﻿Mazamure Maxaafa.
2.
Kawoteththati ays dendizoo? Qasse kawoteththay ays iita ooththanaas maqettizee? 
Sa7a kawotinne daannati dendida; istti GODAA bollanne GODAY tiydayssa bolla dendanaas issife duulatida. 
Istti, «Ane nuni istta sansalataa duuththoos; istti nuna qachchizayssaka kessi wora oloos» geettes. 
Salon ba araata bolla uttidayssi istta bolla miiccees; Goday istta qidhees. 
Goday ba hanqon istta seerees; ba wolqqama hanqon istta daganththees. 
Goday, «Tani ta geeshsha zuma Xiyoone bolla ta kawoza kawoththadis» gees. 
He kawoy, «Tani GODAA woga awajjana; GODAY tana, ‹Neni ta naa; tani nena hach yeladis. 
Neni tana oychcha; tani kawoteththa ubbaa nees immana; sa7a ubbay nees gidana. 
Neni birata guufen istta qoxereththana; istta neni mana miishshi meqqiza mala menththereththana› gees» gides. 
Hessa gishshas intteno kawotoo akeekite; ha sa7a haarizaytoo intte naagettite! 
GODAAS yashshateththan ooththite; izas kokkorsan haarettite. 
GODAY hanqettiin ogen intte dhayontta mala izas suure wozinan goynnite; ays giikko iza hanqoy eeson eexxi kezana. Iza banttas zemppo ooththizayti anjjettidayta. 
