﻿Mazamure Maxaafa.
136.
GODAA galatite! Izi kiya; iza siiqoy mernaassa. 
Xoossata Xoossa galatite! iza siiqoy mernaassa. 
GODAA galatite! iza siiqoy mernaassa. 
Izi xalla gita malalisiza miish ooththees; iza siiqoy mernaassa. 
Ba hiillateththan salota medhdhides; iza siiqoy mernaassa. 
Biittaa haaththa bollan miccides; iza siiqoy mernaassa. 
Gita poo7ota medhdhides; iza siiqoy mernaassa. 
Arshey gallas poo7ana mala ooththides; iza siiqoy mernaassa. 
Aginaynne xoolintteti omars poo7isana mala ooththides; iza siiqoy mernaassa. 
Izi Gibxe biittan bayrata wodhides; iza siiqoy mernaassa. 
Isra7eele asaa Gibxeppe kaaleththi kessides; iza siiqoy mernaassa. 
Ba mino kusheninne ba wolqqama qesen hayssa ooththides; iza siiqoy mernaassa. 
Zo7o abba shaakki yeggides; iza siiqoy mernaassa. 
Isra7eele asaa he abba giddora pinththides; iza siiqoy mernaassa. 
Gibxe kawonne iza olanchchata Zo7o abban mitissides; iza siiqoy mernaassa. 
Izi ba asaa bazzora kaaleththides; iza siiqoy mernaassa. 
Gita kawota shocides; iza siiqoy mernaassa. 
Wolqqama kawota wodhides; iza siiqoy mernaassa. 
Amooreta kawoza Sihoone wodhides; iza siiqoy mernaassa. 
Qasse Baasaane kawoza Aage wodhides; iza siiqoy mernaassa. 
Histtidi istta biitta ba asaa laatissides; iza siiqoy mernaassa. 
Ba aylle Isra7eele laatissides; iza siiqoy mernaassa. 
Nuni kawuyida wode izi nuna qoppides; iza siiqoy mernaassa. 
Nuna nu morkketappe ashshides; iza siiqoy mernaassa. 
Medheta ubbaas mizaaz immees; iza siiqoy mernaassa. 
Salo Xoossa galatite! iza siiqoy mernaassa. 
