﻿1 Timote.
3.
N ye ń tɔke tigbɛr tà nɔ tù te nɛ. Unil yíe wɔ ń li likeh Kristo ya taanl la, u gɛ̀nde' lituonmɔnmɔnl nɛ. 
Nì kpɛ Kristo ya taanl yaab ya sɛnlierl ń li yé unil wà ŋa ŋmɔbe biil nɛ, kí li ŋmɔbe upii uba, kí li coh uʼba tibont kɛ ni, kí li ŋmɔbe miyɛnm, kí li yé unil wà bi boh wɔ, kí li teknh bicɛnb, kí li yé unil wà li fre kí wɔkn binib Uwien ya gbɛr mɔnmɔnm, 
ki la taa' uʼba kí de daam, ki la ŋmɔbe jɛr. Wɔ ń li ŋmɛ nin binib kɛ, ki la findeh nin nib, ki la cère uʼnun ń li mɔ́n ilike bo, 
kí li likeh uʼdencɛnl mɔnmɔnm, kí cère uʼbumu ń li ciih litubl, ki ŋmɔbe mibom nì kpɛ kibuk ń li ŋmɔbe mibom ma bo. 
Kimɛ unil ŋa ń fre kí liike uʼdencɛnl mɔnmɔnm la, u li tien mila kí liike Uwien ya taanl yaab-i? 
U la li yé wà ŋa wuɔke' Uwien ya sɛn ni. U yé unil wà ŋa wuɔke' Uwien ya sɛn ni la, nba la, u li ŋmɔbe tigbengt, nɛ kí lɛ utudɛre tɛn usɛnpol. 
Nì kpɛ bà ŋa yé Kristo yaab ń li pɛ̀keh wɔ nɛ. U te nnɔ la, nil ŋa ń len uʼbo fɛnfɛnm, nɛ sɛnpol ya diɛku mɔ ŋa ń cuo wɔ. 
Kristo ya taanl ya totorb mɔ li yé binib bà bi boh bɛ nɛ, ki la li yé iñuɔn ilele ya nib, ki la taa biʼba kí de daam, ki la jinh pònt. 
Kí cère jɔknt la li te biʼfɛ̀l bo ŋɔ bɛ ń li pɛ tigbɛmɔ̀nt tà Uwien kpiire' tù nnɔ bo. 
Bɛ ń kpiɛ kí fìin bɛ kí liike biʼtetem te ma bo kí yaan. Bi laa' ba ŋmɔbe biil la, bi li fre kí li sɔnh bitotorb ya tùon. 
Bipiib bà yé bitotorb mɔ li yé binib bà bi boh bɛ nɛ, ki la lienh tɔb bo fɛnfɛnm, kí li coh biʼba tibont kɛ ni, kí li yé bipiib bà bi du biʼbo isɛn kɛ ni. 
Kristo ya taanl ya totorb li ŋmɔbe upii uba uba nɛ, kí li likeh biʼbumu nin biʼdencɛn mɔnmɔnm. 
Kimɛ binib bà sɔnh bitotorb ya tùon mɔnmɔnm nnɔ ya yel li kpienh nɛ. Bi ŋmɔbe midum ki gbien' bi teke' *Yesu Kristo ki jin' ma nnɔ bo. 
N kiɛh ŋɛ kugbɔnku kuu nɔ ki daan n li baa aʼsaan na ń wuɔke nɛ. 
Ma lì baa' tonm mɔnɔn la, kugbɔnku kuu li cère á bɛnde a li ŋmɔbe mitetem mà Uwien ya nib ni. Binib nnɔ yé Uwien limiɛl ya daan ya taanl nɛ. Lì te tɛn likpɛnkpɛnl nɛ ki co tigbɛmɔ̀nt ki dienh tù mituɔm. 
Imɔ̀n, Uwien bo ya paanm ya gbɛr tà buɔ u kpiire' tù nnɔ yé tigbɛciɛnt nɛ. Kristo nɛ yé tigbɛr tà buɔ nnɔ, ki tien' uʼba unisaal, ki ñɛn' uʼba upaan bo *Mifuoñaanm nɛ wuɔn' ki ye u yé ugbɛmɔ̀ndaan, u cère' Uwien ya tondb laa' wɔ, bi kpaande' uʼgbɛr bà ŋa yé *Sufmbɛ ni, nɛ binib teke' wɔ uŋɛndun ni ki jin', Uwien taa' wɔ uʼkpiɛke ni ki don' paaki bó. 
