﻿Mazamure Maxaafa.
101.
Tani ne siiqo gishshassinne tuma pirda gishshas yexxana; abeet GODAWU! Tani nees galata mazamure yexxana. 
Tani suure oge kaallana; neni taakko awude yaanee? Tani ta keeththan suureteththan daana. 
Tani ta ayfera iita miish xeellike; Xoossafe kare kezida asata ooso ixxays; tani isttara mulekka zuppetikke. 
Wozina geellati taappe haakketto; iitateththara taas gaytoteththi deenna. 
Geeman ba lagge zigirzayssa tani sirphi ooththana; otorettizayssinne ceeqettiza as tani co7u ga aggike. 
Istti tanara daana mala biitta bolla de7iza ammanettizayta tani lo7o ayfen xeellays. Suureteththan hemettiza asi taas haggazana. 
Cimo ooththizay oonikka ta keeththan deenna; wordo haasayzay ta sinththan eqqenna. 
Biittan de7iza iita as ubbaa tani hach hach dhayssana; iita ooththizayta ubbaa tani GODAA katamappe dhoqalla dhayssana. 
