﻿Mazamure Maxaafa.
52.
Haysso wolqqamazoo! Xoossi nena kadhichides; ne ays iita ooson nashettay? Ays ubbaa gallas ceeqettay? 
Nenoo baleththon kumida genanchchawu! harata dhayssana qaxxaasa! Ne inxarsayka qara magalla mala. 
Neni lo7o aggada iita siiqaasa; tuma haasayanaappe wordo haasaya dosaasa. 
Nenoo baleththon kumida wordanchchazoo! Neni as madunththiza qaala siiqaasa. 
Gido attiin Xoossi nena mernaas dhayssana; izi nena ne keeththafe buuci kessana; paxa dizayta giddofekka dhoqalli diggana. 
Xilloti hayssa be7idi yayyana; istti iza bolla hizgi miiccana; 
«Xoossa baas zemppo ooththonttaade, ba dureteththa daron ammanettizaade ba iita ooson minnizaade hayssa be7ite!» gaana. 
Gido attiin aaciza wogara miththa mala tani Xoossa Keeththan aacays; iza mernaa siiqon tani meri mernaas ammanettays. 
Neni ooththida ubbaas tani nena mernaas galatays; ne lo7o gidida gishshas ta ne sunththan hidota ooththays; tani Xoossa deraa sinththan ne kiyateththaa sabbana. 
