﻿Mazamure Maxaafa.
83.
Abeet Xoossawu! Co7u gooppa! sirphi gooppa! Abeet Xoossawu! qelli gooppa! 
Be7a! Ne morkketi ne bolla dendida; nena ixxizayti ne bolla ba qoodhe qaaththida. 
Istti ne asa bolla geeman gene duulatida; neni siiqiza asata bolla maqettida. 
Istti, «Haa yiite! Istta kawoteththa dhayssoos; Isra7eele geetettiza sunththi mernaas hassa7ettontta mala ooththoos» gida. 
Istti issi wozina gididi issife maqettida; ne bolla dendanaas caaqettida. 
Isttika Eedoome asata, Isma7eele asata, Mo7aabe zareta, Aggaari zareta, 
Gebaale asata, Amoone asata, Amaaleeqe asata, Filisxeeme asatanne Xiroose asata. 
Asoore asati isttara issifeteth medhdhida; Looxe zaretaskka maado gidida. 
Neni Midiyaame asata bolla, Sisaaranne Yaabine bolla Qisoone Shaafan ooththida mala istta bolla ooththa. 
Istti En-Doore geetettizason dhayda; istta ahay moogettontta biitta bolla wooqqides. 
Oreebe bollanne Za7eebe bolla ooththida mala istta halaqata bolla ooththa; Zebahanne Xalmuna dhayssida mala istta haarizaytakka neni dhayssa. 
Heyti, «Nuni Xoossa asaa biitta nuus buzoththana» gidayta. 
Abeet ta Xoossawu! Istta gudulla mala laalla; carkoy efiza suulla mala ooththa. 
Xaragay wora miidi wursiza mala, tama lacoy zuma may7iza mala, 
goten ne istta daganththa; ne uushonkka istta yedeththa. 
Abeet GODAWU! Asay ne sunth koyana mala neni istta ayfeso yeella mayza. 
Istti mernaas yeellatetto; hirgettonne kawuyi dhayetto. 
Ne sunththay GODAA gididayssanne sa7a ubbaa bolla neni xalla Ubbaafe Dhoqqa Xoossa gididayssa istti eretto. 
