﻿Leemiso Maxaafa.
31.
Kawo Limu7eele aaya kawo Limu7eele tamaarsida timirtey hayssafe kaallidayssa. 
«Ta naazoo! Ta uloppe wodhdhida ta naazoo! Tani adinetta yelida ta naazoo! 
Maccassan ne wolqqa wursofa; kawota bashshiza miishshan ne akata dhayssofa. 
«Limu7eele hayssi kawotas bessenna; kawoti woyne ushshu uyanaas bessenna; dere ayssizayti maththosiza ushshu yaaretanaas bessenna. 
Istti uyiza wode wogaa baletteettes; qohettidayta maata sugeettes. 
Hayqqana hanizaytas maththosiza ushshu meto bolla dizaytas woyne ushshu immite. 
Istti uyidi bantta manqoteththa dogetto; bantta tuggaka zaari qoppofetto. 
«Bantta gishshas haasayanaas dandayonttaytas neni haasaya; metotanchchata maata gishshas neni mootetta. 
Haasayada isttas suure pirda pirda; hiyeesatanne metotanchchata maata bonchchisa» gaada tamaarsadus. 
Wozinama machcho ooni demmanawu dandayzee? Iza zo7o inqqufekka keeha aadhdhawus. 
Izi keeththa aaway izo ubbaa miishshankka ammanees; izas aykkoyka paccenna. 
Iza ba de7o layth ubbaan izas lo7o attiin iita miish ooththuku. 
Dorsa iskefenne talbba buuxa ekkada, ooso dosiza ba kushen suqawus. 
Iza zal7anchchata markabe mala; ba kath haakko biittafe ehawus. 
Iza ba soo asas quma kaththanaassinne ba macca aylletas ooso shaakka immanaas, sa7ay buro wonttana gishin dendawus. 
Iza barkka qoppada goshsha gade shammawus; ba demmida miishshan woyne tokkawus. 
Iza minnada ba ooso polawus; izi qesetikka oosos mino. 
Iza ba oosos wodhey dizayssa akeekawus; omarsika izi xomppey to7enna. 
Iza ba liqaqan suqawus, ba afala daddawus. 
Iza hiyeesatas ba kushe miccawus; metotanchchatas kiyateth immawus. 
Izi soo asay ubbay ho7iza may7o may7ida; hessa gishshas iza shachchi bukkikokka hirguku. 
Hiiththan ongiza may7o ooththawus; laynonne ochcha teera misatiza may7o may7awus. 
Dere cimati dubbusha shiiqizason izi keeththa aaway bonchchettida asa. 
Laynoppe seelo may7ota ooththada bayzawus; zal7anchchataskka dancco dadda shiishshawus. 
Iza minonne puulara diza maccassa; iza yiza layththata ufayssan mokkawus. 
Aadho eran iza haasayawus; izi inxarsafe suure zorey ke7ees. 
Iza ba soo asaa hano lo7eththa kaallawus; azalla hanoy izi bollan beetti erenna. 
Izi nayti izo, «Anjjettidaree» geettes; izi keeththa aawaykka izo galatishe, 
«Lo7o miish ooththida daro maccassati deettes; gido attiin neni istta ubbaafe aadhdhaasa» gees. 
Mala lo7oy baleththees; puulaykka qokkees; gido attiin GODAAS yayyiza maccassi iza anjjettidaaro. 
Izis bessiza imota immite; iza ooththida oosoy ubbay dubbushan izo galatisso.
