﻿Mazamure Maxaafa.
143.
Abeet GODAWU! Ta woosa siya; ta shoobbizayssa ezga; neni xillonne ammanettizayssa gidida gishshas taas zaaro imma. 
Ne sinththan xillo gidana asi oonikka deenna; tana ne aylleza pirdas shiishshofa. 
Ta hayqqana gakkanaas ta morkketi tana yedeththida; tana dirxxidi biitta gars gelththida; kase hayqqida asata malakka tana dhuman woththida. 
Hessa gishshas tani daaburadis; ta wozinaykka hidota qanxxides. 
Tani beni wodeta hassa7ays; neni ooththida ooso ubbaa yuushsha qoppays; ne kushe oosotakka akeekays. 
Tani ta kusheza neekko miccays; mela biittay haath koyza mala ta shemppoya nena saamettadus. 
Abeet GODAWU! Tani daaburadis; ne taas zaaro immanaas elela! Tani hayqqida asataththo duge duufon gelontta mala ne sinththa taappe genththofa. 
Tani nena ammanettiza gishshas maalado maalado ne siiqo tana bessa; tani ta shemppo nees hadaradis; hessa gishshas ta baana oge tana tamaarsa. 
Abeet GODAWU! Ta ne garsan qotettadis; tana ta morkketappe ashsha. 
Neni ta Xoossa; tani ne shene polana mala tana tamaarsa; ne lo7o Ayanay tana suure oge kaaleththo. 
Abeet GODAWU! Ne sunththa gishshas tana ashsha; ne xilloteththan tana metoppe kessa. 
Ne tana siiqiza gishshas ta morkketa suppu histta wodha; tana ne aylleza un7eththizayta dippi histta dhayssa. 
