﻿Mazamure Maxaafa.
65.
Abeet Xoossawu! Xiyoonen nees galatay bessees; nuni nees adinettidayssa gaththana. 
Abeet woosa siyizayssoo! Asay ubbay neekko yaana. 
Nu nagaray nuna mittides; neni gidikko nu balaa atto ga wursadasa. 
Neni dooridaadeynne nenara daana mala ne dubbushaakko shiishsha ekkidaadey anjjettidaade; ne geeshshasozappenne ne dunkaane anjjozappe nu kallana. 
Abeet nuna ashshiza Xoossawu ne xillo ooson malalisiza miish nuus ooththa; Sa7aa gaxappe gaxa gakkanaas, haaho abbatappeka he pinththan diza asa ubbaas hidotay nena. 
Neni ne wolqqa gixettadasa; zumatakka ne minththa essadasa. 
Neni abba giirissanne dambala gunththa sirphi ooththaasa; qasse derey dendiza denththa irxxisaasa. 
Hessaththo neni ooththida malaata gishshas, sa7a gaxa gakkanaas de7iza asay ubbay nees, «Hoola!» gees. Arshey mokkizasoppe wullizaso gakkanaas diza asa ubbaa ufayssan ilili giissadasa. 
Neni biitta naagada haath ushshaasa; histtada daro duresaasa; Asas kaththay mokkana mala Xoossa shaafay haaththan kumides; hessaththo ooththada neni giigsadasa. 
Goshsha gadetas gidiza ira immaasa; Phasheta liiqisaasa; biittaaka puuse iran shugisaasa; caarechchati doli diccana mala anjjaasa. 
Layththaa kalo layth ooththaasa; neni aadhdhidaso ubbay kath xalla gidees. 
Mehe heemmizasohon cilila maatay kumides; zumbullati ufayssan kumida. 
Dembatan wude mehey kumides; shoobbatan kaththi kumides; ubbatikka ufayssan ililishe yexxeettes. 
