﻿Mikpiirm.
7.
Ni ya puoli bó nɛ n tí laa' tidɛknt yaam Uwien ya tondb binan se kitink ya kɛle kɛ inan, ki co ikɛle inan nnɔ ya tafaam ŋɔ tafaam la ji ń jo tink nin ñunciɛnm nin subu bo. 
N liɛbe' ki laa' utondtɔ ñɛn' liwenpurl bó ní, ki ŋuuke Uwien limiɛl ya daan taah nà ki diɛkeh uʼnib nnɔ. U yin' Uwien ya tondb binan bà Uwien de' bɛ ufaa bɛ ń tien kitink nin miñunciɛnm nà bre nnɔ ufaa bo 
ki tɔke' bɛ ki ye: «Cuo mɛn niʼba, laan la tien mɛn tink nin ñunciɛnm nin subu nà bre. Cère mɛn tí tien tiʼWien ya dìɛku uʼnib ya yutun bo kí yaan.» 
Nɛ n cii' bi tien' Uwien ya dìɛku binib bà bo nnɔ ya ñɔbu. Bi te binib itur kobk nin pinan nin inan nɛ, ki ñɛn' Israyɛl yaab ya baamul kɛ ni ní. 
Bi diɛke' bà nnɔ bɛn si: Suda ya baamul ni binib itur piik nin ile, Lubɛnn ya baamul ni binib itur piik nin ile, Gaad ya baamul ni binib itur piik nin ile, 
Asɛr ya baamul ni binib itur piik nin ile, Nɛftali ya baamul ni binib itur piik nin ile, Manase ya baamul ni binib itur piik nin ile, 
Simeyɔn ya baamul ni binib itur piik nin ile, Lefi ya baamul ni binib itur piik nin ile, Isaka ya baamul ni binib itur piik nin ile, 
Sabulɔn ya baamul ni binib itur piik nin ile, Yosɛf ya baamul ni binib itur piik nin ile, Bɛnsamɛn ya baamul ni binib itur piik nin ile. 
Ni ya puoli bó nɛ n tí liike' ki laa' kuniwulku kuba; nil ŋa ń fre kí kàan kí cuo biʼñɔbu. Bi ñɛn' inibol yà kɛ te uŋɛndun wuu ni, ki lienh ilenbol kɛ nnɔ ni nɛ, ki se kibɛrbiɛk nin Kipebuk nnɔ ya nun bó, ki guo tiliɛrpenpient, ki ŋuuke mubiɛbisiimu ya fɛr, 
ki wuureh ufaa bo ki teh: «TiʼWien wà kɛ kibɛrbiɛk bo nin Kipebuk nɛ ŋmiɛndeh tɛ.» 
Nɛ Uwien ya tondb kɛ se ki guɔn' kibɛrbiɛk nin biciɛnb nin tiwɛnfuobt tunan nnɔ, nɛ ki gbaan' ki dondeh Uwien, 
ki teh: «Imɔ̀n, tiʼWien ŋmɔbe mituɔm nin miyɛnfuom nin ufaa. Nɛn bo tí li pɛ̀keh wɔ, kí li kpiɛkreh wɔ, kí li faareh wɔ, kí li ñɛngeh wɔ uyo kɛ. Ami.» 
Nɛ biciɛnb nnɔ ya uba niire' nni ki ye: «Binib bà guo tiliɛrpenpient nɔ, bi yé ŋmɛmbɛ? Bi ñɛn' la?» 
Nɛ n jiin' wɔ ki ye: «NʼYonbdaan, sin nɛ bɛn.» Nɛ u ye: «Bi yé binib bà bi jɛ̀nde' bɛ ki gbien' nɛ. Bi sɔkre' biʼliɛrt Kipebuk nnɔ ya sɛ̀m ni nɛ tù pende'. 
Nɛn bo nɛ bi se Uwien ya bɛrbiɛk ya nun bó, ki sɔnh itùon ki dienh wɔ uʼduku ni ñɔnku nin wien ni. Nɛ wà kɛ kibɛrbiɛk bo nnɔ li lèkn biʼbo. 
Kònm ŋa ji li cuo bɛ, ñuñun ŋa ji li cuo bɛ, kuwienku ya wɔl mɔnɔn ŋa ji li sɛ bɛ. 
Kimɛ Kipebuk kà te kibɛrbiɛk saan nnɔ nɛ li liike bɛ kí taa bɛ kí jo liñunbunl là ya ñunm dienh limiɛl saan. Nɛ Uwien li ŋmire biʼnunsiir kɛ.» 
