﻿Mazamure Maxaafa.
145.
Abeet ta kawo Xoossawu! Tani nena dhoqqu dhoqqu histtana; ne sunththa mernaaskka galatana. 
Tani nena ubba gallas sabbana; ne sunththaaka mernaas galatana. 
GODAY gita; gita galatay izas bessees; iza gitateththay asa qofappe bolla. 
Issi yeletay kaalliza yeletas ne ooththida ooso yootees; malalisiza ne oosotakka qonccisana. 
Istti ne bonchchonne ne gita teema haasayana; tanikka malalisiza ne oosoza zaara zaara qoppana. 
Asay malalisiza ne oosoza gitateththa gishshas haasayettana; tanikka ne gitateththa awajjana. 
Istti ne kiyateththa daroza yootana; ne xilloteththaa ufayssan yexxana. 
GODAY qadhettizayssanne maarizayssa; izi hanqettanaas eesotonttayssanne siiqoy kumidayssa. 
GODAY ubbaas kiya; izi ba medhdhida ubbaas qadhettizayssa. 
Abeet GODAWU! medheta ubbay nena galatana; ne derey ubbayka nena sabbana. 
Istti ne kawoteththa bonchcho gishshas haasayana; ne wolqqa gishshas yootana. 
Hessan ne wolqqama oosotanne ne kawoteththa teema bonchchoza istti erisana. 
Yeletappe yeleta gakkanaas ne haarana; ne kawoteththay mernaassa. GODAY ba gida qaalan ammanettizayssa; izi ba ooso ubbaan kiya. 
GODAY gandigarzayta kaafees; kundidaytakka denththees. 
Ubbaa ayfey neekko xeellees; isttas koshshiza woden neni isttas quma immaasa. 
Neni ne kushe miccada shemppora paxa diza ubbaa amo kunththaasa. 
GODAY ba oge ubbaan xillo; izi ba ooso ubbaan kiya. 
GODAY bana xeygizaytas ubbaas mata; wozinappe xeygiza ubbaas matan dees. 
Izi baas yayyiza ubbaas amo kunththees. Qasse izi istta waasoza siyidi istta ashshees. 
GODAY bana siiqizayta ubbaa naagees; gido attiin iitata ubbaa dhayssana. 
Tani ta doonan GODAA galatana. Medheta ubbay iza geeshsha sunththa meri mernaas galato! 
