﻿Mazamure Maxaafa.
14.
Eeyati bantta wozinan, «Xoossi baawa» geettes; istta de7oy moorettides; istti harassiza miish ooththeettes; istta giddon lo7o ooththiza issi asikka deenna. 
Xoossa koyzaynne akeekizay de7izakko be7anaas, GODAY saloppe duge asaa xeellees. 
Gido attiin ubbayka ogeppe kare ke7ida; ubbayka mulera go7onttaaz gidida; lo7o ooththizay ooninne deenna; haray atto issaadeyka deenna. 
GODAY, «Ta asaa bonqqi miza iita asati aykkoka erettennee?» gees. 
Gido attiin Xoossi xillo asatara de7iza gishshas iita asati hessan dagammana. 
Intte hiyeesata halchcho laalleeta; gido attiin GODAY hiyeesati baqati attizaso gidees. 
Isra7eeles atoteththi Xiyooneppe yidaakko! GODAY istta duussa zaariza wode Yaaqoobe zereththati ufayettana; Isra7eele asay ufayssan galatana. 
