶሳፔ ኣቲን ሃራባ ኤራናው ኮዪኬ ጋዳ ታ ቆፋ ቃቻስ።
1CO 2:3 ታ ሂንቴራ ዴዒያ ዎዴ ዳቡራን፥ ያሻኒኔ ዳሮ ኮኮርሳን ዴዓስ።
1CO 2:4 ታ ኪታይኔ ታ ቲሚርቴይ ዶና ቢላቴꬃኒኔ ጪንጫቴꬃን ጊዶናሺን ጌሻ ኣያና ዎልቃ ቆንጪሴꬃና።
1CO 2:5 ሄሲካ፥ ሂንቴ ኣማኖይ ፆሳ ዎልቃናፔ ኣቲን ኣሳ ጪንጫቴꬃን ዜምፖና ሜላሳ።
1CO 2:6 ኣያና ዴዖን ዲጪዳይሳታስ ኑኒ ጪንጫቴꬃ ቃላን ኦዶስ። ሺን ሄ ጪንጫቴꬃይ፥ ሃ ሳዓ ጪንጫቴꬃ ዎይኮ ꬋያናው ዴዒያ ሃ ሳዓ ሃሬይሳታ ጪንጫቴꬃ ጊዴና።
1CO 2:7 ሺን ኑኒ ኦዲያ ጪንጬቴꬃይ፥ ዳሮ ዎዴፔ ሲንꬄ ፆሳይ ኑ ቦንቹዋስ ጊጊሲዳይሳኔ ጌሚዲ ዴዒያ ፁራ ጪንጫቴꬃ።
1CO 2:8 ሃ ሳዓ ሃሬይሳታፔ ኦኒካ ሃ ጪንጫቴꬃ ኤሪቤና። ኤንቲ ኤሪዳባ ጊዲያኮ፥ ቦንቾ ጎዳ ማስቃሊያ ቦላ ካቆኮና።
1CO 2:9 ሺን ጌሻ ማፃፋን፥ «ኣይፌይ ቤዒቦናባ፥ ሃይꬂ ሲዒቦናባ፥ ዎዛኒ ቆፒቦናባ፥ ፆሳይ ባና ሲቄይሳታስ ጊጊሲስ» ያጌስ።
1CO 2:10 ፆሳይ ባ ፁራ ባ ኣያና ባጋራ ኑስ ቆንጪሲስ። ጌሻ ኣያናይ ሃሪ ኣቶሺን ጌሚዳ ፆሳ ፁራ ኡባ ፒልጌስ።
1CO 2:11 ኣሳን ዴዒያ ኣሳ ኣያናፔ ኣቲን ኣሳባ ኦኒካ ኤሬና። ሄሳዳካ፥ ፆሳባ ፆሳ ኣያናፔ ኣቲን ኦኒካ ኤሬና።
1CO 2:12 ፆሳይ ኑስ ጮ ኢሚዳባ ኑ ኤራና ሜላ ፆሳ ኣያና ኤኪዳፔ ኣቲን ሃ ሳዓ ኣያና ኤኪቦኮ።
1CO 2:13 ኑኒ ኣያናባ፥ ኣያና ኣሳታስ ኣሳ ጪንጫቴꬃን ጊዶናሺን ፆሳ ኣያናይ ኢሚያ ጪንጫቴꬃን ታማርሶስ።
1CO 2:14 ሺን ጌሻ ኣያናይ ባይና ኣሲ ፆሳ ኣያና ኢሞታታ ኤኬና። ሄሲ ኢያው ኤያቴꬂ፤ ኡባይ ጌሻ ኣያናን ፒልጌቲያ ጊሾ ኢ ኤራናው ዳንዳዔና።
1CO 2:15 ሺን ጌሻ ኣያኒ ዴዒያ ኣሲ ኡባባ ፒልጌስ፥ ሺን ኢያ ኦኒካ ፒልጌና።
1CO 2:16 ጌሻ ማፃፋን፥ «ጎዳ ዎዛና ኤሬይ ኦኔ? ኢያ ዞራናው ዳንዳዔይ ኦኔ?» ጌቴቲዲ ፃፌቲዳይሳ ሜላ። ሺን ኑስ ኪሪስቶሳ ዎዛኒ ዴዔስ።
1CO 3:1 ታ ኢሻቶ፥ ሂንቴ ኪሪስቶሳን ቡሮ ዮጋኔ ኣማኖና ኣሳꬆ ዴዒያ ጊሾ ታኒ ኣያናባ ሂንቴው ኦዳናው ዳንዳዓቢኬ።
1CO 3:2 ሂንቴ ሚኖ ካꬂ ማናው ዳንዳዒቦና ጊሾ ታኒ ሂንቴና ማꬂ ፓሃስ፤ ሃዒካ ዳንዳዒቤኬታ።
1CO 3:3 ሃዒካ ሂንቴ ኣማኖና ኣሳዳ ዴዔታ። ሂንቴ ጊዶን ዴዒያ ቃናቴይኔ ፓላማይ ሂንቴ ኣማኖና ኣሳዳ ዴዔይሳ ኤሪሴኔ? ሂንቴ ኣማኖና ኣሳዳ ሃኔታ።
1CO 3:4 ሂንቴፌ ኢሶይ፥ «ታኒ ጳዉሎሳሳ» ሃራይ ቃሲ፥ «ታኒ ኣጲሎሳሳ» ጊኮ፥ ኣማኖና ኣሳ ሜላ ጊዴኬቲ?
1CO 3:5 ያቲን፥ ኣጲሎሲ ኦኔ? ጳዉሎሲ ኦኔ? ኑኒ ሂንቴና ኣማንꬂዳ ፆሳ ኦሳንቾታ። ፆሳይ ኢሱዋስ ኢሱዋስ ኢሚዳ ኦሱዋ ሜላ ኦꬂያ ኦሳንቾታ ጊዶኮናዬ?
1CO 3:6 ታ ቶካስ፤ ኣጲሎሲ ሃꬄ ኡሺስ፥ ሺን ዲቼይ ፆሳ።
1CO 3:7 ሄሳ ጊሾ፥ ዲቺዳ ፆሳፌ ኣቲን ቶኬይካ ሃꬄ ኡሼይካ ኣይኮካ ጊዴና።
1CO 3:8 ቶኬይኔ ሃꬄ ኡሼይ ዎሊ ሜላ፥ ሺን ኢሶይ ኢሶይ ባ ኦሱዋ ሜላ ፆሳይ ኢሚያ ዎይቱዋ ኤካና።
1CO 3:9 ኑኒ ኢሲፌ ፆሳስ ኦꬂያ ኢያ ኦሳንቾታ ጊዲያ ጊሾ ሂንቴ ፆሳ ሾቃ፤ ፆሳ ኬꬂ።
1CO 3:10 ፆሳይ ታው ኢሚዳ ኣꬎ ኬሃቴꬃ ሜላ ሂላንቾ ኣናፄዳ ባሱዋ ዬጋስ። ሃራ ኡራይ ኢያ ቦላ ኬፄስ። ሺን ኢያ ቦላ ኬፂያ ኦኒካ ዋቲዲ ኬፂያኮ፥ ባው ናጌቶ።
1CO 3:11 ኢሲ ቶሆ ዬጌቲዳ ባሱዋፔ ሃራ ባሶ ዬጋናው ኦኒካ ዳንዳዔና። ሄ ባሶይካ ዬሱስ ኪሪስቶሳ።
1CO 3:12 ሺን ሃ ባሱዋ ቦላ ኦኒካ ዎርቃን ዎይኮ ቢራን ጊዲን፥ ኣልዖ ሹቻን ዎይኮ ሚꬃን ጊዲን፥ ማታን ዎይኮ ማቃን ኬፂኮ፥
1CO 3:13 ኢሲ ኢሲ ኣሲ ሄ ባሱዋ ቦላ ኣይቢን ኬፂዳኮ ፒርዳ ጋላስ ታማን ፓጬቲዲ ቆንጫና።
1CO 3:14 ኦኒካ ሄ ባሱዋ ቦላ ኬፂዳ ኬꬃይ ታማን ፁጌቶና ኣቲኮ፥ ባ ዎይቱዋ ኤካና።
1CO 3:15 ሺን ኦዴ ኦሶይካ ታማን ፁጌቲኮ፥ ሄ ኡራስ ዎይቶይ ባዋ። ጊዶሺን፥ ኢ ባ ሁዔን ታማፔ ኬሲ ኤኪዳ ኣሳዳ ኣታና።
1CO 3:16 ሂንቴ ፆሳ ኬꬂ ጊዴይሳኔ ፆሳ ኣያናይ ሂንቴናን ዴዔይሳ ኤሬኬቲ?
1CO 3:17 ኦኒካ ፆሳ ኬꬂ ላሊኮ፥ ፆሳይካ ኢያ ላላና። ፆሳ ኬꬃይ ጌሺ፤ ሄ ኬꬃይካ ሂንቴና።
1CO 3:18 ኦኒካ ባና ጪሞፎ። ሃ ሳዓ ጪንጫቴꬃን ባና ጪንጫ ኦꬂዲ ኤኪያ ኦኒካ ፆሳ ሲንꬃን ጪንጫ ጊዳናው ኤያ ጊዶ።
1CO 3:19 ሃ ሳዓ ጪንጫቴꬃይ ፆሳ ሲንꬃን ኤያቴꬂ። ጌሻ ማፃፋን፥ «ፆሳይ ጪንጫታ ኤንታ ጌኔ ቆፋን ኦይኬስ» ያጌስ።
1CO 3:20 ቃሲ፥ «ጪንጫታ ቆፋይ ማዶናባ ጊዴይሳ ጎዳይ ኤሬስ» ያጌስ።
1CO 3:21 ሄሳ ጊሾ፥ ኡባይ ሂንቴሳ ጊዲያ ጊሾ ኦኒካ ኣሳን ጬቄቶፎ።
1CO 3:22 ጳዉሎሲ፥ ኣጲሎሲኔ ጴፂሮሲ፥ ሃ ኣላሜይ፥ ዴዖይ፥ ሃይቆይ፥ ሃዒ ዴዔይ፥ ሲንꬃፌ ያናይሲ፥ ኡባይ ሂንቴሳ።
1CO 3:23 ሂንቴ ኪሪስቶሳሳ፤ ኪሪስቶሲ ፆሳሳ።
1CO 4:1 ኣሳይ ኑና ኪሪስቶሳ ኣይሌዳኔ ፆሳ ፁራ ቆንጪሳናው ሃዳሪ ኢሜቲዳ ኣሳዳ ኦꬂዲ ቆፖ።
1CO 4:2 ሄ ሃዳራ ኤኪዳ ኣሳቲ ባንታ ጎዳስ ኣማኔቲዳይሳታ ጊዳናው ቤሴስ።
1CO 4:3 ሺን ሂንቴ ዎይኮ ሃራይ ታና ፒርዲኮ፥ ታው ኣይኮካ ጊዴና። ሃራይ ኣቶ፥ ታካ ታ ቦላ ፒርዲኬ።
1CO 4:4 ታ ካሃይ ጌሺ፥ ሺን ሄሲ ታ ፖሎ ፂሎ ጊዴይሳ ቤሴና። ታ ቦላ ፒርዳናይ ጎዳ ፃላላ።
1CO 4:5 ሄሳ ጊሾ፥ ዎዴይ ጋኮና፥ ጎዳይ ዮና ኦዴ ቦላካ ፒርዶፊቴ። ኢ ꬉማን ጌሚዳባ ፖዖ ኬሴና፤ ኣሳ ዎዛናን ቆሴቲዳ ቆፋ ቆንጪሳና። ሄ ዎዴ ኢሶይ ኢሶይ ፆሳፌ ጋላታ ኤካና።
1CO 4:6 ታ ኢሻቶ፥ ሂንቴ ጊሾ ኣጲሎሳኔ ታና ሌሚሶ ኦꬃዳ ሂንቴው ኦዳስ። ሄሳ ታ ኦꬂዳይ፥ «ፃፌቲዳይሳፌ ኣꬎፋ» ያጊያ ዞሪያ ሂንቴ ኑፔ ታማራና ሜላሳ። ሄሳ ጊሾ፥ ኦኒካ ኢሱዋ ሳቢዲ ሃንኩዋ ካꬋናው ቤሴና።
1CO 4:7 ኔ ሃራታፔ ኣይቢን ኣꬋይ? ኔኒ ኤካቦናባይ ኣይቢ ዴዒ? ያቲን፥ ኔኒ ኤኪዳባ ሃራ ኣሳፔ ኤኪዳ ጊዲኮ፥ ኤኪቦና ኣሳዳ ኣይስ ጬቄታይ?
1CO 4:8 ሃዒ ሂንቴ ካሊዴታ። ሃዒ ሂንቴ ዱሬቲዴታ። ኑኒ ባይና ሂንቴ ፃላላ ካዎቲዴታ። ሂንቴ ቱማ ካዎቲዳባ ጊዲያኮ፥ ኑካ ሂንቴራ ካዎታናሺን።
1CO 4:9 ፆሳይ ኑና ሃዋሬታ፥ ሃይቆ ፒርዴቲዳ ኣሳዳ ኣሳ ኡባፌ ኑና ጉዬ ኣꬂዳ ታው ዳኔስ። ኑኒ ሃ ኣላሚያስ፥ ኪታንቾታሲኔ ኣሳስ ካሳባ ጊዲዳ።
1CO 4:10 ኑኒ ኪሪስቶሳ ጊሾ ኤያ ጊዲዳ፥ ሺን ሂንቴ ኪሪስቶሳን ጪንጫታ ጊዲዴታ። ኑኒ ዳቡራንቾ፥ ሺን ሂንቴ ሚኖ ጊዲዴታ። ሂንቴ ቦንቼቲዴታ፥ ሺን ኑኒ ቶሼቲዳ።
1CO 4:11 ሃዒ ጋካናው ኑ ኮሻቶስ፥ ሳሞቶስ፥ ካሎቶስ፥ ዋꬌቶስ፤ ዳና ሶ ꬋዪዲ ቶይላቶስ።
1CO 4:12 ኑኒ ኑ ኩሼን ኦꬂ ኣቆስ። ኑና ኣሲ ባዲያ ዎዴ ኣንጆስ፤ ኑና ጎዲያ ዎዴ ዳንዳዖስ።
1CO 4:13 ኑ ቦላ ኢታባ ኦዴቲያ ዎዴ ሎዖ ቃላ ዛሮስ። ኑ ሃዒ ጋካናው ሃ ኣላሚያ ፒቶኔ ዎራ ዬጌቲያ ቡሬ ጊዲዳ።
1CO 4:14 ታኒ ሄሳ ፃፊዳይ፥ ታ ሲቂያ ናይታዳ፥ ሂንቴና ዞራናው ፃፋሲፔ ኣቲን ዬላያናው ጊዴና።
1CO 4:15 ኪሪስቶሳን ሂንቴና ዲቺያ ታይቦፔ ቦላ ጊዲዳ ካሌꬄይሳቲ ዴዒኮካ፥ ሂንቴው ኢሲ ኣዉ ዴዔስ። ታ ሂንቴና ኪሪስቶስ ዬሱሳ ዎንጌላን ዬላስ።
1CO 4:16 ሂዛ፥ ሂንቴ ታና ሌሚሶ ኦꬂዲ ካላና ሜላ ሂንቴና ዎሳይስ።
1CO 4:17 ሄሳ ጊሾ፥ ኣማኔቲዳ፥ ታ ሲቂያ፥ ጎዳን ታ ናዓ፥ ፂሞቲዮሳ ሂንቴኮ ኪታስ። ኢ ዱማ ዱማ ቤሳን ዴዒያ ዎሳ ኬꬃን ታ ታማርሲዳ፥ ኪሪስቶሳ ዬሱሳን ዴዒያ ታ ኦጊያ ሂንቴና ሃሳዪሳና።
1CO 4:18 ታኒ ሂንቴኮ ዮናባ ዳኒን፥ ኦቶሪያ ኢሲ ኢሲ ኣሳቲ ዴዖሶና።
1CO 4:19 ሺን ጎዳይ ጊኮ፥ ማታ ዎዴ ታኒ ሂንቴኮ ባና። ሄ ዎዴ ኦቶራንቾታ ኦዳ ፃላላ ጊዶናሺን ኤንታ ዎልቃካ ኤራና።
1CO 4:20 ፆሳ ካዎቴꬃይ ኦዳ ጊዶናሺን ዎልቃ።
1CO 4:21 ታኒ ሂንቴኮ ፃምዓራ ቦዬ ዎይኮ ሲቆራኔ ኣሽኬ ኣያናራ ቦ? ኣዉሳ ዶሬቲ?
1CO 5:1 ሂንቴ ጊዶን ላይማቴꬂ ዴዔይሲ ዚጊሬቴስ። ሄሳ ሜላ ላይማቴꬂ ሃሪ ኣቶሺን፥ ኣማኖና ኣሳይካ ኦꬆኮና። ሂንቴ ጊዶን ባ ኣዋ ማቼራ ቱኒዳ ኣሲ ዴዔስ።
1CO 5:2 ሄሳን ሂንቴ ቂሮታናዉኔ ዬላታናው ቤሴኔ፥ ሺን ኦቶርቲዴታ። ሄሳ ሜላ ቦርሶባ ኦꬂዳ ኡራ ሂንቴ ጊዶፌ ኬሳናው ቤሴኔ?
1CO 5:3 ታኒ ኣሾን ሂንቴራ ዶና ኢፂኮካ ኣያናን ታ ሂንቴራ ዴዓይስ። ታኒ ሂንቴራ ዴዒያ ኣሳዳ ሃናዳ ሄሳ ሜላ ኦሱዋ ኦꬂዳ ኡራ ቦላ ፒርዳስ።
1CO 5:4 ኑ ጎዳ ዬሱስ ኪሪስቶሳ ሱንꬃን ሂንቴ ሺቂያ ዎዴ ታኒ ኣያናን ሂንቴራ ዳና። ሄሳን ጎዳ ዬሱስ ኪሪስቶሳ ዎልቃይ ሂንቴራ ጊዳና።
1CO 5:5 ሄ ኡራ ናጋራ ኣሾይ ꬋዪዲ፥ ኢያ ኣያናይ ጎዳ ዬሱሳ ፒርዳ ጋላሳን ኣታና ሜላ ኢ ፃላሄስ ኣꬊ ኢሜቶ።
1CO 5:6 ሂንቴ ጬቆይ ሎዖ ጊዴና። ጉꬃ ኢርሾይ ሙኑቃ ኡባ ዴንꬄይሳ ኤሬኬቲዬ?
1CO 5:7 ሂንቴ ሃዒ ኢርሾይ ባይና ሙኑቃ ጊዳና ሜላ፥ ናጋራ ኢርሹዋ ሂንቴፌ ኬሲቴ። ኑስ ፓሲካ ዶርሳ ጊዲዳ ኪሪስቶሲ ያርሼቲስ።
1CO 5:8 ሄሳ ጊሾ፥ ጌኔይኔ ኢታቴꬂ ዴዒያ ኢርሹዋራ ጊዶናሺን ቱማቴꬂኔ ጌሻቴꬂ ዴዒያ ኡይꬃራ ኑ ባሊያ ቦንቾስ።
1CO 5:9 ታ ካሴ ፃፊዳ ዳብዳቢያን ሂንቴ ላይማቲያ ኣሳራ ጋሄቶና ሜላ ሂንቴው ኦዳስ።
1CO 5:10 ሄሳ ጉሳይ ሃ ኣላሚያን ዴዒያ ላይማቴይሳታራ ዎይኮ ኡዜታራ ዎይኮ ካይሶታራ ዎይኮ ኤቃ ጎይኔይሳታራ ፖሎ ጋሄቶፊቴ ጉሱ ጊዴና። ሄሳ ጊዲኮ፥ ሃ ኣላሚያፔ ሂንቴ ኬያናው ቤሴስ ሺን ኣቲስ።
1CO 5:11 ሺን ኣማናይስ ያጊሼ ላይማቴይሳታራ ዎይኮ ኡዜታራ ዎይኮ ኤቃ ጎይኔይሳታራ ዎይኮ ጫዬይሳታራ ዎይኮ ማꬆቴይሳታራ ዎይኮ ካይሶታራ ጋሄቶፊቴ ጋዳ ሂንቴው ኦዳይስ። ሄሳ ሜላ ኣሳራ ሃሪ ኣቶሺን፥ ካꬂካ ሞፒቴ።
1CO 5:12 ዎሳ ኬꬃፌ ካሬራ ዴዔይሳታ ቦላ ፒርዳናው ታና ኣይቤ ጋꬄይ? ዎሳ ኬꬃን ዴዔይሳታ ቦላ ሂንቴ ፒርዴኬቲዬ?
1CO 5:13 ሺን ካሬራ ዴዔይሳታ ቦላ ፆሳይ ፒርዳና። ሄ ኢታባ ኦꬂያ ኡራ ሂንቴ ጊዶፌ ኬሲቴ።
1CO 6:1 ሂንቴ ጊዶፌ ኢሶይ ኢሱዋራ ሞቶይ ዴዒኮ፥ ሄሳ ኣማኒያ ኣሳ ሲንꬃን ፒርዴታናይሳ ኣጊዲ ኣማኖና ኣሳ ሲንꬃን ፒርዴታናው ዋኒዲ ቢ?
1CO 6:2 ጌሻቲ ኣላሚያ ቦላ ፒርዳናይሳ ሂንቴ ኤሬኬቲ? ያቲን፥ ሂንቴ ኣላሚያ ቦላ ፒርዲያባ ጊዲኮ፥ ሃይሳ ሜላ ጉꬃባ ፒርዳናው ዋኒዲ ዳንዳዔኬቲ?
1CO 6:3 ኑኒ ኪታንቾታ ቦላ ፒርዳናይሳ ኤሬኬቲ? ያቲን፥ ሃ ሳዓ ዱሳባ ቦላ ፒርዳናይሲ ሂንቴና ዋኒዲ ፆኒ?
1CO 6:4 ያቲን፥ ሄሳ ሜላ ሜቶይ ሂንቴ ጊዶን ሜꬌቲኮ፥ ዎሳ ኬꬃ ኣይፌን ካꬌቲዳ ኣሳ ሲንꬃን ፒርዴታናው ዋቲ ኤፌቲ?
1CO 6:5 ታኒ ሂንቴና ዬላያናው ሄሳ ጋይስ። ሂንቴ ጊዶን ካጬቲዳ ኣሳታ ሲጌꬃናው ዳንዳዒያ ኣኬካ ኣሲ ባዌ?
1CO 6:6 ያቲን፥ ኢሲ ኣማኔይሲ ሃንኮ ኣማኔይሳ ፒርዳ ኬꬃን ኣማኖና ኣሳ ሲንꬃን ሞታናው ቤሲ?
1CO 6:7 ሂዛ፥ ሂንቴ ኢሶይ ኢሱዋ ሞቲያባ ጊዲኮ ሄሲ ሂንቴ ኩንዴꬃ ቤሴስ። ሄሳፌ ሂንቴ ቆሄቲኮኔ ጪሜቲኮ ኬሄኔ?
1CO 6:8 ሺን ሂንቴ ዎሊ ጊዶን ኣማኔይሳቲ ኢሶይ ኢሱዋ ቆሄታኔ ጪሜታ።
1CO 6:9 ጌላቲ ፆሳ ካዎቴꬃ ላቶናይሳ ሂንቴ ኤሬኬቲ? ሂንቴና ጪሞፊቴ፤ ላይማቴይሳቲ ዎይኮ ኤቃ ጎይኔይሳቲ ዎይኮ ቃይፄይሳቲ ዎይኮ ኣዴራ ኣዴራ ጋሄቴይሳቲ፥
1CO 6:10 ዎይኮ ካይሶቲ ዎይኮ ኡዜቲ ዎይኮ ማꬆቴይሳቲ ዎይኮ ጫዬይሳቲ ዎይኮ ቦንቄይሳቲ ፆሳ ካዎቴꬃ ላቶኮና።
1CO 6:11 ሂንቴፌ ኢሲ ኢሲ ኣሳቲ ካሴ ሄሳ ሜላ። ሺን ሂንቴ ሃዒ ጎዳ ዬሱስ ኪሪስቶሳ ሱንꬃኒኔ ፆሳ ኣያናን ሜጬቲዴታ፤ ጌዪዴታ፤ ፂሊዴታ።
1CO 6:12 ሂንቴ፥ «ኑ ኮዪዳባ ኦꬃናው ዳንዳዖስ» ያጌታ። ሺን ኡባይ ሂንቴና ማዴና። ታኒ ኮዪዳባ ኡባ ኦꬃናው ዳንዳዓይስ፥ ሺን ኣይቢካ ታና ሃሬና።
1CO 6:13 ሂንቴ፥ «ካꬂ ኡሎሳ፤ ኡሎይካ ካꬃሳ» ያጌታ። ሺን ፆሳይ ኡሉዋካ ካꬃካ ꬋይሳናይሳ ታ ሂንቴው ኦዳይስ። ኑ ኣሳቴꬃይ ጎዳሳፌ ኣቲን ላይማቴꬃሳ ጊዴና። ጎዳይካ ኑ ኣሳቴꬃሳ።
1CO 6:14 ፆሳይ ጎዳ ሃይቆፔ ዴንꬂዳይሳዳ፥ ኑናካ ሃይቆፔ ባ ዎልቃን ዴንꬃና።
1CO 6:15 ሂንቴ ኣሳቴꬃይ ኪሪስቶሳ ኣሳቴꬃፌ ባጋ ጊዴይሳ ኤሬኬቲ? ያቲን፥ ታኒ ኪሪስቶሳ ኣሳቴꬃፌ ባጋ ኤፋዳ ላይማቴꬃ ኣሳቴꬂ ጊዳና ሜላ ኦꬆ? ሃኔና!
1CO 6:16 ላይማቲያ ኡራይ ኢ ጋሄቲያ ኣሴራ ኢሲ ኣሳቴꬂ ጊዴይሳ ኤሬኬቲ? ጌሻ ማፃፋን፥ «ኤንቲ ናምዓይ ኢሲ ኣሳቴꬂ ጊዳና» ጌቴቲዲ ፃፌቲስ።
1CO 6:17 ሺን ጎዳራ ኢሲፊያ ኡራይ ኢያራ ኣያናን ኢሶ ጊዴስ።
1CO 6:18 ላይማቴꬃፌ ሃኪቴ። ኢሲ ኡራይ ኦꬂያ ሃራ ናጋራይ ኢያ ኣሳቴꬃፌ ካሬራ ኦሴቴስ፥ ሺን ላይማቲያ ኣሲ ባ ኣሳቴꬃ ቦላ ናጋራ ኦꬄስ።
1CO 6:19 ሂንቴ ኣሳቴꬃይ ፆሳይ ሂንቴው ኢሚዳ ሂንቴናን ዴዒያ ጌሻ ኣያና ኬꬂ ጊዴይሳ ኤሬኬቲ? ሂንቴ ሂንቴባ ጊዴኬታ።
1CO 6:20 ፆሳይ ሂንቴና ጋቴን ሻሚስ። ሄሳ ጊሾ፥ ሂንቴ ኣሳቴꬃን ፆሳ ቦንቺቴ።
1CO 7:1 ሂንቴ ታው ፃፊዳ ዳብዳቢያስ ዛሮይ ሃይሳ። ኢሲ ኣሲ ማቾና ዴዒኮ ሎዖ።
1CO 7:2 ሺን ላይማቴꬃፌ ኣታናው ኢሲ ኢሲ ኣዴይ ማቾ ኤኮ፤ ቃሲ ኢሲ ኢሲ ማጫሳስ ኣዚኒ ዴዖ።
1CO 7:3 ኣዚናይ ባ ማቼስ፥ ቃሲ ማቺያ ባ ኣዚናስ ቤሲያባ ኩንꬆ።
1CO 7:4 ማቼስ ባ ኣሳቴꬃ ቦላ ኢው ማቲ ባዋ፥ ሺን ማታይ ኢ ኣዚናሳ። ሄሳዳካ፥ ኣዚናስ ኢያ ኣሳቴꬃ ቦላ ማቲ ባዋ፥ ሺን ማታይ ማቼሳ።
1CO 7:5 ሂንቴ ዎሳን ጉꬃ ዎዴ ጋምዓናው ዞሬቴꬃን ጊዶና ኢፂኮ፥ ኢሶይ ኢሱዋ ዲጎፊቴ። ሄሳ ጋሶን ሂንቴናቴꬃ ሃራናው ፆኔቲን፥ ፃላሄይ ሂንቴና ፓጮና ሜላ ኢሲፌ ዴዒቴ።
1CO 7:6 ሺን ታኒ ሂንቴና ዞራናው ሃይሳ ጋይሲፔ ኣቲን ኪታ ጊዴና።
1CO 7:7 ኣሲ ኡባይ ታዳ ማቾ ኤኮና ዴዒያኮ ዶሳይስ፥ ሺን ፆሳይ ኢሱዋስ ኢሱዋስ ኢሚዳ ዱማ ኢሞቲ ዴዔስ። ኢሱዋስ ሃይሳ ሜላ ሃንኩዋስ ሄሳ ሜላ ኢሞቲ ዴዔስ።
1CO 7:8 ማቾ ኤኪቦናይሳታሲኔ ኣዚና ጌሊቦናይሳታስ ቃሲ ኣምዔታስ ታኒ ጌይ፥ ታዳ ኤኮና ዎይኮ ጌሎና ዴዒቴ ጋዳ ዞራይስ።
1CO 7:9 ሺን ኣሞን ፁጌቴይሳፌ ኤኬይሲኔ ጌሌይሲ ሎዖ ጊዲያ ጊሾ ኤንቲ ባንታና ሃራናው ዳንዳዖና ኢፂኮ፥ ኤኮኔ ጌሎ።
1CO 7:10 ታኒ ኤኪዳይሳታኔ ጌሊዳይሳታ ሃይሳዳ ጋዳ ዞራይስ፤ ታና ጊዲኬ ጎዳይ ኪቴስ፤ ማቺያ ባ ኣዚናፔ ሻኬቶፎ።
1CO 7:11 ሺን ሻኬቲኮ ሃራ ኣዚና ጌሎና ባርካ ዴዖ ዎይኮ ባ ኣዚናራ ጊጎ። ኣዚናይ ባ ማቺው ቢሎፎ።
1CO 7:12 ሺን ሃራታስ ጎዳ ጊዶናሺን ታኒ ሃይሳዳ ጋይስ። ኣማኖና ማቻ ዴዒያ ኣማኒያ ኣዚኒ ዴዒኮ፥ ኢያ ማቺያ ኢያራ ኢሲፌ ዳናው ኮይኮ ኢዮ ቢሎፎ።
1CO 7:13 ቃሲ ኣማኖና ኣዚኒ ዴዒያ ኣማኒያ ማቻ ዴዒኮ፥ ኢ ኣዚናይ ኢራ ኢሲፌ ዳናው ኮይኮ ኢያፔ ቢሌቶፎ።
1CO 7:14 ኣማኖና ኣዚናይ ባ ኣማኒያ ማቼ ባጋራ ጌዬስ፤ ቃሲ ኣማኖና ማቺያ ባ ኣማኒያ ኣዚና ባጋራ ጌያዉሱ። ሄሲ ባይኔኮ፥ ሂንቴ ናይቲ ቱና ጊዶሶና፥ ሺን ሃዒ ኤንቲ ጌሺ።
1CO 7:15 ሺን ኣማኖና ኣዚናይ ዎይኮ ማቺያ ቢላናው ኮይኮ ቢሎ። ኣማኒያ ማቺያ ዎይኮ ኣዚናይ ሄሳ ሜላባን ቃሼቶኮና። ፆሳይ ኑና ሳሮቴꬃን ዳና ሜላ ፄጊስ።
1CO 7:16 ኣማኒያ ማቼቴ፥ ኔኒ ኣማኖና ኔ ኣዚና ኣሻኔኮ ኣይ ኤራይ? ዎይኮ ኣማኒያ ኣዚናው፥ ኔኒ ኣማኖና ኔ ማቺው ኣሻኔኮ ኣይ ኤራይ?
1CO 7:17 ኢሲ ኢሲ ኣሲ ጎዳይ ኢያው ኢሚዳ ኢሞታዳኔ ፆሳይ ኢያ ፄጊዳይሳዳ ዴዖ። ዎሳ ኬꬃ ኡባን ታኒ ታማርሲዳ ዎጋይ ሃይሳ።
1CO 7:18 ኦኒካ ቃፃሬቲዲ ኣማኒዳባ ጊዲኮ፥ ቃፃሬቶናዳ ሃኖፖ። ቃፃሬቶና ኣማኒዳ ኦኒካ ዴዒኮ፥ ቃፃሬታናው ኮዮፖ።
1CO 7:19 ፆሳ ኪታ ፖላናው ቤሴስፔ ኣቲን ቃፃሬቲን ቃፃሬቶና ኣጊን ኣይኮካ ማዴና።
1CO 7:20 ኢሲ ኢሲ ኣሲ ፆሳይ ባና ፄጊያ ዎዴ ዴዔይሳዳ ዴዖ።
1CO 7:21 ፆሳይ ኔና ፄጊያ ዎዴ ኔኒ ኣይሌ? ኣይኮይ ባዋ ሄሳስ ኡንዔቶፋ። ሺን ኔኒ ኣይሌቴꬃፌ ላዓ ኬያናው ዳንዳዒኮ ዬዳ ኬያ።
1CO 7:22 ኣይሌ ጊዲ ዴዒሼ ጎዳን ፄጌቲዳ ኣሲ ጎዳን ኣይሌቴꬃፌ ላዓ ኬዪስ። ሄሳዳካ፥ ኣይሌ ጊዶና ዴዒሼ፥ ጎዳን ፄጌቲዳ ኣሲ ኪሪስቶሳ ኣይሌ።
1CO 7:23 ፆሳይ ሂንቴና ጋቴን ሻሚዳ ጊሾ ኣሳ ኣይሌ ጊዶፒቴ።
1CO 7:24 ታ ኢሻቶ፥ ሂንቴ ኢሶይ ኢሶይ ፄጌቲያ ዎዴ ዴዒያ ዴዑዋን ፆሳራ ኢሲፌ ዴዒቴ።
1CO 7:25 ጌላዖታባ ጎዳይ ታና ኪቲዳባይ ባዋ። ሺን ጎዳይ ታው ኢሚዳ ማሮቴꬃ ሜላ ታኒ ሂንቴና ዞራይስ።
1CO 7:26 ሂዛ፥ ሃዒ ሜቱዋ ጊሾ ኤኮና ዎይኮ ጌሎና ዱሲ ታው ሎዖ ዳኔስ።
1CO 7:27 ኔ ማቾ ኤኪዳባ ጊዲኮ፥ ቢላናው ኮዮፓ። ኔ ማቾ ኤካቦናባ ጊዲኮ፥ ኤካናው ኮዮፓ።
1CO 7:28 ሺን ኔ ማቾ ኤኪኮ ናጋሪ ባዋ። ሄሳዳ ጌላዒያካ ኣዚና ጌሊኮ ናጋሪ ባዋ። ሺን ኤኪያ ጌሊያ ኣሳስ ሃ ሳዓን ዳሮ ሜቶይ ዴዒያ ጊሾ ሂንቴ ሄሳፌ ኣታና ሜላ ታ ኮያይስ።
1CO 7:29 ታ ኢሻቶ፥ ታ ጌይ ሄሳ፤ ዎዴይ ዉሪስ። ሂዛፔ ሲንꬄ ማቻ ዴዔይሲ ማቾ ኤኮናይሳዳ ዴዖ።
1CO 7:30 ዬኬይሳቲ ዬኮናዳ፥ ኡፋይቴይሳቲ ኡፋይቶናዳ፥ ሻሜይሳቲ ኣይኮይካ ባይናዳ ባንታና ታይቦ።
1CO 7:31 ሃ ሳዓ ሻሉዋን ማዴቴይሳቲ ማዴቲቦናዳ ሃኖ። ሃ ኣላሚያ ማላይ ኣꬋና።
1CO 7:32 ሂንቴ ሂርጊ ባይና ዳና ሜላ ታ ዶሳይስ። ማቾ ኤኪቦናይሲ ጎዳ ኡፋይሳናው ኮያ ጊሾ ጎዳባ ቆፔስ።
1CO 7:33 ሺን ማቾ ኤኪዳይሲ ባ ማቺው ኡፋይሳናው ኮያ ጊሾ ሃ ሳዓባ ቆፔስ።
1CO 7:34 ኢያ ቆፋይ ናምዓን ሻኬቴስ። ኣዚና ጌላቦና ጌላዒያ ባ ኣሳቴꬃኒኔ ባ ሼምፑዋን ጌያዳ ጎዳ ኡፋይሳናው ኮያ ጊሾ ጎዳባ ቆፓዉሱ። ሺን ኣዚና ጌሊዳራ ባ ኣዚና ኡፋይሳናው ኮያ ጊሾ ሳዓባ ቆፓዉሱ።
1CO 7:35 ታኒ ሄሳ ሂንቴው ኦዴይ፥ ሂንቴ ማዴታና ሜላሳፌ ኣቲን ሂንቴና ኡንዔꬃናው ጊዴና። ሺን ሂንቴ ቆፋይ ሻኬቶና ማራን ዴዒዲ ጎዳ ኡፋይሲያባ ሂንቴ ኦꬃና ሜላ ታኒ ኦዳይስ።
1CO 7:36 ኦኒካ ባ ኦይቺዳ ጌላዔስ ጌሎ ዎዴይ ኣꬊስ ጊዲ ኢዮ ኣጋናው ቆፒኮ፥ ሄሲ ቃሲ ኢው ሎዖ ጊዶናይሲ ኢያው ሲዔቲኮ፥ ባ ኮዪዳይሳ ኦꬆ፤ ኤንቲ ኤኬቶ፥ ጌሌቶ፤ ሄሳን ናጋሪ ባዋ።
1CO 7:37 ሺን ኢሲ ኣሲ ኡንዔꬂያባይ ꬋዪን፥ ባ ዎዛናን ሚኒዲ፥ ባና ሃሪዲ፥ ባ ኦይቺዳ ጌላዒው ኤኮና ኣጋናው ኮይኮ ሎይꬂስ።
1CO 7:38 ሄሳ ጊሾ፥ ጌላዒው ኤኪያ ኡራይ ሎይꬂስ፤ ቃሲ ኤኮና ኡራይ ዳሮ ሎይꬂስ።
1CO 7:39 ማቺያ ባ ኣዚናይ ፓፃ ዴዒያ ዎዴ ኡባን ኢያራ ቃሼታሱ። ሺን ኢ ኣዚናይ ሃይቂኮ፥ ባ ዶሲዳ ኣዚና ጌላናው ዳንዳዓዉሱ። ጊዶሺን፥ ኢያ ጌሊያ ኣዴይ ኣማኒያ ኣሲ ጊዳናው ቤሴስ።
1CO 7:40 ታ ቆፋን ጊዲኮ፥ ኢያ ጌሎና ዴዒኮ ኡፋይሳን ዳና። ቃሲ ታው፥ ታ ቦላ ፆሳ ኣያኒ ዴዒያ ዳኔስ።
1CO 8:1 ኤቃስ ያርሼቲያ ካꬃባ ጊዲኮ ኑ ኡባይ ኤሮስ። ኤራቴꬂ ኦቶርሴስ፥ ሺን ሲቆይ ዲቼስ።
1CO 8:2 ኦኒካ ባና ኤራይስ ጊዲ ቆፒኮ፥ ኢ ቡሮ ኤራናው ቤሴይሳ ኤሪቤና።
1CO 8:3 ሺን ኦኒካ ፆሳ ሲቂኮ ኢ ፆሳ ማታን ኤሬቲዳይሳ።
1CO 8:4 ሄሳ ጊሾ፥ ኤቃስ ያርሼቲዳ ካꬂ ሙሳባ ጊዲኮ ሃ ኣላሚያን ጎዲ ኢሲ ፆሳፌ ኣቲን ሃሪ ባይና ጊሾ ኤቂ ፓꬆናባ ጊዴይሳ ኑኒ ኤሮስ።
1CO 8:5 ፆሴ ጊዶናሺን ሳሎኒኔ ሳዓን ፆሴ ጌቴቲ ፄጌቲያ ዳሮ ፆሳቲኔ ጎዳቲ ዴዒኮካ፥
1CO 8:6 ኡባባ ሜꬊዳ፥ ኑ ኢያባ ጊዲዳ፥ ኢሲ ፆሳይ፥ ኣዋይ፥ ኑስ ዴዔስ። ኡባይ ኢያ ባጋራ ሜꬌቲዳ፥ ኑካ ኢያ ባጋራ ዴዖ ዴሚዳ ኢሲ ጎዳይ፥ ዬሱስ ኪሪስቶሲ ኑስ ዴዔስ።
1CO 8:7 ሺን ሃይሳ ኤሬይ ኡባ ጊዴና። ኢሲ ኢሲ ኣሳይ ኤቃ ጎይኖራ ሜዜቲዳ ጊሾ ካꬂ ሚያ ዎዴ ኤቃስ ያርሼቲዳባ ኦꬂዲ ኤኮሶና። ሄ ዎዴ ኤንታ ካሃይ ዳቡራ ጊዲያ ጊሾ ቱኔስ።
1CO 8:8 ሺን ካꬂ ኑና ፆሳራ ዳቦዬና። ኑ ሞና ኣጊዲ ኣይኮካ ቆሄቶኮ፤ ቃሲ ሚዲ ዱማ ጎዔቶኮ።
1CO 8:9 ሺን ሂንቴ ኮዪዳባ ማናው ላዓቴꬂ ሂንቴው ዴዒኮካ ሄሲ ኣማኖን ሚኖናይሳታ ꬉቦና ሜላ ናጌቲቴ።
1CO 8:10 ኔኒ ኔና ኤራንቾ ጋዳ ኤቃስ ያርሼቲዳ ካꬂ ማናው ኤቃ ኬꬃን ኡቲዳሺን፥ ኣማኖን ሚኖናይሲ ኔና ቤዒኮ ሄሲ ኢያ ኤቃስ ያርሼቲዳ ካꬂ ማና ሜላ ዴንꬄꬄኔዬ?
1CO 8:11 ሂዛ፥ ኔ ኤራቴꬃ ጋሶን ኪሪስቶሲ ኢያ ጊሾ ሃይቂዳ፥ ኣማኖን ሚኖና ኔ ኢሻይ፥ ꬋይስ።
1CO 8:12 ሄሳዳ ኦꬂዲ፥ ኣማኖን ሚኖና ሂንቴ ኢሻታ ቆሂሼኔ ኤንታ ካሃ ማዱንፂሲሼ ኪሪስቶሳ ቆሄታ።
1CO 8:13 ሄሳ ጊሾ፥ ካꬂ ታ ኢሻ ꬉቢያባ ጊዲኮ፥ ኢ ꬉቤቶና ሜላ ኣሾ ኡባራካ ሚኬ።
1CO 9:1 ታኒ ዬዳ ዴዒያ ኣሲ ጊዲኪና? ታ ሃዋሬ ጊዲኪና? ታኒ ኑ ጎዳ ዬሱስ ኪሪስቶሳ ቤዓቢኪና? ሂንቴ ጎዳን ታ ዳቡራ ኣይፌ ጊዴኬቲ?
1CO 9:2 ሂንቴ ጎዳባ ጊዲያ ጊሾ ታ ሃራታስ ሃዋሬ ጊዶና ኢፂኮካ፥ ሂንቴው ሃዋሬ ጊዴይሳስ ሂንቴ ማርካ።
1CO 9:3 ታና ሃዋሬ ጊዴና ጌይሳታስ ታ ኢሚያ ዛሮይ ሃይሳ።
1CO 9:4 ኑ ሂንቴፌ ማናዉኔ ኡያናው ቱማ ኑስ ማቲ ባዌ?
1CO 9:5 ሃንኮ ሃዋሬታዳ፥ ጎዳ ኢሻታዳኔ ጴፂሮሳዳ፥ ኣማኒያ ኑ ማቼታ ኤኪ ሃሙታናው ኑስ ማቲ ባዌ?
1CO 9:6 ዎይኮ ኦꬂዲ ማናው ቤሴይ ታራኔ ባርናባሳ ፃላሌ?
1CO 9:7 ባ ሚሼን ዎታዳሬታꬂ ኦꬄይ ኦኔ? ዎይኮ ዎይኔ ቶኪዲ፥ ኢያፔ ኣይፌ ሞናይ ኦኔ? ዎይኮ ዉዴ ሄሚሼ፥ ሄ ዉዲያፔ ማꬂ ኡዮናይ ኦኔ?
1CO 9:8 ታኒ ሄሳ ኣሳ ቆፋꬆ ጋይናዬ? ሂጌይ ሄሳ ጌኔ?
1CO 9:9 ሙሴ ሂጊያን፥ «ዉዱማን ካꬃ ዬꬊያ ቦራ ዶና ቃቾፋ» ጌቴቲዲ ፃፌቲስ። ያቲን ፆሳይ ሄሳ ቦራስ ቆፒዲ ጊዴ?
1CO 9:10 ፆሳይ ሄሳ ጊዳይ ኑስ ቆፒዲ ጊዴኔ? ኤ ኑ ጊሾሳ። ጎዬይሲካ፥ ካꬃ ጌሼይሲካ ባና ጋኬይሳ ኤካና ጊዲ ኡፋይሳን ኦꬃናው ቤሴስ ጌቴቲዲ ቱማ ኑ ጊሾ ፃፌቲስ።
1CO 9:11 ኑኒ ሂንቴ ጊዶን ኣያና ዜሬꬂ ዜሪዳ ጊዲኮ ኣሾስ ኮሺያባ ኑ ሂንቴፌ ኤኪኮ፥ ሄሲ ጊታባዬ?
1CO 9:12 ሃራቲ ሄሳ ሂንቴፌ ኤካናው ኤንታው ማቲ ዴዒኮ፥ ኑስ ኤንታይሳፌ ኣꬊያ ማቲ ዴዔስ። ሺን ኑኒ ኪሪስቶሳ ዎንጌላስ ꬉቤ ጊዶና ሜላ፥ ኡባ ጌንጮሲፔ ኣቲን ሄ ማታን ጎዔቲቦኮ።
1CO 9:13 ፆሳ ኬꬃን ኦꬂያ ኣሳቲ ባንታ ካꬃ ፆሳ ኬꬃፌ ኤኬይሳ ኤሬኬቲ? ቃሲ ያርሾ ቤሳን ኦꬄይሳቲ ያርሹዋፌ ኤኬይሳ ኤሬኬቲ?
1CO 9:14 ሄሳዳካ፥ ዎንጌላ ማርካቴይሳቲ ዱሳስ ኮሺያባ ዎንጌላፔ ኤካና ሜላ ጎዳይ ኪቲስ።
1CO 9:15 ሺን ታኒ ሃ ማታ ኡባን ኣይኮካ ጎዔታቢኬ። ታኒ ሃይሳ ፃፊዳይ ታ ማታ ቦንቺሳናው ኮያዳ ጊዴና። ኦኒካ ታ ጬቁዋ ሃዳ ኦꬃናፔ ሃይቆይ ታው ሎዖ።
1CO 9:16 ታኒ ዎንጌላ ኦዴይ ኪቴቲዳ ጊሾሳፌ ኣቲን ታና ጬቂሲያባ ጊዴና። ዎንጌላ ኦዶና ኢፂኮ፥ ታና ኣዬ።
1CO 9:17 ታኒ ዎንጌላ ዶሳዳ ሳባኪኮ ታው ዎይቶይ ዴዔስ። ሺን ታኒ ዎንጌላ ዶሶና ኪቴታዳ ሳባኪያባ ጊዲኮ ሄሳ ፆሳይ ታው ሃዳራ ኢሚስ።
1CO 9:18 ያቲን፥ ታ ዎይቶይ ኣይቤ? ታኒ ዎንጌላ ሳባኪያ ዎዴ ታ ማታን ጎዔቶና ዎንጌላ ጮ ሳባኬይሲ ታው ዎይቶ።
1CO 9:19 ታኒ ኦዴስካ ኣይሌ ጊዲኬ፥ ሺን ዳሮታ ኣሻናው ኡባስ ኣይሌ ጊዳስ።
1CO 9:20 ታኒ ኣይሁዴታ ኣሻናው ኤንታራ ኤንታ ጊዳስ። ታ ሁዔን ሂጌፌ ጋርሳን ዴዒኬ፥ ሺን ሂጌፌ ጋርሳን ዴዔይሳታ ኣሻናው ሂጌፌ ጋርሳን ዴዒያ ኣሲ ጊዳስ።
1CO 9:21 ፆሳ ሂጊያፌ ካሬ ኬዮና፥ ኪሪስቶሳ ሂጊያስ ኪቴታሼ፥ ሂጌይ ባይናይሳታ ኣሻናው ሂጌይ ባይና ኣሳዳ ጊዳስ።
1CO 9:22 ታኒ ዳቡራንቾታ ኣሻናው ዳቡራንቾ ጊዳስ። ታኒ ጉꬃታ ኣሻናው ኡባራ ኡባ ሃናስ።
1CO 9:23 ታኒ ዎንጌላ ኣንጁዋ ሻኬታናው፥ ሃ ኡባ ዎንጌላ ጊሾ ሃናስ።
1CO 9:24 ዎꬃን ጋዴቲያ ኡባይ ዎፄስ፥ ሺን ኢሱዋ ፃላሊ ዎይቶ ኤኬይሳ ኤሬኬቲ? ሄሳዳ ሂንቴካ ዎይቱዋ ኤካናው ዎፂቴ።
1CO 9:25 ጋዴቲያ ኣሳ ኡባይ ኡባባን ባንታና ሃሬስ። ኤንቲ ሄሳ ዳቡሬይ ꬋያ ካላቻ ዎይቶ ኤካናሳ። ሺን ኑኒ ዳቡሬይ ሜሪና ካላቻ ዎይቱዋ ኤካናሳ።
1CO 9:26 ሄሳ ጊሾ፥ ታኒ ቆፊ ባይና ኣሳዳ ዎፂኬ። ጫርኮ ዪምፒያ ኣሳዳ ጮ ኩሼ ዬዲኬ።
1CO 9:27 ሺን ታኒ ሃራታስ ዎንጌላ ሳባኪዳፔ ጉዬ ታ ሁዔን ዬጌቲዳ ኣሲ ጊዶና ሜላ ታ ኣሳቴꬃ ዎልቃን ሃራዳ ታው ኪቴታና ሜላ ኦꬃይስ።
1CO 10:1 ታ ኢሻቶ፥ ታኒ ሂንቴ ሃይሳ ኣኬካና ሜላ ኮያይስ። ኑ ኣዋቲ ኡባይ ሻራፔ ጋርሳራ ሃሙቲዶሶና፤ ኡባይ ኣባ ፒኒዶሶና።
1CO 10:2 ኤንቲ ሙሴራ ኢሲፋናው ሻራኒኔ ኣባን ፃማቄቲዶስና።
1CO 10:3 ኤንቲ ኡባይ ኢሲ ኣያና ካꬃ ሚዶሶና።
1CO 10:4 ቃሲ ኡባይ ኢሲ ኣያና ኡሻ ኡዪዶሶና። ኤንቲ ባንታና ካሊያ ኣያና ዛላፌ ፑልቲዳ ኡሻ ኡዪዶሶና፤ ሄ ዛላይካ ኪሪስቶሳ።
1CO 10:5 ሺን ፆሳይ ኤንታፌ ዳሮታን ኡፋይቲቦና ጊሾ ኤንታ ኣሃይ ባዞ ቢታን ዎꬊዲ ኣቲስ።
1CO 10:6 ኤንቲ ኢታባ ኣሞቲዳይሳዳ፥ ኑካ ኢታባ ኣሞቶና ሜላ ሄሲ ኡባይ ኑስ ሌሚሶ ጊዲስ።
1CO 10:7 ጌሻ ማፃፋን፥ «ኣሳይ ማናዉኔ ኡያናው ኡቲዶሶና፤ ቃሲ ዬፃናው ዴንዲዶሶና» ጌቴቲዳይሳዳ ኤንታፌ ኢሶቲ ኢሶቲ ኤቃ ጎይኒዳይሳ ሜላ ሂንቴ ኤቃ ጎይኖፊቴ።
1CO 10:8 ኤንታፌ ኢሶቲ ኢሶቲ ላይማቲዳይሳዳ ኑ ላይማታናው ቤሴና። ሄሳ ጋሶን ኤንታፌ ኢሲ ጋላስ ላታማኔ ሄꬑ ሙኩሉ ኣሲ ሃይቂስ።
1CO 10:9 ኤንታፌ ኢሶቲ ኢሶቲ ጎዳ ፓጪዲ ሾሻን ዱኬቲዲ ሃይቂዳይሳዳ ኑ ጎዳ ፓጫናው ቤሴና።
1CO 10:10 ኤንታፌ ኢሶቲ ኢሶቲ ዙዙሚዲ ሃይቆ ኤሂያ ኪታንቹዋን ꬋዪዳይሳዳ ሂንቴካ ዙዙሞፊቴ።
1CO 10:11 ሃ ኤንታ ቦላ ጋኪዳ ኡባይ ኑ ናጌታና ሜላ ኑስ ሌሚሶ ጊዲስ። ቃሲ ዎዴ ዉርሴꬃ ቦላ ዴዒያ ኑስ ቲሚርቴ ጊዳና ሜላ ሃ ኡባይ ፃፌቲስ።
1CO 10:12 ሄሳ ጊሾ፥ ታ ኤቃስ ጊያ ኦኒካ ኩንዶና ሜላ ባና ናጎ።
1CO 10:13 ኣሴ ኡባ ጋኪያ ፓጬፔ ኣቲን ዱማ ፓጬይ ሂንቴና ጋኪቤና። ሂንቴ ዎልቃይ ዳንዳዔይሳፌ ኣꬊያ ፓጬን ሂንቴ ፓጬቶና ሜላ ኣꬂ ኢሞና ፆሳይ ኣማኔቲዳይሳ። ሂንቴና ፓጬይ ጋኪያ ዎዴ ሄ ፓጪያ ኢ ሂንቴና ዳንዳዒሳና። ቃሲ ሄ ፓጪያፔ ሂንቴ ኬያና ኦጊያ ኢ ጊጊሳና።
1CO 10:14 ሂዛ፥ ታ ኣልዖ ኢሻቶ፥ ኤቃ ጎይኖፌ ሃኪቴ።
1CO 10:15 ሂንቴ ዎዛናማ ኣሲ ጊዲዳ ጊሾ ታ ሃይሳ ኦዳይስ። ታኒ ጌይሲ ቱማ ጊዴይሳ ሂንቴ ሂንቴ ሁዔን ፒርዲቴ።
1CO 10:16 ኑኒ ፆሳ ጋላቲዲ ሻኬቲያ ኣንጆ ፁዓይ ኪሪስቶሳ ሱꬃራ ኢሲፌቴꬂ ዴዔይሳ ጊዴኔዬ? ቃሲ ኑኒ ባꬂያ ኡይꬃይ ኪሪስቶሳ ኣሹዋራ ኢሲፌቴꬂ ዴዔይሳ ጊዴኔዬ?
1CO 10:17 ኑኒ ዳሮ ጊዲኮካ ኡይꬃይ ኢሲኖ፥ ኑ ሄ ኢሲ ኡይꬃ ሻኬቲያ ጊሾ ኢሲ ኣሳቴꬂ።
1CO 10:18 ኣኔ ኢስራዔሌ ኣሳይ ኦꬂዳይሳ ኣኬኪቴ። ያርሼቲዳ ያርሹዋ ሜይሳታስ ያርሾ ቤሳራ ኢሲፌቴꬂ ባዌዬ?
1CO 10:19 ታኒ ኣይ ጋናው ኮያዳ ጋይና? ኤቃስ ያርሼቲዳ ካꬃይ ዎይኮ ኤቃይ ፓꬂያባ ጊዴና።
1CO 10:20 ኤንቲ ያርሼይ ፆሳስ ጊዶናሺን ቱና ኣያናታሳ። ሄሳ ጊሾ፥ ሂንቴው ቱና ኣያናታራ ኢሲፌቴꬂ ዳና ሜላ ኮዪኬ።
1CO 10:21 ሂንቴ ጎዳ ፁዓፔ ኡዪሼ፥ ቃሲ ቱና ኣያናታ ፁዓፔ ኡያናው ዳንዳዔኬታ። ጎዳ ጋይታፔ ሚሼ ቃሲ ቱና ኣያናታ ጋይታፔ ማናው ዳንዳዔኬታ።
1CO 10:22 ኑ ሄሳ ኦꬂዲ ጎዳ ዪሎይኖ? ኑ ኢያፔ ኣꬊያ ሚኖዬ?
1CO 10:23 ሂንቴ፥ «ኡባባ ኦꬆና ሜላ ዲጊያባይ ባዋ» ጌታ፥ ሺን ኡባይ ማዴና። ሂንቴ፥ «ኡባባ ኦꬆና ሜላ ዲጊያባይ ባዋ» ጌታ፥ ሺን ኡባባይ ዲቼና።
1CO 10:24 ኢሲ ኢሲ ኣሲ፥ ሃራ ኣሲ ማዲያባ ቆፓናው ቤሴሲፔ ኣቲን ባና ማዲያባ ፃላላ ቆፖፎ።
1CO 10:25 ሂንቴ ካሃ ሲꬌን ጌልሲያ ኦይሻ ዴንꬆና ጊያን ባይዜቲያ ኣሹዋ ጮ ሚቴ።
1CO 10:26 ኣይስ ጊኮ፥ «ሳዒኔ ሳዓን ዴዒያ ኡባይ ጎዳሳ።»
1CO 10:27 ኢሲ ኣማኖና ኣሲ ሂንቴና ኢማታናው ኮዪዲ ፄጊኮ ባናው ኮይኮ ቢቴ። ሂንቴ ካሃን ሜꬌቲያ ኦይሻን ሲꬎና ሂንቴ ሲንꬄ ኣꬂያባ ኡባ ሚቴ።
1CO 10:28 ሺን ኢሲ ኣሲ፥ «ሃይሲ ኤቃስ ያርሼቲዳባ» ጊኮ፥ ሄ ሂንቴው ኦዲዳ ኣዲያ ጊሾኔ ሂንቴ ካሃ ጊሾ ሄ ካꬃ ሞፒቴ።
1CO 10:29 ታኒ፥ ካሃ ጊሾ ጌይ ሄ ሂንቴው ኦዲዳ ኡራ ካሃ ጉሱፌ ኣቲን ሂንቴ ካሃ ጊዴና። ሃራ ኣሳ ካሃ ጊሾ ጋዳ ታኒ ታ ላዓቴꬃ ቦላ ኣይስ ፒርዶ?
1CO 10:30 ታኒ ሚያ ካꬃ ፆሳ ጋላታዳ ሚኮ ባሊዳዳ ኣይስ ቦሬቲያና?
1CO 10:31 ሂዛ፥ ሂንቴ ኣይ ሚኮ ኣይ ኡዪኮ፥ ዎይኮ ኣይ ኦꬂኮካ ኡባባ ፆሳ ቦንቾስ ኦꬂቴ።
1CO 10:32 ኣይሁዴታ ጊዲን ጊሪኬታ ጊዲን ዎይኮ ፆሳ ዎሳ ኬꬂ ጊዲን ኦዴስካ ꬉቤ ጊዶፒቴ።
1CO 10:33 ታኒ ኡባ ዎዴ ዳሮታ ኣሻናው ኤንቲ ማዴቲያ ኦጌ ኮያይሲፔ ኣቲን ታና ማዲያ ኦጌ ኮዪኬ።
1CO 11:1 ታኒ ኪሪስቶሳ ሌሚሱዋ ካሌይሳዳ፥ ሂንቴካ ታና ካሊቴ።
1CO 11:2 ሂንቴ ኡባባን ታና ቆፒያ ጊሾኔ ታ ታማርሲዳ ቲሚርቲያ ሚንꬂዲ ናጊዳ ጊሾ ታ ሂንቴና ጋላታይስ።
1CO 11:3 ሺን ኪሪስቶሲ ኣዴ ኡባስ ሁዔ፥ ኣዴይ ማጫሳስ ሁዔ፥ ቃሲ ፆሳይ ኪሪስቶሳስ ሁዔ ጊዴይሳ ሂንቴ ኤራና ሜላ ታ ኮያይስ።
1CO 11:4 ባ ሁዒያ ጉሉንቲዲ ፆሳ ዎሲያ ዎይኮ ቲንቢቴ ኦዲያ ኣዴ ኡባይ ሁዔ ጊዲዳ ኪሪስቶሳ ቶቼስ።
1CO 11:5 ባ ሁዒያ ቃጮና ፆሳ ዎሲያ ዎይኮ ቲንቢቴ ኦዲያ ማጫሲያ ሁዔ ጊዲዳ ባ ኣዚና ቶቻዉሱ። ባ ሁዒያ ቃጮና ማጫሲያ ባ ሁዒያ ሜዴቲዳ ማጫሳ ሜላ።
1CO 11:6 ማጫሲ ባ ሁዒያ ቃጮና ኢፂኮ፥ ባ ሁዒያ ቃንፄቶ። ሺን ኢው ሁዒያ ቃንፆይ ዎይኮ ሜዶይ ቦርሶ ጊዲኮ ባ ሁዒያ ቃጮ።
1CO 11:7 ኣዴይ ፆሳ ሌሚሶኔ ፆሳ ቦንቾ ጊዲያ ጊሾ ባ ሁዒያ ቃቻናው ቤሴና፥ ሺን ማጫሲ ኣዴስ ቦንቾ።
1CO 11:8 ማጫሲ ኣዴፌ ሜꬌታሱፔ ኣቲን ኣዴይ ማጫሳፔ ሜꬌቲቤና።
1CO 11:9 ማጫሲ ኣዴስ ሜꬌቲሲፔ ኣቲን ኣዴይ ማጫሳስ ሜꬌቲቤና።
1CO 11:10 ሃይሳ ጊሾኔ ኪታንቾታ ጊሾ ማጫሲ ባው ማቲ ዴዔይሳ ቤሲያ ማላ ባ ሁዔን ቃጫናው ቤሴስ።
1CO 11:11 ሺን ጎዳ ቆፋን ማጫሲ ኣዴይ ባይና ዴና፤ ኣዴይካ ማጫሲ ባይና ዴዔና።
1CO 11:12 ማጫሲ ኣዴፌ ሜꬌቲዳይሳዳ ኣዴይካ ማጫሳፔ ዬሌቲስ። ሺን ኡባባይካ ፆሳፌ ሜꬌቲስ።
1CO 11:13 ኣኔ ሂንቴ ፒርዲቴ። ማጫሲ ባ ሁዔ ቃጮና ፆሳ ዎሳናው ቤሲ?
1CO 11:14 ኣዴይ ባ ሁዒያ ዲቺኮ ኢያው ቦርሶ ጊዴይሳ ሃሪ ኣቶሺን ሜꬌቴꬂ ሂንቴና ታማርሴኔ?
1CO 11:15 ሺን ማጫሲ ባ ሁዒያ ዲቺኮ ኢው ቦንቾ ጊዴኔ? ማጫሳስ ሁዔይ ኢሜቲዳይ ኢያ ባና ካማና ሜላሳ።
1CO 11:16 ሺን ሃይሳ ቦላ ፓላማናው ኮያ ኣሲ ዴዒኮ፥ ኑስ ጊዲን ዎይኮ ፆሳ ዎሳ ኬꬃታስ ጊዲን ሃይሳፌ ሃራ ዎጊ ባዋ።
1CO 11:17 ሂንቴ ኢሲፌ ሺቄይ ጎዓስ ጊዶናሺን ቆሆስ ጊዲያ ጊሾ ሃዒ ታ ኢሚያ ኪታን ሂንቴና ናሺኬ።
1CO 11:18 ታ ኮይሮ ሲዒዳይ፥ ሂንቴ ዎሳ ኬꬃን ሺቂያ ዎዴ ሂንቴ ጊዶን ሻሄቴꬂ ዴዔይሳ። ሄ ታ ሲዒዳይሳፌ ባጋይ ቱማ ጊዴይሳ ኣማናይስ።
1CO 11:19 ሂንቴ ጊዶፌ ቱሚ ዴዔይሳቲ ኦናንቴኮ ኤሬታና ሜላ ሂንቴ ጊዶን ሻኮይ ዳናይሲ ኣቴና።
1CO 11:20 ሂንቴ ኢሲፌ ሺቂያ ዎዴ ሂንቴ ሺቄይ ጎዳ ካሁዋ ማናሳ ጊዴና።
1CO 11:21 ሂንቴ ካꬂ ሚያ ዎዴ ኢሶይ ኢሱዋ ናጎና ባይሳ ባይሳ ሚያ ጊሾ ኢሶይ ኮሻቴስ ሃንኮይ ቃሲ ማꬆቴስ።
1CO 11:22 ቱማ ሂንቴ ማናዉኔ ኡያናው ሂንቴው ኬꬂ ባዌ? ዎይኮ ፆሳ ዎሳ ኬꬃ ካꬌቲ? ኣይኮይ ባይና ማንቆታ ዬላዬቲ? ታ ሂንቴና ዎይጎ? ሃይሳስ ታ ሂንቴና ናሾ? ናሺኬ።
1CO 11:23 ታኒ ሂንቴው ኢሚዳ ቲሚርቲያ ጎዳፔ ኤካስ። ጎዳ ዬሱሲ ኣꬊዲ ኢሜቲያ ቃማን ኡይꬃ ኤኪዲ፥
1CO 11:24 ፆሳ ጋላቲስ። ኡይꬃ ባꬂዲ «ሄዒቴ፤ ሚቴ። ሃይሲ ሂንቴው ኢሜቲያ ታ ኣሹዋ። ሃይሳ ሚሼ ታና ሃሳዪቴ» ያጊስ።
1CO 11:25 ሄሳዳካ፥ ካሁዋ ሚዲ ሲሚን፥ ፁዓ ኤኪዲ፥ «ሃይሲ ፁዓይ ታ ሱꬃን ኤቂያ ኦራꬃ ጫቁዋ። ሂንቴ ኢያፔ ኡያ ዎዴ ኡባን ታና ሃሳዪቴ» ያጊስ።
1CO 11:26 ሂንቴ ሃ ኡይꬃ ሚያ ዎዴኔ ሃ ፁዓ ኡያ ዎዴ ኡባን ጎዳይ ያና ጋካናው ኢያ ሃይቁዋ ኦዴታ።
1CO 11:27 ሄሳ ጊሾ፥ ቤሶና ኦጊያን ጎዳ ኡይꬃ ሚያ ዎይኮ ጎዳ ፁዓ ኡያ ኦኒካ ኢያ ኣሹዋኔ ሱꬃ ቶቺዳ ጊሾ ባ ናጋራን ኦይሼቴስ።
1CO 11:28 ሺን ኣሲ ባና ፓጮ። ያቲዲ ኡይꬃ ሞ፤ ፁዓፔካ ኡዮ።
1CO 11:29 ጎዳ ኣሹዋባ ሻኪ ኤሮና፥ ኡይꬃ ሜይኔ ፁዓፔ ኡዬይ፥ ባ ቦላ ፒርዳ ሜሲኔ ኡዬስ።
1CO 11:30 ሄሳ ጊሾ፥ ሂንቴ ጊዶፌ ዳሮቲ ዳቡሪዶሶና፤ ሃርጊዶሶና፤ ቃሲ ኡንዴና ኣሳቲ ሃይቂዶሶና።
1CO 11:31 ሺን ኑ ኑና ፓጪ ቤዒዳባ ጊዲያኮ፥ ኑ ቦላ ፒርዴታናሺን።
1CO 11:32 ኣላሜይ ፒርዴቲያ ዎዴ ኑ ኣላሚያራ ፒርዴቶና ሜላ ሃዒ ጎዳይ ኑና ሴሬስ።
1CO 11:33 ሄሳ ጊሾ፥ ታ ኢሻቶ፥ ጎዳ ካሁዋ ማናው ሂንቴ ሺቂያ ዎዴ ኢሶይ ኢሱዋ ጋꬂ ኤኪቴ።
1CO 11:34 ሂንቴ ሺቆይ ፒርዳስ ጊዶና ሜላ ኮሻቲዳ ኦኒካ ዴዒኮ፥ ባ ሶን ሞ። ኣቲዳባ ታኒ ያ ባዳ ሂንቴው ኦዳና።
1CO 12:1 ታ ኢሻቶ፥ ጌሻ ኣያና ኢሞታታባ ሂንቴ ኤራና ሜላ ታ ኮያስ።
1CO 12:2 ሂንቴ ፆሳ ኣማኖና ዎዴ ዶኒ ባይና ኤቃታን ጎሼቲዲ፥ ሂንቴ ኤሮና ሶ ቢዳይሳ ኤሬታ።
1CO 12:3 ፆሳ ኣያናይ ካሌꬂያ ኣሲ ኦኒካ፥ «ዬሱሲ ቃንጌቶ» ያጌና። ቃሲ ጌሻ ኣያናይ ካሌꬆና ዴዒሺን፥ ኦኒካ፥ «ዬሱሲ ጎዳ» ጋናው ዳንዳዖናይሳ ሂንቴ ኤራና ሜላ ኮያይስ።
1CO 12:4 ዱማ ዱማ ኣያና ኢሞታቲ ዴዖሶና፥ ሺን ኢሞታታ ኢሚያ ኣያናይ ኢሱዋ።
1CO 12:5 ኑ ጎዳስ ኦꬂያ ዱማ ዱማ ኦሶቲ ዴዖሶና፥ ሺን ጎዳይ ኢሱዋ።
1CO 12:6 ኑ ጎዳስ ኦꬂያ ዱማ ዱማ ኦጌቲ ዴዖሶና፥ ሺን ሄ ኦጌታን ኣሳ ኡባን ኦꬂያ ፆሳይ ኢሱዋ።
1CO 12:7 ሺን ኢሱዋስ ኢሱዋስ ኢሜቲዳ ኢሞታታን ሃራታ ማዳና ሜላ ጌሻ ኣያናይ ቆንጬስ።
1CO 12:8 ጌሻ ኣያናይ ኢሱዋስ ጪንጫቴꬂ ኩሚዳ ቃላ ኢሜስ፤ ቃሲ ኢሱዋስ ኤራቴꬂ ኩሚዳ ቃላ ኢሜስ።
1CO 12:9 ሄ ጌሻ ኣያናይ ኢሱዋስ ኣማኖ፥ ሃንኩዋስ ቃሲ ፓꬂያ ዎልቃ ኢሜስ።
1CO 12:10 ጌሻ ኣያናይ ኢሱዋስ ማላታ ኦꬂያ ዎልቃ፥ ኢሱዋስ ቲንቢቴ ኦዲያ ዎልቃ ኢሜስ። ኢሱዋስ ኣያናፔ ኣያና ሻኪ ኤሪያ ዎልቃ፥ ኢሱዋስ ዱማ ዱማ ዶናን ኦዲያ ዎልቃ፥ ቃሲ ኢሱዋስ ዱማ ዱማ ዶናን ኦዴቲዳይሳ ቢርሺያ ዎልቃ ኢሜስ።
1CO 12:11 ሺን ሃ ኡባ ኦꬄይ ሄ ኢሲ ጌሻ ኣያና። ኢ ኮያ ሜላ ኢሲ ኢሲ ኣሳስ ዱማ ዱማ ኢሞታ ኢሜስ።
1CO 12:12 ኢሲ ኣሳቴꬃን ዳሮ ቢሊቴቲ ዴዖሶና፥ ሺን ሄ ዱማ ዱማ ቢሊቴቲ ኢሲ ኣሳቴꬂ ጊዶሶና። ሄሳዳካ፥ ኪሪስቶሲ ዱማ ዱማ ቢሊቴቲ ዴዒያ ኣሳቴꬃ ሜላ።
1CO 12:13 ኑኒ ኣይሁዴ ጊዲን ጊሪኬ ጊዲን ኣይሌ ጊዲን ዎማኖ ጊዲን፥ ኡባይ ኢሲ ኣሳቴꬂ ጊዳናው ጌሻ ኣያናን ፃማቄቲዳ። ቃሲ ኑ ኡባይ ኢሲ ጌሻ ኣያና ኤኪዳ።
1CO 12:14 ኑ ኣሳቴꬃን ዱማ ዱማ ቢሊቴቲ ዴዖሶናፔ ኣቲን ኢሲ ቢሊቴ ጊዴና።
1CO 12:15 ቶሆይ፥ «ታኒ ኩሼ ጊዶና ጊሾ ቢሊቴ ጊዲኬ» ጊኮ፥ ኢ ሄሳ ጊዳ ጊሾ ቢሊቴቴꬃይ ኣቲዬ?
1CO 12:16 ሃይꬂ፥ «ታኒ ኣይፌ ጊዶና ጊሾ ቢሊቴ ጊዲኬ» ጊኮ፥ ኢ ሄሳ ጊዳ ጊሾ ኣሳቴꬃፌ ኢሲ ቢሊቴ ጊዴይሲ ኣቲዬ?
1CO 12:17 ኣሳቴꬃ ኡባይ ኣይፌ ፃላላ ጊዲዳኮ፥ ኑ ኣይቢን ሲዓኔ? ቃሲ ኣሳቴꬂ ኡባይ ሃይꬃ ፃላላ ጊዲዳኮ ኑ ኣይቢን ሲንጋኔ?
1CO 12:18 ሺን ፆሳይ ባ ኮዪዳይሳዳ፥ ኣሳቴꬃ ጊዶን ዱማ ዱማ ቢሊቴታ ዎꬂስ።
1CO 12:19 ኡባይ ኢሲ ቢሊቴ ጊዲዳኮ ኣሳቴꬂ ዋኒዲ ዳኔ?
1CO 12:20 ሺን ቢሊቴቲ ዳሮ ጊዲኮካ፥ ኣሳቴꬃይ ኢሶ።
1CO 12:21 ኣይፌይ ኩሼኮ፥ «ኔ ታው ኮሻካ» ጋናው ዳንዳዔና። ዎይኮ ሁዔይ ቶሆኮ፥ «ኔ ታው ኮሻካ» ጋናው ዳንዳዔና።
1CO 12:22 ሺን ዳቡራ ዳኒያ ኣሳቴꬃ ቢሊቴቲ ኑስ ኣꬊዲ ኮሾሶና።
1CO 12:23 ቦንቾ ኮሼና ጊዲ ኑ ቆፒያ ኑ ቢሊቴታፔ ባጋታ ዳሮ ቦንቾስ። ቃሲ ኑ ቦርሴቲያ ኑ ኣሳቴꬃ ቢሊቴታ ኣꬂ ቦንቺዲ ናጎስ።
1CO 12:24 ኑ ቤዒን ቦርሶና ኣሳቴꬃ ቢሊቴታስ ቦንቾ ኮሼና። ሺን ፆሳይ ኑ ኣሳቴꬃ ቢሊቴታ ዎሊራ ጋሴꬂዲ ቦርሲያ ቢሊቴታስ ኣꬊያ ቦንቾ ኢሚስ።
1CO 12:25 ኣሳቴꬃ ቢሊቴቲ ኢሶይ ኢሱዋራ ሻኮ ሜꬎና ዎሊስ ቆፓና ሜላ ኦꬂዲ ሜꬊስ።
1CO 12:26 ኣሳቴꬃ ቢሊቴታፔ ኢሶይ ሳኬቲኮ ቢሊቴቲ ኡባይ ኢያራ ሳኬቶሶና። ኣሳቴꬃ ቢሊቴታፔ ኢሶይ ቦንቼቲኮ ቢሊቴቲ ኡባይ ኢያራ ኡፋይቶሶና።
1CO 12:27 ሂንቴ ኡባይ ኪሪስቶሳ ኣሳቴꬂ፤ ቃሲ ሂንቴ ኢሶይ ኢሶይ ኢያ ቢሊቴታ።
1CO 12:28 ዎሳ ኬꬃን ፆሳይ፥ ኮይሮ ሃዋሬታ፥ ናምዓንꬆ ናቤታ፥ ሄꬓንꬆ ኣስታማሬታ፥ ካሊዲ ማላታ ኦꬄይሳታ፥ ፓꬄይሳታ፥ ሃራታ ማዴይሳታ፥ ዎሳ ኬꬃ ኣይሴይሳታኔ፥ ዱማ ዱማ ዶናን ሃሳዬይሳታ ዎꬂስ።
1CO 12:29 ኡባይ ሃዋሬ? ኡባይ ናቤ? ኡባይ ኣስታማሬ? ኡባይ ማላታ ኦꬂ?
1CO 12:30 ኡባይ ፓꬂዬ? ኡባይ ዱማ ዱማ ዶናን ኦዴቲ? ኡባይ ዱማ ዱማ ዶናን ኦዴቶይሳ ቢርሺ?
1CO 12:31 ሺን ኡባፌ ኣꬊያ ኢሞታ ሚንꬂዲ ኮዪቴ። ቃሲ ኡባፌ ኣꬊያ ኦጊያ ታ ሂንቴና ቤሳና።
1CO 13:1 ታኒ ኣሳ ቃላኔ ኪታንቾ ቃላ ኦዴታናው ዳንዳዒኮካ፥ ታው ሲቆይ ꬋዪኮ፥ ጮ ጊሪያ ዳላ ሜላ።
1CO 13:2 ቲንቢቴ ኦዲያ ኢሞይ ታው ዴዒኮካ፥ ፁራ ኡባ ኤሪኮካ፥ ኤራቴꬂ ኡባይ ዴዒኮካ፥ ቃሲ ዴሪያ ዴንꬂዲ ሃራሶ ኤፊያ ኣማኖይ ታው ዴዒኮካ፥ ሲቆይ ꬋዪኮ፥ ታ ኣይኮካ ጊዲኬ።
1CO 13:3 ታው ዴዒያባ ኡባ ማንቆታስ ኢሚኮካ፥ ሃሪ ኣቶሺን፥ ታና ታማስ ኣꬃ ኢሚኮካ፥ ሲቆይ ꬋዪኮ ታና ኣይኮካ ማዴና።
1CO 13:4 ሲቆይ ዳንዳዓንቾ። ሲቆይ ኬሃ። ሲቆይ ቃናቴና። ሲቆይ ጬቄቴና። ሲቆይ ኦቶሬና።
1CO 13:5 ሲቆይ ቤሶናባ ኦꬄና። ሲቆይ ኡዜቴና። ሲቆይ ዪሎቴና። ሲቆይ ባ ቆሆ ፓይዴና።
1CO 13:6 ሲቆይ ቱማን ኡፋይቴሲፔ ኣቲን ዎርዶን ኡፋይቴና።
1CO 13:7 ሲቆይ ኡባ ዳንዳዔስ፤ ኡባ ኣማኔስ፤ ሎዖባይ ሃናና ጊዲ፥ ኡፋይሳን ናጌስ፤ ኡባ ጌንጬስ።
1CO 13:8 ሲቆይ ዉርሴꬂ ጋካናው ꬋዬና። ሺን ቲንቢቴይ ኣታና፤ ዱማ ዱማ ዶናን ኦዴቴይሲ ኣታና፤ ኤራቴꬂካ ኣꬋና።
1CO 13:9 ኑ ኤራቴꬃፌ ጉꬂ ኤሮስ፤ ቲንቢቲያፔ ባጋ ኦዶስ።
1CO 13:10 ሺን ፖሎ ጊዲዳይሲ ያ ዎዴ ፖሎ ጊዶናይሲ ኣታና።
1CO 13:11 ታኒ ናዓ ዴዒያ ዎዴ ናዓዳ ሃሳይስ፤ ናዓዳ ቆፓይስ፤ ናዓዳ ኣኬካይስ። ታ ካሃሚዳ ዎዴ ናዓቴꬃ ሃኑዋ ኣጋስ።
1CO 13:12 ሃዒ ፖዖይ ባይናሶን ማስቶቴን ቤዔይሳዳ ቤዖስ፥ ሺን ሄ ዎዴ ኑ ቆንጬን ቤዓና። ሃዒ ኑ ኤራቴꬃፌ ጉꬃ ኤሮስ፥ ሺን ሄ ዎዴ ፆሳይ ኑና ኤሬይሳዳ ፖሎ ኤራና።
1CO 13:13 ሂዛ፥ ኣማኖይ፥ ኡፋይሲኔ ሲቆይ፥ ሃ ሄꬓቲ ኤቂዲ ዳና። ሺን ሃይሳታፔ ኣꬌይ ሲቆ።
1CO 14:1 ሲቆ ካሊቴ። ኣያና ኢሞታታ ሚንꬂዲ ኮዪቴ፤ ኡባፌ ኣꬂዲ፥ ቲንቢቴ ኢሞታ ሚንꬂዲ ኮዪቴ።
1CO 14:2 ዱማ ዱማ ዶናን ኦዴቲያ ኣሲ ፆሳስ ኦዴሲፔ ኣቲን ኣሳስ ኦዴና። ሺን ኣሳስ ቆንጪቦና ፁራ ኣያና ዎልቃን ኦዴቲያ ጊሾ ኦኒካ ኢ ኦዴቴይሳ ኣኬኬና።
1CO 14:3 ሺን ቲንቢቴ ኦዴይሳቲ ኣሴ ዲቻናው፥ ሚንꬄꬃናዉኔ ሚንꬃናው ኣሳስ ኦዴስ።
1CO 14:4 ዱማ ዱማ ዶናን ኦዲያ ኣሲ ባና ዲቼስ። ሺን ቲንቢቴ ኦዲያ ኣሲ ዎሳ ኬꬃ ዲቼስ።
1CO 14:5 ሂንቴ ኡባይ ዱማ ዱማ ዶናን ኦዴቲያኮ ታ ዶሳይስ፥ ሺን ቲንቢቴ ኦዳናይሳ ኣꬃዳ ዶሳይስ። ዱማ ዱማ ዶናን ኦዴቴይሳ ዎሳ ኬꬂ ዲቻናው ቢርሺያ ኣሲ ꬋዪኮ፥ ዱማ ዱማ ዶና ኦዴቴያሳፌ ቲንቢቴ ኦዴይሲ ኣꬌስ።
1CO 14:6 ሺን ታ ኢሻቶ፥ ታኒ ሂንቴኮ ባዳ ቆንጬꬃን ዎይኮ ኤራቴꬃን ዎይኮ ቲንቢቴ ኦዶን ዎይኮ ቲሚርቴን ጊዶናሺን ዱማ ዱማ ዶናን ኦዴቲኮ ሂንቴና ኣይ ማዳኔ?
1CO 14:7 ዱማ ዱማ ዬꬃ ሚሼታስ ኢሲ ቆሞ ጊርሲ ዴዒኮ፥ ሱሱልዔ ጊርሲኔ ዲꬃ ጊርሲ ዋቲዲ ሻኪ ኤራኔ?
1CO 14:8 ቃሲ ሞይዜ ፑኖይ ጌዪዲ ኤሬቶና ኢፂኮ ኦላስ ጊጌቴይ ኦኔ?
1CO 14:9 ሄሳዳካ፥ ዱማ ዱማ ዶናን ሂንቴ ኦዴቴይሲ ቆንጬ ጊዶና ኢፂኮ ሂንቴ ኦዴይሳ ኦኒ ኤራኔ? ሄሲ ጫርኮስ ኦዲያ ሜላ።
1CO 14:10 ሃ ኣላሚያን ዳሮ ዶናቲ ዴዖሶና፤ ሄ ኡባስ ቢርሼꬂ ዴዔስ።
1CO 14:11 ሺን ኢሲ ኣሲ ኦዴቲያ ዶና ታኒ ኤሮና ኢፂኮ ኢ ታው ኢማꬄ ጊዴስ፤ ታካ ኢያው ኢማꬄ ጊዳይስ።
1CO 14:12 ሄሳዳካ፥ ጌሻ ኣያና ኢሞታ ሂንቴ ኤካናው ሚንꬂዲ ኮይኮ፥ ዎሳ ኬꬂ ዲቻናው ኡባፌ ኣꬊያ ኢሞታ ኮዪቴ።
1CO 14:13 ዱማ ዱማ ዶናን ኦዴቲያ ኣሲ ባ ኦዳ ቢርሻናው ቢርሼꬃ ኢሞታይ ኢሜታና ሜላ ፆሳ ዎሶ።
1CO 14:14 ታኒ ዱማ ዱማ ዶናን ፆሳ ዎሲኮ፥ ታ ኣያናይ ዎሴስ፥ ሺን ታ ዎዛናይ ኣይኮካ ጎዔቴና።
1CO 14:15 ያቲን፥ ታ ኣይ ኦꬃናው ኮሺ? ታኒ ታ ኣያናን ዎሳይስ፤ ታ ዎዛናንካ ዎሳይስ። ታኒ ታ ኣያናን ዬፃይስ፤ ታ ዎዛናንካ ዬፃይስ።
1CO 14:16 ሄሳ ጊዶና ኢፂኮ ኔኒ ኔ ኣያናን ፆሳ ጋላቲያ ዎዴ ሄ ቤሳን ኔኒ ጌይሳ ኤሮና ኣሲ ኔ ጋላቴይሳ ዎይጊዲ፥ «ኣሚንዒ» ጋኔ?
1CO 14:17 ኔኒ ፆሳ ጋላቴይሲ ሎዖ፥ ሺን ሃራ ኣሲ ማዴና።
1CO 14:18 ታ ሂንቴ ኡባፌ ኣꬃዳ ዱማ ዱማ ዶናን ኦዴቲያ ጊሾ ፆሳ ጋላታይስ።
1CO 14:19 ሺን ታኒ ዎሳ ኬꬃን ሃራታ ታማርሳናው ዱማ ዱማ ዶናን ታሙ ሙኩሉ ቃላ ኦዴታናፔ ኤሬቲያ ዶናን ኢቻሹ ቃላ ኦዴታናው ዶሳይስ።
1CO 14:20 ታ ኢሻቶ፥ ሂንቴ ቆፋን ናይታዳ ሃኖፒቴ። ሂንቴ ኢታባስ ናይታዳ ሃኒቴፔ ኣቲን ሂንቴ ቆፋን ካሃማታ ጊዲቴ።
1CO 14:21 ጎዳይ፥ ጌሻ ማፃፋን፥ «ታኒ ሃ ኣሳስ፥ ዱማ ዱማ ዶናን ኦዴቲያ ኣሳኒኔ ኢማꬃ ኢንፃርሳን ኦዴቲያ ኣሳን ኦዳና። ሺን ሄሲ ሃኒኒካ ታና ሲዖኮና» ያጌስ።
1CO 14:22 ሂዛ፥ ዱማ ዱማ ዶናን ሃሳዮይ፥ ኣማኖና ኣሳስ ማላ ጊዴሲፔ ኣቲን ኣማኒያ ኣሳሳ ጊዴና። ቲንቢቴይ ኣማኒያ ኣሳስ ማላ ጊዴሲፔ ኣቲን ኣማኖና ኣሳሳ ጊዴና።
1CO 14:23 ዎሳ ኬꬃ ኣሳይ ኢሲፌ ሺቂያ ዎዴ ኡባይ ዱማ ዱማ ዶናን ኦዴቲኮ ኤሮና ዎይኮ ኣማኖና ኣሳይ ሂንቴ ሺቁዋ ዪዲ፥ «ሃይሳቲ ጎዮሶና» ጎኮናዬ?
1CO 14:24 ሺን ኤሮና ዎይኮ ኣማኖና ኣሳይ ዎሳ ኬꬂ ያ ዎዴ ኣሳይ ቲንቢቴ ኦዲሺን፥ ሲዒኮ ባ ናጋራ ኣኬካና፤ ቃሲ ኢ ሲዒዳ ቃላን ፒርዴታና።
1CO 14:25 ኤንቲ ኢያ ዎዛናን ጌሚዳ ቆፋ ቆንጪሳና። ሄሳዳካ፥ «ቱማ ፆሳይ ሂንቴ ጊዶን ዴዔስ» ያጊዲ ማርካቲዲ፥ ጉፋኒዲ ፆሳስ ጎይናና።
1CO 14:26 ታ ኢሻቶ፥ ኑ ዎይጊኖ? ሂንቴ ኢሲፌ ሺቂያ ዎዴ ኢሱዋስ ማዝሙሬይ ዴዔስ፤ ኢሱዋስ ታማርሶ ኢሞቲ ዴዔስ፤ ኢሱዋስ ቆንጬꬂ ዴዔስ፤ ኢሱዋስ ዱማ ዱማ ዶናን ሃሳዮይ ዴዔስ፤ ኢሱዋስ ቢርሼꬃ ኢሞቲ ዴዔስ። ሄ ኡባይ ዎሳ ኬꬂ ዲቺያባ ጊዳናው ቤሴስ።
1CO 14:27 ዱማ ዱማ ዶናን ኦዴቲያ ኣሳቲ ዴዒኮ፥ ናምዓ ዎይኮ ዳሪኮ ሄꬓ ጊዲዲ ማራን ማራን ሃሳያናው ቤሴስ። ኤንቲ ኦዴቴይሳ ሃራ ኣሲ ቢርሾ።
1CO 14:28 ሺን ቢርሺያ ኣሲ ꬋዪኮ፥ ዱማ ዱማ ዶናን ኦዴቴይሲ ዎሳ ኬꬃን ሲዒ ጎ። ባዉኔ ባ ፆሳስ ኦዶ።
1CO 14:29 ቲንቢቴ ኦዴይሳቲ ናምዓ ዎይኮ ሄꬓ ጊዲዲ ኦዶ። ቃሲ ሃራቲ ኤንቲ ጊያባ ፒርዶና።
1CO 14:30 ሄ ሺቁዋን ዴዒያ ሃራ ኣሳስ ኢሲባይ ቆንጪኮ ካሴ ኦዴቴይሲ ሲዒ ጎ።
1CO 14:31 ኡባይ ታማራና ሜላኔ ኡባይ ሚናና ሜላ ማራን ማራን ቲንቢቴ ኦዳናው ዳንዳዔታ።
1CO 14:32 ናቤታ ኣያናይ ናቤታስ ኪቴቴስ።
1CO 14:33 ጌሻታ ዎሳ ኬꬃ ኡባይ ሜዜቲዳይሳዳ ፆሳይ ሳሮቴꬃ ፆሳፌ ኣቲን ጫቦ ፆሲ ጊዴና።
1CO 14:34 ማጫሲ ዎሳ ኬꬃን ሲዒ ጎ። ሙሴ ሂጌይ ጌይሳዳ ኤንቲ ሃሬቶፌ ኣቲን ዎሳ ኬꬃን ኦዳናው ኤንታው ማቲ ባዋ።
1CO 14:35 ማጫሲ ዎሳ ኬꬃን ሃሳዮይ ቦርሶ ጊዲያ ጊሾ ኢሲባ ኤራናው ኮይኮ ሶን ባንታ ኣዚናታ ኦይቾና።
1CO 14:36 ፆሳ ቃላ ኮይሮ ሂንቴ ኤሂዴቲ? ዎይኮ ፆሳ ቃላይ ሂንቴ ፃላላኮ ዪዴ?
1CO 14:37 ኦኒካ ባና ናቤ ዎይኮ ባና ፆሳ ኣሲ ጊዲ ቆፒኮ፥ ታኒ ሂንቴው ፃፌይሲ ጎዳ ኪታ ጊዴይሳ ኣኬኮ።
1CO 14:38 ሺን ኦኒካ ኣኬኮና ኢፂኮ ኢካ ኣኬኬቶፎ።
1CO 14:39 ሄሳ ጊሾ፥ ታ ኢሻቶ፥ ቲንቢቴ ኦዳናው ሚንꬂዲ ኣሞቲቴ፤ ቃሲ ዱማ ዱማ ዶናን ኦዴቴይሳካ ዲጎፊቴ።
1CO 14:40 ሺን ኡባይካ ዎጋኒኔ ማራን ጊዶ።
1CO 15:1 ታ ኢሻቶ፥ ታ ሂንቴው ማርካቲዳ ዎንጌላ ሂንቴ ኤኪዳይሳኔ ሂንቴ ኣማኖይ ኢያን ኤቂዳይሳ ሂንቴ ኣኬካና ሜላ ኮያይስ።
1CO 15:2 ታ ታማርሲዳ ዎንጌላ ሚንꬂዲ ኦይኪኮ ሂንቴ ኢያን ኣታና። ሄሲ ሃኖና ኢፂኮ ሂንቴ ኣማናኦይ ሃዳ ጊዳና።
1CO 15:3 ታኒ ኤኪዳ ኡባፌ ኣꬊያ ኪታ ካሴታዳ ሂንቴው ኢማስ። ሄሲካ፥ ጌሻ ማፃፋይ ጌይሳዳ፥ ኪሪስቶሲ ኑ ናጋራ ጊሾ ሃይቂስ።
1CO 15:4 ሞጌቲስ፤ ጌሻ ማፃፋይ ጌይሳዳ፥ ሄꬓንꬆ ጋላሳን ሃይቆፔ ዴንዲስ።
1CO 15:5 ጴፂሮሳስ ቆንጪስ። ሄሳፌ ጉዬ፥ ታማኔ ናምዑ ሃዋሬታስ ቆንጪስ።
1CO 15:6 ሄሳፌ ጉዬ፥ ኢቻሹ ፄታፔ ዳሪያ ኣሳስ ኢሲ ቶሆ ቆንጪስ። ኤንታፌ ዳሪያ ባጋይ ሃዒ ጋካናው ፓፃ ዴዖሶና፥ ሺን ጉꬃቲ ሃይቂዶሶና።
1CO 15:7 ሄሳፌ ጉዬ፥ ያይቆባስ ቆንጪስ፤ ጉዬፔ ባ ሃዋሬታ ኡባስ ቆንጪስ።
1CO 15:8 ቃሲ ዉርሴꬃን ኣዉጫያ ሜላ ጊዲዳ ታው ቆንጪስ።
1CO 15:9 ታኒ ዬሱሳ ሃዋሬታ ኡባፌ ላፋ። ታኒ ፆሳ ዎሳ ኬꬃ ጎዲዳ ጊሾ ዬሱሳ ሃዋሬ ጌቴታዳ ፄጌታናው ቤሶናይሳ።
1CO 15:10 ሺን ፆሳ ኣꬎ ኬሃቴꬃን ታ ሃዒ ጊዲዳይሳ ጊዳስ፤ ኢ ታው ኢሚዳ ኣꬎ ኬሃቴꬃይ ሜላ ኣቲቤና። ታኒ ሃንኮ ሃዋሬታፔ ኣꬃዳ ዳቡራስ። ሺን ታራ ዴዒያ ፆሳ ኣꬎ ኬሃቴꬃይ ኦꬂስፔ ኣቲን ታና ጊዲኬ።
1CO 15:11 ሂዛ፥ ታና ጊዲን ኤንቲ፥ ኑ ኡባይ ታማርሴይ ሄሳ፤ ሂንቴካ ሄ ኪታ ኣማኒዴታ።
1CO 15:12 ኪሪስቶሲ ሃይቆፔ ዴንዲዳይሳ ኑ ሳባኪያ ዎዴ ሂንቴፌ ኢሶቲ ኢሶቲ ያቲን፥ ዎይጊዲ፥ «ሃይቆፔ ዴንዶይ ባዋ» ያጎና?
1CO 15:13 ሃይቆፔ ዴንዶይ ባይናባ ጊዲኮ ኪሪስቶሲ ሃይቆፔ ዴንዲቤና ጉሱ።
1CO 15:14 ኪሪስቶሲ ሃይቆፔ ዴንዲቦናባ ጊዲኮ ኑ ቲሚርቴይ ቃሲ ሂንቴ ኣማኖይካ ሃዳ።
1CO 15:15 ሃይቆፔ ዴንዶይ ባይናሺን፥ ኑኒ ፆሳይ፥ «ኪሪስቶሳ ሃይቆፔ ዴንꬂስ» ያጊዲ ሳባኪሼ ፆሳ ዎርዳንቾ ማርካታ ጊዲዳ ጉሱ።
1CO 15:16 ሃይቂዳ ኣሳይ ሃይቆፔ ዴንዲቦናባ ጊዲኮ ሂዛ፥ ኪሪስቶሲ ሃይቆፔ ዴንዲቤና።
1CO 15:17 ኪሪስቶሲ ሃይቆፔ ዴንዶናባ ጊዲኮ፥ ሂንቴ ኣማኖይ ሃዳ፤ ቃሲ ሂንቴ ሃዒ ጋካናው ሂንቴ ናጋራን ዴዔታ።
1CO 15:18 ሂዛ፥ ኪሪስቶሳ ኣማኒዲ ሃይቂዳይሳቲካ ꬋዪዶሶና ጉሱ።
1CO 15:19 ኑኒ ሃ ኣላሚያ ዴዑዋ ፃላላስ ኪሪስቶሳን ኡፋይሲ ኦꬂዳባ ጊዲኮ፥ ሃ ሳዓን ዴዒያ ኣሳ ኡባፌ ኑባይ ኣꬊዳ ዪባታ።
1CO 15:20 ሺን ኪሪስቶሲ ሃይቂዳይሳታስ ሃይቆፔ ዴንዶን ባይራ ጊዲዲ ቱማ ዴንዲስ።
1CO 15:21 ሃይቆይ ኢሲ ኣሳ ባጋራ ሃ ኣላሚያ ዪዳይሳዳ ሃይቆፔ ዴንዶይ ኢሲ ኣሳ ባጋራ ዪስ።
1CO 15:22 ኣዳሜ ባጋራ ኣሳ ኡባይ ሃይቂዳይሳዳ ኪሪስቶሳ ባጋራ ኣሳ ኡባይ ዴዖን ዳና።
1CO 15:23 ሺን ኢሶይ ኢሶይ ባ ማራን ማራን ዴንዳና። ኪሪስቶሲ ኡባፌ ካሴቲዲ ዴንዲስ፤ ሄሳፌ ጉዬ፥ ኪሪስቶሳይሳቲ ኢ ያ ዎዴ ዴንዳና።
1CO 15:24 ሄሳፌ ጉዬ፥ ኪሪስቶሲ ሃሬይሳ፥ ማታኔ ዎልቃ ኡባ ꬋይሲዲ፥ ካዎቴꬃ ፆሳ ኣዋስ ኢሚያ ዎዴ ዎዲያ ዉርሴꬃይ ያና።
1CO 15:25 ፆሳይ ኢያ ሞርኬታ ኡባ ኢያ ቶሁዋፔ ጋርሳን ዎꬃና ጋካናው ኪሪስቶሲ ሃራናው ቤሴስ።
1CO 15:26 ዉርሴꬃን ኢ ꬋይሳናው ዴዒያ ሞርኬይ ሃይቆ።
1CO 15:27 ጌሻ ማፃፋን፥ «ፆሳይ ኡባባ ኢያ ማታፔ ጋርሳን ሃሪሲስ» ጌቴቲዲ ፃፌቲስ። ሺን ኡባ ኢያ ማታፔ ጋርሳን ሃሪሲስ ጌይሲ፥ ኡባባ ኢያ ማታፔ ጋርሳን ሃሪሲዳ ፆሳ ጉጄና።
1CO 15:28 ኡባባይ ኪሪስቶሳ ማታፔ ጋርሳን ሃሬቲዳፔ ጉዬ ኪሪስቶሲ ቃሲ ባ ሁዔን ኡባባ ባው ሃሪሲዳ ፆሳስ ሃሬታና። ሄ ዎዴ ፆሳይ ባ ፃላላ ኡባ ሃራና።
1CO 15:29 ሃይቂዳይሳቲ ዴንዶናባ ጊዲኮ ኤንታ ጊሾ ኣሳስ ኣይቢ ዎꬌይ ዴዒ? ሃይቂዳይሳቲ ዴንዶናባ ጊዲኮ ያቲን፥ ኣይስ፥ ኣሳይ ሃይቂዳይሳታ ጊሾ ፃማቄቶና?
1CO 15:30 ያቲን፥ ኑኒ ኣይስ ኡባ ዎዴ ኑናቴꬃ ሜቶስ ኣꬂ ኢሞና?
1CO 15:31 ታ ኢሻቶ፥ ታ ጋላስ ጋላስ ሃይቆስ ኣꬋዳ ኢሜታይስ። ሄሲካ፥ ጎዳ ኪሪስቶስ ዬሱሳን ዴዒያ ዴዑዋ ኢሲፌቴꬃን ሂንቴናን ጬቂያ ጊሾሳ።
1CO 15:32 ኣሳ ቆፋꬆ ጊዲኮ፥ ታኒ ኤፌሶናን ዶዓራ ቡቴቲዳይሲ ታና ኣይ ማዲ? ሃይቂዳይሳቲ ሃይቆፔ ዴንዶናባ ጊዲኮ፥ «ዎንቶ ኑ ሃይቂያ ጊሾ ሃቺ ማና ኡያና» ያጊያ ኣሳ ሜላ ጊዶስ።
1CO 15:33 ጪሜቶፊቴ! ኢታ ላጌቴꬂ ሎዖ ኣማሊያ ኢሴስ።
1CO 15:34 ሂንቴ ኣኬካኮ ሲሚቴ። ናጋራ ኦꬆፊቴ። ሂንቴፌ ኢሲ ኢሲ ኣሳይ ፆሳ ኤሮኮና። ታኒ ሂንቴና ዬላያናው ሄሳ ጋይስ።
1CO 15:35 ኢሲ ኣሲ፥ «ሃይቂዳ ኣሳይ ዋኒዲ ዴንዳኔ? ኤንቲ ኣይ ሜላ ኣሳቴꬃራ ያኔ?» ያጎና ኣጌና።
1CO 15:36 ኔኖ ኤያው፥ ኔኒ ቢታን ዜሪያ ዜሬꬃይ ሃይቆና ዶሌና።
1CO 15:37 ኔኒ ዜሬይ ጊስቴ ጊዲን ዎይኮ ሃራ ካꬃ ቆሞ ኣይፌ ፃላላ ዜራሳፔ ኣቲን ዶሊዳ ዶላ ጊዴና።
1CO 15:38 ሺን ፆሳይ ዜሬꬃስ ባ ዶሲዳ ሜላ ሜꬌቴꬂ ኢሜስ። ዱማ ዱማ ዜሬꬃስ ዱማ ዱማ ኣሳቴꬂ ኢሜስ።
1CO 15:39 ሜꬌቴꬃ ኡባ ኣሾይ ኢሶ ጊዴና። ሺን ኣሳ ኣሾይ ኢሱዋ፤ ሜሄ ኣሾይ ዱማ፤ ካፎታ ኣሾይ ዱማ፤ ቃሲ ሞሎ ኣሾይ ዱማ።
1CO 15:40 ሳሎ ኣሳቴꬂ ዴዔስ፤ ቃሲ ሳዓ ኣሳቴꬂ ዴዔስ። ሺን ሳሎ ኣሳቴꬃ ቦንቾይ ዱማ፤ ቃሲ ሳዓ ኣሳቴꬃ ቦንቾይ ዱማ።
1CO 15:41 ኣዋ ቦንቾይ ዱማ፤ ኣጌና ቦንቾይ ዱማ፤ ፆሊንቶታ ቦንቾይ ዱማ፤ ኢሲ ፆሊንቶይ ሃንኮ ፆሊንቱዋፌ ቦንቾን ዱማቴስ።
1CO 15:42 ሃይቂዳይሳቲ ሃይቆፔ ዴንዲያ ዎዴ ሄሳዳ ሃናና። ሃይቂያ ኣሳቴꬃይ ዜሬቴስ፤ ሃይቆና ኣሳቴꬂ ጊዲዲ ዴንዴስ።
1CO 15:43 ቶሼን ዜሬቲዲ፥ ቦንቾን ዴንዳና፤ ዳቡራን ዜሬቲዲ፥ ዎልቃን ዴንዳና።
1CO 15:44 ሜꬌቴꬃ ኣሳቴꬃይ ዜሬቲዲ፥ ኣያና ኣሳቴꬂ ጊዲዲ ዴንዳና። ሜꬌታ ኣሳቴꬂ ዴዒኮ፥ ኣያና ኣሳቴꬂ ዴዔስ።
1CO 15:45 ሄሳዳካ፥ ጌሻ ማፃፋን፥ «ኮይሮ ኣዴይ፥ ኣዳሜይ፥ ፓፃ ዴዒያ ኣሴ ጊዲዲ ሜꬌቲስ» ያጌስ። ሺን ዉርሴꬃ ኣዳሜይ፥ ኪሪስቶሲ፥ ዴዖ ኢሚያ ኣያና ጊዲስ።
1CO 15:46 ሺን ሜꬌታ ኣሲ ኮይሮ ዪን፥ ጉዬፔ ኣያና ኣሲ ዪሲፔ ኣቲን ኣያና ኣሲ ኮይሮ ዪቤና።
1CO 15:47 ኮይሮ ኣዳሜይ ቢታፌ ሜꬌቲዳ ቢታ ኣሲ፤ ናምዓንꬆ ኣዳሜይ ሳሎፔ ዪዳ ሳሎ ኣሲ።
1CO 15:48 ቢታፌ ሜꬌቲዳይሳቲ ቢታፌ ሜꬌቲዳይሳ ዳኖሶና። ሳሎይሳቲ ሳሎፔ ዪዳይሳ ዳኖሶና።
1CO 15:49 ኑኒ ቢታፌ ሜꬌቲዳ ኣዲያ ዳኔይሳ ሜላ ሳሎፔ ዪዳ ኣዲያ ዳናና።
1CO 15:50 ታ ኢሻቶ፥ ታ ጌይሲ ሄሳ፤ ሃዒ ኑ ማዒዳ ኣሳቴꬃይ ፆሳ ካዎቴꬃ ላታናው ዳንዳዔና። ዎቂያ ኣሳቴꬃይ ዎቆና ኣሳቴꬃ ላቴና።
1CO 15:51 ታ ሂንቴው ኢሲ ፁራ ኦዳና። ኑ ኡባይ ሃይቆኮ፥ ሺን ዉርሴꬃን ኡባይ ላሜታና።
1CO 15:52 ሞይዜይ ፑኔቲያ ዎዴ ኣይፌይ ቂጲ ፄላናው ሃሳዮና ላሜታና። ሃይቂዳ ኣሳይ ዎቆና ኣሲ ጊዲዲ ዴንዳና፤ ኑካ ላሜታና።
1CO 15:53 ሃይሲ ዎቄይሲ ዎቆናይሳ፥ ሃይሲ ሃይቄይሲ ሃይቆናይሳ ማዓናው ቤሴስ።
1CO 15:54 ሃይሲ ዎቄይሲ ዎቆናይሳ፥ ቃሲ ሃይሲ ሃይቄይሲ ሃይቆናይሳ ማዒያ ዎዴ ጌሻ ማፃፋን፥ «ሃይቆይ ፆኖን ሚቴቲስ» ጊያ ቃላይ ፖሌታና።
1CO 15:55 ሄሳዳካ፥ «ሃይቆ፥ ኔ ፆኖይ ኣዉን ዴዒ? ሃይቆ፥ ኔ ቆሂያ ዎልቃይ ኣዉን ዴዒ?» ጊዳ ቃላይ ፖሌታና።
1CO 15:56 ሃይቆይ ዱኪያ ዎልቃይ ናጋራ፤ ቃሲ ናጋራ ዎልቃይ ሂጌ።
1CO 15:57 ሺን ኑ ጎዳ ዬሱስ ኪሪስቶሳ ባጋራ ኑስ ፆኖ ኢሚያ ፆሳ ጋላቲ ጋኮ።
1CO 15:58 ሄሳ ጊሾ፥ ታ ሲቆ ኢሻቶ፥ ቃፆና ሚኒዲ ኤቂቴ። ጎዳ ኦሱዋን ሂንቴ ዳቡሬይሲ ጮ ጊዶናይሳ ኤሪዲ ኡባ ዎዴ ጎዳ ኦሱዋ ኣዛሎና ኦꬂቴ።
1CO 16:1 ኣማኒያ ኣሳስ ሚሼ ሺሾባ ጋላቲያ ዎሳ ኬꬃታስ ታኒ ኪቲዳይሳዳ ሂንቴካ ኦꬂቴ።
1CO 16:2 ሚሺያ ሺሾይ ታ ሂንቴኮ ቢያ ዎዴ ጊዶና ሜላ ኢሶይ ኢሶይ ሳሚንታፌ ኮይሮ ጋላስ፥ ዎጋ ዎዴ ዎጋ ዎዴ ባ ዴሜይሳፌ ኬሲዲ ባ ሶን ዳጋዮ።
1CO 16:3 ታኒ ያ ቢዳ ዎዴ ሚሺያ ዬሩሳላሜ ጋꬃና ሜላ ሂንቴ ዶሪያ ኣሳስ ዳብዳቤ ኢማዳ ኤንታ ዬሩሳላሜ ኪታና።
1CO 16:4 ኤንታራ ታ ቡሳይ ኮሺያባ ጊዲኮ ኤንቲ ታራ ባናው ዳንዳዖሶና።
1CO 16:5 ታኒ ማቄዶኒያራ ኣꬋናው ቆፒዳ ጊሾ ያ ባዳ ሂንቴኮ ያና።
1CO 16:6 ታ ቢያሶ ኣው ጊዲኮካ፥ ታ ቡሳን ሂንቴ ታና ማዳና ሜላ ሂንቴ ማታን ጉꬃ ዎዴ ጋምዖና ኣጊኬ። ባልጎ ኣጌናታ ሂንቴ ማታን ኣꬆና ዋያ ኣጋና።
1CO 16:7 ታኒ ኦጌራ ኣꬋሼ ሂንቴና ቤዓናው ኮዪኬ። ጎዳይ ጊኮ፥ ሂንቴ ማታን ጉꬃ ዎዴ ታካናው ቆፓይስ።
1CO 16:8 ሺን ታኒ ጴንፄቆስፄ ባሌይ ጋካናው ኤፌሶናን ጋምዓና።
1CO 16:9 ታው ኦሶይ ኩሚዳ ዳልጋ ፔንጌይ ዶዬቲስ፥ ሺን ዳሮ ኤቄቲያ ሞርኬቲ ዴዖሶና።
1CO 16:10 ኢ ታ ሜላ ጎዳ ኦሶ ኦꬂያ ኣሲ ጊዲያ ጊሾ ፂሞቲዮሲ ሂንቴኮ ቢኮ፥ ሂንቴ ማታን ኢ ሂርጎና ዳና ሜላ ኦꬂቴ።
1CO 16:11 ኦኒካ ኢያ ካꬎፖ። ኢ ታኮ ሳሮ ሲማና ሜላ ኢያ ማዲዲ ሞይዚቴ። ታኒ ኢ ሃንኮ ኣማኔይሳታራ ሲማናይሳ ናጋይስ።
1CO 16:12 ኑ ኢሻ ኣጲሎሲ ሃንኮ ኣማኔይሳታራ ሂንቴኮ ባና ሜላ ታ ኢያ ሚንꬃ ዎሳስ። ሃዒ ሂንቴኮ ባናው ኮዪቤና፥ ሺን ኢያው ኢንጄቲያ ዎዴ ሂንቴኮ ባና።
1CO 16:13 ባርኪቴ፤ ኣማኖን ኤቂቴ፤ ፃሊቴ፤ ሚኒቴ።
1CO 16:14 ኦሶ ኡባ ሲቆን ኦꬂቴ።
1CO 16:15 ታ ኢሻቶ፥ ኢስፂፋኖሴይኔ ኢያ ሶ ኣሳይ ኣካያን ኤንቲ ኮይሮ ኣማኒዳይሳታ ጊዴይሳኔ ኣማኔይሳታ ማዳናው ባንታና ኣꬂ ኢሚዳይሳ ሂንቴ ኤሬታ።
1CO 16:16 ሂንቴካ ኤንታ ሜላ ኣሳሲኔ፥ ኤንታራ ኦሶን ዳቡሪያ ኡባስ ኪቴታና ሜላ ታ ሂንቴና ዎሳይስ።
1CO 16:17 ኢስፂፋኖሴይ፥ ፎርቹናሲኔ ኣካይቆሲ ታኮ ዪዳይሲ ታና ኡፋይሲስ። ሂንቴ ባይና ቤሳን ኤንቲ ሂንቴና ጊዲዲ ታ ፓጫ ኩንꬂዶሶና።
1CO 16:18 ኤንቲ ሂንቴና ኡፋይሲዳይሳዳ ታናካ ኡፋይሲዶሶና። ሄሳ ሜላ ኣሳታ ዶጎፒቴ።
1CO 16:19 ኢሲያ ዎሳ ኬꬃ ኣሳይ ሂንቴና ሳሮ ጎሶና። ኣቂሊኔ ጲሪስቂላ ባንታ ሶን ሺቂያ ዎሳ ኬꬃ ኣሳራ ኢሲፌ ሂንቴና ጎዳ ሱንꬃን ዎዛናፔ ሳሮꬆሶና።
1CO 16:20 ኣማኒያ ኢሻቲ ኡባይ ሂንቴና ሳሮ ያጎሶና። ጌሻ ዬሬቴꬂ ዬሬቲሼ ኢሶይ ኢሱዋ ሳሮꬂቴ።
1CO 16:21 ታኒ፥ ጳዉሎሲ፥ ሃ ሳሮꬁዋ ታ ኩሼን ፃፋስ።
1CO 16:22 ጎዳ ዶሶና ኣሲ ዴዒኮ፥ ቃንጌቲዳይሳ ጊዶ። ኑ ጎዳው፥ ሃያ!
1CO 16:23 ጎዳ ዬሱስ ኪሪስቶሳ ኣꬎ ኬሃቴꬃይ ሂንቴራ ጊዶ።
1CO 16:24 ታ ሲቆይ ኪሪስቶስ ዬሱሳን ዴዒያ ሂንቴ ኡባራ ጊዶ። ኣሚንዒ።
2CO 1:1 ፆሳ ሼኔን ዬሱስ ኪሪስቶሳ ሃዋሬ ጊዲዳ ጳዉሎሲኔ፥ ኑ ኢሻ ፂሞቲዮሲ፥ ቆሮንቶሳን ዴዒያ ፆሳ ዎሳ ኬꬃሲኔ ኣካያ ቢታን ዴዒያ ፆሳ ኣሳ ኡባስ ፃፊዳ ኪታ።
2CO 1:2 ፆሳ ኑ ኣዋፔኔ ጎዳ ዬሱስ ኪሪስቶሳፔ፥ ኣꬎ ኬሃቴꬃይኔ ሳሮቴꬃይ ሂንቴው ጊዶ።
2CO 1:3 ማሮቴꬃ ኣዋስ፥ ኡባ ዎዴ ኑና ሚንꬄꬂያ ፆሳስ፥ ኑ ጎዳ ዬሱስ ኪሪስቶሳ ኣዋስ ጋላቲ ጊዶ።
2CO 1:4 ፆሳይ ኑስ ኢሚዳ ሚንꬄꬁዋን፥ ሜቶን ዴዔይሳታ ኑ ሚንꬄꬃና ሜላ ፆሳይ ኑና ኑ ሜቶ ኡባን ሚንꬄꬄስ።
2CO 1:5 ኑኒ ኪሪስቶሳ ዳሮ ዋያ ሻኬቲዳይሳዳ ቃሲ ኑኒ ኢያ ዳሮ ሚንꬄꬁዋን ሚናና።
2CO 1:6 ኑኒ ዋዬቲኮ ሄሲ ሂንቴና ሚንꬄꬃናሳኔ ሂንቴና ኣሻናሳ። ቃሲ ኑኒ ሚኔቲኮ ኑኒ ጌንጪዳ ዋያ ሜላ ሂንቴካ ጌንጪዲ፥ ፆሳይ ሂንቴው ኢሚያ ሚንꬄꬁዋን ሚናና።
2CO 1:7 ሂንቴ ኑ ኤኪዳ ሜቱዋ ሜላ ኤኪዲ፥ ኑ ሚንꬄꬁዋን ሻኬታናይሳ ኑ ኤሪያ ጊሾ ኑ ኡፋይሳይ ሂንቴናን ሚኖ።
2CO 1:8 ኑ ኢሻቶ፥ ኢሲያ ቢታን ኑና ጋኪዳ ሜቱዋ ሂንቴ ኤራና ሜላ ኮዮስ። ሄ ኑና ጋኪዳ ሜቶይ ኑ ዎልቃፌ ዳሪን፥ ሃይቆና ኣቶኮ ጊዲ ኡፋይሲ ቃንፂዳሺን።
2CO 1:9 ኑኒ ኑ ቦላ ሃይቆ ፒርዲ ፒርዴቲዳ ሜላ ቆፒዳ። ሺን ኑኒ ኑ ሁዔን ጊዶናሺን፥ ሃይቂዳይሳታ ዴንꬂያ ፆሳን ኣማኔታና ሜላ ሄሲ ሃኒስ።
2CO 1:10 ፆሳይ ሄሳ ሜላ ኢታ ሃይቆፔ ኑና ኣሺስ፤ ሃዒካ ኣሻና፤ ሲንꬃፌካ ኢ ኑና ኣሻና ጊዲ ኢያን ኡፋይሲ ዎꬆስ።
2CO 1:11 ዎሳን ኑና ማዲቴ። ዳሮ ዎሳ ጋሶን ፆሳ ማዱዋ ኑ ዴሚያ ዎዴ ዳሮ ኣሳይ ኑ ጊሾ ፆሳ ጋላቶሶና።
2CO 1:12 ኑኒ ኑ ጌሻ ካሃን ጬቄቶስ። ኑኒ ሃ ኣላሚያን ዴዒዳ ዴዑዋን ኡባራካ ኑ ዴዒዳ ዴዑዋን ቱማቴꬃኒኔ ሱሬቴꬃን ሂንቴራ ዴዒዳ። ሄሲካ፥ ሃ ኣላሚያ ጪንጫቴꬃን ጊዶናሺን ፆሳ ኣꬎ ኬሃቴꬃና።
2CO 1:13 ኑ ሂንቴው ፃፊዳ ዳብዳቤይ ሂንቴ ናባባናዉኔ ኣኬካናው ዳንዳዒያባፔ ኣቲን ሃራ ጊዴና። ሂንቴ ኢያ ኣኬካናው ዳንዳዔይሳ ታ ኣማናይስ።
2CO 1:14 ሃዒ ሂንቴ ኑና ሃኒዳ ኬና ኤሬታ፥ ሺን ሲንꬃፌ ኩሜꬂ ኤራናይሳ ታ ኣማኔታይስ። ኑ ጎዳ ዬሱሲ ሲሚያ ዎዴ ኑኒ ሂንቴናን ጬቄቲዳይሳዳ ሂንቴካ ኑናን ጬቄታና።
2CO 1:15 ሄሳ ታኒ ሎይꬃ ኤሪዳ ጊሾ ሂንቴ ናምዓንꬆ ጎዔታና ሜላ ካሴታዳ ሂንቴኮ ባናው ቆፋ ቃቻስ።
2CO 1:16 ታኒ ማቄዶኒያ ባሼኔ ያፔ ሲማሼ ሂንቴና ቤዓና። ታኒ ያፔ ዪሁዳ ቢያ ዎዴ ሂንቴ ታና ታ ኦጊያን ማዳና ጋዳ ቆፓስ።
2CO 1:17 ታኒ ሄሳ ጋሼ ኣይ ኦꬃናው ቤሲያኮ ኤሮና ኣሲ ዳናይና? ዎይኮ ታኒ ታ ቆፋ ቃቺያ ዎዴ ኣሳ ቆፋዳ፥ ኢሲ ቶሆ «ኤ» ቃሲ ኢሲ ቶሆ «ኣካይ» ጊያ ኣሳ ሜሌዬ?
2CO 1:18 ሺን ፆሳይ ኣማኔቴይሳ ጊዲያ ጊሾ ኑ ሂንቴው ኦዲያ ቃላይ «ኤ» ዎይኮ «ኣካይ» ጌይሳ ጊዴና።
2CO 1:19 ታኒ፥ ሲላሴይኔ ፂሞቲዮሲ ሂንቴው ማርካቲዳ ፆሳ ናዓይ፥ ዬሱስ ኪሪስቶሲ ኡባ ዎዴ «ኤፔ» ኣቲን «ኤ» ኔ «ኣካይ» ጊዴና።
2CO 1:20 ፆሳይ ኢማና ጊዳ ኡባይ ኪሪስቶሳ ባጋራ «ኤ» ጊዴስ። ኑኒ ኪሪስቶሳ ባጋራ ፆሳ ቦንቾስ፥ «ኣሚንዒ» ጌይ ሄሳ ጊሾሳ።
2CO 1:21 ኑኔ ሂንቴ ኪሪስቶሳን ሚኒዲ ኤቃና ሜላ ኦꬂዳይኔ ባ ኦሱዋስ ዶሪዳይ ፆሳ።
2CO 1:22 ኑኒ ኢያባ ጊዴይሳ ኤሪሳናው ባ ማታሚያ ኑ ቦላ ዎꬂስ፤ ቃሲ ባ ጌሻ ኣያና ኦይꬂ ኦꬂዲ ኑ ዎዛናን ዎꬂስ።
2CO 1:23 ታኒ ቆሮንቶሳ ቦና ኣጊዳይ ሂንቴ ኣዛኖና ኣታና ሜላሳ፤ ሄሲ ዎርዶ ጊዲኮ ፆሳይ ታ ሼምፑዋ ታፔ ኤኮ።
2CO 1:24 ሂንቴ፥ ሂንቴ ኣማኑዋን ሚኒዲ ዴዒያ ጊሾ ኑ ሂንቴና ኡፋይሳናው ሂንቴራ ኢሲፌ ኦꬄይሳታፔ ኣቲን ሂንቴና ዎልቃን ኣማንꬄይሳታ ጊዶኮ።
2CO 2:1 ታኒ ናምዓንꬆ ሂንቴኮ ቢኬ ጋዳ ቆፋ ቃቺዳይ ሂንቴና ኣዛንꬆና ኣጋናሳ።
2CO 2:2 ታኒ ሂንቴና ኣዛንꬂኮካ ታ ኣዛንꬂዳ ሂንቴፌ ሃሪ ታና ኡፋይሳናው ዴዔይ ኦኔ?
2CO 2:3 ታኒ ሂንቴው ሄ ዳብዳቢያ ፃፊዳይ፥ ታ ሂንቴና ቤዓናው ቢያ ዎዴ ታና ኡፋይሳናው ቤሲያ ኣሳን ታ ኣዛናናው ኮዮና ጊሾሳ። ታ ኡፋይቲያ ዎዴ ሂንቴ ኡባይካ ኡፋይታናይሳ ታ ኣማናይስ።
2CO 2:4 ታኒ ዳሮ ዋዬኒኔ ኡንዓን ቃሲ ዳሮ ኣፉꬃን ፃፊዳይ፥ ሂንቴና ኣዛንꬃናሳ ጊዶናሺን ታኒ ሂንቴና ኡባ ኣይ ሜላ ዶሲያኮ ሂንቴና ኤሪሳና ሜላሳ።
2CO 2:5 ኣሴ ኣዛንꬂዳ ኦኒካ ዴዒኮ ታ ኢያ ባላ ዳርሳናው ኮዪኬፌ ኣቲን ታና ጊዶናሺን ሂንቴፌ ዳሮታ ኣዛንꬂስ።
2CO 2:6 ሂንቴፌ ዳሪያ ኣሳይ ሄ ኡራ ሴሪዳ ሴራይ ኢያው ጊዳና።
2CO 2:7 ሄሳ ጊሾ፥ ሄ ኡራይ ዳሮ ኣዛኒዲ፥ ኡፋይሲ ቃንፆና ሜላ ሂንቴ ኢያ ማራናዉኔ ሚንꬄꬃናው ቤሴስ።
2CO 2:8 ሂንቴ ኢያ ሲቄይሳ ዛሪ ኢያው ቆንጪሳና ሜላ ታ ሂንቴና ዎሳይስ።
2CO 2:9 ታ ሄ ዳብዳቢያ ሂንቴው ፃፊዳይ፥ ሂንቴ ፓጬቲዲ፥ ኡባባን ታው ኪቴቴይሳ ኤራናው ኮዪዳ ጊሾሳ።
2CO 2:10 ሂንቴ ማሪያ ኡራ ታካ ማራና። ታኒ ማራናባይ ኣይቢ ዴዒኮካ፥ ኪሪስቶሳ ሲንꬃን ሂንቴ ጊሾ ጋዳ ማራስ።
2CO 2:11 ታኒ ሄሳ ኦꬂዳይ ፃላሂያ ጪሞ ኦሱዋ ኑ ኤሪያ ጊሾ ፃላሄን ጪሜቶና ኣታና ሜላሳ።
2CO 2:12 ታኒ ኪሪስቶሳ ዎንጌላ ሳባካናው ፂሮዓዳ ቢዳ ዎዴ ጎዳይ ያን ታው ኦሶ ኦጌ ጊጊሲዲ ዎꬂስ።
2CO 2:13 ሺን ታኒ ታ ኢሻ ቲቶ ያን ዴማቦና ጊሾ ታ ዎዛናይ ሼምፒቤና። ሄሳ ጊሾ፥ ያን ዴዒያ ኣሳ ሳሮꬃዳ ኢያ ኮያናው ማቄዶኒያ ባስ።
2CO 2:14 ሺን ኪሪስቶሳ ባጋራ ኡባ ዎዴ ኑና ፆኖን ካሌꬂያኔ ሺቶ ሜላ ሳዊያ ኪሪስቶሳባ ኑ ኤሪያ ቲሚርቲያ ኡባ ቤሲ ጋꬃና ሜላ ኦꬂያ ፆሳ ጋላቲ ጋኮ።
2CO 2:15 ኑኒ ኣቲያ ኣሳ ጊዶኒኔ ꬋያ ኣሳ ጊዶን ኪሪስቶሳ ባጋራ ፆሳስ ኢሜቲዳ ሳዊያ ሺቶ ሜላ።
2CO 2:16 ꬋያ ኣሳስ ሃይቆኮ ኤፊያ ሃይቆ ፔኖ፤ ቃሲ ኣቲያ ኣሳስ ዴዖኮ ኤፊያ ዴዖ ሳዎ፤ ያቲን፥ ሄሳ ሜላ ኦሱዋስ ጊዳናይ ኦኔ?
2CO 2:17 ኑኒ ፆሳ ቃላ ዎꬌ ዴማናው ኮዪዲ ዋላኪዲ ዛልዒያ ዳሮ ኣሳ ሜላ ጊዶኮ። ሺን ፆሳይ ኪቲዳ ሱሬ ኣሳታ ሜላ ኪሪስቶሳን ዴዒዲ ፆሳ ሲንꬃን ቃላ ኦዶስ።
2CO 3:1 ኑኒ ዛሪዲ ኑና ሳቢኖዬ? ዎይኮ ሃራ ኣሳዳ፥ ሳባ ዳብዳቢያ ሂንቴው ዬዳናው ዎይኮ ሂንቴፌ ኤካናው ኑና ኮሺዬ?
2CO 3:2 ኣሲ ኡባይ ሂንቴና ኤራና ሜላኔ ናባባና ሜላ ሂንቴ ኑ ዎዛናን ፃፌቲዲ ዴዒያ ኑ ዳብዳቤ።
2CO 3:3 ሂንቴ ቃላሜን ጊዶናሺን ዴዖ ፆሳ ኣያናን፥ ሹቻ ቦላ ጊዶናሺን ኣሳ ዎዛናን ፃፌቲዳይሳታኔ ኑናን ሃጋዜቲዳ ኪሪስቶሳ ዳብዳቤ ጊዴይሳ ቤሲዴታ።
2CO 3:4 ኑ ሄሳ ጊዳይ፥ ኪሪስቶሳ ባጋራ ፆሳን ኣማኖይ ኑስ ዴዒያ ጊሾሳ።
2CO 3:5 ኑ ሄሳ ኦꬃናው ዳንዳዒዳይ ፆሳ ዎልቃናፔ ኣቲን ኑኒ ኑ ዎልቃን ኣይኮካ ኦꬃናው ዳንዳዖኮ።
2CO 3:6 ኑ ኦራꬃ ጫቁዋ ኦሳንቾታ ጊዳና ሜላ ፆሳይ ኑና ዳንዳዒሲስ። ሄ ኦራꬃ ጫቆይ ጌሻ ኣያናን ቤንቲዳይሳፌ ኣቲን ፃፌቲዳ ሂጌን ጊዴና። ሂጌይ ዎꬌስ፥ ሺን ጌሻ ኣያናይ ዴዖ ኢሜስ።
2CO 3:7 ሹቻ ቦላ ፃፌቲዳ ሂጌይ ኢሜቲያ ዎዴ ፆሳ ቦንቾይ ቆንጪስ። ሙሴ ሶምዑዋን ዴዒያ ቦንቾይ ꬋዪሼ ቢያባ ጊዲኮካ፥ ኢስራዔሌ ኣሳይ ኢያ ሶምዑዋ ቲሺ ኦꬂዲ ፄላናው ዳንዳዒቦኮና። ሂዛ፥ ሃይቆ ኤሂያ ሂጌይ ሄሳ ሜላ ቦንቾን ቆንጪኮ፥
2CO 3:8 ያቲን፥ ጌሻ ኣያናን ኦሴቲያ ኦሱዋ ቦንቾይ ዋኒዲ ኣꬌኔ?
2CO 3:9 ኣሳ ቦላ ፒርዳ ኤሂያ ሂጌይ ቦንቾ ጊዲኮ ያቲን፥ ኣሴ ፂሊሲያ ኦራꬃ ኦጌይ ዋኒዲ ኣꬊዲ ቦንቼቴኔ?
2CO 3:10 ካሴ ቦንቾ ጊዲዳይሳ ሃዒ ኣꬊያ ቦንቾይ ዴዔይሳራ ጋꬂ ቤዒያ ዎዴ ቦንቾይ ባይናባ ጊዲስ።
2CO 3:11 ጉꬃ ዎዴስ ቆንጪዲ ጉዬፔ ꬋይዳይሲ ሃይሳዳ ቦንቼቲኮ፥ ሜሪናው ዴዔይሲ ዋኒዲ ኣꬊዲ ቦንቼቴኔ?
2CO 3:12 ኑስ ሃይሳ ሜላ ኡፋይሳይ ዴዒያ ጊሾ ዬላቶና ኦዴቶስ።
2CO 3:13 ኑኒ፥ ኢስራዔሌ ኣሳይ ꬋዪሼ ቢያ ቦንቹዋ ዉርሴꬃ ቤዖና ሜላ ባ ሶምዑዋ ካሚዳ ሙሴ ሜላ ጊዶኮ።
2CO 3:14 ሺን ኤንታ ዎዛናይ ዶጪስ። ሃቺ ጋካናው ኤንቲ ጋልዓ ጫቁዋ ናባቢያ ዎዴ ኤንታ ዎዛናይ ሄ ካማን ካሜቲ ዴዔስ። ሄ ካማይ ኪሪስቶሳ ፃላላን ቃሬቴስ።
2CO 3:15 ሺን ሃቺ ጋካናዉካ ኤንቲ ሙሴ ማፃፋ ናባቢያ ዎዴ ኡባን ሄ ካማይ ኤንታ ዎዛና ካሜስ።
2CO 3:16 ሺን ኦኒካ ጎዳኮ ሲሚያ ዎዴ ኣዉዴካ ሄ ካማይ ቃሬቴስ።
2CO 3:17 ጎዳይ ኣያና፤ ጎዳ ኣያናይ ዴዒያ ቤሳን ላዓቴꬂ ዴዔስ።
2CO 3:18 ኑኒ ኡባይ ካሜቲቦና ሶምዖን ጎዳ ቦንቹዋ ቤዓና። ኑኒ ኣያና ጊዲዳ ጎዳ ማላ ዳናናው ቦንቾፌ ቦንቾን ላሜታና።
2CO 4:1 ሂዛ፥ ፆሳይ ባ ማሮቴꬃን ሃ ኦሱዋ ኑስ ኢሚዳ ጊሾ ኑኒ ኡፋይሲ ቃንፆኮ።
2CO 4:2 ኑኒ ዬላያ ጌማ ኦሶ ኡባ ኣጊዳ፤ ጌኔ ኦሶ ኦꬆኮ፤ ፆሳ ቃላ ዎርዶራ ዋላኮኮ። ቱማ ቆንጬን ሃሳዪሼ፥ ኣሳ ኡባ ካሃይ ኑና ኤካና ሜላ ፆሳ ሲንꬃን ኑና ሺሾስ።
2CO 4:3 ኑ ኦዲያ ዎንጌላይ ጌሚዳባ ጊዲኮካ፥ ጌሚዳይ ꬋዮ ኦጌን ዴዒያ ኣሳሳ።
2CO 4:4 ሃ ኣላሚያ ሃሪያ ፆሳይ ኣማኖና ኣሳ ዎዛና ጎዚስ። ኤንቲ ፆሳ ማላን ቆንጪዳ ኪሪስቶሳ ቦንቾ ዎንጌላ ፖዑዋ ቤዖና ሜላ ዲጊስ።
2CO 4:5 ኑኒ፥ ዬሱስ ኪሪስቶሲ ጎዳ ጊዴይሳኔ ኑ ኢያ ጊሾ ሂንቴ ኦሳንቾ ጊዴይሳ ኦዶሲፔ ኣቲን ኑባ ኦዶኮ።
2CO 4:6 «ꬉማን ፖዖይ ፖዖ» ጊዳ ፆሳይ፥ ኪሪስቶሳ ሶምዑዋን ፖዒያ ፆሳ ቦንቹዋ ኤራ ፖዑዋ ኢማናው ባ ፖዑዋ ኑ ዎዛናን ፖዒሲስ።
2CO 4:7 ሺን ኡባፌ ኣꬊያ ዎልቃይ ኑባ ጊዶናሺን ፆሳባ ጊዴይሳ ቤሳናው ሃ ቦንቾ ሻሎይ ሜቃ ሚሼ ጊዲዳ ኑ ኣሳቴꬃን ዴዔስ።
2CO 4:8 ኑ ኡባ ባጋራካ ዋዬቲዳ፥ ሺን ሜቄሬቲቦኮ። ኑስ ሃዲርሲ ጊዲስ፥ ሺን ኡፋይሲ ቃንፂቦኮ።
2CO 4:9 ኑ፥ ሞርኬታን ጎዴቲዳ፥ ሺን ላጌ ꬋዪቦኮ። ኑ ሞርኬታን ሾጬቲዲ ኩንዲዳ፥ ሺን ꬋዪቦኮ።
2CO 4:10 ዬሱሳ ዴዖይ ኑ ኣሳቴꬃን ቆንጫና ሜላ ኢያ ሃይቁዋ ኡባ ዎዴ ኑ ኣሳቴꬃን ቶኪዲ ዩዮስ።
2CO 4:11 ዬሱሳ ዴዖይ ሃይቂያ ኑ ኣሳቴꬃን ቆንጫና ሜላ ፓፃ ዴዒያ ኑኒ ኢያ ጊሾ ኡባ ዎዴ ሃይቆስ ኣꬊዲ ኢሜቶስ።
2CO 4:12 ሂዛ፥ ሃይቆይ ኑናን ኦꬂያ ዎዴ ዴዖይ ሂንቴናን ኦꬄስ።
2CO 4:13 ጌሻ ማፃፋን፥ «ታ ኣማናስ፤ ሄሳ ጊሾ ሃሳያስ» ያጌቲስ። ሄሳ ሜላ ኣማኖይ ኑስ ዴዒያ ጊሾ ሃሳዮስ።
2CO 4:14 ጎዳ ዬሱሳ ሃይቆፔ ዴንꬂዳ ፆሳይ፥ ኑናካ ዬሱሳራ ሃይቆፔ ዴንꬃናይሳኔ ሂንቴራ ኢሲፌ ባ ሲንꬄ ሺሻናይሳ ኤሮስ።
2CO 4:15 ሄሲ ኡባይ ሃኒዳይ ሂንቴ ጊሾሳ። ፆሳ ኣꬎ ኬሃቴꬃይ ዳሮ ኣሳ ጋኪያ ዎዴ ኣሳይ ፆሳ ቦንቹዋስ ዳሮ ጋላታ ኢማና።
2CO 4:16 ሄሳ ጊሾ፥ ኑኒ ኡፋይሲ ቃንፆኮ። ኑ ቤንቲያ ኣሳቴꬃይ ዳቡሪሼ ቢያባ ጊዲኮካ፥ ኑ ኣያና ኣሳቴꬃይ ጋላስ ጋላስ ኦራፄስ።
2CO 4:17 ሃዒስ ኑኒ ዋዬቲያ ሃ ካዉሻ ዋዬይ፥ ኡባፌ ኬሂ ጊታቲያ ሜሪና ቦንቹዋ ኑስ ኢሚሳና።
2CO 4:18 ኑኒ ቤንቲያባ ጊዶናሺን ቤንቶናባ ፄሎስ። ቤንቲያባይ ሃዒሳ፥ ሺን ቤንቶናባይ ሜሪናሳ።
2CO 5:1 ሃዒ ኑ ዴዒያ ዱንካኔ ዳኒያ ሃ ሳዓ ኣሳቴꬃይ ላሌቲኮካ፥ ኣሲ ኬፂቦና፥ ፆሳይ ኬፂዳ ሜሪና ኬꬃይ ኑስ ሳሎን ዴዔይሳ ኤሮስ።
2CO 5:2 ሳሎ ኣሳቴꬃ ማዓናው ኣሞቲሼ ሃዒ ሃ ሳዓን ዴዒሼ ኦሎስ።
2CO 5:3 ኑኒ ሄሳ ማዒያ ዎዴ ካሎቶኮ።
2CO 5:4 ዱንካኔ ዳኒያ ሃ ሳዓ ኣሳቴꬃን ኑ ዴዒሼ ዴፄቲዲ ኦሎስ። ሃይቂያ ኑ ኣሳቴꬃይ ዴዖን ላሜታና ሜላ ሳሎ ኣሳቴꬃ ማዓናው ኮዮሲፔ ኣቲን ኣሹዋፔ ሻኬታናው ኮዪዲ ጊዴና።
2CO 5:5 ኑና ሃይሳስ ጊጊሲዳይ ፆሳ። ቃሲ ሲንꬃፌ ያናባስ ኦይꬂ ኦꬂዲ ባ ኣያና ኑስ ኢሚስ።
2CO 5:6 ሄሳ ጊሾ፥ ኑኒ ሃ ሳዓ ኣሳቴꬃን ዴዒያ ዎዴ ኡባን ጎዳፔ ሃኪዲ ዴዔይሳ ኤሪኮካ ኡባ ዎዴ ኣማኔቲዲ ዴዖስ።
2CO 5:7 ኑኒ ዴዔይ ኣማኖናፔ ኣቲን ቤዒያባን ጊዴና።
2CO 5:8 ኑ ሃ ሳዓ ኣሳቴꬃፌ ሻኬቲዲ፥ ኑ ሶ ቢዲ ጎዳራ ኢሲፌ ዳናው ኣሞቲያ ጊሾ ኣማኔቲዲ ዴዖስ።
2CO 5:9 ሄሳ ጊሾ፥ ኑ ሃ ኣሳቴꬃን ዴዒን ዎይኮ ሃ ኣሳቴꬃፌ ሻኬቲን፥ ኑ ኣሞይ ኢያ ኡፋይሳናይሳ።
2CO 5:10 ኑኒ ኢሶይ ኢሶይ ሃ ሳዓን ዴዒሼ ሎዖ ጊዲን ዎይኮ ኢታ ጊዲን፥ ኦꬂዳ ኦሱዋስ ቤሲያ ፒርዳ ኤካናው ኪሪስቶሳ ፒርዳ ኣራታ ሲንꬃን ሺቃና።
2CO 5:11 ሂዛ፥ ኑኒ ጎዳ ቦንቼይሲ ኣይ ጉሴኮ ኤሪያ ጊሾ ኣሳይ ኑ ኦዴይሳ ኤካና ሜላ ዞሮስ። ፆሳይ፥ ኑኒ ኦኔኮ ኑና ኤሬስ፤ ቃሲ ሂንቴካ ሂንቴ ካሃን ኑ ኦኔኮ ኤሬታ ያጋዳ ቆፓይስ።
2CO 5:12 ዎዛናን ጊዶናሺን ማላን ጬቄቲያ ኣሳ ዶና ኦይꬃናው ሂንቴ ኑናን ጬቄታና ሜላ ሂንቴው ጋሶ ጊዳናው ኮዮሲፔ ኣቲን ኑ ኑና ዛሪዲ ናሻናው ኮዮኮ።
2CO 5:13 ኑ ጎሺ ጊዲኮ ፆሳ ቦንቾሳ፤ ዎዛናማ ጊዲኮ ሂንቴሳ።
2CO 5:14 ኢሶይ ኡባስ ሃይቂዳይሳኔ ኡባይ ቃሲ ኢያራ ሃይቂዳይሳ ኑ ኤሪያ ጊሾ ኪሪስቶሳ ሲቆይ ኑና ሃሬስ።
2CO 5:15 ዴዖን ዴዔይሳቲ ሂዛፔ ጉዬ ባንታው ጊዶናሺን ኤንታው ሃይቂዳይሳሲኔ ሃይቆፔ ዴንዲዳይሳስ ዳና ሜላ ኪሪስቶሲ ኣሳ ኡባ ጊሾ ሃይቂስ።
2CO 5:16 ሂዛፔ ጉዬ፥ ኑኒ ኦናካ ኣሳ ቆፋን ፒርዶኮ። ሃይሳፌ ካሴ ኑኒ ኪሪስቶሳካ ኣሳ ቆፋን ፒርዲዳባ ጊዲኮካ፥ ሂዛፔ ሄሳዳ ፒርዶኮ።
2CO 5:17 ሄሳ ጊሾ፥ ኦኒካ ኪሪስቶሳን ዴዒኮ ኦራꬃ ሜꬌቴꬂ፤ ጋልዓ ሜꬌቴꬃይ ኣꬊስ፤ ኡባይካ ኦራꬂ ጊዲስ።
2CO 5:18 ሄሳ ኡባ ፆሳይ ኦꬂስ። ኢ ኪሪስቶሳ ባጋራ ኑና ባራ ሲጌꬂስ። ቃሲ ሃራታ ባራ ሲጌꬃና ሜላ ኑስ ሲጌꬆ ኦሶ ኢሚስ።
2CO 5:19 ፆሳይ ኪሪስቶሳ ባጋራ ኣሳ ኡባ ባራ ሲጌꬄስ። ኤንታ ናጋራ ታይቢቤና፤ ቃሲ ኣሳ ባራ ሲጌꬂያ ቃላ ኑስ ኢሚስ።
2CO 5:20 ፆሳይ ኣሳ ኑ ባጋራ ፄጊያ ጊሾ ኑ ኪሪስቶሳን ኪቴቲዲ ኣሳ ፆሳራ ሲጌቲቴ ጊዲ ኪሪስቶሳ ጊሾ ዎሶስ።
2CO 5:21 ኑኒ ፆሳ ፂሎቴꬃ ኪሪስቶሳ ባጋራ ኤካና ሜላ፥ ናጋራ ኤሮና ኪሪስቶሳ ኑ ጊሾ ናጋራንቾ ኣሳዳ ኦꬂስ።
2CO 6:1 ኑኒ ፆሳራ ኢሲፌ ኦꬂያ ኣሲ ጊዴይሳዳ፥ ሂንቴ ኤኪዳ ኣꬎ ኬሃቴꬃ ሃዳ ኦꬆና ሜላ ኑ ሂንቴና ዎሶስ።
2CO 6:2 ፆሳይ፥ «ታ ኔና ሲዓና ዎዴን ሲዓስ፤ ኣቶቴꬃ ጋላሳን ኔና ማዳስ» ያጌስ። ሄኮ፥ ታ ሲዒያ ዎዴይ ሃዒ፤ ኣቶቴꬃ ጋላሳይ ሃቺ።
2CO 6:3 ኦኒካ ኑ ኦሱዋ ቦራና ሜላኔ ኑናን ꬉቤታና ሜላ ኮዮኮ።
2CO 6:4 ጊዶሺን፥ ኑ ቱማ ፆሳ ኦሳንቾታ ጊዴይሳ ኑ ኦꬂያ ኡባባን ቤሲዳ። ዳሮ ጌንጫን፥ ዋዬን፥ ሜቶን፥ ኡንዓን፥
2CO 6:5 ጋራፌቴꬃን፥ ቃሾን፥ ኢፆን ኩሚዳ ዎጫማን፥ ዳቡራን፥ ꬊስኮ ꬋዮን፥ ፆማን፥
2CO 6:6 ጌሻቴꬃን፥ ኤራቴꬃን፥ ዳንዳዓን፥ ኬሃቴꬃን፥ ጌሻ ኣያናን፥ ቱማ ሲቆን፥
2CO 6:7 ቱማ ሃሳያኒኔ ፆሳ ዎልቃን ኑኒ ኢያ ኦሳንቾታ ጊዴይሳ ቤሲዳ። ቃሲ ፂሎቴꬃይ ኑስ ቶራኔ ጎንዳሌ።
2CO 6:8 ኑኒ ቦንቼቲዳኔ ቶሼቲዳ፤ ጫዬቲዳኔ ጋላቴቲዳ። ቱማ ሃሳዮስ፥ ሺን ኣሳይ ኑና ዎርዳንቾ ጊዶሶና።
2CO 6:9 ኑ ኣሳን ኤሬቲዳ ኣሲ፥ ሺን ኤሬቶና ኣሳ ሜላ ጊዲዳ። ሃይቂዶሶና ያጌቲዳ፥ ሺን ፓፃ ዴዖስ፤ ሾጬቲዳ፥ ሺን ሃይቂቦኮ።
2CO 6:10 ኑኒ ኣዛኒኮካ ኡባ ዎዴ ኡፋይቶስ። ኑ ማንቆ ዳኖስ፥ ሺን ዳሮ ኣሳ ዱሬዮስ። ቃሲ ኣይኮይካ ባይና ኣሲ ዳኖስ፥ ሺን ኡባይ ኑባ።
2CO 6:11 ቆሮንቶሳ ኣሳው፥ ኑ ሂንቴው ቆንጬን ኦዲዳ፤ ኑ ኡሉዋ ሂንቴና ቤሲዳ።
2CO 6:12 ሂንቴ ኑና ሂንቴ ሲቁዋ ቤሶና ዲጊዴታፔ ኣቲን ኑ ኑ ሲቁዋ ሂንቴና ዲጊቦኮ።
2CO 6:13 ኣዉ ባ ናይታስ ኦዴይሳዳ ታ ሂንቴው ኦዳይስ፤ ኑ ሂንቴና ኑ ኡሉዋ ቤሲዳይሳዳ፥ ሂንቴካ ሂንቴ ኡሉዋ ኑና ቤሲቴ።
2CO 6:14 ኣማኖና ኣሳራ ቤሶና ኦጌን ዋፄቶፊቴ። ፂሎቴꬃሲኔ ናጋራስ ኣይቢ ጋሄቴꬂ ዴዒ? ፖዖሲኔ ꬉማስ ኣይቢ ኢሲፌቴꬂ ዴዒ?
2CO 6:15 ኪሪስቶሳኔ ፃላሄ ኢሲፌ ጋꬂያባይ ኣይቤ? ቃሲ ኣማኔይሲኔ ኣማኖናይሲ ኢሲፌ ኮፂያባይ ኣይቤ?
2CO 6:16 ፆሳ ኬꬃስ ኤቃታራ ኣይቢ ኢሲፌቴꬂ ዴዒ? ፆሳይ፥ «ታኒ ኤንታ ጊዶን ዴዓና፥ ኤንታ ጊዶን ሃሙታና። ታኒ ኤንታ ፆሳ ጊዳና፤ ኤንቲካ ታ ኣሴ ጊዳና» ጊዳይሳዳ፥ ኑኒ ዴዖ ፆሳ ኬꬂ።
2CO 6:17 ሄሳዳካ፥ ጎዳይ፥ «ኤንታ ጊዶፌ ሻኬቲዲ ኬዪቴ፤ ቱና ጊዲዳባ ቦቾፊቴ፤ ታ ሂንቴና ኤካና።
2CO 6:18 ታ ሂንቴው ኣዋ ጊዳና፤ ሂንቴ ታው ኣዴ ናይታኔ ማጫ ናይታ ጊዳና፤ ያጌስ ኡባፌ ዎልቃማ ጎዳይ» ያጊስ።
2CO 7:1 ሂዛ፥ ታ ሲቆቶ፥ ሃ ኡፋይሳይ ኑስ ዴዒያ ጊሾ ኑ ኣሹዋኔ ኑ ሼምፑዋ ቱኒሲያባ ኡባፌ ኑና ጌሾስ። ፆሳስ ያዪዲ ኑ ጌሻቴꬃ ፖሎ ኦꬆስ።
2CO 7:2 ሂንቴ ኡሉዋ ኑና ቤሲቴ። ኑኒ ኦናካ ናቂቦኮ፤ ኦናካ ቆሂቦኮ፤ ኦናካ ጪሚቦኮ።
2CO 7:3 ታኒ ሄሳ ሂንቴ ቦላ ፒርዳናው ጊኬ። ሃይሳፌ ካሴ ታ ሂንቴው ኦዲዳይሳዳ፥ ሂንቴ ኑ ዎዛናን ዴዔታ፤ ኑ ፓፃ ዴዒንካ ሃይቂንካ ሂንቴፌ ሻኬቶኮ።
2CO 7:4 ታ ኦዲያባ ሂንቴፌ ቆቲኬ፤ ታ ሂንቴናን ጬቄታይስ፤ ኑ ዋዬ ኡባን ሚኔታይስ፤ ቃሲ ጊታ ኡፋይሲ ኡፋይታይስ።
2CO 7:5 ኑኒ ማቄዶኒያ ቢዳ ዎዴ ኡባ ባጋራ ዋዬቲዳፔ ኣቲን ሼምፒቦኮ። ካሬራ ሞርኬታን፥ ኑ ጋꬃን ያሻን ኡንዔቲዳ።
2CO 7:6 ሺን ኣዛኒዳይሳታ ሚንꬄꬂያ ፆሳይ፥ ቲቶ ዩሳን ኑና ሚንꬄꬂስ።
2CO 7:7 ኑና ሚንꬄꬂዳይ ቲቶ ዩሳ ፃላላ ጊዶናሺን ሂንቴካ ኢያ ሚንꬄꬂዳይሳና። ሂንቴ ታና ላሞቴይሳ፥ ታው ኣዛኔይሳኔ ታው ቆፔይሳ ታ ሲዒዳ ዎዴ ታና ዳሮ ኡፋይሲስ።
2CO 7:8 ታ ዳብዳቤይ ሂንቴና ኣዛንꬂኮካ ኣይስ ፃፋዲናሻ ጋዳ ቂሮቲኬ። ታ ቂሮቲዳይ ታ ፃፊዳ ዳብዳቤይ ሂንቴና ጉꬃ ዎዴስ ኣዛንꬂዳ ጊሾሳ።
2CO 7:9 ሃዒ ታኒ ኡፋይቲዳይ፥ ታ ሂንቴና ኣዛንꬂዳ ጊሾ ጊዶናሺን ሂንቴ ኣዛኖይ ሂንቴና ሂንቴ ናጋራፔ ዛሪዳ ጊሾሳ። ፆሳይ ባ ሼኒያዳ ሂንቴና ኣዛንꬂሲፔ ኣቲን ኑ ሂንቴና ኣይቢንካ ቆሂቦኮ።
2CO 7:10 ፆሳይ ኮያ ኣዛኖይ፥ ኣቶቴꬃኮ ጋꬂያ ናጋራፔ ሲሞ ኤሄስ፤ ኢያን ቂሮያባይ ባዋ። ሺን ሃ ሳዓ ኣዛኖይ ሃይቆ ኤሄስ።
2CO 7:11 ሂንቴ ኣዛኖይ ሂንቴናን ኣይፊሲዳ ኣይፊያ ቤዒቴ። ሄ ኣዛኖይ ሂንቴና ኣይ ሜላ ዴንꬄꬂዳኮ፥ ኣይ ሜላ ዛሮ ኢማናዳ ጊጊሲዳኮ፥ ሄ ኡራ ቦላ ኣይ ሜላ ሃንቂሲዳኮ፥ ኣይ ሜላ ታው ያያና ሜላ ኦꬂዳኮ፥ ኣይ ሜላ ኣሞዪዳኮ፥ ሄ ኡራ ሴራናው ኣይ ሜላ ጊጊዳኮ ቤዒቴ። ሃ ኡባባን ሂንቴ ጌሺ ጊዴይሳ ማርካዪዴታ።
2CO 7:12 ሄሳ ጊሾ፥ ታኒ ሃ ዳብዳቢያ ሂንቴው ፃፊዳይ፥ ናቂዳ ኡራ ዎይኮ ናቄቲዳ ኡራ ጊሾ ጊዴና። ሺን ሂንቴ ኑስ ኣይ ሜላ ቆፒያኮ ፆሳ ሲንꬃን ሂንቴ፥ ሂንቴና ቤዓና ሜላ ፃፋስ።
2CO 7:13 ኑኒ ኡፋይቲዳይ ሄሳ ጊሾሳ። ኑ ኡፋይሳፌ ኣꬊዲ ኑና ዳሮ ኡፋይሲዳይ፥ ሂንቴ ቲቶ ኡፋይሲዳይሳኔ ኢያ ዎዛና ሼምፒሲዳይሳ።
2CO 7:14 ታኒ ሂንቴና ናሻዳ ኢያው ኦዲን ሂንቴ ታና ዬላዪቤኬታ። ሺን ኑኒ ኡባ ዎዴ ሂንቴው ቱማ ኦዲዳ፤ ሄሳዳካ ኑኒ ቲቶ ሲንꬃን ሂንቴና ናሺዳይሲ ቱማ ጊዲስ።
2CO 7:15 ሂንቴ ኢያው ያሻን ኮኮሪዲ፥ ኢያ ሞኪዳይሳ ቃሲ ኢያው ኣይ ሜላ ኪቴቲዳኮ ኢ ቆፒያ ዎዴ ሂንቴው ዴዒያ ሲቆይ ሚኒሼ ቢስ።
2CO 7:16 ታኒ ኡባባን ሂንቴናን ኣማኔቲያ ጊሾ ኡፋይታይስ።
2CO 8:1 ኑ ኢሻቶ፥ ፆሳይ ማቄዶኒያን ዴዒያ ዎሳ ኬꬃታስ ኢሚዳ ኣꬎ ኬሃቴꬃ ሂንቴ ኤራና ሜላ ኑ ኮዮስ።
2CO 8:2 ኤንቲ ጊታ ሜቶን ፓጬቲዶሶና፥ ሺን ኤንታ ኡፋይሳይ ዎልቃማ። ኤንታ ማንቆቴꬃስ ዛዊ ባዋ፥ ሺን ባንታ ኢሙዋን ዳሮ ኬሂዶሶና።
2CO 8:3 ኤንቲ ባንታ ዎልቃ ሜላኔ ባንታ ዎልቃፌ ኣꬌይሳ ዶሲዲ ኢሚዳይሳስ ታ ማርካ።
2CO 8:4 ኤንቲ ፆሳ ኣሳ ማዲያ ሎዖ ኦሶ ኑራ ኦꬃናው ኮዪዲ ኑና ዳሮ ዎሲዶሶና።
2CO 8:5 ኤንቲ ኑኒ ቆፒዳይሳፌ ኣꬂዲ ኦꬂዶሶና። ኮይሮቲዲ ባንታና ጎዳስ ኢሚዶሶና፤ ካሊዲ፥ ፆሳ ሼኒያዳ ባንታና ኑስ ኢሚዶሶና።
2CO 8:6 ሃ ሎዖ ኦሱዋ ዶሚዳ ቲቶይ ጉጂ ኦꬃናዳኔ ሂንቴና ማዲዲ፥ ሄ ኦሱዋ ፖሊሳናዳ ኢያ ዎሲዳ።
2CO 8:7 ሺን ሂንቴ ኡባባን፥ ኣማኖን፥ ሃሳያን፥ ኤራቴꬃን፥ ጊታ ኣሞን፥ ኑና ሲቆኒኔ ኡባባን ዱሬቲዳይሳዳ ሃ ሎዖ ኦሱዋንካ ሂንቴ ኬሃ ጊዳና ሜላ ኑ ኮዮስ።
2CO 8:8 ታኒ ሄሳ ኪታናው ጊኬ። ሺን ሃራታ ጊታ ኣሙዋ ሂንቴ ሲቁዋራ ጋꬃ ቤዓዳ ሂንቴ ኣይ ኬና ቱሜኮ ኤራናው ጋይስ።
2CO 8:9 ሂንቴ ኑ ጎዳ ዬሱስ ኪሪስቶሳ ኣꬎ ኬሃቴꬃ ኤሬታ። ኪሪስቶሲ ዱሬ ጊዲ ኡቲዲ፥ ሂንቴ ኢያ ማንቆቴꬃን ዱሬታናዳ ሂንቴ ጊሾ ማንቂስ።
2CO 8:10 ታኒ ሃ ኦዳን ሂንቴና ማዲያ ዞሬ ዞራናው ኮያይስ። ሂንቴ ዚላይꬂ ኢማናው ፃላላ ጊዶናሺን ሄሳ ኦꬃናው ኣሞቴꬃንካ ሂንቴ ኮይሮ።
2CO 8:11 ሂንቴ ኦꬃናው ዶሚዳ ኦሱዋ ሃዒ ፖሊቴ። ሂንቴ ሂንቴው ዴዔይሳ ኬና ኢሚኮ፥ ሄሲ ሂንቴ ኢማናው ዳሮ ኣሞቴይሳ ቆንጪሴስ።
2CO 8:12 ኢሲ ኣሲ ኢማናው ኣሞቲኮ፥ ኢያ ኢሞይ ፆሳ ሲንꬃን ኤኬቴይ፥ ኢ ባው ዴዒዳይሳ ኬና ኢሚናፔ ኣቲን ባይናባፔ ኢማናው ኡንዔቲን ጊዴና።
2CO 8:13 ታኒ ሄሳ ጌይ፥ ሂንቴ ኡባይ ኢሲ ጊና ጊዳና ሜላሳፌ ኣቲን ሃራቲ ዋያፔ ሼምፒን ሂንቴ ዋዬታና ሜላሳ ጊዴና።
2CO 8:14 ዎዴ ኤንታ ፓላሃይ ሂንቴ ፓጫ ኩንꬃና ሜላ ሃዒ ሂንቴ ፓላሃይ ኤንታ ፓጫ ኩንꬆ። ሄሳን ሂንቴ ጊና ጊዳና።
2CO 8:15 ጌሻ ማፃፋን፥ «ዳሮ ሺሺዳይሳስ ፓላሂቤና፤ ጉꬃ ሺሺዳይሳስ ፓጪቤና» ጌቴቲ ፃፌቲዳይሳ ሜላ።
2CO 8:16 ኑ ሂንቴው ቆፔይሳዳ ቲቶይካ ሂንቴው ቆፓና ሜላ ኦꬂዳ ፆሳይ ጋላቴቶ።
2CO 8:17 ቲቶይ ሂንቴኮ ቢዳይ፥ ኑ ኢያ ዴንꬄꬂዳ ጊሾ ፃላላ ጊዶናሺን ኢ ባ ሼኔን ባናው ኣሞቲዳ ጊሾሳ።
2CO 8:18 ዎንጌላ ማርካቴꬃን ዎሳ ኬꬃ ኡባን ዳሮ ኤሬቲዳ ኢሻ፥ ኑኒ ቲቶራ ኢሲፌ ኪቶስ።
2CO 8:19 ሄሳ ቦላ ኑኒ ሃ ኬሃ ኢሞታ ኤፊያ ዎዴ ኑራ ባና ሜላ ሃ ሎዖ ኦሱዋን ጎዳ ቦንቻናዉኔ ሃራታ ማዳናው ዴዒያ ኣሙዋ ቤሳናው ኢ ዎሳ ኬꬃታን ዶሬቲስ።
2CO 8:20 ሃ ኢሜቲዳ ኬሃ ኢሙዋ፥ ኑ ኦሶ ቦላ ፔሺያ ዎዴ ቦሬቶና ሜላ ናጌቶስ።
2CO 8:21 ኑኒ ጎዳ ሲንꬃን ፃላላ ጊዶናሺን ኣሳ ሲንꬃንካ ሎዖ ጊዲዳባ ኦꬆስ።
2CO 8:22 ቃሲ ዳሮ ዎዴ ፓጬን ሚኒዲ ኣꬊዳ ኑ ኢሻ፥ ኤንታራ ሂንቴኮ ኪቲዳ። ኢ ሂንቴናን ኬሂ ኣማኔቲያ ጊሾ ሃዒ ሂንቴና ማዳናው ዳሮ ኣሞቴስ።
2CO 8:23 ቲቶባ ኤራናው ኮይኮ፥ ኢ ሂንቴና ማዳናው ታራ ኦꬂያ ታ ኦሶ ላጊያ። ሃንኮ ኢሻታባ ጊዲኮ ዎሳ ኬꬃቲ ኪቲዳይሳታ፤ ቃሲ ኣሳይ ኤንታ ዱሳ ቤዒዲ ኪሪስቶሳ ቦንቾሶና።
2CO 8:24 ሄሳ ጊሾ፥ ዎሳ ኬꬃቲ ሂንቴ ሲቁዋኔ ኑ ሂንቴና ናሼይሲ ቱማ ጊዴይሳ ቆንጪሳናው ሂንቴ ሲቁዋ ሃ ኣሳታ ቤሲቴ።
2CO 9:1 ኣማኒያ ኣሳስ ኬሲያ ሚሺያባ ታ ሂንቴው ፃፋናው ኮሼና።
2CO 9:2 ሂንቴ ማዳናው ኬሂ ኣሞቴይሳ ታ ኤራይስ። ሂንቴ ኣካያ ኣሳይ፥ ዚላይꬃፌ ዶሚዲ ማዳናው ጊጌቲዳይሳ ታኒ ማቄዶኒያ ኣሳስ ዶና ኩንꬃዳ ኦዳስ። ሂንቴ ጊታ ኣሞይካ ኤንታፌ ዳሮታ ዴንꬄꬂስ።
2CO 9:3 ሃ ኦሱዋን ሂንቴናን ኑ ጬቄቲያ ጬቆይ ሃዳ ጊዶና ሜላ ኮይሮ ሂንቴባ ታ ኦዲዳይሳዳ ሂንቴ ጊጌቲዲ ናጋና ሜላ ሃ ኢሻታ ሂንቴኮ ኪታስ።
2CO 9:4 ማቄዶኒያ ኣሳይ ታራ ቢዲ፥ ሂንቴ ጊጌቶና ዴዒሺን፥ ዴሚኮ፥ ኑ ሂንቴናን ዬላታና፤ ቃሲ ሂንቴ ኑፔ ኣꬎ ዬላታና።
2CO 9:5 ሄሳ ጊሾ፥ ሃ ኢሻቲ ታፔ ሲንꬃቲዲ ሂንቴኮ ቢዲ፥ ሂንቴ ኢማና ጊዳ ኢሙዋ ካሴቲዲ ጊጊሳና ሜላ ታ ኤንታና ኪታስ። ታኒ ጋኪያ ዎዴ ሄ ኢሞይ ጊጊ ኡቴስ። ሄ ዎዴ ሄ ኬሃቴꬃ ኢሞይ ዎልቃን ጊዶናሺን ዶሳን ጊዴይሳ ኤሪሴስ።
2CO 9:6 ሃይሳ ኣኬኪቴ፤ ጉꬁ ዜሪዳይ ጉꬁ ጫካና፤ ዳሮ ዜሪዳይ ዳሮ ጫካና።
2CO 9:7 ፆሳይ ኡፋይሳን ኢሚያ ኡራ ዶሲያ ጊሾ ዎልቃን ዎይኮ ዶሲ ባይና ጊዶናሺን ኢሲ ኢሲ ኣሲ ባ ዎዛናን ቆፒዳይሳዳ ዶሳን ኢማናው ቤሴስ።
2CO 9:8 ኡባ ዎዴ ኡባባን ኮሺያባ ኡባ ዴሚዲ ሎዖ ኦሶ ኡባ ኦꬃናው ዳንዳዓና ሜላ ፆሳይ ሂንቴው ባ ኣንጁዋ ዳርሳና።
2CO 9:9 ጌሻ ማፃፋን፥ «ኢ ባ ሻሉዋ ማንቆታስ ላሊስ፤ ኢያ ፂሎቴꬃይ ሜሪናው ዴዓና» ያጌስ።
2CO 9:10 ዜሬይሳስ ዜሬꬂ፥ ማናው ካꬂ ኢሚያ ጎዳይ፥ ሂንቴ ዜሪያ ዜሬꬃ ዳርሲዲ ኢማና። ሂንቴ ፂሎቴꬃ ኣይፊያካ ዳርሳና።
2CO 9:11 ዳሮ ኣሳይ ሂንቴ ኢሚያ ኢሙዋ ኑፔ ኤኪዲ፥ ፆሳ ጋላታናዳ፥ ሂንቴ ኡባ ዎዴ ዳርሲዲ ኢሜይሳታ ጊዳና ሜላ ፆሳይ ሂንቴና ኡባ ባጋራ ዱሬያና።
2CO 9:12 ሃ ሂንቴ ኢሚያ ኢሞይ ኣማኒያ ኣሳ ፓጫ ኩንꬆ ፃላላ ጊዶናሺን ኣሳይ ፆሳ ጋላታናው ጋሶ ጊዴስ።
2CO 9:13 ሃ ሂንቴ ኦሶይ ሂንቴ ኣማኑዋ ኤርሲዲ ኪሪስቶሳ ዎንጌላ ሂንቴ ኣማኒዲኔ ኢያው ኪቴቲዲ ሂንቴው ዴዒያባ ኤንታራኔ ሃራታራ ሻኬቲዳ ጊሾ ኡባይ ፆሳ ቦንቻና።
2CO 9:14 ፆሳይ ሂንቴው ኢሚዳ ኣꬎ ኬሃቴꬃ ጊሾ ኤንቲ ሂንቴው ፆሳ ዎሲሼ ሂንቴና ቤዓናው ላሞቶሶና።
2CO 9:15 ዛዊ ባይና ፆሳ ኢሙዋስ ፆሳይ ጋላቴቶ።
2CO 10:1 ታ ሂንቴራ ዴዒያ ዎዴ ሹጎ፥ ቃሲ ሂንቴፌ ሃኪያ ዎዴ ኑ ቦላ ሚኔስ ያጌቲዳ፥ ጳዉሎሲ፥ ኬሃኔ ኣሽኬ ጊዲዳ ኪሪስቶሳ ሱንꬃን ሂንቴና ዎሳይስ።
2CO 10:2 ታኒ ሂንቴኮ ቢያ ዎዴ ኑ ኣሾ ቆፋራ ሲሜሬቲያ ኣሲ ኦꬂዲ ቆፒያ ኣሳ ቦላ ሚኖ ቃላን ኦዴታናው ቆፋ ቃቻስ። ሂንቴ ቦላ ሄሳዳ ኦዴታና ሜላ ሂንቴ ታና ኦꬆናዳ ሂንቴና ዎሳይስ።
2CO 10:3 ኑኒ ሃ ሳዓን ዴዒኮካ ሃ ሳዓ ኣሳዳ ኦሌቶኮ።
2CO 10:4 ኑ ኦላ ሚሼይ ሃ ሳዓይሳ ጊዴና። ሺን ሚፃ ላላናው ዎልቃራ ዴዒያ ፆሳ ቶራ። ቱማራ ኤቄቲያ ፓላማኔ፥
2CO 10:5 ፆሳ ኤሮና ሜላ ዲጊያ ኦቶሮ ቆፋ ኡባ ላሎስ። ኣሳ ቆፋ ኡባ ዲዒዲ ኪሪስቶሳስ ኪቴታና ሜላ ኦꬆስ።
2CO 10:6 ሂንቴ ኪቴቴꬃይ ፖሎ ጊዲያ ዎዴ ኑኒ ኪቴቴꬃ ኢፆ ኡባ ሴራናው ጊጌታና።
2CO 10:7 ሂንቴ ኣይፌይ ቤዒዳ ሜላ ፒርዴታ። ኦኒካ ባና ኪሪስቶሳባ ጊዲ ቆፒያባ ጊዲኮ፥ ኑካ ኪሪስቶሳባ ጊዴይሳ ኤሮ።
2CO 10:8 ጎዳይ ታው ኢሚዳ ማታን ጬቄቲኮካ ሄሳን ዬላቲኬ። ሄ ማታይ ታው ኢሜቲዳይ ሂንቴና ዲቻናሳፌ ኣቲን ቆሃናሳ ጊዴና።
2CO 10:9 ታኒ ታ ዳብዳቢያን ሂንቴና ያሺሳናው ኮያዳ ፃፊዳባ ዳኖፖ።
2CO 10:10 ኢሲ ኢሲ ኣሳይ፥ «ጳዉሎሳ ዳብዳቤይ ዴፆኔ ዎልቃማ፥ ሺን ኢያ ሶምዖን ቤዒያ ዎዴ ኢ ዳቡራንቾ፤ ኢያ ኦዳይካ ፓꬄና» ያጎሶና።
2CO 10:11 ሄ ኣሳቲ ኑ ሃሆን ዴዒሼ ፃፊያ ዳብዳቢያኒኔ ማታን ሂንቴራ ዴዒሼ ኦꬂያ ኦሱዋ ጊዶን ዱማቴꬂ ባይናይሳ ኣኬኮ።
2CO 10:12 ኑኒ ባንታና ናሺያ ኣሳታራ ኑና ጊናያናው ዎይኮ ጋዴያናው ኮዮኮ። ሺን ኤንቲ ባንታና ባንታራ ጊናዪዲ ዎይኮ ጋዴዪዲ ቤዒሼ ኤያ።
2CO 10:13 ሺን ኑኒ ፆሳይ ኑስ ኢሚዳ ꬋሳን ጬቄቶሲፔ ኣቲን ዛዋ ፒኒዲ ጬቄቶኮ፤ ሄ ዛዋይ ሂንቴኮካ ጋኬስ።
2CO 10:14 ኑኒ ቤሴይሳፌ ኣꬂዲ ጬቄቶኮ፥ ሺን ኪሪስቶሳ ዎንጌላ ሂንቴኮ ጋꬂዳይሳን ጬቄቶስ።
2CO 10:15 ኑኒ ፆሳይ ኤሲዳ ዛዋፔ ፒኒዲ፥ ሃራቲ ኦꬂዳ ኦሶን ጬቄቶኮ። ጊዶሺን፥ ሂንቴ ኣማኖይ ዲጫና ሜላ ፆሳይ ኢሚዳ ዛዋን ሂንቴ ጊዶን ኑ ኦꬂያ ኦሶይ ዳልጋና ጊዲ ቆፖስ።
2CO 10:16 ኑኒ ሃራ ኣሲ ባ ዛዋን ኦꬂዳ ኦሶን ጌሊዲ ጬቄቶኮ፥ ሺን ሂንቴፌ ፒኒዲ ሃራታስ ዎንጌላ ማርካታናው ዳንዳዖስ።
2CO 10:17 ሺን፥ ጌሻ ማፃፋን፥ «ጬቂያ ኡባይ ጎዳ ሎዖቴꬃን ጬቆ» ያጊዲ ፃፌቲስ።
2CO 10:18 ጎዳይ ናሺያ ኡራፔ ኣቲን ባና ባው ናሺያ ኡራይ ናሼቴና።
2CO 11:1 ታ ጉꬃ ኤያቴꬃ ሂንቴ ሃዒካ ዳንዳዓና ጋዳ ቆፓይስ፤ ሃያና ዳንዳዒቴ።
2CO 11:2 ፆሳይ ሂንቴው ቆፒዳይስሳዳ፥ ታካ ሂንቴው ቆፓይስ። ታኒ ሂንቴና ጌሻ ጌላዒዳ ኢሲ ኣዲያ፥ ኪሪስቶሳስ ኢማናው ኦይቻ ዎꬃስ።
2CO 11:3 ሺን ሾሻይ ባ ጌኒያን ሄዋኖ ባሌꬂዳይሳዳ ኦኒ ኤሪ ሂንቴ ዎዛናይ ኢቲዲ ኪሪስቶሳስ ዴዒያ ሂንቴ ሱሬቴꬃኔ ጌሻቴꬃ ኣጋንዴቲ ጋዳ ሂርጋይስ።
2CO 11:4 ኢሲ ኣሲ ዪዲ፥ ኑኒ ሂንቴው ማርካቲዳ ዬሱሳፔ ሃራ ዬሱሳ ሂንቴው ማርካቲኮ፥ ዎይኮ ሂንቴ ኤኪዳ ኣያናፔኔ ዎንጌላፔ ሃራ ኣያናኔ ዎንጌላ ሂንቴው ኦዲኮ፥ ሲዒ ጊዲ ኤኬታ።
2CO 11:5 ሺን ታኒ ዬሱስ ኪቲዳ «ጊታ ሃዋሬታፔ» ጉፃይስ ጋዳ ቆፒኬ።
2CO 11:6 ታኒ ኦዳ ኤሮና ኣሲ ጊዲኮካ፥ ኤራቴꬂ ታው ዴዔስ። ሄሳ ታ ሂንቴው ዳሮ ኦጌን ቆንጪሳስ።
2CO 11:7 ታኒ ሚሼ ኦይቾና ፆሳ ዎንጌላ ሂንቴው ጮ ኦዲዳይሲኔ ሂንቴና ꬎቁ ኦꬃዳ ታና ቶቺዳይሲ ታው ናጋራ ጊዲ?
2CO 11:8 ታኒ ሂንቴው ኦꬃናው ሃራ ዎሳ ኬꬃታፔ ሚሼ ቦንቃ ኤካስ።
2CO 11:9 ታ ሂንቴራ ዴዒያ ዎዴ ታና ሜቲንካ ሂንቴፌ ኢሲ ኣሲካ ዋይሳቢኬ። ማቄዶኒያፔ ዪዳ ኣማኔይሳቲ ታና ኮሺያባ ኡባን ማዲዶሶና። ሃቺ ጋካናው ታ ሂንቴው ቶሆ ጊዳቢኬ ሲንꬃስካ ቶሆ ጊዲኬ።
2CO 11:10 ኪሪስቶሳ ቱማቴꬃይ ታናን ዴዒሺን፥ ታ ጬቁዋ ኣካያ ቢታን ታና ኦኒካ ዲጌና።
2CO 11:11 ታ ሃይሳ ኣይስ ጋይና? ሂንቴና ዶሶና ጊሾሴዬ? ታኒ ሂንቴና ዶሴይሳ ፆሳይ ኤሬስ።
2CO 11:12 «ኑካ ሂንቴ ሜላ ኦꬆስ» ያጊዲ ጬቂያ ሃንኮ ሃዋሬታ ጬቁዋ ጋሱዋ ꬋይሳናው ሃዒ ታ ኦꬄይሳ ሲንꬃስካ ኦꬃና።
2CO 11:13 ሃይሳ ሜላ ኣሳቲ ኪሪስቶሳ ሃዋሬ ዳናናው ባንታና ላሚያ ዎርዳንቾ ሃዋሬታኔ ጪሚያ ኦሳንቾታ።
2CO 11:14 ሄሲ ማላሊሲያባ ጊዴና፤ ኣይስ ጊኮ፥ ፃላሄይ ፖዖ ኪታንቾ ዳናናው ባና ላሜስ።
2CO 11:15 ሄሳ ጊሾ፥ ፃላሄ ኦሳንቾቲ ፂሎቴꬃ ኦሳንቾታ ዳናናው ባንታና ላሚኮ ሄሲ ጊታባ ጊዴና። ኤንቲ ዉርሴꬃን ባንታ ኦሱዋዳ ኤካና።
2CO 11:16 ኦኒካ ታና ኤያ ጊዲ ቆፖና ሜላ ዛራዳካ ኦዳይስ። ታ ሂንቴው ኤያ ዳኒኮካ ታ ጉꬃራ ጬቄታና ሜላ ታና ኤያ ኦꬂዲ ኤኪቴ።
2CO 11:17 ታኒ ሃይሳዳ ጬቄታዳ ኦዴቴይ፥ ጎዳይ ኮዬይሳዳ ጊዶናሺን ኤያቴꬃን ኦዳይስ።
2CO 11:18 ዳሮ ኣሳይ ሃ ሳዓባን ጬቄቲያ ጊሾ ታካ ጬቄታና።
2CO 11:19 ሂንቴ ዎዛናማ ጊዲያ ጊሾ ኤያ ኣሳባ ኡፋይሳን ዳንዳዔታ።
2CO 11:20 ኦኒካ ሂንቴና ኣይሌይኮ ዎይኮ ሂንቴና ቦንቂኮ ዎይኮ ባው ማዴታናው ሂንቴኮ ሺቂኮ ዎይኮ ሂንቴ ቦላ ኦቶርቲኮ ዎይኮ ሂንቴና ባቂኮ ሂንቴ ዳንዳዔታ።
2CO 11:21 ኑኒ ሄሳ ኦꬃናው ዳሮ ዳቡራንቾ ጊዴይሳ ዬላታሼ ታ ኦዳይስ። ሺን ኦኒካ ሚኒዲ ጬቄቲኮ፥ ታካ ጬቄታናው ሚናይስ። ታኒ ሄሳ ኤያ ኣሳዳ ኦዴታይስ።
2CO 11:22 ኤንቲ ኢብራዌ? ታካ ኢብራዌ። ኤንቲ ኢስራዔሌ? ታካ ኢስራዔሌ። ኤንቲ ኣብራሃሜ ሼሼ? ታካ ኣብራሃሜ ሼሺ።
2CO 11:23 ኤንቲ ኪሪስቶሳ ኦሳናቾ? ታኒ ጎሻ ኣሳዳ ኦዳይስ፥ ኤንታፌ ኣꬊያ ኪሪስቶሳ ኦሳንቾ። ታኒ ኦሶን ዳሮ ዳቡራስ፤ ዳሮ ዎዴ ቃሼታስ፤ ጋራፌታስ፤ ዳሮ ዎዴ ሃይቆፔ ኣታስ።
2CO 11:24 ኣይሁዴቲ ታና ሃስታማኔ ኡዱፉና ኢቻሹ ቶሆ ጋራፊዶሶና።
2CO 11:25 ሄꬑ ቶሆ ፃምዓን ሾጬታስ፤ ኢሲ ቶሆ ሹቻን ጫዴታስ፤ ማርካቤይ ሄꬑ ቶሆ ሜዒስ፤ ኣባ ጊዶን ኢሲ ቃማ ኩሜꬂ ኣቃዳ ፔዓስ።
2CO 11:26 ታኒ ዳሮ ኦጊያ ዳቡራን ሃሙታስ። ኪፃ ሃꬃፌኔ ፓንጋፌ ኣታስ። ኣይሁዴቲኔ ኣይሁዴ ጊዶና ኣሳይ ታ ቦላ ሜቶ ጋꬂዶሶና። ካታማይ፥ ባዞይ፥ ኣባይ፥ ታና ያሺስ፤ ኣማኒያ ዳኒያ ኣሳቲ ታና ዋይሲዶሶና።
2CO 11:27 ታኒ ኦሶን ዳቡራሲኔ ጫዋታስ፥ ዳሮ ቶሆ ꬊስኮ ꬋያስ፥ ኮሻታስ፥ ሳሞታስ፥ ዳሮ ቶሆ ፆማስ፥ ሜጌታስ፥ ካሎታስ።
2CO 11:28 ሃራባ ኡባ ታይቦና ኡባ ዎዴ ታና ቆፊሴይ ዎሳ ኬꬃታባ።
2CO 11:29 ኢሲ ኣሲ ዳቡሪያ ዎዴ ኢያራ ታ ዳቡራቢኪና? ኢሲ ኣሲ ናጋራን ꬉቤቲያ ዎዴ ታ ኣዉዴ ቂሮቶና ኣጋዲና?
2CO 11:30 ታ ጬቄታናው ኮሺያባ ጊዲኮ ታኒ ዳቡራንቾ ጊዴይሳ ኤሪሲያባን ጬቄታና።
2CO 11:31 ሜሪናው ቦንቼቲዳ ፆሳይ፥ ኑ ጎዳ ዬሱስ ኪሪስቶሳ ኣዋይ፥ ታ ዎርዶቶናይሳ ኤሬስ።
2CO 11:32 ዳማስቆ ካታማን ኣሬታሳ ጊያ ካዉዋፔ ጋርሳራ ሃሬይሲ ታና ኦይꬃናው ኮዪዲ ዳማስቆ ካታማ ፔንጊያ ናጊሲስ።
2CO 11:33 ሺን ኣሳይ ታና ዳቾን ዬጊዲ፥ ካታማ ዲርሳ ማስኮቲያራ ዎꬊሲን ታኒ ኢያ ኩሺያፔ ኣታስ።
2CO 12:1 ጬቄቴꬃስ ጎዒ ባይናይሳ ኤራይስ። ሺን ጬቄታናው ኮሺኮ፥ ጎዳፔ ኤኪዳ ቆንጬꬃን ጬቃና።
2CO 12:2 ታማኔ ኦይዱ ላይꬃፌ ካሴ፥ ኪሪስቶሳ ኣማኒያ ኢሲ ኡራይ ሄꬓንꬆ ሳሉዋ ቢዳይሳ ታ ኤራይስ። ሄ ኡራይ ኣሾን ዎይኮ ኣሾፔ ካሬራ ቢዳኮ ታ ኤሪኬ፤ ፆሳይ ኤሬስ።
2CO 12:3 ሄ ኡራይ ሄꬓንꬆ ሳሉዋ ኤኬቲዳይሳ ኤራይስ። ሺን ኢ ኣሾን ዎይኮ ኣሾፔ ካሬራ ኤኬቲዳኮ ታ ኤሪኬ፤ ፆሳይ ኤሬስ።
2CO 12:4 ሄ ኡራይ ጋናቴ ኤኬቲዲ ኣሲ ቆንጪሳናዉኔ ኣሲ ኦዳናው ዳንዳዖናባ ሲዒስ።
2CO 12:5 ታኒ ሄ ኣዲያባን ጬቄታና፥ ሺን ታኒ ታ ዳቡራፔ ኣቲን ታናን ጬቄቲያባይ ባዋ።
2CO 12:6 ታኒ ቱማ ኦዴቲያ ጊሾ ጬቄታናው ኮይኮካ ኤያ ጊዲኬ። ሺን ኣሲ ታ ኦꬄይሳ ቤዔይሳፌኔ ሲዔይሳፌ ኣꬂዲ ቆፖና ሜላ ጋዳ ጬቄቴꬂ ኣጋይስ።
2CO 12:7 ታው ቆንጪዳ ጊታ ቆንጬꬃን ታ ኦቶርቶና ሜላ ታና ዋይሳናው ታ ኣሹዋን ጫዲያ ፃላሂያ ኪታንቾይ ታው ኢሜቲስ።
2CO 12:8 ሃ ዋይሲያባ ታፔ ዲጋና ሜላ ታኒ ጎዳ ሄꬑ ቶሆ ዎሳስ።
2CO 12:9 ሺን ጎዳይ፥ «ታ ዎልቃይ ኔ ዳቡራን ቆንጪያ ጊሾ ታ ኣꬎ ኬሃቴꬃይ ኔው ጊዳና» ያጊስ። ኪሪስቶሳ ዎልቃይ ታናን ቆንጫና ሜላ ታ ዳቡራን ኡፋይታሼ ጬቄታይስ።
2CO 12:10 ታኒ ኪሪስቶሳ ጊሾ ዳቡሪያ ዎዴ ጫዬቲያ ዎዴ ዋዬቲያ ዎዴ ጎዴቲያ ዎዴ ሜቶቲያ ዎዴ ታ ዳቡራን ኡፋይታይስ። ኣይስ ጊኮ፥ ታ ዳቡሪያ ዎዴ ሄ ዎዴ ሚናይስ።
2CO 12:11 ታኒ ኤያ ኣሳዳ ጬቄታስ። ሄሳዳ ታ ጬቄታና ሜላ ኦꬂዳይ ሂንቴና። ታ፥ ታ ሁዔን ኤሬቶና ኣሲ ጊዲኮካ፥ «ጊታ ሃዋሬታ» ጌቴቴይሳታፔ ጉፂኬ። ሄሳ ታው ማርካታናው ቤሴይ ሂንቴናሺን።
2CO 12:12 ታ ሂንቴ ጊዶን ዴዓሼ ዳንዳዓን ኦꬂዳ ማላታቲኔ ማላቲ ታ ቱማ ሃዋሬ ጊዴይሳ ቤሶሶና።
2CO 12:13 ታ ሂንቴው ቶሆ ጊዶናይሳፌ ኣቲን ሃራ ዎሳ ኬꬃታፔ ሂንቴ ኣይቢን ጉፂዴቲ? ሄሲ ባላ ጊዲኮ ታና ማሪቴ።
2CO 12:14 ታኒ ሂንቴኮ ባናው ጊጌቲሺን ሃይሲ ታው ሄꬓንꬆ። ታ ሂንቴናፔ ኣቲን ሂንቴው ዴዒያባ ኮዮና ጊሾ ሂንቴና ዋይሳናው ኮዪኬ። ዬሊዳይሳቲ ባንታ ናይታስ ሻሎ ሚንጆሶናፔ ኣቲን ናይቲ ባንታና ዬሊዳይሳታስ ሻሎ ሚንጆኮና።
2CO 12:15 ታ ሂንቴ ጊሾ ታው ዴዒያባኔ ታና ኣꬃ ኢሚንካ ታና ኡፋይሴስ። ያቲን፥ ታኒ ሂንቴና ሄሳዳ ኬሃ ሲቂያ ዎዴ ሂንቴ ታና ጉꬃራ ሲቄቲ?
2CO 12:16 ጊዲኮካ፥ ታ ሂንቴው ቶሆ ጊዲኬ፤ ዋይሳቢኬ፤ ሺን ሂንቴና ጪሞኒኔ ጌኔን ኦይኪዳባ ሂንቴው ዳኖና ኣጌና።
2CO 12:17 ሃሪ ኣቶሺን፥ ታ ሂንቴኮ ኪቲዳ ኣሳታፔ ሂንቴና ጪሚዳ ኣሲ ዴዒ?
2CO 12:18 ቲቶይ ሂንቴኮ ባና ሜላ ታኒ ዎሳስ፤ ቃሲ ኣማኒያ ኢሻካ ኢያራ ዬዳስ። ያቲን፥ ቲቶይ ሂንቴና ጪሚዴ? ኑኒ ኑ ኦሱዋ ኢሲ ኣያናን ኦꬂቦኮ? ቃሲ ኑ ሃኖይካ ኢሲኖ ጊዴኔ?
2CO 12:19 ኑ ኡባ ዎዴ ሂንቴ ሲንꬃን ኑና ፂሊሳናው ሞቴቲያባ ሂንቴው ዳኒ? ኑ ኪሪስቶሳን ዴዒዲ ፆሳ ሲንꬃን ሃዒ ጋካናው ኦዶስ። ኑ ሲቆ ኢሻቶ፥ ኑ ሃ ኡባ ኦꬄይ ሂንቴና ዲቻናሳ።
2CO 12:20 ታ ሂንቴኮ ቢያ ዎዴ ኦኒ ኤሪ ሂንቴ ታ ኮዬይሳዳ ሃኖና፥ ቃሲ ታካ ሂንቴ ኮዬይሳዳ ሃኖና ጋሄቶና ኣጎኮ ጋዳ ያያይስ። ቃሲ ኦኒ ኤሪ ሂንቴ ጊዶን ፓላሚ፥ ቃናቴይ፥ ሃንቆይ፥ ዪቄይ፥ ዚጊርሲ፥ ኣሳ ሱንꬁ ኢሶይ፥ ኦቶሮይኔ ካቺ ዶና ኣጌና ጋዳ ያያይስ።
2CO 12:21 ታኒ ናምዓንꬆ ሂንቴኮ ቢያ ዎዴ ፆሳይ ሂንቴ ሲንꬃን ታና ካዉሻና ጋዳ ያያይስ። ካሴ ናጋራ ኦꬂዲ ሄ ባንታ ኦꬂዳ ቱናቴꬃፌ፥ ላይማቴꬃፌኔ ዬላያ ኦሱዋፔ ሲሚቦና ኣሳታ ቤዓዳ ኣዛኖና ኣጊኬ ጋዳ ያያይስ።
2CO 13:1 ታ ሂንቴኮ ቢሺን ሃይሲ ሄꬓንꬆ። ኣይ ሞቶይካ ናምዑ ዎይኮ ሄꬑ ማርካን ሚኔስ።
2CO 13:2 ታኒ ናምዓንꬆ ሂንቴራ ጋሄቲዳ ዎዴ ሂንቴ ጊዶን ካሴ ናጋራ ኦꬂዳ ኡራኔ ሃራታ ኡባ ሴሮና ኣጊኬ ጋዳ ኦዳ ዎꬃስ። ሃዒ ታ ሃካዳ ዴዒኮካ ሲማዳ ሂንቴኮ ቢያ ዎዴ ኦዴስካ ቃꬌቲኬ።
2CO 13:3 ታናን ዴዒዲ ኦዴይ ኪሪስቶሳ ጊዴይሳ ሂንቴ ኤራናው ኮዬታ። ኢ ሂንቴራ ሃሳያ ዎዴ ዎልቃማፔ ኣቲን ሂንቴ ጊዶን ዳቡራንቾ ጊዴና።
2CO 13:4 ኪሪስቶሲ ማስቃሊያ ቦላ ዳቡራን ካቄቲስ፥ ሺን ፆሳ ዎልቃን ዴዖን ዴዔስ። ኢ ዳቡራንቾ ጊዲዳይሳዳ፥ ኑካ ዳቡራንቾ። ሺን ሂንቴና ሃጋዛናው ፆሳ ዎልቃን ኢያራ ዴዖን ዳና።
2CO 13:5 ኣማኖን ሚኒዲ ዴዒያኮ ሂንቴና ሂንቴው ፓጪ ቤዒቴ። ፓጬን ሂንቴ ኩንዶና ኣቲኮ፥ ኪሪስቶሲ ሂንቴናን ዴዔይሳ ሂንቴ ኤሬታ። ሺን ኪሪስቶሲ ሂንቴናን ዶና ኢፂኮ ሂንቴ ኩንዴታ።
2CO 13:6 ኑኒ ፓጬን ኩንዶናይሳ ሂንቴ ኤሬታ ጋዳ ኣማናይስ።
2CO 13:7 ሂንቴ ኢታባ ኦꬆና ሜላ ኑኒ ፆሳ ዎሶስ። ኑኒ ሚኖ ጊዴይሳ ኣሳይ ቤዓና ሜላ ጊዶናሺን ኑኒ ሚኖ ጊዶና ኢፂኮካ፥ ሂንቴ ሎዖ ኦꬃና ሜላ ኑኒ ዎሶስ።
2CO 13:8 ኑኒ ቱማስ ኦꬆሲፔ ኣቲን ቱማራ ኤቄቲያባ ኣይባካ ኦꬆኮ።
2CO 13:9 ኑ ዳቡሪያ ዎዴ ሂንቴ ቃሲ ሚኒያ ዎዴ ኑና ኡፋይሴስ። ሂንቴ ቦሬይ ባይናይሳታ ጊዳና ሜላ ኑ ሂንቴው ፆሳ ዎሶስ።
2CO 13:10 ታኒ ሂንቴፌ ሃካዳ ዴዓሼ ፃፊዳይ ሄሳ ጊሾሳ። ታኒ ሂንቴኮ ቢያ ዎዴ ጎዳይ ታው ኢሚዳ ማታን ዜምፓዳ ሂንቴ ቦላ ጎዳታናው ኮዪኬ። ጎዳይ ታው ማታ ኢሚዳይ፥ ሂንቴና ማዳናሳፌ ኣቲን ቆሃናሳ ጊዴና።
2CO 13:11 ዉርሴꬃን ታ ኢሻቶ፥ ሳሮ ዴዒቴ። ቦሬይ ባይና ዴዒቴ፤ ታ ዞሪያ ሲዒቴ። ኢሲ ዎዛናን ጊዲዲ ዴዒቴ፤ ሳሮቴꬃን ዴዒቴ። ሲቆኔ ሳሮ ኢሚያ ፆሳይ ሂንቴራ ጊዶ።
2CO 13:12 ጌሻ ዬሬቴꬂ ዬሬቲሼ፥ ኢሶይ ኢሱዋ ሳሮꬂቴ።
2CO 13:13 ፆሳ ኣሳ ኡባይ ሂንቴና ሳሮ ሳሮ ያጎሶና።
2CO 13:14 ጎዳ ዬሱስ ኪሪስቶሳ ኣꬎ ኬሃቴꬃይ፥ ፆሳ ሲቆይ፥ ጌሻ ኣያና ኢሲፌቴꬃይ ሂንቴ ኡባራ ጊዶ።
GAL 1:1 ኣሳፔ ዎይኮ ኣሳ ባጋራ ጊዶናሺን ዬሱስ ኪሪስቶሳፔኔ ኢያ ሃይቆፔ ዴንꬂዳ ፆሳ ኣዋፔ ሃዋሬ ጊዳና ሜላ ኪቴቲዳ ታ ጳዉሎሲ፥
GAL 1:2 ታራ ዴዒያ ኣማኒያ ኢሻቲ ኡባይ፥ ጋላቲያን ዴዒያ ዎሳ ኬꬃታስ ኪቲዳ ኪታ።
GAL 1:3 ፆሳይ ኑ ኣዋይኔ ኑ ጎዳ ዬሱስ ኪሪስቶሲ ሂንቴው ኣꬎ ኬሃቴꬃኔ ሳሮቴꬃ ኢሞ።
GAL 1:4 ሃ ኢታ ዎዲያፔ ኑና ኣሻናው፥ ኑ ፆሳ፥ ኑ ኣዋ ሼኔን ኪሪስቶሲ ኑ ናጋራ ጊሾ ባና ኣꬂ ኢሚስ።
GAL 1:5 ፆሳስ ሜሪናፔ ሜሪና ጋካናው ቦንቾይ ጊዶ። ኣሚንዒ።
GAL 1:6 ኪሪስቶሳ ኣꬎ ኬሃቴꬃን ሂንቴና ፄጊዳ ፆሳ ኣጊዲ፥ ሃራ ዎንጌላኮ፥ ሂንቴ ኤሌሲዲ፥ ዋኒዲ ሲሚዳኮ ታና ማላሊሴስ።
GAL 1:7 ሂንቴና ባሌꬃናዉኔ ኪሪስቶሳ ዎንጌላ ዎቢሳንው ኮያ ጉꬃ ኣሳቲ ዴዖሶናፔ ኣቲን ቱማ ዎንጌላይ ኢሲኖ።
GAL 1:8 ሺን ኑና ጊዲን ዎይኮ ሳሎ ኪታንቾ ጊዲን ኑኒ ሂንቴው ኮይሮ ኦዲዳ ዎንጌላፔ ዱማቲያ ሃራ ዎንጌላ ሂንቴው ኦዲያባ ጊዲኮ፥ ኢ ቃንጌቲዳባ ጊዶ።
GAL 1:9 ሃይሳፌ ሲንꬄ ኑኒ ጊዳይሳዳ ሃዒካ ዛራዳ ጋይስ። ሂንቴ ኤኪዳ ዎንጌላፔ ዱማቲያ ዎንጌላ ኦኒካ ሂንቴው ኦዲኮ ሄ ኡራይ ቃንጌቲዳባ ጊዶ።
GAL 1:10 ያቲን፥ ታና ኣሲ ናሻና ሜላ ኮያይናዬ? ዎይኮ ፆሲ ናሻና ሜላ ኮያይና? ዎይኮ ታ ኣሴ ኡፋይሳናው ኮያይና? ታ ኣሴ ኡፋይሳናው ኮያባ ጊዲኮ፥ ኪሪስቶሳ ኣይሌ ጊዲኬ።
GAL 1:11 ታ ኢሻቶ፥ ታ ሂንቴው ኦዲዳ ዎንጌላይ ኣሳፔ ጊዶናይሳ ሂንቴ ኤራና ሜላ ታ ኮያይስ።
GAL 1:12 ታው ሃ ዎንጌላ ዬሱሲ ኪሪስቶሲ ቆንጪሲሲፔ ኣቲን ኣሳፔ ኤካቢኬ ዎይኮ ኣሲ ታና ታማርሲቤና።
GAL 1:13 ታ ካሴ ኣይሁዴ ኣማኖን ዴዒያ ዎዴ ዋና ዴዒዳኮ፥ ሂንቴ ሲዒዴታ። ታ ዎሳ ኬꬃ ቃꬌይ ባይና ጎዳናዉኔ ꬋይሳናው ባፄታስ።
GAL 1:14 ኣይሁዴ ኣማኖ ናጎን፥ ታ ዎዴን ዴዒያ ኣይሁዴ ኢሻታፔ ኣꬋይስ። ኑ ኣዋታ ዎጋስካ ኣꬋዳ ሚሼታይስ።
GAL 1:15 ሺን ታ ቡሮ ታ ኣዬ ኡሎን ዴዒሺን ፆሳይ ታና ዶሪስ፤ ባ ኣꬎ ኬሃቴꬃን ታና ፄጊስ።
GAL 1:16 ኣይሁዴ ጊዶና ኣሳስ ዎንጌላ ኦዳና ሜላ ፆሳይ ባ ናዓ ታው ቆንጪሲዳ ዎዴ ታ ኦዴራካ ዞሬታቢኬ።
GAL 1:17 ዎይኮ ታፔ ሲንꬄ ሃዋሬ ጊዲዳይሳታራ ጋሄታናው ዬሩሳላሜ ባቢኬ። ሺን ታ ካሴታዳ ኣራቤ ቢታ ባስ፤ ሄሳፌ ሲማዳ ዳማስቆ ካታማ ያስ።
GAL 1:18 ሄꬑ ላይꬃፌ ጉዬ፥ ጴፂሮሳራ ጋሄታናው ዬሩሳላሜ ባዳ ኢያራ ታማኔ ኢቻሹ ጋላስ ኡታስ።
GAL 1:19 ሺን ጎዳ ኢሻ ያይቆባፔ ኣቲን ሃንኮ ሃዋሬታ ቤዓቢኬ።
GAL 1:20 ታ ሂንቴው ፃፊይዳይሲ ዎርዶ ጊዶናይሳ ፆሳ ሲንꬃን ሂንቴው ቆንጪሳይስ።
GAL 1:21 ሄሳፌ ጉዬ፥ ታኒ ሶሪያ ቢታኔ ኪልቂያ ቢታ ባስ።
GAL 1:22 ዪሁዳን ዴዒያ ዎሳ ኬꬃ ኣሳይ ታና ቤዒዲ ኤሪቦኮና።
GAL 1:23 ሺን ኤንቲ፥ «ካሴ ኑና ጎዲያ ኡራይ፥ ሃዒ ሄ ኢ ꬋይሳናው ኮያ ኣማኑዋባ ሳባኬስ» ያጌይሳ ሲዒዶሶና።
GAL 1:24 ሲዒዳ ኡባይ ታ ጋሶን ፆሳ ጋላቲዶሶና።
GAL 2:1 ታማኔ ኦይዱ ላይꬃፌ ጉዬ፥ ባርናባሳራ ዛራዳ ዬሩሳላሜ ባስ። ሄ ዎዴ ቲቶ ታራ ኤካዳ ባስ።
GAL 2:2 ፆሳይ ታው ቆንጪሲዳ ቆንጬꬃን ያ ባዳ ኣይሁዴ ጊዶና ኣሳ ጊዶን ታ ሳባኪያ ዎንጌላ ኤንታው ቆንጪሳስ። ካሴ ታ ዎፂዳ ዎꬃይኔ ሃዒካ ታ ዎፂያ ዎꬃይ ሃዳ ጊዶና ሜላ ጋዳ ካሌꬄይሳታ ዱማ ሺሻዳ ኤንታው ኦዳስ።
GAL 2:3 ሃሪ ኣቶሺን፥ ታራ ዴዒያ ቲቶይ ጊሪኬ ኣሲ ጊዲኮካ፥ ቃፃሬቶ ጊዲ ኡንዔꬂቦኮና።
GAL 2:4 ጊዶሺን፥ ኣማኒያ ኢሻታ ዳኒዲ ኑ ጊዶ ጌሊዳ ኢሶቲ ኢሶቲ ኢ ቃፃሬታና ሜላ ኮዪዶሶና። ሄ ኣሳቲ ኪሪስቶስ ዬሱሳን ኑስ ዴዒያ ላዓቴꬃ ዎቺዲ ቤዓናው ጌማን ኑ ጊዶ ጌሊዲ ዛሪዲ ኑና ኣይሌ ኦꬃናው ኮዮሶና።
GAL 2:5 ሺን ቱማ ዎንጌላይ ሂንቴናን ሚኒዲ ዳና ሜላ ኑኒ ሃሪ ኣቶሺን፥ ጉꬃ ዎዴስካ ኤንታው ኩሼ ኢሚቦኮ።
GAL 2:6 ሺን ሃላቃ ዳኒያ ኣሳታ ኦናቴꬃይ ታው ኣይኮካ ጊዴና። ፆሳይ ኣሳ ሶምዖ ቤዒዲ ፒርዴና። ሃ ኣሳቲ ታ ማርካቲያ ዎንጌላ ቦላ ጉጂዳባይ ባዋ።
GAL 2:7 ሺን ጴፂሮሲ፥ ኣይሁዴታስ ዎንጌላ ኦዳና ሜላ ፆሳይ ኢያው ሃዳራ ኢሚዳይሳዳ ታዉካ ኣይሁዴ ጊዶና ኣሳስ ዎንጌላ ኦዲያ ሃዳራ ኢሚዳይሳ ኤንቲ ጉዬፔ ቤዒዶሶና።
GAL 2:8 ሂዛ፥ ጴፂሮሲ ኣይሁዴታ ሃዋሬ ጊዳና ሜላ ኦꬂዳ ፆሳይ፥ ታካ ኣይሁዴ ጊዶና ኣሳስ ሃዋሬ ጊዳና ሜላ ኦꬂስ።
GAL 2:9 ቃሲ ቱሱ ዳኒዲ ቤንቲያ ያይቆቢ፥ ጴፂሮሲኔ ዮሃኒሲ፥ ታው ኢሜቲዳ ኣꬎ ኬሃቴꬃ ቤዒዳ ዎዴ ኑራ ኢሲፊዳይሳ ቆንጪሳናው ታ ኩሺያኔ ባርናባሳ ኩሺያ ኦይኪዶሶና። ኑኒ ኣይሁዴ ጊዶና ኣሳኮ፥ ቃሲ ኤንቲ ኣይሁዴ ኣሳኮ ባናው ጊጊዶሶና።
GAL 2:10 ኤንቲ ኑና ሚንꬂዲ ሃዳራ ጊዳይ፥ ኑኒ ማንቆታስ ቆፓናይሳ። ካሴካ ታ ሄሳ ኦꬃናው ኣሞቴይስ።
GAL 2:11 ጴፂሮሲ ኣንፆኪያ ካታማ ዪዳ ዎዴ ኢ ባሊዳ ጊሾ ታኒ ኢያ ሶምዖን «ኔኒ ባላዳሳ» ጋስ።
GAL 2:12 ያይቆቢ ኪቲዳ ጉꬃ ኣሳይ ያናፔ ሲንꬄ ኢ ኣይሁዴ ጊዶና ኣሳራ ሜስ፥ ሺን ኤንቲ ዪዳፔ ጉዬ፥ «ኣይሁዴ ጊዶና ኣሳፔ ኣማኒዳይሳቲ ቃፃሬታናው ቤሴስ» ጊያ ኣሳስ ያዪዲ ኤንታፌ ሻኬቲስ።
GAL 2:13 ቃሲ ሃንኮ ኣማኒዳ ኣይሁዴቲ ጴፂሮሳ ሃኑዋ ካሊዶሶና። ሃሪ ኣቶሺን፥ ባርናባሲካ ኢያ ቆፋን ጎሼቲስ።
GAL 2:14 ሺን ኤንቲ ዎንጌላ ቱማቴꬃን ሱሬ ሃሙቶናይሳ ቤዓዳ፥ ጴፂሮሳ ኣሳ ኡባ ሲንꬃን፥ «ኔኒ ኣይሁዴ ጊዳሼ፥ ኣይሁዴ ዎጋꬆ ጊዶናሺን ኣይሁዴ ጊዶና ኣሳዳ ዴዓሳ፤ ያቲን፥ ዋናዳ ኣይሁዴ ጊዶናይሳታ፥ ‹ኣይሁዴ ዎጋን ዴዒቴ ጋዳ ዎልቃታይ?› » ያጋስ።
GAL 2:15 ኑኒ ዬሌታን ኣይሁዴ፥ ሺን ናጋራንቾ ጊዲዳ ኣይሁዴ ጊዶና ኣሳ ሜላ ጊዶኮ።
GAL 2:16 ሺን ኣሲ ዬሱስ ኪሪስቶሳ ኣማኒዲ ፂሌሲፔ ኣቲን ሂጌ ናጊዲ ፂሎናይሳ ኤሮስ። ኦኒካ ሂጌ ናጊዲ ፂሎና ጊሾ ኑካ ሂጌ ናጊዲ ጊዶናሺን ኪሪስቶሳን ኣማኒዲ ፂላና ሜላ ኪሪስቶስ ዬሱሳ ኣማኒዳ።
GAL 2:17 ኑ ኣይሁዴቲካ ኪሪስቶሳ ባጋራ ፂላናው ኮሼስ። ሄሳ ጊዲኮ ኑካ ሃራ ኣሳዳ ናጋራንቾ ጊዴይሳ ቤዖስ። ያቲን፥ ኑ ናጋራ ኦꬃና ሜላ ዴንꬄꬄይ ኪሪስቶሳ ጉሴዬ? ኡባካ ጊዴና!
GAL 2:18 ሂዛ፥ ታ ላሊዳይሳ ዛራዳ ኬፂያባ ጊዲኮ ታኒ ታ ሁዔን ሂጌ ሜንꬄይሳ ጊዴይሳ ቆንጪሳይስ።
GAL 2:19 ታኒ ፆሳስ ዳና ሜላ ሂጌ ባጋራ ሂጌስ ሃይቃስ።
GAL 2:20 ታኒ ኪሪስቶሳራ ማስቃሊያ ቦላ ካቄታስ። ታኒ ሂዛፔ ታው ዴዒኬ፥ ሺን ኪሪስቶሲ ታናን ዴዔስ። ታ ሃዒ ዴዒያ ዴዑዋ፥ ታና ዶሲዲ ታ ጊሾ ባና ኣꬂ ኢሚዳ ፆሳ ናዓ ኣማናዳ ዴዓይስ።
GAL 2:21 ታኒ ፆሳ ኣꬎ ኬሃቴꬃ ሃዳ ኦꬂኬ። ፂሎቴꬂ ኣሳስ ሂጌ ባጋራ ቤንቲያባ ጊዲያኮ፥ ኪሪስቶሲ ጮ ሃይቂስ ጉሱ።
GAL 3:1 ሂንቴኖ፥ ኣኬኪ ባይና ጋላቲያ ኣሳው፥ ሂንቴ ኣይፊያ ሲንꬃን ኪሪስቶሲ ማስቃሌ ቦላ ካቄቲዳ ሚሲሌዳ ቆንጪዲ ቤንቴስ። ያቲን፥ ቱማስ ሂንቴ ኪቴቶና ሜላ ሂንቴና ቢቲዳይ ኦኔ?
GAL 3:2 ታ ኢሲባ ኤራናው ኮያይስ፤ ሂንቴ ጌሻ ኣያና ኤኪዳይ ሂጌ ናጊዲዬ ዎይኮ ሂንቴ ሲዒዳ ዎንጌላ ኣማኒዲ ኤኪዴቲ?
GAL 3:3 ሂንቴ ሄሳ ሜላ ኤዬ? ሂንቴ ፆሳ ኣያናን ዶሚዲ፥ ሃዒ ዎልቃን ፖላናው ኮዬቲ?
GAL 3:4 ሂንቴ ዎንጌላ ጋሶን ዳሮ ዋዬቲዳይ ሜሌ? ሄ ዋዬ ኡባይ ጮ ጊዲዴ?
GAL 3:5 ፆሳይ ሂንቴው ጌሻ ኣያና ኢሜይኔ ሂንቴ ጊዶን ማላታታ ኦꬄይ፥ ሂንቴ ሂጌ ናጊዳ ጊሾዬ ዎይኮ ዎንጌላ ሲዒዲ ኣማኒዳ ጊሾ?
GAL 3:6 ኣኔ ኣብራሃሜ ቤዒቴ፥ «ኢ ፆሳ ኣማኒስ፤ ፆሳይ ኢያው ሄሳ ፂሎቴꬂ ኦꬂዲ ኤኪስ» ጌቴቲዲ ፃፌቲስ።
GAL 3:7 ሂዛ፥ ኣማኔይሳቲ ኣብራሃሜ ናይታ ጊዴይሳ ኤሪቴ።
GAL 3:8 ፆሳይ ኣይሁዴ ጊዶና ኣሳ ኣማኖን ፂሊሳናይሳ ጌሻ ማፃፋይ ቤዒዲ፥ «ካዎቴꬃ ኡባይ ኔናን ኣንጄታና» ያጊዲ፥ ዎንጌላ ኣብራሃሜስ ካሴቲዲ ኦዲስ።
GAL 3:9 ሄሳ ጊሾ፥ ኣማኒያ ኡባይ ኣማኒዳ ኣብራሃሜራ ኢሲፌ ኣንጄቲዶሶና።
GAL 3:10 ሂጌ ናጊዲ ፂላና ጊያ ኦኒካ ቃንጌቲዳይሳ። ኣይስ ጊኮ፥ ጌሻ ማፃፋን፥ «ሂጌ ማፃፋን ፃፌቲዳ ኡባ ናጎና ኦኒካ ቃንጌቲዳይሳ ጊዶ» ጌቴቲዲ ፃፌቲስ።
GAL 3:11 «ፂሎይ ኣማኖን ዳና» ጌቴቲዲ ፃፌቲዳ ጊሾ ኦኒካ ፆሳ ሲንꬃን ሂጌ ናጊዲ ፂሎናይሲ ኤሬቲዳባ።
GAL 3:12 ሂጌይ ኣማኖን ዜምፔና። ሺን፥ «ሂጊያ ናጊያ ኦኒካ ሂጊያን ዴዖን ዳና» ያጌስ።
GAL 3:13 «ሚꬃ ቦላ ካቄቲዲ ሃይቂያ ኦኒካ ቃንጌቲዳይሳ» ጌቴቲ ፃፌቲዳ ጊሾ ኪሪስቶሲ ኑ ጊሾ ቃንጌቲዳይሳ ጊዲዲ፥ ኑና ሂጌ ቃንጌꬃፌ ዎዚስ።
GAL 3:14 ፆሳይ ኣብራሃሜስ ኢሚዳ ኣንጆይ፥ ዬሱስ ኪሪስቶሳ ባጋራ ኣይሁዴ ጊዶና ኣሳ ጋካና ሜላኔ ፆሳይ ኢማና ጊዳ ጌሻ ኣያና ኑኒ ኣማኖን ኤካና ሜላ ሄሳ ኦꬂስ።
GAL 3:15 ታ ኢሻቶ፥ ታ ሂንቴው ኣሳ ዴዖን ሜዜ ጊዲዲ ዴዒያባ ሌሚሶ ኦꬃዳ ኦዳይስ። ኣሲ ጫቂዳ ጫቆይ ሚኒዳፔ ጉዬ፥ ኦኒካ ሄ ጫቁዋ ሻራናው ዎይኮ ኢያ ቦላ ሃራ ጉጃናው ዳንዳዔና።
GAL 3:16 ፆሳይ ሄ ኬኬ ቃላ ኣብራሃሜሲኔ ኢያ ዜሬꬃስ ኢሚስ። ጌሻ ማፃፋይ፥ ዳሮ ኣሳስ ኦዲያዳ፥ «ኔ ዜሬꬃታስ» ጌና። ሺን ኢሲ ኣሳስ ኦዲያዳ፥ «ኔ ዜሬꬃስ» ያጌስ፤ ኢካ ኪሪስቶሳ።
GAL 3:17 ታኒ ጌይ ሃይሳ፤ ኦይዱ ፄታኔ ሃስታሙ ላይꬃፌ ጉዬ ኢሜቲዳ ሂጌይ፥ ኮይሮ ፆሳይ ሚንꬂዳ ጫቁዋ ሻሪዲ ኡፋይሳ ቃላ ꬋይሳናው ዳንዳዔና።
GAL 3:18 ፆሳይ ኢሚያ ላታይ ሂጌን ኤኬቲያባ ጊዲያኮ ፆሳይ ኢሚዳ ኡፋይሳ ባጋራ ጊዴይሲ ኣቴስ። ሺን ፆሳይ ባ ኣꬎ ኬሃቴꬃን ላታ ኣብራሃሜስ ኡፋይሳ ቃላ ባጋራ ኢሚስ።
GAL 3:19 ያቲን፥ ሂጌይ ኣይስ ኢሜቲዴ? ሂጌይ ኢሜቲዳይ፥ ኣብራሃሜስ ኡፋይሳ ቃሊ ኢሜቲዳ ዜሬꬃይ ያና ጋካናው ኢታ ኦሶይ ኣይቤኮ ኤሪሳናሳ። ሂጌይ ኪታንቾታ ባጋራ ኢሜቲዲ፥ ጊዶ ጊዲዲ ሲጌꬂያ ኢሲ ኣሳ ባጋራ ኦሶ ቦላ ፔዒስ።
GAL 3:20 ጊዶ ጊዲዲ ሲጌꬂያ ኡራይ ኢሲ ኣሳ ፃላላስ ጊዴና፥ ሺን ፆሳይ ኢሲኖ።
GAL 3:21 ያቲን፥ ሂጌይ ፆሳ ኡፋይሳ ቃላራ ኤቄቲዬ? ኣካይ፥ ጊዴና! ሂጌይ ኢሜቲዳይ ኣሳስ ዴዖ ኢማናው ጊዲያኮ፥ ፂሎቴꬂ ሂጌ ባጋራ ቤንታናሺን።
GAL 3:22 ሺን ዬሱስ ኪሪስቶሳ ኣማኒን ቤንቲያ ኡፋይሳ ቃላይ ኣማኔይሳታስ ኢሜታና ሜላ ኩሜꬃ ኣላሜይ ናጋራስ ሃሬቲዲ ዴዔይሳ ጌሻ ማፃፋይ ኦዴስ።
GAL 3:23 ሺን ኣማኖይ ያናፔ ካሴ ሂጌይ ኑና ቃቺ ዎꬂስ። ሄ ኣማኖይ ቆንጫና ጋካናው ሂጌይ ኑ ቦላ ጎርዲ ዎꬂስ።
GAL 3:24 ሄሳ ጊሾ፥ ኑኒ ኣማኖን ፂላና ሜላ ኪሪስቶሲ ያና ጋካናው ሂጌይ ናዓ ናጊያ ኣሳ ሜላ ኑና ናጌይሳ ጊዲስ።
GAL 3:25 ሺን ሃዒ ኣማኖይ ዪዳ ጊሾ ሂጌይ ሂዛፔ ጉዬ ናዓ ናጊያ ኣሳ ሜላ ኑና ናጌይሲ ኣቲስ።
GAL 3:26 ሂንቴ ኡባይ ዬሱስ ኪሪስቶሳ ኣማኒዲ ፆሳ ናይታ ጊዲዴታ።
GAL 3:27 ኪሪስቶሳራ ኢሲኖ ጊዳናው ፃማቄቲዳ ኡባይ ኪሪስቶሳ ማዖዳ ማዒዴታ።
GAL 3:28 ሂንቴ ኡባይ ኪሪስቶሳን ኢሲኖ ጊዲያ ጊሾ ኣይሁዴ ኣሳ ጊዶኒኔ ጊሪኬ ኣሳ ጊዶን፥ ኣይሌ ጊዶኒኔ ዎማኖ ጊዶን፥ ኣዴ ጊዶኒኔ ማጫሳ ጊዶን ዱማቴꬂ ባዋ።
GAL 3:29 ሂዛ፥ ሂንቴ ኪሪስቶሳባ ጊዲኮ ሂንቴ ኣብራሃሜ ዛሬ። ፆሳ ኡፋይሳ ቃላዳ ሂንቴ ላቴይሳታ።
GAL 4:1 ታ ጌይሲ ሃይሳ። ላቴይ ናዓ ጊዲ ዴዒሼ፥ ሻሎ ኡባይ ኢያባ ጊዲኮካ፥ ኢ ኣይሌፌ ኣይኮካ ዱማቴና።
GAL 4:2 ሺን ኢያ ኣዋይ ጊዳ ዎዴይ ጋካናው ኢ ሃዳራ ኤኪዳይሳታ ኩሼኒኔ ናጌይሳታ ኩሼን ዴዔስ።
GAL 4:3 ሄሳዳካ፥ ኑኒ ናዓቴꬃን ዴዒያ ዎዴ ኣላሚያ ዎጋስ ኣይሌቲዲ ዴዒዳ።
GAL 4:4 ሺን ዎዴይ ጋኪዳ ዎዴ ፆሳይ ሂጌፌ ጋርሳን፥ ማጫሳፔ ዬሌቲዳ ባ ናዓ ኪቲስ።
GAL 4:5 ኢ ሄሳ ኦꬂዳይ፥ ሂጌስ ሃሬቲዲ ዴዔይሳታ ዎዛናዉኔ ኑና ባ ናይታ ኦꬃናሳ።
GAL 4:6 ኑ ፆሳ ናይታ ጊዲያ ጊሾ «ኣባ፥ ኣዋው» ጊዲ ፄጊያ ባ ናዓ ኣያና ኑ ዎዛና ጊዶ ኪቲስ።
GAL 4:7 ሄሳ ጊሾ፥ ሂዛፔ ኔኒ ፆሳ ናዓፔ ኣቲን ኣይሌ ጊዳካ። ኔኒ ኢያ ናዓ ጊዲኮ፥ ፆሳ ላቴይሳ ጊዳዳሳ።
GAL 4:8 ሂንቴ ካሴ ፆሳ ኤሮና ዎዴ ፆሴ ጊዶናይሳታስ ኣይሌ ጊዲዲ ሃሬቲዴታ።
GAL 4:9 ሺን ሃዒ ሂንቴ ፆሳ ኤሪዴታ፤ ኡባራካ ፆሳን ኤሬቲዴታ። ያቲን ፓꬆናኔ ጎዖና ኣላሜ ዎጋታኮ ጉዬ ዋኒዲ ሲሜቲ? ዎꬊ ኤቂዲ፥ ዋኒዲ ኤንታው ኣይሌ ጊዳናው ኮዬቲ?
GAL 4:10 ዱማ ጊዲዳ ጋላሳታ፥ ኣጌናታ፥ ዎዴታኔ ላይꬃታ ሂንቴ ሎይꬂ ቦንቼታ።
GAL 4:11 ታና ሂንቴባይ ያሼስ፤ ታ ሂንቴው ጮ ዳቡራዲናሻ?
GAL 4:12 ታ ኢሻቶ፥ ታ ሂንቴዳ ሃኒዳ ጊሾ ሂንቴካ ታዳ ሃኒቴ ጋዳ ሂንቴና ዎሳይስ። ሂንቴ ታና ኣይቢንካ ቆሂቤኬታ።
GAL 4:13 ታኒ ኮይሮ ሃርጌታሼ ሂንቴው ዎንጌላ ኦዲዳይሳ ሂንቴ ኤሬታ።
GAL 4:14 ታ ሃርጌይ ሂንቴው ፓጬ ጊዲኮካ፥ ታና ሳሌቲቤኬታ፤ ኢፂቤኬታ። ሺን ታና ፆሳ ኪታንቾ ዎይኮ ኪሪስቶስ ዬሱሳ ሞኬይሳዳ ሞኪዴታ።
GAL 4:15 ያቲን፥ ሄ ሂንቴው ዴዒያ ኡፋይሳይ ኡባይ ኣው ቢዴ? ሂንቴው ዳንዳዔቲዳኮ፥ ሂንቴ ታው፥ ሂንቴ ኣይፊያ ኬሲዲ ኢሚያኮ ኢፆናይሳ ታ ማርካታይስ።
GAL 4:16 ያቲን፥ ታ ሂንቴው ቱማ ኦዲዳ ጊሾ ሂንቴው ሞርኬ ጊዳዲናዬ?
GAL 4:17 ሄ ኣሳቲ ሂንቴና ባንታኮ ዛራናው ኮዮሶና፥ ሺን ኤንታ ቆፋይ ሎዖሳ ጊዴና። ኤንታ ቆፋይ ሂንቴና ሻካናሳኔ ሂንቴ ኤንታው ቆፓና ሜላ ኦꬃናሳ።
GAL 4:18 ሎዖባ ኦꬃናው ኣሞቲኮ ሎዖ፥ ሺን ሄሲ ታ ሂንቴራ ዴዒያ ዎዴ ፃላላ ጊዶናሺን ኡባ ዎዴ ጊዶ።
GAL 4:19 ታ ሲቆ ናይቶ፥ ኪሪስቶሲ ሂንቴናን ሚሲሌታና ጋካናው ዬሎስ ማጫሲ ሚፆቴይሳዳ ታ ሂንቴ ጊሾ ሚፆታይስ።
GAL 4:20 ሂንቴባይ ታው ሃዲርሲ ጊዲን ታ ኡንዔታስ፤ ሃዒ ሂንቴ ጊዶን ታ ቤንታዳ ሼኔታዳ ኦዲያኮ ኣይ ሜላ ዶሳይናሺን።
GAL 4:21 ሙሴ ሂጌን ሃሬቲዲ ዳናው ኮዬይሳቶ፥ ኣኔ ታው ኦዲቴ፤ ሂጌይ ኣይ ጊያኮ ኤሬኬቲ?
GAL 4:22 ጌሻ ማፃፋይ፥ «ኣብራሃሜስ ኣይሌፌኔ ጎዳቴፌ ዬሌቲዳ ናምዑ ናይቲ ዴዖሶና» ያጌስ።
GAL 4:23 ኣይሌ ናዓይ ኣሲ ናዓ ዬሊያ ማራን ዬሌቲስ፥ ሺን ጎዳቴ ናዓይ ፆሳ ኡፋይሳ ቃላን ዬሌቲስ።
GAL 4:24 ሃ ማጫሳቲ ናምዑ ጫቆታስ ሌሚሶ ጊዲዲ ኤኬቶሶና። ኤንታፌ ኢሲኒያ፥ ሲና ዴሪያፔ ዪዳራ፥ ባ ናይታ ኣይሌቴꬃስ ዬላሱ፤ ኢያካ ኣጋሮ።
GAL 4:25 ኣጋራ ኣራቤ ቢታን ዴዒያ ሲና ዴሪያን ሌሚሴታዳ ሃዒ ዴዒያ ዬሩሳላሜ ዳናዉሱ። ኣይስ ጊኮ፥ ኢያ ባ ናይታራ ኣይሌቴꬃን ዴዓዉሱ።
GAL 4:26 ሺን ሳሎን ዴዒያ ዬሩሳላሜይ ኣይሌቴꬃን ዴዑኩ፤ ኢያ ኑ ኡባስ ኣዮ።
GAL 4:27 ጌሻ ማፃፋይ፥ «ናቴ፥ ዬሎና ማይንꬄቴ ኡፋይታ፤ ናቴ ሚፆታ ኤሮናሬ ኢሊላ። ኣዚናራ ዴዒያ ማጫሴፔ፥ ኣዚኒ ባይና ማጫሴስ ናይቲ ዳሮ» ያጌስ።
GAL 4:28 ታ ኢሻቶ፥ ሂንቴ ዪሳቃዳ ፆሳ ኡፋይሳ ቃላን ዬሌቲዳ ናይታ።
GAL 4:29 ሺን ሄ ዎዴ ኣሳ ማራዳ ዬሌቲዳይሲ፥ ኣያና ዎልቃን ዬሌቲዳይሳ ጎዲስ። ሃቺካ ሄሳ ሜላ።
GAL 4:30 ሺን ጌሻ ማፃፋይ ዎይጊ? «ኣይሌ ናዓይ ጎዳቴ ናዓራ ኢሲፌ ላቶና ጊሾ ኣይሊው ኢ ናዓራ ዎላ ኬሳ ዬዳ» ያጌስ።
GAL 4:31 ሄሳ ጊሾ፥ ታ ኢሻቶ፥ ኑኒ ጎዳቴ ናይታፔ ኣቲን ኣይሌ ናይታ ጊዶኮ።
GAL 5:1 ኑኒ ላዓቴꬃን ዳና ሜላ ኪሪስቶሲ ኑና ኣይሌቴꬃፌ ኬሲስ። ሂዛ፥ ሚኒዲ ኤቂቴ፤ ዛሪዲ ኣይሌቴꬃ ቃምባራን ጌሎፒቴ።
GAL 5:2 ታ፥ ጳዉሎሲ፥ ጌይሳ ሲዒቴ። ሂንቴ ቃፃሬታናው ኮይኮ፥ ኪሪስቶሲ ሂንቴና ኣይኮካ ማዴና።
GAL 5:3 ቃፃሬቲያ ኦኒካ ሂጌይ ኪቲያ ኡባ ፖላናው ቤሴይሳ ጉጃዳ ታ ኦዳይስ።
GAL 5:4 ሂጌ ናጊዲ ፂላናው ኮዬይሳቶ፥ ኪሪስቶሳፔ ሻኬቲዴታ፤ ፆሳ ኣꬎ ኬሃቴꬃፌ ኩንዲዴታ።
GAL 5:5 ሺን ኑኒ ፆሳ ኣያና ባጋራ ኣማኖን ፂላናው ኡፋይሳን ናጎስ።
GAL 5:6 ሂዛ፥ ኪሪስቶስ ዬሱሳን ዴዒኮ፥ ሲቆን ቆንጪያ ኣማኖፔ ኣቲን ቃፃሬቲን፥ ቃፃሬቶና ኣጊን ኑና ኣይኮካ ማዴና።
GAL 5:7 ካሴ ሂንቴ ሎዖ ዎፄታ፥ ሺን ሃዒ ቱማስ ኪቴቶና ሜላ ሂንቴና ዲጊዳይ ኦኔ?
GAL 5:8 ሃይሳ ሜላ ኢታ ጪሞይ ሂንቴና ፄጊዳ ፆሳፌ ዪቤና።
GAL 5:9 ሄሲካ፥ «ጉꬃ ኢርሾይ ሙኑቃ ኡባ ዴንꬄስ።» ጌቴቲዲ ፃፌቲዳይሳ ሜላ።
GAL 5:10 ሂንቴው ሃራ ቆፊ ባይናይሳስ ታ ጎዳን ኣማኔታይስ። ሺን ሂንቴና ቡቂያ ኦኒካ ፆሳፌ ባ ፒርዳ ኤካና።
GAL 5:11 ታ ኢሻቶ፥ ታ ሃዒ ጋካናው ቃፃሮ ሳባኪያባ ጊዲኮ፥ ያቲን ታና ኣይስ ጎዶና? ሄሲ ቱማ ጊዲያኮ ኪሪስቶሳ ማስቃሊያባ ታማርሶይ ኣሳስ ꬉቤ ጊዴናሺን።
GAL 5:12 ሂንቴና ቡቄይሳቲ ቃፃሬቴꬃ ፃላላ ጊዶናሺን ባንታና ቃራቲያኮካ ታ ዶሳይስ።
GAL 5:13 ታ ኢሻቶ፥ ሂንቴ ላዓ ዳናው ፄጌቲዴታ። ጊዶሺን፥ ሂንቴ ላዓቴꬃይ ኣሾ ኣሞ ፖላናው ሂንቴው ጋሶ ጊዶፖ፤ ሄሳፌ ኣꬂዲ ኢሶይ ኢሱዋ ሲቆን ማዲቴ።
GAL 5:14 ሂጌ ኡባይ፥ «ኣሴ ኔዳ ዶሳ» ያጊያ ኢሲ ቃላን ቃሼቲስ።
GAL 5:15 ሺን ሂንቴ ኢሶይ ኢሱዋራ ሳፄቲያባኔ ሜቴቲያባ ጊዲኮ፥ ሂንቴ ዎሊ ዉርሶና ሜላ ናጌቲቴ።
GAL 5:16 ሂዛ፥ ታ ሂንቴው ኦዳይስ፤ ኣያናን ዴዒቴ፤ ሂንቴ ኣሾ ኣሙዋ ፖሎፒቴ።
GAL 5:17 ኣሾ ኣሞይ ኣያና ኣሙዋራ ሞርኬ፤ ቃሲ ኣያና ኣሞይካ ኣሾ ኣሙዋራ ሞርኬ። ኤንቲ ኢሶይ ኢሱዋራ ኢፄቲያ ጊሾ ሂንቴ ዶሲያባ ኦꬃናው ዳንዳዔኬታ።
GAL 5:18 ሺን ኣያናይ ሂንቴና ካሌꬂያባ ጊዲኮ ሂጌይ ሂንቴና ሃሬና።
GAL 5:19 ኣሾ ኦሶቲ ኤሬቲዳይሳታ፤ ኤንቲካ፥ ላይማቴꬂ፥ ቱናቴꬂ፥ ቃይፄ፥
GAL 5:20 ኤቃ ጎይኖ፥ ቢታ፥ ሞርኬቴꬂ፥ ካቺ፥ ቃናቴ፥ ሃንቆ፥ ባና ዶሶ፥ ሻኬቴꬂ፥ ኢታ ቶቤ
GAL 5:21 ጌኔ፥ ማꬆ፥ ዬꬂኔ ሄሳ ሄሳ ሜላታ። ካሴ ታ ሂንቴው ኦዲዳይሳዳ ሃዒካ ታ ሂንቴው ኦዳይስ። ሃይሳ ሜላባታ ኦꬄይሳቲ ፆሳ ካዎቴꬃ ላቶኮና።
GAL 5:22 ሺን ኣያና ኣይፌይ፥ ሲቆ፥ ኡፋይሲ፥ ሳሮቴꬂ፥ ዳንዳዓ፥ ኬሃቴꬂ፥ ሎዖቴꬂ፥ ኣማኖ፥
GAL 5:23 ኣሽኬቴꬂ፥ ባና ሃሮ። ሃይሳ ሜላባታ ኢፂያ ሂጌይ ባዋ።
GAL 5:24 ኪሪስቶስ ዬሱሳባ ጊዲዳይሳቲ ባንታ ኣሹዋ ኢያ ኢታ ቆፋራኔ ኢያ ኣሙዋራ ኢሲፌ ማስቃሊያ ቦላ ካቂዶሶና።
GAL 5:25 ኑ ኣያናን ዴዒያባ ጊዲኮ፥ ኑና ኣያናይ ካሌꬆ።
GAL 5:26 ኣኔ ኢሶይ ኢሱዋ ዪሎዪሼኔ ቃናቲሼ ጮ ጬቄቴይሳ ኣጎስ።
GAL 6:1 ታ ኢሻቶ፥ ኢሲ ኣሲ ናጋራን ኩንዲኮ፥ ኣያናን ዴዒያ ሂንቴ ሄ ኡራ ኣሽኬቴꬃን ሱሪሲቴ። ሺን ኔኒ ሄሳ ሜላባን ፓጬቶና ሜላ ኔና ናጋ።
GAL 6:2 ኢሶይ ኢሱዋ ዴፆ ቶሁዋ ቶኪቴ። ያቲኮ ኪሪስቶሳ ሂጊያ ፖሌታ።
GAL 6:3 ኢሲ ኣሲ ኣይኮይካ ባዋሺን፥ ባና ሃራታፔ ሎዖ ጊዲ ቆፒኮ፥ ኢ ባና ጪሜስ።
GAL 6:4 ሺን ኢሲ ኢሲ ኣሲ ባ ኦሱዋ ፓጮ። ሄሳፌ ጉዬ፥ ሃራታራ ባና ጋዴዬይሳ ኣጊዲ ባው ጬቄቲያባ ዴሜስ።
GAL 6:5 ኢሲ ኢሲ ኣሲ ባ ቶሁዋ ባው ቶካናው ቤሴስ።
GAL 6:6 ፆሳ ቃላ ታማሪያ ኦኒካ ሎዖባ ኡባ ባ ኣስታማሪያራ ሻኬቴስ።
GAL 6:7 ሂንቴ፥ ሂንቴና ጪሞፊቴ። ኣሲ ባ ዜሪዳባ ዛሪዲ ጫኪያ ጊሾ ፆሳ ቦላ ቄልቂሶፒቴ።
GAL 6:8 ባ ኣሾ ኣሙዋ ኩንꬃናው ዜሪያ ኦኒካ፥ ባ ኣሾ ኣሙዋፔ ሃይቆ ቡጫና። ሺን ኣያና ኡፋይሳናው ዜሪያ ኦኒካ ኣያናፔ ሜሪና ዴዖ ጫካና።
GAL 6:9 ኣኔ ሎዖ ኦሶ ኦꬃናው ኣዛሌይሳ ኣጎስ። ኑኒ ኣዛሎና ኢፂኮ ዎዴይ ጋኪያ ዎዴ ኑ ዜሪዳይሳ ጫካና።
GAL 6:10 ኑ ኢንጄ ዎዴ ዴሚኮ፥ ኣሳ ኡባስ፥ ኣꬂዲካ ኣማኒያ ኣሳስ ሎዖባ ኦꬆስ።
GAL 6:11 ታኒ ታ ኩሼን፥ ኣይ ሜላ ጊታ ፒዳሌን ሂንቴው ፃፊዳኮ ቤዒቴ።
GAL 6:12 ኣሳ ሲንꬃን ሎዖ ጊዲዲ ቤንታናው ኮያ ኣሳቲ ሂንቴ ቃፃሬታና ሜላ ኮዮሶና። ሺን ሄሳ ኤንቲ ኦꬄይ፥ ኪሪስቶሳ ማስቃሊያ ጊሾ ኤንታና ጎዲ ጋኮና ሜላሳ።
GAL 6:13 ኤንቲ ሂንቴ ቃፃሬቴꬃን ጬቄታናው ኮዪዲ ሂንቴና ቃፃሬቶ ጎሶናፔ ኣቲን ቃፃሬቲዳይሳቲካ ባንታ ሁዔን ሂጊያ ናጎኮና።
GAL 6:14 ሺን ኣላሜይ ታው ካቄቲዳይሳፌኔ ታኒካ ኣላሚያስ ካቄቲዳ፥ ጎዳ ዬሱስ ኪሪስቶሳ ማስቃሊያፔ ኣቲን ሃራ ጬቄቴꬂ ታፔ ሃኮ።
GAL 6:15 ሂዛ፥ ቃፃሬቲን ቃፃሬቶና ኣጊን ኣይኮካ ማዴና። ማዴይ ኦራꬃ ሜꬌቴꬂ ጊዶ።
GAL 6:16 ሃ ዎጋ ካሊያ ኡባሲኔ ፆሳ ዴሬ ጊዲዳ ኢስራዔሌስ ሳሮቴꬃይኔ ማሮቴꬃይ ጊዶ።
GAL 6:17 ታኒ ዬሱሳስ ማዱንፂዳ ቤታ ታ ኣሳቴꬃን ቶኪዳ ጊሾ ሂዛፔ ታና ኦኒካ ዋይሶፖ።
GAL 6:18 ታ ኢሻቶ፥ ኑ ጎዳ ዬሱስ ኪሪስቶሳ ኣꬎ ኬሃቴꬃይ ሂንቴራ ጊዶ። ኣሚንዒ።
EPH 1:1 ፆሳ ሼኔን ኪሪስቶስ ዬሱሳ ሃዋሬ ጊዲዳ ጳዉሎሳፔ፥ ኤፌሶናን ዴዒያ ጌሻታሲኔ ኪሪስቶስ ዬሱሳ ኣማኔይሳታስ ፃፌቲዳ ኪታ።
EPH 1:2 ፆሳ ኑ ኣዋፔኔ ጎዳ ዬሱስ ኪሪስቶሳፔ ኣꬎ ኬሃቴꬃይኔ ሳሮቴꬃይ ሂንቴው ጊዶ።
EPH 1:3 ሳሎን ዴዒያ ኣያና ኣንጆ ኡባን ኪሪስቶሳ ባጋራ ኑና ኣንጂዳ፥ ኑ ጎዳ ዬሱስ ኪሪስቶሳ ኣዋይ፥ ፆሳይ ጋላቴቶ።
EPH 1:4 ኑኒ ኢያ ሲንꬃን ጌሻታኔ ቦሬይ ባይናይሳታ ጊዳና ሜላ ፆሳይ ኣላሜይ ሜꬌታናፔ ካሴ ኪሪስቶሳ ባጋራ ባ ሲቁዋን ኑና ዶሪስ።
EPH 1:5 ፆሳይ ባ ሼኒያን ባ ዶሲዳይሳዳ ዬሱስ ኪሪስቶሳ ባጋራ ኑና ባ ናይታ ኦꬃናው ካሴቲዲ ቆፒ ዎꬂስ።
EPH 1:6 ፆሳይ ባ ሲቂያ ናዓ ባጋራ ኑስ ጮ ኢሚዳ ኣꬎ ኬሃቴꬃይ ቦንቼታና ሜላ ሄሳ ኦꬂስ።
EPH 1:7 ፆሳ ኣꬎ ኬሃቴꬃ ዱሬቴꬃዳ ኪሪስቶሳ ሱꬃን ዎዜቲዲ ናጋራ ኣቶቴꬃ ዴሚዳ።
EPH 1:8 ባ ኣꬎ ኬሃቴꬃ ጪንጫቴꬃኒኔ ኤራቴꬃን ኩንꬂዲ ኑስ ኢሚስ።
EPH 1:9 ፆሳይ ባ ዶሲዳይሳዳ ኪሪስቶሳ ባጋራ ኢያ ሼኒያ ፁራ ኑ ኤራና ሜላ ኦꬂስ።
EPH 1:10 ዎዴይ ጋኪያ ዎዴ ፆሳይ ፖላናው ቆፒዳ ቆፋይ፥ ሳሎኒኔ ሳዓን ዴዒያ ሜꬌቴꬃ ኡባይ ኪሪስቶሳፔ ጋርሳን ጊዳና ሜላሳ።
EPH 1:11 ኡባባ ባ ሼኒያዳ ኦꬂያ ፆሳይ፥ ካሴቲዲ ባ ቆፒ ዎꬂዳይሳዳ ኪሪስቶሳ ባጋራ ኑኒ ኢያባ ጊዳና ሜላ ኑና ዶሪስ።
EPH 1:12 ሄሳ ኢ ኦꬂዳይ፥ ኪሪስቶሳን ኡፋይሲ ዎꬂዲ ናጎን ኮይሮ ጊዲዳ ኑኒ ፆሳ ቦንቹዋ ጋላታን ቆንጪሳና ሜላሳ።
EPH 1:13 ሂንቴካ ሂንቴ ኣቶቴꬃ ዎንጌላ፥ ሄሲካ ቱማ ቃላ ሲዒዳ ዎዴ ኪሪስቶሳ ኣማኒዴታ። ፆሳይ ሂንቴው ኢማና ጊዳ ጌሻ ኣያናን ሂንቴ ኣታሜቲዴታ።
EPH 1:14 ፆሳ ቦንቾይ ጋላቴታና ሜላ ፆሳይ ባ ኣሳ ዎዛና ጋካናው ጌሻ ኣያና ኑስ ኦይꬁ ኦꬂዲ ኢሚስ።
EPH 1:15 ሄሳ ጊሾ፥ ጎዳ ዬሱሳ ሂንቴ ኣማኔይሳኔ ጌሻታ ኡባ ሂንቴ ሲቄይሳ ታ ሲዒዳ ዎዴ
EPH 1:16 ታ ዎሳን ሂንቴና ቆፓሼ ሂንቴ ጊሾ ፆሳ ጋላቴይሳ ኣጋቢኬ።
EPH 1:17 ጎዳ ዬሱስ ኪሪስቶሳ ፆሳይ፥ ቦንቾ ኣዋይ፥ ፆሳ ሂንቴ ኣꬂ ኤራናዳ ጪንጫቴꬃኔ ቆንጬꬃ ኣያና ሂንቴው ኢማናዳ ታኒ ፆሳ ዎሳይስ።
EPH 1:18 ፆሳይ ሂንቴና ፄጊዳ ኡፋይሳይኔ ጌሻቲ ላቲያ ቦንቾ ላታይ ኣይ ሜላ ዳሮኮ ሂንቴ ኤራና ሜላ ፆሳይ ሂንቴ ዎዛና ኣይፊያ ዶያና ሜላ ታኒ ፆሳ ዎሳይስ።
EPH 1:19 ቃሲ ኢያ ኣማኒያ ኑናን ኦꬂያ ኢያ ዎልቃይ ኣይ ሜላ ኣꬊዳ ጊቴኮ ሂንቴ ኤራና ሜላ ዎሳይስ። ሄ ዎልቃይ ፆኔቶናኔ ዳቡሮና ዎልቃ። ሃ ኑናን ዴዒዲ ኦꬂያ ዎልቃይኔ፥
EPH 1:20 ኪሪስቶሳ ሃይቆፔ ዴንꬂዲ፥ ሳሎን ፆሳፌ ኡሻቻ ባጋራ ኡቲሲዳ ጊታ ዎልቃይ ኢሲኖ።
EPH 1:21 ኢያ ሱንꬃይ፥ ኣይሴይሳታፔኔ ማታ ኣዋታፔ፥ ሃሬይሳታፔኔ ጎዳታፔ፥ ቦላ ጊዲዲ ሃ ኣላሚያ ፃላላን ጊዶናሺን ሲንꬃፌ ያና ኣላሚያንካ ሃራ ሱንꬃታ ኡባፌ ꬎቃ።
EPH 1:22 ፆሳይ ኡባ ኪሪስቶሳ ቶሁዋፔ ጋርሳን ሃሪሲስ፤ ቃሲ ዎሳ ኬꬃን ኡባባን ጎዳ ጊዳና ሜላ ኢያ ሹሚስ።
EPH 1:23 ዎሳ ኬꬃይ ኪሪስቶሳ ኩሜꬂ ኦꬂያ ኢያ ኣሳቴꬃ። ሜꬌቴꬃይ ዴዒያ ቤሳ ኡባን ኪሪስቶሲ ባ ሁዔን ኡባባ ኩንꬄይሳ።
EPH 2:1 ሃይሳፌ ካሴ ሂንቴ፥ ሂንቴ ናጋራኔ ሂንቴ ቆሁዋ ጋሶን ሃይቂዳይሳታ።
EPH 2:2 ሄ ዎዴ ሂንቴ ሃ ኣላሚያ ኢታ ኦጊያ ካሊዴታ። ጫርኩዋ ቦላ ዴዒያ ኣያና ዎልቃታ ሃላቃሲኔ ሃዒካ ፆሳስ ኪቴቶና ኣሳ ሃሪያ ኣያናስ ኪቴቲዴታ።
EPH 2:3 ኑ ኡባይካ ካሴ ሄ ኣሳታ ጊዶን ኑ ኣሾ ኣሙዋኔ ኑ ዎዛና ሼኒያ ካሊዲ ዴዒዳ። ኑካ ሃራታ ሜላ ኑ ሜꬌቴꬃን ፆሳ ሃንቁዋ ኤካናው ዴዔይሳታ።
EPH 2:4 ሺን ፆሳ ጊታ ማሮቴꬃፌኔ ኑስ ዴዒያ ጊታ ሲቁዋፔ ዴንዲዳይሳን፥
EPH 2:5 ሃሪ ኣቶሺን ኑኒ ኑ ቆሁዋን ሃይቂዲ ዴዒሺን ኪሪስቶሳ ባጋራ ኑስ ዴዖ ኢሚስ። ሂንቴካ ኣቲዳይ ፆሳ ኣꬎ ኬሃቴꬃና።
EPH 2:6 ፆሳይ ኑና ኪሪስቶሳራ ኢሲፌ ሃይቆፔ ዴንꬂዲ ሳሎ ሶሁዋን ኢያራ ኢሲፌ ዎꬂስ።
EPH 2:7 ኢ ሄሳ ኦꬂዳይ፥ ኪሪስቶስ ዬሱሳ ባጋራ ኑስ ቆንጪሲዳ ባ ኬሃቴꬃኔ ዛዊ ባይና ባ ኣꬎ ኬሃቴꬃ ዱሬቴꬃ ያና ላይꬃን ኑና ቤሳናሳ።
EPH 2:8 ሂንቴ ኣꬎ ኬሃቴꬃን ኣማኖን ኣቲዴታ። ሄሲካ፥ ፆሳ ኢሞታፔ ኣቲን ሂንቴ ኦሶን ቤንቲዳባ ጊዴና።
EPH 2:9 ኦኒካ ጬቄቶና ሜላ ኣቶቴꬃይ ቤንቲዳይ ኦሶን ጊዴና።
EPH 2:10 ኑኒ ፆሳ ሜꬌቴꬂ፤ ኢ ኑስ ካሴቲዲ ጊጊሲ ዎꬂዳ ሎዖ ኦሶታ ኦꬃና ሜላ ኪሪስቶስ ዬሱሳ ባጋራ ኦራꬂ ሜꬌቲዳ።
EPH 2:11 ሄሳ ጊሾ፥ ሂንቴኖ ዬሌታን ኣይሁዴ ጊዶናይሳቶ፥ ኣይሁዴቲ ባንታው ኣሳ ኩሼን ቃፃሬቲዲ፥ ሂንቴና ቃሲ ቃፃሬቲቦናይሳታ ጊዲ ፄጌይሳ ኣኬኪቴ።
EPH 2:12 ሄ ዎዴ ሂንቴ ኪሪስቶሳፔ ሻኬቲ ዴዒዳይሳ፥ ኢስራዔሌ ኣሳስ ኣላጋ ጊዲዲ ዴዒዳይሳ፥ ፆሳ ኡፋይሳ ቃላፔ ሃኪዲ ዴዒዳይሳኔ ሃ ኣላሚያን ኡፋይሲኔ ፆሲ ባይና ዴዒዳይሳ ኣኬኪቴ።
EPH 2:13 ሺን ሂንቴ ካሴ ሃኪዲ ዴዒዳይሳቲ፥ ሃዒ ኪሪስቶስ ዬሱሳን ዴዒዲ ኪሪስቶሳ ሱꬃን ማታ ሺቂዴታ።
EPH 2:14 ኪሪስቶሲ ኑ ሳሮቴꬃ፤ ኢ ኣይሁዴኔ ኣይሁዴ ጊዶና ኣሳ ቲሚዲ፥ ናምዓ ሻኪ ዎꬂዳ ሞርኬቴꬃ ጎዳ ላሊስ።
EPH 2:15 ኢ ባናን ሃ ናምዑ ዛሬታፔ ኢሲ ኦራꬃ ኣሴ ሜꬊዲ፥ ሂጊያ ኢያ ኪታራኔ ዎጋታራ ኢሲፌ ባ ኣሳቴꬃን ꬋይሲዲ ሳሮቴꬂ ኢሚስ።
EPH 2:16 ኪሪስቶሲ ማስቃሊያ ቦላ ሃይቂዲ ሞርኬቴꬃ ꬋይሲስ፤ ቃሲ ናምዑ ዛሬታ ኢሲ ኣሳቴꬂ ኦꬂዲ ፆሳራ ሲጌꬂስ።
EPH 2:17 ኪሪስቶሲ ዪዲ፥ ፆሳፌ ሃኪዲ ዴዒያ ሂንቴው፥ ቃሲ ማቲዲ ዴዒያ ኤንታው ሳሮቴꬃ ዎንጌላ ኦዲስ።
EPH 2:18 ኑ ኡባይ ኢያ ባጋራ ኢሲ ኣያናን ኣዋ ሲንꬄ ሺቃናው ዳንዳዖስ።
EPH 2:19 ሂዛፔ ሂንቴ ኣላጋ ዎይኮ ኢማꬄ ጊዴኬታ፥ ሺን ሂንቴ ሃዒ ጌሻታ ቢታ ኣሲኔ ፆሳ ሶ ኣሲ።
EPH 2:20 ሂንቴ ሃዋሬቲኔ ናቤቲ ባሲዳ ባሱዋ ቦላ ኬፄቲዴታ። ጎዳ ፃጱዋ ሚንꬂያ ሹቻይ ኪሪስቶስ ዬሱሳ።
EPH 2:21 ኢያን ኬꬃ ኡባይ ኢሲፌ ኦይኬቲዲ ጎዳን ጌሻ ፆሳ ኬꬂ ጊዳናው ዲጬስ።
EPH 2:22 ሂንቴ ቃሲ ፆሳይ ባ ኣያናን ዴዒያ ኬꬂ ጊዳናው ኪሪስቶሳን ኢሲፌ ኬፄቴታ።
EPH 3:1 ሄሳ ጊሾ፥ ታኒ፥ ጳዉሎሲ፥ ኣይሁዴ ጊዶና ሂንቴ ጊሾ ኪሪስቶስ ዬሱሳን ቃሾ ኣሲ ጊዳስ።
EPH 3:2 ታ ሂንቴና ማዳና ሜላ ፆሳይ ባ ኣꬎ ኬሃቴꬃን ታው ኢሚዳ ሃ ኦሱዋባ ሂንቴ ሎይꬂ ሲዒዴታ።
EPH 3:3 ታ ሂንቴው ካሴ ቃንꬃን ፃፊዳይሳዳ ፆሳይ ባ ፁራ ቆንጬꬃን ታው ቆንጪሲስ።
EPH 3:4 ታ ፃፊዳይሳ ሂንቴ ናባቢያ ዎዴ ኪሪስቶሳ ፁራ ታ ኣይ ሜላ ኤሪዳኮ ሂንቴ ኣኬካናው ዳንዳዔታ።
EPH 3:5 ሃ ፁራይ ጌሻ ሃዋሬታሲኔ ናቤታስ ሃዒ ኣያና ባጋራ ቆንጪዳይሳዳ ቤኒ ዎዴ ኣሳስ ሄሳዳ ቆንጪሲቤና።
EPH 3:6 ፁራይ ሃይሳ፡ ኣይሁዴ ጊዶና ኣሳይ ዎንጌላ ባጋራ ኢስራዔሌታራ ኢሲፌ ፆሳ ኣንጁዋ ላቶሶና። ኢስራዔሌታራ ኢሲ ኬꬃ ኣሲ ጊዶሶና፤ ኪሪስቶስ ዬሱሳ ባጋራ ፆሳ ኡፋይሳ ቃላ ኤኮሶና።
EPH 3:7 ፆሳይ ባ ኦꬂያ ዎልቃ ባጋራ ታው ኢሚዳ ኣꬎ ኬሃቴꬃን ሃ ዎንጌላስ ኦሳንቾ ጊዳስ።
EPH 3:8 ታኒ ጌሻታ ኡባፌ ላፋ ጊዲኮካ ኣይሁዴ ጊዶና ኣሳስ ዛዊ ባይና ኪሪስቶሳ ዱሬቴꬃ ዎንጌላ ኦዳና ሜላ ሃ ኣꬎ ኬሃቴꬃይ ታው ኢሜቲስ።
EPH 3:9 ቃሲ ካሴ ዎዲያን ኡባ ሜꬊዳ ፆሳን ቆሴቲዲ ዴዒያ ፁራስ፥ ፆሳ ቆፋይ ኣይቤኮ ቆንጪሳናው ኣꬎ ኬሃቴꬃይ ታው ኢሜቲስ።
EPH 3:10 ፆሳይ ሄሳ ኦꬂዳይ ሃዒ ዎዲያን ዎሳ ኬꬃ ባጋራ ሳሎ ሶሁዋን ዴዒያ ሃላቃታሲኔ ሃሬይሳታስ ባ ዱማ ዱማ ቆንጬꬃ ኤሪሳናሳ።
EPH 3:11 ፆሳይ ባ ሜሪና ቆፋ ኑ ጎዳ ኪሪስቶስ ዬሱሳ ባጋራ ፖላናው ሄሳ ኦꬂስ።
EPH 3:12 ኑ ኣማኖን ያሺ ባይና ፆሳኮ ሺቃና ሜላ ኪሪስቶሲ ኑስ ሚኖቴꬂኔ ላዓቴꬂ ኢሚስ።
EPH 3:13 ታኒ ሂንቴ ጊሾ ዋዬ ኤኪያ ጊሾ ሂንቴ ታ ዋያን ዬላቶናዳ ሂንቴና ዎሳይስ፤ ታኒ ሂንቴ ቦንቹዋስ ዋዬታይስ።
EPH 3:14 ታኒ ኣዋ ሲንꬃን ጉልባታዳ ዎሴይ ሄሳ ጊሾሳ።
EPH 3:15 ሳሎኒኔ ሳዓን ዴዒያ ኢሲ ኢሲ ሶ ኣሳይ ኢያን ሱንꬄቴስ።
EPH 3:16 ፆሳይ ባ ቦንቾ ዱሬቴꬃፌ ሂንቴ ጋርሳ ኣሳቴꬃ ሚንꬂያ ዎልቃ ባ ኣያና ባጋራ ኢማና ሜላ ሂንቴው ዎሳይስ።
EPH 3:17 ቃሲ ኣማኖን ኪሪስቶሲ ሂንቴ ዎዛናን ዳና ሜላኔ ሂንቴ ሲቆን ፃጶ ዬዲዲ ሚኒዲ ዳና ሜላ ዎሳይስ።
EPH 3:18 ሄሳዳካ፥ ኪሪስቶሳ ሲቆይ ኣይ ሜላ ዳልጌኮ፥ ኣዱሴኮ፥ ꬎቄኮኔ ጪሞኮ ጌሻታ ኡባራ ኤሪያ ዎልቃ ሂንቴ ኣኬካና ሜላ ዎሳይስ።
EPH 3:19 ኤራቴꬃፌ ኣꬊያ ኪሪስቶሳ ሲቁዋ ሂንቴ ኤራና ሜላ ቃሲ ዴዖ ኢሚያ ፆሳ ዎልቃን ሂንቴ ኩማና ሜላ ታ ዎሳይስ።
EPH 3:20 ሂዛ፥ ኑ ጊዶን ኦꬂያ ባ ዎልቃ ባጋራ ኑኒ ዎሴይሳፌ ዎይኮ ቆፔይሳፌ ኣꬂዲ ኦꬃናው ዳንዳዒያ ፆሳስ፥
EPH 3:21 ዎሳ ኬꬃኒኔ ኪሪስቶስ ዬሱሳን ዎዴ ኡባን ሜሪናፔ ሜሪና ጋካናው ቦንቾይ ጊዶ። ኣሚንዒ።
EPH 4:1 ሂዛ፥ ጎዳ ጊሾ ቃሼቲዳ ታኒ፥ ሂንቴ ፄጌቲዳ ፄሳስ ቤሲያ ዴዖ ዳና ሜላ ሂንቴና ዎሳይስ።
EPH 4:2 ሂንቴ ኡባ ዎዴ ኣዳኔ ሃዮ ጊዲቴ፤ ኢሶይ ኢሱዋ ዳንዳዒቴኔ ሲቆን ዴዒቴ።
EPH 4:3 ሳሮቴꬃን ቃሼቲዲ ኣያናይ ኢሚያ ኢሲፌቴꬃ ናጋናው ሚኒቴ።
EPH 4:4 ፆሳይ ሂንቴና ፄጊዳ ዎዴ ኢሲ ኡፋይሳስ ፄጊዳይሳዳ ኢሲ ኣሳቴꬂኔ ኢሲ ኣያኒ ዴዔስ።
EPH 4:5 ኢሲ ጎዳይ፥ ኢሲ ኣማኖይኔ ኢሲ ፂንቃቴይ ዴዔስ።
EPH 4:6 ኡባፌ ቦላ ጊዲዳ፥ ኡባ ባጋራ ኦꬂያኔ ኡባ ጊዶን ዴዒያ ኢሲ ፆሳይ፥ ኡባ ኣዋይ ዴዔስ።
EPH 4:7 ሺን ኪሪስቶሲ ኢማናው ኮዪዳይሳዳ ኑ ኢሶይ ኢሶይ ዱማ ዱማ ኢሞታ ኤኪዳ።
EPH 4:8 ሄሳ ጊሾ፥ ፆሳ ቃላይ፥ «ኢ ፑዴ ኬዪዳ ዎዴ ዲዔቲዳ ዳሮታ ባራ ኤኪዲ ቢስ፤ ኣሳስካ ኢሞታ ኢሚስ» ያጌስ።
EPH 4:9 ያቲን፥ «ፑዴ ኬዪስ» ጉሳይ ዎይ ጉሴ? ኢ ኮይሮ ዱጌ፥ ሳዓ ዚቃ ቤሳ ዎꬊስ ጉሱ ጊዶና ኢፂኮ ኣይ ጉሴ?
EPH 4:10 ሃ ዱጌ ዎꬊዳይሲ፥ ኡባ ቤሳን ቤንታናው ኡባፌ ꬎቃ ሳሉዋ ኬዪዳይሲ ኢያ።
EPH 4:11 ኢ ኢሶታ ኢሶታ ሃዋሬታ፥ ኢሶታ ኢሶታ ናቤታ፥ ኢሶታ ኢሶታ ዎንጌላ ሳባኬታ፥ ኢሶታ ኢሶታ ዎሳ ኬꬂ ሄሜይሳታ፥ ኢሶታ ኢሶታ ኣስታማሬታ ኦꬂዲ ኢሚስ።
EPH 4:12 ኢ ሄሳ ኦꬂዳይ ኪሪስቶሳ ኣሳቴꬂ ጊዲዳ ዎሳ ኬꬂ ዲቻናዉኔ ኣማኒያ ኣሳ ፆሳ ኦሶስ ጊጊሳናሳ።
EPH 4:13 ሄሳዳካ፥ ኑ ኡባይ ፆሳ ናዓ ኤሪዲ ኣማኖን ቤንቲያ ኢሲፌቴꬃኮ ጋኪዲ፥ ኪሪስቶሳ ኣያና ዴዑዋ ኩሜꬃ ጋኪዲ ዲጫና ሜላሳ።
EPH 4:14 ሂዛፔ ጉዬ፥ ኣሳ ጌኔ ጪሞን ጊጊዳ ባሌꬂያ ዎርዶ ቲሚርቴ ጫርኮኒኔ ሆቤን ጌዴኔ ሃ ኩሎ ካዒያ ናይታ ሜላ ጊዳናው ቤሴና።
EPH 4:15 ሺን ኑኒ ቱማ ሲቆን ኦዲሼ ኣሳቴꬃስ ሁዔ ጊዲያ ኪሪስቶሳራ ዴዒያ ኢሲፌቴꬃ ጉጂ ጉጂ ዲቾስ።
EPH 4:16 ኩሜꬃ ኣሳቴꬃይ ኪሪስቶሳ ቦላ ዜምፔስ ቃሲ ዱማ ዱማ ኣሳቴꬃ ቢሊቴቲ ኢሶይ ኢሱዋራ ኦይኬቲዲ ኡቲስ። ኢሲ ኢሲ ኣሳቴꬃ ኪፊሌይ ባ ኦሱዋ ኦꬂያ ዎዴ ኩሜꬃ ኣሳቴꬃይ ሲቆን ዲጬስ።
EPH 4:17 ሄሳ ጊሾ፥ ታኒ ሃይሳ ሂንቴው ጎዳ ሱንꬃን ኦዳይሲኔ ማርካታይስ። ጎዒ ባይና ቆፋ ቆፒያ ኣይሁዴ ጊዶና ኣሳታዳ ዴዖፒቴ።
EPH 4:18 ኤንታ ቆፋይ ꬉሚስ፤ ባንታ ዎዛና ሙሚሲዶሶና። ኤንቲ ኤራቴꬃ ꬋዮኒኔ ኢፃስ ጊዲ ፆሳይ ኢሚያ ዴዑዋፔ ሃኪዶሶና።
EPH 4:19 ኤንቲ ዬላ ጊያባ ኤሮኮና፤ ኤንቲ ላይማቴꬃስ ባንታና ኣꬂ ኢሚዶሶና፤ ቃሲ ቱናባ ኡባ ጉዬ ጎና ኦꬆሶና።
EPH 4:20 ሺን ሂንቴ ኪሪስቶሳ ኤሪዳይ ሄሳ ሜላ ኦጌን ጊዴና።
EPH 4:21 ኢያባ ቱማ ሲዒዴታ። ቃሲ ዬሱሳን ዴዒያ ቱማ ሜላ ኢያፔ ታማሪዴታ።
EPH 4:22 ሂንቴ ካሴ ዴዒያ ዴዖ ኦጊያ ኣጊቴ። ቃሲ ባ ጪሚያ ኣሞን ꬋያ ሂንቴ ጬጋ ኣሳቴꬃ ዲጊቴ።
EPH 4:23 ሂንቴ ዎዛና ቆፋን ኦራፂቴ።
EPH 4:24 ቱማ ፂሎቴꬃኒኔ ጌሻቴꬃን ፆሳ ሌሚሶን ሜꬌቲዳ ኦራꬃ ኣሳቴꬃ ማዒቴ።
EPH 4:25 ሂዛ፥ ዎርዶ ኦዴቶፊቴ። ኑኒ ኡባይ ኪሪስቶሳ ኣሳቴꬃ ቢሊቴታ ጊዲያ ጊሾ ኣሳ ኡባራ ቱማ ኦዴቲቴ።
EPH 4:26 ሃንቄቲቴ፥ ሺን ሂንቴ ሃንቁዋን ናጋራ ኦꬆፊቴ። ሂንቴ ሃንቄቲ ዴዒሺን ኣዊ ዉሎፎ።
EPH 4:27 ፃላሄስ ቤሴ ኢሞፊቴ።
EPH 4:28 ካይሲያ ኡራይ ሂዛፔ ጉዬ ካይሶቶፖ። ሺን ማንቆታ ማዲያባይ ኢያው ዳና ሜላ ባ ኩሼን ሎዖባ ኦꬆ።
EPH 4:29 ሂንቴ ዶናፔ ኢታ ቃሊ ኬዮፖ። ሺን ሲዔይሳታ ጎዓና ሜላኔ ሃራታ ሚንꬄꬂያ ኮሺያ ሎዖ ቃሊ ሂንቴ ዶናፔ ኬዮ።
EPH 4:30 ፆሳይ ሂንቴና ዎዚያ ጋላሳስ ሂንቴና ኣታሚዲ ዎꬂዳ ፆሳ ኣያና ኣዛንꬆፊቴ።
EPH 4:31 ጫሜቴꬂ፥ ዪሎ፥ ሃንቆ፥ ዋሶ፥ ጫሼኔ ኢታ ኡባ ሂንቴፌ ሃሲቴ።
EPH 4:32 ኣꬂዲ ኢሶይ ኢሱዋስ ኬሃኔ ቃꬌቴይሳታ ጊዲቴ። ፆሳይ ኪሪስቶሳ ባጋራ ሂንቴው ኣቶ ጊዳይሳዳ ሂንቴካ ዎሊስ ኣቶ ጊቴ።
EPH 5:1 ሂዛ፥ ፆሳይ ዶሲያ ናይታዳ ኢያ ዳኒቴ።
EPH 5:2 ኪሪስቶሲ ኑና ዶሲዲ ባና ኑ ጊሾ ፆሳስ ሳዊያ ኢሞኔ ያርሾ ኦꬂዲ ኢሚዳይሳዳ ሂንቴካ ሲቆን ዴዒቴ።
EPH 5:3 ሺን ላይማቴꬂ፥ ቱናቴꬂኔ ኡዜቴꬂ ኣማኒያ ኣሳስ ቤሶና ጊሾ ሂንቴ ጊዶን ኡባራካ ሲዔቶፎ።
EPH 5:4 ፆሳ ጋላቲቴፔ ኣቲን ዬላያባይኔ ኤያ ኦዲ ዎይኮ ቂꬌይ ሂንቴው ቤሶና ጊሾ ሂንቴ ጊዶን ኡባካ ዴዖፖ።
EPH 5:5 ሃይሳ ኤሪቴ፤ ኦኒካ ላይማቴይ ዎይኮ ቱናባ ኦꬄይ ዎይኮ ኡዜቴይ ኪሪስቶሳ ካዎቴꬃኔ ፆሳ ካዎቴꬃ ላታናው ዳንዳዔና። ኡዜቴꬂ ኤቃ ጎይኖ ሜላ።
EPH 5:6 ሃይሳታ ጋሶን ፆሳ ሃንቆይ ኪቴቶና ኣሳ ቦላ ያና ጊሾ ኦኒካ ሂንቴና ፓꬆና ኦዳን ጪሞፎ።
EPH 5:7 ሄሳ ሜላ ኣሳራ ኢሲፌቴꬂ ኦꬆፊቴ።
EPH 5:8 ካሴ ሂንቴ ꬉማን ዴዒዴታ፥ ሺን ሃዒ ጎዳ ባጋራ ፖዖን ዴዔታ። ሂዛ፥ ፖዖ ኣሳዳ ፖዖን ሲሜሬቲቴ።
EPH 5:9 ፖዖይ ሎዖቴꬂ፥ ፂሎቴꬂኔ ቱማቴꬂ ኣይፌስ።
EPH 5:10 ጎዳ ኡፋይሲያባ ኦꬃናው ኮዪቴ።
EPH 5:11 ጎዒ ባይና ꬉማ ኦሶ ቆንጪሲቴፔ ኣቲን ኢያራ ኢሲፎፒቴ።
EPH 5:12 ኤንቲ ጌማን ኦꬂያ ኦሱዋ ሃሪ ኣቶሺን ኦዳናዉካ ዬላዬስ።
EPH 5:13 ሺን ኡባባይ ፖዖን ኬያ ዎዴ ቆንጬን ቤንቴስ።
EPH 5:14 ፖዖይ ኡባባ ቆንጬን ቤሴስ። ሄሳ ጊሾ፥ «ኔኖ ꬊስኬይሶ ባርካ፤ ሃይቆፔ ዴንዳ፤ ኪሪስቶሲ ኔ ቦላ ፖዓና» ያጌቲስ።
EPH 5:15 ሂዛ፥ ሂንቴ ዋኒዲ ዴዒያኮ ኣኬኪ ቤዒቴ። ጪንጫታ ጊዲቴፔ ኣቲን ኤያታ ጊዶፒቴ።
EPH 5:16 ላይꬃይ ኢታ ጊዲያ ጊሾ ኢንጄቲያ ዎዴ ኡባ ጎዔቲቴ።
EPH 5:17 ሄሳ ጊሾ፥ ጎዳ ሼኔይ ኣይቤኮ ኣኬኪቴፔ ኣቲን ኤዮፒቴ።
EPH 5:18 ጌሻ ኣያናን ጋላስ ጋላስ ኩሚቴፔ ኣቲን ꬋዮኮ ሂንቴና ካሌꬂያ ጊሾ ዎይኔ ኡሻን ማꬆቶፊቴ።
EPH 5:19 ማዝሙሬን፥ ሳባኒኔ ኣያና ዬꬃን፥ ኢሶይ ኢሱዋራ ኦዴቲቴ። ቃሲ ሂንቴ ዎዛናን ዛማሪሼኔ ሳቢሼ ጎዳ ጋላቲቴ።
EPH 5:20 ኑ ጎዳ ዬሱስ ኪሪስቶሳ ሱንꬃን ኡባ ዎዴ ፆሳ ኣዋ ኡባባስ ጋላቲቴ።
EPH 5:21 ኪሪስቶሳ ቦንቹዋስ ጊዲ ኢሶይ ኢሱዋስ ሃሬቲቴ።
EPH 5:22 ማቼቶ፥ ጎዳስ ሃሬቴይሳዳ ሂንቴ ኣዚናታስ ሃሬቲቴ።
EPH 5:23 ኪሪስቶሲ ዎሳ ኬꬃስ ሁዔ ጊዴይሳዳ ኣዚኒካ ባ ማቼስ ሁዔ። ቃሲ ኪሪስቶሲ ባ ኣሳቴꬂ ጊዲዳ ዎሳ ኬꬃ ኣሼይሳ።
EPH 5:24 ሺን ዎሳ ኬꬃይ ኪሪስቶሳስ ሃሬቴይሳዳ ማቼቲ ባንታ ኣዚናታስ ኡባባን ሃሬታናው ቤሴስ።
EPH 5:25 ኣዚናቶ፥ ኪሪስቶሲ ዎሳ ኬꬃ ዶሲዲ ባና ኢው ኢሚዳይሳዳ ሂንቴካ ሂንቴ ማቼታ ዶሲቴ።
EPH 5:26 ኢ ዎሳ ኬꬃ ባ ቃላ ባጋራ ሃꬃን ሜጪዲ ጌሺስ።
EPH 5:27 ኪሪስቶሲ ዎሳ ኬꬃ ቂቲ ዎይኮ ሶምዖ ቱሲ ዎይኮ ሄሳ ሜላባይ ባይና ኢ ኩሜꬃ ቦንቹዋራ ጌሺኔ ቦሬቶናሮ ኦꬂዲ ባኮ ሺሻናው ኮዪዲ ሄሳ ኦꬂስ።
EPH 5:28 ሄሳዳካ፥ ኣዚናቲ ባንታና ዶሴይሳዳ ባንታ ማቼታ ዶሳናው ቤሴስ። ባ ማቺው ዶሴይሲ ባና ዶሴስ።
EPH 5:29 ባና ኢፂያ ኣሲ ኦኒካ ባዋ፥ ሺን ኪሪስቶሲ ዎሳ ኬꬃስ ኦꬄይሳዳ ባ ኣሳቴꬃ ሙዜሲኔ ናጌስ።
EPH 5:30 ኑኒ ኪሪስቶሳ ኣሳቴꬃ ቢሊቴታ።
EPH 5:31 ፆሳ ቃላይ፥ «ሄሳ ጊሾ፥ ኣሲ ባ ኣዋኔ ባ ኣዪው ኣጊዲ፥ ባ ማቼራ ኢሲፌ ዳና፤ ኤንቲ ናምዓይካ ኢሲ ኣሾ ጊዳና» ያጌስ።
EPH 5:32 ሃይሲ ጊታ ፁራ፥ ሺን ታኒ ሄሳ ኪሪስቶሳባኔ ዎሳ ኬꬃባ ሌሚሶ ኦꬃዳ ኦዳይስ።
EPH 5:33 ጊዶሺን፥ ሂንቴ ኢሶይ ኢሶይ ሂንቴ ማቼታ ሂንቴ፥ ሂንቴና ዶሴይሳዳ ዶሲቴ። ኢሲ ኢሲ ማቻ ባ ኣዚና ቦንቻናው ቤሴስ።
EPH 6:1 ናይቶ፥ ሂንቴ ጎዳባ ጊዲያ ጊሾ ሂንቴና ዬሊዳይሳታስ ኪቴቲቴ። ሄሲ ሂንቴው ቤሲያባ።
EPH 6:2 «ኔ ኣዪዉኔ ኔ ኣዋ ቦንቻ።» ሄሲ ኡፋይሳ ቃሊ ዴዒያ ኮይሮ ኪታ።
EPH 6:3 «ኔ ሄሳ ፖሊያባ ጊዲኮ ኡባይ ኔው ኢንጄታና፤ ኔ ላይꬃይ ሳዓ ቦላ ኣዱቃና።»
EPH 6:4 ኣዋቶ፥ ሂንቴ ናይታ ጎዳ ቃላ ታማርሶኒኔ ኤንታ ካሌሶን ዲቺቴፔ ኣቲን ኤንታና ጫሚሶፒቴ።
EPH 6:5 ኣይሌቶ፥ ኪሪስቶሳስ ኪቴቴይሳዳ ሂንቴ ሳዓ ጎዳታስ ያሻን፥ ቦንቾኒኔ ሱሬ ዎዛናን ኪቴቲቴ።
EPH 6:6 ኤንታ ሲንꬃን ሳባ ዴማናው ኤንቲ ቤዒያ ዎዴ ፃላላ ኦꬆፊቴ። ሺን ኪሪስቶሳ ኣይሌታዳ ፆሳ ሼኒያ ዎዛናፔ ፖሊቴ።
EPH 6:7 ኣሳስ ጊዶናሺን ጎዳስ ጊዲ ሂንቴ ኩሜꬃ ዎዛናፔ ኦꬂቴ።
EPH 6:8 ኣይሌ ጊዲን ዎይኮ ጎዳ ጊዲን ኢሶይ ኢሶይ ባ ኦꬂዳ ሎዖ ኦሱዋስ ጎዳፔ ዎይቶ ኤካናይሳ ኤሬታ።
EPH 6:9 ጎዳቶ፥ ኣሳ ሶምዖ ቤዒዲ ማዶና ጎዳይ፥ ሳሉዋን ዴዔይሳ ኤሬታ። ሄሳ ጊሾ፥ ሂንቴ ኣይሌታ ማንዴይሳ ኣጊዲ ኤንቲ ሂንቴው ቦንቾን ኪቴቴይሳ ሜላ ሂንቴ ኤንታው ሎዖባ ኦꬂቴ።
EPH 6:10 ዉርሴꬃን፥ ጎዳኒኔ ኢያ ጊታ ዎልቃን ሚኒቴ።
EPH 6:11 ፃላሄ ጪሙዋ ኤቄታናው ዳንዳዓና ሜላ ፆሳይ ሂንቴው ኢሚዳ ኦላ ሚሺያ ኡባ ማዒቴ።
EPH 6:12 ኑ ኦላይ ኣሳራ ጊዶናሺን ሳሎን ዴዒያ ቱና ኣያና ኦላንቾታራ፥ ማታ ኣዋታራ፥ ሃሬይሳታራኔ ሃ ꬉማ ኣላሚያ ዎልቃታራ።
EPH 6:13 ሄሳ ጊሾ፥ ኢታ ጋላሳ ቴቃናዉኔ ኡባ ፖሊዲ፥ ሚኒዲ ኤቃናው ሂንቴ ዳንዳዓና ሜላ ፆሳ ኦላ ሚሼታ ኡባ ማዒቴ።
EPH 6:14 ቱማ ፄሳን ዳንጮዳ ዳንጪዲ፥ ፂሎቴꬃ ፁሩሬዳ ቲራን ዎꬂዲ፥ ሳሮቴꬃ ዎንጌላ ሂንቴ ቶሁዋን ጫማዳ ኣꬂዲ ሚኒዲ ኤቂቴ።
EPH 6:16 ሄ ኡባፌ ኣꬂዲ፥ ፃላሄይ ዬዲያ ላፂያ ታማ ዶንጌ ኡባ ቶይሳናው ዳንዳዒያ ኣማኑዋ ኡባ ዎዴ ጎንዳሌዳ ኦይኪቴ።
EPH 6:17 ፆሳ ኣቶቴꬃ ቢራታ ባርኔፃዳ ሂንቴ ሁዔን ዎꬂቴ፤ ቃሲ ጌሻ ኣያና ማሻ፥ ኢካ ፆሳ ቃላ ኦይኪቴ።
EPH 6:18 ዎሳ ኣጎፊቴ፤ ሃራታስካ ጋናቲቴ፤ ኡባ ዎዴ ኣያናን ዎሲቴ። ሄሳን፥ ጌሻታስ ሳሌቶና ሚኒዲ ኡባ ዎዴ ዎሲቴ።
EPH 6:19 ታኒ ዎንጌላ ፁራ ያሺ ባይና ቆንጪሳዳ ኦዳና ሜላ ፆሳይ ታው ቃላ ኢማና ሜላ ዎሲቴ።
EPH 6:20 ታኒ ሄሳ ኦꬃናው ኪቴታስ ሃዒካ ቃሾን ዴዔይ ሄ ዎንጌላ ጊሾሳ። ያኒያ ጊሾ፥ ታኒ ያሺ ባይና ቤሴይሳዳ ኦዳና ሜላ ታው ዎሲቴ።
EPH 6:21 ታኒ ዋና ዴዒያኮኔ ኣይ ኦꬂያኮ ሂንቴ ኤራና ሜላ ኑ ሲቆ ኢሻይ፥ ጎዳ ኦሱዋን ኣማኔቲዳ ኦሳንቾይ፥ ቲኪቆሲ፥ ታባ ኡባ ሂንቴው ኦዳና።
EPH 6:22 ኑኒ ኡባይ ዋኒዲ ዴዒያኮ ሂንቴው ኦዳና ሜላኔ ሂንቴና ሚንꬄꬃና ሜላ ታኒ ኢያ ሂንቴኮ ኪታስ።
EPH 6:23 ፆሳ ኣዋፔ፥ ጎዳ ዬሱስ ኪሪስቶሳፔ ሳሮቴꬃይኔ ሲቆይ ኣማኖራ ኢሲፌ ኣማኒያ ኡባስ ጊዶ።
EPH 6:24 ኢርፆና ሲቆን ኑ ጎዳ ዬሱስ ኪሪስቶሳ ሲቂያ ኡባራ ፆሳ ኣꬎ ኬሃቴꬃይ ጊዶ።
PHI 1:1 ኪሪስቶስ ዬሱሳራ ኢሲፊዳ ጊሾ ፆሳባ ጊዲዳ፥ ፊልጲሲዩሳ ካታማን ዴዒያ ዎሳ ኬꬃ ጪማታሲኔ ዳቆኔታ ኡባስ። ዬሱስ ኪሪስቶሳ ኣይሌ ጊዲዳ፥ ጳዉሎሳፔኔ ፂሞቲዮሳፔ ኪቴቲዳ ኪታ።
PHI 1:2 ኑ ኣዋ ፆሳፌኔ ጎዳ ዬሱስ ኪሪስቶሳፔ ኣꬎ ኬሃቴꬃይኔ ሳሮቴꬃይ ሂንቴው ጊዶ።
PHI 1:3 ታኒ ሂንቴና ቆፒያ ዎዴ ኡባን፥ ታ ፆሳ ጋላታይስ።
PHI 1:4 ታኒ ሂንቴ ኡባስ ፆሳ ዎሲያ ዎዴ ኡፋይሳን ዎሳይስ።
PHI 1:5 ሂንቴ ኮይሮ ጋላሳፔ ሃዒ ጋካናው፥ ዎንጌላ ማርካቴይሳን ታራ ኢሲፌ ጊዲዲ፥ ታና ማዲዳ ጊሾ ፆሳ ጋላታይስ።
PHI 1:6 ሂንቴ ጊዶን ሎዖ ኦሶ ዶሚዳ ፆሳይ፥ ኪሪስቶስ ዬሱሲ ሲሚያ ጋላሳይ ጋካናው፥ ፖላናይሳ ኤራይስ።
PHI 1:7 ሂንቴ ኡባ ዎዴ ታ ዎዛናን ዴዔታ። ታኒ ኡባ ዎዴካ ሄሳዳ ቆፓናው ቤሴስ። ሃዒ ታኒ ቃሾን ዴዓሼኔ ቃሼታናፔ ሲንꬄ ዎንጌላ ናጎኒኔ ዎንጌላ ሚንꬃ ኤሶን ፆሳይ ታው ቃዲዳ ቃዳ ሂንቴካ ታራ ሻኬቲዴታ።
PHI 1:8 ታኒ ሂንቴና ኡባ ኪሪስቶስ ዬሱሳ ሲቁዋን ኣይ ሜላ ላሞቲያኮ ፆሳይ ታው ማርካ።
PHI 1:9 ሂንቴ ሲቆይ ቱማ ኤራቴꬃራኔ ኣኬካራ ኢሲፌ ጉጂ ጉጂ ዲጫና ሜላ ፆሳ ዎሳይስ።
PHI 1:10 ሄሳን ሂንቴ ሎዖባ ሻኪዲ፥ ዶሬይሳታ፥ ኪሪስቶሲ ሲሚያ ጋላሳን ጌሻታኔ ቦሬቶናይሳታ ጊዳና።
PHI 1:11 ሂንቴ ዴዖይ ፆሳ ቦንቹዋሲኔ ጋላታስ ዬሱስ ኪሪስቶሳ ባጋራ ቤንቲያ ፂሎቴꬃ ኣይፊያን ኩሚዲ ኣይፋና።
PHI 1:12 ታ ኢሻቶ፥ ታና ጋኪዳ ኡባይ ዎንጌላይ ዳልጋና ሜላ ቱማ ማዲዳይሳ ሂንቴ ኤራና ሜላ ኮያይስ።
PHI 1:13 ታኒ ኪሪስቶሳ ጊሾ ቃሼቲዳይሳ፥ ካዎ ኬꬃ ናጌይሳቲኔ ሃይሳን ዴዒያ ሃራቲ ኡባይ ኤሮሶና።
PHI 1:14 ታ ቃሹዋ ጋሶን ኑ ኢሻታፔ ዳሮቲ ጎዳን ኬሂ ኣማኔቲዶሶና። ሄሳ ጊሾ፥ ፆሳ ቃላ ያሺ ባይና ካሴይሳፌ ኣꬊ ሚኒዲ ኦዳና ሜላ ሚኖቴꬂ ዴሚዶሶና።
PHI 1:15 ጊዶሺን፥ ኢሶቲ ኢሶቲ ቃናቴኒኔ ፓላማን ኪሪስቶሳባ ኦዶሶና፥ ሺን ሃራቲ ሱሬ ዎዛናፔ ኦዶሶና።
PHI 1:16 ሱሬ ዎዛናፔ ኦዴይሳቲ፥ ፆሳይ ታው ዎንጌላ ናጎ ኦሶ ኢሚዳይሳ ኤሪያ ጊሾ ሲቆን ኦዶሶና።
PHI 1:17 ሺን ታና ቃናቴይሳቲ ታ ቃሹዋ ቦላ ሃራ ሜቶ ኤሃናባ ኤንታው ዳኒን ባንታና ዶሲዲ ኪሪስቶሳባ ኦዶሶናፔ ኣቲን ቱማ ዎዛናፔ ኦዶኮና።
PHI 1:18 ሄሲ ኣይኮካ ሜቴና። ቱማ ኦጌን ጊዲን ዎይኮ ዎርዶ ኦጌን ጊዲን ሄ ኡባን ኪሪስቶሲ ሳባኬቴስ። ታና ሄሲ ኡፋይሴስ። ቃሲ ሃራባይ ታና ኡፋይሲያባይ፥
PHI 1:19 ታኒ ሂንቴ ዎሳኒኔ ዬሱስ ኪሪስቶሳ ኣያና ማዱዋን ኣታናይሳ ኤሪያ ጊሾ ታና ኡፋይሴስ።
PHI 1:20 ታ ጊታ ኣሞይኔ ኡፋይሳን ናጊያ ናጎይ ታ ዬላቶና ኣታናይሳ። ሺን ኡባ ዎዴ ኦꬄይሳዳ፥ ሃዒካ ታኒ ፓፃ ዴዒን ዎይኮ ሃይቂን ያዮና ታ ኩሜꬃ ኣሳቴꬃን ኪሪስቶሲ ቦንቼታና ጋዳ ሚኖቴꬃን ኦዳይስ።
PHI 1:21 ታ ዴዒኮካ ኪሪስቶሳ ፃላላስ ዴዓይስ፤ ቃሲ ታ ሃይቂኮካ ታው ኣꬊዳ ዎꬌ።
PHI 1:22 ሺን ታ ፓፃ ዴዒኮ ኣይፌይ ዴዒያ ኦሶ ኦꬃና። ሺን ፓፃ ዴዔይሳፌኔ ሃይቆፔ ኣዉሳ ዶራኔኮ ታው ኤሬቴና።
PHI 1:23 ታኒ ሃ ናምዓታፔ ኣዉሳ ዶራኔኮ ኡንዔታስ። ሃ ዴዑዋፔ ሻኬታዳ ኪሪስቶሳራ ኢሲፌ ዳናው ኣሞታይስ፤ ኪሪስቶሳራ ኢሲፌ ዴዔይሲ ኡባፌ ኣꬊዳ ሎዖ።
PHI 1:24 ሺን ታኒ ሂንቴ ጊሾ ፓፃ ዴዔይሲ ሂንቴው ዳሮ ኮሺያባ።
PHI 1:25 ሄሳ ታኒ ጌሻዳ ኤራይስ፤ ታኒ፥ ሂንቴ ኣማኖን ዲጫናዳኔ ኡፋይታናዳ ሂንቴራ ፓፃ ዳና።
PHI 1:26 ሄሳ ጊሾ፥ ታኒ ሂንቴኮ ሲማዳ ያ ዎዴ ኪሪስቶስ ዬሱሳራ ሂንቴ ዴዒያ ዴዑዋን ታናን ዴዒያ ጬቄቴꬃይ ሂንቴው ዳራና።
PHI 1:27 ኡባፌ ኣꬂዲ፥ ሂንቴ ኪሪስቶሳ ዎንጌላስ ቦንቾ ኤሂያ ዴዖ ዴዒቴ። ታ ሂንቴና ቤዒን ዎይኮ ቤዖና ኢፂን ሂንቴ ኢሲ ቆፋን ሚኒዲ ኤቂዲ፥ ሃራቲ ዎንጌላን ኣማናና ሜላ ኢሲ ዎዛናን ጊዲዲ ኢሲፌ ባፄቴይሳ ታ ሲዓና።
PHI 1:28 ሂንቴ ሞርኬታስ ያዮፊቴ። ኤንቲ ሂንቴራ ኤቄቲያባ ጊዲኮ ሄሲ ሂንቴው ኣቶቴꬃስ፥ ኤንታው ꬋዮስ ፆሳፌ ጊዲዳ ማላ።
PHI 1:29 ኪሪስቶሳስ ኦꬂያ ቃዳይ ሂንቴው ኢሜቲዳይ፥ ሂንቴ ኢያ ኣማናና ሜላ ፃላላ ጊዶናሺን ሂንቴ ኢያ ጊሾ ሜቶ ኤካና ሜላሳ።
PHI 1:30 ሄሳ ጊሾ፥ ሂንቴ ታ ዋያ ካሴ ቤዒዴታ፤ ሃዒካ ታ ዋዬቴይሳ ሲዔታ። ሂንቴካ ታ ዋያ ሜላ ዋዬቴታ።
PHI 2:1 ኪሪስቶሳን ሂንቴ ዴዒያ ዴዖይ ሂንቴና ሚንꬄስ፤ ቃሲ ኢያ ሲቆይካ ሂንቴና ሚንꬄꬄስ። ጌሻ ኣያናራ ሂንቴው ኢሲፌቴꬂ ዴዔስ፤ ሂንቴ ሃራታስ ኬሄታኔ ቃꬌቴታ።
PHI 2:2 ሂዛ፥ ሂንቴ ኢሲ ቆፋን፥ ሲቆን፥ ኢሲ ዎዛናኒኔ ኣያናን ኢሲኖ ጊዲዲ ታና ፖሎ ኡፋይሲቴ።
PHI 2:3 ሂንቴና ዶሶን ዎይኮ ጬቄቲያ ሃዳ ኣሞን ኢሲባካ ኦꬆፊቴ። ሺን ሂንቴ ኢሶይ ኢሱዋፌ ጊታታይስ ያጊዲ ቆፖና ሂንቴና ካዉሺቴ።
PHI 2:4 ሂንቴ ኢሶይ ኢሶይ፥ ሃራ ኣሲ ማዲያባ ኮዪቴፔ ኣቲን ሂንቴና ማዲያባ ፃላላ ኮዮፒቴ።
PHI 2:5 ኪሪስቶስ ዬሱሳን ዴዒያ ቆፋይ ሂንቴናን ዳናው ቤሴስ።
PHI 2:6 ኢያው ኡባ ዎዴ ፆሳ ሃኖቴꬂ ዴዔስ። ያኒያ ጊሾ፥ ኢያ ፆሳራ ኢሲኖ ኦꬂያ ሃኖታ፥ ዎልቃን ኤካናው ኮዪቤና።
PHI 2:7 ጊዶሺን፥ ኢ ባው ዴዒያ ቦንቹዋ ኡባ ኣጊዲ፥ ኣይሌ ሜꬌታ ኤኪስ፤ ኣሴ ዳኒዲ ቆንጪስ።
PHI 2:8 ኢ ባና ካዉሺስ፤ ሃይቃና ጋካናው፥ ሃሪ ኣቶሺን ማስቃሊያ ቦላ ሃይቃናው ኪቴቲስ።
PHI 2:9 ሄሳ ጊሾ፥ ፆሳይ ኢያ ዳሮ ꬎቁ ꬎቁ ኦꬂስ፤ ቃሲ ሱንꬃ ኡባፌካ ኣꬊያ ꬎቃ ሱንꬃ ኢሚስ።
PHI 2:10 ሳሎኒኔ ሳዓን፥ ሳዓፔ ጋርሳን ዴዒያ ኡባይ፥ ዬሱሳ ሱንꬃ ቦንቹዋስ ጉልባታና።
PHI 2:11 ኣሳ ኡባይ ባንታ ኢንፃርሳን፥ ዬሱስ ኪሪስቶሳ ጎዳ ያጊዲ፥ ፆሳ ኣዋ ቦንቹዋስ ማርካታና።
PHI 2:12 ታ ኢሻቶ፥ ታኒ ሂንቴራ ዴዒያ ዎዴ ኡባን ሂንቴ ኪቴቲዳይሳዳ፥ ሃዒ ታኒ ሂንቴ ማታፔ ሃኪንካ፥ ካሴይሳፌ ኣꬂዲ፥ ኪቴታናው ቤሴስ። ፆሳስ ያሻኒኔ ኮኮርሳን ሂንቴ ኣቶቴꬃ ፖላናው ኦꬂቴ።
PHI 2:13 ፆሳይ፥ ሂንቴ ኢያው ኤሮ ጊዲ ኪቴታና ሜላ ኡባ ዎዴ ሂንቴ ጊዶን ኦꬄስ።
PHI 2:14 ኣይ ኦሶ ኦꬂሼካ ዙዙሞና ዎይኮ ፓላሞና ኦꬂቴ።
PHI 2:15 ጌላኔ ናጋራንቾ ኣሳ ጊዶን ቦሬቶናይሳታ፥ ጌሻታኔ ፖኮይ ባይና ፆሳ ናይታ ጊዲቴ። ሂንቴ ኤንታ ጊዶን ሳሎ ፆሊንቶዳ ፖዒሼ፥
PHI 2:16 ዴዖ ኢሚያ ኪታ ኤንታው ኦዲቴ። ሄ ዎዴ ታ ዳቡሪሳይኔ ታ ኦሶይ ሜላ ኣቲቦና ጊሾ ኪሪስቶሲ ያ ጋላስ ታ ሂንቴናን ጬቄታና።
PHI 2:17 ሂንቴ ፆሳስ ኢሚያ ኣማኖ ኢሞታ ቦላ ታ ሱꬃይ ኡሻ ያርሾዳ ጉኪኮካ ታና ኡፋይሴስ። ሂንቴካ ታራ ኡፋይታና።
PHI 2:18 ሄሳዳ ሂንቴካ ኡፋይቲዲ ታናካ ኡፋይሳናው ቤሴስ።
PHI 2:19 ታኒ ሂንቴ ዴዑዋባ ሲዓዳ ኡፋይታናው ፂሞቲዮሳ ሂንቴኮ ኤሌሳዳ ዬዳና ሜላ ጎዳ ዬሱሲ ታና ማዳናይሳ ኣማኔታይስ።
PHI 2:20 ሂንቴ ዴዑዋስ ዎዛናፔ ቆፒያ ኢያ ሜላ ኣሲ ሃሪ ኦኒካ ባዋ።
PHI 2:21 ሃራቲ ባንታና ጎዒያባ ኮዮሶናፔ ኣቲን ዬሱስ ኪሪስቶሲ ኮያባ ኦꬆኮና።
PHI 2:22 ኢ ታራ ኢሲፌ ጊዲዲ ናዒ ባ ኣዋስ ኦꬄይሳዳ ዎንጌላ ኦሶ ኦꬂዳይሳኔ ኣማኔቲያ ኣሲ ጊዴይሳ ሂንቴ ኤሬታ።
PHI 2:23 ሄሳ ጊሾ፥ ታባይ ሃኒያባ ቤዓዳ ኤሌሳዳ ኢያ ሂንቴኮ ዬዳና ጋዳ ቆፓይስ።
PHI 2:24 ታኒ፥ ታ ሁዔን ማታ ዎዴን ሂንቴኮ ባናይሳ ጎዳን ኣማኔታይስ።
PHI 2:25 ሄሳዳካ፥ ታኒ፥ ታ ኢሻ ኤጳፊሮዲቱሳ፥ ታራ ኢሲፌ ታ ባጋ ጊዲዲ ኦꬂዳይሳ፥ ኦሌቲዳይሳኔ፥ ታና ማዳናው ሂንቴው ኪቴቲዳይሳ፥ ሂንቴኮ ኪታናው ቆፓስ።
PHI 2:26 ኢ ሂንቴና ኡባ ቤዓናው ዳሮ ላሞቴስ። ቃሲ ኢ ሃርጌቲዳይሳ ሂንቴ ሲዒዳ ጊሾ ባ ዎዛናን ዳሮ ኡንዔቲስ።
PHI 2:27 ኢ ቱማ ሃርጌቲዲ ሃይቂ ኪቺዲ ኣቲስ። ሺን ፆሳይ ኢያው ቃꬌቲስ። ኢያ ፃላላስ ጊዶናሺን ኣዛኖይ ኣዛኖ ቦላ ጉዤቶናዳ፥ ታዉካ ቃꬌቲስ።
PHI 2:28 ሂዛ፥ ሂንቴ ኢያ ዛሪ ቤዒዲ ኡፋይታናዳ ታዉካ ታ ዎዛና ሴላይ ኢርፃናዳ ታኒ ኢያ ኤሌሳዳ ሂንቴኮ ዬዳናው ኣሞታይስ።
PHI 2:29 ጎዳስ ሃጋዚያ ኣሳዳ ኢያ ኩሜꬃ ኡፋይሳን ሞኪቴ። ቃሲ ኢያ ሜላ ኣሳ ኡባካ ቦንቺቴ።
PHI 2:30 ሂንቴ ታ ማታን ጊዲዲ ኦꬃናው ዳንዳዖና ማዲያ ማዲዲ ኪሪስቶሳ ኦሱዋ ጊሾ ባ ሼምፑዋስ ሚሼቶና ኢፂዲ ሃይቂ ኪቺዲ ኣቲስ።
PHI 3:1 ዉርሴꬃን፥ ታ ኢሻቶ፥ ሂንቴ ጎዳባ ጊዲያ ጊሾ ኡፋይቲቴ። ታኒ ካሴ ፃፊዳይሳ ዛራዳ ፃፋናይሲ ታና ዋይሴና፥ ሺን ሂንቴና ባላፔ ናጋና።
PHI 3:2 ኢታባ ኦꬂያ ካናታፔ፥ ቃሲ ቃፃሬታናው ኮሼስ ጊያ ኢታ ኣሳታፔ ናጌቲቴ።
PHI 3:3 ኑኒ ፆሳ ጌሻ ኣያናን ጎይኒያ ጊሾኔ ኑ ዴዑዋን ኪሪስቶስ ዬሱሳን ጬቄቲያ ጊሾ ቱማ ቃፃሮ ቃፃሬቲዳይሳታ። ኑኒ ካሬ ኣሳቴꬃ ቦላ ኦሴቲያባን ጬቄቶኮ።
PHI 3:4 ታ ካሬ ኣሳቴꬃን ጬቄታናው ኮሺኮ ታ ዳሮባን ጬቄታናው ዳንዳዓይስ። ኣይ ኣሲካ ባ ካሬ ኣሳቴꬃን ጬቄቲያባይ ባው ዴዔስ ጊዲ ቆፒኮ፥ ታኒ ኢያፔ ዳሮ ኣꬋዳ ጬቄቲያባይ ዴዔስ።
PHI 3:5 ታኒ ዬሌቲዳ ሳሚንታራ ቃፃሬታስ። ታኒ ዬሌታን ኢስራዔሌ፤ ታኒ ቢኒያሜ ዛሬ፤ ታኒ ዋላኪ ባይና ኣይሁዴ ኣሴ። ኣይሁዴ ሂጌ ናጎን ጊዲኮ ታኒ ፋሪሳዌ።
PHI 3:6 ኣይሁዴ ኣማኑዋስ ሚሼቴꬃን ጊዲኮ ታኒ ዎሳ ኬꬃ ዬዴꬃስ። ኢሲ ኣሲ ሂጌ ናጊዲ ፂሊያባ ጊዲኮ፥ ታናን ቦሬይ ቤንቲቤና።
PHI 3:7 ሺን ካሴ ታና ማዴስ ጋዳ ቆፒዳባ ኡባ፥ ኪሪስቶሳ ጊሾ ጋዳ ማዶናባ ኦꬃዳ ታይባስ።
PHI 3:8 ሄሳ ፃላላ ጊዶናሺን ታኒ ታ ጎዳ ኪሪስቶስ ዬሱሳ ኤሬይሲ ሃራባ ኡባፌ ዳሮ ኣꬊያ ጊሾ ሄ ኡባ ዎꬌይ ባይናባዳ ታይባስ። ታኒ ኢያ ጊሾ ኡባባ ꬋያስ። ኪሪስቶሳ ዴማናው ኡባባ ዎራ ሆሌቲዳ ቡሬዳ ታይባይስ። ታኒ ዬሱሳራ ኢሲኖ ጊዳስ።
PHI 3:9 ታኒ ሂጌስ ኪቴታዳ ዴሚያ ታ ሁዔ ፂሎቴꬂ ታው ባዋ። ኪሪስቶሳ ኣማኒን ቤንቲያ ፂሎቴꬃይ፥ ፆሳ ማታፔ ያ ፂሎቴꬃይ ሃዒ ታው ዴዔስ።
PHI 3:10 ታኒ ኪሪስቶሳኔ ኢያ ዴንዶ ዎልቃ ኤራናው ኮያይስ። ታኒ ኢያ ሜቱዋ ኢያራ ሻኬታናዉኔ ኢያ ሃይቁዋን ኢያ ዳናናው ኣሞታይስ።
PHI 3:11 ሄሳዳካ፥ ሃይቆፔ ዴንዳዳ ሜሪናው ዴዖን ዳናይሳ ኡፋይሲ ኦꬃይስ።
PHI 3:12 ታኒ ሃዒ ጋፃ ጋካስ ዎይኮ ታናን ባሊ ባዋ ጊኬ። ሺን ኪሪስቶስ ዬሱሲ ታና ኦይኪዳ ጊሾ ታኒ ታ ሲንꬃን ዴዒያ ዎይቱዋ ኦይካናው ዎፃይሲኔ ቡቴታይስ።
PHI 3:13 ታ ኢሻቶ፥ ታኒ ሄሳ ዴማስ ጋዳ ቆፒኬ፥ ሺን ታኒ ኢሲባ ኦꬃይስ። ታፔ ጉዬራ ዴዔይሳ ዶጋዳ ሲንꬃን ዴዔይሳ ኦይካናው ዛቱራይስ።
PHI 3:14 ሄሳ ጊሾ፥ ታኒ ጋፃ ጋካናው ዎፃይስ። ፆሳይ ኪሪስቶስ ዬሱሳ ባጋራ ሳሎ ዴዑዋስ ፄጊዳ ዎይቱዋ ኤካናው ዳቡራይስ።
PHI 3:15 ሂዛ፥ ኑኒ ኣያናን ጋሽቲዳ ኡባይ ሄሳ ቆፓናው ቤሴስ። ሂንቴፌ ባጋታስ ዱማቲያ ቆፊ ዴዒኮ፥ ሄሳካ ፆሳይ ሂንቴው ቆንጪሳና።
PHI 3:16 ጊዲኮካ፥ ኑኒ ሃኖ ጋካናው ዴዒዳ ዴዑዋን፥ ኣኔ ሲንꬄ ቦስ።
PHI 3:17 ታ ኢሻቶ፥ ታና ዳኒቴ፤ ሄሳዳካ፥ ኑ ሌሚሱዋ ካሊያ ኣሳታ ኣኬኪዲ ቤዒቴ።
PHI 3:18 ታኒ ሄሳ ሂንቴው ካሴ ዳሮ ቶሆ ኦዳስ፥ ሺን ሃዒካ ዛራዳ ኣፉꬃን ኦዳይስ። ኪሪስቶሲ ማስቃሊያ ቦላ ሃይቂዳይሳስ ባንታና ሞርኬ ኦꬂዳ ዳሮ ኣሳቲ ዴዖሶና።
PHI 3:19 ኤንታ ዉርሴꬃይ ꬋዮ፤ ኤንታ ኡሎይ ኤንታው ፆሴ። ዬላታናው ቤሲያባን ኤንቲ ጬቄቶሶና፤ ቃሲ ሃ ሳዓባ ፃላላ ቆፖሶና።
PHI 3:20 ኑ ቢታይ ሳሉዋና። ሳሎፔ ዪዲ ኑና ኣሻናው ዴዒያ ጎዳ ዬሱስ ኪሪስቶሳ ናጎስ።
PHI 3:21 ኪሪስቶሲ ኡባባ ባ ማታፔ ጋርሳን ኦꬃናው ዳንዳዒያ ባ ዎልቃን ኑ ዳቡራንቾ ኣሳቴꬃ ላሚዲ ባ ቦንቾ ኣሳቴꬃ ዳኒሳና።
PHI 4:1 ታ ኢሻቶ፥ ታ ዶሴይሳቶ፥ ታ ላሞቴይሳቶ፥ ታና ኡፋይሴይሳቶ፥ ታና ጊታዬይሳቶ ሂዛ ጎዳን ሚኒዲ ኤቂቴ።
PHI 4:2 ኤዎዲኔ ሲንፂካ፥ ሂንቴ ናምዓይ፥ ኢሲ ቆፋን ሚቺዳ ጎዳን ዳናዳ ታኒ ሂንቴና ዞራይስ።
PHI 4:3 ታራ ኦꬂያ ኣማንꬄይሶ፥ ኔኒ ሃ ማጫሳታ ማዳና ሜላ ታ ኔና ዎሳይስ። ሃ ማጫሳቲ ታራ፥ ቄሌሚንፆሳራኔ ኤንታ ሱንꬃይ ፆሳ ዴዖ ማፃፋን ፃፌቲዳ ሃራታራ ኢሲፌ ዎንጌላ ኡባ ቤሳ ጋꬃናው ዳቡሪዶሶና።
PHI 4:4 ጎዳራ ሂንቴ ዴዒያ ዴዑዋን ኡባ ዎዴ ኡፋይቲቴ። ታኒ ሄሳ ጉጃዳካ ኦዳይስ፤ ኡፋይቲቴ።
PHI 4:5 ኣሳ ኡባይ ሂንቴ ኣሽኬቴꬃ ኤሮ፤ ጎዳይ ማታን ያና።
PHI 4:6 ፆሳ ሂንቴ ዎሲያ ዎዴ ኡባን ኢያ ጋላቲሼ፥ ሂንቴና ኮሺያባ ኡባስ ዎሲቴፔ ኣቲን ኣይቢባስካ ሂርጎፊቴ።
PHI 4:7 ኣሳ ኤራቴꬃ ኡባፌ ኣꬊያ ፆሳ ሳሮቴꬃይ፥ ሂንቴ ዎዛናኔ ሂንቴ ቆፋ ጎዳ ዬሱስ ኪሪስቶሳ ባጋራ ናጋና።
PHI 4:8 ዉርሴꬃን፥ ታ ኢሻቶ፥ ሂንቴ ዎዛናን ሎዖባኔ ጋላቲሲያባ ቆፒቴ። ቱማ ጊዲያባ ኡባ፥ ቦንቾባ ኡባ፥ ቆሆ ጊዶናባ ኡባ፥ ጌሻባ ኡባ፥ ሲቆባ ኡባኔ ኡፋይሲያባ ኡባ ቆፒቴ።
PHI 4:9 ሂንቴ ታፔ ታማሪዳባ፥ ኤኪዳባ፥ ሲዒዳባኔ ቤዒዳባ ኡባ ኦꬂቴ። ሳሮቴꬃ ኢሚያ ፆሳይ ሂንቴራ ኢሲፌ ጊዳና።
PHI 4:10 ዳሮ ዎዴፔ ጉዬ፥ ሂንቴ ታባ ዛሪዲ ቆፓናው ዶሚዳ ጊሾ ታኒ ጎዳን ዳሮ ኡፋይታይስ። ሄሳ ጉሳይ፥ ታው ቆፓናው ሂንቴው ኢንጄቶና ኢፂዳይሳፌ ኣቲን ታው ቆፋ ኣጊቤኬታ።
PHI 4:11 ታኒ ሄሳ ታና ሜቲዳ ጊሾ ጊኬ፤ ታው ዴዒያባይ ጊዳና ጉሱ ታማራስ።
PHI 4:12 ታኒ ሜቶቴቲዲ ዴዒያ ዱሲ ኤራይስ፤ ቃሲ ዱሬቲዲ ዴዒያ ዱሲካ ኤራይስ። ኣዉን ጊዲን ቃሲ ኣይ ዎዴካ ታኒ ካሎኔ ኮሻ፥ ፓጬኔ ፓላሃ ታማራስ።
PHI 4:13 ኪሪስቶሲ ታው ኢሚያ ዎልቃን ኡባባ ኦꬃናው ዳንዳዓይስ።
PHI 4:14 ጊዲኮካ፥ ሂንቴ ታ ሜቱዋ ታራ ኤኪዳይሳን ሎዖ ኦꬂዴታ።
PHI 4:15 ፊልጲሲዩሳ ኣሳው፥ ዎንጌላ ኮይሮ ኦዳናው ታኒ ማቄዶኒያፔ ኬያ ዎዴ ኢሚያባንካ ኤኪያባንካ ሂንቴ ዎሳ ኬꬃፌ ኣቲን ሃሪ ታና ማዲቦናይሳ ሂንቴ ኤሬታ።
PHI 4:16 ቴሴሎንቄን ሜቶይ ጋኪዳ ዎዴካ ታና ዛሪ ዛሪዲ ማዲዴታ።
PHI 4:17 ታኒ፥ ሂንቴፌ ኢሞታ ኤካናው ኮያዳ ጊዶናሺን ኢሞፔ ያ ኣንጁዋ ሂንቴ ኤካና ሜላሳ።
PHI 4:18 ታኒ፥ ሂንቴ ኢሚዳ ኡባኔ ጊዲዲ ፓላሄይሳ ኤካስ። ሂንቴ ዬዲዳ ኡባ ኤጳፊራዲቱሳፔ ኤካስ፤ ኮሺያባ ኡባይ ታው ዴዔስ። ሂንቴ ታው ዬዲዳ ኢሞይ ፆሳስ ሳዎ ቶንጉ ጊያ፥ ኢ ዶሲያ፥ ኢ ኡፋይቲያ ያርሾ ሜላ።
PHI 4:19 ታ ፆሳይ ባ ቦንቾ ዱሬቴꬃፌ፥ ኪሪስቶስ ዬሱሳ ባጋራ ሂንቴው ኮሺያባ ኡባ ኢማና።
PHI 4:20 ኑ ኣዋ ፆሳስ ሜሪናፔ ሜሪና ጋካናው ቦንቾይ ጊዶ። ኣሚንዒ።
PHI 4:21 ኪሪስቶስ ዬሱሳ ባጋራ ፆሳባ ጊዲዳ ኡባ ሳሮ ጊቴ። ታራ ዴዒያ ኢሻቲ ሂንቴና ሳሮ ጎሶና።
PHI 4:22 ፆሳባ ጊዲዳ ኣሳ ኡባይ፥ ኡባፌ ኣꬂዲ ካዉዋ ቄሳሬ ኬꬃን ዴዔይሳቲ ሂንቴና ሳሮ ጎሶና።
PHI 4:23 ጎዳ ዬሱስ ኪሪስቶሳ ኣꬎ ኬሃቴꬃይ ሂንቴራ ጊዶ።
COL 1:1 ፆሳ ሼኔን ኪሪስቶሲ ዬሱሳ ሃዋሬ ጊዲዳ ጳዉሎሲኔ ኑ ኢሻ ፂሞቲዮሲ፥
COL 1:2 ቆላሲያሳ ካታማን ዴዒያ ኪሪስቶሳን ጌሻታሲኔ ኣማኔቲዳ ኣሳስ ፃፊዳ ኪታ። ፆሳ ኑ ኣዋፔ ኣꬎ ኬሃቴꬃይኔ ሳሮቴꬃይ ሂንቴው ጊዶ።
COL 1:3 ኑኒ ሂንቴው ዎሲያ ዎዴ ፆሳ ኑ ጎዳ፥ ዬሱስ ኪሪስቶሳ ኣዋ ኡባ ዎዴ ጋላቶስ።
COL 1:4 ኑኒ ኪሪስቶስ ዬሱሳን ዴዒያ ሂንቴ ኣማኑዋኔ ጌሻታ ኡባስ ዴዒያ ሂንቴ ሲቁዋ ሲዒዳ።
COL 1:5 ሄሳ ሂንቴ ኦꬂዳይ ሂንቴ ኡፋይሳይ ሳሎን ሂንቴው ናጌቲዳ ጊሾሳ። ሂንቴ ቱማ ኪታ ጊዲዳ ዎንጌላ ኮይሮ ኣማኒዳ ዎዴ ሄ ኡፋይሳ ሲዒዴታ።
COL 1:6 ሂንቴ ሄ ዎንጌላ ሲዒዳ ዎዴኔ ፆሳ ኣꬎ ኬሃቴꬃ ቱማ ሻኪ ኤሪዳ ዎዴፔ ዶሚዲ ሂንቴ ጊዶን ሃኒዳይሳዳ ቢታ ኡባን ዲጪሼኔ ኣይፊሼ ዴዔስ።
COL 1:7 ሂንቴ ሄሳ ኑራ ኢሲፌ ኪሪስቶሳስ ኦꬂያ ኣማኔቲዳ፥ ዶሴቲዳ ኤጳፊራፔ ታማሪዴታ።
COL 1:8 ኢ ሄሳ ቦላ ጉጂዲ ኣያናይ ሂንቴው ኢሚዳ ሲቁዋባ ኑስ ኦዲስ።
COL 1:9 ሄሳ ጊሾ፥ ኑኒ ሂንቴባ ሲዒዳ ጋላሳፔ ዶሚዲ፥ ፆሳይ ባ ሼኒያ ሂንቴና ቤሳና ሜላኔ፥ ጌሻ ኣያናይ ኢሚያ ኤራቴꬃኒኔ ጪንጫቴꬃ ኡባን ሂንቴና ኩንꬃና ሜላ ኡባ ዎዴ ሂንቴው ፆሳ ዎሶስ።
COL 1:10 ሄሳዳካ፥ ጎዳይ ኮዬይሳዳ ሂንቴ ዳና ሜላ፥ ኡባ ዎዴ ኢያ ኡፋይሳና ሜላ፥ ሎዖ ኦሶ ኡባን ሂንቴ ኣይፌ ኣይፋና ሜላኔ ፆሳ ኣꬂ ኤሪሼ ዲጫና ሜላ ፆሳ ዎሶስ።
COL 1:11 ፆሳ ቦንቾ ዎልቃይ ሂንቴ ኡባባ ጌንጫናዳኔ ዳንዳዓናዳ ባ ሚኖቴꬃ ኢሚዲ ሂንቴና ኡፋይሶ።
COL 1:12 ቃሲ ጌሻታ ፖዖ ካዎቴꬃ ላታና ሜላ ሂንቴና ኦꬂዳ ኣዋ ጋላቲቴ።
COL 1:13 ኢ ኑና ꬉማ ዎልቃፌ ኣሺዲ ባ ዶሲያ ናዓ ካዎቴꬃኮ ኤሂስ።
COL 1:14 ኢያን ዎዜቲዲ ኢያ ሱꬃን ናጋራ ኣቶቴꬂ ዴሚዳ።
COL 1:15 ኪሪስቶሲ ቤንቶና ፆሳስ ቱማ ሌሚሶ። ኢ ሜꬌቴꬃ ኡባፌ ባይራ።
COL 1:16 ኡባባይ ኢያ ባጋራ ሜꬌቲስ። ቤንቲያባቲኔ ቤንቶናባቲ፥ ዎልቃቲኔ ጎዳቲ፥ ሃሬይሳቲኔ ማታ ኣዋቲ፥ ሳሎኒኔ ሳዓን ዴዒያ ኡባይ ኢያዉኔ ኢያ ባጋራ ሜꬌቲስ።
COL 1:17 ኢ ኡባባፔ ካሴ ዴዔስ። ኡባባይ ኢያን ባ ቤሳን ቤሳን ኦይኬቲዲ ዴዔስ።
COL 1:18 ኢ ባ ኣሳቴꬂ ጊዲዳ ዎሳ ኬꬃስ ሁዔ። ኢ ኡባፌ ቦላ ጊዳናው ሃይቆፔ ዴንዶን ሲንꬄኔ ባይራ።
COL 1:19 ፆሳይ ባ ኩሜꬃ ፆሳቴꬃራ ኢያን ዳናው ኮዪስ።
COL 1:20 ቃሲ ማስቃሊያ ቦላ ጉሲዳ ባ ናዓ ሱꬃን ሳሮቴꬂ ሜꬊዲ ሳሎኒኔ ሳዓን ዴዒያ ኡባ ኢያ ባጋራ ባራ ሲጌꬂስ።
COL 1:21 ሃይሳፌ ካሴ ሂንቴ ቆፋ ኢታቴꬃይ ሂንቴና ፆሳፌ ሻኪሲኔ ኢያራ ሞርኬ ኦꬂስ፤ ሂንቴ ኦሶይካ ኢታ።
COL 1:22 ሺን ሃዒ ኪሪስቶሲ ኣሾን ሃይቂዳ ሃይቁዋ ባጋራ ፆሳይ ሂንቴና ባራ ሲጌꬂዲ፥ ጌሻታ፥ ቦሬይ ባይናይሳታኔ ፂሎታ ኦꬂስ።
COL 1:23 ሂንቴ፥ ሂንቴ ኣማኑዋን ቃፆና ሚኒዲኔ ፃጲዲ ዳናው ቤሴስ። ሂንቴ ዎንጌላ ቃላ ሲዒዳ ዎዴ ኤኪዳ ኡፋይሳ ሚንꬂ ኦይኪቴ። ሄ ዎንጌላይ ሂንቴ ሲዒዳይሳኔ ቢታ ኡባን ሳባኬቲዳይሳ። ታ፥ ጳዉሎሲካ ሃ ዎንጌላስ ኦሳንቾ ጊዳስ።
COL 1:24 ታኒ ሂንቴ ጊሾ ሃዒ ኤኪያ ዋያን ኡፋይታይስ። ኪሪስቶሲ ኢያ ኣሳቴꬂ ጊዲዳ ዎሳ ኬꬃስ ኤኪዳ ዋያ ታኒ ታ ኣሹዋን ፖላይስ።
COL 1:25 ፆሳ ቃላ ሂንቴው ፖላዳ ኦዳና ሜላ ታው ኢሜቲዳ ማታን ዎሳ ኬꬃስ ኦሳንቾ ጊዳስ።
COL 1:26 ሃ ቃላይ ካሴ ኣꬊዳ ዎዲያን ዬሌቴꬃ ኡባፌ ጌሚዲ ዴዒስ። ሺን ሃዒ ፆሳይ ሃ ፁራ ኣማኒያ ኡባስ ቆንጪሲስ።
COL 1:27 ፆሳይ ኣይሁዴ ጊዶና ኣሳ ጊዶን ሃ ፁራ ቦንቾ ዱሬቴꬃ ቆንጪሲስ። ኢካ ቦንቾ ኡፋይሲ ጊዲዳ ሂንቴ ጊዶን ዴዒያ ኪሪስቶሳ።
COL 1:28 ሄሳ ጊሾ፥ ኢሲ ኢሲ ኣሲ ኪሪስቶሳን ኩሜꬃ ኣሲ ኦꬂዲ ሺሻናው ጪንጫቴꬃ ኡባን ኣሳ ታማርሶኒኔ ዞሬን ኪሪስቶሳባ ሳባኮስ።
COL 1:29 ፆሳይ ባ ጊታ ዎልቃን ታናን ኦꬂያ ጊሾ ሃዒ ጋካናው ኢያ ዎልቃን ባፄታይሲኔ ዳቡራይስ።
COL 2:1 ታ ሂንቴዉኔ ሎዶቂያ ካታማን ዴዒያ ኣሳስ፥ ሄሳዳካ ታና ኣይፌን ቤዒቦና ኣሳ ኡባስ ኣይ ሜላ ባፄቲያኮ ሂንቴ ኤራና ሜላ ኮያይስ።
COL 2:2 ታ ባፄቲያ ጋሶይካ ኤንቲ ባንታ ዎዛናን ሚኒዲ፥ ሲቆን ቃሼቲዲ፥ ፖሎ ጊዲዳ ኩሜꬃ ኣኬካ ዱሬቴꬃ ዴሚዲ ፆሳ ፁራ ኪሪስቶሳ ኤራና ሜላሳ።
COL 2:3 ኢያን ፆሳይ ሚንጂዳ ኤራይኔ ጪንጫቴꬃ ኡባይ ዴዔስ።
COL 2:4 ታ ሄሳ ኦኒካ ሂንቴና ጪሞ ቃላን ባሌꬆና ሜላ ኮያዳ ጋይስ።
COL 2:5 ታ ሂንቴፌ ሃካዳ ዴዒኮካ ኣያናን ሂንቴራ ዴዓይስ። ሂንቴ ዱሳ ማራኔ ኪሪስቶሳ ሂንቴ ሚኒዲ ኣማኔይሳ ቤዓዳ ኡፋይታይስ።
COL 2:6 ሂንቴ ጎዳ ኪሪስቶስ ዬሱሳ ኤኪዳይሳዳ ኢያን ዴዒቴ።
COL 2:7 ኢያን ፃጶ ዬዲቴ፤ ኢያን ኬፄቲቴ። ሂንቴ ታማሪዳይሳዳ ኣማኖን ሚኒቴ፤ ፆሳስ ኩሚዲ ፓላሂዳ ጋላታ ኢሚቴ።
COL 2:8 ኪሪስቶሳፔ ጊዶናሺን ኣሳ ዎጋኒኔ ሃ ኣላሚያ ጮ ዎጋን ካቲዳ ቲሚርቲያኒኔ ኣሳፔ ዪዳ ኤራቴꬃን ኦኒካ ሂንቴና ጪሚ ባሌꬂዲ ዲዖና ሜላ ናጌቲቴ።
COL 2:9 ፆሳ ፆሳቴꬃይ ኪሪስቶሳ ኣሳቴꬃን ኩሜꬂ ዴዔስ።
COL 2:10 ሂንቴካ ማታሲኔ ዎልቃ ኡባስ ሁዔ ጊዲያ ኪሪስቶሳን ኩሚዴታ።
COL 2:11 ሂንቴ ኪሪስቶሳ ኣማኒዲ ቃፃሬቲዴታ። ሄሲካ ኣሳ ኩሼን ጊዶናሺን ሂንቴና ኢታ ሃኖቴꬃፌ ዲጊያ ኪሪስቶሳን ኦሴቲዳ ቃፃሬቴꬂ።
COL 2:12 ሂንቴ ፃማቄቲዳ ዎዴ ኪሪስቶሳራ ኢሲፌ ሞጌቲዲ፥ ኪሪስቶሳ ሃይቆፔ ዴንꬂዳ ፆሳ ዎልቃ ኣማኒዲ፥ ኪሪስቶሳራ ኢሲፌ ዴንዲዴታ።
COL 2:13 ሂንቴ፥ ሂንቴ ናጋራ ጊሾኔ ሂንቴ ጬጋ ኣሳቴꬃ ቃፃሬቶና ጊሾ ሃይቂዲ ዴዒሺን፥ ፆሳይ ሂንቴ ናጋራ ኣቶ ጊስ። ኪሪስቶሳራ ሂንቴው ዴዖ ኢሚስ።
COL 2:14 ኢ ኑና ሞቲያኔ ኑራ ኤቄቲያ፥ ኑ ቦላ ፃፌቲዳ ኣጩዋ ዳኪዲ ማስቃሊያ ቦላ ꬊሺዲ ኦጌፔ ዲጊስ።
COL 2:15 ኪሪስቶሲ ዎልቃታኔ ማታታ ማስቃሊያን ፆኒዲ፥ ኤንታ ኦላ ዳንጩዋ ቢሊሲዲ፥ ዲዔቲዳ ኣሳዳ ኦꬂዲ ኤንታ ቆንጬን ዩሺዲ ቤሲስ።
COL 2:16 ሄሳ ጊሾ፥ ሚያባን ዎይኮ ኡያባን፥ ባሌ ጋላስ ዎይኮ ኣጌኒ ፄሪያ ቃማ ቦንቾን ኦኒካ ሂንቴ ቦላ ፒርዶፎ።
COL 2:17 ሃይሳቲ ሲንꬃፌ ያናው ዴዒያባታስ ኤሾ፥ ሺን ቱማይ ኪሪስቶሳ።
COL 2:18 ቆꬌፔ ቆሞ ኣሽኬቴꬃኒኔ ኪታንቾ ጎይኖን ጬቄቲያ ኦኒካ ሂንቴና ሂንቴ ዎይቱዋፔ ኣሾፎ። ሄሳ ሜላ ኣሲ ባ ቤዒዳ ቆንጬꬃን ናሼቲሼ ባ ኣሾ ቆፋን ጮ ኦቶርቴስ።
COL 2:19 ሄሳ ሜላ ኣሳስ ሁዔ ጊዲዳ ኪሪስቶሳራ ጋሄቴꬂ ባዋ። ኢ ኣሳቴꬃ ኡባ ሻያኒኔ ኬሶን ኬሶን ጋꬂ ኦይꬂዲ ሙዚዲ ዲቼስ። ፆሳይ ሄሳ ሜላ ኦጌን ኣሳቴꬃ ኡባስ ዲቺ ኢሜስ።
COL 2:20 ሂንቴ ኪሪስቶሳራ ሃይቂዲ ሃ ኣላሚያ ሃሪያ ኣያናታ ዎልቃፌ ላዓ ኬዪዴታ። ያቲን፥ ኣይስ ሻኬቶና ኣሳዳ ጊዲዲ ሃ ዎጋታስ ሃሬቴቲ?
COL 2:21 ሃ ዎጋቲ፥ «ኦይኮፋ፤ ላጮፋ፤ ቦቾፋ» ጌቴቴይሳታ።
COL 2:22 ሃ ኡባይ ኣሳ ዎጋኔ ቲሚርቴ ጊዲያ ጊሾ ኦሶ ቦላ ፔዒዳፔ ጉዬ ꬋያና።
COL 2:23 ሃ ኪታቲ ቦንቾኔ ጪንጫቴꬂ ዳኒዲ ቤንታናው ዳንዳዖሶና። ሃ ዎጋቲ ፆሴ ዳሮ ዶሲሲያባ፥ ኣሽኬኔ ሂንቴ ኣሳቴꬃ ሃሪሲያባ ዳኖሶና፥ ሺን ኑ ኢታ ኣሞቴꬃ ቦላ ዎልቂ ኤንታው ባዋ።
COL 3:1 ሂዛ፥ ሂንቴ ኪሪስቶሳራ ሃይቆፔ ዴንዲዳይሳዳ፥ ፆሳፌ ኡሻቻ ባጋን ኡቲዳ ኪሪስቶሲ ዴዒያ ቤሳን፥ ሳሎን ዴዒያባታ ኮዪቴ።
COL 3:2 ሳሎን ዴዔይሳታ ቦላ ሂንቴ ቆፋ ዎꬂቴፔ ኣቲን ሳዓን ዴዒያባታ ቦላ ዎꬆፊቴ።
COL 3:3 ሂንቴ ሃይቆን ሻኬቲዳ ሜላ ሃ ኣላሚያፔ ሻኬቲዴታ። ሂንቴ ዴዖይ ኪሪስቶሳራ ኢሲፌ ፆሳን ጌሚስ።
COL 3:4 ሂንቴው ዴዖ ጊዲዳ ኪሪስቶሲ ቆንጪያ ዎዴ ሄ ዎዴ ሂንቴካ ኢያራ ቦንቾን ቆንጫና።
COL 3:5 ሄሳ ጊሾ፥ ሂንቴናን ዴዒያ ኣላሜ ኣሞታ ዎꬊቴ። ሄሳቲካ ላይማቴꬂ፥ ቱናቴꬂ፥ ላይማታናው ኣሞቴꬂ፥ ኤቃ ጎይኖ ሜላ ጊዲዳ ኡዜቴꬂ።
COL 3:6 ሃይሳታ ጋሶን ፆሳ ሃንቆይ ኪቴቶና ኣሳ ቦላ ያና።
COL 3:7 ሂንቴካ ካሴ ሄ ኢታ ኦጊያን ቢያ ኣሳ ጊዶን ዴዒሼ ሃይሳታ ኦꬂዴታ።
COL 3:8 ሃዒ ሂንቴ ሄሳታ ኦꬆፊቴ። ቃሲ ሃንቆ፥ ኢፆ፥ ካቺ፥ ዚጊርሲኔ ቦርሶ ኦዳ ሂንቴፌ ዲጊት።
COL 3:9 ጬጋ ኣሳቴꬃ ኢያ ኦሱዋራ ሂንቴፌ ቃሪዳ ጊሾ ኢሶይ ኢሱዋስ ዎርዶቶፒቴ።
COL 3:10 ፆሳ ሜꬎ ዳኒያ፥ ኤራቴꬃን ላሜቲዳ ኦራꬃ ኣሳቴꬃ ማዒቴ።
COL 3:11 ሃ ኦራꬃ ሜꬌቴꬃን፥ ጊሪኬ ኣሲ ዎይኮ ኣይሁዴ ኣሲ፥ ቃፃሬቲዳይ ዎይኮ ቃፃሬቶናይ፥ ባርባሬ ኣሲ ዎይኮ ኢስኩቴ ኣሲ ኣይሌይ ዎይኮ ዎማኖይ ባዋ። ኪሪስቶሲ ኡባ፤ ኢ ኡባን ዴዔስ።
COL 3:12 ሄሳ ጊሾ፥ ፆሳን ዶሬቲዳ ኣሳዳ ጌሻታኔ ዶሴቲዳይሳታ ጊዲዲ፥ ማሮቴꬃ፥ ኬሃቴꬃ፥ ኣሽኬቴꬃኔ ዳንዳዓ ማዒቴ።
COL 3:13 ኢሶይ ኢሱዋ ዳንዳዒቴ። ኦኒካ ባ ላጊያን ቆሄቲዳባይ ዴዒኮ ኢያው ኣቶ ጎ። ጎዳይ ሂንቴው ኣቶ ጊዳይሳዳ ሂንቴካ ዎሊስ ኣቶ ጊቴ።
COL 3:14 ሄ ኡባ ቦላ ኡባባ ኢሲፌ ሺሺዲ ቃቺያ ሲቆ ማዒቴ።
COL 3:15 ፆሳይ ሂንቴና ኢሲ ኣሲ ኦꬂዲ ፄጊዳይ፥ ሳሮቴꬃስ ጊዲያ ጊሾ ኪሪስቶሳ ሳሮቴꬃይ ሂንቴ ዎዛና ሃሮ።
COL 3:16 ኪሪስቶሳ ቃላይ ሂንቴ ዎዛናን ኩሚዲ ዴዖ። ጪንጫቴꬃ ኡባን ኢሶይ ኢሱዋ ታማርሲቴኔ ዞሪቴ። ማዝሙሬን፥ ሳባኒኔ ኣያና ዬꬃን ፆሳ ዎዛናፔ ጋላቲሼ ዬፂቴ።
COL 3:17 ፆሳ ኣዋ ዬሱሳ ባጋራ ጋላቲሼ ሂንቴ ኦዴቲያባ ዎይኮ ኦꬂያባ ኡባ ጎዳ ዬሱሳ ሱንꬃን ኦꬂቴ።
COL 3:18 ማቼቶ፥ ኣማኒያ ኣሳስ ቤሲያባ ጊዲያ ጊሾ ሂንቴ ኣዚናታስ ሃሬቲቴ።
COL 3:19 ኣዚናቶ፥ ሂንቴ ማቼታ ሲቂቴ፤ ኤንታው ኢቶፒቴ።
COL 3:20 ናይቶ፥ ሂንቴና ዬሊዳይሳታስ ኡባባን ኪቴቲቴ፤ ሄሲ ጎዳ ኡፋይሲያባ።
COL 3:21 ኣዋቶ፥ ሂንቴ ናይቲ ኡፋይሲ ቃንፆና ሜላ ኤንታ ጫሜꬆፊቴ።
COL 3:22 ኣይሌቶ፥ ሳዓን ሂንቴው ጎዳ ጊዲዳይሳታስ ኡባባን ኪቴቲቴ። ጎዳ ቦንቺሼ ሱሬ ዎዛናፔ ኪቴቲዲ ኤንታ ኡፋይሲቴፔ ኣቲን ኣሲ ቤዖ ጊዲ ኦꬆፊቴ።
COL 3:23 ሂንቴ ኦꬂያ ኦሶ ኡባ ኣሳስ ጊዶናሺን ጎዳስ ኦꬂያ ሜላ ዎዛናፔ ኦꬂቴ።
COL 3:24 ጎዳፔ ላታ ዎይቶ ኦꬂዲ ሂንቴ ኤኬይሳ ኤሪቴ፤ ሂንቴ ጎዳ ኪሪስቶሳ ሃጋዜታ።
COL 3:25 ፆሳይ ኣሳ ሶምዖ ቤዒዲ ፒርዶና ጊሾ ኦኒካ ኢታ ኦሶ ኦꬂኮ ባ ኢታ ኦሱዋ ጊሾ ዛሮ ኤካና።
COL 4:1 ጎዳቶ፥ ሂንቴዉካ ቃሲ ሳሎን ጎዳይ ዴዔይሳ ኤሪዲ፥ ሂንቴ ኣይሌታስ ፂሎቴꬃኒኔ ኢሱዋ ኢሱዋፌ ሻኮና ኮሺያባ ኦꬂቴ።
COL 4:2 ፆሳ ባርኪዲ ጋላቲሼ ቃንፆና ዎሲቴ።
COL 4:3 ፆሳይ ባ ቃላስ ፔንጌ ዶያና ሜላኔ ታኒ ሄሳ ጋሶን ቃሾን ዴዒያ ኪሪስቶሳ ፁራ ኣዋጃና ሜላ ኑስካ ዎሲቴ።
COL 4:4 ቃሲ ታካ ቤሴይሳዳ ቃላ ቆንጪሳዳ ኦዳና ሜላ ታው ፆሳ ዎሲቴ።
COL 4:5 ኢንጄቲያ ዎዴ ኡባ ጎዔቲሼ ኣማኖና ኣሳ ማታን ጪንጫቴꬃን ዴዒቴ።
COL 4:6 ሂንቴ ኣሳ ኡባስ ኮሺያ ዛሮ ኢሞ ኤራና ሜላ ሂንቴ ኦዳይ ኡባ ዎዴ ኣꬎ ኬሃቴꬃን ኩሚዳይሳኔ ማፂኔዳ ማልዒያባ ጊዳናው ቤሴስ።
COL 4:7 ኑ ሲቆ ኢሻይ ቲኪቆሲ፥ ታራ ኢሲፌ ጎዳ ኦሱዋን ኣይሌ ጊዲዳ፥ ኣማኔቲያ ኦሳንቾይ፥ ታ ዴዑዋባ ሂንቴው ኦዳና።
COL 4:8 ታኒ ኢያ ሂንቴኮ ኪቲዳይ፥ ኑ ዋኒዲ ዴዒያኮ ሂንቴው ኦዲዲ ሂንቴና ሚንꬄꬃና ሜላሳ።
COL 4:9 ኣናስሞሲ፥ ኣማኔቲያ ሲቆ ኢሻይ፥ ሂንቴ ባጋይ፥ ኢያራ ሂንቴኮ ቤስ። ኤንቲ ሃይሳን ሃኒያባ ኡባ ሂንቴው ኦዳና።
COL 4:10 ታራ ቃሼቲዳ ኣሪስፂሮኮሲኔ ባርናባሳ ኢሻ ናዓይ ማርቆሲ፥ ሂንቴና ሳሮ ያጎሶና። ታ ሂንቴው ካሴ ኦዲዳይሳዳ ማርቆሲ ሂንቴኮ ቢኮ ኢያ ሞኪቴ።
COL 4:11 ዬሱሳ ጊያ ያስፆሲ ሂንቴና ሳሮ ሳሮ ያጌስ። ፆሳ ካዎቴꬃ ጊሾ ታራ ኦꬂያ ኣሳታ ጊዶፌ ኣይሁዴ ጊዲዳይሳቲ ሃ ሄꬓታ፤ ኤንቲ ታና ዳሮ ሚንꬄꬂዶሶና።
COL 4:12 ሂንቴ ባጋይ፥ ኪሪስቶስ ዬሱሳ ኣይሌይ፥ ኤጳፊሪ ሂንቴና ሳሮ ሳሮ ያጌስ። ኢ ሂንቴ ፆሳ ሲንꬃን ሚኒዲ ኤቃናዳኔ ፆሳ ሼኒያ ኤሪዲ ፖላና ሜላ ኡባ ዎዴ ፆሳ ሂንቴ ጊሾ ዎሴስ።
COL 4:13 ኢ ሂንቴ ጊሾኔ ሎዶቂያኒኔ ሂራፖሊሳ ካታማን ዴዒያ ኣሳ ጊሾ ዳሮ ዳቡሪዳይሳ ታ ማርካታይስ።
COL 4:14 ኑ ሲቆ ኢሻይ ዶቶሬይ ሉቃሲኔ ዴማሲ፥ ሂንቴና ሳሮ ሳሮ ያጎሶና።
COL 4:15 ሎዶቂያን ዴዒያ ኑ ኢሻታስ፥ ኒምፋሲኔ ኢ ኬꬃን ሺቂያ ኣሳስ ኑ ሳሮꬁዋ ኦዲቴ።
COL 4:16 ሃ ዳብዳቢያ ሂንቴ ናባቢዳፔ ጉዬ፥ ሎዶቂያ ዎሳ ኬꬃን ናባቢሲቴ። ሂንቴካ ሎዶቂያ ዎሳ ኬꬃይ ሂንቴው ዬዲያ ዳብዳቢያ ናባቢቴ።
COL 4:17 ቃሲ ኣርኪጳሳ፥ «ጎዳይ ኔው ኢሚዳ ኦሱዋ ፖላናይሳ ዶጎፓ» ያጊዲ ቆፊሲቴ።
COL 4:18 ታኒ፥ ጳዉሎሲ፥ ሃ ሳሮꬁዋ ታ ኩሼን ፃፋስ። ታ ቃሹዋ ቆፒቴ። ፆሳ ኣꬎ ኬሃቴꬃይ ሂንቴራ ጊዶ።
1TH 1:1 ጳዉሎሲ ሲላሴይኔ ፂሞቲዮሲ ቴሴሎንቄ ዎሳ ኬꬃን ዴዒያ፥ ፆሳ ኣዋባኔ ጎዳ ዬሱስ ኪሪስቶሳባ ጊዲዳ ኣሳስ ፃፊዳ ኪታ። ኣꬎ ኬሃቴꬃይኔ ሳሮይ ሂንቴው ጊዶ።
1TH 1:2 ኑኒ ፆሳ ዎሲያ ዎዴ ኡባን ሂንቴና ቆፒሼ ሂንቴ ጊሾ ኡባ ዎዴ ፆሳ ጋላቶስ።
1TH 1:3 ፆሳ ኑ ኣዋ ሲንꬃን ኣማኖን ሂንቴ ኦꬂዳ ኦሱዋ፥ ሲቆን ሂንቴ ዳቡሪዳ ዳቡራኔ ዬሱስ ኪሪስቶሳን ዴዒያ ኡፋይሳ ኤካናው ሂንቴ ሚኒዲ ኤቂዳ ኤቁዋ ኡባ ዎዴ ቆፖስ።
1TH 1:4 ኑ ኢሻቶ፥ ፆሳይ ሂንቴና ዶሴይሳኔ ባ ኣሴ ኦꬂዲ ሂንቴና ዶሪዳይሳ ኤሮስ።
1TH 1:5 ኣይስ ጊኮ፥ ኑኒ ዎንጌላ ዶና ፃላላን ጊዶናሺን ዎልቃን፥ ጌሻ ኣያናኒኔ ዎንጌላ ቱማ ኣማኖን ሂንቴው ኤሂዳ። ኑኒ ሂንቴራ ጋምዒዳ ዎዴ ኡባን ሂንቴ ጊሾ ዋኒዲ ዴዒዳኮ ሂንቴ ኤሬታ።
1TH 1:6 ሂንቴ ዳሮ ሜቶ ኤኪኮካ ጌሻ ኣያናይ ኢሚያ ኡፋይሳን ኪታ ኤኪዴታ፤ ኑናኔ ጎዳ ዳኒዴታ።
1TH 1:7 ሄሳ ጊሾ፥ ማቄዶኒያኔ ኣካያ ቢታን ዴዒያ ኣማኒያ ኡባስ ሌሚሶ ጊዲዴታ።
1TH 1:8 ጎዳ ቃላይ ሂንቴፌ ኬዪዲ፥ ማቄዶኒያኒኔ ኣካያ ፃላላን ጊዶናሺን ፆሳ ሂንቴ ኣማኔይሲ ኡባሶን ሲዔቲስ። ሂዛ፥ ኑኒ ጋናባይ ኣይኮይካ ባዋ።
1TH 1:9 ኑኒ ሂንቴኮ ቢዳ ዎዴ ሂንቴ ኑና ሞኪዳ ሞኩዋኔ ሂንቴ፥ ሂንቴ ኤቃ ኣጊዲ ቱማኔ ዴዖ ፆሳ ሃጋዛናው ሂንቴ ሲሚዳይሳ ኤንቲ ባንታ ሁዔን ኦዶሶና።
1TH 1:10 ቃሲ ፆሳ ናዓይ፥ ዬሱሲ፥ ፆሳይ ሃይቆፔ ዴንꬂዳይሲ፥ ሲንꬃፌ ያና ፆሳ ሃንቁዋፌ ኑና ኣሻናይሲ፥ ሳሎፔ ያናይሳ ሂንቴ ናጌይሳ ኤንቲ ማርካቶሶና።
1TH 2:1 ታ ኢሻቶ፥ ኑኒ ሂንቴኮ ቢዳይ ሜላ ጊዶናይሳ ሂንቴ፥ ሂንቴ ሁዔን ኤሬታ።
1TH 2:2 ሺን ኑኒ ሂንቴኮ ቴሴሎንቄ ያናፔ ሲንꬄ ፊልጲሲዩሳ ካታማን ዋዬቲዳይሳኔ ጫዬቲዳይሳ ሂንቴ ኤሬታ። ዳሮ ኢፆይ ዴዒኮካ ሂንቴው ኢያ ዎንጌላ ኦዳና ሜላ ፆሳይ ኑስ ሚኖቴꬂ ኢሚስ።
1TH 2:3 ኑኒ ሂንቴና ዞሪዳይ ባሌሶን ዎይኮ ጪሞን ዎይኮ ጌኔን ጊዴና።
1TH 2:4 ሺን ፆሳይ ኑናን ኣማኔቲዲ ባ ዎንጌላ ኦዳና ሜላ ኑስ ሃዳራ ኢሚዳ ጊሾ ኦዶስ። ኑ ሄሳ ኦꬄይ ኑ ዎዛና ቤዒያ ፆሳ ኡፋይሳናሳፌ ኣቲን ኣሴ ኡፋይሳናሳ ጊዴና።
1TH 2:5 ኑ ሚሼ ያሪዲ ዎርዶ ሂንቴና ሳቢሼ ሂንቴኮ ዮናይሳ ሎይꬂዲ ኤሬታ፤ ፆሳይ ኑስ ማርካ።
1TH 2:6 ኑኒ ሂንቴፌ ጊዲን ዎይኮ ሃራ ኣሳ ኦዴፌካ ቦንቾ ኮዪቦኮ።
1TH 2:7 ኑኒ ኪሪስቶሳ ሃዋሬ ጊዴይሳዳ ኑስ ኮሺያባ ኢሚቴ ጊዲ ኤካናው ዳንዳዖስ፥ ሺን ኣያ ባ ናይታ ዲቼይሳ ሜላ ሂንቴ ጊዶን ኣሽኬ ጊዲዳ።
1TH 2:8 ኑ ሂንቴና ዶሲዳ ጊሾ ፆሳ ዎንጌላ ሂንቴው ሻኮ ፃላላ ጊዶናሺን ኑ ዴዑዋካ ሂንቴው ኢማናው ጊጊዳ። ሂንቴ ኑስ ዳሮ ኣልዖ።
1TH 2:9 ኑ ኢሻቶ፥ ኑ ኦሱዋኔ ኑ ዳቡራ ኤሬታ። ሂንቴው ፆሳ ዎንጌላ ኦዲሼ፥ ሂንቴና ዋይሶና ሜላ ቃማኔ ጋላስ ኦꬂዳ።
1TH 2:10 ኑ ዴዖይ ሂንቴ ኣማኔይሳታ ማታኒኔ ፆሳ ሲንꬃን ጌሺ፥ ፂሎኔ ቦሬቶናይሳ ጊዴይሳስ ሂንቴ ማርካ።
1TH 2:11 ኑኒ ሂንቴው ሁዔን ሁዔን ዬሊዳይሳቲ ባንታ ናይታስ ሃኔይሳዳ ሃኒዳይሳ ኤሬታ።
1TH 2:12 ኑ ሂንቴና ዞሪዳ፥ ሚንꬄꬂዳ። ቃሲ ባ ካዎቴꬃኔ ባ ቦንቹዋ ሻካናው ሂንቴና ፄጊያ ፆሳ ኡፋይሲያ ዴዖ ሂንቴ ዳና ሜላ ሂንቴው ሚንꬂዲ ኦዲዳ።
1TH 2:13 ሂንቴው ኑኒ ፆሳ ቃላ ኦዲዳ ዎዴ ኣሳ ቃላዳ ጊዶናሺን ፆሳ ቃላዳ ሲዒዲ ኤኪዳ ጊሾ ኑኒ ኡባ ዎዴ ፆሳ ጋላቶስ። ኢ ቱማ ፆሳ ቃላ፤ ፆሳ ቃላይ ኣማኒያ ሂንቴናን ኦꬄስ።
1TH 2:14 ታ ኢሻቶ፥ ሂንቴ ዪሁዳ ቢታን ዴዒያ ዎሳ ኬꬃታኔ ያን ኪሪስቶስ ዬሱሳ ካሊያ ኣሳታዳ ሃኒዴታ። ኤንታ ኣይሁዴቲ ዋይሲዳይሳዳ ሂንቴናካ ሂንቴ ቢታ ኣሳይ ዋይሲዶሶና።
1TH 2:15 ሄ ኣይሁዴቲ ጎዳ ዬሱሳኔ ናቤታ ዎꬊዶሶና፤ ቃሲ ኑና ጎዲዶሶና። ኤንቲ ፆሳ ኡፋይሶናይሳታኔ ኣሴ ኡባ ኢፄይሳታ።
1TH 2:16 ኤንቲ ሃሪ ኣቶሺን፥ ኣይሁዴ ጊዶና ኣሳይ ኣታና ሜላ ኑኒ ኤንታው ቃላ ኦዴይሳ ዲጎሶና። ሄሳዳ ሃኒዲ ኤንታ ናጋራ ፁዓይ ኩማና ጋካናው ኡባ ዎዴ ናጋራ ኦꬆሶና። ዉርሴꬃን፥ ፆሳ ሃንቆይ ኤንታ ቦላ ዎꬌስ።
1TH 2:17 ሺን ኑ ኢሻቶ፥ ኑኒ ኑ ቆፋን ጊዶናሺን ኣሾን ሂንቴፌ ሻኬቲዲ ጉꬃ ዎዴ ጋምዒዳይሳን ሂንቴና ዳሮ ላሞቲዲ ቤዓናው ኮዪዳ።
1TH 2:18 ኑ ሲሚ ሂንቴኮ ባናው ኮዪዳ። ታኒ ታ ሁዔን ሂንቴኮ ባናው ኮያስ፥ ሺን ፃላሄይ ኑና ዲጊስ።
1TH 2:19 ሂዛ፥ ኑ ጎዳ ዬሱስ ኪሪስቶሲ ያ ዎዴ ኑ ኡፋይሳይ ዎይኮ ኑ ጬቄቲያ ኑ ካላቻይ ኦኔ? ሂንቴና ጊዴኬቲዬ?
1TH 2:20 ቱማ ሂንቴ ኑ ቦንቾኔ ኑ ኡፋይሲ።
1TH 3:1 ሄሳ ጊሾ፥ ኑስ ጌንጫናው ዳንዳዔቶና ኢፂን፥ ኣቴና ካታማን ኑርካ ኣታናው ቆፋ ቃቺዳ።
1TH 3:2 ሂንቴና ዞራናዳኔ ኣማኖን ሂንቴና ሚንꬄꬃናዳ ኑራ ኢሲፌ ፆሳስ ኦꬄይሳኔ ኪሪስቶሳ ዎንጌላ ኦዲያ ኑ ኢሻ ፂሞቲዮሳ ሂንቴኮ ኪቲዳ።
1TH 3:3 ሂንቴና ጋኪዳ ጎዳን ሂንቴፌ ኦኒካ ጉዬ ሲሞፎ። ሄ ጎዳይ ኑስ ፆሳ ሼኔ ጊዴይሳ ሂንቴ፥ ሂንቴ ሁዔን ኤሬታ።
1TH 3:4 ኑ ሂንቴራ ዴዒያ ዎዴ ጎዲ ጋካናይሳ ሂንቴው ኮይሮቲዲ ኦዲዳ። ሂንቴ ኤሬይሳ ሜላ ሄሳዳ ሃኒስ።
1TH 3:5 ሄሳ ጊሾ፥ ታው ጌንጫናው ዳንዳዔቶና ኢፂን፥ «ኦኒ ኤሪ ፃላሄይ ኤንታ ፓጪዲ ኑ ዳቡራ ሜላ ኣሾና ኣጌና» ጋዳ ሂንቴ ኣማኑዋባ ኤራናው ፂሞቲዮሳ ሂንቴኮ ኪታስ።
1TH 3:6 ሃዒ ፂሞቲዮሲ ሂንቴ ማታፔ ዪዲ፥ ሂንቴ ኣማኑዋባኔ ሂንቴ ሲቁዋባ ሎዖ ዎሬ ኦዲስ። ቃሲ ሂንቴ ኡባ ዎዴ ኑስ ሎዖ ቆፔይሳኔ ኑኒ ሂንቴና ቤዓናው ላሞቴይሳዳ ሂንቴካ ኑና ቤዓናው ላሞቴይሳ ኢ ኑስ ኦዲስ።
1TH 3:7 ታ ኢሻቶ፥ ኑና ጋኪያ ዋያኒኔ ኑ ሜቶ ኡባን ሂንቴ ኣማኑዋ ጊሾ ሂንቴናን ሚኔቲዳ።
1TH 3:8 ሂንቴ ጎዳን ሚኒዲ ዴዒኮ ኑካ ዴዖን ዴዖስ።
1TH 3:9 ሂዛ፥ ኑኒ ሂንቴ ጋሶን ዴሚዳ ኡፋይሳስ ፆሳ ዋቲ ጋላቲኖ?
1TH 3:10 ኑኒ ሂንቴና ቤዓናዉኔ ሂንቴ ኣማኑዋን ፓጪዳባ ኩንꬃናው ቃማኔ ጋላስ ኑ ኩሜꬃ ዎዛናን ፆሳ ዎሶስ።
1TH 3:11 ፆሳይ ኑ ኣዋይ ባ ሁዔኒኔ ኑ ጎዳይ ዬሱስ ኪሪስቶሲ ኑ ሂንቴኮ ባና ኦጊያ ጊጊሶ።
1TH 3:12 ኑ ሂንቴና ዳሮ ዶሴይሳዳ ጎዳይ ሂንቴ ኢሶይ ኢሱዋ ሲቂያ ሲቆኔ ኣሴ ኡባ ሲቂያ ሲቆ ሂንቴው ዳርሶኔ ጉጆ።
1TH 3:13 ኑ ጎዳይ ዬሱስ ኪሪስቶሲ ባ ጌሻታራ ያ ዎዴ ፆሳ፥ ኑ ኣዋ ሲንꬃን ሂንቴ ዎዛናይ ጌሺኔ ቦሬይ ባይናይሳ ኦꬂዲ ኢ ሂንቴና ሚንꬄꬃና።
1TH 4:1 ዉርሴꬃን፥ ታ ኢሻቶ፥ ፆሳ ኡፋይሳናው ሂንቴ ዋኒዲ ዳናው ቤሲያኮ ኑፔ ታማሪዴታ። ሄሲ ሂንቴ ኮይሮፔ ዴዒዳ ዴዑዋ፥ ሺን ሃዒ ሂንቴ ካሴይሳፌ ኣꬂዲ ኦꬃናዳ ጎዳ ዬሱሳ ሱንꬃን ሂንቴና ዎሶሲኔ ዞሮስ።
1TH 4:2 ኑኒ ጎዳ ዬሱሳ ማታን ሂንቴና ኪቲዳ ኪታይ ኣዉሴኮ ኤሬታ።
1TH 4:3 ፆሳይ፥ ሂንቴ ጌሺ ጊዳና ሜላኔ ላይማቶና ሜላ ኮዬስ።
1TH 4:4 ሂንቴ ኢሶይ ኢሶይ፥ ሂንቴ ማቼታራ ጌሻቴꬃኒኔ ቦንቾን ዳናው ቤሴስ።
1TH 4:5 ፆሳ ኤሮናኔ ኣማኖና ኣሳዳ ላይማቴꬃ ኣሞን ፁጌቶፊቴ።
1TH 4:6 ኑ ካሴ ሂንቴው ኦዲዳይሳዳኔ ሚንꬂ ዞሪዳይሳዳ ጎዳይ ሄሳ ሜላባ ኦꬂያ ኡባ ፒርዲያ ጊሾ ኦኒካ ሃይሳታን ባ ኣማኒያ ኢሻ ናቃናዉኔ ጪማናው ቤሴና።
1TH 4:7 ፆሳይ ኑኒ ጌሽቴꬃን ዳና ሜላፔ ኣቲን ቱናቴꬃን ዳና ሜላ ፄጊቤና።
1TH 4:8 ሄሳ ጊሾ፥ ሃ ቲሚርቲያ ኢፂያ ኦኒካ ሂንቴው ጌሻ ኣያና ኢሚያ ፆሳ ኢፄስፔ ኣቲን ኣሴ ጊዴና።
1TH 4:9 ሂንቴ ኢሶይ ኢሱዋ ዋቲ ሲቃኔኮ ፆሳይ ሂንቴና ታማርሲዳ ጊሾ ሃዒ ሲቆባ ኑ ህንቴው ፃፋናው ኮሼና።
1TH 4:10 ቃሲ ማቄዶኒያ ቢታን ዴዒያ ኣማኒያ ኢሻታ ኡባ ቱማ ሂንቴ ዶሴታ። ሺን ኑ ኢሻቶ፥ ሃዒካ ሂንቴ ኤንታ ኣꬂ ዶሳና ሜላ ሂንቴና ዎሶስ።
1TH 4:11 ኑኒ ካሴ ሂንቴው ኦዲዳይሳዳ ዎፑ ጊዳ ዴዑዋ ዴዒቴ። ሂንቴ፥ ሂንቴ ኦሶ ኦꬂዲ ሂንቴው ዱሳስ ኮሺያባ ዴሚቴ።
1TH 4:12 ሄሳዳ ሃኒኮ፥ ኣማኖናይሳታ ማታን ሂንቴ ቦንቼታና፤ ቃሲ ሂንቴና ኮሺያባስ ኦናካ ኣዳሼኬታ።
1TH 4:13 ኑ ኢሻቶ፥ ኣማኒዲ ሃይቂዳ ኣሳቲ ሃናናባ ሂንቴ ኤራና ሜላ ኮዮስ። ሂንቴ ኤንታ ጊሾ ኡፋይሲ ባይና ኣሳዳ ካዮቶፊቴ።
1TH 4:14 ኑኒ፥ ዬሱሲ ሃይቂዳይሳኔ ቃሲ ሃይቆፔ ዴንዲዳይሳ ኣማኖስ። ሄሳዳካ፥ ፆሳይ ዬሱሳ ኣማኒዲ ሃይቂዳይሳታ ኢያራ ዎላ ኤሃናይሳ ኣማኖስ።
1TH 4:15 ጎዳይ ኑስ ኦዲዳይሳዳ ጎዳይ ያ ጋላስ ኢያራ ጋሄታናው ኑኒ ፓፃ ዴዔይሳቲ፥ ሃይቂዳይሳታፔ ሲንꬃቶኮ።
1TH 4:16 ጎዳይ ዎልቃማ ኪታራ፥ ኪታንቾታ ሃላቃ ጊርሳራ፥ ፆሳ ሞይዜ ፑኖራ፥ ሳሎፔ ዎꬋና። ኪሪስቶሳ ኣማኒዲ ሃይቂዳይሳቲ ኮይሮቲዲ ሃይቆፔ ዴንዳና።
1TH 4:17 ሄሳፌ ጉዬ፥ ሄ ዎዴ ኑኒ ፓፃ ዴዔይሳቲ፥ ጎዳራ ሻራን ጋሄታናው ኤንታራ ኢሲፌ ሳሎ ኤኬታና። ሄሳፌ ጉዬ፥ ኑኒ ጎዳራ ኢሲፌ ሜሪናው ዳና።
1TH 4:18 ሄሳ ጊሾ፥ ሃ ቃላን ኢሶይ ኢሱዋ ሚንꬄꬂቴ።
1TH 5:1 ታ ኢሻቶ፥ ሃ ሃኖቲ ሃናና ዎዲያኔ ኣጌና ሂንቴው ፃፋናው ኮሼና።
1TH 5:2 ጎዳ ጋላሳይ ካይሶይ ቃማ ዬይሳዳ ያናይሳ ሂንቴ ሎይꬂ ኤሬታ።
1TH 5:3 ኣሳይ፥ «ሳዒ ሳሮ፥ ኣይኮይካ ሃኔና» ያጊሺን፥ ማጫስ ኢቄꬂ ኦይኬይሳዳ ꬋዮይ ኤንቲ ቆፖና ኤንታ ቦላ ያና። ኤንቲ ኣይ ኦጌንካ ኬሲ ኤኮኮና።
1TH 5:4 ሺን ኑ ኢሻቶ፥ ሄ ጋላሳይ ሂንቴው ካይሶይ ዬይሳዳ ያናው ሂንቴ ꬉማን ዴዔኬታ።
1TH 5:5 ሂንቴ ኡባይ ፖዖ ኣሲኔ ጋላሳን ዴዒያ ኣሲ፤ ኑኒ ቃማ ኣሲ ዎይኮ ꬉማ ኣሲ ጊዶኮ።
1TH 5:6 ሄሳ ጊሾ፥ ኑኒ ሃራቲ ꬊስኬይሳዳ ꬊስካናው ቤሴና፤ ኑኒ ባርካንዉኔ ጊጊዲ ዳናው ቤሴስ።
1TH 5:7 ꬊስኬይሳቲ ቃማ ꬊስኮሶና፤ ማꬆቴይሳቲ ቃማ ማꬆቶሶና።
1TH 5:8 ሺን ኑኒ ጋላሳ ኣሲ ጊዲያ ጊሾ ጊጊዲ ዳናው ቤሴስ። ኣማኖኔ ሲቆ ፁሩሬዳ ቲራን ማዒዲ፥ ኣቶቴꬃ ኡፋይሳ ሁዔን ዎꬂያ ኦላ ቢራታ ባርኔፃዳ ዎꬂዲ ዳናው ቤሴስ።
1TH 5:9 ፆሳይ ኑና ኑ ጎዳ ዬሱስ ኪሪስቶሳ ባጋራ ኩሜꬃ ኣቶቴꬂ ኤካና ሜላ ዶሪስፔ ኣቲን ሃንቆስ ዶሪቤና።
1TH 5:10 ኑኒ ፓፃ ዴዒን ዎይኮ ሃይቂን፥ ኪሪስቶሲ ያ ዎዴ ኢያራ ኢሲፌ ዳና ሜላ ኪሪስቶሲ ኑ ጊሾ ሃይቂስ።
1TH 5:11 ሄሳ ጊሾ፥ ሂንቴ ካሴ ኦꬄይሳዳ፥ ኢሶይ ኢሱዋ ሚንꬄꬂቴኔ ዲቺቴ።
1TH 5:12 ኑ ኢሻቶ፥ ሂንቴ ጊዶን ኦꬄይሳታ፥ ሂንቴና ካሌꬃና ሜላኔ ዞራና ሜላ ጎዳይ ዶሪዳይሳታ ቦንቻና ሜላ ሂንቴና ዎሶስ።
1TH 5:13 ኤንቲ ኦꬂያ ኦሱዋ ጊሾ ኤንታ ዳሮ ቦንቺቴኔ ሲቂቴ። ኢሶይ ኢሱዋራ ሳሮቴꬃን ዴዒቴ።
1TH 5:14 ኑ ኢሻቶ፥ ኑኒ ሂንቴና ዞሮስ። ቦዛታ ሃንቂቴ፤ ባቤይሳታ ሚንꬄꬂቴ፤ ዳቡራንቾታ ማዲቴ፤ ኣሴ ኡባ ዳንዳዒቴ።
1TH 5:15 ኦኒካ ኢታ ጊሾ ኢታ ዛሮና ሜላ ናጌቲቴ። ሂንቴ ዎሊሲኔ ኣሳ ኡባስ ሎዖባ ኦꬃናው ሚኒቴ።
1TH 5:16 ኡባ ዎዴ ኡፋይቲቴ።
1TH 5:17 ኡባ ዎዴ ፆሳ ዎሲቴ።
1TH 5:18 ኡባባን ጋላቲቴ። ኪሪስቶስ ዬሱሳ ባጋራ ፆሳይ ሂንቴፌ ኮዬይ ሄሳ።
1TH 5:19 ጌሻ ኣያና ኦሱዋ ቶይሶፒቴ።
1TH 5:20 ቲንቢቴ ቃላ ካꬎፒቴ።
1TH 5:21 ኡባባ ፓጪቴ፤ ሎዖባ ኤኪቴ።
1TH 5:22 ኢታ ኦሶ ኡባፌ ሃኪቴ።
1TH 5:23 ሳሮ ኢሚያ ፆሳይ ባ ሁዔን ሂንቴና ፖሎ ጌሾ። ኑ ጎዳይ ዬሱስ ኪሪስቶሲ ያና ጋላሳስ፥ ፆሳይ ሂንቴ ኣያና፥ ሂንቴ ሼምፑዋኔ ሂንቴ ኩሜꬃ ኣሳቴꬃ ቦሬይ ባይና ናጎ።
1TH 5:24 ሂንቴና ፄጌይሲ ኣማኔቲዳይሳ ጊዲያ ጊሾ ሄሳ ኢ ፖላና።
1TH 5:25 ኑ ኢሻቶ፥ ኑስ ፆሳ ዎሲቴ።
1TH 5:26 ኣማኒያ ኣሳ ኡባ ጌሻ ዬሬቴꬃን ሳሮꬂቴ።
1TH 5:27 ሂንቴ ሃ ኪታ ኣማኒያ ኣሳ ኡባስ ናባባናዳ ጎዳ ሱንꬃን ሂንቴና ዎሳይስ።
1TH 5:28 ኑ ጎዳ ዬሱስ ኪሪስቶሳ ኣꬎ ኬሃቴꬃይ ሂንቴራ ኢሲፌ ጊዶ። ኣሚንዒ።
2TH 1:1 ጳዉሎሲ፥ ሲላሴይኔ ፂሞቲዮሲ ቴሴሎንቄ ዎሳ ኬꬃን ዴዒያ፥ ፆሳ ኣዋባኔ ጎዳ ዬሱስ ኪሪስቶሳባ ጊዲዳ ኣሳስ ፃፊዳ ኪታ።
2TH 1:2 ፆሳ ኑ ኣዋፔኔ ጎዳ ዬሱስ ኪሪስቶሳፔ ኣꬎ ኬሃቴꬃይኔ ሳሮቴꬃይ ሂንቴው ጊዶ።
2TH 1:3 ኑ ኢሻቶ፥ ሂንቴ ኣማኖይኔ ሂንቴ ኢሶይ ኢሱዋኔ ሃራታ ሲቂያ ሲቆይ ዳሮ ዲጪያ ጊሾ ኑኒ ሄሳስ ፆሳ ኡባ ዎዴ ጋላታናው ቤሴስ።
2TH 1:4 ሂንቴና ጋኪዳ ጎዳኒኔ ዋዬ ኡባን ጌንጫኒኔ ኣማኖን ሚኒዲ ኤቂዳ ጊሾ ኑኒ ኑ ሁዔን ፆሳ ዎሳ ኬꬃታን ሂንቴባ ማርካቲሼ ሂንቴናን ጬቄቶስ።
2TH 1:5 ሂንቴ ኢያ ጊሾ ጊዲ ሜቶ ኤኪያ ፆሳ ካዎቴꬃስ ቤሴይሳታ ጊዲዲ ታይቤታና ሜላ ፆሳ ፂሎ ፒርዳስ ሃይሲ ማላ።
2TH 1:6 ፆሳይ ቱማ ፒርዳ ፒርዳና። ፆሳይ ሂንቴና ዋይሴይሳታ ቦላ ዋዬ ኤሃና።
2TH 1:7 ጎዳይ ዬሱሲ ባ ዎልቃማ ኪታንቾታራ፥ ታማ ላጮራ ሳሎፔ ያ ዎዴ ዋዬቲያ ሂንቴናኔ ኑና ሼምፒሳና።
2TH 1:8 ቃሲ ፆሳይ ባና ኤሮናይሳታኔ ኑ ጎዳ ዬሱስ ኪሪስቶሳ ዎንጌላስ ኪቴቶናይሳታ ፒርዳና።
2TH 1:9 ኤንቲ ጎዳ ሲንꬃፌኔ ኢያ ቦንቹዋ ዎልቃፌ ሻኬቲዲ ሜሪና ꬋዩዋን ፒርዴታና።
2TH 1:10 ሄ ጋላስ፥ ኢ ባይሳታኒኔ ባና ኣማኔይሳታ ኡባን ቦንቼታንዉኔ ሳቤታናው ያ ዎዴ ኑ ሂንቴው ኦዲዳ ኪታ ሂንቴ ኣማኒዳ ጊሾ ሂንቴ ኢያ ቦንቼይሳታ ጊዶኒኔ ሳቤይሳታ ጊዶን ዳና።
2TH 1:11 ኑኒ ሂንቴው ኡባ ዎዴ ፆሳ ዎሴይ ሄሳሳ። ኑ ፆሳይ ሂንቴና ፄጊዳ ዴዑዋስ ቤሴይሳታ ጊዲዲ ታይቤታና ሜላ ኑኒ ዎሶስ። ሂንቴ ሎዖባ ኦꬃናው ኣሞቲያ ኣሙዋኔ ሂንቴ ኣማኖ ኦሱዋ ኢ ባ ዎልቃን ፖሎ።
2TH 1:12 ሄሳን ኑ ፆሳኔ ኑ ጎዳ ዬሱስ ኪሪስቶሳ ኣꬎ ኬሃቴꬃን፥ ጎዳ ዬሱሳ ሱንꬃ ሂንቴ ቦንቻና፤ ሂንቴናካ ኢ ቦንቻና።
2TH 2:1 ኑ ኢሻቶ፥ ኑ ጎዳ ዬሱስ ኪሪስቶሳ ዩሳባኔ ኑ ኢያራ ጋሄታናው ሺቃናባስ ኑ ሂንቴና ዎሶስ።
2TH 2:2 ቲንቢቴን ዎይኮ ሃራ ኣሳፔ ሲዒዳ ቃላን ዎይኮ ኑፔ ኤኪዳ ኪታዳ ኦꬂዲ፥ «ጎዳ ጋላሳይ ጋኪስ» ጊዲ ሂንቴ ዎዛናይ ዳጋሞፎኔ ዋባቆፖ።
2TH 2:3 ሂንቴና ኦኒካ ኣይ ኦጌንካ ባሌꬆፎ። ካሴቲዲ ዉርሴꬃ ኡራ ጌላቴꬃይ ቆንጮናኔ ꬋዮይ ቤሲያ ጌላ ኡራይ ዮና ዴዒሺን፥ ጎዳ ጋላሳይ ጋኬና።
2TH 2:4 ኣሲ ጎይኒያባኔ ፆሳያባ ኡባ ኢ ኢፃናኔ ባና ꬎቁ ኦꬃና። ሃሪ ኣቶሺን፥ ፆሳ ኬꬂ ጌሊ ኡቲዲ፥ «ታኒ ፆሴ» ጋና።
2TH 2:5 ታኒ ሂንቴራ ዴዓሼ ሂንቴው ኦዲዳይሳ ኣኬኬኬቲ?
2TH 2:6 ኢ ባ ጋላሳን ያናፔ ኣቲን ሃዒ ዮናዳ ኣይቢ ኢያ ቴቂያኮ ኤሬታ።
2TH 2:7 ኣሳስ ቆንጪቦና ጌላቴꬃ ፁራ ዎልቃይ ሃዒካ ኦꬄስ፥ ሺን ሃዒ ኢያ ቴቄይሲ ዴዔስ። ኢያ ቴቄይሲ ኦጌፔ ኪቻና ጋካናው ኢ ቆንጬና።
2TH 2:8 ሄሳፌ ጉዬ፥ ጌላ ኡራይ ቆንጫና፥ ሺን ጎዳ ዬሱሲ ባ ዶናፔ ኬያ ሼምፑዋን ባ ቦንቾ ዩሳን ኢያ ዎꬋና።
2TH 2:9 ጌላ ኡራይ ፃላሂያ ዎልቃን ዪዲ ዎርዶ ማላታታኔ ማላሊሲያባታ ኦꬃና።
2TH 2:10 ሄሳዳካ፥ ꬋዮስ ዴዒያ ኣሳታ ዱማ ዱማ ጪሚያ ኢታ ኦሶን ባሌꬃና። ኤንቲ ꬋዪዳይ ኣሺያ ቱማ ዶሲዲ ኤኮና ኢፂዳ ጊሾሳ።
2TH 2:11 ሄሳ ጊሾ፥ ኤንቲ ዎርዶ ጊዲያባ ኣማናና ሜላ ፆሳይ ዎልቃማ ባሌሶ ኤንታ ቦላ ዬዳና።
2TH 2:12 ሄሲካ፥ ቱማ ኣማኖና ኣሳቲ፥ ናጋራ ኦሶን ኡፋይቴሳቲ ኡባይ ፒርዴታና ሜላሳ።
2TH 2:13 ጎዳይ ዶሲያ ኑ ኢሻቶ፥ ኑኒ ፆሳ ሂንቴ ጊሾ ኡባ ዎዴ ጋላታናው ቤሴስ። ሂንቴ ኣታና ሜላ ፆሳይ ጌሻ ኣያና ዎልቃን ሂንቴና ጌሺዳይሳኔ ሂንቴካ ቱማ ኣማኒዳይሳን ኢ ሂንቴና ባይራዳ ዶሪስ።
2TH 2:14 ፆሳይ፥ ኑ ሂንቴው ኦዲዳ ዎንጌላ ባጋራ ሂንቴና ፄጊዳይ፥ ሂንቴ ኑ ጎዳ ዬሱስ ኪሪስቶሳራ ኢሲፌ ቦንቼታናሳ።
2TH 2:15 ሂዛ፥ ኑ ኢሻቶ፥ ሚኒዲ ኤቂቴ። ኑኒ ሂንቴና ኑ ዶናን ጊዲን ዎይኮ ዳብዳቢያን ጊዲን ታማርሲዳ ቲሚርቲያ ኦይኪቴ።
2TH 2:16 ፆሳይ ኑ ኣዋይ ኑና ዶሴስ። ኢ ኑስ ኬሃ፤ ኢ ሜሪና ሚንꬄꬆኔ ሎዖ ኡፋይሳ ኑስ ኢሚስ። ሂንቴ ኡባ ዎዴ ሎዖባ ኦꬃናዉኔ ኦዴታናው ኢ ሚንꬄꬃና ሜላኔ ማዳና ሜላ ኑ ጎዳ ዬሱስ ኪሪስቶሳኔ ፆሳ ኑ ኣዋ ዎሶስ።
2TH 3:1 ዉርሴꬃን ኑ ኢሻቶ፥ ጎዳ ቃላይ ሂንቴ ጊዶን ኤሌሲዲ ዳልጋናዳኔ ቦንቼታናዳ ኑስ ዎሲቴ።
2TH 3:2 ሄሳዳካ፥ ኣሲ ኡባይ ቃላ ሲዒዲ ኣማኖና ጊሾ ፆሳይ ጌላታፔኔ ኢታ ኣሳታፔ ኑና ኣሻና ሜላ ኑስ ዎሲቴ።
2TH 3:3 ሺን ጎዳይ ኣማኔቲዳይሳ፤ ኢ ሂንቴና ሚንꬄꬃናኔ ፃላሄፔ ናጋና።
2TH 3:4 ኑኒ ሂንቴና ኪቴይሳ ሃዒካ ሲንꬃፌካ ሂንቴ ኦꬃናይሳስ ጎዳን ኑኒ ኣማኔቶስ።
2TH 3:5 ጎዳይ ሂንቴ ዎዛና ፆሳ ሲቁዋኮኔ ኪሪስቶሳ ዳንዳዓኮ ካሌꬆ።
2TH 3:6 ኑ ኢሻቶ፥ ሂንቴ ኑፔ ኤኪዳ ኪታ ካሎናይሳታፔኔ ኦሶ ቢሊያ ኣዛላ ኣማኒያ ኣሳታፔ ሂንቴ ሻኬታናዳ ጎዳ ዬሱስ ኪሪስቶሳ ሱንꬃን ሂንቴና ኪቶስ።
2TH 3:7 ኑዳ ሃኒዲ ዳናው ቤሴይሳ ሂንቴ፥ ሂንቴ ሁዔን ኤሬታ። ኑኒ ሂንቴራ ዴዒያ ዎዴ ኦሶ ቢሊቦኮ።
2TH 3:8 ኑኒ ኦዴፌካ ካꬂ ሜላ ሚቦኮ። ኑስ ዳንዳዔቲዳ ሜላ ቃማኔ ጋላስ ኦꬂ ዳቡሪዲ ዴዒዳፔ ኣቲን ኦዴስካ ቶሆ ጊዲቦኮ።
2TH 3:9 ኑኒ ሄሳ ኦꬂዳይ፥ ሂንቴው ሌሚሶ ጊዳናሳፌ ኣቲን ሂንቴፌ ማዴ ኦይቻናው ኑስ ማቲ ꬋዪና ጊዴና።
2TH 3:10 ኑ ሂንቴራ ዴዒያ ዎዴካ፥ «ኦꬃናው ኮዮና ኣሲ ኦኒካ ሞፖ» ያጊዲ ኪቲዳ።
2TH 3:11 ኑኒ ሄሳ ጊዳይ፥ ሂንቴ ጊዶን ኢሲ ኢሲ ኣዛላቲ ዴዔይሳ ሲዒዳ ጊሾሳ። ሄ ኣሳቲ ጌልሶናባን ጌሊዲ ሃራታ ኦሶ ቢሊሶሶናፔ ኣቲን ኣይኮካ ኦꬆኮና።
2TH 3:12 ኑኒ ሄሳ ሜላ ኣሳቲ ማራ ዴዖ ዳናዳኔ ባንታና ኮሺያባ ኦꬂዲ ዴማናዳ ጎዳ ዬሱስ ኪሪስቶሳ ሱንꬃን ኤንታ ኪቶሲኔ ዞሮስ።
2TH 3:13 ሺን ኑ ኢሻቶ፥ ሎዖ ኦሶ ኦꬃናው ኣዛሎፊቴ።
2TH 3:14 ሃዒ ኑኒ ሃ ዳብዳቢያን ኪቲዳ ኪታስ ኪቴቶና ኣሲ ኦኒካ ዴዒኮ ሄ ኡራ ኤሪቴ። ኢ ዬላታና ሜላ ኢያፔ ሻኬቲቴ።
2TH 3:15 ሺን ኢያ ኢሻዳ ሴሪቴፔ ኣቲን ሞርኬዳ ፄሎፊቴ።
2TH 3:16 ሳሮ ኢሚያ ጎዳይ፥ ባ ሁዔን ሂንቴው ኡባ ዎዴኔ ኡባ ባጋራ ሳሮ ኢሞ። ጎዳይ ሂንቴ ኡባራ ጊዶ።
2TH 3:17 ታኒ ጳዉሎሲ፥ ሃ ኪታ ታ ኩሼን ፃፋስ። ታ ኪታ ኡባስ ማላይ ሃይሳ፤ ታኒ ሄሳዳ ፃፋይስ።
2TH 3:18 ኑ ጎዳ ዬሱስ ኪሪስቶሳ ኣꬎ ኬሃቴꬃይ ሂንቴ ኡባራ ጊዶ።
1TI 1:1 ኑና ኣሺያ ፆሳኒኔ ኑ ኡፋይሳን ናጊያ ዬሱስ ኪሪስቶሳን ኪቴቲዳ፥ ዬሱስ ኪሪስቶሳ ሃዋሬ ጊዲዳ፥ ጳዉሎሳፔ፥
1TI 1:2 ኣማኖን ታው ቱማ ናዓ ጊዲዳ ፂሞቲዮሳስ። ፆሳ ኑ ኣዋ፥ ኑ ጎዳ ኪሪስቶሳ ኣꬎ ኬሃቴꬃይ፥ ማሮቴꬃይኔ ሳሮቴꬃይ ኔው ጊዶ።
1TI 1:3 ታኒ ማቄዶኒያ ባሼ ኔና ሃዳሪዳይሳዳ፥ ኢሲ ኢሲ ኣሳቲ ዎርዶ ቲሚርቲያ ታማርሴይሳ ዲጋናው ኔ ኤፌሶናን ጋምዓና ሜላ ኮያይስ።
1TI 1:4 ኤንቲ ጎዒ ባይና ሃይሴ ኦዳኔ ባንታ ኮቻ ታይቡዋ ኣጋናዳ ኦዳ። ሄሳ ሜላባይ ፓላማ ካሌꬄሲፔ ኣቲን ኣማኖን ኦሴቲያ ፆሳ ኦሱዋስ ማዴና።
1TI 1:5 ሃ ኪታ ሁዔ ቆፋይ ጌሻ ዎዛናፔ፥ ሎዖ ካሃፔኔ ቱማ ኣማኑዋፔ ቤንቲያ ሲቁዋ ዴንꬄꬃናሳ።
1TI 1:6 ኢሲ ኢሲ ኣሳቲ ሃይሳ ኣጊዲ፥ ፓꬆና ኦዳኮ ሲሚዶሶና።
1TI 1:7 ኤንቲ ፆሳ ሂጊያ ኣስታማሬ ጊዳናው ኮዮሶና። ሺን ኤንቲ ኣይ ኦዲያኮ ዎይኮ ቱማ ኦꬂዲ ኦዴይሲ ኢ ኣይቤኮ ኤሮኮና።
1TI 1:8 ኣሲ ቤሴይሳዳ ሂጊያን ጎዔቲኮ ሂጌይ ሎዖ ጊዴይሳ ኤሮስ።
1TI 1:9 ኢሲባ ኣኬካናው ኮሼስ። ሂጌይ ሎዖ ኣሳስ ሜꬌቲቤና። ሺን ሂጌይ፥ ሂጌ ሜንꬄይሳታ፥ ዎራንꬖታ፥ ፆሴ ያዮናይሳታ፥ ሼምፖ ዎꬌይሳታ፥ ናጋራንቾታ፥ ጌሻቴꬂ ባይናይሳታ፥ ቱናታ፥ ሃሪ ኣቶሺን ባንታ ኣዪው ዎይኮ ኣዋ ዎꬌይሳታ፥
1TI 1:10 ላሜይሳታ፥ ኣዴይ ኣዴራ ላይማቴይሳታ፥ ኣሴ ባይዜይሳታ፥ ዎርዳንቾታ፥ ዎርዶን ጫቄይሳታ፥ ዎይኮ ቱማ ቲሚርቲያራ ጋሄቶና ኣይ ኦሶ ኦꬄይሳታ ሴራናው ኬዪስ።
1TI 1:11 ሄ ቲሚርቴይ ቦንቾኔ ኣንጄቲዳ ፆሳይ ታኒ ኣዋጃና ሜላ ታው ሃዳራ ኢሚዳ ዎንጌላ ጊዶን ዴዔስ።
1TI 1:12 ታኒ ኦꬂያ ኦሱዋን ታው ዎልቃ ኢሚዳ ኑ ጎዳ ኪሪስቶስ ዬሱሳ ጋላታይስ። ታና ባ ኦሱዋስ ሹሚዲ ሄ ኦሱዋስ ቤሳሳ ጊዲ ታይቢዳ ጊሾ ኢያ ጋላታይስ።
1TI 1:13 ታኒ ሃይሳፌ ካሴ ኢያ ጫዬይሳ፥ ኢያ ዬዴꬄይሳኔ ሜቶꬄይሳ ጊዲኮካ ታኒ ሄሳ ኤሮናኔ ኣማኖና ኦꬂዳ ጊሾ ፆሳይ ታና ማሪስ።
1TI 1:14 ኑ ጎዳይ ባ ኣꬎ ኬሃቴꬃ ታ ቦላ ጉሲዲ፥ ሄ ኣꬎ ኬሃቴꬃራ ኣማኖኔ ሲቆ ኪሪስቶስ ዬሱሳ ባጋራ ታው ኢሚስ።
1TI 1:15 «ኪሪስቶስ ዬሱሲ ናጋራንቾታ ኣሻናው ሃ ኣላሚያ ዪስ» ጊያ ቃላይ ኣማንꬄይሳኔ ኣሳ ኡባይ ኤካናው ቤሴይሳ። ኡባፌ ኣꬊዳ ናጋራንቾይ ታና።
1TI 1:16 ሺን ሜሪና ዴዑዋ ኤካናው ኢያ ኣማኒያ ኣሳስ ታኒ ሌሚሶ ጊዳና ሜላ ዬሱስ ኪሪስቶሲ ዳሮ ዳንዳዒስ። ታው ኡባፌ ኣꬊዳ ናጋራንቹዋስ ፆሳይ ባ ማሮታ ዳርሲስ።
1TI 1:17 ኣይፌን ቤንቶናይሳስ፥ ኢሲ ፆሳስ፥ ሃይቆናይሳስ፥ ሜሪና ካዉዋስ፥ ሜሪናፔ ሜሪና ጋካናው ጋላታይኔ ቦንቾይ ጊዶ። ኣሚንዒ።
1TI 1:18 ፂሞቲዮሳ፥ ታ ናዓው፥ ካሴ ኔባ ናቤቲ ኦዲዳ ቃላ ቦላ ኤቃዳ ሃ ኪታ ሃዳራ ኔው ኢማይስ። ኔ ሄ ቃላ ካሊኮ ሎዖ ኦላ ኦሌታና።
1TI 1:19 ኣማኖይኔ ሎዖ ካሂ ኔው ዴዖ። ኢሶቲ ኢሶቲ ካሃ ꬋዪዲ ማርካቤይ ሆቤን ꬋዬይሳዳ ባንታ ኣማኑዋ ꬋይሲዶሶና።
1TI 1:20 ሄሳ ሃኒዳይሳታ ጊዶን ሄሜኔዮሲኔ ኢስኪንዲሬይ ዴዖሶና። ኤንቲ ታማሪዲ ፆሳ ጫዬይሳ ኣጋና ሜላ ታኒ ፃላሄስ ኤንታና ኣꬃ ኢማስ።
1TI 2:1 ኡባፌ ሲንꬃታዳ፥ ኣሳ ኡባስ ፆሳ ኦይቻናው፥ ዎሳናው፥ ጋናታናዉኔ ጋላታናው ቤሴይሳ ታኒ ኔና ኣኬኪሳይስ።
1TI 2:2 ኑኒ ቱማ ኣያና ዴዖኒኔ ጌሻቴꬃን ፆሳ ጎይኒሼ ሳሮቴꬃኒኔ ዎፑ ጊዳ ዴዖን ዳና ሜላ ካዎታሲኔ ሹማታ ኡባስ ዎሲቴ።
1TI 2:3 ሄሳ ሜላ ዎሳይ ኑና ኣሺያ ፆሳ ሲንꬃን ሎዖኔ ኡፋይሲያባ።
1TI 2:4 ፆሳይ ኣሲ ኡባይ ኣታናዳኔ ቱማ ኤራናዳ ኮዬስ።
1TI 2:5 ኢሲ ፆሲ ዴዔስ። ፆሳፌኔ ኣሳፔ ጊዶን ጊዲዲ ሲጌꬂያ ኢሶይ ዴዔስ፤ ኢካ ኣሴ ጊዲዳ ኪሪስቶስ ዬሱሳ።
1TI 2:6 ኢ ኣሳ ኡባ ዎዛናው ባና ኣꬂ ኢሚስ። ፆሳይ ባ ዎዲያን ኣሳ ኡባ ዎዛናው ኮዬይሳ ቤሲያ ማርካይ ሃይሳ።
1TI 2:7 ፆሳይ ታና ዎንጌላስ ኣስታማሬኔ ሃዋሬ ኦꬂዲ ዶሪዳይ ሄሳሳ። ታኒ ቱማ ኦዳይስ፤ ዎርዶቲኬ፤ ኣማኖኔ ቱማ ኣይሁዴ ጊዶና ኣሳስ ማርካታና ሜላ ፆሳይ ታና ሹሚስ።
1TI 2:8 ሄሳ ጊሾ፥ ኡባ ቤሳን ዴዒያ ኣዴቲ፥ ባንታና ፆሳስ ዱማዪዲ፥ ሃንቆኔ ፓላማ ዲጊዲ፥ ባንታ ኩሺያ ፑዴ ዴንꬂዲ ፆሳ ዎሳና ሜላ ኮያይስ።
1TI 2:9 ሄሳዳ ማጫሳይ ባንታና ሃሪዳይሳ ቆንጪሲያ፥ ቦንቾይኔ ማሪ ዴዒያ ማዑዋ ማዓናው ቤሴስ። ኤንቲ ማሪ ባይና ሁዔ ዳꬃን፥ ዎርቃን ዎይኮ ኢንቆን፥ ዎይኮ ኣልዖ ኣፊላን ባንታና ኣሌቂሶፖ።
1TI 2:10 ሺን ፆሳስ ጎይናይስ ጊያ ማጫሳይ ባንታው ቤሴይሳዳ ሎዖባ ኦꬆና።
1TI 2:11 ማጫሲ ኪቴቴꬃን ሲዒ ጊዲ ታማሮ።
1TI 2:12 ታኒ ማጫሳይ ታማርሳና ሜላ ዎይኮ ኣዴ ቦላ ኣዋታና ሜላ ጊዶናሺን ሲዒ ጊዲ ዳና ሜላ ኮያይስ።
1TI 2:13 ኣዳሜይ ኮይሮ ሜꬌቲስ፤ ጉዬፔ ሄዋና ሜꬌታሱ።
1TI 2:14 ቃሲ ጪሜታዳ ፆሳ ሂጊያ ሜንꬂዳይ ማጫሲፔ ኣቲን ኣዳሜ ጊዴና።
1TI 2:15 ሺን ማጫሲ ኣማኖን፥ ሲቆኒኔ ጌሻቴꬃን ባንታና ሃሪዲ ዴዒኮ ናይታ ዬሎን ኣታና።
1TI 3:1 ኦኒካ፥ «ዎሳ ኬꬂ ካሌꬂያ ኣሲ ጊዳናው ኮይኮ ሎዖባ ኣሞቴስ» ጊያ ኦዳይ ቱማ።
1TI 3:2 ዎሳ ኬꬃ ካሌꬂያ ኣሲ ቦሬቶናይሳ፥ ኢሲ ማቺ ፃላሊ ዴዔይሳ፥ ማራን ዴዔይሳ፥ ባና ሃሬይሳ፥ ቤሴይሳዳ ኦꬄይሳ፥ ኢማꬄ ሞኬይሳ፥ ታማርሳናው ዳንዳዔይሳ፥
1TI 3:3 ማꬆቶናይሳ፥ ኦዬቶናይሳ፥ ፓላሞናይሳ፥ ሚሼ ሲቆናይሳ፥
1TI 3:4 ኢያ ናይቲ ኢያው ኪቴቴይሳኔ ቦንቼይሳ፥ ባ ኬꬃ ኣይሳናው ዳንዳዔይሳ ጊዳናው ቤሴስ።
1TI 3:5 ኢሲ ኣሲ ባ ኬꬃ ኣይሳናው ዳንዳዖና ኢፂኮ፥ ፆሳ ዎሳ ኬꬂ ዋቲ ኣይሳናው ዳንዳዒ?
1TI 3:6 ኦቶሮን ሱጌቲዲ፥ ፃላሄይ ፆሳ ፒርዳን ኩንዲዳይሳዳ ኩንዶና ሜላ፥ ኦራꬂ ኣማኒዳ ኣሲ ጊዳናው ቤሴና።
1TI 3:7 ቦሬኒኔ ፃላሄ ፂሄን ጌሎና ሜላ ሄ ኡራይ ኣማኖና ኣሳ ማታን ናሼቴይሳ ጊዳናው ቤሴስ።
1TI 3:8 ሄሳዳ ቃሲ ዎሳ ኬꬃ ዳቆኔቲ ቦንቼቲዳይሳታ፥ ናምዑ ዶና ኦዴቶናይሳታ፥ ዳሮ ዎይኔ ኡሻ ኡዮናይሳታ፥ ሚሼ ያሬቶናይሳታ፥
1TI 3:9 ኣማኑዋ ፁራ ጌሻ ካሃን ናጌይሳታ ጊዳናው ቤሴስ።
1TI 3:10 ኤንቲ ኮይሮቲዲ ፓጬታናው ኮሼስ፤ ኤንታ ቦላ ቦሬይ ባይና ኢፂኮ፥ ዎሳ ኬꬃ ዳቆኔ ጊዲዲ ኦꬆ።
1TI 3:11 ሄሳዳካ፥ ኤንታ ማጫሳቲ ቦንቼቲዳይሳታ፥ ዚጊሮናይሳታ፥ ማራን ዴዔይሳታ፥ ኡባባን ኣማኔቴይሳታ ጊዳናው ቤሴስ።
1TI 3:12 ዎሳ ኬꬃ ዳቆኔቲ ኢሲ ማቺ ፃላሊ ዴዔይሳ ጊዶ። ባ ናይታኔ ባ ኬꬃ ሎይꬂ ኣይሴይሳ ጊዳናው ቤሴስ።
1TI 3:13 ዎሳ ኬꬃ ዳቆኔ ጊዲዲ፥ ሎዖ ኦሶ ኦꬄይሳቲ፥ ኤንታው ጊታ ቦንቾ ቃሲ ኪሪስቶስ ዬሱሳን ባንታው ዴዒያ ኣማኑዋባ ኦዳናው ዳሮ ሚኖቴꬂ ዴማና።
1TI 3:14 ታኒ ሃ ኪታ ኔው ፃፋሼ፥ ኤሌሳዳ ኔኮ ባና ጋዳ ኡፋይሲ ዎꬃይስ።
1TI 3:15 ሺን ታኒ ቦና ጋምዒኮ፥ ፆሳ ኬꬃን ኣሳይ ዋኒዲ ዳናው ቤሲያኮ ኤራና ሜላ ሃይሳ ኔው ፃፋይስ። ዴዖ ፆሳ ኬꬃይ ቱማቴꬃስ ቱሲኔ ባሶ።
1TI 3:16 ኑ ኣማኑዋ ፁራይ ሲꬌይ ባይና ጊታ። ኪሪስቶሲ ኣሾ ማዒዲ ቆንጪስ፤ ኢያ ቱማቴꬃ ጌሻ ኣያናይ ማርካቲስ። ኪታንቾታስ ቤንቲስ፤ ኢ ካዎቴꬃ ኡባስ ሳባኬቲስ። ኣላሜን ዴዒያ ኣሳን ኣማኔቲስ፤ ቦንቾን ሳሎ ኤኬቲስ።
1TI 4:1 ያና ዎዲያን ባሌꬂያ ኣያናታኔ ቱና ኣያናታ ቲሚርቲያ ካሊዲ፥ ኢሲ ኢሲ ኣሳይ ኣማኑዋ ካዳናይሳ ጌሻ ኣያናይ ቆንጪሲዲ ኦዲስ።
1TI 4:2 ሄሳ ሜላ ቲሚርቴይ ኤንታ ካሃይ ዶጪን፥ ኣሳ ባሌꬂያ ዎርዳንቾ ኣስታማሬታፔ ዬስ።
1TI 4:3 ሄሳ ሜላ ኣሳቲ ኤኮኔ ጌሎ ቃሲ ኢሲ ኢሲ ካꬃታ ሞና ሜላ ዲጎሶና። ሺን ኣማኔይሳቲኔ ቱማ ኤሬይሳቲ ፆሳ ጋላቲ ዎሲዲ ማና ሜላ ፆሳይ ካꬂ ሜꬊስ።
1TI 4:4 ፆሳይ ሜꬊዳ ኡባባይ ሎዖ። ፆሳ ጋላቲዲ ሚኮ ዎራ ዎꬊያባይ ኣይቢካ ባዋ።
1TI 4:5 ኡባባይ ፆሳ ቃላኒኔ ዎሳን ጌሺ ጊዴስ።
1TI 4:6 ሄሳ ጊሾ፥ ኔኒ ሃ ቲሚርቲያ ኣማኔይሳታ ታማርሲኮ፥ ኑ ኣማኑዋኒኔ ሎዖ ቲሚርቲያ ኪቴታዳ ዲጪዳ ኪሪስቶስ ዬሱሳ ሎዖ ኣይሌ ጊዳና።
1TI 4:7 ሺን ጎዒ ባይና ቱማ ጊዶና ኦዳፔኔ ጪማ ማጫሳ ሃይሲያፔ ባቃታ። ቱማ ኣያና ዴዖን ዳናው ኔና ሎሂሳ።
1TI 4:8 ኣሲ ባ ኣሳቴꬃ ሚንꬃናው ኦꬂያ ኦሶይ ጉꬂ ማዴስ። ሺን ቱማ ኣያና ዴዖን ባና ሎሂሶይ ሃዒካ ሜሪናዉካ ዴዖ ኢሚያ ኡፋይሲ ዴዒያ ጊሾ ኡባስ ማዴስ።
1TI 4:9 ሃ ቃላይ ኣሳ ኡባይ ኤካናው ቤሲያ ቱማ ኦዳ።
1TI 4:10 ኑኒ ኣሳ ኡባ፥ ኡባፌ ኣꬂዲ ኣማኔይሳታ ኣሺያ ዴዖ ፆሳፌ ኤካና ጊዲ ኡፋይሳን ናጊያ ጊሾ፥ ሄሳስ ኑኒ ኦሶን ዳቡሮሲኔ ባፄቶስ።
1TI 4:11 ሃይሳ ኪታኔ ታማርሳ።
1TI 4:12 ኔኒ ያላጋ ጊዲያ ጊሾ ኔና ኦኒካ ካꬎፖ። ሺን ኣማኔይሳታስ ኔኒ ኦዳን፥ ኦሶን፥ ሲቆን፥ ኣማኖኒኔ ጌሻቴꬃን ሌሚሶ ጊዳ።
1TI 4:13 ታኒ ያና ጋካናው ኣሳስ ጌሻ ማፃፋ ናባቦን፥ ሳባኮኒኔ ታማርሶን ሚና።
1TI 4:14 ቲንቢቴይ ኦዴቲን፥ ጪማቲ ባንታ ኩሺያ ኔ ቦላ ዎꬂዳ ዎዴ ኔኒ ኤኪዳ፥ ኔናን ዴዒያ ጌሻ ኣያና ኢሞታ ካꬎፓ።
1TI 4:15 ኔ ዲቻይ ኣሳ ኡባስ ቆንጫና ሜላ ሄሳ ሚንꬃ ቆፓ፤ ሃይሳ ኡባ ዎዴ ኦꬃ።
1TI 4:16 ኔ ሁዒያሲኔ ኔ ቲሚርቲያስ ናጌታ። ኔኒ ሄሳ ኡባ ዎዴ ኦꬂኮ ኔናኔ ኔና ሲዔይሳታ ኣሻሳ።
1TI 5:1 ጪማ ኣዴታ ኔ ኣዋዳ ቦንቻፌ ኣቲን ሃንቄቶፋ። ያላጋ ኣዴታ ኔ ኢሻዳ ኦꬃዳ ፄላ።
1TI 5:2 ጪማ ማጫሳታ ኔ ኣዪዳ፥ ያላጋ ማጫሳታ ኔ ሚቺዳ፥ ፖሎ ጌሻቴꬃን ኦይካ።
1TI 5:3 ኣዚኒ ሃይቂዳ ቱማ ኣምዔታ ቦንቻ።
1TI 5:4 ሺን ኣምዔስ ናይቲ ዎይኮ ናይታ ናይቲ ዴዒኮ፥ ሄ ናይቲ ቱማ ኣያና ዴዖን ዴዔይሳ ቤሳናው ባንታና ዬሊዳይሳታኔ፥ ባንታ ዎጋ ኣዪዉኔ ዎጋ ኣዋ ማዲዲ ኩሼ ዛሮ ታማሮ። ሄሲ ፆሳ ኡፋይሲያባ።
1TI 5:5 ባርካ ዴዒያ ቱማ ኣምዒያ ፆሳፌ ማዴ ዴማናው ኡፋይሳን ናጋሱ። ጋላሲኔ ቃማ ፆሳይ ባና ማዳና ሜላ ዎሳዉሱኔ ኦይቻዉሱ።
1TI 5:6 ሺን ሃ ኣላሚያን ሎዖ ዱሳ ፃላላ ኮያ ኣምዒያ ፓፃ ዴዓሼ ሃይቂዳሮ።
1TI 5:7 ኦኒካ ኤንታ ቦሮና ሜላ ሃ ኪታ ኤንታው ኢማ።
1TI 5:8 ሺን ባ ዳቦታስ፥ ኡባፌ ኣꬂዲ ባ ሶ ኣሳስ ቆፖና ኦኒካ ባ ኣማኑዋ ካዲዳይሳ፤ ኣማኖና ኣሳፔካ ኣꬊዳ ኢታ።
1TI 5:9 ላይꬂ ኡሱፑን ታሙ ኩሚቦና ኣምዔ ሱንꬃ ማዝጋባን ፃፎፓ። ቃሲ ሄሳ ቦላ ኢያ ባ ኣዚናስ ኣማኔቲዳሮ ጊዳናው ኮሼስ።
1TI 5:10 ናይታ ዲሾን፥ ኢማꬄ ሞኮን፥ ጌሻታ ቶሁዋ ሜቻን፥ ሜቶቲያ ኣሳ ማዴን፥ ሎዖ ኦሶ ኡባስ ባና ኣꬃ ኢሚዳሮኔ ሎዖ ኦሶን ኤሬቲዳሮ ጊዳናው ቤሴስ።
1TI 5:11 ሺን ያላጋ ኣምዔታ ሱንꬃ ማዝጋባን ፃፎፓ። ኤንታና ኣዚና ጌሎ ጌሎ ጊያ ኣሾ ኣሞይ ኦይኪያ ዎዴ ኪሪስቶሳ ኣጋና።
1TI 5:12 ኤንቲ ኮይሮ ጌሊዳ ቃላ ሜንꬂዳ ጊሾ ፒርዴታና።
1TI 5:13 ሄሳ ቦላ ኤንቲ ኦሶ ꬋዪዲ ኬꬃፌ ኬꬄ ዩያና። ዩሻ ፃላላ ጊዶናሺን ዚጊርሳኒኔ ባንታና ጋꬆናባን ጌሊዲ ቤሶናባ ኦዴቶሶና።
1TI 5:14 ሄሳ ጊሾ፥ ኑ ሞርኬቲ ኑ ቦላ ኦዴቲያ ኢታባ ዴሞና ሜላ ያላጋ ኣምዔቲ ኣዚና ጌሊዲ፥ ናዓ ዬሊዲ፥ ባንታ ኬꬃ ኣይሳና ሜላ ዞራይስ።
1TI 5:15 ሃይሳፌ ካሴ ጉꬃ ኣምዔቲ ፃላሄ ካላናው ጉዬ ሲሚዶሶና።
1TI 5:16 ኢሲ ኣማኒያ ማጫሴስ ሶ ኣሳ ጊዶን ኣምዔቲ ዴዒኮ ኢያ ኤንታ ማዳናው ቤሴስ። ሄሳዳ ኦꬂኮ፥ ዎሳ ኬꬃስ ቶሆይ ካዉዬስ። ሄ ዎዴ ዎሳ ኬꬃይ ማዴ ቤሲያ ቱማ ኣምዔታ ማዳናው ዳንዳዔስ።
1TI 5:17 ዎሳ ኬꬂ ሎይꬂ ሄሚያ ጪማቲ፥ ኡባፌ ኣꬂዲ፥ ቃላ ሳባኮኒኔ ታማርሶን ዳቡሬይሳቲ ዳኮ ቦንቾ ኤካናው ቤሴስ።
1TI 5:18 ጌሻ ማፃፋይ፥ «ዉዱማን ካꬃ ዬꬊያ ቦራ ዶና ቃቾፋ» ሄሳዳካ፥ «ኦሳንቾይ ባ ዳሞዚያ ኤካናው ቤሴስ» ያጌስ።
1TI 5:19 ናምዑ ዎይኮ ሄꬑ ማርኪ ባይና፥ ዎሳ ኬꬃ ጪማ ሞቲያባ ሲዖፓ።
1TI 5:20 ሃራቲ ያያና ሜላ ናጋራ ኦꬂያ ኦናካ ኣሳ ኡባ ሲንꬃን ሃንቄታ።
1TI 5:21 ኔኒ ኣሳ ሶምዖ ቤዖና፥ ኢሱዋ ኢሱዋፌ ዱማዮና ሃ ኪታ ናጋና ሜላ ፆሳ፥ ጎዳ ዬሱስ ኪሪስቶሳኔ ዶሬቲዳ ኪታንቾታ ሲንꬃን ታ ኔና ዞራይስ።
1TI 5:22 ኦዴ ቦላካ ኔ ኩሺያ ዎꬃዳ ሹማናው ኤሌሶፓ። ሃራታ ናጋራን ጌሎፓ፤ ኔና ጌሻቴꬃን ናጋ።
1TI 5:23 ኔኒ ኡባ ዎዴ ሃርጌቲያ ጊሾኔ ኔ ኡሎ ሃርጊያ ጊሾ ሃꬃ ፃላላ ኡዮፓ፤ ጉꬃ ዎይኔ ኡያ።
1TI 5:24 ኢሲ ኢሲ ኣሳታ ናጋራይ ቆንጬ፤ ኤንታ ናጋራይ ኤንታ ፒርዳናው ኤንታፌ ሲንꬄ ኣꬌስ፥ ሺን ሃራታ ናጋራይ ጉዬፔ ጋምዒዲ ቆንጬስ።
1TI 5:25 ሄሳዳ፥ ሎዖ ኦሶይካ ቆንጬ፤ ቆንጮና ኢፂኮካ ጌማናው ዳንዳዔና።
1TI 6:1 ፆሳ ሱንꬃይኔ ኑ ቲሚርቴይ ጫዬቶና ሜላ ኣይሌቴꬃን ዴዔይሳቲ ባንታና ሃሪያ ጎዳታ ቦንቾ።
1TI 6:2 ኣማኒያ ጎዳቲ ዴዒያ ኣይሌቲ፥ ኤንታ ጎዳቲ ኤንታው ኢሻ ጊዲያ ጊሾ ኤንታ ካꬎፖ። ኤንታ ኦሱዋን ማዴቲያ ጎዳቲ፥ ኣማኔይሳታኔ ዶሴቲዳይሳታ ጊዲያ ጊሾ ኤንቲ ካሴይሳፌ ኣꬂዲ ኦꬃናው ቤሴስ። ኔኒ ሃይሳ ታማርሳናዉኔ ኤንቲ ኦꬃና ሜላ ዞራናው ቤሴስ።
1TI 6:3 ኦኒካ ዱማ ቲሚርቲያ ታማርሲያባ ጊዲኮ፥ ኑ ጎዳ ዬሱስ ኪሪስቶሳ ቱማ ቃላራኔ ኑ ኣማኑዋ ቲሚርቲያራ ጋሄቴና።
1TI 6:4 ሄ ኡራይ ኦቶሮን ሱጌቴሲፔ ኣቲን ኣይኮካ ኤሬና። ኤንታው ኢሲ ቆፋ ቦላ ፓላማናዉኔ ኦዬታናው ኢታ ኣሞይ ዴዔስ። ሄሲ ቃናቴ፥ ኦሺ፥ ጫሼ፥ ኢታ ሲꬌኔ፥
1TI 6:5 ጊጎና ፓላማ ካሌꬄስ። ቃሲ ኤንታው ኢታ ዎዛኒ ዴዔስ፤ ቱማካ ባሊዶሶና፤ ኤንቲ ፆሳ ኣማኖይ ዱሬቴꬃስ ኦጌ ጊዲ ቆፖሶና።
1TI 6:6 ሺን ታው ዴዒያባይ ጊዳና ጊያ ኣሳስ ቱማ ኣያና ዴዖይ ጊታ ዎꬌ።
1TI 6:7 ኑኒ ሃ ኣላሚያ ኣይኮካ ኤሂቦኮ፤ ቃሲ ኢያፔ ኣይኮካ ኤኪዲ ቦኮ።
1TI 6:8 ኑስ ካꬂኔ ማዖይ ዴዒኮ ሄሲ ጊዳና።
1TI 6:9 ሺን ዱሬቴꬂ ኮዬይሳቲ ፓጬኒኔ ፂሄን ጌሎሶና። ቃሲ ኤንታና ዱጌ ዳፊያኔ ꬋይሲያ ኤያቴꬂኔ ቆሂያ ኣሞን ኩንዶሶና።
1TI 6:10 ሚሼ ሲቆይ ኢታቴꬃ ኡባስ ፑልቶ። ኢሶቲ ኢሶቲ ሚሼ ኣሞቲሼ ኣማኖፔ ባሌቲዲ ዳሮ ሜቶን ባንታና ዬጊዶሶና።
1TI 6:11 ሺን ኔኖ፥ ፆሳ ኣሶ፥ ሄሳፌ ባቃታ። ፂሎቴꬃ፥ ፆሳ ዳኖ፥ ኣማኖ፥ ሲቆ፥ ዳንዳዓኔ ኣሽኬቴꬂ ካላ።
1TI 6:12 ኣማኖ ባፂያ ሎይꬃ ባፄታ። ዳሮ ኣሳ ሲንꬃን ኔ ማርካቲዳ ኔ ኣማኑዋባ፥ ፆሳይ ኔና ኢያው ፄጊዳ ሜሪና ዴዑዋ ኦይካ።
1TI 6:13 ኡባስ ዴዖ ኢሚያ ፆሳ ሲንꬃኒኔ፥ ጴንፄ ጲላፆሳ ሲንꬃን ሎዖ ማርካ ማርካቲዳ ኪሪስቶስ ዬሱሳ ሲንꬃን ታ ኔና ኪታይስ።
1TI 6:14 ኑ ጎዳ ዬሱስ ኪሪስቶሲ ቆንጫና ጋካናው ሃ ኪታ ባሊኔ ቦሬይ ባይና ናጋ።
1TI 6:15 ባ ፃላላ ኡባ ሃሪያ ቦንቾ ፆሳይ፥ ካዎታ ካዎይ፥ ጎዳታ ጎዳይ፥ ባ ቆፒዳ ቃማን ዬሱስ ኪሪስቶሳ ዛሪ ኪታና።
1TI 6:16 ኢሲ ኢያ ፃላሊ ሃይቄና። ኦኒካ ሺቃናው ዳንዳዖና ፖዖን ዴዔስ። ኦኒካ ኢያ ቤዒቤና፤ ቃሲ ቤዓናዉካ ዳንዳዔና። ቦንቾይኔ ሜሪና ዎልቃይ ኢያው ጊዶ። ኣሚንዒ።
1TI 6:17 ሃ ኣላሚያ ዱሬቲ ጮ ꬋያ ሻሎን ኦቶርቶና ሜላኔ ጬቆና ሜላ ኦዳ። ኑስ ኮሺያባ ፓላሂሲዲ ኢሚያ ኑና ኣንጂያ፥ ዱሬ ፆሳን ኣማኔታና ሜላ ኤንታ ኪታ።
1TI 6:18 ኤንቲ ሎዖ ኦሶ ኦꬃናዳ ሎዖ ኦሶን ዱሬታናዳ፥ ኬሃታኔ ሃራታስ ሻኬይሳታ ጊዳና ሜላ ኪታ።
1TI 6:19 ሄሲ ኤንታው ሲንꬃስ ሚኖ ባሶ ጊዲያ ጊሾ ሄ ዎዴ ኤንቲ ቱማ ዴዖይ ኣይ ዳኒያኮ ኤራና።
1TI 6:20 ፂሞቲዮሳ፥ ኢሲ ኢሲ ኣሳይ፥ «ኤራቴꬂ» ጊያ ኤያ ፓላማፔኔ ሃዳ ኦዳፔ ባቃታ፤ ኔው ኢሜቲዳ ሃዳራ ናጋ።
1TI 6:21 ኢሶቲ ኢሶቲ ኑስ ኤራቴꬂ ዴዔስ ያጊሼ ኣማኑዋ ኣጊዶሶና። ፆሳ ኣꬎ ኬሃቴꬃይ ሂንቴ ኡባራ ጊዶ።
2TI 1:1 ፆሳ ሼኔን፥ ዬሱስ ኪሪስቶሳን ቤንቲዳ ዴዖ ኡፋይሳ ማርካታናው ዬሱስ ኪሪስቶሳ ሃዋሬ ጊዲዳ ጳዉሎሳፔ፥
2TI 1:2 ታ ዶሲያ ናዓ ፂሞቲዮሳስ ኪቴቲዳ ኪታ። ፆሳ ኣዋፔኔ ኑ ጎዳ ኪሪስቶስ ዬሱሳፔ ኣꬎ ኬሃቴꬃይ፥ ማሮቴꬃይኔ ሳሮቴꬃይ ኔው ጊዶ።
2TI 1:3 ታኒ፥ ታ ዎሳን ቃማኔ ጋላስ ኔና ቆፓይስ። ታኒ ዎሲያ ዎዴ ታ ማይዛታ ፆሳኔ ታኒ ሎዖ ካሃን ሃጋዚያ ፆሳ ኔ ጊሾ ጋላታይስ።
2TI 1:4 ታኒ ኔ ኣፉꬃ ቆፓይስ፤ ኔና ቤዓዳ ኡፋይታናው ዳሮ ላሞታይስ።
2TI 1:5 ቃሲ ኔው ዴዒያ ቱማ ኣማኑዋ ኤራይስ። ሄ ኣማኖይ ቤኒ ኔ ዎጋ ኣዬ ሎይዲኒኔ ኔ ኣዬ ኤዉኒቂን ዴዒያ ኣማኑዋ ሜላ።
2TI 1:6 ሄሳ ጊሾ፥ ታኒ ታ ኩሺያ ኔ ቦላ ዎꬂዳ ዎዴ ፆሳይ ኔው ኢሚዳ ኢሞታ ኔኒ ዛራ ኤꬃና ሜላ ኣኬኪሳይስ።
2TI 1:7 ኣይስ ጊኮ፥ ፆሳይ ኑስ ዎልቃ፥ ሲቆኔ ኑ ሁዔ ሃሪያ ኣያና ኢሚስፔ ኣቲን ያሻ ኣያና ኢሚቤና።
2TI 1:8 ሂዛ፥ ኑ ጎዳስ ማርካታናው ዬላቶፓ፤ ቃሲ ኢያ ጊሾ ቃሼቲዳ ታናንካ ዬላቶፓ። ሺን ፆሳይ ኔው ኢሚያ ዎልቃን ዎንጌላ ጊሾ ታራ ሜቶ ኤካ።
2TI 1:9 ፆሳይ ባ ሼኔኒኔ ባ ኣꬎ ኬሃቴꬃን ኑና ኣሺዲ፥ ባ ጌሻ ዴሬ ኦꬃናው ኑና ዶሪስፔ ኣቲን ኑኒ ኦꬂዳ ኦሱዋ ጊሾ ጊዴና። ሃ ኣꬎ ኬሃቴꬃ ኪሪስቶስ ዬሱሳ ባጋራ ኣላሜይ ሜꬌታናፔ ሲንꬄ ኑስ ኢሚስ።
2TI 1:10 ሃዒ ሃ ኣꬎ ኬሃቴꬃይ ኑና ኣሺያ ኪሪስቶስ ዬሱሳ ዩሳን ቆንጪስ። ኢ ሃይቆ ዎልቃ ꬋይሲዲ፥ ዎንጌላ ባጋራ ꬋዮና ዴዖ ኑስ ቆንጪሲስ።
2TI 1:11 ታኒ ዎንጌላ ሳባኬ፥ ሃዋሬኔ ኣስታማሬ ጊዳና ሜላ ፆሳይ ታና ዶሪስ።
2TI 1:12 ታኒ ሄሳ ጊሾ ሃ ሜቱዋ ኤካይስ፤ ሺን ታ ኣማኔይ ኦኔኮ ኤሪያ ጊሾ ዬላቲኬ። ታው ኢሜቲዳ ሃዳራ ሄ ጋላሳይ ጋካናው ኢ ናጋናው ዳንዳዔይሳ ኤራይስ።
2TI 1:13 ታኒ ኔና ታማርሲዳ ቱማ ቃላ ሌሚሶ ኦꬃ ኦይካዳ ኪሪስቶስ ዬሱሳ ባጋራ ኑባ ጊዲዳ ኣማኑዋኒኔ ሲቁዋን ዴዓ።
2TI 1:14 ኑ ጊዶን ዴዒያ ጌሻ ኣያና ዎልቃን ኔው ኢሜቲዳ ሎዖ ሃዳራ ናጋ።
2TI 1:15 ኢሲያ ቢታን ዴዒያ ኡባይ ታፔ ሃኪዳይሳ ኤራሳ፤ ኤንታ ጊዶን ፊጌሉሲኔ ሄርሞጌኔሲ ዴዖሶና።
2TI 1:16 ኣኔስፎሪ ታና ዳሮ ዎዴ ሚንꬄꬂዳ ጊሾ ጎዳይ ኢያ ሶ ኣሳስ ቃꬌቶ። ታኒ ቃሾ ኬꬃን ዴዒያ ዎዴ ኢ ታናን ዬላቲቤና።
2TI 1:17 ሄሳ ቦላ ኢ ሮሜ ካታማ ዪዳ ዎዴ ታና ሚንꬂ ኮዪዲ ዴሚስ።
2TI 1:18 ዉርሴꬃ ጋላሳን ጎዳይ ኢያው ቃꬌታና ሜላ ታኒ ጎዳ ዎሳይስ። ኤፌሶና ካታማን ኢ ታና ኣይ ሜላ ማዲዳኮ ኔ ሎይꬃ ኤራሳ።
2TI 2:1 ሂዛ፥ ታ ናዓው፥ ኪሪስቶስ ዬሱሳን ዴዒያ ማሮቴꬃን ሚና።
2TI 2:2 ዳሮ ማርካታ ሲንꬃን ታኒ ኔና ታማርሲዳ ቲሚርቲያ፥ ሃራታ ታማርሳናው ዳንዳዒያ ኣማኔቲዳ ኣሳስ ሃዳራ ኢማ።
2TI 2:3 ዬሱስ ኪሪስቶሳስ ኣማንꬂያ ዎታዳሬ ጊዳዳ ታራ ሜቶ ኤካ።
2TI 2:4 ኦላ ዎታዳሬይ ባ ሃላቃ ኡፋይሳናው ጊጌቴሲፔ ኣቲን ሃራ ኦሶን ባና ፔሼና።
2TI 2:5 ሄሳዳካ፥ ጋዴ ዎፂያ ኦኒካ ቤሲያ ኦጌራ ጋዴቶና ኢፂኮ ዎይቶ ኤኬና።
2TI 2:6 ጎሻን ዳቡሪያ ጎሻንቾይ ባ ዳቡራ ኣይፊያፔ ሚያ ኮይሮ ኣሲ ጊዳናው ቤሴስ።
2TI 2:7 ኔ ኣኬካና ሜላ ጎዳይ ኔና ማዳና ጊሾ ታ ኔው ኦዲዳባ ኔ ዎዛናን ናጋ።
2TI 2:8 ታኒ ማርካቲያ ዎንጌላ ሜላ ሃይቆፔ ዴንዲዳ፥ ዳዊቴ ዜሬꬂ ጊዲዳ ዬሱስ ኪሪስቶሳ ቆፓ።
2TI 2:9 ታኒ ዎንጌላ ኦዲያ ጊሾ ኢታባ ኦꬂዳ ኣሳዳ፥ ቃሼታዳ ሜቶ ኤካስ። ሺን ፆሳ ቃላይ ቃሼቴና።
2TI 2:10 ሄሳ ጊሾ፥ ፆሳይ ዶሪዳ ኣሳቲ ኪሪስቶስ ዬሱሳን ዴዒያ ኣቶቴꬃ ሜሪና ቦንቹዋራ ኤካና ሜላ ኤንታ ጊሾ ኡባባን ዋዬታይስ።
2TI 2:11 ሃይሳዳ ያጊያ ቱማ ቃሊ ዴዔስ፤ «ኑኒ ኢያራ ሃይቂዳባ ጊዲኮ፥ ኢያራ ኢሲፌ ዴዓና።
2TI 2:12 ኑኒ ጌንጪኮ፥ ኢያራ ኢሲፌ ካዎታና። ኑኒ ኢያ ካዲኮ፥ ኢ ኑና ካዳና።
2TI 2:13 ኑኒ ኣማኔቶና ኢፂኮ፥ ኢ ኣማኔቲዳይሳ ጊዲዲ ዳና። ኣይስ ጊኮ፥ ኢ ባና ካዳናው ዳንዳዔና» ያጌስ።
2TI 2:14 ኔኒ ኤንታ ሃይሳ ኣኬኪሳ፤ ኤንቲ ቃላታ ጋሶን ፓላሞና ሜላ፥ ጎዳ ሲንꬃን ኤንታ ዞራ። ሄሲ ሲዔይሳታ ꬋይሴሲፔ ኣቲን ኣይኮካ ማዴና።
2TI 2:15 ኔኒ ቱማ ቃላ ሱሬቴꬃን ታማርሴይሳኔ ዬላዮና ኦሳንቾ ጊዳዳ፥ ፆሳይ ናሺያ ኣሳዳ፥ ኔናቴꬃ ኢያው ኢማናው ሚና።
2TI 2:16 ሺን ሃ ኣላሚያስ ኢንጄቲያ ጎዖና ኦዳፔ ባቃታ። ሄሳ ሜላ ኦዳይ ኣሴ ፆሳፌ ሃሴስ።
2TI 2:17 ሄሳ ሜላ ኦዳይ ኣሳቴꬂ ሚዲጊያ ፓፆና ዎይዛዚሬ ማዱንꬃ ሜላ። ሄሳ ሜላ ኦዳ ኦዴቴይሳታ ጊዶፌ ሄሜኔዮሲኔ ፊሊፆሲ ዴዖሶና።
2TI 2:18 ሃ ኣሳቲ ቱማ ኦጊያ ኣጊዲ፥ «ሃይቂዳ ኣሳይ ሃይቆፔ ቤኒ ዴንዲዶሶና» ያጊዲ ጉꬃ ኣሳታ ኣማኑዋ ꬋይሲዶሶና።
2TI 2:19 ጊዶሺን፥ ፆሳይ ሚኖ ዛላ ሂፂዳ ጊሾ ቃፃናው ዳንዳዔና። ኢያ ቦላ፥ «ጎዳይ ባይሳታ ኤሬስ። ጎዳ ሱንꬃ ፄጊያ ኦኒካ ኢታ ኦሶፔ ሃኮ» ያጊያ ቃላይ ፃፌቲስ።
2TI 2:20 ኢሲ ጊታ ኬꬃን ዎርቃፌ ዎይኮ ቢራፔ ኦሴቲዳ ሚሼታ ፃላላ ጊዶናሺን ሚꬃፌ ዎይኮ ኡርቃፌ ኦሴቲዳ ሚሼቲካ ዴዖሶና። ሄሳታፔ ባጋቲ ቦንቾ ኦሶስ፥ ቃሲ ባጋቲ ቶሼቲያ ኦሶስ ፔዖሶና።
2TI 2:21 ሄሳ ጊሾ፥ ኦኒካ ኢታ ኡባ ኣጊኮኔ ባና ጌሺኮ፥ ቦንቾ ኦሶ ኦꬂያ ሚሼ ጊዳና። ኤንታ ዴዖይ ጌሺኔ ጎዳ ኡፋይሲያባ፥ ቃሲ ኤንቲ ሎዖ ኦሶ ኡባ ኦꬃናው ዳንዳዔይሳታ ጊዳና።
2TI 2:22 ናዓቴꬃ ኢታ ኣሙዋፔ ባቃታ። ጌሻ ዎዛናን ጎዳ ፄጊያ ኣሳታራ ኢሲፌ፥ ፂሎቴꬃ፥ ኣማኑዋ፥ ሲቆኔ ሳሮቴꬃ ካላ።
2TI 2:23 ሺን ኦሺ ሜꬌይሳ ኤራዳ ኤያቴꬂኔ ሃዳ ጊዲዳ ፓላማፔ ሃካ።
2TI 2:24 ጎዳ ኦሳንቾይ ኣሳ ኡባስ ኬሃ፥ ሎዖ ታማርሴይሳኔ ዳንዳዓንቾ ጊዳናው ቤሴሲፔ ኣቲን ኦዬታናው ቤሴና።
2TI 2:25 ኢ ባራ ኤቄቴይሳታ ኣሽኬቴꬃን ሴሬይሳ ጊዳናው ቤሴስ። ኤንቲ ባንታ ናጋራፔ ሲሚዲ ቱማ ኤራናዳ ፆሳይ ኦꬃኔኮ ኦኒ ኤሪ።
2TI 2:26 ኤንቲ ባንታ ዎዛናኮ ሲሚዲ ባ ሼኒያ ኦꬃና ሜላ ኤንታ ኦይኪዳ ፃላሄ ፂሂያፔ ኬሲ ኤካና።
2TI 3:1 ዉርሴꬃ ጋላሳን ኡንዔꬂያ ዎዴይ ያናይሳ ኤራ።
2TI 3:2 ኣሳይ ባንታና ዶሴይሳታ፥ ሚሼ ሲቄይሳታ፥ ጬቄቴይሳታ፥ ኦቶሬይሳታ፥ ጫዬይሳታ፥ ባንታና ዬሊዳይሳታስ ኪቴቶናይስታ፥ ጋላቶናይስታ፥ ጌሻቴꬂ ባይናይሳታ፥
2TI 3:3 ሲቆይ ባይናይሳታ፥ ማሮቴꬂ ኤሮናይሳታ፥ ዚጊሬይሳታ፥ ባንታና ሃሮናይሳታ፥ ቃꬌይ ባይናይሳታ፥ ሎዖ ዶሶናይሳታ፥
2TI 3:4 ሞርኬስ ኣꬂ ኢሜይሳታ፥ ቆፊ ባይናይሳታ፥ ኦቶሮን ሱጌቴይሳታ፥ ፆሳፌ ኣꬂዲ ኣሾ ኡፋይሳናው ዶሴይሳታ ጊዳና።
2TI 3:5 ኤንቲ ኣማኒያ ዳኖሶናፔ ኣቲን ኣማኖ ዎልቃ ካዶሶና፤ ኔኒ ሄሳ ሜላ ኣሳታፔ ባቃታ።
2TI 3:6 ኤንታፌ ኢሶቲ ኢሶቲ ኣሳ ኬꬂ ጌሊዲ ናጋራን ኦይኬቲዳይሳታኔ ዱማ ዱማ ኣሞን ሱጌቲያ ዳቡራንቾ ማጫሳታ ቦላ ጎዳቶሶና።
2TI 3:7 ሄ ማጫሳቲ ኡባ ዎዴ ታማሮሶና፥ ሺን ቱማ ኤራናው ዳንዳዖኮና።
2TI 3:8 ያኔሲኔ ያምባሬሲ ሙሴራ ኤቄቲዳይሳዳ ሃ ኣሳቲ ጉጌይ ኦꬆናይሳታኔ ኣማኖን ኩንዲዳ ኣሳታ ጊዲያ ጊሾ ቱማራ ኤቄቶሶና።
2TI 3:9 ሺን ያኔሳኔ ያምባሬሳ ኤያቴꬃይ ቆንጪዳይሳዳ ኤንታ ኤያቴꬃይካ ኣሳ ኡባ ሲንꬃን ቆንጫና ጊሾ ኤንታው ሃኔና።
2TI 3:10 ሺን ኔኒ ታ ቲሚርቲያ፥ ታ ዱሳ፥ ታ ቆፋ፥ ታ ኣማኑዋ፥ ታ ዳንዳዓ፥ ታ ሲቁዋ፥ ታ ጌንጫ፥
2TI 3:11 ታ ዬዴቴꬃኔ ታ ሜቱዋ ኤራሳ። ኣንፆኪያን፥ ኢቆኒዮኔን፥ ሊስፂራ ካታማታን ታና ጋኪዳባኔ ታኒ ዳንዳዒዳ ሜቱዋ ኤራሳ፤ ጎዳይ ታና ሄ ኡባፌ ኣሺስ።
2TI 3:12 ኪሪስቶስ ዬሱሳን ፆሳ ኡፋይሲያ ዴዖ ዳናው ኮያ ኡባይ ጎዴታና።
2TI 3:13 ኢታ ኣሳቲኔ ባሌꬄይሳቲ ባንታው ባሌቲሼኔ ሃራታ ባሌꬂሼ ካሴፔ ኢቲ ኢቲ ባና።
2TI 3:14 ሺን ኔ ታማሪዳ ቱማኒኔ ኔ ኣማኒዳ ኣማኑዋን ኤቃ። ኔ ኦዴፌ ታማሪዳኮ ኤራሳ።
2TI 3:15 ኔኒ ኔ ናዓቴꬃፌ ዶማዳ ኪሪስቶስ ዬሱሳ ኣማናዳ ኣቶቴꬂ ዴሚያ ጪንጫቴꬂ ኢማናው ዳንዳዒያ ጌሻ ማፃፋታ ኤራዳሳ።
2TI 3:16 ጌሻ ማፃፋ ኡባይ ፆሳፌ ኢሜቲዳ ቃላ። ሄ ማፃፋይ ቱማ ታማርሳናው፥ ባሊዳይሳታ ሴራናው፥ ሱሪሳናዉኔ ፂሎቴꬃ ዱሳስ ኮሺያ ዞሬ ኢማናው ማዴስ።
2TI 3:17 ፆሳ ኣሲ ፖሎኔ ሎዖ ኦሶ ኡባ ኦꬃናው ጊጊዳይሳ ጊዳና ሜላ ማዴስ።
2TI 4:1 ታኒ ኔና ፆሳ ሲንꬃኒኔ፥ ካዎ ጊዲዲ ሃራናው ቆንጪያ ዎዴ ፓፃታኔ ሃይቂዳይሳታ ፒርዳናው ዴዒያ ኪሪስቶስ ዬሱሳ ሲንꬃን ዞራይስ።
2TI 4:2 ቃላ ኦዳ፤ ዎዴይ ኢንጄቲን ኢንጄቶና ኢፂን ሚናዳ ኦዳ። ዳሮ ዳንዳዓኒኔ ታማርሶን ኣሳ ዞራ፥ ሴራኔ ዴንꬄꬃ።
2TI 4:3 ኣሳይ ቱማ ቲሚርቲያ ሲዖና ኢፂያ ዎዴይ ያና። ኤንቲ ባንታ ኣሙዋ ካሊዲ፥ ባንታው ሲዓናው ኡፋይሲያባ ኦዲያ ኣስታማሬታ ሺሾሶና።
2TI 4:4 ኤንቲ ቱማ ቲሚርቲያ ኣጊዲ፥ ቱማ ጊዶና ኦዳ ሲዓናው ባንታ ሃይꬃ ዛሮሶና።
2TI 4:5 ሺን ኔኒ ኡባባን ኔና ሃራ። ሜቱዋ ዳንዳዓ። ዎንጌላ ማርካቴꬃ ኦሱዋ ኦꬃ። ኔው ኢሜቲዳ ፆሳ ኦሶ ኡባ ፖላ።
2TI 4:6 ታኒ ያርሼቲያ ዎዴይ ጋኪስ፤ ሃ ኣላሚያ ኣጋዳ ቢያ ዎዴይ ማቲስ።
2TI 4:7 ታኒ ሎዖ ኦላ ኦሌታስ፤ ታ ጋዲያ ዎፃዳ ዉርሳስ፤ ኣማኑዋ ናጋስ።
2TI 4:8 ሲንꬃፌ ፂሎቴꬃ ካላቻይ ታና ናጌስ። ሄሳ ፂሎ ፒርዳ ፒርዲያ ጎዳይ ሄ ጋላስ ታው ኢማና። ሄሳ ታ ፃላላስ ጊዶናሺን ኢያ ቆንጬꬃ ኣሞቲያ ኡባስ ኢማና።
2TI 4:9 ኤሌሳ ያዳ ታና ቤዓ።
2TI 4:10 ዴማሲ ሃ ኣላሚያን ዴዒያባታ ዶሲዲ፥ ታና ኣጊዲ፥ ቴሴሎንቄ ካታማ ቢስ። ቄርቂሲ ጋላቲያ ቢታ፥ ቃሲ ቲቶይ ዲልማፂያ ቢታ ቢስ።
2TI 4:11 ሉቃሳ ፃላሊ ታራ ዴዔስ። ማርቆሲ ፆሳ ኦሶን ታና ማዳናው ዳንዳዒያ ጊሾ ኔራ ኤካዳ ያ።
2TI 4:12 ታኒ ቲኪቆሳ ኤፌሶና ካታማ ኪታስ።
2TI 4:13 ኔኒ ያሼ፥ ፂሮዓዳ ካታማን ካርፖሳ ማታን ኣጋዳ ዪዳ ታ ኮቲያኔ ማፃፋታ ታው ኤካዳ ያ። ኡባካ ጋልባን ፃፌቲዳ ማፃፋታ ኤኮና ዮፓ።
2TI 4:14 ቢራታ ቆፂያ ኢስኪንዲሬይ ታና ዳሮ ቆሂስ፤ ጎዳይ ኢያ ኦሱዋዳ ኢያው ዛራና።
2TI 4:15 ኢ ኑ ቲሚርቲያ ዳሮ ኢፂያ ጊሾ ኢያፔ ኔና ናጋ።
2TI 4:16 ኮይሮ ታ ሞቴቲያ ዎዴ ኡባይ ኣጊዲ ቢዶሶናፔ ኣቲን ኦኒካ ታና ማዲቤና። ፆሳይ ሄ ባላ ኤንታው ታይቦፖ።
2TI 4:17 ሺን ታኒ ኩሜꬃ ኪታ ኣይሁዴ ጊዶና ኣሳ ኡባስ ማርካቲን፥ ኤንቲ ሲዓና ሜላ ጎዳይ ታ ማታን ኤቂዲ ታው ዎልቃ ኢሚስ። ቃሲ ኮሻቲዳ ጋሞዳ ዶና ዶዪዳ ሃይቁዋፔ ታና ኣሺስ።
2TI 4:18 ጎዳይ ታና ኢታ ኡባፌ ኣሺዲ ባ ሳሎ ካዎቴꬃ ሳሮን ኤፋና። ኢያው ሜሪናፔ ሜሪና ጋካናው ቦንቾይ ጊዶ። ኣሚንዒ።
2TI 4:19 ጲሪስቂላስ፥ ኣቂላሲኔ ኣኔስፎራ ሶ ኣሳስ ታ ሳሮꬁዋ ኦዳ።
2TI 4:20 ኤራስፆሲ ቆሮንቶሳ ካታማን ኣቲስ። ፂሮፊሞሲ ሃርጌቲዳ ጊሾ ሚሊፄ ካታማን ኣጋስ።
2TI 4:21 ባልጎይ ጌላናፔ ሲንꬄ ኤሌሳዳ ያ። ኤዉቡሉሲ፥ ጱዴሲ፥ ሊኑሲ፥ ቂላዴይኔ ሃራ ኣማኒያ ኣሳቲ ኡባይ ኔና ሳሮ ሳሮ ጎሶና።
2TI 4:22 ጎዳይ ዬሱስ ኪሪስቶሲ ኔ ኣያናራ ጊዶ። ፆሳ ማሮቴꬃይ ሂንቴ ኡባራ ጊዶ።
TIT 1:1 ዬሱስ ኪሪስቶሳ ሃዋሬይኔ ፆሳ ኣይሌይ፥ ጳዉሎሲ፥ ፃፊዳ ዳብዳቢያ። ፆሳይ ዶሪዳ ኣሳ ኣማኑዋ ዲቻናዳኔ ቱማ ኣያና ዴዑዋ ዋኒዲ ዳኔኮ ቤሲያ ቱማ ኤራኮ ኤንታ ካሌꬃናው ታኒ ኪቴታስ።
TIT 1:2 ሄ ኣማኖይኔ ኤራቴꬃይ ሜሪና ዴዑዋ ኡፋይሳ ቦላ ዜምፒስ። ሄሳ ዳሮ ዎዴፔ ሲንꬄ ዎርዶቶና ፆሳይ ኑስ ኢማና ጊዲ ቃላ ጌሊስ።
TIT 1:3 ኑና ኣሺያ ፆሳይ ባ ዎዴን ሃ ኪታ ኦዳና ሜላ ታው ሃዳራ ኢሚስ።
TIT 1:4 ኑ ኮꬄ ኣማኑዋን ታ ቱማ ናዓ ጊዲዳ ቲቶ፥ ፆሳ ኣዋፔኔ ኑና ኣሺያ ዬሱስ ኪሪስቶሳፔ ኣꬎ ኬሃቴꬃይ፥ ማሮቴꬃይኔ ሳሮቴꬃይ ኔው ጊዶ።
TIT 1:5 ታኒ ኔና ቃርፄሳን ኣጋዳ ዪዳይ፥ ኔኒ ኣቲዳባ ጊጊሳናዳኔ ታኒ ኪቲዳይሳዳ ካታማ ኡባን ዎሳ ኬꬃ ጪማታ ዶራና ሜላሳ።
TIT 1:6 ጪሚ ቦሬቶናይሳ፥ ኢሲ ማቼ ኣዚና፥ ማራ ꬋዮን ዎይኮ ኪቴቴꬃ ኢፆን ኣሲ ቦሮና ኣማኒያ ናይቲ ዴዒያ ኣሲ ጊዳናው ቤሴስ።
TIT 1:7 ዎሳ ኬꬃ ጪሚ ፆሳ ኦሱዋ ሃዳራ ኤኪዳ ጊሾ ቦሬቶናይሳ፥ ኦቶርቶናይሳ፥ ኤሌ ዪሎቶናይሳ፥ ማꬆቶናይሳ፥ ኦዳ ሜꬎናይሳኔ ቤሶና ጎዓስ ዳፌቶናይሳ ጊዳናው ቤሴስ።
TIT 1:8 ሺን ኢማꬄ ሞኬይሳ፥ ሎዖባ ኡባ ዶሴይሳ፥ ኣኬካንቾ፥ ፂሎ፥ ጌሺኔ ባና ሃሬይሳ ጊዳናው ቤሴስ።
TIT 1:9 ሃራታ ሱሬ ቲሚርቲያን ሚንꬄꬃናዉኔ ሄ ቲሚርቲያ ኢፄይሳታ ዛራናው ባ ታማሪዳ ቱማ ቃላን ሚኒዲ ኤቃናው ቤሴስ።
TIT 1:10 ኪቴቶናይሳቲ፥ ፓꬆና ኦዳ ኦዴቴይሳቲ፥ ጪሜይሳቲ ኡባካ ቃፃሬቴꬃ ዎጋ ናጊያ ዳሮ ኣሳቲ ዴዖሶና።
TIT 1:11 ኤንቲ ቤሶና ኦጌን ሚሼ ዴማናው ኮዪዲ፥ ታማርሳናው ቤሶናባ ታማርሲሼ ኬꬃ ኣሳ ኡባ ኢሲያ ጊሾ ኤንታ ቲሚርቲያ ቴቃናው ቤሴስ።
TIT 1:12 ኤንታ ናቤታፔ ኢሶይ፥ «ቃርፄሳ ኣሳይ ኡባ ዎዴ ዎርዶ ኦዴቶሶና፤ ኢታ ዶዓታኔ ኣዛላ ያራምባታ» ያጊስ።
TIT 1:13 ሃ ማርካቴꬃይ ቱማ ማርካቴꬂ። ሄሳ ጊሾ፥ ኤንታው ቱማ ኣማኖይ ዳና ሜላ ኤንታ ሃንቄታ።
TIT 1:14 ቱማ ኢፂያ ኣሳ ቲሚርቲያኔ ኣይሁዴታ ፓꬆና ቶሲያ ሲዖና ሜላ ኤንታ ሴራ።
TIT 1:15 ባንታው ጌሺ ጊዲዳይሳታስ ኡባይ ጌሺ፥ ሺን ቱናታሲኔ ኣማኖናይስታስ ኤንታ ቆፋይኔ ካሃይ ቱኒዳ ጊሾ ኤንታው ኣይቢካ ጌሺ ጊዴና።
TIT 1:16 ኤንቲ ኑ ፆሳ ኤሮስ ጎሶና፥ ሺን ባንታ ኦሱዋን ኢያ ካዶሶና። ኤንቲ ፆሳን ኢፄቲዳይሳታ፥ ኪቴቶናይሳታኔ ሎዖ ኦሶ ኡባስ ጊዶናይሳታ።
TIT 2:1 ሺን ኔኒ ሱሬ ቲሚርቲያ ጳልቆና ቲሚርቴ ታማርሳናው ቤሴስ።
TIT 2:2 ጪማ ኣዴቲ ባንታና ሃሬይሳታ፥ ዎፑ ጊዳይሳታ፥ ቦንቼቲዳይሳታ፥ ኣማኖን፥ ሲቆኒኔ ዳንዳዓን፥ ሚኖ ጊዳና ሜላ ዞራ።
TIT 2:3 ሄሳዳካ፥ ጪማ ማጫሳይ ባንታ ዱሳን ጌሻታ፥ ዚጊሮናይሳታ፥ ዎይኔ ኡሻን ሃሬቶናይሳታኔ ሎዖባ ታማርሴይሳታ ጊዳና ሜላ ታማርሳ።
TIT 2:4 ኤንቲ ሄሳዳ ሃኒኮ ያላጋ ማጫሳይ ባንታ ኣዚናታኔ ባንታ ናይታ ሲቃና ሜላ ታማርሳናው ዳንዳዖሶና።
TIT 2:5 ፆሳ ቃላይ ቦሬቶና ሜላ ባንታና ሃሬይሳታ፥ ጌሻታ፥ ባንታ ሶን ኦꬄይሳታ፥ ኬሃታኔ ባንታ ኣዚናታስ ኪቴቴይሳታ ጊዳና ሜላ ያላጋ ማጫሳ ታማርሶና።
TIT 2:6 ሄሳዳካ፥ ያላጋ ኣዳቲ ባንታና ሃራና ሜላ ዞራ።
TIT 2:7 ኔኒ ኔ ሁዔን ሎዖ ኦሶ ኡባን ኤንታው ሌሚሶ ጊዳ። ኔኒ ኔ ቲሚርቲያን ኤቂዳይሳኔ ኣማኔቲዳይሳ ጊዳ።
TIT 2:8 ኑ ሞርኬቲ ኑና ዚጊራናው ጋሶያባይ ኤንታው ꬋዪን ኤንቲ ዬላታና ሜላ ኔኒ ቦሬቶና ሎዖ ኦዳ ኦዴታ።
TIT 2:9 ኣይሌቲ ኡባባን ባንታ ጎዳታስ ኪቴታና ሜላ፥ ኤንታ ኡፋይሳና ሜላኔ ኤንታራ ፓላሞና ሜላ ዞራ።
TIT 2:10 ኤንቲ ባንታ ጎዳታፔ ካይሶቶፖ። ሄሲካ፥ ኑና ኣሺያ ፆሳ ቲሚርቴይ፥ ኡባ ኦጌን ዶሴቲዳይሳ ጊዳና ሜላ ባንታ ኦꬂያ ኦሱዋን ኣማኔቴይሳታ ጊዴይሳ ቤሳና ሜላ ኤንታ ዞራ።
TIT 2:11 ኣሴ ኣሺያ ፆሳ ኣꬎ ኬሃቴꬃይ ኣሳ ኡባስ ቆንጪስ።
TIT 2:12 ሄ ኣꬎ ኬሃቴꬃይ፥ ኑ ናጋራኔ ሃ ኣላሚያ ኣሙዋ ኣጊዲ፥ ሃ ዎዲያን ኑና ሃሪዲ፥ ቱማ ኣያና ዴዑዋኒኔ ፂሎቴꬃን ዳና ሜላ ኑና ታማርሴስ።
TIT 2:13 ኑኒ ኣንጄቲዳ ኡፋይሳ ጊዲዳ ጊታ ፆሳኔ ኑና ኣሺያ ዬሱስ ኪሪስቶሳ ቦንቾ ቆንጬꬃ ናጎስ።
TIT 2:14 ኢታ ኦሶ ኡባፌ ኑና ዎዛናዉኔ ሎዖባ ኦꬃናው ኣሞቲያ ባ ጌሻ ኣሲ ኬሳናው ኑ ጊሾ ባና ኣꬂ ኢሚስ።
TIT 2:15 ኔኒ ሃይሳ ታማርሳ፤ ኩሜꬃ ማታን ዞራ፥ ሴራ፤ ኦኒካ ኔና ካꬎፖ።
TIT 3:1 ኣሳይ ዴሪያ ሃሬይሳታስ፥ ኣዋቴꬃይ ዴዔይሳታስ ሃሬታናው፥ ኪቴታናዉኔ ሎዖ ኦሶ ኡባ ኦꬃናው ጊጌቲዳይሳታ ጊዳና ሜላ ኣኬኪሳ።
TIT 3:2 ቃሲ ኤንቲ ኦዴ ቦላካ ኢታ ኦዴቶና ሜላ፥ ሳሮ ኣሲ ጊዳና ሜላ፥ ኣሽኬታኔ ኣሳ ኡባስ ካꬌቴይሳታ ጊዳና ሜላ ዞራ።
TIT 3:3 ኑኒ ካሴ ኤያታ፥ ኪቴቶናይሳታ፥ ባሌቲዳይሳታ፥ ዱማ ዱማ ኣሾ ኡፋይሳሲኔ ኣሞስ ኣይሌቲዳይሳታ። ኑኒ ኢታቴꬃኒኔ ቃናቴን ኩሚዳይሳታ፤ ኑ ኣሴ ኢፄይሳታ፥ ኣሲካ ኑና ኢፄይሳታ።
TIT 3:4 ሺን ኣሺያ ፆሳ ኬሃቴꬃይኔ ሲቆይ ቆንጪዳ ዎዴ
TIT 3:5 ኑ ኦꬂዳ ፂሎ ኦሱዋ ጊሾ ጊዶናሺን ባ ማሮቴꬃ ጊሾ ኑና ኣሺስ። ኑና ኢ ኣሺዳይ፥ ናምዓንꬆ ዬሌቴꬃ ሜቻኒኔ ጌሻ ኣያና ባጋራ ኢሚዳ ኦራꬃ ዴዑዋና።
TIT 3:6 ሄ ኣያና፥ ፆሳይ ኑና ኣሺያ ዬሱስ ኪሪስቶሳ ባጋራ ኑ ቦላ ዳርሲዲ ጉሲስ።
TIT 3:7 ባ ኣꬎ ኬሃቴꬃ ባጋራ ኑና ፂሊሲዲ ሜሪና ዴዑዋ ላታ ኡፋይሳ ኦይካና ሜላ ሄሳ ኦꬂስ።
TIT 3:8 ሃ ቃላይ ኣማኔቲዳ ቃላ። ፆሳ ኣማኔይሳቲ ሎዖ ኦሶ ኦꬃናው ጊጊዳይሳታ ጊዳና ሜላ ኔ ሃ ቃላ ሚንꬃዳ ኦዳና ሜላ ታ ኮያይስ። ሃይሳቲ ኣሴ ኡባስ ሎዖኔ ጎዔይሳታ።
TIT 3:9 ሺን ኤያቴꬃ ፓላማፔ፥ ኮቻ ታይቦፔ፥ ካቻፌኔ ሂጌ ጋሶን ዴንዲያ ኦሻፌ ናጌታ። ሄሲ ጎዒኔ ዎꬌይ ባይናባ።
TIT 3:10 ሻሆቴꬂ ሜꬊያ ኡራ ኮይሮ ዞራ፤ ናምዓንꬆ ሃንቄታ ሄሳፌ ጉዬ ኢያፔ ሃካ።
TIT 3:11 ሄሳ ሜላ ኣሲ ጌላኔ ናጋራንቾ፤ ኢ ባ ቦላ ፒርዴይሳ ኤራ።
TIT 3:12 ታኒ ባልጎ ያን ሻጫናው ቆፒዳ ጊሾ ኣርፄማሳ ዎይኮ ቲኪቆሳ ኔኮ ኪቲያ ዎዴ ኔ ታኮ ኒቆጲሊዮና ያናው ሚና።
TIT 3:13 ሂጌ ኤሪያ ዜናሲኔ ኣጲሎሲ ኦጌ ቢያ ዎዴ ኤንታው ኮሺያባይ ፓጮና ሜላ ኤንታ ማዳ።
TIT 3:14 ኑ ኣሳይካ ፓꬆና ኣሲ ጊዲዲ ኣቶና ሜላ ባንታው ኮሺያባ ዴማና ሜላ ሎዖ ኦሶ ኦꬃናው ሚኒዲ ታማሮ።
TIT 3:15 ታራ ዴዒያ ኡባይ ኔና ሳሮ ጎሶና፤ ኣማኖን ኑና ሲቂያ ኣሳ ሳሮ ጋ። ፆሳ ኣꬎ ኬሃቴꬃይ ሂንቴ ኡባራ ጊዶ። ኣሚንዒ።
PHM 1:1 ታኒ ጳዉሎሲ፥ ዬሱስ ኪሪስቶሳ ጊሾ ቃሾን ዴዔይሲኔ ኑ ኢሻ ፂሞቲዮሲ፥ ኑራ ኦꬂያ ኑኒ ዶሲያ ፊልሞናስ፥
PHM 1:2 ኔ ሶን ሺቂያ ዎሳ ኬꬃስ፥ ኑ ሚቼ ኣፊቢያሲኔ ኑራ ኢሲፌ ዴዒያ ዎታዳሬ ኣርኪጳሳስ ፃፊዳ ኪታ።
PHM 1:3 ፆሳ ኑ ኣዋፔኔ ኑ ጎዳ ዬሱስ ኪሪስቶሳፔ ኣꬎ ኬሃቴꬃይኔ ሳሮቴꬃይ ሂንቴው ጊዶ።
PHM 1:4 ኔኒ ጌሻታ ዶሴይሳኔ ጎዳ ዬሱሳ ኣማኔይሳ ታኒ ሲዒያ ጊሾ ፆሳ ዎሳሼ ኔና ቆፒያ ዎዴ ኡባን ታ ፆሳ ጋላታይስ።
PHM 1:6 ኔኒ ኔ ኣማኑዋ ሃራታስ ሻኬይሲ ኑስ ኪሪስቶስ ዬሱሳ ባጋራ ያ ሎዖባ ኡባ ኤሪሳና ሜላ ታኒ ፆሳ ዎሳይስ።
PHM 1:7 ጌሻታ ዎዛናይ ኔ ኦሱዋን ሚኒዳ ጊሾ ታ ኢሻው፥ ታኒ ኔ ሲቁዋን ዳሮ ኡፋይሲኔ ሚንꬄꬆ ዴማስ።
PHM 1:8 ሄሳ ጊሾ፥ ኔኒ ኦꬃናው ቤሲያባ ኦꬃና ሜላ ኔና ኪታናው ኪሪስቶሳ ባጋራ ታው ሚኖቴꬂ ዴዔስ።
PHM 1:9 ታኒ፥ ጪማይ ጳዉሎሲ፥ ኪሪስቶስ ዬሱሳስ ሃዒካ ቃሾን ዴዔይሲ፥ ሲቆን ኔና ዎሳይስ።
PHM 1:10 ታኒ ቃሾን ዴዓሼ ኢያው ዞሪያ ኣዋ ጊዳዳ ታ ናዓ ኣናስሞሳ ጊሾ ኔና ዎሳይስ።
PHM 1:11 ኢ ካሴ ኔና ማዴና፥ ሺን ሃዒ ኔናካ ታናካ ቱማ ማዲያ ኣሲ።
PHM 1:12 ታኒ ዎዛናፔ ዶሲያ ኣናስሞሳ ኔኮ ዬዳይስ። ታኒ ዎንጌላ ጊሾ ቃሼቲዳሺን፥ ኔ ጊሾ ታው ኦꬂዲ ታና ማዳና ሜላ ታ ማታን ኢያ ኣሻናው ኮያስ።
PHM 1:14 ሺን ኔ ሼኔዳ ኦꬃናው ኮያሲፔ ኣቲን ኔራ ዞሬቶና ዎልቃን ኣይኮካ ኦꬃናው ኮዪኬ።
PHM 1:15 ኣናስሞሲ ጉꬃ ዎዴ ኔፔ ሻኬቲዳይሲ፥ ኦኒ ኤሪ ሲሚዲ ኡባ ዎዴ ኔራ ዴዖና ኣጌና።
PHM 1:16 ሂዛ፥ ሃይሳፌ ጉዬ ኣናስሞሲ ኣይሌ ጊዶናሺን ኣይሌፌ ኢ ዳሮ ኣꬌስ። ኢ ታው ኣይ ሜላ ሲቆ ኢሼ! ቃሲ ኢ ኔው ኣሳ ባጋራካ ጎዳ ባጋራካ ኣꬊዳ ኢሻ።
PHM 1:17 ሂዛ፥ ኔኒ ታና ኔ ላጌ ጊያባ ጊዲኮ ታና ሞኬይሳዳ ኢያ ሞካ።
PHM 1:18 ኢ ኔና ቆሂዳባይ ዎይኮ ኢ ኣጮቲዳባይ ዴዒኮ ታፔ ኤካ።
PHM 1:19 ሄ ኣጩዋ ታኒ ቃንፃና ጋዳ ታኒ፥ ጳዉሎሲ፥ ታ ኩሼን ፃፋይስ። ኔኒ ታው ኔ ሼምፑዋ ኣጮታ ኡቲዳይሳ ታኒ ኔና ኣኬኪሳናው ኮሼና።
PHM 1:20 ታ ኢሻው፥ ጎዳ ባጋራ ኔፔ ማዴ ዴማናው ኮያይስ። ኪሪስቶሳ ባጋራ ታና ሚንꬄꬃ።
PHM 1:21 ታኒ ጊዳይሳፌ ዳሮ ኔኒ ኦꬃናይሳ ኤራዳ ቃሲ ኔ ታው ኪቴታናይሳ ኣማናዳ ሃይሳ ፃፋይስ።
PHM 1:22 ፆሳይ ሂንቴ ዎሳ ሲዒዲ ታና ሂንቴኮ ጉዬ ዛራና ጋዳ ቆፒያ ጊሾ ታው ኢማꬂ ሼምፒያ ኬꬂ ጊጊሳ።
PHM 1:23 ኪሪስቶስ ዬሱሳ ጊሾ ታራ ቃሾን ዴዒያ ኤጳፊሪ ኔና ሳሮ ሳሮ ጌስ።
PHM 1:24 ቃሲ ታራ ኢሲፌ ኦꬂያ ማርቆሲ፥ ኣርስፂሮኮሲ፥ ዴማሲኔ ሉቃሲ ኔና ሳሮ ሳሮ ጎሶና።
PHM 1:25 ጎዳ ዬሱስ ኪሪስቶሳ ኣꬎ ኬሃቴꬃይ ሂንቴ ኣያናራ ጊዶ።
HEB 1:1 ካሴ ፆሳይ፥ ኑ ኣዋታስ ናቤታ ባጋራ ዱማ ዱማ ኦጌን ዳሮ ዎዴ ኦዲስ።
HEB 1:2 ሺን ሃ ዉርሴꬃ ዎዲያን ኡባ ኢያ ላቲሲዳ ቃሲ ኣላሚያ ኢያ ባጋራ ሜꬊዳ ባ ናዓ ባጋራ ኑስ ኦዲስ።
HEB 1:3 ናዓይ ፆሳ ቦንቹዋ ጶሌꬃኔ ኩሜꬃ ፆሳ ፆሳቴꬃ ኤኪዲ፥ ባ ዎልቃማ ቃላን ሃ ኣላሚያ ካቲሲዲ ኦይኪስ። ኣሳ ኤንታ ናጋራፔ ጌሺዳፔ ጉዬ ኡባፌ ቦላ ፆሳ ኡሻቻ ባጋን ሳሉዋን ኡቲስ።
HEB 1:4 ኢያው ኢሜቲዳ ሱንꬃይ ኪታንቾታ ሱንꬃፌ ቦላ ጊዴይሳዳ ኢ ኤንታፌ ቦላ።
HEB 1:5 ሂዛ፥ ፆሳይ ኪታንቾታፔ ኦዴኮ፥ «ኔኒ ታ ናዓ፤ ታ ሃቺ ኔው ኣዋ ጊዳስ» ጊዴ? ዎይኮ ቃሲ ኦዴኮ፥ «ታኒ ኢያው ኣዋ ጊዳና፤ ኢካ ታው ናዓ ጊዳና» ጊዴ?
HEB 1:6 ቃሲ ፆሳይ ባ ባይራ ናዓ ሃ ኣላሚያ ኪቲሼ፥ «ፆሳ ኪታንቾቲ ኡባይ ኢያው ጎይኖ» ያጊስ።
HEB 1:7 ፆሳይ ኪታንቾታባ ኦዲሼ፥ «ፆሳይ ባ ኪታንቾታ ጫርኮ፥ ባ ኣይሌታ ታማ ላጮ ኦꬄስ» ያጌስ።
HEB 1:8 ሺን ባ ናዓባ ኦዲሼ፥ «ፆሳው፥ ኔ ካዎቴꬃይ ሜሪናው ዴዔስ። ኔ ካዎቴꬃ ኔ ፂሎቴꬃን ኣይሳሳ።
HEB 1:9 ኔኒ ፂሎቴꬂ ዶሳዳሳ፤ ኢታ ኢፃዳሳ። ፆሳይ፥ ኔ ጎዳይ፥ ኔና ኔ ላጌታፔ ኣꬂዲ ዶሪስ፥ ኡፋይሳ ዛይቴ ኔና ቲዪስ» ያጌስ።
HEB 1:10 ፆሳይ ዛሪዲ፥ «ጎዳው፥ ኮይሮ ኔኒ ሳዓ ሜꬋዳሳ፤ ሳሎቲ ኔ ኩሼ ኦሶ።
HEB 1:11 ሄሳቲ ኡባይ ꬋያና፤ ሺን ኔኒ ዳና። ኤንቲ ኡባይ ኣፊላዳ ዉራና።
HEB 1:12 ኔኒ ኤንታ ሳሌናዳ ፃፃና፤ ቃሲ ኤንቲ ኣፊላዳ ላሜታና። ሺን ኔኒ ኡባ ዎዴ ኔና፤ ኔ ላይꬃይካ ዉሬና» ያጌስ።
HEB 1:13 ሺን ፆሳይ ኪታንቾታፔ ኦዴኮ፥ «ታኒ ኔ ሞርኬታ ኔ ቶሆይ ዬꬊያሶ ኦꬃና ጋካናው፥ ሃይሳን ታፔ ኡሻቻ ባጋን ኡታ» ጊዴ?
HEB 1:14 ኪታንቾቲ ኡባይ ኣቶቴꬂ ዴማናው ዴዒያ ኣሳታ ማዳናው ፆሳይ ኪቲዳ ኣያናታ ጊዶኮናዬ?
HEB 2:1 ሄሳ ጊሾ፥ ኑኒ ሲዒዳ ቱማፔ ሃራሶ ኤኬቶና ሜላ ሄ ሲዒዳይሳ ሚንꬂዲ ናጋናው ቤሴስ።
HEB 2:2 ሂዛ፥ ኪታንቾታ ባጋራ ኦዴቲዳ ቃላይ ቱማ ጊዲኮ፥ ኢያ ናቆይኔ ኪቴቶና ኢፆይ ፒርዳ ኤሂያባ ጊዲኮ፥
HEB 2:3 ያቲን፥ ኑኒ ሃይሳ ሜላ ጊታ ኣቶቴꬃ ኢፃስ ጊኮ፥ ዋኒዲ ኣታኔ? ኮይሮ ጎዳይ ባ ሁዔን ሄ ኣቶቴꬃ ኦዲስ፤ ቃሲ ኢያፔ ሲዒዳይሳቲ ኑስ ጌሺዲ ማርካቲዶሶና።
HEB 2:4 ቃሲ ፆሳይ ማላታታን፥ ኦራꬃባታን፥ ዱማ ዱማ ማላታኒኔ ባ ሼኒያዳ ኢሚዳ ጌሻ ኣያና ኢሞታታን ማርካቴꬃ ሚንꬂስ።
HEB 2:5 ፆሳይ ሃ ኑኒ ኦዲያ ሲንꬃፌ ያና ኣላሚያ፥ ኪታንቾታስ ሃሪሲቤና።
HEB 2:6 ጌሻ ማፃፋይ ኢሲ ቤሳን ሃይሳዳ ያጌስ፡ «ኔኒ ኣሳስ ቆፓናው ኣሲ ኣይቤ? ዎይኮ ኔኒ ኢያ ናጋናው ኢ ኣይቤ?
HEB 2:7 ኔ ኢያ ኪታንቾታፔ ጉꬃ ዎዴስ ጉꬃዳሳ፤ ኢያ ሁዔን ቦንቾኔ ሳባ ካላቻ ዎꬃዳሳ።
HEB 2:8 ቃሲ ኡባባ ኢያ ቶሁዋፔ ጋርሳን ዎꬃዳሳ» ያጌስ። ፆሳይ ኡባባ ኢያው ሃሪሲያ ዎዴ ኢያው ሃሬቲቦናባይ ኣይቢካ ባዋ። ሺን ሃዒ ኡባባይ ኢያው ሃሬቲሺን ኑኒ ቤዒቦኮ።
HEB 2:9 ሺን ኑኒ ኪታንቾታፔ ጉꬃራ ጉፂዳ ዬሱሳ ቤዖስ። ፆሳ ኣꬎ ኬሃቴꬃ ጋሶን ዬሱሲ ኣሳ ኡባስ ሃይቂስ። ኢ ዋዬ ሃይቆ ሃይቂዳ ጊሾ ቦንቾኔ ሳባ ካላቻ ኢያ ሁዔን ዎꬂስ።
HEB 2:10 ኡባባይ ኢያዉኔ ኢያ ጋሶን ሜꬌቲዳ ፆሳይ፥ ዳሮ ናይታ ባራ ቦንቺሳናው ኤንታ ኣቶቴꬃ ሁዒያ፥ ዬሱሳ ዋዬን ፖሎ ኦꬃናው ኢያው ቤሴስ።
HEB 2:11 ዬሱሲኔ ሄ ኢ ጌሺዳ ኣሳ ኡባይ ኢሲ ኣዋ ናይታ። ዬሱሲ ኤንታ፥ «ታ ኢሻታ» ጊዲ ፄጋናው ዬላቶናይ ሄሳሳ።
HEB 2:12 ዬሱሲ፥ «ታኒ ኔ ሱንꬃ ታ ኢሻታስ ኣዋጃና፤ ዴሪያ ሺቁዋን ኔና ጋላታና» ያጌስ።
HEB 2:13 ቃሲ ኢ፥ «ታኒ ታ ኣማኑዋ ኢያ ቦላ ዎꬃና» ቃሲካ፥ «ፆሳይ ታው ኢሚዳ ናይታራ ታ ሃይሳን ዴዓይስ» ያጌስ።
HEB 2:14 ናይቲ ኣሾይኔ ሱꬂ ዴዔይሳታ ጊዲያ ጊሾ ዬሱሲካ ኤንታዳ ኣሴ ጊዲስ። ኢ ሄሳ ኦꬂዳይ፥ ሃይቆ ቦላ ዎልቂ ዴዒያ ፃላሂያ ባ ሃይቁዋን ꬋይሳናሳ።
HEB 2:15 ቃሲ ባንታ ዴዖ ላይꬃ ኡባን ሃይቆ ያሻን ኣይሌቲዲ ዴዔይሳታ ኣይሌቴꬃፌ ዎዛናሳ።
HEB 2:16 ቱማ ዬሱሲ ዪዳይ ኣብራሃሜ ዜሬꬂ ማዳናሳፌ ኣቲን ኪታንቾታ ማዳናሳ ጊዴና።
HEB 2:17 ኣሳ ናጋራይ ኣቶ ጌቴታና ሜላ ፆሳ ሲንꬃን ማሪያኔ ኣማኔቲዳ ካሂኔ ሃላቃ ጊዲስ። ሄሳ ጊሾ፥ ኢ ኡባባን ባ ኢሻታ ዳናናው ቤሴስ።
HEB 2:18 ኢ ባ ሁዔን ፓጬን ዋዬቲዳ ጊሾ ፓጬቴይሳታ ማዳናው ዳንዳዔስ።
HEB 3:1 ሄሳ ጊሾ፥ ፆሳይ ፄጊዳ ጌሻ ኢሻቶ፥ ኑ ኣማኖን ጎዳ ጊዲ ፄጊያ ሃዋሪያኔ ካሂኔ ሃላቃ ዬሱሳ ቤዒቴ።
HEB 3:2 ሙሴይ ፆሳ ኬꬃ ኡባን ኣማኔቲዳይሳዳ ዬሱሲካ ባና ዶሪዳ ፆሳስ ኣማኔቲዳይሳ።
HEB 3:3 ኬꬄ ኬፄይሲ ኬꬃፌ ኣꬊዲ ቦንቼቴይሳዳ ዬሱሲ ሙሴፔ ኣꬊያ ቦንቾ ኤካናው ቤሴስ።
HEB 3:4 ኢሲ ኢሲ ኬꬃ ኬፂዳ ኣሲ ዴዔስ፥ ሺን ኡባ ጊጊሲዳይ ፆሳ።
HEB 3:5 ሙሴይ ፆሳ ኬꬃ ኡባን ኣማኔቲዳ ኣይሌ ጊዲዲ፥ ፆሳይ ሲንꬃፌ ጋናባስ ማርካ ጊዲስ።
HEB 3:6 ሺን ኪሪስቶሲ ፆሳ ኬꬃን ናዓዳ ኣማኔቲዳይሳ። ኑኒ ኤካና ጊዲ ናጊያ ኡፋይሳ ሚንꬂዲ ናጊኮ ፆሳ ኬꬂ ጊዶስ።
HEB 3:7 ሄሳ ጊሾ፥ ጌሻ ኣያናይ ጌይሳዳ፥ «ሃቺ ሂንቴ ፆሳይ ጌይሳ ሲዒያ ዎዴ
HEB 3:8 ባዞ ቢታን ፓጪያ ጋላስ፥ ሂንቴ ኣዋቲ ማካሊዳይሳዳ፥ ሂንቴ ዎዛና ሚንꬆፊቴ።
HEB 3:9 ሂንቴ ኣዋቲ ታና ፓጪዶሶና፤ ኦይታሙ ላይꬂ ታ ኦሱዋ ቤዒዶሶና።
HEB 3:10 ሄሳ ጊሾ፥ ታ ሄ ዬሌቴꬃ ሃንቄታዳ፥ ‹ኤንቲ ኡባ ዎዴ ባንታ ዎዛናን ባሎሶና፤ ታ ኦጊያ ኤሪቦኮና› ያጋስ።
HEB 3:11 ሄሳ ጊሾ፥ ታኒ ታ ሃንቁዋን ጫቃዳ፥ ‹ታ ሼምፖ ቤሳ ኡባካ ጌሎኮና› ያጋስ» ያጌስ።
HEB 3:12 ታ ኢሻቶ፥ ሂንቴፌ ኦዴንካ፥ ዴዖ ፆሳፌ ሂንቴና ሻኪያ ኢታኔ ኣማኖና ዎዛኒ ዶና ሜላ ናጌቲቴ።
HEB 3:13 ሂንቴፌ ኦናካ ናጋሪ ባሌꬂን፥ ባ ዎዛና ሚንꬆና ሜላ «ሃቺ» ያጌቲዲ ፄጌቲሺን ጋላስ ጋላስ ኢሶይ ኢሱዋራ ዞሬቲቴ።
HEB 3:14 ኑ ኮይሮ ኣማኑዋ ኑኒ ዉርሴꬂ ጋካናው ሚንꬂዲ ናጊኮ፥ ኪሪስቶሳራ ኢሲፌ ላታና።
HEB 3:15 ጌሻ ማፃፋን፥ «ሃቺ ፆሳይ ጌይሳ ሂንቴ ሲዒያ ዎዴ ሄ ዎዴ ኤንቲ ማካላቴꬃን ሃኒዳይሳዳ፥ ሂንቴ ዎዛና ሚንꬆፊቴ» ያጊስ።
HEB 3:16 ፆሳይ ጊያባ ሲዒዲ ማካሊዳይ ኦኔ? ሙሴይ ጊብፄፌ ካሌꬂ ኬሲዳ ኡባ ጊዶኮናዬ?
HEB 3:17 ፆሳይ ኦይታሙ ላይꬂ ኦና ሃንቄቲዴ? ናጋራ ኦꬂዳይሳታኔ ኤንታ ኣሃይ ባዞ ቢታን ዎꬊ ኣቲዳ ኣሳታ ጊዶኮናዬ?
HEB 3:18 ቃሲ ፆሳይ፥ «ታ ሼምፖ ቤሳ ጌሌኬታ» ያጊዲ ጫቂዳይ፥ ኢያው ኪቴቶና ኢፂዳ ኣሳፔ ኣቲን ኦዴሴ?
HEB 3:19 ሂዛ፥ ኤንቲ ሄ ሼምፖ ቤሳ ጌሎና ኣቲዳይ ኣማኒቦና ጊሾ ጊዴይሳ ኑ ቤዖስ።
HEB 4:1 ሂዛ፥ ፆሳይ ኑና ባ ሼምፖ ቤሳ ጌልሳና ጊዳ ቃላይ ቡሮ ሲንꬃፌ ዴዒያ ጊሾ ሂንቴፌ ኦኒካ ሄ ሼምፖ ቤሳ ጌሎና ኣቶና ሜላ ናጌቶስ።
HEB 4:2 ኤንታው ዎንጌላይ ሳባኬቲዳይሳዳ፥ ኑስካ ሳባኬቲስ። ሺን ኤንቲ ሲዒዳባ ኣማኒዲ ኤኪቦና ጊሾ ኤንታ ጎዒቤና።
HEB 4:3 ጊዶሺን፥ ኣላሜይ ሜꬌቶሳፔ ዶሚዲ ፆሳ ኦሶይ ፖሌቲዳይሳ ጊዲኮካ፥ ፆሳይ፥ «ታኒ ታ ሃንቁዋን ጫቃዳ፥ ታ ሼምፖ ቤሳ ኡባካ ጌሎኮና» ጊዳይሳዳ፥ ኑኒ ኣማኒዳይሳቲ ኢያ ሼምፖ ቤሳ ጌላና።
HEB 4:4 ላፑንꬃ ጋላሳባ ኢሲ ቤሳን፥ «ፆሳይ ላፑንꬃ ጋላሳን ባ ኦሶ ኡባፌ ሼምፒስ» ያጊስ።
HEB 4:5 ቃሲካ ሄ ቤሳን፥ «ኤንቲ ታ ሼምፖ ቤሳ ኡባራካ ጌሎኮና» ያጊስ።
HEB 4:6 ኮይሮ ዎንጌላ ሲዒዳይሳቲ ኪቴቶና ኢፂዲ ሼምፖ ቤሳ ጌሊቦኮና። ያኒያ ጊሾ፥ ሃዒካ ሄ ሼምፖ ቤሳ ጌላና ኢሲ ኢሲ ኣሳቲ ዴዖሶና።
HEB 4:7 ሄሳ ጊሾ፥ ፆሳይ፥ «ሃቺ» ጊዲ ፄጊሼ ኢሲ ጋላስ ኑስ ቃንፂስ። ዳሮ ዎዴፔ ጉዬ ፆሳይ ዳዊቴ ባጋራ፥ «ፆሳይ ጊያባ ሃቺ ሂንቴ ሲዒያ ዎዴ ሂንቴ ዎዛና ሚንꬆፊቴ» ያጊዲ ኦዲስ።
HEB 4:8 ኢያሱይ ኤንታው ሼምፑዋ ኢሚዳባ ጊዲያኮ፥ ፆሳይ ሃራ ጋላሳባ ጉዬፔ ኦዴናሺን።
HEB 4:9 ሂዛ፥ ፆሳ ኣሳስ ሳምባታ ሼምፖይ ናጌቲዲ ዴዔስ።
HEB 4:10 ፆሳ ሼምፖ ቤሳ ጌሊያ ኦኒካ፥ ፆሳይ ባ ኦሱዋፔ ሼምፒዳይሳዳ ኢካ ባ ኦሱዋፔ ሼምፓና።
HEB 4:11 ሄሳ ጊሾ፥ ኦኒካ ሄ ኣሳ ኪቴቴꬃ ኢፁዋ ካሊዲ፥ ኩንዶናዳ ፆሳ ሼምፖ ቤሳ ጌላናው ሚኖስ።
HEB 4:12 ፆሳ ቃላይ ዴዖኔ ኦꬄይሳ። ናምዑ ባጋራ ቃራቲዳ ማሻፌ ኣꬊዲ ኦጮ። ኢ ሼምፖ፥ ኣያና፥ ፃጶኔ ኮሊዜ ጋካናው ካንꬂዲ ጫዴስ። ቃሲ ኣሳ ዎዛናን ዴዒያ ጌሚዳ ቆፋኔ ኣሙዋ ሻኪዲ ፒርዴስ።
HEB 4:13 ፆሳ ሲንꬃፌ ቆሴቲያባይ ኣይባ ሜꬌቴꬂካ ባዋ። ኢያ ኣይፌ ሲንꬃን ኡባባይ ቆንጬኔ ካሎ ዴዔስ። ኑኒ ዛሮ ኢማናው ቤሴይ ኢያ ሲንꬃና።
HEB 4:14 ሂዛ፥ ሳሎ ኬዪዳ ጊታ ካሂኔ ሃላቃይ፥ ፆሳ ናዓይ ዬሱሲ፥ ኑስ ዴዒያ ጊሾ ኑ ኣማኑዋ ሚንꬂዲ ናጎስ።
HEB 4:15 ኑ ካሂኔ ሃላቃይ ኑ ዳቡሪያ ዎዴ ኑስ ቃꬌታናው ዳንዳዔይሳ። ኢ ናጋራ ኦꬂቤና፥ ሺን ኑዳ ኡባባን ፓጬቲስ።
HEB 4:16 ሂዛ፥ ማሮቴꬃ ኤካናዉኔ ማዴ ኮሺያ ዎዴ ኣꬎ ኬሃቴꬃ ዴማናው ኣꬎ ኬሃቴꬃይ ዴዒያሱዋ ፆሳ ኣራታኮ ያዮና ሺቆስ።
HEB 5:1 ኢሲ ኢሲ ካሂኔ ሃላቂ ኣሳ ጊዶፌ ዶሬቲዲ፥ ፆሳራ ጋꬂያባን ኣሳ ጊሾ ኢሞታኔ ናጋራ ያርሾ ያርሻናው ሹሜቴስ።
HEB 5:2 ኢ ባ ሁዔን ዳቡራንቾ ጊዲያ ጊሾ ኤሮናይሳታሲኔ ባሌይሳታስ ቃꬌታናው ዳንዳዔስ።
HEB 5:3 ኢ ባ ናጋራ ጊሾኔ ኣሳ ኡባ ናጋራ ጊሾ ያርሾ ያርሻናው ቤሴይ ሄሳሳ።
HEB 5:4 ኦኒካ ሃ ቦንቹዋ ባው ኤካናው ዳንዳዔና፥ ሺን ኣሮኒ ካሂኔ ሃላቃ ጊዳናው ፄጌቲዳይሳዳ ፆሳን ፄጌታናው ቤሴስ።
HEB 5:5 ሄሳዳካ፥ ኪሪስቶሲ ካሂኔ ሃላቃ ጊዲያ ቦንቹዋ ባው ኤኪቤና። ሺን ፆሳይ ኢያ፥ «ኔኒ ታ ናዓ። ሃቺ ታ ኔው ኣዋ ጊዳስ» ያጌስ።
HEB 5:6 ቃሲ ሃራሶን፥ «ማልኬፃዲቄይ ካሂኔ ጊዲዳይሳዳ፥ ኔኒ ሜሪናው ካሂኔ ጊዳና» ያጌስ።
HEB 5:7 ዬሱሲ ኣሴ ጊዲዲ ሃ ኣላሚያን ዴዒያ ዎዴ ባና ሃይቆፔ ኣሻናው ዳንዳዒያ ፆሳ ዳሮ ዬሆኒኔ ኣፉꬃን ዎሲስ። ኢ፥ ኢያ ቦንቺዲ ኪቴቲዳ ጊሾ ፆሳይ ኢያ ዎሳ ሲዒስ።
HEB 5:8 ዬሱሲ ፆሳ ናዓ ጊዲኮካ ባ ዋዬቲዳ ዋያን ኪቴቴꬂ ታማሪስ።
HEB 5:9 ሄሳንካ፥ ዬሱሲ ባ ኦሱዋ ፖሊዳፔ ጉዬ ባው ኪቴቲያ ኡባይ ሜሪና ኣቶቴꬃ ዴማና ሜላ ጋሶ ጊዲስ።
HEB 5:10 ፆሳይ ማልኬፃዲቄ ሹሚዳይሳዳ ካሂኔ ሃላቃ ኦꬂዲ ኢያ ሹሚስ።
HEB 5:11 ሃ ኑ ኦዳ ቦላ ጉጂ ሃሳያናባይ ዳሮባይ ዴዔስ፥ ሺን ሂንቴ ኣኬካይ ጉꬃ ጊዲያ ጊሾ ሂንቴው ኦዲ ጌልሳናው ዋይሴስ።
HEB 5:12 ሂንቴ ሃኖዴ ኣስታማሬ ጊዳናው ቤሴስ፥ ሺን ፆሳ ቃላ ኮይሮ ቲሚርቲያ ሂንቴና ዛሪ ታማርሲያ ሃራ ኣሲ ኮሼስ። ሂንቴ ሚኖ ካꬂ ማናው ዳንዳዖና ጊሾ ማꬂ ኮሼስ።
HEB 5:13 ማꬂ ፓሄቲያ ኦኒካ ዮጋ ናዓ ጊዲያ ጊሾ ሎዖኔ ኢታ ሻኪ ኤሬና።
HEB 5:14 ሺን ሚኖ ካꬂ ሎዖኔ ኢታ ሻኪዲ ኤሪያ ካሃማ ኣሳሳ።
HEB 6:1 ሂዛ፥ ኪሪስቶሳባ ታማርሲያ ኮይሮ ቲሚርቲያ ኣጊዲ ኪሪስቶሳን ካሃማቴꬃኮ ቦስ። ሃይቆ ኦሶፔ ሲሞባኔ ፆሳ ኣማኖባ ኮይሮ ቲሚርቲያኮ ጉዬ ሲሞኮ።
HEB 6:2 ሄሳዳካ፥ ፂንቃቴታባ፥ ኩሼ ዎሶባ፥ ሃይቆፔ ዴንዶባኔ ሜሪና ፒርዳባ ዛሪ ታማሮኮ።
HEB 6:3 ፆሳይ ጊኮ ኑ ሄሳ ኦꬃና።
HEB 6:4 ኢሲ ቶሆ ፖዖይ ፖዒዳይሳታ፥ ሳሎ ኢሞታ ኤኪዳይሳታ፥ ጌሻ ኣያናን ሻኬቲዳይሳታ፥
HEB 6:5 ሎዖ ፆሳ ቃላኔ ሲንꬃፌ ያና ኣላሚያ ዎልቃ ቤዒዳይሳታ፥
HEB 6:6 ጉዬፔ ካዲዳይሳታ ናጋራፔ ናምዓንꬆ ዛራናው ዳንዳዔቴና። ኣይስ ጊኮ፥ ኤንቲ ባንታ ꬋዩዋስ ፆሳ ናዓ ዛሪ ካቂያ ሜላ ማስቃሊያ ቦላ ኢያ ካቆሶናኔ ኣሳ ሲንꬃን ካዉሾሶና።
HEB 6:7 ኡባ ዎዴ ኢ ቦላ ቡኪያ ኢራ ኡያዳ፥ ጎዪዳ ኡራ ማዲያ ካꬂ ኢሚያ ቢቲያ ፆሳን ኣንጄቲዳሮ።
HEB 6:8 ሺን ኣጉንꬁኔ ኪንቾቴ ዶሊያ ቢቲያ ኣይቢባካ ማዱኩ፤ ኢው ቃንጌꬃይ ማታቲስ፤ ዉርሴꬃን ፁጌታና።
HEB 6:9 ኑ ሲቆ ኢሻቶ፥ ኑኒ ሃይሳዳ ኦዲያባ ጊዲኮካ፥ ሂንቴና ኣቶቴꬃኮ ካሌꬂያ ሎዖባይ ሂንቴው ዴዔይሳ ኤሮስ።
HEB 6:10 ፆሳይ ሱሬ ፒርዴይሳ። ፆሳይ፥ ሂንቴ ኦꬂዳ ኦሱዋኔ ካሴ ጊዲን ሃዒካ ኣማኔይሳታ ማዲዲ፥ ኢያው ዴዒያ ሲቁዋ ቤሲዳይሳ ዶጌና።
HEB 6:11 ሂንቴ ኡባይ ኡፋይሳን ናጌይሳ ዴማና ጋካናው ሃ ሚኖቴꬃ ዉርሴꬂ ጋካናው ቤሳና ሜላ ኑ ኣሞቶስ።
HEB 6:12 ሂንቴ ኣማኖኒኔ ዳንዳዓን ናጊያ ኡፋይሳ ላቲያ ኣሳ ዳናና ሜላፔ ኣቲን ኣዛላ ጊዳና ሜላ ኮዮኮ።
HEB 6:13 ፆሳይ ኣብራሃሜስ ኢማና ጊዲ ጫቂዳ ዎዴ ባፔ ኣꬊያ ሃሪ ጊቲ ባይና ጊሾ ባ ሁዔን ጫቂስ።
HEB 6:14 ኢያኮ፥ «ታኒ ኔና ኣንጃና፤ ኔ ዜሬꬃካ ዳርሳና» ያጊስ።
HEB 6:15 ኣብራሃሜይ ዳንዳዓን ናጊዲ ፆሳይ ኢማና ጊዳ ኡፋይሳ ኤኪስ።
HEB 6:16 ኣሲ ጫቂሼ ባፔ ጊታቲያ ኡራን ጫቄስ፤ ሄ ጫቆይ ጌቴቲዳባ ሚንꬂዲ፥ ፓላማ ኡባ ቴቄስ።
HEB 6:17 ሄሳ ጊሾ፥ ፆሳይ ባ ላሜቶና ቆፋ ኡፋይሳ ቃላ ላቴይሳታስ ቆንጪሳናው ኮዪዳ ጊሾ ጫቆን ሚንꬂስ።
HEB 6:18 ፆሳይ ዎርዶቴና። ኢያ ኡፋይሳ ቃላይኔ ጫቆይ፥ ናምዓይካ ላሜቶኮና። ሃ ናምዑባታን ኑ ሲንꬃን ዴዒያ ኡፋይሳ ኦይካናው ዳናዳዓና ሜላ ጌሼ ዴማናው ኢያኮ ባቃቲዳ ኑኒ፥ ዎልቃማ ሚንꬄꬆ ዴማና።
HEB 6:19 ሃ ኡፋይሳይ ኑ ሼምፑዋስ፥ ማርካቤይ ቃፆናዳ ሚንꬂዲ ኦይኪያ ቢራታ ሜላ። ሄ ኡፋይሳይ ማጋራጁዋፌ ጉዬ ባጋን ዴዒያ ጌሻ ቤሳ ጌሊስ።
HEB 6:20 ዬሱሲ ማልኬፃዲቄ ሹማቴꬃዳ ሜሪናው ካሂኔ ሃላቃ ጊዲዲ፥ ኑ ጊሾ ኑፔ ሲንꬃቲዲ ሄ ቤሳ ጌሊስ።
HEB 7:1 ማልኬፃዲቄይ፥ ሳሌሜ ካዎይ፥ ኡባፌ ቦላ ፆሳ ካሂኔ። ሄ ማልኬፃዲቄይ ኣብራሃሜይ ካዎታ ኦሊ ፆኒዲ ሲሚሺን ኢያራ ጋሄቲዲ ኢያ ኣንጂስ።
HEB 7:2 ኣብራሃሜይ ባ ዲዒዳባ ኡባፌ ኢያው ኣስራታ ኬሲዲ ኢሚስ። ማልኬፃዲቄ ሱንꬃይ ኮይሮ «ፂሎቴꬃ ካዎ»፥ ናምዓንꬆ፥ «ሳሌሜ ካዎ» ቢርሼꬃይ፥ «ሳሮቴꬃ ካዉዋ» ጉሱ።
HEB 7:3 ማልኬፃዲቄስ ኣያ ዎይኮ ኣዉ ዎይኮ ዛሬ ፓይዶይ ባዋ። ኢያ ዬሌቴꬃስ ዶሜꬂ ዎይኮ ኢያ ዴዑዋስ ዉርሴꬂ ባዋ፥ ሺን ፆሳ ናዓ ዳኒዲ ሜሪናው ካሂኔ ጊዲስ።
HEB 7:4 ማልኬፃዲቄይ ኣይ ሜላ ጊቴኮ ቤዒቴ። ኑ ኣዋታ ማይዛይ፥ ኣብራሃሜይ፥ ባ ዴዒዳባፔ ኢያው ኣስራታ ኢሚስ።
HEB 7:5 ካሂኔ ጊዲያ ሌዌ ዛሬይ ኢስራዔሌ ኣሳፔ፥ ሄሲካ ኣብራሃሜ ዜሬꬂ ጊዲዳ ባንታ ኢሻታፔ ኣስራታ ኤካና ሜላ ሂጌይ ኪቴስ።
HEB 7:6 ማልኬፃዲቄይ ሌዌ ዛሬ ጊዶና ኢፂኮካ ኣብራሃሜፔ ኣስራታ ኤኪስ፤ ኡፋይሳ ቃሊ ዴዒያ ኣብራሃሜ ኣንጂስ።
HEB 7:7 ጉꬃይ ጊታን ኣንጄቴይሲ ፓላንꬄና።
HEB 7:8 ኢሲ ባጋራ፥ ኣስራታ ኤኬይሳቲ ሃይቂያ ኣሳታ፥ ሺን ሃራ ባጋራ ኣስራታ ኤኬይሲ ዴዖን ዴዔስ ያጊዲ ኦዴቲዳይሳ።
HEB 7:9 ሂዛ፥ ኣስራታ ኤኪያ ሌዌይ፥ ኣብራሃሜ ባጋራ ኣስራታ ኢሚስ ጋናው ዳንዳዔቴስ።
HEB 7:10 ኣይስ ጊኮ፥ ማልኬፃዲቄይ ኣብራሃሜራ ጋሄቲያ ዎዴ ሌዌይ ዬሌቲቦናባ ጊዲኮካ፥ ባ ማይዛ ኣብራሃሜ ጉልባታን ዴዔስ።
HEB 7:11 ኢስራዔሌ ኣሳስ ሂጌይ ሌዌ ካሂኔቴꬃ ባጋራ ኢሜቲስ። ሃ ሌዌ ካሂኔቴꬃይ ፖሎ ጊዲዳባ ጊዲያኮ ኣሮናይሳ ሜላ ጊዶናሺን፥ ማልኬፃዲቄ ሜላ ሃራ ካሂኔ ሹማናው ኣይስ ኮሺዴ?
HEB 7:12 ሂዛ፥ ካሂኔቲ ላሜቲያ ዎዴ ሂጌይካ ቃሲ ላሜታናው ቤሴስ።
HEB 7:13 ሃ ኑ ኢያባ ኦዲያ ኡራይ ሃራ ዛሬ፤ ኢያ ሼሻፔ ኦኒካ ያርሾ ቤሳን ካሂኔቴꬃን ኦꬂቤና።
HEB 7:14 ኑ ጎዳይ ዪሁዳ ሼሻፔ ዪዳይሲ ኤሬቲዳይሳ። ጊዶሺን፥ ሙሴይ ካሂንቴባ ኦዲሼ ዪሁዳ ዛሪያባ ኣይባካ ኦዲቤና።
HEB 7:15 ማልኬፃዲቄ ሜላ ሃራ ካሂኔይ ዪዳባ ጊዲያኮ ሃ ኑ ኦዲያባይ ኣꬊ ቆንጫና።
HEB 7:16 ኢ ካሂኔ ጊዲዳይ ꬋዮና ዴዑዋ ዎልቃናፔ ኣቲን ኢያ ማይዛ ሂጌኒኔ ዎጋን ጊዴና።
HEB 7:17 ጌሻ ማፃፋይ፥ «ማልኬፃዲቄ ካሂኔቴꬃ ሜላ፥ ኔኒ ሜሪናው ካሂኔ» ያጊዲ ማርካቴስ።
HEB 7:18 ኮይሮ ሂጌይ ዳቡራንቾኔ ማዶናባ ጊዲያ ጊሾ ሻሬቲስ።
HEB 7:19 ሙሴ ሂጌይ ኣይቢንካ ፖሎ ኦꬃናው ዳንዳዒቤና። ሺን ኑኒ ኢያ ባጋራ ፆሳኮ ሺቂያ ኡባፌ ኣꬊያ ኡፋይሳ ቃላይ ኑስ ኢሜቲስ።
HEB 7:20 ኪሪስቶሲ ካሂኔ ጊዲያ ዎዴ ፆሳይ ጫቂስ፥ ሺን ሃራቲ ካሂኔ ጊዲዳ ዎዴ ሄሳ ሜላ ጫቆይ ባዋ።
HEB 7:21 ሺን ዬሱሲ ጫቆን ካሂኔ ጊዲስ። ፆሳይ ያጊዲ ጫቂስ፤ «ጎዳይ ጫቂስ፤ ኢ ባ ቆፋ ላሜና፤ ‹ኔኒ ሜሪና ካሂኔ› » ያጊስ።
HEB 7:22 ሃ ጫቁዋ ጋሶን ዬሱሲ ኑስ ኡባፌ ኣꬊያ ቃላ ጫቁዋስ ዋሴ ጊዲስ።
HEB 7:23 ካሂኔቴꬃን ኦꬆና ሜላ ሃይቆይ ኤንታ ዲጊዳ ጊሾ ኮይሮ ካሂኔታ ታይቦይ ዳሮ።
HEB 7:24 ሺን ዬሱሲ ሜሪናው ዴዒያ ጊሾ ኢያ ካሂኔቴꬃ ሃሪ ላቴና።
HEB 7:25 ሄሳ ጊሾ፥ ኢ ኡባ ዎዴ ኤንታ ጊሾ ጋናታናው ሜሪናው ዴዒያ ጊሾ ፆሳኮ ኢያ ባጋራ ዬይሳታ ፖሎ ኣሻናው ዳንዳዔስ።
HEB 7:26 ሂዛ፥ ኑስ ኮሺያባ ኢሚያ፥ ጌሻይ፥ ቦሬይኔ ቱኒ ባይናይሲ፥ ናጋራንቾታፔ ሻኬቲዳይሲኔ ሳሉዋፔ ኣꬊዲ ꬎቂዳ ካሂኔ ሃላቃይ ኑስ ኮሼስ።
HEB 7:27 ኢ ሃንኮ ካሂኔ ሃላቃታ ሜላ ኮይሮ ባ ናጋራ ጊሾ ካሊዲ ኣሳ ናጋራ ጊሾ ጋላስ ጋላስ ያርሾ ያርሻናው ኮሼና። ኢ ባና ያርሺዳ ዎዴ ዛሬꬆና ኦጌን ኢሲ ቶሆ ባና ያርሺስ።
HEB 7:28 ሙሴ ሂጌይ ዳቡራንቾ ኣሳ ካሂኔ ሃላቃ ኦꬂዲ ሹሜስ። ሺን ሂጊያፌ ጉዬ ዪዳ ጫቆ ቃላይ ሜሪናው ፖሎ ጊዲዳ ፆሳ ናዓ ሹሚስ።
HEB 8:1 ኑኒ ሃሳያ ጊታባይ ሄሳ። ሳሉዋን ኡባፌ ቦላ ፆሳ ኣራታፔ ኡሻቻ ባጋን ኡቲዳ ሃይሳ ሜላ ካሂኔ ሃላቃይ ኑስ ዴዔስ።
HEB 8:2 ኢ ኣሳን ጊዶናሺን ጎዳን ኤቂዳ ቱማ ዱንካኒያን ፆሳ ኬꬃን ኦꬄስ።
HEB 8:3 ካሂኔ ሃላቃ ኡባይ ኢሞኔ ያርሾ ያርሻናው ሹሜቴስ። ሄሳ ጊሾ፥ ሃ ካሂኔይ ያርሻናው ኢሲባይ ዳናው ኮሼስ።
HEB 8:4 ሂጌይ ኪቴይሳዳ ያርሺያ ካሂኔቲ ዴዒያ ጊሾ ኪሪስቶሲ ሳዓን ዴዒያባ ጊዲያኮ ካሂኔ ጊዴና።
HEB 8:5 ኤንቲ ካሂኔቴꬃን ኦꬂያ ዱንካኔይ ሳሎን ዴዔይሳስ ሌሚሶኔ ኩያ። ሙሴይ ዱንካኒያ ኤሲያ ዎዴ ፆሳይ ኢያኮ፥ «ታኒ ኔና ዴሪያ ቦላ ቤሲዳ ሌሚሱዋ ካላዳ ኦꬃ» ያጊስ።
HEB 8:6 ሺን ዬሱሲ ጊዶ ጊዲዲ ሲጌꬂያ ጫቆይ፥ ኮይሮ ጫቁዋፔ ኣꬌይሳዳ ኢ ኤኪዳ ኦሶይ ኤንታይሳፌ ኣꬌስ። ሄሲ ኤቂዳይ ኣꬊያ ጫቆ ቃላና።
HEB 8:7 ኮይሮ ጫቁዋን ባሊ ባይናባ ጊዲያኮ ናምዓንꬆ ጫቆ ኮሼና።
HEB 8:8 ሺን ጎዳይ ኢያ ቦሪዲ፥ ሃይሳዳ ያጊስ፡ «ታኒ ኢስራዔሌ ኣሳራኔ ዪሁዳ ኣሳራ ኦራꬃ ጫቆ ጫቂያ ዎዴይ ያና።
HEB 8:9 ሄ ጫቆይ ታ ኤንታ ኣዋታ ጊብፄ ቢታፌ ኩሺያ ኦይካዳ፥ ጎቻ ኬሲዳ ዎዴ ኤንታራ ጫቂዳ ጫቁዋ ሜላ ጊዴና። ኤንቲ ታ ጫቁዋን ኣማኔቲቦና ጊሾ ታኒ ኤንታ ዬጋ ኣጋስ ያጌስ ጎዳይ።
HEB 8:10 ሺን ሂዛፔ ጉዬ ኢስራዔሌ ኣሳራ ታ ጫቃና ጫቆይ ሃይሳ ያጌስ ጎዳይ። ታኒ ታ ሂጊያ ኤንታ ጉጊያን ዎꬃና፤ ኤንታ ዎዛናን ፃፋና። ታኒ ኤንታ ፆሳ ጊዳና፤ ኤንቲካ ታ ኣሴ ጊዳና።
HEB 8:11 ኤንታፌ ኦኒካ ባ ሾሩዋ ዎይኮ ባ ኢሻ፥ ‹ጎዳ ኤራ› ያጊዲ ታማርሴና። ኤንቲ ጉꬃፌ ጊታ ጋካናው ኡባይ ታና ኤራና።
HEB 8:12 ታኒ ኤንታ ናቁዋ ኣቶ ጋና፤ ኤንታ ናጋራ ዛራ ቆፒኬ» ያጌስ።
HEB 8:13 ፆሳይ ሃ ጫቁዋ «ኦራꬂ» ጊዲ ፄጊሼ ኮይሮይሳ ጋልዒሲስ። ሂዛ፥ ጋልዓይኔ ጬጋይ ꬋያ ዎዴይ ጋኪስ።
HEB 9:1 ኮይሮ ጫቁዋስ ፆሳ ጎይኒያ ዎጋይኔ ሳዓ ፆሳ ኬꬃይ ዴዔስ።
HEB 9:2 ዱንካኔይ ኤቂስ። ኢያን ፆምፔ ዎꬂያ ኮጫይ፥ ፃርጴዛይኔ ጎዳ ሲንꬃን ዎꬂያ ኡይꬃይ ዴዔስ፤ ሄ ቤሳይ ጌሻ ቤሳ ጌቴቴስ።
HEB 9:3 ናምዓንꬆ ማጋራጁዋፌ ጉዬ ባጋራ ዴዒያ ቤሳይ ኡባፌ ጌሻ ቤሳ ጌቴቴስ።
HEB 9:4 ኢያ ጊዶን ኢፃኔ ጩዪሲያ ዎርቃ ሳፂኔይኔ ዎርቃን ሜሼቲዳ ጫቆ ታቦቴይ ዴዔስ። ሄ ጫቆ ታቦቲያን ማናይ ዴዒያ ዎርቃ ፃሮይ፥ ኣጪዳ ኣሮና ፃምዓይኔ ሙሴ ሂጌይ ፃፌቲዳ ናምዑ ሎቼ ሹቻቲ ዴዖሶና።
HEB 9:5 ሄ ታቦቲያፔ ቦላ ባጋራ ኣቶቴꬃ ካማ ባንታ ቄፊያን ጌንꬂያ ቦንቾ ኪሩቤቲ ዴዖሶና። ሺን ሃዒ ሄ ኡባ ቆንጪሲዲ ኦዳናው ዳንዳዖኮ።
HEB 9:6 ሃ ኡባይ ሃይሳዳ ጊጊዳፔ ጉዬ፥ ካሂኔቲ ኡባ ዎዴ ባንታ ኦሱዋ ኦꬃናው ዱንካኒያስ ኮይሮ ኪፊሊያ ጌሎሶና።
HEB 9:7 ሺን ካሂኔ ሃላቃ ፃላሊ ዱንካኒያስ ናምዓንꬆ ኪፊሊያ ላይꬃፌ ኢሲ ቶሆ ጌሌስ። ኢ ያ ጌሊሼ ባ ናጋራ ጊሾኔ ኣሳይ ኤሮና ኦꬂዳ ናጋራ ጊሾ ሱꬃ ያርሾ ኤኮና ጌሌና።
HEB 9:8 ኮይሮ ዱንካኔይ ኤቂዲ ዴዒሺን፥ ኡባፌ ጌሻ ቤሳ ኤፊያ ኦጌይ ቡሮ ዶዬቲቦናይሳ ጌሻ ኣያናይ ሄሳን ኤሪሴስ።
HEB 9:9 ሄሲ ሃ ዎዲያስ ሌሚሶ፤ ፆሳስ ኢሜቲያ ኢሞይኔ ያርሾይ ጎይኒያ ኡራ ካሃ ጌሻናው ዳንዳዖናይሳ ሃይሲ ቤሴስ።
HEB 9:10 ሄሳቲ ሙሳባ፥ ኡሻባኔ ዱማ ዱማ ሜቻ ዎጋታ ኦዴይሳታ። ኤንቲ ኦራꬃ ዎጋይ ያና ጋካናው ኦሴቲያ ካሬ ባጋ ዎጋታ።
HEB 9:11 ሺን ኪሪስቶሲ ሃዒ ኑ ዴሚዳ ሎዖባታስ ካሂኔ ሃላቃ ጊዲዲ ዪስ። ኢ ጌሊዳ ዱንካኔይ ጊታኔ ፖሎ ጊዲዳይሳ። ሄ ዱንካኔይ ኣሳ ኩሼን ኦሴቲቤና ቃሲ ሃ ኣላሚያባ ጊዴና።
HEB 9:12 ኪሪስቶሲ ኡባፌ ጌሻ ቤሳ ጌሊያ ዎዴ ዴሻ ሱꬂኔ ማራ ሱꬂ ኤኪዲ ጌሊቤና። ሺን ሜሪና ኣቶቴꬃ ኢማናው ባ ሱꬃ ኤኪዲ ዛሬꬆና ኦጌን ኢሲ ቶሆ ጌሊስ።
HEB 9:13 ዴሻ ሱꬃይኔ ኮርማ ሱꬃይ፥ ፁጌቲዳ ኡሳ ቢዶይ፥ ቱኒዳ ኣሳ ቦላ ꬋርጬቲዲ ኤንታና ጌሺያባ ጊዲኮ፥
HEB 9:14 ሜሪና ጌሻ ኣያና ባጋራ ቦሬይ ባይና ያርሾ ኦꬂዲ፥ ፆሳስ ባና ኢሚዳ ኪሪስቶሳ ሱꬃይ፥ ዴዖ ፆሳ ጎይናና ሜላ ሃይቆ ካሌꬂያ ኦሱዋፔ ኑ ካሃ ዋቲ ኣꬂ ጌሼኔ?
HEB 9:15 ሄሳ ጊሾ፥ ፄጌቲዳይሳቲ ፆሳይ ኢሚዳ ሜሪና ላታ ኤካና ሜላ ኪሪስቶሲ ኦራꬃ ጫቁዋስ ጊዶ ጊዲዲ ሲጌꬄይሳ ጊዲስ። ሄሲ ሃኒዳይ ኣሳይ ኮይሮ ጫቁዋፔ ጋርሳን ዴዒያ ዎዴ ኦꬂዳ ናጋራፔ ኤንታና ዎዛናው ኢ ሃይቂዳይሳና።
HEB 9:16 ሂዛ፥ ኬኬይ ዴዒኮ፥ ሄ ኬኪዳ ኡራ ሃይቆይ ኤሬታናው ኮሼስ።
HEB 9:17 ኬኪዳ ኡራይ ሃይቂኮ ኢያ ኬኬይ ሚኔስ። ኬኪዳ ኡራይ ሃይቆና ኣቲኮ ኢያ ኬኬይ ኦꬄና።
HEB 9:18 ሃሪ ኣቶሺን፥ ኮይሮ ጫቆይካ ሱꬂ ባይና ሚኒቤና።
HEB 9:19 ሙሴይ ሂጌ ኪታ ኡባ ኣሳስ ኦዲዳፔ ጉዬ ማራ ሱꬂኔ ዴሻ ሱꬂ ሃꬃራ ዋላኪዲ፥ ዞዖ ዶርሳ ኢኪሴኔ ሂሶጴ ቦንጮ ኤኪዲ፥ ማፃፋ ቦላኔ ኣሳ ቦላ ዉርፂስ።
HEB 9:20 ሙሴይ ኣሳኮ፥ «ሂንቴ ናጋና ሜላ ፆሳይ ኪቲዳ ሱꬃ ጫቆይ ሃይሳ» ያጊስ።
HEB 9:21 ሄሳዳካ፥ ዱንካኒያ ቦላኔ ኦꬂያ ሚሼ ኡባ ቦላ ሱꬃ ዉርፂስ።
HEB 9:22 ቱማካ ሂጌይ ጌይሳዳ ጉꬃባታፔ ኣቲን ኡባባይ ሱꬃን ጌዬስ። ሱꬂ ጉኮናሺን ኣቶቴꬂ ባዋ።
HEB 9:23 ሳሉዋባስ ሌሚሶ ጊዲዳይሳቲ ኡባይ ሜሄ ያርሾን ጌያናው ኮሼስ። ሺን ሳሎባቲ ባንታ ሁዔን ሄሳፌ ኣꬊያ ያርሹዋን ጌያናው ኮሼስ።
HEB 9:24 ኪሪስቶሲ ቱማ ፆሳ ኬꬃስ ሌሚሶ ጊዲዳ፥ ኣሳ ኩሼን ኦሴቲዳ ኡባፌ ጌሻ ቤሳ ጌሊቤና። ሺን ኢ ሃዒ ኑ ጊሾ ፆሳ ሲንꬃን ቤንታናው ሳሉዋ ጌሊስ።
HEB 9:25 ካሂኔ ሃላቃይ ላይꬃን ላይꬃን ባ ሱꬂ ጊዶናይሳ ኤኪዲ፥ ኡባፌ ጌሻ ቤሳ ጌሌስ። ሺን ኪሪስቶሲ ዳሮ ቶሆ ባና ያርሻናው ሳሎ ጌሊቤና።
HEB 9:26 ሄሳዳ ሃኒዳባ ጊዲያኮ፥ ኪሪስቶሲ ኣላሜይ ሜꬌቶሳፔ ዶሚዲ ዳሮ ቶሆ ዋዬታናው ኮሼስ። ሺን ሃዒ ዎዲያ ዉርሴꬃን ናጋራ ዲጋናው ባና ያርሺዲ ዛሬꬆና ኦጌን ኢሲ ቶሆ ቤንቲስ።
HEB 9:27 ኣሲ ኡባይ ኢሲ ቶሆ ሃይቃናው ሄሳፌ ጉዬ ፒርዴታናው ቤሴስ።
HEB 9:28 ሄሳዳካ፥ ኪሪስቶሲ ዳሮ ኣሳ ናጋራ ዲጋናው ኢሲ ቶሆ ያርሼቲስ። ሺን ኢ ናጋራ ቶካናው ጊዶናሺን ባና ናጌይሳታ ኣሻናው ናምዓንꬆ ቆንጫና።
HEB 10:1 ሙሴ ሂጌይ ያናው ዴዒያ ሎዖባታስ ኩያፔ ኣቲን ባ ሁዔን ዋና ጊዴና። ሄሳ ጊሾ፥ ላይꬃን ላይꬃን ፓጬይ ባይና ያርሼቲያ ያርሾይ ጎይናናው ሺቂያ ኣሳ ፖሎ ኦꬃናው ዳንዳዔና።
HEB 10:2 ሂጌይ ኤንታ ፖሎ ኦꬃናው ዳንዳዒዳባ ጊዲያኮ ኤንቲ ያርሾ ያርሼይሳ ኣጋናሺን። ቃሲ ጎይናናው ሺቂያ ኣሳይ ባንታ ናጋራፔ ጌያና፤ ኤንታ ካሃይካ ኤንታና ባላ ጊዲ ሞቴና።
HEB 10:3 ሺን ሄ ያርሾቲ ላይꬃን ላይꬃን ናጋራ ቆፊሶሶና።
HEB 10:4 ኣይስ ጊኮ፥ ኮርማ ሱꬂኔ ዴሻ ሱꬂ ናጋራ ዲጋናው ዳንዳዔና።
HEB 10:5 ሄሳ ጊሾ፥ ኪሪስቶሲ ሃ ኣላሚያ ዪዳ ዎዴ ሃይሳዳ ያጊስ፡ «ኔኒ ያርሾኔ ኢሞ ኮያባካ፤ ሺን ታው ኣሾ ጊጊሳዳሳ።
HEB 10:6 ኔኒ ፁጌቲያ ያርሾኒኔ ናጋራ ያርሹዋን ኡፋይታባካ።
HEB 10:7 ሄ ዎዴ ‹ታ ጊሾ ማፃፋን ፃፌቲዳይሳዳ፥ ጎዳው፥ ታኒ ኔ ሼኒያ ኦꬃናው ያስ› ያጋስ» ያጊስ።
HEB 10:8 ያርሾይ ያርሼታና ሜላ ሂጌይ ኪቲያባ ጊዲኮካ፥ ኪሪስቶሲ ኮይሮ፥ «ኔኒ ያርሾኔ ኢሞ፥ ፁጌቲያ ያርሾኔ ናጋራ ያርሾ ኮያባካ፤ ኤንታን ኡፋይታባካ» ያጊስ።
HEB 10:9 ካሊዲካ ኢ፥ «ጎዳው፥ ሄኮ ታኒ ኔ ሼኒያ ኦꬃናው ያስ» ያጊስ። ሄሳ ጊሾ፥ ኪሪስቶሲ ናምዓንꬁዋ ኤሳናው ኮይሮይሳ ሻሪስ።
HEB 10:10 ዬሱስ ኪሪስቶሲ ፆሳ ሼኒያ ኦꬂዲ፥ ዛሬꬆና ኦጌን ኢሲ ቶሆ ባ ኣሹዋ ያርሺዳ ጊሾ ኑኒ ጌዪዳ።
HEB 10:11 ካሂኔ ኡባይ፥ ናጋራ ዲጋናው ዳንዳዖና ሄ ያርሾታ ጋላስ ጋላስ ያርሺሼ ኤቂዲ ባ ኦሱዋ ኦꬄስ።
HEB 10:12 ሺን ኪሪስቶሲ ኡባ ዎዴስ ጊዲያ ኢሲ ናጋራ ያርሹዋ ያርሺዲ፥ ፆሳፌ ኡሻቻ ባጋን ኡቲስ።
HEB 10:13 ሄ ዎዲያፔ ዶሚዲ ኢያ ሞርኬቲ ኢያ ቶሆይ ዬꬊያባ ኦꬃና ጋካናው ናጌስ።
HEB 10:14 ኢ ዛሬꬆና ኦጌን ኢሲ ቶሆ ባና ያርሺዳ ያርሹዋን ጌሻታ ሜሪናው ፖሎ ኦꬂስ።
HEB 10:15 ቃሲ ጌሻ ኣያናይ ኑስ ሃይሳ ማርካቴስ። ኮይሮ ሃይሳዳ ያጊስ፡
HEB 10:16 «ሄ ጋላሳታፔ ጉዬ፥ ታኒ ኤንታራ ጫቂያ ጫቆይ ሃይሳ፡ ታኒ ታ ሂጊያ ኤንታ ቆፋን ዎꬃና፤ ኤንታ ዎዛናን ፃፋና» ያጌስ።
HEB 10:17 ካሊዲካ፥ «ታኒ ኤንታ ናጋራኔ ኤንታ ኢታ ኦሱዋ ዛራ ቆፒኬ» ያጌስ።
HEB 10:18 ሂዛ፥ ናጋሪ ኣቶ ጌቴቲዳፔ ጉዬ ናጋራስ ያርሼቲያ ያርሾ ኮሼና።
HEB 10:19 ሂዛ፥ ታ ኢሻቶ፥ ኑኒ ዬሱሳ ሱꬃ ባጋራ ኡባፌ ጌሻ ቤሳ ጌላናው ኑስ ሚኖቴꬂ ዴዔስ።
HEB 10:20 ኑ ጌላናይ ኪሪስቶሲ ባ ማጋራጁዋ፥ ሄሲካ ባ ኣሹዋ ባጋራ ኑስ ዶዪዳ ኦራꬂኔ ዴዖ ጊዲዳ ኦጊያና።
HEB 10:21 ኑስ ፆሳ ኬꬃ ቦላ ሹሜቲዳ ጊታ ካሂኔ ሃላቃይ ዴዔስ።
HEB 10:22 ኑኒ ኢታ ካሃፔ ጌያናው ኑ ዎዛና ዉርፄቲዲ፥ ኑ ኣሳቴꬃ ፂሎ ሃꬃን ሜጬቲዲ፥ ሱሬ ዎዛናኒኔ ፖሎ ኣማኖን ፆሳኮ ሺቆስ።
HEB 10:23 ኑስ ኡፋይሳ ቃላ ኢሚዳ ፆሳይ ኣማንቲዳይሳ ጊዲያ ጊሾ ኑ ማርካቲያ ኡፋይሳ ኡሻቺ ሃዲርሲ ጎና ሚንꬂዲ ኦይኮስ።
HEB 10:24 ኢሶይ ኢሱዋ ሲቆሲኔ ሎዖ ኦሶስ ዋቲ ዴንꬄꬃኔኮ ኣኔ ቆፖስ።
HEB 10:25 ኢሶቲ ኢሶቲ ሜዜ ኦꬂዲ ሺቄይሳ ኣጊዳይሳዳ ኑኒ ኢሲፌ ሺቄይሳ ኣጎኮ። ሺን ጎዳ ጋላሳይ ማታቲዳይሳ ሂንቴ ቤዒያ ጊሾ ሄሳ ካሴይሳፌ ኣꬂዲ ኦꬂቴ።
HEB 10:26 ኑኒ ቱማ ኤራቴꬃ ኤኪዳፔ ጉዬ ኤሪሼ ናጋራ ኦꬂኮ፥ ሂዛፔ ኑ ናጋራ ጊሾ ያርሼታና ያርሾይ ባዋ።
HEB 10:27 ሺን ሂዛ ኣቲዳይ ያሺያ ፒርዳኔ ፆሳ ሞርኬታ ፁጋናው ጊጊዳ ዎልቃማ ታማ።
HEB 10:28 ሙሴ ሂጊያ ኪቴቶና ኢፂዳ ኦኒካ ናምዑ ዎይኮ ሄꬑ ኣሲ ኢያ ቦላ ማርካቲኮ ቃꬌይ ባይናሺን ሃይቄስ።
HEB 10:29 ያቲን፥ ፆሳ ናዓ ካꬊዳ ኡራይ፥ ባና ጌሺዳ ፆሳ ጫቆ ሱꬃ ቱናባዳ ቆፒዳ ኡራይ፥ ቃሲ ኣꬎ ኬሃቴꬃ ኣያና ጫዪዳ ኡራይ፥ ኣይ ሜላ ኢታ ፒርዳ ኤካናው ቤሲያኮ ኣኔ ቆፒቴ።
HEB 10:30 ሂዛ፥ «ሃሎ ኬሶይ ታባ፥ ታ ኩሼ ዛራና» ጊዳይሳ ኑ ኤሮስ። ቃሲካ፥ «ጎዳይ ባ ኣሳ ፒርዳና» ያጊስ።
HEB 10:31 ዴዖ ፆሳ ኩሼን ኩንዴꬂ ዳሮ ያሼስ።
HEB 10:32 ሂንቴው ፆሳ ፖዖይ ፖዒዳፔ ጉዬ ሂንቴ ዳሮ ዋዬን፥ ጊታ ባፄን ጌንጪዳ ቤኒ ዎዲያ ቆፒቴ።
HEB 10:33 ኢሲ ኢሲ ቶሆ ሂንቴ ኣሳ ሲንꬃን ጫዬቲዴታ፤ ጎዴቲዴታ፤ ኢሲ ኢሲ ቶሆ ሄሳ ሜላ ዋዬይ ጋኪዳ ኣሳራ ኢሲፌ ዋዪዴታ።
HEB 10:34 ቃሾን ዴዒያ ኣሳስካ ቃꬌቲዴታ። ሂንቴው ሎዖኔ ꬋዮና ሻሎይ ሳሎን ዴዔይሳ ሂንቴ ኤሪዳ ጊሾ ሂንቴ ሻሎይ ቦንቄቲያ ዎዴ ኡፋይሳን ዳንዳዒዴታ።
HEB 10:35 ሄሳ ጊሾ፥ ጊታ ዎይቶይ ዴዒያ ሂንቴ ሚኖቴꬃ ዬጎፊቴ።
HEB 10:36 ፆሳ ሼኒያ ፖሊዲ፥ ኢ ሂንቴው ኢማና ጊዳ ኡፋይሳ ኤካና ጋካናው ጌንጫናው ኮሼስ።
HEB 10:37 ሂዛ፥ ጌሻ ማፃፋን፥ «ኢ፥ ያና ጊዳይሲ ያና፤ ጋምዔና።
HEB 10:38 ሺን ታ ፂሎይ፥ ታናን ኣማኔቲዲ ዳና፤ ኦኒካ ጉዬ ሲሚኮ ታና ኡፋይሴና» ያጌስ።
HEB 10:39 ኑኒ ኣማኔቲዲ ኣቲያ ኣሳ ባጋፌ ኣቲን ጉዬ ሲሚዲ ꬋያ ኣሳ ባጋ ጊዶኮ።
HEB 11:1 ኣማኖይ ጉሳይ፥ ዴማና ጊዲ ኡፋይሳን ኣማኔቲዲ ናጊያባኔ ኑ ቤዖናባ ቤዒያዳ ኦꬂዲ ኤኪያባ።
HEB 11:2 ቤኒ ኣዋቲ ኣማኖን ፆሳፌ ማርካቴꬂ ኤኪዶሶና።
HEB 11:3 ኣላሜይ ፆሳ ቃላን ሜꬌቲዳይሳ ኑ ኣማኖን ኤሮስ። ቃሲ ቤንቲያባይ ቤንቶናባፔ ሜꬌቲስ።
HEB 11:4 ኣቤሊ ቃዔላይሳፌ ኣꬊያ ያርሾ ፆሳስ ያርሺዳይ ኣማኖና። ፆሳይ ኣቤላ ኢሙዋ ኡፋይቲዲ ኤኪዳ ዎዴ ኢ ፂሎ ጊዲዳይሳ ማርካቲስ። ኣቤሊ ሃሪ ኣቶሺን፥ ሃይቂዲካ ባ ኣማኑዋን ሃዒ ጋካናው ኦዴስ።
HEB 11:5 ሄኖኬይ ሃይቆና ሳሎ ቢዳይ ኣማኖና። ፆሳይ ኢያ ኤኪዳ ጊሾ ኦኒካ ኢያ ቤዓናው ዳንዳዒቤና። ሄኖኬይ ሳሎ ኤኬታናፔ ሲንꬄ ኢ ፆሳ ኡፋይሲዳ ኣሲ ጊዴይሲ ኦዴቲስ።
HEB 11:6 ኣማኖይ ባይና ኦኒካ ፆሳ ኡፋይሳናው ዳንዳዔና። ፆሳኮ ያ ኦኒካ ፆሳይ ዴዔይሳኔ ባና ኮዬይሳታስ ዎይቶ ኢሜይሳ ኣማናናው ኮሼስ።
HEB 11:7 ኖሄይ ቡሮ ቤንቶናባስ ፆሳይ ኢያው ኦዲዳ ዎዴ ፆሳስ ያዪዲ፥ ባናኔ ባ ሶ ኣሳ ኣሻናው ኣማኖን ማርካቤ ኬፂስ። ያቲዲ ባ ኣማኑዋን ኣላሚያ ፒርዲዲ፥ ኣማኖን ቤንቲያ ፂሎቴꬃ ፆሳፌ ኤኪስ።
HEB 11:8 ኣብራሃሜይ ላታ ኦꬂዲ ኤካና ቢታ ባና ሜላ ፆሳይ ኢያ ፄጊዳ ዎዴ ሃሪ ኣቶሺን፥ ኢ ኣው ቢያኮ ኤሮና ኢፂኮካ ኪቴቲዳይ ኣማኖና።
HEB 11:9 ኣብራሃሜይ ፆሳይ ኢያው ኢማና ጊዳ ቢታን ቤቴ ኣሳዳ ዴዒዳይ ኣማኖና። ፆሳይ ሄ ኢማና ጊዳይሳ ኢያራ ኢሲፌ ላታናው ዴዒያ ዪሳቃራኔ ያይቆባራ ዎላ ዱንካኔን ዴዒስ።
HEB 11:10 ኢ፥ ፆሳይ ቆፒዲ ኬፂዳ ፃላ ባሶይ ዴዒያ ካታማ ናጌስ።
HEB 11:11 ሳራ ባ ሁዔን ጪሚዳባ ጊዲኮካ ኡፋይሲ ኢሚዳ ፆሳይ ኣማኔቲዳይሳ ጊዴይሳ ኤሪዳ ጊሾ ቃንꬃታናው ዎልቃ ዴሚዳይ ኣማኖና።
HEB 11:12 ሄሳ ጊሾ፥ ሃይቂዳ ኣሲ ዳኒያ ኢሲ ኣዲያፌ ሳሎ ፆሊንቶ ሜላኔ ኣባ ጋፃን ዴዒያ ታይቦይ ባይና ሻፌ ሜላ ዜሬꬃይ ዬሌቲዶሶና።
HEB 11:13 ሄ ኣሳ ኡባይ ባንታው ጌቴቲዳ ኡፋይሳ ቃላ ኤኮና ኣማኖን ሃይቂዶሶና። ሺን ሃሆራ ሄሳ ቤዒዲ፥ ዴሚዳዳ ኦꬂዲ፥ ኡፋይሳን ኤኪዶሶና። ቃሲ ኤንቲ ሳዓን ኢማꬄኔ ቤቴ ኣሲ ጊዴይሳ ኤሪዶሶና።
HEB 11:14 ሄሳዳ ጊያ ኣሳይ ባንታ ቢታ ናጌይሳ ቆንጬን ቤሴስ።
HEB 11:15 ኤንቲ ሄ ኣጊዲ ኬዪዳ ቢታ ጉዬ ቆፒዳባ ጊዲያኮ ጉዬ ሲማናው ዳንዳዖሶና።
HEB 11:16 ሺን ሃዒ ኣꬊ ሎዒያ ሳሎ ቢታ ላሞቶሶና። ሄሳ ጊሾ፥ ፆሳይ ኤንታው ካታማ ጊጊሲዳ ጊሾ «ኤንታ ፆሳ» ጌቴቲዲ ፄጌታናው ዬላቴና።
HEB 11:17 ኣብራሃሜይ ፓጬቲዳ ዎዴ ዪሳቃ ያርሺዳይ ኣማኖና። ሄ ኡፋይሳ ቃላ ኤኪዳ ኣብራሃሜይ ባ ኢሲ ናዓ ያርሻናው ጊጊስ።
HEB 11:18 ፆሳይ ኣብራሃሜኮ፥ «ኔ ዜሬꬃይ ዪሳቃ ባጋራ ፄጌታና» ያጊዲ ኦዲስ።
HEB 11:19 ፆሳይ ሃይቆፔ ዴንꬃናው ዳንዳዔይሳ ኣብራሃሜይ ኣማኒዳ ጊሾ ዪሳቃ ሃይቆፔ ፓፂ ዴንዲዳዳ ኦꬂዲ ዛሪ ኤኪስ።
HEB 11:20 ዪሳቂ ዎዴፔ ሃናናባ ኤሪዲ ያይቆባኔ ኤሳዌ ኣንጂዳይ ኣማኖና።
HEB 11:21 ያይቆቢ ሃይቃና ሃኒሼ፥ ኢሲ ኢሲ ዮሴፋ ናይታ ኣንጂዳይኔ ጉፌ ቦላ ካቲዲ ጎይኒዳይ ኣማኖና።
HEB 11:22 ዮሴፊ ሃይቃናው ማቲዳ ዎዴ ኢስራዔሌ ኣሳይ ጊብፄፌ ኬያናይሳ ኦዲዳይኔ ባ ሜቄꬃ ኦꬃናባ ኤንታ ኪቲዳይ ኣማኖና።
HEB 11:23 ሙሴይ ዬሌቲዳፔ ጉዬ ኢያ ኣያኔ ኢያ ኣዋይ ማላ ሎዖ ናዓ ጊዲዳይሳ ቤዒዲ ሄꬑ ኣጌና ቆቲዳይ ኣማኖና፤ ኤንቲ ካዉዋ ኣዋጁዋ ያዪቦኮና።
HEB 11:24 ሙሴይ ዲጪዳፔ ጉዬ ጊብፄ ካዉዋ ናዔ ናዓ ጌቴታናይሳ ኢፂዳይ ኣማኖና።
HEB 11:25 ሙሴይ ናጋራን ጉꬃ ዎዴስ ኡፋይታናፔ፥ ፆሳ ኣሳራ ዋዬ ኤካናይሳ ዶሪስ።
HEB 11:26 ኢ ዎዴፔ ዴማና ዎይቱዋ ቲሺ ኦꬂዲ ፄሊዳ ጊሾ ጊብፄ ሻሉዋፔ ኣꬂዲ ኪሪስቶሳ ጊሾ ቦሬታናይሲ ዳሮ ኣꬊያ ዱሬቴꬂ ጊዲዳይሳ ኤሪስ።
HEB 11:27 ሙሴይ ካዉዋ ሃንቁዋ ያዮና፥ ጊብፄፌ ኬዪዳይ ኣማኖና። ቤንቶና ፆሳ ቤዒዳ ኣሳዳ ሃኒዲ ባ ቆፋን ጌንጪስ።
HEB 11:28 ሃይቆ ኤሂያ ኪታንቾይ ኢስራዔሌ ኣሳ ባይራ ናይታ ዎꬎና ሜላ ሙሴይ ፋሲካኔ ሱꬃ ዉርፄꬃ ዎጋ ኦꬂዳይ ኣማኖና።
HEB 11:29 ኢስራዔሌ ኣሳይ ሜላ ቢታራ ሃሙቲያዳ ሃሙቲዲ፥ ዞዖ ኣባ ፒኒዳይ ኣማኖና። ሺን ጊብፄ ኣሳይ ጌላናው ፓጪ ቤዒሺን ሃꬃይ ኤንታ ሚቲስ።
HEB 11:30 ኢስራዔሌ ኣሳይ ኢያርኮ ካታማ ሹቻ ዲርሳ ላፑን ጋላስ ዩዪዲ፥ ኩንዲሲዳይ ኣማኖና።
HEB 11:31 ላይሚያ ራዓባ ቢታ ዎቼይሳታ ሞኪዳ ጊሾ ኪቴቶና ኣሳራ ሃይቆና ኣቲዳይ ኣማኖና።
HEB 11:32 ሂዛ፥ ሃራ ታ ኣይ ጎ? ጌዲዮናባ፥ ባራቃባ፥ ሳምሶናባ፥ ዮፍታሄባ፥ ዳዊቴባ፥ ሳሙዔላባ፥ ቃሲ ናቤታባ ኦዳናው ታው ዎዴይ ጊዴና።
HEB 11:33 ኤንቲ ኣማኖን ካዎቴꬃታ ፆኒዶሶና፤ ፂሎቴꬃን ኣይሲዶሶና፤ ፆሳይ ኢማና ጊዳ ኡፋይሳ ኤኪዶሶና፤ ጋሞታ ዶና ጎርዲዶሶና፤
HEB 11:34 ታማ ዎልቃ ቶይሲዶሶና፤ ሞርካታ ማሻፌ ኣቲዶሶና፤ ባንታ ዳቡራን ሚኒዶሶና፤ ኦላን ዎልቃማ ጊዲዶሶና፤ ኣላጋ ቶራ ጎዲዶሶና።
HEB 11:35 ማጫሳቲ ባንታ ሃይቂዳይሳቲ ሃይቆፔ ፓፂን ኤኪዶሶና። ቃሲ ሃራቲ ኣꬊያ ሃይቆፔ ዴንዱዋ ኤካናው ኮዪዲ ቃሹዋፔ ቢሌታናይሳ ኢፂዶሶና።
HEB 11:36 ሃራቲ ኣሳን ቦሬቲዲ ሊሶን ጋራፌቲዶሶና፤ ሃራቲ ሳንꬃላታን ቃሼቲዲ ቃሾ ኬꬃን ዬጌቲዶሶና።
HEB 11:37 ኤንቲ ሱቻን ጫዴቲዶሶና፤ ማጋዜን ናምዓ ኬዪዲ ጳልቄቲዶሶና፤ ፓጬቲዶሶና፤ ማሻን ሃይቂዶሶና፤ ኤንታው ኡባባይ ꬋዪን ሜቶቲዶሶና። ዶርሳ ኢቴኔ ዴሻ ኢቴ ማዒዲ ዩዪዶሶና።
HEB 11:38 ኤንታው ሃ ኣላሜይ ጊጎና ኢፂን ባዞ ቢታን፥ ዴሬ ቦላ፥ ጎንጎሎኒኔ ኦላ ጊዶን ዩዪዶሶና።
HEB 11:39 ፆሳይ ኤንታ ኣማኑዋባ ማርካቲኮካ፥ ሄ ኡባይ ጌቴቲዳ ኡፋይሳ ቃላ ኤኪቦኮና።
HEB 11:40 ፆሳይ ኑስ ሎዖባ ቆፒ ዎꬂዳ ጊሾ ኤንቲ ኑኒ ባይና ፖሎ ጊዶኮና።
HEB 12:1 ሂዛ፥ ሻራዳ ኑ ዩሹዋን ዳሪዳ ሃይሳ ሜላ ማርካቲ ኑ ማታን ዴዒያ ጊሾ ኑና ꬉቢያ ኡባኔ ኦይኪዲ ሃሪያ ናጋራ ዲጊዲ፥ ኑ ሲንꬃን ዴዒያ ጋዴ ዎꬃ ጌንጫን ዎፆስ።
HEB 12:2 ኑ ኣማኑዋስ ኦጌ ዶዪዳይሳኔ ኑ ዉርሴꬃ ፖሉዋኮ ኑና ጋꬂያ ዬሱሳ ቦላ ኑ ኣይፊያ ዎꬆስ። ዬሱሲ ዎዴፔ ዴዒያ ኡፋይሳ ጊሾ ማስቃሊያ ዋያ ዳንዳዒዲ፥ ዬላ ሃይቁዋ ካꬊዲ፥ ፆሳፌ ኡሻቻ ባጋን ኡቲስ።
HEB 12:3 ሂዛ፥ ሂንቴ ዶጪዲ ኡፋይሲ ቃንፆና ሜላ ናጋራንቾታ ኢፁዋ ዳንዳዒዳ ዬሱሳ ቆፒቴ።
HEB 12:4 ናጋራራ ዴዒያ ባፂያን ቡሮ ሱꬁ ጉሳና ጋካናው ኤቄቲቤኬታ።
HEB 12:5 ፆሳይ ባ ቃላን፥ ባ ናይታዳ ሂንቴና ዞሪዳይሳ ዶጊዴታ። «ታ ናዓው፥ ፆሳ ሴራ ሌቆፋ፤ ኢ ኔና ሴሪያ ዎዴ ኡፋይሲ ቃንፆፋ።
HEB 12:6 ጎዳይ ባ ዶሲያ ኡራ ሴሬስ፤ ቃሲ ባ ናዓዳ ኤኪያ ኡባ ጋራፌስ» ያጌስ።
HEB 12:7 ፆሳይ ሂንቴና ባ ናይታዳ ሴሪያ ዎዴ ጌንጪቴ፤ ኣዋይ ሴሮና ናዒ ኦኔ?
HEB 12:8 ፆሳይ ባ ናይታ ኡባ ሴሬስ፤ ሂንቴ ሴሬቶና ኢፂኮ ቱማ ኢያ ናይታ ጊዶናሺን ባላኮ ናይታ።
HEB 12:9 ቃሲ ኑና ዬሊዳ ኑ ኣዋቲ ኑና ሴሮሶና፤ ኑካ ኤንታና ቦንቾስ። ያቲን፥ ኑኒ ኑ ኣያና ኣዋስ ዋኒዲ ኣꬂ ሃሬቶኮ?
HEB 12:10 ሂዛ፥ ኑ ኣዋቲ ባንታው ሎዖ ዳኒዳ ሜላ ጉꬃ ዎዴስ ኑና ሴሪዶሶና። ሺን ፆሳይ ኑ ጎዓስ፥ ኑ ኢያ ጌሻቴꬃን ሻኬታና ሜላ ሴሬስ።
HEB 12:11 ኑኒ ሴሬቲያ ዎዴ ዪሎዬሲፔ ኣቲን ኡፋይሴና። ሺን ጉዬፔ ሴሬቴꬃ ሜዜቲዳ ኣሳስ ሴራይ፥ ሳሮይ ኩሚዳ ፂሎቴꬃ ኣይፌ ኣይፊሴስ።
HEB 12:12 ሂዛ፥ ሂንቴ ኣርጋጪዳ ቄሲያኔ ሂንቴ ዳቡሪዳ ጉልባታ ሚንꬂቴ።
HEB 12:13 ዎቤይ ፓፃና ሜላፔ ኣቲን ኣꬂ ሜቆና ሜላ ሂንቴ ቶሁዋስ ሱሬ ኦጌ ጊጊሲቴ።
HEB 12:14 ኣሳ ኡባራ ሳሮ ዳናዉኔ ጌሻቴꬃን ዳናው ሚኒቴ፤ ጌሻቴꬂ ባይና ኦኒካ ጎዳ ቤዓናው ዳንዳዔና።
HEB 12:15 ሂንቴፌ ኦዴስካ ፆሳ ኣꬎ ኬሃቴꬃይ ፓጮናዳ፥ ቃሲ ጫሞ ኣይፌ ኣይፊዲ ዳሮ ኣሳ ቱኒሲያኔ ꬋይሲያ ዜሬꬃዳ ጊዶና ሜላ ናጌቲቴ።
HEB 12:16 ሂንቴ ጊዶን ላይማቲያ ኣሲ ዎይኮ ኢሲ ቶሆ ሚያ ካꬃስ ባ ባይራቴꬃ ቶቺዲ ባይዚዳ ኤሳዌ ሜላ ኣሲ ዶና ሜላ ናጌቲቴ።
HEB 12:17 ጉዬፔ ኤሳዌይ ሄ ኣንጁዋ ኤካናው ኮዪዳ ዎዴ ዲጌቲዳይሳ ኤሬታ። ኢ ሄ ኣንጁዋ ኣፉꬃን ሚኒዲ ኮይኮካ፥ ዴማናው ዳንዳዒቤና፤ ኢ ናጋራፔ ሲማናው ቃዳ ዴሚቤና።
HEB 12:18 ሂንቴ ኩሼን ቦሼቲያ ሲና ዴሪያኮ፥ ኤፂያ ታማኮ፥ ꬉማኮ፥ ጫጋናኮ፥ ጎቲያኮ፥
HEB 12:19 ሞይዚያ ዋሱዋኮ ዎይኮ ቃላይ ሲዔቲያ ቤሳኮ ዪቤኬታ። ሄ ቃላ ሲዒዳ ኣሳይ ሃራ ጉዣ ቃላ ሲዖና ሜላ ዎሲዶሶና።
HEB 12:20 ኣይስ ጊኮ፥ «ሃሪ ኣቶሺን፥ ዶዒ ሄ ዴሪያ ቦቺኮ፥ ሹቻን ጫዴቲዲ ሃይቆ» ያጊዳ ኪታ ኤንቲ ቶካናው ዳንዳዒቦኮና።
HEB 12:21 ሄ ሃኒያባይ ዳሮ ዳጋንꬂያባ ጊዲዳ ጊሾ ሙሴይ፥ «ታኒ ያሻን ኮኮራስ» ያጊስ።
HEB 12:22 ሺን ሂንቴ ፂዮኔ ዴሪያኮ፥ ዴዖ ፆሳይ ዴዒያ ዬሩሳላሜ ካታማኮ፥ ኢሲፌ ሺቂዲ ኡፋይቲያ ዳሮ ሙኩሉ ኪታንቾታኮ ሳሉዋ ዪዴታ።
HEB 12:23 ኤንታ ሱንꬃይ ሳሎን ፃፌቲዳ ዎሳ ኬꬃ ባይራ ናይታኮ፥ ኣሳ ኡባ ፒርዲያ ፆሳኮ፥ ፖሎ ጊዲዳ ፂሎ ኣሳ ኣያናታኮ ዪዴታ።
HEB 12:24 ኦራꬃ ጫቁዋስ ጊዶ ጊዲዲ ሲጌꬂያ ዬሱሳኮ፥ ኣቤላ ሱꬃፌ ኣꬊያባ ኦዲያ ዉርፄቲዳ ሱꬃኮ ዪዴታ።
HEB 12:25 ሂንቴው ኦዲያ ኡራ ቃላ ኢፃስ ጎና ሜላ ናጌቲቴ። ካሴይሳቲ ሳዓን ጊዲዲ ኦዲዳ ኪታ ሲዖና ኢፂዲ ኣቲቦናባ ጊዲኮ ያቲን፥ ሳሎን ጊዲዲ ኦዲያ ቃላ ኑኒ ኢፃስ ጊኮ ዋኒዲ ኣታኔ?
HEB 12:26 ሄ ዎዴ ኢያ ቃላይ ሳዓ ቃꬂስ። ሺን ሃዒ ታኒ፥ «ሳዓ ፃላላ ጊዶናሺን ኢሲ ቶሆ ዛራዳ ሳሉዋካ ቃꬃና» ያጊስ።
HEB 12:27 «ኢሲ ቶሆ ዛራዳ» ጊያ ቃላይ ቃፆኖባይ ሚኒዲ ዳና ሜላ ቃፂያ ሜꬌቲዳባቲ ꬋያናይሳ ቤሴስ።
HEB 12:28 ኑኒ ቃፃናው ዳንዳዖና ካዎቴꬃ ኤኪያ ጊሾ ፆሳ ጋላቶስ፤ ፆሳ ኡፋይሲያ ኦጌን ቦንቾኒኔ ያሻቴꬃን ኢያ ጎይኖስ።
HEB 12:29 ሂዛ፥ ኑ ፆሳይ ቱማ ፁጊያ ታማ።
HEB 13:1 ኣማኒያ ኣሳዳ ኢሶይ ኢሱዋራ ፖሎ ሲቄቲቴ።
HEB 13:2 ኢማꬄ ሞኬይሳ ዶጎፒቴ። ኢሲ ኢሲ ኣሳቲ ሄሳዳ ኦꬂሼ ኤሮና ኪታንቾታ ሞኪዶሶና።
HEB 13:3 ቃሾን ዴዔይሳታ ሂንቴካ ኤንታራ ኢሲፌ ቃሾን ዴዒያዳ ኦꬂዲ ኤንታና ቆፒቴ። ዋዬ ኤኪያ ኣሳራ ኢሲፌ ሂንቴካ ዋዬ ኤኪያዳ ኦꬂዲ ኤንታና ቆፒቴ።
HEB 13:4 ኤኮይኔ ጌሎይ ኣሳ ኡባ ማታን ቦንቼቲዳባ ጊዶ። ቃሲ ፆሳይ ላይማቴይሳታኔ ላሜይሳታ ፒርዳናው ዴዒያ ጊሾ ኣዚናይኔ ማቺያ ኢሶይ ኢሱዋስ ኣማኔታናው ቤሴስ።
HEB 13:5 ሚሼ ሲቆፔ ሂንቴና ናጊቴ፤ ሂንቴው ዴዒያባን ኣሊቴ። ፆሳይ፥ «ታኒ ኔና ኡባራካ ዬጊኬ ዎይኮ ኣጊኬ» ያጊስ።
HEB 13:6 ሄሳ ጊሾ፥ ኑኒ ኣማኔቲዲ፥ «ጎዳይ ታና ማዴይሳ፤ ታ ያዪኬ፤ ኣሲ ታና ኣይ ኦꬃኔ?» ያጎስ።
HEB 13:7 ፆሳ ቃላ ኮይሮ ሂንቴው ኦዲዳ ሂንቴና ካሌꬄይሳታ ቆፒቴ። ኤንቲ ዋኒዲ ዴዒዳኮ ኤንታ ዱሳ ቤዒዲ ኤንታ ኣማኑዋ ካሊቴ።
HEB 13:8 ዬሱስ ኪሪስቶሲ ዚኔካ ሃቺካ ሜሪናዉካ ላሜቴና።
HEB 13:9 ዱማ ዱማ ኦራꬃ ቲሚርቴን ሃራሶ ቢዲ ꬋዮፒቴ፤ ቦፒቴ። ኑ ዎዛናይ ፆሳ ኣꬎ ኬሃቴꬃን ሚናናው ቤሴስፔ ኣቲን ሚን ጎዖና ካꬃን ዎጋ ፖሎን ጊዶፖ።
HEB 13:10 ሺን ዱንካኒያ ጊዶን ኦꬂያ ካሂኔቲ ሄ ያርሾ ካꬃፌ ማናው ኤንታው ማቲ ባይና ያርሾ ቤሳይ ኑስ ዴዔስ።
HEB 13:11 ካሂኔ ሃላቃይ ናጋራ ያርሾስ ሜሄ ሱꬂ ኤኪዲ ያርሻናው ኡባፌ ጌሻ ቤሳ ጌሌስ። ሺን ሄ ሜሂያ ኣሹዋ ዲርሳፌ ካሬን ፁጌስ።
HEB 13:12 ሄሳዳካ፥ ዬሱሲ ዴሪያ ናጋራፔ ባ ሱꬃን ጌሻናው ካታማ ፔንጊያፌ ካሬን ዋዬቲስ።
HEB 13:13 ሂዛ፥ ኑኒ ቦሪያ ቶኪዲ ዲርሳፌ ካሬ ኢያኮ ኬዮስ።
HEB 13:14 ሂዛ፥ ኑስ ሃይሳን ሜሪናው ዴዒያ ካታሚ ባዋ፥ ሺን ኑኒ ያና ካታማ ናጎስ።
HEB 13:15 ሂዛ፥ ዬሱሳ ባጋራ ኡባ ዎዴ ኢያ ሱንꬃስ ማርካቲያ ሜቴርሻ ጋላታ ያርሾ ፆሳስ ኢሞስ።
HEB 13:16 ሎዖባ ኦሶኔ ሂንቴው ዴዒያባፔ ሜቶቲዳ ኣሳስ ኢሞ ዶጎፒቴ። ሂዛ፥ ሄሳ ሜላ ያርሾይ ፆሳ ኡፋይሴስ።
HEB 13:17 ሂንቴና ካሌꬄይሳታስ ኪቴቲቴ፤ ኤንቲ ጊያባ ኦꬂቴ። ኤንቲ ባንታ ኦꬂያባስ ፆሳ ሲንꬃን ኦይሼታናው ዴዒያ ጊሾ ሂንቴና ሄሞሶና። ሂንቴ ኤንታው ኪቴቲኮ፥ ባንታ ኦሱዋ ኡፋይቲዲ ኦꬃና፤ ሄሲ ሃኖና ኢፂኮ፥ ኤንቲ ኣዛኒሼ ኦꬃና፤ ሄሲ ሂንቴና ኣይቢባካ ማዴና።
HEB 13:18 ኑስ ፆሳ ዎሲቴ። ኑ ካሃይ ጌሺ፤ ኑ ኡባ ዎዴ ሎዖባ ኦꬃናው ኮዮስ።
HEB 13:19 ታኒ ሂንቴኮ ኤሌሳዳ ያና ሜላ ሂንቴ ታው ሚንꬂዲ ፆሳ ዎሳና ሜላ ታ ሂንቴና ሃዳራ ጋይስ።
HEB 13:20 ሳሮቴꬃ ፆሳይ፥ ዶርሳ ሄሚያ ኑ ጎዳ ዬሱሳ፥ ባ ሜሪና ጫቆ ሱꬃን ሃይቆፔ ዴንꬂዳይሲ፥
HEB 13:21 ኢያ ሼኒያ ኦꬃና ሜላ ሎዖባ ኡባን ኢ ሂንቴና ዳንጪሶ። ኢያ ኡፋይሲያባ ዬሱስ ኪሪስቶሳ ባጋራ ኑናን ፆሳይ ኦꬆ። ዬሱስ ኪሪስቶሳ ባጋራ ፆሳስ ሜሪናፔ ሜሪና ጋካናው ቦንቾይ ጊዶ። ኣሚንዒ።
HEB 13:22 ታ ኢሻቶ፥ ታ ሃ ዳብዳቢያ ሂንቴው ቃንꬃን ፃፊዳ ጊሾ ሂንቴ ታ ዞሪያ ሳሌቶና ኤካና ሜላ ታ ሂንቴና ዎሳይስ።
HEB 13:23 ኑ ኢሻይ፥ ፂሞቲዮሲ ቃሾፔ ቢሌቲዳይሳ ኤሪቴ። ኢ ኤሌሲዲ ታኮ ዪኮ ታ ኢያራ ሂንቴና ባዳ ቤዓና።
HEB 13:24 ሂንቴና ካሌꬄይሳታኔ ኣማኒያ ኡባ ሳሮ ጊቴ። ፃሌፔ ዪዳ ኣማኒያ ኣሳይ ሂንቴና ሳሮ ያጎሶና።
HEB 13:25 ፆሳ ኣꬎ ኬሃቴꬃይ ሂንቴ ኡባራ ጊዶ። ኣሚንዒ።
JAM 1:1 ፆሳኔ ጎዳ ዬሱስ ኪሪስቶሳ ኣይሌይ፥ ያይቆቢ፥ ቢታ ኡባን ላሌቲዳ ታማኔ ናምዑ ሼሻታስ ኪቲዳ ኪታ። ሳሮ፥ ኣይ ሜላ ዴዔቲ?
JAM 1:2 ታ ኢሻቶ፥ ሂንቴና ዱማ ዱማ ፓጬይ ጋኪያ ዎዴ ሂንቴ ሎዖባ ዴሚዳዳ ኩሜꬃ ኡፋይሳን ኤኪቴ።
JAM 1:3 ሂንቴ ኣማኑዋ ፓጬቴꬃይ ዳንዳዓ ሂንቴው ኢሜይሳ ኤሬታ።
JAM 1:4 ሂንቴ ዉርሴꬂ ጋካናው ዳንዳዒኮ ኣይቢ ፓጬይ ባይና ፖሎኔ ኩሜꬂ ጊዴታ።
JAM 1:5 ሂንቴፌ ኦዴስካ ጪንጫቴꬂ ꬋዪኮ ፆሳ ዎሶ። ኢያው ኢሜታና። ፆሳይ ኦናካ ቦሮና ኡባስ ኬሃቴꬃን ኢሚያ ፆሴ።
JAM 1:6 ሺን ኢ ዎሲያ ዎዴ ሲꬎና ኣማኖን ፆሳ ዎሶ። ሲꬊያ ኦኒካ ጫርኮይ ሱጊን ቃፂያ ኣባ ዙሌ ሜላ።
JAM 1:7 ናምዑ ቆፊ ዴዔይኔ ባ ኦጊያን ኤቆና ኦኒካ ጎዳፔ ኣይኮካ ዴማና ጊዲ ቆፖፎ።
JAM 1:9 ኣማኒያ ማንቆ ኣሳቲ፥ ፆሳይ ኤንታና ꬎቁ ኦꬂያ ዎዴ ኡፋይቶ።
JAM 1:10 ቃሲ ኣማኒያ ዱሬ ኣሳቲ ፆሳይ ኤንታና ዚቂ ኦꬂያ ዎዴ ኡፋይቶ። ዱሬ ኣሳቲ ጪሻዳ ꬋያና።
JAM 1:11 ኣዋይ ባ ሚሻራ ኬዪዲ ማታ ሜሊሲን፥ ጪሻይ ቆሌቴስ፤ ኢያ ሎዖቴꬃይካ ꬋዬስ። ሄሳዳካ፥ ዱሬ ኣሳቲ ባንታ ኦሱዋን ዳቡሪሼ ꬋያና።
JAM 1:12 ሜቱዋ ፆኒዲ ኣꬊዳፔ ጉዬ፥ ፆሳይ ባና ሲቄይሳታስ ኢማና ጊዲ ቃላ ጌሊዳ ዴዖ ካላቻ ኤካና ጊሾ ሜቶን ጌንጪያ ኣሲ ኣንጄቲዳይሳ።
JAM 1:13 ኦኒካ ፓጬቲያ ዎዴ «ታና ፆሳይ ፓጬስ» ጎፖ። ፆሳይ ኢታን ፓጬቴና፤ ቃሲ ኢ ኦናካ ፓጬና።
JAM 1:14 ሺን ኢሲ ኢሲ ኣሲ ባ ኢታ ኣሙዋን ጎሼቲያ ዎዴኔ ጪሜቲያ ዎዴ ፓጬቴስ።
JAM 1:15 ሄሳፌ ጉዬ፥ ኣሞቴꬂ ቃንꬃቲዲ ናጋራ ዬሌስ፤ ቃሲ ናጋሪ ዲጪዲ ሃይቆ ዬሌስ።
JAM 1:16 ታ ሲቆ ኢሻቶ፥ ጪሜቶፊቴ።
JAM 1:17 ሎዖ ኢሞይኔ ኩሜꬃ ኣንጆ ኡባይ ሳሎፔኔ ሳሉዋ ፖዑዋ ሜꬊዳ ፆሳ ኣዋፔ ዬስ። ፆሳይ ኩያዳ ኡባ ዎዴ ላሜቴና።
JAM 1:18 ኑኒ፥ ኢያ ሜꬌቴꬃስ ኮይሮ ጊዳና ሜላ ኑና ቱማ ቃላን ባ ሼኔን ዬሊስ።
JAM 1:19 ታ ሲቆ ኢሻቶ፥ ሃይሳ ኣኬኪቴ። ኣሲ ኡባይ ሲዓናው ኤሌሶ፥ ሺን ኦዴታናዉኔ ሃንቄታናው ኤሌሶፖ።
JAM 1:20 ኣሳ ሃንቆይ ፆሳይ ኮያ ፂሎቴꬃ ኤሄና።
JAM 1:21 ሄሳ ጊሾ፥ ቱና ሃኖታኔ ኢታቴꬃ ኡባ ዲጊዲ፥ ፆሳይ ሂንቴ ዎዛናን ቶኪዳ ሂንቴ ሼምፑዋ ኣሻናው ዳንዳዒያ ቃላ ኣዳቴꬃን ኤኪቴ።
JAM 1:22 ሺን ፆሳ ቃላ ኦሶን ፔሺቴፔ ኣቲን ሲሳ ፃላላን ሂንቴና ጪሞፊቴ።
JAM 1:23 ቃላ ሲዒዲ ኦꬆና ኣሲ፥ ኢ ባ ሶምዑዋ ማስቶቴን ቤዒያ ኣሳ ሜላ።
JAM 1:24 ኢ ባ ሶምዑዋ ቤዒዲ ቤስ፥ ሺን ኢ ኣይ ዳኒያኮ ኤሌሲ ዶጌስ።
JAM 1:25 ሺን ኦኒካ ኣይሌቴꬃፌ ኬሲያ ፖሎ ሂጊያ ኣኬካን ቤዒዲ፥ ካሊዲ ናጌይ፥ ሲዒዳይሳ ዶጎና ኦሶን ፔሺያ ኡራይ፥ ባ ኦሶ ኡባን ኣንጄታና።
JAM 1:26 ባ ኢንፃርሳ ናጎና ኣማናይስ ጊያ ኡራይ ባና ጪሜስ፤ ኢያ ኣማኖይ ሃዳ።
JAM 1:27 ፆሳ ኣዋ ሲንꬃን ቦሬይ ባይና ጌሻ ኣማኖይ ሃይሳ፡ ኣያ ኣዉ ባይና ናይታኔ ኣምዔታ ማዶኔ ኣላሚያ ቱናፔ ባና ናጎ።
JAM 2:1 ታ ኢሻቶ፥ ሂንቴ ኑ ቦንቾ ጎዳ ዬሱስ ኪሪስቶሳ ኣማኒያባ ጊዲኮ፥ ኣሳ ሶምዖ ፄሊዲ ኣሴ ቦንቾፊቴ።
JAM 2:2 ሌሚሶስ፥ ዎርቃ ሚጊዶ ኣꬂዲ፥ ሎዖ ማዖ ማዒዳ ዱሬ ኣሲ ሂንቴ ሺቁዋ ዪስ። ቃሲ ጩርቃ ማዖ ማዒዳ ማንቆ ኣሲካ ዪስ።
JAM 2:3 ሎዖ ማዖ ማዒዳ ኣዲያ ሂንቴ ኣꬂ ቦንቺዲ፥ «ኔ ሃይሳን ሎዒያ ኦይዲያን ኡታ» ጊዲ፥ ቃሲ ማንቆ ኣዲያ፥ «ኔ ያን ኤቃ ዎይኮ ሃይሳን ታ ቶሁዋ ማታን ሳዓን ኡታ» ጌታ።
JAM 2:4 ያቲን፥ ሂንቴ፥ ሂንቴ ጊዶን ሻኬቴꬂ ሜꬌይሳታኔ ኢታ ቆፋራ ዴዒያ ዳይናታ ሜላ ጊዴኬቲዬ?
JAM 2:5 ታ ሲቆ ኢሻቶ፥ ሲዒቴ። ኣማኖን ዱሬ ጊዳና ሜላኔ ባና ሲቄይሳታስ ኢማና ጊዳ ሳሎ ካዎቴꬃ ላታና ሜላ ሃ ሳዓን ዴዒያ ማንቆታ ፆሳይ ዶሪቤኔዬ?
JAM 2:6 ሺን ሂንቴ ማንቆታ ቶቼታ። ሂንቴና ኡንዔꬄይሳቲ ዱሬታ ጊዶኮናዬ? ሂንቴና ዳይና ሲንꬂ ጎቼይሳቲ ኤንታ ጊዶኮናዬ?
JAM 2:7 ሂንቴ ፄጌቲዳ ሎዖ ጎዳ ሱንꬃ ጫዬይሳቲ ኤንታ ጊዶኮናዬ?
JAM 2:8 ሺን ጌሻ ማፃፋን፥ «ኣሴ ኡባ ኔና ኔ ዶሴይሳዳ ዶሳ» ጌቴቲዲ ፃፌቲዳ ፆሳ ካዎቴꬃ ሂጊያ ሂንቴ ፖሊኮ ሎዖ ኦꬄታ።
JAM 2:9 ሺን ሂንቴ ኣሳ ሶምዖ ፄሊዲ ቦንቺኮ፥ ናጋራ ኦꬄታ ቃሲ ሂጌይ ሂንቴና ሂጌ ሜንꬂዳ ኣሳዳ ፒርዳና።
JAM 2:10 ኦኒካ ሂጌ ኡባፌ ኢሱዋ ሜንꬂዲ፥ ኣቲዳ ኡባ ናጊኮ ኡባ ሜንꬂዳዳ ታይቤቴስ።
JAM 2:11 «ላሞፋ» ጊዳ ጎዳይ፥ ቃሲ «ዎꬎፓ» ጊስ። ሺን ኔኒ ላሞና ኣጋዳ ዎꬊዳባ ጊዲኮ፥ ሂጊያ ሜንꬃዳሳ።
JAM 2:12 ኣይሌቴꬃፌ ኬሲያ ሂጊያ ሲንꬃን ፒርዳ ኤካናው ዴዒያ ኣሳዳ ኦዴቲቴኔ ኦꬂቴ።
JAM 2:13 ኣሴ ማሮና ኦናካ ፆሳይ ማሮና ፒርዳና። ሺን ማሮቴꬃይ ፒርዳ ፆኔስ።
JAM 2:14 ታ ኢሻቶ፥ ሂንቴፌ ኢሲ ኣሲ ታው ኣማኖይ ዴዔስ ጊዲ፥ ባ ኣማኑዋ ኦሶን ቤሶና ኢፂኮ ኢያ ኣይ ማዳኔ? ኢያ ኣማኖይ ኢያ ኣሻናው ዳንዳዒ?
JAM 2:15 ሌሚሶስ ኢሲ ኢሻይ ዎይኮ ኢሲ ሚቺያ ካሎቲኮኔ ኤንታው ሚያባይ ꬋዪኮ፥
JAM 2:16 ሂንቴፌ ኢሲ ኣሲ ኤንታኮ፥ «ሳሮ ቢቴ! ታማ ካዪቴ! ካሊዲ ሚቴ!» ጊዲ፥ ኮሺያባ ኤንታው ኢሞና ኢፂኮ ኤንታ ኣይ ማዲ?
JAM 2:17 ሄሳ ጊሾ፥ ኦሶይ ባይና ኣማኖይ ባርካ ሃይቂዳይሳ።
JAM 2:18 ሺን ኢሲ ኣሲ፥ «ኔው ኣማኖይ ዴዔስ፤ ቃሲ ታው ኦሶይ ዴዔስ። ኔኒ ኔ ኣማኑዋ ኔ ኦሱዋፔ ሻካዳ ታና ቤሳ፤ ታካ ታ ኣማኑዋ ታ ኦሱዋን ኔና ቤሳና» ጋና።
JAM 2:19 ኔኒ፥ ኢሲ ፆሳይ ዴዔይሳ ኣማናሳ፤ ሄሲ ሎዖ። ቱና ኣያናቲካ ኣማኖሶና፤ ያሻን ኮኮሮሶና።
JAM 2:20 ኔኖ ኤያው! ኣማኖይ ኦሶፔ ሻኬቲዲ ማዶናይሳ ኤራናው ኮያይ?
JAM 2:21 ኑ ኣዋ ኣብራሃሜይ፥ ባ ናዓ ዪሳቃ ያርሾ ቤሳ ቦላ ዎꬂዳ ዎዴ ባ ኦሱዋን ፂሊቤኔ?
JAM 2:22 ኢያ ኣማኖይኔ ኢያ ኦሶይ ኢሲፌ ኦꬂዳይሳ ቤዒኪ? ኢያ ኣማኖይ ኢያ ኦሱዋን ፖሌቲስ።
JAM 2:23 ጌሻ ማፃፋይ፥ «ኣብራሃሜይ ፆሳ ኣማኒስ። ፆሳይ ሄሳ ኢያው ፂሎቴꬂ ኦꬂዲ ታይቢስ» ጊዳይሲ ፖሌቲስ። ቃሲ ኢ ፆሳ ዳቦ ጌቴቲዲ ፄጌቲስ።
JAM 2:24 ኣሲ ኣማኖ ፃላላን ጊዶናሺን ኦሶን ፂሌይሳ ቤዓሳ።
JAM 2:25 ሄሳዳካ፥ ላይሚያ ራዓባ ኢስራዔሌፔ ኪቴቲዳይሳታ ሞካዳ ሃራ ኦጌራ ኤንታ ሞይዚዳ ዎዴ ባ ኦሱዋን ፂላቤኬ?
JAM 2:26 ሼምፖይ ሻኬቲዳ ኣሳቴꬃይ ሃይቆ ጊዴይሳዳ፥ ኦሶይ ሻኬቲዳ ኣማኖይካ ሃይቂዳይሳ።
JAM 3:1 ታ ኢሻቶ፥ ሂንቴፌ ዳሮቲ ኣስታማሬ ጊዶፖ። ኑ፥ ኣስታማሬቲ ሃራታፔ ኣꬊያ ፒርዳ ኤካናይሳ ሂንቴ ኤሬታ።
JAM 3:2 ኑ ኡባይ ዳሮባን ባሌቶስ። ባ ኦዳን ባሌቶና ኦኒካ ባናቴꬃ ናጋናው ዳንዳዒያ ፖሎ ኣሲ።
JAM 3:3 ፓራቲ ኑስ ኪቴታና ሜላ ቢፃላ ባርሲዲ ኑኒ ኮያ ቤሲ ኡባ ኤፎስ።
JAM 3:4 ማርካቤይ ሄሳ ሜላ ጊታ ጊዲሼ ዎልቃማ ጫርኩዋን ሱጌቲኮካ፥ ኢያ ላጌይሲ ባ ኮያ ቤሲ ዛሪዲ ላጊያ ጉꬃ ሚꬃን ላጌቲዲ ቤስ።
JAM 3:5 ሄሳዳ ኢንፃርሲ ኣሳቴꬃ ጊዶን ጉꬃ ጊዲኮካ ዳሮ ጊታባን ጬቄቴስ። ጉꬃ ታሚ ዳሮ ጊታ ዎራ ፁጌስ።
JAM 3:6 ኢንፃርሲ ታማ ሜላ። ኢንፃርሲ ኑ ኣሳቴꬃ ጊዶን ኢታን ኩሚዳ ኣላሜ፤ ኣሳቴꬃ ኡባ ቱኒሴስ። ጋናሜፔ ኬያ ታማዳ ኑ ዴዑዋ ዎꬃ ኡባ ፁጌስ።
JAM 3:7 ዶዓታኔ ካፎታ፥ ኡሎራ ጎሼቴይሳታኔ ኣባን ዴዒያ ሜꬌቴꬃታ ኡባ ኣሲ ሃሬስ፤ ኤንቲካ ሃሬቲዶሶና።
JAM 3:8 ሺን ኦኒካ ኢንፃርሲ ሃራናው ዳንዳዒቤና። ኢንፃርሲ ዎꬊያ ማርዜይ ኩሚዳ ሃሬቶና ኢታ ሜꬌቴꬂ።
JAM 3:9 ኑ ኢንፃርሳን፥ ኑ፥ ጎዳኔ ፆሳ ጋላቶስ። ቃሲ ኢያራ ፆሳ ሌሚሶን ሜꬌቲዳ ኣሳ ቃንጎስ።
JAM 3:10 ኢሲ ዶናፔ ጋላቲኔ ቃንጌꬂ ኬዬስ። ታ ኢሻቶ፥ ሄሳዳ ሃናናው ቤሴና።
JAM 3:11 ፑልቶይ ኢሲ ኦላፌ ማልዒያ ሃꬂኔ ጫሚያ ሃꬂ ፑልታናው ዳንዳዒ?
JAM 3:12 ታ ኢሻቶ፥ ባላሴ ሚꬂ ሻማሆ ኣይፋናው ዳንዳዒ? ዎይኮ ዎይኔ ሚꬂ ባላሴ ሚꬃ ኣይፌ ኣይፋናው ዳንዳዒ? ጫሞ ሃꬃፌ ማልዖ ሃꬂ ኬያናው ዳንዳዔና።
JAM 3:13 ሂንቴ ጊዶን ጪንጪኔ ኣኬካንቾይ ኦኔ? ባ ሎዖ ዴዑዋ፥ ኣሽኬቴꬃኒኔ ጪንጫቴꬃን ኦሴቲዳ ኦሶን ቤሶ።
JAM 3:14 ሺን ሂንቴ ዎዛናን ጫሚያ ቃናቴይኔ ባና ዶሶይ ዴዒኮ ጬቄቶፊቴ፤ ቱማ ቦላ ዎርዶቶፒቴ።
JAM 3:15 ሄሳ ሜላ ጪንጫቴꬃይ ሳሎፔ ዪዳባ ጊዶናሺን ሄሲ ኣሳባ፥ ኣላሜባ፥ ፃላሄባ።
JAM 3:16 ቃናቴይኔ ባና ዶሶይ ዴዒያ ሶን ኦሺኔ ኢታ ኦሶ ኡባይ ዴዖሶና።
JAM 3:17 ሺን ቦላፌ ያ ጪንጫቴꬃይ ኡባፌ ሲንꬄ ጌሺ። ቃሲ ሳሮቴꬂ፥ ኣዳቴꬂ፥ ሲዒዲ ኤኬይሳ፥ ቃꬌቴይሳ፥ ሎዖ ኣይፌይ ኩሚዳይሳ፥ ኣሴ ሻኮናይሳኔ ጩቦቴꬂ ባይናይሳ።
JAM 3:18 ሳሮቴꬃ ዶሴይሳቲ ሳሮቴꬂ ዜሪዲ ፂሎቴꬂ ቡጮሶና።
JAM 4:1 ኦሺኔ ኦሊ ሂንቴ ጊዶ ኣዉፔ ዪ? ኤንቲ ዬይ ሂንቴ ኣሳቴꬃ ሃራናው ኦሌቲያ ሂንቴ ኣሾ ኣሙዋፔ ጊዴኔዬ?
JAM 4:2 ሂንቴ ኣሞቴታ፥ ሺን ዴሜኬታ፤ ሄሳ ጊሾ፥ ዎꬌታ። ሚንꬂ ኮዬታ፥ ሺን ዴማናው ዳንዳዔኬታ፤ ሄሳ ጊሾ፥ ኦዬቴታኔ ኦሌቴታ። ሂንቴ ፆሳ ዎሶና ጊሾ ኮያባ ዴሜኬታ።
JAM 4:3 ሂንቴ ዎሴታ፥ ሺን ዴሜኬታ። ሂንቴ ኣሾ ኣሙዋ ፖላናው ዎቤ ኦጌን ዎሲያ ጊሾ ዴሜኬታ።
JAM 4:4 ሂንቴኖ፥ ላይማቴይሳቶ! ሃ ኣላሚያ ዶሴይ ፆሳራ ሞርኬ ጊዴይሳ ኤሬኬቲ? ሃ ኣላሚያራ ዳቦታናው ኮዬይ ኦኒካ ፆሳራ ሞርኬ።
JAM 4:5 ጌሻ ማፃፋይ፥ «ፆሳይ ኑናን ዳና ሜላ ኦꬂዳ ኣያናይ፥ ኑኒ ኢያው ቡዞ ጊዳና ሜላ ኣሞቴስ» ጊዳይሳ ጮ ጊዳባ ዳኒ?
JAM 4:6 ሺን ጌሻ ማፃፋይ፥ «ፆሳይ ኦቶራንቾታ ኢፄስ፥ ሺን ባንታና ካዉሼይሳታስ ማሮቴꬃ ኢሜስ» ያጊያ ጊሾ ፆሳይ ማሮቴꬃ ዳርሲዲ ኢሜስ።
JAM 4:7 ሄሳ ጊሾ፥ ፆሳስ ሃሬቲቴ፤ ፃላሂያራ ኤቄቲቴ፤ ኢ ሂንቴፌ ሃካና።
JAM 4:8 ፆሳኮ ሺቂቴ፤ ኢ ሂንቴኮ ሺቃና። ሂንቴኖ፥ ናጋራንቾቶ፥ ሂንቴ ኩሺያ ሜጬቲቴ፤ ናምዑ ቆፊ ዴዔይሳቶ፥ ሂንቴ ዎዛና ጌሺቴ።
JAM 4:9 ካዮቲቴ፥ ዬኪቴኔ ኣፉፂቴ። ሂንቴ ሚቻይ ዬሆን፥ ሂንቴ ኡፋይሳይ ኣዛኖን ላሜቶ።
JAM 4:10 ጎዳ ሲንꬃን ሂንቴናቴꬃ ካዉሺቴ፤ ኢ ሂንቴና ꬎቁ ꬎቁ ኦꬃና።
JAM 4:11 ታ ኢሻቶ፥ ኢሶይ ኢሱዋ ዚጊሮፒቴ። ባ ኢሻ ዚጊሬይኔ ኢያ ቦላ ፒርዴይ ሂጌ ዚጊሬሲኔ ሂጌ ቦላ ፒርዴስ። ኔኒ ሂጌ ቦላ ፒርዲኮ ሂጌ ቦላ ፒርዴይሳ ጊዳሳፔ ኣቲን ሂጌ ፖሌይሳ ጊዳካ።
JAM 4:12 ሂጌ ኢሜይኔ ፒርዴይ ፆሳ ፃላላ። ኣሻናዉኔ ꬋይሳናው ዳንዳዔይ ኢያ። ያቲን፥ ኣሳ ቦላ ፒርዲያ ኔኒ ኦኔ?
JAM 4:13 ሂንቴ፥ «ኑኒ ሃቺ ዎይኮ ዎንቶ ያ ካታማ ዎይኮ ሃ ካታማ ባና፤ ያን ላይꬂ ኡታና፤ ዛልዒዲ ዎꬊሳና» ያጌይሳቶ፥ ሲዒቴ።
JAM 4:14 ዎንቶ ኣይቢ ሃናኔኮ ሂንቴ ኤሬኬታ። ሂንቴ ዴዖይ ዋናኔኮ ኤሬይ ኦኔ? ሂንቴ ጉꬃ ዎዴ ቤንቲዲ ꬋያ ኣካ ሜላ።
JAM 4:15 ሄሳ ኣጊዲ፥ «ጎዳይ ጊኮ ኑኒ ዳና፤ ሃይሳ ዎይኮ ሄሳ ኦꬃና» ያጋናው ቤሴስ።
JAM 4:16 ሺን ሂንቴ ሃዒ ኦቶርቴታኔ ጬቄቴታ። ሄሳ ሜላ ጬቆ ኡባይ ኢታ።
JAM 4:17 ሄሳ ጊሾ፥ ሎዖባ ኦꬃናው ኤሪሼ ኦꬆና ኡራስ ሄሲ ናጋራ።
JAM 5:1 ሂንቴኖ፥ ዱሬቶ፥ ሂንቴ ቦላ ኢታ ሜቶይ ያ ጊሾ ዬኪቴኔ ዜሌሊቴ።
JAM 5:2 ሂንቴ ሻሎይ ቡቂስ፤ ሂንቴ ኣፊላይካ ቢላን ሜቴቲስ።
JAM 5:3 ሂንቴ ዎርቃይኔ ሂንቴ ቢራይ ሺዒስ። ሄ ሺዓይ ሂንቴ ቦላ ማርካ ጊዳና። ኢ ሂንቴ ኣሳቴꬃ ታማዳ ማና። ሂንቴ ሃ ዉሪዳ ቃማታን ሂንቴው ሻሎ ዳጋዬታ።
JAM 5:4 ሂንቴ ጋዴን ኦꬂ ፔዒዳ ኣሳ ኬራ ሚሺያ ቃንፂቤኬታ። ሄሲ ሂንቴ ቦላ ዋሴስ። ሄ ኣሳታ ዋሶይ ዎልቃማ ጎዳ ሃይꬃን ሲዔቲስ።
JAM 5:5 ሃ ሳዓን ሂንቴ ኡሎ ፃላላስ ቆፒዲ፥ ኢንጄን ዴዒዴታ። ሹካስ ጊጌቲዳ ሜሄዳ ሂንቴና ꬊኪዴታ።
JAM 5:6 ሂንቴራ ኤቄታናው ዳንዳዖና ፂሎ ኣሳ ቦላ ፒርዲዴታ፤ ኢያ ዎꬊዴታ።
JAM 5:7 ታ ኢሻቶ፥ ጎዳይ ያና ጋካናው ጌንጪቴ። ጎሻንቾይ ቶርቼ ኢራይኔ ሲላ ኢራይ ያና ጋካናው ጌንጪዲ ኣልዖ ካꬃ ናጊዲ ዋቲ ጋꬂ ኤኪያኮ ቆፒቴ።
JAM 5:8 ሄ ጎሻንቹዋዳ ሂንቴካ ጌንጪቴ። ጎዳ ዩሳይ ማታቲዳ ጊሾ ኡፋይሳን ናጊቴ።
JAM 5:9 ታ ኢሻቶ፥ ፆሳይ ሂንቴ ቦላ ፒርዶና ሜላ ኢሶይ ኢሱዋ ቦላ ዙዙሞፊቴ። ፒርዴይሲ ፔንጌን ኤቂስ።
JAM 5:10 ታ ኢሻቶ፥ ዋያን ጌንጪዳ፥ ጎዳ ሱንꬃን ኦዲዳ ናቤታ ሌሚሶ ኦꬂዲ ኤኪቴ።
JAM 5:11 ዳንዳዓን ጌንጪዳይሳታ ኑኒ ኣንጄቲዳይሳታ ጎስ። ኢዮቤይ ዋኒዲ ጌንጪዳኮ ሂንቴ ሲዒዴታ። ጎዳይ ዉርሴꬃን ኢያ ዋቲ ማዲዳኮ ቤዒዴታ። ኢ ማሮቲኔ ቃꬌይ ኩሚዳ ጎዳ ጊዲያ ጊሾ ሄሳ ኦꬂስ።
JAM 5:12 ሺን ኡባፌ ሲንꬄ፥ ታ ኢሻቶ፥ ሳሉዋን ጊዲን ዎይኮ ሳዓን ጊዲን ዎይኮ ሃራ ኣይቢንካ ጫቆፊቴ። ፆሳ ፒርዳን ሂንቴ ጌሎናዳ ሂንቴ ኦዳይ ኤ ጊዲኮ፥ «ኤ» ጊቴ፤ ኣካይ ጊዲኮ፥ «ኣካይ» ጊቴ።
JAM 5:13 ሂንቴ ጊዶን ሜቶ ኤኪያ ኦኒካ ዴዒኮ ፆሳ ዎሶ። ኡፋይቲያ ኦኒካ ዴዒኮ ጋላታን ዬፆ።
JAM 5:14 ሂንቴፌ ሃርጌቲያ ኦኒካ ዴዒኮ ዎሳ ኬꬃ ጪማታ ፄጎ። ኤንቲ ጎዳ ሱንꬃን ሻማሆ ዛይቴ ቲዪዲ ኢያው ፆሳ ዎሶ።
JAM 5:15 ኣማኖን ዎሲዳ ዎሳይ ሃርጋንቹዋ ፓꬃና። ጎዳይ ኢያ፥ ሃርጊያፌ ዴንꬃና፤ ኢ ናጋራ ኦꬂዳባ ጊዲኮካ ጎዳይ ኢያ ማራና።
JAM 5:16 ሄሳ ጊሾ፥ ሂንቴ ፓፃና ሜላ ሂንቴ ናጋራ ኢሶይ ኢሱዋስ ፓፂቴኔ ኢሶይ ኢሱዋስ ዎሲቴ። ፂሎ ኣሳ ዎሳይ ዎልቃማ ኦሶ ኦꬄስ።
JAM 5:17 ኤሊያሲ ኑ ሜላ ኣሴ። ኢሪ ሳዓን ቡኮና ሜላ ሚንꬂዲ ፆሳ ዎሲን ሄꬑ ላይꬂኔ ኡሱፑን ኣጌና ሳዓን ኢሪ ቡኪቤና።
JAM 5:18 ዛሪዲ ኢ ፆሳ ዎሲን ሳሎፔ ኢሪ ቡኪስ፤ ሳዓይካ ካꬂ ሞኪስ።
JAM 5:19 ታ ኢሻቶ፥ ሂንቴፌ ኦኒካ ቱማ ኦጊያፔ ቡቲኮ፥ ሃራይ ኢያ ቱማኮ ዛሪኮ፥
JAM 5:20 ናጋራንቹዋ ኢያ ባላ ኦጊያፔ ዛሪያ ኦኒካ፥ ኢያ ሼምፑዋ ሃይቆፔ ኣሼይሳኔ ኢያ ዳሮ ናጋራስ ማሮታ ኢሜይሳ ኤሮ።
1PE 1:1 ታኒ፥ ዬሱስ ኪሪስቶሳ ሃዋሬይ ጴፂሮሲ፤ ጳንፆሳን፥ ጋላቲያን፥ ቃጳዶቂያን፥ ኢሲያኒኔ ቢቲኒያን ቤታንቾዳ ላሌቲዲ ዴዒያ ፆሳይ ዶሪዳ፥ ኣሳስ ሃ ዳብዳቢያ ፃፋስ።
1PE 1:2 ዬሱስ ኪሪስቶሳስ ሂንቴ ኪቴታና ሜላኔ ኢያ ሱꬃን ጌያና ሜላ፥ ፆሳ ኣዋይ ባ ካሴ ኤራን ዶሪዳይሳታሲኔ ጌሻ ኣያናን ጌዪዳ፥ ሂንቴው ኣꬎ ኬሃቴꬃይኔ ሳሮቴꬃይ ጊዶ።
1PE 1:3 ዬሱስ ኪሪስቶሳ ሃይቆፔ ዴንꬂዲ ባ ጊታ ማሮቴꬃን ናምዓንꬆ ዬሌቴꬃኔ ꬋዮና ኡፋይሳ ኢሚዳ ኑ ጎዳ ዬሱስ ኪሪስቶሳ ኣዋይ፥ ፆሳይ ጋላቴቶ።
1PE 1:4 ቃሲ ፆሳይ ሂንቴው ꬋዮና፥ ኢቶናኔ ቡቆና ላታ ሳሎን ጊጊሲስ።
1PE 1:5 ሄ ላታይ ዎዴ ዉርሴꬃን ቆንጫናው ዴዒያ ኣቶቴꬃስ ፆሳ ዎልቃን ኣማኖን ሂንቴው ናጌቲዲ ዴዔስ።
1PE 1:6 ሃዒ ጉꬃ ዎዴስ ሂንቴ ዱማ ዱማ ፓጬን ኡንዔቲኮካ ሄሳን ኡፋይቲቴ።
1PE 1:7 ሄ ፓጬይ ሂንቴና ጋኪዳይ፥ ታማን ዬጊን ꬋያ ዎርቃፌ ሂንቴ ኣማኖይ ኣꬎኔ ቱማ ጊዴይሳ ቤሳናሳ። ሄ ፓጬቲዳ ኣማኑዋን ዬሱስ ኪሪስቶሲ ቆንጪያ ዎዴ ጋላታ፥ ቦንቾኔ ሳባ ሂንቴ ኤካና።
1PE 1:8 ሂንቴ ዬሱሳ ቤዒቤኬታ፥ ሺን ኢያ ሲቄታ። ሂንቴ ሃዒ ኢያ ቤዒቦናባ ጊዲኮካ፥ ኢያ ኣማኔታ። ቃሲ ኦዳን ቆንጪሳናው ዳንዳዔቶና ኡፋይሳኒኔ ቦንቾን ኩሚዴታ።
1PE 1:9 ሂንቴ ኣማኖን ናጊያ ሂንቴ ሼምፑዋ ኣቶቴꬃ ኤካና።
1PE 1:10 ኣꬎ ኬሃቴꬃ ባጋራ ሂንቴው ጊጊዳ ሃ ኣቶቴꬃባ ናቤቲ ኤራናው ጊታ ኮሻኒኔ ናጎን ኮዪዶሶና።
1PE 1:11 ኤንታን ዴዒያ ኪሪስቶሳ ኣያናይ ኢያ ዋያባኔ ሄሳፌ ጉዬ ያና ቦንቹዋባ ካሴቲዲ ማርካቲሼ፥ ኣዉዴ ዎይኮ ዋኒዲ ሃናኔኮ ኣኬካን ፒልጊዶሶና።
1PE 1:12 ናቤቲ ኦዲዳ ቲንቢቴይ ባንታው ጊዶናሺን ሂንቴው ጊዴይሳ ፆሳይ ሂንቴው ቆንጪሲስ። ሃዒ ኣሳይ ሂንቴው ኦዲዳ ዎንጌላ ሳሎፔ ኪቴቲዳ ጌሻ ኣያና ዎልቃን ሂንቴው ኦዲዶሶና። ኪታንቾቲካ ሄሳ ቤዓናው ኣሞቲዶሶና።
1PE 1:13 ሄሳ ጊሾ፥ ኦሶስ ሂንቴና ጊጊሲቴ፤ ሂንቴና ሃሪቴ። ዬሱስ ኪሪስቶሲ ቆንጪያ ዎዴ ሂንቴ ኤካና ኣꬎ ኬሃቴꬃ ኡፋይሳን ናጊቴ።
1PE 1:14 ፆሳ ናይታዳ ኢያው ኪቴቲቴ፤ ሂንቴ ካሴ ኤሮና ኦꬂዳ ኢታ ኣሙዋ ካሎፊቴ።
1PE 1:15 ሺን ሂንቴና ፄጊዳ ፆሳይ ጌሺ ጊዲዳይሳዳ ሂንቴካ ሂንቴ ዱሳ ኡባን ጌሺ ጊዲቴ።
1PE 1:16 ጌሻ ማፃፋን፥ «ታኒ ጌሺ ጊዲዳ ጊሾ ሂንቴካ ጌሺ ጊዲቴ» ጌቴቲ ፃፌቲስ።
1PE 1:17 ኣሳ ሶምዖ ቤዖና ኢያ ኦሱዋዳ ፒርዲያ ፆሳ፥ «ኑ ኣዋው» ጊዲ ፄጊያባ ጊዲኮ፥ ሃ ሳዓ ኢማꬃቴꬃ ዱሳ ያሻን ዴዒቴ።
1PE 1:18 ሂንቴ፥ ሂንቴ ኣዋታፔ ላቲዳ ፓꬆና ዴዑዋፔ ዎዜቲዳይሲ፥ ꬋያ ቢራን ዎይኮ ዎርቃን ጊዶናይሳ ኤሬታ።
1PE 1:19 ቦሬይ ዎይኮ ቦርሶይ ባይና ዶርሳ ሱꬃዳ ኣልዖ ጊዲዳ ኪሪስቶሳ ሱꬃን ዎዜቲዴታ።
1PE 1:20 ፆሳይ ኣላሜይ ሜꬌታናፔ ካሴ ኪሪስቶሳ ዶሪስ፥ ሺን ሃ ዉርሴꬃ ዎዲያን ኪሪስቶሲ ሂንቴ ጊሾ ቆንጪስ።
1PE 1:21 ሂንቴ ኣማኖይኔ ሂንቴ ኡፋይሳይ ፆሳን ጊዳና ሜላ ኢያ ሃይቆፔ ዴንꬂዲ፥ ቦንቺዳ ኪሪስቶሳ ባጋራ ፆሳን ኣማኔታ።
1PE 1:22 ሂንቴ ቱማቴꬃስ ኪቴቲዲ ሂንቴናቴꬃ ጌሺዴታ። ሂንቴ ኢሶይ ኢሱዋ ዎዛናፔ ሲቄታ፥ ሺን ሃዒካ ቱማ ዎዛናፔ ሚንꬂዲ ሲቂቴ።
1PE 1:23 ሂንቴ ናምዓንꬆ ዬሌቲዳይ ꬋያ ዜሬꬃፌ ጊዶናሺን ሜሪናው ዴዒያ ፆሳ ቃላን ꬋዮና ዜሬꬃፌ ዬሌቲዴታ።
1PE 1:24 ፆሳ ቃላይ፥ «ኣሲ ኡባይ ማታ ሜላ፤ ኢያ ቦንቾ ኡባይ ጪሻ ሜላ። ማታይ ሜሌስ፥ ጪሻይካ ቆሌቴስ።
1PE 1:25 ሺን ጎዳ ቃላይ ሜሪናው ዴዔስ» ያጌስ። ሂንቴው ኦዴቲዳ ዎንጌላ ቃላይ ሃይሳ።
1PE 2:1 ሂዛ፥ ኢታቴꬂ ኡባ፥ ጪሞ ኡባ፥ ጩቦቴꬂ ቃናቴኔ ዚጊርሲ ኡባ ሂንቴፌ ዲጊቴ።
1PE 2:2 ጎዳይ ኬሃ ጊዴይሳ ሂንቴ ኤሪዲ ሜዜቲዳይሳዳ ሃዒ ዬሌቲዳ ጉꬃ ናይታዳ ሂንቴ ኣቶቴꬃን ዲጪሼ ባናው ፆሳ ጌሻ ቃላ ማꬃ ኡባ ዎዴ ኣሞቲቴ።
1PE 2:4 ኣሳን ቦሬቲዲ ፆሳን ዶሬቲዳ ኣልዖ ጊዲዳ ዴዖ ሹቻ፥ ጎዳ ዬሱሳኮ ሺቂቴ።
1PE 2:5 ሂንቴ ኣያና ኬꬂ ኬፄቲያ ዴዖ ሹቻታ። ሂንቴ ዬሱስ ኪሪስቶሳ ባጋራ ፆሳ ኡፋይሲያ ኣያና ያርሾ ያርሺያ ጌሻ ካሂኔታ።
1PE 2:6 ጌሻ ማፃፋን፥ «ሄኮ፥ ታኒ ፂዮኔ ካታማን ጎዳ ፃጱዋ ሚንꬂያ፥ ዶሬቲዳ፥ ኣልዖ ሹቻ ዎꬃስ፤ ኢያን ኣማኒያ ኦኒካ ዬላቴና» ያጌስ።
1PE 2:7 ሃ ሹቻይ ሂንቴው ኣማኔይሳታስ ኣልዖ፥ ሺን ኣማኖናይሳታስ፥ «ጊምቤይሳቲ ካꬊዲ ኢፂዳ ሹቻይ ጎዳ ፃጱዋ ሚንꬂያ፥ ኡባፌ ኣꬊያ ሹቹ ጊዲስ።»
1PE 2:8 ቃሲካ፥ «ሃ ሹቻይ ኣሴ ꬉቢያ ሹቹኔ ኣሴ ኩንዲሲያ ዛላ» ያጌስ። ኤንቲ ሄሳስ ቃዴቲዳ ጊሾ ፆሳ ቃላ ኪቴቶና ኢፂዲ ꬉቤቲዶሶና።
1PE 2:9 ሺን ፆሳይ ꬉማፔ ማላሊሲያ ባ ፖዑዋኮ ሂንቴና ፄጊዳይ፥ ሂንቴ ኢያ ሎዖቴꬃ ሃራታስ ኦዳናው ዶሬቲዳ ዛሬ፥ ካዎ ካሂኔ፥ ጌሻ ዴሬኔ ፆሳ ዱማ ዴሬ።
1PE 2:10 ሂንቴ ካሴ ፆሳ ዴሬ ጊዴኬታ፥ ሺን ሃዒ ሂንቴ ኢያ ዴሬ። ሂንቴ ካሴ ማሮቴꬂ ዴሚቤኬታ፥ ሺን ሃዒ ማሮቴꬂ ዴሚዴታ።
1PE 2:11 ታ ኢሻቶ፥ ሂንቴ ሃ ሳዓን ኢማꬄኔ ቤታንቾ ጊዲዳይሳዳ ሂንቴ ሼምፑዋ ኦሊያ ኣሾ ኣሞፔ ሃካና ሜላ ታኒ ሂንቴና ዎሳይስ።
1PE 2:12 ኣማኖና ኣሳይ ሂንቴና ኢታ ኦꬂያ ኣሳዳ ዚጊርያ ዎዴ ፆሳይ ኑና ቤዓናው ያ ጋላስ፥ ኤንቲ ሂንቴ ሎዖ ኦሱዋ ቤዒዲ ፆሳ ጋላታና ሜላ ሂንቴው ሎዖ ዴዖይ ዴዖ።
1PE 2:13 ጎዳ ጊሾ ጊዲ ማታራ ዴዒያ ኣሳታስ ሃሬቲቴ፤ ኡባፌ ቦላ ጊዲያ ጊሾ ካዉዋስካ ሃሬቲቴ።
1PE 2:14 ኤንቲ ኢታ ኦꬄይሳታ ሴራናዉኔ ሎዖ ኦꬄይሳታ ሳባናው ካዉዋፔ ኪቴቲዳ ጊሾ ዴሪያ ኣይሴይሳታስ ሃሬቲቴ።
1PE 2:15 ሂንቴ፥ ሂንቴ ሎዖ ኦሱዋን ኤሮና ኤያ ኣሳ ዶና ኦይꬃናይሲ ፆሳ ሼኔ።
1PE 2:16 ፆሳ ኣይሌ ጊዲዲ ላዓቴꬃን ዴዒቴፔ ኣቲን ሂንቴ ላዓቴꬃ ኢታ ኦሶስ ካማ ኦꬆፊቴ።
1PE 2:17 ኣሳ ኡባ ቦንቺቴ፤ ኣማኒያ ኣሳ ሲቂቴ፤ ፆሳ ያዪቴ፤ ካዎ ቦንቺቴ።
1PE 2:18 ኣይሌቶ፥ ሎዖ ጎዳታሲኔ ኬሃ ጎዳታ ፃላላስ ጊዶናሺን ኢታታስካ ቦንቾን ሃሬቲቴ።
1PE 2:19 ኣሲ ፆሳ ጊሾ ጊዲ ቤሶና ዋዬ ዋዬቲኮ ፆሳይ ኢያ ኣንጃና።
1PE 2:20 ሺን ሂንቴ ናጋራ ኦꬂን ሂንቴና ዴቺያ ዎዴ ሂንቴ ዳንዳዒኮ ሂንቴው ኣይ ጋላቲ ዴዒ? ሺን ሎዖባ ኦꬂዲ ዋዬ ዳንዳዒኮ ፆሳይ ሂንቴና ሄሳስ ኣንጃና።
1PE 2:21 ፆሳይ ሂንቴና ፄጊዳይ ሄሳ ጊሾሳ፤ ኪሪስቶሲ ሂንቴው ዋዬቲስ፤ ሂንቴ ኢያ ካላና ሜላ፥ ሂንቴው ሌሚሶ ጊዲስ።
1PE 2:22 ኢ ናጋራ ኦꬂቤና፤ ኢያ ዶናንካ ዎርዶይ ቤንቲቤና።
1PE 2:23 ኤንቲ ኢያ ጫያ ዎዴ ዛሪዲ ጫዪቤና። ሺን ዋዬ ኤኪሼ ፂሎ ፒርዲያ ፆሳስ ባ ፒርዳ ኣጋጊስፔ ኣቲን ማንዲቤና።
1PE 2:24 ኑኒ ናጋራስ ሃይቂዲ ፂሎቴꬃስ ዳና ሜላ ኪሪስቶሲ ባ ኣሹዋን ኑ ናጋራ ማስቃሊያ ቦላ ቶኪስ፤ ሂንቴ ኢያ ማዱንꬃን ፓፂዴታ።
1PE 2:25 ካሴ ሂንቴ ኦጌ ባሊዲ ꬋዪዳ ዶርሳ ሜላ፥ ሺን ሃዒ ሂንቴ ሼምፑዋ ሄሜይሳኮኔ ናጌይሳኮ ሲሚዴታ።
1PE 3:1 ሄሳዳካ፥ ማቼቶ፥ ሂንቴ ኣዚናታፔ ፆሳ ቃላስ ኪቴቶናይሳቲ ዴዒኮካ ኣይኮካ ኦዴቶናሺን፥ ሂንቴ ያሻቴꬃኔ ሂንቴ ጌሻ ዴዑዋ ቤዒዲ ኣማናና ሜላ ኤንታው ሃሬቲቴ።
1PE 3:3 ሂንቴ፥ ሂንቴ ሁዔ ፒፆኒኔ ዎርቃ ኣሶን ዎይኮ ሎዖ ማዖን ሂንቴ ቦላ ኣሳቴꬃ ሎይሶን ጊዶፖ።
1PE 3:4 ሺን ሂንቴ ዎዛና ጊዶን ዴዒያ ዬጌልሳቴꬃይ ፆሳ ሲንꬃን ሂንቴው ዳሮ ኣልዖ ጊዲዲ ꬋዮና፥ ኣሽኬኔ ዎፑ ጊዳ ኣያና ጊዶ።
1PE 3:5 ፆሳይ ኢማና ጊዳይሳ ኣማኒዳ ጌሻ ማጫሳቲ ቢኒ ዎዴ ባንታ ኣዚናታስ ሃሬቲዲ፥ ባንታና ሄሳዳ ዳሮ ሎይꬂዶሶና።
1PE 3:6 ሄሳዳ ሳራ ኣብራሃሜ፥ «ታ ጎዳው» ያጋዳ ፄጋሼ፥ ኢያው ኪቴታሱ፤ ሂንቴካ ኣይኮካ ያዮና ሎዖባ ኦꬂኮ ኢ ናይታ።
1PE 3:7 ኣዚናቶ፥ ሂንቴ ማቼቲ ሂንቴፌ ዳቡራንቾ ሜꬌታ ጊዴይሳ ኤሪዲ፥ ኤንታና ቦንቺቴ፤ ሂንቴ ዎሳ ꬉቦና ሜላ ፆሳይ ኢሚዳ ዴዑዋ ኤንቲ ሂንቴራ ኢሲፌ ላቲያ ጊሾ ኤንታ ቦንቺቴ።
1PE 3:8 ዉርሴꬃን፥ ኡባይ ኢሲ ቆፋን ዴዒቴ። ኢሶይ ኢሱዋስ ቃꬌቲሼ፥ ኢሻዳ ሲቄቲቴ፤ ቃሲ ኢሶይ ኢሱዋስ ኬሃታኔ ኣሽኬታ ጊዲቴ።
1PE 3:9 ኢታ ጊሾስ ኢታ ዎይኮ ጫሻ ጊሾ ጫዪዲ ዛሮፒቴ፤ ሄሳ ኣጊዲ፥ ፆሳይ ሂንቴው ኣንጁዋ ኢማናው ሂንቴና ፄጊዳ ጊሾ ኣንጂቴ።
1PE 3:10 ኣይስ ጊኮ፥ ጌሻ ማፃፋይ፥ «ዴዖ ዶሴይኔ ሎዖ ዎዴ ቤዓናው ኮዬይ ኦና ጊዲኮካ ባ ኢንፃርሳን ኢታባኔ ዎርዶ ኦዴቴይሳ ኣጎ።
1PE 3:11 ኢታባ ኦꬄይሳ ኣጊዲ ሎዖባ ኦꬆ፤ ሳሮቴꬃካ ኬሂ ኮዮኔ ካሎ።
1PE 3:12 ጎዳ ኣይፌይ ፂሎታኮ ፄሌስ፤ ቃሲ ኢ ኡባ ዎዴ ኤንታ ዎሳ ሃይዜስ። ሺን ጎዳይ ኢታባ ኦꬄይሳታ ባ ሃንቆ ሶምዑዋን ፄሌስ» ያጌስ።
1PE 3:13 ሂንቴ ሎዖባ ኦꬃናው ኣሞቲኮ ሂንቴና ቆሃናይ ኦኔ?
1PE 3:14 ሃሪ ኣቶሺን፥ ፂሎቴꬃ ጊሾ ሂንቴ ዋዬቲኮ ኣንጄቲዳይሳታ። ኣሳስ ያዮፊቴኔ ሂርጎፊቴ።
1PE 3:15 ኪሪስቶሳ ሂንቴ ዎዛናን ቦንቺቴኔ ጎዳዪቴ። ፆሳይ ሂንቴው ኢሚዳ ኡፋይሳስ ጋሶ ኦይቺያ ኦዴስካ ዛሮ ኢማናው ኡባ ዎዴ ጊጊ ኡቲቴ፥ ሺን ሄሳ ኣሽኬቴꬃኒኔ ያሻን ኦꬂቴ።
1PE 3:16 ቃሲ ኪሪስቶሳን ሂንቴ ዴዒያ ሎዖ ዴዑዋ ኢታባ ኦꬂዳባዳ፥ ሂንቴና ጫያ ኣሳይ ዚጊርያባን ዬላታና ሜላ ሂንቴ ካሃይ ጌሺ ጊዶ።
1PE 3:17 ፆሳይ ጊዳባ ጊዲኮ ኢታባ ኦꬂዳ ጊሾ ዋዬ ኤኬይሳፌ ሎዖባ ኦꬂዳ ጊሾ ዋዬ ኤኬይሲ ሎዖ።
1PE 3:18 ኪሪስቶሲ ኑና ፆሳኮ ሺሻናው ባው ፂሎ ጊዲዲ ዴዒሼ፥ ናጋራንቾታ ጊሾ ኢሲ ቶሆ ናጋራ ኡባስ ሃይቂስ፤ ኢ ባ ኣሳቴꬃን ሃይቂስ፥ ሺን ኣያናን ፓፂስ።
1PE 3:19 ቃሲ ሄ ኣያናን ኢ ቢዲ ቃሾን ዴዒያ ሼምፖታስ ቃላ ኦዲስ።
1PE 3:20 ኖሄይ ማርካቢያ ኬፂያ ዎዴ ሄ ሼምፖቲ ፆሳስ ኪቴቶና ኢፂዶሶና፥ ሺን ፆሳይ ኤንታና ዳንዳዒስ። ሆስፑን ኣሳ ፃላሊ ማርካቢያን ጌሊዲ፥ ꬋዮ ሃꬃፌ ኣቲዶሶና።
1PE 3:21 ሄ ꬋዮ ሃꬃይ ሃዒ ሂንቴና ኣሺያ ፂንቃቴ ሌሚሶ ጊዲስ። ሃ ፂንቃቴይ ቦላ ቂታ ሜጮ ጊዶናሺን ሎዖ ካሃ ፆሳፌ ኤካናው ኢያ ዎሲያ ኦጌ ጊዲዲ፥ ኪሪስቶሳ ዴንዱዋ ባጋራ ሂንቴና ኣሼስ።
1PE 3:22 ኢ ሳሎ ቢዲ ፆሳ ኡሻቻን ኡቲዲ፥ ኪታንቾታ፥ ማታ ኣዋታኔ ዎልቃማታ ሃሬስ።
1PE 4:1 ሄሳ ጊሾ፥ ኪሪስቶሲ ባ ኣሹዋን ኑስ ዋዬቲዳ ጊሾ ሂንቴካ ሄ ቆፋን ሂንቴና ዳንጪሲዲ ሚኒዲ ኤቂቴ። ኪሪስቶሳ ጊሾ ጊዲ ባ ኣሹዋን ዋዬ ኤኪዳ ኡራይ ናጋራ ኦꬂኬ ጊዲ ቃንፂዳ ኣሲ።
1PE 4:2 ሄ ኡራይ ባ ኣቲዳ ላይꬃን ፆሳ ሼኔ ኦꬃናው ኮዬሲፔ ኣቲን ኢታ ኣሾ ኣሞን ዴና።
1PE 4:3 ካሴ ሂንቴ ኣማኖና ኣሳይ ዴዒዳይሳዳ ዴዒዴታ። ሂንቴ ኢታ ኣሞን፥ ላይማቴꬃን፥ ማꬆን፥ ቱናቴꬂ ዴንꬄꬂያ ዬꬃን፥ ፖኪያ ኤቃ ጎይኖን ካሴ ዴዒዳ ዱሳይ ጊዳና።
1PE 4:4 ኣማኖና ኣሳራ ሂንቴ ሾሪ ባይና ኦሱዋ ኦꬆና ጊሾ ማላሌቲዲ ሂንቴና ጫዮሶና።
1PE 4:5 ሺን ኤንቲ ፓፃታ ቦላኔ ሃይቂዳ ኣሳ ቦላ ፒርዳናው ዴዒያ ፆሳስ ዛሮ ኢማና።
1PE 4:6 ሃይቂዳ ኣሳስ ዎንጌላይ ሳባኬቲዳይ ሃይሳ ጊሾሳ። ኤንቲ ኣሳꬆ ባንታ ኣሹዋን ፒርዴታና ቃሲ ባንታ ኣያናን ፆሳꬆ ዴዖን ዳና።
1PE 4:7 ሂዛ፥ ኡባባስ ዉርሴꬃይ ማታቲስ። ሄሳ ጊሾ፥ ዎሳናው ዳንዳዔታና ሜላ ዎፑ ጊዳ ዎዛኒ ዴዖ፤ ማራራ ዴዒቴ።
1PE 4:8 ሲቆይ ዳሮ ናጋራ ካሚያ ጊሾ ኡባፌ ኣꬂዲ ኢሶይ ኢሱዋራ ዎዛናፔ ሲቄቲቴ።
1PE 4:9 ዙዙሞና ኢሶይ ኢሱዋ ኢማꬃቴꬃን ሞኪቴ።
1PE 4:10 ሂንቴ ፆሳፌ ዱማ ዱማ ኣꬎ ኬሃቴꬃ ኢሞታ ኤኪዳይሳዳ ሂንቴ ኢሶይ ኢሶይ ሄ ኢሙዋ ቤሲያዳ ኦይኪዲ ኢሶይ ኢሱዋ ሃጋዚቴ።
1PE 4:11 ዬሱስ ኪሪስቶሳ ባጋራ ኡባባን ፆሳይ ጋላቴታና ሜላ ኦኒካ ኦዲያባ ጊዲኮ ፆሳፌ ቃላ ኤኪዳዳ ኦዶ። ቃሲ ኦኒካ ማዲያባ ጊዲኮ ፆሳይ ኢያው ኢሚያ ዎልቃዳ ማዶ። ቦንቾይኔ ዎልቃይ ሜሪናፔ ሜሪና ጋካናው ኢያው ጊዶ። ኣሚንዒ።
1PE 4:12 ታ ባጋቶ፥ ሂንቴ ታማዳ ፁጊያ ዋዬ ፓጪያ ጊዶራ ኣꬊያ ዎዴ ኦራꬃባይ ሃኒዳዳ ማላሌቶፊቴ።
1PE 4:13 ሺን ኢያ ቦንቾይ ቆንጪያ ዎዴ ሂንቴ ኡፋይሳይ ጊታ ጊዳና ሜላ ኪሪስቶሳ ዋያ ሂንቴ ኤኬይሳን ኡፋይቲቴ።
1PE 4:14 ኪሪስቶሳ ሱንꬃ ጊሾ ኣሲ ሂንቴና ጫያ ዎዴ ፆሳ ቦንቾ ኣያናይ ሂንቴ ቦላ ሼምፒያ ጊሾ ሂንቴ ኣንጄቲዳይሳታ።
1PE 4:15 ሂንቴፌ ዋዬ ኤኪያ ኦኒካ ሼምፖ ዎꬊዳዳ ዎይኮ ካይሶቲዳዳ ዎይኮ ኢታ ኦꬂዳዳ ዎይኮ ጌልሶናባን ጌሊዳዳ ሃኒዲ ዋዬቶፎ።
1PE 4:16 ጊዶሺን፥ ኣማኖ ጊሾ ዋዬቲኮ ኪሪስቶሳ ሱንꬃ ጊሾ ፆሳ ጋላቶፔ ኣቲን ዬላቶፖ።
1PE 4:17 ፒርዲ ፆሳ ኣሳ ቦላ ዶሚያ ዎዴይ ጋኪስ። ሂዛ፥ ሄ ፒርዳይ ኮይሮ ኑ ቦላ ዶሚያባ ጊዲኮ፥ ፆሳ ዎንጌላስ ኪቴቶና ኣሳ ዉርሴꬃይ ኣይ ጊዳኔ?
1PE 4:18 ፂሎይ ኡንዓን ኣቲያባ ጊዲኮ፥ ማካላንቾይኔ ናጋራንቾይ ያቲን ዋናኔ?
1PE 4:19 ሄሳ ጊሾ፥ ፆሳ ሼኔዳ ዋዬ ኤኬይሳቲ ባንታ ሼምፑዋ ሃዳራ ባንታና ሜꬊዳ፥ ኣማንꬂያ ፆሳስ ኢሚሼ ሎዖባ ኦꬆ።
1PE 5:1 ሂዛ፥ ዎሳ ኬꬃ ጪማታራ ጪማ ጊዲዳይሲ፥ ኪሪስቶሳ ዋያ ማርካቴይሲኔ ቆንጫናው ዴዒያ ቦንቹዋ ሻኬታናው ዴዒያ ታኒ፥ ሂንቴ ጊዶን ዴዒያ ጪማታ ዞራይስ።
1PE 5:2 ሂንቴ ኣዋቴꬃፌ ጋርሳን ዴዒያ ፆሳ ዉዲያ ሄሚቴ። ፆሳይ ኮዬይሳዳ ዶሳናፔ ኣቲን ኡንዔቲዲ ሄሞፊቴ። ቃሲ ሚሼ ኮሻን ጊዶናሺን ሃጋዛናው ዴዒያ ሎዖ ቆፋን ሄሚቴ።
1PE 5:3 ሂንቴ ኣዋቴꬃፌ ጋርሳን ዴዒያ ዉዲያስ ሌሚሶ ጊዲቴፔ ኣቲን ጎዳቶፒቴ።
1PE 5:4 ሄሜይሳታ ሃላቃይ ቆንጪያ ዎዴ ቆሌቶና ቦንቾ ካላቻ ሂንቴ ኤካና።
1PE 5:5 ሄሳዳካ፥ ያላጋቶ፥ ጪማታስ ሃሬቲቴ። ሂንቴ ኢሶይ ኢሱዋስ ኣሽኬ ጊዲቴ። ጌሻ ማፃፋን፥ «ፆሳይ ኦቶራንቾታ ኢፄስ፥ ሺን ኣሽኬታስ ኣꬎ ኬሃቴꬃ ኢሜስ» ያጌስ።
1PE 5:6 ፆሳይ ባ ዎዴ ሂንቴና ቦንቻና ሜላ ዎልቃማ ፆሳ ኩሺያፔ ጋርሳን ሂንቴና ካዉሺቴ።
1PE 5:7 ኢ ሂንቴው ቆፒያ ጊሾ ሂንቴና ሂርጊሲያ ኡባ ኢያ ቦላ ዬጊቴ።
1PE 5:8 ሂንቴ ሞርኬይ ፃላሄይ፥ ሚቲያባ ኮዪዲ፥ ጋሞዳ ጉዲሼ ሂንቴ ማታራ ዩያ ጊሾ ሂንቴና ሃሪቴኔ ባርኪቴ።
1PE 5:9 ኣላሜን ዴዒያ ሂንቴ ኢሻቲ ሄሳዳ ዋዬ ኤኬይሳ ኤሪዲ፥ ኣማኖን ሚኒዲ፥ ፃላሂያራ ኤቄቲቴ።
1PE 5:10 ባ ሜሪና ቦንቹዋስ ኪሪስቶስ ዬሱሳ ባጋራ ሂንቴና ፄጊዳ ኣꬎ ኬሃቴꬃ ኡባ ፆሳይ፥ ጉꬃ ዎዴስ ሂንቴ ዋዬቲዳፔ ጉዬ፥ ኢ ባ ሁዔን ሂንቴና ሺሻና፥ ካቲሳና፥ ሚንꬂዲ ኤሳና፥ ፃሊሳና።
1PE 5:11 ሜሪናፔ ሜሪና ጋካናው ፆሳይ ካዎቶ። ኣሚንዒ።
1PE 5:12 ኣማኔቲዳ ኢሻ ጋዳ ታ ኤኪያ ሲላሴ ባጋራ ሃ ዳብዳቢያ ሂንቴው ቃንꬃን ፃፋስ። ታ ሄሳ ሂንቴው ፃፊዳይ፥ ሂንቴና ዞራናዉኔ ፆሳ ኣꬎ ኬሃቴꬃይ ቱማ ጊዴይሳ ማርካታናሳ። ሄ ኣꬎ ኬሃቴꬃን ሚኒዲ ኤቂቴ።
1PE 5:13 ሂንቴራ ኢሲፌ ዶሬቲዳ ባቢሎኔን ዴዒያ ዎሳ ኬꬃ ኣሳይኔ ታ ናዓ ማርቆሲ ሂንቴና፥ «ሳሮ ሳሮ» ያጌስ።
1PE 5:14 ሲቆ ዬሬቴꬃ ዬሬቲሼ፥ ኢሶይ ኢሱዋ ሳሮꬂቴ። ኪሪስቶሳን ዴዒያ ሂንቴ ኡባስ ሳሮይ ጊዶ። ኣሚንዒ።
2PE 1:1 ዬሱስ ኪሪስቶሳ ሃዋሬይኔ ኢያ ኣይሌይ፥ ታኒ፥ ሲሞን ጴፂሮሲ፥ ኑ ፆሳኔ ኑና ኣሺያ ዬሱስ ኪሪስቶሳ ፂሎቴꬃ ባጋራ ኑይሳ ሜላ ኣልዖ ኣማኖ ኤኪዳይሳታስ ሃ ዳብዳቢያ ፃፋስ።
2PE 1:2 ፆሳኔ ኑ ጎዳ ዬሱሳ ኤሮን ኣꬎ ኬሃቴꬃይኔ ሳሮይ ሂንቴው ኩሞ።
2PE 1:3 ባ ቦንቾኒኔ ሎዖቴꬃን ኑና ፄጊዳ ኢያ ኤሮን ዴዖሲኔ ፆሳ ዳኒዲ ዳናው ኮሺያባ ኡባ ፆሳይ ባ ዎልቃን ኑስ ኢሚስ።
2PE 1:4 ሂንቴ ኢታ ኣሞ ጋሶን ሜꬌቲያ ሃ ኣላሚያን ዴዒያ ባሻፌ ኬሲ ኤካናዳኔ ፆሳ ፆሳቴꬃን ሻኬታናዳ፥ ሃ ኢሞታታ ባጋራ ዳሮ ኣልዖኔ ጊታ ኡፋይሳ ኑስ ኢሚስ።
2PE 1:5 ሄሳ ጊሾ፥ ሚኒዲ፥ ሂንቴ ኣማኑዋ ቦላ ሎዖቴꬂ፥ ሎዖቴꬃ ቦላ ኤራቴꬂ፥
2PE 1:6 ኤራቴꬃ ቦላ ባና ሃሮ፥ ባና ሃሮ ቦላ ጌንጫ፥ ጌንጫ ቦላ ፆሳ ዳኖ፥
2PE 1:7 ፆሳ ዳኖ ቦላ ኢሻቴꬃ ኬሃቴꬂ፥ ኢሻቴꬃ ኬሃቴꬃ ቦላ ሲቆ ጉጂቴ።
2PE 1:8 ሃይሳቲ ሂንቴው ዳሪዲ ዴዒያባ ጊዲኮ፥ ጎዳ ዬሱስ ኪሪስቶሳ ኤሮን ማዲያ ኣሲኔ ኣይፌራ ዴዒያ ኣሲ ኦꬃና።
2PE 1:9 ሺን ሄሳቲ ባይና ኦኒካ ማታን ዴዒያባ ፃላላ ቤዒያ ቆቄ። ኢ ባ ካሴ ናጋራፔ ጌዪዳይሳ ዶጊስ።
2PE 1:10 ሄሳ ጊሾ፥ ታ ኢሻቶ፥ ሂንቴ ፄሳኔ ሂንቴ ዶሩዋ ሚንꬃናው ካሴይሳፌ ኣꬂዲ ሚኒቴ። ሂንቴ ሄሳታ ኦꬂያባ ጊዲኮ፥ ꬉቤቴኬታ።
2PE 1:11 ሄሳን ኑ ጎዳኔ ኑና ኣሺያ ዬሱስ ኪሪስቶሳ ሜሪና ካዎቴꬃ ጌሊያ ኩሜꬃ ማታይ ሂንቴው ኢሜታና።
2PE 1:12 ሄሳ ጊሾ፥ ሂንቴ ሃይሳታ ኤሪያባኔ ሄ ኦይኪዳ ቱማን ሚኒዲ ዴዒያባ ጊዲኮካ፥ ታኒ ሃይሳታ ኡባ ዎዴ ሂንቴና ሃሳዪሶ ኣጊኬ።
2PE 1:13 ታኒ ሼምፖራ ዴዒዳ ዎዴ ኡባን ሂንቴና ሃሳዪሳናይሲ ኮሺያባ ጋዳ ቆፓይስ።
2PE 1:14 ኑ ጎዳ ዬሱስ ኪሪስቶሲ ታው ቆንጪሳዳይሳዳ ታኒ ሃ ሃይቂያ ኣሳቴꬃ ጋምዖና ቃራ ዬጋዳ ባናይሳ ኤራይስ።
2PE 1:15 ታኒ ሂንቴፌ ሻኬቲኮካ ሂንቴ ሃይሳታ ኡባ ዎዴ ኣኬካና ሜላ ታው ዳንዳዔቲያባ ኡባ ኦꬃና።
2PE 1:16 ኑኒ ጎዳ ኪሪስቶሳ ዎልቃኔ ኢያ ዩሳባ ሂንቴው ኦዴይ፥ ኢያ ጊታ ቦንቹዋ ቤዒዲፔ ኣቲን ሜꬊ ኬሲዳ ሃይሴ ጊዴና።
2PE 1:17 ዳሮ ዎልቃማ ቦንቹዋፌ፥ «ታኒ ኡፋይቲያ፥ ታ ዶሲያ ናዓይ ሃይሳ» ያጊያ ቃላይ ዪዳ ዎዴ ፆሳ ኣዋፔ ቦንቾኔ ጋላታ ኤኪስ።
2PE 1:18 ኑኒ ጌሻ ዴሪያ ቦላ ኢያራ ዴዒያ ዎዴ ሄ ቃላይ ሳሎፔ ዪሺን ሲዒዳ።
2PE 1:19 ኑስ ሄሳፌ ኣꬊያ ኣማኔቲዳ ቲንቢቴ ቃሊ ዴዔስ። ሳዒ ዎንታና ጋካናዉኔ ባካሊ ሂንቴ ዎዛናን ዶላና ጋካናው፥ ꬉማን ፖዒያ ፖዖ ኣሲ ናጌይሳዳ፥ ሂንቴ ሄ ቃላ ናጊኮ ሎዖ ኦꬄታ።
2PE 1:20 ኡባፌ ካሴቲዲ ሃይሳ ኤሪቴ። ጌሻ ማፃፋን ፃፌቲዳ ቲንቢቴ ቃላ ኦኒካ ባ ዶሲዳዳ ቢርሻናው ዳንዳዔና።
2PE 1:21 ቲንቢቴ ኡባ፥ ፆሳይ ኪቲዳ ኣሳቲ ጌሻ ኣያናይ ካሌꬂን፥ ኦዲዶሶናፔ ኣቲን ኣሳ ሼኔን ኦዲቦኮና።
2PE 2:1 ሺን ዎርዶ ናቤቲ ካሴ ኣሳ ጊዶን ዴዔይሳ ሜላ ሃዒካ ዎርዶ ኣስታማሬቲ ሂንቴ ጊዶን ዴንዳና። ኤንቲ ባንታና ዎዚዳ፥ ጎዳ ካዲዲ፥ ꬋይሲያ ዎርዶ ቲሚርቲያ ኤሃና። ሄሳን ኤንቲ ባንታ ቦላ ኤሌሲዲ ꬋዮ ኤሆሶና።
2PE 2:2 ዳሮ ኣሳይ ዬላያ ኤንታ ኢታ ኦጊያ ካላና፤ ኤንታ ጋሶን ቱማ ኦጌይ ጫዬታና።
2PE 2:3 ዎርዶ ኣስታማሬቲ ሚሼ ያሪዲ ባንታው ሜꬊ ኬሲዳ ሃይሴን ሂንቴና ቦንቃና። ቤኒፔ ዶሚዲ ኤንታ ፒርዳይ ጊጊ ኡቲስ፤ ኤንታ ꬋዮይካ ኤንታና ናጊ ኡቲስ።
2PE 2:4 ናጋራ ኦꬂዳ ኪታንቾታስ ፆሳይ ቃꬌቶና፥ ፒርዳ ጋላስ ጋካናው ጋናሜ ꬉማ ኦላን ኤንታ ቃቺ ዬጊስ።
2PE 2:5 ሄሳዳካ፥ ፆሳይ ፂሎቴꬃባ ኦዲያ ኖሄኔ ሃራ ላፑን ኣሳታ ኣሺዲ፥ ፆሳ ጎይኖና ኣሳይ ዴዒያ ቤኒ ኣላሚያ ቃꬌቶና ꬋዮ ሃꬃን ꬋይሲስ።
2PE 2:6 ጌላታስ ሌሚሶ ጊዳና ሜላ ፆሳይ ሶዶሜኔ ጋሞራ ካታማታ ቢዶ ኦꬂዲ ፁጊዲ ꬋይሲስ።
2PE 2:7 ሂጌስ ኪቴቶና ላይማቲያ ኣሳታ ጊዶን ዋዬቲሼ ዴዒዳ ፂሎ ሎፄ ፆሳይ ኣሺስ።
2PE 2:8 ሄ ፂሎ ኣዴይ ኤንታ ጊዶን ዴዒሼ፥ ኤንቲ ኦꬂያ ኢታ ኦሱዋ ጋላስ ጋላስ ቤዒዳ ዎዴኔ ሲዒዳ ዎዴ ኢያ ሎዖ ዎዛናይ ኡንዔቴስ።
2PE 2:9 ሄሳ ጊዲኮ፥ ጎዳይ፥ ባና ጎይኒያ ኣሳታ ፓጬፔ ዋቲ ኣሻኔኮ፥ ቃሲ ናጋራንቾታ ፒርዳ ጋላሳስ ጋካናው ዋቲዲ ሴሪሼ ናጊሳኔኮ ኤሬስ።
2PE 2:10 ኡባፌ ኣꬂዲ ቱና ኣሞን ኣሾ ቆፋ ካሌይሳታኔ ማታ ኣዋታ ካꬌይሳታ፥ ፒርዳ ጋላስ ጋካናው ጎዳይ ናጊሲስ። ሄ ኣሳቲ ጋንጄ ሚኖኔ ኦቶራንቾ ጊዲያ ጊሾ ሳሎ ሜꬌቴꬃታ ጫዪሼ ያዮኮና።
2PE 2:11 ሺን ኪታንቾቲ ዎርዶ ኣስታማሬታፔ ዎልቃኒኔ ሚኖቴꬃን ዳሮ ኣꬎሶናሺን ጎዳ ሲንꬃን ሳሎ ሜꬌቴꬃታ ጫዮኮና።
2PE 2:12 ሺን ሄ ኣሳቲ ባንታ ኤሮናባን ጌሊዲ ጫዮሶና። ኤንቲ ኦይኬታናውኔ ሃይቃናው ዬሌቲዳ፥ ዎዛኒ ባይና ዶዓ ሜላ ሃኖሶና፤ ኤንቲካ ዎራ ዶዓዳ ጮ ꬋያና።
2PE 2:13 ኤንቲ ጋꬂዳ ሜቱዋዳ ዛሪ ሜቶታና። ሴታ ጋላስ ዬፂሼ ጉፔይሳ ኡፋይሲያባ ጊዲ ቆፖሶና። ኤንቲ ካዉሻታኔ ቱናታ ጊዲ ዴዒሼ ሂንቴራ ሻኬቲያ ሲቆ ኢማቱዋን ኡፋይቶሶና።
2PE 2:14 ላይማቲያ ማጫሲ ፄሊዲ ኣጎና ኣይፌይ ኤንታው ዴዔስ፤ ቃሲ ናጋራ ኦꬄይሳ ኣጎኮና። ኣማኖን ሚኒቦና ኣሳ ጪሞሶና። ኤንታው ኡባ ዎዴ ኣሞቲያ ዎዛኒ ዴዔስ፤ ኤንቲ ቃንጌቲዳይሳታ።
2PE 2:15 ኤንቲ ሱሬ ኦጌ ኣጊዲ፥ ማካላ ሚሼ ሲቂዲ ባሊዳ፥ ቢዖራ ናዓ ባላማ ኦጊያ ካሊዶሶና።
2PE 2:16 ኢ ባ ናጋራ ጋሶን ሃንቄቲስ፤ ዶኒ ባይና ሃሬይ ኣሳዳ ሃሳዪዲ ናቢያ ጎሻቴꬃ ቴቂስ።
2PE 2:17 ሄ ኣሳቲ ሜሊዳ ፑልቶታ ሜላኔ ጫርኮይ ቶኪዲ ኤፊያ ሻራ ሜላ፤ ኤንታ ናጌይ ሳካና ꬉማ።
2PE 2:18 ኤንቲ ሃዳኔ ኦቶሮ ኦዳ ኦዴቲሼ ባላን ዴዒያ ኣሳ ጊዶፌ ኬሲ ኤኪዲ ቡሮ ሚኒቦና ኣሳታ ላይማቴꬃ ኣሾ ኣሞን ጪሚዲ ባሌꬆሶና።
2PE 2:19 ኤንቲ ባንታው ꬋዮ ኣይሌቴꬃን ዴዒሼ ሃራታኮ፥ «ሂንቴ ኣይሌቴꬃፌ ኬያና» ያጎሶና። ኣይስ ጊኮ፥ ኣሲ ባ ፆኔቲዳባ ኡባስ ኣይሌ።
2PE 2:20 ኤንቲ ኣሺያ ኑ ጎዳ ዬሱስ ኪሪስቶሳ ኤሪዲ ሃ ኣላሚያ ቱናቴꬃፌ ኬሲ ኤኪዳፔ ጉዬ፥ ዛሪ ቃፄቲዲ ፆኔቲኮ ካሴ ዴዒያ ዴዑዋፔ ጉዬይሲ ኤንታው ኢታ ጊዳና።
2PE 2:21 ኤንቲ ፂሎቴꬃ ኦጊያ ኤሪ ሲሚዲ ኣጌይሳፌ ኮይሮቲዲ ጌሻ ኪታ ኤሮናኮ ኤንታው ሎዖሺን።
2PE 2:22 «ካኒ ባ ጮሻኮ ጉዬ ሲሜስ» ቃሲ፥ «ሜጬቲዳ ጉዱንꬆይ ጉዬ ሲሚዲ ኡርቃን ጎንዶሬቴስ» ጊያ ሌሚሶይ ቱማ ጊዴይሲ ኤንታ ቦላ ኦꬄስ።
2PE 3:1 ታ ሲቆ ኢሻቶ፥ ሃይሲ ታ ሂንቴው ፃፊዳ ዳብዳቤይ ናምዓንꬆ። ታኒ ሃ ናምዑ ዳብዳቤታካ ሂንቴው ፃፊዳይ፥ ሂንቴ ሱሬ ቆፋ ቆፓናዳ ሂንቴና ዴንꬄꬃናሳ።
2PE 3:2 ቃሲ ጌሻ ናቤቲ ቤኒ ኦዲዳ ቃላኔ ኑና ኣሺያ ጎዳይ፥ ሃዋሬታ ባጋራ ኪቲዳ ኪታ ሂንቴ ሃሳያና ሜላ ኮያይስ።
2PE 3:3 ኡባፌ ካሴቲዲ፥ ዎዴ ዉርሴꬃን ባንታ ኣሙዋ ካሊዲ ኣሴ ቶቼይሳቲ፥ ቶቺሼ ያናይሳ ኤሪቴ።
2PE 3:4 ኤንቲ፥ «ታ ያና ጊዳይሲ ኣዉን ዴዒ? ኑ ኣዋቲ ሃይቂዶሶና፥ ሺን ኡባባይ ሳዓይ ሜꬌቶሳፔ ዶሚዲ ዴዔይሳዳ ዴዔስ» ያጎሶና።
2PE 3:5 ዳሮ ዎዴፔ ካሴ ሳሎይ ፆሳ ቃላን ሜꬌቲዳይሳ፤ ቃሲ ሳዓይ ሃꬃፌኔ ሃꬃን ሜꬌቲዳይሳ ኤሪሼ ካዶሶና።
2PE 3:6 ሄ ዎዴ ዴዒያ ሳዓይ ሃꬃን ሚቴቲዲ ꬋይስ።
2PE 3:7 ሺን ሃዒ ዴዒያ ሳሎይኔ ሳዓይ፥ ጌላቲ ፒርዴቲያ ጋላሳይኔ ꬋያ ጋላሳይ ጋካናው ሄ ቃላን ታማስ ናጌቲዲ ዴዖሶና።
2PE 3:8 ሺን ታ ሲቆ ኢሻቶ፥ ሃ ኢሲባ ዶጎፒቴ። ጎዳ ማታን ኢሲ ጋላሲ ሙኩሉ ላይꬃ ሜላ ጊዴይሳኔ ሙኩሉ ላይꬂ ኢሲ ጋላሳ ሜላ ጊዴይሳ ዶጎፒቴ።
2PE 3:9 ኢሶቲ ኢሶቲ ጋምዒስ ጊዲ ቆፔይሳዳ፥ ጎዳይ ባ ኡፋይሳ ቃላ ጊሾ ጋምዔና። ሺን ኦኒካ ꬋዮና ሜላ ኮዪዲ፥ ኡባይ ባንታ ናጋራፔ ሲማና ሜላ ሂንቴ ጊሾ ጊዲ ጌንጬስ።
2PE 3:10 ሺን ጎዳ ጋላሳይ ካይሶዳ ያና። ሄ ጋላሳን ሳሎቲ ዎልቃማ ጉንꬃን ꬋያና፤ ሳሎ ሜꬌቴꬃቲ ታማን ፁጌታና፤ ሳዓይኔ ኢያ ቦላ ዴዒያ ኡባይ ꬋያና።
2PE 3:11 ሂዛ፥ ኡባባይ ሄሳዳ ሃኒዳ ꬋያባ ጊዲኮ ሂንቴ ኣይ ሜላ ኣሲ ጊዳናው ቤሲ? ሂንቴ ጌሺኔ ፆሳ ዳኒያ ዴዖ ዳናው ቤሴስ።
2PE 3:12 ሂንቴ ሲንꬃራ ያ ፆሳ ጋላሳ ናጊሼ ሂንቴው ዳንዳዔቲያባ ኡባ ኦꬂዲ ሄ ጋላሳ ኤሶዪቴ። ሄ ጋላስ ሳሎቲኔ ኢያን ዴዒያባይ ታማን ፁጌታና፤ ዎልቃማ ሱላን ቲልዓና።
2PE 3:13 ሺን ኑኒ ፂሎቴꬂ ሃሪያ ኦራꬃ ሳሎኔ ኦራꬃ ሳዓ ፆሳ ኡፋይሳ ቃላዳ ናጎስ።
2PE 3:14 ሄሳ ጊሾ፥ ታ ሲቆ ኢሻቶ፥ ኑ ሄ ጋላሳ ናጊያ ጊሾ ፖኮይኔ ቦሬይ ባይናይሳታ ጊዲዲ፥ ጎዳራ ሳሮን ዳናው ሚኒቴ።
2PE 3:15 ኣሲ ኡባይ ኣታና ሜላ ኮዪዲ ጎዳይ ዳንዳዔይሳ ዶጎፒቴ። ቃሲ ኑ ሲቆ ኢሻይ፥ ጳዉሎሲ፥ ፆሳይ ኢያው ኢሚዳ ጪንጫቴꬃን ሄሳዳ ሂንቴው ፃፊስ።
2PE 3:16 ኢ ባ ዳብዳቤታ ኡባን ሄሳታባ ፃፊስ። ኢያ ዳብዳቤታ ጊዶን ኣኬካናው ዋይሲያ ቆፋቲ ዴዖሶና። ታማሪቦናኔ ሚኒቦና ኣሳቲ ሃራ ፆሳ ቃላ ሚርቄይሳዳ ሃ ኪታታካ ꬋያናው ማቺዲ ሚርቆሶና።
2PE 3:17 ሄሳ ጊሾ፥ ታ ሲቆ ኢሻቶ፥ ሂንቴ ሄሳ ኤሪያ ጊሾ ማካላታ ባላን ጪሜቲዲ፥ ꬋዮና ሜላኔ ሚኒዲ ዴዒያ ቤሳፌ ኩንዶና ሜላ ናጌቲቴ።
2PE 3:18 ሺን ሂንቴ ኑና ኣሺያ ኑ ጎዳ፥ ዬሱስ ኪሪስቶሳ ኣꬎ ኬሃቴꬃኒኔ ኤራቴꬃን ዲጪቴ። ኢያው ሃዒካ ሜሪናዉካ ቦንቾይ ጊዶ። ኣሚንዒ።
1JO 1:1 ኑኒ ኮይሮፔ ዶሚዲ ዴዒያ፥ ኑ ሃይꬃን ሲዒዳ፥ ኑ ፄሊዳ፥ ኣይፊያን ቤዒዳ፥ ኑ ኩሺያን ቦቺዳ ዴዖ ቃላባ ሂንቴው ፃፎስ።
1JO 1:2 ሄ ዴዖይ ቆንጪን፥ ኑኒ ኢያ ቤዒዲ፥ ኢያባ ማርካቶስ። ኣዋ ማታን ዴዒያ ኑስ ቆንጪዳ፥ ሜሪና ዴዑዋባ ሂንቴው ኣዋጆስ።
1JO 1:3 ኑራ ሂንቴው ኢሲፌቴꬂ ዳና ሜላ ኑኒ ቤዒዳይሳኔ ሲዒዳይሳ ሂንቴው ኦዶስ። ሂንቴው ኑራ ኢሲፌቴꬂ ዴዒያ ጊሾ ኣዋራኔ ኢያ ናዓ ዬሱስ ኪሪስቶሳራ ኢሲፌቴꬂ ዴዔስ።
1JO 1:4 ኑ ኡፋይሳይ ፖሎ ጊዳና ሜላ ሄሳ ሂንቴው ፃፎስ።
1JO 1:5 ኑኒ ዴዖ ጊዲዳ ኢያፔ ሲዒዲ፥ ሂንቴው ኦዲያ ኪታይ ሃይሳ፡ «ፆሳይ ፖዖ፤ ኢያን ꬉሚ ባዋ» ያጌይሳ።
1JO 1:6 ኑስ ኢያራ ኢሲፌቴꬂ ዴዔስ ያጊሼ ꬉማን ዴዒኮ፥ ኑ ኦዳኒኔ ኑ ኦሱዋን ዎርዶቶስ።
1JO 1:7 ሺን ፖዖን ኢ ዴዔይሳዳ፥ ኑካ ፖዖን ዴዒኮ፥ ኑስ ዎሊ ጊዶን ኢሲፌቴꬂ ዴዔስ። ኢያ ናዓ፥ ዬሱሳ ሱꬃይ ናጋራ ኡባፌ ኑና ጌሼስ።
1JO 1:8 ኑኒ፥ ኑናን ናጋሪ ባዋ ጊኮ ኑ ኑና ጪሞስ፤ ኑናን ቱሚ ባዋ።
1JO 1:9 ሺን ፆሳስ ኑ ናጋራ ፓፂኮ፥ ኢ ኑ ናጋራ ኣቶ ጋናዉኔ ኑ ቆሆ ኦሶ ኡባፌ ኑና ጌሻናው፥ ኣማኔቲዳይሳኔ ቱማ።
1JO 1:10 ኑኒ ናጋራ ኦꬂቦኮ ጊኮ ፆሳ ዎርዳንቾ ኬሶስ፤ ኢያ ቃላይካ ኑናን ዴና።
1JO 2:1 ታ ናይቶ፥ ናጋራ ሂንቴ ኦꬆና ሜላ ታኒ ሃይሳ ሂንቴው ፃፋይስ። ሺን ኦኒካ ናጋራ ኦꬂኮ ኣዋ ማታን ኑስ ጋናቲያ ፂሎይ፥ ዬሱስ ኪሪስቶሲ፥ ዴዔስ።
1JO 2:2 ኑ ናጋራይ ኪሪስቶሳ ባጋራ ኣቶ ጌቴቴስ። ኢ ኑ ናጋራ ፃላላስ ጊዶናሺን ኣሳ ኡባ ናጋራስ ያርሼቲስ።
1JO 2:3 ኑኒ ፆሳ ኪታ ናጊኮ፥ ሲꬌይ ባይናሺን፥ ቱማ ኑ ኢያ ኤሮስ።
1JO 2:4 ኦኒካ፥ «ታኒ ኢያ ኤራይስ» ያጊሼ፥ ኢያ ኪታ ናጎና ኢፂኮ ሄ ኡራይ ዎርዳንቾ፤ ቱማቴꬂ ኢያን ባዋ።
1JO 2:5 ሺን ኢያ ቃላስ ኑ ኪቴቲያባ ጊዲኮ ሄ ኡራይ ፆሳ ሲቂያ ሲቆይ ፖሎ ጊዴስ። ኑኒ ፆሳን ዴዔይሳስ ሄሲ ባው ቱማ ማርካ።
1JO 2:6 ታኒ፥ «ፆሳን ዴዓይስ» ጊያ ኦኒካ ኪሪስቶሲ ዴዒዳይሳዳ ዳናው ቤሴስ።
1JO 2:7 ታ ሲቆ ኢሻቶ፥ ታኒ ሂንቴው ኮይሮፔ ዴዒያ ጋልዓ ኪታ ፃፋይሲፔ ኣቲን ኦራꬃ ኪታ ፃፊኬ። ኢካ ሂንቴ ሲዒዳ ሄ ጋልዓ ኪታ።
1JO 2:8 ጊዲኮካ፥ ኪሪስቶሳኒኔ ሂንቴናን ቱማ ጊዲዲ ዴዒያ፥ ኦራꬃ ኪታ ፃፋይስ። ꬉማይ ኪቺን፥ ሃዒ ቱማ ፖዖይ ፖዔስ።
1JO 2:9 «ፖዖን ዴዓይስ» ጊሼ ባ ኢሻ ኢፂያ ኦኒካ፥ ሃዒካ ꬉማን ዴዔስ።
1JO 2:10 ባ ኢሻ ዶሲያ ኦኒካ ፖዖን ዴዔስ። ሄ ኡራን ሃራ ኣሲ ꬉቢያባይ ባዋ።
1JO 2:11 ሺን ባ ኢሻ ኢፂያ ኦኒካ ꬉማን ዴዔስ፤ ꬉማን ሃሙቴስ። ꬉማይ ኢያ ኣይፊያ ቆቂሲዳ ጊሾ ኣው ቢያኮ ኤሬና።
1JO 2:12 ታ ናይቶ፥ ኪሪስቶሳ ሱንꬃ ባጋራ ሂንቴ ናጋራይ ኣቶ ጌቴቲዳ ጊሾ ታኒ ሂንቴው ፃፋይስ።
1JO 2:13 ኣዋቶ፥ ኮይሮፔ ዴዒያ፥ ኢያ ሂንቴ ኤሪዳ ጊሾ ሂንቴው ፃፋይስ። ያላጋቶ፥ ፃላሂያ ሂንቴ ፆኒዳ ጊሾ ሂንቴው ፃፋይስ።
1JO 2:14 ጉꬃ ናይቶ፥ ፆሳ ሂንቴ ኤሪዳ ጊሾ ሂንቴው ፃፋይስ። ኣዋቶ፥ ኮይሮፔ ዴዒያ ኢያ ሂንቴ ኤሪዳ ጊሾ ሂንቴው ፃፋይስ። ያላጋቶ፥ ሂንቴ ሚኖ ጊዲያ ጊሾ ፆሳ ቃላይ ሂንቴናን ዴዒያ ጊሾኔ ፃላሂያ ሂንቴ ፆኒዳ ጊሾ ሂንቴው ፃፋይስ።
1JO 2:15 ኣላሜ ዎይኮ ኣላሜን ዴዒያባ ዶሶፒቴ። ኣላሚያ ዶሲያ ኦኒካ ፆሳ ዶሴና።
1JO 2:16 ኣላሜን ዴዒያ ኡባባይ፥ ኣሾ ኣሞቴꬂ፥ ኣይፌን ቤዒዲ ኣሞቲያባይኔ ሚሼን ጬቄቴꬂ ኣላሜባፔ ኣቲን ፆሳፌ ጊዴና።
1JO 2:17 ኣላሜይኔ ኣላሜን ኣሲ ኣሞቲያ ኡባይ ኣꬋና፥ ሺን ፆሳ ሼኒያ ፖሊያ ኦኒካ ሜሪናው ዳና።
1JO 2:18 ታ ናይቶ፥ ዎዲያ ዉርሴꬃይ ማታቲስ። ኪሪስቶሳ ሞርኬይ ሲንꬃፌ ያናይሳ ሂንቴ ሲዒዳይሳዳ ሃሪ ኣቶሺን፥ ሃዒካ ኢያ ሞርኬቲ ዳሮቲ ዴንዲዶሶና። ሄሳ ጊሾ፥ ዎዲያ ዉርሴꬃይ ማታቲዳይሳ ኑኒ ሄሳን ኤሮስ።
1JO 2:19 ሄ ሞርኬቲ ኑ ባጋ ጊዶና ጊሾ ኑ ጊዶፌ ኬዪዶሶና። ኤንቲ ኑ ባጋ ጊዲያኮ ኑ ጊዶን ዴዓና፥ ሺን ኤንታፌ ኦኒካ ኑ ባጋ ጊዶናይሲ ኤሬታና ሜላ ኑ ጊዶፌ ኬዪዶሶና።
1JO 2:20 ሺን ኪሪስቶሲ ሂንቴ ቦላ ጌሻ ኣያና ጉሲስ፤ ቃሲ ሂንቴ ኡባይ ቱማ ኤሬታ።
1JO 2:21 ቱማ ሂንቴ ኤሪያ ጊሾኔ ቱማን ኣይቢ ዎርዶይ ባይናይሳ ሂንቴ ኤሪያ ጊሾ ታኒ ሂንቴው ፃፋይሲፔ ኣቲን ቱማ ሂንቴ ኤሮና ጊሾ ጊዴና።
1JO 2:22 ዬሱሲ፥ ፆሳይ ዶሪዳይሳ ጊዴና ጊዲ ካዲያ ኣሳፔ ሃሪ ዎርዳንቾይ ኦኔ? ሄሳ ሜላ ኣሲ ኪሪስቶሳ ሞርኬ። ኢ ናዓ ካዲኮ ኣዋካ ካዴስ።
1JO 2:23 ናዓ ካዲያ ኦዴስካ ኣዋይ ባዋ፤ ቃሲ ናዓስ ማርካቲያ ኦዴስካ ኣዋይ ዴዔስ።
1JO 2:24 ሄሳ ጊሾ፥ ኮይሮ ሂንቴ ሲዒዳ ቃላ ሂንቴ ዎዛናን ሚንꬂዲ ናጊቴ። ኮይሮ ሲዒዳይሳ ሂንቴ ናጊኮ ሂንቴው ናዓራኔ ኣዋራ ኢሲፌቴꬂ ዳና።
1JO 2:25 ናዓይ ኑስ ሜሪና ዴዑዋ ኢማና ጊዲ ቃላ ጌሊስ።
1JO 2:26 ሂንቴና ባሌꬂያ ኣሳ ጊሾ ታኒ ሃይሳ ሂንቴው ፃፋስ።
1JO 2:27 ሺን ኪሪስቶሲ ሂንቴ ቦላ ባ ጌሻ ኣያና ጉሲስ። ጌሻ ኣያናይ ሂንቴናን ዴዒያ ጊሾ ኦኒካ ሂንቴና ታማርሶ ኮሼና። ኢያ ጌሻ ኣያናይ ሂንቴና ቱማ ታማርሴሲፔ ኣቲን ዎርዶ ጊዴና። ጌሻ ኣያናይ ሂንቴና ታማርሲዳይሳዳ ኪሪስቶሳን ዴዒቴ።
1JO 2:28 ሂዛ፥ ታ ናይቶ፥ ኢ ቆንጪያ ዎዴ ኑኒ ያሺ ባይናኔ ኢያ ዩሳ ጋላስ ኢያ ሲንꬃን ኑ ዬላን ቆሴቶና ሜላ ኢያን ዴዒቴ።
1JO 2:29 ኪሪስቶሲ ፂሎ ጊዴይሳ ሂንቴ ኤሪኮ ፂሎ ኦꬂያ ኡባይ ፆሳ ናዓ ጊዴይሳ ኤሪቴ።
1JO 3:1 ኑኒ ፆሳ ናይታ ጌቴቲዲ ፄጌታና ሜላ ፆሳይ ኑና ኣይ ሜላ ዶሲዳኮ ቤዒቴ። ኑኒ ቱማካ ፆሳ ናይታ። ሃ ኣላሜይ ፆሳ ኤሮና ጊሾ ኑናካ ኤሬና።
1JO 3:2 ታ ሲቆ ኢሻቶ፥ ሃዒ ኑኒ ፆሳ ናይታ፤ ኑኒ ኣይ ሃናኔኮ ቡሮ ኤሬቲቤና። ሺን ኪሪስቶሲ ቆንጪያ ዎዴ ኑኒ ኢያ ዳናናይሳ ኤሮስ። ኢ ቱማ ዴዔይሳ ኑኒ ቤዓና።
1JO 3:3 ኪሪስቶሳ ቤዓና ጊዲ ኡፋይሳን ናጊያ ኦኒካ፥ ኪሪስቶሲ ጌሺ ጊዲዳይሳዳ ባና ጌሼስ።
1JO 3:4 ናጋሪ ሂጌ ሜንꬆ ጊዲያ ጊሾ ናጋራ ኦꬂያ ኡባይ ፆሳ ሂጌ ሜንꬄስ።
1JO 3:5 ኪሪስቶሲ ኣሳ ናጋራ ꬋይሳናው ቆንጪዳይሳ ሂንቴ ኤሬታ፤ ኢያን ናጋሪ ባዋ።
1JO 3:6 ኪሪስቶሳን ዴዒያ ኦኒካ ናጋራን ዴና። ቃሲ ናጋራን ዴዒያ ኦኒካ ኢያ ቤዒቤና ዎይኮ ኤሪቤና።
1JO 3:7 ታ ናይቶ፥ ሂንቴና ኦኒካ ባሌꬆፎ። ኪሪስቶሲ ፂሎ ጊዲዳይሳዳ ፂሎ ኦꬂያ ኦኒካ ፂሎ።
1JO 3:8 ፃላሄይ ኮይሮፔ ናጋራ ኦꬂዳ ጊሾ ናጋራ ኡባ ዎዴ ኦꬂያ ኦኒካ ፃላሄ ዳቦ። ሄሳ ጊሾ፥ ፆሳ ናዓይ ፃላሄ ኦሶ ꬋይሳናው ቆንጪስ።
1JO 3:9 ፆሳ ናዓ ጊዲያ ኦኒካ ፆሳ ኣያናይ ኢያን ዴዒያ ጊሾ ኢ ኡባ ዎዴ ናጋራን ዴና። ፆሳይ ኢያ ኣዋ ጊዲያ ጊሾ ናጋራን ዴና።
1JO 3:10 ፆሳ ናይታ ጊዶኒኔ ፃላሄ ናይታ ጊዶን ዴዒያ ዱማቴꬃይ ሄሳን ኤሬቴስ፤ ፂሎ ኦꬆና ኣሲ ዎይኮ ባ ኢሻ ዶሶና ኣሲ ፆሳ ናዓ ጊዴና።
1JO 3:11 ኮይሮፔ ሂንቴ ሲዒዳ ኪታይ፥ «ኢሶይ ኢሱዋ ዶሳናው ቤሴስ» ያጊያ ኪታ።
1JO 3:12 ኑኒ ቃዔላ ሜላ ጊዳናው ቤሴና። ቃዔሊ ፃላሄ ዳቦ ጊዲዲ ባ ኢሻ ዎꬊስ። ኢ ባ ኢሻ ኣይስ ዎꬊዴ? ኢያ ኦሶይ ኢታ ጊዲዳ ጊሾኔ ኢያ ኢሻ ኦሶይ ሎዖ ጊዲዳ ጊሾ ዎꬊስ።
1JO 3:13 ታ ኢሻቶ፥ ሃ ኣላሚያ ኣሳይ ሂንቴና ኢፂኮ ማላሌቶፊቴ።
1JO 3:14 ኑኒ ኑ ኢሻታ ሲቂያ ጊሾ ሃይቆፔ ዴዖ ፒኒዳይሳ ኤሮስ። ባ ኢሻ ዶሶና ኦኒካ ሃይቆ ኩያን ዴዔስ።
1JO 3:15 ባ ኢሻ ኢፂያ ኦኒካ ሼምፖ ዎꬌስ። ቃሲ ሼምፖ ዎꬊያ ኦዴስካ ሜሪና ዴዖይ ባይናይሳ ሂንቴ ኤሬታ።
1JO 3:16 ኪሪስቶሲ ባ ሼምፑዋ ኑ ጊሾ ኣꬂ ኢሚዳይሳን ሲቆይ ኣይቤኮ ኑኒ ኤሪዳ። ኑካ ኑ ኢሻታ ጊሾ ኑ ሼምፑዋ ኣꬂዲ ኢማናው ቤሴስ።
1JO 3:17 ሺን ዱሬ ጊዲዳ ኦኒካ ሜቶታንቹዋ ቤዒሼ፥ ኢያው ቃꬌቶና ኢፂኮ ባ ዎዛናን ፆሳ ሲቆይ ዴዔስ ጋናው ዋኒዲ ዳንዳዒ?
1JO 3:18 ታ ናይቶ፥ ኑኒ ኦሶኒኔ ቱማቴꬃን ኑ ሲቁዋ ቆንጪሳናው ቤሴስፔ ኣቲን ጮ ኦዳ ፃላላን ዎይኮ ዶና ፃላላን ሲቄታናው ቤሴና።
1JO 3:19 ኑኒ ኢሶይ ኢሱዋ ሲቂኮ፥ ኑ ቱማ ባጋ ጊዴይሳ ኤሮስ፤ ሄሳስ ፆሳ ሲንꬃን ዬላቶኮ።
1JO 3:20 ኑ ዎዛናይ ኑ ቦላ ፒርዲያባ ጊዲኮ፥ ፆሳይ ኑ ዎዛናፔ ጊታ ጊዴይሳ ኤሮስ፤ ኢ ኡባባ ኤሬስ።
1JO 3:21 ታ ሲቆ ኢሻቶ፥ ኑ ዎዛናይ ኑ ቦላ ፒርዶናባ ጊዲኮ ኑኒ ፆሳ ሲንꬃን ያዮኮ።
1JO 3:22 ኑኒ ኢያ ኪታ ናጊያ ጊሾኔ ኢያ ኡፋይሲያባ ኦꬂያ ጊሾ ዎሲያ ኡባ ኢያፔ ኤኮስ።
1JO 3:23 ኪሪስቶሲ ኑና ኪቲዳይሳዳ ፆሳ ናዓ ዬሱስ ኪሪስቶሳ ሱንꬃን ኣማናናዳኔ ኢሶይ ኢሱዋ ሲቃናዳ ፆሳይ ኑና ኪቲስ።
1JO 3:24 ፆሳ ኪታ ናጊያ ኦኒካ ፆሳን ዴዔስ፤ ፆሳይካ ኢያን ዴዔስ። ፆሳይ ኑስ ኢሚዳ ጌሻ ኣያና ባጋራ ኢ ኑናን ዴዔይሳ ኤሮስ።
1JO 4:1 ታ ሲቆ ኢሻቶ፥ ኣያናታ ኡባ ኣማኖፒቴ፥ ሺን ኤንቲ ፆሳፌ ዪዳኮ ፓጪ ቤዒቴ። ኣይስ ጊኮ፥ ዳሮ ዎርዶ ናቤቲ ኣላሜን ዴንዲዶሶና።
1JO 4:2 ፆሳ ኣያና ጊዴይሳ ሂንቴ ሃይሳን ኤራና፤ «ዬሱስ ኪሪስቶሲ ኣሴ ጊዲዲ ዪዳይሳ ማርካታይስ» ጊያ ኣያና ኡባይ ፆሳፌ ዬስ።
1JO 4:3 ኪሪስቶሲ ኣሴ ጊዲዲ ዪዳይሳ ኣማናይስ ጎና ኣያና ኡባይ ፆሳፌ ጊዴና። ሄሲ ኪሪስቶሳ ኢፂያ ኣያና። ሂንቴ ሄ ኣያናይ ያናይሳ ካሴ ሲዒዴታ፤ ኢ ሃሪ ኣቶሺን ሃዒካ ኣላሜን ዴዔስ።
1JO 4:4 ታ ናይቶ፥ ሂንቴ ፆሳሳ። ሂንቴ ጊዶን ዴዒያ ጌሻ ኣያናይ ኣላሜን ዴዒያ ኣያናፔ ዳሮ ዎልቃማ ጊዲያ ጊሾ ዎርዳንቾ ናቤታ ሂንቴ ፆኒዴታ።
1JO 4:5 ኤንቲ ሃ ኣላሚያ ኣሴ ጊዲያ ጊሾ ሃ ኣላሚያባ ኦዶሶና፤ ሃ ኣላሚያ ኣሳይ ኤንታ ኦዳ ሲዖሶና።
1JO 4:6 ኑኒ ፆሳፌ ዬሌቲዳ፤ ፆሳ ኤሪያ ኦኒካ ኑና ሲዔስ። ፆሳ ኤሮና ኦኒካ ኑና ሲዔና። ኑኒ ቱማ ኣያናኔ ዎርዶ ኣያና ሄሳን ሻኮስ።
1JO 4:7 ታ ሲቆ ኢሻቶ፥ ሲቆይ ፆሳፌ ያ ጊሾ ኣኔ ኢሶይ ኢሱዋራ ሲቄቶስ። ሲቂያ ኦኒካ ፆሳ ናዓ፤ ኢ ፆሳ ኤሬስ።
1JO 4:8 ፆሳይ ሲቆ ጊዲያ ጊሾ ሲቆና ኦኒካ ፆሳ ኤሬና።
1JO 4:9 ኑኒ ኪሪስቶሳ ባጋራ ዴዑዋ ዴማና ሜላ ፆሳይ ባ ኢሲ ናዓ ሃ ኣላሚያ ኪቲስ። ፆሳይ ኑና ባ ሲቁዋ ሄሳን ቤሲስ።
1JO 4:10 ቱማ ሲቆ ጉሳይ ሃይሳ፡ ኑኒ ፆሳ ሲቂዳ ጊሾ ጊዶናሺን ፆሳይ ኑና ሲቂዳ ጊሾኔ ኑ ናጋራፔ ኑና ማራናው ባ ናዓ ኪቲዳ ጊሾሳ።
1JO 4:11 ታ ሲቆ ኢሻቶ፥ ፆሳይ ኑና ሃይሳዳ ሲቂኮ፥ ኑካ ኢሶይ ኢሱዋ ሲቃናው ቤሴስ።
1JO 4:12 ፆሳ ቤዒዳይ ኦኒካ ባዋ። ኑኒ ኢሶይ ኢሱዋ ሲቂኮ ፆሳይ ኑናን ዴዔስ፤ ኢያ ሲቆይካ ኑናን ፖሎ ጊዴስ።
1JO 4:13 ፆሳይ ባ ጌሻ ኣያና ኑስ ኢሚዳ ጊሾ ኑኒ ፆሳን ዴዔይሳኔ ኢካ ኑናን ዴዔይሳ ኤሮስ።
1JO 4:14 ኣዋይ ባ ናዓ፥ ሃ ኣላሚያ ኣሼይሳ ጊዳና ሜላ ኪቲዳይሳ ኑኒ ቤዒዲ ማርካቶስ።
1JO 4:15 ዬሱሲ ፆሳ ናዓ ጊዴይሳ ማርካቲያ ኦዴንካ ፆሳይ ዴዔስ፤ ኢካ ፆሳን ዴዔስ።
1JO 4:16 ፆሳይ ኑና ሲቄይሳ ኑኒ ኤሮሲኔ ኣማኖስ። ፆሳይ ሲቆ። ሲቆን ዴዒያ ኦኒካ ፆሳን ዴዔስ፤ ፆሳይካ ኢያን ዴዔስ።
1JO 4:17 ኑ ዴዖይ ሃ ኣላሚያን ኪሪስቶሲ ዴዒዳይሳ ሜላ ጊዲያ ጊሾ ፒርዳ ጋላስ ያዮና ኢያ ሲንꬄ ሺቃናው ኢያ ሲቆይ ኑናን ፖሎ ጊዴስ።
1JO 4:18 ሲቆን ያሺ ባዋ፥ ቱማ ሲቆይ ያሺ ኬሲ ሆሌስ። ያሺኔ ፒርዲ ኢሲፌ ቢያ ጊሾ ያያ ኡራ ሲቆይ ፖሎ ጊዴና።
1JO 4:19 ፆሳይ ኮይሮ ኑና ሲቂዳ ጊሾ ኑ ሲቆስ።
1JO 4:20 ኦኒካ፥ «ፆሳ ሲቃይስ» ጊሼ ባ ኢሻ ኢፂኮ፥ ኢ ዎርዳንቾ። ኣይስ ጊኮ፥ ቤዒያ ባ ኢሻ ሲቆና ኦኒካ ቤዒቦና ፆሳ ሲቃናው ዋኒዲ ዳንዳዒ?
1JO 4:21 ኪሪስቶሲ ኑስ ኢሚዳ ኪታይ ሃይሳ፤ «ፆሳ ሲቂያ ኦኒካ ባ ኢሻ ሲቃናው ቤሴስ» ያጌይሳ።
1JO 5:1 ዬሱሳ፥ ኢ ኪሪስቶሳ ያጊዲ፥ ኣማኒያ ኦኒካ ፆሳ ናዓ። ኣዋ ሲቂያ ኦኒካ ኢያ ናዓካ ሲቄስ።
1JO 5:2 ኑኒ ፆሳ ሲቂያ ጊሾኔ ኢያ ኪታ ናጊያ ጊሾ ፆሳ ናይታ ሲቄይሳ ኤሮስ።
1JO 5:3 ኑኒ ፆሳ ሲቂኮ፥ ኢያ ኪታታ ናጎስ። ኢያ ኪታቲ ዴፆ ጊዶኮና።
1JO 5:4 ኣይስ ጊኮ፥ ፆሳ ናዓ ጊዲያ ኦኒካ ሃ ኣላሚያ ፆናናው ዳንዳዔስ። ኑኒ ሃ ኣላሚያ ፆናናይ ኑ ኣማኑዋና።
1JO 5:5 ኣላሚያ ፆናናው ዳንዳዔይ ኦኔ? ዬሱሲ ፆሳ ናዓ ጊዴይሳ ኣማኒያ ኣሳ ፃላሊ ፆናና።
1JO 5:6 ዬሱስ ኪሪስቶሲ ሃꬃ ፂንቃቲያራኔ ባ ሃይቁኣዋ ሱꬃራ ዪስ። ኢ፥ ሃꬃራኔ ሱꬃራ ዪሲፔ ኣቲን ሃꬃ ፃላላራ ዪቤና። ጌሻ ኣያናይ ቱማ ጊዲያ ጊሾ ሄሲ ቱማ ጊዴይሳ ማርካቴስ።
1JO 5:7 ሄꬑ ማርካቲ ዴዖሶና።
1JO 5:8 ሄሳቲ፥ ጌሻ ኣያና፥ ሃꬃኔ ሱꬃ። ሃ ሄꬓታ ማርካቴꬃይ ኢሲኖ።
1JO 5:9 ኑ ኣሲ ማርካቴይሳ ኣማኖስ። ሺን ፆሳ ማርካቴꬃይ ኣሳይሳፌ ዳሮ ኣꬌስ። ፆሳይ ባ ናዓስ ማርካቲዳ ማርካቴꬃይ ሃይሳ።
1JO 5:10 ፆሳ ናዓ ኣማኒያ ኡራ ዎዛናን ሃ ማርካቴꬃይ ዴዔስ። ፆሳ ኣማኖና ኦኒካ ፆሳይ ባ ናዓስ ማርካቲዳ ማርካቴꬃ ኣማኒቦና ጊሾ ፆሳ ዎርዳንቾ ኦꬄስ።
1JO 5:11 ሂዛ፥ ማርካቴꬃይ ሃይሳ፤ ፆሳይ ኑስ ሜሪና ዴዖ ኢሚስ፤ ሄ ዴዖይካ ኢያ ናዓን ዴዔስ ያጌይሳ።
1JO 5:12 ፆሳ ናዓይ ዴዒያ ኦዴስካ ዴዖይ ዴዔስ። ፆሳ ናዓይ ባይና ኦዴስካ ዴዖይ ባዋ።
1JO 5:13 ፆሳ ናዓን ኣማኒያ ሂንቴው ሜሪና ዴዖይ ዴዔይሳ ሂንቴ ኤራና ሜላ ሃይሳ ሂንቴው ፃፋስ።
1JO 5:14 ፆሳ ሼኒያዳ ኣይቢባካ ኢያ ዎሲኮ፥ ኢ ሲዔይሳ ኑኒ ኤሪያ ጊሾ ኢያን ኣማኔቶስ።
1JO 5:15 ኑኒ ዎሲያ ኡባ ኢ ሲዔይሳ ኤሪኮ፥ ኑኒ ዎሲያባ ኢ ኢማናይሳ ኤሮስ።
1JO 5:16 ኦኒካ ባ ኢሻይ ሃይቆ ቤሶና ናጋራ ኦꬂሺን ቤዒኮ፥ ፆሳ ኢያው ዎሳናው ቤሴስ። ሃይቆ ቤሶና ናጋራ ኦꬂዳይሳታስ ፆሳይ ዴዖ ኢማና። ሃይቆ ቤሲያ ናጋሪ ዴዔስ። ታኒ ሂንቴና ሄሳስ ፆሳ ዎሲቴ ጊኬ።
1JO 5:17 ኢታ ኦሶ ኡባይ ናጋራ፥ ሺን ሃይቆ ቤሶና ናጋሪ ዴዔስ።
1JO 5:18 ፆሳ ናዓይ ኢያ ናጊያ ጊሾ ፆሳ ናዓ ጊዲዳ ኦኒካ ናጋራን ኡባ ዎዴ ዴዖናይሳ ኑኒ ኤሮስ። ፃላሄይ ኢያ ቆሃናው ዳንዳዔና።
1JO 5:19 ኑኒ ፆሳሳ ጊዴይሳኔ ሃ ኩሜꬃ ኣላሜይ ፃላሄን ሃሬቴይሳ ኤሮስ።
1JO 5:20 ኑኒ ቱማ ፆሳ ኤራናዳ ፆሳ ናዓይ ዪዳይሳኔ ኑስ ኣኬካ ኢሚዳይሳ ኤሮስ። ኑኒ ኢያ ናዓ፥ ዬሱስ ኪሪስቶሳ ባጋራ ቱማ ፆሳን ዴዖስ። ዬሱሲ ቱማ ፆሳኔ ሜሪና ዴዑዋ።
1JO 5:21 ታ ናይቶ፥ ኤቃታፔ ሂንቴ ሃኪቴ።
2JO 1:1 ታ ጪማይ ዶሬቲዳ ጎዳቴሲኔ ኢ ናይታስ ኪቲዳ ኪታ። ታ ፃላላ ጊዶናሺን ቱማ ኤሪያ ኡባይ ሂንቴና ዶሶሶና።
2JO 1:2 ሃ ቱማይ ኑናን ዴዒያ ጊሾኔ ሜሪናው ኑራ ዳና ጊሾ ታኒ ሂንቴና ቱማ ዶሳይስ።
2JO 1:3 ፆሳ ኑ ኣዋኔ ኢያ ናዓ ዬሱስ ኪሪስቶሳ ኣꬎ ኬሃቴꬃይ፥ ማሮቴꬃይኔ ሳሮቴꬃይ ቱማኒኔ ሲቆን ኢሲፌ ኑራ ጊዶ።
2JO 1:4 ኣዋይ ኑና ኪቲዳይሳዳ፥ ኔ ናይታፔ ባጋቲ፥ ቱማስ ኪቴቴይሳ ቤዓዳ ታኒ ዳሮ ኡፋይታስ።
2JO 1:5 ጎዳቴ፥ ሃዒካ ኑኒ ኡባይ ኢሶይ ኢሱዋ ሲቃና ሜላ ታኒ ኔና ዎሳይስ። ሃ ኪታይ ኮይሮፔ ኑራ ዴዒያ ኪታፔ ኣቲን ታኒ ኔው ኦራꬃ ኪታ ፃፊኬ።
2JO 1:6 ቱማ ሲቆይ ኑኒ ፆሳ ኪታ ናጊዲ ዳናይሳ። ቃሲ ኮይሮፔ ሂንቴ ሲዒዳይሳዳ ኢያ ኪታይ፥ ሂንቴ ኡባይ ሲቆን ዳና ሜላሳ።
2JO 1:7 ዬሱስ ኪሪስቶሲ ኣሴ ጊዲዲ ዪዳይሳ ኣማኖና፥ ዳሮ ባሌꬂያ ኣሳቲ፥ ኣላሜን ዴንዲዶሶና። ሄሳ ሜላ ኣሲ ኦኒካ ባሌꬄይሳኔ ኪሪስቶሳ ሞርኬ።
2JO 1:8 ሂንቴ ኦꬂዳ ኩሜꬃ ዎይቱዋ ኤካናው ሚኒቴ። ሂንቴ ኦꬂዳይሲ ꬋዮና ሜላ ናጌቲቴ።
2JO 1:9 ኪሪስቶሳ ቲሚርቲያን ዶናይሳሲኔ ኢያፔ ሃኪያ ኡራስ ፆሳይ ባዋ። ኪሪስቶሳ ቲሚርቲያን ዴዒያ ኡራስ ኣዋይኔ ናዓይ ዴዖሶና።
2JO 1:10 ኦኒካ ሂንቴኮ ዪሼ ሃ ቲሚርቲያ ኤሆና ኢፂኮ፥ ሂንቴ ሶ ጌልሶፊቴ፤ ሳሮካ ጎፒቴ።
2JO 1:11 ኢያ ሳሮ ጊያ ኦኒካ ኢያ ኢታ ኦሱዋን ኢያራ ሻኬቴስ።
2JO 1:12 ታኒ ሂንቴው ፃፋናው ኮዪዳ ዳሮባይ ዴዔስ፥ ሺን ዎርቃቴኒኔ ቃላሜን ፃፋናው ኮዪኬ። ኑ ኡፋይሳይ ፖሌታና ሜላ ሂንቴራ ሶምዖን ጋሄታዳ ኦዴታናው ሂንቴኮ ባና ጋዳ ቆፓይስ።
2JO 1:13 ፆሳይ ዶሪዳ ኔ ሚቼ ናይቲ ኔና ሳሮ ያጎሶና።
3JO 1:1 ታኒ ጪማይ፥ ቱማ ዶሲያ ጋዮሳስ ኪቲዳ ኪታ።
3JO 1:2 ታ ሲቁዋው፥ ኔኒ ኔ ሼምፑዋን ሎዖ ዴዔይሳ ታ ኤሬይሳዳ ኔው ፓያቴꬂ ዳና ሜላኔ ኔ ኦꬂያባይ ሱራና ሜላ ኔው ፆሳ ዎሳይስ።
3JO 1:3 ጉꬃ ኣማኒያ ኣሳቲ ዪዲ፥ ኡባ ዎዴ ኔኒ ቱማን ዴዔይሳኔ ኔ ቱማቴꬃባ ማርካቲዳ ዎዴ ታኒ ዳሮ ኡፋይታስ።
3JO 1:4 ታ ናይቲ ቱማቴꬃን ዴዔይሳ ሲዔይሳፌ ኣꬊዲ፥ ታና ኡፋይሲያባይ ባዋ።
3JO 1:5 ታ ሲቁዋው፥ ኤንቲ ኔው ኢማꬄ ጊዲኮካ፥ ኔኒ ኣማኒያ ኣሳታስ ኣማንꬂያ ኦሶ ኦꬃሳ።
3JO 1:6 ኤንቲ ኔ ሲቁዋባ ዎሳ ኬꬃን ማርካቶሶና። ሃዒካ ኤንቲ ቢያ ኦጊያን ፆሳይ ዶሴይሳዳ ኦꬃዳ ኤንታ ማዲኮ ሎዖ ኦꬃሳ።
3JO 1:7 ኤንቲ ኪሪስቶሳ ሱንꬃ ጊሾ ኬዪሼ፥ ኣማኖና ኣሳታፔ ኣይኮካ ኤኪቦኮና።
3JO 1:8 ኑኒ ቱማ ኦሱዋ ኤንታራ ኢሲፌ ኦꬃናው ሃይሳ ሜላ ኣሳታ ማዳናው ቤሴስ።
3JO 1:9 ታኒ ዎሳ ኬꬃታስ ዳብዳቤ ፃፋስ፥ ሺን ኤንታ ሃላቃ ጊዳናው ኮያ ዲዮቲራፊሲ ኑኒ ጌይሳ ኤኬና።
3JO 1:10 ሄሳ ጊሾ፥ ታኒ ያ ቢያ ዎዴ ኢ ኑ ቦላ ኦዴቲያ ኢታ ኦዳኔ ኢ ኦꬂዳ ኦሱዋ ኦዳና። ኢ ሄሲ ጉፂስ ጊዲ፥ ኑ ኢሻቲ ያ ዎዴ ሞኬና። ሃሪ ኣቶሺን፥ ኤንታ ሞካናው ኮዬይሳታካ ዲጊዲ ዎሳ ኬꬃፌ ኬሴስ።
3JO 1:11 ታ ሲቁዋው፥ ሎዖባ ዳናፔ ኣቲን ኢታባ ዳኖፓ። ሎዖባ ኦꬂያ ኦኒካ ፆሳ ኣሲ፥ ሺን ኢታባ ኦꬂያ ኦኒካ ፆሳ ቤዒቤና።
3JO 1:12 ዲሜፂሮሲ ሎዖ ኣሲ ጊዴይሳ ኣሳ ኡባይ ማርካቴስ። ቱማይ ባ ሁዔን ኢያባ ማርካቴስ፤ ኑካ ኢያባ ማርካቶስ፤ ኑ ማርካቴꬃይ ቱማ ጊዴይሳ ሂንቴ ኤሬታ።
3JO 1:13 ታኒ ኔው ፃፋናው ኮዪዳ ዳሮባይ ዴዔስ፥ ሺን ቃላሜኒኔ ዎርቃቴን ፃፋናው ኮዪኬ።
3JO 1:14 ሺን ታኒ ማታራ ኔራ ጋሄታናው ቆፓይስ፤ ሄ ዎዴ ኑኒ ኦዴታና።
3JO 1:15 ሳሮይ ኔው ጊዶ። ኔ ዳቦቲ ኔና ሳሮ ያጎሶና። ኑ ዳቦታ ኡባ ኤንታ ሱንꬃ ሱንꬃ ፄጋዳ ታና «ሳሮ ጊስ» ያጋ።
JUD 1:1 ታኒ ዪሁዲ፥ ዬሱስ ኪሪስቶሳ ኣይሌይ፥ ያይቆባ ኢሻይ፤ ፆሳይ ፄጊዳይሳታስ፥ ፆሳ ኣዋይ ዶሴይሳታሲኔ ዬሱስ ኪሪስቶሳን ናጌቲዳይሳታስ ሃ ዳብዳቢያ ፃፋይስ።
JUD 1:2 ማሮቴꬂ፥ ሳሮቴꬂኔ ሲቆይ ሂንቴው ኩሞ።
JUD 1:3 ታ ሲቆ ኢሻቶ፥ ኑኒ ኢሲፌ ሻኬቲያ ኣቶቴꬃባ ሂንቴው ፃፋናው ታኒ ዳሮ ኣሞታስ። ሺን ኣማኒያ ኣሳስ ኢሲ ቶሆኔ ዉርሴꬂ ጋካናው ኢሜቲዳ ኣማኑዋስ ኦሌታና ሜላ ሂንቴና ዞራሼ ፃፋናይሲ ታው ኮሺያባ ጊዲስ።
JUD 1:4 ኤንታ ፒርዳይ ቤኒፔ ፃፌቲዲ ኡቲዳ፥ ኢሲ ኢሲ ኣሳቲ ኦኒካ ኤሮና ሂንቴ ጊዶ ጌሊዶሶና። ኤንቲ ፆሳ ኤሮናይሳታ፥ ኤንቲ ኑ ፆሳ ኣꬎ ኬሃቴꬃ ላይማታናው ጎዔቲያ ኦጌ ኦꬂዲ ኤኮሶና። ባ ፃላላ ካዎ ጊዲዳ፥ ኑ ጎዳ ዬሱስ ኪሪስቶሳ ካዶሶና።
JUD 1:5 ሺን ሂንቴ ሃ ኡባ ኤሪያባ ጊዲኮካ፥ ጎዳይ ኢስራዔሌ ኣሳ ጊብፄ ቢታፌ ዋቲ ኬሲዳኮ፥ ቃሲ ጉዬፔ ኣማኖናይሳታ ꬋይሲዳይሳ ታ ሂንቴና ኣኬኪሳናው ኮያይስ።
JUD 1:6 ባንታ ዴዒያሱዋ ኣጊዲ፥ ባንታው ኢሜቲዳ ማታ ናጊቦና ኪታንቾታ፥ ጊታ ፒርዳ ጋላሳይ ጋካናው ፆሳይ ኤንታ ꬉማፔ ጋርሳን ሜሪና ሳንꬃላታን ቃቺ ዎꬂስ።
JUD 1:7 ሄሳዳ፥ ሶዶሜኔ ጋሞራ ኣሳይኔ ኤንታ ማታን ዴዒያ ካታማታን ዴዒያ ኣሳይ ላይማቲዶሶና፤ ላይማቴꬃራ ጋሄቲያ ቱናቴꬃ ኦꬂዶሶና። ኤንቲ ሜሪና ታማን ዋዬታናይሳታስ ሌሚሶ ጊዲዶሶና።
JUD 1:8 ሄሳዳካ፥ ሃ ኣሙሃንቾቲ ባንታ ኣሳቴꬃ ቱኒሶሶና፤ ማታ ኣዋታ ካꬎሶና፤ ሳሎ ሜꬌቴꬃታ ጫዮሶና።
JUD 1:9 ሺን ኪታንቾታ ሃላቃይ ሚካዔሌይ ሙሴ ኣሃስ ፃላሄራ ፓላሚዳ ዎዴ «ጎዳይ ኔና ሴሮ» ያጊሲፔ ኣቲን ኢያ ቦላ ጫሻ ቃላ ኦዲዲ ሞታናው ኮዪቤና።
JUD 1:10 ሺን ሃ ኣሳቲ ባንታው ኤሮናባ ኡባ ጫዮሶና፤ ቃሲ ኤንቲ ዎዛኒ ባይና ሜሄዳ ሜꬎን ኤሪያ ኤራይ፥ ኢ ኤንታና ꬋይሳና።
JUD 1:11 ኤንታና ኣዬ! ኤንቲ ቃዔላ ኦጊያን ቢዶሶና። ሚሼ ኮዪዲ ባላማ ባላን ኩንዲዶሶና። ቆሬይ ፆሳ ቦላ ዴንዲዳይሳዳ ኤንቲ ፆሳ ቦላ ዴንዲዲ ꬋዪዶሶና።
JUD 1:12 ሃ ኣሳቲ፥ ሂንቴ ሲቆ ጊቢራ ሚያ ቤሳን ሂንቴራ ኡቲያ ዎዴ ዬሊ ባይና ካዉሻታ። ኤንቲ ባንታና ፃላላ ሄሜይሳታ። ኤንቲ ጫርኮይ ኤፊያ ኢሪ ባይና ሻራ ሜላ። ቃሲ ኣይፌ ዎዴን ኣይፌ ኣይፎና፥ ፃጶራ ሾዴቲድ፥ ናምዑ ቶሆ ሜሊዳ ሚꬃ ሜላ።
JUD 1:13 ኤንቲ ሃንቄቲዳ ኣባ ዙሊያ ሜላ ባንታ ፖኩዋ ጎፖንቴይሳታ። ኤንቲ ሜሪናው ሳካና ꬉማይ ናጊያ ቶይላቲያ ፆሊንቶታ።
JUD 1:14 ኣዳሜፔ ዶሚዲ፥ ላፑንꬃ ዬሌታ ጊዲዳ ሄኖኬይ፥ ሃ ኣሳታባ ቲንቢቴ ኦዲሼ፥ «ሄኮ፥ ጎዳይ፥ ባ ዳሮ ሙኩሉ ጌሻታራ ያና።
JUD 1:15 ኣሳ ኡባ ፒርዳና፤ ጌላታ ኡባ ኤንቲ ኦꬂዳ ኢታ ኦሶ ኡባ ጊሾኔ ማካላቴꬃን ኤንቲ ፆሳ ቦላ ኦዴቲዳ ኢታ ኦዳ ኡባ ጊሾ ፒርዳና» ያጊስ።
JUD 1:16 ሄ ኣሳቲ ኡባ ዎዴ ዙዙሜይሳታኔ ኦዳ ኮዬይሳታ። ቃሲ ባንታ ኢታ ኣሙዋ ካሎሶና፤ ባንታናን ጬቆሶናኔ ባንታና ጎዒያባ ዴማናው ሃራታ ሳቦሶና።
JUD 1:17 ሺን ታ ኢሻቶ፥ ኑ ጎዳ ዬሱስ ኪሪስቶሳ ሃዋሬቲ ካሴ ሂንቴው ኦዲዳ ቃላ ኣኬኪቴ።
JUD 1:18 ኤንቲ፥ «ዉርሴꬃ ዎዲያን፥ ባንታ ኣሙዋ ካሊዲ ቶቼይሳቲ ያና» ያጊዶሶና።
JUD 1:19 ሄ ኣሳቲ ኣሳ ጊዶን ሻሆቴꬂ ሜꬌይሳታ፥ ባንታ ኣሾ ኣሙዋስ ሃሬቴይሳታኔ ጌሻ ኣያናይ ባይናይሳታ።
JUD 1:20 ሺን ታ ኢሻቶ፥ ጌሺ ጊዲዳ ሂንቴ ኣማኑዋን ሂንቴና ዲቻናው ሚኒቴ፤ ቃሲ ጌሻ ኣያና ዎልቃን ዎሲቴ።
JUD 1:21 ሂንቴና ሜሪና ዴዑዋኮ ጋꬂያ ኑ ጎዳ ዬሱስ ኪሪስቶሳ ማሮቴꬃ ናጊሼ ሂንቴና ፆሳ ሲቁዋን ናጊቴ።
JUD 1:22 ሲꬌይ ዴዒያ ኣሳስ ቃꬌቲቴ።
JUD 1:23 ኢሲ ኢሲ ኣሳታ ታማፔ ኬሲ ኤኪቴ። ቃሲ ኢታ ኣሞን ቱኒዳ ኤንታ ማዑዋ ኢፂሼ ሃራታስ ያሻን ቃꬌቲቴ።
JUD 1:24 ሂንቴ ኩንዶና ሜላ ናጋናው ቦሬይ ባይናይሳታኔ ጊታ ኡፋይሳን ኩሚዳይሳታ ኦꬂዲ ባ ቦንቹዋ ሲንꬃን ሂንቴና ሺሻናው ዳንዳዒያ፥
JUD 1:25 ኑና ኣሺያ ኢሲ ፆሳስ፥ ኑ ጎዳ ዬሱስ ኪሪስቶሳ ባጋራ ቦንቾይ፥ ጊታቴꬂ፥ ዎልቂኔ ማቲ፥ ካሴካ፥ ሃዒካ፥ ሜሪናዉካ ኢያው ጊዶ። ኣሚንዒ።
REV 1:1 ኤሶን ሃናናው ዴዒያባ ባ ኣይሌታ ቤሳና ሜላ ፆሳይ ኢያው ኢሚዳ ዬሱስ ኪሪስቶሳ ቆንጬꬃይ ሃይሳ። ዬሱሲ ባ ኪታንቹዋ ኪቲዲ፥ ባ ኣይሊያ ዮሃኒሳስ ቆንጪሲስ።
REV 1:2 ዮሃኒሲ ፆሳ ኪታ፥ ዬሱስ ኪሪስቶሲ ኦꬂዳባኔ ኦዲዳባ ኡባ ማርካቲስ።
REV 1:3 ሃ ኡባይ ሃናናው ዎዴይ ማቲዳ ጊሾ ሃ ቲንቢቴ ቃላ ናባቢያ ኦኒካ ኣንጄቲዳይሳ፤ ቃሲ ሃ ቃላ ሲዔይሳቲኔ ፃፌቲዳ ኪታ ናጊያ ኡባይ ኣንጄቲዳይሳታ።
REV 1:4 ሃ ዳብዳቤይ፥ ዮሃኒሳፔ፥ ኢሲያ ቢታን ዴዒያ ላፑን ዎሳ ኬꬃታስ ፃፌቲስ። ካሴካ፥ ሃዒካ ዴዒያ፥ ሲንꬃፌካ ያናው ዴዒያ ፆሳፌ፥ ቃሲ ኢያ ኣራታ ሲንꬃን ዴዒያ ላፑን ኣያናታፔ፥ ሄሳዳካ፥ ሃይቆፔ ዴንዶን ኮይሮ ጊዲዳይሳፌ፥ ሳዓ ካዎታ ሃሪያ ኣማኔቲያ ማርካ ጊዲዳ ዬሱስ ኪሪስቶሳፔ፥ ኣꬎ ኬሃቴꬃይኔ ሳሮቴꬃይ ሂንቴው ጊዶ። ዬሱሲ ኑና ሲቄስ፥ ቃሲ ባ ሱꬃን ናጋራ ኣይሌቴꬃፌ ኑና ላዓ ኬሲስ።
REV 1:6 ኑኒ ፆሳ ኢያ ኣዋስ ኦꬃና ሜላ ኑና ካዎቴꬃ ካሂኔ ኦꬂስ። ኢያው ሜሪናፔ ሜሪና ጋካናው ቦንቾይኔ ዎልቃይ ጊዶ። ኣሚንዒ።
REV 1:7 ሄኮ፥ ዬሱሲ ሻራራ ዬስ። ኣሳ ኡባይ ሃሪ ኣቶሺን፥ ኢያ ጫዲዳ ኣሳይካ ኢያ ቤዓና። ሳዓን ዴዒያ ኣሳ ኡባይ ኢያ ጊሾ ዬካና። ሄሲ ቱማ ሃናና! ኣሚንዒ።
REV 1:8 «ካሴካ፥ ሃዒካ ዴዔይሲ፥ ሲንꬃፌካ ያና ጎዳይ፥ ኡባፌ ዎልቃማ ፆሳይ፥ ኣልፋኔ ኦሜጊ ታና» ያጌስ ጎዳ ፆሳይ።
REV 1:9 ታኒ፥ ዮሃኒሲ፥ ሂንቴ ኢሻይ፥ ሂንቴራ ኢሲፌ ዬሱሳን ዋያ፥ ኢያ ካዎቴꬃኔ ኢያ ዳንዳዓ ቤዓስ። ታኒ ፆሳ ቃላ ጊሾኔ ዬሱሳባ ማርካቲዳ ጊሾ ፓፂሞ ጊያ ሃꬃን ቴቄቲዳ ቢታን ዴዓይስ።
REV 1:10 ጎዳ ጋላሳን ታ ጌሻ ኣያናን ሃሬታዳ ዴዓይስ፤ ታፔ ጉዬራ ሞይዜ ፑኖ ሜላ ጊታ ጊርሲ ሲዓስ።
REV 1:11 ሄ ጊርሳይ ታና፥ «ኔ ቤዔይሳ ማፃፋን ፃፋዳ፥ ኢሲያን ዴዒያ ላፑን ዎሳ ኬꬃታስ፥ ኤፌሶና፥ ሳሚርኔሳ፥ ጴርጋሞና፥ ቲያቲሮና፥ ሳርዴሳ፥ ፊላዴልፊያኔ ሎዶቂያ ዬዳ» ያጊስ።
REV 1:12 ታኒ ታው ኦዲያ ጊርሳ ቤዓናው ጉዬ ሲማዳ ፆምፔ ዎꬂያ ላፑን ዎርቃ ኮጫታ ቤዓስ።
REV 1:13 ሄ ኮጫታ ጊዶን ኣሳ ናዓ ዳኔይሳ ቤዓስ። ኢ ኣዱሳ ኣፊላ ባ ቶሁዋ ጋꬂ ማዒስ፥ ዎርቃ ዳንጮን ባ ቲራ ዳንጪስ።
REV 1:14 ኢያ ሁዔይኔ ኢያ ቢናናይ ቦꬃ ዶርሳ ኢኪሴ ሜላ ዎይኮ ሻቻ ሜላ ቦꬂ፤ ኢያ ኣይፌይ ታማ ላጮ ዳኔስ።
REV 1:15 ኢያ ቶሆይ ታማን ሴሪዲ ዞዒዳ ናሴ ቢራታ ዳኔስ፤ ኢያ ጊርሳይካ ጊታ ሻፋ ኮሺንቻ ሜላ።
REV 1:16 ኢ ባ ኡሻቻ ኩሼን ላፑን ፆሊንቶታ ኦይኪስ። ኢያ ዶናፔ ናምዑ ባጋራ ቃራቲዳ ማሺ ኬዬስ። ኢያ ሶምዖይ ሴታ ጋላሳ ኣዋ ኣይፌ ዳኔስ።
REV 1:17 ታኒ ኢያ ቤዒዳ ዎዴ ሃይቂዳ ኣሳዳ ሃናዳ ኢያ ቶሁዋ ማታን ኩንዳስ። ኢ ባ ኡሻቻ ኩሺያ ታ ቦላ ዎꬂዲ፥ «ያዮፋ፤ ኮይሮይ ዉርሴꬃይ ታና።
REV 1:18 ታኒ ዴዖን ዴዓይስ፤ ታኒ ሃይቃስ፥ ሺን ሄኮ ሜሪ ሜሪናዉካ ዴዖን ዴዓይስ። ሃይቆኔ ሲዖሌ ቁልፔይ ታ ኩሼና።
REV 1:19 ሂዛ፥ ሃዒ ሃኒያባኔ ሲንꬃፌ ሃናናባ ኔ ቤዒዳባ ፃፋ።
REV 1:20 ኔኒ ታ ኡሻቻ ኩሼን ቤዒዳ ላፑን ፆሊንቶታኔ ላፑን ዎርቃ ኮጫታ ቢርሼꬃይ ሃይሳ፡ ላፑን ፆሊንቶቲ ላፑን ዎሳ ኬꬃታ ኪታንቾታ፤ ላፑን ዎርቃ ኮጫቲ ላፑን ዎሳ ኬꬃታ።»
REV 2:1 «ኤፌሶና ዎሳ ኬꬃ ኪታንቹዋስ ሃይሳዳ ያጋዳ ፃፋ። ባ ኡሻቻ ኩሼን ላፑን ፆሊንቶታ ኦይኪዳይሲኔ ላፑን ዎርቃ ኮጫታ ጊዶራ ሃሙቴይሲ ሃይሳዳ ያጌስ፡
REV 2:2 ታኒ ኔ ኦሱዋ፥ ኔ ዳቡራኔ ኔ ጌንጫ ኤራይስ። ኔኒ ኢታ ኣሳታባ ጌንጫናው ዳንዳዓቦናይሳ ኤራይስ። ቃሲ ሃዋሬ ጊዶናሺን ባንታና፥ ሃዋሬ ጌይሳታ ፒልጋ ኤራዳ ኤንቲ ዎርዳንቾ ጊዴይሳ ዴሚዳይሳ ታ ኤራይስ።
REV 2:3 ኔኒ ጌንጫዳሳ፤ ታ ሱንꬃ ጊሾ ሜቶ ዳንዳዓዳሳ፤ ፆኔታባካ።
REV 2:4 ጊዶሺን፥ ሃዒ ታ ኔና ቦሪያባይ ዴዔስ፤ ሄሲካ ኔኒ ካሴ ኔ ሲቁዋ ኣጋዳሳ።
REV 2:5 ሂዛ፥ ኔ ኣይ ሜላ ꬎቃ ቤሳፌ ኩንዲዳኮ ኣኬካ! ኔ ናጋራፔ ሲማ፤ ኔኒ ካሴ ኦꬂያ ኦሱዋ ኦꬃ። ኔኒ ኔ ናጋራፔ ሲሞና ኢፂኮ፥ ኔ ፆምፔ ዎꬂያ ኮጫ ኢያ ቤሳፌ ኤካና።
REV 2:6 ሃዒ ታ ኔና ናሺያ ኢሲባይ ዴዔስ፤ ታ ኢፂያ ኒቆላዌታ ኦሱዋ ኔካ ኢፃዳሳ።
REV 2:7 ጌሻ ኣያናይ ዎሳ ኬꬃታስ ጊያባ ሲዓናው ሃይꬂ ዴዒያ ኦኒካ ሲዖ። ፆኒያ ኦኒካ ፆሳ ጋናቲያን ዴዒያ ዴዖ ሚꬄ ኣይፌፔ ማና ሜላ ማታ ኢማና።
REV 2:8 «ሳሚርኔሳ ዎሳ ኬꬃ ኪታንቹዋስ ሃይሳዳ ያጋዳ ፃፋ። ኮይሮይኔ ዉርሴꬃይ፥ ሃይቂዳይሲኔ ሃይቆፔ ዴንዲዳይሲ ሃይሳዳ ያጌስ፡
REV 2:9 ታኒ ኔ ዋያኔ ኔ ማንቆቴꬃ ኤራይስ፤ ጊዶሺን ኔኒ ዱሬ። ኣይሁዴ ጊዶናሺን ባንታና ኣይሁዴ ጌይሳቲ ጫያ ጫሻ ታ ኤራይስ፥ ሺን ኤንቲ ፃላሄ ማባራን ዴዖሶና።
REV 2:10 ኔኒ ኤካናው ዴዒያ ዋያ ባቦፋ። ፃላሄይ ሂንቴፌ ኢሶታ ኢሶታ ፓጫናው ቃሾ ኬꬃን ዬጋና፤ ታሙ ጋላስ ጋካናው ሂንቴ ዋዬታና። ሃይቃና ጋካናው ኣማኔቲዳይሳ ጊዳ፤ ታ ኔው ዴዖ ካላቻ ኢማና።
REV 2:11 ጌሻ ኣያናይ ዎሳ ኬꬃታስ ጊያባ ሲዓናው ሃይꬂ ዴዒያ ኦኒካ ሲዖ። ፆኒያ ኦኒካ ናምዓንꬆ ሃይቁዋን ቆሄቴና።
REV 2:12 «ጴርጋሞና ዎሳ ኬꬃ ኪታንቹዋስ ሃይሳዳ ያጋዳ ፃፋ። ናምዑ ባጋራ ቃራቲዳ ማሺ ዴዔይሲ ሃይሳዳ ያጌስ፡
REV 2:13 ታኒ ኔ ዴዒያ ቤሳ ኤራይስ፤ ኔኒ ፃላሄ ኣራታይ ዴዒያ ቤሳን ዴዓሳ፤ ታ ሱንꬃ ሚንꬃ ናጋዳሳ። ሃሪ ኣቶሺን፥ ፃላሄይ ዴዒያ ሂንቴ ካታማን ሃይቂዳ ታው ኣማኔቲዳ ማርካይ፥ ኣንቲጳሲ፥ ዴዒያ ዎዴካ ኣማኑዋ ኣጋባካ።
REV 2:14 ጊዶሺን፥ ታ ኔና ቦሪያ ጉꬃባቲ ዴዖሶና። ሄሲካ ኢስራዔሌ ኣሳይ ኤቃስ ያርሼቲዳ ካꬃ ሚዲ ቱናና ሜላኔ ላይማቴꬃ ናጋራ ኦꬃና ሜላ ባላቃ ታማርሲዳ ባላማ ቲሚርቲያ ኤኪዳ ኢሲ ኢሲ ኣሳቲ ኔራ ዴዖሶና።
REV 2:15 ሄሳዳካ፥ ኒቆላዌታ ቲሚርቲያ ታማሪያ ኣሳቲ ኔራ ዴዖሶና።
REV 2:16 ሄሳ ጊሾ፥ ኔኒ ኔ ናጋራፔ ሲማ። ሄሲ ሃኖና ኢፂኮ፥ ታ ኔኮ ኤሌሳ ያዳ ሄ ኣሳታ ታ ዶናፔ ኬያ ማሻን ኦላና።
REV 2:17 ጌሻ ኣያናይ ዎሳ ኬꬃታስ ጊያባ ሲዓናው ሃይꬂ ዴዒያ ኦኒካ ሲዖ። ፆኒያ ኦዴስካ ቆሴቲዲ ዴዒያ ማናፌ ኢማና። ቃሲ ኤኪያ ኡራፔ ኣቲን ሃራ ኣሲ ኤሮና ኦራꬃ ሱንꬃይ ፃፌቲዳ ቦꬃ ሹቻ ታ ኢያው ኢማና።
REV 2:18 «ቲያቲሮና ዎሳ ኬꬃ ኪታንቹዋስ ሃይሳዳ ያጋዳ ፃፋ። ታማ ላጮ ዳኒያ ኣይፌይ ዴዔይሲ፥ ቃሲ ታማን ሴሪዳ ናሴ ቢራታ ዳኒያ ቶሆይ ዴዔይሲ፥ ፆሳ ናዓይ፥ ሃይሳዳ ያጌስ፡
REV 2:19 ታኒ ኔ ኦሱዋ፥ ኔ ሲቁዋ፥ ኔ ኣማኑዋ፥ ኔ ኦሱዋኔ ኔ ጌንጫ ኤራይስ። ኔኒ ኮይሮ ኦꬄይሳፌ ሃዒ ኣꬃዳ ኦꬄይሳካ ኤራይስ።
REV 2:20 ጊዶሺን፥ ታ ኔና ቦሪያ ኢሲባይ ዴዔስ፤ ባና ናቤ ጊያ ማጫሲው፥ ኤልዛቤሎ፥ ኣይኮካ ጋባካ። ሄ ማጫሲያ ኤቃስ ያርሼቲዳ ካꬃ ሚዲ ቱናናዳኔ ላይማታናዳ ኦꬃዳ ታ ኣይሌታ ባሌꬃሱ።
REV 2:21 ኢያ ባ ናጋራፔ ሲማና ሜላ ታ ኢው ዎዴ ኢማስ፥ ሺን ኢያ ሲማናው ኮያቡኩ።
REV 2:22 ኤንቲ ኢ ባላ ኦጊያፔ ሲሞና ኢፂኮ፥ ታ ኢዮ ኢታ ሃርጌን ዬጋና፤ ኢራ ላይማቴይሳቲካ ኢታ ዋዬ ዋዬታና።
REV 2:23 ታኒ ኢ ናይታ ዎꬋና፤ ቃሲ ዎሳ ኬꬃ ኡባይ ታ ኣሳ ቆፋኔ ኣሳ ዎዛና ኤሬይሳ ጊዴይሳ ኤራና። ታ ኢሱዋስ ኢሱዋስ ሂንቴ ኦሱዋዳ ኦሱዋዳ ኢማና።
REV 2:24 ሺን ቲያቲሮናን ዴዒያ ሃራታ፥ ሄ ኢታ ቲሚርቲያ ኤኪቦናይሳታኔ፥ «ፃላሄ ጊታ ፁራ» ጌቴቲያ ሃ ቲሚርቲያ ታማሪቦና ሂንቴና ሃራ ዴፆ ቶሆ ቶሲኬ።
REV 2:25 ጊዶሺን፥ ታ ያና ጋካናው ሂንቴው ዴዒያባ ሚንꬂ ናጊቴ።
REV 2:26 ፆኔይሳሲኔ ዉርሴꬂ ጋካናው ታው ኪቴቲያ ኦዴስካ ካዎቴꬃታ ሃራና ሜላ ማታ ኢማና።
REV 2:27 ‹ኢ ኤንታ ቢራታ ፃምዓን ሃራና፤ ሜቃ ሚሼዳካ ሜንꬄሬꬃና።› ሄ ማታይ ታኒ ታ ኣዋፔ ኤኪዳ ማታ ሜላ።
REV 2:28 ቃሲ ታ ኢያው ባካላ ፆሊንቶ ኢማና።
REV 2:29 ጌሻ ኣያናይ ዎሳ ኬꬃታስ ጊያባ ሲዒያ ሃይꬂ ዴዒያ ኦኒካ ሲዖ።
REV 3:1 «ሳርዴሳ ዎሳ ኬꬃ ኪታንቹዋስ ሃይሳዳ ያጋዳ ፃፋ። ላፑን ፆሳ ኣያናታኔ ላፑን ፆሊንቶታ ኦይኪዳይሲ ሃይሳዳ ያጌስ፡ ታኒ ኔ ኦሱዋ ኤራይስ፤ ኣሲ ኔና ፓፃ ዴዔስ ጊኮካ፥ ኔ ሃይቃዳሳ።
REV 3:2 ባርካ! ጉꬃ ኣቲዳባኔ ሃይቃናው ማቲዳባ ሚንꬃ። ኔ ኦሶይ ፆሳ ሲንꬃን ፖሎ ጊዶናይሳ ዴማስ።
REV 3:3 ሂዛ፥ ኔ ኤኪዳባኔ ሲዒዳባ ኣኬካ፤ ናጋ፤ ኔ ናጋራፔ ሲማ። ኔኒ ባርኮና ኢፂኮ ታ ካይሶዳ ያና፤ ታ ኣይ ዎዴ ያኔኮ ኔ ኤራካ።
REV 3:4 ሺን ባንታ ማዑዋ ቂታዮና ጉꬃ ኣሳቲ ሳርዴሳን ዴዖሶና። ኤንታው ቤሲያባ ጊዲያ ጊሾ ቦꬃ ማዖ ማዒዲ ታራ ሃሙታና።
REV 3:5 ፆኒያ ኦኒካ ኤንታይሳዳ ቦꬃ ማዖ ማዓና። ታኒ ኢያ ሱንꬃ ዴዖ ማፃፋፔ ቁቺኬ። ታኒ ታ ኣዋ ሲንꬃኒኔ ኢያ ኪታንቾታ ሲንꬃን ኢ ታባ ጊዴይሳ ማርካታና።
REV 3:6 ጌሻ ኣያናይ ዎሳ ኬꬃታስ ጊያባ ሲዒያ ሃይꬂ ዴዒያ ኦኒካ ሲዖ።
REV 3:7 «ፊላዴልፊያ ዎሳ ኬꬃ ኪታንቹዋስ ሃይሳዳ ያጋዳ ፃፋ። ጌሻይኔ ቱማንቾይ፥ ዳዊቴ ቁልፒያ ባ ኩሼን ኦይኪዳይሲ፥ ሃይሳዳ ያጌስ፡ ኢ ጎርዲን ኦኒካ ዶያናው ዳንዳዔና፤ ቃሲ ኢ ዶዪን ኦኒካ ጎርዳናው ዳንዳዔና።
REV 3:8 ታኒ ኔ ኦሱዋ ኤራስ፤ ሄኮ ታ ኔ ሲንꬃን ኦኒካ ጎርዳናው ዳንዳዖና ዶያ ፔንጌ ዎꬃስ። ኔ ዎልቃይ ጉꬃ ጊዲኮካ፥ ታ ቃላ ናጋዳሳ፤ ታና ካዳባካ።
REV 3:9 ኣይሁዴ ጊዶናሺን ባንታና ኣይሁዴ ጊያ ዎርዶታኔ ፃላሄ ባጋታ ኔኮ ኤሃናኔ ኔ ሲንꬃን ጉልባቲሳና። ታ ኔና ዶሴይሳ ኤንታና ኤሪሳና።
REV 3:10 ኔኒ፥ ‹ጌንጫ› ጋዳ ታ ኪቲዳ ኪታ ናጊዳ ጊሾ ኩሜꬃ ኣላሚያ ፓጫናው ያ ዋዬ ዎዲያፔ ታኒ ኔና ናጋና።
REV 3:11 ታኒ ኤሌሳዳ ያና፤ ኦኒካ ኔ ካላቻ ኤኮና ሜላ ኔው ዴዒያባ ሚንꬃዳ ኦይካ።
REV 3:12 ፆኒዳይሳ ታ ፆሳ ኬꬃን ቱሱ ኦꬃና፤ ኢ ያን ሜሪናው ዳና። ታኒ ታ ፆሳ ሱንꬃኔ ታ ፆሳ ካታማ ሱንꬃ ኢያ ቦላ ፃፋና፤ ኢያካ ታ ፆሳ ማታፔ ዎꬊያ ኦራꬃ ዬሩሳላሜ። ቃሲ ታ ታ ኦራꬃ ሱንꬃካ ኢ ቦላ ፃፋና።
REV 3:13 ጌሻ ኣያናይ ዎሳ ኬꬃታስ ጊያባ ሲዒያ ሃይꬂ ዴዒያ ኦኒካ ሲዖ።
REV 3:14 «ሎዶቂያ ዎሳ ኬꬃ ኪታንቹዋስ ሃይሳዳ ያጋዳ ፃፋ። ‹ኣሚንዒ› ጊዲዳ ኣማኔቲዳ ቱማ ማርካይ፥ ፆሳ ሜꬌቴꬃ ሃሬይሲ ሃይሳዳ ያጌስ፡
REV 3:15 ታኒ ኔ ኦሱዋ ኡባ ኤራይስ፤ ኔኒ ኢርፃ ዎይኮ ሚሻ ጊዳካ፤ ኔኒ ናምዓፌ ኢሱዋ ጊዲኮ ሎዖ!
REV 3:16 ኔኒ ኢርፃ ዎይኮ ሚሻ ጊዶናሺን ቦልዖ ጊዲያ ጊሾ ታ ኔና ታ ዶናፔ ጩታና ሃናይስ።
REV 3:17 ሂዛ፥ ኔኒ፥ ‹ታኒ ዱሬ፥ ሻሎራ ዴዓይስ፥ ታው ኣይቢባይካ ፓጪቤና› ያጋሳ። ሺን ኔኒ ሜቶታንቾ፥ ማንቆ፥ ቆቄኔ ካሎቲዳ ኣሲ ጊዴይሳ ኤራካ።
REV 3:18 ሄሳ ጊሾ፥ ኔ ዱሬታናው ታማን ጌዪዳ ዎርቃ፥ ኔ ዬላ ካሉዋ ካማናው ቦꬃ ማዖኔ ሎይꬃ ፄላናው ማዲያ ኣይፌ ꬋሌ ታፔ ሻማና ሜላ ኔና ዞራይስ።
REV 3:19 ታ ዶሴይሳ ሴራይሲኔ ሃንቃይስ፤ ሂዛ ሚና፤ ኔ ናጋራፔ ሲማ።
REV 3:20 ሄኮ፥ ታ ካሬን ኤቃዳ ፄጋይስ። ኦኒካ ታ ፄሳ ሲዒዲ፥ ዉላ ዶዪኮ፥ ኢያኮ ጌላና፤ ኢያራ ኢሲፌ ካꬂ ማና፤ ኢካ ታራ ኢሲፌ ማና።
REV 3:21 ታ ፆናዳ ታ ኣዋራ ኢያ ኣራታን ኡቲዳይሳዳ ፆኒዳይ ታራ ታ ኣራታን ኡታና ሜላ ማታ ኢማና።
REV 3:22 ጌሻ ኣያናይ ዎሳ ኬꬃታስ ጊያባ ሲዒያ ሃይꬂ ዴዔይ ኦኒካ ሲዖ» ያጊስ።
REV 4:1 ሄሳፌ ጉዬ፥ ታኒ ሳሎ ፄሊያ ዎዴ ዶዬቲዳ ፔንጌ ቤዓስ። ቃሲ ታ ካሴ ሲዒዳ ሞይዜ ጊርሳ ሜላይ ታኮ፥ «ሃ ኬያ፤ ሃይሳፌ ጉዬ፥ ሃናናው ዴዒያባ ታ ኔና ቤሳና» ያጊስ።
REV 4:2 ሄ ዎዴ ታ ኣያናን ሃሬታዳ ዴዓይስ። ሄኮ፥ ሳሉዋን ኣራታ ቦላ ኢሶይ ኡቲዳይሳ ቤዓስ።
REV 4:3 ሄ ኡቲዳይሳ ማላይ ኢያስጴዴኔ ሳርዲዮና ጊያ ኣልዖ ሹቻ ሜላ። ኢያ ኣራታ ዩሹዋን ኣልዖ ሹቺ ዳኒያ ዙላይ ዴዔስ።
REV 4:4 ሄ ኣራታ ዩሹዋን ላታማኔ ኦይዱ ኣራታቲ ዴዖሶና፤ ኤንታ ቦላ ቦꬃ ማዖ ማዒዲ፥ ሁዔን ዎርቃ ካላቻ ዎꬂዳ ላታማኔ ኦይዱ ጪማቲ ኡቲዶሶና።
REV 4:5 ኣራታፔ ዎልዓንꬂ፥ ጉንꬂኔ ዴሾይ ኬዬስ። ኣራታ ሲንꬃን ላፑን ፖዒያ ፆምፔቲ ዴዖሶና፤ ኤንቲ ላፑን ፆሳ ኣያናታ።
REV 4:6 ኣራታ ሲንꬃን ቢሪሌ ዳኒያ ጶሊያ ቡርጩኮ ኣባይ ዴዔስ። ሲንꬃራኔ ጉዬራ ኣይፌይ ዴዒያ ኦይዱ ዴዖራ ዴዒያ ሜꬌቴꬃቲ ኣራታ ዩሹዋኒኔ ኣራታ ጊዶን ዴዖሶና።
REV 4:7 ኮይሮ ሜꬌቴꬃ ሜꬎይ ጋሞ ዳኔስ፤ ናምዓንꬆይ ቦሪ ዳኔስ፤ ሄꬓንꬆይ ኣሴ ዳኔስ፤ ቃሲ ኦይዳንꬆይ ፒራꬊያ ኣርጋንꬂ ዳኔስ።
REV 4:8 ኦይዱ ሜꬌቴꬃታ ኡባስ ኡሱፑን ቄፌይ ዴዔስ፤ ኤንታ ኣሳቴꬃ ኡባይ ኣይፌን ኩሚስ። ኤንቲ ቃማኔ ጋላስ ቃንፆና፥ «ጌሻው፥ ጌሻው፥ ጌሻው፥ ጎዳው፥ ኡባፌ ዎልቃማ ፆሳው፥ ካሴካ፥ ሃዒካ ዴዔይሶ፥ ሲንꬃፌ ያናይሶ» ያጎሶና።
REV 4:9 ሄ ሜꬌቴꬃቲ ኣራታን ኡቲዳይሳሲኔ ሜሪናው ዴዔይሳስ ሳባ፥ ቦንቾኔ ጋላታ ኢሚዳ ዎዴ
REV 4:10 ላታማኔ ኦይዱ ጪማቲ ኣራታን ኡቲዳይሳኔ ሜሪናው ዴዔይሳ ሲንꬃን ጉፋኒዲ ጎይኒዶሶና፤ ባንታ ካላቻ ኣራታ ሲንꬃን ዎꬂዲ፥
REV 4:11 «ኑ ጎዳው፥ ኑ ፆሳው፥ ኔኒ ቦንቾ፥ ሳባኔ ዎልቃ ኤካናው ቤሳሳ። ኔኒ ኡባ ሜꬋዳሳ፤ ኡባባይ ኔ ሼኒያዳ ሃኒስ፥ ሜꬌቲስ» ያጊዶሶና።
REV 5:1 ሄሳፌ ጉዬ፥ ኣራታ ቦላ ኡቲዳይሳ ኡሻቻ ኩሼን ጊዶራኔ ካሬራ ፃፌቲዳ ላፑን ማታሜን ጎርዴቲዳ ፃꬃ ማፃፋ ቤዓስ።
REV 5:2 ኢሲ ሚኖ ኪታንቾይ ባ ቃላ ꬎቁ ኦꬂዲ፥ «ማታሚያ ቢላናዉኔ ማፃፋ ዶያናው ቤሴይ ኦኔ?» ያጊዲ ኣዋጂሺን ቤዓስ።
REV 5:3 ሺን ሳሎን ጊዲን ሳዓን ዎይኮ ሳዓፔ ጋርሳን ጊዲን ሄ ፃꬃ ማፃፋ ቢላናዉኔ ጊዱዋ ቤዓናው ዳንዳዔይ ኦኒካ ቤንቲቤና።
REV 5:4 ፃꬃ ማፃፋ ቢላናዉኔ ኢያ ጊዱዋ ቤዓናው ቤሲያ ኣሲ ꬋዪዳ ጊሾ ታ ዳሮ ዬካስ።
REV 5:5 ያቲን፥ ጪማታፔ ኢሶይ ታኮ፥ «ዬኮፋ! ሄኮ፥ ዪሁዳ ዜሬꬂ ጊዲያ ጋሞይ፥ ዳዊቴ ሼሻይ፥ ላፑን ማታሜታ ቢላናዉኔ ማፃፋ ዶያናው ዳንዳዒስ» ያጊስ።
REV 5:6 ሄሳፌ ጉዬ፥ ሹኬቲዳ ዶርሳይ ኣራታስ፥ ኦይዱ ዴዖን ዴዒያ ሜꬌቴꬃታሲኔ ጪማታስ ጊዶን፥ ኤቂዳይሳ ቤዓስ። ኢያው ላፑን ካጬቲኔ ላፑን ኣይፌቲ ዴዖሶና። ሄሳቲ ሳዓ ኡባ ኪቴቲዳ ፆሳ ላፑን ኣያናታ።
REV 5:7 ሄ ዶርሳይ ቢዲ፥ ኣራታ ቦላ ኡቲዳይሳ ኡሻቻ ኩሼፔ ፃꬃ ማፃፋ ኤኪስ።
REV 5:8 ኢ ሄ ፃꬃ ማፃፋ ኤኪዳ ዎዴ ዴዖን ዴዒያ ኦይዱ ሜꬌቴꬃቲኔ ላታማኔ ኦይዱ ጪማቲ ዶርሳ ሲንꬃን ኩንዲዶሶና። ኤንቲ ኢሶይ ኢሶይ ዲꬂኔ ጌሻታ ዎሳ ጊዲዳ ኢፃኔይ ኩሚዳ ዎርቃ ሻቴ ኦይኪዶሶና።
REV 5:9 ኤንቲ፥ «ፃꬃ ማፃፋ ኤካናው፥ ማታሚያ ቢላናው ኔው ቤሴስ። ኣይስ ጊኮ፥ ኔኒ ሹኬታዳሳ፤ ዜሬꬂ ኡባፌ፥ ዱማ ዱማ ዶናፔ፥ ያራታፔኔ ካዎቴꬃታ ኡባፌ ኔ ሱꬃን ፆሳስ ዎዛዳሳ።
REV 5:10 ኤንቲ ኢያ ፆሳ ኣዋስ ኦꬃና ሜላ ኤንታና ካሂኔ ካዎቴꬂ ኦꬃዳሳ። ኤንቲካ ቢታ ኡባ ሃራና» ያጊዲ ኦራꬃ ማዝሙሬ ዬፂዶሶና።
REV 5:11 ታ ቤዒያ ዎዴ ሙኩሉ ቶሆ ሙኩሉኔ ታሙ ሙኩሉ ቶሆ ታሙ ሙኩሉ ጊዲያ ኪታንቾታ ጊርሳ ሲዓስ። ኤንቲካ ኣራታ፥ ኦይዱ ዴዖን ዴዒያ ሜꬌቴꬃታኔ፥ ጪማታ ዩሹዋን ኤቂዶሶና።
REV 5:12 ሄ ኪታንቾቲ ꬎቁ ጊዳ ቃላን፥ «ሹኬቲዳ ዶርሳይ ዎልቃ፥ ዱሬቴꬂ፥ ጪንጫቴꬂኔ ሚኖቴꬂ፥ ቦንቾ፥ ሳባኔ ጋላታ ኤካናው ቤሴስ» ያጊዶሶና።
REV 5:13 ሄሳፌ ጉዬ፥ ሳዓን፥ ሳሎን፥ ሳዓፔ ጋርሳኒኔ ኣባ ጊዶን ዴዒያ ሜꬌቴꬂ ኡባይ፥ «ኣራታ ቦላ ኡቲዳይሳሲኔ ዶርሳስ፥ ጋላታይ፥ ቦንቾይ፥ ሳባይኔ ዎልቃይ ሜሪ ሜሪናው ጊዶ» ያጊዲ ዬፂሺን ሲዓስ።
REV 5:14 ኦይዱ ዴዖን ዴዒያ ሜꬌቴꬃቲ፥ «ኣሚንዒ» ያጊዶሶና፤ ቃሲ ጪማቲ ጉፋኒዲ ጎይኒዶሶና።
REV 6:1 ዶርሳይ ላፑን ማታሚያፔ ኢሱዋ ዶዪሺን ቤዓስ። ቃሲ ኦይዱ ዴዖን ዴዒያ ሜꬌቴꬃታፔ ኢሶይ፥ ዳዳ ዴሾ ጊርሳን፥ «ሃያ!» ያጊሺን ሲዓስ።
REV 6:2 ሄኮ ቦꬃ ፓራ ቤዓስ። ሄ ፓራ ቶጊዳሲ ዶንጌ ኦይኪስ፤ ኢያ ሁዔን ካላቺ ዴዔስ። ኢካ ፆኒሼ ፆናናው ኬዪስ።
REV 6:3 ቃሲ ዶርሳይ ናምዓንꬆ ማታሚያ ዶዪዳ ዎዴ ዴዖን ዴዒያ ናምዓንꬆ ሜꬌቴꬃይ፥ «ሃያ!» ያጊሺን ሲዓስ።
REV 6:4 ቃሲ ሃራ ሲሃ ዞዖ ፓሪ ኬዪስ። ሄ ፓራ ቶጊዳይሳስ ሳዓፔ ሳሮ ꬋይሳና ሜላኔ ኣሳይ ዎሊ ዉርሳና ሜላ ማቲኔ ጊታ ማሺ ኢሜቲስ።
REV 6:5 ዶርሳይ ሄꬓንꬆ ማታሚያ ዶዪዳ ዎዴ ዴዖን ዴዒያ ሄꬓንꬆ ሜꬌቴꬃይ፥ «ሃያ!» ያጊሺን ሲዓስ። ሄኮ ካሬꬃ ፓራ ቤዓስ፤ ኢካ ባ ኩሼን ሚዛኔ ኦይኪስ።
REV 6:6 ኦይዱ ዴዖን ዴዒያ ሜꬌቴꬃታ ጊዶፌ፥ «ኢሲ ጋላሳ ኦሶስ ዳሞዜ፥ ባጋ ኪሎ ጊስቴ፤ ቃሲ ኢሲ ጋላሳ ኦሶስ ዳሞዜ፥ ኢሲ ኪሎኔ ባጋ ባንጋ ጊዶ። ሺን ዛይቲያኔ ዎይኒያ ቆሆፓ» ያጊሺን ሲዓስ።
REV 6:7 ዶርሳይ ኦይዳንꬆ ማታሚያ ዶዪዳ ዎዴ ኦይዳንꬆ ዴዖን ዴዒያ ሜꬌቴꬃይ፥ «ሃያ!» ያጊሺን ሲዓስ።
REV 6:8 ሄኮ ዋንጮ ፓራ ቤዓስ። ሄ ፓራ ቶጊዳይሳ ሱንꬃይ ሃይቆ፤ ኢያ ጌዶ ሲዖሌይ ካሌስ። ኤንታው ኣላሜፔ ኦይዳንꬆ ኩሺያ ኦላን፥ ኮሻን፥ ጋዶኒኔ ዶዓን ዎꬊሳና ሜላ ማቲ ኢሜቲስ።
REV 6:9 ዶርሳይ ኢቻሻንꬆ ማታሚያ ዶዪዳ ዎዴ ኤንቲ ፆሳ ቃላ ኦዲዳ ጊሾኔ ባንታ ማርካቴꬃን ኣማኔቲዳ ጊሾ ሹኬቲዳ ኣሳ ሼምፖታ ያርሾ ቤሳፌ ጋርሳን ቤዓስ።
REV 6:10 ኤንቲ ባንታ ቃላ ꬎቁ ኦꬂዲ፥ «ኡባ ሃሪያ ጎዳው፥ ጌሻው፥ ቱማንቹዋው፥ ሳዓን ዴዒያ ኣሳ ቦላ ኔ ፒርዳናይኔ ኑ ሱꬃ ጊሾ ሃሎ ኬያናይ ኣዉዴ?» ያጊዶሶና።
REV 6:11 ኤንታ ኢሱዋስ ኢሱዋስ ቦꬃ ማዖይ ኢሜቲስ። ኤንታይሳዳ ሃኒዲ ሃይቃናው ቤሲያ ኤንታ ላጌታ ታይቦይ ኩማና ጋካናው ጉꬃ ዎዴ ሼምፓና ሜላ ኤንታው ኦዴቲስ።
REV 6:12 ዶርሳይ ኡሱፑንꬃ ማታሚያ ዶዪዳ ዎዴ ታ ቤዓስ፤ ዎልቃማ ቢታ ቃፆይ ሃኒስ። ኣዋ ኣይፌይ ካሬፂዲ ካሌ ዳኒስ። ኣጌናይካ ዞዒዲ ሱꬁ ዳኒስ።
REV 6:13 ዎልቃማ ጫርኮይ ጫርኪዲ ባላሴ ሚꬃ ቃዉዔ ኣይፊያ ቆቆፌይሳዳ ሳሉዋ ፆሊንቶቲ ሳዓን ቆቆፌቲዶሶና።
REV 6:14 ሳሎይ ፃꬃ ማፃፋዳ ፃፄቲዲ ኣꬊስ፤ ዙማይኔ ኣባን ቴቄቲዳ ቢታቲ ባንታ ቤሳፌ ꬋዪዶሶና።
REV 6:15 ቢታ ካዎቲ፥ ዴሪያ ሃሬይሳቲ፥ ኦላ ካሌꬄይሳቲ፥ ዱሬቲ፥ ዎልቃማቲ፥ ኣይሌቲኔ፥ ዎማኖቲ ጎንጎሎኒኔ ዴሪያ ቦላ ዴዒያ ዛላ ሆምዖን ቆሴቲዶሶና።
REV 6:16 ኤንቲካ ዙማኮኔ ዛላኮ፥ «ኑ ቦላ ዎꬊቴ፤ ኑና ቆሲቴ፤ ኣራታን ኡቲዳይሳ ኣይፊያፔኔ ዶርሳ ሃንቁዋፌ ኑና ጌንꬂቴ።
REV 6:17 ሂዛ፥ ጊታ ሃንቆ ጋላሳይ ጋኪስ፤ ኦኔ ዳንዳዒዲ ኤቃናይ?» ያጊዶሶና።
REV 7:1 ሄሳፌ ጉዬ፥ ኦይዱ ኪታንቾቲ ኦይዱ ሳዓ ጋፃን ኤቂዳይሳታ ቤዓስ። ሄ ኪታንቾቲ ሳዓ ቦላ ዎይኮ ኣባ ቦላ ዎይኮ ኣይ ሚꬃ ቦላ ጫርኮይ ኦይዱ ሳዓ ጋፃፔ ጫርኮና ሜላ ቴቂዶሶና።
REV 7:2 ቃሲ ዴዖ ፆሳ ማታሚያ ኦይኪዳ ሃራ ኪታንቾይ ዶሎሃ ባጋፌ ኬዬይሳ ቤዓስ። ሄ ኪታንቾይ ባ ቃላ ꬎቁ ኦꬂዲ፥ ሳዓኔ ኣባ ቆሃናው ዎልቂ ኢሜቲዳ ኦይዱ ኪታንቾታ፥
REV 7:3 ፄጊዲ፥ «ኑኒ ፆሳ ኣይሌታ ሶምዖን ማታሚያ ዎꬃና ጋካናው ቢታ ዎይኮ ኣባ ዎይኮ ሚꬃ ቆሆፒቴ» ያጊስ።
REV 7:4 ያቲን፥ ታኒ ፆሳ ማታሜይ ሶምዖን ዎሴቲዳይሳታ ፓይዱዋ ሲዓስ። ኢስራዔሌ ማይዛታ ኡባፌ ፄታኔ ኦይታማኔ ኦይዱ ሙኩሉ ኣሳስ ሶምዖን ማታሜ ዎꬂስ።
REV 7:5 ዪሁዳ ዜሬꬃፌ ታማኔ ናምዑ ሙኩሉ፥ ሮቤላ ዜሬꬃፌ ታማኔ ናምዑ ሙኩሉ፥ ጋዴ ዜሬꬃፌ ታማኔ ናምዑ ሙኩሉ፥
REV 7:6 ኣሴሬ ዜሬꬃፌ ታማኔ ናምዑ ሙኩሉ፥ ኒፍታሌሜ ዜሬꬃፌ ታማኔ ናምዑ ሙኩሉ፥ ሚናሴ ዜሬꬃፌ ታማኔ ናምዑ ሙኩሉ፥
REV 7:7 ሲሞና ዜሬꬃፌ ታማኔ ናምዑ ሙኩሉ፤ ሌዌ ዜሬꬃፌ ታማኔ ናምዑ ሙኩሉ፥ ዪሳኮሬ ዜሬꬃፌ ታማኔ ናምዑ ሙኩሉ፥
REV 7:8 ዛቢሎኔ ዜሬꬃፌ ታማኔ ናምዑ ሙኩሉ፥ ዮሴፋ ዜሬꬃፌ ታማኔ ናምዑ ሙኩሉ፥ ቢኒያሜ ዜሬꬃፌ ታማኔ ናምዑ ሙኩሉ፥ ኣሳ ሶምዖን ማታሜ ዎꬂስ።
REV 7:9 ሄሳፌ ጉዬ፥ ዜሬꬂ ኡባፌ፥ ካዎቴꬃ ኡባፌ፥ ያራ ኡባፌኔ ዱማ ዱማ ዶናፔ ዛዊ ባይና ዳሮ ኣሳ ቤዓስ። ሄ ኣሳይ ቦꬃ ማዖ ማዒዲ፥ ዛምባ ሃይꬂ ባንታ ኩሼን ኦይኪዲ፥ ኣራታ ሲንꬃኒኔ ዶርሳ ሲንꬃን ኤቂዶሶና።
REV 7:10 ኤንቲ ባንታ ቃላ ꬎቁ ኦꬂዲ፥ «ኣቶቴꬃይ ኣራታን ኡቲዳ ኑ ፆሳፌኔ ዶርሳፌ ዬስ» ያጊዶሶና።
REV 7:11 ኪታንቾቲ ኡባይ፥ ኣራታ፥ ጪማታኔ ኦይዱ ሜꬌቴꬃታ ዩሹዋን ኤቂዶሶና። ኤንቲ ኣራታ ሲንꬃን ጉፋኒዲ ፆሳ ጎይኒዶሶና።
REV 7:12 «ኣሚንዒ! ኣንጆይ፥ ቦንቾይ፥ ጪንጫቴꬃይ፥ ጋላታይ፥ ሳባይ ዎልቃይ፥ ሚኖቴꬃይ ሜሪ ሜሪናው ኑ ፆሳስ ጊዶ። ኣሚንዒ!» ያጊዶሶና።
REV 7:13 ጪማታፔ ኢሶይ ታኮ፥ «ሃ ቦꬃ ማዑዋ ማዒዳ ኣሳቲ ኦናንቴ? ኤንቲ ኣዉፔ ዪዶና?» ያጊዲ ኦይቺስ።
REV 7:14 ታኒ ዛራዳ፥ «ጎዳው፥ ኔ ኤራሳ» ያጋስ። ኢካ ታኮ፥ «ሃይሳቲ ዳሮ ዋዬ ዋዪዲ ኣꬊዳይሳታ። ኤንቲ ባንታ ማዑዋ ዶርሳ ሱꬃን ሜጪዲ ጌሺዶሶና።
REV 7:15 ሄሳ ጊሾ፥ ኤንቲ ፆሳ ኣራታ ሲንꬃን ጊዲዲ ቃማኔ ጋላስ ኢያ ኬꬃን ኦꬆሶና። ቃሲ ኣራታ ቦላ ኡቲዳይሲ ኤንታው ኩያ ጊዳና።
REV 7:16 ሂዛፔ ጉዬ፥ ኤንቲ ኮሻቶኮና፥ ሳሞቶኮና። ኣዊ ዎይኮ ሚሺ ኤንታ ሜና።
REV 7:17 ኣራታ ጊዶን ኡቲዳ ዶርሳይ ኤንታ ሄማና። ዴዖ ፑልቶ ሃꬃኮ ኤንታ ካሌꬃና። ፆሳይ ኤንታ ኣይፊያፔ ኣፉꬃ ኡባ ቁቻና» ያጊስ።
REV 8:1 ዶርሳይ ላፑንꬃ ማታሚያ ዶዪዳ ዎዴ ባጋ ሳቴ ጊዴይሳ ሜላ ሳሎይ ሲዒ ጊስ።
REV 8:2 ሄሳፌ ጉዬ፥ ታኒ ላፑን ሞይዜቲ ኢሜቲዳ ላፑን ኪታንቾታ ፆሳ ሲንꬃን ኤቂዳይሳታ ቤዓስ።
REV 8:3 ኢፃኔ ጩዪሲያ ዎርቃ ሻቴ ኦይኪዳ ሃራ ኪታንቾይ ዪዲ፥ ያርሾ ቤሳ ማታን ኤቂስ። ኢ ኣራታ ሲንꬃን ዴዒያ ዎርቃ ያርሾ ቤሳ ቦላ ጌሻታ ኡባ ዎሳራ ጉጂዲ ያርሻና ሜላ ኢያው ዳሮ ኢፃኔይ ኢሜቲስ።
REV 8:4 ኢፃኒያ ጩያይ ጌሻታ ዎሳራ ኢሲፌ ኪታንቹዋ ኩሼፔ ፑዴ ፆሳኮ ኬዪስ።
REV 8:5 ሄሳፌ ጉዬ፥ ኪታንቾይ ኢፃኔ ጩዪሲያ ሻቲያ ኤኪዲ፥ ኢያን ያርሾ ቤሳፌ ቦንቆ ታማ ኩንꬂዲ ሳዓ ዱጌ ሆሊስ። ያቲን ዴሾይ፥ ዎልዓንꬂ፥ ጊርሲኔ ቢታ ቃፆይ ሃኒስ።
REV 8:6 ሄሳፌ ጉዬ፥ ላፑን ኪታንቾቲ ባንታ ሞይዚያ ፑናናው ጊጌቲዶሶና።
REV 8:7 ኮይሮ ኪታንቾይ ባ ሞይዚያ ፑኒያ ዎዴ ሻቺኔ ሱꬃራ ዋላኬቲዳ ታሚ ሳሎፔ ቡኪስ። ሳዓፔ ሲኮይ ፁጌቲስ፤ ሚꬃፌ ሲኮይ ፁጌቲስ፤ ጪልዖ ማታ ኡባይ ፁጌቲስ።
REV 8:8 ናምዓንꬆ ኪታንቾይ ባ ሞይዚያ ፑኒዳ ዎዴ ዎልቃማ ዴሬ ዳኒያባይ ታማን ኤፂሼ ኣባን ዬጌቲስ። ያቲን፥ ኣባፌ ሲኮይ ሱꬁ ጊዲስ።
REV 8:9 ኣባን ዴዖን ዴዒያ ሜꬌቴꬃፌ ሲኮይ ሃይቂስ፤ ማርካቤታፔ ሲኮይ ꬋይስ።
REV 8:10 ሄꬓንꬆ ኪታንቾይ ባ ሞይዚያ ፑኒዳ ዎዴ ፆምፔዳ ኤፂያ ዎልቃማ ፆሊንቶይ ሻፋፔ ሲኩዋ ቦላኔ ፑልቶታ ቦላ ሳሎፔ ዎꬊስ።
REV 8:11 ሄ ፆሊንቱዋ ሱንꬃይ ጫሞ ጌቴቴስ። ሃꬃፌ ሲኩዋ ጫሚሲስ፤ ሃꬃይ ጫሚዳ ጊሾ ዳሮ ኣሳይ ሄ ሃꬃ ኡዪዲ ሃይቂዶሶና።
REV 8:12 ኦይዳንꬆ ኪታንቾይ ባ ሞይዚያ ፑኒስ። ኣዋፔ፥ ኣጌናፔኔ ፆሊንቶታፔ ሲኩዋ ዴቺስ፤ ኤንታ ፖዑዋፔ ሲኮይ ꬉሚስ። ጋላሳፔ ሲኮይ፥ ቃማፌካ ሲኮይ ꬉሚስ።
REV 8:13 ኢሲ ኣርጋንꬂ ሳሎ ꬎቁ ጊዲ፥ ፒራꬊሺን ቤዓስ። ሄ ኣርጋንꬃይ ባ ቃላ ꬎቁ ኦꬂዲ፥ «ኣቲዳ ሄꬑ ኪታንቾቲ ባንታ ሞይዚያ ፑናናው ዴዒያ ጊሾ ሳዓን ዴዒያ ኣሳ ኣዬ! ኣዬ! ኣዬ!» ያጊሺን ሲዓስ።
REV 9:1 ሄሳፌ ጉዬ፥ ኢቻሻንꬆ ኪታንቾይ ባ ሞይዚያ ፑኒን ሳሎፔ ዱጌ ሳዓ ኩንዲዳ ፆሊንቶ ቤዓስ። ሄ ፆሊንቱዋስ ዎልቃማ ኦላ ቁልፔይ ኢሜቲስ።
REV 9:2 ፆሊንቶይ ኦላ ዶዪዳ ዎዴ ዳልጋ ጮጬፔ ኬያ ጩያ ሜላ ጩያይ ሄ ኦላፌ ኬዪስ። ሄ ኦላፌ ኬዪዳ ጩያን ኣዋይኔ ሳሎይ ꬉሚዶሶና።
REV 9:3 ሄ ጩያፔ ቦሌይ ኬዪዲ ሳዓን ዎꬊስ። ሳዓን ዴዒያ ኮርኔታስ ዴዒያ ዎልቃ ሜላ ዎልቂ ቦሌታስ ኢሜቲስ።
REV 9:4 ፆሳ ማታሜይ ሶምዖን ባይና ኣሳ ፃላላፔ ኣቲን ሳዓን ዴዒያ ማታ ዎይኮ ሚꬂ ዎይኮ ኣይ ጪልዖባ ጊዲን ቆሆና ሜላ ቦሌታስ ኦዴቲስ።
REV 9:5 ቦሌቲ ኣሳ ኢቻሹ ኣጌና ጋካናው ፓፃ ካዓና ሜላ ማቲ ኢሜቲስፔ ኣቲን ኣሳ ዎꬋና ሜላ ጊዴና። ኮርኔይ ኣሴ ዱኪን ዛሜይሳ ሜላ ቦሌይ ዱኪዲ ዛሚሴስ።
REV 9:6 ሄ ጋላሳታን ኣሳይ ሃይቆ ኮያና፥ ሺን ዴሜና። ኤንቲ ሃይቃናው ኣሞታና፥ ሺን ሃይቆይ ኤንታፌ ሃካና።
REV 9:7 ቦሌይ ኦላስ ጊጊ ኡቲዳ ፓራ ዳኔስ። ቦሊያ ሁዔን ዎርቃ ካላቺ ዴዔስ፤ ኤንታ ሶምዖይካ ኣሳ ሶምዖ ዳኔስ።
REV 9:8 ኢያ ቢናናይ ማጫሳ ቢናና ሜላ ኣዱሴ። ኤንታ ኣቻይካ ጋሞ ኣቺ ዳኔስ።
REV 9:9 ኤንታው ቲራ ቦላ ዎꬂያ ቢራታ ፁሩሬይ ዴዔስ፤ ኤንታ ቄፊያ ጊርሳይ ኦሌታናው ጋላቢያ ፓራኔ ፓራ ጋሬ ጊርሳ ሜላ።
REV 9:10 ኤንታው ኮርኔ ጎይና ዳኒያ ጎይኒኔ ዱኪያ ዪሺ ዴዔስ። ሄ ጎይናን ኢቻሹ ኣጌና ኣሳ ቆሃና ሜላ ማቲ ኢሜቲስ።
REV 9:11 ኤንታና ሃሪያ ካዎይ ዴዔስ፤ ሄ ካዎይ ኦላ ኪታንቹዋ። ኢያ ሱንꬃይ ኢብራይስፄ ዶናን ኣብዶና፤ ቃሲ ጊሪኬ ዶናን ኣጶሊዮና ጌቴቴስ። ኢያ ሱንꬃ ቢርሼꬃይ «ꬋይሴይሳ» ጉሱ።
REV 9:12 ኮይሮ ኣዬይ ኣꬊስ፤ ሄኮ፥ ቡሮ ሃራ ናምዑ ኣዬቲ ኤሶን ሃናና።
REV 9:13 ኡሱፑንꬃ ኪታንቾይ ባ ሞይዚያ ፑኒስ። ፆሳ ሲንꬃን ኤቂዳ፥ ዎርቃ ያርሾ ቤሳን ዴዒያ ኦይዱ ካጬታፔ ኢሲ ጊርሲ ሲዓስ።
REV 9:14 ሄ ጊርሳይ ሞይዜ ኦይኪዳ ኡሱፑንꬃ ኪታንቹዋኮ፥ «ኤፊራፂሴ ጊያ ጊታ ሻፋን ቃሼቲዳ ኦይዱ ኪታንቾታ ቢርሻ» ያጊስ።
REV 9:15 ቢታ ቦላ ዴዒያ ኣሳፔ ሲኩዋ ዎꬋና ሜላ ሄ ሳቲያስ፥ ሄ ጋላሳስ፥ ሄ ኣጌናሲኔ ሄ ላይꬃስ ጊጊዲ ኡቲዳ ኦይዱ ኪታንቾቲ ቢርሼቲዶሶና።
REV 9:16 ኦላ ፓራ ቶጊያ ኦላንቾታ ፓይዶይ ዳሮ ፄቱ ሚሎኔ ጊዴይሳ ሲዓስ።
REV 9:17 ቃሲ ታ ቆንጬꬃን ፓራታኔ ሄ ፓራታ ቶጊዳ ኣሳ ቤዓስ። ሄ ኣሳይ ቲራን ዎꬂያ ቢራታ ፁሩሬይ ታማ ቦንቆ ሜላ ዞዖ፥ ያኪንቴ ሜላ፥ ካሬꬃ ካሎሴ ሜላኔ ዲኔ ሜላ ጪሊሎ። ፓራታ ሁዔይ ጋሞ ሁዔ ሜላ፤ ኤንታ ዶናፔ ታሚ፥ ጩዪኔ ዲኔይ ኬዪስ።
REV 9:18 ፓራታ ዶናፔ ኬዪዳ ታማን፥ ጩያኒኔ ዲኒያን ሄ ሄꬑ ጋዶታን ሳዓን ዴዒያ ኣሳፔ ሲኮይ ሃይቂስ።
REV 9:19 ሄ ፓራታ ዎልቃይ ኤንታ ዶና ጊዶኒኔ ጎይናን ዴዔስ። ኤንታ ጎይናይካ ሾሻ ሁዔ ሜላ፤ ኤንቲ ኢያራ ኣሳ ቆሆሶና።
REV 9:20 ሃ ጋዶታፔ ኣቲዳይሳቲ ባንታ ኩሼ ኦሱዋፔ ሲሚቦኮና። ኤንቲ ቱና ኣያናን ዎርቃፌ፥ ቢራፔ፥ ናሴ ቢራታፔኔ ሹቻፌ ኦሴቲዳ ኤቃስ ጎይኖሶና። ፄላናው፥ ሲዓናው፥ ሃሙታናው ዳንዳዖና ኤቃታስ ጎይኔይሳ ኣጊቦኮና።
REV 9:21 ኣሳይ ዎꬌይሳ፥ ቢቴይሳ፥ ላይማቴይሳኔ ካይሴይሳ ኣጊዲ ማሮታ ኦይቺቦኮና።
REV 10:1 ሄሳፌ ጉዬ፥ ታ ሃራ ዎልቃማ ኪታንቾይ ሳሎፔ ሳዓ ዎꬊሺን ቤዓስ። ኢ ሻራ ማዒስ፤ ኢያ ሁዒያ ቦላ ዙላይ ዴዔስ። ኢያ ሶምዖይ ኣዋ ሜላ፤ ኢያ ቶሆይ ታማ ቱሳ ሜላ።
REV 10:2 ሄ ኪታንቾይ ዶያ ዴዒያ ኢሲ ጉꬃ ፃꬃ ማፃፋ ባ ኩሼን ኦይኪዲ፥ ባ ኡሻቻ ቶሁዋ ኣባ ቦላ፥ ባ ሃዲርሳ ቶሁዋ ቢታ ቦላ ኤሲስ።
REV 10:3 ጉዲያ ጋሞዳ ባ ቃላ ꬎቁ ኦꬂዲ ዋሲስ። ኢ ዋሲዳ ዎዴ ላፑን ዳዳቲ ባንታ ጉንꬃ ሲሲዶሶና።
REV 10:4 ላፑን ዳዳቲ ኦዴቲዳ ዎዴ ታ ፃፋናው ጊጌታስ። ሺን ሳሎፔ፥ «ላፑን ዳዳቲ ኦዲዳይሳ ማታሜን ጎርዳፌ ኣቲን ፃፎፓ» ያጊያ ጊርሳ ሲዓስ።
REV 10:5 ያቲዲ፥ ኣባ ቦላኔ ቢታ ቦላ ኤቂዳ፥ ታ ቤዒዳ ኪታንቾይ፥ ባ ኡሻቻ ኩሺያ ሳሎ ፑዴ ሚጪስ።
REV 10:6 ኢ ሚጪዲ ሳሎኒኔ ኢያ ጊዶን ዴዒያ ኡባ፥ ሳዓኒኔ ኢያ ጊዶን ዴዒያ ኡባ፥ ኣባኔ ኢያ ጊዶን ዴዒያ ኡባ ሜꬊዳ፥ ሜሪናው ዴዒያ ፆሳ ሱንꬃን ጫቂዲ፥ «ሂዛፔ ጉዬ፥ ፆሳይ ጋምዔና።
REV 10:7 ሺን ላፑንꬃ ኪታንቾይ ባ ሞይዚያ ፑኒያ ዎዴ ፆሳይ ባ ኣይሌ ጊዲዳ ናቤታ ባጋራ ቆንጪሲዳ ፁራ ቆፋይ ፖሌታና» ያጊስ።
REV 10:8 ሄሳፌ ጉዬ፥ ኣባ ቦላኔ ቢታ ቦላ ኤቂዲ፥ «ኢያ ኩሼን ዶዬቲዲ ዴዒያ ፃꬃ ማፃፋ ኪታንቹዋ ኩሼፔ ኤካ» ያጊዲ ናምዓንꬆ ታው ኦዲሺን ሲዓስ።
REV 10:9 ታኒ ሄ ኪታንቹዋኮ ባዳ፥ ጉꬃ ፃꬃ ማፃፋ ኢማ ጋዳ ኦይቻስ። ኢ ታኮ፥ «ኤካዳ ማ፤ ኢ ኔ ኡሎን ጫማና፥ ሺን ኔ ዶናን ኤሳዳ ማልዓና» ያጊስ።
REV 10:10 ታኒ ኪታንቹዋ ኩሼፔ ሄ ጉꬃ ፃꬃ ማፃፋ ኤካዳ ማስ፤ ታ ዶናን ኤሳዳ ማልዒስ፥ ሺን ታ ኡሎን ጫሚስ።
REV 10:11 ሄሳፌ ጉዬ፥ ታኮ፥ «ኔኒ ያራ ኡባስ፥ ዴሬ ኡባስ፥ ዱማ ዱማ ዶናን ኦዴቴይሳታሲኔ ካዎታስ ቲንቢቴ ዛራ ኦዳናው ቤሴስ» ያጊስ።
REV 11:1 ሄሳፌ ጉዬ፥ ታው ዋꬋ ፃምዓ ኢሚዲ፥ «ባዳ ፆሳ ኬꬃኔ ያርሾ ቤሳ ዋꬋ፤ ያን ጎይኒያ ኣሳታካ ፓይዳ።
REV 11:2 ሺን ፆሳ ኬꬃ ካሬ ዳባባይ ኣይሁዴ ጊዶና ኣሳስ ኢሜቲዳ ጊሾ ዋꬎና ኣጋጋ። ኣይሁዴ ጊዶና ኣሳይ ጌሻ ካታማ ኦይታማኔ ናምዑ ኣጌና ሃራና።
REV 11:3 ታኒ ካሌ ማዒዳ ታ ናምዑ ማርካታ ኪታና፤ ኤንቲ 1260 ጋላስ ቲንቢቴ ኦዳና» ያጊስ።
REV 11:4 ሄ ናምዑ ማርካቲ ኣላሚያ ጎዳ ሲንꬃን ኤቂያ ናምዑ ሻማሆ ሚꬃታኔ ናምዑ ፆምፔ ዎꬂያ ኮጫታ።
REV 11:5 ኦኒካ ኤንታ ቆሃናው ኮይኮ ኤንታ ዶናፔ ታሚ ኬዪዲ፥ ኤንታ ሞርኬታ ꬋይሴስ። ኤንታ ቆሃናው ኮያ ኦኒካ ሄሳዳ ሃይቃና።
REV 11:6 ኤንቲ ቲንቢቴ ኦዲያ ዎዴ ኢሪ ቡኮና ሜላ ሳሉዋ ጎርዳናው ኤንታው ማቲ ዴዔስ። ኤንታው ሃꬄ ሱꬂ ኬሳናው፥ ቃሲ ኤንቲ ኮዪዳ ሜላ ቢታ ዱማ ዱማ ጋዶን ꬋይሳናው ኤንታው ማቲ ዴዔስ።
REV 11:7 ኤንቲ ባንታ ማርካቴꬃ ኦንጊዳፔ ጉዬ፥ ኦላፌ ኬያ ዶዓይ ኤንታና ኦላና። ሄ ዶዓይ ኤንታ ፆናና፤ ዎꬋና።
REV 11:8 ኤንታ ጎዳይ ማስቃሊያ ቦላ ካቄቲዳ ጊታ ካታማ ኦጊያ ቦላ ኤንታ ኣሃይ ዬጌታና። ሄ ካታማይ ሌሚሶን ሶዶሜ ዎይኮ ጊብፄ ጌቴቲ ፄጌቴስ።
REV 11:9 ቃሲ ዜሬꬂ ኡባፌ፥ ያራ ኡባፌ፥ ዱማ ዱማ ዶናፔኔ ካዎቴꬂ ኡባፌ ዪዳ ኣሳይ ኤንታ ኣሃ ሄꬑ ጋላሲኔ ባጋ ጋካናው ቤዓና። ኤንታ ኣሃይ ሞጌቶና ሜላ ኣሳይ ዲጋና።
REV 11:10 ሃ ናምዑ ናቤቲ ሳዓን ዴዒያ ኣሳ ዋይሲዳ ጊሾ ኣሳይ ኤንታ ሃይቁዋን ኡፋይታና። ባንታ ኡፋይሳ ቤሳናው ኢሶይ ኢሱዋስ ኢሞታ ኢማና።
REV 11:11 ሄꬑ ጋላሲኔ ባጋፌ ጉዬ፥ ዴዖ ኣያናይ ፆሳ ማታፔ ዪዲ ኤንታን ጌሊን፥ ኤንቲ ዴንዲ ኤቂዶሶና። ኤንታ ቤዒዳ ኡባይ ጊታ ያሺ ያዪዶሶና።
REV 11:12 ሄሳፌ ጉዬ፥ ሄ ናምዑ ናቤቲ፥ «ሃ ፑዴ ኬዪቴ» ጊያ ቃላ ሳሎፔ ሲዒዶሶና። ኤንታ ሞርኬቲ ኤንታና ቤዒሺን፥ ኤንቲ ሻራን ጌሊዲ ፑዴ ሳሎ ቢዶሶና።
REV 11:13 ሄ ሳቲያን ቢታይ ዎልቃማ ቃፆ ቃፂን፥ ካታማፔ ታማንꬆ ኩሼይ ꬋይስ። ቃሲ ቢታ ቃፆን ላፑን ሙኩሉ ኣሳይ ሃይቂስ። ኣቲዳ ኣሳይ ዳሮ ኮኮሪዲ ባቢዲ፤ ሳሎ ፆሳስ ቦንቾ ኢሚዶሶና።
REV 11:14 ናምዓንꬆ ኣዬይ ኣꬊስ፥ ሺን ሄኮ ሄꬓንꬆ ኣዬይ ኤሶን ያና።
REV 11:15 ላፑንꬃ ኪታንቾይ ባ ሞይዚያ ፑኒስ። ሳሎፔ፥ «ሳዓ ካዎቴꬃይ ኑ ጎዳሲኔ ኪሪስቶሳስ ጊዲስ፤ ኢ ሜሪናፔ ሜሪና ጋካናው ሃራና» ያጊያ ዎልቃማ ቃላይ ሲዔቲስ።
REV 11:16 ያቲን፥ ፆሳ ሲንꬃን፥ ባንታ ኣራታን ኡቲዳ ላታማኔ ኦይዱ ጪማቲ ጉፋኒዲ፥ ፆሳስ ጎይኒዲ፥
REV 11:17 «ሃዒካ ካሴካ ዴዔይሶ፥ ጎዳው፥ ኡባፌ ዎልቃማ ፆሳው፥ ኔኒ ጊታ ዎልቃ ኦይካዳሳ። ኔኒ ሃራናው ዶሚዳ ጊሾ ኑኒ ኔና ጋላቶስ።
REV 11:18 ኣይሁዴ ጊዶና ኣሳይ ሃንቄቲዶሶና፥ ሺን ኔ ሃንቆይ ዪስ። ሃይቂዳይሳታ ቦላ ኔ ፒርዲያ ዎዴይ ዪስ። ኔኒ ኔ ኣይሌታ፥ ናቤታስ ጌሻታሲኔ ኔ ሱንꬃስ ያዬይሳታስ፥ ጉꬃታሲኔ ጊታታስ፥ ኤንታ ኦሱዋዳ ኢሚያ ዎዴይ ጋኪስ። ኣላሚያ ꬋይሴይሳታ ꬋይሲያ ዎዴይ ዪስ» ያጊዶሶና።
REV 11:19 ሳሎን ዴዒያ ፆሳ ኬꬃይ ዶዬቲስ፤ ኢያ ጊዶን ፆሳ ጫቆ ታቦቴይ ቤንቲስ። ቃሲ ዎልዓንꬂ ዎልዓሚስ፥ ዴሾይ ዴቺስ፤ ዳዲ ꬉቂስ፤ ቢቲ ቃፂስ፤ ሻቺ ቡኪስ።
REV 12:1 ሄሳፌ ጉዬ፥ ሳሎን ዎልቃማ ማላቲ ቤንቲስ። ኣዋ ማዓዳ፥ ኣጌና ቦላ ኤቃዳ፥ ታማኔ ናምዑ ፆሊንቶ ካላቻ ባ ሁዔን ዎꬂዳ ዴዒያ፥ ኢሲ ማጫሲያ ቤንታሱ።
REV 12:2 ሄ ማጫሲያ ቃንꬄሺን፥ ኢዮ ኢቄꬂ ኦይኪን ኡንዔታዳ ዋሳሱ።
REV 12:3 ቃሲ ሃራ ማላቲ ሳሎን ቤንቲስ። ላፑን ሁዔቲኔ ታሙ ካጬቲ ዴዒያ ጊታ ዞዖ ዳዌይ ቤንቲስ። ኢ ባ ሁዔታ ቦላ ላፑን ካላቻ ዎꬂስ።
REV 12:4 ሄ ዳዌይ ባ ጎይናን ፆሊንቶታፔ ሲኩዋ ሳሎፔ ዳፊዲ ሳዓን ዬጊስ። ሄ ዳዌይ ናዓይ ዬሌቲ ዎꬊዳ ሜላ ሚታናው ኮዪዲ፥ ዬላናው ኤቄቲያ ማጫሴ ሲንꬃን ኤቂስ።
REV 12:5 ሄ ማጫሲያ ካዎቴꬃ ኡባ ቢራታ ፃምዓን ሃራናው ዴዒያ ኣዴ ናዓ ዬላሱ። ናዓይ ፆሳኮኔ ኢያ ኣራታኮ ፑዴ ኤኬቲስ።
REV 12:6 ማጫሲያ 1260 ጋላስ ጋካናው ኢዮ ናጋና ሜላ ፆሳይ ኢው ጊጊሲ ዎꬂዳ ቤሳ ባዞ ቢታ ባቃታሱ።
REV 12:7 ሳሎን ኦሊ ሜꬌቲስ። ሚካዔሌይ ባ ኪታንቾታራ ዳዊያራ ኦሌቲስ፤ ዳዌይ ባ ኪታንቾታራ ጊዲዲ ዛሪ ኦሌቲስ።
REV 12:8 ሺን ዳዌይ ፆኔቲዲ ሳሎን ኤንታው ዴዒያ ቤሲ ꬋዪዶሶና።
REV 12:9 ጊታ ዳዌይ፥ ቤኒ ሾሻይ፥ ሳዓን ዬጌቲስ። ኢካ ዳቡሎሳ ዎይኮ ፃላሄ ጌቴቲያ ኣላሚያ ባሌꬄይሳ። ኢ ባ ኪታንቾታራ ኢሲፌ ዱጌ ኣላሚያ ዬጌቲስ።
REV 12:10 ሄሳፌ ጉዬ፥ ሳሎን ሃይሳዳ ያጊያ ቃላ ሲዓስ። «ሃዒ ኣቶቴꬃይ፥ ዎልቃይኔ ካዎቴꬃይ፥ ኑ ፆሳሳ፤ ማታይ ኪሪስቶሳስ ጊዲስ። ሂዛ፥ ቃማኔ ጋላስ ፆሳ ሲንꬃን፥ ኑ ኢሻታ ሞቴይሲ ሳሎፔ ዱጌ ሆሌቲስ።
REV 12:11 ኤንቲ ዶርሳ ሱꬃኒኔ ባንታ ማርካቴꬃ ቃላን፥ ኢያ ኦሊዲ ፆኒዶሶና። ኤንቲ ባንታ ሼምፑዋስ ሚሼቶና ባንታና ሃይቆስ ኣꬂ ኢሚዶሶና።
REV 12:12 ሄሳ ጊሾ፥ ሳሎኒኔ ኢያ ጊዶን ዴዔይሳቶ ኡፋይቲቴ። ሺን ቢታኔ ኣባ ኣዬ! ሂዛ፥ ፃላሄይ ባው ጉꬃ ዎዴይ ኣቲዳይሳ ኤሪዳ ጊሾ ዎልቃማ ሃንቆን ሂንቴኮ ዎꬊስ» ያጊስ።
REV 12:13 ቃሲ ዳዌይ ባና ሳዓ ዬጊዳይሳ ቤዒዳ ዎዴ ኣዴ ናዓ ዬሊዳ ማጫሲው ጎዲስ።
REV 12:14 ማጫሲው ሾሻይ ቆሆና ሜላ ሄꬑ ላይꬂኔ ባጋ ማሼኔ ኡያሼ ኢያ ናጌቲያ ቤሲ ባዞ ቢታ ፒራꬋዳ ባና ሜላ ናምዑ ዎልቃማ ኣርጋንꬃ ቄፌይ ኢው ኢሜቲስ።
REV 12:15 ያቲዲ፥ ማጫሲው ዲዖይ ዲዒዲ ኤፋና ሜላ ዳዌይ ሻፋ ሃꬃ ሜላ ባ ዶናፔ ማጫሴ ጉዬራ ጮዪስ።
REV 12:16 ሺን ቢታይ ማጫሲው ማዲስ፤ ቢታይ ባ ዶና ዶዪዲ ዳዊያ ዶናፔ ኬዪዳ ሃꬃ ሚቲስ።
REV 12:17 ሄ ዳዌይ ማጫሴ ቦላ ዳሮ ሃንቄቲዲ፥ ኢ ዜሬꬃታ፥ ፆሳ ኪታ ናጌይሳታኔ ዬሱሲ ቆንጪሲዳ ቱማስ ኣማኔቲዳይሳታ ኦላናው ቢዲ።
REV 12:18 ኣባ ጋፃን ዴዒያ ሻፊያን ኤቂስ።
REV 13:1 ሄሳፌ ጉዬ፥ ኢሲ ዶዓይ ኣባፌ ኬዪሺን ቤዓስ። ኢያው ታሙ ካጬይኔ ላፑን ሁዔይ ዴዔስ። ሄ ታሙ ካጬታ ቦላ ታሙ ካላቻቲ ዴዖሶና። ሄ ሁዔታ ቦላ ፆሳ ጫሻ ሱንꬃቲ ፃፌቲዲ ኡቲስ።
REV 13:2 ታ ቤዒዳ ዶዓይ ማሄ ዳኔስ፤ ኢያ ቶሆይ ባባንꬃ ቶሆ ሜላ፤ ኢያ ዶናይካ ጋሞ ዶና ዳኔስ። ዳዌይ ባ ዎልቃ፥ ባ ኣራታኔ ባ ጊታ ማታ ሄ ዶዓስ ኢሚስ።
REV 13:3 ሄ ዶዓ ሁዒያፔ ኢሱዋ ቦላ ሃይቆስ ጋꬂያ ማዱንꬂ ቤዓስ፥ ሺን ሄ ማዱንꬃይ ፓፂስ። ኣላሚያ ኣሳ ኡባይ ማላሌቲዲ ሄ ዶዓ ካሊስ።
REV 13:4 ዳዌይ ባ ማታ ዶዓስ ኢሚዳ ጊሾ ኣሳ ኡባይ ዳዊያ ጎይኒዶሶና። ቃሲ ኣሳይ፥ «ዶዓ ሜሊ ኦኔ? ኢያራ ኦሌታናው ዳንዳዔይ ኦኔ?» ያጊዲ ዶዓስ ጎይኒዶሶና።
REV 13:5 ሄ ዶዓስ ኦቶርታና ሜላኔ ጫያና ሜላ ዶኒ ኢሜቲስ፤ ኦይታማኔ ናምዑ ኣጌና ሃራና ሜላ ማቲ ኢያው ኢሜቲስ።
REV 13:6 ሄ ዶዓይ ፆሳ፥ ኢያ ሱንꬃ፥ ኢ ዴዒያ ቤሳኔ ሳሎን ዴዒያ ኡባ ቃንጌꬂ ኦይኪስ።
REV 13:7 ሄ ዶዓይ ጌሻታራ ኦሌቲዲ፥ ኤንታና ፆናና ሜላ ዎልቂ ኢያው ኢሜቲስ። ያራ ኡባ፥ ዴሬ ኡባ፥ ዱማ ዱማ ዶና ኡባ ቦላኔ ዜሬꬂ ኡባ ቦላ ማቲ ኢያው ኢሜቲስ።
REV 13:8 ኣላሜይ ሜꬌቶሳፔ ዶሚዲ፥ ሹኬቲዳ ዶርሳ ዴዖ ማፃፋን ኤንታ ሱንꬃይ ፃፌቶና ሃ ሳዓን ዴዒያ ኣሳ ኡባይ ሄ ዶዓስ ጎይናና።
REV 13:9 ሲዒያ ሃይꬂ ዴዒያ ኣሲ ሲዖ።
REV 13:10 ኦኒካ ዲዔታናው ዴዔይ ዲዔቴስ። ማሻን ሃይቃናው ዴዔይ ማሻን ሹኬታና። ሄሳንካ ጌሻታ ዳንዳዓይኔ ኣማኖይ ኤሬታና።
REV 13:11 ቃሲካ፥ ሃራ ዶዒ ሳዓፔ ኬዪሺን ቤዓስ። ኢያው ዶርሳ ካጬ ዳኒያ ናምዑ ካጬይ ዴዔስ፤ ኢያ ሃሳያይ ዳዌይሳ ሜላ።
REV 13:12 ሄ ዶዓይ ኮይሮ ዶዓ ቤሳን፥ ኢያ ማታን ኦꬄስ። ኢካ ሃይቆስ ጋꬂያ ማዱንꬃፌ ፓፂዳ ኮይሮ ዶዓስ፤ ቢታን ዴዒያ ኣሳ ኡባይ ጎዪናና ሜላ ኦꬄስ።
REV 13:13 ሄ ናምዓንꬆ ዶዓይ ሃሪ ኣቶሺን፥ ታማ ሳሎፔ ኣሳ ኡባ ሲንꬃን ዎꬊሳና ጋካናው ጊታ ማላታታ ኦꬂስ።
REV 13:14 ኮይሮ ዶዓ ቤሳን ኦꬃና ሜላ፥ ኢያው ኢሜቲዳ ማላታታን ሳዓን ዴዒያ ኣሳ ኡባ ኢ ባሌꬂስ። ማሻን ማዱንፂዲ ፓፂዳ ዶዓ ቦንቾስ ሚሲሌ ጊጊሳና ሜላ ኤንታና ኪቲስ።
REV 13:15 ናምዓንꬆ ዶዓይ ኮይሮ ዶዓ ሚሲሊያስ ሼምፖ ኢሚዲ ኦዴታና ሜላኔ ኢያው ጎይኖናይሳቲ ሃይቃና ሜላ ኦꬂያ ማቲ ኢሜቲስ።
REV 13:16 ሄ ናምዓንꬆ ዶዓይ ጊቲኔ ጉꬂ፥ ማንቆይኔ ዱሬይ፥ ዎማኖይኔ ኣይሌይ ባ ኡሻቻ ኩሼን ዎይኮ ባ ሶምዖን ማላ ዎꬃና ሜላ ኦꬂስ።
REV 13:17 ሄ ዶዓ ሱንꬃይ ዎይኮ ኢያ ሱንꬃ ፓይዱዋ ማላይ ባይና ኣሲ ኦኒካ ባይዛናዉኔ ሻማናው ዳንዳዔና።
REV 13:18 ጪንጫቴꬂ ኮሼይ ሄሳና። ኤራቴꬂ ዴዒያ ኦኒካ ሄ ዶዓ ፓይዱዋ ቢርሼꬃ ኤሮ፤ ሄ ፓይዶይ ኣሳ ሱንꬂ። ሄ ፓይዶይ ኡሱፑን ፄታኔ ኡስፑን ታማኔ ኡሱፑና።
REV 14:1 ሄሳፌ ጉዬ፥ ዶርሳይ ፂዮኔ ዴሪያ ቦላ ኤቂዳይሳ ቤዓስ። ኢያራ ኢያ ሱንꬃይኔ ኢያ ኣዋ ሱንꬃይ ኤንታ ሶምዖን ፃፌቲዳ፥ 144፥000 ኣሳይ ዴዔስ።
REV 14:2 ሳሎፔ ጊታ ሃꬃ ጉንꬁኔ ዳዳ ጉንꬁ ዳኒያ ዎልቃማ ጊርሲ ሲዓስ። ቃሲ ታ ሲዒዳ ጊርሳይ ዲꬂ ዲፂሺን ሲዔቲያ ጊርሳ ሜላ።
REV 14:3 144፥000 ኣሳይ ኣራታ ሲንꬃን፥ ኦይዱ ዴዖን ዴዒያ ሜꬌቴꬃታ ሲንꬃኒኔ ጪማታ ሲንꬃን ኤቂዲ ኤንታፌ ሃራ ኦኒካ ታማራናው ዳንዳዖና ኦራꬃ ማዝሙሬ ዬፂዶሶና።
REV 14:4 ሃይሳቲ ማጫሳራ ባንታና ቱኒሶና ናጊዳ ጌሻታ። ኤንቲ ዶርሳይ ቢያሶ ኡባ ካሎሶና። ኤንቲ ፆሳሲኔ ዶርሳስ ባይራ ጊዲዲ፥ ሺቃናው ሳዓ ኣሳ ጊዶፌ ዎዜቲዶሶና።
REV 14:5 ኤንቲ ዎርዶይኔ ቦሬይ ባይና ኣሳታ።
REV 14:6 ሄሳፌ ጉዬ፥ ሜሪና ዎንጌላ ሳዓ ቦላ ዴዒያ ካዎቴꬃ ኡባስ፥ ዜሬꬂ ኡባስ፥ ያራ ኡባሲኔ ዱማ ዱማ ዶና ኡባስ ማርካታናው ሳሎራ ፒራꬊያ ሃራ ኪታንቾ ቤዓስ።
REV 14:7 ሄ ኪታንቾይ ባ ቃላ ꬎቁ ኦꬂዲ፥ «ፆሳይ ኣላሚያ ፒርዲያ ሳቴይ ጋኪዳ ጊሾ ፆሳስ ያዪቴ፤ ኢያ ቦንቺቴ። ሳሎ፥ ሳዓ፥ ኣባኔ ፑልቶ ሃꬃ ሜꬊዳ ፆሳ ጎይኒቴ» ያጊስ።
REV 14:8 ኮይሮይሳ ካሊዲ ሃራ ናምዓንꬆ ኪታንቾይ፥ «ዴሬ ኡባ ቱናኔ ማꬆያ ዎይኔ ኡሺዳ፥ ጊታ ባቢሎኔይ ኩንዳሱ! ኩንዳሱ!» ያጊዲ ዋሲስ።
REV 14:9 ሄꬓንꬆ ኪታንቾይ ኤንታ ካሊዲ፥ ባ ቃላ ꬎቁ ኦꬂዲ፥ «ዶዓኔ ኢያ ሚሲሊያ ጎይኒያ ቃሲ ኢያ ማላ ባ ሶምዖን ዎይኮ ባ ኩሼን ዎꬂያ ኦኒካ ዴዒኮ፥
REV 14:10 ኢ ሃንቆ ፁዓን ኩሚዳ ፆሳ ሃንቆ ዎይኒያ ኡያና። ኤንቲ ጌሻ ኪታንቾታ ሲንꬃኒኔ ዶርሳ ሲንꬃን ኤፂያ ዲኔ ታማን ዋዬታና።
REV 14:11 ኤንታ ዋያ ጩያይ ሜሪ ሜሪናው ጩዪሼ ዳና። ዶዓኔ ኢያ ሚሲሊያ ጎይኔይ ቃሲ ሄ ዶዓ ሱንꬃ ማላይ ዴዒያ ኦኒካ ቃማኔ ጋላስ ሼምፖይ ባይና ካዔታና» ያጊስ።
REV 14:12 ፆሳ ኪታ ናጌይሳቲኔ ዬሱሳ ኣማኔቴይሳቲ ጌንጪያ ሚኖቴꬃይ ቆንጪያ ዎዴይ ሄሳ።
REV 14:13 ሄሳፌ ጉዬ፥ «ሂዛፔ ጎዳን ሃይቄይሳቲ ኣንጄቲዳይሳታ» ያጊያ ቃላ ሳሎፔ ሲዓስ። ኣያናይ፥ «ኤ ቱማ፥ ኤንታ ኦሶይ ኤንታ ካሊያ ጊሾ ኤንቲ ባንታ ዳቡራፔ ሼምፓና» ያጌስ።
REV 14:14 ሄሳፌ ጉዬ፥ ቦꬃ ሻራ ቦላ ኡቲዳ ኣሳ ናዓ ዳኔይሳ ቤዓስ። ኢ ባ ሁዔን ዎርቃ ካላቻ ዎꬂስ፤ ቃሲ ባ ኩሼን ባጫ ኦይኪስ።
REV 14:15 ሃራ ኪታንቾይ ፆሳ ኬꬃፌ ኬዪዲ፥ ሻራ ቦላ ኡቲዳይሳኮ ባ ቃላ ꬎቁ ኦꬂዲ፥ «ካꬃ ሺሾ ዎዴይ ጋኪዳ ጊሾ ኔ ባጫ ዬዳዳ ካꬃ ጫካ፤ ሳዓን ዴዒያ ካꬃይ ጋኪስ» ያጊስ።
REV 14:16 ያቲን ሻራ ቦላ ኡቲዳይሲ ባ ባጫ ሳዓ ዬዲዲ፥ ሳዓን ዴዒያ ካꬃ ጫኪስ።
REV 14:17 ቃሲካ ሳሎን ዴዒያ ፆሳ ኬꬃፌ ሃራ ኪታንቾይ ኬዪስ፤ ኢያዉካ ኦጮ ባጪ ዴዔስ።
REV 14:18 ታማ ቦላ ማቲ ዴዒያ ሃራ ኪታንቾይ ያርሾ ቤሳፌ ኬዪስ። ኢ ባ ቃላ ꬎቁ ኦꬂዲ ኦጮ ባጫ ኦይኪዳ ኪታንቹዋኮ፥ «ዎይኔ ኣይፌይ ቴሪዳ ጊሾ ኔ ኦጮ ባጫ ዬዳዳ፥ ሳዓን ዴዒያ ዎይኒያፔ ቃንፃ» ያጊስ።
REV 14:19 ሄ ኪታንቾይ ባ ባጫ ዬዲዲ፥ ሳዓን ዴዒያ ዎይኒያፔ ቃንፂዲ፥ ፆሳ ጊታ ሃንቁዋ ጉምዒያ ቤሳን ዬጊስ።
REV 14:20 ኤንቲ ካታማፔ ጋፃን ዴዒያ ዎይኔ ኣይፌ ጉምዒያ ቤሳን ዬꬌቲዶሶና። ሱꬂ ዎይኒያ ጉምዒያ ቤሳፌ ኬዪዲ ኢሲ ሙኩሉኔ ኡስፑን ፄቱ ኪሎ ሚቲሬ ሜላ ሃኪዲ፥ ፓራ ፑሎ ጋኪያ ሜላ ኤሊዲ ꬎቁ ጊስ።
REV 15:1 ታኒ ሳሎን ሃራ ጊታኔ ማላሊሲያ ማላታ ቤዓስ። ፆሳ ዉርሴꬃ ሃንቁዋ ቆንጪሲያ ላፑን ቦሻታ ኦይኪዳ ላፑን ኪታንቾቲ ዴዖሶና።
REV 15:2 ቃሲ ታማራ ዋላኬቲዳ ቡርጩኮ ኣባ ዳኔይሳ ቤዓስ። ሄ ኣባ ጋፃን ዶዓ፥ ኢያ ሚሲሊያኔ ኢያ ሱንꬃ ታይቡዋ ፆኒዳይሳታ ቤዓስ። ፆሳይ ኤንታው ኢሚዳ ዲꬃ ኦይኪዲ ኤቂዶሶና።
REV 15:3 ኤንቲ ፆሳ ኣይሊያ ሙሴ ማዝሙሪያኔ ዶርሳ ማዝሙሪያ ሃይሳዳ ያጊድ ዬፆሶና። «ጎዳው፥ ኡባፌ ዎልቃማ ፆሳው፥ ኔ ኦሶይ ጊታኔ ማላሊሲያባ። ዴሬ ኡባ ካዋው፥ ኔ ኦጌይ ፂሎኔ ቱማ።
REV 15:4 ጌሺ ኔ ፃላላ ጊዲያ ጊሾ ጎዳው፥ ኔው ያዮናይኔ ኔ ሱንꬃ ቦንቾናይ ኦኔ? ኔ ፂሎ ኦሶይ ኣሳ ኡባስ ቆንጬ ጊዲያ ጊሾ ካዎቴꬂ ኡባይ ኔ ሲንꬄ ዪዲ ጎይናና» ያጊዲ ዬፆሶና።
REV 15:5 ሄሳፌ ጉዬ፥ ሳሎን ዶዬቲዲ ዴዒያ ፆሳ ኬꬃ፥ ኢካ ማርካቴꬃ ዱንካኒያ ቤዓስ።
REV 15:6 ላፑን ቦሻታ ኦይኪዳ ላፑን ኪታንቾቲ ፆሳ ኬꬃፌ ኬዪዶሶና። ኤንቲ ጌሺኔ ጶሊያ ሊኖ ማዖ ማዒዶሶና፤ ባንታ ቲራን ዎርቃ ዳንጮ ዳንጪዶሶና።
REV 15:7 ኦይዱ ሜꬌቴꬃታፔ ኢሶይ፥ ሜሪናው ዴዒያ ፆሳ ሃንቆይ ኩሚዳ ላፑን ዎርቃ ፁዓታ ላፑን ኪታንቾታስ ኢሚስ።
REV 15:8 ፆሳ ቦንቹዋፌኔ ኢያ ዎልቃፌ ዴንዶይሳን ፆሳ ኬꬃይ ጩያን ኩሚስ። ላፑን ኪታንቾቲ ኦይኪዳ ላፑን ቦሻቲ ፖሌታና ጋካናው ፆሳ ኬꬃ ኦኒካ ጌላናው ዳንዳዒቤና።
REV 16:1 ሄሳፌ ጉዬ፥ ፆሳ ኬꬃፌ ላፑን ኪታንቾታኮ፥ «ቢዲ ፆሳ ሃንቁዋ ላፑን ፁዓታፔ ሳዓን ጉሲቴ» ያጊዲ፥ ኦዲያ ዎልቃማ ቃላ ሲዓስ።
REV 16:2 ኮይሮ ኪታንቾይ ቢዲ፥ ባ ፁዓን ዴዔይሳ ሳዓን ጉሲን፥ ዶዓ ማላይ ዴዔይሳታ ቦላኔ ኢያ ሚሲሊያ ጎይኒዳይሳታ ቦላ ኢታኔ ዛሚያ ማዱንꬂ ኬዪስ።
REV 16:3 ናምዓንꬆ ኪታንቾይ ባ ፁዓን ዴዔይሳ ኣባን ጉሲን፥ ኣባይ ሃይቂዳ ኣሳ ሱꬂ ዳኒስ። ቃሲ ኣባን ዴዒያ ሜꬌቴꬃ ኡባይ ሃይቂስ።
REV 16:4 ሄꬓንꬆ ኪታንቾይ ባ ፁዓን ዴዔይሳ ሻፋታኒኔ ፑልቶ ሃꬃታን ጉሲን፥ ሃꬃቲ ሱꬂ ጊዲዶሶና።
REV 16:5 ሄሳፌ ጉዬ፥ ሃꬃ ቦላ ማቲ ዴዒያ ኪታንቾይ ሃይሳዳ ያጊሺን ሲዓስ። «ሃዒካ ቤኒካ ዴዒያ ጌሻው፥ ሃይሳዳ ኔ ፒርዲዳ ጊሾ ኔኒ ፂሎ።
REV 16:6 ኤንቲ ጌሻታ ሱꬃኔ ናቤታ ሱꬃ ጉሲዳ ጊሾ ኤንቲ ሱꬁ ኡያና ሜላ ኦꬃዳሳ። ኤንቲ ባንታው ቤሲያባ ኤኪዶሶና» ያጊስ።
REV 16:7 ያርሾ ቤሳፌ፥ «ጎዳው፥ ኡባፌ ዎልቃማ ፆሳው፥ ኔ ፒርዳይ ቱማኔ ፂሎ» ያጊያ ቃላ ሲዓስ።
REV 16:8 ኦይዳንꬆ ኪታንቾይ ባ ፁዓን ዴዔይሳ ኣዋ ቦላ ጉሲን፥ ኣዋይ ባ ሴላን ኣሳ ፁጋና ሜላ ኣዋስ ዎልቂ ኢሜቲስ።
REV 16:9 ኣሳይ ዎልቃማ ሴላን ፁጌቲዲ፥ ሄ ቦሻታ ቦላ ማቲ ዴዒያ ፆሳ ሱንꬃ ባዲዶሶና፤ ባንታ ናጋራፔ ሲሚዲ ፆሳ ቦንቺቦኮና።
REV 16:10 ኢቻሻንꬆ ኪታንቾይ ባ ፁዓን ዴዔይሳ ዶዓ ኣራታ ቦላ ጉሲን፥ ሄ ዶዓ ካዎቴꬃይ ꬉሚስ። ኣሳይ ኡንዓ ጊሾ ባንታ ኢንፃርሳ ሳፆሶና።
REV 16:11 ቃሲ ኣሳይ ኡንዓ ጊሾኔ ማዱንꬃ ጊሾ ሳሎ ፆሳ ባዲዶሶና፤ ባንታ ኦꬂዳ ናጋራፔ ሲሚቦኮና።
REV 16:12 ኡሱፑንꬃ ኪታንቾይ ባ ፁዓን ዴዔይሳ ጊታ ኤፊራፂሴ ሻፋን ጉሲን፥ ዶሎሃ ባጋፌ ያና ካዎታስ ኦጌይ ጊጋና ሜላ ሃꬃይ ሜሊስ።
REV 16:13 ሄሳፌ ጉዬ፥ ሾꬌ ዳኒያ ሄꬑ ቱና ኣያናቲ ዳዊያ ዶናፔ፥ ዶዓ ዶናፔኔ ዎርዶ ናቢያ ዶናፔ ኬዪሺን ቤዓስ።
REV 16:14 ኤንቲ ማላታታ ኦꬂያ ቱና ኣያናታ። ሄ ሄꬑ ቱና ኣያናቲ ኡባፌ ዎልቃማ ፆሳ ጊታ ጋላሳን ሃናናው ዴዒያ ኦላስ ሺሻናው ኣላሜ ካዎታ ኡባኮ ባና።
REV 16:15 «ሄኮ፥ ታ ካይሶዳ ያና! ኣሳ ሲንꬃን ካሎቶናዳኔ ዬላቶናዳ ባርኪዲ፥ ባ ማዑዋ ናጊያ ኡራይ ኣንጄቲዳይሳ!» ያጊስ።
REV 16:16 ሄ ቱና ኣያናቲ ካዎታ ኢብራይስፄ ዶናን ኣርማጌዶኔ ጊያ ቤሳን ሺሺዶሶና።
REV 16:17 ላፑንꬃ ኪታንቾይ ባ ፁዓን ዴዔይሳ ጫርኮ ቦላ ጉሲን፥ ፆሳ ኬꬃን ዴዒያ ኣራታፔ፥ «ፖሌቲስ» ያጊያ ዎልቃማ ቃላይ ዪስ።
REV 16:18 ሄሳፌ ዎልዓንꬂ ዎልዓሚስ፤ ዳዳይ ꬉቂስ፥ ቢታይ ቃፂስ። ኣሲ ሳዓን ሜꬌቶሳፔ ቢቲ ሄሳ ሜላ ቃፆ ቃፂቤና። ሄሲ ኡባፌ ኣꬊዳ ቃፆ።
REV 16:19 ጊታ ካታማይ ሄꬑ ኬዪዲ ሻኬቲስ፤ ቢታ ኡባን ዴዒያ ካታማቲ ꬋዪዶሶና። ፆሳይ ጊታ ካታማ ባቢሎኔ ቆፒዲ፥ ባ ኢታ ሃንቆ ዎይኔ ኡሻይ ኩሚዳ ፁዓ ኢው ኢሚስ።
REV 16:20 ሃꬃን ቴቄቲዳ ቢታቲ ꬋዪዶሶና፤ ዴሬቲካ ቤንቲቦኮና።
REV 16:21 ኣሳ ቦላ ኦይታማኔ ኢቻሹ ኪሎ ጊራሜ ሜላ ዴፂያ ዎልቃማ ሻቺ ሳሎፔ ቡኪስ። ቦሻይ ዳሮ ኢታ ጊዲያ ጊሾ ኣሳይ ሻቻ ቦሻ ጊሾ ፆሳ ባዲዶሶና።
REV 17:1 ላፑን ፁዓታ ኦይኪዳ ላፑን ኪታንቾታፔ ኢሶይ ታኮ ዪዲ፥ «ሃያ፤ ዳሮ ሃꬃታ ቦላ ኡቲዳ ጊታ ላይማቲያ ማጫሴ ቦላ ያናው ዴዒያ ፒርዳ ታ ኔና ቤሳና።
REV 17:2 ኣላሚያ ካዎቲ ኢራ ላይማቲዶሶና፤ ኣላሜን ዴዒያ ኣሳይካ ኢ ላይማቴꬃ ዎይኒያ ኡዪዲ ማꬆቲዶሶና» ያጊስ።
REV 17:3 ሄ ኪታንቾይ ታና ጌሻ ኣያናን ባዞ ቢታ ኤፊስ። ያን ኢሲ ማጫሲያ ጫሻ ሱንꬃይ ኢ ቦላ ኡባን ፃፌቲዲ ኡቲዳ፥ ዞዖ ዶዓ ቶጊዳሮ ቤዓስ፤ ሄ ዶዓስ ላፑን ሁዔይኔ ታሙ ካጬይ ዴዔስ።
REV 17:4 ሄ ማጫሲያ ካሎሴ ማዖኔ ዞዖ ማዖ ማዓሱ፤ ኢያ ዎርቃን፥ ቦንቾ ሹቻኒኔ ኢንቆ ጊያ ኣልዖ ሹቻን ኣሌቄታሱ። ኢያ ባ ኩሼን ቦርሲያባኔ ላይማቴꬃ ቱናቴꬃን ኩሚዳ ዎርቃ ፁዓ ኦይካሱ።
REV 17:5 ኢ ሶምዖን ፁራ ኦሶ ቢርሼꬃይ ዴዒያ ሱንꬃይ፥ «ጊታ ባቢሎኔይ፥ ላይማቴꬃሲኔ ሳዓን ዴዒያ ቱናባ ኡባስ ኣዮ» ያጊያ ፁፌይ ፃፌቲዲ ኡቲስ።
REV 17:6 ቃሲ ሄ ማጫሲያ ጌሻታ ሱꬃኔ ዬሱሳስ ማርካቲሼ ሃይቂዳይሳታ ሱꬃ ኡያዳ ማꬆቲዳሮ ታ ቤዓዳ ማላሌታስ።
REV 17:7 ኪታንቾይ ታኮ፥ «ኔኒ ኣይስ ማላሌታይ? ታኒ ኔው ማጫሴ ፁራኔ ኢያ ቶኪዳ ላፑን ሁዔይኔ ታሙ ካጬይ ዴዒያ ዶዓ ፁራ ኦዳና።
REV 17:8 ኔኒ ቤዒዳ ዶዓይ ኮይሮ ዴዔስ፥ ሺን ሃዒ ባዋ። ሄ ዶዓይ ጪሞ ኦላፌ ኬዪዲ ꬋዮስ ባና። ሳዓይ ሜꬌቶሳፔ ዶሚዲ፥ ዴዖ ማፃፋን ኤንታ ሱንꬃይ ፃፌቲቦና ሳዓን ዴዒያ ኣሳይ ዶዓ ቤዒዲ ማላሌታና። ሂዛ፥ ኢ ካሴ ዴዔስ፤ ሃዒ ባዋ፥ ሺን ሲንꬃፌ ያና።
REV 17:9 «ሃይሲ ጪንጫቴꬂኔ ኣኬካ ኮዬስ። ላፑን ሁዔቲ ማጫሲያ ኡቲያ ላፑን ዴሬታ፤ ሄሳቲ ቃሲ ላፑን ካዎታ።
REV 17:10 ኤንታፌ ኢቻሹ ካዎቲ ኩንዲዶሶና። ኢሶይ ሃዒ ጋካናው ሃሬስ፤ ሃንኮ ካዎይ ዪቤና። ኢ ዪዲ ጉꬃ ዎዴ ታካናው ቤሴስ።
REV 17:11 ሲንꬄ ዴዒዳ ዶዓይ፥ ሃዒ ባይናይሲ፥ ኢ ባ ሁዔን ሆስፑንꬃ ዶዓ። ኢ ላፑን ዶዓታፔ ኢሱዋ፤ ኢ ꬋያናው ቤስ።
REV 17:12 ኔኒ ቤዒዳ ታሙ ካጬቲ ሃሮ ዶሚቦና ታሙ ካዎታ። ሺን ኤንቲ ዶዓራ ኢሲፌ ኢሲ ሳቴ ካዎቲዲ ሃራናው ኤንታው ማቲ ኢሜታና።
REV 17:13 ኤንታ ኡባስ ኢሲ ቆፋይ ዴዔስ፤ ኤንቲ ባንታ ዎልቃኔ ባንታ ማታ ዶዓስ ኢማና።
REV 17:14 ኤንቲ ዶርሳራ ኦሌታና፥ ሺን ዶርሳይ ጎዳታ ጎዳኔ ካዎታ ካዎ ጊዲያ ጊሾ ኢ ፄጊዳይሳቲ፥ ዶሪዳይሳቲኔ ኣማኔቲዳይሳቲ ሄ ካዎታ ፆናና» ያጊስ።
REV 17:15 ኪታንቾይ ቃሲካ ታኮ፥ «ላይማቲያራ ኡቲዳ ሄ ኔኒ ቤዒዳ ሃꬃቲ ያራታ፥ ካዎቴꬃታ፥ ዜሬꬃታኔ ዱማ ዱማ ዶናን ኦዴቴይሳታ።
REV 17:16 ቃሲ ኔኒ ቤዒዳ ታሙ ካጬይኔ ዶዓይ ላይማቲያሮ ኢፃና። ኤንቲ ኢው ዴዒያ ኡባባ ኤካና። ቃሲ ኢዮ ካሎ ኣሻናኔ ኢ ኣሹዋ ሚዲጋና፤ ያቲዲ ኤንቲ ኢዮ ታማን ፁጋና።
REV 17:17 ሂዛ፥ ፆሳ ቃላይ ፖሌታና ጋካናው ኤንታ ቆፋይ ኢሲኖ ጊዳና ሜላ ኤንቲ ባንታ ኣይሲያ ዎልቃ ዶዓስ ኢማናዳኔ ፆሳይ ቆፒዳይሳ ኤንቲ ኦꬃናዳ ኤንታ ዎዛናን ፆሳይ ኣሞ ዎꬂስ።
REV 17:18 ሄ ኔኒ ቤዒዳ ማጫሲያ ሳዓ ካዎታ ሃሪያ ጊታ ካታሚው» ያጊስ።
REV 18:1 ያቲዲ፥ ጊታ ማቲ ዴዒያ ሃራ ኪታንቾይ ሳሎፔ ዎꬊሺን ታ ቤዓስ። ሄ ኪታንቹዋ ቦንቾይ ሳዓ ፖዒሲስ።
REV 18:2 ሄ ኪታንቾይ ባ ቃላ ꬎቁ ኦꬂዲ፥ «ኢያ ኩንዳሱ! ጊታ ባቢሎኔይ ኩንዳሱ! ባቢሎኔይ ቱና ኣያናቲ ኣቂያ ቤሲ ጊዳሱ። ዱማ ዱማ ኢታባታስ ኬꬄ ጊዳሱ፤ ቱና ካፎቲኔ ዶዓቲ ሼምፒያ ቤሲ ጊዳሱ።
REV 18:3 ኣሳ ዜሬꬂ ኡባ ባ ላይማቴꬃ ዎይኒያ ኡሻሱ። ሳዓ ካዎቲ ኢራ ላይማቲዶሶና። ኢ ሚኮቴꬃፌ ዴንዶይሳን ቢታን ዴዒያ ዛልዓንቾቲ ዱሬቲዶሶና» ያጊስ።
REV 18:4 ሄሳፌ ጉዬ፥ ታ ሳሎፔ ሃይሳዳ ያጊያ ሃራ ቃላ ሲዓስ። «ኢ ናጋራ ኢራ ኮፆና ሜላኔ፥ ኢያ ኤካናው ዴዒያ ሴራ ሂንቴ ኤኮና ሜላ፥ ታ ዴሪያው ኢፔ ኬዪቴ።
REV 18:5 ሂዛ፥ ኢ ናጋራይ ሳሎ ጋካናው ዶሬቲስ። ፆሳይ ኢ ናቁዋ ኣኬኪስ።
REV 18:6 ኢያ ኢሚዳይሳ ሜላ ዛሪዲ ኢው ኢሚቴ። ኢያ ኦꬂዳ ኦሱዋስ ናምዑ ኩሼ ኢው ዛሪቴ። ኢያ ጊጊሲዳ ኡሻ ቦላ ሂንቴ ናምዑ ኩሼ ማꬆያ ኡሻ ኢ ፁዓን ኩንꬂቴ።
REV 18:7 ኢያ ቦንቼቲዳይሳዳኔ ኢው ኢንጄቲዳይሳ ሜላ፥ ኢዮ ሜቶꬂቴኔ ካዮዪቴ። ኢያ ባ ዎዛናን፥ ‹ታኒ ካዌዳ ኡታስ፤ ታ ኣዚኒ ባይና ማጫስ ጊዲኬ፤ ታኒ ኡባካ ካዮቲኬ› ያጋሱ።
REV 18:8 ሄሳ ጊሾ፥ ቦሻ ኡባይ፥ ሃርጌይ፥ ካዮይኔ ኮሺ ኢዮ ኢሲ ጋላስ ኦይካና። ቃሲ ኢያ ታማን ፁጌታና፤ ኣይስ ጊኮ፥ ኢ ቦላ ፒርዲያ ፆሳይ ዎልቃማ» ያጊስ።
REV 18:9 «ኢራ ላይማቲዳይሳቲኔ ኢ ሚኮቴꬃን ዴዒዳ፥ ኣላሚያ ካዎቲ ሄ ካታሚያ ፁጌቲን ኬያ ጩያ ቤዒዳ ዎዴ ኢው ዋሲዲ ዬካና።
REV 18:10 ኤንቲ ሄ ካታሜ ዋያ ቤዒዲ ያዪዳ ጊሾ ሃኪ ኤቂዲ፥ ‹ሃ ጊታ ካታሜ! ዎልቃማ ካታሜ! ባቢሎኔ፥ ኔና ኣዬ! ኔኒ ኢሲ ሳቴ ጊዶን ኔ ፒርዳ ኤካዳሳ› ያጋና።
REV 18:11 «ኤንታ ማርካቢያ ጫና ሂዛፔ ሻሚያ ኣሲ ባይና ጊሾ ሳዓን ዴዒያ ዛልዓንቾቲ ሄ ካታሜስ ዋሳናኔ ካዮታና።
REV 18:12 ኤንታ ዎርቃ፥ ቢራ፥ ቦንቾ ሹቻ፥ ኢንቆ ጊያ ኣልዖ ሹቻ፥ ካሎሴ ማዖ፥ ሊኖ ማዖ፥ ሃሬ ማዖ፥ ዞዖ ማዖ፥ ዱማ ዱማ ሳዎ ሚꬃ፥ ዛሌ፥ ኣልዖ ሚꬃ፥ ናሴ ቢራታ፥ ጎሌ ሹቹ፥
REV 18:13 ቃራፋ፥ ቂማሜ፥ ኢፃኔ፥ ካርቤ፥ ሺቶ፥ ዎይኔ፥ ዛይቴ፥ ሊቆ ꬊሌ፥ ጊስቴ፥ ሜሄ፥ ዶርሴ፥ ፓራ፥ ፓራ ጋሬ፥ ኣይሌታኔ ሃራ ኣሳታ ሻሚያ ኦኒካ ባዋ።
REV 18:14 «ዛልዓንቾቲ ማጫሴኮ፥ ‹ኔኒ ኣሞቲዳ ሎዖባ ኡባይ ኔፔ ꬋይስ። ኔ ኣቆይኔ ኣሌቄቲዳባ ኡባይ ኔፔ ሃኪስ። ኔኒ ዛራዳ ኤንታ ኡባ ዴማካ› ያጊዶሶና።
REV 18:15 ሄ ካታማን ዛልዒዲ ዱሬቲዳ ዛልዓንቾቲ ኢ ሜቱዋ ባቢዲ ኢፔ ሃኪዲ ኤቃና። ኤንቲ ዬካናኔ ካዮታና።
REV 18:16 ቃሲ፥ ‹ሊኖ ማዖ፥ ካሎሴ ማዖኔ ዞዖ ማዖ ማዓዳ፥ ዎርቃን፥ ቦንቾ ሹቻኒኔ ኢንቆ ጊያ ኣልዖ ሹቻን ኣሌቄቲዳ፥ ሄ ጊታ ካታሜስ ኣዬ!
REV 18:17 ሃይሳ ሜላ ጊታ ሻሎ ኡባይ ኢሲ ሳቴ ጊዶን ꬋይስ› ያጊዶሶና። «ማርካቢያ ላጊያ ኡባይ፥ ማርካቢያን ቢያ ኡባይ፥ ማርካቢያ ቦላ ኦꬂያ ኡባይኔ ኣባን ዛልዒያ ኡባይ ሃኪ ኤቂዶሶና።
REV 18:18 ሄ ካታሚያ ፁጌቲን ኬያ ጩያ ቤዒዳ ዎዴ ‹ሃ ጊታ ካታሚው ዳኒያ ሃራ ካታሚ ዴዒሻ?› ያጊዶሶና።
REV 18:19 ኤንቲ ባንታ ሁዔን ባና ቆሊዲ፥ ዋሲዶሶናኔ ካዮቲዶሶና። ‹ኣባ ቦላ ማርካቤቲ ዴዒያ ኡባይ፥ ኢ ሻሉዋን ዱሬቲዳ ኡባይ፥ ሄ ካታሚያ ኢሲ ሳቴን ꬋዪዳ ጊሾ ኣዬ! ኣዬ!
REV 18:20 ሳሉዋው፥ ኢ ꬋዩዋን ኡፋይታ! ጌሻቶ፥ ሃዋሬቶ፥ ናቤቶ፥ ፆሳይ ሂንቴ ጊሾ ኢ ቦላ ፒርዲዳ ጊሾ ኡፋይቲቴ።› ያጊዶሶና።»
REV 18:21 ያቲን፥ ሚኖ ኪታንቾይ ዎፃ ዳኒያ ጊታ ሹቹ ዴንꬂዲ ኣባን ሆሊሼ፥ «ጊታ ካታሚያ ባቢሎኔይ ዎልቃን ሆሌታዳ ሃይሳዳ ኩንዳና፤ ኢያ ሃቺፌ ጉዬ ኡባካ ቤንቱኩ።
REV 18:22 ዲꬂ ዲፄይሳቲኔ ዬፄይሳቲ፥ ሱሱልዔኔ ሞይዜ ፑኔይሳቲ፥ ሂዛፔ ጉዬ ኔ ጊዶን ኡባካ ሲዔቶኮና። ኣይ ኮቻ ዛልዔ ዛልዒያ ኣሲካ ኔ ጊዶን ቤንቴና። ዎፃ ጊርሲ ሂዛፔ ጉዬ ኔ ጊዶን ሲዔቴና።
REV 18:23 ፆምፔ ፖዖይ ዛሪዲ ኔ ጊዶን ፖዔና። ማቾ ኤኬይሳኔ ኣዚና ጌሊያሪ ቃሊ ሂዛፔ ጉዬ ኔ ጊዶን ሲዔቴና። ኔ ዛልዓንቾቲ ቢታ ኡባን ኤሬቲዳ ዎልቃማታ። ኔ ቢታን ካዎቴꬃታ ኡባ ጪማዳሳ» ያጊስ።
REV 18:24 ናቤታ ሱꬃይ፥ ጌሻታ ሱꬃይኔ ቢታ ቦላ ሃይቂዳ ኣሳ ኡባ ሱꬃይ ኢ ጊዶን ቤንቲዳ ጊሾ ባቢሎኔይ ፒርዴታሱ።
REV 19:1 ያቲን፥ ሳሎን ዳሮ ኣሳይ፥ «ፆሳይ ጋላቴቶ! ኣቶቴꬃይ፥ ቦንቾይኔ ዎልቃይ ኑ ፆሳስ ጊዶ።
REV 19:2 ኢያ ፒርዳይ ቱማኔ ፂሎ። ሳዓ ቱኒሲዳ ኢታ ላይሚው ፆሳይ ፒርዲስ። ፆሳይ ባ ኣይሌታ ሱꬃ ኢፔ ኣቺስ» ያጊሺን ሲዓስ።
REV 19:3 ሄ ኣሳይ ዛሪዲ ባንታ ቃላ ꬎቁ ኦꬂዲ፥ «ፆሳ ጋላቲ ጋኮ። ሄ ካታሚያ ሜሪናው ጩያሼ ዳና» ያጊዶሶና።
REV 19:4 ላታማኔ ኦይዱ ጪማቲኔ ዴዖን ዴዒያ ኦይዱ ሜꬌቴꬃቲ ኣራታን ኡቲዳ ፆሳስ ጉፋኒዲ፥ «ኣሚንዒ! ፆሳ ጋላቲ ጋኮ» ያጊዲ ጎይኒዶሶና።
REV 19:5 ያቲን፥ «ፆሳ ኣይሌቲ፥ ፆሴ ያያ ጉꬂኔ ጊቲ ኡባይ፥ ኑ ፆሳ ጋላቲቴ» ያጊያ ቃላይ ኣራታፔ ኬዪስ።
REV 19:6 ያቲን፥ ዳሮ ኣሳዳ ዎጫሚያ፥ ዎልቃማ ሻፋዳ ጉሚያ፥ ዳዳዳ ዴቺያ ጊርሳይ፥ «ፆሳ ጋላቲ ጋኮ፤ ኑ ጎዳይ፥ ኡባፌ ዎልቃማ ፆሳይ ካዎቲስ።
REV 19:7 ዶርሳ ያጋኖይ ጋኪዳ ጊሾኔ ኢያ ጌሊያራ ጊጊዳ ጊሾ ኑ ኡፋይቶስ፥ ጋላቶሲኔ ዶርሳ ቦንቾስ።
REV 19:8 ጌሎስ ጊጊዳራ ጶሊያኔ ጌሺ ጊዲዳ ሊኖ ማዖ ማዓና ሜላ ኢው ኢሜቲስ» ያጊሺን ታ ሲዓስ። (ሊኖ ማዖይ ጌሻታ ፂሎ ኦሶ ሌሚሶ።)
REV 19:9 ሄሳፌ ጉዬ፥ ኪታንቾይ ታኮ፥ «ዶርሳ ያጋኑዋ ፄጌቲዳይሳቲ ኣንጄቲዳይሳታ» ጋዳ ፃፋ። ሄ ኪታንቾይ ጉጂዲ፥ «ሃይሲ ፆሳ ቱማ ቃላ» ያጊስ።
REV 19:10 ሄ ዎዴ ታ ኢያ ጎይናናው ኢያ ቶሁዋ ቦላ ኩንዳስ። ሺን ኢ፥ «ሄሳ ኦꬆፋ! ታኒ ዬሱሳባ ማርካቲያ ኔ ሜላኔ ኔ ኢሻታ ሜላ። ኔ ፆሳ ጎይና» ያጊስ። ሂዛ፥ ዬሱሳባ ማርካቲዳይሳታስ ናቤቴꬃ ኣያኒ ዴዔስ።
REV 19:11 ያቲን፥ ሳሎይ ዶዬቲን፥ ያን ቦꬃ ፓሪ ዴዔይሳ ቤዓስ። ሄ ፓራ ቶጊዳይሲ ኣማኔቲዳይሳኔ ቱማንቾ ጌቴቴስ። ኢ ፂሎቴꬃን ፒርዴሲኔ ኦሌቴስ።
REV 19:12 ኢያ ኣይፌይ ታማ ላጮ ዳኔስ፤ ኢያ ሁዔን ዳሮ ካላቺ ዴዔስ። ኢያ ቦላ ኢ ኣቲን ሃሪ ኦኒካ ኤሮና ፃፌቲዳ ሱንꬂ ዴዔስ።
REV 19:13 ኢ ሱꬃን ሙኬቲዳ ማዖ ማዒስ፤ ኢያ ሱንꬃይካ ፆሳ ቃላ።
REV 19:14 ጶሊያኔ ጌሺ ጊዲዳ ሊኖ ማዖ ማዒዳ ሳሎ ኦላንቾቲ ቦꬃ ፓራታ ቶጊዲ ኢያ ጌዶ ካሎሶና።
REV 19:15 ካዎቴꬃታ ቃንፂያ ማሺ ኢያ ዶናፔ ኬዬስ። ኢ ቢራታ ፃምዓን ኣሳ ሃራና። ኡባፌ ዎልቃማ ፆሳ ሃንቆ ዎይኔ ኡሻ ጉምዒያ ቤሳ ኢ ዬꬋና።
REV 19:16 ኢያ ማዑዋ ቦላኔ ኢያ ዎዲሪያ ቦላ፥ «ካዎታ ካዉዋኔ ጎዳታ ጎዳ» ያጊያ ሱንꬃይ ፃፌቲስ።
REV 19:17 ሄሳፌ ጉዬ፥ ኢሲ ኪታንቾይ ኣዋ ቦላ ኤቂዳይሳ ቤዓስ። ሄ ኪታንቾይ ሳሎራ ፒራꬊያ ካፎ ኡባስ ባ ቃላ ꬎቁ ኦꬂዲ፥ «ሃ ዪቴ! ፆሳ ጊቢራ ማናው ኢሲ ቤሲ ሺቂቴ።
REV 19:18 ዪዲ ካዎታ ኣሹዋ፥ ሻላቃታ ኣሹዋ፥ ዎታዳሬታ ኣሹዋ፥ ፓራታ ኣሹዋ፥ ፓራታ ቶጌይሳታ ኣሹዋ፥ ኣሳ ኡባ ኣሹዋ፥ ኣይሌታ ኣሹዋ፥ ዎማኖታ ኣሹዋ፥ ጊታታኔ ጉꬃታ ኣሹዋ ሚቴ» ያጊስ።
REV 19:19 ዶዓይ፥ ፓራ ቶጊዳይሳራኔ ኢያ ኦላንቾታራ ኦሌታናው ሳዓ ካዎቲኔ ኤንታ ኦላንቾቲ ኢሲ ቤሲ ሺቂዳሺን ቤዓስ።
REV 19:20 ሺን ሄ ዶዓይኔ ኢያ ሱንꬃን ማላታታ ኦꬂዳ ዎርዶ ናቤይ ኢያራ ኢሲፌ ኦይኬቲስ። ሄ ማላታታን ዶዓ ማላይ ዴዔይሳታኔ ኢያ ሚሲሊያ ጎይኔይሳታ ኢ ባሌꬂስ። ዶዓይኔ ዎርዶ ናቤይ ናምዓይካ ዲኔን ኤፂያ ታማ ኣባን ፓፃ ዬጌቲዶሶና።
REV 19:21 ኣቲዳይሳቲ ፓራ ቶጊዳይሳ ዶናፔ ኬያ ማሻን ሃይቂዶሶና። ካፎቲ ኡባይ ኤንታ ኣሹዋ ሚዲ ካሊዶሶና።
REV 20:1 ዛዊ ባይና ኦላ ቁልፒያኔ ጊታ ሳንꬃላታ ባ ኩሼን ኦይኪዳ ኢሲ ኪታንቾይ ሳሎፔ ዎꬊሺን ቤዓስ።
REV 20:2 ኢ ዳዊያ ኦይኪዲ ሙኩሉ ላይꬃስ ቃቺስ። ሄ ዳዌይ ኮይሮ ሾሻ፥ ዳቡሎሳ ዎይኮ ፃላሄ።
REV 20:3 ኪታንቾይ ዛዊ ባይና ኦላን ኢያ ዬጊዲ፥ ሙኩሉ ላይꬂ ዉራና ጋካናው ካዎቴꬃታ ዛሪ ባሌꬆና ሜላ ቁልፔን ጎርዲዲ ኣታሚስ። ሄሳፌ ጉዬ፥ ዳዌይ ጉꬃ ዎዴስ ቢሌታናው ቤሴስ።
REV 20:4 ሄሳፌ ጉዬ፥ ኣራታታኔ ኣራታታ ቦላ ኡቲዲ ፒርዳና ሜላ ማቲ ኢሜቲዳይሳታ ቤዓስ። ዬሱሳስ ማርካቲዳ ጊሾኔ ፆሳ ቃላ ኦዲዳ ጊሾ ባንታ ቆꬊያ ጎይሬቲዳ ኣሳ ሼምፑዋ ቤዓስ። ኤንቲ ዶዓ ዎይኮ ዶዓ ሚሲሊያ ጎይኒቦኮና። ኤንቲ ዶዓ ማላ ባንታ ሶምዖን ዎይኮ ባንታ ኩሼን ዎꬂቦኮና። ኤንቲ ሃይቆፔ ዴንዲዲ ኪሪስቶሳራ ኢሲፌ ሙኩሉ ላይꬂ ሃሪዶሶና።
REV 20:5 ሃይሲ ኮይሮ ዴንዱዋ፤ ኣቲዳ ሃንኮ ሃይቂዳይሳቲ ሙኩሉ ላይꬃይ ዉራና ጋካናው ሃይቆፔ ዴንዲቦኮና።
REV 20:6 ኮይሮ ዴንዱዋስ ቃዲ ዴዔይሳቲ ኣንጄቲዳይሳታኔ ጌሻታ። ኤንታ ቦላ ናምዓንꬆ ሃይቁዋስ ዎልቂ ባዋ። ኤንቲ ፆሳሲኔ ኪሪስቶሳስ ካሂኔ ጊዳና፤ ኢያራ ኢሲፌ ሙኩሉ ላይꬂ ሃራና።
REV 20:7 ሙኩሉ ላይꬃይ ዉሪዳፔ ጉዬ ፃላሄይ ቃሾፔ ቢሌታና።
REV 20:8 ኢ ሳዓ ጋፃፔ ጋፃ ጋካናው ዴዒያ ካዎቴꬃታ፥ ኤንቲካ፥ ጎጌኔ ማጎጌ ጌቴቴይሳታ ባሌꬂዲ ኦላስ ሺሻናው ኬያና። ኤንታ ፓይዶይ ኣባ ጋፃን ዴዒያ ሻፌ ሜላ።
REV 20:9 ኤንቲ ቢታ ኡባን ላሌቲዲ፥ ጌሻታ ሄራኔ ፆሳይ ዶሲያ ካታማ ቴቂዶሶና። ሺን ታሚ ሳሎፔ ዎꬊዲ ኤንታና ሚስ።
REV 20:10 ኤንታ ባሌꬂዳ ፃላሄይ፥ ዶዓይኔ ዎርዶ ናቤይ ዬጌቲዳ ኤፂያ ዲኔ ታማ ኣባን ዬጌቲስ። ኤንቲ ቃማኔ ጋላስ ሜሪናው ፓፃ ካዔታና።
REV 20:11 ሄሳፌ ጉዬ፥ ጊታ ቦꬃ ኣራታ ቦላ ኡቲዳይሳ ቤዓስ። ሳዒኔ ሳሎይ ኢያ ሲንꬃፌ ባቃቲዶሶና፤ ኤንቲ ዛሪ ቤንቲቦኮና።
REV 20:12 ሃይቂዳይሳቲ፥ ጊታቲኔ ጉꬃቲ ኣራታ ሲንꬃን ኤቂዳይሳታ ቤዓስ፤ ማፃፋቲ ዶዬቲዶሶና፤ ቃሲ ዴዖ ማፃፋ ጊዲዳ ሃራ ማፃፊ ዶዬቲስ። ሃይቂዳይሳቲ ማፃፋን ፃፌቲዳ ባንታ ኦሱዋዳ ፒርዳ ኤኪዶሶና።
REV 20:13 ኣባይ ባ ጊዶን ዴዒያ ሃይቂዳይሳታ ኢሚስ፤ ሃይቆይኔ ሲዖሌይ ባንታ ጊዶን ዴዒያ ሃይቂዳይሳታ ኢሚዶሶና። ኢሲ ኢሲ ኣሲ ባ ኦሱዋዳ ፒርዳ ኤኪስ።
REV 20:14 ያቲን፥ ሃይቆይኔ ሲዖሌይ ታማ ኣባን ዬጌቲዶሶና። ሄ ታማ ኣባይ ናምዓንꬆ ሃይቆ።
REV 20:15 ዴዖ ማፃፋን ኢያ ሱንꬃይ ፃፌቲቦና ኦኒካ ታማ ኣባን ዬጌቲስ።
REV 21:1 ታኒ ኦራꬃ ሳሎኔ ኦራꬃ ሳዓ ቤዓስ። ኮይሮ ሳሎይኔ ኮይሮ ሳዓይ ꬋይስ፤ ኣባይካ ꬋይስ።
REV 21:2 ጌሻ ካታሚያ፥ ኦራꬃ ዬሩሳላሜይ፥ ኣዚና ጌላናው ኣሌቄታዳ ጊጋዳ ዴዒያ ማጫሳዳ ሳሎፔ ፆሳ ማታፔ ዱጌ ዎꬊሺን ቤዓስ።
REV 21:3 ኣራታፔ ሃይሳዳ ያጊዲ፥ ኦዲያ ጊታ ቃላ ሲዓስ፤ «ፆሳ ኬꬃይ ኣሳራ ዴዔስ፤ ፆሳይ ባ ቦንቹዋራ ኣሳራ ኢሲፌ ዳና። ኤንቲ ኢያ ዴሬ ጊዳና፤ ፆሳይ ባ ሁዔን ኤንታራ ዳና፤ ኢ ኤንታ ፆሳ ጊዳና።
REV 21:4 ፆሳይ ኤንታ ኣይፌፔ ኣፉꬃ ኡባ ቁቻና። ሂዛፔ ሃይቆይ ዎይኮ ካዮይ ዎይኮ ዋሶይ ዎይኮ ዋዬይ ዴና። ጋልዓ ኡባይ ኣꬊስ» ያጊስ።
REV 21:5 ኣራታ ቦላ ኡቲዳይሲ፥ «ታኒ ኡባ ኦራꬂ ኦꬃና» ያጊስ። ቃሲ ዛሪዲ ታኮ፥ «ታኒ ኦዴይሲ ኣማንꬄይሳኔ ቱማ ጊዲያ ጊሾ ፃፋ» ያጊስ።
REV 21:6 ቃሲ ታኮ፥ «ፖሌቲስ! ታኒ ኣልፋኔ ኦሜጋ፤ ዶሜꬂኔ ፖሎ። ሳሞቲዳ ኦናካ ዴዖ ሃꬃ ፑልቱዋፌ ጪጊ ባይና ጮ ኡሻና።
REV 21:7 ፆኒያ ኦኒካ ሄሳ ኡባ ላታና፤ ታኒ ኢያው ፆሳ ጊዳና፤ ኢካ ታ ናዓ ጊዳና።
REV 21:8 ሺን ያሻንቾታ፥ ኣማኔቶናይሳታ፥ ቱናታ፥ ሼምፖ ዎꬌይሳታ፥ ላይማቴይሳታ፥ ቢቴይሳታ፥ ኤቃ ጎይኔይሳታኔ ዎርዳንቾታ ቃዳይ ዲኔይ ኤፂያ ታማ ኣባን ጊዳና። ሄሲ ናምዓንꬆ ሃይቆ» ያጊስ።
REV 21:9 ላፑን ዉርሴꬃ ቦሻቲ ኩሚዳ ላፑን ፁዓታ ኦይኪዳ ላፑን ኪታንቾታፔ ኢሶይ ታኮ ዪዲ፥ «ሃያ፥ ታኒ ኔና ጌሎስ ጊጊዳ ዶርሳ ማቺው ቤሳና» ያጊስ።
REV 21:10 ኪታንቾይ ታና ዳሮ ꬎቃ ዴሪያ ሁዔ ጌሻ ኣያናን ኬሲዲ፥ ጌሻ ካታማይ፥ ዬሩሳላሜይ፥ ሳሎፔ ፆሳ ማታፔ ዱጌ ዎꬊሺን ቤሲስ።
REV 21:11 ሄ ካታማይ ፆሳ ቦንቾን ፖዔስ። ሄ ካታማ ፖዖይ ያስጲዴ ጊያ ኣልዖ ሹቻ ሜላ፤ ጌሻ ቢሪሌዳ ጶሌስ።
REV 21:12 ሄ ካታማ ዲርሳይ ዎልቃማኔ ኣዱሴ። ኢያው ታማኔ ናምዑ ፔንጌቲኔ ሄ ፔንጌታ ናጊያ ታማኔ ናምዑ ኪታንቾቲ ዴዖሶና። ፔንጌታ ቦላ ታማኔ ናምዑ ኢስራዔሌ ዜሬꬃታ ሱንꬃይ ፃፌቲስ።
REV 21:13 ዶሎሃ ባጋራ ሄꬑ ፔንጌቲ፥ ፑዴሃ ባጋራ ሄꬑ ፔንጌቲ፥ ዱጌሃ ባጋራ ሄꬑ ፔንጌቲኔ ዉሎሃ ባጋራ ሄꬑ ፔንጌቲ ዴዖሶና።
REV 21:14 ካታማ ጊምቤ ዲርሳይ ታማኔ ናምዑ ሹቻ ባሶታ ቦላ ኤቂስ። ኤንታ ቦላ ታማኔ ናምዑ ዶርሳ ሃዋሬታ ሱንꬃይ ፃፌቲስ።
REV 21:15 ታው ኦዲያ ኪታንቹዋስ፥ ካታማ፥ ኢያ ፔንጌታኔ ኢያ ዲርሳ ዋꬊያ ዎርቃ ፃምዓይ ዴዔስ።
REV 21:16 ካታማስ ኦይዱ ማዛኔቲ ዴዖሶና፤ ካታማ ጌሳይኔ ጎምፓይ ኢሲ ጊና። ኪታንቾይ ካታማ ባ ፃምዓን ዋꬊን፥ ካታማይ ታማኔ ናምዑ ሙኩሉ ኪሎ ሚቲሬ ጊዲስ፤ ካታማ ጌሳይ፥ ጎምፓይኔ ꬎቃቴꬃይ ኢሲ ጊና።
REV 21:17 ኪታንቾይ ቃሲ ዲርሳ ዋꬊን፥ ኪታንቾይ ጎዔቲያ ኣሳ ኩሼን ኢሲ ፄታኔ ኦይታማኔ ኦይዱ ዋꬋ ጊዲስ።
REV 21:18 ካታማ ዲርሳይ ያስጲዴ ጊያ ሹቻን ዲሬቲስ። ካታማይ ማስቶቴዳ ጶሊያ ጌሻ ዎርቃን ኦሴቲስ።
REV 21:19 ካታማ ዲርሳ ባሶይ ኡባ ቆሞ ቦንቼቲዳ ሹቻን ኣሌቄቲስ። ኮይሮ ሂፄቲዳ ሹቻይ ያስጲዴ፥ ናምዓንꬆይ ሳምፔሬ፥ ሄꬓንꬆይ ኬልቄዶኔ፥ ኦይዳንꬆይ ባሉሬ፥
REV 21:20 ኢቻሻንꬆይ ሳርዶንኪሴ፥ ኡሱፑንꬆይ ሳርዲዮኔ፥ ላፑንꬃይ ኪሪስቲሎቤ፥ ሆስፑንꬆይ ቢሪሌ፥ ኡዱፉንꬆይ ቶጳዚዮኔ፥ ታማንꬆይ ኪሪስጲራሲሴ፥ ታማኔ ኢሲንꬆይ ያኪንቴ፥ ታማኔ ናምዓንꬆይ ኣሜቴስፂኖሴ።
REV 21:21 ታማኔ ናምዑ ፔንጌታስ ታማኔ ናምዑ ኢንቆ ጊያ ኣልዖ ሹቺ ዴዔስ። ኢሲ ኢሲ ፔንጌይ ኢሲ ኢንቆን ኦሴቲስ። ካታማ ዎጋ ኦጌይ ማስቶቴዳ ጶሊያ ጌሻ ዎርቃፌ ኦሴቲስ።
REV 21:22 ጎዳይ፥ ኡባፌ ዎልቃማ ፆሳይኔ ዶርሳይ ካታማስ ኬꬄ ጊዲያ ጊሾ ታ ሄ ካታማን ፆሳ ኬꬂ ቤዓቢኬ።
REV 21:23 ፆሳ ቦንቾይ ሄ ካታማስ ፖዒያ ጊሾኔ ዶርሳይ ኢያው ፆምፔ ጊዲያ ጊሾ ካታማስ ኣዋ ዎይኮ ኣጌና ፖዖ ኮሼና።
REV 21:24 ካዎቴꬃቲ ሄ ካታማ ፖዖን ሃሙታና፤ ካዎቲካ ባንታ ቦንቹዋ ያ ኤሃና።
REV 21:25 ቃሚ ያን ባይና ጊሾ ካታማ ፔንጌቲ ኡባ ዎዴ ዶያ ጊዳና፤ ጎርዴቶኮና።
REV 21:26 ካዎቴꬃታ ጊታቴꬃይኔ ቦንቾይ ሄ ካታማ ያና።
REV 21:27 ዶርሳ ዴዖ ማፃፋን ሱንꬃይ ፃፌቲዳይሳታ ፃላሊ ኣቲን ቱናባ ዎይኮ ዬላያባ ኦꬄይ ዎይኮ ዎርዶቴይ ኦኒካ ሄ ካታማ ጌሌና።
REV 22:1 ያቲዲ፥ ኪታንቾይ ታና ፆሳ ካዎቴꬃ ኣራታፔኔ ዶርሳ ካዎቴꬃ ኣራታፔ ጎጊያ ማስቶቴዳ ጶሊያ ዴዖ ሃꬃ ሻፋ ቤሲስ።
REV 22:2 ሄ ሻፋይ ካታማ ኦጊያ ጊዶራ ዱጌ ጎጌስ። ሻፋፔ ሄፊንꬃ ባጋራኔ ሃፊንꬃ ባጋራ ኣጌናን ኢሲ ቶሆ፤ ላይꬃን ታማኔ ናምዑ ቶሆ ኣይፊያ ዴዖ ሚꬂ ዴዔስ። ሄ ሚꬃ ቦንጮይ ካዎቴꬃታ ኡባ ሃርጌፌ ፓꬄስ።
REV 22:3 ሄ ካታማን ኣይቢ ቃንጌꬂካ ዴና። ፆሳ ካዎቴꬃ ኣራታይኔ ዶርሳ ካዎቴꬃ ኣራታይ ሄ ካታማን ዳና። ፆሳ ኣይሌቲ ፆሳስ ኦꬃና።
REV 22:4 ኤንቲ ኢያ ሶምዑዋ ቤዓና፤ ኢያ ሱንꬃይ ኤንታ ሶምዖን ፃፌታና።
REV 22:5 ሂዛፔ ቃሚ ዴና፤ ጎዳ ፆሳይ ኤንታው ፆምፔ ጊዲያ ጊሾ ኤንታው ፆምፔ ዎይኮ ኣዋ ፖዖ ኮሼና። ኤንቲ ሜሪ ሜሪናው ካዎታና።
REV 22:6 ኪታንቾይ ታኮ፥ «ሃ ታ ኦዲያ ቃላይ ቱማኔ ኣማንꬄይሳ። ጎዳይ፥ ናቤታ ባ ጌሻ ኣያናን ኪቲያ ፆሳይ፥ ማታን ሃናናባ ባ ኣይሌታ ቤሳናው ባ ኪታንቹዋ ኪቲስ» ያጊስ።
REV 22:7 ዬሱሲ፥ «ሄኮ ታ ኤሌሳዳ ያና፤ ሃ ማፃፋን ዴዒያ ቲንቢቴ ቃላ ናጊያ ኦኒካ ኣንጄቲዳይሳ» ያጊስ።
REV 22:8 ታኒ፥ ዮሃኒሲ፥ ሄ ኡባባ ሲዓስ፤ ቤዓስ። ታኒ ሄሳ ሲዒዳ ዎዴኔ ቤዒዳ ዎዴ ሄሳ ታና ቤሲዳ ኪታንቹዋ ጎይናናው ኢያ ቶሁዋ ቦላ ኩንዳስ።
REV 22:9 ሺን ኪታንቾይ ታኮ፥ «ሄሳ ኦꬆፋ! ታኒ ኔዳ፥ ናቤታዳ ኔ ኢሻታዳኔ ሃ ማፃፋን ዴዒያ ኡባ ኪቴቲያ ኣይሌታ ሜላ፤ ፆሳ ጎይና» ያጊስ።
REV 22:10 ኪታንቾይ ዛሪዲ፥ «ሃ ኡባይ ፖሌቲያ ዎዴይ ማታቲዳ ጊሾ ሃ ማፃፋን ፃፌቲዳ ቲንቢቴ ቃላ ማታሜን ጎርዶፋ።
REV 22:11 ኢታ ኦꬄይ ጉጂዲ ኢታ ኦꬆ፤ ቱኔይ ጉጂዲ ቱኖ። ሎዖ ኦꬄይ ጉጂዲ ሎዖ ኦꬆ፤ ጌዬይ ጉጂዲ ጌዮ» ያጊስ።
REV 22:12 ዬሱሲ፥ «ሄኮ፥ ታኒ ኤሌሳዳ ያና። ኢሱዋስ ኢሱዋስ ኢያ ኦሱዋዳ ኢማናው ታ ዎይቶይ ታራ ዴዔስ።
REV 22:13 ታኒ ኣልፋኔ ኦሜጋ፤ ኮይሮኔ ዉርሴꬂ፤ ዶሜꬂኔ ፖሎ።
REV 22:14 «ባንታ ማዑዋ ሜጪዲ ጌሼይሳቲ ኣንጄቲዳይሳታ። ዴዖ ሚꬄ ኣይፊያ ማናዉኔ ካታማ ፔንጊያራ ጌላናው ኤንታው ማቲ ኢሜቲስ።
REV 22:15 ሺን ካናቲ፥ ቢቴይሳቲ፥ ላይማቴይሳቲ፥ ሼምፖ ዎꬌይሳቲ፥ ኤቃ ጎይኔይሳቲ፥ ዎርዶ ዶሴይሳቲኔ ኦꬄይሳቲ ካሬን ዴዖሶና።
REV 22:16 «ታኒ፥ ዬሱሲ፥ ሃ ማርካቴꬃ ሂንቴው፥ ዎሳ ኬꬃታስ ኦዳና ሜላ ታ ኪታንቹዋ ኪታስ። ታኒ ዳዊቴ ሼሺኔ ዜሬꬂ። ታኒ ፖዒያ ጉራ ባካላ» ያጊስ።
REV 22:17 ጌሻ ኣያናይኔ ጌላናው ጊጊዳ ማጫሲያ፥ «ሃያ» ያጎሶና። ቃሲ ሃይሳ ሲዒያ ኦኒካ፥ «ሃያ» ያጎ። ሳሞቲዳ ኦኒካ ሃዮ፤ ዴዖ ሃꬃ ኮያ ኦኒካ ጮ ኤኮ።
REV 22:18 ታኒ ሃ ማፃፋን ፃፌቲዳ ቲንቢቴ ቃላ ሲዒያ ኦናካ ዞራይስ። ኦኒካ ሃ ቃላ ቦላ ኢሲባ ጉጂኮ፥ ፆሳይ ሃ ማፃፋን ፃፌቲዳ ቦሻ ኢያ ቦላ ጉጃና።
REV 22:19 ኦኒካ ማፃፋን ዴዒያ ቲንቢቴ ቃላፔ ኢሲባ ፓጪሲኮ፥ ፆሳይ ሃ ማፃፋን ፃፌቲዳ ዴዖ ሚꬃ ኣይፊያፔኔ ጌሻ ካታማፔ ኢያ ቃዳ ፓጪሳና።
REV 22:20 ሃ ኡባ ማርካቴይሲ፥ «ቱማ፥ ታኒ ኤሌሳዳ ያና» ያጌስ። ኣሚንዒ፤ ጎዳ ዬሱሳ፥ ሃያ።
REV 22:21 ጎዳ ዬሱስ ኪሪስቶሳ ኣꬎ ኬሃቴꬃይ ሂንቴ ኡባራ ጊዶ። ኣሚንዒ።
