﻿Mazamure Maxaafa.
3.
GODAWU! Ta morkketi ay keena corattidoo! Ta bolla aappunati dendidoo! 
Daroti, «Xoossi iza ashshenna» giidi ta bolla haasayda. 
Gido attiin GODAWU! Neni ta yuushon gondalle. Tana bonchchisizaynne minththeththizay nena. 
Tani ta qaala dhoqqisada GODAAKKO waassana; histtiko izi ba geeshsha zuma bolla dishe ta woosa siyana. 
GODAY tana naagiza gishshas, tani ichchada dhiskayssinne beegottays. 
Tani tana giddoththi uttida cora morkketaska babbike. 
Abeet GODAWU! Denda! Abeet ta Xoossawu! Tana ashsha! Neni ta morkketa ubbaa banqila shoca; iitata achchaaka menththa. 
Maadoy GODAASSA; GODAWU ne anjjoy ne deraa bolla gido. 
