﻿Kugbɔnku kùa bi kɛle' ki de' Ebrembɛ nnɔ.
1.
Uyo bo Uwien là ñɛn' isɛn yà yɛbe nɛ ki cère' uʼñɔbonsɔknb len' nin tiʼyaajɛb nà luo' bolm miŋɛ. 
Ama idɛnfɔrkɛ yiɛ nɔ, u ji cère' uʼBijɛ nɛ len' nin tɛ. U cère' wɔn nɛ ñɛn' nà kɛ te, ki gɛ̀nde' wɔ ki tien' tibont kɛ ya daan. 
UʼBijɛ bugbɛn nɛ yé uʼkpiɛke ya wenwenku, ki naan nin wɔ ki tì gben', ki cère' uʼgbɛr ya tuɔm co tibont kɛ tù se tuʼbùol, ki sɔkre' ki ñɛn' binib ya biɛre ki gben', nɛ ki don' paaki bó ki tì kɛ̀le' Uwien uyɛbm kɛ ya daan ya jie bó. 
Uwien ya Bijɛ cɛn' Uwien ya tondb. Nɛn bo nɛ Uwien yin' wɔ liyel là ŋmɔbe lisel ki cɛn' biʼyɛ. 
Uwien kpele ki tɔke' u lɛ tond ba ki ye: «Sin nɛ yé nʼBijɛ, dinnɔ nɛ n wuɔn' ki ye n yé aʼBaa?» Bii u tí kpele ki tɔke' u lɛ ba ki ye: «Min li yé uʼBaa, nɛ wɔ ń li yé nʼBijɛ?» 
Ama uyo wà Uwien yíe uʼBijɛ wà yé kibukpiɛk nnɔ ń baa uŋɛndun ni nnɔ, u len' ki ye: «Uʼtondb kɛ ń gbaan kí puke uʼBijɛ.» 
Uwien len' uʼtondb bɛn bo ki ye: «U cèreh bi te tɛn mitafaam nɛ, ki liɛbe' ki cèreh bi te tɛn umupien.» 
Ama u len' uʼBijɛ wɔn bo ki ye: «Uwien, a yé ubɛr nɛ ki kɛ aʼbɛrbiɛk bo, nɛ aʼbɛl ŋa ŋmɔbe gbenm. A likeh aʼnib nin mitetem mà cuube nɛ. 
A yíe nà cuube nɛ ki nɛn nà bre. Nɛn bo nɛ sin wà yé Uwien nnɔ, aʼWien wule' aʼyul bo mikpɔm, ki wuɔn' ki ye u gɛ̀nde' ŋɛ, ki cère' aʼyɛnm sɔnge, ki de' ŋɛ lisel ki cɛn' aʼtɔb kɛ.» 
Uwien tí len' ki ye: «Micincinm, sin Yonbdaan nɛ ñɛn' kitink, nɛ kutaaku mɔ yé aʼnuɔ ya tuonl nɛ. 
Nɛn kɛ li gben, ama sin li tuu ki te nɛ, nɛn kɛ li cɛre tɛn tikpɛlcɛr nɛ. 
A li gongonde nɛn kɛ tɛn lilierl nɛ. Imɔ̀n, a li lèbre tù tɛn bi lèbreh liliɛrl ma bo nɛ, ama sin ŋa ń lèbre, a li tuu ki fuobe nɛ.» 
Uwien kpele ki tɔke' u lɛ tond ba ki ye: «Kɛ̀le nʼnɔjie bó, kí tì baa uyo wà n li cère á tɛ aʼnɛnnɛndb bo litaal-i?» 
Uwien ya tondb bɛn wɔn, biʼkɛ yé uʼtonsɔnb nɛ, nisaal ŋa ń fre kí lɛ bɛ nin nunbu. U sɔnh bɛn nɛ bi lá toreh binib bà u li ŋmiɛn bɛ nnɔ. 
