﻿Mazamure Maxaafa.
82.
Xoossi salon diza duulata kaaleththees; xoossati ubbay shiiqiin istta bolla pirdishe, 
«Intte awude gakkanawu geella pirda pirdanee? Iitatakka awude gakkanaas maaddanee? 
Wolqqay bayndaytassinne yi7otas tuma pirda pirdite; manqonne naaqettida asata maata naagissite. 
Daaburanchchatanne metotanchchata ashshite; iitata kusheppeka istta woththi ekkite. 
«Inttes aykko erateththinne akeekay deenna; intte dhuman simeretteeta; biitta yochchati ubbay qaaxxeettes. 
«Tani inttena, ‹Intte xoossata; intte ubbayka Ubbaafe Dhoqqa Xoossa nayta› gadis. 
‹Gido attiin intte asi hayqqiza mala hayqqana; Qasse hara halaqati kundiza mala intteka kundana› gays» gees. 
Abeet Xoossawu! Denda! Sa7a bolla pirda; kawoteththi ubbay neessa. 
