﻿Mazamure Maxaafa.
72.
Abeet Xoossawu! Suure pirda kawos, ne xilloteththaka kawo naas imma. 
Histtiko izi ne deraas xilloteththan pirdana; naaqettidaytasikka suure pirdana. 
Zumati dureteth ehana; zumbullatikka xilloteth ne deraas ehana. 
Metotidayta gishshas izi mootettana; hiyeesata izi ashshana; un7eththizayssaka izi liiqisana. 
Awaynne aginay diza wode ubbaan yeletappe yeleta gakkanawu asay izas haaretto. 
Kawoy shooqan bukkiza ira malanne gade kalssiza puuse ira mala gidana. 
Izi diza layth ubbaan xilloy ciiyana; aginay dhayana gakkanaas biitta bolla saroteththi darana. 
Abbafe biidi abba gakkanaas, Efiraaxise Shaafaappe sa7a gaxa gakkanaas izi haarana. 
Bazzon mehe xalla haari aqizayti, iza morkketi gudulla laaccana. 
Tarseese kawotinne harurota kawoti izas giira ehana. Saabanne Saaba kawoti izas kushe genththo ehana. 
Kawoti ubbay izas gulbatana; kawoteththay ubbay izas haarettana. 
Metotanchchay waassiza wode, manqonne maadoy baynda as izi ashshana. 
Hiyeesatassinne manqotas izi qadhettees; metotanchchata shemppoka izi hayqoppe ashshees. 
Istta shemppo qohoppenne geneppe izi ashshana; istta suuththay iza sinththan al7o. 
Kawoy shemppo gam7o; Saaba biitta worqqay izas imetto. Pacey baynda izas woossetto; gallas ubbaan istti iza anjjetto. 
Biittan daro kaththay mokko; zumati kaththan kamettetto; Biittay Libaanoose mala kaththa biitta gido; maatay demba kumiza mala katama kumo. 
Kawoza sunththi mernaas minni de7o; arshey de7iza keena xeygettishe gam7o. Kawoteth ubbay iza baggara anjjetto; dere ubbay iza, «Ne anjjettidaade» gi anjjo. 
Malalisiza miish barkka ooththiza GODAY, Xoossay, Isra7eele Xoossay galatetto. 
Iza bonchcho sunththay mernaas galatetto; biitta ubbay iza bonchchon kumo. Amiin! Amiin! 
Isseye naa Dawite woosay hayssan polettides. 
