﻿Ebrembɛ.
8.
Umɛsɛn wà sɔ yé umɛsɛnjɛ ti tɔkeh tigbɛr tà nɔ ni: ti ŋmɔbe u ya tɔtuɔrciɛnb kɛ ya ciɛn ya bol nɛ, u kɛ Uwien uyɛbm kɛ ya daan, ya jie bó paaki bó, 
ki sɔnh uʼtuonl Uwien te lininbonl là ni nnɔ. Nɛn saan nɛ yé Uwien ya ninbonmɔ̀nl. Na yé nisaal nɛ tien' lɛ̀, Uwien nin uʼyul nɛ tien' lɛ̀. 
Bi teh unil kɛ bitɔtuɔrciɛnb ya ciɛn wɔ ń li taah tibont nɛ ki dienh Uwien, kí li teh ituɔrɛ mɔ ki dienh wɔ. Nnɔ nɛ nì kpɛ tiʼmɔ ya tɔtuɔrciɛnb ya ciɛn mɔ ń li ŋmɔbe u li taa nà kí de Uwien. 
U bi te kitink bo la, wa bi li yé tɔtuɔrkɛ mɔnɔn, kimɛ bitɔtuɔrkaab te ki taah tibont ki dienh Uwien, Moyis ya yiko ye ma bo nɛ. 
Bi sɔnh itùon yà nnɔ yé tibonmɔ̀nt tà te paaki bó nnɔ ya nɛnnɛnku nin tuʼjinjint nɛ. Nnɔ nɛ Moyis là ye wɔ ń tien Uwien ya ninbonl uyo wà nnɔ, Uwien tɔke' wɔ ki ye: «Tùɔre kí cenge, á tien lɛ̀, lɛ̀ ń tùɔre kí li naan n wuɔn' ŋɛ lininbonl là ya nɛnnɛnku lijuɔl bo nnɔ.» 
Ama fɛnfɛnnɔ, Uwien de' *Yesu utɔtuɔrkɛ ya tuonl là nnɔ cɛn' tɔtuɔrkɛ kɛ tɔtuɔrkɛ yaal. Wɔn nɛ se Uwien cuo' nin binib kujɔtieku kùa nnɔ ni, nɛ kujɔtieku nnɔ mɔn ki cɛn' mikpiɛkm yaaku, kimɛ Uwien pùon' lipuonl là nnɔ mɔn ki cɛn' mikpiɛkm yaal. 
Tɔ, nì yé kujɔtiekpiɛku kùa là te nnɔ ŋa bi ŋmɔbe gbɛr tuba la, Uwien ŋa bi li liɛbe kí cuo nin nib jɔtietɔku. 
Imɔ̀n, Uwien laa' uʼnib ya biil nɛ ki len' ki ye: «Min Yonbdaan nɛ lienh, uyo uba we ní ń liɛbe kí cuo nin Israyɛl yaab nin Suda yaab kɛ kujɔtiefɛ̀nku. 
Kujɔtieku nnɔ ŋa ń li naan nin n là kpiɛ' ki cuo' kùa nin biʼyaajɛb, uyo wà n dɛ̀re', ki ñɛn' bɛ Esipt ni nnɔ. Ba paan' kujɔtieku nnɔ bo ma nnɔ, nɛ nʼmɔ sɛln' ki dàan' bɛ. Min Yonbdaan nɛ len' nnɔ. 
Yonbdaan liɛbe' ki ye: ‹Idɛn yiɛ gɛ̀bre' la, n li cuo nin Israyɛl yaab kujɔtieku kùa sɔ. N li kuɔn nʼyikombɛ biʼyɛnm ni, kí kɛle bɛ biʼfɛ̀l bo. N li yé biʼWien, nɛ bɛ ń li yé nʼnib.› 
Biʼni uba ŋa ji li wɔkn uʼtɔ, uba ŋa ji li wɔkn uʼninjɛ kí tɔke wɔ kí ye: ‹wɔ ń bɛnde Yonbdaan.› Kimɛ biʼkɛ li bɛnde nni nɛ. Kí cin ibaan kí tì baa binikpɛkpiɛkb. 
N li fère bɛ biʼbiil, ma ji li tiɛre biʼbiɛre bó fiebu.» 
Uwien lienh kujɔtiefɛ̀nku bó la, nì wuɔn' ki ye kukpiɛku nnɔ kpaare' nínɔ. Kimɛ nibonkpaann kɛ tì pore' la, nì joh nɛ̀ ń gben nɛ. 
