﻿Mazamure Maxaafa.
77.
Tani ta qaala dhoqqu histtada Xoossako waassays; tana siyana mala ta iza woossays. 
Tani metotida gallas Xoossa koyays; omarsika shempontta ta kusheta izakko miccays; gidikkoka tani minettanaas dandayabeekke. 
Abeet Xoossawu! Ta nena qoppashe ceecays; ta yuushsha qoppashe keeha daaburdes. 
Ta ayfeppe dhisko dhayssadasa; taas gaanaazi dhayana gakkanaas ceecadis. 
Tani aadhdhida wodeta qoppadis; kase aadhdhida layththatakka hassa7adis. 
Ta yexxidayssa giddoth yuushsha qoppadis; tani wozinan akeekadis; ta ayanay tana denththeththiin, 
«Goday nuna mernaas yeggi agganee? Hayssafe guye nuna lo7o bessennee? 
Nuna siiqizayssa mulera aggidee? izi yootida hidotay shaarettidee? 
Xoossi ba maarizayssa aggidee? Hanqon ba qadheta aggidee?» ga oychchays. 
Ubbaafe Dhoqqa Xoossawu! Tana qohiday, ne ushachcha kushey kaseyssaththo nuna maaddontta aggoyssa. 
GODAWU! Ne oosota tani qoppana; neni beni wode ooththida malalisiza oosota ubbaa ta yuushsha qoppana. 
Ne ooththida ubbaa tani zaara zaarada qoppana; ne wolqqama oosota ubbaa tani akeekana. 
Abeet Xoossawu! Ne ogey geeshsha; nu Xoossaa mala hara gita xoossi oonee? 
Neni malalisizaaz ooththiza Xoossa; dereta giddon ne wolqqa bessaasa. 
Yaaqoobenne Yooseefe zereth gidida ne dereta neni ne wolqqan wozzadasa. 
Abeet Xoossawu! Haaththati nena be7ida; Haaththati nena be7idi yayyida; ciimma abbatikka kokkorida. 
Shaarati ira immida; salon daday guummides; wolqqanththi wawaci gides. 
Ne dada gunththay gote carko giddon kooshimides; ne wolqqanththa phoolleththi sa7a poo7isides; biittayka qaaxxi kokkorides. 
Neni abba giddora hemettaasa; ciimma abba giddora kanththaasa; gidikkoka ne bida geedoy erettenna. 
Musenne Aaroone kushen neni ne dereza dorsa wude mala kaaleththadasa. 
