GEN 1:1 ጾሲ ኮይሮ ሳሎኔ ሳኣ ሜꬊዴስ።
GEN 1:2 ሄ ዎዴ ሳኣይ ሎኢ ጊጊቤናኔ ኣይኮይካ ባይንዳ ሜላ ዴስ፤ ጪማሶሆታ ꬉማይ ጎዚ ኦይኪዴስ፤ ጾሳ ኣያናይ ሃꬃፌ ቦላራ ማይኢ ኡቲዴስ።
GEN 1:3 ሄሳፌ ጉዬ ጾሲ፥ «ፖኦ ጊዶ» ጊን ፖኦ ጊዲዴስ።
GEN 1:4 ፖኦይ ሎኦ ጊዲዳይሳ ጾሲ ቤኢዲ ፖኦ ꬉማፔ ሻኪዴስ።
GEN 1:5 ጾሲ ፖኦዛ፥ «ጋላስ»፥ ꬉማዛ፥ «ኦማርስ» ጊ ሱንꬂዴስ። ጋዴይ ቃሚዴሲኔ ዎንቲዴስ፤ ሄሲካ ኮይሮ ጋላሳ።
GEN 1:6 ሄሳፌ ጉዬ ጾሲ፥ «ቦላራ ዲዛ ሃꬃ ጋርሳራ ዲዛ ሃꬃፌ ሻኪዛ ሳሎ ጉፋንꬆይ ሃኖ» ጊን ሃኒዴስ። ጾሲ ሳሎ ጉፋንꬆ ጊግሲዲ፥ ሳሎ ጉፋንꬆፌ ቦላራ ዲዛ ሃꬃ ጋርሳራ ዲዛ ሃꬃፌ ሻኪዴስ።
GEN 1:8 ጾሲ ሄ ጉፋንꬆዛ፥ «ሳሎ» ጊ ሱንꬂዴስ። ጋዴይ ቃሚዴሲኔ ዎንቲዴስ፤ ሄሲካ ናምኣንꬆ ጋላሳ።
GEN 1:9 ሄሳፌ ጉዬ ጾሲ፥ «ሳሎፔ ጋርሳራ ዲዛ ሃꬂ ኢሲሶን ሺቂ ኤሊኮ ሜላ ቢታይ ቆንጮ» ጊን ሃኒዴስ።
GEN 1:10 ጾሲ ሄ ሜላ ሶሆዛ፥ «ቢታ» ጊ ሱንꬂዴስ፤ ቃሴ ኢሲሶን ኤሊዳ ሃꬃ፥ «ኣባ» ጊ ሱንꬂዴስ፤ ሂስቲዲ ጾሲ ሄሲ ሎኦ ጊዲዳይሳ ቤኢዴስ።
GEN 1:11 ሄሳፌ ሲሚን ጾሲ፥ «ቢታይ ሚꬂኔ ማታ ሞኪሶ፤ ዜሬꬃ ኣይፌራ ዲዛ ሚꬂኔ ዜሬꬃ ኣይፌራ ዲዛ ቴሪዛ ሚꬅ ዱማ ዱማ ቆሞ ሞኪሶ» ጊን ሃኒዴስ።
GEN 1:12 ሄሳ ጊሻስ ቢታይ ሚꬂኔ ማታ ዱማ ዱማ ቆሞን ሞኪሲን ጾሲ ሄሲ ሎኦ ጊዲዳይሳ ቤኢዴስ።
GEN 1:13 ጋዴይ ቃሚዴሲኔ ዎንቲዴስ፤ ሄሲካ ሄꬓንꬆ ጋላሳ።
GEN 1:14 ሄሳፌ ጉዬ ጾሲ፥ «ጋላስ ቃማፌ ሻካናስ ፖኦቲ ሳሎ ጉፋንꬆን ጊዴቶ፤ ኢስቲ ጋላስ፥ ዎዴኔ ላይꬅ ኤሪሴቶ፤
GEN 1:15 ቢታ ቦላን ፖኢሳና ማላ ኢስቲ ሳሎ ጉፋንꬆን ፖኤቶ» ጊን ሃኒዴስ።
GEN 1:16 ጾሲ ናምኡ ጊታ ፖኦታ፥ ጊታቲዛይሲ ጋላስ ፖኣና ማላኔ ጉጺዛይሲ ኦማርስ ፖኣና ማላ ሜꬊዴስ፤ ጾሊንቴታካ ሜꬊዴስ።
GEN 1:17 ጾሲ ኢስታ ሃ ቢታ ቦላን ፖኢሳና ማላ፥ ጋላሲኔ ቃማ ሃራና ማላኔ ፖኦዛ ꬉማፔ ሻካና ማላ፥ ሳሎ ጉፋንꬆን ኢስታ ዎꬂዴስ። ሂስቲዲ ጾሲ ሄሲ ሎኦ ጊዲዳይሳ ቤኢዴስ።
GEN 1:19 ጋዴይ ቃሚዴሲኔ ዎንቲዴስ፤ ሄሲካ ኦይዳንꬆ ጋላሳ።
GEN 1:20 ሄሳፌ ጉዬ ጾሲ፥ «ሼምፖራ ዲዛ ዱማ ዱማ ሜꬌቴꬃቲ ሃꬃ ጊዶን ዳሬቶ፤ ካፎቲካ ቢታፌ ቦላራኔ ሳሎ ጉፋንꬆፌ ጋርሳራ ፒራꬌቶ» ጊዴስ።
GEN 1:21 ሂስቲዲ ጾሲ ኣባን ዲዛ ጊታ ዶኣታ፥ ሃꬃ ጊዶን ዎጺ ቃጺዛ ሜꬌቴꬃታ ኡባ፥ ካፎ ኡባ ዱማ ዱማ ቆሞን ሜꬊዴስ። ሄሲካ ሎኦ ጊዲዳይሳ ጾሲ ቤኢዴስ።
GEN 1:22 ጾሲ ኢስታስ፥ «ዬሌቲቴ፤ ዳሪቴ፤ ኣባ ሃꬃ ኩሚቴ፤ ካፎይካ ቢታ ቦላን ጮራቶ» ጊ ኣንጂዴስ።
GEN 1:23 ጋዴይ ቃሚዴሲኔ ዎንቲዴስ፤ ሄሲካ ኢቻሻንꬆ ጋላሳ።
GEN 1:24 ሄሳፌ ጉዬ ጾሲ፥ «ሼምፖራ ዲዛ ሜꬌቴꬃቲ ባ ቆሞን ቆሞን ሜሄቲ፥ ቢታራ ጎሼቲዛ ሜꬌቴꬃቲኔ ዶኣቲ ባ ቆሞን ቆሞን ቢታ ቦላ ኬዜቶ» ጊን ሃኒዴስ።
GEN 1:25 ጾሲ ዶኣታ ኢስታ ቆሞን ቆሞን፥ ሜሄታካ ኢስታ ቆሞን ቆሞኒኔ ቢታራ ጎሼቲዛ ሜꬌቴꬃታካ ኡባ ኢስታ ቆሞን ቆሞን ሜꬊዴስ፤ ሄሲካ ሎኦ ጊዲዳይሳ ጾሲ ቤኢዴስ።
GEN 1:26 ሄሳፌ ሲሚን ጾሲ፥ «ኣኔ ኣስ ኑ ሌሚሶን ኑና ሚሳቲሲዲ ሜꬎስ፤ ኢስቲ ኣባ ሞሌታ፥ ሳሎ ካፎታ፥ ሜሄታ፥ ቢታ ቦላ ዎጺ ቃጺዛ ሜꬌቴꬃታ ኡባ ሃሬቶ» ጊዴስ።
GEN 1:27 ሄሳꬆ ጾሲ ኣስ ባ ሌሚሶን ባና ሚሳቲሲዲ ሜꬊዴስ፤ ኢዚ ኢስታ ኣዴኔ ማጫ ኦꬂ ሜꬊዴስ።
GEN 1:28 ጾሲ ኢስታስ፥ «ዬሌቲቴ፤ ጮራቲቴ፤ ሃይሳ ቢታ ኩሚቴኔ ሃሪቴ፤ ኣባ ሞሌ፥ ሳሎ ካፎታኔ ቢታ ቦላ ዎጺ ቃጺዛ፥ ሼምፖራ ዲዛ ሜꬌቴꬃታ ኡባ ሃሪቴ» ጊ ኣንጂዴስ።
GEN 1:29 ሄሳፌ ሲሚን ጾሲ፥ «ቤኢቴ! ታኒ ሃ ቢታ ኡባ ቦላን ዜሬꬃ ኣይፌራ ዲዛ ሚꬂኔ ዜሬꬃ ኣይፌራ ዲዛ ቴሪዛ ሚꬅ ኡባ ኢንቴስ ኢማዲስ፤ ኢስቲካ ኢንቴስ ሚዛ ቁማ ጊዴቶ።
GEN 1:30 ቃሴካ ሃ ቢታ ቦላ ዲዛ ሜሄኔ ዶኣ ኡባስ፥ ሳሎ ካፎታስ ኡባስ፥ ቢታራ ጎሼቲዛ ሜꬌቴꬃታ ኡባሲኔ ሼምፖራ ፓጻ ዲዛ ሜꬌቴꬃታ ኡባስ ሚዛ ሚሽ ጊዳና ማላ፥ ጪሊላ ሚꬂኔ ማታ ኩሜꬅ ኢማዲስ» ጊን ሃኒዴስ።
GEN 1:31 ጾሲ ባ ሜꬊዳይሳ ኡባካ ጼሊዲ ዳሮ ሎኦ ጊዲዳይሳ ቤኢዴስ። ጋዴይ ቃሚዴሲኔ ዎንቲዴስ፤ ሄሲካ ኡሱፑንꬃ ጋላሳ።
GEN 2:1 ሳሎ ቦላኔ ሳኣ ቦላ ዲዛይ ዉሪ ሃይሳꬆ ኦሴቲ ፖሌቲዴስ።
GEN 2:2 ጾሲ ባ ኦꬂዳ ኦሶ ኡሱፑንꬃ ጋላስ ፖሊዲ ባ ኦꬂዳ ኦሶ ኡባፌ ላፑንꬃ ጋላስ ሼምፒዴስ።
GEN 2:3 ቃሴ ጾሲ ላፑንꬃ ጋላሳ ኣንጂዴሲኔ ዱማ ጋላስ ኦꬂዴስ፤ ኣይስ ጊኮ ጾሲ ባ ኦꬂዛ ኦሶ ዉርሲዲ ሼምፒዳይ ሄ ጋላሳና።
GEN 2:4 ሳሎይኔ ሳኣይ ሜꬌቲዳይ ሄሳ ማላና። ጎዳይ ሳኣኔ ሳሎ ሜꬊዳ ዎዴ፥
GEN 2:5 ሳኣ ቦላን ማታይ፥ ሚꬂ፥ ኣይ ሚሺካ ሞኪቤና፤ ኣይስ ጊኮ ጎዳይ ኢራ ቡኪሲቤና፤ ቃሴ ቢታ ኦꬂዛ ኣሲካ ሜꬌቲቤና።
GEN 2:6 ጊዲኮካ ሃꬂ ቢታፌ ፑዴ ማጮቲ ኬዚዲ ቢታ ኡባ ኢርጺሴስ።
GEN 2:7 ሄሳፌ ጉዬ ጎዳይ ቢታፌ ኢሲ ኣስ ሜꬊዲ ኢዛ ሲꬌን ዴኦ ሼምፖ ፑኒን ኣዴዚ ሼምፖራ ዲዛዴ ጊዲዴስ።
GEN 2:8 ካሴ ጎዳይ ኣርሼይ ሞኪዛ ባጋራ ኤዴኔ ጌቴቲዛሶን ሎኦሶ ጊግሲዲ ባ ሜꬊዳ ኣዴዛ ሄን ዎꬂዴስ።
GEN 2:9 ጎዳይ ጼላናስ ሎኢዛ፥ ማናስካ ማልኢዛ ዱማ ዱማ ቆሞ ሚꬅ ቢታፌ ሞኪሲዴስ፤ ኤዴኔ ጊዶን ዴኦ ኢሚዛ ሚꬂ ዴስ፤ ሄሳꬆካ ሎኦኔ ኢታ ኤሪሲዛ ሚꬅ ዎꬂዴስ።
GEN 2:10 ጋናቴ ኡሺዛ ሻፋ ሃꬂ ኤዴኔፔ ጎጌስ። ኤዴኔፔ ኬዚዳፔ ጉዬ፥ ኦይዱ ሻፋ ጊዲ ሻኬቴስ።
GEN 2:11 ኮይሮ ሻፋ ሱንꬂ ፒሶኔ፤ ፒሶኔይ ዎርቃይ ዲዛ ሃዊላ ጌቴቲዛ ቢታ ዩሾ ኡባን ጎጌስ።
GEN 2:12 ሄ ቢታ ዎርቃይ ጌሻ ዎርቃ፤ ቃሴ ኣልኦ ሺቶይኔ ኬሂ ሎኢዛ ሹቺ ሄን ዴስ።
GEN 2:13 ናምኣንꬆ ሻፋ ሱንꬂ ጊዮኔ፤ ጊዮኔይ ቶጵያ ቢታ ዩሾ ኡባን ጎጌስ።
GEN 2:14 ሄꬓንꬆ ሻፋ ሱንꬂ ጼግሮሴ፤ ጼግሮሴይ ኣሶሬፔ ኣርሼይ ሞኪዛ ባጋራ ጎጌስ፤ ቃሴ ኦይዳንꬆ ሻፋይ ኤፊራጺሴ ጌቴቴስ።
GEN 2:15 ኣዴዚ ኤዴኔን ኦꬃና ማላኔ ናጋና ማላ ጎዳ ጾሳይ ኢዛ ኤፊ ዎꬂዴስ።
GEN 2:16 ሂስቲዲ ጎዳ ጾሳይ ኣዴዛ፥ «ኤዴኔ ሚꬃ ቴራ ኡባፌ ኔኒ ማና ጊኮ ማ፤
GEN 2:17 ጊዶ ኣቲን ሎኦኔ ኢታ ኤሪሲዛ ሚꬃይ ቴራፔ ሞፓ፤ ኣይስ ጊኮ ኔኒ ኢዚፔ ሚዳ ጋላስ ቱሙ ሃይቃና» ጊ ኣዛዚዴስ።
GEN 2:18 ሄሳፌ ጉዬ ጎዳ ጾሳይ፥ «ኣዴዚ ባርካ ዲዛይሲ ሎኦ ዴና፤ ታኒ ኢዛስ ኢንጄቲዛ ማዶ ኣስ ሜꬋና» ጊዴስ።
GEN 2:19 ጎዳ ጾሳይ ካሴ ሜሄታ ዶኣታ ሳሎ ካፎታ ኡባ ቢታፌ ሜꬊዴስ፤ ቃሴ ኣዴዚ ኢስታ ኣይ ጊዲ ሱንꬃናኮ ሲያናስ ኢዛኮ ኤሂን ኣዴዚ ሼምፖራ ዲዛ ሜꬌቴꬃታ ኡባ ሱንꬂዳ ሱንꬃይ ኢስታስ ሱንꬅ ጊዲ ኣቲዴስ።
GEN 2:20 ሄሳꬆ ኣዴዚ ሜሄታ፥ ሳሎ ካፎታኔ፥ ዶኣታ ኡባ ሱንꬂዴስ፤ ጊዶ ኣቲን ኣዳሜስ ኢንጄቲዛ ማዶ ኣሲ ቤቲቤና።
GEN 2:21 ሄሳ ጊሻስ ጎዳ ጾሳይ ኣዴዛ ꬊስኮ ꬊስኪሲዲ፥ ኢዚ ꬊስኮን ዲሺን ኢዛ ሚሌ ሜቄꬃታፔ ኢሳ ኤኪዲ ሄ ሶሆዛን ኣሾ ኩንꬂዴስ።
GEN 2:22 ጎዳ ጾሳይ ኣዴዛፔ ኤኪዳ ሜቄꬃ ማጫስ ሜꬊዲ ኢዞ ኣዴዛኮ ኤሂዴስ።
GEN 2:23 ኤሂን ኣዴዚ፥ «ሄኮ! ሃ ሜቄꬃያ ታ ሜቄꬃፌ፥ ሃ ኣሾያካ ታ ኣሾፔ ኤኬቲዳሮ፤ ኢዛካ ኣቱማሳፔ ኤኬቲዳ ጊሻስ፥ ማጫስ ጌቴቱ» ጊዴስ።
GEN 2:24 ሄሳ ጊሻስ ኣሲ ባ ኣዋኔ ባ ኣዮ ኣጌስ፤ ባ ማቼይራ ኢሲፌ ዴስ፤ ኢስቲ ናምኣይ ኢሲ ኣሾ።
GEN 2:25 ኣዴዚኔ ኢዛ ማቼያ ናምኣይካ ፓጻ ካሎ ዴቴስ፤ ጊዶ ኣቲን ኢሳይ ኢሳስ ዬላቲ ኤሬቴና።
GEN 3:1 ሾሻይ ጎዳ ጾሳይ ሜꬊዳ ዶኣ ኡባፌ ኣꬊዳ ጌናንቻ፤ ኢሲ ጋላስ ሾሻይ ሄ ማጫሳዮ፥ «ጾሲ ቱሙ ኢንቴና፥ ‹ኤዴኔን ዲዛ ሚꬃ ኣይፌ ኡባፌካ ሞፒቴ› ጊዴ?» ጊ ኦይቺዴስ።
GEN 3:2 ማጫሳያ ሾሻስ ዛራዳ፥ «ጊዴና! ጾሲ ሄሳꬆ ጊቤና፤ ኑኒ ኤዴኔን ዲዛ ሚꬃታ ኣይፌ ማናስ ዳንዳዮስ፤ ጊዶ ኣቲን ጾሲ ኑና፥ ‹ኤዴኔ ጊዶን ዲዛ ሚꬃ ኣይፌ ሞፒቴ፤ ቦቾፍቴ፤ ሂስቶንታ ኣጊኮ ኢንቴ ሃይቃና› ጊዴስ» ጋዱስ።
GEN 3:4 ሾሻይ ማጫሳዮ፥ «ጊዴና! ኢንቴ ቱማ ሃይቄኬታ፤
GEN 3:5 ጾሲ ሄሳ ጊዳይ ሄ ሚꬃይ ኣይፌ ኢንቴ ሚኮ ኢንቴ ኣይፌይ ዶዬቲን፥ ጾሳ ማላ ኢንቴ ሎኦኔ ኢታ ሻኪ ኤራናይሳ ኢዚ ኤሪዛ ጊሻሳ» ጊዴስ።
GEN 3:6 ማጫሳያ ሄ ሚꬃ ኣይፌይ ማናስ ማልኢዛይሳ፥ ጼላናስ ሎኢዛይሳ፥ ቃሴ ኣሲ ኣꬎ ኤራቴꬅ ዴማናስ ኣሞሲዛዝ ጊዲዳይሳ ቤያዳ ሄ ሚꬃ ኣይፌፔ ኤካዳ ማዱስ፤ ቃሴ ባናራ ዲዛ ባ ኣዚናስካ ሄሳፌ ኢሚን ኢዚካ ሚዴስ።
GEN 3:7 ሚዳ ዎዴ ኢስታ ናምኣ ኣይፌይካ ዶዬቲን ኢስቲ ፓጻ ካሎ ዲዛይሳ ኤሪዲ ባላሴ ጌቴቲዛ ሚꬃ ሃይꬅ ሲኪዲ ባ ጼሳን ጊጺዳ።
GEN 3:8 ኦማርሳ ዎዴ፥ ኤዴኔ ጊዶን ጎዳ ጾሳይ ሄሜቲሺን፥ ኢዛ ጬንጉርሳ ኣዴዚኔ ኢዛ ማቼያ ሲዪዲ ጎዳ ጾሳፌ ኤዴኔ ሚꬃ ጊዶን ቆቴቲዳ።
GEN 3:9 ጊዶ ኣቲን ጎዳ ጾሳይ ኣዴዛ ጼይጊዲ፥ «ኣዳሜ ኣዋን ዳይ?» ጊዴስ።
GEN 3:10 ኣዴዚካ፥ «ኤዴኔ ጊዶን ኔ ጬንጉርሳ ሲያዳ ታኒ ካሎ ዲዛ ጊሻስ ባባዳ ቆቴታዲስ» ጊዴስ።
GEN 3:11 ጎዳ ጾሳይ ኢዛ፥ «ኔኒ ካሎ ዳሳ ጊዲ ኔስ ዮቲዳይ ኦኔ? ታኒ ኔና፥ ‹ሞፓ› ጋዳ ኣዛዚዳ ሚꬃ ኣይፌፔ ማዲ?» ጊ ኦይቺዴስ።
GEN 3:12 ኢዚካ፥ «ታናራ ዳና ማላ ኔ ኢሚዳ ማጫሳያ ሄ ሚꬃ ኣይፌፔ ታስ ኢሚን ማዲስ» ጊዴስ።
GEN 3:13 ጎዳ ጾሳይ ሄሳፌ ጉዬ ማጫሳዮ፥ «ኔኒ ሄሳ ኣይስ ኦꬃዲ?» ጊ ኦይቺዴስ። ማጫሳያካ፥ «ታና ሾሻይ ባሌꬂን ማዲስ» ጋዱስ።
GEN 3:14 ጎዳ ጾሳይ ሄሳፌ ጉዬ ሾሻ፥ «ኔኒ ሃይሳ ኦꬂዳ ጊሻስ፥ ሜሄ ኡባኔ ዶኣ ኡባ ጋርሳን ኔ ጻላይ ቃንጌቲዳዛ! ኔኒ ኔ ኡሎን ቢታራ ጎሼታና፤ ኔ ዴኦ ላይꬅ ኡባንካ ቢታ ጉዱላ ላጫ።
GEN 3:15 ታኒ ኔሲኔ ማጫሳይስ፥ ኔ ዜሬꬃሲኔ ኢዚ ዜሬꬃስ ጊዶን ሞርኬቴꬅ ሜꬋና፤ ኢዚ ኔ ሁኤ ቆጻና፤ ኔኒካ ኢዛ ቂርጴ ዱካና» ጊዴስ።
GEN 3:16 ማጫሳዮካ ጎዳ ጾሳይ፥ «ኔ ሻሪዛ ኣጊናን ኔኒ ዳሮ ቱጋታና፤ ቃሴ ኔኒ ዎልቃማ ሚጻን ናይታ ዬላና። ጊዲኮካ ኔኒ ኔ ኣዚናራ ኣቃናስ ኣሞታና፤ ኢዚካ ኔና ሃራና» ጊዴስ።
GEN 3:17 ኣዳሜካ ጎዳ ጾሳይ፥ «ኔኒ ኔ ማቼይ ቃላ ሲዪዳ ጊሻስ ታኒ ኔና፥ ‹ሄ ሚꬃ ኣይፌ ሞፓ› ጋዳ ኣዛዚዳ ሚꬃ ኣይፌፔ ኔኒ ሚዳ ጊሻስ፥ «ኔ ጌዶን ቢታይ ቃንጌቲዳዝ ጊዶ! ኔኒ ኔ ዴኦ ላይꬅ ኡባን ጊታ ዳቡራን ቢታ ኦꬃዳ ማና።
GEN 3:18 ቢታይ ኔስ ኣጉንꬂኔ ኪንዲቾ ሞኪሳና፤ ኔኒ ቢታፌ ሞኪዳይሳ ማና።
GEN 3:19 ኔኒ ቢታን ሲማና ጋካናስ ዳቡራን ኔ ጫዋ ጉሳ ኦꬃዳ ማና፤ ኔኒ ቢታፌ ሜꬌቲዳ ጊሻስ ቢታን ሲማንዳሳ» ጊዴስ።
GEN 3:20 ኣዳሜይ ባ ማቺዮ ሄዋኖ ጊ ሱንꬂዴስ፤ ኣይስ ጊኮ ኢዛ ኣሳ ኡባስ ኣዮ።
GEN 3:21 ጎዳ ጾሳይ ኣዳሜሲኔ ኢዛ ማቼይስ ኢቴ ጊግሲዲ ኢስታ ማይዚዴስ።
GEN 3:22 ሄሳፌ ጉዬ ጎዳ ጾሳይ፥ «ሂስቲን ኣሲ ኑፔ ኢሳዴ ማላ ሎኦኔ ኢታ ኤሪዛዴ ጊዲዴስ፤ ኢዚ ባ ኩሼ ዬዲዲ ዴኦ ኢሚዛ ሚꬃፌ ኤኪዲ ቃሴ ሞንታ ማላኔ ሜርናስ ፓጻ ዴኦንታ ማላ ቴቄታናስ ኮሼስ» ጊዴስ።
GEN 3:23 ሄሳ ጊሻስ ኢዚ ባ ሜꬌቲዳ ቢታ ኦꬃና ማላ፥ ጎዳ ጾሳይ ኤዴኔፔ ኢዛ ኬሲዴስ።
GEN 3:24 ኢዛ ኬሲዲ፥ ዴኦ ሚꬃኮ ኤፊዛ ኦጌ ናጋና ማላ፥ ኪሩቤ ጌቴቲዛ ኪታንቻታኔ ፖፖልኡ ጊ ኣꬊ ኣꬊ ዎꬊዛ ታማ ላጮ ሚሳቲዛ ጊꬃ ማሻ ኤዴኔፔ ኣርሼይ ሞኪዛ ባጋራ ዎꬂዴስ።
GEN 4:1 ኣዳሜይ ባ ማቾ ሄዋኒራ ኣቂን ኢዛ ሻራዳ ኣቱማ ና ዬላዱስ፤ «ጎዳይ ታና ማዲን ኣቱማ ና ዴማዲስ» ጋሼ ኢዛ ቃዬሌ ጋ ሱንꬃዱስ።
GEN 4:2 ቃሴ ኢዛ ኢሻ ኣቤሌካ ዬላዱስ። ኣቤሊ ዶርሳ ሄንꬃንቻ፤ ቃዬሌይ ቢታ ጎሻንቻ።
GEN 4:3 ኡንዴና ዎዴፔ ጉዬ ቃዬሌይ ባ ጋዴን ሞኪዳ ካꬃፌ ጎዳስ ያርሾ ሺሺዴስ።
GEN 4:4 ጊዶ ኣቲን ኣቤሊ ባ ዶርሳታ ጊዶን ኮይሮ ዬሌቲዳ ላቃታፔ ኢሳ ኤኪ ሹኪዲ ኣሾዛፔ ሃንዳዛ ያርሺዴስ፤ ጎዳይ ኣቤሌኔ ኢዛ ያርሾዛ ኤኪዴስ።
GEN 4:5 ቃዬሌኔ ኢዛ ያርሾ ኤኪቤና፤ ሄሳ ጊሻስ ቃዬሌይ ኬሂ ዪሎቲዴስ፤ ባ ኣይፌሶካ ኢሲዴስ።
GEN 4:6 ሂስቲን ጎዳይ ቃዬሌ፥ «ኣይስ ዪሎታይ? ኔ ኣይፌሶይ ኣይስ ꬉሚዴ?
GEN 4:7 ኔ ሎኦ ኦꬂዳ ጊዲዳኮ ጾሲ ኔ ያርሾ ኤኬኔሺን? ኔኒ ሎኦ ኦꬆንታ ኢጺኮ ናጋራይ ኔ ካሬን ኔና ናጌስ፤ ናጋራይ ኔና ሃራና ኮዬስ፤ ኔኒ ኢዛ ጾናና ቤሴስ» ጊዴስ።
GEN 4:8 ሄሳፌ ጉዬ ቃዬሌይ ባ ኢሻ ኣቤሌ፥ «ኣኔ ጌዴ ዴምባሶ ቦስ» ጊዴስ። ቢዲ ኢስቲ ዴምባን ዲሺን ቃዬሌይ ባ ኢሻ ኣቤሌ ቦላ ዴንዲዲ ዎꬊዴስ።
GEN 4:9 ጎዳይ ቃዬሌ፥ «ኔ ኢሻይ ኣቤሊ ኣዋን ዲዜ?» ጊ ኦይቺዴስ። ቃዬሌይ ዛሪዲ፥ «ታ ኤሪኬ፤ ታ ኢሻ ናጊዛይ ታኔዬ?» ጊዴስ።
GEN 4:10 ጎዳይ ቃዬሌ፥ «ሄሳ ኣይስ ኦꬃዲ? ቤያ፤ ኔ ኢሻ ሱꬂ ቢታፌ ፑዴ ታኮ ዋሴስ።
GEN 4:11 ኔ ኩሼፔ ኔ ኢሻ ሱꬃ ኤኪዲ ሚታናስ ዶና ዶይዳ ቢታ ቦላ ሃኢ ኔኒ ቃንጌታዳሳ።
GEN 4:12 ኔኒ ኦꬂንካ ቢታይ ኔስ ካꬅ ኢሜና፤ ቤቴ ኣሳ ማላ ኔኒ ቢታ ቦላን ቶይላታና» ጊዴስ።
GEN 4:13 ቃዬሌይ ጎዳ፥ «ኔ ታና ቃጻዪዛ ቂጻቴ ታኒ ሙሌካ ዳንዳይኬ።
GEN 4:14 ሄኮ ኔኒ ታና ሃች ሃ ቢታፌ ዬዴꬃሳ፤ ታኒ ኔ ሲንꬃፌ ቆቴታና፤ ቤቴ ኣሳ ማላ ታኒ ቢታ ቦላ ቶይላታና፤ ታና ዴሚዳይ ኦኒካ ዎꬋና» ጊዴስ።
GEN 4:15 ጎዳይ ኢዛ፥ «ኔና ኦኒካ ዎꬌና፤ ዎꬊኮ ኔ ሃሎ ታኒ ላፑን ኩሼ ኬሳና» ጊዴስ፤ ሄሳ ጊሻስ ዴሚዳይ ኦኒካ ኢዛ ዎꬎንታ ማላ ጎዳይ ኢዛ ቦላ ማላታ ዎꬂዴስ።
GEN 4:16 ቃዬሌይ ጎዳ ሲንꬃፌ ኬዚዲ ኤዴኔ ባጋፌ ኣርሼይ ሞኪዛ ባጋራ ዲዛ ኖዴ ጌቴቲዛ ቢታን ዴኢዴስ።
GEN 4:17 ቃዬሌይ ባ ማቼይራ ኣቂን ኢዛ ሻራዳ ሄኖኬ ዬላዱስ፤ ሄ ዎዴ ቃዬሌይ ካታማ ጊግሲዲ ሄ ካታማ ባ ናዛ ሱንꬃን፥ «ሄኖኬ» ጊ ሱንꬂዴስ።
GEN 4:18 ሄኖኬይ ኢራዴ ዬሊዴስ፤ ኢራዴይ ማሁያኤሌ ዬሊዴስ፤ ማሁያኤሌይ ማቱሳኤሌ ዬሊዴስ፤ ማቱሳኤሌይ ላሜኬ ዬሊዴስ።
GEN 4:19 ላሜኬይ ኣዶኔ ጺሎ ጌቴቲዛ ናምኡ ማቼታ ዳዉꬅ ኤኪዴስ።
GEN 4:20 ኣዳይ ያባሌ ዬላዱስ፤ ያባሌይ ሜሄ ሃሪሼ ዩዪ ዩዪ ዱንካኔን ዲዛ ኣሳታ ኣዋ።
GEN 4:21 ኢዛ ኢሻ ሱንꬂ ዩባሌ፤ ዩባሌይ ቃሴ ዲꬅ ዲጺዛኔ ሱሱልኤ ፑኒዛ ኣሳታ ኡባታ ኣዋ፤
GEN 4:22 ጺላይ ቃሴ ቱባሊቃይኔ ጌቴቲዛ ና ዬላዱስ፤ ቱባሊቃይኔይ ጻርቂማላፔኔ ቢራታፔ ዱማ ዱማ ሚሻታ ቆጺዛዴ። ቱባሊቃይኔ ሚቼያ ናኢሞ ጌቴታዉስ።
GEN 4:23 ኢሲ ጋላስ ላሜኬይ ባ ማቼታ፥ «ታ ማቼቶ ኣዴ፥ ጺሌ ሲዪቴ! ኣኔ ታኒ ዮቲዛይሳ ኤዝጊቴ። ኢሲ ኣሲ ታና ዋꬊ ማዱንꬂዳ ጊሻስ ታኒ ኢዛ ዎꬋዲስ፤ ኤ፥ ታኒ ሄ ታና ማዱንጺሲዳ ዎዳላዛ ዎꬋዲስ።
GEN 4:24 ቃዬሌ ሃሎ ኬሳናስ ላፑን ኩሼ ኮሺኮ ላሜኬ ሃሎ ኬሳናስ ላፑን ታማኔ ላፑን ኩሼ ኮሼስ» ጊዴስ።
GEN 4:25 ኣዳሜይ ባ ማቼይራ ኣቂን ሃራ ና ዬላዱስ። ዬላዳ፥ «ቃዬሌይ ዎꬊዳ ኣቤሌ ጊሻስ ጾሲ ታስ ሃራ ና ኢሚዴስ» ጋሼ ኢዛ ሴቴ ጋዳ ሱንꬃዱስ።
GEN 4:26 ሴቴይካ ኣቱማ ና ዬሊዲ ኢዛ፥ «ሄኖሴ» ጊ ሱንꬂዴስ። ኣሳይ ሄ ዎዴ ጎዳ ሱንꬅ ጼይጊዲ ጎይኖ ኦይኪዴስ።
GEN 5:1 ኣዳሜ ዜሬꬂ ሃይሳፌ ካሊዲ ጻፌቲዴስ፤ ጾሲ ኣስ ሜꬊዳ ጋላስ ባና ሚሳቲሲዲ ሜꬊዴስ።
GEN 5:2 ኣዴኔ ማጫስ ኦꬂ ሜꬊዲ ኢስታ ኣንጂዴስ። ኢስታ ሜꬊዲ ኣስ ጊ ሱንꬂዴስ።
GEN 5:3 ኣዳሜይ 130 ላይꬅ ዴኢዲ ባና ሚሳቲዛ ኣቱማ ና ዬሊዲ ኢዛ፥ «ሴቴ» ጊ ሱንꬂዴስ።
GEN 5:4 ኣዳሜይ ሴቴ ዬሊዳፔ ጉዬ 800 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:5 ኣዳሜይ ሙሌራ 930 ላይꬅ ዴኢዲ ሃይቂዴስ።
GEN 5:6 ሴቴይ 105 ላይꬅ ዴኢዲ ሄኖሴ ዬሊዴስ፤
GEN 5:7 ሴቴይ ሄኖሴ ዬሊዳፔ ጉዬ 807 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:8 ሴቴይ ሙሌራ 912 ላይꬅ ዴኢዲ ሃይቂዴስ።
GEN 5:9 ሄኖሴይ 90 ላይꬅ ዴኢዲ ቃይናኔ ዬሊዴስ፤
GEN 5:10 ሄኖሴይ ቃይናኔ ዬሊዳፔ ጉዬ 815 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:11 ሄኖሴይ ሙሌራ 905 ላይꬅ ዴኢዲ ሃይቂዴስ።
GEN 5:12 ቃይናኔይ 70 ላይꬅ ዴኢዲ ማላልኤሌ ዬሊዴስ፤
GEN 5:13 ቃይናኔይ ማላልኤሌ ዬሊዳፔ ጉዬ 840 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:14 ቃይናኔይ ሙሌራ 910 ላይꬅ ዴኢዲ ሃይቂዴስ።
GEN 5:15 ማላልኤሌይ 65 ላይꬅ ዴኢዲ ያሬዴ ዬሊዴስ፤
GEN 5:16 ማላልኤሌይ ያሬዴ ዬሊዳፔ ጉዬ 830 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:17 ማላልኤሌይ ሙሌራ 895 ላይꬅ ዴኢዲ ሃይቂዴስ።
GEN 5:18 ያሬዴይ 162 ላይꬅ ዴኢዲ ሄኖኬ ዬሊዴስ፤
GEN 5:19 ያሬዴይ ሄኖኬ ዬሊዳፔ ጉዬ 800 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:20 ያሬዴይ ሙሌራ 962 ላይꬅ ዴኢዲ ሃይቂዴስ።
GEN 5:21 ሄኖኬይ 65 ላይꬅ ዴኢዲ ማቱሳላ ዬሊዴስ፤
GEN 5:22 ማቱሳላ ዬሊዳፔ ጉዬ ሄኖኬይ 300 ላይꬅ ጾሳ ኡፋይሲሼ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:23 ሄኖኬይ ሙሌራ 365 ላይꬅ ዴኢዴስ፤
GEN 5:24 ኢዚ ጾሳ ኡፋይሲሼ ዲን ጾሲ ኢዛ ኤኪዳ ጊሻስ ቤቶንታ ꬋይዴስ።
GEN 5:25 ማቱሳላይ 187 ላይꬅ ዴኢዲ ላሜኬ ዬሊዴስ፤
GEN 5:26 ማቱሳላይ ላሜኬ ዬሊዳፔ ጉዬ፥ 782 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:27 ማቱሳላይ ሙሌራ 969 ላይꬅ ዴኢዲ ሃይቂዴስ።
GEN 5:28 ላሜኬይ 182 ላይꬅ ዴኢዲ ኣቱማ ና ዬሊዲ፥
GEN 5:29 «ሃ ናዚ ጎዳይ ቃንጊዳ ቢታ ቦላን ኑና ኑ ዳቡራፔ ሼምፒሳና» ጊዲ ኖሄ ጊ ሱንꬂዴስ።
GEN 5:30 ላሜኬይ ኖሄ ዬሊዳፔ ጉዬ 595 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 5:31 ላሜኬይ ሙሌራ 777 ላይꬅ ዴኢዲ ሃይቂዴስ።
GEN 5:32 ኖሄይ 500 ላይꬅ ዴኢዲ ሴሜ፥ ካሜኔ ያፌቴ ዬሊዴስ።
GEN 6:1 ኣሲ ቢታ ቦላ ዳሪዳ ዎዴ ኣሳስ ማጫ ናይቲ ዬሌቲዳ፤
GEN 6:2 «ጾሳ ናይታ» ጌቴቲዛ ሜꬌቴꬃቲ ኣሳ ማጫ ናይቲ ሜꬎ ሎኦ ጊዲዳይሳ ቤኢዲ ኢስታፌ ባ ዶሪዳይታ ማቾ ኤኪዳ።
GEN 6:3 ጎዳይ፥ «ኣሲ ሃይቂዛዛ፤ ኢዛ ላይꬃይካ 120 ላይꬃፌ ዳሬና፤ ሄሳ ጊሻስ ታ ኣያናይ ኣሳ ና ቦላ ሜርናስ ዴና» ጊዴስ።
GEN 6:4 ሄ ዎዴኔ ሄሳፌ ጉዬ ጾሳ ናይቲ ኣሳ ማጫ ናይታ ማቾ ኤኪን ናይቲ ዬሌቲዳ ዎዴ ዎጋ ዎልቃማ ኣሳቲ ቢታ ቦላን ዴቴስ። ኢስቲካ ቤኒ ዎዴ ኦላስ ሚኖኔ ኤሬቲዳ ኣሳ።
GEN 6:5 ጎዳይ ሄ ዎዴ ቢታ ቦላን ዲዛ ኣሳ ኢታቴꬂ ዳሪዳይሳኔ ኢስቲ ባ ዎዚናን ቆፒዛይሲ ዉሪ ኡባ ዎዴካ ኢታ ጻላላ ጊዲዳይሳ ቤኢዴስ፤
GEN 6:6 ጎዳይ ኣስ ሃ ቢታ ቦላን ሜꬊዳ ጊሻስ ሞꬌቲዴስ፤ ባ ዎዚናን ኬሂ ሴሌቲዴስ።
GEN 6:7 ሄሳ ጊሻስ ጎዳይ፥ «ታኒ ሜꬊዳ ኣሳ ሃ ቢታ ቦላፌ ኡባ ꬋይሳና፤ ኣሳ፥ ሜሄ፥ ዶኣ፥ ቢታራ ጎሼቲዛ ሜꬌቴꬃታኔ ካፎታ ꬋይሳና፤ ኣይስ ጊኮ ታኒ ኢስታ ሜꬊዳ ጊሻስ ሚሼታዲስ» ጊዴስ።
GEN 6:8 ጊዶ ኣቲን ኖሄይ ጎዳ ሲንꬃን ሳቤቲዴስ።
GEN 6:9 ኖሄይ ሃኒዳይሲ ሃይሳፌ ካሊዲ ጻፌቲዴስ። ኖሄይ ጺሎ ኣሳ፤ ኢዚ ባ ዎዴን ዲዛ ኣሳ ጊዶን ሱሬ ኣሳ፤ ኖሄይ ጾሳራ ጊጋ ዱስ ዴኢዴስ።
GEN 6:10 ኖሄይ ሴሜ፥ ካሜኔ ያፌቴ ጌቴቲዛ ሄꬑ ኣቱማ ናይታ ዬሊዴስ።
GEN 6:11 ሄ ዎዴ ቢታ ቦላ ዲዛ ኣሲ ዉሪ ጾሳ ሲንꬃን ቱኒዴስ፤ ቢታይ ዉሪ ማካላን ኩሚዴስ።
GEN 6:12 ጾሲ ዱጌ ቢታ ጼሊሺን ቢታ ቦላ ዲዛ ኣሳይ ዉሪ ቱኒዳይሳ ቤኢዴስ።
GEN 6:13 ሄሳ ጊሻስ ጾሲ ኖሄ፥ «ታኒ ኣሳ ኡባ ꬋይሳና ጋይስ፤ ኣሳ ጋሶን ቢታይ ማካላን ኩሚዳ ጊሻስ ታኒ ቱማፔ ኣሳኔ ቢታ ቦላ ዲዛዝ ኡባ ꬋይሳና።
GEN 6:14 ሄሳ ጊሻስ ሚኖ ሚꬃፌ ኔስ ማርካቤ ኬጻ፤ ሄ ማርካቤዛ ጊዶን ኪፊሌ ኦꬃ፤ ሂስታዳ ሶ ባጋራኔ ካሬ ባጋራ ሺዳን ሜሻ።
GEN 6:15 ማርካቤዛ ኬጻሼ ኢዛ ኣዱሳቴꬂ 300 ዋꬋ፥ ጎምፓይ 50 ዋꬋ፥ ፑዴ ꬎቃቴꬂ 133 ዋꬋ ሂስታ ኦꬃ።
GEN 6:16 ማርካቤዛስ ካራ ሜꬋ፤ ካራፔኔ ጎዳፔ ጊዶን ኢሲ ዋꬋ ጊዲዛሶ ዶያ ኣጋ፤ ፔንጌዛ ማርካቤዛስ ሚሌራ ኬሳ፤ ማርካቤዛ ሄꬑ ፖቄ ኬሳ ኬጻ።
GEN 6:17 «ታኒ ሳሎፔ ጋርሳን ሼምፖራ ዲዛ ሜꬌቴꬃ ኡባ ꬋይሳናስ ሃ ቢታ ቦላን ꬋይሳ ሃꬅ ዬዲኮ ቢታን ዲዛይሲ ዉሪ ꬋያና።
GEN 6:18 ጊዶ ኣቲን ታኒ ኔናራ ጫቄታና። ኔኒ፥ ኔ ማቺያ፥ ኔ ናይቲኔ ኔ ናይታ ማቼቲ ኔናራ ማርካቤዛን ጌላንዴታ።
GEN 6:19 ኢስቲ ኔናራ ፓጻ ዳና ማላ ሼምፖራ ዲዛ ሜꬌቴꬃ ኡባፌ ቆሞን ቆሞን ኣዴኔ ማጫ ናምኡ ናምኡ ሂስታዳ ማርካቤዛ ጊዶ ጌልꬃ።
GEN 6:20 ዱማ ዱማ ቆሞ ካፎታፔ፥ ዱማ ዱማ ቆሞ ሜሄታፔኔ ቢታራ ጎሼቲዛ ዱማ ዱማ ቆሞ ሜꬌቴꬃታፔ ኡባፌ ናምኡ ናምኡ ጊዲዲ ሼምፖራ ፓጻ ኣታና ማላ ኔኮ ያና።
GEN 6:21 ቃሴ ኔኒኔ ኔናራ ዲዛይቲ ማና ማላ ዱማ ዱማ ቆሞ ካꬅ ኤፋዳ ማርካቤዛ ጊዶ ጌልꬃ» ጊ ኣዛዚዴስ።
GEN 6:22 ኖሄይ ኡባካ ጾሲ ኣዛዚዳ ማላ ኦꬂዴስ።
GEN 7:1 ሄሳፌ ጉዬ ጎዳይ ኖሄ፥ «ኔኒ ሃይሳ ሃ ዎዴ ዬሌታ ጊዶን ጺሎ ጊዲዳይሳ ታ ቤኢዳ ጊሻስ ኔኒ ኔሶ ኣሳ ኡባራ ማርካቤዛ ጊዶ ጌላ።
GEN 7:2 ኔኒ ጌሽ ጊዲዳ ሜሄኔ ዶኣ ኡባፌ ኢዛ ቆሞፌ ቆሞፌ ኣዴኔ ማጫ ላፑን ላፑን፥ ጌሽ ጊዶንታ ሜሄኔ ዶኣ ኡባፌ ኢዛ ቆሞፌ ቆሞፌ ኢሲ ኣዴኔ ኢሲ ማጫ ቃሴ ካፎታፔ ኢዛ ቆሞፌ ቆሞፌ ኣዴኔ ማጫ ላፑን ላፑን፥ ቢታ ኡባ ቦላን ዱማ ዱማ ዜሬꬃይ ፓጻ ዳና ማላ ኔናራ ኤካ ጌላ።
GEN 7:4 ኣይስ ጊኮ ላፑን ጋላሳፌ ጉዬ ታኒ ኦይዱ ታሙ ጋላሲኔ ኦይዱ ታሙ ቃማ ቢታ ቦላን ኢራ ቡኪሳና፤ ሂስታዳ ታኒ ሜꬊዳ ሜꬌታ ኡባ ቢታ ቦላፌ ꬋይሳና» ጊዴስ።
GEN 7:5 ኖሄይ ጎዳይ ኢዛ ኣዛዚዳይሳ ኡባ ኦꬂዴስ።
GEN 7:6 ꬋይሳ ሃꬂ ቢታ ቦላ ዪዛ ዎዴ ኖሄስ ላይꬃይ ኡሱፑን ጼታ።
GEN 7:7 ኖሄ፥ ኢዛ ኣቱማ ናይቲ፥ ኢዛ ማቼያኔ ኢዛ ናይታ ማቼቲ ꬋይሳ ሃꬃፌ ኣታናስ ማርካቤዛ ጊዶ ጌሊዳ።
GEN 7:8 ጌሻ ሜሄፔኔ ዶኣፔ፥ ጌሽ ጊዶንታ ሜሄፔኔ ዶኣፔ፥ ካፎፔኔ ቢታራ ጎሼቲዛ ኡባፌ፥
GEN 7:9 ጾሲ ኖሄ ኣዛዚዳ ማላካ ኣዴኔ ማጫ ናምኡ ናምኡ ጊዲዲ ኖሄኮ ማርካቤዛ ጊዶ ጌሊን፥
GEN 7:10 ላፑን ጋላሳፌ ጉዬ ꬋይሳ ሃꬂ ቢታ ቦላ ዪዴስ።
GEN 7:11 ኖሄስ ኡሱፑን ጼቱ ላይꬅ ጊዲሺን ናምኣንꬆ ኣጊናን ታማኔ ላፑንꬃ ጋላሳን ሄ ጋላሳንካ ቢታ ጊዶን ዲዛ ጊታ ጪማ ፑልቶይ ዉሪ ꬉቂዴስ፤ ሳሎን ዲዛ ሃꬃ ማስኮቴቲካ ዶዬቲ ዎꬊዳ።
GEN 7:12 ኢራይ ቢታ ቦላን ኦይዱ ታሙ ጋላሲኔ ኦይዱ ታሙ ኦማርስ ቡኪዴስ።
GEN 7:13 ሄ ጋላሳን ኖሄይኔ ኢዛ ኣቱማ ናይቲ፥ ሴሜይ፥ ካሜይኔ ያፌቴይ፥ ኖሄ ማቼያኔ ኢዛ ናይታ ሄꬓታ ማቼቲ ኢሲፌ ማርካቤዛ ጊዶ ጌሊዳ።
GEN 7:14 ኢስታኔ ዶኣ ኡባፌ ባ ቆሞን ቆሞን፥ ሜሄ ኡባፌካ ባ ቆሞን ቆሞን፥ ቢታራ ጎሼቲዛያታ ኡባፌ ባ ቆሞን ቆሞን፥ ካፎ ኡባፌ ባ ቆሞን ቆሞን ኢስታራ ኢሲፌ ጌሊዳ።
GEN 7:15 ሼምፖራ ፓጻ ዲዛይቲ ዉሪ ናምኡ ናምኡ ጊዲዲ ኖሄኮ ማርካቤዛን ጌሊዳ፤
GEN 7:16 ጾሳይ ኖሄ ኣዛዚዳ ማላ ሜꬌታ ኡባፌ ኣዴኔ ማጫ ጊዲዲ ማርካቤዛ ጊዶ ጌሊን ኖሄይ ጊዶን ዲሺን ጎዳይ ማርካቤዛ ፔንጌ ጎርዲዴስ።
GEN 7:17 ꬋይሳ ሃꬂ ኦይዱ ታሙ ጋላስ ቢታ ቦላ ቡኪሼ ጋምኢዴስ፤ ሃꬂ ዳሪዲ፥ ማርካቤዛ ቢታፌ ፑዴ ዴንꬂዴስ።
GEN 7:18 ሃꬃይ ቢታ ቦላን ኬሂ ዳሪን ማርካቤዚ ሃꬃ ቦላን ቶኬቲዴስ።
GEN 7:19 ሳሎፔ ጋርሳራ ዲዛ ꬎቃ ዙማቲ ዉሪ ሚቴታና ጋካናስ ሃꬃይ ቢታ ቦላን ኬሂ ዎልቃፌ ዳሪዴስ።
GEN 7:20 ሃꬃይ ዙማታ ጼራፔ ኣꬊዲ 15 ዋꬋ ጋካናስ ꬎቁ ጊዴስ።
GEN 7:21 ሂስቲን ቢታ ቦላን ሼምፖራ ፓጻ ቃጺዛ ሜꬌቴꬃቲ ዉሪ፥ ካፎይ፥ ሜሄይ፥ ዶኣይ፥ ቢታ ቦላን ዎጺ ቃጺዛይኔ ኣሲ ዉሪ ሃይቂዴስ።
GEN 7:22 ቢታ ቦላን ዲዛ ሲꬌራ ሼምፒዛይ ዉሪካ ሃይቂዴስ።
GEN 7:23 ሃ ቢታን ፓጻ ዲዛይ ዉሪ ኣሲ፥ ሜሄይኔ ዶኣይ፥ ቢታራ ጎሼቲዛ ሜꬌቴꬂኔ ሳሎ ካፎቲ ዉሪካ ቢታፌ ፒቴቲ ꬋዪን ኖሄይኔ ኢዛራ ማርካቤ ጊዶን ዲዛይቲ ጻላ ኣቲዳ።
GEN 7:24 ሃꬃይካ 150 ጋላስ ጋካናስ ቢታ ቦላን ጋምኢዴስ።
GEN 8:1 ጊዶ ኣቲን ጾሲ ኖሄ፥ ኢዛራ ማርካቤዛ ጊዶን ዲዛ ዶኣኔ ሜሄ ኡባ ቆፒዲ ቢታ ቦላን ጫርኮ ጫርኪሲን ሃꬃይ ዎꬊ ዎꬊ ቢዴስ።
GEN 8:2 ቃሴ ቢታ ጊዶን ዲዛ ጪማ ፑልቶይኔ ሳሎን ዲዛ ሃꬃ ማስኮቴቲ ጎርዴቲዳ፤ ኢራይካ ሳሎን ቴቄቲዴስ።
GEN 8:3 ሂስቲን ሃꬃይ ዎꬊ ዎꬊ ቢዴስ፤ ሄ 150 ጋላሳፌ ጉዬ ሃꬃይ ዎꬊዴስ።
GEN 8:4 ሃꬃይ ዎꬊን ማርካቤዚ ላፑንꬃ ኣጊናን ታማኔ ላፑንꬃ ጋላሳን ኣራራቴ ጌቴቲዛ ዙማ ቦላ ሼምፒዴስ።
GEN 8:5 ሃꬃይ ታማንꬆ ኣጊና ጋካናስካ ዎꬊ ዎꬊ ቢዴስ፤ ታማንꬆ ኣጊናን ኮይሮ ጋላስ ዙማታስ ሁኤይ ቤቲዴስ።
GEN 8:6 ኦይዱ ታሙ ጋላሳፌ ጉዬ ኖሄይ ባ ኬጺዳ ማርካቤዛ ማስኮቴዛ ዶይዲ፥
GEN 8:7 ኢሲ ቁሮ ካሬ ኬሲ ዬዲን ቁሮዚ ሃꬂ ቢታ ቦላፌ ሜላና ጋካናስ ያኔ ሃ ፒራꬊሼ ጋምኢዴስ።
GEN 8:8 ቃሴ ኖሄይ ሃꬂ ቢታ ቦላፌ ዎꬊ ዉሪዳኮ ቤያናስ ኢሲ ሃራጴ ካሬ ዬዲዴስ።
GEN 8:9 ጊዶ ኣቲን ሄ ሃራጴያ ሃꬂ ቢታ ኡባ ቦላን ሃኢካ ዲዛ ጊሻስ ሼምፒዛሶ ዴማቤኩ፤ ሄሳ ጊሻስ ሲማዳ ማርካቤዛ ጊዶን ዲዛ ኖሄኮ ዪን ኢዚ ባ ኩሼ ዬዲዲ ባኮ ማርካቤዛ ጊዶ ኤኪዴስ።
GEN 8:10 ቃሴካ ሃራ ላፑን ጋላስ ጋምኢዲ ሃኢካ ሃራጴዮ ማርካቤዛ ጊዶፌ ኬሲ ዬዲዴስ።
GEN 8:11 ሄ ሃራጴያ ጋዴይ ቃሚሺን ኢዛኮ ሲማ ያሼ ዎጋራ ጼራፔ ጪሊላ ሃይꬅ ዱꬃዳ ዶናን ሳጻ ኤካ ዪዳ ጊሻስ ሃꬂ ቢታ ቦላፌ ዎꬊዳይሳ ኖሄይ ኤሪዴስ።
GEN 8:12 ቃሴ ኖሄይ ሃራ ላፑን ጋላስ ጋምኢዲ ሄ ሃራጴዮ ዛሪ ዬዲዴስ፤ ጊዶ ኣቲን ሄ ሃራጴያ ኢዛኮ ሲማ ያቤኩ።
GEN 8:13 ኖሄይ 601 ላይꬅ ዴኢን ኮይሮ ኣጊናን ኮይሮ ጋላስ ሃꬂ ቢታ ቦላፌ ጾስኪዴስ፤ ኖሄይ ማርካቤዛ ካራ ቃሪ ጼሊዲ ጋዴይ ጾስኪዳይሳ ቤኢዴስ።
GEN 8:14 ናምኣንꬆ ኣጊናን ናምኡ ታማኔ ላፑንꬃ ጋላሳን ቢታይ ሙሌራ ሜሊዴስ።
GEN 8:15 ሄ ዎዴ ጾሲ ኖሄ ሂዝጊ ኣዛዚዴስ፥
GEN 8:16 «ኔኒ ኔ ማቾ፥ ኔ ናይታኔ ኔ ናይታ ማቼታ ኤካዳ ማርካቤዛፔ ኬዛ።
GEN 8:17 ኢስቲ ዬሌቲ ዳሪዲ ጮራታና ማላ ሼምፖራ ዲዛ ሜꬌቴꬃ ኡባፌ ኔናራ ዲዛይታ፥ ካፎታ፥ ሜሄታ፥ ዶኣታኔ ቢታራ ጎሼቲዛይታ ኡባ ኔናራ ኬሳ» ጊዴስ።
GEN 8:18 ኖሄይ ባ ናይታራ፥ ባ ማቼይራኔ ባ ናይታ ማቼታራ ማርካቤዛ ጊዶፌ ኬዚዴስ።
GEN 8:19 ሜሄይ፥ ዶኣይ፥ ቢታራ ጎሼቲዛ ሜꬌቴꬂ፥ ካፎይኔ ቢታ ቦላን ዎጺ ቃጺዛ ሚሺ ዉሪ ባ ቆሞን ቆሞን ማርካቤዛ ጊዶፌ ኬዚዴስ።
GEN 8:20 ሄሳፌ ጉዬ ኖሄይ ጎዳስ ያርሺዛሶ ኬሊዲ ጌሻ ሜሄ ኡባፌኔ ጌሻ ካፎ ኡባፌ ኤኪዲ ያርሺዛሶን ጹጊዲ ያርሺዴስ።
GEN 8:21 ሂስቲን ጎዳይ ያርሾዛ ፔኖ ሳዊዛይሳ ሲንጊዲ ባ ዎዚናን፥ «ዬላጋቴꬃፌ ዶሚን ኣሲ ዎዚናን ቆፒዛይሲ ዉሪ ኢታ ጊዲኮካ ታኒ ኣሳ ጊሻስ ጋዳ ናምኣንꬆ ሙሌካ ሃ ቢታ ቃንጊኬ። ቃሴ ታኒ ሃኢ ኦꬂዳ ማላ ፓጻ ዲዛ ሜꬌቴꬅ ኡባ ናምኣንꬆ ሙሌካ ꬋይሲኬ።
GEN 8:22 ሃ ቢታይ ዲዛ ዎዴ ኡባን ዜሬꬃ ዎዴይኔ ማጻ ዎዴይ ሞጬይኔ ሆምቤይ፥ ቦኔይኔ ባልጎይ፥ ጋላሲኔ ቃማይ ኡባ ዎዴካ ፓጬና» ጊዴስ።
GEN 9:1 ጾሲ ኖሄኔ ኢዛ ናይታ፥ «ዬሌቲቴ፤ ጮራቲቴ፤ ቢታ ኡባ ኩሚቴ።
GEN 9:2 ቢታ ዶኣቲ፥ ካፎቲ፥ ቢታን ዎጺ ቃጺዛ ሚሻቲኔ ኣባ ጊዶን ዲዛ ሞሌቲ ዉሪ ኢንቴስ ያዬቶኔ ዳጋሜቶ፤ ኢስቲ ኢንቴ ሼኔን ዴቶ።
GEN 9:3 ታ ኢንቴስ ቢታፌ ሞኪዛ ዱማ ዱማ ካꬃታ ኢሚዳ ማላካ ሼምፖራ ፓጻ ዲዛ ሜꬌቴꬃቲ ዉሪ ኢንቴስ ቁማ ጊዳና።
GEN 9:4 ሼምፖይ ሱꬃ ጊዶን ዲዛ ጊሻስ ሱꬂ ኢዛፔ ጉኮንታ ኣሾ ሞፒቴ።
GEN 9:5 ታኒ ኢንቴ ሼምፖይ ኢዛን ዲዛ ኢንቴ ሱꬅ ሜሄፔኔ ዶኣ ኡባፌ ቱሙ ታ ኦይቻና፤ ቃሴ ኣሳ ኡባፌካ ኢዛ ማላ ኣሳ ሱꬅ ኦይቻና።
GEN 9:6 ጾሲ ኣስ ባና ሚሳቲሲዲ ሜꬊዳ ጊሻስ ኣሳ ሱꬅ ጉሲዛ ኦናካ ጊዲኮ ኢዛ ሱꬂካ ኣሳ ኩሼን ጉካና።
GEN 9:7 ኢንቴ ዬሌቲቴ፤ ጮራቲቴኔ ቢታ ቦላ ኬሂ ዳሪቴ» ጊ ኣንጂዴስ።
GEN 9:8 ሄሳፌ ጉዬ ጾሲ ኖሄኔ ኢዛራ ዲዛ ኢዛ ናይታ ሂዝጊዴስ፤
GEN 9:9 «ሂስቲን ሃኢ ታኒ ታ ጫቆ ኢንቴናራ፥ ኢንቴፌ ጉዬ ኢንቴ ዜሬꬃራኔ ኔናራ ሼምፖራ ዲዛ ሜꬌቴꬃታራ ጫቄታዲስ፤ ኤ! ታኒ ታ ጫቆ ካፎራ፥ ሜሄራ፥ ቢታ ዶኣ ኡባራኔ ማርካቤፔ ኢንቴናራ ኬዚዳ ፓጻ ዲዛ ሜꬌቴꬅ ኡባራ ጫቄታዲስ።
GEN 9:11 ታኒ ኢንቴናራ ጫቄታዲስ፤ ሃይሳፌ ሲንꬃን ፓጻ ዲዛይ ዉሪ ꬋይሲዛ ሃꬃን ሙሌካ ꬋዬና፤ ሃ ቢታ ꬋይሲዛ ሃꬂ ሃይሳፌ ጉዬ ሙሌካ ዴና» ጊዴስ።
GEN 9:12 ቃሴካ ጾሲ፥ «ታኒ ታፔኔ ኢንቴፌ፥ ኢንቴናራ ዲዛ ፓጻ ሜꬌቴꬃታስ ኡባፌ ጊዶን ያና ዬሌታ ኡባራ ጫቄቲዛ ጫቆዛስ ማላታይ ሃይሳ፤
GEN 9:13 ታኒ ታ ዙላ ሳሎ ቦላ ኤሳና፤ ኢዚ ታፔኔ ሃ ቢታ ቦላ ዲዛ ሜꬌቴꬃፌ ጊዶን ዲዛ ጫቆዛስ ማላታ ጊዳና።
GEN 9:14 ታኒ ቢታፌ ቦላን ሻራ ኤሂዳ ዎዴኔ ሻራ ቦላን ዙላይ ቤቲዳ ዎዴ፥
GEN 9:15 ‹ፓጻ ዲዛ ሜꬌቴꬅ ኡባ ꬋይሳናስ ሃይሳፌ ሲንꬃን ሙሌካ ꬋይሳ ሃꬂ ዬና› ጋዳ ታፔኔ ኢንቴፌ ፓጻ ዲዛ ዱማ ዱማ ቆሞ ሜꬌቴꬃታ ኡባፌ ጊዶን ጫቂዳ ታ ቃላ ታ ቆፓና።
GEN 9:16 ዙላይ ሻራ ቦላ ቤቲዳ ዎዴ ኣይዴካ ታኒ ኢዛ ቤያዳ ታፔ ጾሳፌኔ ሃ ቢታ ቦላን ፓጻ ዲዛ ዱማ ዱማ ቆሞ ሜꬌቴꬃ ኡባፌ ጊዶን ጫቆ ጌሊዳ ሜርና ጫቆ ቃላ ታ ሃሳኣና» ጊዴስ።
GEN 9:17 ጾሲ ኖሄ፥ «ታኒ ታፔኔ ሃ ቢታ ቦላን ፓጻ ዲዛ ኡባፌ ጊዶን ጫቂዳ ጫቆዛስ ማላታይ ሃይሳ» ጊዴስ።
GEN 9:18 ማርካቤዛፔ ኬዚዳ ኖሄ ናይቲ ሴሜ፥ ካሜኔ ያፌቴ፤ ካሜይ ካናኔ ኣዋ።
GEN 9:19 ሃይቲ ሄꬓይካ ኖሄ ናይታ፤ ቢታ ኡባን ዲዛ ኣሳይ ኢስታፌ ዬሌቲዴስ።
GEN 9:20 ኖሄይ ጎሻንቻ፤ ኢዚ ዎይኔ ሚꬅ ቶኬꬅ ኦይኪዴስ።
GEN 9:21 ኢሲ ጋላስ ኢዚ ዎይኔፔ ኦሴቲዳ ጫጄ ኡዪ ማꬆቲዲ ባ ዱንካኔዛ ጊዶን ፓጻ ካሎ ኢቺዴስ።
GEN 9:22 ካናኔ ኣዋ ካሜይ ባ ኣዋ ካሎቴꬅ ቤኢዲ ካሬ ኬዚዲ ባ ኢሻታ ናምኣታስ ዮቲዴስ።
GEN 9:23 ጊዶ ኣቲን ሴሜይኔ ያፌቴይ ማይኦ ኤኪዲ ናምኣይካ ባ ሃሼ ሃሼ ቦላ ጋꬂ ኦይኪዲ ጉንዲጉꬅ ሄሜቲ ጌሊዲ ባ ኣዋ ካሎቴꬅ ካሚዳ፤ ኢስቲ ባ ኣዋ ካሎቴꬅ ቤኦንታ ማላ ባ ኣይፌሶ ጉዬ ዛሪዳ።
GEN 9:24 ኖሄይ ማꬆይ ኣꬊን ቤጊዲ ኡባፌ ካሎ ናዚ ባ ቦላ ኦꬂዳይሳ ኤሪዲ፥
GEN 9:25 «ካናኔይ ቃንጌቲዳዝ ጊዶ! ኢዚ ባ ኢሻታ ኣይሌታስ ኣይሌ ጊዶ!» ጊዴስ።
GEN 9:26 ቃሴካ ኖሄይ፥ «ጎዳይ፥ ሴሜ ጾሲ ጋላቴቶ! ካናኔይ ሴሜ ኣይሌ ጊዶ!
GEN 9:27 ጾሲ ያፌቴ ቢታ ኣሶ! ያፌቴ ዜሬꬃቲ ሴሜ ዜሬꬃታራ ዴቶ! ካናኔይ ያፌቴ ኣይሌ ጊዶ!» ጊዴስ።
GEN 9:28 ꬋይሳ ሃꬃፌ ጉዬ ኖሄይ 350 ላይꬅ ዴኢዴስ።
GEN 9:29 ኖሄይ ሙሌራ 950 ላይꬅ ዴዪዲ ሃይቂዴስ።
GEN 10:1 ኖሄ ናይታ፥ ሴሜ፥ ካሜኔ ያፌቴ ዬሌታይ ሃይሳፌ ካሊ ጻፌቲዳይሳ፤ ꬋይሳ ሃꬃፌ ጉዬ ኢስታስ ኣቱማ ናይቲ ዬሌቲዳ።
GEN 10:2 ያፌቴ ኣቱማ ናይቲ ጎሜሬ፥ ማጎጌ፥ ማዳዬ፥ ያዋኔ፥ ቱባሌ፥ ሜሼኬኔ ቲራሴ
GEN 10:3 ጎሜሬ ኣቱማ ናይቲ ኣሽኬናዜ፥ ኢራፋቴኔ ቶጋርማ።
GEN 10:4 ያዋኔ ኣቱማ ናይቲ ኤሊሼ፥ ታርሴሴ፥ ኪቲሜኔ ኤሮዴ።
GEN 10:5 ሃይታንታፌ ኣባ ዶናን ዲዛ ኣሳይ ዉሪ ባ ቢታን ቢታን፥ ባ ቃላን ቃላን፥ ባ ቆሞን ቆሞኒኔ ባ ካዎቴꬃን ካዎቴꬃን ሻኬቲዴስ።
GEN 10:6 ካሜ ኣቱማ ናይቲ ኩሼ፥ ጊብጼ፥ ፑጼኔ ካናኔ።
GEN 10:7 ኩሼ ኣቱማ ናይቲ ሴባ፥ ሃዊላ፥ ሳቢቴ፥ ኤራኢሜኔ ሳቢቴካ። ኤራኢሜ ኣቱማ ናይቲ ሳባኔ ዳዳኔ።
GEN 10:8 ኩሼይ ናሙሩዴ ዬሊዴስ፤ ናሙሩዴይ ቢታ ቦላን ኮይሮ ዎልቃማ ኦላንቻ ጊዲዴስ፤
GEN 10:9 ጎዳ ሲንꬃንካ ኢዚ ዎልቃማ ሻንካንቻ ጊዲዴስ፤ ሄሳ ጊሻስ፥ «ናሙሩዴ ማላ ጎዳ ሲንꬃን ዎልቃማ ሻንካንቻ ጊዳ» ጌቴቴስ።
GEN 10:10 ኢዛ ካዎቴꬃን ኮይሮ ካታማቲ ሳናኦሬ ቢታን ዲዛ ባቢሎኔ፥ ኤሬኬ፥ ኣካዴኔ ካላናሄ።
GEN 10:11 ኢዚ ሄ ቢታፌ ኣሶሬ ቢዲ ናናዌ፥ ኤራሆቦቴኔ ካላሄ ካታማታ ኦꬂዴስ፤ ቃሴ ናናዌፔኔ ካላሄፔ ጊዶን ዲዛ ኤሬሴኔ ጌቴቲዛ ጊታ ካታማካ ኦꬂዴስ።
GEN 10:13 ጊብጼይ ሉዲሜታ፥ ኣናሜታ፥ ላሃቤታ፥ ናፍቱሄታ፥ ጳጺሮሴታ፥ ካሲሉሄታኔ ፊሊስጼሜታ ዬሊዳ ካፍቶሬታ ኣዋ።
GEN 10:15 ካናኔይ ባ ባይራ ናዛ ሲዶና፥ ኬጼታ፥ ያቡሴታ፥ ኣሞሬታ፥ ጌርጌሴታ ኣዋ፤
GEN 10:17 ቃሴካ ሂዌታ፥ ኣርቄታ፥ ሲኔታ፥
GEN 10:18 ኣርዋዴታ፥ ጻማሬታኔ ሃማቴታ ኣዋ። ሄሳፌ ጉዬ ካናኔ ዜሬꬃቲ ቢታ ቦላ ላሌቲዳ።
GEN 10:19 ካናኔ ቢታ ዛዋይ ሲዶናፔ ዶሚዲ ጌራሬኔ ጋዛራ ካንꬂዲ፥ ሶዶሜኔ ጋሞራ፥ ኣዳማኔ ጻቦይሜ ካንꬂ ቢዲ ላሻኤሬ ጋኬስ።
GEN 10:20 ካሜ ኣቱማ ናይቲ ባ ቆሞን ቆሞን፥ ባ ቃላን ቃላን፥ ባ ቢታን ቢታኒኔ ባ ካዎቴꬃን ካዎቴꬃን ጻፌቲዳይቲ ሃይታንታ።
GEN 10:21 ሴሜስ ናይቲ ዬሌቲዳ፤ ኢዚ ያፌቴስ ባይራ ኢሻኔ ኤቦሬ ናይታ ኡባስ ማይዛ።
GEN 10:22 ሴሜ ኣቱማ ናይቲ ኤላሜ፥ ኣሶሬ፥ ኣርፋኪሲዴ፥ ሉዴኔ ኣራሜ።
GEN 10:23 ኣራሜ ኣቱማ ናይቲ ኡጼ፥ ሁሌ፥ ጌቴሬኔ ሜሼ።
GEN 10:24 ኣርፋኪሲዴይ ሼላሄ ዬሊዴስ። ሼላሄይ ኤቦሬ ዬሊዴስ።
GEN 10:25 ኤቦሬስ ናምኡ ኣቱማ ናይቲ ዬሌቲዳ፤ ቢታን ዲዛ ኣሳይ ኢዛ ዎዴን ሻኬቲዳ ጊሻስ ኢሳ ሱንꬂ ፔሌጌ ጌቴቲዴስ፤ ኢዛ ኢሻዛ ሱንꬂ ዮቂጻኔ ጌቴቴስ።
GEN 10:26 ዮቂጻኔይ ናይታ ዬሊዴስ፤ ኢስቲካ ኣልሞዳዴ፥ ሼሌፌ፥ ሃጻርማዌቴ፥ ዬራሄ፥
GEN 10:27 ሃዶራሜ፥ ኡዛሌ፥ ዲቂሌ፥
GEN 10:28 ኦባሌ፥ ኣቢማኤሌ፥ ሳባ፥
GEN 10:29 ኦፊሬ፥ ሃዊላኔ ዮባቤ፤ ሃይታንቲ ዉሪካ ዮቂጻኔ ኣቱማ ናይታ።
GEN 10:30 ኢስቲ ዴኢዳ ቢታይ ኣርሼይ ሞኪዛ ባጋራ ዲዛ ዙማ ሜሼፔ ቢዲ ሳፋሬ ጋኬስ።
GEN 10:31 ሴሜ ኣቱማ ናይቲ ባ ቆሞን ቆሞን፥ ባ ቃላን ቃላን፥ ባ ቢታን ቢታኒኔ ባ ካዎቴꬃን ካዎቴꬃን ጻፌቲዳይቲ ሃይታንታ።
GEN 10:32 ሃይታንቲ ባ ቆሞን ቆሞኒኔ ባ ካዎቴꬃን ካዎቴꬃን ጻፌቲዳ ኖሄ ኣቱማ ናይታ ዜሬꬃታ፤ ꬋይሳ ሃꬃፌ ሲሚን ካዎቴꬃቲ ሃይታንታፌ ቢታ ኡባ ቦላ ላሌቲዳ።
GEN 11:1 ቢታ ቦላን ዲዛ ኣሲ ዉሪ ኮይሮ ኢሲ ዶናኔ ኢሲ ቃላ ሃሳዬስ።
GEN 11:2 ኣሳይ ኣርሼይ ሞኪዛ ባጋ ሲሚዲ ቢሼ ሳናኦሬ ጌቴቲዛ ቢታን ኢሲ ዴምባሶ ዴሚዲ ሄን ኡቲዴስ።
GEN 11:3 ኢስቲ ኢሶይ ኢሳ፥ «ሃ ዪቴ፤ ጹቤ ሜꬊዲ ኣኔ ታማን ጹጎስ» ጊዲ ኢስታ ሹቻ ጊሻስ ጹቤ፥ ኡርቃ ጊሻስ ሺዳ
GEN 11:4 ኤኪዲ፥ «ሃ ዪቴ! ኑ ሱንꬅ ጼይጊሳናሲኔ ቃሴ ኑኒ ሃ ቢታ ኡባ ቦላን ላሌቶንታ ማላ ኢሲ ጊታ ካታማኔ ጼራይ ፑዴ ሳሎ ጋኪዛ ኢሲ ጊምቤ ኣኔ ኬጾስ» ጊዳ።
GEN 11:5 ጊዶ ኣቲን ጎዳይ ኣሳይ ኬጺዳ ጊታ ካታማዛኔ ጊምቤዛ ቤያናስ ዱጌ ዎꬊዲ፥
GEN 11:6 «ሄኮ ኢስቲ ኢሲ ኣሳ! ቃሴ ኢስቲ ዉሪካ ኢሲ ቃላን ሃሳዬቴስ፤ ኢስቲ ሃኢ ሃይሳ ኦሶ ኦይኪዳፔ ጉዬ፥ ኢስቲ ባስ ኦꬃናስ ቆፒዳይሳ ኢስታ ዲጋናይ ዴና።
GEN 11:7 ሃ ዪቴ! ኣኔ ኑ ዱጌ ዎꬊዲ ኢስቲ ኢሶይ ኢሳ ቃላ ኤሮንታ ማላ ኢስታ ቃላ ዋላኮስ» ጊዴስ።
GEN 11:8 ሄሳ ጊሻስ ጎዳይ ኢስታ ሄሳፌ ቢታ ኡባ ቦላን ላሊን ኢስቲ ሄ ጊታ ካታማ ኦꬂዛይሳ ኣጋጊዳ።
GEN 11:9 ጎዳይ ቢታ ኣሳ ቃላ ሄን ዋላኪዳ ጊሻስ ሄ ካታማያ ባቢሌ ጌቴታዱስ። ጎዳይ ኢስታ ሄሳፌ ቢታ ኡባ ቦላን ላሊዴስ።
GEN 11:10 ሴሜ ዜሬꬂ ሃይሳፌ ካሊዲ ጻፌቲዳይሳ፤ ꬋይሳ ሃꬂ ሲሚን ናምኡ ላይꬃፌ ጉዬ ሴሜስ ላይꬃይ 100 ጊዲን ሴሜይ ኣርፋኪሲዴ ዬሊዴስ።
GEN 11:11 ሴሜይ ኣርፋኪሲዴ ዬሊዳፔ ጉዬ 500 ላይꬅ ዴኢዴስ፤ ሃራ ኣቱማ ናይታካ ማጫ ናይታካ ዬሊዴስ።
GEN 11:12 ኣርፋኪሲዴይ 35 ላይꬅ ዴኢዲ ሼላሄ ዬሊዴስ፤
GEN 11:13 ኣርፋኪሲዴይ ሼላሄ ዬሊዳፔ ጉዬ 403 ላይꬅ ዴኢዴስ፤ ሃራ ኣቱማ ናይታኔ ማጫ ናይታካ ዬሊዴስ።
GEN 11:14 ሼላሄይ 30 ላይꬅ ዴኢዲ ኤቦሬ ዬሊዴስ፤
GEN 11:15 ሼላሄይ ኤቦሬ ዬሊዳፔ ጉዬ 403 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 11:16 ኤቦሬ ሄꬑ ታማኔ ኦይዱ ላይꬅ ዴኢዲ ፔሌጌ ዬሊዴስ፤
GEN 11:17 ኤቦሬይ ፔሌጌ ዬሊዳፔ ጉዬ 430 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 11:18 ፔሌጌይ 30 ላይꬅ ዴኢዲ ኤራኤ ዬሊዴስ፤
GEN 11:19 ፔሌጌይ ኤራኤ ዬሊዳፔ ጉዬ 209 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 11:20 ኤራኤይ 32 ላይꬅ ዴኢዲ ሳሩጌ ዬሊዴስ፤
GEN 11:21 ኤራኤይ ሳሩጌ ዬሊዳፔ ጉዬ 207 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 11:22 ሳሩጌይ 30 ላይꬅ ዴኢዲ ናኮሬ ዬሊዴስ፤
GEN 11:23 ሳሩጌይ ናኮሬ ዬሊዳፔ ጉዬ 200 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 11:24 ናኮሬይ 29 ላይꬅ ዴኢዲ ታራ ዬሊዴስ።
GEN 11:25 ናኮሬይ ታራ ዬሊዳፔ ጉዬ 119 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
GEN 11:26 ታራይ 70 ላይꬅ ዴኢዲ ኣብራሜ፥ ናኮሬኔ ሃራኔ ዬሊዴስ።
GEN 11:27 ታራ ዬሌታይ ሃይሳፌ ካሊዲ ጻፌቲዳይሳ፤ ታራይ ኣብራሜ፥ ናኮሬኔ ሃራኔ ዬሊን ሃራኔይ ሎጼ ዬሊዴስ።
GEN 11:28 ሃራኔይ ባ ኣዋይ ታራይ ፓጻ ዲሺን ባ ዬሌቲዳ ካላዳዌታ ቢታን ኡሬ ጌቴቲዛ ጊታ ካታማን ሃይቂዴስ።
GEN 11:29 ኣብራሜይኔ ናኮሬይ ናምኣይካ ማቺዳ፤ ኣብራሜ ማቼይ ሱንꬂ ሶራ፤ ቃሴ ናኮሬ ማቼይ ሱንꬂ ሚልካ፤ ሚልካይ ሃራኔ ና፤ ሃራኔይ ሚልኪሲኔ ዪስካኒሲ ኣዋ።
GEN 11:30 ሶራይ ማይኔ፤ ኢዚስ ናይ ባዋ።
GEN 11:31 ታራይ ባ ና ኣብራሜ፥ ባ ናዛ ሃራኔ ና ሎጼኔ ባ ና ኣብራሜ ማቾ ሶራ ኤኪዲ ኬዚን ኢስቲ ኢሲፌ ካናኔ ቢታ ባናስ ኡሬ ጌቴቲዛ ካላዳዌታ ካታማፔ ዴንዲዳ፤ ጊዶ ኣቲን ኢስቲ ካራኔ ጌቴቲዛ ካታማ ጋካናስ ቢዲ ሄን ዴኢዳ።
GEN 11:32 ታራይ 205 ላይꬅ ዴኢዲ ካራኔን ሃይቂዴስ።
GEN 12:1 ጎዳይ ኣብራሜ፥ «ኔ ዴሬፔ፥ ኔ ዳቦታፔኔ ኔ ኣዋ ኬꬃ ኣሳፔ ሻኬታዳ ታኒ ኔና ቤሲዛ ቢታ ባ።
GEN 12:2 «ታኒ ኔና ጊታ ካዎቴꬅ ኦꬃና፤ ቃሴካ ኣንጃና፤ ኔ ሱንꬃ ጊታሳና፤ ኔካ ሃራታስ ኣንጆ ጊዳና።
GEN 12:3 ኔና ኣንጂዛይታ ታ ኣንጃና፤ ኔና ቃንጊዛይታካ ታ ቃንጋና፤ ቢታ ቦላ ዲዛ ኣሲ ዉሪ ኔ ባጋራ ኣንጄታና» ጊዴስ።
GEN 12:4 ኣብራሜይ ጎዳይ ኢዛስ ዮቲዳ ማላ ዴንዲ ቢዴስ፤ ሎጼይካ ኢዛራ ቢዴስ፤ ኣብራሜይ ካራኔ ዴሬፔ ቢሺን ኢዛስ ላይꬃይ ላፑን ታማኔ ኢቻሻ።
GEN 12:5 ኣብራሜይ ባ ማቺዮ ሶራ፥ ባ ኢሻ ና ሎጼ፥ ካራኔን ኢስቲ ዴሚዳ ኣይሌታኔ ሄን ሺሺዳ ባንታ ኣቆታ ኡባ ኤኪዲ ካናኔ ቢታ ቢዴስ።
GEN 12:6 ኣብራሜይ ሄ ቢታን ሴኬሜን ሞሬ ጌቴቲዛሶን ዲዛ ጊታ ሚꬃኮ ጋካናስ ቢዴስ፤ ሄ ዎዴ ካናኔ ኣሳቲ ሄ ቢታን ዴቴስ።
GEN 12:7 ጎዳይ ኣብራሜስ ቆንጪዲ፥ «ሃ ቢታ ታኒ ኔ ዜሬꬃስ ኢማና» ጊዴስ፤ ኢዚ ባስ ቆንጪዳ ጎዳስ ሄ ሶሆን ያርሾ ያርሺዛሶ ኬጺዲ ጎይኒዴስ።
GEN 12:8 ሄሳፌ ዴንዲዲ ቤቴሌፔ ኣርሼይ ሞኪዛ ባጋራ ዲዛ ዙማቲዛሶ ቢዲ ሄን ቤቴሌ ኣርሼይ ዉሊዛ ባጋን ኣጊዲ ቃሴ ኣዬ ጌቴቲዛ ካታማ ኣርሼይ ሞኪዛ ባጋ ኣጊዲ ጊዶን ባ ዱንካኔ ቶሊዴስ፤ ሄንካ ጎዳስ ያርሾ ያርሺዛሶ ኬጺዲ ጎዳ ሱንꬃ ጼይጊዴስ።
GEN 12:9 ሄሳፌ ጉዬ ኣብራሜይ ሄፔ ዴንዲ ቢዲ ኔጌቤ ጌቴቲዛ ባዞ ጋኪዴስ።
GEN 12:10 ሄ ዎዴ ካናኔ ቢታን ኮሻይ ዴንዲን ኮሻዚ ኬሂ ኢታ ጊዲዳ ጊሻስ ኣብራሜይ ኮሻ ዎዴ ኣꬃናስ ዱጌ ጊብጼ ዎꬊዴስ።
GEN 12:11 ጊብጼ ጌላና ሃኒሺን ኣብራሜይ ባ ማቺዮ ሶራ፥ «ሲያ! ኔ ዳሮ ማላ ሎኦ ማጫስ ጊዲዳይሳ ታ ኤራይስ።
GEN 12:12 ጊብጼ ኣሳይ ኔና ቤኢዛ ዎዴ ኢስታስ፥ ‹ሃና ኢዛ ማቾ› ጊዲ ኔና ኣጊዲ ታና ዎꬋና።
GEN 12:13 ሄሳ ጊሻስ ኢስቲ ታስ ኔ ጋሶን ኪያና ማላኔ ቃሴ ኔ ጋሶን ታ ሃይቆንታ ኣታና ማላ ኔኒ፥ ‹ታ ኢዛስ ሚቾ› ጋ» ጊዴስ።
GEN 12:14 ኣብራሜይ ጊብጼ ቢታ ጌሊዳ ዎዴ ጊብጼ ኣሳቲ ሄ ማጫሳያ ዳሮ ማላ ሎኦ ማጫስ ጊዲዳይሳ ቤኢዳ።
GEN 12:15 ቃሴ ጊብጼ ካዎስ ኦꬂዛ ሃላቃቲካ ኢዞ ቤኢዲ ካዎ ሲንꬃን ኢዞ ናሺዳ፤ ሂስቲዲ ኢዞ ካዎሶ ኤፊዳ።
GEN 12:16 ሂስቲን ኢዚ ጌዶን ካዎይ ኣብራሜ ሎኦ ኣይፌን ጼሊዲ ኣብራሜስ ዶርሳታኔ ቦራታ፥ ኣዴ ሃሬታኔ ማጫ ሃሬታ፥ ኣዴ ኣይሌታኔ ማጫ ኣይሌታ፥ ጋሜላታካ ኢሚዴስ።
GEN 12:17 ጊዶ ኣቲን ጎዳይ ኣብራሜ ማቼዮ ሶራ ጌዶን ጊብጼ ካዎ ቦላኔ ኢዛሶ ኣሳ ቦላ ቦሻ ዬዲዴስ።
GEN 12:18 ሂስቲን ካዎዚ ኣብራሜ ጼይጊዲ፥ «ኔኒ ሃይሳ ኣይስ ታ ቦላ ኦꬃዲ? ኢዛ ኔ ማቾ ጊዲዳይሳ ኣይስ ታስ ዮታቤኪ?
GEN 12:19 ታ ኢዞ ማቾ ኤካና ማላ፥ ‹ኢዛ ታ ሚቾ› ጋዳ ኣዛስ ዎርዶታዲ? ሄኮ ሃኖ ኔ ማቼዮ ኤካዳ ባ!» ጊዴስ።
GEN 12:20 ካዎዚካ ባ ኣይሌታ ኣብራሜ ኢዛ ማቼይራኔ ኢዛስ ዲዛዝ ኡባ ኬሲዲ ዬዳና ማላ ኣዛዚን ኣይሌቲ ኢስታ ዴሬፔ ኬሲ ዬዲዳ።
GEN 13:1 ሄሳ ጊሻስ ኣብራሜይ ባ ማቼይራኔ ባስ ዲዛዝ ኡባራ ጊብጼፔ ኔጌቤ ባዞ ቢዴስ፤ ሎጼይካ ኢዛራ ቢዴስ።
GEN 13:2 ኣብራሜይ ሄ ዎዴ ሜሄን፥ ቢራኒኔ ዎርቃን ዳሮ ዱሬቲዴስ።
GEN 13:3 ኢዚ ኔጌቤፔ ዴንዲዲ ቤቴሌ ጋካናስ ቢዴስ፤ ቤቴሌፔኔ ኣዬፔ ጊዶን ዲዛ ዴሬ ቢዴስ፤ ሄሶይካ ኢዚ ኮይሮ ባ ዱንካኔ ቶሊዲ፥
GEN 13:4 ያርሾ ሺሻናስ ኬጺዳሶ፤ ሄንካ ኣብራሜይ ጎዳ ሱንꬅ ጼይጊዴስ።
GEN 13:5 ኣብራሜራ ዩዪዛ ሎጼስካ ዳሮ ሚዚ፥ ዶርሲ፥ ዴይሺኔ ዱንካኔይ ዴስ።
GEN 13:6 ጊዶ ኣቲን ኢስታስ ዳሮ ሜሄይ ዲዛ ጊሻሲኔ ኢስቲ ኢሲፌ ዳናስ ኢስታስ ቢታይ ጹሚዳ ጊሻስ ኢሲፌ ዳናስ ዳንዳይቤቴና።
GEN 13:7 ሄሳ ጌዶን ኣብራሜ ዉዴ ሄሚዛይታ ጊዶኒኔ ሎጼ ዉዴ ሄሚዛይታ ጊዶን ኦሺ ሜꬌቲዴስ፤ ሄ ዎዴ ካናኔቲኔ ፓሪዜቲ ሄ ቢታን ዴቴስ።
GEN 13:8 ሂስቲን ኣብራሜይ ሎጼስ፥ «ኑኒ ኢሻንታ ጊዲዳ ጊሻስ፥ ኑ ጊዶን፥ ታ ሜሄ ሄሚዛይታ ጊዶኒኔ ኔ ሜሄ ሄሚዛይታ ጊዶን ኦሽ ሜꬎፋ።
GEN 13:9 ቢታይ ዉሪ ኔ ሲንꬃን ዴኔ? ኣኔ ኑኒ ሻኬቶስ፤ ኔኒ ሃዲርሳ ባጋ ቢኮ፥ ታኒ ኡሻቻ ባጋ ባና፤ ኔኒ ኡሻቻ ባጋ ቢኮ ታኒ ሃዲርሳ ባጋ ባና» ጊዴስ።
GEN 13:10 ሎጼይ ዩዪ ኣꬊ ጼሊዲ ዮርዳኖሴ ሾባይ ቢዲ ዞኣሬ ጋካናስ ጎዳ ጋናቴ ዎይኮ ጊብጼ ቢታ ማላ ዳሮ ሃꬂ ዲዛይሳ ቤኢዴስ። (ሄሲካ ጎዳይ ሶዶሜኔ ጋሞራ ጌቴቲዛ ካታማታ ꬋይሳናፔ ካሴ።)
GEN 13:11 ሄሳ ጊሻስ ሎጼይ ባስ ዮርዳኖሴ ሾባ ኡባ ዶሪዲ ኣርሼይ ሞኪዛ ባጋራ ቢዳ ጊሻስ ኢስቲ ባ ጋርሳን ሻኬቲዳ።
GEN 13:12 ኣብራሜይ ካናኔ ቢታን ዴኢዴስ፤ ሎጼይ ጊዲኮ ሾባን ዲዛ ጊታ ካታማታ ጊዶን ኡቲዲ ሶዶሜ ካታማ ማታን ባ ዱንካኔዛ ቶሊዴስ።
GEN 13:13 ሄ ዎዴ ሶዶሜ ኣሳይ ኢታኔ ጎዳ ሲንꬃን ፓላ ናጋራ ኦꬂዛይታ።
GEN 13:14 ሎጼይ ኣብራሜፔ ሻኬቲዳፔ ጉዬ ጎዳይ ኣብራሜ፥ «ꬎቁ ጋዳ ኔኒ ዲዛሶፔ ኣርሼይ ሞኪዛ ባጋኔ ጌሊዛ ባጋ ቃሴ ዱጌሃ ባጋኔ ፑዴሃ ባጋ ጼላ።
GEN 13:15 ሃይሳ ኔኒ ጼሊዛ ቢታ ኡባ ታ ኔሲኔ ኔ ዜሬꬃስ ሜርናስ ኢማና።
GEN 13:16 ታኒ ኔ ዜሬꬅ ቢታ ኣጬ ማላ ዳርሳና፤ ኦኒካ ቢታ ኣጬ ታይባና ዳንዳይኮ ኔ ዜሬꬂካ ታይቤታና።
GEN 13:17 ዴንዳዳ ቢታ ቦላ ፑዴኔ ዱጌ፥ ያኔ ሃ ዩያ ጼላ፤ ጋሶይካ ታኒ ሃይሳ ቢታ ኔስ ኢማና» ጊዴስ።
GEN 13:18 ሂስቲን ኣብራሜይ ባ ዱንካኔዛ ሾዲዲ፥ ኬብሮኔን ማሚሬ ጌቴቲዛሶን ዲዛ ጊታ ሚꬃ ኣቻን ዴኣናስ ቢዴስ። ሄንካ ጎዳስ ያርሾ ያርሺዛሶ ኬጺዴስ።
GEN 14:1 ሄ ዎዴ ሳናኦሬ ካዎይ ኣሚራፌሌይ፥ ኤላሳሬ ካዎይ ኣርዮኬይ፥ ኤላሜ ካዎይ ካዶርላኦሜሬይኔ ኣይዛቤ ካዎ ቲዲኣሌይ ኦይዳቲ፥
GEN 14:2 ሶዶሜ ካዎ ቤራኤራ፥ ጋሞራ ካዎ ቢርሻራ፥ ኣዳማ ካዎ ሺንኣቤራ፥ ጻቦይሜ ካዎ ሼሜቤሬይኔ (ዞኣሬ ጌቴቲዛ) ቤላ ካዎራ ኦሌታናስ ቢዳ።
GEN 14:3 ሃ ኢቻሹ ካዎቲ ጋጊዲ ኢሲ ባጋ ጊዲዲ፥ (ሃይቆ ኣባ ጌቴቲዛ) ሲዲሜ ሾባን ሺቂዳ።
GEN 14:4 ኢስቲ ካሴ ታማኔ ናምኡ ላይꬅ ካዶርላኦሜሬስ ሃሬቲዳ፤ ጊዶ ኣቲን ታማኔ ሄꬓንꬆ ላይꬃን ኢዛ ቦላ ማካሊዳ።
GEN 14:5 ታማኔ ኦይዳንꬆ ላይꬃን ካዶርላኦሜሬይኔ ኢዛራ ዙፔቲዳ ካዎቲ ባ ኦላንቻታ ኤኪ ቢዲ፥ ኣስታሮቴ-ቃርናይሜን ዲዛ ኤራፋይሜታ፥ ሃማን ዲዛ ዙዜታኔ ሻዌ-ቂሪያታይሜን ዲዛ ኤሚሜ ጌቴቲዛ ዴሬታ ኦሊዲ ጾኒዳ።
GEN 14:6 ሆሬ ቢታ ኣሳታካ ሴይሬ ዙማ ቦላ ኦሊዲ ባዞ ኣቻን ዲዛ ኤልፓራኔ ጌቴቲዛሶ ጋካናስ ጎዲዳ።
GEN 14:7 ሄሳፌ ጉዬ ሲሚዲ ኤን-ሚሺፓጼ ዪዳ። (ሃኢ ሄ ዴሬይ ቃዴሴ ጌቴቴስ።) ኢስቲ ኣማሌቄታ ቢታ ቃሴ ሃጻጾኔ ታማሬ ጌቴቲዛሶን ዲዛ ኣሞሬ ኣሳ ኡባ ኦሊዲ ጾኒዳ።
GEN 14:8 ሄሳፌ ሲሚን፥ ሶዶሜ ካዎይ፥ ጋሞራ ካዎይ፥ ኣዳማ ካዎይ፥ ጻቦይሜ ካዎይኔ (ዞኣሬ ጌቴቲዛ) ቤላ ካዎይ ዴንዲዲ ሲዲሜ ሾባን ኦላስ ሳልፊዳ።
GEN 14:9 ሃይቲ ዉሪ ኤላሜ ካዎራ፥ ኣይዛቤታ ካዎራ፥ ሳናኦሬ ካዎራኔ ኤላሳሬ ካዎራ (ሃ ኢቻሹ ካዎቲ ኦይዱ ካዎታራ) ኦሌቲዳ።
GEN 14:10 ሄ ዎዴ ሲዲሜ ሾባን፥ ሺዳ ኦይኪዛ ዳሮ ኦላይ ዴስ። ሶዶሜ ካዎይኔ ጋሞራ ካዎይ ባ ኦላ ኣሳራ ኦላፔ ባቃቲሺን፥ ኢስታፌ ጉꬃቲ ሄ ኦላታን ኩንዲዳ፤ ጊዶ ኣቲን ኣቲዳይቲ ፑዴ ዙማ ቦላ ባቃቲዳ።
GEN 14:11 ኦይዱ ካዎቲ ሶዶሜኔ ጋሞራ ካታማታ ኣቆታኔ ሚዛ ካꬅ ኡባ ቦንቂ ኤኪ ቢዳ።
GEN 14:12 ኣብራሜ ኢሻ ናይ ሎጼይ፥ ሶዶሜን ዲዛ ጊሻስ ኢዛካ ኢዛ ኣቆታካ ኡባ ኤኪ ቢዳ።
GEN 14:13 ሄሳፌ ጉዬ ኢሲ ኣሲ ኬሲ ኤኪዲ ባቃቲ ዪዲ ኢብራዌ ኣብራሜስ ሄሳ ዮቲዴስ፤ ኣብራሜይ ሄ ዎዴ ኤሽኮሌኔ ኣኔሬ ኢሻ ኣሞሬ ዴሬ ኣስ ማሚሬ ዎላ ኣቻን ዴስ፤ ኢስቲ ዉሪካ ኦላ ዛራናስ ኣብራሜራ ጫቄቲዳ።
GEN 14:14 ኣብራሜይ ባ ዳቦይ ዲኤቲዳይሳ ሲዪዳ ዎዴ ኦላ ኤሪዛ ባሶን ዬሌቲዳ ሄꬑ ጼታኔ ታማኔ ኦስፑን ኣሳ ዴንꬂዴስ፤ ሄ ኦይዱ ካዎታ ካሊዲ ዳኔ ጌቴቲዛ ካታማ ጋካናስ ቢዴስ።
GEN 14:15 ሄን ኦማርሳን ባ ኣሳ ጩጋን ጩጋን ሻኪዲ፥ ባ ሞርኬታራ ኦሌቲዲ ጾኒዴስ፤ ሂስቲዲ ዳማስቆፌ ቦላ ባጋራ ዲዛ ሆቤ ጌቴቲዛሶ ጋካናስ ጎዲዴስ።
GEN 14:16 ኣብራሜይካ ባ ዳቦ ሎጼኔ ኢዛ ኣቆታ ኡባ ካሴ ዲኤቲዳ ማጫሳኔ ሃራ ኣሳካ ዎꬂ ኤኪዴስ።
GEN 14:17 ኣብራሜይ ካዶርላኦሜሬኔ ኢዛራ ዙፔቲዳ ካዎታ ጾኒዲ ሲሚዳፔ ጉዬ፥ ሶዶሜ ካዎይ፥ (ካዎታ ሾባ ጌቴቲዛ) ሻዌሃ ሾባን ኢዛ ሞካናስ ኬዚዴስ።
GEN 14:18 ሄ ዎዴ፥ ሳሌሜ ካዎይ ማልኬጼዴቄይ ኡኬꬂኔ ዎይኔ ኡሹ ኤኪ ዪዴስ፤ ኢዚካ ኡባፌ ꬎቃ ጾሳ ቄሴ።
GEN 14:19 ኢዚ ኣብራሜ ሂዝጊ ኣንጂዴስ፤ «ኡባፌ ꬎቃ ጾሲ ሳሎኔ ሳኣ ሜꬊዳይሲ ኣብራሜ ኣንጆ።
GEN 14:20 ቃሴ ኡባፌ ꬎቃ ጾሲ፥ ኔ ሞርኬታ ኔ ኩሼን ኣꬂ ኢሚዳይሲ ጋላቴቶ» ጊዴስ። ኣብራሜይ ኡባፌ ታማፌ ኢሲ ኩሼ ኬሲዲ ማልኬጼዴቄስ ኢሚዴስ።
GEN 14:21 ሶዶሜ ካዎይ ኣብራሜ፥ «ታ ኣሳ ታስ ዛራዳ ኔ ዲኢዳ ሜሄዛ ኡባ ኔስ ኤካ» ጊዴስ።
GEN 14:22 ጊዶ ኣቲን ኣብራሜይ ሶዶሜ ካዎ፥ «ታኒ ጎዳስ፥ ኡባፌ ꬎቃ ጾሳስ፥ ሳሎኔ ሳኣ ሜꬊዳይሳስ፥ ታ ኩሼ ዴንꬃዳ ጫቃይቻዲስ።
GEN 14:23 ታ ኣሳይ ሚዳይሳፌኔ ታናራ ቢዳ ኣኔሬ፥ ኤሽኮሌኔ ማሚሬ ጋኪዛይሳፌ ኣቲን ኔኒ፥ ‹ኣብራሜ ታኒ ዱሬሳዲስ ጎንታ ማላ ታኒ ኔይሳፌ ሃራይ ኣቶ ኢሲ ሚሽ ዎይኮ ጫማ ኪሬካ ታ ኤኪኬ፤ ኢስቲ ባና ጋኪዛይሳ ኤኬቶ› ጌስ» ጊዴስ።
GEN 15:1 ሄሳፌ ጉዬ ጎዳ ቃላይ ኣጁታን ኣብራሜኮ ዪዲ፥ «ኣብራሜ፥ ባቦፋ! ታኒ ኔስ ጎንዳሌ፤ ኔ ኣንጆይ ኬሂ ጊታ» ጊዴስ።
GEN 15:2 ኣብራሜይ፥ «ኣቤት ኡባ ሃሪዛ ጎዳዉ! ታስ ሙሌካ ናይ ባይንዳ ጊሻስ ኔኒ ኢሚዛ ኢሞታይ ታስ ኣይሴ? ዳማስቆ ዴሬ ኣስ ኤልኤዜሬይ ታና ላታና» ጊዴስ።
GEN 15:3 ቃሴካ ኣብራሜይ፥ «ኔኒ ታስ ኣይኮ ና ኢማቤካ፤ ሄሳ ጊሻስ ታሶን ዲዛ ኣይሌይ ታና ላታናስ ዴስ» ጊዴስ።
GEN 15:4 ጎዳ ቃላይ ኢዛኮ ዪዲ፥ «ሃይሲ ኣይሌይ ኔና ላቴና፤ ኔፔ ዬሌቲዳይ ኔና ላታና» ጊዴስ።
GEN 15:5 ሄሳፌ ጉዬ ጎዳይ ኣብራሜ ካሬ ኬሲዲ፥ «ፑዴ ሳሎ ጼላ፤ ኔኒ ጾሊንቴታ ታይባናስ ዳንዳይኮ ታይባ፤ ኔ ዜሬꬃይካ ሃይሳ ማላ ጊዳና» ጊዴስ።
GEN 15:6 ኣብራሜይካ ጎዳ ኣማኒዴስ፤ ኢዛ ኣማኖይካ ጺሎቴꬃን ቆዴቲዴስ።
GEN 15:7 ቃሴካ ጎዳይ ኢዛ፥ «ኔ ሃይሳ ቢታ ላታና ማላ ታ ኔስ ኢማናስ ኡሬ ጌቴቲዛ ካላዳዌታ ካታማፔ ኔና ኬሳ ኤሂዳ ጎዳይ ታና ዲኪና?» ጊዴስ።
GEN 15:8 ጊዶ ኣቲን ኣብራሜይ ኢዛ፥ «ኣቤት ኡባ ሃሪዛ ጎዳዉ! ታኒ ሃይሳ ቢታ ላታናይሳ ኣዛን ኤሮ?» ጊዴስ።
GEN 15:9 ጎዳይካ ኢዛ፥ «ሄꬑ ላይꬃ ኡስ፥ ሄꬑ ላይꬃ ዴይሽ፥ ሄꬑ ላይꬃ ዶርሳ ላቃኔ ናምኡ ቆሞ ሃራጴታ ታስ ኤካ ያ» ጊዴስ።
GEN 15:10 ኢዚ ሄይታ ኡባታ ኢዛስ ኤኪ ኤፊ ሹኪዲ ጊዶን ናምኡ ናምኡ ኬሲ ሻኪዲ ኢሳ ኢሳ ጊናን ዎꬂዴስ፤ ጊዶ ኣቲን ካፎታ ናምኡ ኬሲቤና።
GEN 15:11 ሄ ዎዴ ኣንኮ ካፎቲ ሄ ኣሾዛ ቦላ ኡቲን ኣብራሜይ ኢስታ ጎዲዴስ።
GEN 15:12 ኣርሼይ ዉሊዛ ዎዴ ኣብራሜ ዎልቃማ ꬊስኮይ ኦይኪን ዳጋንꬂዛ ጊርዲ ጊዳ ꬉማይ ኢዛ ቦላ ꬉሚዴስ።
GEN 15:13 ሂስቲን ጎዳይ ኢዛስ፥ «ኔ ዜሬꬃይ ሃራ ቢታን ቤቴ ጊዲ ዳናይሳ ኔኒ ቱማፔ ኤራ፤ ኢስቲ ኣይሌቲዲ 400 ላይꬅ ዬꬌቲ ሃሬታና።
GEN 15:14 ኣይሌሲዲ ኢስታ ሃሪዛ ካዎቴꬃ ታ ቃጻያና፤ ሄሳፌ ጉዬ ኢስቲ ዳሮ ኣቆራ ሄ ቢታፌ ኬዛና።
GEN 15:15 ኔኒ ጊዲኮ ኔ ኣዋታኮ ሳሮን ባና፤ ኔ ኬሃ ጪማዳ ሃይቃናኔ ሞጌታና።
GEN 15:16 ኦይዳንꬆ ዬሌታን ኔ ዜሬꬃይ ሃ ቢታ ሲማና፤ ኣይስ ጊኮ ኣሞሬ ዴሬ ኣሳ ናጋራይ ቡሮ ኩሞንታ ጊሻሳ» ጊዴስ።
GEN 15:17 ኣርሼይ ዉሊን ጋዴይ ꬉሚዳፔ ጉዬ ጮጬ ታማ ላጮይኔ ጩዋይ ቤቲዲ ሄ ናምኡ ናምኡ ኬዚ ሻኬቲዳ ኣሾታ ጊዶራ ካንꬂዴስ።
GEN 15:18 ሄ ጋላስ ጎዳይ ኣብራሜስ፥ «ጊብጼ ሻፋፔ ዶሚዲ ኤፊራጺሴ ጌቴቲዛ ጊታ ሻፋ ጋካናስ ሃ ቢታ ታኒ ኔ ዜሬꬃስ ኢማዲስ።
GEN 15:19 ሄይቲካ ቄናዌታ፥ ቄናዜታ፥ ቃዲሞኔታ፥ ሂቴታ፥ ፓሪዜታ፥ ኤራፋይሜታ፥ ኣሞሬታ፥ ካናኔታ፥ ጌርጌሴታኔ ያቡሴታ ቢታ» ጊ ጫቂዴስ።
GEN 16:1 ኣብራሜ ማቼያ ሶራይ ኢዛስ ሃኢካ ና ዬላቤኩ፤ ጊዶ ኣቲን ኢዚስ ጊብጼፔ ዪዳ ኣጋሮ ጌቴቲዛ ኢሲ ኣይሌያ ዳዉስ።
GEN 16:2 ሄሳ ጊሻስ ሶራይ ኣብራሜ ጼይጋዳ፥ «ቤያ! ጎዳይ ታና ዬሎ ዲጊዴስ። ኔኒ ባዳ፥ ታ ኣይሌይራ ኣቃ፤ ኦኔ ኤሪዛይ፥ ታኒ ኢዚ ባጋራ ና ኣዮ ጊዳናኮኔ» ጋዱስ፤ ሂስቲን ኣብራሜይ ሶራ ቃላ ሲዪዴስ።
GEN 16:3 ኣብራሜይ ካናኔ ቢታን ታሙ ላይꬅ ኡቲዳፔ ጉዬ ኣብራሜ ማቼያ ሶራይ ጊብጼፔ ኤሂዳ ባ ኣይሌዮ ኣጋሮ፥ ባ ኣዚና ኣብራሜስ ማቾ ሂስታ ኢማዱስ።
GEN 16:4 ኣብራሜይካ ኣጋሮ ኤኪን ኢዛ ቃንꬃታዱስ፤ ኢዛ ባስ ሻራይ ኣቲዳይሳ ኤሪዳ ዎዴ ባ ጎዳቴዮ ሌቃዱስ።
GEN 16:5 ሄ ዎዴ ሶራይ ኣብራሜ፥ «ታ ቆሄቲዛ ቆሆይ ኔና ጋኮ፤ ታኒ ታ ኣይሌዮ ኔስ ኢሚን ኢዛ ሃኢ ባስ ሻራይ ኣቲዳይሳ ኤራዳ ታና ሌቃዉስ። ኔሲኔ ታስ ጾሲ ፒርዶ» ጋዱስ።
GEN 16:6 ኣብራሜይካ ሶራ፥ «ሃኖ ቤያ! ኔ ኣይሌያ ኔ ኩሼን ዳዉስ፤ ኔኒ ኢዞ ኔና ሎኢዳዝ ኦꬃ» ጊዴስ፤ ሄሳፌ ጉዬ ሶራይ ኣጋሮ ቆሂን ኢዛ ኬዛዳ ኢዚፔ ቤታዱስ።
GEN 16:7 ጎዳ ኪታንቻይ ኣጋሮ ባዞን ፑልቶ ሃꬃ ኣቻን ዴሚዴስ፤ ሄ ፑልቶይ ሹራ ጌቴቲዛ ቢታ ኤፊዛ ኦጌ ማታን ዴስ።
GEN 16:8 ኢዚካ ኣጋሮ፥ «ሃኔ ሶራ ኣይሌ ኣጋሬ! ኣዋፔ ያዲ? ቃሴ ኣዋ ባይ?» ጊ ኦይቺዴስ። ኢዛ፥ «ታኒ ታ ጎዳቴዮ ሶራፔ ቤቴ ባይስ» ጋዱስ።
GEN 16:9 ጎዳ ኪታንቻይካ ኢዚስ፥ «ኔኒ ኔ ጎዳቴይኮ ጉዬ ሲማ ባዳ ኢዚስ ሃሬታ» ጊዴስ
GEN 16:10 ቃሴካ ጾሳ ኪታንቻይ ኢዞ፥ «ኔ ዜሬꬅ ታይባናስ ዳንዳዬቶንታይሳ ኬና ታኒ ዳርሳና» ጊዴስ።
GEN 16:11 ቃሴካ ጎዳ ኪታንቻይ ኢዞ፥ «ሃኢ ኔኒ ቃንꬃታዳሳ፤ ኔኒ ኣቱማ ና ዬላና፤ ዬላዳ ኢዛ ኢስማኤሌ ጋዳ ሱንꬃና፤ ጋሶይካ ጾሲ ኔ ዋሳ ሲዪዴስ።
GEN 16:12 ኢዚ ባዞን ዬዳ ዲዛ ሃሬ ማላ ጊዳና፤ ኣሳ ኡባራ ኢዚ ኤቄታና፤ ቃሴ ኣሲ ዉሪካ ኢዛራ ኤቄታና፤ ኢዚ ባ ኢሻታ ኡባራ ኢጼቲ ዳና» ጊዴስ።
GEN 16:13 ኣጋራካ፥ «ታኒ ታና ቤኢዛይሳ ቤኣዳ ፓጻ ኣታኔ?» ጋዳ ኢዛ ባስ ሃሳይዳ ጎዳ፥ «ኔኒ ታና ቤኢዛ ጾሳ» ጋ ሱንꬃዱስ።
GEN 16:14 ሄሳ ጊሻስ ሄ ፑልቶ ኦላይ፥ «ታና ቤኢዛ ዴኦ ጾሳ ፑልቶ» ጌቴቲዴስ፤ ሄ ኦላይ ሃኢ ጋካናስ ቃዴሴፔኔ ባሬዴፔ ጊዶን ዴስ።
GEN 16:15 ኣጋራ ኣብራሜስ ኣቱማ ና ዬላዱስ፤ ኣብራሜይ ኣጋራ ዬሊዳ ናዛ ኢስማኤሌ ጊ ሱንꬂዴስ።
GEN 16:16 ኣጋራ ኢስማኤሌ ኣብራሜስ ዬሊዳ ዎዴ ኣብራሜ ላይꬃይ 86።
GEN 17:1 ኣብራሜ ላይꬂ ኡዱፉን ታማኔ ኡዱፉን ጊዲሺን ጎዳይ ኢዛስ ቆንጪዲ፥ «ታኒ ኡባ ዳንዳይዛ ጾሳ፤ ኔ ታ ሲንꬃን ሱሬ ሄሜታ።
GEN 17:2 ታኒ ታፔኔ ኔፔ ጊዶን ዲዛ ጫቆ ቃላ ሚንꬃና፤ ታኒ ኔ ዜሬꬃ ኬሃ ዳርሳና!» ጊዴስ።
GEN 17:3 ኣብራሜይ ቢታን ዱጌ ጉፋኒዲ ሁኤይ ቢታ ቦቺን ኢዚ ጾሳስ ዚጊን ጾሲ ኢዛስ፥
GEN 17:4 «ሃኢ ታ ኔናራ ጫቂዛ ጫቆይ ሃይሳ፤ ኔኒ ዳሮ ካዎቴꬃታስ ኣዋ ጊዳና።
GEN 17:5 ሃቺፌ ጉዬ ኔ ሱንꬂ ኣብራሜ ጌቴቴና፤ ጊዶ ኣቲን ኔ ሱንꬂ ኣብራሃሜ ጌቴታና፤ ኣዛስ ጊኮ ታኒ ኔና ዳሮ ካዎቴꬃታስ ኣዋ ኦꬃዲስ።
GEN 17:6 ታኒ ኔና ኬሃ ዳርሳና፤ ታኒ ኔና ዳሮ ካዎቴꬅ ሂስታና፤ ካዎቲካ ኔፔ ኬዛና።
GEN 17:7 ታኒ ታፔኔ ኔፔ፥ ኔፔ ጉዬ ኔ ዜሬꬃ ጊዶን፥ ዬሌታፔ ዬሌታ ጋካናስ ታ ጌሊዳ ጫቆ ቃላ ሚንꬃና፤ ሃ ጫቆይካ ታኒ ኔሲኔ ኔፔ ጉዬ ኔ ዜሬꬃስ ጾስ ጊዳና።
GEN 17:8 ሃኢ ኔኒ ቤቴ ጊዳዳ ዲዛ ካናኔ ዴሬይ ዉሪ ኔሲኔ ኔፔ ጉዬ ኔ ዜሬꬃስ ሜርናስ ላታ ቢታ ጊዳና ማላ ታኒ ኢማና፤ ቃሴ ታኒ ኢስታ ጾስ ጊዳና» ጊዴስ።
GEN 17:9 ቃሴካ ጾሲ ኣብራሃሜ፥ «ኔካ ኔፔ ጉዬ ኔ ዜሬꬃይካ፥ ዬሌታፔ ዬሌታ ጋካናስ ታ ጫቆ ቃላ ናጊቴ።
GEN 17:10 ታፔኔ ኔፔ፥ ኔፔ ጉዬ ኔ ዜሬꬃ ጊዶን ኢንቴ ናጋና ታ ጫቆ ቃላይ ሃይሳ፤ ኢንቴ ጊዶን ዲዛ ኣቱማስ ኡባይ ቃጻሬቶ።
GEN 17:11 ኢንቴ ሹርቴ ቃጻሬቴታ፤ ሃይሲ ታሲኔ ኢንቴስ ጊዶን ዲዛ ጫቆ ቃላስ ማላታ ጊዳና።
GEN 17:12 ኢንቴ ጊዶን ሲንꬃፌ ዬሌታና ኣዴ ናይቲ ዉሪ ዬሌቲዳ ኦስፑንꬃ ጋላስ ቃጻሬታናስ ኮሼስ፤ ኔሶን ዬሌቲዳይታ ጊዲን፥ ዎይኮ ኣላጋፔ ሚሻን ሻሜቲዳ ኣይሌታ ጊዲን ኔ ዜሬꬅ ጊዶንታ ኣዴታካ ቃጻራናስ ኮሼስ።
GEN 17:13 ኔሶን ዬሌቲዳይቲኔ ኔ ሚሻን ሻሜቲዳይቲ ቃጻሬቴቶ፤ ሃይሲ ኢንቴ ኣሾን ዲዛ ታ ጫቆይ ሜርና ጫቆ ጊዳና።
GEN 17:14 ቃጻሬቶንታ ኣቱማሲ ዉሪ ባ ኣሳፔ ሻኬቲዲ ꬋዮ፤ ጋሶይካ ኢዚ ታ ጫቆ ቃላ ናጊቤና» ጊዴስ።
GEN 17:15 ቃሴካ ጾሲ ኣብራሃሜ፥ «ኔ ማቼይ ሱንꬃ ሶራ ጎፓ፤ ሃይሳፌ ጉዬ ኢዚ ሱንꬂ ሳራ ጌቴቶ።
GEN 17:16 ታኒ ኢዞ ኣንጃና፤ ታኒ ኢዚፔ ኔስ ቱማፔ ኣቱማ ና ኢማና፤ ኢዞ ታኒ ኣንጃና፤ ኢዛ ካዎቴꬃታስ ኣዮ ጊዳና፤ ካዎቲ ኢዚፔ ዬሌታና» ጊዴስ።
GEN 17:17 ኣብራሃሜይ ቢታ ቦላ ጉፋኒዲ ባ ዎዚናን ሚጪሼ፥ «100 ላይꬃ ኣሲ ቱሙ ና ዬላኔ? ቃሴ ኢዚስ ላይꬃይ ኡዱፉን ታሙ ጊዲዳ ሳራይ ቡሮ ና ዬላኔ?» ጊ ቆፒዴስ።
GEN 17:18 ኣብራሃሜይ ጾሳስ፥ «ኔ ኢስማኤሌ ታስ ኣንጂዳኮ ኣይ ማላ ሎኦሺን!» ጊዴስ።
GEN 17:19 ጾሳይካ ኢዛስ፥ «ሃኔና! ኔ ማቼያ ሳራይ ኔስ ኣቱማ ና ቱማፔ ዬላና፤ ኔኒ ኢዛ ዪሳቃ ጋዳ ሱንꬃና፤ ኢዛፔ ጉዬ ኢዛ ዜሬꬃስ ሜርና ጫቆ ጊዳና ማላ ታ ኢዛራ ጫቆ ቃላ ጌላና።
GEN 17:20 ኢስማኤሌስ ጊዲኮ ኔ ኦይቺዳይሳ ታ ሲያዲስ፤ ታኒ ኢዛካ ኣንጃና፤ ታኒ ኢዛ ዳርሳና፤ ኢዛ ዜሬꬃ ኬሃ ዳርሳና፤ ኢዚ ታማኔ ናምኡ ካዎታ ዬላና፤ ታኒ ኢዛ ዜሬꬃ ጊታ ካዎቴꬅ ኬሳና።
GEN 17:21 ጊዶ ኣቲን ታኒ ታ ጫቆ ቃላ ላይꬅ ሃኒ ዎዴ ሳራይ ኔስ ዬላና ናዛ ዪሳቃራ ጫቄታና» ጊዴስ።
GEN 17:22 ጾሲ ኣብራሃሜራ ሃሳይዲ ዉርሲዳፔ ጉዬ፥ ኣብራሃሜፔ ሻኬቲዲ ፑዴ ቢዴስ።
GEN 17:23 ሄ ጋላሳንካ ኣብራሃሜይ ባ ና ኢስማኤሌ ባሶን ዬሌቲዳይታ ኡባ፥ ባ ሚሻን ሻሚዳይታ ኡባኔ ባሶን ዲዛ ኣቱማስ ኡባ፥ ጾሲ ኢዛስ ዮቲዳ ማላ ቃጻሪዴስ።
GEN 17:24 ኣብራሃሜይ ቃጻሬቲሺን ኢዛስ ላይꬃይ ኡዱፉን ታማኔ ኡዱፑና።
GEN 17:25 ኢዛ ና ኢስማኤሌይ ቃጻሬቲሺን ኢዛስ ላይꬃይ ታማኔ ሄꬓ።
GEN 17:26 ኣብራሃሜይኔ ኢዛ ና ኢስማኤሌይ ናምኣቲካ ኢሲ ጋላስ ቃጻሬቲዳ።
GEN 17:27 ኣብራሃሜሶን ዲዛ ኣቱማሳይ ዉሪ ኢዛ ሶን ዬሌቲዳይቲኔ ሚሻን ሻሜቲዳይቲ ዉሪካ ኢዛራ ቃጻሬቲዳ።
GEN 18:1 ሴታ ጋላስ ኣብራሃሜይ ማሚሬን ዲዛ ጊታ ሚꬃታ ጋርሳን ባ ዱንካኔ ፔንጌን ኡቲ ዲሺን ጎዳይ ኢዛስ ቆንጪዴስ።
GEN 18:2 ኣብራሃሜይ ꬎቁ ጊ ጼሊዲ ሄꬑ ኣሳቲ ኤቂዳይታ ቤኢዲ ኢስታ ሞኪ ኤካናስ ባ ዱንካኔዛ ፔንጌፌ ዴንዲዲ ዎጺ ቢዴስ፤ ሄ ጋኪ ቢታን ሆኪዲ ኢስታ ሲንꬃን ዚጊዴስ።
GEN 18:3 ዚጊ ሲሚዲ፥ «ኣቤት ታ ጎዶ! ኔ ታና ኔ ኣይሌዛ ቦንቺዛ ጊዲኮ ታሶ ጌሎንታ ኣꬋ ቦፓ።
GEN 18:4 ሃኢ ኢንቴ ቶሆ ሜጫና ቶሆ ሃꬂ ዪኮ ኢንቴ ቶሆ ሜጬቲዲ ሃይሳ ሚꬃ ኩዋን ሼምፒ ኤኪቴ።
GEN 18:5 ኢንቴ ሃኢ ታኮ ኢንቴ ኣይሌዛኮ ዪዳ ጊሻስ ሼምፒ ኤኪዲ ኢንቴ ቢዛሶ ባና ማላ ታኒ ኢንቴስ ሚዛ ሚሽ ኣኔ ኤሃይስ» ጊዴስ። ኢስቲ፥ «ዳሮ ሎኦ፤ ኔኒ ጊዛ ማላ ኦꬃ» ጊዳ።
GEN 18:6 ኣብራሃሜይ ዱንካኔዛ ጊዶ ሳራኮ ኤሶቲ ቢዲ፥ «ኤሶታዳ ሊቆ ꬊሌዛፔ ሄꬑ ኬሬ ጊዲዛይሳ ኤካ ሙኑቃዳ ኡኬꬅ ኡካ» ጊዴስ።
GEN 18:7 ቃሴ ኣብራሃሜይ ባ ዉዴዛኮ ዎጺ ቢዲ ሎኦ ኣንቃራ ማር ዶሪዲ ኢሲ ኣይሌስ ኢሚን ኢዚ ኤሶን ሹኪዲ ጊግሲዴስ።
GEN 18:8 ሂስቲን ኣብራሃሜይ ሜቆ ማꬂኔ ጊግሲዳ ማራ ኣሾዛ ኢማꬃታ ሲንꬅ ኣꬂዴስ፤ ኢስቲ ሚሺን ኢዚ ሄ ሚꬃ ጋርሳን ኢስታ ኣቻን ኤቂዴስ።
GEN 18:9 ኢስቲ ኢዛ፥ «ኔ ማቼያ ሳራይ ኣዋኔ?» ጊ ኦይቺን ኢዚ፥ «ሄኒን ዱንካኔ ጊዶን ዳዉስ» ጊዴስ።
GEN 18:10 ጎዳይ ኢዛስ፥ «ታኒ ዪዛ ላይꬅ ሃኒ ዎዴ ቱሙ ኔኮ ሲማና፤ ሄ ዎዴ ኔ ማቺያ ሳራይ ኣቱማ ና ኔስ ዬላና» ጊዴስ። ሳራይካ ኢዛፔ ጉዬ ባጋራ ዱንካኔዛ ሲንꬃን ዳሼ ሄሳ ሲያዱስ።
GEN 18:11 ኣብራሃሜይኔ ሳራይ ኬሂ ጪሚዳ፤ ሳራስካ ማጫሳታስ ዪዛ ዎጋይ ኣጊዴስ።
GEN 18:12 ሄሳ ጊሻስ ሳራይ ባ ዎዚናን፥ «ታኒ ሃኢ ጪሚዳፔ ጉዬ፥ ታ ኣዚናይካ ጪሚዳፔ ጉዬ ሃይሲ ኡፋይሳይ ታስ ሃናኔ?» ጋዳ ሚጫዱስ።
GEN 18:13 ሄ ዎዴ ጎዳይ ኣብራሃሜ፥ « ‹ታኒ ጪማይቺዳፔ ጉዬ ቱሙ ና ዬላኔ?› ጋዳ ሳራይ ኣዛስ ሚጫዴ?
GEN 18:14 ጎዳስ ዳንዳዬቶንታ ሚሺ ቱሙ ዲዜ? ታ ጊዳ ማላ ዪዛ ላይꬅ ሃኒ ዎዴ ታ ኔኮ ያና፤ ሄ ዎዴ ሳራይ ኣቱማ ና ዬላና» ጊዴስ።
GEN 18:15 ሳራይ ኬሃ ባቢዳ ጊሻስ፥ «ታኒ ሚጫቤኬ» ጋዳ ላሆታዱስ። ጊዶ ኣቲን ኢዚ፥ «ኤ፥ ኔኒ ቱማ ሚጫዳሳ» ጊዴስ።
GEN 18:16 ሄሳፌ ጉዬ ኣሳቲ ባና ዴንዲሼ ሶዶሜ ካታማ ዱጌ ዛሪ ጼሊዳ፤ ኣብራሃሜይካ ኢስታ ሞይዚሼ ኢስታራ ቢዴስ።
GEN 18:17 ሄ ዎዴ ጎዳይ፥ «ታኒ ታ ኦꬃና ጊዛይሳ ኣብራሃሜፔ ቆታኔ?
GEN 18:18 ኣብራሃሜይ ቱማፔ ጊታኔ ዎልቃማ ካዎቴꬅ ጊዳና፤ ሃ ቢታ ኣሲ ዉሪ ኢዛ ባጋራ ኣንጄታና።
GEN 18:19 ጺሎቴꬂኔ ሱሬ ኦሶ ኦꬂዲ ጎዳ ኦጌ ናጋና ማላ ባ ናይታኔ ባፔ ጉዬ ባ ሶ ኣሳ ኢዚ ዞራና ማላ ታኒ ኢዛ ዶራዲስ፤ ሄሲካ ጎዳይ ኣብራሃሜስ ኢማና ጊዳይሳ ኡባ ፖላናሳ» ጊዴስ።
GEN 18:20 ጎዳይ ኣብራሃሜ፥ «ሶዶሜኔ ጋሞራ ዋሶይ ኬሂ ዳሪዳ ጊሻሲኔ ኢስታ ናጋራይ ኬሂ ዴጺዳ ጊሻስ ኢስቲ ኦꬂዳይሲ ታኮ ጋኪዳ ዋሶ ማላ ኢታኮኔ ኢታ ጊዶንታኮ ኣኔ ታኒ ዱጌ ዎꬋ ቤያይስ» ጊዴስ።
GEN 18:22 ሄሳፌ ጉዬ ናምኡ ኣሳቲ ሶዶሜ ሲሚ ቢዳ፤ ጊዶ ኣቲን ኣብራሃሜይ ጎዳ ሲንꬃን ኤቂዳ ማላ ዴስ።
GEN 18:23 ሄ ዎዴ ኣብራሃሜይ ኢዛኮ ሺቂዲ፥ «ቱሙ ኔኒ ጺሎታ ኢታታራ ጋꬃ ꬋይሳኔ?
GEN 18:24 ሄ ጊታ ካታማን 50 ጺሎቲ ዲኮ ኔኒ ኢስታ ꬋይሳኔ? ኔኒ ኢዛን ዲዛ 50 ጺሎታ ጊሻስ ሄ ካታማ ማርኪ?
GEN 18:25 ጺሎታ ዎርዶታራ ጋꬃ ዎꬊዛይሲኔ ጺሎታኔ ዎርዶታ ኢሲ ኣይፌን ጼሊዛይሲ ሄሲ ኔፔ ሃኮ፤ ሃ ቢታ ኡባ ቦላ ፒርዲዛ ኔኒ ጺሎ ፒርዲኪ?» ጊዴስ።
GEN 18:26 ጎዳይካ፥ «ሄ ሶዶሜ ካታማን 50 ጺሎቲ ዲኮ ሄ ካታማ ኡባ ኢስታ ጊሻስ ታኒ ኡባ ማራና» ጊዴስ።
GEN 18:27 ሄሳፌ ጉዬ ኣብራሃሜይ፥ «ታኒ ቢታኔ ቢዲንꬃኮሺን ታ ጎዳራ ጻላዳ ሃሳያ ኦይካዲስ።
GEN 18:28 ኢቻሹ ታሙ ጺሎታፔ ኢቻሻቲ ፓጪኮ ኔኒ ሄ ፓጪዳ ኢቻሻታ ጊሻስ ሄ ካታማ ኡባ ꬋይሳኔ?» ጊዴስ። ጎዳይካ፥ «ታኒ ሄን ኦይዱ ታማኔ ኢቻሽ ጺሎታ ዴሚኮ ሄ ካታማ ꬋይሲኬ» ጊዴስ።
GEN 18:29 ኣብራሃሜይ ዛሬꬂዲካ፥ «ሄን 40 ጺሎቲ ጻላ ቤቲኮቺ?» ጊዴስ። ኢዚካ፥ «ታኒ ሄ ኦይዱ ታማታ ጊሻስ ሄ ካታማ ꬋይሲኬ» ጊዴስ።
GEN 18:30 ሄሳፌ ጉዬ ኢዚ፥ «ታ ጎዶ! ኔ ታ ቦላ ሃንቄቶፋ፤ ታኒ ጉጃዳካ ኦይቻይስ፤ ሄን 30 ጺሎቲ ጻላ ቤቲኮቺ?» ጊዴስ። ጎዳይ፥ «ታኒ ሄን 30 ጺሎ ኣስ ዴሚኮ ሄ ካታማ ꬋይሲኬ» ጊዴስ።
GEN 18:31 ቃሴካ ኣብራሃሜይ፥ «ታኒ ጎዳራ ጻላቴꬃን ሃሳያ ዶማዲስ፤ ሄን 20 ጺሎቲ ጻላ ቤቲኮቺ?» ጊዴስ። ጎዳይ፥ «ሄ ናምኡ ታማታ ጊሻስ ꬋይሲኬ» ጊዴስ።
GEN 18:32 ሄሳፌ ጉዬ ኣብራሃሜይ፥ «ታ ጎዶ! ኔ ታ ቦላ ሃንቄቶፋ፤ ታኒ ሜጺ ኢሲቶ ሃሳያይስ፤ ሄን 10 ጺሎይ ቤቲኮቺ?» ጊዴስ። ጎዳይ፥ «ሄ ታማታ ጊሻስ ታኒ ሄ ካታማ ꬋይሲኬ» ጊዴስ።
GEN 18:33 ጎዳይ ኣብራሃሜራ ሃሳያ ዉርሲዳፔ ጉዬ ቢዴስ፤ ኣብራሃሜይካ ባሶ ሲሚዴስ።
GEN 19:1 ሄ ናምኡ ኪታንቻቲ ኦማርስ ሶዶሜ ካታማ ጋኪዛ ዎዴ ሎጼይ ሄ ካታማ ፔንጌን ኡቲዴስ። ሎጼይ ኢስታ ቤኢዲ ኢስታራ ጋጋናስ ዴንዲ ቢዲ ባ ሁኤ ዱጌ ቢታ ጋꬂ ዚጊዲ፥
GEN 19:2 «ታ ጎዳቶ! ኢንቴ ኣይሌ ታሶ ሃ ዬርኬቲ፤ ኢንቴ ቶሆ ሜጬቲ ኣቂዲ ዎንቶ ማላዶራ ዴንዲዲ ኢንቴ ቢዛሶ ቤታ» ጊዴስ። ኢስቲካ፥ «ኣካይ ቦኮ፤ ኑኒ ሃይሳ ካታማ ዱቡሻን ኣቃና» ጊዳ።
GEN 19:3 ጊዶ ኣቲን ኢዚ ኢስታ ኬሂ ሾቢዳ ጊሻስ ኢዛራ ቢዲ ኢዛ ሶ ጌሊዳ፤ ኢዚካ ኢስታስ ኡኬꬅ ኡኪዲ ካዎ ኣꬂን ኢስቲ ሚዳ።
GEN 19:4 ኢስቲ ኢቾንታ ዲሺን ሶዶሜ ካታማ ኣቱማሳይ ዉሪ ናይታፔ ጪማ ጋካናስ ኢሳዴይካ ኣቶንታ ዪዲ ኬꬃ ዩዪ ኣꬊዳ።
GEN 19:5 ኢስቲካ ሎጼ ጼይጊዲ፥ «ሃች ኦማርስ ኔሶ ዪዳ ኣሳቲ ኣዋን ዲዞ? ኑኒ ኢስታራ ኣቃና ማላ ኢስታ ኑኮ ካሬ ኬሳ» ጊዳ።
GEN 19:6 ሎጼይ ኢስታራ ጋጋናስ ካሬ ኬዚዲ ሶሆን ዲዛ ኣሳታ ቦላ ካሬዛ ጉዬ ዛሪ ጎርዲዲ፥
GEN 19:7 ኢስታስ፥ «ታ ኢሻቶ! ሃይሳ ኢታ ኦሶ ኦꬆፍቴ።
GEN 19:8 ታስ ኣዴ ጌሎንታ ናምኡ ጌላኦ ማጫ ናይቲ ዴቴስ፤ ታኒ ኢስታ ኢንቴስ ካሬ ኬሲኮ ኢንቴ ኢስታ ኢንቴና ሎኢዳ ማላ ኦꬃና ዳንዳዬታ፤ ጊዶ ኣቲን ሃይታ ኣሳታ ቦላ ኣይኮካ ኦꬆፍቴ፤ ኣይስ ጊኮ ኢስቲ ታ ኬꬅ ጌሊዲ ታ ኢማꬅ ጊዲዳ» ጊዴስ።
GEN 19:9 ኣሳቲ ኢዛ፥ «ኑ ሲንꬃፌ ኪቻ!»፤ ቃሴካ፥ «ሃይሲ ኣዴዚ ሃ ቢታን ቤቴ ኣስ ጊዲ ኡቲዲ ሃኢ ኑ ቦላ ፒርዳናስ ካጃሌስ፤ ሃኢ ኑኒ ኢስታ ቦላ ኦꬃና ቆፒዳ ኢታፔ ኣꬊዳ ኢታ ኔ ቦላ ኦꬃና» ጊዳ። ሎጼካ ጉዬ ሱጊ ዬጊዲ ፔንጌዛ ሜንꬃናስ ማቲዳ።
GEN 19:10 ጊዶ ኣቲን ሄ ናምኡ ኣሳቲ ባ ኩሼ ካሬ ዬዲዲ ሎጼ ሶ ጎቺ ጌልꬂዲ ካሬዛ ዛሪ ጎርዲዳ።
GEN 19:11 ሄሳፌ ጉዬ ኢስቲ ኬꬃ ፔንጌን ዲዛ ኣሳ ጉꬃፌ ጊታ ጋካናስ ቆቂሲን ኢስቲ ፔንጌዛ ዴማናስ ኮዪሼ ዳቡርዳ።
GEN 19:12 ሄ ናምኡ ኣሳቲ ሎጼ፥ «ኔስ ሃይሳ ካታማ ጋርሳን ዲዛ ኣቱማ ና ዎይኮ ማጫ ና ጊዲን ኔ ናይታ ኤካናስ ጊግሲዳይቲካ ዲኮ ዎይኮ ሃራ ዳቦይ ዲኮ ኢስታ ሃይሳፌ ኬሳ።
GEN 19:13 ኣይስ ጊኮ ኑኒ ሃይሳ ካታማ ꬋይሳና ጎስ፤ ሃ ዴራ ናጋራይ ኬሂ ዳሮ ጊዲዳይሳ ጎዳይ ቤኢዳ ጊሻስ ሃይሳ ካታማ ꬋይሳናስ ኑና ኪቲዴስ» ጊዳ።
GEN 19:14 ሄሳ ጊሻስ ሎጼይ ባ ማጫ ናይታ ኤካናስ ጊግሲዳይታኮ ቢዲ ኢስታስ፥ «ጎዳይ ሃ ካታማ ꬋይሳና ጊዛ ጊሻስ ኤሌሊ ዴንዲዲ ሃይሳፌ ኬዚ ኪቺቴ» ጊዴስ፤ ጊዶ ኣቲን ኢዛ ማጫ ናይታ ጊግሲዳይቲ ኢዚ ቂꬌ ጌስ ጊ ቆፒዳ።
GEN 19:15 ጋዴይ ዎንታና ጊሺን ሄ ኪታንቻቲ ሎጼ፥ «ዴንዳ! ኔ ማቺዮኔ ሃይሳን ዲዛ ኔ ናምኡ ማጫ ናይታ ኤካዳ ኤሶን ኬዛ! ኬዞንታ ኢጺኮ፥ ሃና ካታማያ ፒርዴቲዛ ዎዴ ኔኒካ ꬋያና» ጊዲ ኤሶሲዳ።
GEN 19:16 ጊዶ ኣቲን ሎጼይ ሺኒን ጎዳይ ኢስታስ ቃꬌቲዳ ጊሻስ ኪታንቻቲ ኢዛ ኩሼ፥ ኢዛ ማቼይ ኩሼኔ ማጫ ናይታ ናምኣታ ኩሼ ኦይኪዲ ሄ ካታማፔ ኢስታ ኬሲዳ።
GEN 19:17 ኪታንቻቲ ኢስታ ካታማፔ ኬሲዳ ማላካ ኪታንቻታፔ ኢሳይ፥ «ኢንቴ ሼምፖ ኤኪዲ ባቃቲቴ! ጉዬ ጼሎፍቴ! ቃሴ ሃይሳ ሾባን ኣዋንካ ኤቆፍቴ! ዙማኮ ዎጺቴ! ሂስቶንታ ኢጺኮ ኢንቴ ꬋያና» ጊዴስ።
GEN 19:18 ጊዶ ኣቲን ሎጼይ ኢስታስ፥ «ታ ጎዳቶ! ሄሳꬆ ጊዶፖ!
GEN 19:19 ታኒ ኢንቴ ኣይሌይ ኢንቴ ሲንꬃን ሳቤቲዳ ጊሻስ ታና ኣሻናስ ታስ ዳሮ ቃꬌቲዴታ፤ ጊዲኮካ ሃይሲ ባሻይ ታና ጋኪዲ ꬋይሲኮ ሃይቃና ጊሻስ ታኒ ፑዴ ዙማኮ ባቃታናስ ዳንዳይኬ።
GEN 19:20 ቤኢቴ! ባቃቲ ቢዲ ኣታናስ ማታን ኢሲ ጉꬃ ካታማይ ዳዉስ፤ ታ ሼምፖ ኣሻናስ ሄ ባቃቶ? ኢዛ ቄሪ ካታማ ዴኬ?» ጊዴስ።
GEN 19:21 ጊዶ ኣቲን ኪታንቻይ፥ «ኤ ጊዶ! ታኒ ኔ ዎሳ ሲያዲስ፤ ታኒ ኔኒ ጊዛ ካታማዮ ꬋይሲኬ።
GEN 19:22 ሄሳ ጊሻስ ጌዴ ኤሶን ባቃታ፤ ኔኒ ጌዴ ጋካናስ ታኒ ኣይኮካ ኦꬃናስ ዳንዳይኬ» ጊዴስ፤ ሂስቲን ሄ ካታማይ ሱንꬂ ዞኣሬ ጌቴቲዴስ።
GEN 19:23 ሎጼይ ዞኣሬ ጋኪሺን ቡሮ ጻልቄይ ጫሪዴስ።
GEN 19:24 ሄ ዎዴ ጎዳይ ታማኔ ጹጊዛ ዲኔ ሶዶሜ ቦላኔ ጋሞራ ቦላ ሳሎፔ ቡኪሲዴስ።
GEN 19:25 ሄሳꬆ ኦꬂዲ ጎዳይ ሄ ዙሌን ዲዛ ካታማታኔ ዙሌን ዲዛዝ ኡባ ሄ ካታማታ ጊዶን ዲዛ ኣሳ ኡባኔ ሄ ቢታን ዲዛ ሚꬂኔ ማታ ኡባ ጹጊ ꬋይሲዴስ።
GEN 19:26 ጊዶ ኣቲን ሎጼ ማቺያ ጉዬ ጼላዳ ማጺኔ ሹች ጊዳዱስ።
GEN 19:27 ዎንቴꬃ ጋላስ ኣብራሃሜይ ማላዶ ዎንታራ ዴንዲዲ ጎዳ ሲንꬃን ካሴ ኢዚ ኤቂዳሶ ሲሚ ቢዴስ።
GEN 19:28 ኢዚ ሶዶሜኔ ጋሞራ ሄ ሾባን ዲዛ ቢታ ኡባ ዱጌ ጼሊዛ ዎዴ ዎልቃማ ጩዋይ ጹሳ ታማ ማላ ሄ ቢታፌ ቱሉ ጊዛይሳ ቤኢዴስ።
GEN 19:29 ጾሲ ሄ ሾባን ዲዛ ካታማታ ꬋይሲዳ ዎዴ፥ ኣብራሃሜ ቆፒዲ ሎጼይ ካሴ ዲዛ ካታማታ ꬋይሲዳ ዎዴ ሎጼ ꬋይሳፌ ኣሺዴስ።
GEN 19:30 ሎጼይ ዞኣሬን ዴኣናስ ባቢዳ ጊሻስ ባ ማጫ ናይታ ናምኣታራ ዙማ ቦላ ኬዚዲ ጎንጎሎ ጊዶን ዴኢዴስ።
GEN 19:31 ኢሲ ጋላስ ባይራ ናያ ካሎዮ፥ «ኑ ኣዋይ ጪሚዴስ፤ ቢታ ቦላ ዲዛ ዎጋ ማላ ኑናራ ዚንኣናስ ሃይሳ ቢታን ሙሌካ ኣቱማይ ዴና።
GEN 19:32 ሄሳ ጊሻስ ሃ ያ፤ ዎይኔ ኡሹ ኑ ኣዋ ኡሺ ማꬆሶስ፤ ሂስቲዲ ኢዛራ ኣቂዲ ኣኔ ኑ ኣዋፔ ኑስ ዜሬꬅ ኤሶስ» ጋዱስ።
GEN 19:33 ሄ ጋላሳ ኦማርሲካ ባ ኣዋ ዎይኔ ኡሹ ኡሺዳፔ ጉዬ ባይራያ ጌላዳ ኢዛራ ዚንኣዱስ፤ ኢዛ ኢዛራ ዚንኢዛ ዎዴካ ዴንዲዛ ዎዴካ ኢዚ ኤሪቤና።
GEN 19:34 ዎንቴꬃ ጋላስ ባይራያ ካሎዮ፥ «ሲያ! ቃማ ታኒ ኑ ኣዋራ ኣቃዲስ፤ ሃች ኦማርስ ቃሴ ዎይኔ ኡሹ ኡሺኮ ኔኒ ጌላዳ ኢዛራ ኣቃ፤ ሂስቲዲ ኑኒ ኑ ኣዋፔ ኑስ ዜሬꬅ ኤሶስ» ጋዱስ።
GEN 19:35 ሄ ጋላስ ቃማ ቃሴካ ዎይኔ ኡሹ ኢዛ ኡሺዳፔ ጉዬ ካሎያ ጌላዳ ኢዛራ ኣቃዱስ፤ ኢዛ ኢዛራ ኣቃዳ ዴንዳ ቢዛ ዎዴ ኢዚ ኤሪቤና።
GEN 19:36 ሂስቲዲ ሎጼ ማጫ ናይቲ ናምኣቲካ ባ ኣዋስ ቃንꬃቲዳ።
GEN 19:37 ባይራያ ኣቱማ ና ዬላዱስ፤ ሱንꬃካ ሞኣቤ ጋዳ ሱንꬃዱስ፤ ኢዚካ ሃች ጋካናስ ሞኣቤታስ ኣዋ።
GEN 19:38 ቃሴ ካሎያካ ኣቱማ ና ዬላዱስ፤ ሱንꬃካ ቤኒ-ኣሜ ጋዳ ሱንꬃዱስ፤ ኢዚካ ሃች ጋካናስ ኣሞኔታስ ኣዋ።
GEN 20:1 ኣብራሃሜይ ማሚሬፔ ዴንዲዲ ኔጌቤ ጌቴቲዛ ቢታ ቢዲ ቃዴሴኔ ሹራ ጌቴቲዛ ካታማታፔ ጊዶን ዴኢዴስ፤ ጌራሬ ቢታን ጉꬃ ዎዴ ጋምኢዴስ።
GEN 20:2 ሄን ኣብራሃሜይ ባ ማቺዮ ሳራ፥ «ኢዛ ታስ ሚቾ» ጊን ጌራሬ ካዎ ኣቢሜሌኬይ ኪቲዲ ሳራ ባሶ ኤፊዴስ።
GEN 20:3 ጊዶ ኣቲን ጾሲ ኢሲ ጋላሳ ኦማርስ ኣጉሞን ኣቢሜሌኬኮ ዪዲ፥ «ኔኒ ኤሂዳ ማጫሳይ ጌዶን ኔ ሃይቃና፤ ኢዛ ኣሳ ማቾ» ጊዴስ።
GEN 20:4 ጊዶ ኣቲን ኣቢሜሌኬይ ኢዚራ ኣቂቤና፤ ሄሳ ጊሻስ፥ «ታ ጎዶ! ኔኒ፥ ታኒ፥ ታ ካዎቴꬃይካ ኔና ቆሆንታ ዲሺን ኑና ጮ ꬋይሳኔ?
GEN 20:5 ኢዚ፥ ‹ኢዛ ታ ሚቾ› ጊቤኔ? ቃሴ ኢዛ፥ ‹ኢዚ ታ ኢሻ› ጋቤኬ? ታኒ ሃይሳ ቱሙ ዎዚናፔ ኦꬃዲስ» ጊዴስ።
GEN 20:6 ሄሳፌ ጉዬ ጾሲ ኣጉሞን ኢዛስ፥ «ኤ፥ ኔኒ ኔ ዎዚና ጌሻቴꬃን ኦꬂዳይሳ ታኒ ኤራዳ ኔኒ ኢዞ ቦቾንታ ማላኔ ታ ሲንꬃን ናጋራ ኦꬆንታ ማላ ኔና ታኒ ቴቃዲስ።
GEN 20:7 ሃኢ ሃኖ ማጫሳዮ ኢዚ ኣዚናስ ዛራ፤ ጋሶይካ ኢዚ ናቤ ጊዲዳ ጊሻስ ኢዚ ኔስ ጾሳ ዎሲኮ ኔኒ ፓጻና፤ ጊዶ ኣቲን ኔ ኢዞ ዛሮንታ ኢጺኮ ኔኒኔ ኔስ ዲዛዚ ዉሪ ሃይቃናይሳ ቱማፔ ኔ ኤራ» ጊዴስ።
GEN 20:8 ኣቢሜሌኬይ ዎንቴꬃ ጋላስ ማላዶ ባ ካዎቴꬃን ዲዛ ሹሜታ ኡባ ጼይጊዲ ሃ ዮኦዛ ኡባ ኢስታስ ዮቲን ኢስቲ ኬሂ ባቢዳ።
GEN 20:9 ሂስቲን ኣቢሜሌኬይ ኣብራሃሜ ጼይጊዲ፥ «ኔኒ ኑ ቦላ ኣይ ኦꬃዲ? ኔኒ ታ ቦላኔ ታ ካዎቴꬃ ቦላ ሃይሳ ማላ ቆሆ ኤሃናስ ታኒ ኔስ ኣይ ኢታ ሚሽ ኦꬃዲና? ኔኒ ታ ቦላ ኦሴታናስ ቤሶንታ ኢታ ኦꬃዳሳ» ጊዴስ።
GEN 20:10 ቃሴካ ኣቢሜሌኬይ ኣብራሃሜ፥ «ኔና ሃይሳ ኦሲሲዳይ ኣዜ?» ጊ ኦይቺን፥
GEN 20:11 ኣብራሃሜይ፥ « ‹ጾሳስ ባቢዛ ኢሲ ኣሲካ ሃ ዴሬን ባዋ፤ ቃሴካ ታ ማቼይ ጌዶን ኢስቲ ታና ዎꬋና› ጋዳ ቆፒዳ ጊሻሳ።
GEN 20:12 ኢዛካ ታ ኣዋ ና ጊዲዳ ጊሻስ ታስ ሚቾ፤ ታስ ኣዪ ና ጊዶንታ ጊሻስ ታ ኢዞ ማቾ ኤካዲስ።
GEN 20:13 ጾሲ ታና ታ ኣዋ ኬꬃፌ ኬሲዳ ዎዴ ታኒ ኢዚስ ኑኒ ቢዳ ቢታን ኡባን ኔኒ ታስ ኦꬃና ኪያቴꬂ፥ ‹ኢዚ ታስ ኢሻ› ጋዳ ዮታ ጋዲስ» ጊዴስ።
GEN 20:14 ሄሳፌ ጉዬ ኣቢሜሌኬይ ዶርስ፥ ሚዝ፥ ማጫ ኣይሌታኔ ኣቱማ ኣይሌታ ኤሂዲ ኣብራሃሜስ ኢሚዴስ፤ ቃሴ ኢዛ ማቺዮ ሳራካ ኢዛስ ዛሪዴስ።
GEN 20:15 ኣቢሜሌኬይ፥ «ሄኮ ታ ቢታይ ኔ ሲንꬃን ዴስ፤ ኔና ሎኢዛሶን ዳ» ጊዴስ።
GEN 20:16 ሳራስካ፥ «ታኒ ኔ ኢሻስ ኢሲ ሺ ሳቂሌ ቢራ ኢማዲስ፤ ሃይሲ ሄኮ ኔናራ ዲዛይታ ኡባ ሲንꬃን ኔኒ ጺሎ ጊዲዳይሳ ኤሪሳና» ጊዴስ።
GEN 20:17 ጎዳይ ኣብራሃሜ ማቼዮ ሳራ ጌዶን ኣቢሜሌኬ ኬꬃ ኣሳ ኡባ ዬሊዛ ኡሎ ማካርሲዳ ጊሻስ ኣብራሃሜይ ጾሳ ዎሲን ኣቢሜሌኬይ ኢዛ ማቼያኔ ኢዛ ማጫ ኣይሌቲ ና ዬላና ማላ ጾሲ ኢስታ ፓꬂዴስ።
GEN 21:1 ጎዳይ ሳራ ቆፒዴስ፤ ካሴ ኢዚስ ዮቲዳ ማላካ ኦꬂዴስ።
GEN 21:2 ሳራይ ሻራዳ ጪማቴꬃን ኣብራሃሜስ ጾሲ ጊዳ ዎዴይ ጋኪን ኣቱማ ና ዬላዱስ።
GEN 21:3 ሳራይ ኢዛስ ዬሊዳ ናዛ ሱንꬃ ኣብራሃሜይ፥ «ዪሳቃ» ጊ ሱንꬂዴስ።
GEN 21:4 ኣብራሃሜይ ናዛ ዪሳቃ ጾሲ ባና ኣዛዚዳ ማላ ዬሌቲዳፔ ኦስፑንꬃ ጋላስ ቃጻሪዴስ።
GEN 21:5 ኢዛ ና ዪሳቂ ኢዛስ ዬሌቲዳ ዎዴ ኣብራሃሜስ ላይꬃይ ጼታ።
GEN 21:6 ሳራይ፥ «ጾሲ ታና ሚቺዴስ፤ ቃሴ ሃይሳ ሲዪዛይ ዉሪ ታናራ ሚጫና» ጋዱስ።
GEN 21:7 ቃሴካ ሳራይ፥ «ኣብራሃሜስ ሳራይ ና ዬላናኔ ꬋንꬃና ጊዲ ቆፒዳይ ኦኔ? ጊዲኮካ ታኒ ሃኢ ኢዛስ ኢዚ ጪሚዳ ዎዴን ና ዬላዲስ» ጋዱስ።
GEN 21:8 ጉꬃ ናዚ ዲጪዲ ꬋንꬅ ዱጺዴስ፤ ዪሳቂ ꬋንꬃፌ ዱጺዳ ጋላስ ኣብራሃሜይ ጊታ ዲጊሳ ዲጊሲዴስ።
GEN 21:9 ጊብጼፔ ዪዳ ኣጋራ ኣብራሃሜስ ዬሊዳ ናዚ ኢስማኤሌይ ዪሳቃ ሌቂዛይሳ ሳራይ ቤኣዳ፥
GEN 21:10 ኣብራሃሜ፥ «ሃኖ ኣይሌይ ናዚ ታ ና ዪሳቃራ ሙሌካ ላቶንታ ጊሻስ ኣይሌዮኔ ኢዚ ናዛ ኬሳ ጎዳ» ጋዱስ።
GEN 21:11 ሃ ዮኦዚ ባ ናዛ ቦቺዛ ጊሻስ ኣብራሃሜይ ዳሮፔ ሜቶቴቲዴስ።
GEN 21:12 ጊዶ ኣቲን ጾሲ ኣብራሃሜ፥ «ኔ ዜሬꬃይ ዪሳቃ ባጋራ ጼይጌታናይሳ ጊሻስ ኣይሌይ ጊሻሲኔ ኢዚ ናዛ ጊሻስ ዳሮ ሜቶቶፓ፤ ሳራይ ኔስ ዮቲዛይሳ ኡባ ሲያ።
GEN 21:13 ቃሴ ታኒ ኢዚ ኔ ዜሬꬅ ጊዲዳ ጊሻስ ኣይሌይ ናዛ ካዎቴꬅ ሂስታና» ጊዴስ።
GEN 21:14 ኣብራሃሜይ ማላዶ ዎንታራ ዴንዲዲ ጉꬃ ካꬂኔ ኮዳን ሃꬅ ኤኪዲ ኣጋሮ ሃሼን ቶሲዲ ኢዚ ናዛካ ኢዚስ ኢሚዲ ኬሲ ዬዲዴስ፤ ኢዛ ባዳ ቤርሳቤሄ ጌቴቲዛ ባዞን ቶይላታዱስ።
GEN 21:15 ሃꬃይካ ኮዳፌ ዉሪን ኢዛ፥ «ታ ናዚ ሃይቂሺን ኡታዳ ታ ኢዛ ቤኢኬ» ጋዳ ናዛ ቡራ ጋርሳን ዎꬃዳ 200 ዋꬋ ጊዲዛሶ ማላ ባዳ ሄን ኡታዱስ፤ ሄንካ ኢዛኮ ሲማ ኡታዳ ባ ቃላ ꬎቁ ሂስታ ዬካዱስ።
GEN 21:17 ጾሲ ናዛ ዋሶ ሲዪዴስ፤ ሳሎፔ ጾሳ ኪታንቻይ ኣጋሮ ጼይጊዲ፥ «ኣጋሬ! ዋናዲ? ጾሲ ናዚ ኢቺዳሶን ዬኪዛይሳ ሲዪዳ ጊሻስ ባቦፋ፤
GEN 21:18 ዴንዳ ኤቃ፤ ናዛ ዴንꬃዳ ኔ ኩሼን ኦይካ፤ ታኒ ኢዛ ጊታ ካዎቴꬅ ሂስታና» ጊዴስ።
GEN 21:19 ጾሲ ኢዚስ ሃꬃ ኦላ ቤሲን ባዳ ኮዳን ሃꬅ ኩንꬃዱስ፤ ናዛካ ኡሻዱስ።
GEN 21:20 ጾሲ ናዛራ ዴስ፤ ናዚካ ዲጪዲ ባዞ ቢታን ዎንዳፌ ዱኪዛ ኣስ ጊዲዴስ።
GEN 21:21 ኢዚ ፓራኔ ባዞን ዴኢሺን ኢዛ ኣያ ኢዛስ ማቾ ጊብጼፔ ኤካዱስ።
GEN 21:22 ሄ ዎዴ ኣቢሜሌኬይ ባ ዎታዳራታ ሃላቃ ፒኮሌራ ኣብራሃሜኮ ቢዲ፥ «ኔኒ ኦꬂዛ ኡባን ጾሲ ኔናራ ዴስ።
GEN 21:23 ኔኒ ታ ቦላ ዎይኮ ታ ናይታ ቦላ ዎይኮ ታ ዜሬꬃ ቦላ ባሌꬆን ጌኔ ኦꬆንታ ማላ ሃኢ ሃይሳን ጾሳ ሲንꬃን ታስ ጫቃ፤ ታኒ ኔስ ኔ ኪዪዳይሳꬆ ኔኒካ ታሲኔ ኔኒ ኢማꬃቴꬃን ዲዛ ሃይሳ ቢታዛስ ሎኦ ኦꬃ» ጊዴስ።
GEN 21:24 ኣብራሃሜይ፥ «ታኒ ጫቃይስ» ጊዴስ።
GEN 21:25 ሄ ዎዴ ኣብራሃሜይ ኣቢሜሌኬ ኣይሌቲ ኤኪዳ ሃꬃ ኦላ ጊሻስ ኣቢሜሌኬስ ማጋኒዴስ።
GEN 21:26 ጊዶ ኣቲን ኣቢሜሌኬይ፥ «ሄሳ ኦኒ ኦꬂዳኮ ታኒ ኤሪኬ፤ ኔኒካ ቃሴ ታስ ዮታቤካ፤ ታኒ ሃች ጋካናስ ሄሳ ሲያቤኬ» ጊዴስ።
GEN 21:27 ሄሳፌ ጉዬ ኣብራሃሜይ ዶርሳታኔ ሚዛታ ኤሂዲ ኣቢሜሌኬስ ኢሚን ኢስቲ ናምኣይ ጫቄቲዳ።
GEN 21:28 ኣብራሃሜይ ሜሄታ ጊዶፌ ላፑን ኡዚ ዶርሳታ ሻኪዴስ።
GEN 21:29 ኣቢሜሌኬይ ኣብራሃሜ፥ «ሃ ኔኒ ሻኪዳ ላፑን ኡዞታ ኣይስ ሻካዲ?» ጊ ኦይቺዴስ።
GEN 21:30 ኣብራሃሜይ፥ «ታኒ ሃይሳ ሃꬃ ኦላ ቦኪዳይሳስ ማርካ ጊዳና ማላ ሃይታ ላፑን ኡዞታ ታፔ ኤካ» ጊዴስ።
GEN 21:31 ሄን ሄ ናምኡ ኣሳቲ ጫቄቲዳ ጊሻስ ሄ ሶሆይ ቤርሳቤሄ ጌቴቲዴስ።
GEN 21:32 ቤርሳቤሄን ጫቆ ጫቄቲዳይሳፌ ጉዬ ኣቢሜሌኬይኔ ኢዛ ዎታዳራታ ሃላቃ ፒኮሌይ ዴንዲዲ ፊሊስጼሜ ቢታ ሲሚዳ።
GEN 21:33 ኣብራሃሜይ ቤርሳቤሄን ታማርሲኬ ጌቴቲዛ ሚꬅ ቶኪዲ ሄን ጎዳ ሜርና ጾሳ ጼይጊዲ ጎይኒዴስ።
GEN 21:34 ኣብራሃሜይ ፊሊስጼሜ ቢታን ዳሮ ዎዴ ኢማꬃቴꬃን ዴኢዴስ።
GEN 22:1 ሄሳፌ ጉዬ ጾሲ ኣብራሃሜ ፓጪዴስ፤ ጾሲ፥ «ኣብራሃሜ!» ጊ ጼይጊን ኣብራሃሜይ፥ «ዬ!» ጊ ኮዪዴስ።
GEN 22:2 ጾሲ፥ «ኔኒ ሲቂዛ ኔ ሜጺ ኢሲ ናዛ ዪሳቃ ኤካዳ ሞሪያ ጌቴቲዛ ቢታ ባ፤ ባዳ ሄን ታኒ ኔስ ቤሲዛ ኢሲ ዙማ ቦላን ኢዛ ጹጌቲዛ ያርሾ ኦꬃዳ ታስ ያርሻ» ጊዴስ።
GEN 22:3 ዎንቴꬃ ጋላስ ኣብራሃሜይ ማላዶ ዎንታራ ዴንዲዲ ሃሬ ጫኒዴስ፤ ባ ኣይሌታፔ ናምኣታኔ ባ ና ዪሳቃ ባናራ ኤኪዲ ጹጊዛ ያርሾስ ጊዲዛ ሚꬅ ቄሪ ኤኪዲ ጾሲ ኢዛስ ዮቲዳሶ ባናስ ዴንዲዴስ።
GEN 22:4 ቢሼ ሄꬓንꬃ ጋላስ ኣብራሃሜይ ꬎቁ ጊዲ ያርሾ ያርሻናሶዛ ሃሆን ቤኢዴስ።
GEN 22:5 ኣብራሃሜይ ባ ኣይሌታ፥ «ኢንቴ ሃሬዛራ ሃይሳን ዲሺቴ፤ ታኒኔ ታ ናዚ ጌዴ ቢዲ ጾሳስ ጎይኒዲ ኢንቴኮ ሃ ሲማና» ጊዴስ።
GEN 22:6 ኣብራሃሜይ ያርሾ ሚꬃ ዴንꬂዲ ናዛ ዪሳቃ ቶሲዲ ባስ ታማኔ ሹካ ማሻ ኦይኪዴስ፤ ኢስቲ ናምኣይ ኢሲፌ ቢሺን፥
GEN 22:7 ዪሳቂ ባ ኣዋ ኣብራሃሜ፥ «ኣቦ!» ጊዴስ። ኣብራሃሜይካ፥ «ዬ! ታ ናዞ!» ጊን ዪሳቂ፥ «ታማይኔ ሚꬂ ዴስ ሺን ያርሼታና ዶርሳይ ኣዋኔ?» ጊዴስ።
GEN 22:8 ኣብራሃሜይካ፥ «ታ ናዞ! ያርሼታና ዶርሳ ጾሲ ጊጊሳና» ጊዴስ፤ ሂስቲን ኢስቲ ናምኣይ ኢሲፌ ቢዳ።
GEN 22:9 ኢስቲ ጾሲ ኢዛስ ዮቲዳሶ ጋኪዳ ዎዴ ኣብራሃሜይ ያርሾ ያርሺዛሶ ሄን ጊግሲዲ ሚꬃ ኮሪዴስ፤ ባ ና ዪሳቃ ቃቺዲ ሄ ሚꬃ ቦላን ሹካናስ ኢሺሲዴስ።
GEN 22:10 ኣብራሃሜይ ባ ናዛ ሹካናስ ኩሼ ዬዲዲ ማሻ ኤኪዴስ።
GEN 22:11 ጊዶ ኣቲን ጎዳ ኪታንቻይ ሳሎፔ ኢዛ፥ «ኣብራሃሜ! ኣብራሃሜ!» ጊ ጼይጊን ኢዚ፥ «ዬ!» ጊ ኮዪን፥
GEN 22:12 «ናዛ ቦላ ኔ ኩሼ ዎꬆፋ፤ ኢዛ ኣይኮካ ኦꬆፋ፤ ኔኒ ኔ ሜጺ ኢሲ ናዛካ ታና ዲጎንታ ጊሻስ ኔኒ ጾሳስ ያዪዛ ኣስ ጊዲዳይሳ ታኒ ሃኢ ኤራዲስ» ጊዴስ።
GEN 22:13 ኣብራሃሜይ ꬎቁ ጊዲ ጼሊሺን ካጬይ ቱራን ኦይኬቲዳ ꬋርሾ ቤኢዴስ፤ ኣብራሃሜይ ቢዲ ሄ ꬋርሾዛ ኤኪዲ ጹጌቲዛ ያርሾ ያርሺዴስ።
GEN 22:14 ሄሳ ጊሻስ ኣብራሃሜይ ሄ ሶሆዛ፥ «ጎዳይ ኢሚዛሶ» ጊ ሱንꬂዴስ፤ ሃች ጋካናስካ ሄ ሶሆዚ፥ «ጎዳይ ዙማ ቦላን ኢማና» ጌቴቴስ።
GEN 22:15 ጎዳ ኪታንቻይ ሳሎፔ ናምኣንꬆ ኣብራሃሜ ጼይጊዲ፥
GEN 22:16 «ታኒ ኔስ ታናን ጫቃይስ፤ ኔኒ ሃይሳ ኦꬂዳ ጊሻስ ኔ ሜጺ ኢሲ ናዛካ ታና ዲጎንታ ጊሻስ፥
GEN 22:17 ታኒ ኔና ቱሙ ኣንጃና፤ ኔ ዜሬꬃካ ታኒ ሳሎ ጾሊንቴ ማላኔ ኣባ ዶናን ዲዛ ኣጬ ማላ ኦꬃዳ ዳርሳና፤ ኔ ዜሬꬃቲ ባ ሞርኬታ ካታማታ ላታና።
GEN 22:18 ኔኒ ታስ ኣዛዜቲዳ ጊሻስ ሃ ካዎቴꬃይ ዉሪ ኔ ዜሬꬃ ባጋራ ኣንጄታና» ጊዴስ።
GEN 22:19 ሄሳፌ ጉዬ ኣብራሃሜይ ባ ኣይሌታኮ ሲሚን ኢስቲ ዉሪ ኢሲፌ ቤርሳቤሄ ዴንዲ ቢዳ። ኣብራሃሜይ ቤርሳቤሄን ዴኢዴስ።
GEN 22:20 ሄሳፌ ሲሚን ኣብራሃሜስ፥ «ሚልካይ ኔ ኢሻ ናኮሬስ ናይታ ዬላዱስ።
GEN 22:21 ኢስቲካ፥ ባይራ ና ኡጼ፥ ኡጼ ኢሻታ ቡዜ፥
GEN 22:22 ኣራሜ ኣዋ ቃሙኤሌ፥ ኬሳዴ፥ ሃዞ፥ ፒልዳሴ፥ ዪዲላፌ፥ ባቱኤሌ ጌቴቴቴስ።
GEN 22:23 ሄይታ ሄ ኦስፑን ናይታካ ሚልካ ኣብራሃሜ ኢሻ ናኮሬስ ዬላዱስ፤ ባቱኤሊ ኢርቢቃ ዬሊዴስ።
GEN 22:24 ኤሬሂሞ ጌቴቲዛ ኢዛ ጋራዴያ ቃሴ ጼባሄ፥ ጌሃሜ፥ ቴሃሻኔ ማኪሳ ዬላዱስ» ጊ ዮቲዳ።
GEN 23:1 ሳራይ 127 ላይꬅ ዴኢዳፔ ጉዬ፥
GEN 23:2 ኢዛ ካናኔ ቢታን ዲዛ (ኬብሮኔ ጌቴቲዛ) ቂሪያቴ-ኣርባኤ ካታማን ሃይቂን ኣብራሃሜይ ሳራስ ዬኪዴሲኔ ካዮቲዴስ።
GEN 23:3 ኣብራሃሜይ ባ ማቼይ ኣሃ ኣቻፌ ሂቴታኮ ቢዲ፥
GEN 23:4 «ታኒ ኢንቴ ጊዶን ኢማꬃ፤ ታ ማቼዮ ሞጋናስ ታስ ኢንቴ ጋዴፔ ሞጎሶ ባይዜርኬቲ!» ጊዴስ።
GEN 23:5 ሂቴቲ ኢዛስ፥ «ጎዶ! ኑኒ ኔና ዮቲዛይሳ ሲያ፤ ኔኒ ኑ ጊዶን ጊታ ኣሳ፤ ኔኒ ኔ ማቼይ ኣሃ ኑ ዱፎፔ ኔና ሎኢዳሶን ሞጋ፤ ኔኒ ኔ ማቼይ ኣሃ ሞጋናስ ባ ዱፎ ኦኒካ ኔና ዲጌና» ጊ ዛሪዳ።
GEN 23:7 ኣብራሃሜይ ዴንዲ ኤቂዲ ሂቴታ ሃላቃታ ሲንꬃን ዚጊዴስ።
GEN 23:8 ኢዚ ኢስታስ፥ «ኢንቴ ታና፥ ‹ኔ ማቼይ ኣሃ ሞጋ› ጊኮ ሲዪቴ፤ ጾሃሬ ና ኤፍሮኔስ ኢዛ ጋዴዛ ጋጻን ዲዛ ማኪጴሌ ጌቴቲዛ ጎንጎሎዛ ታስ ዱፎስ ባይዛና ማላ ኩሜꬃ ዋጋን ኑና ዛልኢሴርኬቲ» ጊዴስ።
GEN 23:10 ሄ ዎዴ ኤፍሮኔይ ካታማ ፔንጌን ሺቂዳ ባ ኣሳ ሂቴታ ጊዶን ዴስ፤ ሄሳ ጊሻስ ሂቴቲ ዉሪ ሲዪሺን ኣብራሃሜስ፥
GEN 23:11 «ሄሳ ማላ ጊዴና፤ ታ ጎዶ! ታ ዮቲዛይሳ ሲያ፤ ታኒ ጋዴዛካ ኢዛ ጊዶን ዲዛ ጎንጎሎዛካ ታ ኔስ ሃይሳ ኣሳ ሲንꬃን ኢማዲስ፤ ኔካ ኔ ማቼይ ኣሃ ሞጋ» ጊዴስ።
GEN 23:12 ኣብራሃሜይ ሃላቃታ ሲንꬃን ቃሴካ ዚጊዲ፥
GEN 23:13 ኣሳይ ሲዪሺን ኤፍሮኔ፥ «ታ ዮቲዛይሳ ሲያርኪ! ታኒ ሄ ጋዴዛስ ዋጋ ቃንጻና፤ ኔ ታፔ ኤካርኪ! ሄን ታኒ ታ ማቼይ ኣሃ ሞጋና» ጊዴስ።
GEN 23:14 ኤፍሮኔይ ኣብራሃሜስ ዛሪዲ፥ «ታ ጎዶ! ታኒ ዮቲዛይሳ ሲያ፤ ጋዴዚ 400 ሳቂሌ ቢራ ጻላ ኬሲዛ ጋዴ ጊዲዳ ጊሻስ ሃይሲ ኔ ጊዶኒኔ ታ ጊዶን ኣይኮካ ጊዴና፤ ኔ ማቼይ ኣሃ ኢዛን ሞጋ» ጊዴስ።
GEN 23:16 ኣብራሃሜይ ሂቴ ኣሳይ ሲዪሺን ኤፍሮኔይ ጊዳ ዋጋ 400 ሳቂሌ ቢራ ኤፍሮኔስ ኢሚዴስ።
GEN 23:17 ማሚሬ ካታማ ኣቻን ማኪጴሌን ዲዛ ኤፍሮኔ ጋዴን ዲዛ ጎንጎሎይኔ ሄ ጋዴን ዲዛ ሚꬃይ ዉሪ፥
GEN 23:18 ካታማ ፔንጌን ሺቂዳ ሂቴ ኣሳ ኡባ ሲንꬃን ዎጋን ኣብራሃሜ ጋዴ ጊዲዴስ።
GEN 23:19 ሄሳፌ ጉዬ ኣብራሃሜይ ባ ማቾ ሳራ ኣሃ ካናኔ ቢታን (ኬብሮኔ ጌቴቲዛ) ማሚሬ ካታማ ኣቻን ዲዛ ጎንጎሎን ሞጊዴስ።
GEN 23:20 ሄሳ ጊሻስ ሄ ጋዴዚኔ ጋዴዛን ዲዛ ጎንጎሎዚ ሂቴታ ሲንꬃን ዎጋን ኣብራሃሜስ ጊዲዴስ።
GEN 24:1 ኣብራሃሜይ ዳሮ ጪሚዴስ፤ ጎዳይ ኢዛ ኡባንካ ኣንጂዴስ።
GEN 24:2 ኣብራሃሜይ ባሶ ኣስ ኡባስ ሃላቃቲዛይሳኔ ኢዛፔ ጋርሳራ ኢዛ ኣቆታ ኡባ ኣይሲዛ ኣይሌዛ፥ «ኔ ኩሼ ታ ጉልባቴ ቦላ ዎꬃዳ ጫቃ።
GEN 24:3 ታኒ ኢስታ ጊዶን ዲዛ ካናኔ ማጫ ናይታፔ ኔ ታ ናስ ማቾ ኦይቾንታ ማላ ሳሎ ሳኣ ሜꬊዳ ጾሳን ታ ኔስ ጫቃይስ፤
GEN 24:4 ጊዶ ኣቲን ታ ዬሌቲዳ ቢታ ታ ዳቦታኮ ባዳ፥ ታ ና ዪሳቃስ ማቾ ኦይቻ» ጊዴስ።
GEN 24:5 ኢዛ ኦሳንቻዚ፥ «ማጫሳያ ታናራ ያናስ ዶሶንታ ኢጺኮ ናዛ ኔኒ ዪዳ ቢታ ጉዬ ዛራ ኤፎ?» ጊ ኦይቺዴስ።
GEN 24:6 ኣብራሃሜይ፥ «ታ ናዛ ጌዴ ጉዬ ዛራ ኤፎንታ ማላ ናጌታ!
GEN 24:7 ጎዳ ሳሎ ጾሳይ ታና ታ ኣዋ ሶሆፔኔ ታ ዬሌቲዳ ቢታፌ ኬሲዳይሲ ታስ፥ ‹ኔ ዜሬꬃስ ታኒ ሃይሳ ቢታ ኢማና› ጊ ጫቂዳይሲ ኔኒ ታ ናስ ሄፔ ማቾ ዴማና ማላ ኢዚ ባ ኪታንቻ ኔፔ ሲንꬄ ኪታና።
GEN 24:8 ማጫሳያ ኔናራ ጉዬ ያናስ ዶሶንታ ኢጺኮ ሃይሲ ታኒ ኔና ጫቄꬂዳ ጫቆይ ኔስ ጎሜቶፖ፤ ናዛ ጉዬ ሙሌካ ኤፎፓ» ጊዴስ።
GEN 24:9 ሄሳ ጊሻስ ኦሳንቻዚ ባ ጎዳ ኣብራሃሜ ዎዲራ ቦላ ባ ኩሼ ዎꬂ ጫቂዴስ።
GEN 24:10 ሄሳፌ ጉዬ ኦሳንቻዚ ባ ጎዳ ጋሜላታፔ ታማታ ኤኪዲ ባ ጎዳ ሚሻፌካ ሙሩታ ሙሩታ ኤኪዲ ቢዴስ፤ ሜስጴጾሚያ ጌቴቲዛ ቢታን ዲዛ ናኮሬ ካታማ ጋኪዴስ።
GEN 24:11 ኦማርሳ ዎዴ ማጫሲ ሃꬅ ዱቃናስ ዪሺን ካታማፔ ጋጻን ሃꬃ ኦላ ኣቻን ባ ጋሜላታ ጉልባቲሲዲ፥
GEN 24:12 «ጎዳዉ! ታ ጎዳ ኣብራሃሜ ጾሶ! ሃች ታኒ ቆፓዳ ዪዳይሳ ታስ ኢንጄሳ፤ ቃሴ ታ ጎዳ ኣብራሃሜስ ኪያ ኦꬃ።
GEN 24:13 ቤያ! ታኒ ሃይሳ ፑልቶ ሃꬃ ኣቻን ኤቃዲስ፤ ሃ ካታማ ኣሳ ማጫ ናይቲ ሃꬅ ዱቃናስ ሃ ዬቴስ።
GEN 24:14 ታኒ፥ ‹ኣኔ ኦቶዛ ዚቂ ሂስታዳ ታና ሃꬅ ኡሻ› ጊዛ ዎዴ፥ ኢዛካ፥ ‹ሄኮ ኡያ! ቃሴ ኔ ጋሜላታካ ታኒ ኡሻና› ጊዛራ ሂና ኔ ኣይሌ፤ ዪሳቃስ ኔኒ ዶሪዳሮ ጊዱ፤ ኔኒ ታ ጎዳስ ኪያ ኦꬂዳይሳ ታኒ ሄሳን ኤራና» ጊ ዎሲዴስ።
GEN 24:15 ቡሮ ኢዚ ዎሳ ዉርሶንታ ዲሺን ኢርቢቃይ ሃꬃ ኦቶ ቶካ ኤካዳ ፑቱ ጋዱስ፤ ኢዞ ባቱኤሊ ዬሊዴስ፤ ባቱኤሊ ሚልካ ና፤ ሚልካይ ኣብራሃሜ ኢሻ ናኮሬ ማቾ።
GEN 24:16 ኢርቢቃይ ዳሮ ማላ ሎኦኔ ጌሎንታ ጌላኦ። ዱጌ ዎꬋዳ ፑልቶዛፔ ባ ኦቶ ሃꬅ ኩንꬃዳ ኬዛዱስ።
GEN 24:17 ሄ ኣይሌይ ኢዚኮ ዎጺ ቢዲ ኢዞ፥ «ኔ ኦቶዛፔ ታና ጉꬃ ሃꬅ ኡሻርኪ!» ጊዴስ።
GEN 24:18 ኢዛ፥ «ኤሮ ታ ጎዶ! ኡያ» ጋዱስ። ኤሶታዳ ኦቶዛ ባ ሃሼፔ ዎꬃዳ ጌዲ ሂስታ ኦይካዳ ኢዛ ኡሻዱስ።
GEN 24:19 ኢዛ ኡሺዳይሳፌ ጉዬ፥ «ኔ ጋሜላቲካ ኣላና ጋካናስ ታኒ ኢስታስ ሃꬅ ዱቃና» ጋዱስ።
GEN 24:20 ኣቲዳ ሃꬄ ኤሶን ሃꬃ ጎንጌን ቲጋዳ ዱቃናስ ሃꬃ ኦላይ ዲዛሶ ዎጻዱስ፤ ጋሜላቲ ዉሪ ኣላና ጋካናስ ሃꬃ ኦላፌ ዱቃ ዱቃ ኤሃዳ ሃꬃ ጎንጌን ቲጋዳ ኡሻዱስ።
GEN 24:21 ኢዚ ቆፒዲ ዪዳ ቆፋ ጎዳይ ኢንጄሲዳኮ ኤራና ማላ ኣዴዚ ጮኡ ጊዲ ኢዞ ጼሌስ።
GEN 24:22 ጋሜላቲ ሃꬅ ኡዪ ሲሚን ኣዴዚ ኢቻሽ ጊራሜ ባጋ ጊዲዛ ዎርቃ ሳጋዮታኔ 100 ጊራሜ ጊዲዛ ናምኡ ዎርቃ ሳጋዮታ፥
GEN 24:23 ኬሲዲ ኢዞ፥ «ኔኒ ኦና ና? ኣኔ ታስ ዮታ፤ ኔ ኣዋ ሶን ኑስ ኣቂዛሶይ ዳኔ?» ጊዴስ።
GEN 24:24 ኢዛ፥ «ታኒ ሚልካይ ናኮሬስ ዬሊዳ ባቱኤሌ ና።
GEN 24:25 ኑሶን ጊዲዛ ሃፓይኔ ባሶይ ዴስ፤ ቃሴ ኢንቴስካ ኣቂዛሶይ ዴስ» ጋዱስ።
GEN 24:26 ኣዴዚ ጉልባቲዲ ጎዳስ ጎይኒሼ፥
GEN 24:27 «ባ ኪያቴꬃኔ ባ ቱማ ታ ጎዳፔ ሃሶንታ ታ ጎዳ ኣብራሃሜ ጎዳ ጾሳይ ጋላቴቶ! ታኒ ዪሺን ጎዳ ጾሳይ ታና ታ ጎዳ ዳቦታሶ ካሌꬂዴስ» ጊዴስ።
GEN 24:28 ናያ ዎጻ ባዳ፥ ባ ኣዬይሶን ዲዛ ኣሳስ ሃኒዳይሳ ዮታዱስ።
GEN 24:29 ኢርቢቃስ ላባ ጌቴቲዛ ኢሻይ ዴስ፤ ላባይ ካሬ ኬዚዲ ሃꬃ ፑልቶ ኣቻን ዲዛ ኣዴዛኮ ዎጺዴስ።
GEN 24:30 ቃላባቴኔ ባ ሚቼይ ኩሼን ዲዛ ሳጋዮታ ቤኢዳ ማላኔ ኢርቢቃይ ኣዴዚ ባና ጊዳይሳ ዮቲን ሲዪዳ ማላ ኬዚ ቢዲ ኣዴዚ ጋሜላታራ ፑልቶዛ ኣቻን ኤቂዳይሳ ዴሚዴስ።
GEN 24:31 ኢዛ፥ «ሃይሶ ጎዳይ ኔና ኣንጂዳይሶ ሃያ! ኔኒ ሃይሳን ካሬን ኣይስ ኤቃዲ? ታኒ ኔስ ኬꬂኔ ጋሜላታስካ ሶ ጊጊሳዲስ» ጊዴስ።
GEN 24:32 ሄሳ ጊሻስ ኣዴዚ ሶ ጌሊዴስ፤ ላባይ ጋሜላታ ጫና ቢርሺዲ ሃፓኔ ባሶ ጋሜላታስ ዬጊዴስ። ኢዛሲኔ ኢዛራ ዲዛ ኣሳታስ ቶሆ ሃꬅ ኤሂዴስ።
GEN 24:33 ቁማካ ኢዛ ሲንꬅ ኣꬂዴስ፤ ኢዚ፥ «ታና ኤሂዳ ጉዳ ኢንቴስ ዮቶንታ ዳሼ ካꬅ ሚኬ» ጊዴስ። ላባይ፥ «ሂስቲኮ ዮታ» ጊዴስ።
GEN 24:34 ሄሳ ጊሻስ ኢዚ፥ «ታኒ ኣብራሃሜ ኣይሌ።
GEN 24:35 ጎዳይ ታ ጎዳ ኣብራሃሜ ኬሂ ኣንጂን ኢዚ ዱሬቲዴስ፤ ዶርስ፥ ሚዝ፥ ቢራ፥ ዎርቃ፥ ኣቱማ ኣይሌታ፥ ማጫ ኣይሌታ፥ ጋሜላታኔ፥ ሃሬታ ኢዛስ ኢሚዴስ።
GEN 24:36 ታ ጎዳ ማቺያ ሳራይ ባ ጪማቴꬃ ላይꬃን ኢዛስ ኣቱማ ና ዬሊን ኢዚ ባስ ዲዛዝ ኡባ ኢዛስ ኢሚዴስ።
GEN 24:37 ታ ጎዳይ ታና ሃይሳꬆ ጫቂሲዴስ፤ ‹ታኒ ዲዛ ካናኔ ቢታ ማጫ ናይታፔ ታ ናዛስ ማቾ ኦይቾፋ፤
GEN 24:38 ታ ኣዋ ኣሳኮ ታ ዜሬꬃኮ ባዳ ታ ናዛስ ማቾ ኦይቻ› ጊዴስ።
GEN 24:39 ታኒካ ታ ጎዳዉ፥ ‹ናያ ታናራ ያናስ ዶሶንታ ኢጺኮቺ?› ጋዲስ።
GEN 24:40 ኢዚ፥ ‹ጎዳይ ታኒ ኢዛ ሲንꬃን ሱሬ ሄሜቲዳ ጾሲ ኔናራ ባ ኪታንቻ ኪታና፤ ኔኒ ታ ኔስ ታ ኣዋ ኣሳፔ፥ ታ ዛሬታፔ ማቾ ዴማና ማላ፥ ኔ ቢዛ ኦጌ ኡባ ሎኤꬃና።
GEN 24:41 ኔኒ ታ ዛሬታኮ ቢን ኢስቲ ኔስ ኢዞ ኢሞንታ ኢጺኮ ሄ ዎዴ ኔስ ጫቆይ ጎሜቴና› ጊዴስ።
GEN 24:42 «ታኒ ሃች ሃይሳ ፑልቶዛኮ ዪዳ ዎዴ ጎዳዉ! ታ ጎዳ ኣብራሃሜ ጾሶ! ኔ ሼኔ ጊዲኮ ታኒ ቢዛ ቆፋዛ ኢንጄሳ።
GEN 24:43 ቤኣ፤ ታኒ ሃ ፑልቶዛ ኣቻን ኤቃዲስ፤ ጌላኦ ኢሲኒያ ሃꬄ ዱቃናስ ዪኮ ታኒ ኢዞ፥ ‹ታና ኔ ኦቶዛፔ ጉꬃ ሃꬅ ኡሻርኪ!› ጋና።
GEN 24:44 ሂስቲኮ ኢዛ ታና፥ ‹ኤሮ ኡያ› ቃሴ፥ ‹ኔ ጋሜላታስካ ታኒ ሃꬅ ዱቃና› ጊዛራ ጾሲ ታ ጎዳይ ኔስ ዶሪዳሮ ጊዱ።
GEN 24:45 «ታኒ ታ ዎዚናን ዎሲዛይሳ ዉርሶንታ ዲሺን ኢርቢቃይ ባ ኦቶ ሃሼን ቶካ ኤካዳ ፑቱ ጋዱስ፤ ዱጌ ፑልታኮ ዎꬋዳ ሃꬅ ዱቃዱስ፤ ታኒ ኢዞ፥ ‹ታና ሃꬅ ኡሻርኪ!› ጋዲስ።
GEN 24:46 «ኢዛ ኤሶን ባ ሃሼፔ ኦቶዛ ዎꬃዳ፥ ‹ሄኮ ኡያ! ቃሴ ታኒ ኔ ጋሜላታ ኡሻና› ጋዱስ፤ ታኒካ ኡያዲስ፤ ቃሴ ታ ጋሜላታካ ኡሻዱስ።
GEN 24:47 «ታኒ ኢዞ፥ ‹ኔኒ ኦና ና?› ጋ ኦይቻዲስ። «ኢዛ፥ ‹ታኒ ሚልካይ ናኮሬስ ዬሊዳ ባቱኤሌ ና› ጋዱስ። «ታኒካ ኢዚ ኩሼን ቃላባቴ ኣꬃዲስ።
GEN 24:48 ሄሳፌ ጉዬ ታኒ ጉልባታዳ ጎዳስ ጎይናዲስ፤ ታኒ ጎዳ ታ ጎዳ ኣብራሃሜ ጾሳ፥ ታ ጎዳ ኢሻ ናዮ ኢዛ ኔስ ኤካናስ ታና ሊኬ ኦጌ ካሌꬂዳይሳ ጋላታይስ።
GEN 24:49 ሃኢካ ኢንቴ ታ ጎዳስ ኪያና ማላኔ ኣማኔታና ጊዲኮ ታስ ዮቲቴ፤ ሄሲ ሃኔና ጊኮካ ታስ ዮቲቴ፤ ሄሳፌ ጉዬ ታኒ ሃናናይሳ ታ ኤራይስ» ጊዴስ።
GEN 24:50 ላባይኔ ባቱኤሊ፥ «ሃ ቆፋዚ ጎዳፔ ዪዴስ፤ ኑኒ ኔስ ጌዴ ሃ ጋናስ ዳንዳዮኮ።
GEN 24:51 ኢርቢቃ ሃኖ ቤያ፤ ኤካዳ ባ! ጎዳይ ጊዳ ማላ ኔ ጎዳ ናዛስ ማቾ ጊዱ» ጊዳ።
GEN 24:52 ኣብራሃሜ ኣይሌይ ኢስቲ ጊዛይሳ ሲዪዳ ማላ ቢታን ጉልባቲዲ ጾሳስ ጎይኒዴስ።
GEN 24:53 ኣሽካራዚ ቢራ ኣሌቆኔ ዎርቃ ኣሌቆ፥ ማይኦካ ኬሲዲ ኢርቢቃስ ኢሚዴስ፤ ቃሴ ኣልኦ ሚሻታ ኢዚ ኢሻሲኔ ኢዚ ኣዬይስ ኢሚዴስ።
GEN 24:54 ሄሳፌ ጉዬ ኢዚካ ኢዛራ ዲዛይቲ ሚዳኔ ኡዪዳ፤ ሂስቲዲ ሄን ኣቂዳ፤ ኢስቲ ማላዶ ዎንታራ ዴንዲን፥ «ታና ታ ጎዳኮ ሞይዚቴ» ጊዴስ።
GEN 24:55 ጊዶ ኣቲን ኢዚ ኢሻይኔ ኢዚ ኣያ፥ «ናያ ኢሲ ታሙ ጋላሳ ማላ ኑናራ ታኩ፤ ሄሳፌ ጉዬ ኢዛ ባና» ጊዳ።
GEN 24:56 ኢዚ ጊዲኮ፥ «ጎዳይ ታኒ ዪዳይሳ ኢንጄሲን ኢንቴ ታና ጋምኢሶፒቴ፤ ታኒ ታ ጎዳኮ ባና ማላ ታና ሞይዚቴ» ጊዴስ።
GEN 24:57 ኢስቲካ፥ «ናዮ ጼይጊዲ ኣኔ ኑ ኢዞ ኦይቾስ» ጊዳ።
GEN 24:58 ሄሳ ጊሻስ ኢርቢቃ ጼይጊዲ፥ «ሃ ኣዴዛራ ባኔ?» ጊ ኦይቺዳ። ኢዛካ፥ «ኤ፤ ታኒ ባና» ጋዱስ።
GEN 24:59 ሂስቲን ኢስቲ ባ ሚቼዮ ኢርቢቃ ኢዞ ዲቺዛሪራ፥ ኣብራሃሜ ኣይሌዛራኔ ኢዛ ኣሳታራ ሞይዚዳ።
GEN 24:60 ኢስቲ ኢርቢቃ፥ «ኑ ሚቼዬ ኢርቢቃ! ጮራታ ቢታ ኩማ፤ ኔ ዜሬꬂ ባ ሞርኬታ ካታማታ ላቴቶ» ጊ ኣንጂዳ።
GEN 24:61 ሄሳፌ ጉዬ ኢርቢቃይኔ ኢዚ ጋራዴቲ ዴንዲዲ ጋሜላታ ቶጊዲ ኣዴዛራ ቢዳ፤ ሂስቲን ኣይሌዚ ኢርቢቃ ኤኪዲ ቢዴስ።
GEN 24:62 ሄ ዎዴ ዪሳቂ፥ «ታና ቤኢዛ ዴኦ ጾሳ ፑልቶ» ጊዛ ፑልቶዛ ማታ ቢዲ፥ ኔጌቤ ባዞን ዴስ።
GEN 24:63 ኢሲ ጋላሳ ኦማርስ ዪሳቂ ባ ዎዚናን ቆፒዲ ዴምባ ኬዚዲ ዩዪሼ ኢዚ ꬎቁ ጊ ጼሊዛ ዎዴ ጋሜላቲ ዪዛይታ ቤኢዴስ።
GEN 24:64 ኢርቢቃይካ ꬎቁ ሂስታ ጼላዳ ዪሳቃ ቤያዳ ጋሜላ ቦላፌ ዎꬋዱስ።
GEN 24:65 ዎꬋዳ ኣይሌዛ፥ «ኑናራ ጋጋናስ ሴኪ ዴምባራ ሃ ዪዛ ኣዴይ ኦኔ?» ጋዱስ። ኣሽካራዚ፥ «ኢዚ ታ ጎዳ ዴኔ» ጊዴስ፤ ኢዛ ባ ሻሼዛ ኤካዳ ጉሉንታዱስ።
GEN 24:66 ቃሴ ኣይሌዚ ባ ኦꬂዳይሳ ኡባ ዪሳቃስ ዮቲዴስ።
GEN 24:67 ዪሳቂ ኢርቢቃ ባ ኣዬይ ሳራ ዱንካኔን ኤፊዲ ኢዞ ማቾ ኤኪዴስ፤ ኢዛካ ኢዛስ ማቾ ጊዳዱስ፤ ሂስቲን ኢዚ ኢዞ ሲቂዴሲኔ ባ ኣዬይ ሃይቆን ካዮቲዛይሳፌ ሚኔቲዴስ።
GEN 25:1 ቃሴ ኣብራሃሜይ ኬጹራ ጌቴቲዛ ሃራ ማቾ ኤኪዴስ።
GEN 25:2 ኢዛ ዚሚራኔ፥ ዮቂሻኔ፥ ሜዳኔ፥ ሚዲያኔ፥ ዪሺባቄኔ ሹሃ ኢዛስ ዬላዱስ።
GEN 25:3 ዮቂሻኔይ ሳባኔ ዳዳኔ ዬሊዴስ፤ ዳዳኔይ ኣሶሬታ፥ ሌጹሴታኔ ሌኣሜታ ዬሊዴስ።
GEN 25:4 ሚዲያኔ ናይቲ ኤፋ፥ ኤፌሬ፥ ሄኖኬ፥ ኣቢዳኤኔ ኤልዳኤ። ሃይቲ ዉሪካ ኬጹራ ናይታ።
GEN 25:5 ኣብራሃሜይ ባ ሃሮ ኡባ ዪሳቃ ላቲሲዴስ።
GEN 25:6 ጊዶ ኣቲን ኢዚ ቡሮ ፓጻ ዲሼ ባ ጋራዴታፔ ዬሊዳ ናይታስ ባስ ዲዛይሳፌ ዎይቲዴስ። ዎይቲዲ ባ ና ዪሳቃፔ ኢስታ ሻኪዲ ኣርሼይ ሞኪዛ ባጋራ ዲዛ ዴሬ ዬዲዴስ።
GEN 25:7 ኣብራሃሜይ ሙሌራ 175 ላይꬅ ዴኢዴስ።
GEN 25:8 ኣብራሃሜይ ዳሮ ዎዴ ዴኢዲ ሎኦ ጪማ ጪሚዲ ሃይቂዴስ።
GEN 25:9 ኢዛ ናይቲ ዪሳቂኔ ኢስማኤሌይ ኢዛ ማኪጴሌ ጌቴቲዛ ጎንጎሎ ዱፎን ሞጊዳ፤ ሄ ጎንጎሎዚ ማሚሬ ኣቻን ሂቴ ጾሃሬ ና ኤፍሮኔ ጋዴን ዴስ።
GEN 25:10 ሄሲካ ኣብራሃሜይ ሂቴታፔ ሻሚዳ ጋዴ። ኣብራሃሜይ ባ ማቺያ ሳራይ ሞጌቲዳሶን ሞጌቲዴስ።
GEN 25:11 ኣብራሃሜይ ሃይቂዳፔ ጉዬ ጾሲ ኢዛ ና ዪሳቃ ኣንጂዴስ። ሄ ዎዴ ዪሳቂ፥ «ታና ቤኢዛ ዴኦ ጾሳ ፑልቶ» ጌቴቲዛ ፑልቶ ኣቻን ዴስ።
GEN 25:12 ሳራ ኣይሌያ ጊብጼፔ ዪዳ ኣጋራ ኣብራሃሜስ ዬሊዳ ናዛ ኢስማኤሌ ዬሌታይ ሃይሳፌ ካሊ ጻፌቲዳይሳ።
GEN 25:13 ኢስማኤሌ ናይቲ ባ ሱንꬃኒኔ ባ ዬሌታ ማራን ሃይታንታ፤ ሄይታንቲካ ኔባዮቴ፥ ቄዳሬ፥ ኣዲቢኤሌ፥ ሚቢሳሜ፥
GEN 25:14 ሚሺማኤ፥ ዱማ፥ ማሴ፥
GEN 25:15 ሃዳዴ፥ ቴማ፥ ዪጹሬ፥ ናፊሻኔኔ ቄዲማ።
GEN 25:16 ኢስማኤሌ ናይቲ ሃይታንታ፤ ኢስታ ሱንꬂ ኢስታ ሞꬃኒኔ ዲዛሶን ዲዛሶን ሃይሳ፤ ኢስታስ 12 ዛርኬ ሃላቃቲ ዴቴስ።
GEN 25:17 ኢስማኤሌይ ሙሌራ 137 ላይꬅ ዴኢዲ ሃይቂዴስ፤ ሃይቂዲ ባ ኣዋታን ጋጊዴስ።
GEN 25:18 ኢስማኤሌ ዜሬꬂ ጊብጼፔ ኣርሼይ ሞኪዛ ባጋን ዲዛ ሃዊላፔኔ ሹራፔ ጊዶን ኣሶሬ ኤፊዛ ኦጌ ኣቻን ዴኢዳ። ኢስቲ ባ ኢሻታ ኡባታራ ሞርኬቴꬃን ዴኢዳ።
GEN 25:19 ኣብራሃሜ ና ዪሳቃ ዬሌታይ ሃይሳፌ ካሊ ጻፌቲዳይሳ። ኣብራሃሜይ ዪሳቃ ዬሊዴስ።
GEN 25:20 ዪሳቃስ ላይꬃይ 40 ጊዲዳ ዎዴ ኢርቢቃ ኤኪዴስ፤ ኢዛ ሜስጴጾሚያን ዲዛ ኣራሜ ባቱኤሌ ናዮኔ ኣራሜ ዴሬ ኣስ ላባ ሚቾ።
GEN 25:21 ዪሳቂ ባ ማቺያ ማይኔ ጊዲዳ ጊሻስ ኢዚስ ጎዳ ዎሲን ጎዳይ ኢዛ ዎሳ ሲዪዴስ፤ ሂስቲን ኢዛ ማቺያ ኢርቢቃይካ ቃንꬃታዱስ።
GEN 25:22 ጊዶ ኣቲን ኢዚ ኡሎ ጊዶን ዲዛ ናይቲ ሜንቴ ጊዲዳ ጊሻስ ኢሶይ ኢሳራ ሱጌቲዳ፤ ሂስቲን ኢዛ፥ «ሃይሲ ታ ቦላ ኣይስ ሃኒዜ?» ጋዱስ። ሄሳ ጊሻስ ጾሳ ኦይቻና ቢን፥
GEN 25:23 ጎዳይ ኢዚስ፥ «ኔ ኡሎን ናምኡ ካዎቴꬂ ዴስ፤ ቃሴ ኔ ኡሎን ዲዛ ናምኡ ዴሬ ኣሳቲ ኢሶይ ኢሳፌ ሻኬታና፤ ኢሲ ዴሬ ኣሳይ ሃንኮይታፔ ሚናና፤ ቃሴ ባይራይ ካሎዛስ ሃሬታና» ጊዴስ።
GEN 25:24 ኢዚስ ዬሎ ዎዴይ ጋኪን ኢዛ 2 ኣቱማ ናይታ ሜንቴ ዬላዱስ።
GEN 25:25 ኮይሮ ዬሌቲዳይሲ ኣሪሳ፤ ኢዛ ቦላይካ ዉሪ ኢስኬ ጻላ፤ ሄሳ ጊሻስ ኢስቲ ኢዛ ኤሳዌ ጊ ሱንꬂዳ።
GEN 25:26 ሄሳፌ ጉዬ፥ ኢዛ ኢሻይ ዬሌቲሼ ኤሳዌ ቶሆ ኦይኪ ዬሌቲዴስ፤ ሄሳ ጊሻስ ኢዛ ያቆቤ ጊ ሱንꬂዳ። ኢርቢቃይ ኢስታ ዬሊዳ ዎዴ፥ ዪሳቃስ ላይꬃይ ኡሱፑን ታሙ ላይꬂ ጊዲዴስ።
GEN 25:27 ናይቲ ዲጪዳ፤ ኤሳዌይ ሻንካ ኤሪዛ ባዞ ኣስ ጊዲዴስ፤ ጊዶ ኣቲን ያቆቤይ ዱንካኔን ዲዛ ኣሽኬ ኣስ ጊዲዴስ።
GEN 25:28 ዪሳቂ ኤሳዌ ሲቂዴስ፤ ኣይስ ጊኮ ኢዚ ሻንካቲዳይሳፌ ማናስ ዶሲዴስ፤ ጊዶ ኣቲን ኢርቢቃይ ያቆቤ ሲቃዱስ።
GEN 25:29 ኢሲ ዎዴ ያቆቤይ ዎጼ ካꬂሺን ኤሳዌ ጋፋይ ዎꬊሺን፥ ባዞፌ ዪዴስ።
GEN 25:30 ኤሳዌይ ያቆቤ፥ «ታና ሃይሳ ዞኦ ዎጼዛፔ ሚዛ፤ ታና ጋፋይ ዎꬌስ» ጊዴስ። (ሄሳ ጊሻስ ቃሴ ኢዛ ሱንꬂ ኤዶሜ ጌቴቲዴስ።)
GEN 25:31 ያቆቤይ ኢዛ፥ «ኮይሮ ታስ ኔ ባይራቴꬃ ባይዛ» ጊዴስ።
GEN 25:32 ሂስቲን ኤሳዌይ፥ «ሄኮ! ታ ሃይቃና ጋይስ ሃና ታ ባይራቴꬃያ ታና ኣይ ማዳኔ?» ጊዴስ።
GEN 25:33 ያቆቤይ ዛሪዲ፥ «ኣኔ ታስ ኮይሮ ኔኒ ጫቃ» ጊዴስ፤ ሂዝጊን ኢዚ ጫቂዴስ፤ ባ ባይራቴꬃካ ያቆቤስ ባይዚዴስ።
GEN 25:34 ሄሳፌ ሲሚን ያቆቤይ ኤሳዌስ ቡዴናኔ ሚሲራ ዎጼ ኢሚን ኢዚ ሚዴሲኔ ኡዪዴስ፤ ሄሳፌ ጉዬ ዴንዲዲ ቢዴስ፤ ኤሳዌይ ባ ባይራቴꬃ ካꬊዴስ።
GEN 26:1 ሄ ቢታን ካሴ ኣብራሃሜ ዎዴን ዲዛ ኮሻፔ ሃራ ኮሻይ ዴንዲዴስ፤ ሂስቲን ዪሳቂ ፊሊስጼሜ ካዎ ኣቢሜሌኬኮ ጌራሬ ቢዴስ።
GEN 26:2 ጎዳይ ዪሳቃስ ቆንጪዲ፥ «ጊብጼ ቢታ ዱጌ ቦፓ፤ ታኒ ኔስ ዮቲዛ ቢታን ዴኣ።
GEN 26:3 ሃ ቢታን ጉꬃ ዎዴ ኡታሻ፤ ታኒ ኔናራ ጊዳና፤ ኔና ኣንጃና፤ ኣይስ ጊኮ ሃይሳ ቢታ ኡባ ታኒ ኔሲኔ ኔ ዜሬꬃስ ኢማና፤ ታኒ ኔ ኣዋ ኣብራሃሜስ ጫቆ ጌሊዳ ኡፋይሳ ቃላ ሚንꬃና።
GEN 26:4 ኔ ዜሬꬃ ታኒ ሳሎ ጾሊንቴ ማላ ዳርሳና፤ ሃይሳ ቢታ ኡባ ታ ኢስታስ ኢማና፤ ቢታ ኣሳይ ኡባይ ኔ ዜሬꬃ ባጋራ ኣንጄታና።
GEN 26:5 ጋሶይካ ኣብራሃሜይ ታ ቃላ ሲዪዲ ኣዛዜቲዴስ፤ ታ ኢዛስ ዮቲዳይሳ ኢዚ ኡባ ናጊዳ ጊሻሳ» ጊዴስ።
GEN 26:6 ሄሳ ጊሻስ ዪሳቂ ጌራሬን ዴኢዴስ።
GEN 26:7 ሄ ቢታ ኣሳይ ኢርቢቃ ጊሻስ ዴንꬂዲ ዪሳቃ፥ «ሃና ኔስ ኣዜ?» ጊ ኦይቺዳ። ኢዚካ ኢርቢቃይ ኬሃ ማላ ሎኦ ጊዲዳ ጊሻስ፥ «ታኒ ኢዛ ታ ማቾ ጊኮ ሃ ኣሳይ ኢዚ ጌዶን ታና ዎꬋናኮኔ» ጊ ባቢዳ ጊሻስ፥ «ሃና ታስ ሚቾ» ጊዴስ።
GEN 26:8 ዪሳቂ ሄን ዳሮ ዎዴ ዲዳፔ ጉዬ ፊሊስጼሜ ካዎ ኣቢሜሌኬይ ማስኮቴራ ዱጌ ጼሊዲ ዪሳቂ ባ ማቾ ኢርቢቃራ ኢዲሜቲሼ ካኢሺን ቤኢዴስ።
GEN 26:9 ሄሳ ጊሻስ ኣቢሜሌኬይ ዪሳቃ ጼይጊሲዲ፥ «ሄኮ ኢዛ ኔስ ማቾ! ኔኒ ኣይስ ኢዞ ታ ሚቾ ጋዲ?» ጊ ኦይቺዴስ። ኢዚካ፥ «ኢዛ ታ ማቾ ጊኮ ኢዚ ጋሶን ኣሳይ ታና ዎꬋና ጋዳ ባቢዳ ጊሻስ ጋዲስ» ጊዴስ።
GEN 26:10 ሂስቲን ኣቢሜሌኬይ፥ «ሃይሲ ኔኒ ኑ ቦላ ኦꬂዳይሲ ኣዜ? ታ ኣሳፔ ኢሲ ኣሲ ኔ ማቼይራ ኣቂዳኮ ኑ ቦላ ጎሜ ኤሃሼ ኣጋዳሳ» ጊዴስ።
GEN 26:11 ሄሳ ጊሻስ ኣቢሜሌኬይ ባ ኣሳ ኡባ፥ «ሃ ኣዴዛ ዎይኮ ኢዛ ማቾ ቦቺዛይ ኦኒካ ቱሙ ሃይቆ» ጊ ኣዛዚዴስ።
GEN 26:12 ዪሳቂ ሄ ቢታን ካꬅ ዜሪን ጎዳይ ኢዛ ኣንጂዳ ጊሻስ ሄ ላይꬃን ጼቱ ኩሼ ሺሺዴስ።
GEN 26:13 ኢዛስ ኣቆታይ ዳሪ ዳሪ ቢዳ ጊሻስ ኬሂ ዱሬቲዴስ።
GEN 26:14 ዪሳቃስ ዶርሲ፥ ሚዛ ዉዴይኔ ኣይሌቲ ኬሂ ዳሪዳ ጊሻስ ፊሊስጼሜ ኣሳይ ኢዛ ሚቃይኒዴስ።
GEN 26:15 ሄሳ ጊሻስ ኢዛ ኣዋ ኣብራሃሜ ዎዴን ኢዛ ኣዋ ኣይሌቲ ቦኪዳ ሃꬃ ኦላ ኡባ ፊሊስጼሜ ኣሳይ ቢታ ዛሪዲ ኩንꬂዴስ።
GEN 26:16 ሄ ዎዴ ኣቢሜሌኬይ ዪሳቃ፥ «ኑፔ ሻኬታዳ ባ፤ ኔኒ ኑፔ ኣꬋ ሚናዳሳ» ጊዴስ።
GEN 26:17 ሂዝጊን ዪሳቂ ሄፔ ዴንዲዲ ጌራሬ ሾባ ቢዲ ዱንካኔ ቶኪዲ ሄን ዴኢዴስ።
GEN 26:18 ኣብራሃሜይ ፓጻ ዲሼ ቦኪሲዳ ሃꬃ ኦላታ ኣብራሃሜይ ሃይቂዳፔ ጉዬ ፊሊስጼሜ ኣሳይ ቱጪዳ ሃꬃ ኦላታ ዪሳቂ ቃሴካ ቦካና ማላ ኦꬂዲ ካሴ ኢዛ ኣዋይ ሱንꬂዳ ሱንꬃን ጼይጊዴስ።
GEN 26:19 ዪሳቃ ኣይሌቲ ሾባን ሃꬃ ኦላ ቦኪሼ ቦኪዛ ኦላፌ ፑልቲዛ ሃꬅ ዴሚዳ።
GEN 26:20 ጊዶ ኣቲን ጌራሬን ሜሄ ሄሚዛይቲ ዪሳቃ ሜሄ ሄሚዛይታራ፥ «ሃꬃይ ኑይሳ» ጊ ኦዬቲዳ። ኢስቲ ኢዛራ ፓላሜቲዳ ጊሻስ ዪሳቂ ሄ ሃꬃ ኦላ፥ «ኤሴቄ» ጊ ሱንꬂዴስ።
GEN 26:21 ሄሳፌ ጉዬ ኢስቲ ሃራ ሃꬃ ኦላካ ቦኪዳ፤ ጊዶ ኣቲን ኢስቲ ሄ ሃꬃ ኦላ ጌዶንካ ኦዬቲዳ፤ ሄሳ ጊሻስ ኢዚ ሄ ሃꬃ ኦላ፥ «ሲጺና» ጊ ሱንꬂዴስ።
GEN 26:22 ሄሳፌ ጉꬅ ሃራሶ ኣꬊ ሃራ ሃꬃ ኦላ ቦኪሲዴስ፤ ኢዛ ጋሶን ኦኒካ ኦዬቲቤና፤ «ጾሲ ሃኢ ኑስ ኣሲዴስ፤ ኑኒ ሃ ቢታን ዳራና» ጊዲ ኢዛ፥ «ኦሮቦቴ» ጊ ሱንꬂዴስ።
GEN 26:23 ሄሳፌ ጉዬ ዪሳቂ ፑዴ ቤርሳቤሄ ጌቴቲዛሶ ኬዚዴስ።
GEN 26:24 ሄ ቢዳ ጋላስ ቃማራ ጎዳይ ኢዛስ ቆንጪዲ፥ «ታኒ ኔ ኣዋ ኣብራሃሜ ጾሳ፤ ታኒ ኔናራ ዲዛ ጊሻስ ባቦፋ! ታኒ ኔና ኣንጃና፤ ታ ኣይሌ ኣብራሃሜ ጊሻስ ኔ ዜሬꬃ ታ ዳርሳና» ጊዴስ።
GEN 26:25 ዪሳቂ ሄን ያርሺዛሶ ኬጺዲ ጎዳ ሱንꬅ ጼይጊዴስ፤ ሄን ኢዚ ባ ዱንካኔዛ ቶኪዴስ፤ ቃሴ ሄን ኢዛ ኣይሌቲ ሃꬃ ኦላ ቦኪዳ።
GEN 26:26 ሄሳፌ ጉዬ ኣቢሜሌኬይ ባና ዞሪዛ ኣሁዛታኔ ባ ዎታዳራታ ሃላቃ ፒኮሌ ኤኪዲ ጌራሬፔ ዪሳቃኮ ዪዴስ።
GEN 26:27 ዪሳቂ ኢስታስ፥ «ኢንቴ ካሴ ታና ኢጺዲ ኢንቴ ቢታፌ ኬሲ ዬዲዲ ሃኢ ቃሴ ታኮ ኣይ ኤካና ዪዴቲ?» ጊዴስ።
GEN 26:28 ኢስቲ ኢዛ፥ «ጎዳይ ኔናራ ዲዛይሳ ቱሙ ኑኒ ቆንጬን ቤኢዶስ፤ ሄሳ ጊሻስ ኑሲኔ ኔስ ጊዶን ጫቆ ቃላይ ዴኣና ኮሼስ ጎስ።
GEN 26:29 ጊዶ ኣቲን ኑኒ ኔስ ኪያቴꬅ ጻላ ኦꬂዲ ኔና ሳሮቴꬃን ሞይዚዶስ፤ ሄሳꬆካ ኔኒ ኑ ቦላ ኢታ ሚሽ ኦꬆንታ ማላ ኣኔ ኔናራ ጫቆ ጫቄቶስ፤ ሃኢ ኔና ጎዳይ ኣንጂዳይሲ ቆንጪዴስ» ጊዳ።
GEN 26:30 ሄ ዎዴ ዪሳቂ ኢስታስ ጊቢራ ጊግሲን ሚዳኔ ኡዪዳ።
GEN 26:31 ዎንቴꬃ ጋላስ ማላዶ ዎንታራ ዴንዲዲ ኢስቲ ኢሶይ ኢሳራ ጫቄቲዳ። ዪሳቂ ኢስታ ሞይዚን ኢስቲ ኢዛፔ ሳሮን ሻኬቲዲ ቢዳ።
GEN 26:32 ሄ ጋላስ ዪሳቃ ኣይሌቲ ዪዲ ባ ቦኪዳ ሃꬃ ኦላ ጊሻስ፥ «ኑኒ ሃꬅ ዴሚዶስ» ጊ ኢዛስ ዮቲዳ።
GEN 26:33 ኢዚ ሄ ሃꬃ ኦላ፥ «ሳቤሄ» ጊ ሱንꬂዴስ፤ ሄሳ ጊሻስ ሄ ካታማ ሱንꬂ ሃች ጋካናስ ቤርሳቤሄ ጌቴቴስ።
GEN 26:34 ኤሳዌ ላይꬂ 40 ጊዲዳ ዎዴ ቢኤሬ ና ዮዲቶኔ ኤሎኔ ና ባሴማቶ ማቾ ኤኪዴስ፤ ኢስቲ ናምኣይካ ሂቴ ቢታ ኣሳ።
GEN 26:35 ኢስቲካ ዪሳቃኔ ኢርቢቃ ሚሺሲሼ ዴኢዳ።
GEN 27:1 ዪሳቂ ጪሚን ኢዛ ኣይፌይ ጼሎ ኢጺዳ ዎዴ ባስ ባይራ ናዛ ኤሳዌ ጼይጊዲ ኢዛ፥ «ታ ናዞ!» ጊዴስ። ሂስቲን ኢዚ፥ «ዬ!» ጊ ኮዪዴስ።
GEN 27:2 ኢዚካ፥ «ቤያ! ሃኢ ታኒ ጪማዲስ፤ ታኒ ኣይዴ ሃይቃናኮኔ ታ ሃይቃና ጋላስ ኤሪኬ።
GEN 27:3 ሄሳ ጊሻስ ሃኢ ኔ ኢዛራ ሻንካቲዛ ቶራ ኤካዳ ባዞ ባዳ ዶኣ ሻንካታዳ ታስ ኣሾ ኤካዳ ያ።
GEN 27:4 ታ ዶሲዛ ማልኦ ቁማ ካꬃዳ ታስ ኣꬃ፤ ሄሲካ ታኒ ሃይቃናፔ ካሴ ኔና ኣንጃናሳ» ጊዴስ።
GEN 27:5 ኢርቢቃይ ዪሳቂ ባ ና ኤሳዌስ ዮቲዛይሳ ሄ ዎዴ ሲያዱስ፤ ኤሳዌይ ዶኣ ሻንካቲዲ ኤሃናስ ባዞ ቢን፥
GEN 27:6 ኢርቢቃይ ባ ናዛ ያቆቤ፥ «ኔ ኣዋይ ኔ ኢሻ ኤሳዌ፥
GEN 27:7 ‹ዶኣ ሻንካታ ኤሃዳ ታ ማና ማላ ታስ ማልኦ ቁማ ካꬃ፤ ሂስቲኮ ታ ሃይቆንታ ዳሼ ጎዳ ሲንꬃን ኔና ኣንጃና› ጊሺን ታኒ ሲያዲስ።
GEN 27:8 ታ ናዞ! ሃኢ ታኒ ኔና ኣዛዚዛይሳ ሎኤꬃዳ ሲያ።
GEN 27:9 ዉዴዛ ጋርስ ባዳ ናምኡ ኣንቃራ ዴይሻ ላቃታ ታስ ኤካዳ ያ፤ ኔ ኤሂኮ ታኒ ኔ ኣዋስ ማልኦ ቁማ ኢዚ ዶሲዛ ማላ ካꬃና።
GEN 27:10 ኔ ኣዋይ ሃይቆንታ ዲሼ ሚዲ ኔና ኣንጃና ማላ ኤሃዳ ሚዛ» ጋዱስ።
GEN 27:11 ጊዶ ኣቲን ያቆቤይ ባ ኣዮ ኢርቢቃስ፥ «ታ ኢሻ ኤሳዌ ቦላን ኢስኬይ ዴስ፤ ጊዶ ኣቲን ታ ቦላይ ሊቆ።
GEN 27:12 ታ ኣዋይ ታና ኦይኪ ቤይኮቺ? ታኒ ኢዛ ጪሚዛ ኢዛስ ሚሳቲኮ ታኒ ኣንጆ ኣጋዳ ቃንጌꬃ ታ ቦላ ኤሃናኮ» ጊዴስ።
GEN 27:13 ኢዛ ኣዬያ ኢዛ፥ «ታ ናዞ! ሄ ቃንጌꬃይ ታና ጋኮ። ታኒ ኔስ ዮቲዛይሳ ኔ ኦꬃ፤ ባዳ ዴይሻ ላቃታ ታስ ኤካ ያ» ጋዱስ።
GEN 27:14 ኢዚ ኤሂዲ ባ ኣዬይስ ኢሚን ኣዬያ ማልኦ ቁማ ኢዛ ኣዋይ ዶሲዳ ማላ ማልኤꬃ ካꬃዱስ።
GEN 27:15 ሄሳፌ ጉዬ ኢርቢቃይ ሶን ባ ኣቻን ዲዛ ባ ባይራ ና ኤሳዌ ሎኦ ማይኦ ኤሃዳ ካሎ ናዛ ያቆቤ ማይዛዱስ።
GEN 27:16 ቃሴ ሄ ዴይሻታ ኢቴ ኢዛ ኩሼኒኔ ኢዛ ቆꬌን ማይዛዱስ።
GEN 27:17 ሂስታዳ ባ ካꬂዳ ማልኦ ቁማኔ ኡኬꬃ ባ ና ያቆቤ ኩሼን ዎꬃዱስ።
GEN 27:18 ሂስቲን ኢዚ ባ ኣዋኮ ቢ ጌሊዲ፥ «ታ ኣዋዉ!» ጊዴስ። ኢዚካ፥ «ዬ! ታ ናዞ! ኔኒ ኦኔ?» ጊዴስ።
GEN 27:19 ያቆቤይ ባ ኣዋስ፥ «ታኒ ኔ ባይራ ና ኤሳዌ፤ ኔኒ ታና ኣዛዚዳ ማላ ታኒ ኦꬃዲስ፤ ሱራዳ፥ ታኒ ሻንካታ ኤሂዳይሳ ማ፤ ሂስታዳ ታና ኣንጃ» ጊዴስ።
GEN 27:20 ዪሳቂ ያቆቤ፥ «ታ ናዞ! ዎስታ ኤሶን ዴማዲ?» ጊ ኦይቺዴስ። ኢዚካ፥ «ጎዳይ ኔ ጾሲ ታና ማዲና» ጊዴስ።
GEN 27:21 ዪሳቂ ያቆቤ፥ «ታ ናዞ! ኔኒ ቱሙ ታ ና ኤሳዌኮኔ ታኒ ኔና ኦይካ ቤኣናስ ኣኔ ታኮ ሃ ሺቃ» ጊዴስ።
GEN 27:22 ያቆቤይ ባ ኣዋ ዪሳቃኮ ሺቂን ኦይኪ ቤኢዲ፥ «ሃይሲ ቃላይ ያቆቤ ቃላ ሺን ኩሼይ ኤሳዌ ኩሼ» ጊዴስ።
GEN 27:23 ኢዛ ኩሼይ ኢዛ ኢሻ ኤሳዌ ኩሼꬆ ኢስኬራ ዲዛ ጊሻስ ኤሮንታ ኢዛ ኣንጂዴስ።
GEN 27:24 ኢዛ፥ «ቱሙ ኔኒ ታ ና ኤሳዌ?» ጊ ኦይቺዴስ። ኢዚካ፥ «ኤ ታናኮ!» ጊዴስ።
GEN 27:25 ኢዚካ፥ «ታ ናዞ! ታኒ ኔኒ ሻንካቲዳይሳ ማናስ ሃ ኣꬃ፤ ማዳ ታኒ ኔና ኣንጃና» ጊዴስ። ያቆቤይ ኣꬂን ኢዚ ሚዴስ፤ ዎይኔ ኡሻካ ኤሂን ኡዪዴስ።
GEN 27:26 ሄሳፌ ጉዬ ኢዛ ኣዋ ዪሳቂ፥ «ታ ናዞ! ሃ ሺቃዳ ታና ዬራ» ጊዴስ።
GEN 27:27 ያቆቤይ ሺቂዲ ኢዛ ዬሪዴስ፤ ዪሳቂ ኢዛ ማይኦ ሲንጊ ሲዪዲ፥ «ታ ናዛ ፔኖይ ጎዳይ ኣንጂዳ ጎሻ ማላ ሳዌስ።
GEN 27:28 ጾሲ ሳሎ ኢራኔ ሳኣ ኣንጆ፥ ካꬂኔ ኦራꬃ ዎይኔ ኡሹ ፓላሂሲዲ ኔስ ኢሞ።
GEN 27:29 ካዎቴꬃቲ ኔስ ሃሬቴቶ፤ ኣሲ ዉሪ ኔስ ጉልባቶ፤ ኔኒ ኔ ኢሻታስ ጎዳ ጊዳ፤ ኔ ኣዬይ ዜሬꬂ ኔስ ጉልባቶ፤ ኔና ቃንጊዛይ ቃንጌቲዳዝ ጊዶ፤ ኔና ኣንጂዛይ ኣንጄቲዳይሳ ጊዶ» ጊዴስ።
GEN 27:30 ዪሳቂ ያቆቤ ኣንጂ ዉርሲዳፔ ጉዬ ያቆቤይ ባ ኣዋ ዪሳቃ ሲንꬃፌ ኬዚዳ ማላ ኤሳዌይ ሻንካፌ ፑቱ ጊዴስ።
GEN 27:31 ኢዚካ ቃሴ ማልኦ ቁማ ካꬂዲ ባ ኣዋስ ኣꬂዴስ፤ ኣꬂዲ ኢዛ፥ «ታ ኣዋዉ! ሱራዳ ሃይሳ ታኒ ሻንካቲዳይሳፌ ማ፤ ሂስታዳ ታና ኣንጃ» ጊዴስ።
GEN 27:32 ሂስቲን ኣዋይ ዪሳቂ ኢዛ፥ «ኔ ኦኔ?» ጊ ኦይቺዴስ። ኢዚ፥ «ታኒ ኔስ ባይራ ናዛ ኤሳዌ» ጊዴስ።
GEN 27:33 ዪሳቂ ዳጋሚዲ ኮኮሪሼ፥ «ሂስቲን ዶኣ ሻንካቲዳይሳ ኤኪዲ ታስ ኣꬂዳይ ኦኔ? ታኒ ሃኢ ኔኒ ያናፔ ሲንꬄ ማዳ ኢዛ ኣንጃዲስ፤ ቱሙካ ኢዚ ኣንጄቲዳይሳ ጊዳና» ጊዴስ።
GEN 27:34 ኤሳዌይ ባ ኣዋ ቃላ ሲዪዳ ማላ ባ ቃላ ꬎቁ ሂስታዲ ዳሮ ጫሞ ዬሆ ዬኪዲ ባ ኣዋ፥ «ታና ኣንጃ፤ ታ ኣዋዉ ታናካ ኣንጃ!» ጊዴስ።
GEN 27:35 ጊዶ ኣቲን ኢዚ፥ «ኔ ኢሻይ ዪዲ ታና ጪሚዲ ኔ ኣንጆ ኤኪቺዴስ» ጊዴስ።
GEN 27:36 ኤሳዌይ፥ «ኢዛ ኤሪዲ ያቆቤ ጊ ሱንꬂዴስ፤ ኢዚ ታና ጪሚሺን ሃይሲ ናምኣንꬆ፤ ኢዚ ታ ባይራቴꬃ ኤኪዴስ፤ ቃሴ ሃኢካ ታ ኣንጆ ኤኪዴስ» ጊዴስ፤ ቃሴ ዛሪዲ ባ ኣዋ፥ «ኔኒ ታስ ኣንጆፌ ኣይኮካ ኣሻቤኪ?» ጊ ኦይቺዴስ።
GEN 27:37 ዪሳቂ ኤሳዌስ፥ «ታኒ ኢዛ ኔ ቦላ ጎዳታና ማላ፥ ኢዛ ኢሻቲ ኢዛስ ኦꬃና ማላ፥ ካꬂኔ ዎይኔ ኡሺ ፓላሃና ማላ ኣንጃዲስ፤ ሂስቲን ታ ናዞ ታ ኔስ ሃኢ ኣይ ኦꬃና ዳንዳያዚና?» ጊዴስ።
GEN 27:38 ኤሳዌይ ባ ኣዋ፥ «ታ ኣዋዉ ኔስ ዲዛይ ኢሲ ኣንጆ ጻላ? ታ ኣዋዉ! ታናካ ኣንጃርኪ!» ጊዴስ። ሄሳፌ ጉዬ ኤሳዌይ ባ ቃላ ꬎቁ ሂስቲዲ ዬኪዴስ።
GEN 27:39 ኢዛ ኣዋ ዪሳቂ ዛሪዲ፥ «ኔ ዲዛሶይ ሃ ሳኣ ዱሬቴꬃፌ ሃካና፤ ሳሎ ኢራይካ ኔስ ቡኬና።
GEN 27:40 ኔኒ ኔ ጊꬃ ማሻን ኣቃና፤ ኔኒ ኔ ኢሻስ ሃሬታና፤ ጊዶ ኣቲን ኔኒ ኢዛራ ኤቄቲኮ ኢዛ ቃምባራ ኔ ሞርጌፌ ዲጋና» ጊዴስ።
GEN 27:41 ኣዋይ ያቆቤ ኣንጂዳ ጊሻስ ኤሳዌይ ያቆቤ ኬሂ ኢጺዴስ፤ ኢዚ ባ ዎዚናራ፥ «ታ ኣዋይ ሃይቃና ማቲዴስ፤ ኢዚ ሃይቂዳ ማላ ታ ኢሻ ያቆቤ ታ ዎꬋና» ጊዴስ።
GEN 27:42 ጊዶቲን ኢርቢቃይ ሃይሳ ባ ባይራ ናዛ ኤሳዌ ቃላ ሲዪዳ ጊሻስ ባ ካሎ ና ያቆቤ ጼይጊሳ ኤሃዳ፥ «ኔ ኢሻይ ኤሳዌይ ኔና ዎꬊዲ ሃሎ ኬሳናስ ኮዬስ።
GEN 27:43 ሃኢካ ታ ናዞ፥ ታኒ ኔስ ዮቲዛይሳ ኦꬃ። ዴንዳ! ዴንዳዳ ካራኔን ዲዛ ታ ኢሻ ላባኮ ባቃታ!
GEN 27:44 ሂስታዳ ኔ ኢሻ ሃንቆይ ዶቻና ጋካናስ ኢማꬃቴꬃን ኢዛራ ዳሻ።
GEN 27:45 ኔ ኢሻይ ኔስ ሃንቄቲዛይሳ ኢዚ ኣጊዛ ዎዴኔ ኔ ኢዛ ቦላ ኦꬂዳይሳ ኢዚ ባሊዛ ዎዴ ታኒ ኪታዳ ኔና ሄፔ ኤሂሳና፤ ታኒ ኢሲ ጋላስ ኢንቴፌ ናምኣታፔ ሜላ ኣታና ማላ ኮይኬ» ጋዱስ።
GEN 27:46 ሄሳፌ ጉዬ ኢርቢቃይ ዪሳቃ፥ «ኤሳዌይ ኤኪዳ ሂቴታ ማጫ ናይታ ጌዶን ዱሳይ ታና ኢቴስ፤ ቃሴ ያቆቤይካ ሄይታ ማላ ሂቴታ ማጫ ናይታፔ ማቾ ኤኪኮ ታኒ ሄኮ ሃይቃናስ ኮያይስ» ጋዱስ።
GEN 28:1 ሄሳ ጊሻስ ዪሳቂ ያቆቤ ጼይጊዲ፥ «ካናኔ ኣሳ ማጫ ናይታፔ ኔስ ማቾ ኤኮፋ።
GEN 28:2 ዴንዳዳ ኔ ኣዬይ ኣዋ ባቱኤሌኮ፥ ሜስጴጾሚያ ቢታ ባዳ ሄፔ ኔ ኣዬይ ኢሻ ላባ ማጫ ናይታፔ ኢሲኒዮ ኔስ ማቾ ኤካ።
GEN 28:3 ኡባ ዳንዳይዛ ጾሲ ኔና ኣንጆ፤ ኢዚ ኔስ ዳሮ ናይታ ኢሞ፤ ኔና ዳሮ ዴሬስ ኣዋ ሂስቶ።
GEN 28:4 ኣብራሃሜ ኣንጂዳ ማላ ኔናኔ ኔ ዜሬꬅ ጾሲ ኣንጆ፤ ሃይሳ ኣብራሃሜይ ኢሚዳ ቢታኔ ኔካ ኢማꬃቴꬃን ዴኢዳ ቢታ ኔስ ኢሞ» ኣዛዚዴስ።
GEN 28:5 ሂስቲን ዪሳቂ ያቆቤ ዬዲን ያቆቤይ ሜስጴጾሚያ ቢታ ላባኮ ቢዴስ። ላባይ ያቆቤኔ ኤሳዌ ዬሊዳ ኢርቢቃስ ኢሻኔ ኣራሜ ቢታ ኣስ ባቱኤሌ ና።
GEN 28:6 ዪሳቂ ያቆቤ ኣንጂዳይሳ ሄፔ ማቾ ኤካናስ ሜስጴጾሚያ ቢታ ኢዛ ዬዲዳይሳ ቃሴካ ኢዚ ያቆቤ ኣንጂዳ ዎዴ፥ «ካናኔ ማጫስ ኤኮፋ» ጊ ኣዛዚዳይሳ ሲዪዴስ፤
GEN 28:7 ያቆቤይካ ባ ኣዋሲኔ ባ ኣዬይስ ኣዛዜቲዲ ሜስጴጾሚያ ቢታ ቢዳይሳ ኤሳዌይ ኤሪዴስ።
GEN 28:8 ኤሳዌይ ኢዛ ኣዋ ዪሳቃይ ካናኔ ማጫ ናይታ ኣይ ማላ ኢጺዛኮኔ ሄሳን ኤሪዴስ።
GEN 28:9 ሄሳ ጊሻስ ኤሳዌይ ኣብራሃሜ ና ኢስማኤሌኮ ቢዲ ኢዛ ናዮ ማሂላቶ ባ ማቼይ ቦላ ጉጂ ኤኪዴስ። ኢዛካ ኔባዮቴ ሚቾ።
GEN 28:10 ያቆቤይ ቤርሳቤሄፔ ካራኔ ባናስ ዴንዲዴስ።
GEN 28:11 ኢዚ ኢሲ ሶ ጋኪሺን ኣርሼይ ዉሊን ሄን ኣቂዴስ፤ ሄ ሶን ዲዛ ሹቻታፔ ኢሲ ሹች ኤኪ ቦርኮቲዲ ሄን ꬊስኪዴስ።
GEN 28:12 ኣጉሞዛን ቢታን ኤቂዲ ጼራይ ፑዴ ሳሎ ጋኪዛ ያንጋሬ ቤኢዴስ፤ ያንጋሬዛ ቦላ ጾሳ ኪታንቻቲ ዱጌ ዎꬊሺኒኔ ፑዴ ኬዚሺን ቤኢዴስ።
GEN 28:13 ያንጋሬዛስ ቦላ ጼራን ጎዳይ ኤቂዲ ኢዛ፥ «ታኒ ጎዳ ኔ ኣዋ ኣብራሃሜ ጾሳ፥ ዪሳቃ ጾሳ። ሃ ኔ ኢቺዳ ቢታ ታ ኔሲኔ ኔ ዜሬꬃስ ኢማና።
GEN 28:14 ኔ ዜሬꬃይ ቢታ ኣጬ ማላ ዳራና፤ ኢስቲካ ኦይዱ ባጋ ጋካና፤ ቢታ ቦላን ዲዛ ኣሲ ዉሪ ኔ ባጋራኔ ኔ ዜሬꬃ ባጋራ ኣንጄታና።
GEN 28:15 ታኒ ኔናራ ዳይስ፤ ኔኒ ቢዛሶ ኡባን ታኒ ኔና ናጋና፤ ቃሴ ታኒ ኔና ሃ ቢታ ጉዬ ዛራዳ ኤሃና፤ ታኒ ኔስ ኦꬃና ጊዳይሳ ኦꬃና፤ ኔናካ ዬጊኬ» ጊዴስ።
GEN 28:16 ያቆቤይ ꬊስኮፌ ቤጊዲ፥ «ታኒ ኤራቤኬፌ ኣቲን ጎዳይ ቱሙ ሃይሳን ዴስ» ጊዴስ።
GEN 28:17 ኢዚ ባቢዲ፥ «ሃይሲ ኣይ ማላ ባቢሲዛሶ! ሃይሲ ጾሳ ኬꬃፌ ኣቲን ሃራሶ ዴና፤ ሃይሲ ሳሎ ፔንጌ» ጊዴስ።
GEN 28:18 ያቆቤይ ዎንቴꬃ ጋላስ ማላዶ ዎንታራ ዴንዲዲ ባ ቦርኮቲዳ ሹቻ ኤኪዲ ቱሳ ማላ ኤሲዲ ጾሳስ ዱማሳናስ ኢዛ ቦላ ዛይቴ ጉሲዴስ።
GEN 28:19 ያቆቤይ ሄ ሶሆዛ ቤቴሌ ጊ ሱንꬂዴስ፤ ሄ ካታማያ ሄሳፌ ካሴ ሎዛ ጌቴታዉስ።
GEN 28:20 ያቆቤይ፥ «ኔ ታናራ ጊዳዳ ታ ቢዛ ኦጌን ኔ ታና ናጊኮ ታስ ሚዛ ቁማኔ ማይኦ ኔ ኢሚኮ ታ ኣዋ ሶ ሳሮን ኔ ታና ዛሪኮ ኔኒ ጎዳይ ታ ጾሳ ጊዳና።
GEN 28:22 ታኒ ቱሳ ማላ ኤሲዳ ሃ ሹቻይ ጾሳ ኬꬅ ጊዳና፤ ኔኒ ታስ ኢሚዛ ኡባፌ ታማፌ ኢሲ ኩሼ ታኒ ኔስ ኢማና» ጊ ኣዲኔቲዴስ።
GEN 29:1 ሄሳፌ ጉዬ ያቆቤይ ዴንዲ ቢዲ ኣርሼይ ሞኪዛ ባጋራ ዲዛ ኣሳታ ዴሬ ጋኪዴስ።
GEN 29:2 ሂስቲዲ ኢሲ ዴምባን ሃꬃ ኦላይ ዲዛይሳ ቤኢዴስ፤ ሄꬑ ጩጋ ዶርሲ ቃሴ ሄ ሃꬃ ኦላ ኣቻን ኢቺዴስ፤ ኣይስ ጊኮ ዉዴይ ዉሪ ሃꬅ ኡዪዛይ ሄ ኦላዛፔ፤ ሄ ሃꬃ ኦላ ዶና ቱቻ ሹቻይካ ጊታ።
GEN 29:3 ዶርሳ ዉዴይ ዉሪ ሄን ሺቂዳ ዎዴ ዉዴዛ ሄሚዛይቲ ሃꬃ ኦላ ዶናፔ ሄ ሹቻ ጌንዴሪሲዲ ዶርሳ ኡሼቴስ። ኡሺዲ ሄ ሹቻ ሃꬃ ኦላን ዛሪዲ ቱጬቴስ።
GEN 29:4 ያቆቤይ ኢስታስ፥ «ሃይቶ! ኢንቴ ኣዋፔ ዪዴቲ?» ጊ ኦይቺዴስ። ኢስቲካ፥ «ኑኒ ካራኔፔ ዪዶስ» ጊ ዮቲን፥
GEN 29:5 ኢዚ፥ «ናኮሬስ ናዛ ና ላባ ኤሬቲ?» ጊዴስ። ኢስቲካ፥ «ኤ፥ ኢዛ ኑ ኤሮስ» ጊዳ።
GEN 29:6 ያቆቤይ ኢስታስ፥ «ኢዚ ሎኦ ዲዜ?» ጊ ኦይቺን፥ «ኤ፥ ሎኦኮ፤ ኢዛ ና ኤራሄሎ ዶርስ ኤካ ዪዛሮ ሃኖ ቤያ» ጊዳ።
GEN 29:7 ሂስቲን ያቆቤይ ኢስታስ፥ «ቤኢቴ! ኣርሼይ ሃኢ ꬎቃን ዴስ፤ ሜሄ ሶ ሺሺዛ ዎዴይ ቡሮ ጋኪቤና፤ ዶርሳታ ሃꬅ ኡሺዲ ኤፊ ሄሚሺቴ» ጊዴስ።
GEN 29:8 ጊዶ ኣቲን ኢስታስ፥ «ሜሄይ ዉሪ ሺቃና ጋካናስ፥ ሹቻ ሃꬃ ኦላዛ ዶናፔ ጌንዴሪሳና ጋካናስ ኑኒ ኡሻናስ ዳንዳዮኮ፤ ሄሳፌ ጉዬ ኑኒ ሜሃ ኡሻና» ጊዳ።
GEN 29:9 ኢዚ ቡሮ ሃሳያን ዲሺን ዶርሳታ ሄሚዛይ ኢዞ ጊዲዳ ጊሻስ ላባ ናያ ኤራሄላ ባ ኣዋ ዶርሳታ ላጋ ኤካዳ ጋካ ዎꬋዱስ።
GEN 29:10 ያቆቤይ ባ ኣዬይ ኢሻ ላባ ና ኤራሄሊ ዶርሳታ ቤኢዳ ዎዴ ቢዲ ኦላ ዶናፔ ሹቻ ጌንዴሪሲዲ ባ ኣዬይ ኢሻ ዶርሳታ ሃꬅ ኡሺዴስ።
GEN 29:11 ያቆቤይ ኤራሄሎ ዬሪዲ ኡፋይሳፌ ዴንዲዳይሳን ባ ቃላ ꬎቂሲዲ ዬኪዴስ።
GEN 29:12 ያቆቤይ ኢዚስ ኣዋ ዳቦኔ ኢርቢቃ ና ጊዲዳይሳ ኤራሄሊስ ዮቲን ኢዛ ዎጻ ባዳ ባ ኣዋስ ዮታዱስ።
GEN 29:13 ላባይ ባ ሚቼይ ና ያቆቤ ዎሬ ሲዪዳ ማላ ኢዛራ ጋጋናስ ዎጺዴስ፤ ዎጺ ጋኪዲ ኢዛ ኢዲሚ ዬሪ ኤኪዲ ባ ሶ ኤፊዴስ፤ ሄን ያቆቤይ ባ ሃኒዳይሳ ኡባ ላባስ ዮቲዴስ።
GEN 29:14 ላባይ ኢዛ፥ «ኔኒ ቱሙ ታ ኣሾኔ ታ ሱꬃ» ጊዴስ። ያቆቤይ ኢዛራ ኢሲ ኣጊና ኩሜꬅ ኡቲዴስ።
GEN 29:15 ሄሳፌ ጉዬ ላባይ ኢዛ፥ «ኔኒ ታስ ዳቦ ጊዲዳ ጊሻስ ታስ ጮ ሜላ ኦꬃኔ? ኣኔ ኔስ ኣይ ቃንጻናስ ቤሲዛኮ ታስ ዮታ» ጊዴስ።
GEN 29:16 ላባስ ናምኡ ማጫ ናይቲ ዴቴስ፤ ባይራይ ሱንꬂ ሊያ፥ ካሎያ ኤራሄሎ።
GEN 29:17 ሊያ ኣይፌይ ሾላ፤ ኤራሄሊ ኣይፌይ ጊዲኮ ሎኦ።
GEN 29:18 ያቆቤይ ኤራሄሎ ሲቂዳ ጊሻስ፥ «ታኒ ኔስ ካሎ ናዮ ኤራሄሊ ጊሻስ ኔስ ላፑን ላይꬅ ኦꬃና» ጊዴስ።
GEN 29:19 ላባይ፥ «ኢዞ ሃራ ኣሳስ ኢማናፔ ኔስ ኢሚዛይሲ ሎኦ፤ ኔኒ ታናራ ሃይሳን ዴያ» ጊዴስ።
GEN 29:20 ሄሳ ጊሻስ ያቆቤይ ኤራሄሎ ኤካናስ ላፑን ላይꬅ ኦꬂዴስ፤ ጊዶ ኣቲን ኢዚ ኢዞ ሲቂዛ ጊሻስ ኢዛስ ዎዴዚ ኬሂ ቃንꬅ ሚሳቲዴስ።
GEN 29:21 ሄሳፌ ጉዬ ያቆቤይ ላባ፥ «ታ ማቾ ታስ ኢማ፤ ታ ዎዴይ ዉሪዴስ፤ ታኒ ኢዞ ኤካና ኮያይስ» ጊዴስ።
GEN 29:22 ሄሳ ጊሻስ ላባይ ሄን ዲዛ ኡባ ኣሳ ጼይጊ ሺሺዲ፥ ቡላቻ ኬሲዴስ።
GEN 29:23 ጊዶ ኣቲን ጋዴይ ቃሚን ኢዚ ባ ና ሊያ ኤፊዲ ያቆቤስ ኢሚዴስ፤ ያቆቤይካ ኢዞ ኤኪዴስ።
GEN 29:24 ቃሴ ላባይ ባ ኣይሌዮ ዚልፎ ባ ና ሊያስ ኣይሌ ጊዳና ማላ ኢሚዴስ።
GEN 29:25 ጋዴይ ዎንቲን ጼሊዛ ዎዴ ሄኮ ሊያ ጊዳዱስ! ሂስቲን ያቆቤይ ላባ፥ «ሃይሲ ኔኒ ታ ቦላ ኦꬂዳይሲ ኣዜ? ታኒ ኔስ ኦꬂዳይ ኤራሄሊ ጊሻስ ዴኔ? ታና ኣይስ ጪማዲ?» ጊዴስ።
GEN 29:26 ላባይ ኢዛ፥ «ኑ ቢታን ባይራያ ዲሺን ካሎዮ ኣዚናስ ኢሚዛይሲ ዎጋ ዴና።
GEN 29:27 ሄ ሚሺራቴꬃ ሳሚንታ ኡባ ዉርሳ፤ ቃሴ ካሎቲዛሮካ ኑኒ ኔስ ኢማና፤ ሄሳፌ ጉዬ ሃራ ላፑን ላይꬅ ታስ ኦꬃሳ» ጊዴስ።
GEN 29:28 ያቆቤይ ሄሳꬆ ሃኒዲ ሄ ሳሚንታ ዉርሲዴስ፤ ሄሳፌ ጉዬ ላባይ ባ ናዮ ኤራሄሎ ኢዛስ ኢሚዴስ።
GEN 29:29 ቃሴ ላባይ ባ ኣይሌዮ ቢሊሃ ባ ና ኤራሄሊስ ኣይሌ ጊዳና ማላ ኢሚዴስ።
GEN 29:30 ያቆቤይ ኤራሄሎካ ኤኪዴስ፤ ኤራሄሎ ሊያፔ ኣꬂ ሲቂዴስ፤ ሃራ ላፑን ላይꬅ ላባስ ኦꬂዴስ።
GEN 29:31 ያቆቤይ ሊያ ኤራሄሊ ማላ ሲቆንታይሳ ቤኢዲ ጎዳይ ኢዚስ ዬሊዛ ኡሎዛ ዶይዴስ፤ ጊዶ ኣቲን ኤራሄሊስ ናይ ባ።
GEN 29:32 ሊያይ ሻራዳ ኣቱማ ና ዬላዱስ፤ ኢዛ ሱንꬃካ ኦሮቤሌ ጋ ሱንꬃዱስ፤ ኣይስ ጊኮ ኢዛ፥ «ጎዳይ ታ ሜቶ ቤኢዴስ፤ ሃኢ ቱሙ ታና ታ ኣዚናይ ሲቃና» ጋዱስ።
GEN 29:33 ኢዛ ቃሴካ ሻራዳ ሃኢካ ኣቱማ ና ዬላዱስ፤ ኢዛ፥ «ጎዳይ ታኒ ዶሴቶንታይሳ ቤኢዳ ጊሻስ ታስ ሃይሳካ ጉጂዴስ» ጋዳ ኢዛ ሲሞና ጋ ሱንꬃዱስ።
GEN 29:34 ኢዛ ቃሴካ ሻራዳ ኣቱማ ና ዬላዱስ፤ ኢዛ፥ «ታኒ ኢዛስ ሄꬑ ኣቱማ ናይታ ዬሊዳ ጊሻስ ታ ኣዚናይ ባ ዎዚና ታኮ ዛራና» ጋዳ ኢዛ ሌዌ ጋ ሱንꬃዱስ።
GEN 29:35 ኢዛ ቃሴካ ቃንꬃታዳ ኣቱማ ና ዬላዳ ኢዛ፥ «ሂኣ ታኒ ጎዳ ጋላታና» ጋዱስ፤ ሄሳ ጊሻስ ኢዛ ዩሁዳ ጋ ሱንꬃዱስ፤ ሄሳፌ ጉዬ ዬሎ ኤሳዱስ።
GEN 30:1 ኤራሄላ ያቆቤስ ናይ ኢዚፔ ዬሌቶንታይሳ ኤራዳ ባ ሚቼይ ቦላ ቃናታዱስ፤ ሄሳ ጊሻስ ኢዛ ያቆቤ፥ «ታስ ና ኢማ፤ ኢጺስ ጊኮ ታ ሃይቃና» ጋዱስ።
GEN 30:2 ያቆቤይ ኤራሄሊ ቦላ ሃንቄቲዲ፥ «ታና ኔስ ዬሎ ዲጋናስ ጾሳ ጋዲ?» ጊዴስ።
GEN 30:3 ኢዛካ፥ «ታ ኣይሌዮ ቢሊሃ ሂኖ ቤኣ፤ ኢዛ ታ ጊሻስ ዬላና ማላ ኔኒ ኢዞ ኤካ፤ ሂስቲኮ ኢዚ ባጋራ ታኒካ ና ኣዮ ጊዳና» ጋዱስ።
GEN 30:4 ኤራሄላ ባ ኣይሌዮ ቢሊሃ ማቾ ሂስቲ ኤካና ማላ ኢዛስ ኢሚን ያቆቤይ ኢዞ ኤኪዴስ።
GEN 30:5 ቢሊሃ ሻራዳ ኣቱማ ና ያቆቤስ ዬላዱስ።
GEN 30:6 ሂስቲን ኤራሄላ፥ «ጾሲ ታስ ፒርዲዴስ፤ ታ ዎሳካ ሲዪዲ ታስ ኣቱማ ና ኢሚዴስ» ጋዱስ፤ ሄሳ ጊሻስ ዬሌቲዳ ናዛ፥ «ዳኔ» ጋ ሱንꬃዱስ።
GEN 30:7 ኤራሄሊ ኣይሌያ ቢሊሃይ ቃሴካ ሻራዳ ያቆቤስ ናምኣንꬆ ኣቱማ ና ዬላዱስ።
GEN 30:8 ኤራሄላካ፥ «ታኒ ታ ሚቼይራ ዎልቃማ ባጼ ባጼታዳ ጾናዲስ» ጋሼ ናዛ ኒፍታሌሜ ጋ ሱንꬃዱስ።
GEN 30:9 ሊያይ ባስ ዬሎይ ኤቂዳይሳ ቤያዳ ባ ኣይሌዮ ዚልፎ ኤፋዳ ያቆቤስ ማቾ ሂስታ ኢማዱስ።
GEN 30:10 ሊያ ኣይሌ ዚልፋ ያቆቤስ ኣቱማ ና ዬላዱስ።
GEN 30:11 ሊያይካ፥ «ሃይሲ ኣይ ማላ ሎኦ ቃዳ!» ጋሼ ናዛ ጋዴ ጋዳ ሱንꬃዱስ።
GEN 30:12 ሊያ ኣይሌያ ዚልፋይ ያቆቤስ ናምኣንꬆ ኣቱማ ና ዬላዱስ።
GEN 30:13 ሊያይካ፥ «ታኒ ኬሃ ኡፋዬታዲስ! ማጫሳይካ ታና ኡፋዬቲዛሮ ጋና» ጋዱስ፤ ሄሳ ጊሻስ ኢዛ ናዛ ኣሴሬ ጋ ሱንꬃዱስ።
GEN 30:14 ጊስቴ ማጻ ኣጊናን ኦሮቤሌይ ጋዴ ጊዶ ቢዲ ኢንኮዬ ቴራ ዴሚዲ ባ ኣዮ ሊያስ ኤሂዴስ፤ ኤራሄላ ሊያ፥ «ኔ ናይ ኤሂዳ ኢንኮዬዛፔ ኣኔ ታስ ኢማ» ጋዱስ።
GEN 30:15 ጊዶ ኣቲን፥ «ኔ ታ ኣዚናዛ ታፔ ዎꬃ ኤኪዳይሲ ጊዶንታ ኢጺን ቃሴ ታ ናዛ ኢንኮዬዛ ኤካኔ?» ጋዱስ። ኤራሄላካ፥ «ሂስቲኮ ኔ ናዛ ኢንኮዬዛ ጊሻስ ያቆቤይ ሃቻ ቃማ ኔናራ ኣቆ» ጋዱስ።
GEN 30:16 ሄ ጋላሳ ኦማርስ ያቆቤይ ኦሶሶፔ ሲሚሺን ሊያይ ኢዛ ሞካናስ ኬዛዳ፥ «ኔኒ ታናራ ኣቃና ኮሼስ፤ ኣይስ ጊኮ ታኒ ታ ና ኢንኮዬዛን ኔና ኪራስ ኤካይቻዲስ» ጊን ኢዚ ሄ ጋላሳ ኦማርስ ኢዚራ ኣቂዴስ።
GEN 30:17 ጾሲ ሊያ ዎሳ ሲዪዴስ፤ ሄሳ ጊሻስ ኢዛ ቃንꬃታዳ ኢቻሻንꬆ ኣቱማ ና ያቆቤስ ዬላዱስ።
GEN 30:18 ሊያይካ፥ «ታኒ ታ ኣይሌዮ ታ ኣዚናስ ኢሚዳ ጊሻስ ጾሲ ሄሳ ኪራ ታስ ቃንጺዴስ» ጋሼ ናዛ ዪሳኮሬ ጋዳ ሱንꬃዱስ።
GEN 30:19 ሊያይ ቃሴካ ሻራዳ ኡሱፑንꬃ ኣቱማ ና ያቆቤስ ዬላዱስ።
GEN 30:20 ሊያይ፥ «ጾሲ ታስ ኣልኦ ኢሞታ ኢሚዴስ፤ ታኒ ታ ኣዚናስ ኡሱፑን ናይታ ዬሊዳ ጊሻስ ሃኢ ኢዚ ታና ቦንቻና» ጋዱስ። ሄሳ ጊሻስ ኢዛ ናዛ ዛቢሎኔ ጋ ሱንꬃዱስ።
GEN 30:21 ሄሳፌ ጉዬ ኢሲ ማጫ ና ዬላዳ ኢዞ ዲና ጋ ሱንꬃዱስ።
GEN 30:22 ጾሲ ኤራሄሎ ቆፒዴስ፤ ኢዚ ዎሳካ ሲዪዲ ኢዚስ ዬሊዛ ኡሎ ዶይዴስ።
GEN 30:23 ኢዛካ ሻራዳ ኣቱማ ና ዬላዱስ፤ «ጾሲ ታ ዬላ ታፔ ዴንꬂዴስ፤
GEN 30:24 ጎዳይ ታስ ሃራ ኣቱማ ናካ ጉጄሬኔ!» ጋሼ ናዛ ዮሴፌ ጋ ሱንꬃዱስ።
GEN 30:25 ኤራሄላ ዮሴፌ ዬሊዳፔ ጉዬ ያቆቤይ ላባ፥ «ታኒ ታ ኣዋ ቢታ ሲማና ማላ ታና ሞይዛ።
GEN 30:26 ታኒ ኢስታ ጊሻስ ኔስ ኦꬂዳ ታ ማቼታኔ ታ ናይታ ታስ ኢማ፤ ታኒ ባና፤ ኣይስ ጊኮ ታኒ ኔስ ኣይ ማላ ኦꬂዳኮ ኔ ኤራሳ» ጊዴስ።
GEN 30:27 ቃሴ ላባይ ኢዛስ፥ «ታኒ ኔስ ኢሲ ሚሽ ዮታይስ፤ ጎዳይ ኔ ጌዶን ታና ኣንጂዳይሳ ታ ቤያዲስ።
GEN 30:28 ኔ ኤካና ዳሞዛ ታስ ዮታ፤ ታኒ ኔስ ኢዛ ቃንጻና» ጊዴስ።
GEN 30:29 ያቆቤይ፥ «ታኒ ኔስ ዎስታ ኦꬂዳኮ ኔ ሜሄይካ ዋኒ ዬሌቲዳኮ ኔኒ ኤራሳ።
GEN 30:30 ታኒ ያናፔ ካሴ ኔስ ዲዛ ጉꬃይ ሃኢ ኬሂ ዳሪዴስ፤ ታ ኣꬊዳ ኡባሶን ጎዳይ ኔና ኣንጂዴስ፤ ጊዶ ኣቲን ሃኢ ታኒ ታሶ ኣሳስ ኣይዴ ኦꬆ?» ጊዴስ።
GEN 30:31 ላባይ፥ «ታኒ ኔስ ኣይ ኢሞ?» ጊ ኢዛ ኦይቺን፥ ያቆቤይ፥ «ታስ ኣይኮካ ኢሞፋ፤ ጊዶ ኣቲን ኔኒ ታስ ኢሲ ሚሽ ኦꬂኮ ታኒ ኔ ዉዴዛ ቃሴካ ሄማናኔ ናጋና።
GEN 30:32 ታኒ ሃች ኔ ሜሄ ኡባ ጊዶራ ኣꬋና፤ ሄን ኔ ዶርሳፌ ማሳራ ዎይኮ ፑንጫራ ኡባ፥ ዶርሳ ላቃ ካሬꬃታ ኡባ፥ ዴይሻፌ ፑንጫራኔ ማሳራ ጊዲዳይታ ኡባ ታ ሻካና፤ ሄይታንቲ ታ ዳሞዛ ጊዴቶ።
GEN 30:33 ሄሳ ጊሻስ ታ ጺሎቴꬂ ኔኒ ታስ ቃንጺዳ ዳሞዛ ታይባናስ ሲንꬃፌ ኔ ዪዛ ዎዴ ኤሬታና፤ ታ ዴይሻፌ ጻላቃ ጊዶንታይ ዎይኮ ካሬꬅ ጊዶንታ ኢሲ ላቃይ ታ ኣቻን ቤቲኮ ካይሶቲዳ ማላ ቆዴቶ» ጊዴስ።
GEN 30:34 ላባይ፥ «ኔ ጊዳ ማላ ጊዶ» ጊዴስ።
GEN 30:35 ሄ ጋላሲካ ላባይ ጻላቃ ጊዲዳ ኦርጌታ ኡባ፥ ጻላቃ ጊዲዳ ማጫ ዴይሼታኔ ካሬꬃ ዶርሳ ላቃታ ኡባ ኬሲዲ ሄማና ማላ ባ ኣቱማ ናይታስ ኢሚዴስ።
GEN 30:36 ሂስቲዲ ሄ ሜሄዛራ ሄꬑ ጋላሳ ኦጌ ያቆቤፔ ሃኪ ቢዴስ፤ ጊዶ ኣቲን ያቆቤይ ኣቲዳ ላባ ሜሄታ ሄንꬅ ጌሊዴስ።
GEN 30:37 ያቆቤይ ሚꬃፌ ቃዬ ጉፌ ኬሲዲ ባጋ ፖቂዲ ባጋ ፖቆንታ ኣጊዲ ጉፌዛ ባጋ ካሬꬅ፥ ባጋ ቦꬅ ሂስቲዲ ዋራርዴስ።
GEN 30:38 ሜሄይ ሃꬄ ኡያና ዪዛ ኡባ ዎዴ ሜሄቲ ሃꬅ ኡዪዛ ጎንጌ ጊዶን ጉፌታ ዎꬂዴስ፤ ሜሄቴꬅ ኬዚዳ ሜሄቲ ሃꬅ ኡያናስ ዪዛ ዎዴ፥
GEN 30:39 ሄ ጉፌታ ሲንꬃን ሜሄቲዳ፤ ኢስቲካ ማሳራ፥ ጻላቃኔ ባታካ ላቃታ ዬሊዳ።
GEN 30:40 ያቆቤይ ላቃታ ሜሄታፔ ሻኪዲ ዱማ ዎꬂዴስ፤ ኣቲዳ ሜሄታ ማሳራኔ ጻላቃ ጊዲዳይታ ላባ ሜሄ ሲንꬅ ዛሪዴስ፤ ሄሳꬆ ያቆቤይ ባ ሜሄ ላባ ሜሄራ ዋላኬቶንታ ማላ ዱማ ሻኪ ዎꬂዴስ።
GEN 30:41 ጎባ ሚኖ ማጫ ዶርሳቲኔ ዴይሻቲ ሜሄቴꬅ ኬዚዛ ዎዴ ኣይዴ ጊዲንካ ኢስቲ ሄ ጉፌታ ኣቻን ሜሄታና ማላ ያቆቤይ ሄ ጉፌታ ሃꬃ ጎንጌ ጊዶን ሜሄታ ሲንꬃን ዎꬂዴስ።
GEN 30:42 ጉፌዛ ላፋ ሜሄታ ሲንꬃን ዎꬄና፤ ሄሳ ጊሻስ ላፋ ላፋ ሜሄቲ ላባስ ጊዲን ጎቢዛይቲ ያቆቤስ ጊዲዳ።
GEN 30:43 ሄሳꬆ ሃኒዲ ያቆቤይ ኬሂ ዱሬቲዲ፥ ዳሮ ሜሄ ዉዴ፥ ማጫ ኣይሌታኔ ኣቱማ ኣይሌታ፥ ዳሮ ጋሜላታኔ ሃሬታ ሃሪዴስ።
GEN 31:1 ላባ ኣቱማ ናይቲ ባ ጊዶን፥ «ያቆቤይ ኑ ኣዋ ሃሮ ኡባ ኤኪዴስ፤ ሃይሲ ኡባይ ኢዚ ሺሺዳ ኣቆታይ ኑ ኣዋፔ ቤቲዳዛ» ጊ ሃሳይሺን ያቆቤይ ሲዪዴስ።
GEN 31:2 ያቆቤይ ላባ ኣይፌሶይ ኢዛስ ካሴ ማላ ጊዶንታይሳ ቤኢዴስ።
GEN 31:3 ሄ ዎዴ ጎዳይ ያቆቤ፥ «ኔኒ ኔ ኣዋታ ቢታ ኔ ዳቦታኮ ጉዬ ሲማ፤ ታኒ ኔናራ ጊዳና» ጊዴስ።
GEN 31:4 ሄሳ ጊሻስ ያቆቤይ ኤራሄሎኔ ሊያ ባ ሜሄይ ዲዛሶ ያና ማላ ኪቲዲ ጼይጊሲዴስ።
GEN 31:5 ኢዚ ኢስታስ፥ «ኢንቴ ኣዋ ኣይፌሶይ ታስ ካሴይሳ ማላ ጊዶንታይሳ ታኒ ቤኣዲስ፤ ጊዶ ኣቲን ታ ኣዋ ጾሲ ታናራ ዴስ።
GEN 31:6 ታኒ ታ ኩሜꬃ ዎልቃፌ ኢንቴ ኣዋስ ኦꬂዳይሳ ኢንቴ ኤሬታ።
GEN 31:7 ጊዶ ኣቲን ኢንቴ ኣዋይ ታና ጪሚዲ ታ ዳሞዛ ታሙቶ ላሚ ላሚ ዬጊዴስ፤ ጊዲኮካ ኢዚ ታና ቆሆንታ ማላ ጾሲ ኢዛ ዲጊዴስ።
GEN 31:8 ኢዚ፥ ‹ማሳራ ዶርሳቲኔ ዴይሻቲ ኔ ዳሞዛ ጊዳና› ጊን ዉዴ ሜሄቲ ዉሪ ማሳራ ጻላ ዬሊዳ፤ ቃሴ ኢዚ፥ ‹ጻላቃ ዶርሳቲኔ ዴይሻቲካ ኔ ዳሞዛ ጊዳና› ጊን ሜሄይ ዉሪ ጻላቃ ዬሊዴስ።
GEN 31:9 ጾሲ ሃይሳꬆ ኢንቴ ኣዋፔ ዎꬂ ኤኪዲ ኢንቴ ኣዋ ሜሄ ታስ ኢሚዴስ።
GEN 31:10 «ሜሄቲ ሜሄቴꬅ ኬዚዛ ኣጊናን ኣጉሞራ ሜሄታ ሜሄሲዛ ዴይሻ ኦርጌቲ ማሳራ፥ ጻላቃኔ ባታካ ጊዲዳይሳ ቤያዲስ።
GEN 31:11 ጾሳ ኪታንቻይ ኣጉሞን ታና፥ ‹ያቆቤ!› ጊ ጼይጊን ታኒ፥ ‹ዬ!› ጋዳ ኮያዲስ።
GEN 31:12 ኢዚካ ታና፥ ‹ꬎቁ ጋዳ ሜሄታ ሜሄቲሲዛ ዴይሻ ኦርጌቲ ዉሪ ማሳራኔ ጻላቃ ጊዲዳይሳ ቤያ፤ ጋሶይካ ላባይ ኔ ቦላ ኦꬂዛይሳ ኡባ ታ ቤያዲስ።
GEN 31:13 ኔኒ ሹች ኤሳዳ ዛይቴ ኢዛ ቦላ ቲጋዳ ኣዲኒዳ ቤቴሌ ጾሲ ታና፤ ሃኢ ዴንዳዳ ሃ ቢታፌ ኬዛዳ ኤሌላዳ ጉዬ ኔ ዬሌቲዳ ቢታ ሲማ› » ጊዴስ።
GEN 31:14 ሄሳፌ ጉዬ ኤራሄላኔ ሊያይ ኢዛስ፥ «ኑ ኣዋይሳፌ ኑና ጋካናይ ኣዜ?
GEN 31:15 ኢዚ ኑና ኣላጋ ማላ ጼሌስ ዴኔ? ኢዚ ኑና ባይዚ ኤኪዴስ፤ ባይዚዲ ኤኪዳ ሚሻካ ባስ ሚ ꬋይሲዴስ።
GEN 31:16 ጾሲ ኑ ኣዋፔ ዎꬂ ኤኪዲ ኔስ ኢሚዳ ሜሄይ ዉሪ ቱሙካ ኑሳኔ ኑ ናይታይሳ፤ ሄሳ ጊሻስ ጾሲ ኔስ ዮቲዳይሳ ኡባ ኦꬃ» ጊዳ።
GEN 31:17 ሂስቲን ያቆቤይ ካናኔ ቢታን ዲዛ ባ ኣዋ ዪሳቃኮ ባናስ ዴንዲዴስ፤ ኢዚ ባ ናይታኔ ባ ማቼታ ጋሜላ ቶጊሲዴስ፤ ባስ ዲዛ ሜሄ ኡባ ሲንꬄ ኣꬂ ላጊዲ ሜስጴጾሚያን ዲሼ ኢዚ ሺሺዳ ሃሮ ኡባ ኤኪ ቢዴስ።
GEN 31:19 ላባይ ባ ዶርሳታ ኢስኬዛ ቃንጻናስ ቢቺዳሼ ኤራሄላ ባ ኣዋ ኤቃ ሚስሌታ ካይሳዱስ።
GEN 31:20 ያቆቤይካ ባ ባቃቲዛይሳ ኣራሜ ዴሬ ኣሲ ጊዲዳ ላባስ ዮቶንታ ባሌꬂ ቢዴስ።
GEN 31:21 ኢዚ ባስ ዲዛዝ ኡባ ሺሺ ኤኪ ባቃቲዲ ኤፊራጺሴ ሻፋ ፒኒዲ ጋላኣዴ ጌቴቲዛ ጌዜ ቢታ ቢዴስ።
GEN 31:22 ያቆቤይ ባቃቲ ቢዳይሳ ላባይ ሄꬓንꬆ ጋላስ ሲዪዴስ።
GEN 31:23 ባ ዳቦታ ባናራ ኤኪዲ ላፑን ጋላሳ ኦጌ ያቆቤ ጉዬ ካሊዲ ካሊዲ ጋላኣዴ ጌቴቲዛ ጌዜ ቢታን ኢዛ ጋኪ ኦይኪዴስ።
GEN 31:24 ሄ ጋላሳ ኦማርስ ጾሲ ኣራሜ ላባኮ ኣጉሞራ ዪዲ፥ «ኔኒ ያቆቤ ቦላ ኢታ ጊዲን ኪያ ጊዲንካ ሃሳዮንታ ማላ ናጌታ!» ጊዴስ።
GEN 31:25 ላባይ ጋኪዛ ዎዴ ያቆቤይ ጋላኣዴ ጌዜን ዱንካኒ ኡቲዴስ፤ ቃሴ ላባይኔ ኢዛ ዳቦቲ ሄን ዱንካኔ ቶኪዳ።
GEN 31:26 ሄሳፌ ጉዬ ላባይ ያቆቤ፥ «ኔኒ ሃይሳꬆ ኣይስ ኦꬃዲ? ኔኒ ታና ጪማዳ ታ ማጫ ናይታ ኦላን ዲኤቲዳ ማላ ላጋዳ ኬሳዳሳ።
GEN 31:27 ኔኒ ኣይስ ቆታን ታፔ ኬሳ ኤካዳ ታና ጪማዲ? ታኒ ካራቤኒኔ ዲꬃን ኡፋይሳ ዬꬃን ኔና ሞይዛና ማላ ታስ ኣይስ ዮታቤኪ?
GEN 31:28 ኔኒ ሃራይ ኣቶ ታ ናይታ ናይታኔ ታ ማጫ ናይታ ታኒ ዬራ ኤኮንታ ማላ ዲጋዳሳ፤ ኔኒ ባላ ኦሶ ኦꬃዳሳ።
GEN 31:29 ታኒ ኔና ቆሃናስ ታስ ዎልቃይ ዴስ፤ ጊዶ ኣቲን ኔ ኣዋ ጾሲ ቃማ ኦማርስ ታና፥ ‹ያቆቤ ቦላ ኢታ ጊዲን ኪያ ጊዲንካ ኢሲ ሚሽ ኔ ሃሳዮንታ ማላ ናጌታ!› ጊዲ ታስ ዮቲዴስ።
GEN 31:30 ሃኢ ጊዲኮካ ኔኒ ኔ ኣዋ ሶ ባናስ ኬሃ ላሞቲዳ ጊሻስ ኬኣዳሳ፤ ጊዶ ኣቲን ታሶ ኤቃ ሚስሌታ ኣዛስ ካይሳዲ?» ጊዴስ።
GEN 31:31 ያቆቤይ ላባ፥ «ኔኒ ኔ ናይታ ታፔ ዎልቃን ዎꬃ ኤካናኮ ጋዳ ባቢዳ ጊሻስ ሃይሳꬆ ኦꬃዲስ።
GEN 31:32 ጊዶ ኣቲን ኔ ሚስሌታ ኦይኪዳ ኣስ ኦናካ ኔኒ ዴሚኮ ሄ ኡራይ ሃይቆ! ኔስ ጊዲዳ ሚሺ ታ ኣቻን ቤቲኮ ኑ ዳቦቲ ቤዪሺን ኮያዳ ዴሚኮ ኔስ ኤካ» ጊዴስ፤ ጋሶይካ ያቆቤይ ኤራሄላ ኤቃ ሚስሌታ ካይሲዳይሳ ኤሪቤና።
GEN 31:33 ሄሳ ጊሻስ ላባይ ያቆቤ ዱንካኔ ጊዶ፥ ሊያ ዱንካኔ ጊዶኔ ናምኡ ኣይሌታ ዱንካኔ ጊዶ ጌሊዴስ፤ ጊዶ ኣቲን ኣይኮካ ዴሚቤና፤ ሊያ ዱንካናፔ ኬዚዲ ኤራሄሊ ዱንካኔ ጊዶ ጌሊዴስ።
GEN 31:34 ኤራሄላ ባ ኣዋ ኤቃ ሚስሌታ ኤካዳ ጋሜላ ኮራ ጋርሳን ቆታዳ፥ ኢዛ ቦላ ኡታዱስ። ላባይ ዱንካናን ዲዛይሳ ኡባ ፒልጊዲ ኮዪዴስ፤ ጊዶ ኣቲን ኣይኮካ ዴሚቤና።
GEN 31:35 ኤራሄላ ባ ኣዋ፥ «ታ ኣዋዉ! ታና ሃንቄቶፋ፤ ታኒ ኔስ ኤቃና ዳንዳይኬ፤ ታስ ማጫሳ ዎጋይ ዪዴስ» ጋዱስ። ኢዚ ኡባሶን ኮዪዴስ፤ ጊዶ ኣቲን ኤቃ ሚስሌታ ዴሚቤና።
GEN 31:36 ያቆቤይ ላባ ቦላ ሃንቄቲዲ፥ «ታኒ ኣይ ሞራዲና? ሄሳ ሲሬ ኔ ታና ካላናስ ታኒ ኦꬂዳ ናጋራይ ኣዜ?
GEN 31:37 ሃኢ ኔኒ ታ ሚሻ ኡባ ፒልጋዳ ኮያዳሳ ሺን ኣይ ዴማዲ? ኢስቲ ኔፔኔ ታፔ ኦኒ ዎርዶኮ ፒርዳና ማላ ሃ ዮኦዛ ታ ዳቦታ ሲንꬃኒኔ ኔ ዳቦታ ሲንꬃን ዎꬃ።
GEN 31:38 «ታኒ ኔናራ ናምኡ ታሙ ላይꬅ ኩሜꬅ ዴኣዲስ፤ ኔ ዶርሲኔ ዴይሻ ጊዲን ኣዉጫይቤና፤ ዎይኮ ኔ ሜሄፔ ጋልꬅ ማቤኬ።
GEN 31:39 ዶኣይ ዎꬊዳይሳካ ኡባ ታ ቦላ ቆዳዲስ ኣቲን ኔስ ኤሃቤኬ፤ ጋላስ ጊዲን ኦማርስ ካይሶይ ኤኪዳይሳ ታና ቃንጺሳዳሳ።
GEN 31:40 ጋላስ ኣዋ ሴላይ፥ ኦማርስ ኬንቾይ ታና ቆሂዴስ፤ ꬊስኮይካ ታ ኣይፌፔ ꬋይዴስ።
GEN 31:41 ታኒ ሃይሳꬆ ኔ ሶን ናምኡ ታሙ ላይꬅ ዴኣዲስ፤ ኔ ማጫ ና ናምኣታ ጊሻስ 14 ላይꬅ፥ ኣቲዳ ኡሱፑን ላይꬅ ኔ ኢሚዳ ሜሄታ ጊሻስ ኔስ ኦꬃሼ ዴኣዲስ፤ ጊዶ ኣቲን ኔኒ ታ ዳሞዛ ታሙቶ ላማ ላማ ዬጋዳሳ።
GEN 31:42 ታ ኣዋቲ ኣብራሃሜይኔ ዪሳቂ ጎይኒዳ ጾሲ ታናራ ጊዶንታኮ ኔ ታና ሜላ ኩሼ ኬሳ ዬዳናኮሺን ጾሲ ታ ዋዬኔ ታ ዳቡራ ቤኢዲ ቃማ ኦማርስ ኔና ሃንቂዴስ» ጊዴስ።
GEN 31:43 ላባይ ያቆቤ፥ «ኔ ማቼቲ ታ ማጫ ናይታ፤ ኢስቲ ዬሊዳ ናይቲካ ታ ናይታ፤ ሜሄዚካ ታ ሜሄ፤ ኔስ ዲዛዚ ዉሪካ ታይሳ፤ ሃች ሃ ማጫ ናይታ ታይታ ቦላኔ ኢስቲ ዬሊዳ ናይታ ቦላ ኣይ ኦꬃናስ ዳንዳያዚና?
GEN 31:44 ኣኔ ሃኢ ሃ ያ፤ ኔኒኔ ታኒ ጫቄቶስ፤ ሃይሲ ኔፔኔ ታፔ ጊዶን ማርካ ጊዶ» ጊዴስ።
GEN 31:45 ሄሳ ጊሻስ ያቆቤይ ኢሲ ሹች ኤኪዲ ቱሳ ማላ ኤሲዴስ።
GEN 31:46 ኢዚ ባ ዳቦታካ፥ «ሹች ሺሺቴ» ጊዴስ፤ ሂስቲን ኢስቲ ሹች ሺሺዲ ኮሪዳ፤ ሄ ሹቻ ኮራ ኣቻንካ ካꬅ ሚዳ።
GEN 31:47 ላባይ ሄ ሹቻ ኮራ፥ ዪጋር-ሳሃዱታ ጊ ሱንꬂዴስ፤ ቃሴ ያቆቤይ ኢዛ ጋልኤዴ ጊ ሱንꬂዴስ።
GEN 31:48 ላባይ፥ «ሃ ኬላይ ኔፔኔ ታፔ ጊዶን ሃች ማርካ» ጊዴስ፤ ሄሳ ጊሻስ ኢዛ ሱንꬃይ ጋልኤዴ ጌቴቲዴስ።
GEN 31:49 ቃሴ ኢዚ ሄ ሹቻ ቱሳ ሚጺጳ ጊ ሱንꬂዴስ፤ ኣይስ ጊኮ ላባይ፥ «ኑኒ ኢሳይ ኢሳፌ ሃኪዲ ዲዛ ዎዴ ጎዳይ ኔ ጊዶኒኔ ታ ጊዶን ጊዲዲ ናጎ።
GEN 31:50 ኔኒ ታ ማጫ ናይታ ቆሂኮ፥ ዎይኮ ኔኒ ታ ማጫ ናይታ ቦላ ሃራ ማጫሳታ ኤኪኮ ኑናራ ሃኢ ኦኒካ ባይንዳ ኣጊኮካ ኔ ጊዶኒኔ ታ ጊዶን ጾሳይ ማርካ ጊዲዳይሳ ኤራ» ጊዴስ።
GEN 31:51 ላባይ ቃሴካ ያቆቤስ፥ «ኬሌቲዳ ሹቻ ሃይሳ ቤያ፤ ቃሴ ታኒ ኔፔኔ ታፔ ጊዶን ኤሲዳ ሹቻ ቱሳ ሃይሳ ቤያ።
GEN 31:52 ታኒ ኔ ቦላ ጌኔ ኦꬃናስ ሃ ኬላፔ ኔኮ ካንꬆንታ ማላ ኔኒካ ታ ቦላ ጌኔ ኦꬃናስ ሃ ኬላፔኔ ሃ ሹቻ ቱሳፌ ካንꬆንታ ማላ ሃ ሹቻ ኮራይኔ ሃ ሹቻ ቱሳይ ማርካ።
GEN 31:53 ኣብራሃሜ ጾሲ፥ ናኮሬ ጾሲ፥ ኢስታ ኣዋ ጾሲ፥ ኢዚ ኑ ጊዶን ፒርዶ» ጊዴስ። ያቆቤይ ባ ኣዋ ዪሳቂ ጎይኒዳ ጾሳ ሱንꬃን ጫቂዴስ።
GEN 31:54 ያቆቤይ ዙማ ቦላን ያርሾ ያርሺዴስ፤ ባ ዳቦታካ ቁማ ማናስ ጼይጊዴስ፤ ኢስቲ ሚዲ ሄን ዙማ ቦላን ኣቂዳ።
GEN 31:55 ዎንቴꬃ ጋላስ ማላዶ ዎንታራ ላባይ ዴንዲዲ ባ ናይታ ናይታኔ ባ ማጫ ናይታ ኣንጂዲኔ ዬሪ ኤኪዲ ጉዬ ባ ሶ ሲሚዴስ።
GEN 32:1 ያቆቤይ ዴንዲዲ ሲንꬄ ቢሺን ጾሳ ኪታንቻቲ ኢዛራ ጋጊዳ።
GEN 32:2 ያቆቤይ ኢስታ ቤኢዲ፥ «ሃይሲ ጾሲ ኣቂዛሶ» ጊሼ ሄ ሶሆዛ ማሃናይሜ ጊ ሱንꬂዴስ።
GEN 32:3 ያቆቤይ ሴይሬ ጌቴቲዛሶን ኤዶሜ ቢታን ዲዛ ባ ኢሻ ኤሳዌኮ ባፔ ሲንꬄ ኪታ ዬዲዴስ።
GEN 32:4 ኢዚ ኢስታ ቦላ ኪታ፥ «ኢንቴ ታ ጎዳ ኤሳዌስ ጋና ሚሺ ሃይሳ፤ ‹ኔ ኣይሌ ያቆቤይ፥ ታኒ ላባ ኣቻን ሃኖ ጋካናስ ጋምኣዲስ።
GEN 32:5 ታስ ሚዚ፥ ሃሬይ፥ ዶርሲ፥ ዴይሺ፥ ኣዴ ኣይሌቲኔ ማጫ ኣይሌቲ ዴቴስ፤ ሃኢ ታኒ ሃ ኪታ ታ ጎዳስ ኪቲዛይ ታስ ሎኦ ቆፓና ማላ ጋ ኪታዲስ› ጊዴስ» ጊ ኪቲዴስ።
GEN 32:6 ኪቴቲዳይቲ ያቆቤኮ ሲሚዲ ኢዛስ፥ «ኑኒ ኔ ኢሻ ኤሳዌኮ ቢዶስ፤ ሃኢ ኢዚ ቃሴ ኔናራ ጋጋናስ ዬስ፤ ኢዛራካ 400 ኣሲ ዴስ» ጊዳ።
GEN 32:7 ያቆቤይ ባቢዲ ሾቢዴስ፤ ባናራ ዲዛ ኣሳ 2 ጩጋን ጩጋን ሻኪዲ ባ ዶርሳ፥ ዴይሻ፥ ሚዛኔ ጋሜላ 2 ጩጋን ጩጋን ሻኪዴስ።
GEN 32:8 ኢዚ፥ «ኤሳዌይ ዪዲ ኢሲ ጩጋ ኦሊ ኤኪዛ ጊዲኮ ኣቲዳ ጩጋይ ኬሲ ኤካናኮ» ጊ ቆፒዴስ።
GEN 32:9 ሄ ዎዴ ያቆቤይ፥ «ኣቤት ጾሳዉ! ታ ኣዋ ኣብራሃሜ ጾሳዉ፥ ታ ኣዋ ዪሳቃ ጾሳዉ፥ ታና፥ ‹ኔ ዳቦታኮ ኔ ዴሬ ሲማ፤ ታኒ ኔስ ሎኦ ኦꬃና› ጊዳሶ፥
GEN 32:10 ኔኒ ኔ ኣይሌዛስ ኦꬂዳ ኪያቴꬃሲኔ ኣማኔቴꬃስ ኡባስ ታኒ ቤሶንታ ኣሳ። ታኒ ሃ ዮርዳኖሴ ሻፋ ፒኒዛ ዎዴ ታስ ኢሲ ጉፌይፔ ኣቲን ኩሼን ሃራይ ዴና፤ ጊዶ ኣቲን ሃኢ ታኒ ናምኡ ጩጋ ዴሬ ጊዳዲስ።
GEN 32:11 ታ ኔና ዎሳይስ፤ ታ ኢሻ ኤሳዌ ኩሼፔ ታና ኣሻ፤ ጋሶይካ ኢዚ ዪዲ ታናኔ ታ ናይታ ኣዬታ ኢስታ ናይታራ ꬋይሳናኮ ጋዳ ባባዲስ።
GEN 32:12 ጊዶ ኣቲን ኔኒ ታና፥ ‹ታኒ ኔስ ቱሙ ሎኦ ኦꬃና፤ ታኒ ኔ ዜሬꬃይ ታይቤታናስ ዳንዳዬቶንታ ኣባ ሻሚንታ ማላ ኦꬃና› ጊዳይሳ ቆፓ» ጊ ዎሲዴስ።
GEN 32:13 ሄ ጋላሳ ኦማርስ ኢዚ ሄን ኣቂዳይ ባስ ዲዛ ኡባፌ ባ ኢሻ ኤሳዌስ ኢማናሳ።
GEN 32:14 ኢዚካ 200 ማጫ ዴይሻታኔ ናምኡ ታሙ ዴይሻ ኦርጌታ፥ 200 ማጫ ዶርሳታኔ 200 ꬋርሾታ፥ 300 ꬋንꬂዛ ጋሜላታኔ ኢስታ ማራታራ፥ 40 ሚዛታ፥ 10 ኮርማ ቦራታ፥ 20 ማጫ ሃሬታኔ 10 ዎዳላ ሃሬታ ቆሪ ኬሲዴስ።
GEN 32:16 ሄይታ ዉዴን ዉዴን ሻኪ ሻኪ ባ ኣይሌታ ኩሼን ዎꬂዲ ኣይሌታስ፥ «ታፔ ሲንꬃቲ ቢቴ፤ ዉዴዛ ኢሳ ኢሳፌ ሃሲ ሃሲ ላጊቴ» ጊዴስ።
GEN 32:17 ኡባፌ ሲንꬃን ቢዛይሳ፥ «ታ ኢሻ ኤሳዌይ ኔናራ ጋጊዲ ኔና፥ ‹ኔ ኦኔ? ኣዋ ባይ? ኔ ሲንꬃን ዲዛ ሜሄይ ዉሪ ኦናሴ?› ጊ ኦይቺዛ ጊዲኮ፥
GEN 32:18 ‹ኔኒ ኢዛስ ሃይቲ ኔ ኣይሌ ያቆቤሳ፤ ኢዚ ሃይታ ዬዲዳይካ ታ ጎዳ ኤሳዌስ ኢማናሳ፤ ቃሴ ኢዚካ ኑፔ ጉዬራ ዬስ› ጋ» ጊ ኣዛዚዴስ።
GEN 32:19 ቃሴካ ናምኣንꬆኔ ሄꬓንꬆ ጩጋታሲኔ ዉዴዛ ካሊዛ ሃራ ኡባታስ ሃይሳꬆ፥ «ኢንቴ ኤሳዌራ ጋጊዛ ዎዴ ሃይሳꬆካ ጌታ፤
GEN 32:20 ‹ኔ ኣይሌ ያቆቤይ ኑፔ ጉዬራ ዬስ› ጎንታ ኣጎፍቴ» ጊዴስ፤ ኢዚ ሄሳꬆ ጊዳይ፥ «ታኒ ታፔ ሲንꬄ ኢማናስ ኪቲዳይሳን ኢዛ ሃንቆ ዶሺሳና፤ ሄሳፌ ጉዬ ታኒ ኢዛራ ጋጊዛ ዎዴ ኢዚ ታና ሞኪ ኤካናኮ ኦኔ ኤሪዛይ» ጊ ቆፒዴስ።
GEN 32:21 ሄሳ ጊሻስ ባ ኢሚዛይሳ ባፔ ሲንꬃሲ ዬዲዴስ፤ ጊዶ ኣቲን ኢዚ ባ ሁኤስ ሄ ጋላሳ ኦማርስ ሄን ባ ዲዛሶን ኣቂዴስ።
GEN 32:22 ሄ ጋላሳ ኦማርስ ያቆቤይ ዴንዲዲ፥ ባ ናምኡ ማቼታ፥ ባ ናምኡ ኣይሌታ ባ ናይታ ታማኔ ኢሲኔታ ኤኪዲ ያቦቄ ጌቴቲዛ ሻፋ ጋኪዴስ፤ ኢዚ ኢስታኔ ባስ ዲዛይታ ኡባ ፒንꬂ ዬዲዴስ፤
GEN 32:24 ጊዶ ኣቲን ያቆቤይ ባርካ ሄን ኣቲዴስ። ሄ ዎዴ ኢሲ ኣሲ ጋዴይ ዎንታና ጋካናስ ኢዛራ ባጼቲዴስ።
GEN 32:25 ሄ ኣዴዚ ኢዛ ጾናናስ ዳንዳዬቶንታይሳ ቤኢዲ ያቆቤስ ዎዲራ ቦቺን ኢዛ ዎዲራይ ዶጪዴስ።
GEN 32:26 ሂስቲን ሄ ኣዴዚ ኢዛ፥ «ጋዴይ ዎንታና ጌስ ታና ዬዳ» ጊዴስ። ጊዶ ኣቲን ያቆቤይ ኢዛ፥ «ኔ ታና ኣንጆንታ ዬዲኬ» ጊዴስ።
GEN 32:27 ኣዴዚካ ኢዛ፥ «ኔ ሱንꬂ ኦኔ?» ጊ ኦይቺን ኢዚ፥ «ያቆቤ» ጊ ዛሪዴስ።
GEN 32:28 ኣዴዚካ ኢዛ፥ «ሃይሳፌ ሲንꬃን ኔ ሱንꬂ ኢስራኤሌ ጌቴቶ ኣቲን ያቆቤ ጌቴቶፎ፤ ኣይስ ጊኮ ኔኒ ጾሳራኔ ኣሳራ ባጼታዳ ጾናዳሳ» ጊዴስ።
GEN 32:29 ያቆቤይ ኢዛ፥ «ኔ ሱንꬂ ኦኔ?» ጊ ኦይቺዴስ። ኣዴዚካ፥ «ኔኒ ታ ሱንꬁ ኣይስ ኦይቻይ?» ጊ ሲሚዲ ኢዛ ሄን ኣንጂዴስ።
GEN 32:30 ሄሳ ጊሻስ ያቆቤይ ሄ ሶሆዛ ጲንኤሌ ጊ ሱንꬂዴስ፤ ኣይስ ጊኮ ኢዚ፥ «ታኒ ጾሳ ታ ኣይፌራ ቤኣዳ ሃይቆንታ ኣታዲስ» ጊዴስ።
GEN 32:31 ኢዚ ፓኑኤሌፔ ዴንዲዛ ዎዴ ኢዛ ቦላ ጻልቄይ ኬዚዴስ፤ ኢዚ ባ ዎዲራ ጊሻስ ዎቢዴስ።
GEN 32:32 ያቆቤ ዎዲራይ ዴሼቲዳ ጊሻስ ኢስራኤሌ ኣሳይ ሃች ጋካናስካ ጌዳ ጊዶን ዲዛ ፓሻ ኣሾ ሚ ኤሬቴና።
GEN 33:1 ያቆቤይ ꬎቁ ጊ ጼሊዲ ኤሳዌይ 400 ኣስ ባናራ ኤኪ ዪዛይሳ ቤኢዴስ፤ ሄሳ ጊሻስ ናይታ ሊያስ፥ ኤራሄሊሲኔ ናምኡ ኣይሌታስ ሻኪ ሻኪ ኢሚዴስ።
GEN 33:2 ኣሽካራታኔ ኢስታ ናይታ ሲንꬃን ሊያኔ ኢዚ ናይታ ኢስታፌ ጉዬን ኤራሄሎኔ ዮሴፌ ዉርሴꬃን ዎꬂዴስ።
GEN 33:3 ጊዶ ኣቲን ኢዚ ባ ባጋራ ኡባፌ ሲንꬄ ኣꬊዲ ባ ኢሻኮ ማቲዳ ዎዴ ላፑንቶ ዚጊዴስ።
GEN 33:4 ኤሳዌይ ጊዲኮ ኢዛራ ጋጋናስ ዎጺዲ ኢዛ ቆꬌ ቦላ ጻጼቲዲ ዬሪዴስ፤ ናምኣቲካ ዬኪዳ።
GEN 33:5 ሄሳፌ ጉዬ ኤሳዌይ ꬎቁ ጊ ጼሊዲ ማጫሳታኔ ናይታ ቤኢዲ፥ «ሃ ኔናራ ዲዛይቲ ኦናንቴ?» ጊ ኦይቺዴስ። ያቆቤይ ኢዛስ፥ «ሃይቲ ጾሲ ኔ ኣይሌስ ታስ ባ ኪያቴꬃን ኢሚዳ ናይታ» ጊዴስ።
GEN 33:6 ሄሳፌ ጉዬ ኣይሌቲ ባ ናይታራ ሺቂዲ ኢዛ ሲንꬃን ዚጊዳ።
GEN 33:7 ካሊዲ ሊያይኔ ኢዚ ናይቲ ዪዲ ዚጊዳ፤ ዉርሴꬃን ዮሴፌይኔ ኤራሄላ ዪዲ ዚጊዳ።
GEN 33:8 ኤሳዌይ፥ «ሲንꬃን ታናራ ጋጊዳ ሜሄይ ዉሪ ኣዛ ሜሄ?» ጊ ኦይቺዴስ። ኢዚካ፥ «ታ ጎዶ! ሃይሲ ኔ ታና ኡፋይሳን ሞካ ኤካናሳ» ጊዴስ።
GEN 33:9 ኤሳዌይ፥ «ታ ኢሾ! ታስ ዳሮ ሃሮይ ዴስ፤ ኔ ሚሺ ኔስ ጊዶ» ጊዴስ።
GEN 33:10 ያቆቤይ፥ «ኣካይ፥ ሃኢ ኔ ታና ሞካ ኤካና ጊዲኮ ታ ኔስ ኢሚዛይሳ ኤካ፤ ኔ ታና ሲቆን ሞካ ኤኪሺን ታ ቤኢዳይሳ ጾሳ ኣይፌሶ ቤኢዳ ማላ ቆዳይስ።
GEN 33:11 ጾሲ ባ ኪያቴꬃን ኡባ ኩንꬂ ታስ ኢሚዳ ጊሻስ ኮሺዛዚ ኡባይ ታስ ዴስ፤ ታ ኔስ ኢሚዛይሳ ኤካርኪ» ጊዲ ያቆቤይ ሚንꬂ ሾቢዳ ጊሻስ ኤሳዌይ ኢዚ ጊዳይሳ ኤኪዴስ።
GEN 33:12 ሄሳፌ ጉዬ ኤሳዌይ፥ «ዴንዳ ኣኔ ቦስ፤ ታኒካ ኢንቴናራ ኢሲፌ ባና» ጊዴስ።
GEN 33:13 ጊዶ ኣቲን ያቆቤይ ኢዛ፥ «ታ ጎዶ! ኔ ቤኢዛ ማላ ናይቲ ሹጎ ጊዲዳይሳ ኔ ኤራሳ፤ ቃሴ ታኒ ጋሎ ማራታኔ ጉꬃ ላቃታ ꬋንꬂዛ ዶርሳታኔ ሚዛታ ናጋና ኮሼስ፤ ኢስቲ ኤሌ ኤሌ ላጊኮ ሜሄቲ ዉሪ ኢሲ ጋላስ ሃይቂ ዉራና።
GEN 33:14 ሄሳ ጊሻስ ታ ጎዶ ኔኒ ታፔ ሲንꬃታዳ ባ፤ ታ ሲንꬃን ዲዛ ሜሄይኔ ናይቲ ሄሜታና ዳንዳይዛ ኬና ሄሜቲዲ ኔናራ ሴይሬን ጋይታና» ጊዴስ።
GEN 33:15 ኤሳዌይ ኢዛ፥ «ሂስቲኮ ታኒ ታ ኣሳፔ ጉꬃታ ኔስ ኣሻይስ» ጊዴስ። ጊዶ ኣቲን ያቆቤይ ኢዛ፥ «ሄሲ ኣይሴ? ታኒ ታ ጎዳ ሲንꬃን ቦንቼቲዳይሲ ታስ ጊዳና» ጊዴስ።
GEN 33:16 ሄሳ ጊሻስ ኤሳዌይ ሄ ጋላስ ሴይሬ ሲሚ ቢዴስ።
GEN 33:17 ጊዶ ኣቲን ያቆቤይ ሱኮቴ ቢዴስ፤ ሄን ባስ ኬꬅ ኬጺዴስ፤ ባ ሜሄታስካ ኣቂዛሶ ጊግሲዴስ፤ ሄሳ ጊሻስ ሄ ሶሆዛ ሱኮቴ ጊ ሱንꬂዴስ።
GEN 33:18 ያቆቤይ ሜስጴጾሚያፔ ሲሚዳ ዎዴ ካናኔ ቢታን ዲዛ ሴኬሜ ጊዛ ካታማ ሳሮን ጋኪዴስ፤ ካታማይስ ሲንꬃ ባጋራ ዲዛ ዴምባን ዱንካኒ ኡቲዴስ።
GEN 33:19 ባ ዱንካኔዛ ቶሊዳ ጋዴዛ ሴኬሜ ኣዋ ኤሞሬ ናይታፔ 100 ሳቂሌ ቢራን ሻሚዴስ።
GEN 33:20 ሄን ያርሾሶሆ ኬጺዲ ኢዛ፥ «ጾሲ ኢስራኤሌ ጾሳ» ጊ ሱንꬂዴስ።
GEN 34:1 ሊያይ ያቆቤስ ዬሊዳ ናያ ዲናይ ሄ ዎዴ ሴኬሜ ዴሬ ማጫሳ ቤያናስ ኬዛዱስ።
GEN 34:2 ሄ ቢታ ሃሪዛ ሂዌይ ኤሞሬ ና ሴኬሜይ ኢዞ ዎልቃራ ኦይኪዲ ላይማቲዴስ።
GEN 34:3 ሄሳፌ ጉዬ ኢዛ ዎዚናይ ኢዚን ኤኬቲዴስ፤ ኢዚካ ናዮ ኬሂ ዶሲዳ ጊሻስ ሲቆ ቃላን ባሌꬂዴስ።
GEN 34:4 ሴኬሜይ ባ ኣዋ ኤሞሬ፥ «ታስ ሃኖ ናዮ ማቾ ኦይቻርኪ!» ጊዴስ።
GEN 34:5 ያቆቤይ ባ ና ዲናይ ሞሬቲዳይሳ ሲዪዳ ዎዴ ኢዛ ኣቱማ ናይቲ ሜሄራ ባዞን ዲዛ ጊሻስ ኢስቲ ያና ጋካናስ ጮኡ ጊዴስ።
GEN 34:6 ሄሳፌ ጉዬ ሴኬሜ ኣዋ ኤሞሬይ ያቆቤራ ሃሳያናስ ዪዴስ።
GEN 34:7 ያቆቤ ኣቱማ ናይቲ ሄ ሃኒዳይሳ ሲዪዳ ማላ ባ ዲዛሶፔ ዪዲ ጬጪዳኔ ሼኔቲዳ፤ ኣይስ ጊኮ ሴኬሜይ ኢስራኤሌ ና ቦላ ኦꬃናስ ቤሶንታ ኦሶ ኦꬂዳ ጊሻስ ዳሮ ሃንቄቲዳ።
GEN 34:8 ጊዶ ኣቲን ኤሞሬይ ኢስታስ፥ «ታ ና ሴኬሜይ ኢንቴ ናዮ ዲና ዳሮ ሲቂዛ ጊሻስ ሃያና ኢዞ ኢዛስ ማቾ ኢሜርኬቲ!
GEN 34:9 ኑናራ ኤኬቲቴኔ ጌሌቲቴ፤ ኢንቴ ማጫ ናይታ ኑስ ኢሚቴ፤ ኑ ማጫ ናይታካ ኢንቴስ ኤኪቴ።
GEN 34:10 ኢንቴ ኑ ጊዶን ኡታና ዳንዳዬታ፤ ዴሬይ ኬሂ ኣሆ፤ ኢዛን ዴኢቴ፤ ዛልኢቴ፤ ኢዛን ኣቆ ኬሲቴ» ጊዴስ።
GEN 34:11 ሄ ዎዴ ሴኬሜይ ዲና ኣዋኔ ኢዚ ኢሻታ፥ «ታኒ ኢንቴ ታ ጊዛይሳ ኩንꬂዛ ጊዲኮ ኢንቴ ኦይቺዛይሳ ኣይ ጊዲኮካ ታ ኢማና።
GEN 34:12 ኢንቴ ኮይታ ኮይኮ ኢማና፤ ኢሞታ ኮይኮ ኢንቴ ኮዪዳይሳ ኬና ታ ኢማና ሺን ናዮ ታ ኤካና ማላ ኤሮ ጊቴ» ጊዴስ።
GEN 34:13 ባ ሚቼዮ ዲና ሴኬሜይ ቱኒሲዳ ጊሻስ ያቆቤ ኣቱማ ናይቲ ሴኬሜሲኔ ኢዛ ኣዋ ኤሞሬስ ዎርዶ ዮቲዳ፤
GEN 34:14 ኢስቲካ ኢስታስ፥ «ኑኒ ሄሳ ማላ ሚሽ ኦꬃና ዳንዳዮኮ፤ ኑኒ ኑ ሚቼዮ ቃጻሬቶንታ ኣሳስ ኢሚኮ ሃይሲ ኑና ካዉሺዛ ሚሻ።
GEN 34:15 ኑኒ ኢንቴ ኢሲ ሚሽ ኦꬂኮ ኢንቴስ፥ ‹ኤሮ› ጋና፤ ሄሲካ ኣዜ ጊኮ ኢንቴ ቢታ ኣቱማ ኣሳይ ዉሪ ኑ ማላ ቃጻሬቲኮ።
GEN 34:16 ኑኒ ኑ ማጫ ናይታ ኢንቴስ ኢማና ኢንቴ ማጫ ናይታካ ኑስ ኤካና፤ ኑ ኢንቴ ጊዶን ኡቲዲ ኢንቴናራ ኢሲ ዴሬ ጊዳና።
GEN 34:17 ኢንቴ ቃጻሬታናስ ኮዮንታ ጊዲኮ ኑኒ ኑ ሚቼዮ ኤኪዲ ባና» ጊዳ።
GEN 34:18 ሂስቲን ኢስቲ ጊዳይሲ ኤሞሬሲኔ ኢዛ ና ሴኬሜስ ሎኦ ሚሳቲዴስ።
GEN 34:19 ባ ኣዋ ኬꬃን ዲዛ ኡባፌ ኣꬊ ቦንቼቲዳ ሴኬሜይ ያቆቤ ናዪን ኡፋዬቲዳ ጊሻስ ኢስቲ ጊዳይሳ ኦꬃናስ ጋምኢቤና።
GEN 34:20 ሄ ዎዴ ኤሞሬይኔ ኢዛ ና ሴኬሜይ ባ ኣሳስ ዮታናስ ባ ዲዛ ካታማ ሲሚ ቢዲ፥
GEN 34:21 «ሃ ኣሳቲ ኑናራ ሲጋ፤ ኢስቲ ኑ ቢታን ዴቶኔ ዛልኤቶ፤ ኑ ዴሬይ ኬሂ ኣሆ፤ ኢስታ ማጫ ናይታ ኑኒ ኤካና፤ ኢስቲካ ኑ ማጫ ናይታ ኤኬቶ።
GEN 34:22 ጊዶ ኣቲን ኑናራ ኢስቲ ኢሲ ኣሳ ማላ ዴኣናስ ኑኒ ኢሲ ሚሽ ኦꬃናስ ኮሼስ፤ ሄሲካ ኢስቲ ቃጻሬቲዳ ማላ ኑ ኣቱማ ኣሳይ ዉሪ ቃጻሬቲኮ ሃናና።
GEN 34:23 ኑኒ ሄሳꬆ ኦꬂኮ ኢስታ ሚዛይ፥ ኢስታ ኣቆይኔ ኢስታ ሜሄይ ዉሪ ኑስ ዴኔ? ሄሳ ጊሻስ ኣኔ ኑኒ ኢስቲ ጎይሳ ኤሮ ጎስ፤ ኢስቲካ ኑናራ ዳና» ጊዳ።
GEN 34:24 ካታማ ዱቡሻን ሺቂዳ ኣሳይ ዉሪ ኤሞሬሲኔ ኢዛ ና ሴኬሜስ፥ «ኤሮ» ጊዳ። ሂስቲን ሄ ካታማ ኣቱማሳይ ዉሪ ቃጻሬቲዴስ።
GEN 34:25 ሄꬓንꬆ ጋላስ ኢስቲ ዉሪ ባ ቃጻራ ማዱንꬃ ሳኬቲሺን፥ ያቆቤ ኣቱማ ናይታፔ ዲና ኢሻቲ፥ ሲሞኒኔ ሌዌይ ጊꬃ ማሻ ኤኪዲ ኦኒካ ኤሮንታ ካታማ ጌሊዲ፥ ኣዴ ጊዲዳይታ ኡባ ዎꬊዳ።
GEN 34:26 ኤሞሬኔ ኢዛ ና ሴኬሜ ጊꬃ ማሻን ዎꬊዲ ባ ሚቼዮ ዲና ሴኬሜ ሶፔ ኬሲ ኤኪዲ ቢዳ።
GEN 34:27 ያቆቤ ኣቱማ ናይቲካ ኣሃታ ቦላራ ዬꬌቲ ኣꬊዲ ባ ሚቼዮ ዲኖ ቱኒሲዳ ካታማ ቦንቂዳ።
GEN 34:28 ኢስታ ዶርስ፥ ዴይሽ፥ ሚዝ፥ ሃሬ፥ ቃሴካ ካታማ ጊዶን ዲዛይሳኔ ጋጻን ዲዛይሳ ኡባ ኤኪዳ።
GEN 34:29 ኢስታ ሜሄታኔ ኢስታ ማቼታ ጉꬃ ናይታራ ኡባ ዲኢ ኤኪ ቢዳ፤ ኬꬃን ዲዛይሳካ ኡባ ቦንቂዳ።
GEN 34:30 ያቆቤይ ሲሞናኔ ሌዌ፥ «ኢንቴ ታ ቦላ ሜቶ ኤሂቺዴታ፤ ሃ ቢታን ዲዛ ካናኔቲኔ ፓሪዜቲ ታና ኢጻና፤ ኑኒ ቆዳን ጉꬃ፤ ኢስቲ ኢሲፌ ጊዲዲ ታ ቦላ ዎራጂኮ ታኒኔ ታሶ ኣሳይ ꬋያና» ጊዴስ።
GEN 34:31 ጊዶ ኣቲን ኢስታስ፥ «ሂስቲን ኢዚ ኑ ሚቼዮ ላይማ ማጫሳ ማላ ኦꬃናስ ቤሲዜ?» ጊዳ።
GEN 35:1 ሄሳፌ ጉዬ ጾሲ ያቆቤ፥ «ዴንዳዳ ፑዴ ቤቴሌ ባዳ ሄን ዴኣ፤ ኔኒ ኔ ኢሻ ኤሳዌፔ ባቃቲዛ ዎዴ ኔስ ቆንጪዳ ጾሳስ ሄን ያርሾ ያርሺዛሶ ጊጊሳ» ጊዴስ።
GEN 35:2 ያቆቤይካ ባሶ ኣሳኔ ባናራ ዲዛ ኣሳ ኡባ፥ «ኢንቴ ጊዶን ዲዛ ኣላጋ ኤቃ ሚስሌታ ዲጊቴ፤ ኢንቴ ቦላ ጌሺቴ፤ ኢንቴ ማይኦካ ላሚቴ።
GEN 35:3 ኣኔ ዴንዲዲ ፑዴ ቤቴሌ ቦስ፤ ታ ሜቶቲዳ ጋላስ ታኒ ጊዛ ሲዪዲ ታኒ ቢዳ ኡባሶን ታናራ ጊዲዳ ጾሳስ ታኒ ሄን ያርሾ ያርሺዛሶ ጊጊሳና» ጊዴስ።
GEN 35:4 ሄሳ ጊሻስ ኢስቲ ባ ኣቻን ዲዛ ሃራ ዴሬ ኣሳ ኤቃ ሚስሌታ ኡባኔ ባ ሃይꬃን ዲዛ ጉቲቻ ኡባ ኬሲዲ ያቆቤስ ኢሚን ያቆቤይ ሄይታ ሴኬሜን ዲዛ ዎላ ጋርሳን ሞጊዴስ።
GEN 35:5 ሄሳፌ ጉዬ ኢስታ ዩሾን ዲዛ ካታማ ኡባ ኣሳ ቦላ ጾሳፌ ዳጋማይኔ ያሻቴꬂ ዎꬊዳ ጊሻስ ያቆቤይኔ ኢዛ ኣቱማ ናይቲ ዴንዲዲ ቢሺን ኦኒካ ኢስታ ኦይካናስ ካሊቤና።
GEN 35:6 ያቆቤይኔ ኢዛራ ዲዛ ኣሳይ ዉሪ ካናኔ ቢታን ዲዛ ቤቴሌ ጌቴቲዛ ሎዛ ጋኪዳ።
GEN 35:7 ሄን ኢዚ ያርሾ ያርሺዛሶ ኬጺዲ ሄ ሶሆዛ ኤሊ-ቤቴሌ ጊ ሱንꬂዴስ፤ ኣይስ ጊኮ ኢዚ ባ ኢሻፔ ባቃቲዲ ቢዛ ዎዴ ጾሲ ኢዛስ ቆንጪዳ ሶሆ ጊዲዳ ጊሻሳ።
GEN 35:8 ኢርቢቃ ዲቺዳ ዲቦራይ ሄን ሃይቃዳ ቤቴሌፔ ዱጌ ባጋራ ዲዛ ዎላ ጋርሳን ኢዛ ሞጌታዱስ፤ ሄሳ ጊሻስ ሄ ሚꬃ ሱንꬂ ኣሌም-ባኩቴ ጌቴቲዴስ።
GEN 35:9 ያቆቤይ ሜስጴጾሚያፔ ሲሚዳፔ ጉዬ ጾሲ ኢዛስ ቃሴካ ቆንጪዲ ኢዛ ኣንጂዴስ፤
GEN 35:10 ጾሲ ኢዛ፥ «ሃኢ ጋካናስ ኔ ሱንꬂ ያቆቤ፤ ጊዶ ኣቲን ሃይሳፌ ጉዬ ሙሌካ ያቆቤ ጌቴታካ፤ ኔ ሱንꬂ ኢስራኤሌ ጌቴታና» ጊዲ ኢዚ ኢዛ ኢስራኤሌ ጊ ሱንꬂዴስ።
GEN 35:11 ቃሴ ጾሲ ያቆቤ፥ «ታኒ ኡባ ዳንዳይዛ ጾሳ፤ ኔኒ ዬሌታ፤ ጮራታ፤ ዴሬይኔ ዴሬ ማባራይ ኔፔ ኬዛና፤ ካዎቲካ ኔ ጉልባቴፔ ኬዛና።
GEN 35:12 ታኒ ኣብራሃሜሲኔ ዪሳቃስ ኢሚዳ ቢታ ቃሴ ኔስ ኢማና፤ ኔፔ ጉዬካ ታኒ ሃ ቢታ ኔ ዜሬꬃስ ኢማና» ጊዴስ።
GEN 35:13 ሄሳፌ ጉዬ ጾሲ ኢዛራ ሃሳይዳ ሶሆፔ ፑዴ ቢዴስ።
GEN 35:14 ያቆቤይ ጾሲ ባናራ ሃሳይዳ ሶሆን ሹች ኤሲዲ ኢዛ ቦላ ኡሻ ያርሾ ጉሲዴስ፤ ዛይቴካ ኢዛ ቦላ ቲጊዴስ።
GEN 35:15 ያቆቤይ ጾሲ ባናራ ሃሳይዳ ሶሆዛ፥ «ቤቴሌ» ጊ ሱንꬂዴስ።
GEN 35:16 ኢስቲ ሄሳፌ ጉዬ ቤቴሌፔ ዴንዲ ኤፍራታ ጋካናስ ጉꬅ ኣሺዳ ማላ ኤራሄሎ ዎልቃማ ሚጻይ ኦይኪዴስ።
GEN 35:17 ሚጻይ ኢዞ ዋዪሲን ኢዞ ዬሊሲዛራ፥ «ባቦፋ፤ ሃይሲካ ኣቱማ ና» ጋዱስ።
GEN 35:18 ጊዶ ኣቲን ኢዛ ሃይቃ ሼምፖ ኬዚሺን ባ ና ቤኒ-ኦኔ ጋ ሱንꬃዱስ፤ ያቆቤይ ኢዛ ቢኒያሜ ጊ ሱንꬂዴስ።
GEN 35:19 ሄሳፌ ጉዬ ኤራሄላ ሃይቃዳ ቤቴሊሄሜ ጊዛ ኤፍራታ ኤፊዛ ኦጌ ዶናን ሞጌታዱስ።
GEN 35:20 ያቆቤይ ኢዚ ዱፎን ሃዉልቴ ሹች ኤሲዴስ፤ ሄ ሃዉልቴ ሹቻይ ሃች ጋካናስካ ኤራሄሊ ዱፎ ማላታ ጊዲ ዴስ።
GEN 35:21 ኢስራኤሌይ ሄፔ ዴንዲዲ ኤዴራ ጊምቤፌ ሄ ፒንꬃን ባ ዱንካኔዛ ቶኪዴስ።
GEN 35:22 ኢስራኤሌይ ሄ ቢታን ዲሺን ኦሮቤሌይ ቢዲ ባ ኣዋስ ዬሊዳ ኣይሌ ቢሊሃራ ዚንኢዴስ፤ ኢስራኤሌይካ ሃ ዮኦዛ ሲዪዴስ። ያቆቤ ኣቱማ ናይቲ ታማኔ ናምኣ። ኢስቲካ፥
GEN 35:23 ሊያ ናይቲ ያቆቤ ባይራ ና ኦሮቤሌ፥ ሲሞና፥ ሌዌ፥ ዩሁዳ፥ ዪሳኮሬኔ ዛቢሎኔ።
GEN 35:24 ኤራሄሊ ኣቱማ ናይቲ ዮሴፌኔ ቢኒያሜ።
GEN 35:25 ኤራሄሊ ኣይሌ ቢሊሃ ኣቱማ ናይቲ ዳኔኔ ኒፍታሌሜ።
GEN 35:26 ሊያ ኦሳንቻ ዚልፊ ኣቱማ ናይቲ ጋዴኔ ኣሴሬ። ሃይቲ ማሶጴጾምያን ያቆቤስ ዬሌቲዳ ኢዛ ኣቱማ ናይታ።
GEN 35:27 ያቆቤይ ባ ኣዋይ ዲዛሶ ማሚሬ ጌቴቲዛሶ ዪዴስ፤ ሄሲካ ኣብራሃሜይኔ ዪሳቂ ካሴ ዴዪዳ ቂሪያቴ-ኣርባኤ ዎይኮ ኬብሮኔ ጌቴቲዛሶ።
GEN 35:28 ዪሳቂ 180 ላይꬅ ዴኢዴስ፤
GEN 35:29 ኢዚ ዳሮ ዎዴ ዴኢዲ ኬሂ ጪሚ ሃይቂዲ ባ ኣዋታን ጋጊዴስ፤ ኢዛ ናይቲ ኤሳዌይኔ ያቆቤይ ኢዛ ሞጊዳ።
GEN 36:1 ኤዶሜ ጌቴቲዛ ኤሳዌ ዬሌታይ ሃይሳፌ ካሊ ጻፌቲዳይሳ።
GEN 36:2 ኤሳዌይ ካናኔ ቢታ ማጫ ናይታፔ ባስ ማቾ ኤኪዴስ፤ ኢስቲካ ሂቴ ኤሎኔ ና ኣዳ፥ ሂዌያ ጺባኦኔ ና ኣናይ ዬሊዳ ኦሆሊባሜኔ
GEN 36:3 ኢስማኤሌ ና ኔባዮቲ ሚቺዮ ባሴማቶ።
GEN 36:4 ኣዳይ ኤሳዌስ ኤልፋዜ ዬላዱስ፤ ባሴማታያካ ኤራኡኤሌ ዬላዱስ፤
GEN 36:5 ኦሆሊባሜ ያኡሼ፥ ያኢላሜኔ ቆሬ ዬላዱስ፤ ካናኔ ቢታን ኤሳዌስ ዬሌቲዳ ኣቱማ ናይቲ ሃይታንታ።
GEN 36:6 ኤሳዌይ ባ ማቼታ፥ ባ ኣቱማ ናይታኔ ማጫ ናይታ፥ ባሶ ኣስ ኡባ ባ ሚዛታኔ ባ ሜሄ ኡባ ካናኔ ቢታን ኢዚ ሃሪዳይሳ ኡባ ኤኪዲ ባ ኢሻ ያቆቤፔ ሃኪ ቢዴስ።
GEN 36:7 ኢስታ ሃሮይ ዳሪዳ ጊሻስ ኢስቲ ኢሲፌ ዴኣናስ ዳንዳይቤቴና፤ ሜሄይ ኢስታስ ዳሪዳ ጊሻስ ኢስቲ ዲዛ ዴሬይ ኢስታ ናምኣታስ ጊዳናስ ዳንዳይቤና።
GEN 36:8 ሂስቲን ኤዶሜ ጌቴቲዛ ኤሳዌይ ሴይሬ ጌቴቲዛ ጌዜን ኡቲዴስ።
GEN 36:9 ሴይሬ ጌቴቲዛ ጌዜ ቢታን ዲዛ ኤዶሜታ ኣዋ ኤሳዌ ዬሌታይ ሃይሳፌ ካሊ ጻፌቲዳይሳ።
GEN 36:10 ኤሳዌ ኣቱማ ናይታ ሱንꬂ ሃይሳፌ ካሊ ጻፌቲዳይሳ፤ ሄሳቲካ ኤሳዌ ማቾ ኣዳ ና ኤልፋዜኔ ኤሳዌ ማቾ ባሴማቲ ና ኤራኡኤሌ።
GEN 36:11 ኤልፋዜ ናይቲ ቴማኔ፥ ኦማሬ፥ ጼፎ፥ ጋኢታሜኔ ቄናዜ።
GEN 36:12 ቃሴ ኤሳዌ ና ኤልፋዜስ ቴሚናኤ ጌቴቲዛ ኣይሌይ ዳዉስ፤ ኢዛካ ኤልፋዜስ ኣማሌቄ ዬላዱስ፤ ሃይቲ ኤሳዌ ማቾ ኣዲስ ና ናይታ።
GEN 36:13 ኤራኡኤሌ ኣቱማ ናይቲ ናሃቴ፥ ዛራሄ፥ ሻማሃኔ ሚዛሄ፤ ሃይቲ ኤሳዌ ማቺዮ ባሴማቲስ ና ናይታ።
GEN 36:14 ጺባኦኔስ ናዛ ና ኣናይ ዬሊዳ ኦሆሊባሚ ኣቱማ ናይቲ ሃይታ፤ ኢዛ ኤሳዌስ ያኡሼ፥ ያኢላሜኔ ቆሬ ዬላዱስ።
GEN 36:15 ኤሳዌ ዬሌታ ዜሬꬃ ሃላቃቲ ሃይሳፌ ካሊ ጻፌቲዳይታ። ኤሳዌስ ባይራ ና ኤልፋዜ ኣቱማ ናይታስ ሃላቃ ጊዲዳይቲ ቴማኔ፥ ኦማሬ፥ ጼፎ፥ ቄናዜ፥
GEN 36:16 ቆሬ፥ ጋኢታሜኔ ኣማሌቄ፤ ኤዶሜ ቢታን ኤልፋዜይ ዬሊዳ ሃላቃቲ ሃይታ፤ ሃይቲ ዉሪ ኣዲስ ና ናይታ።
GEN 36:17 ኤሳዌ ና ኤራኡኤሌ ኣቱማ ናይታስ ሃላቃ ጊዲዳይቲ ናሃቴ፥ ዛራሄ፥ ሻማሃኔ ሚዛሄ፤ ኤዶሜ ቢታን ኤራኡኤሌይ ዬሊዳ ሃላቃቲ ሃይታ፤ ኢስቲ ኤሳዌ ማቾ ባሴማቲስ ና ናይታ።
GEN 36:18 ኤሳዌ ማቺዮ ኦሆሊባሚ ኣቱማ ናይታስ ሃላቃ ጊዲዳይቲ ያኡሼ፥ ያኢላሜኔ ቆሬ፤ ኢስቲ ኣና ና፥ ኤሳዌ ማቺዮ ኦሆሊባሚፔ ዬሌቲዳ ሃላቃታ።
GEN 36:19 ሃይቲ ኤዶሜ ጌቴቲዛ ኤሳዌ ኣቱማ ናይታሲኔ ኢስታ ዜሬꬃታስ ሃላቃታ።
GEN 36:20 ኤዶሜ ቢታን ዲዛ ሆሬ ሴይሬ ኣቱማ ናይቲ ሃይሳፌ ካሊ ጻፌቲዳይታ፤ ሄይቲካ ሎጻኔ፥ ሾባሌ፥ ጺባኦኔ፥ ኣና፥
GEN 36:21 ዲሾኔ፥ ኤጼሬኔ ዲሻኔ፤ ኢስቲካ ኤዶሜ ቢታን ዲዛ ሴይሬ ኣቱማ ናይቲ፥ ሆሬታ ሃላቃታ።
GEN 36:22 ሎጻኔ ኣቱማ ናይቲ ሆሬኔ ሄማኔ፤ ሎጻኔ ሚቺያ ቴሚናኦ።
GEN 36:23 ሾባሌ ኣቱማ ናይቲ ኣሊዋኔ፥ ማናሃቴ፥ ኤባሌ፥ ሼፋኔ ኦናሜ።
GEN 36:24 ጺባኦኔ ኣቱማ ናይቲ ኣያኔ ኣና፤ ኣናይካ ባዞን ባ ኣዋ ጺባኦኔ ሃሬታ ሄሚሼ ጻባላ ሃꬅ ዴሚዳይሳ።
GEN 36:25 ኣና ናይ ዲሾኔ፤ ናያ ቃሴ ኦሆሊባሞ።
GEN 36:26 ዲሾኔ ኣቱማ ናይቲ ሄምዳኔ፥ ኤሺባኔ፥ ዪቲራኔኔ ካራኔ።
GEN 36:27 ኤጼሬ ኣቱማ ናይቲ ቢሊሃኔ፥ ዛኢዋኔኔ ኣቃኔ።
GEN 36:28 ዲሻኔ ኣቱማ ናይቲ ኡጼኔ ኣራኔ።
GEN 36:29 ሆሬታ ሃላቃቲ ሃይታንታ፤ ሎጻኔ፥ ሾባሌ፥ ጺባኦኔ፥ ኣና፥
GEN 36:30 ዲሾኔ፥ ኤጼሬኔ ዲሻኔ። ሃይቲ ሴይሬ ቢታን ባ ቆሞን ቆሞን ሻኬቲዳ ሆሬታ ሃላቃታ።
GEN 36:31 ኢስራኤሌን ካዎይ ካዎታናፔ ካሴ ኤዶሜ ቢታን ካዎቲዳ ካዎቲ ሃይሳፌ ካሊ ጻፌቲዳይታ።
GEN 36:32 ቢኦሬ ና ቤላይ ኤዶሜን ካዎቲዴስ፤ ኢዛ ካታማ ሱንꬂ ዲናቤ ጌቴቴስ።
GEN 36:33 ቤላይ ሃይቂን ቦጺራፔ ዪዳ ዛራሄ ናይ ዮባቤይ ካዎቲዴስ።
GEN 36:34 ዮባቤይ ሃይቂን ቴማኔ ቢታፌ ዪዳ ሁሻሜይ ካዎቲዴስ።
GEN 36:35 ሁሻሜይ ሃይቂን ሚዲያሜ ኣሳታ ሞኣቤ ቢታን ጾኒዳ ባዳዴ ና ሃዳዴይ፥ ካዎቲዴስ፤ ኢዛ ካታማ ሱንꬂ ኣዊቴ ጌቴቲዴስ።
GEN 36:36 ሃዳዴይ ሃይቂን ማሲሬቄፔ ዪዳ ሳሚላይ ካዎቲዴስ።
GEN 36:37 ሳሚላይ ሃይቂን ሻፋ ኣቻን ዲዛ ኤራሆቦቴፔ ዪዳ ሻኡሌይ ካዎቲዴስ።
GEN 36:38 ሻኡሌይ ሃይቂን ኣኪቦሬ ና ባኣሊ-ሃናኔይ ካዎቲዴስ።
GEN 36:39 ኣኪቦሬ ና ባኣሊ-ሃናኔይ ሃይቂን ሃዳሬይ ካዎቲዴስ፤ ኢዛ ካታማ ሱንꬂ ፓኡ ጌቴቴስ፤ ኢዛ ማቺያ ሜዛሃቤ ናዮ ማጺሬዳ ዬሊዳ ማሄጻቢኤሎ ጌቴታዉስ።
GEN 36:40 ኤሳዌ ዬሌታ ሃላቃቲ ባ ቆሞን ቆሞን ባ ሱንꬃን ሱንꬃን ሃይታንታ፤ ቴሚናኤ፥ ኣሊዋ፥ ዬቴቴ፥
GEN 36:41 ኦሆሊባሜ፥ ኤላ፥ ፒኖኔ፥
GEN 36:42 ቄናዜ፥ ቴማኔ፥ ሚቢዛሬ፥
GEN 36:43 ማጊዲኤሌኔ ኢራሜ። ሃይታንቲ ባ ሃሪዛ ቢታን፥ ባ ዲዛሶን ኤዶሜ ሃላቃታ። ሃይሲ ኤሳዌይ ኤዶሜታ ኣዋ።
GEN 37:1 ያቆቤይ ካሴ ባ ኣዋይ ዴዪዳ ካናኔ ቢታን ኡቲዴስ።
GEN 37:2 ያቆቤ ናይቲ ሃኒዳይሲ ሃይሳፌ ካሊዲ ጻፌቲዳይሳ። ዮሴፌይ 17 ላይꬃ ና ጊዲዳ ዎዴ ባ ኣዋ ኣይሌታፔ፥ ቢሊሃፔኔ ዚልፊፌ ዬሌቲዳ ባ ኢሻታራ ባ ኣዋ ሜሄታ ሄሜስ፤ ሄ ዎዴ ኢዚ ባ ኣዋስ ኢስቲ ኦꬂዳ ኢታ ሚሽ ኤሂ ዮቴስ።
GEN 37:3 ኢስራኤሌይ ዮሴፌ ጪማቴꬃን ዬሊዳ ጊሻስ ሃንኮ ኣቱማ ናይታ ኡባፌ ኣꬂ ሲቄስ፤ ኢዚ ኢዛስ ኣሌቆ ማይኦ ጊግሲዴስ።
GEN 37:4 ኢዛ ኢሻቲ ኢስታ ኣዋይ ኢዛ ኢስታፌ ኣꬂ ሲቂዛይሳ ቤኢዲ ኢስቲ ኢዛ ኢጺዲ ሎኦ ቃላን ኢዛራ ሃሳያናስ ዳንዳይቤቴና።
GEN 37:5 ዮሴፌይ ኣጉሞ ኣጉሜቲዲ ባ ኢሻታስ ዮቲዴስ፤ ኢስቲካ ኢዛ ጌዴ ጉጂ ኢጺዳ።
GEN 37:6 ኢዚ ኢስታስ፥ «ታኒ ኣጉሜቲዳ ኣጉሞ ሲዪቴ።
GEN 37:7 ኑኒ ጋዴ ጊዶን ካꬃ ሚርቄ ሚርቂሺን ታ ሚርቄያ ዴንዳዳ ሲቲ ጋ ኤቃዱስ፤ ኢንቴ ሚርቄቲ ጊዲኮ ዩዪ ኣꬊዲ ታ ሚርቄይሲ ዚጊዳ» ጊዴስ።
GEN 37:8 ኢዛ ኢሻቲ ኢዛ፥ «ኔኒ ኑ ቦላ ካዎታና ሃናይ? ዎይኮ ኑና ቱሙ ሃራና ሃናይ?» ጊዳ፤ ኢስቲ ኢዛ ኣጉሞዛ ጊሻሲኔ ኢዚ ኢስታስ ዮቲዳ ቃላ ጊሻስ ካሴፔ ኢዛ ኣꬂ ኢጺዳ።
GEN 37:9 ቃሴካ ዮሴፌይ ሃራ ኣጉሞ ኣጉሜቲዲ ባ ኢሻንታስ ዮቲዴስ፤ «ሲዪቴ፤ ታኒ ሃራ ኣጉሞካ ኣጉሜታዲስ፤ ሄ ኣጉሞዛን ኣርሼይ፥ ኣጊናይኔ 11 ጾሊንቴቲ ታስ ዚጊሺን ቤኣዲስ» ጊዴስ።
GEN 37:10 ሄ ኢዚ ቤኢዳ ኣጉሞዛ ባ ኣዋሲኔ ባ ኢሻታስ ዮቲን ኢዛ ኣዋይ ኢዛ፥ «ሃይሲ ኔኒ ኣጉሜቲዳይሲ ኣይ ኣጉሞ? ቱሙ ታኒ፥ ኔ ኣዬያኔ ኔ ኢሻቲ ዪዲ ኔ ሲንꬃን ሳኣን ጉፋኒዲ ኔስ ዚጋኔ?» ጊ ሃንቄቲዴስ።
GEN 37:11 ኢዛ ኢሻቲ ኢዛ ሚቃይኒዳ፤ ጊዶ ኣቲን ኢዛ ኣዋይ ሃ ዮኦዛ ባ ዎዚናን ዎꬂዲ ናጊዴስ።
GEN 37:12 ኢሲ ጋላስ ኢዛ ኢሻቲ ሴኬሜ ኣቻን ባ ኣዋ ሜሄታ ሄማናስ ቢን፥
GEN 37:13 ኢስራኤሌይ ዮሴፌ፥ «ኔ ኢሻቲ ሴኬሜን ሜሄ ሄሚዛይሳ ኔ ኤራሳ፤ ሃ ያ፤ ታ ኔና ኢስታኮ ኪታና» ጊዴስ። ዮሴፌይካ፥ «ኤሮ» ጊዴስ።
GEN 37:14 ያቆቤይካ፥ «ባዳ ኔ ኢሻቲኔ ሜሄይ ሳሮ ዲዛኮ ቤኣ ያዳ ኢስታ ሃኖታ ታስ ዮታ» ጊዲ ኢዛ ኬብሮኔ ሾባ ኪቲን ኢዚ ሴኬሜ ቢዴስ።
GEN 37:15 ሄን ዴምባ ጊዶን ኢዚ ጌዴ ሃ ሲሜሬቲሺን ኢሲ ኣሲ ኢዛ ዴሚዲ፥ «ናዞ! ኣይ ኮያይ?» ጊ ኦይቺዴስ።
GEN 37:16 ኢዚካ፥ «ታ ኢሻታ ኮያይስ፤ ኢስቲ ሜሄ ሄሚዛሶሆይ ኣዋኮ ታስ ዮታርኪ!» ጊዴስ።
GEN 37:17 ሂስቲን ኣዴዚ፥ «ሄሳፌ ዴንዲቺዳ፤ ኢስታስ፥ ‹ኑኒ ዶታኔ ቦስ› ጊሺን ሲያዲስ» ጊዴስ፤ ሄሳ ጊሻስ ዮሴፌይ ባ ኢሻታ ጉዬ ቢዲ ኢስታ ዶታኔን ዴሚዴስ።
GEN 37:18 ጊዶ ኣቲን ኢዚ ሃሆን ዲሺን ኢስቲ ኢዛ ቤኢዳ፤ ኢዚ ኢስታኮ ጋኮንታ ዲሺን ኢስቲ ኢዛ ዎꬋናስ ማቄቲዳ።
GEN 37:19 ኢሶይ ኢሳስ፥ «ቤኢቴ! ኣጉሞ ጎዳይ ዬስ።
GEN 37:20 ሃ ዪቴ! ኢዛ ዎꬊዲ ሃ ኦላታፔ ኢሳ ጊዶ ዬጎስ። ሄሳፌ ጉዬ፥ ‹ኢታ ዶኣይ ኢዛ ሚዴስ› ጋና፤ ሂስቲዲ ኢዛ ኣጉሞይ ፖሌቲን ኣኔ ቤኣና» ጊዳ።
GEN 37:21 ኦሮቤሌይ ሄሳ ሲዪዲ ኢስታ ኩሼፔ ኢዛ ኣሻናስ ኮዪዲ፥ «ኢዛ ዎꬎ ዎꬎኮ፤
GEN 37:22 ሱꬅ ጉሶፍቴ፤ ኢዛ ኢንቴ ባዞን ዲዛ ሃ ኦላ ጊዶ ዬጊቴ፤ ኢዛ ቦላ ኩሼ ዎꬆፍቴ» ጊዴስ። ኦሮቤሌይ ኢዛ ኢስታ ኩሼፔ ኣሺዲ ጉዬ ኢዛ ኣዋኮ ዬዳናስ ቆፒዴስ።
GEN 37:23 ዮሴፌይ ባ ኢሻታኮ ጋኪዳ ዎዴ ኢዚ ማይኢዳ ኣሌቆ ማይኦ ኢዛፔ ቃሪ ኤኪዳ፤
GEN 37:24 ኢዛ ኤፊዲ ሃꬂ ባይንዳ ሜላ ኦላን ዬጊዳ።
GEN 37:25 ኢስቲ ባ ቁማ ማናስ ኡቲዳሼ ኢስማኤሌ ዴሬ ኣሳቲ ጊብጼ ባናስ ጋላኣዴፔ ዪዛይታ ꬎቁ ጊዲ ቤኢዳ፤ ኢስቲ ባ ጋሜላን ሳዎ፥ ባላሳኔ ጌቴቲዛ ꬋሌኔ ካርቤ ጫኒ ዎꬂዳ።
GEN 37:26 ዩሁዳይ ባ ኢሻታ፥ «ኑኒ ኑ ኢሻ ዎꬊዲ ኢዛ ሱꬃ ቆቲኮ ኑና ኣይ ማዳኔ?
GEN 37:27 ሃ ዪቴ፤ ኢዛ ኢስማኤሌታስ ባይዞስ፤ ኢዛ ቦላ ኑ ኩሼ ዎꬆኮ፤ ጋሶይካ ኢዚ ኑ ኢሻኔ ኑ ኣሾ።» ሂስቲን ኢዛ ኢሻቲ ዉሪካ ኤሮ ጊዳ።
GEN 37:28 ሄሳ ጊሻስ ሚዲያሜ ቢታ ዛልኣንቻቲ ሄሳራ ኣꬊሺን ኢዛ ኢሻቲ ዮሴፌ ኦላፌ ኬሲዲ ኢስማኤሌ ኣሳታስ 20 ቢራስ ባይዚን ኢስቲ ዮሴፌ ጊብጼ ቢታ ኤፊዳ።
GEN 37:29 ኦሮቤሌይ ኦላኮ ሲሚዲ ዮሴፌይ ሄን ባይንዳይሳ ቤኢዳ ዎዴ ጬጪዲ ባ ማይኦ ዳኪዴስ
GEN 37:30 ኢዚ ጉዬ ባ ኢሻታኮ ቢዲ፥ «ናዚ ሄን ባዋ፤ ሃኢ ታ ኣዋ ሲማ ቦ!» ጊዴስ።
GEN 37:31 ሄሳፌ ጉዬ ኢስቲ ኢሲ ዴይሽ ኤኪ ሹኪዲ ዮሴፌ ማይኦ ሱꬃን ማꬊዳ።
GEN 37:32 ኢዛ ኣሌቆ ማይኦዛ ኣዋኮ ኤፊዲ ኣዋስ፥ «ኑኒ ሃይሳ ዴሚ ኤኪዶስ፤ ሃይሲ ኔ ናዛ ማይኦኮኔ ሃራኮ ኣኔ ጼላ» ጊዳ።
GEN 37:33 ኣዋይካ ማይኦዚ ዮሴፌይሳ ጊዲዳይሳ ኤሪዲ፥ «ኤ ሃይሲ ታ ናዛ ማይኦ! ኢታ ዶኣይ ኢዛ ሚቺዴስ፤ ቱሙካ ዮሴፌ ዶኣይ ፑዜሬꬂ ሞንታ ኣጌና» ጊዴስ።
GEN 37:34 ያቆቤይካ ሚሼቲዲ ባ ማይኦ ፔꬊ ዬጊዴስ፤ ማቃ ማይኢዲ ዳሮ ዎዴ ጋካናስ ባ ናዛስ ዬኪዴስ።
GEN 37:35 ኢዛ ኣቱማ ናይቲኔ ማጫ ናይቲ ዉሪ ኢዛ ሚንꬄꬃናስ ኢዛኮ ዪዳ፤ ጊዶ ኣቲን ኢዚ ሚኔቶንታ ኢጺዲ፥ «ሃኔና! ታኒ ዬካዳ ታ ናኮ ባዳ ዱፎን ጌላና» ጊዲ ኢዛ ኣዋይ ኢዛስ ዬኪዴስ።
GEN 37:36 ሄ ዎዴ ሚዲያሜ ቢታ ኣሳቲ ዮሴፌ ጊብጼ ካዎ ኦሳንቻ ጲጺፋራስ ጊብጼን ባይዚዳ፤ ጲጺፋራይካ ዛቤታ ሃላቃ።
GEN 38:1 ሄ ዎዴ ዩሁዳይ ባ ኢሻታፔ ሻኬቲዲ ኣዱላሜ ጌቴቲዛ ካታማን ዲዛ ሂራ ጌቴቲዛ ኣዴዛራ ዴኣና ቢዴስ።
GEN 38:2 ሄን ዩሁዳይ ሹኣ ጌቴቲዛ ካናኔ ዴሬ ማጫ ና ቤኢዴስ። ኢዚካ ኢዞ ማቾ ኤኪዲ ኢዚራ ዴኢዴስ።
GEN 38:3 ኢዛ ኢዛስ ሻራዳ ኣቱማ ና ዬላዳ ኤራ ጋ ሱንꬃዱስ።
GEN 38:4 ቃሴካ ሻራዳ ኣቱማ ና ዬላዳ ኦናኔ ጋ ሱንꬃዱስ።
GEN 38:5 ቃሴ ጉጃዳካ ኣቱማ ና ዬላዳ ኢዛ ሴላ ጋ ሱንꬃዱስ። ኢዛካ ኢዛ ኣኪዛቤ ጌቴቲዛ ቢታን ዬላዱስ።
GEN 38:6 ዩሁዳይ ባ ባይራ ናዛ ኤራ ቲኢማሮ ማቾ ኤኪሲዴስ።
GEN 38:7 ዩሁዳ ባይራ ና ኤራይ ጎዳ ሲንꬃን ኢታ ኣስ ጊዲዳ ጊሻስ ጎዳይ ኢዛ ዎꬊዴስ።
GEN 38:8 ዩሁዳይ ኦናኔ፥ «ኔ ኢሻዛ ማቾ ላታዳ ኢዛስ ላታ ና ዬላዳ ኢዛ ሱንꬅ ጼይጊሳ» ጊዴስ።
GEN 38:9 ጊዶ ኣቲን ኦናኔይ ዬሌቲዛ ናይቲ ባስ ጊዶንታይሳ ኤሪዲ ባ ኢሻ ማቼይራ ኣቂዛ ዎዴ ኣይዴካ ባ ኢሻስ ናይ ዬሌቶንታ ማላ ባ ዜሬꬃ ቢታን ጉሴስ።
GEN 38:10 ኢዚ ኦꬂዳይሲ ጎዳ ሲንꬃን ፓራ ጊዲዳ ጊሻስ ጎዳይ ኢዛካ ዎꬊዴስ።
GEN 38:11 ሄሳፌ ጉዬ ዩሁዳይ ባ ና ማቾ ቲኢማሮ፥ «ታ ናዬ ሴላይ ዲጫና ጋካናስ ኔ ኣዋ ሶ ባዳ ኣምኤቴꬃን ዳሻ» ጊዴስ። ሄሳ ኢዚ ኣዛስ ጊዴ? ጊኮ፥ «ሴላይ ባ ኢሻታ ማላ ሃይቃናኮ» ጊዲ ሂርጊዳ ጊሻሳ። ሄሳ ጊሻስ ቲኢማራ ባዳ ባ ኣዋ ሶን ዴኣዱስ።
GEN 38:12 ዳሮ ዎዴፔ ጉዬ ሹኣ ናያ፥ ዩሁዳ ማቺያ ሃይቃዱስ። ዩሁዳይ ካዮቲ ኣꬂዳፔ ጉዬ ባ ላጌ ኣዱላሜ ዴሬ ኣስ ሂራ ጌቴቲዛይሳራ ባ ዶርሳ ኢስኬ ቃንጺዛ ኣሳቲ ዲዛሶ ቴሚና ቢዴስ።
GEN 38:13 ኣሳይ ቲኢማሪስ፥ «ቤያ፤ ኔ ቦሎይ ዩሁዳይ ባ ዶርሳታ ኢስኬ ቃንጻናስ ቴሚና ቤስ» ጊ ዮቲዴስ።
GEN 38:14 ኢዛ ባ ኣምኤቴꬃ ማይኦዛ ቃራዳ ባና ባሌꬃናስ ጎስ ኤካ ጉሉንታዳ ቴሚና ኤፊዛ ኦጌ ዶናን ዲዛ ኤናይሜ ካታማ ፔንጌን ኡታዱስ። ሄሳ ኢዛ ኦꬂዳይ ሴላይ ዲጪዲ ጋኪንካ ኢዛ ኢዛስ ማቾ ጊዳናስ ኤኮንታይሳ ኤሪዳ ጊሻሳ።
GEN 38:15 ኢዛ ባ ኣይፌሶ ጉሉንታ ኡቲዳ ጊሻስ ዩሁዳይ ኢዞ ቤኢዲ ላይማ ማጫስ ጊዲ ቆፒዴስ።
GEN 38:16 ባ ና ማቾ ጊዲዳይሳ ኤሮንታ ዲሼ ኦጌ ጋጻ ኢዚኮ ሺቂዲ ኢዞ፥ «ታናራ ዚንኣርኪ!» ጊዴስ። ሂስቲን ኢዛ፥ «ታኒ ኔናራ ዚንኢኮ ኔኒ ታስ ኣይ ኢማኔ?» ጋ ኦይቻዱስ።
GEN 38:17 ኢዚካ፥ «ታኒ ታ ሜሄፔ ኢሲ ዴይሻ ላቃ ኔስ ዬዳና» ጊዴስ። ኢዛካ፥ «ኔኒ ሄሳ ታስ ዬዳና ጋካናስ ኣይ ኦይꬃኔ?» ጋዱስ።
GEN 38:18 ኢዚ፥ «ኣይ ኦይꬆ?» ጊ ኢዛ ኦይቺዴስ። ኢዛካ፥ «ኔ ማታሜ ቃላባቴዛ ኢዛ ቃቺዛይሳራኔ ኔ ኩሼን ዲዛ ጉፌዛ ኦይꬃ» ጊን ኢዚ ሄይታ ኢሚዲ ኢዚራ ዚንኢን ኢዛ ኢዛስ ሻራዱስ።
GEN 38:19 ኢዛ ሄሳፌ ዴንዳዳ ቢዳፔ ጉዬ ባ ጉሉንቲዳ ጎሳዛ ቃራዳ ባ ኣምኤቴꬃ ማይኦ ማይኣዱስ።
GEN 38:20 ዩሁዳይ ባ ኦይꬂዳይሳ ኢዚፔ ዛሪ ኤካናስ ዴይሻ ላቃ ባ ላጌ ኣዱላሜ ቦላ ኢዚስ ዬዲዴስ፤ ጊዶ ኣቲን ኢዚ ኢዞ ዴሚቤና።
GEN 38:21 ኢዚ ሄ ቢታ ኣሳ፥ «ኤናይሜ ካታማን ኦጌ ዶናን ኡቲዳ ላይማ ማጫሳያ ኣዋ ባዴ?» ጊ ኦይቺዴስ። ኣሳይ፥ «ላይማ ማጫሲ ሃይሳን ሙሌካ ባዋ» ጊዴስ።
GEN 38:22 ኢዚካ ዩሁዳኮ ሲሚዲ ኢዛ፥ «ታኒ ኢዞ ዴማቤኬ፤ ሄሳፌካ ቦላራ ሄ ቢታ ኣሳይ፥ ‹ላይማ ማጫሲ ሃይሳን ሙሌካ ዲ ኤሬና› ጊዳ» ጊዴስ።
GEN 38:23 ሂስቲን ዩሁዳይ፥ «ባ ኦይኪዳይሳ ባስ ኤኩ፤ ሂስቶንታ ኣጊኮ ኣሲ ኑና ሚጫና። ሂስቲን ታኒ ኢዚስ ዴይሻ ላቃ ዬዳዲስ፤ ጊዶ ኣቲን ኔኒ ኢዞ ዴማቤካ» ጊዴስ።
GEN 38:24 ሄꬑ ኣጊናፔ ጉዬ ኣሳይ፥ «ኔ ና ማቺያ ቲኢማራ ላይማታዳ ሻራዱስ» ጊዲ ዩሁዳስ ዮቲዴስ። ዩሁዳይካ፥ «ኢዞ ካሬ ኬሲዲ ታማን ጹጊቴ» ጊዴስ።
GEN 38:25 ኢዞ ካሬ ኬሲዛ ዎዴ፥ «ታኒ ሻሪዳይ ሃ ሚሻታ ጎዳሳ፤ ቤያ፤ ሃይሳ ማታሜ ቃላባቴዛ ኢዛ ቃቺዛይሳኔ ሃይሲ ጉፌዚ ኦናይሳኮ ኤራና ዳንዳይኮ ኤራ» ጋዳ ባ ቦሎስ ኪታ ዬዳዱስ።
GEN 38:26 ዩሁዳይ ሄ ሚሻታ ኤሪዲ፥ «ታፔ ኢዛ ጺሎ፤ ጋሶይካ ታኒ ኢዞ ታ ና ሴላስ ኤካቤኬ» ጊዴስ። ሄሳፌ ጉዬ ኢዚ ኢዚራ ናምኣንꬆ ዚንኢቤና።
GEN 38:27 ኢዛ ዬላና ሃኒዛ ዎዴ ኢዚ ኡሎን ሜንቴ ኣቱማ ናይቲ ዴቴስ።
GEN 38:28 ኢዛ ማሬቲሺን ኢስታፌ ኢሳይ ባ ኩሼ ኬሲን ዬሊሲዛራ፥ «ቤኢቴ፤ ሃይሲ ኮይሮ ኬዜስ» ጋዳ ዞኦ ቃጪና ኢዛ ኩሼን ቃቻዱስ።
GEN 38:29 ጊዶ ኣቲን ኢዚ ባ ኩሼ ጉዬ ኤኪዳ ዎዴ ኢዛ ኢሻይ ዬሌቲን ኢዛ፥ «ኔኒ ዋና ሲንꬃታ ኬዛዲ!» ጋዱስ። ሄሳ ጊሻስ ኢዛ ፓሬሴ ጋ ሱንꬃዱስ።
GEN 38:30 ሄሳፌ ጉዬ ኢዛ ኩሼን ዞኦ ቃጪናይ ቃሼቲ ዲዛ ፓሬሴ ኢሻይ ዬሌቲን ሱንꬃይ ዛራሄ ጌቴቲዴስ።
GEN 39:1 ኢስማኤሌ ኣሳቲ ዮሴፌ ጊብጼ ኤፊን ጊብጼ ካዎ ኦሳንቻታፔ ጲጺፋራ ጌቴቲዛ ዛቤታ ሃላቃይ ዮሴፌ ኢስማኤሌታፔ ሻሚዴስ።
GEN 39:2 ጎዳይ ዮሴፌራ ዲዛ ጊሻስ ኢዚ ኦꬂዛይሳ ኡባ ኢዛስ ኢንጄሲዴስ፤ ኢዚካ ባ ጎዳ ሶን ጊብጼን ዴኢዴስ።
GEN 39:3 ጎዳይካ ኢዛራ ዴኢዛይሳኔ ጎዳይ ኢዚ ኦꬂዳይሳ ኡባ ኢዛስ ኢንጄሲዳይሳ ጲጺፋራይ ቤኢዲ፥
GEN 39:4 ዮሴፌ ዶሲዴስ። ዮሴፌይካ ኢዛ ኦሳንቻ ጊዲዴስ። ጲጺፋራይ ኢዛ ባ ኬꬃ ኣሳ ቦላ ሱንꬂዲ ባስ ዲዛዝ ኡባ ኢዛ ኩሼን ዎꬂዴስ።
GEN 39:5 ጲጺፋራይ ባ ኬꬃን ዲዛይሳ ኡባ ቦላኔ ባ ኣቆታ ኡባ ቦላ ሱንꬂዳ ዎዴፔ ዶሚን ጎዳይ ጊብጼ ኣዴዛ ኬꬅ ዮሴፌ ጌዶን ኣንጂዴስ። ጎዳ ኣንጆይ ጲጺፋራ ሶን ጊዲን ካሬን ዲዛ ሚሽ ኡባ ቦላ ዎꬊዴስ።
GEN 39:6 ሄሳ ጊሻስ ባስ ዲዛ ኡባ ዮሴፌስ ሼꬊዴስ፤ ኢዚ ባ ሚዛ ካꬃፌ ኣቲን ሃራ ዮሴፌ ኩሼን ዬጊዴስ። ዮሴፌይ ዬጋልꬂኔ ማላ ሎኦ ኣሳ።
GEN 39:7 ጉꬃ ዎዴፔ ጉዬ ኢዛ ጎዳ ማቼያ ዮሴፌ ጫዳ ጼላዳ፥ «ሃ ያ፤ ታናራ ዚንኣ» ጋዱስ።
GEN 39:8 ጊዶ ኣቲን ኢዚ ኢጺዴስ፤ ባ ጎዳ ማቼይስ፥ «ቤያ! ታ ጎዳይ ባሶን ዲዛ ኡባ ታስ ሼꬊዲ ኣዛስካ ሂርጌና፤ ባስ ዲዛይሳ ኡባ ታ ኩሼን ዎꬂዴስ።
GEN 39:9 ሃሶን ታፔ ኣꬊዛይ ዴና፤ ኔኒ ኢዛ ማቾ ጊዲዳ ጊሻስ ኔና ጻላ ኣቲን ታ ጎዳይ ታስ ኢሞንታ ሚሺ ባዋ። ሂስቲን ታኒ ሃይሳ ማላ ኢታ ሚሽ ጾሳ ሲንꬃን ዎስታ ኦꬆ?» ጊዴስ።
GEN 39:10 ኢዛ ኡባ ዎዴ ዮሴፌ ሳሌꬂንካ ኢዚ ኤሞ ኢሚቤና፤ ኢዚራ ኢሼች ኣቲን ኢዚኮ ሺቃናዉካ ኮዪቤና።
GEN 39:11 ኢሲ ጋላስ ኢዚ ባ ኦሶ ኦꬃናስ ሶ ጌሊሺን ሶ ኣይሌታፔ ኦኒካ ሶን ባዋ።
GEN 39:12 ኢዛካ ዮሴፌ ማይኦ ሺሻ ኦይካዳ፥ «ታናራ ዚንኣ» ጋዱስ። ጊዶ ኣቲን ኢዚ ባ ማይኦ ኢዚ ኩሼን ዬጊዲ ሶፔ ካሬ ዎጺ ኬዚዴስ።
GEN 39:13 ዮሴፌይ ባ ማይኦ ኢዚ ኩሼን ዬጊዲ ሶፔ ካሬ ዎጺ ኬዚዳይሳ ኢዛ ቤኣዳ፥
GEN 39:14 ባ ሶ ኣይሌታ ጼይጋዳ ኢስታስ፥ «ቤኢቴ! ታ ኣዚናይ ኤሂዳ ኢብራዌ ኣዴዚ ታና ካዉሺሼ ኣጊዴስ፤ ኢዚ ታናራ ዚንኣናስ ሃ ሶ ጌሊዴስ፤ ጊዶ ኣቲን ታኒ ታ ቃላ ꬎቂሳዳ ዋሳዲስ።
GEN 39:15 ሂስቲን ኢዚ ባ ማይኦ ታ ኣቻን ዬጊዲ ሶፔ ካሬ ዎጺ ኬዚዴስ» ጋዱስ።
GEN 39:16 ኬꬃ ኣዋይ ያና ጋካናስ ኢዛ ዮሴፌ ማይኦዛ ባ ኣቻን ዎꬃዱስ።
GEN 39:17 ሄሳፌ ጉዬ ኢዛ ኢዛስ፥ «ሄሲ ኔኒ ኑስ ኤሂዳ ኢብራዌ ኣይሌይ ታናራ ዚንኣናስ ታኮ ጌሊዴስ፤
GEN 39:18 ጊዶ ኣቲን ታኒ ታ ቃላ ꬎቂሳዳ ዋሲን ኢዚ ባ ማይኦ ታ ኣቻን ዬጊዲ ሶፔ ካሬ ዎጺ ኬዚዴስ» ጋዱስ።
GEN 39:19 ኬꬃ ኣዋይ ማቼዮ፥ «ኔ ኣይሌይ ታና ሃይሳꬆ ኦꬂዴስ» ጋዳ ዮቲዳ ቃላ ሲዪዲ ዳሮ ሃንቄቲዴስ።
GEN 39:20 ኢዚካ ዮሴፌ ኤፊዲ ካዎ ቃሾ ኣሳይ ዲዛ ቃሾ ኬꬃን ዬጊዴስ።
GEN 39:21 ጊዶ ኣቲን ዮሴፌይ ሄን ቃሾ ኬꬃን ዲዛ ዎዴ ጎዳይ ኢዛራ ዴስ። ጾሲ ቃሾ ኬꬃን ኢዛራ ዲዛ ባ ኪያቴꬅ ኢዛስ ዳርሲዴስ። ቃሴካ ቃሾ ኬꬃ ሃላቃዛ ሲንꬃን ኢዛስ ቦንቾ ኢሚዴስ።
GEN 39:22 ሂስቲን ቃሾ ኬꬃ ሃላቃይ ቃሾ ኣሳ ኡባ ዮሴፌ ኩሼን ዎꬂዴስ፤ ሄን ኦሴቲዛይሳ ኡባ ቦላ ኣዋቲዛይ ኢዛ።
GEN 39:23 ጎዳይ ዮሴፌራ ጊዲዲ ኢዚ ኦꬂዛ ኡባ ፖሊሲዛ ጊሻስ ዎይኔ ኬꬃ ኣላፌይ ዮሴፌ ኣላፌቴꬃን ዲዛ ኣይ ሚሻስካ ዋናንዴሻ ጊዲ ሂርጊ ኤሬና።
GEN 40:1 ጉꬃ ዎዴፔ ጉዬ ጊብጼ ካዎ ኡሹ ዱቂዛይታ ኣላፌይኔ ቁማ ካꬂዛይታ ኣላፌይ ባ ጎዳ ጊብጼ ካዎ ቆሂዳ።
GEN 40:2 ካዎይ ኡሹ ዱቂዛይታ ሃላቃኔ ቁማ ካꬂዛይታ ሃላቃታ ናምኣታ ቦላ ኬሂ ሃንቄቲዴስ።
GEN 40:3 ሄሳ ጊሻስ ዛቤታ ሃላቃዛ ኬꬃን ዮሴፌይ ቃሼቲዳ ዎይኔ ኬꬃን ዬጊዴስ።
GEN 40:4 ዛቤታ ሃላቃይ ኢስታ ዮሴፌስ ሼꬊን ኢዚ ኢስታስ ኮሺዛ ሚሻን ማዲዴስ፤ ኢስቲካ ቃሾ ኬꬅ ጌሊዲ ጉꬅ ጋምኢዳ ማላ፥
GEN 40:5 ጊብጼ ካዎስ ኡሹ ዱቂዛይታ ሃላቃይኔ ቁማ ካꬂዛይታ ሃላቃይ፥ ናምኣይካ ቃሾ ኬꬃን ዲሼ ኢሲ ቃማ ኦማርስ ባስ ባስ ኣጉሞ ኣጉሜቲዳ። ናምኣታ ኣጉሞ ቢርሼꬂካ ዱማ ዱማ።
GEN 40:6 ዮሴፌይ ማላዶ ኢስታኮ ጌሊዳ ዎዴ ኢስቲ ሙዞቲ ኡቲዳይታ ቤኢዴስ።
GEN 40:7 ሄሳ ጊሻስ ባ ጎዳ ቃሾ ኬꬃን ባናራ ዲዛ ካዎ ኦሳንቻታ፥ «ሃች ኢንቴ ኣይፌሶይ ኣዛስ ꬉሚዴ?» ጊ ኦይቺዴስ።
GEN 40:8 ኢስቲካ ኢዛስ፥ «ኑኒ ናምኣይ ኣጉሞ ኣጉሜቲዶስ፤ ጊዶ ኣቲን ኑስ ቢርሺዛ ኣሲ ꬋይዴስ» ጊዳ። ዮሴፌይካ ኢስታስ፥ «ኣጉሞ ቢርሺዛይ ጾሳ ጊዴኔ? ኢንቴ ኣጉሞዛ ኣኔ ታስ ዮቲቴ» ጊዴስ።
GEN 40:9 ሂስቲን ኡሹ ዱቂዛይታ ሃላቃይ ባ ኣጉሞ ዮሴፌስ፥ «ታኒ ታ ኣጉሞን ኢሲ ዎይኔ ሚꬅ ታ ሲንꬃን ዲዛይሳ ቤኣዲስ።
GEN 40:10 ቃሴ ሄ ዎይኔ ሚꬃስ ሄꬑ ሃጋይ ዴስ። ሄራካ ኣጫዳ ጪያዱስ፤ ሎኤꬃ ዉርጫዳ ኣይፋዱስ።
GEN 40:11 ሄ ዎዴ ፓሮኔ ኡሻ ጹኣይ ታ ኩሼን ዴስ፤ ታኒካ ዎይኔዛ ኣይፌ ማጻዳ ጹኣዛ ጊዶን ጉምኣዳ ኡሻ ፓሮኔስ ኢማዲስ» ጊ ዮቲዴስ።
GEN 40:12 ሂስቲን ዮሴፌይካ ዛሪዲ፥ «ሄሳ ቢርሼꬂ ሃይሳ፤ ሄꬑ ሃጋቲ ሄꬑ ጋላሳታ።
GEN 40:13 ሄꬑ ጋላሳታ ጊዶን ካዎይ ኔና ዴንꬂዲ ኢዚ ኔና ካሴ ኔ ዲዛ ኣላፌቴꬃን ዎꬃና፤ ካሴ ኔኒ ኡሹ ዱቂዛ ዎዴ ኦꬂዳ ማላ ኔኒ ካዎ ዋንጫ ኢዛ ኩሼን ዎꬃና።
GEN 40:14 ጊዶ ኣቲን ኔስ ዎዴይ ሎኢዳ ዎዴ ታና ባሎፓ፤ ታስካ ኪያ፤ ታ ጊሻስ ካዎስ ዮታዳ ሃ ቃሾ ኬꬃፌ ታና ኬሲሳ፤
GEN 40:15 ጋሶይካ ታና ኢብራዌታ ቢታፌ ዎልቃራ ሻሚ ኤሂዳ፤ ጊዶ ኣቲን ሃይሳꬆ ታና ቃሾስ ጋꬂዛ ሚሽ ኣይኮካ ኦꬃቤኬ» ጊዴስ።
GEN 40:16 ካꬅ ካꬂዛይታ ሃላቃይ ዮሴፌይ ኡሹ ዱቂዛይታ ኣጉሞ ሎኤꬂ ቢርሺዳይሳ ቤኢዲ ዮሴፌስ፥ «ታኒካ ኣጉሞ ኣጉሜታዲስ፤ ሄሲካ፥ ‹ታ ሁኤን ሄꬑ ማሶቤ ቶካ ኦይካዲስ።
GEN 40:17 ቦላ ባጋ ማሶቤን ጊብጼ ካዎስ ኡኬቲዳ ዱማ ዱማ ቁማይ ዴስ። ጊዶ ኣቲን ካፎቲ ሄሳ ታ ሁኤን ዲዛ ማሶቤዛፔ ሚዳ› » ጊ ዮቲዴስ።
GEN 40:18 ሂስቲን ዮሴፌይ፥ «ሄሳ ቢርሼꬃይ ሃይሳ፤ ሄꬑ ማሶቤቲ ሄꬑ ጋላሳታ።
GEN 40:19 ሄꬑ ጋላሳታ ጊዶን ካዎይ ኔና ዴንꬂዲ ኔ ቆꬌ ሙጪዲ ሚꬃ ቦላ ካቂሳና፤ ኔ ኣሾካ ካፎቲ ማና» ጊዴስ።
GEN 40:20 ሄꬓንꬆ ጋላስ ጊብጼ ካዎይ ባ ዬሌቲዳ ጋላስ ባ ካዎቴꬃን ዲዛ ሹሜታ ኡባስ ጊቢራ ጊግሲዴስ። ኡሹ ዱቂዛይታ ሃላቃኔ ካꬅ ካꬂዛይታ ሃላቃ ቃሾ ኬꬃፌ ኬሲዲ ባ ሹሜታ ሲንꬃን ኤሲዴስ።
GEN 40:21 ኡሹ ዱቂዛይታ ሃላቃዛ ካሴ ኢዛ ሹሜቴꬃን ዛሪን ኢዚ ካዎ ኩሼን ዋንጫ ዎꬂዴስ።
GEN 40:22 ጊዶ ኣቲን ካዎዚ ካꬅ ካꬂዛይታ ሃላቃ ዮሴፌይ ኢዛ ኣጉሞ ቢርሺዳ ማላ ኢዛ ካቂሲዴስ።
GEN 40:23 ኡሹ ዱቂዛይታ ሃላቃይ ጊዲኮ ዮሴፌ ቆፖንታ ዶጊ ኣጊዴስ።
GEN 41:1 ናምኡ ላይꬅ ኩሜꬅ ኣꬊዳ ዎዴ ጊብጼ ካዎይ ኣጉሞ ኣጉሜቲዴስ፤ ኣጉሞራ ኢዚ ኣባዬ ሻፋ ዶናን ኤቂ ዲሺን፥
GEN 41:2 ላፑን ኦርዴኔ ሞꬎ ሚዛቲ ኣባዬ ሻፋፔ ኬዚዲ ሻፋ ኣቻን ማታ ሚሺን ቤኢዴስ።
GEN 41:3 ኢስታፌ ካሊዲ ሃራ ላፑን ማላ ኢታኔ ጊልቃ ሚዛቲ ኣባዬ ሻፋፔ ኬዚዲ ሻፋዛ ዶናን ዲዛ ሞꬎ ሚዛታ ኣቻን ኤቂዳ።
GEN 41:4 ሄ ሜꬎ ኢታኔ ጊልቃ ሚዛቲ ላፑን ኦርዴኔ ሞꬎ ሚዛታ ሚቲሺን ቤኢዴስ። ሄሳፌ ጉዬ ካዎይ ꬊስኮፌ ቤጊዴስ።
GEN 41:5 ኢዚ ቃሴካ ꬊስኪዲ ናምኣንꬆ ኣጉሜቲዲ ላፑን ሎኦኔ ሙሩታ ቲያቲ ኢሲ ማቃ ቦላ ዲጪዳይሳ ቤኢዴስ።
GEN 41:6 ኢስታፌ ካሊዲ ኣይፌ ላፋኔ ጫርኮን ሹሊዲ ሜሊዳ ላፑን ቲያቲ ኬዚዳ።
GEN 41:7 ሄ ላፋ ኣይፌ ቲያቲ ሎኦኔ ሙሩታ ቲያታ ሚቲዳ። ሄሳፌ ጉዬ ካዎዚ ቤጊዲ ኣጉሞ ጊዲዳይሳ ኤሪዴስ።
GEN 41:8 ጋዴይ ዎንቲሺን ኢዛ ዎዚናይ ሺሮትዴስ፤ ሄሳ ጊሻስ ጊብጼን ዲዛ ቢታንቻታሲኔ ኤራ ኣሳታ ኡባስ ኪቲዲ ጼይጊሲዴስ፤ ካዎይ ኢስታስ ባ ኣጉሞዛ ዮቲዴስ፤ ጊዶ ኣቲን ኢዛስ ሄ ኣጉሞዛ ቢርሻናስ ዳንዳይዛ ኣሲ ቤቲቤና።
GEN 41:9 ሄ ዎዴ ኡሹ ዱቂዛይታ ሃላቃይ ጊብጼ ካዎስ፥ «ታኒ ታ ሞሮ ሃች ቆፓይስ።
GEN 41:10 ኢሲቶ ካዎይ ባ ኣይሌስ ሃንቄቲዲ ታናኔ ካꬅ ካꬂዛይታ ሃላቃዛ ቃሾ ኬꬃን ዬጊዴስ።
GEN 41:11 ኑኒ ሄን ዲሼ ኑስ ኑስ ኣጉሞ ኣጉሜቲዶስ፤ ኣጉሞዛስካ ዱማ ዱማ ቢርሼꬂ ዴስ።
GEN 41:12 ሄ ዎዴ ዛቤታ ሃላቃዛ ኣይሌ ጊዲዳ ኢሲ ኢብራዌ ፓንꬂ ኑናራ ቃሾ ኬꬃን ዴስ። ኑኒ ኑ ኣጉሞ ኢዛስ ዮቲን ኢዚ ኑስ ሁኤን ሁኤን ኑ ኣጉሞ ቢርሺዴስ።
GEN 41:13 ሂስቲን ሄ ዮኦቲ ኢዚ ኑስ ቢርሺዳ ማላ ሃኒዳ። ሄሲ ኣዜ ጊኮ ታኒ ካሴ ታ ኣላፌቴꬃን ሲማዲስ፤ ሃንኮይሲ ጊዲኮ ካቄቲዴስ» ጊዴስ።
GEN 41:14 ሂስቲን ጊብጼ ካዎይ ዮሴፌ ኪቲዲ ጼይጊሲዴስ። ኢስቲ ኢዛ ቃሾ ኬꬃፌ ኤሶን ኤኪ ዪን ባ ሁኤ ሜዴቲዲ ማይኦ ላሚዲ ካዎዛኮ ጌሊዴስ።
GEN 41:15 ካዎይ ዮሴፌ፥ «ታ ኣጉሜቲዳ ኣጉሞዛ ቢርሻናስ ኦኒካ ዳንዳይቤና። ጊዶ ኣቲን ታኒ፥ ‹ዮሴፌይ ኣጉሞ ሲዪኮ ቢርሻናስ ዳንዳዬስ› ጊዛዝ ሲያዲስ» ጊዴስ።
GEN 41:16 ሂስቲን ዮሴፌይ፥ «ታኒ ሄሳ ዳንዳይኬ፤ ጊዶ ኣቲን ጾሳይ ካዎስ ሎኦ ቢርሼꬅ ኢማና» ጊዴስ።
GEN 41:17 ካዎይካ፥ «ታኒ ታ ኣጉሞን ኣባዬ ሃꬃ ሻፋ ዶናን ኤቂዲሺን፥
GEN 41:18 ላፑን ጊታኔ ሞꬎ ሚዛቲ ኣባዬ ሻፋፔ ኬዚዲ ሃꬃ ዶናን ማታ ሚሺን።
GEN 41:19 ቃሴካ ኢስታፌ ሃራ ላፑን ሜꬋ ኢታ፥ ጊልቃኔ ላፋ ሚዛቲ ሻፋፔ ኬዚዳ፤ ታኒ ሄሳ ማላ ሜꬋ ኢታ ሚዝ ጊብጼ ቢታን ሙሌካ ቤኣ ኤሪኬ።
GEN 41:20 ሜꬋ ኢታኔ ላፋ ሚዛቲ ኮይሮይታ ላፑን ሞꬎ ሚዛታ ሚቲ ኣጊዳ።
GEN 41:21 ጊዶ ኣቲን ኢስቲ ሚቲዳፔ ጉዬካ ኢስታ ሜꬋይ ካሴ ማላካ ኢቲ ኡቲዳ ጊሻስ ኢስቲ ሚቲዳይሳ ኣሲ ኤራናስ ዳንዳይቤና። ሄሳፌ ጉዬ ታኒ ꬊስኮፌ ቤጋዲስ።
GEN 41:22 «ቃሴካ ኣጉሞራ ላፑን ሎኦኔ ሙሩታ ቲያቲ ኢሲ ማቃ ቦላ ዲጪዳይታ ቤኣዲስ።
GEN 41:23 ቃሴካ ኢስታፌ ሃራ ኣይፌ ላፋኔ ጫርኮን ሹሊዳ ላፑን ቲያቲ ኬዚዳ።
GEN 41:24 ሄ ሹሊ ኡቲዳ ቲያቲ ላፑን ሎኦ ቲያታ ሚቲዳ። ታኒ ሃ ኣጉሞዛ ማሮታስ ዮታዲስ፤ ጊዶ ኣቲን ታስ ኣጉሞዛ ቢርሺዛ ኣሲ ቤቲቤና» ጊዴስ።
GEN 41:25 ሄሳፌ ጉዬ ዮሴፌይ ጊብጼ ካዎዛ፥ «ናምኣይካ ኔ ቤኢዳ ኣጉሞታ ቢርሼꬃይካ ኢሲኖ። ጾሲ ባ ኦꬃና ሃኒዛይሳ ካዎስ ቆንጪሲዴስ።
GEN 41:26 ሄ ላፑን ሎኦ ሚዛቲ ላፑን ላይꬃታ፤ ቃሴ ላፑን ሎኦ ቲያቲ ላፑን ላይꬃታ፤ ናምኣይካ ኢሲ ማላ።
GEN 41:27 ሄ ላፑን ሜꬋ ኢታኔ ላፋ ሚዛቲ ላፑን ላይꬃታ፤ ቃሴ ጫርኮን ሹሊዳ ፓꬆንታ ላፑን ቲያቲ ላፑን ኮሻ ላይꬃታ።
GEN 41:28 «ታኒ ካዎስ ዮቲዳ ማላካ ጾሲ ባ ኦꬃና ሃኒዛይሳ ካዎስ ቤሲዴስ።
GEN 41:29 ላፑን ዳሮ ካሎ ላይꬃቲ ጊብጼ ቢታስ ኡባስ ያና፤
GEN 41:30 ጊዶ ኣቲን ላፑን ኮሻ ላይꬃቲ ኢዛፔ ካሊዲ ያና። ሄ ዎዴ ጊብጼ ካሎይ ዉሪ ዶጌታና፤ ቢታይ ኮሻን ሾጬታና።
GEN 41:31 ካሎ ላይꬃታፔ ጉዬ ዪዛ ጋፋ ላይꬃቲ ኬሂ ኢታ ጊዲዳ ጊሻስ ካሴ ካሎይ ሙሌካ ቆፌቶንታ ኣታና።
GEN 41:32 ናምኡቶ ካዎስ ሄ ኣጉሞይ ቤቲዳይ ኣዛሴ ጊኮ ሃይሳ ዮኦዛ ጾሲ ሚንꬂዲ ኩዪዳ ጊሻሳ፤ ጾሲ ሄሳ ኤሶን ኦꬃና።
GEN 41:33 «ሃኢ ሄኮ ኤሶን ካዎይ ኣꬎ ኤራቴꬂኔ ኣኬካይ ዲዛ ኣስ ኮዪዲ ጊብጼ ቢታን ሱንꬆ።
GEN 41:34 ሄሳꬆካ ላፑን ካሎ ላይꬃታፔ ኢቻሻንꬆ ኩሼ ሺሺዛ ኣላፌታ ካዎይ ሹሞ።
GEN 41:35 ኢስቲ ዪዛ ካሎ ላይꬃታን ካꬅ ሺሺዲ ካዎ ኣዋቴꬃን ሚንጄቶ፤ ሄ ካꬃካ ካታማታን ናጌቶ።
GEN 41:36 ቢታይ ኮሻን ቆሄቶንታ ማላ ሃ ካꬃይ ጊብጼ ቢታን ላፑን ላይꬃን ዴንዳና ኮሻስ ሚንጄቲዲ ዴኦ» ጊዴስ።
GEN 41:37 ሂስቲን ሃ ዮኦዚ ጊብጼ ካዎሲኔ ኢዛ ኦሳንቻታስ ሎኦ ጊዲዲ ቤቲዴስ።
GEN 41:38 ሄሳ ጊሻስ ካዎይ ኢስታስ፥ «ኑኒ ጾሳ ኣያናራ ዲዛ ሃይሳ ማላ ሃራ ኣስ ኦና ዴማኔ?» ጊ ኦይቺዴስ።
GEN 41:39 ሄሳፌ ጉዬ ካዎይ ዮሴፌ፥ «ጾሲ ሃይሳ ኡባ ኔና ኤሪሲዳ ጊሻስ ኔ ማላ ኣꬎ ኤራቴꬂኔ ኣኬካይ ዲዛ ኣሲ ኦኒካ ባዋ።
GEN 41:40 ታኒ ኔና ታ ኬꬃን ሹማይስ፤ ታ ኣሳይ ዉሪ ኔስ ኣዛዜታና፤ ታኒ ኔፔ ኣꬋናይ ታ ካዎቴꬃ ኣልጋን ጻላ ጊዳና» ጊዴስ።
GEN 41:41 ሄሳ ጊሻስ ካዎይ ዮሴፌ፥ «ቤያ! ታኒ ኔና ጊብጼ ቢታ ኡባ ቦላን ሹማዲስ» ጊዴስ።
GEN 41:42 ሄሳፌ ጉዬ ካዎይ ባ ካዎቴꬃ ቃላባቴ ባ ቢራꬌፌ ኬሲዲ ዮሴፌ ቢራꬌን ኣꬂዴስ፤ ቃሴካ ላይኖፔ ዳዴቲዳ ማይኦ ማይዚዲ ኢዛ ቆꬌንካ ዎርቃ ሎታ ኣꬂዴስ።
GEN 41:43 ካዎይ ባ ናምኣንꬆ ፓራ-ጋሬዛ ዮሴፌ ቶጊሲዴስ፤ ኣይሌቲካ፥ «ዚጊቴ! ዚጊቴ!» ጊዲ ኢዛፔ ሲንꬃራ ቢዳ። ሄሳꬆ ኦꬂዲ ካዎይ ኢዛ ጊብጼ ቢታ ኡባ ቦላ ሹሚዴስ።
GEN 41:44 ሄሳፌ ጉዬ ካዎይ ዮሴፌ፥ «ታኒ ካዎ! ጊዶ ኣቲን ኔኒ ቃጻ ጎንታ ጊብጼ ቢታ ኡባን ኦኒካ ኩሼ ዎይኮ ቶሆ ቃꬄና» ጊዴስ።
GEN 41:45 ካዎይ ዮሴፌ፥ «ጻፊናቴ-ፓኢናሄ» ጊ ሱንꬂዴስ፤ ኢዚ ኢዛስ ኦና ጌቴቲዛ ካታማ ቄሴ ጲጺፋራ ናዮ ኣሲናቶ ማቾ ኢሚዴስ። ሂስቲን ዮሴፌይ ኩሜꬃ ጊብጼ ቢታ ዩዪ ጼሊዴስ።
GEN 41:46 ዮሴፌይ ጊብጼ ካዎስ ኦꬃናስ ዶሚዛ ዎዴ ኢዛስ ላይꬃይ ሄꬑ ታማ። ቃሴ ዮሴፌይ ካዎ ሲንꬃፌ ኬዚዲ ጊብጼ ቢታ ኡባ ዩዪ ጼሊዴስ።
GEN 41:47 ሄ ላፑን ካሎ ላይꬃታን ቢታይ ኬሂ ዳሮ ካꬅ ኢሚዴስ።
GEN 41:48 ዮሴፌይ ጊብጼ ቢታን ሄ ላፑን ካሎ ላይꬃ ካꬅ ኡባ ሺሺዲ ካታማታን ሚንጂዴስ። ኢሲ ኢሲ ካታማታ ዩሾን ካጺዳ ካꬅ ኡባ ሄ ካታማን ካታማን ሚንጂዴስ።
GEN 41:49 ዮሴፌይ ኣባ ሻሚንታ ማላ ዳሮ ካꬅ ሚንጂዴስ፤ ካꬃይ ዎጋፔ ዳሪን ማካናስ ዳንዳይቤና ጊሻስ ማኪ ማኪ ቆሊዛይሳ ኣጋጊዴስ።
GEN 41:50 ላፑን ኮሻ ላይꬃይ ያናፔ ካሴ ኦና ጌቴቲዛ ካታማ ቄሴ ጲጺፋራ ናዮ ኣሲናቲፔ ዮሴፌይ ናምኡ ኣቱማ ናይታ ዬሊዴስ።
GEN 41:51 ዮሴፌይ፥ «ጾሲ ታና ታ ሜቶኔ ታ ኣዋ ሶ ኣሳ ኡባ ዶጊሲዴስ» ጊሼ ባ ኮይሮ ናዛ ሚናሴ ጊ ሱንꬂዴስ።
GEN 41:52 ናምኣንꬆ ናዛካ፥ «ጾሲ ታስ ታ ቱጋቲዳ ቢታን ታና ኣይፊሲዴስ» ጊሼ ኤፍሬሜ ጊ ሱንꬂዴስ።
GEN 41:53 ጊብጼ ቢታን ዲዛ ሄ ላፑን ካሎ ላይꬃቲ ዉሪዳ።
GEN 41:54 ቃሴ ዮሴፌይ ካሴቲ ዮቲዳ ማላ ላፑን ኮሻ ላይꬃቲ ዶሚዳ። ሃራ ቢታ ኡባን ኮሻይ ዴንዲዴስ፤ ጊዶ ኣቲን ጊብጼ ቢታ ኡባን ካꬂ ዴስ።
GEN 41:55 ጊብጼ ዴሬይ ዉሪ ኮሻቲዳ ዎዴ ኣሳይ፥ «ካꬅ ኢማ» ጊ ካዎስ ዋሲን ካዎዚ ጊብጼ ኣሳ ኡባ፥ «ዮሴፌኮ ቢዲ ኢዚ ዮቲዛይሳ ኦꬂቴ» ጊዴስ።
GEN 41:56 ኮሻይ ጊብጼ ቢታ ኡባ ጋኪዳ ዎዴ ዮሴፌይ ካꬅ ሚንጂዳ ኬꬃታ ኡባ ዶይዲ ካꬅ ጊብጼ ኣሳስ ባይዚሲዴስ፤ ጋሶይካ ኮሻይ ኩሜꬃ ጊብጼን ሚኒዴስ።
GEN 41:57 ሳኣ ኡባን ኮሻይ ሱሊዳ ጊሻስ ቢታን ዲዛ ኣሳይ ዉሪ ካꬅ ዮሴፌፔ ሻማናስ ጊብጼ ዪዴስ።
GEN 42:1 ያቆቤይ ጊብጼን ካꬂ ዲዛይሳ ሲዪዲ ባ ኣቱማ ናይታ፥ «ኢንቴ ኢሶይ ኢሳራ ኣዛስ ጼሌቴቲ?
GEN 42:2 ቤኢቴ! ጊብጼን ካꬂ ዲዛይሳ ታኒ ሲያዲስ፤ ዱጌ ጊብጼ ቢዲ ኑ ሃይቆንታ ፓጻ ዳና ማላ ሄፔ ካꬅ ኑስ ሻሚ ኤሂቴ» ጊዴስ።
GEN 42:3 ሄሳ ጊሻስ ዮሴፌ ኢሻቲ ታማቲ ካꬅ ሻማናስ ዱጌ ጊብጼ ቢዳ።
GEN 42:4 ጊዶ ኣቲን ያቆቤይ ዮሴፌ ኢሻ ቢኒያሜ ኢዚ ቆሄታናኮ ጊዲ ቆፒዳ ጊሻስ ኢዛ ኢሻታራ ዬዲቤና።
GEN 42:5 ካናኔ ቢታን ዎልቃማ ኮሻይ ዲዛ ጊሻስ ካꬅ ሻማና ቢዛይታራ ኢስራኤሌ ኣቱማ ናይቲ ጊብጼ ቢዳ።
GEN 42:6 ሄ ዎዴ ዮሴፌይ ሄ ቢታ ኣይሲዛዴኔ ቢታን ዲዛ ኣሳ ኡባስ ካꬅ ባይዚሲዛይ ኢዛ ጊዲዳ ጊሻስ ዮሴፌ ኢሻቲ ጋኪዳ ማላ፥ ባ ሁኤ ቢታን ጋꬂዲ ኢዛስ ዚጊዳ።
GEN 42:7 ዮሴፌይ ባ ኢሻታ ቤኢዳ ማላ ኤሪዴስ ሺን ኢዚ ኢስታ ኤሮንታ ኣሳ ማላ ሃንቆ ቃላን ኢስታ፥ «ኢንቴ ኣዋፔ ዪዴቲ?» ጊ ኦይቺዴስ። ኢስቲካ፥ «ካꬅ ሻማናስ፥ ካናኔ ቢታፌ ዪዶስ» ጊዳ።
GEN 42:8 ዮሴፌይ ባ ኢሻታ ኤሪዴስ፤ ኢስቲ ጊዲኮ ኢዛ ኤሪቤቴና።
GEN 42:9 ሄራካ ዮሴፌይ ኢስታ ጊሻስ ኣጉሜቲዳ ኣጉሞዛ ቆፒዲ ኢስታስ፥ «ኢንቴ ዴሬ ጾሞሲዛ ኣሳ፤ ኢንቴ ኑ ቢታን ናጌይ ሌፒዛ ባጋይ ኣዋይሳኮ ጼላናስ ዪዴታ» ጊዴስ።
GEN 42:10 ሂስቲን ኢስቲ፥ «ኑ ጎዶ! ኑኒ ዴሬ ጾሞሲዛ ኣስ ጊዶኮ፤ ኑኒ ኔ ኣይሌቲ ካꬅ ሻማናስ ዪዶስ።
GEN 42:11 ኑ ዉሪካ ኢሲ ኣዋ ናይታ። ኑኒ ኔ ኣይሌቲ ኣማኔቲዛ ኣሳ» ጊዳ።
GEN 42:12 ሂስቲን ዮሴፌይ ኢስታስ፥ «ጊዴኬታ! ኢንቴ ኑ ቢታን ናጎይ ሌፒዛ ባጋይ ኣዋይሳኮ ጾሞሲ ጼላና ዪዴታ» ጊዴስ።
GEN 42:13 ጊዶ ኣቲን ኢስቲ፥ «ኑኒ ኔ ኣይሌቲ ታማኔ ናምኡ ኢሻታኔ ካናኔ ቢታን ዲዛ ኢሲ ኣዋ ናይታ። ዉርሴꬃ ካሎይ ሃኢ ኑ ኣዋራ ዴስ፤ ኢሶይ ጊዲኮ ꬋይዴስ» ጊዳ።
GEN 42:14 ዮሴፌይ ኢስታስ፥ «ታኒ ኢንቴስ ዮቲዳ ማላካ ኢንቴ ቢታ ጾሞሲዛይታ።
GEN 42:15 ቃሴ ኢንቴ ፓጬታናይ ሃይሳና፤ ቱሙፔ ካዎይ ቤዪን! ኢንቴ ዉርሴꬃ ካሎ ኢሻይ ሃ ዮንታ ኢጺኮ ኢንቴ ሃይሳፌ ቤኬታ።
GEN 42:16 ኢንቴ ዮቲዛይሲ ቱሙኮኔ ፓጫናስ፥ ኢንቴፌ ኢሳዴ ኪቲቴ፤ ኢዚ ኢንቴ ኢሻ ኤኪ ዮ፤ ኣቲዳይቲ ቃሾ ኬꬃን ጋምኤታ። ሄሳ ማላ ጊዶንታ ኣጊኮ ካዎይ ቤዪን! ኢንቴ ዩዪ ዩዪ ዴሬ ጾሞሲዛ ኣሳ»
GEN 42:17 ጊዲ ኢስታ ሄꬑ ጋላሳስ ቃሾ ኬꬃን ዬጊዴስ።
GEN 42:18 ሄꬓንꬆ ጋላሳን ዮሴፌይ ኢስታስ፥ «ታኒ ጾሳስ ባቢዛ ኣሳ፤ ኢንቴ ኢሲ ሚሽ ኦꬂኮ ኢንቴ ሼምፖ ኣሼታ።
GEN 42:19 ኢንቴ ቱሙካ ኣማኔቲዛ ኣስ ጊዲኮ ኢንቴ ኢሻታፔ ኢሶይ ሃይሳን ቃሾ ኬꬃን ዶ፤ ኣቲዳይቲ ጋፊዳ ኢንቴሶ ኣሳስ ካꬅ ኤኪ ቢቴ፤
GEN 42:20 ጊዶ ኣቲን ኢንቴ ቃላይ ቱሙ ጊዳና ማላኔ ኢንቴ ሃይቆንታ ማላ ኢንቴ ኢንቴ ዉርሴꬃ ካሎ ኢሻ ታኮ ኤኪ ያናስ ኮሼስ» ጊዴስ። ኢስቲካ ሃ ዮኦዛን ኤሮ ጊዳ።
GEN 42:21 ኢስቲ ኢሶይ ኢሳ፥ «ቱሙ ኑ ኦꬂዳ ጌኔይ ኑና ጋኪዴስ። ኢዚ ባ ሼምፖስ ሃኒዛዚ ኢጺን ኑና ሾቢዛ ዎዴ ኑኒ ሲዪሼ ኢጺዶስ፤ ሃ ዋዬይ ኑና ጋኪዳይ ሄሳ ጊሻሳ» ጊዳ።
GEN 42:22 ኦሮቤሌይ፥ «ታኒ ኢንቴና፥ ‹ናዛ ቦላ ናጋራ ኦꬆፍቴ› ጋዳ ዮታዲስ፤ ጊዶ ኣቲን ኢንቴ ሲዮንታ ኢጺዴታ። ሂስቲን ሃኢ ኢዛ ሱꬃ ጎሜይ ኑና ሞቴስ» ጊዴስ።
GEN 42:23 ኢስቲ ጊዛይሳ ዮሴፌይ ኤሪዛይሳ ኢስቲ ኣኬኪቤቴና፤ ኣይስ ጊኮ ኢዚ ኢስታራ ዎካሌን ሃሳዬስ።
GEN 42:24 ኢዚ ኢስታፌ ሻኬቲ ጉዬ ሲሚዲ ዬኪዴስ፤ ጊዶ ኣቲን ቃሴ ኢስታኮ ሲሚዲ ኢስታ ሃሳይሲዴስ። ኢዚ ሲሞና ኢስታፌ ዱꬂ ኣሺዲ ኢስቲ ቤኢሺን ኢዛ ቃቺዴስ።
GEN 42:25 ዮሴፌይ ባ ኣይሌታ፥ «ካꬅ ኢስታ ኦጎሮ ኩንꬂቴ፤ ኢስታ ቢራካ ዛሪዲ ኢስታ ኦጎሮን ኦጎሮን ዬጊቴ፤ ቃሴ ኢስታስ ኦጌ ሺንቄ ኢሚቴ» ጊ ኣዛዚዴስ።
GEN 42:26 ኢስቲ ኢዚ ጊዳ ማላ ኦꬂዳፔ ጉዬ ዮሴፌ ኢሻቲ ካꬃ ባ ሃሬታን ጫኒዲ ዴንዲ ቢዳ።
GEN 42:27 ኢስቲ ኦጌ ቦላ ኣቃናስ ሼምፒዳሶን ኢስታፌ ኢሳይ ባ ሃሬዛስ ካꬃፌ ዬጋናስ ባ ኦጎሮ ቢርሺዲ፥ ኦጎሮዛ ዶናን ዲዛ ባ ቢራ ዴሚዴስ።
GEN 42:28 ኢዚ ባ ኢሻታ፥ «ታ ቢራይ ታስ ሲሚዴስ፤ ቱማ ሃይሳ ቤኢቴ! ታ ኦጎሮን ዴስ» ጊዴስ። ኢስቲ ዳጋሚዲ ኮኮሪሼ ኢሶይ ኢሳኮ ሲሚዲ፥ «ጾሲ ኣዛስ ኑ ቦላ ሃይሳ ኦꬂዴ?» ጊዳ።
GEN 42:29 ኢስቲ ካናኔ ቢታን ዲዛ ባ ኣዋ ያቆቤኮ ሶ ሲሚ ዪዲ ባ ቦላ ጋኪዳይሳ ኡባ ኢዛስ ዮቲዳ።
GEN 42:30 ኢስቲ ኢዛስ፥ «ሄ ቢታይስ ጎዳ ጊዲዳ ኣዴዚ ኑና ባቢሲዴስ፤ ሄሳፌ ጉዬ ኢዚ ኑና ሄ ቢታ ዩዪ ዩዪ ጾሞሲ ጼሊዛ ኣሳ ማላ ኦꬂ ጎዳቲዴስ።
GEN 42:31 ጊዶ ኣቲን ኑኒ ኢዛስ፥ ‹ኑ ኣማኔቲዛ ኣሳ፤ ዴሬ ጾሞሲ ጼሊዛ ኣስ ጊዶኮ።
GEN 42:32 ኑኒ ታማኔ ናምኡ ኢሻቲ ኢሲ ኣዋ ናይታ፤ ኢሶይ ꬋይዴስ፤ ዉርሴꬃ ካሎይ ካናኔ ቢታን ሃኢ ኑ ኣዋራ ዴስ› ጊ ዮቲዶስ።
GEN 42:33 ሂስቲን ሄ ቢታይስ ጎዳ ጊዲዳ ኣዴዚ ኑና፥ ‹ኢንቴ ኣማኔቲዛ ኣስ ጊዲዳይሳ ታኒ ሃይሳን ኤራና፤ ኢንቴ ኢሻታፔ ኢሳ ሃን ታ ኣቻን ዬጊዲ ጋፊዳ ኢንቴ ሶ ኣሳስ ካꬅ ኤኪ ቢቴ።
GEN 42:34 ኢንቴ ዴሬ ዩዪ ዩዪ ጾሞሲዛዴ ጊዶንታ፥ ኣማኔቲዛ ኣስ ጊዲዳይሳ ታኒ ኤራና ማላ፥ ኢንቴ ዉርሴꬃ ካሎ ኢሻ ታኮ ኤኪ ዪቴ። ሂስቲኮ ታኒ ሃን ኣቲዳ ኢንቴ ኢሻ ኢንቴስ ዛራ ኢማና፤ ኢንቴካ ሃ ቢታን ዛልኣና ዳንዳዬታ› ጊዴስ» ጊዳ።
GEN 42:35 ኢስቲ ባ ኦጎሮፔ ኦጎሮፔ ካꬃ ቆሊዲ ባ ኦጎሮን ኦጎሮን ቢራይ ቃሾራ ኡቲዳይሳ ዴሚዳ። ኢስቲኔ ኢስታ ኣዋይ ሄ ቃሾራ ዲዛ ቢራ ቤኢዲ ባቢዳ።
GEN 42:36 ኢስታ ኣዋ ያቆቤይ ኢስታስ፥ «ኢንቴ ታና ታ ናይታፔ ሜላ ኬሲዴታ፤ ዮሴፌይ ባዋ፥ ሲሞኒ ባዋ፤ ቃሴ ኢንቴ ቢኒያሜ ኤፋና ኮዬታ። ዉሪ ታስ ꬉማ ጊርዲ ጊዴስ» ጊዴስ።
GEN 42:37 ሄሳፌ ጉዬ ኦሮቤሌይ ባ ኣዋ፥ «ታኒ ቢኒያሜ ኔስ ዛራ ኤሆንታ ኣጊኮ ታ ኣቱማ ናይታ ናምኣታካ ዎꬋ፤ ታና ኣማኔታዳ ኢዛ ታ ኩሼን ኢማ፤ ቃሴ ታኒ ኢዛ ዛራዳ ኤሃና» ጊዴስ።
GEN 42:38 ጊዶ ኣቲን ያቆቤይ ኢስታስ፥ «ታ ናዚ ኢንቴናራ ዱጌ ቤና፤ ኢዛ ኢሻይ ሃይቂን ኣቲዳይ ኢዛ ጻላ፤ ኢንቴ ኤፊሺን ኦጌን ኢታ ሚሺ ኢዛ ጋኪዛ ጊዲኮ ኢንቴ ታና ዬሆራኔ ሙዞራ ዱፎን ኤፋና» ጊዴስ።
GEN 43:1 ሃኢካ ኮሻይ ካናኔ ቢታን ሚኒዴስ።
GEN 43:2 ሂስቲን ኢስቲ ጊብጼፔ ኤሂዳ ካꬃይ ሙሌራ ዉሪን ኢስታ ኣዋይ፥ «ቃሴካ ጉዬ ቢዲ ኑስ ጉꬃ ካꬅ ሻሚቴ» ጊዴስ።
GEN 43:3 ጊዶ ኣቲን ዩሁዳይ ኢዛስ፥ «ሄ ኣዴዚ ኑና፥ ‹ኢንቴ ኢሻ ኢንቴናራ ኤኪ ዮንታ ኣጊኮ ታ ኣይፌሶ ናምኣንꬆ ቤኤኬታ› ጊዲ ሎኤꬂ ዮቲዴስ።
GEN 43:4 ኔኒ ኑ ኢሻ ኑናራ ዬዲኮ ኑኒ ዱጌ ቢዲ ኔስ ካꬅ ሻማና።
GEN 43:5 ጊዶ ኣቲን ኔኒ ኢዛ ዬዶንታ ኢጺኮ ኑኒ ዱጌ ቦኮ፤ ኣይስ ጊኮ ሄ ኣዴዚ ኑና፥ ‹ኢንቴ ኢሻ ኢንቴናራ ኤሆንታ ኣጊኮ ኢንቴ ታ ኣይፌሶ ናምኣንꬆ ቤኤኬታ› ጊዴስ» ጊዴስ።
GEN 43:6 ኢስራኤሌይካ፥ «ኢንቴ፥ ‹ኑስ ሃራ ኢሻይ ዴስ› ጊ ዮቲዲ ሃይሳ ሃ ሜቶዛ ታ ቦላ ኣይስ ኤሂዴቲ?» ጊዴስ።
GEN 43:7 ኢስቲካ ኢዛስ፥ «ሄ ኣዴዚ ኑ ጊሻሲኔ ኑሶ ኣሳ ጊሻስ ሎኤꬂ ኦይቺዴስ። ኢዚ ኑና፥ ‹ኢንቴ ኣዋይ ሃኢካ ፓጻ ዲዜ? ኢንቴስ ሃራ ኢሻይ ዲዜ?› ጊ ኦይቺን ኑኒ ኢዚ ኦይቺዳ ኦይሾዛስ ዛሮ ኢሚዶስ። ኢዚካ ኑና፥ ‹ኢንቴ ኢሻ ዱጌ ሃ ኤኪ ዪቴ› ጋናይሳ ኑኒ ኣዛን ኤሪኖ?» ጊዳ።
GEN 43:8 ዩሁዳይ ባ ኣዋ ኢስራኤሌ፥ «ኑኒካ፥ ኔኒካ፥ ኑ ናይቲካ ሃይቆንታ ፓጻ ዳና ማላ ናዛ ታናራ ዬዳ፤ ኑኒ ሃኢ ኤሌሊዲ ባና።
GEN 43:9 ናዛ ኑስ ታ ዋሴቴꬃን ኢማ፤ ኢዛ ጊሻስ ታና ኦይቻ፤ ታኒ ኢዛ ኔስ ሎኦራ ዛራ ኤሆንታ ኣጊኮ ታ ዲዛ ዎዴ ኡባን ታ ኦይሼታና።
GEN 43:10 ኑኒ ሃን ጋምኦንታኮ ሃኒ ዎዴ ናምኣንꬆ ጌዴ ጋኪዲ ሃ ሲማና ሺን» ጊዴስ።
GEN 43:11 ሄሳፌ ጉዬ ኢስታ ኣዋ ኢስራኤሌይ ኢስታስ፥ «ሄሳ ጊዲኮ ሂስቲቴ፤ ሄ ኣዴዛስ ኩሼ ጌንꬆ ሚሽ ኑ ቢታን ሞኪዛ ሚሽ ኡባፌ ሎኢዛይሳ ዶሪቴ፤ ሄሲካ ሺቶ፥ ኤስ፥ ሳዎ፥ ካርቤ፥ ሚꬃ ኣይፌታ ኢንቴ ኦጎሮን ዬጊ ኤኪ ቢቴ።
GEN 43:12 ኢንቴ ኦጎሮ ዶናን ሲሚዳ ቢራዚ ባሌታን ሲሚዳዝ ጊዳና ዳንዳይዛ ጊሻስ ቢራካ ናምኡ ኩሼ ሂስቲ ኤኪ ቢቴ።
GEN 43:13 ቃሴ ኢንቴ ኢሻካ ኤኪዲ ሄ ኣዴዛኮ ኤሶን ጉዬ ቢቴ።
GEN 43:14 ኢዚ ሃንኮ ኢንቴ ኢሻ ዬዳና ማላ ቢኒያሜይካ ኢንቴናራ ሲሚ ያና ማላ ኡባ ዳንዳይዛ ጾሳይ ሄ ኣዴዚ ኢንቴስ ቃꬌታና ማላ ኦꬆ፤ ታኒ ጊዲኮ ታ ናይታፔ ሜላ ኣቲኮኔ ኣታይስ» ጊዴስ።
GEN 43:15 ሄሳ ጊሻስ ሄ ኣሳቲ ኩሼ ጌንꬆ ካሴ ቢራስ ናምኡ ኩሼ ቃሴ ቢኒያሜ ኤኪዲ ዱጌ ጊብጼ ቢዲ ዮሴፌ ሲንꬅ ሺቂዳ።
GEN 43:16 ዮሴፌይ ባ ኢሻታራ ቢኒያሜ ቤኢዲ ባ ኬꬃ ሃላቃዛ፥ «ሃ ኣሳታ ታሶ ኤካዳ ባ፤ ሃቻ ጋላስ ኢስቲ ታናራ ቁማ ማና ማላ ሜሄ ሹካዳ ጊጊሳ» ጊ ኣዛዚዴስ።
GEN 43:17 ሂስቲን ኢዚ ዮሴፌይ ኢዛስ ዮቲዳ ማላ ሄ ኣሳታ ዮሴፌሶ ኤፊዴስ።
GEN 43:18 ኣሳቲ ዮሴፌ ሶ ቢዳ ጊሻስ ባቢዳ፤ ኢስታስ፥ «ኢስቲ ኑና ሃይሳ ኤሂዳይ ኮይሮ ኑ ኦጎሮራ ሲሚ ቢዳ ቢራ ጊሻስ ጊዶንታ ኣጌና፤ ኢዚ ኑና ቆሃናስ ኣይሌቴꬃን ሃራናሲኔ ኑ ሃሬታ ኤካናስ ሃኔስ» ጊ ቆፒዳ።
GEN 43:19 ሄሳ ጊሻስ ኢስቲ ዮሴፌ ኬꬃ ፔንጌ ጋኪዲ ኬꬃ ሃላቃዛ፥
GEN 43:20 «ኑ ጎዶ! ኑኒ ኮይሮ ካꬅ ሻማናስ ሃ ዪዶስ፤
GEN 43:21 ሲሚዲ ቢሼ ኑ ኣቂዛሶን ኦማርስ ኑ ኦጎሮ ኦጎሮ ኑ ቢርሺን ኑ ቢራይ ፓጮንታ ኑ ኦጎሮ ኦጎሮ ዶናን ዲዛይሳ ዴሚዶስ፤ ሄሳ ጊሻስ ሃኢ ኑኒ ኢዛ ጉዬ ኤኪ ዪዶስ።
GEN 43:22 ቃሴ ኑኒ ካꬅ ሻማናስ ሃራ ቢራካ ኤኪ ዪዶስ። ኑ ቢራ ኑ ኦጎሮ ኦጎሮ ዶናን ኦኒ ዎꬂዳኮ ኑ ኤሮኮ» ጊ ሃሳይሲዳ።
GEN 43:23 ሂስቲን ኢዚ ኢስታስ፥ «ኣይኮይ ባ ሄሳስ ባቦፍቴ! ኢንቴ ጾሲ ኢንቴ ኣዋ ጾሲ ኢንቴ ኦጎሮ ጊዶን ኢንቴስ ቢራ ኢሚዴስ፤ ታኒ ኢንቴ ቢራ ኤካዲስ» ጊዴስ። ሄሳፌ ጉዬ ሲሞና ኢስታኮ ኬሲዴስ።
GEN 43:24 ሄ ኣዴዚ ሄ ኣሳታ ዮሴፌ ሶ ኤፊዲ ኢስታ ቶሆስ ሃꬅ ኤሂን ባ ቶሆ ሜጬቲዳ። ኢስታ ሃሬታስካ ሃርቆ ኢሚዴስ።
GEN 43:25 ዮሴፌራ ቁማ ማና ማላ ኢስታስ ዮቴቲዳ ጊሻስ ዮሴፌይ ያና ጋካናስ ኢዛስ ኢማና ኩሼ ጌንꬆ ጊግሲዳ።
GEN 43:26 ዮሴፌይ ባሶ ጌሊዳ ማላ ኢስቲ ባ ጊግሲዳ ኩሼ ጌንꬆዛ ኢዛስ ኢሚዲ ኢዛ ሲንꬃን ባ ሁኤ ዱጌ ቢታን ጋꬂ ዚጊዳ።
GEN 43:27 ኢዚ ኢስታ ሳሮቴꬅ ኦይቺ ሲሚዲ፥ «ኢንቴ ታስ ዮቲዳ ኢንቴ ጪማ ኣዋይ ሎኢ ዲዜ? ሃኢካ ኢዚ ፓጻ ዲዜ?» ጊዴስ።
GEN 43:28 ሂስቲን ኢስቲ፥ «ኤ፥ ኔ ኣይሌይ ኑ ኣዋይ ሃኢካ ፓጻ ዴስ፤ ኢዚ ሎኦኮ» ጊ ሆኪ ኢዛስ ዚጊዳ።
GEN 43:29 ኢዚ ባ ኣዬይ ና ቢኒያሜ ቤኢዲ ኢስታስ፥ «ኢንቴ ዮቲዳ ኢንቴ ዉርሴꬃ ካሎ ኢሻይ ሃይሴ?» ጊዴስ። ቃሴ ኢዚ ቢኒያሜ፥ «ታ ናዞ ጾሲ ኔና ኣንጆ» ጊዴስ።
GEN 43:30 ዮሴፌይ ባ ኢሻ ቤኢን ኢዛስ ዬሆይ ዳንዳዬቶንታ ኢጺን ዬካናስ ኢሲፌ ኢሲሶ ፖቂዴስ። ኢዚ ባ ዱማ ቆልኣ ጌሊዲ ሄን ዬኪዴስ።
GEN 43:31 ኢዚ ባ ኣይፌሶ ሜጬቲ ሲሚ ኬዚዲ ባርካ ባና ሚንꬄꬂዲ፥ «ቁማ ሃ ኣꬂቴ!» ጊዴስ።
GEN 43:32 ሂስቲን ኢስቲ ኢዛስ ዱማ፥ ኢዛ ኢሻታስ ዱማ፥ ሄን ኢዛራ ሚዛ ጊብጼ ኣሳታስ ዱማ ኣꬂዳ፤ ኣይስ ጊኮ ጊብጼ ኣሳይ ኢብራዌ ኣሳራ ኢሲፌ ሚ ኤሬቴና። ሄሲካ ጊብጼ ቢታ ኣሳስ ቱናቴꬃ።
GEN 43:33 ኢስቲ ዮሴፌ ሲንꬃን ባይራይ ባ ባይራቴꬃ ማላ ካሎይ ባ ካሎቴꬃ ማላ ማራን ኡቲዳ። ኢስቲ ኢሶይ ኢሳ ጼሊዲ ኢስታ ዎስቲ ኡቲሲዳኮ ቤኢዲ ማላሌቲዳ።
GEN 43:34 ዮሴፌይ ባ ጊሻፔ ኢስታስ ቁማ ጊሺዛ ዎዴ፥ ቢኒያሜ ጋኪዳይሲ ሃራታይሳፌ ኢቻሹ ኩሼ ዳሬስ፤ ሂስቲን ኢስቲ ኡፋዬቲሼ ኢዛራ ሚዳኔ ኡዪዳ።
GEN 44:1 ዮሴፌይ ባ ኬꬃ ሃላቃዛስ፥ «ኔኒ ሃ ኣሳታ ኦጎሮይ ኤኪዛ ኬና ካꬅ ኢስታስ ኩንꬃ፤ ኢስታ ቢራ ኡባ ኢስታ ኦጎሮ ኦጎሮ ዶናን ዎꬃ፤
GEN 44:2 ሂስታዳ ዉርሴꬃ ካሎዛ ኦጎሮ ዶናን ታ ቢራ ዋንጫኔ ኢዛ ካꬃ ቢራ ዎꬃ» ጊ ኣዛዚን ኢዚ ዮሴፌይ ጊዳ ማላ ኦꬂዴስ።
GEN 44:3 ጋዴይ ዎንቲሺን ሄ ኣሳቲ ባ ሃሬታ ኤኪዲ ባና ማላ ሞይዚዳ።
GEN 44:4 ኢስቲ ሄ ካታማፔ ኬዚዲ ሃኪ ቢቾንታ ዲሺን ዮሴፌይ ባ ኬꬃ ሃላቃስ፥ «ዴንዳ! ሃ ኣሳታ ጉዬ ካላ፤ ኔኒ ባ ኢስታ ጋካዳ፥ ‹ኢንቴ ኣይስ ኪያ ጊሻስ ኢታ ዛሪዴቲ?›
GEN 44:5 ‹ኣይስ ታ ጎዳ ቢራ ዋንጫ ካይሲዴቲ? ሃይሲ ታ ጎዳይ ኡዪዛይሳኔ ቃሴ ጹራ ሚሽ ዴሚዛ ዋንጫ ጊዴኔ? ሃይሲ ኢንቴ ኦꬂዳይሲ ጊታ ቆሆ› ጋ» ጊዴስ። ሄ ዎዴ ጊብጼ ቢታ ኣሳቲ ዋንጫ ጋርሳን ዲዛ ኡሻ ቤኢዲ ሲንꬃፌ ኣዚ ሃናናኮ ኤሬቴስ።
GEN 44:6 ሂስቲን ኢዚ ኢስታ ጉዬራ ጋኪዲ ኢዚ ጊዳ ማላካ ኢስታስ ዮቲዴስ።
GEN 44:7 ጊዶ ኣቲን ኢስቲ፥ «ኑ ጎዳይ ኣዛስ ሃይሳ ማላ ቃላ ኑ ቦላ ሃሳይዜ? ሄሳ ማላ ሚሽ ኦሶይ ኑፔ ኔ ኣይሌታፔ ሃኮ!
GEN 44:8 ሃራይ ኣቶሺን ሃይሳፌ ካሴ ኑ ኦጎሮ ዶናፔ ዴሚዳ ቢራ ካናኔ ቢታፌ ጉዬ ኔስ ኑ ዛሪ ኤሂዳይሳ ኔ ኤራሳ። ሂስቲን ሃኢ ኑኒ ኔ ጎዳ ሶፔ ዎስቲዲ ቢራ ዎይኮ ዎርቃ ካይሲዞኒ?
GEN 44:9 ኔ ኣይሌታ ኑ ጊዶፌ ሄ ዋንጫይ ኢዛኮን ቤቲዳዴይ ሃይቆ፤ ቃሴ ኣቲዳ ኑኒ ኑ ጎዳስ ኣይሌ ጊዳና» ጊዳ።
GEN 44:10 ኢዚ ኢስታስ፥ «ሄሳ ማላ ጊዲኮ ሎኦ፤ ኢንቴ ጊዳ ማላ ጊዶ፤ ዋንጫዛ ኤኪዳ ኡራይ ኦኒካ ታ ኣይሌ ጊዳና፤ ሃንኮ ኣቲዳ ኢንቴ ጊዲኮ ሳሮራ ባና» ጊዴስ።
GEN 44:11 ሄሳፌ ጉዬ ኢስቲ ኤሶን ባ ኦጎሮ ኦጎሮ ዎꬂ ቢርሺዳ።
GEN 44:12 ሃላቃዚካ ኡባፌ ባይራቲዛይሳ ኦጎሮፔ ዶሚዲ ዉርሴꬃ ካሎዛይሳ ጋካናስ ኮዪዴስ፤ ሄ ዋንጫዛካ ቢኒያሜ ኦጎሮ ጊዶፌ ዴሚዴስ።
GEN 44:13 ሂስቲን ኢስቲ ሙዞቲዲ ባ ማይኦ ዳኪዳ፤ ባ ኦጎሮ ኦጎሮ ባ ሃሬታን ጫኒዲ ጉዬ ካታማ ሲሚዳ።
GEN 44:14 ዩሁዳይ ባ ኢሻታራ ዮሴፌኮ ጌሊዛ ዎዴ ዮሴፌይ ሶን ዲዛይሳ ዴሚዲ ኢስቲ ኢዛ ሲንꬃን ጉፋኒዳ።
GEN 44:15 ዮሴፌይ ኢስታስ፥ «ኢንቴ ኣይ ፓላ ሚሽ ኦꬂዴቲ? ታ ማላ ኣሲ ጹራ ሚሺ ሄሳꬆ ዴሚዛይሳ ኤሬኬቲዬ?» ጊዴስ።
GEN 44:16 ሂስቲን ዩሁዳይ፥ «ኑ ጎዳስ ኑ ኣይ ጋኔ? ኑኒ ኣይ ሃሳያኔ? ዎይኮ ኑኒ ጺሎቴꬅ ዎስቲ ቤሳኔ? ጾሲ ኔ ኣይሌታ ሞሮ ቆንጪሲዴስ። ሂስቲን ኑናካ ጊዲን ሄ ዋንጫይ ኢዛፔ ቤቲዳይሲካ ጊዲን ታ ጎዳስ ኣይሌ ጊዳና» ጊዴስ።
GEN 44:17 ጊዶ ኣቲን ዮሴፌይ፥ «ሄሳ ማላ ሚሽ ኦሶይ ታፔ ሃኮ፤ ታ ቢራ ዋንጫዚ ኢዛፔ ቤቲዳ ኣዴዚ ጻላ ታ ኣይሌ ጊዳና። ሂስቲኮ ኢንቴ ኢንቴ ኣዋኮ ጉዬ ሳሮን ሲሚቴ» ጊዴስ።
GEN 44:18 ሂስቲን ዩሁዳይ ኢዛኮ ሺቂዲ ኢዛ፥ «ታ ጎዶ! ታኒ ኢሲ ቃላ ሃሳያና ማላ ኔና ዎሳይስ፤ ኔ ካዎ ፓሮኔ ማላ ጊዲኮካ ታና ኔ ኣይሌዛ ቦላ ሃንቄቶፋ።
GEN 44:19 ኔኒ ታ ጎዳይ ኑና ኔ ኣይሌታ፥ ‹ኢንቴስ ኣዋይ ዲዜ ዎይኮ ኢሻይ ዲዜ?› ጋ ኦይቻዳሳ።
GEN 44:20 ኑኒካ፥ ‹ኑስ ጪሚዳ ኣዋይ ዴስ፤ ኢዚ ጪሚዲ ዬሊዳ ካሎ ናይካ ዴስ፤ ሄ ናዛ ኢሻይ ሃይቂዴስ፤ ባ ኣዬይስ ኢሲ ኢዛ ጻላይ ኣቲዴስ፤ ኣዋይካ ኢዛ ኬሂ ሲቄስ› ጊ ኔስ ዮቲዶስ።
GEN 44:21 «ኔካ ኔ ኣይሌታስ ኑስ፥ ‹ታኒ ኢዛ ቤያና ማላ ታስ ኤኪ ዪቴ› ጋዳሳ።
GEN 44:22 ኑኒ ኑ ጎዳስ ኔስ፥ ‹ኤ ናዚ ባ ኣዋፔ ሻኬታናስ ዳንዳዬና፤ ሻኬቲኮ ኢዛ ኣዋይ ሃይቃና› ጊዶስ።
GEN 44:23 ጊዶ ኣቲን ኔኒ ኔ ኣይሌታ፥ ‹ኢንቴ ካሎ ኢሻይ ኢንቴናራ ዱጌ ዮንታ ኢጺኮ ናምኣንꬆ ታ ኣይፌሶ ቤዬኬታ› ጋዳሳ።
GEN 44:24 ኑኒ ኔ ኣይሌቲ ኑ ኣዋኮ ሲሚ ቢዳ ዎዴ ኔ ኑ ጎዳይ ኑስ ጊዳይሳ ኢዛስ ዮቲዶስ።
GEN 44:25 «ኑ ኣዋይ፥ ‹ሃኢካ ሲሚ ጉዬ ቢዲ ጉꬃ ካꬅ ጉጂ ሻሚቴ› ጊን፥
GEN 44:26 ኑኒ ኢዛስ፥ ‹ኑስ ካሎ ኢሻይ ኑናራ ቢኮፌ ኣቲን ጉዬ ባናስ ዳንዳዮኮ፤ ኣይስ ጊኮ ኑ ካሎ ኢሻይ ኑናራ ቦንታ ጊዲኮ ኑኒ ሄ ኣዴዛ ኣይፌሶ ቤያናስ ዳንዳዮኮ› ጊዶስ።
GEN 44:27 «ሂስቲን ኑ ኣዋይ ኔ ኣይሌታ ኑና፥ ‹ታ ማቻ ኤራሄላ ታስ ናምኡ ኣቱማ ናይታ ዬሊዳይሳ ኢንቴ ኤሬታ፤
GEN 44:28 ኢስታፌ ኢሶይ ታፔ ሻኬቲ ቢን ቱሙ ኢዛ ዶኣይ ፑዜሬꬂ ሚዴስ፤ ሃች ጋካናስካ ታኒ ኢዛ ቤያቤኬ።
GEN 44:29 ሃይሳ ቃሴ ኢንቴ ታፔ ሻኪ ኤፊን ኢታ ሚሺ ኢዛ ጋኪኮ ኢንቴ ጪማቴꬃን ታ ቦላ ኤሂዛ ሚሻይ ታና ዎꬋና› » ጊዴስ።
GEN 44:30 «ሄሳ ጊሻስ ሃኢ ታ ኔ ኣይሌይ ጉዬ ታ ኣዋኮ ቢዛ ዎዴ ታ ኣዋይ ናዛ ባ ሼምፖ ማላ ሲቂዛይሲ፥ ናዚ ኑናራ ዶንታይሳ ቤይኮ ሃይቃና። ኑኒ ኔ ኣይሌቲ ኑ ኣዋ ጪማቴꬅ ካዮራ ዱፎን ዬጋና።
GEN 44:32 ታኒ ኔ ኣይሌይ ናዛ ታ ዋሴቴꬃን ኤካ ያዲስ፤ ታኒ ኢዛ፥ ‹ኣቦ፥ ታኒ ኢዛ ኔስ ሳሮን ዛራዳ ኤሆንታ ኣጊኮ ታ ላይꬃ ኩሜꬃን ታ ኦይሼታና!› ጋ ዮታ ዎꬃዲስ።
GEN 44:33 «ሄሳ ጊሻስ ታኒ ኔ ኣይሌይ ታ ጎዳስ ናዛ ጊሻስ ኣይሌታዳ ሃን ኣቲን ናዚ ባ ኢሻታራ ጉዬ ሲሞ።
GEN 44:34 ናዚ ባይንዳ ታኒ ዋናዳ ጉዬ ታ ኣዋኮ ሲማ ቦ? ሃኔና፤ ታ ኣዋይ ሚሼታና ሚሻ ታና ቤሶፋ» ጊዴስ።
GEN 45:1 ሄ ዎዴ ዮሴፌይ ሄ ኣሳ ኡባ ሲንꬃን ጌንጫና ዳንዳዮንታ ጊሻስ፥ «ኣሳ ኡባ ታ ሲንꬃፌ ኬሲቴ» ጊ ዋሲዴስ። ሄሳ ጊሻስ ዮሴፌይ ባና ባ ኢሻታስ ኤሪሲሺን ኢሻታፔ ኣቲን ሃራይ ኢዛራ ኦኒካ ዴና።
GEN 45:2 ኢዚ ባ ቃላ ꬎቂሲዲ ጊብጼ ኣሳይ ኢዛ ሲያና ጋካናስ ዋሲ ዬኪዴስ። ካዎዛ ሶ ኣሳይካ ሄ ዎሬዛ ሲዪዴስ።
GEN 45:3 ዮሴፌይ ባ ኢሻታስ፥ «ታኒ ዮሴፌኮ! ታ ኣዋይ ሃኖ ጋካናስ ፓጻ ዲዜ?» ጊ ኦይቺዴስ። ጊዶ ኣቲን ኢዛ ኢሻቲ ዳሮ ዳጋሚዳ ጊሻስ ኢዛስ ማልꬄ ዛራናስ ዳንዳይቤቴና።
GEN 45:4 ሂስቲን ዮሴፌይ ባ ኢሻታስ፥ «ታኮ ሃ ሺቂቴ» ጊዴስ። ኢስቲካ ኢዛኮ ሺቂን ኢዚ ኢስታስ፥ «ታኒ ኢንቴ ጊብጼ ቢታስ ባይዚዳ ኢንቴ ኢሻ ዮሴፌኮ፥
GEN 45:5 ጾሲ ታና ኢንቴፌ ሲንꬄ ኪቲዳይ ኣሳ ሼምፖ ኣሻናስ ጊዲዳ ጊሻስ ኢንቴ ታና ሃ ባይዚዳይሳስ ዚልኤቶፍቴ።
GEN 45:6 ኮሻይ ሃ ቢታ ጌሊን ሃይሲ ናምኣንꬆ ላይꬃ፤ ቃሴ ሲንꬃፌ ዪዛ ኢቻሹ ላይꬃታ ጊዶን ኣሳይ ቢታ ጎዪዲ ካꬅ ሺሻናስ ዳንዳዬና።
GEN 45:7 ጊዶ ኣቲን ታኒ ኢንቴስ ዜሬꬅ ቢታ ቦላ ኣሻና ማላኔ ኢንቴ ሼምፖ ሃይሳ ማላ ጊታ ኣቶቴꬃን ኣሻና ማላ፥ ጾሲ ታና ኢንቴፌ ሲንꬄ ሃ ኪቲዴስ።
GEN 45:8 ሄሳ ጊሻስ ታና ሃ ኪቲዳይ ጾሳ ኣቲን ኢንቴና ዴኬታ። ጾሲ ታና ጊብጼ ካዎስ ኣዋ፥ ኢዛ ኣቆ ኡባስ ጎዳኔ ጊብጼ ቢታ ሃሪዛዴ ኦꬂዴስ» ጊዴስ።
GEN 45:9 «ሃኢ ኤሶን ጉዬ ታ ኣዋኮ ቢዲ ኢዛስ ኔ ና ዮሴፌይ፥ ‹ጾሲ ታና ጊብጼ ቢታ ኡባ ቦላ ጎዳ ኬሲዴስ፤ ሄሳ ጊሻስ ጋምኦንታ ታኮ ሃያ።
GEN 45:10 ኔኒ ታ ማታን ጌሴሜ ቢታን ኔ ናይታራ፥ ናይታ ናይታራ፥ ዶርሳታራ፥ ሜሄታራ፥ ኔስ ዲዛ ኡባራ ሃን ዳንዴታ።
GEN 45:11 ቡሮፔ ኢቻሹ ኮሻ ላይꬃቲ ዴቴስ፤ ኔና ኔሶ ኣሳኔ ኔ ሜሄ ኮሻይ ጋኮንታ ማላ ታኒ ኔና ሚዛና› ጌስ ጊቴ» ጊዴስ።
GEN 45:12 ቃሴካ ዮሴፌይ ኢስታስ፥ «ሃ ኢንቴናራ ሃሳይዛይሲ ቱሙ ታኒ ዮሴፌ ጊዲዳይሳ ኢንቴካ፥ ታ ኢሻ ቢኒያሜይካ ኢንቴ ኣይፌን ቤኤታ።
GEN 45:13 ታስ ጊብጼ ቢታን ዲዛ ቦንቾ ኢንቴ ቤኢዳይሳ ኡባ ታ ኣዋስ ዮቲቴ፤ ኤሶንካ ሃ ዱጌ ኤኪ ዪቴ» ጊዴስ።
GEN 45:14 ሂስቲዲ ባ ኢሻ ቢኒያሜ ኢዲሚ ኦይኪዲ ዬኪዴስ፤ ቢኒያሜይካ ባ ኢሻ ኢዲሚ ኦይኪዲ ዬኪዴስ።
GEN 45:15 ዮሴፌይካ ዬኪሼ ባ ኢሻታ ኡባ ዬሪ ዬሪ ኤኪዴስ። ሄሳፌ ጉዬ ኢዛ ኢሻቲ ኢዛራ ሃሳያ ኦይኪዳ።
GEN 45:16 ዮሴፌ ኢሻታ ዩሳ ዎሬይ ካዎ ፓሮኔ ኬꬅ ጋኪዳ ዎዴ ካዎይኔ ኢዛ ኦሳንቻቲ ኡፋዬቲዳ።
GEN 45:17 ካዎይ ዮሴፌ፥ «ኔኒ ኔ ኢሻታ፥ ‹ኢንቴ ሜሄ ጫኒዲ ካናኔ ቢታ ሲሚቴ፤
GEN 45:18 ሂስቲዲ ኢንቴ ኣዋኔ ኢንቴ ሶ ኣሳ ኤኪዲ ጉዬ ታኮ ሃ ኤሂቴ። ታኒ ኢንቴስ ጊብጼ ቢታን ኡባሶፔ ሎኢዛሶ ኢማና፤ ኢስቲካ ሃ ቢታ ሞꬎ ካቻና› ጋ።
GEN 45:19 ቃሴካ ኔኒ ኔ ኢሻታ፥ ‹ፓራ-ጋሬዛ ኢንቴ ናይታሲኔ ኢንቴ ማጫሳታስ ጊብጼፔ ኤኪ ቢዲ ኢንቴ ኣዋካ ኤኪ ዪቴ።
GEN 45:20 ጊብጼ ቢታን ዲዛ ኡባፌ ኣꬊ ሎኢዛ ሚሽ ኢንቴስ ጊዳና ጊሻስ ኢንቴስ ዲዛ ሃሮ ኤኪ ያና ቆፖፍቴ› ጋ ዮታ» ጊዴስ።
GEN 45:21 ሂስቲን ያቆቤ ናይቲ ጊዳ ማላ ኦꬂዳ። ዮሴፌይካ ካዎይ ኣዛዚዳ ማላ ፓራ-ጋሬታኔ ኦጌስ ጊዲዛ ሺንቄ ኢስታስ ኢሚዴስ።
GEN 45:22 ኢስታስ ኡባሲካ ሁኤን ሁኤን ኦራꬃ ማይኦ ኢሚዴስ፤ ጊዶ ኣቲን ቢኒያሜስ ሄꬑ ጼቱ ሳቂሌ ቢራኔ ኢቻሹ ኩሜꬃ ማይኦ ኢሚዴስ።
GEN 45:23 ኢዚካ ባ ኣዋስ ጊብጼን ዲዛ ኡባፌ ሎኢዛይሳ ታሙ ሃሬን ጫኒዲ፥ ቃሴ ኦጌስ ካꬅ፥ ኡኬꬂኔ ሃራ ሺንቄ ታሙ ማጫ ሃሬታን ጫኒዲ ዬዲዴስ።
GEN 45:24 ዮሴፌይ ባ ኢሻታ ሞይዚዴስ። ኢስቲ ቢሺን ኢዚ ኢስታስ፥ «ቢሼ ኦጌን ኢንቴ ጋርሳን ኦዬቶፍቴ» ጊዴስ።
GEN 45:25 ኢስቲ ጊብጼፔ ኬዚዲ ቢዳ፤ ካናኔ ቢታ ቢዲ ባ ኣዋ ያቆቤኮ ጋኪዳ።
GEN 45:26 ኢስቲ ኢዛስ፥ «ዮሴፌይ ፓጻ ዴስ! ቃሴካ ኢዚ ጊብጼ ቢታ ኡባ ሃሬስ» ጊን ያቆቤ ዎዚናይ ዳጋሚዳ ጊሻስ ኢስታ ኣማኒቤና።
GEN 45:27 ጊዶ ኣቲን ኢስቲ ዮሴፌይ ባስ ዮቲዳይሳ ኡባ ኢዛስ ዮቲኒኔ ኢዛ ኤኪ ኤሃና ማላ ዮሴፌይ ኪቲዳ ፓራ-ጋሬታ ኢዚ ቤዪን፥ ኢስታ ኣዋ ያቆቤስ ሼምፖይ ሲሚዴስ።
GEN 45:28 ያቆቤይካ፥ «ሄሲ ታስ ጊዳና፤ ታ ናዚ ዮሴፌይ ሃኖ ጋካናስ ፓጻ ዴስ! ታኒ ሃይቃናፔ ሲንꬃን ባዳ ኢዛ ቤያና» ጊዴስ።
GEN 46:1 ኢስራኤሌይ ባስ ዲዛይሳ ኡባ ኤኪ ዴንዲዲ ቤርሳቤሄ ጋኪዴስ። ሄንካ ኢዚ ባ ኣዋ ዪሳቃ ጾሳስ ያርሾ ሺሺዴስ።
GEN 46:2 ጾሲ ኦማርስ ኣጉሞራ ኢዛ፥ «ያቆቤ፥ ያቆቤ» ጊ ጼይጊን ኢዚ፥ «ዬ!» ጊ ኮዪዴስ።
GEN 46:3 «ታኒ ጾሳይ ኔ ኣዋ ጾሳ፤ ኔኒ ዱጌ ጊብጼ ባናስ ባቦፋ፤ ኣይስ ጊኮ ታኒ ኔና ሄን ጊታ ካዎቴꬅ ኬሳና።
GEN 46:4 ታኒ ኔናራ ኢሲፌ ጊብጼ ባና፤ ቃሴ ታኒ ኔ ዜሬꬃ ሄፔ ኬሳና። ዮሴፌይ ባ ኩሼራ ኔ ሃይቂሺን ኔና ሺሻና» ጊዴስ።
GEN 46:5 ሄሳፌ ጉዬ ያቆቤይ ቤርሳቤሄፔ ዴንዲዴስ፤ ያቆቤ ኣቱማ ናይቲ ባ ኣዋ ያቆቤ፥ ባ ናይታኔ ባ ማቼታ ጊብጼ ካዎይ ኢስታስ ኪቲዳ ፓራ-ጋሬ ቶጊሲ ኤኪ ቢዳ።
GEN 46:6 ኢስቲ ካናኔ ቢታን ሃሪዳ ኣቆኔ ሜሄ ኡባ ኤኪ ቢዳ። ያቆቤይኔ ኢዛ ዜሬꬂ ዉሪ ኢዛራ ጊብጼ ቢዴስ።
GEN 46:7 ኢዚካ ባ ዜሬꬅ ኡባ ባ ኣቱማ ናይታ፥ ባ ማጫ ናይታኔ ናይታ ናይታ ኡባ ባናራ ጊብጼ ኤኪ ቢዴስ።
GEN 46:8 ያቆቤራ ጊብጼ ቢታ ቢዳ ኢስራኤሌ ናይታ ሱንꬂ ሃይሳፌ ካሊ ጻፌቲዳይሳ። ያቆቤ ባይራ ናይ ኦሮቤሌ፤
GEN 46:9 ኦሮቤሌ ኣቱማ ናይቲ ሄኖኬ፥ ፓሉ፥ ሄጺሮሜኔ ካርሜ።
GEN 46:10 ሲሞና ኣቱማ ናይቲ ዪሙኤሌ፥ ያሚኔ፥ ኦሃዴ፥ ያኪኔ፥ ጾሃሬኔ ካናኔ ማጫሳይ ና ሳኦሌ።
GEN 46:11 ሌዌ ኣቱማ ናይቲ ጌርሾኔ፥ ቃኣቴኔ ሜራሬ።
GEN 46:12 ዩሁዳ ኣቱማ ናይቲ ኤራ፥ ኦናኔ፥ ሴላ፥ ፓሬሴኔ ዛራሄ፤ ጊዶ ኣቲን ኤራይኔ ኦናኔይ ካናኔ ቢታን ሃይቂዳ። ፓሬሴ ኣቱማ ናይቲ ሄጺሮሜኔ ሃሙሌ።
GEN 46:13 ዪሳኮሬ ኣቱማ ናይቲ ቶላ፥ ፑዋ፥ ያሹቤኔ ሺሚሮኔ።
GEN 46:14 ዛቢሎኔ ኣቱማ ናይቲ ሴሬዴ፥ ኤሎኔኔ ያሂሌኤሌ።
GEN 46:15 ሃይቲ ሊያይ ሜስጴጾሚያን ያቆቤስ ዬሊዳ ኣቱማ ናይታ፤ ኢዚ ማጫ ናያ ዲኖ። ሃይቲ ኢዛ ናይቲኔ ናይታ ናይቲ ሙሌራ ሄꬑ ታማኔ ሄꬓ።
GEN 46:16 ጋዴ ኣቱማ ናይቲ ጻፎኔ፥ ሃጌ፥ ሹኔ፥ ኤጺቦኔ፥ ኤሬ፥ ኣሮዴኔ ኣርኤሌ።
GEN 46:17 ኣሴሬ ኣቱማ ናይቲ ዪሚኔ፥ ዪሺዋ፥ ዪሺዌኔ ባሪሄ፤ ኢስታ ሚቼያካ ሴራሆ። ባሪሄ ኣቱማ ናይቲ ሄቤሬኔ ማልኪኤሌ።
GEN 46:18 ላባይ ባ ና ሊያስ ኢሚዳ ዚልፋይ ያቆቤስ ዬሊዳ ናይቲ ናይታ ናይቲ ሃይታ፤ ኢስቲ ሙሌራ ታማኔ ኡሱፑና።
GEN 46:19 ያቆቤ ማቼዮ ኤራሄሊ ኣቱማ ናይቲ ዮሴፌኔ ቢኒያሜ።
GEN 46:20 ኦና ጌቴቲዛ ካታማ ቄሴ ጲጺፋራ ናያ ኣሲናታ ዮሴፌስ ጊብጼን ሚናሴኔ ኤፍሬሜ ዬላዱስ።
GEN 46:21 ቢኒያሜ ናይቲ ቤላ፥ ቤኬሬ፥ ኣሺቤሌ፥ ጌራ፥ ናኢማኔ፥ ኤሄ፥ ኦሮሼ፥ ሙፒሜ፥ ሁፒሜኔ ኣራዴ።
GEN 46:22 ያቆቤስ ዬሌቲዳ ኤራሄሊ ኣቱማ ናይቲኔ ናይታ ናይቲ ሃይታ፤ ኢስቲ ሙሌራ ታማኔ ኦይዳ።
GEN 46:23 ዳኔ ኣቱማ ናይ ሁሺሜ።
GEN 46:24 ኒፍታሌሜ ኣቱማ ናይቲ ያሂጼሌ፥ ጉኔ፥ ዬጺሬኔ ሼሌሜ
GEN 46:25 ላባይ ባ ና ኤራሄሊስ ኢሚዳ ቢሊሃይ ያቆቤስ ዬሊዳ ናይቲኔ ናይታ ናይቲ ሃይታ፤ ኢስቲ ሙሌራ ላፑና።
GEN 46:26 ያቆቤራ ጊብጼ ቢዳ ናይቲኔ ናይታ ናይቲ፥ ኢዛ ናይታ ማቼታ ጉጆንታ ሙሌራ ኡሱፑን ታማኔ ኡሱፑና።
GEN 46:27 ጊብጼን ዮሴፌስ ዬሌቲዳ ናምኡ ናይታ ጉጂን ጊብጼ ቢዳ ያቆቤ ሶ ኣሳይ ሙሌራ ላፑን ታማ።
GEN 46:28 ሲንꬃቲ ቢዲ ጌሴሜ ቢታን ባና ሞካና ማላ ያቆቤይ ዩሁዳ ባፔ ሲንꬄ ዮሴፌኮ ዬዲዴስ፤ ኢስቲ ጌሴሜ ጋኪዳ ዎዴ፥
GEN 46:29 ዮሴፌይ ባ ፓራ-ጋሬዛ ጊግሲዲ ባ ኣዋ ያቆቤራ ጋጋናስ ጌሴሜ ቢዴስ። ዮሴፌይ ባ ኣዋ ዴሚዳ ማላ ኢዲሚ ኦይኪዲ ዳሮ ሳቴ ዬኪዴስ።
GEN 46:30 ኢስራኤሌይ ዮሴፌ፥ «ኔኒ ፓጻ ዲሺን ታኒ ኔ ኣይፌሶ ቤኢዳ ጊሻስ ሂኣ ታኒ ሃይቂኮ ሜቴና» ጊዴስ።
GEN 46:31 ሄሳፌ ጉዬ ዮሴፌይ ባ ኢሻታሲኔ ባ ኣዋ ሶ ኣሳታስ፥ «ታኒ ጊብጼ ካዎዛኮ ባዳ ኢዛስ፥ ‹ካናኔ ቢታን ዲዛ ታ ኢሻቲኔ ታ ኣዋ ሶ ኣሳይ ታኮ ዪዳ።
GEN 46:32 ኢስቲ ሚዚኔ ዶርሳ ሃሪዛይታ፤ ኢስቲ ባናራ ባ ዶርሳታ፥ ባ ሚዛታኔ ባስ ዲዛይሳ ኡባ ኤኪ ዪዳ› ጋና።
GEN 46:33 ካዎይ ኢንቴና ጼይጊዲ፥ ‹ኢንቴ ኦሶይ ኣዜ?› ጊ ኦይቺኮ፥
GEN 46:34 ኢንቴ ኢዛስ፥ ‹ኑኒ ኔ ኣይሌቲ ናቴꬃፌ ዶሚዲ ኑ ኣዋታ ማላካ ሜሄ ሄሞስ› ጊቴ። ሂስቲኮ ኢዚ ኢንቴና ጌሴሜ ቢታን ዎꬃና፤ ኣይስ ጊኮ ዶርሳ ሄንꬃንቻይ ዉሪ ጊብጼ ኣሳ ኣቻን ካꬌቲዳይታ» ጊዴስ።
GEN 47:1 ዮሴፌይ ጌሊዲ ጊብጼ ካዎስ፥ «ታ ኣዋይኔ ታ ኢሻቲ ባ ዶርሳታራ፥ ባ ሚዛታራ ባስ ዲዛዝ ኡባ ኤኪዲ ካናኔ ቢታፌ ዪዲ፥ ሃኢ ጌሴሜ ቢታን ዴቴስ» ጊ ዮቲዴስ።
GEN 47:2 ኢዚ ባ ኢሻታፔ ኢቻሻታ ዶሪዲ ካዎዛ ሲንꬅ ኣꬂዴስ።
GEN 47:3 ካዎይ ሄ ኢሻታ፥ «ኢንቴ ኦሶይ ኣዜ?» ጊ ኦይቺን ኢስቲ ካዎዛስ፥ «ኑኒ ኔ ኣይሌቲ ኑ ኣዋታꬆ ዶርሳ ሄሞስ» ጊ ዮቲዳ።
GEN 47:4 ቃሴ ኢስቲ ኢዛስ፥ «ካናኔ ቢታን ኮሻይ ዳሪዳ ጊሻስ ኑስ ኔ ኣይሌታ ሜሄታስ ሚዛ ሚሺ ኣይኮካ ባይንዳ ጊሻስ፥ ኑኒ ሃይሳን ኢማꬃቴꬃን ዳና ዪዶስ፤ ሾቤ ኑና ኔ ኣይሌታ ጌሴሜን ዎꬃርኪ!» ጊዳ።
GEN 47:5 ካዎይ ዮሴፌ፥ «ኔ ኣዋይኔ ኔ ኢሻቲ ኔኮ ዪዳ።
GEN 47:6 ሂስቲን ጊብጼ ዴሬይ ኔ ኩሼን ዴስ ጊዴኔ፤ ሃ ቢታን ኡባፌ ኣꬊዲ ሎኢዛሶን ኔ ኣዋኔ ኔ ኢሻታ ዎꬃ፤ ኢስቲ ጌሴሜ ቢታን ዴቶ። ኢስታ ጊዶፌ ዱማ ኤራቴꬂ ዲዛይታ ኔ ኤሪዛ ጊዲኮ ሄይታ ታ ሜሄታ ቦላ ሹማ» ጊዴስ።
GEN 47:7 ሄሳፌ ጉዬ ዮሴፌይ ባ ኣዋ ያቆቤ ጌልꬂዲ ካዎ ሲንꬅ ኣꬂዴስ። ያቆቤይ ጊብጼ ካዎ ኣንጂዴስ።
GEN 47:8 ካዎይካ ያቆቤ፥ «ኔስ ኣፑን ላይꬄ?» ጊ ኦይቺዴስ።
GEN 47:9 ያቆቤይ ካዎዛስ፥ «ታኒ ዩያ ዩያ ዴዪዳ ላይꬃይ 130፤ ታ ላይꬃይ ቤኒ ታ ኣዋቲ ዩዪ ዩዪ ዴዪዳ ላይꬃታፔ ጉꬃኔ ሜቶይ ዳሪዳ ላይꬃ» ጊዴስ።
GEN 47:10 ሄሳፌ ጉዬ ያቆቤይ ካዎዛ ኣንጂዲ ኢዛ ሲንꬃፌ ካሬ ኬዚዴስ።
GEN 47:11 ዮሴፌይ ባ ኣዋኔ ባ ኢሻታ ጊብጼ ቢታን ዎꬂዴስ፤ ካዎይ ኣዛዚዳ ማላ ጊብጼ ቢታን ኤራሚሴ ኣቻን ዲዛ ኡባሶፔ ኣꬊዲ ሎኢዛ ጋዴ ኢስታስ ኢሚዴስ።
GEN 47:12 ዮሴፌይ ቃሴ ባ ኣዋስ፥ ባ ኢሻታሲኔ ባ ኣዋ ሶ ኣሳ ኡባስ ኢስታ ናይታ ቆዳ ማላ ካꬅ ኢሚዴስ።
GEN 47:13 ጊዲኮካ ኮሻይ ዳሪዳ ጊሻስ ቢታ ኡባ ቦላ ካꬂ ꬋይዴስ። ሄ ኮሻን ጊብጼ ዴሬይኔ ካናኔ ዴሬይ ናምኣይካ ቆሄቲዳ።
GEN 47:14 ዮሴፌይ ጊብጼ ካꬅ ባይዚዲ ጊብጼኒኔ ካናኔ ቢታን ዲዛ ሚሽ ኡባ ሺሺዲ ጊብጼ ካዎ ኬꬅ ጌልꬂዴስ።
GEN 47:15 ጊብጼ ሚሻይኔ ካናኔ ሚሻይ ኡባይ ዉሪን ጊብጼ ኣሳይ ዉሪ ዮሴፌኮ ዪዲ ኢዛ፥ «ኑስ ካꬅ ኢማ፤ ኑ ሚሻይ ዉሪዳ ጊሻስ ኑኒ ኔ ዲሺን ኣይስ ሃይቂዞኒ?» ጊዳ።
GEN 47:16 ሂስቲን ዮሴፌይ ኢስታስ፥ «ኢንቴ ሜሄ ኤኪ ዪቴ፤ ኢንቴ ሚሻይ ዉሪዳ ጊዲኮ ታኒ ካꬅ ኢንቴስ ሜሄራ ላማና» ጊዴስ።
GEN 47:17 ሄሳ ጊሻስ ኢስቲ ባ ሜሄ ዮሴፌስ ኤሂን ዮሴፌይ ኢስታ ፓራ፥ ዶርሳ፥ ዴይሼ፥ ሚዚኔ ሃሬ ካꬃራ ላሚዴስ፤ ኢዚ ሄ ላይꬅ ኢስታ ሜሄ ኡባራ ካꬅ ላሚ ላሚ ሚዚ ሻቺዴስ።
GEN 47:18 ሄ ላይꬃይ ዉሪን ናምኣንꬆ ላይꬃን ኢስቲ ኢዛኮ ዪዲ ኢዛስ፥ «ኑኒ ኑ ጎዳፔ ቆቲዛ ሚሺ ዴና፤ ኑ ሚሻይ ዉሪዴስ፤ ኑስ ዲዛ ሜሄካ ኡባ ኔስ ሼꬊዶስ፤ ኑ ጎዳስ ኔስ ኑናቴꬃፌኔ ኑ ጋዴፔ ኣቲን ኑ ኢማና ሚሺ ሃራይ ዴና።
GEN 47:19 ኔ ዲሺን ኑ ኣይስ ሃይቂዞኒ? ኑ ጋዴይካ ኣይስ ꬋይዜ? ኑናካ ኑ ጋዴዛካ ካꬃራ ላማ፤ ኑኒ ካዎስ ኣይሌታና፤ ኑ ጋዴይካ ኢዛስ ጊዶ፤ ኑኒ ሃይቆንታ ዴኦን ዳና ማላኔ ኑ ጋዴይካ ኦጾንታ ማላ ዜሬꬅ ኑስ ኢማ» ጊዳ።
GEN 47:20 ዮሴፌይ ጊብጼ ቢታ ኡባ ካዎስ ሻሚዴስ። ጊብጼቲ ዉሪ ኮሻይ ሚኒዳ ጊሻስ ባ ጋዴዛ ባይዚን ጋዴዚ ካዎስ ጊዲዴስ።
GEN 47:21 ዮሴፌይ ጊብጼ ኣሳ ኡባ ሃ ጋጻፔ ዶሚዲ ሄ ጋጻ ጋካናስ ካዎስ ኣይሌ ኬሲዴስ።
GEN 47:22 ጊዲኮካ ካዎይ ቄሴታስ ካꬅ ኢሚዛ ጊሻስ ቄሴታ ጋዴ ሻሚቤና። ሄሳ ጊሻስ ቄሴቲ ባ ጋዴ ባይዚቤቴና።
GEN 47:23 ዮሴፌይ ኣሳ፥ «ሂስቲን ሃች ታኒ ኢንቴናኔ ኢንቴ ጋዴ ካዎስ ሻሚዳ ጊሻስ ዜሬꬅ ኤኪዲ ኢንቴ ጋዴን ጋዴን ዜሪቴ።
GEN 47:24 ጊዶ ኣቲን ካꬅ ማጺ ጌልꬂዛ ዎዴ ካꬃፌ ኢቻሹ ኩሼፔ ኢሲ ኩሼ ካዎስ ኢሚቴ። ኢቻሽ ኩሼፔ ኣቲዳ ኦይዱ ኩሼዚ ኢንቴ ጋዴስ ዜሬꬅ፥ ኢንቴሶ ኣሳሲኔ ኢንቴ ናይታስ ቁማ ጊዶ» ጊዴስ።
GEN 47:25 ሂስቲን ኢስቲ፥ «ኔኒ ኑና ኣሻዳሳ! ኑ ጎዳ ሲንꬃን ኑኒ ናሼቲዳ ጊዲኮ ኑ ካዎስ ኣይሌ ጊዳና» ጊዳ።
GEN 47:26 ሄሳ ጊሻስ ዮሴፌይ ጊብጼ ቢታን ካጺዳ ካꬃስ ኢቻሽ ኩሼፔ ኢሲ ኩሼ ካዎስ ኢሚዛይሲ ዎጋ ጊዳና ማላ ኦꬂዴስ። ሄ ዎጋዚካ ሃች ጋካናስ ኤቂ ዴስ። ካዎስ ጊዶንታ ጋዴይ ቄሴታ ጋዴ ጻላ።
GEN 47:27 ኢስራኤሌቲ ጊብጼ ቢታን ጌሴሜ ጌቴቲዛሶን ኡቲዳ፤ ኢስቲ ሄን ኣቆታ ዴሚዳ፤ ኢስቲ ዬሌቲዳኔ ዳሮ ጮራቲዳ።
GEN 47:28 ያቆቤይ ጊብጼ ቢታን 17 ላይꬅ ዴኢዴስ። ያቆቤይ ዴኢዳ ላይꬃይ ኢሲ ጼታኔ ኦይዱ ታማኔ ላፑና።
GEN 47:29 ያቆቤስ ሃይቆ ዎዴይ ማቲን ባ ና ዮሴፌ ጼይጊሲዲ፥ «ታኒ ኔ ሲንꬃን ሳቤቲዳ ጊዲኮ ኔ ኩሼ ታ ጉልባቴ ቦላ ዎꬃዳ ኔኒ ታስ ኪያታናሲኔ ኣማኔታናስ ኣኔ ጫቃ። ታና ጊብጼን ሞጎፓ።
GEN 47:30 ጊዶ ኣቲን ታኒ ታ ኣዋታን ጋጊዛ ዎዴ ታና ጊብጼፔ ኤፋዳ ኢስቲ ሞጌቲዳሶን ሞጋ» ጊዴስ። ሂስቲን ዮሴፌይ፥ «ታኒ ኔና ኔኒ ጊዳ ማላ ኦꬃና» ጊዴስ።
GEN 47:31 ያቆቤይ ኢዛ፥ «ኣኔ ታስ ጫቃ» ጊዴስ። ዮሴፌይካ ኢዛስ ጫቂዴስ፤ ሄሳፌ ጉዬ ያቆቤይ ባ ሂጻን ጉፋኒዲ ጾሳስ ጎይኒዴስ።
GEN 48:1 ሄሳፌ ጉዬ ኣሳይ ዮሴፌስ፥ «ኔ ኣዋይ ሳኬቴስ» ጊ ዮቲን ኢዚ ባ ናምኡ ኣቱማ ናይታ ሚናሴኔ ኤፍሬሜ ኤኪ ቢዴስ።
GEN 48:2 ኣሳይ ያቆቤ፥ «ቤያ! ኔ ናይ ዮሴፌይ ኔኮ ዪዴስ» ጊን ኢስራኤሌይ ሚኔቲዲ ባ ሂጻ ቦላ ዴንዲ ኡቲዴስ።
GEN 48:3 ያቆቤይ ዮሴፌ፥ «ኡባ ዳንዳይዛ ጾሲ ካናኔ ቢታን ሎዛ ጌቴቲዛሶን ታስ ቆንጪዲ ሄን ታና ኣንጂዴስ።
GEN 48:4 ኢዚ ታና፥ ‹ታ ኔስ ዬሎ ኢማና ኔ ዬሎታካ ዳርሳና፤ ታኒ ኔና ዳሮ ዴሬ ሂስታና። ሃ ቢታ ታኒ ኔፔ ጉዬ ኔ ዜሬꬃስ ሜርናስ ላታ ቢታ ሂስታ ኢማና› ጊዴስ።
GEN 48:5 «ሂስቲን ሃኢ ኔ ናምኡ ኣቱማ ናይቲ ታኒ ኔኮ ሃይሳ ያናፔ ካሴ ጊብጼን ኔስ ዬሌቲዳይቲ ታይታ፤ ኤፍሬሜይኔ ሚናሴይ ታስ ኦሮቤሌኔ ሲሞና ማላ።
GEN 48:6 ኢስታፌ ጉዬ ኔስ ዬሌቲዳይቲ ኔ ናይታ፤ ኢስቲ ላታና ዴሬይ ኤፍሬሜኔ ሚናሴ ሱንꬃን ሱሞ።
GEN 48:7 ታኒ ሜስጴጾሚያፔ ሲሚሺን ኤፍራታ ጌቴቲዛ ዴሬ ጋካና ጊሺን ኤራሄላ ካናኔ ቢታን ሃይቂን ታኒ ኢዞ ቤቴሊሄሜ ጌቴቲዛ ኤፍራታ ኤፊዛ ኦጌ ዶናን ሞጋዲስ» ጊዴስ።
GEN 48:8 ኢስራኤሌይ ዮሴፌ ኣቱማ ናይታ ናምኣታ ቤኢዲ፥ «ሃይቲ ኦኔ?» ጊ ኦይቺዴስ።
GEN 48:9 ዮሴፌይካ ባ ኣዋስ፥ «ሃይቲ ጾሲ ታስ ሃን ሃይሳን ኢሚዳ ታ ናይታ» ጊዴስ። ሂስቲን ኢስራኤሌይ፥ «ታ ኢስታ ኣንጃና ማላ ታኮ ሃ ሺሻ» ጊዴስ።
GEN 48:10 ያቆቤይ ጪሚን ኢዛ ኣይፌይ ዳቡርዳ ጊሻስ ዴማናስ ዳንዳይቤና። ሄሳ ጊሻስ ዮሴፌይ ባ ኣቱማ ናይታ ኢዛኮ ሺሺን ኢዛ ኣዋይ ኢስታ ኢዲሚዲ ዬሪዴስ።
GEN 48:11 ያቆቤይ ዮሴፌ፥ «ታኒ ኔ ኣይፌሶ ቤያና ጋዳ ቆፓቤኬ፤ ጊዶ ኣቲን ጾሲ ሄኮ ኔ ናይታካ ታና ቤሲዴስ» ጊዴስ።
GEN 48:12 ዮሴፌይ ኢስታ ያቆቤ ጉልባቴ ቦላፌ ዴንꬂዲ ባ ሁኤ ቢታ ጋꬂ ዚጊዴስ።
GEN 48:13 ዮሴፌይ ባ ናምኡ ኣቱማ ናይታ ኤኪዲ ኤፍሬሜ ባ ኡሻቻ ባጋን ያቆቤስ ሃዲርሳ ባጋራ፥ ሚናሴ ባ ሃዲርሳ ባጋን ያቆቤስ ኡሻቻ ባጋራ ኢዛኮ ሺሺዴስ።
GEN 48:14 ጊዶ ኣቲን ያቆቤይ ባ ኩሼ ያኔ ሃ ቃሴꬂ ኣꬂዲ ባ ኡሻቻ ኩሼ ካሎ ናዛ ኤፍሬሜ ሁኤ ቦላ፥ ባ ሃዲርሳ ኩሼ ባይራ ናዛ ሚናሴ ሁኤ ቦላ ዎꬂዴስ።
GEN 48:15 ሄሳፌ ጉዬ ያቆቤይ ዮሴፌ፥ «ታ ኣዋቲ ኣብራሃሜይኔ ዪሳቂ ኢዛ ሲንꬃን ሱሬን ዴኢዳ ጾሲ፥ ታ ዴኦ ኡባን ሃች ጋካናስ ታና ሄሚዳ ጾሲ፥
GEN 48:16 ኢታ ሚሻ ኡባፌ ታና ኣሺዳ ኪታንቻይ፥ ሃ ናይታ ኣንጆ። ታ ሱንꬃይኔ ታ ኣዋታ ኣብራሃሜኔ ዪሳቃ ሱንꬃይ ኢስታን ጼይጌቶ። ኢስቲ ቢታ ቦላን ጮራቴቶ» ጊ ኣንጂዴስ።
GEN 48:17 ዮሴፌይ ባ ኣዋይ ባ ኡሻቻ ኩሼ ኤፍሬሜ ሁኤ ቦላ ዎꬂዳይሳ ዶሲቤና። ሄሳ ጊሻስ ኤፍሬሜ ሁኤ ቦላፌ ዴንꬂዲ ሚናሴ ሁኤ ቦላ ዎꬃናስ ባ ኣዋ ኩሼ ኦይኪዴስ።
GEN 48:18 ዮሴፌይ ባ ኣዋስ፥ «ኣቦ ሄሳꬆ ዴና! ባይራይ ሃይሳ ጊዶንታ ጊሻስ ኔ ኡሻቻ ኩሼ ሃይሳ ቦላ ዎꬃ» ጊዴስ።
GEN 48:19 ጊዶ ኣቲን ኢዛ ኣዋይ ኢጺዲ ኢዛስ፥ «ታ ናዞ! ታ ኤራይስ፤ ኢዚካ ጊታ ዴሬ ጊዳና። ጊዲኮካ ካሎ ኢሻይ ኢዛፔ ኣꬊ ጊታታና፤ ኢዛ ዜሬꬃይካ ዳሮ ጊታ ካዎቴꬅ ጊዳና» ጊዴስ።
GEN 48:20 ኢዚ ሄ ጋላስ ኢስታ ኣንጂዲ፥ «ኢስራኤሌ ናይቲ ኣንጆ ኣንጂዛ ዎዴ፥ ‹ጾሲ ኢንቴና ኤፍሬሜ ማላኔ ሚናሴ ማላ ኦꬆ› ጊዲ ኢንቴ ሱንꬃን ኣንጃና» ጊዴስ። ሂስቲዲ ኤፍሬሜ ሚናሴፔ ሲንꬄ ኣꬂዴስ።
GEN 48:21 ሄሳፌ ጉዬ ያቆቤይ ዮሴፌ፥ «ታ ሃይቃና ጋይስ፤ ጊዶ ኣቲን ጾሲ ኢንቴናራ ጊዳና፤ ቃሴ ኢዚ ኢንቴ ኣዋታ ቢታ ኢንቴና ጉዬ ዛራና።
GEN 48:22 ቃሴ ኔና ኔ ኢሻታራ ጋኪዛ ቢታፌ ጊሻ ዳርሳዳ ኔስ ኢማይስ፤ ሄሲካ ታኒ ኣሞሬታፔ ታ ማሻኒኔ ቶራን ኦላ ኤኪዳ ቢታ» ጊዴስ።
GEN 49:1 ሄሳፌ ጉዬ ያቆቤይ ባ ኣቱማ ናይታ ጼይጊዲ፥ «ሲንꬃፌ ኢንቴስ ሃናናይሳ ታኒ ኢንቴስ ዮታና ማላ ሃ ሺቂቴ።
GEN 49:2 «ኢንቴኖ ያቆቤ ናይቶ! ኢሲፌ ሃ ሺቂዲ ሲዪቴ፤ ኢንቴ ኣዋይ ኢስራኤሌይ ኢንቴስ ዮቲዛይሳ ኤዝጊቴ።
GEN 49:3 «ኦሮቤሌ ታ ና ባይራዞ፥ ኔኒ ታ ዎልቃ፤ ታ ሚኖቴꬃስ ኮይሮ፤ ኔኒ ቦንቾንካ ዎልቃንካ ኡባፌ ኣꬋሳ።
GEN 49:4 ኔኒ ቢጻላይ ባይንዳ ፓራ ማላ፤ ኔ ዶሲዳ ሃናሳ፤ ኔኒ ኔ ኣዋ ሂꬅ ኬዛዳሳ፤ ኔ ኣዋ ሂꬃካ ቱኒሳዳሳ። ሄሳ ጊሻስ ሃላቃቴꬂ ኔስ ቤሴና።
GEN 49:5 «ሲሞኒኔ ሌዌይ ኢሻንታ፤ ኢስቲ ኢታ ኦꬃናስ ማሻኔ ቶራ ኤኬቴስ።
GEN 49:6 ታኒ ኢስታ ዞሬቴꬃን ጌሊኬ፤ ታኒ ኢስታ ሺቆሶንካ ኡቲኬ። ኣይስ ጊኮ ኢስቲ ባ ሃንቆን ኣስ ዎꬊዳኔ ባና ኤካ ኤካ ጊን ቦራታ ጊልዳዪ ቃንጺዳ።
GEN 49:7 ኢስታ ኢታ ሃንቆይኔ ኢስታ ሜቄꬃ ኢታቴꬂ ቃንጌቲዳዝ ጊዶ! ታኒ ኢስታ ያቆቤ ኣሳ ጊዶን ላላና፤ ኢስራኤሌ ቢታን ꬋርጫና።
GEN 49:8 «ዩሁዳ ኔ ኢሻቲ ኔና ጋላታና፤ ኔኒ ኔ ሞርኬታ ሞርጌ ናቃ ኦይካና፤ ኔ ኣዋ ናይቲ ኔስ ሆኪዲ ዚጋና።
GEN 49:9 ዩሁዳ ኔኒ ዎዳላ ጋሞ ማላ፤ ታ ናዞ! ኔኒ ሻንካቲ ኦይኪዲ፥ ጮጎቲ ኢቺዳ ጋሞ ማላ። ኔኒ ኣሲ ባና ቦሼꬃናስ ኮዮንታ ማጫ ጋሞ ማላ።
GEN 49:10 ዴሬ ሃሪዛዴይ ያና ጋካናሼ፥ ካዎቴꬃ ኣልጋይ ዩሁዳፔ፥ ሃላቃቴꬃ ጉፌይ ኢዛ ኬꬃፌ ሻኬቴና። ቃሴ ዴሬ ኣሳይ ኢዛስ ኣዛዜታና።
GEN 49:11 ኢዚ ባ ሃሬ ካꬃ ጊዶን ባ ሃሬ ጉቴካ ዶሬቲዳ ካꬃን ቃቻና። ኢዚ ባ ሃꬅ ዎይኔ ኡሻን፥ ባ ማይኦ ቃሴ ዎይኔ ማꬋን ሜጫና።
GEN 49:12 ኢዛ ኣይፌይ ዎይኔ ኡሻፌ ኣꬊ ዞኣና፤ ኢዛ ኣቻይካ ማꬃፌ ኣꬊ ቦታና።
GEN 49:13 «ዛቢሎኔይ ኣባ ዶናን ዳና፤ ኢዛ ቢታይ ዳሮ ማርካቤታስ ሼምፖሶ ጊዳና፤ ኢዛ ዛዋይ ሲዶና ጋካና።
GEN 49:14 «ዪሳኮሬይ ናምኡ ጎዳይ ጎኤቲዛ ሚኖ ሃሬ ማላ።
GEN 49:15 ኢዚ ባ ሼምፒዛሶይ ሎኦ ጊዲዳይሳኔ ባ ዴሬይ ኡፋይሲዛዝ ጊዲዳይሳ ቤኢዲ፥ ቶሆ ቶካናስ ባ ዞኮ ዚቂ ሂስቲዲ፥ ኣይሌቴꬃ ኦሶ ኦꬃና።
GEN 49:16 «ዳኔይ ኢስራኤሌ ቆሞታፔ ኢሳስ ፒርዲዛ ዳና ጊዳና።
GEN 49:17 ዳኔይ ፓራ ቶጊዳዴይ ጉዬ ኩንዳና ማላ ፓራ ቂርጴ ዱኪዛ ኦጌ ዶናን ዲዛ ሃሶ ሾሻ።
GEN 49:18 «ኣቤት ጎዶ! ታ ኔ ማዶ ናጋይስ።
GEN 49:19 «ጋዴይ ቦንቂዛይታን ዴሼታና፤ ጊዶ ኣቲን ኢዚካ ኢስታ ጌዶ ካሊዲ ኢስታ ቦንቃና።
GEN 49:20 «ኣሴሬ ማዳይ ኣካና፤ ካዎታስ ኢዚ ሎኦ ቁማ ኢማና።
GEN 49:21 «ኒፍታሌሜይ ቃሼቶንታ ዬዳ ዲዛ፥ ሎኦ ላቃታ ዬሊዛ ጌኔሳ።
GEN 49:22 «ዮሴፌይ ሜሎንታ ፑልቶ ሃꬃ ኣቻን ቶኬታዳ፥ ኢዚ ኣይፌይ ላሻ ቦላራ ኣላሌታና ጋካናስ ኣይፌ ኢሚዛ ሚꬃይ ማላ።
GEN 49:23 ዎንዳፌዛ ዱኪዛይቲ ኢዛ ቦላ ዎራጂዳ፤ ባ ዎንዳፌንካ ጎዲ ጎዲ ጫዴቴስ።
GEN 49:24 ጊዶ ኣቲን ያቆቤ ጎዳ ጾሳ ዎልቃን ኢዛ ሄሚዛ ኢስራኤሌ ዛላን ኢዛ ዎንዳፌይ ሚኒዴስ፤ ኢዛ ሚኖ ቄሴይካ ፒላቲዴስ።
GEN 49:25 ኔና ማዲዛ ኔ ኣዋ ጾሳን ኡባ ዳንዳይዛይሳኒኔ ኔና ኣንጂዛ ጾሳን ፑዴ ቦላፌ ቤቲዛ ማዶኒኔ ጋርሳ ቢታፌ ቤቲዛ ኣንጆን ቃሴካ ኣዪ ኡሎፔኔ ꬋንꬃፌ ቤቲዛ ኣንጆን ኔና ኣንጃና።
GEN 49:26 ኔ ኣዋ ኣንጆይ ቤኒ ዎዴፔ ሃኖ ጋካናስ ሚኒ ዲዛ ዙማታፔኔ ሜርና ዙማታ ኡባፌ ኣꬌስ። ሄሳ ጊሻስ ሃይሲ ሃ ኣንጆይ ዉሪካ ዮሴፌ ጋኮ። ባ ኢሻታ ቦላ ሃላቃ ጊዲዳ ዮሴፌ ቦላ ዎꬎ።
GEN 49:27 «ቢኒያሜይ ቦንቂዛ ካና ሱይቴ ማላ። ባ ሻንካቲዳይሳ ማላዶ ሜስ፤ ባ ዲኢዳይሳ ኦማርስ ጊሼሬꬄስ» ጊዴስ።
GEN 49:28 ሃይቲ ታማኔ ናምኡ ኢስራኤሌ ቆሞታ፤ ቃሴ ኢስታ ኣዋይ ኢስታ ኢሳ ኢሳ ኢስታ ሃኖ ማላ ኢስታስ ቤሲዛ ኣንጆ ሄሳꬆ ኣንጂዴስ።
GEN 49:29 ሄሳፌ ጉዬ ኢዚ ኢስታስ፥ «ታኒ ታ ኣዋታን ጋጋና ጋይስ፤ ታና ሂቴ ኣስ ኤፍሮኔ ጋዴን ዲዛ ጎንጎሎን፥ ታ ኣዋታራ ሞጊቴ።
GEN 49:30 ሄሲካ ካናኔ ቢታን፥ ማሚሬ ኣቻን ዲዛ ማኪጴሌ ጌቴቲዛ ጎንጎሎ፤ ሃይሲካ ኣብራሃሜይ ሞጎስ ሂቴ ኣስ ኤፍሮኔፔ ጋዳራ ጋꬂ ሻሚዳ ጎንጎሎ።
GEN 49:31 ኣብራሃሜይኔ ኢዛ ማቼያ ሳራይ ሄን ሞጌቲዳ፤ ዪሳቂኔ ኢዛ ማቼያ ኢርቢቃይካ ሄን ሞጌቲዳ፤ ታኒ ቃሴ ሊያ ሄን ሞጋዲስ።
GEN 49:32 ሄ ጋዴዚኔ ኢዛን ዲዛ ጎንጎሎይ ሂቴታፔ ሻሜቲዳይሳ» ጊ ኣዛዚዴስ።
GEN 49:33 ያቆቤይ ባ ናይታስ ኣዛዞ ዉርሲዳፔ ጉዬ ባ ቶሆ ፑዴ ባ ሂጻን ሺሺ ኤኪዲ ሃይቂዲ ባ ኣዋታን ጋጊዴስ።
GEN 50:1 ዮሴፌይ ባ ኣዋ ኣሃ ቦላ ኩንዲዲ ዬኪዴሲኔ ኢዛ ዬሪዴስ።
GEN 50:2 ሄሳፌ ጉዬ ዮሴፌይ ꬋሌ ሺሺዛ ባ ኦሳንቻታ ባ ኣዋ ኢስራኤሌ ኣሃ ሳዊዛ ሺቶ ቲይዲ ሜሊሳና ማላ ኣዛዚን ኢስቲ ቲይዲ ሜሊሲዳ።
GEN 50:3 ሺቶ ቲዮይ ጻላ 40 ጋላስ ኩሜꬅ ዉርሲዴስ፤ ኣይስ ጊኮ ሃይሲ ቲዮይ ዎናካ ኦይዱ ታሙ ጋላስ ኤኬስ። ጊብጼ ኣሳቲ ኢዛስ ላፑን ታሙ ጋላስ ዬኪዳ።
GEN 50:4 ዬሆ ጋላሳቲ ኣꬊን ዮሴፌይ ጊብጼ ካዎ ኬꬃ ኣሳታ፥ «ታኒ ኢንቴ ሲንꬃን ሳቤቲዳ ጊዲኮ ካዎስ ሂዝጊ ዮቲቴ፤
GEN 50:5 ታ ኣዋይ ታና ኢሲ ጫቆ ጫቂሲዴስ፤ ኢዚ ታና፥ ‹ታኒ ሃይቃና ሃናይስ፤ ታኒ ታስ ካናኔ ቢታን ዎጪዳ ጎንጎሎ ዱፎን ታና ሞጋ› ጊዴስ። ሄሳ ጊሻስ፥ ‹ሃኢ ታኒ ፑዴ ባዳ ታ ኣዋ ሞጋና ማላ ዬዳርኪ! ሄሳፌ ጉዬ ታኒ ሲማና› » ጊዴስ።
GEN 50:6 ሂስቲን ካዎይ፥ «ኢዚ ኔና ጫቂሲዳ ማላ ፑዴ ባዳ ኔ ኣዋ ሞጋ» ጊዴስ።
GEN 50:7 ዮሴፌይ ባ ኣዋ ሞጋናስ ፑዴ ቢዴስ። ካዎዛ ኦሳንቻቲ ዉሪ፥ ኢዛ ካዎቴꬃ ኬꬃን ዲዛ ጊታ ኣሳይ ዉሪ ጊብጼ ቢታን ዲዛ ጊታ ኣሳይ ዉሪ ዮሴፌ ካሊዲ ቢዴስ።
GEN 50:8 ቃሴ ዮሴፌ ሶ ኣሳይ ዉሪ ኢዛ ኢሻቲኔ ኢዛ ኣዋ ሶ ኣሳይ ኢዛራ ቢን፤ ኢስታ ናይቲኔ ሜሄይ ጻላ ጌሴሜን ኣቲዳ።
GEN 50:9 ፓራ-ጋሬቲካ ቶጋ ኣሳይካ ኢዛራ ፑዴ ቢዴስ፤ ኢዛ ካሊዲ ቢዳ ኣሳይ ኬሂ ዳሮ።
GEN 50:10 ኢስቲ ዮርዳኖሴ ሻፋ ኣቻን ዲዛ ኣጻዴ ጌቴቲዛ ባሌ ጋኪዲ ባ ቃላ ꬎቁ ሂስቲዲ ኢዛስ ዚላሊዳኔ ዬኪዳ፤ ሄን ዮሴፌይ ባ ኣዋ ዬሆን ላፑን ጋላስ ኡቲዴስ።
GEN 50:11 ሄ ቢታን ዲዛ ካናኔ ኣሳቲ ኣጻዴ ጌቴቲዛ ዬሆ ባሌን ሄ ዬሆዛ ቤኢዲ፥ «ጊብጼ ኣሳይ ኣይ ሚሻ ዬሆ ዬኪዞ!» ጊዳ። ሄሳ ጊሻስ ዮርዳኖሴ ኣቻን ዲዛ ሄ ሶይ፥ ጊብጼታ ዬሆ ጌቴቲዴስ።
GEN 50:12 ያቆቤ ናይቲ ባ ኣዋይ ኢስታ ኣዛዚዳ ማላ ኦꬂዳ፤
GEN 50:13 ኢዛ ኣሃ ካናኔ ቢታ ኤፊዲ ማሚሬ ኣቻን ዲዛ ማኪጴሌ ጌቴቲዛ ጎንጎሎን፥ ኣብራሃሜይ ሂቴ ኣስ ኤፍሮኔፔ ሞጎስ ሻሚዳ ጋዴን ኢዛ ሞጊዳ።
GEN 50:14 ዮሴፌይ ባ ኣዋ ሞጊዳፔ ጉዬ፥ ባ ኢሻታኔ ኢዛ ኣዋ ሞጋናስ ኢዛራ ቢዳ ሃራ ኣሳታ ኡባራ ጊብጼ ሲሚዴስ።
GEN 50:15 ኢስታ ኣዋይ ሃይቂዳይሳ ቤኢዲ፥ ዮሴፌ ኢሻቲ ባ ጋርሳን፥ «ኦኒ ኤሪዜ ዮሴፌይ ኑና ባ ኡሎን ሞርኪዲ ኑኒ ኢዛስ ኦꬂዳ ኢታ ሚሽ ኡባስ ሃሎ ኬሳና ኮይኮ፥ ኑኒ ዋናኔ?» ጊዳ።
GEN 50:16 ሄሳ ጊሻስ ዮሴፌኮ ኪታ፥ «ኔ ኣዋይ ሃይቃናፔ ካሴ፤
GEN 50:17 ኢንቴ ዮሴፌ፥ ‹ኔኒ ኔ ኢሻታ ናጋራኔ ኢስቲ ኔና ቆሂዳ ኢታ ቆሆዛ ሃያና ኣቶ ጋ› ጊዲ ዮቲቴ ጊዴስ። ሄሳ ጊሻስ ሃኢ ሃያና፥ ኑ ናጋራ፥ ኔ ኣዋ ጾሳ ኣይሌታ ናጋራ ኣቶ ጋ» ጊዳ። ሄ ኪታይ ኢዛኮ ጋኪን፥ ዮሴፌይ ዬኪዴስ።
GEN 50:18 ሄሳፌ ጉዬ ኢዛ ኢሻቲ ባርካ ኢዛኮ ቢዲ ኢዛ ሲንꬃን ጉፋኒዲ፥ «ኑኒ ኔ ኣይሌታ» ጊዳ።
GEN 50:19 ጊዶ ኣቲን ዮሴፌይ ኢስታስ፥ «ባቦፍቴ፤ ታና ኢንቴስ ጾሳ ጊዴቲዬ?
GEN 50:20 ኢንቴ ታስ ኢታናስ ኦꬂዴታ ሺን ሃይሲ ዳሮ ኣሳይ ሃይቆንታ ኣታና ማላ ጾሲ ሎኦስ ሃይሳ ኦꬂዴስ።
GEN 50:21 ሄሳ ጊሻስ ሄኮ ኢንቴ ባቦፍቴ፤ ታኒ ኢንቴናኔ ኢንቴ ናይታ ሚዛና» ጊዲ፥ ኢዚ ኢስታ ሚንꬄꬂዲ ሎኦ ቃላን ሃሳዪዴስ።
GEN 50:22 ዮሴፌይ ባ ኣዋ ሶ ኣሳ ኡባራ ጊብጼን ጋምኢዴስ፤ ኢዚ 110 ላይꬅ ዴኢዴስ።
GEN 50:23 ኤፍሬሜ ናይታ፥ ሄꬓንꬆ ዬሌታ ጋካናስ ቤኢዴስ፤ ቃሴ ሚናሴ ና ማኪሬ ናይታካ ኢዚ ባ ና ማላ ሂስቲዴስ።
GEN 50:24 ሄሳፌ ጉዬ ዮሴፌይ ባ ኢሻታ፥ «ታኒ ሃይቃና ጋይስ፤ ጊዶ ኣቲን ጾሲ ኢንቴና ማዳናስ ቱሙ ዎቻና፤ ኢዚ ኢንቴና ሃ ቢታፌ ኬሲዲ ኣብራሃሜስ፥ ዪሳቃሲኔ ያቆቤስ ኢማና ጊዲ ጫቂዳ ቢታ ዛሪ ኤፋና» ጊዴስ።
GEN 50:25 ዮሴፌይ ኢስራኤሌ ናይታ፥ «ጾሲ ኢንቴና ማዳናስ ቱሙ ጾሞሲዛ ዎዴ፥ ኢንቴ ታ ሜቄꬃ ሃ ቢታፌ ፑዴ ኤኪ ቢቴ» ጊዲ ጫቄቺዴስ።
GEN 50:26 ዮሴፌይ 110 ላይꬅ ዴኢዲ ሃይቂን፥ ኢስቲ ሺቶን ኢዛ ኣሃ ቲይዲ ሜሊሲዳፔ ጉዬ ጊብጼ ቢታን ዎንጊሬ ጊዶን ዎꬂዳ።
EXO 1:1 ባሶ ኣሳ ኡባ ኤኪ ያቆቤራ ጊብጼ ቢዳ ያቆቤ ናይታ ሱንꬂ ሃይሳፌ ካሊ ጻፌቲዴስ።
EXO 1:2 ኢስቲካ ኦሮቤሌ፥ ሲሞና፥ ሌዌ፥ ዩሁዳ፥
EXO 1:3 ዪሳኮሬ፥ ዛቢሎኔ፥ ቢኒያሜ፥
EXO 1:4 ዳኔ፥ ኒፍታሌሜ፥ ጋዴኔ ኣሴሬ።
EXO 1:5 ያቆቤ ዜሬꬃቲ ሙሌራ ላፑን ታማ፤ ዮሴፌይ ካሴቲዲ ጊብጼ ቢዲ ሄን ዴስ።
EXO 1:6 ዮሴፌይ፥ ኢዛ ኢሻቲኔ ሄ ዬሌታይ ዉሪካ ሃይቂዴስ፤
EXO 1:7 ጊዶ ኣቲን ኢስራኤሌ ዜሬꬃቲ ዬሌቲዲ ኬሂ ዳሪዳ፤ ሄ ቢታ ኩማና ጋካናስ ኢስቲ ኬሂ ጮራቲዳ።
EXO 1:8 ሄሳፌ ጉዬ ዮሴፌ ኤሮንታ ኦራꬃ ካዎይ ጊብጼ ቢታን ዴንዲዴስ።
EXO 1:9 ኢዚ ባ ኣሳ፥ «ቤኢቴ፤ ሃይቲ ኢስራኤሌ ኣሳይ ኑፔ ኬሂ ዳሪዳኔ ዎልቃሚዳ።
EXO 1:10 ሃ ዪቴ፥ ኣኔ ኑኒ ኢስታ ሂላን ኦይኮስ፤ ሂስቶንታ ኣጊኮ ኢስቲ ካሴፔ ጌዴ ዳሪ ዳሪ ባና። ጌሊ ጊዳ ኦላይ ዴንዲኮ ኢስቲ ኑ ሞርኬታራ ጋጊዲ ኑና ኦላናኔ ቢታ ዬጊዲ ባና» ጊዴስ።
EXO 1:11 ሄሳ ጊሻስ ዴጾ ኦሶን ኢስታ ቱጋሳና ማላ ኢስታ ቦላ ሃላቃታ ዶሪዳ። ኢስቲካ ካዎስ ፒቶሜኔ ኤራሚሴ ጌቴቲዛ ዱማ ዱማ ሚንጃ ሚሻታ ዎꬂዛ ካታማታ ኬጺዳ።
EXO 1:12 ጊዶ ኣቲን ጊብጼ ኣሳይ ኢስታ ኬሂ ዋዪሲዳ ዎዴ ኢስቲ ጉጄቲ ጉጄቲ ዬሌቲዳኔ ቢታ ጋኪዳ። ሄሳ ጊሻስ ጊብጼ ኣሳይ ኢስራኤሌ ናይታ ኢጺዴስ።
EXO 1:13 ሄሳ ጊሻስ ኢስታ ዳሮ ዳቡርሲዛ ኦሶን ዋዪሲዳ።
EXO 1:14 ዎልቃማ ኦሶን፥ ሲሚንቶኒኔ ጹቤ ሜꬎን፥ ቃሴ ጎሼ ጎይሶን፥ ኢስታ ዱሳን ኡንኤꬂዳ፤ ዳቡርሲዛ ኦሶ ኡባ ቃꬌታይ ባይንዳ ኢስታ ኦሲሲዳ።
EXO 1:15 ጊብጼ ካዎይ ኢብራዌ ማጫሳታ ዬሊሲዛ ሲፖሮኔ ፑሆ ጌቴቲዛ ናምኡ ማጫሳታስ፥
EXO 1:16 «ኢብራዌ ማጫሳቲ ዬሊዛ ዎዴ ኢንቴ ዬሊሲሺን ዬሌቲዳይሲ ኣቱማ ና ጊዲኮ ዎꬊቴ፤ ጊዶ ኣቲን ማጫ ና ጊዲኮ ዎꬎፒቴ»
EXO 1:17 ጊዶ ኣቲን ዬሊሲዛይቲ ጾሳስ ባቢዲ ጊብጼ ካዎይ ኢስታ ኣዛዚዳ ማላ ኦꬂቤቴና፤ ዎꬎንታ ኣቱማ ናይታ ፓጻ ኣጊዳ።
EXO 1:18 ሄሳፌ ጉዬ ጊብጼ ካዎይ ሄ ዬሊሲዛይታ ጼይጊዲ፥ «ኢንቴ ኣይስ ሃይሳꬆ ኦꬂዴቲ? ኣቱማ ናይታ ኣይስ ፓጻ ኣጊዴቲ?» ጊ ኦይቺዴስ።
EXO 1:19 ዬሊሲዛይቲ ዛሪዲ፥ «ኢብራዌ ማጫሳቲ ጊብጼ ማጫሳታ ማላ ጊዴቴና፤ ኢስቲ ሚኖ ጊዲዳ ጊሻስ ዬሊሲዛይቲ ጋካናፔ ሲንꬃቲዲ ዬሊቼቴስ» ጊዳ።
EXO 1:20 ሄሳ ጊሻስ ጾሲ ዬሊሲዛይታስ ኪዪዴስ። ኣሳ ቆዳይካ ጉጄቲ ጉጄቲ ቢዲ ካሴይሳፌ ጌዴ ዳሪዴሲኔ ሚኒዴስ።
EXO 1:21 ቃሴ ዬሊሲዛይቲ ጾሳስ ባቢዳ ጊሻስ ጾሲ ኢስታስ ዬሎ ኢሚ ኣንጂዴስ።
EXO 1:22 ሄሳፌ ጉዬ ካዎይ ባ ኣሳ ኡባ፥ «ኢብራዌታፔ ዬሌቲዛ ኣዴ ና ኡባ ናይሌ ጌቴቲዛ ሻፋ ሃꬃን ኦሊቴ፤ ጊዶ ኣቲን ማጫ ናይ ዬሌቲኮ ፓጻ ኣጊቴ» ጊዲ ኣዛዚዴስ።
EXO 2:1 ሄ ዎዴ ኢሲ ሌዌ ቆሞ ጊዲዳ ኣዴይ ሌዌ ማጫ ናዮ ማቾ ኤኪዴስ፤
EXO 2:2 ኢዛ ቃንꬃታዳ ኣዴ ና ዬላዱስ። ናዚካ ማላ ሎኦ ና ጊዲዳይሳ ቤያዳ ሄꬑ ኣጊና ቆታዱስ።
EXO 2:3 ጊዶ ኣቲን ኢዛ ሄሳፌ ዳሮ ቆታናስ ዳንዳዮንታይሳ ኤራዳ፥ ሻጫፌ ኬሼ ኢዛስ ዳዳዳ ሺዳን ሜሻዳ፥ ናዛ ኢዛ ጊዶን ዎꬃዳ ናይሌ ሻፋ ዶናን ዱሬሳ ጌቴቲዛ ማታ ጊዶን ዎꬃዱስ።
EXO 2:4 ኢዛ ሚቼያ ኢዛ ቦላ ኣዚ ሃናናኮ ቤያናስ ሃሆን ኤቃዳ ጼላዉስ።
EXO 2:5 ጊብጼ ካዎ ናያ ቦላ ሜጬታናስ ናይሌ ሻፋ ዎꬋዱስ፤ ኢዚ ማጫ ኣይሌቲካ ሃꬃ ዶናን ያኔ ሃ ሄሜቴቴስ፤ ኢዛ ኬሼዛ ዱሬሳ ጌቴቲዛ ማታ ጊዶን ቤያዳ፥ ባዳ ኤካዳ ያና ማላ ባ ኣይሌዮ ኪታዱስ፤
EXO 2:6 ኬሼዛ ዶያዳ ሄ ጉꬃ ናዛ ቤያዱስ። ኢዚ ዬኪዛ ጊሻስ ኢዛስ ቃꬌታዳ፥ «ሃይሲ ኢብራዌታ ጉꬃ ናይታፔ ኢሳ ጊዶንታ ኣጌና» ጋዱስ።
EXO 2:7 ሄ ዎዴ ኢዛ ሚቼያ ካዋ ናዮ፥ «ኔስ ሃ ናዛ ꬋንꬃናስ ኢብራዌታፔ ኢሲ ማጫስ ኤሃናስ ቦ?» ጋዳ ኦይቻዱስ።
EXO 2:8 ሂስቲን ኢዛ፥ «ኤ፥ ባ» ጋዱስ። ናያ ባዳ ሄ ናዛ ኣዮ ኤሃዱስ።
EXO 2:9 ካዎዛ ናያ ሄ ማጫሳዮ፥ «ሃይሳ ናዛ ኤፋዳ ታስ ꬋንꬃሻ፤ ታኒ ኔስ ዳሞዛ ቃንጻና» ጋዱስ። ማጫሳያ ናዛ ኤፋዳ ꬋንꬃ ዲቻዱስ።
EXO 2:10 ናዚ ዲጪን ካዎ ናይኮ ኢዛ ኤሂን ኢዚ ኢዚስ ና ጊዲዴስ፤ «ታኒ ኢዛ ሃꬃፌ ኬሳዲስ» ጋዳ ኢዛ ሙሴ ጋ ሱንꬃዱስ።
EXO 2:11 ሙሴይ ዲጪዲ ጊታ ጊዲዲ ኢሲ ጋላስ ባ ኣሳይ ዲዛሶ ቢዲ ኢስቲ ዴጾ ኦሶ ኦꬂሺን ቤኢዴስ። ኢሲ ጊብጼ ቢታ ኣሲ ኢዛ ኣሳታ ኢብራዌታፔ ኢሳ ዋꬊሺን ቤኢዴስ።
EXO 2:12 ኢዚ ያኔ ሃ ጼሊን ኦኒካ ባይንዳይሳ ቤኢዲ ሄ ጊብጼ ኣዴዛ ዎꬊዲ ኣጬ ጊዶን ካሺ ቆቲዴስ።
EXO 2:13 ዎንቴꬃ ጋላስ ኬዚዲ ናምኡ ኢብራዌቲ ባ ጋርሳን ዋꬌቲዛይታ ቤኢዴስ። ቆሂዛይሳ ኢዚ፥ «ኔኒ ኔ ኣስ ጊዲዳ ኢብራዌዛ ኣይስ ዋꬋይ?» ጊ ኦይቺዴስ።
EXO 2:14 ሄ ኣዴዚካ፥ «ኔና ኑ ቦላ ጎዳኔ ዳና ሂስቲዳይ ኦኔ? ኔኒ ጊብጼ ኣዴዛ ዎꬊዳይሳ ማላ ታናካ ዎꬋና ቆፓይ?» ጊን ሙሴይ፥ «ታኒ ኦꬂዳይሲ ኤሬቲቺዴስ» ጊ ባቢዴስ።
EXO 2:15 ካዎዚ ሄሳ ሲዪዲ ሙሴ ዎꬋናስ ኮዪዴስ፤ ጊዶ ኣቲን ሙሴይ ካዋፔ ቤቲዲ ሚዲያሜ ቢታን ዳናስ ቢዲ ኢሲ ሃꬃ ኦላ ዶናን ኡቲዴስ።
EXO 2:16 ሄ ዎዴ ኢሲ ሚዲያሜ ቄሴስ ላፑን ማጫ ናይቲ ዴቴስ፤ ኢስቲ ሄ ሃꬃ ኦላኮ ባ ኣዋ ዶርሳታ ሃꬅ ኡሻናስ ዪዲ ጎንጌን ሃꬅ ዱቂ ኩንꬂዳ።
EXO 2:17 ሄሚዛይቲ ዪዲ ማጫ ናይታ ጎዲዳ፤ ጊዶ ኣቲን ሙሴይ ዴንዲ ኤቂዲ ኢስታ ኣሺዴሲኔ ኢስታ ዶርሳታ ሃꬅ ኡሺዴስ።
EXO 2:18 ኢስቲ ባ ኣዋ ዮቶሬኮ ቢን ኢዚ፥ «ሃች ዋኒ ኤሶን ዪዴቲ?» ጊ ኦይቺዴስ።
EXO 2:19 ኢስቲ ዛሪዲ፥ «ኢሲ ጊብጼ ቢታ ኣዴ ዳይሲ ኑና ሜሄ ሄሚዛይታፔ ኣሺዴስ፤ ቃሴካ ኑስ ሃꬄካ ዱቂዲ ኑ ዶርሳታካ ኡሺዴስ» ጊዳ።
EXO 2:20 ሂስቲን ኢዚ ባ ማጫ ናይታ፥ «ሃኢ ኢዚ ኣዋን ዲዜ? ኢንቴ ሄ ኣዴዛ ኣይስ ሄን ኣጊዴቲ? ኣኔ ኢዛ ጼይጊቴ፤ ዪዲ ካꬅ ሞ» ጊዴስ።
EXO 2:21 ሙሴይካ ሄ ኣዴዛራ ሄን ዳናስ ዶሲዴስ፤ ኣዴዚካ ባ ናዮ ጺፖሮ ሙሴስ ማቾ ሂስቲ ኢሚዴስ።
EXO 2:22 ጺፖራ ኣዴ ና ዬሊን ሙሴይ ናዛ፥ «ታኒ ኣሳ ቢታን ቤቴ ኣሳ» ጊሼ ጌርሾሜ ጊ ሱንꬂዴስ።
EXO 2:23 ሙሴይ ሚዲያሜ ቢታን ዲዛ ዳሮ ላይꬃታ ጋርሳን ጊብጼ ካዎይ ሃይቂዴስ። ኢስራኤሌ ኣሳይ ባ ኣይሌቴꬃፌ ዴንዲዳይሳን ኦሊዳኔ ዋሲዳ፤ ኣይሌቴꬃ ዋዬይ ዳሪን ኢስቲ ዋሲዳ ዋሶይ ፑዴ ጾሳኮ ጋኪዴስ።
EXO 2:24 ጾሲ ኢስታ ኦሌዛኔ ኢስታ ዋሶዛ ሲዪዲ ኢዚ ኣብራሃሜራ፥ ዪሳቃራኔ ያቆቤራ ጫቂዳ ጫቆ ቃላ ዩሺ ቆፒዴስ።
EXO 2:25 ሄሳ ጊሻስ ጾሲ ኢስራኤሌ ናይታ ጼሊዲ ኢስታ ሃኖቴꬅ ቆፒዴስ።
EXO 3:1 ሙሴይ ሚዲያሜ ቢታ ቄሴ፥ ባ ቦሎ ዮቶሬ ዶርሳታ ሄሜስ፤ ኢዚ ዶርሳታ ላጊ ኤኪ ቢዲ ባዞ ቢታ ጋጻ ጋካናስ ኤፊዲ ሲና ጌቴቲዛ ጾሳ ዙማኮ ጋኪዴስ።
EXO 3:2 ሄን ጾሳ ኪታንቻይ ቄሪ ዎራ ጊዶን ኤጺዛ ታማ ላጮ ጊዶን ኢዛስ ቤቲዴስ፤ ዎራ ጊዶን ታማ ላጮይ ዲኮካ ታማይ ዎራ ሞንታይሳ ሙሴይ ቤኢዴስ።
EXO 3:3 ሄሳ ጊሻስ ሙሴይ፥ «ታኒ ጌዴ ባዳ ኣይስ ዎራይ ታማን ሜቴቶንታኮ ሃይሳ ኦራꬃ ሚሽ ኣኔ ቤያይስ» ጊ ቆፒዴስ።
EXO 3:4 ኢዚ ቤያናስ ጌዴ ቢሺን ጾሲ ቤኢዲ ዎራ ጊዶን ዲሼ ኢዛ፥ «ሙሴ! ሙሴ!» ጊ ጼይጊዴስ። ሙሴይካ፥ «ዬ!» ጊ ኮዪዴስ።
EXO 3:5 ጾሲ ኢዛ፥ «ሃ ሺቆፓ፤ ኔኒ ኤቂዳሶይ ጌሽ ጊዲዳ ጊሻስ ኔ ቶሆን ዲዛ ጫማ ኬሳ» ጊዴስ።
EXO 3:6 ቃሴካ ጾሳይ ኢዛ፥ «ታኒ ኔ ኣዋታ ኣብራሃሜ፥ ዪሳቃኔ ያቆቤ ጾሳ» ጊዴስ። ሂስቲን ሙሴይ ጾሳ ጼላናስ ባቢዳ ጊሻስ ባ ኣይፌሶ ካሚዴስ።
EXO 3:7 ቃሴካ ጎዳይ፥ «ታኒ ጊብጼ ቢታን ታ ኣሳይ ዋዪዛ ዋዬ ሎኤꬃ ቤያዳ፥ ኢስቲ ባ ጎዳታፔ ዴንዲዳይሳን ዋሲዛ ዋሶ ሲያዲሲኔ ኢስታ ዋዬ ኤራዲስ።
EXO 3:8 ሄሳ ጊሻስ ታኒ ኢስታ ጊብጼ ቢታ ኣሳታ ኩሼፔ ኣሻናሲኔ ሄ ቢታፌ ኢስታ ኬሳዳ፥ ኣሆኔ ሎኦ ቢታ ኤፋናስ ሃ ዱጌ ዎꬋዲስ። ሄ ቢታይ ማꬂኔ ኤሲ ጎጊዛ ቢታ፤ ሃኢ ሄ ቢታን ካናኔቲ፥ ሂቴቲ፥ ኣሞሬቲ፥ ፓሪዜቲ፥ ሂዌቲኔ ያቡሴታ ጌቴቲዛ ኣሳቲ ዴቴስ።
EXO 3:9 ሃኢ ኢስራኤሌ ናይታ ዋሶይ ታኮ ጋኪዴስ፤ ጊብጼ ቢታ ኣሳቲ ኢስታ ቆሂዛ ቆሆካ ታ ቤያዲስ፤
EXO 3:10 ሄሳ ጊሻስ ሃኢ ባ፤ ታ ኣሳታ፥ ኢስራኤሌ ናይታ ጊብጼፔ ኬሳና ማላ፥ ጊብጼ ካዎዛኮ ታኒ ኔና ኪታይስ» ጊዴስ።
EXO 3:11 ጊዶ ኣቲን ሙሴይ ጾሳስ፥ «ካዎዛኮ ባናሲኔ ኢስራኤሌ ናይታ ጊብጼፔ ኬሳናስ ታኒ ኦኔ?» ጊዴስ።
EXO 3:12 ጾሲካ ኢዛ፥ «ታኒ ኔናራ ጊዳና፤ ቃሴ ታኒ ኔና ኪቲዳይሳስ ማላታይ ሃይሳ፤ ኔኒ ሄ ኣሳ ጊብጼፔ ኬሲዳ ዎዴ ሃይሳ ዙማ ቦላን ኢንቴ ታስ ጾሳስ ጎይናና» ጊዴስ።
EXO 3:13 ሙሴይ ጾሳስ፥ «ጊዶ ኣቲን ታኒ ኢስራኤሌ ናይታኮ ባዳ ኢስታስ፥ ‹ኢንቴ ኣዋታ ጾሲ ታና ኢንቴኮ ኪቲዴስ› ጊኮ፥ ኢስቲ ታና፥ ‹ኢዛ ሱንꬂ ኦኔ?› ጊ ኦይቺኮ ሄ ዎዴ ታኒ ኢስታስ ኣይ ጋ ዮታኔ?» ጊዴስ።
EXO 3:14 ጾሲካ ሙሴስ፥ « ‹ታኒ ታናኮ፤ ሄሳ ጊሻስ ካሴካ ሃኢካ ዲዛ ጾሲ ታና ኢንቴኮ ኪቲዴስ› ጋዳ ዮታ» ጊዴስ።
EXO 3:15 ቃሴ ጾሲ ሙሴስ፥ «ኔኒ ኢስራኤሌ ናይታስ፥ ‹ጎዳይ ኢንቴ ኣዋታ ኣብራሃሜ፥ ዪሳቃኔ፥ ያቆቤ ጾሲ ኢዚ ታና ኢንቴኮ ኪቲዴስ› ጋ ዮታ፤ ሃይሲ ዬሌታፔ ዬሌታ ጋካናስ ታኒ ኤሬቲዛ ታ ሱንꬃ።
EXO 3:16 «ሄ ባዳ ኢስራኤሌ ጪማታ ሺሻዳ ጎዳ ኢንቴ ኣዋታ ኣብራሃሜ፥ ዪሳቃኔ ያቆቤ ጾሲ ታስ ቆንጪዲ፥ ‹ታኒ ኢንቴኮ ያዲስ፤ ጊብጼን ኢንቴ ቦላ ኣዚ ኦሴቲዳኮ ታኒ ቤያዲስ።
EXO 3:17 ታኒ ኢንቴና ጊብጼ ቢታ ዋዬፔ ኬሳዳ ፑዴ ማꬂኔ ኤሲ ጎጊዛ ካናኔታ፥ ሂቴታ፥ ኣሞሬታ፥ ፓሪዜታ፥ ሂዌታኔ ያቡሴታ ቢታ ኤፋና ጋዲስ› ጊዴስ» ጋዳ ዮታ።
EXO 3:18 «ኢስራኤሌ ጪማቲ ኔ ቃላ ሲያና፤ ሄሳፌ ጉዬ ኔኒኔ ሄ ጪማቲ ጊብጼ ካዎዛኮ ቢዲ ኢዛስ፥ ‹ጎዳ ኢብራዌታ ጾሳይ ኑስ ቆንጪዴስ። ሃኢ ኑኒ ሄꬑ ጋላሳ ኦጌ ባዞ ቢዲ ጎዳስ ኑ ጾሳስ ያርሾ ያርሻና ማላ ኑና ዬዳ› ጊቴ።
EXO 3:19 ጊዶ ኣቲን ታ ዎልቃራ ዬዲሶንታ ዲሺን ጊብጼ ካዎይ ኢንቴና ዬዶንታይሳ ታኒ ኤራይስ።
EXO 3:20 ሄሳ ጊሻስ ታኒ ታ ኩሼ ዬዳዳ ኢስታ ጊዶን ታኒ ኦꬂዛ ታ ማላታታ ኡባን ጊብጼ ኣሳ ሾጫና። ሄሳፌ ጉዬ ኢዚ ኢንቴና ዬዳና።
EXO 3:21 «ኢንቴ ኬኢዛ ዎዴ ጊብጼ ኣሳይ ኢንቴስ ኪያና ማላ ታ ኦꬃና ጊሻስ ኬኢሼ ሜላ ኩሼ ኬኤኬታ።
EXO 3:22 ኢብራዌ ማጫሳቲ ዉሪ ባ ጉታ ጊብጼ ማጫሳታኔ ባ ሶን ዲዛ ጊብጼ ማጫሳታ ኦናኮካ ጊዲን ቢዲ ቢራ፥ ዎርቃኔ ኣዴ ናይቲኔ ማጫ ናይቲ ማይኣና ማይኦታ፥ ‹ኢሚቴ› ጊ ኦይቻና። ሄሳꬆ ኦꬂዲ ኢንቴ ጊብጼ ኣሳ ኣቆ ኡባ ቡሪ ኤኪዲ ኬዛና» ጊዴስ።
EXO 4:1 ሙሴይካ ጎዳስ፥ «ኢስቲ ታና ኣማኖንታ ኢጺኮ ዎይኮ ታኒ ዮቲዛይሳ ሲዮንታ ኢጺዲ፥ ‹ጎዳይ ኔስ ቆንጪቤና› ጊኮ ታ ዋኖ?» ጊዴስ።
EXO 4:2 ጎዳይ ኢዛ፥ «ሄሲ ኔ ኩሼን ዲዛይ ኣዜ?» ጊ ኦይቺዴስ። ኢዚካ፥ «ጉፌኮ» ጊዴስ።
EXO 4:3 ጎዳይካ ኢዛ፥ «ኣኔ ኢዛ ጋዴን ዬጋ» ጊዴስ። ሙሴይ ሄ ጉፌዛ ጋዴን ዬጊን ሾሽ ጊዲዴስ፤ ሂስቲን ሙሴይ ኢዛፔ ዎጺ ኪቺዴስ።
EXO 4:4 ሄሳፌ ጉዬ ጎዳይ ኢዛ፥ «ኔ ኩሼ ዬዳዳ ሾሻ ጎይና ኦይካ» ጊዴስ። ሙሴይ ዬዲዲ ሾሻ ጎይና ኦይኪን ሾሻዚ ኢዛ ኩሼን ሲሚዲ ጉፌ ጊዲዴስ።
EXO 4:5 ጎዳይ፥ «ሃይሲ ሃኒዳይሲ ኔ ኣዋታ ኣብራሃሜ፥ ዪሳቃኔ ያቆቤ ጾሲ ኔስ ቆንጪዳይሳ ኢስቲ ኣማናና ማላሳ» ጊዴስ።
EXO 4:6 ቃሴካ ጎዳይ ኢዛ፥ «ኔ ኩሼ ኔ ሾጳ ጊዶ ጌልꬃ» ጊን ሙሴይ ባ ኩሼ ባ ሾጳ ጊዶ ጌልꬂዴስ፤ ኢዚ ባ ኩሼዛ ሾጳፌ ኬሲዛ ዎዴ ኩሼዚ ቃራቲዲ ሻቻ ማላ ቦጺዴስ።
EXO 4:7 ጎዳይ ኢዛ፥ «ኔ ኩሼ ኔ ሾጳ ጊዶ ዛራ ጌልꬃ» ጊዴስ። ሂስቲን ሙሴይ ባ ኩሼ ባ ሾጳ ጊዶ ዛሪ ጌልꬂ ኬሲዛ ዎዴ ኢዛ ኩሼይ ሲሚዲ ሃንኮ ቦላ ማላ ጊዲዴስ።
EXO 4:8 ቃሴካ ጎዳይ ኢዛስ፥ «ኢስቲ ኔና ኣማኖንታ ኣጊኮ ኮይሮ ማላታ ኣማኖንታ ኢጺኮ፥ ናምኣንꬆዛ ኣማናና።
EXO 4:9 ጊዶ ኣቲን ኢስቲ ጾሲ ኦꬂዛ ሃ ናምኡ ማላታታ ኣማኖንታ ኣጊኮ ዎይኮ ኔኒ ዮቲዛይሳ ሲዮንታ ኢጺኮ፥ ናይሌ ሻፋፔ ሃꬅ ዱቃ ኤካዳ ቢታ ቦላ ጉሳ፤ ኔኒ ሻፋፔ ኤኪዳ ሃꬂ ቢታ ቦላ ሱꬅ ጊዳና» ጊዴስ።
EXO 4:10 ጊዶ ኣቲን ሙሴይ ጎዳስ፥ «ኣቤት ጎዶ! ታኒ ሃይሳፌ ካሴካ፥ ዎይኮ ኔኒ ኔ ኣይሌዛስ ታስ ዮቶሶፔ ሃ ሲሚንካ ታኒ ሎኤꬃ ሃሳያናስ ዳንዳዮንታ ኣስ ጊዲኪና?» ጊዴስ።
EXO 4:11 ጎዳይ ኢዛስ፥ «ኣሳስ ዶና ሜꬊዳይ ኦኔ? ኣስ ዱዴ፥ ዎይኮ ቱሌ ኦꬂዛይ ኦኔ? ጼላኔ ቆቄ ኦꬂዛይ ኦኔ? ታና ጎዳ ጊዲኪና?
EXO 4:12 ኔኒ ሃኢ ባ፤ ኔ ሃሳያና ማላ ታ ኔናራ ጊዳናኔ ኔና ማዳና፤ ኔኒ ዮታናይሳካ ታ ኔና ታማርሳና» ጊዴስ።
EXO 4:13 ጊዶ ኣቲን ሙሴይ ጎዳ፥ «ኣቤት ጎዶ! ሃይሳ ኦꬃናስ ሃራ ኣስ ኪታርኪ!» ጊዴስ።
EXO 4:14 ሄሳፌ ጉዬ ጎዳይ ሙሴ ቦላ ኬሂ ሃንቄቲዲ ኢዛ፥ «ሌዌ ባጋፌ ጊዲዳ ኔ ኢሻ ኣሮኔይ ዴስ ጊዴኔ? ኢዚ ሎኦ ሃሳያና ዳንዳይዛይሳ ታኒ ኤራይስ፤ ሃኢ ኢዚ ኔናራ ጋጋናስ ዪሼ ኦጌ ቦላን ዴስ፤ ኢዚ ኔና ቤኢዲ ኡፋዬታና።
EXO 4:15 ኔኒ ኢዛስ ዮታ፤ ኢዚ ዮታና ቃላካ ኔ ኢዛ ኤሪሳ፤ ታኒ ኢንቴና ናምኣታካ ሃሳያን ማዳናኔ ኢንቴ ኦꬃናይሳ ታማርሳና።
EXO 4:16 ኢዚ ኣሳስ ኔ ጊሻስ ዮታና፤ ሄሲካ ኢዚ ኔስ ኔ ዶና ማላ ጊዲን ኔ ኢዛስ ሃሳይዛ ጾሳ ማላ ጊዳና ጉሳ።
EXO 4:17 ማላታታ ኢዛን ኦꬃናስ ኔኒ ሃይሳ ጉፌዛ ኤካ» ጊዴስ።
EXO 4:18 ሄሳፌ ጉዬ ሙሴይ ባ ቦሎ፥ ዮቶሬኮ ሲሚ ቢዲ፥ «ሃኖ ጋካናስ ኣሳይ ፓጻ ዲዛኮ ቤያናስ ታኒ ጉዬ ታ ኣሳኮ ጊብጼ ቦ?» ጊዴስ። ዮቶሬይካ ሙሴ፥ «ኤ ባ፤ ሳሮን ጋካ» ጊዴስ።
EXO 4:19 ሙሴይ ሚዲያሜ ቢታን ዲሺን ጎዳይ ኢዛ፥ «ኔና ዎꬋናስ ኮዪዳ ኣሳቲ ዉሪ ሃይቂዳ ጊሻስ ጉዬ ጊብጼ ቢታ ሲማ ባ» ጊዴስ።
EXO 4:20 ሙሴይ ባ ማቺዮኔ ባ ኣቱማ ናይታ ሃሬ ቶጊሲ ኤኪዲ ጉዬ ጊብጼ ሲሚሼ ጾሳ ጉፌ ኦይኪ ቢዴስ።
EXO 4:21 ጎዳይ ሙሴ፥ «ኔኒ ጊብጼ ሲማዳ ቢዛ ዎዴ ታኒ ኔስ ኢሚዳ ዎልቃን ኔኒ ኦꬃና ማላታታ ኡባ ጊብጼ ካዎ ፓሮኔ ሲንꬃን ኔኒ ኦꬃናይሳ ባሎፓ። ሂስቲንካ ኢዚ ኣሳ ዬዶንታ ማላ ታኒ ኢዛ ዎዚና ሙሚሳና።
EXO 4:22 ሄ ዎዴ ታኒ ጎዳይ ጊዛይሳ ካዋስ፡ ኢስራኤሌይ ታስ ባይራ ና፤
EXO 4:23 ታ ናዚ ታስ ጎይናናስ ኔ ዬዳና ማላ ታኒ ኔስ ዮታዲስ ሺን ኔኒ ኢዛ ዬዶንታ ኢጻዳሳ፤ ሄሳ ጊሻስ፥ ‹ታኒ ኔስ ባይራ ናዛ ዎꬋና› ጊዴስ ጋዳ ዮታ» ጊዴስ።
EXO 4:24 ኦጌ ቦላ ኢማꬂ ሼምፒዛሶን ጎዳይ ሙሴራ ጋጊዲ ኢዛ ዎꬋናስ ኮዪዴስ።
EXO 4:25 ኢዛ ማቺያ ጺፖራይ ቃራ ሹች ኤካዳ ባ ናዛ ቃጻራዱስ። ቃጻራዳ ሄ ሹርቴዛ ሙሴ ቶሆ ቦቻዳ ሙሴ፥ «ኔኒ ታስ ቱሙ ሱꬃ ሚሺራ» ጋዱስ።
EXO 4:26 ሄሳ ጊሻስ ጎዳይ ኢዛ ዎꬎንታ ኣጊዴስ። ሄ ዎዴ ቃጻራ ጋሶን ኢዛስ፥ «ኔኒ ታስ ሱꬃ ሚሺራ» ጋዱስ።
EXO 4:27 ጎዳይ ኣሮኔ፥ «ኔኒ ሙሴራ ጋጋናስ ባዞ ባ» ጊን ኢዚ ቢዲ ሙሴራ ጾሳ ዙማ ቦላ ጋጊዲ ኢዛ ዬሪዴስ።
EXO 4:28 ሄሳፌ ጉዬ ሙሴይ ጎዳይ ባ ቦላ ኪቲዳ ቃላ ኡባ ቃሴካ ኦꬃና ማላ ባና ኣዛዚዳ ማላታታ ኡባ ኣሮኔስ ዮቲዴስ።
EXO 4:29 ሙሴይኔ ኣሮኔይ ቢዲ ኢስራኤሌ ጪማታ ኡባ ኢሲ ቦላ ሺሺዳ።
EXO 4:30 ኣሮኔይ ጎዳይ ሙሴስ ዮቲዳ ቃላ ኡባ ኢስታስ ዮቲዴሲኔ ማላታታ ሄ ኣሳ ሲንꬃን ኦꬂዴስ።
EXO 4:31 ኢስቲካ ኣማኒዳ። ጎዳይ ኢስታኮ ዪዳይሳኔ ኢስታ ዋዬ ቤኢዳይሳ ሲዪዳ ማላ ቢታ ቦላ ጉፋኒ ጎይኒዳ።
EXO 5:1 ሄሳፌ ጉዬ ሙሴይኔ ኣሮኔይ ጊብጼ ካዎዛኮ ቢዲ ኢዛስ፥ «ጎዳይ፥ ኢስራኤሌ ጾሲ፥ ‹ታ ኣሳይ ታስ ባዞን ባኣሌ ቦንቻና ማላ ዬዳ› ጊዴስ» ጊዳ።
EXO 5:2 ሂስቲን ካዎዚ፥ «ታኒ ኢዛስ ኣዛዜታዳ ኢስራኤሌ ዬዳናስ ሄ ጎዳይ ኢዚ ኦኔ? ታኒ ጎዳ ኤሪኬ፤ ኢስራኤሌካ ዬዲኬ» ጊዴስ።
EXO 5:3 ሄሳፌ ጉዬ ሙሴይኔ ኣሮኔይ፥ «ኢብራዌታ ጾሲ ኑናራ ጋጊዴስ። ሃኢ ኑኒ ጎዳስ፥ ኑ ጾሳስ ያርሾ ያርሻናስ ሄꬑ ጋላሳ ኦጌ ባዞ ጊዶ ባናስ ኑና ዬዳርኪ! ሂስቶንታ ኣጊኮ ኢዚ ኑና ኢታ ሃርጌን ዎይኮ ኦላን ዎꬋና» ጊዳ።
EXO 5:4 ጊዶ ኣቲን ጊብጼ ካዎይ፥ «ኢንቴኖ! ሙሴ! ኣሮኔ! ኣሳ ኣይስ ኦሶ ዲጌቲ? ሲሚዲ ኢንቴ ኦሶስ ቢቴ» ጊዴስ።
EXO 5:5 ካዎዚካ፥ «ሄኮ ቤኢቴ፥ ሃ ቢታን ኣሳይ ጮራቲዴስ፤ ቃሴ ኢንቴ ኣሳ ኦሶ ዲጌታ» ጊዴስ።
EXO 5:6 ሄ ጋላስ ካዎይ ኢስራኤሌ ኣሳ ጋርሳፌ ኣሳ ኦሲሲዛይታኔ ኢስታፌ ቦላራ ዲዛ ጊብጼ ሃላቃታ ሂዝጊ ኣዛዚዴስ።
EXO 5:7 «ሃራ ዎዴይሳ ማላ ጹቤ ኦꬂዛ ኡቱላ ኣሳስ ኤሂ ኢሞፍቴ፤ ኢስቲ ኡቱላ ባፔ ኮዪዲ ሺሼቶ፤
EXO 5:8 ጊዶ ኣቲን ኢስቲ ቆዳን ካሴይሳ ጊና ጹቤ ሜꬊዲ ሼꬋና ማላ ኣዛዚቴ፤ ካሴ ቆዳፔ ፓጪሶፒቴ፤ ኣይስ ጊኮ ኢስቲ ኣዛላ፤ ኢስታስ፥ ‹ኑኒ ኑ ጾሳስ ያርሾ ያርሻና ማላ ኑና ዬዳ› ጊዲ ዋሲዛይ ሄሳሳ።
EXO 5:9 ኢስቲ ኦሶን ሼካና ማላኔ ዎርዶ ሃሳያ ሲዮንታ ኣጋና ማላ ኢስታስ ኦሶ ዴጼꬂቴ» ጊዴስ።
EXO 5:10 ሄሳፌ ጉዬ ኢስራኤሌ ኣሳ ጋርሳፌ ኣሳ ኦሲሲዛይቲኔ ኢስታፌ ቦላራ ዲዛ ጊብጼ ሃላቃቲ ኬዚዲ ኣሳስ፥ «ካዎዚ፥ ‹ሃይሳፌ ጉዬ ታ ኢንቴስ ኡቱላ ሙሌካ ኢሚኬ።
EXO 5:11 ኢንቴ ኡቱላ ዴማና ዳንዳይዛሶፔ ኢንቴ ባጋራ ኮዪ ኤሂቴ ሺን ኢንቴ ካሴ ሼꬊዛ ጹቤ ቆዳይ ሙሌካ ፓጮፎ› ጊዴስ» ጊዳ።
EXO 5:12 ሂስቲን ኣሳይ ኡቱላ ሺሻናስ ጊብጼ ቢታ ኡባን ላሌቲዴስ።
EXO 5:13 ጊብጼ ሃላቃቲ ኢስታስ፥ «ካሴ ኢንቴስ ኡቱላ ኢሚዛ ዎዴ ኢንቴ ሃች ሃች ኦꬂዛይሳ ማላ ኦꬂቴ» ጊዲ ኢስታ ቦላ ጎዳቲዳ።
EXO 5:14 ኢስራኤሌ ናይታ ኦሲሲዛይታስ ዋና ሃላቃቲ፥ «ኢንቴ ካሴ ኦꬂዛይሳ ማላ ጹቤ ቃማ ዎይኮ ሃች ኣይስ ኦꬂ ዉርሲቤኬቲ?» ጊ ኦይቺዲ ዋꬊዳ
EXO 5:15 ሄሳፌ ጉዬ ኢስራኤሌ ናይታፔ ዶሬቲዲ ኣሳ ኦሲሲዛይቲ ቢዲ ካዎዛስ ዋሲዳ፤ ኢስቲ ኢዛስ፥ «ኑኒ ኔ ኣይሌታ ጊዲሺን ኑ ቦላ ሃይሳꬆ ኣዛስ ኦꬃይ?
EXO 5:16 ኔ ኣይሌታስ ኑስ ኡቱላ ኢሜቴና፤ ጊዶ ኣቲን፥ ‹ጹቤዛ ሜꬊቴ› ጊዲ ኑና ኔ ኣይሌታ ዋꬌቴስ ሺን ባላይ ኔ ኣሳ ቦላ ዴስ» ጊዳ።
EXO 5:17 ጊዶ ኣቲን ካዎዚ ኢስታ፥ «ሃ ኣዛላቲ! ኢንቴ ኣዛላታ! ሄሳ ጊሻሳ ኢንቴ ዛሪ ዛሪዲ፥ ‹ኑኒ ጎዳስ ያርሻናስ ባና ኑና ዬዳ› ጌታ።
EXO 5:18 ሃኢ ቢዲ ኦꬂቴ፤ ኢስቲ ኢንቴስ ኣይኮ ጋላባካ ኢሜቴና፤ ጊዶ ኣቲን ኢንቴ ካሴይሳፌ ፓጪሶንታ ጹቤዛ ሜꬊቴ» ጊዴስ።
EXO 5:19 ኢስራኤሌ ናይታፔ ዶሬቲዲ ኣሳ ኦሲሲዛይቲ፥ «ኢንቴ ሃች ሃች ሜꬊዛ ጹቤ ቆዳ ካሴይሳፌ ፓጪሶፒቴ» ጊዳ ጊን ኢስቲ ሜቶን ጌሊዳይሳ ኤሪዳ።
EXO 5:20 ኢስቲ ካዎዛ ሲንꬃፌ ኬዚዲ ሙሴይኔ ኣሮኔይ ኢስታራ ጋጋናስ ናጊዛይታ ዴሚዳ።
EXO 5:21 ኢስቲ፥ «ጾሲ ኢንቴና ጼሎ! ኢንቴ ቦላ ኢዚ ፒርዶ! ኢንቴ ኑና ካዎኒኔ ኢዛ ኦሳንቻታን ኢጺሲዴታ፤ ቃሴ ኢስቲ ኑና ዎꬋና ማላ፥ ማሻ ኢስታስ ኢሚዴታ» ጊዳ።
EXO 5:22 ሙሴይ ጎዳኮ ሲሚዲ፥ «ጎዶ፥ ኔኒ ሃ ኣሳ ቦላ ሜቶ ኣይስ ኤሃዲ? ኔኒ ታና ኪቲዳይ ሃይሳሴ?
EXO 5:23 ታኒ ኔ ሱንꬃን ካዋስ ሃሳያናስ ቢዳ ዎዴፔ ዶሚን ኢዚ ሃ ኣሳ ቦላ ሜቶ ኤሂዴስ። ቃሴ ኔኒካ ኔ ኣሳ ሙሌ ኣሻቤካ» ጊዴስ።
EXO 6:1 ሄሳፌ ጉዬ ጎዳይ ሙሴስ፥ «ታኒ ጊብጼ ካዎ ቦላ ኦꬃናይሳ ኔኒ ሃኢ ቤያና፤ ታ ዎልቃማ ቄሴ ጋሶን ኢዚ ኢስታ ዬዳና፤ ታ ዎልቃማ ቄሴፔ ዴንዲዳይሳን ኢዚ ኢስታ ባ ቢታፌ ኬሲ ጎዳና» ጊዴስ።
EXO 6:2 ጾሲ ቃሴካ ሙሴስ፥ «ታኒ ጎዳ፤
EXO 6:3 ታኒ ኡባ ዳንዳይዛ ጾሳ ጊዳዳ ኣብራሃሜስ፥ ዪሳቃሲኔ ያቆቤስ ቆንጫዲስ ሺን ታኒ፥ ‹ጎዳ› ጌቴቲዛ ታ ሱንꬃን ታናቴꬃ ኢስታ ኤሪሳቤኬ።
EXO 6:4 ቃሴ ታኒ ኢስታስ ኢስቲ ቤቴ ጊዲዲ ዴኢዳ ካናኔ ቢታ ኢስታስ ኢማናስ ታ ኢስታራ ጫቄታዲስ።
EXO 6:5 ቃሴካ ጊብጼ ኣሳይ ኣይሌ ሂስቲ ዋዪሲዳ ኢስራኤሌ ናይታ ዋሶ ሲያዳ ታ ጌሊዳ ጫቆ ቃላ ቆፓዲስ።
EXO 6:6 «ሄሳ ጊሻስ ኔኒ ኢስራኤሌ ናይታስ፥ ‹ታኒ ጎዳ፤ ታኒ ኢንቴና ጊብጼ ኣሳ ቆሆፔ ኬሳና፤ ታኒ ኢንቴና ኢስታ ኣይሌቴꬃፌካ ጎቻ ኬሳና፤ ቃሴ ታኒ ኢንቴና ታ ጊታ ዎልቃኒኔ ዱማ ዱማ ፒርዳን ዎዛና።
EXO 6:7 ታኒ ኢንቴና ታ ዴሬ ሂስታና፤ ታኒ ኢንቴ ጾሳ ጊዳና። ሄ ዎዴ ታ ኢንቴና ጊብጼ ኣሳ ኣይሌቴꬃፌ ኬሲዳ ኢንቴ ጎዳ ሜርና ጾሳ ጊዲዳይሳ ኢንቴ ኤራና።
EXO 6:8 ቃሴ ታኒ ኢንቴና ኣብራሃሜስ፥ ዪሳቃሲኔ ያቆቤስ ኢማና ጋዳ ታ ኩሼ ዴንꬃዳ ጫቂዳ ቢታ ኤሃና፤ ሄ ቢታ ታኒ ኢንቴስ ኢንቴ ጋዴ ሂስታ ኢማና፤ ታኒ ጎዳ› ጋ» ጊዴስ።
EXO 6:9 ሙሴይ ሄሳ ኢስራኤሌ ናይታስ ዮቲዴስ ሺን ኢስቲ ኡፋይስ ቃንጺዳ ጊሻሲኔ ኢታ ኣይሌቴꬃፌ ዴንዲዳይሳን ኢስታ ዎዚናይ ሜቂዳ ጊሻስ ኢስቲ ኢዛ ቃላ ሲዪቤቴና።
EXO 6:10 ሄሳፌ ጉዬ ጎዳይ ሙሴ፥
EXO 6:11 «ሄ ባዳ ጊብጼ ካዋስ፥ ‹ኢስራኤሌ ናይታ ኔ ቢታፌ ኬሳ ዬዳ› ጋዳ ዮታ» ጊዴስ።
EXO 6:12 ጊዶ ኣቲን ሙሴይ ጎዳስ፥ «ኢስራኤሌ ናይቲ ታይሳ ሲዮንታ ኢጺዳ ሺን ታኒ ዶናይ ቢርሾንታ ኣስ ጊዲሺን ካዎይ ታ ጊዛይሳ ዎስቲ ሲያኔ?» ጊዴስ።
EXO 6:13 ጎዳይ ሙሴኔ ኣሮኔ፥ «ቢዲ ኢንቴ ኢስራኤሌ ኣሳ ጊብጼፔ ኬሳና ማላ ታኒ ኢንቴና ዬዲዳይሳ ኢስራኤሌ ኣሳሲኔ ጊብጼ ካዎስ ዮቲቴ» ጊ ኣዛዚዴስ።
EXO 6:14 ሃይሳፌ ካሊ ዲዛይቲ ኢስታ ኬꬃ ኬꬃ ሃላቃታ። ኢስራኤሌስ ባይራ ና ኦሮቤሌ ኣቱማ ናይቲ፥ ሄኖኬ፥ ፓሉ፥ ሄጺሮሜኔ ካርሜ፤ ሃይታንቲ ኦሮቤሌ ቆሞታ። ኢስታ ሶ ኣሳታ ሃላቃቲ ሃይታ።
EXO 6:15 ቃሴ ሲሞና ኣቱማ ናይቲ፥ ዪሙኤሌ፥ ያሚኔ፥ ኦሃዴ፥ ያኪኔ፥ ጾሃሬኔ ካናኔ ቢታ ማጫሳታፔ ዬሌቲዳ ሳኦሌ፤ ሃይቲ ሲሞና ቆሞታ።
EXO 6:16 ሌዌ ባጋቲ ባ ዬሌታ ማራ ማላ ጌርሾኔ፥ ቃኣቴኔ ሜራሬ። ሌዌይ 137 ላይꬅ ዴኢዴስ።
EXO 6:17 ጌርሾኔ ኣቱማ ናይቲ ባ ቆሞን ቆሞን ሊቢናኔ ሺምኤ ጌቴቴቴስ።
EXO 6:18 ቃሄቴ ኣቱማ ናይቲ ኣሚራሜ፥ ዪጺሃሬ፥ ኬብሮኔኔ ኡዚኤሌ። ቃኣቴይ 133 ላይꬅ ዴኢዴስ።
EXO 6:19 ሜራሬ ኣቱማ ናይቲ ማሂሌኔ ሙሼ ጌቴቲዛይታ። ባ ዬሌታ ማራን ሌዌ ዛሬቲ ሃይታንታ።
EXO 6:20 ኣሚራሜይ ባ ኣዋ ሚቼዮ ዮካቤዶ ማቾ ኤኪዴስ። ኢዛካ ኢዛስ ኣሮኔኔ ሙሴ ዬላዱስ። ኣሚራሜይ 137 ላይꬅ ዴኢዴስ።
EXO 6:21 ዪጺሃሬ ኣቱማ ናይቲ፥ ቆሬ፥ ኔፌጌኔ ዚኪሬ።
EXO 6:22 ኡዚኤሌ ኣቱማ ናይቲ፥ ሚሻኤሌ፥ ኤልጻፋኔኔ ሲቲሬ።
EXO 6:23 ኣሮኔይ ኣሚናዳቤ ናዮ፥ ኔኣሶኔ ሚቼዮ ኤሊሼቦ ማቾ ኤኪዴስ። ሂስቲን ኢዛ ኢዛስ ናዳቤ፥ ኣቢሁ፥ ኤልኤዜሬኔ ኢታማሬ ዬላዱስ።
EXO 6:24 ቆሬ ኣቱማ ናይቲ፥ ኣሲሬ፥ ሂልቃናኔ ኣቢያሳፌ፤ ሃይታንቲ ቆሬ ቆሞታስ ኣዋታ።
EXO 6:25 ኣሮኔ ና ኤልኤዜሬይ ፑቲኤሌ ናይታፔ ኢሲኒዮ ማቾ ኤኪዴስ፤ ኢዛካ ኢዛስ ፊኒሃሴ ዬላዱስ። ሃይታንቲ ባ ቆሞን ቆሞን ሌዌ ኬꬃ ኣሳ ሃላቃታ።
EXO 6:26 ጎዳይ፥ «ጊብጼ ቢታፌ ኢስራኤሌ ናይታ ኢስታ ጩጋን ጩጋን ኬሲቴ» ጊዲ ኣዛዚዳይ ሃይታ ሙሴኔ ኣሮኔ።
EXO 6:27 ኢስራኤሌ ናይታ ጊብጼ ቢታፌ ኬሲዛይሳ ጊብጼ ካዋስ ዮቲዳይቲ ሙሴኔ ኣሮኔ።
EXO 6:28 ጎዳይ ጊብጼን ሙሴስ ዮቲዛ ዎዴ ኢዛስ፥
EXO 6:29 «ታኒ ጎዳ፤ ታኒ ኔስ ዮቲዛይሳ ኡባ ኔኒ ጊብጼ ካዋስ ዮታ» ጊዴስ።
EXO 6:30 ሙሴይ ቃሴ ጎዳስ፥ «ታኒ ዶናይ ቢርሾንታ ኣስ ጊዲዳ ጊሻስ ካዎይ ታኒ ዮቲዛይሳ ዎስቲ ሲያኔ?» ጊዴስ።
EXO 7:1 ሄሳፌ ጉዬ ጎዳይ ሙሴስ፥ «ቤያ፤ ታኒ ኔና ጊብጼ ካዋስ ጾሳ ማላ ኦꬃዲስ፤ ኔ ኢሻ ኣሮኔይ ኔ ዶና ጊዲዲ ኔ ጊሻስ ሃሳያና፤
EXO 7:2 ታኒ ኔና ኣዛዚዳይሳ ኡባ ኔ ኢሻ ኣሮኔስ ዮታንዳሳ፤ ካዎዚ ኢስራኤሌ ናይታ ባ ቢታፌ ኬሲ ዬዳና ማላ ኢዚ ዮታና።
EXO 7:3 ጊዶ ኣቲን ታኒ ካዎዛ ዎዚና ሚንꬃና፤ ታኒ ጊብጼ ቢታን ታ ማላታኔ ማላሊሲዛ ሚሽ ዳርሳ ኦꬂኮካ፥
EXO 7:4 ኢዚ ኢንቴ ዮቲዛይሳ ሲዬና። ሄ ዎዴ ታኒ ታ ኩሼ ጊብጼ ኣሳ ቦላ ዴንꬃና፤ ታኒ ታ ዴሬታ ኢስራኤሌ ናይታ ዎልቃማ ፒርዳን ጊብጼፔ ኬሳና።
EXO 7:5 ቃሴ ጊብጼቲ ታኒ ታ ቄሴ ጊብጼ ኣሳ ቦላ ዴንꬃዳ ኢስራኤሌ ናይታ ኢስታ ጊዶፌ ኬሲዛ ዎዴ ታኒ ጎዳ ጊዲዳይሳ ኢስቲ ኤራና» ጊዴስ።
EXO 7:6 ሙሴይኔ ኣሮኔይ ጎዳይ ኢስታ ኣዛዚዳ ማላ ኦꬂዳ።
EXO 7:7 ኢስቲ ካዎዛስ ዮቲዛ ዎዴ ሙሴስ ላይꬃይ ኦስፑን ታማ፤ ኣሮኔይ ቃሴ 83 ላይꬃ ኣሳ።
EXO 7:8 ጎዳይ ሙሴኔ ኣሮኔ፥
EXO 7:9 «ካዎይ ኢንቴና፥ ‹ኣኔ ማላታ ታና ቤሲቴ› ጊኮ ኔኒ ኣሮኔ፥ ‹ኔ ጉፋ ኤካዳ ካዎዛ ሲንꬃን ዬጋ› ጋ፤ ሂስቲኮ ኢዚ ሾሽ ጊዳና» ጊዴስ።
EXO 7:10 ሂስቲን ሙሴይኔ ኣሮኔይ ካዎዛኮ ጌሊዲ ጎዳይ ኢስታ ኣዛዚዳ ማላ ኦꬂዳ፤ ኣሮኔይ ባ ጉፌ ካዎዛ ሲንꬃኒኔ ዳናታ ሲንꬃን ዬጊን ጉፌዚ ሾሽ ጊዲዴስ።
EXO 7:11 ሄሳፌ ጉዬ ካዎዚ ዳሮ ኤራንቻታኔ ቢቲዛይታ ጼይጊሲን ጊብጼ ዴሬ ማሮቲካ ባ ዴሬን ሄሳꬆ ኦꬂዳ።
EXO 7:12 ኢስቲ ዉሪካ ባ ጉፌ ጉፌ ጋዴን ዬጊን ጉፌቲ ዉሪካ ሾሽ ጊዲዳ ሺን ኣሮኔ ጉፌያ ኢስታ ጉፌታ ኡባ ሚታዱስ።
EXO 7:13 ጊዲኮካ ጎዳይ ዮቲዳ ማላ ካዎዛ ዎዚናይ ሚኒዳ ጊሻስ ኢዚ ኢስታ ዮኦ ሲዮንታ ኢጺዴስ።
EXO 7:14 ጎዳይ ሙሴስ፥ «ካዎዛ ዎዚናይ ሙሚን ኣሳ ኢዚ ዬዶንታ ኢጺዳ ጊሻስ፥
EXO 7:15 ካዎዚ ሻፋ ቢዛ ዎዴ ማላዶራ ኔኒ ኢዛኮ ባዳ ኢዛራ ጋጋና ማላ ኣባዬ ሻፋ ዶናን ኤቃ፤ ሄ ባሼ ሾሻን ላሜቲዳ ጉፌዛ ኦይካ ኤካዳ ባ።
EXO 7:16 ኔኒ ኢዛ፥ ‹ጎዳ ኢብራዌታ ጾሳይ ኔና፥ «ባዞን ታስ ጎይናና ማላ ታ ኣሳ ዬዳ» ጊዲ ታና ኔኮ ኪቲዴስ ሺን ሃኖ ጋካናስ ኔኒ ኤሮ ጋቤካ።
EXO 7:17 ጎዳይ፥ «ታኒ ጎዳ ጊዲዳይሳ ኔኒ ሃይሳን ኤራና» ጊዴስ። ታኒ ኣባዬ ሻፋ ሃꬃ ታ ኩሼን ዲዛ ጉፌዛን ሾጪኮ ሃꬃይ ሱꬃን ላሜታና።
EXO 7:18 ኣባዬ ሻፋ ሞሌይካ ሃይቃና፤ ሻፋይካ ጺንቃና፤ ጊብጼቲ ሄ ሻፋ ሃꬃ ኡያናስ ዳንዳዬቴና› ጋዳ ዮታ» ጊዴስ።
EXO 7:19 ጎዳይ ሙሴስ፥ «ኔኒ ኣሮኔስ፥ ‹ኔ ጉፌ ኦይካዳ ጊብጼ ሃꬃታ ቦላ፥ ሻፋታ ቦላ፥ ዛራ ሃꬃታ ቦላኔ ኤሊዳ ሃꬂ ዲዛሶ ኡባ ቦላ ኔ ኩሼ ፒዲሳ› ጋ፤ ኢዚ ባ ኩሼ ፒዲሲኮ ሃꬂ ዉሪ ሱꬃን ላሜታና፤ ጊብጼ ቢታ ኡባን፥ ሃራይ ኣቶሺን፥ ሚꬃፌኔ ሹቻፌ ዎጪ ኬሲዳ ሃꬅ ቲጊዛ ሚሻታ ኡባን ሱꬂ ኩማና» ጊዴስ።
EXO 7:20 ሙሴይኔ ኣሮኔይ ጎዳይ ኣዛዚዳ ማላ ኦꬂዳ። ካዎዛ ሲንꬃኒኔ ዳናታ ሲንꬃን ኣሮኔይ ባ ጉፌዛ ዴንꬂዲ ሻፋ ሃꬃ ሾጪን ሃꬂ ዉሪ ሱꬃን ላሜቲዴስ።
EXO 7:21 ሄ ሻፋ ሃꬃ ጊዶን ዲዛ ሞሌቲ ሃይቂዳ፤ ሻፋ ሃꬂ ኬሂ ጺንቂዳ ጊሻስ ጊብጼ ኣሳይ ኡያናስ ዳንዳይቤና። ጊብጼ ቢታይ ኩሜꬅ ሱꬅ ጻላ ጊዲዴስ።
EXO 7:22 ጊዶ ኣቲን ጊብጼ ማሮቲ ባ ቢታን ኢዛꬆካ ኦꬂዳ፤ ጎዳይ ዮቲዳ ማላካ ካዎዛ ዎዚናይ ሚኒዳ ጊሻስ ሙሴይኔ ኣሮኔይ ዮቲዳይሳ ሲዮንታ ኢጺዴስ።
EXO 7:23 ሄሳፌ ጉዬ ካዎዚ ሄሳስ ኣይኮ ባቦንታ ዲሼ ባ ሶ ሲሚ ቢዴስ።
EXO 7:24 ጊብጼ ኣሳይ ዉሪ ኣባዬ ሻፋ ሃꬃ ኡያናስ ዳንዳዮንታ ጊሻስ፥ ኡዪዛ ሃꬅ ዴማናስ ኣባዬ ሻፋ ኣቻን ኦላ ቦኪዳ።
EXO 7:25 ጎዳይ ሃꬃ ሱꬃን ላሚን ላፑን ጋላስ ጊዲዴስ።
EXO 8:1 ሄሳፌ ጉዬ ጎዳይ ሙሴ፥ «ጊብጼ ካዋኮ ባዳ፥ ‹ጎዳይ ኔና ሂዝጌስ ጋ፤ ታስ ጎይናና ማላ ታ ኣሳ ዬዳ፤
EXO 8:2 ኔኒ ኢስታ ዬዶንታ ኢጺኮ ታኒ ኔ ቢታ ኡባ ሞሪዛ ኦቃርስ ዬዳና።
EXO 8:3 ኣባዬ ሻፋን ኦቃርሲ ኩሚ ኣꬊዲ ኔ ሶ፥ ኔ ኣቂዛ ሶ፥ ኔ ኣርሳ ቦላ፥ ዳናታ ኬꬃ ጊዶ ጌላና፤ ኔ ኣሳ ቦላ ኬዛና፤ ኔ ጮጬን ኔ ሙኑቃ ጎንጌታንካ ጌላና።
EXO 8:4 ኦቃርሳቲ ኔ ቦላ፥ ኔ ኣሳ ቦላኔ ዳናታ ኡባ ቦላ ኬዛና› ጋዳ ዮታ» ጊዴስ።
EXO 8:5 ሄሳፌ ጉዬ ጎዳይ ሙሴ፥ «ኔኒ ኣሮኔ፥ ‹ኔ ጉፌዛ ኤካዳ፥ ሻፋታ ቦላ፥ ዛራ ሃꬃታ ቦላኔ ኤሊዳ ሃꬃታ ቦላ ኔ ኩሼ ፒዲሳዳ ኦቃርሲ ጊብጼ ቢታ ቦላ ኬዛና ማላ ኦꬃ› ጋዳ ዮታ» ጊዴስ።
EXO 8:6 ሂስቲን ኣሮኔይ ጊብጼ ሃꬃታ ቦላ ባ ኩሼ ፒዲሲን ኦቃርሲ ኬዚዲ ጊብጼ ቢታ ማይኢዴስ።
EXO 8:7 ጊዶ ኣቲን ማሮቲካ ባንታ ቢታን ጊብጼን ኦቃርሲ ኬዛና ማላ ኢዛꬆካ ኦꬂዳ።
EXO 8:8 ካዎዚ ሙሴኔ ኣሮኔ ጼይጊሲዲ፥ «ሃይሳ ኦቃርሳ ታፔኔ ታ ኣሳ ቦላፌ ዲጋና ማላ ጎዳ ኢንቴ ዎሲቴ፤ ሂስቲኮ ጎዳስ ያርሻና ማላ ታኒ ኣሳ ዬዳና» ጊዴስ።
EXO 8:9 ሂስቲን ሙሴይ ካዎዛ፥ «ካዎ ኔስ ቶ! ኦቃርሲ ኔፔኔ ኔ ሶፔ ꬋይዲ ኣባዬ ሻፋን ጻላ ኣታና ማላ ታኒ ኔስ፥ ዳናታሲኔ ኔ ኣሳስ ዎሳና ጋላስ ኔ ዮታ» ጊዴስ።
EXO 8:10 ሂስቲን ካዎዚ፥ «ዎንቶ ጊዶ» ጊዴስ። ሙሴይካ፥ «ጎዳ ኑ ጾሳ ማላይ ኦኒካ ባይንዳይሳ ኔኒ ኤራና ማላ ኔ ጊዳ ማላ ኦꬃና።
EXO 8:11 ሄ ኦቃርሳይ ኔፔ፥ ኔ ኬꬃፌ፥ ዳናታፔኔ ኔ ኣሳፔ ꬋያና፤ ኢስቲ ኣባዬ ሻፋን ጻላ ኣታና» ጊዴስ።
EXO 8:12 ሙሴይኔ ኣሮኔይ ካዋ ኣቻፌ ኬዚዲ ካዎዛ ቦላ ኢዚ ኤሂዳ ኦቃርሳታ ጊሻስ ሙሴይ ጎዳኮ ዋሲዴስ።
EXO 8:13 ጎዳይካ ሙሴይ ኦይቺዳ ማላ ኦꬂዴስ፤ ኦቃርሲ ሶን፥ ካሬኒኔ ዴምባን ዲዛይሲ ዉሪ ሃይቂዴስ።
EXO 8:14 ጊብጼ ኣሳይ ኦቃርሳ ሺሺ ሺሺዲ ኮሪዴስ፤ ቢታይካ ጺንቆን ዜቂዴስ።
EXO 8:15 ጊዶ ኣቲን ካዎዚ ጉꬃ ፔቃ ዴሚዳ ዎዴ ባ ዎዚና ሚንꬂዴስ፤ ጎዳይ ዮቲዳ ማላካ ኢዚ ሙሴይኔ ኣሮኔይ ዮቲዳ ዮኦዛ ሲዮንታ ኢጺዴስ።
EXO 8:16 ሄሳፌ ጉዬ ጎዳይ ሙሴ፥ «ኔኒ ኣሮኔስ፥ ‹ኔ ጉፌዛራ፥ ቢታ ጉዱላ ሾጫ› ጋ፤ ኢዚ ሾጪኮ ጊብጼ ቢታ ኡባን ጉዱላይ ጩች ጊዳና» ጊዴስ።
EXO 8:17 ሂስቲን ኢስቲ ሄሳꬆ ኦꬂዳ፤ ኣሮኔይ ባ ጉፌ ኤኪዲ ጉፌዛራ ቢታ ጉዱላ ሾጪን ኣሳኔ ሜሄ ኡባ ቦላ ጩቺ ኬዚዴስ። ጊብጼ ቢታን ሃ ጋጻፔ ሄኒ ጋጻ ጋካናስ ጉዱላይ ዉሪ ጩች ጊዲዴስ።
EXO 8:18 ማሮቲካ ባ ቢታን ኢዛꬆ ኦꬃናስ ፓጪን ኢስታስ ዳንዳዬቲቤና። ጩቻይ ኣሳ ቦላኔ ሜሄ ቦላ ኩሚዴስ።
EXO 8:19 ማሮቲካ ካዎዛስ፥ «ሃይሲ ጾሳ ኦሶኮ!» ጊዳ። ጊዶ ኣቲን ካዎዛ ዎዚናይ ሚኒዴስ፤ ጎዳይ ጊዳ ማላካ ኢዚ ኢስቲ ዮቲዛይሳ ሲዮንታ ኢጺዴስ።
EXO 8:20 ጎዳይ ሙሴስ፥ «ዎንታ ማላዶራ ዴንዳዳ፥ ካዎዚ ሻፋ ቢሺን ኢዛራ ጋጋዳ ኔኒ ኢዛ፥ ‹ጎዳይ ታስ ጎይናና ማላ ታ ኣሳ ዬዳ፤
EXO 8:21 ኔኒ ታ ኣሳ ዬዶንታ ኢጺኮ፥ ታኒ ኔ ቦላ፥ ዳናታ ቦላ፥ ኔ ኣሳ ቦላኔ ኔ ኬꬃታ ጊዶ ዎልቃማ ቦጼ ዬዳና፤ ጊብጼ ኣሳ ኬꬃኒኔ ኢስቲ ዲዛ ቢታ ኡባን ቦጼይ ኩማና።
EXO 8:22 ጊዶ ኣቲን ታኒ ጎዳይ ሃ ቢታን ዲዛይሳ ኔኒ ኤራና ማላ ሄ ጋላስ ታ ኣሳይ ዲዛ ጌሴሜ ቢታን ቦጼይ ጋኮንታ ማላ ታኒ ቴቃዳ ኢስታ ቢታ ናጋና።
EXO 8:23 ታኒ ኔ ኣሳፔ ታ ኣሳ ዱማ ሻካና፤ ሃይሳን ማላታ ዎንቶ ኦꬃና› ጊዴስ ጋዳ ዮታ» ጊዴስ።
EXO 8:24 ሄሳፌ ጉዬ ጎዳይ ጊዳ ማላ ኦꬂዴስ፤ ካዎዛ ሶኒኔ ኢዛ ዳናታ ሶን ዳሮ ዎልቃማ ቦጼይ ኩሚዴስ፤ ኩሜꬃ ጊብጼ ቢታ ኡባ ኢሲዴስ።
EXO 8:25 ሄ ዎዴ ካዎዚ ሙሴኔ ኣሮኔ ጼይጊሲዲ፥ «ቢቴ፤ ሃይሳ ሃ ቢታን ኢንቴ ጾሳስ ያርሺቴ» ጊዴስ።
EXO 8:26 ጊዶ ኣቲን ሙሴይ፥ «ሄሲ ሎኦ ዴና፤ ኑኒ ጎዳ ኑ ጾሳስ ሺሺዛ ያርሾቲ ጊብጼ ኣሳስ ቱና ሚሽ ጊዳና፤ ኑኒ ኢስታ ቱኒሲዛ ያርሾታ ኢስቲ ጼሊሺን ያርሺኮ፥ ኢስቲ ኑና ሹቻን ጫዴቴኔ?
EXO 8:27 ኑኒ ጎዳ ኑ ጾሳስ ያርሾታ ሺሻናስ ኢዚ ኑና ኣዛዚዳ ማላ ሄꬑ ጋላሳ ኦጌ ባዞ ባናስ ኮሼስ» ጊዴስ።
EXO 8:28 ሂስቲን ካዎዚ፥ «ጎዳ ኢንቴ ጾሳስ ኢንቴ ባዞ ቢዲ ያርሻና ማላ ታኒ ኢንቴና ዬዳና ሺን ኢንቴ ሃኪ ቦፒቴ፤ ሃኢ ታስ ዎሲቴ» ጊዴስ።
EXO 8:29 ሙሴይ፥ «ታኒ ኔ ኣቻፌ ኬዚዳ ማላ ጎዳ ዎሳና፤ ሃ ዎልቃማ ቦጼይ ዎንቶ ካዎዛፔ፥ ዳናታፔኔ ኢዛ ኣሳፔ ኪቻና። ጊዶ ኣቲን ጎዳስ ያርሻናስ ኣሳ ዬዶንታ ኢጻናስ ካዎይ ኑና ዛሪ ጪሞንታ ማላ ቆፖ» ጊዴስ።
EXO 8:30 ሄሳፌ ጉዬ ሙሴይ ካዎዛ ኣቻፌ ኬዚዲ ጎዳ ዎሲዴስ።
EXO 8:31 ሙሴይ ኦይቺዳ ማላ ጎዳይ ኦꬂዴስ፤ ቦጼይ ካዎዛፔ፥ ዳናታፔኔ ኢዛ ኣሳፔ ኢሲኖካ ኣቶንታ ኪቺዴስ።
EXO 8:32 ጊዶ ኣቲን ሃኢካ ካዋ ዎዚናይ ሚኒዳ ጊሻስ ኢዚ ኣሳ ዬዶንታ ኢጺዴስ።
EXO 9:1 ጎዳይ ሙሴ፥ «ጊብጼ ካዎዛኮ ባዳ ጎዳ ኢብራዌታ ጾሳይ ኔና፥ ‹ታስ ጎይናና ማላ ታ ኣሳ ዬዳ፤
EXO 9:2 ኔኒ ዬዶንታ ኢጺዛ ጊዲኮ፥
EXO 9:3 ሄሜቲዛሶን ዲዛ ኔ ሜሄታ ቦላ፥ ፓራታ ቦላ፥ ሃሬታ ቦላ፥ ጋሜላታ ቦላ፥ ሚዛታ ቦላ፥ ዶርሳታ ቦላኔ ዴይሻታ ቦላ ዎልቃማ ሃርጌ ዬዳና።
EXO 9:4 ጊዶ ኣቲን ታኒ ጎዳይ ኢስራኤሌ ሜሄታ ጊዶኒኔ ጊብጼ ኣሳ ሜሄታ ጊዶን ሻኮቴꬅ ሜꬋና። ኢስራኤሌ ኣሳ ሜሄታፔ ኢሶይካ ሃይቄና› ጋ» ጊዴስ።
EXO 9:5 ጎዳይ ዎዴ ባሪዲ፥ «ታኒ ዎንቶ ሃይሳ ሃ ቢታ ቦላ ኦꬃና» ጊዴስ።
EXO 9:6 ዎንቴꬃ ጋላስ ጎዳይ ሄሳ ኦꬂዴስ። ጊብጼ ኣሳ ሜሄይ ዉሪ ሃይቂዴስ ሺን ኢስራኤሌ ኣሳ ሜሄፔ ኢሲናካ ሃይቃቤኩ።
EXO 9:7 ካዎዚ ሃ ዮኦዛ ፓጫናስ ኣስ ኪቲዲ ኢስራኤሌ ናይታ ሜሄፔ፥ ሃራይ ኣቶሺን ፔጺ ኢሲናካ ሃይቆንታይሳ ኤሪዴስ። ጊዲኮካ ካዎዛ ዎዚናይ ሚኒዳሶፔ ሲሞንታ ኢጺዳ ጊሻስ ኣሳ ዬዶንታ ኢጺዴስ።
EXO 9:8 ሄሳፌ ጉዬ ጎዳይ፥ ሙሴኔ ኣሮኔ፥ «ኩሼ ኩንꬂዲ ጮጬፔ ቢዲንꬃ ኩጪ ኤኪዲ ሙሴይ ካዎዚ ጼሊሺን ሄሳ ፑዴ ጫርኮ ቦላ ላሎ፤
EXO 9:9 ሃይሲ ጊብጼ ቢታ ኡባ ቦላ ጉዱላ ጊዳና፤ ጊብጼ ቢታ ኡባን ኣሳ ቦላኔ ሜሄ ቦላ ኪጻይ ዎꬋና» ጊዴስ።
EXO 9:10 ሂስቲን ኢስቲ ጮጬፔ ቢዲንꬅ ኤኪዲ ካዎዛ ሲንꬃን ኤቂዳ፤ ሙሴይ ሄሳ ፑዴ ጫርኮን ላሊን ኣሳ ቦላኔ ሜሄ ቦላ ጊዪዛ ኪጻይ ኬዚዴስ።
EXO 9:11 ማሮቲካ ኢስታ ቦላኔ ጊብጼ ኣሳ ኡባ ቦላ ዎꬊዳ ኪጻይ ኤቆ ዲጊን ሙሴ ሲንꬃን ኤቃናስ ዳንዳይቤቴና።
EXO 9:12 ጊዶ ኣቲን ጎዳይ ሙሴስ ጊዳ ማላካ ካዎዛ ዎዚና ሚንꬂዳ ጊሻስ ሙሴይኔ ኣሮኔይ ዮቲዛይሳ ካዎዚ ሲዮንታ ኢጺዴስ።
EXO 9:13 ሄሳፌ ጉዬ ጎዳይ ሙሴስ፥ «ዎንቶ ዎንታ ማላዶራ ዴንዳ ባዳ ካዎዛራ ጋጋዳ ኢዛ ኢብራዌታ ጎዳይ ኔና፥ ‹ታስ ጎይናና ማላ ታ ኣሳ ዬዳ።
EXO 9:14 ኔ ዬዶንታ ኢጺኮ ኔ ቦላ፥ ዳናታ ቦላኔ ኔ ኣሳ ቦላ ታ ዎልቃማ ሃንቆ ሃኢ ዬዳና፤ ሄሳንካ ቢታ ቦላን ታ ማላይ ባይንዳይሳ ኔኒ ኤራና።
EXO 9:15 ታኒ ሃኖ ጋካናስ ታ ኩሼ ዬዳዳ ኔናኔ ኔ ኣሳ ኢታ ሃርጌን ቆሂዳኮ ሃ ቢታ ቦላፌ ፒታ ꬋይሳናኮሺን።
EXO 9:16 ታኒ ኔና ፓጻ ዎꬂዳይ ኔና ታ ዎልቃ ቤሳናሲኔ ታ ሱንꬂ ቢታ ኡባ ቦላን ጼይጌታና ማላሳ።
EXO 9:17 ኔኒ ሃኢካ ኦቶሬታዳ ታ ኣሳ ዬዶንታ ኢጻዳሳ።
EXO 9:18 ሄሳ ጊሻስ ታኒ ዎንቶ ሃኒ ዎዴ ጊብጼይ ጊብጼ ጊዶሶፔ ሃች ጋካናስ ቡኪ ኤሮንታ ዎልቃማ ሻች ቡኪሳና።
EXO 9:19 ሃኢ ኔኒ ኔ ሜሄኔ ጋዴን ኔስ ዲዛዝ ኡባ ሶ ጌልꬃና ማላ ኣዛዛ፤ ኣይስ ጊኮ ሶ ጌሎንታ ቡሮ ጋዴን ዲዛ ኣሳ ኡባ ቦላኔ ሜሄ ኡባ ቦላ ሻቺ ቡኪዲ ዎꬋና› ጊዴስ ጋ» ጊዴስ።
EXO 9:20 ካዎዚ ሱንꬂዳ ዳናታፔ ጎዳ ቃላስ ባቢዳይቲ ባ ኣይሌታኔ ባ ሜሄ ኤሶቲዲ ሶ ጌልꬂዳ።
EXO 9:21 ጊዶ ኣቲን ጎዳ ቃላ ካꬊዳይቲ ባ ኣይሌታኔ ባ ሜሄ ካሬን ኣጋጊዳ።
EXO 9:22 ሄሳፌ ጉዬ ጎዳይ ሙሴስ፥ «ጊብጼ ቢታ ኡባ ቦላን፥ ኣሳ ቦላ፥ ሜሄ ቦላኔ ቢታፌ ሞኪዛ ኡባ ቦላ ሻቺ ቡካና ማላ ኔ ኩሼ ሳሎ ዴንꬃ» ጊዴስ።
EXO 9:23 ሙሴይ ባ ጉፌ ፑዴ ሳሎ ዴንꬂዳ ማላ፥ ጎዳይ ዳዳኔ ሻች ዬዲዴስ፤ ዎልቃንꬂካ ዱጌ ቢታ ቦላ ዎልቃሚዴስ። ጎዳይ ጊብጼ ቢታን ሻች ቡኪሲዴስ።
EXO 9:24 ሻቻይ ቡኪዴስ፤ ዎልቃንꬂካ ዎልቃሚዴስ፤ ጊብጼ ዴሬይ ዴሬ ጊዶሶፔ ሃ ሲሚን ጊብጼ ቢታ ኡባ ቦላ ዎꬊዳ ሻቻ ኡባፌ ሃይሲ ኣꬊዛ ኢታ ሻቻ።
EXO 9:25 ሄ ሻቻይ ጊብጼ ቢታ ኡባን ጋዴን ዲዛ ኡባ፥ ኣሳካ ሜሄካ ሾጪዴስ፤ ቢታፌ ሞኪዳዝ ኡባ ዱጌ ዛሪዲ ሾጪዴስ፤ ሚꬂካ ኡባ ሜንꬄሬꬂዴስ።
EXO 9:26 ኢስራኤሌ ናይቲ ዲዛ ጌሴሜ ቢታይ ጻላ ሻቺ ቡኮንታ ኣቲዴስ።
EXO 9:27 ካዎይካ ሙሴኔ ኣሮኔ ጼይጊሲዲ፥ «ሃኢ ሄኮ፥ ታኒ ናጋራ ኦꬃዲስ፤ ጎዳይ ጺሎ፤ ታኒኔ ታ ኣሳይ ዎርዶ።
EXO 9:28 ዳዳይኔ ሻቺ ኑ ቦላ ዳሪዳ ጊሻስ ኑስ ጎዳ ዎሲቴ። ታኒ ኢንቴና ዬዳና፤ ሄኮ ሃይሳፌ ሲንꬃን ኢንቴ ሃይሳን ጋምኤኬታ» ጊዴስ።
EXO 9:29 ሙሴይካ ኢዛስ፥ «ታኒ ሃ ካታማፔ ኬዛ ባዳ ዎሳናስ ታ ኩሼ ጎዳኮ ሚጫና፤ ሂስቲኮ ዳዳይ ኣጋና፤ ቃሴ ሻቻይካ ቡኬና፤ ሄሳንካ ቢታይ ጎዳስ ጊዲዳይሳ ኔኒ ኤራና።
EXO 9:30 ጊዶ ኣቲን ኔኒኔ ዳናቲ ጎዳ ጾሳስ ሃኢካ ባቦንታይሳ ታኒ ኤራይስ» ጊዴስ።
EXO 9:31 ጪዪዳ ካꬃይኔ ቲያቲዳ ካꬃይ ዉሪ ꬋይዴስ፤ ጊዶ ኣቲን ጪዮንታኔ ቲያቶንታ ቡሮ ጋኪዛ ካꬃ ሻቻይ ቆሂቤና።
EXO 9:33 ሄሳፌ ጉዬ ሙሴይ ካዎዛ ኣቻፌ ዴንዲዲ ካታማፔ ጋጻ ኬዚዲ ባ ኩሼ ጎዳኮ ሚጪዴስ፤ ሂስቲን ዳዳይኔ ሻቻይ ኤቂዴስ፤ ኢራይካ ቢታ ቦላ ቡኪዛይሳ ኣጊዴስ።
EXO 9:34 ጊዶ ኣቲን ካዎዚ ኢራይ፥ ሻቻይኔ ዳዳይ ኣጊዳይሳ ቤኢዳ ዎዴ ቃሴካ ናጋራ ኦꬂዴስ፤ ኢዚኔ ዳናቲካ ባንታ ዎዚና ሚንꬂዳ።
EXO 9:35 ጎዳይ ሙሴ ዶናራ ሃሳይዳ ማላካ ካዋ ዎዚናይ ሚኒን ኢስራኤሌ ናይታ ዬዶንታ ኢጺዴስ።
EXO 10:1 ሄሳፌ ጉዬ ጎዳይ ሙሴስ፥ «ጊብጼ ካዋኮ ጉዬ ሲማ ባ፤ ኣይስ ጊኮ ታኒ ጊብጼ ኣሳ ዎስታ ቃጻይዳኮኔ ማላታ ኢስታ ጊዶን ዎስታ ኦꬂዳኮ ኢንቴ ኢንቴ ናይታሲኔ ኢንቴ ናይታ ናይታስ ዮታና ማላ፥ ቃሴ ኢንቴካ ታኒ ጎዳ ጊዲዳይሳ ኤራና ማላ፥ ታ ማላታ ኢስታ ጊዶን ኦꬃናስ ኢዛ ዎዚናኔ ዳናታ ዎዚና ሚንꬃ ዎꬃዲስ» ጊዴስ።
EXO 10:3 ሂስቲን ሙሴይኔ ኣሮኔይ ካዎዛኮ ጌሊዲ፥ «ጎዳ ኢብራዌታ ጾሲ ኔና፥ ‹ኔ ኔናቴꬃ ታ ሲንꬃን ካዉሾንታ ኢጺዛይ ኣዉዴ ጋካናሴ? ሃኢ ታስ ጎይናና ማላ ታ ኣሳ ዬዳ።
EXO 10:4 ኔኒ ኢስታ ዬዶንታ ኢጺኮ ዎንቶ ታ ኔ ቢታ ቦላ ቦሌ ዬዳና።
EXO 10:5 ቦሌዚ ኦኒካ ቤኦንታ ማላ ቢታ ማይኣና። ኢንቴስ ሻቻፌ ኣቲዳ ጉꬃ ሚሺ፥ ጋዴን ዲጪዛ ሚꬂካ ኡባ ማና።
EXO 10:6 ኔ ኬꬃታን፥ ዳናታ ኬꬃኒኔ ጊብጼ ኣሳ ኡባ ኬꬃን ኩማና፤ ሃይሲ ኔ ኣዋቲ፥ ዎይኮ ኔ ማይዛቲ ሃ ቢታ ቦላ ዶሶፔ ሃኖ ጋካናስ ሙሌካ ቤዪ ኤሮንታ ሚሻ› ጊዴስ» ጊዳ። ሄሳፌ ጉዬ ሙሴይ ካዎዛ ሲንꬃፌ ኬዚ ቢዴስ።
EXO 10:7 ካዎዚ ሱንꬂዳ ዳናቲካ ካዎዛ፥ «ሃይሲ ኣዴዚ ኑስ ኣይዴ ጋካናስ ꬉጴ ጊዳኔ? ኢስቲ ጎዳ ባ ጾሳስ ጎይናና ማላ ኔኒ ኣሳ ዬዳ፤ ጊብጼ ዴሬይ ꬋይዳይሳ ኔኒ ሃኢካ ዩሻ ቆፒኪ?» ጊዳ።
EXO 10:8 ሄሳ ጊሻስ ካዎዚ ሙሴኔ ኣሮኔ ጼይጊሲ ጉዬ ዛሪዲ፥ «ቢቴ፤ ጎዳ ኢንቴ ጾሳስ ጎይኒቴ ሺን ቢዛይቲ ኦናንቴ?» ጊዴስ።
EXO 10:9 ሂስቲን ሙሴይ፥ «ኑኒ ኑ ቄሪ ናይታራ ጪማታራ፥ ኑ ኣቱማ ናይታራ ማጫ ናይታራ፥ ኑ ሜሃራኔ ሚዛ ዉዴታራ ኢሲፌ ባና፤ ኣይስ ጊኮ ኑኒ ቢዛሶን ጎዳስ ባኣሌ ቦንቻናስ ኮሼስ» ጊዴስ።
EXO 10:10 ካዎዚ፥ «ኢንቴ ማጫሳታራኔ ኢንቴ ናይታራ ባና ማላ ታ ኢንቴና ዬዳና፤ ጎዳይ ኢንቴናራ ጊዶ፤ ጊዶ ኣቲን ኢንቴ ኢንቴ ዎዚናን ጌኔ ቆፒዴታ።
EXO 10:11 ሄሳ ጊሻስ ሃኔና፤ ኢንቴ፥ ‹ኑ ቢዲ ጎዳስ ጎይናና ማላ ኑና ዬዳ› ጊሼ ጋምኢዳ ጊሻስ ኣቱማሳይ ጻላ ቢዲ ጎዳስ ጎይኒቴ» ጊዴስ። ሄሳፌ ጉዬ ሙሴኔ ኣሮኔ ካዎዛ ሲንꬃፌ ኬሲ ጎዲዳ።
EXO 10:12 ጎዳይ ሙሴስ፥ «ቦሌይ ጊብጼ ቢታ ቦላ ያና ማላ ሻቻፌ ኣቲዲ ዲጪዛ ኡባ ሊምኢ ሂስቲ ዉርሳና ማላ፥ ኔ ኩሼ ጊብጼ ቢታ ቦላ ፒዲሳ» ጊዴስ።
EXO 10:13 ሙሴይ ባ ኦይኪዳ ጉፋ ጊብጼ ቢታ ቦላ ꬎቁ ሂስቲ ዴንꬂን፥ ሄ ዎዴ ጋላሲኔ ቃማ ጎዳይ ኣርሼይ ሞኪዛ ባጋፌ ዎልቃማ ጫርኮ ቢታ ኡባ ቦላ ዬዲዴስ፤ ጋዴይ ዎንቲሺን ሄ ጫርኮይ ቦሌ ኤኪ ዪዴስ።
EXO 10:14 ቦሌይ ጊብጼ ቢታ ኩሜꬂ ማይኢዴስ። ሃይሳ ላጌ ቦሌ ቦሻይ ሄ ቢታን ሃይሳፌ ካሴ ሃኒቤና፤ ሃይሳፌ ሲንꬃንካ ኢዛ ማላይ ሃኔና።
EXO 10:15 ቢታይ ካሬጻና ጋካናስ ቦሌዚ ቢታ ኡባ ማይኢዴስ። ሻቻፌ ኣቲዲ ቢታ ቦላ ዲጪዛዛኔ ሚꬃ ቦላን ዲዛ ኣይፌ ኡባ ሊምኢ ሂስቲ ሚዴስ። ሄሳ ጊሻስ ሚꬃ ሃይꬂ ዎይኮ ጋዴን ዲዛ ጪሊላ ሚሺ ዉሪ ጊብጼ ቢታ ኡባሶን ኣይኮይካ ኣቲቤና።
EXO 10:16 ካዎዚካ ሙሴኔ ኣሮኔ ኤሶን ጼይጊሲዲ፥ «ጎዳ ኢንቴ ጾሳኔ ኢንቴና ታኒ ቆሃዲስ።
EXO 10:17 ሄኮ ኢንቴ ታና ዉርሴꬃ ማሮ ማሪቴ። ሃ ኢታ ቦሻ ታፔ ዲጋና ማላ ጎዳ ኢንቴ ጾሳ ዎሲቴ» ጊዴስ።
EXO 10:18 ሙሴይ ካዎዛ ኣቻፌ ኬዚዲ ጎዳ ዎሲዴስ።
EXO 10:19 ጎዳይካ ኣርሼይ ሞኪዛ ባጋራ ዪዳ ጫርኮዛ ኣርሼይ ዉሊዛ ባጋራ ዪዳ ዎልቃማ ጫርኮን ላሚን ቦሌዛ ቶኪ ኤኪ ኤፊዲ፥ ዞኦ ኣባን ዬጊዴስ። ጊብጼ ቢታ ኩሜꬃን ኢሲ ቦሌይካ ኣቲቤና።
EXO 10:20 ጊዲኮካ ጎዳይ ካዎዛ ዎዚና ሚንꬂዳ ጊሻስ ኢስራኤሌ ናይታ ዬዶንታ ኢጺዴስ።
EXO 10:21 ሄሳፌ ጉዬ ጎዳይ ሙሴስ፥ «ጊብጼ ቢታን ጊርዲ ጊዳ ꬉማይ ꬉማና ማላ ኔ ኩሼ ፑዴ ሳሎ ዴንꬃ» ጊዴስ።
EXO 10:22 ሙሴይ ባ ኩሼ ፑዴ ሳሎ ዴንꬂን ጊብጼ ቢታ ኡባን ሄꬑ ጋላስ ኩሜꬅ ጊርዲ ጊዳ ꬉማይ ꬉሚዴስ።
EXO 10:23 ሄ ሄꬑ ጋላሳታን ኣሲ ኦኒካ ኢሶይ ኢሳ ቤኦንታ፥ ዎይኮ ሶፔ ካሬ ኬዞንታ ጋምኢዴስ። ጊዶ ኣቲን ኢስራኤሌ ናይቲ ዲዛሶ ኡባን ኢስታስ ፖኦይ ዴስ።
EXO 10:24 ካዎዚ ሙሴ ጼይጊሲዲ፥ «ቢቴ፤ ቢዲ ጎዳስ ጎይኒቴ፤ ኢንቴ ማጫሳይካ ኢንቴ ናይቲካ ኢንቴናራ ባና ዳንዳዬቴስ። ኢንቴ ሜሄታ ጊዲኮ ሃን ኣጊ ቢቴ» ጊዴስ።
EXO 10:25 ጊዶ ኣቲን ሙሴይ ኢዛስ፥ «ኑኒ ጹጊዲ ያርሺዛ ያርሾ ጎዳ ኑ ጾሳስ ሺሻና ማላ ሜሄ ኢማዳ ዬዳናስ ኮሼስ።
EXO 10:26 ኢሲ ጹጉንꬂካ ኣቶንታ ዲሺን ኑ ሜሄይ ዉሪካ ኑናራ ባናስ ቤሴስ። ኑኒ ጌዴ ጋኮንታ ዲሼ ሜሃፔ ኣዋይሳ ኣዋይሳ ያርሻናኮ ሃኢ ኤራናስ ዳንዳዮኮ። ጎዳ ኑ ጾሳስ፥ ያርሾስ ሄ ሜሃፔ ዶሪዲ ኤካናስ ኮሼስ» ጊዴስ።
EXO 10:27 ጊዶ ኣቲን ጎዳይ ካዎዛ ዎዚና ሚንꬂዳ ጊሻስ ኢዚ ኢስታ ዬዳናስ ኮዪቤና።
EXO 10:28 ሄሳፌ ጉዬ ካዎዚ ሙሴ፥ «ታ ኣቻፌ ኪቻ! ናምኣንꬆ ታ ሲንꬃን ቤታሼ ኔና ኤራ! ናምኣንꬆ ታ ኣይፌሶ ኔ ቤኢዳ ጋላስ ኔ ሃይቃና» ጊዴስ።
EXO 10:29 ሂስቲን ሙሴይ ኢዛስ፥ «ቱሙካ፤ ኔኒ ጊዳ ማላ ታኒ ኔና ናምኣንꬆ ሙሌካ ቤይኬ» ጊዴስ።
EXO 11:1 ጎዳይ ሙሴስ፥ «ታኒ ጊብጼ ካዋ ቦላኔ ኢዛ ኣሳ ቦላ ኢሲ ሃራ ቦሻ ዬዳና፤ ሄሳፌ ጉዬ ኢዚ ኢንቴና ሃ ቢታፌ ኬሲ ዬዳና፤ ኬሲዲ ኢዚ ኢንቴና ኢሳዴ ኣሾንታ ኡባ ጎዲ ኬሳና።
EXO 11:2 ኢስራኤሌ ኣሳይ ማጫይ ኣዴይ ባ ሾሮታፔ ቢራፔኔ ዎርቃፌ ኦሴቲዳ ሚሻታ ኦይቺ ኤካና ማላ ኢስታስ ዮታ» ጊዴስ።
EXO 11:3 ጎዳይካ ጊብጼ ኣሳይ ኢስራኤሌ ኣሳስ ኪያቴꬅ ኦꬃና ማላ ኦꬂዴስ። ቃሴ ሙሴይ ባ ባጋራ ጊብጼ ቢታን ካዎይ ሱንꬂዳ ዳናታኒኔ ኣሳን ኬሂ ዳሮ ቦንቼቲዳ ኣሳ ማላ ጼሌቲዴስ።
EXO 11:4 ሙሴይ ካዎዛስ፥ «ጎዳይ፥ ‹ጊዲ ጊዶꬅ ታኒ ጊብጼ ቢታን ሄሜታና፤
EXO 11:5 ጊብጼ ቢታን ዲዛ ኣቱማ ናይ፥ ካዎቴꬃ ኣልጋን ኡቲዳ ካዋስ ባይራ ናፔ ዶሚዲ፥ ዎጻን ጋጪዛ ኣይሌይ ባይራ ና ጋካናስካ ባይራ ዬሌቲዳ ሜሄይካ ኣቶንታ ዉሪ ሃይቃና።
EXO 11:6 ጊብጼ ቢታ ኡባን ሃይሳፌ ካሴ ጊዲን ዎይኮ ሲንꬃፌካ ሃኖንታ ዬሆይ ዬኬታና።
EXO 11:7 ጊዶ ኣቲን ኢስራኤሌ ናይታ ጊዶን ኣሳ ቦላ ዎይኮ ሜሄ ቦላ ኣሲ ኣቶሺን ካናይካ ቦጬና› ጊዴስ። ሄ ዎዴ ጎዳይ ጊብጼሲኔ ኢስራኤሌ ናይታስ ጊዶን ሻኮቴꬅ ሜꬋናይሳ ኢንቴ ኤራና።
EXO 11:8 ኔ ሱንꬂዳ ዳናቲ ዉሪ ታኮ ዪዲ፥ ታ ሲንꬃን ጉፋኒ ዚጊዲ፥ ‹ኬዛዳ ባርኪ! ኔና ካሊዛ ኣሳይ ዉሪካ ቦ!› ጋና። ሄሳፌ ጉዬ ታኒ ባና» ጊዴስ። ሙሴይ ዳሮ ሃንቄቲዲ ኢዛ ሲንꬃፌ ኬዚዲ ቢዴስ።
EXO 11:9 ጎዳይ ሙሴስ፥ «ታ ማላሊሲዛ ሚሽ ጊብጼ ቢታን ጉጃ ጉጃ ኦꬃና ማላ ካዎይ ኢንቴ ዮቲዛይሳ ሲዬና» ጊ ካሴ ዮቲ ዎꬂዴስ።
EXO 11:10 ሙሴይኔ ኣሮኔይ ሃይታ ማላታታ ኡባ ካዎዛ ሲንꬃን ኦꬂኮካ ጎዳይ ካዎዛ ዎዚና ሚንꬂዳ ጊሻስ ኢዚ ኢስራኤሌ ናይታ ባ ዴሬፔ ዬዶንታ ኢጺዴስ።
EXO 12:1 ጊብጼ ቢታን ጎዳይ ሙሴኔ ኣሮኔ ሂዝጊዴስ፤
EXO 12:2 «ሃ ኣጊናይ ኢንቴስ ላይꬃስ ኮይሮ ኣጊና ጊዶ፤
EXO 12:3 ኢስራኤሌ ኣሳ ኡባስ ሃይሳ ሃ ዎጋዛ ዮቲቴ፤ ሃይሲ ኣጊናይ ጌሊዳ ታማንꬃ ጋላስ፥ ኢሲ ኢሲ ኣሲ ባ ሶ ኣሳስ ኢሲ ላቃ ዶሪ ኤኮ።
EXO 12:4 ሄ ኬꬃ ኣሳ ቆዳይ ላቃዛ ኡባ ማናስ ጉጺዛ ጊዲኮ ኢዛዴይ ባስ ማታቲዛ ጉታ ባ ሶ ኣሳ ማላ ቆዲዲ ኢሳዴይ ኢሳዴይ ሚ ዉርሳናይሳ ሻኪ ኤሬቶ።
EXO 12:5 ኢንቴ ዶሪ ኤካና ላቃይ ዬሌቲን ኢሲ ላይꬅ ጊዲዲ ኢዛ ቦላ ኣይኮ ቦሬይ ባይንዳ ኣዴ ላቃ ጊዶ። ኢንቴ ላቃዛ ዶርሳፌ ዎይኮ ዴይሻፌ ኤካናስ ዳንዳዬታ።
EXO 12:6 ሃ ኣጊናይ ታማኔ ኦይዳንꬆ ጋላስ ጊዳና ጋካናስ ኢስታ ናጊቴ፤ ሄ ጋላስ ኣርሼይ ዉሊሺን ኢስራኤሌ ማባራ ኣሳይ ዉሪ ኢስታ ሹካናስ ኮሼስ።
EXO 12:7 ሹኪዲ ሱꬃፌ ኤኪዲ ኢስታ ኣሾዛ ሚዛ ኬꬃስ ቆሲላꬃኔ ቆሬዛ ቦላ ቲዬቶ።
EXO 12:8 ኣሾዛ ሄ ጋላስ ቃማካ ታማን ጺጺዲ፥ ጫሚዛ ቦንጮራኔ ኢርሾይ ባይንዳ ኡኬቲዳ ኡኬꬃራ ሜቶ።
EXO 12:9 ኣሾዛ ቃዬ ዎይኮ ዶይሲዲ ሞፒቴ፤ ሁኤዛ፤ ጌዳታ፤ ቃንꬃ ኣሾዛካ ኡባ ጺጺዲ ሚቴ።
EXO 12:10 ሄ ኣሾዛፔ ጋዴይ ዎንታና ጋካናስ ኣይኮካ ኣሾፍቴ። ዎንታና ጋካናስ ኣቲዳዚ ዲኮ ታማን ጹጋና ኮሼስ።
EXO 12:11 ሚሽ፥ ኦጌስ ጊዲዛ ማይኦ ማይኢዲ፥ ኢንቴ ጫማ ቶሆን ኣꬂዲ ኢንቴ ጉፌ ኢንቴ ኩሼን ኦይኪዲ ኤሶን ሚቴ፤ ሃይሲ ታና ጎዳ ኢንቴ ቦንቺዛ ፓዚጋ ያርሾ።
EXO 12:12 «ታኒ ሄ ጋላስ ቃማራ ጊብጼ ቢታራ ሄሜታሼ ባይራ ዬሌቲዳ፥ ኣሴካ ሜሄካ ኡባ ዎꬋና። ጊብጼ ኤቃታ ኡባ ቦላካ ታኒ ፒርዳና፤ ታኒ ጎዳ ጊዲኪና?
EXO 12:13 ሄ ሱꬃይ ኢንቴ ዲዛ ኬꬃታ ኤሪሲዛ ማላታ ጊዳና። ታኒ ሄ ሱꬃ ቤኢዛ ዎዴ ኢንቴና ኣጋ ኣꬋና፤ ታኒ ጊብጼ ቢታ ቦሻን ሾጪዛ ዎዴ ኢንቴ ቦላ ኣይኮ ቦሻይካ ጋኬና።
EXO 12:14 «ሄ ጋላሳይ ታኒ ጎዳይ ኢንቴስ ኦꬂዳይሳ ቆፒ ቆፒ ቦንቺዛ ጋላስ ጊዶ፤ ኢንቴ ዜሬꬂ ዉሪ ጎዳ ባኣሌ ቦንቾ፤ ሃይሳ ኢንቴስ ዎጋ ሂስቲዲ ሜርናስ ቦንቺቴ።
EXO 12:15 «ላፑን ጋላስ ጋካናስ ኢርሾይ ጌሎንታ ኡኬꬅ ሚቴ፤ ኮይሮ ጋላስ ኢንቴ ሶፔ ኢርሾ ዲጊቴ። ሄ ኮይሮ ጋላሳፌ ዶሚዲ ላፑንꬃ ጋላስ ጋካናስ፥ ኢርሾራ ዲዛ ኡኬꬅ ሚዛ ኣሲ ኦኒካ ኢስራኤሌ ኣሳ ጊዶፌ ሻኬቲ ꬋዮ።
EXO 12:16 ኮይሮ ጋላስ ጌሻ ዱላታ ሺቂቴ፤ ሃራ ጌሻ ዱላታ ቃሴ ላፑንꬃ ጋላስ ሺቂቴ፤ ኣሳይ ዉሪ ማናስ ቁማ ካꬆፌ ኣቲን ሄ ጋላሳታ ኡባን ኣይኮካ ኦꬆፍቴ፤ ኢንቴ ኦꬃና ሚሺ ሄሳ ጻላ።
EXO 12:17 «ታኒ ኢንቴና ኢስራኤሌ ናይታ ጊብጼ ቢታፌ ኬሲዳይ ሄ ጋላስ ጊዲዳ ጊሻስ ኡኬꬃ ባኣሌ ቦንቺቴ። ሄ ጋላሳ ባኣሌዛ ና ናስ ኣቶንታ ዎጋ ሂስቲ ቦንቺቴ።
EXO 12:18 ኮይሮ ኣጊናን ሄ ኣጊናስ ታማኔ ኦይዳንꬃ ጋላሳ ኦማርሳፌ ዶሚዲ ናምኡ ታማኔ ኢሲንꬃ ጋላሳ ኦማርሳ ጋካናስ ኢርሾይ ጌሎንታ ኡኬꬅ ሚቴ።
EXO 12:19 ላፑን ጋላስ ጋካናስ ኢርሾይ ኢንቴ ሶን ቤቶፎ፤ ኢርሾይ ጌሊዳ ካꬅ ሚዛ ኣሲ ቤቴ ኣሲ ጊዲን ዎይኮ ሄ ዴሬ ኣስ ኦናካ ጊዲን ሄሳዴይ ኢስራኤሌ ማባራ ጊዶፌ ꬋዮ።
EXO 12:20 ኢርሾይ ጌሊዳዝ ኣይኮካ ሞፒቴ፤ ኢንቴ ዲዛሶን ኣዋንካ ኢርሾይ ጌሎንታ ኡኬꬅ ማናስ ቤሴስ።»
EXO 12:21 ሄሳፌ ጉዬ ሙሴይ ኢስራኤሌ ጪማታ ኡባ ጼይጊሲዲ፥ «ኢንቴ ቢዲ ኢንቴ ሶ ኣሳስ ፓዚጋ ያርሾስ ላቃ ኤኪ ሹኪቴ።
EXO 12:22 ሂሶጴ ጌቴቲዛ ማታ ሃይꬃፌ ዳንኪ ኤኪዲ ኬሬን ዲዛ ሱꬃን ጌልꬂ ኬሲዲ፥ ሄ ሱꬃ ናምኡ ቆሲላꬃታኒኔ ቆሬታ ቦላ ቲዪቴ፤ ኢንቴፌ ኢሲ ኣሲካ ጋዴይ ዎንታና ጋካናስ ባ ኬꬃፌ ካሬ ኬዞፖ።
EXO 12:23 ጎዳይ ጊብጼ ባይራ ናይታ ዎꬋናስ ሄ ቢታራ ሄሜቲዛ ዎዴ ሱꬅ ኬꬃ ቆሲላꬃታኒኔ ቆሬታ ቦላ ቤኢዲ ካሬራ ኣꬊ ባና፤ ዎꬊዛይሲ ኢንቴ ሶ ጌሊዲ ኢንቴና ዎꬎንታ ማላ ኢዛ ጎዳይ ዲጋና።
EXO 12:24 «ኢንቴ ሃይሳ ኣዛዞዛ ኢንቴሲኔ ኢንቴ ዜሬꬃስ ሜርናስ ዎጋ ሂስቲዲ ኣዛዜቲቴ።
EXO 12:25 ጎዳይ ካሴ ኢማና ጊዲ ጫቂዳ ቃላ ማላ ኢዚ ኢሚዛ ቢታ ኢንቴ ጌሊዛ ዎዴ ሃ ዎጋ ናጊቴ።
EXO 12:26 ኢንቴ ናይቲ ኢንቴና፥ ‹ሃይሳ ሃ ዎጋዛስ ቢርሼꬂ ኣዜ?› ጊ ኦይቺኮ፥
EXO 12:27 ኢንቴ ኢስታስ፥ ‹ሃይሲ ጎዳ ቦንቻናስ ያርሺዛ ፓዚጋ ያርሾ፤ ኣይስ ጊኮ ጎዳይ ጊብጼ ቢታን ኢስራኤሌ ኣሳ ኬꬅ ኣጊ ኣꬊዲ ጊብጼ ኣሳ ዎꬊዲ ኑና ኣሺዳ ጊሻሳ› ጊቴ» ጊዴስ። ሄሳፌ ጉዬ ኣሳይ ቢታ ቦላ ጉፋኒ ጎይኒዴስ።
EXO 12:28 ኢስራኤሌ ኣሳይ ቢዲ ጎዳይ ሙሴኔ ኣሮኔ ኣዛዚዳ ማላ ኦꬂዴስ።
EXO 12:29 ጊዲ ጊዶꬃን ጎዳይ ጊብጼን ባይራ ዬሌቲዳ ኡባ ካዎቴꬃ ኣልጋን ኡቲዛ ካዎ ባይራ ናፔ ዶሚዲ፥ ቃሾ ኬꬃን ዲዛ ዲኤቲዳ ኣሳ ባይራ ና ጋካናስ፥ ቃሴ ባይራ ዬሌቲዳ ሜሄ ኡባ ዲፒ ሂስቲዴስ።
EXO 12:30 ካዎይ፥ ኢዚ ሱንꬂዳ ዳናቲኔ ጊብጼ ቢታ ኣሳይ ዉሪ ቃማራ ቤጊዴስ። ጊብጼ ቢታን ኣሲ ሃይቆንታ ኬꬂ ሙሌካ ባይንዳ ጊሻስ ኣሳይ ቃላ ꬎቁ ሂስቲዲ ዳሮ ዋሲ ዬኪዴስ።
EXO 12:31 ሄ ጋላሳ ኦማርስ ካዎዚ ሙሴኔ ኣሮኔ ጼይጊሲዲ፥ «ዴንዲቴ! ኢንቴካ ኢንቴ ኣሳይካ ታ ኣሳ ጊዶፌ ኬዚቴ! ቢዲ ኢንቴ ኦይቺዳ ማላካ ጎዳስ ጎይኒቴ!
EXO 12:32 ኢንቴ ጊዳ ማላካ ኢንቴ ሜሄ፤ ኢንቴ ዴይሺኔ ዶርስ ኡባ ኤኪዲ ቢቴ! ቃሴ ታናካ ኣንጂቴ» ጊዴስ።
EXO 12:33 ኢስራኤሌ ኣሳይ ባ ቢታፌ ኤሶን ኬዛና ማላ ጊብጼ ኣሳይ ዲርባሲዴስ። ኣይስ ጊኮ ኢስቲ፥ «ኬዞንታ ኢጺኮ ኑኒ ዉሪካ ዉራና» ጊዳ።
EXO 12:34 ሄሳ ጊሻስ ኢስራኤሌ ኣሳይ ኢርሾይ ጌሎንታ ሙኑቃ ኬሬን ኩንꬂ ማይኦን ጻጺዲ ሃሼን ቶኪዴስ።
EXO 12:35 ኢስራኤሌ ኣሳይ ሙሴይ ኢስታ ኣዛዚዳ ማላ፥ ጊብጼ ኣሳ ቢራ፥ ዎርቃኔ ማይኦ፥ «ኢሚቴ» ጊ ኦይቺዴስ።
EXO 12:36 ጎዳይ ጊብጼ ኣሳ ሲንꬃን ኢስራኤሌ ኣሳይ ሳቤታና ማላ ኦꬂዳ ጊሻስ ጊብጼ ኣሳይ ኢስታ ኦይቺዳይሳ ኡባ ኢሚዳ። ሄሳꬆ ሂስቲዲ ኢስታ ጊብጼ ኣሳታ ኣቆ ቡሪ ኤኪ ቢዳ።
EXO 12:37 ኢስራኤሌ ኣሳይ ኤራሚሴ ጌቴቲዛ ካታማፔ ዴንዲዲ ሱኮቴ ጌቴቲዛሶ ጋካናስ ቢዴስ። ኣሳይ ናይታኔ ማጫሳ ጉጆንታ ቆዲን ቶሆን ሄሜቲዛ ኣቱማ ኣሳይ 600,000 ጊዲዴስ።
EXO 12:38 ቃሴ ኢስታራ ዳሮ ሃራ ዴሬ ኣሳይ፥ ኬሂ ዳሮ ሜሄ፥ ዶርሲኔ ዴይሽ ኤኪ ኬዚዴስ።
EXO 12:39 ጊብጼፔ ኢስቲ ኤኪ ኬዚዳ ኢርሾይ ጌሎንታ ሙኑቃፔ ኡኬꬅ ኡኪዳ፤ ኣይስ ጊኮ ኢስታ ጊብጼፔ ኤሶን ኬሲዳ ጊሻስ ባስ ሺንቄ ካꬃናሲኔ ሙኑቃይ ዴንዲን ኡካና ዎዴ ኢስታ ጋꬂቤና።
EXO 12:40 ኢስራኤሌ ኣሳይ ጊብጼ ቢታን ዴዪዳ ላይꬃይ ዉሪ ኦይዱ ጼታኔ ሄꬑ ታማ።
EXO 12:41 ሄ ኦይዱ ጼታኔ ሄꬑ ታሙ ላይꬃይ ዉሪዛ ሄ ዉርሴꬃ ጋላሳን ጎዳ ኣሳይ ዉሪ ጊብጼ ቢታፌ ኬዚዴስ።
EXO 12:42 ጊብጼ ቢታፌ ኦማርሳ ዎዴ ጎዳይ ባ ኣሳ ኬሲሼ ናጊዳ ጊሻስ ሄ ቃማይ ና ና ጋካናስ፥ ኢስራኤሌ ኣሳይ ዉሪ ቤጊ ናጊዲ ኣቂዛ ጎዳስ ዱማቲዳ ቃማ።
EXO 12:43 ጎዳይ ሙሴኔ ኣሮኔ፥ «ፓዚጋ ቦንቺዛ ዎጋይ ሃይሳ፤ ሃራ ዴሬ ኣሲ ኢዛፔ ኦኒካ ሙሌራ ሞፖ።
EXO 12:44 ኢንቴ ሚሻን ሻሚዳ ኣይሌይ ኦኒካ ኢንቴ ኢዛ ቃጻሪዳፔ ጉዬ ኢዛፔ ማናስ ኮሼስ።
EXO 12:45 ጊዶ ኣቲን ጉꬃ ዎዴስ ኢንቴናራ ኢማꬃቴꬃን ጋምኢዛይኔ ኡኔ ኦꬂዛ ሃራ ዴሬ ኣሲ ኢዛፔ ሞፖ።
EXO 12:46 «ሃ ፓዚጋ ያርሾዛ ኢንቴ ኢሲ ኬꬃን ሚቴ፤ ኢንቴ ሄ ኣሾዛፔ ኣይኮካ ካሬ ኬሶፍቴ። ሜቄꬃታፔ ኢሲኖካ ሜንꬆፍቴ።
EXO 12:47 ኢስራኤሌ ማባራይ ዉሪ ፓዚጋ ያርሾ ቦንቻናስ ኮሼስ።
EXO 12:48 «ቤቴ ዪዲ ኢንቴ ጊዶን ዲዛ ኣሲ ጎዳ ፓዚጋ ያርሾ ቦንቻናስ ኮይኮ ባ ሶን ኣዴ ጊዲዳ ኣሳ ኡባ ቃጻሮ። ሄሳፌ ጉዬ ኢዚ ሄ ቢታን ዬሌቲዳ ኣሳ ማላ ሺቂዲ ፓዚጋ ያርሾ ቦንቻናስ ቤሴስ። ጊዶ ኣቲን ቃጻሬቶንታ ኣሲ ሙሌካ ኢዛፔ ሞፖ።
EXO 12:49 ኢንቴ ቢታን ዬሌቲዳይሳስካ ጊዲን ኢንቴ ጊዶን ቤቴ ጊዲዲ ዲዛይሳስካ ጊዲን ሃይሲ ዎጋይ ኡባስ ኢሲኖ» ጊዴስ።
EXO 12:50 ሂስቲን ኢስራኤሌ ኣሳይ ዉሪ ጎዳይ ሙሴኔ ኣሮኔ ኣዛዚዳ ማላካ ኦꬂዴስ።
EXO 12:51 ሄ ጋላሳንካ ጎዳይ ኢስራኤሌ ናይታ ኢስታ ጩጋን ጩጋን ጊብጼ ቢታፌ ኬሲዴስ።
EXO 13:1 ጎዳይ ሙሴ ሂዝጊዴስ፥
EXO 13:2 «ኣዴ ጊዲ ኮይሮ ዬሌቲዳ ኡባ ታስ ዱማሳ። ኢስራኤሌ ኣሳ ጊዶን ኮይሮ ዬሌቲዳ ባይራይ ዉሪ ሜሄ ጊዲን ኣስ ጊዲን ዉሪካ ታሳ።»
EXO 13:3 ሄሳፌ ጉዬ ሙሴይ ኣሳ፥ «ጊብጼፔ፥ ኣይሌቴꬃ ቢታፌ ኢንቴ ኬዚዳ ጋላሳያ ሃኖ ጋላሳዮ ጊዲዳይሳ ዩሺ ቆፒቴ፤ ኣይስ ጊኮ ጎዳይ ባ ዎልቃማ ቄሴን ኢንቴና ኬሲዴስ፤ ሄሳ ጊሻስ ኢርሾይ ጌሊዳ ካꬅ ኣይኮካ ሞፒቴ።
EXO 13:4 ኢንቴ ሃ ጋላሳይን ኣቢቤ ጌቴቲዛ ኣጊናን ኬዚዴታ።
EXO 13:5 ጎዳይ ካናኔታ፥ ሂቴታ፥ ኣሞሬታ፥ ሂዌታኔ ያቡሴታ ጌቴቲዛ ዴሬታ ቢታ ኢንቴና ጋꬂዛ ዎዴ ኢንቴ ሃ ቦንቾ ጋላሳ ሃ ኣጊናን ቦንቼታ። ሄ ቢታይ ጎዳይ ኢንቴስ ኢማና ማላ ካሴ ኢንቴ ኣዋታስ ጫቂ ዎꬂዳ ቢታ። ሄ ቢታይ ማꬂኔ ኤሲ ጎጊዛ ቢታ።
EXO 13:6 ኢንቴ ላፑን ጋላስ ኢርሾይ ጌሎንታ ኡኬꬅ ማና፤ ላፑንꬃ ጋላስ ጎዳስ ባኣሌ ሂስቲ ቦንቼታ።
EXO 13:7 ሄ ላፑን ጋላሳታን ኢርሾይ ጌሎንታ ኡኬꬅ ኢንቴ ማና፤ ኢንቴ ጊዶን ኢርሾራ ዲዛይ ኣይኮይካ ቤቶፎ፤ ኔ ቢታ ዛዋን ኣዋንካ ኢርሾይ ሙሌካ ዶፖ።
EXO 13:8 «ሄ ጋላስ ኔኒ ኔ ናይታስ፥ ‹ታኒ ሃይሳ ኦꬂዛይ ታኒ ጊብጼፔ ኬዚዛ ዎዴ ጎዳይ ታስ ኦꬂዳይሳ ዛሪ ቆፓናሳ› ጋ ዮታ።
EXO 13:9 ጎዳይ ኢንቴና ባ ዎልቃማ ኩሼን ጊብጼፔ ኬሲዳ ጊሻስ፥ ጎዳ ዎጋይ ኢንቴ ዶናፔ ሻኬቶንታ ማላ፥ ሃይሲ ባኣሌዚ ኢንቴ ኩሼ ቦላ ቃሼቲዳኔ ኢንቴ ሊጴን ዎꬂን ቆፍሲዛ ሚሻ ማላ ጊዳና።
EXO 13:10 ሄሳ ጊሻስ ኢንቴ ሃ ዎጋ ዎꬂዲ ላይꬃን ላይꬃን ሃ ጋላሳን ቦንቺቴ።
EXO 13:11 «ጎዳይ ኢንቴሲኔ ካሴ ኢንቴ ኣዋታስ ኢማናስ ጫቂዳ ማላ፥ ኢዚ ኢንቴና ካናኔታ ቢታ ጌልꬂዲ፥ ሄ ቢታ ኢንቴስ ኢሚዛ ዎዴ፥
EXO 13:12 ኣቱማ ጊዲ ዬሌቲዳ ባይራ ኡባ ጎዳስ ዱማሲቴ፤ ኔ ሜሄ ጋርሳን ኣዴ ጊዲዲ ባይራ ዬሌቲዳይ ዉሪ ጎዳሳ።
EXO 13:13 ባይራ ዬሌቲዛ ሃሬ ማር ኡባ ላቃራ ላማዳ ዎዛ፤ ላማዳ ዎዞንታ ኢጺኮ ኢዛ ሞርጌን ሾጫ ዎꬋ። ኔ ናይታ ጊዶን ኣቱማ ጊዲ ባይራ ዬሌቲዳይታ ኡባ ዎዛ።
EXO 13:14 ዎዴፔ ኔ ናይ ኔና፥ ‹ሃይሲ ኣዛ ዎጋ?› ጊ ኦይቺኮ፥ ኔኒ ኢዛስ፥ ‹ጎዳይ ኑና ባ ዎልቃማ ቄሴን ኣይሌቴꬃ ቢታ ጊብጼፔ ኬሲዴስ፤
EXO 13:15 ጊብጼ ካዎይ ባ ዎዚና ሚንꬂዲ ኑና ዬዶንታ ኢጺን ጎዳይ ጊብጼ ቢታን ዲዛ ባይራ ኡባ፥ ኣሳፔ ዶሚዲ ሜሄ ባይራ ጋካናስ ዎꬊዴስ። ታኒ ኣዪ ኡሎፔ ኮይሮ ዬሌቲዳ ኣዴ ሜሄ ኡባ ጎዳስ ያርሺዛይሲኔ ባይራ ጊዲዳ ኣቱማ ናይታ ኡባ ዎዚዛይሲ ሄሳሳ› ጋ።
EXO 13:16 ጎዳይ ኑና ባ ዎልቃማ ቄሴን ጊብጼፔ ኬሲዳይሳስ፥ ሃይሲ ኢንቴስ ኩሼን ቃቺዳ ማላታኔ ሊጴ ቦላ ዎꬂዳ ማላታ ማላ ጊዳና» ጊዴስ።
EXO 13:17 ካዎይ ኣሳ ዬዲዳ ዎዴ ጾሲ ኢስታ ፊሊስጼሜ ቢታራ ካንꬂሲዛ ኦጌይ ማታ ሺን ሄ ኦጌዛራ ኤፊቤና፤ ጋሶይካ ጾሲ፥ «ኣሳይ ኦላ ቤይኮ ባ ቆፋ ላሚዲ ጉዬ ጊብጼ ሲማናኮ» ጊዲ ቆፒዴስ።
EXO 13:18 ሄሳ ጊሻስ ጾሲ ኣሳ ባዞ ኦጌራ ዩሺዲ፥ ዞኦ ኣባኮ ካሌꬂዴስ። ኢስራኤሌ ኣሳይ ጊብጼ ቢታፌ ኦላስ ጊጌቲዳ ኣሳ ማላ ጊጌቲዲ ጊብጼፔ ኬዚዴስ።
EXO 13:19 ዮሴፌይ ኢስራኤሌ ኣሳ፥ «ጾሲ ቱማፔ ኢንቴና ማዳና ያና፤ ሄ ዎዴ ኢንቴ ታ ሜቄꬃ ሃይሳፌ ኢንቴናራ ኤኪ ቢቴ» ጊዲ ጫቄꬂ ዎꬂዳ ጊሻስ ሙሴይ ኢዛ ሜቄꬃ ባናራ ኤኪ ቢዴስ።
EXO 13:20 ኢስቲ ሱኮቴፔ ዴንዲዲ ባዞ ዶናን ዲዛ ኤታሜ ጌቴቲዛሶን ኡቲዳ።
EXO 13:21 ኢስቲ ጋላሲካ ቃማካ ሄሜታና ማላ ጎዳይ ኢስታ ኦጌ ቤሳናስ ቱሳ ማላ ኤቂዳ ሻራን ጋላስ፥ ቱሳ ማላ ኤቂዳ ታማን ኦማርስ ኢስታ ካሌꬂዴስ።
EXO 13:22 ጋላስ ቱሳ ማላ ኤቂዳ ሻራይ፥ ኦማርስ ቱሳ ማላ ኤቂዳ ታማይ ኣሳ ሲንꬃፌ ኡባ ዎዴ ሻኬቲቤና።
EXO 14:1 ሄሳፌ ጉዬ ጎዳይ ሙሴስ፥ «ኢስቲ ጉዬ ሲሚዲ ሚጊዶሌፔኔ ኣባፌ ጊዶን፥ ፒሃሂሮቴ ኣቻን ኡታና ማላ ዴራስ ዮታ፤ ኢስቲ ኣባ ኣቻን ባኣሊ-ጻፎኔ ሲንꬃን ባዛን ኡቴቶ።
EXO 14:3 ጊብጼ ካዎይ፥ ‹ባዞን ኦጌይ ጎርዴቲ ꬋዪን ኢስራኤሌ ኣሳይ ቢዛሶ ꬋይዲ ጮ ቶይላቴስ› ጊዲ ቆፓና።
EXO 14:4 ታኒ ካዎዛ ዎዚና ሚንꬃና፤ ኢዚ ኢስታ ጎዳና፤ ታኒ ካዎዛ ባጋራኔ ኢዛ ኦላንቻታ ኡባ ባጋራ ቦንቼታና፤ ጊብጼ ኣሳይካ ታኒ ጎዳ ጊዲዳይሳ ኤራና» ጊዴስ። ሂስቲን ኢስራኤሌ ኣሳይ ኢዚ ዮቲዳ ማላ ኦꬂዴስ።
EXO 14:5 ኣሳይ ኬሲ ኤኪ ቢዳይሳ ጊብጼ ካዎስ ዮቲን፥ ኢዚካ ዳናታ ኢስራኤሌ ናይታ ጊሻስ ቆፒዳ ባ ቆፋ ላሚዲ፥ «ኑኒ ሃይሳꬆ ኣዛስ ኦꬂዶኒ? ኑኒ ኢስራኤሌ ናይታ ዬዲዲ ኢስቲ ኑስ ኦꬂዛ ዎልቃፌ ሜላ ኣቲዶስ» ጊዳ።
EXO 14:6 ሄሳ ጊሻስ ካዎዚ ባ ፓራ-ጋሬዛ ኮሪዲ ኦላንቻታ ባናራ ኤኪ ቢዴስ።
EXO 14:7 ኢዚ ኡባፌ ኣꬊዛ 600 ፓራ-ጋሬታ፥ ቃሴ ጊብጼ ቢታን ዲዛ ፓራ-ጋሬታ ኡባ ቦላካ ኦላ ሃላቃታ ዎꬂ ኤኪ ቢዴስ።
EXO 14:8 ጎዳይ ጊብጼ ቢታ ካዎ ዎዚና ሚንꬂን ሚኖቴꬃራ ቡሮ ቡሳ ቦላ ዲዛ ኢስራኤሌ ኣሳ ጎዲዴስ።
EXO 14:9 ጊብጼ ኣሳይ ካዎ ፓራ-ጋሬቲ ዉሪ ፓራ ኣሳቲኔ ኦላንቻቲ ኢስራኤሌ ናይታ ካሊ ጎዲዳ። ኣባ ዶናን ባኣሊ-ጻፎኔ ሲንꬃን ዲዛ ፒሃሂሮቴ ኣቻን ኢስቲ ኡቲ ዲሺን ዴሚዳ።
EXO 14:10 ካዎዚ ማቲግዲን ኢስራኤሌ ኣሳይ ጉዬ ጼሊዛ ዎዴ፥ ጊብጼ ኣሳይ ኢስታ ጉዬራ ካሊ ዪዛይሳ ቤኢዲኔ ዳሮፔ ባቢዲ ጎዳስ ዋሲዳ።
EXO 14:11 ኢስቲ ሙሴስ፥ «ኔኒ ኑና ጊብጼ ቢታን ኑስ ዱፎይ ꬋዪን ባዞን ሃይቃና ማላ ኬሳዲ? ኑና ጊብጼፔ ኣዛስ ኤሃዲ?
EXO 14:12 ኑኒ ጊብጼን ዲሼ፥ ‹ኑና ኣጋ፤ ኑኒ ጊብጼ ኣሳስ ሃሬታና› ጊዲ ኔስ ዮቲቤኮኒ? ባዞን ሃይቃናፔ ኢስታስ ሃሬቲዛይሲ ኑስ ሎኦኮሺን» ጊዳ።
EXO 14:13 ሙሴይ ኣሳ፥ «ባቦፍቴ፤ ሚኒ ኤቂቴ፤ ጎዳይ ሃች ኢንቴና ኣሻናይሳ ኢንቴ ቤያና። ሃች ኢንቴ ቤኢዛ ጊብጼ ኣሳ ናምኣንꬆ ሙሌካ ቤኤኬታ።
EXO 14:14 ኢንቴ ጊሻስ ጎዳይ ኦሌታና፤ ኢንቴፌ ኮዬቲዛይ ጮኡ ጉስ ጻላላ» ጊዴስ።
EXO 14:15 ጎዳይ ሙሴ፥ «ኔኒ ታኮ ኣይስ ዋሳይ? ኢስራኤሌ ኣሳይ ጌዴ ሲንꬄ ባና ማላ ዮታ።
EXO 14:16 ኢስራኤሌ ኣሳይ ሜላ ቢታ ቦላራ ኣባ ፒኒ ባና ማላ ኔ ጉፌ ዴንꬃዳኔ ኔ ኩሼ ኣባ ቦላ ፒዲሳዳ ሃꬃ ናምኡ ኬሳ ሻካ።
EXO 14:17 ታኒ ጊብጼ ኣሳ ዎዚና ሚንꬂኮ ኢስቲ ኢንቴ ጉዬ ካሊዲ ኣባን ጌላና። ታኒ ካዎዛኔ ኢዛ ኦላንቻታ ኡባ ቦላ፥ ኢዛ ፓራ-ጋሬታኔ ቶጋ ኣሳታ ቦላ ታስ ቦንቾ ዴማና።
EXO 14:18 ታኒ ካዎዛ ባጋራ ኢዛ ፓራ-ጋሬታ ባጋራኔ ኢዛ ቶጋ ኣሳታ ባጋራ ታስ ቦንቾ ዴሚዳ ዎዴ ታኒ ጎዳ ጊዲዳይሳ ጊብጼ ኣሳይ ኤራና» ጊዴስ።
EXO 14:19 ሄሳፌ ጉዬ ካሴ ኢስራኤሌ ኣሳ ሲንꬃራ ቢዛ ጾሳ ኪታንቻይ ኣሳፔ ጉዬ ኣꬊ ኤቂዴስ። ቱሳ ማላ ሻራይካ ኢስታ ሲንꬃፌ ጉዬ ባጋ ዩዪዲ፥
EXO 14:20 ጊብጼ ኣሳሲኔ ኢስራኤሌ ናይታስ ጊዶን ኣꬊ ኤቂዴስ። ሄ ሻራይ ኦማርስ ኢሲ ባጋራ ꬉሚሲዲ ሃንኮ ባጋራ ፖኢሲዴስ፤ ሂስቲን ኦማርስ ኩሜꬅ ኢሶይ ኢሳኮ ሺቃና ዳንዳይቤቴና።
EXO 14:21 ሄሳፌ ጉዬ ሙሴይ ኣባ ቦላን ባ ኩሼ ፒዲሲዴስ፤ ጎዳይ ሄ ጋላሳ ኦማርስ ኩሜꬅ ኣርሼይ ሞኪዛ ባጋፌ ዎልቃማ ጫርኮ ዬዲዲ፥ ኣባ ሻኪ ሻኪዲ ሜላ ቢታ ኬሲዴስ። ሃꬃይካ ናምኣን ሻኬቲዴስ።
EXO 14:22 ኢስራኤሌ ኣሳይ ኣባ ጊዶን ሜላ ቢታራ ሄሜቲዲ ሃꬂ ኢስታስ ኡሻቻራኔ ሃዲርሳራ ጎዳ ማላ ኤቂን ቢዳ።
EXO 14:23 ጊብጼ ኣሳይ ካዎ ፓራቲ ዉሪ፥ ፓራ-ጋሬቲኔ ቶጋ ኣሳይ ኢስታ ጎዲ ኤኪዲ ኣባ ጊዶ ጌሊዳ።
EXO 14:24 ቡሮ ባዞይ ዞኣናፔ ካሴቲዲ ጎዳይ ታማኒኔ ቱሳ ማላ ሻራን ጊዲዲ፥ ጊብጼ ኦላንቻታ ጼሊዳ ዎዴ ኢስታ ዎዚናይ ꬋይዴስ።
EXO 14:25 ጎዳይ ኢስታ ፓራ-ጋሬታ ቶሆ ቃቺ ኦይኪዳ ጊሻስ ላጎይ ባና ዋዪሲን ጊብጼ ኣሳይ፥ «ጎዳይ ኢስታ ማዲዲ ጊብጼ ኦሊዛ ጊሻስ ኣኔ ኑኒ ኢስራኤሌ ኣሳፔ ባቃቶስ» ጊዳ።
EXO 14:26 ጎዳይ ሙሴ፥ «ሃꬃይ ጊብጼ ኣሳ ቦላ፥ ኢስታ ፓራ-ጋሬታ ቦላኔ ቶጋ ኣሳታ ቦላ ጉዬ ጎጋና ማላ ኔ ኩሼ ኣባ ቦላ ፒዲሳ» ጊዴስ።
EXO 14:27 ሙሴይ ባ ኩሼ ኣባ ቦላ ፒዲሲዴስ፤ ጋዴይ ዎንቲሺን ኣባይ ካሴ ባ ዲዛ ሶሆ ጉዬ ሲሚዴስ፤ ጊብጼ ኣሳይ ጌዴ ኢዛ ጊዶ ባቃቲሺን ጎዳይ ጊብጼ ኣሳ ሄን ኣባ ጊዶን ዬጊዴስ።
EXO 14:28 ሃꬃይ ጉዬ ሲሚዲ ፓራ-ጋሬታ ቶጋ ኣሳታኔ ኢስራኤሌ ናይታ ካሊዲ ኣባን ጌሊዳ ካዎ ኦላንቻታ ሙሌ ሚቲ ኣጊዴስ፤ ኢስታፌ ኢሳዴይካ ኣቲቤና።
EXO 14:29 ጊዶ ኣቲን ኢስራኤሌ ኣሳይ ሃꬂ ኢስታስ ኡሻቻራኔ ሃዲርሳራ ጎዳ ማላ ኤቂ ዲሺን ኣባ ጊዶራ ሜላ ቢታ ቦላራ ሄሜቲ ቢዴስ።
EXO 14:30 ጎዳይ ሄ ጋላስ ኢስራኤሌ ኣሳ ጊብጼ ኣሳ ኩሼፔ ሃይሳꬆ ኣሺዴስ። ቃሴ ኢስራኤሌ ኣሳይ ጊብጼ ኣሳ ኣሃ ኣባ ዶናን ቤኢዴስ።
EXO 14:31 ጎዳይ ጊብጼ ኣሳ ቦላ ቤሲዳ ጊታ ዎልቃ ቤኢዲ ኢስራኤሌ ኣሳይ ጎዳስ ባቢዴሲኔ ኢዛኔ ኢዛ ኣይሌ ሙሴካ ኣማኒዴስ።
EXO 15:1 ሄ ዎዴ ሙሴይኔ ኢስራኤሌ ኣሳይ ሃይሳ ዬꬃዛ ጎዳስ ዬጺዴስ፤ «ቦንቾን ኢዚ ኬሂ ꬎቁ ꬎቁ ጊዳ ጊሻስ፥ ታኒ ጎዳስ ዬꬃ ዬጻና። ፓራኔ ፓራ ቶጊዳ ኣሳ ኣባ ጊዶን ዬጊዴስ።
EXO 15:2 ጎዳይ ታስ ዎልቃኔ ዬꬃ፤ ኢዚ ታና ኣሺዴስ። ኢዚ ታ ጾሳ፤ ታኒ ኢዛ ሳባና። ኢዚ ታ ኣዋ ጾሳ፤ ታኒ ኢዛ ꬎቁ ꬎቁ ሂስታና።
EXO 15:3 ጎዳይ ኦላንቻ፤ ኢዛ ሱንꬂካ ጎዳ።
EXO 15:4 ጊብጼ ካዎ ፓራ-ጋሬታኔ ኢዛ ኦላንቻታ ኣባን ዉርሲዴስ፤ ኡባፌ ኣꬊ ዶሬቲዳ ጊብጼ ካዎ ሃላቃቲ፥ ዞኦ ኣባን ሚቴቲዳ።
EXO 15:5 ጪማ ሃꬂ ኢስታ ካሚዴስ፤ ኢስቲ ሹቻꬆ ጪማን ሚቴቲዳ።
EXO 15:6 «ኣቤት ጎዳዉ! ኔ ኡሻቻ ኩሼይ ዎልቃን ጎቢዴስ፤ ጎዳዉ ኔ ዎልቃማ ኡሻቻ ኩሼይ ሞርኬ ሜንꬄሬꬂዴስ።
EXO 15:7 ኔ ጊታ ዎልቃን ኔናራ ኤቄቲዳይታ ኩንዲሳዳሳ። ኤጺዛ ኔ ሃንቆ ኔ ዬዳዳሳ፥ ኢዚካ ኢስታ ጋፌ ማላ ሚዴስ።
EXO 15:8 ኔ ፔኖይ ሃꬃ ፑዴ ኤሲ ዶሪዴስ። ጎጊዛ ሃꬂካ ጎዳ ማላ ሚኒ ኤቂዴስ፤ ጪማ ጊዶን ዲዛ ሃꬂ ኣባ ጊዶን ኢርኪዴስ።
EXO 15:9 «ሞርኬይ ጬቄቲሼ፥ ‹ታኒ ኢስታ ዬዴꬃ ኦይካና። ታኒ ኢስታ ሃሮ ሻካዳ፥ ታ ኮዪዳይሳ ኡባ ኤካና። ታኒ ታ ጊꬃ ማሻ ሾዳዳ፥ ኢስታ ꬋይሳና› ጊዴስ።
EXO 15:10 ጊዶ ኣቲን ኔኒ ኢስታ ኔ ፔኖን ፑኒን፥ ኣባይ ኢስታ ካሚዴስ። ኢስቲ ዎልቃማ ሃꬃን ቢራታይ ሚቴቲዛ ማላ ሚቴቲዳ።
EXO 15:11 «ኣቤት ጎዳዉ! ኤቃ ጾሳታ ጊዶን ኔ ማላይ ኦኔ? ጌሻቴꬃን ቦንቼቲዛይ፥ ቦንቾን ባቢሲዛይኔ፥ ማላሊሲዛ ሚሽ ኦꬂዛይ ኔ ማላይ ኦኔ?
EXO 15:12 ኔኒ ኔ ኡሻቻ ኩሼ ፒዲሳዳሳ፥ ቢታይካ ኢስታ ሚቲዴስ።
EXO 15:13 «ኔ ዎዚዳ ኔ ኣሳ ዉሮንታ ኔ ሲቆን ካሌꬃዳሳ። ኔኒ ኔ ዎልቃን ኢስታ ኔ ኣቂዛ ጌሻ ሶ ጌልꬃዳሳ።
EXO 15:14 ዴሬ ኣሳይ ሄሳ ሲዪዲ ኮኮሪዴስ። ፊሊስጼሜ ቢታ ኣሳታካ ሂርጋ ሚጻይ ኦይኪዴስ።
EXO 15:15 ሄ ዎዴ ኤዶሜ ቢታ ሃላቃቲ ዳጋሚዳ። ሞኣቤ ቢታ ሃሪዛይቲ ሂርጋን ኮኮሪዳ። ካናኔ ዴሬ ኣሳይ ዉሪ ሴሪዴስ።
EXO 15:16 ኣቤት ጎዳዉ! ዳጋማይኔ ሂርጋይ ኢስታ ኦይካና። ኢስቲ ኔ ዎልቃ ጊታቴꬅ ቤኢዲ፥ ኔ ኣሳይ ኣꬋና ጋካናስ፥ ኔኒ ዎዚዳ ኣሳይ ኣꬋና ጋካናስ፥ ሹቻ ማላ ቶሌቲ ኤቃና።
EXO 15:17 ኔኒ ኢስታ ኤሃዳ፥ ኔስ ቡዞ ቢታን ዲዛ ዙማ ሁኤን ቶካና። ኣቤት ሜርና ጎዶ፥ ሄ ሶሆይ ኔኒ ኔስ ዴያናስ ኦꬂዳ ሶሆኮ። ኣቤት ጎዳዉ! ሄ ጌሻ ሶሆይ ኔኒ ኔ ኩሼን ሚንꬃ ኤሲዳ ሶሆኮ።
EXO 15:18 ጎዳይ ሜርናፔ ሜርና ጋካናስ ካዎታና።»
EXO 15:19 ጊብጼ ካዎ ፓራቲ ዉሪ፥ ፓራ-ጋሬቲኔ ቶጋ ኣሳቲ ኣባን ጌሊዳ ዎዴ ጎዳይ ኢስታ ቦላ ኣባ ሃꬃ ጉዬ ዛሪ ኤሂዴስ፤ ጊዶ ኣቲን ኢስራኤሌ ኣሳይ ኣባ ጊዶራ ሜላ ቢታ ቦላራ ሄሜቲዲ ፒኒዴስ።
EXO 15:20 ኣሮኔ ሚቼያ፥ ናቤ ማራማ ካራቤ ኤካዱስ፤ ማጫሳይ ዉሪ ካራቤ ባቂዲ ዬጺሼኔ ጉፒሼ ኢዞ ካሊዴስ።
EXO 15:21 ማራማ ኢስታስ ዬꬃዛ ዬጻሼ፥ «ጎዳይ ኬሂ ꬎቁ ꬎቁ ጊዳ ጊሻስ ኢዛስ ዬጺቴ። ፓራኔ ፓራ ቶጊዳይታ ኢዚ ኣባን ኦሊዴስ» ጋ ዬጻዱስ።
EXO 15:22 ሄሳፌ ጉዬ ሙሴይ ኢስራኤሌ ኣሳ ዞኦ ኣባፌ ፒንꬂን ኢስቲ ሹራ ጌቴቲዛ ባዞ ቢዳ። ሄ ባዞን ኢስቲ ሃꬅ ዴሞንታ ሄꬑ ጋላስ ሄሜቲዳ።
EXO 15:23 ኢስቲ ማራ ጌቴቲዛሶ ጋኪዳ ዎዴ ማራ ሃꬂ ጫሞ ጊዲዳ ጊሻስ ኡያና ዳንዳይቤቴና፤ ሄሳ ጊሻስ ሄ ሶሆይ ማራ ጌቴቲዴስ።
EXO 15:24 ኣሳይካ፥ «ኑኒ ኣይ ኡያኔ?» ጊዲ ሙሴ ቦላ ዙዙሚዴስ።
EXO 15:25 ሙሴይ ጎዳስ ዋሲን ጎዳይ ኢዛ ኢሲ ሚꬅ ቤሲዴስ፤ ሙሴይ ሄ ሚꬃ ሃꬃን ዬጊን ሃꬃይ ማልኢዴስ። ሄን ጎዳይ ኢስታስ ዎጋኔ ማራ ኬሲዴሲኔ ኢስታ ፓጪዴስ።
EXO 15:26 ኢዚ ኢስታስ፥ «ጎዳ ኢንቴ ጾሳይ ዮቲዛይሳ ኢንቴ ሎኤꬂ ሲዪኮ፥ ኢዛ ኣይፌ ሲንꬃን ሎኦ ኦꬂኮ፥ ኢንቴ ኢዛ ኣዛዞ ዎዚናን ዎꬂ ናጊኮ፥ ኢዛ ዎጋካ ኡባ ናጊኮ፥ ታኒ ጊብጼ ኣሳ ቦላ ኤሂዳ ሃርጌፌ ኢሳካ ኢንቴ ቦላ ኤሂኬ፤ ጋሶይካ ታኒ ኢንቴና ፓꬂዛ ጎዳ» ጊዴስ።
EXO 15:27 ሄሳፌ ኢስቲ ታማኔ ናምኡ ሃꬃ ፑልቶቲኔ ላፑን ታሙ ዛምባ ሚꬃቲ ዲዛሶ ኤላሜ ዪዲ ሄን ሃꬃ ዶናን ኡቲዳ።
EXO 16:1 ጊብጼፔ ኬዚዳ ናምኣንꬆ ኣጊናን፥ ታማኔ ኢቻሻንꬆ ጋላሳን ኢስራኤሌ ኣሳ ማባራይ ኩሜꬅ ኤላሜፔ ዴንዲ ቢዲ ኤላሜፔኔ ሲናፔ ጊዶን ዲዛ ሲኔ ጌቴቲዛ ባዞ ዪዳ።
EXO 16:2 ኢስራኤሌ ኣሳ ማባራይ ዉሪ ባዞን ሙሴ ቦላኔ ኣሮኔ ቦላ ዙዙሚዴስ፤
EXO 16:3 «ጎዳይ ኑና ጊብጼ ቢታን ባ ኩሼን ዎꬊዳኮ ሎኦኮሺን! ሄን ኑኒ ኣሾ ሚዛ ኬሬዛ ዩዪ ኣꬊ ኡቲዲ ኑኒ ኮዪዳ ማላ ካꬅ ካሊ ሚዶስ፤ ጊዶ ኣቲን ኢንቴ ኑና ሄፔ ኬሲዲ ሃይሳ ዴራ ኡባ ጋፋን ዎꬋናስ ሃ ባዞ ኤሂዴታ» ጊዳ።
EXO 16:4 ሂስቲን ጎዳይ ሙሴስ፥ «ታኒ ኢንቴስ ሳሎፔ ሚዛ ካꬅ ቡኪሳና፤ ኣሳይ ኡባ ጋላሲካ ኬዚዲ ሃቺስ ሃቺስ ጊዳናዝ ጻላላ ማጻና ኮሼስ። ኣሳይ ታ ኣዛዞ ካሊዛኮኔ ካሎንታኮ ታኒ ኢስታ ሄሳን ፓጫ ጼላና።
EXO 16:5 ኡሱፑንꬆ ጋላስ ኢስቲ ሃራ ዎዴ ማጺዛይሳስ ናምኡ ኩሼ ማጺዲ ካꬄቶ» ጊዴስ።
EXO 16:6 ሄሳ ጊሻስ ሙሴይኔ ኣሮኔይ ኢስራኤሌ ኣሳ ኡባስ፥ «ኢንቴና ጊብጼ ቢታፌ ኬሲዳይ ጎዳ ጊዲዳይሳ ሃች ኦማርስ ኢንቴ ኤራና።
EXO 16:7 ቃሴ ኢዛ ቦላ ኢንቴ ዙዙሚዳይሳ ኢዚ ሲዪዳ ጊሻስ ማላዶ ኢንቴ ጎዳ ቦንቾ ቤያና። ኢንቴ ኑ ቦላ ዙዙማናስ ኑኒ ኦኔ?» ጊዳ።
EXO 16:8 ሄሳፌ ጉዬ ሙሴይ፥ «ኢንቴ ኢዛ ቦላ ዙዙሚዳይሳ ኢዚ ሲዪዳ ጊሻስ ኢዚ ኢንቴስ ማናስ ኦማርስ ኣሾ ኢሚኮ ኢንቴ ኮዪዳ ማላ ሚዛ ኡኬꬃካ ኡባ ኢንቴስ ማላዶ ኢማና። ኑ ኦኔ? ኢንቴ ጎዳ ቦላ ዙዙሚዴታ ኣቲን ኑ ቦላ ዙዙሚቤኬታ» ጊዳ።
EXO 16:9 ሙሴይ ኣሮኔስ፥ «ኔኒ ኢስራኤሌ ኣሳ ማባራ ኡባ፥ ‹ጎዳይ ኢንቴ ዙዙንꬃ ሲዪዳ ጊሻስ ጎዳ ሲንꬅ ሺቂቴ› ጋ ዮታ» ጊዴስ።
EXO 16:10 ኣሮኔይ ኢስራኤሌ ኣሳ ማባራ ኡባስ ዮቲዳ ማላ ኣሳይ ባዞ ሲሚ ጼሊሺን ሄን ጎዳ ቦንቾይ ሻራራ ቆንጪዳይሳ ቤኢዳ።
EXO 16:11 ጎዳይ ሙሴስ፥ «ታኒ ኢስራኤሌ ናይታ ዙዙንꬃ ሲያዲስ፤ ኔኒ ኢስታስ፥ ‹ኢንቴ ኦማርሳ ዎዴ ኣሾ ማና፤ ማላዶ ኡኬꬅ ካላና፤ ሄ ዎዴ ታኒ ጎዳ ኢንቴ ጾሳ ጊዲዳይሳ ኢንቴ ኤራና› ጋዳ ዮታ» ጊዴስ።
EXO 16:13 ሄ ጋላሳ ኦማርሳ ዎዴ ኩራቾቲ ዪዲ ኢስራኤሌ ኣሳይ ዲዛሶን ኩሚዳ፤ ቃሴ ማላዶ ኢስቲ ዲዛሶ ዩሾን ጻዛይ ማይኢ ኡቲዴስ።
EXO 16:14 ጻዛይ ጾስኪሺን ቢታ ቦላን ቦꬃ ሻች ሚሳቲዛ ሊቆ ሚሺ ቤቲዴስ።
EXO 16:15 ኢስራኤሌ ኣሳይ ሄሳ ቤኢዲ ባ ጋርሳን ኢሶይ ኢሳ፥ «ሃይሲ ኣዜ?» ጊዳ። ኣይስ ጊኮ ኢስቲ ኢዚ ኣዛኮ ኤሪቤቴና። ሂስቲን ሙሴይ ኢስታስ፥ «ኢንቴስ ማናስ ጎዳይ ኢሚዳ ካꬂ ሃይሳኮ።
EXO 16:16 ጎዳይ፥ ‹ኣሳይ ኢሶይ ኢሶይ ባስ ማናስ ኮሺዛ ማላ ሺሾ፤ ኢንቴ ሶ ኣሳስ ሁኤን ሁኤን ኢሲ ኢሲ ኪሎኔ ባጋ ኤኪቴ› ጊ ኣዛዚዴስ» ጊዴስ።
EXO 16:17 ኢስራኤሌ ኣሳይ ሙሴይ ኢስታስ ዮቲዳ ማላ ኦꬂዴስ፤ ባጋይ ዳርሲዲ ባጋይ ቃሴ ጉꬂዲ ሺሺዳ።
EXO 16:18 ሺሺዲ ኢስቲ ማኪን ዳርሲዲ ሺሺዳይሳስ ፓላሂቤና፤ ጉꬅ ሺሺዳይሳስካ ፓጪቤና፤ ዉሪካ ኢሶይ ኢሶይ ባስ ጊዲዛ ማላ ሺሺዴስ።
EXO 16:19 ሄሳፌ ጉዬ ሙሴይ ኢስታስ፥ «ኦኒካ ኢዛፔ ዎንቶስ ኣሾፎ» ጊዴስ።
EXO 16:20 ጊዲኮካ ኢስታፌ ባጋይ ሙሴይ ዮቲዛይሳ ኤኮንታ ኣጊዲ ኣቲዳይሳ ዎንቶ ማላዶ ጋካናስ ዎꬂዳ፤ ዎꬂዳይሲካ ጉጹኒዲ ጺንቂዴስ። ሄሳ ጊሻስ ሙሴይ ኢስታ ሃንቄቲዴስ።
EXO 16:21 ማላዶ ማላዶ ኣሳይ ዉሪ ባስ ኮሺዛይሳ ላጌ ሺሺዴስ፤ ኣርሼይ ሚቺዛ ዎዴ ቢታን ኣቲዳይሲ ማዪዴስ።
EXO 16:22 ኡሱፑንꬃ ጋላሳን ኢስቲ ካሴይሳስ ናምኡ ኩሼ ኢሲ ኢሲ ኣሳስ ሄꬑ ኪሎ ሺሺዳ። ሂስቲን ማባራ ሃላቃቲ ዉሪ ዪዲ ሄሳ ሙሴስ ዮቲዳ።
EXO 16:23 ኢዚ ኢስታስ፥ «ጎዳይ ኣዛዚዳይሲ ሃይሳ፤ ዎንቶይ ሼምፖ ጋላሳ፥ ጎዳስ ጌሻ ሳምባታ። ሄሳ ጊሻስ ኢንቴ ኡካናይሳ ኡኪቴ፤ ኢንቴ ዶይሳናይሳካ ዶይሲቴ፤ ፓላሂዳይሳ ዎንቶስ ኣሺቴ» ጊዴስ።
EXO 16:24 ሄሳ ጊሻስ ኢስቲ ሙሴይ ኣዛዚዳ ማላ ዎንቶስ ዎꬂን ጺንቂቤና ዎይኮ ጉጹኒቤና።
EXO 16:25 ዎንቴꬃ ጋላስ ሙሴይ ኢስታስ፥ «ሃይሳ ሃች ሚ ዉርሲቴ፤ ኣይስ ጊኮ ሃች ጎዳ ሳምባታ፤ ኢንቴ ኢዛ ሃች ዴምባን ዴሜኬታ።
EXO 16:26 ኢንቴ ኡሱፑን ጋላሳን ኢዛ ሺሺቴ፤ ጊዶ ኣቲን ላፑንꬃ ጋላሳይ ሳምባታ ጊዲዳ ጊሻስ ኣይኮይካ ዴና» ጊዴስ።
EXO 16:27 ጊዶ ኣቲን ኢሲ ኢሲ ኣሳቲ ላፑንꬃ ጋላሳን ሺሻናስ ኬዚዳ ሺን ኣይኮካ ዴሚቤቴና።
EXO 16:28 ጎዳይ ሙሴስ፥ «ኢንቴ ታ ኣዛዞታኔ ታ ዎጋታ ናጎዛ ኣይዴ ጋካናስ ኢጻኔ?
EXO 16:29 ታ ኢንቴስ ሳምባታ ኢሚዳይሳ ኣኬኪቴ፤ ኡሱፑንꬃ ጋላሳን ታ ኢንቴስ ናምኡ ጋላሳስ ካꬅ ኢሚዛይሲ ሄሳ ጊሻሳ። ላፑንꬃ ጋላስ ዉሪካ ባ ዲዛሶን ዲዛሶን ታኮ፤ ኦኒካ ኣዋካ ቦፖ» ጊዴስ።
EXO 16:30 ሄሳ ጊሻስ ኣሳይ ላፑንꬃ ጋላሳን ሼምፒዴስ።
EXO 16:31 ኢስራኤሌ ኣሳይ ሄ ካꬃዛ ማና ጊ ሱንꬂዴስ። ኢዚካ ዴቦ ኣይፌ ማላ ጊዲዲ ቦꬃ፤ ኤሳራ ኡኬቲዳ ኡኬꬃ ማላ ማልኤስ።
EXO 16:32 ሙሴይ ኢስራኤሌ ኣሳስ፥ «ጎዳይ ኣዛዚዳይሲ ሃይሳ፥ ‹ታኒ ኢንቴና ጊብጼ ቢታፌ ኬሲዳ ዎዴ፥ ባዞን ሚዚዳ ካꬃ ኢስቲ ቤያና ማላ፥ ማናፌ ኢሲ ኢሲ ኪሎኔ ባጋ ኢንቴ ሲንꬃፌ ያና ዬሌታታስ ኣሺ ዎꬂቴ› ጊ ኣዛዚዴስ» ጊዴስ።
EXO 16:33 ሂስቲን ሙሴይ ኣሮኔ፥ «ኢሲ ጻሮ ኤካዳ ኢሲ ኪሎኔ ባጋ ጊዲዛ ማና ኢዛን ቆላ፤ ሂስታዳ ያና ዬሌታታስ ሚንጃና ማላ ጎዳ ሲንꬃን ዎꬃ» ጊዴስ።
EXO 16:34 ጎዳይ ሙሴ ኣዛዚዳ ማላ ሚንጃናስ፥ ኣሮኔይ ማና ጎዳ ማርካ ታቦታ ሲንꬃን ዎꬂዴስ።
EXO 16:35 ኢስራኤሌ ኣሳይ ባ ዳና ቢታ ቢ ጋካናስ ኦይዱ ታሙ ላይꬅ ኩሜꬅ ማና ሚዳ፤ ኢስቲ ካናኔ ቢታ ዛዋ ጋካናስ ማና ሚሼ ዴኢዳ።
EXO 16:36 ኢሲ ኪሎይኔ ባጋይ ሄ ዎዴ ማኪዛ ጊታ ማካ ሚሻስ ታማፌ ኢሲ ኩሼኮ።
EXO 17:1 ኢስራኤሌ ማባራይ ዉሪ ጎዳይ ኣዛዚዳ ማላ ሲና ጌቴቲዛ ባዞፌ ዴንዲ ቢዲ ኤራፊዲሜ ጌቴቲዛሶን ኡቲዴስ፤ ጊዶ ኣቲን ኣሳስ ኡያናስ ሃꬂ ሄን ቤቲቤና።
EXO 17:2 ሄሳ ጊሻስ ኢስቲ ሙሴራ ኦዬቲዲ ኢዛ፥ «ኑስ ኡያና ሃꬅ ኢማ» ጊዳ። ሙሴይ ዛሪዲ፥ «ኢንቴ ታናራ ኣይስ ኦዬቴቲ? ጎዳ ኢንቴ ኣይስ ፓጬቲ?» ጊዴስ።
EXO 17:3 ጊዶ ኣቲን ኣሳይ ሄን ሳሜቲዲ ሙሴ ቦላ ዙዙሚዴስ። ኢስቲ፥ «ኔኒ ኑና፥ ኑ ናይታኔ ኑ ሜሄ ሳሞን ዎꬋናስ ጊብጼፔ ኣይስ ኬሳዲ?» ጊዲ ሙሴ ቦላ ጉጉሚዳ።
EXO 17:4 ሂስቲን ሙሴይ፥ «ታኒ ሃ ኣሳ ዎስቶ? ኢስቲ ታና ሹቻን ጫዳና ጌቴስ» ጊዲ ጎዳኮ ዋሲዴስ።
EXO 17:5 ጎዳይ ሙሴ፥ «ኢስራኤሌ ኣሳ ጪማታፔ ኔናራ ኤካዳ፥ ካሴ ኔኒ ኣባዬ ሻፋ ሃꬃ ኢዛራ ሾጪዳ ጉፌዛ ኔ ኩሼን ኦይካዳ ኣሳፔ ሲንꬅ ባ።
EXO 17:6 ታኒ ሲና ዙማን ዲዛ ዛላ ቦላ ሄን ኔ ሲንꬃን ኤቃዳ ናጋና፤ ኔኒ ሄ ዛላ ሾጫ፤ ኣሳይ ኡያና ማላ ሃꬂ ኢዛፔ ኬዛና» ጊን ሙሴይ ኢስራኤሌ ጪማታ ሲንꬃን ኢዚ ጊዳ ማላ ኦꬂዴስ።
EXO 17:7 ኢስራኤሌ ኣሳይ፥ «ጎዳይ ኑ ጊዶን ዲዜዬ? ዴኔ?» ጊ ጎዳ ፓጪዲ ኦዬቲዳ ጊሻስ ሄ ሶሆዛ ሙሴይ ማሳኔ ማሪባ ጊ ሱንꬂዴስ።
EXO 17:8 ኣማሌቄ ኣሳይ ዪዲ ኤራፊዲሜን ኢስራኤሌ ናይታ ኦሊዴስ።
EXO 17:9 ሙሴይ ኢያሶ፥ «ኔኒ ኑስ ኣሳ ጋርሳፌ ኢሲ ኢሲ ኣስ ዶራ ኤካዳ ዎንቶ ኣማሌቄታራ ኦሌታና ኬዛ፤ ታኒካ ጾሳ ጉፌ ኦይካዳ ꬎቃሶሆን ኤቃና» ጊዴስ።
EXO 17:10 ኢያሶይ ሙሴይ ጊዳ ማላ፥ ኣማሌቄታራ ኦሌቲዴስ። ሙሴይ፥ ኣሮኔይኔ ሁሬይ ꬎቃሶ ኬዚዳ።
EXO 17:11 ሙሴይ ባ ኩሼ ፑዴ ዴንꬂሺን ኢስራኤሌ ኣሳይ ጾኔስ ሺን ኢዚ ባ ኩሼ ዚቂሲሺን ኣማሌቄ ኣሳይ ጾኔስ።
EXO 17:12 ሙሴ ኩሼይ ኢጼቲሺን ኣሮኔይኔ ሁሬይ ሹች ኤኪ ኤሂዲ ሙሴ ኢዛ ቦላ ኡቲሲዳ። ኢስቲ ኢሶይ ኢሲ ባጋራ ኡሻቻ ኩሻ ኢሶይ ኢሲ ባጋራ ሃዲርሳ ኩሻ ꬎቁ ሂስቲ ኦይኪዳ። ሂስቲን ኣርሼይ ዉላና ጋካናስ ኢዛ ኩሼይ ꬎቁ ጊ ጋምኢዴስ።
EXO 17:13 ሄሳ ጊሻስ ኢያሶይ ኣማሌቄ ኦላንቻታኔ ኣማሌቄ ኣሳ ጊꬃ ማሻን ጾኒዴስ።
EXO 17:14 ሄሳፌ ጉዬ ጎዳይ ሙሴስ፥ «ታኒ ኣማሌቄ ኣሳይ ቆፌቶንታ ማላ ኢስታ ቢታ ቦላፌ ኩሜꬅ ꬋይሳና። ሃይሲ ኡባ ዎዴ ቆፌታና ማላ ማጻፋን ጻፋዳ ኢያሶስ ናባባ ሲሶንታ ኣጎፋ» ጊዴስ።
EXO 17:15 ሙሴይካ ያርሾ ያርሺዛሶ ኦꬂዲ፥ «ጎዳይ ታ ባንዲራ» ጊ ሱንꬂዴስ።
EXO 17:16 ቃሴካ፥ «ቱማፔ ጎዳይ ባ ኩሼ ዴንꬂዲ ዬሌታፔ ዬሌታ ጋካናስ ኣማሌቄታራ ኦሌታናስ ጫቂዴስ» ጊዴስ።
EXO 18:1 ሚዲያሜ ቢታ ቄሴ፥ ሙሴ ቦሎ ዮቶሬይ፥ ጾሳይ ሙሴሲኔ ኢዛ ኣሳ ኢስራኤሌ ናይታስ ኦꬂዳይሳ ሄሲካ ጎዳይ ኢስታ ጊብጼ ቢታፌ ኬሲዳይሳ ኡባ ሲዪዴስ።
EXO 18:2 ሄ ዎዴ ሙሴ ቦሎ ዮቶሬይ፥ ሙሴይ ጉዬ ዛሪ ሞይዚዳ ሙሴ ማቼዮ ጺፖሮኔ ኢዚ ናምኡ ናይታ ባናራ ኤኪ ዪዴስ። ሙሴይካ፥ «ታኒ ኣሳ ቢታን ቤቴ ኣስ ጊዳዲስ» ጊሼ ባይራ ናዛ ጌርሾሜ ጊ ሱንꬂዴስ።
EXO 18:4 ቃሴካ፥ «ታ ኣዋ ጾሲ ታና ማዲዴስ፤ ኢዚ ታና ጊብጼ ካዎ ቶራፔ ኣሺዴስ» ጊሼ ናምኣንꬆ ናዛ ኤልኤዜሬ ጊ ሱንꬂዴስ።
EXO 18:5 ሙሴ ቦሎ ዮቶሬይ ሙሴ ኣቱማ ናይታራኔ ሙሴ ማቼይራ ጊዲዲ ባዞን ጾሳ ዙማ ኣቻን ዲዛ ሙሴኮ ዪዴስ።
EXO 18:6 ኢዚ፥ «ታኒ ኔ ቦሎ ዮቶሬይ፥ ኔ ማቼይራኔ ኢዚ ናይታ ናምኣታራ ኔኮ ሄ ቦስ» ጊዲ ኪታ ሙሴኮ ዬዲዴስ።
EXO 18:7 ሄሳ ጊሻስ ሙሴይ ባ ቦሎዛራ ጋጋናስ ኬዚዲ ሆኪዲ ኢዛ ዬሪዴስ። ኢስቲ ኢሶይ ኢሳ ሳሮꬂዳፔ ጉዬ ሙሴ ዱንካኔ ጊዶ ጌሊዳ።
EXO 18:8 ጎዳይ ኢስራኤሌ ኣሳ ጊሻስ ጊብጼ ካዎ ቦላኔ ጊብጼ ኣሳ ቦላ ኦꬂዳይሳ፥ ኦጌ ቦላ ኢስታ ጋኪዳ ዳቡራኔ ጎዳይ ኢስታ ኣሺዳይሳ ኡባ ሙሴይ ባ ቦሎዛስ ዮቲዴስ።
EXO 18:9 ኢስራኤሌ ኣሳ፥ ጊብጼ ኣሳ ኩሼፔ ኣሻናስ ጎዳይ ኦꬂዳ ሎኦ ኦሶ ኡባ ሲዪዲ ዮቶሬይ ኡፋዬቲዴስ።
EXO 18:10 «ኢንቴና ጊብጼ ኣሳ ኩሼፔኔ ካዎ ፓሮኔ ኩሼፔ ኣሺዳ ጎዳይ ባ ኣሳ ጊብጼ ኣሳ ኩሼፔ ኬሲ ኤኪዳይሲ ኢዚ ጋላቴቶ።
EXO 18:11 ኢዚ ኢስራኤሌ ኣሳ ቦላ ኦቶሬቲዳይታስ ሃይሳ ኦꬂዳ ጊሻስ ጎዳይ ሃራ ኤቃ ጾሳታ ኡባፌ ጎባ ጊዲዳይሳ ታኒ ሃኢ ኤራዲስ» ጊዴስ።
EXO 18:12 ሄሳፌ ጉዬ ሙሴ ቦሎ ዮቶሬይ ጹጌቲዛ ያርሾ ቃሴካ ሃራ ያርሾታ ጾሳስ ሺሺዴስ። ኣሮኔይኔ ኢስራኤሌ ጪማቲ ዉሪ ጾሳ ሲንꬃን ሙሴ ቦሎዛራ ካꬅ ማናስ ዪዳ።
EXO 18:13 ዎንቴꬃ ጋላስ ሙሴይ ኣሳስ ፒርዳናስ ኡቲን ኣሳይ ኢዛ ሲንꬃን ዪዲ ዪዲ ኤቂዛ ጊሻስ ሙሴይ ማላዶፔ ኦማርሳ ዎዴ ጋካናስ ኡቲዴስ።
EXO 18:14 ሙሴ ቦሎይ ሙሴይ ኣሳስ ኦꬂዛይሳ ኡባ ቤኢዲ፥ «ኔኒ ሃ ኣሳስ ኦꬂዛይሲ ሃይሲ ኣዜ? ሃይሲ ኣሳይ ዉሪ ማላዶፔ ዶሚዲ ኦማርሳ ዎዴ ጋካናስ ኔ ሲንꬃን ዪዲ ዪዲ ኤቂሺን፥ ማዶይ ባይንዳ ኣሳ ማላ ኔኒ ኔርካ ኣይስ ፒርዳስ ኡታዲ?» ጊዴስ።
EXO 18:15 ሂስቲን ሙሴይ ባ ቦሎዛስ፥ «ኣሳይ ጾሳ ሼኔ ኦይቻናስ ታኮ ዪዛ ጊሻሳ።
EXO 18:16 ኢስታ ጊዶን ዮኦይ ዲኮ ታኮ ዬቴስ፤ ታኒካ ኢስታ ጊዶን ዲዛ ዮኦ ፒርዳይስ፤ ጾሳ ማራኔ ዎጋ ኢስታ ኤሪሳይስ» ጊዴስ።
EXO 18:17 ዮቶሬይካ፥ «ሃይሲ ኔኒ ኦꬂዛይሲ ሎኦ ዴና።
EXO 18:18 ኔኒኔ ኔናራ ዲዛ ኣሳይ ዳቡራ ጻላላ ዳቡሬታ፤ ሃይሲ ኦሶዚ ኔስ ዳሮ ዴጾ፤ ኔኒ ሃይሳ ኔርካ ኦꬃናስ ዳንዳያካ።
EXO 18:19 ኣኔ ሃኢ ታ ኔና ዞራይስ! ታ ዮቲዛይሳ ሲያ፤ ጾሲ ኔናራ ጊዶ። ኔኒ ሃ ኣሳ ጊሻስ ጾሳ ሲንꬃን ኤቃ፤ ኣሳዛ ዮኦካ ጾሳኮ ሺሻ።
EXO 18:20 ጾሳ ማራኔ ዎጋ ኢስታ ኔኒ ታማርሳ፤ ኢስቲ ዋኒ ዳናኮ ኢስቲ ኦꬃና ኦሶ ኢስታ ቤሳ።
EXO 18:21 ቃሴ ኣሳ ኡባ ጊዶፌ ኤራ ኣሳታ፥ ጾሳስ ባቢዛይታ፥ ኣማኔቲዳይታኔ ማታኤ ኢጺዛይታ ዶራዳ ኢስታፌ ኣሳስ ሻላቃታ፥ ማቶ ሃላቃታ፥ ሃምሳ ሃላቃታኔ ኣሲራ ሃላቃታ ሂስታ ሱንꬃ።
EXO 18:22 ኢስቲ ኡባ ዎዴ ኣሳስ ፒርዴቶ፤ ጊዶ ኣቲን ዴጾ ዮኦ ኡባ ኔኮ ኤሄቶ፤ ዋዪሶንታ ዮኦ ኡባ ኢስቲ ሄን ዉርሴቶ። ኢስቲ ኔናራ ጊሼቲዛ ጊሻስ ቶሆይ ኔስ ካዉያና።
EXO 18:23 ኔኒ ሄሳꬆ ኦꬂኮ ሃይሲ ጾሳ ሼኔ ጊዲኮ ኔኒ ዳሮ ዳቡራካ። ቃሴ ሃ ኣሳይ ዉሪካ ባ ዮኦይ ፖሌቲን ኡፋይሳን ባ ሶ ባ ሶ ባና» ጊዴስ።
EXO 18:24 ሙሴይ ባ ቦሎዛ ቃላ ሲዪዴስ፤ ኢዚ ጊዳይሳ ኡባካ ኦꬂዴስ።
EXO 18:25 ሙሴይ ኢስራኤሌ ኡባ ጊዶፌ ኤራ ኣሳታ ዶሪዲ ኣሳ ካሌꬂዛ ሻላቃታ፥ ማቶ ሃላቃታ፥ ሃምሳ ሃላቃታኔ ኣሲራ ሃላቃታ ሂስቲ ሱንꬂዴስ።
EXO 18:26 ኢስቲካ ኣሳስ ኡባ ዎዴ ፒርዲዳ፤ ባና ዴጺዳ ዮኦዛ ሙሴኮ ኤሂዳ ሺን ዴጾንታ ዮኦዛ ኡባ ባርካ ዉርሲዳ።
EXO 18:27 ሄሳፌ ጉዬ ሙሴይ ባ ቦሎ ዮቶሬ ሞይዚን ዮቶሬይ ጉዬ ባ ዴሬ ሲሚዴስ።
EXO 19:1 ኢስራኤሌ ኣሳይ ጊብጼፔ ኬዚዳ ሄꬓንꬆ ኣጊናን ኮይሮ ጋላስ ሲና ባዞ ጋኪዴስ።
EXO 19:2 ኢስቲ ኤራፊዲሜፔ ዴንዲዲ ሲና ባዞ ቢዲ ባዞን ዲዛ ዙማ ሲንꬃን ኡቲዳ።
EXO 19:3 ሙሴይካ ጾሳኮ ፑዴ ዙማ ቦላ ኬዚን ጎዳይ ዙማ ቦላ ዲሼ ኢዛ ጼይጊዲ፥ «ኔኒ ያቆቤ ኬꬃ ኣስ ጊዲዳ ኢስራኤሌ ናይታስ ሂዝጋ ዮታ፤
EXO 19:4 ‹ታኒ ጊብጼ ኣሳ ቦላ ኣይ ኦꬂዳኮ ቃሴ ጎሌ ካፎይ ባ ና ባ ቄፌን ቶኪዛ ማላ ታኒ ኢንቴና ዎስታ ቶካዳ ታኮ ኤሂዳኮ ኢንቴ ኢንቴ ኣይፌራ ቤዪዴታ።
EXO 19:5 ሂስቲን ሃኢ ኢንቴ ታስ ኩሜꬅ ኣዛዜቲኮ፥ ኢንቴ ታ ጫቆ ቃላ ናጊኮ፥ ኩሜꬃ ዴራ ጋርሳን ኢንቴ ታስ ቡዞ ዴሬ ጊዳና። ቢታይ ዉሪ ታስ ጊዲኮካ፥
EXO 19:6 ኢንቴ ታ ካዎቴꬃስ ዱማ ሻኬቲዳ ቄሴታኔ ዱማ ዴሬ ጊዳና፤› ኔኒ ኢስራኤሌ ናይታስ ዮታና ቃላይ ሃይሳ» ጊዴስ።
EXO 19:7 ሂስቲን ሙሴይ ዙማ ቦላፌ ዱጌ ኣሳኮ ዎꬊዲ ዴሬ ጪማታ ጼይጊ ሺሺዲ ጎዳይ ዮታ ጊዳ ቃላታ ኡባ ኢስታስ ዮቲዴስ።
EXO 19:8 ኣሳይ ዉሪ ኢሲ ቃላን ጊዲዲ፥ «ጎዳይ ጊዳይሳ ኡባ ኑ ኦꬃና» ጊን ሙሴይ ኢስቲ ጊዳይሳ ጎዳኮ ኤኪ ቢዴስ።
EXO 19:9 ጎዳይ ሙሴ፥ «ታኒ ኔናራ ሃሳይሺን ኣሳይ ሲያና ማላኔ ኢስቲ ኔናን ኡባ ዎዴካ ኣማኔታና ማላ፥ ታኒ ኔኮ ዎልቃማ ሻራራ ያና» ጊዴስ። ሄሳፌ ጉዬ ሙሴይ ኣሳይ ጊዳይሳ ጎዳስ ዮቲዴስ።
EXO 19:10 ጎዳይ ሙሴስ፥ «ኔኒ ኣሳኮ ባዳ ሃቺኔ ዎንቶ ኢስታ ጌሻ። ኢስቲ ባ ማይኦ ሜጪዲ፥
EXO 19:11 ሄꬓንꬆ ጋላሳስ ጊጌቴቶ። ጋሶይካ ሄꬓንꬆ ጋላሳን ኣሳይ ዉሪ ቤዪሺን ታኒ ጎዳይ ሲና ዙማ ቦላ ዎꬋና።
EXO 19:12 ኔኒ ኣሳይ ዲዛሶ ዩሾን ኣሳስ ዛዋ ዎꬃዳ ኢስታስ፥ ‹ዙማ ቦላ ፑዴ ኬዞንታ ማላ ዎይኮ ዙማ ጻጶ ቦቾንታ ማላ ኢንቴና ኤሪቴ። ዙማ ቦቺዳይ ኦኒካ ቱማፔ ሃይቃናስ ቤሴስ።
EXO 19:13 ኣስ ዎይኮ ሜሄ ጊዲን ዛዋ ፒኒ ኣꬊኮ ኦኒካ ባ ኩሼን ኢዛ ቦቾንታ ሹቻን ጫዲዲ ዎይኮ ዎንዳፌን ዱኪዲ ዎꬎ› ጌስ። ዛዬ ጎቺ ፑኒኮ ኢስቲ ፑዴ ዙማ ቦላ ኬዛና ዳንዳዬቴስ» ጊዴስ።
EXO 19:14 ሙሴይ ዙማፔ ኣሳኮ ዱጌ ዎꬊዳፔ ጉዬ ኣሳ ጌሺን ኣሳይ ባ ማይኦ ሜጪዴስ።
EXO 19:15 ኣሳካ፥ «ሄꬓንꬆ ጋላሳስ ጊጌቲቴ፤ ማጫሳራ ኣቆፒቴ» ጊዴስ።
EXO 19:16 ሄꬓንꬆ ጋላስ ማላዶ ዳዳ ጊሪሲ ሲዬቲዴስ። ዎልቃንꬃ ፖኦይኔ ዎልቃማ ሻራይ ዙማ ቦላ ቤቲዴስ፤ ዛዬይ ፑኔቲዛ ዳሮ ዎልቃማ ጊሪሲ ሲዬቲዴስ። ሄሳ ጊሻስ ኣሳይ ዉሪ ባ ዲዛሶን ባቢዲ ኮኮሪዴስ።
EXO 19:17 ሙሴይካ ኣሳ ጾሳራ ጋꬃናስ ኣሳይ ዲዛሶፔ ኬሲን ኣሳይ ዙማ ኣቻን ኤቂዴስ።
EXO 19:18 ጎዳይ ሲና ዙማ ቦላ ታማራ ዎꬊዳ ጊሻስ ጊታ ጮጬፔ ኬዚዛ ማላ ጩዋይ ቱሉ ጊ ኬዚዲ ዙማ ኩሜꬅ ካሚዴስ፤ ዙማዚ ኩሜꬅ ኬሂ ቃጺዴስ።
EXO 19:19 ዛዬዛ ጊሪሳይካ ኬሂ ዳሪ ዳሪ ቢዳ ዎዴ ሙሴይ ሃሳዪን ሃሳዪን ጾሲ ኢዛስ ዛሪ ዛሪዲ ቃላን ሃሳይዴስ።
EXO 19:20 ጎዳይ ካሴ ሲና ዙማ ቦላ ዎꬊዳ ዎዴ ሙሴ ፑዴ ዙማ ሁኤ ጼይጊን ሙሴይ ፑዴ ኬዚዴስ።
EXO 19:21 ጎዳይ ኢዛ፥ «ኔኒ ዱጌ ባዳ ኣሳይ ቤያና ጊዲ ሃ ታኮ ዛዋ ኣꬎንታ ማላኔ ኢስታፌ ዳሮቲ ሃይቆንታ ማላ ኣሳ ሃንቃ።
EXO 19:22 ሃራይ ኣቶሺን ታ ማታ ሺቂዛ ቄሴቲካ ኡባ ዎዴ ባና ጌሻናስ ኮሼስ፤ ሂስቶንታ ኢጺኮ ጎዳይ ኢስታ ቃጻያና» ጊዴስ።
EXO 19:23 ሙሴይ ጎዳስ፥ «ኣሳይ ዙማ ቦላ ፑዴ ያናስ ዳንዳዬና፤ ኣይስ ጊኮ ኔኒ ኔ ሁኤን፥ ‹ሃ ሶሆዛ ጌሻ ማላ ዱማሳዳ፥ ሃ ዙማ ኣቻን ዛዋ ዎꬂቴ› ጋዳ ኑስ ዮታ ዎꬃዳሳ» ጊዴስ።
EXO 19:24 ሂስቲን ጎዳይ ኢዛ፥ «ኔኒ ዱጌ ሃኢ ኤሌ ዎꬋዳ ፑዴ ኬዛ። ኣሮኔይካ ኔናራ ዮ። ቄሴታኔ ኣሳ ታ ቃጻዮንታ ማላ ኢስቲ ዛዋ ፒኒዲ ፑዴ ታኮ ዮፔቶ» ጊዴስ።
EXO 19:25 ሄሳ ጊሻስ ሙሴይ ዱጌ ኣሳኮ ዎꬊዲ ጎዳይ ጊዳይሳ ኢስታስ ዮቲዴስ።
EXO 20:1 ጎዳይ ሃሳይዳ ቃላቲ ኡባይ ሃይሳፌ ካሊዛይታ፤
EXO 20:2 «ኔና ጊብጼፔ ኣይሌቴꬃ ቢታፌ ኬሲዳ ጎዳ ኔ ጾሳይ ታና።
EXO 20:3 «ታፔ ኣቲን ሃራ ኤቃ ጾሳታስ ጎይኖፋ።
EXO 20:4 «ቦላ ሳሎን ዲዛ ሚሽ ጊዲን፥ ዎይኮ ጋርሳ ሳኣን ዲዛ ሚሽ ጊዲን፥ ዎይኮ ቢታፌ ጋርሳን ሃꬃ ጊዶን ዲዛ ሚሽ ጊዲን ኣይኮካ ሚሳቲሳዳ ኔስ ሚስሌ ሂስታዳ ሜꬎፋ።
EXO 20:5 ኢስታስ ሆኮፋኔ ኢስታስ ጎይኖፋ። ኣይስ ጊኮ ታኒ ጎዳ ኔ ጾሳይ ቃናቲዛ ጾሳኮ፤ ታና ኢጺዛይታ ኣዋታ ናጋራ ጊሻስ ናይታ ሄꬓንꬆ ዬሌታኔ ኦይዳንꬆ ዬሌታ ጋካናስ ቃጻያይስ።
EXO 20:6 ቃሴ ታኒ ታና ሲቂዛይታሲኔ ታ ኣዛዞ ናጊዛይታስ ዳሮ ሺ ዬሌቴꬅ ጋካናስ ታኒ ታ ሲቆ ቤሲዛ ጾሳ።
EXO 20:7 «ጎዳ ኔ ጾሳ ሱንꬅ ሃዳን ዴንꬆፋ፤ ኣይስ ጊኮ ጎዳ ኔ ጾሳይ ባ ሱንꬅ ሃዳን ዴንꬂዛይታ ቃጻያና።
EXO 20:8 «ሳምባታ ጋላሳ ሃራ ጋላሳታፔ ዱማሳዳ ናጋ።
EXO 20:9 ኔ ኦꬂዛ ኦሶ ኡባ ኡሱፑን ጋላሳታን ኦꬃ።
EXO 20:10 ጊዶ ኣቲን ላፑንꬃ ጋላሳይ ጎዳ ኔ ጾሳስ ሳምባታ። ሄ ጋላስ ኣይኮ ኦሶካ ኦꬆፋ፤ ኔኒ ዎይኮ ኔ ኣቱማ ናይ፥ ዎይኮ ኔ ማጫ ናይ፥ ዎይኮ ኔ ኣቱማ ኣይሌይ፥ ዎይኮ ኔ ማጫ ኣይሌይ፥ ዎይኮ ኔ ሚዛይ፥ ዎይኮ ኔ ዴሬን ዲዲ ኔስ ኦꬂዛ ሃራ ዴሬ ኣስ ጊዲን ሄ ጋላሳን ኣይ ኦሶካ ኦꬆፍቴ።
EXO 20:11 ኣይስ ጊኮ ኡሱፑን ጋላሳን ጎዳይ ሳሎ፥ ሳኣ፥ ኣባኔ ኢስታ ጊዶን ዲዛ ኡባ ሜꬊዲ ላፑንꬃ ጋላስ ሼምፒዴስ። ሄሳ ጊሻስ ጎዳይ ሳምባታ ጋላሳ ኣንጂዴሲኔ ዱማሲዴስ።
EXO 20:12 «ጎዳ ኔ ጾሳይ ኔስ ኢሚዛ ቢታን ኔ ዳሮ ላይꬅ ዳና ማላ፥ ኔ ኣዋኔ ኔ ኣዮ ቦንቻ።
EXO 20:13 «ኣስ ዎꬎፓ።
EXO 20:14 «ላይማቶፓ።
EXO 20:15 «ካይሶቶፓ።
EXO 20:16 «ኦና ቦላካ ዎርዶ ማርካቶፋ።
EXO 20:17 «ኣሳ ኬꬅ ኣሞቶፋ፤ ኣሳ ማቾ ዎይኮ ኢዛ ኣይሌ ዎይኮ ኢዛ ኣይሌዮ ዎይኮ ኢዛ ቦራ ዎይኮ ኢዛ ሃሬ ዎይኮ ኢዛስ ዲዛ ኣይ ሚሺካ ኣሞቶፋ» ጊዴስ።
EXO 20:18 ኣሳይ ዉሪ ዳዳይ ጊሪዛይሳኔ ዛዬይ ዛዬቲዛይሳ ሲዪዲ ቃሴ ዎልቃንꬂ ዎልቃሚዛይሳኔ ዙማይ ጩዋቲዛይሳ ቤኢዲ ኮኮሪሼ ሃሆን ኤቂዴስ።
EXO 20:19 ኣሳይ ሙሴስ፥ «ኑኒ ሃይቆንታ ማላ ጾሲ ኑናራ ሃሳዮፖ፤ ኔኒ ኑስ ዮታ፤ ኑኒ ሲያና» ጊዳ።
EXO 20:20 ሙሴይ ኣሳስ፥ «ጾሲ ኢንቴና ፓጫናስ፥ ኢዛ ያሺ ኢንቴ ዎዚናን ኩሚን ኢንቴ ናጋራ ኦꬆንታ ማላ ዪዳ ጊሻስ ባቦፍቴ» ጊዴስ።
EXO 20:21 ኣሳይ ሃሆን ኤቂ ዲሺን ሙሴይ ጾሲ ዲዛሶ ዎልቃማ ሻራ ꬉማኮ ሺቂዴስ።
EXO 20:22 ሄሳፌ ጉዬ ጎዳይ ሙሴ፥ «ኢስራኤሌ ኣሳስ፥ ‹ታኒ ሳሎፔ ኢንቴስ ሃሳይሺን ኢንቴ ኢንቴ ኣይፌራ ቤኢዴታ።
EXO 20:23 ታፔ ኣቲን ሃራ ጾሲ ኢንቴስ ዶፖ፤ ቢራፔ ዎይኮ ዎርቃፌ ኢንቴስ ኤቃ ጾሳታ ሜꬊዲ ጎይኖፍቴ።
EXO 20:24 « ‹ኔኒ ታስ ያርሾ ያርሺዛሶ ኡርቃፌ ሜꬋዳ ጹጌቲዛ ያርሾታ፥ ኢሲፌቴꬃ ያርሾታ፥ ኔ ዶርሳታፔ፥ ኔ ዴይሻታፔኔ ኔ ሜሄታፔ ኢዛ ቦላ ያርሻ። ታ ሱንꬂ ቆፌታና ማላ፥ ኢንቴ ኦꬂዳሶ ኡባ ሶሆ ያዳ ታ ኢንቴና ኣንጃና።
EXO 20:25 ኔኒ ታስ ያርሾ ያርሺዛሶ ሹቻፌ ኦꬂዛ ጊዲኮ ማሴቲዳ ሹቻፌ ኦꬆፋ፤ ኣይስ ጊኮ ኔኒ ማሲዛ ቢራታን ኢዛ ቦቺኮ ኔ ኢዛ ቱኒሳሳ።
EXO 20:26 ታስ ያርሾ ያርሺዛሶ ፑዴ ኬዛናስ ያንጋሬ ሜꬋዳ ኢዛ ቦላ ኬዞፓ፤ ጋሶይካ ኔኒ ኬዚዛ ዎዴ ኔ ካሎቴꬂ ቤታና› ጋዳ ዮታ» ጊዴስ።
EXO 21:1 «ኔኒ ኢስራኤሌ ናይታስ ኢማና ዎጋይ ሃይሳ።
EXO 21:2 ኔኒ ኢስራኤሌ ናይታ ጋርሳፌ ኣይሌ ሻሚኮ ኢዚ ኔስ ኡሱፑን ላይꬅ ኦꬆ፤ ጊዶ ኣቲን ላፑንꬃ ላይꬃን ኢዚ ኣይኮካ ቃንጾንታ ኣይሌቴꬃፌ ጮ ሜላ ዬዴቶ።
EXO 21:3 ኢዚ ባርካ ዪዳ ጊዲኮ ባርካ ቦ፤ ባ ማቼይራ ዪዳ ጊዲኮ ኢዛ ማቼያካ ኢዛራ ቡ።
EXO 21:4 ኢዛ ጎዳይ ኢዛስ ማቾ ኤኪዳ ጊዲኮ ማቼያ ኢዛስ ኣዴ ናይታ ዎይኮ ማጫ ናይታ ዬሊዳ ጊዲኮ፥ ሄ ማጫሳያኔ ኢዚ ናይቲ ኢዛ ጎዳስ ኣቲኮ ኢዚ ባርካ ኬዚ ቦ።
EXO 21:5 ጊዶ ኣቲን ሄ ኣይሌይ፥ ‹ታኒ ታ ጎዳ፥ ታ ማቺዮኔ ታ ናይታ ሲቃይስ፤ ታኒ ኣይሌቴꬃፌ ኬዚኬ› ጊኮ፥
EXO 21:6 ኢዛ ጎዳይ ኢዛ ፒርዲዛ ኣሳ ሲንꬅ ኣꬆ፤ ሄሳፌ ጉዬ ኬꬃ ፔንጌ ዎይኮ ፔንጌ ቆሲላꬃኮ ኢዛ ኤፊዲ ኢዛ ሃይꬅ ጎንꬃን ሉኮ። ሂስቲኮ ኢዚ ባ ዴኦ ላይꬅ ኡባን ኢዛስ ኣይሌ ጊዳና።
EXO 21:7 «ኣሲ ባ ማጫ ናዮ ኣይሌቴꬃስ ባይዚኮ ኣዴ ኣይሌቲ ኣይሌቴꬃፌ ኬዚዛ ማላ ኢዛ ኬዙፑ።
EXO 21:8 ኢዛ ባና ዶሪዲ ኤፊዳ ጎዳ ኡፋይሶንታ ኢጺኮ ኢዚ ጎዳይ ኢዞ ዎዚሳናስ ኮሼስ። ኢዚ ኢዚስ ኣማኔቶንታ ኣጊዳ ጊሻስ ኢዞ ኣላጋስ ባይዛና ቤሴና።
EXO 21:9 ኢዚ ኢዞ ባ ናስ ኤካናስ ኮይኮ ባ ማጫ ናስ ኦꬂዛ ማላ ኢዚስ ቤሲዛይሳ ኦꬆ።
EXO 21:10 ኢዚ ባስ ሃራ ማቾ ኤኪኮ ኮይሮ ማቼይስ ቁማ ዎይኮ ማይኦ ፓጪሶፖ፤ ቃሴ ኢዚራ ኣቆ ኣጎፎ።
EXO 21:11 ኢዚ ሃይታ ሄꬓታ ኢዚስ ኢሞንታ ኢጺኮ ኣይኮ ሚሼይካ ቃንጼቶንታ ኣይሌቴꬃፌ ኬዛዳ ቡ።
EXO 21:12 «ኣስ ዎꬊዳ ኣሲ ሃይቃናስ ቤሴስ።
EXO 21:13 ጾሳ ሼኔ ጊዲ ኡቲን ቆፖንታ ዲሼ ኣስ ዎꬊዳዴይ ታኒ ጊግሲዳሶ ቤቴ ቦ።
EXO 21:14 ጊዶ ኣቲን ኣስ ዎꬋና ቆፒዲ ኤሪሼ ሃራ ኣስ ዎꬊኮ ሄሳዴይ ኣታናስ ጊዲ ሄ ታ ጊግሲዳ ታስ ያርሾ ሺሺዛሶ ዪኮ ያርሺዛሶሆዛፔ ሃራሶ ኤፋዳ ዎꬋ።
EXO 21:15 «ባ ኣዋ ዎይኮ ባ ኣዮ ዋꬊዛ ኣሲ ኦኒካ ሃይቆ።
EXO 21:16 «ኣሳ ዎልቃን ኦይኪዲ ባይዚዛዴይ ዎይኮ ዎልቃን ኦይኪን ኣሲ ኢዛ ኩሼን ቤቲዳዴይ ሃይቃናስ ቤሴስ።
EXO 21:17 «ባ ኣዋ ዎይኮ ባ ኣዮ ጫዪዛዴይ ሃይቆ።
EXO 21:18 «ናምኡ ኣሳቲ ባ ጋርሳን ኦዬቲኮ፥ ኢሶይ ኢሳ ሹቻራ ጫዲኮ ዎይኮ ኩሼራ ኢጪኮ ሄ ቆሄቲዳዴዚ ሃይቆንታ ሃርጊዲ ሂጻን ኢቺኮ፥
EXO 21:19 ሄሳፌ ዴንዲዲ ጉፌራ ካሬ ጊዶን ሄሜቲኮ፥ ሄ ቆሂዳይሲ ቃጻዬቶንታ ኣቴስ፤ ጊዲኮካ ኢዚ ኢዛ ኦሶ ቴቂዳ ጊሻስ ሚሼ ቃንጻናሲኔ ኢዚ ፓጻና ጋካናስ ኢዛ ጼላናስ ኮሼስ።
EXO 21:20 «ኣሲ ባ ኣቱማ ኣይሌ ዎይኮ ማጫ ኣይሌዮ ጉፌን ሾጪኮ ሄ ሾቻ ጌዶን ሄራካ ኢዛ ኩሼን ሃይቂኮ ሾጪዳይሲ ቃጻዬታናስ ቤሴስ።
EXO 21:21 ጊዶ ኣቲን ሄ ቆሄቲዳይሲ ኢሲ ጋላስ ዎይኮ ናምኡ ጋላስ ጋካናስ ሃይቆንታ ኣጊኮ ሄ ኣይሌዚ ኢዛ ሚሽ ጊዲዳ ጊሻስ ኢዚ ቃጻዬቴና።
EXO 21:22 «ናምኡ ኣሳቲ ባ ጋርሳን ኢሶይ ኢሳራ ኦዬቲሼ ቃንꬃራ ዲዛ ማጫሳዮ ቦሻስ ጋꬂኮ፥ ሄሳፌ ሃራ ኢታ ሚሽ ኢዚ ቦላ ጋꬆንታ ኣጊኮ፥ ኢዚ ቦላ ቆሆ ጋꬂዳዴይ ሄ ማጫሳይ ኣዚናይ ኦይቺዳይሳ ዳናቲ ፒርዲኮ ኣይ ሚሼካ ቃንጾ።
EXO 21:23 ጊዶ ኣቲን ኢዚስ ቦሻይ ዳሪኮ ሼምፖ ጊሻስ ሼምፖ፥
EXO 21:24 ኣይፌ ጊሻስ ኣይፌ፥ ኣቻ ጊሻስ ኣቻ፥ ኩሼ ጊሻስ ኩሼ፥ ቶሆ ጊሻስ ቶሆ፥
EXO 21:25 ጹሳ ጊሻስ ጹስ፥ ማዱንꬃ ጊሻስ ማዱንꬅ፥ ቆኦ ጊሻስ ቆኦ ኤካናስ ቤሴስ።
EXO 21:26 «ኢሲ ኣሲ ኣቱማ ዎይኮ ማጫ ኣይሌ ኣይፌ ሾጪ ቶይሲኮ ሄ ኣይፌዛ ጊሻስ ኣይሌቴꬃፌ ኬሲ ዬዶ።
EXO 21:27 ሄሳꬆካ ባ ኣይሌይ ዎይኮ ባ ኣይሌዛ ኣች ሜንꬂኮ ሄ ኣቻ ጊሻስ ኣይሌቴꬃፌ ኬሲ ዬዶ።
EXO 21:28 «ቦራይ ማጫስ ዎይኮ ኣቱማስ ኢጪ ዎꬊኮ፥ ሄ ቦራይ ሹቻን ጫዴቲ ሃይቆ፤ ኢዛ ኣሾይ ሜቴቶፎ። ጊዶ ኣቲን ቦራ ጎዳይ ቃጻዬቶፎ።
EXO 21:29 ጊዶ ኣቲን ቦራይ ካሴካ ኢጪዛ ቦራ ጊዲኮ፥ ኣሳይ ቦራዛ ጎዳስ ዮቲዲሺን ቦራ ጎዳይ ቦራ ቃቾንታ ኣጊኮ፥ ቦራይ ኣዴ ዎይኮ ማጫ ኣስ ዎꬊኮ ሄ ቦራይ ሹቻን ጫዴቲ ሃይቆ፤ ቃሴ ቦራዛ ጎዳይካ ሃይቆ።
EXO 21:30 ጊዶ ኣቲን ኢዚ ጪጎ ቃንጻና ማላ ኦይሼቲኮ ኢስቲ ኦይቺዳይሳ ኣይ ጊዲኮካ ቃንጺዲ ባ ሼምፖ ዎዞ።
EXO 21:31 ቦራይ ኣቱማ ና ዎይኮ ማጫ ና ኢጪ ዎꬊኮ ፒርዳይ ኢሲ ማላ ጊዶ።
EXO 21:32 ቦራይ ኣቱማ ኣይሌ ዎይኮ ማጫ ኣይሌዮ ኢጪ ዎꬊኮ ቦራ ጎዳይ ኣይሌዛ ጎዳስ ሄꬑ ታሙ ቢራ ጪጎ፤ ቦራይካ ሹቻን ጫዴቲዲ ሃይቆ።
EXO 21:33 «ኢሲ ኣሲ ኦላ ካማ ቃሪኮ ዎይኮ ኦላ ቦኪዲ ካሞንታ ኣጊኮ፥ ቦራይ ዎይኮ ሃሬይ ሄ ኦላን ዉሊኮ፥
EXO 21:34 ሄ ኦላዛ ጎዳይ ሜሄዛ ዋጋ ቃንጾ። ኢዚ ሜሄዛ ጎዳስ ዋጋ ቃንጺዲ ሃይቄꬃ ባስ ኤኮ።
EXO 21:35 «ኢሲ ኣሳ ቦራይ ሃራ ኣሳ ቦራ ኢጪ ዎꬊኮ፥ ኢጪ ዎꬊዳ ፓጻ ቦራ ባይዚዲ ኢዛ ሚሻኔ ሃይቂዳ ቦራዛ ኣሾዛ ጊዶን ጊና ሻኪ ኤኬቶ።
EXO 21:36 ጊዶ ኣቲን ሄ ቦራይ ኢጪዛ ቦራ ጊዲዳይሲ ካሴቲ ኤሬቲሺን፥ ኢዛ ጎዳይ ኢዛ ቃቾንታ ኣጊኮ፥ ኢዛ ጎዳይ ቦራ ጊሻስ ቦራ ቃንጺዲ ሄ ሃይቂዳይሳ ባስ ኤኮ።
EXO 22:1 «ኢሲ ኣሲ ቦራ ዎይኮ ዶርሳ ካይሶቲ ኤኪዲ ሹኪኮ፥ ዎይኮ ባይዚ ኤኪኮ፥ ኢሲ ቦራ ጊሻስ ኢቻሹ ቦራ፥ ኢሲ ዶርሳ ጊሻስ ኦይዱ ዶርስ ቃንጾ።
EXO 22:2 «ካይሶይ ኬꬅ ቦኪሼ ኦይኬቲዲ ሾጬቲ ሃይቂኮ ሾጪዳይሲ ሱꬅ ጉሲዳ ጊሻስ ኦይቼቴና።
EXO 22:3 ጊዶ ኣቲን ሄሲ ጋዴይ ዎንቲ ጌዪን ሃኒዛ ጊዲኮ ኢዚ ሄ ጉኪዳ ሱꬃ ኣጮን ኦይሼቴስ። ካይሶዚ ካይሶቲዳይሳ ቃንጾ፤ ጊዶ ኣቲን ኢዛስ ኣይኮይካ ባይንዳ ጊዲኮ ካይሶቲዳይሳ ቃንጻናስ ኢዚ ባይዜቶ።
EXO 22:4 ኢዚ ካይሶቲዳ ሜሄይ ፓጻ ዲሼ ኢዛ ኩሼን ቤቲኮ፥ ቦራ ዎይኮ ሃሬ ዎይኮ ዶርሳ ጊዲኮካ ኢዚ ባ ካይሶቲዳይሳስ ናምኡ ኩሼ ቃንጾ።
EXO 22:5 «ኢሲ ኣሲ ባ ሜሄ ዴምባን ዎይኮ ኣይፌይ ሜቴቲዛ ሚꬃ ጊዶን ሄሚሼ፥ ሜሄታ ሃራ ኣሳ ካꬃን ላኣ ዬዲ ሄሚኮ፥ ኢዚ ባ ካꬃፌ ዎይኮ ኣይፌይ ሜቴቲዛ ባ ሚꬃ ኡባፌ ሎኢዛይሳ ኣፊላማ ቃንጾ።
EXO 22:6 «ኢሲ ኣሲ ቡራ ጹጊኮ ታማይ ዴንዲዲ ቡራዛ ዉርሲዲ ዶሬን ዲዛ ካꬅ ዎይኮ ኤቆን ዲዛ ካꬃ ሙሌራ ሚዛ ጊዲኮ ኮይሮ ታማ ኦይꬂዳ ኣዴዚ ኣፊላማ ቃንጾ።
EXO 22:7 «ኢሲ ኣሲ ቢራ ዎይኮ ሃራ ሚሽ ናጊሳናስ ባ ሾሮስ ሃዳራ ኢሚኮ፥ ሾሮዛሶፔ ሄ ሚሻ ካይሶቲዳ ካይሶዚ ኦይኬቲኮ፥ ካይሶዚ ሄ ሚሻስ ናምኡ ኩሼ ቃንጾ።
EXO 22:8 ጊዶ ኣቲን ካይሶዚ ቤቶንታ ኢጺኮ፥ ሃዳራ ኤኪዳ ኣዴዚ ፒርዲዛይታኮ ሺቂዲ ሃዳራ ሚሻ ኢዚ ሞንታይሳስ ጫቆ።
EXO 22:9 «ኣሲ ኣይ ሞቶንካ ቦራ ጌዶን፥ ዎይኮ ሃሬ ጌዶን፥ ዎይኮ ዶርሳ ጌዶን፥ ዎይኮ ማይኦ ጌዶን፥ ዎይኮ ሃራ ꬋይዳ ሚሻ ጌዶን፥ ‹ሃይሲ ታይሳ› ጊዲ ሞቴቲኮ፥ ናምኡ ባጋይካ ባ ዮኦዛ ፒርዲዛይታ ሲንꬅ ኣꬄቶ፤ ፒርዲዛይቲ ዎርዶሲዳ ኣሲ ሃንኮይሳስ ናምኡ ኩሼ ቃንጾ።
EXO 22:10 «ኣሲ ባ ሾሮስ ሃሬ፥ ዎይኮ ቦራ፥ ዎይኮ ዶርሳ፥ ዎይኮ ሃራ ኣይ ሜሄካ ሃዳራ ኢሚን ኦኒካ ቤኦንታ ሃይቂኮ፥ ዎይኮ ቆሄቲኮ፥ ዎይኮ ኣሲ ቦንቂ ኤፊኮ፥
EXO 22:11 ሃዳራዴይ ባ ሾሮ ሜሄዛ ቦቾንታይሳስ ጎዳ ሲንꬃን ጫቂኮ፥ ኢስታ ጊዶን ዲዛ ዮኦዚ ዉሬስ። ሄ ሜሄዛ ጎዳይ ጫቆዛ ኤኮ፤ ቃንጺሳናስ ቤሴና።
EXO 22:12 ጊዶ ኣቲን ሜሄዚ ሃዳራዴፌ ካይሶቴቲዳ ጊዲኮ ሜሃዴስ ቃንጾ።
EXO 22:13 ሄ ሜሄዛ ዶኣይ ሚዳ ጊዲኮ፥ ማርካ ጊዳና ማላ ዶኣይ ሚሺን ኣቲዳይሳፌ ኤኪ ኤሂ ቤሶ፤ ሂስቲዲ ሜቴቲዳ ሜሄዛ ጊሻስ ቃንጾፎ።
EXO 22:14 «ኣሲ ባ ሾሮፔ ሜሄ ጋርጺ ኤኪኮ ኢዛ ጎዳይ ባይንዳሶን ሄ ሜሄይ ቆሄቲኮ ዎይኮ ሃይቂኮ ሄ ሜሄዛ ጊሻስ ቃንጾ።
EXO 22:15 ጊዶ ኣቲን ኢዛ ጎዳይ ኢዛራ ዲኮ፥ ጋርጺዳይሲ ቃንጾፎ፤ ኪራስ ኤኪዳ ጊዲኮ ኪራስ ጪጊዛ ሚሻይ ኣጮዛስ ቃንጾ ጊዶ።
EXO 22:16 «ኢሲ ኣሲ ኣዚናስ ጊጎንታ ጌላኦዮ ባሌꬂዲ ኢዚራ ዚንኢዛ ጊዲኮ ኢዞ ጪሎሺዲ ባስ ማቾ ኤኮ።
EXO 22:17 ኢዚ ኣዋይ ኢዞ ኢዛስ ኢሞንታ ኢጺኮ፥ ጌላኦዮ ኤኪዛ ኣሲ ጪሎሻስ ኢሜቲዛ ሚሻ ኬና ቢራ ኢዚ ኣዋስ ኢሞ።
EXO 22:18 «ቢታ ቢቲዛ ማጫስ ፓጻ ዎꬆፋ።
EXO 22:19 «ሜሄራ ጋጊዛ ኣሲ ኦኒካ ሃይቆ።
EXO 22:20 «ጎዳስ ጻላላፔ ኣቲን ሃራ ጾሳስ ሹኪ ያርሺዛ ኣሲ ኦኒካ ሃይቂ ꬋዮ።
EXO 22:21 «ቤቲዲ ዪዳ ኣስ ቆሆፒቴ፥ ዎይኮ ዋዪሶፒቴ፤ ጋሶይካ ኢንቴካ ጊብጼ ቢታን ቤቴ ጊዲዲ ዴኢዴታ።
EXO 22:22 ኣዚናይ ሃይቂዳ ኣምኤዮኔ ኣዋይ ዎይኮ ኣያ ሃይቂዳ ና ዋዪሶፒቴ።
EXO 22:23 ኢንቴ ኢስታ ዋዪሲን ኢስቲ ታኮ ዋሲኮ ታኒ ኢስታ ዋሶ ቱማፔ ሲያና፤
EXO 22:24 ሄ ዎዴ ታ ሃንቆይ ኢንቴ ቦላ ዴንዳና፤ ታኒ ኢንቴና ማሻን ዉርሳና፤ ኢንቴ ማቼቲ ኣምኤታ ኢንቴ ናይቲካ ኣዋይ ባይንዳ ዪኦ ናይታ ጊዳና።
EXO 22:25 «ኢንቴ ጊዶን ዲዛ ታ ኣሳስ ኢሲ ማንቆ ኣሳስ ሚሼ ታልኢኮ፥ ባ ሚሽ ዲቻስ ኢሚዛ ኣሳ ማላ ሃኖፒቴ፤ ኔኒ ዬሎ ኢዛ ኦይቾፋ።
EXO 22:26 ኔኒ ኢሲ ሚሻ ጊሻስ ኔ ላጌ ማይኦ ኦይኪኮ ኣርሼይ ዉሎንታ ዲሺን ኢዛስ ዛራ።
EXO 22:27 ኣዛስ ጊኮ ኢዚ ባ ካሎ ካሚዛይ ኢዚን ጻላ፤ ሃራ ኣይ ማይኢዲ ኣቃናስ ዳንዳይዜ? ኢዚ ታስ ዋሲኮ ታ ሚሼቲዛ ጊሻስ ኢዛስ ሲያናኔ ኢዛ ማዳና።
EXO 22:28 «ጾሳ ቦላ ጫሻ ቃላ ሃሳዮፓ፥ ዎይኮ ዴሬ ኣይሲዛዴ ቃንጎፋ።
EXO 22:29 «ኔ ካꬃ ጼራ፥ ዎይኔ ሚꬃ ኣይፌ ጼራኔ ዎጋራ ዛይቴ ታስ ያርሾ ሺሻ። ኔኒ ኔ ኣቱማ ናይታ ጊዶን ባይራቲዛ ና ታስ ኢማናስ ቤሴስ።
EXO 22:30 ቦራፔ፥ ዴይሻፌኔ ዶርሳፌካ ሄሳꬆ ኦꬃ። ኢስቲ ላፑን ጋላሳይ ጋካናስ፥ ባ ኣዪራ ኣዪራ ጋምኤቶ፤ ኦስፑንꬃ ጋላስ ኢስታ ታስ ኢማ።
EXO 22:31 «ኢንቴ ታስ ጌሻ ኣስ ጊዳናስ ኮሼስ፤ ሄሳ ጊሻስ ዶኣይ ዴምባን ዎꬊዳ ዎይኮ ዳፊ ዳኪዳ ሜሄ ኣሾ ካናስ ዬጊቴ ኣቲን ሞፒቴ።
EXO 23:1 «ዎርዶ ዮኦ ላሎፋ፤ ዎርዶ ማርካታዳ ኢታ ኣስ ማዶፋ።
EXO 23:2 «ኢታ ሚሽ ኦꬃናስ ዳሮ ኣሳ ካሎፋ፤ ፒርዳ ሚርቃናስ ዳሮ ኣሳራ ጊዳዳ ማርካቶፋ።
EXO 23:3 ማንቆ ኣሲ ፒርዳሶ ሺቂኮ ኢዛ ማንቆቴꬅ ቤኣዳ ማዳ ፒርዶፋ።
EXO 23:4 «ኔ ሞርኬ ቦራይ ዎይኮ ሃሬይ ꬋይዳይሳ ዴሚኮ ኢዛዴስ ዛራ ኢማ።
EXO 23:5 ኔና ኢጺዛ ኣሳስ ሃሬይ ጫናራ ኩንዲ ዲሺን ቤኢኮ ኢዛራ ማዴታዳ ዴንꬃ ኣቲን ሄን ኣጋጎፓ።
EXO 23:6 «ፒርዳስ ዱቡሻን ሺቃዳ፥ ማንቆ ኣሳ ፒርዳ ዎቢሶፓ።
EXO 23:7 ዎርዶ ሞቶ ሲዮፓ፤ ጌሽ ዎይኮ ጺሎ ኣስ ሃይቆስ ኣꬃ ኢሞፋ፤ ኣይስ ጊኮ ሞሮ ኦꬂዳዴ ታኒ ሜላ ዬዲኬ።
EXO 23:8 «ማታኤ ኤኮፋ፤ ኣዛስ ጊኮ ማታኤይ ጼሊዛይታ ኣይፌ ቆቂሴሲኔ ጺሎታ ቃላ ሚርቄስ።
EXO 23:9 «ሃራ ዴሬፔ ዪዳ ቤቴ ኣስ ቆሆፒቴ፤ ቤቴ ኣስ ጊዴꬂ ኣይ ማላ ዴጺዛኮ ኢንቴ ኤሬታ፤ ኣይስ ጊኮ ኢንቴ ኢንቴ ሁኤን ቤቴ ጊዲዲ ጊብጼ ቢታን ዴኢዴታ።
EXO 23:10 «ኡሱፑን ላይꬅ ጋካናስ ኔ ጎያዳ ዜሪዳ ካꬃ ማጻ ሺሻ።
EXO 23:11 ላፑንꬃ ላይꬃን ጋዴዛ ጎዮንታ ሻቻ፤ ሂስቲኮ ኔ ዴሬ ጋርሳን ዲዛ ማንቆቲ ሄሳፌ ማና ካꬅ ዴማና፤ ቃሴ ኢስታፌ ኣቲዛይሳ ዶኣቲ ማና። ኔኒ ኔ ዎይኔ ቶኪዛ ጋዴ ቦላኔ ዛይቴ ኢሚዛ ዎጋራ ሚꬃ ጋዴ ቦላካ ሄሳꬆ ኦꬃ።
EXO 23:12 «ኡሱፑን ጋላስ ኔ ኦሶ ኦꬃ፤ ኔ ቦራይኔ ኔ ሃሬይ ሼምፓና ማላኔ ኔሶን ዬሌቲዳ ኣይሌይኔ ቤቴ ኣሲ፥ ሼምፓና ማላ፥ ላፑንꬃ ጋላስ ኦሶ ኦꬆፋ።
EXO 23:13 «ታኒ ኢንቴና ጊዳይሳ ኡባ ሚንꬂዲ ኦꬂቴ፤ ሃራ ጾሳታ ሱንꬅ ጼይጎፒቴኔ ኢስታ ዎሶፍቴ።
EXO 23:14 «ላይꬃን ሄꬑቶ ኢንቴ ታስ ባኣሌ ቦንቺቴ።
EXO 23:15 ኣቢቤ ጌቴቲዛ ኣጊናን ባሬቲዳ ጋላሳን ኡኬꬃ ባኣሌ ቦንቺቴ፤ ኣይስ ጊኮ ኢንቴ ጊብጼፔ ኬዚዳይ ሄ ኣጊናና። ታኒ ኢንቴና ኣዛዚዳ ማላ ላፑን ጋላስ ኢርሾይ ጌሎንታ ኡኬꬅ ሚቴ። «ኢንቴፌ ኢሳዴይካ ታ ሲንꬃን ሜላ ኩሼ ቤቶፎ።
EXO 23:16 «ቃሴ ኢንቴ ኢንቴ ጋዴን ዜሪን፥ ኮይሮ ጋኪዳ ካꬅ ማጺዛ ዎዴ፥ ካꬃ ጼራ ሺሺዛ ባኣሌ ቦንቺቴ። «ቃሴካ ላይꬃ ዉርሴꬃን፥ ካꬅ ኡባ ሺሺ ዉርሲዛ ዎዴ፥ ካꬃ ሺሾ ባኣሌ ቦንቺቴ።
EXO 23:17 ኣዴቲ ዉሪ ኡባ ሃሪዛ ጎዳ ታ ሲንꬅ ላይꬃን ሄꬑቶ ዬቶ።
EXO 23:18 «ኔኒ ያርሾ ሱꬅ ታስ ሺሻሼ ኢርሾራ ኡኬቲዳ ኡኬꬃራ ሺሾፋ። ሄ ባኣሌዛ ቦንቺዛ ጋላስ ያርሼቲዳ ሞꬌፔ ማላዶስ ኣይኮይካ ኣቶፎ።
EXO 23:19 ኔ ጋዴን ባይራ ካጺዳ ካꬃ ኡባፌ ሎኢዛይሳ ጎዳ ኔ ጾሳ ሶ ኤካ ያ። ዴይሻ ላቃ ኢዛ ኣዬይ ማꬃን ዶይሶፋ።
EXO 23:20 «ኔ ኦጌን ኔና ናጋና ማላኔ ታኒ ኔስ ጊግሲዳሶ ኔና ኤፋና ማላ፥ ታኒ ኪታንቻ ኔ ሲንꬃራ ዬዳና።
EXO 23:21 ኢዚ ዮቲዛይሳ ኤሮ ጋዳ ኢዛስ ኣዛዜታ፤ ኢዛ ቦላ ማካሎፋ፤ ታ ኢዛ ኪቲዳ ጊሻስ ኢንቴ ናጋራ ኦꬂኮ ኢንቴስ ኢዚ ኣቶ ጌና።
EXO 23:22 ኢዚ ዮቲዛይሳ ኢንቴ ሎኤꬂ ሲዪኮ፥ ታኒ ዮቲዛይሳ ኡባ ኦꬂኮ ኢንቴ ሞርኬታ ኡባ ታኒ ሞርካና፤ ኢንቴናራ ኤቄቲዛይታራ ታኒካ ኤቄታና።
EXO 23:23 ታ ኪታንቻይ ኢንቴፌ ሲንꬄ ቢዲ፥ ኢንቴና ኣሞሬታ ቢታ፥ ሂቴታ ቢታ፥ ፓሪዜታ ቢታ፥ ካናኔታ ቢታ፥ ሂዌታ ቢታኔ ያቡሴታ ቢታ ኤፋና። ታኒ ኢስታ ሙሌራ ꬋይሳና።
EXO 23:24 ኢስታ ኤቃታ ሲንꬃን ሆኮፍቴ፥ ዎይኮ ጎይኖፍቴ፥ ዎይኮ ኢስታ ሃኖ ቁሎፍቴ። ኢንቴ ኢስታ ꬋይሳናሲኔ ቱሳ ማላ ኤቂ ዲዛ ኢስታ ሹቻ ኤቃታ ሜንꬄሬꬃናስ ቤሴስ።
EXO 23:25 ጎዳ ኢንቴ ጾሳስ ጎይኒቴ፤ ሂስቲኮ፥ ኢዚ ኢንቴና ካꬃኒኔ ሃꬃን ኣንጃና፤ ታ ኢንቴ ጊዶፌ ሃርጌ ዲጋና።
EXO 23:26 ኢንቴ ቢታን ኣይ ማጫሲካ ቦሼቴናኔ ማይኔና። ታኒ ኢንቴ ዳና ላይꬅ ኣዱሳና።
EXO 23:27 «ኢንቴናራ ጋጊዛ ዴሬታ ኡባ ዳጋንꬃና ማላ ታኒ ታ ያሻቴꬅ ኢንቴ ሲንꬃራ ዬዳና፤ ኢንቴ ሞርኬቲ ዉሪ ኢንቴስ ዞኮ ዛሪዲ፥ ባቃታና ማላ ታ ኦꬃና።
EXO 23:28 ታኒ ኢንቴፌ ሲንꬃራ ካዤ ዬዳዳ ሂዌታ፥ ካናኔታኔ ሂቴታ ጎዳ ኬሳና።
EXO 23:29 ጊዶ ኣቲን ቢታይ ካሎ ኣቶንታ ማላኔ ዶኣይ ዳሮንታ ማላ፥ ታ ኢስታ ኢሲ ላይꬃ ጋርሳን ጎዲኬ።
EXO 23:30 ጊዶ ኣቲን ኢንቴ ቆዳን ዳሪዲ፥ ሄ ቢታ ላታና ጋካናስ፥ ታኒ ኢስታ ጉꬅ ጉꬅ ጎዳ ኬሳና።
EXO 23:31 ታኒ ኢንቴ ዛዋ ዞኦ ኣባፌ ሜዲቴራኔ ኣባ ጋካናስ፥ ባዞፌ ኤፊራጺሴ ሻፋ ጋꬃና። ሄ ቢታን ዲዛዝ ኡባ ታኒ ኢንቴ ኩሼን ኣꬃ ኢማና፤ ኢንቴካ ኢስታ ኢንቴ ሲንꬃፌ ጎዲ ኬሳና።
EXO 23:32 ኢስታራ ዎይኮ ኢስታ ኤቃ ጾሳታራ ጫቆን ጌሎፒቴ።
EXO 23:33 ኢስታ ኢንቴ ቢታን ዎꬆፍቴ፤ ኢንቴ ሂስቶንታ ኣጊኮ ኢስቲ ኢንቴና ታ ቦላ ናጋራ ኦሲሳና፤ ኣይስ ጊኮ ኢስታ ኤቃታስ ጎይኒዛይሲ ቱማፔ ኢንቴስ ናርጻ ጊዳና» ጊዴስ።
EXO 24:1 ጎዳይ ሙሴ፥ «ኔኒ፥ ኣሮኔይ፥ ናዳቤይ፥ ኣቢሁይኔ ኢስራኤሌፔ ላፑን ታሙ ዴሬ ሃላቃቲ ጎዳኮ ዙማ ቦላ ፑዴ ኬዚዲ ሃሆን ኤቂዲ ታስ ጎይኒቴ።
EXO 24:2 ጊዶ ኣቲን ኔኒ ኔርካ ታኮ ሺቃ፤ ሃራቲ ታ ማታ ሺቆፔቶ። ቃሴ ኣሳይካ ኔናራ ፑዴ ኬዞፖ» ጊዴስ።
EXO 24:3 ሙሴይ ዪዲ ጎዳ ቃላኔ ኢዛ ዎጋ ኡባ ኣሳስ ዮቲን ኣሳይ ዉሪ ኢሲ ቃላን፥ «ጎዳይ ዮቲዳይሳ ኡባ ኑኒ ኦꬃና» ጊዴስ።
EXO 24:4 ሙሴይ ጎዳይ ዮቲዳይሳ ኡባ ጻፊዴስ። ዎንቴꬃ ጋላስ ማላዶ ዎንታራ ዴንዲዲ ዙማ ጋርሳን ያርሺዛሶ ጊግሲዲ ኢስራኤሌ ኣሳ ታማኔ ናምኡ ቆሞታ ሱንꬃን ታማኔ ናምኡ ሹች ቱሳ ማላ ኤሲዴስ።
EXO 24:5 ኢዚ ኢስራኤሌ ኣሳፔ ናቴꬃ ኣቱማ ናይታ ኪቲን፥ ኢስቲ ቢዲ ጎዳስ ሚርጎታ ጹጌቲዛ ያርሾኔ ኢሲፌቴꬃ ያርሾ ሂስቲ ያርሺዳ።
EXO 24:6 ሙሴይ ሱꬃፌ ባጋ ኤኪዲ ኬሬታን ቆሊዴስ፤ ኣቲዳ ሱꬃ ያርሾ ያርሺዛ ሶሆዛን ጫጫፊዴስ።
EXO 24:7 ሄሳፌ ጉዬ ጫቆ ቃላ ማጻፋ ኤኪዲ ኣሳስ ꬎቁ ሂስቲዲ ናባቢን ኣሳይ፥ «ጎዳይ ዮቲዳይሳ ኡባ ኑኒ ኦꬃናኔ ኣዛዜታና» ጊዴስ።
EXO 24:8 ሙሴይካ ኬሬታን ኣቲዳ ሱꬃ ኤኪዲ ኣሳ ቦላ ዉጺዲ ኣሳ፥ «ቤኢቴ፥ ሃይሲ ጎዳይ ሃይታ ቃላታ ኢንቴስ ኢሚሼ ኢንቴናራ ዎꬂዳ ጫቆ ሱꬃ» ጊዴስ።
EXO 24:9 ሄሳፌ ጉዬ ሙሴይ፥ ኣሮኔይ፥ ናዳቤይ፥ ኣቢሁይኔ ኢስራኤሌ ሃላቃታፔ ላፑን ታማቲ ፑዴ ኬዚዲ፥
EXO 24:10 ኢስራኤሌ ጾሳ ቤኢዳ፤ ኢስቲ ቤኦይሲካ ኢዛ ቶሆፔ ጋርሳራ ሳሎ ማላ ጌዪ ኡቲዳ ሲምፔሬ ጌቴቲዛ ሹቻፌ ኦሴቲዳ ሚሽ ሚሳቲዛ ዉይጌ ዲዛይሳኮ።
EXO 24:11 ጊዶ ኣቲን ጾሲ ኢስራኤሌ ኣሳ ሃላቃታ ዎꬊቤና፤ ኢስቲ ጾሳ ቤኢዳ፤ ኢዛ ሲንꬃን ሚዳኔ ኡዪዳ።
EXO 24:12 ጎዳይ ሙሴስ፥ «ኔኒ ታኮ ዙማ ቦላ ፑዴ ሃያ፤ ሃ ታኮ ኬዛዳ ሃን ጋምኣ፤ ሂስቲኮ ኔኒ ዎጋ ታማርሳና ማላ ታኒ ዎጋኔ ኣዛዞ ኢዛ ቦላ ጻፊዳ ሎቻ ሹቻታ ኔስ ኢማና» ጊዴስ።
EXO 24:13 ሄሳፌ ጉዬ ሙሴይ ባ ኣይሌ ኢያሶራ ባና ኬዚን ሙሴይ ፑዴ ጾሳ ዙማ ቦላ ኬዚዴስ።
EXO 24:14 ኢስራኤሌ ኣሳ ሃላቃታ ኢዚ፥ «ኑኒ ኢንቴኮ ሲማናሼ ጋካናስ ሃይሳን ዲሺቴ፤ ኣሮኔይኔ ሁሬይ ሃን ኢንቴናራ ዴቴስ፤ ዮኦይ ዲዛ ኣሲ ኦኒካ ኢስታኮ ቦ» ጊዴስ።
EXO 24:15 ሙሴይ ዙማ ቦላ ፑዴ ኬዚን ጾሳ ሻራይ ዙማ ካሚዴስ።
EXO 24:16 ጎዳ ቦንቾይካ ሲና ዙማ ቦላ ዎꬊ ጋምኢዴስ፤ ኡሱፑን ጋላስ ጋካናስ ሻራዚ ዙማ ጎዚ ኦይኪዴስ፤ ላፑንꬃ ጋላሳን ሻራ ጊዶራ ጎዳይ ሙሴ ጼይጊዴስ።
EXO 24:17 ኢስራኤሌ ናይታስ ጎዳ ቦንቾይ ዙማ ጼራን ኤጺዛ ታማ ሚሳቲዲ ቤቲዴስ።
EXO 24:18 ሄሳፌ ጉዬ ሙሴይ ሄ ሻራ ጊዶ ጌሊዲ ፑዴ ዙማ ቦላ ኬዚዲ ሄን ኦይዱ ታሙ ጋላሲኔ ኦይዱ ታሙ ቃማ ጋምኢዴስ።
EXO 25:1 ጎዳይ ሙሴስ ሂዝጊዴስ፥
EXO 25:2 «ታስ ኢሞታ ኤሃና ማላ ኔኒ ኢስራኤሌ ናይታስ ዮታ፤ ታስ ኢማናስ ኢዛ ዎዚናይ ኢዛ ኢማ ኢማ ጊን ኢሚዛ ኣሳ ኢሞታ ኡባ ኔ ታስ ኤካ።
EXO 25:3 ኢንቴ ኢስታፌ ኤካና ኢሞታይ ሃይታንታ፤ ዎርቃ፥ ቢራ፥ ጻርቂማላ፥
EXO 25:4 ሳሎ ሚሳቲዛ ቃጪና፥ ኦቻ ቴራ ሚሳቲዛ ቃጪና፥ ጼቃ ዞኦ ቃጪናኔ ቦꬃ ሊቆ ላይኖ፥ ዴይሻ ኢስኬ፥
EXO 25:5 ꬋርሾ ኢቴ ዞኦ ቃላሜን ዬጊ ኬሲዳይሳ፥ ኣባ ጊዶን ዲዛ ኢሲ ዶኣ ጋልባ፥ ኦዶሮ ሚꬅ፥
EXO 25:6 ጾምፔስ ዎጋራ ዛይቴ፥ ቲዬቲዛ ዛይቴሲኔ ኤጻኔስ ሳዊሲዛ ቂማሜ፥
EXO 25:7 ኤፉዴኒኔ ቲራ ቦላን ዲዛ ኪሴታ ጊዶን ዎꬂዛ ማርጊዴ ጌቴቲዛ ሹቻታኔ ሃራ ኣልኦ ሹቻታ።
EXO 25:8 «ሂስቲዲ ታኒ ኢስታ ጊዶን ኣቃና ማላ ኢስቲ ታስ ዱማ ጎይኒዛ ሶ ጊጊሴቶ።
EXO 25:9 ጾሳ ዱንካኔዛኔ ኢዛ ጊዶን ዲዛ ሚሻታ ታኒ ኔና ቤሲዛ ሌሚሶዛ ማላ ኦꬂቴ።
EXO 25:10 «ኢስቲ ኦዶሮ ሚꬃፌ ኣዱሳቴꬃይ ናምኡ ዋꬋኔ ባጋ፥ ጎምፓይ ኢሲ ዋꬋኔ ባጋ፥ ꬎቃቴꬃይ ቃሴ ኢሲ ዋꬋኔ ባጋ ጊዲዛ ታቦታ ኦꬄቶ።
EXO 25:11 ሶ ባጋኔ ካሬ ባጋ ዋላካይ ባይንዳ ዎርቃን ሜሻ፤ ኢዛ ዩዪ ኣꬋናስ ቦላ ባጋ ጻንጻ ዎርቃራ ዩሻ ኣꬃ ኦꬃ።
EXO 25:12 ታቦታስ ኦይዱ ዎርቃ ሳጋዮታ ኦꬃዳ ኦይዱ ቶሆታን ኢሲ ባጋራ ናምኡ ሳጋዮታ፥ ቃሴ ሃንኮ ባጋራ ናምኡ ሳጋዮታ ኣꬃ።
EXO 25:13 ሄሳፌ ጉዬ ኦዶሮ ሚꬃፌ ቶሆ ሚꬃታ ኬሳዳ ዎርቃ ቲያ።
EXO 25:14 ታቦታ ቶካና ማላ ታቦታዛ ሚሌን ዲዛ ሳጋዮታን ቶሆ ሚꬃታ ጌልꬃ።
EXO 25:15 ቶሆ ሚꬃቲ ታቦታ ሳጋዮታ ጊዶን ዴቶ፤ ኢስቲ ሄፔ ሙሌካ ኬዞፔቶ።
EXO 25:16 ታኒ ኔስ ኢሚዛ ጫቆ ቃላ ማርካ ታቦታ ጊዶን ዎꬃ።
EXO 25:17 «ሃራራ ዋላኬቶንታ ዎርቃፌ ጻላላ ናምኡ ዋꬋኔ ባጋ ኣዱቂዛ፥ ኢሲ ዋꬋኔ ባጋ ኣኪዛ ማሮቴꬃ ካማ ኦꬃ።
EXO 25:18 ካማዛ ጼራ ናምኡ ባጋራ ቆጻዳ ናምኡ ኪሩቤታ ዎርቃፌ ኦꬃ።
EXO 25:19 ኢሲ ኪሩቤዛ ኢሲ ባጋ ጋጻን፥ ናምኣንꬆ ኪሩቤዛ ሃንኮ ባጋ ጋጻን ናምኣታካ ማሮቴꬃ ካማዛራ ጋꬃ ኦꬃ።
EXO 25:20 ኪሩቤቲ ባ ቄፌ ዴንꬂዲ ማሮቴꬃ ካማ ቦላራ ካሜቶ፤ ቃሴ ኢሶይ ኢሳኮ ሲሚ ኡቲዲ ካማዛኮ ጼሌቶ።
EXO 25:21 ታኒ ኔስ ኢሚዛ ጫቆ ቃላ ማርካ ታቦታ ጊዶን ዎꬃ፤ ቃሴ ካማዛ ታቦታስ ቦላ ባጋራ ዎꬃ።
EXO 25:22 ጫቆ ቃላ ማርካይ ኢዛን ዲዛ ታቦታ ካማ ቦላ ዲዛ ናምኡ ኪሩቤታፔ ጊዶን ታኒ ኔናራ ጋጋዳ ኢስራኤሌ ኣሳስ ኢሚዛ ኣዛዞ ኡባ ሄን ታ ኔስ ኢማና።
EXO 25:23 «ኦዶሮ ሚꬃፌ ኣዱሳቴꬃይ ናምኡ ዋꬋ፥ ጎምፓይ ኢሲ ዋꬋ፥ ꬎቃቴꬃይ ቃሴ ኢሲ ዋꬋኔ ባጋ ጊዲዛ ኢሲ ጻራጴዛ ኦꬃ።
EXO 25:24 ሂስታዳ ዋላካይ ባይንዳ ዎርቃን ቲያ፤ ቃሴ ኢዛ ዩሾን ዎርቃ ጻንጻ ዩሻ ኣꬃ።
EXO 25:25 ሄሳꬆካ ቃሴ ኣሆቴꬂ ታꬋኮ ጊዲዛ ጻንጻ ኢዛ ቦላ ዩሻ ኣꬃ። ሂስታዳ ኢዛ ቦላ ዎርቃ ባልጻንꬅ ዩሻ ኣꬃ።
EXO 25:26 ጻራጴዛዛስ ኦይዱ ዎርቃ ሳጋዮታ ሜꬋዳ፥ ጻራጴዛ ቶሆቲ ዲዛ ኦይዱ ባጋራ ኦይꬃ።
EXO 25:27 ጻራጴዛ ቶካናስ ቶሆ ሚꬅ ኢዛ ጊዶራ ኣꬂዛ ሳጋዮቲ ጻራጴዛዛስ ጻንጻ ማታን ዴቶ።
EXO 25:28 ሄ ቶኪዛ ሚꬃታ ኦዶሮ ሚꬃፌ ኬሳዳ፥ ዎርቃ ቲያዳ ኢስታራ ጻራጴዛዛ ቶካ።
EXO 25:29 ሄሳꬆካ ቃሴ ሳኔታኔ ፒልኦታ፥ ዱቃና ጻሮታኔ ኬሬታ ዋላካይ ባይንዳ ዎርቃፌ ኦꬃ።
EXO 25:30 ታ ሲንꬅ ኣꬊዛ ጌሻ ኡኬꬃይ ኡባ ዎዴካ ጻራጴዛ ቦላፌ ꬋዮፖ።
EXO 25:31 «ዎርቃፌ ጻላ ቆጻዳ ጾምፔ ኢስታ ቦላ ዎꬂዛ ባላታ ኬሳ፤ ቃሴካ ኢዛ ቆጻዳ ጾምፔዚ ኢዛን ኤቂዛ ቶሆ፥ ጊዶ ቶማኔ ቶማዛ ኩሬታ፥ ꬌሞታኔ ጪሻታ ኡባ ኦꬃ።
EXO 25:32 ኢሲ ሚሌራ ሄꬑ ባላቲ፥ ኢሲ ሚሌራ ቃሴካ ሄꬑ ባላቲ ኢሲ ቦላ ኡሱፑን ሃጋቲ ኢዛስ ዴቶ።
EXO 25:33 ኡሱፑን ባላታስካ ኢሳስ ኢሳስ ꬌሞይኔ ጪሻይ ኢዛን ዲዛ ኦቾሎኔ ጌቴቲዛ ሚꬃ ጪሽ ሚሳቲዛ ሄꬑ ኩሬቲ ዴቶ።
EXO 25:34 ጾምፔዛ ጊዶ ቶማይ፥ ꬌሞቲኔ ጪሻቲ ኢዛን ዲዛ ኦቾሎኔ ጌቴቲዛ ሚꬃ ጪሽ ሚሳቲዛ ኦይዱ ኩሬቲ ዴቶ።
EXO 25:35 ናምኣይ ናምኣይ ኢሲፌ ዋꬃን ዲዛ ሄꬑ ባላታፔ ጋርሳራ ኢሲ ኢሲ ꬌሞይ ዴኦ።
EXO 25:36 ꬌሞቲኔ ባላቲ ዉሪ ጊዶ ቶማዛፔ ቆጼቲዲ ዋላካይ ባይንዳ ዎርቃፌ ኦሴቴቶ።
EXO 25:37 «ሄሳፌ ጉዬ ጾምፔ ዎꬂዛሶዛስ ላፑን ኤጺዛሶ ጊጊሳዳ ጾምፔቲ ሲንꬃ ባጋ ፖኣና ማላ ኦይꬃ።
EXO 25:38 ጾምፔዛ ቦላ ኤጺሼ ቃሚዳ ሻሎታ ኬሲዛ ቃጴታኔ ጺጻ ዎꬂዛ ሳኔታ ዋላካይ ባይንዳ ዎርቃፌ ኦꬃ።
EXO 25:39 ጾምፔዚኔ ኢዛ ሚሻቲ ዉሪ ሄꬑ ታማኔ ኢቻሹ ኪሎ ጊራሜ ጊዲዛ ዋላካይ ባይንዳ ዎርቃፌ ኦሴቴቶ።
EXO 25:40 ታኒ ኔና ዙማ ቦላ ቤሲዳ ሌሚሶዛ ካላዳ ኣኬካን ኦꬃ።
EXO 26:1 «ቃሴ ሎኤꬂ ሱቄቲዳ ቦꬃ ላይኖፔ ዳዴቲዳ ታሙ ማጋላሻታ ዱንካኔዛ ጊዶን ጊጊሳ። ቃሴካ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናራ ሄ ማጋላሻታ ቦላ ኢሲ ሂላን ኪሩቤታ ሚስሌ ኦሲሳ።
EXO 26:2 ማጋላሻቲ ዉሪ ኢሲ ጊና ጊዴቶ፤ ኢሳ ኢሳ ኣዱሳቴꬃይ ናምኡ ታማኔ ኦስፑን ዋꬋ፤ ጎምፓይ ቃሴ ኦይዱ ዋꬋ ጊዶ።
EXO 26:3 ኢቻሹ ማጋላሻታ ኢሲፌ ጋꬃ ሲካ፤ ሃንኮ ኣቲዳ ኢቻሹ ማጋላሻታካ ኢስታꬆካ ኦꬃ።
EXO 26:4 ኢሲፌ ጋጊ ሲኬቲዳ ማጋላሻታፔ ጋጻን ዲዛ ማጋላሻስ ባልጻንꬃ ቦላ ሳሎ ሚሳቲዛ ጫርቃፌ ሲꬌ ኦꬃ፤ ቃሴ ኢሲፌ ጋጊዲ ሲኬቲዳ ሃንኮ ማጋላሻንካ ሄሳꬆ ኦꬃ።
EXO 26:5 ኢሲፌ ጋጊዳ ኢሲ ማጋላሻ ቦላ ኢቻሹ ታሙ ሲꬌ ሚሳቲዛ ሚሽ፥ ቃሴ ኢሲፌ ጋጊዳ ሃንኮ ማጋላሻ ቦላካ ኢቻሽ ታሙ ሲꬌ ሚሳቲዛ ሚሽ ኦꬃ፤ ሄ ሲꬌ ሚሳቲዛ ሚሻቲ ዉሪካ ሄ ባጋራኔ ሃ ባጋራ ኢሳይ ኢሳራ ጊናን ዴቶ።
EXO 26:6 ሄሳፌ ጉዬ ዎርቃፌ ኢቻሽ ታሙ ቃጴታ ሜꬋዳ ጊዶ ዱንካኔዚ ኢሲኖ ጊዳና ማላ፥ ሄ ማጋላሻታ ማንጻኮታን ኢሳ ኢሳራ ኦይሴꬃ።
EXO 26:7 «ጊዶ ዱንካኔዛ ቦላራ ሃራ ዱንካኔ ኦꬃናስ ታማኔ ኢሲ ማጋላሻታ ዴይሻ ኢስኬፌ ዳዳ።
EXO 26:8 ታማኔ ኢሲ ማጋላሻቲካ ኢሲ ጊና ጊዴቶ፤ ኢሲ ኢሲ ማጋላሻ ኣዱሳቴꬃይ ሄꬑ ታሙ ዋꬋ፥ ጎምፓይ ቃሴ ኦይዱ ዋꬋ ጊዶ።
EXO 26:9 ኢቻሹ ማጋላሻታ ኢሲ ባጋራ ኡሱፑን ማጋላሻታ ቃሴ ሃንኮ ባጋራ ጋꬃ ሲካ። ኡሱፑንꬃ ማጋላሻይ ሲንꬃራ ሶ ባጋ ሲሚ ቃላምኤቶ።
EXO 26:10 ጋꬂ ሲኪዳ ማጋላሻታፔ ኢሲ ማጋላሻ ጋጻን ኢቻሽ ታሙ ሲꬌ ሚሳቲዛ ሚሻታ ኦꬃ፤ ቃሴ ጋꬂ ሲኪዳ ሃንኮ ማጋላሻታፔ ዉርሴꬃ ማጋላሻ ባልጻንꬃ ቦላ ኢቻሽ ታሙ ሲꬌ ሚሳቲዛ ሚሻታ ኦꬃ።
EXO 26:11 ጻርቂማላፔ ኢቻሹ ታሙ ቃጴታ ኦꬃዳ፥ ቃንጎ ሚሳቲዛ ሚሻታ ጊዶ ጌልꬃ፤ ሂስታዳ ቦላ ዱንካኔዛ ኢሲፌ ጋꬃ ኦይꬃ። ሂስቲኮ ሃ ናምኡ ኦይኬቲዳ ካማቲ ኢሲኖ ጊዳና።
EXO 26:12 ቦላ ዱንካኔዛ ማጋላሻታፔ ፓላሂዳ ባጋ ማጋላሻይ ጊዶ ዱንካኔዛስ ጉዬራ ኣላሌቶ።
EXO 26:13 ቦላ ዱንካኔዛ ማጋላሻቲ ናምኡ ባጋራካ ኢሲ ኢሲ ዋꬋ ማላ ፓላሂዲ ሄራ ሃራ ኣላሌቲዲ ጊዶ ዱንካኔዛ ካማና ማላ ናምኡ ባጋ ሚሌራ ኣላሌቶ።
EXO 26:14 «ቦላ ባጋ ዱንካኔዛ ቦላራ ካማናስ ዞኦ ቃላሜን ጌሊ ኬዚዳ ꬋርሾ ኢቴ ጊጊሳ፤ ቃሴ ኢዛ ቦላራ ካማናስ ሃꬃ ጊዶ ዶኣ ጋልባፌ ሃራ ካማ ጊጊሳ።
EXO 26:15 «ጊዶ ዱንካኔዛ ቶሌ ሚꬃታ ኦዶሮ ሚꬃፌ ኦꬃ።
EXO 26:16 ኢሲ ኢሲ ቶሌ ሚꬃስ ኣዱሳቴꬃይ ታሙ ዋꬋ፥ ጎምፓይ ኢሲ ዋꬋኔ ባጋ ጊዶ።
EXO 26:17 ኢሲ ቶሌ ሚꬃስ ኢሲ ቦላ ኦይኬቲ ኡቲዳ ናምኡ ቶሆታ ኦꬃ። ጊዶ ዱንካኔዛ ቶሌ ሚꬃታ ኡባካ ሄሳꬆ ኦꬃ፤
EXO 26:18 ጊዶ ዱንካኔዛስ ዱጌ ባጋራ ናምኡ ታሙ ቶሌ ሚꬃታ ኬሳዳ፥
EXO 26:19 ኢሲ ኢሲ ቶሌ ሚꬃስ ናምኡ ኤቆሶ፥ ሙሌራ ኦይዱ ታሙ ኤቆሶ ቢራፔ ጊጊሳ።
EXO 26:20 ጊዶ ዱንካኔዛስ ፑዴሃ ባጋራ፥ ናምኡ ታሙ ቶሌ ሚꬃታ ኬሳዳ፥
EXO 26:21 ኢሲ ኢሲ ቶሌ ሚꬃስ ናምኡ ኤቆሶ፥ ሙሌራ ኦይዱ ታሙ ኤቆሶ ቢራፔ ጊጊሳ።
EXO 26:22 ቃሴ ጊዶ ዱንካኔዛስ ጉዬራ ኣርሼይ ዉሊዛ ባጋራ ኡሱፑን ቶሌ ሚꬃታ ኬሳዳ፥
EXO 26:23 ጉዬ ባጋራ ዲዛ ዞዜታስ ናምኡ ቶሌ ሚꬃታ ጊጊሳ።
EXO 26:24 ጉዬ ባጋራ ዲዛ ቶሌ ሚꬃቲ ዉሪ ጻጶፔ ጼራ ጋካናስ ኢሲ ቦላ ጋጊ ኦይኬቲዲ፥ ጼራን ኢሶይ ኢሳራ ሳጋዮን ኦይኬቴቶ፤ ሄሳꬆካ ናምኡ ዞዜታ ቦላ ዲዛ ናምኡ ቶሌ ሚꬃቲካ ሃራ ቶሌ ሚꬃታራ ኦይኬቴቶ።
EXO 26:25 ኢሲ ኢሲ ቶሌ ሚꬃስ ጋርሳራ ናምኡ ናምኡ ቶሌ ኤቆሶይ ዴኦ፤ ሙሌራ ኦስፑን ቶሌ ሚꬃቲኔ ቢራፔ ኦሴቲዳ ታማኔ ኡሱፑን ኤቆሶይ ዴዮ።
EXO 26:26 «ቃሴ ሜጋ ሚꬃታ ኦዶሮ ሚꬃፌ ኬሳ። ጊዶ ዱንካኔዛስ ኢሲ ባጋ ሚሌን ዲዛ ቶሌ ሚꬃታስ ኢቻሹ ሜጋ ሚꬃታ፥
EXO 26:27 ቃሴ ሃንኮ ባጋ ሚሌን ዲዛ ቶሌ ሚꬃታስ ሃኢካ ኢቻሹ ሜጋ ሚꬃታ ጊጊሳ። ሄሳꬆካ ጊዶ ዱንካኔዛስ ጉዬራ ኣርሼይ ዉሊዛ ባጋራ ዲዛ ቶሌ ሚꬃታስ ኢቻሹ ሜጋ ሚꬃታ ጊጊሳ።
EXO 26:28 ጊዶ ሜጋ ሚꬃቲ ቶሌ ሚꬃታስ ጊዶራ ሃ ጋጻፔ ሄ ጋጻ ጋካናስ ካንꬂ ኬዛናስ ቤሴስ።
EXO 26:29 «ቶሌ ሚꬃታ ዎርቃን ቲያዳ ሜጋ ሚꬃቲ ኢስታ ጊዶራ ኣꬊዛ ሳጋዮታ ዎርቃፌ ኦꬃ፤ ቃሴ ሜጋ ሚꬃታካ ዎርቃን ቲያ።
EXO 26:30 ጊዶ ዱንካኔዛ ታኒ ኔና ዙማ ቦላን ቤሲዳ ሌሚሶዛ ማላ ቶካ።
EXO 26:31 «ሳሎ ሚሳቲዛፔ፥ ኦቻ ቴራ ሚሳቲዛ ቃጪናፔኔ ጼቃ ዞኦ ቃጪናፔኔ ሎኢ ሱቄቲዳ ሊቆ ላይኖፔ ኢሲ ማጋላሻ ኦꬃ፤ ሄ ማጋላሻዛ ቦላ ኪሩቤታ ሚስሌ ሲኪ ሜꬊዛ ሂላን ኦሲሳ።
EXO 26:32 ሂስታዳ ኦዶሮ ሚꬃፌ ኦሴቲዲ ዎርቃን ቲዬቲዳ ኦይዱ ኤቆ ሚꬃታ ቦላ ዲዛ ዎርቃፌ ኦሴቲዳ ካቆታን ካቃ። ሄ ኦይዱ ኤቆ ሚꬃቲ ቢራፔ ኦሴቲዳ ኤቆሶታን ጌሌቶ።
EXO 26:33 ሄ ማጋላሻዛ ጊዶ ዱንካኔዛ ካራን ዲዛ ቃጴታፔ ጋርሳራ ካቃዳ፥ ጫቆ ቃላስ ማርካ ጊዲዳ ታቦታ ማጋላሻዛፔ ጋꬃ ባጋራ ዎꬃ፤ ሂስቲኮ ሄ ማጋላሻዚ ጌሽ ጌቴቲዛ ሶሆዛ ኡባፌ ዱማቲዛ ቆልኣፌ ጊዶን ሻካና።
EXO 26:34 ማሮቴꬃ ካማ ኡባፌ ዱማቲዳ ቆልኣን ዲዛ ጫቆ ቃላስ ማርካ ጊዲዳ ታቦታ ቦላ ዎꬃ።
EXO 26:35 ጻራጴዛዛ ማጋላሻፔ ካሬራ ፑዴ ባጋራ ዎꬃ፤ ጾምፔ ዎꬂዛ ባላ ቃሴ ኢዛ ጊናን ዱጌ ባጋራ ዎꬃ።
EXO 26:36 «ዱንካኔዛን ጌሊዛ ፔንጌዛስ ሳሎ ሚሳቲዛ ቃጪናፔ፥ ኦቻ ቴራ ሚሳቲዛ ቃጪናፔ፥ ጼቃ ዞኦ ቃጪናፔኔ ሎኢ ሱቄቲዳ ሊቆ ላይኖፔ ጺልፔን ኣሌቂሲ ኦሴቲዳ ማጋላሻ ጊጊሳ።
EXO 26:37 ማጋላሻዛስ ኢቻሹ ኤቆ ሚꬃታ ኦዶሮ ሚꬃፌ ኬሳዳ፥ ዎርቃን ቲያ፤ ኢስታ ካቆቲካ ዎርቃፌ ኦሴቲዳ ጊዴቶ፤ ኤቆ ሚꬃታስ ጻርቂማላፔ ኦሴቲዳ ኢቻሹ ኤቆሶ ጊጊሳ።
EXO 27:1 «ኦዶሮ ሚꬃፌ ያርሺዛሶ ኦꬃ። ሄ ያርሺዛሶዛ ꬎቃቴꬃይ ሄꬑ ዋꬋ፤ ጎምፓይኔ ኣዱሳቴꬃይ ኢሲ ማላ፥ ኢቻሹ ኢቻሹ ዋꬋ ጊዲዲ ኦይዱ ዞዜራ ዴዮ።
EXO 27:2 ኦይዱ ዞዜታ ዉርሴꬃ ጋጻን ጋጻን ኢሲ ኢሲ ካጬ ሜꬋ፤ ካጬቲ ያርሾሶዛፔ ኦሴቴቶ። ሂስታዳ ያርሺዛሶዛ ጻርቂማላ ቲያ።
EXO 27:3 ኢዛን ጎኤቲዛ ሚሻታ፥ ቢዲንꬅ ካሺዛ ሚሻታ፥ ካሼቲዳ ቢዲንꬃ ኬሲዛ ሚሻታ፥ ኬሬታ፥ ኣሾ ጺጺዛ ኮንጬታኔ ታማ ካቺዛኔ ኬሲዛ ሚሻታ ኡባ ጻርቂማላፔ ኦꬃ።
EXO 27:4 ሂስታዳ ኢዛስ ጻርቂማላፔ ዛይዛሬ ማላ ሚሺኔ ኦይዱ ጉላታ ቦላን ኦይዱ ሳጋዮታ ኦꬃ።
EXO 27:5 ሂስታዳ ያርሺዛሶዛስ ዳባ ቦላ ዎꬃ።
EXO 27:6 ኦዶሮ ሚꬃፌ ያርሺዛሶዛስ ቶሆ ሚꬃታ ኬሳዳ ጻርቂማላ ቲያ።
EXO 27:7 ያርሺዛሶዛ ቶኪዛ ዎዴ ማዳና ማላ ሄ ቶሆ ሚꬃታስ ናምኡ ሚሌራ ዲዛ ሳጋዮታን ኣꬃ።
EXO 27:8 ታኒ ኔና ዙማ ቦላን ቤሲዳ ማላ ያርሺዛሶዛ ሳንቃፌ ኦꬃዳ ጊዶዛ ዶያ ኣጋ።
EXO 27:9 «ጾሳ ዱንካኔዛ ጊቤ ሎኢ ዳዴቲዳ ሊቆ ላይኖፔ ማጋላሻታ ጊጊሳ። ዱጌ ባጋራ ዲዛ ማጋላሻታ ኣዱሳቴꬃይ ጼቱ ዋꬋ ጊዶ።
EXO 27:10 ኢዛስ ናምኡ ታሙ ኤቆ ሚꬃቲኔ ኤቆ ሚꬃቲ ኢስታን ኤቂዛ ናምኡ ታሙ ኤቆሶታ ጻርቂማላፔ ኦꬃ፤ ኢስታ ሁኤን ቃሴ ካቆታኔ ቶሬ ሚꬃታ ሁኤ ቦላ ጊታ ሳጋዮታ ቢራፔ ኦꬃ።
EXO 27:11 ሄሳꬆካ ፑዴ ባጋ ኣዱሳቴꬃይ ጼቱ ዋꬋ፤ ቃሴ ናምኡ ታሙ ቶሬ ሚꬃቲኔ ኤቆ ሚꬃታስ ናምኡ ታሙ ጻርቂማላፔ ኦሴቲዳ ኤቆሶቲ ዴቶ። ሂስታዳ ቢራፔ ኦሴቲዳ ካቆታኔ ኤቆ ሚꬃታስ ሁኤ ቦላ ጊታ ሳጋዮታ ዎꬃ።
EXO 27:12 ኣርሼይ ዉሊዛ ባጋራ ኣኮቴꬃይ ኢቻሹ ታሙ ዋꬋ ጊዶ፤ ታሙ ቶሬ ሚꬃቲኔ ቶሬ ሚꬃታስ ታሙ ኤቆሶቲ ዲዛ ማጋላሻቲ ኢዛስ ዴቶ።
EXO 27:13 ቃሴ ኣርሼይ ሞኪዛ ባጋራ ኣኮቴꬃይ ኢቻሹ ታሙ ዋꬋ ጊዲዲ፥
EXO 27:14 ፔንጌዛፔ ኢሲ ባጋራ ታማኔ ኢቻሹ ዋꬋ ኣዱቂዛ ማጋላሻቲ ዴቶ፤ ኢስታስ ሄꬑ ኤቆ ሚꬃቲኔ ኢስታን ኤቂዛ ሄꬑ ኤቆሶቲ ዴቶ።
EXO 27:15 ሄሳꬆካ ሃንኮ ባጋራ ታማኔ ኢቻሹ ዋꬋ ኣዱቂዛ ማጋላሻቲ ዴቶ፤ ኢስታስ ሄꬑ ኤቆ ሚꬃቲኔ ኢስታን ኤቂዛ ሄꬑ ኤቆሶቲ ዴቶ።
EXO 27:16 «ፔንጌዛስ ናምኡ ታሙ ዋꬋ ኣዱቂዛ ማጋላሻ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሎኢ ሱቄቲዳ ላይኖፔ ዳዴቲዳ፥ ጺልፔን ሎኢዳ ማጋላሻ ጊጊሳ። ኢዛ ቱቂ ኦይካናስ ኦይዱ ኤቆ ሚꬃቲኔ ቶሬ ሚꬃቲ ኢስታን ኤቂዛ ኦይዱ ኤቆሶታ ጊጊሳ።
EXO 27:17 «ጊቤዛ ዩዪ ኣꬋናስ ዲዛ ኤቆ ሚꬃታ ኡባስ ቢራፔ ኦሴቲዳ ጊታ ሳጋዮቲ፥ ካቆቲኔ ጻርቂማላፔ ኦሴቲዳ ኤቆሶቲ ዴቶ።
EXO 27:18 ጊቤዛ ኣዱሳቴꬃይ ጼቱ ዋꬋ፥ ኣኮቴꬃይ ኢቻሽ ታሙ ዋꬋ ጊዶ፤ ꬎቃቴꬃይ ኢቻሹ ዋꬋ ጊዲዳ ሎኢ ሱቄቲ ዳዴቲዳ ላይኖፔ ኦሴቲዳ ማጋላሻቲ ዴቶ፤ ቃሴካ ጻርቂማላፔ ኦሴቲዳ ኤቆሶቲ ዴቶ።
EXO 27:19 «ጾሳ ዱንካኔዛ ኦሶስ ጎኤቲዛ ሚሻቲ፥ ዱንካኔዛኔ ጊቤዛ ቶሌ ꬊሽኬቲ ዉሪካ ጻርቂማላፔ ኦሴቴቶ።
EXO 27:20 «ጾምፔይ ቶኦንታ ኤጺሼ ዳና ማላ ኢዛስ ኮሺዛ ዛይቴ ዎጋራ ሚꬃ ኣይፌ ጫዲ ጉምኢዲ ጺሎ ዛይቴ ኔስ ኤሃና ማላ ኢስራኤሌ ናይታ ኣዛዛ።
EXO 27:21 ኣሮኔይኔ ኢዛ ኣቱማ ናይቲ ጾምፔይ ጎዳ ሲንꬃን ቃሚዳ ጋዴይ ዎንታና ጋካናስ ፖኣና ማላ፥ ጾሳ ዱንካኔዛ ጊዶን፥ ጫቆ ቃላስ ማርካይ ኢዛ ጊዶን ዲዛ ታቦታ ሲንꬃን ዲዛ ማጋላሻፔ ካሬራ ኤꬄቶ። ሃይሲ ኢስራኤሌ ኣሳስ ሜርናስ ዎጋ ጊዲ ዴኦ።
EXO 28:1 «ኔ ኢሻ ኣሮኔኔ ኢዛ ኣቱማ ናይታ ናዳቤ፥ ኣቢሁ፥ ኤልኤዜሬኔ ኢታማሬ ኔኮ ኤካ ያ፤ ኢስቲ ቄሴ ጊዲዲ ታስ ኦꬃና ማላ ኢስራኤሌ ኣሳ ጊዶፌ ኢስታ ዱማሳ።
EXO 28:2 ኢዛስ ቦንቾኔ ሎኦቴꬅ ኢማና ማላ ኔ ኢሻ ኣሮኔስ ዱማ ማይኦ ጊጊሳ።
EXO 28:3 ታኒ ዱማ ዱማ ኤራቴꬅ ኢሚዳ ኩሼ ሂላ ኤሪዛ ኣስ ኡባ ጼይጋዳ ኣሮኔስ ማይኦ ጊጊሳና ማላ ዮታ፤ ኢዚካ ቄሴ ጊዲዲ ታስ ኦꬃናስ ዱማቶ።
EXO 28:4 ኢስቲ ጊጊሳና ማይኦቲካ ሃይታንታኮ፤ ቲራ ኪሴ፥ ኤፉዴ፥ ኤፉዴፔ ጋርሳራ ማይኢዛ ሃራ ማይኦ፥ ቃሴካ ኡባፌ ጋርሳራ ማይኢዛ ኣዱሳ ማይኦ፥ ጎሴኔ ዳንጮ። ኔ ኢሻይ ኣሮኔይኔ ኢዛ ኣቱማ ናይቲ ቄሴ ጊዲዲ ታስ ኦꬂሼ ዱማ ማይኦታ ማይኣና ማላ፥ ማይኦ ጊጊሴቶ።
EXO 28:5 ኩሼ ሂላቴꬅ ኤሪዛይቲካ ሄ ማይኦታ ጊጊሳናስ፥ ዎርቃ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናኔ ሊቆ ላይኖ ኤኪ ኦꬄቶ።
EXO 28:6 «ኤፉዴ ጌቴቲዛ ማይኦ ዎርቃፌ፥ ሳሎ ሚሳቲዛ፥ ኦቻ ቴራ ሚሳቲዛ፥ ጼቃ ዞኦ ቃጪናፔኔ ሎኢ ሱቄቲዳ ሊቆ ላይኖፔ ኩሼ ሂላቲ ኣሌቂሲ ጊጊሴቶ።
EXO 28:7 ኢዛስ ሃሼራ ዱጌ ዎꬊዛ ናምኡ ካቆቲ ዴቶ፤ ኢስቲካ ቢዲ ኤፉዴ ማይኦዛራ ኢሲፌ ሃራ ኦይꬂዛ ሚሻራ ዳባ ቦላ ኦይኬቲዲ ኢሲኖ ጊዴቶ።
EXO 28:8 ሂላይ ሎኤꬂዲ ዳዲዳ ዳንጮይካ ኤፉዴዛ ማላ ዎርቃፌ፥ ሳሎ ሚሳቲዛ ኦቻ ቴራ ሚሳቲዛ፥ ጼቃ ዞኦ ቃጪናፔኔ ሎኢ ባቄቲዳ ላይኖፔ ኤፉዴዛራ ኢሲፌ ኦይኬቲ ዳዴቶ።
EXO 28:9 «ማርጊዴ ጌቴቲዛ ናምኡ ሹቻታ ኤካዳ ኢስራኤሌ ናይታ ሱንꬅ ኢስታ ቦላ ዎጫ ጻፋ።
EXO 28:10 ኢስታ ዬሌታ ማራ ማላ ኢሲ ሹቻ ቦላ ኡሱፑን ሱንꬅ፥ ሃንኮ ሹቻ ቦላ ቃሴ ኣቲዳ ኡሱፑናታ ሱንꬅ ዎጫ ጻፋ።
EXO 28:11 ሂላንቻይ ማታሜ ቦላ ሱንꬅ ዎጪ ጻፊዛ ማላ፥ ሄ ናምኡ ሹቻታ ቦላ ኢስራኤሌ ናይታ ሱንꬁ ዎጫ ጻፋዳ ዩዪ ኣꬋናስ ዎርቃፌ ጊጌቲዳ ሚሻ ጊዶን ዎꬃ።
EXO 28:12 ሂስታዳ ታማኔ ናምኡ ኢስራኤሌ ዜሬꬃታ ቆፍሲዛዝ ጊዳና ማላ ሃ ናምኡ ሹቻታ ኤፉዴዛራ ኦይꬃዳ ሃሼ ቦላ ዎꬃ፤ ሂስቲኮ ጎዳ ሲንꬃን ኡባ ዎዴ ቆፌታና ማላ ሃ ሱንꬃታ ኣሮኔይ ባ ሃሼ ቦላ ቶኮ።
EXO 28:13 ሹቻታ ዎꬃናስ ዎርቃፌ ዶቄቲ ጊጊዳ ማጫራታ ኦꬃ።
EXO 28:14 ቃሴ ዋላካይ ባይንዳ ዎርቃፌ ዎዶሮ ማላ ዶቄቲዳ ናምኡ ኦርዴ ሳንሳላታታ ጊጊሳዳ፥ ሹቻታ ዎꬃናስ ዎርቃፌ ዶቄቲ ጊጌቲዳ ማጫራታራ ጋꬃ ኦዬሴꬃ።
EXO 28:15 «ጎዳ ሼኔይ ኣዛኮኔ ኢዛ ኦይቺዲ ኤሪዛ ቲራ ኪሴ ኩሼ ሂላንቻን ኦሲሳ። ሄ ቲራ ኪሴ ኤፉዴ ዳዲዳ ማላ፥ ዎርቃፌ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሎኢ ሱቄቲዳ ላይኖፔ ዳዳ።
EXO 28:16 ኢዛስ ኣዱሳቴꬃይኔ ኣሆቴꬃይ ዳኮቲ ቃላምኤቲዲ ኢሲ ታꬋኮ ጊዶ።
EXO 28:17 ሄሳፌ ጉዬ ኢዛ ቦላ ኦይዱ ማራን ኣልኦ ሹቻታ ዎꬃ፤ ኮይሮ ማራን ሳርዲዮኔ፥ ቶጳዚዮኔኔ ጶሊዛ ኢንቁ።
EXO 28:18 ናምኣንꬆ ማራን ባሉሬ፥ ሲምፔሬኔ ኣልማዜ ጌቴቲዛ ኣልኦ ሹቻታ፤
EXO 28:19 ሄꬓንꬆ ማራን ያኪንቴ፥ ኬልቄዶኔኔ ኣሜቴስጺኖሴ፤
EXO 28:20 ኦይዳንꬆ ማራን ቢሪሌ፥ ማርጊዴ፥ ያስጲዴ። ሃይታንቲ ዉሪ ሹቻታ ዎꬃናስ ዎርቃፌ ዶቄቲ ጊጊዳ ማጫራታ ቦላ ኡቴቶ።
EXO 28:21 ኢስራኤሌ ቆሞታ ሱንꬃ ቆዳ ማላ፥ ሹቻታ ቆዳይካ ታማኔ ናምኡ ጊዶ፤ ኢሳ ኢሳ ቦላ ማታሜ ማላ ዎጬቲዲ ታማኔ ናምኡ ዜሬꬃታ ሱንꬂ ሄ ሹቻታን ጻፌቶ።
EXO 28:22 «ቲራ ኪሴስ ዋላካይ ባይንዳ ዎርቃፌ ዎዶሮ ማላ ዶቄቲዳ ኦርዴ ሳንሳላታታ ኦꬃ።
EXO 28:23 ናምኡ ዪች ዎርቃፌ ጊጊሳዳ ቲራ ኪሴስ ቆሞ ጋጻ ጼራራ ጋꬃዳ ኦይꬃ ዎꬃ።
EXO 28:24 ሄ ናምኡ ዎርቃ ሳንሳላታታ ቲራ ኪሴታስ ጼራታን ዲዛ ሳጋዮታራ ጋꬃ ኦይꬃ።
EXO 28:25 ሄ ሳንሳላታታስ ሃንኮ ባጋ ጼራ ቃሴ ኤፉዴዛስ ሲንꬃ ባጋራ፥ ሃሼ ቦላ ዲዛ ሹቻታ ዎꬃናስ ዎርቃፌ ዶቄቲ ጊጊዳ ማጫራታራ ጋꬃ ኦይሴꬃ።
EXO 28:26 ቃሴካ ናምኡ ዎርቃ ዪቻታ ጊጊሳዳ፥ ኤፉዴፔ ካሊ ዲዛ ቲራ ኪሴታስ ጋꬃ ባጋራ ዲዛ ናምኡ ጼራታን ኣꬃ።
EXO 28:27 ሄሳꬆካ ዎርቃፌ ሃራ ናምኡ ዪቻታ ጊጊሳዳ ኤፉዴዛስ ሲንꬃ ባጋራ፥ ሃሼ ቦላ ዲዛ ካቆዛፔ ጋርሳ ባጋራ፥ ኤፉዴ ዳንጪዛሶፔ ቆሞራ ሲኮይ ጋጊዛሶ ኣቻን ኢስታ ኦይꬃ።
EXO 28:28 ቲራ ኪሴን ዲዛ ሳጋዮታ ኤፉዴዛን ዲዛ ሳጋዮታራ ጋꬂዲ ሳሎ ሚሳቲዛ ሱቄꬃን ዳንጮዛራ ጋꬃ ቃቻ፤ ሂስቲኮ ቲራ ኪሴዚ ጼሳፌ ቦላራ ዲዛ ጊሻስ ቃሾይ ሌፔና።
EXO 28:29 «ኣሮኔይ ኡባፌ ዱማ ቆልኣ ጌሊዛ ዎዴ ሄ ቲራ ኪሴን ዲዛ ኢስራኤሌ ቆሞታ ሱንꬃታ ቶኮ። ሂስቲኮ ሃይሲ ጎዳ ሲንꬃን ኡባ ዎዴ ሃሳኤታና።
EXO 28:30 ቃሴ ኡሪሜኔ ቱሚሜ ጌቴቲዛይታ ቲራ ኪሴታን ዬጋ። ኣሮኔይ ጎዳ ሲንꬅ ኣꬊሼ ባ ቲራን ዎꬂ ኤኪ ጌሎ። ጎዳ ሼኔይ ኣዛኮኔ ኢስራኤሌ ኣሳ ኤሪሳና ማላ፥ ኢዚ ጎዳ ሲንꬃን ኦꬃናስ ጌሊዛ ኡባ ዎዴ ቲራ ኪሴፔ ꬋይሶፎ።
EXO 28:31 «ኤፉዴዛፔ ቦላራ ማይኤቲዛ ኣዱሳ ማይኦ ሳሎ ሚሳቲዛ ጫርቃፌ ጻላ ጊጊሳ።
EXO 28:32 ሄ ኣዱሳ ማይኦዛስ ሁኤይ ጌሊዛሶ ጊጊሳ። ሁኤይ ኬዚዛሶዚ ዳኬቶንታ ማላ ሶ ባጋ ቃላምኣዳ ዩሻ ኣꬃ ሲካ።
EXO 28:33 ኣዱሳ ማይኦዛስ ጋርሳ ባጋ ማጫራ ዩሾን ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔ፥ ኦሮማኔ ጌቴቲዛ ሚꬃ ኣይፌ ሚስሌታ ሜꬋ። ሂስታዳ ኢስታ ጊዶን ዎርቃፌ ኦሴቲዳ ዳላታ ዋላካን ዎꬃ።
EXO 28:34 ዎርቃ ዳላቲኔ ኦሮማኔ ሚꬃ ኣይፌ ሚስሌቲ ሄ ኣዱሳ ማይኦ ጋርሳ ባጋ ጼራን ዩዪ ኣꬋናስ ዋላካን ዴቶ።
EXO 28:35 ኣሮኔይ ቄሴቴꬃን ኦꬂዛ ዎዴ ሃ ኣዱሳ ማይኦዛ ማይኦ፤ ጎዳ ሲንꬅ ኡባፌ ዱማ ቆልኣ ጌሊዛ ዎዴኔ ኬዚዛ ዎዴ ዳላይ ጊራና። ኢዚ ሄ ማይኦዛ ማይኢኮ ሃይቄና።
EXO 28:36 ዋላካይ ባይንዳ ዎርቃፌ ኢሲ ኣሌቆ ጊጊሳዳ ማታሜ ዎጪ ኬሲዛ ማላ ኢዛ ቦላ ዎጫዳ፥ ‹ጎዳስ ጌሽ ጊዲ ዱማቲዴስ› ጋዳ ጻፋ።
EXO 28:37 ሂስታዳ ሁኤን ጎሳ ቦላ ሳሎ ሚሳቲዛ ቃጪናን ጎሳዛስ ሲንꬃ ባጋራ ኦይꬃ ካቃ።
EXO 28:38 ሂስቲዲ ኣሮኔይ ኢዛ ባ ሊጴን ዎꬆ፤ ሄን ኢስራኤሌ ኣሳይ ጎዳስ ኢሞታ ኢሚሼ ሞሪዳ ሚሺ ዲኮካ ሄ ሞሮዛ ኣሮኔይ ቶኮ። ኣሳይ ኤሂዛይሳ ጎዳይ ኤካና ማላ ኢዚ ሄ ጻፌቲዳይሳ ኡባ ዎዴካ ባ ሊጴን ዎꬃናስ ኮሼስ።
EXO 28:39 «ኣሮኔ ሻሚዜ ሌኤ ላይኖፔ ዳዳ፤ ሁኤን ጻጺዛ ጎሳካ ላይኖፔ ጊጊሳ። ቃሴ ዳንጮዛካ ጺልፔን ኣሌቂሳዳ ሲኪሳ።
EXO 28:40 ኣሮኔ ናይታስ ቦንቾኔ ኣሌቆ ጊዳና ማላ፥ ሻሚዜታ፥ ዳንጮታኔ ሁኤን ጻጺዛ ጎሳታ ጊጊሳ።
EXO 28:41 ኔኒ ሃ ማይኦታ ኔ ኢሻ ኣሮኔኔ ኢዛ ናይታ ማይዚዳፔ ጉዬ፥ ኢስቲ ቄሴቴꬃን ታስ ኦꬃና ማላ ኢስታ ዎጋራ ዛይቴ ቲያ፤ ቲያዳ ኢስቲ ቄሴ ጊዲዲ ታስ ኦꬃና ማላ ኢስታ ዱማሳ።
EXO 28:42 ኢስታ ካሎይ ካሜታና ማላ ጋርሳራ ጊጺዛ ጊꬅ፥ ጼሳፌ ቢዲ ዎዲራ ጋካናስ ካሚዛዝ፥ ሊቆ ላይኖ ቃጪናፔ ጊጊሳ።
EXO 28:43 ኣሮኔይኔ ኢዛ ናይቲ ጾሳ ዱንካኔ ጊዶ ጌሊዛ ዎዴ ዎይኮ ጊቤ ጊዶን ቄሴቴꬃን ኦꬃናስ ያርሾ ያርሺዛሶ ሺቂዛ ዎዴ ሃይታ ማይኦታ ማይኤቶ። ሄሳꬆ ሃንኮ ኢስቲ ባንታ ቦላ ቆሆኔ ሃይቆ ኤሄቴና። ሃይሲ ኣሮኔሲኔ ኢዛ ዜሬꬃታስ ሜርናስ ዎጋ ጊዶ።
EXO 29:1 «ኣሮኔይኔ ኢዛ ናይቲ ቄሴ ጊዲዲ ታስ ኦꬃና ማላ ኔኒ ኢስታ ዱማሳናስ ኦꬃ፤ ዎሶይ ባይንዳ ኢሲ ሚርጎኔ ናምኡ ꬋርሾታ ኤካ።
EXO 29:2 ሎኦ ጊስቴ ꬊሌ ኤካዳ ኢርሾ ዬጎንታ ኡኬꬅ ኡካ፤ ቃሴካ ኢርሾ ዬጎንታ ዛይቴን ጉꬃ ኡኬꬅ ኡካ፤ ሄሳꬆካ ኢርሾ ዬጎንታ ቄሪ ኡኬꬅ ኡካዳ ዛይቴ ቲያ።
EXO 29:3 ኔኒ ሄይታ ሌማቴን ዎꬃዳ፥ ሚርጎዛ ናምኡ ꬋርሾታራ ኢሲፌ ታስ ሺሻ።
EXO 29:4 «ሂስታዳ ኣሮኔኔ ኢዛ ናይታ ጾሳ ዱንካኔዛ ፔንጌ ኤሃዳ ሃꬃን ሜጫ።
EXO 29:5 ሄሳፌ ጉዬ ማይኦታ ኤካዳ፥ ሻሚዜ፥ ኤፉዴፔ ቦላራ ማይኢዛ ኣዱሳ ማይኦ፥ ኤፉዴኔ ቲራ ኪሴ ኣሮኔ ማይዛዳ ኤፉዴዛ ሂላን ዳዴቲዳ ዳንጮን ዳንጪሳ።
EXO 29:6 ጎሳዛ ኢዛ ሁኤን ጎዚሳዳ፥ ‹ጎዳስ ጌሽ ጊዲ ዱማቲዴስ› ጌቴቲ ጻፌቲዳ ኣሌቆዛ ጎሳ ቦላ ዎꬃ።
EXO 29:7 ቲዪዛ ዛይቴካ ኤካዳ ኢዛ ሁኤን ቲጋዳ ቲያ።
EXO 29:8 ኢዛ ናይታካ ኤሃዳ ሻሚዜታ ማይዛ።
EXO 29:9 ጎሳካ ኢስታ ሁኤን ጎዚሳ። ሄሳፌ ጉዬ ኣሮኔኔ ኢዛ ናይታ ዳንጮ ዳንጪሳ። ቄሴቴꬃይ ኢስታስ ሜርና ኦሶ ዎጋ ጊዶ፤ ሄሳꬆ ሂስታዳ ኣሮኔኔ ኢዛ ናይታ ቄሴ ሂስታ።
EXO 29:10 «ኔ ታስ ሚርጎ ጾሳ ዱንካኔ ሲንꬅ ኤሂኮ ኣሮኔይኔ ኢዛ ናይቲ ኢዛ ሁኤ ቦላ ባ ኩሼ ዎꬂኮ፥
EXO 29:11 ዎፋኖዛ ሄን ጎዳ ሲንꬃን ሹካ።
EXO 29:12 ዎፋኖዛ ሱꬃን ኔ ቢራꬌ ጌልꬃ ኬሳዳ፥ ያርሺዛሶዛ ቦላን ዲዛ ካጬታ ቲያ፤ ቲዪሺን ኣቲዳ ሱꬃ ያርሺዛሶዛፔ ጋርሳ ባጋራ ጉሳ።
EXO 29:13 ሄሳፌ ጉዬ ማራጬ ካሚዳ ሞꬌ፥ ቲሬዛራ ኦይኬቲ ዲዛ ኣሾ፥ ናምኡ ኪላሆታኔ ኢስታ ካሚዳ ሃንዳ ኤካዳ፥ ያርሺዛሶሆዛ ቦላ ዎꬃዳ ጹጋ።
EXO 29:14 ጊዶ ኣቲን ሚርጎዛ ኣሾ፥ ጋልባኔ ማራጬዛ፥ ሜቴቶንታ ኣሾታ ኣሲ ዲዛሶሆፔ ሃራሶ ኤፋዳ ናጋራ ያርሾ ጊዳና ማላ ጹጋ፤
EXO 29:15 «ናምኡ ꬋርሾታፔ ኢሳ ኔ ኤኪኮ ኣሮኔይኔ ኢዛ ናይቲ ባ ኩሼ ኢዛ ሁኤ ቦላ ዎꬄቶ።
EXO 29:16 ሹካዳ ሱꬃ ያርሺዛሶዛ ሚሌ ቦላ ኡባ ባጋራ ዉጻ።
EXO 29:17 ꬋርሾዛ ኣሾ ቃንጼሬꬃዳ፥ ቃንꬃ ኣሾኔ ቶሆታ ሜጫዳ ሁኤዛራኔ ሃንኮ ኣቲዳ ኣሻራ ኢሲ ቦላ ዎꬃ።
EXO 29:18 ሄሳፌ ጉዬ ꬋርሾዛ ሙሌራ ያርሺዛሶሆዛ ቦላ ጹጋ፤ ሄሲ ጎዳስ ታማን ጹጌቲዛ ሳዎ ቱኑ ጊዛ ያርሾኮ።
EXO 29:19 «ቃሴ ሃንኮ ꬋርሾዛ ኔ ኤኪኮ ኣሮኔይኔ ኢዛ ናይቲ ባ ኩሼ ኢዛ ሁኤ ቦላ ዎꬄቶ።
EXO 29:20 ሄ ꬋርሾዛ ሹካዳ ኢዛ ሱꬃፌ ጉꬃራ ኤካዳ፥ ኣሮኔሲኔ ኢዛ ናይታስ ኡሻቻ ሃይꬃታ ጼራ፥ ኡሻቻ ኩሼ ማንꬃ ቢራꬌታኔ ኡሻቻ ቶሆ ማንꬃ ቢራꬌታ ቲያ፤ ሄሳፌ ጉዬ ኣቲዳ ሱꬃ ያርሺዛሶ ሚሌ ቦላ ኡባሶራ ዉጻ።
EXO 29:21 ያርሺዛሶን ዲዛ ሱꬃፌኔ ቲዬቲዛ ዛይቴዛፔ ጊናራ ኤካዳ፥ ኣሮኔ ቦላኔ ኢዛ ማይኦ ቦላ፥ ኢዛ ናይታ ቦላኔ ኢስታ ማይኦ ቦላ ዉጻ፤ ሂስቲኮ ኢዚ ኢዛ ናይቲኔ፥ ኢስታ ማይኦይ ጎዳ ኦሶስ ዱማታና።
EXO 29:22 «ሃ ꬋርሾዛፔ ጎይናዛኔ ኢዛን ዲዛ ቶልꬆዛ፥ ማራጬ ቦላን ዲዛ ሞꬌ፥ ቲሬዛራ ኦይኬቲ ዲዛ ኣሾ፥ ናምኡ ኪላሆታ፥ ኢስታ ካሚ ኦይኪዳ ሃንዳራኔ ኡሻቻ ጌዳራ ኔኒ ኤካ፤ ሃይሲ ቄሴቴꬃ ሱንꬅ ኢሚዛ ዎዴ ሹኬቲዛ ዶርሳ።
EXO 29:23 ጎዳ ሲንꬃን ዎꬂዳ ኢርሾይ ጌሎንታ ኡኬꬃፌ ኢሲኖ፥ ዛይቴይ ዋላኬቶንታ ኡኬꬃፌ ኢሲኖ፥ ዛይቴራ ኡኪዳ ኢሲ ኮምፖኔ ኢሲ ቄሪ ኮምፓ ኤካ።
EXO 29:24 ኔኒ ሃ ካꬃ ኡባ ኣሮኔ ኩሼኒኔ ኢዛ ናይታ ኩሼን ዎꬂኮ ኢስቲ ያኔ ሃ ቃሴꬂዛ ያርሾ ሂስቲዲ ጎዳ ሲንꬃን ሺሼቶ።
EXO 29:25 ሄሳፌ ጉዬ ኔኒ ኢስታ ኩሼፔ ሄይታ ኤካዳ፥ ያርሺዛሶዛ ቦላ ዎꬃዳ፥ ጹጌቲዛ ያርሾራ ኢሲፌ ጋꬃዳ፥ ጎዳስ ሳዎ ቱኑ ጋና ማላ፥ ያርሺዛሶዛ ቦላ ታማን ጹጋ።
EXO 29:26 ኣሮኔይ ቄሴ ጊዲዲ ሱሚዛ ዎዴ ሹኪዳ ꬋርሾዛ ኣንጋሶ ኤካዳ ጎዳ ሲንꬃን ያኔ ሃ ቃሴꬂዛ ያርሾ ሂስታ ቃሴꬃ፤ ሃይሲ ኢንቴና ጋኪዛ ጊሻ ጊዳና።
EXO 29:27 «ሄ ሹኬቲዳ ꬋርሾዛ ኣሾፔ ያርሾ ኦꬂዲ ያኔ ሃ ቃሴꬂዳ ኣንጋሶዛኔ ጎዳ ሲንꬅ ሺቂዳ ጌዳ ዱማሳ። ሄሲካ ኣሮኔ ጊሻኔ ኢዛ ናይታ ጊሻ ጊዳና።
EXO 29:28 ኢስራኤሌ ኣሳይ ጎዳስ ሺሺዛ ኢሲፌቴꬃ ያርሾዛፔ ኣንጋሶዛኔ ጌዳዛ ኡባ ዎዴካ ኣሮኔሲኔ ኢዛ ኣቱማ ናይታ ጋኪዛ ጊሻ ጊዶ። ኣይስ ጊኮ ሃይሲ ኢስራኤሌ ኣሳይ ጎዳስ ሺሺዛ ኢሞታ።
EXO 29:29 «ኣሮኔ ቄሴቴꬃ ዱማ ማይኦይ ኢዛፔ ጉዬ ኢዛ ዜሬꬃስ ጊዶ፤ ኢስቲ ቲዬቲዲ ቄሴ ጊዲዛ ዎዴ ሄ ማይኦዛ ማይኤቶ።
EXO 29:30 ኢዛ ናይታፔ ኢዛሶሆን ቄሴ ጊዲዲ ዱማቲዳ ሶሆዛን ኦꬃናስ ጾሳ ዱንካኔ ዪዳ ኣቱማ ናይ ሄ ማይኦዛ ላፑን ጋላስ ጋካናስ ማይኦ።
EXO 29:31 «ኣሮኔይኔ ኢዛ ናይቲ ቄሴቴꬃን ሱንꬃናስ ሹኬቲዳ ꬋርሻ ኣሾ ኤካዳ ዱማ ሶሆዛን ዶይሳ።
EXO 29:32 ኣሮኔይኔ ኢዛ ናይቲ ꬋርሾዛ ኣሻ ሌማቴን ዲዛ ኡኬꬃራ ጾሳ ዱንካኔ ፔንጌን ሜቶ።
EXO 29:33 ኢስቲ ቄሴ ጊዲዲ ሱሚዛ ዎዴኔ ዱማቲዛ ዎዴ ኢስታ ናጋራይ ኣቶ ጌቴታና ማላ ያርሼቲዳ ሄ ያርሾታ ሜቶ። ጊዶ ኣቲን ሄ ያርሾቲ ጌሽ ጊዲዳ ጊሻስ ሃራ ኣሲ ኦኒካ ሞፖ።
EXO 29:34 ቄሴቴꬃን ሱንꬃናስ ሹኪዳ ꬋርሾዛ ኣሾፔ ዎይኮ ኡኬꬃፌ ማላዶ ጋካናስ ፓላሂዲ ኣቂኮ ዱማ ጊዲዳ ጊሻስ ታማን ጹጌቶ ኣቲን ሜቴቶፎ።
EXO 29:35 «ሄሳꬆ ሂስታዳ ላፑን ጋላስ ጋካናስ ታኒ ኔና ኣዛዚዳ ማላ ኣሮኔኔ ኢዛ ናይታ ቄሴ ሂስታዳ ሱንꬃ።
EXO 29:36 «ናጋራይ ኣቶ ጌቴታና ማላ ሃች ሃች ናጋራ ጊሻስ ኢሲ ሚርጎ ያርሻ። ሄሳንካ ያርሺዛሶዛ ጌሻ፤ ሂስታዳ ያርሺዛሶዛ ዱማꬃናስ ዛይቴ ቲያ።
EXO 29:37 ያርሺዛሶዛ ናጋራ ጌሾ ዎጋ ላፑን ጋላስ ጋካናስ ዉርሳዳ ኢዛ ዱማꬃ። ሂስቲኮ ያርሺዛሶዚ ዱማ ጌሻሶሆ ጊዳና። ኢዛ ቦቺዛዴይ ኡባይ ጌሽ ጊዳና ቤሴስ።
EXO 29:38 «ያርሺዛሶን ኔኒ ሃች ሃች ሺሻና ያርሾይ ሃይሳ፤ ዬሌቲን ኢሲ ላይꬅ ኩሞንታ ናምኡ ኣዴ ላቃ ያርሻ።
EXO 29:39 ኣዴ ላቃታፔ ኢሳ ማላዶ፥ ቃሴ ናምኣንꬆዛ ኦማርሳ ዎዴ ያርሻ።
EXO 29:40 ኮይሮ ꬋርሾ ላቃ ኢሲ ኪሎኔ ባጋ ሎኦ ጊስቴ ꬊሌ ኢሲ ሊቲሮ ጉምኤቲዳ ዛይቴን ሙኑቃዳ ያርሻ፤ ኢሲ ሊቲሮ ዎይኔ ኡሹ ኡሻ ያርሾ ሂስታዳ ያርሻ።
EXO 29:41 ናምኣንꬆ ꬋርሾ ላቃዛ ኦማርሳ ዎዴ ያርሻ። ማላዶይሳ ጊና ꬊሌ፥ ዛይቴኔ ዎይኔ ኡሹ ሺሻ። ሄሲካ ጎዳስ ታማን ጹጌቲዲ ሳዎ ቱኑ ጊዛ ያርሾ ጊዳና።
EXO 29:42 «ሃ ጹጌቲዛ ያርሾይ ዪዛ ዬሌታ ኡባን ጾሳ ዱንካኔዛ ፔንጌን ጎዳ ሲንꬃን ፓጬይ ባይንዳ ያርሼታናስ ኮሼስ። ታኒ ኢንቴናራ ጋጋናይኔ ኔስ ሃሳያናይ ሄንኮ።
EXO 29:43 ቃሴ ሄን ታኒ ኢስራኤሌ ናይታራ ጋጋናኔ ታ ቦንቾይካ ሄ ሶሆዛ ዱማ ሶሆ ሂስታና።
EXO 29:44 «ሄሳ ጊሻስ ታኒ ጾሳ ዱንካኔዛኔ ያርሺዛሶዛ ዱማሳና፤ ኣሮኔይኔ ኢዛ ናይቲ ታስ ቄሴ ጊዲዲ ኦꬃና ማላ ታኒ ኢስታ ዱማሳና።
EXO 29:45 ሂስታዳ ታኒ ኢስራኤሌ ናይታ ጊዶን ዴኣና፤ ቃሴ ታኒ ኢስታ ጾሳ ጊዳና።
EXO 29:46 ታኒ ኢስታ ጊዶን ዴኣና ማላ ጊብጼፔ ኢስታ ኬሲዳ ጎዳ ኢስታ ጾሳ ጊዲዳይሳ ኢስቲ ኤራና። ኤ፥ ታኒ ጎዳ ኢስታ ጾሳ።
EXO 30:1 «ኤጻኔ ጩዋሲ ያርሺዛሶ ኦዶሮ ሚꬃፌ ጊጊሳ፤
EXO 30:2 ኢዛስ ኦይዱ ዞዜይ ዴዮ፤ ኣዱሳቴꬃይ ኢሲ ዋꬋ፥ ኣሆቴꬃይ ኢሲ ዋꬋ፥ ꬎቃቴꬃይ ቃሴ ናምኡ ዋꬋ ጊዶ፤ ካጬቲካ ኢዛራ ኢሲ ቦላ ኦይኬቲ ኦሴቴቶ።
EXO 30:3 ኢዛስ ቦላ ባጋ፥ ኦይዱ ሚሌታኔ ካጬታ ኡባ ዋላካይ ባይንዳ ዎርቃን ቲያ፤ ኢዛ ዩሾንካ ዎርቃ ባልጻንꬅ ዩሻ ኣꬃ።
EXO 30:4 ሄ ባልጻንꬃፌ ጋርሳራ ኤጻኔ ጩዋሲ ያርሺዛሶዛስ ዎርቃፌ ናምኡ ቃንጎታ ኦꬃዳ ሄ ባጋራኔ ሃ ባጋራ ኦይሴꬃ። ሄይቲ ቶኪዛ ዎዴ ቶሆ ሚꬃታ ጌልꬃናሳ።
EXO 30:5 ቶሆ ሚꬃታ ኦዶሮ ሚꬃፌ ኬሳዳ ዎርቃን ቲያ።
EXO 30:6 ሃ ያርሺዛሶዛ ጫቆ ቃላ ማርካይ ኢዛን ዲዛ ታቦታ ሲንꬃን ካቄቲዳ ማጋላሻፔ ካሬ ባጋራ፥ ጫቆ ቃላ ማርካ ቦላን ዲዛ ኣቶ ጌቴቲዛ ሶሆዛ ካማ ጊናራ ዎꬃ። ሄሲካ ታኒ ኔናራ ጋጊዛሶ።
EXO 30:7 «ኣሮኔይ ማላዶ ማላዶ ጾምፔታ ጊጊሳናስ ዪዛ ዎዴ ሳዊዛ ኤጻኔ ያርሺዛሶዛን ጩዋሶ።
EXO 30:8 ኣሮኔይ ኦማርሳ ዎዴ ጾምፔታ ፖኢሲዛ ዎዴ፥ ዛሬꬂዲካ ኤጻኔ ጩዋሶ፤ ሂስቲኮ ኤጻኔይ ጎዳ ሲንꬃን ዪዛ ዬሌታስ ኡባ ዎዴ ጩዋታና።
EXO 30:9 ሃ ያርሺዛሶዛን ሃራ ዲጌቲዳ ኤጻኔካ፥ ዎይኮ ጹጌቲዛ ያርሾ፥ ዎይኮ ካꬃ ያርሾ ያርሾፋ፤ ኡሻ ያርሾካ ኢዛ ቦላ ቲጎፓ።
EXO 30:10 ኣሮኔይ ላይꬃን ኢሲቶ ናጋራፔ ማሬታናስ ሹኪዛ ሜሄ ሱꬅ ኤኪዲ ሄ ያርሺዛሶዛ ቦላ ዲዛ ካጬታ ቦላ ቲዮ። ሂስቲዲ ጌሾ ዎጋ ፖሎ። ሃ ዎጋይ ሲንꬃራ ያና ዎዴታ ኡባን ላይꬃን ላይꬃን ኦꬄቶ። ሄሳꬆ ሃ ያርሺዛሶዚ ጎዳስ ዱማ ጌዪዳሶ ጊዶ» ጊዴስ።
EXO 30:11 ሄሳፌ ጉዬ ጎዳይ ሙሴ ሂዝጊዴስ፥
EXO 30:12 «ኔኒ ኢስራኤሌ ኣቱማ ኣሳ ታይቢዛ ዎዴ፥ ኢሲ ኢሲ ኣሲ ታይቤቲዲ ባ ሼምፖ ኣሻናስ ጎዳስ ሚሼ ኢሞ፤ ሂስቲኮ ኔኒ ኢስታ ታይቢዛ ዎዴ ኣሳ ቦላ ቦሻይ ዬና።
EXO 30:13 ታይቤቲዳ ኣቱማ ኣሳይ ሁኤን ሁኤን ጾሳ ዱንካኔን ኤሬቲዳ ማካ ሚሻ ማላ ኮሺዛ ሚሽ ቃንጾ። ኢሲ ኢሲ ኣሲ ባስ ዲዛ ማላ ኢሞ።
EXO 30:14 ቆዳን ጌሊዛ ኣቱማ ኣሳ ላይꬃይ ናምኡ ታሙ ኩሚዳይኔ ሄሳፌ ቦላይ ዉሪ ጎዳስ ኢሞታ ኤሆ።
EXO 30:15 ኢንቴ ኢንቴ ሼምፖ ኣሻናስ ጎዳስ ኢሞታ ኢሚሺን፥ ዱሬይካ ማንቆይካ ኢሲ ማላ ኢማናፔ ኣቲን፥ ዱሬይ ዳርሲዲ ዎይኮ ማንቆይ ጉꬂዲ ኢሞፎ።
EXO 30:16 ባ ሼምፖ ኣሻናስ ኢሚዛ ሚሼ ኢስራኤሌ ኣሳፔ ኤካዳ ጾሳ ዱንካኔዛ ኦሶስ ፔይሻ። ሃ ሚሻይ ኢንቴ ሼምፖ ዎዛናስ፥ ጎዳ ሲንꬃን ኢስራኤሌ ኣሳ ጊሻስ ሃሳኢሲዛዝ ጊዳና» ጊዴስ።
EXO 30:17 ሄሳፌ ጉዬ ጎዳይ ሙሴስ ሂዝጊዴስ፥
EXO 30:18 «ሜቻ ኬሬዛኔ ኬሬዛ ኢዛ ቦላ ዎꬂዛ ሚሽ ጻርቂማላፔ ሜꬋ። ጾሳ ዱንካኔዛፔኔ ያርሺዛሶዛፔ ጊዶን ዎꬃዳ ኢዛን ሃꬅ ቲጋ።
EXO 30:19 ሄ ሃꬃን ኣሮኔይኔ ኢዛ ናይቲ ባ ኩሼኔ ባ ቶሆ ሜጬቴቶ።
EXO 30:20 ኢስቲ ሃይቆንታ ማላ ጾሳ ዱንካኔዛን ጌልሼ ኣይዴካ ሄ ሃꬃን ሜጬቴቶ። ቃሴ ጎዳስ ታማን ያርሾ ያርሻናስ ያርሺዛሶ ማታ ሺቂዛ ዎዴ፥
EXO 30:21 ኢስቲ ሃይቆንታ ማላ ባ ኩሼኔ ባ ቶሆ ሜጬቴቶ። ሃይሲ ኣሮኔሲኔ ኢዛ ዜሬꬃታስ፥ ዪዛ ዬሌታ ኡባስ ሜርና ዎጋ ጊዶ» ጊዴስ።
EXO 30:22 ጎዳይ ሙሴ ሂዝጊዴስ፥
EXO 30:23 «ሎኦ ቂማሜታ፥ ሄይቲካ ኡሱፑን ኪሎ ጎጊዛ ካርቤ፥ ሄꬑ ኪሎ ሳዊዛ ቃራፋ፥ ሄꬑ ኪሎ ሳዊዛ ጉጫቻ ማታኔ
EXO 30:24 ኡሱፑን ኪሎ ቡርጉዴ ኤካ። ሃይሲ ዉሪካ ጾሳ ዱንካኔን ኤሬቲዳ ሜዛኔን ሜዛኔቲዳ ጊዶ። ሄሳ ቦላካ ኦይዱ ሊቲሮ ዎጋራ ዛይቴ ጉጃ ኤካ።
EXO 30:25 ሄይታንታ ሺቶ ኦꬂዛ ማላ ዋላካዳ ሳዊዛ ጌሻቴꬃስ ቲዬቲዛ ዱማ ዛይቴ ጊጊሳ።
EXO 30:26 ሂስታዳ ጾሳ ዱንካኔዛ፥ ጫቆ ቃላ ማርካይ ኢዛን ዲዛ ታቦታ፥
EXO 30:27 ጻራጴዛኔ ኢዛን ጎኤቲዛ ሚሻታ ኡባ፥ ጾምፔ ዎꬂዛ ባላኔ ኢዛ ሚሻታ፥ ኤጻኔ ጩዋሲ ያርሺዛሶዛ፥
EXO 30:28 ጹጌቲዛ ያርሾ ያርሺዛሶዛኔ ኢዛን ጎኤቲዛ ሚሻታ ኡባ፥ ሜቻ ኬሬኔ ኢዛ ዎꬂዛሶዛ ኡባ ቲያ።
EXO 30:29 ኢስቲ ኬሂ ጌሽ ጊዳና ማላ ኔኒ ኢስታ ዱማሳ፤ ኢስታ ቦቺዛይ ዉሪካ ጌሽ ጊዳናስ ቤሴስ።
EXO 30:30 «ቃሴካ ኣሮኔይኔ ኢዛ ናይቲ ቄሴ ጊዲዲ ታስ ኦꬃና ማላ ኢስታ ቲያዳ ዱማሳ፤
EXO 30:31 ኢስራኤሌ ኣሳስ፥ ‹ሃይሲ ቡሮ ያና ዬሌታስካ ቲዬቲዛ ጌሻ ዛይቴ ጊዶ።
EXO 30:32 ሃ ዛይቴዛ ሃራ ኣስ ቲዮፓ፤ ቃሴ ሃራ ዛይቴ ሄሳꬆ ጊጊሶፋ። ኢዚ ዱማ ጊዲዳ ጊሻስ ኢንቴካ ኢዛ ዱማቴꬅ ኤሪቴ።
EXO 30:33 ሃይሳ ማላ ሺቶ ጊግሲዛ ኣሲኔ ቲዬታናስ ቤሶንታ ሃራ ኣስ ቲዪዛ ኣሲ ኦኒካ ባ ኣሳ ጋርሳፌ ꬋዮ› ጋ» ጊዴስ።
EXO 30:34 ሄሳፌ ጉዬ ጎዳይ ሙሴስ፥ «ሳዊዛ ቂማሜታ፥ ሚꬃ ኡዛስ፥ ሄሌሎን ዲዛ ሺቶ፥ ሳዊዛ ሺዳኔ ሃራራ ዋላኬቶንታ ኤጻኔ ኤካ፤ ኢስታ ኡባ ሜዛኔይካ ኢሲ ጊና ጊዶ።
EXO 30:35 ሺቶ ማላ ዋላኬቲዳ ኤጻኔ ኦꬃዳ ኢስታን ጎኤታ፤ ዋላካይ ባይንዳ ጌሺኔ ዱማ ጊዳና ማላ ኢዛን ማጺኔ ዬጋ።
EXO 30:36 ኢዛፔ ኤካዳ ሊቂሳ ጫዳ፤ ሂስታዳ ታኒ ኔናራ ጋጊዛ ጾሳ ዱንካኔዛ ጊዶን ጫቆ ቃላ ማርካይ ኢዛን ዲዛ ታቦታ ሲንꬃን ኤጻኔ ጩዋሲ ያርሺዛሶዛ ቦላ ዎꬃ። ኢዚ ኔስ ኡባፌ ኣꬊዳ ጌሽ ጊዳና።
EXO 30:37 ሃይሳ ጊግሲዳይሳꬆ ሃራ ኤጻኔ ጊጊሶፍቴ። ሄሲ ታስ ዱማ ጌሽ ጊዲዳይሳ ኔ ኤራ።
EXO 30:38 ሄሳ ሚሳቲዛዝ ጊግሲዲ ኢዛ ሳዎ ሲንጊዲ ኡፋዬታናስ ኮይዛ ኣሲ ዲኮ ኢዚ ባ ኣሳ ጋርሳፌ ꬋዮ» ጊዴስ።
EXO 31:1 ቃሴካ ጎዳይ ሙሴስ ሂዝጊዴስ፥
EXO 31:2 «ቤያ፤ ታኒ ዩሁዳ ዜሬꬅ ጊዲዳ ሁሬስ ናዛ ና፥ ኡሬይ ና፥ ባስሊኤሌ ዶራዲስ።
EXO 31:3 ኢዛ ታኒ ታ ኣያናን፤ ሂላቴꬃን፥ ኣኬካኒኔ ኦሶ ኡባ ኦꬂዛ ኤራቴꬃን ኩንꬃዲስ።
EXO 31:4 ሄሲካ ኢዚ ቆፒ ቆፒዲ ሂላቴꬃን፥ ዎርቃፌ፥ ቢራፔኔ ጻርቂማላፔ ዱማ ዱማ ሚሽ ኦꬃናሳ።
EXO 31:5 ሄሳꬆካ ኣልኦ ሹች ማሲ ማሲዲ ጊጊሳናስ፥ ሚꬅ ማሳናሲኔ ሄይታንታ ኡባ ኦꬃናሳ።
EXO 31:6 «ሄሳ ቦላካ ቃሴ ኢዛ ማዳና ማላ፥ ዳኔ ዜሬꬅ ጊዲዳ ኣሂሳሜኬ ና ኤላቤ ዶራዲስ። ታኒ ኔና ኣዛዚዳይሳ ኡባ ኢስቲ ኦꬃና ማላ፥ ኩሼ ሂላቴꬅ ኤሪዛይታ ኡባስ ኤራቴꬅ ኢማዲስ።
EXO 31:7 ኢስቲ ኦꬃናይሲ ጾሳ ዱንካኔ፥ ጫቆ ቃላይ ኢዛን ዲዛ ታቦታኔ ታቦታዛ ቦላ ዎꬂዛ ኣቶቴꬃ ካማ፥ ጾሳ ዱንካኔዛ ኦꬃናስ ጎኤቲዛ ሚሻታ ኡባ፥
EXO 31:8 ጻራጴዛኔ ኢዛ ሚሻታ፥ ዋላካይ ባይንዳ ዎርቃፌ ኦሴቲዳ ጾምፔ ኢዛ ቦላ ዎꬂዛ ሚሽ ኡባራ፥ ኤጻኔ ጩዋሲ ያርሺዛሶዛ፥
EXO 31:9 ጹጌቲዛ ያርሾ ያርሺዛሶዛኔ ኢዛ ሚሻታ ኡባራ፥ ሜጬቲዛ ኬሬኔ ኬራ ኢዛ ቦላ ዎꬂዛ ሚሻራ፥
EXO 31:10 ዳዴቲ ኦሴቲዳ ጫርቃታ፥ ቄሴ ኣሮኔይ ማይኢዛ ዱማ ማይኦ፥ ኢዛ ኣቱማ ናይቲ ቄሴቴꬃ ኦሶ ኦꬂሼ ማይኣና ማይኦ፥
EXO 31:11 ቃሴ ቲዬቲዛ ዛይቴኔ ጌሻ ሶዛስ ሳዎ ቱኑ ጊዛ ኤጻኔ። ኢስቲ ሃይሳ ኡባ ታኒ ኔና ኣዛዚዳ ማላ ኦꬃና» ጊዴስ።
EXO 31:12 ሄሳፌ ጉዬ ጎዳይ ሙሴ፥
EXO 31:13 «ኔኒ ኢስራኤሌ ኣሳስ፥ ‹ታ ሳምባታ ሎኤꬂ ናጊቴ። ሄሲ ታኒ ጎዳይ ኢንቴና ታስ ዱማ ሂስታዳ ዶሪዳይሳ ቤሲዛዝ ጊዲዲ ያና ዬሌታ ኡባስ ታፔኔ ኢንቴፌ ጊዶን ማላታ ጊዳና።
EXO 31:14 ኢንቴስ ሄ ጋላሳይ ዱማ ጊዲዳ ጊሻስ ሳምባታ ናጊቴ። ኢዛ ቱኒሲዛ ኣሲ ሙሌ ሃይቃናስ ቤሴስ፤ ሄ ጋላሳን ኦሶ ኦꬂዛይ ኦኒካ ባ ኣሳ ጋርሳፌ ꬋዮ።
EXO 31:15 ኡሱፑን ጋላሳታን ኢንቴ ኦሶ ኦꬂቴ፤ ጊዶ ኣቲን ላፑንꬃ ጋላሳይ ታስ ጎዳስ ዱማቲዳ ሼምፖ ሳምባታ፤ ሄ ጋላሳን ኦꬂዛዴይ ኦኒካ ሙሌራ ሃይቃናስ ቤሴስ።
EXO 31:16 ኢስራኤሌ ኣሳይ ሄ ሳምባታ ጋላሳ ና ናስ ሜርናስ ማላታ ሂስቲዲ ናጎ።
EXO 31:17 ታኒ ኡሱፑን ጋላሳታን ሳሎኔ ሳኣ ሜꬋዳ ላፑንꬃ ጋላሳን ኦሶ ኣጋዳ ሼምፒዳ ጊሻስ፥ ታሲኔ ኢስራኤሌ ናይታስ ጊዶን ሃይሲ ሜርናስ ጫቆ ጊዳና› ጋ» ጊዴስ።
EXO 31:18 ጎዳይ ሙሴራ ሲና ዙማ ቦላ ሃሳይዛይሳ ዉርሲዳ ማላ ኢዚ ባ ቢራꬌን ጻፊዳ ታሙ ኣዛዞታ ኦይኪዳ ናምኡ ማሴቲዳ ሹቻታ ሙሴስ ኢሚዴስ።
EXO 32:1 ሙሴይ ዙማፔ ዎꬎንታ ኬሂ ጋምኢዳይሳ ቤኢዲ ኣሳይ ኣሮኔ ዩሾን ሺቂዲ፥ «ኣኔ ሃያ፤ ኔኒ ኑና ካሌꬂዛ ኤቃ ጾሳታ ኑስ ሜꬋ። ጊብጼ ቢታፌ ኑና ኬሲዳ ሙሴይ ጊዲኮ ኢዚ ዋኒዳኮ ኑ ኤሮኮ!» ጊዳ።
EXO 32:2 ሂስቲን ኣሮኔይ ኢስታስ፥ «ኢንቴ ማቼታ ሃይꬃን፥ ኢንቴ ኣቱማ ናይታ ሃይꬃኒኔ ማጫ ናይታ ሃይꬃን ዲዛ ዎርቃ ኬሲዲ ታስ ሃ ኤኪ ዪቴ» ጊዴስ።
EXO 32:3 ሄሳፌ ጉዬ ኣሳይ ዉሪ ባ ሃይꬃ ዎርቃ ኬሲዲ ኣሮኔስ ኤሂዴስ።
EXO 32:4 ኢዚ ሄሳ ኢስታ ኩሼፔ ኤኪዲ ታማን ሴሪሲዳፔ ጉዬ ቆጺዛ ሚሻን ቆጺዲ ማራ ሚስሌ ሜꬊዴስ። ሄሳፌ ጉዬ ኣሳይካ፥ «ኢስራኤሌ ኣሳዉ! ኑና ጊብጼ ቢታፌ ኬሲዳ ኑ ጾሳቲ ሃይታንታ» ጊዴስ
EXO 32:5 ኣሮኔይ ሄሳ ቤኢዲ ማራ ሚስሌዛ ሲንꬃን ያርሺዛሶ ጊግሲዲ፥ «ዎንቶ ጎዳስ ባኣሌ ጋላስ ጊዳና» ጊ ኣዋጂዴስ።
EXO 32:6 ሄሳ ጊሻስ ዎንቴꬃ ጋላስ ኣሳይ ዎንታራ ዴንዲዲ ጹጌቲዛ ያርሾታኔ ኢሲፌቴꬃ ያርሾታ ያርሺዴስ። ሂስቲዲ ኣሳይ ማናሲኔ ኡያናስ ኡቲዴስ። ሚ ኡዪ ሲሚዲ ቃሴ ዱራናሲኔ ጉፓናስ ዴንዲዴስ።
EXO 32:7 ሂስቲን ጎዳይ ሙሴስ፥ «ኔ ጊብጼፔ ኬሳ ኤሂዳ ኔ ኣሳይ ናጋራ ኦꬂዲ ባናቴꬃ ቱኒሲዳ ጊሻስ ኤሶን ዱጌ ዎꬋ።
EXO 32:8 ታኒ ኢስታ ኣዛዚዳ ኦጌፔ ኢስቲ ኤሶን ሼርኢ ጊቺዳ። ዎርቃ ሴሪሲዳይሳ ማራ ሚሳቲሲዲ፥ ባስ ኤቃ ጾሳታ ሜꬊዲ ኢዛስ ጎይኒዳኔ ያርሺዳ። ቃሴካ፥ ‹ኢስራኤሌ ኣሳዉ! ኑና ጊብጼ ቢታፌ ኬሲዳ ኑ ጾሳቲ ሃይታንታ› ጊዳ።
EXO 32:9 «ታኒ ሃ ኣሳ ቤያዲስ፤ ኢስቲ ባንታ ዎዚና ሙሚዳ ኣሳ።
EXO 32:10 ሃኢ ታ ሃንቆይ ኢስታ ቦላ ኤጺ ኬዚን ታኒ ኢስታ ꬋይሳናይሳ ኔኒ ታና ዲጎፋ። ሄሳፌ ቃሴ ታ ኔና ጊታ ካዎቴꬅ ሂስታና» ጊዴስ።
EXO 32:11 ጊዶ ኣቲን ሙሴይ ጎዳ ባ ጾሳ፥ «ኣቤት ጎዶ! ኔኒ ኔ ጊታ ዎልቃኒኔ ኔ ሚኖ ቄሴን ጊብጼፔ ኬሳዳ ኤሂዳ ኔ ኣሳ ቦላ ሄሳꬆ ኣዛስ ሃንቄታይ?
EXO 32:12 ጊብጼ ኣሳይ፥ ‹ኢዚ ኢስታ ዙማታ ቦላን ዎꬋናሲኔ ቢታፌ ፒቲ ꬋይሳናስ ኢታ ቆፋን ኬሲዴስ› ኣይስ ጌቴታይ? ኔኒ ኔ ዎልቃማ ሃንቆፌ ሲማ፤ ኣሳ ꬋይሳናስ ቆፒዳይሳ ኣጋ።
EXO 32:13 ኔ ኣይሌታ ኣብራሃሜ፥ ዪሳቃኔ ያቆቤ ቆፓ፤ ኔኒ ኢስታስ፥ ‹ታኒ ኢንቴ ዜሬꬅ ሳሎ ጾሊንቴ ማላ ዳርሳና፤ ታኒ ኢንቴስ ኢማና ጊዳ ቢታ ኡባካ ኢንቴ ዜሬꬃታስ ኢማና፤ ኢስቲ ሄ ቢታ ሜርናስ ላታና› ጋዳ ኔኒ ኔ ሱንꬃን ጫቂዳ ቃላ ዩሻ ቆፓ» ጊዲ ጋናቲዴስ።
EXO 32:14 ሄሳ ጊሻስ ጎዳይ ባ ኣሳ ቦላ ኢታ ሚሽ ኤሃናስ ቆፒዳይሳ ኣጊዴስ።
EXO 32:15 ሄሳፌ ጉዬ ሙሴይ ዙማ ቦላፌ ዱጌ ዎꬊሼ ታሙ ኣዛዞቲ ኢስታ ቦላ ናምኡ ባጋራ ጻፌቲ ኡቲዳ ናምኡ ማሴꬃ ሹቻታ ባ ኩሼን ኦይኪ ኤኪ ዪዴስ።
EXO 32:16 ሄ ማሴቲዳ ሹቻታ ጊግሲዳይ ጾሳ፤ ሹቻታ ቦላ ዎጪዲ ጻፊዳይካ ጾሳ።
EXO 32:17 ኢያሶይ ኣሳይ ዎጫሚዛይሳ ሲዪዲ ሙሴስ፥ «ኣሳይ ዲዛሶን ኦላ ዋሶይ ሲዬቴስ» ጊዴስ።
EXO 32:18 ሙሴይካ ዛሪዲ፥ «ታኒ ሲዪዛይሲ ሃይሲ ዬꬃፌ ኣቲን፥ ኦላን ጾኒዳይታ ቃላ ዎይኮ ጾኔቲዳይታ ቃላ ዴና» ጊዴስ።
EXO 32:19 ሙሴይ ዴሬዚ ዲዛሶ ማቲሼ ማራ ሚስሌዛ ሲንꬃን ኣሳይ ዱሪሺኒኔ ጉፒሺን ቤኢዲ ኬሂ ሃንቄቲዲ ማሴቲዳ ሹቻታ ዙማ ጋርሳን ቦላፌ ዬጊዲ ሜንꬄሬꬂዴስ።
EXO 32:20 ኣሳይ ሜꬊዳ ማራካ ኤኪዲ ታማን ጹጊዴስ፤ ሄሳፌ ጉዬ ሊቂሲ ጋጪ ሃꬃን ማꬊዲ ኢስራኤሌ ኣሳይ ኡያና ማላ ኦꬂዴስ።
EXO 32:21 ሄሳፌ ጉዬ፥ ሙሴይ ኣሮኔ፥ «ሃ ኣሳይ ኔና ዎስቲን ኔኒ ኢስታ ሃይሳ ማላ ጊታ ናጋራ ኦꬃና ማላ ካሌꬃዲ?» ጊዴስ።
EXO 32:22 ኣሮኔይካ ዛሪዲ፥ «ታ ጎዶ፥ ሃንቄቶፋ! ሃይሲ ኣሳይ ኢታ ኦꬃናስ ኣይ ማላ ኮይዛኮ ኔ ኤራሳ።
EXO 32:23 ኢስቲ ታና፥ ‹ኑና ካሌꬂዛ ኤቃ ጾሳታ ኑስ ሜꬋ። ኣይስ ጊኮ ኑና ጊብጼፔ ኬሲ ኤሂዳ ሙሴይ ኢዚ ዋኒዳኮ ኑ ኤሮኮ!› ጊዳ።
EXO 32:24 ሂስቲን ታኒ ኢስታስ፥ ‹ኢንቴ ቦላ ዲዛ ዎርቃ ኬሲዲ ሃሚቴ› ጋዲስ፤ ሄሳፌ ጉዬ ኢስቲ ታስ ኢሚዳ ዎርቃ ታኒ ታማን ዬጊን ሃይሲ ማራይ ኬዚዴስ» ጊዴስ።
EXO 32:25 ኣሮኔይ ኣሳ ላኣ ዬዲ ኣጊን ኣሳይ ባ ሞርኬታ ሲንꬃን ካዉዪዲ ካꬌታናይሳ ሙሴይ ቤኢዴስ።
EXO 32:26 ሄሳ ጊሻስ ሙሴይ ኣሳይ ዱንካኒዲ ዲዛሶ ጌሊዛ ፔንጌን ኤቂዲ፥ «ጎዳ ባጋ ጊዲዳ ኣሲ ኦኒካ ታኮ ሃ ዮ!» ጊን ሌዌ ቆሞቲ ዉሪ ኢዛኮ ሺቂዳ።
EXO 32:27 ሄሳፌ ጉዬ ኢዚ ኢስታስ፥ «ጎዳ ኢስራኤሌ ጾሳይ፥ ‹ኣሳይ ዉሪ ባ ጊꬃ ማሻ ባ ጼሳን ጼሳን ጊጺዲ ኣሳይ ዱንካኒዳሶን ጋጻፔ ጋጻ ጋካናስ፥ ኣሳ ጊዶን ያኔ ሃ ሲሜሬቲዲ ባ ኢሻ፥ ባ ላጌኔ ባ ሾሮ ዎꬎ› » ጊዴስ።
EXO 32:28 ሌዌ ቆሞቲ ሙሴይ ኣዛዚዳ ማላ ኦꬂዳ፤ ሄ ጋላስ ኣሳፔ ሄꬑ ሺ ጊዲዛ ኣሲ ሃይቂዴስ።
EXO 32:29 ሄሳፌ ጉዬ ሙሴይ ሌዌ ቆሞታ፥ «ሃች ኢንቴ ጎዳስ ዱማቲዴታ፤ ኣይስ ጊኮ ኢንቴ ኢንቴ ናይታኔ ኢንቴ ኢሻታ ዎꬋናስ ኣዛዜቲዲ ዎꬊዴታ፤ ሃች ጎዳይ ኢንቴና ኣንጂዴስ» ጊዴስ።
EXO 32:30 ዎንቴꬃ ጋላስ ሙሴይ ኣሳ፥ «ኢንቴ ጊታ ናጋራ ኦꬂዴታ ሺን ሃኢ ታኒ ጎዳኮ ፑዴ ዙማ ቦላ ኬዛና፤ ታ ኢንቴ ናጋራ ኣቶ ጊሳናኮ ኦኔ ኤሪዛይ» ጊዴስ።
EXO 32:31 ሂስቲን ሙሴይ ጎዳኮ ሲሚ ቢዲ፥ «ሃይሲ ኣሳይ ጊታ ናጋራ ኦꬂዴስ፤ ኢስቲ ባስ ዎርቃፌ ኤቃ ጾስ ሜꬊዳ።
EXO 32:32 ጊዶ ኣቲን ኣቤት ጎዶ! ሃኢ ኢስታ ናጋራ ኣቶ ጋ፤ ኣካይ ጊኮ ኔኒ ጻፊዳ ማዝጋባፔ ታ ሱንꬃ ቁጫ ዲጋ» ጊዴስ።
EXO 32:33 ሂስቲን ጎዳይ ዛሪዲ ሙሴስ፥ «ታኒ ታ ማዝጋባፔ ታ ቦላ ናጋራ ኦꬂዳ ኣሳታ ሱንꬃ ቁጫና።
EXO 32:34 ሃኢ ባዳ ሃ ኣሳ ታኒ ኔስ ዮቲዳ ሶ ካሌꬃ፤ ታ ኪታንቻይካ ኔና ካሌꬃና፤ ጊዶ ኣቲን ቃጻያና ዎዴይ ጋኪሺን ኢስታ ናጋራ ጊሻስ ታ ኢስታ ቃጻያና» ጊዴስ።
EXO 32:35 ኣሮኔይ ዎርቃፌ ማራ ሚስሌ ሜꬋና ማላ ኣሳይ ኢዛ ዋዪሲዳ ጊሻሲኔ ኢዚ ሜꬊዳ ጊሻስ ጎዳይ ኢስታ ቦላ ቦሻ ዬዲዴስ።
EXO 33:1 ሄሳፌ ጉዬ ጎዳይ ሙሴስ፥ «ኔኒኔ ኔ ጊብጼፔ ኬሲዳ ኣሳይ ሃይሳፌ ዴንዲዲ፥ ‹ታኒ ኢንቴ ዜሬꬃታስ ኢማና› ጋ ዎꬂዳ ቢታ ቢቴ። ሄ ቢታይ ታኒ ኣብራሃሜስ፥ ዪሳቃሲኔ ያቆቤስ ኢማና ጋዳ ካሴ ጫቃ ዎꬂዳይሳ።
EXO 33:2 ታኒ ኢንቴፌ ሲንꬃራ ኪታንቻ ኪታዳ፥ ካናኔታ፥ ኣሞሬታ፥ ሂቴታ፥ ፓሪዜታ፥ ሂዌታኔ ያቡሴታ ጎዳና።
EXO 33:3 ማꬂኔ ኤሲ ጎጊዛ ሄ ቢታ ቢቴ። ጊዶ ኣቲን ኢንቴ ዎዚና ሙሜ ኣስ ጊዲዳ ጊሻስ ታኒ ኢንቴና ኦጌን ꬋይሶንታ ማላ ታ ኢንቴናራ ቢኬ» ጊዴስ።
EXO 33:4 ኣሳይ ሄሳ ኢታ ዮኦዛ ሲዪዲ ኬሂ ዬኪዴስ። ሄ ዎዴፔ ዶሚዲ ኣሳይ ዉሪካ ኣሌቆስ ኣꬂዛይሳ ኣጊዴስ።
EXO 33:5 ጋሶይካ ጎዳይ ሙሴስ፥ «ኢስራኤሌ ኣሳስ፥ ‹ኢንቴ ዎዚና ሙሚዳ ኣሳ። ሃራይ ኣቶሺን ጉꬃ ዎዴ ታ ኢንቴናራ ኢሲፌ ቢዛኮ ታኒ ኢንቴና ꬋይሳና። ሃኢ ኢንቴ ኣሌቆ ኬሲቺቴ፤ ሂስቲኮ ታኒ ኢንቴ ቦላ ኣይ ኦꬃናኮ ኢንቴ ቤያና› ጋ» ጊ ዮቲ ዎꬂዴስ።
EXO 33:6 ኢስራኤሌ ኣሳይ ሲና ዙማፔ ዶሚዲ ባ ኣሌቆ ሚሻ ኬሲ ዎꬂዴስ።
EXO 33:7 ሙሴይ ዱንካኔዛ ኤኪ ኤፊዲ ኣሳይ ዱንካኒዳሶፔ ሃሲ ቶሊዴስ። ዱንካኔዚ፥ «ጋይቶቴꬃ ዱንካኔ» ጌቴቲ ሱሚዴስ። ጎዳ ኦይቻናስ ኮይዛይ ዉሪ ሄ ጋይቴꬃ ዱንካኔይ ዲዛሶ ቤስ።
EXO 33:8 ሙሴይ ሄ ዱንካኔዛኮ ቢዳ ዎዴ ኣይዴካ ኣሳይ ዉሪ ባ ዱንካኔዛ ፔንጌን ፔንጌን ኤቂዲ ሙሴይ ዱንካኔዛን ጌላና ጋካናስ ኢዛ ጼሌስ።
EXO 33:9 ሙሴይ ጋይቴꬃ ዱንካኔዛ ጊዶ ጌሊዳ ዎዴ ቱሳ ማላ ሻራይ ዱጌ ዎꬊን ጎዳይ ሙሴራ ሃሳይሼ ዱንካኔዛ ፔንጌን ጋምኤስ።
EXO 33:10 ቱሳ ማላ ሻራዛ ዱንካኔዛ ፔንጌን ቤኢዳ ኡባ ዎዴ፥ ኣሳይ ዉሪ ባ ፔንጌን ፔንጌን ኤቂዲ ዲዛሶሆን ዲሼ ጎዳስ ጎይኔስ።
EXO 33:11 ኣሲ ባ ላጌራ ሃሳይዛ ማላ ጎዳይ ሙሴራ ሲንꬃን ኤቂዲ ሃሳዬስ። ሄሳፌ ጉዬ ሙሴይ ዱንካኔይ ዲዛሶ ጉዬ ሲሜስ ሺን ኢዛ ማዲዛ ናቴꬃ ና፥ ናዌ ና ኢያሶይ ጋይቶቴꬃ ዱንካኔዛፔ ሻኬቴና።
EXO 33:12 ሙሴይ ጎዳስ፥ «ኔኒ ታና፥ ‹ሃይሳ ኣሳ ካሌꬃ› ጋዳሳሺን ታናራ ኔኒ ኦና ኪቲዛኮ ታና ኤሪሳቤካ። ኔኒ፥ ‹ታኒ ኔና ኔ ሱንꬃን ኤራይስ፤ ኔኒ ታ ሲንꬃን ሳቤቲዳ ኣሳ› ጋዳሳ።
EXO 33:13 ኔ ሲንꬃን ታ ሳቤቲዳ ጊዲኮ ታኒ ኔና ኤራና ማላኔ ሲንꬃፌካ ኔ ሲንꬃን ሳቤታሼ ዳና ማላ፥ ኔ ኦጌ ታና ታማርሳ። ሃ ኣሳይ ኔ ኣሳ ጊዲዳይሳ ቆፓ» ጊዴስ።
EXO 33:14 ሂስቲን ጎዳይ ዛሪዲ፥ «ታኒ ኔናራ ባና፤ ታኒ ኔና ሼምፒሳና» ጊዴስ።
EXO 33:15 ሂስቲን ሙሴይ ኢዛ፥ «ኔኒ ኑናራ ቦንታ ጊዲኮ ሃይሳፌ ኑና ኬሶፋ።
EXO 33:16 ኔኒ ኑናራ ቦንታ ኢጺኮ ታናኒኔ ኔ ኣሳን ኔኒ ሳቤቲዳይሳ ኣሳይ ዉሪ ዎስቲ ኤራኔ? ቢታ ቦላ ዲዛ ሃራ ኣሳ ኡባፌ ታናኔ ኔ ኣሳ ዱማሲዛይ ሃራ ሚሺ ኣዜ?» ጊዴስ።
EXO 33:17 ሂስቲን ጎዳይ ሙሴ፥ «ታ ኔናን ሳቤቲዳ ጊሻሲኔ ኔና ኔ ሱንꬃን ኤሪዛ ጊሻስ ኔኒ ታና ኦይቺዳይሳ ቃሴካ ታኒ ኦꬃና» ጊዴስ።
EXO 33:18 ሂስቲን ሙሴይ፥ «ሂስቲኮ ኔ ጊታ ቦንቾዛ ታና ቤሳርኪ?» ጊዴስ።
EXO 33:19 ጎዳይ፥ «ታኒ ታ ሎኤቴꬃ ኡባ ኔ ሲንꬃራ ኣꬃና፤ ታ ጌሻ ሱንꬃካ ኔ ኣቻን ኣዋጃና። ታኒ ጎዳ፤ ታኒ ማራናስ ኮይዛይታ ማራና፤ ቃሴ ሚሼታናስ ኮይዛይታስካ ሚሼታና።
EXO 33:20 ጊዶ ኣቲን ኔኒ ታ ኣይፌሶ ቤያካ፤ ኣይስ ጊኮ ኦኒካ ታና ቤኢዲ ፓጻ ኣቴና» ጊዴስ።
EXO 33:21 ሄሳፌ ጉዬ ጎዳይ፥ «ኔኒ ታ ኣቻን ኤቃናስ ዛላ ቦላ ኤቃናሶይ ሃይሳን ዴስ።
EXO 33:22 ታ ቦንቾይ ኣꬊ ቢዛ ዎዴ ታኒ ኔና ዛላ ዛኣ ጊዶን ዎꬃና። ኣꬋና ጋካናስ ታ ኩሼን ኔና ካማና።
EXO 33:23 ሄሳፌ ጉዬ ታኒ ታ ኩሼ ዲጊኮ ኔኒ ታ ዞኮ ቤያናሺን ታ ኣይፌሶይ ቤታናስ ቤሴና» ጊዴስ።
EXO 34:1 ጎዳይ ሙሴስ፥ «ኮይሮይታ ሚሳቲዛ ናምኡ ሹቻታ ማሳ ጊጊሳ፤ ሂስቲኮ ታኒ ሄ ማሴቲዳ ሹቻታ ቦላ ካሴ ኔኒ ሜንꬂዳ ሹቻታ ቦላን ዲዛ ቃላታ ጻፋና።
EXO 34:2 ዎንቶ ማላዶ ፑዴ ሲና ዙማ ቦላ ኬዛናስ ጊጌታ፤ ሂስታዳ ታናራ ሄን ዙማ ቦላን ጋጋ።
EXO 34:3 ኔናራ ኦኒካ ኬዞፖ፤ ዎይኮ ዙማ ቦላ ኣዋንካ ቤቶፎ፤ ሃራይ ኣቶሺን ዶርሲ ዎይኮ ሜሄ ዉዴይካ ዙማ ሲንꬃን ሄሜቶፎ» ጊዴስ።
EXO 34:4 ሄሳ ጊሻስ ሙሴይ ኮይሮ ሹቻታ ሚሳቲዛ ናምኡ ሹቻታ ማሲዲ ጎዳይ ኣዛዚዳ ማላ፥ ሹቻታ ባ ኩሼን ኦይኪ ኤኪዲ፥ ማላዶ ዎንታራ ፑዴ ሲና ዙማ ቦላ ኬዚዴስ።
EXO 34:5 ኬዚን ጎዳይ ሻራራ ዱጌ ዎꬊ ኢዛራ ሄን ኤቂዲ ባ ሱንꬃ፥ «ጎዳ» ጊ ኤሪሲዴስ።
EXO 34:6 ጎዳይ ሙሴ ሲንꬃራ፥ «ታኒ ጎዳይ ቃꬌታይኔ ማሮታይ ኩሚዳ ጾሳ፥ ሃንቄታናስ ጋምኢዛ፥ ሜርናስ ሲቂዛኔ ኣማኔቴꬃይ ዳሪዳ ጾሳ።
EXO 34:7 ታኒ ታ ሜርና ሲቆዛ ሺ ዬሌታ ጋካናስ ናጋይስ፤ ኢታቴꬅ፥ ማካላኔ ናጋራ ኣቶ ጋይስ። ጊዲኮካ ሞሪዛዴ ቃጻዮንታ ኣጊኬ፤ ኣዋታ ናጋራ ጊሻስ ናይታኔ ናይታ ናይታ፥ ሄꬓንꬆ ዬሌታኔ ኦይዳንꬆ ዬሌታ ጋካናስ ቃጻያይስ» ጊ ኣዋጂሼ ኣꬊዴስ።
EXO 34:8 ሂስቲን ሙሴይ ሄራካ ቢታ ቦላ ጉፋኒ ጎይኒዲ፥
EXO 34:9 «ኣቤት ጎዶ! ኔኒ ታናን ኡፋዬቲዳ ጊዲኮ ኔ ኑናራ ኢሲፌ ባና ማላ ታ ኔና ዎሳይስ። ሃይሲ ኣሳይ ዎዚና ሙሜ ጊዲኮካ ኑ ኢታቴꬃኔ ኑ ናጋራ ኣቶ ጋዳ ኑና ኔ ኣስ ሂስታ» ጊዴስ።
EXO 34:10 ሂስቲን ጎዳይ፥ «ታኒ ኢንቴናራ ጫቆ ጌላዲስ፤ ሃይሳፌ ካሴ ቢታ ቦላ ዲዛ ካዎቴꬅ ኡባን ሃኒ ኤሮንታ ማላሊሲዛ ሚሽ ኔ ኣሳ ኡባ ሲንꬃን ኦꬃና፤ ታኒ ጎዳይ ኢንቴስ ኦꬂዛ ኦሶይ ኣይ ማላ ማላሊሲዛዛኮ ኔኒ ኢስታ ጊዶን ዲዛ ኣሳይ ቤያና።
EXO 34:11 ሃች ታኒ ኢንቴና ኣዛዚዛ ኣዛዞ ናጊቴ፤ ኢንቴ ሲንꬃፌ ኣሞሬታ፥ ካናኔታ፥ ሂቴታ፥ ፓሪዜታ፥ ሂዌታኔ ያቡሴታ ታኒ ጎዳና።
EXO 34:12 ኢስቲ ኢንቴስ ናርጻ ጊዶንታ ማላ ኢንቴ ቢዛ ቢታን ዲዛ ኣሳራ ጫቆ ጫቄቶፍቴ።
EXO 34:13 ኢስቲ ያርሺዛሶሆታ ላሊቴ፤ ኢስቲ ጎይኒዛ ሹቻታካ ሜንꬄሬꬂቴ፤ ቃሴ ኣሼሮ ጌቴቲዛ ኢስታ ማጫ ኤቃ ጾሳይ ሚስሌታካ ሜንꬄሬꬂ ዬጊቴ።
EXO 34:14 ታኒ ጎዳይ ቃናቲዛ ጾሳ ጊዲዛ ጊሻስ ታፔ ኣቲን ሃራ ኤቃ ጾሳታስ ጎይኖፍቴ።
EXO 34:15 «ሄ ቢታን ዲዛ ኣሳታራ ኣይ ጫቆካ ጫቄቶፍቴ፤ ኣይስ ጊኮ ኢስቲ ታናን ኣማኔቶንታ ኢጺዲ ባ ኤቃታ ካሊዛ ዎዴኔ ኢስታስ ያርሺዛ ዎዴ ኢስቲ ኢንቴና ጼይጊኮ ኢንቴ ኢስታ ያርሾ ማና።
EXO 34:16 ቃሴ ኢንቴ ኢስታ ማጫ ናይታፔ ዶሪዲ ኢንቴ ኣቱማ ናይታስ ኤካና፤ ሄ ዎዴ ሄ ማጫ ናይቲ ታናን ኣማኔቶንታ ኢጺዲ ባ ኤቃ ጾሳ ካሊዲ ኢንቴ ኣቱማ ናይቲ ኢስታ ካላና ማላ ኦꬃና።
EXO 34:17 «ኢንቴስ ጎይናና ኤቃ ጾሳታ ኣዛፔካ ሴሪሲዲ ሜꬎፍቴ።
EXO 34:18 «ኡኬꬃ ባኣሌ ቦንቺቴ፤ ታኒ ኢንቴና ኣዛዚዳ ማላ ላፑን ጋላሳስ ኢርሾይ ጌሎንታ ኡኬቲዳ ኡኬꬅ ሚቴ፤ ሄሳካ ኢንቴ ጊብጼፔ ኬዚዳ ኣቢቤ ኣጊናን ኦꬂቴ።
EXO 34:19 «ኡሎፔ ባይራ ዬሌቲዛ ኣቱማ ናይ ዉሪ ታሳ፤ ኢንቴ ሜሄ ኡባፌካ ቦራ ጊዲን፥ ዎይኮ ዶርሳ ጊዲን ባይራይ ታሳ፤
EXO 34:20 ኮይሮ ዬሌቲዳ ሃሬ ማር፥ ዶርሳ ላቃራ ላማዳ ዎዛ፤ ዎዞንታ ኢጺኮ ኢዛ ቆꬌ ሚርቃ ዎꬋ። ኔ ናይታፔ ባይራ ዬሌቲዳ ኣቱማ ና ኡባ ዎዛ። «ኦኒካ ኢሚዛ ሚሽ ኦይኮንታ ሜላ ኩሼ ታ ሲንꬃን ቤቶፎ።
EXO 34:21 «ኡሱፑን ጋላስ ኦꬂቴ ሺን ላፑንꬃ ጋላስ ሼምፒቴ፤ ጎሻ ዎዴ ጊዲን ዎይኮ ማጻ ዎዴንካ ላፑንꬃ ጋላሳን ሼምፒቴ።
EXO 34:22 «ጊስቴ ጼራ ኢንቴ ማጺዛ ዎዴ ካꬃ ሺሾ ባኣሌ ቦንቺቴ፤ ሄ ላይꬃ ዉርሴꬃ ካꬅ ሺሺዛ ዎዴካ ዳሴ ባኣሌ ቦንቺቴ።
EXO 34:23 ኢስራኤሌ ኣቱማ ኣሳይ ዉሪ ጎዳ ኡባ ሃሪዛ ኢስራኤሌ ጾሳ ሲንꬃን ላይꬃን ሄꬑቶ ቤቴቶ።
EXO 34:24 ዱማ ዱማ ዴሬታ ታኒ ኢንቴ ሲንꬃፌ ዬዴꬃ ኬሳና፤ ሂስታዳ ኢንቴ ዛዋ ታኒ ኣሳና። ጎዳ ኢንቴ ጾሳ ሲንꬃን ኢንቴ ላይꬃን ሄꬓ ቤታናስ ፑዴ ኬዚዛ ዎዴ ኦኒካ ኢንቴ ቢታ ኣሞቴና።
EXO 34:25 «ኢንቴ ታስ ሱꬃ ያርሾ ያርሺዛ ዎዴ ኢርሾ ዬጊዲ ኡኪዳ ኡኬꬃራ ያርሾፍቴ። ፓዚጋ ቦንቺዛ ጋላሳስ ያርሺዳ ያርሾፌ ማላዶስ ኣይኮይካ ኣቶፎ።
EXO 34:26 «ኢንቴ ጋዴን ባይራ ካጺዳ ካꬃፌ ኮይሮ ጼራ ጎዳ ኢንቴ ጾሳ ኬꬅ ኤሂቴ። «ዴይሻ ላቃ ኢዛ ኣዬይ ማꬃን ዶይሶፍቴ» ጊዴስ።
EXO 34:27 ጎዳይ ሙሴስ፥ «ታኒ ኔናራኔ ኢስራኤሌ ኣሳራ ጫቆ ጫቄቲዛይ ሃ ቃላቲ ጊዛ ማላ ጊዲዳ ጊሻስ ሃ ቃላታ ጻፋ» ጊዴስ።
EXO 34:28 ሙሴይ ካꬅ ሞንታኔ ሃꬄ ኡዮንታ ኦይዱ ታሙ ጋላሲኔ ኦይዱ ታሙ ቃማ ጎዳራ ሄን ጋምኢዲ ጫቆ ቃላ ጊዲዳ ታሙ ኣዛዞታ ማሴቲዳ ሹቻ ቦላ ጻፊዴስ።
EXO 34:29 ሙሴይ ናምኡ ማሴቲዳ ሹቻታ ባ ኩሼን ኦይኪዲ ሲና ዙማፔ ዱጌ ዎꬊዳ ዎዴ፥ ኢዚ ጎዳራ ሃሳይሼ ጋምኢዳ ጊሻስ ኢዛ ኣይፌሶይ ጾልቂዴስ፤ ጊዶ ኣቲን ኢዚ ሄሳ ኤሪቤና።
EXO 34:30 ኣሮኔይኔ ኢስራኤሌ ኣሳይ ዉሪ ሙሴ ጼሊዲ ኢዛ ኣይፌሶይ ጾልቂዛይሳ ቤኢዲ ኢዛኮ ሺቃናስ ባቢዳ።
EXO 34:31 ጊዶ ኣቲን ሙሴይ ኢስታ ጼይጊን ኣሮኔይኔ ዴሬዛ ካሌꬂዛ ሃላቃቲ ዉሪ ኢዛኮ ዪን ኢዚ ኢስታ ሃሳይሲዴስ።
EXO 34:32 ሄሳፌ ጉዬ ኢስራኤሌ ኣሳይ ዉሪ ኢዛኮ ሺቂን ጎዳይ ኢዛስ ሲና ዙማ ቦላ ኢሚዳ ኣዛዞታ ኡባ ኢዚ ኢስታስ ኢሚዴስ።
EXO 34:33 ሙሴይ ኢስታስ ዮቲ ዉርሲዲ ባ ኣይፌሶ ናጻላን ካሚዴስ።
EXO 34:34 ጊዶ ኣቲን ሙሴይ ጎዳ ሲንꬅ ኢዛራ ሃሳያናስ ጋይቶቴꬃ ዱንካኔ ጊዶ ጌሊዛ ዎዴ ናጻላ ባ ኣይፌሶፔ ቃሬስ። ሄፔ ኬዚዲ ጎዳይ ኣዛዚዳይሳ ኢስራኤሌ ኣሳስ ዮቴስ።
EXO 34:35 ሙሴይ ዮቲዛ ዎዴ ኢስራኤሌ ኣሳይ ኢዛ ኣይፌሶይ ጾልቂዛይሳ ቤኢዴስ። ሄሳ ጊሻስ ሙሴይ ጎዳራ ሃሳያና ባና ጋካናስ ባ ኣይፌሶ ዛሬꬂዲካ ናጻላን ካሜስ።
EXO 35:1 ሙሴይ ኢስራኤሌ ኣሳ ኡባ ሺሺዲ፥ «ኢንቴ ኦꬃና ማላ ጎዳይ ኣዛዚዳይሲ ሃይሳፌ ካሊ ዲዛይሳ።
EXO 35:2 ሳሚንታ ጊዶን ኡሱፑን ጋላስ ጻላላ ኦሶ ኦꬂቴ፤ ጊዶ ኣቲን ላፑንꬃ ጋላሳይ ኢንቴስ ዱማ ጋላሳ፤ ጎዳስካ ሼምፖ ሳምባታ። ሄ ጋላስ ኣይ ኦሶካ ኦꬂዛ ኣሲ ኦኒካ ሃይቃናስ ቤሴስ።
EXO 35:3 ሳምባታ ጋላሳን ኢንቴ ሶን ሶን ታማ ኤꬆፍቴ» ጊዴስ።
EXO 35:4 ሙሴይ ኢስራኤሌ ማባራስ ኩሜꬃስ፥ «ጎዳይ ኢንቴና ሂዝጊ ኣዛዚዴስ።
EXO 35:5 ኢንቴስ ዲዛይሳፌ ጎዳስ ኢሞታ ኤሂቴ፤ ጎዳስ ኢሞታ ኤሃናስ ኮይዛይ ኦኒካ ዎርቃ፥ ቢራ፥ ጻርቂማላ፥
EXO 35:6 ሳሎ ሚሳቲዛ ቃጪና፥ ኦቻ ቴራ ሚሳቲዛ ቃጪና፥ ጼቃ ዞኦ ቃጪናኔ ሊቆ ላይኖ፥ ዴይሻ ኣንታሻ፥
EXO 35:7 ዞኦ ቃላሜን ጌሊ ኬዚዳ ꬋርሾ ኢቴ፥ ቃጬቲዳ ጋልባ፥ ኦዶሮ ሚꬅ፥
EXO 35:8 ጾምፔስ ዎጋራ ዛይቴ፥ ቲዬቲዛ ዛይቴኔ ኤጻኔ ሳዊዛ ቂማሜ፥
EXO 35:9 ኤፉዴኔ ቲራ ኪሴን ዎꬂዛ ማርጊዴ ጌቴቲዛ ሹቻታኔ ሃራ ጾልቂዛ ኣልኦ ሹቻታ ኤሆ።
EXO 35:10 «ኢንቴ ጊዶን ዲዛ ኩሼ ሂላንቻይ ኡባይ ዪዲ ጎዳይ ኣዛዚዳይሳ ኡባ ኦꬆ።
EXO 35:11 ጾሳ ዱንካኔዛ፥ ዱንካኔዛስ ሶ ባጋራኔ ካሬ ባጋራ ካሚዛ ዱንካኔ፥ ቃጴታ፥ ቶሌ ሚꬃታ፥ ጎርዴ ሚꬃታ፥ ቱሳታኔ ኢስቲ ኢስታን ኤቂዛ ቶሆታ፥
EXO 35:12 ታቦታኔ ኢዛ ቶኪዛ ቶሆ ሚꬃታ፥ ኣቶ ጌቴቲዛ ካማኔ ታቦታ ካሚዛ ማጋላሻ፥
EXO 35:13 ጻራጴዛዛ፥ ኢዛ ቶኪዛ ቶሆ ሚꬃታራኔ ኢዛስ ኮሺዛ ሚሻታ ኡባ፥ ጎዳ ሲንꬃን ዎꬂዛ ዱማ ኡኬꬃ፤
EXO 35:14 ጾምፔ ኢዛ ቦላ ዎꬂዛ ሚሻ ኢዛስ ኮሺዛ ሚሻታራ፥ ጾምፔታ፥ ጾምፔ ዛይቴ፥
EXO 35:15 ኤጻኔ ጩዋሲዛሶዛኔ ኢዛ ቶኪዛ ቶሆ ሚꬃታ፥ ቲዬቲዛ ዛይቴኔ ሳዊዛ ኤጻኔ፥ ጾሳ ዱንካኔዛ ፔንጌ ማጋላሻ፥
EXO 35:16 ጹጌቲዛ ያርሾ ያርሺዛሶኔ ጻርቂማላፔ ኦሴቲዳ ዛይዛሬዛ፥ ኢዛ ቶኪዛ ቶሆ ሚꬃታኔ ኢዛስ ኮሺዛ ሚሻታ ኡባ፥ ጻርቂማላፔ ኦሴቲዳ ሜቻ ኬሬኔ ኢዛ ዎꬂዛሶ፥
EXO 35:17 ዱንካናስ ካሬ ባጋ ዉይጌ ማጋላሻታ፥ ቱሳታኔ ኢስታ ቶሆታ፥ ዱንካናስ ካሬ ባጋ ዉይጌ ጌሊዛ ፔንጌዛ ማጋላሻ፥
EXO 35:18 ጾሳ ዱንካኔዛ ቶሊዛ ꬊሽኬታ፥ ዱንካናስ ካሬ ባጋ ዉይጌ ꬊሽኬታኔ ኢስታ ዎዶሮታ፥
EXO 35:19 ቄሴቲ ዱማሶዛን ኦꬂሼ ማይኣናስ ዳዴቲዳ ማይኦታ፥ ቄሴ ኣሮኔይኔ ኢዛ ናይቲ ቄሴቴꬃ ኦሶ ኦꬂሼ ማይኢዛ ማይኦታ ኦꬃና» ጊዴስ።
EXO 35:20 ሄሳፌ ጉዬ ኢስራኤሌ ኣሳይ ዉሪ ሙሴ ሲንꬃፌ ኬዚ ቢዴስ።
EXO 35:21 ኢማናስ ኮዪዳይቲኔ ኢስታ ዎዚናይ ኢስታ ኢማ ኢማ ጊዳይቲ ዉሪ ዪዲ ጾሳ ዱንካኔዛስ፥ ኢዛ ጊዶን ኦሴቲዛ ኦሶሲኔ ጌሻ ማይኦ ኡባስ ኮሺዛ ሚሽ ኡባ ኤሂዳ።
EXO 35:22 ኢማና ኮይዛ ኣቱማይኔ ማጫይ ዉሪ ዪዲ ዎርቃፌ ኦሴቲዳ ኣሌቆታ፥ ሃይꬃ ዎርቃ፥ ሳጋዮ፥ ቆꬌን ኣꬂዛ ጻንጋላታኔ ዎርቃ ኣሌቆታ ኤሂዲ ጎዳስ ያኔ ሃ ቃሴꬂዛ ያርሾ ሂስቲ ሺሺዳ።
EXO 35:23 ሳሎ ሚሳቲዛ ቃጪናይ፥ ኦቻ ቴራ ሚሳቲዛ ቃጪናይ፥ ጼቃ ዞኦ ቃጪናይ፥ ዎይኮ ላይኖ ጌቴቲዛ ሊቆ ቃጪናይ፥ ዎይኮ ዴይሻ ኣንታሻያይ፥ ዞኦ ቃላሜን ጌሊ ኬዚዳ ꬋርሾ ኢቴይ፥ ዎይኮ ቃጬቲዳ ጋልባይ ዲዛ ኣሲ ዉሪ ኤሂዴስ።
EXO 35:24 ቢራ ዎይኮ ጻርቂማላ ኢማናስ ዳንዳይዛይ ዉሪ ባ ኢሞታ ጎዳስ ኢሚዴስ፤ ቃሴ ኦዶሮ ሚꬂ ዲዛ ኣሳይ ዉሪ ዱማ ዱማ ኦሶስ ኦዶሮ ሚꬅ ኤሂዴስ።
EXO 35:25 ኩሼ ሂላ ኤሪዛ ማጫሳይ ዉሪ ባ ኩሼን ሱቂዳ ሳሎ ሚሳቲዛ ቃጪና፥ ኦቻ ቴራ ሚሳቲዛ ቃጪና፥ ጼቃ ዞኦ ቃጪናኔ ሊቆ ላይኖ ኤሂዴስ።
EXO 35:26 ቃሴካ ኢሞታ ኢማናስ ኮዪዳ ማጫሳይ ዉሪ ዴይሻ ኣንታሻ ዳዲ ኤሂዳ።
EXO 35:27 ሃላቃቲ ኤፉዴኔ ቲራ ኪሴን ዎꬂዛ ማርጊዴኔ ሃራ ቦንቼቲዳ ሹቻታ ኤሂዳ።
EXO 35:28 ቃሴካ ጾምፔስ፥ ሳዊዛ ኤጻኔሲኔ ቲዬታናስ ዎጋራ ዛይቴኔ ቂማሜ ኤሂዳ።
EXO 35:29 ኢስራኤሌ ኣሳይ ዉሪ ኣቱማይኔ ማጫይ፥ ኢስቲ ኦꬃና ማላ ጎዳይ ሙሴ ባጋራ ኣዛዚዳ ኦሶስ ጊዲዛ ኢሞታ ኡባ ባ ዶሳን ጎዳስ ኤሂዴስ።
EXO 35:30 ሙሴይ ኢስራኤሌ ኣሳስ፥ «ቤኢቴ፤ ጎዳይ ዩሁዳ ቆሞፌ ሁሬስ ናዛ ና፥ ኡሬይ ና ባስሊኤሌ ዶሪዴስ።
EXO 35:31 ጎዳይ ኢዛ ጾሳ ኣያናን፥ ኣꬎ ኤራን፥ ኣኬካኒኔ ኦሶ ኡባ ኦꬂዛ ኤራቴꬃን ኩንꬂዴስ።
EXO 35:32 ሄሲካ ሂላን ኦሶ ቆፒ ኬሲዲ ዎርቃፌ፥ ቢራፔኔ ጻርቂማላፔ ዱማ ዱማ ሚሽ ኦꬃናሳ።
EXO 35:33 ሄሳꬆካ ኣልኦ ሹች ማሲ ጊጊሳናሳ፤ ቃሴካ ሚꬅ ማሳናሲኔ ዱማ ዱማ ኦሶ ሂላን ኦꬃናሳ።
EXO 35:34 ሄሳ ቦላካ ቃሴ ኢዛሲኔ ዳኔ ቆሞፌ ኣሂሳሜኬ ና ኤላቤስ፥ ሃራ ኣስ ታማርሲዛ ኤራቴꬅ ኢሚዴስ።
EXO 35:35 ኢስቲ ኡባ ቆሞ ኦሶ ኦꬃና ማላ፥ ሂላን ኦꬂዛይታ፥ ኦሶ ቆፋ ኬሲዛይታ፥ ሳሎ ሚሳቲዛ ቃጪናን፥ ኦቻ ቴራ ሚሳቲዛ ቃጪናን፥ ጼቃ ዞኦ ቃጪናኒኔ ላይኖ ቃጪናን ኣሌቂሲ ዳዲዛይታ ጊዳና ማላ፥ ጎዳይ ኢስታ ኤራቴꬃን ኩንꬂዴስ። ኢስቲ ዉሪካ ኡባ ቆሞ ኦሶ ኤሪዛ ኤራንቻ ጊዲዳ።
EXO 36:1 «ሄሳ ጊሻስ ባስሊኤሌይ፥ ኤላቤይኔ ጾሳ ዱንካኔ ኦꬃና ማላ ጎዳይ ኤራቴꬅ ኢሚዳ ኣሳይ ዉሪ ጎዳይ ኣዛዚዳ ማላ ኢስቲ ኦꬃና» ጊዴስ።
EXO 36:2 ሄሳፌ ጉዬ ሙሴይ ባስሊኤሌ፥ ኤላቤኔ ጎዳይ ዱማ ኤራቴꬅ ኢሚዳይታ ኦሶ ኦꬃናስ ያና ኮይዛይታ ኡባ ጼይጊዲ ሺሺዴስ።
EXO 36:3 ሺቂዳይቲ ኢስራኤሌ ኣሳይ ጾሳ ዱንካኔ ኦꬃናስ ኤሂዳ ኢሞታ ኡባ ሙሴፔ ኤኪዳ። ቃሴ ኣሳይ ባ ዶሳን ጮ ኢሚዛ ኢሞታ ማላዶ ማላዶ ጉጂ ጉጂዲ ኤሆ ኣጊቤና።
EXO 36:4 ሂስቲን ጾሳ ዱንካኔዛ ኦꬂዛ ኤራቴꬂ ኩሚዳ ኣሳይ ዉሪ ባ ኦꬂዛይሳ ኣጊ ሙሴኮ ቢዲ፥
EXO 36:5 «ኣሳይ ጎዳይ ኣዛዚዳ ኦሶስ ኮሺዛይሳፌ ቦላራ ዳሮ ኤሆን ዴስ» ጊዳ።
EXO 36:6 ሂስቲን ሙሴይ ባ ዱንካኔን ዱንካኔን ዲዛ ኣሳስ፥ «ናምኣንꬆ ኦናካ ጊዲን ጾሳ ዱንካኔ ኦሶስ ኢሚዛ ኢሞታ ኤሆፖ» ጊ ዮቲን ኣሳይ ኤሂዛይሳ ኣጋጊዴስ።
EXO 36:7 ጋሶይካ ኢስቲ ኤሂዳ ኢሞታይ ኦሶ ኡባ ኦꬃናስ ጊዲ ፓላሃና።
EXO 36:8 ኦሶዛ ኦꬂዛይታ ጊዶፌ ሂላ ዳርዛይቲ ዉሪ ሊቆ ላይኖፔኔ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔ ዳዴቲዳ ታሙ ማጋላሻታፔ ጾሳ ዱንካኔዛ ጊግሲዳ። ሄ ማጋላሻታ ቦላ ቦላራ ኢሲ ሂላንቻይ ኪሩቤታ ሚስሌ ሲኪዴስ።
EXO 36:9 ማጋላሻቲ ዉሪ ኢሲ ጊና ጊዲዲ ኣዱሳቴꬃይ ናምኡ ታማኔ ኦስፑን ዋꬋ፤ ኣሆቴꬃይ ኦይዱ ዋꬋ።
EXO 36:10 ኢቻሹ ማጋላሻታ ኢሲፌ ጋꬂ ሲኪዳ፤ ቃሴ ሃንኮ ኣቲዳ ኢቻሹ ማጋላሻታካ ኢዛꬆካ ኦꬂዳ።
EXO 36:11 ኢሲፌ ጋꬂ ሲኪዳ ማጋላሻታፔ ኢሲ ማጋላሻስ ዉርሴꬃ ጋጻን ሳሎ ሚሳቲዛ ጫርቃፌ ሲꬌ ሜꬊዳ። ቃሴ ኢሲፌ ጋጊ ሲኬቲዳ ሃንኮ ማጋላሻታንካ ሄሳꬆካ ኦꬂዳ።
EXO 36:12 ኢስቲ ኢሲፌ ጋጊዳ ኢሲ ማጋላሻ ቦላ ኢቻሹ ታሙ ሲꬌታ፥ ቃሴ ኢሲፌ ጋጊዳ ሃንኮ ማጋላሻታ ቦላካ ኢቻሹ ታሙ ሲꬌታ ሜꬊዳ። ሄ ሲꬌቲ ዉሪካ ኢሶይ ኢሳራ ጊናን ዴቴስ።
EXO 36:13 ሄሳፌ ጉዬ ዎርቃፌ ኢቻሹ ታሙ ቃጴታ ሜꬊዲ ዱንካኔዚ ኢሲኖ ጊዳና ማላ፥ ሄ ማጋላሻታ ጋጻ ጋጻ ሄ ቃጴታን ጋꬂ ኦይሴꬂዳ።
EXO 36:14 ጾሳ ዱንካኔዛ ቦላራ ካሚዛ ዱንካኔዛስ ታማኔ ኢሲ ማጋላሻታ ዴይሻ ኣንታሻፔ ዳዲዳ።
EXO 36:15 ታማኔ ኢሲ ማጋላሻቲካ ኢሲ ጊና፤ ኢሲ ኢሲ ማጋላሻስ ኣዱሳቴꬂ ሄꬑ ታሙ ዋꬋ፥ ኣሆቴꬂ ኦይዱ ዋꬋ።
EXO 36:16 ኢቻሹ ማጋላሻታ ኢሲ ባጋራ፥ ኡሱፑን ማጋላሻታ ቃሴ ሃንኮ ባጋራ ጋꬂዲ ሲኪዳ።
EXO 36:17 ሄሳፌ ጉዬ ጋꬂ ሲኪዳ ማጋላሻታፔ ኢሲ ማጋላሻ ጋጻን ኢቻሹ ታሙ ሲꬌታ ሜꬊዳ። ቃሴካ ጋꬂ ሲኪዳ ሃንኮ ማጋላሻታፔ ዉርሴꬃ ማጋላሻዛ ጋጻን ኢቻሹ ታሙ ሲꬌታ ሜꬊዳ።
EXO 36:18 ናምኡ ባጋራ ዲዛ ማጋላሻታ ጋꬂ ኢሲ ካማ ኦꬃናስ ጻርቂማላፔ ኢቻሹ ታሙ ቃጴታ ሜꬊዳ።
EXO 36:19 ሄሳፌ ጉዬ ዱንካኔዛ ካማናስ ዞኦ ቃላሜን ዬጊ ኬሲዳ ꬋርሾ ኢቴ ጊግሲዳ፤ ቃሴ ኢዛ ቦላራ ካማናስ ቃጬቲዳ ጋልባ ጊግሲዳ።
EXO 36:20 ጾሳ ዱንካኔ ቶሌ ሚꬃታ ሉሌ ጊዲዳ ኦዶሮ ሚꬃፌ ኬሲዳ።
EXO 36:21 ኢሲ ኢሲ ቶሌ ሚꬃስ ኣዱሳቴꬃይ ታሙ ዋꬋ፤ ኣሆቴꬃይ ኢሲ ዋꬋኔ ባጋ።
EXO 36:22 ኢሲ ኢሲ ቶሌ ኢሳ ኢሳራ ጋꬂ ኦይሴꬂዛ ናምኡ ቶሌ ሜꬊዳ። ጾሳ ዱንካኔዛ ቶሌ ሚꬃታ ዉርሲካ ሄሳꬆ ኦꬂዳ።
EXO 36:23 ጾሳ ዱንካኔዛስ ቶሆሶ ባጋራ ናምኡ ታሙ ቶሌ ሚꬃታ ሜꬊዲ፥
EXO 36:24 ኢሲ ኢሲ ቶሌ ሚꬃስ ናምኡ ቶሆ፥ ሙሌራ ኦይዱ ታሙ ቶሆ ቢራፔ ጊግሲዳ።
EXO 36:25 ጾሳ ዱንካኔዛስ ሁኤሶ ባጋራ ናምኡ ታሙ ቶሌ ሚꬃታ ሜꬊዲ፥
EXO 36:26 ኢሲ ኢሲ ቶሌ ሚꬃስ ናምኡ ቶሆ፥ ሙሌራ ኦይዱ ታሙ ቶሆ ቢራፔ ጊግሲዳ።
EXO 36:27 ጾሳ ዱንካኔዛስ ጉዬ ጋጻን ዱጌ ባጋራ ኡሱፑን ቶሌ ሚꬃታ ሜꬊዳ።
EXO 36:28 ጾሳ ዱንካኔዛ ጉዬ ጋጻን ዲዛ ዞዜታስ ናምኡ ቶሌ ሚꬃታ ጊግሲዳ።
EXO 36:29 ሃ ናምኡ ዞዜታን ዲዛ ቶሌቲ ጻጶፔ ጼራ ጋካናሼ ናምኡ ጊዲ ቢዲ ጼራን ኢሲ ሳጋዮን ጌሊ ኦይኬቲዳ። ኢስቲ ናምኣይካ ሄሳꬆ ኦሴቲዳ።
EXO 36:30 ሄሳ ጊሻስ ኢሲ ኢሲ ቶሌ ሚꬃስ ጋርሳራ ናምኡ ናምኡ ቶሆቲ ዴቴስ፤ ሙሌራ ኦስፑን ጻጋጋቲኔ ቢራፔ ኦሴቲዳ ታማኔ ኡሱፑን ቶሆቲ ዴቴስ።
EXO 36:31 ቃሴ ኢስቲ ኦዶሮ ሚꬃፌ ታማኔ ኢቻሹ ካሬ ጎርዲዛ ሚꬅ ኬሲዳ፤ ኢስታፌ ጾሳ ዱንካኔዛስ ኢሲ ባጋ ሚሌን ዲዛ ቶሌ ሚꬃታስ ኢቻሹ ጎርዲዛ ሚꬃታ፥
EXO 36:32 ቃሴ ሃንኮ ባጋ ሚሌን ዲዛ ቶሌ ሚꬃታስ ኢቻሹ ጎርዲዛ ሚꬃታ ጊግሲዳ። ሄሳꬆካ ጾሳ ዱንካኔዛስ ጉዬ ባጋራ ኣርሼይ ዉሊዛ ባጋራ ዉርሴꬃ ጋጻን ዲዛ ቶሌ ሚꬃታስ ኢቻሹ ጎርዲዛ ሚꬃታ ሜꬊዳ።
EXO 36:33 ጊዶራ ጎርዲዛ ሚꬃቲ ጻጋጋታስ ጊዶ ጊናራ፥ ሃ ጋጻፔ ሄ ጋጻ ጋካናስ ካንꬂ ኬዛና ማላ ኦꬂዳ።
EXO 36:34 ቶሌ ሚꬃ ዎርቃን ቲይዲ ጎርዲዛ ሚꬃቲ ኣꬊዛ ሳጋዮታ ዎርቃፌ ሜꬊዳ፤ ቃሴ ጎርዲዛ ሚꬃታ ዎርቃን ቲይዳ።
EXO 36:35 ሳሎ ሚሳቲዛ ቃጪናፔ፥ ኦቻ ቴራ ሚሳቲዛ ቃጪናፔ፥ ጼቃ ዞኦ ቃጪናፔኔ ሊቆ ላይኖፔ ኢሲ ማጋላሻ ኦꬂዳ። ሄ ማጋላሻዛ ቦላ ኢሲ ሂላይ ኪሩቤታ ሚስሌ ሲኪዴስ።
EXO 36:36 ማጋላሻስ ኦይዱ ቱሳታ ኦዶሮ ሚꬃፌ ጊግሲዲ ዎርቃን ቲይዳ። ሂስቲዲ ዎርቃፌ ካቆታ ኢስታስ ጊግሲዳ። ቃሴ ቱሳታ ኤሲዛ ኦይዱ ቶሆታ ቢራፔ ሜꬊዳ።
EXO 36:37 ጾሳ ዱንካኔ ጌሊዛ ፔንጌዛስ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዴቲዳ፥ ጺልፔን ኣሌቄቲዳ ማጋላሻ ጊግሲዳ።
EXO 36:38 ቃሴ ኢስታስ ኢቻሹ ካቆታራ ዲዛ ኢቻሹ ቱሳታ ኦꬂዳ። ቱሳታ ጼራኔ ጪሮ ቃቺዛይታ ዎርቃን ቲይዳ። ቃሴ ቱሳቲ ኤቃና ማላ ኢቻሹ ቶሆ ጻርቂማላፔ ሜꬊዳ።
EXO 37:1 ባስሊኤሌይ ኦዶሮ ሚꬃፌ ታቦታ ጊግሲዴስ። ታቦታስ ኣዱሳቴꬃይ ናምኡ ዋꬋኔ ባጋ፤ ኣሆቴꬃይ ኢሲ ዋꬋኔ ባጋ፤ ꬎቃቴꬃይ ኢሲ ዋꬋኔ ባጋ።
EXO 37:2 ታቦታ ጊግሲዲ ሶ ባጋኔ ካሬ ባጋ ዋላካይ ባይንዳ ዎርቃን ሜሺዴስ፤ ኢዛ ዩዪ ኣꬋናስ ዳንጮ ዎርቃራ ዩሺ ኣꬂዴስ።
EXO 37:3 ቃሴ ኦይዱ ዎርቃ ሳጋዮታ ሴሪሲዲ ታቦታስ ኦይዱ ቶሆታን፥ ኢሲ ባጋራ ናምኡ ሳጋዮታ፥ ቃሴ ሃንኮ ባጋራ ናምኡ ሳጋዮታ ኣꬂዴስ።
EXO 37:4 ሂስቲዲ ኦዶሮ ሚꬃፌ ቶሆ ሚꬃታ ኬሲዲ ኢስታካ ዎርቃን ሜሺዴስ።
EXO 37:5 ታቦታ ቶካናስ ታቦታ ሚሌን ዲዛ ሳጋዮታን ቶሆ ሚꬃታ ኣꬂዴስ።
EXO 37:6 ዋላካይ ባይንዳ ዎርቃፌ ናምኡ ዋꬋኔ ባጋ ኣዱቂዛ፥ ኢሲ ዋꬋኔ ባጋ ኣኪዛ ኣቶ ጌቴቲዛ ሶሆዛ ካማ ሜꬊዴስ።
EXO 37:7 ካማታስ ዉርሴꬃ ናምኡ ባጋ ጋጻን ናምኡ ኪሩቤታ ቆጼቲዳ ዎርቃፌ ሜꬊዴስ።
EXO 37:8 ኢሲ ኪሩቤዛ ኢሲ ባጋ ጋጻን፥ ናምኣንꬆ ኪሩቤዛ ሃንኮ ባጋ ጋጻን፥ ናምኣታካ ካማዛራ ጋꬂ ኦይሴꬂ ሜꬊዴስ።
EXO 37:9 ኪሩቤቲ ባ ቄፌ ዴንꬂዲ ኣቶ ጌቴቲዛ ሶሆዛ ካሚዛ ካማ ባ ቄፌን ካሚ ዎꬂዳ፤ ቃሴ ኢሶይ ኢሳራ ጼሌታና ማላ ኦꬂዴስ።
EXO 37:10 ቃሴ ኣዱሳቴꬃይ ናምኡ ዋꬋ፥ ኣሆቴꬃይ ኢሲ ዋꬋ፥ ꬎቃቴꬃይ ኢሲ ዋꬋኔ ባጋ ጊዲዳ ጻራጴዛ ኦዶሮ ሚꬃፌ ሜꬊዲ፥
EXO 37:11 ዋላካይ ባይንዳ ዎርቃን ሜሺዴስ። ኢዛ ዩዪ ኣꬋናስ ዎርቃ ኪፋፌ ዩሺ ኣꬂዴስ።
EXO 37:12 ሄሳꬆካ ኣሆቴꬃይ ታꬋኮ ጊዲዛ ኪፋፌ ኢዛ ቦላ ዩሺ ኣꬂዴስ። ሂስቲዲ ኢዛ ዩዪ ኣꬋናስ ዎርቃ ዳንጮ ዩሺ ኣꬂዴስ።
EXO 37:13 ሂስቲዲ ታቦታ ቶካናስ ጊጊዛ ኦይዱ ዎርቃ ሳጋዮታ ሜꬊዲ ኦይዱ ቶሆቲ ቶኬቲዳ ኦይዱ ዞዜታራ ኦይሴꬂዴስ።
EXO 37:14 ጻራጴዛዛ ቶካናስ ቶሆ ሚꬃታ ኢስታ ጊዶራ ኣꬂዛ ሳጋዮቲ ጻራጴዛዛ ጻንጻ ቦላ ሜꬌቲዳ።
EXO 37:15 ጻራጴዛዛ ቶኪዛ ቶሆ ሚꬃ ኦዶሮ ሚꬃፌ ኬሲዲ ዎርቃን ሜሺዴስ።
EXO 37:16 ሄሳꬆካ ጻራጴዛ ቦላ ዎꬂዛ ዱማ ዱማ ሚሻታ ዋላካይ ባይንዳ ዎርቃፌ ሜꬊዴስ፤ ሄይቲካ ሳኔታኔ ጪልፋታ፥ ቃሴ ኡሻ ያርሾ ኢስታን ሴሪሲዛ ኬሬታኔ ጹኣታ።
EXO 37:17 ሄሳፌ ጉዬ ባስሊኤሌይ ጾምፔ ዎꬂዛሶዛ ቆጼቲዳ ዋላካይ ባይንዳ ዎርቃፌ ሜꬊዴስ፤ ጾምፔዚ ኢዛን ኤቂዛ ቶሆ፥ ቃሴ ጊዶ ቶማካ ኡባ ቆጼቲዳ ዎርቃፌ ሜꬊዴስ። ኢዛ ኩሬታ፥ ኢዛ ꬌሞታኔ ኢዛ ጪሻታ ኡባ ኢዛራ ኢሲፌ ኦይሴꬂ ሜꬊዴስ።
EXO 37:18 ሚሌራ ኡሱፑን ባላታ ሜꬊዴስ፤ ሄꬑ ሃጋታ ኢሲ ባጋራ፥ ቃሴ ሄꬑ ሃጋታ ሃንኮ ባጋራ ኬሲዴስ።
EXO 37:19 ኡሱፑን ሃጋታስካ ሁኤን ሁኤን ኢሲ ኢሲ ꬌሞቲኔ ጪሻቲ ዲዛ፥ ኦቾሎኔ ጪሽ ሚሳቲዛ ዋንጫ ሜꬊዴስ፤
EXO 37:20 ጾምፔ ዎꬂዛሶዛስ ጊዶ ቶማይ፥ ꬌሞቲኔ ጪሻቲ ዲዛ ኦቾሎኔ ጪሼ ሚሳቲዛ ኦይዱ ዋንጫን ኣሌቄቲ ኡቲዴስ።
EXO 37:21 ናምኣይ ናምኣይ ኢሲፌ ዋꬃን ዲዛ ሄꬑ ባላታኔ ጋርሳራ ኢሲ ኢሲ ꬌሞይ ዴስ።
EXO 37:22 ꬌሞቲኔ ሃጋቲ ዉሪ ጾምፔ ዎꬂዛሶዛራ ኢሲፌ ኦይኬቲ ኢሲኖ ጊዲዲ ዋላካይ ባይንዳ ዎርቃፌ ቆጼቲ ሜꬌቲዳ።
EXO 37:23 ኢዚ ቃሴ ጾምፔ ዎꬂዛሶዛስ ላፑን ጾምፔታ፥ ጾምፔ ቶይሲዛ ቃጴታኔ ቃጴታ ዎꬂዛሶ ዋላካይ ባይንዳ ዎርቃፌ ሜꬊዴስ።
EXO 37:24 ጾምፔዛ ዎꬂዛሶዛኔ ኢዛን ጎኤቲዛ ሚሽ ኡባ ሜꬋናስ ሄꬑ ታማኔ ኢቻሽ ኪሎ ጊዲዛ ዋላካይ ባይንዳ ዎርቃ ዉርሲዴስ።
EXO 37:25 ሄሳꬆካ ቃሴ ኤጻኔ ጩዋሲዛሶዛ ኦዶሮ ሚꬃፌ ሜꬊዴስ። ኢዛስ ኦይዱ ጉላይ ዴስ፤ ኣዱሳቴꬃይ ኢሲ ዋꬋ፤ ኣሆቴꬃይ ኢሲ ዋꬋ፥ ꬎቃቴꬃይ ናምኡ ዋꬋ። ኢዛ ካጬቲካ ኢዛራ ኢሲኖ ጊዲዲ ኦይኬቲ ሜꬌቲዳይታ።
EXO 37:26 ኢዛስ ቦላ ባጋዛ፥ ኦይዱ ሚሌታኔ ኢዛ ካጬታ ዋላካይ ባይንዳ ዎርቃን ሜሺዲ ኢዛ ዩሺ ኣꬃናስ ጻንጻዛ ዎርቃፌ ኦꬂዴስ።
EXO 37:27 ሄ ዎርቃ ጻንጻፌ ጋርሳራ ኤጻኔ ጩዋሲዛሶዛስ ዎርቃፌ ናምኡ ሳጋዮታ ሜꬊዴስ፤ ሂስቲዲ ሄ ባጋራኔ ሃ ባጋራ ናምኡ ናምኡ ኦይꬂዴስ። ሄይቲ ቶኪዛ ዎዴ ቶሆ ሚꬃታ ኣꬃናስ ማዳናሳ።
EXO 37:28 ቶሆ ሚꬃታ ኦዶሮ ሚꬃፌ ኬሲዲ ኢስታ ዎርቃን ሜሺዴስ።
EXO 37:29 ቃሴ ዱማቲዳ ቲዬቲዛ ዛይቴኔ ሳዎ ቱኑ ጊዛ ሎኦ ኤጻኔ ሺቶ ማላ ጊግሲዴስ።
EXO 38:1 ኦዶሮ ሚꬃፌ ጹጌቲዛ ያርሾ ያርሺዛሶ ኦꬂዴስ። ሄ ያርሺዛሶዛ ꬎቃቴꬃይ ሄꬑ ዋꬋ፥ ኣሆቴꬃይኔ ኣዱሳቴꬃይ ኢሲ ጊና፥ ኢቻሹ ኢቻሹ ዋꬋ ጊዲዲ ኦይዱ ጉላይ ዲዛይሳ ኦꬂዴስ።
EXO 38:2 ኦይዱ ጉላታ ዉርሴꬃ ጼራን ጼራን ኢሲ ኢሲ ካጬ ሜꬊዴስ። ሄ ካጬቲ ያርሺዛሶዛራ ኢሲፌ ኦይኬቲዲ ኦሴቲዳ። ሂስቲዲ ያርሺዛሶዛ ጻርቂማላራ ሜሺዴስ።
EXO 38:3 ኢዛን ጎኤቲዛ ሚሻታ፥ ቢዲንꬅ ኬሲዛ ሳኔታ፥ ኣካፋታ፥ ኬሬታ፥ ኣሾ ኮንጬታኔ ቦንቆ ታማ ኦይኪዛ ኮንኣ ኡባ ጻርቂማላፔ ሜꬊዴስ።
EXO 38:4 ሂስቲዲ ጻርቂማላፔ ዛይዛሬ ያርሺዛሶዛስ ጊግሲዲ ያርሺዛሶዛስ ዱጌ ጊዶ ጊናን ዲዛ ጻንጻዛስ ጋርሳ ባጋራ ዎꬂዴስ።
EXO 38:5 ጻርቂማላፔ ሜꬊዳ ዛይዛሬዛስ ኦይዱ ጉላን ቶሆ ሚꬃታ ኣꬃናስ ኦይዱ ቃንጎታ ሜꬊዴስ።
EXO 38:6 ኦዶሮ ሚꬃፌ ያርሺዛሶዛ ቶሆ ሚꬃታ ኬሲዲ ጻርቂማላን ሜሺዴስ።
EXO 38:7 ያርሺዛሶዛ ቶኪዛ ዎዴ ማዳና ማላ ቶሆ ሚꬃታ ናምኡ ሚሌራ ዲዛ ቃንጎታን ኣꬂዴስ። ያርሺዛሶዛ ጊዶ ዶይኣ ኣጊዲ ሳንቃፌ ሜꬊዴስ።
EXO 38:8 ጻርቂማላፔ ሜቻ ኬሬኔ ኬሬዛ ዎꬂዛሶ ሜꬊዴስ፤ ሄ ጻርቂማላዚካ ጾሳ ዱንካኔዛ ፔንጌን ኦꬂዛ ማጫሳቲ ኤሂዳ ጻርቂማላ ማስቶቴፔ ኤኬቲዴስ።
EXO 38:9 ሄሳፌ ጉዬ ዱቡሻሶዛ ጊግሲዴስ። ዱንካኔዛስ ካሬ ባጋ ዉይጌስ ቶሆሶ ባጋ ኣዱሳቴꬃ ጼቱ ዋꬋ ኦꬂዲ፥ ሊቆ ላይኖፔ ዳዴቲዳ ማጋላሻ ጊግሲዴስ።
EXO 38:10 ኢዛስ ጻርቂማላፔ ናምኡ ታሙ ቱሳታኔ ቱሳቲ ኢዛን ኤቂዛ ጻርቂማላ ቶሆ ኦꬂዴስ፤ ኢስታ ሁኤን ቃሴ ቢራፔ ሜꬌቲዳ ኢስታ ቦላ ካቂዛይታኔ ቱሳታ ሁኤን ቃቺዛይታ ኦꬂዴስ።
EXO 38:11 ዱንካኔዛስ ካሬ ባጋ ዉይጌዛስ ሁኤሶ ባጋ ኣዱሳቴꬃይ ጼቱ ዋꬋ፤ ቃሴ ናምኡ ታሙ ቱሳቲኔ ሄ ቱሳታስ ናምኡ ታሙ ጻርቂማላ ቶሆቲ ዴቴስ። ቃሴካ ቢራፔ ኦሴቲዳ ኢስታ ቦላ ካቂዛይቲኔ ቱሳታ ሁኤን ቃቺዛይቲ ዴቴስ።
EXO 38:12 ኣርሼይ ዉሊዛሶ ባጋራ ዲዛ ዱቡሻ ኣሆቴꬂ ኢቻሹ ታሙ ዋꬋ ጊዲዲ ታሙ ቱሳቲኔ ቱሳታስ ታሙ ቶሆቲ ዲዛ ማጋላሻታ ጊግሲዴስ፤ ሄ ቱሳታ ሁኤን ቢራፔ ሜꬌቲዳ ኢስታ ቦላ ካቆታኔ ቱሳታስ ሁኤን ቃቺዛይታ ኦꬂዴስ።
EXO 38:13 ቃሴ ኣርሼይ ሞኪዛ ባጋራ ዲዛ ዱቡሻሶ ኣሆቴꬂ ኢቻሽ ታሙ ዋꬋ።
EXO 38:14 ዱንካኔዛስ ካሬ ባጋ ዉይጌዛ ጌሊዛሶፔ ኢሲ ባጋራ ታማኔ ኢቻሽ ዋꬋ ኣዱቂዛ ማጋላሻቲ፥ ኢስታስ ሄꬑ ቱሳቲኔ ቱሳታስ ሄꬑ ቶሆቲ ዴቴስ።
EXO 38:15 ሄሳꬆካ ዱንካኔዛስ ካሬ ባጋ ዉይጌዛ ጌሊዛሶፔ ሃንኮ ባጋራ ታማኔ ኢቻሹ ዋꬋ ኣዱቂዛ ማጋላሻቲ፥ ኢስታስ ሄꬑ ቱሳቲኔ ቱሳታስ ሄꬑ ቶሆቲ ዴቴስ።
EXO 38:16 ዱንካኔዛስ ካሬ ባጋ ዉይጌዛ ዩሾን ዲዛ ማጋላሻቲ ዉሪ ሊቆ ላይኖፔ ዳዴቲዳ።
EXO 38:17 ሄ ቱሳታስ ቶሆይ ጻርቂማላፔ፥ ካቆቲኔ ቱሳታስ ሁኤን ቃቺዛይቲ ቢራፔ ኦሴቲዳ፤ ኢስታ ሁኤይ ቢራን ሜሼቲዴስ። ሄሳ ጊሻስ ዱቡሻሶዛ ዩሾን ዲዛ ቱሳታ ኡባ ሁኤን ቢራፔ ኦሴቲዳ ቃቺዛ ሚሻቲ ዴቴስ።
EXO 38:18 ዱንካኔዛስ ካሬ ባጋ ዉይጌዛ ጌሊዛሶን ካቂዛ ማጋላሻይ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዴቲዲ ጺልፔን ኣሌቂሲ ጊግሲዳዛ። ኢዛስ ኣዱሳቴꬃይ ናምኡ ታሙ ዋꬋ፤ ꬎቃቴꬃይ ዱንካኔዛስ ካሬ ባጋ ዉይጌዛ ማጋላሻታ ማላ ኢቻሹ ዋꬋ።
EXO 38:19 ኢዛስካ ጻርቂማላፔ ኦሴቲዳ ኦይዱ ቱሳቲኔ ቱሳታስ ኦይዱ ቶሆቲ ዴቴስ። ኢስታ ካቆቲኔ ቱሳታስ ሁኤን ቃቺዛ ሚሻቲ ቢራፔ ኦሴቲዳ፤ ኢስታ ጼራቲካ ቢራን ሜሼቲዳ።
EXO 38:20 ጾሳ ዱንካኔዛ ꬊሽኬቲኔ ኢዛ ዩሾን ዲዛ ዱንካኔዛስ ካሬ ባጋ ዉይጌዛ ꬊሽኬቲ ዉሪ ጻርቂማላፔ ኦሴቲዳይታ።
EXO 38:21 ጾሳ ዱንካኔዛስ ጎኤቲዳ ሚሻታ ሌዌ ቆሞቲ ማዝጋባን ጻፊዳ። ሄ ሚሻታ ቄሴ ኣሮኔ ና ኢታማሬ ዳናቴꬃ ጋርሳን ዲዛ ሌዌቲ ማዝጋባን ጻፋና ማላ ሙሴይ ኣዛዚዴስ።
EXO 38:22 ቢኒያሜ ዜሬꬅ ጊዲዳ ኡሬስ ናዛ ና፥ ኡሬ ና፥ ባስሊኤሌይ ጎዳይ ሙሴ ኣዛዚዳይሳ ኡባ ኦꬂዴስ።
EXO 38:23 ዳኔ ዜሬꬅ ጊዲዳ ኣሂሳሜኬ ና ኤላቤይ ኢዛራ ዴስ፤ ኢዚ ኩሼ ሂላንቻኔ ኦሶስ ኮይሮ ቆፋ ኬሲዛዴኮ፤ ቃሴ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናኒኔ ሊቆ ላይኖን ዳዲዲ ጺልፔን ኣሌቂሲዛ ኣሳ።
EXO 38:24 ጾሳ ዱንካኔዛ ኦሶስ ጎዳስ ያኔ ሃ ቃሴꬂ ሺሺዛ ያርሾስ ኢሜቲዳ ዎርቃይ ጾሳ ዱንካኔን ኤሬቲዳ ሜዛኔን ዎꬂን 1,000 ኪሎ ጊዲዴስ።
EXO 38:25 ታይቦን ዲዛ ማባራ ኣሳፔ ቤቲዳ ቢራይ ጾሳ ዱንካኔን ኤሬቲዳ ሜዛኔን ዎꬂን 3,430 ኪሎ ጊዲዴስ።
EXO 38:26 ኣሳ ታይቢዛ ዎዴ ታይቤቲዳ ኣቱማሳይ ዉሪ ኢሳዴይ ሁኤን ሁኤን ኢሚዳይሲ ጾሳ ዱንካኔን ኤሬቲዳ ሜዛኔን ዎꬂን ኡሱፑን ጊራሜ ማላ ጊዲዴስ። ታይቤቲዳ ኣሳይ ናምኡ ታሙ ላይꬅ ኩሚዳይኔ ናምኡ ታማፌ ቦላራ ዲዛይ ሙሌራ 603,550።
EXO 38:27 ጾሳ ዱንካኔዛ ማጋላሻታ ኤሲዳ ጼቱ ቶሆቲ 3,400 ኪሎ ጊዲዛ ቢራን ኦሴቲዳ። ሄሲካ ኢሲ ኢሲ ቶሆስ 34 ኪሎ ቲጌቲዛ ቢራ።
EXO 38:28 ኣቲዳ ሄꬑ ታሙ ኪሎ ቢራ ቱሳታ ቦላ ካቆሶ ሜꬋናስ፥ ቱሳታስ ሁኤ ቦላ ሜሻናሲኔ ኢስታ ሁኤን ቃቺዛ ሚሻታ ሜꬋናስ ጎኤቲዳ።
EXO 38:29 ሄሳꬆካ ኣሳይ ጎዳስ ያኔ ሃ ቃሴꬂ ሺሻናስ ኤሂዳ ጻርቂማላ ያርሾይ 2,425 ኪሎ ጊዲዴስ።
EXO 38:30 ሄ ጻርቂማላፔ ጾሳ ዱንካኔዛ ጌሊዛሶን ኤቂዛ ቱሳታስ ቶሆይ፥ ጻርቂማላፔ ኦሴቲዳ ያርሺዛሶ ጌቴቲዛ ያርሺዛሶዚ፥ ኢዛ ጊዶን ዎꬂዳ ጻርቂማላ ዛይዛሬይኔ ኢዛ ጊዶን ጎኤቲዛ ዱማ ዱማ ሚሻይ ዉሪ ሜꬌቲዴስ።
EXO 38:31 ሄሳꬆካ ቃሴ ዱንካኔዛስ ካሬ ባጋ ዉይጌ ዩሾን ዲዛ ዲርሳ ጊዶ ጌሊዛሶ ፔንጌን ኤቂዳ ቶሆይ፥ ቃሴ ጾሳ ዱንካኔዛኔ ኢዛ ዩሾን ዲዛ ዱንካኔዛስ ካሬ ባጋ ዉይጌ ዲርሳይ ቶሌቲዳ ꬊሽኬቲ ዉሪ ሄ ጻርቂማላፔ ሜꬌቲዳ።
EXO 39:1 ቄሴቲ ጾሳ ዱንካኔን ኦꬂዛ ዎዴ ማይኣና ማይኦ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔ ዳዲዳ። ኣሮኔ ቄሴቴꬃ ማይኦካ ጎዳይ ሙሴ ኣዛዚዳ ማላ ኦꬂዳ።
EXO 39:2 ቃሴ ኢስቲ ኤፉዴ ዎርቃፌ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዲዳ።
EXO 39:3 ኢስቲ ዎርቃ ቆጺ ሌኢሲዲ፥ ኢዛፔ ቃራሪ ቃራሪዲ ቃጪና ኬሲዳ። ሂስቲዲ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናኔ ሊቆ ላይኖ ጋꬂዲ ኩሼ ሂላንቻቲ ዳዲዳ።
EXO 39:4 ናምኡ ባጋይ ጋጊዲ ኢሲኖ ጊዳና ማላ ናምኡ ሃሼ ቦላ ጋꬂዲ ኦይꬂዛ ጫርቃ ጊግሲዳ።
EXO 39:5 ጎዳይ ሙሴ ኣዛዚዳ ማላ ሂላይ ኣሌቂሲዲ ዳዲዳ ዳንጮይካ ኤፉዴራ ኢሲፌ ጊዲዲ፥ ዎርቃፌ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዴቲዴስ።
EXO 39:6 ኢስቲ ማርጊዴ ጌቴቲዛ ናምኡ ሹቻታ ጊግሲዲ ዎርቃፌ ሜꬊዳ ሹቹ ኦይኪዛይሳ ቦላ ማራራ ዎꬂዳ። ማታፋ ቦላ ሱንꬅ ዎጪ ጻፊዛ ማላ ሄ ሹቻታ ቦላ ኢስራኤሌ ናይታ ሱንꬅ ዎጪዲ ጻፊዳ።
EXO 39:7 ጎዳይ ሙሴ ኣዛዚዳ ማላ ታማኔ ናምኡ ኢስራኤሌ ቆሞታ ሃሳኢሲዛዝ ጊዳና ማላ፥ ሃ ታማኔ ናምኡ ሹቻታ ኤፉዴዛራ ኦይꬂዲ ሃሼ ካቆዛ ቦላ ዎꬂዳ።
EXO 39:8 ኢስቲ ቲራን ዎꬂዛ ኪሴ ኩሼ ሂላን ኦꬂዳ። ሄ ቲራን ዎꬂዛ ኪሴዛ ኤፉዴ ዎርቃፌ ዳዲዳ ማላ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዲዳ።
EXO 39:9 ኢዛስ ኦይዱ ጼራይ ዴስ፤ ꬎቃቴꬃይኔ ኣሆቴꬃይ ኢሲ ኢሲ ታꬋኮ።
EXO 39:10 ሄሳፌ ጉዬ ኢዛ ቦላ ኦይዱ ማራን ኣልኦ ሹቻታ ዎꬂዳ፤ ኮይሮ ማራን ዎꬂዳ ሹቻይ ሳርዲዮኔ፥ ቶጳዚዮኔኔ ጾልቂዛ ኢንቁ፤
EXO 39:11 ናምኣንꬆ ማራን ባሉሬ፥ ሲምፔሬ ኣልማዜ ጌቴቲዛ ኣልኦ ሹቻታ፤
EXO 39:12 ሄꬓንꬆ ማራን ያኪንቴ፥ ኬልቄዶኔኔ ኣሜቴስጺኖሴ፤
EXO 39:13 ኦይዳንꬆ ማራን ቢሪሌ፥ ማርጊዴኔ ያስጲዴ። ሄይታ ኡባ ዎርቃፌ ኦሴቲዳ ሹቹ ኦይኪዛይሳ ቦላ ዎꬂዳ።
EXO 39:14 ኢስራኤሌ ናይታ ሱንꬃ ቆዳ ማላ፥ ሹቻታ ቆዳይካ ታማኔ ናምኣ፤ ኢሳይ ኢሳይ ማታሜ ማላ ዎጬቲዲ ታማኔ ናምኡ ቆሞታ ሱንꬂ ሄ ሹቻታ ቦላ ጻፌቲዴስ።
EXO 39:15 ቲራን ዲዛ ኪሴዛስ ዎዶሮ ማላ ዶቄቲዳ ሳንሳላታ ዋላካይ ባይንዳ ዎርቃፌ ሜꬊዳ።
EXO 39:16 ናምኡ ዎርቃፌ ሜꬊዳ ሹቹ ኦይኪዛይታኔ ናምኡ ዎርቃ ሚጊዶታ ሜꬊዲ ቲራን ዎꬂዛ ኪሴዛስ ቆሞ ጋጻ ጼራታ ጋꬂ ኦይꬂዳ።
EXO 39:17 ሄ ናምኡ ዎርቃ ሳንሳላታታ ቲራን ዎꬂዛ ኪሴዛስ ጼራን ዲዛ ሚጊዶታራ ጋꬂ ኦይሴꬂዳ።
EXO 39:18 ሄ ሳንሳላታታስ ሃንኮ ባጋ ጼራ ቃሴ ኤፉዴዛስ ሲንꬃ ባጋራ፥ ሃሼ ካቆ ቦላ ዲዛ ሹች ኦይኪዛይታራ ጋꬂ ቃቺዳ።
EXO 39:19 ቃሴካ ናምኡ ዎርቃ ሚዲጋታ ሜꬊዲ ኤፉዴፔ ካሊ ዲዛ ቲራ ኪሴዛስ ሶ ባጋራ ዲዛ ናምኡ ጼራታን ኣꬂዳ።
EXO 39:20 ሄሳꬆካ ዎርቃፌ ሃራ ናምኡ ሚጊዶታ ሜꬊዲ፥ ኤፉዴዛስ ሲንꬃ ባጋራ፥ ሃሼ ካቆዛፔ ጋርሳ ባጋራ ኤፉዴ ጼሳን ቃቺዛይሳፌ ቆሞራ፥ ሲኮይ ጋጊዛሶ ኣቻን ኢስታ ኦይꬂዳ።
EXO 39:21 ጎዳይ ሙሴ ኣዛዚዳ ማላ ቲራ ኪሴን ዲዛ ሚጊዶታ ኤፉዴዛን ዲዛ ሚጊዶታራ ጋꬂዲ፥ ሳሎ ሚሳቲዛ ሱቄꬃን ቃቺዳ ጊሻስ ቲራ ኪሴዚ ጼሳፌ ቦላራ ዲዛ ጊሻስ ቃሾይ ዶልኤና።
EXO 39:22 ኤፉዴዛፔ ቦላራ ማይኢዛ ቃሚሳ ኢስቲ ሙሌራ ሳሎ ሚሳቲዛ ጫርቃፌ ጊግሲዳ፤ ሄሲካ ሼማኔ ኦሶኮ።
EXO 39:23 ሄ ቃሚሳዛስ ቆꬌ ኣꬂዛሶ ሜꬊዳ፤ ቆꬌሶይ ዳኬቶንታ ማላ፥ ሶ ባጋ ቃላምኢዲ ዩሺ ኣꬂ ሲኪዳ።
EXO 39:24 ኢስታ ቃሚሳዛስ ዱጌ ባጋ ማጫራ ዩሾን ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ኦሮማኔ ጌቴቲዛ ሚꬃ ኣይፌ ቴራ ሚስሌታ ሜꬊዳ።
EXO 39:25 ቃሴካ ዎርቃፌ ዳላታ ሜꬊዲ ቃሚሳታስ ዱጌ ባጋ ጼራ ዩሺ ኣꬂዲ ኦሮማኔ ሚስሌታ ጊዶን ኣꬂ ኣꬂ ዋላኪዳ።
EXO 39:26 ጎዳይ ሙሴስ ኣዛዚዳ ማላ ኢስቲ ጾሳ ዱንካኔ ኦሶ ኦꬂሼ ማይኣና ማላ ቃሚሳዛስ ዱጌ ባጋ ማጫራ ዩሺ ኣꬂዲ ዳላኔ ኦሮማኔ ቴራ ሚስሌ ዋላኪ ኣꬂዳ።
EXO 39:27 ጎዳይ ሙሴ ኣዛዚዳ ማላ ኢስቲ ኣሮኔሲኔ ኢዛ ናይታስ ሼማኔይ ዳዲዳ ሊቆ ላይኖፔ ቆሌታ ጊግሲዳ።
EXO 39:28 ቃሴ ሁኤን ጻጺዛ ሻሼታ፥ ቆቤታኔ ጋርሳራ ማይኢዛ ማይኦታ ሊቆ ላይኖፔ ዳዲዲ ጊግሲዳ።
EXO 39:29 ሄሳꬆካ ቃሴ ኢስቲ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዲዲ ኩሼ ሂላን ኣሌቂሲዲ ዳንጮ ጊግሲዳ።
EXO 39:30 ኢስቲ ኣኪሊሌ ሚስሌ ዋላካይ ባይንዳ ዎርቃፌ ሜꬊዲ ማታሜ ቦላ ዎጪዛ ማላ ኢዛ ቦላ፥ «ጎዳስ ጌሽ ጊዲዲ ዱማቲዴስ» ጊዛይሳ ዎጪ ጻፊዳ።
EXO 39:31 ሄሳፌ ጉዬ ሁኤ ጎሳ ቦላ ካቃና ማላ፥ ጎዳይ ሙሴ ኣዛዚዳ ማላ ሳሎ ሚሳቲዛ ባቄꬅ ኢዛን ኣꬂዲ ቃቺዳ።
EXO 39:32 ጾሳ ዱንካኔዛ ኦሶይ ዉሪ ሙሌራ ፖሌቲዴስ። ኢስራኤሌ ኣሳይ ኡባ ጎዳይ ሙሴ ኣዛዚዳ ማላ ኦꬂዴስ።
EXO 39:33 ሄሳፌ ጉዬ ኢስቲ ጾሳ ዱንካኔዛ ሙሌራ ኤኪዲ ሙሴኮ ኤሂዳ፤ ሄሲካ ዱንካኔዛኔ ኢዛ ሚሻዛ ኡባ፥ ቃጴታ፥ ቶሌ ሚꬃታ፥ ፔንጌ ጎርዲዛ ሚꬃታ፥ ቱሳታኔ ኢስቲ ኤቂዛ ቶሆታ፥
EXO 39:34 ቦላራ ካማናስ ꬋርሾዛ ኢቴ ዞኦ ቃላሜን ዬጊ ኬሲዳይሳ፥ ቃጬቲዳ ጋልባ፥ ጌንꬂዛ ማጋላሻ፥
EXO 39:35 ጫቆ ቃላ ታቦታ፥ ኢዛ ቶኪዛ ቶሆ ሚꬃታ፥ ኣቶ ጌቴቲዛ ካማ፥
EXO 39:36 ጻራጴዛኔ ኢዛ ሚሼ ኡባ ጎዳ ሲንꬃን ዎꬂዛ ጌሻ ኡኬꬃ፥
EXO 39:37 ዋላካይ ባይንዳ ዎርቃፌ ኦሴቲዳ ጾምፔ ዎꬂዛሶዛኔ ኢዛን ማራን ዲዛ ጾምፔታ፥ ኢስታ ሚሻታ ኡባኔ ጾምፔ ዛይቴ፥
EXO 39:38 ዎርቃፌ ኦሴቲዳ ኤጻኔ ጩዋሲዛሶዛ፥ ቲዬቲዛ ዛይቴ፥ ሳዊዛ ኤጻኔ፥ ጾሳ ዱንካኔ ፔንጌ ማጋላሻ፥
EXO 39:39 ጻርቂማላፔ ኦꬂዳ ያርሺዛሶዛ፥ ጻርቂማላ ዛይዛሬዛ፥ ኢዛ ቶኪዛ ቶሆ ሚꬅ፥ ኢዛ ሚሻታ ኡባ፥ ሜቻ ኬሬኔ ኬሬዛ ኢዛ ቦላ ዎꬂዛ ሚሻታ፥
EXO 39:40 ዱንካኔዛስ ካሬ ባጋ ዉይጌ ጎዳ ጌንꬂዛ ማጋላሻታ፥ ኢዛ ቱሳታ፥ ኢስቲ ኤቂዛ ቶሆታ፥ ዱንካኔዛስ ካሬ ባጋ ዉይጌ ጌሊዛ ፔንጌታ ማጋላሻታ፥ ዱንካኔዛስ ካሬ ባጋ ዉይጌ ዎዶሮታኔ ꬊሽኬታ፥ ጾሳ ዱንካኔዛስ ኮሺዛ ሚሻታ ኡባ፤
EXO 39:41 ቄሴቲ ጌሻ ሶን ኦꬂዲ ማይኣናስ ዳዴቲዳ ማይኦታ፥ ኣሮኔይኔ ኢዛ ናይቲ ቄሴቴꬃን ኦꬂሼ ማይኢዛ ማይኦታ።
EXO 39:42 ኢስራኤሌ ኣሳይ ኦሶዛ ኡባ ጎዳይ ሙሴ ኣዛዚዳ ማላ ኦꬂዴስ።
EXO 39:43 ሙሴይ ኦሶዛ ጾሞሲ ጼሊዲ ኢስታ ጎዳይ ኣዛዚዳ ማላ ኦꬂዳይሳ ቤዪዴስ። ሄሳ ጊሻስ ሙሴይ ኢስታ ኣንጂዴስ።
EXO 40:1 ሄሳፌ ጉዬ ጎዳይ ሙሴ፥
EXO 40:2 «ኮይሮ ኣጊናን ኮይሮ ጋላስ፥ ኔኒ ጾሳ ዱንካኔ ቶላ።
EXO 40:3 ጫቆ ቃላ ታቦታ ኢዛ ጊዶን ዎꬃዳ ታቦታዛ ማጋላሻን ጌንꬃ።
EXO 40:4 ጻራጴዛ ጌልꬃዳ ኢዛ ቦላ ዎꬋናስ ኮሺዛ ሚሻታ ኡባ ኢዛ ቦላ ዎꬃ። ሂስታዳ ጾምፔታ ኢዛ ቦላ ዎꬂዛ ሚሻዛ ሶ ጌልꬃዳ ኢዛ ቦላ ጾምፔታ ዎꬃ።
EXO 40:5 ዎርቃፌ ኦሴቲዳ ኤጻኔ ጩዋሲዛሶዛ ጫቆ ቃላ ታቦታ ሲንꬃን ዎꬃዳ፥ ጾሳ ዱንካኔዛ ጊዶ ጌሊዛ ፔንጌ ማጋላሻዛ ካቃ።
EXO 40:6 «ጹጌቲዛ ያርሾ ያርሺዛሶዛ ጾሳ ዱንካኔዚ ጌሊዛ ፔንጌ ሲንꬃን ዎꬃ።
EXO 40:7 ኢዛን ሜጬቲዛ ኬሬዛ ጾሳ ዱንካኔዛፔኔ ያርሺዛሶዛፔ ጊዶን ዎꬃዳ ሃꬄ ኢዛን ቲጋ።
EXO 40:8 ጾሳ ዱንካኔዛፔ ካሬራ ዩሻ ኣꬃዳ ዱንካኔዛስ ካሬ ባጋ ዉይጌ ጊጊሳዳ ዱቡሻ ጌሊዛሶን ማጋላሻ ካቃ።
EXO 40:9 «ቲዬቲዛ ዛይቴዛ ኤካዳ ጾሳ ዱንካኔዛኔ ኢዛ ጊዶን ዲዛይሳ ኡባ ቲያ፤ ኢዛኔ ኢዛ ጊዶን ጎኤቲዛ ሚሻታ ኡባ ዱማሳ፤ ሂስቲኮ ኢዚ ጌሽ ጊዳና።
EXO 40:10 ሄሳፌ ጉዬ ጹጌቲዛ ያርሾ ያርሺዛሶኔ ኢዛስ ጎኤቲዛ ሚሻ ኡባ ቲያ፤ ያርሺዛሶዛ ዱማሳ፤ ሂስቲኮ ኢዚ ኡባፌ ኣꬊዳ ጌሽ ጊዳና።
EXO 40:11 ሜቻ ኬሬዛኔ ኬሬዛ ኢዛ ቦላ ዎꬂዛ ሚሻታ ቲያዳ ኢስታ ዱማሳ።
EXO 40:12 «ኔኒ ኣሮኔኔ ኢዛ ናይታ ጾሳ ዱንካኔዚ ጌሊዛ ፔንጌ ኤሃዳ ሃꬃን ሜጫ።
EXO 40:13 ሄሳፌ ጉዬ ቄሴቴꬃ ማይኦዛ ኣሮኔ ማይዛዳ ኢዚ ታስ ቄሴቴꬃን ኦꬃና ማላ ኢዛ ቲያዳ ዱማሳ።
EXO 40:14 ኢዛ ኣቱማ ናይታካ ኤሃዳ ቆሌ ማይዛ።
EXO 40:15 ኢስቲ ታስ ቄሴቴꬃን ኦꬃና ማላ፥ ኢስታ ኣዋ ቲይዳ ማላ፥ ኢስታካ ቲያ። ኢስታ ቲዬቴꬃንካ ኢስታኔ ኢስታ ዬሌታይ ዉሪ ቄሴ ጊዲዲ ኦꬃና ማላ ታ ኦꬃና» ጊዴስ።
EXO 40:16 ሙሴይ ኡባካ ጎዳይ ባና ኣዛዚዳ ማላ ኦꬂዴስ።
EXO 40:17 ሄሳ ጊሻስ ጊብጼፔ ኢስቲ ኬዚዳ ናምኣንꬆ ላይꬃን፥ ኮይሮ ኣጊናን ኮይሮ ጋላሳን ጾሳ ዱንካኔይ ቶሌቲዴስ።
EXO 40:18 ሙሴይ ጾሳ ዱንካኔዛ ኤሲዛ ዎዴ ዱንካኔዛ ቶሆ ኢስታ ሶሆን ሶሆን ዎꬂዴስ፤ ቶሌ ሚꬃታኔ ቱሳ ኣꬂዴስ፤ ጎርዲዛ ሚꬃታካ ጌልꬂዴስ።
EXO 40:19 ሄሳፌ ጉዬ ሙሴይ ጎዳይ ኣዛዚዳ ማላ ዱንካኔዛ ቶሊዲ ኢዛ ቦላራ ካማ ካሚዴስ።
EXO 40:20 ሂስቲዲ ታሙ ኣዛዞቲ ጻፌቲዳ ማሴቲዳ ሹቻታ ኤፊዲ ታቦታዛ ጊዶን ዎꬂዴስ፤ ቶኪዛ ቶሆ ሚꬃታ ታቦታን ኣꬂዴስ፤ ማሮቴꬃ ካማካ ታቦታ ቦላ ዎꬂዴስ።
EXO 40:21 ሄሳፌ ጉዬ ታቦታዛ ጾሳ ዱንካኔዛ ጊዶ ጌልꬂዴስ፤ ጌንꬂዛ ማጋላሻ ካቂዲ፥ ጎዳይ ኣዛዚዳ ማላ ጫቆ ቃላ ታቦታዛ ካሚዴስ።
EXO 40:22 ጎዳይ ሙሴ ኣዛዚዳ ማላ፥ ሙሴይ ጻራጴዛዛ ጾሳ ዱንካኔዛን ጌልꬂዲ፥ ማጋላሻፔ ካሬራ ሁኤሶራ ዎꬂዲ፥
EXO 40:23 ኢዛ ቦላ ጎዳ ሲንꬃን ዎꬂዛ ጌሻ ኡኬꬅ ጊግሲዴስ።
EXO 40:24 ጎዳይ ሙሴ ኣዛዚዳ ማላ፥ ጾምፔ ዎꬂዛሶዛ ጾሳ ዱንካኔ ጊዶ ጌልꬂዲ፥ ጻራጴዛስ ሲንꬃ ባጋራ፥ ጾሳ ዱንካኔዛስ ቶሆሶራ ዎꬂዴስ፤
EXO 40:25 ቃሴ ጾምፔታ ጎዳ ሲንꬃን ኦይꬂዴስ።
EXO 40:26 ጎዳይ ኣዛዚዳ ማላ፥ ዎርቃፌ ኦሴቲዳ ኤጻኔ ጩዋሲዛሶዛ ጾሳ ዱንካኔዛ ጊዶ ጌልꬂዲ ማጋላሻዛስ ሲንꬃ ባጋራ ዎꬂዲ፥
EXO 40:27 ኢዛ ቦላ ሳዊዛ ኤጻኔ ጩዋሲዴስ።
EXO 40:28 ሄሳፌ ጉዬ ጾሳ ዱንካኔዛ ፔንጌን ማጋላሻ ካቂዴስ።
EXO 40:29 ጹጌቲዛ ያርሾ ያርሺዛሶዛ ጾሳ ዱንካኔ ጌሊዛሶ ፔንጌ ኣቻን ዎꬂዴስ፤ ኢዛ ቦላ ጹጌቲዛ ያርሾኔ ካꬃ ያርሾ ጎዳይ ኣዛዚዳ ማላ ያርሺዴስ።
EXO 40:30 ሜቻ ኬሬዛ ጾሳ ዱንካኔዛፔኔ ያርሺዛሶዛፔ ጊዶን ዎꬂዴስ። ሂስቲዲ ሜጬታናስ ሃꬄ ኢዛን ቲጊዴስ።
EXO 40:31 ሙሴይ፥ ኣሮኔይኔ ኢዛ ናይቲ ባ ኩሼኔ ባ ቶሆ ኢዛን ሜጬቲዳ።
EXO 40:32 ጎዳይ ሙሴ ኣዛዚዳ ማላ፥ ኢስቲ ጾሳ ዱንካኔን ጌሊዛ ዎዴ ዎይኮ ያርሺዛሶ ሺቂዛ ዎዴ ኣይዴካ ሜጬቴቴስ።
EXO 40:33 ጾሳ ዱንካኔን ያርሺዛሶ ዩሺ ኣꬂዲ ዱቡሻ ጊግሲዴስ፤ ሄ ዱቡሻ ፔንጌን ማጋላሻ ካቂዴስ። ሄሳꬆ ሂስቲዲ ሙሴይ ኦሶዛ ፖሊዴስ።
EXO 40:34 ሄሳፌ ጉዬ ሻራይ ጾሳ ዱንካኔዛ ካሚዴስ፤ ጎዳ ቦንቾይካ ኢዛ ኩሚዴስ።
EXO 40:35 ሻራይ ጾሳ ዱንካኔዛ ቦላ ኡቲዳ ጊሻሲኔ ጎዳ ቦንቾይ ኢዛ ጊዶን ኩሚዳ ጊሻስ ሙሴይ ኢዛ ጊዶ ጌላናስ ዳንዳይቤና።
EXO 40:36 ኢስራኤሌ ኣሳይ ባ ኦጌ ኡባን፥ ሄ ሻራይ ጾሳ ዱንካኔዛፔ ዴንዲዛ ዎዴ ኣይዴካ ኢዛ ካሊዲ ቤቴስ።
EXO 40:37 ጊዶ ኣቲን ሄ ሻራይ ዴንዶንታ ኢጺኮ ኢዚ ዴንዳና ጋላሳይ ጋካናስ ኢስቲካ ቃጼቴና።
EXO 40:38 ኢስታ ኦጌ ኡባን ጎዳ ሻራይ ኢስራኤሌ ኣሳይ ዉሪ ቤኢሺን፥ ጋላስ ጋላስ ጾሳ ዱንካኔ ካሜሲኔ ቃማ ቃማ ቃሴ ታማይ ሄ ሻራ ጊዶን ኤጼስ።
LEV 1:1 ጎዳይ ጋይቶቴꬃ ዱንካኔዛ ጊዶን ዲሼ ሙሴ ጼይጊዲ ሂዝጊ ኣዛዚዴስ፥
LEV 1:2 «ኢስራኤሌ ኣሳይ ጎዳስ ያርሾ ሺሺዛ ዎዴ ኢስቲ ናጋና ዎጋይ ሃይሳፌ ካሊዛይሳ፤ ኢሲ ኢሲ ኣሲ ሚዛፔ ጊዲን ዶርሳፌ ዎይኮ ዴይሻፌ ጊዲን ኣይ ቆሞ ያርሾካ ሺሺዛ ዎዴ፥
LEV 1:3 ሄሲካ ሚዛፔ ኢሳ ጹጌቲዛ ያርሾስ ሺሻናስ ኮይኮ ኢሲ ቦሬይካ ኢዛ ቦላ ባይንዳ ሚርጎ ቦራ ዶሪዲ ኤሆ፤ ሂስቲኮ ኢዚ ጎዳ ኡፋይሲዛ ያርሾ ጊዳና ማላ ጋይቶቴꬃ ዱንካኔዛ ፔንጌን ሺሾ።
LEV 1:4 ጹጌቲዛ ያርሾ ሺሺዛዴይ ባ ሺሺዛ ቦራ ሁኤ ቦላ ባ ኩሼ ዎꬆ፤ ሄ ያርሾዚካ ኢዛ ናጋራ ዉርሳናስ ጎዳይ ኤኪዛ ሎኦ ያርሾ ጊዳና።
LEV 1:5 ሄሳዴይ ሚርጎዛ ሄን ጎዳ ሲንꬃን ሹኮ፤ ሂስቲኮ ኣሮኔ ዜሬꬃታፔ ጊዲዳ ቄሴቲ ቦራዛ ሱꬃ ጎዳስ ሺሼቶ፤ ጋይቶቴꬃ ዱንካኔን ጌሊዛ ፔንጌ ባጋራ ዲዛ ያርሾ ያርሺዛሶዛ ቦላ ላንቄራ ዩዪ ኣꬋናስ ሱꬃ ዉጼቶ።
LEV 1:6 ሄሳፌ ጉዬ ሄ ያርሾዛ ሺሺዛይሲ ሄ ሹኬቲዳ ሜሄዛ ጋልባ ሾቂዲ ኬሶ፤ ኣሾዛ ቆሞን ቆሞን ቃንጼሬꬆ።
LEV 1:7 ቄሴ ኣሮኔ ዜሬꬅ ጊዲዳ ቄሴቲ ያርሾ ያርሺዛሶዛ ቦላ ሚꬅ ጎጲዲ ታማ ኤꬄቶ።
LEV 1:8 ቄሴዛ ኣሮኔ ዜሬꬅ ጊዲዳ ቄሴቲ ሄ ሜሄዛ ኣሾዛ ቆሞን ቆሞን ሻኪዲ ሁኤዛኔ ሃንዳዛ ጉጂዲ ያርሾ ሺሺዛሶን ኮሬቲዳ ሚꬃ ቦላ ዎꬄቶ።
LEV 1:9 ሄ ያርሾዛ ሺሺዛይሲ ሄ ሜሄዛ ቃንꬃ ኣሾዛኔ ጉዬ ጌዳታ ሃꬃን ሜጮ፤ ቄሴዚ ያርሾዛ ኡባ ያርሺዛሶዛ ቦላ ጹጎ፤ ሃይሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።
LEV 1:10 «ኢዛዴይ ባ ዶርሳፌ ዎይኮ ባ ዴይሻፌ ኢሳ ጹጌቲዛ ያርሾስ ሺሻና ኮይኮ ኢሲ ቦሬይ ኢዛ ቦላ ባይንዳ ꬋርሾ ዎይኮ ኦርጌ ጊዶ።
LEV 1:11 ሄሳካ ያርሾ ሺሺዛሶዛፔ ፑዴሃ ባጋራ ጾሳ ሲንꬃን ሹኮ፤ ኣሮኔ ዜሬꬅ ጊዲዳ ቄሴቲ ሱꬃ ኤኪዲ ያርሾ ያርሺዛሶዛ ቦላ ዩዪ ኣꬋናስ ዉጼቶ።
LEV 1:12 ሄ ያርሻ ሺሺዛዴይ ሄ ሹኪዳ ኣሾዛ ቆሞን ቆሞን ቃንጺ ኬሲዳፔ ጉዬ ሄ ኦሶዛስ ዶሬቲዳ ቄሴይ ሄ ኬሲዳ ኣሾዛ ኡባ ሁኤዛኔ ሃንዳዛካ ኢሲፌ ያርሾ ያርሺዛሶን ጎጴቲዲ ታማን ኤጺዛ ሚꬃ ቦላ ዎꬆ፤
LEV 1:13 ኣዴዚ ሄ ሜሄዛስ ቃንꬃ ኣሾዛኔ ናምኡ ጌዳታ ሃꬃን ሜጮ፤ ቄሴዚካ ሄሳ ኡባ ጎዳስ ያርሾ ኦꬂ ሺሺዲ ያርሾ ሺሺዛሶዛ ቦላ ኡባ ጹጎ፤ ሄሳ ማላ ታማን ጹጌቲዛ ያርሾ ሳዎይ ጾሳ ኡፋይሴስ።
LEV 1:14 «ኢሳዴይ ጎዳስ ጹጌቲዛ ያርሾ ካፎፔ ሺሻና ኮይኮ ሃራጴ ጪዬ ዎይኮ ዋኖሴ ጌቴቲዛ ካፎፔ ጊዳናስ ዳንዳዬስ።
LEV 1:15 ቄሴዚካ ሄ ካፎዛ ኤኪዲ ጌዴ ያርሾዛሶ ሺሺዲ ካፎዛ ቆꬌ ሚርቆ፤ ያርሾዛ ሺሺዳ ታማን ኢዛ ጹጎ፤ ሱꬂካ ያርሾይ ኢዛ ቦላ ሺቂዛይሳ ሚሌራ ዱጌ ጾኬቶ።
LEV 1:16 ባሌዛኔ ቃንꬃ ኣሾዛ ዱማ ሻኪዲ ያርሾ ኢዛ ቦላ ሺሺዛሶዛፔ ኣርሼይ ሞኪዛ ባጋራ ቢዲንꬂ ቆሌቲዛሶን ዬጌቶ።
LEV 1:17 ቄፌታ ኦይኪዲ ናምኡ ኬሲ ጳልቂዲ ኣሾዛ ሙሌራ ሻኪ ዬጎንታ ዲሼ ያርሾ ሺሺዛሶዛ ቦላ ዲዛ ታማን ሙሌራ ጹጎ፤ ሄሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።
LEV 2:1 «ኣይ ኣሲካ ጾሳስ ካꬃ ያርሾ ሺሺዛ ዎዴ ሊቆ ꬊሌ ሺሻና ቤሴስ፤ ሄ ꬊሌዛ ቦላ ዎጋራ ዛይቴኔ ኤጻኔ ጉጆ፤
LEV 2:2 ኣሮኔ ዜሬꬃፌ ጊዲዳ ቄሴታኮ ኤኪ ዮ፤ ሄ ዎዴ ኢዛ ኦሶ ታራይ ጋኪዳ ቄሴይ ሄ ꬊሌዛፔ ባ ኩጳ ኩሜꬃ ዛይቴዛኔ ኤጻኔዛ ኤኪዲ ዉሪካ ጾሳስ ሺቂዳይሳ ኤሪሳናስ ያርሾ ሺሺዛይሳ ቦላ ታማን ጹጎ፤ ሄሳ ማላ ካꬃ ያርሾ ሳዎይ ጾሳ ኡፋይሴስ።
LEV 2:3 ካꬃ ያርሾፌ ኣቲዳ ꬊሌይ ኣሮኔ ዜሬꬃፌ ጊዲዳ ቄሴታስ ኢሜቶ፤ ሄሲካ ጾሳስ ሺቂዳ ያርሾፌ ሻኬቲ ኤኬቲዳ ጊሻስ ሃራታፔ ኬሂ ዱማቴስ።
LEV 2:4 «ያርሾዚ ኡኬꬂ ኡኬቲዛ ባሼን ኡኬቲዳ ጊዲኮካ ኢርሾይ ቦቾንታዝ ጊዶ፤ ኢዚካ ዎጋራ ሚꬃ ዛይቴራ ዋላኬቲዲ ሊቆ ꬊሌራ ኡኬቲዳ ቄሪ ኡኬꬅ ዎይኮ ዛይቴን ጊንዴቲ ኡኬቲዳ ኡኬꬅ ጊዳናስ ቤሴስ።
LEV 2:5 «ያርሾዚ ታማ ጮጬን ኮምፔቲዳዝ ጊዲኮ ኢርሾይ ቦቾንታ ዎጋራ ሚꬃ ዛይቴይ ጉጄቲዲ ሊቆ ꬊሌፌ ጊጌቲዳዝ ጊዶ።
LEV 2:6 ኔ ኡኬꬃዛ ባሴሬꬃዳ ኢዛ ቦላ ዎጋራ ሚꬃ ዛይቴ ጉሳዳ ካꬃ ያርሾ ሺሻ።
LEV 2:7 «ያርሾዚ ቄሪ ባሼን ኡኬቲዳ ኡኬꬃ ማላ ጊዲኮ ዎጋራ ሚꬃ ዛይቴይ ኢዛን ጉጄቲ ሙኑቄቲዳ ሊቆ ꬊሌፌ ጊጊዳዝ ጊዶ።
LEV 2:8 ካꬃ ያርሾ ጾሳስ ኢሜቲዛ ያርሾ ሂስታ ቄሴዛስ ኢማ፤ ቄሴዚካ ያርሾ ያርሺዛሶን ያርሾ።
LEV 2:9 ቄሴዚ ሄሳ ሄ ያርሾዛፔ ባጋ ኤኪዲ ኡባ ጎዳይ ኢዚ ሺሺዳይሳ ዩሺ ቆፓና ማላ ያርሾ ያርሺዛሶን ዲዛ ታማን ጹጎ፤ ሃይሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።
LEV 2:10 ያርሺሺን ኣቲዳይሲ ቃሴ ቄሴታስ ኢሜቶ፤ ሄሲካ ጎዳስ ሺቂዳ ያርሾፌ ሻኬቲ ኤኬቲዳ ጊሻስ ሃራታፔ ኬሂ ዱማቴስ።
LEV 2:11 «ጎዳስ ጹጌቲ ያርሼቲዛ ካꬃ ያርሾራ ሺቂዛ ኢርሾ ጊዲን ዎይኮ ኤስ ጊዲኮካ ኔ ታማን ጹጋናስ ቤሶንታ ጊሻስ ኔ ጎዳስ ሺሺዛ ካꬃ ያርሾን ኡባን ኣይኮ ኢርሾይካ ኢዛን ጌሎፖ።
LEV 2:12 ላይꬃን ላይꬃን ካꬅ ሺሺዛ ዎዴ ኮይሮ ማጼቲዳ ካꬃፌ ጼራ ያርሾ ኦꬂዲ ጎዳስ ኤኪ ዪቴ፤ ሄ ያርሾዚ ያርሾ ያርሺዛሶዛን ታማን ጹጌቶፎ።
LEV 2:13 ኣይ ቆሞ ካꬃ ያርሾንካ ማጺኔይ ꬋዮፖ፤ ሄሲ ኔኒ ኔ ጾሳራ ጫቄቲዳ ጫቆ ቃላስ ማላታ፤ ሄሳ ጊሻስ ኔ ሺሺዛ ካꬃ ያርሾ ኡባ ማጺኔራ ማልኢንꬃ ኦꬃ።
LEV 2:14 ካꬅ ሺሺዛ ኮይሮ ኣጊናን ካꬃ ጼራ ኔ ሺሺዛ ዎዴ ጫጬቲዲ ሺጌቼቲዳ ቲያ ጊዶ።
LEV 2:15 ሃይሲ ካꬃ ያርሾ ጊዲዳ ጊሻስ ኢዛ ቦላ ዎጋራ ሚꬃ ዛይቴኔ ኤጻኔ ጉጃ።
LEV 2:16 ቄሴዚካ ሄ ያርሾዛፔ ባጋ ኤኪዲ ኢዚ ጎዳስ ሺቂዳዝ ጊዲዳይሳ ኣኬኪሳና ማላ ዛይቴዛካ፥ ኤጻኔዛካ ኡባ ካꬃራ ኢሲፌ ጹጎ።
LEV 3:1 «ኣይ ኣሲካ ሳሮቴꬃ ጊሻስ ባ ሜሄፔ ጎዳስ ኢሲፌቴꬃ ያርሾ ሺሺዛ ዎዴ ኢዛ ቦላ ዎሶይ ባይንዳ ሚርጎ ዎይኮ ማጫ ሚዝ ዶሪዲ ኤሆ።
LEV 3:2 ያርሾ ኤሂዛዴይ ያርሾስ ኢዚ ሺሺዛ ሜሄዛ ቦላ ባ ኩሼ ዎꬂዲ ጋይቶቴꬃ ዱንካኔ ፔንጌ ማታን ሹኮ፤ ኣሮኔ ዜሬꬅ ጊዲዳ ቄሴቲ ሱꬃ ኢዛፔ ኤኪዲ ያርሾይ ያርሼቲዛሶዛ ሚሌዛ ቦላ ዩዪ ኣꬋናስ ዉጼቶ።
LEV 3:3 ኢሲፌቴꬃ ያርሾስ ሺቂዛ ያርሾዛፔ ጎዳስ ታማን ጹጌቲዛ ያርሾ ጊዲ ሺቃናይቲ ቃንꬃ ኣሾታ ጎዚ ኦይኪዳ ሃንዳ ኩሜꬅ፥
LEV 3:4 ኪላሆታኔ ኢስታ ቦላ ዲዛ ሃንዳ ሄሳꬆካ ቲሬ ጎዚ ኦይኪዳ ሃንዳታፔ ዶሬቲዳይታ።
LEV 3:5 ቄሴቲ ሄሳ ኡባ ሃራ ጹጌቲዛ ያርሾራ ጋꬂ ያርሾ ያርሺዛሶን ጹጌቶ፤ ሄሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።
LEV 3:6 «ኢሲፌቴꬃስ ሺቂዛ ያርሾይ ዶርሳፌ ዎይኮ ዴይሻፌ ጊዲኮ ኣዴ ዎይኮ ማጫ ጊዲዲ ኢስታ ቦላ ዎሶይ ባይንዳይታ ጊዴቶ።
LEV 3:7 ኢሲ ኣሲ ጎዳስ ሺሺዛ ያርሾይ ዶርሳ ላቃ ጊዲኮ፥
LEV 3:8 ባ ኩሼዛ ላቃ ሁኤ ቦላ ዎꬂዲ ዱንካኔዛ ፔንጌ ቦላ ሹኮ፤ ቄሴቲ ሱꬃ ኢዛፔ ኤኪዲ ያርሾ ያርሺዛሶዛ ቦላ ሚሌዛ ዩዪ ኣꬋናስ ዉጼቶ።
LEV 3:9 ኢሲፌቴꬃ ያርሾስ ሺቂዛ ያርሾዛፔ ጎዳስ ታማን ጹጌቲዛ ያርሾ ጊዲ ሺቃናይቲ ሃንዳዛኔ ዞኮ ሜቄꬃ ጋርሳፌ ቃንጼቲዳ ጎይና ኡባ፥ ቃንꬃ ኣሾ ጎዚ ኦይኪዳ ሃንዳ ኡባ፥
LEV 3:10 ኪላሆታኔ ኢስታ ጎዚ ኦይኪዳ ሃንዳ ኡባ ቃሴ ቲሬ ካሚ ኦይኪዳ ሎኦ ሃንዳ ኡባ፥
LEV 3:11 ቄሴዚካ ሄሳ ኡባ ጎዳስ ካꬃ ያርሾ ሂስቲ ሺሺዲ ያርሾ ያርሺዛሶዛ ቦላ ጹጎ።
LEV 3:12 «ኢሲ ኣሲ ጎዳስ ያርሾ ዴይሼ ሺሺዛ ጊዲኮ፥
LEV 3:13 ባ ኩሼ ዴይሻዛ ሁኤ ቦላ ዎꬂዲ ዱንካኔዛ ሲንꬃን ሹኮ፤ ቄሴቲ ሱꬃ ኢዛፔ ኤኪዲ ያርሾይ ያርሼቲዛሶዛ ቦላ ሚሌዛ ዩዪ ኣꬋናስ ዉጼቶ።
LEV 3:14 ሄ ሹኬቲዳ ኣሾዛፔ ሃይሳፌ ካሊዛ ኣሾ ቆሞታ ካꬃ ያርሾ ኦꬂዲ ጎዳስ ሺሼቶ፤ ሄይቲካ ቃንꬃ ኣሾ ካሚዛ ሃንዳ ኡባ፥
LEV 3:15 ኪላሆታኔ ኢስታ ጎዚ ኦይኪዳ ሃንዳ፥ ቃሴካ ቲሬ ካሚ ኦይኪዳ ሎኦ ሃንዳዛፔ ኤኬቶ።
LEV 3:16 ቄሴዚካ ሄሳ ታማን ጹጌቲ ሳዊዛ ያርሾ ኦꬂዲ ያርሾ ያርሺዛሶን ጹጎ፤ ሃንዳይ ዉሪ ጎዳስ ሻኬቲዲ ዱማቶ።
LEV 3:17 ኢስራኤሌ ናይታፔ ሃንዳ ሚዛዴይ ዎይኮ ሜሄ ሱꬅ ኡዪዛዴይ ዶፖ፤ ሄሲ ዉሪ ኢስራኤሌ ናይቲ ዲዛሶኒኔ ኢስቲ ዲዛ ዎዴ ኡባን ሜርናስ ኤቂ ዲዛ ዎጋ ጊዶ።»
LEV 4:1 ጾሲ ሙሴ ሂዝጊ ኣዛዚዴስ፤
LEV 4:2 «ኔኒ ኢስራኤሌ ናይታስ ዮታናይሲ ሃይሳ፤ ኦኒካ ኤሮንታ ባሌቴꬃን ናጋራ ኦꬂኮ ዎይኮ ኤሮንታ ጎዳ ኣዛዞታፔ ኢሳ ሞሪኮ ሃይሳፌ ካሊዛ ዎጋ ናጎ!
LEV 4:3 «ሄ ዎዴ ቲዬቲዳ ቄሴይ ናጋራ ኦꬂዲ ዴሬዚ ናጋራ ኦꬂዳ ሚሳቲሲ ቤቲኮ ኢዛ ቦላ ኢሲ ዎሶይካ ባይንዳ ኢሲ ሚርጎ ቦራ ኤሂዲ ባ ናጋራ ጊሻስ ጎዳስ ያርሾ ሺሾ።
LEV 4:4 ኮርማዛ ዱንካኔዛ ፔንጌ ኤሂዲ ባ ኩሼ ኢዛ ሁኤ ቦላ ዎꬂዲ ጎዳ ሲንꬃን ሹኮ።
LEV 4:5 ሄሳፌ ጉዬ ቄሴታ ሃላቃይ ሄ ቦራዛ ሱꬃፌ ጉꬃራ ኤኪዲ ጌዴ ዱንካኔዛ ጊዶ ጌሎ፤
LEV 4:6 ጎዳ ኬꬃ ማጋላሻስ ሲንꬃ ባጋራ ኤቂዲ ባ ቢራꬌ ሱꬃን ጌልꬂ ጌልꬂ ኬሲዲ ላፑንቶ ጋካናስ ዉጾ።
LEV 4:7 ኢዛፔ ጉꬃ ሱꬅ ኤኪዲ ዱንካኔዛ ጊዶን ኤጻኔ ያርሺዛሶዛን ኦይዱ ባጋራ ዲዛ ꬌሞታ ቦላ ዎꬆ፤ ሃንኮ ኣቲዳ ሱꬃ ዱንካኔዛን ጌሊዛ ፔንጌ ባጋራ ጹጌቲዛ ያርሾይ ያርሼቲዛሶ ጋርሳን ጉሶ።
LEV 4:8 ሄ ሚርጎዛ ሃንዳዛ ኡባ፥ ቃንꬃ ኣሾ ካሚ ኦይኪዳ ሃንዳዛካ፥
LEV 4:9 ኪላሆታካ ኢስታ ጎዚ ኦይኪዳ ሃንዳዛኔ ሄሳꬆካ ቲሬ ካሚ ኦይኪዳ ሞꬌዛፔ ዶሬቲዳይሳ ኤኮ።
LEV 4:10 ቄሴታ ሃላቃይ ሄሳ ኡባ ኤኪዲ ጹጌቲዛ ያርሾይ ሺቂዛ ያርሾሶዛ ቦላ ጹጎ፤ ኦሶዚካ ኢሲፌቴꬃስ ያርሾይ ሺቂዛ ሜሄዛ ሃንዳፌ ኤኪዲ ጹጌቲዛ ያርሾስ ሺቂዛ ማላ ሃኖ።
LEV 4:11 ጊዶ ኣቲን ጋልባዛ፥ ኣሾዛ፥ ሁኤዛኔ ቶሆታ፥ ማራጬዛራኔ ቃንꬃ ኣሾ፥
LEV 4:12 ሄራፔ ጌዴ ካሬ ኬሶ፤ ጌዴ ቢዲንꬅ ኬሲ ቆሊዛሶ፥ ቱኖንታሶ ኤፊዲ ሚꬂ ሺሺዲ ታማን ጹጎ።
LEV 4:13 «ኢስራኤሌ ኣሳይ ኤሮንታ ባላ ኦꬂኮ ዎይኮ ኤሮንታ ጎዳ ኣዛዞፔ ኢሲኖ ሞሪዳ ጊዲኮ ሄ ናጋራይካ ኣሳፔ ጌሚኮ፥
LEV 4:14 ሄ ኦሴቲዳ ናጋራይ ኤሬቲዳ ማላ ሄራካ ዴሬዚ ሄ ናጋራ ጊሻስ ያርሾስ ኢሲ ሚርጎ ኤሆ፤ ኢዛካ ኣሳይ ጋይቶቴꬃ ዱንካኔ ሲንꬄ ሺሾ።
LEV 4:15 ዴራ ሃላቃቲ ባንታ ኩሼ ሚርጎዛ ሁኤ ቦላ ዎꬂን ሄን ቦራዚ ጎዳ ሲንꬃን ሹኬቶ።
LEV 4:16 ቲዬቲዳ ቄሴይ ሄ ሚርጎዛ ሱꬃፌ ጉꬃራ ኤኪዲ ጌዴ ዱንካኔዛን ጌሎ፤
LEV 4:17 ጎዳ ኬꬃ ማጋላሻስ ሲንꬃ ባጋራ ጊዲዲ ባ ኩሼ ቢራꬌታ ላፑንቶ ሱꬃን ጌልꬂ ጌልꬂ ኬሲዲ ጾሳ ሲንꬃን ዉጾ።
LEV 4:18 ቃሴካ ጉꬃ ሱꬅ ኤኪዲ ዱንካኔ ጊዶን ዲዛ ኤጻኔ ኢዛ ቦላ ያርሺዛሶዛስ ኦይዱ ባጋራ ዲዛ ꬌሞታ ቦላ ዎꬆ፤ ኣቲዳ ሱꬃ ቃሴ ጌዴ ዱንካኔን ጌሊዛሶን ጹጌቲዛ ያርሾይ ያርሼቲዛሶዛ ጋርሳን ጉሶ።
LEV 4:19 ሄሳፌ ቃሴ ሄ ሚርጎ ሞꬌዛ ኡባ ኤኪዲ ያርሾ ያርሺዛሶዛ ቦላ ጹጎ።
LEV 4:20 ኦሶዚ ዉሪካ ናጋራ ጊሻስ ሺቂዛ ሚርጎ ያርሺዛይሳꬆ ኦꬄቶ፤ ቲዬቲዳ ቄሴዚ ዴራፔ ናጋራ ዲጋና፤ ዴራሲካ ኣቶ ጌቴታና።
LEV 4:21 ሄሳፌ ጉዬ ሚርጎዛ ኣሳይ ዲዛሶፔ ጌዴ ካሬ ኬሲዲ ባ ናጋራ ጊሻስ ሺሺዳ ሚርጎዛ ካሴ ጹጎይሳꬆ ጹጎ፤ ሄሲካ ዴሬዛ ናጋራፔ ጌሺዛ ያርሾ ጊዳና።
LEV 4:22 «ናጋራ ኦꬂዳዴይኔ ኤሮንታ ዲሼ ባሌቴꬃን ጎዳ ባ ጾሳ ኣዛዞታፔ ኢሲኒዮ ሞሪዳዴይ ኢዚ ዴሬ ካሌꬂዛዴ ጊዲኮ፥
LEV 4:23 ባ ኦꬂዳ ናጋራ ኢዚ ኤሪዳ ማላ ሄራካ ኢሲ ቦሬይ ኢዛ ቦላ ባይንዳ ዴይሻ ኦርጌ ባ ናጋራፔ ማሬታናስ ያርሾ ሺሾ።
LEV 4:24 ባ ኩሼ ዴይሻ ሁኤ ቦላ ዎꬂዲ ያርሾ ያርሺዛሶዛፔ ፑዴሃ ባጋራ ጹጌቲዛ ያርሾስ ሺቂዛ ሜሄቲ ሹኬቲዛሶን ጎዳ ሲንꬃን ሹኮ። ሄሲካ ናጋራ ዲጊዛ ያርሾ ጊዳና።
LEV 4:25 ቄሴዚ ሄ ሹኬቲዳ ሜሄዛ ሱꬃን ባ ቢራꬌታ ጌልꬂ ጌልꬂ ኬሲዲ ኦይዱ ባጋራ ዲዛ ꬌሞታ ቲዮ፤ ኢዛፔ ኣቲዳ ሱꬃ ያርሾይ ያርሼቲዛሶዛ ጋርሳን ጉሶ።
LEV 4:26 ሃንዳዛ ኡባ ያርሾ ያርሺዛሶዛ ቦላ ጹጎ፤ ሄ ኦሶይ ካሴ ኢሲፌቴꬃ ያርሾስ ሺሺዳ ሜሄታ ሃንዳ ጹጎይሳꬆ ኦꬄቶ፤ ሄሳꬆ ቄሴዚ ዴሬዛ ካሌꬂዛዴ ናጋራ ዉርሳናስ ያርሾ ሺሾ፤ ኢዛስካ ኣቶ ጌቴታና።
LEV 4:27 «ናጋራ ኦꬂዳዴይኔ ኤሮንታ ዲሼ ባሌቴꬃን ጎዳ ኣዛዞታፔ ኢሲኒዮ ሞሪዳዴይ ሃንኮ ዴራ ጊዶፌ ጊዲኮ፥
LEV 4:28 ባ ኦꬂዳ ናጋራ ኢዚ ኤሪዳ ማላ ሄራካ ኢዚ ቦላ ኢሲ ቦሬይካ ባይንዳ ማጫ ዴይሽ ባ ናጋራ ጊሻስ ሺሾ።
LEV 4:29 ባ ኩሼ ሄ ዴይሻይ ሁኤ ቦላ ዎꬆ፤ ያርሾ ያርሺዛሶፔ ፑዴሃ ባጋራ ጹጌቲዛ ያርሾስ ሺቂዛ ሜሄቲ ሹኬቲዛሶን ሹኮ።
LEV 4:30 ቄሴዚካ ሄ ሹኬቲዳ ዴይሻይ ሱꬃን ባ ቢራꬌታ ጌልꬂ ጌልꬂ ኬሲዲ ኦይዱ ባጋራ ዲዛ ꬌሞታ ቲዮ፤ ኢዛፔ ኣቲዳ ሱꬃ ያርሾይ ያርሼቲዛሶዛ ጋርሳን ጉሶ።
LEV 4:31 ኢሲፌቴꬃስ ሺቂዛ ያርሾስ ሺቂዛ ሜሄታ ሞꬌ ቦላራ ሾቂ ኬሲዛይሳꬆ ሃይሳ ሃ ሜሄዛ ሞꬌካ ኡባ ቦላራ ሾቂ ዲጎ፤ ሳዎዚ ጎዳ ኡፋይሲዛ ያርሾ ኦꬂዲ ያርሺዛሶዛ ቦላ ጹጎ፤ ሄሳꬆ ቄሴዚ ሄ ኣዴዛ ናጋራ ኢዛፔ ዲጋናስ ያርሾ ሺሾ፤ ኢዛዴስካ ኣቶ ጌቴታና።
LEV 4:32 «ሄ ኣዴዚ ባ ናጋራፔ ማሬታናስ ያርሾስ ዶርስ ሺሻና ኮይኮ ኢዚ ቦላ ኣይኮ ቦሬይ ባይንዳ ማጫ ዶርስ ሺሾ።
LEV 4:33 ኢዛዴይካ ዶርሳይ ሁኤ ቦላ ባ ኩሼ ዎꬆ፤ ያርሾ ያርሺዛሶፔ ፑዴሃ ባጋን ጹጌቲዛ ያርሾስ ሺቂዛ ሜሄቲ ሹኬቲዛሶን ሹኮ።
LEV 4:34 ቄሴዚ ቃሴ ዶርሳይ ሱꬃን ባ ቢራꬌ ጌልꬂ ጌልꬂ ኬሲዲ ያርሾ ያርሺዛሶዛስ ኦይዱ ባጋራ ዲዛ ꬌሞታ ሱꬃራ ቲዮ፤ ኢዛፔ ኣቲዳ ሱꬃ ያርሾ ያርሺዛሶ ጋርሳን ጉሶ።
LEV 4:35 ሄሳፌ ካሊዲ ኢሲፌቴꬃ ያርሾስ ሺቂዛ ሜሄታ ሞꬌ ሾቂ ኤኪዛይሳ ማላ ሃ ዶርሳይ ሞꬌካ ኡባ ሾቂ ዲጎ፤ ሄሳካ ጎዳስ ሺቂዛ ካꬃ ያርሾስ ሺሺዛሶዛ ቦላ ጹጎ፤ ሄሳꬆ ቄሴዚ ሄ ኣዴዛ ናጋራ ኢዛፔ ዲጋናስ ያርሾ ሺሾ፤ ኢዛዴስካ ኣቶ ጌቴታና።
LEV 5:1 «ኢሳዴይ ባ ቤኢዳ ሚሼ ማርካታና ማላ ፒርዳ ፒርዲዛሶ ጼይጌቲዲ ባ ቤኢዳይሳ ዎይኮ ባ ኤሪዛይሳ ማርካቶንታ ኢጺኮ ሄሲ ኢዛስ ናጋራ ጊዳና፤ ሄሳ ጊሻስ ኢዛዴይ ኦይሼታና።
LEV 5:2 «ኣይ ኣሲካ ኤሮንታ ዲሼ ዎጋን ዲጌቲዳ ዶኣታ ባዉታ፥ ሜሄታ ባዉታ ዎይኮ ቲራን ቢታራ ጎሼቲዛ ሜꬌቴꬃታ ባዉታ ቦቺዳዴይ ቱኔስ፤ ሄሲካ ኢዛዴስ ናጋራ ጊዴስ።
LEV 5:3 «ኣይ ኣሲካ ኤሮንታ ዲሺን ኣሳፔ ጎጊ ኬዚዲ ቱኒሲዛ ሚሽ ቦቺኮ ኢዛዴይ ሄሳ ኤሪዳ ጋላሳፌ ዶሚዲ ኢዛስ ናጋራ ጊዴስ።
LEV 5:4 «ኣይ ኣሲካ ኢታስ ጊዲን ኪያስ ጊዲን ዩሺ ቆፖንታ ጮ ሜላ ኣዲና ኣዲኔቲኮ ኢዛዴይ ኦꬂዳ ሞሮዛ ዛሪ ኣኬኪዳ ዎዴፔ ዶሚዲ ኢዛዴስ ናጋራ ጊዳና።
LEV 5:5 «ኣይ ኣሲካ ሃይታ ሃ ሚሻታፔ ኢሳን ቆሂ ቤቲኮ ባ ናጋራ ቆንጪሲ ፓጻናስ ቤሴስ።
LEV 5:6 ኢዛዴይ ባ ናጋራ ጊሻስ ማጫ ዶርስ ዎይኮ ማጫ ዴይሽ ያርሻናስ ኤሆ፤ ቄሴይካ ኢዛፔ ኤኪዲ ኢዛዴ ናጋራ ዉርሳናስ ጎዳ ሲንꬃን ያርሾ።
LEV 5:7 «ኣይ ኣሲካ ባ ኦꬂዳ ናጋራ ጊሻስ ዶርስ ዎይኮ ዴይሼ ሺሻናስ ዳንዳዮንታዝ ጊዲኮ ናምኡ ሃራጴታ ዎይኮ ሃራጴ ጪዬታ ኤሂዲ ኢሲኒዮ ናጋራ ያርሾስ ናምኣንꬃዮካ ጹጌቲዛ ያርሾስ ጾሳ ሲንꬅ ሺሾ።
LEV 5:8 ኤሂዲ ቄሴዛስ ኢሞ፤ ቄሴዚካ ቆሆ ያርሾስ ሺቂዛ ካፎይ ቆꬌ ቃንጾንታ ሚርቂዲ ቆሆ ያርሾስ ሺሾ።
LEV 5:9 ሱꬃፌ ጉꬃራ ኤኪዲ ያርሾ ያርሾዛሶዛ ቦላ ዩዪ ኣꬋናስ ዉጾ፤ ኣቲዳ ሱꬃ ያርሾ ያርሺዛሶ ጋርሳን ዉጾ፤ ሄሲካ ናጋራ ዉርሶ ያርሾ ጊዳና።
LEV 5:10 ሃንኮ ኣቲዳ ካፎዮ ዲዛ ዎጋ ማላ ጹጌቲዛ ያርሾ ሂስቲ ሺሾ፤ ሄሳꬆ ኦꬂዲ ቄሴዚ ኢዛዴ ናጋራ ዉርሳናስ ያርሾ፤ ኢታ ኦꬂዳዴስ ኢዛ ናጋራይ ኣቶ ጌቴታና።
LEV 5:11 ኢዛዴይ ናምኡ ሃራጴታ ሺሻናስ ዳንዳዮንታይሳ ጊዲኮ ባ ናጋራ ጊሻስ ኢሲ ኪሎ ሊቆ ꬊሌ ኤሆ፤ ሄሲካ ናጋራ ያርሾስ ጊዲዛ ጊሻስ ዎጋራ ዛይቴይ ዎይኮ ኤጻኔይ ኢዛን ጉጄቶፎ።
LEV 5:12 ኢዛካ ኤሂዲ ቄሴዛስ ኢሞ፤ ቄሴዚካ ሄ ꬊሌዛፔ ባ ኩሼን ኩጳቲ ኤኪዲ ጎዳስ ሺቂዛ ካꬃ ያርሾራ ኢሲፌ ጋꬂ ሃሳኢሳናስ ያርሾ ያርሺዛሶዛ ቦላ ጹጎ፤ ሄሲካ ናጋራ ጊሻስ ሺቂዛ ያርሾ።
LEV 5:13 ኣይ ኣሲካ ሃይታንታ ማላ ናጋራታፔ ኢሳ ኦꬂኮ ቄሴዚ ሄሳ ማላ ኦꬂዲ ኢዛዴይ ኦꬂዳ ናጋራ ዉርሳናስ ያርሾ ሺሾ፤ ሄሳዴስካ ኣቶ ጌቴታና፤ ሃንኮ ኣቲዳ ꬊሌይ ካꬃ ያርሾይ ቄሴዛስ ኣቲዛ ማላ ኢዛስ ጊዶ።»
LEV 5:14 ጎዳይ ሙሴስ ሂዝጊዴስ፥
LEV 5:15 «ኣይ ኣሲካ ጎዳስ ኢማናስ ቤሲዛይሳ ኤሮንታ ኣጊዲ ኢሞንታ ኣጊኮ ኢዛስ ናጋራ ጊዲዳ ጊሻስ ኢሲ ዎሶይ ኢዛ ቦላ ባይንዳ ꬋርሾ ቆሆስ ጊዲዛ ያርሾ ጎዳስ ሺሾ፤ ኢዛ ዋጋ ሄሬጋይካ ካሴ ጾሳ ኬꬃን ኤሬቲዳ ሄሬጋ ማላ ጊዶ፤ ሄሲካ ቆሆ ጊሻስ ሺቂዛ ያርሾ።
LEV 5:16 ጎዳስ ኢማናስ ቤሲሺን ኢዛዴይ ኢሞንታ ኣጊዳይሳ ጪጎ፤ ሄሳፌካ ቦላራ ሃይሳ ሃ ሄሬጋስ ኢቻሻፔ ኢሲ ኩሼ ጉጂዲ ቄሴዚካ ኢዚ ኤሂዳ ꬋርሻራ ጋጊዲ ናጋራ ያርሾ ኦꬂዲ ኤሂዳዴ ናጋራ ዉርሳና፤ ሄ ሞሮ ኦꬂዳይሲ ኣቶ ጌቴታና።
LEV 5:17 «ኣይ ኣሲካ ኤሮንታ ዲሼ ጎዳይ ኦꬆፍቴ ጊዳ ኣዛዞታፔ ኢሲኒዮ ሞሪኮ ኢዛዴስ ናጋራ፤ ሄ ናጋራ ጊሻስ ኢዛዴይ ኦይሼታና።
LEV 5:18 ኢዛዴይካ ባ ሞሪዳ ሞሮዛ ጊሻስ ባ ሜሄታ ጊዶፌ ኢዛ ቦላ ኢሲ ዎሶይ ባይንዳ ꬋርሾ ቄሴዛኮ ኤሆ፤ ኢዚ ኤሂዳይሳ ዎጋይ ካሴ ቆሆ ያርሾስ ጪጊዛ ዋጋ ኬሲዛዝ ጊዶ፤ ቄሴዚካ ሄሳꬆ ኣሲ ኤሮንታ ኦꬂዳ ሞሮዛ ጌሾ፤ ኢዛዴይካ ማሬታና።
LEV 5:19 ሄሲካ ቆሆ ጊሻስ ሺቂዛ ያርሾ፤ ኢዛዴይካ ጎዳ ሲንꬃን ሞሮ ኦꬂዳ ጊሻስ ናጋራንቻ።»
LEV 6:1 ጎዳይ ሙሴስ ሂዝጊዴስ፥
LEV 6:2 «ኦኒካ ኣሲ ኢዛስ ሃዳራ ዎይኮ ታልኤ ኢሚዳ ሚሽ ካዲዲ ባ ላጌ ባሌꬆን ናጋራ ኦꬂዲ ሄሳን ጎዳ ሚሺሲኮ ዎይኮ ኣሳ ሚሼ ቦንቂ ኤኪኮ ዎይኮ ባሌꬂኮ፥
LEV 6:3 ዎይኮ ኣሳፔ ዎꬊ ꬋይዳ ሚሼ ዴሚ ኤኪዲ ታ ቤያቤኬ ጊ ዎርዶራ ጫቂኮ ኣሲ ኦꬂዛ ሃ ሞሮታ ኡባፌ ኢሲኔይን ቆሂኮ፥
LEV 6:4 ኣይ ኣሲካ ሃይሳ ማላ ናጋራ ኦꬂኮ ኢዚ ካይሶን ኤኪዳይሳ ኢዛስ ሃዳራ ኢሜቲዳይሳ ዎይኮ ꬋዪን ዴሚ ኤኪዳይሳ ዛሮ።
LEV 6:5 ዎርዶራ ጫቂ ኤኪዳይሳ ኡባ ቆሆ ያርሾ ሺሺዛ ዎዴ ካሴ ባ ኤኮይሳ ቦላ ኢቻሻፔ ኢሲ ኩሼ ጉጂዲ ዛሮ።
LEV 6:6 ባ ቆሂዳይሳስ ኤዳ ጊዳና ማላ ኢዛ ቦላ ኢሲ ዎሶይ ባይንዳ ꬋርሾ ጎዳስ ያርሻና ማላ ቄሴኮ ኤሆ፤ ኢዛ ዎጋይካ ካሴ ቆሆ ያርሾስ ጪጌቲዛ ዋጋ ኬሲዛዝ ጊዶ።
LEV 6:7 ቄሴዚካ ሄ ኣዴዛ ናጋራ ዲጋና ማላ ጎዳ ሲንꬃን ያርሾ፤ ኢዛዴስካ ኣቶ ጌቴታና።»
LEV 6:8 ጎዳይ ሙሴ ሂዝጊዴስ፥
LEV 6:9 «ኔኒ ኣሮኔሲኔ ኢዛ ናይታስ ኢስቲ ናጋና ማላ ኔ ኢስታስ ኢማና ኣዛዞይ ሃይሳፌ ካሊዛይሳ፤ ጹጌቲዛ ያርሾይ ፓጬይ ባይንዳ ጋዴይ ዎንታና ጋካናስ ያርሺዛሶዛ ቦላ ኡባ ዎዴ ታማይ ኤጺሼ ኣቆ።
LEV 6:10 ቄሴዚ ላይኖፔ ዳዴቲዳ ቃሚሳኔ ሱሬ ማይኢዲ ጹጌቲዛ ያርሾዛ ታማይ ሚዳይሳፌ ጉዬ ኣቲዳ ቢዲንꬃ ሄፔ ያርሾ ያርሺዛሶዛፔ ሚሌ ባጋራ ቆሎ።
LEV 6:11 ሄሳፌ ጉዬ ባ ማይኢዳ ማይኦ ላሚዲ ቢዲንꬃዛ ቶኪ ኤኪዲ ኣሲ ዲዛሶፔ ጌዴ ካሬ ኬሲዲ ማራራ ሎኦሶን ቆሎ።
LEV 6:12 ያርሺዛሶ ቦላ ዲዛ ታማይ ቶኦንታ ኡባ ዎዴ ኤጺሼ ዶ፤ ኣይዴካ ቶኦፖ፤ ቄሴዚካ ዎንታ ዎንታ ታማን ሚꬅ ጉጆ፤ ኢዛ ቦላ ጹጌቲዛ ያርሾ ኡባ ዎዴ ጊግሲ ዎꬂዲ ኢሲፌቴꬃ ያርሾስ ሺቂዛ ሃንዳ ጹጎ።
LEV 6:13 ያርሾ ያርሺዛሶዛ ቦላ ዲዛ ታማይ ኡባ ዎዴ ቶኦንታ ኤጻናስ ቤሴስ።
LEV 6:14 «ካꬃ ያርሾ ሺሾ ጊሻስ ዎꬂዳ ዎጋቲ ሃይሳፌ ካሊዛይታ፤ ኣሮኔ ባጋፌ ጊዲዳ ቄሴዚ ካꬃ ያርሾ ያርሺዛሶ ሲንꬃ ባጋራ ጾሳስ ያርሾ።
LEV 6:15 ካሌꬂዲ ዛይቴራ ዲዛ ሊቆ ꬊሌ ኩጳቲ ኤኪዲኔ ካꬃ ያርሾ ቦላ ዲዛ ኤጻኔዛ ኡባ ዴንꬂዲ ጎዳስ ሺሺዳይሳ ኤሪሳና ማላ ያርሾ ሺሺዛሶ ቦላ ጹጎ፤ ሄሳ ሳዎይካ ጎዳ ኡፋይሲዛ ያርሾ ጊዳና።
LEV 6:16 ሄሳፌ ኣቲዳይሳ ቄሴቲ ሜቶ፤ ኢዛንካ ኢርሾይ ጌሎንታ ዲሺን ኡኪዲ ጎዳይ ዎሴቲዛ ጌሻ ዱንካናሲ ሲንꬃ ባጋራ ዲዛ ዴምባ ቦላ ሜቶ።
LEV 6:17 ሄሲካ ኢዛን ኢርሾይ ጌሎንታ ኡኬታናስ ቤሴስ፤ ታኒ ጎዳይ ታማን ጹጌቲዛ ካꬃ ያርሾፌ ሃይሳ ኢስታ ጊሻ ሂስታ ኢማዲስ፤ ሄሲካ ናጋራ ጊሻሲኔ ቆሆ ጊሻስ ሺሺዛ ያርሾ ማላ ዉሪካ ኬሂ ዱማቲዳዛ።
LEV 6:18 ዎዴ ዎዴናስ ኣሮኔ ዜሬꬃፌ ኣቱማ ጊዲ ዬሌቲዳይ ዉሪ ጎዳስ ሺቂዛ ያርሾፌ ሻኬቲዲ ዱማ ኢዛስ ጊሻ ኢሜቲዳይሲ ሄሲ ኢዛስ ጊሻ ጊዲዳ ጊሻስ ኢዚ ባ ጊሻ ማናስ ዳንዳዬስ፤ ኦኒካ ሄሳ ሄ ያርሾዛ ቦቺዳዴይ ጎዳስ ዱማቲዳዴ ጊዳና ቤሴስ።»
LEV 6:19 ጎዳይ ሙሴስ ሂዝጊዴስ፥
LEV 6:20 «ኣሮኔይ ዎይኮ ኢዛ ዜሬꬃቲ ቄሴቴꬃን ሹሜቲዛ ጋላስ ኢስቲ ጾሳስ ሺሻና ካꬃ ያርሾይ ኡባ ዎዴ ኢሲ ኪሎ ጊዲዛ ሊቆ ꬊሌ ካꬃ ያርሾ ኦꬂዲ ጎዳስ ሺሼቶ፤ ሄሳፌ ባጋ ማላዶ፥ ባጋ ኦማርስ ያርሼቶ።
LEV 6:21 ዛይቴን ሎኤꬂ ሙኑቄቲዲ ባሼን ኡኬቶ። ሄሳፌ ጉዬ ካꬃ ያርሾዛ ባሴሬꬂዲ ሳዎዚ ጎዳ ኡፋይሲዛ ሳዎ ጊዳና ማላ ጾሳስ ሺቆ።
LEV 6:22 ሃይሳፌ ያና ላይꬃታን ቄሴ ጊዲዲ ኦꬂዛ ኣሮኔ ዜሬꬂ ዉሪካ ሃይሳ ሃ ዎጋ ፖሎ፤ ሃይሲ ጾሳስ ሺቂዛ ያርሾ ጊዲዲ ሙሌራ ጹጌቶ።
LEV 6:23 ቄሴዚ ሺሺዛ ካꬃ ያርሾዚ ኩሜꬅ ጹጌቶ ኣቲን ኣሲ ኢዛፔ ሞፖ።»
LEV 6:24 ጎዳይ ሙሴ ሂዝጊ ኣዛዚዴስ፥
LEV 6:25 «ኣሮኔሲኔ ኢዛ ናይታስ ኔ ሂዝጋ ዮታ፥ ‹ናጋራ ጊሻስ ያርሼቲዛ ያርሾ ዎጋይ ሃይሳፌ ካሊዛይሳ፥ ጹጌቲዛ ያርሾ ሜሄይ ሹኬቲዛሶን ናጋራ ጊሻስ ያርሼቲዛ ያርሾ ሜሄይካ ሄን ጎዳ ሲንꬃን ሹኬቶ፤ ሄሲካ ኬሂ ዱማ ያርሾ።
LEV 6:26 ሄ ያርሾዛካ ሺሺዛ ቄሴዚ ዱማቲዳሶን ጋይቶቴꬃ ዱንካኔዚ ዲዛ ጊቤዛ ጊዶን ዲዛ ዴምባን ኣሾዛ ሞ።
LEV 6:27 ኣስ ጊዲን ሃራ ኣይ ሚሺካ ሄ ኣሾዛ ቦቺኮ ዱማታና፤ ሄ ሜሄዛ ሱꬂ ኢዛ ቦላ ፒንጺዳ ኣይ ማይኦይካ ጾሳስ ዱማቲዳሶን ሜጬቶ።
LEV 6:28 ሄ ኣሾይ ኢዛን ዶይሴቲዳ ማና ሚሺ ሜቆ፤ ኣሾይ ጻርቂማላ ቢራታን ዶይሴቲኮ ሄ ጻርቂማላ ቢራታዚ ቂጬቲዲ ሃꬃን ሜጬቶ።
LEV 6:29 ቄሴታ ዜሬꬃፌ ጊዲዳ ኣቱማ ና ኡባይ ሄሳ ሄ ያርሾዛፔ ሞ፤ ሄሲካ ኬሂ ዱማ ያርሾ።
LEV 6:30 ጊዶ ኣቲን ናጋራ ጌሾስ ኦሴቲዛ ዎጋን ሱꬃይ ጋይቶቴꬃ ዱንካኔ ጊዶ ጌሊዳ ጊዲኮ ሄ ሜሄዛ ኣሾዚ ታማን ጹጌቶ ኣቲን ሜቴቶፎ።
LEV 7:1 « ‹ኬሂ ዱማ ጊዲዳ ጊሻስ ቆሆ ጋሶን ሺቂዛ ያርሾ ዎጋይ ሃይሳፌ ካሊዛይሳ፥
LEV 7:2 ቆሆ ያርሾስ ሺቂዳ ሜሄይ ጹጌቲዛ ያርሾስ ሺቂዛ ሜሄቲ ሹኬቲዛሶን ሄን ሹኬቶ፤ ሱꬃካ ያርሾ ያርሺዛሶዛ ቦላ ዩዪ ኣꬋናስ ዉጼቶ።
LEV 7:3 ሞꬌ ኡባ ሺሾ፤ ሄሲካ ጎይና ሃንዳ፥ ቃንꬃ ኣሾ ጎዚ ኦይኪዳ ሞꬌይ፥
LEV 7:4 ኪላሆታ፥ ኢስታ ካሚ ኦይኪዳ ሞꬌታኔ ሄሳꬆካ ቲሬ ካሚ ኦይኪዳ ሞꬌታ ኢሲ ቦላ ያርሼቶ።
LEV 7:5 ያርሾ ያርሺዛሶን ዲዛ ሞꬌ ኡባ ቄሴዚ ጾሳስ ታማን ጹጊ ያርሾ፤ ሄሲካ ቆሆ ጊሻስ ሺቂዛ ያርሾ።
LEV 7:6 ቄሴታ ዜሬꬅ ጊዲዳ ኣቱማ ኣሲ ኡባይ ሄ ያርሾዛ ኣሾ ሞ፤ ጊዶ ኣቲን ሄ ያርሾዚ ዱማ ጊዲዳ ጊሻስ ኢዛስ ዱማ ጊጌቲዳሶን ሞ።
LEV 7:7 « ‹ናጋራ ዉርሳናስ ሺቂዛ ያርሾሲኔ ቆሆስ ሺቂዛ ያርሾ ጊዶን ናምኣታስካ ኦꬂዛ ኢሲ ዎጋይ ዴስ፤ ሄሲካ ሄ ሹኬቲዛ ሜሄዛ ኣሾይ ያርሾዛ ሺሺዛ ቄሴዛስ ማና ማላ ኢዛስ ኢሜቴስ።
LEV 7:8 ጹጌቲዛ ያርሾስ ሺቂዛ ሜሄዛ ጋልባይ ሾቄቲዲ ያርሾዛ ያርሺዳ ቄሴዛስ ኢሜቴስ።
LEV 7:9 ታማ ጮጬን ኮምፔቲዳ ካꬃ ያርሾይ ዉሪ ዎይኮ ዶይሲዛ ሚሻን ዶይሴቲዳዚኔ ባሼን ኡኬቲዳ ካꬃ ያርሾ ኡባይ ያርሾ ሺሺዛ ቄሴዛስ ኢሜቶ።
LEV 7:10 ዛይቴን ሙኑቄቲዳዝ ጊዲኮ ዎይኮ ጮ ሙኑቄቶንታ ካꬃ ያርሾ ኡባይ ኣሮኔ ዜሬꬃታፔ ጊዲዳ ቄሴታስ ኡባስ ኢሜቶ፤ ኢስቲካ ኢዛ ባ ጋርሳን ኢሲ ጊና ጊሼቲ ኤኬቶ።
LEV 7:11 « ‹ኣሲ ጎዳስ ሺሺዛ ኢሲፌቴꬃ ያርሾ ዎጋይ ሃይሳፌ ካሊዛይሳ፤
LEV 7:12 ኢሲ ኣሲ ጎዳስ ጋላታ ያርሾ ሺሻና ኮይኮ ባ ኤሂዛ ጋላታ ያርሾዛራ ኢርሾይ ኢዛን ጌሎንታ ዛይቴን ሙኑቄቲ ኡኬቲዳ ኡኬꬅ፥ ኢርሾይ ኢዛን ጌሎንታ ሌኤን ኡኬቲዲ ዛይቴን ቲዬቲዳ ኡኬꬅ፥ ሊቆ ꬊሌፌ ዛይቴን ሙኑቄቲዳ ኡኬꬅ ያርሾ።
LEV 7:13 ጋላታስ ሺቂዛ ኢሲፌቴꬃ ያርሾዛራ ጋꬂ ኢሞታስ ጊዳና ማላ ኢርሾን ሙኑቄቲ ኡኬቲዳ ኡኬꬅ ሺሾ።
LEV 7:14 ኡኬቲዳ ዱማ ዱማ ቆሞ ኡኬꬃታፔ ኢሲ ኢሲ ኡኬꬅ ጎዳስ ዱማ ያርሾ ሂስቲ ሺሾ፤ ሄ ኢሲፌቴꬃ ያርሾስ ሺቂዛ ሱꬃ ኤኪዲ ያርሾ ሺሺዛሶዛ ዩዪ ኣꬋናስ ዉጺዛ ቄሴዛስ ጊሻ ጊዶ።
LEV 7:15 ጋላታስ ሺቂዛ ኢሲፌቴꬃ ያርሾዛስ ሺቂዛ ኣሾይ ሄ ያርሼቲዛ ጋላስ ሜቴቶ ኣቲን ሃራ ጋላሳስ ኣቶፎ።
LEV 7:16 ኢሲ ኣሲ ሺሺዛ ያርሾይ ኣዲና ጋሶ ዎይኮ ባ ዶሳን ጮ ኢሚዛ ኢሲፌቴꬃ ያርሾ ጊዲኮ ሄ ያርሾዚ ሺቂዳ ጋላስ ሜቴቶ፤ ኢዛፔ ኣቲዳ ኡባይ ዎንቴꬃ ጋላስ ሜቴቶ።
LEV 7:17 ሄሳፌካ ቲርፒዲ ሄꬓንꬆ ጋላስ ጋካናስ ኣቲዳ ኣሾይ ታማን ጹጌቶ፤
LEV 7:18 ሄꬓንꬆ ጋላስ ጋካናስ ኣቲዳ ኣይ ኣሾይካ ሜቴቲዛ ጊዲኮ ሄ ያርሾዛ ሺሺዳዴ ያርሾዚ ኤኬቴና፤ ያርሾዚ ያርሼቲዳ ማላ ቆዴቴና፤ ሄ ያርሾይካ ቱና ጊዲ ቆዴታና፤ ሄ ኣሾዛ ሚዳዴይ ባ ናጋራን ኦይሼታና።
LEV 7:19 « ‹ቱና ጊዲዳዛራ ቦሼቲዳ ኣሾይ ታማን ጹጌቶ ኣቲን ሜቴቶፎ፤ ሃንኮ ቱኖንታ ኣቲዳ ኣሾዛ ዎጋ ማላ ባና ጌሻቴꬃን ናጊዳዴይ ሞ።
LEV 7:20 ጊዶ ኣቲን ጌሽ ጊዶንታ ኣይ ኣሲካ ጾሳስ ሺቂዛ ኢሲፌቴꬃ ያርሾ ኣሾዛ ሚኮ ጎዳ ዴራ ጊዶፌ ሻኬቲ ኪቾ።
LEV 7:21 ኣይ ኣሲካ ጌሽ ጊዶንታ ሚሽ ዎይኮ ሜዶሳታኔ ጎጊዛ ቱና ሚሽ ቦቺዲ ኢሲፌቴꬃስ ሺቂዛ ያርሾ ኣሾ ሚኮ ሄሳዴይ ጎዳ ዴራ ጊዶፌ ሻኬቲ ꬋዮ።› »
LEV 7:22 ጎዳይ ሙሴስ፥
LEV 7:23 «ኔኒ ኢስራኤሌ ኣሳስ፥ ‹ቦራ ዎይኮ ሚዛ ሞꬌ፥ ዶርሳ ሞꬌ ዎይኮ ዴይሻ ሞꬌ ሞፒቴ።
LEV 7:24 ባዉታ ሃይቂዳ ሜሄ ሞꬌይ ዎይኮ ዶኣይ ዎꬊዳ ሜሄ ሞꬌይ ሃራ ኦሶስ ኤኬቶ ኣቲን ኣይ ኣሲካ ኢዛ ሞፖ።
LEV 7:25 ጹጌቲ ጎዳስ ያርሾ ሺቂዛ ሜሄ ሞꬌ ሚዛዴይ ኦኒካ ጾሳ ዴራ ጊዶፌ ሻኬቲ ꬋዮ።
LEV 7:26 ኢንቴ ኣዋን ዲኮካ ኢንቴ ዲዛሶን ካፎ ሱꬅ ዎይኮ ሜሄ ሱꬅ ኡዮፒቴ፤
LEV 7:27 ሱꬅ ኡዪዛዴይ ኦኒካ ጾሳ ዴሬ ጊዶፌ ሻኬቲ ꬋዮ› ጊ ዮቲዴስ» ጊዴስ።
LEV 7:28 ጎዳይ ሙሴስ፥
LEV 7:29 «ኔኒ ኢስራኤሌ ኣሳስ፥ ‹ኣይ ኣሲካ ኢሲፌቴꬃ ያርሾ ሺሺዛ ጊዲኮ ኢዛፔ ባጋ ሻኪዲ ጎዳስ ዱማ ያርሾ ሂስቲ ኤሆ።
LEV 7:30 ሄ ኢዚ ኤሆይሳካ ጎዳስ ጹጌቲዛ ያርሾ ሂስቲ ሺሾ፤ ሞꬌዛካ ኣንጋሶዛራ ጎዳ ሲንꬃን ያኔ ሃ ቃሴꬂ ሺሺዛ ያርሾ ሂስቲ ሺሾ።
LEV 7:31 ቄሴዚ ቃሴ ሞꬌዛ ያርሾ ያርሺዛሶዛ ቦላ ጹጎ፤ ኣንጋሶዚ ጊዲኮ ቄሴታስ ኢሜቶ።
LEV 7:32 ኢንቴ ኢሲፌቴꬃ ያርሾዛፔ ኡሻቻ ሚሳ ቄሴዛስ ጊሻ ሂስቲ ኢሚቴ፤
LEV 7:33 ኢሲፌቴꬃ ያርሾዛ ሱꬃኔ ሞꬌዛ ሺሺዛ ቄሴዚ ኡሻቻ ሚሳ ባ ጊሻ ሂስቲ ኤኮ።
LEV 7:34 ኢስራኤሌ ኣሳ ኢሲፌቴꬃ ያርሾፌ ያኔ ሃ ቃሴꬂዳ ኣንጋሶዛኔ ያርሾስ ሺሺዳ ሚሳ ኤካዳ ቄሴ ኣሮኔሲኔ ኢዛ ኣቱማ ናይታስ ኢማዲስ፤ ሄሲካ ኡባ ዎዴ ኢስራኤሌ ኣሳፔ ኢስታስ ጊሻ ጊዳና ማላ ኢማዲስ› ጋዳ ዮታ» ጊዴስ።
LEV 7:35 ሃይሲካ ጎዳይ ኣሮኔኔ ኢዛ ናይታ ቄሴ ሂስቲ ሹሚዳ ጋላስ ጎዳስ ሺቂዲ ጹጌቲዛ ያርሾፌ ቄሴታ ጊሻ ጊዳና ማላ ሻኪዳዛ።
LEV 7:36 ሄ ጋላሲካ ኢስቲ ቲዬቲዳ፤ ጎዳይ ሄሳ ሄ ያርሼቲዛይሳፌ ቄሴታስ ኢማና ማላ ኢስራኤሌ ኣሳ ኣዛዚዴስ፤ ሄሲካ ጉዬፔ ያና ዎዴ ኡባን ኢስራኤሌ ናይታስ ኢስታ ጊሻ ሂስቲ ኢማና ማላ ኦꬂዴስ።
LEV 7:37 ሄሳ ጊሻስ ጹጌቲዛ ያርሾ ጊሻሲኔ ካꬃ ያርሾ ጊሻስ፥ ናጋራፔ ማሮቴꬃስ ሺቂዛ ያርሾ ጊሻሲኔ ቆሆ ጊሻስ፥ ኤዳ ያርሾ ጊሻስ፥ ቄሴቴꬃ ጊሻስ ሺቂዛ ያርሾኔ ኢሲፌቴꬃ ያርሾ ፖላናስ ዎꬂዳ ዎጋቲ ሃይታንታ።
LEV 7:38 ሄይቲካ ባዞን ሲና ዙማ ቦላ ኢስራኤሌ ናይቲ ያርሾ ሺሻና ማላ ኣዛዚዳ ዎዴ ሄ ጋላስ ጎዳይ ሙሴስ ሃይታ ኣዛዞታ ኢሚዴስ።
LEV 8:1 ጎዳይ ሙሴስ፥
LEV 8:2 «ኣሮኔኔ ኢዛ ኣቱማ ናይታ፥ ቄሴቴꬃ ማይኦዛካ፥ ቲዬቲዛ ዛይቴዛ፥ ናጋራ ጌሾስ ሺቂዛ ኮርማ ቦራ፥ ናምኡ ꬋርሾኔ ኢርሾይ ጌሎንታ ኡኬቲዳ ኡኬꬂ ኢዛን ዲዛ ሌማቴዛ ኢስታራ ኤካ ያ።
LEV 8:3 ኩሜꬃ ኢስራኤሌ ናይታ ጼይጋዳ ጋይቶቴꬃ ዱንካኔዛ ፔንጌን ሺሻ» ጊዴስ።
LEV 8:4 ሙሴይካ ጎዳይ ኢዛስ ዮቲዳ ማላ ኦꬂዴስ፤ ዴሬይካ ጋይቶቴꬃ ዱንካኔ ፔንጌን ሺቂዴስ።
LEV 8:5 ሙሴይካ ዴራስ፥ «ኦሴታና ማላ ጎዳይ ኣዛዞይሲ ሃይሳኮ!» ጊዴስ።
LEV 8:6 ሙሴይካ ኣሮኔኔ ኢዛ ኣቱማ ናይታ ዴራ ሲንꬅ ሺሺዲ ሃꬃን ሜጪዴስ።
LEV 8:7 ኣሮኔ ቃሚሳ ማላ ኣዱሳ ማይኦ ማይዚዲ፥ ካቦርቴካ ኢዛ ቦላ ጎጲ ማይዚዲ ዳንጮ ዳንጪሲዴስ፤ ሄሳ ቦላካ ኤፉዴ ጌቴቲዛ ማይኦ ማይዚዲ ኢዛካ ዱማ ሂላቴꬃን ኦሴቲዳ ቃባቶን ኦይሴꬂዲ ዳንጪዴስ።
LEV 8:8 ኤፉዴ ጌቴቲዛ ማይኦዛስ ቲራ ቦላ ኪሴይ ሲኬቲዲ ኡሪሜኔ ቱሚሜ ጌቴቲዛይታ ኢዛ ጊዶን ዎꬂዴስ።
LEV 8:9 ኢዛ ሁኤ ቦላካ ጎሴ ጻጺ ዎꬂዲ ሄ ጻꬃ ጎሳ ቦላ ሲንꬃ ባጋራ ጎዳይ ሙሴስ ዮቲዳ ማላ ዎርቃፌ ኦሴቲዳ ሴሎይ ጌሻቴꬃስ ማላታ ጊዳና ማላ ካላቻ ኢዛ ቦላ ዎꬂዴስ።
LEV 8:10 ሄሳፌ ጉዬ ሙሴይ ቲዬቲዛ ዛይቴዛ ኤኪዲ ጋይቶቴꬃ ዱንካኔዛኔ ኢዛን ዲዛ ኡባ ቲይዲ ጎዳ ኦሶስ ዱማሲዴስ።
LEV 8:11 ዛይቴዛፔ ጉꬃራ ኤኪዲ ያርሾ ያርሺዛሶዛ ቦላ ላፑንቶ ዉጺዴስ፤ ቃሴካ ጎዳ ኦሶስ ዱማታና ማላ ያርሾ ያርሺዛሶዛኔ ኢዛ ኦሶስ ጊጌቲዳ ሚሻታ ኩሜꬃ ቦላ ሄሳꬆካ ኢዛን ሜጬቲዛ ሳኔዛኔ ሳኔዛ ኢዛ ቦላ ዎꬂዛይሳ ቦላካ ዉጺዴስ።
LEV 8:12 ቲዬቲዛ ዛይቴዛ ኣሮኔ ሁኤን ጉሲዲ ጎዳ ኦሶስ ኢዛ ዱማሲዴስ።
LEV 8:13 ካሌꬂዲካ ሙሴይ ጎዳይ ኢዛ ኣዛዚዳ ማላ ኣሮኔ ኣቱማ ናይታ ሲንꬅ ሺሺዲ ኣዱሳ ማይኦ ማይዚዴስ፤ ጼሳን ቃባቶ ዳንጪሲዲ ኢስታ ሁኤን ቆቤ ዎꬂዴስ።
LEV 8:14 ሄሳፌ ጉዬ ሙሴይ ናጋራ ጊሻስ ያርሻናስ ኮርማ ቦራ ኤሂዴስ፤ ኣሮኔይኔ ኢዛ ናይቲ ኮርማ ቦራዛ ቦላ ባ ኩሼ ዎꬂዳ።
LEV 8:15 ሙሴይካ ቦራዛ ሹኪዴስ፤ ቦራ ሱꬃን ባ ቢራꬌ ጌልꬂዲ ያርሾ ያርሺዛሶዛስ ኦይዱ ባጋን ዲዛ ꬌሞታ ቲይዲ ጌሺዴስ፤ ሄሳፌ ኣቲዳ ሱꬃ ያርሾ ያርሺዛሶዛ ጋርሳን ጉሲዴስ፤ ሄሳ ማላን ያርሾ ያርሺዛሶዛ ጎዳስ ሻኪ ዱማሲዴስ።
LEV 8:16 ሙሴይ ሹኬቲዳ ሜሄዛ ቃንꬃ ኣሾዛ ቦላ ዲዛ ሞꬌዛ ኡባ፥ ቲሬ ካሚ ኦይኪዳ ሞꬌዛ፥ ኪላሆታኔ ኢስታ ካሚ ኦይኪዳ ሞꬌዛ ኡባ ኤኪዲ ያርሾ ያርሺዛሶዛ ቦላ ጹጊዴስ።
LEV 8:17 ኮርማዛ ኣሾፔ ኣቲዳይሳኔ ማራጬዛ ኤኪዲ ጎዳይ ኢዛ ኣዛዚዳ ማላ ኣሳይ ዲዛሶፔ ጌዴ ሃሲዲ ጹጊዴስ።
LEV 8:18 ሄሳፌ ጉዬ ሙሴይ ጹጌቲዛ ያርሾስ ሺቂዛ ዶርሳ ꬋርሾ ኤሂን ኣሮኔይኔ ኢዛ ናይቲ ꬋርሾዛ ሁኤ ቦላ ባ ኩሼ ዎꬂዳ።
LEV 8:19 ሙሴይካ ꬋርሻ ሹኪዴስ፤ ሱꬃካ ያርሾ ያርሺዛሶዛ ቦላ ዩዪ ኣꬋናስ ዉጺዴስ።
LEV 8:20 ꬋርሾዛ ኣሻ ቆሞን ቆሞን ቃንጺዲ ኬሲዴስ፤ ሁኤዛ፥ ቆሞን ቆሞን ቃንጼቲዳ ኣሾታኔ ሞꬌዛ ጹጊዴስ።
LEV 8:21 ጎዳይ ኢዛ ኣዛዚዳ ማላ ሙሴይ ቃንꬃ ኣሾታኔ ቶሆታ ሃꬃን ሜጪዴስ፤ ሄ ꬋርሾዛ ኣሾ ኡባ ጎዳስ ታማን ጹጌቲ ሳዊዛ ያርሾ ኦꬂዲ ያርሾ ያርሺዛሶዛ ቦላ ጹጊዴስ።
LEV 8:22 ሄሳፌ ካሊዲ ሙሴይ ቄሴቴꬃ ሱንꬃስ ናምኣንꬆ ꬋርሾዛ ኤሂዴስ፤ ኣሮኔይኔ ኢዛ ኣቱማ ናይቲ ባ ኩሼ ꬋርሻ ሁኤ ቦላ ዎꬂዳ።
LEV 8:23 ሙሴይ ꬋርሻ ሹኪዴስ፤ ሱꬃፌ ጉꬃራ ኤኪዲ ኣሮኔስ ኡሻቻ ሃይꬃ ጼራ፥ ኡሻቻ ማንꬃ ቢራꬌኔ ኡሻቻ ቶሆ ማንꬃ ቢራꬌ ቲይዴስ።
LEV 8:24 ቃሴካ ኣሮኔ ናይታ ዴራ ሲንꬅ ሺሺዲ ኢስታ ኡሻቻ ሃይꬃታ ጼራኔ ኡሻቻ ኩሼ ማንꬃ ቢራꬌታኔ ኡሻቻ ቶሆታ ማንꬃ ቢራꬌታ ቲይዴስ፤ ሄሳፌ ቲርፒዳ ሱꬃ ያርሾ ያርሺዛሶዛ ቦላ ዩዪ ኣꬋናስ ዉጺዴስ።
LEV 8:25 ሃንዳ፥ ጎይና፥ ቃንꬃ ኣሾ ካሚ ኦይኪዳ ሞꬌ ኡባ፥ ቲሬ ካሚ ኦይኪዳ ሞꬌ፥ ኪላሆታካ፥ ኪላሆታ ቦላ ዲዛ ሞꬌዛኔ ኡሻቻ ሚሴዛ ኤኪዴስ።
LEV 8:26 ኢርሾይ ቦቾንታ ጎዳስ ዱማ ኡኬꬂ ኢዛን ዲዛ ሌማቴዛፔ ኢሲ ዳቦ ኤኪዴስ፤ ሄሳꬆካ ዛይቴን ሙኑቄቲ ኡኬቲዳ ዳቦይ ኢዛን ዲዛ ሌማቴዛፔ ኢሲ ዳቦኔ ሌኤ ኡኬꬅ ኤኪዲ ሞꬌዛ ቦላኔ ኡሻቻ ሚሳ ቦላ ዎꬂዴስ።
LEV 8:27 ሄ ካꬃ ኡባ ኤኪዲ ኣሮኔ ኩሼኒኔ ኢዛ ናይታ ኩሼን ኦይꬂዴስ፤ ኢስቲካ ኦይኪዲ ያኔ ሃ ቃሴꬂዲ ጎዳስ ያርሾ ሺሺዳ።
LEV 8:28 ሄሳፌ ቃሴ ሙሴይ ኢስታ ኩሼፔ ኤኪዲ ቄሴቴꬃ ያርሾ ጊዳና ማላ ሺቂዲ ጹጌቲዛ ያርሾፌ ቦላራ ዎꬂዲ ያርሾ ያርሺዛሶዛ ቦላ ዎꬂዲ ጹጊዴስ፤ ሄሲካ ኢዛ ሳዎይ ጎዳ ኡፋይሲዛ ካꬃ ያርሾ።
LEV 8:29 ሙሴይ ቃሴካ ኣንጋሶዛ ኤኪዲ ያኔ ሃ ቃሴꬂዲ ጎዳስ ሺሺዴስ፤ ሙሴይ ኡባካ ጎዳይ ኢዛ ኣዛዚዳ ማላ ቄሴቴꬃ ሱንꬅ ሱማናስ ሺሺዛ ꬋርሾፌ ሙሴ ጊሻይ ሄሳ።
LEV 8:30 ሙሴይ ቲዬቲዛ ዛይቴፔኔ ያርሾ ያርሺዛሶዛን ዲዛ ሱꬃፌ ጉꬃራ ኤኪዲ ኣሮኔ ቦላ፥ ኣሮኔ ናይታ ቦላኔ ቃሴካ ኢስታ ማይኦ ቦላ ዉጺዴስ፤ ሄሳ ማላን ሙሴይ ኢስታኔ ኢስታ ማይኦ ኡባ ጎዳስ ዱማሲዴስ።
LEV 8:31 ሙሴይ ኣሮኔኔ ኢዛ ኣቱማ ናይታስ፥ «ኣሾዛ ጋይቶቴꬃ ዱንካኔ ፔንጌን ዶይሲቴ፤ ኣሮኔይኔ ኢዛ ናይቲ ማና ማላ ጎዳይ ኣዛዚዳይሳ ቄሴቴꬃ ሱንꬅ ሱሚዛ ዎዴ ያርሾ ኢዛራ ሺሺዛ ሌማቴን ዲዛ ኡኬꬃራ ሄን ሚቴ።
LEV 8:32 ኣሾዛፔ ዎይኮ ኡኬꬃዛፔ ቲርፒኮ ታማን ጹጊቴ።
LEV 8:33 ኢንቴ ቄሴቴꬃ ሱንꬅ ሱሚዛ ዎጋይ ፖሌታናስ ላፑን ጋላስ ኤኪዛ ጊሻስ ሄ ላፑን ጋላሳይ ዉራና ጋካናስ ጋይቶቴꬃ ዱንካኔዛ ፔንጌፌ ኪቾፍቴ።
LEV 8:34 ኢንቴና ናጋራፔ ጌሻናስ ሃይሳ ሃች ኑ ኦꬂዳ ዎጋ ፖላና ማላ ጾሳይ ኑና ኣዛዚዴስ።
LEV 8:35 ሄሳ ጊሻስ ጎዳይ ኣዛዚዳይሳ ፖላናስ ላፑን ጋላስ ኩሜꬅ ጋላሲኔ ኦማርስ ጋይቶቴꬃ ዱንካኔዛ ፔንጌፌ ኪቾፍቴ፤ ጎዳ ዎጋካ ናጊቴ፤ ሂስቶንታ ኣጊኮ ኢንቴ ሃይቃና፤ ታና ጎዳይ ኣዛዚዳ ዎጋይ ሃይሳ» ጊዴስ።
LEV 8:36 ኣሮኔይኔ ኢዛ ናይቲ ሙሴ ባጋራ ጎዳይ ኣዛዚዳይሳ ኡባ ፖሊዳ።
LEV 9:1 ኦስፑንꬃ ጋላሳን ሙሴይ ኣሮኔ፥ ኢዛ ኣቱማ ናይታኔ ኢስራኤሌ ኣሳ ካሌꬂዛ ጪማታ ጼይጊዴስ፤
LEV 9:2 ኣሮኔካ፥ «ኢሲ ዎሶይካ ኢስታ ቦላ ባይንዳ ኢሲ ሚርጎኔ ኢሲ ꬋርሾ ኤካዳ ሚርጎዛ ናጋራ ጊሻስ ያርሺዛ ያርሾ ꬋርሾዛ ጹጌቲዛ ያርሾ ሂስታ ጎዳስ ያርሻ።
LEV 9:3 ሄሳፌ ጉዬ ኢስራኤሌ ናይታ ናጋራ ጊሻስ ሺቂዛ ያርሾስ ዴይሻ ኦርጌኔ ኢስታ ቦላ ኣይኮ ዎሶይ ባይንዳ ኢሲ ላይꬃ ማራራኔ ኢሲ ላይꬃ ዶርሳ ላቃ ጹጌቲዛ ያርሾስ ኤሃና ማላ ዮታ።
LEV 9:4 ቃሴካ ኢሲ ኮርማኔ ኢሲ ዶርሳ ላቃ ኢሲፌቴꬃ ያርሾስ ኤሄቶ፤ ሄይታንታ ዛይቴን ጊንዴቲዳ ካꬃ ያርሾራ ጎዳስ ያርሾ ሺሼቶ፤ ሄሳ ኡባ ኦꬄቶ፤ ጋሶይካ ጾሲ ኢስታስ ሃች ቆንጫና» ጊዴስ።
LEV 9:5 ኢስቲካ ሙሴይ ኢስታ ኣዛዚዳይሳ ኡባ ዱንካኔዛ ፔንጌ ኤሂዳ፤ ኣሳይ ዉሪካ ጎዳ ሲንꬃን ሺቂ ኤቂዴስ።
LEV 9:6 ሙሴይ ኢስታስ፥ «ጎዳ ቦንቾይ ኢንቴስ ቆንጫና ማላ ኢንቴ ኦꬃናስ ጎዳይ ኢንቴና ኣዛዚዳ ኣዛዞይ ሃይሳ» ጊዴስ።
LEV 9:7 ቃሴካ ሙሴይ ኣሮኔስ፥ «ጌዴ ያርሾይ ያርሼቲዛሶ ሺቃዳ ኔ ናጋራኔ ዴሬዛ ናጋራ ዉርሳናስ ሺቂዛ ያርሾኔ ጹጌቲዛ ያርሾ ያርሻ፤ ሄሳ ኡባ ጎዳይ ዴሬዛ ናጋራ ዉርሳና ማላ ኢዚ ኔና ኣዛዚዳ ማላ ሺሻ» ጊዴስ።
LEV 9:8 ኣሮኔይካ ያርሾ ያርሺዛሶ ቢዲ ኮይሮ ባ ናጋራ ጊሻስ ሺቂዛ ያርሾስ ሺቂዛ ሚርጎዛ ሹኪዴስ።
LEV 9:9 ኢዛ ናይቲ ሱꬃ ኢዛስ ኤሂዳ፤ ኢዚካ ሱꬃን ባ ቢራꬌ ጌልꬂ ኬሲዲ ያርሾ ያርሺዛሶዛ ቦላ ዲዛ ꬌሞታ ሱꬅ ቲይዴስ፤ ኣቲዳ ሱꬃ ያርሾ ያርሺዛሶ ጋርሳን ጉሲዴስ።
LEV 9:10 ሄሳፌ ካሌꬂዲ ሞꬌዛ፥ ኪላሆታኔ ቲሬ ካሚ ኦይኪዳ ሞꬌታ ኤኪዲ ጎዳይ ሙሴ ኣዛዚዳ ማላ ያርሾ ያርሺዛሶዛ ቦላ ጹጊዴስ።
LEV 9:11 ኣሾዛኔ ጋልባዛ ቃሴ ኣሳይ ዲዛሶፔ ጌዴ ሃራሶ ሃሲዲ ጹጊዴስ።
LEV 9:12 ሄሳፌ ጉዬ ኣሮኔይ ጹጌቲዛ ያርሾስ ሹኪዴስ፤ ሂስቲን ኢዛ ናይቲ ሱꬃ ኢዛስ ኤሂዳ፤ ኢዚካ ሱꬃዛ ኤኪዲ ያርሾ ያርሺዛሶዛ ቦላ ዩዪ ኣꬋናስ ዉጺዴስ።
LEV 9:13 ኢዛ ናይቲ ጹጌቲዛ ያርሾስ ሹኬቲዳ ኣሾዛ ቆሞን ቆሞን ሁኤዛራ ጋꬂ ኢዛስ ኤሂ ኢሚዳ፤ ኢዚካ ሄሳ ኡባ ያርሾ ያርሺዛሶዛ ቦላ ጹጊዴስ።
LEV 9:14 ሄሳፌ ቃሴካ ቃንꬃ ኣሾዛኔ ጉዬ ቶሆታ ሃꬃን ሜጪዲ ያርሾ ያርሺዛሶዛ ቦላ ጹጌቲዛ ያርሾዛራ ኢሲፌ ጋꬂ ጹጌቲዛሶን ጹጊዴስ።
LEV 9:15 ሄሳፌ ካሌꬂዲ ኣሮኔይ ዴሬዛ ናጋራ ጊሻስ ሹኬቲዛ ዴይሻ ኦርጌ ኤኪ ሹኪዲ ባ ናጋራ ጊሻስ ያርሺዳይሳꬆ ያርሺዴስ።
LEV 9:16 ጹጌቲዛ ያርሾዛ ኤሂዲ ካሴ ዲዛ ዎጋ ማላ ያርሺዴስ።
LEV 9:17 ካꬃ ያርሾዛካ ሺሺዴስ፤ ꬊሌዛፔ ኩጳ ኩሜꬅ ኤኪዲ ያርሾ ያርሺዛሶዛ ቦላ ጹጊዴስ፤ ሄሲካ ጹጌቲዛ ያርሾስ ማላዶ ማላዶ ሺቂዛ ያርሾዛ ቦላ ጉጄቲዲ ሺቂዴስ።
LEV 9:18 ኮርማ ቦራኔ ꬋርሾዛ ሹኪዲ ዴሬዛ ጊሻስ ኢሲፌቴꬃ ያርሾ ሺሺዴስ፤ ኢዛ ናይቲካ ሱꬃ ኢዛስ ኤሂዳ፤ ኢዚካ ሱꬃ ኤኪዲ ያርሾ ያርሺዛሶዛ ዩዪ ኣꬋናስ ዉጺዴስ።
LEV 9:19 ኣሮኔይካ ኮርማ ቦራ ሞꬌዛ፥ ꬋርሻ ሞꬌዛ፥ ኡባካ ጎይና ቶልꬆዛ፥ ቃንꬃ ኣሾ ካሚ ኦይኪዳ ሞꬌዛኔ ቲሬ ካሚ ኦይኪዳ ሞꬌዛ ዶሬቲዳይሳ ቲሬታኔ ኢስታ ቦላ ዲዛ ሞꬌዛ ኤኪዲ፥
LEV 9:20 ሄ ሜሄታ ኣንጋሶ ጼራ ቦላ ዎꬂዳ፤ ኣሮኔይ ሞꬌዛ ኡባካ ያርሾ ያርሺዛሶዛ ቦላ ጹጊዴስ።
LEV 9:21 ኣንጋሶታኔ ኡሻቻ ጌዳ ኣሾታ ሙሴይ ኣዛዚዳ ማላ ያኔ ሃ ቃሴꬂዲ ጎዳስ ዱማ ያርሾ ሂስቲ ሺሺዴስ።
LEV 9:22 ኣሮኔይ ናጋራ ጊሻስ ሺቂዛ ያርሾ፥ ጹጌቲዛ ያርሾኔ ኢሲፌቴꬃ ጊሻስ ሺቂዛ ያርሾ ያርሺዳፔ ጉዬ ባ ኩሼ ꬎቁ ሂስቲዲ ዴራ ኣንጂዲ ዎꬊዴስ።
LEV 9:23 ሙሴይኔ ኣሮኔይ ጋይቶቴꬃ ዱንካኔ ጊዶ ጌሊዳ፤ ሄፔ ኬዚሼ ዴሬዛ ኣንጂዳ፤ ጎዳ ቦንቾይ ኣሳ ኡባስ ቆንጪዴስ።
LEV 9:24 ኣሳይ ቆፖንታ ዲሺን ጎዳ ኣቻፌ ኪቴቲዳ ታማይ ዪዲ ያርሾ ያርሺዛሶዛ ቦላ ዲዛ ያርሾስ ሺቂዳ ሃንዳዛ ኡባ ሚዴስ፤ ዴሬዚካ ዉሪ ሄሳ ቤኢዲ ኢሊሊ ጊዴሲኔ ዉሪካ ሆኪ ጎይኒዴስ።
LEV 10:1 ናዳቤይኔ ኣቢሁ ጌቴቲዛ ኣሮኔ ና ናምኣቲ ኢሶይ ኢሶይ ባስ ባስ ኤጻኔ ጩዋሲዛ ጺና ኤኪዲ ቦንቆ ታማ ኢዛን ጉጂዳ፤ ቃሴካ ኤጻኔካ ኢዛን ጉጂዲ ጎዳስ ሺሺዳ፤ ሄ ኢስቲ ኤኪዳ ታማይ ጎዳስ ዱማቲዳ ታማ ጊዶንታ ጊሻስ ኢስቲ ሄሳ ማላ ታማ ሺሻና ማላ ጎዳይ ኢስታ ኣዛዚቤና።
LEV 10:2 ኢስቲ ቆፖንታ ጾሳ ኣቻፌ ዪዳ ታማይ ኢስታ ሚዳ ጊሻስ ኢስቲ ጎዳ ሲንꬃን ሃይቂዳ።
LEV 10:3 ሙሴይ ቃሴ ኣሮኔስ፥ «ጎዳይ፥ ‹ታ ሲንꬄ ሺቂዲ ታስ ኦꬂዛይታስ ታኒ ታ ጌሻቴꬃ ቆንጪሳና፤ ታኒካ ታ ዴሬዛ ኣቻን ቦንቼቲዳዴ ጊዳና› ጊዲ ኢዚ ኣሳ ካሴ ቆፍሲዳይሲ ሃይሳ» ጊዴስ። ኣሮኔይካ ኣይ ዛሮካ ኢሞንታ ጮኡ ጊዴስ።
LEV 10:4 ሙሴይካ ኣሮኔስ ኣዋ ኢሻ ኡዚኤሌ ናይታ ሚሻኤሌኔ ኤልጻፋኔ ጼይጊዲ፥ «ሃ ዪቴ! ሃይሳ ኢንቴ ኢሻታ ኣሃ ጌሻ ዱንካኔፔ ዴንꬂዲ ኣሲ ዲዛሶፔ ጌዴ ሃራሶ ኤፍቴ» ጊዴስ።
LEV 10:5 ኢስቲካ ቄሴቴꬃ ማይኦዛ ሃይቂዳይታ ኣሃ ቦላፌ ኬሶንታ ዲሼ ቢዲ ሙሴይ ኣዛዚዳ ማላ ኣሳታ ኣሃ ኣሳይ ዲዛሶፔ ጌዴ ሃራሶ ኤፊዳ።
LEV 10:6 ሄሳፌ ካሊዲ ሙሴይ ኣሮኔስ፥ ኢዛ ና ኤልኤዜሬሲኔ ኢታማሬስ፥ «ኢንቴ ሃይቆንታ ማላኔ ጎዳ ሃንቆይ ዴራ ቦላ ዮንታ ማላ ሃይቂዳይታስ ሚሼቲዲ ኢንቴ ሁኤ ቡጮፍቴ፤ ኢንቴ ማይኦካ ዳኮፍቴ፤ ጊዶ ኣቲን ሃንኮ ኢስራኤሌ ናይቲ ጎዳ ኣቻፌ ዪዳ ታማን ሃይቂዳይታስ ዬካና ዳንዳዬቴስ።
LEV 10:7 ኢንቴ ጎዳይ ኣዛዚን ቲዬቲዛ ቲዮ ዛይቴን ቲዬቲዳ ጊሻስ ኢንቴ ሃይቆንታ ማላ ጋይቶቴꬃ ዱንካኔ ፔንጌፌ ካሬ ኬዞፒቴ» ጊዴስ። ኢስቲካ ሙሴይ ኣዛዚዳ ማላ ሃኒዳ።
LEV 10:8 ጎዳይ ኣሮኔስ ሂዝጊዴስ፥
LEV 10:9 «ኔኒኔ ኔ ናይቲ ዎይኔፔ ኦሴቲዳ ኡሹ ዎይኮ ሃራ ማꬆሲዛ ኡሹ ኡዪዲ ጋይቶቴꬃ ዱንካኔዛን ኢንቴ ጌሎንታ ማላ ናጌቲቴ፤ ሂስቶንታ ኣጊኮ ኢንቴ ሃይቃና፤ ሃይሲ ሃ ዎጋዚ ኢንቴፌካ ጉዬን ያና ዬሌታ ኡባ ማታንካ ሜርናስ ናጌታናስ ቤሴስ።
LEV 10:10 ኢንቴ ዱማቲዳይታኔ ዱማቶንታይታ፥ ጌሺኔ ቱና ጊዲዳይታ ጊዶን ዲዛ ዱማቴꬃ ሻኪ ኤራናስ ቤሴስ።
LEV 10:11 ታ ኢንቴስ ሙሴ ባጋራ ኢሚዳ ዎጋ ኡባ ኢስራኤሌ ናይታ ታማርሲቴ።»
LEV 10:12 ሙሴይካ ኣሮኔኔ ኣቲዳ ኢዛ ና ናምኣታ ኤልኤዜሬኔ ኢታማሬስ፥ «ጎዳስ ታማን ጹጌቲ ሺቂዳ ካꬃፌ ኤኪዲ ኢርሾይ ቦቾንታ ኡኬꬅ ኡኪቴ፤ ኢዚካ ኬሂ ዱማቲዳ ያርሾ ጊዲዳ ጊሻስ ያርሾ ያርሺዛሶዛ ኣቻን ሚቴ።
LEV 10:13 ጎዳስ ታማን ጹጌቲ ሺቂዛ ካꬃ ያርሾፌ ሻኬቲዲ ኢንቴሲኔ ኢንቴ ናይታስ ኢሜቲዳ ጊሻ ጊዲዳ ጊሻስ ኢንቴ ኢዛ ጎዳስ ዱማቲዳሶን ሚቴ፤ ኢንቴ ሄሳꬆ ሂስታና ማላ ጾሲ ታና ኣዛዚዴስ።
LEV 10:14 ጊዶ ኣቲን ያኔ ሃ ቃሴꬆን ዱማ ያርሾ ጊዲዲ ጎዳስ ሺቂዳፔ ጉዬ ቄሴታ ጊሻ ጊዳና ማላ ጌቴቲዳ ጊሻስ ኣንጋሶዛኔ ሚሴዛ ኔኒኔ ኔ ኬꬃን ዲዛ ኔ ማጫ ናይቲ ማንዴታ፤ ሄሳ ሄ ዎጋካ ጎዳስ ዱማቲዳሶን ማንዴታ፤ ሄሲካ ኢስራኤሌ ኣሳይ ኢሲፌቴꬃ ጊሻስ ሺሺዛ ያርሾ ኡባፌ ሻኬቲ ኔሲኔ ኔ ናይታስ ኢሜቲዴስ።
LEV 10:15 ሺቂዳ ሚሴዛኔ ኣንጋሶዛ ጎዳ ሲንꬃን ያኔ ሃ ቃሴꬂ ሺሺዛ ያርሾዛ ማላ ቃሴꬃናስ ኤሄቶ፤ ሄሲካ ጎዳይ ኣዛዚዳ ማላ ሜርናስ ኔሲኔ ኔ ናይታስ ጊሻ ጊዶ» ጊዴስ።
LEV 10:16 ሙሴይ ናጋራ ጊሻስ ሺቂዳ ያርሾስ ሺቂዳ ዴይሻ ኦይቺ ሲዪዲ ኢዚ ጹጌቲዳይሳ ኤሪዴስ፤ ሄሳ ጊሻስ ሙሴይ ኤልኤዜሬ ቦላኔ ኢታማሬ ቦላ ሃንቄቲዲ፥
LEV 10:17 «ኢንቴ ናጋራ ጊሻስ ሺቂዳ ያርሾዛ ጾሳስ ዱማቲዳሶን ኣዛስ ሚቤኬቲ? ያርሾዚ ጎዳስ ኬሂ ዱማ፤ ኢዚ ዴሬዛፔ ናጋራኔ ቆሆ ዉርሳና ማላ ጎዳይ ሄሳ ኢንቴስ ኢሚዳዛ።
LEV 10:18 ሱꬃዚ ጌዴ ጎዳስ ዱማቲዳ ዱንካኔዛን ጌሎንታ ጊሻሲኔ ታ ኢንቴና ኣዛዚዳ ማላ ኢንቴ ሄ ዱማቲዳሶን ሺቂዳ ያርሾዛ ኢንቴ ማናስ ቤሴስ» ጊዴስ።
LEV 10:19 ኣሮኔይካ ሙሴስ፥ «ናጋራ ጊሻስ ሺቂዛ ጹጌቲዛ ያርሾ ሄኮ ሃች ኣሳይ ጾሳ ሲንꬅ ኤኪ ዪዴስ፤ ታናካ ሃይሳ ማላ ሜቶይ ጋኪዴስ፤ ሂስቲን ሃች ናጋራ ጊሻስ ሺቂዛ ያርሾዛ ታ ሚዳኮ ጎዳይ ኡፋዬታናሺን ኣቲዴ?» ጊዴስ፤
LEV 10:20 ሙሴይካ ሄሳ ሲዪዲ ኢዚ ዛሪዳ ቃላን ኡፋዬቲዴስ።
LEV 11:1 ጎዳይ ሙሴሲኔ ኣሮኔስ ሂዝጊዴስ፥
LEV 11:2 «ሃይሳ ኢስራኤሌ ናይታስ ዮቲቴ፥ ‹ቢታ ቦላ ዲዛ ዶኣታፔኔ ሜሄታፔ ኢንቴ ማናይቲ ሃይሳፌ ካሊ ዲዛይታ፥
LEV 11:3 ቶሆ ቂንጪፊሌይ ጳልቄꬃታኔ ባንቺኪዛይታ ሚቴ።
LEV 11:4 « ‹ጊዶ ኣቲን ባንቺኪዛይታ ጊዲ ኡቲዲ ቂንጪፊሌይ ጳልቄቶንታይታ ዎይኮ ባንቺኮንታይታ ጊዲ ኡቲዲ ቂንጪፊሌይ ጳልቄቲዳይታ ሞፒቴ፤ ጋሜላይ ባንቺኬስ ሺን ቂንጪፊሌይ ጳልቄቶንታ ጊሻስ ኢዚ ኢንቴስ ቱና ጊዶ።
LEV 11:5 ጉፓሌይ ባንቺኬስ ሺን ቂንጪፊሌይ ጳልቄቶንታ ጊሻስ ኢዚ ኢንቴስ ቱና ጊዶ።
LEV 11:6 ሃርባይኖይ ባንቺኬሲሺን ቂንጪፊሌይ ጳልቄቶንታ ጊሻስ ኢዚ ኢንቴስ ቱና ጊዶ።
LEV 11:7 ጉዱንꬂካ ሞፒቴ፤ ኢዛ ቂንጪፊሌይ ጳልቄꬅ ጊዲኮካ ኢዚ ባንቺኮንታ ጊሻስ ኢንቴስ ቱና ጊዲ ቆዴቶ።
LEV 11:8 ሄይታንቲ ቱና ጊዲዳ ጊሻስ ኢስታ ኣሾ ሞፒቴ፤ ሃራይ ኣቶሺን ኢስታ ኣሃካ ቦቾፍቴ።
LEV 11:9 « ‹ኣባ ጊዶኒኔ ሻፋ ሃꬃታ ጊዶን ዲዛ ሜꬌቴꬃታ ኣባ ጊዶፌ ቄፌይኔ ፖቆ ማላ ጋልባይ ዲዛ ኡባ ሚቴ።
LEV 11:10 ኣባ ጊዶኒኔ ሻፋ ሃꬃ ጊዶን ዲዛ ሜꬌቴꬃታፔኔ ሼምፖራ ፓጻ ዲዛ ሃራ ሜꬌቴꬃታ ኡባ ጊዶፌ ቄፌይኔ ፖቄቲዛ ጋልባይ ባይንዳ ኡባይ ኢንቴስ ቱና ጊዲዳ ጊሻስ ሞፒቴ።
LEV 11:11 ሄይታንቲ ቱና ጊዲዳ ጊሻስ ኢስታ ኣሾ ሞፒቴ፤ ሃራይ ኣቶሺን ኢስታ ኣሃካ ቦቾፍቴ።
LEV 11:12 ሄሳ ጊሻስ ሃꬃ ጊዶን ዲዛ ቄፌይኔ ፖቄቲዛ ጋልባይ ኢስታ ቦላ ባይንዳ ሜꬌቴꬃቲ ዉሪካ ኢንቴ ኣቻን ኢጼቲዳይታ ጊዴቶ።
LEV 11:13 « ‹ካፎታፔ ሃይሳፌ ካሊዛይቲ ቱና ጊዲዳ ጊሻስ ሞፒቴ። ሄይታንቲካ ጎሌ፥ ቆሎ፥ ዎሌ
LEV 11:14 ጺሎ፥ ዱማ ዱማ ቆሞ ጲርጮታ።
LEV 11:15 ዱማ ዱማ ቁሮታ
LEV 11:16 ያንቻ፥ ጫንጬ ጉቶ፥ ሃꬃ ካፎ፥ ጋጬ ዛሬ ኡባ፥
LEV 11:17 ጉቶ፥ ቢያ፥ ዪንዳሬ
LEV 11:18 ዎይኖ፥ ሃꬃ ካፎ፥ ኣንኮ፥
LEV 11:19 ዚጊሌ፥ ሳቢሳ ካፎ ዛሬ ኡባ፥ ጂንጂላቴ ጌቴቲዛ ካፎኔ ዉርካዉርኮ።
LEV 11:20 « ‹ቄፌይ ዲሺን ኦይዱ ቶሆራ ቃጺዛ ሜꬌቴꬃቲ ዉሪካ ቱናታ፤
LEV 11:21 ሄይታንታ ጊዶፌ ጉፓናስ ማዲዛ ጌዳይ ዲዛ ሜꬌቴꬃታ ሚቴ፤
LEV 11:22 ሄይቲካ ቦሌ ዛሬታ፥ ጺንጎታ ዛሬታኔ ጉምባሮ ዛሬ ኡባ።
LEV 11:23 ሂንኮ ቄፌይ ዲሺን ኦይዱ ቶሆራ ሄሜቲዛ ሜꬌቴꬃታ ኢንቴ ቱና ማላ ቆዲቴ።
LEV 11:24 « ‹ሃይሳፌ ካሊ ዲዛይታ ቦቺዳዴይ ዉሪ ኦማርስ ጋካናስ ቱና ጊዳና።
LEV 11:25 « ‹ሄይታንታ ኣሃ ዴንꬂዳዴይ ዉሪካ ባ ማይኦ ሃꬃን ሜጮ፤ ሜጪኮካ ኦማርስ ጋካናስ ኢዛዴይ ቱና ጊዶ።
LEV 11:26 « ‹ቂንጪፊሌይ ኢስታስ ዲሺን ጳልቄቶንታይቲኔ ባንቺኮንታ ሜሄይ ዉሪካ ኢንቴስ ቱና ጊዳና፤ ሄይታንታ ቦቺዳዴይ ዉሪካ ቱኔስ።
LEV 11:27 ኦይዱ ቶሆራ ዲዛይታፔ ቂንጪፊሌይ ባይንዳ ካንቴን ሄሜቲዛይቲ ዉሪካ ኢንቴ ኣቻን ቱናታ ጊዴቶ፤ ኢስታ ኣሃ ቦቺዳዴይ ኦማርስ ጋካናስ ቱና ጊዶ፤
LEV 11:28 ሄይታንታ ኣሃ ዴንꬂዳዴይ ዉሪካ ባ ማይኦ ሃꬃን ሜጮ፤ ሜጪኮካ ኦማርስ ጋካናስ ኢዛዴይ ቱና ጊዶ፤ ኢስቲካ ኢንቴ ኣቻን ቱና።
LEV 11:29 « ‹ቢታራ ጎሼቲዛይታ ጊዶፌ ሃይሳፌ ካሊዛይቲ ኢንቴስ ቱና ጊዴቶ፤ ጊሮይ፥ ኤጬሬይ፥ ዛሬይ፥ ኮርቼይ፥ ሃይላሾይ፥ ጌጌይ፥ ዋካላይኔ፥ ሻቃንቻይ ኢንቴስ ቱና ጊዴቶ።
LEV 11:31 ቢታራ ጎሼቲዛ ኡባታፔ ቱና ጊዲዳይቲ ሃይታንታ፤ ኢስታ ጊዲን ዎይኮ ኢስታ ኣሃ ቦቺዛዴይ ዉሪ ኦማርስ ጋካናስ ቱና ጊዶ።
LEV 11:32 ኢስታ ኣሃይ ኢዛ ቦላ ዎꬊዳ ሚሺ ዉሪካ ቱኔስ፤ ሄሲካ ሚꬃፌ ኦሴቲዳ ሚሻቲ፥ ማይኦቲ፥ ጋልባ፥ ካራጺቴ፥ ኦጎሮኔ ሄይታንታ ሚሳቲዛ ሃራታካ ጉጄስ፤ ኢስታ ኣሃ ቦቺዳ ሚሺ ዉሪካ ሃꬃን ጌሊዲ ጋምኦ፤ ኦማርስ ጋካናስ ቱና ጊዲዲ ሄሳፌ ጉዬ ጌሽ ጊዶ።
LEV 11:33 ሄይታንታ ኣሃይ ማና ሚሻ ጊዶን ጌሊኮ ሄ ሚሻ ጊዶን ዲዛ ሚሺ ዉሪካ ቱኒዛ ጊሻስ ሄ ማና ሚሻዛ ዎꬊቴ።
LEV 11:34 ሄ ማና ሚሻፌ ሃꬂ ኢዛ ቦላ ጾኬቲዳ ካꬂ ዉሪካ ቱና ጊዴስ፤ ኢዛን ዲዛ ኡዬቲዛ ሚሺካ ቱና ጊዴስ።
LEV 11:35 ኣይ ኣሃይካ ቦቺዳ ሚሺ ዉሪካ ቱና ጊዲዳ ጊሻስ ኢዛ ኢጺቴ፤ ማኒ ሜꬊዳ ጮጬ ጊዲን ኦቶይ ሜቆ።
LEV 11:36 ሄይታንታ ኣሃይ ሃራ ኡባ ቱኒሲዛዝ ጊዲኮካ ፑልቶ ሃꬄኔ ሃꬂ ዲዛ ኦላ ቱኒሴና።
LEV 11:37 ዜሬꬃስ ኡቲዳ ካꬃ ቦላ ዎꬊኮ ዜሬꬃይ ቱኔና።
LEV 11:38 ጊዲኮካ ዜሬꬃ ቦላ ሃꬂ ጉኪ ሲሚን ኣሃይ ቦቺኮ ሄ ዜሬꬃይ ሄሳፌ ጉዬ ቱና ጊዴስ።
LEV 11:39 « ‹ሜቴቲዛ ሜሄ ጋርሳፌ ኣዋይሲካ ሃይቂን ሄ ሃይቄꬃ ቦቺዳዴይ ኦማርስ ጋካናስ ቱና።
LEV 11:40 ኣይ ኣሲካ ሄ ሃይቄꬃፌ ሚኮ ባ ማይኦ ሜጮ፤ ኦማርስ ጋካናስ ቱና ጊዶ፤ ኣይ ኣሲካ ሄ ሃይቄꬃ ኣሃ ቶኪኮ ባ ማይኦ ሜጮ፤ ጊዲኮካ ኦማርስ ጋካናስ ኢዛዴይ ቱና ጊዶ።
LEV 11:41 « ‹ቢታራ ጎሼቲዛ ኣይ ሜꬌቴꬃቲ ዉሪካ ኢንቴ ኣቻን ሜቴቶንታዚኔ ኢጼቲዳዝ ጊዴቶ።
LEV 11:42 ቲራን ጎሼቲዛ፥ ኦይዱ ቶሆራ ቢዛይታ፥ ዎይኮ ዳሮ ቶሆይ ዲዛይታ ኡባካ ሞፒቴ፤ ኢስቲ ኢንቴ ማታንካ ኢጼቲዳይታ ጊዴቶ።
LEV 11:43 ሄይታንታፌ ኣዋይሳካ ሚዲ ኢንቴና ቱኒሶፒቴ።
LEV 11:44 ታኒ ጎዳ ኢንቴ ጾሳ፤ ታኒ ሃራፔ ዱማ ጊዲዳ ጊሻስ ኢንቴካ ዱማ ጊዲቴ፤ ባ ቲራን ጎሼቲዛይታ ሚዲ ኢንቴርካ ኢንቴና ቱኒሶፒቴ።
LEV 11:45 ኢንቴስ ጎዳ ጊዳናስ ጊብጼፔ ኢንቴና ካሌꬃ ኬሲዳይ ኢንቴ ጾሳይ ታና፤ ሄሳ ጊሻስ ታኒ ዱማ ጊዲዳ ማላ ኢንቴካ ዱማ ጊዲቴ።
LEV 11:46 « ‹ሜሄታ፥ ዶኣታ፥ ካፎታ፥ ሃꬃ ጊዶኒኔ ቢታ ቦላ ቲራን ጎሼቲዛ ሜꬌቴꬃታ ኡባ ጊሻስ ኢሜቲዳ ዎጋይ ሃይሳ፤
LEV 11:47 ዎꬊዳ ዎጋ ማላ ጌሻታኔ ጌሽ ጊዶንታይታ ጊዶን ዲዛ ዱማቴꬅ ሻኪ ኤራናስ ሄሲካ ሜቴቲዛይታኔ ሜቴቶንታይታ ጊዶን ዲዛ ዱማቴꬃ ሻኪ ኤራናስ ኢንቴ ሎኤꬂ ናጌቲቴ።› »
LEV 12:1 ጎዳይ ሙሴስ ሂዝጊዴስ፥
LEV 12:2 «ኢስራኤሌ ኣሳስ፥ ‹ማጫሲ ሻራዳ ኣቱማ ና ዬሊኮ ካሴ ማጫሳ ዎጋይ ኢዚ ቦላ ቤቲዳ ዎዴ ሃኒዛይሳꬆ ላፑን ጋላስ ጋካናስ ኢዛ ቱና ጊዳዉስ።
LEV 12:3 ዬሌቲዳ ናዚ ኦስፑንꬃ ጋላስ ቃጻሬታናስ ቤሴስ።
LEV 12:4 ሄሳፌ ጉዬ ጋጪኖ ሱꬃይ ኢዚፔ ኤቃና ጋካናሲኔ ኢዛ ዬሎሶፌ 33 ጋላስ ጋካናስ ጾሳስ ዱማቲዳ ኣይ ሚሺካ ቦቻናስ ቤሴና፤ ሄሲካ ኢዛ ጌይዛ ዎዴይ ዉሮንታ ዲሺን ጋይቶቴꬃ ዱንካኔ ጊዶ ጌሉፑ።
LEV 12:5 « ‹ሄሳꬆካ ኢሲ ማጫሲ ማጫ ና ዬሊኮ ካሴ ቦላ ቂታይ ኢዚ ቦላ ቤቲዳ ዎዴ ሃኒዛይሳꬆ 14 ጋላስ ጋካናስ ቱና ጊዳዉስ፤ ሄሳፌ ጉዬ ሱꬃይ ኢዚፔ ሲሚን ኢዛ ዬሎሶፌ 66 ጋላስ ጋካናስ ጋምኡ።
LEV 12:6 « ‹ኢዛ ጌይዛ ጋላሳቲ ዉሪዛ ዎዴ ኣቱማ ና ጊሻስ ጊዲን ዎይኮ ማጫ ና ጊሻስ ጹጌቲዛ ያርሾስ ኢሲ ላይꬃ ላቃኔ ናጋራፔ ጌያናስ ሺቂዛ ያርሾስ ሃራጴ ዎይኮ ሃራጴ ጪዬ ጋይቶቴꬃ ዱንካኔ ፔንጌ ኤሃዳ ሄን ኦꬂዛ ቄሴስ ኢሙ።
LEV 12:7 ቄሴዚካ ኢዛ ኢሚዛይሳ ኢዚፔ ኤኪዲ ጎዳስ ያርሾ ሺሾ፤ ማጫሳያካ ኢዛ ዬሊሺን ኢዚፔ ጉኪዳ ሱꬃፌ ጌያዉስ፤ ሃይሲ ኣቱማ ና ዎይኮ ማጫ ና ዬሊዛ ማጫሳስ ዎꬊዳ ዎጋ።
LEV 12:8 ዬሊዳ ማጫሳያ ዶርሳ ላቃ ኤሃናስ ዳንዳዮንታሮ ጊዲኮ ናምኡ ሃራጴታ ዎይኮ ናምኡ ዋኖሴታ ኤሁ፤ ናምኣታፔ ኢሶይ ጹጌቲዛ ያርሾስ፥ ሃንኮይሲ ናጋራ ጌሾስ ያርሾ ሺቆ፤ ቄሴዚካ ኢዞ ናጋራፔ ጌሾ፤ ሄሳፌ ጉዬ ኢዛ ጌሽ ጊዳና› ጌስ።»
LEV 13:1 ጎዳይ ሙሴሲኔ ኣሮኔስ ሂዝጊዴስ፥
LEV 13:2 «ኣይ ኣሲካ ኢዛዴ ቦላ ኪጻይ ዎይኮ ሺምፔይ ዎይኮ ኢሊዋይ ኢዛዴ ቦላ ቤቲዲ ቃቻ ሃርጌ ማላ ካሴፔ ጌዴ ዳሪ ዳሪ ቢኮ ኢዛዴ ጌዴ ቄሴ ኣሮኔኮ ዎይኮ ቄሴ ጊዲዳ ኢዛ ናይታፔ ኢሳኮ ኤፌቶ።
LEV 13:3 ቄሴዚካ ሄ ማዱንꬃ ሎኤꬂ ጼሎ፤ ሄ ማዱንꬃ ሄራን ዲዛ ኢስኬይ ቦጺዛዝ ጊዲኮኔ ማዱንꬃዚ ዱጌ ኦላቲ ቤቲኮ ሄሲ ዳሮ ኢታ ሃራ ኣሳ ቦላ ኣꬊዛ ጋልባ ሃርጌ፤ ቄሴዚ ካሴ ዎጋ ማላ ኢዛዴይ ቱና ጊዲዳይሳ ኣሳስ ኤሪሶ።
LEV 13:4 ጊዶ ኣቲን ማዱንꬃዚ ቦጺዲ ዱጌ ኦላቶንታ ኣጊኮኔ ኢዛ ሄራን ዲዛ ኢስኬዚካ ቦጾንታ ኣጊኮ ቄሴዚ ሄሳዴ ላፑን ጋላስ ጋካናስ ሶን ካሬ ባ ቦላ ጎርዲ ባርካ ጋምኣና ማላ ኦꬆ።
LEV 13:5 ላፑንꬆ ጋላስ ቄሴዚ ኢዛ ቃሴካ ፓጪ ጼሎ፤ ኢዚ ኢዛ ፓጪሺን ማዱንꬃይ ካሴፔ ኣይኮካ ዱማቴꬅ ቤሶንታ ኣጊኮ ሃኢካ ሃራ ላፑን ጋላስ ኢዚ ባ ኬꬃን ካሬ ባ ቦላ ጎርዲ ኡታና ማላ ኦꬆ።
LEV 13:6 ላፑን ጋላሳፌ ጉዬ ቄሴዚ ኢዛ ቃሴካ ፓጪ ጼሎ፤ ኢዚ ፓጪ ጼሊሺን ማዱንꬃይ ጌዴ ዲች ኣጊዲ ካሴፔ ጉጺ ቤቲኮ ሄ ማዱንꬃይ ዴጾ ጊዶንታይሳ ኢዛስ ዮቲዲ ዎጋን ዲዛይሳ ማላ ኢዚ ጌሽ ጊዲዳይሳ ኢዛ ኤሪሶ፤ ኢዛዴይካ ዎጋይ ጊዛ ማላ ጌያናስ ባ ማይኦዛ ሃꬃን ሜጮ።
LEV 13:7 ሄሲካ ቄሴዚ ኢዚ ጌሽ ጊዲዳይሳ ፓጪዲ ኢዛዴስ ኤሪሲዳፔ ጉዬ ቃሴካ ማዱንꬃይ ካሴፔ ኣኪ ኣኪ ቢኮ ሄሳዴይ ቃሴካ ቄሴዛኮ ሺቆ።
LEV 13:8 ቄሴዚ ቃሴካ ፓጮ፤ ማዱንꬃይ ካሴፔ ኣኪኮ ኢታ ጋልባ ሃርጌ ጊዲዳ ጊሻስ ዎጋን ዲዛ ማላ ኢዛዴይ ኢታ ጋልባ ሃርጋንቻ ጊዲዳይሳ ኤሪሶ።
LEV 13:9 «ኦኒካ ኢዛዴ ኣሾዛ ጋልባ ቦላ ኬዚዛ ሃርጌይ ኦይኪኮ ሄሳዴ ቄሴኮ ኤሄቶ።
LEV 13:10 ቄሴዚካ ሄ ኢዛዴ ቦላይ ኡዛዚዛኮ ሎኤꬂ ጼሊዲ ኢዛዴ ኣሳቴꬃ ቦላ ዲዛ ኢስኬታ ቦꬂዛ ኪጻ ጊዲኮ ኪጻዚ ኡዛዚዲኔ ሄ ኡዛሳይ ዲዛሶን ዲዛ ጊዲኮ፥
LEV 13:11 ሄሲ ኢታ ቦላ ጋልባ ሃርጌ ጊዲዛ ጊሻስ ቄሴይ ሄ ሃርጋንቻዚ ቱና ጊዲዳይሳ ኢዛስ ዮቶ፤ ኢዚ ቱኒዳይሲ ኤሬቲዳ ጊሻስ ሄሳ ማላ ኣሲ ካሬይ ጎርዴቲን ኬꬃን ጋምኣናስ ቤሴና።
LEV 13:12 ሄ ጋልባ ሃርጌዚ ኢዛዴ ቦላ ቶሆ ጹጉንꬃፌ ቢዲ ሁኤ ኢስኬ ጋካናስ ኡባ ጋኪኮ፥
LEV 13:13 ቄሴዚ ቃሴካ ፓጪ ጼሊዲ ሃርጌዚ ኢዛዴስ ኩሜꬃ ኣሳቴꬃ ጋኪ ማይኢዳ ጊዲኮ ቄሴዚ ሄሳዴ ዎጋ ማላ ጌሽ ጊዲዳይሳ ኤሪሶ፤ ጋሶይካ ኢዛ ቦላይ ኩሜꬅ ላሜቲዲ ቦꬅ ጊዲዳ ጊሻስ ኢዛዴይ ጌሻ።
LEV 13:14 ጊዶ ኣቲን ማዱንꬃይ ዛሪ ኡዛዚዲ ዞኦ ኣሾ ጊዶፌ ቤሲኮ ሄሳዴይ ቱና ጊዴስ።
LEV 13:15 ቄሴይ ቃሴካ ዛሪ ፓጪ ጼሊሺን ማዱንꬃይ ኡዛዚሺን ዞኦ ኣሾ ቤይኮ ኢዛዴይ ቱና፤ ኢዚ ቱና ጊዲዳይሳ ኢዛስ ኤሪሶ፤ ጋሶይካ ሃርጌዚ ሃራ ኣሳ ቦላ ኣꬊዛ ሃርጌ ጊዲዳ ጊሻስ ሄሳዴይ ቱና።
LEV 13:16 ማዱንꬃይ ፓጺዲ ቦቲዛዝ ጊዲኮ ሄሳዴይ ቃሴካ ቄሴኮ ቦ።
LEV 13:17 ቄሴይካ ፓጪ ጼሊዲ ማዱንꬃይ ቦጺ ቤሲኮ ቄሴይካ ሄሳዴይ ጌሽ ጊዲዳይሳ ኢዛስ ዮቶ፤ ኢዛዴይካ ጌሽ ጊዳና።
LEV 13:18 «ኢሳዴይ ካሴ ኪጻይ ኢዛ ቦላ ኬዚዲ ፓጺኮ፥
LEV 13:19 ቃሴ ጋምኢሼ ካሴ ማዱንꬃይ ዲዛሶን ቦꬃ ኪጻይ ዎይኮ ዞኦ ኢሊዋይ ኬዚኮ ኢዛዴይ ቄሴኮ ቦ።
LEV 13:20 ቄሴዚ ሎኤꬂ ጼሊዲ ማዱንꬃይ ዱጌ ኣሾ ጊዶ ጌሊ ቤቲኮ ኢዛ ሄራን ዲዛ ኢስኬይ ቦጺ ቤሲኮ ሄሳዴይ ቱና ጊዲዳይሳ ኢዛ ኤሪሶ፤ ጋሶይካ ሄሲ ኪጻ ኦይኪዳይሲ ባ ባጋራ ኢታ ጋልባ ሃርጌ።
LEV 13:21 ጊዲኮካ ቄሴዚ ፓጪ ጼሊን ጋልባ ቦላ ዲዛ ኢስኬይ ቦቶንታ ኣጊኮኔ ሃንኮ ኣሳቴꬃ ጋልባፌ ኦላቲ ቤሶንታዝ ጊዲኮ ቃላሜ ዱማቴꬃ ጊሻስ ቄሴይ ሄሳዴይ ላፑን ጋላስ ጋካናስ ካሬይ ጎርዴቲን ኬꬃን ጋምኣና ማላ ኦꬆ።
LEV 13:22 ማዱንꬃይ ዲዛሶይ ካሴፔ ኣኪ ኣኪ ቢኮ ሄሳዴይ ኣሳ ቦላ ኣꬊዛ ኢታ ሃርጌን ኦይኬቲዳ ጊሻስ ኢዚ ቱና ጊዲዳይሳ ኢዛስ ቄሴዚ ዮቶ።
LEV 13:23 ጊዶ ኣቲን ኢሊዋዚ ካሴፔ ኣኪ ኣኪ ቦንታ ኣጊዲ ካሴ ባ ዲዛሶን ዲኮ ካሴ ኪጻይ ፓጺዳሶ ኣቲን ሃርጌ ዴና፤ ቄሴዚ ኢዚ ጌሽ ጊዲዳይሳ ኤሪሶ።
LEV 13:24 ካሴ ኢዛ ታማይ ሚዳዴይ ዲኮ ሄ ኢዚ ታማን ሜቴቲዳሶይ ቦꬃ ኢሊዋ ዎይኮ ዞኣናዳን ሃኒ ቤሲኮ፥
LEV 13:25 ቄሴዚ ኢዛ ፓጪ ጼሎ፤ ሄ ኢሊዋይ ዲዛሶን ሞኪዳ ኢስኬይ ቦꬅ ጊዲኮኔ ሃንኮ ኢዛ ኣቻን ዲዛ ጋልባፌ ዱጌ ኣሾን ጌሊኮ ሄሲ ታማን ጹጌቴꬃ ጋሶን ኣሳፔ ኣሳን ኣꬊዛ ኢታ ጋልባ ሃርጌ፤ ሄሳ ጊሻስ ቄሴይ ሄሳዴይ ቱኒዳይሳ ኢዛስ ኤሪሶ።
LEV 13:26 ኢዛ ቦላ ሞኪዳ ኢስኬዚ ቦꬃ ኢስኬን ላሜቶንታ ኣጊኮኔ ማዱንꬃዚ ዱጌ ኣሾን ጌሎንታ ኣጊዲ ሾሎቲ ሾሎቲ ቢኮ ቄሴዚ ሎኤꬂ ቤኢዲ ላፑን ጋላስ ጋካናስ ካሬ ኢዛ ቦላ ጎርዲ ዎꬆ።
LEV 13:27 ቃሴካ ላፑንꬃ ጋላስ ፓጪ ጼሎ፤ ኢዚ ካሴፔ ኣኪ ኣኪ ቢኮ ሄሲ ኢታ ጋልባ ሃርጌ፤ ሄሳ ጊሻስ ሄሳዴይ ቱና ጊዲዳይሳ ቄሴዚ ኢዛ ኤሪሶ።
LEV 13:28 ማዱንꬃይ ዲዛሶይ ቃሴ ካሴፔ ኣይኮካ ኣኮንታ ኣጊኮኔ ፓጺ ፓጺ ቢኮ ኢዚ ታማይ ሚዳሶ ኣቲን ሃራ ጊዴና፤ ሄሳ ጊሻስ ሄሳዴይ ዎጋ ማላ ጌሽ ጊዲዳይሳ ቄሴይ ኢዛ ኤሪሶ።
LEV 13:29 «ኣዴ ጊዲን ማጫስ ጊዲን ሁኤ ቦላ ዎይኮ ሻጋላ ቦላ ማዱንꬂ ዲኮ፥
LEV 13:30 ቄሴዚ ሄ ማዱንꬃ ፓጪ ጼሊሺን ማዱንꬃይ ዱጌ ኣሾን ጌሊኮ ኢዛ ቦላ ዲዛ ኢስኬይ ጋላልኦ ማላ ጊዲዲ ሌኢ ቤሲኮ ሄሲ ሁኤ ዎይኮ ቡቻ ቃጪሲ ጎኢሲዛ ዳሮ ኢታ ጋልባ ሃርጌ ጊዲዳ ጊሻስ ሄሳዴይ ቱና ጊዲዳይሳ ቄሴዚ ኢዛ ኤሪሶ።
LEV 13:31 ቃሴካ ቄሴይ ፓጪ ጼሊሺን ማዱንꬃይ ሃንኮ ኢዛ ኣቻን ዲዛ ጋልባፌ ዱጌ ኦላቲ ቤሶንታ ኣጊኮ፥ ኢዛ ቦላ ዲዛ ኢስኬይ ሎኦ ጊዶንታ ኣጊኮ ሄሳዴ ላፑን ጋላስ ጋካናስ ካሬ ጎርዲዲ ኬꬃን ዎꬆ።
LEV 13:32 ላፑንꬆ ጋላስ ቃሴካ ቄሴዚ ኢዛዴ ፓጪ ጼሎ፤ ካሴፔ ኣኪ ኣኪ ቦንታ ኣጊኮ ቆሩማ ሚሳቲዛ ኢስኬይካ ባይንዳ ኣጊኮኔ ማዱንꬃዚ ዱጌ ኣሾን ጌሎንታ ኣጊኮ፥
LEV 13:33 ሄሳዴይ ማዱንꬃ ዩዪ ኣꬊ ዲዛ ኢስኬዛ ኡባ ሜዴቶ፤ ቄሴይካ ኢዛ ቃሴካ ላፑን ጋላስ ጋካናስ ካሬይ ኢዛ ቦላ ጎርዴቲን ጋምኣና ማላ ኦꬆ።
LEV 13:34 ላፑንꬆ ጋላስ ቄሴዚ ቃሴካ ሄ ማዱንꬃ ፓጪ ጼሎ፤ ማዱንꬃይ ካሴፔ ኣኪ ኣኪ ቦንታ ኣጊኮኔ ኣሾ ሚ ኦላሶንታ ኣጊኮ ሄሳዴይ ዲዛ ዎጋ ማላ ጊዲዳይሳ ኢዛ ኤሪሶ፤ ኢዛዴይካ ባ ማይኦ ሜጪዲ ጌሽ ጊዶ።
LEV 13:35 ጊዶ ኣቲን ኢዚ ጌሽ ጊዲዳይሳ ቆንጪሲዳፔ ጉዬ ማዱንꬃይ ካሴፔ ኣኪ ኣኪ ቢኮ፥
LEV 13:36 ቄሴዚ ቃሴካ ፓጪ ጼሎ፤ ማዱንꬃይ ኣዳካ ካሴፔ ኣኪዳ ጊዲኮ ኢስኬይ ቆሩሚኮ ዎይኮ ቆሩሞንታ ኣጊኮካ ኢዛዴይ ቱና።
LEV 13:37 ጊዶ ኣቲን ቄሴዚ ቤዪሺን ማዱንꬃይ ካሴፔ ኣኪ ኣኪ ቦንታ ኣጊኮኔ ሎኦ ኢስኬይ ሞኪኮ ማዱንꬃይ ፓጺዳይሳኔ ኢዛዴይ ጌዪዳይሳ ቄሴዚ ኢዛ ኤሪሶ።
LEV 13:38 «ማጫስ ጊዲን ዎይኮ ኣዴ ጊዲን ኢሳዴ ቦላ ኢሊዋይ ኬዚኮ፥
LEV 13:39 ቄሴዚ ሄ ኢሊዋይ ዲዛዴዛ ፓጪ ጼሎ፤ ኢሊዋይ ዲዛሶይ ጮ ሜላ ፑቃ ቦꬅ ጊዶንታ ኣጊኮ ኢዛ ዳሮ ቆሆንታ ጮ ሜላ ቦላራ ጋልባ ቦላ ኬዚዳ ሺምፔ ጊዲዳ ጊሻስ ሄሳዴይ ዲዛ ዎጋ ማላ ኢዚ ጌሻ።
LEV 13:40 «ኢሳዴስ ሁኤ ኢስኬይ ጉዬ ባጋራ ዎይኮ ሲንꬃ ባጋራ ቦኣቲኮ ሄሳዴ ቦኣይ ኢዛ ቱኒሴና።
LEV 13:42 ጊዶ ኣቲን ኢዛ ቦኣ ቦላ ዎይኮ ሊጴ ቦላ ዞኢ ቤሲዛ ቦꬃ ማዱንꬂ ቤቲኮ ሄሲ ኢታ ሃራ ኣሳ ቦላ ኣꬊዛ ጋልባ ሃርጌ።
LEV 13:43 ቄሴዚ ሄሳዴ ፓጪ ጼሊሺን ሄሲ ሃራ ኣሳ ቦላ ኣꬊዛ ጋልባ ሃርጌ ሚሳቲዲ ዞኢ ቤሲዛ ቦꬃ ማዱንꬅ ጊዲኮ፥
LEV 13:44 ሄሳዴይ ሃራ ኣሳ ቦላ ኣꬊዛ ኢታ ሃርጌን ኦይኬቲዳ ጊሻስ ኢዛዴይ ቱና ጊዲዳይሳ ቄሴዚ ኢዛዴ ኤሪሶ።
LEV 13:45 ሄሳ ማላ ሃርጌይ ኢዛ ቦላ ዲዛዴይ ዳኬꬃ ማይኦ ማይኦ፤ ባ ሁኤካ ፒጾፖ፤ ባ ዶና ካሚዲ፥ ‹ታኒ ቱናኮ! ታኒ ቱናኮ!› ጊሼ ዋሶ።
LEV 13:46 ሄ ሃርጌዚ ኢዛ ቦላ ዲዛ ዎዴ ኡባን ኢዚ ቱና፤ ሄሳ ጊሻስ ኢዚ ኣሲ ዲዛሶፔ ጌዴ ሃራሶ ሃኪዲ ባርካ ዴኦ።
LEV 13:47 «ኣሳ ቦላ ሃርጌ ጋꬂዛ ቡቃይ ዶርሳ ኢስኬፌ ኦሴቲዳ ማይኦ ቦላ ዎይኮ ኣይ ቆሞ ማይኦ ቦላካ ሃርፓን ዳዴቲዳ ማይኦ ቦላ ዎይኮ ኩሼን ኦሴቲዳ ጋልባ ማይኦ ዎይኮ ጋልባፌ ኦሴቲዳ ማይኦ ቦላ ቤቲኮ፥
LEV 13:49 ሄ ሃርጌዛስ ማላይ ማታ ማላ ጪሊሊ ቤሲኮ ዎይኮ ዞኢ ቤሲኮ ሄሲ ኢሳፌ ኢሳን ኣꬊዛ ሃርጌ ጊዲዳ ጊሻስ ቄሴዚ ኢዛ ቤዮ።
LEV 13:50 ቄሴዚ ሄ ሃርጌዛ ሎኤꬂ ጼሊዲ ሄ ማይኦታ ኡባካ ላፑን ጋላስ ጋካናስ ኢሲ ኬꬃን ጌልꬂ ዱማ ዎꬆ።
LEV 13:51 ላፑንꬆ ጋላስ ቃሴካ ፓጪ ጼሊሺን ኣሳ ቦላ ሃርጌ ጋꬂዛ ቡቃዚ ካሴይሳፌ ዳሪ ቤቲኮ ሄሳ ማላ ማይኦዚ ቱና።
LEV 13:52 ሄሳ ማላ ማይኦ ቡቃይ ኣሳ ቦላ ሃርጌ ጋꬂዛ ጊሻስ ቄሴዚ ሺሺዲ ሄ ቡቃ ማይኦታ ታማን ጹጎ።
LEV 13:53 «ቄሴዚ ዛሪ ፓጪ ጼሊሺን ቡቃዚ ካሴፔ ሃ ዳሮንታ ኣጊኮ ማይኦዛ ሃꬃን ሜጫና ማላ ኣዛዞ፤ ሄ ሜጬቲዳ ማይኦዛ ላፑን ጋላስ ጋካናስ ሻኪ ዎꬆ።
LEV 13:55 ሄሳፌ ቃሴካ ጼሊሺን ካሴፔ ቡቃይ ጉጄቶንታ ኣጊኮኔ ቡቃዛ ሜꬋይ ካሴፔ ላሜቶንታ ኣጊኮ ሃኢካ ኢዚ ቱና፤ ካሴይሳ ቦላ ጊዶራ፥ ካሬራ ቡቃዚ ጉጄቲኮ ሄ ማይኦዚ ታማን ጹጌቶ።
LEV 13:56 ጊዶ ኣቲን ማይኦዛ ሜጪ ሲሚዳፔ ቄሴዚ ቃሴካ ዛሪ ቤኢዛ ዎዴ ቡቃዚ ካሴፔ ዱጌ ጉጺኮ ቡቃዚ ዲዛሶዮ ጻላ ኢታ ማይኦፌ ጊዲን ዎይኮ ኣፋላ ጊዲን ዳኪ ኬሶ።
LEV 13:57 ቡቃዚ ቃሴካ ቤቲኮ ሄሲ ጌዴ ዳሪ ዳሪ ቢዛ ጊሻስ ሄ ማይኦዚ ጹጌቶ።
LEV 13:58 ኣይ ማይኦኔ ጋልባፌ ኦሴቲዳ ኣይ ሚሽ ሜጪሺን ቡቃዚ ኢዛፔ ꬋይኮ ቃሴካ ሜጮ፤ ሄሳፌ ጉዬ ዎጋይ ጊዛ ማላ ማይኦዚ ጌሽ ጊዳና።»
LEV 13:59 ሃይሲ ዶርሳ ኢስኬፌ ኦሴቲዳ ማይኦ ቦላ ዎይኮ ኣይ ቆሞ ማይኦ ቦላ ዎይኮ ሃርፓን ዳዴቲዳ ዎይኮ ኩሼን ኦሴቲዳ ማይኦ ቦላ፥ ጋልባ ዎይኮ ጋልባፌ ኦሴቲዳ ማይኦ ቦላ ኣሳ ቦላ ሃርጌ ጋꬂዛ ቡቃይ ቤቲኮ ሄ ማይኦዚ ጌሽ ዎይኮ ቱና ጊዲዳይሳ ኤሪሲዛ ዎጋይ ሃይሳፌ ቦላን ዲዛይሳ።
LEV 14:1 ጎዳይ ሙሴስ ሂዝጊዴስ፥
LEV 14:2 «ኢሳዴይ ኣሳቴꬃ ቦላ ዲዛ ኢታ ጋልባ ሃርጌፌ ፓጺዳፔ ጉዬ ጌሾ ዎጋይ ሃይሳፌ ካሊዛይሳ፤ ኢዚ ጌሽ ጊዲዳይሳ ኢዛዴስ ዮቴቲዛ ጋላስ ሄሳዴይ ቄሴኮ ባና ማላ ኢዛስ ዮቴቶ።
LEV 14:3 ሄ ኢዛስ ዮቴቲዳ ቄሴዚ ኣሲ ዲዛሶፔ ጌዴ ሃራሶ ኬሲዲ ባኮ ዪዳይሳ ሎኤꬂ ጼሎ፤ ኢዛዴይ ሃርጌዛፔ ፓጺዳ ጊዲኮ፥
LEV 14:4 ቄሴዚ ፓጻ ዲዛ ናምኡ ጌሻ ካፎታኔ ዚጋ ሚꬅ፥ ዞኦ ጺላታ፥ ሂሶጴ ሚꬃ ሃይꬅ ጉጂ ኤኪ ያና ማላ ኣዛዞ።
LEV 14:5 ሄሳፌ ጉዬ ቄሴዚ ካፎታፔ ኢሳ ፑልቶ ሃꬂ ኢዛን ዲዛ ጉቃ ኬሬ ቦላ ሹኬታና ማላ ኣዛዞ።
LEV 14:6 ሃንኮ ፓጻ ዲዛ ካፎዛ ኤፊዲ ዚጋ ሚꬃራ፥ ዞኦ ጺላታራኔ ሂሶጴ ሚꬃ ቦንጮራ ኢሲፌ ጋꬂ ካሴ ሹኬቲዳ ካፎዛ ሱꬃን ጌልꬂ ኬሶ።
LEV 14:7 ሱꬃካ ኣሳቴꬃ ቦላ ዲዛ ጋልባ ሃርጌፌ ፓጺዛዴ ቦላ ላፑንቶ ዉጾ፤ ሄሳፌ ጉዬ ኢዚ ጌሽ ጊዲዳይሳ ኢዛ ኤሪሶ፤ ሃንኮ ፓጻ ዲዛ ካፎዛካ ጌዴ ሃራሶ ኬሲዲ ዴምባን ፒራꬋና ማላ ዬዶ።
LEV 14:8 «ኢታ ጋልባ ሃርጌፌ ፓጺዳዴይ ባ ማይኦ ሜጮ፤ ባ ቦላ ዲዛ ኢስኬ ኡባ ሜዴቶ፤ ባ ቦላካ ሜጬቶ፤ ዎጋይ ጊዛ ማላ ኢዚ ጌሽ ጊዳና፤ ሄሳፌ ጉዬ ኣሲ ዲዛሶ ጌላናስ ዳንዳዬስ፤ ጊዶ ኣቲን ላፑን ጋላስ ጋካናስ ኢዚ ባ ዱንካናፔ ካሬን ዴኦ።
LEV 14:9 ላፑንꬆ ጋላስ ቃሴካ ባ ሁኤ፥ ባ ቡቺኔ ባ ዴሞ፥ ሃራ ኣዋንካ ባ ኣሳቴꬃ ቦላ ዲዛ ኢስኬ ኡባ ሜዴቶ፤ ባ ማይኦ ሃꬃን ሜጮኔ ባ ቦላካ ሜጬቶ፤ ሄሳፌ ጉዬ ኢዚ ጌሽ ጊዳና።
LEV 14:10 «ኦስፑንꬃ ጋላስ ኢሲ ዎሶይካ ኢስታ ቦላ ባይንዳ ናምኡ ዶርሳ ላቃታኔ ኢሲ ላይꬃ ኡዞ ኤሆ፤ ካꬃ ያርሾ ጊሻስ ዎጋራ ሚꬃ ዛይቴን ሙኑቄቲዳ ሄꬑ ኪሎ ꬊሌኔ ኢሲ ሊቲሮ ዛይቴስ ሄꬓንꬆ ኩሼ ዎጋራ ሚꬃ ዛይቴ ኤሆ።
LEV 14:11 ቄሴዚካ ኣዴዚ ኢዚ ኤሂዳ ኡባራ ኢሲ ቦላ ጋይቶቴꬃ ዱንካኔዛ ፔንጌን ጎዳ ሲንꬅ ሺሾ።
LEV 14:12 «ሄሳፌ ጉዬ ናምኡ ቄሪ ꬋርሾታፔ ኢሳ ኤኪዲ ኢሲ ሊቲሮስ ሄꬓንꬆ ኩሼ ጊዲዛ ዎጋራ ዛይቴራ ኢሲፌ ጋꬂ ኤኪዲ ቆሆ ጊሻስ ሺቂዛ ያርሾ ሂስቲ ሺሾ፤ ቄሴዚ ሄ ያርሾዛካ ያኔ ሃ ቃሴꬂዛ ያርሾ ሂስቲ ጎዳ ሲንꬃን ቃሴꬂ ሺሾ።
LEV 14:13 ላቃዛካ ናጋራ ያርሾሲኔ ጹጌቲዛ ያርሾስ ሹኪዛ ጌሻሶሆን ሹኮ፤ ጋሶይካ ቆሆ ጊሻስ ያርሾይ ናጋራ ዉርሳናስ ሺቂዛ ያርሾ ማላ ቄሴዛስ ጊሻ ጊዳና፤ ኢዚካ ኬሂ ዱማ።
LEV 14:14 ቄሴዚ ቆሆ ያርሾስ ሺቂዛ ሱꬃፌ ጉꬃራ ኤኪዲ ሄ ጌይዛዴስ ኡሻቻ ሃይꬃ ጼራ ኢዛስ ኡሻቻ ኩሼ ማንꬃ ቢራꬌኔ ኡሻቻ ቶሆ ማንꬃ ቢራꬌ ቲዮ።
LEV 14:15 ቄሴዚ ዎጋራ ሚꬃ ዛይቴዛፔ ጉꬃራ ኤኪዲ ባ ሃዲርሳ ኩሼ ቃኣን ቲጎ።
LEV 14:16 ባ ኡሻቻ ኩሼ ጼራን ጉꬃራ ኤኪዲ ጾሳ ሲንꬃን ላፑንቶ ዉጾ።
LEV 14:17 ባ ኩሼ ቃኣን ኣቲዳ ዛይቴዛፔ ጉꬃራ ኤኪዲ ጌይዛዴስ ኡሻቻ ሃይꬃ ጼራ፥ ኡሻቻ ኩሼ ማንꬃ ቢራꬌኔ ኡሻቻ ቶሆ ማንꬃ ቢራꬌ ቲዮ።
LEV 14:18 ባ ኩሼ ቃኣን ኣቲዳ ዛይቴዛካ ጌይዛዴ ሁኤን ጉሶ፤ ቄሴይ ኢዛዴ ናጋራ ጌሾ።
LEV 14:19 «ሄሳፌ ጉዬ ቄሴዚ ባ ቱናቴꬃፌ ጌይዛዴ ናጋራ ዉርሳናስ ሺቂዳ ሜሄ ሹኮ።
LEV 14:20 ቃሴካ ቄሴዚ ሄ ጹጌቲዛ ያርሾዛ ካꬃ ያርሾዛራ ኢሲፌ ያርሾ ያርሺዛሶዛ ቦላ ዎꬂዲ ጹጎ፤ ሄሳ ማላ ኦሶን ኢዛዴ ናጋራፔ ማሪሴስ፤ ኢዛዴይካ ጌሽ ጊዴስ።
LEV 14:21 «ኢዛዴይ ሄሳ ኡባ ኤሃናስ ዳንዳዮንታ ማንቆ ጊዲኮ ጎዳ ሲንꬃን ያኔ ሃ ቃሴꬂዲ ባ ናጋራ ዉርሳናስ ኢሲ ꬋርሾ ላቃ ኤሂዲ ቆሆ ያርሾ ጊሻስ ሺሾ፤ ቃሴ ካꬃ ያርሾዛስካ ዎጋራ ሚꬃ ዛይቴን ሙኑቄቲዳ ኢሲ ኪሎ ሊቆ ꬊሌ ካꬃ ያርሾስ ኤሆ፤ ሄሳꬆካ ኢሲ ሊቲሮስ ሄꬓንꬆ ኩሼ ጊዲዛ ዛይቴ ኤሆ።
LEV 14:22 ቃሴካ ኢዛ ዎልቃይ ዳንዳይዳ ማላ ናምኡ ሃራጴታ ዎይኮ ናምኡ ዋኖሴታፔ ኢሳ ናጋራ ጊሻስ ያርሾስ፥ ናምኣንꬆዛ ቃሴ ጹጌቲዛ ያርሾስ ኤሆ።
LEV 14:23 «ጌሾ ዎጋይ ፖሌቲዛ ኦስፑንꬃ ጋላስ ሄይታ ኡባ ኤሂዲ ጋይቶቴꬃ ዱንካኔ ፔንጌን ጎዳ ሲንꬃን ቄሴስ ኢሞ።
LEV 14:24 ቄሴዚካ ቆሆ ያርሾስ ሺቂዛ ዶርሳ ላቃኔ ዎጋራ ሚꬃ ዛይቴዛ ኤኪዲ ያኔ ሃ ቃሴꬂዛ ያርሾ ኦꬂ ጎዳ ሲንꬃን ያርሾ።
LEV 14:25 ቆሆ ጊሻስ ሺቂዛ ያርሾስ ሺቂዳ ዶርሳ ላቃ ሹኮ፤ ሱꬃፌ ጉꬃራ ኤኪዲ ጌይዛዴስ ኡሻቻ ኩሼ ማንꬃ ቢራꬌ፥ ኡሻቻ ቶሆ ማንꬃ ቢራꬌኔ ኡሻቻ ሃይꬃ ጼራ ቲዮ።
LEV 14:26 ቄሴዚ ዛይቴዛፔ ጉꬃራ ባ ሃዲርሳ ኩሼ ቃኣን ቲጎ።
LEV 14:27 ባ ኡሻቻ ኩሼ ቢራꬌን ጉꬃራ ቦቺዲ ጾሳ ሲንꬃን ላፑንቶ ዉጾ።
LEV 14:28 ባ ኩሼ ቃኣን ቲጊዳ ዛይቴፔ ጉꬃራ ኤኪዲ ቆሆ ያርሾ ሱꬃን ቦቺዳሶን ሄሲካ ጌይዛዴስ ኡሻቻ ሃይꬃ ጼራ፥ ኡሻቻ ኩሼ ማንꬃ ቢራꬌ ጼራ፥ ኡሻቻ ቶሆ ማንꬃ ቢራꬌ ጼራ ቦሺሶ።
LEV 14:29 ቄሴዚ ባ ኩሼን ኣቲዳ ዛይቴዛ ኣዴዛ ሁኤን ጉሶ፤ ሄሳꬆ ኦꬂዲ ጌሾ ዎጋ ጎዳ ሲንꬃን ፖሎ።
LEV 14:30 ሄሳፌ ጉዬ ሃራጴታ ዎይኮ ዋኖሴታ ጌይዛዴ ዎልቃይ ጋꬂዳ ኬና ቄሴዚ ያርሾ።
LEV 14:31 ሄይታንታፌ ኢሳ ናጋራስ ሺቂዛ ያርሾስ ናምኣንꬆዛ ቃሴ ጹጌቲዛ ያርሾስ ካꬃ ያርሾራ ጋꬂ ሺሾ፤ ቄሴዚ ኡባካ ሃይሳ ማላን ጌይዛዴ ናጋራፔ ጌሾ።
LEV 14:32 ኣሳፔ ጌዴ ሃራ ኣሳን ኣꬊዛ ኢታ ጋልባ ሃርጌፌ ጌያናስ ኮሺዛ ዎጋ ፖላናስ ዳንዳዮንታ ማንቆ ኣሳስ ዲዛ ዎጋይ ሃይሳ» ጊዴስ።
LEV 14:33 ጎዳይ ሙሴሲኔ ኣሮኔስ ሂዝጊዴስ፥
LEV 14:34 «ታኒ ኢንቴስ ኢሚዛ ካናኔ ቢታ ኢንቴ ጌሊዛ ዎዴ ኢሲ ኬꬃን ታኒ ቡቃ ዬጊኮ፥
LEV 14:35 ሄ ኬꬃዴይ ቢዲ ቄሴዛ፥ ‹ታሶን ኣይ ኢታ ሃርጌይ ዲዛኮ› ጊዲ ዮቶ።
LEV 14:36 ሶን ዲዛ ሚሽ ኡባይ ቱና ጌቴቶንታ ማላ ቄሴዚ ሄ ኢታ ሃርጋ ቤያናስ ጌላናፔ ካሴቲዲ ሶን ዲዛ ሚሽ ኡባ ካሬ ኬሳና ማላ ኣዛዞ፤ ሄሳፌ ጉዬ ቄሴዚ ጼላናስ ኬꬃ ጊዶ ጌሎ።
LEV 14:37 ሃርጌዛ ሎኤꬂ ፓጪ ጼሊዛ ዎዴ ኬꬃ ሉኪ ሉኪ ሚዛ ሃርጌዛስ ሜꬋይ ማታ ማላ ጪሊላ ዎይኮ ዞኦ ዎይኮ ፑንጫርካ ሚሳቲ ቤቲኮ፥
LEV 14:38 ቄሴዚ ሄ ኬꬃፌ ኬዚዲ ኬꬃይ ላፑን ጋላስ ጋካናስ ጎርዴታና ማላ ኦꬆ።
LEV 14:39 ቄሴዚ ላፑንꬃ ጋላስ ሲሚዲ ቃሴካ ጼሎ፤ ሃርጌዚ ካሴፔ ጌዴ ዳሪ ዳሪ ቢኮ፥
LEV 14:40 ሃርጌይ ኢስታ ቦላ ቤቲዳ ሹቻቲ ኬꬃፌ ዎጬቲ ኬዚዲ ካታማፔ ጌዴ ካሬን ዲዛ ቱና ሚሽ ዬጌቲዛሶን ዬጌታና ማላ ኣዛዞ።
LEV 14:41 ሄሳፌ ጉዬ ኬꬃስ ሶ ባጋ ጊሪዲ ሄ ጊሬꬃዛ ካታማፔ ካሬ ባጋራ ቱና ሚሽ ዬጊዛሶን ዬጋና ማላ ኣዛዞ።
LEV 14:42 ሄሳፌ ጉዬ ካሴ ሹቻታ ሶሆን ሃራ ኦራꬃ ሹቺ ጌሊን ሄ ኬꬃን ሃራ ኦራꬃ ኡርቃይ ሜሼቶ።
LEV 14:43 «ሹቻቲ ዲጌቲን ቃሴካ ኡርቃካ ቆቆፊዲ ሃራ ኡርቃን ሜሺ ኦራꬂዳፔ ጉዬ ሄ ሃርጌዛ ማላታይ ቃሴካ ሲሚ ቤቲኮ፥
LEV 14:44 ቄሴዚ ሲሚ ቢዲ ቤዮ፤ ሃርጌዚ ካሴፔ ጌዴ ኣኪ ኣኪ ቢዛ ማላ ጊዲኮ ሄ ሃርጌይ ኢሳፌ ኢሳን ኣꬊዛ ኢታ ሃርጌ ጊዲዳ ጊሻስ ሄ ኬꬃይ ቱና።
LEV 14:45 ሄሳ ጊሻስ ሄ ኬꬃይ ላሌታናስ ቤሴስ፤ ሄ ኬꬃ ሹቻይ፥ ሚꬃይኔ ሚሺ፥ ኡርቃይ ዉሪካ ካታማፔ ጌዴ ካሬ ቱና ሚሺ ዬጌቲዛሶን ዬጌቶ።
LEV 14:46 ጎርዴቲዳፔ ጉዬ ሄ ኬꬃን ጌሊዳ ኣሲ ዉሪካ ኦማርስ ጋካናስ ቱና ጊዴስ።
LEV 14:47 ሄ ኬꬃን ኢቺዳዴይ ዎይኮ ካꬅ ሚዳዴይ ባ ማይኦ ሜጮ።
LEV 14:48 «ኬꬃይ ቃሴካ ኦራጺዲ ሜሼቲዳፔ ጉዬ ቄሴዚ ዪዲ ጼሊሺን ሃርጌዚ ካሴፔ ኣኪ ኣኪ ቦንታ ኣጊኮ፥ ሃርጌዛ ማላታይ ꬋይዳ ጊሻስ፥ ሄ ኬꬃይ ጌሽ ጊዲዳ ጊሻስ ቄሴዚ ኬꬃ ኣዋ ኤሪሶ።
LEV 14:49 ሄ ኬꬃ ጌሻናስ ናምኡ ካፎ፥ ሊባኖሴ ዚጋ፥ ዞኦ ጺላታኔ ሂሶጴ ጌቴቲዛ ሚꬃ ሃይꬅ ኤሆ።
LEV 14:50 ካፎታፔ ኢሳ ፑልቶ ሃꬂ ኢዛን ዲዛ ጉቃ ኬሬን ሹኮ፤
LEV 14:51 ሄሳፌ ጉዬ ዚጋ ሚꬅ፥ ሂሶጴ ሚꬃ ሃይꬅ፥ ዞኦ ጺላታኔ ፓጻ ዲዛ ካፎዛ ኢሲፌ ጋꬂ ኤኪዲ ጉቃ ኬሬን ዲዛ ፑልቶ ሃꬃኒኔ ሃንኮ ሹኬቲዳ ካፎዛ ሱꬃን ጌልꬂ ኬሲዲ ኬꬃዛ ላፑንቶ ኣራጮ።
LEV 14:52 ቄሴዚ ሄሳꬆ ሂስቲዲ ሄ ኬꬃ ካፎዛ ሱꬃን፥ ፑልቶ ሃꬃን፥ ፓጻ ዲዛ ካፎን፥ ዚጋ ሚꬃን፥ ሂሶጴ ሚꬃ ሃይꬃኒኔ ዞኦ ጺላታን ጌሾ።
LEV 14:53 ሄሳፌ ጉዬ ፓጻ ዲዛ ካፎዛ ኢዚ ፒራꬊ ባና ማላ ጌዴ ዴምባ ኬሲ ዬዶ፤ ሄሳꬆ ኦꬂዲ ኬꬃ ጌሺዛ ዎጋ ፖሊኮ ኬꬃይካ ጌሽ ጊዴስ።»
LEV 14:54 ሃይሲ ሃ ዎጋዚ ኢሳፌ ኢሳን ኣꬊዛ ጋልባ ቦላ ኬዚዛ ኣይ ሃርጌስ፥ ቃቻ ሃርጌስ፥
LEV 14:55 ማይኦ ቦላኔ ኬꬃ ቦላ ኢሳፌ ኢሳን ኣꬊ ኣꬊ ዪዛ ሃርጌስ፥
LEV 14:56 ኪጻ ሃርጌስ፥ ባꬊንቴሲኔ ኢሊዋ ሃርጌስ፥
LEV 14:57 ሃይሲ ኣይ ሚሺካ ቱና ዎይኮ ጌሽ ጊዲዳይሳ ሻኪ ኤሪሳናሲኔ ኢሳፌ ኢሳን ኣꬊዛ ኢታ ሃርጌ ዎይኮ ቡቃ ጌሻናስ ዲዛ ዎጋ።
LEV 15:1 ጎዳይ ሙሴሲኔ ኣሮኔስ ሂዝጊዴስ፥
LEV 15:2 «ኣይ ኣሳስካ ኢዛዴ ኣሳቴꬃፌ ጎጊዛ ሚሺ ዲኮ ሄሳዴይ ቱና ጋዳ ኢስራኤሌ ኣሳስ ዮታ።
LEV 15:3 ኣሳቴꬃፌ ጎጊ ኬዚዛይሲ ኣጎንታ ኢጺኮ ዎይኮ ጎጌꬃ ኣጊኮካ ሄሳዴይ ቱና።
LEV 15:4 «ሄሳዴይ ኢዛ ቦላ ኢቺዳ ሂꬂ፥ ኡቲዳ ኣይ ሚሺካ ቱና ጊዴስ።
LEV 15:5 ሂጻዛ ቦቺዳ ኣይ ኣሲካ ባ ማይኦኔ ባ ቦላ ሃꬃን ሜጮ፤ ጊዲኮካ ሄሳዴይ ኦማርስ ጋካናስ ቱና ጊዶ።
LEV 15:6 ኣሳቴꬃፌ ቱኒሲዛ ሚሺ ጎጊ ኬዚዛ ኣሲ ኡቲዳሶሆን ኡቲዳ ኣይ ኣሲካ ባ ማይኦኔ ባ ቦላ ሃꬃን ሜጮ፤ ጊዲኮካ ሄሳዴይ ኦማርስ ጋካናስ ቱና ጊዶ።
LEV 15:7 «ኣሳቴꬃፌ ቱኒሲዛ ሚሺ ጎጊ ኬዚዛ ኣስ ቦቺዳይ ኣይ ኣሲካ ባ ማይኦኔ ባ ቦላ ሃꬃን ሜጮ፤ ጊዲኮካ ኦማርስ ጋካናስ ቱና ጊዶ።
LEV 15:8 «ኣሳቴꬃፌ ቱኒሲዛ ሚሺ ጎጊ ኬዚዛ ኣሲ ሃንኮ ፓጻ ዲዛ ኣሳ ቦላ ጩች ጩቲኮ ሄ ጩቻይ ኢዛ ቦቺዳ ኣሲ ባ ማይኦኔ ባ ቦላ ሃꬃን ሜጮ፤ ጊዲኮካ ሄሳዴይ ኦማርስ ጋካናስ ቱና ጊዶ።
LEV 15:9 «ኣሳቴꬃፌ ቱኒሲዛ ሚሺ ጎጊ ኬዚዛ ኣሲ ኡቲዳ ኮራ ኡባይ ቱና፤
LEV 15:10 ሄሳዴይ ኢዛ ቦላ ኡቲዳ ሚሽ ቦቺዳ ኣሲ ኡባይ ኦማርስ ጋካናስ ቱና፤ ጊዶ ኣቲን ሄ ቱኒዳ ኢሲ ሚሻታፔ ኢሳ ዴንꬂዳ ኣይ ኣሲካ ባ ማይኦኔ ባ ቦላ ሜጮ፤ ጊዲኮካ ኢዚ ኦማርስ ጋካናስ ቱና ጊዶ።
LEV 15:11 «ኣሳቴꬃፌ ቱኒሲዛ ሚሺ ጎጊ ኬዚዛ ኣሲ ባ ኩሼ ሜጬቶንታ ዲሼ ሃራ ቦቺኮ ሄ ቦሼቲዳዴይ ባ ማይኦኔ ባ ቦላ ሃꬃን ሜጮ፤ ጊዲኮካ ኦማርስ ጋካናስ ቱና ጊዶ።
LEV 15:12 ኣሳቴꬃፌ ቱኒሲዛ ሚሺ ጎጊ ኬዚዛ ኣስ ቦቺዳ ማና ሚሺ ሜቆ፤ ሚꬃፌ ኦሴቲዳ ሚሺ ዉሪካ ሃꬃን ሜጬቶ።
LEV 15:13 «ኣሳቴꬃፌ ቱኒሲዛ ሚሺ ጎጊ ኬዚዛ ኣሲ ሄ ሃርጌዛፔ ፓጺኮ ካሴ ዲዛ ማላ ባ ፓጺዳይሳ ኤሪሳናስ ላፑን ጋላስ ጋካናስ ጋምኢሾ፤ ሄሳፌ ጉዬ ባ ማይኦ ሜጮ፤ ቃሴካ ባ ቦላ ጺሎ ጊዲዳ ፑልቶ ሃꬃን ሜጬቶ፤ ሂስቲዲ ጌሽ ጊዶ።
LEV 15:14 ኦስፑንꬃ ጋላስ ናምኡ ሃራጴታ ዎይኮ ናምኡ ሃራጴ ጪዬታ ጋይቶቴꬃ ዱንካኔ ፔንጌ ኤፊዲ ጎዳ ሲንꬃን ቄሴዛስ ኢሞ።
LEV 15:15 ቄሴዚካ ሃራጴታ ኤኪዲ ኢሳ ናጋራ ዉርሶስ ያርሾ፥ ሃንኮይሳ ቃሴ ጹጌቲዛ ያርሾ ሂስቲ ያርሾ፤ ሄሳꬆ ሂስቲዲ ቄሴዚ ሄሳዴ ጎጊ ኬዚዛ ሚሻስ ጌይዛ ዎጋ ጎዳ ሲንꬃን ፖሎ።
LEV 15:16 «ኣይ ኣሲካ ኢዛ ኣቱማቴꬃፌ ዜሬꬂ ጉኪኮ ኢዚ ባ ቦላ ሜጬቶ፤ ጊዲኮካ ኦማርስ ጋካናስ ቱና ጊዶ።
LEV 15:17 ዜሬꬃይ ኢዛ ቦላ ጉኪዳ ኣይ ማይኦ ጊዲን ዎይኮ ጋልባ ጊዲኮ ሃꬃን ሜጬቶ፤ ጊዲኮካ ኦማርስ ጋካናስ ቱና ጊዶ።
LEV 15:18 ኣዴይ ማጫሳራ ዚንኢ ዴንዲዳፔ ጉዬ ናምኣይካ ባንታ ቦላ ሃꬃን ሜጬቴቶ፤ ጊዲኮካ ኦማርስ ጋካናስ ቱና ጊዴቶ።
LEV 15:19 «ማጫሳስ ኣጊናን ኣጊናን ዪዛ ዎጋይ ቤቲኮ ላፑን ጋላስ ጋካናስ ኢዛ ቱና ጊዱ፤ ኢዞ ቦቺዛ ኣይ ኣሲካ ኦማርስ ጋካናስ ቱና ጊዶ።
LEV 15:20 ማጫሳስ ኣጊናን ኣጊናን ዲዛ ዎጋይ ዪዛ ዎዴ ኢዛ ኡቲዛሶይኔ ኢቺዳሶይ ኡባይ ቱና ጊዶ።
LEV 15:21 ኢዛ ኢቺዳ ሂጻ ቦቺዳ ኣይ ኣሲካ ባ ማይኦኔ ባ ቦላ ሜጮ፤ ጊዲኮካ ኦማርስ ጋካናስ ቱና ጊዶ፤
LEV 15:22 ኢዛ ኡቲዳ ኣይ ሚሺካ ቦቺዳዴይ ባ ማይኦኔ ባ ቦላ ሜጮ፤ ጊዲኮካ ኦማርስ ጋካናስ ቱና ጊዶ።
LEV 15:23 ኢዛ ኢቺዳሶ ዎይኮ ኡቲዳሶ ሚሽ ቦቺዳ ኣይ ኣሲካ ኦማርስ ጋካናስ ቱና ጊዶ።
LEV 15:24 ኣጊናን ኣጊናን ቤቲዛ ማጫሳ ዎጋይ ዪዛ ዎዴ ኢዚራ ዚንኢዛ ኣይ ኣዴይካ ኢዚ ማላ ቱና ጊዲዛ ጊሻስ ላፑን ጋላስ ጋካናስ ቱና ጊዶ፤ ኢዚ ኢቺዛ ሂጻይ ቱና ጊዴስ።
LEV 15:25 ኢሲ ማጫሳስ ኣጊናን ኣጊናን ቤቲዛ ማጫሳ ዎጋይ ጉኪዛ ዎዴፔ ዳሮ ጋላስ ጉኪኮ ዎይኮ ኣጊናን ኣጊናን ቤቲዛ ዎዴዛፔ ቦላራ ኣጎንታ ሱꬂ ጉኪኮ ሄ ሱꬃይ ኤቃና ጋካናስ ኢዛ ቱና ጊዳዉስ።
LEV 15:26 ሄ ዎዴ ኢዛ ኢቺዳ ሂጻ ጊዲን ዎይኮ ኢዛ ኢዛ ቦላ ኡቲዳ ሚሺ ኣጊናን ኣጊናን ቤቲዛ ማጫሳ ዎጋይ ዲዛ ዎዴ ሃኒዛ ማላ ኡባ ዎዴ ቱና።
LEV 15:27 ሄይታ ቦቺዳ ኣይ ኣሲካ ቱኒዳ ጊሻስ ባ ማይኦኔ ባ ቦላ ሜጮ፤ ጊዲኮካ ኦማርስ ጋካናስ ቱና ጊዶ።
LEV 15:28 «ኢዚፔ ጉኪዛ ሱꬃይ ኤቂኮ ሄ ሱꬃይ ኤቆ ጋላሳፌ ቢዲ ላፑን ጋላስ ጋካናስ ጋምኣዳ ሄሳፌ ጉዬ ዎጋይ ጊዛ ማላ ጌዩ።
LEV 15:29 ኦስፑንꬃ ጋላስ ናምኡ ሃራጴታ ዎይኮ ናምኡ ዋኖሴታ ጋይቶቴꬃ ዱንካኔ ፔንጌ ኤካ ያዳ ቄሴዛስ ኢሙ።
LEV 15:30 ቄሴዚካ ኢሳ ናጋራፔ ጌሺዛ ያርሾስ ናምኣንꬆዛካ ጹጌቲዛ ያርሾስ ሺሾ፤ ሂስቲዲ ሄ ማጫሳዮ ቱናቴꬃፌ ጌሺዛ ዎጋ ፖሎ።
LEV 15:31 «ሄን ኢስታ ጊዶን ዲዛ ጋይቶቴꬃ ዱንካኔ ቱኒሲዲ ሃይቆንታ ማላ ኢስራኤሌ ናይታ ቱኒሲዛ ሚሻፌ ናጊቴ።»
LEV 15:32 ቱኒሲዛ ሚሺ ኢዛ ኣሳቴꬃፌ ጎጊ ኬዚዛዴሲኔ ኢዛ ኣቱማቴꬃፌ ዜሬꬂ ጉኪዛዴስ፥
LEV 15:33 ቃሴካ ኣጊናን ኣጊናን ቤቲዛ ማጫሳ ዎጋይ ቤቲዛ ማጫሳስ ዎይኮ ኣዴ ጊዲን ማጫ ጊዲን ቱኒሲዛ ሚሺ ኢስታ ኣሳቴꬃፌ ጎጊዛ ዎዴ ዎይኮ ጌዮንታ ማጫሳራ ዚንኢዛ ኣቱማሳስ ዎꬊዳ ዎጋይ ሄሳ።
LEV 16:1 ኣሮኔ ኣቱማ ና ናምኣቲ ቤሶንታ ታማ ጎዳ ሲንꬅ ኤኪ ሺቂዳ ጊሻስ ሃይቂዳ፤ ሄሳፌ ጉዬ ጎዳይ ሙሴስ ሂዝጊዴስ፥
LEV 16:2 «ኔ ኢሻ ኣሮኔይ ታቦታ ቦላን ዲዛ ኣቶ ጊዛሶዛ ካሚዛይሳ ሲንꬃን ማጋላሻፔ ጉዬ ባጋራ ዲዛ ኬሂ ዱማ ጌቴቲዛሶዛ ባ ሼኔ ማላ ኡባ ዎዴ ጌሎንታ ማላ ኢዛስ ዮታ፤ ኢዚ ኡባ ዎዴ ባ ሼኔን ጌሊዛ ጊዲኮ ሃይቃና፤ ጋሶይካ ታኒ ሻራ ጊዶራ ኣቶ ጊዛሶዛ ካማ ቦላ ቆንጫይስ።
LEV 16:3 «ኣሮኔይ ናጋራፔ ማሬꬂዛ ያርሾስ ኢሲ ሚርጎ ቦራኔ ቃሴ ጹጌቲዛ ያርሾስ ኢሲ ꬋርሾ ኤኪዲ ኬሂ ዱማ ጌቴቲዛሶዛ ጌሎ።
LEV 16:4 ኣሮኔይ ኬሂ ዱማ ጌቴቲዛሶ ጌላናፔ ካሴ ማይኦቲ ዱማ ጊዲዳ ጊሻስ ባ ቦላ ሜጬቲዲ ቄሴቴꬃ ማይኦ ማይኦ፤ ሄሲካ ላይኖፔ ኦሴቲዳ ቃሚሳኔ ሱሬ ማይኦ፤ ሄሳꬆካ ላይኖፔ ኦሴቲዳ ቃባቶን ጊጾ፤ ላይኖፔ ኦሴቲዳ ጎሴካ ጎዞ።
LEV 16:5 «ኢስራኤሌ ናይታ ማባራይ ናጋራ ጊሻስ ሺሺዛ ያርሾስ ናምኡ ዴይሻ ኦርጌኔ ጹጌቲዛ ያርሾስ ኢሲ ꬋርሾ ኣሮኔስ ኤሄቶ።
LEV 16:6 ኣሮኔይ ባሲኔ ባሶ ኣሳ ናጋራ ዉርሳናስ ኢሲ ኮርማ ቦራ ያርሾስ ሺሾ።
LEV 16:7 ሄሳፌ ጉዬ ሄ ናምኡ ዴይሻ ኦርጌታ ጌዴ ጋይቶቴꬃ ዱንካኔዛ ፔንጌን ጎዳ ሲንꬅ ኤፎ።
LEV 16:8 ሂስቲዲ ሄ ናምኡ ኦርጌታ ቦላ ኢዚ ሳማ ዬጎ፤ ሄይታፔ ኢሶይ፥ ‹ጎዳ› ናምኣንꬆዚ፥ ‹ኣዛዜሌ› ጊዛ ማላታይ ዲዛ ሹቻታ ኦርጌታ ቦላ ዬጎ።
LEV 16:9 ጎዳስ ጊዛ ማላታይ ኢዛ ቦላ ዎꬊዳ ዴይሻዛ ናጋራፔ ጌሺዛ ያርሾስ ሹኮ።
LEV 16:10 ኣዛዜሌስ ጊዛ ማላታይ ኢዛ ቦላ ዎꬊዳ ዴይሻዚ ሹኬቶንታ ፓጻ ጎዳስ ሺቆ፤ ዴሬዛ ናጋራ ቶኪዲ ዱጌ ባዞ ዬዴቶ።
LEV 16:11 «ኣሮኔይካ ኮርማ ቦራዛ ባ ናጋራ ዉርሳናሲኔ ባሶ ኣሳ ናጋራ ዉርሳናስ ያርሾ ሹኮ።
LEV 16:12 ቃሴ ጎዳ ሲንꬃን ዲዛ ያርሾ ያርሺዛሶፔ ኤጻኔ ጩዋሲዛ ሚሻ ኩሜꬃ ቦንቆኔ ሊቂ ጋጬቲዳ ናምኡ ዞሌ ሳዊዛ ኤጻኔ ኤኪዲ ማጋላሻ ጊዶን ዲዛ ኬሂ ዱማ ጊዲዳ ኪፊሌ ኤሆ።
LEV 16:13 ኤጻኔዛ ሄን ጎዳ ሲንꬃን ታማን ዬጎ፤ ኢዚ ኢዛ ቤኢዲ ሃይቆንታ ማላ ኤጻኔዛ ጩዋይ ታቦታ ካሚዛይሳ ኡባ ጌንꬆ።
LEV 16:14 ኮርማዛ ሱꬃፌ ጉꬃራ ኤኪዲ ኢዛን ባ ቢራꬌ ጌልꬂ ጌልꬂዲ ታቦታ ካማዛ ቦላ ሲንꬃ ባጋራ ኣራጮ፤ ሄሳꬆካ ኢዛፔ ጉꬃራ ጫቆ ቃላ ታቦታ ሲንꬃን ላፑንቶ ዉጾ።
LEV 16:15 «ሄሳፌ ጉዬ ሃንኮ ዴሬዛ ናጋራ ጊሻስ ሹኬቲዛ ዴይሻ ሹኮ፤ ኢዛ ሱꬃ ኬሂ ዱማ ጌቴቲዛ ኪፊሌዛ ጌልꬂዲ ካሴ ኮርማዛ ሱꬃ ኦꬆይሳꬆ ኣቶ ጊዛሶ ታቦታ ካማዛ ቦላኒኔ ኢዛስ ሲንꬃ ባጋራ ላፑንቶ ዉጾ።
LEV 16:16 ሄሳꬆካ ኦꬂዲ ኬሂ ዱማ ጊዲዳ ኪፊሌዛ ኢስራኤሌ ናይታ ቱናቴꬃፌኔ ኢስታ ናጋራ ኡባፌ ጌሻናስ ጌሾ ዎጋ ፖሎ፤ ካሴ ኢስቲ ቱና ሚሽ ኦꬂሺን ኢስታ ጊዶን ዲዛ ጋይቶቴꬃ ዱንካኔዛካ ሄሳꬆ ጌሾ።
LEV 16:17 ጌሾ ዎጋ ፖላናስ ኣሮኔይ ኬሂ ዱማ ጌቴቲዛ ኪፊሌዛ ጌሊዲ ባ ናጋራ ጊሻስ፥ ባሶ ኣሳ ናጋራ ጊሻሲኔ ኢስራኤሌ ዴሬ ናጋራ ጊሻስ ያርሾ ሺሺ ማሪሲዲ ኬዛና ጋካናስ ኣይ ኣሲካ ጋይቶቴꬃ ዱንካኔዛ ጊዶን ዶፖ።
LEV 16:18 ሄሳፌ ካሊዲ ኢዚ ጎዳ ሲንꬃን ያርሾ ያርሺዛሶ ኬዚዲ ጌሾ፤ ኮርማ ሱꬃፌኔ ዴይሻ ሱꬃፌ ጉꬃራ ኤኪዲ ያርሾ ያርሺዛሶዛን ዩዪ ኣꬋናስ ዲዛ ꬌሞታ ቲዮ።
LEV 16:19 ቃሴ ኢስራኤሌ ናይታ ቱናቴꬃፌ ያርሾ ያርሺዛሶዛ ጌሻናሲኔ ዱማሳናስ ሱꬃፌ ጉꬃራ ኤኪዲ ባ ቢራꬌ ጼራን ያርሾ ያርሺዛሶዛ ቦላ ላፑንቶ ዉጾ።
LEV 16:20 «ኣሮኔይ ኬሂ ዱማ ጌቴቲዛሶ፥ ጋይቶቴꬃ ዱንካኔኔ ያርሾ ያርሺዛሶዛ ጌሾ ዎጋ ፖሊዳፔ ጉዬ ሹኬቶንታ ኣቲዳ ባቃ ዴይሻ ኤኪዲ ጎዳስ ሺሾ።
LEV 16:21 ባ ኩሼ ናምኣታ ዴይሻ ሁኤ ቦላ ዎꬂዲ ዴሬዛ ናጋራ፥ ኢታቴꬃኔ ማካላቴꬃ ኡባ ፓጾ፤ ዴይሻዛ ሁኤ ቦላ ዩሺ ፒቲሼ ዴራ ናጋራ ኢዛ ቦላ ዎꬆ፤ ሄሳፌ ጉዬ ካሴ ዴይሻዛ ኤፋናስ ጊጌቲ ኡቲዳዴ ቦላ ዱጌ ባዞ ዬዴቶ።
LEV 16:22 ሄሲካ ዴይሻይ ኣሳ ኡባ ናጋራ ኡባ ቶኪዲ ኣይ ኣሲካ ባይንዳሶ ዱጌ ባዞ ሃሲ ዬዶ።
LEV 16:23 «ኣሮኔይካ ጋይቶቴꬃ ዱንካና ጊዶ ጌሎ፤ ጌዴ ኬሂ ዱማ ጌቴቲዛ ኪፊሌዛ ጌላናፔ ካሴቲዲ ኢዚ ካሴ ማይኢዳ ቄሴቴꬃ ማይኦዛ ሄን ቃሪ ዎꬆ።
LEV 16:24 ባ ቦላ ሄን ጌሻሶሆን ሜጬቲዲ ባ ካሴ ማይኢዛ ማይኦ፤ ሄፔ ኬዚዲ ባ ናጋራ ዉርሳናሲኔ ዴራ ናጋራ ዉርሳናስ ጹጌቲዛ ያርሾ ሺሾ።
LEV 16:25 ናጋራ ዉርሳናስ ሺቂዳ ሜሄዛ ሞꬌ ያርሾ ያርሺዛሶዛ ቦላ ጹጎ።
LEV 16:26 «ባዞ ዬዴቲዛ ዴይሻ ዱጌ ባዞ ላጊ ኤፊዳዴይ ጉዬ ኣሳይ ዲዛሶ ሲሚ ጌላናፔ ካሴቲዲ ባ ማይኦ ሜጮ፤ ባ ቦላካ ሜጬቶ፤ ሄሳፌ ጉዬ ኣሳይ ዲዛሶ ጌሎ።
LEV 16:27 ናጋራ ጊሻስ ያርሼታና ሺቂዳይታኔ ናጋራ ጌሻናስ ኢስታ ሱꬂ ኬሂ ዱማ ኪፊሌ ጌቴቲዛሶ ጌሊዳ ኮርማዛኔ ዴይሻዛ ኣሾይ፥ ጋልባዚኔ ቶጬይ ኣቶንታ ኣሲ ዲዛሶፔ ጌዴ ሃራሶ ቢዲ ጹጌቶ።
LEV 16:28 ሄሳ ኡባ ጹጊዛዴይ ጹጊዲ ኣሲ ዲዛሶ ሲሚ ጌላናፔ ካሴቲዲ ባ ማይኦ ሃꬃን ሜጮ፤ ባ ቦላካ ሜጬቶ።
LEV 16:29 «ሃይሳፌ ካሊዲ ኢንቴስ ኢሜቲዛ ዎጋታ ሃይሳፌ ጉዬ ያና ላይꬃታን ኡባን ላሜቶንታ ኤቂ ዲዛ ዎጋ ሂስቲዲ ናጊቴ፤ ላይꬃፌ ላፑንꬃ ኣጊናይ ጌሊዳ ታማንꬆ ጋላስ ኢስራኤሌ ዴሬ ኣሳይኔ ኢስታ ጋርሳን ዲዛ ሃራ ዴሬ ኣሳይ ጾማ ጾማናስ ቤሴስ፤ ሄ ጋላስ ኣይ ኦሶይካ ኦሴቶፎ።
LEV 16:30 ሄ ጋላስ ኢንቴ ናጋራይ ኪቻና ማላኔ ኢንቴ ጌያና ማላ ጌሾ ዎጋይ ፖሌቲዛ ጊሻስ ኢንቴ ጎዳ ሲንꬃን ኢንቴ ናጋራ ኡባፌ ጌዪዳይታ ጊዳና።
LEV 16:31 ሄ ጋላሳይ ጾማ ጋላሲኔ ሼምፖ ሼምፒዛ ሳምባታ ጋላስ ጊዶ፤ ሄሲካ ሜርና ዎጋ ጊዶ፤
LEV 16:32 ባ ኣዋ ሶሆን ቄሴታ ሃላቃ ጊዳናስ ቲዬቲዳኔ ሹሜቲዳ ቄሴይ ናጋራ ኡባ ዎጋ ፖላናስ ባ ቄሴቴꬃ ማይኦዛ ማይኢዲ ፖሎ።
LEV 16:33 ኢዚካ ኬሂ ዱማ ኪፊሌዛ፥ ያርሾ ያርሺዛሶዛ፥ ጋይቶቴꬃ ዱንካኔዛ፤ ቄሴታኔ ኢስራኤሌ ኣሳ ኡባ ናጋራ ዉርሶ።
LEV 16:34 ኢስራኤሌ ኣሳ ናጋራ ኡባ ዎጋ ኢንቴ ላይꬃን ላይꬃን ኢሲቶ ፖላና ማላ ሄሲ ኢንቴስ ሜርናስ ላሜቶንታ ዎጋ ጊዶ።» ሄሳꬆ ጎዳይ ኢዛ ኣዛዚዳ ማላ ሙሴይ ኦꬂዴስ።
LEV 17:1 ጎዳይ ሙሴስ ሂዝጊዴስ፥
LEV 17:2 « ‹ጎዳይ ኣዛዚዳ ኣዛዞይ ሃይሳ› ጋዳ ኣሮኔስ፥ ኢዛ ናይታሲኔ ኢስራኤሌ ኣሲ ኡባይ ዲዛ ሄራን ዮታ፤
LEV 17:3 ዎይኮ ባ ዲዛ ሄራፔ ካሬን ቦራ ዎይኮ ዶርስ ዎይኮ ዴይሼ ያርሾ ሹኪዲ፥
LEV 17:4 ጎዳስ ዱማቲዳሶን ጾሳስ ያርሻናስ ጋይቶቴꬃ ዱንካኔ ፔንጌ ኤሆንታ ኣጊኮ ሄሳዴይ ሱꬃ ጮ ሃዳ ጉሲዳ ማላ ቆዴቲዲ ዴሬ ጊዶፌ ሻኬቲ ጎዴቶ።
LEV 17:5 ሄሳ ጊሻስ ኢስራኤሌ ናይቲ ኣይ ሜሄ ጊዲን ጮ ዴምባን ሹኮንታ ጎዳ ሲንꬅ ጋይቶቴꬃ ዱንካኔ ፔንጌ ኤሄቶ፤ ሜሄታ ዱንካኔ ፔንጌ ኤሂዲ ቄሴዛስ ኢሜቶ፤ ቄሴዚካ ኢሲፌቴꬃ ያርሾ ሂስቲ ሹኮ።
LEV 17:6 ቄሴዚካ ሱꬃ ጋይቶቴꬃ ዱንካኔ ፔንጌን ዲዛ ጎዳስ ያርሾ ያርሺዛሶዛ ቦላ ዉጾ፤ ጎዳ ኡፋይሲዛ ሎኦ ሳዎ ጊዳና ማላ ሞꬌዛ ታማን ጹጎ።
LEV 17:7 ኢስራኤሌ ናይቲ ኢስታ ኣማኖፔ ሃሲዛ ዳይዳንꬃታስ ያርሾ ኦꬂዲ ባ ሜሄ ቤቶሶን ቤቶሶን ያርሾስ ሹካናስ ቤሴና፤ ሄሲካ ኢስታሲኔ ኢስታፌ ጉዬ ዬሌታ ኡባስ ሜርና ዎጋ ጊዲ ዴኦ።
LEV 17:8 «ኔ ኢስታስ፥ ‹ኢስራኤሌ ናይታፔ ጊዲን ዎይኮ ኢስታራ ዲዛ ሃራ ዴሬ ኣስ ጊዲን ዱንካኔዛ ፔንጌፌ ኣቲን ሃራሶን ኣዋንካ ጎዳስ ጹጌቲዛ ያርሾ ዎይኮ ሃራ ያርሾ ያርሺኮ ሄሳዴይ ጎዳ ዴሬታራ ቆዴታናስ ቤሴና› ጋ ዮታ።
LEV 17:10 «ኢስራኤሌ ኣስ ጊዲዳይ ኦኒካ ዎይኮ ኢስራኤሌ ናይታራ ኢሲፌ ዲዛ ሃራ ዴሬ ኣሲ ሱꬅ ኡዪኮ ሄሳዴይ ታ ኣቻን ኢጼቲዳዴ ጊዴስ፤ ታኒ ሄሳዴ ኢዛ ዴሬ ጋርሳፌ ሻካ ꬋይሳና።
LEV 17:11 ሼምፖራ ፓጻ ዲዛ ሜꬌቴꬅ ኡባስ ሼምፖይ ሱꬃ ጊዶን ዴስ፤ ሄሳ ጊሻስ ኣሳ ናጋራ ዉርሳናስ ጉኪዛ ሱꬂ ዉሪካ ያርሾ ያርሺዛሶዛ ቦላ ጉካና ማላ ኢማዲስ፤ ኣሳ ሼምፖ ናጋራፔ ማሪሲዛይ ሱꬃ።
LEV 17:12 ሄሳ ጊሻስ ኢስራኤሌ ኣሳ፥ ‹ኢንቴፌ ዎይኮ ኢንቴ ጊዶን ዲዛ ሃራ ዴሬ ኣሳፔ ኦኒካ ሱꬅ ኡዮፖ› ጋይስ።
LEV 17:13 «ኢስራኤሌ ናይታፔ ዎይኮ ኢስታራ ዲዛ ሃራ ዴሬ ኣሳፔ ኦኒካ ኣሾይ ሜቴታና ማላ ኢሜቲዳ ሜሄ ጊዲን ዎይኮ ዎራ ዶኣ ዎይኮ ካፎ ሻንካቲ ኦይኪዲ ኢዛ ሱꬃ ቢታ ቦላ ጉሲዲ ቢታ ኢዛ ቦላ ካሞ።
LEV 17:14 ጋሶይካ ኣሾ ማይኢዳ ኡባ ሼምፖይ ሱꬃ ጊዶን ዴስ፤ ሄሳ ጊሻስ ታኒ ኢስራኤሌ ኣሳ፥ ‹ኣሾ ማይኢዳ ሜꬌታ ኡባ ሼምፖይ ኢዛ ሱꬃ ጊዶን ዲዛ ጊሻስ ሱꬅ ሞፒቴ፤ ሚዳዴይ ኦኒካ ባ ዴሬ ጊዶፌ ሻኬቲ ꬋዮ› ጋይስ።
LEV 17:15 «ኢስራኤሌ ናይታፔ ዎይኮ ሃራ ዴሬ ኣሳፔ ኦኒካ ባዉቲ ሃይቂዳዝ ዎይኮ ዶኣይ ዎꬊዳ ሜሄ ኣሾ ሚኮ ባ ማይኦ ሜጮ፤ ባ ቦላ ሜጬቶ፤ ጊዲኮካ ኦማርስ ጋካናስ ቱና ጊዶ፤ ሄሳፌ ጉዬ ጌሽ ጊዶ።
LEV 17:16 ባ ማይኦ ሜጮንታ ኣጊኮኔ ባ ቦላ ሜጬቶንታ ኣጊኮ ሄሳዴይ ናጋራ ኦꬂዳ ጊሻስ ባ ናጋራን ኦይሼታና።»
LEV 18:1 ጎዳይ ሙሴስ ሂዝጊ ዮቲዴስ፤
LEV 18:2 «ኢስራኤሌ ናይታስ፥ ‹ታኒ ጎዳ ኢንቴ ጾሳ፤
LEV 18:3 ካሴ ኢንቴ ሄን ዴኢዳ ጊብጼ ቢታ ኣሳይ ዎይኮ ቡሮ ታ ኢንቴና ጌልꬃና ካናኔ ቢታን ዲዛ ዴሬ ኣሳይ ኦꬂዛ ሻቲዛ ኦሶ ኢንቴ ኦꬆፍቴኔ ኢስታ ሃኖ ካሎፍቴ።
LEV 18:4 ታ ዎጋታ ናጊቴ፤ ታ ኣዛዞታካ ፖሊቴ፤ ታኒ ጎዳ ኢንቴ ጾሳ።
LEV 18:5 ታ ኣዛዞታኔ ዎጋታ ናጊቴ፤ ሄሳንታ ናጊዛ ኣሲ ባ ሼምፖ ኣሻና፤ ታኒ ጎዳ› ጋ ዮታ።
LEV 18:6 «ኢንቴፌ ኦኒካ ባስ ኣሾ ዳቦራ ላይማቶፖ፤ ታኒ ጎዳ።
LEV 18:7 «ኔ ኣዬይራ ላይማታዳ ኔ ኣዋ ካዉሾፋ፤ ኔስ ኣዮ ጊዲዳ ጊሻስ ኢዚራ ላይማቶፓ።
LEV 18:8 «ኔ ኣዋስ ሃራ ማቼታራካ ላይማታዳ ኔ ኣዋ ዬላቾፋ።
LEV 18:9 «ኔ ሚቼይራ ላይማቶፓ፤ ሄሳꬆካ ኔናራ ኢሲፌ ዲጪዳሮ ጊዲን ዎይኮ ሃራሶን ዲጪዳሮ ጊዲን ኔ ኣዋይ ዬሊዳ ሃራ ማቺ ና ዎይኮ ኔ ኣያ ሃራ ኣዚናስ ዬሊዳ ማጫ ናይራ ላይማቶፓ።
LEV 18:10 «ኔስ ዬላ ጊዶንታ ማላ ኔስ ናዛ ናይራ፥ ዎይኮ ኔስ ናይ ናይራ ላይማቶፓ።
LEV 18:11 «ኔ ኣዋስ ሃራ ማቻ ዬሊዳ ኔ ሚቼይራ ዚንኦፋ፤ ጋሶይካ ኢዛ ኔስ ሚቾ።
LEV 18:12 «ኔ ኣዋ ሚቼይራ ዚንኦፋ፤ ጋሶይካ ኢዛ ኔስ ሚቾ።
LEV 18:13 ኔ ኣዬይ ሚቼይራካ ዚንኦፋ፤ ጋሶይካ ኢዛ ኔ ኣዬይስ ኣሾ ዳቦ።
LEV 18:14 «ኔ ኣዋ ኢሻ ማቺራ ዚንኦፋ፤ ጋሶይካ ኢዛ ኔስ ኣዋ ማቺ ማላ።
LEV 18:15 «ኔ ናዛ ማቼይራ ዚንኦፋ፤ ኢዛ ኔስ ናዛ ማቾ ጊዲዳ ጊሻስ ኢዚራ ዚንኦፋ።
LEV 18:16 ኔ ኢሻ ማቼይራ ዚንኦፋ፤ ጋሶይካ ኢዛ ኔስ ኢሻ ማቾ፤ ሄሲ ኔ ኢሻ ካዉሺዛ ሚሻ።
LEV 18:17 «ኣዬይራኔ ናይራ ዚንኦፋ፤ ኢዚስ ናይ ናዛ ናይራኔ ናይስ ናይ ናይራ ዚንኦፋ፤ ኢስቲካ ኢዛስ ማታ ዳቦ ጊዲዳ ጊሻስ ሄሳꬆ ሃኖይ ካዉሻቴꬃ።
LEV 18:18 «ኔ ማቺያ ፓጻ ዲሺን ኢዚ ሚቺዮ ዳዉꬅ ኤኮፋ፤ ኢዚራካ ላይማቶፓ።
LEV 18:19 «ኣጊናን ኣጊናን ቤቲዛ ማጫሳ ዎጋይ ዪዛ ዎዴ ማጫሳራ ዚንኦፋ።
LEV 18:20 «ሃራ ኣሳ ማቺራ ዚንኣዳ ኔርካ ኔና ቱኒሶፓ።
LEV 18:21 «ኔ ናይታፔ ኦናካ ሞሎኬ ጌቴቲዛ ኤቃስ ጹጌቲዛ ያርሾ ኦꬃ ኢሞፋ፤ ጋሶይካ ኔ ጾሳ ሱንꬅ ቱኒሶፓ፤ ታኒ ጎዳ።
LEV 18:22 «ጎዳ ሲንꬃን ኢጼቲዳ ሚሽ ጊዲዳ ጊሻስ ማጫሳራ ዚንኢዛ ማላ ኣዴራ ዚንኦፋ።
LEV 18:23 «ኣዴ ጊዲን ዎይኮ ማጫሲ ሜሄራ ፓራቲዲ ባናቴꬃ ቱኒሶፖ፤ ሄሳ ማላ ሃኖይ ካዉሻቴꬃ።
LEV 18:24 «ጎዳይ ኔና ኢስታ ዴሬ ጌልꬃናስ ኔ ሲንꬃፌ ዲጋና፤ ሃንኮ ኣሳይ ባርካ ባ ኦሶን ባና ቱኒሲዳይሳ ማላ ኢስቲ ኦꬂዛ ኢታ ኦሶታፔ ኢሲኔይንካ ኢንቴና ቱኒሶፒቴ።
LEV 18:25 ኢስታ ኦሶይ ቢታ ቱኒሲዳ ጊሻስ ታኒ ሄ ቢታዮ ኢዚ ናጋራ ጊሻስ ቃጻያዲስ፤ ቢታያካ ባ ጊዶን ዲዛ ኣሳ ኬሳ ጩታዱስ።
LEV 18:26 ኢንቴ ጊዲኮ ታ ኣዛዞታኔ ታ ዎጋ ናጊቴ፤ ኢስራኤሌ ኣሳፔ ዎይኮ ኢንቴ ጊዶን ዲዛ ሃራ ቢታ ኣሳፔ ኦኒካ ሃይሳ ማላ ኣይ ኦሶካ ኦꬆፍቴ።
LEV 18:27 ኢንቴፌ ካሴ ሄ ቢታይን ዲዛ ኣሳቲ ሄይታ ማላ ሃራሲዛ ሚሽ ኦꬂዳ ጊሻስ ቢታያ ቱናዱስ።
LEV 18:28 ኢንቴ ሄሳꬆ ኦꬂኮ ቢታያ ካሴ ኢንቴፌ ሲንꬃን ዲዛ ካዎቴꬃታ ጩቲዳይሳꬆ ኢንቴናካ ጩታና።
LEV 18:29 «ሃይታ ሃራሲዛ ኢታ ኦሶታፔ ኢሲኔዮካ ኦꬂዛዴይ ባ ዴሬ ኣሳ ጊዶፌ ሻኬቲ ꬋዮ።
LEV 18:30 ሄሳ ጊሻስ ኢንቴፌ ካሴ ሲንꬃን ቢታ ቦላ ዲዛ ኣሳቲ ኦꬂዳ ቱና ኦሶታ ኡባ ኦꬂዲ ኢንቴ ቱኖንታ ማላ ታ ኣዛዞታ ናጊቴ፤ ታኒ ጎዳ ኢንቴ ጾሳ።»
LEV 19:1 ጎዳይ ሙሴ ሂዝጊዴስ፥
LEV 19:2 «ሃይሳ ኢስራኤሌ ናይታስ ዮታ፥ ‹ታኒ ጎዳይ ኢንቴ ጾሳይ ዱማ ጊዲዳ ማላ ኢንቴካ ዱማ ጊዲቴ።
LEV 19:3 « ‹ኢንቴፌ ኦኒካ ኣቶንታ ባ ኣዋኔ ባ ኣዮ ቦንቾ፤ ታ ኢንቴና ኣዛዚዳ ማላ ሳምባታ ጋላሳታ ቦንቾ፤ ታኒ ጎዳ ኢንቴ ጾሳ።
LEV 19:4 « ‹ታና ኣጊዲ ኤቃታስ ጎይኖፍቴ፤ ዎይኮ ኤቃ ጾሳታ ቢራታፔ ሴሪሲዲ ኢንቴስ ሜꬎፍቴ፤ ታኒ ጎዳ ኢንቴ ጾሳ።
LEV 19:5 « ‹ኢንቴ ኢሲፌቴꬃ ያርሾ ጎዳስ ሺሺዛ ዎዴ ሄ ያርሾይ ኢንቴ ጊሻስ ኤኬታና ቤሲዛ ማላ ያርሺቴ።
LEV 19:6 ያርሾዛ ሺሺዳ ጋላስ ዎይኮ ዎንቴꬃ ጋላስ ሜቴታናስ ቤሴስ፤ ሄꬓንꬆ ጋላስ ጋካናስ ጋምኢዳ ያርሾይ ዉሪካ ታማን ጹጌቶ።
LEV 19:7 ሄꬓንꬆ ጋላሳን ኢዛ ሚኮ ሄሲ ቱና፤ ሄሳ ጊሻስ ታኒ ሄ ያርሾዛ ኤኪኬ።
LEV 19:8 ኢዛፔ ሚዳዴይ ኦኒካ ታስ ዱማቲዳይሳ ሃዳ ሚሻ ማላ ቆዲዳ ጊሻስ ኢዚ ባ ናጋራን ኦይሼታና፤ ሄሳዴይ ባ ዴሬ ኣሳ ጊዶፌ ሻኬቲ ꬋዮ።
LEV 19:9 « ‹ኢንቴ ማጻ ዎዴ ኢንቴ ካꬅ ማጺሺን ጋጻ ቦላ ዲዛ ካꬅ ማጾፒቴ፤ ኢንቴ ማጺሺን ጌዶን ኣቲዳ ፑሼቾ ማጻናስ ጉዬ ሲሞፍቴ።
LEV 19:10 ኔኒ ኔ ዎይኔ ሚꬃ ኣይፌ ማጺሺን ሃጋ ጊዶን ቆቴቲ ኣቲዳይሳ ዎይኮ ጋዴን ቆቆፌቲዳይሳ ቆራ ኤካናስ ጉዬ ሲሞፋ፤ ሄይታንታ ኡባ ማንቆታሲኔ ቤቴ ዪዳይታስ ኣጋጋ፤ ታኒ ጎዳ ኢንቴ ጾሳ።
LEV 19:11 « ‹ካይሶቶፒቴ፤ ኣስ ባሌꬆፍቴ፤ ዎርዶ ሃሳዮፒቴ፤
LEV 19:12 « ‹ታ ሱንꬃን ዎርዶራ ጫቆፍቴ፤ ዎርዶ ጫቂዲ ኢንቴ ጾሳ ሱንꬃ ቱኒሶፒቴ፤ ታኒ ጎዳ ኢንቴ ጾሳ።
LEV 19:13 « ‹ኣስ ባሌꬆፋ፤ ዎይኮ ኣሳ ሚሼ ቦንቃ ኤኮፋ፤ ሚሼ ኢማና ጋዳ ኔ ኦሶ ኦሲሲዳዴስ ሚሻ ኢሞንታ ዳሼ ኔ ኣቻን ኢሲ ቃማካ ኣይሶፋ።
LEV 19:14 « ‹ሲዬና ጋዳ ቱሌ ጫዮፓ፤ ቆቄይ ꬉጴቲዲ ኩንዳና ማላ ኢዛ ሲንꬃን ꬉጲዛዝ ዎꬆፋ፤ ኔ ጾሳስ ያያ፤ ታኒ ጎዳ ኔ ጾሳ።
LEV 19:15 « ‹ኔኒ ፒርዳ ፒርዲዛ ዎዴ ፒርዳ ጌላሶፓ፤ ማንቆ ኢዛ ማንቆቴꬃ ጊሻስ ማዳ ፒርዶፋ፤ ጊታ ኣሳታስ ዱማ ቦንቾ ኢሞፋ፤ ዴሬ ኣሳካ ዱማ ማዳ ፒርዶፋ፤ ኣሳ ኡባስ ቱሙ ፒርዳ ፒርዳ።
LEV 19:16 « ‹ኔኒ ኣሳ ጊዶን ዚጊርስ ኤካዳ ዩዮፓ፤ ኔ ሾሮዛ ሃይቆስ ጋꬂዛ ኣይ ሚሺካ ኦꬆፋ፤ ታኒ ኔ ጎዳ።
LEV 19:17 « ‹ኔ ኢሻ ኔ ዎዚናን ኢጾፋ፤ ኢዛ ጋሶን ኔስ ናጋራ ጊዶንታ ማላ ኔ ሾሮዛ ሃንቃ።
LEV 19:18 « ‹ኣስ ኡባ ኔ ኔና ሲቂዛ ማላ ሲቃ ኣቲን ኣይ ኣሳ ቦላካ ኔ ኡሎን ላንጬ ኦይካዳ ሃሎ ኬሶፋ፤ ታኒ ጎዳ።
LEV 19:19 « ‹ታ ኣዛዞታ ናጊቴ፤ ዱማ ዱማ ቆሞ ሜሄታ ኢሲ ቦላ ጋꬂ ሜሄቲሶፍቴ፤ ናምኡ ቆሞ ካꬃ ዜሬꬅ ዋላኪዲ ኢሲ ቦላ ዜሮፒቴ፤ ናምኡ ቆሞ ሚሻፌ ዳዴቲዳ ማይኦ ማይኦፍቴ።
LEV 19:20 « ‹ኢሳዴይ ሃራ ኣሳራ ጊጌታ ኡቲዳ ኣይሌይራ ላይማቲኮ ኢዛካ ባ ኣይሌቴꬃፌ ዎዜቶንታሮ ጊዲኮ ኢዛዴይ ቃጻዬቶ፤ ጊዲኮካ ኢዛ ዎዜቶንታ ጊሻስ ናምኣይካ ሃይቆፌቶ።
LEV 19:21 ሄሳ ማላ ቆሆ ጋꬂዳዴይ ቆሆ ጊሻስ ሺቂዛ ያርሾስ ኢሲ ꬋርሾ ጋይቶቴꬃ ዱንካኔ ፔንጌ ጎዳ ሲንꬅ ኤሆ።
LEV 19:22 ቄሴዚካ ሄሳዴ ናጋራ ዉርሳናስ ጾሳ ሲንꬃን ቆሆ ያርሾስ ኢሜቲዳ ꬋርሾዛ ሺሾ፤ ኢዛዴ ናጋራይካ ኣቶ ጌቴታና።
LEV 19:23 « ‹ኢንቴ ካናኔ ጌሊዲ ኣይፌ ኣይፊዛ ሚꬅ ቶኪኮ ሄ ኣይፌ ኣይፊዛ ሚꬃያ ኣይፌ ዶሞሶፌ ቢዲ ሄꬑ ላይꬅ ጋካናስ ኢሚዛ ኣይፌይ ሜቴቶንታ ዲጌቲዳይሳ ኤሪቴ፤ ሄ ላይꬃታን ሄ ሚꬃታ ኣይፌ ሞፒቴ።
LEV 19:24 ኦይዳንꬆ ላይꬃ ቦላ ሄ ሚꬃ ኣይፌይ ኡባይ ጎዳስ ጋላታስ ሺሺዛ ያርሾ ጊዶ።
LEV 19:25 ኢቻሻንꬆ ላይꬃን ቃሴ ሚꬃ ኣይፌዛ ኢንቴስ ሚቴ፤ ኢንቴ ሄሳꬆ ሂስቲኮ ኣይፌ ኣይፊዛ ኢንቴ ሚꬃይ ዎዴን ዎዴን ኢንቴስ ኢሚዛ ኣይፌይ ካሴፔ ጌዴ ጉጄቲ ጉጄቲ ባና፤ ታኒ ጎዳ ኢንቴ ጾሳ።
LEV 19:26 « ‹ሱꬃራ ዲዛ ኣይ ኣሾካ ሞፒቴ፤ ማሮꬆፍቴኔ ቢታ ቢቶፒቴ።
LEV 19:27 « ‹ኢንቴ ሁኤ ቢናና ጋርሳራ ዩሺ ኣꬂዲ ቃንጾፍቴ፤ ኢንቴ ቡቻካ ቃንꬃን ቃንጾፍቴ።
LEV 19:28 « ‹ኢንቴ ኣሳቴꬃ ቦላ ኒቅሴ ጫች ጫዶፍቴ፤ ዎይኮ ኣሲ ሃይቂኮ ኢዛስ ሚሼቲዲ ኢንቴ ቦላ ቃንጺ ማዱንꬆፍቴ፤ ታኒ ጎዳ።
LEV 19:29 « ‹ቢታያ ላይማኒኔ ቱናቴꬃን ኩሞንታ ማላ ኔ ናዮ ላይማቴꬃ ኦሶስ ኣꬃ ኢማዳ ካዉሾፋ።
LEV 19:30 ታ ሳምባታ ጋላሳታ ናጊቴ፤ ታ ኬꬃ ቦንቺቴ፤ ታኒ ጎዳ።
LEV 19:31 « ‹ሞይቲሌ ሃሳይሲዛይታ ዎይኮ ኢታ ኣያናታ ሃሳይሲዛይታ ዞሬ ኦይቾፋ፤ ኢንቴ ቱኖንታ ማላ ኢስታ ኮዮፒቴ፤ ታኒ ጎዳይ ኢንቴ ጾሳ።
LEV 19:32 « ‹ኔፔ ጪሚዳዴ ቤይኮ ኔ ኡቲዳሶሆፔ ዴንዳ ኤቃዳ ቦንቻ፤ ታስ ጾሳስ ያሻቴꬃን ኣዛዜታ፤ ታኒ ጎዳ።
LEV 19:33 « ‹ሃራ ቢታፌ ዪዲ ኢንቴ ጊዶን ዲዛ ኣሳታ ቆሆፒቴ።
LEV 19:34 ኢንቴ ኢንቴ ዴሬ ኣሳስ ኦꬂዛ ማላ ኢስታስካ ሎኦ ኦꬂቴ፤ ኢንቴ ኢንቴና ሲቂዛ ማላ ኢስታካ ሲቂቴ፤ ካሴ ኢንቴካ ጊብጼ ቢታን ቤቴታ ጊዲዳይሳ ዩሺ ቆፒቴ፤ ታኒ ጎዳ ኢንቴ ጾሳ።
LEV 19:35 « ‹ማካ ሚሼን ጊዲን ዎይኮ ሜዛኔን ዎይኮ ዋꬋ ሚሻን ኣስ ጪሞፍቴ።
LEV 19:36 ኣስ ጪሞንታ ቱሙ ሜዛኔይ፥ ማካ ሚሺኔ ሚጼ ሚሺ ኢንቴስ ዴኦ፤ ታኒ ኢንቴና ጊብጼፔ ኬሲዳ ጎዳ ኢንቴ ጾሳ።
LEV 19:37 « ‹ታ ኢንቴስ ኢሚዳ ታ ኣዛዞታኔ ታ ዎጋታ ኡባ ናጊቴኔ ኦꬂቴ፤ ታኒ ኢንቴ ጎዳ።› »
LEV 20:1 ጎዳይ ሙሴ ሂዝጊዴስ፥
LEV 20:2 «ኢስራኤሌ ናይታ፥ ‹ኢንቴና ጊዲኮኔ ኢንቴ ጊዶን ዲዛ ሃራ ዴሬ ኣሳታፔ ኦኒካ ሞሎኬ ጌቴቲ ጼይጌቲዛ ኤቃ ጾሳስ ባ ናይታፔ ኢሳ ኣꬂ ኢሚ ቤቲኮ ኩሜꬃ ኢስራኤሌ ዴሬ ኣሳይ ሄሳዴ ሹቻን ጫዲ ዎꬎ።
LEV 20:3 ኦኒካ ባ ናይታፔ ኢሳዴ ሞሎኬስ ኣꬂ ኢሚዲ ታ ኬꬃ ቱኒሲዳ ጊሻሲኔ ጌሻ ሱንꬃ ታይሳ ካዉሺዳ ጊሻስ ታ ሄሳዴ ቦላ ቂጻቴ ዬዳና፤ ሄሳፌ ጉዬ ታ ኢዛዴስ ሞርኬ ጊዳዳ ዴሬ ጊዶፌ ኢዛ ሻካ ꬋይሳና።
LEV 20:4 ኢዛ ዴሬ ኣሳይ ኢዛዴይ ኦꬆይሳ ኡባካ ዉዴቶንታ ቤሲ ኣጊኮኔ ዎꬎንታ ኣጊኮ፥
LEV 20:5 ታኒ ታ ባጋራ ሄሳዴኔ ኢዛዴሶ ኣሳ ቃሴካ ታስ ኣማኔቶንታ ሞሎኬስ ጎይኖን ኢዛራ ኢሲፌ ጊዲዳይታ ኡባ ቦላ ኢታ ሃንቆ ዬዳና፤ ሄሳፌ ጉዬ ሄይታንታ ታኒ ኢስታ ኢስታ ዴሬዛ ጊዶፌ ሻካ ꬋይሳና።
LEV 20:6 « ‹ኦኒካ ኢስታፌ ዞሬ ኦይቻናስ ሞይቲሌ ጼይጊዛይታኮኔ ማሮታኮ ቢኮ ሄሳዴ ቦላ ታ ኢታ ሃንቆ ዬዳና፤ ሄሳፌ ጉዬ ሄሳዴ ታኒ ኢዛ ዴሬ ጊዶፌ ሻካ ꬋይሳና።
LEV 20:7 « ‹ኢንቴ ኣሳቴꬅ ኡባ ጌሺቴ፤ ዱማቲቴ፤ ጋሶይካ ታኒ ጎዳ ኢንቴ ጾሳ።
LEV 20:8 ታ ኣዛዞዮ ናጊቴኔ ፖሊቴ፤ ጋሶይካ ታኒ ኢንቴና ታስ ዱማሲዳ ኢንቴ ጎዳ።
LEV 20:9 « ‹ባ ኣዋ ዎይኮ ባ ኣዮ ጫዪዛዴይ ሃይቆን ቃጻዬቶ፤ ኢዚ ሃይቆን ቃጻዬቲዛይ ባ ሞሮና።
LEV 20:10 « ‹ኢሲ ኣሲ ሃራ ኣሳ ማቺራ ላይማቲኮ ሄ ላይማቲዳ ኣዴዛራኔ ማጫሳይራ ናምኣይካ ሃይቆን ቃጻዬቴቶ።
LEV 20:11 ኢሲ ኣሲ ባ ኣዋ ማቺራ ላይማቲኮ ባ ኣዋ ካዉሺዳ ጊሻስ ሄ ላይማቲዳይቲ ናምኣይካ ሃይቆን ቃጻዬቴቶ፤ ኢስቲ ሃይቆን ቃጻዬቲዛይ ባ ሞሪዳ ሞሮና።
LEV 20:12 ኢሲ ኣሲ ባስ ናዛ ማቺራ ላይማቲኮ ሄ ላይማቲዳይቲ ናምኣይካ ሃይቆን ቃጻዬቴቶ፤ ኣሾ ዳቦቴꬅ ላይማን ቱኒሲዳ ጊሻስ ኢስቲ ሃይቆን ቃጻዬቲዛይ ባ ሞሪዳ ሞሮና።
LEV 20:13 « ‹ኢሲ ኣሲ ማጫራ ዚንኢዛ ማላ ኣዴይ ኣዴራ ዚንኢኮ ናምኣይካ ዬላቺዛ ሚሽ ኦꬂዳ ጊሻስ ሃይቆን ቃጻዬቴቶ፤ ኢስቲ ሃይቆን ቃጻዬቲዛይ ባ ሞሪዳ ሞሮና።
LEV 20:14 « ‹ኢሲ ኣሲ ኣዬዮኔ ናዮ ማቾ ኤኪኮ ሄይታንቲ ኦꬂዳ ሃራሲዛ ሃኖዛ ጊሻስ ሄꬓይካ ታማን ጹጌቲ ሃይቄቶ፤ ሄይታንታ ማላ ኢታ ሃኖይ ኢንቴ ጊዶን ፖሌታናስ ቤሴና።
LEV 20:15 « ‹ኣይ ኣሲካ ሜሄራ ፓራቲኮ ኢዛዴይኔ ሄ ሜሄዚ ናምኣይ ሃይቄቶ።
LEV 20:16 « ‹ኢሲ ማጫሲ ሜሄራ ፓራቲኮ ኢዛኔ ሄ ኢዛ ፓራቲዳ ሜሄይ ናምኣይ ሃይቄቶ፤ ኢስቲ ሃይቂዛይ ባ ሞሪዳ ሞሮና።
LEV 20:17 « ‹ኢሲ ኣሲ ባ ሚቺዮ፥ ባስ ኣዪ ናዮ ዎይኮ ኣዋ ናዮ ማቾ ኤኪኮ ሄሲ ዬላቺዛዛ፤ ሄሳ ጊሻስ ኢስቲ ባንታ ዴሬ ጊዶፌ ሻኬቲ ꬋዬቶ፤ ባ ኦꬂዳ ሞሮ ጊሻስ ባ ቂጻቴ ኤኬቶ።
LEV 20:18 « ‹ኢሲ ኣሲ ኣጊናን ኣጊናን ቤቲዛ ማጫሳ ዎጋይ ቤቲዳ ማጫሳራ ዚንኢኮ ኢዛዴይ ኢዚ ካሎቴꬅ ቃሪዳ ጊሻሲኔ ኢዛካ ባ ካሎቴꬃ ቃራ ቤሲዳ ጊሻስ ናምኣይካ ባንታ ዴሬ ጊዶፌ ሻኬቲ ꬋዬቶ።
LEV 20:19 « ‹ኣይ ኣሲካ ባ ኣዋ ሚቺራ ዎይኮ ባ ኣዪ ሚቺራ ዚንኦፎ፤ ሄሳꬆ ኦꬂዛ ጊዲኮ ናምኣይካ ባንታ ዳቦቴꬃ ካዉሺዛ ጊሻስ ባ ሞሪዳ ሞሮን ኦይሼታና።
LEV 20:20 « ‹ኣይ ኣሲካ ባ ኣዋ ኢሻ ማቺራ ዎይኮ ባ ኣዬይ ኢሻ ማቺራ ላይማቲኮ ባ ኣዋ ኢሻ ማቾ ዎይኮ ባ ኣዪ ኢሻ ዬላሲዳ ጊሻስ ላይማቲዳይቲ ናምኣይካ ኦይሼታናኔ ዬሎይ ባይንዳ ኣታና።
LEV 20:21 ኣይ ኣሲካ ባ ኢሻ ማቾ ኤኪዛ ጊዲኮ ሄሲ ቱና ኦꬄስ፤ ባ ኢሻዛ ቦንቾ ካዉሺዳ ጊሻስ ናምኣይካ ና ዬሎንታ ኣታና።
LEV 20:22 « ‹ታ ኢንቴና ኢዚን ጌልꬃና ካናኔ ቢታያ ኢንቴና ጩታ ዲጎንታ ማላ ኢንቴ ታ ኣዛዞታኔ ታ ዎጋታ ናጊቴኔ ፖሊቴ።
LEV 20:23 ታኒ ኢንቴ ሲንꬃፌ ꬋይሲዛ ካዎቴꬃታ ሎሴ ዎጋ ካሎፍቴ፤ ኢስቲ ሄይታንታ ኡባ ኦꬂዳ ጊሻስ ታ ኢስታ ሻቴታዲስ።
LEV 20:24 ታ ቃሴ ኢዚፔ ማꬂኔ ኤሲ ጎጊዛ ሄ ጪሊላ ቢታዮ ኢንቴና ጌልꬃናስ ጫቃዲስ፤ ኢዞካ ታ ኢንቴስ ኢማና፤ ሃንኮ ዴሬፔ ኢንቴ ታስ ሻኬቲዳይታ ጊዳና ማላ ኦꬂዳይ ታና ጎዳ ኢንቴ ጾሳ።
LEV 20:25 « ‹ሄሳ ጊሻስ ኢንቴ ጌሽ ጊዲዳ ሜሄታኔ ካፎታ ቱና ጊዲዳይታፔ ሎኤꬂዲ ሻኪ ኤሪቴ፤ ታኒ ሃይታንቲ ኢንቴስ ቱና ጋ ዎꬂዳ ሜሄታን፥ ካፎታኒኔ ቢታ ቦላ ቃጺዛ ኣይ ሚሻንካ ኢንቴና ቱኒሶፒቴ።
LEV 20:26 ኢንቴ ታስ ዱማ ሻኬቲዳይታ ጊዲቴ፤ ጋሶይካ ታኒ ጎዳይ ዱማ ጾሳ፤ ኢንቴ ታ ዴሬታ ጊዳና ማላ ኣይዛቤታ ጊዶፌ ታኒ ኢንቴና ታስ ዱማሳ ሻካዲስ።
LEV 20:27 « ‹ኣይ ኣሲካ ኢንቴ ጊዶፌ ሞይቲሌ ጼይጊዛ ዎይኮ ማሮቲዛዴ ጊዲኮ ኢዚ ሹቻን ጫዴቲ ሃይቆ፤ ሄሳꬆ ኦꬂዛዴይ ኣይ ኣሲካ ሃይቆን ቃጻዬቲዛይ ባ ኦꬂዳ ሞሮና› ጋ ዮታ።»
LEV 21:1 ጎዳይ ሙሴስ፥ «ኣሮኔ ናይታስ ቄሴታስ፥ ‹ኢንቴፌ ኦኒካ ባ ዳቦታ ጋርሳፌ ኣሲ ሃይቂኮ ኢዛዴ ኣሃ ቦቺዲ ባና ቱኒሶፖ።
LEV 21:2 ማታ ዳቦታፔ ኣያ ዎይኮ ኣዋይ ዎይኮ ባ ናይ ዎይኮ ባ ኢሻይ ሃይቂኮ፥
LEV 21:3 ሄሳꬆካ ኣዚና ጌሎንታ ኢጻዳ ዲዛ ሚቼያ ሃይቂኮ ኢስታ ኣሃ ቦቻናስ ዳንዳዬስ።
LEV 21:4 ጊዶ ኣቲን ጌሎኒኔ ኤኮን ዳቦቲዳይቲ ኣሃ ቦቺዲ ባና ቱኒሶፔቶ።
LEV 21:5 « ‹ቄሴታፔ ኦኒካ ሃይቂዳዴስ ሚሼቲዲ ባ ሁኤ ቢናና ቡጮፖ፤ ባ ቡቼካ ቡጮፖ፤ ባ ቦላካ ቃጪ ማዱንꬆፎ።
LEV 21:6 ቄሴይ ዉሪካ ታስ ዱማ ጊዶ፤ ባንታ ጾሳ ሱንꬃ ቱኒሶፔቶ፤ ጋሶይካ ኢስቲ ጾሳስ ታማን ጹጌቲዛ ያርሾኔ ጎዳስ ካꬃ ያርሾ ሺሺዛይታ ጊዲዳ ጊሻስ ኢስቲ ጌሽ ጊዴቶ።
LEV 21:7 « ‹ቄሴ ጊዲዳዴይ ላይማ ማጫስ ዎይኮ ጌላኦቴꬂ ኤኬቲዳ ጌላኦዮ ዎይኮ ጌላ ኬዚዳ ማጫስ ማቾ ኤኮፎ፤ ጋሶይካ ቄሴቲ ጾሳስ ዱማቲዳይታ፤
LEV 21:8 ቄሴይ ኢንቴ ጾሳስ ካꬃ ያርሾ ሺሺዛይሳ ጊዲዳ ጊሻስ ኢዚ ሃራ ኣሳፔ ዱማ ጊዶ፤ ታኒ ኢንቴና ጌሺዛ ኢንቴ ጎዳይ ጌሻ፤ ኢዚካ ጌሽ ጊዶ።
LEV 21:9 ቄሴ ማጫ ናይ ላይማቲኮ ኢዛ ባ ኣዋ ካዉሺዳ ጊሻስ ታማን ጹጌታ ሃይቁ።
LEV 21:10 « ‹ቄሴታ ሃላቃይ ኢዚ ባ ሁኤ ቲዬቲዛ ዛይቴይ ቲዬቲዳ ጊሻሲኔ ቄሴቴꬃ ማይኦ ማይኣና ማላ ዱማቲዳዴ ጊዲዳ ጊሻስ ኣሲ ሃይቂኮ ሃይቂዳዴስ ኢዚ ሚሼቲዛይሳ ኤሪሳናስ ባ ሁኤ ቢናና ቡጮፖ፤ ባ ማይኦካ ዳኮፎ።
LEV 21:11 ኣሃይ ዲዛሶካ ኢዚ ጌሎፖ፤ ሃራይ ኣቶሺን ባ ኣዋ ዎይኮ ባ ኣዬይ ኣሃካ ቦቺዲ ባና ቱኒሶፖ።
LEV 21:12 ኢዛ ዱማሳናስ ቲይዳ ጾሳ ዛይቴይ ኢዛ ቦላ ዲዛ ጊሻስ ቄሴይ ጾሳ ኬꬃፌ ኬዚ ቢዲ ጾሳ ኬꬃ ቱኒሶፖ።
LEV 21:13 « ‹ቄሴይ ኤካና ማቻ ጌላኦ ጊዱ።
LEV 21:14 ኣዚናይ ሃይቂዳሮ ዎይኮ ጌላ ኬዚዳሮ ዎይኮ ላይማ ማጫስ ኤኮፎ፤ ጌሎንታ ጌላኦ ጻላ ባ ዴሬ ኣሳ ጊዶፌ ዶሪ ኤኮ።
LEV 21:15 ሄሳꬆ ሂስቶንታ ኣጊኮ ኢዚ ባ ዴሬ ጊዶን ባ ናይታ ቱኒሳና፤ ኢዛ ዱማ ሻኪዳ ጎዳይ ታና ጾሳ› ጋ ዮታ» ጊዴስ።
LEV 21:16 ጎዳይ ሙሴ ሂዝጊ ኣዛዚዴስ፤
LEV 21:17 «ኣሮኔስ፥ ‹ኔ ቆሞታፔ ኢዛ ኣሳቴꬃ ቦላ ዎሶይ ዲዛዴይ ኦኒካ ታስ ያርሾ ሺሾፎ፤ ሃይሲ ሃ ዎጋይ ቡሮ ሲንꬃፌ ያና ዬሌታን ኡባን ናጌቲ ዴኦ።
LEV 21:18 ፓጬ ኣሳቴꬂ ዲዛዴይ ኦኒካ ሄሲካ ቆቄይ ዎይኮ ዎቤይ ዎይኮ ሜꬎ ኢታይ ዎይኮ ኣሳቴꬃይ ቦርሲዛዴይ፥
LEV 21:19 ኩሼይ ዎይኮ ቶሆይ ሲሊዳዴይ፥
LEV 21:20 ዞኮ ቁናይ ዎይኮ ዲንኬይ፥ ኣይፌይ ሳኪዛዴይ ዎይኮ ኢዛ ቦላ ኡዛዚዛዚ ዲዛዴይ ዎይኮ ሹፋይ ካꬃ ያርሾ ታስ ሺሻናስ ቤሴና።
LEV 21:21 ኣሮኔ ዜሬꬅ ኩሜꬃ ጊዶፌ ኣሳቴꬃ ቦላ ዎሶይ ዲዛ ኣሲ ኦኒካ ጹጌቲዛ ያርሾኔ ያርሾ ባ ጎዳስ ያርሻናስ ዮፖ።
LEV 21:22 ሄሳ ማላ ኣሲ ናምኡ ቆሞ ካꬃ ያርሾታ ማናስ ዳንዳዬስ፤ ሄይቲካ ዱማቲዳ ካꬂኔ ኬሂ ዱማቲዳ ያርሾ ካꬃ።
LEV 21:23 ጊዲኮካ ኢዛ ኣሳቴꬃን ቦሬይ ዲዛ ጊሻስ ታ ኬꬃ ቱኒሶንታ ማላ ኢዛዴይ ጌዴ ያርሾ ያርሺዛሶ ዎይኮ ጌዴ ማጋላሻኮ ሺቆፖ፤ ጋሶይካ ኢስታ ዱማ ኦꬃ ሻኪዳይ ታና ጾሳ› ጋዳ ዮታ።»
LEV 21:24 ሙሴይካ ሄሳ ኡባ ኣሮኔሲኔ ኣሮኔ ናይታስ ኩሜꬃ ኢስራኤሌ ዴሬ ኣሳስ ዮቲዴስ።
LEV 22:1 ጎዳይ ሙሴ ሂዝጊዴስ፥
LEV 22:2 «ኣሮኔሲኔ ኢዛ ናይታስ፥ ‹ኢንቴ ሃራፔ ዱማ ጊዲዳ ታ ሱንꬃ ቱኒሶንታ ማላ ኢስራኤሌ ናይቲ ታስ ዱማሲዲ ሺሺዛ ያርሾ ኡባ ቦንቾራ ኤኪዲ ጌሻቴꬃን ናጊቴ፤ ታኒ ጎዳ።
LEV 22:3 « ‹ኢንቴ ዜሬꬃፌ ቱኒዳዴይ ኢስራኤሌ ናይቲ ታስ ዱማ ሻኪ ኢሚዳ ሚሽ ጻላቴꬃን ቦቺዳዴይ ታ ሲንꬃፌ ꬋያና፤ ሃይሲ ሃ ዎጋይ ሃይሳፌ ጉዬ ሲንꬃራ ያና ዬሌታ ኡባን ናጌቶ፤ ታኒ ጎዳ።
LEV 22:4 « ‹ኣሮኔ ዜሬꬃታፔ ኣይ ኣሲካ ኢዛ ቦላ ኣሳፔ ኣሳን ኣꬊዛ ጋልባ ሃርጌይ ዲዛዴይ ዎይኮ ኢዛ ኣሳቴꬃፌ ጎጊ ኬዚዛ ሚሺ ዲዛዴይ ኦኒካ ጌያና ጋካናስ ጾሳስ ዱማቲዳ ሚሽ ሞፖ፤ ኣሃይ ቦቺን ቱኒዳ ሚሽ ቦቺዳዴይ ዎይኮ ኢዛ ቦላፌ ዜሬꬃ ሃꬂ ጾኬቲዛዴ ቦቺዳዴይ፥
LEV 22:5 ሄሳꬆካ ቢታራ ጎሼቲዛይታኔ ኣይ ሚሻንካ ቱኒዳ ኣስ ቦቺዳዴይ፥
LEV 22:6 ሄሳ ማላ ኣይ ቱና ሚሺካ ቦቺዳዴይ ኦማርስ ጋካናስ ቱና ጊዴስ፤ ሄሳፌ ጉዬ ኢዚ ባ ቦላ ሃꬃን ሜጬቶንታ ዲሼ ጾሳስ ዱማቲዳ ካꬅ ሞፖ።
LEV 22:7 ኣርሼይ ዉሊዳፔ ጉዬ ቃሴ ኢዚ ጌሽ ጊዴስ፤ ሄሳፌ ጉዬ ዱማ ጊዲዳ ካꬃ ያርሾዛ ኢዛስ ቁማ ጊዲዳ ጊሻስ ማናስ ዳንዳዬስ።
LEV 22:8 ባዉቲ ሃይቂዳዚኔ ዶኣይ ዎꬊዳ ሜሄ ኣሾ ሞፖ፤ ኢዚ ሄሳ ሚዛዝ ጊዲኮ ቱኔስ፤ ታኒ ጎዳ።
LEV 22:9 « ‹ቄሴቲ ታኒ ኢስታስ ኢሚዳ ዎጋ ናጌቶ፤ ኢስቲ ናጎንታ ኣጊኮ ጌሽ ጊዲዳ ታ ኣዛዞታስ ኣዛዜቶንታ ኢጺዳ ጊሻስ ኢስታስ ቆሆ ጊዲን ኢስቲ ሃይቃና፤ ኢስታ ዱማሳ ሻኪዳይ ታና ጎዳ።
LEV 22:10 « ‹ታስ ዱማቲዳ ያርሾፌ ማናስ ዳንዳይዛይ ቄሴታኔ ኢስታሶ ኣስ ጻላ ኣቲን ሃራ ኣሲ ኢዛፔ ሞፖ፤ ቄሴራ ኢማꬂ ዎይኮ ኦሶስ ቃጻሬቲዲ ኢዛራ ዲዛዴይካ ሞፖ።
LEV 22:11 ጊዶ ኣቲን ቄሴይ ባ ሚሻን ሻሚዳ ኣይሌይ ዎይኮ ሶን ዬሌቲዳ ኣይሌይ ቄሴዛ ጊሻፔ ሞ።
LEV 22:12 ቄሴ ጊዶንታ ሃራ ኣስ ጌሊዳ ቄሴዛ ናያ ጾሳስ ዱማቲዳ ያርሾፌ ሙፑ።
LEV 22:13 ጊዶ ኣቲን ና ዬሎንታ ዲሺን ኢዚ ኣዚናይ ሃይቂዳራ ዎይኮ ባ ኣዚናፔ ኣንጄታዳ ባ ኣዋ ሶ ሲማዳ ዲዛ ቄሴ ናያ ካሴ ኢዛ ናቴቴꬃ ዎዴ ኦꬂዛ ማላ ባ ኣዋ ጊሻፔ ሙ፤ ጊዲኮካ ቄሴሶ ኣሳፔ ኣቲን ሃራ ኣሲ ዱማቲዳ ያርሾ ካꬃፌ ሞፖ።
LEV 22:14 « ‹ቄሴሶ ኣስ ጊዶንታዴይ ኦኒካ ኤሮንታ ዲሼ ጎዳስ ዱማቲዲ ኢሜቲዳ ሚሽ ሚኮ ሄ ኢዚ ሚዳይሳ ኩሜꬃ ዎጋ ጼታፔ ናምኡ ኩሼ ጉጂዲ ቄሴዛስ ቃንጾ።
LEV 22:15 ኢስራኤሌ ናይቲ ጾሳስ ኢሚዛ ዱማ ያርሾታ ቄሴቲ ቱኒሳናስ ቤሴና።
LEV 22:16 ሄሲካ ኢዛፔ ማናስ ቤሶንታዴስ ቄሴቲ ኢሚኮ ሄ ሚዳዴስ ሞሮ ጊዲዲ ኢዛዴ ቦላ ሃንቆ ጋꬃና፤ ኢሞታታ ኡባ ታስ ዱማሲዳይ ታና ጎዳ› ጋ ዮታ።»
LEV 22:17 ጎዳይ ሙሴ ሂዝጊዴስ፥
LEV 22:18 «ኣሮኔስ ኢዛ ናይታሲኔ ኢስራኤሌ ዴሬ ኡባስ፥ ‹ኢስራኤሌ ኣስ ጊዲዳይ ዎይኮ ኢስራኤሌ ናይታ ጊዶን ዲዛ ኢማꬃ ኣሲ ኣዲና ጋꬃናስ ዎይኮ ኢዚ ጮ ኡፋይሳን ሜላ ኢሚዛ ጹጌቲዛ ያርሾ ሺሺኮ፥
LEV 22:19 ኢዛ ያርሾይ ኤኬታና ማላ ኢሲ ቦሬይ ኢዛ ቦላ ባይንዳ ኮርማ ቦራፔ፥ ꬋርሾፌኔ ዴይሻ ኦርጌፌ ጊዶ።
LEV 22:20 ኢዛ ቦላ ዎሶይ ዲዛ ሜሄ ኢንቴ ሺሺኮ ጎዳይ ሄሳ ኤኬና።
LEV 22:21 « ‹ቃሴ ኦና ጊዲኮካ ባ ኣዲና ጋꬃናስ ኢሲፌቴꬃ ያርሾ ጎዳስ ያርሺዛ ዎዴ ዎይኮ ባ ዶሳን ባ ሜሄታፔ ኪያቴꬃ ኢሞታ ኢሚዛ ጊዲኮ ሄ ኢሞታ ኤካና ማላ ኢዚ ኢሚዛ ሜሄዛ ቦላ ኣይኮ ዎሶይ ባይንዳዝ ጊዶ።
LEV 22:22 ቆቄ ዎይኮ ሜቆ ዎይኮ ቂሻ ዎይኮ ጊይዛ ማዱንꬃራ ዲዛ ዎይኮ ጋራንዳ ዎይኮ ሻቶራ ዲዛ ሜሄ ጎዳስ ያርሾ ሺሾፋ፤ ሄሳንታ ማላ ሜሄ ያርሾ ያርሺዛሶዛን ጹጌቲዛ ያርሾ ሂስታ ያርሾፋ።
LEV 22:23 ኢዛስ ሜꬌቴꬂ ዎጋይ ባይንዳ ኣዱሳ ዎይኮ ቃንꬅ ጊዲዳ ሜሄ ባ ዶሳን ኢሚዛ ኪያቴꬃ ኢሞታ ጊዲዲ ሺቃናስ ዳንዳዬስ፤ ጊዶ ኣቲን ኣዲና ጋሶስ ሺሻናስ ዳንዳዬና።
LEV 22:24 ሳንጌቲዳ ዎይኮ ꬊቄቲዳ ሜሄ ጎዳስ ያርሾ ሺሾፍቴ፤ ኢንቴ ቢታን ሄይታንታ ማላ ያርሾፍቴ።
LEV 22:25 ኣላጋ ኣሳፔ ኢሜቲዳ ሜሄ ጾሳስ ያርሾ ሺሾፍቴ፤ ሄይታንታ ማላ ሜሄቲ ቦሬይ ዲዛ ማላ ቆዴቲዛ ጊሻስ ኢስቲ ኤኬቴቴና› ጋ ዮታ።»
LEV 22:26 ጎዳይ ሙሴስ ሂዝጊዴስ፥
LEV 22:27 «ሚዛ ማሪ ዎይኮ ዶርሳ ላቃይ ዎይኮ ዴይሻ ላቃይ ዬሌቲኮ ላፑን ጋላስ ጋካናስ ባ ኣይፔ ሻኬቶፎ፤ ጊዶ ኣቲን ኦስፑንꬃ ጋላሳፌ ኦይኪዲ ጹጌቲዛ ያርሾስ ሺቃናስ ዳንዳዬስ።
LEV 22:28 ሚዝ ኢዚ ማራራ፥ ዶርስ ኢዚ ላቃራ ኢሲ ጋላስ ያርሾስ ሹኮፍቴ።
LEV 22:29 «ኢንቴ ጎዳስ ጋላታ ያርሾ ያርሺዛ ዎዴ ኢንቴ ሺሺዛ ጋላታዚ ኤኬታና ማላ ኦꬂ ሺሺቴ።
LEV 22:30 ኢንቴ ሺሺዳይሳፌ ኣይኮካ ዎንቶስ ኣሾንታ ሄ ጋላስ ኡባ ሚቺቴ፤ ታኒ ጎዳ።
LEV 22:31 «ኢንቴ ታ ኣዛዞታ ናጊቴኔ ኦꬂቴ፤ ታኒ ጎዳ።
LEV 22:32 ታ ጌሻ ሱንꬃ ቱኒሶፒቴ፤ ታ ጌሻቴꬃ ኩሜꬃ ኢስራኤሌ ኣሳይ ኤሪዲ ታና ቦንቾ፤ ኢንቴና ዱማሲዳይ ታና ጎዳ።
LEV 22:33 ኢንቴ ጾሳ ጊዳናስ ኢንቴና ጊብጼ ቢታፌ ኬሲዳይ ታና፤ ታኒ ጎዳ ኢንቴ ጾሳ።»
LEV 23:1 ጎዳይ ሙሴ ሂዝጊዴስ፥
LEV 23:2 «ኢስራኤሌ ኣሳስ ዱማ ሺቆ ጊ ኣዋጂዲ ኢንቴ ቦንቻናስ ቤሲዛ ዶሬቲዳ ባኣሌቲ ሃይሳፌ ካሊ ዲዛይታ፤
LEV 23:3 «ኢንቴ ኢንቴስ ኦꬃናስ ኡሱፑን ጋላሳቲ ዴቴስ፤ ላፑንꬃ ጋላሳይ ጊዲኮ ኢንቴስ ሼምፒዛ ሳምባታ ጋላሳ፤ ሄ ጋላስ ኢንቴ ጾሳ ጎይናናስ ሺቂቴ ኣቲን ኣይ ኦሶካ ኦꬆፍቴ፤ ኢንቴ ዲዛሶ ኡባን ሄሲ ኢንቴ ጾሳ ቦንቻና ሳምባታ ጋላሳ።
LEV 23:4 «ኢስታስ ዎꬊዳ ዎዴን ጌሻ ሺቆ ኦꬂ ኣዋጂዲ ኢንቴ ቦንቻናስ ቤሲዛ ጎዳ ባኣሌቲ ሃይሳፌ ካሊዛይታ፥
LEV 23:5 ጎዳይ ኢዛን ቦንቼቲዛ ፓዚጋ ባኣሌይ ኮይሮ ኣጊናይ ጌሊዳ ታማኔ ኦይዳንꬆ ጋላስ ኣርሼይ ዉሊን ጋዴይ ሌምኢ ሌምኢሺን ኦይኬቴስ።
LEV 23:6 ሄ ኣጊናዛን ታማኔ ኢቻሻንꬆ ጋላስ ኡኬꬃ ባኣሌይ ኦይኬቴስ፤ ሄሳፌ ጉዬ ላፑን ጋላስ ጋካናስ ኢርሾይ ጌሎንታ ኡኬꬅ ሚቴ።
LEV 23:7 ሄ ጋላሳታፔ ኮይሮ ጋላስ ጾሳ ጎይናናስ ሺቂቴ፤ ሄ ጋላስ ኢንቴ ኦሶ ኦꬆፍቴ።
LEV 23:8 ላፑን ጋላስ ጋካናስ ጹጌቲዛ ያርሾ ጎዳስ ሺሺቴ፤ ኢንቴ ኦሶ ኣጊዲ ላፑንꬃ ጋላስ ጎዳ ጎይናናስ ሺቂቴ።»
LEV 23:9 ጎዳይ ሙሴ ሂዝጊዴስ፥
LEV 23:10 «ኢስራኤሌ ኣሳስ ታኒ ኢንቴስ ኢሚዛ ቢታ ጌሊዲ ኢንቴ ካꬅ ሺሺዛ ዎዴ ካꬃ ጼራ ቄሴኮ ኤሂቴ።
LEV 23:11 ጎዳ ሲንꬃን ኢንቴ ሺሺዛይሲ ኤኬታና ማላ ቄሴዚ ቃሴ ካꬃ ጼራ ኤኪዲ ያኔ ሃ ቃꬂዛ ያርሾ ሂስቲ ጾሳስ ሺሾ፤ ቄሴዚ ሄ ጼራ ካꬃ ያኔ ሃ ቃሴꬂዛ ያርሾ ሂስቲ ሺሻናስ ቤሲዛይ ሳምባታ ጋላሳፌ ዎንቴꬃ ጋላስ ጊዶ።
LEV 23:12 ኢንቴ ሄ ያርሾ ሺሺዛ ጋላስ ኢዛ ቦላ ቦሬይ ባይንዳ ኢሲ ላይꬃ ꬋርሾ ላቃ ጹጌቲዛ ያርሾ ኦꬂዲ ኢሲ ቦላ ጾሳስ ሺሺቴ።
LEV 23:13 ኢዛራ ኢሲፌ ዎጋራ ሚꬃ ዛይቴን ሙኑቄቲዳ ናምኡ ኪሎ ጊዲዛ ሊቆ ꬊሌ ካꬃ ያርሾ ሂስቲ ሺሺቴ፤ ሄሲካ ኢዛ ሳዎይ ጎዳ ኡፋይሲዛ ጹጌቲዛ ያርሾ ጊዳና፤ ኢዛራ ኢሲፌ ኢሲ ሊቲሮ ጊዲዛ ዎይኔ ኡሹ ኢሞታ ሺሺቴ።
LEV 23:14 ኢንቴ ሄይታ ጎዳስ ኢማናፔ ኮይሮ ጋኪዳ ካꬃ ኣይፌ ቃዬ ጊዲን ዎይኮ ሻሽ ዎይኮ ኡኬꬅ ኡኪዲ ሞፒቴ፤ ሃይሳ ሃ ዎጋዛ ኢንቴ ዲዛሶ ኡባን ጉዬፔ ያና ኢንቴ ዬሌታስ ኤቂ ዲዛ ሜርና ዎጋ ጊዶ።
LEV 23:15 «ኢንቴ ጎዳስ ያኔ ሃ ቃሴꬂ ሺሺዛ ያርሾ ያርሺዳ ሳምባታ ጋላሳ ዎንቴꬃፌ ዶሚዲ ላፑን ሳምባታ ቆዲቴ፤
LEV 23:16 ላፑንꬃ ሳምባታፔ ጉዬ ኢቻሽ ታማንꬆ ጋላስ ቃሴካ ሃራ ኦራꬃ ካꬃ ያርሾ ጎዳስ ሺሺቴ።
LEV 23:17 ናምኡ ኪሎ ጊዲዛ ሊቆ ꬊሌ ኢንቴ ሶፔ ኢርሾን ሙኑቄቲ ኡኬቲዳ ናምኡ ኡኬꬅ ያኔ ሃ ቃሴꬂዛ ያርሾ ሂስቲ ኤኪ ዪቴ፤ ሄሲካ ኦራꬅ ሺቂዛ ካꬃ ጊሻስ ጾሳስ ሺቂዛ ካꬃ ያርሾ ጊዶ።
LEV 23:18 ሄ ኡኬꬃራካ ኢሲፌ ኢስታ ቦላ ዎሶይ ባይንዳ ኢሲ ላይꬅ ጊዲዛ ላፑን ꬋርሾ ላቃታ ኢሲ ኮርማ ቦራራ ናምኡ ꬋርሾታ ሺሺቴ፤ ካꬃ ያርሾዛራኔ ዎይኔ ኡሻ ያርሾዛራ ኢሲፌ ጎዳስ ጹጌቲዛ ያርሾኔ ሳዎ ቱኑ ጊዛ ያርሾ ሂስቲ ሺሺቴ።
LEV 23:19 ቃሴካ ናጋራ ጊሻስ ሺቂዛ ያርሾስ ኢሲ ዴይሻ ኦርጌ፥ ኢሲፌቴꬃ ያርሾስ ኢሲ ላይꬅ ꬋርሾ ላቃ ናምኣታ ያርሾስ ሺሺቴ።
LEV 23:20 ቄሴይ ኡኬꬃ ናምኡ ላቃታራ ያኔ ሃ ቃሴꬂዲ ጎዳስ ዱማ ያርሾ ሂስቲ ሺሾ፤ ሄሲካ ቄሴታ ጊሻ ጊዶ፤ ሄይቲ ሄ ኢሞታቲ ሃራፔ ዱማ ኢሞታ።
LEV 23:21 ሄ ጋላስ ኣዋጃ ኣዋጂዲ ጎዳ ጎይናናስ ኢሲ ቦላ ሺቂቴ ኣቲን ሃራ ኦሶ ኦꬆፍቴ፤ ሃይሲ ኢንቴ ዲዛሶ ኡባን ኢንቴፌ ጉዬራ ዪዛ ዬሌታስ ሜርናስ ኤቂ ዲዛ ዎጋ ጊዶ።
LEV 23:22 ኢንቴ ኢንቴ ቢታን ካꬅ ሺሺዛ ዎዴ ꬋሳ ቦላ ዲዛ ካꬃ ማጾፒቴ፤ ማጺሺን ጉዬን ኣቲዳይሳ ማጻናስ ጉዬ ሲሞፍቴ፤ ጉዬን ኣቲዳይሲ ማንቆታሲኔ ሃራ ቢታፌ ቤቴ ዪዳ ኣሳታስ ኣቶ፤ ታኒ ጎዳ ኢንቴ ጾሳ።»
LEV 23:23 ጎዳይ ሙሴስ ሂዝጊዴስ፥
LEV 23:24 «ኢስራኤሌ ኣሳስ ላፑንꬃ ኣጊናይ ጌሊዳ ኮይሮ ጋላሳይ ኢንቴስ ሼምፖ ጋላስ ጊዶ፤ ሄ ዎዴ ዛዬይ ፑኔቲሺን ኢንቴ ጎዳ ጎይናናስ ሺቂዛ ዱማ ሺቆ ጊዶ።
LEV 23:25 ሄ ጋላስ ጎዳስ ታማን ጹጌቲዛ ካꬃ ያርሾ ሺሺቴ ኣቲን ሄ ጋላስ ኣይኮካ ኦꬆፍቴ።»
LEV 23:26 ጎዳይ ሙሴስ ሂዝጊዴስ፥
LEV 23:27 «ላፑንꬆ ኣጊናይ ጌሊዳፔ ጉዬ ታማንꬃ ጋላሳይ ናጋራፔ ማሬቴꬃ ጋላሳ፤ ሄ ጋላስ ኣይ ካꬂካ ሞፒቴ፤ ጎዳ ጎይናናስ ሺቂቴ፤ ጾሳስ ታማን ጹጌቲዛ ያርሾ ሺሺቴ።
LEV 23:28 ሄ ጋላሳይ ጎዳ ኢንቴ ጾሳ ሲንꬃን ኣሳ ናጋራ ዉርሶ ጋላስ ጊዲዳ ጊሻስ ሄ ጋላስ ኣይኮካ ኦꬆፍቴ።
LEV 23:29 ሄ ጋላስ ባናቴꬃ ካዉሺዲ ማሬቶንታ ኣይ ኣሲካ ዴራ ጊዶፌ ሻኬቲ ꬋዮ።
LEV 23:30 ሄ ጋላስ ኣይ ኦሶ ጊዲን ኦꬂዛዴ ታኒ ኢዛ ኢዛ ዴራ ጊዶፌ ሻካ ꬋይሳና፤
LEV 23:31 ሄሳ ጊሻስ ሄ ጋላስ ኢንቴ ኣይ ኦሶካ ኦꬆፍቴ፤ ሃይሲ ሃ ዎጋዚ ኢንቴ ዲዛሶ ኡባን ኢንቴፌ ጉዬ ያና ኢንቴ ዬሌታስ ኤቂ ዲዛ ሜርና ዎጋ ጊዶ።
LEV 23:32 ሄ ኣጊናይ ጌሊዳ ኡዱፉንꬆ ጋላሳ ኦማርሳፌ ቢዲ ታማንꬆ ጋላሳ ኦማርስ ጋካናስ ኢንቴናቴꬃ ካዉሺዲ ሄ ጋላሳ ሳምባታ ሂስቲ ቦንቺቴ።»
LEV 23:33 ጎዳይ ሙሴስ ሂዝጊዴስ፥
LEV 23:34 «ጎዳስ ዳሴ ባኣሌይ ላፑንꬃ ኣጊናይ ጌሊዳ ታማኔ ኢቻሻንꬆ ጋላሳፌ ዶሚዲ ላፑን ጋላስ ጋካናስ ቦንቼቶ።
LEV 23:35 ሄ ጋላሳታፔ ኮይሮ ጋላስ ጎዳ ጎይናናስ ሺቂቴ ኣቲን ኣይ ኦሶካ ኦꬆፍቴ።
LEV 23:36 ላፑን ጋላሳታን ኢሳን ኢሳን ጎዳስ ጹጌቲዛ ያርሾ ሺሺቴ፤ ኦስፑንꬃ ጋላስ ቃሴካ ጎዳ ጎይናናስ ሺቂቴ፤ ጎዳስ ጹጌቲዛ ካꬃ ያርሾ ያርሺቴ፤ ሄ ጋላሳይ ኢንቴ ሺቆዛ ዉርሲዛ ጋላስ ጊዲዳ ጊሻስ ሄ ጋላስ ኣይኮካ ኦꬆፍቴ።
LEV 23:37 «ኢንቴ ታማን ጹጌቲዛ ያርሾኔ ካꬃ ያርሾ ቃሴ ሃራ ያርሾታ ኡባኔ ኡሻ ያርሾ ኮሺዛ ኬና ዎꬂዳ ጋላሳን ጎዳስ ሺሻናስ ኢንቴ ጌሻ ሺቆ ኦꬂዲ ኣዋጃናስ ቤሲዛ ጎዳስ ዶሬቲዳ ባኣሌቲ ሃይታንታ።
LEV 23:38 ሃይቲ ሃ ያርሾቲ ጎዳ ሳምባታ ጋላሳታን ኢንቴ ሺሺዛይታፔ ጾሳስ ኢሚዛ ኢሞታታፔ ኣዲና ጋꬂዛይታፔኔ ኢንቴ ኢንቴ ዶሳን ጮ ኢሚዛይታፔ ቦላራ ጉጂዲ ኢንቴ ኢሚዛ ኢሞታታ።
LEV 23:39 «ኢንቴ ካꬅ ሺሺዳፔ ጉዬ ላፑንꬃ ኣጊናይ ጌሊዳ ታማኔ ኢቻሻንꬃ ጋላስ ኮይሮራ ሃይሳ ኡፋይሳ ባኣሌዛ ጎዳ ሲንꬃን ላፑን ጋላስ ጋካናስ ቦንቺቴ፤ ኮይሮ ጋላሲኔ ኦስፑንꬃ ጋላሳይ ኢንቴስ ዱማ ሼምፖ ጋላስ ጊዶ።
LEV 23:40 ሄ ኮይሮ ጋላስ ኢንቴ ቢታን ካጺዛ ሎኦ ሚꬃ ኣይፌፔ፥ ዛምባ ሃይꬅ፥ ጪሊላ ሚꬃ ሃጋኔ ሃꬂናጌ ሚꬃ ሃጋ ኦይኪዲ ጎዳ ኢንቴ ጾሳ ሲንꬃን ኡፋዬቲሼ ላፑን ጋላስ ጋካናስ ባኣሌ ኦꬂቴ።
LEV 23:41 ሃይሳካ ላይꬃን ላይꬃን ላፑንꬃ ኣጊናን ላፑን ጋላስ ጋካናስ ጎዳ ሲንꬃን ቦንቺቴ፤ ሃይሲ ሃ ዎጋይ ኢንቴስ ና ና ጋካናስ ሜርና ዎጋ ጊዲ ቦንቼቶ።
LEV 23:42 ኩሜꬃ ኢስራኤሌ ዴሬይ ላፑን ጋላስ ጋካናስ ዳሴን ኡቶ።
LEV 23:43 ሃይሳንካ ታኒ ኢስራኤሌ ናይታ ጊብጼ ቢታፌ ኬሲዳ ዎዴ ኢስቲ ዳሴን ኡታና ማላ ታ ኦꬂዳይሳ ኢንቴፌ ጉዬ ዪዛ ዬሌታይ ኤራና። ታኒ ጎዳ ኢንቴ ጾሳ።»
LEV 23:44 ሙሴይ ሃይሳꬆ ኦꬂዲ ጎዳ ባኣሌታ ቦንቺዛ ዎጋ ኢስራኤሌ ኣሳ ኤሪሲዴስ።
LEV 24:1 ጎዳይ ሙሴስ ሂዝጊዴስ፥
LEV 24:2 «ዱንካኔዛን ፓጬይ ባይንዳ ፖኣና ማላ ኦꬃናስ ዎጋራ ሚꬃፌ ጉምኢ ጺሊሲ ኬሲዳ ዛይቴ ኢስራኤሌ ዴሬ ኣሳይ ኔስ ኤሃና ማላ ኣዛዛ።
LEV 24:3 ኣሮኔይ ኦማርስ ኦማርስ ጾምፔዛ ኦይሴꬆ፤ ሄሲካ ጋይቶቴꬃ ዱንካኔዛ ጊዶን ዲዛ ጫቆ ቃላ ታቦታዛፔ ሲንꬃ ባጋራ ዲዛ ማጋላሻፔ ካሬ ባጋራ ጎዳ ሲንꬃን ጋዴይ ዎንታና ጋካናስ ፖኢሼ ኣቆ፤ ሃይሲ ሃ ዎጋዚ ሲንꬃፌ ያና ዬሌታስ ሜርና ዎጋ ጊዶ።
LEV 24:4 ኣሮኔይ ሄ ጾምፔታ ዎꬂዛ ዋላካይ ባይንዳ ዎርቃፌ ኦሴቲዳ ባላዛ ቦላ ዲዛ ጾምፔቲ ፓጬይ ባይንዳ ጎዳ ሲንꬃን ፖኣና ማላ ናጎ።
LEV 24:5 «ታማኔ ናምኡ ኪሎ ጊዲዛ ሊቆ ꬊሌ ኤካዳ ታማኔ ናምኡ ኡኬꬅ ኡካ።
LEV 24:6 ኡኬꬃታፔ ኡሱፑናታ ቦላራ ዋላካይ ባይንዳ ዎርቃን ቲዬቲዳ ጻራጴዛ ቦላ ኢሲ ባጋራ ዎꬃ፤ ቃሴ ሃንኮ ኡሱፑናታ ሃንኮ ባጋራ ዲዛ ማዳ ቦላ ማራን ማራን ዎꬃ።
LEV 24:7 ጎዳስ ታማን ጹጌቲ ያርሼቲዛ ካꬃ ያርሾ ጊዲዳይሳ ቆፍሳናስ ሙሩታ ኤጻኔ ናምኡ ባጋራካ ዎꬃ።
LEV 24:8 ሃይሳ ሃ ኡኬꬃዛ ሳምባታን ሳምባታን ኡባ ዎዴ ኣሮኔይ ጎዳ ሲንꬃን ኢስራኤሌ ኣሳ ጊሻስ ዎꬆ፤ ሃይሲ ኢስራኤሌ ኣሳይ ፓጬይ ባይንዳ ኦꬃና ማላ ቤሲዛ ጫቆ ቃላ።
LEV 24:9 ኡኬꬃይ ኣሮኔሲኔ ኢዛ ዜሬꬃታስ ጊሻ ጊዶ፤ ኢስቲ ኡኬꬃ ጎዳስ ዱማቲዳሶን ሜቶ፤ ሄሲካ ጎዳስ ታማን ጹጌቲ ሺቂዛ ያርሾታፔ ኬሂ ዱማቲዳ ኣሮኔሲኔ ኢዛ ዜሬꬃታስ ኢሜቲዳ ጊሻ ጊዶ።»
LEV 24:10 ኣዪ ባጋራ ኢስራኤሌ፥ ኣዋ ባጋራ ጊብጼ ዴሬ ኣስ ጊዲዳ ኢሳዴይ ዴስ፤ ኢዚካ ኢሲ ጋላስ ባ ዲዛ ሄራን ዲዛ ኢሲ ኢስራኤሌ ኣስ ጊዲዳሪራ ኦዬቲዴስ።
LEV 24:11 ሄ ኣዬይ ባጋራ ኢስራኤሌ ኣስ ጊዲዳይሲ ኦዬቲሼ ጎዳ ሱንꬅ ጫዪዴስ፤ ሂስቲን ኢዛዴ ሙሴኮ ኤሂዳ፤ ሄ ኣዴዛ ኣያ ዳኔ ባጋፌ ጊዲዳ ዲብራዬ ና ሻሎሚቶ ጌቴታዉስ።
LEV 24:12 ኢስቲ ኢዛ ቦላ ኣይ ቂጻቴ ዬጋናስ ቤሲዛኮ ጎዳይ ኢስታስ ዮታና ጋካናስ ኢዛ ቃሾ ኬꬃን ዬጊዳ።
LEV 24:13 ጎዳይ ሙሴስ ሂዝጊዴስ፥
LEV 24:14 «ሄ ኣዴዛ ኣሳይ ዲዛሶፔ ጌዴ ሃራሶ ኬሳ፤ ኢዚ ጾሳ ጫዪሺን ሲዪዳ ኡባይ ሄሳዴይ ሞሮ ኦꬂዳይሳ ማርካታናስ ኢሶይ ኢሶይ ባ ኩሼ ሄ ኣዴዛ ሁኤ ቦላ ዎꬆ፤ ሄሳፌ ካሊዲ ኩሜꬃ ኢስራኤሌ ዴሬይ ኢዛ ሹቻን ጫዲ ዎꬎ።
LEV 24:15 ታና ጾሳ ጫዪዳ ኣይ ኣሲካ ሄሳꬆካ ባ ቂጻቴ ኤኮ።
LEV 24:16 ጎዳ ጫዪዳ ኣይ ኣስ ጊዲንካ ዴሬይ ኡባይ ኢዛ ሹቻን ጫዲ ዎꬎ፤ ኢስራኤሌ ኣስ ጊዲን ዎይኮ ኢስራኤሌ ዴሬ ጋርሳን ዲዛ ሃራ ዴሬ ኣስ ጊዲን ጎዳ ጫዪዳዴይ ሹቻን ጫዴቲ ሃይቆ።
LEV 24:17 «ኣሴ ዎꬊዳዴይ ኦኒካ ሃይቆን ቃጻዬቶ።
LEV 24:18 ኣሳ ሜሄ ዎꬊዳዴይ ኢዛ ማላ ሜሄ ቃንጾ፤ ሄሲ ሄ ዋጋዚ ሼምፖ ጊሻስ ሼምፖ ቃንጺዛ ዎጋ።
LEV 24:19 «ኣይ ኣሲካ ሃራ ኣሳ ቦላ ቆሆ ጋꬂኮ ኢዛዴይ ቆሆ ጋꬂዳይሳ ማላ ቆሆይ ሄ ጋꬂዳዴ ቦላ ጋኮ።
LEV 24:20 ሜቄꬅ ሜንꬂዳዴስ ሜቄꬂ ሜቆ፤ ኣይፌ ቶይሲዳዴስ ኣይፌይ ቶኦ፤ ኣች ሜንꬂዳዴስ ኣቺ ሜቆ፤ ሃራ ኣሳ ቦላ ኣይ ቆሆካ ጋꬂዳዴስ ኢዚ ጋꬂዳ ቆሆዛ ማላይ ኢዛ ቦላ ጋኮ።
LEV 24:21 ሜሄ ዎꬊዳዴይ ሜሄ ቃንጾ፤ ኣሴ ዎꬊዳዴይ ጊዲኮ ሃይቆን ቃጻዬቶ።
LEV 24:22 ሃይሲ ዎጋዚ ኢንቴስ ኢስራኤሌ ናይታስ ጊዲን ዎይኮ ኢንቴ ጊዶን ዲዛ ሃራ ዴሬ ኣሳ ኡባሳ፤ ጋሶይካ ታኒ ጎዳ ኢንቴ ጾሳ።»
LEV 24:23 ሙሴይ ሄሳ ኡባ ዴሬዛስ ዮቲ ፖሊዳፔ ጉዬ ሄ ጾሳ ጫዪዳ ኣዴዛ ኣሲ ዲዛሶፔ ሃራሶ ኬሲዲ ሹቻራ ጫዲ ዎꬊዳ፤ ሄሳꬆካ ኢስራኤሌ ኣሳይ ጎዳይ ሙሴ ኣዛዚዳ ማላ ኦꬂዳ።
LEV 25:1 ጎዳይ ሲና ዙማ ቦላን ሙሴ ሂዝጊ ኣዛዚዴስ፥
LEV 25:2 «ኔ ኢስራኤሌ ኣሳስ፥ ‹ታኒ ኢንቴስ ኢሚዛ ቢታ ኢንቴ ጌሊዛ ዎዴ ላፑንꬃ ላፑንꬃ ላይꬃን ቢታ ጎዮንታ ሻቺ ሼምፒሶን ጾሳ ቦንቺቴ።
LEV 25:3 ኡሱፑን ላያꬅ ኩሜꬅ ጎዪቴኔ ዜሪቴ፤ ዎይኔ ሚꬃይ ሎኤꬂ ኣይፋና ማላ ቂርጺቴ፤ ኣይፌካ ማጺ ሺሺቴ።
LEV 25:4 ጊዶ ኣቲን ላፑንꬃ ላይꬃይ ታስ ጾሳስ ዱማ ጊዲን ቢታይ ሼምፖ ዴሚዛ ላይꬅ ጊዶ፤ ሄ ላይꬅ ቢታ ጎዮፒቴ፤ ዎይኔ ሚꬃይካ ኣይፋና ማላ ቂርጾፍቴ።
LEV 25:5 ኢንቴ ዜሮንታ ኣዛባ ጫሪዳ ካꬃ ኢንቴስ ማጺ ሺሾፍቴ፤ ሄ ላይꬃይ ቢታያ ሙሌራ ሼምፒዛ ላይꬃ።
LEV 25:6 ሄ ላይꬅ ኢዛ ኣይኮካ ጎዮንታ ኣጊኮካ ቢታያ ኢንቴስ ኢንቴ ኣይሌታሲኔ ኢንቴስ ሚሻራ ኦꬂዛይታስ፤ ቃሴካ ሃራ ዴሬፔ ዪዲ ኢንቴናራ ዲዛ ሃራ ዬሌታታስ ሚዛዝ ጊዶ።
LEV 25:7 ኢንቴ ሜሄታሲኔ ኢንቴ ቢታ ቦላ ዲዛ ዶኣታሳራ ሜቴቲዛዝ ቢታያ ኢማና፤ ሄ ኢዛ ኢሚዛይሲ ኡባይ ኢስታስ ሜቴቲዛዝ ጊዶ።
LEV 25:8 « ‹ላፑንቶ ላፑን ላይꬅ ቆዳ፤ ሄ ላይꬃታ ቆዳይ ኦይዱ ታማኔ ኡዱፉን ላይꬅ ጊዴስ፤
LEV 25:9 ላፑንꬆ ኣጊናይ ጌሊዳፔ ታማንꬃ ጋላስ ቦንቼቲዛ ናጋራፔ ማሬቴꬃ ጋላስ ኩሜꬃ ቢታ ቦላ ዛዬ ዛያናዴ ዬዲቴ።
LEV 25:10 ሄሳꬆካ ኢቻሽ ታማንꬆ ላይꬃ ዱማሲ ሻኪዲ ቢታይ ቦላ ዲዛይታስ ኡባስ ዎዜቴꬅ ኣዋጂቴ፤ ሃይሳፌ ካሴ ባይዜቲዳ ጋዴይ ካሴ ባይዚዳዴስ ዎይኮ ኢዛዴ ቆሞስ ሲሞ፤ ኣይሌቴꬃን ባይዜቲዳ ኣይሌይካ ካሴ ባ ኣሳኮ ሲሞ።
LEV 25:11 ሄ ላይꬅ ጎሼ ጎዪዲ ዜሬꬅ ዜሮፒቴ፤ ዜሬꬅ ዜሮንታ ጮ ኣዛባ ካጺዳ ካꬅ ዎይኮ ቂርጼቶንታ ኣይፊዳ ዎይኔ ሚꬃ ኣይፌ ማጺ ሺሾፍቴ።
LEV 25:12 ሄ ላይꬃይ ኩሜꬅ ኢንቴስ ዱማ ሻኬቲዳ ላይꬅ ጊዶ፤ ካሴ ኢንቴ ዜሮንታ ጮ ባርካ ካጺዳ ካꬅ ጻላ ሚቴ።
LEV 25:13 « ‹ሃይሳፌ ካሴ ባይዜቲዳ ጋዴይ ኡባይ ሄ ዎዞ ላይꬃን ጋዳዴስ ሲሞ።
LEV 25:14 ሄሳ ጊሻስ ኔ ኣሾ ጊዲዳ ኢስራኤሌ ኣሳ ኔኒ ጋዴ ባይዚዳዝ ጊዲኮ ዎይኮ ኔ ሃ ኔስ ሻሚዳዝ ጊዲኮ ጌኔ ኦሶ ኦꬆፋ።
LEV 25:15 ጋዴዛ ዋጋይ ሄሬጌታናስ ቤሲዛይ ሲንꬃፌ ቢታይ ሲሚዛ ላይꬃይ ጋካናፔ ካሴ ሄ ጋዴይ ኢማና ዳንዳይዛ ካꬃ ቆፒ ሄሬጋናስ ቤሴስ።
LEV 25:16 ላይꬃይ ዳሮ ጊዲኮ ሄሬጋይካ ዳሮ ጊዶ፤ ላይꬃይ ጉꬅ ጊዲኮ ሄሬጋይካ ጉꬅ ጊዶ፤ ጋዴይ ባይዜቲዛ ዋጋይ ጋዴዚ ኢሚዛ ካꬃ ማላ ጊዶ።
LEV 25:17 ኢሲ ኢስራኤሌ ኣሲ ሃራ ኢስራኤሌ ኣስ ቆሆፖ፤ ኢንቴ ኢንቴ ጾሳስ ያዪቴ፤ ታኒ ጎዳ ኢንቴ ጾሳ።
LEV 25:18 « ‹ኢንቴ ኢንቴ ቢታ ቦላ ሳሮን ዴኣና ማላ ጾሳ ዎጋ ኡባ ቦንቺቴ።
LEV 25:19 ቢታያ ኢንቴስ ጊዳና ካꬅ ኢማና፤ ኢንቴካ ኢዚፔ ካላና ጋካናስ ማና፤ ሳሮቴꬃንካ ዴኣና።
LEV 25:20 « ‹ጊዶ ኣቲን ላፑንꬃ ላይꬃን ጎሼ ጎዮንታኔ ካꬅ ዜሮንታ ማጾንታ ኣይ ማኔ?› ጊዲ ኦይቺዛ ኣሲ ዶንታ ኣጌና።
LEV 25:21 ኡሱፑንꬃ ላይꬃታን ቢታዮ ኣንጃና፤ ሂስቲኮ ኢዛ ኢንቴስ ሄꬑ ላይꬃስ ጊዳና ካꬅ ኢማና።
LEV 25:22 ኦስፑንꬃ ላይꬃንካ ጎሼ ጎዪሼ ኢንቴ ካሴ ሺሺዳ ካꬃ ማና፤ ሄሳ ሄ ካꬃ ኡዱፉንꬃ ላይꬃን ቦኔ ካꬅ ኢንቴ ሺሻና ጋካናስ ኢዛፔ ማና።
LEV 25:23 « ‹ጋዴይ ዎዜቶንታ ማላ ባይዛናስ ቤሴና፤ ጋሶይካ ቢታይ ታሳ ኣቲን ኢዛ ኢንቴስ ጊዱኩ፤ ኢንቴ ኢማꬃታኔ ቤቴ ኣሳታ ማላ።
LEV 25:24 « ‹ቢታይ ባይዜቲኮ ሄ ባይዚዛዴይ ሄ ቢታ ዛሪ ዎዛናይሲ ኤሬቲዳዝ ጊዶ።
LEV 25:25 ኢስራኤሌ ኣሳፔ ኢሳዴይ ሜቶፔ ኣታናስ ባ ጋዴ ባይዚኮ ኢዛስ ማቲዛ ዳቦይ ሄ ባይዜቲዳ ጋዳ ዎዞ።
LEV 25:26 ኢዛስ ዎዚዛ ማታ ዳቦይ ዶንታ ኣጊኮ ኢዛዴይ ጋምኢሼ ሚሼ ዴሚዲ ዛሪ ዎዛናስ ዳንዳዬስ።
LEV 25:27 ሄሳ ዎዛናስ ኢዚ ዳንዳይዛ ዎዴ ባ ባይዚዳ ዎዴዛፔ ዶሚዲ ዲዛ ላይꬃ ቆዲዲ ኣቲዳ ላይꬃታ ሚሻ ሻሚዳዴስ ዛሮ፤ ሄሳፌ ጉዬ ካሴ ባ ጋዴዛ ዛሪ ኤኮ።
LEV 25:28 ቃሴካ ጋዴዛ ዎዛናስ ጊዲዛ ሚሺ ኢዛስ ዶንታ ኣጊኮ ኢዚ ባይዚዳ ጋዴይ ዎዜቲዛ ላይꬃይ ጋካናስ ሻሚዳዴ ኩሼን ዴኦ፤ ዎዜቲዛ ላይꬃይ ጋኪሺን ጋዴይ ጋዳዴስ ሲሞ፤ ጋዳዴይካ ጌዴ ባ ጋዴን ሲሞ።
LEV 25:29 « ‹ኢሲ ኣሲ ጊምቤይ ጊምቤቲዳ ካታማ ጊዶን ዲዛ ኬꬅ ባይዚዳ ጊዲኮ ኢዚ ባይዚዳፔ ኢሲ ላይꬃ ጋርሳን ዛሪ ዎዛናስ ዳንዳዬስ፤ ኢዚ ዛሪ ዎዛና ዳንዳይዛይ ኢሲ ላይꬃ ጋርሳን ጻላ።
LEV 25:30 ጊዲኮካ ኢሲ ላይꬃ ጋርሳን ዛሪ ዎዛናስ ዳንዳዮንታ ኣጊኮ ሃራ ዎዴ ዛሪ ዎዚሲዛ ዎጋይ ኢዛስ ዴና፤ ኬꬃይ ሻሚዳዴስ ዎይኮ ኢዛ ና ናስ ሃሮ ጊዲ ኣቴስ፤ ባይዜቲዳ ሚሻይ ዎዜቲዛ ላይꬃንካ ባይዚዳዴስ ኬꬃይ ሲሜና።
LEV 25:31 ጊምቤይ ጊምቤቶንታ ጮ ዴሬ ጋርሳን ዲዛ ኬꬃቲ ባይዜቲዳፔ ጉዬ ጎሻ ቢታ ማላ ቆዴቲዲ ኬꬃ ጎዳይ ዛሪ ዎዛናስ ዳንዳዬስ።
LEV 25:32 « ‹ጊዶ ኣቲን ሌዌ ናይቲ ባስ ኢሜቲዳ ካታማታን ዲዛ ባ ኬꬃታ ባ ኮዪዳ ኣይ ዎዴካ ዎዛናስ ዳንዳዬቴስ።
LEV 25:33 ሃይቲ ካታማታን ኢሲ ሌዌ ቆሞይ ኬꬅ ባይዚኮ ቃሴ ዛሪ ዎዛናስ ኢዚ ዳንዳዮንታ ኣጊኮ ባይዜቲዳ ሚሽ ዎዞ ላይꬃን ኢዛስ ሲሞ፤ ጋሶይካ ሌዌ ቆሞቲ ባ ካታማታን ኬጺዳ ኬꬃቲ ኢስራኤሌ ናይታ ጊዶን ኣይ ዎዴ ጋካናስካ ኢስታሳ።
LEV 25:34 ቃሴካ ኢስቲ ካታማታ ዩሾን ዲዛ ሜሄይ ሄሜቲዛ ቢታይ ሙሌካ ባይዜቶፎ፤ ሄ ቢታይ ኣይ ዎዴካ ኢስታሳ።
LEV 25:35 « ‹ኔ ባጋ ኢስራኤሌ ኣሳፔ ኢሳዴይ ማንቂዲ ባና ኣይሳናስ ዳንዳዮንታዴ ጊዲኮ ኢማꬃ ጊዲዳ ዎይኮ ቤቴ ኣሲ ኔ ኣቻን ዳና ማላ ኔ ማዲዛይሳꬆ ኢዛካ ማዳ።
LEV 25:36 ኔ ባጋ ጊዲዳ ኢስራኤሌ ኣሲ ኔናራ ዳና ማላ ኢዛፔ ዲች ሞፓ፤ ኔ ጾሳስ ያያ።
LEV 25:37 ኔ ኢዛስ ታልኤ ኢሚኮ ኢዛፔ ዲች ኦይቾፋ፤ ኔ ካꬅ ኢዛስ ዎꬌራ ባይዞፓ።
LEV 25:38 ኔና ካናኔ ቢታ ላቲሳናስ ኔስ ጎዳ ጊዳናስ ጊብጼ ቢታፌ ኬሲዳ ጾሳይ ታና።
LEV 25:39 « ‹ኔ ባጋ ጊዲዳ ኢስራኤሌ ኣሳፔ ኢሳዴይ ማንቆቴꬃፌ ዴንዲዳይሳን ኣይሌ ማላ ኔስ ሃሬታናስ ባና ባይዚኮ ኔ ኢዛ ኣይሌ ማላ ኦሲሶፓ።
LEV 25:40 ኔ ኢዛ ኔ ማታን ዲዛ ኢማꬃ ማላ ዎይኮ ሚሻስ ኦꬂዛ ኦሳንቻ ማላ ቆዳ፤ ኢዚካ ኢቻሹ ታሙ ላይꬅ ጋካናስ ኔስ ኦꬆ።
LEV 25:41 ሄሳፌ ጉዬ ባ ናይታራ ኔፔ ሻኬቲ ጌዴ ባሶ ኣሳኮኔ ባ ዱሳሶ ሲሞ።
LEV 25:42 ኢስራኤሌ ኣሳ ታ ጊብጼ ቢታፌ ኬሲዳ ታ ኦሳንቻታ ጊዲዳ ጊሻስ ኢስቲ ኣይሌ ማላ ባይዜቶፌቶ።
LEV 25:43 ኔ ኢስታ ዎልቃራ ሃሮፓ፤ ኔ ጾሳስ ያያ።
LEV 25:44 « ‹ኔስ ኣቱማኔ ማጫ ኣይሌቲ ዴኣና ማላ ኮይኮ ኔ ዩሾን ዲዛ ኣይዛቤታ ጊዶፌ ሻማ ኤካ።
LEV 25:45 ቃሴካ ኢንቴ ቢታን ዲዛ ቤቴ ኣሳታፔኔ ኢንቴ ቢታን ዬሌቲዳ ኣሳታፔ ሻማናስ ዳንዳዬታ፤ ኢስቲ ኢንቴስ ሃሮ ጊዴቶ።
LEV 25:46 ሄይታን ኢንቴ ኢንቴ ናይታ ላቲሳናስ ዳንዳዬታ፤ ኢስቲ ዴኢዛ ላይꬃ ኡባን ኢንቴ ናይታስ ኦꬂዛይታ ጊዳና፤ ኢንቴ ቆሞ ጊዲዳ ኢስራኤሌ ኣስ ዎልቃራ ሃሮፒቴ።
LEV 25:47 « ‹ኢንቴ ጊዶን ዲዛ ሃራ ዴሬ ኣሳፔ ኢሳዴይ ዱሬ ጊዲኮ ኢንቴ ባጋ ጊዲዳ ኢስራኤሌ ናይታፔ ማንቆ ጊዲዳይ ባና ሃራ ዴሬ ዱሬስ ዎይኮ ኢዛሶ ኣሳፔ ኢሳዴስ ባና ኣይሌቴꬃስ ኣꬂ ኢሚኮ፥
LEV 25:48 ኢዚ ባይዜቲዳፔ ጉዬ ሲሚዲ ናምኣንꬆ ዎዜታናስ ዳንዳዬስ፤ ሄሳ ጊሻስ ኢዛ ኢሻታፔ ኢሳዴይ ኢዛ ዎዞ።
LEV 25:49 ኢዛ ኣዋ ኢሻይ ዎይኮ ኢዛ ኣዋ ኢሻ ናይ ዎይኮ ኢዛስ ማታ ዳቦታፔ ኢሳዴይ ኢዛ ዛሪ ዎዛናስ ዳንዳዬስ፤ ኢዛዴይ ባስ ጊዲዛ ሚሼ ሺሺዳ ጊዲኮ ባ ሚሻራ ዎዜታናስ ዳንዳዬስ።
LEV 25:50 ኢዚ ባና ሃሪዳዴራ ኢሲፌ ጊዲዲ ኢዚ ባና ባርካ ባይዚዳ ላይꬃፌ ዶሚዲ ዎዜቴꬃ ላይꬃ ጋካናስ ዲዛ ላይꬃ ቆዶ፤ ኢዛ ዎዚሲዛ ሚሻይ ሄ ላይꬃታ ቆዳ ጊዶ፤ ኢዚ ባና ሃሪዛይሳራ ጋምኢዳ ዎዴ ዋጋይ ኢሲ ኣሲ ኦꬂዲ ዴሚዛ ኪራ ሚሻ ኬና ጊዶ።
LEV 25:51 ዎዞ ላይꬃይ ጋካናስ ቡሮ ዳሮ ላይꬃቲ ኣቲዳ ጊዲኮ ባ ባይዜቲዳ ዋጋፔ ሄ ኣቲዳ ላይꬃ ቆዳን ባና ዎዚዛ ዋጋ ቃንጾ።
LEV 25:52 ሄ ኣቲዳ ላይꬃቲ ጉꬅ ጊዲኮ ባ ሃሬቲን ኣቲዳ ላይꬃ ቆዲዲ ባና ዎዚዛ ዋጋ ቃንጾ።
LEV 25:53 ኢዚ ላይꬃፌ ላይꬅ ጋካናስ ኡኔ ኦꬂዛ ኣሳ ማላ ባና ሃሪዳዴራ ዴኦፔ ኣቲን ኢዛ ዎልቃራ ሃራናስ ቤሴና።
LEV 25:54 « ‹ሄሳꬆ ሃኒዲ ዎዜታናስ ዳንዳዮንታ ኣጊኮ ሲንꬃፌ ያና ኣይሌቴꬃፌ ዎዜቲዛ ላይꬃን ኢዚኔ ኢዛ ናይቲ ሜላ ዬዴቴቶ።
LEV 25:55 ኢስራኤሌ ኣሳይ ታስ ኣይሌታኔ ታኒ ጊብጼ ቢታፌ ኬሲዳ ታ ኦሳንቻታ፤ ታኒ ጎዳ ኢንቴ ጾሳ።
LEV 26:1 « ‹ኢንቴ ኢዛስ ጎይናና ማላ ኢንቴስ ኣይኮካ ኤቃ ሜꬎፍቴ፤ ሄሳꬆካ ሚስሌ ዎይኮ ሃዉልቴ ዎይኮ ሹቻፌ ማሴቲ ኬዚዳ ቱስ ኤሶፍቴ፤ ታኒ ጎዳ ኢንቴ ጾሳ።
LEV 26:2 « ‹ሳምባታ ጋላሳታ ናጊቴ፤ ታ ኬꬃ ቦንቺቴ፤ ታኒ ጎዳ።
LEV 26:3 « ‹ኢንቴ ታ ዎጋን ዲኮኔ ታ ኣዛዞታካ ናጊኮ፥
LEV 26:4 ታኒ ኢንቴስ ኢራ ዎዴራ ቡኪሳና፤ ቢታያካ ካꬅ ዳርሳ ኢማና፤ ኣይፌ ኢሚዛ ሚꬃቲካ ዳርሲ ኣይፋና።
LEV 26:5 ኢንቴ ካꬃይ ኬሂ ዳሮ ጊዲዳ ጊሻስ ኢንቴ ቡሮ ሺሾ ቦላ ዲሺን ዎይኔ ሚꬃ ኣይፌ ቃንጺዛ ዎዴይ ጋካና፤ ኢንቴ ዎይኔ ሚꬃ ኣይፌ ቃንጺዲ ሺሺ ዉርሶንታ ዲሺን ካꬅ ዜሪዛ ዎዴይ ጋካና፤ ኢንቴ ካꬅ ካሊ ማና፤ ኢንቴ ቢታንካ ሳሮቴꬃን ዳና።
LEV 26:6 « ‹ኢንቴ ቢታስ ሳሮቴꬅ ኢማና፤ ኦናስካ ባቦንታ ኢንቴ ዎፑ ጊ ኣቃና፤ ኢታ ዶኣታ ኢንቴ ዴሬፔ ታ ዲጋና፤ ሃይሳፌ ጉዬ ኢንቴ ዴሬን ኦላይ ዴና።
LEV 26:7 ኢንቴ ኢንቴ ሞርኬታ ጎዳና፤ ኢስቲካ ኢንቴ ሲንꬃን ማሻን ሃይቃና።
LEV 26:8 ኢንቴፌ ኢቻሽ ኣሲ ጼቱ ኣስ፥ ጼታይ ቃሴ 10,000 ኣስ ጎዳና፤ ኢንቴ ሞርኬይ ኢንቴ ሲንꬃን ማሻን ዉራና።
LEV 26:9 « ‹ታኒ ታ ሲንꬅ ኢንቴኮ ዛራና፤ ሂስታዳ ኢንቴና ዳርሳና፤ ታ ኢንቴስ ጌሊዳ ጫቆ ቃላ ናጋና።
LEV 26:10 ካꬃይ ኢንቴስ ላይꬃፌ ላይꬅ ጋꬃና፤ ሄሳፌ ዴንዲዳይሳን ኦራꬅ ጋኪዳ ካꬅ ጌልꬃናስ ዚላይꬃ ካꬃፌ ኣቲዳይሳ ሃራሶ ኬሴታ።
LEV 26:11 ታኒ ኢንቴ ጊዶን ዴያና፤ ታ ኢንቴና ሻቴቲኬ።
LEV 26:12 ታኒ ኡባ ዎዴ ኢንቴ ጊዶን ሲሜሬታና፤ ታኒ ኢንቴ ጾስ ጊዳና፤ ኢንቴካ ታ ዴሬታ ጊዳና።
LEV 26:13 ኢንቴ ኣይሌቴꬃን ሃሬቶንታ ማላ ጊብጼ ቢታፌ ኢንቴና ኬሲዳይ ታኒ ጎዳ ኢንቴ ጾሳ፤ ታኒ ኢንቴ ኣይሌቴꬃ ቃምባራ ሜንꬃዳ ኢንቴ ꬎቁ ጊዲ ባና ማላ ኦꬃዲስ።
LEV 26:14 « ‹ጊዶ ኣቲን ኢንቴ ታ ጊዛዝ ሲዮንታ ኢጺኮ ሃ ኣዛዞታ ኡባ ኦꬆንታ ኣጊኮ፥
LEV 26:15 ታ ዎጋኔ ታ ኣዛዞታ ኢንቴ ካꬊዛ ጊዲኮ ታ ኢንቴናራ ጫቄቲዳ ጫቆዛ ኢንቴ ላሊኮ፥
LEV 26:16 ሄ ዎዴ ታኒ ኢንቴ ቦላ ሃይሳ ኤሃና፤ ጊታ ዳጋማ፥ ጊልቃቴꬅ፥ ኣይፌ ቦልጄሲዛዝ፥ ኣሳቴꬃ ጊልቂሲዛዝ ቆጾ ሃርጌ ታ ኢንቴ ቦላ ኤሃና፤ ኢንቴ ዜሬꬅ ዜራናሺን ጮ ሜላ ሃዳ ጊዳና፤ ጋሶይካ ኢንቴ ዜሪዳይሳ ኢንቴ ሞርኬቲ ማና።
LEV 26:17 ታኒ ኢንቴ ቦላ ሃንቆን ዴንዲዛ ጊሻስ ኢንቴ ጾኔታና፤ ኢንቴ ኢጺዛ ኢንቴ ሞርኬቲ ኢንቴና ሃራና፤ ኦኒካ ኢንቴና ጎዶንታ ኢንቴ ኢንቴርካ ባቃታና።
LEV 26:18 « ‹ሄሲ ዉሪካ ኢንቴ ቦላ ጋኪዳፔ ጉዬካ ኢንቴ ታስ ኣዛዜቶንታ ኢጺኮ ታ ኢንቴ ቦላ ዬጋና ቂጻቴዛ ላፑን ኩሼ ዳርሳና።
LEV 26:19 ኢንቴ ኦቶሮቴꬃ ዎልቃ ታ ሜንꬃና፤ ኢንቴፌ ቦላራ ሳሎዛ ቢራታ ማላ ኦꬃና፤ ኢንቴ ቢታካ ጻርቂማላꬆ ኦꬃና።
LEV 26:20 ኢንቴ ዎልቃይ ጮ ሃዳ ዉራና፤ ጋሶይካ ኢንቴ ቢታይ ካꬅ ኢሜና፤ ሚꬃቲካ ኣይፌቴና።
LEV 26:21 « ‹ሃኢካ ኢንቴ ታስ ኢጺስ ጊዲ ኣዛዜቶንታ ኣጊኮ ታኒ ኢንቴ ቦላ ኢንቴ ናጋራ ኬና ቂጻቴዛ ላፑን ኩሼ ዳርሳና።
LEV 26:22 ኢታ ዶኣታ ታ ኢንቴ ጊዶ ዬዳና፤ ሄ ዶኣቲ ኢንቴ ናይታ ዋꬋና፤ ኢንቴ ሚዛታካ ኡባ ꬋይሳና፤ ኢንቴፌ ጉꬃ ኣሳቲ ጻላ ኣታና፤ ካሴ ኢንቴ ሄሜቲዛ ኦጌይ ሳማና።
LEV 26:23 « ‹ሃይሲ ሃ ቂጻቴዚ ኢንቴ ቦላ ጋኪዳፔ ጉዬካ ኢንቴ ታ ጊዛይሳ ሲዮንታ ኢጺዲ ታ ቦላ ኢንቴ ኤቄቴꬅ ዳርሲኮ፥
LEV 26:24 ሄ ዎዴ ታኒካ ኢንቴስ ሞርኬ ጊዳና፤ ኢንቴ ናጋራ ጊሻስ ታ ኢንቴና ላፑን ዳኮ ቃጻያና።
LEV 26:25 ኢንቴ ታናራ ጫቂዳ ቃላ ላሊዳ ጊሻስ ታ ኢንቴና ቃጻያናስ ኢንቴ ቦላ ኦላ ዬዳና፤ ኢንቴ ኢንቴ ካታማታን ሺቂዛ ዎዴ ታ ኢንቴ ጊዶን ኢታ ሃርጌ ኪታና፤ ኢንቴ ሞርኬታስ ኢንቴ ኣꬊ ኢሜታና።
LEV 26:26 ኢንቴ ካꬃ ታኒ ꬋይሲዛ ዎዴ ታሙ ማጫሳቲ ዉሪ ኢሲ ባሼን ኡካና፤ ኢዞካ ማካ ሚሻን ጌዳሪ ጌዳሪ ኤካና፤ ኢንቴካ ሚዲ ካሌኬታ።
LEV 26:27 « ‹ሃይሲ ኡባይ ኢንቴ ቦላ ጋኪን ኢንቴ ታስ ኣዛዜቶንታ ኢጺዲ ታ ቦላ ማካሊ ማካሊ ቢኮ፥
LEV 26:28 ታ ኢንቴ ቦላ ሃንቆን ዴንዳና፤ ኢንቴ ናጋራ ጊሻስ ታ ኢንቴና ላፑን ዳኮ ቃጻያና።
LEV 26:29 ኢንቴ ኮሻ ዳሮፔ ዴንዲዳይሳን ኢንቴ ናይታ ኣሾ ማና።
LEV 26:30 ꬎቃሶሆን ዲዛ ኢንቴ ጎይኒዛ ኤቃ ጾሳታ ታኒ ꬋይሳና፤ ኢንቴ ኤጻኔ ያርሾ ኢዛን ሺሺዛሶዛ ታ ላላና፤ ኢንቴ ኣሃ ኢንቴ ኤቃታ ቦላ ታ ዬጋና፤ ታ ሼምፒያ ኢንቴና ሻቴታና።
LEV 26:31 ታ ኢንቴ ካታማታ ላላና፤ ኢንቴ ጎይኒዛሶታ ታ ካይስ ሂስታና፤ ሳዊዛ ኢንቴ ያርሾዛ ታ ኤኪኬ።
LEV 26:32 ኢንቴ ቢታ ሙሌራ ታ ꬋይሳና፤ ሄን ዲዛ ኢንቴ ሞርኬቲ ማላሌታና ጋካናስ ቢታዮ ታ ኣሲ ባይንዳሶ ሂስታና።
LEV 26:33 ታ ኢንቴ ቦላ ኦላ ኤሃዳ ኢንቴና ኣይዛቤታ ጊዶን ላላና፤ ታኒ ታ ማሻ ኬሳዳ ኢንቴና ጎዳና፤ ኢንቴ ካዎቴꬃይ ኣሲ ባይንዳ ቢታ ጊዳና፤ ኢንቴ ካታማቲካ ላሌታና።
LEV 26:34 ኢንቴ ኢንቴ ሞርኬታ ቢታን ዲዛ ዎዴ ኢንቴ ቢታይ ካይስ ጊዲዛ ጊሻስ ሼምፖ ዴማዳ ሳምባታ ላይꬃታን ኡፋዬታና።
LEV 26:35 ኢንቴ ቢታያ ካሴ ኢንቴ ኢዚን ዲሺን ሳምባታ ዴሞንታራ ኣሳይ ꬋይዳ ዎዴ ኢዛ ሼምፖ ዴማና።
LEV 26:36 « ‹ኢንቴ ቤቴ ቢታን ዲዛይቲ ዉሪካ ጫርኮይ ቃꬂዛ ቆናሼ ጊሪስ ሲዪዲ ዳጋማን ፒራꬊ ባቃታና ማላ ታ ኦꬃና፤ ሞርኬይ ኦላሶን ጎዲን ዎጺዛ ማላ ኢንቴ ዎጻና፤ ኣይ ሞርኬይካ ኢንቴ ኣቻን ባይንዳ ኢንቴ ꬉጴቲ ኩንዳና።
LEV 26:37 ኦኒካ ኢንቴና ጎዶንታ ኢንቴ ኢንቴርካ ኢሶይ ኢሳራ ቃጼቲ ኩንዳና፤ ኢንቴ ኢንቴ ሞርኬታራ ኤቄቲ ኦሌታናስ ዳንዳዬኬታ።
LEV 26:38 ኢንቴ ቤቴ ቢዲ ሄ ዴሬን ሃይቃና፤ ኢንቴ ኢንቴ ሞርኬታ ካዎቴꬃን ሚቴቲ ኣታና።
LEV 26:39 ኢንቴ ሞርኬታ ዴሬን ሃይቆንታ ኣቲዳይቲ ቃሴ ኢንቴ ናጋራኒኔ ካሴ ኢንቴ ኣዋታ ናጋራ ጌዶን ሄን ጊልቂ ኣታና።
LEV 26:40 « ‹ጊዶ ኣቲን ኢንቴ ታስ ኣማኔቶንታ ኣጊዳይሳኔ ታ ቦላ ማካሊዳ ኢንቴ ናጋራኔ ኢንቴ ኣዋታ ናጋራ ኢንቴ ፓጺኮ፥
LEV 26:41 ታኒ ኢንቴስ ሞርኬ ጊዳዳ ኢንቴና ጌዴ ኢንቴ ሞርኬታ ቢታ ዬዳና ማላ ታና ኦሲሲዳ ኢንቴ ናጋራ ኢንቴ ፓጺኮ ሙሚዳ ኢንቴ ዎዚና ኢንቴ ካዉሺዲ ኢንቴ ናጋራፔ ኢንቴ ሲሚኮ፥
LEV 26:42 ኣብራሃሜራ፥ ዪሳቃራኔ ያቆቤራ ታ ጫቂዳ ጫቆ ቃላ ቆፓና፤ ቢታዮካ ታ ቆፓና።
LEV 26:43 ኢስቲ ዬጊ ቢዳ ጊሻስ ቢታያ ኣሲ ባይንዳ ባዞ ጊዳዱስ፤ ሄ ዎዴ ኢዚን ኣሲ ባይንዳ ባዞ ጊዳዳ ባ ሳምባታ ኡፋይሳን ቦንቻና፤ ኢስቲ ታ ዎጋኔ ታ ኣዛዞዛ ካዉሺዳ ጊሻስ ኢስቲ ኦꬂዳ ናጋራ ጊሻስ ቃጻዬታና።
LEV 26:44 ጊዲኮካ ኢስቲ ባ ሞርኬታ ዴሬን ዲዛ ዎዴ ኢስታ ሙሌራ ꬋይሲኬ ጋዳ ታ ጫቂዳ ቃላ ማቤኬ፤ ታ ኢንቴና ኣጋጊኬ፤ ታ ኢንቴና ሃራሴቲኬ፤ ታኒ ጎዳ ኢንቴ ጾሳ።
LEV 26:45 ታኒ ኢስታ ጾሳ ጊዳና ጋዳ ኣይዛቤ ኣሳይ ቤዪሺን ጊብጼ ቢታፌ ኬሲዳ ኢስታ ኣዋታራ ጫቂዳ ጫቆዛ ታ ቆፓና፤ ታኒ ጎዳ› ጌስ።»
LEV 26:46 ኢስራኤሌ ዴራስ ዮታና ማላ ሙሴይ ሲና ዙማ ቦላ ዲሺን ጾሲ ኢዛስ ኢሚዳ ዎጋቲ፥ ማራቲኔ ኣዛዞቲ ሃይታንታ።
LEV 27:1 ጎዳይ ሙሴስ ሂዝጊዴስ፥
LEV 27:2 «ኢስራኤሌ ኣሳስ፥ ‹ኣይ ኣሲካ ጎዳስ ኣስ ኢማናስ ኣዲኔቲን ሄ ኣዲናይ ፖሌቲኮ ሄ ኢማና ጊ ኣዲኔቲዳይሳ ዎዛናስ ኣዲና ዎጋይ፥
LEV 27:3 ሄሳዴ ላይꬃይ ናምኡ ታማፌ ቢዲ ኡሱፑን ታሙ ኩሚዳ ኣቱማ ኣስ ጊዲኮ ጎዳ ኬꬃን ኤሬቲዳ ሜዛኔን ሜዛኔቲዲ ኢቻሽ ታሙ ጊዲዛ ሳቂሌ ቢራ ቃንጾ።
LEV 27:4 ማጫ ጊዲኮ ሄꬑ ታሙ ሳቂሌ ቢራ ጊዶ፤
LEV 27:5 ቃሴካ ኢቻሽ ላይꬃፌ ቢዲ ናምኡ ታሙ ላይꬅ ጋካናስ ዲዛ ኣቱማ ና ጊዲኮ ናምኡ ታሙ ሳቂሌ ቢራ፥ ማጫ ና ጊዲኮ ታሙ ሳቂሌ ቢራ ቃንጾ፤
LEV 27:6 ኢሲ ኣጊናፔ ቢዲ ኢቻሽ ላይꬅ ጋካናስ ዲዛ ኣቱማ ና ጊዲኮ ኢቻሽ ሳቂሌ ቢራ ቃንጾ፤ ሄ ላይꬃታ ጊዶን ዲዛ ማጫ ናስ ጊዲኮ ሄꬑ ሳቂሌ ቢራ ቃንጾ።
LEV 27:7 ሄሳꬆካ ላይꬃይ ኡሱፑን ታማፌ ቦላራ ዲዛ ኣቱማ ኣስ ጊዲኮ ታማኔ ኢቻሽ ሳቂሌ ቢራ፥ ማጫ ጊዲኮ ታሙ ሳቂሌ ቢራ ቃንጾ።
LEV 27:8 ኣዲና ኣዲኔቲዳዴይ ሃይሳ ሃ ሄሬጌቶይሳ ቃንጻናስ ዳንዳዮንታ ኬሂ ማንቆ ጊዲኮ ኢዚ ባ ኢማና ጊ ኣዲኒዳይሳ ቄሴዛ ሲንꬅ ኤኪ ዮ፤ ቄሴዚካ ኣዲኔቲዳዴ ጼሊ ቤኢዲ ኢዛዴ ዎልቃ ኬና ሄሬጎ።
LEV 27:9 « ‹ኣዲና ኣዲኔቲዳይሲ ጾሳስ ያርሻናስ ቤሲዛ ሜሄ ጊዲኮ ሄሳ ማላ ሜሄይ ጾሳስ ዱማ ጊዲዳ ጊሻስ ዎዜቴና።
LEV 27:10 ኣዲና ኣዲኔቲዳዴይ ባ ኣዲኔቲዳ ሜሄዛ ሃራ ሜሄን ላሞፎ፤ ጊዶ ኣቲን ኢታዛካ ሎኦ ሜሄን ላሚዛ ጊዲኮ ኢዚ ካሴ ኤሆይሳራ ናምኣይካ ጾሳስ ዱማቲዳይታ ጊዴቶ።
LEV 27:11 ኢዛዴይ ኢሚዛይሲ ጾሳስ ያርሼታናስ ቤሶንታ ሜሄ ጊዲኮ ሄ ሜሄዛ ኤሂዳዴይ ሜሄዛ ቄሴኮ ኤሆ።
LEV 27:12 ቄሴዚ ሄ ሜሄዛ ኢታቴꬂኔ ኢዛ ሎኤቴꬅ ጫዲ ጼሊዲ ኢዚ ኬሳና ዋጋ ዮቶ፤ ሄ ኢዚ ጊዳ ዋጋይ ኢዚ ጊዳ ማላ ሃኖ።
LEV 27:13 ሄ ሜሄዛ ጎዳይ ሜሄዛ ዛሪ ሚሻራ ሻማና ኮይኮ ሄ ሜሄዛ ዋጋ ቦላ ጼታፔ ናምኡ ታሙ ኩሼ ጉጂዲ ሻሞ።
LEV 27:14 « ‹ኢሳዴይ ባ ኬꬅ ጎዳስ ዱማ ኢሞታ ኢሚኮ ቄሴታ ሃላቃይ ኬꬃይ ኢታኮኔ ሎኦኮ ኢዛ ሃኖቴꬅ ጫዲ ጼሊ ሄሬጊዲ ዋጋ ዮቶ፤ ሄ ቄሴዚ ሄሬጊዳ ዋጋይ ኬꬃስ ሄሬጋ ጊዶ።
LEV 27:15 ካሴ ኬꬃ ጎዳይ ሄ ኬꬃ ዛሪ ዎዛና ኮይኮ ሄሬጌቲዳ ዋጋ ጼታፔ ናምኡ ታሙ ኩሼ ቦላራ ጉጂዲ ኬꬃ ባስ ኤኮ።
LEV 27:16 « ‹ኢሳዴይ ባ ጋዴፔ ሻኪ ጎዳስ ዱማ ኢሞታ ኢሚኮ ቢታይ ኢሚዛ ካꬃ ማላ ሄሬጌቶ፤ ሄሲካ ኢሲ ኪሎ ባንጋ ጊሻስ ኢቻሽ ታሙ ሳቂሌ ቢራይ ቃንጼቶ።
LEV 27:17 ጋዴዛ ጎዳይ ካሴ ጋዴዛ ኢሚዳይ ዎዞ ላይꬃ ባኣሌፔ ጉዬ ጊዲኮ ጋዴስ ካሴ ዎꬊዳ ዎጋይ ላሜቴና።
LEV 27:18 ኢዛዴይ ጋዳ ኢሚዳይ ኢቻሽ ታማንꬆ ላይꬃፌ ጉዬ ጊዲኮ ቄሴዚ ሄሬጋናይ ዪዛ ኢቻሽ ታማንꬆ ላይꬅ ጋካናስ ዲዛ ኣቲዳ ላይꬃ ቆዲዲ ሄሬጎ፤ ሚሻፌ ኣሺ ጪጎ።
LEV 27:19 ጋዴዛ ኢሚዳዴይ ዛሪ ዎዛና ኮይኮ ካሴ ጋዴዚ ሄሬጌቲዳ ዋጋ ቦላ ጼታፔ ናምኡ ኩሼ ጉጂዲ ዛሪ ዎዞ።
LEV 27:20 ካሴ ጋዴይ ባ ጋዳ ጾሳፌ ሚሻን ዎዛናፔ ሲንꬃን ሃራ ኣሳስ ባይዚዳ ጊዲኮ ቃሴ ሄ ጋዴዛ ናምኣንꬆ ዛሪ ዎዛና ዎጋይ ኢዛስ ዴና።
LEV 27:21 ዎዞ ላይꬃን ጋዴይ ሲሚዛ ዎዴ ሄ ጋዴዚ ጊዲኮ ጎዳስ ዱማቲዲ ቄሴታ ላታ ጋዴ ጊዲ ኣቶ።
LEV 27:22 « ‹ኢሳዴይ ሃራ ኣሳፔ ሻሚ ኤኪዳ ጋዴ ጾሳስ ኢማና ኮይኮ፥
LEV 27:23 ካሊ ዪዛ ዎዞ ላይꬅ ጋካናስ ጋዴዚ ኬሳና ዋጋ ቄሴዚ ሄሬጎ፤ ሄ ጋላስ ሄ ሄሬጌቲዳ ሚሽ ጋዳዴይ ቃንጾ፤ ሄ ሚሻይካ ጾሳ ኦሶስ ዱማቲዳዝ ጊዳና።
LEV 27:24 ዎዞ ላይꬃ ባኣሌይ ጋኪዛ ዎዴ ሄ ጋዴዛ ኮይሮ ላታን ኤኪዲ ባይዚዳዴስ ጋዴዚ ሲሞ።
LEV 27:25 ሄ ሄሬጋዛ ዋጋይ ጎዳ ኬꬃን ኤሬቲዳ ሜዛኔን ሜዛኔቲዲ ናምኡ ታሙ ሳቂሌ ጊዶ።
LEV 27:26 « ‹ኮይሮ ባይራ ዬሌቲዳ ሜሄይ ኢዚ ካሴካ ጎዳስ ጊዲዳ ጊሻስ ኦኒካ ኢዛ ጾሳስ ሜላ ኪያቴꬅ ኢማናስ ዳንዳዬና፤ ጋሎ ማር ጊዲን ዎይኮ ዶርሳኔ ዴይሻ ላቃቲ ካሴቲዲ ጾሳስ ዱማቲዳይታ።
LEV 27:27 ኢዛ ቦላ ዎሶይ ዲዛ ሜሄኔ ያርሾ ሺሻናስ ቤሶንታ ሜሄ ጊዲኮ ሄ ሜሄዛ ጎዳይ ኢዛ ሄሬጌቲዳ ዋጋ ቦላ ጼታፔ ናምኡ ታሙ ኩሼ ጉጂዲ ዛሪ ዎዚ ኤካናስ ዳንዳዬስ፤ ኢዛ ጎዳይ ዎዚ ኤካናስ ኮዮንታ ኢጺኮ ሄ ሄሬጌቲዳ ዋጋን ሃራ ኣሳስ ባይዜቶ።
LEV 27:28 « ‹ኢሳዴይ ባ ጎዳስ ባስ ዲዛይሳፌ ኣስ ጊዲን ዎይኮ ሜሄ፥ ጊዲን ዎይኮ ጋዴ ጊዲን ኩሜꬃራ ዱማ ሻኪዳፔ ጉዬ ሙሌካ ባይዛናሲኔ ዛሪ ዎዛናስ ቤሴና።
LEV 27:29 « ‹ኣሳ ጊዶፌ ሻኬቲዲ ዴያና ማላ ፒርዴቲዳዴይ ዎዜቶፎ፤ ኢዛዴይ ሃይቃናስ ቤሴስ።
LEV 27:30 « ‹ቢታፌ ሞኪዛ ካꬅ ጊዲን ዎይኮ ሚꬃ ኣይፌ ጊዲን ታማፌ ኢሶይ ጾሳስ ዱማቲዳ ኣስራታ።
LEV 27:31 ሄሳፌ ኣዋይሳካ ባስ ዎዚ ኤካናስ ኮይዛዴይ ሄ ሚሻይ ባይዜቲዛ ዋጋስ ጼታፔ ናምኡ ታሙ ኩሼ ጉጂዲ ሻማናስ ዳንዳዬስ።
LEV 27:32 ሶ ሜሄታፔ ታማፌ ኢሳይ ጾሳ ጊሻ፤ ሜሄይ ታይቤቲሺን ታማንꬃይ ታማንꬃይ ጎዳስ ዱማ ሻኬቲዳዛ።
LEV 27:33 ታማንꬃ ሜሄይ ኢታ ጊዲን ዎይኮ ሎኦ ጊዲን ዶሮፖ፤ ዎይኮ ሃራራ ላሞፎ፤ ላሚዛ ጊዲኮ ኮይሮይሲኔ ላሜ ኢሜቲዳይሳራ ናምኣይካ ጎዳስ ዱማቲዳዝ ጊዴቴስ ኣቲን ዛሪ ዎዛናስ ዳንዳዬና› ጋ ዮታ።»
LEV 27:34 ሲና ዙማ ቦላ ጎዳይ ሙሴ ባጋራ ኢስራኤሌ ኣሳ ኣዛዚዳ ኣዛዞቲ ሃይታንታ።
NUM 1:1 ኢስራኤሌ ኣሳይ ጊብጼፔ ኬዚዳ ናምኣንꬆ ላይꬃን ናምኣንꬃ ኣጊናይ ዶሚዳ ኮይሮ ጋላስ ኢስቲ ሲና ባዞን ዲሺን ጎዳይ ጋይቶቴꬃ ዱንካኔ ጊዶን ሙሴራ ጋይቲዲ፥
NUM 1:2 «ኣቱማሳ ኢሳ ኢሳ ሱንꬃን ሱንꬃን ጻፋዳ ኢስራኤሌ ኣሳ ቆሞን ቆሞኒኔ ዛርኬን ዛርኬን ቆዳ።
NUM 1:3 ኔኒኔ ኣሮኔይ ኢስታስ ላይꬃይ ናምኡ ታሙኔ ኢዛፔ ቦላራ ዲዛ ኦሌቲ ዳንዳያና ኣቱማሳታ ኢስታ ማራን ማራን ቆዲቴ።
NUM 1:4 ዱማ ዱማ ዛርኬታፔ ኢስታ ካሌꬂዛ ኢስታስ ኣዋቲዛ ኮራፒኔቲ ኢንቴናራ ጊዴቶ።
NUM 1:5 ኢንቴና ማዳናይታ ሱንꬂ ሃይሳፌ ካሊ ዲዛይታ፥ ኦሮቤሌ ዛርኬፌ ሻዱሬ ና ኤልጹሬ፥
NUM 1:6 ሲሞና ዛርኬፌ ጹርሻዳዬ ና ሳሉምኤሌ፥
NUM 1:7 ዩሁዳ ዛርኬፌ ኣሚናዳቤ ና ኔኣሶኔ፥
NUM 1:8 ዪሳኮሬ ዛርኬፌ ጹኣሬ ና ናቲናኤሌ፥
NUM 1:9 ዛቢሎኔ ዛርኬፌ ሄሎኔ ና ኤልያቤ፥
NUM 1:10 ዮሴፌ ናይታፔ ኤፍሬሜ ቆሞቲ ኣሚሁዴ ና ኤልሻማ ሚናሴ ናይታፔ ፔዳጹሬ ና ጋማልኤሌ፥
NUM 1:11 ቢኒያሜ ዛርኬፌ ጊዲኦኔ ና ኣቢዳኔ፥
NUM 1:12 ዳኔ ዛርኬፌ ኣሚሻዳዬ ና ኣሂኤዜሬ፥
NUM 1:13 ኣሴሬ ዛርኬፌ ኦክራ ና ፋጉኤሌ፥
NUM 1:14 ጋዴ ዛርኬፌ ዳኡኤሌ ና ኤልያሳፌ፥
NUM 1:15 ኒፍታሌሜ ዛርኬፌ ኤናኔ ና ኣሂሬ» ጊ ዮቲዴስ።
NUM 1:16 ማባራ ጋርሳፌ ዛርኬፌ ዛርኬፌ ኢስራኤሌ ኣሳ ካሌꬃናስ ዶሬቲዳ ኮራፒኔቲ ሃይታንታ።
NUM 1:17 ሙሴይኔ ኣሮኔይ ሃይታ ባንታ ሱንꬃን ጻፌቲዳይታ ኤኪዳ።
NUM 1:18 ናምኣንꬆ ኣጊናይ ዶሚዳ ኮይሮ ጋላስ ማባራዛ ኩሜꬅ ኢሲ ቦላ ሺሺዲ ዛርኬን ዛርኬኒኔ ዳቦን ዳቦን ሺሺዳፔ ጉዬ ዴሬዛ ቆዲዳ፤ ዬሌቲን ላይꬃይ ናምኡ ታሙ ኩሚዳይታኔ ሄሳፌካ ቦላራ ጊዲዳ ኣቱማሳ ኢስታ ሱንꬃን ሱንꬃን ማዝጋቢ ቆዲዳ።
NUM 1:19 ሄሳꬆካ ሙሴይ ጎዳይ ኣዛዚዳ ማላ ሲና ባዞን ዴሬዛ ቆዲዴስ።
NUM 1:20 ኦላ ኦሌታናስ ዳንዳይዛይታ ላይꬃይ ናምኡ ታማኔ ሄሳፌካ ቦላራ ዲዛይቲ ባንታ ዛርኬፌ ዛርኬፌ ቆዴቲዳ፤ ኣዴታ ቆዳይ ሃይሳፌ ካሊዛይሳ፤
NUM 1:21 ኦሮቤሌ ዛርኬፌ 46,500፥
NUM 1:22 ሲሞና ዛርኬፌ 59,300፥
NUM 1:24 ጋዴ ዛርኬፌ 45,650፥
NUM 1:26 ዩሁዳ ዛርኬፌ 74,600፥
NUM 1:28 ዪሳኮሬ ዛርኬፌ 54,400፥
NUM 1:30 ዛቢሎኔ ዛርኬፌ 57,400፥
NUM 1:32 ዮሴፌ ና ኤፍሬሜ ዛርኬፌ 40,500፥
NUM 1:34 ዮሴፌ ና ሚናሴ ዛርኬፌ 32,200፥
NUM 1:36 ቢኒያሜ ዛርኬፌ 35,400፥
NUM 1:38 ዳኔ ዛርኬፌ 62,700፥
NUM 1:40 ኣሴሬ ዛርኬፌ 41,500፥
NUM 1:42 ኒፍታሌሜ ዛርኬፌ 53,400።
NUM 1:44 ሙሴይ፥ ኣሮኔይኔ ታማኔ ናምኡ ኢስራኤሌ ዛርኬታ ኮራፒኔቲ ቆዲዳ ኣቱማ ኣሳይ ሃይታንታ፤
NUM 1:45 ኦላስ ባና ዳንዳይዛ ኣዴቲ ኡባይ ኢስታስ ላይꬃይ ናምኡ ታማኔ ሄሳፌካ ቦላራ ዲዛይቲ ባ ዛርኬን ዛርኬን ቆዴቲዳ።
NUM 1:46 ሄይታ ቆዳይ ኢሲ ቦላ 603,550 ጊዲዴስ።
NUM 1:47 ጊዶ ኣቲን ሃንኮ ዛርኬታራ ሌዌ ዛርኬቲ ቆዴቲቤቴና።
NUM 1:48 ካሴ ጎዳይ ሙሴስ፥
NUM 1:49 «ኔ ኢስራኤሌ ኣቱማ ኣሳ ቆዳሼ ሌዌ ዛርኬታ ኢስታራ ጋꬃ ቆዶፓ።
NUM 1:50 ሌዌ ዛርኬቲ ጊዲኮ ጋይቶቴꬃ ዱንካኔኔ ኢዛ ጊዶን ጎኤቲዛ ሚሻ ቦላ ኣላፌቴꬅ ኢማ፤ ኢስቲ ዱንካኔዛኔ ኢዛ ጊዶን ጎኤቲዛ ሚሻታ ኡባ ቶኬቶ፤ ዱንካና ጊዶን ኦꬄቶ፤ ኢዛ ዩሾን ዱንካኒ ኡቴቶ።
NUM 1:51 ኢንቴ ካሴ ዱንካኒ ዲዛሶፔ ዴንዲ ቢዛ ዎዴ ሌዌ ዛርኬቲ ጻላላ ዱንካኔዛ ሾዲ ላሊዲ ኢስቲ ሼምፒዛ ኦራꬃሶን ኢስታካ ቶኬቶ፤ ኢስታፌ ኣቲን ዱንካናኮ ሺቂዛ ኣይ ኣሲካ ሃይቆን ቃጻዬቶ።
NUM 1:52 ሃንኮ ኣቲዳ ኢስራኤሌ ኣሳይ ባ ቡቴን ቡቴኒኔ ባ ዲዛ ጉታን ጉታን ባ ባንዲራ ባንዲራ ቶኬቶ።
NUM 1:53 ጊዶ ኣቲን ኣይ ኣሲካ ዱንካናኮ ሺቂዲ ታና ሃንቄꬂዲ ኢስራኤሌ ዴራ ꬋይሲሶንታ ማላ ሌዌ ዛርኬቲ ሄ ዱንካኔዛ ዩሾን ዱንካኒዲ ናጌቶ» ጊዴስ።
NUM 1:54 ሄሳ ጊሻስ ኢስራኤሌ ኣሳይ ጎዳይ ሙሴ ኣዛዚዳ ማላ ኡባካ ኦꬂዳ።
NUM 2:1 ጎዳይ ሙሴሲኔ ኣሮኔስ ሂዝጊዴስ፥
NUM 2:2 «ኢስራኤሌ ኣሳይ ባ ባጋ ባጋ ኣሳ ኤሪሲዛ ማላታኔ ባንታ ዛርኬ ዛርኬ ኤሪሲዛ ባንዲራ ካሊዲ ጋይቶቴꬃ ዱንካኔዛፔ ጉꬃራ ሃኪዲ ኢዛ ዩሾን ዱንካኖ።»
NUM 2:3 ኣርሼይ ሞኪዛ ባጋራ ዩሁዳ ዛርኬቲ ኡቴቶ፤ ዩሁዳ ዛርኬ ካሌꬃናይ ኣሚናዳቤ ና ኔኣሶኔ።
NUM 2:4 ኢዚ ካሌꬂዛ ኣሳ ቆዳይ 74,600።
NUM 2:5 ዩሁዳ ዛርኬታፔ ካሊዲ ዪሳኮሬ ቆሞቲ ኢስታ ማታን ዱንካኒ ኡቴቶ፤ ዪሳኮሬ ዛርኬታ ካሌꬃናይ ጹኣሬ ና ናቲናኤሌ።
NUM 2:6 ሄ ኢዛፔ ጋርሳራ ዲዛ ኣሳ ቆዳይ 54,400።
NUM 2:7 ዪሳኮሬ ዛርኬታፔ ካሊዲ ዛቢሎኔ ዛርኬቲ ዱንካኒ ኡቴቶ፤ ዛቢሎኔ ዛርኬታ ካሌꬃናይ ሄሎኔ ና ኤልያቤ።
NUM 2:8 ኢዛስ ዲዛ ኣሳ ቆዳይ 57,400።
NUM 2:9 ባ ዛርኬን ዛርኬን ጊዲዲ ዩሁዳ ዛርኬቲ ዱንካኒዳ ባጋራ ኡቲዳ ኣሳ ቆዳይ ኩሜꬅ 186,400፤ ኣሳፔ ሲንꬅ ቢዛይ ሃይሳ ሃ ቡቴዛን ዲዛ ኣሳ።
NUM 2:10 ዱጌሃ ባጋራ ኦሮቤሌ ዛርኬቲ ባ ባጋታ ኤሪሲዛ ማላታ ጋርሳን ዱንካኒ ኡቴቶ፤ ኦሮቤሌ ዛርኬታ ካሌꬂዛይ ሻዱሬ ና ኤልጹሬ።
NUM 2:11 ኢስታ ቆዳይ 46,500።
NUM 2:12 ኦሮቤሌ ዛርኬታፔ ካሊዲ ሲሞና ዛርኬቲ ዱንካኒ ኡቴቶ፤ ኢስታ ካሌꬃናይ ጹርሻዳዬ ና ሳሉምኤሌ።
NUM 2:13 ኢስታ ቆዳይ 59,300።
NUM 2:14 ኢስታፌ ካሊዲ ጋዴ ዛርኬቲ ዱንካኒ ኡቴቶ፤ ጋዴ ዛርኬታ ካሌꬃናይ ኤራኡኤሌ ና ኤልያሳፌ።
NUM 2:15 ሄይታንታ ቆዳይ 45,650።
NUM 2:16 ኢስቲ ባ ዛርኬን ዛርኬን ጊዲዲ ኦሮቤሌይ ዱንካኒ ኡቲዳ ባጋራ ዱንካኒዳ ኣሳ ቆዳይ ኩሜꬅ 151,450 ጊዲዴስ፤ ዩሁዳ ቡቴዛፔ ካሊዲ ናምኣንꬆራ ቢዛይ ኦሮቤሌ ቡቴዛ።
NUM 2:17 ኮይሮ ናምኡ ቡቴታፔኔ ዉርሴꬃ ናምኡ ቡቴታፔ ጊዶን ሌዌ ባጋቲ ጋይቶቴꬃ ዱንካኔዛ ቶኪዲ ቤቶ፤ ኢሲ ኢሲ ቡቴይ ባ ቆሞይ ሻኬቲ ኤሬታና ማላ ዱማ ማላታ ጋርሳን ባንታ ታራ ታራ ናጊዲ ቤቶ።
NUM 2:18 ኣርሼይ ዉሊዛ ባጋራ ኤፍሬሜ ዛርኬቲ ባ ባጋታ ኤሪሲዛ ማላ ጋርሳን ዱንካኒ ኡቴቶ፤ ኤፍሬሜ ዛርኬ ካሌꬃናይ ኣሚሁዴ ና ኤልሻማ።
NUM 2:19 ኢስታስ ቆዳይ 40,500።
NUM 2:20 ኤፍሬሜ ዛርኬታፔ ካሊዲ ሚናሴ ዛርኬቲ ዱንካኔቶ፤ ሚናሴ ዛርኬታ ካሌꬃናይ ፔዳጹሬ ና ጋማልኤሌ።
NUM 2:21 ኢስታ ቆዳይ 32,200።
NUM 2:22 ኢስታፌ ካሊዲ ቢኒያሜ ዛርኬቲ ዱንካኒ ኡቴቶ፤ ቢኒያሜ ዛርኬታ ካሌꬃናይ ጊዲኦኔ ና ኣቢዳኔ።
NUM 2:23 ሄ ኢስታ ቆዳይ 35,400።
NUM 2:24 ኢስቲ ባ ዛርኬን ዛርኬን ጊዲዲ ኤፍሬሜ ዛርኬቲ ዱንካኒ ኡቲዳ ባጋራ ዱንካኒዳ ኣሳ ቆዳይ 108,100 ጊዲዴስ፤ ኦሮቤሌ ቡቴዛ ካሊዲ ሄꬓንꬆን ኤፍሬሜ ቡቴይ ቦ።
NUM 2:25 ፑዴሃ ባጋራ ዳኔ ዛርኬቲ ባ ባጋታ ኤሪሲዛ ማላታ ጋርሳን ዱንካኒ ኡቴቶ፤ ዳኔ ቆሞታ ካሌꬃና ሃላቃይ ኣሚሻዳዬ ና ኣሂኤዜሬ።
NUM 2:26 ኢስታ ቆዳይ 62,700።
NUM 2:27 ዳኔ ዛርኬታፔ ካሊዲ ኣሴሬ ዛርኬቲ ዱንካኒ ኡቴቶ፤ ኣሴሬ ዛርኬታ ካሌꬃና ሃላቃይ ኦክራ ና ፋጉኤሌ።
NUM 2:28 ኢስታ ቆዳይ 41,500።
NUM 2:29 ኢስታፌ ካሊዲ ኒፍታሌሜ ዛርኬቲ ዱንካኒ ኡቴቶ፤ ኒፍታሌሜ ዛርኬታ ካሌꬃና ሃላቃይ ኤናኔ ና ኣሂሬ።
NUM 2:30 ሄይታንታ ቆዳይ 53,400።
NUM 2:31 ኢስቲ ባ ዛርኬን ዛርኬን ጊዲዲ ዳኔ ዛርኬቲ ዱንካኒ ኡቲዳ ባጋራ ዱንካኒዳ ኣሳ ቆዳይ ኩሜꬅ 157,600 ጊዲዴስ። ሄሳꬆካ ዳኔ ዛርኬቲ ዉርሴꬃን ኦይዳንꬆ ማራን ቤቶ።
NUM 2:32 ኢስራኤሌ ኣሳይ ባሶን ባሶኒኔ ባ ዛርኬን ዛርኬን ማዝጋቤቲዳይታ ቆዳይ ኢሲ ቦላ 603,550 ጊዲዴስ።
NUM 2:33 ሌዌ ዛርኬቲ ጊዲኮ ጎዳይ ካሴ ሙሴ ኣዛዚዳ ማላ ሃንኮ ኢስራኤሌ ኣሳራ ቆዴቲቤቴና።
NUM 2:34 ሄሳ ማላን ኢስራኤሌ ኣሳይ ጎዳይ ካሴ ሙሴ ኣዛዚዳ ማላ ኦꬂዳ፤ ኢስታ ዛርኬታፔ ኢሶይ ኢሶይ ባ ባንዲራ ባንዲራ ካሊ ካሊ ዱንካኒ ኡቲዴስ፤ ኢሶይ ኢሶይ ባ ሶ ኣሳራ ኢሲፌ ሄሜቴስ።
NUM 3:1 ጎዳይ ሙሴ ሲና ዙማ ቦላ ሃሳይሲዛ ዎዴ ኣሮኔ ዬሌታይኔ ሙሴ ዬሌታይ ሃይሳፌ ካሊ ዲዛይሳ፤
NUM 3:2 ኣሮኔስ ኦይዱ ኣቱማ ናይቲ ዴቴስ፤ ሄይቲካ ባይራዚ ናዳቤ ጊዲሺን ሃንኮይቲ ኣቢሁ፥ ኤልኤዜሬኔ ኢታማሬ።
NUM 3:3 ሄይቲ ቄሴቴꬃን ኦꬃና ማላ ቲዬቲዳኔ ሱሚዳ።
NUM 3:4 ጊዶ ኣቲን ኢስታ ጋርሳፌ ናዳቤይኔ ኣቢሁይ ሲና ባዞን ጎዳ ሲንꬃን ቤሶንታ ታማ ኤሂዲ ኤꬂዳ ጊሻስ ጎዳ ሃንቆን ቦሼቲ ሃይቂዳ፤ ኢስታስ ናይ ባይንዳ ጊሻስ ኤልኤዜሬይኔ ኢታማሬይ ጻላ ኢስታ ኣዋ ኣሮኔይ ሼምፖራ ፓጻ ዲዛ ዎዴ ኡባን ቄሴቴꬃን ኦꬂዳ።
NUM 3:5 ጎዳይ ሙሴስ ሂዝጊዴስ፥
NUM 3:6 «ኔኒ ሌዌ ዛርኬታ ሺሻዳ ኢስቲ ቄሴ ኣሮኔ ኦሶን ማዳና ማላ ዎꬃ።
NUM 3:7 ኢስቲ ኣሮኔኔ ኩሜꬃ ማባራ ጋይቶቴꬃ ዱንካኔዛ ጊዶን ኦꬂ ማዶን ባ ኦሶዛ ኦꬂ ፖሌቶ።
NUM 3:8 ጋይቶቴꬃ ዱንካኔዛ ጊዶን ዲዛ ኦሶ ሚሻታስ ኢስታ ኣላፌ ጊዴቶ፤ ዱንካኔዛ ጊዶን ኢስራኤሌ ኣሳስ ኦሴቲዛ ኦሶ ኦꬂ ፖሌቶ።
NUM 3:9 ኢስራኤሌ ኣሳ ኡባፌ ኢስቲ ሻኬቲዲ ኣሮኔኔ ኢዛ ናይታ ኦሶን ማዳና ማላ ሌዌ ዛርኬታ ዎꬃ።
NUM 3:10 ቄሴቴꬃ ኦሶዛ ኢስቲ ፖላና ማላ ኣሮኔኔ ኢዛ ናይታ ኔ ሱንꬃ፤ ኢስታፌ ኣቲን ሃራ ኣሲ ሃይሳ ሃ ኦሶዛ ኦꬃናስ ጋይቶቴꬃ ዱንካኔዛኮ ሺቂዛ ጊዲኮ ኢዛዴይ ሃይቆን ቃጻዬቶ።»
NUM 3:11 ጎዳይ ሙሴስ ሂዝጊዴስ፥
NUM 3:12 «ሄኮ ሌዌ ቆሞቲ ታስ ሃጋዚዛይታ፤ ታኒ ጊብጼ ዴሬ ኣሳ ባይራ ዉርሳ ዎꬊዳ ዎዴ ኢስራኤሌ ኣሳፔ ኢሳፌ ኢሳፌ ዬሌቲዳ ባይራኔ ኢስታ ሜሄታ ባይራታ ኩሜꬅ ታስ ዱማሳዲስ፤ ጊዶ ኣቲን ሃኢ ቃሴ ባይራ ጊዲ ዬሌቲዳ ኣቱማ ናይታ ሶሆን ሌዌ ዛርኬታ ታኒ ታስ ዶራዲስ፤ ኢስቲ ታስ ኦꬂዛይታ ጊዳና፤ ታኒ ጎዳ።»
NUM 3:14 ጎዳይ ሙሴስ ሲና ዙማ ቦላ ሂዝጊዴስ፥
NUM 3:15 «ሌዌ ዛሬታ ኢስታ ኢስታ ዛርኬን ዛርኬኒኔ ኢስታ ቆሞን ቆሞን ቆዳ፤ ዬሌቲን ኢዛስ ኢሲ ኣጊና ኩሚዳይሳኔ ሄሳፌ ቦላራ ዲዛ ኣቱማ ና ዉርሳካ ቆዳ።»
NUM 3:16 ሙሴይካ ጎዳይ ኢዛ ኣዛዚዳ ማላ ቆዲዴስ።
NUM 3:17 ሌዌስ ሄꬑ ኣቱማ ናይቲ ዴቴስ፤ ሄይቲካ ጌርሾኔ፥ ቃኣቴኔ ሜራሬ ጌቴቴቴስ።
NUM 3:18 ጌርሾኔ ዛርኬቲ ሊቢናኔ ሺምኤ ጌቴቴቴስ።
NUM 3:19 ቃኣቴ ዛርኬቲ ኣሚራሜ ዪጺሃሬ፥ ኬብሮኔኔ ኡዚኤሌ ጌቴቴቴስ
NUM 3:20 ሜራሬ ዛርኬቲ ማሂሌኔ ሙሼ ጌቴቴቴስ፤ ሄይታንቲ ባ ሱንꬃን ሱንꬃን ባ ኬꬃ ኣሳስ ኣዋቲዛይታ።
NUM 3:21 ሊቢናኔ ሺምኤ ኬꬃ ኣሳይ ጌርሾኔ ዛርኬን ቆዴቲዳ።
NUM 3:22 ዬሌቲን ኢሲ ኣጊና ጊዲዳ ናፔ ዶሚዲ ማዝጋቤቲዳ ኣቱማሳ ቆዳይ 7,500።
NUM 3:23 ጌርሾኔ ባጋቲ ዱንካኔዛፔ ጉዬ ባጋራ ኣርሼይ ዉሊዛ ባጋራ ዱንካኒዳ።
NUM 3:24 ጌርሾኔ ባጋታ ካሌꬂዛይ ላኤሌ ና ኤልያሳፌ።
NUM 3:25 ጋይቶቴꬃ ዱንካኔን ጌርሾኔ ዛርኬታ ኣላፌቴꬂ፥ ጋይቶቴꬃ ዱንካኔዛ ካማታኔ ፔንጌ ቦላ ቃጴቲዛ ማጋላሻታ፥
NUM 3:26 ጊቤዛ ጊዶ ማጋላሻታ፥ ዱንካኔዛኔ ያርሾ ያርሺዛሶዛ ዩዪ ኣꬊዳ ጊቤዛ ፔንጋ ማጋላሻ ቶሌታኔ ሄሳꬆካ ሄይታንታስ ጊዲዛ ሚሻታ ኡባታ ናጎ።
NUM 3:27 ኣሚራሜ፥ ዪጺሃሬ፥ ኬብሮኔኔ ኡዚኤሌ ሶ ኣሳይ ቃኣቴ ዛርኬን ቆዴቲዳ።
NUM 3:28 ዬሌቲን ኢሲ ኣጊናኔ ሄሳፌ ቦላራ ጊዲዳ ኣቱማሳ ቆዳይ 8,600፤ ሄይታንቲ ጋይቶቴꬃ ዱንካኔዛ ናጌቴስ።
NUM 3:29 ቃኣቴ ዛርኬቲ ጋይቶቴꬃ ዱንካኔዛፔ ጉዬራ ዱጌሃ ባጋራ ዱንካኒዳ።
NUM 3:30 ቃኣቴ ቆሞታ ካሌꬂዛ ኮራፒኔይ ኡዚኤሌ ና ኤልጻፋኔ።
NUM 3:31 ኢስታ ኣላፌቴꬂ ጫቆ ቃላ ታቦታ ቦላ፥ ማዳ ኢዛ ቦላ ዎꬂዛ ጻራጴዛ ቦላ፥ ጾምፔ ኢዛ ቦላ ዎꬂዛይሳ ቦላ፥ ያርሾ ኢዛ ቦላ ያርሺዛይሳ ቦላ፥ ቄሴቲ ዱማ ቆልኣዛን ጎኤቲዛ ሚሻታ ቦላ፥ ጌዴ ዱንካኔዛስ ኡባፌ ዱማቲዳ ጊዶ ቆልኣ ጌሊዛሶ ባጋራ ዲዛ ማጋላሻ ጊዲሺን ኩሜꬅ ሃይታ ሃ ሚሻታ ቦላ ኢስታስ ናጋና ኣላፌቴꬂ ዴስ።
NUM 3:32 ሌዌ ዛርኬ ኡባ ሃላቃይ ቄሴ ኣሮኔ ና ኤልኤዜሬ፤ ኢዚ ዱማቲዳ ቆልኣን ኦꬂዛይታ ኡባ ቦላ ኣላፌ።
NUM 3:33 ማሂሌ ሶ ኣሳይኔ ሙሼ ሶ ኣሳይ ሜራሬ ዛርኬራ ኢሲኖ ጊዲዳ፤ ሄይቲ ሜራሬ ዛርኬን ቆዴቲዳ።
NUM 3:34 ዬሌቲን ኢሲ ኣጊና ጊዲዳ ጉꬃ ናፔ ዶሚዲ ቆዴቲዳ ኣቱማሳ ቆዳይ ኡሱፑን ታማኔ ናምኡ ጼታ።
NUM 3:35 ሜራሬ ዛርኬታ ካሌꬂዛይ ጹሪኤሌ ና ኣቢኤሌ፤ ኢስቲ ጋይቶቴꬃ ዱንካኔዛፔ ፑዴሃ ባጋራ ዱንካኒ ኡቲዳ።
NUM 3:36 ኢስታ ኣላፌቴꬂ ዱንካኔዛ ቶሌታ፥ ኮላታታ፥ ቱሳታኔ ቱሳታ ኢስታን ኤሲዛ ቶሆታ፥ ሄሳꬆካ ሃራ ኦሶስ ጎኤቲዛ ሚሻታ ቦላኔ ሄይታንታስ ቤሲዛ ኦሶታ ኦꬃና ኣላፌቴꬂ ዴስ።
NUM 3:37 ሄሳꬆካ ጊቤዛ ዩሾን ዲዛ ቱሳታ፥ ዱንካኔዛ ቶሌታ፥ ꬊሽኬታኔ ቶሌ ዎዶሮታ ቦላ ኣላፌቴꬂ ዴስ።
NUM 3:38 ጋይቶቴꬃ ዱንካኔዛፔ ኣርሼይ ሞኪዛ ባጋራ ዱንካኒ ኡታናይቲ ሙሴ፥ ኣሮኔኔ ኢዛ ናይታ፤ ጋይቶቴꬃ ዱንካኔ ጊዶን ኢስራኤሌ ኣሳ ጊሻስ ኦሴቲዛ ኣይ ኦሶ ጊዲኮካ ሄ ኦሶዛ ዎጋ ፖሊሲዛ ኣላፌይ ኢስታ ጊዴቶ፤ ሃራይ ኦኒካ ጌዴ ጋይቶቴꬃ ዱንካኔ ኬꬃዛኮ ሺቂኮ ሃይቆን ቃጻዬቶ።
NUM 3:39 ጎዳይ ኢስታ ኣዛዚዳ ማላ ሙሴይኔ ኣሮኔይ ዬሌቲን ኢሲ ኣጊና ጊዲዳ ናፔ ዶሚዲ ኣሳይ ባ ኬꬃን ኬꬃን ማዝጋቢዳ ሌዌ ቆሞታፔ ኣቱማ ናይቲ ኩሜꬅ 22,000 ጊዲዳ።
NUM 3:40 ጎዳይ ሙሴስ፥ «ኢስራኤሌን ባይራ ጊዲ ዬሌቲዳ ኣቱማ ናይታስ ላይꬃይ ኢሲ ኣጊናኔ ሄሳፌ ቦላራ ጊዲዳይታ ቆዳዳ ኢስታ ሱንꬃ ጻፋ።
NUM 3:41 ኢስራኤሌ ኣሳ ባይራ ናይታ ኡባ ሳማ ሌዌ ናይታ፥ ሄሳꬆካ ኢስራኤሌ ኣሳ ሜሄ ባይራ ኡባ ሳማ ሌዌ ቆሞታ ሜሄ ኤካ፤ ታኒ ጎዳ» ጊዴስ።
NUM 3:42 ሙሴይካ ባና ጎዳይ ኣዛዚዳ ማላ ኢስራኤሌ ኣሳ ጋርሳን ባይራ ጊዲ ዬሌቲዳይታ ኡባ ቆዲዴስ።
NUM 3:43 ኢስቲ ዬሌቲን ኢሲ ኣጊናኔ ሄሳፌ ቦላራ ጊዲዳ ባይራ ኣቱማ ናይታ ኡባ ኢስታ ሱንꬃን ሱንꬃን ቆዲን ኢስታ ቆዳይ 22,273 ጊዲዴስ።
NUM 3:44 ጎዳይ ሙሴስ ሂዝጊዴስ፥
NUM 3:45 «ሄሳ ጊሻስ ባይራ ጊዲ ዬሌቲዳ ኢስራኤሌ ኣሳ ኣቱማ ናይታ ሶሆን ሌዌታ ኔ ታስ ሻካ፤ ሄሳꬆካ ኢስራኤሌ ኣሳ ሜሄ ባይራ ሶሆን ሌዌታ ሜሄ ታስ ዱማሳ፤ ታኒ ጎዳ።
NUM 3:46 ኢስራኤሌ ኣሳይ ዬሊዳ ባይራ ናይታ ቆዳይ ሌዌ ቆሞታፔ 273 ጊዲ ዳሪዛ ጊሻስ ሄይታ ቲርፓ ኣቱማ ናይታ ሚሻን ዎዛ።
NUM 3:47 ኢሳ ኢሳ ዎዛናስ ጋይቶቴꬃ ዱንካኔ ሜዛኔዛ ማላ ኢቻሹ ሳቂሌ ቢራ ኤካ፤
NUM 3:48 ሄ ኣቲዳ ዎዞ ሚሻ ኣሮኔሲኔ ኢዛ ናይታስ ኢማ።»
NUM 3:49 ሙሴይካ ሌዌ ቆሞታን ዎዜቲዳይታፔ ቦላራ ቲርፒዳ 273 ኣሳታ ጊሻስ ሺቂዳ ዎዞ ሚሻ ኤኪዴስ።
NUM 3:50 ኢስራኤሌ ኣሳ ባይራታፔ ጋይቶቴꬃ ዱንካኔ ሜዛኔዛ ማላ ሚሻ 1,365 ሳቂሌ ቢራ ኤኪዴስ።
NUM 3:51 ጎዳይ ኣዛዚዳ ማላ ሙሴይ ዎዞ ሚሻ ኣሮኔሲኔ ኢዛ ናይታስ ኢሚዴስ።
NUM 4:1 ጎዳይ ሙሴሲኔ ኣሮኔስ ሂዝጊዴስ፥
NUM 4:2 «ሌዌ ናይታ ጊዶፌ ቃኣቴ ዛሬታ ኢስታ ሶ ኣሳን ኣሳን ኢስታ ማታ ዳቦን ዳቦን ቆዳ።
NUM 4:3 ጋይቶቴꬃ ዱንካኔዛን ኦꬃናስ ዳንዳይዛይታ፥ ኢስታ ላይꬂ ሄꬑ ታማፌ ቢዲ ኢቻሹ ታሙ ጋካናስ ዲዛ ኣቱማሳታ ኡባ ማዝጋባ።
NUM 4:4 ኢስቲ ኦꬃና ኦሶይ ጋይቶቴꬃ ዱንካኔዛ ጊዶን ዲዛ ኡባፌ ዱማ ጌሻ ሚሻታ ናጎ ጊዳና።
NUM 4:5 ኣሳይ ባ ዲዛሶፔ ዴንዲ ቢሺን ኣሮኔይኔ ኢዛ ናይቲ ዱንካኔዛን ጌሊዲ ጫቆ ቃላ ታቦታዛ ሲንꬃን ዲዛ ማጋላሻ ዱጌ ዎꬂዲ ጫቆ ቃላ ታቦታዛ ኢዛን ጻጼቶ።
NUM 4:6 ኢዛ ካማናስ ቃጬቲዳ ጋልባ ማጋላሻዛ ቦላራ ዎꬂዲ ሄሳ ቦላ ሙሌራ ሳሎ ሚሳቲዛ ካሬꬃ ማይኦ ኢዛ ቦላ ሚጪዲ ማይዜቶ፤ ሂስቲዲ ቶሆ ሚꬃታ ቃላባቴ ሉኮዛን ጌልꬄቶ።
NUM 4:7 «ጎዳስ ሺቂዛ ዱማ ኡኬꬃ ኢዛ ቦላ ዎꬂዛ ጋባቴዛ ሳሎ ሚሳቲዛ ካሬꬃ ጫርቃን ካሜቶ፤ ጋባቴዛ ቦላ ሼልኤታ፥ ጪልፋታ፥ ጹኣታኔ ዎይኔ ኡሹ ዱቂዛ ሚሻታኔ ኡኬꬅ ኡባ ዎዴ ፓጬይ ባይንዳ ኢዛ ቦላ ዎꬄቶ።
NUM 4:8 ሄሳ ኡባ ዞኦ ጫርቃን ካሚዲ ቦላራ ቃጬቲዳ ጋልባ ማይዜቶ፤ ኢስታን ቶኪዛ ቶሆ ሚꬃታ ቃላባቴ ሉኮዛን ጌልꬄቶ።
NUM 4:9 «ሳሎ ሚሳቲዛ ካሬꬃ ጫርቃዛ ኤኪዲ ጾምፔ ኢዛ ቦላ ዎꬂዛይሳኔ ጾምፔታ፥ ቃጴታኔ ቢዲንꬅ ዎꬂዛ ኮንኣታ፥ ሄሳꬆካ ዛይቴ ዎꬂዛ ሚሻታ ኡባ ኢሲ ቦላ ካሜቶ።
NUM 4:10 ጾምፔዛኔ ጾምፔዛስ ኮሺዛ ሚሻታ ኡባካ ኢዛ ካሚዛ ጋልባን ጻጺዲ ኢዛራ ቶኪዛ ሃላ ቦላ ዎꬄቶ።
NUM 4:11 «ካሌꬂዲ ዎርቃፌ ኦሴቲዳ ያርሾ ያርሺዛይሳ ቦላ ሳሎ ሚሳቲዛ ጫርቃን ካሚዲ ቃጬቲዳ ጋልባ ቦላራ ማይዚዲ ቶሆ ሚꬃታ ኢዛን ጌልꬄቶ።
NUM 4:12 ጋይቶቴꬃ ዱንካኔን ጎኤቲዛ ሚሻታ ኡባ ኤኪዲ ሳሎ ማላ ካሬꬃ ጫርቃን ካሜቶ፤ ቃጬቲዳ ሌኤ ጋልባ ኢዛ ቦላራ ካሚዲ ቶሆ ሚꬃ ቦላ ዎꬄቶ።
NUM 4:13 ቢዲንꬃዛ ያርሾ ያርሺዛሶዛ ቦላፌ ፒቲዲ ያርሾ ያርሺዛሶዛ ኦቻ ቴራ ሚሳቲዛ ጫርቃን ካሜቶ።
NUM 4:14 ያርሾ ያርሺዛሶዛን ኦꬃናስ ጎኤቲዛ ሚሻታ ሄይቲካ ሁላሌታ፥ ሜንጾታ፥ ታማ ካሺዛ ሚሻታኔ ጉቃ ሳኔታ ኢዛ ቦላ ዎꬄቶ፤ ቃጬቲዳ ሌኤ ጋልባ ኢዛ ቦላ ካሚዲ ቶሆ ሚꬃታ ኢዛን ጌልꬄቶ።
NUM 4:15 ኢስቲ ባ ዲዛ ሄራፔ ዴንዲ ቢሺን ኣሮኔይኔ ኢዛ ናይቲ ጌሻ ሚሻታኔ ሄ ሚሻቲ ኢስታን ጎኤቲዛ ሚሻታ ኡባካ ካሚዳፔ ጉዬ ቃኣቴ ናይቲ ዪዲ ቶኬቶ፤ ጊዶ ኣቲን ኢስቲ ሃይቆንታ ማላ ሄ ጌሻ ሚሻታ ኩሼን ቦቻናስ ቤሴና፤ ሄሳ ጊሻስ ጋይቶቴꬃ ዱንካኔዚ ዴንዲዛ ዎዴ ሄሲ ዉሪካ ቃኣቴ ናይታ ኣላፌቴꬃ።
NUM 4:16 «ቄሴዛ ኣሮኔ ና ኤልኤዜሬይ ጾምፔዛ ዛይቴ ሎኦ ሳዎ ሳዊዛ ኤጻኔ፥ ኡባ ዎዴ ሺቂዛ ካꬃ ያርሾዛኒኔ ቲዬቲዛ ዛይቴዛ ቦላ ኢዛስ ኣላፌቴꬂ ዴኦ፤ ሄሳꬆካ ጋይቶቴꬃ ዱንካኔዛኔ ኢዛ ጊዶንካ ዲዛ ጌሻ ሚሻታ ኡባ ናጎ።»
NUM 4:17 ጎዳይ ሙሴኔ ኣሮኔ ሂዝጊዴስ፥
NUM 4:18 «ቃኣቴ ናይቲ ሌዌ ቆሞታ ጊዶፌ ꬋያና ማላ ኦꬆፍቴ።
NUM 4:19 ጌዴ ኡባፌ ዱማ ጌሻ ሚሻታኮ ሺቂዲ ኢስቲ ሃይቆንታ ማላ ኢስታ ኣሮኔይኔ ኢዛ ናይቲ ጋይቶቴꬃ ዱንካኔን ጌሊዲ ኣሳስ ኢሳስ ኢሳስ ኦሶኔ ኢዛዴ ቶሆ ሻኪ ኢሜቶ።
NUM 4:20 ጊዶ ኣቲን ኢስቲ ሃይቆንታ ማላ ቃኣቴ ናይቲ ዱንካኔዛ ጊዶ ጌሊዲ ቤያናስ ጉꬃ ዎዴስካ ጼሎፔቶ።»
NUM 4:21 ጎዳይ ሙሴስ ሂዝጊዴስ፥
NUM 4:22 «ሌዌ ዛርኬታ ጋርሳፌ ጌርሾኔ ናይታ ኢስታ ዳቦን ዳቦኒኔ ኢስታ ዬሌታን ዬሌታን ቆዳ።
NUM 4:23 ጋይቶቴꬃ ዱንካኔዛን ኦꬃናስ ዳንዳይዛይታ ሄꬑ ታሙ ላይꬃፌ ቢዲ ኢቻሹ ታሙ ላይꬅ ጋካናስ ዲዛ ኣቱማሳታ ኡባ ቆዳ።
NUM 4:24 «ዱማ ዱማ ሚሻታ ቶካና ኣላፌቴꬂ ኢስታስ ዴስ።
NUM 4:25 ጋይቶቴꬃ ዱንካኔዛ ሶ ባጋራኔ ካሬ ባጋራ ካሚዛ ቦላራካ ኢዛ ቦላ ካሚዛ ቃጬቲዳ ሌኤ ጋልባኔ ጌሎሶ ፔንጌዛካ ቶኬቶ።
NUM 4:26 ሄሳꬆካ ዱንካኔዛኔ ያርሾ ያርሾሶሆ ጊቤዛ ዩዪ ኣꬊዳ ማጋላሻታ፥ ቶሌ ዎዶሮታ፥ ጊቤ ጌሊዛሶ ፔንጌ ማጋላሻታኔ ሄይታንታ ኦꬃናስ ጊጌቲዳ ሚሻታካ ኢስቲ ቶኬቶ፤ ሄይታ ሄ ሚሻታስ ጊዲዛ ኣይ ኦሶካ ኢስቲ ፖሌቶ።
NUM 4:27 ጌርሾኔ ናይቲ ኦꬂዛ ኦሶ ጊዲን ዎይኮ ቶሆ ጊዲን ኣሮኔይኔ ኢዛ ናይቲ ኢስታ ኣዛዚዳ ማላ ኦꬄቶ፤ ኢስቲ ቶካናስ ቤሲዛ ሚሻ ኩሜꬅ ኔ ኢስታስ ጊሻ ኢማ።
NUM 4:28 ጋይቶቴꬃ ዱንካኔዛ ጊዶን ጌርሾኔ ናይታ ኦሶይ ሄሳ፤ ኢስታ ኦሶ ቄሴ ኣሮኔ ና ኢታማሬይ ጼሊ ኦሲሶ።
NUM 4:29 «ሌዌ ዛርኬፌ ጊዲዳ ሜራሬ ናይታ ኢስታ ዛርኬን ዛርኬኒኔ ኢስታ ዬሌታን ዬሌታን ቆዳ።
NUM 4:30 ጋይቶቴꬃ ዱንካኔ ጊዶን ኦꬃናስ ዳንዳይዛይታ ኢስታስ ላይꬃይ 30 ላይꬃፌ ቢዲ 50 ላይꬅ ጋካናስ ዲዛ ኣቱማሳታ ኡባ ቆዳ።
NUM 4:31 ኢስቲ ቶካናስ ቤሲዛይ ዱንካኔዛ ቶሌታኔ ቶሌታ ጊዶራ ጌሊዛይታ፥ ቱሳታ፤ ዱንካኔዚ ኢዛን ቶሌቲዛ ሚሻታ።
NUM 4:32 ሄሳꬆካ ዱንካኔዛ ዩሾን ዲዛ ዴምባን ኤቂዛ ቱሳታ ቶሆታ፤ ቶሌታ ዎዶሮታኔ ሄይታ ኡባታስ ኮሺዛ ሚሻታ፤ ኢሲ ኢሲ ኣሲ ቶካናስ ቤሲዛ ሚሻይ ኢዛ ሱንꬃን ሱንꬃን ኢዛስ ኡቶ።
NUM 4:33 ቄሴ ኣሮኔ ና ኢታማሬይ ኦሶዛ ናጌቲ ኦሲሳናስ ጋይቶቴꬃ ዱንካኔ ጊዶን ሜራሬ ናይታ ሶ ኣሳ ኦሶይ ሃይሳ።»
NUM 4:34 ሙሴይ፥ ኣሮኔይኔ ዴሬዛ ሃላቃቲ ቃኣቴ ዜሬꬃታ ኢስታ ዛርኬን ዛርኬኒኔ ኢስታ ዳቦን ዳቦን ቆዲዳ።
NUM 4:35 ጋይቶቴꬃ ዱንካኔዛ ጊዶን ኦꬃናስ ኦሶን ጌሊዳይታ ኩሜꬅ 30 ላይꬃፌ ቢዲ 50 ላይꬅ ጊዲዳይታ ቆዲዳ።
NUM 4:36 ቆዴቲዳ ኣሳይ 2,750 ጊዲዴስ።
NUM 4:37 ጎዳይ ካሴ ሙሴ ኣዛዚዳ ማላ ጋይቶቴꬃ ዱንካኔዛን ኦꬂዳይቲ ሙሴይኔ ኣሮኔይ ቆዲዳ ቃኣቴ ሶ ኣሳይ ሃይታንታ።
NUM 4:38 ባ ዛርኬን ዛርኬኒኔ ባ ዳቦን ዳቦን ቆዴቲዳ ጌርሾኔ ናይቲ፥
NUM 4:39 ጋይቶቴꬃ ዱንካኔዛን ኦꬃና ጌላናስ ዳንዳይዛይታስ ላይꬃይ ሄꬑ ታማፌ ቢዲ ኢቻሹ ታሙ ላይꬅ ጋካናስ ዲዛይቲ ዉሪካ፥
NUM 4:40 ናምኡ ሺያኔ ኡሱፑን ጼታኔ ሄꬑ ታማ።
NUM 4:41 ጎዳይ ሙሴ ኣዛዚዳ ማላ ጋይቶቴꬃ ዱንካኔዛን ኦꬂዳይቲኔ ሙሴይኔ ኣሮኔይ ቆዲዳ ጌርሾኔ ናይቲ ሃይታንታ።
NUM 4:42 ባ ዛርኬን ዛርኬኒኔ ባ ዳቦን ዳቦን ቆዴቲዳ ሜራሬ ናይቲ፥
NUM 4:43 ጋይቶቴꬃ ዱንካኔዛን ኦꬃና ጌላናስ ዳንዳይዛይታስ ላይꬃይ ሄꬑ ታማፌ ቢዲ ኢቻሹ ታሙ ላይꬅ ጋካናስ ዲዛይቲ ዉሪካ፥
NUM 4:44 ሄꬑ ሺያኔ ናምኡ ጼታ።
NUM 4:45 ጎዳይ ሙሴ ኣዛዚዳ ማላ ጋይቶቴꬃ ዱንካኔዛን ሃጋዚዛ ሙሴይኔ ኣሮኔይ ቆዲዳ ሜራሬ ናይቲ ሃይታንታ።
NUM 4:46 ሙሴይ፥ ኣሮኔይኔ ኢስራኤሌ ሃላቃቲ ኢስታ ቆሞን ቆሞኒኔ ኢስታ ዛርኬን ዛርኬን ቆዲዳ ሌዌ ናይቲ፥
NUM 4:47 ሄꬑ ታሙ ላይꬃፌ ዶሚዲ 50 ላይꬅ ጋካናስ ዲዛይቲ ጋይቶቴꬃ ዱንካኔዛ ጊዶን ኦሶዛ ኦꬃናስ ኦꬂዛ ሚሻታ ቶካናስ ጌሊዳይቲ፥
NUM 4:48 ሙሌራ ኢስታ ቆዳይ 8,580።
NUM 4:49 ሄሳ ማላን ኢሲ ኢሲ ኣሲ ጎዳይ ሙሴ ኣዛዚዳ ማላ ቆዴቲዴስ፤ ሄሳꬆካ ጎዳይ ሙሴስ ኢሚዳ ኣዛዞ ማላ ኢሲ ኢሲ ኣሲ ቶካናስ ኣላፌቴꬅ ኤኪዴስ።
NUM 5:1 ጎዳይ ሙሴስ ሂዝጊዴስ፥
NUM 5:2 «ኢንቺራቻ ሃርጌይ ኢዛ ቦላ ዲዛዴ ዎይኮ ኢዛ ቦላፌ ሃꬃ ማላይ ጎጊዛዴ ዎይኮ ኣሃ ቦቺዲ ቱኒዳዴ ኡባ ኢስራኤሌ ኣሳይ ባ ዲዛ ጉታፔ ካሬ ኬሳና ማላ ኣዛዛ።
NUM 5:3 ታኒ ኢስታራ ዲዛ ኢስታ ጉታ ኢስቲ ቱኒሶንታ ማላ ሄይታ ጌዮንታ ኣሳታ ኡባ ኣዴ ጊዲን ማጫ ጊዲን ኢንቴ ጊዶፌ ኬሲ ጎዲቴ።»
NUM 5:4 ጎዳይ ሙሴ ኣዛዚዳ ማላ ኢስራኤሌ ኣሳይ ባ ጉታፔ ኢስታ ኬሲ ጎዲዴስ።
NUM 5:5 ጎዳይ ሙሴስ ሂዝጊዴስ፥
NUM 5:6 «ኔኒ ኢስራኤሌ ኣሳስ፥ ማጫፌ ጊዲን ኣቱማሳፔ ኣይ ኣሲካ ጎዳስ ኣማኔቶንታዴ ጊዲ ቤቲዲ ኣይ ኣሳ ቦላካ ቆሆ ጋꬂኮ ሄሳዴይ ቆሃንቻ።
NUM 5:7 ኢዚ ባ ናጋራ ፓጾ፤ ባ ቆሆዛ ጊሻስ ቃንጼቲዛ ሚሻ ቦላ ጼታፔ ናምኡ ታሙ ኩሼ ጉጂዲ ቆሄቲዳዴስ ኤሆ።
NUM 5:8 ጊዶ ኣቲን ሄ ቆሄቲዳዴይ ሃይቂዳ ጊዲኮኔ ኤዳ ኤካናስ ኢዛስ ማታ ዳቦይ ባይንዳ ጊዲኮ ሄ ኤዳይ ጎዳሳ፤ ሄ ኤዳቲዛ ኤዳይ ቆሂዳዴ ናጋራ ዉርሳና ሺቂዛ ያርሾስ ኢሚዛ ꬋርሾዛራ ኢሲፌ ቄሴዛስ ኢሜቶ።
NUM 5:9 ሄሳ ማላን ኢስራኤሌ ኣሳይ ጎዳስ ኢሚዛ ዱማ ኢሞታይ ዉሪካ ሄ ኢሞታ ኤኪዛ ቄሴዛስ ጊዶ።
NUM 5:10 ኢሲ ኢሲ ኣሲ ጎዳስ ኢሚዛ ዱማ ኢሞታይ ሄ ኢሞታ ኢሚዳዴሳ፤ ጊዶ ኣቲን ኢዚ ቄሴዛስ ኢሚዛ ጊዲኮ ሄ ሚሻይ ቄሴዛሳ።»
NUM 5:11 ሄሳፌ ጉዬ ጎዳይ ሙሴስ ሂዝጊዴስ፥
NUM 5:12 «ኢስራኤሌ ኣሳፔ ኢሳዴ ማቻ ባ ኣዚናስ ኣማኔቶንታ ኣጋዳ ካሬ ካሬ ጊኮ፥
NUM 5:13 ሃራ ኣዴራ ዚንኢኮ፥ ቃሴካ ኢዛ ኦꬂዳ ቱና ኦሶይ ቆንጮንታ ኣዚናፔ ጌሚዳ ጊዲኮ፥ ኢዚ ቦላ ማርካቲዛ ኣሲ ቤቶንታ ኣጊን ኢዚ ቱናቴꬃይ ቆንጮንታ ኣጊኮ፥
NUM 5:14 ኢዛ ቱኒዳ ጊሻስ ኢዚ ኣዚናይ ኢዞ ሲꬋናስ ዳንዳዬስ፤ ዎይኮ ኢዛ ቱኖንታ ዲሺን ኢዚ ቃናቴን ኩሚዳ ጊሻስ ባ ማቾ ሲꬋና ዳንዳዬስ።
NUM 5:15 ሄሳዴይ ባ ማቺዮ ቄሴኮ ኤኪ ኤሆ፤ ሄ ማጫሳይ ጊሻስ ኮዬቲዛ ኢሲ ኪሎ ባንጋ ꬊሌ ያርሾስ ኤኪ ዮ፤ ሃይሲ ቃናቴስ ሺቂዛ ካꬃ ያርሾይ ቆሆ ቆፍሲዛዝ ጊዲዛ ጊሻስ ዛይቴ ኢዛ ቦላ ጉሶፎ፤ ኤጻኔካ ኢዛ ቦላ ዎꬆፎ።
NUM 5:16 «ቄሴዚ ማጫሳዮ ኤፊዲ ጎዳ ሲንꬃን ኤሶ።
NUM 5:17 ጌሻ ሃꬅ ጻሮን ዱቂ ኤኮ፤ ጋይቶቴꬃ ዱንካኔ ዉይጌፔ ጉꬃ ቢታ ኤኪዲ ሄ ሃꬃን ጉጆ።
NUM 5:18 ቄሴዚ ማጫሳዮ ጎዳ ሲንꬃን ኤሶ፤ ኢዚ ጎሴ ቢርሾ፤ ቃናቴስ ሺቂዛ ካꬃ ያርሾዛ ኢዚ ኩሼን ዎꬆ፤ ቃሴ ሄ ቄሴዚ ቃንጌꬅ ኤሂዛ ጫሞ ሃꬅ ጻሮራ ባ ኩሼን ኦይኮ።
NUM 5:19 ቄሴዚ ኢዞ ሂዝጊ ጫቄꬆ፤ ኔኒ ኔ ኣዚናራ ዲሺን ሃራ ኣዴይ ኔናራ ኣቆንታ ጊዲኮኔ ኔኒ ኔና ቱኒሶንታ ጊዲኮ ቃንጌꬅ ኤሂዛ ሃይሲ ጫሞ ሃꬃይ ኔስ ጎሜቶፖ።
NUM 5:20 ጊዶ ኣቲን ኔኒ ኔ ኣዚናፔ ሃራ ኣዴራ ዚንኣዳ ቱኒዳ ጊዲኮ፥
NUM 5:21 ‹ጎዳይ ኔስ ዬላ ኡሎ ሜሊሶኔ ኔ ኡሎ ፑሪሶ! ኔ ዴሬዛ ጋርሳን ኔና ጫቆሲኔ ቃንጌꬃስ ኬሶ።
NUM 5:22 ሃይሲ ሃꬃዚ ጌዴ ኔ ቦላ ጊዶ ጌሊዲ ኔ ኡሎዛ ፑሪሶ! ኔስ ዬላ ኡሎዛ ጉንዲሶ!› ማጫሳያካ፥ ‹ኣሚን! ጎዳይ ታ ቦላ ሄሳꬆ ኦꬆ› ጋ ዛሩ።
NUM 5:23 «ሄሳፌ ጉዬ ቄሴዚ ሄሳ ሄ ቃንጌꬃ ቃላ ጻꬃ ማጻፋን ጻፎ፤ ሄ ጻፎይሳካ ጫሞ ሃꬃዚ ዲዛ ጻሮዛን ዬጊ ሜጮ።
NUM 5:24 ኢዚ ማጫሳዮ ኢታ ሳኮ ኦይꬂዛ ጫሞ ሃꬃ ኢዞ ኡሻናፔ ሲንꬃን፥
NUM 5:25 ቄሴዚ ማጫሳይፌ ያርሾ ꬊሌዛ ኤኪዲ ጎዳስ ያኔ ሃ ቃሴꬂ ሺሺዛ ዱማ ያርሾ ጊዳና ማላ ያርሾ ያርሺዛሶዛ ቦላ ሺሾ።
NUM 5:26 ሄሳፌ ጉዬ ካꬃ ያርሾ ኢሲ ዞላ ꬊሌ ኤኪዲ ቆፊሶ ያርሾ ጊዳና ማላ ያርሾ ያርሺዛሶዛ ቦላ ጹጎ፤ ዉርሴꬃን ሄ ማጫሳዮ ሄ ሃꬃ ኡሾ።
NUM 5:27 ማጫሳያ ባና ቱኒሳዳ ባ ኣዚናስ ዲዛ ኣማኔቴꬃ ፓጪንቺዳ ጊዲኮ ቃንጌꬅ ኤሂዛ ሃꬃ ኢዛ ኡዪዛ ዎዴ ኢዚ ቦላ ጊዶን ዎልቃማ ሳኮ ኤሃና፤ ሄሲካ ኢዚ ኡሎይ ፑራና፤ ኢዚስ ዬላ ኡሎይ ጉንዳና፤ ኢዚ ሱንꬂ ኢዚ ዴሬዛ ጊዶን ቃንጌቲዳዝ ጊዲ ኣታና።
NUM 5:28 ጊዶ ኣቲን ኢዛ ኣይኮ ሞሮካ ኦꬆንታ ጊዲኮ ኢዚ ቦላ ኣይኮ ቆሆይካ ጋኬና፤ ኢዛ ናይታካ ዬላና።
NUM 5:29 «ኢሳዴይ ባ ማቾ ላይማቴꬃን ሲꬊዛ ዎዴ ኦꬃና ዎጋይ ሃይሳፌ ካሊዛይሳ፤ ኢዛ ካሬ ካሬ ጋዳ ሃራ ኣዴራ ዚንኣዳ ቱኒዳ ጊዲኮ፥
NUM 5:30 ዎይኮ ኢሲ ኣሲ ባ ማቾ ጮ ሜላ ሲꬊዛ ጊዲኮ ኢዛ ጎዳ ሲንꬃን ኤቃና ማላ ኦꬆ።
NUM 5:31 ኢዚ ኣዚናዚካ ቆሆፔ ጌሽ ጊዳና፤ ማጫሳያ ላይማታ ቤቲዳ ጊዲኮ ቃሴ ኢዛ ባ ቆሆዛ ጋሶን ባ ቦላ ጋኪዛ ፒርዳ ኤካና።»
NUM 6:1 ጎዳይ ሙሴስ ሂዝጊዴስ፥
NUM 6:2 «ኢስራኤሌ ኣሳስ፥ ‹ማጫ ጊዲን ዎይኮ ኣዴ ጊዲን ኣይ ኣሲካ ባና ጎዳስ ዱማሳናስ ኣዲና ኣዲኔቲኮ፥
NUM 6:3 ሄሳዴይ ዎይኔ ኡሹ ዎይኮ ሃራ ማꬆሲዛ ኡሹ ኡዮፖ፤ ዎይኔፔ ዎይኮ ሃራፔ ኦሴቲዳ ጫላ ዎይኮ ማꬆሲዛ ኡሹ ኢዚ ኡዮፖ፤ ዎይኔ ሚꬃ ኣይፌፔ ቲያ ጊዲን ዎይኮ ሜላ ጊዲን ሞፖ።
NUM 6:4 ኢዚ ባና ዱማሲዲ ዲዛ ዎዴን ዎይኔ ሚꬃ ሃጋ ቦላ ዲዛ ኣይፌ ጊዲን ዎይኮ ፖቆ ሞፖ።
NUM 6:5 « ‹ኢዚ ናዚራዌቴꬃስ ኣዲኔቲዳ ዎዴይ ዉራና ጋካናስ ኢዛዴ ሁኤ ቢናና ማጋላይ ቦቾፎ፤ ኢዚ ባና ጎዳስ ዱማሲዳ ዎዴይ ፖሌታና ጋካናስ ኢዚ ዱማቲዳዴ ጊዲዲ ባ ሁኤ ቢናና ዲቾ።
NUM 6:6 ኢዚ ናዚራዌ ጊዲ ዲዛ ዎዴ ኡባን ሃይቂዳ ኣሃኮ ሺቆፖ።
NUM 6:7 ኢዚ ባ ጎዳስ ባና ዱማሲዳ ማላታይ ኢዛ ሁኤ ቦላ ዲዛ ጊሻስ ኢዛስ ኣዋይ ዎይኮ ኣያ ዎይኮ ኢዛስ ኢሻይ ዎይኮ ሚቻ ሃይቂኮ ኢስታ ኣሃ ቦቺዲ ኢዚ ባና ቱኒሶፖ።
NUM 6:8 ኢዚ ባና ናዚራዌ ኦꬂዳ ዎዴ ኡባን ኢዚ ጎዳስ ዱማቲዳ ኣሳ።
NUM 6:9 « ‹ኢዚ ቆፖንታ ዲሺን ኢሳዴይ ኢዛ ኣቻን ሃይቂዲ ካሴ ዱማቲ ዲዛ ኢዛ ሁኤ ቢናና ቱኒሲኮ ኢዚ ላፑንꬃ ጋላስ ባ ሁኤ ቢናና ሜዴቲ ቡሉሶ።
NUM 6:10 ኦስፑንꬃ ጋላስ ናምኡ ሃራጴታ ዎይኮ ሃራጴ ጪዬታ ጋይቶቴꬃ ዱንካኔዛ ፔንጌን ዲዛ ቄሴዛኮ ኤሆ።
NUM 6:11 ቄሴዚካ ኢሲ ሃራጴዛ ናጋራ ያርሾስ ናምኣንꬆዛ ቃሴ ጹጌቲዛ ያርሾስ ሺሾ፤ ጋሶይካ ኢዚ ኣሃ ማታ ሺቂዲ ቱኒዳ ጊሻስ ቄሴዚ ኢዛ ናጋራ ዉርሳና፤ ሄ ጋላሲካ ናዚራዌይ ባ ሁኤ ኢስኬዛ ናምኣንꬆ ጎዳስ ዱማሶ።
NUM 6:12 ኢዚ ናዚራዌቴꬃን ኦꬃናስ ባና ጎዳስ ናምኣንꬆ ዱማሶ፤ ጎዳስ ዱማቲዳ ሄ ኢዛ ኢስኬዚ ቱኒዳ ጊሻስ ሄሳፌ ካሴ ኢዚ ናዚራዌቴꬃን ጋምኢዳ ዎዴይ ኢዛስ ቆዳን ጌሌና፤ ኢዚ ባ ቆሆዛ ጊሻስ ኢሲ ላይꬃ ꬋርሾ ላቃ ኤሆ።
NUM 6:13 « ‹ኢሲ ናዚራዌይ ባ ናዚራዌቴꬃ ኣዲና ኡባ ዎዴ ኢዚ ፖላና ዎጋይ ሃይሳፌ ካሊ ዲዛይሳ፤ ኢዚ ጌዴ ጋይቶቴꬃ ዱንካኔን ጌሊዛ ፔንጌዛኮ ቢዲ፥
NUM 6:14 ሄን ባ ያርሾ ጎዳስ ሺሾ፤ ሄሲካ ጹጌቲዛ ያርሾስ ኢሲ ላይꬅ ኩሚዳ ꬋርሾ ላቃ፥ ናጋራ ያርሾስ ኢሲ ላይꬅ ኩሚዳ ኡዚ ዶርስ፥ ሄሳꬆካ ኢሲፌቴꬃ ያርሾስ ዎሶይ ባይንዳ ꬋርሾ ሺሾ።
NUM 6:15 ቃሴ ካꬃ ያርሾኔ ኡሻ ያርሾ ኢስታራ ኢሲፌ ያርሻናስ ኤሆ፤ ሄ ሌማቴዛን ካꬃ ያርሾይ ኢርሾይ ኢዛን ጌሎንታይሳ ጊዶ፤ ቃሴ ሊቆ ꬊሌ ዛይቴን ሙኑቂ ኡኪዳ ኦርዴ ኡኬꬂኔ ዛይቴን ቲዬቲዳ ሌኤ ኡኬꬅ ኤሆ።
NUM 6:16 « ‹ቄሴዚካ ሄሳ ኡባ ናጋራ ያርሾኔ ጹጌቲዛ ያርሾ ኦꬂዲ ጎዳ ሲንꬅ ሺሾ።
NUM 6:17 ꬋርሾዛኔ ሌማቴራ ኢርሾይ ኢዛን ጌሎንታ ኡኬꬃታ ኢሲፌቴꬃ ያርሾ ኦꬂዲ ጎዳስ ሺሾ፤ ቃሴ ሄሳራ ኢሲፌ ጋꬂዲ ካꬃ ያርሾኔ ኡሻ ያርሾ ያርሾ።
NUM 6:18 « ‹ሄሳፌ ጉዬ ጋይቶቴꬃ ዱንካኔዛን ጌሊዛ ፔንጌ ቦላ ሄ ናዚራዌዚ ጎዳስ ኣዲኔቲዳ ባ ሁኤ ቢናና ሜዴቲዲ ኢሲፌቴꬃ ያርሾይ ጹጌቲዛ ታማን ዬጎ።
NUM 6:19 « ‹ባና ጎዳስ ዱማሲዳ ናዚራዌይ ባ ሁኤ ቢናና ሜዴቲዳፔ ጉዬ ቄሴዚ ዶይሴቲዳ ꬋርሾዛ ሚሳ ኣሾ፥ ኢርሾይ ጌሎንታ ኡኬቲዳ ኦርዴ ኡኬꬂኔ ሌኤ ኡኬꬅ ሌማቴፔ ኤኪዲ ሄ ናዚራዌዛ ኩሼን ዎꬆ።
NUM 6:20 ሄሳፌ ጉዬ ቄሴዚ ኡባ ኤኪዲ ጎዳ ሲንꬃን ያኔ ሃ ቃሴꬂዛ ያርሾ ሂስቲ ሺሾ፤ ሄይቲካ ጎዳስ ዱማቲዳ ያርሾ፤ ሄ ቃሴꬂዳ ኣንጋሶይኔ ሚሳዚ ቄሴዛስ ጊዶ፤ ሄሳፌ ጉዬ ናዚራዌዚ ዎይኔ ኡሹ ኡያናስ ዳንዳዬስ።
NUM 6:21 « ‹ሄሳ ጊሻስ ጎዳስ ባና ዱማሳናስ ኣዲኒዳ ናዚራዌስ ዎꬊዳ ዎጋይ ባና ጎዳስ ያርሻናስ ኮሺዛ ያርሾታፔ ቦላራ ኣꬂ ጌፒኮ ኢዚ ቃላ ጌሊዳ ማላ ባ ኣዲና ፖላናስ ቤሴስ ጋ ዮታ› ጌስ።»
NUM 6:22 ጎዳይ ሙሴስ ሂዝጊዴስ፤
NUM 6:23 «ኣሮኔይኔ ኢዛ ናይቲ ኢስራኤሌ ዴራ ኣንጂሼ ሂዝጊ ኣንጄቶ፥
NUM 6:24 ‹ጎዳይ ኔና ኣንጆ፤ ኢዚ ኔና ናጎ፤
NUM 6:25 ጎዳይ ባ ኣይፌሶ ፖኦ ኔስ ቆንጪሶ፤ ኢዚ ኔስ ቃꬌቶ።
NUM 6:26 ጎዳይ ኔና ባ ማሮቴꬃ ኣይፌን ጼሎ፤ ባ ሳሮቴꬅካ ኢዚ ኔስ ኢሞ› ጋዳ ዮታ።»
NUM 6:27 ቃሴካ ጎዳይ፥ «ኢስቲ ኢስራኤሌ ኣሳ ታ ሱንꬃን ኣንጂዛ ዎዴ ታኒ ኢስታ ኣንጃና» ጊዴስ።
NUM 7:1 ሙሴይ ጋይቶቴꬃ ዱንካኔዛ ቶሊ ጊጊዳ ዎዴ ዱንካኔዛኔ ኢዛን ጎኤቲዛ ሚሻታ ኡባ፥ ያርሾ ያርሺዛሶዛኔ ኢዛን ጎኤቲዛ ሚሻታ ቲይዲ ዱማሲዴስ።
NUM 7:2 ሄሳፌ ጉዬ ኢስራኤሌ ኣሳ ካሌꬂዛይቲ፥ ዴራ ቆዲዛ ዎዴ ኢስታ ቦላ ኣላፌቴꬂ ዲዛ ኮራፒኔቲ ዉሪ ባ ያርሾ ያርሾ ጎዳስ ሺሺዳ።
NUM 7:3 ኢስቲ ሺሺዳ ያርሾቲ ናምኡ ናምኡ ሃላቃታ ሱንꬃን ኢሲ ፓራ-ጋሬ፥ ሄሳꬆካ ኢሲ ኢሲ ሃላቃ ሱንꬃን ኢሲ ኢሲ ቦራ፤ ሄ ኢስቲ ሺሺዳ ያርሾቲ ኢሲ ቦላ ኡሱፑን ፓራ-ጋሬታኔ ታማን ናምኡ ቦራታ፤ ሄይታ ሄ ያርሾታካ ጋይቶቴꬃ ዱንካኔዛ ሲንꬃን ሺሺዳ።
NUM 7:4 ጎዳይ ሙሴስ ሂዝጊዴስ፥
NUM 7:5 «ሃይቲ ሚሻቲ ጋይቶቴꬃ ዱንካኔዛን ዱማ ዱማ ኦሶስ ኢስታን ጎኤታና ማላ ሃይታ ያርሾ ሚሻታ ኢስታፌ ኤካዳ፥ ዱማ ዱማ ኦሶስ ኢስታስ ኮሺዛ ማላ ሻካዳ ሌዌታስ ኢማ።»
NUM 7:6 ሄሳ ጊሻስ ሙሴይ ፓራ-ጋሬታኔ ቦራታ ኤኪዲ ሌዌታስ ኢሚዴስ።
NUM 7:7 ጌርሾኔ ዛርኬታስ ኦሶስ ኮሺዛ ናምኡ ፓራ-ጋሬታኔ ኦይዱ ቦራታ ኢሚዴስ።
NUM 7:8 ቃሴካ ሜራሬ ዛርኬታስ ኦይዱ ፓራ-ጋሬታኔ ኦስፑን ቦራታ ኢሚዴስ፤ ሄይታንታ ኦሶይ ፖሌታናይ ኣሮኔ ና ኢታማሬ ኣላፌቴꬃና።
NUM 7:9 ኢስታስ ዲዛ ኣላፌቴꬂ ጌሻ ሚሻታ ባ ሃሼን ቶኪዛ ጊሻስ ሙሴይ ቃኣቴ ዛርኬታስ ፓራ-ጋሬታ ጊዲን ዎይኮ ቦራታካ ኢሚቤና።
NUM 7:10 ያርሾ ያርሺዛሶዛ ሙሴይ ቲይዲ ጌሺዳ ጋላስ ሃላቃቲ ያርሾ ያርሺዛሶዛ ኣንጂሳናስ ባንታ ኢሞታ ኤሂዲ ያርሾ ያርሺዛሶዛ ሲንꬃን ሺሺዳ።
NUM 7:11 ጎዳይ ሙሴስ፥ «ታማኔ ናምኡ ጋላሳታን ታማኔ ናምኡ ሃላቃቲ ፓጬይ ባይንዳ ኢሶይ ኢሶይ ኢሲ ኢሲ ጋላስ ኣንጂሶ ባኣሌስ ጊዲዛ ያርሾ ሁኤን ሁኤን ሺሻና ማላ ዮታ» ጊዴስ።
NUM 7:12 ኮይሮ ጋላስ ዩሁዳ ቆሞታ ጋርሳፌ ኣሚናዳቤ ና ኔኣሶኔይ ሺሺዴስ።
NUM 7:13 ኢዚ ሺሺዳ ያርሾቲካ ሃይሳፌ ካሊዛይታ፤ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬅ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:14 ኢዛን ኤጻኔይ ኩሚ ኡቲዳ 10 ሳቂሌ ዎርቃፌ ኦሴቲዳ ጪልፋ።
NUM 7:15 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:16 ናጋራ ያርሾስ ኢሲ ዴይሻ ኦርጌ፥
NUM 7:17 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ኣሚናዳቤ ና ኔኣሶኔይ ሺሺዳ ያርሾታ።
NUM 7:18 ናምኣንꬆ ጋላስ ዪሳኮሬ ዛርኬታ ጋርሳፌ ጹኣሬ ና ናቲናኤሌይ ሺሺዴስ።
NUM 7:19 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን ጼታኔ ሄꬑ ታሙ ሳቂሌ ቢራፔ ኦሴቲዳ ኢሲ ፒጫ ሳኔኔ ላፑን ታሙ ሳቂሌ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚ ኡቲዴስ።
NUM 7:20 ኢዛን ኤጻኔይ ኩሚ ኡቲዳ ታሙ ሳቂሌ ዎርቃፌ ኦሴቲዳ ጪልፋ።
NUM 7:21 ጹጌቲዛ ያርሾስ ኢሲ ሚርጎ፤ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:22 ናጋራ ያርሾስ ኢሲ ዴይሻ ኦርጌ፥
NUM 7:23 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ጹኣሬ ና ናቲናኤሌይ ሺሺዳ ያርሾታ።
NUM 7:24 ሄꬓንꬆ ጋላስ ዛቢሎኔ ዛርኬታ ጋርሳፌ ሄሎኔ ና ኤልያቤይ ሺሺዴስ።
NUM 7:25 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን ጼታኔ ሄꬑ ታሙ ሳቂሌ ቢራፔ ኦሴቲዳ ኢሲ ፒጫ ሳኔኔ ላፑን ታሙ ሳቂሌ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:26 ኢዛን ኤጻኔይ ኩሚ ኡቲዳ ታሙ ሳቂሌ ዎርቃፌ ኦሴቲዳ ጪልፋ።
NUM 7:27 ጹጌቲዛ ያርሾስ ኢሲ ሚርጎ፤ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:28 ናጋራ ያርሾስ ኢሲ ዴይሻ ኦርጌ፥
NUM 7:29 ኢሲፌቴꬃ ያርሾስ 5 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ሄሎኔ ና ኤልያቤይ ሺሺዳ ያርሾታ።
NUM 7:30 ኦይዳንꬆ ጋላስ ኦሮቤሌ ቆሞታ ጋርሳፌ ሻዱሬ ና ኤልጹሬይ ሺሺዴስ።
NUM 7:31 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣንካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃይ ኩሚ ኡቲዴስ።
NUM 7:32 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:33 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:34 ናጋራ ያርሾስ ኢሲ ዴይሻ ኦርጌ፥
NUM 7:35 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ሻዱሬ ና ኤልጹሬይ ሺሺዳ ያርሾታ።
NUM 7:36 ኢቻሻንꬆ ጋላስ ሲሞና ቆሞታ ጋርሳፌ ጹርሻዳዬ ና ሳሉምኤሌይ ሺሺዴስ።
NUM 7:37 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:38 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:39 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:40 ናጋራ ያርሾስ ኢሲ ዴይሻ ኦርጌ፥
NUM 7:41 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ ኢቻሹ ꬋርሾ ላቃታ፤ ሄይቲ ዉሪ ጹርሻዳዬ ና ሳሉምኤሌይ ሺሺዳ ያርሾታ።
NUM 7:42 ኡሱፑንꬆ ጋላስ ጋዴ ዛርኬታ ጋርሳፌ ዳኡኤሌ ና ኤልያሳፌይ ሺሺዴስ።
NUM 7:43 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናዉ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:44 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:45 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:46 ናጋራ ያርሾስ ኢሲ ዴይሻ ኦርጌ፥
NUM 7:47 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ዳኡኤሌ ና ኤልያሳፌይ ሺሺዳ ያርሾታ።
NUM 7:48 ላፑንꬆ ጋላስ ኤፍሬሜ ዛርኬታ ጋርሳፌ ኣሚሁዴ ና ኤልሻማይ ሺሺዴስ።
NUM 7:49 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:50 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:51 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:52 ናጋራ ያርሾስ ኢሲ ዴይሻ ኦርጌ፥
NUM 7:53 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ኣሚሁዴ ና ኤልሻማ ያርሾታ።
NUM 7:54 ኦስፑንꬃ ጋላስ ሚናሴ ዛርኬታ ጋርሳፌ ፔዳጹሬ ና ጋማልኤሌይ ሺሺዴስ።
NUM 7:55 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:56 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:57 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:58 ናጋራ ያርሾስ ኢሲ ዴይሻ ኦርጌ፥
NUM 7:59 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ፔዳጹሬ ና ጋማልኤሌ ያርሾታ።
NUM 7:60 ኡዱፉንꬆ ጋላስ ቢኒያሜ ዛርኬታ ጋርሳፌ ጊዲኦኔ ና ኣቢዳኔይ ሺሺዴስ።
NUM 7:61 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:62 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:63 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:64 ናጋራ ያርሾስ ኢሲ ዴይሻ ኦርጌ፥
NUM 7:65 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ጊዲኦኔ ና ኣቢዳኔ ያርሾታ።
NUM 7:66 ታማንꬆ ጋላስ ዳኔ ቆሞታ ጋርሳፌ ኣሚሻዳዬ ና ኣሂኤዜሬይ ሺሺዴስ።
NUM 7:67 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:68 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:69 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:70 ናጋራ ያርሾስ ኢሲ ዴይሻ ኦርጌ፥
NUM 7:71 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ኣሚሻዳዬ ና ኣሂኤዜሬ ያርሾታ።
NUM 7:72 ታማኔ ኢሲንꬃ ጋላስ ኣሴሬ ቆሞታ ጋርሳፌ ኦክራ ና ፋጉኤሌይ ሺሺዴስ።
NUM 7:73 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:74 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:75 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:76 ናጋራ ያርሾስ ኢሲ ዴይሻ ኦርጌ፥
NUM 7:77 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ኦክራ ና ፋጉኤሌ ያርሾታ።
NUM 7:78 ታማኔ ናምኣንꬃ ጋላስ ኒፍታሌሜ ዛርኬታ ጋርሳፌ ኤናኔ ና ኣሂሬይ ሺሺዴስ።
NUM 7:79 ኢዚ ሺሺዳ ያርሾቲካ ሃይሳፌ ካሊዛይታ፥ ኤሬቲዳ ሜዛኔን ዎꬂን 130 ሳቂሌ ቢራፔ ኦሴቲዳ ኢሲ ፒጫ ሳኔኔ 70 ሳቂሌ ኢሲ ጉቃ ሳኔ፥ ናምኣይካ ካꬃ ያርሾ ሺሻናስ ሊቆ ꬊሌፌ ዛይቴን ሙኑቄቲዳ ሙኑቃን ኩሚዳ።
NUM 7:80 ኢዛን ኤጻኔይ ኩሚ ኡቲዳ ኢሲ ታሙ ሳቂሌ ዎርቃፌ ኦሴቲዳ ጪልፋታ፥
NUM 7:81 ጹጌቲዛ ያርሾስ ኢሲ ሚርጎ፥ ኢሲ ꬋርሾ፥ ኢሲ ላይꬃ ꬋርሾ ላቃ፥
NUM 7:82 ናጋራ ያርሾስ ኢሲ ዴይሻ ኦርጌ፥
NUM 7:83 ኢሲፌቴꬃ ያርሾስ 2 ቦራታ፥ 5 ꬋርሾታ፥ 5 ዴይሻ ኦርጌታኔ ላይꬅ ኩሚዳ 5 ꬋርሾ ላቃታ፤ ሄይቲ ዉሪ ኤናኔ ና ኣሂሬ ያርሾታ።
NUM 7:84 ያርሾ ያርሺዛሶዛ ቲይዲ ጌሺዳ ጋላስ ሃላቃቲ ያርሾሶዛ ኣንጂሶ ጋሶን ሺሺዳ ኢሞታይ ሃይታንታ፤ ቢራፔ ኦሴቲዳ 12 ፒጫ ሳኔታ፥ ቢራፔ ኦሴቲዳ 12 ጉቃ ሳኔታኔ ዎርቃፌ ኦሴቲዳ ኢስታን ኤጻኔ ዎꬂዛ 12 ኬሬታ።
NUM 7:85 ቢራፔ ኦሴቲዳ ኢሲ ኢሲ ኬሬይ 130 ሳቂሌ ጊዲ ዴጼስ፤ ቢራፔ ኦሴቲዳ ኢሲ ኢሲ ቁሌ ማላ ሳኔይ 7 ሳቂሌ ጊዲ ዴጼስ፤ ቢራፔ ኦሴቲዳ ኬሬቲኔ ቁሌ ማላ ሳኔቲ ጾሳ ኬꬃ ሜዛኔን ዎꬂዛ ዎዴ ኡባይ ኢሲ ቦላ 2,400 ሳቂሌ ጊዲዳ።
NUM 7:86 ዎርቃፌ ኦሴቲዳ ኤጻኔይ ኢስታ ኩሚ ኡቲዳ ታማኔ ናምኡ ሻቴቲ ጎዳ ኬꬃ ሜዛኔን ዎꬂዛ ዎዴ ኢሶይ ኢሶይ 10 ሳቂሌ ጊዲሺን ኡባይ ኢሲ ቦላ 120 ሳቂሌ ጊዲዴስ።
NUM 7:87 ካꬃ ያርሾራ ኢሲፌ ጹጌቲዛ ያርሾስ ሺቂዳ ሜሄ ቆዳይ 12 ቦራታ፥ 12 ꬋርሾታኔ ላይꬅ ኩሚዳ 12 ꬋርሾ ላቃታ፤ ቃሴ ኢስቲ ናጋራ ያርሾስ ሺሺዳይ 12 ዴይሻ ኦርጌታ።
NUM 7:88 ኢሲፌቴꬃ ያርሾስ ሺቂዳ ሜሄ ቆዳይ 24 ቦራ፥ 60 ꬋርሾ፥ 60 ዴይሻ ኦርጌኔ ላይꬅ ኩሚዳ 60 ꬋርሾ ላቃ፤ ያርሾ ያርሺዛሶዚ ቲዬቲ ጌዪዳፔ ጉዬ ኣንጂሶ ባኣሌስ ኢሜቲዳ ኢሞታቲ ሃይታንታ።
NUM 7:89 ሙሴይ ጎዳራ ሃሳያናስ ጌዴ ጋይቶቴꬃ ዱንካኔዛን ጌሊን ኣቶቴꬅ ዴማናስ ሺቂዛሶን ታቦታ ካማ ቦላ ዲዛ ናምኡ ኪሩቤታ ጊዶራ ጎዳይ ኢዛስ ሃሳይዛ ቃላ ሲዪዲ ኢዚካ ኢዛራ ሃሳዬቲዴስ።
NUM 8:1 ጎዳይ ሙሴስ ሂዝጊዴስ፥
NUM 8:2 « ‹ኔኒ ኣሮኔስ ላፑን ጾምፔታ ኢስታ ቦላ ዎꬂዛ ዎዴ ጾምፔቲ ጾምፔ ኢስታ ቦላ ዎꬂዛ ባላታስ ሲንꬃ ባጋራ ዲዛሶ ፖኢሳና› ጋዳ ዮታ።»
NUM 8:3 ኣሮኔይካ ጎዳይ ሙሴ ኣዛዚዳ ማላ ኦꬂዴስ፤ ጾምፔታ ኢስታ ቦላ ዎꬂዛ ባላታፔ ሲንꬃ ባጋራ ዲዛሶዛ ፖኢሳና ማላ ጊግሲ ዎꬂዴስ።
NUM 8:4 ጾምፔታ ኢስታ ቦላ ዎꬂዛ ባላቲ ጋርሳ ቶሆሶፔ ዶሚዲ ጪሼ ሚሳቲዛ ባላታ ጼራ ጋካናስ ቆጼቲዳ ዎርቃፌ ኦሴቲዳ፤ ሄይቲካ ጎዳይ ሙሴ ቤሲዳ ማላ ጾምፔ ኢስታ ቦላ ዎꬂዛ ባላታ ሌሚሶን ኦሴቲዳ።
NUM 8:5 ጎዳይ ሙሴስ ሂዝጊዴስ፥
NUM 8:6 «ሃንኮ ኣቲዳ ኢስራኤሌ ዴራ ጋርሳፌ ሌዌ ቆሞታ ዱማ ሻካዳ ጌሻ።
NUM 8:7 ጌሾ ዎጋስ ጊጌቲዳ ሃꬃን ኢስታ ኣራጫ፤ ኢስቲ ባንታ ቦላ ዲዛ ኢስኬ ኡባ ሜዴታናሲኔ ባ ማይኦካ ሜጪዲ ባና ጌሻና ማላ ኦꬃ።
NUM 8:8 ሄሳፌ ካሊዲ ኢሲ ሚርጎኔ ካꬃ ያርሾስ ጊዲዛ ሊቆ ꬊሌፌ ዛይቴን ሙኑቄቲዳ ሙኑቃ ኤኪ ቤቶ፤ ኔካ ናጋራ ያርሾስ ሺቂዛ ኢሲ ሚርጎ ኤካ ባ።
NUM 8:9 ሄሳፌ ጉዬ ኔ ኢስራኤሌ ኣሳ ሺሻዳ ሌዌቲ ጋይቶቴꬃ ዱንካናስ ሲንꬃ ባጋራ ጎዳ ሲንꬃን ኤሳ።
NUM 8:10 ኢስራኤሌ ኣሳይካ ሌዌታ ሁኤ ቦላ ባ ኩሼ ዎꬆ።
NUM 8:11 ኣሮኔይ ሌዌታ ጎዳ ኦሶ ኦꬃናስ ጊጌቲዳይታ ጊዳና ማላ ኢስራኤሌ ኣሳ ጋርሳፌ ያኔ ሃ ቃሴꬂ ሺሺዛ ያርሾ ኦꬂዲ ኢስታ ጎዳ ሲንꬅ ሺሾ።
NUM 8:12 «ሄሳፌ ጉዬ ሌዌቲ ባ ኩሼታ ሄ ናምኡ ሚርጎታ ሁኤ ቦላ ዎꬄቶ፤ ኢሳ ናጋራ ዉርሶ ያርሾስ፥ ኢሳ ጹጌቲዛ ያርሾስ ኦꬃዳ ኢስታ ማሪሳናስ ጎዳ ሲንꬃን ያርሻ።
NUM 8:13 ሌዌታ ያኔ ሃ ቃሴꬂ ሺሺዛ ያርሾ ሂስታዳ ጎዳ ሲንꬅ ሺሻ፤ ኣሮኔኔ ኢዛ ናይታካ ኢስታ ቦላ ሹማ።
NUM 8:14 ሄሳ ማላን ሌዌቲ ታይታ ጊዳና ማላ ሃንኮ ኣቲዳ ኢስራኤሌ ኣሳ ጊዶፌ ኔ ታስ ኢስታ ሻካ።
NUM 8:15 «ኔኒ ሌዌታ ሻካ ጌሺዳፔኔ ያኔ ሃ ቃሴꬂ ሺሺዛ ያርሾ ሂስቲዳፔ ጉዬ ኢስቲ ጋይቶቴꬃ ዱንካኔዛ ጊዶን ኦꬃና ቤሲዛ ኦሶዛ ፖላናስ ዬቶ።
NUM 8:16 ታኒ ኢስታ ኮይሮ ባይራ ዬሌቲዛ ኢስራኤሌ ኣሳ ኣቱማ ናይታ ኡባ ጊሻስ ታስ ዶራዲስ፤ ኢስራኤሌ ኣሳ ጊዶፌ ኢስቲ ታስ ሙሌራ ቡዞ ጊዳና።
NUM 8:17 ጊብጼ ቢታን ባይራ ዬሌቲዳ ኣሳፔ ሜሄ ጋካናስ ዲዛይታ ታኒ ዎꬊዳ ዎዴ ኢስራኤሌ ኣሳ ኢሳ ኢሳ ኬꬃን ኣዴ ጊዲዲ ባይራ ዬሌቲዳ ኣሳፔ ሜሄ ጋካናስ ዲዛይታ ኡባ ታስ ዱማሳ ሻካዲስ።
NUM 8:18 ሃኢ ቃሴ ኢስራኤሌ ኣሳ ባይራ ኣቱማ ናይታ ጊሻስ ሌዌ ዛርኬታ ታስ ሻካዲስ።
NUM 8:19 ኢስቲ ኢስራኤሌ ኣሳ ጊሻስ ጊዲዲ ጋይቶቴꬃ ዱንካኔዛ ጊዶን ታስ ኦꬃና ማላኔ ኢስራኤሌ ኣሳይ ጌዴ ጌሻሶዛኮ ሺቂዲ ቦሻን ቦሼቶንታ ማላ ኢስታ ናጋና ማላ ሌዌታ ኢስራኤሌ ኣሳ ጋርሳፌ ታስ ኢሞታ ማላ ኤካዳ ኣሮኔሲኔ ኢዛ ናይታስ ኢማዲስ።»
NUM 8:20 ሄሳ ጊሻስ ጎዳይ ሙሴ ኣዛዚዳ ማላ ሙሴይ፥ ኣሮኔይኔ ኢስራኤሌ ኣሳይ ኡባይ ሌዌታ ዱማሲ ሻኪዳ።
NUM 8:21 ሌዌቲ ሜጬቲ ጌዪዳ፤ ባ ማይኦካ ሜጪዳ፤ ኣሮኔይ ኢስታ ያኔ ሃ ቃሴꬂ ሺሺዛ ያርሾ ሂስቲ ጎዳ ሲንꬅ ሺሺዴስ፤ ጌሾ ዎጋካ ኢስታ ጊሻስ ፖሊዴስ።
NUM 8:22 ጎዳይ ሙሴስ ሌዌታ ጊሻስ ኢሚዳ ኣዛዞዛ ማላ ዴሬዚ ዉሪካ ኦꬂዴስ፤ ሄሳ ማላን ሌዌቲ ኣሮኔኔ ኢዛ ናይታ ኣላፌቴꬃ ጋርሳን ጋይቶቴꬃ ዱንካኔዛ ጊዶን ኦꬃናስ ጊጌቲዳ።
NUM 8:23 ጎዳይ ሙሴስ ሂዝጊዴስ፥
NUM 8:24 «ሌዌቲ ኦሶ ዶማናስ ቤሲዛ ዎጋቲ ዬሌቲን ናምኡ ታማኔ ኢቻሹ ላይꬃፌ ቢዲ ኢቻሹ ታሙ ላይꬅ ጋካናስ ዲዛይቲ ዉሪ ጋይቶቴꬃ ዱንካኔዛ ጊዶን ኦꬄቶ፤ ኢቻሽ ታሙ ላይꬅ ኩሚሺን ኦꬆፌቶ።
NUM 8:26 ሄሳፌ ጉዬ ኢስታ ኢሻቲ ጋይቶቴꬃ ዱንካኔዛ ጊዶን ኦꬂዛ ዎዴ ማዳናስ ዳንዳዬቴስ ኣቲን ባርካ ጻላ ዲኮ ኣይ ኦሶካ ኦꬆፌቶ።»
NUM 9:1 ኢስራኤሌ ኣሳይ ጊብጼፔ ኬዚዳ ናምኣንꬆ ላይꬃን ኮይሮ ኣጊናን ጎዳይ ሙሴስ ሲና ባዞን ሂዝጊ ዮቲዴስ፥
NUM 9:2 «ኢስራኤሌ ኣሳይ ፓዚጋ ባኣሌዛ ኢዚ ቦንቼቲዛ ዎዴን ቦንቾ፤
NUM 9:3 ሃይሳ ሃ ኣጊናዛን ታማኔ ኦይዳንꬆ ጋላሳ ኦማርስ ዎጋ ማላኔ ዲዛ ማራ ማላ ቦንቾ።»
NUM 9:4 ሄሳ ጊሻስ ሙሴይ ፓዚጋ ባኣሌዛ ኣሳይ ቦንቻና ማላ ዮቲዴስ።
NUM 9:5 ኢስቲካ ኮይሮ ኣጊናይ ጌሊዳ ታማኔ ኦይዳንꬆ ጋላስ ጋዴይ ቃሚሺን ሲና ባዞን ፓዚጋ ባኣሌዛ ቦንቺዳ፤ ኢስራኤሌ ኣሳይ ጎዳይ ሙሴ ኣዛዚዳ ማላ ኡባ ኦꬂዳ።
NUM 9:6 ጊዶ ኣቲን ኢስታ ጋርሳፌ ሃይቂዳ ኣሃ ቦቺዳ ጊሻስ ቱኒዳ ኣሳቲ ኢስታ ጊዶን ዲዛ ጊሻስ ሄ ጋላስ ፓዚጋ ባኣሌዛ ቦንቻናስ ዳንዳይቤቴና፤ ሄሳ ጊሻስ ኢስቲ ሙሴኮኔ ኣሮኔኮ ሺቂዲ፥
NUM 9:7 ሙሴስ፥ «ኑኒ ኣሃ ቦቺዲ ቱኒዶስ ሺን ሃንኮ ኢስራኤሌ ኣሳፔ ዱማሶን ኑኒ ኢዛ ዎዴን ጎዳስ ያርሾ ሺሾንታ ማላ ኣዛስ ዲጌቲዞኒ?» ጊዳ።
NUM 9:8 ሙሴይካ ኢስታስ፥ «ታኒ ጎዳፔ ኢዚ ኢንቴ ጊሻስ ኣዛዚዛይሳ ሲያና ጋካናስ ናጊሺቴ» ጊዴስ።
NUM 9:9 ጎዳይ ሙሴስ ሂዝጊዴስ፥
NUM 9:10 «ኔኒ ኢስራኤሌ ኣሳስ፥ ‹ኢንቴፌ ጊዲን ዎይኮ ኢንቴ ዜሬꬃፌ ኣሳይ ኣሃ ቦቺዲ ቱኒኮ ዎይኮ ኦጌ ቢዳ ጊዲኮ ኢዛዴይ ጎዳ ፓዚጋ ባኣሌ ቦንቻናስ ዳንዳዬስ።
NUM 9:11 ሄሲካ ናምኣንꬆ ኣጊናይ ጌሊዳ ታማኔ ኦይዳንꬆ ጋላስ ጋዴይ ቃሚሺን ቦንቻናስ ዳንዳዬስ፤ ኢስቲ ቦንቺሼ ፓዚጋ ዶርሳ ኢርሾይ ጌሎንታ ኡኬꬅ ጫሞ ሚꬃ ሃይꬃራ ሜቶ።
NUM 9:12 ጋዴይ ዎንታና ጋካናስ ሄ ካꬃፌ ኣይኮካ ኣሾፌቶ፤ ሹኬቲዳ ሜሄዛ ሜቄꬃፌ ኢሲኔዮካ ሜንꬆፌቶ፤ ኢስታስ ኢሜቲዳ ዎጋ ማላ ባኣሌዛ ቦንቼቶ።
NUM 9:13 ጌሽ ጊዲዲኔ ኦጌ ቦንታ ኣሲ ኦኒካ ፓዚጋ ባኣሌዛ ቦንቺዛ ጋላስ ቦቾንታዴይ ታ ዴራፔ ሻኬቶ፤ ኢዚ ያርሾዛ ቤሲዛ ዎዴን ያርሾንታ ኣጊዳ ጊሻስ ባ ናጋራስ ቤሲዛ ቂጻቴ ኤኮ።
NUM 9:14 « ‹ኢንቴ ጊዶን ቤቲ ዪዳ ሃራ ዴሬ ኣሲ ጎዳ ፓዚጋ ባኣሌዛ ቦንቻና ኮይኮ ዲዛ ዎጋ ማላ ኡባ ፖሊ ቦንቻናስ ቤሴስ፤ ዴሬን ዬሌቲዳይሳ ጊዲን ኣሳ ቢታ ኣስ ጊዲን ሃይሳ ዎጋዛ ኢሲ ማላ ፖሎ› ጋዳ ዮታ።»
NUM 9:15 ጋይቶቴꬃ ዱንካኔዚ ቶኬቲዳ ጋላስ ሻራዚ ዱንካኔዛ ጎዚ ኦይኪዴስ፤ ኦማርሳፌ ቢዲ ጋዴይ ዎንታና ጋካናስ ዱንካኔዛ ቦላ ታማ ሚሳቲዛ ሻራይ ካሚ ኦይኪዴስ።
NUM 9:16 ጋላስ ጋላስ ሻራይ ካሚ ኦይኬስ፤ ሄ ሻራዚካ ኦማርስ ኦማርስ ታማ ማላ ፖኤስ።
NUM 9:17 ሻራዚ ዱንካኔዛ ቦላፌ ዴንዲዛ ዎዴ ኡባን ኢስራኤሌ ኣሳይ ባ ዱንካኒ ዲዛሶፔ ዴንዲ ቤስ፤ ሻራዚ ኤቂዛ ዎዴ ኣሳይካ ባ ዲዛሶን ዱንካኒ ኡቴስ።
NUM 9:18 ኢስራኤሌ ኣሳይ ባ ዲዛሶፔ ዴንዲ ቢዛ ዎዴ ጊዲን ኢስቲ ሃራሶን ዱንካኒ ኡቲዛ ዎዴ ጎዳይ ኢስታ ኣዛዚዳ ማላ ሃኔቴስ፤ ሻራዚ ዱንካኔዛ ቦላ ዎꬊዲ ካሚ ኦይኪዳ ዎዴ ኡባን ኢስቲ ባንቲ ዱንካኒ ኡቲዳሶሆን ጋምኤቴስ።
NUM 9:19 ሻራዚ ዱንካኔዛ ቦላ ዳሮ ጋላስ ጋምኢኮካ ኢስቲ ጎዳስ ኣዛዜቴꬃን ሄን ባ ዱንካኒ ዲዛሶን ጋምኤቴስ ኣቲን ኣዋካ ቃጼቴና።
NUM 9:20 ኢሲ ኢሲ ዎዴ ሻራዚ ዱንካኔዛ ቦላ ጉꬃ ጋላሳታ ጻላ ጋምኤስ፤ ጊዲኮካ ሄን ጋዳን ኢስቲ ጋምኢኮ ዎይኮ ጌዴ ሲንꬄ ቢኮ ጎዳይ ኢስታ ኣዛዚዳ ማላ ሃኔቴስ።
NUM 9:21 ሻራዚ ኢሲ ኢሲ ዎዴ ጋዴይ ዎንታና ጋካናስ ጻላ ጋምኤስ፤ ጋዴይ ዎንቲሺን ሻራዚ ዴንዲዳ ማላ ሄራካ ሄሜꬅ ዶሜቴስ፤ ዎይኮ ሻራዚ ጋላስ ጊዲን ኦማርስ ዴንዲዛ ዎዴ ኢስቲካ ዴንዲ ቤቴስ።
NUM 9:22 ናምኡ ጋላስ ጊዲን ዎይኮ ኢሲ ኣጊና ጊዲን ዎይኮ ኢሲ ላይꬂካ ጊዲን ሄሳፌካ ኣዱሳ ዎዴ ሻራዚ ዱንካኔዛ ቦላ ካሚ ኡቲዳ ዎዴ ኡባን ኢስቲካ ባንቲ ዱንካኒ ዲዛሶፔ ቃጼቴና፤ ጊዶ ኣቲን ሻራዚ ዴንዲ ቢዛ ዎዴ ኢስቲካ ዴንዲ ሄሜꬅ ዶሜቴስ።
NUM 9:23 ኢስቲ ዱንካኒ ኡቲዛይ ዎይኮ ባ ዲዛሶፔ ዴንዲ ቢዛይ ጎዳይ ሙሴስ ኢሚዳ ኣዛዞዛ ማላ።
NUM 10:1 ጎዳይ ሙሴስ ሂዝጊዴስ፥
NUM 10:2 «ዴሬዛ ኢሲ ቦላ ሺሻናስ ጊዲን ዎይኮ ኣሳይ ዱንካኒ ዲዛሶፔ ዴንꬄꬃናስ ፑኒዛ ናምኡ ዛዬታ ቢራፔ ቆጻ ኬሳ።
NUM 10:3 ናምኡ ዛዬቲ ፑኔቲዛ ዎዴ ኩሜꬃ ማባራይ ጋይቶቴꬃ ዱንካኔዛ ፔንጌን ኔ ዲዛሶ ሺቆ።
NUM 10:4 ኢሲ ዛዬይ ዛዬቲዛ ዎዴ ጊዲኮ ኢስራኤሌ ኣሳፔ ኮራፒኔቲ ጻላ ኔኮ ሺቄቶ።
NUM 10:5 ዛዬዛ ꬎቁ ሂስቲ ዛይኮ ኣርሼይ ሞኪዛ ባጋራ ዱንካኒ ኡቲዳ ኣሳይ ኮይሮ ሄሜꬅ ዶሞ።
NUM 10:6 ኔ ዛዬዛ ናምኣንꬆ ꬎቁ ሂስታ ፑኒዛ ዎዴ ዱጌሃ ባጋራ ዱንካኒ ኡቲዳ ኣሳይ ሄሜꬅ ዶሞ፤ ዛዬይ ꬎቁ ጊ ዛዬቲዛ ዎዴ ኣሳይ ሄሜꬅ ዶማናስ ማላታ ጊዶ።
NUM 10:7 ዴራ ኢሲ ቦላ ሺሻናስ ዛዬታ ꬎቂሶንታ ዚቂ ሂስታ ዛያ።
NUM 10:8 ቄሴ ጊዲዳ ኣሮኔ ናይቲ ዛዬታ ፑኔቶ፤ ሄሲካ ኢንቴስ ና ና ጋካናስ ኤቂ ዲዛ ዎጋ ጊዶ።
NUM 10:9 «ኢንቴ ዴራ ቦላ ዎራጂዳ ኢንቴ ሞርኬታራ ኢንቴ ኦሌታናስ ኬዚዛ ዎዴ ዛዬታ ꬎቁ ሂስቲ ፑኒቴ፤ ሂስቲኮ ጎዳ ኢንቴ ጾሳይ ኢንቴና ቆፓናኔ ኢንቴ ሞርኬታፔ ኢንቴና ኣሻና።
NUM 10:10 ሄሳꬆካ ኢንቴ ኡፋይሳ ባኣሌ ጋላስ፥ ሄሲካ ኣጊና ባኣሌታኔ ዱማ ዱማ ኢንቴ ቦንቻናስ ቃቺዳ ባኣሌታ ቦንቺዛ ዎዴ ጹጌቲዛ ያርሾኔ ኢሲፌቴꬃ ያርሾታ ሺሺዛ ዎዴ ዛዬታ ፑኒቴ፤ ሄይቲ ጾሳ ሲንꬃን ኢንቴና ቆፍሳና፤ ታኒ ጎዳ ኢንቴ ጾሳ።»
NUM 10:11 ዴሬዚ ጊብጼ ዴሬፔ ኬዚዳ ናምኣንꬆ ላይꬃን ናምኣንꬆ ኣጊናይ ጌሊዳ ናምኡ ታማንꬆ ጋላስ ማርካቴꬃ ዱንካኔዛፔ ቦላራ ዲዛ ሻራዚ ዴንዲዴስ።
NUM 10:12 ኢስራኤሌ ኣሳይ ሲና ባዞፌ ዴንዲዲ ሻራዚ ፓራኔ ባዞን ኤቃና ጋካናስ ዱማ ዱማሶን ሼምፒዳ።
NUM 10:13 ኢስራኤሌ ኣሳይ ጎዳይ ካሴ ሙሴ ኣዛዚዳ ኣዛዞዛ ማላ ኮይሮ ዩሾ ሄሜꬅ ዶሚዴስ።
NUM 10:14 ዩሁዳ ቆሞታ ባንዲራ ጋርሳን ዲዛ ኣሚናዳቤ ና ኔኣሶኔይ ካሌꬂን ባ ቡቴ ታራ ናጊዲ ኮይሮ ቢዳ።
NUM 10:15 ዪሳኮሬ ዛርኬታ ካሌꬂዛይ ጹኣሬ ና ናቲናኤሌ።
NUM 10:16 ዛቢሎኔ ዛርኬታ ካሌꬂዛይ ሄሎኔ ና ኤልያቤ።
NUM 10:17 ሄሳፌ ጉዬ ዱንካኔዚ ሾዴቲን ዱንካኔዛ ቶኪዳይቲ ጌርሾኔ ቆሞቲኔ ሜራሬ ዛርኬቲ ቡስ ዶሚዳ።
NUM 10:18 ኢስታ ካሊዲ ኦሮቤሌ ዛርኬታ ባንዲራ ጋርሳን ዲዛይቲ ሻዱሬ ና ኤልጹሬይ ካሌꬂን ባ ታራ ናጊዲ ቢዳ።
NUM 10:19 ሲሞና ዛርኬታ ካሌꬂዛይ ጹርሻዳዬ ና ሳሉምኤሌ።
NUM 10:20 ጋዴ ዛርኬታ ካሌꬂዛይ ዳኡኤሌ ና ኤልያሳፌ።
NUM 10:21 ሄሳፌ ጉዬ ሌዌ ባጋ ኣስ ጊዲዳ ቃኣቴ ዛርኬ ጊዲዳይቲ ጌሻ ሚሻታ ቶኪ ኤኪዲ ቢዳ፤ ኢስቲ ባፔ ሲንꬃ ባጋን ዲዛ ሄራዛ ጋካናፔ ካሴ ጾሳ ዱንካኔዚ ቶሌቲ ኡቴስ።
NUM 10:22 ሄሳፌ ካሊዲ ኤፍሬሜ ዛርኬታ ባንዲራ ጋርሳን ዲዛይቲ ኣሚሁዴ ና ኤልሻማይ ካሌꬂን ባ ታራ ናጊዲ ቢዳ።
NUM 10:23 ሚናሴ ዛርኬታ ካሌꬂዛይ ፔዳጹሬ ና ጋማልኤሌ።
NUM 10:24 ቢኒያሜ ዛርኬታ ካሌꬂዛይ ጊዲኦኔ ና ኣቢዳኔ።
NUM 10:25 ዉርሴꬃን ሃ ቡቴታ ጉዬ ቱቻን ናጊዛ ዳኔ ዛርኬታ ባንዲራ ጋርሳን ዲዛይቲ ባ ታራ ናጊዲ ቢዳ፤ ዳኔ ቆሞታ ካሌꬂዛይ ኣሚሻዳዬ ና ኣሂኤዜሬ።
NUM 10:26 ኣሴሬ ዛርኬታ ካሌꬂዛይ ኦክራ ና ፋጉኤሌ፤
NUM 10:27 ኒፍታሌሜ ዛርኬታ ካሌꬂዛይ ኤናኔ ና ኣሂሬ።
NUM 10:28 ሄሳ ጊሻስ ኢስራኤሌ ኣሳይ ካሴ ባ ዲዛሶፔ ኬዚዲ ባ ቡቴን ቡቴን ቢዛ ቡሳ ማራይ ሃይሳ ማላ።
NUM 10:29 ሙሴይ ባ ማቼይ ኣዋ ሚዲያሜ ዴሬ ኣስ ኤራኡኤሌ ና ሆባቤስ፥ «ሄኮ ኑኒ ጎዳይ ኑስ ኢማናስ ካሴ ጫቂዳ ዴሬ ባናስ ጊጌቲዶስ፤ ጎዳይ ኢስራኤሌ ኣሳ ዱሬሳናስ ካሴ ኑስ ጫቂ ዎꬂዴስ፤ ሄሳ ጊሻስ ኔካ ኑናራ ሄꬋ፤ ኑኒ ኔስ ሎኦ ኦꬃና» ጊዴስ።
NUM 10:30 ሆባቤይ፥ «ኣካይ! ካሴ ታኒ ዬሌቲዳ ዴሬኔ ታ ዳቦታኮ ሲማ ባና» ጊዴስ።
NUM 10:31 ሙሴይ ኢዛስ፥ «ኔ ኑፔ ሻኬታ ቦፓርኪ! ኑኒ ሃይሳ ባዞ ቢታን ቢሼ ኣዋን ኣዋን ሼምፓና ቤሲዛኮ ኔኒ ኤራሳ፤ ኔኒ ኑና ኦጌ ካሌꬂዛ ኣስ ጊዳና።
NUM 10:32 ኔኒ ኑናራ ቢኮ ጎዳይ ኑስ ኢሚዛ ሎኦ ሚሻ ኡባፌ ኑ ኔስ ሻኪ ኢማና» ጊዴስ።
NUM 10:33 ዴሬዚ ጌሻ ዙማይ ዲዛ ሲና ባዞ ዬጊዲ ሄꬑ ጋላሳ ኦጌ ቢዴስ፤ ሄꬑ ጋላሳታን ጎዳ ጫቆ ቃላ ታቦታዚ ኣሳይ ሼምፓናሶ ኮያናስ ኣሳፔ ሲንꬃቲ ቢዴስ፤ ኢስቲ ካሴ ባ ዲዛ ሄራ ዬዳናፔ ካሴቲዲ ኣሳይ ሼምፓናሶ ኮያናስ ጫቆ ቃላ ታቦታዚ ኢስታፌ ሲንꬃን ሲንꬃን ቢዴስ።
NUM 10:34 ኢስቲ ባ ዲዛሶፔ ዴንዲ ዴንዲ ቢሺን ጎዳ ሻራይ ጋላስ ጋላስ ኢስታ ካሚ ኦይኬስ።
NUM 10:35 ጫቆ ቃላ ታቦታይ ባና ዴንዲሺን ዴንዲሺን ሙሴይ፥ «ጎዳዉ! ኔካ ዴንዳ፤ ኔ ሞርኬቲ ላሌቴቶ፤ ኔና ኢጺዛይቲ ዉሪካ ኔ ሲንꬃፌ ኪቼቶ!» ጌስ።
NUM 10:36 ጫቆ ቃላ ታቦታዚ ኢሲሶ ጋኪ ኤቂዛ ዎዴ፥ «ታ ጎዳዉ! ዳሮ ሺያን ቆዴቲዛ ኢስራኤሌ ኣሳኮ ኔ ኣይፌሶ ሃ ዛራ» ጌስ።
NUM 11:1 ኢስራኤሌ ኣሳይ ባ ቦላ ጋኪዳ ሜቶ ኡባ ጊሻስ ጎዳ ቦላ ዙዙሚዴስ፤ ጎዳይ ኣሳ ዙዙንꬃ ዋሶዛ ሲዪዲ ኬሂ ሃንቄቲዴስ፤ ኢስታ ቦላካ ጹጊዛ ታማ ዬዲዴስ፤ ሄ ጎዳ ታማይ ኣሳይ ዱንካኒ ኡቲዳሶሆፔ ጋጻራ ኣማርዳይሳ ሚዴስ።
NUM 11:2 ኣሳይካ ባና ጎዳራ ጊጊሳና ማላ ሙሴኮ ዋሲዴስ፤ ሙሴይካ ጎዳ ዎሲን ታማዚ ቶኢዴስ።
NUM 11:3 ጾሳ ታማይ ሄን ኢስታ ጊዶን ኤጺዳ ጊሻስ ሄ ሶሆይ፥ «ታቤሬ» ጌቴቲዴስ።
NUM 11:4 ኢስራኤሌ ኣሳራ ዋላኬቲ ኬዚዲ ቢዛ ሃራ ዱማ ዱማ ዴሬ ኣሳይ ኣሾ ማናስ ዳሮ ኣሞቲዴስ፤ ኢስራኤሌ ኣሳይካ፥ «ኑኒ ማና ኣሾ ኣዋፔ ዴሚኖ!
NUM 11:5 ካሴ ኑ ጊብጼን ዲዛ ዎዴ ኣይኮ ሚሽ ቃንጾንታ ጮ ሜላ ሚዛ ሞሌ ኣሾይ፥ ሌሌሄይ፥ ሌሌሄ ሚሳቲዛ ሃቢሃቤይ፥ ዶኖ ሚሳቲዛ ኩራቴይ፥ ሱንኩርቶይኔ ቱሞይ ኑና ላሞꬄስ።
NUM 11:6 ሃኢ ጊዲኮ ማና ጻላይ ኑና ሳሌꬂዴስ፤ ቆꬌይካ ካꬅ ኢጺዴስ፤ ማናፌ ኣቲን ሃራ ኑ ቤኢዛ ካꬂ ባዋ» ጊ ዬኪዴስ።
NUM 11:7 ማናይ ዴቦ ኣይፌ ማላ ጉꬃ፤ ኢዛስ ሜꬋይ ቦጺ ኤኪዛ ሺዳ ማላ ጊዲዲ ጋላልኦ ሚሳቴስ።
NUM 11:8 ኣሳይ ሄሳ ዩዪ ዩዪ ማጼስ፤ ኢዛ ዎጻን ጋጪዲ ዎይኮ ኡዱላን ጫዲዲ ጉꬃ ጻሮን ሙኑቂዲ ኡኬስ፤ ሚሺን ኢዚ ዶናን ዛይቴራ ጊንዴቲ ኡኬቲዳ ኡኬꬃ ማላ ማልኤስ።
NUM 11:9 ኦማርስ ኦማርስ ኢስቲ ዱንካኒ ዲዛሶ ሄራን ጻዛይ ዎꬊሺን ማናይ ኢዛራ ኢሲፌ ዎꬌስ።
NUM 11:10 ዴሬዚ ዉሪካ ባ ዱንካኔ ፔንጌን ፔንጌን ባሶ ኣሳራ ኣሳራ ኤቂዲ ዬኪሺን ሙሴይ ሲዪዴስ፤ ጾሲ ኢስታ ቦላ ሃንቄቲዳ ጊሻስ ሙሴይ ኬሂ ጬጪዴስ።
NUM 11:11 ኢዚ ጎዳ፥ «ሃይሳ ዴጾ ሜቶ ኔስ ኣይሌ ጊዲዳ ታ ቦላ ኣይስ ኤሃዲ? ኔኒ ሃይሳ ሃ ዴሬዛ ኡባ ዴጾ ቶሆ ታና ኔ ቶሳናስ ታ ኔና ኣይ ሚሺሳዲና?
NUM 11:12 ቡሮ ꬋንꬅ ꬋሚዛ ና ዲቺዛ ሄ ጉꬃ ናዛ ኢዲሚዛ ማላ ታኒ ኢስታ ኢዲማዳ ኔኒ ካሴ ኣዋታስ ጫቂዳ ቢታ ጋꬃና ማላ ኔ ታና ኦꬂዛይ ሃይታንታ ዉርሳ ሻሪዳይ ታኔ? ዎይኮ ኢስታ ታ ዬላዲና?
NUM 11:13 ኢስቲ ታና፥ ‹ኑስ ኣሾ ኢማ› ጊዲ ታኮ ዪዲ ዬኪዛ ጊሻስ ሃይሳ ኣሳ ኡባስ ጊዳና ኣሾ ታ ኣዋፔ ኤሆ?
NUM 11:14 ታኒ ታርካ ሃይሳ ዴራ ካሌꬃናስ ዳንዳይኬ፤ ሃይሲ ኣላፌቴꬃዚ ታና ኬሂ ዴጺዴስ።
NUM 11:15 ኔ ታና ሃይሳꬆ ዋዪሳናፔ ታኒ ሜቶ ቤኦንታ ማላ ኔ ታስ ሚሼቲዛ ጊዲኮ ኔ ታና ሃኢ ዎꬊዳኮ ታስ ሎኦ» ጊ ዎሲዴስ።
NUM 11:16 ጎዳይ ሙሴስ፥ «ዴሬዛ ኣይሳና ዳንዳይዛ ኤሬቲዳ ላፑን ታሙ ጪማታ ዶራ፤ ኔኒ ኢስታ ሺሻዳ ጋይቶቴꬃ ዱንካኔዛኮ ኤሃዳ ኔ ኣቻን ኤሳ።
NUM 11:17 ታኒካ ሄ ዎꬋዳ ኔናራ ሃሳያና፤ ታኒ ኔስ ኢሚዳ ኣያናፔ ኢስታስ ሻካ ኢማና፤ ሄሳፌ ጉዬ ኢስቲ ዴሬዛ ኔስ ዲዛ ኣላፌቴꬃፌ ሻኪ ኤኪዲ ዴሬዛ ቶሆ ቶኪ ኔና ማዳና፤ ሃይሳፌ ጉዬ ሃይሳ ኣላፌቴꬃ ኔ ጻላ ቶካካ።
NUM 11:18 ሃኢካ ዴሬዛስ፥ ‹ዎንቶስ ኢንቴና ጌሺቴ፤ ኢንቴስ ማና ኣሾይ ዳና፤ ኢንቴ ኑኒ ማና ኣሾ ኑስ ኦኔ ኢማናይ ጊዲ ዬኪዳይሳኔ ኑስ ጊብጼይ ሎኦ ጊዳይሳ ጎዳይ ሲዪዴስ፤ ሄኮ ሃኢ ኢንቴስ ጎዳይ ኣሾ ኢማና፤ ኢንቴካ ኢዛ ማንዴታ።
NUM 11:19 ኢንቴ ኣሾ ማናይ ኢሲ ጋላስ ዎይኮ ናምኡ ጋላስ ዎይኮ ኢቻሹ ጋላስ ዎይኮ ታሙ ጋላስ ዎይኮ ናምኡ ታሙ ጋላስ ጻላ ጊዴና።
NUM 11:20 ኢዚ ኢንቴና ሳሌꬂዲ ኢንቴስ ሲꬌራ ኬዛና ጋካናስ ኣጊና ኩሜꬅ ኢንቴ ኢዛ ማና፤ ሄሲካ ሃናናይ ኢንቴ ሃይሳ ኢንቴ ጊዶን ዲዛ ጎዳ ካꬊዳ ጊሻሲኔ ኑኒ ጊብጼፔ ካሴ ኬዞንታ ኣጊዳኮ ኑስ ሎኦኮሺን ጊዲ ኢንቴ ዬኪዳ ጊሻሳ› » ጊዴስ።
NUM 11:21 ሙሴይ ጎዳስ፥ «ሄኮ ሃኢ ታኒ ካሌꬂዛይ ኡሱፑን ጼቱ ሺ ኣሳ፤ ‹ኔኒ ኣጊናስ ጊዳና ኣሾ ኢስታስ ኢማና› ጋዳ ቃላ ጌላዳሳ።
NUM 11:22 ሂስቲን ሃይሳ ኣሳስ ኣይ ኬና ሜሄይ ሹኬቲን ጊዳኔ? ኣባ ጊዶን ዲዛ ሞሌይ ኡባይ ኢሲ ቦላ ሺቂዳኮ ጊዳንዴ?» ጊ ኦይቺዴስ።
NUM 11:23 ጎዳይ ሙሴስ፥ «ታስ ጾሳስ ዎልቃይ ጉꬄ? ታ ቃላይ ኢንቴ ኣቻን ፖሌታናኮኔ ኣጋናኮ ኔ ሃኢ ቤኣና» ጊ ዛሪዴስ።
NUM 11:24 ሄሳ ጊሻስ ሙሴይ ኬዚዲ ጎዳይ ኢዛስ ጊዳይሳ ኡባ ዴሬዛስ ዮቲዴስ፤ ዴሬዛ ካሌꬂዛይታፔ ላፑን ታሙ ኣስ ኢሲሶ ሺሺዲ ዱንካኔዛ ዩሾን ኤሲዴስ።
NUM 11:25 ጎዳይካ ሻራራ ዎꬊዲ ኢዛስ ዮቲዴስ፤ ሙሴስ ኢሚዳ ኣያናፔ ሻኪዲ ዴራ ካሌꬂዛ ላፑን ታሙ ጪማታ ቦላ ዎꬂዴስ፤ ኣያናይ ኢስታ ቦላ ዎꬊን ኢስቲ ባንታ ቃላ ꬎቁ ሂስቲዲ ናቤታ ማላ ቲንቢቴ ሃሳይዳ፤ ኢስቲ ሄሳ ናምኣንꬂቤቴና።
NUM 11:26 ማዝጋቤቲዳ ላፑን ታሙ ዴራ ካሌꬂዛይታ ጊዶፌ ናምኣቲ ኤልዳዴኔ ሜዳዴ ጌቴቲዛይቲ ጌዴ ዱንካኔዛኮ ቦንታ ባንቲ ዲዛ ሄራን ጋምኢዳ፤ ኢስቲ ሄን ዲሺን ኣያናይ ኢስታ ቦላ ዎꬊን ኢስቲካ ባ ቃላ ꬎቁ ሂስቲዲ ናቤታ ማላ ቲንቢቴ ሃሳይዳ።
NUM 11:27 ኢሲ ናቴꬃ ኣሲ ሙሴኮ ዎጺ ቢዲ፥ «ኤልዳዴይኔ ሜዳዴይ ሄን ባንታ ሄራን ዲሼ ቲንቢቴ ሃሳዬቴስ» ጊ ዮቲዴስ።
NUM 11:28 ናቴꬃፌ ዶሚዲ ሙሴ ኦꬂ ማዲዛ ናዌ ና ኢያሶይ፥ «ታ ጎዳ ሙሴ! ሃይታንቲ ቲንቢቴ ሃሳዮንታ ማላ ቴቃ!» ጊዴስ።
NUM 11:29 ሙሴይካ ኢዛስ፥ «ኔ ታስ ሚሼታዳ ሄሳ ጋይ? ታኒ ጊዲኮ ጾሲ ሃይሳ ዴራ ኡባ ቦላ ባ ኣያና ዎꬂኮኔ ኡባይካ ባ ቃላ ꬎቁ ሂስቲዲ ናቤታ ማላ ቲንቢቴ ሃሳይዳኮ ሄሲ ታስ ኡፋይሳ!» ጊዴስ።
NUM 11:30 ሙሴይኔ ኢስራኤሌ ኣሳ ካሌꬂዛ ላፑን ታሙ ኣሳይ ጌዴ ባ ዲዛሶ ሲሚዴስ።
NUM 11:31 ሄሳፌ ጉዬ ጎዳይ ጫርኮ ዴንꬂዲ ኣባ ጊዶፌ ኩራቾ ሚሳቲዛ ካፎ ኣሳይ ዱንካኒ ኡቲዳ ሄራ ኤሂዴስ፤ ሂስቲዲ ሄ ካፎታ ቢታፌ ፑዴ ናምኡ ዋꬋ ኬና ꬎቁ ጊዲ ፒራꬊ ዪዲ ኣሳይ ዱንካኒ ኡቲዳ ሄራ ዩሾን ኢሲ ጋላሳ ኦጌ ኬና ጊዲዛሶን ቢታ ቦላ ማይኢ ኡቲዳ።
NUM 11:32 ሄሳ ጊሻስ ሄ ጋላሲኔ ኦማርስ፥ ሄሳꬆካ ዎንቴꬃ ጋላሲካ ዴሬዚ ሄ ካፎታ ኦይኪ ሺሺዴስ፤ ኢሲ ኣሲካ ታሙ ኪሎፔ ፓጬ ኦይኪቤና፤ ኢዚካ ሜላና ማላ ባ ዱንካኒዳ ሄራ ዩሾ ኡባን ሚጪዳ።
NUM 11:33 ጊዶ ኣቲን ኢስቲ ቡሮ ጮሚ ሚቶንታ ዲሺን ጎዳይ ዴራ ቦላ ኬሂ ሃንቄቲዴስ፤ ጎዳይ ጊታ ቦሻካ ዴራ ቦላ ዬዲዴስ።
NUM 11:34 ኣሾ ኣሞቲዲ ሃይቂዳ ኣሳ ሄን ጋዳን ሞጊዳ ጊሻስ ሄ ጋዴዛ ሱንꬂ፥ «ኪብሮቴ-ሃታኣቤ» ጌቴቲዴስ።
NUM 11:35 ኣሳይ ኪብሮቴ-ሃታኣቤ ጌዴ ሃጺሮቴ ቢዲ ሄን ዱንካኒ ኡቲዴስ።
NUM 12:1 ሙሴይ ቶጵያፔ ማቾ ኤኪዳ ጊሻስ ማራማኔ ኣሮኔይ ዚጊርሳን ኢዛ ሂዝጊ ካꬊዳ፥
NUM 12:2 «ጎዳይ ሙሴ ባጋራ ጻላ ሃሳይዴ? ኑ ባጋራ ሃሳይቤኔ?» ጎዳይ ኢስቲ ጊዳይሳ ኡባካ ሲዪዴስ።
NUM 12:3 ሙሴይ ጊዲኮ ቢታ ቦላ ዲዛ ኣሳ ኡባፌ ኣꬊዳ ኣሽኬ ኣሳ።
NUM 12:4 ሄራካ ጎዳይ ሙሴ፥ ኣሮኔኔ ማራሞ፥ «ኢንቴ ሄꬓይ ጋይቶቴꬃ ዱንካኔኮ ሃ ዪቴ!» ጊዴስ፤ ኢስቲካ ቢዳ።
NUM 12:5 ሂስቲን ጎዳይ ቱስ ሚሳቲዛ ሻራ ጊዶራ ዎꬊዲ ዱንካኔዛ ፔንጌን ኤቂዲ፥ «ሃይሶ ኣሮኔ! ሃኔ ማራሜ!» ጊ ጼይጊዴስ፤ ናምኣቲካ ጌዴ ኢዛ ሲንꬅ ሺቂዳ።
NUM 12:6 ጎዳይ ኢስታስ፥ «ሄኮ ሃኢ ታ ኢንቴና ጊዛይሳ ኣኬኪ ሲዪቴ! «ኢንቴ ጊዶን ናቤቲ ዲኮ፥ ታኒ ታና ኢስታስ ኣጁታን ቆንጪሳይስ፤ ኣጉሞን ኢስታ ሃሳይሳይስ።
NUM 12:7 ታኒ ታስ ሃጋዚዛ ሙሴራ ጊዲኮ ሄሳ ማላን ሃሳይኬ፤ ኢዚ ታ ኬꬃን ኣማኔቲዳ ኣሳ።
NUM 12:8 ሄሳ ጊሻስ ታኒ ኢዛራ ሲንꬃን ቆንጬራ ሃሳያይስ ኣቲን ጉዬራ ቆታን ሃሳይኬ፤ ኢዚ ታ ሜꬋ ቤዬስ፤ ሂስቲን ኢንቴ ታ ኦሳንቻዛ ሙሴ ቦላ ዋኒ ያዮንታ ካꬌ ቃላ ሃሳይዴቲ?» ጊዴስ።
NUM 12:9 ጎዳ ሃንቆይ ኢስታ ቦላ ታማ ማላ ኤጺ ኬዚዴስ፤ ኢዚካ ኢስታ ሄን ኣጊ ቢዴስ።
NUM 12:10 ሻራዚ ዱንካኔዛ ቦላፌ ዴንዲ ቢን ማራማ ኢንቺራቻ ሃርጋንቻ ጊዳዱስ፤ ኢንቺራቻ ሃርጌዚካ ኢዚ ቦላ ሻቻ ማላ ቦꬂዴስ፤ ኣሮኔይ ማራሞ ቤዪሺን ኢዛ ኢዛስ ኢንቺራቻ ሃርጋንቻ ጊዳ ቤታዱስ።
NUM 12:11 ኣሮኔይ ሙሴስ፥ «ታ ጎዶ! ኑኒ ኔ ቦላ ኦꬂዳ ናጋራ ጋሶን ሃይሲ ኢታ ቂጻቴይ ኑ ቦላ ፖሌታና ማላ ኦꬆፋርኪ!
NUM 12:12 ኢዛካ ባ ኣዪ ኡሎን ሃይቃዳ ኢዚስ ባጋ ኣሳቴꬃይ ሜቴቲቺን ዬሌቲዳ ኣዉጫያ ና ማላ ኦꬆፋርኪ!» ጊዴስ።
NUM 12:13 ሄሳ ጊሻስ ሙሴይ፥ «ጾሳዉ! ኢዞ ፓꬃርኪ!» ጊዲ ፑዴ ጎዳኮ ዋሲዴስ።
NUM 12:14 ጎዳይካ ሙሴስ፥ «ኢዚ ኣዋይ ኣይፌሶን ጩች ጩቲዳራካ ዬላታዳ ላፑን ጋላስ ጋካናስ ጋምኣ ኤሬኬ? ሄሳ ጊሻስ ኢዛ ኣሳይ ዲዛ ሄራፔ ኬዛዳ ላፑን ጋላስ ጋካናስ ኣሲ ባይንዳሶን ታካሹ፤ ሄሳፌ ጉዬ ኣሳይ ዲዛሶ ጌላናስ ዳንዳያዉስ» ጊ ዛሪዴስ።
NUM 12:15 ሄሳ ጊሻስ ማራማ ኣሲ ዲዛ ጉታፔ ካሬ ኬዛዳ ላፑን ጋላስ ጋካናስ ባና ጌንꬃዱስ፤ ኢዛ ሄፔ ሲማና ጋካናስ ዴሬዚ ባ ዲዛሶፔ ሃራሶ ቃጺቤና።
NUM 12:16 ሄሳፌ ጉዬ ኣሳይ ሃጺሮቴፔ ዴንዲዲ ፓራኔ ባዞን ዱንካኒ ኡቲዴስ።
NUM 13:1 ጎዳይ ሙሴስ ሂዝጊዴስ፥
NUM 13:2 «ታማኔ ናምኡ ኢስራኤሌ ኣሳ ጋርሳፌ ዴሬ ካሌꬂዛይታ ዶራዳ ታኒ ኢስራኤሌ ኣሳስ ኢማና ጊዳ ካናኔ ቢታዮ ጾሞሲ ጼሊዲ ያና ማላ ዬዳ።»
NUM 13:3 ሙሴይካ ጎዳይ ኢዛ ኣዛዚዳ ማላ ኢስራኤሌ ኣሳ ካሌꬂዛይታ ጊዶፌ ፓራኔ ባዞፌ ታማኔ ናምኡ ኣሳታ ዬዲዴስ።
NUM 13:4 ሄ ኣሳታ ሱንꬃይካ ሃይሳፌ ካሊዛይሳ፤ ኦሮቤሌ ዛርኬፌ ዛኩሬ ና ሻሙኤ፥
NUM 13:5 ሲሞና ዛርኬፌ ሆሬ ና ሳፋጼ
NUM 13:6 ዩሁዳ ዛርኬፌ ዮፊኔ ና ካሌቤ፥
NUM 13:7 ዪሳኮሬ ዛርኬፌ ዮሴፌ ና ዪጊኣሌ፥
NUM 13:8 ኤፍሬሜ ዛርኬፌ ናዌ ና ሆሴኤ፥
NUM 13:9 ቢኒያሜ ዛርኬፌ ኤራፎ ና ፓሊጼ፥
NUM 13:10 ዛቢሎኔ ዛርኬፌ ሳዴ ና ጋዱኤሌ፤
NUM 13:11 ዮሴፌ ዛርኬፌ ሚናሴ ባጋ ጊዲዳ ሱሴ ና ጋዴዬ፥
NUM 13:12 ዳኔ ዛርኬፌ ጋማሌ ና ኣምኤሌ፥
NUM 13:13 ኣሴሬ ዛርኬፌ ሚካኤሌ ና ሳቱሬ፥
NUM 13:14 ኒፍታሌሜ ዛርኬፌ ዋፊሴ ና ናሂቤ፥
NUM 13:15 ጋዴ ዛርኬፌ ማኬ ና ጋኡኤሌ።
NUM 13:16 ሄይቲ ዴሬዛ ሃኖታ ጾሞሲ ጼሊዲ ያና ማላ ሙሴይ ኪቲዳይታ፤ ናዌ ና ሆሴኤ፥ «ኢያሶ» ጊዲ ኢዛ ሱንꬃ ላሚዴስ።
NUM 13:17 ሙሴይ ኢስታ ኪቲ ዬዲሼ፥ «ኢንቴ ቢሼ ኔጌቤ ባጋራ ኣꬊዲ ፑዴ ጌዜ ቢታ ቢቴ።
NUM 13:18 ሄ ዴሬያ ኣይ ሚሳቲዛኮ፥ ኣይ ኬና ኣሲ ኢዚን ዲዛኮ ቃሴካ ኣሳ ሚኖቴꬂ ኣይ ማላኮ ጾሞሲ ጼሊዲ ዪቴ።
NUM 13:19 ሄ ቢታያ ኢታኮኔ ሎኦኮ ኣሳይ ዲዛ ካታማያ ጊምቤታ ኡቲዳኮ ዎይኮ ጊምቤቶንታ ጮ ሜላ ዲዛኮ ጾሞሲ ጼሊቴ።
NUM 13:20 ቢታያ ሞꬎኮኔ ቃላኮ፥ ዎራኮኔ ጮ ዲዛኮ ጾሞሲ ጼሊቴ፤ ሚኒቴ! ሄ ቢታን ዲዛ ሚꬃ ኣይፌታፔ ኤኪ ዪቴ» ጊዴስ፤ ኢስቲ ሄ ቢዳ ዎዴይ ዎይኔ ሚꬃ ኣይፌይ ቴሪዛ ዎዴ።
NUM 13:21 ሄሳ ጊሻስ ሄ ዎዴ ኣሳይ ፑዴሃ ባጋ ዴሬ ቢዴስ፤ ሄ ዴሬዛን ዲዛ ጺኔ ባዞፌ ዶሚዲ ጌዴ ሃማቴ ኣꬊ ቢዛሶዛ ማታን ዲዛ ኤራሆቤ ጋካናስ ዩዪ ጼሊዳ።
NUM 13:22 ኮይሮ ጌዴ ኔጌቤ ቢዲ ሄራ ኬብሮኔ ጋኪዳ፤ ኬብሮኔይካ፥ «ኤናቄ» ጌቴቲዛ ጌሳኔ ጉባ ጊታ ኣሳታ ዜሬꬅ ጊዲዳ ኣሂማኔ፥ ሻሻዬኔ ታሊማዬ ጌቴቲዛ ዛርኬቲ ዲዛ ቢታ። [ኬብሮኔይ ጊብጼን ዲዛ ጻኖሴ ካታማይፔ ላፑን ላይꬅ ሲንꬃታ ኤቃዱስ።]
NUM 13:23 ኢስቲ ሄራ ኣꬊዲ ጌዴ ኤሽኮሌ ሾባ ጋኪዳ፤ ሄፔካ ዎይኔ ሚꬃ ኣይፌራ ዲዛ ሃጋ ቃንጺ ኤኪዲ ሄ ዎይኔ ሚꬃ ኣይፌፔ ኢሲ ዉርጮ ኢሳዴይ ባርካ ቶካናስ ዳንዳዮንታ ዴጾ ጊዲዳ ጊሻስ ናምኡ ኣሳቲ ሚꬃን ኣꬂ ቶኪዳ፤ ኢዛራ ኢሲፌ ኦሮማኔ ሚꬃ ኣይፌኔ ባላሴ ሚꬃ ኣይፌ ኤኪ ዪዳ።
NUM 13:24 ሄሲ ሄ ሶሆዚ፥ «ኤሽኮሌ ሾባ» ጌቴቲዳ ጋሶይካ ኢስራኤሌ ኣሳይ ዎይኔ ሚꬃ ኢዛ ኣይፌ ዉርጮዛራ ጋꬂ ቃንጺ ኤኪዲ ዪዳሶ ጊዲዳ ጊሻሳ።
NUM 13:25 ኢስቲ ቢታዮ ኦይዱ ታሙ ጋላስ ጾሞሲ ጼሊዳፔ ጉዬ ኣጊ ሲሚዳ።
NUM 13:26 ፓራኔ ባዞን ቃዴሴን ዲዛ ሙሴኮ፥ ኣሮኔኮኔ ኢስራኤሌ ማባራ ኩሜꬃኮ ሲሚ ዪዲ ባንቲ ቤይዳይሳ ኡባ ቆንጪሲ ዮቲዳ፤ ባንቲ ኤኪ ዪዳ ሚꬃ ኣይፌዛካ ኢስታ ቤሲዳ።
NUM 13:27 ኢስቲ ሙሴስ፥ «ኑኒ ቢታዮ ጾሞሲ ቤኢዲ ኣዳፌካ ኢዛ ማꬂኔ ኤሲ ኩሚዳ ዱሬ ዴሬ ጊዲዳሮ ሻኪ ኤሪዶስ፤ ሄ ቢታያ ኢሚዛ ኣይፌዛ ሃይሳ ቤያ።
NUM 13:28 ጊዶ ኣቲን ሄ ዴሬዪን ዲዛ ኣሳይ ዳሮ ሚኖ፤ ሄሳፌ ቦላራ ኢስታ ካታማቲካ ዳሮ ጊታታኔ ጊምቤይ ዩዪ ኣꬊዳይታ፤ ሄሲ ሄሳ ጊዲሺን ኣሳይ ቃሴ ጌሳኔ ጉባ ጊታ ጊዲዳ ኤናቄ ዜሬꬃታ ኑ ቤይዶስ።
NUM 13:29 ኣማሌቄ ኣሳይ ኔጌቤን ዲሺን፥ ሂቴ ኣሳይ፥ ያቡሴ ኣሳይኔ ኣሞሬ ኣሳይ ቦላ ጌዜ ቢታን ካናኔ ኣሳይ ቃሴ ዮርዳኖሴ ሃꬃ ጋጻኒኔ ሜዲቴራኔ ኣባ ኣቻን ዴቴስ» ጊ ዮቲዳ።
NUM 13:30 ካሌቤይ ቃሴ ሙሴ ሲንꬃን ኣሳ ጮኡ ሂስቲዲ፥ «ኑኒ ኢስታ ጾናናስ ኑስ ጊዲዛ ዎልቃይ ዲዛ ጊሻስ ኑኒ ሃኢ ቢዲ ሄ ቢታዮ ኣኔ ኦይኮስ» ጊዴስ።
NUM 13:31 ካሌቤራ ቢዳ ኣሳቲ ቃሴ፥ «ኑኒ ኢስታ ቦላ ሜቶ ጋꬃናስ ሙሌካ ኑስ ዎልቃይ ባዋ፤ ሄ ዴራን ዲዛ ኣሳይ ኑፔ ዳሮ ሚኖ» ጊዳ።
NUM 13:32 ኢስቲ ጾሞሲ ጼላና ቢዳ ዴሬዛ ጊሻስ ኢስራኤሌ ኣሳስ ኤሂ ዮቲዳ ዮኦይ ኣሳስ ዲዛ ሂዶታ ቃንጺሲዛ ዮኦ፤ ኢስቲ ቃሴካ፥ «ኑኒ ኢዞ ጾሞሲ ጼሊዳ ቢታያ ኢዚን ዳናስ ቢዛ ኣስ ሚቲዛ ቢታ፤ ኑኒ ሄን ቤይዳ ኣሳይካ ጌሳኔ ጉባ ጊታ።
NUM 13:33 ኔፍሌሜ ባጋ ጊዲዳ ኤናቄ ናይታ ኑኒ ሄን ቤይዶስ፤ ኑኒ ኢስታ ኣቻን ቄሪ ጉምባሮ ሚሳቲዶስ፤ ኢስቲካ ኑና ሄሳꬆ ጼሎንታ ኣጌቴና» ጊዳ።
NUM 14:1 ዴሬዚ ሄ ጋላሳ ኦማርስ ኩሜꬅ ባ ቃላ ꬎቁ ሂስቲዲ ዋሲሼ ኣቂዴስ፤
NUM 14:2 ኩሜꬃ ኢስራኤሌ ማባራይ ሙሴ ቦላኔ ኣሮኔ ቦላ ዙዙሚሼ፥ «ኑኒ ካሴ ሄን ጊብጼን ዲሼ ዎይኮ ሃይሳ ሃ ባዞ ቢታን ሃይቂዳኮ ኑስ ሎኦኮሺን!
NUM 14:3 ጎዳይ ኑና ሂኖ ሄ ዴሬዮ ኣዛስ ኤፊዜ? ኑኒ ዉሪካ ኦላን ዉራናስ ዶስ፤ ኑ ማቼቲኔ ኑ ናይቲካ ዲኤታና፤ ሄሳፌ ኑኒ ዱጌ ጊብጼ ሲሚኮ ኑስ ሎኣና» ጊዳ።
NUM 14:4 ሄሳ ጊሻስ ኢስቲ ባ ጋርሳን ኢሶይ ኢሳራ፥ «ኣኔ ሃ ዪቴ! ኑና ካሌꬃና ኣስ ዶሪዲ ኣኔ ኣጊ ጉዬ ጊብጼ ሲሞስ» ጊ ሃሳዬቲዳ።
NUM 14:5 ሄ ዎዴ ሙሴይኔ ኣሮኔይ ኩሜꬃ ዴራ ሲንꬃን ቢታ ቦላ ጉፋኒዳ።
NUM 14:6 ቢታዮ ጾሞሳናስ ኪቴቲዳ ኣሳታፔ ናዌ ና ኢያሶይኔ ዮፊኔ ና ካሌቤይ ዮኦዛን ዳሮ ጬጪዲ ባንታ ማይኦዛ ዳኪዳ።
NUM 14:7 ኢስቲ ዴሬዛስ፥ «ኑኒ ቢዲ ዩዪ ጾሞሲ ጼሊዳ ቢታያ ኬሃ ሎኦ ቢታ።
NUM 14:8 ጎዳይ ኑናን ኡፋዬቲዳ ጊዲኮ ኢዚ ኑና ሄ ኤፋና፤ ኤሲኔ ማꬂ ኢዚን ኩሚዳ ጋሳ ቢታዮ ኢዚ ኑስ ኢማና።
NUM 14:9 ኢንቴ ጊዲኮ ጎዳ ቦላ ማካሎፍቴ! ሄን ዲዛ ዴሬዛስካ ባቦፍቴ! ኑኒ ኢስታ ቂሶን ጾናና፤ ጎዳይ ኑናራ ዴስ፤ ኢስታ ቦላፌ ኤሾይ ዴንዲቺዳ ጊሻስ ኢንቴ ኢስታስ ሙሌካ ባቦፍቴ!» ጊዳ።
NUM 14:10 ኢስታ ሹቻራ ጫዲ ዎꬋናስ ኩሜꬃ ማባራይ ኢስታ ቦላ ዴንዲዴስ፤ ጊዶ ኣቲን ጎዳ ቦንቾይ ኢስራኤሌ ኣሳ ኩሜꬃስ ጋይቶቴꬃ ዱንካኔዛን ቆንጪዴስ።
NUM 14:11 ጎዳይ ሙሴስ፥ «ሃይሲ ዴሬዚ ኣይዴ ጋካናስ ታና ካꬋኔ? ታኒ ዴሬዛ ሲንꬃን ዳሮ ማላታ ኦꬃዲስ፤ ሂስቲን ዴሬዚ ታናን ኣማኔቶንታ ኣይዴ ጋካናስ ኢጻኔ?
NUM 14:12 ሄኮ ሃኢ ታኒ ኢታ ሃርጌ ኢስታ ቦላ ኤሃዳ ኢስታ ኡባ ዉርሳና፤ ኔና ጊዲኮ ኢስታፌ ኣꬊዛ ሚኖ ካዎቴꬃስ ኣዋሳና» ጊዴስ።
NUM 14:13 ሙሴይ ጊዲኮ ጎዳስ፥ «ኔኒ ሃይሳ ዴሬዛ ኔ ዎልቃን ጊብጼፔ ኬሳዳሳ፤ ኔኒ ሃይሳ ኔ ዴሬዛ ቦላ ኦꬂዳይሳ ጊብጼ ኣሳይ ሲዪዳ ዎዴ፥
NUM 14:14 ሄሳ ሃኒዳ ዮኦ ኡባ ሃይሳ ዴሬዛን ዲዛ ኣሳ ኩሜꬃስ ኢስቲ ዮታና፤ ሃይቲ ሃ ኣሳቲ ኔኒ ጎዳይ ኑናራ ዲዛይሳኔ ሻራይ ኑፔ ቦላራ ቆንጬን ቤቲዛ ማላ ኔኒ ጋላስ ጋላስ ሻራ ማላ ቱሳን ኦማርስ ኦማርስ ታማ ማላ ቱሳን ጊዳዳ ኑፔ ሲንꬄ ኣꬋ ካሌꬂዛይሳ ሲዪሼ ጋምኢዳ።
NUM 14:15 ሂስቲን ኔ ሃኢ ኔ ኣሳ ዉርሳ ዎꬊኮ ኔ ጎባቴꬃ ሲዪዳ ካዎቴꬅ ኡባይ፥
NUM 14:16 ኔና፥ ‹ኢዚ ባ ዴሬዛ ጌልꬃና ጊዲ ካሴ ጫቂዳ ጫቆዛ ፖላናስ ዳንዳዮንታ ኣጊዳ ጊሻስ ኢስታ ባዞን ዎꬊ ꬋይሲዴስ› ጋና።
NUM 14:17 ጎዶ ሃይሳፌ ካሴ ኔኒ፥ ‹ጎዳይ ኤሌ ሃንቄቲ ኤሬና፤ ኢዛ ማሮቴꬃይኔ ኢዛ ሲቆይ ዳሮ፤ ኢዚ ናጋራኔ ጌላቴꬃ ኣቶ ጋና፤ ጊዶ ኣቲን ናይታኔ ኢስታስ ናይታ ናይታ ጋካናስ ኢስቲ ዬሊዳይታ ናጋራ ጊሻስ ታ ኢስታ ቃጻያና› ጊዳ ማላ ፖላዳ ኔ ዎልቃ ቤሳ።
NUM 14:19 ሃኢካ ጎዶ! ላሜቶንታ ኔ ጊታ ሲቆዛን ኢስቲ ጊብጼፔ ኬዞሶፌ ሃኖ ጋካናስ ኔ ኢስታ ማሪዳ ማላ ሃይሳ ዴራ ናጋራ ኔ ማራና ማላ ታ ኔና ዎሳይስ» ጊዴስ።
NUM 14:20 ጎዳይካ ሙሴስ፥ «ኔ ታና ኦይቺዳ ማላ ታ ኢስታ ማራዲስ።
NUM 14:21 ጊዶ ኣቲን ታኒ ዴኦን ዲዛ ማላኔ ታ ቦንቾይ ቢታ ኡባን ኩሚዳ ማላ፥
NUM 14:22 ታኒ ኢስታስ ጊብጼኒኔ ሃይሳ ባዞ ቢታን ኦꬂዳ ጊታ ማላታኔ ታ ቦንቾዛ ቤኢዲ ታስ ኣዛዜቶንታ ኢጺዳይታፔኔ ታሙቶ ታና ፓጪዳ ኣሳታፔ ኦኒካ፥
NUM 14:23 ታኒ ካሴ ኢስታ ኣዋታስ ኢማና ጋዳ ጫቂዳ ቢታዮ ኢስቲ ሙሌካ ጌሌቴና፤ ታና ካꬊዳይ ኦኒካ ኢዞ ሙሌራ ቤኤና።
NUM 14:24 ጊዶ ኣቲን ታ ኦሳንቻ ካሌቤስ ሃንኮይታፔ ዱማ ቆፋይ ኢዛስ ዲዛ ጊሻሲኔ ኢዚ ታና ኩሜꬃ ዎዚናፔ ካሊዳ ጊሻስ ኢዚ ቢዲ ካሴ ዩዪ ጼሊዳ ቢታዮ ታ ኢዛስ ኢማና፤ ኢዛ ዜሬꬃቲካ ሄ ቢታዮ ላታና።
NUM 14:25 ኣማሌቄ ዴሬ ኣሳይኔ ካናኔ ዴሬ ኣሳይ ሾባ ጊዶን ዲዛ ጊሻስ ኢንቴ ዎንቶ ጉዬ ሲሚዲ ዞኦ ኣባ ባጋራ ኤፊዛ ኦጌዛራ ጌዴ ባዞ ሲሚ ቢቴ» ጊዴስ።
NUM 14:26 ጎዳይ ሙሴሲኔ ኣሮኔስ ሂዝጊዴስ፥
NUM 14:27 «ሃይቲ ኢታ ኣሳቲ ኣይዴ ጋካናስ ታ ቦላ ዙዙማኔ? ሃ ዙዙሜቲዛ ኢስራኤሌ ኣሳይ ታ ቦላ ዙዙሜቲሺን ታ ሲያዲስ።
NUM 14:28 ኔ ኢስታስ፥ ‹ታኒ ታ ዴኦ ሱንꬃን ጫቃይስ፤ ታኒ ኢንቴ ሃሳይሺን ታ ሃይꬃን ሲዪዳ ማላ ኢንቴ ቦላ ኦꬃና፤ ታኒ ጎዳይ ሃይሳ ዮታዲስ።
NUM 14:29 ኢንቴ ታ ቦላ ዙዙሜቲዳ ጊሻስ ኢንቴ ጋርሳፌ ቆዴቲሺን ላይꬃይ ናምኡ ታሙኔ ኢዛፔ ቦላራ ጊዲዳይታ ኡባ ኣሃይ ሃይሳ ባዞ ቢታን ኩንዲ ኣታና።
NUM 14:30 ኢንቴ ሄ ዴሬዮ ጌሊዲ ዴኣና ማላ ካሴ ታ ኢንቴስ ጫቃዲስ፤ ጊዶ ኣቲን ዮፊኔ ና ካሌቤፔኔ ናዌ ና ኢያሶፔ ኣቲን ኢንቴፌ ኢሳዴይካ ሄ ቢታዮ ጌሌና።
NUM 14:31 ዲኤቲዲ ኣታና ጌቴቲዳ ኢንቴ ናይታ ኢንቴ ካꬊዳ ቢታዮ ታ ጌልꬃና፤ ሄ ቢታዮ ታ ኢስታ ላቲሳና።
NUM 14:32 ኢንቴ ኣሃይ ጊዲኮ ሃይሳ ሃ ባዞዛን ኩንዲ ኣታና።
NUM 14:33 ኢንቴ ናይቲ ኢንቴ ኣማኖንታ ኢጺዳ ጋሶን ኢንቴፌ ዉርሴꬃን ሃይቂዛዴ ኣሃይ ባዞ ቢታን ኩንዲ ኣታና ጋካናስ 40 ላይꬅ ኩሜꬅ ጊታ ሜቶ ኤኪሼ ሃይሳ ሃ ባዞዛን ቶይላታና።
NUM 14:34 ኢንቴ ሄ ቢታ ጾሞሲ ጼሊዳ 40 ጋላሳ ቆዳን ኢሲ ጋላሳዮ ኢሲ ላይꬅ፥ ሄሲካ ኦይዱ ታሙ ላይꬅ ኩሜꬅ ኢንቴ ኢንቴ ናጋራ ጊሻስ ዋዬታና፤ ታኒ ኢንቴ ቦላ ዴንዲዳይሳ ኢንቴ ሄሳን ኤራና።
NUM 14:35 ታ ቦላ ዴንዲዳ ኢታ ኣሳታ ቦላ ታኒ ሃይሳ ኡባ ኦꬃና፤ ሃይሳ ባዞዛን ኡባቲካ ዉሪ ዉራና፤ ኡባቲካ ሃይቃና፤ ታኒ ጎዳይ ሃይሳ ዮታዲስ› ጋ ዮታ።»
NUM 14:36 ሙሴይ ካናኔ ቢታዮ ጾሞሲ ጼላናስ ኪቲ ዬዲዳ ኣሳቲ ቢዲ ቢታዮ ቤዪ ሲሚዳፔ ጉዬ ሄ ቢታይ ጊሻስ ኢታ ዎሬ ኤሂዲ ዴሬዚ ባ ጋርሳን ዙዙሜታና ማላ ኦꬂዳ።
NUM 14:37 ሄ ኣሳቲ ጎዳ ሲንꬃን ቦሻን ሾጬቲ ሃይቂዳ።
NUM 14:38 ሄ ቢታዮ ቢዲ ጾሞሲ ጼሊዳ ኣሳታ ጊዶፌ ናዌ ና ኢያሶይኔ ዮፊኔ ና ካሌቤይ ጻላ ሼምፖራ ፓጻ ኣቲዳ።
NUM 14:39 ጎዳይ ጊዳይሳ ሙሴይ ኢስራኤሌ ኣሳስ ዮቲን ኣሳይ ጫሞ ዬሆ ዬኪዴስ።
NUM 14:40 ዎንቴꬃ ጋላስ ዎንታ ማላዶራ ኢስቲ ዴንዲዲ ፑዴ ጌዜቲዛሶ ኬዛናስ ጊጌቲዲ፥ «ኑኒ ናጋራ ኦꬆይሳካ ዛሪ ኣኬኪዶስ፤ ሃኢ ጊዲኮ ኑኒ ካሴ ጾሲ ኑና ጌልꬃና ጊ ሂዶታ ኢሚዳ ዴሬዮ ባናስ ጊጌቲዶስ» ጊዳ።
NUM 14:41 ሙሴይ ጊዲኮ ኢስታስ፥ «ሂስቲን ኢንቴ ጎዳስ ሃኢካ ኣይስ ኣዛዜቴኬቲ? ኢንቴ ቆፒዳይሲ ኢንቴስ ሱሬና።
NUM 14:42 ሄሳ ጊሻስ ኢንቴ ሄ ቦፒቴ፤ ጎዳይ ኢንቴናራ ጊዶንታ ጊሻስ ኢንቴ ሞርኬቲ ኢንቴና ጾናና።
NUM 14:43 ኣማሌቄ ኣሳይኔ ካናኔ ኣሳይ ኢንቴናራ ሄን ኦሌታና፤ ጊዶ ኣቲን ኢንቴ ጎዳ ኣጊዳ ጊሻሲኔ ኢዚ ኢንቴናራ ባይንዳ ጊሻስ ኢንቴ ሄ ኦላን ሃይቃና» ጊዴስ።
NUM 14:44 ሙሴ ጊዲን ጫቆ ቃላ ታቦታዚ ካሴ ባ ዲዛ ሄራፔ ዴንዶንታ ዲሺን ኢስቲ ፑዴ ጌዜ ቢታዮ ኦላናስ ጻላቴꬃን ዴንዲዳ።
NUM 14:45 ሄሳፌ ጉዬ ሄ ዴሬን ዲዛ ኣማሌቄ ኣሳይኔ ካናኔ ኣሳይ ኢስታ ቦላ ሜቶ ጋꬂዲ ጾኒዳ ሆርማ ጋካናስ ጎዲ ዬዲዳ።
NUM 15:1 ጎዳይ ሙሴስ ሂዝጊዴስ፥
NUM 15:2 «ኔኒ ኢስራኤሌ ኣሳስ፥ ‹ታ ኢንቴስ ኢማና ቆፒዳ ቢታዮ ኢንቴ ጌሊዳ ዎዴ፥
NUM 15:3 ጹጌቲዛ ያርሾስ ዎይኮ ኣዲና ጊሻስ ያርሼታና ያርሾስ ዎይኮ ኣሲ ባ ሎኦ ቆፋፔ ሺሺዛ ያርሾ ጊሻስ፥ ዎይኮ ሎሴ ባኣሌታ ዎዴ ሺቂዛ ያርሾታ ሚዛፔ ዎይኮ ዶርሳፌ ጎዳስ ኢንቴ ሺሻንዴታ፤ ሄሳ ሚሳቲዛ ያርሾይ ጎዳ ሳዊዛ ያርሾ ጊዳና።
NUM 15:4 ሄሳ ጊሻስ ሄሳ ማላ ሺሺዛ ኣሲ ዉሪ ኢሲ ሊቲሮ ጊዳና ዛይቴን ኢሲ ኪሎ ጊዲዛ ሊቆ ꬊሌፌ ሙኑቄቲዳ ካꬃ ያርሾ ሺሻናስ ቤሴስ።
NUM 15:5 ቃሴ ጹጌቲዛ ያርሾስ ዎይኮ ሃራ ያርሾስ ኤሂዛ ኢሲ ኢሲ ዶርሳ ላቃራ ኢሲ ሊቲሮ ዎይኔ ኡሻ ያርሾ ሺሺቴ።
NUM 15:6 « ‹ꬋርሾ ያርሾስ ሺሺዛ ዎዴ ቃሴ ናምኡ ኪሎ ꬊሌ ኢሲ ሊቲሮኔ ሳይሶ ጊዲዛ ዎጋራ ዛይቴን ሙኑቂዲ ሺሺቴ።
NUM 15:7 ኡሻ ያርሾስ ኢሲ ሊቲሮኔ ሳይሶ ጊዲዛ ዎይኔ ኡሹ ሺሻ፤ ሄሲ ዉሪካ ሎኦ ጎዳ ሳዊዛዚኔ ኡፋይሲዛዝ ጊዳና፤
NUM 15:8 « ‹ኔኒ ኢሲ ሚርጎ ኣዲናስ፥ ዎይኮ ኢሲፌቴꬃ ያርሾስ፥ ዎይኮ ጹጌቲዛ ያርሾስ፥ ዎይኮ ሃራ ያርሾስ ሺሺዛ ዎዴ፥
NUM 15:9 ሄ ሚርጎዛራ ሄꬑ ኪሎ ጊዲዛ ሊቆ ꬊሌፌ ናምኡ ሊቲሮ ዛይቴን ሙኑቄቲዳ ካꬃ ያርሾ ሺሻ።
NUM 15:10 ሄሳꬆካ ኡሻ ያርሾስ ናምኡ ሊቲሮ ጊዲዛ ዎይኔ ኡሹ ሺሻ፤ ሄሲካ ጎዳ ኡፋይሲዛ፥ ሳዊዛዛኔ ጹጌቲዛ ያርሾ ጊዳና።
NUM 15:11 ሄሳ ጊሻስ ኢሲ ኢሲ ሚርጎ፥ ዎይኮ ኢሲ ኢሲ ꬋርሾ ዎይኮ ꬋርሾ ላቃ ዎይኮ ኮርቤ ላቃ ያርሾስ ሺሺዛ ዎዴ ኢሲፌ ሺቂዛ ካꬃ ያርሾይ ሄሳ።
NUM 15:12 ኢሲ ሜሄፔ ቦላራ ሺቂዛ ዎዴ ኢዛራ ኢሲፌ ሺቂዛ ካꬃ ያርሾይ ሄሳ ማላ ጉጄቴስ።
NUM 15:13 ዴሬን ዬሌቲዳ ኢስራኤሌ ኣሳፔ ኢሶይ ኢሶይ ጹጌቲዛ ያርሾኔ ሳዎይ ጎዳ ኡፋይሲዛ ያርሾ ሺሺዛ ዎዴ ሄሳꬆ ኦꬃናስ ቤሴስ።
NUM 15:14 ሲንꬃፌ ያና ዬሌታን ኢንቴናራ ዲዛ ቤቴ ኣሲ ዎይኮ ኢንቴ ጋርሳን ዲዛ ሃራ ዴሬ ኣሲ ኦኒካ ጹጌቲዛ ያርሾ ዎይኮ ጎዳ ኡፋይሲዛ ካꬃ ያርሾ ጎዳስ ሺሻና ኮይኮ ኢዛዴይካ ኢንቴ ኦꬂዛይሳ ማላ ኦꬃናስ ቤሴስ።
NUM 15:15 ኢንቴ ኡባቲካ ኢንቴ ጊዶን ዲዛ ኣሳ ዴሬ ኣሳቲካ ሃይሳፌ ያና ላይꬃታን ኡባታን ሃይታ ዎጋታ ኢሲ ማላ ናጋናስ ኢንቴስ ቤሴስ፤ ኢንቴኒኔ ኢስቲ ኡባቲ ጎዳ ሲንꬃን ኢሲኖ።
NUM 15:16 ኢንቴሲኔ ኢንቴናራ ዲዛ ሃራ ዴሬ ኣሳ ኡባስ ዲዛ ዎጋይኔ ማራይ ኢሲኖ ጊዶ› ጋ ዮታ።»
NUM 15:17 ጎዳይ ሙሴስ ሂዝጊዴስ፥
NUM 15:18 «ኔኒ ኢስራኤሌ ኣሳስ፥ ‹ታ ኢንቴና ካሌꬂዛ ቢታዮ ኢንቴ ጌሊዛ ዎዴ፥
NUM 15:19 ሄ ቢታይን ካጺዛ ካꬅ ኡባ ሚዛ ዎዴ ሄ ካꬃፌ ጎዳስ ኢሞታ ኢሚቴ።
NUM 15:20 ሄሲካ ኮይሮ ꬊሌዛፔ ኡኬꬅ ኡኪዲ ባሌፔ ኢሜቲዳ ያርሾ ኦꬂዲ ሺሺቴ።
NUM 15:21 ቡሮፔ ያና ዬሌታ ኡባን ኮይሮ ꬊሌዛፔ ኤኪዲ ጎዳስ ኢሞታ ሺሺቴ።
NUM 15:22 « ‹ጎዳይ ሙሴስ ኢሚዳ ኣዛዞታፔ ኢሳ ኢንቴ ኤሮንታ ሞሪዛ ጊዲኮ፥
NUM 15:23 ዎይኮ ሲንꬃፌ ያና ዬሌታቲ ሙሴ ባጋራ ኢሜቲዳ ኣዛዞዛ ፖሎንታ ኣጊኮ፥
NUM 15:24 ሄሳ ማላ ባላይ ማባራይ ኤሮንታ ሃኒኮ ኢሲ ሚርጎ ኤሂዲ ጎዳ ሳዊዲ ኡፋይሲዛ ያርሾኔ ጹጌቲዛ ያርሾ ኢዛስ ሺሼቶ፤ ዎጋዚ ኣዛዚዛ ማላ ካꬃ ያርሾኔ ኡሻ ያርሾ ኢዛራ ኢሲ ቦላ ጋꬂ ሺሼቶ፤ ሄሳፌካ ቦላራ ኢሲ ዴይሻ ኦርጌ ናጋራ ያርሾስ ሺሼቶ።
NUM 15:25 ቄሴዚ ኩሜꬃ ኢስራኤሌ ማባራ ናጋራ ዉርሶ፤ ኢስቲ ኤሮንታ ኦꬂዳ ናጋራ ጋሶን ጹጌቲዛ ያርሾኔ ካꬃ ያርሾ ሺሺዳ ጊሻስ ኢስታ ናጋራይ ኣቶ ጌቴታና።
NUM 15:26 ኡባይካ ኤሮንታ ዲሼ ናጋራ ኦꬂዳ ጊሻስ ኢስራኤሌ ኣሳ ዎይኮ ኢስታ ጊዶን ዲዛ ሃራ ዴሬ ኣሳ ናጋራይ ኣቶ ጌቴታና።
NUM 15:27 « ‹ኢሲ ኣሲ ኤሮንታ ናጋራ ኦꬂኮ ኢሲ ላይꬃ ዴይሻ ላቃ ባ ናጋራ ጊሻስ ያርሾስ ሺሾ።
NUM 15:28 ኤሮንታ ዲሼ ናጋራ ኦꬂዳዴስ ኢዛ ናጋራይ ኣቶ ጌቴታና ማላ ቄሴዚ ጎዳ ሲንꬃን ኢዛ ናጋራ ዉርሶ፤ ኢዛ ናጋራይካ ኣቶ ጌቴታና።
NUM 15:29 ኢስራኤሌ ዴሬን ዬሌቲዳ ኢስራኤሌ ኣሲ ዎይኮ ኢስታ ጊዶን ዲዛ ኣሳ ዴሬ ኣሲ ኤሮንታ ዲሼ ናጋራ ኦꬂዳ ጊዲኮ ኡባስ ዲዛ ዎጋይ ኢሲ ማላ።
NUM 15:30 « ‹ጊዶ ኣቲን ኢስራኤሌ ዴሬ ኣስ ዎይኮ ሃራ ዴሬፔ ቤቲ ኢስታ ጊዶ ዪዳ ኣሲ ዎዚናይ ኤሪሺን ናጋራ ኦꬂዳ ኣሲ ዉሪካ ጎዳ ሌቂዳ ጊሻስ ዴሬዛፔ ሻኬቲ ꬋዮ።
NUM 15:31 ኢዛዴይ ጎዳ ሌቂዳ ጊሻሲኔ ኢዛ ኣዛዞታ ኤሪሼ ሞሪዳ ጊሻስ ሙሌራ ꬋዮ፤ ኢዛ ጎሜይ ኢዛራ ቦ› ጋ ዮታ።»
NUM 15:32 ኢስራኤሌ ኣሳይ ባዞን ዲዛ ዎዴ ኢሲ ጋላስ ኢሳዴይ ሳምባታ ጋላስ ሚꬅ ሚጺሼ ኦይኬቲዴስ።
NUM 15:33 ሄ ኢዛ ኦይኪዳ ኣሳቲ ኢዛ ኦይኪ ኤኪዲ ሙሴኮ፥ ኣሮኔኮኔ ኩሜꬃ ማባራይ ዲዛሶ ኤፊዳ።
NUM 15:34 ኢስቲካ ኢዛ ዎስታናኮኔ ኤሬቶንታ ኢጺን ጉꬃ ዎዴስ ቃሼቲሻና ማላ ዛቤስ ኢሜቲዴስ።
NUM 15:35 ሄሳፌ ጉዬ ጎዳይ ሙሴስ፥ «ሄ ኣዴዚ ሃይቆ! ኩሜꬃ ማባራይ ዲዛሶፔ ኢዛ ካሬ ኬሲዲ ሹቻራ ጫዲ ዎꬎ» ጊዴስ።
NUM 15:36 ሄሳ ጊሻስ ኩሜꬃ ማባራይ ባንቲ ዲዛ ጉታፔ ሃራሶ ኤፊዲ ጎዳይ ኣዛዚዳ ማላ ሹቻራ ኩራኪ ዎꬊዴስ።
NUM 15:37 ጎዳይ ሙሴስ ሂዝጊዴስ፥
NUM 15:38 «ኔኒ ኢስራኤሌ ኣሳስ፥ ‹ኢንቴ ማይኢዛ ማይኦስ ማጫራ ኬሲቴ፤ ኢሲ ኢሲ ማጫራይ ሳሎ ሚሳቲዛ ጺላታፔ ጊዶ፤ ሄሳካ ኢንቴ ቡሮፔ ያና ዬሌታ ኡባንካ ኣጎፍቴ።
NUM 15:39 ሄ ማጫራታ ኢንቴ ቤኢዛ ዎዴ ኡባን ታ ኣዛዞታ ሃሳኢ ኤኪዲ ፖሊቴ፤ ሂስቲኮ ኢንቴ ኢንቴ ኣይፌን ቤኢዳይሳኔ ኢንቴ ዎዚናን ኣሞቲዳይሳ ካሊዲ ታፔ ሻኬቴኬታ።
NUM 15:40 ማይኦታ ጼራን ዲዛ ማጫራታ ኢንቴ ቤኢዛ ዎዴ ታ ኣዛዞታ ኡባ ፖላና ማላ ኢስቲ ኢንቴና ቆፍሳና፤ ኢንቴካ ሙሌራ ታስ ሃሬቲዳይታ ጊዳና።
NUM 15:41 ታኒ ኢንቴ ጎዳ፤ ኢንቴስ ጎዳ ጊዳናስ ኢንቴና ጊብጼፔ ኬሲዳ ጾሳይ ታና› ጋ ዮታ።»
NUM 16:1 ሌዌ ዛርኬ ቃኣቴ ባጋፌ ዪጺሃሬ ና ቆሬይ፥ ኦሮቤሌ ዛርኬ ኤልያቤ ናይቲ ዳታኔይኔ ኣብራሜይ ቃሴካ ፓሌቴ ና ኦናይ ሜቶ ሜꬊዳ።
NUM 16:2 ኢስራኤሌ ኣሳ ጋርሳን ኤሬቲዳ ዴሬዛ ካሌꬃናስ ዶሬቲዳ 250 ኣሳታ ባንታ ቦላ ኤኪዲ ሙሴ ቦላ ዴንዲዳ።
NUM 16:3 ኢስቲካ ሙሴ ሲንꬃኒኔ ኣሮኔ ሲንꬃን ሺቂዲ ኢስታስ፥ «ኢንቴ ሙሌካ ዎጋፔ ኣꬊዴታ! ሃይሲ ዴሬዚ ኡባይ ጎዳስ ዱማቲዳ ዴሬ፤ ጎዳይካ ኢስታራ ዴስ፤ ሂስቲን ኢንቴ ጎዳ ዴራ ቦላ ኣዛስ ኢንቴና ꬎቁ ꬎቁ ሂስቴቲ?» ጊዳ።
NUM 16:4 ሙሴይካ ሄሳ ሲዪዳ ማላ ጉፋኒዲ ዎሲዴስ።
NUM 16:5 ቆሬሲኔ ኢዛ ካሊዛይታስ፥ «ዎንቶ ማላዶ ጎዳይ ኢዛስ ዱማቲዳይቲ ኦናንታኮ ኢዚ ሻኪ ኑና ቤሳና፤ ሄሲካ ባስ ጊዲዛይታኔ ባ ዶሪዳይታ ባስ ኦꬃና ማላ ባኮ ሺሺ ኤካና።
NUM 16:6 ዎንቶ ማላዶ ኔኒኔ ኔናራ ኢሲፌ ኦꬂዛይቲ ዉሪካ ኢንቴ ኢዛን ኤጻኔ ጩዋሲዛ ጺናዛ ኤኪ ዪቴ።
NUM 16:7 ኢስታ ቦላ ቦንቆ ታማኔ ኤጻኔ ዎꬂዲ ጌዴ ያርሾ ኢዛ ቦላ ያርሺዛሶ ሺሺቴ፤ ሄሳፌ ጉዬ ጎዳይ ኑፔ ኦና ባስ ዶሪዳኮ ኑ ቤያና፤ ኢንቴ ሌዌ ናይቲ ኬሂ ሞሪዴታ!» ጊዴስ።
NUM 16:8 ቃሴካ ሙሴይ ቆሬስ፥ «ኢንቴ ሌዌቲ ዎዚናን ዎꬂ ሲዪቴ!
NUM 16:9 ኢንቴ ጌዴ ኢዛኮ ሺቂዲ ጋይቶቴꬃ ዱንካኔ ጊዶን ኢንቴ ኢንቴ ኦሶ ፖላና ማላኔ ኢንቴ ኢስራኤሌ ኣሳ ሲንꬃን ኤቂዲ ኢስታስ ኦꬃና ማላ ኢስራኤሌ ጎዳይ ኢንቴና ሃንኮ ኢስራኤሌ ኣሳ ጋርሳፌ ሻኪ ዱማሲዳይሳ ኢንቴ ጮ ሜላ ላፋ ኣይፌን ጼሌቲ!
NUM 16:10 ኢዚ ኢንቴናኔ ሃንኮ ሌዌ ዛርኬታ ባኮ ሺሺዴስ፤ ኢንቴ ጊዲኮ ቄሴቴꬃ ኤካናስ ቃቃቴታ፤
NUM 16:11 ሄሳ ጊሻስ ኔኒኔ ኔናራ ዙፔቲዛይቲ ዉሪካ ጎዳ ቦላ ዴንዲዴታ፤ ኢንቴ ኣሮኔ ቦላ ዙዙሜታናስ ኢዚ ኦኔ?» ጊዴስ።
NUM 16:12 ሄሳፌ ጉዬ ሙሴይ ኤልያቤ ናይታ ዳታኔኔ ኣብራሜ ጼይጊሲዴስ፤ ኢስቲ ጊዲኮ፥ «ኑ ቦኮ!
NUM 16:13 ኑኒ ባዞን ሃይቃና ማላ ኔ ኑና ኤሲኔ ማꬂ ኩሚዳ ቢታፌ ኬሲዳይሲ ኔስ ጉጺን ሃኢ ቃሴ ኑ ቦላ ሃላቃ ጊዳናስ ኮያይ?
NUM 16:14 ኔኒ ኑና ሎኦ ካꬅ ኢሚዛ ጎሻ ጋዴ ኤሆንታይሲ ዎይኮ ኣታኪልቴራ ዲዛሶ ላቲሶንታይሲ ኤሬቲዳዛ፤ ሃኢ ቃሴ ኔ ኑና ባሌꬃናስ ኮያሳ፤ ሄሳ ጊሻስ ሃኢ ኑ ኔኮ ቦኮ!» ጊዳ።
NUM 16:15 ሙሴይካ ዳሮ ሃንቄቲዲ ጎዳስ፥ «ሃይቲ ኣሳቲ ኔስ ሺሺዛ ያርሾዛ ኔ ኤኮፋ፤ ታኒ ጊዲኮ ኢስታፌ ኢሳዴካ ቆሃቤኬ፤ ሃራይ ኣቶሺን ኢሲ ሃሬካ ኢስታፌ ኤካቤኬ» ጊዴስ።
NUM 16:16 ሙሴይ ቆሬስ፥ «ኔኒኔ ኔናራ ኢሲፌ ዲዛ 250 ኣሳይ ኣሮኔይ ዲዛሶ ጋይቶቴꬃ ዱንካኔኮ ዪቴ።
NUM 16:17 ኢንቴፌ ኢሳዴይ ኢሳዴይ ኢንቴ ኢንቴ ጺና ኦይኪ ዪቴ፤ ጺናዛ ጊዶን ኤጻኔ ጉጂቴ፤ 250 ጺናታራ ኢንቴ ኢንቴ ኤጻኔዛ ጎዳ ሲንꬃን ሺሻንዴታ፤ ኔኒኔ ኣሮኔይካ ኢንቴ ኢንቴ ኤጻኔ ኤጻኔ ሺሺቴ» ጊዴስ።
NUM 16:18 ሄሳ ጊሻስ ኢስቲ ዉሪካ ኢሶይ ኢሶይ ባ ጺናን ጺናን ኤጻኔ ጉጂ ኤኪዲ ጋይቶቴꬃ ዱንካኔ ፔንጌን ሙሴራኔ ኣሮኔራ ኢሲፌ ኤቂዳ።
NUM 16:19 ሄሳፌ ጉዬ ቆሬይ ኢስታራ ኤቄቲዲ ባናራ ዙፔቲዛይታ ጋይቶቴꬃ ዱንካኔዛ ፔንጌ ሺሺዳ ዎዴ ጎዳ ቦንቾይ ኩሜꬃ ዴራስ ቆንጪዴስ።
NUM 16:20 ጎዳይካ ሙሴሲኔ ኣሮኔስ ሂዝጊዴስ፥
NUM 16:21 «ሃይሳ ዴራ ኣቻፌ ሃኪ ኤቂቴ፤ ታኒ ኢስታ ኢሲቶ ኡባ ꬋይሳና።»
NUM 16:22 ሙሴይኔ ኣሮኔይ ሲንꬃ ጉꬅ ጉፋኒዲ፥ «ሼምፖራ ዲዛ ሜꬌታ ኡባስ ጎዳ ጊዲዳ ጾሶ! ኢሲ ኣሲ ኦꬂዳ ናጋራ ጌዶን ኔኒ ኩሜꬃ ዴራ ꬋይሳና ጋይ?» ጊዲ ጾሳኮ ዋሲዳ።
NUM 16:23 ጎዳይ ሙሴስ፥ «ቆሬ ዱንካናፔ፥ ዳታኔ ዱንካናፔኔ ኣብራሜ ዱንካናፔ ሃኪ ኤቃና ማላ ኔኒ ዴራስ ዮታ» ጊዴስ።
NUM 16:25 ሄሳፌ ጉዬ ሙሴይ ኢስራኤሌ ኣሳ ካሌꬂዛይታ ካሌꬂ ኤኪዲ ዳታኔኮኔ ኣብራሜኮ ቢዴስ።
NUM 16:26 ዴሬዛስካ፥ «ኢንቴ ሃይታ ማካላ ኣሳታ ዱንካኔታፔ ሃኪ ኤቂቴ፤ ኢስታ ሚሽ ጊዲዳዝ ኣይኮካ ቦቾፍቴ፤ ሂስቶንታ ኣጊኮ ኢስታ ናጋራ ጋሶን ኢንቴ ዉሪካ ኢስታራ ኢሲፌ ፒቴቲ ꬋያና» ጊዴስ።
NUM 16:27 ሄሳ ጊሻስ ዴሬዚ ቆሬ ዱንካኔዛፔ፤ ዳታኔ ዱንካኔዛፔኔ ኣብራሜ ዱንካኔዛፔ ሃኪ ኤቂዴስ። ዳታኔይኔ ኣብራሜይካ ባ ማቼታራኔ ባ ናይታራ ባ ዱንካኔዛፔ ካሬ ኬዚዲ ባ ፔንጌን ፔንጌን ኤቂዳ።
NUM 16:28 ሄ ዎዴ ሙሴይ ዴራስ፥ «ሃይሳ ሃ ኦሶዛ ኦꬃናስ ጎዳይ ታና ኪቲዳይሳኔ ታኒካ ሃይሳ ኦꬂዛይ ታ ሼኔን ጊዶንታይሳ ኢንቴ ሃይሳን ኤራና።
NUM 16:29 ሃይቲ ሃ ኣሳቲ ኣሲ ሃይቂዛ ማላ ሃይቂዛ ጊዲኮ ጎዳይ ታና ኪቲቤና።
NUM 16:30 ጊዶ ኣቲን ኣሲ ሃይꬃን ሲዪ ኤሮንታ ኦራꬃ ሚሽ ጎዳይ ኢስታ ቦላ ኦꬂን ኢስቲ ሼምፖራ ፓጻ ዲሼ ዱጌ ሃይቂዳይቲ ዲዛሶ ዎꬋና ማላ ቢታያ ዶዬታዳ ኢስታኔ ኢስታስ ዲዛዝ ኡባ ሚቲኮ ሃይቲ ኣሳቲ ጎዳራ ኤቄቲዳይሳ ኢንቴ ሄ ዎዴ ኤራና» ጊዴስ።
NUM 16:31 ሙሴይ ሄሳ ዮቲዳ ማላ ዳታኔይኔ ኣብሮኔይ ኤቂ ዲዛ ቢታያ ዶዬታዳ፥
NUM 16:32 ኢስታኔ ኢስታ ሶ ኣሳ፥ ቆሬ፥ ኢዛራ ዙፔቲዛ ኣሳኔ ኢስታስ ዲዛዝ ኡባ ሚታዱስ።
NUM 16:33 ሂስቲን ኢስቲ ሼምፖራ ፓጻ ዲሼ ባስ ዲዛ ሚሻራ ዱጌ ዱፎን ጌሊዳ፤ ቢታያ ኢስታ ካማዳ ዴራ ጊዶፌ ꬋይሳዱስ።
NUM 16:34 ሄ ሄራን ዲዛ ኢስራኤሌ ኣሳይ ሄ ኣሳ ዋሶ ሲዪዲ፥ «ሃይሲ ቢታይ ኑናካ ሚቶንታ ኣጌና!» ጊ ዋሲሼ ባቃቲዴስ።
NUM 16:35 ቃሴካ ጎዳይ ሳሎፔ ታማ ዬዲዲ ኤጻኔ ጩዋሲዛ 250 ኣሳ ጹጊዴስ።
NUM 16:36 ሄሳፌ ጉዬ ጎዳይ ሙሴስ ሂዝጊዴስ፥
NUM 16:37 «ኣሮኔ ና ኤልኤዜሬይ ጻርቂማላፔ ቆጼቲዳ ጺናቲ ዱማ ጊዲዳ ጊሻስ ጹጌቲዛ ኣሳታ ማታፔ ኢስታ ጊዶን ዲዛ ቦንቆ ታማዛ ሃሆሶ ኤፊ ቆላና ማላ ኢዛስ ዮታ፤
NUM 16:38 ሄ ጺናቲ ጎዳስ ያርሾ ያርሺዛሶዛ ሺቂዳ ዎዴ ጌዪዳ፤ ሄሳ ጊሻስ ባ ናጋራ ጋሶን ሃይቂዳ ኣሳታ ጺና ኤካዳ ሌኢሳ ቆጻ፤ ሂስታዳ ያርሾ ያርሺዛሶዛስ ካማ ኦꬃ፤ ሄይቲካ ኢስራኤሌ ኣሳይ ናጌታና ማላ ኢስታስ ሴራ ማላታ ጊዳና።»
NUM 16:39 ሄሳ ጊሻስ ኤልኤዜሬይ ጺናታ ኤኪዲ ያርሾ ያርሺዛሶዛስ ካማ ጊዳና ማላ ሌኤን ቆጺ ኬሲዴስ።
NUM 16:40 ሄሲ ሄ ሃኖዚ ኦኒካ ኣሮኔ ዜሬꬅ ጊዶንታ ኣሲ ጎዳስ ኤጻኔ ጩዋሳናስ ያርሾ ያርሺዛሶዛ ሺቆንታ ማላ ኢስራኤሌ ኣሳይ ኡባይ ናጌታና ማላ ቆፍሲዛ ማላታ ጊዳና፤ ሄሳꬆ ጊዶንታ ኣጊኮ ሄሳ ማላ ኦꬂዛ ኣሲ ኡባይካ ቆሬ ማላኔ ኢዛራ ዙፔቲዳይታ ማላ ꬋያና፤ ሃይሲ ዉሪካ ካሴ ጎዳይ ሙሴ ባጋራ ኢሚዳ ኣዛዞዛ ማላ ፖሌቲዴስ።
NUM 16:41 ዎንቴꬃ ጋላስ ኩሜꬃ ኢስራኤሌ ማባራይ፥ «ጎዳ ዴራ ኢንቴ ዎꬊዴታ» ጊዲ ሙሴ ቦላኔ ኣሮኔ ቦላ ጉጉሚዴስ።
NUM 16:42 ዴሬይ ሙሴራኔ ኣሮኔራ ኤቄታናስ ኢሲ ቦላ ሺቄቲዳ ዎዴ ጋይቶቴꬃ ዱንካኔዛ ሻራይ ካሚ ኦይኪን ጎዳ ቦንቾይ ኢዛን ቆንጪዳይሳ ጉዬ ሲሚ ቤኢዶስ።
NUM 16:43 ሙሴይኔ ኣሮኔይ ዪዲ ጋይቶቴꬃ ዱንካናስ ሲንꬃ ባጋራ ኤቂዳ።
NUM 16:44 ጎዳይ ሙሴስ ሂዝጊዴስ፥
NUM 16:45 «ሃይታ ሃ ኣሳታፔ ፖቂ ኤቂቴ፤ ታኒ ኢስታ ኢሲቶ ዲፒ ሂስታ ꬋይሳና!» ናምኣቲካ ዱጌ ቢታ ቦላ ጉፋኒዳ።
NUM 16:46 ሙሴይ ኣሮኔስ፥ «ኔኒ ኔ ጺና ኤካዳ ያርሾ ያርሺዛሶዛፔ ቦንቆ ታማ ኢዛ ቦላ ጉጃ፤ ሄ ታማ ቦላ ኤጻኔ ዎꬃ፤ ሄሳፌ ጉዬ ኤሶን ዴራኮ ባዳ ኣሳ ናጋራ ዉርሳ! ሄኮ ጾሳ ሃንቆይ ቆንጪዳ ጊሻስ ዴሬዛ ጊዶን ቦሻይ ዶሚዴስ» ጊዴስ።
NUM 16:47 ሄሳ ጊሻስ ኣሮኔይ ሙሴይ ኣዛዚዳ ማላ ባ ጺና ኤኪዲ ሺቄቲ ዲዛ ኣሳ ጊዶ ኤሶን ቢዴስ፤ ቦሻይ ዴራ ጊዶን ዶሚዳይሳ ቤኢዲ ኤጻኔዛ ቦንቆ ታማ ቦላ ዎꬂዲ ኣሳ ናጋራ ዉርሲዴስ።
NUM 16:48 ኣሮኔይ ፓጻ ዲዛ ኣሳሲኔ ሃይቂዳ ኣሳስ ጊዶን ኤቂዲ ዴራ ቦላ ዪዛ ቦሻ ቴቂዴስ።
NUM 16:49 ሄ ዎዴ ሃይቂዳ ኣሳ ቆዳይ ቆሬራ ኢሲፌ ጌላቴꬃን ሃይቂዳይቲ ኣቲን 14,700።
NUM 16:50 ቦሻዚ ኤቂን ኣሮኔይ ጋይቶቴꬃ ዱንካኔዛ ፔንጌን ዲዛ ሙሴኮ ሲሚ ቢዴስ።
NUM 17:1 ጎዳይ ሙሴስ ሂዝጊዴስ፥
NUM 17:2 «ኢስራኤሌ ኣሳፔ ዛርኬፌ ዛርኬፌ ኮራፒኔይ ኢሲ ኢሲ ጉፌ ሺሺዲ ታማኔ ናምኡ ጉፌ ኢማና ማላ ኦይቻ፤ ሂስታዳ ኢሳ ኢሳ ሱንꬅ ሄ ጉፌታ ቦላ ጻፋ።
NUM 17:3 ሌዌ ዛርኬታፔ ሺቂዳ ጉፌታ ቦላ ኣሮኔ ሱንꬅ ጻፋ፤ ኢሲ ኢሲ ዛርኬ ካሌꬂዛዴስ ኢሲ ጉፌይ ሺቆ።
NUM 17:4 ሄይታካ ጌዴ ጋይቶቴꬃ ዱንካኔዛን ኤፋዳ ታ ኔና ሃሳይሲዛሶን ታቦታዛፔ ሲንꬃ ባጋራ ዎꬃ።
NUM 17:5 ሄሳፌ ጉዬ ታኒ ዶሪዛዴ ጉፌይ ፑርጪዲ ጪሊላና፤ ሄሳን ኢስራኤሌ ኣሳይ ኡባ ዎዴ ኔ ቦላ ዙዙሞንታ ማላ ታ ዲጋና።»
NUM 17:6 ሄሳ ጊሻስ ሙሴይ ሄሳ ኢስራኤሌ ኣሳስ ዮቲዴስ፤ ዴሬዛ ካሊዛይቲ ኢሶይ ኢሶይ ባ ጉፌ ጉፌ ኤኪዲ ኢዛስ ኢሚዴስ፤ ኢሲ ዛርኬ ጊሻስ ኢሲ ኢሲ ጉፌ ጊዲሺን ኡባይ ኢሲ ቦላ 12 ጉፌይ ሺቂዴስ፤ ሄ ሺቂዳ ጉፌታ ጊዶን ኣሮኔ ጉፌይ ዴስ።
NUM 17:7 ሙሴይ ጉፌታ ኡባ ኤኪዲ ጋይቶቴꬃ ዱንካኔዛ ጊዶን ጎዳ ጫቆ ቃላ ታቦታዛ ሲንꬃን ዎꬂዴስ።
NUM 17:8 ዎንቴꬃ ጋላስ ሙሴይ ጌዴ ጋይቶቴꬃ ዱንካኔዛን ጌሊሺን ሌዌ ቆሞ ሱንꬃን ሺቂዳ ኣሮኔ ጉፌያ ጪሊሊዳሮ ቤኢዴስ፤ ቃሴካ ጪያዳ ካጺዳ ኦቾሎኔ ኣይፌ ኣይፊዳሮ ቤኢዴስ።
NUM 17:9 ሙሴይካ ጉፌታ ኡባካ ኤኪ ኤፊዲ ኢስራኤሌ ኣሳ ቤሲዴስ፤ ኣሳይካ ሄሳ ኡባ ቤኢዲ ኢሲ ኢሲ ኮራፒኔቲ ባ ጉፌ ጉፌ ኤኪዳ።
NUM 17:10 ጎዳይ ሙሴስ፥ «ኣሮኔ ጉፌዛ ዛራዳ ጫቆ ቃላ ታቦታፔ ሲንꬃ ባጋራ ዎꬃ፤ ማካሊዛ ኢስራኤሌ ኣሳይ ታ ቦላ ዙዙሚዛይሳ ኣጎንታ ኢጺኮ ኢስቲ ሃይቃናይሳ ቤሲዛ ማላታ ጊዲ ኡቶ» ጊዴስ።
NUM 17:11 ሙሴይካ ጎዳይ ኢዛ ኣዛዚዳ ማላ ኦꬂዴስ።
NUM 17:12 ኢስራኤሌ ኣሳይ ሙሴስ፥ «ሃይሳ ማላ ጊዲኮ ኑኒ ዉሪካ ዉራናስ ዶስ!
NUM 17:13 ጋይቶቴꬃ ዱንካኔዛኮ ሺቂዳ ኣሲ ኡባይ ሃይቂዛ ጊዲኮ ኑኒካ ዉሪ ሃይቃናስ ዶስ ጉሴ?» ጊዴስ።
NUM 18:1 ጎዳይ ኣሮኔስ፥ «ጋይቶቴꬃ ዱንካኔዛ ጊዶን ኦሴቲዛ ሞሮ ኡባ ጊሻስ ኔኒኔ ኔ ናይቲ፥ ሌዌ ቆሞቲ ኣላፌቴꬅ ኤኪዴታ፤ ቄሴቴꬃ ኦሶን ፖሌቲዛ ሞሮ ጊሻስ ጊዲኮ ሄሳ ኣላፌቴꬅ ኤካናይ ኔናኔ ኔ ናይታ ጻላ።
NUM 18:2 ኔኒኔ ኔ ናይቲ ጋይቶቴꬃ ዱንካኔዛን ኦꬂዛ ዎዴ ኢንቴና ኦሶን ማዳናስ ሌዌ ቆሞ ጊዲዳ ኔ ባጋታ ኤካ።
NUM 18:3 ኢስቲ ኔ ኣላፌቴꬃ ጋርሳን ዲሼ ጋይቶቴꬃ ዱንካኔዛ ኦሶ ኦꬄቶ፤ ጊዶ ኣቲን ጌሻሶዛን ጎኤቲዛ ሚሻታኮ ያርሾ ያርሺዛሶ ሺቆፔቶ፤ ሄ ሺቂዛ ጊዲኮ ኔኒኔ ኢስቲካ ኢሲ ቦላ ሃይቃና።
NUM 18:4 ኢስቲ ኡባ ዎዴ ኢንቴናራ ኢሲፌ ኦሶኔ ጋይቶቴꬃ ዱንካኔዛ ጊዶን ኢስታስ ኢሜቲዳ ኦሶ ኡባ ባ ኣላፌቴꬃን ፖላናስ ቤሴስ፤ ጊዶ ኣቲን ሌዌ ቆሞ ጊዶንታ ኣይ ኣሲካ ኦꬃናስ ኢንቴኮ ሺቆፖ።
NUM 18:5 «ታ ሃንቆይ ቃሴካ ኢስራኤሌ ኣሳ ቦላ ቆንጮንታ ማላ ጌሻሶዛኒኔ ያርሾ ያርሺዛሶዛን ኦሴቲዛ ኦሶዛ ኣላፌቴꬅ ፖላናይቲ ኢንቴናኔ ኢንቴ ናይታ ጻላ።
NUM 18:6 ኢንቴ ባጋ ጊዲዳ ሌዌ ዛርኬታ ኢስራኤሌ ኣሳ ጋርሳፌ ኢንቴስ ዶሪዳ ኢሞታ ሂስታ ኢሚዳይ ታና፤ ኢስቲካ ጋይቶቴꬃ ዱንካኔዛ ጊዶን ባስ ኢሜቲዳ ኦሶ ኦꬃና ማላ ታስ ዱማቲዳይታ።
NUM 18:7 ጊዶ ኣቲን ያርሾ ያርሺዛሶዛኒኔ ማጋላሻፔ ጉዬ ባጋራ ኡባፌ ዱማቲዳ ጊዶ ቆልኣን ኦሴቲዛ ቄሴቴꬃ ኦሶይ ኔሲኔ ኔ ናይታስ ጻላ ቤሴስ፤ ቄሴቴꬃ ኦሶዛካ ታ ኢንቴስ ኢሞታ ሂስታ ኢማዲስ፤ ቄሴ ጊዶንታ ኣይ ኣሲካ ሄ ሺቂኮ ሃይቃና» ጊዴስ።
NUM 18:8 ሃይሳፌ ጉዬ ጎዳይ ኣሮኔስ፥ «ጹጌቶንታ ጮ ሜላ ታስ ሺቂዛ ያርሾ ኡባ ታ ኔስ ኢሚዳይሳ ዩሻ ቆፓ፤ ሄሲካ ኔሲኔ ኔ ዛሬ ኡባስ ጊሻ ጊዳና ማላ ታኒ ኢማዲስ።
NUM 18:9 ታስ ዳሮ ዱማቲ ሺቂዛ ኢሞታታፔ ታማን ጹጌቶንታ ያርሾይ ኔሲኔ ኔ ናይታስ ጊሻ ጊዳና፤ ሄሲካ ካꬃ ያርሾ ኡባይ፥ ናጋራ ጊሻስ ዎይኮ ቆሆ ጊሻስ ሺቂዛ ያርሾ ኡባይ ኔሲኔ ኔ ናይታስ ጊሻ ጊዶ።
NUM 18:10 ኢንቴ ሄሳ ጌሻሶዛን ዲሼ ሚቴ፤ ሄሳካ ኣቱማሳይ ኡባይ ሞ፤ ኢዚካ ኬሂ ዱማቲዳዛ።
NUM 18:11 «ቃሴካ ኢስራኤሌ ኣሳይ ታ ሲንꬃን ያኔ ሃ ቃሴꬂ ያርሺዛ ያርሾይ ኡባይ ኢንቴስ ጊዶ፤ ሃይታንታ ታኒ ኔስ፥ ኔ ማጫ ናይታስ፥ ኔ ኣቱማ ናይታሲኔ ሲንꬃፌ ያና ዬሌታ ኡባስ ኤቂ ዳና ማላ ኢንቴስ ጊሻ ሂስታ ኢማዲስ፤ ኔሶ ኣሳፔ ጌሽ ጊዲዳይ ኦኒካ ማናስ ዳንዳዬስ።
NUM 18:12 «ኢስራኤሌ ኣሳይ ታስ ኢሚዛ ኦራꬅ ጋኪዛ ካꬃ ጼራፔ ዎጋራ ዛይቴ፥ ዎይኔ ኡሺኔ ካꬃ ቆሞ ኡባፌ ጼራ ታ ኢንቴስ ኢማዲስ።
NUM 18:13 ኢስቲ ባ ጋዴፔ ታስ ጎዳስ ኢሚዛ ካꬃ ጼራይ ኢንቴሳ፤ ሄሳ ኢንቴሶ ኣሳን ጌሽ ጊዲዳ ኣሲ ኦኒካ ማናስ ዳንዳዬስ።
NUM 18:14 «ኢስራኤሌ ኣሳፔ ታስ ኢሜቲዳ ሚሺ ኡባይ ኢንቴሳ።
NUM 18:15 ኢስራኤሌ ኣሳይ ታስ ሺሺዛ ሜሄፔ ዎይኮ ኣሳፔ ባይራ ጊዲ ዬሌቲዳይ ኢንቴሳ፤ ጊዶ ኣቲን ኣሳፔ ባይራ ጊዲ ዬሌቲዳይሳ ጊዲኮ ኢስታ ሚሻን ዎዛና ቤሴስ፤ ሄሳꬆካ ጌሽ ጊዶንታ ሜሄታፔ ኮይሮ ዬሌቲዳይሳ ሚሻን ዎዛናስ ዳንዳዬታ።
NUM 18:16 ኢሲ ኣጊና ናይታ ዎዛናስ ጌሻሶዛን ኤሬቲዳ ሜዛኔ ሊኬን ኢቻሹ ሳቂሌ ቢራ ዎዞ ሚሽ ጪጊዲ ዎዛናስ ዳንዳዬቴስ።
NUM 18:17 «ሚዛፔ ዎይኮ ዶርሳፌ ዎይኮ ዴይሻፌ ባይራ ጊዲ ዬሌቲዳይሳ ዎዞፍቴ፤ ሄይቲ ሙሌካ ጌሽ ጊዲዳ ጊሻስ ታስ ያርሾ ጊዲ ሺቃናስ ቤሴስ፤ ኢስታ ሱꬃ ያርሾ ያርሺዛሶዛ ቦላ ኣራጪቴ፤ ሃንዳዛካ ታና ሎኦ ሳዎ ሳዋና ማላ ታማን ጹጊቴ።
NUM 18:18 ያኔ ሃ ቃሴꬂ ሺሺዛ ያርሾ ጊዲዲ ሺቂዛ ኣንጋሶ ማላኔ ኡሻቻ ሚሴ ማላ ኢስታ ኣሾዚ ኔስ ጊዶ።
NUM 18:19 ኢስራኤሌ ኣሳይ ታስ ሺሺዛ ዱማ ዱማ ኢሞታታ ዉርሳካ ታ ኢንቴስ፥ ኢንቴ ኣቱማ ናይታሲኔ ኢንቴ ማጫ ናይታስ ቡሮ ሲንꬃፌ ያና ዎዴታን ኡባን ዎጋ ጊዲዲ ኢንቴስ ጊሻ ጊዳና ማላ ታ ኢንቴስ ኢማዲስ፤ ሄሲካ ታኒ ኢንቴናራኔ ኢንቴ ዜሬꬃታራ ጫቄቲዛ ላሜቶንታ ማጺኔ ጫቆ ማላ» ጊዴስ።
NUM 18:20 ጎዳይ ኣሮኔስ፥ «ኔኒ ኔ ዜሬꬃስ ላቲሳናስ ላታ ጋዴይ ኔስ ኢሜቴና፤ ኢስታ ጊዶን ኔና ጋኪዛ ጊሻይ ኣይኮይካ ዴና፤ ኔና ጋኪዛ ላታይ ታና ጾሳ» ጊዴስ።
NUM 18:21 ጎዳይ፥ «ኢስራኤሌ ኣሳይ ታስ ኤሂዛ ኣስራታይ ዉሪ ሌዌ ዛርኬታስ ጊሻ ጊዶ ጋዳ ታ ኢማዲስ፤ ሄሲካ ኢስቲ ጋይቶቴꬃ ዱንካኔ ጊዶን ኦꬂዛ ኦሶዛ ዳሞዛ ጊዶ።
NUM 18:22 ሃንኮ ኢስራኤሌ ኣሳይ ጊዲኮ ባ ቦላ ሃይቆ ቂጻቴ ጋꬆንታ ማላ ናምኣንꬆ ጌዴ ጋይቶቴꬃ ዱንካኔዛኮ ሺቃናስ ቤሴና።
NUM 18:23 ሃይሳፌ ጉዬ ጋይቶቴꬃ ዱንካኔዛ ጊዶን ኣላፌቴꬅ ኤኪ ኦꬃናስ ቤሲዛይ ሌዌ ዛርኬታ ጻላ ጊዳና፤ ሄን ኦሴቲዛ ሞሮስካ ኢስቲ ኦይሼታና፤ ሄሲካ ኢስታስ ና ና ጋካናስ ላሜቶንታ ዎጋ ጊዳና፤ ሌዌታስ ጺንጾይ ኢስራኤሌ ዴሬን ዴና።
NUM 18:24 ኢስራኤሌ ኣሳይ ታስ ዱማ ያርሾ ኤሂዛ ኣስራታ ታኒ ኢስታስ ጊሻ ሂስታ ኢማዲስ፤ ሄሳ ጊሻስ ኢስታስ ኢስራኤሌ ኣሳ ጊዶን ጺንጾይ ዶንታ ማላ ዮታዲስ» ጊዴስ።
NUM 18:25 ጎዳይ ሙሴስ ሂዝጊዴስ፥
NUM 18:26 «ኔኒ ሌዌታስ፥ ‹ጎዳይ ኢንቴስ ጊሻ ሂስቲ ኢሚዛ ኣስራታ ኢንቴ ኢስራኤሌ ኣሳ ኩሼፔ ኤኪሼ ኢንቴካ ኢንቴ ባጋራ ሄ ኢንቴ ኤኪዳይሳፌ ኣስራታ ኬሲዲ ጎዳስ ዱማ ያርሾ ሂስቲ ሺሺቴ።
NUM 18:27 ሄሲ ሄ ዱማ ያርሾዚ ኢሲ ጎሻንቻይ ካꬃ ጼራ ዎይኮ ዎይኔ ኡሹ ኣስራታ ኢሚዛ ማላ ጊዲ ኢንቴስ ቆዴታና።
NUM 18:28 ሄሳ ማላን ኢንቴካ ኢስራኤሌ ኣሳፔ ኤኪዛ ኣስራታ ኡባፌ ጎዳስ ዱማ ያርሾ ሂስቲ ሺሺቴ፤ ኢንቴ ጎዳስ ሺሺዛ ያርሾዛ ቄሴ ኣሮኔስ ኢሚቴ።
NUM 18:29 ኢንቴ ሃ ኤኪዛ ሚሽ ኡባፌ ዶሬቲዳይሳኔ ሎኦ ጊዲዳይሳ ጎዳስ ጊሻ ሂስቲ ኢሚቴ።
NUM 18:30 « ‹ጎሻንቻይ ካꬃ ኣይፌፔኔ ዎይኔ ኡሻፌ ዶሬቲዳይሳ ታስ ኢሚዲ ኣቲዳይሳ ባስ ኤኪዛ ማላ ኢንቴካ ዶሬቲዳይሳ ታስ ኢሚዲ ኣቲዳይሳ ኢንቴስ ኤኪቴ።
NUM 18:31 ሄሲካ ኢንቴ ጋይቶቴꬃ ዱንካኔ ጊዶን ኦꬂዛ ኦሶዛስ ዋጋ ጊዲዳ ጊሻስ ኣቲዳይሳ ኢንቴ ኢንቴሶ ኣሳራ ኣዋንካ ዲዲ ማናስ ዳንዳዬታ።
NUM 18:32 ዶሬቲዳዝ ኢንቴ ጎዳስ ሺሺዳፔ ጉዬ ኣቲዳይሳ ኢንቴ ሚኮ ኢንቴስ ናጋራ ጊዴና፤ ጊዶ ኣቲን ዶሬቲዳይሳ ኢዛፔ ሻኮንታ ሚዲ ዱማ ጊዲዳ ኢስራኤሌ ኣሳ ኢሞታ ቱኒሶንታ ማላ ናጌቲቴ፤ ቱኒሲዛ ጊዲኮ ኢንቴ ሃይቃና› ጋ» ጊዴስ።
NUM 19:1 ጎዳይ ሙሴሲኔ ኣሮኔስ ሂዝጊዴስ፥
NUM 19:2 «ሃይሲ ታ ኣዛዚዳይሲ ዎጋስ ዲዛ ማራ፤ ኢስራኤሌ ኣሳይ ኢዚ ሞርጌ ቦላ ቃምባራይ ዎꬊ ኤሮንታ ቦሬይ ባይንዳ ኢሲ ዞኦ ሚዛ ኡስ ኢስራኤሌ ኣሳይ ኤሃና ማላ ኣሳስ ዮታ።
NUM 19:3 ሄ ኡሳዮ ቄሴ ኤልኤዜሬስ ኢሚቴ፤ ሄ ኡሳዮ ኣሲ ዲዛሶፔ ጌዴ ካሬ ኬሲኮ ሄን ኢዛ ሲንꬃን ሹኬቱ።
NUM 19:4 ቄሴ ኤልኤዜሬይ ኢዚ ሱꬃፌ ጉꬃራ ኤኪዲ ባ ቢራꬌ ጼራን ላፑንቶ ጌዴ ጋይቶቴꬃ ዱንካኔዛስ ሲንꬃ ባጋራ ፒስቶ።
NUM 19:5 ሄ ኡሳይ ጋልባይ፥ ኣሾይ፥ ሱꬂኔ ቃንꬃ ኣሾይ ዉሪ ቄሴዛ ሲንꬃን ጹጌቶ።
NUM 19:6 ቄሴዚ ሊባኖሴ ዚጋ፥ ሂሶጴኔ ዞኦ ቃጪና ኤኪዲ ኡሳያ ጹጌቲዛ ታማዛን ዬጎ።
NUM 19:7 ሄሳፌ ጉዬ ባ ማይኦ ሜጮ፤ ባ ቦላካ ሃꬄን ሜጬቲዲ ካሴ ባ ዲዛሶ ሲሞ፤ ጊዶ ኣቲን ኦማርስ ጋካናስ ዎጋይ ጊዛ ማላ ቱና ጊዲ ጋምኦ።
NUM 19:8 ሄ ኡሳዮ ጹጊዳዴይካ ባ ማይኦ ሜጮ፤ ባ ቦላካ ሃꬃን ሜጬቶ፤ ኢዚካ ኦማርስ ጋካናስ ቱና ጊዲ ጋምኦ።
NUM 19:9 «ሄሳፌ ጉዬ ጌሽ ጊዲዳ ሃራ ኣሲ ሄ ቢዲንꬃ ሺሺ ኤፊዲ ኣሳይ ዲዛሶፔ ጌዴ ኬሲዲ ጌሻሶሆን ዎꬆ፤ ሄንካ ኢስራኤሌ ኣሳይ ሜጬቲዲ ጌያናስ ጎኢዛ ሃꬅ ጊጊሳናሳ፤ ሃይሲ ዎጋዚ ኦሴቲዛይ ኣሳ ናጋራ ዉርሳናሳ።
NUM 19:10 ቢዲንꬃ ሺሺዳዴይ ባ ማይኦ ሜጮ፤ ጊዶ ኣቲን ኢዚ ኦማርሳ ዎዴ ጋካናስ ቱና ጊዲ ጋምኦ፤ ሃይሲ ዎጋዚ ኢስራኤሌ ኣሳሲኔ ቤቴ ዪዲ ኢስታ ጊዶን ዲዛ ኣሳስ ቡሮፔ ያና ዬሌታ ኡባስ ላሜቶንታ ዎጋ ጊዳና።
NUM 19:11 «ሃይቂዳ ኣሳ ኣሃ ቦቺዳ ኣሲ ላፑን ጋላስ ጋካናስ ቱና ጊዲ ጋምኦ።
NUM 19:12 ሄꬓንꬆ ጋላሳኒኔ ላፑንꬃ ጋላሳን ጌያናስ ጊጌቲ ዲዛ ሃꬃን ባና ጌሾ፤ ሄሳፌ ጉዬ ኢዚ ጌሽ ጊዳና፤ ሄꬓንꬆ ጋላሲኔ ላፑንꬃ ጋላስ ባና ጌሾንታ ኣጊኮ ኢዚ ጌያናስ ዳንዳዬና።
NUM 19:13 ጌሻናስ ዲዛ ሃꬂ ኢዛ ቦላ ጉኮንታ ኣጊዳ ጊሻስ ኣሃ ቦቺዲ ባና ጌሾንታ ኣሲ ቱኒዳ ማላ ጋምኦ፤ ሄሳ ማላ ኣሲ ጋይቶቴꬃ ዱንካኔዛ ቱኒሴስ፤ ሄሳ ጊሻስ ኢዚ ኢስራኤሌ ኣሳ ጊዶፌ ሻኬቲ ኪቾ።
NUM 19:14 «ኢሳዴይ ጋይቶቴꬃ ዱንካኔዛ ጊዶን ሃይቂኮ ፖሌታና ዎጋይ ሃይሳ። ኢዚ ሃይቂዳ ዎዴ ሄ ዎዴ ሄን ጋይቶቴꬃ ዱንካኔዛ ጊዶን ዲዛዴይ ዎይኮ ሄ ጌዴ ጋይቶቴꬃ ዱንካኔዛን ጌሊዛዴይ ላፑን ጋላስ ጋካናስ ቱና ጊዲ ጋምኦ።
NUM 19:15 ሄ ጋይቶቴꬃ ዱንካኔዛ ጊዶን ቱቺ ባይንዳ ዲዛ ኦቶይ ዉሪካ ጻሮይካ ቱና ጊዶ።
NUM 19:16 ኣሲ ዎꬊዳ ኣሳ ኣሃ ጊዲን ዎይኮ ሃርጊ ሃይቂዳ ኣሳ ኣሃ ጊዲን ካሬን ኩንዲ ዲዛ ኣሃ ቦቺዳዴይ ዎይኮ ኣሳ ሜቄꬅ ቦቺዳዴይ ላፑን ጋላስ ጋካናስ ቱና ጊዶ።
NUM 19:17 «ቱኒዳ ኣስ ናጋራፔ ጌሻናስ ጹጌቲዛ ኡሳይ ቢዲንꬃፌ ጉꬃራ ኦቶን ዬጌቶ፤ ጺሊ ኡቲዳ ፑልቶ ሃꬂ ኢዛ ቦላ ጉጄቶ።
NUM 19:18 ካሊዲ ጌሽ ጊዲዳ ሃራ ኣሲ ሂሶጴ ሚꬃ ሃጋ ኤኪዲ ሃꬃን ጌልꬂ ጌልꬂ ኬሲዲ ጋይቶቴꬃ ዱንካኔዛ ቦላ፥ ኢዛ ጊዶን ዲዛ ሚሻታ ቦላኔ ኣሳ ቦላ ኣራጮ፤ ሄሳፌ ጉዬ ኣሳ ሜቄꬅ ዎይኮ ኣሃ ዱፎ ቦቺዳዴ ቦላ ሃꬄ ኣራጮ።
NUM 19:19 ሄꬓንꬃ ጋላሲኔ ላፑንꬃ ጋላስ ጌዪዳዴይ ሃንኮ ጌዮንታዴ ቦላ ሃꬄ ኣራጮ፤ ላፑንꬃ ጋላስ ኢዛ ጌሾ፤ ሄ ጌይዛዴይካ ባ ማይኦ ሜጪዳፔኔ ባ ቦላ ሜጬቲዳፔ ጉዬ ኣርሼይ ዉሊሺን ኢዛዴይ ጌሽ ጊዳና።
NUM 19:20 «ቱኒዳዴይኔ ባና ጌሾንታዴይ ጌሾ ሃꬃ ባ ቦላ ጉሶንታ ኣጊዳ ጊሻስ ኢዚ ቱኒዳ ማላ ጋምኦ፤ ሄሳ ማላ ኣሲ ጌሻሶዛ ቱኒሲዛ ጊሻስ ማባራ ጊዶፌ ሻኬቲ ኪቾ።
NUM 19:21 ሃይሳ ሃ ዎጋ ቡሮፔ ያና ዬሌታስ ኢንቴ ናጋናስ ቤሴስ፤ ጌሾስ ጎኢዛ ሃꬃ ባ ቦላ ኣራጪዛ ኣሲ ባ ማይኦዛካ ሜጫናስ ቤሴስ፤ ሄ ሃꬃ ቦቺዳዴይ ኦማርስ ጋካናስ ቱና ጊዲ ጋምኦ።
NUM 19:22 ጌዮንታ ኣሲ ቦቺዳ ሚሺ ኡባይ ቱና ጊዶ፤ ሄ ቱና ሚሻ ቦቺዳ ኣሲካ ኦማርስ ጋካናስ ቱና ጊዶ።»
NUM 20:1 ኮይሮ ኣጊናን ኢስራኤሌ ኣሳይ ኩሜꬅ ጺኔ ባዞን ቃዴሴ ጌቴቲዛሶን ዱንካኒ ኡቲዴስ፤ ማራማ ሃይቂን ሄን ሞጊዳ።
NUM 20:2 ኣሳይ ዱንካኒ ኡቲዳሶሆን ሃꬂ ባይንዳ ጊሻስ ሙሴ ቦላኔ ኣሮኔ ቦላ ዴንዲዴስ።
NUM 20:3 ዴሬዚ፥ «ኑኒ ካሴ ጋይቶቴꬃ ዱንካኔ ሲንꬃን ሃይቂዳ ኢስራኤሌ ኣሳ ማላ ኢስታꬆ ኑኒካ ሃይቂዳኮ ኑስ ሎኦ ጊዳናሺን፤
NUM 20:4 ኢንቴ ጎዳ ማባራ ሃይሳ ሃ ባዞ ቢታ ኤሂዳይ ኑኒኔ ኑ ሜሄይ ሃይሳን ዉራና ማላ ኦꬃናሴ?
NUM 20:5 ኢንቴ ኑና ጊብጼፔ ኬሲዲ ሃይሳ ኣይኮይ ሞኮንታ ኢታ ባዞ ኑና ኣዛስ ኤሂዴቲ? ሃይሳን ካꬂ፥ ባላሴይ፥ ዎይኔ ኣይፌይኔ ኦሮማኔይ ዴና፤ ሃራይ ኣቶሺን ጋንጺ ኤኪዛ ሃꬂካ ዴና!» ጊዲ ሙሴራ ኦዬቲዳ።
NUM 20:6 ሙሴይኔ ኣሮኔይ ኣሳፔ ሻኬቲዲ ጌዴ ጋይቶቴꬃ ዱንካኔ ፔንጌ ቢዳ፤ ኢስቲ ዱጌ ቢታን ጉፋኒ ዲሺን ጎዳ ቦንቾይ ኢስታስ ቆንጪዴስ።
NUM 20:7 ጎዳይ ሙሴስ ሂዝጊዴስ፥
NUM 20:8 «ጫቆ ቃላ ታቦታ ሲንꬃን ዲዛ ጉፌዛ ኤኪዳ ኔኒኔ ኣሮኔይ ኩሜꬃ ማባራ ኢሲ ቦላ ሺሺቴ፤ ኔኒ ሄን ኩሜꬃ ዴራ ሲንꬃን ዲዛ ዛላዚ ሃꬄ ኢማና ማላ ዮታ፤ ኔኒ ሄሳꬆ ኦꬃዳ ዛላዛፔ ኢስታስ ሃꬄ ኬሳ፤ ሂስቲኮ ኢስቲኔ ኢስታ ሜሄይ ሃꬅ ኡዪዲ ኣላና።»
NUM 20:9 ሙሴይ ጎዳይ ኢዛ ኣዛዚዳ ማላ ቢዲ ጋይቶቴꬃ ዱንካኔዛፔ ባ ጉፌዛ ኤኪ ዪዴስ።
NUM 20:10 ኢዚኔ ኣሮኔይ ኩሜꬃ ማባራ ዛላዛ ሲንꬃን ሺሺዳፔ ጉዬ ሙሴይ ዴሬዛ፥ «ኢንቴኖ ማካላንቻቶ! ሃይሳ ሃ ዛላዛፔ ኑ ኢንቴስ ሃꬄ ኬሳኔ!» ጊዴስ።
NUM 20:11 ሄሳፌ ጉዬ ሙሴይ ባ ጉፌዛን ዛላዛ ናምኣ ዛሪ ሾጪዴስ፤ ዎልቃማ ሃꬂ ዛላፌ ፑልቲዴስ፤ ዴሬዚኔ ሜሄይ ሃꬃ ኡዪዴስ።
NUM 20:12 ጊዶ ኣቲን ጎዳይ ሙሴ ቦላኔ ኣሮኔ ቦላ፥ «ኢንቴ ኢስራኤሌ ኣሳ ሲንꬃን ታ ዱማቴꬃ ማላ ታና ቦንቻናስ ኣማኔቲቤኬታ፤ ሄሳ ጊሻስ ታ ኢንቴና ላቲሳና ጋ ጫቂዳ ዴሬዛ ሃይሳ ዴራ ካሌꬂዲ ጌሌኬታ» ጊ ሃንቄቲዴስ።
NUM 20:13 ኢስራኤሌ ኣሳይ ጎዳራ ኦዬቲዳሶይኔ ኢዚ ባ ዱማቴꬃ ቆንጪሲዳሶይ ማሪባ ጌቴቲዳ ጊሻስ ሃꬃይካ ማሪባ ሃꬅ ጌቴቲ ሱሚዴስ።
NUM 20:14 ሙሴይ ኤዶሜ ካዎስ ኪታ ጋꬃና ማላ ቃስታኔ ኣስ ቃዴሴፔ ዬዲዴስ፤ «ኔ ኢሻ ኢስራኤሌይ፥ ‹ኑ ቦላ ጋኪዳ ሜቶዛ ኡባ ኔኒ ሲያዳሳ፤
NUM 20:15 ቤኒ ኑ ኣዋቲ ዋኒ ዱጌ ጊብጼ ዎꬊዳኮኔ ኑኒካ ጊብጼን ዳሮ ላይꬃታ ዋኒ ዋኒ ዲዳኮ ኔ ኤራሳ፤ ጊብጼ ኣሳይ ካሴ ኑ ኣዋታ ጊዲን ኑናካ ዳሮ ዋዪሲዴስ።
NUM 20:16 ኑኒካ ኢዚ ኑና ማዳና ማላ ጎዳኮ ዋሲዶስ፤ ኢዚካ ኑ ዋሶዛ ሲዪዲ ጊብጼፔ ኑና ኬሳናስ ባ ኪታንቻ ኑስ ኪቲዴስ፤ ሄኮ ኑኒ ሃኢ ኔስ ꬋሳን ዲዛ ቃዴሴን ዶስ።
NUM 20:17 ሄሳ ጊሻስ ኑኒ ኔ ቢታራ ኣꬊ ባና ማላ ኑስ ኤሮ ጋርኪ! ኑና ጊዲን ኑ ሜሄይካ ኦጌፔ ካሬ ኬዞኮ፤ ካꬃ ጊዶ ጊዲን ዎይኮ ዎይኔ ሚꬃ ጊዶ ኑ ጌሎኮ፤ ኔ ሃꬃ ኦላፌካ ኡዮኮ፤ ኔ ዴሬፔ ኣꬋና ጋካናስ ኦጌፔ ካሬ ኬዞኮ› ጌስ» ጊ ኪቲዴስ።
NUM 20:18 ኤዶሜ ኣሳይ ጊዲኮ፥ «ኢንቴ ኑ ዴሬራ ኣꬊ ባና ማላ ኮዮኮ፤ ኢንቴ ኑ ዴሬ ጌላናስ ፓጪኮ ኑ ኢንቴ ቦላ ዎራጃና» ጊዳ።
NUM 20:19 ኢስራኤሌ ኣሳይካ፥ «ኑኒ ዋና ኦጌዛፔ ኬዞኮ፤ ኑና ጊዲን ዎይኮ ኑ ሜሄይ ኢንቴ ሃꬃፌ ኡዪኮ ኑ ኢንቴስ ኢዛ ዋጋ ቃንጻና፤ ኑ ዋና ኮይዛይ ኢንቴ ዴሬዛራ ኣꬊ ባናሳ» ጊዲ ኢስታስ ማልꬄ ኢሚዳ።
NUM 20:20 ኤዶሜ ኣሳይ ጊዲኮ፥ «ሄሲ ሃኔና! ኑ ኢንቴና ኣꬂ ዬዶኮ!» ጊዲ ሚኖ ኦላንቻታ ኤኪዲ ኢስራኤሌ ኣሳ ኦላናስ ኬዚዳ።
NUM 20:21 ኤዶሜ ዴሬ ኣሳይ ባ ቢታራ ኣꬂ ዬዶንታይሳ ኤሪዲ ኢስራኤሌ ኣሳይ ባ ቢዛ ኦጌዛ ላሚዲ ሃራሶራ ቢዴስ።
NUM 20:22 ኩሜꬃ ኢስራኤሌ ማባራይ ቃዴሴፔ ዴንዲ ሆሬ ዙማኮ ጋኪዴስ።
NUM 20:23 ሄ ዙማዚ ኤዶሜ ꬋሳን ዴስ፤ ጎዳይ ሄን ሙሴሲኔ ኣሮኔስ፥
NUM 20:24 «ታኒ ኢስራኤሌ ኣሳስ ኢማና ጋዳ ካሴ ጫቂዳ ዴሬዮ ኣሮኔይ ጌሌና፤ ኢንቴ ዉሪካ ማሪባ ሃꬃ ኣቻን ታ ኣዛዞዛ ቦላ ማካሊዳ ጊሻስ ኣሮኔይ ሃይቃና።
NUM 20:25 ኣሮኔኔ ኢዛ ናዛ ኤልኤዜሬ ኔናራ ኤካዳ ፑዴ ሆሬ ዙማ ቦላ ኬዛ።
NUM 20:26 ኣሮኔይ ቄሴቴꬃስ ማይኢዳ ማይኦዛ ቃራ ኤካዳ ኤልኤዜሬ ማይዛ፤ ኣሮኔይ ሄን ሃይቃና» ጊዴስ።
NUM 20:27 ሙሴይካ ጎዳይ ኢዛስ ጊዳይሳ ኡባካ ኦꬂዴስ፤ ኩሜꬃ ማባራይ ኢስታ ጼሊሺን ኢስቲ ፑዴ ሆሬ ዙማ ቦላ ኬዚዳ።
NUM 20:28 ሙሴይካ ኣሮኔ ቄሴቴꬃ ማይኦዛ ቃሪ ኤኪዲ ኤልኤዜሬ ማይዚዴስ፤ ኣሮኔይ ሄን ዙማ ሁኤን ሃይቂዴስ፤ ሙሴይኔ ኤልኤዜሬይ ዙማ ቦላፌ ዱጌ ሲሚ ዎꬊዳ።
NUM 20:29 ኣሮኔይ ሃይቂዳይሳ ኩሜꬃ ዴሬዚ ሲዪዲ 30 ጋላስ ጋካናስ ኢዛስ ሚሼቲዲ ዬኪዴስ።
NUM 21:1 ኢዛስ ዱሳሶይ ኔጌቤ ጊዲዳ ካናኔ ዴሬ ካዎ ኣራዴይ ኢስራኤሌ ኣሳይ ኣታራሜ ባጋራ ዪዛይሳ ሲዪዲ ኢስታ ቦላ ኦላ ዴንꬂዲ ኢስታፌ ኣማርዳይታ ዲኢዴስ።
NUM 21:2 ሄ ዎዴ ኢስራኤሌ ኣሳይ፥ «ኑኒ ሃይሳ ዴሬዛ ጾናና ማላ ኔ ኑና ማዲኮ ኢስታ ጊዲን ዎይኮ ኢስታ ካታማታ ናምኣንꬆ ዴንዶንታ ማላ ኦꬂዲ ኑ ኢስታ ሙሌራ ዲፒ ሂስታና» ጊዲ ጎዳስ ኣዲኒዳ።
NUM 21:3 ጎዳይ ኢስታ ዎሳ ሲዪዲ ማዲዳ ጊሻስ ኢስቲ ካናኔ ኣሳ ጾኒ ኦይኪዳ፤ ሄሳ ጊሻስ ኢስራኤሌ ኣሳይ ኢስታኔ ኢስታ ካታማ ሙሌራ ዲፒ ሂስቲ ꬋይሲዳ፤ ኢስቲ ዉሪ ዉሪዳይሳ ኤራናስ ሄሳ ሄ ጋዴዛ፥ «ሆርማ» ጊ ሱንꬂዳ።
NUM 21:4 ኢስራኤሌ ኣሳይ ኤዶሜ ዴሬ ዩዪ ኣꬊዲ ባናስ ቆፒዳ ሆሬ ዙማፔ ዴንዲዲ ጌዴ ዞኦ ኣባኮ ኤፊዛ ኦጌዛራ ቢዳ፤ ጊዶ ኣቲን ኢስቲ ቡሮ ኦጌን ዲሺን ዴሬዛፔ ዳንዳያይ ዉሪዴስ።
NUM 21:5 ጎዳ ቦላኔ ሙሴ ቦላ ኢታ ቃላ ኬሲዲ፥ «ሃꬂኔ ካꬂ ባይንዳሶ ሃይሳ ባዞ ቢታን ኑ ሃይቃና ማላ ኑና ጊብጼፔ ኣይስ ኬሲዴቲ? ሃይሲ ሃ ኢታ ካꬃይ ኑና ሳሌꬂዴስ» ጊዳ።
NUM 21:6 ሄሳፌ ጉዬ ጎዳይ ኢታ ማርዜራ ዲዛ ሾሽ ዴሬዛ ጊዶ ዬዲዴስ፤ ሄ ሾሻይ ዱኪን ኢስራኤሌ ኣሳፔ ዳሮይ ሃይቂዴስ።
NUM 21:7 ዴሬዚካ ሙሴኮ ቢዲ፥ «ጎዳ ቦላኔ ኔ ቦላ ኑ ኢታ ቃላ ሃሳይዳ ጊሻስ ኑኒ ቆሂዶስ፤ ሃኢካ ሃይቲ ዱኪዛ ሾሻቲ ኑፔ ኪቻና ማላ ኔኒ ኑስ ጎዳ ዎሳርኪ!» ጊዳ፤ ሙሴይካ ዴራስ ዎሲዴስ።
NUM 21:8 ሄ ዎዴ ጎዳይ ሙሴስ፥ «ኔኒ ጻርቂማላ ሾሽ ቆጻ ኬሳዳ ቱሳ ማላ ኣዱሳ ሚꬃ ቦላ ካቃ፤ ሾሺ ዱኪዳ ኣሲ ዉሪካ ሄሳ ቤኢዲ ኣታና» ጊዴስ።
NUM 21:9 ሙሴይካ ጻርቂማላፔ ሾሽ ሜꬊዲ ቱሳ ማላ ኣዱሳ ሚꬃ ቦላ ቃጲዴስ፤ ሾሺ ሳጺዳ ኣሲ ኡባይ ሄ ጻርቂማላ ሾሻ ꬎቁ ጊ ጼሊዳይ ጼሊዳይ ፓጺዴስ።
NUM 21:10 ኢስራኤሌ ኣሳይ ባ ዲዛሶፔ ዴንዲ ቢዲ ኦቦቴን ዱንካኒ ኡቲዴስ።
NUM 21:11 ሄፔ ዴንዲዲ ሞኣቤፔ ኣርሼይ ሞኪዛ ባጋራ ዲዛ ኢዬ-ኣባሪሜ ባዞን ዱንካኒ ኡቲዴስ።
NUM 21:12 ሄፔ ዴንዲ ቢዲ ዛራዴ ሾባን ኡቲዴስ።
NUM 21:13 ሄፔካ ዴንዲ ቢዲ ኣሞሬታ ዴሬራ ካንꬂ ቢዛ ባዞ ኣርኖኔ ሻፋፔ ሄ ፒንꬃን ዲዛ ቢታን ዱንካኒ ኡቲዳ፤ ኣርኖኔ ሻፋዚ ሞኣቤ ዴሬሲኔ ኣሞሬ ዴሬዛስ ጊዶ ꬋሳን ዴስ።
NUM 21:14 ሄሳ ጋሶን ጎዳይ ካሌꬂን ኦሌቲዳ ኦላ ጊሻስ ዮቲዛ ታሪኬ ማጻፋዛን፥ «ሱፋ ሄራኒኔ ሾባታን ዲዛ ዋሄቤ ካታማን ኣርኖኔን ሃꬂ ባይንዳ ሻፋን፥
NUM 21:15 ቢዲ ኤሬ ካታማኔ ሞኣቤ ꬋስ ጋካናስ ካንꬂ ቢዛ ዞዜታ» ጌቴቲዴስ።
NUM 21:16 ሄፔ ዴንዲዲ ቢኤሬ ቢዳ፤ ሄሲካ ጎዳይ ሙሴስ፥ «ዴራ ኢሲ ቦላ ሺሻ፤ ታኒ ኢስታስ ሃꬅ ኢማና» ጊዲ ዮቲዳ ሃꬃ ኦላ።
NUM 21:17 ሄ ዎዴ ኢስራኤሌ ኣሳይ ሃይሳ፥ «ሃይሶ ፑልቶዞ ፑልታ፤ ኢንቴካ ኢዛስ ዬጺቴ።
NUM 21:18 ካዎቲ ባ ካዎቴꬃ ጉፌን ቦኪዳ፤ ዳናቲ ባ ጉፌን ዚቂሲዳ፤ ሃꬃ ኦላስ ዬጺቴ» ጊዳ። ሄ ባዞዛፔ ዴንዲዲ ጌዴ ማታኔ ቢዳ።
NUM 21:19 ማታኔፔካ ጌዴ ናሃልኤሌራ ካንꬂዲ ጌዴ ባሞቴ ቢዳ።
NUM 21:20 ባሞቴፔ ዴንዲዲ ኣሞኔ ዴሬን ዲዛ ሾባ ቢዳ፤ ሄ ሾባይካ ፒዝጋ ዙማፔ ዳንኤ ባጋራ ባዞዛ ጊናን ዴስ።
NUM 21:21 ሄሳፌ ጉዬ ኢስራኤሌ ኣሳይ ኣሞሬ ዴሬ ካዎ ሲሆኔስ ቃስታኔ ዬዲዲ፥
NUM 21:22 «ኑኒ ኔ ቢታራ ኣꬊ ባና ማላ ኑና ኣꬃ ዬዳርኪ! ኑኒኔ ኑ ሜሄይ ኦጌፔ ካሬ ኬዞኮ፤ ጌዴ ኔ ካꬃ ጊዶ ጊዲን ዎይኮ ኔ ዎይኔ ሚꬃ ጋርስ ኑ ጌሎኮ፤ ኔ ሃꬃ ኦላፌ ኤኪ ኡዮኮ፤ ኑኒ ኔ ዴሬራ ኣꬊ ባና ጋካናስ ኦጌፔ ሼርኢ ጎኮ» ጊዴስ።
NUM 21:23 ሲሆኔይ ጊዲኮ ኢስራኤሌ ኣሳይ ኢዛ ቢታራ ኣꬊ ባና ማላ ኮዪቤና፤ ሃራፔካ ኢዚ ባስ ዲዛ ኦላ ኣሳ ሺሺ ኤኪዲ ያሃጼ ባዞ ዎꬊዴስ፤ ኢስራኤሌ ኣሳራካ ኦላ ኦይኬቲዴስ።
NUM 21:24 ኢስራኤሌ ኣሳይ ጊዲኮ ኢስታ ጾኒዴስ፤ ኣርኖኔ ሻፋፔ ዶሚዲ ኣሞኔ ዴሬ ꬋስ ጊዲዳ ያቦቄ ሻፋ ጋካናስ ዲዛሶዛ ኦይኪዳ፤ ጊዶ ኣቲን ኣሞኔ ኣሳይ ባ ዛዋ ሚኒ ናጊዛ ጊሻስ ሄ ጌሊቤቴና።
NUM 21:25 ኢስራኤሌ ኣሳይ ሂስቲዲ ኣሞሬ ዴሬ ቢታን ዲዛ ካታማታ ሃሴቦኔኔ ሄ ሄራን ዲዛ ጉꬃ ካታማታካ ኦይኪዲ ዱንካኒ ኡቲዳ።
NUM 21:26 ሃሴቦኔይ ኣሞሬታ ካዎ ሲሆኔይ ካዎቲዳ ካታማ፤ ኢዚካ ካሴ ሞኣቤን ካዎቲዳ ካዎዛራ ኦሌቲዲ ኣርኖኔ ሻፋ ጋካናስ ዲዛ ቢታ ኡባ ኢስታፌ ዎꬂ ኤኪዴስ።
NUM 21:27 ጊንጾ ጊግሲዲ ዬጺዛይቲ ሄሳ ጊሻስ ዬጺሼ «ሃሴቦኔኮ ሃ ዪቴ! ሃና ካታማያ ጊምቤቱ! ሲሆኔ ካታማያ ኦሶ ዶሜቱ።
NUM 21:28 ሃሴቦኔፔ ታማይ ኬዚዴስ፤ ላጮይካ ሲሆኔ ካታማፔ ኬዚዴስ፤ ሞኣቤ ዴሬን ኤሬ ጌቴቲዛሶዛ ꬋይሲዴስ፤ ኣርኖኔ ቦላ ጌዜ ቢታን ዲዛ ሃላቃታካ ዲፒ ሂስቲዴስ።
NUM 21:29 ሃኔ ሞኣቤ ኔስ ኣዬ ኣና! ኢንቴኖ ካሞሼስ ጎይኒዛይቶ! ኢንቴ ዲፒ ጊ ꬋያና፤ ኢንቴ ኣቱማ ናይታ ቤቴስ፥ ኢንቴ ማጫ ናይታካ ዲኤቴꬃስ ኣሞሬ ካዎ ሲሆኔስ ኣꬂ ኢሚዴስ።
NUM 21:30 ሄሳ ጊሻስ ኢስታ ዜሬꬃይ ሙሌራ ꬋይዴስ፤ ሃሴቦኔፔ ቢዲ ዲቦኔ ጋካናስ ኖፋፔ ቢዲ ሜዴባ ጋካናስ ዲዛ ኡባ ፒስኪ ሂስቲ ላሊዶስ» ጊዳ።
NUM 21:31 ሄሳ ጊሻስ ኢስራኤሌ ኣሳይ ኣሞሬ ዴሬን ዱንካኒ ኡቲዴስ።
NUM 21:32 ሙሴይካ ኢያዜሬ ቢዲ ጾሞሳና ኣስ ዬዲዴስ፤ ኢስራኤሌ ኣሳይካ ሄ ካታማዮኔ ኢዚ ሄራን ዲዛ ቄሪ ካታማታ ኦሊ ኦይኪዳ፤ ካሴ ሄን ዲዛ ኣሞሬ ኣሳታ ጎዲዳ።
NUM 21:33 ሄሳፌ ጉዬ ኢስራኤሌ ኣሳይ ጉዬ ሲሚዲ ጌዴ ባሳኔ ኤፊዛ ኦጌዛራ ቢዳ፤ ባሳኔ ካዎ ኣጌይ ኤዲራኤን ኢስታራ ኦላ ኦይኬታናስ ባ ኦላንቻታ ኡባ ኤኪ ኬዚዴስ።
NUM 21:34 ጎዳይ ሙሴስ፥ «ሃይሳ ኣዴዛስ ባቦፋ! ኢዛ ኣሳኔ ኢዛ ዴሬዛ ታ ኔስ ኣꬃ ኢማና፤ ካሴ ሃሴቦኔን ዴኢሼ ኣሞሬታ ሃሪዛ ካዎ ሲሆኔ ቦላ ኔ ኦꬆይሳꬆ ሃይሳ ቦላካ ኦꬃ» ጊዴስ።
NUM 21:35 ሄሳ ጊሻስ ኢስራኤሌ ኣሳይ ኣጌ፥ ኢዛ ናይታኔ ኢዛ ዴራ ኡባ ዲፒ ሂስቲዲ ቢታ ባስ ኤኪዴስ።
NUM 22:1 ሄሳፌ ጉዬ ኢስራኤሌ ኣሳይ ዴንዲዲ ኢያርኮ ጊናራ ዮርዳኖሴ ሻፋፔ ኣርሼይ ሞኪዛ ባጋራ ዲዛ ሞኣቤ ዴምባን ዱንካኒ ኡቲዴስ።
NUM 22:2 ኢስራኤሌ ኣሳይ ኣሞሬታ ቦላ ኦꬂዳይሳ ኡባ ጺፖራ ና ባላቄይ ሲዪዴስ።
NUM 22:3 ኢስራኤሌ ኣሳይ ኬሂ ዳሮ ጊዲዳ ጊሻስ ሞኣቤ ኣሳይ ኬሂፔ ባቢዴስ።
NUM 22:4 ሞኣቤቲ ሚዲያሜ ጪማታስ፥ «ቦራይ ማታ ሚ ꬋይሲዛ ማላ ሃ ማቴ ኣሳይ ኑ ዩሾን ዲዛ ኡባ ዲፒ ሂስቲ ꬋይሳና» ጊዳ። ሄ ዎዴ ሞኣቤ ካዎ ጺፖራ ና ባላቄይ፥
NUM 22:5 ኣማዋ ቢታን ኤፊራጺሴ ሻፋ ማታን ፓቶሬ ካታማን ዲዛ ቢኦሬ ና ባላሜኮ ቃስታኔ ኪቲዲ፥ «ቤያ! ጊብጼ ቢታፌ ኬዚዳ ኢሲ ዴሬይ ቢታ ማይኢዴስ፤ ሄ ዴሬዚ ኑ ማታን ዱንካኒ ኡቲዴስ።
NUM 22:6 ኢስቲ ኑፔ ኬሂ ዎልቃማ ጊዲዳ ጊሻስ ዎዜ ኔና ሁ! ሃ ያዳ ታስ ኢስታ ቃንጋርኪ! ኔ ቃንጊዛ ጊዲኮ ታ ኢስታ ጾናዳ ቢታፌ ኬሳናኮ ኦኔ ኤሪዛይ? ኣይስ ጊኮ ኔኒ ኣንጂዳዴይ ኣንጄቲዛይሳ፥ ኔ ቃንጊዳዴይ ቃንጌቲዛይሳ ታ ኤራይስ» ጊዴስ።
NUM 22:7 ሂስቲን ሞኣቤ ጪማቲኔ ሚዲያሜ ጪማቲ ቃንጊሳናስ ኤኪ ቢዳ ሚሻ ባላሜስ ኢሚዲ ባላቄ ኪታ ዮቲዳ።
NUM 22:8 ባላሜይ ኢስታስ፥ «ኢንቴ ሃች ሃን ኣቂኮ ጎዳይ ታስ ዮቲዳይሳ ኡባ ታ ኢንቴስ ዎንቶ ማላዶ ዮታና» ጊዴስ፤ ሂስቲን ሞኣቤ ጪማቲ ባላሜ ማታን ኣቂዳ።
NUM 22:9 ጾሲ ባላሜኮ ዪዲ፥ «ሃይቲ ኔናራ ዲዛ ኣሳቲ ኣይ ኣሴ?» ጊዲ ኦይቺዴስ።
NUM 22:10 ባላሜይካ ጾሳስ፥ «ሞኣቤ ካዎ ጺፖራ ና ባላቄይ፥
NUM 22:11 ‹ጊብጼፔ ኬዚዳ ዴሬይ ቢታ ዪ ማይኢዴስ፤ ኔኒ ያዳ ታስ ኢስታ ቃንጊዛ ጊዲኮ ታ ኢስታ ኦላ ጾናዳ ቢታፌ ኬሳናኮ ኦኔ ኤሪዛይ!› ጊ ኪቲዳ ኣሳታ» ጊ ዛሪዴስ።
NUM 22:12 ጾሲ ቃሴ ባላሜ፥ «ኔኒ ሃይታ ሃ ኣሳታራ ቦፓ፤ ኢስራኤሌ ዴሬይ ኣንጄቲዳ ዴሬ ጊዲዳ ጊሻስ ኔኒ ኢስታ ቃንጎፋ» ጊዴስ።
NUM 22:13 ዎንቴꬃ ጋላስ ማላዶራ ባላሜይ ዴንዲዲ ባላቄይ ኪቲዳ ጪማታስ፥ «ታኒ ኢንቴናራ ቦንታ ማላ ጎዳይ ዲጊዳ ጊሻስ ኢንቴ ቢታ ሲሚቴ» ጊዴስ።
NUM 22:14 ሂስቲን ሞኣቤ ጪማቲ ባላቄኮ ሲሚዲ ባላሜይ ኢስታራ ዮንታ ኢጺዳይሳ ኢዛስ ዮቲዳ።
NUM 22:15 ሄሳፌ ጉዬ ዛሪዲካ ባላቄይ ካሴ ኪቴቲዳይታፔ ኣꬊ ቦንቼቲዳኔ ቆዳን ዳሮ ጪማታ ባላሜኮ ኪቲዴስ።
NUM 22:16 ኢስቲካ ባላሜኮ ቢዲ፥ «ጺፖራ ና ባላቄይ ኔና፥ ‹ኔኒ ታኮ ዮንታ ማላ ኣይ ሚሺካ ኔና ቴቆፎ!
NUM 22:17 ታ ኔስ ኢዛ ኩሼ ዛራና፤ ኔ ታና ኦይቺዳ ኡባ ታ ኔስ ኢማና፤ ሄሳ ጊሻስ ሃ ዴሬዛ ያዳ ኔ ታስ ቃንጋና ማላ ታ ኔና ሾባይስ!› ጊዴስ» ጊ ዮቲዳ።
NUM 22:18 ጊዶ ኣቲን ባላሜይ ኢስታስ፥ «ባላቄይ ባ ካዎቴꬃ ኬꬃን ዲዛ ቢራኔ ዎርቃ ኡባ ኢዚ ታስ ኢሚዛኮካ ጎዳይ ታና ኣዛዚዳ ኣዛዞዛ ሜንꬃዳ ታኒ ታፔ ኣይ ሚሺካ ጉጃናስ ዎይኮ ፓጪንቻናስ ዳንዳይኬ።
NUM 22:19 ጎዳይ ታስ ዮቲዛ ሃራ ሚሺ ዲኮ ታ ኤራናሼ ጋካናስ ኢንቴካ ካሴይታꬆ ሃቻ ኦማርስ ሃን ኣቂቴ» ጊዴስ።
NUM 22:20 ሄ ጋላሳ ኦማርስ ጾሲ ባላሜኮ ዪዲ፥ «ሃ ኣሳቲ ኔና ጼይጋና ዪዳ ጊሻስ ዴንዳዳ ኢስታራ ባ፤ ጊዲኮካ ታ ኔስ ዮቲዛዝ ጻላ ኦꬃ» ጊዴስ።
NUM 22:21 ሂስቲን ዎንቴꬃ ጋላስ ባላሜይ ባ ሃሬ ኮሪ ቶጊ ኤኪዲ ሞኣቤ ሃላቃታራ ቢዴስ።
NUM 22:22 ባላሜይ ባ ሃሬ ቶጊ ኤኪዲኔ ባ ኣይሌታፔ ናምኣታ ካሌꬂዲ ቢሺን ጎዳ ሃንቆይ ኢዛ ቦላ ታማ ማላ ኤጺ ኬዚዴስ፤ ሂስቲን ጎዳ ኪታንቻይ ኢዛ ቴቃናስ ኦጌ ቦላ ኣꬊ ኤቂዴስ።
NUM 22:23 ሃሬያ ጎዳ ኪታንቻይ ጊꬃ ማሻ ኦይኪዲ ኤቂዳይሳ ቤያዳ ኦጌፔ ሃራሶ ኬዛዱስ። ባላሜይ ሃሬዮ ኦጌን ዛራናስ ኢታ ሾች ሾጪዴስ።
NUM 22:24 ሂስቲን ጎዳ ኪታንቻይ ናምኡ ባጋራ ዎይኔይ ቶኬቲዛሶሆፔ ጊዶን ያ ባጋራኔ ሃ ባጋራ ጊምቤይ ጊምቤቲ ኡቲዳ ኡንኦሶን ኤቂዴስ።
NUM 22:25 ሃሬያ ጎዳ ኪታንቻዛ ቤኢዳ ማላ ጊምቤዛኮ ሺቃዳ ባላሜ ቶሆዛ ጊምቤዛራ ዳራጻዱስ፤ ሂስቲን ባላሜይ ሃሬዮ ናምኣንꬆ ቡካ ኦይኪዴስ።
NUM 22:26 ሄሳፌ ጉዬ ጎዳ ኪታንቻይ ጌዴ ሲንꬄ ኣꬊ ቢዲ ናምኡ ባጋራ ኣꬊዛሶይ ባይንዳ ጹንꬃ ኦጌን ኤቂዴስ።
NUM 22:27 ሃሬያ ጎዳ ኪታንቻዛ ቤኣዳ ባላሜይ ቶጊ ዲሺን ቢታን ኢቻዱስ፤ ሄሳ ጊሻስ ባላሜይ ባ ጉፌራ ኢዞ ቡኪዴስ።
NUM 22:28 ሄ ዎዴ ጎዳይ ሃሬይስ ሃሳያናስ ዶና ዶዪን ኢዛ ባላሜስ፥ «ታ ኔስ ኣይ ኢታ ኦꬃዲና? ሄꬑቶ ኔ ታና ኣይስ ሾጫዲ?» ጋዱስ።
NUM 22:29 ባላሜይካ ኢዚስ፥ «ኔ ታና ኬሃ ካኢዳ ጊሻሳ! ታ ኩሼን ማሻይ ዲዛኮ ታ ኔና ዎꬎ ዎꬋናሺን!» ጊዴስ።
NUM 22:30 ሃሬያካ ባላሜስ፥ «ሃኖ ጋካናስ ኔ ቶጊዛ ታ ኔ ሃሬዮ ጊዲኪና! ሃይሳፌ ካሴ ሃኒꬆ ሃና ኤራዚና?» ጋዱስ። ባላሜይ ኢዚስ ዛሪዲ፥ «ሙሌካ ሃይሳꬆ ሃና ኤራካ» ጊዴስ።
NUM 22:31 ሄ ዎዴ ጎዳይ ባላሜ ኣይፌታ ዶዪን ጎዳ ኪታንቻይ ጊꬃ ማሻ ሾዲ ኦይኪዲ ኦጌን ኤቂዳይሳ ቤኢዲ ባላሜይ ቢታ ቦላ ጉፋኒዴስ።
NUM 22:32 ጎዳ ኪታንቻዚ ኢዛስ፥ «ኔ ሃሬዮ ኣይስ ሄꬑቶ ሾጫዲ? ታኒ ያዳ ኔ ኦጌ ጎርዲዳይ ኔ ቢዛ ኦጌዚ ጌላ ጊዲዳ ጊሻስ ኔና ዛራናሳ።
NUM 22:33 ኔ ሃሬያ ታና ቤኣዳ ሄꬑቶ ታ ሲንꬃፌ ባቃታዱስ፤ ኢዛ ባቃቶንታኮ ታ ኢዞ ኣጋዳ ኔና ዎꬋይቻናኮሺን» ጊዴስ።
NUM 22:34 ባላሜይ ጎዳ ኪታንቻስ ዛሪዲ፥ «ቱሙካ ታ ናጋራ ኦꬃዲስ፤ ኔ ታና ቴቃናስ ኦጌ ቦላ ኤቂዳይሳ ታ ኤራቤኬ፤ ሃኢካ ኔ ታ ቡሳ ዶሶንታ ጊዲኮ ታኒ ጉዬ ታሶ ሲማና» ጊዴስ።
NUM 22:35 ጎዳ ኪታንቻይ ባላሜስ፥ «ኔ ሃ ኣሳታራ ባ ሺን ታኒ ኔስ ዮቲዛይሳ ጻላ ዮታ» ጊዴስ፤ ሂስቲን ባላሜይ ባላቄይ ኪቲዳ ሃላቃታራ ቢዴስ።
NUM 22:36 ባላቄይ ባላሜይ ዪዛይሳ ሲዪዲ ኢዛ ሞካናስ ሞኣቤ ባዞን ኣርኖኔ ሻፋ ኣቻን ዲዛ ኤሬ ካታማ ቢዴስ።
NUM 22:37 ባላቄይ ባላሜ፥ «ኮይሮ ታ ኔኮ ኪቲዳ ኣሳታራ ኣዛስ ዮንታ ኢጻዲ? ታ ኔና ቦንቾንታ ኣስ ሚሳቲኔ?» ጊ ኢዛ ኦይቺዴስ።
NUM 22:38 ባላሜይካ ባላቄስ፥ «ጊዲኮካ ሃኢ ታኒ ኔኮ ያዲስ፤ ሃኢካ ታስ ኣይ ዎልቃይ ዲዜ? ታ ሃሳያና ዳንዳይዛይ ጾሲ ታስ ዮቶሮ ጻላ» ጊዴስ።
NUM 22:39 ሄሳ ጊሻስ ባላሜይ ባላቄራ ጌዴ ቂሪያቴ ሁጾቴ ካታማ ቢዴስ።
NUM 22:40 ባላቄይ ሄን ሜሄ ሹኪሲዲ ሄ ኣሾዛፔ ጉꬅ ሄን ባናራ ዲዛ ዴሬ ካሌꬂዛይታሲኔ ባላሜስ ኢሚዴስ።
NUM 22:41 ዎንቴꬃ ጋላስ ማላዶ ባላቄይ ባላሜ ኢስራኤሌ ኣሳፔ ባጋይ ቤቲዛሶ ፑዴ ባሞቲ ባኣሌ ጌቴቲዛ ዙማ ቦላ ኬሲዴስ።
NUM 23:1 ባላሜይ ባላቄ፥ «ኔ ታስ ሃይሳን ላፑን ያርሾ ያርሻናሶታ ኦꬃ፤ ቃሴካ ላፑን ኮርማ ቦራታኔ ላፑን ዶርሳ ꬋርሾታ ታስ ሃ ኤካ ያ» ጊዴስ።
NUM 23:2 ባላቄይ ባላሜይ ኢዛስ ዮቲዳ ማላ ኦꬂዴስ፤ ኢስቲ ናምኣይ ያርሾ ያርሺዛሶሆታ ቦላ ኢሲ ኢሲ ኮርማ ቦራኔ ኢሲ ኢሲ ꬋርሾ ያርሾ ሺሺዳ።
NUM 23:3 ሄሳፌ ጉዬ ባላሜይ ባላቄስ፥ «ጾሲ ሃ ታኮ ያናኮኔ ዮንታኮ ታኒ ጌዴ ባዳ ኤራና ጋካናስ ኔኒ ሃይሳን ጹጌቲዛ ያርሾዛ ኣቻን ኤቃሻ፤ ጎዳይ ታስ ቆንጪሲኮ ሄሳ ታ ኔስ ዉርሳ ዮታና» ጊዴስ፤ ሄሳፌ ጉዬ ባላሜይ ባርካ ፑዴ ꬎቃሶ ኬዚዴስ።
NUM 23:4 ሄን ጾሲ ኢዛራ ጋይቲዴስ፤ ባላሜይካ፥ «ታኒ ላፑን ያርሾ ያርሺዛሶሆታ ጊጊሳዲስ፤ ያርሾ ያርሺዛሶሆታ ኢሳ ኢሳ ቦላ ኢሲ ኢሲ ኮርማ ቦራኔ ኢሲ ኢሲ ꬋርሾ ያርሻዲስ» ጊዴስ።
NUM 23:5 ጎዳይካ ባላሜይ ባላቄስ ዮታናስ ቤሲዛ ኪታ ኢዛስ ዮቲዳፔ ጉዬ ባላቄኮ ሲሚ ባና ማላ ዮቲዴስ።
NUM 23:6 ኢዚካ ጉዬ ሲሚ ቢሺን ባላቄይ ሞኣቤ ኣይሲዛ ዳናታ ኡባራ ኢሲፌ ሄ ጹጌቲዛ ያርሾዛ ኣቻን ኤቂዳ ማላ ዴሚዴስ።
NUM 23:7 ሄሳፌ ጉዬ ባላሜይ ሃሳያ ዶሚዲ፥ «ሞኣቤ ካዎ ባላቄይ ኣርሼይ ሞኪዛ ባጋራ ዲዛ ዙማቲ ዲዛ ኣራሜፔ ታና ጼይጊ ኤሂዴስ፤ ኢዚ ታና፥ ‹ሃ ያዳ ኢስራኤሌ ኣሳ ታስ ዶቃርኪ! ኢስቲ ꬋያና ማላ ታስ ኢስታ ቃንጋርኪ!› ጊዴስ።
NUM 23:8 ሂስቲን ታኒ ጾሲ ቃንጎንታዴ ዎስታ ቃንጎ? ጾሲ ሂሎንታዴ ታኒ ዎስታ ሂሎ?
NUM 23:9 ታኒ ኢስታ ሃይታ ጊታ ዛላታ ቦላ ዳሼ ዴማይስ፤ ꬎቃ ዙማታ ቦላ ዳሼ ታ ኢስታ ጼላይስ፤ ኢስቲ ባርካ ዲዛ ካዎቴꬅ፤ ኢስቲ ባና ሃራ ካዎቴꬃራ ጋꬂ ቆዶንታይሲ ታስ ቤቴስ።
NUM 23:10 ጉዱላ ማላ ጮሪዳ ያቆቤ ዜሬꬃ ቆዲ ዳንዳያናይ ኦኔ? ዎይኮ ኢስራኤሌስ ጪጎዛካ ቆዲ ካንꬃናይ ኦኔ? ጺሎ ኣሳታ ሃይቆ ታ ሃይቃና፤ ታ ዉርሴꬃይካ ኢስታ ዉርሴꬃ ማላ ጊዶ» ጊዴስ።
NUM 23:11 ባላቄይ ባላሜስ፥ «ሃይሲ ኔ ታ ቦላ ኦꬂዳይሲ ኣዜ? ታኒ ኔና ሃ ኤሂዳይ ኔ ታ ሞርኬታ ቃንጋናሳ፤ ኔኒ ጊዲኮ ኢስታ ኣንጆ ኣንጃዳሳ ኣቲን ቃንጋቤካ» ጊዴስ።
NUM 23:12 ባላሜይካ ዛሪዲ፥ «ጎዳይ ታስ ቆንጪሲዳይሳ ጻላ ታ ዮታናስ ቤሴኔ?» ጊዴስ።
NUM 23:13 ባላቄይ ባላሜስ፥ «ኢስራኤሌ ኣሳ ኩሜꬃ ጊዶንታ ኢስታፌ ጉꬃቲ ኔስ ቤቲዛሶ ጌዴ ሃራሶ ታናራ ኢሲፌ ባዳ ኔ ኢስታ ሄን ታስ ቃንጋርኪ!» ጊዴስ።
NUM 23:14 ሄሳፌካ ፑዴ ፒዝጋ ዙማ ሁኤን ዲዛ ጾፊሜ ዴምባ ኤፊዴስ፤ ሄንካ ላፑን ያርሾ ያርሺዛሶ ጊግሲዲ ኢሲ ኢሲ ያርሺዛሶዛ ቦላ ኢሲ ኢሲ ኮርማ ቦራኔ ꬋርሾ ያርሺዴስ።
NUM 23:15 ባላሜይ ባላቄስ፥ «ኔኒ ሃይሳ ጹጌቲዛ ያርሾዛ ማታን ኤቃሻ፤ ታኒ ጎዳራ ጋይታና ጌዴ ባይስ» ጊዴስ።
NUM 23:16 ጎዳይካ ባላሜራ ሄን ጋይቲዴስ፤ ኢዚ ዮታና ኪታ ኢዛስ ዮቲዲ ኔኒ ባላቄኮ ሲማ ባዳ ሃይሳ ሃ ኪታ ኢዛስ ዮታ።
NUM 23:17 ኢዚ ሲሚ ቢሺን ባላቄይ ሞኣቤ ዴሬዛ ካሌꬂዛይታራ ሄ ጹጌቲዛ ያርሾዛ ማታን ኤቂዳ ማላ ዴሚዴስ፤ ባላቄይካ ጎዳይ ኢዛስ ኣይ ዮቲዳኮ ኢዛ ኦይቺዴስ።
NUM 23:18 ባላሜይካ ኢዛስ ሃሳያ ዶሚሼ፥ «ጺፖራ ና ባላቄ! ሃ ሺቃ! ታኒ ኔስ ዮቲዛይሳ ሲያ።
NUM 23:19 ጾሲ ኣሳ ማላ ዎርዶቴና፤ ኢዛ ቆፋይ ኣሳ ቆፋ ማላ ላሜቴና፤ ኢዚ ባ ኢሚዳ ሂዶታ ኡባ ፖሌስ፤ ኢዚ ባ ዮቲዳ ኡባ ኦꬄስ።
NUM 23:20 ኢዚ ታስ ታ ኣንጃና ማላ ዮቲዴስ፤ ጾሲ ኣንጂዳ ቃላ ታኒ ላማናስ ዳንዳይኬ።
NUM 23:21 ያቆቤ ዜሬꬃ ቦላ ሜቶይ ጋኬና፤ ኢስራኤሌ ኣሳ ቦላካ ዋዬይ ጋኮንታይሲ ታስ ቤቴስ፤ ጎዳይ ኢስታራ ዴስ፤ ጾሲ ካዎ ጊዲዳይሳ ኢስቲ ቆንጬን ዮቴቴስ።
NUM 23:22 ጾሲ ኢስታ ጊብጼፔ ኬሲዴስ፤ ኢዚ ኢስታስ ሜንꬃ ማላ ቃይጫና።
NUM 23:23 ያቆቤ ናይታ ቦላ ኣይ ቢታይ፥ ኢስራኤሌ ቦላ ኣይ ሙሬኖይካ ኦꬄና፤ ሄኮ ሃኢ ያቆቤሲኔ ኢስራኤሌስ፥ ‹ጾሲ ኢስቲ ኣይ ኦꬂዳኮ ኣኔ ጼሊቴ!› ጌቴታና።
NUM 23:24 ኢስራኤሌ ኣሳይ ማጫ ጋሞ ማላ ዴንዳና፤ ባ ሻንካቲ ኤሂዳይሳ ሞንታ፥ ሱꬃካ ኡዮንታ ዲሼ ሼምፖንታ ጋሞ ማላ ዴንዳና» ጊ ዮቲዴስ።
NUM 23:25 ሄሳፌ ጉዬ ባላቄይ ባላሜስ፥ «ኔኒ ኢስራኤሌ ኣሳ ቃንጎንታ ኢጺዳ ማላ ኢስታ ኣንጆካ ኣንጆፋ!» ጊዴስ።
NUM 23:26 ባላሜይካ፥ «ታኒ ካሴ ኔስ ጎዳይ ታስ ዮቶሮ ጻላ ታ ኦꬃና ጋዳ ዮታቤኪና?» ጊዴስ።
NUM 23:27 ባላቄይካ፥ «ሃ ያ ኣኔ ሃይሳፌ ሃራሶ ቦስ፤ ኦኔ ኤሪዛይ ኔኒ ሄን ዳዳ ሃይሳ ዴሬዛ ታስ ቃንጋና ማላ ጾሲ ኔስ ኤሮ ጎንታ ኣጌና» ጊዴስ።
NUM 23:28 ሄሳ ጊሻስ ባላቄይ ባላሜ ጌዴ ባዞ ጊናራ ዲዛ ፔኦሬ ዙማ ሁኤ ኤኪ ኬዚዴስ።
NUM 23:29 ባላሜይካ ኢዛ፥ «ሃይሳን ታስ ላፑን ያርሾ ያርሺዛሶ ጊጊሳ፤ ላፑን ኮርማ ቦራታኔ ላፑን ꬋርሾታ ሃ ታስ ኤካ ያ» ጊዴስ።
NUM 23:30 ባላቄይካ ባላሜይ ኢዛስ ዮቲዳ ማላ ኦꬂዴስ፤ ያርሾ ያርሺዛሶዛ ቦላ ኢሲ ኢሲ ኮርማ ቦራኔ ኢሲ ኢሲ ꬋርሾ ያርሾ ሺሺዴስ።
NUM 24:1 ባላሜይካ ጎዳይ ኢስራኤሌ ኣሳ ኣንጃናስ ዶሲዳይሳ ኤሪዳ ዎዴ ካሴ ኢዚ ኦꬂዛይሳ ማላ ሙሬኖ ኦሶ ኦꬃናስ ኮዪቤና፤ ባ ሲንꬃካ ዱጌ ባዞ ዛሪዴስ።
NUM 24:2 ኢስራኤሌ ኣሳይ ባ ቆሞን ቆሞን ማራራ ዱንካኒ ኡቲዳይሳ ቤኢዴስ፤ ጾሳ ኣያናይ ኢዛ ቦላ ዎꬊዴስ፤
NUM 24:3 ሂስቲን ኢዚ ቲንቢቴ ሃሳያ ዶሚዲ፥ «ቢኦሬ ና ባላሜይ ሃሳይዛ ቲንቢቴ ቃላይ፥ ኢዛ ኣይፌቲካ ዶዬቲዳዴይ፥
NUM 24:4 ጾሳ ቃላ ሲዪዛዴይ ኢዚ ኩንዲ ዲሺን ኢዛ ኣይፌቲ ዶዬቲን ኡባ ዳንዳይዛ ጾሳ ኣጁታ ቤኢዛዴ ኪታይ ሃይሳ።
NUM 24:5 ያቆቤ ኔ ዱንካኔቲ ኢስራኤሌ ኔ ዲዛሶቲ ኣይ ማላ ሎኦ?
NUM 24:6 ኢስቲካ ሚጬቲዳ ዙሌታ ማላ፤ ቃሴካ ሻፋ ዶናን ዲዛ ኣታኪልቴሶሆታ ማላ፤ ጎዳይ ቶኪዳ ጎዳሬ ኡꬃ ማላ፤ ዎይኮ ሻፋ ዶናን ዲዛ ሊባኖሴ ዚጋ ማላ።
NUM 24:7 ኢራይ ኡባ ዎዴ ኢስታስ ቡኪዛ ጊሻስ ኢስታ ሃꬂ ኩሚ ፓላሄስ፤ ዜሬꬃ ዎዴ ኢስታስ ጊዲዛ ሃꬂ ዴስ፤ ኢስታ ካዎይ ኣጋጌፔ ኣꬌꬅ ጊዳና፤ ኢስታ ካዎቴꬂ ꬎቁ ꬎቁ ጋና።
NUM 24:8 ኢስታ ጊብጼፔ ኬሲዳ ጾሲ ኢስታስ ሜንꬃ ማላ ኦሌታና፤ ኢስታ ሞርኬ ጊዲዳ ካዎቴꬃታ ኢዚ ፑዜሬꬂ ዬጋና፤ ኢዚ ኢስታ ሜቄꬃታ ሊቂሳና፤ ኢስታ ዎንዳፌታካ ሜንꬄሬꬂ ዬጋና።
NUM 24:9 ሃይሲ ካዎቴꬃይ ጋሞ ማላ ዛማዲ ኡቲዴስ፤ ማጫ ጋሞ ማላካ ዙጊ ኡቲዴስ፤ ኢስቲ ዛማዲ ኡቲዳሶሆፔ ኢስታ ዴንꬃና ዳንዳይዛይ ኦኔ? ኔና ኣንጂዛዴይ ኣንጄቶ፤ ኔና ቃንጊዛዴይካ ቃንጌቶ» ጊዴስ።
NUM 24:10 ባላቄይ ሃንቆን ባ ኩሼ ባቂዲ ባላሜስ፥ «ታኒ ኔና ታ ሞርኬታ ቃንጋናስ ጼይጋዲስ፤ ጊዶ ኣቲን ኔኒ ኢስታ ሄꬑቶ ኣንጃዳሳ።
NUM 24:11 ሃኢ ጊዲኮ ኤሶን ጌዴ ኔሶ ባ! ታ ኔስ ዳሮ ሚሽ ኢማና ጋ ቃላ ጌላዲስ፤ ጊዶ ኣቲን ኔ ሄ ሚሻ ዴሞንታ ማላ ጾሲ ጎርዲዴስ» ጊዴስ።
NUM 24:12 ባላሜይ ባላቄስ ዛሪዲ፥ «ኔኒ ታኮ ኪቲዳ ኣሳታስ፥
NUM 24:13 ‹ባላቄይ ባስ ዲዛ ቢራኔ ዎርቃ ኡባ ኢዚ ታስ ኢሚዛኮካ ታኒ ታ ሼኔን ኢታ ጊዲን ዎይኮ ሎኦ ኦꬃናስ ጎዳ ቃላፔ ኣꬋናስ ዳንዳይኬ፤ ታኒ ዮታናይ ጎዳይ ታስ ዮቶሮ ጻላ› ጋዳ ካሴ ታ ኢስታስ ዮታቤኪና?» ጊዴስ።
NUM 24:14 ዉርሴꬃን ባላሜይ ባላቄስ፥ «ሃኢ ታኒ ጌዴ ታ ዴሬ ሲማ ባይስ፤ ጊዶ ኣቲን ታ ባናፔ ካሴታዳ ኢስራኤሌ ኣሳይ ኔ ዴሬ ኣሳ ቦላ ጋꬃናይሳ ኔስ ቆንጪሳናስ ኮያይስ» ጊዴስ።
NUM 24:15 ሄሳፌ ጉዬ ኢዛስ ቲንቢቴ ዮቶ ዶሚዲ፥ «ኢዛ ኣይፌይ ዶዬቲዳዴይ፥ ቢኦሬ ና ባላሜይ ዮቲዛ ቲንቢቴ ቃላይ ሃይሳ፤
NUM 24:16 ጾሳ ቃላ ሲዪዛዴ፥ ኢዚ ኩንዲ ዲሺን ኢዛ ኣይፌቲ ዶዬቲን ዎልቃማ ጾሳፌ ኤራቴꬅ ዴሚዳዴ፥ ኡባ ዳንዳይዛ ጾሳ ኣጁታ ቤኢዛዴ ኪታይ ሃይሳ።
NUM 24:17 ታኒ ኢዛ ቤኣይስ፤ ጊዶ ኣቲን ሃኢ ጊዴና፤ ታ ኢዛ ጼላይስ፤ ጊዲኮካ ሃኢ ማታን ጊዴና፤ ጾሊንቴይ ያቆቤፔ ቤታና፤ ካዎቴꬃ ጉፌይ ኢስራኤሌፔ ኬዛና፤ ሞኣቤ ዜሬꬃኔ ሴቴ ዜሬꬃታ ኡባ ዲፒ ሂስቲ ꬋይሳና።
NUM 24:18 ኤዶሜይ ጾኔታና፤ ኢዛ ሞርኬ ሴይሬይካ ኢዛስ ሃሬታና፤ ኢስራኤሌ ዴሬይ ጾኖይ ጾኖሺን ዳና።
NUM 24:19 ያቆቤፔ ዴሬ ኣይሲዛዴይ ኬዛና፤ ኢዚ ካታማ ጊዶን ኣቲዳይታ ፒቲ ꬋይሳና» ጊዴስ።
NUM 24:20 ሄሳፌ ጉዬ ባላሜይ ጌዴ ኣማሌቄ ዛሪ ጼሊዲ፥ «ኣማሌቄይ ኡባፌ ኣꬊዛ ዎልቃማ ካዎቴꬅ፤ ጊዶ ኣቲን ኢዚ ዉርሴꬃን ሜርናስ ꬋያና» ጊ ቲንቢቴ ዮቲዴስ።
NUM 24:21 ጌዴ ቄናዌ ዴሬ ኣሳኮ ሲሚ ጼሊዲ፥ «ኔ ዱሳሶይ ኣማኔቲዳሶ ሚሳቲኮካ፥ ኔ ኬꬃይ ዛላፌ ዎጬቲ ኬጼቲዳ ጊዲኮካ፥
NUM 24:22 ኢንቴኖ ቄናዌ ዴሬቶ! ኣሶሬይ ኢንቴና ጾኒዲ ዲኢ ኤፊዛ ዎዴ ኢንቴ ዉሪ ዉራና» ጊ ቲንቢቴ ዮቲዴስ።
NUM 24:23 ዉርሴꬃን ባላሜይ፥ «ጾሲ ሃይሳ ኦꬂሺን ኦኔ ሼምፖራ ፓጻ ዳናይ?
NUM 24:24 ኦላስ ዎራጂዛ ኣሳይ ማርካቤራ ቆጲሮሴፔ ያና፤ ኢስቲካ ኣሶሬኔ ኤቦሬ ꬋይሳና፤ ኢስቲካ ባ ሁኤስ ሜርናስ ꬋያና» ጊ ቲንቢቴ ዮቲዴስ።
NUM 24:25 ሄሳፌ ጉዬ ባላሜይ ዴንዲዲ ጌዴ ባ ዴሬ ቢዴስ፤ ባላቄይካ ባሶ ሲሚዴስ።
NUM 25:1 ኢስራኤሌ ኣሳይ ሺጺሜ ሾባን ዲዛ ዎዴ ኣዴቲ ሄን ዲዛ ሞኣቤ ዴሬ ማጫሳታራ ላይማቲዳ፤
NUM 25:2 ሄ ሞኣቤ ማጫሳቲ ኤቃ ጾሳታስ ያርሺዛ ያርሾ ካꬃፌ ማና ማላ ኢስራኤሌ ኣሳ ጼይጊን ኢስቲካ ሄ ካꬃፌ ሚዲ ኤቃ ጾሳስ ጎይኒዳ።
NUM 25:3 ኢስራኤሌ ኣሳይ ባኣሊ-ፔኦሬ ጌቴቲዛ ኤቃ ጾሳስ ጎይኒዳ ጊሻስ ጾሲ ኢስታ ቦላ ሃንቄቲዴስ።
NUM 25:4 ጎዳይ ሙሴስ፥ «ኢስራኤሌ ኣሳ ቦላ ኤጺዳ ታ ሃንቆይ ዶቻና ማላ ኢስራኤሌ ኣሳ ካሌꬂዛይታ ኡባ ኤካዳ ሴታ ጋላስ ሱሊዛ ኣዋን ዴሬዚ ቤኢሺን ካቃ ዎꬋ» ጊዴስ።
NUM 25:5 ሙሴይካ ኢስራኤሌ ኣሳ ቦላ ፒርዲዛ ዳናታስ፥ «ኢንቴ ኢሶይ ኢሶይ ኢንቴ ዛርኬፌ ዛርኬፌ ባኣሊ-ፔኦሬ ጌቴቲዛ ኤቃ ጾሳዛስ ጎይኒዳ ኣስ ኡባ ዎꬊቴ» ጊዲ ኣዛዚዴስ።
NUM 25:6 ሙሴይኔ ኩሜꬃ ማባራይ ጋይቶቴꬃ ዱንካኔ ፔንጌን ሺቂዲ ዬኪሺን ኢስራኤሌ ኣሳ ጋርሳፌ ኢሳዴይ ኢሲ ሚዲያሜ ማጫሳዮ ኤኪዲ ዴራ ሲንꬃራ ኣꬊ ጌዴ ባሶ ኣሳኮ ቢዴስ።
NUM 25:7 ቄሴ ኣሮኔስ ናዛ ናይ፥ ኤልኤዜሬ ና ፊኒሃሲ ሄሳ ቤኢዲ ካሴ ባ ኡቲዳሶሆፔ ፑሱኩ ጊ ዴንዲዲ ቶሆራ ኤኪዲ ዴሬዛ ጊዶፌ ኬዚ ቢዴስ።
NUM 25:8 ሄ ኣዴዚኔ ማጫሳያ ኢዛን ዲዛ ዱንካኔን ጌሊዴስ፤ ናምኣታካ ኢሲ ቦላ ቶራራ ጫዲ ዎꬊዴስ፤ ሂስቲን ኢስራኤሌ ኣሳ ቦላ ዪዳ ቦሻይ ሲሚዴስ።
NUM 25:9 ቦሻይ ሲማና ጋካናስ ሲንꬃን ሃይቂዳ ኣሳይ 24,000 ጊዲዴስ።
NUM 25:10 ጎዳይ ሙሴስ ሂዝጊዴስ፥
NUM 25:11 «ቄሴ ኣሮኔስ ናዛ ና፥ ኤልኤዜሬ ና ፊኒሃሲ ኢስራኤሌ ኣሳ ጊዶን ታኒ ታ ቦንቾስ ኤቄቲዛ ማላ ኢዚ ኤቄቲዳ ጊሻስ ኢስታ ቦላ ታ ሃንቄቲዳ ሃንቆይ ዶቺዴስ፤ ሄሳ ጊሻስ ታኒ ታ ሃንቆዛን ኢስራኤሌ ኣሳ ꬋይሳቤኬ።
NUM 25:12 ሄሳ ጋሶን ታኒ ኢዛስ ሜርና ሳሮቴꬃ ጫቆ ቃላ ጌሊዳይሳ ኔ ኢዛስ ዮታ።
NUM 25:13 ኢዚ ባ ጎዳ ቦንቾስ ኤቂዳ ጊሻሲኔ ዴራ ናጋራ ኢዚ ዉርሲዳ ጊሻስ ኢዚኔ ኢዛ ዜሬꬃቲ ኡባይ ሜርናስ ቄሴ ጊዳና።»
NUM 25:14 ሄ ሚዲያሜ ማጫሳይራ ኢሲፌ ሃይቂዳ ኢስራኤሌ ኣዴዛ ሱንꬂ ሳሉ ና ዚሚሬ ጌቴቴስ፤ ኢዚካ ሲሞና ዛርኬታስ ኮራፒኔ።
NUM 25:15 ሄ ማጫሳያ ኮዜቦ ጌቴታዉስ፤ ኢዚ ኣዋይ ጹሬ ጌቴቴስ፤ ኢዚካ ባናራ ኢሲፌ ዲዛ ኣማርዳ ሚዲያሜ ቆሞታስ ኮራፒኔ።
NUM 25:16 ጎዳይ ሙሴስ ሂዝጊዴስ፥
NUM 25:17 «ኢንቴ ሚዲያሜ ኣሳ ሞርኬ ማላ ቆዲዲ ዲፒ ሂስቲ ꬋይሲቴ።
NUM 25:18 ጋሶይካ ኢስቲ ፔኦሬን ኢንቴ ቦላ ጌኔ ኦꬂዳ ጊሻሲኔ ሄን ዎꬊዳ ቦሻ ጌዶን ሃይቂዳ ኢስታ ሃላቃ ናዮ ኮዜቢ ባጋራ ባሌꬂዲ ኢንቴ ቦላ ሞርኬቴꬃ ኦሶ ኦꬂዳ ጊሻሳ።»
NUM 26:1 ሄ ቦሻዚ ኣጊዳፔ ጉዬ ጾሲ ሙሴሲኔ ቄሴ ኣሮኔ ና ኤልኤዜሬስ፥
NUM 26:2 «ኩሜꬃ ኢስራኤሌ ማባራን ኢሳዴ ኬꬃን ኬꬃን ኢስታስ ላይꬂ 20 ኩሚዳይታኔ ሄሳፌካ ቦላራ ጊዲዲ ዎታዳሬቴꬃን ኦꬃናስ ዳንዳይዛ ኣቱማ ናይታ ኡባ ቆዲቴ» ጊዴስ።
NUM 26:3 ሙሴይኔ ቄሴ ኤልኤዜሬይ ዮርዳኖሴ ሻፋ ማታን ኢያርኮ ጊናራ ዲዛ ሞኣቤ ዴምባን ዴሬዛ ሺሺዲ፥
NUM 26:4 «ጎዳይ ሙሴስ ኣዛዚዳ ማላ ናምኡ ታሙ ላይꬂኔ ሄሳፌካ ቦላራ ዲዛ ኣሳ ኡባ ቆዲቴ» ጊዳ። ጊብጼ ዴሬፔ ኬዚዳ ኢስራኤሌ ኣሳይ ሃይሳፌ ካሊዛይታ፤
NUM 26:5 ያቆቤስ ባይራ ናዛ ኦሮቤሌ ዛርኬፌ ዬሌቲዳይቲ ሄኖኬኔ ኢዛ ዜሬꬃታ፥ ፓሉኔ ኢዛ ዜሬꬃታ፥
NUM 26:6 ሄጺሮሜኔ ኢዛ ዜሬꬃታ፥ ካርሜኔ ኢዛ ዜሬꬃታ።
NUM 26:7 ኦሮቤሌ ዛርኬፌ ቆዴቲዳይቲ 43,730።
NUM 26:8 ፓሉ ናይ ኤልያቤ፤
NUM 26:9 ኤልያቤ ናይቲ ናሙኤሌ፥ ዳታኔኔ ኣብራሜ፤ ዳታኔይኔ ኣብራሜይ ዴሬዛን ዶሬቲዳይታ ጊዲ ኡቲዲ ቆሬራኔ ኢዛ ካሊዛይታራ ዙፔቲዲ ጎዳ ቦላ ማካሊዲ ሙሴኔ ኣሮኔ ፓጪዳ።
NUM 26:10 ኢስታካ ቢታያ ዶዬታዳ ቆሬራ ኢሲ ቦላ ጋꬃ ሚታዱስ፤ ኢስቲካ ሃይቂን ሳሎፔ ዎꬊዳ ታማይ 250 ኣሳ ጹጊዴስ፤ ሂስቲን ኢስታ ቃጻዬቴꬂ ሃራ ኣሳስ ማላታ ጊዲዴስ።
NUM 26:11 ቆሬ ዜሬꬃቲ ጊዲኮ ሃይቂቤቴና።
NUM 26:12 ሲሞና ዛርኬፌ ዬሌቲዳይቲ ናሙኤሌኔ ኢዛ ዜሬꬃታ፥ ያሚኔኔ ኢዛ ዜሬꬃታ፥ ያኪኔኔ ኢዛ ዜሬꬃታ፥
NUM 26:13 ዛራሄኔ ኢዛ ዜሬꬃታ፥ ሳኦሌኔ ኢዛ ዜሬꬃታ፥
NUM 26:14 ሲሞና ዛርኬታፔ ቆዴቲዳይቲ 22,200 ኣዴታ።
NUM 26:15 ጋዴ ዛርኬፌ ዬሌቲዳይቲ ጺፎኔኔ ኢዛ ዜሬꬃታ፥ ሃጌኔ ኢዛ ዜሬꬃታ፥ ሹኔኔ ኢዛ ዜሬꬃታ፥
NUM 26:16 ኦሲናኔ ኢዛ ዜሬꬃታ፥ ኤሬኔ ኢዛ ዜሬꬃታ፥
NUM 26:17 ኣሮዴኔ ኢዛ ዜሬꬃታ፥ ኣርኤሌኔ ኢዛ ዜሬꬃታ።
NUM 26:18 ጋዴ ዛርኬታፔ ቆዴቲዳይቲ 40,500 ኣዴታ።
NUM 26:19 ዩሁዳ ዛርኬፌ ዬሌቲዳይቲ፥ ኤራኔ ኦናኔ፤ ኢስቲ ካናኔ ቢታን ሃይቂዳ።
NUM 26:20 ሃንኮ ኣቲዳ ዩሁዳ ዛርኬፌ ዬሌቲዳይቲ ሴሎሜኔ ኢዛ ዜሬꬃታ፥ ፓሬሴኔ ኢዛ ዜሬꬃታ፥ ዛራሄኔ ኢዛ ዜሬꬃታ።
NUM 26:21 ፓሬሴ ዜሬꬃቲ ሄጺሮሜኔ ኢዛ ባጋታ፥ ሃሙሌኔ ኢዛ ዜሬꬃታ።
NUM 26:22 ዩሁዳ ዛርኬፌ ቆዴቲዳይቲ 76,500 ኣዴታ።
NUM 26:23 ዪሳኮሬ ዛርኬፌ ዬሌቲዳይቲ ቶላ ኢዛ ዜሬꬃታ፥ ፑዋኔ ኢዛ ዜሬꬃታ፥
NUM 26:24 ያሹቤኔ ኢዛ ዜሬꬃታ፥ ሺሚሮኔኔ ኢዛ ዜሬꬃታ።
NUM 26:25 ዪሳኮሬ ዛርኬታፔ ቆዴቲዳይቲ 64,300 ኣዴታ።
NUM 26:26 ዛቢሎኔ ዛርኬፌ ዬሌቲዳይቲ፥ ሴሬዴኔ ኢዛ ዜሬꬃታ፥ ኤሎኔኔ ኢዛ ዜሬꬃታ፥ ያሂሌኤሌኔ ኢዛ ዜሬꬃታ።
NUM 26:27 ዛቢሎኔ ዛርኬፌ ቆዴቲዳይቲ 60,500 ኣዴታ።
NUM 26:28 ዮሴፌ ዛርኬፌ ዬሌቲዳይቲ፥ ሚናሴኔ ኢዛ ዜሬꬃታ፥ ኤፍሬሜኔ ኢዛ ዜሬꬃታ፥
NUM 26:29 ሚናሴ ናይታ ዜሬꬅ ማኪሬይ ጋላኣዴ ዬሊዴስ፤
NUM 26:30 ጋላኣዴ ናይቲ ኤዜሬኔ ኢዛ ዜሬꬃታ፥ ሄሌቄኔ ኢዛ ዜሬꬃታ፥
NUM 26:31 ኣሲራኤሌኔ ኢዛ ዜሬꬃታ፥ ሴኬሜኔ ኢዛ ዜሬꬃታ፥
NUM 26:32 ሻሚዳኔ ኢዛ ዜሬꬃታ፥ ሄፌሬኔ ኢዛ ዜሬꬅ።
NUM 26:33 ሄፌሬ ና ጺሎፋዴይ ማጫ ናይታ ጻላ ዬሊዴስ፤ ሄይቲካ ማሂሎ፥ ኖኦ፥ ሆጊሎ፥ ሚልኮኔ ቲርጾ ጌቴቴቴስ።
NUM 26:34 ሚናሴ ቆሞታፔ ቆዴቲዳይቲ 52,700 ኣዴታ።
NUM 26:35 ኤፍሬሜ ዛርኬፌ ዬሌቲዳይቲ፥ ሹቱላኔ ኢዛ ዜሬꬃታ፥ ቤኬሬኔ ኢዛ ዜሬꬃታ፥ ታሃኔኔ ኢዛ ዜሬꬃታ፥
NUM 26:36 ሹቱላ ና ኤራኔኔ ኢዛ ዜሬꬃታ።
NUM 26:37 ኤፍሬሜ ዛርኬታፔ ቆዴቲዳይቲ 32,500 ኣዴታ፤ ዮሴፌ ዛርኬፌ ባ ባጋን ባጋን ቆዴቲዳይቲ ሃይታንታ።
NUM 26:38 ቢኒያሜ ዛርኬፌ ዬሌቲዳይቲ፥ ቤላኔ ኢዛ ዜሬꬃታ፥ ኣሺቤሌኔ ኢዛ ዜሬꬃታ፥ ኣሂራሜኔ ኢዛ ዜሬꬃታ፥
NUM 26:39 ሻፋሜኔ ኢዛ ዜሬꬃታ፥ ሁፉሜኔ ኢዛ ዜሬꬃታ፥
NUM 26:40 ቤላ ዛርኬፌ ኣራዴኔ ኢዛ ዜሬꬃታ፤ ናኢማኔኔ ኢዛ ዜሬꬃታ፥
NUM 26:41 ቢኒያሜ ዛርኬፌ ቆዴቲዳይቲ 45,600 ኣዴታ።
NUM 26:42 ዳኔ ዛርኬታፔ ዬሌቲዳይቲ፥ ሹሃሜኔ ኢዛ ዜሬꬃታ፥
NUM 26:43 ሹሃሜ ዜሬꬃታ ቆዳይ 64,400 ኣዴታ።
NUM 26:44 ኣሴሬ ዛርኬታፔ ዬሌቲዳይቲ ዪሚኔኔ ኢዛ ዜሬꬃታ፥ ዪሺዌኔ ኢዛ ዜሬꬃታ፥ ባሪሄኔ ኢዛ ዜሬꬃታ፥
NUM 26:45 ባሪሄ ናይታፔ ሄቤሬኔ ኢዛ ዜሬꬃታ፥ ማልኪኤሌኔ ኢዛ ዜሬꬃታ፥
NUM 26:46 ኣሴሬስ ሴራሆ ጌቴቲዛ ማጫ ናይ ዳዉስ።
NUM 26:47 ኣሴሬ ዛርኬታፔ ቆዴቲዳይቲ 53,400 ኣዴታ።
NUM 26:48 ኒፍታሌሜ ዛርኬፌ ዬሌቲዳይቲ፥ ያሂጼሌኔ ኢዛ ዜሬꬃታ፥ ጉኔኔ ኢዛ ዜሬꬃታ፥
NUM 26:49 ዬጺሬኔ ኢዛ ዜሬꬃታ፥ ሼሌሜኔ ኢዛ ዜሬꬃታ፥
NUM 26:50 ኒፍታሌሜ ዛርኬታፔ ቆዴቲዳይቲ፥ 45,400 ኣዴታ።
NUM 26:51 ኩሜꬅ ቆዴቲዳ ኢስራኤሌ ኣቱማሳይ 601,730 ጊዲዴስ።
NUM 26:52 ጎዳይ ሙሴስ ሂዝጊዴስ፥
NUM 26:53 «ቢታዮ ኢስታ ሱንꬃ ሱንꬃ ቆዳ ማላ ዛርኬታስ ጺንጾ ጊዳና ማላ ሻካ ሻካዳ ኢማ።
NUM 26:54 ቆዳን ዳሪዛ ዛርኬታስ ኣሳ ኢማ፤ ቆዳን ጉጺዛይታስ ጹንꬃ ኢማ፤ ቢታ ጊሾይ ኣሳ ቆዳ ጮራቴꬃ ማላ ጊዶ።
NUM 26:55 ጊዲኮካ ጊሾዚ ሳማን ጊዶ፤ ሳማዚካ ዬጌታናይ ኢዛዴ ዛርኬን ዛርኬና።
NUM 26:56 ሳማዚ ዬጌታናይ ቆዳን ዳሮ ዜሬꬃታ ጊዶኒኔ ቆዳን ጉꬃ ዜሬꬃታ ጊዶን ጊዶ።»
NUM 26:57 ሌዌ ዛርኬፌ ዬሌቲዳይቲ ጌርሾኔኔ ኢዛ ዜሬꬃታ፥ ቃኣቴኔ ኢዛ ዜሬꬃታ፥ ሜራሬኔ ኢዛ ዜሬꬃታ፥
NUM 26:58 ቃሴካ ሊቢና ዜሬꬃታ፥ ኬብሮኔ ዜሬꬃታ፥ ማሂሌ ዜሬꬃታ፥ ሙሼ ዜሬꬃታ፥ ቆሬ ዜሬꬃታ፥ ቃኣቴይ ኣሚራሜ ማኤ።
NUM 26:59 ኣሚራሜይ ጊብጼን ዬሌቲዳ ሌዌ ናዮ ዮካቤዶ ማቾ ኤኪዴስ፤ ኢዛካ ኣሮኔኔ ሙሴ ጌቴቲዛ ናምኡ ኣቱማ ናይታኔ ማራሞ ጌቴቲዛ ኢሲ ማጫ ና ዬላዱስ።
NUM 26:60 ኣሮኔስ ናዳቤ፥ ኣቢሁ፥ ኤልኤዜሬኔ ኢታማሬ ጌቴቲዛ ኦይዱ ኣቱማ ናይቲ ዴቴስ።
NUM 26:61 ናዳቤይኔ ኣቢሁይ ጾሳ ሲንꬃን ቤሶንታ ታማ ሺሺዳ ጊሻስ ቦሻን ሃይቂዳ።
NUM 26:62 ኢስታስ ላይꬃይ ኢሲ ኣጊናኔ ኢዛፔ ቦላራ ጊዲዳ ሌዌ ዛርኬፌ ኣዴታ ቆዳይ 23,000 ጊዲዴስ፤ ሄይቲካ ሃንኮ ኢስራኤሌ ኣሳፔ ዱማ ማዝጋባን ጻፌቲ ኡቲዳ፤ ጋሶይካ ኢስታስ ኢስራኤሌ ዴሬን ጺንጾስ ጊዲዛ ኣይኮ ጋዴይ ኢሜቶንታይሳሳ።
NUM 26:63 ሙሴይኔ ኤልኤዜሬይ ኢያርኮ ጊናራ ዮርዳኖሴ ሻፋ ማታን ዲዛ ሞኣቤ ዴምባን ኢስራኤሌ ኣሳ ቆዲዳ ዎዴ ኢስቲ ጻፊ ኦይኪዳ ኢስራኤሌ ኣሳ ቆዳይ ሃይሳፌ ቦላን ዲዛይታ።
NUM 26:64 ሙሴይኔ ኣሮኔይ ኮይሮ ሲና ባዞን ዴራ ቆዲዳ ዎዴ ቆዴቲዳ ኣቱማሳፔ ሼምፖራ ፓጻ ኣቲዳይ ባዋ።
NUM 26:65 ሄሲ ሄሳꬆ ሃኒዳይ ጎዳይ ካሴ ኢስታስ፥ «ኢስቲ ዉሪካ ባዞ ቢታን ሃይቃና!» ጊዳ ጊሻሳ፤ ጊዶ ኣቲን ዮፊኔ ና ካሌቤይኔ ናዌ ና ኢያሶይ ኣታፌ ኡባይካ ሃይቂዳ።
NUM 27:1 ዮሴፌይ ሚናሴ ዬሊዴስ፤ ሚናሴይ ማኪሬ ዬሊዴስ፤ ማኪሬይ ጋላኣዴ ዬሊዴስ፤ ጋላኣዴይ ሄፌሬ ዬሊዴስ፤ ሄፌሬይ ጺሎፋዴ ዬሊዴስ፤ ጺሎፋዴስ ማሂሎ፥ ኖኦ፥ ሆጊሎ፥ ሚልኮኔ ቲርጾ ጌቴቲዛ ማጫ ናይቲ ዴቴስ።
NUM 27:2 ኢስቲካ ጋይቶቴꬃ ዱንካኔዛ ፔንጌኮ ቢዲ ኩሜꬃ ማባራኔ ዴሬዛ ካሌꬂዛይቲ ዲዛሶን ሙሴኔ ኤልኤዜሬ ሲንꬃን ኣꬊ ኤቂዲ፥
NUM 27:3 «ኑ ኣዋይ ኢሲ ኣቱማ ናካ ዬሎንታ ባዞ ቢታን ሃይቂዴስ፤ ኢዚ ጎዳ ቦላ ማካሊዳ ቆሬ ካሊዛይታራ ኢሲፌ ዙፔቲቤና፤ ጊዶ ኣቲን ኢዚ ባ ናጋራ ጋሶን ሃይቂዴስ።
NUM 27:4 ሂስቲን ኢዚ ኣቱማ ና ዬሎንታ ኣጊዳ ጋሶን ጻላ ኑ ኣዋ ሱንꬂ ኢስራኤሌ ኣሳ ጊዶፌ ቁጬቲ ꬋያናስ ቤሲዜ? ሄሳ ጊሻስ ኑስ ቤሲዛ ጺንጾ ጋዴ ኑ ኣዋ ዳቦታ ጊዶን ኢሚቴ» ጊዳ።
NUM 27:5 ሙሴይ ኢስታ ኦይሻ ጎዳ ሲንꬅ ሺሺዴስ።
NUM 27:6 ጎዳይካ ኢዛስ ሂዝጊዴስ፥
NUM 27:7 «ጺሎፋዴ ማጫ ናይቲ ኦይቺዳ ኦይሻይ ሊኬ፤ ሄሳ ጊሻስ ኔ ኢስታ ኣዋ ዳቦታ ጊዶን ኢስታስ ጺንጾ ጋዴ ኢማ፤ ካሴ ኢስታ ኣዋ ጋዴይ ጌዴ ኢስታስ ኢሜቶ።
NUM 27:8 ኣቱማ ና ዬሎንታ ሃይቂዳዴይ ዲኮ ኢዛ ማጫ ናይ ሄ ኢዛስ ዲዛዝ ላታናስ ዳንዳይዛይሳ ኢስራኤሌ ኣሳ ኤሪሳ።
NUM 27:9 ኢዛስ ማጫ ናይካ ባይንዳዝ ጊዲኮ ኢዛስ ዲዛዝ ኢዛ ኢሻቲ ላቴቶ።
NUM 27:10 ኢሻይካ ዶንታ ኣጊኮ ኢዛ ኣዋ ኢሻቲ ላቴቶ።
NUM 27:11 ኢዛስ ኣዋ ኢሻይ ዶንታ ኣጊኮ ኢዛስ ማታቲዛ ዳቦይ ኢዛ ኣቆታ ላቲዲ ጎኤታናስ ዳንዳዬስ፤ ታኒ ጎዳይ ኔና ኣዛዚዳ ማላ ኢስራኤሌ ዴሬ ኣሳይ ሃይሳ ሃ ዎጋዛ ባስ ኤቂ ዲዛ ዎጋ ሂስቲ ናጎ።»
NUM 27:12 ጎዳይ ሙሴስ፥ «ኔኒ ፑዴ ኣባሪሜ ዙማታ ቦላ ኬዛዳ ታኒ ኢስራኤሌ ኣሳስ ኢማናስ ቆፒዳ ቢታ ኡባ ዩሻ ጼላ።
NUM 27:13 ኔኒ ኢዛ ቤይዳፔ ጉዬ ኔ ኢሻ ኣሮኔይ ሃይቆይሳꬆ ኔካ ሃይቃና፤
NUM 27:14 ኢንቴ ናምኣቲካ ጺኔ ጌቴቲዛ ባዞን ታ ኣዛዞ ቦላ ማካሊዴታ፤ ኩሜꬃ ማባራይ ማሪባ ሃꬃ ኣቻን ዲሼ ታ ቦላ ማካሊዳ ዎዴ ኢንቴ ኢስራኤሌ ኣሳ ሲንꬃን ታ ዱማቴꬃ ማላ ታና ቦንቻናስ ኣማኔቲቤኬታ» ጊዴስ፤ [ማሪባይ ጺኔ ባዞን ቃዴሴን ዲዛ ፑልቶ ሃꬃ።]
NUM 27:15 ሙሴይካ ጎዳኮ ሂዝጊ ዎሲዴስ፥
NUM 27:16 «ኣስ ኡባስ ዴኦ ኢሚዳ ጎዳዉ! ሃይሳ ዴራ ሄሚዛ ኣስ ኔኒ ዶራ፤
NUM 27:17 ጋሶይካ ሃይሳ ኔ ዴሬዚ ሄሚዛይ ባይንዳ ዉዴ ማላ ጊዶንታ ማላ ኢዚ ዴራ ኬሲዛዴኔ ጌልꬂዛዴ፥ ዴሬዛካ ካሌꬂዛዴ ጊዳና።»
NUM 27:18 ጎዳይካ ሙሴስ፥ «ሎኦ ኣያናይ ኢዛን ዲዛ ናዌ ና ኢያሶ ኔኮ ኤካዳ ኔ ኩሼ ኢዛ ቦላ ዎꬃ።
NUM 27:19 ቄሴዛ ኤልኤዜሬ ሲንꬃኒኔ ኩሜꬃ ኢስራኤሌ ኣሳ ሲንꬃን ኔ ኢዛ ኤሳዳ ኢዚ ኔ ኦላ ዶሬቲዳይሳ ኣሳ ኤሪሳ።
NUM 27:20 ኩሜꬃ ኢስራኤሌ ማባራይ ኢዛስ ኣዛዜታና ማላ ኔስ ዲዛ ማታፔ ኢዛስ ሻካ ኢማ።
NUM 27:21 ቄሴ ኤልኤዜሬይ ኡሪሜን ጎዳ ሼኔ ሻኪ ኤሪዛ ጊሻስ ኢዚ ኢያሶ ማዳና፤ ሄሳ ጊሻስ ኢያሶይኔ ኩሜꬃ ኢስራኤሌ ማባራይ ኤልኤዜሬ ኣዛዞን ኬዛናኔ ጌላና» ጊዴስ።
NUM 27:22 ሙሴይካ ጎዳይ ኢዛ ኣዛዚዳ ማላ ኦꬂዴስ፤ ኢያሶካ ኤፊዲ ቄሴ ኤልኤዜሬ ሲንꬃኒኔ ኩሜꬃ ኢስራኤሌ ኣሳ ሲንꬃን ኤሲዴስ።
NUM 27:23 ጎዳይ ኢዛ ኣዛዚዳ ማላ ሙሴይ ባ ኩሼ ኢያሶ ቦላ ዎꬂዲ ኢዛ ባሶሆዛን ዶሪዴስ።
NUM 28:1 ጎዳይ ሙሴስ፥
NUM 28:2 «ኔኒ ኢስራኤሌ ኣሳስ፥ ‹ኢዛ ሳዎይ ቱኑ ጊ ታና ኡፋይሳና ማላ ጹጌቲዛ ካꬃ ያርሾ ዎዴን ዎዴን ናጊዲ ኢስቲ ታስ ሺሻና ማላ ኔ ኢስታ ኣዛዛ› ጋ ዮታ።
NUM 28:3 ቃሴካ ኢስታስ፥ ‹ታማን ጹጌቲዲ ታስ ሺቃና ያርሾይ ሃይሳፌ ካሊዛይሳ፤ ኢስታ ቦላ ዎሶይ ባይንዳ ላይꬅ ጊዲዛ ናምኡ ꬋርሾ ላቃታ ጋላስ ጋላስ ሺቂ ጹጌቲዛ ያርሾስ ሺሺቴ።
NUM 28:4 ኢሲ ላቃ ማላዶ ናምኣንꬆዛ ኦማርሳ ዎዴ ሺሺቴ።
NUM 28:5 ኢሲ ኢሲ ላቃራ ኢሲ ኪሎ ጊዲዛ ሊቆ ꬊሌ ኢሲ ሊቲሮ ጊዲዛ ዎጋራ ዛይቴን ሙኑቄቲዲ ካꬃ ያርሾ ጊዲ ሺቆ።
NUM 28:6 ሄሲካ ጋላስ ጋላስ ሺቂዛ ጹጌቲዛ ያርሾ፤ ሄሳ ማላ ያርሾ ሳዎይ ታና ጎዳ ኡፋይሲዛ ያርሾ ጊዲዲ ኮይሮ ሲና ዙማ ቦላ ሺቃና ማላ ዎጋይ ዎꬊዴስ።
NUM 28:7 ኮይሮ ላቃዛራ ሺቂዛ ኡሻ ያርሾይ ኢሲ ሊቲሮ ጊዲዛ ሚኖ ኡሹ ጌሻሶዛን ጎዳስ ጉሲቴ።
NUM 28:8 ኦማርሳ ዎዴ ናምኣንꬆ ላቃዛ ኮይሮይሳꬆካ ኡሻ ያርሾዛ ጉጂዲ ሺሺቴ፤ ሄሳ ሳዎይካ ጎዳ ኡፋይሲዛ ካꬃ ያርሾ ጊዳና።
NUM 28:9 « ‹ሳምባታ ጋላስ፥ ላይꬅ ጊዲዳ ዎሶይ ኢስታ ቦላ ባይንዳ ናምኡ ꬋርሾ ላቃታ፥ ኡሻ ያርሾራኔ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ካꬃ ያርሾ ሂስቲ ሺሺቴ።
NUM 28:10 ሃይሲ ሃ ያርሾዚ ኡሻ ያርሾዛፔኔ ጋላስ ጋላስ ጹጌቲዛ ያርሾዛፔ ሳምባታ ጋላስ ጋላስ ሺቂዛ ሃራ ጹጌቲዛ ያርሾ።
NUM 28:11 « ‹ኣጊናን ኣጊናን ኮይሮ ጋላስ ጋላስ ኢስታ ቦላ ዎሶይ ባይንዳ ናምኡ ሚርጎታ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ጎዳስ ጹጌቲዛ ያርሾ ሂስቲ ሺሺቴ።
NUM 28:12 ኢሲ ኢሲ ሚርጎራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ፤
NUM 28:13 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ፤ ሄ ጹጌቲዛ ያርሾታ ኡባ ሳዎይ ጎዳ ኡፋይሲዛ ካꬃ ያርሾ ጊዲ ሺቆ።
NUM 28:14 ኢሲ ኢሲ ሚርጎራ ናምኡ ሊቲሮ ጊዲዛ ዎይኔ ኡሹ፥ ꬋርሾዛራ ኢሲ ሊቲሮኔ ሳይሶ ጊዲዛ ዎይኔ ኡሹኔ ኢሲ ኢሲ ላቃራ ኢሲ ሊቲሮ ጊዲዛ ዎይኔ ኡሹ ያርሾስ ሺሺቴ፤ ሄሲካ ኣጊናን ኣጊናን ላይꬅ ኩሜꬅ ሺቂዛ ጹጌቲዛ ያርሾ።
NUM 28:15 ጋላስ ጋላስ ጹጌቲዛ ያርሾኔ ኢዛራ ሺቂዛ ኡሻ ያርሾዛ ቦላ ዴይሻ ኦርጌ ናጋራ ጊሻስ ያርሾ ጊዳና ማላ ጎዳ ሲንꬅ ሺሺቴ።
NUM 28:16 « ‹ጎዳስ ፓዚጋ ባኣሌ ኮይሮ ኣጊናይ ጌሊዳ ታማኔ ኦይዳንꬆ ጋላስ ቦንቺቴ።
NUM 28:17 ሃ ኣጊናይ ጌሊዳ ታማኔ ኢቻሻንꬆ ጋላሳፌ ዶሚዲ ኡኬꬃ ባኣሌ ቦንቺቴ፤ ሄ ጋላሳፌ ቢዲ ላፑን ጋላስ ጋካናስ ኡኬꬅ ሚቴ።
NUM 28:18 ባኣሌዛስ ኮይሮ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ።
NUM 28:19 ኢስታ ቦላ ዎሶይ ባይንዳ 2 ሚርጎታ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ጹጌቲዛ ያርሾ ሂስቲ ጎዳስ ሺሺቴ።
NUM 28:20 ኢሲ ኢሲ ሚርጎራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 28:21 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 28:22 ቃሴካ ናጋራ ዉርሳናስ ዴይሻ ኦርጌ ናጋራ ያርሾስ ሺሺቴ።
NUM 28:23 ሄይቲ ዉሪካ ሺቃናይ ኡባ ዎዴ ማላዶ ማላዶ ጹጌቲ ሺቂዛ ያርሾራ ኢሲፌ ሺቄቶ።
NUM 28:24 ጎዳ ሳዎ ቱኑ ጊዲ ኡፋይሲዛ ካꬃ ያርሾ ላፑን ጋላስ ኩሜꬅ ኢሲ ማላን ሺሺቴ፤ ሄሳካ ጋላስ ጋላስ ሺቂዛ ጹጌቲዛ ያርሾ ቦላኔ ኡሻ ያርሾ ቦላ ጉጂዲ ሺሺቴ።
NUM 28:25 ላፑንꬆ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ።
NUM 28:26 « ‹ካꬃ ሺሾን ባኣሌ ቦንቺዛ ኮይሮ ጋላስ ኢንቴ ኦራꬅ ጋኪዛ ካꬃፌ ጼራ ጎዳስ ሺሺዛ ጋላስ ጎይናና ሺቂቴፔ ኣቲን ሃራ ኣይ ኦሶካ ኦꬆፍቴ።
NUM 28:27 ናምኡ ሚርጎታ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾ ሺሺቴ።
NUM 28:28 ኢሲ ኢሲ ሚርጎራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ፤
NUM 28:29 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 28:30 ቃሴካ ናጋራ ዉርሳናስ ዴይሻ ኦርጌ ናጋራ ያርሾስ ሺሺቴ።
NUM 28:31 ሄሳ ሄ ያርሾዛ ኡባ ኡሻ ያርሾራ፥ ሄ ጋላስ ሺቂ ጹጌቲዛ ያርሾዛኔ ካꬃ ያርሾዛ ቦላ ጉጂዲ ሺሺቴ፤ ሄ ያርሾ ሜሄቲ ዎሶይ ባይንዳይታ ጊዲዳይሳ ሻኪ ኤሪቴ።
NUM 29:1 « ‹ላፑንꬃ ኣጊናይ ጌሊዳ ኮይሮ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ፤ ሄ ጋላሳይ ዛዬይ ፑኔቲዛ ጋላሳ።
NUM 29:2 ኢስታ ቦላ ዎሶይ ባይንዳ ኢሲ ሚርጎ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎይ ቱኑ ጊዲ ጎዳ ኡፋይሲዛ ጹጌቲዛ ያርሾ ያርሺቴ።
NUM 29:3 ኢሲ ሚርጎዛራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 29:4 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 29:5 ቃሴካ ናጋራ ዉርሳናስ ዴይሻ ኦርጌ ናጋራ ያርሾስ ሺሺቴ።
NUM 29:6 ኢንቴ ሃይሳ ሃ ያርሾዛ ጋላስ ጋላሲኔ ኣጊናን ኣጊናን ኮይሮ ጋላስ ሺቂ ጹጌቲዛ ያርሾዛ፥ ካꬃ ያርሾዛኔ ኡሻ ያርሾዛ ቦላ ጉጂዲ ሺሺቴ፤ ሄይታንቲካ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾታ።
NUM 29:7 « ‹ላፑንꬆ ኣጊናይ ጌሊዳ ታማንꬃ ጋላስ ጎይናናስ ሺቂቴ፤ ሄ ጋላስ ጾሚቴ፤ ኦሶካ ኦꬆፍቴ።
NUM 29:8 ኢስታ ቦላ ዎሶይ ባይንዳ ኢሲ ሚርጎ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎይ ቱኑ ጊዲ ጎዳ ኡፋይሲዛ ጹጌቲዛ ያርሾ ያርሺቴ።
NUM 29:9 ኢሲ ሚርጎዛራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ 2 ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 29:10 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 29:11 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:12 « ‹ላፑንꬃ ኣጊናይ ጌሊዳ ታማኔ ኢቻሻንꬆ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ፤ ላፑን ጋላስ ጋካናስ ጎዳስ ዳሴ ባኣሌ ቦንቺቴ።
NUM 29:13 ሃ ኮይሮ ጋላስ ኢስታ ቦላ ዎሶይ ባይንዳ 13 ሚርጎታ፤ ናምኡ ꬋርሾታኔ ላይꬅ ኩሚዳ ታማኔ ኦይዱ ꬋርሾ ላቃታ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾ ሂስቲ ሺሺቴ።
NUM 29:14 ኢሲ ኢሲ ሚርጎራ ካꬃ ያርሾስ 3 ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ኢሲ ኢሲ ꬋርሾራ ካꬃ ያርሾስ 2 ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 29:15 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።
NUM 29:16 « ‹ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:17 « ‹ናምኣንꬆ ጋላስ ኢስታ ቦላ ኣይ ዎሶይ ባይንዳ 12 ሚርጎታ፥ 2 ꬋርሾታኔ ላይꬂ ኩሚዳ 14 ꬋርሾ ላቃታ ሺሺቴ።
NUM 29:18 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ።
NUM 29:19 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:20 « ‹ሄꬓንꬆ ጋላስ ኢስታ ቦላ ዎሶይ ባይንዳ ታማኔ ኢሲ ሚርጎታ፥ ናምኡ ꬋርሾታኔ ላይꬂ ኩሚዳ ታማኔ ኦይዱ ꬋርሾ ላቃታ ሺሺቴ።
NUM 29:21 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ።
NUM 29:22 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:23 « ‹ኦይዳንꬆ ጋላስ ኢስታ ቦላ ዎሶይ ባይንዳ ታሙ ሚርጎታ፥ ናምኡ ꬋርሾታኔ ላይꬂ ኩሚዳ ታማኔ ኦይዱ ꬋርሾ ላቃታ ሺሺቴ።
NUM 29:24 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ።
NUM 29:25 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:26 « ‹ኢቻሻንꬆ ጋላስ ኢስታ ቦላ ዎሶይ ባይንዳ ኡዱፉን ሚርጎታ፥ ናምኡ ꬋርሾታኔ ላይꬂ ኩሚዳ ታማኔ ኦይዱ ꬋርሾ ላቃታ ሺሺቴ።
NUM 29:27 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ።
NUM 29:28 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:29 « ‹ኡሱፑንꬆ ጋላስ ኢስታ ቦላ ዎሶይ ባይንዳ ኦስፑን ሚርጎታ፥ ናምኡ ꬋርሾታኔ ላይꬅ ኩሚዳ ታማኔ ኦይዱ ꬋርሾ ላቃታ ሺሺቴ።
NUM 29:30 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ።
NUM 29:31 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:32 « ‹ላፑንꬃ ጋላስ ኢስታ ቦላ ዎሶይ ባይንዳ ላፑን ሚርጎታ፥ ናምኡ ꬋርሾታኔ ላይꬅ ኩሚዳ ታማኔ ኦይዱ ꬋርሾ ላቃታ ሺሺቴ።
NUM 29:33 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ።
NUM 29:34 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:35 « ‹ኦስፑንꬃ ጋላስ ኢሲ ቦላ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ።
NUM 29:36 ኢስታ ቦላ ዎሶይ ባይንዳ ኢሲ ሚርጎ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾ ሂስቲ ሺሺቴ።
NUM 29:37 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ።
NUM 29:38 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።
NUM 29:39 « ‹ኢንቴስ ዎꬊዳ ባኣሌ ጋላሳታን ጎዳስ ሺሺቴ፤ ሄሲካ ኢንቴ ኣዲኔቲዲ ሺሺዛ ያርሾፌኔ ኢንቴ ኢንቴ ዶሳን ሺሺዛ ያርሾፌ ጹጌቲዛ ሃራ ያርሾ፥ ካꬃ ያርሾ፥ ኡሻ ያርሾኔ ኢሲፌቴꬃ ያርሾ ሺሺቴ› ጋ።»
NUM 29:40 ሙሴይካ ጎዳይ ኢዛ ኣዛዚዳ ማላ ኢስራኤሌ ኣሳስ ዮቲዴስ።
NUM 30:1 ሙሴይ ኢስራኤሌ ኣሳ ካሌꬂዛ ኮራፒኔታስ፥ «ጎዳይ ኣዛዚዳ ኣዛዞይ ሃይሳፌ ካሊዛይሳ፥
NUM 30:2 ኢሲ ኣሲ ጎዳስ ኢሲ ሚሽ ኦꬃናስ ኣዲኔቲኮ ዎይኮ ኢሳዴይ ጫቂ ጌፒዲ ባና ባርካ ባ ቃላን ቃቺኮ ኢዚ ባ ጌሊዳ ቃላ ኡባ ፖላና ቤሴስ ኣቲን ባ ጊዳይሳ ኣጋናስ ቤሴና።
NUM 30:3 «ኢሲ ጌላኦያ ባ ኣዋ ሶን ዳሼ ጎዳስ ኢሲ ሚሽ ኦꬃናስ ኣዲኔቲኮ ዎይኮ ጫቃ ጌፓዳ ባና ባርካ ባ ቃላን ቃቺዛ ጊዲኮ፥
NUM 30:4 ኢዚ ኣዋይ ሄሳ ሲዪዲ ኢዞ ዲጎንታ ኣጊኮ ኢዛ ባ ኣዲኔቲዳይሳ ዎይኮ ባ ጫቃ ጌፒዳ ቃላዛ ፖላናስ ቤሴስ።
NUM 30:5 ኢዚ ኣዋይ ሄ ዮኦዛ ሲዪዲ ኢዞ ዲጊዛ ጊዲኮ ኢዛ ኣዲኔቲዳ ኣዲናይ ዎይኮ ኢዛ ጫቃ ጌፒዳ ቃላይ ኢዚስ ጎሜ ጊዴና፤ ጋሶይካ ኢዚ ኣዋይ ኢዞ ዲጊዳ ጊሻስ ጎዳይ ኢዞ ማራና።
NUM 30:6 «ኣዚና ጌሎንታ ማጫሲ ኣኬካዳ ዎይኮ ኣኬኮንታ ኣዲና ኣዲኔታ ኡታዳ ዎይኮ ጫቃ ጌፓዳ ባና ባርካ ባ ቃላን ቃቻ ዎꬃዳ ኣዚና ጌሊኮ፥
NUM 30:7 ኢዛ ጌሊዳ ኣዚናዚ ሄ ዮኦዛ ሲዪዲ ኢዞ ዲጎንታ ኣጊኮ ኢዛ ባ ጊዳይሳ ኡባ ፖላናስ ቤሴስ።
NUM 30:8 ኢዚ ኣዚናይ ሄ ዮኦዛ ሲዪዲ ኢዞ ዲጊዛ ጊዲኮ ኢዛ ኣዲኔቲዳ ኣዲናይ ዎይኮ ኢዛ ጫቃ ጌፒዳ ቃላይ ኢዚስ ጎሜ ጊዴና፤ ጋሶይካ ኢዚ ኣዚናይ ኢዞ ዲጊዳ ጊሻስ ጎዳይ ኢዞ ማራና።
NUM 30:9 «ኣዚናይ ሃይቂዳ ማጫሲ ዎይኮ ኣዚናይ ኣንጂ ዬዲዳ ማጫሲ ኢሲ ሚሽ ኦꬃናስ ኣዲኔቲኮ ዎይኮ ጫቃ ጌፓዳ ባና ባርካ ባ ቃላን ቃቺዳ ጊዲኮ ኢዛ ባ ጌሊዳ ቃላ ፖላናስ ቤሴስ።
NUM 30:10 «ኣዚና ጌሊዳ ማጫሲ ኢሲ ሚሽ ኦꬃናስ ኣዲኔቲኮ ዎይኮ ጫቃ ጌፓዳ ባና ባርካ ባ ቃላን ቃቺዳ ጊዲኮ፥
NUM 30:11 ኢዛ ጌሊዳ ኣዚናዚ ሄ ዮኦዛ ሲዪዲ ኢዞ ዲጎንታ ኣጊኮ ኢዛ ባ ጊዳይሳ ኡባ ፖላናስ ቤሴስ።
NUM 30:12 ኢዚ ኣዚናይ ሄ ዮኦዛ ሲዪዲ ኢዞ ዲጊዛ ጊዲኮ ኢዛ ኣዲኔቲዳ ኣዲናይ ዎይኮ ኢዛ ጫቃ ጌፒዳ ቃላይ ኢዚስ ጎሜ ጊዴና፤ ጋሶይካ ኢዚ ኣዚናይ ኢዞ ዲጊዳ ጊሻስ ጎዳይ ኢዞ ማራና።
NUM 30:13 ኢዚ ኣዚናይ ኣይ ኣዲና ዎይኮ ጫቃ ጌፓዳ ባና ባርካ ቃቺዳ ቃላ ዲጋናስ ዎይኮ ፖሊሳናስ ኢዛስ ማታይ ዴስ።
NUM 30:14 ኢዚ ኣዚናይ ሄ ዮኦዛ ሲዪዳ ማላ ዎንቴꬃ ጋላስ ኣይኮካ ቃቶንታ ጮኡ ጊኮ ኢዛ ባ ጊዳይሳ ኡባ ፖላናስ ቤሴስ፤ ሄ ዮኦዛ ሲዪዳ ማላ ኣይኮካ ቃቶንታ ጮኡ ጊኮ ሄሲ ኢዚ ኤሮ ጊዳይሳ ቆንጪሴስ።
NUM 30:15 ጊዶ ኣቲን ኢዚ ኣዚናይ ጋምኢዲ ሄ ኢዚ ኣዲናዛ ዲጊዛ ጊዲኮ ኣላፌቴꬃን ኦይሼታናይ ኢዛ» ጊዴስ።
NUM 30:16 ጌላኦይኔ ጌሊዳ ማጫሲ ኣዲና ኣዲኔቲኮ ዎይኮ ጫቃ ጌፓዳ ባርካ ባና ባ ቃላን ቃቺዳ ጊዲኮ ኢዚ ኣዋስ ዎይኮ ኢዚ ኣዚናስ ዲዛ ኣላፌቴꬃኔ ማታ ጊሻስ ጎዳይ ሙሴስ ኢሚዳ ዎጋይ ሃይሳ።
NUM 31:1 ጎዳይ ሙሴስ፥
NUM 31:2 «ሚዲያሜ ኣሳይ ኢስራኤሌ ኣሳ ቦላ ጋꬂዳ ቆሆዛ ጊሻስ ኔኒ ሚዲያሜ ኣሳ ሃሎ ኬሳ፤ ሄሳ ኦꬂዳፔ ጉዬ ኔኒ ሃይቃና» ጊዴስ።
NUM 31:3 ሄሳ ጊሻስ ሙሴይ ዴሬዛስ፥ «ሚዲያሜ ኣሳይ ጎዳ ቦላ ካሴ ኦꬂዳ ቆሆዛ ጊሻስ ኢንቴ ሃሎ ኬሳናስ ኦላስ ጊጌቲቴ።
NUM 31:4 ኢስራኤሌ ኣሳ ዛርኬፌ ዛርኬፌ ኢሲ ኢሲ ሺ ኣቱማስ ዶሪዲ ጌዴ ኦላስ ዬዲቴ» ጊዴስ።
NUM 31:5 ሄሳ ጊሻስ ኢስራኤሌ ዛርኬታፔ ኢሲ ኢሲ ሺ ኣስ ኬሲ ኢሚን 12,000 ኣሲ ኦላስ ጊጼቲዲ ጊጌቲዴስ።
NUM 31:6 ሙሴይካ ኢሲ ኢሲ ዛርኬፌ ኢሲ ኢሲ ሺ ኣሲ ቄሴ ኤልኤዜሬ ና ፊኒሃሴ ካሌꬆን ኦላስ ዬዲዴስ፤ ፊኒሃሲካ ጌሻሶዛፔ ዱማ ሚሻታኔ ኦላስ ዴንꬄꬂዛ ዛዬታ ባ ኩሼን ኦይኪዲ ቢዴስ።
NUM 31:7 ኢስቲካ ጎዳይ ሙሴ ኣዛዚዳ ማላ ሚዲያሜ ኣሳ ኦሊዲ ኣቱማሳ ሙሌራ ዎꬊዳ።
NUM 31:8 ሃይቂዳይታ ጊዶን ሚዲያሜ ካዎ ኢቻሻቲ ኤዋይ፥ ኤሬቄሜይ፥ ጹሬይ፥ ኡሬይኔ ኤሬባኤይ ዴቴስ፤ ቢኦሬ ና ባላሜካ ማሻን ዎꬊዳ።
NUM 31:9 ኢስራኤሌ ኣሳይ ሚዲያሜ ማጫሳታኔ ጉꬃ ናይታ ዲኢዲ ኢስታ ሜሄታኔ ኢስታ ኣቆታ ኡባ ፒቲ ኤኪዴስ።
NUM 31:10 ኢስቲ ዲዛ ካታማታኔ ኢስቲ ዲዛ ጉታታ ኡባ ታማን ጹጊዳ።
NUM 31:11 ኢስታ ኣሳ፥ ሜሃኔ ዲኢዳ ሚሽ ኡባ ኤኪዳ።
NUM 31:12 ዮርዳኖሴ ሻፋፔ ሄ ፒንꬃ ጊናራ ዲዛ ሞኣቤ ዴምባን ዱንካኒ ኡቲዳ ሙሴኮ፥ ቄሴ ኤልኤዜሬኮኔ ኩሜꬃ ኢስራኤሌ ማባራኮ ኤሂዳ።
NUM 31:13 ሙሴይ ቄሴ ኤልኤዜሬይኔ ማባራ ካሌꬂዛይቲ ኦላ ኣሳ ሞካናስ ጌዴ ኬዚዳ።
NUM 31:14 ሙሴይ ጊዲኮ ኦላሶፔ ሃ ሲሚዛ ኦላ ኣሳ ኣዛዚዛ ሻላቃታ ቦላኔ ማቶ ሃላቃታ ቦላ ሃንቄቲዴስ።
NUM 31:15 ኢዚካ ኢስታስ፥ «ሃይሳ ማጫስ ኡባ ኣዛስ ዎꬎንታ ሼምፖራ ፓጻ ኣጊዴቲ?
NUM 31:16 ኑኒ ካሴ ፔኦሬን ዲሺን ሃይቲ ባላሜ ዞሬ ኤኪዲ ኢስራኤሌ ኣሳይ ባ ጎዳፔ ሃካና ማላኔ ቦሻን ዉራና ማላ ኦꬂዳይ ኢስታ ጊዴቴኔ!
NUM 31:17 ሄሳ ጊሻስ ኣቱማ ናይታ ኡባኔ ኣዴራ ጋይቲዳ ማጫሳታ ኡባ ዎꬊቴ።
NUM 31:18 ጊዶ ኣቲን ኣዴራ ጋይቲ ኤሮንታ ጌላኦታ ዎꬎንታ ኢንቴስ ኣሺቴ።
NUM 31:19 «ኢንቴ ጋርሳን ኣስ ዎꬊዳዴይ ዎይኮ ኣሃ ቦቺዳ ኣሲ ዉሪካ ላፑን ጋላስ ጋካናስ ኣሲ ዲዛሶፔ ሃራሶን ጋምኦ፤ ሄꬓንꬃ ጋላሲኔ ላፑንꬃ ጋላስ ኢንቴናኔ ኢንቴ ዲኢ ኤሂዳ ማጫሳታ ጌሺቴ።
NUM 31:20 ሄሳꬆካ ኣይ ማይኦ ዎይኮ ጋልባፌ፥ ዴይሻ ኢስኬፌኔ ሚꬃፌ ኦሴቲዳ ሚሽ ኡባ ጌሺቴ» ጊዴስ።
NUM 31:21 ቄሴ ኤልኤዜሬይ ኦላፔ ሲሚዳ ኣቱማሳስ፥ «ጎዳይ ሙሴስ ኢሚዳ ዎጋቲ ሃይሳፌ ካሊዛይታ፤
NUM 31:22 ዎርቃይ፥ ቢራይ፥ ጻርቂማላይ፥ ቢራታይ፥ ቆርቆሮይኔ ኢርሳሴይ፥
NUM 31:23 ሄሳꬆካ ታማይ ኢስታ ቆሆንታይቲ ታማ ጊዶራ ኣꬊዲ ጌያናስ ቤሴስ፤ ታማ ዳንዳዮንታ ኣይ ሚሺካ ካሴ ዎꬊዳ ዎጋ ማላ ጌሾስ ጊጌቲዳ ሃꬃን ጌሺቴ።
NUM 31:24 ኢንቴ ኢንቴ ማይኦ ላፑንꬃ ጋላስ ሜጪቴ፤ ሄሳፌ ጉዬ ኢንቴ ጌሽ ጊዲዛ ጊሻስ ሲሚዲ ካሴ ኢንቴ ዱንካኒ ዲዛሶ ጌላናስ ዳንዳዬታ» ጊዴስ።
NUM 31:25 ጎዳይ ሙሴስ ሂዝጊዴስ፥
NUM 31:26 «ኔኒ ቄሴ ኤልኤዜሬይኔ ዴራ ካሌꬂዛ ኮራፒኔታራ ጊዲዲ ዲኤቲ ዪዳ ኣሳኔ ሜሃ ቆዲቴ።
NUM 31:27 ናምኡ ኬሲ ሻኪዲ ባጋ ኦላሶ ቢዳ ዎታዳራታስ ኣቶይሳ ሃንኮ ማባራስ ኢሚቴ።
NUM 31:28 ዎታዳራታ ጊሻፔ ዲኤቲዳ ኣሳፔ፥ ሚዛታፔ፥ ሃሬታፔ ዶርሳታፔኔ ዴይሻታፔ ኢቻሹ ጼታፔ ኢሲኖ ታስ ጎዳስ ዱማ ኢሞታ ሂስቲ ሻኪቴ።
NUM 31:29 ሄ ኢንቴ ታስ ጎዳስ ሻኪዳይሳ ታ ጊሻዛ ቄሴ ኤልኤዜሬስ ኢሚቴ።
NUM 31:30 ሂንኮ ማባራስ ኢሜቲዳ ጊሻፔ፥ ኣሳፔ፥ ሚዛፔ፥ ዶርሳታፔ፥ ዴይሻታፔኔ ሃሬታፔ ኢቻሽ ታማፌ ኢሲኖ ጋይቶቴꬃ ዱንካኔን ኣላፌቴꬃን ኦꬂዛ ሌዌታስ ኢሚቴ።»
NUM 31:31 ሙሴይኔ ኤልኤዜሬይ ጎዳይ ኢስታ ኣዛዚዳይሳ ኡባ ኦꬂዳ።
NUM 31:32 ዎታዳራቲ ባንታስ ኤኪሺን ኣቲዳይሲ፥ 675,000 ዶርሳታኔ ዴይሻታ፥
NUM 31:33 ላፑን ታማኔ ናምኡ ሺ ሚዛታ፥
NUM 31:34 ኡሱፑን ታማኔ ኢሲ ሺ ሃሬታ፥
NUM 31:35 ሄꬑ ታማኔ ናምኡ ሺ ኣዴ ኤሮንታ ጌላኦታ።
NUM 31:36 ዲኤቲ ዪዳይሳፌ ባጋይ ኦሌቲ ዪዳይታስ ኢሜቲዴስ፤ ሄሲካ 337,500 ዶርሳታ።
NUM 31:37 ኢስታፌ 675 ጎዳስ ዱማ ኢሞታ ጌቴቲ ሻኬቲዳይታ።
NUM 31:38 ሚዛቲ 36,000፤ ኢስታፌ ጎዳስ ዱማ ኢሞታ ጊዲ ሻኬቲዳይቲ ላፑን ታማኔ ናምኣ።
NUM 31:39 ሃሬቲ 30,500፤ ኢስታፌ ጎዳስ ዱማ ኢሞታ ጊዲ ሻኬቲዳይቲ ኡሱፑና።
NUM 31:40 ኣዴ ኤሮንታ ጌላኦቲ 16,000፤ ኢስታፌ ጎዳስ ዱማ ኢሞታ ጊዲዲ ሻኬቲዳይቲ ሄꬑ ታማኔ ናምኣ።
NUM 31:41 ሄሳ ጊሻስ ሙሴይ ጎዳይ ኢዛ ኣዛዚዳ ማላ ጎዳስ ዱማ ኢሞታ ሂስቲ ሻኪዳይሳ ቄሴ ኤልኤዜሬስ ኢሚዴስ።
NUM 31:42 ሃንኮ ኢስራኤሌ ማባራ ጊሻይ ኦላስ ኪቴቲዳ ዎታዳራታ ጊሻራ ኢሲ ጊና።
NUM 31:43 ሄሲካ 337,500 ዶርሳታኔ ዴይሻታ፥
NUM 31:44 ሄꬑ ታማኔ ኡሱፑን ሺ ሚዛታ፥
NUM 31:45 ሄꬑ ታሙ ሺያኔ ኢቻሹ ጼቱ ሃሬታ፥
NUM 31:46 ታማኔ ኡሱፑን ሺ ኣዴ ኤሮንታ ጌላኦታ።
NUM 31:47 ሄሳ ጊሻስ ሙሴይ ኢቻሽ ታማፌ ኢሲኖ ጎዳይ ኢዛ ኣዛዚዳ ማላ ጋይቶቴꬃ ዱንካኔን ኣላፌቴꬃን ኦꬂዛ ሌዌ ዛርኬታስ ኢሚዴስ።
NUM 31:48 ሄሳፌ ጉዬ ኦላ ኣሳ ኣዛዚዛይቲ ሻላቃቲኔ ማቶ ሃላቃቲ ሙሴኮ ሺቂዲ፥
NUM 31:49 «ኑኒ ኔ ኦሳንቻቲ ኑፔ ጋርሳራ ኣዛዜቲዛ ዎታዳራታ ኡባ ቆዲዶስ፤ ኢስታፌ ኢሶይካ ፓጪቤና፤
NUM 31:50 ሄሳ ጊሻስ ኑኒ ኢሶይ ኢሶይ ኤኪዳ ዎርቃ ኣሌቆታ፥ ቶሆ ጊሞታ፥ ኩሼ ሳጋዮታ፥ ቢራꬌ ሚዲጋታ፥ ሃይꬃ ጉቲቻታ፥ ቆꬌን ኣꬊዛ ማጪፋራታ ኡባ ኑ ናጋራ ዉርሳናስ ጎዳስ ያርሾ ኢማናስ ኤኪ ዪዶስ» ጊዳ።
NUM 31:51 ሙሴይኔ ቄሴ ኤልኤዜሬይ ዎርቃፌ ኦሴቲዳ ኣሌቆታ ኡባ ኤኪዳ።
NUM 31:52 ሻላቃታፔኔ ማቶ ሃላቃታፔ ኤኪዲ ሙሴይኔ ቄሴ ኤልኤዜሬይ ጎዳስ ኢሞታ ሂስቲ ሺሺዳ ዎርቃ ኣሌቆቲ 16,750 ሳቂሌ ጊዲዴስ።
NUM 31:53 ጋርሳራ ዲዛ ዎታዳራቲ ጊዲኮ ባ ዲኢዳይሳ ባስ ባስ ኤኪ ቢዳ።
NUM 31:54 ሄሳ ጊሻስ ሙሴይኔ ቄሴ ኤልኤዜሬይ ሻላቃታፔኔ ማቶ ሃላቃታፔ ኤኪዳ ዎርቃ ኣሌቆታ ጎዳ ሲንꬃን ኢስራኤሌ ዴራ ሃሳኢሳና ማላ ጌዴ ጋይቶቴꬃ ዱንካኔዛኮ ኤኪ ቢዳ።
NUM 32:1 ኦሮቤሌ ዛርኬታሲኔ ጋዴ ዛርኬታስ ኬሂ ዳሮ ሜሄይ ዴስ፤ ኢያዜሬ ዴሬይኔ ጋላኣዴ ዴሬይ ሜሄስ ዳሮ ሎኦ ጊዲዳይሳ ቤይዳ።
NUM 32:2 ሄሳ ጊሻስ ኢስቲ ሙሴኮ፥ ቄሴ ኤልኤዜሬኮኔ ሃንኮ ማባራ ካሌꬂዛይታኮ ቢዲ፥
NUM 32:3 «ጎዳይ ኢስራኤሌ ኣሳን ጾኒሲዳ ኣጻሮቴ ዴሬይ፥ ዲቦኔ ዴሬይ፥ ኢያዜሬ ዴሬይ፥ ኒምራ ዴሬይ፥ ሃሴቦኔ ዴሬይ፥ ኤልኤሌ ዴሬይ፥ ሲቢማ ዴሬይ፥ ኔቦ ዴሬይኔ ባኦኔ ዴሬይ ሜሄስ ሎኦ፤ ኑስካ ዳሮ ሜሄይ ዴስ።
NUM 32:5 ኢንቴ ኑስ ሎኦ ቆፒኮ ሃይሳ ሃ ዴሬዛ ኑስ ኢንቴ ኦሳንቻታስ ዳናሶ ሂስቲ ኢሚቴ ኣቲን ኑኒ ዮርዳኖሴ ፒናና ማላ ኦꬆፍቴ» ጊዳ።
NUM 32:6 ሙሴይካ ኢስታስ፥ «ኢንቴ ኢሻቲ ኦላስ ቢሺን ኢንቴ ሃን ኣታናስ ኮዬቲ?
NUM 32:7 ኢስራኤሌ ኣሳይ ዮርዳኖሴ ፒኒዲ ጎዳይ ኢስታስ ኢሚዳ ዴሬዛ ጌሎንታ ማላ ኢንቴ ኣሳ ሂዶታ ኣዛስ ቃንጺሴቲ?
NUM 32:8 ሃኖ ቢታዮ ጾሞሳና ማላ ቃዴሴ ባሪኔፔ ታኒ ካሴ ኢንቴ ኣዋታ ዬዲን ሃይሳꬆካ ኦꬂዳ።
NUM 32:9 ኢስቲ ኤሽኮሌ ሾባ ጋካናስ ቢዲ ሄ ቢታዮ ጾሞሲ ጼሊዳ፤ ጊዶ ኣቲን ሄፔ ሲሚዲ ኢስራኤሌ ኣሳይ ጎዳይ ኢስታስ ኢሚዳ ዴሬዛ ጌሎንታ ማላ ሂዶታ ቃንጺሲዳ።
NUM 32:10 ሄ ጋላስ ጎዳይ ኬሂ ሃንቄቲዲ፥ ‹ኢስቲ ኩሜꬃ ዎዚናፔ ታና ካሎንታ ኢጺዳ ጊሻስ ጊብጼፔ ኬዚዳ ኣሳፔ ላይꬃይ ናምኡ ታሙ ኩሚዳይቲኔ ሄሳፌ ቦላራ ጊዲዳይቲ ኡባይ ታኒ ኣብራሃሜስ፥ ዪሳቃሲኔ ያቆቤስ ኢማና ጋዳ ካሴ ጫቂዳ ቢታ ኢስቲ ሙሌካ ጌሎንታ ማላ ጫቃዲስ› ጊዴስ።
NUM 32:12 ሃይሲ ጎዳይ ጫቂ ቃቺዳ ቃላዚ ጎዳ ኩሜꬃ ዎዚናፔ ካሊዳ ቄናዜ ዴሬ ኣስ ዮፊኔ ና ካሌቤፔኔ ናዌ ና ኢያሶፔ ኣቲን ሃንኮ ኣሳ ኡባካ ቦቼስ።
NUM 32:13 ጎዳይ ኢስራኤሌ ዴሬዛ ቦላ ሃንቄቲዳ ጊሻስ ሄ ኢዛ ሃንቄꬂዳ ዬሌታቲ ኡባይ ዉራና ጋካናስ ኢስቲ ባዞ ቢታን ኦይዱ ታሙ ላይꬅ ቶይላታና ማላ ኦꬂዴስ።
NUM 32:14 ኢንቴኖ ናጋራንቻ ዬሌታቶ! ጎዳይ ኢስራኤሌ ዴሬ ቦላ ጉጂ ሃንቄታና ማላ ሃኢካ ኢንቴ ኢንቴ ኣዋታꬆ ኦꬄታ።
NUM 32:15 ኢንቴ ኦሮቤሌ ዛርኬቲኔ ጋዴ ዛርኬቲ ጎዳ ካሎንታ ኢጺኮ ኢዚ ሃ ዴራ ኡባ ባዞን ኣጋጋና፤ ኢስታ ቦላ ጋኪዛ ሜቶ ኡባን ኢንቴ ኦይሼታና» ጊዴስ።
NUM 32:16 ኢስቲካ ሙሴኮ ሺቂዲ፥ «ኑኒ ኑ ሜሄታስ ኣቆሶ፥ ኑ ማቼታሲኔ ኑ ናይታስ ዱሳሶ ኦꬃና ኮዮስ።
NUM 32:17 ጊዶ ኣቲን ኑ ባጋ ኢስራኤሌ ኣሳይ ባስ ዱሳሶ ጊዲዳ ቢታዮ ጌሊዲ ኡታና ጋካናስ ኑ ኡባፌ ሲንꬃቲ ኦላስ ኬዛናስ ጊጌቲ ኡቲዶስ፤ ኑኒ ሄሳ ፖሊዲ ሲማና ጋካናስ ኑ ናይቲኔ ኑ ማቼቲ ሃይሳ ሃ ዴሬዛን ዲዛ ኣሳፔ ኢስታ ቦላ ቆሆይ ጋኮንታ ማላ ጊምቤቲዳ ካታማን ሂርጋይ ባይንዳ ዲሼቶ።
NUM 32:18 ኢስራኤሌ ኣሳይ ኡባይ ባስ ባስ ጊጌቲዳ ቢታ ኤካና ጋካናስ ኑኒ ኑሶ ሲሞኮ።
NUM 32:19 ኑኒ ኑ ጊሻ ዮርዳኖሴፔ ኣርሼይ ሞኪዛ ባጋራ ኤኪዳ ጊሻስ ፒንꬃፌ ኢስታ ጋኪዛ ጊሻፔ ኑ ኣይኮካ ኤኮኮ» ጊዳ።
NUM 32:20 ሙሴይካ ኢስታስ፥ «ሃይሲ ኢንቴ ጊዳይሲ ቱሙ ጊዲኮ ኢንቴ ጎዳ ሲንꬃን ኦላ ባናስ ኢንቴ ጊጌቲዳ ጊዲኮ፥
NUM 32:21 ቃሴካ ጎዳይ ባ ሞርኬታ ባ ሲንꬃፌ ዬዴꬂ ኬሳና ጋካናስ ኢንቴ ኡባቲካ ጎዳ ሲንꬃን ኦላስ ጊጌቲዳይታ ጊዲዲ ዮርዳኖሴ ሻፋ ፒኒኮ፥
NUM 32:22 ቢታያካ ጎዳስ ሃሬቲዳፔ ጉዬ ኢንቴ ሲማና ዳንዳዬታ፤ ሄ ዎዴ ኢንቴ ጎዳሲኔ ኢስራኤሌ ኣሳስ ኦꬃናስ ቤሲዛ ኣላፌቴꬅ ፖሊዳፔ ጉዬ ሃራ ኣይኮካ ኦይሼቴኬታ፤ ሄሳፌ ጉዬ ሃ ቢታያ ኢንቴስ ጺንጾ ጊዳና።
NUM 32:23 «ኢንቴ ኢንቴ ጊዳ ቃላ ናጎንታ ኣጊኮ ኢንቴ ጎዳ ቆሄታ፤ ኢንቴ ናጋራ ጊሻስ ቂጻቴይ ኢንቴ ቦላ ጋካናይሳ ኤሪቴ።
NUM 32:24 ሄሳ ጊሻስ ኢንቴ ማቼታሲኔ ኢንቴ ናይታስ ዱሳሶ፥ ኢንቴ ሜሄታስካ ኣቆሶ ኦꬂቴ፤ ኢንቴ ጫቆ ጌሊዳ ቃላካ ፖሊቴ» ጊዴስ።
NUM 32:25 ጋዴ ዛርኬቲኔ ኦሮቤሌ ዛርኬቲ ሙሴስ፥ «ኑኒ ኔ ኦሳንቻቲ ኔኒ ኑ ጎዳይ ኑና ኣዛዚዳይሳ ኑ ኦꬃና።
NUM 32:26 ኑ ማቼቲ፥ ኑ ናይቲኔ ኑ ሜሄቲ ሃይሳን ጋላኣዴ ካታማታን ጋምኤቶ።
NUM 32:27 ጊዶ ኣቲን ኑኒ ኔ ኦሳንቻቲ ኦላ ኦሌታናስ ጊጼቲዳይቲ ዉሪካ ጎዳ ሲንꬃን ኦሌታናስ ኑ ጎዳይ ኔኒ ኑና ኣዛዚዛ ማላ ጌዴ ሄ ፒንꬅ ኑ ፒናና» ጊዳ።
NUM 32:28 ሄሳ ጊሻስ ሙሴይ ቄሴ ኤልኤዜሬስ፥ ናዌ ና ኢያሶሲኔ ኢስራኤሌ ማባራ ካሌꬂዛ ኮራፒኔታስ ኢስታ ጊሻስ፥
NUM 32:29 «ጋዴ ዛርኬቲኔ ኦሮቤሌ ዛርኬቲ ዮርዳኖሴ ፒኒዲ ጎዳ ሲንꬃን ኦላስ ጊጌቲዲ ኢስቲ ኢንቴና ማዲን ቢታያ ኢንቴ ኩሼን ጌሊዛ ዎዴ ጋላኣዴ ኢንቴ ኢስታስ ጺንጾ ሂስቲ ኢሚቴ።
NUM 32:30 ኢስቲ ኢንቴናራ ዮርዳኖሴ ሻፋ ፒኒ ቢዲ ኦሌቶንታ ኣጊኮ ኢስቲካ ኢንቴናራ ኢሲፌ ካናኔፔ ጊሼቲ ኤኬቶ» ጊዴስ።
NUM 32:31 ጋዴ ዛርኬቲኔ ኦሮቤሌ ዛርኬቲ፥ «ኑኒ ኔ ኦሳንቻቲ ጎዳይ ኑና ኣዛዚዳይሳ ኡባ ኦꬃና።
NUM 32:32 ኑ ኦላስ ጎዳ ሲንꬅ ጌዴ ካናኔ ፒናና፤ ኑ ላታና ቢታይ ጊዲኮ ዮርዳኖሴ ሻፋፔ ሃ ፒንꬃን ኣርሼይ ሞኪዛ ባጋና» ጊ ዛሪዳ።
NUM 32:33 ሄሳ ጊሻስ ሙሴይ ኣሞሬ ዴሬ ካዎ ሲሆኔይ ሃሪዛ ዴሬታኔ ባሳኔ ዴሬ ካዎ ኣጌይ ሃሪዛ ዴሬን ዲዛ ካታማታ፥ ኢስታ ዩሾን ዲዛ ካታማታኔ ዴሬታ ኡባ ኦሮቤሌ ቆሞታስ፥ ጋዴ ቆሞታሲኔ ሚናሴ ቆሞታፔ ባጋይታስ ኢሚዴስ።
NUM 32:34 ጋዴ ቆሞቲ፥ ዲቦኔ፥ ኣጻሮቴ፥ ኣሮኤሬ፥
NUM 32:35 ኣጻሮቴ-ሶፋኔ፥ ኢያዜሬ፥ ዮጊባሃ፥
NUM 32:36 ቤቲ-ኒሚሬኔኔ ቤቲ-ሃራኔ ዩዪ ኣꬋናስ ጊምቤ ጊምቢዳ፤ ባ ሜሄታስካ ኣቆሶ ኬጺዳ።
NUM 32:37 ኦሮቤሌ ዛርኬቲ ሃሴቦኔ፥ ኤልኤሌ፥ ቂሪያታይሜ ካታማታ ዛሪ ጊምቢዳ።
NUM 32:38 ሄሳꬆካ ጉዬፔ ኢስታስ ሱንꬃይ ላሜቲዳ ኔቦ፥ ባኣሊ-ሜኦኔኔ ሴባማ ካታማታ ዛሪ ጊምቢዳ፤ ሄ ካታማታ ኡባታስ ኦራꬃ ሱንꬅ ሱንꬂዳ።
NUM 32:39 ሚናሴ ና ማኪሬ ዜሬꬃቲ ጋላኣዴ ኦሊ ኦይኪዲ ካሴ ሄን ዲዛ ኣሞሬ ኣሳታ ዬዴꬂ ኬሲዳ።
NUM 32:40 ሄሳ ጊሻስ ሙሴይ ጋላኣዴ ዴሬ ሚናሴ ና ማኪሬ ዜሬꬃታስ ኢሚዴስ፤ ኢስቲካ ባንታስ ሄን ዱሳሶ ኦꬂዳ።
NUM 32:41 ሚናሴ ዛርኬፌ ጊዲዳ ያኢሬይ ኢሲ ኢሲ ጉታታን ሜቶ ጋꬂዲ ባስ ኤኪዴስ፤ ኢስቲካ፥ «ሃቦት-ያኢሬ» ጊ ሱንꬂዴስ።
NUM 32:42 ኖባሄይ ቃሴ ቄናቴኔ ኢዛ ዩሾን ዲዛ ጉታታ ኦሊ ኦይኪዲ ባ ሱንꬃን፥ «ኖባሄ» ጊ ሱንꬂዴስ።
NUM 33:1 ኢስራኤሌ ኣሳይ ባ ዛርኬን ዛርኬን ሻኬቲ ሻኬቲ ሙሴይኔ ኣሮኔይ ካሌꬂን ጊብጼፔ ኬዚዳፔ ጉዬ ዱማ ዱማ ዎዴ ኢስቲ ዱንካኒ ኡቲዳሶሆቲ ሃይሳፌ ካሊዛይታ፤
NUM 33:2 ኢስቲ ዱማ ዱማ ዎዴ ዱንካኒ ኡቲዳሶሆታ ሱንꬃ ጎዳይ ኣዛዚዳ ማላ ሙሴይ ጻፊዴስ።
NUM 33:3 ኢስራኤሌ ኣሳይ ኮይሮ ኣጊናይ ጌሊዳ 15 ጋላስ ፓዚጋ ባኣሌፔ ዎንቴꬅ ጊብጼ ኣሳይ ኡባይ ኢስቲ ጼሊሺን ያዮንታ ኤራሚሴ ካታማ ዬጊ ኬዚዴስ።
NUM 33:4 ሄ ዎዴ ጊብጼ ኣሳይ ኢስታ ጊዶፌ ጎዳ ቦሻን ሃይቂዳ ባይራታ ባይራታ ሞጎን ዴቴስ፤ ሄ ዎዴ ጎዳይ ኢስታ ኤቃ ጾሳታ ቦላካ ፒርዲዴስ።
NUM 33:5 ኢስራኤሌ ኣሳይ ኤራሚሴፔ ዴንዲ ቢዲ ሱኮቴን ዱንካኒ ኡቲዴስ።
NUM 33:6 ሱኮቴፔ ዴንዲዲ ባዞ ጋጻ ቦላ ዲዛ ኤታሜን ዱንካኒ ኡቲዴስ።
NUM 33:7 ኤታሜፔ ዴንዲዲ ባኣሊ-ጻፎኔፔ ኣርሼይ ሞኪዛ ባጋራ ዲዛ ፒሃሂሮቴ ሲሚዲ ሚጊዶሌ ሄራን ዱንካኒ ኡቲዴስ።
NUM 33:8 ፒሃሂሮቴፔ ዴንዲዲ ዞኦ ኣባ ፒኒዲ ኤታሜ ባዞ ቢዴስ፤ ኤታሜ ባዞን ሄꬑ ጋላስ ጋካናስ ቢዲ ማራ ጋኪ ዱንካኒዴስ፤
NUM 33:9 ማራፔ ዴንዲዲ ታማኔ ናምኡ ሃꬃ ፑልቶቲኔ ላፑን ታሙ ታሚሬ ሚꬃቲ ዲዛሶ ኤላሜ ጋኪ ዱንካኒ ኡቲዴስ።
NUM 33:10 ኤላሜፔ ዴንዲዲ ዞኦ ኣባ ማታን ዱንካኒ ኡቲዴስ።
NUM 33:11 ዞኦ ኣባ ማታፔ ዴንዲዲ ሲና ባዞን ዱንካኒ ኡቲዴስ።
NUM 33:12 ሲና ባዞፌ ዴንዲዲ ዱፊቃን ዱንካኒ ኡቲዴስ።
NUM 33:13 ዱፊቃፔ ዴንዲዲ ኣሉሼን ዱንካኒ ኡቲዴስ።
NUM 33:14 ኣሉሼፔ ዴንዲዲ ኡሻ ሃꬂ ባይንዳሶን ኤራፊዲሜን ዱንካኒ ኡቲዴስ።
NUM 33:15 ኤራፊዲሜፔ ዴንዲዲ ሲና ባዞን ዱንካኒ ኡቲዴስ።
NUM 33:16 ሲና ባዞፌ ዴንዲዲ ኪብሮቴ-ሃታኣቤን ዱንካኒ ኡቲዴስ።
NUM 33:17 ኪብሮቴ-ሃታኣቤፔ ዴንዲዲ ሃጺሮቴን ዱንካኒ ኡቲዴስ።
NUM 33:18 ሃጺሮቴፔ ዴንዲዲ ኤሬቲማን ዱንካኒ ኡቲዴስ።
NUM 33:19 ኤሬቲማፔ ዴንዲዲ ኤሬሞን-ፔሬዜን ዱንካኒ ኡቲዴስ።
NUM 33:20 ኤሬሞን-ፔሬዜፔ ዴንዲዲ ሊቢናን ዱንካኒ ኡቲዴስ።
NUM 33:21 ሊቢናፔ ዴንዲዲ ኤሪሳን ዱንካኒ ኡቲዴስ።
NUM 33:22 ኤርሳፔ ዴንዲዲ ቃሃላቴን ዱንካኒ ኡቲዴስ።
NUM 33:23 ቃሃላቴፔ ዴንዲዲ ሼፌሬ ዙማን ዱንካኒ ኡቲዴስ።
NUM 33:24 ሼፌሬ ዙማፔ ዴንዲዲ ሃራዳን ዱንካኒ ኡቲዴስ።
NUM 33:25 ሃራዳፔ ዴንዲዲ ማቂሃሎቴን ዱንካኒ ኡቲዴስ።
NUM 33:26 ማሃሎቴፔ ዴንዲዲ ታሃቴን ዱንካኒ ኡቲዴስ።
NUM 33:27 ታሃቴፔ ዴንዲዲ ታራን ዱንካኒ ኡቲዴስ።
NUM 33:28 ታራፔ ዴንዲዲ ሚቲቃን ዱንካኒ ኡቲዴስ።
NUM 33:29 ሚቲቃፔ ዴንዲዲ ሃሼሞኔን ዱንካኒ ኡቲዴስ።
NUM 33:30 ሃሼሞኔፔ ዴንዲዲ ሞሴሮቴን ዱንካኒ ኡቲዴስ።
NUM 33:31 ሞሴሮቴፔ ዴንዲዲ ቤኒ ያቂኔን ዱንካኒ ኡቲዴስ።
NUM 33:32 ቤኒ ያቂኔፔ ዴንዲዲ ሆሪ-ሃጊዲጋን ዱንካኒ ኡቲዴስ።
NUM 33:33 ሆሪ-ሃጊዲጋፔ ዴንዲዲ ዮጽባቴን ዱንካኒ ኡቲዴስ።
NUM 33:34 ዮጽባቴፔ ዴንዲዲ ኣብሮኔን ዱንካኒ ኡቲዴስ።
NUM 33:35 ኣብሮኔፔ ዴንዲዲ ኤጺዮን-ጋቢሬን ዱንካኒ ኡቲዴስ።
NUM 33:36 ኤጺዮን-ጋቢሬፔ ዴንዲዲ ጺኔ ባዞን ዲዛ ቃዴሴን ዱንካኒ ኡቲዴስ።
NUM 33:37 ቃዴሴፔ ዴንዲዲ ኤዶሜ ዴሬ ꬋሳን ዲዛ ሆሬ ዙማን ዱንካኒ ኡቲዴስ።
NUM 33:38 ቄሴ ኣሮኔይ ጎዳ ኣዛዞን ፑዴ ሆሬ ዙማ ቦላ ኬዚዴስ፤ ሄን ኢስራኤሌ ኣሳይ ጊብጼፔ ኬዚዳ ኦይዱ ታማንꬃ ላይꬃን ኢቻሻንꬆ ኣጊናይ ጼሪዳ ኮይሮ ጋላስ ሃይቂዴስ።
NUM 33:39 ኣሮኔይ ሆሬ ዙማ ቦላ ሃይቂዛ ዎዴ ኢዛ ላይꬃይ ጼታኔ ናምኡ ታማኔ ሄꬓ።
NUM 33:40 ካናኔ ቢታን ኔጌቤን ዲዛ ካናኔ ኣስ ኣራዴ ካዎይ ኢስራኤሌ ኣሳይ ዪዛይሳ ሲዪዴስ።
NUM 33:41 ዴሬዚካ ሆሬ ዙማፔ ዴንዲዲ ጼሊሞናን ዱንካኒ ኡቲዳ።
NUM 33:42 ጼሊሞናፔ ዴንዲዲ ፓኖኔን ዱንካኒ ኡቲዴስ።
NUM 33:43 ፓኖኔፔ ዴንዲዲ ኦቦቴን ዱንካኒ ኡቲዴስ።
NUM 33:44 ኦቦቴፔ ዴንዲዲ ሞኣቤ ꬋሳን ዲዛ ኢዬ-ኣባሪሜን ዱንካኒ ኡቲዴስ።
NUM 33:45 ኢዬ-ኣባሪሜፔ ዴንዲዲ ዲቦን-ጋዴን ዱንካኒ ኡቲዴስ።
NUM 33:46 ዲቦን-ጋዴፔ ዴንዲዲ ኣልሞን-ዲቢላታዬን ዱንካኒ ኡቲዴስ።
NUM 33:47 ኣልሞን-ዲቢላታዬፔ ዴንዲ ኔቦ ማታን ዲዛ ኣባሪሜ ዙማታ ቦላ ዱንካኒ ኡቲዴስ።
NUM 33:48 ኣባሪሜ ዙማታፔ ዴንዲዲ ኢያርኮፌ ዮርዳኖሴ ፒንꬃን ዲዛ ሞኣቤ ዴምባን ዱንካኒ ኡቲዴስ።
NUM 33:49 ሄን ዮርዳኖሴ ማታን ሞኣቤ ዴምባን ቤቲ-ያሺሞቴፔ ቢዲ ኣቤሊ-ሹቲሜ ጋካናስ ዱንካኒ ኡቲዴስ።
NUM 33:50 ኢያርኮ ጊናራ ዮርዳኖሴ ፒንꬃን ሞኣቤ ዴምባን ኢስቲ ዲሺን ኢስራኤሌ ዴሬዛስ ዮታና ማላ ጎዳይ ሙሴስ ሃይሳፌ ካሊዛ ዎጋ ኢሚዴስ።
NUM 33:51 ኔኒ ኢስራኤሌ ኣሳስ፥ «ኢንቴ ካናኔ ዴሬ ጌላናስ ዮርዳኖሴ ፒኒዛ ዎዴ፥
NUM 33:52 ሄ ቢታን ዲዛ ኣሳ ኡባ ኢንቴ ሲንꬃፌ ጎዲ ኬሲቴ፤ ሹቻፌኔ ቢራታፔ ኦሴቲዳ ኢስታ ኤቃ ጾሳታ ሜንꬄሬꬂ ዬጊቴ፤ ሄሳꬆካ ꬎቃሶሆታን ዲዛ ኢስቲ ጎይኒዛሶታካ ላሊቴ።
NUM 33:53 ታኒ ሄ ቢታዮ ኢንቴስ ኢሚዳ ጊሻስ ላቲዲ ኢንቴ ኢዚን ዲቴ።
NUM 33:54 ቢታዮ ኢንቴ ዛርኬን ዛርኬን ጊሼቲ ኤኪቴ፤ ቆዳን ዳሪዛ ዛርኬስ ዳልጋ ጋዴ ኢሚቴ፤ ቆዳን ጉጺዛ ዛርኬታስ ጹንꬃ ጋዴ ኢሚቴ፤ ኢሶይ ኢሶይ ባ ዛርኬን ዛርኬን ቢታዮ ኣይ ጊዲንካ ሳማይ ጋꬂዳ ማላ ባስ ላታ ጋዴ ሂስቲ ኤኮ።
NUM 33:55 «ካሴ ሄ ቢታን ዲዛ ኣሳታ ኡባ ጎዲ ኬሶንታ ኢስታፌ ሻኪ ኣሺኮ ኢስቲ ኢንቴ ኣይፌ ጫዲ ቶይሲዛ ፒልቄ ማላ ጊዳና፤ ሚሌ ጫዲዛ ኣጉንꬃ ማላ ጊዲዲ ኢስቲ ኢንቴና ዋዪሳና፤ ኢንቴ ዲዛ ዴሬዛን ኢስቲ ኡባ ዎዴ ኦላ ዴንꬂ ዴንꬂ ኢንቴና ሜቶꬃና።
NUM 33:56 ኢንቴ ሄሳꬆ ኦꬆንታ ኣጊኮ ታኒ ኢስታ ꬋይሳና ጋ ቆፖይሳ ኢንቴ ቦላ ዛራ ፖላና» ጊዴስ።
NUM 34:1 ጎዳይ ሙሴስ ሂዝጊዴስ፥
NUM 34:2 «ኢስራኤሌ ኣሳ፥ ‹ታኒ ኢንቴስ ኢሚዛ ካናኔ ቢታዮ ኢንቴ ቢዲ ጌሊዛ ዎዴ ኢዚ ዩሾን ዲዛ ዴሬቲ ሃይሳፌ ካሊዛይታ፤
NUM 34:3 ዱጌሃ ባጋራ ጺኔ ባዞፌ ዴንዲዲ ኤዶሜ ባዞ ኣቻራ ካንꬂ ቢዲ ኣርሼይ ሞኪዛ ባጋራ ሃይቆ ኣባፌ ዱጌሃ ባጋ ጼራ ቦላራ ዶሚዲ፥
NUM 34:4 ኣቅራቢሜ ፑርዴራ ካንꬂ ኣꬊዲ ጺኔ ጋኪዲ ዱጌሃ ባጋራ ቃዴሴ ባሪኔ ጋኬስ፤ ሄሳፌ ሃጻሬ-ኣዳሬ ካንꬂዲ ኣጺሞኔ ጋኬስ።
NUM 34:5 ኣጺሞኔፔ ዶሚዲ ሃꬂ ባይንዳ ጊብጼ ሻፋታራ ዩዪ ኣꬊዲ ሜዲቴራኔ ኣባን ኤቄስ።
NUM 34:6 « ‹ኣርሼይ ዉሊዛ ባጋራ ሜዲቴራኔ ኣባይ ዛዋ ጊዳና።
NUM 34:7 « ‹ፑዴሃ ባጋራ ዲዛ ዛዋይ ሜዲቴራኔ ኣባፌ ቢዲ ኡሬ ዙማ ጋኬስ።
NUM 34:8 ኡሬ ዙማፔ ቢዲ ሃማቴራ ኣꬊ ቢዲ ጼዳዴ ጋኬስ።
NUM 34:9 ጌዴ ዚፒሮኔ ፒኒዲ ሃጻሬ-ኤናኔ ጋኪ ኤቄስ፤ ሃይሲ ኡባይ ኢንቴስ ፑዴሃ ባጋራ ዲዛ ዛዋ ጊዳና።
NUM 34:10 « ‹ኣርሼይ ሞኪዛ ባጋራ ሃጻሬ-ኤናኔፔ ቢዲ ሻፋሜ ጋካናስ ማላታ ዎꬂቴ።
NUM 34:11 ዛዋዚ ሻፋሜፔ ዶሚዲ ኣዪኔፔ ኣርሼይ ሞኪዛ ባጋራ ኤሬቢላ ካንꬂ ኣꬊዲ ጋሊላ ኣባፌ ኣርሼይ ሞኪዛ ባጋራ ዲዛ ዞዜታራ ካንꬂዲ፥
NUM 34:12 ዮርዳኖሴ ሻፋ ዎꬌስ፤ ሄራ ቢዲ ዉርሴꬃዚ ሃይቆ ኣባ ጊዳና፤ ሃይቲ ኢንቴ ቢታዮ ዩዪ ኣꬊዛ ዛዋታ ጊዳና› ጋዳ ኣዛዛ።»
NUM 34:13 ሙሴይ ኢስራኤሌ ኣሳ፥ «ሳማ ዬጊዲ ኢንቴ ላታና ማላ ኡዱፉን ዛርኬታሲኔ ሚናሴ ዛርኬፌ ባጋይታስ ሄ ቢታይ ኢሜታና ማላ ጎዳይ ኣዛዚዴስ።
NUM 34:14 ኦሮቤሌ ዛርኬቲ ጋዴ ዛርኬቲኔ ሚናሴስ ባጋ ዛርኬቲ ባስ ኢሜቲዳ ቢታ ላቲዳ።
NUM 34:15 ኢስቲካ ዮርዳኖሴፔ ሄ ፒንꬃን ኢያርኮ ጊናራ ኣርሼይ ሞኪዛ ባጋራ ባና ጋኪዛ ጺንጾዛ ኤኪዳ» ጊ ዮቲዴስ።
NUM 34:16 ጎዳይ ሙሴስ ሂዝጊዴስ፥
NUM 34:17 «ቄሴ ኤልኤዜሬይኔ ናዌ ና ኢያሶይ ጋዴዛ ዴሬዛስ ጊሼቶ።
NUM 34:18 ኢስቲ ቢታ ጊሺዛ ዎዴ ኢስታ ማዳናስ ዛርኬፌ ዛርኬፌ ኮራፒኔ ኤካ።
NUM 34:19 ሄ ኔ ኤካና ኣሳታ ሱንꬂ ሃይሳፌ ካሊዛይሳ፤ ዩሁዳ ዛርኬፌ ዮፊኔ ና ካሌቤ፥
NUM 34:20 ሲሞና ዛርኬፌ ኣሚሁዴ ና ሳሜላ፥
NUM 34:21 ቢኒያሜ ዛርኬፌ ኪሳሎኔ ና ኤልዳዴ፥
NUM 34:22 ዳኔ ዛርኬፌ ዮጊሌ ና ቡቃ፥
NUM 34:23 ዮሴፌ ዛርኬፌ ሚናሴ ባጋ ሱፊዴ ና ሃንኤሌ፥
NUM 34:24 ዮሴፌ ዛርኬፌ ኤፍሬሜ ባጋ ሺፊጼ ና ቃሙኤሌ፥
NUM 34:25 ዛቢሎኔ ዛርኬፌ ፔሪናኬ ና ኤልጻፋኔ፥
NUM 34:26 ዪሳኮሬ ዛርኬፌ ሆዛ ና ፓልቲኤሌ፥
NUM 34:27 ኣሴሬ ዛርኬፌ ሴሌሜ ና ኣሁዴ፥
NUM 34:28 ኒፍታሌሜ ዛርኬፌ ኣሚሁዴ ና ፔዳሄሌ።»
NUM 34:29 ሃይታንቲ ኢስራኤሌ ኣሳስ ካናኔን ቢታ ጊሺ ኢማና ማላ ጎዳይ ዶሪዳ ኣሳታ።
NUM 35:1 ኢያርኮ ጊናራ ዮርዳኖሴ ሻፋፔ ሄ ፒንꬃን ዲዛ ሞኣቤ ዴምባ ቦላ ጎዳይ ሙሴስ ሂዝጊዴስ፥
NUM 35:2 «ኢስራኤሌ ኣሳይ ባ ጊሻፔ ጊሻፔ ሌዌ ዛርኬቲ ዳና ካታማታኔ ሄ ካታማታ ዩሾን ኢስቲ ባ ሜሄ ኢዛን ሄማና ጋዴ ኢማና ማላ ዮታ።
NUM 35:3 ሄ ካታማቲካ ሌዌ ዛርኬታስ ዱሳሶ ጊዳና ጊዴስ፤ ሜሄ ሄሚዛሶሆቲ ኢስታ ሜሄይ ፔኢዛሶ ጊዳና።
NUM 35:4 ካታማታ ዩሾን ኢንቴ ሌዌ ዛርኬታስ ኢማና ሜሄ ሄንꬃ ጋዴዛ ኣኮቴꬃይ ካታማ ጊምቤዛፔ ዶሚዲ ኦይዱ ባጋራካ 1,000 ዋꬋ ዋꬋ ጊዶ።
NUM 35:5 ሄሳ ማላን ካታማዛ ጊዶ ኣꬂዲ ኦይዱ ባጋራካ ጉላፔ ቢዲ ጉላ ጋካናስ 2,000 ዋꬋ ጊዶ፤ ሄሳ ሌዌ ቆሞቲ ባስ ሜሄ ሄንꬃሶሆ ሂስቴቶ።
NUM 35:6 «ሌዌ ቆሞታስ ኢንቴ ኢሚዛ ካታማታፔ ኡሱፑናቲ ኣስ ዎꬊዳ ኣሲ ባቃቲ ኣቲዛ ካታማታ ጊዴቶ፤ ሄይታፔ ሃራ 42 ካታማታ ጉጂ ኢሚቴ።
NUM 35:7 ኢስቲ ሜሄ ሄሚዛሶሆታራ ጉጂን 48 ካታማቲ ኢሜቴቶ።
NUM 35:8 ኢስራኤሌ ዛርኬቲ ላቲዳ ጋዴፔ ኢስታ ጋዴ ጋዴ ዳልጋቴꬃ ማላ ዳልጋ ጋዴ ኦይኪዳይታፔ ዳልጋ፥ ጹንꬃ ጋዴ ኦይኪዳይታፔ ጹንꬅ ኤኪዲ ሌዌ ዛርኬታስ ኢሚቴ።»
NUM 35:9 ጎዳይ ሙሴስ ሂዝጊ ዮቲዴስ፥
NUM 35:10 «ኔኒ ኢስራኤሌ ኣሳስ፥ ‹ኢንቴ ካናኔ ዴሬ ጌላናስ ዮርዳኖሴ ሻፋ ፒኒዛ ዎዴ፥
NUM 35:11 ኢሲ ኣሲ ኤሮንታ ዲሼ ኣስ ዎꬊኮ ሄሳዴይ ባቃቲ ቢዲ ኣታና ካታማታ ኔ ዶራ።
NUM 35:12 ሄ ካታማቲ ሼምፖ ዎꬊዳዴይ ፒርዳስ ሺቆንታ ዲሺን ሃይቂዳዴ ዳቦይ ኢዛ ዎꬎንታ ማላ ኢዚ ባቃቲ ኣቲዛ ካታማታ ጊዴቶ።
NUM 35:13 ሃይቲ ኢንቴ ሌዌታስ ኢሚዳ ኡሱፑን ካታማቲ ኤሮንታ ሼምፖ ዎꬊዳ ኣሲ ባቃቲ ኣቲዛ ካታማታ ጊዳና።
NUM 35:14 ሄ ካታማታፔ ሄꬓቲ ዮርዳኖሴ ሻፋፔ ሄ ፒንꬃን ኣርሼይ ሞኪዛ ባጋራ ሃንኮ ሄꬓቲ ቃሴ ካናኔ ቢታን ጊዴቶ።
NUM 35:15 ሃ ኡሱፑን ካታማቲ ኤሮንታ ዲሼ ኣስ ዎꬊዳ ኢስራኤሌ ኣሲ፥ ኢማꬃቲኔ ኢንቴ ጊዶን ዲዛ ሃራ ዴሬ ኣሳቲ ባቃቲ ኣቲዛሶ ጊዴቶ።
NUM 35:16 « ‹ኢሲ ኣሲ ቢራታፔ ኦሴቲዳዛን ኣስ ዎꬊዳ ጊዲኮ ሄ ሼምፖ ዎꬊዳዴይ ኢዚካ ኣሳ ኩሼን ሃይቆ።
NUM 35:17 ኢሲ ኣሲ ሹቻን ጫዲዲ ኣስ ዎꬊዳ ጊዲኮ ሄ ሼምፖ ዎꬊዳዴይ ኢዚካ ኣሳ ኩሼን ሃይቆ።
NUM 35:18 ኢሲ ኣሲ ሚꬃን ጫዲ ኣስ ዎꬊዳ ጊዲኮ ሄ ሼምፖ ዎꬊዳዴይካ ኣሳ ኩሼን ሃይቆ።
NUM 35:19 ሄ ሃይቂዳይሳስ ማታ ዳቦይ ሱꬅ ኣዛራናስ ዳንዳይዛ ጊሻስ ኣዋንካ ዴሚኮ ዎꬋናስ ዳንዳዬስ።
NUM 35:20 « ‹ኢሲ ኣሲ ኦዲዲ ኣስ ሱጊ ዬጊ ዎꬊኮ ዎይኮ ጌማሶን ኡቲዲ ኢሲ ሚሻን ጫዲ፥
NUM 35:21 ዎꬊኮ ሞርኬቴꬃን ዴንዲዲ ኢጪ ዎꬊኮ ኢዚ ሼምፖ ዎꬊዳ ጊሻስ ኢዚካ ኣሳ ኩሼን ሃይቃናስ ቤሴስ፤ ሄ ሃይቂዳይሳስ ማታ ዳቦይ ሱꬅ ኣጫናስ ዳንዳይዛ ጊሻስ ኣዋንካ ዴሚኮ ዎꬋናስ ዳንዳዬስ።
NUM 35:22 « ‹ጊዶ ኣቲን ኢሲ ኣሲ ኤሮንታ ዲሼ ኣስ ሱጊ ዎꬊኮ ዎይኮ ቆፖንታ ዲሼ ኢሲ ሚሻን ጫዲ ዎꬊኮ፥
NUM 35:23 ዎይኮ ኤሮንታ ዲሼ ሹች ኢዛ ቦላ ዬጊ ዎꬊዛ ጊዲኮ ሄሳዴይ ኢዛ ቆሃናስ ኦዲ ኦꬆንታ ጊሻስ፥
NUM 35:24 ዴሬዚ ሄ ዎꬊዳይሳ ጊዶኒኔ ሃይቂዳይሳ ዳቦታ ጊዶን ኢሜታና ፒርዳይ ሃይሳፌ ካሊዛይሳ ጊዶ።
NUM 35:25 ኤሮንታ ዲሼ ኣስ ዎꬊዳዴይ ሱꬅ ኣጪዛ ኣሳ ኩሼፔ ዴሬዚ ኣሺዲ ኢዚ ባቃቲ ኣቲዳ ካታማ ዛሮ፤ ዛይቴን ቲዬቲዳ ቄሴታ ሃላቃይ ሃይቃና ጋካናስ ኢዚ ሄን ጋምኦ።
NUM 35:26 « ‹ኣስ ዎꬊዲ ካሳሴቲዳይሲ ባቃቲ ኣቲዛ ካታማፔ ካሬ ኬዚዛ ጊዲኮ፥
NUM 35:27 ሱꬃ ኣጪዛዴይ ዴሚዲ ኢዛ ዎꬊኮ ሱꬃ ኣጮን ኦይሼቴና።
NUM 35:28 ኣስ ዎꬊዲ ካሳሴቲዳይሲ ቄሴታ ሃላቃይ ሃይቃና ጋካናስ ባቃቲ ኣቲዛ ካታማን ጋምኦ፤ ቄሴታ ሃላቃዚ ሃይቂዳፔ ጉዬ ኢዚ ባሶ ሲማና ዳንዳዬስ።
NUM 35:29 « ‹ሃይሲ ሃ ዎጋዚ ኢንቴ ዲዛ ዴሬ ኡባን ኢንቴሲኔ ኢንቴ ዜሬꬃታስ ኤቂ ዲዛ ዎጋ ጊዶ።
NUM 35:30 « ‹ሼምፖ ዎꬊዳ ኣይ ኣሲካ ሃይቆ ፒርዳ ፒርዴታናስ ዳንዳይዛይ ኢዛ ቦላ ናምኡ ማርካይ ዎይኮ ኢዛፔ ቦላራ ማርካቲኮ ኣቲን ኢሲ ማርካን ጻላ ሃይቆ ቂጻቴ ኤኬና።
NUM 35:31 ሼምፖ ዎꬊን ሃይቆ ፒርዳይ ኢዛ ቦላ ፒርዴቲዳ ኣሲ ሃይቃና ቤሴስ ኣቲን ባ ዎꬊዳ ሼምፖ ጊሻስ ሚሼ ቃንጺ ኣታናስ ዳንዳዬና።
NUM 35:32 ኢዛን ባቃቲ ኣቲዛ ካታማ ባቃቲዳ ኦናፔካ ቄሴታ ሃላቃይ ሃይቃናፔ ካሴ ኢዚ ጉዬ ሲሚዲ ባ ቢታን ዴኣና ማላ ጊዲ ሱꬃ ቃንጾ ኤኮፍቴ።
NUM 35:33 ኢንቴ ሄሳꬆ ኦꬂዛ ጊዲኮ ኢንቴ ቢታ ቱኒሴታ፤ ጋሶይካ ኣሳ ሱꬅ ጉሲዛይሲ ቢታ ቱኒሴስ፤ ሄ ቢታይ ጌያናይ ኣሳ ሱꬅ ጉሲዳዴ ሱꬃይ ጉኪን ኣቲን ሃራን ጌዬና።
NUM 35:34 ታኒ ኢንቴ ጎዳ ጊዲዳ ጊሻሲኔ ኢንቴናራ ኢስራኤሌ ዴሬዛ ጊዶን ዲዛ ጊሻስ ታኒ ኢዛን ዲዛ ቢታ ቱኒሶፒቴ› ጋ ዮታ።»
NUM 36:1 ዮሴፌ ና ሚናሴይ ዬሊዳ ማኪሬ ና ጋላኣዴ ዛርኬታ ካሌꬂዛ ሃላቃቲ ሙሴኮኔ ኢስራኤሌ ኣሳ ካሌꬂዛይታኮ ሺቂዲ፥
NUM 36:2 «ኔኒ ሃኖ ቢታዮ ኢስራኤሌ ዴሬዛስ ሳማን ጊሻና ማላ ጎዳይ ኔና ኑ ጎዳዛ ኣዛዚዴስ፤ ሄሳꬆካ ኑ ኢሻ ጺሎፋዴ ጊሻ ኢዛ ማጫ ናይታስ ኢማና ማላ ኔና ኣዛዚዴስ።
NUM 36:3 ጊዶ ኣቲን ኢስቲ ጌሊዛ ኣዚናቲ ሃራ ቆሞፌ ጊዲኮ ኢስታ ጊሻ ጋዴይ ኑ ዛርኬታ ጺንጾፌ ቃንጼቲዲ ሄ ኢስቲ ጌሊዳ ኣዚናታ ዛርኬታስ ጉጄቲዛ ጊሻስ ኑ ዛርኬታ ጺንጾዚ ካሴ ኤኬቶይሳፌ ፓጬ ጊዴስ።
NUM 36:4 ዎዞ ላይꬃይ ጋኪዛ ዎዴ ኢስታ ጊሻዚ ኢስቲ ጌሊዳ ዛርኬስ ጉጄቴስ፤ ሄሳ ጊሻስ ኢስታ ጺንጾይ ኑ ዛርኬታ ጺንጾ ፓጪንቼስ» ጊዳ።
NUM 36:5 ሄሳፌ ጉዬ ሙሴይ ጎዳይ ኢዛስ ዮቲዳ ማላ ኢስራኤሌ ኣሳስ፥ «ሚናሴ ዛርኬቲ ጊዳይሲ ዉሪካ ሊኬ።
NUM 36:6 ሄሳ ጊሻስ ጎዳይ ጺሎፋዴ ማጫ ናይቲ ባ ዛርኬታ ጊዶፌ ባ ዶሲዳዴ ጌላናስ ዳንዳዬቴስ።
NUM 36:7 ሄሳ ማላን ኢስራኤሌ ኣሳ ጺንጾይ ኢሲ ዛርኬፌ ሃራ ዛርኬን ኣꬎፎ፤ ኢስራኤሌ ኣሳይ ካሴ ባ ኣዋታፔ ላቲዳ ቢታ ሚንꬂ ኦይኮ።
NUM 36:8 ኢስራኤሌ ኣሳ ዛርኬታ ጊዶን ባ ኣዋ ጋዴ ላቲዳ ማጫሲ ኦኒካ ባ ቆሞ ጌላናስ ቤሴስ፤ ሄሳ ማላን ኢስራኤሌ ኣሳይ ኡባይ ባ ኣዋታ ጺንጾ ናጋናስ ዳንዳዬስ።
NUM 36:9 ሄሳ ጊሻስ ጋዴዚ ኢሲ ዛርኬ ኩሼፔ ሃራ ዛርኬ ኩሼን ኣꬋናስ ዳንዳዬና፤ ዉሪካ ባ ዛርኬን ዛርኬን ባ ቢታ ኦይኪ ናጎ» ጊዴስ።
NUM 36:10 ጺሎፋዴ ማጫ ናይቲ ጎዳይ ሙሴ ኣዛዚዳ ማላ ኦꬂዳ።
NUM 36:11 ጺሎፋዴ ማጫ ናይቲ ማሂሎ፥ ቲርጾ፥ ሆጊሎ፥ ሚልኮ፥ ኖኦ፤ ሄይታንቲ ባ ኣዋ ኢሻታ ናይታ ጌሊዳ።
NUM 36:12 ዮሴፌ ና ሚናሴ ዛርኬታ ጊዶን ኣዚና ጌሊዳ፤ ሄ ኢስታ ቢታይ ኢስታ ኣዋታ ዛርኬ ሱንꬃን ሚኒ ኣቲዴስ።
NUM 36:13 ኢስራኤሌ ኣሳይ ኢያርኮ ጊናራ ዮርዳኖሴ ሻፋፔ ሄ ፒንꬃን ሞኣቤ ዴምባን ዲሺን ጎዳይ ሙሴ ባጋራ ኢስታስ ኢሚዳ ዎጋቲኔ ኣዛዞቲ ሃይታንታ።
DEU 1:1 ሃይሳ ሃ ማጻፋን ዲዛ ቃላይ ዉሪካ ዮርዳኖሴ ሻፋፔ ሄ ፒንꬃን ኣርሼይ ሞኪዛ ባጋራ ዲዛ ባዞን ኢስቲ ዲሺን ሙሴይ ኢስራኤሌ ናይታስ ዮቲዳ ቃላ። ሙሴይካ ሃ ቃላ ዮቲዛ ዎዴ ኢስቲ ሱፌ ጌቴቲዛሶ ጊናራ ፓራኔ ካታማፔ ቃሴካ ሃራ ባጋራ ቶፔሌ፥ ላባ፥ ሃጺሮቴኔ ዲዛሃቤ ጌቴቲዛ ካታማታ ጊዶን ዲዛ ዮርዳኖሴ ሾባን ዴቴስ።
DEU 1:2 ሲና ዙማፔ ዴንዲዲ ቃዴሴ ባሪኔ ጋካናስ ኤዶሜ ዙማታ ቦላራ ኤፊዛ ቶሆ ኦጌራ ቢኮ ታማኔ ኢሲ ጋላስ ኤኬስ።
DEU 1:3 ጊብጼፔ ኢስቲ ኬዚዳፔ ኦይዱ ታማንꬆ ላይꬃን ታማኔ ኢሲንꬃ ኣጊናይ ጌሊዳ ኮይሮ ጋላስ ሙሴይ ዴሬዛስ ኤሪሳና ማላ ጎዳይ ኢዛስ ዮቲዳ ቃላ ኡባ ኢስታስ ዮቲዴስ።
DEU 1:4 ሄሲካ ሃኒዳይ ሃሴቦኔ ካታማን ካዎቲ ሃሪዛ ኣሞሬ ዴሬ ካዎ ሲሆኔኔ ኣስታሮቴን፥ ኤዲራኤ ካታማን ኡቲዲ ሃሪዛ ባሳኔ ካዎ ኣጌ ጾኒዳፔ ጉዬና።
DEU 1:5 ኣሳይ ዮርዳኖሴፔ ኣርሼይ ሞኪዛ ባጋራ ሞኣቤ ዴሬን ዲሺን ሙሴይ ሃይሳፌ ካሊ ዲዛ ጎዳ ዎጋ ቆንጪሴꬅ ዶሚዴስ፤
DEU 1:6 «ኑኒ ሲና ዙማ ቦላ ዲዛ ዎዴ ጎዳ ኑ ጾሳይ ኑስ፥ ‹ሄኮ ኢንቴ ሃይሳ ዙማ ቦላ ዳሮ ጋምኢዴታ፤
DEU 1:7 ሃይሳፌ ጉዬ ኢንቴ ዲዛሶፔ ዴንዲ ጌዴ ጌዜቲዛ ኣሞሬታ ዴሬ፥ ኢስታ ሄራን ዲዛ ኣራቤ ዴሬን ዲዛ ጌዜኔ ጋꬋ፥ ኔጌቤ ዴሬ፥ ሜዲቴራኔ ኣባ ላንቄራ፥ ካናኔ ዴሬኔ ሊባኖሴ ባጋራ ካንꬂዲ ጊታ ሃꬃ ኤፊራጺሴ ሻፋ ጋካናስ ካንꬂ ቢቴ።
DEU 1:8 ሄኮ ታኒ ሃ ቢታዮ ኢንቴስ ኢማዲስ፤ ኢንቴካ ቢዲ ኢንቴ ኣዋታስ ኣብራሃሜስ፥ ዪሳቃስ፥ ያቆቤሲኔ ኢስታፌ ጉዬን ያና ኢስታ ዜሬꬃታስ ኢማናስ ጎዳይ ጫቂዳ ቢታዮ ላቲቴ› ጊዴስ» ጊዲ ዮቲዴስ።
DEU 1:9 ሙሴይ ዴሬዛስ፥ «ሄ ዎዴ ታኒ ኢንቴስ፥ ‹ታኒ ታርካ ኢንቴና ካሌꬃናስ ዳንዳይኬ።
DEU 1:10 ኢንቴ ጎዳይ ኢንቴ ቆዳ ሳሎ ጾሊንቴ ማላ ዳርሲዴስ።
DEU 1:11 ሃኢካ ኢንቴ ኣዋታ ጾሳይ ካሴ ኢንቴስ ኢሚዳ ሂዶታ ቃላ ማላ ሺ ዳኮ ጉጂዲ ኢንቴና ኣንጆ።
DEU 1:12 ጊዶ ኣቲን ሃኢ ኢንቴ ጋርሳን ዲዛ ፓላማ፥ ኦሻኔ ኢንቴ ሜቶዛ ታኒ ታርካ ዎስታ ቢርሻና ዳንዳያዚና?
DEU 1:13 ኢንቴ ኢንቴ ቆሞፌ ቆሞፌ ኣኬካይ፥ ኣꬎ ኤራቴꬂ ዲዛይታኔ ኦꬂ ሎሲዳይታ ዶሪቴ፤ ታኒካ ኢስታ ኢንቴ ቦላ ሹማና› ጋ ዮታዲስ።
DEU 1:14 «ኢንቴካ፥ ‹ኔ ሺሺዳ ቆፋይ ሎኦ› ጊ ኤኪዴታ።
DEU 1:15 ሄሳ ጊሻስ ኢሲ ኢሲ ቆሞፌ ኢንቴ ዶሪዳይታ ኦሶ ሎሲዳይታ፥ ኣꬎ ኤራንቻታኔ ኣኬኪዛይታ ኢንቴፌ ኤካዳ ባጋይታ ሻላቃታ፥ ባጋይታ ማቶ ሃላቃታ፥ ባጋይታ ሃምሳ ሃላቃታኔ ኣሲራ ሃላቃታ፥ ባጋይታ ቆሞታ ካሌꬂዛ ሃላቃ ሂስታ ሹማዲስ።
DEU 1:16 «ታ ሄ ዎዴ ኢስታስ፥ ‹ኢንቴ ዴራ ጋርሳን ዴንዲዛ ፓላማኔ ኦሽ ኤኪ ጌላይ ባይንዳ ሱሬ ፒርዳ ፒርዲቴ፤ ኢንቴ ዴራ ጊዶን ዎይኮ ሃራ ዴሬፔ ዪዲ ኢንቴ ጊዶን ዲዛ ኣሳስ ጌላይ ባይንዳ ሱሬ ፒርዳ ፒርዲቴ።
DEU 1:17 ኢንቴ ጌላ ፒርዳ ፒርዶፍቴ፤ ጉꬅ ጊዲን ጊታ ጊዲን ማዶ ፒርዳ ፒርዶፍቴ፤ ፒርዳይ ጾሳስ ጊዲዳ ጊሻስ ኣይ ኣሳስካ ባቦፍቴ፤ ኢንቴፌ ቦላ ጊዲዳይሳ ኡባ ታኮ ኤሂቴ፤ ሄሳ ታኒ ፒርዳና› ጋዲስ።
DEU 1:18 ኢንቴ ኦꬃናስ ቤሲዛይሳ ታ ኢንቴስ ሄ ዎዴ ሎኤꬃ ዮታዲስ።
DEU 1:19 «ሄሳፌ ጉዬ ኑ ጎዳይ ኑና ኣዛዚዳ ማላ ሲና ዙማፔ ዴንዲዲ ኢንቴ ቤኢዳ ኢታ ባዞዛራ ካንꬂዲ ኣሞሬ ዴሬን ሻራ ሜንꬆራ ኣꬊ ቢዲ ቃዴሴ ባሪኔ ጋኪዶስ።
DEU 1:20 ታኒ ኢንቴስ፥ ‹ጾሳይ ኑና ላቲሳናስ ቃላ ጌሊዳ ሻራ ሜንꬆ ጊዲዳ ኣሞሬ ዴሬ ሄኮ ጋኪዴታ።
DEU 1:21 ሄ ዴሬዮ ሃኖ ቤኢቴ! ጎዳይ ኑ ኣዋታ ጾሳይ ቤኒ ኣዛዚዳ ማላ ኢንቴ ጌሊዲ ኢዞ ላቲቴ፤ ባቦፍቴኔ ሂዶታ ቃንጾፍቴ› ጋ ዮታዲስ።
DEU 1:22 «ኢንቴ ኡባቲካ ታኮ ዪዲ፥ ‹ሄ ቢታይን ዲዛ ካታማቲ ኣይ ማላኮ ቃሴ ኑና ሄ ጋꬃና ኦጌይካ ኣይ ማላ ኦጌኮ ቢ ዎቺ ሲሚዲ ኑስ ዮታና ኣሳታ ኑ ጋርሳፌ ኣኔ ዶሮስ› ጊዲ ታና ኦይቺዴታ።
DEU 1:23 «ሄሳ ሂስታናይሲ ታስ ሎኦ ሚሳቲ ቤቲን ኢንቴ ጋርሳፌ ቆማፌ ቆማፌ ኢሲ ኢሲ ኣስ ዶራዳ ታማኔ ናምኡ ኣሳታ ዬዳዲስ።
DEU 1:24 ኢስቲካ ሻራ ሜንꬆ ዴራራ ካንꬂ ቢዲ ኤሽኮሌ ሾባ ጋካናስ ዩዪ ጾሞሲ ጼሊዳ።
DEU 1:25 ኢስቲካ ሄን ባ ቤኢዳ ሚꬃ ኣይፌፔ ኣማርዳይሳ ኤኪ ዪዲ ጎዳ ኑ ጾሳይ ኑስ ኢማና ቆፒዳ ቢታያ ኬሃ ሎኦ ቢታ ጊዲዳይሳ ኑስ ቆንጪሲ ዮቲዳ።
DEU 1:26 «ጊዶ ኣቲን ጎዳ ኢንቴ ጾሳ ኣዛዞ ቦላ ማካሊዳ ጊሻስ ሄ ቢታዮ ጌላናስ ኮዪቤኬታ።
DEU 1:27 ኢንቴ ኢንቴ ዱንካኔን፥ ‹ጾሲ ኑና ኢጺዴስ፤ ኢዚ ኑና ጊብጼፔ ኬሲዳይ ሃይታ ኣሞሬ ኣሳታን ኑና ዎꬊሳናሲኔ ኢስታ ኩሼን ኑና ኣꬂ ኢማናሳ፤
DEU 1:28 ሂስቲን ኑ ሄ ኣዛስ ቢዞኒ? ኑኒ ባቦስ፤ ኑኒ ኪቲዳ ኣሳቲ ሄን ዲዛ ኣሳይ ዉሪካ ሚኖኔ ኬሂ ኣዱሳታ ጊዲዳይሳ ቃሴካ ኢስቲ ዲዛ ካታማታ ጊምቤይ ሳሎ ጋኪዳይሳ ኑስ ዮቲዳ፤ ኬሂ ኣዱስ ጊዲዳ ኤናቄ ናይታ ቤኢዳ› ጊዲ ዙዙሚዴታ።
DEU 1:29 «ጊዶ ኣቲን ታኒ ኢንቴስ፥ ‹ሃይታ ሃ ኣሳታስ ባቦፍቴኔ ዳጋሞፍቴ።
DEU 1:30 ኢንቴፌ ሲንꬃራ ቢዛ ጎዳ ኢንቴ ጾሳይ ካሴ ኢንቴ ኣይፌን ቤኢሺን ጊብጼታ ቦላ ኦꬆይሳ ማላ ሃኢካ ኢዚ ኢንቴ ጊሻስ ኦሌታና።
DEU 1:31 ኣዋይ ባ ና ኣልኢሲዛ ማላ ኢንቴ ቢዛ ባዞ ቢታ ኡባን ኢዚ ኢንቴና ካሌꬂሼ ኢንቴና ሳሮን ሃይሳ ዎስቲ ጋꬂዳኮ ኢንቴ ቤዪዴታ።
DEU 1:32 ሃ ኡባ ታ ዮቲንካ ኢንቴ ዱንካናና ሶሆዛ ቤሳናሲኔ ኢንቴ ባና ኦጌ ቤሳናስ ኦማርስ ቱሳ ታማን፥ ጋላስ ቱሳ ማላ ሻራን ኢንቴና ካሌꬂዳ ኢንቴ ጎዳን ኣማኔቲቤኬታ።
DEU 1:34 «ኢንቴ ዙዙሚዳ ዙዙንꬃ ጾሲ ሲዪዲ ሃንቄቲዴስ፤
DEU 1:35 ሄሳ ጊሻስ፥ ‹ታኒ ካሴ ኢንቴ ኣዋታስ ኢማና ጋዳ ጫቂዳ ሄ ሎኦ ቢታዮ ሃ ኢታ ዬሌታፔ ኢሶይካ ጌሌና።
DEU 1:36 ዮፊኔ ና ካሌቤይ ጻላ ሄ ቢታዮ ጌላና፤ ኢዚካ ኩሜꬃ ዎዚናፔ ኣማኔቲ ቤቲዳ ጊሻስ ሄ ኢዚ ቤኢዳ ቢታዮ ኢዛሲኔ ኢዛ ዜሬꬃታስ ታ ኢማና› ጊ ጫቂዴስ።
DEU 1:37 «ኢንቴ ጋሶን ጎዳይ ታና ሃንቄቲዲ፥ ‹ሙሴ ኔኒካ ሄ ዴሬዮ ጌላካ።
DEU 1:38 ጊዶ ኣቲን ኔና ማዲዛ ናዌ ና ኢያሶይ ሄ ቢታዮ ጌላና፤ ሄ ቢታዮካ ላታና ማላ ኢስራኤሌ ናይታ ካሌꬃናይ ኢዛ ጊዲዳ ጊሻስ ኔ ኢዛ ሚንꬄꬃ› ጊዴስ።
DEU 1:39 «ቃሴካ ጎዳይ ኢንቴስ፥ ‹ኢንቴ ኑ ናይቲ ዲኤታና› ጊዳ ኢታኔ ኪያ ሻኪ ኤሮንታ ቂ ናይቲ ጻላ ሄ ቢታዮ ጌላና፤ ታኒ ሄ ቢታዮ ኢስታስ ኢማና፤ ኢስቲካ ሄ ቢታዮ ላታና።
DEU 1:40 ኢንቴ ጊዲኮ ሲሚዲ ዞኦ ኣባኮ ኤፊዛ ኦጌዛራ ዱጌ ባዞ ቢቴ» ጊዴስ።
DEU 1:41 «ኢንቴካ፥ ‹ሙሴ! ኑኒ ኑ ጎዳ ቆሂዶስ፤ ሃኢ ጎዳይ ኑ ጾሳይ ኑና ኣዛዚዳ ማላ ኑ ኦሌታና› ጊዴታ፤ ሄ ሻራ ሜንꬆ ዴሬዮ ዎራጆይ ካዉሻ ሚሽ ሚሳቲ ቤቲን ኢሶይ ኢሶይ ኦላስ ጊጌቲዴታ» ጊዴስ።
DEU 1:42 ጎዳይ ጊዲኮ፥ «ታ ኢንቴናራ ኬኦንታ ጊሻስ ኦላስ ኬዞፒቴ፤ ኢንቴ ኢጺስ ጊ ኬዚኮ ኢንቴ ሞርኬቲ ኢንቴና ጾናና» ጊዲ ታስ ዮቲዴስ።
DEU 1:43 ታኒካ ጎዳይ ታስ ዮቶይሳ ኢንቴስ ዮታዲስ ሺን ኢንቴ ኢጺዴታ። ኢዛ ቦላካ ማካሊዴታ፤ ኦቶሮ ዳሮፔ ዴንዲዳይሳን ኢንቴ ሄ ሻራ ሜንꬆ ቢታዮ ኦላናስ ቢዴታ።
DEU 1:44 ሄ ዙምቡላታ ቦላ ዲዛ ኣሞሬ ዴሬ ኣሳቲ ኢንቴናራ ኦላ ኦይኬቲዳ፤ ኢስታ ኦላንቻቲ ማꬃ ማላ ኢንቴ ቦላ ዪዲ ሆርማ ጋካናስ ኢንቴና ዬዴꬂዳ፤ ዙምቡላቲ ዳሪ ኡቲዳ ኤዶሜ ዴሬን ኢንቴና ጾኒዳ።
DEU 1:45 ሄሳ ጊሻስ ኢንቴ ሲሚ ዪዲ ጎዳ ሲንꬃን ዬኪዴታ፤ ጊዶ ኣቲን ኢዚ ኢንቴ ዬሆዛኔ ዋሶዛ ሲዪዲ ኢንቴና ማዳናስ ኮዪቤና።
DEU 1:46 ሂስቲን ኢንቴ ቃዴሴን ዳሮ ዎዴ ጋምኢዴታ።
DEU 2:1 ሄሳፌ ጉዬ ጾሲ ኣዛዚዳ ማላ ጌዴ ዞኦ ኣባኮ ኤፊዛ ኦጌዛራ ጉዬ ሲሚ ዱጌ ባዞ ቢታ ቢዶስ፤ ኑኒ ሄን ቶይላቲሼ ሻራ ሜንꬆ ኤዶሜ ዴሬን ዳሮ ዎዴ ጋምኢዶስ።
DEU 2:2 ሄሳፌ ጉዬ ጎዳይ ታስ ሂዝጊ ዮቲዴስ።
DEU 2:3 «ኢንቴ ሃ ሻራ ሜንꬆ ዴሬታን ዳሮ ዎዴ ቶይላቲዴታ፤ ሃኢ ፑዴሃ ባጋ ሲሚ ቢቴ።
DEU 2:4 ዴራ፥ ‹ኢንቴ ዳቦ ኤሳዌ ዜሬꬃቲ ዲዛ ኤዶሜ ዴሬራ ኣꬊ ባና፤ ኢስቲ ኢንቴስ ያያና፤ ጊዲኮካ ኢንቴ ኬሂ ናጌቲቴ።
DEU 2:5 ሻራ ሜንꬆን ዲዛ ኤዶሜ ቢታ ታ ኤሳዌስ ጺንጾ ሂስታ ኢሚዳ ጊሻስ ኢስታ ቢታፌ ቶሆይ ዬꬊዛሶካ ታ ኢንቴስ ኢሚዳ ኢስታ ቦላ ኦላ ዴንꬆፍቴ።
DEU 2:6 ኢንቴስ ኮሺዛ ካꬅ ጊዲን ሃꬅ ሚሻን ሻሚ ኤኪቴ› ጋ ኣዛዛ» ጊዴስ።
DEU 2:7 ጎዳ ኢንቴ ጾሳይ ኢንቴ ኦꬂዳ ኡባ ኢንቴስ ኬሂ ኣንጂዴስ፤ ኢንቴ ሃይሳ ዎልቃማ ባዞዛራ ካንꬂ ቢዛ ዎዴ ኢሻልሲ ኦይኪዴስ፤ ሃ ኦይዱ ታሙ ላይꬅ ኩሜꬃን ጎዳ ኢንቴ ጾሳይ ኢንቴናራ ዲዛ ጊሻስ ኣይኮይካ ኢንቴስ ፓጪቤና።
DEU 2:8 ሄሳ ጊሻስ ኑኒ ኑ ኢሻ ኤሳዌ ዜሬꬃቲ ዲዛ ኤዶሜ ቢታራ ካንꬂ ቢዶስ፤ ቃሴ ኤላቴፔኔ ኤጺዮን-ጋቢሬ ካታማፔ ዪዛ ኦጌዛራ ኣራቤ ኦጌዛራ ሞኣቤ ባዞ ሲሚ ቢዶስ።
DEU 2:9 ጾሳይካ ታስ፥ «ሎጼ ዜሬꬅ ሞኣቤ ኣሳታ ዋዪሶፒቴ፤ ኢስታራ ኦሌታናስ ኢስታ ዴንꬄꬆፍቴ፤ ታኒ ኤሬ ካታማ ኢስታስ ዱሳሶ ሂስታ ኢሚዳ ጊሻስ ኢስታ ጺንጾፌ ኣይኮካ ኢንቴስ ኢሚኬ» ጊዴስ።
DEU 2:10 [ኤሚሜ ጌቴቲዛ ዎልቃማ ዳሮ ዴሬይ ኤሬን ዴስ፤ ሄይቲካ ኤናቄ ዜሬꬃ ማላ ጉባኒኔ ጌሳን ጊታታ።
DEU 2:11 ኢስቲ ኤናቄ ኣሳታ ማላ ኤራፋይሜታ ጌቴቲ ጼይጌቴቴስ፤ ሞኣቤ ኣሳይ ቃሴ ኢስታ ኤሚሜታ ጊ ጼይጌስ፤ ሃንኮ ሞኣቤ ኣሳይ ቃሴ ኢስቲ ኢማሜታ ጊ ጼይጌቴስ።
DEU 2:12 ሆሬ ኣሳይ ካሴ ኤዶሜ ቢታን ዴስ፤ ጊዶ ኣቲን ኢስራኤሌ ኣሳይ ላታና ማላ ጎዳይ ኢስታስ ኢሚዳ ቢታን ኢስቲ ኦꬆይሳꬆ ኤሳዌ ዜሬꬃቲ ኡሬ ኣሳ ጎዲ ꬋይሲዲ ኢስታ ቢታን ኬጺ ኡቲዳ።]
DEU 2:13 ሄሳፌ ጉዬ ጎዳይ ኑስ ዮቲዳ ማላ ዛራዴ ጌቴቲዛ ሻፋ ፒኒዶስ።
DEU 2:14 ኑኒ ቃዴሴ ባሪኔፔ ቢዲ ዛራዴ ሻፋ ፒናናስ ሄꬑ ታማኔ ኦስፑን ላይꬂ ኣꬊዴስ፤ ሄ ዎዴ ጎዳይ ኢስታ ጊሻስ ካሴ ጫቂዳ ማላ ሄ ዬሌታፔ ኦላስ ጋኪዳ ኣቱማ ኣሳይ ኡባይ ዉሪዴስ።
DEU 2:15 ኢስቲ ኡባይ ዉራና ጋካናስ ጎዳ ኩሼይ ኢስታ ቦላ ዴጺዴስ።
DEU 2:16 ኦላስ ጋኪዳ ኣቱማ ኣሳይ ኡባይ ዉሪዳፔ ጉዬ፥
DEU 2:17 ጎዳይ ሂዝጊዴስ፥
DEU 2:18 «ሞኣቤ ዴሬስ ቲጻ ቦላ ዲዛ ኤሬ ቢታራ ኢንቴ ሃች ካንꬂ ባናስ ቤሴስ።
DEU 2:19 ሄሳፌ ካሊዲ ሎጼ ዜሬꬅ ጊዲዳ ኣሞኔ ኣሳታ ዋዪሶፒቴ፤ ኢስታራ ኦሌታናስ ኢስታ ዴንꬄꬆፍቴ፤ ታኒ ኣሞኔ ቢታ ኢስታስ ዱሳሶ ሂስታ ኢሚዳ ጊሻስ ኢስታ ጺንጾፌ ኣይኮካ ኢንቴስ ኢሚኬ።»
DEU 2:20 [ሄ ቢታይ ካሴ ሄን ዲዛ ኣሳይ ጼይጊዛ ሱንꬃን ኤራፋይሜታ ቢታ ጌቴቲዲ ጼይጌቴስ፤ ቃሴ ኣሞኔ ኣሳይ ዛሚዙሜታ ጊ ጼይጌስ።
DEU 2:21 ኢስቲካ ኤናቄ ዜሬꬃ ማላ ጉባኒኔ ጌሳን ጊታታ፥ ዎልቃማኔ ዳሮ ዴሬ፤ ጊዶ ኣቲን ጎዳይ ኢስታ ꬋይሲን ኣሞኔቲ ኢስታ ቢታ ላቲዲ ሄን ኬጺ ኡቲዳ።
DEU 2:22 ጎዳይ ኤዶሜን ዴኢዛ ኤሳዌ ዜሬꬃታስ ኦꬂዳ ማላ ኢስታስካ ኦꬂዴስ፤ ሄሲካ ኢዚ ሄ ቢታን ዴኢዛ ሆሬታ ꬋይሲን ኤሳዌ ዜሬꬃቲ ኢስታ ቢታ ላቲዲ ሃች ጋካናስ ሄን ኬጺ ኡቲዳ።
DEU 2:23 ጋዛ ጋካናስ ዴኢዛ ሄራታን ዲዛ ኣዌ ዴሬ ኣሳታ ካፍቶሬ ጌቴቲዛ ቢታፌ ዪዳ ካፍቶሬ ኣሳቲ ኢስታ ꬋይሲዲ ኢስታ ቢታን ኬጺ ኡቲዳ።]
DEU 2:24 ኑኒ ሞኣቤ ኣቻራ ኣꬊዳፔ ጉዬ ጾሲ ኑስ፥ «ሃኢ ዴንዲዲ ኣርኖኔ ሻፋ ፒኒቴ፤ ሃሴቦኔን ኡቲዲ ሃሪዛ ኣሞሬታ ካዎ ሲሆኔኔ ኢዛ ዴራካ ታኒ ኢንቴስ ኣꬃ ኢማዲስ፤ ኢንቴ ኢዛ ኦሊዲ ኢዛ ቢታ ላቲቴ።
DEU 2:25 ሃቻፌ ጉዬ ኣዋንካ ዲዛ ዴሬ ኣሳይ ኢንቴስ ባባና ማላ ታ ኦꬃና፤ ኦኒካ ኢንቴ ጊሻስ ሲዪዲ ዉሪካ ሂርጋን ኮኮራና» ጊዴስ።
DEU 2:26 ሄሳፌ ጉዬ ሳሮካ ኪታ ኣሳ ቦላ ቂዲሞቴ ባዞፌ ጌዴ ሃሴቦኔ ካዎ ሲሆኔኮ ኪታዲስ።
DEU 2:27 «ኑ ኢንቴ ዴሬራ ኣꬊ ባና ማላ ኑና ዲጎፋ፤ ኑ ኦጌፔ ካሬ ኬዞንታ ሲቲ ጊ ባና።
DEU 2:28 ኑኒ ማና ካꬂኔ ሃꬅ ኑ ሚሻን ሻሚ ኤካና፤ ኑኒ ኔ ቢታራ ካንꬂ ቢሺን ኔ ኑና ዲጎንታ ማላ ጻላ ኮዮስ።
DEU 2:29 ኤዶሜን ዲዛ ኤሳዌ ዜሬꬃቲኔ ኤሬን ዲዛ ሞኣቤ ዜሬꬃቲ ኑ ኢስታ ዴሬራ ኣꬋና ማላ ኑስ ኤሮ ጊዳ ማላካ ዮርዳኖሴ ሻፋ ፒኒዲ ጾሳይ ኑና ላቲሳና ቢታዮ ኑኒ ጋካናሼ ጋካናስ ኑኒ ኦጌራ ጻላ ኣꬊ ባና ማላ ኑስ ኤሮ ጋርኪ!»
DEU 2:30 ካዎ ሲሆኔይ ቃሴ ኑኒ ኢዛ ዴሬራ ኣꬊ ባና ማላ ኮዪቤና፤ ጋሶይካ ጎዳ ኢንቴ ጾሳይ ሃች ኢንቴ ቤኢዛይሳ ማላ ኢዛ ኢንቴ ኩሼን ኣꬂ ኢማናስ ኢዛ ዎዚና ሙሚሲዲ ኦቶራንቻ ኬሲዴስ።
DEU 2:31 ሄሳፌ ጉዬ ጎዳይ ታስ፥ «ኣኔ ጼላ፥ ታኒ ካዎ ሲሆኔኔ ኢዛ ቢታ ኔ ኩሼን ኣꬃ ኢማዲስ፤ ኢንቴ ኢዛ ቢታ ላቲዲ ሄን ዴኢቴ» ጊዴስ።
DEU 2:32 ካዎ ሲሆኔይ ባስ ዲዛ ኦላንቻታ ኡባ ኤኪዲ ያሃጼ ካታማ ኣቻን ኑናራ ኦሌታናስ ዪዴስ።
DEU 2:33 ጊዶ ኣቲን ጎዳ ኑ ጾሳይ ኢዛ ኑ ኩሼን ኣꬂ ኢሚዳ ጊሻስ ኢዛ፥ ኢዛ ናይታኔ ኢዛስ ዲዛ ኦላንቻታ ኡባ ኑ ዲፒ ሂስቲዶስ።
DEU 2:34 ሄ ዎዴ ኑኒ ኢዛ ካታማታ ኡባ ዎራጂ ኦይኪዲ ካታማታ ኡባ፥ ኢስታን ዲዛ ኣቱማሳታራ፥ ማጫሳታራኔ ናይታራ ኢሲፌ ꬋይሲዶስ፤ ኣይኮካ ኣሾንታ ኡባ ዲፒ ሂስቲዶስ።
DEU 2:35 ኢስታ ሜሄታኔ ኑ ዎራጂዳ ካታማታፔ ዲኢዳ ሚሻታ ኑስ ኤኪዶስ።
DEU 2:36 ኑኒ ኣርኖኔ ሾባ ጋጻ ባጋራ ዲዛ ኣሮኤሬ ካታማፔኔ ሄን ዙሌዛን ዲዛ ካታማፔ ዶሚ ቢዲ ጋላኣዴ ጋካናስ ኑናራ ኤቄታና ዳንዳይዛ ኢሲ ካታማይካ ቤቲቤና። ጎዳ ኑ ጾሳይ ኡባ ኑስ ኣꬂ ኢሚዴስ።
DEU 2:37 ጊዶ ኣቲን ኑኒ ኣሞኔ ዴሬ፥ ዎይኮ ያቦቄ ሻፋ ማታ፥ ሻራ ሜንꬆ ቦላ ዲዛ ካታማታኮኔ ጎዳ ኑ ጾሳይ ኑኒ ባና ማላ ኣዛዞንታ ሶሆ ኡባኮ ሺቂቦኮ።
DEU 3:1 ሄሳፌ ጉዬ ኑኒ ሲሚዲ ባሳኔ ኤፊዛ ኦጌዛራ ኬዚዶስ፤ ካዎ ኣጌይ ባ ኦላንቻታ ኡባ ኤኪዲ ኑናራ ኦሌታናስ ኤዲራኤ ካታማ ኬዚዴስ።
DEU 3:2 ጊዶ ኣቲን ጎዳይ ታስ፥ «ካዎ ኣጌስ ባቦፋ! ታኒ ኢዛ፥ ኢዛ ዴራኔ ኢዛ ቢታ ኔ ኩሼን ኣꬃ ኢማዲስ፤ ሃሴቦኔን ኡቲዲ ሃሪዛ ኣሞሬታ ካዎ ሲሆኔ ቦላ ኦꬆይሳ ማላ ኔኒ ኢዛ ቦላካ ኦꬃና» ጊዴስ።
DEU 3:3 ሄሳ ጊሻስ ጎዳ ኑ ጾሳይ ካዎ ኣጌኔ ኢዛ ኦላንቻታ ኡባ ኑ ኩሼን ኣꬂ ኢሚዴስ፤ ኑኒካ ኢስታፌ ኢሲ ኣሲካ ኣሾንታ ኡባ ꬋይሲዶስ።
DEU 3:4 ሄ ዎዴ ኢዛ ካታማታ ኡባ ኦይኪዶስ፤ ኑ ኦይኮንታ ኣቲዳ ኢሲ ካታማይካ ዴና፤ ሄሳꬆካ ባሳኔ ካዎ ኣጌይ ኣርጎባ ዴሬን ኣይሲዛ ኡሱፑን ታሙ ካታማታካ ኦይኪዶስ።
DEU 3:5 ሄ ካታማቲ ዉሪ ጊምቤን ጊምቤቲዳ፤ ፔንጌቲካ ኮላታታን ጎርዴቴቴስ፤ ኢስታ ዩሾን ዲርሳይ ባይንዳ ጮራ ማንዳራቲ ዴቴስ።
DEU 3:6 ሃሴቦኔ ካዎ ሲሆኔፔ ኑ ኤኪዳ ካታማታ ቦላ ኑ ኦꬂዳይሳꬆ ሃ ካታማታካ ኡባ ꬋይሲዶስ፤ ኣቱማ ኣሳ፥ ማጫሳኔ ናይታካ ኣሾንታ ኡባ ꬋይሲዶስ።
DEU 3:7 ሜሄታ ኡባ ዲኢዶስ፤ ካታማታን ዲዛ ሚሽ ኡባ ሊምኢ ሂስቲዶስ።
DEU 3:8 ሄ ዎዴ ኑኒ ዮርዳኖሴ ሻፋፔ ቢዲ ኣርሼይ ሞኪዛ ባጋራ፥ ኣርኖኔ ዙሌፌ ቢዲ ሄርሞኔ ዙማ ጋካናስ ዲዛይሳ ኦይኪዶስ፤ ሃይታ ኣሞሬ ዴሬ ካዎታፔ ዎꬂ ኤኪዶስ።
DEU 3:9 [ሄርሞኔ ዙማዛ ሲዶና ኣሳይ፥ «ሲሪዮኔ» ጊዛይሳ ኣሞሬ ኣሳይ፥ «ሳኒሬ» ጊ ሱንꬂዴስ።]
DEU 3:10 ኑኒ ጌዜ ቢታን ዲዛ ካታማታ ኡባ፥ ጋላኣዴ ቢታ ኡባ፥ ባሳኔ ቢታ ኡባኔ ባሳኔ ቢታን ኣጌይ ሃሪዛ ሳላካኔ ኤዲራኤ ካታማታ ጋካናስ ዲዛሶሆታ ኦይኪዶስ።
DEU 3:11 [ኤራፋይሜታ ባጋፌ ካዎ ኣጌይ ዉርሴꬃ ካዎ፤ ኢዚ ኢቺዛ ኣልጋይ ሚኖ ቢራታፔ ኦሴቲዴስ፤ ኣልጋስ ኣዱሳቴꬃይ ኦስፑን ዋꬋ ጊዲሺን ጎምፓይ ኦይዱ ዋꬋ፤ ሄ ኣልጋዚ ኤራባ ጌቴቲዛ ኣሞኔታ ካታማን ሃኢ ጋካናስ ቤቴስ።]
DEU 3:12 ሄ ቢታዮ ኑኒ ላቲዳፔ ኣርኖኔ ሻፋ ኣቻን ዲዛ ኣሮኤሬ ካታማፔ ዶሚዲ ፑዴሃ ባጋን ዲዛ ዴሬዛኔ ጌዜ ቢታን ዲዛ ጋላኣዴ ዴራፔ ባጋ ሄን ዲዛ ካታማታራ ኦሮቤሌ ዜሬꬃታሲኔ ጋዴ ዜሬꬃታስ ኢማዲስ።
DEU 3:13 ጋላኣዴ ዴሬፔ ኣቲዳ ቢታኔ ኣጌይ ሃሪዛ ባሳኔ ቢታ ኡባ፥ ሄሲካ ኣርጎባ ካዎቴꬃ ሚናሴ ዜሬꬃታፔ ባጋይታስ ኢማዲስ። (ሄ ባሳኔ ቢታ ኡባይ ኤራፋይሜታ ቢታ ጌቴቲ ጼይጌቴስ።
DEU 3:14 ሚናሴ ቆሞ ጊዲዳ ያኢሬይ ኣርጎባ ዴሬ ኩሜꬃ ላቲዴስ፤ ሄሲካ ጌሹሬታኔ ማኢካቴ ዛዋ ጋካናስ ዲዛ ባሳኔ፤ ሄ ቢታያካ ኢዛ ሱንꬃን ጼይጌታዱስ፤ ሄሳ ጋሶን ሃኢ ጋካናስ ኢስቲ ያኢሬ ካታማታ ጌቴቴቴስ።)
DEU 3:15 ቃሴ ጋላኣዴ ቢታካ ሚናሴ ቆሞ ማኪሬ ዜሬꬃታስ ኢማዲስ።
DEU 3:16 ኦሮቤሌ ቆሞታሲኔ ጋዴ ቆሞታስ ጋላኣዴፔ ቢዲ ኣርኖኔ ሻፋ ኣቺ ጋካናስ ዲዛ ዴሬዛ ኢማዲስ፤ ዱጌሃ ባጋራ ኢስታ ዛዋይ ኣርኖኔ ሻፋ፤ ፑዴሃ ባጋ ዛዋይ ቃሴ ኣሞኔታ ዴሬን ዛዋ ቦላ ዲዛ ያቦቄ ሻፋዛ።
DEU 3:17 ኣርሼይ ዉሊዛ ባጋራ ኢስታ ዛዋይ ኣራቤን ዴኢዛ ዮርዳኖሴ ሻፋ ጋኬስ፤ ሄሲካ ኪኔሬቴ ኣባፌ ዶሚዲ ፒዝጋ ዙማ ጋርሳን ዲዛ ማጺኔ ኣባ ጋካናሳ።
DEU 3:18 ሄ ዎዴ ኢስታ ካሌꬃና ማላ ሃይሳፌ ካሊዛ ዎጋታ ታ ኢንቴስ ኢማዲስ፤ ጎዳ ኑ ጾሳይ ዮርዳኖሴፔ ኣርሼይ ሞኪዛ ባጋራ ዲዛ ቢታ ኢንቴ ላታና ማላ ኢንቴስ ኢሚዴስ፤ ሄሳ ጊሻስ ኢንቴ ኢንቴ ኦላንቻታ ጊጺሲዲ ሃንኮ ኢስራኤሌ ኣሳይ ባንታ ጺንጾ ላታና ጋካናስ ኢስታፌ ሲንꬃቲ ኦሌታናስ ኣꬊቴ።
DEU 3:19 ኢንቴስ ዳሮ ሜሄይ ዲዛይሳ ታ ኤራይስ፤ ሄሳ ጊሻስ ኢንቴ ማቼቲ፥ ናይቲኔ ሜሄቲ ጻላ ሃን ኣቴቶ፤ ኢስቲ ታኒ ኢንቴስ ኢሚዳ ካታማታን ዴቶ።
DEU 3:20 ኢንቴ ጎዳይ ሃይሳን ኢንቴና ሼምፒሶይሳꬆ ኢንቴ ኢሻንታካ ዮርዳኖሴፔ ኣርሼይ ዉሊዛ ባጋራ ጎዳይ ኢስታስ ኢሚዛ ቢታዮ ጌሊዲ ሳሮቴꬃን ሼምፓና ጋካናስ ኢንቴ ኢስታ ማዲቴ፤ ሄሳፌ ጉዬ ታኒ ኢንቴስ ኢሚዳ ቢታዮ ሃ ሲማናስ ዳንዳዬታ።
DEU 3:21 ሃይሳፌ ጉዬ ታኒ ኢያሶ፥ «ጎዳ ኢንቴ ጾሳይ ሴዎኔኔ ኣጌ ጌቴቲ ጼይጌቲዛ ናምኡ ካዎታ ቦላ ኦꬆይሳ ኢንቴ ኢንቴ ኣይፌራ ቤኢዴታ፤ ኢንቴ ኢስታ ቢታ ላቲዛ ዴሬ ኡባ ቦላ ሃይሳ ማላ ኦሶ ዛሪ ኦꬃና።
DEU 3:22 ኢንቴስ ኦሌታናይ ጎዳ ኢንቴ ጾሳ ጊዲዳ ጊሻስ ኢንቴ ኢስታስ ባቦፍቴ» ጋ ዞራዲስ።
DEU 3:23 ሄ ዎዴ ታኒ ኬሃ ዎሳሼ፥
DEU 3:24 «ኡባፌ ꬎቃ ጎዳዉ! ኔ ጊታቴꬃኔ ኔ ሚኖ ቄሴዛ ታስ ኔ ኣይሌዛስ ቤሶ ዶማዳሳ፤ ኔኒ ኦꬂዛ ጊታኔ ዎልቃማ ኦሶታ ኦꬂዛ ሃራ ጎዳይ ሳሎንካ ሳኣንካ ዴና።
DEU 3:25 ጎዶ! ታኒ ዮርዳኖሴ ሻፋ ፒናዳ ሄ ፒንꬃን ዲዛ ሎኦኔ ሻራ ሜንꬆሶን ዲዛ ጪሊላ ቢታዮኔ ሊባኖሴ ዙማ ታ ቤኣናይሳ ታና ዲጎፋርኪ!» ጋዲስ።
DEU 3:26 ጊዶ ኣቲን ኢንቴ ጋሶን ጎዳይ ታ ቦላ ሃንቄቲዲ ታ ዎሳ ሲያናይሳ ኢጺዲ፥ «ሂኣ ኔስ ጊዳና! ሃይሳ ናምኣንꬆ ዴንꬆፋ!
DEU 3:27 ሄሳ ኣጋዳ ዴንዳዳ ፑዴ ፒዝጋ ዙማ ቦላ ኬዛ፤ ሂስታዳ ኔ ኣይፌይ ዴማናስ ዳንዳይዛ ኬና ዴሬይሲ ፑዴሃኔ ዱጌሃ ባጋ፥ ኣርሼ ሞኪዛ ባጋኔ ዉሊዛ ባጋ ዩሻ ጼላ፤ ጋሶይካ ኔኒ ዮርዳኖሴ ፒና ባና ማላ ኔስ ፒቃዴይ ኢሜቲቤና።
DEU 3:28 ጊዶ ኣቲን ኔኒ ኢያሶስ ኣዛዞ ኢማ፤ ኢዛ ጻሊሳኔ ሚንꬄꬃ፤ ጋሶይካ ኢዚ ዴራ ካሌꬂዲ ዮርዳኖሴ ሻፋ ፒንꬃና፤ ሃኖ ኔ ቤኢዛ ቢታዮ ኢዚ ኢስታ ላቲሳና» ጊዴስ።
DEU 3:29 ሄሳ ጋሶን ቤቲ-ፔኦሬ ካታማፔ ሲንꬃ ባጋራ ዲዛ ሾባን ጋምኢዶስ።
DEU 4:1 ሄሳፌ ጉዬ ሙሴይ ኣሳስ፥ «ሃኢካ ኢስራኤሌ ኣሳዉ! ኢንቴ ዴኦን ዳና ማላኔ ጎዳ ኢንቴ ኣዋታ ጾሳይ ኢንቴስ ኢሚዛ ቢታ ኢንቴ ላታና ማላ ታኒ ኢንቴና ታማርሲዛ ዎጋኔ ማራ ሲዪቴ! ቃሴካ ናጊቴ።
DEU 4:2 ታ ኢንቴስ ኢሚዛ ዎጋ ቦላ ኣይኮካ ጉጆፍቴ፤ ኣይኮካ ኢዛፔ ፓጪንቾፍቴ፤ ጎዳ ኢንቴ ጾሳይ ኢንቴስ ታ ባጋራ ኢሚዳ ዎጋስ ኣዛዜቲዛይታ ጊዲቴ።
DEU 4:3 ጎዳይ ባኣሊ-ፔኦሬ ዙማ ቦላ ኦꬆይሳ ኡባካ ኢንቴ ኢንቴ ኣይፌራ ቤኢዴታ፤ ኢዚ ሄ ዙማ ቦላ ባኣሌ ጌቴቲዛ ኤቃ ጾሳስ ጎይኒዛይታ ኡባ ኢንቴ ጊዶፌ ꬋይሲዴስ።
DEU 4:4 ኢንቴ ጊዲኮ ጎዳ ኢንቴ ጾሳስ ኣማኔቲ ኤቂዳይታ ጊዲዳ ጊሻስ ሃች ጋካናስ ሼምፖራ ፓጻ ዴታ።
DEU 4:5 «ጎዳ ታ ጾሳይ ታ ኢንቴስ ዮታና ማላ ታና ኣዛዚዳ ዎጋኔ ማራ ኡባ ኢንቴና ታማርሳዲስ፤ ኢንቴ ጌሊዲ ላታና ቢታይን ሄ ኣዛዞታ ናጊቴ።
DEU 4:6 ኢንቴ ኢስታ ናጊቴኔ ፖሊቴ፤ ኢንቴ ሄሳꬆ ኦꬂዛ ጊዲኮ ኢንቴ ኣይ ኬና ኣꬎ ኤራንቻታኔ ኣኬኪዛይታ ሃራ ዴሬ ኣሳይ ኢንቴና ቤኣና፤ ኢስቲ ሃ ኣዛዞታ ሲዪዛ ዎዴ፥ ‹ቱሙካ ሃ ጊታ ካዎቴꬃይ ኣꬎ ኤራንቻኔ ኣኬካንቻ ዴሬ› ጋና።
DEU 4:7 ጎዳ ኑ ጾሳይ ኑ ዎሲሺን ማታ ጊዲዳ ማላ ኢዛ ጎዳይ ኢዛስ ማታ ጊዲዳ ሃራ ጊታ ካዎቴꬂ ኦኔ?
DEU 4:8 ታኒ ሃች ኢንቴ ሲንꬃን ዎꬂዛ ሃ ኣዛዞዛ ማላ ሱሬኔ ሊኬ ጊዲዳ ዎጋይኔ ማራይ ዲዛ ሃራ ኣይ ጊታ ካዎቴꬂ ዲዜ?
DEU 4:9 «ሂስቲኮ ኢንቴ ዲዛ ዎዴ ኡባን ሃይሳ ኢንቴ ኢንቴ ኣይፌራ ቤኢዳይሳ ኡባ ባሎንታ ማላኔ ኢንቴ ዎዚናፔ ꬋዮንታ ማላ ናጌቲቴ፤ ኢንቴ ናይታኔ ኢንቴ ናይታ ናይታካ ታማርሲቴ።
DEU 4:10 ሲና ዙማ ቦላ ጎዳ ኢንቴ ጾሳ ሲንꬃን ኢንቴ ኤቂዳ ዎዴ ኢዚ ታና፥ ‹ኢንቴ ዴኢዛ ዎዴ ኡባን ኢስቲ ታስ ያሻቴꬅ ታማራና ማላ፥ ባንታ ናይታካ ታማርሳና ማላኔ ታ ቃላ ሲያና ማላ ዴራ ታኮ ሺሻ› ጊዳይሳ ኣኬኪቴ።
DEU 4:11 «ሳሎ ጋኪዛ ታማ ላጮይኔ ꬊፒ ጊዳ ጩዋይኔ ሻራይ ኢዛ ጎዚ ኦይኪዳ ዙማ ጋርሳን ሺቂ ኤቂዴታ።
DEU 4:12 ሄሳꬆካ ጎዳይ ታማ ላጮ ጊዶን ዲሼ ኢንቴስ ሃሳይዴስ፤ ሂስቲን ኢዚ ሃሳይዛ ቃላ ሲዪዴታ ኣቲን ኢዛ ሜꬋ ሙሌካ ቤኢቤኬታ።
DEU 4:13 ኢንቴ ኦꬃናስ ቤሲዛ ባ ጫቆ ቃላ ኢንቴስ ቆንጪሲዴስ፤ ሄሲካ ማሴቲዳ ናምኡ ሹቻታ ቦላ ጻፌቲዳ ታሙ ኣዛዞታ።
DEU 4:14 ኢንቴ ጌሊ ላታና ቢታይን ዲሼ ኢንቴ ኦꬃናስ ቤሲዛ ዎጋታኔ ማራታ ታ ኢንቴና ታማርሳና ማላ ጎዳይ ታና ኣዛዚዴስ።
DEU 4:15 «ጎዳይ ሲና ዙማ ቦላን ታማ ላጮ ጊዶፌ ኢንቴስ ሃሳይዛ ጋላስ ኣይ ሜꬋካ ቤኦንታ ጊሻስ ኬሂፔ ናጌቲቴ።
DEU 4:16 ሄሲካ ኣዴ ዎይኮ ማጫ ሚሳቲሲ ኤቃ ሚስሌ ሜꬊዲ ኢዛን ኢንቴ ቱኖንታ ማላሳ።
DEU 4:17 ቢታ ቦላ ዴኢዛ ሜሄኔ ዶኣ ሌሚሶ ዎይኮ ሳሎ ጉፋንꬆን ፒራꬊዛ ካፎ ጊዲን፥
DEU 4:18 ዎይኮ ቢታ ቦላራ ቲራን ጎሼቲዛ ሜꬌቴꬃታኔ ሞሌ ሚስሌታ ኢንቴስ ኦꬂዲ ጎይኖፍቴ።
DEU 4:19 ቃሴ ሳሎ ፑዴ ጼሊዲ ኢንቴ ጎዳይ ኣሳ ኡባስ ኢሚዳ ኣርሼ፥ ኣጊና፥ ጾሊንቴኔ ሳሎ ሜꬌታ ኡባ ቤኢዲ ኢንቴ ኢስታስ ጎይኒዲ ባሎንታ ማላ ናጌቲቴ።
DEU 4:20 ኢንቴ ጊዲኮ ታማይ ኢዛን ኤጺዛ ቢራታ ጮጬ ሚሳቲዛ ጊብጼፔ ኢንቴና ጎዳይ ሾዲ ኬሲዳይ ኢንቴ ኢዛስ ዱማ ዴሬ ጊዳና ማላሳ።
DEU 4:21 «ጎዳይ ኔ ጋሶን ታ ቦላ ሃንቄቲዲ ዮርዳኖሴ ሻፋ ታ ፒና ቦንታ ማላኔ ኢዚ ኢንቴና ላቲሲዛ ሄ ጪሊላ ቢታዮ ታ ቤኦንታ ማላ ታስ ጫቂ ዮቲዴስ።
DEU 4:22 ሄሳ ጊሻስ ታኒ ዮርዳኖሴ ሻፋ ፒኖንታ ሃኒን ሃይቃና ዳይስ፤ ኢንቴ ጊዲኮ ፒኒዲ ሄ ቢታዮ ላታና።
DEU 4:23 ሄሳ ጊሻስ ጾሳይ ኢንቴናራ ጌሊዳ ጫቆ ቃላ ኢንቴ ባሎንታ ማላ ሻኪ ኤሪቴ፤ ጎዳ ኢንቴ ጾሳይ ኢንቴና ኦꬆፍቴ ጊዲ ኣዛዚዳ ኤቃ ሚስሌታ ኣይ ሜꬋንካ ሚሳቲሲ ኦꬂ ኬሶፍቴ።
DEU 4:24 ጋሶይካ ጎዳ ኢንቴ ጾሳይ ጹጊዛ ታማኔ ቃናቲዛ ጾሳ።
DEU 4:25 «ኢንቴ ሄ ቢታይን ናይታኔ ናይታ ናይታ ዬሊዲ ኡፋይሳን ዴኢዛ ላይꬅ ኡባን ኢንቴናቴꬃ ቱኒሲዲ ኣይ ሜꬋን ጊዲኮካ ሚስሌ ሚሳቲሲ ሜꬊዲ ጎዳ ኢንቴ ጾሳ ሲንꬃን ሄሳ ማላ ኢታ ኦꬂዲ ኢዛ ሃንቄꬆፍቴ።
DEU 4:26 ኢንቴ ሄሳ ኦꬂኮ ዮርዳኖሴ ሻፋ ፒኒዲ ላታና ቢታይን ዳሮ ላይꬅ ጋምኦንታይሳኔ ኢንቴ ሙሌራ ꬋያናይሳ ታኒ ሃች ኢንቴ ቦላ ሳሎኔ ሳኣ ማርካ ዎꬃ ዮታይስ።
DEU 4:27 ጎዳይ ኢንቴና ሃራ ካዎቴꬃታ ጊዶን ላላና፤ ኢንቴ ቢ ላሌቲዳሶን ኢንቴፌ ኣማርዳይቲ ጻላ ኣታና።
DEU 4:28 ሄን ኢንቴ ሚꬃፌኔ ሹቻፌ ኣሳ ኩሼን ኦሴቲዲ ጼሎንታ፥ ሲዮንታ፥ ሞንታኔ ሲንጎንታ ኤቃ ጾሳታስ ጎይናና።
DEU 4:29 ጊዶ ኣቲን ኢንቴ ሄን ዲሼ ጎዳ ኢንቴ ጾሳ ኩሜꬃ ዎዚናፔኔ ኩሜꬃ ሼምፖፌ ኮይኮ ኢንቴ ኢዛ ዴማና።
DEU 4:30 ሃ ኡባ ሜቶይ ኢንቴና ጋኪን ኢንቴ ሜቶቲሼ ዉርሴꬃን ጎዳ ኢንቴ ጾሳኮ ሲሚዲ ቃሴካ ኢዛስ ኣዛዜታና።
DEU 4:31 ጎዳ ኢንቴ ጾሳይ ማሪዛ ጾሳ ጊዲዳ ጊሻስ ኢንቴና ሙሌራ ኣጌና፤ ኢንቴና ኡባካ ꬋይሴና፤ ካሴ ኢንቴ ኣዋታራ ጌሊዳ ጫቆ ቃላ ሙሌካ ባሌና።
DEU 4:32 «ጾሳይ ኣሴ ቢታ ቦላ ሜꬎሶፌ ዶሚዲ ኢንቴ ዬሌታናፔ ካሴ ኣꬊዳ ዎዴታ ጾሞሲቴ፤ ቢታ ጋጻፔ ጋጻ ጋካናስ ፒልጊ ጼሊቴ፤ ሃይሳፌ ካሴ ሃይሳ ማላ ጊታ ሚሺ ሙሌካ ሃኒ ኤሪዜ? ዎይኮ ሲዬቲ ኤሪዜ?
DEU 4:33 ታማ ላጮ ጊዶራ ጾሳይ ሃሳዪን ሲዪዲ ኢንቴ ꬋዮንታ ሼምፖራ ፓጻ ዴኦን ዲዛ ማላ ጾሳይ ሃሳዪን ሲዪዲ ሼምፖራ ፓጻ ዴኦን ዲዛ ሃራ ኣሲ ዲዜ?
DEU 4:34 ዎይኮ ጎዳ ኢንቴ ጾሳይ ኢንቴ ጼሊሺን ጊብጼ ቢታን ኢንቴስ ኦꬂዛይሳꬆ ፓጬን፥ ማላታን፥ ማላሊሲዛ ሚሻን፥ ኦላን፥ ሚኖ ቄሴኒኔ ሚጬቲዳ ኩሼን፥ ቃሴ ያሺሲዛ ባ ዎልቃን ሃራ ካዎቴꬃታ ጊዶ ጌሊዲ ኢሲ ካዎቴꬅ ባስ ኤካናስ ባጼቲዳ ሃራ ጾሲ ዲዜ?
DEU 4:35 ጎዳይ ኢዛ ጻላ ጊዲዳይሳ ኢንቴ ኤራና ማላ ሃይሳ ኢዚ ኢንቴና ቤሲዴስ፤ ኢዛፔ ኣቲን ሃራ ጾሲ ዴና።
DEU 4:36 ኢዚ ኢንቴና ታማርሳናስ ኮዪዳ ጊሻስ ባ ጬንጉርሳ ሳሎፔ ሲሲዴስ፤ ቃሴካ ሳኣ ቦላ ያሺዛ ጊታ ታማ ኢንቴና ቤሲዴስ፤ ሄ ታማዛ ጊዶፌ ኢዛ ጬንጉርሳ ሲዪዴታ።
DEU 4:37 ኢዚ ሄሳꬆ ኦꬂዳይ ኢንቴ ኣዋታ ዶሲዳ ጊሻሲኔ ኢስታ ዜሬꬃታ ዶሪዳ ጊሻስ ባ ጊታ ዎልቃን ኢንቴና ጊብጼፔ ኬሲዴስ።
DEU 4:38 ሃች ኢንቴ ቤኢዛ ማላ ኢንቴና ጌልꬃናሲኔ ኢስታ ቢታ ጺንጾ ኦꬂ ኢንቴስ ኢማናስ ኢንቴፌ ዳሪዛይታኔ ዎልቃቲዛ ካዎቴꬃታ ኢንቴ ሲንꬃፌ ጎዲ ኬሲዴስ።
DEU 4:39 «ሄሳ ጊሻስ ሳሎንካ ሳኣንካ ጎዳይ ኢዚ ጻላ ጾስ ጊዲዳይሳኔ ኢዛፔ ሃራ ጾሲ ባይንዳይሳ ኤሪቴ፤ ኢንቴ ዎዚናን ዎꬂቴ።
DEU 4:40 ኢንቴሲኔ ኢንቴፌ ጉዬን ያና ኢንቴ ዜሬꬃስ ሎኦ ጊዳና ማላ ቃሴ ጎዳ ኢንቴ ጾሳይ ሜርናስ ኢንቴስ ኢሚዛ ጺንጾይን ኢንቴ ላይꬂ ኣዱቃና ማላ ታኒ ሃች ኢንቴና ኣዛዚዛ ዎጋኔ ማራ ናጊቴ» ጊዴስ።
DEU 4:41 ሄሳፌ ጉዬ ሙሴይ ዮርዳኖሴ ሻፋፔ ሄ ፒንꬃን ኣርሼይ ሞኪዛ ባጋራ ሄꬑ ካታማታ ሻኪ ዎꬂዴስ።
DEU 4:42 ኢዚ ሄሳꬆ ኦꬂዳይ ካሴ ሞርኬቴꬂ ባይንዳ ኤሮንታ ዲሼ ኣስ ዎꬊዳ ኣይ ኣሲካ ሄ ካታማታፔ ኢሲኔይን ባቃቲ ቢዲ ባ ሼምፖ ኣሻና ማላሳ።
DEU 4:43 ሄሳ ጊሻስ ኦሮቤሌ ቆሞታስ ዙምቡላቲ ኡቲዳ ባዞን ዲዛ ባጺራ፥ ጋዴ ቆሞታስ ጋላኣዴን ዲዛ ኤራሞቴኔ ሚናሴ ቆሞታስ ባሳኔን ዲዛ ጎላኔ ካታማታ ሻኪ ሻኪ ዎꬂዴስ።
DEU 4:44 ሙሴይ ኢስራኤሌ ዴራስ ኢሚዳ ጎዳ ዎጋይ ሃይሳ።
DEU 4:45 ጊብጼፔ ኬዚዳ ዎዴ ሙሴይ ዴራስ ዮቲዳ ኣዛዞይ፥ ዎጋይኔ ማራይ ሃይሳ ቦላን ጻፌቲዳይሳ።
DEU 4:46 ሄይታንታ ኢዚ ኣዋጂዳይ ዮርዳኖሴ ሻፋፔ ኣርሼይ ሞኪዛ ባጋራ ቤቲ-ፔኦሬ ዙሌስ ሲንꬃ ባጋራ ዲዛ ኣሞሬታ ካዎይ ዲዛ ሃሴቦኔ ዴሬን፥ ሙሴይኔ ኢስራኤሌቲ ጊብጼፔ ኬኢ ኦሌቲዲ ጾኒዳ ሲሆኔ ዴሬና።
DEU 4:47 ሄ ዎዴ ኢስቲ ኢዛ ቢታኔ ሄሳꬆካ ዮርዳኖሴፔ ኣርሼይ ሞኪዛ ባጋራ ዲዛ ባሳኔ ዴሬ ሃሪዛ ኣሞሬ ካዎ ኣጌ ቢታ ላቲዳ።
DEU 4:48 ሄ ቢታይ ኣርኖኔ ሻፋ ዶናን ዲዛ ኣሮኤሬ ካታማፔ ቢዲ ሲሪዮኔ ዙማ ጋኬስ፤ ሲሪዮኔ ጌቴቲዛ ዙማዚ ሄርሞኔ ዙማ።
DEU 4:49 ሄ ቢታይካ ዮርዳኖሴ ሻፋፔ ኣርሼይ ሞኪዛ ባጋራ ዲዛ ኣራቤ ዴሬ ኡባ ኤኪዲ ፒዝጋ ዙማ ጋርሳን ዲዛ ሃይቆ ኣባ ጋኬስ።
DEU 5:1 ሙሴይካ ኢስራኤሌ ኣሳ ኡባ ኢሲ ቦላ ጼይጊዲ፥ «ኢስራኤሌ ኣሳዉ! ታኒ ሃች ኢንቴስ ኢሚዛ ዎጋኔ ማራ ኣኔ ዎዚናን ዎꬂ ሲዪቴ፤ ኢስታ ሎኤꬂ ታማርቴኔ ሚንꬂ ናጊቴ።
DEU 5:2 ጎዳ ኑ ጾሳይ ሲና ዙማ ቦላ ኑናራ ጫቆ ቃላ ጌሊዴስ።
DEU 5:3 ኢዚ ኑ ኣዋታራ ጻላ ጊዶንታ ሃኢ ሼምፖራ ፓጻ ዲዛ ኑናራካ ጫቄቲዴስ።
DEU 5:4 ሄን ሄ ዙማ ቦላ ኤጺዛ ታማ ጊዶን ዲሼ ጎዳይ ኢንቴና ቆንጬራ ሃሳይሲዴስ።
DEU 5:5 ኢንቴ ታማዛስ ባቢዲ ፑዴ ዙማ ቦላ ኬዛናስ ያዪዳ ጊሻስ ታኒካ ሄ ዎዴ ጎዳይ ጊዛይሳ ኡባ ኢንቴስ ዮታናስ ኢንቴሲኔ ጎዳስ ጊዶን ኤቃዲስ። «ኢዚካ ታስ፥
DEU 5:6 ‹ኔኒ ካሴ ኣይሌቴꬃን ሃሬታ ዲዛ ጊብጼ ዴሬፔ ኔና ዎዛ ኤኪዳይ ታና ጎዳ ኔ ጾሳ።
DEU 5:7 « ‹ታፔ ኣቲን ሃራ ጾሲ ኔስ ዶፖ።
DEU 5:8 « ‹ሳሎን ጊዲን ሳኣን፥ ዎይኮ ቢታ ጋርሳን ዲዛ ሃꬃ ጊዶን ዲዛይታፔ ኣዎይሳካ ኔስ ሚስሌ ሜꬋዳ ጾሳ ማላ ጎይኖፋ።
DEU 5:9 ታኒ ጎዳ ኔ ጾሳይ ኬሃ ቃናቲዛ ጾሳ፤ ሄሳ ጊሻስ ማሴቲ ኦሴቲዳ ኣይ ኤቃ ጾሳታስካ ጎይኖፋኔ ዚጎፋ፤ ታኒ ታና ኢጺዛይታ ዉርሳ ቃጻያይስ፤ ኢስታ ዜሬꬃታካ ሄꬓንꬆኔ ኦይዳንꬆ ዬሌታ ጋካናስ ታኒ ቃጻያና።
DEU 5:10 ታና ዶሲዛይታሲኔ ታ ኣዛዞታ ናጊዛይታስ ጊዲኮ ሺ ዬሌታ ጋካናስ ታ ኪያቴꬃኔ ታ ሲቆ ታ ኢስታ ቤሳና።
DEU 5:11 « ‹ታና ኔ ጎዳ ሱንꬃ ሃዳን ጼይጎፓ፤ ታ ሱንꬃ ሃዳን ጼይጊዛይታ ታ ቃጻዮንታ ኣጊኬ።
DEU 5:12 « ‹ታኒ ጎዳይ ኔ ጾሳይ ኔና ኣዛዚዳ ማላ ሳምባታ ጋላሳ ዱማሳዳ ቦንቻ።
DEU 5:13 ኔኒ ኦꬂዛ ኦሶ ኡባ ኡሱፑን ጋላሳታን ኦꬃ።
DEU 5:14 ላፑንꬆ ጋላሳይ ጊዲኮ ታስ ኔ ጎዳስ ዱማ ሼምፖ ጋላሳ፤ ሄ ጋላስ ኣይ ኦሶካ ኦꬆፋ፤ ኔና ጊዲን ዎይኮ ኔ ናይታ ጊዲን ኔስ ኦꬂዛይቲካ፥ ኔ ሜሄይካ፥ ኔ ዴሬን ቤቴ ኣሳታ ጊዲኮካ ሄ ጋላስ ኣይኮካ ኦꬆፍቴ፤ ኔ ሼምፒዛይሳꬆ ኢስቲካ ሼምፔቶ።
DEU 5:15 ኔኒ ጊብጼ ቢታን ዴኢዛ ዎዴ ኣይሌ ጊዳዳ ዴኢዳይሳ ኣኬካ፤ ቃሴካ ጎዳ ኔ ጾሳይ ባ ሚኖ ቄሴኒኔ ባ ሚጬቲዳ ኩሼን ኔና ሄፔ ኬሲዳይሳ ዶጎፓ፤ ሳምባታ ጋላሳ ኔ ቦንቻና ማላ ጎዳ ኔ ጾሳይ ኣዛዚዳይ ሄሳሳ።
DEU 5:16 « ‹ታኒ ጎዳ ኔ ጾሳይ ኔና ኣዛዚዳ ማላ ኔ ኣዋኔ ኔ ኣዮ ቦንቻ፤ ኔ ሄሳꬆ ኦꬂኮ ጎዳ ኔ ጾሳይ ኔስ ኢሚዛ ቢታይን ኔ ላይꬂ ኣዱቃናኔ ኔስ ኢንጄታና።
DEU 5:17 « ‹ኣስ ዎꬎፓ፤
DEU 5:18 « ‹ላይማቶፓ፤
DEU 5:19 « ‹ካይሶቶፓ፤
DEU 5:20 « ‹ኦና ቦላካ ዎርዶ ማርካቶፋ፤
DEU 5:21 « ‹ኣሳ ማቾ፥ ኣሳ ኬꬅ፥ ኣሳ ጺንጾ፥ ኣሳ ኦሳንቻታ፥ ኣሳ ሜሄ፥ ኣሳ ሃሬ ጊዲን ሃራ ኣይ ኣቆታካ ኡባ ኣሞቶፋ› ጊዴስ።
DEU 5:22 «ኢንቴ ኢሲ ቦላ ሺቂዳሶን ጎዳይ ዙማ ቦላ ዲሼ ኢንቴስ ኡባስ ኢሚዳ ኣዛዞቲ ሃይታ፤ ታማን፥ ጊርዲ ጊዳ ꬉማኒኔ ሻራ ጊዶን ዲሼ ጊታ ጬንጉርሳን ኢዚ ኢንቴስ ዮቲዳ ኣዛዞቲ ሃይታ ጻላ፤ ኢዚ ሄይታካ ናምኡ ሹቻታ ቦላ ዎጪ ጻፊዲ ታስ ኢሚዴስ።
DEU 5:23 «ዙማዚ ታማን ጹጌቲዛ ዎዴኔ ꬉማ ጊዶፌ ጬንጉርሳ ኢንቴ ሲዪዳ ዎዴ ኢንቴና ካሌꬂዛይቲኔ ኢንቴ ኮራፒኔቲ ታኮ ዪዲ፥
DEU 5:24 ‹ጎዳ ኑኒ ጾሳ ጬንጉርሳ ታማ ጊዶፌ ሲዪዳ ዎዴ ጎዳ ኑ ጾሳይ ባ ጊታቴꬂኔ ባ ቦንቾ ኑና ቆንጬን ቤሲዴስ፤ ጾሲ ኣሳራ ሃሳይዳፔ ጉዬን ኣሲ ሃይቆንታ ሼምፖራ ፓጻ ዴኣና ዳንዳይዛይሳ ኑ ሃች ቤይዶስ።
DEU 5:25 ሃይሳፌ ጉዬ ጎዳ ኑ ጾሳ ጬንጉርሳ ኑ ሲዪዛ ጊዲኮ ኑ ሃይቃና፤ ሄ ዎልቃማ ታማይ ኑና ꬋይሳና ዳንዳዬስ፤ ሂስቲን ኑኒ ኣይስ ሃይቂዞኒ?
DEU 5:26 ዴኦ ጾሳይ ታማ ጊዶን ዲሼ ዮቲን ኑ ሲዪዳ ማላ ኢዛ ጬንጉርሳ ሲዪዲ ሃይቆንታ ሼምፖራ ፓጻ ኣቲዳ ኣሲ ዳኔ?
DEU 5:27 ሄሳ ጊሻስ ኔኒ ኢዛኮ ሺቃዳ ጎዳ ኑ ጾሳይ ጊዛይሳ ኡባ ሲያ፤ ሄሳፌ ጉዬ ኔ ሲዪዳይሳ ኡባ ኑስ ያዳ ዮታ፤ ኑኒካ ኢዛ ሲዪዲ ኣዛዜታና› ጊዴታ።
DEU 5:28 «ጾሳይካ ኢንቴ ሄሳ ጊሺን ሲዪዲ ታስ፥ ‹ሃ ኣሳቲ ኔስ ዮቲዳይሳ ኡባ ታኒ ሲያዲስ፤ ኢስቲ ጊዳይሲ ኡባይ ሊኬ።
DEU 5:29 ኢስታሲኔ ኢስታ ዜሬꬃታስ ሜርናስ ኡባ ሚሺ ሎኦ ጊዳና ማላ ኢስቲ ታስ ያያናሲኔ ታ ኣዛዞታ ኡባ ዎዴ ናጋናስ ሃይሳ ማላ ዎዚናይ ዲዛኮ ኣይ ማላ ሎኦሻ!
DEU 5:30 ሃኢካ ኔኒ ባዳ ኢስቲ ባ ዱንካኔን ዱንካኔን ሲማና ማላ ኢስታስ ዮታ።
DEU 5:31 ኔኒ ጊዲኮ ሃን ታ ኣቻን ኤቃ፤ ታኒ ታ ዎጋታ፥ ኣዛዞታኔ ማራታ ኡባ ኔስ ኢማና፤ ታኒ ኢስታስ ኢሚዛ ዴሬዪን ኢስቲ ሃ ኣዛዞታ፥ ዎጋታኔ ማራታ ናጋና ማላ ዴሬዛ ታማርሳ› ጊዴስ።
DEU 5:32 «ኢስራኤሌ ኣሳዉ! ጎዳ ኢንቴ ጾሳይ ኢንቴና ኣዛዚዳይሳ ኡባ ፖላናስ ጊጌቲቴ፤ ኢስታፌ ኢሲኖዮካ ሜንꬆፍቴ።
DEU 5:33 ኡባ ሚሺ ኢንቴስ ሎኦ ጊዳና ማላኔ ኢንቴ ላታና ቢታይን ኢንቴስ ላይꬃይ ኣዱቃና ማላ ጾሲ ኢንቴና ኣዛዚዳይሳ ኡባ ፖሊቴ» ጊዴስ።
DEU 6:1 ኢንቴ ፒኒ ቢዲ ላታናስ ቢዛ ቢታን ኢንቴ ኦꬃና ማላኔ ታኒ ኢንቴና ታማርሳና ማላ ጎዳ ኢንቴ ጾሳይ ታና ኣዛዚዳ ኣዛዞቲ፥ ዎጋቲኔ ማራቲ ሃይታ።
DEU 6:2 ኢንቴ ሄ ቢታይን ኣዱሳ ላይꬅ ዳና ማላ ኢንቴ፥ ኢንቴ ናይቲኔ ኢንቴ ናይታ ናይቲ ባንቲ ዲዛ ዎዴ ኡባን ጾሳስ ያያናሲኔ ታ ኢሚዳ ኣዛዞታ፥ ማራታኔ ዎጋታ ኡባ ናጋናስ ቤሴስ።
DEU 6:3 ኢንቴኖ ኢስራኤሌ ኣሳዉ! ኡባ ሚሺ ኢንቴስ ሎኦ ጊዳና ማላ፥ ጎዳ ኢንቴ ኣዋታ ጾሳይ ኢንቴስ ጊዳይሳꬆ ማꬂኔ ኤሲ ጎጊዛ ቢታን ኢንቴ ኬሂ ጮራታና ማላ ሃ ኣዛዞታ ሲዪቴኔ ሚኒ ኦꬂቴ።
DEU 6:4 ኢስራኤሌ ኣሳቶ! ኢንቴ ሃይሳ ኣኬኪቴ! ጎዳ ኑ ጾሳይ ኢዚ ጻላ ጾሳ።
DEU 6:5 ጎዳ ኔ ጾሳ ኔ ኩሜꬃ ዎዚናፔ፥ ኔ ኩሜꬃ ሼምፖፌኔ ኔ ኩሜꬃ ዎልቃፌ ሲቃ።
DEU 6:6 ሃች ታ ኔና ኣዛዚዳ ኣዛዞታ ዎዚናን ዎꬃ።
DEU 6:7 ሃይታ ኣዛዞታ ኔ ናይታ ታማርሳ፤ ኔኒ ኔሶን ኡቲዛ ዎዴ ጊዲን ኦጌ ባሼካ፥ ኢቺዛ ዎዴ ጊዲን ቤጊዛ ዎዴ ኡባን ሃይታንታ ኣኬካሼ ዩሻ ቆፓ።
DEU 6:8 ኔስ ማላታ ጊዳና ማላ ኔ ኩሼ ቦላ ቃቻ ቃሴካ ኔ ፒꬌ ቦላ ዎꬃ።
DEU 6:9 ኔ ኬꬃ ቆሲላꬃ ቦላኔ ጊቤ ፔንጌ ቦላ ጻፋ።
DEU 6:10 ጎዳ ኢንቴ ጾሳይ ካሴ ኢንቴ ኣዋታስ ኣብራሃሜስ፥ ዪሳቃሲኔ ያቆቤስካ ጫቂዳ ቃላ ማላ ኢንቴና ኢዚ ሄ ቢታዮ ጌልꬂዛ ዎዴ ካሴ ኢንቴ ኬጾንታ ጊታኔ ሎኢዛ ካታማቲ ዲዛ ቢታዮ ላቲሳና።
DEU 6:11 ኢንቴ ላታናይ ኢንቴ ኬጾንታ ሎኦ ሚሻን ኩሚዳ ኬꬃታ፥ ኢንቴ ቦኮንታ ሃꬃ ኦላታ፥ ኢንቴ ቶኮንታ ዎይኔ ሚꬃታኔ ዎጋራ ሚꬃታ፤ ሄይታንታ ኢዚ ኢንቴስ ኢሚዛ ዎዴ፥
DEU 6:12 ካሴ ኢንቴ ኣይሌቴꬃን ዴዪዳ ጊብጼ ዴሬፔ ኢንቴና ዎዚ ኬሲዳ ጎዳ ኢንቴ ባሎንታ ማላ ናጌቲቴ።
DEU 6:13 ኢንቴ ጎዳ ጾሳስ ያዪቴ፤ ኢዛስ ጻላ ጎይኒቴኔ ኢዛ ሱንꬃን ጻላ ጫቂቴ።
DEU 6:14 ኢንቴ ዩሾን ዲዛ ሃራ ዴሬ ኣሳይ ጎይኒዛ ኤቃ ጾሳታስ ጎይኖፍቴ፤
DEU 6:15 ጋሶይካ ኢንቴ ጊዶን ዴኢዛ ጎዳ ኢንቴ ጾሳይ ቃናቲዛ ጾሳ፤ ሄሳ ጊሻስ ኢዛ ሃንቆይ ኢንቴ ቦላን ታማ ማላ ኤጺ ኬዛና፤ ኢዚካ ኢንቴና ቢታ ቦላፌካ ሙሌራ ዲፒ ሂስቲ ꬋይሳና።
DEU 6:16 ካሴ ኢንቴ ማሳን ኦꬂዳይሳꬆ ጎዳ ኢንቴ ጾሳ ፓጮፍቴ።
DEU 6:17 ኢዚ ኢንቴና ኣዛዚዳ ኣዛዞታ፥ ዎጋታኔ ማራታ ኡባ ሎኤꬂ ናጊቴ።
DEU 6:18 ኢንቴስ ኡባ ሚሺ ሎኦ ጊዳና ማላ ጎዳ ሲንꬃን ኢንቴ ሱሬኔ ሎኦ ኦꬂቴ፤ ሂስቲኮ ኢንቴስ ኢማናስ ጎዳይ ኢንቴ ኣዋታስ ቃላ ጌሊዳ ሄ ሎኦ ቢታዮ ኢንቴ ላታና።
DEU 6:19 ኢዚ ኢንቴስ ሂዶታ ቃላ ጌሊዳ ማላ ኢንቴ ኢንቴ ሞርኬታ ጎዲ ꬋይሳና።
DEU 6:20 ጉዬፔ ያና ዎዴታን ኢንቴ ናይቲ፥ «ጎዳ ኑ ጾሳይ ሃይታ ኣዛዞታ፥ ዎጋታኔ ማራታ ቢርሼꬃይ ኣዜ?» ጊ ኦይቻና።
DEU 6:21 ሄ ዎዴ ኢንቴ ቃሴ ኢስታስ፥ «ካሴ ኑኒ ጊብጼ ካዎስ ኣይሌቲዶስ ሺን ጾሳይ ኑና ባ ጊታ ዎልቃን ዎዚ ኬሲዴስ።
DEU 6:22 ጊብጼ ኣሳ፥ ኢስታ ካዎዛኔ ኢስታ ሹሜታ ኬሂ ቆሂዛ ጊታ ማላታታ ኢዚ ኦꬂዛይሳ ኑኒ ኑ ኣይፌራ ቤኢዶስ።
DEU 6:23 ካሴ ኑ ኣዋታ ላቲሳናስ ኢሚዳ ሂዶታ ቃላ ማላ ኑና ሃ ቢታዮ ላቲሳናስ ጊብጼፔ ዎዚ ኬሲዲ ሃ ኤሂዴስ።
DEU 6:24 ሄሳፌ ጉዬ ሃች ሃኒዳይሳꬆ ኑስ ኡባ ዎዴካ ሎኦ ጊዳና ማላኔ ኑኒ ሼምፖራ ፓጻ ዴኣና ማላ፥ ኑኒ ኣዛዞታ፥ ዎጋታኔ ማራታ ናጋና ማላኔ ጎዳ ኑ ጾሳስ ያያና ማላ ኣዛዚዴስ።
DEU 6:25 ጎዳ ኑ ጾሳይ ኑና ኣዛዚዳ ማላ ኢዛ ኣዛዞታ ኡባ ኑ ናጊኮ ሄሲ ኑስ ጺሎቴꬅ ጊዳና» ጊቴ።
DEU 7:1 ጎዳ ኢንቴ ጾሳይ ኢንቴ ላታናስ ቢዛ ቢታዮ ኢንቴና ጌልꬂዛ ዎዴ ቃሴካ ኢንቴፌ ዎልቃሚዛኔ ሚኒዛ ላፑን ካዎቴꬃታ ሄይቲካ ሂቴታ፥ ጌርጌሴታ፥ ኣሞሬታ፥ ካናኔታ፥ ፓሪዜታ፥ ሂዌታኔ ያቡሴታ ኢንቴ ሲንꬃፌ ꬎቃሊ ꬋይሳና።
DEU 7:2 ጎዳ ኢንቴ ጾሳይ ሄ ዴሬታ ኢንቴ ኩሼን ኣꬂ ኢሚን ኢንቴ ኢስታ ጾኒዛ ዎዴ ኢስታ ኩሜꬅ ሱፑ ሂስቲ ꬋይሲቴ ኣቲን ኢስታራ ኣይ ቃላካ ጌሎፒቴኔ ኢስታስ ቃꬌቶፍቴ።
DEU 7:3 ኢስታራ ኤኬቶፍቴኔ ጌሌቶፍቴ፤ ኢንቴ ማጫ ናይታ ኢስታ ኣቱማ ናይታስ ኢሞፍቴ፤ ኢስታ ማጫ ናይታካ ኢንቴ ኣቱማ ናይታስ ኤኮፍቴ።
DEU 7:4 ጋሶይካ ኢንቴ ሄሳꬆ ኦꬆንታ ኣጊኮ ኢስቲ ኢንቴ ናይታ ጎዳ ካሊዛሶፔ ቤቲሲዲ ኤቃ ጾሳታ ካላና ማላ ኦꬃና፤ ሄ ዎዴ ጎዳ ሃንቆይ ኤጺ ኬዛናኔ ኢዚ ኢንቴና ሄራካ ኤሶን ꬋይሳና።
DEU 7:5 ሄሳ ጊሻስ ኢንቴ ኢስቲ ያርሾ ያርሺዛሶዛ ላሊቴ፤ ኢስቲ ጎይኒዛ ቱሳ ማላታ ሹቻታ ኪንቼሬꬂ ዬጊቴ፤ ኣሼሮ ጌቴቲዛ ኤቃ ጾሳይ ሚስሌዛ ቲንቼሬꬂ ዬጊቴ፤ ማሴቲ ጊጊዳ ኤቃ ጾሳታ ሚስሌታካ ታማን ጹጊቴ።
DEU 7:6 ጋሶይካ ጎዳ ኢንቴ ጾሳይ ኢንቴና ባስ ጊዳና ማላ ዶሪዳ ዱማ ዴሬ፤ ቢታ ቦላ ዲዛ ዴሬ ኡባፌ ኢንቴ ኢዛስ ዱማ ዴሬ ጊዳና ማላ ዶሬቲዴታ።
DEU 7:7 ጎዳይ ኢንቴና ሲቂዳይኔ ዶሪዳይ ኢንቴ ሃራ ኣሳፔ ቆዳን ዳሪዛ ጊሻስ ጊዴና፤ ኢንቴ ሃራ ዴራፔ ቆዳን ኬሂ ጉꬃታ።
DEU 7:8 ጊዶ ኣቲን ጎዳይ ኢንቴና ሲቂዳ ጊሻሲኔ ካሴ ኢንቴ ኣዋታስ ጌሊዳ ሂዶታ ቃላ ናጋናስ ኮዪዳ ጊሻስ ኢዚ ኢንቴና ጊብጼ ካዎስ ኣይሌቴꬃን ዲዛ ጊብጼ ቢታፌ ባ ጊታ ዎልቃን ዎዚዲ ኬሲዴስ።
DEU 7:9 ሄሳ ጊሻስ ጎዳ ኢንቴ ጾሳይ ሙሌራ ኣማኔቲዳ ጾሳ ጊዲዳይሳ ኢንቴ ዩሺ ቆፒቴ፤ ኢዚ ባ ጫቂዳ ቃላ ናጌስ፤ ኢዛ ዶሲዛይታሲኔ ኢዛ ኣዛዞ ፖሊዛይታስ ኡባስ ሺ ዬሌታ ጋካናስ ኢዚ ባ ሜርና ሲቆ ቤሳና።
DEU 7:10 ጊዶ ኣቲን ባና ኢጺዛይታ ባ ሃሎ ኬሳና፤ ኢስታ ቦላ ባ ሃሎ ኬሳናስ ጋምኤና።
DEU 7:11 ሄሳ ጊሻስ ታ ሃች ኢንቴና ኣዛዚዛ ኣዛዞታ፥ ዎጋታኔ ማራታ ሎኤꬂ ናጊቴ።
DEU 7:12 ኢንቴ ሃ ኣዛዞታ፥ ዎጋታኔ ማራታ ሲዪዲ ሎኤꬂ ናጊኮ ጎዳ ኢንቴ ጾሳይ ካሴ ኢንቴ ኣዋታስ ጌሊዳ ጫቆ ቃላኔ ባ ሜርና ሲቆ ኢንቴስካ ሚንꬃና።
DEU 7:13 ኢዚ ኢንቴና ሲቃና፤ ኣንጃናኔ ቆዳን ዳርሳና፤ ቃሴካ ኢዚ ኢንቴ ኣዋታስ ጫቂዳ ቢታይን ኢንቴ ዬሎታ፥ ኢንቴ ቢታይ ኢሚዛ ኣይፌታ፥ ካꬃ፥ ዎይኔኔ ዎጋራ ዛይቴ፥ ኢንቴ ሜሄታኔ ዶርሳ ዉዴታ ኡባ ዳርሲዲ ኣንጃና።
DEU 7:14 ኢንቴ ማላ ኣንጄቲዳ ዴሬይ ኣላሜ ቦላ ሙሌካ ዴና፤ ኢንቴ ጊዶፌ ማጫ ጊዲን ዎይኮ ኣቱማስ ጊዲን ሄሳꬆካ ኢንቴ ሜሄታ ጊዶን ማይኔይ ቤቴና።
DEU 7:15 ጎዳይ ሃርጌ ኡባፌ ኢንቴና ናጋና፤ ኢንቴ ካሴ ጊብጼን ዲሼ ቤኢዳ ኢታ ሃርጌታፔ ኣዎይሳካ ኢንቴ ቦላ ኤሄና፤ ጊዶ ኣቲን ኢዚ ባና ኢጺዛይታ ቦላ ሄ ሃርጌታ ኤሃና።
DEU 7:16 ጎዳ ኢንቴ ጾሳይ ኢንቴ ኩሼን ኣꬂ ኢሚዳ ዴሬታ ኡባሲካ ቃꬌቶንታ ꬋይሲቴ፤ ኢንቴስ ዎጺማዴ ጊዶንታ ማላ ኢስታ ኤቃ ጾሳታስ ጎይኖፍቴ።
DEU 7:17 ኢንቴ ኢንቴ ዎዚናን፥ «ሃ ካዎቴꬃቲ ኑፔ ሚኔቴስ፤ ሂስቲን ኑ ኢስታ ዎስቲ ꬋይሳኔ?» ጊዲ ቆፖንታ ኣጌኬታ።
DEU 7:18 ጊዶ ኣቲን ኢንቴ ኢስታስ ያዮፍቴ፤ ጎዳ ኢንቴ ጾሳይ ጊብጼ ካዎ ቦላኔ ሄ ዴሬ ኣሳ ኡባ ቦላ ኦꬂዳይሳ ዩሺ ቆፒቴ።
DEU 7:19 ጎዳ ኢንቴ ጾሳይ ኢንቴና ጊብጼፔ ኬሲዛ ዎዴ ኦꬂዳ ጊታ ቦሻታ፥ ማላታታ፥ ማላሊሲዛ ሚሻታ፥ ኢዛ ሚኖ ቄሴታኔ ሚጬቲዳ ኩሼታ ኢንቴ ኢንቴ ኣይፌን ቤኢዴታ፤ ሃኢ ኢንቴ ያዪዛ ኣሳ ኡባ ቦላንካ ጎዳ ኢንቴ ጾሳይ ሄሳꬆ ኦꬃና።
DEU 7:20 ጎዳ ኢንቴ ጾሳይ ኢስታ ጊዶን ሺሮ ዴንꬃና፤ ኢንቴፌ ባቃቲዲ ቆቴቲዳይቲካ ሄራ ꬋያና።
DEU 7:21 ሄሳ ጊሻስ ሄ ዴሬታስ ባቦፍቴ፤ ጎዳ ኢንቴ ጾሳይ ኢንቴናራ ዴስ፤ ኢዚ ጊታኔ ያሺሲዛ ጾሳ።
DEU 7:22 ጎዳ ኢንቴ ጾሳይ ሃይታ ካዎቴꬃታ ጉꬃራ ጉꬃራ ሾዲ ኬሳና፤ ኢንቴ ኢስታ ኡባ ኢሲቶ ꬋይሶፍቴ፤ ኢንቴ ኢሲቶ ꬋይሲኮ ቢታ ቦላ ዶኣይ ዳሪዲ ኢንቴና ዋዪሳና።
DEU 7:23 ጎዳ ኢንቴ ጾሳይ ኢንቴ ሞርኬታ ኢንቴ ኩሼን ኣꬂ ኢማና፤ ኢስቲ ኡባይ ዉራና ጋካናስ ኢዚ ኢስታ ጋርሳን ሺሮ ዴንꬃና።
DEU 7:24 ቃሴካ ኢስታ ካዎታ ኢዚ ኢንቴ ኩሼን ኣꬂ ኢማና፤ ኢንቴ ኢስታ ሱንꬃ ሙሌራ ቢታፌ ꬋይሳና፤ ኢንቴ ኢስታ ꬋይሳና ጋካናስ ኢንቴናራ ኤቄቲ ዳንዳያና ኣይ ኣሲካ ዴና።
DEU 7:25 ኢስታ ኤቃ ጾሳታ ኡባ ታማን ጹጊቴ፤ ሄ ኤቃ ጾሳታ ቦላ ዲዛ ዎርቃኔ ቢራ ኣሞቲዲ ኢንቴስ ኤኮፍቴ፤ ጎዳ ኢንቴ ጾሳይ ኤቃ ጾሳታስ ጎይኖ ኢጺዛ ጊሻስ ኢንቴ ኤኪኮ ኢዚ ኢንቴስ ዎጺማዴ ጊዳና።
DEU 7:26 ሃ ቱኒዳ ኤቃ ጾሳታ ኢንቴሶ ጌልꬆፍቴ፤ ኢንቴ ኢንቴሶ ጌልꬂኮ ኢስቲ ꬋይዛይሳꬆ ኢንቴካ ꬋያና፤ ኢስቲ ꬋያናስ ቤሲዛ ጊሻስ ኢንቴ ኢስታ ኢጺቴኔ ሃራሴቲቴ።
DEU 8:1 ኢንቴ ሼምፖራ ፓጻ ዳና ማላ፥ ኢንቴ ቆዳይ ዳራና ማላኔ ጎዳይ ካሴ ኢንቴ ኣዋታስ ኢማናስ ጫቂዳ ቢታዮ ላታናስ ኢንቴ ዳንዳያና ማላ ሃች ታ ኢንቴስ ኢሚዛ ኣዛዞዮ ኣማኔቲዲ ናጊቴ።
DEU 8:2 ጎዳ ኢንቴ ጾሳይ ኢንቴስ ኢሚዳ ኣዛዞታ ኢንቴ ናጊዛኮኔ ናጎንታኮ ኢንቴ ዎዚናን ዲዛ ቆፋ ኤራናስ፥ ኢንቴና ፓጫናሲኔ ኢንቴና ኣሽኬሳናስ ኦይዱ ታሙ ላይꬅ ኩሜꬅ ሜቶ ጊዶራ ኣꬂዲ ኢዚ ኢንቴና ዎስቲ ዎስቲ ካሌꬂዳኮ ኣኔ ዩሺ ቆፒቴ።
DEU 8:3 ኣሲ ጾሳ ዶናፔ ኬዚዛ ቃላን ኣቲን ካꬃን ጻላ ሼምፖራ ፓጻ ዳናስ ዳንዳዮንታይሳ ታማርሳናስ ኢንቴና ጋፊሲዴስ፤ ኢንቴኒኔ ኢንቴ ኣዋቲ ኤሮንታ ማና ሚዚዴስ።
DEU 8:4 ሄ ኦይዱ ታሙ ላይꬃታ ጋርሳን ኢንቴ ማይኢዳ ማይኦይ ዉሪቤና፤ ሄሜꬃ ዳሮን ኢንቴ ቶሆይ ኪጺቤና።
DEU 8:5 ኣዋይ ባ ና ሴሪዛይሳꬆ ጎዳ ኢንቴ ጾሳይ ኢንቴና ሴሪዛይሳ ዩሺ ቆፒቴ።
DEU 8:6 ኢዛ ካሊሼኔ ኢዛስ ያዪሼ ጎዳ ኢንቴ ጾሳ ኣዛዞታ ናጊቴ።
DEU 8:7 ጋሶይካ ጎዳ ኢንቴ ጾሳይ ኢንቴና ሾባፌኔ ዙምቡላታፔ ፑልቲ ጎጊዛ ቄሪ ሻፋቲኔ ፑልቲዛ ፑልቶቲ ዲዛ ሎኦ ቢታ ጌልꬃናስ ኤሂዴስ።
DEU 8:8 ሄ ቢታያ ጊስቴይኔ ባንጋይ፥ ዎይኔይኔ ባላሴይ፥ ኦሮማኔይኔ ዎጋራ ኣይፌይ፥ ቃሴካ ኤሲ ኩሚዳ ቢታ።
DEU 8:9 ሄ ቢታያካ ኢንቴ ፓጬይ ባይንዳ ካꬅ ሚዛ ቢታኔ ኢንቴስ ኣይኮይካ ፓጮንታ ቢታ፤ ሄ ቢታይን ዲዛ ሹቻታፔ ቢራታይ፥ ዙምቡላፌ ጻርቂማላይ ቤቴስ።
DEU 8:10 ኢንቴ ሚዲ ካላና፤ ሂስቲዲ ኢዚ ኢንቴስ ኢሚዳ ሎኦ ቢታይ ጊሻስ ጎዳ ኢንቴ ጾሳ ኢንቴ ጋላታና።
DEU 8:11 ኢንቴ ጎዳ ኢንቴ ጾሳ ዶጊዲ ታኒ ሃች ኢንቴስ ኢሚዛ ኣዛዞታ፥ ዎጋታኔ ማራታ ሞሮንታ ማላ ናጌቲቴ።
DEU 8:12 ኢንቴ ሚዲ ካሊዛ ዎዴኔ ሎኦ ኬꬅ ኬጺ ኡቲዛ ዎዴ፥
DEU 8:13 ሚዚኔ ዶርሳይ፥ ቢራይኔ ዎርቃይ ቃሴካ ሃራ ኣቆታቲ ኢንቴስ ዳሪዛ ዎዴ፥
DEU 8:14 ኢንቴ ዎዚናይ ኦቶሬቶንታ ማላኔ ኢንቴ ጊብጼፔ ኣይሌቴꬃ ቢታፌ ኢንቴና ዎዚ ኬሲዳ ጎዳ ኢንቴ ጾሳ ባሎንታ ማላ ናጌቲቴ።
DEU 8:15 ማርዜ ሾሻይኔ ማሲማሶይ ኩሚዳ ኬሂ ሂርጊሲዛ ባዞራ ኢንቴና ካሌꬂዴስ፤ ኢዚ ኢንቴስ ሜላ ባዞን ሚኖ ዛላፌ ሃꬄ ፑልቲሲዴስ።
DEU 8:16 ኢንቴና ኣሽኬሳናሲኔ ፓጫናስ ዉርሴꬃንካ ሎኦ ጊዳና ማላ ካሴ ኢንቴ ኣዋቲ ሚ ኤሮንታ ማና ባዞ ቢታን ኢንቴስ ኢሚዴስ።
DEU 8:17 ሄሳ ጊሻስ፥ «ኑኒ ኑ ዎልቃኒኔ ኑ ሚኖቴꬃን ዱሬቲዶስ» ጊ ቆፖፍቴ።
DEU 8:18 ኢንቴ ዱሬታና ማላ ኢንቴስ ዎልቃኔ ሚኖቴꬅ ኢሚዳይ ጎዳ ኢንቴ ጾሳ ጊዲዳይሳ ዩሺ ቆፒቴ፤ ኢዚ ሄሳꬆ ኦꬂዳይ ካሴ ኢንቴ ኣዋታስ ጌሊዳ ጫቆ ቃላ ሚንꬃናሳ።
DEU 8:19 ጎዳ ኢንቴ ጾሳ ኢንቴ ዶጊዲ ኤቃ ጾሳታስ ጎይኒኮ፥ ኢስታስ ሃጋዛናስ ኢንቴ ሲንꬅ ኢንቴ ኢስታኮ ዛሪኮ፥ ኣዳካ ኢንቴ ꬋያናይሳ ሃች ታ ኢንቴና ሃራ ኤሪሳይስ።
DEU 8:20 ጎዳ ኢንቴ ጾሳስ ኢንቴ ኣዛዜቶንታ ኢጺኮ ኢንቴ ጌዴ ሲንꬄ ሲንꬄ ቢሺን ኢንቴ ሲንꬃን ዲዛ ካዎቴꬃታ ꬋይሲዛይሳ ማላ ኢንቴናካ ꬎቃሊ ꬋይሳና።
DEU 9:1 ኢንቴኖ ኢስራኤሌ ዴሬ ኣሳዉ! ሲዪቴ፤ ኢንቴ ኢንቴፌ ጊታቲዛኔ ዎልቃሚዛ ካዎቴꬃታ ቃሴ ኢስታስ ዲርሳ ጊምቤይ ሳሎ ጋኪዳ ጊታ ካታማታካ ላታናስ ሃች ዮርዳኖሴ ፒኔታ።
DEU 9:2 ሄ ቢታን ዲዛ ኣሳይ ጌሳኔ ጉባ ጊታታኔ ኬሂ ሚኖታ፤ ኢስታስ፥ «ኦኒኔ ኤናቄ ዜሬꬃታራ ኤቄታናስ ዳንዳዬና» ጊሺን ኢንቴ ሲዪዴታ።
DEU 9:3 ጊዶ ኣቲን ታማ ማላ ጹጊዛ ጎዳ ኢንቴ ጾሳይ ኢዚ ኢንቴፌ ሲንꬃራ ቢሺን ኢንቴ ሃች ቤኣና፤ ኢንቴ ጌዴ ሲንꬄ ሲንꬄ ጉጂሺን ኢዚ ኢስታ ጾኒ ጾኒ ባና፤ ሄሳ ጊሻስ ኢዚ ኢንቴስ ኢሚዳ ሂዶታ ቃላ ማላ ኢንቴ ኢስታ ꬎቃሊዲ ኤሶን ጎዲ ꬋይሳና።
DEU 9:4 ጎዳ ኢንቴ ጾሳይ ኢስታ ኢንቴ ሲንꬃፌ ጎዲዳፔ ጉዬ ኢንቴ፥ «ጎዳይ ኑና ሃ ቢታ ኤሂዳይ ኑኒ ሎኦ ኦሶ ኦꬂዳ ጊሻሳ» ጊዲ ቆፖፍቴ፤ ጎዳይ ኢስታ ኢንቴ ሲንꬃፌ ጎዲ ኬሲዛይ ኢስታ ኢታቴꬃ ጊሻሳ።
DEU 9:5 ኢንቴ ኢስታ ቢታ ላታና ማላ ጎዳ ኢንቴ ጾሳይ ኢስታስ ኣꬂ ኢሚዛይ ኢንቴ ጺሎኔ ሱሬ ኦꬂዳ ጊሻስ ጊዴና፤ ኢስቲ ኢታታ ጊዲዳ ጊሻሲኔ ጾሳይ ካሴ ኢንቴ ኣዋታስ ኣብራሃሜስ፥ ዪሳቃሲኔ ያቆቤስ ኢሚዳ ሂዶታ ቃላ ናጋናስ ኮዪዳ ጊሻስ ኢስታ ሾዲ ጎዳና።
DEU 9:6 ጎዳ ኢንቴ ጾሳይ ሃ ሎኦ ቢታ ኢንቴና ላቲሲዛይ ኢንቴ ጺሎቴꬃ ጊሻስ ጊዴና፤ ጋሶይካ ኢንቴ ዎዚናይ ሙሜ።
DEU 9:7 ጎዳ ኢንቴ ጾሳ ባዞን ኢንቴ ዎስቲ ሃንቄꬂዳኮ ባሎፒቴ፤ ኢንቴ ጊብጼፔ ኬዚዳ ጋላሳፌ ዶሚዲ ሃኖ ጋካናስ ኢንቴ ጎዳ ኢንቴ ጾሳ ቦላ ማካሊዴታ።
DEU 9:8 ሲና ባዞን ኢዚ ኢንቴና ꬋይሳናስ ዴንዳና ጋካናስ ጎዳ ኬሂ ሃንቄꬂዴታ።
DEU 9:9 ጎዳይ ኢንቴናራ ጫቄቲዳ ቃላይ ኢስታ ቦላ ጻፌቲዳ ሹቻታ ኤካናስ ታኒ ፑዴ ዙማ ቦላ ኬዛዳ ሄን ኣይኮካ ሞንታኔ ኡዮንታ ኦይዱ ታሙ ጋላሲኔ ኦይዱ ታሙ ቃማ ጋማኣዲስ።
DEU 9:10 ሄሳፌ ጉዬ ኢንቴ ሄ ዙማ ጋርሳን ሺቂን ጎዳይ ታማ ጊዶፌ ሃሳይሺን ኢንቴ ሲዪዳ ቃላ ኢዚ ባ ኩሼራ ኢስታ ቦላ ጻፊዳ ናምኡ ሎቻ ሹቻታ ታስ ኢሚዴስ።
DEU 9:11 ኦይዱ ታሙ ጋላሳፌኔ ኦይዱ ታሙ ኦማርሳፌ ጉዬ ጎዳ ጫቆ ቃላይ ኢስታ ቦላ ጻፌቲዳ ናምኡ ሎቻ ሹቻታ ታስ ኢሚዴስ።
DEU 9:12 ሄሳፌ ጉዬ ጎዳይ ታስ፥ «ኔ ኤሶን ዙማ ቦላፌ ዱጌ ዎꬋ፤ ኔኒ ጊብጼፔ ካሌꬃ ኬሲዳ ኣሳይ ኢታ ሚሽ ኦꬂዲ ቱኒዴስ፤ ታ ኢስታስ ኢሚዳ ኣዛዞታፔ ኤሶን ካሬ ኬዚዲ ባንታስ ጎይናናስ ኤቃ ጾሳታ ሜꬊዳ» ጊዴስ።
DEU 9:13 ቃሴካ ጎዳይ ታስ፥ «ሃይሲ ዴሬዚ ዎዚና ሙሜኔ ማካላ ጊዲዳይሳ ታ ኤራይስ።
DEU 9:14 ታኒ ኢስታ ꬋይሳናይሳኔ ኢስታ ሱንꬃካ ቢታ ቦላፌ ቁጫ ꬋይሳናይሳ ታና ዲጎፋ፤ ኔና ኢስታፌ ሚኒዛይሳኔ ጮራቲዛ ካዎቴꬅ ኬሳና» ጊዴስ።
DEU 9:15 ሄሳ ጊሻስ ጫቆ ቃላዚ ጻፌቲዳ ናምኡ ሎቻ ሹቻታ ናምኡ ኩሼን ኦይኪዳ ማላ ዙማ ቦላፌ ሲማዳ ዱጌ ዎꬋዲስ፤ ሄ ዎዴ ታማ ላጮይ ዙማ ቦላ ላጬስ።
DEU 9:16 ኢንቴካ ጎዳ ኢንቴ ጾሳይ ኢንቴስ ኢሚዳ ኣዛዞታ ሜንꬂዲ ካሬ ኬዚዴታ፤ ዎርቃፌ ሴሪሲዲ ሜꬊዳ ማራ ሚስሌዛ ኢንቴስ ኤቃ ጾስ ኦꬂዴታ፤ ሄሳን ኢንቴ ኢንቴ ጎዳ ቦላ ማካሊዳይሳ ታ ቤኣዲስ።
DEU 9:17 ሄሳ ጋሶን ኣዛዞቲ ኢስታ ቦላ ጻፌቲዳ ሎቻ ሹቻታ ታ ኢንቴ ሲንꬃን ቦላፌ ዬጋዳ ሜንꬄሬꬃዲስ።
DEU 9:18 ሄሳፌ ጉዬ ኢንቴ ኬሂ ኢታ ናጋራ ኦꬂዲ ጎዳ ሃንቄꬂዳ ጋሶን ታኒ ኦይዱ ታሙ ጋላሲኔ ኦይዱ ታሙ ቃማ ጋካናስ ኣይኮካ ሞንታኔ ኡዮንታ ጎዳ ሲንꬃን ጉፋናዳ ጋምኣዲስ።
DEU 9:19 ኢዚ ኢንቴና ኬሂ ሃንቄቲዲ ꬋይሳናስ ዴንዲዳ ጊሻስ ጎዳይ ሃንቂዛ ጊታ ሃንቆዚ ታና ባቢሲዴስ፤ ጊዲኮካ ጎዳይ ዛሪዲ ታ ዎሳ ሲዪዴስ።
DEU 9:20 ጎዳይ ኣሮኔካ ꬋይሳናስ ኢዛ ቦላ ኬሂ ሃንቄቲዴስ፤ ሄሳ ጊሻስ ኢዛስካ ዎሳዲስ።
DEU 9:21 ታኒ ኢንቴ ሜꬊዳ ሄ ናጋራን ኩሚዳ ማራ ሚስሌዛ ኤካዳ ታማን ጹጋዲስ፤ ኢዛካ ኪንቼሬꬃ ጉዱላ ማላ ሊቂሳዳ ዙማ ቦላፌ ዱጌ ጎጊዛ ሃꬃን ዬጋዲስ።
DEU 9:22 ኢንቴ ቃሴካ ታቤሬን፥ ማሳኒኔ ኪብሮቴ-ሃታኣቤን ኢንቴ ጎዳ ሃንቄꬂዴታ።
DEU 9:23 ጎዳይ ኢንቴና፥ «ቢቴ! ታ ኢንቴስ ኢሚዳ ሂዶታ ቢታዮ ላቲቴ» ጊዲ ኢንቴና ቃዴሴ ባሪኔፔ ኪቲዳ ዎዴ ኢንቴ ኢዛ ቦላ ማካሊዴታ ኣቲን ኢዛን ኣማኔቲቤኬታ፤ ኢዛ ቃላስካ ኣዛዜቲቤኬታ።
DEU 9:24 ታ ኢንቴና ኤሮሶፌ ሃኖ ጋካናስ ኢንቴ ጎዳ ቦላ ማካሊዳ ማላ ዴታ።
DEU 9:25 ጎዳይ፥ «ታኒ ኢስታ ꬋይሳና» ጊዲ ዮቲዳ ጊሻስ ታኒ ሄ ኦይዱ ታሙ ጋላሳታኔ ኦይዱ ታሙ ቃማታ ጎዳ ሲንꬃን ጉፋናዳ ጋምኣዲስ።
DEU 9:26 ታኒ ዎሳሼ፥ «ኡባፌ ꬎቃ ጎዳዉ! ኔኒ ኔ ጊታ ዎልቃኒኔ ኔ ሚኖ ቄሴን ዎዛዳ ጊብጼፔ ኬሲዳ ኔ ዴሬዛ ꬋይሶፋርኪ!
DEU 9:27 ካሴ ኔ ኦሳንቻታ ኣብራሃሜ፥ ዪሳቃኔ ያቆቤ ቆፓርኪ፤ ሃይሳ ዴራ ዎዚና ሙሜቴꬃ፥ ኢታቴꬃኔ፤ ናጋራ ኡባ ቆዶፓርኪ!» ጋ ዎሳዲስ።
DEU 9:28 ኔ ሂስቶንታ ኣጊኮ ኑና ሄ ዴሬ ኣሳይ፥ «ጎዳይ ኢስታ ጌልꬃና ጊዲ ሂዶታ ኢሚዳ ቢታዮ ጌልꬃናስ ዳንዳዮንታ ጊሻሲኔ ኢዚ ኢስታ ኢጺዳ ጊሻስ ባዞ ቢታን ኢስታ ዎꬋናስ ኬሲዴስ» ጊዲ ሚጫና።
DEU 9:29 ጊዶ ኣቲን ሃ ኣሳይ ኔኒ ኔ ጊታ ዎልቃኒኔ ኔ ሚኖ ቄሴን ኔስ ጊዳና ማላ ኔ ዶራ ኬሲዳ ዴሬ።
DEU 10:1 ሄሳፌ ጉዬ ጎዳይ ታና፥ «ሃይሳፌ ካሴ ሜቂዳ ሎቻ ሹቻታ ማላ ሃራ ናምኡ ሹች ማሳ ጊጊሳ፤ ኢስታ ዎꬃናስ ታቦታ ሚꬃፌ ሜꬋ፤ ሂስታዳ ፑዴ ሃ ዙማ ሁኤ ኬዛ።
DEU 10:2 ኔ ካሴ ሜንꬂዳ ሎቻ ሹቻታ ቦላ ጻፌቲዳ ኣዛዞታ ቃሴካ ታኒ ኢዛራ ጻፋና፤ ኔኒካ ኢስታ ታቦታዛ ጊዶን ዎꬃ» ጊዴስ።
DEU 10:3 ሄሳ ጊሻስ ታኒ ኦዶሮ ሚꬃፌ ታቦታ ጊጊሳዲስ፤ ካሴይታ ሚሳቲዛ ናምኡ ሎቻ ሹቻታ ማሳ ኤካዳ ፑዴ ዙማ ቦላ ኬዛዲስ።
DEU 10:4 ኢንቴ ዙማ ጋርሳን ሺቂ ዲሺን ጎዳይ ታማ ጊዶን ዲሼ ኢንቴስ ቆንጪሲዳ ታሙ ኣዛዞታ ካሴይሳꬆካ ሃኢ ሎቻ ሹቻታ ቦላ ጻፊዲ ታስ ኢሚዴስ።
DEU 10:5 ሄሳፌ ጉዬ ታኒ ዙማ ቦላፌ ዱጌ ዎꬋዳ ጎዳይ ታና ኣዛዚዳ ማላ ሄ ማሴቲዳ ሎቻ ሹቻታ ታ ጊግሲዳ ታቦታ ጊዶን ዎꬃዲስ፤ ሄ ጋላሳፌ ሃኖ ጋካናስ ሄን ኢዛ ጊዶን ዴቴስ።
DEU 10:6 [ኢስራኤሌ ኣሳይ ቢኤሮቲ-ቤኒ-ያቂኔ ኣሳታስ ሃꬃ ኦላይ ዲዛሶፔ ሞሴሬ ቢዳ፤ ኣሮኔይካ ሃይቂዲ ሄን ሞጌቲዴስ፤ ኢዛሶሆን ኢዛ ና ኤልኤዜሬይ ቄሴ ጊዲዴስ።
DEU 10:7 ኣሳይ ሄሳፌ ዴንዲዲ ጌዴ ጉዲጎዳ ቢዴስ፤ ሄፔካ ዮጽባቴ ጌቴቲዛ ጎጊዛ ሃꬂ ዲዛሶ ቢዴስ።
DEU 10:8 ሄ ዎዴ ሌዌ ቆሞቲ ጫቆ ቃላ ታቦታ ቶካና ማላ፥ ጎዳ ሲንꬃን ኤቂዲ ኢዛስ ኦꬃና ማላኔ ኣሳካ ጎዳ ሱንꬃን ኣንጃና ማላ ሹሚዴስ፤ ሃች ጋካናስ ሌዌ ቆሞታ ኦሶይ ሄሳ።
DEU 10:9 ሄሳ ጋሶን ሌዌ ቆሞቲ ሃንኮ ቆሞታራ ጊሼታናስ ጺንጾይ ኢሜቶንታይሲ ሄሳሳ፤ ኢንቴ ጎዳይ ኢስታስ ዮቲዳ ማላካ ኢስታ ጺንጾይ ጎዳ ኢንቴ ጾሳ።]
DEU 10:10 ታኒ ካሴይሳꬆ ዎሳሼ ኦይዱ ታሙ ጋላሲኔ ኦይዱ ታሙ ቃማ ጋካናስ ጋምኣዲስ፤ ጎዳይ ሃኢካ ታ ዎሳ ሲዪዲ ኢንቴና ꬋይሶንታ ሼምፖራ ፓጻ ዎꬂዴስ።
DEU 10:11 ሄሳፌ ጉዬ ኢዚ ታና፥ «ሃኢ ኔ ባ! ታኒ ካሴ ኢስታ ኣዋታስ ኢሚዳ ሂዶታ ቃላ ማላ ኢስቲ ሄ ቢታዮ ላታና ማላ ዴራ ካሌꬃ» ጊዴስ።
DEU 10:12 ኢስራኤሌ ኣሳዉ! ጎዳይ ኢንቴፌ ኮይዛይ ሃይሳፌ ካሊዛይሳ፤ ጎዳ ኢንቴ ጾሳ ያዪቴ፤ ኢዛ ኦጌ ካሊቴ፤ ኢዛ ሲቂቴ፤ ኩሜꬃ ዎዚናፔኔ ኩሜꬃ ሼምፖፌ ኢዛስ ኦꬂቴ።
DEU 10:13 ኢንቴስ ሎኣና ማላ ታኒ ሃች ኢንቴስ ኢሚዛ ጎዳ ኣዛዞታኔ ዎጋታ ናጊቴ።
DEU 10:14 ሳሎይኔ ሳሎፔ ቦላን ዲዛ ሳሎቲ፥ ቢታይኔ ቢታ ቦላ ዲዛ ኡባይ ጎዳሳ።
DEU 10:15 ጎዳይ ካሴ ኢንቴ ኣዋታ ኬሂ ሲቂዳ ጋሶን ኢንቴና ኣይዛቤታ ጊዶፌ ዶሪዴስ፤ ኢንቴካ ሃች ጋካናስ ኢዛስ ዶሬቲዳ ዴሬ ጊዲዴታ።
DEU 10:16 ሄሳ ጊሻስ ኣኔ ሃይሳፌ ጉዬ ኢንቴ ዎዚና ሙሚሶፒቴኔ ኢንቴ ዎዚና ኢታቴꬃ ዲጊዲ ጎዳስ ኣዛዜቲቴ።
DEU 10:17 ጎዳ ኢንቴ ጾሳይ ጾሳ ጌቴቲዛ ኡባፌ ቦላ፤ ጎዳታስ ጎዳ፤ ኢዚ ጊታ፥ ሚኖኔ ያሺዛ ጾሳ፤ ኢዚ ማዲ ፒርዶንታ ጾሳኔ ማጋንጾ ኤኮንታ ጾሳ።
DEU 10:18 ኢዚ ዪኦታሲኔ ኣምኤታስ ፒርዴስ፤ ኢዚ ዴራ ጊዶን ዲዛ ቤቴ ኣሳታ ዶሲዛ ጊሻስ ካꬂኔ ማይኦ ኢስታስ ኢሜስ።
DEU 10:19 ሄሳꬆካ ኢንቴ ካሴ ጊብጼ ቢታን ቤቴ ኣስ ጊዲዳ ጊሻስ ኢንቴካ ኢንቴ ጊዶን ዲዛ ቤቴ ኣሳታ ሲቂቴ።
DEU 10:20 ጎዳ ኢንቴ ጾሳስ ያዪቴ፤ ኢዛስ ጻላ ጎይኒቴ፤ ኢዛን ኣማኔቲዲ ኢዛ ሱንꬃን ጫቂቴ።
DEU 10:21 ኢንቴ ጾሳይ ኢዛ፤ ኢዚ ኢንቴስ ኦꬂዳ ጊታኔ ማላሊሲዛ ሚሻታ ኡባ ኢንቴ ኢንቴ ኣይፌን ቤኢዳ ጊሻስ ኡባ ዎዴ ኢዛ ጋላቲቴ።
DEU 10:22 ቤኒ ኢንቴ ኣዋቲ ዱጌ ጊብጼ ዎꬊዛ ዎዴ ኢስታስ ቆዳይ ላፑን ታሙ ጻላ፤ ሃኢ ጊዲኮ ጎዳ ኢንቴ ጾሳይ ኢንቴ ቆዳ ሳሎ ጾሊንቴ ማላ ዳርሲዴስ።
DEU 11:1 ሄሳ ጊሻስ ጎዳ ኢንቴ ጾሳ ሲቂቴ፤ ኢዚ ኢንቴፌ ኮይዛ ኢዛ ዎጋ፥ ማራኔ ኣዛዞታ ኡባ ዎዴ ፖሊቴ።
DEU 11:2 ጎዳ ኢንቴ ጾሳ ሴራዛ ሄሲካ ኢዛ ጊታቴꬃ፥ ኢዛ ዎልቃኔ ኢዛስ ዲዛ ማታ ቤኢዳይኔ ኤሪዛይ ኢንቴ ናይታ ጊዶንታ ኢንቴና ጊዲዳይሳ ዩሺ ቆፒቴ።
DEU 11:3 ማላታታኔ ኢዚ ጊብጼ ካዎ ቦላኔ ኩሜꬃ ዴራ ቦላ ኦꬂዳ ጊታ ኦሶታ ኢንቴ ኢንቴ ኣይፌራ ቤኢዴታ።
DEU 11:4 ቃሴ ኢስቲ ኢንቴና ካሊዲ ዬዴꬂዳ ዎዴ ጎዳይ ጊብጼ ቢታ ኦላንቻታ፥ ኢስታ ፓራታኔ ፓራ-ጋሬታ ዞኦ ኣባን ሚቲሲዲ ሃች ጋካናስ ኢስታ ሙሌራ ꬋይሲዳይሳ ቤኢዴታ።
DEU 11:5 ኢንቴ ባዞፌ ዴንዲዲ ሃ ሃይሳ ጋካናስ ጎዳይ ኢንቴስ ኣይ ኦꬂዳኮ ኢንቴ ኤሬታ።
DEU 11:6 ኦሮቤሌ ቆሞታፔ ኤልያቤ ና ዳታኔኔ ኣብራሜ ቦላ ኢዚ ኦꬆይሳ ዩሺ ቆፒቴ፤ ኢስራኤሌ ናይቲ ቤዪሺን ቢታያ ዶዬታዳ ኢስታ፥ ኢስታሶ ኣሳ፥ ኢስታ ዱንካኔኔ ኢስታ ሃሮ ኡባ ሚታዱስ።
DEU 11:7 ጎዳይ ኦꬂዳ ሃ ጊታ ኦሶታ ኡባ ኢንቴ ኢንቴ ኣይፌራ ቤኢዴታ።
DEU 11:8 ሂስቲኮ ኢንቴ ፒኒዲ ላታና ቢታዮ ኦይካናስ ኢንቴ ዎልቃ ዴማና ማላ ታኒ ሃች ኢንቴስ ኢሚዛ ኣዛዞታ ኡባ ናጊቴ።
DEU 11:9 ኢንቴ ኢዛ ኣዛዞታ ናጊኮ ጎዳይ ካሴ ኢንቴ ኣዋታሲኔ ኢስታ ዜሬꬃታስ ኢማናስ ጫቂዳ ኤሲኔ ማꬂ ኩሚዳ ሄ ሎኦ ቢታይን ኢንቴ ዳሮ ላይꬅ ዳና።
DEU 11:10 ኢንቴ ላታናስ ጌላና ቢታያ ኢንቴ ኬዚዲ ዪዳ ጊብጼ ቢታ ማላ ጊዱኩ፤ ጊብጼን ኢንቴ ካꬅ ዜሪዳፔ ጉዬ ሃꬂ ካꬃ ጊዶ ባና ማላ ዛራዛ ኢንቴ ቶሆን ዬꬊ ዬꬊ ቤሴታ።
DEU 11:11 ጊዶ ኣቲን ኢንቴ ዮርዳኖሴ ሻፋ ፒኒዲ ላታና ቢታያ ኢዚን ዙማቲኔ ሾባቲ ዲዛ ጊሻስ ኢዛ ኢራ ሃꬅ ኡዪዛ ቢታ።
DEU 11:12 ሃኖ ሃ ቢታዮ ሎኤꬂ ኦይኪዛይኔ ላይꬅ ኩሜꬅ ናጊዛይ ጎዳ ኢንቴ ጾሳ።
DEU 11:13 ሄሳ ጊሻስ ጎዳ ኢንቴ ጾሳ ሲቂቴ፤ ኩሜꬃ ዎዚናፔኔ ኩሜꬃ ሼምፖፌ ኢዛስ ኦꬂቴ፤ ታኒ ሃች ኢንቴስ ኢሚዛ ኣዛዞታ ፖሊቴ።
DEU 11:14 ኢንቴ ሄሳꬆ ኦꬂኮ ኢንቴ ካꬃ፥ ዎይኔኔ ዛይቴ ፓጬይ ባይንዳ ሺሻና ማላ ጎዳይ ኢንቴስ ባꬌሳ ኢራኔ ባልጎ ኢራ ዎዴን ዎዴን ቡኪሳና።
DEU 11:15 ጎዳይ ኢንቴ ሜሄታስ ማታ ዳርሳና፤ ኢንቴስ ኮሺዛ ካꬅ ኢሚን ኢንቴ ካላና።
DEU 11:16 ኢንቴ ጎዳፔ ሃኪዲ ኤቃ ጾሳታስ ኦꬃናሲኔ ጎይናናስ ጉዬ ሲሞንታ ማላ ናጌቲቴ።
DEU 11:17 ኢንቴ ናጌቶንታ ኣጊኮ ጎዳ ሃንቆይ ኢንቴ ቦላ ኤጺ ኬዛና፤ ኢራይ ቡኮንታ ማላኔ ቢታይ ካꬅ ኢሞንታ ማላ ኢዚ ሳሎ ጎርዳና፤ ኢንቴካ ጎዳይ ኢንቴስ ኢሚዳ ሎኦ ቢታይፌ ኤሶን ꬋያና።
DEU 11:18 ኢንቴ ሃ ኣዛዞታ ኡባ ዎዴ ኢንቴ ዎዚናኒኔ ኢንቴ ቆፋን ዎꬂቴ፤ ኢንቴስ ማላታ ጊዳና ማላ ኢስታ ኢንቴ ቄሴን ቃቺቴ፤ ቃሴካ ኢንቴስ ሊጴ ቦላካ ኦይꬂቴ።
DEU 11:19 ኢንቴ ናይታ ታማርሲቴ፤ ኢንቴሶን ኡቲሼ ዎይኮ ኦጌን ሄሜቲሼካ ዎይኮ ሼምፒዛሶን ጊዲንካ ዎይኮ ኦሶ ኡባን ኢስታ ጊሻስ ሃሳዬቲቴ።
DEU 11:20 ኢንቴ ኬꬃ ፔንጌ ቆሲላꬃ ቦላኔ ኢንቴ ጊቤ ፔንጌ ቦላ ጻፊ ዎꬂቴ።
DEU 11:21 ኢንቴ ሄሳꬆ ኦꬂኮ ኢንቴ ጎዳይ ካሴ ኢንቴ ኣዋታስ ኢማናስ ጫቂዳ ቢታይ ቦላ ኢንቴ ላይꬃይኔ ኢንቴ ናይታ ላይꬃይ ሳኣፔ ቢዲ ሳሎ ጋካና ኬና ኣዱቃና።
DEU 11:22 ጎዳ ኢንቴ ጾሳ ሲቃናስ፥ ኢዛ ኦጌ ኡባ ካላናሲኔ ኢዛን ኣማኔታናስ ታኒ ሃች ኢንቴስ ኢሚዛ ኣዛዞታ ሚንꬂዲ ናጊቴ።
DEU 11:23 ኢንቴ ሄሳꬆ ኦꬂኮ ጎዳይ ሃይታ ኢንቴ ሲንꬃን ዲዛ ካዎቴꬃታ ኡባ ኬሲ ጎዳና፤ ኢንቴኒካ ጮራቴꬃኒኔ ዎልቃን ኢንቴፌ ሚኖ ጊዲዳ ዴሬታ ቢታ ላታና።
DEU 11:24 ኢንቴ ቶሆን ኢንቴ ዬꬊዳ ቢታይ ዉሪካ ኢንቴስ ጊዳና፤ ኢንቴ ዛዋይ ዱጌሃ ባጋራ ዲዛ ባዛፌ ቢዲ ፑዴሃ ባጋራ ዲዛ ሊባኖሴ ዙማ ጋካና፤ ቃሴካ ኣርሼይ ሞኪዛ ባጋራ ኤፊራጺሴ ሻፋፔ ቢዲ ኣርሼይ ዉሊዛ ባጋራ ዲዛ ሜዲቴራኔ ኣባ ጋካና።
DEU 11:25 ኢንቴናራ ኣይ ኣሲካ ኤቄታናስ ዳንዳዬና፤ ጎዳ ኢንቴ ጾሳይ ኢንቴስ ኢሚዳ ሂዶታ ቃላ ማላ ኢንቴ ቢዛሶ ኡባን ኣሳይ ኢንቴና ቤኢዲ ዳጋማና ማላኔ ያያና ማላ ኦꬃና።
DEU 11:26 ሄኮ! ታኒ ሃች ኣንጆፌኔ ቃንጌꬃፌ ኢሳ ኢንቴ ዶራና ማላ ኢንቴ ሲንꬃን ዎꬃዲስ።
DEU 11:27 ታ ሃች ኢንቴስ ኢሚዛ ጎዳ ኢንቴ ጾሳ ኣዛዞታ ናጊኮ ኢንቴ ኣንጄታና።
DEU 11:28 ጊዶ ኣቲን ታኒ ኢንቴና ሃች ኣዛዚዛ ጎዳ ኢንቴ ጾሳ ኣዛዞታ ናጎንታ ኢጺዲ ኢንቴ ኤሮንታ ሃራ ኤቃ ጾሳታ ጎይናናስ ኢዛ ኦጌፔ ካሬ ኬኢዛ ጊዲኮ ኢንቴ ቃንጌታና።
DEU 11:29 ጎዳ ኢንቴ ጾሳይ ኢንቴ ላታና ቢዛ ቢታዮ ላቲሲዳ ዎዴ ኣንጆዛ ጋሪዛኔ ዙማ ቦላ ቃሴካ ቃንጌꬃ ኤባሌ ዙማ ቦላ ኣዋጃ።
DEU 11:30 ሄ ዙማቲ ዮርዳኖሴ ሻፋፔ ኣርሼይ ዉሊዛ ባጋራ ኣራቤን ዲዛ ካናኔ ቢታን ጌልጌላ ካታማፔ ሲንꬃ ባጋራ ዲዛ ሞሬ ሚꬃ ኣቻን ዴቴስ።
DEU 11:31 ኢንቴ ሄን ዳና ማላ ጎዳ ኢንቴ ጾሳይ ኢንቴስ ኢሚዳ ቢታዮ ላታናስ ኢንቴ ዮርዳኖሴ ሻፋ ፒኒዲ ላቲዛ ዎዴ፥
DEU 11:32 ታ ኢንቴስ ሃች ኢሚዛ ዎጋኔ ማራ ኡባ ሎኤꬂ ናጊቴ።
DEU 12:1 ጎዳ ኢንቴ ኣዋታ ጾሳይ ኢንቴስ ኢሚዛ ቢታ ቦላ ዲዛ ዎዴ ኢንቴ ናጋና ዎጋቲኔ ማራቲ ሃይታንታ፤
DEU 12:2 ኢንቴ ላታና ቢታይን ዲዛ ካዎቴꬃይ ዙማታ ቦላ፥ ዙምቡላታ ቦላኔ ዳሻ ሚꬃታ ጋርሳን ባንታ ኤቃ ጾሳታስ ጎይኒዛሶታ ሙሌራ ꬋይሲቴ።
DEU 12:3 ኢስቲ ያርሾ ያርሺዛሶሆታ ላሊ ꬋይሲቴ፤ ሹቻፌ ኦሴቲዲ ቱሳ ማላ ኤቂዳ ኤቃ ጾሳታ ኡባ ሊቂሲቴ፤ ኣሼሮ ጌቴታ ጼይጌቲዛ ኤቃ ጾሳይ ሚስሌታ ኡባ ታማን ጹጊቴ፤ ማሴቲ ጊጊዳ ኢስታ ኤቃ ጾሳታ ኡባ ሜንꬄሬꬂ ዬጊቴ፤ ኢስታ ሱንꬃካ ቢታፌ ꬋይሲቴ።
DEU 12:4 ኢንቴ ጎዳ ኢንቴ ጾሳስ ኣይዛቤቲ ባንታ ኤቃ ጾሳታስ ጎይኒዛይሳꬆ ጎይኖፍቴ።
DEU 12:5 ጎዳ ኢንቴ ጾሳይ ዳናሲኔ ኢዛ ሱንꬃይ ሄን ጼይጌታና ማላ ኡባ ቆሞታ ጊዶን ኢዚ ዶሪዳሶዛ ኮዪዲ ሄ ቢቴ።
DEU 12:6 ጹጌቲዛ ያርሾታ፥ ሃራ ያርሾታ፥ ኢንቴ ኣስራታ፥ ኢንቴ ሙጹዋታ፥ ኢንቴ ኣዲኔቲዳ ኣዲናታ፥ ኢንቴ ዶሲዲ ኢሚዛ ኢሞታታኔ ኢንቴ ሜሃፔ ባይራታ ሄ ኤሂቴ።
DEU 12:7 ሄን ጎዳ ኢንቴ ጾሳ ሲንꬃን ኢንቴ ማና፤ ቃሴ ኢንቴ ኢንቴ ዎልቃን ኦꬂ ኬሲዳ ኡባኒኔ ጎዳ ኢንቴ ጾሳይ ኢንቴና ኣንጂዳ ኡባን ኢንቴ ኢንቴሶ ኣሳራ ኡፋዬታና።
DEU 12:8 ኢንቴ ሃኖ ጋካናስ ኢንቴ ሼኔ ማላ ኦꬂሼ ጋምኢዴታ፤ ሄ ዎዴ ሄሳꬆ ኦꬄኬታ።
DEU 12:9 ጎዳ ኢንቴ ጾሳይ ኢንቴስ ኢሚን ኢንቴ ሼምፒዲ ዳና ቢታዮ ቡሮ ጌሊቤኬታ።
DEU 12:10 ጎዳ ኢንቴ ጾሳይ ኢንቴስ ኢማና ቢታይን ዳናስ ኢንቴ ዮርዳኖሴ ሻፋ ፒናና፤ ኢንቴ ዩሾን ዶዲ ኡቲዳ ሞርኬታፔ ኢንቴና ኢዚ ሼምፒሳና፤ ኢንቴካ ሄን ዎፑ ጊ ዳና።
DEU 12:11 ሄ ዎዴ ጎዳ ኢንቴ ጾሳይ ባ ሱንꬃይ ጼይጌታና ማላ ዶሪዳሶ ታኒ ኢንቴና ኣዛዚዛ ኡባ፥ ጹጌቲዛ ያርሾታ፥ ሃራ ያርሾታ፥ ኢንቴ ኣስራታ፥ ኢንቴ ሙጹዋታ፥ ኢንቴ ኣዲኔቲዳ ኣዲና ኡባ ኤሃንዴታ።
DEU 12:12 ኢንቴ ማጫ ናይታራኔ ኢንቴ ኣቱማ ናይታራ፥ ኢንቴስ ኦꬂዛ ማጫሳታራኔ ኣቱማሳታራ፥ ኢንቴናራ ጺንጾ ጊሼቲ ኤኮንታ ባንታ ባንታ ካታማን ካታማን ዲዛ ሌዌ ቆሞታራ ጎዳ ኢንቴ ጾሳ ሲንꬃን ኢንቴ ኡፋዬታና።
DEU 12:13 ኢንቴ ጾሳስ ጹጊ ያርሺዛ ያርሾ ቤቶሶን ጮ ያርሾንታ ማላ ናጌቲቴ።
DEU 12:14 ኢንቴ ኢንቴ ዜሬꬃቲ ዲዛሶ ኡባፌ ኢሳን ጎዳይ ዶሪዳሶን ጻላ ጹጌቲዛ ያርሾ ያርሺቴ፤ ታኒ ኢንቴና ኣዛዚዛ ሚሽ ኡባካ ሄን ኦꬂቴ።
DEU 12:15 ጊዲኮካ ጎዳ ኢንቴ ጾሳይ ኢንቴና ኣንጂዳ ኬና ኢንቴ ካታማታፔ ኣዋይሳንካ ኢንቴ ሜሄፔ፥ ዎይኮ ጋራፔ ዎይኮ ጌኔሳፌ ሹኪዲ ኢንቴ ኮዪዳ ኬና ማና ዳንዳዬታ፤ ሃ ኣሾዛፔ ዎጋይ ጊዛ ማላ ጌዪዳ ኣሲ ጊዲን ዎይኮ ጌዮንታ ኣሲ ኡባይ ማና ዳንዳዬስ።
DEU 12:16 ጊዶ ኣቲን ኢስታ ሱꬅ ሞፒቴ፤ ሱꬃዛ ሃꬃ ማላ ዱጌ ጋዴን ጉሲቴ።
DEU 12:17 ኢንቴ ኢንቴ ካꬃፌ፥ ዎይኔ ኡሻፌኔ ዎጋራ ዛይቴፔ ኢሚዛ ኣስራታ፥ ኢንቴ ሚዛታፔ፥ ዶርሳታፔ፥ ዴይሻታፔ ባይራ፥ ጎዳስ ኢንቴ ኢማናስ ኣዲኔቲዳ ኣዲና ኡባኔ ኢንቴ ኢንቴ ዶሳን ሚሽ ኡባካ ኢንቴ ዲዛሶ ኣዋንካ ሞፒቴ።
DEU 12:18 ጎዳ ኢንቴ ጾሳይ ዶሪዳሶን ኢንቴ ማጫ ናይታራኔ ኣቱማ ናይታራ፥ ኢንቴ ማጫ ኣይሌታራኔ ኣቱማ ኣይሌታራ፥ ሄሳꬆካ ኢንቴ ካታማታን ዲዛ ሌዌ ቆሞታራ ኢሲፌ ጎዳ ኢንቴ ጾሳ ሲንꬃን ሚቴ፤ ኢንቴ ዳቡርዲ ሺሺዳ ሚሽ ኡባን ጎዳ ኢንቴ ጾሳ ሲንꬃን ሄን ኡፋዬታና።
DEU 12:19 ኢንቴ ኢንቴ ቢታን ዲዛ ዎዴ ኡባን ሌዌ ቆሞታ ዬጊ ኣጎንታ ማላ ናጌቲቴ።
DEU 12:20 ጎዳ ኢንቴ ጾሳይ ኢንቴስ ጫቂዳ ቃላ ማላ ኢንቴ ዛዋ ኣሲዛ ዎዴ ኢንቴና ኣሾ ኣሞሲኮ ኢንቴ ኮዪዳ ኬና ማና ዳንዳዬታ።
DEU 12:21 ጎዳ ኢንቴ ጾሳይ ባ ሱንꬃይ ጼይጌታና ማላ ዶሪዳሶይ ኢንቴፌ ሃኮን ዲኮ ኢንቴና ኢዚ ኣዛዚዳ ማላ ሚዛታፔ፥ ዶርሳታፔ ሹኪዲ ኢንቴ ዲዛ ካታማታን ኢንቴ ኮዪዳ ኬና ኣሾዛ ማና ዳንዳዬታ።
DEU 12:22 ዎጋይ ጊዛ ማላ ጌሻ ኣስ ጊዲን ዎይኮ ጌዮንታ ኣስ ጊዲን ኦኒካ ጋራ ኣሾ ዎይኮ ጌኔሳ ኣሾ ሚዛ ማላ ሄ ኣሾዛ ማናስ ዳንዳዬስ።
DEU 12:23 ጊዶ ኣቲን ሼምፖይ ሱꬃን ዲዛ ጊሻስ ሱꬃራ ዲዛ ኣሾ ሞንታ ማላ ናጌቲቴ፤ ሄሳ ጊሻስ ሼምፖ ሱꬃራ ጋꬂ ሞፒቴ።
DEU 12:24 ሱꬃ ጋዴን ጉሲቴ ኣቲን ሞፒቴ።
DEU 12:25 ኢንቴሲኔ ኢንቴ ናይታስ ሎኦ ጊዳና ማላ ሱꬅ ሞፒቴ፤ ኢንቴ ሄሳꬆ ኦꬂኮ ጾሲ ኡፋዬታና።
DEU 12:26 ሄሳ ጊሻስ ኢንቴ ጎዳ ኢንቴ ጾሳስ ኢማናስ ዱማሲዳይሳኔ ኣዲኔቲዳይሳ ኤኪዲ ዶሬቲዳሶ ኤፍቴ።
DEU 12:27 ጹጌቲዛ ያርሾዛ፥ ኣሻኔ ሱꬃ ኡባ ጎዳ ኢንቴ ጾሳስ ያርሾ ያርሺዛሶዛ ቦላ ሺሺቴ፤ ሱꬃዛ ጎዳ ኢንቴ ጾሳስ ያርሾ ያርሺዛሶሆታ ቦላ ጉሲቴ፤ ኣሾዛ ጊዲኮ ኢንቴ ሚቴ።
DEU 12:28 ኢንቴሲኔ ኢንቴ ናይታስ ሜርናስ ሎኦ ጊዳና ማላ ኢዚ ኢንቴና ኣዛዚዛ ኣዛዞታ ሎኤꬂ ናጊቴ፤ ኢንቴ ሄሳꬆ ኦꬂኮ ጎዳ ኢንቴ ጾሳ ሲንꬃን ሎኦኔ ሱሬ ጊዲዳ ኦሶ ኦꬄታ።
DEU 12:29 ኢንቴ ላታናስ ቢዛ ካዎቴꬃታ ጎዳ ኢንቴ ጾሳይ ኢንቴ ሲንꬃፌ ꬋይሲዛ ዎዴኔ ኢንቴካ ኢስታ ቢታ ላቲዲ ዴኢዛ ዎዴ፥
DEU 12:30 ኢስቲ ኢንቴ ሲንꬃፌ ꬋይዳፔ ጉዬ፥ «ሃይቲ ሃ ካዎቴꬃቲ ባንታ ኤቃ ጾሳታስ ዎስቲ ጎይኒዞ? ኑኒካ ኢስታይሳꬆ ኦꬃና» ጊዲ ዎጺማዴን ኦይኬቶንታ ማላ ናጌቲቴ።
DEU 12:31 ኢንቴ ጎዳ ኢንቴ ጾሳስ ጎይኒዛ ጎይኖይ ኣይዛቤቲ ጎይኒዛ ጎይኖ ማላ ጊዳናስ ቤሴና፤ ኢስቲ ባ ኤቃ ጾሳታስ ጎይኒሼ ኦꬂዛ ኦሶቲ ኡባይ ኬሂ ሻቲዛዚኔ ጎዳ ማታን ኢጼቲዳዛ፤ ጋሶይካ ኢስቲ ባ ዬሊዳ ናይታካ ባንታ ኤቃ ጾሳታስ ያርሾ ኦꬂዲ ታማን ጹጌቴስ።
DEU 12:32 ሄሳ ጊሻስ ታ ኢንቴና ኣዛዚዳ ኣዛዞ ኡባ ኦꬂቴ፤ ኢስታ ቦላ ኣይኮካ ጉጆፍቴ፤ ቃሴካ ኢስታፌ ኢሲኖካ ፓጪሶፒቴ።
DEU 13:1 ኢንቴ ጊዶፌ ካዪዛ ኣሲ ዎይኮ ኣጉሞ ኣጉሜቲዛ ኣሲ፥ «ታኒ ጊታ ማላታ ዎይኮ ማላሊሲዛ ሚሽ ኦꬃና» ጊኮ፥
DEU 13:2 ኢዚ ዮቲዳ ጊታ ማላታይኔ ማላሊሲዛ ሚሽ ኡባይ ቱሙካ ፖሌቲን ኢዚ ኢንቴና፥ «ኣኔ ኢንቴ ኤሮንታ ሃራ ጾሳታስ ጎይኖስ» ጊኮ፥
DEU 13:3 ጎዳ ኢንቴ ጾሳይ ኢንቴ ኢዛ ኩሜꬃ ዎዚናፔኔ ኩሜꬃ ሼምፖፌ ዶሲዛኮ ኤራናስ ኮዪዲ ሄ ካዪዛይሳ ዬዲዳ ጊሻስ ኢዚ ጊዛይሳ ሙሌካ ሲዮፒቴ።
DEU 13:4 ጎዳ ኢንቴ ጾሳ ካሊቴ፤ ኢዛስ ጻላ ያዪቴ፤ ኢዛ ኣዛዞታ ናጊቴ፤ ኢዛ ቃላ ሲዪቴ፤ ኢዛስ ጻላ ጎይኒቴ፤ ኢንቴስ ኢዛራ ዲዛ ኢሲፌቴꬂ ሚኖ ጊዶ።
DEU 13:5 ካሴ ኢንቴ ኣይሌቴꬃን ዲዛ ጊብጼፔ ኢንቴና ዎዚ ኬሲዲ ኣሺዳ ጎዳ ኢንቴ ጾሳ ቦላ ኢንቴ ማካላና ማላ ኣጉሞ ዮቲዛዴ ዎይኮ ታ ናቤ ጊዛ ኡባ ዎꬊቴ፤ ሄሳ ማላ ኣሳቲ ጎዳ ኢንቴ ጾሳይ ኢንቴና ሚኒ ኤቃና ማላ ኣዛዚዳ ኦጌፔ ካሬ ኬሳናስ ቆፔቴስ፤ ሄሳ ጊሻስ ሃይታ ኢታታ ኢንቴ ጊዶፌ ዲጊቴ።
DEU 13:6 ኢንቴ ኣዪ ና ኢሻይ፥ ኢንቴ ኣቱማ ናይቲኔ ኢንቴ ማጫ ናይቲ፥ ኢንቴ ሲቂዛ ኢንቴ ማቼቲ፥ ኢንቴ ሲቂዛ ኢንቴ ላጌቲ ኢንቴና፥ «ካሴ ኢንቴኒኔ ኢንቴ ኣዋቲ ጎይኒ ኤሮንታ ጾሳስ ኣኔ ጎይኖስ» ጊኮ፥
DEU 13:7 ቢታስ ሃ ጋጻፔ ሄ ጋጻ ጋካናስ ዲዛ ኢንቴ ዩሾ ኡባን ማታኒኔ ሃኮን ዲዛ ኡባ ኣሳይ ጎይኒዛ ጾሳታስ፥ «ቢዲ ኣኔ ኢስታስ ጎይኖስ» ጊዲ ባሌꬂኮ፥
DEU 13:8 ኢንቴ ሄሳ ማላ ኣሳታስ ኤኖ ጎፒቴ፤ ኢስቲ ጊዛይሳካ ሲዮፒቴ፤ ሄሳ ማላ ኣሳታስ ቃꬌቲዲ ኢስታ ኣሻናስ ዳፌቶፍቴ።
DEU 13:9 ሲꬎንታ ኢስታ ዎꬊቴ፤ ሄሳ ማላ ኣስ ኮይሮቲዲ ኢንቴ ጫዲቴ፤ ሃራቲ ኢንቴፌ ካሊዲ ሹቻራ ጫዴቶ።
DEU 13:10 ኢንቴ ካሴ ጊብጼ ቢታን ኣይሌቴꬃን ዲዛሶፔ ኢንቴና ዎዚ ኬሲዳ ጎዳ ኢንቴ ጾሳፌ ኢንቴና ሃሳናስ ኮዪዳ ጊሻስ ሄሳዴይ ሃይቃና ጋካናስ ሹቻን ኩራኪቴ።
DEU 13:11 ሄሳፌ ጉዬ ኢስራኤሌ ኣሳይ ኡባይ ሄሳ ሲዪዲ ባባና፤ ሄሳ ጊሻስ ሄሳ ማላ ኢታ ኦሶ ናምኣንꬆ ኦኒካ ኦꬄና።
DEU 13:12 ጎዳ ኢንቴ ጾሳይ ኢንቴ ዳና ማላ ኢንቴስ ኢሚዛ ካታማታፔ ኢሳን ኢንቴ ዲዛ ዎዴ፥
DEU 13:13 ኢንቴ ኣሳ ጊዶፌ ኢታቲ ዴንዲዲ ኣሳ፥ «ኣኔ ቢዲ ኢንቴ ኤሮንታ ጾሳታስ ጎይኖስ» ጊዲ ባሌꬂሺን ሲዪኮ፥
DEU 13:14 ኢንቴ ሄሳ ሄ ዮኦዛ ኦይቺቴ፤ ሚንꬂካ ቆሪቴ፤ ሃይሲ ኢታ ሃኖይ ኢንቴ ጊዶን ኦሴቲዳይሲ ቱሙ ጊዲኮ፥
DEU 13:15 ሄ ካታማይን ዲዛ ኣሳ ኡባ ማሻን ሲፊ ꬋይሲቴ፤ ሄ ካታማዮኔ ኢዚን ዲዛ ሜሃ ኩሜꬅ ኣሾንታ ꬋይሲቴ።
DEU 13:16 ሄ ካታማይን ዲዛ ኣሳ ኣቆታ ኡባ ኤኪዲ ሄ ካታማይ ጊዶን ዲዛ ዱቡሻን ሺሺ ዶሪቴ፤ ሂስቲዲ ጎዳ ኢንቴ ጾሳስ ያርሾ ኦꬂዲ ታማን ጹጊቴ፤ ሄ ካታማያ ናምኣንꬆ ሲማ ኤቆንታ ማላ ሜርናስ ላሌታ ኣቱ።
DEU 13:17 ፒላ ሚሻፌ ኣይኮይካ ኢንቴ ኩሼን ቤቶፎ፤ ሂስቲኮ ጎዳይ ባ ዎልቃማ ሃንቆፌ ሲሚዲ ኢንቴና ማራና፤ ኢዚ ኢንቴስ ቃꬌታና፤ ካሴ ኢንቴ ኣዋታስ ጌሊዳ ቃላ ማላ ኢንቴ ቆዳ ዳርሳና።
DEU 13:18 ጋሶይካ ታኒ ሃች ኢንቴና ኣዛዚዛ ኣዛዞ ኡባ ኢንቴ ናጊዲ ጎዳ ኢንቴ ጾሳስ ኣዛዜቲኮ፥ ቃሴ ጎዳ ኢንቴ ጾሳ ሲንꬃንካ ሱሬ ኦሶ ኦꬂኮ ሄ ኢዚ ጌሊዳ ሂዶታ ቃላይ ኢንቴስ ቱሙ ፖሌታና።
DEU 14:1 ኢንቴ ጎዳ ኢንቴ ጾሳ ናይታ፤ ሄሳ ጊሻስ ሃይቂዳ ኣሳስ ሚሼቲዲ ኢንቴ ቦላ ቃጪ ማዱንꬆፍቴ፤ ኢንቴ ሁኤ ቢናናካ ቡጮፍቴ።
DEU 14:2 ጋሶይካ ኢንቴ፥ ጎዳ ኢንቴ ጾሳስ ዱማ ዴሬ፤ ጎዳይ ቢታ ቦላ ዲዛ ዴሬ ኡባፌ ኢንቴ ኢዛስ ዱማ ዴሬ ጊዳና ማላ ኢዚ ኢንቴና ባስ ዶሪዴስ።
DEU 14:3 ቱና ጊዲዳዝ ኣይ ሚሼካ ሞፒቴ።
DEU 14:4 ሄሳ ጊሻስ ማና ማላ ኢንቴስ ኢሜቲዳ ሜዶሳቲ ሄኮ ሃይሳፌ ካሊ ዲዛይታ፤ ካጬራ ዲዛይታፔ ሚዝ፥ ዶርሲኔ ዴይሽ፥
DEU 14:5 ጌኔሳ፥ ዶጌ፥ ዉሻ፥ ዎራ ዴይሽ፥ ጮፎሾ፥ ጋራ፥ ጫጎኔ ቢሆሬ ሚቴ።
DEU 14:6 ቂንጪፊሌይ ጳልቄቲዳይታኔ ባንቺኪዛይታ ኡባ ሚቴ።
DEU 14:7 ጊዶ ኣቲን ቂንጫፊሌይ ጳልቄቶንታይታኔ ባንቺኮንታይታ ሞፒቴ፤ ሄይቲካ ጋሜላ፥ ሃርባይኖኔ ጉፓሌ ሞፒቴ፤ ሄይታንታ ማላ ሜዶሳቲ ባንቺኪዛ ጊዲኮካ ኢስታ ቂንጪፊሌይ ሙሜ ጊዲዳ ጊሻስ ቱና ጊዲ ቆዴቴቴስ።
DEU 14:8 ጉዱንꬃ ቂንጪፊሌይ ጳልቄꬅ ጊዲኮካ ባንቺኮንታ ጊሻስ ኢዚ ሃንኮ ቱናታራ ኢሲፌ ቆዴቴስ፤ ሃይታንታ ማላ ሜዶሳታ ሞፒቴኔ ኢስታስ ኣሃካ ቦቾፍቴ።
DEU 14:9 ሃꬃ ጊዶን ዲዛ ሜꬌቴꬃ ኡባፌ ቄፌራ ዲዛይታኔ ፖቆይ ዲዛይታ ኡባ ሚቴ።
DEU 14:10 ጊዶ ኣቲን ሃꬃ ጊዶን ሜꬌቴꬃ ኡባፌ ቄፌይኔ ፖቆይ ባይንዳይታ ሞፒቴ፤ ሄይቲ ኢንቴስ ቱና ጊዴቶ።
DEU 14:11 ካፎታፔ ጌሻታ ሚቴ።
DEU 14:12 ሜቴታናስ ቤሶንታይቲ ጎሌ፥ ቆሎ፥ ኣንኮ፥
DEU 14:13 ዱማ ዱማ ጺሎታኔ ዎሌታ፥
DEU 14:14 ዱማ ዱማ ቁሮታ፥
DEU 14:15 ያንቻ፥ ጫንጬ ጉቶ፥ ሃꬃ ካፎ፥ ጋጬ ዛሬ ኡባ፥
DEU 14:16 ጉቶ፥ ሃዞ፥ ዎዪኖ
DEU 14:17 ባዞ ጉቶ፥ ኣንኮ፥ ቢያ፥
DEU 14:18 ዚጊሌ፥ ሳቢሳ ጌቴቲዛ ካፎ ዛሬ ኡባ፥ ጂንጂላቴ ጌቴቲዛ ካፎኔ ዉርካዉርኮ።
DEU 14:19 ቄፌራ ዲዛ ቄሪ ሜꬌቴꬃቲ ኡባይ ኢንቴስ ቱና ጊዲዳ ጊሻስ ኢስታ ሞፒቴ።
DEU 14:20 ጊዶ ኣቲን ኢስታ ጊዶፌ ጌሻታ ሚቴ።
DEU 14:21 ጎዳ ኢንቴ ጾሳስ ኢንቴ ዱማቲዳ ዴሬ ጊዲዳ ጊሻስ ባዉቲ ሃይቂዳ ሜሄ ኣሾ ሞፒቴ፤ ሃራ ዴሬፔ ዪዲ ኢንቴ ጊዶን ዲዛይቲ ማና ጊኮ ዲጎፍቴ፤ ዎይኮ ሃራ ዴሬ ኣሳስ ባይዛና ዳንዳዬታ። ዴይሻ ላቃ ኢዛ ኣዬይ ማꬃን ዶይሶፍቴ።
DEU 14:22 ኢንቴ ላይꬃን ላይꬃን ጎዪዲ ዴሚዛ ካꬃፌ ታማፌ ኢሲ ኩሼ ዱማ ሻኪ ዎꬂቴ።
DEU 14:23 ኢንቴ ኡባ ዎዴ ጎዳ ኢንቴ ጾሳ ቦንቾ ታማራና ማላ ኢዚ ባ ሱንꬂ ጼይጌታና ማላ ዶሪዳሶን ኢንቴ ካꬃ፥ ዎይኔ ኡሻኔ ዛይቴ ኣስራታ፥ ኢንቴ ዶርሳታፔኔ ሜሄታፔ ኮይሮ ዬሌቲዳይታ ጎዳ ኢንቴ ጾሳ ሲንꬃን ሚቴ።
DEU 14:24 ጎዳ ኢንቴ ጾሳይ ባ ሱንꬂ ጼይጌታና ማላ ዶሪዳሶዚ ኢንቴ ዲዛሶፔ ኬሂ ሃሆ ጊዲኮ ጎዳ ጾሳይ ኢንቴና ኣንጃና ማላ ኢንቴ ኢንቴ ኣስራታ ሄ ቶኪ ኤኪዲ ባናስ ዳንዳዮንታ ኢጺኮ፥
DEU 14:25 ሄ ኢንቴ ኬሲዳ ኣስራታ ባይዚዲ ሚሼዛ ጎዳይ ዶሪዳሶዛ ኤኪዲ ቢቴ።
DEU 14:26 ሂስቲዲ ሄን ሄ ኣስራታ ሚሻራ ኢንቴ ኮዪዳ ሚሽ፥ ሚዝ ጊዲን ዎይኮ ዶርስ፥ ዎይኔ ኡሹ ጊዲን ዎይኮ ሎኦ ሚኖ ኡሹ ኢንቴ ኮዪዳ ማላ ሻሚዲ ኢንቴሶ ኣሳ ኡባራ ሚሼ ጎዳ ኢንቴ ጾሳ ሲንꬃን ኡፋዬቲቴ።
DEU 14:27 ሄሳ ኢንቴ ኦꬂዛ ዎዴ ኢንቴ ካታማን ዲዛ ሌዌ ቆሞታ ጊሻን ጋኪዳ ጺንጾይ ባይንዳ ጊሻስ ኢንቴ ኢስታ ዬጊ ኣጎፍቴ።
DEU 14:28 ሄꬓንꬆ ላይꬃን ላይꬃን ኡባ ዎዴ ኢንቴ ካꬃፌ ኬሲዛ ዱማ ኣስራታ ኢንቴ ዲዛ ካታማታን ሺሺቴ።
DEU 14:29 ሄሳካ ኢንቴ ካታማታን ዲዛ ጺንጾይ ባይንዳ ሌዌቲ፥ ቤቴቲ፥ ኣዋይ ባይንዳ ናይቲኔ ኣምኤቲ ዪዲ ሜቶ፤ ኢንቴ ሄሳꬆ ኦꬂዛ ጊዲኮ ጎዳ ኢንቴ ጾሳይ ኢንቴ ኦሶ ኡባን ኢንቴና ኣንጃና።
DEU 15:1 ላፑንꬃ ላፑንꬃ ላይꬃ ዉርሴꬃን ኢንቴፌ ታልኢዳይታስ ኣጮዛ ኢስታስ ኣጋጊቴ።
DEU 15:2 ኣጊሼ ሂስቲ ኣጊቴ፤ ባ ባጋ ኢስራኤሌ ኣሳስ ሚሼ ታልኢዳዴይ ዉሪ ባ ታልኢዳይሳ ኢዛዴስ ማሮ፤ ጎዳይ ኣጮይ ማሬቲዛ ላይꬃ ጊዲ ኣዋጂዳ ጊሻስ ባ ታልኢዳ ሚሻ ዛሪ ኤካናስ ኮዮፖ።
DEU 15:3 ሃራ ካሬ ዴሬ ኣሳስ ኢንቴ ታልኢዳ ሚሼይ ዲኮ ኢንቴስ ዛራና ማላ ኦይቻና ዳንዳዬታ፤ ኢንቴስ ኢሻ ኢስራኤሌ ኣሳታፔ ኢንቴፌ ሚሼ ታልኢዳይ ዲኮ ኢስታስ ኣጋጊቴ።
DEU 15:4 ሃች ታ ኢንቴና ኣዛዚዛ ኣዛዞታ ኡባን ጎዳ ኢንቴ ጾሳስ ኢንቴ ኣዛዜቲዛይታ ጊዲኮ ጎዳ ኢንቴ ጾሲ ኢንቴና ኬሂ ኣንጃና ጊሻስ ኢዚ ኢንቴስ ጺንጾ ሂስቲ ኢሚዛ ቢታይን ኢንቴ ጋርሳን ማንቆይ ዴና።
DEU 15:6 ጎዳ ኢንቴ ጾሳይ ኢንቴስ ሂዶታ ቃላ ማላ ኢንቴና ኣንጃና፤ ኢንቴ ዳሮ ዴሬታስ ታልኣናሺን ኢስታፌ ኦናፔካ ታልኤ ሃ ኤኬታ፤ ቃሴካ ኢንቴ ካዎቴꬃታ ሃራና ኣቲን ኦኒካ ኢንቴና ሃሬና።
DEU 15:7 ጎዳ ኢንቴ ጾሳይ ኢንቴስ ኢሚዛ ቢታን ኢንቴ ዲዛ ካታማታ ኡባን ኢስራኤሌ ኣሳፔ ኢሳዴይ ሜቶቲሺን ቤኢኮ ኢዚ ኢንቴ ባጋ ጊዲዳ ጊሻስ ኢዛስ ሜቄꬅ ኢቶፒቴ፤ ቃሴ ኢዛ ማዳናፔ ኢንቴ ኩሼ ጉዬ ኤኮፍቴ።
DEU 15:8 ኢንቴ ኩሼ ሚጪዲ ኢዛስ ኮሺዛዝ ኡባ ሞꬌቶንታ ታልኢቴ።
DEU 15:9 «ኣጮ ቃንጾፌ ማሪዛ ላፑንꬃ ላይꬃይ ጋኪዴስ» ጊዲ ሜቶታንቻ ኢንቴ ኢሻታ ታልኤ ዲጎፍቴ፤ ሄሳ ማላ ኢታ ቆፋይ ኢንቴ ዎዚናን ጌሎፖ፤ ማንቆ ጊዲዳ ኢንቴ ኢሻታስ ኢንቴ ታልኦንታ ኢጺኮ ኢስቲ ፑዴ ጾሳኮ ዋሲን ኢንቴስ ጎሜ ጊዶንታ ማላ ናጌቲቴ።
DEU 15:10 ኢንቴ ኢዛስ ጮ ኪያቴꬅ ኢሚቴ፤ ኢንቴ ኢዛስ ኢሚሼ ኢንቴ ዎዚናን ሞꬌቶንታ ኢሚቴ፤ ሂስቲኮ ኢንቴ ኦሶ ኡባኒኔ ኢንቴ ኩሼይ ቦቺዳ ሚሽ ኡባን ጎዳ ኢንቴ ጾሳይ ኢንቴና ኣንጃና።
DEU 15:11 ኣይ ዎዴ ጊዲንካ ቢታ ቦላ ሜቶታንቻይኔ ማንቆይ ዲዛ ጊሻስ ኢንቴ ዴሬን ዲዛ ማንቆታሲኔ ሜቶታንቻታስ ኢንቴ ኪያቴꬅ ኦꬃና ማላ ታ ኣዛዛይስ።
DEU 15:12 ኣዴ ጊዲን ማጫ ጊዲን ኔ ባጋ ጊዲዳ ኢስራኤሌ ኣሳፔ ኢሲ ኣሲ ኣይሌታናስ ባና ኔስ ባይዚኮ ኢዚ ኔስ ኡሱፑን ላይꬅ ኦꬂዳፔ ጉዬ ላፑንꬃ ላይꬃን ኢዛ ኣይሌቴꬃፌ ኬሳ ዬዳ።
DEU 15:13 ኔኒ ኣይሌቴꬃፌ ኢዛ ኬሳ ዬዲዛ ዎዴ ሜላ ኩሼ ዬዶፋ።
DEU 15:14 ጎዳ ኔ ጾሳይ ኔስ ኢሚዳ ኣንጆፌ፥ ዶርሳታፔ፥ ካꬃፌኔ ዎይኔ ኣይፌፔ ኢዛስ ኪያቴꬃን ኢማዳ ዬዳ።
DEU 15:15 ኢንቴካ ካሴ ጊብጼ ቢታን ኣይሌ ጊዲዳይሳኔ ጎዳ ኢንቴ ጾሳይ ኢንቴና ሄፔ ዎዚዳይሳ ዶጎፕቴ፤ ታኒ ኢንቴና ሃች ኣዛዚዛይ ሄሳሳ።
DEU 15:16 ጊዶ ኣቲን ሄ ኣይሌዚ ኔናኔ ኔሶ ኣሳ ዶሲዳ ጊሻሲኔ ኔናራ ዱሲ ኢዛስ ሎኦ ጊዲዳ ጊሻስ፥ «ታ ኔፔ ሻኬታና ኮይኬ» ጊኮ፥
DEU 15:17 ኔኒ ኢዛ ኔሶ ፔንጌ ኤፋዳ ኢዛ ሃይꬃ ኔ ፔንጌ ሳንቃ ቦላ ዎꬃዳ ዎስፌራ ሉካ፤ ሄሳፌ ጉዬ ኢዚ ባ ዴኦ ላይꬅ ኡባን ኔስ ኣይሌ ጊዶ፤ ቃሴካ ኣይሌ ጊዲዛ ማጫሳስካ ሄሳꬆ ኦꬃ።
DEU 15:18 ኔ ኢዛ ኣይሌቴꬃፌ ኬሳ ዬዲዛ ዎዴ፥ «ሃይሲ ታስ ቆሆ» ጋዳ ቆፖፋ፤ ጋሶይካ ኢዚ ሃ ኡሱፑን ላይꬃን ሚሻስ ኦꬂዛ ኣሲ ኦꬂዛ ኦሶፔ ዳኮ ዳርሲዲ ኔስ ኦꬂዴስ፤ ሄሳ ጊሻስ ኔ ሄሳꬆ ኦꬂኮ ጎዳ ኔ ጾሳይ ኔ ኦꬂዛ ኦሶ ኡባን ኔና ኣንጃና።
DEU 15:19 ኔኒ ኔ ሜሃፔኔ ኔ ዶርሳ ዉዳፔ ባይራ ዬሌቲዳ ኣዴ ኡባ ጎዳ ኔ ጾሳስ ዱማሳ፤ ኢስታ ኣይኮስካ ጎኤቶፋ፤ ሄሳꬆካ ዶርሳ ዉዳፔ ባይራ ዬሌቲዳይታ ኢስኬካ ቃንጾፋ።
DEU 15:20 ኔኒኔ ኔሶ ኣሳይ ጎዳ ኔ ጾሳይ ዶሪዳሶሆን ጎዳ ኢንቴ ጾሳ ሲንꬃን ላይꬃን ላይꬃን ሄይታ ሚቴ።
DEU 15:21 ጊዶ ኣቲን ኔ ያርሺዛ ሜሄታ ቦላ ዎሶይ ቤቲኮ፥ ሄሲካ ቶሆ ሲላ ዎይኮ ቆቄ፥ ቃሴካ ሃራ ኢታ ቦሪዛዚ ኢስታ ቦላ ዲኮ ሄሳንታ ጎዳ ኔ ጾሳስ ያርሾ ሺሾፋ።
DEU 15:22 ሄይታንታ ማላ ሜሄታ ሄን ኢንቴሶን ማናስ ዳንዳዬታ፤ ዎጋይ ጊዛ ማላ ጌሻ ኣስ ጊዲን ዎይኮ ቱና ኣስ ጊዲን ጌኔሳ ኣሾኔ ጋራ ኣሾ ሚዛ ማላ ማና ዳንዳዬታ።
DEU 15:23 ጊዶ ኣቲን ኢስታ ሱꬃ ሃꬃ ማላ ዎራ ጉሲቴ ኣቲን ሞፒቴ።
DEU 16:1 ጎዳ ኢንቴ ጾሳይ ኢንቴና ኣቢቤ ኣጊናን ኦማርሳራ ጊብጼፔ ኬሲዴስ፤ ሄሳ ጊሻስ ኣቢቤ ኣጊናን ጎዳ ኢንቴ ጾሳ ፓዚጋ ባኣሌ ቦንቺቴ።
DEU 16:2 ጎዳ ኢንቴ ጾሳይ ባ ሱንꬂ ጼይጌታና ማላ ዶሪዳሶን ኢንቴ ኢዛ ቦንቻና ማላ ኢንቴ ሜሄፔ፥ ዎይኮ ዶርሳፌ ኢሳ ፓዚጋ ባኣሌን ያርሾ ሺሺቴ።
DEU 16:3 ሄ ያርሾ ካꬃ ኢንቴ ሚዛ ዎዴ ኢርሾይ ኢዛን ጌሊዳ ካꬅ ሞፒቴ፤ ሄሳꬆካ ካሴ ኢንቴ ኤሶን ጊብጼፔ ኬዚዛ ዎዴ ኦꬆይሳ ማላ ላፑን ጋላስ ጋካናስ ኢርሾይ ኢዛን ጌሎንታ ዋዬ ኡኬꬅ ሚቴ፤ ሄሲካ ኢንቴ ዳሮ ሜቶ ቤኢዲ ጊብጼ ቢታፌ ኬዚዳ ጋላሳ ኢንቴና ቆፍሳና።
DEU 16:4 ላፑን ጋላስ ጋካናስ ኢንቴ ዴሬን ኣይ ኣሳ ኬꬃንካ ኢርሾይ ዶፖ፤ ኢንቴ ኮይሮ ጋላሳ ኦማርስ ያርሾስ ሹኪዳ ኣሾ ኡባይ ሄ ጋላስ ሜቴቲ ዉራና ቤሴስ።
DEU 16:5 ኢንቴ ፓዚጋ ያርሾ ጎዳ ኢንቴ ጾሳይ ኢንቴስ ኢሚዛ ኣይ ካታማታንካ ጮ ሹኮፍቴ።
DEU 16:6 ጊዶ ኣቲን ጎዳ ኢንቴ ጾሳይ ባ ሱንꬃይ ጼይጌታና ማላ ዶሪዳሶን ጻላ ሹኪቴ፤ ሹኪሼ ኣርሼይ ዉሊዛ ዎዴ ኢንቴ ካሴ ጊብጼፔ ኬዚዳ ጋላሳዮኔ ሳቴዮ ናጊዲ ሹኪቴ።
DEU 16:7 ሄ ሹኪዳ ኣሾዛ ጎዳ ኢንቴ ጾሳይ ዶሪዳሶን ጺጺ ሚቴ፤ ዎንቴꬃ ጋላስ ጌዴ ኢንቴ ዱንካኔን ዱንካኔን ሲሚቴ።
DEU 16:8 ኡሱፑን ጋላስ ኢርሾይ ኢዛን ጌሎንታ ኡኬꬅ ሚቴ፤ ላፑንꬆ ጋላስ ጎዳ ኢንቴ ጾሳስ ጎይናናስ ኢሲሶ ሺቂቴ፤ ሄ ጋላስ ኣይ ኦሶካ ኦꬆፍቴ።
DEU 16:9 ኢንቴ ካꬅ ሺሻናስ ኮይሮ ዶሚዳ ጋላሳፌ ቢዲ ላፑን ሳሚንታ ኩሜꬅ ቆዲቴ።
DEU 16:10 ሄሳፌ ጉዬ ጎዳ ኢንቴ ጾሳይ ኢንቴና ኣንጂዳ ኬና ኢንቴ ኢንቴ ዶሳን ኢሞታ ኤሂዲ ጎዳ ኢንቴ ጾሳስ ካꬃ ሺሾ ባኣሌ ቦንቺቴ።
DEU 16:11 ሄሳን ኢንቴ ኢንቴ ኣቱማ ናይታራኔ ኢንቴ ማጫ ናይታራ፥ ኢንቴ ኣቱማ ኣይሌታራኔ ማጫ ኣይሌታራ፥ ኢንቴ ካታማን ዲዛ ሌዌታራኔ ቤቴ ኣሳታራ፥ ኢንቴ ጊዶን ዲዛ ዪኦታራኔ ኣምኤታራ ኡባይ ጎዳ ኢንቴ ጾሲ ባ ሱንꬂ ጼይጌታና ማላ ዶሪዳሶን ኡፋዬቲቴ።
DEU 16:12 ካሴ ኢንቴ ጊብጼን ኣይሌ ጊዲዳይሳ ዩሺ ቆፒዲ ሃይታ ዎጋታ ሎኤꬂ ናጊቴ።
DEU 16:13 ኢንቴ ካꬅ ባሌፔ ጌልꬂዳፔ ጉዬ ቃሴካ ዎይኔ ጉምኢዛሶሆፔ ኤኪዳፔ ጉዬ ላፑን ጋላስ ጋካናስ ዳሴ ባኣሌ ቦንቺቴ።
DEU 16:14 ሄሳን ኢንቴ፥ ኢንቴ ኣቱማ ናይታራኔ ኢንቴ ማጫ ናይታራ፥ ኢንቴ ኣቱማ ኣይሌታኔ ማጫ ኣይሌታራ፥ ኢንቴ ካታማን ዲዛ ሌዌታራኔ ቤቴ ኣሳታራ፥ ኢንቴ ጊዶን ዲዛ ዪኦታራኔ ኣምኤታራ ኡባይ ኡፋዬቲቴ።
DEU 16:15 ጎዳ ኢንቴ ጾሳይ ዶሪዳሶን ላፑን ጋላስ ጋካናስ ኢዛስ ባኣሌ ቦንቺቴ፤ ጎዳ ኢንቴ ጾሳይ ኢንቴ ካꬃኔ ኢንቴ ኦꬂዛ ኦሶ ኡባን ኢንቴና ኣንጃና፤ ኢዛን ኢንቴ ኡፋዬታና።
DEU 16:16 ኢንቴ ቢታን ዲዛ ኣቱማ ኣስ ጊዲዳ ኡባይ ላይꬃን ሄꬑቶ ፓዚጋ ባኣሌ ዎዴ፥ ካꬃ ሺሾ ባኣሌ ዎዴኔ ዳሴ ባኣሌ ዎዴ ጎዳ ኢንቴ ጾሳይ ኢዚ ዶሪዳሶ ኢዛ ሲንꬅ ሺቆ፤ ባኣሌዛ ቦንቻና ዪሼ ኦኒካ ጮ ሜላ ኩሼ ጎዳ ሲንꬅ ዮፖ።
DEU 16:17 ኢሲ ኢሲ ኣሲ ኤኪ ያና ኢሞታይ ጎዳ ኢንቴ ጾሳይ ኢዛዴ ኣንጂዳ ኬና ጊዶ።
DEU 16:18 ኢንቴ ዛሬቲ ኡባይ ጎዳ ኢንቴ ጾሳይ ኢሚዛ ካታማታን ኡባን ኢንቴ ዳናታኔ ሃላቃታ ሱንꬂቴ፤ ኢስቲካ ኣሳስ ጺሎ ፒርዳ ፒርዴቶ።
DEU 16:19 ፒርዳ ጌላሶፓ፤ ኣሳ ኣይፌሶ ቤያዳ ማዳ ፒርዶፋ፤ ባሌꬆፋ፤ ማጋንጾ ሞፓ፤ ጋሶይካ ማጋንጾይ ኣꬎ ኤራንቻታ ኣይፌ ቆቂሴስ፤ ጺሎታ ቃላካ ቦኪሴስ።
DEU 16:20 ኢንቴ ሼምፖራ ፓጻ ዳና ማላኔ ጎዳ ኢንቴ ጾሳይ ኢንቴስ ኢሚዛ ቢታ ኢንቴ ላታና ማላ ጺሎኔ ሱሬ ፒርዳ ፒርዲቴ።
DEU 16:21 ጎዳ ኢንቴ ጾሳስ ኢንቴ ያርሺዛሶ ኣቻን ሚꬃፌ ኦሴቲዳ ኣሼሪ ሚስሌ ኤሶፍቴ።
DEU 16:22 ቃሴካ ጎዳ ኢንቴ ጾሳይ ኢጺዛ ጎይኖ ሹች ኤሶፍቴ።
DEU 17:1 ኢንቴ ኢንቴ ሜሄ ጋርሳፌ ዎሶይ ዎይኮ ፓጬይ ዲዛዝ ቦራ ጊዲን ዎይኮ ዶርሳ ጎዳ ኢንቴ ጾሳስ ያርሾ ሺሾፍቴ፤ ሄሲ ጎዳ ኣቻን ኢጼቲዳ ሚሻ።
DEU 17:2 ኢንቴ ጎዳይ ኢንቴስ ኢሚዛ ካታማታፔ ኢሲኔይን ዲዛ ማጫ ጊዲን ኣዴ ጊዲን ጫቆ ቃላ ሜንꬂዲ ጎዳ ኢንቴ ጾሳ ሲንꬃን ኢታ ሚሽ ኦꬂ ቤቲኮ፥
DEU 17:3 ቃሴካ ታ ኣዛዞ ዬꬊ ኣꬊዲ ሃራ ጾሳታስ ጎይኒኮ ዎይኮ ኣርሼስ፥ ኣጊናሲኔ ጾሊንቴታስ ጎይኒኮ፥
DEU 17:4 ሄይታንታ ማላ ሃኖታ ኢንቴ ሲዪኮ ሄ ዮኦዛ ፒልጊ ቆሪቴ፤ ሄሳ ማላ ኢታ ዮኦቲ ኢስራኤሌ ኣሳ ጊዶን ኦሴቲዳይሲ ቱሙ ጊዲኮ፥
DEU 17:5 ሄ ኢታ ኦꬂዳዴ ዎይኮ ኦꬂዳሮ ካታማ ጊዶፌ ጌዴ ሃራሶ ኤፊዲ ሹቻን ኩራኪ ዎꬊቴ።
DEU 17:6 ሄሲካ ናምኡ ማርካይ ዎይኮ ሄꬑ ማርካይ ኢዛዴ ቦላ ማርካቲዳፔ ጉዬ ጊዶ፤ ጊዶ ኣቲን ኢሲ ኣሲ ጻላ ማርካቲዳ ማርካን ኣይ ኣሲካ ሃይቆፎ።
DEU 17:7 ማርካቲ ኮይሮቲዲ ሹቻን ጫዴቶ፤ ሄሳፌ ጉዬ ሃንኮ ዴሬ ኡባይ ጫዶ፤ ሄሳꬆ ኦꬂዲ ኢንቴ ጊዶፌ ኢታ ኡባ ዲጊቴ።
DEU 17:8 ኢንቴ ኢንቴ ካታማታን ፒርዳናስ ኬሂ ዴጺዛ ሼምፖ ጊሻስ ሺቂዛ ሞቶ፥ ሾቻ ሞቶ፥ ቃሴ፥ «ታስ ቤሴስ» ጊዛ ኣቆታ ሞቶ ጊዲንካ ዴንዲኮ ሄ ዎዴ ጎዳ ኢንቴ ጾሳይ ዶሪዳሶ ኤሶን ኤሂቴ።
DEU 17:9 ሌዌ ቆሞታፔ ቄሴ ጊዲዳይታሲኔ ሄ ዎዴ ዳና ጊዲዲ ፒርዲዛይሳስ ዮኦዛ ሺሺቴ፤ ሄ ዮኦዛ ኢስቲ ፒርዴቶ።
DEU 17:10 ጎዳይ ዶሪዳሶን ጊዲዲ ኢስቲ ኢንቴስ ፒርዲዛ ፒርዳ ማላ ኦꬂቴ፤ ኢንቴ ፖላና ማላ ኢስቲ ኢሚዛ ኣዛዞታ ናጌቲ ፖሊቴ።
DEU 17:11 ኢስቲ ኢንቴና ታማርሲዳ ዎጋኔ ፒርዳ ማላ ኦꬂቴ፤ ኢስቲ ፒርዲዳ ፒርዳፌ ሃዲርሲኔ ኡሻች ጎፒቴ።
DEU 17:12 ጎዳ ኢንቴ ጾሳስ ኦꬂዛ ዳናስ ዎይኮ ቄሴስ ኣዛዜቶንታ ኢጺዲ ኦቶሬቲዛ ኣሲ ዲኮ ሄሳዴይ ሃይቆ፤ ሄሳꬆ ኦꬂዲ ሄይታንታ ሚሳቲዛ ኢታ ሚሻታ ኡባ ኢስራኤሌ ዴራ ጊዶፌ ዲጊቴ።
DEU 17:13 ሄሳፌ ጉዬ ኣሲ ዉሪ ሄሳ ሲዪዲ ባባና፤ ናምኣንꬆ ሄሳ ማላ ኢታ ኦሶ ኦꬃናስ ጻላና ኣሲ ዴና።
DEU 17:14 ጎዳ ኢንቴ ጾሳይ ኢንቴስ ኢሚዛ ቢታዮ ጌሊ ላቲዲ ሄን ዱስ ዶሚዛ ዎዴ፥ «ኑና ዩዪ ኣꬊዳ ካዎቴꬃታስ ካዎይ ዲዛይሳꬆ ኑኒካ ኑስ ካዎ ካዎꬃና» ጊኮ፥
DEU 17:15 ኢንቴ ካዎꬃናይ ጎዳ ኢንቴ ጾሳይ ኢንቴስ ዶሪዳዴ ጊዲዳይሳ ኤሪቴ፤ ሄሲ ኢንቴ ኣሳ ጊዶፌ ዶሬቲዳይሳ ጊዶፌ ኣቲን ሃራ ቢታ ኣስ ኢንቴ ቦላ ካዎሶፒቴ።
DEU 17:16 ሄ ካዎዚ ዳሮ ፓራ ባስ ሺሻናስ ቤሴና፤ ጎዳይ ኣሳይ ጊብጼ ሲሞንታ ማላ ኣዛዚዳ ጊሻስ ሄፔ ፓራ ሻማናስ ኣሳ ዬዶፎ።
DEU 17:17 ኢዛ ዎዚና ባሌꬆንታ ማላ ካዎይ ጮራ ማቾ ኤኮፎ፤ ዎርቃኔ ቢራካ ዳርሲ ሺሾፎ።
DEU 17:18 ኢዚ ባ ካዎቴꬃ ኣልጋን ኡቲዛ ዎዴ ጾሳ ዎጋ ማጻፋ ሌዌ ቆሞ ጊዲዳ ቄሴታ ማታፔ ባስ ዱቂ ኤኮ።
DEU 17:19 ሄ ማጻፋዛ ባ ማታን ዎꬂዲ ባ ዴኦ ላይꬅ ኡባን ናባቦ፤ ኢዚ ሂስቲኮ ጎዳ ባ ጾሳ ቦንቾኔ ሄ ማጻፋን ጻፌቲዳ ዎጋታኔ ማራታ ኬሂ ናጌቲዲኔ ኣማኔቲዲ ፖሎ ታማራና።
DEU 17:20 ሂስቲኮ ኢዚ ባ ዎዚናን፥ «ታኒ ታ ላጌታፔ ኣꬋይስ» ጊዲ ኢስራኤሌ ኣሳ ቦላ ኦቶሬቴና፤ ጎዳ ባ ጾሳ ዎጋፔ ሃዲርሲኔ ኡሻች ጌና፤ ኢዚ ዳሮ ላይꬅ ካዎታና፤ ኢዛ ናይቲካ ኢስራኤሌ ቢታን ዳሮ ላይꬅ ካዎታና።
DEU 18:1 ሌዌታፔ ቄሴቲኔ ቃሴካ ኩሜꬃ ሌዌ ቆሞቲ ሃንኮ ኣቲዳ ኢስራኤሌ ኣሳራ ቢታ ጊሼቲዛ ዎጋይ ኢስታስ ባይንዳ ጊሻስ ኢስቲ ጎዳስ ያርሻናስ ሺሺዛ ያርሾፌ ሚዲ ዴቶ።
DEU 18:2 ኢስታ ኢሻታ ኢስራኤሌ ኣሳ ጋርሳን ኢስታስ ጺንጾ ጋዴይ ዶፖ፤ ኢዚ ኢስታስ ኢሚዳ ሂዶታ ቃላ ማላ ጎዳይ ኢስታስ ጺንጾ።
DEU 18:3 ዎፋኖ ጊዲን ዎይኮ ዶርሳ ያርሾስ ሺሺዛ ዎዴ ቄሴቲ ሚሳታ፥ ባንቂላታኔ ጋንጄታ ኤኬቶ።
DEU 18:4 ኢንቴ ካꬃፌ ጼራ፥ ዎይኔ ኡሻፌኔ ዎጋራ ዛይቴፔ ጼራ፥ ዶርሳ ኢስኬፌ ኮይሮ ቃንጼቲዳይሳ ኢስታስ ኢሚቴ።
DEU 18:5 ሜርናስ ቄሴቴꬃን ኦꬃና ማላ ሃራ ቆሞታ ጊዶፌ ጎዳ ኢንቴ ጾሳይ ሌዌ ቆሞታ ባስ ዶሪዴስ።
DEU 18:6 ሌዌ ቆሞታፔ ኢሲ ኣሲ ካሴ ባ ዲዛ ኢስራኤሌ ካታማፔ ጎዳይ ዶሪዳሶ ባናስ ዳሮ ኣሞይ ኢዛስ ዲኮ፥
DEU 18:7 ቢዲ ሄን ካሴ ሃጋዚዛ ሌዌ ቆሞቲ ኦꬂዛይሳꬆ ኢዚካ ጎዳ ሲንꬃን ኦꬆ።
DEU 18:8 ቃሴ ባ ኣዋ ኣቆ ባይዚን ባና ጋኪዳይሳ ኤኪዳ ጊዲኮካ ቄሴቲ ጎኤቲዛይሳ ኡባ ኢስታራ ጊና ጊሼቲ ኤኮ።
DEU 18:9 ጎዳ ኢንቴ ጾሳይ ኢንቴስ ኢሚዛ ቢታ ኢንቴ ጌሊዛ ዎዴ ሄ ቢታን ዲዛ ካዎቴꬃይ ኦꬂዛ ቱና ኦሶ ኦꬆፍቴ።
DEU 18:10 ባ ኣቱማ ና ዎይኮ ማጫ ና ያርሾስ ጊዲ ታማን ጹጊዛ ኣይ ኣሲካ ኢንቴ ጊዶን ዶፖ፤ ቢቲዛይ፥ ማራጬ ጼሊዛይ፥ ሙሬኒዛይኔ ማሮይ ኢንቴ ጊዶን ዶፖ።
DEU 18:11 ቃሴካ ዳጋሚዛዴይ (ጎጂዛይ)፥ ዎይኮ ሞይቲሌ ጼይጊዛዴይ ዎይኮ ኢታ ኣያናታራ ሃሳይዛዴይ፥ ዎይኮ ሃይቂዳ ኣሳታ ኣያናራ ሃሳይዛዴይ ኢንቴ ጊዶን ዶፖ።
DEU 18:12 ሄሳንታ ማላ ኦꬂዛ ኣይ ኣሲካ ጎዳ ማታን ኢጼቲዳዴ፤ ኢስቲ ሄሳ ማላ ቱና ኦꬂዳ ጊሻስ ጎዳ ኢንቴ ጾሳይ ሄ ካዎቴꬃታ ኢንቴ ሲንꬃፌ ꬎቃሊ ꬋይሳና።
DEU 18:13 ጎዳ ኢንቴ ጾሳ ሲንꬃን ሙሌራ ኢንቴ ኣማኔቲዛይታ ጊዳናስ ቤሴስ።
DEU 18:14 ሃ ኢንቴ ላታናስ ቢዛ ቢታን ዲዛ ካዎቴꬃቲ ሙሬኒዛይቲኔ ማራጬ ጼሊዛይቲ ዮቲዛይሳ ሲዪዛይታ። ኢንቴ ጊዲኮ ሄሳꬆ ኦꬆንታ ማላ ጎዳ ኢንቴ ጾሳይ ኢንቴና ዲጊዴስ።
DEU 18:15 ጎዳ ኢንቴ ጾሳይ ኢንቴ ዛሬፔ ታ ማላ ናቤ ዴንꬃና፤ ኢንቴ ኢዚ ኢንቴስ ዮቲዛይሳ ሲዪዲ ኣዛዜቲቴ።
DEU 18:16 ኢንቴ ሲና ዙማ ቦላ ሺቂዳ ዎዴ ጎዳ ኢንቴ ጾሳ፥ «ኑኒ ሃይቆንታ ማላ ጎዳ ኑ ጾሳ ጬንጉርሳ ዛሪ ሲዮኮ፤ ቃሴካ ሃ ዎልቃማ ታማካ ናምኣንꬆ ቤኦኮ» ጊዲ ኦይቺዴታ።
DEU 18:17 ሄሳ ጊሻስ ጎዳይ ታስ፥ «ኢስቲ ኦይቺዛ ኦይሻይ ሊኬ» ጊዴስ።
DEU 18:18 ታኒ ኢስታ ዛሬታ ጊዶፌ ኢስታስ ኔ ማላ ናቤ ዴንꬃና፤ ኢዚ ሃሳያና ቃላ ታ ኢዛስ ኢማና፤ ታ ኣዛዚዛይሳ ኡባ ኢዚ ኢንቴስ ዮታና።
DEU 18:19 ታ ሱንꬃን ዮቲዛ ሄ ናቤዛ ቃላ ሲዮንታ ኣስ ታ ቃጻያና።
DEU 18:20 ጊዶ ኣቲን ታ ኢዛ ኣዛዞንታ ጻላቴꬃን ታ ሱንꬃን ዮቲዛ ናቤይ ዎይኮ ኤቃ ጾሳታ ሱንꬃን ዮቲዛ ናቤይ ሃይቆ።
DEU 18:21 ኢንቴ፥ «ናቤይ ዮቲዛ ቲንቢቴ ቃላይ ጎዳፔ ጊዶንታይሳ ታ ኣዛን ሻካ ኤራኔ?» ጊ ኦይቻና ዳንዳዬታ።
DEU 18:22 ሄ ናቤዚ ዮቲዳይ ጎዳ ሱንꬃን ዮቲን ኢዚ ዮቲዳ ቃላይ ፖሌቶንታ ኣጊኮ ሄሲ ጎዳይ ዮቶንታይሳ ጊዲዳይሳ ኤሬታ፤ ሄ ናቤዚ ዎርዶ ሃሳይዳ ጊሻስ ኢዛስ ያዮፍቴ።
DEU 19:1 ጎዳ ኢንቴ ጾሳይ ኢንቴስ ኢሚዛ ቢታን ዲዛ ካዎቴꬃታ ꬋይሲዲ ኢንቴ ኢስታ ካታማታኒኔ ኬꬃታን ዴኦ ዶሚዛ ዎዴ፥
DEU 19:2 ጎዳ ኢንቴ ጾሳይ ኢንቴስ ጺንጾ ኦꬂዲ ኢሚዛ ቢታን ዲዛ ካታማታፔ ሄꬑ ካታማታ ኢንቴስ ሻኪቴ።
DEU 19:3 ጎዳ ኢንቴ ጾሳይ ኢንቴስ ጺንጾ ኦꬂዲ ኢሚዛ ቢታ ሄꬑ ኬሲ ሻኪቴ፤ ሂስቲዲ ኣሴ ዎꬊዳ ኣሲ ኦኒካ ሄ ካታማታፔ ኢሳን ባቃቲ ኣታና ማላ ሄ ኤፊ ጋꬂዛ ኦጌ ጊግሲቴ።
DEU 19:4 ኢሲ ኣሲ ካሴ ኢዛራ ሞርኬቴꬂ ባይንዳዴ ዎꬋና ጊ ቆፖንታ ዲንጋቴ ኣስ ዎꬊኮ ሄሳዴይ ካታማታፔ ኢሲኔይን ቢ ጌሊዲ ባ ሼምፖ ኣሾ።
DEU 19:5 ሌሚሶስ ናምኡ ኣሳቲ ሚꬅ ቃንጻና ቢዳሶን ኢስቲ ሚꬅ ቃንጺሺን ሚꬃ ቃንጺዛ ቤዪጼዚ ዎይኮ ካልታዚ ቱቴዛፔ ቆፖንታ ኮሌቲ ቢዲ ኢዛራ ዲዛዴዛ ዎꬊኮ፥ ሄ ቤዪጼይ ኢዛ ኩሼፔ ኮሌቲ ቢ ዎꬊዳዴዚ ሄ ሄꬑ ካታማታፔ ኢሲ ካታማዮ ቢ ጌሊ ባ ሼምፖ ኣሾ።
DEU 19:6 ቆቴቲ ኣቲዛ ካታማይ ኤሶን ጋኬቶንታ ሃኮሶን ዲዛ ጊዲኮ ኦጌይ ኣዱቂዳ ጋሶን ሱꬅ ኣዛሪዛዴይ ኬሂ ሃንቄቲዲ ጎዲ ጋኪዲ ሃይቃናስ ቤሶንታይሳ ዎꬋናስ ዳንዳዬስ፤ ጋሶይካ ኢዚ ባ ሾሮ ዎꬊዳይ ሞርኬቴꬂ ዲዛ ጊሻስ ጊዴና።
DEU 19:7 ኢንቴ ሄꬑ ካታማታ ዱማ ሻካና ማላ ታ ኢንቴና ኣዛዚዛይ ሄሳ ጊሻሳ።
DEU 19:8 ጎዳ ኢንቴ ጾሳይ ካሴ ኢንቴ ኣዋታስ ጌሊዳ ሂዶታ ቃላ ማላ ኢዚ ኢንቴ ዛዋ ኣሲኮ፥
DEU 19:9 ሃች ታ ኢንቴና ኣዛዚዳይሳ ኡባ ኢንቴ ፖሊኮ፥ ጎዳ ኢንቴ ጾሳካ ሲቂኮ ቃሴ ኢዛ ኦጌን ቢኮ ኢዚ ኢንቴስ ሃኖ ቢታዮ ኢሚዛ ጊሻስ ኣሲ ኢስታን ባቃቲ ቢዲ ኣታና ማላ ሃራ ሄꬑ ካታማታ ጉጂ ጊግሲቴ።
DEU 19:10 ኢንቴ ሄሳꬆ ኦꬂዛ ጋሶይካ ኢንቴ ኢዚን ዳና ማላ ጎዳ ኢንቴ ጾሳይ ኢንቴስ ጺንጾ ሂስቲ ኢሚዛ ቢታይን ጺሎ ሱꬂ ጉኮንታ ማላኔ ኢንቴካ ሱꬃ ኣጮን ኦይሼቶንታ ማላሳ።
DEU 19:11 ጊዲኮካ ኢሲ ኣሲ ሞርኬቴꬃን ዴንዲዲ ጌማን ዛማዲ ኡቲዲ ቃꬌታይ ባይንዳ ኣስ ዎꬊዳፔ ጉዬ ባ ሼምፖ ኣሻናስ ሄ ካታማታፔ ኢሲኔይን ባቃቲ ቢኮ፥
DEU 19:12 ኢዚ ዲዛ ካታማ ጪማቲ ኢዚ ባቃቲ ቢዳ ካታማፔ ኣስ ኪቲ ኤሂሲዲ ሃይቂዳይሳ ሱꬅ ኣዛሪዛዴስ ኣꬂ ኢሜቶ።
DEU 19:13 ኢዛስ ኣይኮካ ቃꬌቶፍቴ፤ ኢንቴስ ኡባ ሚሺ ሎኦ ጊዳና ማላ ሼምፖ ዎꬊዛይታ ኢስራኤሌ ጊዶፌ ꬋይሲቴ።
DEU 19:14 ጎዳ ኢንቴ ጾሳይ ኢንቴስ ኢሚዛ ጺንጾን ቤኒ ኣሳቲ ኢንቴሲኔ ኢንቴ ሾሮስ ጊዶን ኤሲዳ ዛዋ ሾዶፍቴ።
DEU 19:15 ኣሲ ሞሪዳ ሞሮ ሻኪ ኤራናስ ኢሲ ማርካይ ጻላ ጊዴና፤ ናምኡ ዎይኮ ሄꬑ ማርካይ ማርካታና ቤሴስ።
DEU 19:16 ኢሲ ኢታ ኣሲ ሃራ ኣስ ዎርዶራ ሞቲኮ፥
DEU 19:17 ናምኣቲካ ሄ ዎዴ ጎዳ ሲንꬃን ኦꬂዛ ቄሴታ ሲንꬃኒኔ ፒርዲዛ ዳናታ ሲንꬃን ኤቄቶ።
DEU 19:18 ሄ ፒርዲዛይቲካ ሄ ዮኦዛ ሎኤꬂ ፒልጊ ጼሌቶ፤ ሄ ማርካቲዛዴዚ ባ ኢሻዛ ቦላ ዎርዶራ ማርካቲዳይሲ ቱሙ ጊዲኮ፥
DEU 19:19 ኢዚ ሄ ሞቶዛ ባ ኢሻ ቃጻይሳናስ ቆፒዳ ቂጻቴዛን ባ ሁኤስ ቃጻዬቶ፤ ሂስቲዲ ሄሳ ማላ ኢታ ኦꬂዛይሳ ኢንቴ ጊዶፌ ዲጊቴ።
DEU 19:20 ሂስቲኮ ሃራ ኣሳይ ሄሳ ሲዪዲ ባባና፤ ሄሳ ማላ ኢታ ኦሶይ ኢንቴ ጊዶን ኦሴቴና።
DEU 19:21 ሄሳ ማላ ኢታ ኦꬂዛይታስ ሙሌካ ቃꬌቶፍቴ፤ ሼምፖ ዎꬊዳዴ ዎꬊቴ፤ ኣይፌ ቶይሲዳዴስ ኣይፌ ቶይሲቴ፤ ኣች ሜንꬂዳዴስ ኣች ሜንꬂቴ፤ ኩሼ ሜንꬂዳዴስ ኩሼ ሜንꬂቴ፤ ቶሆ ሜንꬂዳዴስ ቶሆ ሜንꬂቴ።
DEU 20:1 ኢንቴ ኢንቴ ሞርኬታ ኦላና ቢሺን ፓራ-ጋሬቲኔ ቶጋ ኣሳቲ ኢንቴፌ ዳሮ ጊዲኮ ሄሳ ቤኢዲ ዳጋሞፍቴ፤ ጋሶይካ ኢንቴና ጊብጼፔ ኬሲዳ ጎዳ ኢንቴ ጾሳይ ኢንቴናራ ዲዛ ጊሻስ ባቦፍቴ።
DEU 20:2 ኢንቴ ኦላ ዶማናፔ ሲንꬃቲዲ ቄሴዚ ኦላ ኣሳኮ ሺቂዲ፥
DEU 20:3 «ኢስራኤሌ ኣሳዉ! ሃ ኤዝጊቴ! ኢንቴ ሃች ኢንቴ ሞርኬታራ ኦሌታናስ ቤታ፤ ኢንቴ ዎዚናይ ዳጋሞፎኔ ባቦፎ፤ ኢስታ ሲንꬃን ኮኮሮፒቴኔ ሺሮቶፒቴ።
DEU 20:4 ጎዳ ኢንቴ ጾሳይ ኢንቴ ሞርኬታ ኦላናስ ኢንቴናራ ቢዛ ጊሻስ ኢዚ ኢንቴና ጾኒሳና» ጎ።
DEU 20:5 ሄሳፌ ካሊዲ ኦላ ኣሳ ካሌꬂዛይቲ ኦላንቻታስ፥ «ኦራꬃ ኬꬅ ኬጺዲ ጌሎንታ ኣሲ ኢንቴ ጋርሳን ዲኮ ኢዚ ኦላሶ ቢ ሃይቂን ሃራ ኣሲ ኢዛ ኬꬃን ጌሎንታ ማላ ባሶ ጉዬ ሲሞ።
DEU 20:6 ዎይኮ ዎይኔ ቶኪዲ ኢዛ ኣይፌ ሺሾንታ ኣሲ ዲኮ ኢዚ ኦላን ሃይቂን ሃራ ኣሲ ኢዛ ዎይኔ ኣይፌ ባስ ሺሺዲ ኡፋዬቶንታ ማላ ኢዚ ባሶ ሲሞ።
DEU 20:7 ማቾ ኤካና ጊግሲ ዎꬂዳ ኣሲ ኦላን ሃይቂን ሃራ ኣሲ ኢዞ ኤኮንታ ማላ ኢዚ ባሶ ሲሞ» ጌቶ።
DEU 20:8 ኦላ ኣሳ ካሌꬂዛይቲ፥ «ዎዚናይ ባቢዛ ኣሲ ኢንቴ ጋርሳን ዲኮ ሃንኮ ኦላ ኣሳ ዎዚና ሂርጊሶንታ ማላ ኢዚ ባሶ ሲሞ» ጌቶ።
DEU 20:9 ኦላ ኣሳ ካሌꬂዛይቲ ሄሳ ዮቲ ዉርሲዳፔ ጉዬ ኦላ ኣሳ ቡቴን ቡቴን ሻኪዲ ኢሲ ኢሲ ቡቴስ ካሌꬂዛይታ ዶሬቶ።
DEU 20:10 ኢሲ ካታማ ኦላናስ ቢዲ ኢንቴ ኢስታኮ ማቲዛ ዎዴ ኮይሮቲዲ ሳሮን ኢስቲ ኩሼ ኢማና ማላ ኦይቺቴ።
DEU 20:11 ኢስቲ ኢንቴና ሳሮን ሞኪ ኤኪዲ ባንታ ጊምቤ ፔንጌ ዶይዲ ኢንቴና ጌልꬂኮ ሄ ካታማን ዲዛ ኣሳይ ኡባይ ኢንቴስ ሃጋዞኔ ዴጾ ኦሶ ኦꬆ።
DEU 20:12 ጊዶ ኣቲን ሄ ካታማ ኣሳይ ኢንቴስ ሳሮን ባ ኩሼ ኢሞንታ ኢጺዲ ኢንቴናራ ኦሌታና ኮይኮ ኢስታ ካታማ ዶዲቴ።
DEU 20:13 ጎዳ ኢንቴ ጾሳይ ሄ ካታማዮ ኢንቴ ኩሼን ኣꬂ ኢሚዛ ዎዴ ሄ ካታማይን ዲዛ ኣቱማሳ ኡባ ዎꬊቴ።
DEU 20:14 ጊዶ ኣቲን ማጫሳታኔ ጉꬃ ናይታ፥ ሜሄኔ ሄ ካታማይን ዲዛ ኣቆታ ኡባ ኢንቴስ ዲኢ ኤኪቴ፤ ቃሴ ጎዳ ኢንቴ ጾሳይ ኢንቴስ ኢሚዛ ኢንቴ ሞርኬታ ኣቆታ ኢንቴስ ጎኤቲቴ።
DEU 20:15 ቃሴካ ኢንቴ ዲዛሶፔ ሃኪ ዲዛ ካታማታካ ኢንቴ ኦይኪዛ ዎዴ ሃይሳፌ ካሊዛይሳ ኦꬂቴ።
DEU 20:16 ጎዳ ኢንቴ ጾሳይ ኢንቴስ ኣꬂ ኢሚዳ ቢታ ቦላ ኣሳ ኢንቴ ኦሊ ኦይኪዛ ጊዲኮ ኣሳ ኡባ ዎꬊቴ።
DEU 20:17 ጎዳይ ኢንቴ ጾሳይ ኢንቴና ኣዛዚዳ ማላ ሂቴታ፥ ኣሞሬታ፥ ካናኔታ፥ ፓሪዜታ፥ ሂዌታኔ ያቡሴታ ኡባ ዎꬊቴ።
DEU 20:18 ኢንቴ ሂስቶንታ ኣጊኮ ኢስቲ ባንታ ኤቃ ጾሳታስ ጎይኒዛ ቱና ኦሶ ኢንቴ ኦꬃና ማላ ኢንቴና ታማርሳና፤ ሄሳን ጎዳ ኢንቴ ጾሳ ቦላ ናጋራ ኦꬃና።
DEU 20:19 ኢንቴ ካታማ ኦይካናስ ዶዲ ዳሮ ጋላስ ኦሌቲሼ ጋምኢዛ ዎዴ ኢዛን ዲዛ ኣይፌ ኢሚዛ ሚꬃታ ኣይፌ ኢንቴ ማና ዳንዳይዛ ጊሻስ ኢስታ ቃንጾፍቴ፤ ኢስቲ ኣይፌ ኣይፊዛ ሚꬃፌ ኣቲን ኣሳራ ኦሌቲዛ ኣስ ጊዴቴና፤ ሄ ዴምባን ዲዛ ሚꬃታ ቃንጾፍቴ።
DEU 20:20 ሃንኮ ኣይፌ ኣይፎንታ ሚꬃታ ጊዲኮ ኢስታ ቃንጼሬꬂ ዬጊዲ ሄ ካታማያ ኩንዳና ጋካናስ ጊዶꬂ ናጋና ዳንዳዬታ።
DEU 21:1 ኢንቴ ላታና ማላ ጎዳ ኢንቴ ጾሲ ኢንቴስ ኢሚዛ ቢታይን ኦኒ ዎꬊዳኮ ኤሬቶንታ ኣሳ ኣሃይ ጮ ዴምባን ኩንዲ ቤቲኮ፥
DEU 21:2 ኢንቴ ዳናቲኔ ኢንቴ ጪማቲ ቢዲ ኣሃዚ ዲዛሶፔ ዶሚዲ ሄ ሄራን ዲዛ ካታማታ ጋካናስ ዲዛ ሃሆቴꬃ ዋꬌቶ።
DEU 21:3 ሄሳፌ ጉዬ ኣሃዚ ዲዛሶስ ማቲዛ ካታማይን ዲዛ ካሌꬂዛይቲ ኦሶስ ጋኮንታ ቡሮ ቃምባራይ ኢዚ ሞርጌ ቦላ ዎꬎንታ ኢሲ ኡሱ ዶሬቶ።
DEU 21:4 ሄ ኡሲዮ ሙሌካ ጎዬቲ ኤሮንታሶ፥ ኣይ ኣታኪልቴይ ቶኬቲ ኤሮንታሶኔ ጎጊዛ ሃꬂ ዲዛ ሾባ ኤፊዲ ሄን ኡሳይ ሞርጌ ሚርቂ ሜንꬄቶ።
DEU 21:5 ሂስቲዲ ጎዳ ኢንቴ ጾሳይ ባ ሲንꬃን ኦꬃና ማላ፥ ባ ሱንꬃን ኣንጃና ማላ፥ ሞቶኔ ሼምፖ ዳፋ ጌሊዲ ሻኪ ፒርዳና ማላ ጎዳ ኢንቴ ጾሳይ ሌዌ ናይታፔ ዶሪዳ ቄሴቲ ኣሃዚ ዲዛሶ ማታ ቤቶ።
DEU 21:6 ሄሳፌ ጉዬ ኣሃዚ ዲዛሶ ማታን ዲዛ ካታማዮ ካሌꬂዛ ጪማቲ ሞርጌ ሚርቂ ሜንꬂዳ ኡሳይ ቦላ ባንታ ኩሼ ሜጬቴቶ።
DEU 21:7 ሂስቲዲ፥ «ሃይሳ ኑ ዎꬊቤኮ፤ ኦኒ ዎꬊዳኮካ ኑ ቤዪቤኮ።
DEU 21:8 ጎዳዉ! ኔኒ ጊብጼፔ ዎዛዳ ኬሲዳ ኔ ዴሬ ኢስራኤሌ ናጋራ ዉርሳ፤ ኑናካ ማራ፤ ሃይሳ ጉኪዳ ጺሎ ሱꬃ ጊሻስ ኑና ኦይቾፋ» ጌቶ።
DEU 21:9 ኢንቴ ጎዳ ሲንꬃን ሱሬ ሚሽ ኦꬂዲ ጺሎ ሱꬂ ጉኪዳ ናጋራ ኢንቴ ጊዶፌ ዲጊቴ።
DEU 21:10 ኔ ሞርኬታራ ኔ ኦሌታናስ ኬዚን ጎዳ ኔ ጾሲ ኢስታ ኔ ኩሼን ኣꬂ ኢሚን ኔ ኢስታ ዲኢዳ ዎዴ፥
DEU 21:11 ሄ ዲኤቲዳይታ ጊዶን ማላ ሎኦ ማጫስ ዴማዳ ኢዞ ኔስ ማቾ ኤካናስ ኮይኮ፥
DEU 21:12 ኢዞ ኔኒ ኔሶ ኤሂኮ ኢዛ ባ ሁኤ ሜዴቱ፤ ቃሴ ባ ጹጉንꬅ ኢሩ።
DEU 21:13 ካሴ ኢዛ ዲኤታ ያሼ ማይኢዳ ማይኦ ላሙ፤ ኢሲ ኣጊና ጋካናስ ኔሶን ኡታዳ ኦላን ሃይቂዳ ባ ኣይሲኔ ባ ኣዋስ ዬኩ፤ ሄሳፌ ጉዬ ኢዞ ኔስ ማቾ ኤካ።
DEU 21:14 ጉዬፔ ኔኒ ኢዚን ኡፋዬቶንታ ኣጊኮ ኢዞ ኣንጃ ዬዳናስ ዳንዳያሳ፤ ካሴ ኢዞ ዎልቃራ ኤኪዳይ ኔና ጊዲዳ ጊሻስ ዛራዳ ባይዛናሲኔ ኣይሌ ማላ ቆዳናስ ቤሴና።
DEU 21:15 ኢሲ ኣሲ ናምኡ ማቾ ኤኪዲ ኢስታፌ ኢሲኔዮ ዶሲዲ ኢሲኔዮ ኢጺኮ ሄ ናምኣቲካ ኢዛስ ኣቱማ ናይታ ዬሊኮ ሄ ዬሌቲዳ ናይታፔ ባይራዚ ኢዚ ኢጺዛሪ ና ጊዲኮ፥
DEU 21:16 ኢዚ ባ ሃሮ ባ ናይታስ ጊሺዛ ዎዴ ኢዚ ኢጺዛሪፔ ዬሌቲዳ ባይራ ናዛ ባይራቴꬃ ካꬊዲ ባ ዶሲዛሪፔ ዬሌቲዳ ናዛስ ማዲዲ ኣꬂ ኢማናስ ቤሴና።
DEU 21:17 ባይራ ናዚ ኢዚ ሲቆንታ ማቼይፌ ዬሌቲኮካ ኢዚ ኢዛስ ኮይሮ ዬሎ ጊዲዳ ጊሻስ ሃንኮ ናይታፔ ናምኡ ኩሼ ኣꬂ ኢሚዲ ኢዚ ባይራ ጊዲዳይሳ ኤሪሶ።
DEU 21:18 ኣዋሲኔ ኣዪስ ኣዛዜቶንታ ኢጺዲ ኢስቲ ሙሪንካ ሲሞንታ ኢጺዳ ማካላንቻኔ ዎዚና ሙሜ ናይ ኢስታስ ዲኮ፥
DEU 21:19 ኣያኔ ኣዋይ ባንቲ ዲዛ ካታማታ ጋርሳን ጪማቲ ፒርዲዛሶ ኤኪ ቤቶ።
DEU 21:20 «ሃይሲ ኑ ናዚ ዎዚና ሙሜ፤ ማካላንቻ፤ ኑስ ኣዛዜቴና፤ ማꬆቴሲኔ ሚሽ ጮ ꬋይሴስ» ጊ ጪማታስ ዮቴቶ።
DEU 21:21 ሄ ካታማይን ዲዛ ኣቱማ ኣሳይ ኡባይ ኢዛ ሹቻን ጫዲ ዎꬌቶ፤ ኢንቴ ሄሳꬆ ሂስቲኮ ኢንቴ ጋርሳፌ ኢታ ሚሺ ꬋያና፤ ኢስራኤሌ ዴሬን ዲዛይ ዉሪ ሄሳ ሲዪዲ ያያና።
DEU 21:22 ኢሲ ኣሲ ባ ኦꬂዳ ጊታ ሞሮ ጋሶን ሚꬃ ቦላ ካቄቲ ሃይቃና ማላ ፒርዴቲኮ፥
DEU 21:23 ሚꬃ ቦላ ካቄቲ ሃይቂዳ ኣሲ ጾሲ ቃንጊዳዴ ጊዲዳ ጊሻስ ኢዛ ኣሃይ ሚꬃ ቦላ ካቄቲ ኣቆፖ፤ ጎዳ ኢንቴ ጾሳይ ኢንቴስ ኢሚዛ ቢታ ቱኒሶንታ ማላ ሃይቂዳ ኣሃዛ ሄ ጋላስ ሞጊቴ።
DEU 22:1 ኢስራኤሌ ኣሳ ቦራይ ዎይኮ ዶርሲ ꬋይዲ ዎራ ቢሺን ኢንቴ ዴሚኮ ጮኡ ጊ ኣꬎፍቴ፤ ኢዛ ጎዳስ ላጋ ኤፋ ኢማ።
DEU 22:2 ጊዶ ኣቲን ሜሃዴይ ዲዛሶይ ሃሆ ጊዲኮ ዎይኮ ሄ ሜሃዴይ ኦናኮ ኔ ኤሮንታ ኣጊኮ ሜሄዛ ኔሶ ኤካዳ ባ፤ ሜሃዴይ ኮዪሼ ዪኮ ኢዛይሳ ኢዛስ ዛራ።
DEU 22:3 ማይኦ ጊዲን ዎይኮ ሃሬ ጊዲን ዎይኮ ሃራ ኣይ ሚሺካ ኔ ባጋ ኢስራኤሌ ኣሳፔ ꬋዪን ኔ ዴሚዳ ጊዲኮ ዛራዳ ኢዛዴስ ኢማ።
DEU 22:4 ኔ ባጋ ኢስራኤሌ ኣሳስ ሃሬይ ዎይኮ ቦራይ ኦጌን ኩንዲን ኔ ቤኢዳ ጊዲኮ ማዳዳ ዴንꬃ ኣቲን ቤኣሼ ዬጋ ኣꬎፋ።
DEU 22:5 ጎዳ ኢንቴ ጾሳይ ሄሳꬆ ኦꬂዛይታ ኢጺዛ ጊሻስ ማጫቲ ኣቱማሳታ ማይኦ፥ ኣቱማሳቲ ማጫሳታ ማይኦ ማይኦፌቶ።
DEU 22:6 ኔ ኦጌ ቢሺን ካፎይ ባ ኬꬃን ሚꬃ ቦላ ዎይኮ ቢታ ቦላ ዬሊዳ ጪዬታ ዎይኮ ጱጱሌ ሃጳ ዲዛ ካፎ ኔ ዴሚዳ ካፎዮ ጪዬታራ ጋꬃ ኔሶ ኤፎፓ።
DEU 22:7 ጪዬታ ኔሶ ኤካ ባናስ ዳንዳያሳ፤ ኣዬዮ ጊዲኮ ኢዛ ፒራꬋ ባና ማላ ዬዳ፤ ኔኒ ሄሳꬆ ኦꬂኮ ኔስ ሎኦ ጊዳናኔ ኔ ዳሮ ላይꬅ ዳና።
DEU 22:8 ኔ ኦራꬃ ኬꬅ ኬጻሼ ሄ ኬꬃ ካራፔ ኣሲ ኩንዲዲ ሱꬃ ኣጮን ኔና ኦይሺሶንታ ማላ ኬꬃ ካራ ቦላ ቴቄ ዎꬃ።
DEU 22:9 ኔኒ ዎይኔ ሚꬅ ቶካሼ ኢዛ ጊዶን ሃራ ዜሬꬅ ዜሮፓ፤ ኔ ሃራ ዜሪኮ ዎይኔ ሚꬃ ኣይፌፔ ጊዲን ዎይኮ ሃራ ኔ ዜሮ ካꬃፌ ጎኤታናስ ዳንዳያካ።
DEU 22:10 ቦራኔ ሃሬ ኢሲፌ ኢሲ ቃምባራን ዋጻ ጎዮፓ።
DEU 22:11 ሱፌፔኔ ፑቶፌ ዋላኬቲ ዳዴቲዳ ማይኦ ማይኦፋ።
DEU 22:12 ኔ ማይኣና ማይኦስ ኦይዱ ባጋራካ ማጫራ ሜꬋ።
DEU 22:13 ኢሲ ኣሲ ማቾ ኤኪዳ ማላ ኢዚራ ኣቂ ሲሚዲ ኢዞ ኢጺኮ፥
DEU 22:14 «ሃኖ ማጫሳዮ ኤካዲስ ሺን ኢዚስ ጌላኦቴꬃ ዎጋይ ባዋ» ጊዲ ዎርዶራ ኢዚ ሱንꬁ ሞሪኮ፥
DEU 22:15 ሄ ናዮ ዬሊዳይቲ ናያ ጌላኦ ጊዲዳይሳስ ማርካ ኤሂዲ ሄ ካታማን ዲዛ ጪማታ ቤሴቶ።
DEU 22:16 ናይ ኣዋይ ኢስታስ፥ «ታኒ ታ ናዮ ሃይሳ ኣዴዛስ ኢማዲስ ሺን ሃኢ ኢዚ ኢዞ ኢጺዳይሳ ቆንጪሲዴስ።
DEU 22:17 ‹ኔ ናይስ ጌላኦቴꬂ ባዋ› ጊዲ ታ ናይ ሱንꬁ ሞሪዴስ፤ ታ ናይስ ጌላኦቴꬂ ዲዛይሳስ ሃይሲ ማርካ» ጊዲ ሄ ዴሬ ካሌꬂዛይታ ሲንꬃን ኢዚ ኢዞ ኤኪሺን ማይኦ ቦላ ጉኪዳ ሱꬃራ ዲዛ ማላታ ጫርቃዛ ቤሶ።
DEU 22:18 ሄ ካታማዮ ካሌꬂዛይቲ ኣዴዛ ሾጪ ቃጻዬቶ።
DEU 22:19 ቃሴካ ኢዚ ኢስራኤሌ ናይታፔ ጌላኦቴꬃራ ዲዛ ኢሲኔይ ሱንꬁ ሞሪዳ ጊሻስ ኢሲ ጼቱ ሳቂሌ ቢራ ናይ ኣዋስ ማጋጮ ቃንጾ፤ ሄሳፌ ጉዬ ናያካ ኢዛስ ማቾ ጊዱ፤ ኢዚ ሼምፖራ ፓጻ ዲዛ ላይꬅ ኡባን ኢዞ ኣንጂ ዬዳናስ ዳንዳዬና።
DEU 22:20 ጊዶ ኣቲን ኢዚ ጊዳይሲ ቱሙ ጊዲ ቤቲኮ ቃሴ ኢዛ ጌላኦ ጊዲዳይሳ ቆንጪሲዛ ማላታይ ባይንዳ ኣጊኮ፥
DEU 22:21 ኢዛ ባ ኣዋ ሶን ዳሼ ላይማታዳ ኢስራኤሌ ኣሳ ዬላቺዛ ኦሶ ኦꬂዳ ጊሻስ ኢዞ ኢዚ ኣዋ ኬꬃ ካሬ ኤፌቶ፤ ሄ ካታማን ዲዛ ኣሳይ ኢዞ ሹቻራ ጫዲ ዎꬎ፤ ሄሳꬆ ሂስቲዲ ኢንቴ ጊዶፌ ኢታ ሚሽ ዲጊቴ።
DEU 22:22 ኢሲ ኣሲ ሃራ ኣሳ ማቺራ ዚንኢ ቤቲኮ ናምኣይካ ሃይቄቶ፤ ሄሳꬆ ሂስቲዲ ኢንቴ ጊዶፌ ኢታ ሚሽ ዲጊቴ።
DEU 22:23 ኣይ ኣሲካ ካታማ ጊዶን ኣዚና ጌላና ጊጋ ኡቲዳ ጌላኦይራ ዚንኢዲ ቤቲኮ፥
DEU 22:24 ናምኣታካ ሄ ካታማይፔ ካሬ ኬሲዲ ሹቻን ጫዲ ዎꬊቴ፤ ጌላኦያ ካታማ ጊዶን ዳሼ፥ «ታና ኣሺቴ» ጋዳ ዋሶንታ ጊሻስ ሃይቃናስ ቤሴስ፤ ቃሴ ኣዴዚ ሃራ ኣሳራ ጊጋ ዲዛሪራ ዚንኢዲ ዎጋ ሜንꬂዳ ጊሻስ ሃይቃናስ ቤሴስ፤ ሄሳꬆ ሂስቲዲ ኢንቴ ጊዶፌ ኢታ ሚሽ ዲጊቴ።
DEU 22:25 ኢሲ ኣሲ ሃራ ኣሳስ ጊጋ ኡቲዳ ጌላኦዮ ኢዛ ዲዛ ካታማፔ ሃራሶን ዴሚ ዎልቃꬂዲ ኢዚ ጌላኦቴꬃ ኤኪዳ ጊዲኮ ሄሳዴይ ጻላ ሃይቆ።
DEU 22:26 ናያ ሃይቆስ ጋꬂዛ ናጋራ ኦꬆንታ ጊሻስ ኢዞ ቦቾፍቴ፤ ሃይሳ ማላ ኦሶይ ኢሲ ኣሲ ጌኔራ ባ ላጌዛ ሼምፖ ዎꬊዛይሳራ ኢሲ ጊና።
DEU 22:27 ሄሲካ ሄ ኣዴዚ ሃራ ኣሳስ ጊጌታ ኡቲዳ ጌላኦያ ባ ዲዛ ካታማፔ ካሬን ዲሺን ዴሚዲ ኢዞ ኦይኪዳ ጊሻሲኔ ኢዛ ዋሲዳኮካ ኢዞ ኣሻና ኣሲ ባይንዳ ጊሻሳ።
DEU 22:28 ኣይ ኣሲካ ሃራ ኣሳራ ጊጌቶንታ ጌላኦይራ ዚንኢሼ ኦይኬቲኮ፥
DEU 22:29 ናይ ኣዋስ ኢቻሽ ታሙ ሳቂሌ ቢራ ቃንጺዲ ኢዞ ባስ ማቾ ሂስቶ፤ ዎልቃን ኢዚራ ዚንኢዳ ጊሻስ ሃይቃና ጋካናስካ ኢዞ ኣንጂ ዬዳናስ ዳንዳዬና።
DEU 22:30 ኦኒካ ባ ኣዋ ማቾ ኤኪዲ ዎይኮ ኢዚራ ዚንኢዲ ባ ኣዋ ዬላሶፖ።
DEU 23:1 ሳንጌቲዳ ኣሲ ዎይኮ ቃራቴቲዳ ኣሲ ጎዳ ዴሬ ዱላታን ቤቶፎ።
DEU 23:2 ላጌꬆን ዬሌቲዳይኔ ኢዛ ዜሬꬂ ቢዲ ታማንꬆ ጋካናስ ጎዳ ኣሳ ሺቆን ጌሎፖ።
DEU 23:3 ኣሞኔኔ ሞኣቤ ዜሬꬃቲ ዉሪካ ታማንꬃ ዬሌታ ጋካናስ ጎዳ ኣሳ ዱላታን ጌሎፔቶ።
DEU 23:4 ጋሶይካ ኢንቴ ጊብጼፔ ኬዚዲ ዪሺን ኢስቲ ኢንቴና ካꬂኔ ሃꬅ ዲጊዳ፤ ቃሴ ሜስጴጾሚያ ቢታን ፓቶሬ ካታማን ዲዛ ቢኦሬ ና ባላሜይ ኢንቴና ቃንጋና ማላ ሚሻን ሻሚዳ።
DEU 23:5 ጊዶ ኣቲን ጎዳ ኢንቴ ጾሳይ ኢንቴና ሲቂዛ ጊሻስ ባላሜይ ቃንጊዛ ቃንጌꬃ ሲዪቤና፤ ኢዚ ቃንጊዳ ቃንጌꬃ ኣንጆን ላሚዴስ።
DEU 23:6 ሄ ዴሬ ኣሳቲ ዱሬቲዲ ሳሮን ዳና ማላ ኢስታ ማዶፍቴ።
DEU 23:7 ኢስቲ ኢንቴስ ዳቦ ጊዲዳ ጊሻስ ኤዶሜ ኣሳ ካꬊዲ ኢጾፍቴ፤ ቃሴ ኢንቴ ጊብጼ ቢታን ካሴ ቤቴ ጊዲዲ ዴኢዳ ጊሻስ ጊብጼ ኣሳታካ ኢጾፍቴ።
DEU 23:8 ኢስታ ዜሬꬂ ሄꬓንꬆ ዬሌታፔ ዶሚዲ ጎዳ ኣሳ ሺቆን ዋላኬታና ዳንዳዬስ።
DEU 23:9 ኢንቴ ኦላስ ኬዚዲ ዱንካኒ ኡቲዳሶሆን ኢንቴና ቱኒሲዛ ሚሻፌ ናጌቲቴ።
DEU 23:10 ኢሲ ኣሲ ኦማርስ ኣጉሞራ ማላይ ኢዛ ቦላ ጉኪኮ ኣሲ ዲዛ ሄራፔ ሃራሶ ቢዲ ሄን ታኮ።
DEU 23:11 ኦማርሳ ዎዴ ባ ቦላ ሜጬቲዲ ኣርሼይ ዉሊሺን ካሴ ባ ዲዛሶ ሲሞ።
DEU 23:12 ሼሽ ኡቲዛሶ ኢንቴ ዲዛሶ ሄራፔ ካሬን ጊግሲቴ።
DEU 23:13 ኢንቴ ሼሽ ኡታናሶ ቦካናሲኔ ቢታ ዛሪ ካማናስ ጎኢዛ ሚሽ ኢንቴ ኦላ ማሳራራ ጋꬂ ኢሲፌ ኦይኪቴ።
DEU 23:14 ጋሶይካ ጎዳ ኢንቴ ጾሳይ ኢንቴና ናጋናሲኔ ኢንቴ ሞርኬታ ኢንቴ ኩሼን ኣꬂ ኢማናስ ኢንቴ ጉታ ጊዶን ሄሜቴቲዛ ጊሻስ ኢዛ ሻቲዛ ሚሽ ቤኢዲ ጉዬ ሲሞንታ ማላ ኢንቴ ዲዛ ሄራይ ጌሽ ጊዳና ቤሴስ።
DEU 23:15 ባ ጎዳፔ ባቃቲዲ ኔኮ ዪዳ ኣይሌ ዛራዳ ኢዛ ጎዳስ ኢሞፋ።
DEU 23:16 ኢዚ ኢንቴ ካታማታፔ ባ ኮዪዳሶን ኢንቴናራ ዴኦ፤ ኢዛ ኡንኤꬆፍቴ።
DEU 23:17 ኢስራኤሌ ኣሳፔ ኦኒኔ ኣቱማ ጊዲን ዎይኮ ማጫ ጊዲን ኤቃ ጾሳታስ ጎይኒዛይቲ ኦꬂዛይሳ ማላ ላይማቶፒቴ።
DEU 23:18 ጎዳ ኢንቴ ጾሳይ ላይማ ኢጺዛ ጊሻስ ኣዴ ጊዲን ዎይኮ ማጫሲ ላይማቴꬃን ዴሚዳ ሚሽ ኣዲና ጋሶ ጊዲ ጎዳ ኢንቴ ጾሳ ኬꬅ ኤሆፔቶ።
DEU 23:19 ኔ ዛሬ ጊዲዳ ኢስራኤሌ ኣሳስ ሚሼ፥ ካꬅ ዎይኮ ሃራ ሚሽ ታልኣዳ ዛራሼ ዲች ኤኮፋ።
DEU 23:20 ሃራ ቢታ ኣሳፔ ዲቻ ኤካናስ ዳንዳያሳ፤ ጊዶ ኣቲን ኔ ባጋ ጊዲዳ ኢስራኤሌ ኣሳስ ዲቻስ ታልኦፋ፤ ሂስቲኮ ኔ ባዳ ላታና ቢታይን ጎዳ ኔ ጾሳይ ኔና ኡባ ባጋራካ ኣንጃና።
DEU 23:21 ጎዳ ኔ ጾሳስ ኔ ኢማና ጋዳ ኣዲኔቲዳ ሚሽ ጋꬃናስ ጋምኦፋ፤ ኔ ጊዳ ቃላ ኔ ፖላና ማላ ጎዳ ኔ ጾሲ ኮዬስ፤ ኔ ኣዲኔቲዳ ቃላ ጋꬆንታ ኢጺኮ ሄሲ ኔስ ናጋራ ጊዴስ።
DEU 23:22 ጎዳ ኔ ጾሳስ ኔ ኢማና ጋዳ ኣዲኔቶንታ ኣጊኮ ሄሲ ኔስ ናጋራ ጊዴና።
DEU 23:23 ጊዶ ኣቲን ጎዳ ኔ ጾሳስ ኔ ዶሳን ኢማና ጋዳ ኔ ጌሊዳ ማላ ኔ ኢንጻርሳፌ ኬዚዳይሳ ፖላ።
DEU 23:24 ኣሲ ቶኪዳ ዎይኔ ሚꬃ ጊዶራ ካንꬃ ባሼ ኔ ኮዪዳ ኬና ኢዛፔ ማናስ ዳንዳያሳ፤ ጊዶ ኣቲን ኣይ ሚሻንካ ዬጋዳ ኔሶ ኤፎፓ።
DEU 23:25 ኣሳ ካꬃ ጊዶራ ኣꬋ ባሼ ቲያፔ ጹጳ ማና ዳንዳያሳ፤ ጊዶ ኣቲን ማጻ ኤካዳ ኔሶ ቦፓ።
DEU 24:1 ኢሲ ኣሲ ማቾ ኤኪ ሲሚዳፔ ጉዬ ኢዚ ቦላ ኢሲ ኢታ ሚሽ ዴሚዲ ኢዞ ኢጺኮ ኢዞ ኣንጂ ዬዲሼ ኢዚስ ዋራቃታ ጻፊ ኢሚዲ ዬዶ።
DEU 24:2 ኢዛሶፔ ኬዛዳ ሃራ ኣዚና ጌሊኮ፥
DEU 24:3 ሄ ናምኣንꬆ ኣዚናይካ ኢዞ ዶሶንታ ኢጺዲ ኢዚስ ዋራቃታ ጻፊ ኢሚዲ ባ ሶፔ ኢዞ ኬሲ ዬዲኮ፥ ዎይኮ ኢዞ ኤኪዳ ሄ ናምኣንꬆ ኣዚናዚ ሃይቂኮ፤
DEU 24:4 ኢዛ ቱኒዳ ጊሻስ ኮይሮ ኣንጂ ዬዲዳ ኣዚናዚ ናምኣንꬆ ኢዞ ዛሪዲ ኤኮፎ፤ ሄሲ ጎዳ ማታን ኢጼቲዳይሳ፤ ቃሴ ኢንቴካ ጎዳ ኢንቴ ጾሳይ ኢንቴስ ኢሚዳ ቢታን ሃይሳ ማላ ናጋራ ኦꬆፍቴ።
DEU 24:5 ማታ ዎዴ ማቾ ኤኪዳ ኣሲ ኦላስ ቦፖ፤ ሃራ ዴጾ ኦሶካ ኢዛ ኦሲሶፒቴ። ኢሲ ላይꬂ ኣꬋና ጋካናስ ባሶን ጋምኢዲ ባናኔ ባ ኤኪዳ ማቺዮ ኡፋይሶ።
DEU 24:6 ኔኒ ኢሳዴስ ሚሼ ታልኤ ታልኣሼ ካꬅ ጋጪዛ ዎጻ ዎይኮ ዎጻ ማይዴ ኢዛፔ ኦይꬆ ኤኮፋ። ሄሳꬆ ኦሶይ ኣሳ ሼምፖ ኦይሶራ ጊና።
DEU 24:7 ባ ኢሻ ጊዲዳ ኢስራኤሌ ኣሳ ጋርሳፌ ꬋንካ ባርሲ ኤፊዲ ባስ ኣይሌ ኦꬂዛይ ዎይኮ ሃራ ኣሳስ ኣይሌቴꬃስ ኣꬂ ባይዚዛዴይ ኦኒካ ሃይቆ። ሄሳꬆ ሂስቲዲ ኢታ ኦሶ ኢንቴ ጊዶፌ ዲጊቴ።
DEU 24:8 ኢሳፌ ኢሳን ኣꬊዛ ጋልባ ሃርጌፌ ኬሂ ናጌቲቴ፤ ታኒ ኢስታ ኣዛዚዳ ማላ ሌዌ ቆሞ ጊዲዳ ቄሴቲ ኢንቴስ ኢሚዛ ዎጋታ ሎኤꬂ ናጊቴ።
DEU 24:9 ኢንቴ ጊብጼፔ ኬዚ ዪሺን ጎዳ ኢንቴ ጾሲ ማራሚ ቦላ ኦꬂዳይሳ ዩሺ ቆፒቴ።
DEU 24:10 ኔኒ ኢሳዴስ ኢሲ ሚሼ ታልኤ ኢማሼ ኢዚ ኔና ኦይꬂዛ ሚሽ ኤካናስ ኢዛዴ ሶ ጌሎፓ።
DEU 24:11 ኔኒ ካሬን ዲሺን ኢዛዴይ ባ ኩሼራ ኔስ ኦይሶ ኤሆ።
DEU 24:12 ኢዛዴይ ማንቆ ጊዲኮ ኔ ኦይሶ ኤካዳ ኢዛ ኣፋላ ኔ ሶን ኣይሶፋ።
DEU 24:13 ኢዚ ማይኢ ኣቃና ማላ ኣርሼይ ዉሎንታ ዲሺን ኢዛስ ዛራ፤ ኢዚካ ኔና ጋላታና፤ ሄሲ ኔስ ጎዳ ኔ ጾሳ ኣቻን ጺሎቴꬃን ቆዴታና።
DEU 24:14 ኔ ባጋ ጊዲዳ ኢስራኤሌ ኣሳፔ ጊዲን ዎይኮ ሃራ ዴሬፔ ቤቴ ዪዲ ሜቶቲዳ ማንቆ ኣሲ ኔስ ኦꬂኮ፥ ኢዛዴ ዎልቃ ጮ ሜላ ኔስ ጎኤቶፋ።
DEU 24:15 ኢዚ ሃች ኦꬂዳይሳ ሃች ኤካናስ ሚንꬂ ኮይዛ ጊሻስ ኣርሼይ ዉሎንታ ዲሺን ቃንጻ፤ ሂስቶንታ ኣጊኮ ሜቶታንቻይ ኔፔ ዴንዶይሳን ጎዳስ ዋሲኮ ኔስ ናጋራ ጊዳና።
DEU 24:16 ናይቲ ሞሪዳ ሞሮን ዬሊዳይቲ፥ ቃሴ ዬሊዳይቲ ሞሪዳ ሞሮን ኢስታ ናይቲ ሃይቆን ቃጻዬታናስ ቤሴና፤ ኢሶይ ኢሶይ ባ ሞሪዳ ሞሮዛ ጊሻስ ሃይቆን ቃጻዬቶ።
DEU 24:17 ሃራ ቢታ ኣሳታሲኔ ዪኦ ናይታስ ፒርዳ ጌላሶፓ፤ ኣምኤይ ማይኦ ኢዛ ታልኤ ኤኪዳ ሚሻ ጊሻስ ጋዳ ኦይሶ ኤኮፋ።
DEU 24:18 ካሴ ኢንቴ ጊብጼ ቢታን ኣይሌቴꬃን ዴኢዳይሳኔ ኢንቴ ጎዳ ጾሳይ ኢንቴና ዎዚ ኬሲዳይሳ ዩሺ ቆፒቴ፤ ታኒካ ሃይታ ሃ ኣዛዞታ ኢንቴስ ኢሚዛይ ሄሳሳ።
DEU 24:19 ኔኒ ማጺዳ ካꬃ ሺሺን ባሌቲ ጉዬ ኣቲዳ ሚርቄይ ዲኮ ኢዛ ኤካናስ ጉዬ ሲሞፋ፤ ሄሳ ሃራ ቢታፌ ዪዳ ቤቴ ኣሳታስ፥ ዪኦታሲኔ ኣምኤታስ ሄን ኣጋጋ። ኔ ሄሳꬆ ኦꬂኮ ኔ ኦꬂዛ ኦሶ ኡባን ጎዳ ኔ ጾሳይ ኔና ኣንጃና።
DEU 24:20 ኔኒ ዎጋራ ሚꬃ ኣይፌ ኢሲቶ ማጺዳፔ ጉዬ ጌዶን ኣቲዳይሳ ኤካናስ ናምኣንꬆ ጉዬ ሲሞፋ። ሄሳ ሃራ ቢታፌ ቤቴ ዪዳይታስ፥ ዪኦ ናይታሲኔ ኣምኤታስ ኣጋጋ።
DEU 24:21 ኔኒ ዎይኔ ሚꬃ ኣይፌ ኢሲቶ ማጺዳፔ ጉዬ ጌዶን ኣቲዳይሳ ኤካናስ ናምኣንꬆ ጉዬ ሲሞፋ፤ ሄሳ ሃራ ቢታፌ ቤቴ ዪዳይታስ፥ ዪኦ ናይታሲኔ ኣምኤታስ ኣጋጋ።
DEU 24:22 ኔካ ካሴ ጊብጼ ቢታን ኣይሌ ጊዲዳይሳ ባሎፓ፤ ታኒካ ሃይታ ሃ ኣዛዞታ ኢንቴስ ኢሚዛይ ሄሳሳ።
DEU 25:1 ናምኡ ኣሳቲ ባ ጋርሳን ፓላሜቲዲ ፒርዳሶ ቢኮ ቆሄቲዳይሳ ኔ ጺሎ፤ ቆሂዳይሳ፥ «ኔ ዎርዶ» ጊዲ ፒርዲዛይቲ ፒርዴቶ።
DEU 25:2 ቆሂዳይሲ ጋራፌቲ ቃጻዬታናስ ቤሲዛ ጊዲኮ ፒርዲዛይቲ ኢዚ ዛቁሊዲ ጋራፌታና ማላ ኣዛዜቶ፤ ሄሳፌ ጉዬ ሞራንቻይ ፒርዲዛይታ ሲንꬃን ባ ሞሮ ኬና ጋራፌቶ።
DEU 25:3 ኢዚ ኦይዱ ታሙቶ ሾጬቶ ኣቲን ሄሳፌ ኣꬎ ሾጬታናስ ቤሴና፤ ሄሳፌ ቦላራ ጋራፌቲኮ ኔ ኢሻዚ ኔ ሲንꬃን ካዉያና።
DEU 25:4 ካꬅ ቦራን ቡካሼ ቡኪዛ ቦራ ዶና ቃቾፋ።
DEU 25:5 ኢሲፌ ዴኢዛ ኢሻንታፌ ኢሶይ ና ዬሎንታ ሃይቂኮ ኢዛ ማቻ ካሬ ባዳ ኣላጋ ኣስ ጌሉፑ፤ ኢዚ ኣዚና ኢሻይ ኢዞ ላቲዲ ኢዚስ ኮሺዛ ኡባ ኩንꬆ።
DEU 25:6 ቃሴካ ኢስታፌ ዬሌቲዳ ኮይሮ ናይ ኢስራኤሌ ቢታን ሃይቂዳዴ ሱንꬃይ ꬋዮንታ ማላ ካሴ ሃይቂዳ ኢሻስ ና ጊዶ።
DEU 25:7 ጊዶ ኣቲን ኢዚ ባ ኢሻ ማቼዮ ኣይሳናስ ኮዮንታ ኣጊኮ ኢዛ ካታማ ፔንጌን ኡቲዳ ጪማታኮ ባዳ፥ «ታ ኣዚና ኢሻይ ባ ኢሻ ሱንꬂ ኢስራኤሌን ዴኣና ማላ ኮዪቤና፤ ታና ኤኪኬ ጊዲ ታስ ኮሺዛ ሚሽ ኩንꬆንታ ኢጺዴስ» ጋዳ ማጋኑ።
DEU 25:8 ሄሳፌ ጉዬ ሄ ካታማዮ ካሌꬂዛ ጪማቲ ኣዴዛ ባኮ ጼይጊዲ ኢዛ ኦይቼቶ። ኢዚ ሃኢካ ማጫሳዮ ኤኮንታ ኢጺኮ፥
DEU 25:9 ሄ ሃይቂዳይሳ ማቼያ ሄ ካታማዮ ካሌꬂዛ ጪማታ ሲንꬂ ሺቃዳ ሄ ኣዴዛ ቶሆፔ ኢሲ ጫማ ሾዳዳ ኢዛ ኣይፌሶን ጩች ጩታዳ፥ «ባ ኢሻስ ዜሬꬂ ዴኣና ማላ ኮዮንታ ኣሳ ቦላ ሃይሳ ማላ ካዉሻቴꬂ ጋካናስ ቤሴስ» ጉ።
DEU 25:10 ሄ ኣዴዛ ዛሬይ ኢስራኤሌ ኣሳ ጊዶን፥ «ኢዛ ቶሆፔ ጫማይ ሾዴቲዳዴ ሶ ኣሳታ» ጌቴቲ ካዉሻን ጼይጌቲሼ ዴኣና።
DEU 25:11 ናምኡ ኣሳቲ ዋꬌቲሺን ኢስታፌ ኢሳ ማቼያ ያዳ ባ ኣዚና ኣሻናስ ባ ኩሼ ዬዳዳ ሃንኮይሳ ኣቱማቴꬃ ኦይኪኮ፥
DEU 25:12 ሄ ማጫሳይ ኩሼይ ማሮይ ባይንዳ ቃንጼቶ።
DEU 25:13 ኣስ ባሌꬃናስ ጊታኔ ጉꬅ ጊዲዳ ናምኡ ቆሞ ጌዳራ ሚሺ ኔ ማታን ዶፖ።
DEU 25:14 ኣስ ባሌꬃናስ ኣዱሴኔ ቃንꬅ ጊዲዳ ናምኡ ቆሞ ዋꬋ ሚሺ ኔ ሶን ዶፖ።
DEU 25:15 ጎዳ ኔ ጾሳይ ኔስ ኢማና ቢታይን ኔኒ ኣዱሳ ዎዴ ዴኣና ማላ ኣማንꬂዛኔ ሊኬ ጊዲዳ ጌዳራ ሚሺኔ ዋꬋ ሚሺ ኔስ ዶ።
DEU 25:16 ጌዳራ ሚሻኒኔ ዋꬋ ሚሻን ዎርዶራ ኣስ ባሌꬂዛ ኣሳታ ኡባ ጎዳ ኔ ጾሳይ ኢጼስ።
DEU 25:17 ኢንቴ ጊብጼ ቢታፌ ኬዚ ቢሺን ኣማሌቄ ኣሳይ ኢንቴ ቦላ ጋꬂዳ ቆሆዛ ባሎፒቴ።
DEU 25:18 ኢስቲ ጾሳስ ያዮንታ ኣሳ፤ ኢንቴ ኦጌን ኢንቴናራ ኤቄቲዳ፤ ኢንቴ ሄሜቲሺን ዳቡርዲ ጉዬ ኣቲዳ ኣሳ ኡባ ዎꬊዳ።
DEU 25:19 ሄሳ ጊሻስ ጎዳ ኢንቴ ጾሳይ ሄ ቢታዮ ኢንቴና ላቲሲዲ ኢንቴና ዩዪ ኣꬊዳ ኢንቴ ሞርኬታ ኡባፌ ሼምፒሲዛ ዎዴ ኣሲ ኢስታ ቢታ ቦላ ዛሪ ቆፖንታ ማላ ኣማሌቄ ኣሳ ዉርሳ ꬋይሳ፤ ሄሳ ሙሌካ ባሎፓ።
DEU 26:1 ጎዳ ኔ ጾሳይ ኔና ላቲሳና ቢታዮ ኔ ጌላ ኡቲዛ ዎዴ፥
DEU 26:2 ጎዳ ኔ ጾሳይ ኔስ ኢሚዛ ቢታን ሞኪዳ ካꬅ ኡባፌ ጼራ ኬሼራ ጎዳ ኔ ጾሳይ ባ ሱንꬂ ሄሳን ጼይጌታና ማላ ዶሪዳሶ ኤካ ባ።
DEU 26:3 ሂስታዳ ሄ ዎዴን ኣዋቴꬃን ኦꬂዛ ቄሴዛኮ ባዳ፥ «ጎዳ ኔ ጾሳይ ኑስ ኢማና ጊዲ ካሴ ኑ ኣዋታስ ጫቂዳ ቢታዮ ታ ጌሊዳይሳ ኔ ጎዳ ሲንꬃን ሃች ማርካታይስ» ጋ።
DEU 26:4 ቄሴዚካ ካꬃራ ዲዛ ኬሼዛ ኤኪዲ ጎዳ ኔ ጾሳስ ያርሾ ሺሺዛሶዛስ ሲንꬃ ባጋን ዎꬆ።
DEU 26:5 ሄሳፌ ጉዬ ኔኒ ጎዳ ኔ ጾሳ ሲንꬃን፥ «ታ ኣዋይ ካሴ ጮ ዩዪ ዩዪ ዲዛ ኣራሜ ዴሬ ኣሳ፤ ኢዚ ቆዳን ጉꬃ ኣሳታራ ጊብጼ ዎꬊዲ ዴኢሼ ሄን ጊታ ዎልቃማኔ ቆዳን ጮራ ካዎቴꬅ ጊዲዴስ።
DEU 26:6 ጊብጼ ኣሳይ ጊዲኮ ኑስ ሜቄꬅ ኢቲዲ ኑና ኡንኤꬂዳኔ ዴጾ ኦሶ ኑ ቦላ ጫኒዳ።
DEU 26:7 ሂስቲን ኑኒ ጎዳ ኑ ኣዋታ ጾሳኮ ዋሲዶስ፤ ኢዚካ ኑ ዋሶዛ ሲዪዲ ኑ ዋዬዛ፥ ኑ ዳቡራዛኔ ኑኒ ቆሄቲዳይሳ ቤኢዴስ።
DEU 26:8 ሂስቲዲ ጎዳይ ባ ዎልቃማ ቄሴኒኔ ባ ሚጬቲዳ ኩሼን፥ ጊታ ዳጋማን፥ ማላታኒኔ ማላሊሲዛ ኦራꬃ ሚሽ ኦꬂዲ ጊብጼ ቢታፌ ኑና ኬሲዴስ።
DEU 26:9 ኑና ሃ ሃይሳ ኤሂዲ ሃኖ ማꬂኔ ኤሲ ኢዚን ኩሚዳ ሞꬎ ቢታዮ ላቲሲዴስ።
DEU 26:10 ሄሳ ጊሻስ ሄኮ ታኒካ ኢዚ ታስ ኢሚዳ ጋዴን ካጺዳ ካꬃፌ ጼራ ኢዛስ ኤካ ያዲስ» ጋዳ ኬሼዛ ዎꬃዳ ጎዳ ኔ ጾሳ ሲንꬃን ሆካ ጎይና።
DEU 26:11 ኔሲኔ ኔ ሶ ኣሳስ ጎዳ ኔ ጾሳይ ኢሚዳ ሎኦ ሚሻን ኡፋዬቲዲ ጎዳ ጋላቲቴ፤ ሌዌቲኔ ኢንቴ ጊዶን ዴኢዛ ቤቴ ኣሳቲ ኡባይካ ኢንቴናራ ኡፋዬቴቶ።
DEU 26:12 ኣስራታ ኬሲዛ ሄꬓንꬆ ላይꬃን ላይꬃን ሞኪዳ ካꬅ ኡባፌ ኣስራታ ኬሳ ዉርሲዳፔ ጉዬ ኔ ካታማን ዴኢዛ ሌዌታስ፥ ቤቴ ኣሳታስ፥ ዪኦታሲኔ ኣምኤታስ ኔ ካታማን ኢስቲ ካሊ ማና ማላ ኢማ።
DEU 26:13 ሄሳፌ ጉዬ ጎዳ ኔ ጾሳ ሲንꬃን፥ «ኔ ኣዛዚዳ ማላ ታኒ ታሶፔ ኔስ ዱማቲዳይሳ ሌዌ ቆሞታስ፥ ቤቴ ኣሳታስ፥ ዪኦታሲኔ ኣምኤታስ ኢማዲስ፤ ታኒ ኔ ኣዛዞታፔ ኢሲኖካ ሜንꬃቤኬ፤ ቃሴ ኢሲኖካ ዶጋ ኣጋቤኬ።
DEU 26:14 ኣሲ ሃይቂን ካዮታሼ ኢዛፔ ማቤኬ፤ ታኒ ጌዮንታ ዳሼ ኢዛፔ ኣይኮካ ማቤኬ፤ ሃይቂዳ ኣሳ ጊሻስ ሺቂዛ ያርሾስካ ኢዛፔ ኣይኮካ ሺሻቤኬ። ታኒ ጎዳ ታ ጾሳስ ኣዛዜታዲስ፤ ቃሴ ኔኒ ታና ኣዛዚዳ ኡባ ፖላዲስ።
DEU 26:15 ኔኒ ሳሎን ዴኢዛ ጌሻ ሶሆፔ ሃ ዱጌ ጼላ፤ ኔ ዴሬ ኢስራኤሌኔ ካሴ ኑ ኣዋታስ ኔ ኢማና ጋዳ ጫቂዳ ማላ ኑስ ኢሚዳ ሃ ማꬂኔ ኤሲ ጎጊዛ ቢታዮ ኣንጃ» ጋ።
DEU 26:16 ጎዳ ኔ ጾሳ ዎጋታኔ ማራታ ኔ ናጋና ማላ ሄኮ ሃች ኔና ኣዛዚዴስ፤ ሄሳ ጊሻስ ኔኒ ኩሜꬃ ሼምፖፌኔ ኩሜꬃ ዎዚናፔ ናጋ።
DEU 26:17 ጎዳይ ኔስ ጾሳ ጊዲዳይሳ ኔ ኢዛ ኦጌን ባናይሳ፥ ኢዛ ዎጋ፥ ኢዛ ኣዛዞታኔ ኢዛ ማራ ኔኒ ፖላናይሳ ሃች ኤሪሳዳሳ።
DEU 26:18 ቃሴ ጎዳይካ ባ ጌሊዳ ቃላ ማላ ኔኒ ኢዛስ ዱማ ኣስ ጊዲዳይሳ፥ ኢዛስ ጺንጾ ጊዲዳይሳኔ ኔኒ ኢዛ ኣዛዞ ኡባ ናጋናይሳ ኤሪሲዴስ።
DEU 26:19 ኔኒ ሄሳ ኦꬂኮ ኢዚ ሜꬊዳ ኣሳ ኡባፌ ቦላራ ጋላታን፥ ሱንꬃኒኔ ቦንቾን ጊታ ካዎቴꬅ ኦꬃና፤ ኢዚ ጌሊዳ ጫቆ ቃላ ማላ ኢዛስ ዱማ ዴሬ ኦꬃናይሳ ኔስ ኤሪሲዴስ።
DEU 27:1 ሄሳፌ ጉዬ ሙሴይ ኢስራኤሌ ኣሳ ካሌꬂዛይታራ ዴሬዛስ፥ «ታኒ ኢንቴስ ሃች ኢሚዛ ኣዛዞታ ኡባ ናጊቴ።
DEU 27:2 ኢንቴ ዮርዳኖሴ ሻፋ ፒኒዲ ጎዳ ኢንቴ ጾሳይ ኢንቴስ ኢሚዛ ቢታዮ ጌሊዛ ዎዴ ኣማርዳ ጊታ ሹቻታ ኤሲዲ ኢስታ ኖራ ቲዪቴ።
DEU 27:3 ካሴ ጎዳ ኢንቴ ኣዋታ ጾሳይ ኤሲኔ ማꬂ ኩሚዳ ቢታዮ ኢንቴስ ኢማናስ ጫቂዳ ቃላ ማላ ሄ ቢታዮ ኦይካናስ ኢንቴ ፒኒዳ ዎዴ ሃ ዎጋ ቃላታ ሎቻ ሹቻታ ቦላ ጻፍቴ።
DEU 27:4 ኢንቴ ዮርዳኖሴ ሻፋ ፒኒዲ ታ ኢንቴና ሃች ኣዛዚዳ ማላ ሄ ሹቻታ ኤባሌ ዙማ ቦላ ኤሲዲ ኢስታ ቦላ ኖራ ቲዪቴ።
DEU 27:5 ሄን ጎዳ ኢንቴ ጾሳስ ቢራታይ ቦቾንታ ሹቻታ ኤኪዲ ያርሾ ያርሺዛሶ ጊግሲቴ።
DEU 27:6 ጎዳ ኢንቴ ጾሳስ ያርሾ ያርሺዛሶ ማሴቶንታ ሹቻፌ ኦꬂዲ ኢዛ ቦላን ጎዳ ኢንቴ ጾሳስ ጹጌቲ ሺቂዛ ያርሾ ሺሺቴ።
DEU 27:7 ኢሲፌቴꬃ ያርሾ ሺሺዲ ሄን ጎዳ ኢንቴ ጾሳ ሲንꬃን ኡፋዬቲሼ ሚቴ።
DEU 27:8 ሄ ሹቻታ ቦላ ጾሳ ዎጋታ ኡባ ናባቤታና ማላ ቆንጪሲ ጻፍቴ» ጊ ኣዛዚዴስ።
DEU 27:9 ሙሴይካ ሌዌ ቆሞታፔ ቄሴታራ ጊዲዲ ኢስራኤሌ ኣሳ ኡባስ፥ «ኢስራኤሌ ኣሳዉ ታኒ ጊዛይሳ ዎዚናን ዎꬃ ሲያ፤ ሄኮ ሃች ኔኒ ጎዳ ኔ ጾሳ ዴሬ ጊዳዳሳ።
DEU 27:10 ሄሳ ጊሻስ ታኒ ኔስ ሃች ኢሚዛ ኣዛዞታኔ ዎጋታ ኔ ዉርሳ ናጋዳ ጎዳ ኔ ጾሳ ቃላስ ኣዛዜታ» ጊዴስ።
DEU 27:11 ሄ ጋላስ ሙሴይ ኢስራኤሌ ዴራ ሂዝጊ ኣዛዚዴስ፥
DEU 27:12 «ኢንቴ ዮርዳኖሴ ፒኒዳፔ ጉዬ ዴሬዛ ኣንጃናስ ጋሪዛኔ ዙማ ቦላ ኤቃናስ ቤሲዛይቲ ሲሞና፥ ሌዌ፥ ዩሁዳ፥ ዪሳኮሬ፥ ዮሴፌ ቆሞታኔ ቢኒያሜ ቆሞታ።
DEU 27:13 ዴሬዛ ቃንጋናስ ኤባሌ ዙማ ቦላ ኤቃናስ ቤሲዛይቲ ኦሮቤሌ፥ ጋዴ፥ ኣሴሬ፥ ዛቢሎኔ፥ ዳኔ ቆሞታኔ ኒፍታሌሜ ቆሞታ።»
DEU 27:14 ሌዌ ቆሞቲ ባ ቃላ ꬎቁ ሂስቲዲ ሃይሳፌ ካሊዛ ቃላ ኢስራኤሌ ኣሳ ኡባስ ጌቶ።
DEU 27:15 «ጎዳይ ኤቃ ጾሳታስ ጎይኖ ኢጺዛ ጊሻስ፥ ሚꬃፌ ማሲዲ ሹቻፌ ቆጺዲኔ ቢራታ ሴሪሲዲ ኤቃ ጾስ ጊግሲዲ ጌማን ጎይኒዛዴይ ኦኒካ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:16 «ባ ኣዋ ዎይኮ ባ ኣዮ ካዉሺዛዴይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:17 «ꬋስ ሾዲዛዴይ ዉሪ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:18 «ቆቄ ኣስ ሃዲርሳ ኦጌ ካሌꬂዛ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:19 «ቤቴ ኣሳታ፥ ዪኦ ናይታኔ ኣምኤታ ፒርዳ ጌላሲ ፒርዲዛ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:20 «ባ ኣዋ ማቺራ ዚንኢዲ ባ ኣዋ ቦንቾ ካዉሺዛ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:21 «ኣይ ሜሄራካ ፓራቲዛዴይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:22 «ባ ሚቼይራ ዎይኮ ባ ኣዪ ናይራ ዎይኮ ባ ኣዋ ናይራ ዚንኢዛ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን» ጎ።
DEU 27:23 «ባ ቦሎቴይራ ዚንኢዛ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን» ጎ።
DEU 27:24 «ጌማሶን ዛማዲ ኡቲዲ ኣሴ ዎꬊዛ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:25 «ሚሻን ሻሜቲዲ ጺሎ ሼምፖ ዎꬊዛ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 27:26 «ሃይታ ሃ ዎጋ ቃላታ ናጎንታ ኡባይ ቃንጌቲዳዴ ጊዶ!» ዴሬዚ ዉሪካ፥ «ኣሚን!» ጎ።
DEU 28:1 ኔኒ ጎዳ ኔ ጾሳስ ኣዛዜቲኮ ሃች ታ ኔስ ኢሚዛ ኣዛዞታ ኔ ኡባ ኣማኔታዳ ናጊኮ ኢዚ ኔና ቢታ ቦላ ዲዛ ካዎቴꬃታ ኡባፌ ቦላራ ꬎቁ ꬎቁ ሂስታና።
DEU 28:2 ኔኒ ጎዳ ኔ ጾሳስ ኣዛዜቲኮ ሃይሳፌ ካሊዛ ኣንጆቲ ዉሪካ ኔይታ ጊዳና።
DEU 28:3 ኔኒ ካታማኒኔ ጋጻሬን ኣንጄቲዳ ኣስ ጊዳና።
DEU 28:4 ኔ ናይቲ፥ ኔ ቢታን ዲዛ ካꬃ ኣይፌይ፥ ኔ ሚዛቲ፥ ዶርሳቲኔ ዴይሻቲ ኡባይ ኣንጄታና።
DEU 28:5 ኔ ካꬃ ጎታራይኔ ማዳይ ኣንጄታና።
DEU 28:6 ኔኒ ጌላዳካ ኬዛዳካ ኣንጄታና።
DEU 28:7 ኔ ሞርኬቲ ኔ ቦላ ሜቶ ጋꬂዛ ዎዴ ጎዳይ ኢስታ ኔ ሲንꬃን ኩንዲሳና፤ ኢስቲ ኔ ቦላ ኢሲ ባጋራ ያና፤ ጊዶ ኣቲን ላፑን ኦጌራ ኔፔ ባቃታና።
DEU 28:8 ጎዳይ ኔ ኩሼይ ኦይኪዳ ኡባኔ ኔ ጎታራ ኡባ ኣንጃና፤ ቃሴ ኢዚ ኔስ ኢሚዳ ቢታንካ ኔና ኣንጃና።
DEU 28:9 ኔኒ ጎዳ ኔ ጾሳስ ኣዛዜቲኮኔ ኔ ኢዛ ኣዛዞታ ኡባ ፖሊኮ ኢዚ ኔስ ጫቂዳ ቃላ ማላ ኢዚ ኔና ባስ ዱማ ሻኬቲዳ ዴሬ ሂስታና።
DEU 28:10 ሄሳፌ ጉዬ ቢታ ቦላ ዲዛ ዴሬይ ዉሪካ ጎዳ ሱንꬂ ኔናን ጼይጌቲዛይሳ ቤኢዲ ኔስ ያያና።
DEU 28:11 ጎዳይ ኔስ ኢማናስ ካሴ ኔ ኣዋታስ ጫቂዳ ቢታ ቦላ ኔስ ዳሮ ናይታ፥ ዳሮ ሜሄኔ ኬሂ ዳሮ ካꬅ ኢማና።
DEU 28:12 ኔ ኩሼ ኦሶ ኡባ ኣንጃናሲኔ ጎዳይ ኔ ቢታስ ኢራ ዎዴራ ቡኪሳናስ ባ ሚንጃ ኬꬃ፥ ሳሎ ፔንጌ ኔስ ዶያና፤ ቃሴ ኔኒ ዳሮ ካዎቴꬃታስ ታልኣናፔ ኣቲን ኦፔካ ሃ ታልኤ ኤካካ።
DEU 28:13 ጎዳይ ኔና ሁኤ ሂስታናፔ ኣቲን ጎይና ሂስቴና፤ ሃች ታኒ ኔስ ኢሚዛ ኔ ጎዳ ኣዛዞ ሲያዳ ሄሳ ኔኒ ሚንꬃዳ ካሊኮ ኔኒ ኡባፌ ቦላ ጊዳናፔ ኣቲን ጋርሴ ጊዳካ።
DEU 28:14 ታኒ ኔስ ሃች ኢሚዳ ሃ ኣዛዞታፔ ካሬ ኬዛዳ ኤቃ ጾሳታስ ጎይናናሲኔ ኢስታስ ኦꬃናስ ቤሴና።
DEU 28:15 ቃሴ ኔኒ ጎዳ ኔ ጾሳስ ኣዛዜቶንታ ኢጺኮ፥ ታኒ ኔስ ኢሚዛ ዎጋታኔ ኣዛዞታ ኔ ኣማኔታዳ ናጎንታ ኢጺኮ ሃይሳፌ ካሊዛ ቃንጌꬃቲ ኔ ቦላ ጋካናኔ ኔና ኤኪ ባና።
DEU 28:16 ኔኒ ካታማኒኔ ጋጻሬን ቃንጌቲዳዴ ጊዳና።
DEU 28:17 ኔ ካꬃ ጎታራይኔ ማዳይ ቃንጌቲዳዝ ጊዳና።
DEU 28:18 ኔ ናይቲ፥ ኔ ቢታን ዲዛ ካꬃ ኣይፌይ፥ ኔ ሚዛቲ፥ ዶርሳቲኔ ዴይሻቲ ኡባይ ቃንጌቲዳዝ ጊዳና።
DEU 28:19 ኔኒ ጌላዳካ ኬዛዳካ ቃንጌቲዳዴ ጊዳና።
DEU 28:20 ኔኒ ኢታ ኦሶን ጎዳ ኣጊዳ ጊሻስ ኔ ኦꬂዛ ኦሶን ኡባን ኔ ሙሌራ ꬋያና ጋካናስ ቃንጌꬅ፥ ሂርጋኔ ካዉሻቴꬅ ጎዳይ ኔ ቦላ ኤሃና።
DEU 28:21 ኔኒ ላታናስ ጌላና ቢታይፌ ኔና ሙሌራ ꬋይሳና ጋካናስ ኔፔ ኪቾንታ ኢታ ሃርጌ ጎዳይ ኔ ቦላ ዬዳና።
DEU 28:22 ጎዳይ ኔና ጊልቃቴꬃን፥ ሚሾኒኔ ቆጾን፥ ማዱንꬃን፥ ጹጊዛ ኣዋኒኔ ኮሻን ꬋይሳና፤ ኔ ካꬃ ꬋይሳናስ ኩቱልኤኔ ሎቤ ኔ ቦላ ዬዳና።
DEU 28:23 ኔፔ ቦላራ ኔ ጊናን ዴኢዛ ሳሎይ ጻርቂማላ ጊዳና፤ ኔ ቢታይካ ቢራታ ማላ ጊዳና።
DEU 28:24 ጎዳይ ኔ ቢታን ቡኪዛ ኢራ ቡሄኔ ጉዱላ ኬሳና፤ ኔኒ ቢታፌ ꬋያና ጋካናስ ጉዱላይ ሳሎፔ ዱጌ ቡካና።
DEU 28:25 ጎዳይ ኔ ሞርኬታ ሲንꬃን ኔኒ ጾኔታና ማላ ኦꬃና፤ ኔኒ ኢስታ ቦላ ኢሲ ኦጌራ ባናሺን ኢስታፌ ኣታናስ ላፑናሶራ ባቃታና፤ ቢታ ቦላ ዲዛ ካዎቴꬃቲ ኡባይ ኔ ቦላ ጋኪዛይሳ ቤኢዲ ሂርጋን ኮኮራና።
DEU 28:26 ኔ ኣሃይ ሳሎ ካፎታሲኔ ባዞ ዶኣታስ ቁማ ጊዳና፤ ኢስታ ጎዳና ኣሲካ ዴና።
DEU 28:27 ጎዳይ ኔና ፓጾንታ ጊብጼ ዴሬ ሃርጌን፥ ኪጻን፥ ጊዪዛ ማዱንꬃኒኔ ፑሶ ሃርጌን ሾጫና።
DEU 28:28 ጎዳይ ኔና ጎሻን፥ ቆቄቴꬃኒኔ ዳጋማን ዬጋና።
DEU 28:29 ጋላሳ ሴታን ኔኒ ቆቄይ ታታፌቲዛ ማላ ታታፌታና፤ ኔ ኦꬂዛ ኡባይ ኔስ ጊጎንታ ኢጻና፤ ኔኒ ኔ ዴኦ ኡባን ኡንኤታሼኔ ቦንቄታሼ ዳና፤ ኔና ማዲዛ ኣሴካ ዴማካ።
DEU 28:30 ኔኒ ማቾ ኤካናስ ጌላኦ ጊጊሳና፤ ጊዶ ኣቲን ሃራ ኣሲ ኢዞ ዳፊ ኤካና፤ ኔ ኬꬅ ኬጻናሺን ኢዛን ዳካ፤ ኔኒ ዎይኔ ሚꬅ ቶካናሺን ኢዛ ኣይፌ ጎኤታካ።
DEU 28:31 ኔ ኣይፌይ ጼሊሺን ኔ ሜሄ ሃራ ኣሲ ሹካና፤ ጊዶ ኣቲን ሄ ኣሾዛፔ ኣይኮካ ማካ፤ ኔ ሃሬይ ኔፔ ቦንቄቲ ኤኬታና፤ ጊዶ ኣቲን ኔስ ጉዬ ሲሜና፤ ኔ ዶርሳቲ ኔ ሞርኬስ ኢሜታና፤ ሄሳፌ ኣሻናስ ኔና ማዳናይ ዴና።
DEU 28:32 ኔ ኣይፌ ሲንꬃን ኔ ኣቱማ ናይቲኔ ማጫ ናይቲ ሃራ ካዎቴꬃስ ኢሜታና፤ ኢስቲ ሲሚን ቤኣና ጋዳ ኔ ጼሊሺን ኔ ኣይፌይ ዶልጁማና፤ ሄሳ ዲጋናስ ኔስ ኣይ ዎልቃይካ ዴና።
DEU 28:33 ኔ ቢታ ካꬃ ኣይፌኔ ኔ ዳቡራ ኬሲዳ ኡባ ሃራ ዴሬ ኣሲ ማና፤ ኔኒ ኔ ዴኦ ኡባን ኡንኤቲዳዴኔ ቆሄቲዳዴ ጊዳና።
DEU 28:34 ኔኒ ኣይፌን ቤኢዛ ኡባይ ኔና ጎሻና።
DEU 28:35 ጎዳይ ኔስ ቶሆ ጹጉንꬃፌ ቢዲ ሁኤ ቢናና ጋካናስ ሚዛ ፓጾንታ ኢታ ማዱንꬃኒኔ ኪጻን ኔ ሱሌኔ ኔ ዎዲራ ሾጫና።
DEU 28:36 ጎዳይ ኔናኔ ኔኒ ኔ ቦላ ካዎሳና ካዎዛ ሃ ቢታፌ ዴንꬂዲ ካሴ ኔኒኔ ኔ ኣዋቲ ኤሮንታ ሃራ ካዎቴꬅ ኤፋና፤ ኢንቴ ሄን ሚꬃፌኔ ሹቻፌ ኦሴቲዳ ኤቃ ጾሳታስ ጎይናና።
DEU 28:37 ጎዳይ ኔኒ ላሌታ ቢዛ ካዎቴꬃታ ኡባ ጊዶን ኔና ቂልጫስ፥ ሚቻሲኔ ካꬌስ ኬሳና።
DEU 28:38 ኔ ጋዴን ኔ ዳሮ ካꬅ ዜራና ሺን ቦሌይ ሚሺን ኣቲዳ ጉꬃ ካꬅ ሺሻና።
DEU 28:39 ኔኒ ዎይኔ ሚꬅ ቶካናሺን ኢዛ ኣይፌዛ ጎኤታካ፤ ጋሶይካ ጉጹኔይ ኢዛ ማና።
DEU 28:40 ኔ ዴሬን ኣዋንካ ዎጋራ ሚꬂ ሞካናሺን ዎዴይ ጋኮንታ ዲሺን ኣይፌ ቆቆፋና፤ ሄሳ ጊሻስ ዎጋራ ዛይቴይ ኔስ ዴና።
DEU 28:41 ኔኒ ማጫ ናይታኔ ኣቱማ ናይታ ዬላናሺን ኢስቲ ኦላን ዲኤቲ ቢኮ ኔ ሜላ ኣታና።
DEU 28:42 ኔ ጋዴን ዲዛ ሚꬃኔ ካꬃ ኡባ ቦሌይ ማና።
DEU 28:43 ኔ ዎልቃይ ዳቡሪ ዳቡሪ ቢሺን ኔ ዴሬን ዲዛ ቤቴ ኣሳ ዎልቃይ ሚኒ ሚኒ ባና።
DEU 28:44 ኔ ዴሬን ዲዛ ቤቴ ኣሳይ ኔስ ታልኤ ኢማና ኣቲን ኔ ኢስታስ ታልኣካ፤ ኢስቲ ኔስ ሁኤ ጊዳና፤ ኔኒ ጊዲኮ ኢስታስ ጎይና ጊዳና።
DEU 28:45 ኔኒ ጎዳ ኔ ጾሳስ ኣዛዜቶንታ ኢጺዳ ጊሻሲኔ ኢዚ ኔስ ኢሚዳ ዎጋታኔ ኣዛዞታ ኔኒ ናጎንታ ኢጺዳ ጊሻስ ኔኒ ሙሌራ ꬋያና ጋካናስ ሃይቲ ሃ ቃንጌꬃቲ ኡባይ ኔ ቦላ ጋካና።
DEU 28:46 ሃ ቃንጌꬃቲ ኡባይ ጾሲ ኔ ቦላኔ ኔ ዜሬꬃታ ቦላ ቂጻቴስ ዬጊዳ ሜርናስ ማላታኔ ማላሊሲዛዝ ጊዳና።
DEU 28:47 ጎዳ ኔ ጾሳይ ኔና ዳሮ ባጋራ ኣንጂዴስ፤ ጊዶ ኣቲን ኔ ጋላታሼ ኡፋይሳን ኢዛስ ኦꬃቤካ።
DEU 28:48 ሄሳ ጊሻስ ኔኒ ጋፋን፥ ሳሞን፥ ካሎቴꬃኒኔ ሜቶ ኡባን ጎዳይ ኔ ቦላ ዬዲዛ ኔ ሞርኬታስ ኔ ሃሬታና፤ ጎዳይ ኔና ꬋይሳና ጋካናስ ኔ ሞርጌን ቢራታ ቃምባራ ዋጻና።
DEU 28:49 ጎዳይ ኔ ኢስታ ቃላ ኤሮንታ ካዎቴꬅ ሃኮ ዴሬፔ ኔ ቦላ ኤሃና፤ ኢስቲካ ጎሌ ካፎ ማላ ኔ ቦላ ዎꬋና።
DEU 28:50 ኢስቲ ሜንጼ ኢታታ፥ ጪሚዳ ኣሳ ቦንቾንታይታኔ ጉꬃ ናይታስ ሚሼቶንታይታ ጊዳና።
DEU 28:51 ኢስቲ ኔ ሜሄኔ ኔ ካꬅ ኡባ ፒቲ ሚዛይታ ጊዲዳ ጊሻስ ኔኒ ሃይቃና ጋካናስ ኮሻን ዋያና፤ ኢስቲ ኔ ꬋያና ጋካናስ ኔ ካꬃፌ ኢሲ ኣይፌ፥ ኔ ሜሄፔ ጉꬃ ማሪ፥ ኔ ዶርሳፌ ጉꬃ ላቃ፥ ዎይኔፔኔ ዎጋራ ሚꬃ ኣይፌፔ ቂ ፓላካ ኣሼቴና።
DEU 28:52 ኔ ቢታን ዴኢዛ ኔኒ ኢስታን ኣማኔቲዛ ኣዱሳኔ ሚኖ ዲርሳቲ ኡባሶራ ላሌታና ጋካናስ ኔ ካታማታ ኡባ ዩሾን ዶዲዲ ኔና ኡንኤꬃና። ጎዳ ኔ ጾሳይ ኔስ ኢሚዳ ቢታ ኡባ ዩሾን ዶዲ ኔ ሚጻታ ዲፒ ሂስቲ ꬋይሳና።
DEU 28:53 ኔ ሞርኬቲ ኔ ካታማታ ዶዲዲ ኔና ኡንኤꬂን ኔስ ሚዛዚ ꬋዪን ኔ ሜቶቲዛ ዎዴ ጎዳ ኔ ጾሳይ ኔስ ኢሚዳ ኔ ኡሎፔ ዬሌቲዳ ማጫ ናይታኔ ኣቱማ ናይታ ኣሾ ዶሳይ ባይንዳ ኔ ማና።
DEU 28:54 ኔ ጊዶን ሃራይ ኣቶ ካሴ ኪያኔ ኢንጄ ዱሲ ዴስ ጌቴቲዛ ኣሲካ ባ ኢሻስ፥ ባ ሲቂዛ ማቼይሲኔ ባ ዬሊዳ ናይታስ ቃꬌቴና።
DEU 28:55 ጉዬን ካታማ ዶዲዲ ኡንኤꬂዳ ጋሶን ማና ሚሺ ሃራይ ባይንዳ ጊሻስ ባ ሚዛ ባ ናይታ ኣሾፔ ሃራስ ኦናስካ ኢሜና።
DEU 28:56 ኔ ጊዶን ካሴ ኢንጄን ዴኣዉስ ጌቴቲዳራ ባ ኢንጄ ዱሳፌ ዴንዶይሳን ሳኣ ዬꬋናስ ሻቴቲዛ ማጫሳያካ ባ ሲቂዛ ኣዚናሲኔ ባ ናይታስ ቃꬌቱኩ።
DEU 28:57 ሞርኬይ ኢዛ ዴኢዛ ካታማ ዶዲዲ ኢዞ ኡንኤꬂዳ ጊሻሲኔ ቱጋሲዳ ጊሻስ ኢዚስ ሚዛ ሚሺ ሃራይ ኣይኮይካ ዴና፤ ሄሳ ጊሻስ ኢዛ ባ ዬሊዳ ዪꬋኔ ዶኣ ባ ሲቂዛ ኣዚናኔ ባ ናይታ ጋꬆንታ ኡዜታዳ ጌማን ባርካ ማና።
DEU 28:58 ሃይሳ ሃ ማጻፋን ጻፌቲዳ ጾሳ ዎጋ ኢንቴ ሎኤꬂ ናጎንታ ኣጊኮ ቃሴ ማላሊሲዛኔ ያሺሲዛ ጎዳ ኢንቴ ጾሳ ሱንꬃ ኢንቴ ቦንቾንታ ኣጊኮ፥
DEU 28:59 ጎዳይ ኢንቴ ቦላኔ ኢንቴ ናይታ ቦላ ባቢሲዛ ቦሻ፥ ሲሞንታ ባሺኔ ፓጾንታ ዴጾ ሃርጌ ዬጋና።
DEU 28:60 ኔኒ ጊብጼ ቢታ ቦላ ዎꬊን ቤያዳ ሂርጊዳ ሄ ኢታ ሃርጌዛ ኡባ ኢዚ ኔ ቦላ ዬዳና፤ ኔካ ሄ ሃርጌዛፔ ፓጻካ።
DEU 28:61 ጎዳ ዎጋቲ ጻፌቲዳ ሃ ማጻፋን ጻፌቶንታ ሃራ ቦሻታ ኢንቴና ኡባ ዉርሳና ጋካናስ ኢንቴ ቦላ ዬዳና።
DEU 28:62 ጎዳ ኢንቴ ጾሳስ ኢንቴ ኣዛዜቶንታ ኢጺዳ ጊሻስ ሳሎ ጾሊንቴ ማላ ዳሪዳ ኢንቴፌ ጉꬃቲ ጻላ ኣታና።
DEU 28:63 ጎዳይ ኢንቴና ዱሬሳናሲኔ ኢንቴ ቆዳ ዳርሳናስ ዶሲዳ ማላ ቃሴካ ኢንቴና ጉꬂሼኔ ቢታፌ ꬋይሲሼ ኢዚ ኡፋዬታና፤ ኢንቴካ ላታናስ ቢዛ ቢታይፌ ሾዴታና።
DEU 28:64 ጎዳይ ኔና ኩሜꬃ ኣላሜን ዲዛ ኣሳ ጊዶን ቢታስ ጋጻፔ ጋጻ ጋካናስ ላላና፤ ሄን ኔኒኔ ኔ ኣዋቲ ካሴ ጎይኒ ኤሮንታ ሚꬃፌኔ ሹቻፌ ኦሴቲዳ ኤቃ ጾሳታስ ኢንቴ ጎይናና።
DEU 28:65 ሄ ካዎቴꬃታ ጊዶን ኢንቴ ዎፓ ዴሜኬታ፤ ኢንቴ ቶሆ ጫማይ ዬꬊዛ ሶሆ ኬና ጋዴይካ ኢንቴስ ዴና፤ ሄሳን ጎዳይ ኢንቴስ ሜቶ ቆፋን ጻላ ኩሚዳ ሁኤ፥ ኣሞን ጻላ ዳቡርዳ ኣይፌኔ ሂዶታ ቃንጺዛ ዎዚና ኢማና።
DEU 28:66 ኢንቴስ ዱሳይ ኡባ ዎዴ ዋዬ ጻላ ጊዳና፤ ዱሳይ ኣማንꬆንታ ጊሻስ ኢንቴ ቃማኔ ጋላስ ሂርጊሼ ዳና።
DEU 28:67 ኢንቴ ዎዚናን ኩሚዳ ሂርጋፌኔ ኢንቴ ኣይፌን ቤኢዛ ፓላፔ ዴንዲዳይሳን ጋዴይ ዎንቲሺን ኢንቴ፥ «ኣይዴ ቃማኔሻ!» ቃሴ ጋዴይ ቃሚሺን፥ «ኣይዴ ዎንታኔሻ!» ጋና።
DEU 28:68 ታኒ ኢንቴና፥ «ናምኣንꬆ ሃ ኦጌዛራ ቤኬታ» ጊዳ ኦጌዛራ ጎዳይ ኢንቴና ዛሪዲ ማርካቤን ጉዬ ጊብጼ ዬዳና። ሄን ኢንቴ ኣይሌ ጊዳናስ ኢንቴ ሞርኬታስ ኢንቴና ባይዛናስ ኮያና፤ ጊዶ ኣቲን ኢንቴና ኣይሌሳናስ ሻሚዛ ኣስ ዴሜኬታ።
DEU 29:1 ጎዳይ ኮሬቤን ኢስራኤሌ ኣሳራ ጫቄቲዳ ጫቆ ቃላፔ ሃራ ሞኣቤ ዴሬን ናምኣንꬆ ጫቄታናስ ሙሴ ኣዛዚዳ ጫቆ ቃላቲ ሃይሳፌ ካሊዛይታ።
DEU 29:2 ሙሴይ ኢስራኤሌ ኣሳ ኡባ ጼይጊዲ፥ ጎዳይ ጊብጼ ካዎ ቦላ፥ ኢዛ ሹሜታ ቦላኔ ኡባ ዴራ ቦላ ኢዚ ኦꬂዳይሳ፥
DEU 29:3 ሄ ኢታ ሜቶታ፥ ጊታ ማላታታኔ ማላሊሲዛ ሚሻታ ኢንቴ ኢንቴ ኣይፌራ ቤኢዴታ።
DEU 29:4 ጊዶ ኣቲን ሃች ጋካናስ ጎዳይ ኢንቴስ ኣኬኪዛ ዎዚና፥ ጼሊዛ ኣይፌኔ ሲዪዛ ሃይꬅ ኢሚቤና።
DEU 29:5 ታኒ ኢንቴና ኦይዱ ታሙ ላይꬅ ኩሜꬅ ባዞን ካሌꬂሺን ኢንቴ ማይኦይ ጬጊቤና፤ ኢንቴ ቶሆን ኣꬂዳ ጫማይካ ዉሪቤና።
DEU 29:6 ኢንቴ ኡኬꬅ ሚቤኬታ፤ ዎይኔ ኡሹ ጊዲን ዎይኮ ማꬆሲዛ ኡሹ ኡዪቤኬታ። ታኒ ሄሳꬆ ኦꬂዳይ ታኒ ጎዳ ኢንቴ ጾሳይ ኢንቴ ጾሳ ጊዲዳይሳ ኢንቴ ኤራናሳ።
DEU 29:7 ኢንቴ ሃይሳ ሃ ጋኪዳ ማላ ሃሴቦኔ ካዎ ሲሆኔይኔ ባሳኔ ካዎ ኣጌይ ኑና ኦላናስ ዪን ኑኒ ኢስታ ጾኒዶስ።
DEU 29:8 ኑኒ ኢስታ ቢታ ኑስ ኤኪዶስ፤ ኦሮቤሌ ቆሞታስ ጋዴ ቆሞታሲኔ ሚናሴ ቆሞታፔ ባጋይታስ ሻኪ ሻኪ ኢስታስ ጺንጾ ጊዳና ማላ ኢሚዶስ።
DEU 29:9 ሄሳ ጊሻስ ኢንቴ ኦꬂዛ ኦሶ ኡባይ ኢንቴስ ኣንጄታና ማላ ሃይታ ጫቆ ቃላታ ኡባ ሚኒ ካሊቴ።
DEU 29:10 ኢንቴ ኡባቲ፥ ኢንቴና ካሌꬂዛይቲኔ ኢንቴ ሃላቃቲ፥ ኢንቴ ጪማቲኔ ኢንቴ ሹሜቲ፥ ሄሳꬆካ ሃንኮ ኢስራኤሌ ኣሳይ ኡባይካ ኢንቴ ሃች ጎዳ ኢንቴ ጾሳ ሱንꬃን ኤቂዴታ።
DEU 29:11 ኢንቴ ናይቲኔ ኢንቴ ማቼቲ ኢንቴስ ሚꬅ ቃንጺሼኔ ሃꬄ ዱቂሼ ኢንቴናራ ዲዛ ቤቴ ኣሳታራ ኢሲፌ ኤቂዴታ።
DEU 29:12 ጎዳ ኢንቴ ጾሳራ ኢንቴ ጫቄቲዳ ቃላዛ ሚንꬃናስ ሃች ሃይሳን ሺቂዴታ።
DEU 29:13 ጾሲ ኢንቴና ሃች ባ ዴሬ ሂስቲ ሚንꬃና፤ ኢንቴሲኔ ቤኒ ኢንቴ ኣዋታስ፥ ኣብራሃሜስ፥ ዪሳቃሲኔ ያቆቤስ ጌሊዳ ጫቆ ቃላ ማላ ኢዚ ኢንቴስ ጾስ ጊዳና።
DEU 29:14 ታኒ ሃይሳ ጫቆ ቃላ ጌሊዳይ ኢንቴናራ ጻላ ጊዴና።
DEU 29:15 ጎዳ ኑ ጾሳይ ሃይሳ ሃ ጫቆ ቃላ ጌሊዛይ ኢዛ ሱንꬃን ኤቂዳ ኑናራ ጻላ ጊዶንታ ሃች ሃይሳን ዶንታ ቡሮ ያና ዬሌታ ኡባሳራ ጫቄስ።
DEU 29:16 ኑኒ ጊብጼን ዋኒ ዴኢዳኮኔ ኑ ሃይሳ ሃ ዪሼ ኢሲ ኢሲ ካዎቴꬃራ ዋኒ ካንꬂ ዪዳኮ ኢንቴ ኡባይካ ሄሳ ኤሬታ።
DEU 29:17 ኢስታ ጊዶን ዲዛ ሃራሲዛ ሚሻታ ሚꬃፌ፥ ሹቻፌ፥ ቢራፔኔ ዎርቃፌ ኦሴቲዳ ኤቃ ጾሳታ ኢንቴ ቤኢዴታ።
DEU 29:18 ሃ ኢንቴፌ ኦኒኔ ኣቱማ ጊዲን ዎይኮ ማጫ ጊዲን ኢሲ ኬꬃ ኣስ ጊዲን ዎይኮ ቆሞ ጊዲን ጎዳ ኑ ጾሳፌ ሼርኢ ጊዲ ሃራ ካዎቴꬃታ ጾሳታስ ጎይኖንታ ማላ ናጌቲቴ፤ ኢንቴ ጋርሳን ሄሳ ማላ ጫሞኔ ማርዜ ጊዲዳ ሚሽ ኦꬂዛ ኣሲ ዶንታ ማላ ናጌቲቴ።
DEU 29:19 ሃ ጫቆ ቃላ ሲዪዲ ባ ዎዚናን፥ «ታኒ ታ ሼኔ ማላ ዲኮካ ታስ ሳሮይ ዴስ» ጊዲ ባና ጪሚኮ ሄሳ ማላ ኣሲ ሎኦታ ቦላኔ ኢታታ ቦላ ባሽ ኤሃና።
DEU 29:20 ሄሳ ማላ ኣስ ጎዳይ ሙሌካ ማሬና፤ ጎዳ ሃንቆይ ኢዛዴ ቦላ ታማ ማላ ኤጻና፤ ሃይሳ ሃ ማጻፋን ጻፌቲዳ ቃንጌꬂ ኢዛዴ ቦላ ዎꬋና፤ ሳሎ ጋርሳፌ ኢዛ ሱንꬃ ጎዳይ ꬋይሳና።
DEU 29:21 ሃይሳ ዎጋ ማጻፋን ጻፌቲዳ ቃንጌꬃ ቃላ ማላ ጎዳይ ኢዛዴ ኢስራኤሌ ኣሳ ኡባ ጋርሳፌ ዱማ ሻኪ ꬋይሳና።
DEU 29:22 ሲንꬃፌ ያና ዬሌታይ፥ ኢንቴ ዛሬይኔ ሃሆ ዴሬፔ ያና ሃራ ቢታ ኣሳይ ጎዳይ ኢንቴ ቦላ ኤሂዳ ቦሻኔ ሜቶዛ ቤኣና።
DEU 29:23 ሄ ቢታያ ሙሌራ ጹጌቲዳ ማጺኔኔ ዲኔ ጌቴቲዛ ቢዲንꬅ ጊዳና፤ ኢሲ ሚሺካ ኢዚን ቶኬቴና፤ ኣይ ሚሺካ ኢዚን ሞኬና፤ ኢዚን ፑዴ ዲጪዛ ሚሺ ቤቴና፤ ኢዚ ቦላ ጋካና ኩንዴꬂ ጎዳይ ኬሂ ሼኔቲዲ ሙሌራ ꬋይሲዳ ሶዶሜ ማላኔ ጋሞራ ማላ፥ ኣዳማ ማላኔ ጻቦይሜ ማላ ጊዳና።
DEU 29:24 ካዎቴꬃቲ ኡባይ፥ «ጎዳይ ሃ ቢታ ቦላ ሃይሳ ኣዛስ ጋꬂዴ? ሃ ዎልቃማ ሃንቆዛስ ጋሶ ጊዲዳይ ኣዜ?» ጊ ኦይቻና።
DEU 29:25 ኣሳይ ኢዛስ ዛሪዲ፥ «ካሴ ኢስታ ኣዋታ ጾሳይ ኢስታ ጊብጼ ዴሬፔ ኬሲዳ ዎዴ ኢስታራ ፓጬቲ ጫቆዛ ኣሳይ ኣጊዳ ጊሻሳ።
DEU 29:26 ቃሴ ኢስቲ ቢዲ ካሴ ባ ኤሮንታ ጾሳታሲኔ ኢዚ ኢስታስ ጎይኖፍቴ ጊዳ ኤቃ ጾሳታስ ጎይኒዳ።
DEU 29:27 ሄሳ ጊሻስ ጎዳይ ሃንቄቲዲ ሃ ማጻፋን ጻፌቲዳ ቃንጌꬅ ኡባ ኢስታ ቦላ ኤሂዴስ።
DEU 29:28 ጎዳይ ዎልቃማ ሃንቆኒኔ ኢታ ቦሻን ኢስታ ኢስታ ዴሬፔ ሾዲዴስ፤ ሄሳ ጊሻስ ኢስቲ ሃች ጋካናስ ሄን ዴቴስ» ጋና።
DEU 29:29 ጹራ ዮኦቲ ጎዳ ኑ ጾሳሳ፤ ጊዶ ኣቲን ኑኒ ሃ ዎጋ ቃላ ናጋና ማላ ቆንጪዳ ዮኦቲ ሜርናስ ኑሲኔ ኑ ናይታሳ።
DEU 30:1 ናምኣታፔ ኢሳ ኢንቴ ዶራና ማላ ሃች ታ ኢንቴ ሲንꬃን ኣንጆኔ ቃንጌꬅ ዎꬃዲስ፤ ጎዳ ኢንቴ ጾሳይ ኢንቴና ካዎቴꬃታ ጊዶን ዲሼ ኢንቴ ኢዛ ዩሺ ቆፒዛ ዎዴ፥
DEU 30:2 ኢንቴኒኔ ኢንቴ ናይቲ ጎዳ ኢንቴ ጾሳኮ ሲሚዲ ኩሜꬃ ዎዚናፔኔ ኩሜꬃ ሼምፖፌ ታኒ ሃች ኢንቴና ኣዛዚዳ ቃላስ ኣዛዜቲኮ፥
DEU 30:3 ጎዳ ኢንቴ ጾሳይ ኢንቴስ ቃꬌታናኔ ኢንቴፌ ዲኤቲዳ ኢንቴ ሚሻ ኢንቴስ ዛራና፤ ኢንቴ ካሴ ላሌቲ ዲዛ ዴሬፔ ዛሪ ኤሂዲ ቃሴካ ዱሬሳና።
DEU 30:4 ኢንቴ ቢታ ጋጻ ጋካናስ ላሌቲኮካ ሄፔ ጎዳ ኢንቴ ጾሳይ ኢንቴና ኢሲ ቦላ ሺሺዲ ዛሪ ኤሃና።
DEU 30:5 ሄሳꬆ ሃኒዲ ካሴ ኢንቴ ኣዋታ ቢታ ኢንቴ ዛሪ ላታና፤ ኢዚካ ኢንቴና ካሴ ኢንቴ ኣዋታፔ ኣꬂ ዱሬሳናኔ ኢንቴ ቆዳ ዳርሳና።
DEU 30:6 ኢንቴ ዴኦን ዳና ማላኔ ጎዳ ኢንቴ ጾሳ ኢንቴ ኩሜꬃ ዎዚናፔኔ ኩሜꬃ ሼምፖፌ ሲቃና ማላ ኢዚ ኢንቴሲኔ ኢንቴ ናይታስ ኣዛዜቲዛ ዎዚና ኢማና።
DEU 30:7 ጎዳ ኢንቴ ጾሳይ ሃይታ ሃ ቃንጌꬃታ ኡባ ኢንቴ ሞርኬታ ቦላኔ ኢንቴና ኢጺዛይታ ቦላ ዛራና።
DEU 30:8 ኢንቴካ ዛሪዲ ኢንቴ ጎዳስ ኣዛዜታና፤ ታ ኢንቴስ ሃች ኢሚዛ ኢዛ ኣዛዞታ ኢንቴ ናጋንዴታ።
DEU 30:9 ሄሳፌ ጉዬ ኢንቴ ኦꬂዛ ኦሶ ኡባን ጎዳ ኢንቴ ጾሳይ ኢንቴና ዱሬሳና፤ ኢዚ ኢንቴስ ናይታ፥ ሜሄ፥ ካꬂኔ ሚꬃ ኣይፌ ዳርሳና፤ ጎዳ ኢንቴ ጾሳይ ካሴ ኢንቴ ኣዋታ ዱሬሲዲ ኡፋዬቲዳ ማላ ኢንቴናካ ዱሬሲዲ ኡፋዬታና።
DEU 30:10 ኢዚ ሄሳꬆ ኦꬃናይካ ሃይሳ ዎጋ ማጻፋን ጻፌቲዳ ኣዛዞታኔ ዎጋታ ኢንቴ ኩሜꬃ ዎዚናፔኔ ኩሜꬃ ሼምፖፌ ናጊዲ ጎዳ ኢንቴ ጾሳኮ ኢንቴ ሲሚኮና።
DEU 30:11 ታኒ ሃች ኢንቴስ ኢሚዛ ኣዛዞይ ኬሂ ዴጾ ዎይኮ ኢንቴፌ ሃኪዳዝ ጊዴና።
DEU 30:12 «ኑኒ ኢዛ ሲዪዲ ኣዛዜታና ማላ ፑዴ ሳሎ ቢ ኤሂዲ ኑስ ዮታናይ ኦኔ?» ጊዲ ኢንቴ ኦይቾንታ ማላ ሃይሲ ዎጋዚ ቦላ ሳሎፔ ቤቴና።
DEU 30:13 «ኑኒ ኢዛ ሲዪዲ ኣዛዜታና ማላ ኣባ ፒኒ ቢ ኤሂዲ ኑስ ዮታናይ ኦኔ?» ጊዲ ኢንቴ ኦይቾንታ ማላ ኢዚ ኣባ ፒንꬃፌ ቤቴና።
DEU 30:14 ኢዛ ቃላይ ኢንቴ ማታን ዴስ፤ ኢንቴ ኢዛ ናጋና ማላ ኢዚ ኢንቴ ዶናኒኔ ኢንቴ ዎዚናን ዴስ።
DEU 30:15 ኔኒ ዶራና ማላ ታኒ ሃች ኔስ ዴኦኔ ሎኤቴꬅ፥ ዎይኮ ሃይቆኔ ባሽ ኔ ሲንꬃን ዎꬃዲስ።
DEU 30:16 ጎዳ ኢንቴ ጾሳ ሲቃና ማላ፥ ኢዛ ኦጌን ሄሜታና ማላኔ ኢዛ ኣዛዞታ፥ ማራታኔ ኢዛ ዎጋታ ናጋና ማላ፥ ታኒ ሃች ኢንቴስ ኢሚዛ ጎዳ ኢንቴ ጾሳ ኣዛዞታ ኢንቴ ናጊኮ ኢንቴ ሼምፖራ ፓጻ ዴኣናኔ ጮራታና፤ ቃሴ ኢንቴ ላታናስ ጌሊዛ ቢታን ጎዳ ኢንቴ ጾሳይ ኢንቴና ኣንጃና።
DEU 30:17 ጊዶ ኣቲን ኢንቴ ኢንቴ ዎዚና ጾሳፌ ሃሲዲ ኢዛ ቃላ ሲዮንታ ኢጺኮ፥ ሃራ ኤቃ ጾሳታስ ጎይኒኮኔ ኢስታስ ኦꬂኮ፥
DEU 30:18 ኢንቴ ሙሌራ ꬋያናይሳ ሃች ታ ኢንቴስ ዮታይስ፤ ኢንቴ ዮርዳኖሴ ሻፋ ፒኒዲ ላታና ቢታይን ዳሮ ላይꬅ ጋምኤኬታ።
DEU 30:19 ታኒ ኢንቴ ሲንꬃን ዴኦኔ ሃይቆ፥ ኣንጆኔ ቃንጌꬅ ዎꬂዳይሳስ ሃች ሳሎኔ ሳኣ ኢንቴ ቦላ ማርካሳይስ፤ ሄሳ ጊሻስ ኢንቴኒኔ ኢንቴ ዛሬቲ ዴኦን ዴኣና ማላ ዴኦ ዶሪቴ።
DEU 30:20 ጎዳ ኢንቴ ጾሳ ሲቂቴ፤ ኢዛ ቃላ ሲዪቴ፤ ኢዛኮ ሺጲ ጊቴ፤ ሄሳꬆ ሃኒኮ ጎዳይ ካሴ ኢንቴ ኣዋታስ፥ ኣብራሃሜስ፥ ዪሳቃሲኔ ያቆቤስ ኢማናስ ጫቂዳ ቢታን ኢንቴኒኔ ኢንቴ ናይቲ ኣዱሳ ላይꬅ ዴኣና።
DEU 31:1 ሙሴይ ሃይሳ ቃላ ኡባ ኢስራኤሌ ኣሳስ ዮቲዳፔ ጉዬ፥
DEU 31:2 ኢስታስ፥ «ሄኮ ሃኢ ታስ 120 ላይꬅ ጊዲዳ ጊሻስ ሃይሳፌ ጉዬን ታ ኢንቴና ካሌꬃናስ ዳንዳይኬ፤ ሄሳፌካ ቦላራ ታኒ ዮርዳኖሴ ሻፋ ፒኖንታ ማላ ጎዳይ ታስ ዮቲ ዎꬂዴስ።
DEU 31:3 ጎዳ ኢንቴ ጾሳይ ኢንቴፌ ሲንꬃራ ቢሼ ኢንቴና ካሌꬃና፤ ሄን ዲዛ ካዎቴꬃታ ኡባ ኢዚ ꬋይሲን ኢንቴ ኢስታ ቢታ ላታና፤ ጎዳይ ዮቲዳ ማላ ኢያሶይ ኢንቴና ካሌꬃና።
DEU 31:4 ጎዳይ ኣሞሬ ዴሬ ካዎታ ሲሆኔኔ ኣጌ ጾኒዲ ኢስታ ቢታ ꬋይሲዳ ማላ ኢስታ ቦላካ ሄሳꬆ ኦꬃና።
DEU 31:5 ጎዳይ ኢስታ ኢንቴስ ኣꬂ ኢማና፤ ኢንቴኒካ ታ ኢንቴና ኣዛዚዳ ማላ ኢስታ ቦላ ኦꬃና።
DEU 31:6 ኢንቴስ ሙርታቴꬂኔ ጻላቴꬂ ዴኦ፤ ኢስታስ ሙሌካ ባቦፍቴኔ ዳጋሞፍቴ፤ ጎዳ ኢንቴ ጾሳይ ኢንቴናራ ዴስ፤ ኢዚ ኢንቴና ዬጊ ኣጌና» ጊዴስ።
DEU 31:7 ሄሳፌ ጉዬ ሙሴይ ኢያሶ ባኮ ጼይጊዲ ኩሜꬃ ኢስራኤሌ ኣሳ ሲንꬃን፥ «ሚና፤ ባቦፋ፤ ጎዳይ ካሴ ኢስታ ኣዋታ ላቲሳና ጊዲ ጫቂዳ ቢታዮ ላታና ማላ ዴሬዛ ካሌꬃ ጌልꬃዳ ላቲሳናይ ኔና።
DEU 31:8 ጎዳይ ኔናራ ጊዲዲ ኢዚ ኔና ካሌꬃና፤ ኢዚ ኔና ዬጌና፤ ሙሌካ ኣጌና፤ ሄሳ ጊሻስ ባቦፋ፤ ሂዶታካ ቃንጾፋ» ጊዴስ።
DEU 31:9 ሄሳፌ ጉዬ ሙሴይ ዎጋ ጻፊዲ ጫቆ ቃላ ታቦታ ቶኪዛ ቄሴ ጊዲዳ ሌዌ ናይታሲኔ ኢስራኤሌ ጪማታ ኡባስ ኢሚዴስ።
DEU 31:10 ሙሴይካ ኢስታስ፥ «ኣጮ ኡባ ማሪዛ ላፑንꬃ ላይꬃን ዉርሴꬃ ቦላ ቦንቼቲዛ ዳሴ ባኣሌዛን፥
DEU 31:11 ጎዳ ኢንቴ ጾሳ ሲንꬃን ኢዚ ካሴ ዶሪዳሶን ኢዛስ ጎይናናስ ኢስራኤሌ ኣሳይ ኡባይ ሺቂዛ ዎዴ ሃይሳ ዎጋዛ ኢስታ ሲንꬃን ናባቢቴ።
DEU 31:12 ኢስቲ ኡባይካ ሄሳ ሲዪዲ ጎዳ ኢንቴ ጾሳስ ያሻቴꬅ ታማራና ማላኔ ሃይሳ ዎጋ ቃላታ ኡባ ሎኤꬂ ናጋና ማላ ማጫሳታ፥ ኣዴታ፥ ናይታኔ ኢንቴ ዴሬን ዲዛ ቤቴ ኣሳታ ኡባ ኢሲ ቦላ ሺሺቴ።
DEU 31:13 ሄሳ ማላን ጎዳ ኢንቴ ጾሳ ዎጋ ካሴ ሲዪ ኤሮንታ ኢንቴ ዜሬꬃቲ ኡባይካ ሲዬቶ፤ ቃሴ ኢንቴ ዮርዳኖሴ ሻፋ ፒኒዲ ላታና ቢታን ዲዛ ዎዴ ኡባን ኢስቲ ጾሳስ ኣዛዜቴꬅ ታማሬቶ» ጊ ኣዛዚዴስ።
DEU 31:14 ሄሳፌ ጉዬ ጾሳይ ሙሴስ፥ «ኔስ ሃይቆ ዎዴይ ጋኪዴስ፤ ኢዚ ካላና ዎጋታ ኢዛስ ታ ኢማና ማላ ኢያሶ ጼይጋዳ ኢዛራ ጌዴ ጋይቶቴꬃ ዱንካኔዛኮ ሺቂቴ» ጊዴስ። ሙሴይኔ ኢያሶይ ኢሲፌ ጌዴ ጋይቶቴꬃ ዱንካኔዛኮ ሺቂዳ።
DEU 31:15 ጎዳይካ ኢስታስ ዱንካኔዛ ፔንጌን ቱሳ ማላ ኤቂዳ ሻራን ቆንጪዴስ።
DEU 31:16 ጎዳይ ሙሴስ፥ «ኔኒ ማታ ዎዴ ሃይቃዳ ኔ ኣዋታን ጋይታና፤ ሄሳፌ ጉዬ ሃይሲ ኣሳዚ ታ ኢዛራ ጫቄቲዳ ቃላ ላላና፤ ኢስቲ ታና ኣጋጊዲ ላይማ ማጫሳ ማላ ሄ ኢስቲ ላታና ቢታን ዲዛ ኤቃ ጾሳታስ ጎይናና።
DEU 31:17 ሄሳꬆ ሃኒዛ ዎዴ ታኒ ኢስታ ቦላ ሃንቄታዳ ኢስታፌ ሻኬታና፤ ታ ኢስታስ ዞኮ ዛራና፤ ኢስቲካ ኡባይ ꬋያና፤ ኢስታ ቦላ ኢታ ሜቶይኔ ቦሻይ ያና፤ ሄ ዎዴ ኢስታስ፥ ‹ሃይሲ ሜቶዚ ኑ ቦላ ጋኪዳይ ኑ ጾሳይ ኑ ጊዶን ዶንታ ኣጊን ጊዴኔ?› ጋና።
DEU 31:18 ኢስቲ ኤቃ ጾሳታስ ጎይኒዲ ኢስቲ ኦꬂዳ ናጋራ ጊሻስ ታኒ ሄ ዎዴ ኢስታስ ዞኮ ዛራና።
DEU 31:19 «ሃይሳ ዬꬃ ጻፋዳ ኢስራኤሌ ኣሳ ታማርሳዳ ኢስቲካ ዬጻና ማላ ኦꬃ፤ ሃይሲ ዬꬃዚ ኢስታ ቦላ ታስ ማርካ ጊዳና።
DEU 31:20 ታኒ ቤኒ ኢስታ ኣዋታስ ጫቂዳ ጫቆ ቃላ ማላ ኤሲኔ ማꬂ ኩሚዳ ቢታዮ ታ ኢስታ ጌልꬃና፤ ኢስቲ ሄን ሚዲኔ ኡዪዲ ካሊዳፔኔ ዱሬቲዳፔ ጉዬ ታና ዬጊ ኣጋና፤ ታ ጫቆ ቃላካ ዬጊ ኣጊዲ ኤቃ ጾሳታስ ጎይናና።
DEU 31:21 ዳሮ ሜቶይኔ ባሺ ኢስታ ቦላ ጋኪዛ ዎዴ ሃ ዬꬃይ ኢስታ ናይታ ዶናፔ ኪቼና ጊሻስ ኢስታ ቦላ ማርካ ጊዳና። ጋሶይካ ታኒ ጫቂዳ ቢታ ኢስታ ቡሮ ጌልꬆንታ ዳሼ ሃራካ ኢስቲ ቆፒዛ ቆፋ ኤራይቻዲስ» ጊዴስ።
DEU 31:22 ሙሴይ ሄ ጋላስ ዬꬃዛ ጻፊዲ ኢስራኤሌ ኣሳ ታማርሲዴስ።
DEU 31:23 ሄሳፌ ጉዬ ጾሳይ ናዌ ና ኢያሶ፥ «ሚና፤ ጻላ ጊዳ፤ ኔኒ ኢስራኤሌ ኣሳ ካሌꬃዳ ታ ካሴ ኢስታስ ኢማና ጋ ጫቂዳ ቢታዮ ጌልꬃና፤ ታኒካ ኔናራ ጊዳና» ጊ ኣዛዚዴስ።
DEU 31:24 ሙሴይካ ሃይሳ ዎጋ ቃላታ ኮይሮፔ ቢዲ ዉርሴꬅ ጋካናስ ኡባ ጻፊዳፔ ጉዬን፤
DEU 31:25 ጎዳ ጫቆ ቃላ ታቦታ ቶኪዛ ሌዌ ቆሞታ ሂዝጊ ኣዛዚዴስ፤
DEU 31:26 «ጎዳ ዎጋይ ኢዛን ጻፌቲዳ ማጻፋ ኤኪዲ ጎዳ ኢንቴ ጾሳ ጫቆ ቃላ ታቦታዛ ኣቻን ዎꬂቴ፤ ሄን ኢዚ ባ ዲዛሶን ዲሼ ዴሬዛ ቦላ ማርካ ጊዳና።
DEU 31:27 ኢስራኤሌ ኣሳይ ኣይ ማላ ማካላንቻኮኔ ዎዚና ሙሜኮ ታ ኤራይስ፤ ታኒ ሼምፖራ ፓጻ ኢስታራ ዲሺን ኢስቲ ጎዳ ቦላ ማካሊዛይቲ ታኒ ሃይቂዳፔ ጉዬ ኬሂ ማካላንቻታ ጊዳና።
DEU 31:28 ሄሳ ጊሻስ ታ ኢስታስ ሃይሳ ኡባ ዮታና ማላ ኮራፒኔታኔ ዴሬ ሃላቃታ ታስ ሺሺቴ፤ ታኒ ኢስታ ቦላ ሳሎኔ ሳኣ ማርካ ጊዳና ማላ ጼይጋና።
DEU 31:29 ታኒ ሃይቂዳፔ ጉዬ ታ ኢንቴና ኣዛዚዳ ኣዛዞፔ ካሬ ኬዚዲ ቱና ኦሶ ኢንቴ ኦꬃናይሳ ታ ኤራይስ፤ ጎዳ ሲንꬃን ኢታ ኦሶ ኦꬂዲ ኢንቴ ኢዛ ሃንቄꬂኮ ኢዚ ኢንቴ ቦላ ቦሻ ዬዳና።»
DEU 31:30 ሄሳፌ ጉዬ ሙሴይ ኩሜꬃ ኢስራኤሌ ኣሳ ሲንꬃን ሃይታ ዬꬃ ቃላታ ኮይሮፔ ቢዲ ዉርሴꬅ ጋካናስ ዮቲዴስ።
DEU 32:1 ሳሎቶ! ታኒ ዮቲዛይሳ ኤዝጊ ሲዪቴ፤ ሳኣዞ ታ ዶናፔ ኬዚዛ ቃላ ሲያ።
DEU 32:2 ታ ኢሚዛ ቲሚርቴይ ኢራ ማላ ቡኮ፤ ታ ሃሳያይካ ጻዛ ማላ ጾኬቶ፤ ማታ ቦላ ሎዲ ጊ ቡኪዛ ኢራ ማላ ቡኮ፤ ካꬃ ጫሬቻ ቦላ ፑሴ ማላ ዎꬎ።
DEU 32:3 ታኒ ጎዳ ሱንꬅ ኣዋጃይስ፤ ኑ ጾሳ ጊታቴꬅ ኢንቴ ዮቲቴ።
DEU 32:4 «ኢዚ ኑስ ሚጻ፤ ኢዛ ኦሶቲካ ኩሜꬃ፤ ኢዛ ኦጌቲ ዉሪካ ሱሬ፤ ኢዚ ባሌቶንታ ኣማኔቲዳ ጾሳ፤ ኢዚ ሱሬኔ ጺሎ ጾሳ።
DEU 32:5 «ኢስቲ ኢዛ ሲንꬃን ኢታ ኦꬂዳ፤ ኢስቲ ባንታ ኢታቴꬃፌ ዴንዲዳይሳን ሃይሳፌ ጉዬ ኢዛ ናይታ ጊዴቴና፤ ኢስቲ ቦካኔ ጌላ ዬሌታታ።
DEU 32:6 «ኢንቴኖ ኤያቶ! ቃሴካ ዎዚናይ ባይንዳይቶ! ኢንቴ ጎዳስ ኢሚዛ ዛሮይ ሃይሴ? ኢንቴና ሜꬊዳ ኢንቴ ኣዋይ ኢዛ ጊዴኔ? ኢንቴና ሜꬊዲ ሃይሳስ ጋꬂዳይ ኢዛ ጊዴኔ?
DEU 32:7 «ካሴ ቤኒ ዎዴዛ ዩሺ ቆፒቴ፤ ዳሮ ዬሌታታ ላይꬃካ ኣኬኪቴ፤ ኢንቴ ኣዋታ ኦይቺቴ፤ ኢስቲ ኢንቴስ ዮታና፤ ካሴ ጪማታካ ኦይቺቴ፤ ኢስቲ ኢንቴስ ቆንጪሲ ዮታና።
DEU 32:8 «ኡባፌ ꬎቃ ጾሳይ ካዎቴꬃታስ ቢታ ጊሼቺዳ ዎዴ፥ ኣሳ ናይታ ኢስታ ዛሬን ዛሬን ሻኪዳ ዎዴ፥ ኢስራኤሌ ኣሳ ቆዳ ኬና ካዎቴꬃታስ ꬋስ ዎꬂዴስ።
DEU 32:9 «ኢስራኤሌይ ጎዳስ ጊሻ፤ ያቆቤይካ ኢዛስ ቡዞ ሚሻ።
DEU 32:10 «ኣይኮይካ ባይንዳ ባዞን ጫርኮይ ፑኒዛ ቢታን ኢዛ ዴሚዴስ፤ ኢዛስ ጎንዳሌ ጊዲዴስ፤ ባ ኣይፌ ጪሮ ማላ ኢዛ ናጊዴስ።
DEU 32:11 ጎሌ ካፎይ ባ ጪዬታ ፒራꬎ ታማርሲዛ ማላ፥ ባ ቄፌ ሚጫዳ ጋካ ኦይካ ኣሺዛ ማላ፥ ጎዳይ ባ ቄፌን ሃጵዲ ኢስታ ኣሺዴስ።
DEU 32:12 ሃራ ኤቃ ጾሳቲ ኢዛራ ባይንዳ ጎዳይ ኢዛ ባርካ ካሌꬂዴስ።
DEU 32:13 «ꬎቃ ሶሆን ኢዛ ዎꬂዴስ፤ ቢታፌ ሞኪዳ ካꬃ ኣይፌ ኢዛ ሚዚዴስ፤ ዛላፌ ቤቲዳ ኤስ ኡሺዴስ፤ ሹቻ ቢታን ሞኪዳ ዎጋራ ዛይቴ ሚዚዴስ።
DEU 32:14 ሚዛፔ ዶርሳፌኔ ዴይሻ ዉዴፔ ቤቲዛ ማꬃኒኔ ኦይስ ባሳኔ ዴሬፔ ቤቲዛ ኦሃላ ላቃታ፥ ሞꬎ ꬋርሾታ፥ ዎፋኖታኔ ዴይሻታ፥ ሎኦ ጊስቴ ዳቦራ ኢስታ ሚዚዴስ። ኢንቴ ኢዛ ዴሬቲ ዞኦ ዎይኔ ሚꬃ ኣይፌፔ፥ ጊጊዳ ዎይኔ ኡሹ ኡዪዴታ።
DEU 32:15 «ኢስራኤሌ ኣሳይ ኦርዲዴሲኔ ማካሊዴስ። ዳሮ ሚዲ ሞꬊዴሲኔ ሞላቲዴስ፤ ባና ሜꬊዳ ጾሳ ኣጊዴስ፤ ባና ኣሺዳይሳካ ካዉሺዴስ።
DEU 32:16 ኢስቲ ኤቃ ጾሳታስ ጎይኒዲ ጾሳ ሚሺሲዳ፤ ባንታ ኢታ ኦሶንካ ኢዛ ሃንቄꬂዳ።
DEU 32:17 ሃይሳፌ ካሴ ባ ኤሮንታይታስ፥ ጾስ ጊዶንታ ዳይዳንꬃታስ፥ ማታ ዎዴ ዪዳ ጾሳታስ፥ ቤኒ ኢስታ ኣዋቲ ኢስታስ ጎይኖንታ ኤቃታስ፥ ኢስቲ ያርሾ ሺሺዳ።
DEU 32:18 ኢስቲ ባስ ዴኦ ኢሚዳ ዛላ ዶጊዳ፤ ባና ሜꬊዳ ጾሳካ ባሊዳ።
DEU 32:19 «ጎዳይ ሄሳ ቤኢዲ ኢስታ ቦላ ሃንቄቲዴስ፤ ኢስታ ማጫ ናይታኔ ኢስታ ኣቱማ ናይታ ዲጊዴስ።
DEU 32:20 ‹ታኒ ታ ኣይፌሶ ኢስታፌ ጌንꬃና፤ ኢስቲ ጌላኔ ኣማኔቶንታ ዴሬ ጊዲዳ ጊሻስ ኢስታ ዉርሴꬂ ኣይ ጊዳናኮ ታ ጮኡ ጋ ቤያና።›
DEU 32:21 ቱሙ ጊዶንታ ጾሳታን ታና ሚሺሲዳ፤ ጎኣይ ባይንዳ ባ ኤቃ ጾሳታን ታና ሃንቄꬂዳ። ታኒካ ኢስታ ካꬌቲዳ ካዎቴꬃታ ኢስቲ ሚጌታና ማላ ኦꬃና። ታ ኢስታ ኣኬኮንታ ዴሬታን ሃንቄꬃና።
DEU 32:22 ታ ሃንቆይ ታማ ማላ ኤጻና፤ ቢታኔ ቢታ ቦላ ዲዛ ኡባ ጹጋና፤ ሄ ታማይ ሲኦሌ ጪማ ጋካናስ ኤጻና፤ ታማዚ ዙማስ ዮች ጋካናስ ማና።
DEU 32:23 ታኒ ኢስታ ቦላ ዛሬꬃ ዛሬꬃ ቦሻ ኤሃና፤ ታስ ዲዛ ዎንዳፌ ታ ኢስታ ቦላ ዉርሳና።
DEU 32:24 ታ ኡባ ዉርሲዛ ኮሻ ኢስታ ቦላ ዬዳና፤ ኢሳፌ ኢሳን ኣꬊዛ ኢታ ሃርጌኒኔ ቦሻን ኢስቲ ዉራና፤ ሜቶ ጋꬂዛ ኢታ ዶኣታኔ ዱኪዛ ማርዜራ ዲዛ ሾሻታ ታ ኢስታ ቦላ ዬዳና።
DEU 32:25 ኦጌ ኡባን ኢስታ ናይታ ኦላይ ዉርሳና፤ ኢስታ ኬꬃ ጊዶንካ ሂርጋይ ኩማና፤ ፓንꬃቲኔ ጌላኦቲ፥ ጉꬃ ናይቲኔ ጪማቲ ኡባይ ዉራና።
DEU 32:26 ታኒ ኢስታ ኡባ ላላና፤ ሄሳፌ ጉዬ ኢስታራ ሃሳኣና ኣሲ ዴና።
DEU 32:27 ጊዶ ኣቲን ኢስታ ሞርኬቲ፥ ‹ኑኒ ኑ ዎልቃን ኢስታ ጾኒዶስ ኣቲን ጾሴ ጊዴና› ጊዲ ኦቶሬቴꬃን ጬቄቲዲ ታና ሃንቄꬃናኮ ጋዳ ቆፓይስ።
DEU 32:28 ኢስራኤሌ ኣሳይ ዩሺ ቆፖንታ ካዎቴꬅ፤ ኢስታስ ኣኬካይ ዴና።
DEU 32:29 ኢስቲ ኤራታ ጊዲዳኮ ሃይሳ ኢስቲ ካሴቲዲ ቆፓና፤ ባንታ ዉርሴꬃንካ ሃናናይሳ ዩሺ ቆፓናሺን!
DEU 32:30 ኢስታ ሜꬊዳይሲ ኢስታ ኣꬂ ኢሞንታኮ፥ ጎዳይ ኢስታ ዬጊ ኣጎንታኮ፥ ኢሳዴይ 1,000 ኣስ ዎስቲ ጎዳንዴ? ዎይኮ ናምኣቲ 10,000 ኣስ ዎስቲ ጎዳኔ?
DEU 32:31 ሃራይ ኣቶሺን ኑ ሞርኬቲ ኢስታ ጾሳይ ላፋ ጊዲዳይሳኔ ኢስራኤሌ ጾሳ ማላ ጊዶንታይሳ ኤሬቴስ።
DEU 32:32 ኑ ሞርኬቲ ሶዶሜኔ ጋሞራ ዴሬ ኣሳ ማላ ቱና፤ ኢስቲካ ጫሞኔ ማርዜራ ዲዛ ኣይፌ ኣይፊዛ ዎይኔ ሚꬃ ማላ።
DEU 32:33 ኢስታ ዎይኔ ኡሻይ ሾሻ ማርዜ ማላ፤ ቃሴካ ሃሶ ሾሻ ማርዜ ማላ።
DEU 32:34 «ሃይሳ ታኒ ዶጋዲና? ታ ማዝጋባን ጻፌቲ ኡቲዴስ።
DEU 32:35 ኢስታ ሞርኬታ ቦላ ሃሎ ኬሳናይ ታና፤ ኡባሲካ ታ ኢስታ ኦሶ ኦሶ ማላ ኢማና፤ ኢስታስ ꬋዮ ጋላሲ ጋኪዳ ጊሻስ ኢስቲ ꬉጴታና፤ ኤሶንካ ꬋያና።»
DEU 32:36 ኢስታስ ዎልቃይ ዳቡርዳይሳኔ ኢስታካ ማዲዛይ ባይንዳይሳ ቤኢዲ፥ ጎዳይ ባ ኣሳስ ፒርዳና፤ ባ ኣይሌታስካ ቃꬌታና።
DEU 32:37 ጎዳይ ባ ኣሳ፥ «ኢስቲ ኣማኔቲዛ ኢስታ ጾሳቲ ኣዋን ዲዞ? ኢስቲ ባቃቲ ኣቲዛ ዛላቲ ኣዋን ዲዞ?» ጊ ኦይቻና።
DEU 32:38 ኢስቲ ያርሾስ ሺሺዛ ቶልꬆዛ ሚዳይቲ፥ ኢስታ ዎይኔ ኡሻ ያርሾዛ ኡዪዳ ኢስታ ኤቃ ጾሳቲ ኣኔ ሃኢ ኢንቴና ዴንዲ ማዴቶ፤ ቃሴካ ኢንቴስ ዱሳሶ ኢሜቶ።
DEU 32:39 «ታኒ ጻላ ጾስ ጊዲዳይሳ ኤሪቴ፤ ታፔ ሃራ ጾሲ ዴና፤ ዎꬊዛይካ ፓጻ ዎꬂዛይካ ታና፤ ታኒ ማዱንꬃይሲኔ ፓꬃይስ፤ ታ ኩሼፔ ኦኒካ ኢንቴና ኣሼና።
DEU 32:40 ታኒ ታ ኩሼ ፑዴ ሳሎ ዴንꬃዳ፥ ‹ታ ሜርናስ ዴኣይስ።
DEU 32:41 ዋዋጪ ጊዛ ታ ጊꬃ ማሻ ሌፋና፤ ታ ኩሼይ ፒርዳስ ኦይካና፤ ታ ሞርኬታ ቦላ ሃሎ ኬሳና፤ ታና ኢጺዛይታስ ታ ኢስታ ኦሶ ማላ ኢስታስ ኢማና።
DEU 32:42 ሞርኬታ ሃላቃታ፥ ማዱንጺዳይታኔ ዲኤቲዳይታ ሱꬃን ታ ዎንዳፌታ ታ ማꬆሳና፤ ታ ጊꬃ ማሻቲካ ታ ሞርኬታ ኣሾ ማና› ጋ ጫቃና።
DEU 32:43 «ኢንቴኖ ካዎቴꬃቶ! ጎዳይ ባ ኦሳንቻታ ሱꬅ ኣጫና፤ ሞርኬታ ቦላ ሃሎ ኬሳና፤ ባና ኢጺዛይታ ቃጻያና፤ ባ ዴሬዛ ናጋራ ዉርሳና፤ ቢታዮካ ቱናቴꬃፌ ጌሻና፤ ሄሳ ጊሻስ ኢንቴ ኢዛ ኣሳራ ኢሲፌ ኡፋዬቲቴ» ጊዲ፥
DEU 32:44 ሙሴይኔ ናዌ ና ኢያሶይ ዴሬዚ ሲዪሺን ሃ ዬꬃዛ ዮቲዳ።
DEU 32:45 ሙሴይ ሃይታ ሃ ቃላታ ኩሜꬃ ኢስራኤሌ ኣሳ ሲሲዳፔ ጉዬ፥
DEU 32:46 ኢዚ፥ «ሃይሳ ዎጋ ቃላ ኡባ ኢንቴ ናይቲ ሎኤꬂ ናጋና ማላ፥ ኢስቲ ኦꬃና ማላኔ ኢንቴ ናይታ ኢንቴ ኣዛዛና ማላ ሃች ታ ኢንቴስ ማርካቲዛ ቃላ ኡባ ኢንቴ ዎዚናን ዎꬂቴ።
DEU 32:47 ሃ ቃላይ ኢንቴስ ዴኦፔ ኣቲን ጮ ሜላ ቃላ ጊዴና፤ ሃ ቃላ ናጊኮ ኢንቴ ዮርዳኖሴ ፒኒዲ ላታና ቢታንካ ኣዱሳ ላይꬅ ኢንቴ ዴኣና» ጊዴስ።
DEU 32:48 ሄ ጋላስ ጎዳይ ሙሴስ ሂዝጊዴስ፥
DEU 32:49 «ሞኣቤ ዴሬን ኢያርኮ ካታማ ጊናራ ዲዛ ኣባሪሜ ዙማታ ጊዶፌ ኔቦ ዙማ ቦላ ኬዛ፤ ሂስታዳ ታኒ ኢስራኤሌ ኣሳስ ኢማና ጊዳ ካናኔ ቢታ ሄ ፒንꬃን ጼላ።
DEU 32:50 ኔ ኢሻ ኣሮኔይ ሆሬ ዙማ ቦላ ሃይቂዲ ካሴ ሃይቂዳ ባ ኣሳታን ጋይቲዳ ማላ ኔካ ሄ ዙማ ቦላ ሃይቃዳ ኔ ኣሳታን ጋይታና።
DEU 32:51 ኢንቴ ናምኣይካ ኢስራኤሌ ኣሳ ሲንꬃን ታስ ኣማኔቲቤኬታ፤ ጺኔ ባዞን ቃዴሴ ካታማ ማታን ዲዛ ማሪባ ሃꬃ ኣቻን ታ ጌሻቴꬃ ኢስራኤሌ ኣሳ ቤሲቤኬታ።
DEU 32:52 ሄሳ ጊሻስ ኔኒ ሄ ቢታዮ ሃሆን ዳሼ ቤኣና ኣቲን ታኒ ኢስራኤሌ ኣሳ ላቲሳና ቢታዮ ኔኒ ጌላካ።»
DEU 33:1 ጾሳ ኣስ ሙሴይ ሃይቃናፔ ካሴቲዲ ኢስራኤሌ ኣሳስ ዎꬂዳ ባሴ ቃላይ ሃይሳፌ ካሊ ዲዛይሳ፤
DEU 33:2 ሙሴይ፥ «ጎዳይ ሲና ዙማፔ ዪዴስ፤ ኤዶሜፔ ኣዋ ኣርሼይ ኑ ቦላ ፖኢዴስ፤ ፓራኔ ዙማ ቦላፌካ ኑስ ጾልቂዴስ፤ ኢዛስ ኡሻቻ ባጋራ ታማ ላጮይ ዴስ፤ ቆዳይ ባይንዳ ኪታንቻቲ ኢዛራ ኢሲፌ ዴቴስ።
DEU 33:3 ጎዳዉ! ኔኒ ዴራ ኬሃ ሲቃሳ፤ ጌሻቲ ኡባይካ ኔ ኩሼን ዴቴስ፤ ኔ ቶሆ ጋርሳን ጉልባቲ ጎይኔቴስ፤ ሂስቲዲ ኔፔ ኣዛዞ ኤኬቴስ።
DEU 33:4 ሙሴይ ኢሚዳ ዎጋይ ኢስራኤሌ ኣሳስ ላታ ጺንጾ።
DEU 33:5 ኢስራኤሌ ቆሞቲ ኡባይኔ ዴራ ሃላቃቲ ሺቂን ጎዳይ ባ ዴሬ ኢስራኤሌ ኣሳ ቦላ ካዎቲዴስ» ጊዴስ።
DEU 33:6 ኦሮቤሌ ቆሞታ ጊሻስ ሙሴይ፥ «ኦሮቤሌ ቆሞቲ ዴቶ ኣቲን ሃይቆፌቶ፤ ኢስታ ቆዳይካ ፓጮፎ» ጊዴስ።
DEU 33:7 ዩሁዳ ቆሞታ ጊሻስ ሙሴይ፥ «ጎዳዉ፥ ዩሁዳ ቆሞታ ዋሶ ሲያ፤ ኢስቲ ባ ዳቦታራ ኢሲፌቴꬃን ዳና ማላ ኦꬃ፤ ኢስታስ ጊታ ዎልቃ ኢማ፤ ኢስቲ ባ ሞርኬታራ ኦሌቲሺን ኔኒ ኢስታ ማዳ» ጊዴስ።
DEU 33:8 ሌዌ ቆሞታ ጊሻስ ሙሴይ፥ «ጎዳዉ! ኔኒ ኢስታ ማሳን ፓጫዳሳ፤ ማሪባ ሃꬃ ኣቻን ኢስታራ ፓላሜታዳሳ፤ ሄሳ ጊሻስ ቱሚሜይኔ ኡሪሜይ ኔ ዶሲዳ ኔ ኦሳንቻታስ ጊዶ።
DEU 33:9 ኔ ጊሻስ ጊዲ ኢስቲ ባና ዬሊዳይታ ባሊዳ፤ ባ ዳቦታፔ ሻኬቲዳ፤ ባ ኢሻታፔ ሻኬቲዳ፤ ባ ናይታ ኣጊዳ፤ ኔ ቃላ ቦንቺዳ፤ ኔ ኢሚዳ ጫቆ ቃላካ ናጊዳ።
DEU 33:10 ኢስቲ ኔ ዎꬂዳ ማራ ያቆቤ፥ ኔ ዎጋካ ኢስራኤሌ ኣሳ ታማርሴቴስ፤ ኢስቲ ኔ ሲንꬃን ኤጻኔ ጩዋሴቴስ፤ ጹጌቲዛ ያርሾካ ያርሾ ያርሺዛሶዛ ቦላ ሺሼቴስ።
DEU 33:11 ጎዳዉ! ኔ ኢስታ ዴኦ ኣንጃ፤ ኢስቲ ኦꬂዛ ኦሶ ኡባን ኔ ኡፋዬታ፤ ኢስታ ሞርኬታ ሻያ ኔ ዱꬃ፤ ኢስታ ኢጺዛይቲ ናምኣንꬆ ዴንዶንታ ማላ ዲጋ!» ጊዴስ።
DEU 33:12 ቢኒያሜ ቆሞታ ጊሻስ ሙሴይ፥ «ጎዳይ ሲቂዳ ኣሲ ኢዛን ኣማኔቲ ዴስ፤ ኡባ ጋላስ ኢስታ ኢዚ ናጌስ፤ ባ ሃሼን ቶኪዲ ሼምፒሴስ» ጊዴስ።
DEU 33:13 ዮሴፌ ቆሞታ ጊሻስ ሙሴይ፥ «ጎዳይ ሳሎፔ ቡኪዛ ኢራን፥ ቢታፌ ፑዴ ኬዚዛ ፑልቶን ኢንቴ ቢታ ኣንጆ።
DEU 33:14 ኣዋ ዎዴ ካጺዛ ሎኦ ኣይፌ ኢሞ፤ ዎዴን ዎዴን ካጺዛ ካꬃ ኣይፌን ኩሞ።
DEU 33:15 ቤኒሶፌ ዲዛ ኢስታ ዙማቲኔ ዙምቡላቲ ጮራኔ ሎኦ ኣይፌን ኣንጄቴቶ።
DEU 33:16 ኢስታ ቢታይ ሎኦ ሚሻን ኩሞ፤ ጹጌቲዛ ቱሻ ጊዶፌ ቆንጪዳ ጎዳ ኪያቴꬂ ዳሮ፤ ዮሴፌይ ባ ኢሻታ ጊዶን ሃላቃ ጊዲዳ ጊሻስ ሃ ኣንጆቲ ኡባይ ኢዛ ጋኬቶ።
DEU 33:17 ዮሴፌ ቴማይ ኮርማ ቦራ ማላ ያሺሶ፤ ኢዛ ካጬቲ ሜንꬃ ካጬ ማላ ሚኖ ጊዴቶ፤ ኢዛ ካጬቲ ሺያን ቆዴቲዛ ሚናሴ ዛሬታኔ ታሙ ሺያን ቆዴቲዛ ኤፍሬሜ ዛሬታ፤ ሄ ካጬታን ኢዚ ካዎቴꬃታ ቃይጫና፤ ቢታ ጋጻ ጋካናስ ኢስታ ኢዚ ጎዳና» ጊዴስ።
DEU 33:18 ዛቢሎኔ ቆሞታ ጊሻሲኔ ዪሳኮሬ ቆሞታ ጊሻስ ሙሴይ፥ «ዛቢሎኔ! ኔኒ ኔ ኬሳን ኡፋዬታ፤ ዪሳኮሬ! ኔኒካ ኔ ዱንካኔ ጊዶን ኡፋዬታ።
DEU 33:19 ኢስቲ ዴሬዛ ፑዴ ዙማ ቦላ ጼይጊዲ ሄን ጺሎቴꬃ ያርሾ ያርሻና፤ ባንታስ ኣቆታኔ ዱሬቴꬅ ኣባፌኔ ሻሚንታፌ ዴማና» ጊዴስ።
DEU 33:20 ጋዴ ቆሞታ ጊሻስ ሙሴይ፥ «ጋዴ ቆሞታ ዛዋ ኣሲዳ ጾሳይ ጋላቴቶ፤ ጋዴይ ሞርኬታ ሜንꬄሬꬃናስ ጋሞ ማላ ሻንካቴስ።
DEU 33:21 ሃላቃታስ ቤሲዛ ቢታዚ ኢዛ ናጌስ፤ ኢዚካ ሎኦ ቢታ ባስ ዶሪዴስ፤ ዴራ ካሌꬂዛይቲ ሺቂዳ ዎዴ ኢዚ ጎዳ ሼኔኔ ጺሎ ፒርዳ ፒርዲዴስ» ጊዴስ።
DEU 33:22 ዳኔ ቆሞታ ጊሻስ ሙሴይ፥ «ዳኔይ ባሳኔፔ ጉፒ ኬኢዛ ዎዳላ ጋሞ ማላ» ጊዴስ።
DEU 33:23 ኒፍታሌሜ ቆሞታ ጊሻስ ሙሴይ፥ «ኒፍታሌሜይ ጎዳ ማታን ዶሴቲዴስ፤ ጎዳ ኣንጆንካ ኩሚዴስ፤ ኢዛ ዛዋይ ኣባፌ ኣꬊዲ ዱጌሃ ባጋ ጋኪዴስ» ጊዴስ።
DEU 33:24 ኣሴሬ ቆሞታ ጊሻስ ሙሴይ፥ «ኣሴሬ ቆሞቲ ሃራ ቆሞታፔ ኣꬊ ኣንጄቲዳይታ ጊዴቶ፤ ኢስቲ ባ ኢሻታ ጊዶን ዶሴቲዳይታ ጊዴቶ፤ ኢስታ ቢታይ ዛይቴን ኩሞ።
DEU 33:25 ኢስታ ካታማታ ፔንጌቲ ቢራታኒኔ ጻርቂማላን ሚኒ ጎርዴቴቶ፤ ባ ዲዛ ላይꬅ ኡባን ኢስቲ ዎልቃማ ጊዴቶ» ጊዴስ።
DEU 33:26 ኢስራኤሌ ኣሳዉ! ሳሎፔ ኢንቴና ማዳናስ ባ ቴማራ ሻራ ቦላ ሄሜቲዛ ኢንቴ ጾሳ ማላ ሃራ ጾሲ ዴና።
DEU 33:27 ሜርና ጾሳይ ኢንቴስ ዱሳሶ፤ ሜርናስ ዲዛ ኢዛ ቄሴቲ ኢንቴፌ ጋርሳራ ዲዲ ካፌቴስ፤ ኢንቴ ሞርኬታ ኢዚ ኢንቴ ሲንꬃፌ ጎዳና፤ ኢንቴ ኢስታ ꬋይሳና ማላ ኢዚ ኢንቴና ማዳና።
DEU 33:28 ሄሳ ጊሻስ ኢስራኤሌ ኣሳይ ሳሎፔ ኢራይ ኢዚን ቡኪዛ ቢታይን፥ ካꬂኔ ዎይኔ ኡሺ ኢዚን ኩሚዳ ቢታይን ሂርጋይ ባይንዳ ሳሮን ዴኣና።
DEU 33:29 ኢስራኤሌ ኣሳዉ! ኢንቴ ኣይ ማላ ኣንጄቲዳ ዴሬ! ጎዳይ ኣሺዳ ኢንቴ ማላይ ኦኔ? ኢዚ ኢንቴስ ጎንዳሌኔ ኢንቴና ማዲዛይሳ፤ ኢዛን ኢንቴ ጾኒዛ ጊꬃ ማሻ፤ ኢንቴ ሞርኬቲ ኢንቴ ሲንꬃን ጉፋናና፤ ኢንቴካ ኢስቲ ጎይኒዛሶታ ላላና።
DEU 34:1 ሙሴይ ሞኣቤፔ ዴንዲ ፑዴ ኔቦ ዙማ ቦላ ኬዚዴስ፤ ኢያርኮፌ ኣርሼይ ሞኪዛ ባጋራ ዲዛ ፑዴ ፒዝጋ ዙማ ጼራ ጋኪዴስ፤ ኢዚ ሄን ዲሺን ጎዳይ ጋላኣዴፔ ቢዲ ዳኔ ጋካናስ ዲዛ ቢታ ኡባ ቤሲዴስ።
DEU 34:2 ኒፍታሌሜ ቢታ፥ ኤፍሬሜኔ ሚናሴ ቢታ ኡባ ኣርሼይ ዉሊዛ ባጋራ ዲዛ ዎጋ ጊታ ኣባ ጋጻ ጋካናስ ዲዛ ዩሁዳ ቢታ፥
DEU 34:3 ኔጌቤኔ ዛምባይ ዲዛ ኢያርኮ ሾባፌ ቢዲ ዞኣሬ ጋካናስ ዲዛሶ ኡባ ቤሲዴስ።
DEU 34:4 ጎዳይ ሙሴስ፥ «ኣብራሜስ፥ ዪሳቃሲኔ ያቆቤስ፥ ‹ታ ኢንቴ ዜሬꬃታ ላቲሳና› ጋ ጫቂዳ ቢታያ ሃኖኮ! ሄኮ ኔኒ ኔ ኣይፌራ ቤኣና ማላ ኦꬃዲስ፤ ጊዶ ኣቲን ኔ ጌላካ» ጊዴስ።
DEU 34:5 ሄሳ ጊሻስ ጎዳ ኦሳንቻ ሙሴይ ሞኣቤ ቢታን ዲሼ ጎዳይ ኢዛስ ዮቲዳ ማላ ሄን ሃይቂዴስ።
DEU 34:6 ጎዳይ ሙሴ ኣሃ ሞኣቤ ዴሬን ዲዛ ቤቲ-ፔኦሬ ካታማፔ ሲንꬃን ዲዛ ሾባን ሞጊዴስ፤ ጊዶ ኣቲን ኢዚ ሞጌቲዳሶ ሻኪ ኤሪዛ ኣሲ ሃች ጋካናስ ቤቲቤና።
DEU 34:7 ሙሴይ ሃይቂሺን ኢዛስ ላይꬃይ 120፤ ጊዶ ኣቲን ኢዛ ኣይፌይ ዶልጁሚቤና፤ ኢዛ ዎልቃይካ ዳቡርቤና።
DEU 34:8 ኢስራኤሌ ኣሳይ ሙሴስ ሚቻይ ኣꬋና ጋካናስ ሄꬑ ታሙ ጋላስ ጋካናስ ሞኣቤ ዴምባን ካዮቲሼ ዬኪዴስ።
DEU 34:9 ባ ኦላን ኢዚ ኦꬃና ማላ ሙሴይ ናዌ ና ኢያሶ ቦላ ባ ኩሼ ዎꬂዲ ሹሚዳ ጊሻስ ኢያሶይ ኣꬎ ኤራቴꬃኒኔ ኣያናን ኩሚዴስ፤ ኢስራኤሌ ኣሳይ ኢያሶስ ኣዛዜቲዴስ፤ ጎዳይ ሙሴ ባጋራ ኢስታስ ኢሚዳ ኣዛዞዛካ ናጊዳ።
DEU 34:10 ኣሲ ኣሳራ ሃሳይዛ ማላ ጎዳራ ሃሳይዳ ሙሴ ማላ ናቤይ ኢስራኤሌ ቢታን ዴንዲቤና።
DEU 34:11 ጎዳይ ጊብጼ ካዎዛኮ፥ ኢዛራ ኦꬂዛ ሃላቃታኮኔ ኩሜꬃ ኣሳኮ ዬዲዲ ኢዛ ባጋራ ኦራꬂኔ ማላሊሲዛ ሚሽ ኡባ ኦꬂዳ ሙሴ ማላ ሃራ ናቤይ ኦኒካ ዴና።
DEU 34:12 ሙሴይ ኢስራኤሌ ኣሳ ኡባ ሲንꬃን ኦꬂዳይሳ ማላ ዎልቃማኔ ባቢሲዛ ማላታታ ኦꬂዳ ሃራ ናቤይ ሙሌካ ዴና።
JOS 1:1 ጎዳ ኣይሌ ሙሴይ ሃይቂዳፔ ጉዬ ጎዳይ ሙሴ ማዲዛ ናዌ ና ኢያሶስ፥
JOS 1:2 «ሄኮ ታ ኣይሌ ሙሴይ ሃይቂዴስ፤ ሃኢ ኔኒኔ ሃይሲ ዴሬዚ ዴንዲቴ፤ ታኒ ካሴ ኢስራኤሌ ኣሳስ ኢማና ጊዳ ቢታ ጌላናስ ዮርዳኖሴ ሻፋ ፒኒቴ።
JOS 1:3 ታኒ ካሴ ሙሴስ ኢሚዳ ሂዶታ ማላ ኢንቴ ቶሆይ ዬꬊዛ ቢታ ኡባ ታ ኢንቴስ ኢማና።
JOS 1:4 ኢንቴ ቢታ ዛዋይ ባዞፌ ዶሚዲ ሊባኖሴ፥ ዎጋ ሻፋ ኤፊራጺሴፔ ቢዲ ሂቴ ዴሬ ኡባ ኦይኪዲ ኣርሼይ ዉሊዛ ባጋራ ቢዲ ዎጋ ኣባ ጋካናሳ።
JOS 1:5 ኔኒ ዲዛ ዎዴ ኡባን ኔናራ ኦኒካ ኤቄታና ዳንዳዬና፤ ታኒ ካሴ ሙሴራ ጊዲዳ ማላ ኔናራካ ጊዳና፤ ሙሌካ ታ ኔና ዬጊኬኔ ኣጊኬ።
JOS 1:6 «ሚና! ጻላ ጊዳ፤ ታኒ ካሴ ኢስታ ኣዋታስ ኢማና ጋዳ ጫቂዳ ቢታ ሃ ዴሬዛ ካሌꬃዳ ላቲሳናይ ኔና ጊዲዳ ጊሻስ ሚና።
JOS 1:7 ኣይኮይ ባ፤ ኔኒ ሚኖ ጻላ ሚና፤ ታ ኣይሌ ሙሴይ ኔስ ኢሚዳ ዎጋዛ ኡባ ሎኤꬃ ኣዛዜታ፤ ኔ ቢዳሶ ኡባን ጊጋ ጊዳና ማላ ሃዲርስ ኡሻች ጎፓ።
JOS 1:8 ሃይሲ ዎጋ ማጻፋይ ኔ ዶናፔ ሻኬቶፎ፤ ኢዛ ጊዶን ዲዛይሳ ኔ ሎኤꬃ ናጌታዳ ፖላና ማላ ጋላስ ጊዲን ኦማርስ ዛራ ዛራ ቆፓ፤ ኔ ሄሳꬆ ኦꬂኮ ኔ ቆፒዳ ኡባይ ኔስ ሱራናኔ ሃናና።
JOS 1:9 ኔኒ ቢዛሶን ኡባን ጎዳ ኔ ጾሳይ ኔናራ ዲዛ ጊሻስ ኣይኮይ ባ፥ ሚና፥ ያዮፋ፥ ዳጋሞፋ ጋዳ ታ ኔና ኣዛዛቤኪና!» ጊዴስ።
JOS 1:10 ሄሳፌ ካሊዲ ኢያሶይ ኢስራኤሌ ኣሳ፥
JOS 1:11 «ኢንቴ ጌዴ ኣሳይ ዲዛሶ ቢዲ፥ ‹ኢንቴ ሄꬑ ጋላሳፌ ጉዬ ካሴ ጎዳ ኢንቴ ጾሳይ ኢንቴና ላቲሳናስ ኢንቴስ ኢሚዛ ቢታዮ ላታናስ ዮርዳኖሴ ፒናና ጊሻስ ኢንቴስ ሺንቄ ጊግሲቴ› ጊ ዮቲቴ» ጊ ኣዛዚዴስ።
JOS 1:12 ኢያሶይ ኦሮቤሌ ቆሞታስ፥ ጋዴ ቆሞታስ፥ ሄሳꬆካ ሚናሴ ቆሞታፔ ባጋይታስ፥
JOS 1:13 «ጎዳ ኣይሌ ሙሴይ፥ ‹ጎዳ ኢንቴ ጾሳይ ኢንቴና ሼምፒሳና፤ ሃኖ ቢታዮካ ኢዚ ኢንቴስ ኢማና› ጊ ኢሚዳ ኣዛዞዛ ኣኬኪቴ።
JOS 1:14 ኢንቴ ማቼቲ፥ ኢንቴ ናይቲኔ ኢንቴ ሜሄቲካ ካሴ ሙሴይ ኢንቴስ ዮርዳኖሴ ሻፋፔ ሄ ፒንꬃን ኢሚዳሶን ሄን ዲሼቶ፤ ጊዶ ኣቲን ኢንቴ ኦላ ኣሳይ ኡባይ ኩሜꬅ ኦላ ሚሻራ ኢንቴ ባጋታ ኢስራኤሌ ኣሳ ማዳናስ ካሴቲዲ ዮርዳኖሴ ፒኔቶ፤ ኢንቴካ ኢንቴ ኢሻታራ ኢሲፌ ኦላስ ኬዚቴ።
JOS 1:15 ሄሲካ ጎዳይ ኢስታ ሼምፒሳና ጋካናሲኔ ኢንቴስ ኢዚ ኦꬆይሳꬆ ኢስቲካ ጎዳ ኢንቴ ጾሳይ ኢስታስ ኢሚዳ ቢታ ጋኪ ላታና ጋካናሳ፤ ሄሳፌ ጉዬ ኢንቴ ሲሚ ዪዲ ኣርሼይ ሞኪዛ ባጋራ ዮርዳኖሴ ሻፋፔ ሄ ፒንꬃን ጎዳ ኣይሌ ሙሴይ ኢንቴስ ኢሚዳ ቢታ ኢንቴ ላታና» ጊዴስ።
JOS 1:16 ኢስቲካ ኢያሶስ፥ «ኔኒ ኑስ ዮቶይሳ ኑኒ ኡባ ፖላና፤ ኔ ኪቲዛሶ ኣዋካ ባና።
JOS 1:17 ኑኒ ሙሴስ ኡባ ዎዴ ኣዛዜቲዳ ማላ ኔስካ ኣዛዜታና፤ ጎዳ ኔ ጾሳይ ካሴ ሙሴራ ጊዲዳ ማላ ኔናራካ ኢዚ ጊዶ!
JOS 1:18 ኔናራ ኤቄቲዛዴይኔ ኔስ ኣዛዜቶንታዴ ኡባይ ሃይቆ፤ ኔ ሚና፤ ኣይኮይ ባ፥ ኔ ሚኖ ሚና» ጊዳ።
JOS 2:1 ናዌ ና ኢያሶይ ቢታ ዎቺዛ ናምኡ ኣሳታ ሺጺሜ ጌቴቲዛሶፔ ቆታን ኪቲዴስ፤ ኪቲሼ ኢስታስ፥ «ቢቴ፤ ቢዲ ቢታ ዎቺቴ፤ ሃራፔካ ኢያርኮ ካታማ ዱማሲ ዎቺቴ» ጊዴስ። ሂስቲን ኢስቲ ቢዲ ኤራኣቦ ጌቴቲዛ ላይማ ማጫሳይ ሶ ጌሊዲ ኣቂዳ።
JOS 2:2 ሂስቲን ኢያርኮ ካዎይ፥ «ኢስራኤሌ ኣሳፔ ኪቴቲዳይቲ ሃ ቢታ ዎቻናስ ኦማርስ ዪዳ» ጊዛ ዮኦ ሲዪዴስ።
JOS 2:3 ኢያርኮ ካዎይ ኤራኣቢኮ፥ «ኔ ሶ ዪ ጌሊዳ ኣሳታ ኬሳ ኢማ። ኣይስ ጊኮ ኢስቲ ቢታ ኡባ ዎቻናስ ዪዳ» ጊዛ ኪታ ዬዲዴስ።
JOS 2:4 ጊዶ ኣቲን ሚሺሬያ ሄ ናምኡ ኣሳታ ቆታ ዎꬃዳ፥ «ኤ ኣሳቲ ታኮ ዪዳኮሺን ኢስቲ ኣዋፔ ዪዳኮ ታ ኤራቤኬ።
JOS 2:5 ኦማርስ ካታማ ፔንጌ ጎርዳና ጊዛ ዎዴ ኢስቲ ኬዚ ቢዳ፤ ኢስቲ ኣዋ ቢዳኮ ታ ኤሪኬ፤ ኤሶቲዲ ካሊዛ ጊዲኮ ኢንቴ ኢስታ ኦይካና» ጋዱስ።
JOS 2:6 ጊዶ ኣቲን ኤራኣባ ኣሳታ ፖቄ ማላ ኦሴቲዳሶ ኬሳዳ ሚጬቲዳ ታልባ ቡጻ ጊዶን ኢስታ ቆታ ዎꬃዱስ።
JOS 2:7 ኣሳቲ ጾሞሲዛይታ ኮያናስ ኬዚዲ ዮርዳኖሴ ሻፋ ፒንꬅ ኤፊዛ ኦጌ ኦይኪዲ ቢዳ፤ ኮይዛይቲ ካታማፔ ኬዚዳ ማላ ካታማ ፔንጌይ ጎርዴቲዴስ።
JOS 2:8 ዎቺዛይቲ ꬊስካናፔ ካሴታዳ ኢዛ ኢስታኮ ፑዴ ኬዛዳ ኢስታስ፥
JOS 2:9 «ጎዳይ ሃ ቢታ ኢንቴስ ኢሚዳይሳ፥ ኢንቴስ ያሻቴꬂ ኑናን ኩሚዳይሳኔ ሃ ቢታን ዴኢዛ ኣሳ ዎዚናይ ኢንቴስ ሂርጋን ሴሪዳይሳ ታ ኤራይስ።
JOS 2:10 ጊብጼ ቢታፌ ኢንቴ ኬዚዳ ዎዴ ኢንቴ ሲንꬃን ዞኦ ኣባ ጎዳይ ዎስቲ ሜሊሲዳኮ ኑኒ ሲዪዶስ፤ ቃሴ ዮርዳኖሴ ሻፋፔ ኣርሼ ኬሳሶ ባጋራ ዲዛ ኣሞሬ ቢታ ካዎታ ናምኣታ፥ ሲሆኔኔ ኣጌ ኢንቴ ዎስቲ ኡባ ꬋይሲዳኮ ኑ ሲዪዶስ።
JOS 2:11 ኑ ሄሳ ሲዪዳ ማላ ኑ ዎዚናይ ሴሪዴስ፤ ኢንቴስ ያሻቴꬃፌ ዴንዲዳይሳን ሺሮቶንታ ኣሲ ዴና፤ ጎዳ ኢንቴ ጾሳይ ቦላ ሳሎንካ ጋርሳ ቢታንካ ኢዚ ጾሳ።
JOS 2:12 ሄሳ ጊሻስ ታኒ ኢንቴስ ኪዪዳ ማላ ኢንቴካ ታ ኣዋ ኬꬃ ኣሳስ ኪያና ማላ ታስ ጎዳን ጫቂቴ፤ ሄሳስካ ኣማንꬂዛ ማላታ ታስ ኢሚቴ።
JOS 2:13 ታ ኣዋኔ ታ ኣዪዮ፥ ታ ኢሻታኔ ታ ሚቼታ ኢስታስ ሼምፖራ ዲዛ ኡባ ዎꬎፒቴ፤ ኑና ሃይቆፔ ኣሺቴ» ጋዱስ።
JOS 2:14 ሄ ኣሳቲ፥ «ኑ ኔስ ጫቂዳ ቃላ ማላ ፖሎንታ ኣጊኮ ጾሲ ኑና ዎꬎ! ኑ ኦꬂዳይሳ ኔ ኦናስካ ዮቶንታ ኣጊኮ፥ ጎዳይ ሃኖ ቢታዮ ኑስ ኢሚዛ ዎዴ ኑ ኔስ ሎኦ ኦꬃና ማላ ጫቆስ» ጊዳ።
JOS 2:15 ኤራኣባ ዲዛ ኬꬃይ ካታማ ዲርሳራ ኦይኬቲ ኬጼቲ ኡቲዳ ጊሻስ ኣሳታ ዎዶሮን ቃቻዳ ማስኮቴራ ዱጌ ዎꬃዱስ።
JOS 2:16 ኤራኣባ ኢስታስ፥ «ኢንቴና ኮይዛይቲ ዴሞንታ ማላ ፑዴ ዙምቡላታ ቦላ ኬዚዲ ሄን ሄꬑ ጋላስ ቆቴቲቴ፤ ሄሳፌ ጉዬ ኢንቴ ባናሶ ቢቴ» ጋዱስ።
JOS 2:17 ኣሳቲካ ኢዚስ፥ «ኑኒ ኔ ቢታ ጌሊዛ ዎዴ ሃ ዞኦ ዎዶሮዛ ኔኒ ኑና ኬሲዳ ማስኮቴ ቦላ ቃቾንታ ኣጊኮ ኔ ኣዋ፥ ኔ ኣዪዮ፥ ኔ ኢሻታኔ ኔሶ ኣሳ ኡባ ኔሶ ኤሆንታ ኣጊኮ ኔኒ ኑና ጫቂሲዳ ጫቆይ ኑስ ጎሜቴና።
JOS 2:19 ኦኒካ ኔ ኬꬃፌ ካሬ ኬዚ ኦጌ ቦላ ቤቲ ሃይቂኮ ሄሲ ኢዛ ጎሜ፤ ኑኒ ሄሳን ኦይሼቶኮ፤ ጊዶ ኣቲን ኔናራ ሶን ኢሲፌ ዲዛይ ኦኒካ ቦሼቲኮ ኢዛ ሱꬃ ጎሜይ ኑና ጋኮ።
JOS 2:20 ኑ ኦꬂዛይሳ ኔ ሃራስ ዮቲዛ ጊዲኮ ኔኒ ኑና ጫቄꬂዳ ጫቆይ ኑስ ጎሜቴና» ጊዳ።
JOS 2:21 ኢዛካ፥ «ኢንቴ ጊዳ ማላ ሃኖ» ጋዳ ኢስታ ሞይዛዱስ፤ ኢስቲ ቢዳፔ ጉዬ ዞኦ ዎዶሮ ባ ማስኮቴ ቦላ ቃጳዱስ።
JOS 2:22 ኢስቲ ፑዴ ዙምቡላታኮ ቢዳ፤ ጎዴꬂዛይቲ ኢያርኮ ሲማና ጋካናስ ሄን ሄꬑ ጋላስ ቆቴቲዳ። ጎዴꬂዛይቲ ኦጌ ኡባን ኮዪዳ ሺን ኢስቲ ዴሚቤቴና።
JOS 2:23 ሄሳፌ ጉዬ ሄ ናምኡ ኣሳቲ ዙምቡላታፔ ዎꬊ ዮርዳኖሴ ሻፋ ፒኒዲ ናዌ ና ኢያሶኮ ቢዲ ባና ጋኪዳ ኡባ ኢዛስ ዮቲዳ።
JOS 2:24 ኢስቲ ኢያሶስ፥ «ጎዳይ ቱማፔ ቢታ ኡባ ኑስ ኣꬂ ኢሚዴስ፤ ቃሴ ሄ ቢታን ዲዛ ኣሳይ ዉሪ ኑስ ያሻቴꬃፌ ዴንዲዳይሳን ኢስታ ዎዚናይ ሴሪዳይሳ ኑ ቤኢዶስ» ጊዳ።
JOS 3:1 ኢያሶይኔ ኢስራኤሌ ኣሳይ ማላዶ ዎንታራ ዴንዲዳ፤ ኢስቲ ሺጺሜ ጌቴቲዛሶፔ ዴንዲዲ ዮርዳኖሴ ሻፋኮ ቢዲ ፒኖንታ ሄን ታኪዳ።
JOS 3:2 ሄꬑ ጋላሳፌ ጉዬ ኦላ ጋዳዋቲ ኢስቲ ዱንካኒዳሶን ጌሊዲ፥
JOS 3:3 ኣሳስ፥ «ጎዳ ኢንቴ ጾሳ ጫቆ ቃላ ታቦታኔ ኢዛ ቶኪዳ ሌዌ ዛሬ ቄሴታ ቤኢዛ ዎዴ ኢንቴ ዱንካኒዳሶፔ ዴንዲዲ ኢስታ ካሊቴ።
JOS 3:4 ኢንቴ ካሴ ሄ ኦጌራ ቢ ኤሮንታ ጊሻስ ኢንቴ ባና ኦጌ ኢስቲ ኢንቴና ቤሳና፤ ጊዶ ኣቲን ጫቆ ቃላ ታቦታኮ ሺቆፒቴ፤ ጫቆ ቃላ ታቦታፔ 2,000 ዋꬋ ጊዲዛይሳ ማላ ሃሆን ኤቂቴ» ጊ ኣዛዞ ኢሚዳ።
JOS 3:5 ኢያሶይ ኣሳ፥ «ጎዳይ ዎንቶ ኢንቴ ጊዶን ማላሊሲዛዝ ኦꬃና ጊሻስ ኢንቴ ጌይቴ» ጊዴስ።
JOS 3:6 ቃሴካ ኢያሶይ ቄሴታስ፥ «ኢንቴ ጫቆ ቃላ ታቦታ ቶኪዲ ኣሳፔ ሲንꬄ ኣꬊቴ» ጊ ዮቲዴስ፤ ኢስቲ ጫቆ ቃላ ታቦታ ቶኪዲ ዴራፔ ሲንꬄ ሲንꬄ ቢዳ።
JOS 3:7 ጎዳይ ኢያሶስ፥ «ታኒ ሙሴራ ጊዲዳ ማላ ኔናራ ጊዳናይሳ ኢስራኤሌ ኣሳይ ዉሪ ኤራና ማላ ሃች ኢስታ ሲንꬃን ታኒ ኔና ꬎቁ ꬎቁ ኦꬃናስ ዶማና።
JOS 3:8 ኔኒ ጫቆ ቃላ ታቦታ ቶኪዛ ቄሴታ፥ ‹ዮርዳኖሴ ሻፋ ዶና ጋኪዛ ዎዴ ሃꬃን ጌሊዲ ኤቂቴ› ጋዳ ኣዛዛ» ጊዴስ።
JOS 3:9 ኢያሶይ ኢስራኤሌ ኣሳ፥ «ሃ ዪቴ፤ ዪዲ ጎዳ ኢንቴ ጾሳ ቃላ ሲዪቴ።
JOS 3:10 ዴኦ ጾሲ ኢንቴ ጊዶን ዲዛይሳኔ ኢዚ ቱማፔ ካናኔታ፥ ሂቴታ፥ ሂዌታ፥ ፓሪዜታ፥ ጌርጌሴታ፥ ኣሞሬታኔ ያቡሴታ ኢንቴ ሲንꬃፌ ኬሳናይሳ ኢንቴ ሄሳን ኤራና።
JOS 3:11 ሳኣ ኡባ ጎዳ ጫቆ ቃላ ታቦታይ ኢንቴፌ ሲንꬃቲዲ ዮርዳኖሴ ሻፋ ጌላና።
JOS 3:12 ሃኢ ኢስራኤሌ ዛሬታፔ 12 ኣሳታ ዶሪቴ፤ ኢሲ ኢሲ ዛሬፔ ኢሲ ኢሲ ኣስ ጊዶ።
JOS 3:13 ሳኣ ኡባ ጎዳ ጫቆ ቃላ ታቦታ ቶኪዳ ቄሴታ ቶሆይ ዮርዳኖሴ ሃꬃ ቦቺዳ ማላ ፑዴሃፔ ዱጌ ጎጊዛ ዮርዳኖሴ ሃꬂ ሄራካ ጎጌꬃ ኣጋጋና፤ ዶሬ ማላ ጊዲ ኤቃ ጋና» ጊዴስ።
JOS 3:14 ኣሳይ ዮርዳኖሴ ሻፋ ፒናናስ ባ ዱንካኔፔ ኬዚዳ ዎዴ ጫቆ ቃላ ታቦታ ቶኪዳ ቄሴቲ ኣሳፔ ሲንꬃቲ ቢዳ።
JOS 3:15 ካꬃ ሺሾ ዎዴን ኡባን ዮርዳኖሴ ሻፋይ ኪጼስ፤ ጊዲኮካ ጫቆ ቃላ ታቦታ ቶኪዳ ቄሴቲ ዮርዳኖሴ ሻፋ ጋኪዲ ኢስታ ቶሆይ ሃꬃ ጋጻ ዬꬊዳ ማላ፥
JOS 3:16 ጎጊዛ ሃꬃይ ኤቂዴስ፤ ሄን ዳሮ ሃሆሶን ጳርታኔ ማታን ዲዛ ኣዳሜ ጌቴቲዛ ካታማ ጋካናስ ኢሲሶ ሺቂዲ ዶሬቲዴስ፤ ዱጌ ኣራቤ ጋꬋን ዲዛ ማጺኔ ኣባን ጎጊዛ ሃꬂ ኡባይ ዱጺ ኣቲዴስ፤ ሂስቲን ኣሳይ ኢያርኮ ካታማ ጊናራ ፒኒዴስ።
JOS 3:17 ኢስራኤሌ ኣሳይ ሜላ ቢታ ዬꬊ ፒኒዛ ዎዴ ኣሳይ ዉሪ ፒናና ጋካናስ ጎዳ ጫቆ ቃላ ታቦታ ቶኪዳ ቄሴቲ ዮርዳኖሴ ሻፋ ጊዶን ሜላ ቢታን ኤቃ ጊዳ።
JOS 4:1 ካዎቴꬃይ ዉሪ ዮርዳኖሴ ሻፋ ፒኒዳፔ ጉዬ ጎዳይ ኢያሶ፥
JOS 4:2 «ኢስራኤሌ ኣሳፔ 12 ኣሳታ ዶራ፤ ኢሲ ኢሲ ቆሞፌ ኢሲ ኢሲ ኣስ ጊዶ።
JOS 4:3 ሂስታዳ ኢስታስ፥ ‹ዮርዳኖሴ ሻፋ ጊዶን ቄሴታ ቶሆይ ኤቂዳሶፔ 12 ሹቻታ ኤኪቴ፤ ሄ ሹቻታ ቶኪ ኤፊዲ ሃች ኢንቴ ኣቂዛሶን ዎꬂቴ› ጋዳ ዮታ» ጊዴስ።
JOS 4:4 ሄሳ ጊሻስ ኢያሶይ ኢስራኤሌ ቆሞታፔ ኢሲ ኢሲ ኣስ ኤኪዲ ታማኔ ናምኡ ዶሬቲዳይታ ጼይጊዴስ።
JOS 4:5 ሂስቲዲ ኢስታስ፥ «ጎዳ ኢንቴ ጾሳ ጫቆ ቃላ ታቦታይ ዲዛሶሆ ዮርዳኖሴ ሻፋ ጌሊቴ፤ ኢስራኤሌ ቆሞታ ቆዳን ዉሪካ ኢሲ ኢሲ ሹች ኢንቴ ሃሼን ሃሼን ቶኪቴ።
JOS 4:6 ሃ ሹቻቲ ጎዳይ ሃች ኦꬂዳይሳ ኢንቴና ሃሳኢሲዛ ማላታ ጊዳና፤ ዎዴፔ ኢንቴ ናይቲ ኢንቴና፥ ‹ሃ ሹቻቲ ኣዜ?› ጊዲ ኦይቺዛ ዎዴ፥
JOS 4:7 ኢንቴ፥ ‹ጎዳ ጫቆ ቃላ ታቦታይ ፒኒዛ ዎዴ ዮርዳኖሴ ሻፋይ ጎጊዛይሳ ኣጊ ኤቂዴስ፤ ሃ ሹቻቲ ሄ ሶሆን ሃኒዳይሳ ኡባ ሜርናስ ኢስራኤሌ ኣሳ ሃሳኢሲዛይታ› ጊዲ ኢስታስ ዮቲቴ» ጊዴስ።
JOS 4:8 ኢስራኤሌ ኣሳይ ኢያሶይ ኣዛዚዳ ማላ ኦꬂዴስ፤ ጎዳይ ኢያሶስ ዮቲዳ ማላ ኢስራኤሌ ቆሞታ ቆዳን 12 ሹቻታ ዮርዳኖሴ ሻፋ ጊዶፌ ኤኪዳ፤ ቶኪ ኤሂዲ ባ ኣቂዳ ሶሆን ዎꬂዳ።
JOS 4:9 ኢያሶይ ጫቆ ቃላ ታቦታ ቶኪዳ ቄሴታ ቶሆይ ዮርዳኖሴ ሻፋ ጊዶን ኤቂዳሶን 12 ሹቻታ ኤሲዴስ፤ ሄ ሹቻቲ ሃች ጋካናስ ሄን ዴቴስ።
JOS 4:10 ጎዳይ ኢያሶ ኣዛዚዳይሳ ኡባ ኣሳይ ፖላና ጋካናስ ጫቆ ቃላ ታቦታ ቶኪዳ ቄሴቲ ዮርዳኖሴ ሻፋ ጊዶን ኤቂ ጋምኢዳ፤ ሙሴይ ኢያሶ ኣዛዚዳ ኣዛዞይካ ሄሳ፤ ኣሳይ ኤሶቲዲ ሻፋ ፒኒዴስ።
JOS 4:11 ኣሳይ ዉሪ ፒኒዳፔ ጉዬ ጎዳ ጫቆ ቃላ ታቦታይኔ ቄሴቲ ኣሳይ ኢስታ ጼሊሺን ፒኒዳ።
JOS 4:12 ሙሴይ ኣዛዚዳ ማላ ኦሮቤሌ ዛሬቲ፥ ጋዴ ዛሬቲኔ ሚናሴ ዛሬታፔ ባጋይ ኦላ ሚሻ ኦይኪዲ ኢስራኤሌ ኣሳፔ ሲንꬃቲዲ ፒኒዳ።
JOS 4:13 ቆዳን 40,000 ጊዲዛ ኣሳይ ቶራኔ ጎንዳሌ ኦይኪ ኦላስ ጊጌቲዲ ጎዳ ሲንꬃን ኢያርኮ ማታን ዲዛ ዴምባ ፒኒዳ።
JOS 4:14 ሄ ጋላስ ጎዳይ ኢያሶ ኢስራኤሌ ኣሳ ኡባ ሲንꬃን ꬎቁ ꬎቁ ሂስቲዴስ፤ ኣሳይ ሙሴ ቦንቺዳ ማላ ኢያሶካ ኢዚ ዲዳ ላይꬅ ኡባን ቦንቺዴስ።
JOS 4:15 ሄሳፌ ጉዬ ጎዳይ ኢያሶስ፥
JOS 4:16 «ጫቆ ቃላ ታቦታ ቶኪዳ ቄሴቲ ዮርዳኖሴ ሻፋፔ ኬዛና ማላ ኣዛዛ» ጊ ዮቲን፥
JOS 4:17 ኢያሶይ ቄሴታ፥ «ዮርዳኖሴ ሻፋፔ ኬዚቴ» ጊ ኣዛዚዴስ።
JOS 4:18 ጎዳ ጫቆ ቃላ ታቦታ ቶኪዳ ቄሴቲ ዮርዳኖሴ ሻፋ ጊዶፌ ኬዚዲ ሜላ ቢታ ኢስቲ ዬꬊዳ ማላ ሄራካ ዮርዳኖሴ ሃꬃይ ካሴ ማላ ሻፋ ኩሚዲ ጎጌꬅ ኦይኪዴስ።
JOS 4:19 ኣሳይ ኮይሮ ኣጊናን ታማንꬃ ጋላሳን ዮርዳኖሴ ሻፋ ፒኒዲ ኢያርኮን ኣርሼይ ሞኪዛሶ ባጋራ ዛዋቲዛ ጌልጌላን ዱንካኒዴስ።
JOS 4:20 ኢያሶይ ዮርዳኖሴ ሻፋፔ ኤሂዳ 12 ሹቻታ ጌልጌላን ኤሲዴስ።
JOS 4:21 ኢስራኤሌ ኣሳስ፥ «ዎዴፔ ኢንቴ ዛሬቲ ባ ኣዋታ፥ ‹ሃ ሹቻቲ ኣዜ?› ጊ ኦይቺዛ ዎዴ፥
JOS 4:22 ‹ኢስራኤሌ ኣሳይ ዮርዳኖሴ ሻፋ ሜላ ቢታ ዬꬊዲ ፒኒዳይሳ ሃሳኢሲዛይሳ› ጊዲ ዮቲቴ።
JOS 4:23 ኑኒ ፒናና ጋካናስ ጎዳ ኑ ጾሳይ ዞኦ ኣባ ካሴ ኑ ሲንꬃን ሜሊሲዳ ማላ ኢንቴካ ፒናና ጋካናስ ጎዳ ኢንቴ ጾሳይ ዮርዳኖሴ ሻፋ ኢንቴ ሲንꬃን ሜሊሲዴስ።
JOS 4:24 ሄሳꬆ ኢዚ ኦꬂዳይ ሳኣን ዲዛ ኣሳይ ዉሪ ጎዳ ዎልቃይ ኣይ ማላ ጊታኮ ኤራናሲኔ ኢንቴካ ጎዳስ ኢንቴ ጾሳስ ሜርናስ ያያናሳ» ጊዴስ።
JOS 5:1 ዮርዳኖሴ ሻፋፔ ኣርሼይ ዉሊዛ ባጋራ ዲዛ ኣሞሬታ ካዎቲኔ ሜዲቴራኔ ኣባ ላንቄ ላንቄ ኦይኪዲ ዲዛ ካናኔታ ካዎቲ ዉሪ ኢስራኤሌ ኣሳይ ፒናና ጋካናስ ጎዳይ ዮርዳኖሴ ሻፋ ሃꬃ ሜሊሲዳይሳ ሲዪዳ ዎዴ ኢስታ ዎዚናይ ባቦን ሴሪዴስ። ሂስቲን ኢስቲ ኢስራኤሌ ኣሳራ ኤቄታናስ ጻሊቤቴና።
JOS 5:2 ሄ ዎዴ ጎዳይ ኢያሶስ፥ «ሳሎ ሹቻ ቃራ ኤካዳ ቃጻሬቶንታ ኢስራኤሌ ኣቱማ ኣሳ ናምኣንꬆ ቃጻራ» ጊዴስ።
JOS 5:3 ሂስቲን ኢያሶይ ሳሎ ሹች ቃራሲዲ ጊቢኣዜ ኤሎቴ ጌቴቲዛሶን ኢስራኤሌ ኣቱማሳ ቃጻሪዴስ።
JOS 5:4 ኢዚ ሄሳ ኦꬂዳ ጋሶይካ ጊብጼፔ ኬዚዳ ኣሳን ላይꬃይ ኦላስ ጋኪዳ ኣቱማ ኣሳይ ዉሪ ጊብጼፔ ኬዚዳፔ ጉዬ ባዞን ኦጌ ቦላ ሃይቂዴስ።
JOS 5:5 ጊብጼፔ ኬዚዳ ኣቱማ ኣሳይ ዉሪ ቃጻሬቲዴስ፤ ጊዶ ኣቲን ባዞን ዩዪዛ ዎዴ ዬሌቲዳ ኣቱማ ናይታፔ ኢሶይካ ቃጻሬቲቤና።
JOS 5:6 ኢስራኤሌ ካዎቴꬃይ ጎዳስ ኣዛዜቶንታ ኢጺዳ ጊሻስ ጊብጼፔ ኬዚዛ ዎዴ ላይꬃይ ኦላስ ጋኪዳ ኣቱማ ኣሳይ ዉሪ ሃይቂዲ ዉራና ጋካናስ ባዞን 40 ላይꬅ ዩዪዴስ፤ ሄሳን ጎዳይ ኢስታስ፥ «ኤሲኔ ማꬂ ጎጊዛ ኣራዳ ቢታ ታኒ ካሴ ኢንቴ ኣዋታስ ኢማና ጊዳ ሄ ቢታ ኢንቴ ቤዬኬታ» ጊዳ ቃላይ ፖሌታናሳ።
JOS 5:7 ሄሳ ጊሻስ ጎዳይ ኢስታ ናይታ ኢስታሶሆን ዴንꬂዴስ፤ ኢያሶይ ቃጻራ ጌልꬂዳይቲ ሄይታንታ፤ ኢስቲ ኦጌ ቦላ ሄሜቲሼ ዲዛ ጊሻስ ቃጻሬቲቤቴና።
JOS 5:8 ካዎቴꬃይ ዉሪ ቃጻሬቲዳፔ ጉዬ ማዱንꬃይ ፓጻና ጋካናስ ባ ዱንካኒ ዲዛሶን ታኪዴስ።
JOS 5:9 ጎዳይ ኢያሶስ፥ «ሃች ታኒ ጊብጼታ ቦሬ ኢንቴፌ ጌንዴሪሳ ዲጋዲስ» ጊዴስ፤ ሂስቲን ሄ ሶሆዛ ሱንꬃይ ሃች ጋካናስ ጌልጌላ ጌቴቴስ።
JOS 5:10 ኢስራኤሌ ኣሳይ ኢያርኮ ዴምባን ጌልጌላን ዱንካኒ ዲሼ ኣጊናይ ጌሊን ታማኔ ኦይዳንꬃ ጋላሳ ኦማርስ ፓዚጋ ባኣሌ ቦንቺዴስ።
JOS 5:11 ፓዚጋፔ ጉዬ ዎንቴꬃ ጋላስ ቢታን ሞኪዳ ካꬃ ኣይፌፔ ኢርሾይ ጌሎንታ ኡኬቲዳይሳኔ ጫጬቲዳ ቲያ ሚዴስ።
JOS 5:12 ሄ ቢታን ሞኪዳ ካꬃ ኣይፌ ሚዳ ጋላስ ማናይ ዩስ ኣጊዴስ፤ ሄሳፌ ጉዬ ኢስራኤሌ ኣሳስ ማናይ ዪቤና፤ ጊዶ ኣቲን ሄ ዎዴፔ ዶሚዲ ኢስቲ ካናኔን ሞኪዳ ካꬅ ሚሼ ዴኢዳ።
JOS 5:13 ኢያሶይ ኢያርኮ ማታን ዲሼ ꬎቁ ጊ ጼሊዲ ጊꬃ ማሻ ሾዲ ኦይኪዳ ኢሲ ኣሲ ኢዛ ሲንꬃን ኤቂዳይሳ ቤኢዴስ፤ ኢያሶይ ኢዛኮ ሺቂዲ፥ «ኔኒ ኑ ባጋዬ ኑ ሞርኬታ ባጋ?» ጊ ኦይቺዴስ።
JOS 5:14 ኢዚካ፥ «ታ ኦና ባጋካ ጊዲኬ፤ ጊዶ ኣቲን ታኒ ጎዳ ኦላንቻታ ጋዳዋ ጊዲዳ ጊሻስ ያዲስ» ጊ ዛሪዴስ። ኢያሶይካ ሳኣን ጉፋኒ ጎይኒዲ፥ «ታ ጎዳዉ! ታስ ኔ ኣይሌዛስ ኔ ኣይ ዮታኔ?» ጊዴስ።
JOS 5:15 ጎዳ ኦላንቻታ ጋዳዋይ፥ «ኔኒ ኤቂዳሶይ ጌሽ ጊዲዳ ጊሻስ ኔ ቶሆፔ ጫማ ኬሳ» ጊዴስ፤ ሂስቲን ኢያሶይ ኢዚ ኣዛዚዳ ማላ ኦꬂዴስ።
JOS 6:1 ኢስራኤሌ ኣሳስ ያዪዳ ጋሶን ኢያርኮ ካታማ ዲርሳ ፔንጌቲ ጎርዴቲዳ፤ ካታማ ጌላናሲኔ ካታማፔ ኬዛናስ ዳንዳይዛይ ኦኒካ ዴና።
JOS 6:2 ጎዳይ ኢያሶስ፥ «ሄኮ ታኒ ኢያርኮ ካታማዮ ኢዚ ካዎዛራ ኢዚ ሚኖ ኦላንቻታራካ ኔ ኩሼን ኣꬃ ኢማዲስ።
JOS 6:3 ኔኒኔ ኔ ኦላንቻቲ ጪፍሪዲ ኡሱፑን ጋላስ ጋካናስ ሃች ሃች ካታማ ዲርሳ ኢሲቶ ዩዪ ኣꬊቴ።
JOS 6:4 ቃሴ ላፑን ቄሴቲ ላፑን ዛዬታ ኦይኪዲ ጎዳ ጫቆ ቃላ ታቦታ ሲንꬅ ኣꬌቶ፤ ላፑንꬃ ጋላስ ቄሴቲ ዛዬታ ፑኒሺን ኦላንቻቲ ጪፍሪዲ ኢሲፌ ካታማዮ ላፑንቶ ዩዪ ኣꬌቶ።
JOS 6:5 ሄሳፌ ጉዬ ዛዬይ ቃንጾይ ባይንዳ ፑኔቲዛይሳ ሲዪዳ ማላ ኣሳይ ዉሪ ባ ቃላ ꬎቁ ሂስቲ ዋሶ፤ ሂስቲዳ ማላ ካታማይ ጊምቤይ ላሌታና፤ ኣሳይ ዉሪ ላዉሁ ጊ ኬኢዲ ካታማይ ጊዶ ሲቲ ጊ ጌላና» ጊዴስ።
JOS 6:6 ናዌ ና ኢያሶይ ቄሴታ ጼይጊዲ፥ «ጎዳ ጫቆ ቃላ ታቦታ ቶኪቴ፤ ኢንቴፌ ላፑን ቄሴቲ ላፑን ዛዬታ ኦይኪዲ ጫቆ ቃላ ታቦታፔ ሲንꬄ ኣꬊ ቢቴ» ጊዴስ።
JOS 6:7 ዴሬዛካ፥ «ጌዴ ሲንꬄ ቢቴ፤ ካታማ ዩዪ ኣꬊቴ፤ ኦላንቻቲካ ጎዳ ጫቆ ቃላ ታቦታፔ ሲንꬃቲ ቤቶ፤ ካታማዮካ ዩዪቴ» ጊዲ ኣዛዚዴስ።
JOS 6:8 ኢያሶይ ኣሳስ ሃሳይዳ ማላ ላፑን ቄሴቲ ላፑን ዛዬታ ጎዳ ሲንꬃን ኦይኪዲ ፑኒሼ ሲንꬃቲ ቢዳ፤ ቃሴ ጎዳ ጫቆ ቃላ ታቦታይ ኢስታ ካሊዴስ።
JOS 6:9 ኦላስ ጊጌቲዳይቲ ዛዬታ ፑኒዛ ቄሴታፔ ሲንꬃራ ቢሺን ጉዬራ ናጊዛ ኦላንቻቲ ጫቆ ቃላ ታቦታ ካሊዳ፤ ሄ ዎዴ ዛዬይ ቃንጾይ ባይንዳ ፑኔቲዴስ።
JOS 6:10 ጊዶ ኣቲን ኢያሶይ ኣሳ፥ «ታኒ ኢንቴና፥ ‹ዋሲቴ!› ጋና ጋላሳይ ጋካናስ ኦላ ዋሶ ዋሶፍቴ፤ ኢንቴ ቃላይ ሲዬቶፎ፤ ኢሲ ቃላካ ቃቶፍቴ፤ ታ ዋሲቴ ጊኮ ሄ ዎዴ ዋሲቴ!» ጊ ኣዛዚዴስ።
JOS 6:11 ሄሳ ጊሻስ ጎዳ ጫቆ ቃላ ታቦታይ ቶኬቲዲ ሄ ካታማ ኢሲቶ ዩዪ ኣꬋና ማላ ኦꬂዴስ፤ ሄሳፌ ጉዬ ኣሳይ ባ ዱንካኒዳሶ ሲሚዲ ኦማርስ ሄን ኣቂዴስ።
JOS 6:12 ዎንቴꬃ ጋላስ ኢያሶይ ዎንታቲ ዴንዲዴስ፤ ቄሴቲካ ጎዳ ጫቆ ቃላ ታቦታ ቶኪዳ።
JOS 6:13 ላፑን ዛዬታ ኦይኪዳ ላፑን ቄሴቲ ሲንꬄ ኣꬊዲ ዛዪሼ ጎዳ ጫቆ ቃላ ታቦታፔ ሲንꬄ ሲንꬄ ቢሼ ዛዬዛ ቃንጾይ ባይንዳ ፑኒዳ፤ ኦላስ ጊጊዳይቲ ኢስታፌ ሲንꬃራ ቢሺን ጉዬራ ናጊዛ ኦላንቻቲካ ጎዳ ጫቆ ቃላ ታቦታ ካሊ ቤቴስ፤ ሄ ዎዴ ቄሴቲ ቃንጾይ ባይንዳ ዛዬ ዛዬቴስ።
JOS 6:14 ናምኣንꬆ ጋላስ ካታማ ኢሲቶ ዩዪ ኣꬊዲ ባ ዱንካኒዳሶ ሲሚዳ፤ ኡሱፑን ጋላስ ጋካናስ ሄሳꬆካ ኦꬂዳ።
JOS 6:15 ላፑንꬃ ጋላስ ባዞይ ዞኢሺን ዴንዲዲ ካሴይሳꬆካ ካታማዮ ላፑንቶ ዩዪ ኣꬊዳ፤ ሄ ጋላስ ጻላ ካታማዮ ላፑንቶ ዩዪ ኣꬊዳ።
JOS 6:16 ላፑንꬆ ዩዪሼ ቄሴቲ ዛዬታ ፑኒሺን ኢያሶይ ዴራ፥ «ጎዳይ ሃኖ ካታማዮ ኢንቴስ ኣꬂ ኢሚዳ ጊሻስ ዋሲቴ!
JOS 6:17 ካታማያኔ ካታማይ ጊዶን ዲዛ ኡባይ ጎዳስ ዱማ ጊዲዳ ጊሻስ ኢዞ ሙሌራ ꬋይሲቴ፤ ኑኒ ቢታዮ ዎቻናስ ኪቲዳ ኣሳታ ቆታ ኣሺዳ ጊሻስ ላይማ ማጫስ ኤራኣባኔ ኢዚ ሶን ኢዚራ ኢሲፌ ዲዛ ኣሲ ጻላ ኣታና።
JOS 6:18 ጊዶ ኣቲን ኢንቴ ጎዳስ ዱማቲዳይሳፌ ኣይኮካ ኤኮንታ ማላ ኢንቴ ሁኤስ ናጌቲቴ፤ ኢንቴ ሂስቶንታ ኣጊኮ ኢስራኤሌቲ ዱንካኒዳሶ ኢታስ ኣꬂ ኢማና፤ ሂስቲዲ ሄ ሶሆዛ ቦላ ሜቶ ጋꬃና።
JOS 6:19 ቢራይኔ ዎርቃይ ዉሪ ቃሴ ጻርቂማላፔኔ ቢራታፔ ኦሴቲዳ ሚሻቲ ኡባይ ጎዳስ ዱማ ጊዲዳ ጊሻስ ጎዳ ሚንጃ ኬꬅ ጌሎ» ጊዴስ።
JOS 6:20 ሄሳ ጊሻስ ዛዬይ ፑኔቲን ኣሳይ ዋሲዴስ፤ ዛዬዚ ፑኔቲሺን ዴሬዚ ባ ቃላ ꬎቁ ሂስቲዲ ዋሲን ካታማ ዲርሳይ ላሌቲዴስ፤ ሄሳፌ ጉዬ ኣሳይ ዉሪ ሲቲ ጊዲ ጌዴ ካታማዮ ጌሊዴስ።
JOS 6:21 ካታማን ሼምፖራ ፓጻ ዲዛይታ ኡባ ኦይኪዲ ማጫ፥ ኣቱማ፥ ናይታ፥ ጪማታ፥ ሚዝ፥ ዶርሳኔ ሃሬ ኡባ ቃራ ማሻን ዎꬊዴስ።
JOS 6:22 ኢያሶይ ቢታ ዎቻናስ ኪቴቲዳ ናምኡ ኣሳታ፥ «ላይማ ማጫስ ኤራኣቢ ሶ ቢቴ፤ ሂስቲዲ ኢንቴ ኢዚስ ጫቂዳ ማላ ኣኔ ኢዞኔ ኢዚ ሶ ኣሳ ኡባ ቆሪ ኬሲቴ» ጊዴስ።
JOS 6:23 ሄሳ ጊሻስ ቢታ ዎቺዳ ኣሳቲ ቢዲ ኤራኣቦ፥ ኢዚ ኣዋ፥ ኢዚ ኣዪዮ፥ ኢዚ ኢሻታኔ ኢዚ ዳቦታ ኡባ ቆሪ ኬሲዳ፤ ኢስራኤሌ ኣሳይ ዱንካኒ ዲዛሶፔ ጋጻራ ዎꬂዳ።
JOS 6:24 ሄሳፌ ጉዬ ካታማዮኔ ኢዚ ጊዶን ዲዛ ኡባ ታማን ጹጊዳ፤ ጊዶ ኣቲን ቢራኔ ዎርቃ፥ ጻርቂማላፔኔ ቢራታፔ ኦሴቲዳ ሚሻታ ጎዳ ሚንጃ ኬꬃን ዎꬂዳ።
JOS 6:25 ቃሴ ኢያሶይ ላይማ ማጫስ ኤራኣቦ ኢዚ ኣዋ ሶ ኣሳኔ ኢዚራ ዲዛ ዳቦታ ኡባ ኣሺዴስ፤ ጋሶይካ ኢያሶይ ኢያርኮ ካታማዮ ዎቻናስ ኪቴቲዳ ኣሳታ ኢዛ ካሴ ቆታዳ ኣሺዳ ጊሻሳ፤ ኢዚ ዛሬቲ ሃች ጋካናስ ኢስራኤሌ ቢታን ዴቴስ።
JOS 6:26 ሄ ዎዴ ኢያሶይ፥ «ሃኖ ካታማዮ ዛሪ ኤሲዛ ኣሲ፥ «ጎዳ ሲንꬃን ቃንጌቲዳዴ ጊዶ። ዮች ዬጊዛ ዎዴ ኢዛስ ባይራ ናይ ꬋዮ። ጊምቤታ ኤሲሺን ዉርሴꬃ ናይ ꬋዮ» ጊዲ ቃንጊዴስ።
JOS 6:27 ሃ ኡባን ጎዳይ ኢያሶራ ጊዲዴስ፤ ኢያሶ ጎባቴꬃ ዎሬይ ቢታ ኡባ ጋኪዴስ።
JOS 7:1 ኢስራኤሌ ኣሳይ ጎዳስ ኣማኔቶንታ ኢጺዲ ፒላ ሚሽ ኤኪዴስ፤ ሄሳ ኤኪዳይ ኣካኔ፤ ኣካኔይ ካርሜ ና፤ ካርሜይ ዚሚሬ ና፤ ዚሚሬይ ዩሁዳ ቆሞፌ ዛራሄ ና፤ ሂስቲን ጎዳ ሃንቆይ ኢስራኤሌ ኣሳ ቦላ ኤጺ ኬዚዴስ።
JOS 7:2 ኢያሶይ ቤቴሌ ካታማፔ ኣርሼይ ሞኪዛ ባጋራ ቤቲ-ኣዌኔ ማታን ዲዛ ኣዬ ካታማ ኢያርኮፌ ኣስ ኪቲዲ፥ «ጌዴ ኬኢቴ፤ ቢታዮካ ዎቺቴ» ጊዴስ። ኣሳቲካ ቢዲ ኣዬ ካታማ ዎቺዳ።
JOS 7:3 ዎቺዳ ኣሳቲ ኢያሶኮ ሲሚ ዪዲ፥ «ኣዬ ካታማ ኦላናስ ኡባ ኣሳይ ባናስ ኮሼና፤ ናምኡ ዎይኮ ሄꬑ ሺ ኣስ ዬዳ፤ ኣዬን ጉꬃ ኣሲ ዲዛ ጊሻስ ኣሳይ ዉሪ ዳቡሮፖ» ጊዳ።
JOS 7:4 ሂስቲን 3,000 ጊዲዛ ኣሳይ ኦሌታናስ ኣዬ ካታማ ቢዴስ፤ ጊዶ ኣቲን ኣሳይ ኣዬ ካታማ ኣሳ ሲንꬃፌ ባቃቲዴስ።
JOS 7:5 ኣዬ ካታማ ኣሳይ ኢስራኤሌ ኣሳ ካታማ ጊምቤ ፔንጌፌ ቢዲ ሺባርሜ ጋካናስ ዱጉንꬃን ጎዲሼ ሾጪዴስ፤ ኢስታፌ 36 ኣስ ዎꬊዳ፤ ሄሳን ኣሳ ዎዚናይ ሴሪዲ ሃꬃ ማላ ጉኪዴስ።
JOS 7:6 ሄሳፌ ጉዬ ኢያሶይ ባ ማይኦ ዳኪዴስ፤ ሂስቲዲ ጎዳ ታቦታ ሲንꬃን ኦማርስ ጋካናስ ጉፋኒዴስ። ኢስራኤሌ ጪማቲካ ሄሳ ማላ ሃኒዳ፤ ባ ሁኤንካ ጉዱላ ማኪዳ።
JOS 7:7 ሂስቲን ኢያሶይ፥ «ኣዬ ኣና! ኡባ ሃሪዛ ጎዳዉ! ኑና ኣሞሬ ኣሳስ ኣꬃ ኢማዳ ዉርሲሳናስ ኣይስ ዮርዳኖሴ ሻፋ ፒንꬃዳ ኤሃዲ? ኑ ፒኖንታ ሄን ኣቲዳኮ ኣዜ ዲዛይሺን!
JOS 7:8 ኣቤት ጎዳዉ! ኢስራኤሌ ኣሳይ ጾኔቲዲ ባ ሞርኬታ ሲንꬃፌ ባቃቲዳይሳ ታኒ ኣይ ጎ?
JOS 7:9 ካናኔ ኣሳይኔ ሃ ቢታን ዲዛ ሃራ ኣሳይ ዉሪ ሃ ዮኦዛ ሲዪዲ ኑና ዶዳና፤ ቢታ ቦላፌ ኑ ሱንꬅ ꬋይሳና፤ ሂስቲን ኔ ጊታ ሱንꬃ ጊሻስ ጋዳ ኔ ኣይ ኦꬃኔ?» ጊዴስ።
JOS 7:10 ጎዳይ ኢያሶ፥ «ዴንዳ ኤቃ! ኣይስ ጉፋናዲ?
JOS 7:11 ኢስራኤሌ ኣሳይ ናጋራ ኦꬂዴስ፤ ታኒ ኢስታራ ጫቄቲዳ ታ ጫቆዛ ሜንꬂዴስ፤ ኢስቲ ፒላ ሚሻታፔ ኤኪዳ፤ ካይሶቲዳ፤ ዎርዶቲዳ፤ ቃሴ ባንቲ ኤኪዳይሳ ባንታ ሚሻራ ዋላኪዳ።
JOS 7:12 ኢስራኤሌ ኣሳይ ባንታ ሞርኬታራ ኤቄታናስ ዳንዳዮንታይ ሄሳ ጋሶና፤ ኢስቲ ꬋዮስ ኣꬊ ኢሜቲዳ ጊሻስ ባንታ ሞርኬታ ሲንꬃፌ ጉዬ ሲሚ ባቃቲዳ፤ ፒላ ሚሽ ኢንቴ ጊዶፌ ኢንቴ ꬋይሶንታ ኣጊኮ ሃይሳፌ ጉዬ ታኒ ኢንቴናራ ጊዲኬ።
JOS 7:13 «ዴንዳ! ኣሳ ጌሻ፤ ኢስታስ፥ ‹ጎዳ ኢስራኤሌ ጾሳይ ኢንቴና፡ ኢስራኤሌቶ! ፒላ ሚሺ ኢንቴ ጊዶን ዴስ፤ ኢንቴ ሄሳ ኢንቴ ጊዶፌ ዲጋና ጋካናስ ኢንቴ ሞርኬታ ሲንꬃን ኤቃናስ ዳንዳዬኬታ፤ ዎንቶስ ኢንቴና ጊጊሳናስ ኢንቴና ጌሺቴ።
JOS 7:14 ዎንቶ ማላዶ ኢንቴ ቆሞን ቆሞን ሺቂቴ፤ ጎዳይ ሻኪዳይሲ፥ ዛሬን ዛሬን፥ ዛርኬን ዛርኬን፥ ኬꬃን ኬꬃኒኔ ሁኤን ሁኤን ሲንꬄ ኬዛና።
JOS 7:15 ሄሳፌ ጉዬ ፒላ ሚሺ ኢዛ ኣቻን ቤቲዳዴይኔ ኢዛስ ዲዛ ኡባይ ታማን ጹጌታና። ጋሶይካ ጎዳ ጫቆ ቃላ ላሊዲ ኢስራኤሌ ጊዶን ዬላቺዛ ኦሶ ኦꬂዳ ጊሻሳ› ጋ» ጊዴስ።
JOS 7:16 ኢያሶይ ዎንቴꬃ ጋላስ ዎንታራ ዴንዲዲ ኢስራኤሌ ኣሳይ ባ ቆሞን ቆሞን ሺቃና ማላ ኦꬂዴስ፤ ሄሳፌ ጉዬ ዩሁዳ ቆሞይ ሻኬቲዴስ።
JOS 7:17 ዩሁዳ ቆሞይ ሺቂን፥ ዛራሄ ዛሬይ ሻኬቲዴስ፤ ዛራሄ ዛሬይ ሺቂን፥ ዚሚሬ ሶ ኣሳይ ሻኬቲዴስ።
JOS 7:18 ዚሚሬ ሶ ኣሳይ ሺቂን፥ ዉርሴꬃን ዚሚሬ ና፥ ካርሜ ና ኣካኔይ ሻኬቲዴስ።
JOS 7:19 ሂስቲን ኢያሶይ ኣካኔ፥ «ታ ናዞ! ጎዳ ኢስራኤሌ ጾሳ ቦንቻ፤ ኢዛስ ፓጻ፤ ኣኔ ኔኒ ኦꬂዳይሳ ቆቶንታ ዳሼ ታስ ዮታ» ጊዴስ።
JOS 7:20 ኣካኔይካ ኢያሶስ፥ «ኤ ቱማ! ታኒ ጎዳ ኢስራኤሌ ጾሳ ቆሃዲስ፤ ታኒ ኦꬂዳይ ሃይሳ፤
JOS 7:21 ዲኤቲ ዪዳ ሚሻ ጊዶፌ ታኒ ኢሲ ሎኢዛ ሳናኦሬ ካባ፥ ናምኡ ጼቱ ሳቂሌ ቢራኔ ባጋ ኪሎ ጊዲዛ ዎርቃ ቤኣዳ ኣሞቲዳ ጊሻስ ኤካዲስ። ሂስታዳ ታ ዱንካኔ ጊዶን ቦካዳ ቢራ ጋርሳራ ሂጻ ሞጋዲስ» ጊዴስ።
JOS 7:22 ሂስቲን ኢያሶይ ኣስ ኪቲዴስ፤ ኢስቲ ኢዛ ዱንካኔኮ ዎጺ ቢዲ ቢራዚ ጋርሳራ ሂጼቲ ሃንኮ ሚሻታራ ሞጌቲዳይሳ ዴሚዳ።
JOS 7:23 ኪቴቲ ቢዳ ኣሳቲ ሚሻ ዱንካኔዛ ጊዶፌ ኤኪዲ፥ ኢያሶኮኔ ኢስራኤሌ ኣሳኮ ኤሂዲ ጎዳ ሲንꬃን ዎꬂዳ።
JOS 7:24 ሄሳፌ ጉዬ ኢያሶይኔ ኢስራኤሌ ኣሳይ ኡባይ ኢሲፌ ዛራሄስ ናዛ ና ካርሜ ና ኣካኔ፥ ቢራ፥ ካባ፥ ዎርቃ፥ ኢዛ ኣቱማ ናይታኔ ማጫ ናይታ፥ ኢዛ ሚዛ፥ ሃሬታኔ ዶርሳታ፥ ኢዛ ዱንካኔኔ ኢዛስ ዲዛይሳ ኡባ ኤኪዲ ኣኮሬ ዙሌ ኤሂዴስ።
JOS 7:25 ኢያሶይ ኣካኔ፥ «ሃይሳ ማላ ሜቶ ኑ ቦላ ኣይስ ኤሃዲ? ጎዳይ ሃች ኔ ቦላካ ሜቶ ኤሃና» ጊዴስ። ሂስቲን ኢስራኤሌ ኣሳይ ዉሪ ኣካኔኔ ኢዛ ሶ ኣሳ ሹቻን ኩራኪ ዎꬊዲ ኢዛስ ዲዛ ኡባ ታማን ጹጊዴስ።
JOS 7:26 ኢስቲ ኣካኔ ቦላን ሃች ጋካናስ ዲዛ ዳሮ ሹች ኮሪዳ። ሄሳፌ ጉዬ ጎዳይ ያሺሲዛ ባ ሃንቆዛ ዛሪዴስ፤ ሄሳ ጊሻስ ሃች ጋካናስ ሄ ሶሆይ ኣኮሬ ዙሌ ጌቴቴስ።
JOS 8:1 ጎዳይ ኢያሶስ፥ «ያዮፋ፤ ዳጋሞፋ! ኦላንቻታ ኡባ ኔናራ ኤካዳ፥ ኣዬ ካታማ ባዳ ኦላ። ሄኮ ኣዬ ካታማ ካዎ፥ ኢዛ ዴራ፥ ኢዛ ካታማኔ ኢዛ ቢታ ታኒ ኔ ኩሼን ኣꬃ ኢማዲስ።
JOS 8:2 ኔኒ ኢያርኮ ካታማኔ ኢዛ ካዎዛ ꬋይሲዳ ማላ ኣዬ ካታማኔ ኢዛ ካዎዛካ ꬋይሳና። ጊዶ ኣቲን ቦንቂዳ ሃሮዛኔ ዲኢዳ ሜሄዛ ኢንቴስ ኤኪቴ። ካታማፔ ጉዬ ባጋራ ዛማዲ ናጊዛ ኦላንቻታ ዎꬃ» ጊዴስ።
JOS 8:3 ሂስቲን ኢያሶይኔ ኦላንቻቲ ኡባይ ኣዬ ኦላናስ ዴንዲዳ። ኢያሶይ ባ ኦላንቻታ ጊዶፌ 30,000 ጊዲዛ ሚኖ ኦላንቻታ ዶሪዲ ቃማራ ዬዲዴስ።
JOS 8:4 ኢያሶይ ኢስታስ፥ «ሲዪቴ፥ ካታማፔ ጉዬ ባጋራ ዛማዲ ናጊቴ፤ ካታማፔ ሃኮፍቴ፤ ኡባይካ ሚኒ ናጊቴ።
JOS 8:5 ታኒኔ ታናራ ዲዛ ኣሳ ኡባይ ካታማይኮ ሺቃና፤ ሄ ዎዴ ኣዬ ካታማ ኣሳይ ካሴይሳꬆካ ኑናራ ኦሌታና ጊዲ ኑኮ ኬዚሺን ኑኒ ኢስታፌ ባቃታና።
JOS 8:6 ካታማፔ ኢስቲ ኡባይ ኬዛና ጋካናስ ኑኒ ኢስታ ሲንꬃፌ ባቃታና፤ ሂስቲዳ ማላ ኢስታስ፥ ‹ካሴይሳꬆ ኢስራኤሌቲ ኑ ሲንꬃፌ ባቃቴቴስ› ጊሼ ኑ ኢስታ ካሌꬂዲ ሃሲ ኤፋና ጋካናስ ኢስቲ ኑና ካላና፤ ኑኒካ ኢስታፌ ባቃታና።
JOS 8:7 ሄ ዎዴ ኢንቴ ቆቴቲዳሶፔ ኬዚዲ ካታማዮ ኦይካንዴታ፤ ጎዳ ኢንቴ ጾሳይ ካታማዮ ኢንቴስ ኣꬂ ኢማና።
JOS 8:8 ካታማዮ ኦይኪዳፔ ጉዬ ጎዳይ ኣዛዚዳ ማላ ታማን ጹጊቴ፤ ቤኢቴ ታኒ ኢንቴና ኣዛዛዲስ» ጊዴስ።
JOS 8:9 ሂስቲዲ ኢያሶይ ኦላንቻታ ዬዲዴስ፤ ኢስቲ ቢዲ ኣዬ ካታማፔ ኣርሼይ ዉሊዛሶ ባጋራ ዲዛ ቤቴሌሲኔ ኣዬስ ጊዶን ዛማዲ ናጊዳ፤ ጊዶ ኣቲን ኢያሶይ ሄ ጋላሳ ኦማርስ ኣሳራ ኢሲፌ ኣቂዴስ።
JOS 8:10 ኢያሶይ ዎንቴꬃ ጋላስ ዎንታራ ዴንዲዲ ኦላንቻታ ኡባ ሺሺዴስ፤ ኢዚኔ ኢስራኤሌ ጋዳዋቲ ኦላ ኣሳ ካሌꬂዲ ኣዬ ቢዳ።
JOS 8:11 ኢዛራ ዲዛ ኦላንቻቲ ኡባይ ካታማይስ ሲንꬅ ቢ ማቲዳ፤ ሄሳፌ ጉዬ ቃሴ ኣዬ ካታማፔ ፑዴሃ ባጋራ ዲዛ ሾባፌ ሄ ፒንꬃን ዱንካኒዳ።
JOS 8:12 ኢያሶይ 5,000 ጊዳና ኦላንቻታ ኤኪዲ ካታማይፔ ኣርሼይ ዉሊዛ ባጋራ ቤቴሌፔኔ ኣዬፔ ጊዶን ዛማዲ ኡታና ማላ ኦꬂዴስ።
JOS 8:13 ካታማይፔ ፑዴሃ ባጋራ ዲዛ ኦላንቻታኔ ካታማይፔ ኣርሼይ ዉሊዛ ባጋራ ዛማዲ ኡቲዳ ኦላንቻታ ኡባ ሶሆ ሶሆ ኦይꬂዴስ። ሄ ጋላሳ ኦማርስ ኢያሶይ ዱጌ ሾባ ዎꬊዴስ።
JOS 8:14 ኣዬ ዴሬ ካዎይ ሄሳ ቤኢዲ ኢዚኔ ኢዛ ኦላንቻቲ ኡባይ ኢስራኤሌ ኣሳ ኦላናስ ኣራቤፔ ሲንꬃ ባጋራ ዲዛሶሆ ዪዳ። ጊዶ ኣቲን ካዎዚ ካታማይፔ ጉዬ ባጋራ ዛማዲ ናጊዛይቲ ዲዛይሳ ኤሪቤና።
JOS 8:15 ኢያሶይኔ ኢስራኤሌ ኣሳይ ኡባይ ጾኔቲዳ ሚሳቲዲ ባዞ ሲሚ ባቃቲዳ።
JOS 8:16 ኣዬ ኣሳይ ኡባይ ኢስታ ዬዴꬃናስ ጼይጌቲዳ፤ ኢያሶካ ዬዴꬂዳ፤ ሄሳꬆ ኦꬂዲ ኣዬ ኣሳይ ካታማፔ ሃካና ማላ ኦꬂዳ።
JOS 8:17 ኢስራኤሌ ኣሳ ዬዴꬃናስ ኣዬፔኔ ቤቴሌፔ ኬዞንታ ኣቲዳ ኣቱማሲ ዴና፤ ካታማዮ ዶያ ዬጊዲ ኢስራኤሌ ዬዴꬂዳ።
JOS 8:18 ሄሳፌ ጉዬ ጎዳይ ኢያሶስ፥ «ካታማዮ ታ ኔ ኩሼን ኣꬃ ኢማና፤ ኔ ኦይኪዳ ቶራ ኣዬ ቦላ ጾንጋናስ ማላ ጼላ» ጊዴስ። ሂስቲን ኢያሶይ ባ ቶራ ካታማኮ ዛሪዲ ማሊዴስ።
JOS 8:19 ኢያሶይ ቶራ ሄ ዛሪ ማሊዳ ማላ ካሴ ዛማዲ ኡቲዳ ኦላንቻቲ ባንቲ ቆቴቲዳሶፔ ኤሶን ኬዚዳ። ዎጺ ጌሊዲ ኦይኪዳ፤ ሄራካ ኢዞ ታማን ጹጊዳ።
JOS 8:20 ኣዬ ኣሳይ ጉዬ ሲሚዲ ጼሊሺን ካታማይፔ ጩዋይ ሳሎ ኬዚዛይሳ ቤኢዳ። ባዞ ባቃቲዳ ኢስራኤሌ ኣሳይ ኢስታ ቦላ ሃ ሲሚ ዎꬊዳ ጊሻስ ኢስታስ ቢዛሶይ ꬋይዴስ።
JOS 8:21 ኢያሶይኔ ኢስራኤሌ ኣሳይ ኡባይ ዛማዲ ኡቲዳ ኦላንቻቲ ካታማ ኦይኪዳይሳኔ ጩዋይ ሳሎ ኬዚዳይሳ ቤኢዳ ማላ ጉዬ ሲሚዲ ኣዬ ኣሳ ቦላ ሜቶ ዬጊዳ።
JOS 8:22 ዛማዲ ኡቲዳ ኦላንቻቲካ ካታማይፔ ኢስታ ቦላ ኬዚዳ። ሄሳ ጊሻስ ኢስራኤሌ ኦላንቻቲ ኢስታ ያራ ሃራ ጊዶꬂዲ ዲፒ ሂስቲዳ፤ ኢሲ ኣሲካ ኣቲቤና።
JOS 8:23 ጊዶ ኣቲን ኣዬ ካዎ ጻላ ሼምፖራ ፓጻ ኦይኪዲ ኢያሶኮ ኤሂዳ።
JOS 8:24 ኢስራኤሌ ኣሳይ ኣዬ ኣቱማ ኣሳ ኡባ ዬዴꬂዳ ዴምባኒኔ ባዞን ኢሳ ኢሳ ቃራ ማሻን ዎꬊ ዉርሲዳፔ ጉዬ ሲሚዲ ካታማዮ ቢዲ ሄን ቤቲዳ ኣስ ኡባ ዎꬊዳ።
JOS 8:25 ሄ ጋላስ ኣዬ ኣሳይ ኡባይ ሃይቂዴስ፤ ሃይቂዳ ኣሳ ኡባ ቆዳይ 12,000 ጊዲዴስ።
JOS 8:26 ኢያሶይ ኣዬ ካታማይን ዲዛ ኣሳ ሙሌራ ꬋይሳና ጋካናስ ካታማኮ ማሊ ዎꬂዳ ቶራ ዱጌ ዎꬂቤና።
JOS 8:27 ጊዶ ኣቲን ጎዳይ ኢያሶ ኣዛዚዳ ማላ ኢስራኤሌ ኣሳይ ሄ ካታማይን ዲዛ ሜዶሳታኔ ዲኢዳ ሚሻታ ባስ ኤኪዳ።
JOS 8:28 ኢያሶይ ኣዬ ካታማ ጹጊዴስ፤ ሃች ጋካናስ ቤቲዛ ማላ ሜርናስ ቢዲንꬃ ዶሬኔ ቡላ ኬሲዴስ።
JOS 8:29 ኣዬ ዴሬ ካዎ ሚꬃ ቦላ ካቂዴስ፤ ኢዛ ኣሃዛ ኦማርስ ጋካናስ ሄ ሚꬃ ቦላ ኣጋጊዴስ፤ ኣርሼይ ዉሊሺን ኢያሶይ ኢዛ ኣሃ ካታማ ፔንጌ ቦላ ዬጋና ማላ ኣዛዚዴስ፤ ኢዛ ቦላ ዳሮ ሹች ኮሪዳ፤ ሹቻይ ሃች ጋካናስ ሄ ሶሆን ዴስ።
JOS 8:30 ሄሳፌ ጉዬ ኢያሶይ ኤባሌ ዙማ ቦላ ጎዳስ ኢስራኤሌ ጾሳስ ያርሾ ያርሺዛሶሆ ጊግሲዴስ።
JOS 8:31 ጎዳ ኣይሌ ሙሴይ ኢስራኤሌ ኣሳ ኣዛዚዳ ማላኔ ሙሴ ዎጋ ማጻፋን ጻፌቲዳ ማላ ያርሺዛሶሆዚ ማሴቶንታኔ ቢራታይ ቦቾንታ ሹቻፌ ኬሌቲዴስ። ኢዛን ጎዳስ ጹጌቲዛ ያርሾኔ ኢሲፌቴꬃ ያርሾ ያርሺዳ።
JOS 8:32 ኢያሶይ ሙሴይ ጻፊዳ ዎጋ ማጻፋ ኢስራኤሌ ኣሳይ ጼሊሺን ሹቻ ቦላ ዎጪ ጻፊዴስ።
JOS 8:33 ኢስራኤሌ ኣሳይ ኡባይ፥ ቤቴ ኣሳቲ፥ ጪማቲ፥ ሹሜቲኔ ዳናቲ ኡባይ ጎዳ ጫቆ ቃላ ታቦታ ቶኪዳ ሌዌ ዛሬ ጊዲዳ ቄሴታ ሲንꬃን ጫቆ ቃላ ታቦታፔ ኡሻቻ ባጋራኔ ሃዲርሳ ባጋራ ኤቂዳ። ጎዳ ኣይሌ ሙሴይ ካሴ ኣዛዚዳ ማላ ኢስራኤሌ ኣሳ ኣንጃናስ ኢስታፌ ባጋ ኣሳይ ጋሪዛኔ ዙማኮ፥ ባጋ ኣሳይ ኤባሌ ዙማኮ ሲሚ ኤቂዴስ።
JOS 8:34 ሄሳፌ ጉዬ ዎጋ ማጻፋን ጻፌቲዳ ማላ ኢያሶይ ዎጋ ቃላ ኣንጆኔ ቃንጌꬅ ኡባ ናባቢዴስ።
JOS 8:35 ሙሴይ ኣዛዚዳ ኡባፌ ኢያሶይ ናባቦንታ ኣጊዳ ኢሲ ቃላይካ ዴና። ኩሜꬃ ኢስራኤሌ ዴራስ፥ ማጫሳስ፥ ናይታሲኔ ኢስታ ጊዶን ዲዛ ቤቴ ኣሳታስ ኡባስ ናባቢዴስ።
JOS 9:1 ዮርዳኖሴ ሻፋፔ ኣርሼይ ዉሊዛ ባጋራ ፑዴ ጌዜን ዲዛ ዴሬይ፥ ጋꬋን ዲዛ ዴሬይ ሊባኖሴ ጋካናስ ዲዛ ጊታ ኣባ ጋጻን ዲዛ ሂቴታ፥ ኣሞሬታ፥ ካናኔታ፥ ፓሪዜታ፥ ሂዌታኔ ያቡሴታ ካዎቲ ኡባይ ኢስራኤሌ ኣሳይ ጾኒዳይሳ ሲዪዳ።
JOS 9:2 ሂስቲዲ ኢያሶኔ ኢስራኤሌ ኣሳ ኦላናስ ኢሲ ቦላ ዴንዲ ዪዳ።
JOS 9:3 ጌባኦኔ ኣሳይ ጊዲኮ ኢያሶይ ኢያርኮ ካታማኒኔ ኣዬ ካታማን ኦꬂዳይሳ ሲዪዳ ዎዴ፥
JOS 9:4 ባሌꬃናስ ኮዪዲ ጋልኣ ኦጎሮኔ ዎይኔ ኡሹ ኢዛን ዎꬂዛ ሲኬቲዳ ሉካሞ ሃሬን ጫኒዳ።
JOS 9:5 ኣሳቲ ጋልኣኔ ሲኬቲዳ ጫማ ኣꬂዳ፤ ጋልኣ ማይኦካ ማይኢዳ፤ ሜሊዲ ቡቂዳ ሺንቄ ኦይኪዳ።
JOS 9:6 ሄሳፌ ጉዬ ኢስቲ ኢያሶይ ዱንካኒዳሶ ጌልጌላ ቢዲ ኢያሶሲኔ ኢስራኤሌ ኣሳስ፥ «ኑኒ ሃሆ ቢታፌ ዪዶስ፤ ሃኢ ኑናራ ጫቄቲቴ» ጊዳ።
JOS 9:7 ኢስራኤሌ ኣሳይ ሂዌታስ፥ «ኢንቴ ኑ ማታን ዲዛ ኣሳኮ ኑ ኣይ ኤሪዲ ኢንቴናራ ጫቄታኔ?» ጊዳ።
JOS 9:8 ኢስቲ ኢያሶስ፥ «ኑኒ ኔ ኣይሌታ» ጊዳ። ኢያሶይ፥ «ኢንቴ ኦኔ? ኣዋፔ ዪዴቲ?» ጊዲ ኦይቺዴስ።
JOS 9:9 ኢስቲካ፥ «ኑኒ ኔ ኣይሌቲ ጎዳ ኔ ጾሳ ጊታቴꬅ ሲዪዲ ዳሮ ሃሆ ቢታፌ ዪዶስ። ኢዛ ጊታቴꬃኔ ኢዚ ጊብጼ ቢታን ኦꬂዳይሳ ኡባ ሲዪዶስ።
JOS 9:10 ቃሴ ዮርዳኖሴ ሻፋፔ ሄ ፒንꬃን ዲዛ ኣሞሬ ካዎታ ናምኣታ፥ ሄይቲካ ሃሴቦኔ ካዎ ሲሆኔ፥ ኣስታሮቴ ሃሪዛ ባሳኔ ካዎ ኣጌ ቦላ ኢዚ ኦꬂዳይሳካ ኑ ሲዪዶስ።
JOS 9:11 ኑ ዴሬ ጪማቲኔ ኑ ቢታን ዲዛ ኣሳይ ኡባይ ኑና፥ ኢንቴስ ኦጌ ሺንቄ ኦይኪዲ ኢስታራ ቢዲ ጋይቲቴ፤ ኢስታስ፥ ‹ኑኒ ኢንቴስ ኣይሌታ ጊዳና፤ ኢንቴ ኑናራ ጫቄቲቴ› ጊዳ።
JOS 9:12 «ኑኒ ኢንቴኮ ያናስ ኑ ሶፔ ሃይሳ ሺንቄዚ ሆኦ ዲሺን ኤኪ ዪዶስ፤ ጊዶ ኣቲን ሜሊዳይሳኔ ቡቂዳይሳ ሃይሳ ቤኢቴ!
JOS 9:13 ሃይቲ ኤሳ ሉካሞቲ ኑኒ ኩንꬂዛ ዎዴ ኦራꬃ፤ ጊዶ ኣቲን ሃኢ ኢስቲ ዋኒ ዳኬቲዳኮ ቤኢቴ! ኑ ሃሆ ኦጌ ሄሜቲዳ ጊሻስ ኑ ማይኦይኔ ጫማይ ዉሪዴስ» ጊዳ።
JOS 9:14 ጎዳ ኦይቾንታ ኢስራኤሌ ኣሳይ ኢስታ ሺንቄፌ ጉꬃራ ኤኪዴስ።
JOS 9:15 ኢያሶይ ኢስቲ ሳሮን ዴኣና ማላ ኢስታራ ጫቄቲዴስ፤ ዴራ ካሌꬂዛይቲካ ሄ ጫቆዛ ሚንꬃናስ ቃላ ጌሊዳ።
JOS 9:16 ኢስታራ ጫቄቲዳ ሄꬓንꬆ ጋላሳፌ ጉዬ ሄ ኣሳቲ ኢስታ ዶꬅ ጊዲዳይሳ ኢስራኤሌቲ ሲዪዳ።
JOS 9:17 ኢስራኤሌ ኣሳይ ሄꬑ ጋላስ ሄሜቲዲ ጌባኦኔ፥ ካፊሬ፥ ቢኤሮቴኔ ቂሪያቴ-ዪኣሪሜ ጌቴቲዛ ካታማታ ጋኪዴስ።
JOS 9:18 ጊዲኮካ ዴራ ካሌꬂዛይቲ ጎዳ ኢስራኤሌ ጾሳ ሱንꬃን ጫቂዳ ጊሻስ ኢስራኤሌቲ ኢስታ ኦሊቤቴና፤ ኩሜꬃ ማባራይካ ኢስታ ቦላ ዙዙሚዴስ።
JOS 9:19 ጊዶ ኣቲን ዴራ ካሌꬂዛይቲ፥ «ኑኒ ጎዳ ኢስራኤሌ ጾሳ ሱንꬃን ጫቂዳ ጊሻስ ሃኢ ሲሚዲ ኢስታ ቦላ ሜቶ ጋꬃናስ ዳንዳዮኮ።
JOS 9:20 ኑኒ ኢስታስ ኦꬃና ዳንዳይዛይ ኢስታስ ጌሊዳ ጫቆ ቃላ ሜንꬂን ሃንቆይ ኑ ቦላ ጋኮንታ ማላ ኢስታ ዎꬎፒቴ።
JOS 9:21 ጊዶ ኣቲን ኢስቲ ኩሜꬃ ማባራስ ሚꬅ ሚጺሼኔ ሃꬅ ዱቂሼ ዴቶ» ጊ ዛሪዳ። ሄሳ ጊሻስ ማባራ ካሌꬂዛይቲ ጌሊዳ ቃላይ ናጌቲዴስ።
JOS 9:22 ኢያሶይ ጌባኦኔ ኣሳታ ጼይጊዲ፥ «ኢንቴ ሃን ኑ ማታን ዴኢሼ፥ ‹ኑኒ ኬሂ ሃሆ ቢታፌ ዪዶስ› ጊዲ ኣይስ ኑና ባሌꬂዴቲ?
JOS 9:23 ሄሳ ጊሻስ ሃኢ ኢንቴ ቃንጌቲዳይታ፤ ጉꬃቲ ታ ጎዳ ኬꬃን ሚꬅ ሚጺዛኔ ሃꬅ ዱቂዛ ኣይሌታ ጊዳና» ጊዴስ።
JOS 9:24 ኢስቲ ኢያሶስ፥ «ኑኒ ኔ ኣይሌቲ ጎዳ ኔ ጾሳይ ሃ ቢታ ኡባ ኢንቴስ ኢማናይሳኔ ኢዛን ዲዛ ኣሳ ኡባ ኢንቴ ሲንꬃፌ ꬋይሳናስ ባ ኣይሌ ሙሴ ኣዛዚዳይሳ ጌሺ ሲዪዶስ። ሄሳ ጊሻስ ኢንቴፌ ዴንዶይሳን ኑ ሼምፖስ ሂርጊዲ ሃይሳ ኦꬂዶስ።
JOS 9:25 ሄኮ ሃኢ ኑኒ ኔ ኩሼን ዶስ፤ ኔስ ሎኦኔ ሱሬ ሚሳቲ ቤቲዳ ማላ ኑ ቦላ ኦꬃ» ጊ ዛሪዳ።
JOS 9:26 ሂስቲን ኢያሶይ ጌባኦኔ ኣሳታ ኢስራኤሌታ ኩሼፔ ኣሺዴስ፤ ኢስቲካ ዎꬊቤቴና።
JOS 9:27 ሄ ጋላስ ኢያሶይ ጌባኦኔ ኣሳታ ኢስራኤሌ ማባራሲኔ ጎዳይ ዶሪዳሶሆን ኤቂዳ ያርሾሶዛስ ኢስቲ ሃች ጋካናስ ሚꬅ ሚጻናሲኔ ሃꬅ ዱቃና ማላ ኦꬂዴስ።
JOS 10:1 ኢያሶይ ካሴ ኢያርኮ ካታማ ኦሊ ꬋይሲዲኔ ኢስታ ካዎዛ ዎꬊዳ ማላ፥ ኣዬ ካታማ ኦሊዲ ኡባ ꬋይሲዳይሳኔ ኢስታ ካዎዛካ ዎꬊዳይሳ ዬሩሳላሜ ካዎ ኣዶኒ-ጼዴቄይ ሲዪዴስ። ቃሴ ጌባኦኔ ኣሳይ ኢስራኤሌ ኣሳራ ሳሮን ዴኣናስ ጫቄቲዳይሳኔ ሃኢ ኢስታራ ኢሲፌ ዲዛይሳ ሲዪዴስ።
JOS 10:2 ሄሳን ኢዚኔ ዴሬዚ ዳጋሚዳ፤ ጋሶይካ ጌባኦኔይ ካዎታ ካታማ ማላ ካታማታ ኡባፌ ጊታ ካታማ፤ ጎምፓይ ኣዬ ካታማይፔ ዳሬስ፤ ኢዚን ዲዛ ኣሳይካ ሚኖ ኦላንቻ።
JOS 10:3 ሄሳ ጊሻስ ዬሩሳላሜ ካዎይ ኣዶኒ-ጼዴቄይ፥ ኬብሮኔ ካዎ ሆሃሜስ፥ ያርሙቴ ካዎ ጲርኣሜስ፥ ላኪሼ ካዎ ያፊኣሲኔ ኤጊሎኔ ካዎ ዳቢሬይ፥
JOS 10:4 «ጌባኦኔ ካታማ ኣሳይ ኢያሶራኔ ኢስራኤሌ ኣሳራ ሳሮ ዴያናስ ጫቄቲዳ ጊሻስ ኢስታራ ኦሌታናስ ዪዲ ታና ማዴርኬቲ!» ጊዴስ።
JOS 10:5 ሄሳፌ ጉዬ ኣሞሬታ ካዎቲ ኢቻሻቲ ዬሩሳላሜ ካዎይ፥ ኬብሮኔ ካዎይ፥ ያርሙቴ ካዎይ፥ ላኪሼ ካዎይኔ ኤጊሎኔ ካዎይ ባ ኦላንቻታ ኢሲፌ ጋꬂዲ ኡባ ኤኪ ቢዲ፥ ጌባኦኔ ካታማ ዶዲ ኦይኪዲ ኦሊዳ።
JOS 10:6 ጌባኦኔ ኣሳይ ጌልጌላን ዱንካኒዳ ኢያሶኮ ኪቲዲ፥ «ኑና ኔ ኣይሌታ ኣጎፋ፤ ኤሶን ኑኮ ያዳ ኑና ኣሻ። ጌዜ ዴሬን ዲዛ ኣሞሬታ ካዎቲ ዉሪ ኑና ኦላናስ ባ ኦላንቻታ ኡባ ሺሺ ኤኪዲ ዪዛ ጊሻስ ኑና ኔ ኣይሌታ ማዳ» ጊዳ።
JOS 10:7 ሄሳ ጊሻስ ኢያሶይ ባ ኦላንቻታኔ ሚኖ ኣሳታ ኡባ ሺሺ ኤኪዲ ጌልጌላፔ ኬዚዴስ።
JOS 10:8 ጎዳይ ኢያሶ፥ «ኔ ኢስታስ ያዮፋ፤ ታኒ ኢስታ ኔ ኩሼን ኣꬃ ኢማዲስ፤ ኢስታፌ ኢሳዴይካ ኔናራ ኤቄታናስ ዳንዳዬና» ጊዴስ።
JOS 10:9 ሄሳፌ ጉዬ ኢያሶይ ጌልጌላፔ ኦማርሳራ ሄሜቲሼ ኣቂዲ ኢስቲ ኣኬኮንታ ዲሺን ኢስታ ቦላ ዎራጂዴስ።
JOS 10:10 ጎዳይ ኢስራኤሌ ኣሳ ሲንꬃን ኣሞሬታ ቦላ ሺሮ ዬዲዴስ፤ ኢስራኤሌ ኣሳይ ኢስታፌ ዳሮ ኣሳ ጌባኦኔን ዎꬊዴስ። ኢስራኤሌ ኣሳይ ኢስታ ቤቲ-ሆሮኔ ኤፊዛ ኦጌ ፑዱንꬃን ካሊዴስ፤ ኣዜቄፔ ቢዲ ማቄዳ ጋካናስ ዬዴꬂ ዎꬊዳ።
JOS 10:11 ቤቲ-ሆሮኔፔ ዱጌ ኣዜቄ ኤፊዛ ኦጌ ኦይኪዲ ኢስቲ ኢስራኤሌ ኣሳ ሲንꬃፌ ባቃቲሺን ጎዳይ ዎልቃማ ሻች ሳሎፔ ኢስታ ቦላ ቡኪሲዴስ። ሂስቲን ኢስራኤሌ ኣሳይ ማሻን ዎꬊዳ ኣሳፔ፥ ሻቻይ ዎꬊዳ ኣሳይ ኬሂፔ ዳሮ።
JOS 10:12 ጎዳይ ኣሞሬታ ኢስራኤሌ ኣሳ ኩሼን ኣꬂ ኢሚዳ ጋላስ ኢስራኤሌ ኣሳ ሲንꬃን ኢያሶይ ጎዳስ፥ «ኣርሼይ ጌባኦኔን ኤቆ፤ ኣጊናይካ ኣያሎኔ ሾባን ኤቁ» ጊዴስ።
JOS 10:13 ሄሳ ጊሻስ ኢስራኤሌ ካዎቴꬃይ ባ ሞርኬታ ቦላ ሃሎ ኬሳና ጋካናስ ኣርሼይ ኤቂዴስ። ኣጊናይካ ቃጻቤኩ። ሄሲካ ያሻሬ ማጻፋን ጻፌቲዴስ፤ ኣርሼይ ሳሎስ ጊዶ ኣዳን ኤቂዴስ፤ ኢሲ ጋላስ ኩሜꬅ ኣርሼይ ዉሎንታ ፔኢዴስ።
JOS 10:14 ጎዳይ ኣሳ ቃላ ሲዪዳ ሄሳ ማላ ጋላሲ ሄሳፌ ካሴካ ጉዬካ ሃኒቤና። ቱሙካ ጎዳይ ኢስራኤሌ ጊሻስ ኦሌቲዴስ።
JOS 10:15 ሄሳፌ ጉዬ ኢያሶይኔ ኢስራኤሌ ኦላንቻቲ ኡባይ ባ ዱንካኒዳሶ ጌልጌላ ሲሚዳ።
JOS 10:16 ሄ ዎዴ ኣሞሬታ ካዎቲ ኢቻሻቲ ባቃቲ ቢዲ ማቄዳን ጎንጎሎ ጊዶን ቆቴቲዳ።
JOS 10:17 ኢያሶይካ ኢቻሽ ካዎቲ ማቄዳን ጎንጎሎ ጊዶን ቆቴቲ ዲዛይሳ ሲዪዴስ።
JOS 10:18 ኢያሶይ፥ «ጊታ ሹቻታ ጌንዴሪሲ ኤፊዲ ጎንጎሎዛ ጎርዲቴ፤ ሂስቲዲ ናጋና ዛቤታ ሄን ዎꬂቴ።
JOS 10:19 ኢንቴ ሞርኬታ ዬዴꬂቴ ኣቲን ኣዛሎፍቴ፤ ኢስታ ካሊ ካሊ ሜቶ ጋꬂቴ፤ ኢስቲ ባ ካታማ ቢ ጌሎንታ ማላ ዲጊቴ፤ ሄኮ ጎዳ ኢንቴ ጾሳይ ኢስታ ኢንቴ ኩሼን ኣꬂ ኢሚዴስ» ጊዴስ።
JOS 10:20 ሄሳ ጊሻስ ኢያሶይኔ ኢስራኤሌ ኣሳይ ኢስታ ሙሌራ ዲፒ ሂስቲዳ፤ ኢስታፌ ኣቲዳ ጉꬃቲ ካሴ ባ ዲዛ ጊምቤቲዳ ካታማታ ሲሚ ጌሊዳ።
JOS 10:21 ሄሳፌ ጉዬ ኣሳይ ኡባይ ሳሮን ሲሚዲ ኢያሶይ ዱንካኒ ዲዛሶ ማቄዳ ዪዴስ፤ ኢስራኤሌ ኣሳ ቦላ ኢሲ ቃላካ ሃሳይዳ ኣሲ ዴና።
JOS 10:22 ኢያሶይ ኢስታስ፥ «ጎንጎሎዛ ዶይዲ ሄ ኢቻሽ ካዎታ ኬሲዲ ታስ ሃ ኤኪ ዪቴ» ጊዴስ።
JOS 10:23 ኢስቲካ ሄ ኢቻሽ ካዎታ ዬሩሳላሜ ካዎ፥ ኬብሮኔ ካዎ፥ ያርሙቴ ካዎ፥ ላኪሼ ካዎኔ ኤጊሎኔ ካዎ ኬሲዲ ኢዛኮ ኤሂዳ።
JOS 10:24 ኢስቲ ሄ ካዎታ ኢያሶኮ ኤሂን ኢያሶይ ኢስራኤሌ ኣቱማ ኣሳ ኡባ ባኮ ጼይጊዲ ባናራ ዲዛ ኦላ ጋዳዋታ፥ «ሃ ዪዲ ሃይታ ካዎታ ቆꬌ ቦላ ዬꬊ ኤቂቴ» ጊዴስ። ኢስቲካ ሲንꬅ ኣꬊዲ ባ ቶሆን ካዎታ ቆꬌ ቦላ ዬꬊ ኤቂዳ።
JOS 10:25 ኢያሶይካ ኢስታስ፥ «ባቦፍቴ፤ ዳጋሞፍቴ፤ ሚኒቴኔ ጻሊቴ፤ ኢንቴናራ ኦሌቲዛ ኢንቴ ሞርኬታ ኡባታ ቦላ ጎዳይ ሃይሳꬆ ኦꬃና» ጊዴስ።
JOS 10:26 ሄሳፌ ጉዬ ኢያሶይ ኢቻሽ ካዎታ ዎꬊዲ ኢቻሽ ሚꬃ ቦላ ኢስታ ኣሃ ካቂዴስ፤ ኦማርሲ ጋካናስ ኢስታ ኣሃይ ሚꬃ ቦላፌ ዎꬊቤና።
JOS 10:27 ኣርሼይ ዉላና ሃኒሺን ኢያሶይ ኣዛዚን ሚꬃ ቦላፌ ካዎታ ኣሃ ዎꬂዲ ካሴ ኢስቲ ቆቴቲዳ ጎንጎሎዛን ኤፊ ዬጊዳ። ሂስቲዲ ጎንጎሎዛ ጊታ ሹቻታን ቱጪዳ፤ ሄ ሹቻቲ ሃች ጋካናስካ ሄን ዴቴስ።
JOS 10:28 ሄ ጋላስ ኢያሶይ ማቄዳ ካታማ ኦይኪዴስ፤ ካታማዮኔ ኢዚ ካዎዛ ጊꬃ ማሻን ሲፊዴስ፤ ኢዚ ጊዶን ዲዛ ኣሳፔ ኢሲኖካ ኣሾንታ ዲሼ ዲፒ ሂስቲዴስ፤ ኢያርኮ ካዎ ቦላ ኦꬂዳይሳꬆካ ማቄዳ ካዎ ቦላካ ኦꬂዴስ።
JOS 10:29 ሄሳፌ ጉዬ ኢያሶይኔ ኢዛራ ዲዛ ኢስራኤሌ ኣሳይ ኡባይ ማቄዳፌ ሊቢና ቢዲ ኦሊዳ።
JOS 10:30 ጎዳይ ሄ ካታማዮኔ ኢዚ ካዎዛ ኢስራኤሌ ኣሳ ኩሼን ኣꬂ ኢሚዴስ፤ ኢያሶይ ካታማዮኔ ኢዚ ጊዶን ዲዛ ኡባ ኢሲኖካ ኣሾንታ ጊꬃ ማሻን ዲፒ ሂስቲዴስ፤ ኢያርኮ ካዎ ቦላ ኦꬆይሳꬆካ ሊቢና ካዎ ቦላካ ኦꬂዴስ።
JOS 10:31 ሄሳፌ ጉዬ ኢያሶይኔ ኢዛራ ዲዛ ኢስራኤሌ ኣሳይ ኡባይ ሊቢናፔ ላኪሼ ቢ ዶዲ ኦሊዳ።
JOS 10:32 ጎዳይ ላኪሼ ኢስራኤሌ ኣሳ ኩሼን ኣꬂ ኢሚዴስ፤ ኢያሶይ ሄ ካታማዮ ናምኣንꬆ ጋላሳን ኦይኪዴስ፤ ኢዚ ሊቢናን ኦꬆይሳꬆካ ሃኖ ሃ ካታማዮኔ ኢዚ ጊዶን ዲዛ ኡባ ጊꬃ ማሻን ሲፊዴስ።
JOS 10:33 ሄ ዎዴ ጌዜሬ ካዎ ሆራሜይ ላኪሼ ካዎ ማዳናስ ዪዴስ፤ ጊዶ ኣቲን ኢያሶይ ኢዛካ ኢዛ ኣሳካ ኢሲኖ ኣሾንታ ኡባ ዲፒ ሂስቲዴስ።
JOS 10:34 ሄሳፌ ጉዬ ኢያሶይኔ ኢዛራ ዲዛ ኢስራኤሌ ኣሳይ ኡባይ ላኪሼፔ ኤጊሎኔ ቢዲ ሄ ካታማ ዶዲ ኦይኪ ኦሊዳ።
JOS 10:35 ሄ ጋላስ ኤጊሎኔ ኦሊ ኦይኪዲ ጊꬃ ማሻን ꬋይሲዳ፤ ካሴ ላኪሼን ኦꬂዳ ማላ ኤጊሎኔ ካታማን ዲዛ ኣሳ ሙሌራ ꬋይሲዳ።
JOS 10:36 ሄሳፌ ጉዬ ኢያሶይኔ ኢዛራ ዲዛ ኢስራኤሌ ኣሳ ኡባይ ኤጊሎኔፔ ኬዚ ቢዲ ኬብሮኔ ኦሊዳ።
JOS 10:37 ሄ ካታማዮኔ ካታማይ ጊዶን ዲዛ ሚሽ ኡባ ኢሲኖካ ኣሾንታ ጊꬃ ማሻን ዲፒ ሂስቲዳ፤ ካሴ ኤጊሎኔን ኦꬂዳ ማላ ሃኖ ካታማይ ጊዶን ዲዛ ኡባ ሙሌራ ዲፒ ሂስቲዳ።
JOS 10:38 ሄሳፌ ጉዬ ኢያሶይኔ ኢዛራ ዲዛ ኢስራኤሌ ኣሳይ ኡባይ ጉዬ ሲሚዲ ዳቢሬ ኦሊዳ።
JOS 10:39 ካታማዮኔ ኢዚ ካዎዛ፥ ኢዚ ሄራን ዲዛ ቄሪ ካታማታካ ኡባ ጊꬃ ማሻን ሲፊዳ፤ ኢዚ ጊዶን ዲዛይሳፌ ኢሲኖካ ኣሾንታ ኡባ ዲፒ ሂስቲዳ፤ ካሴ ሊቢናኒኔ ሊቢና ካዎ ቦላ ኦꬂዳ ማላ፥ ኬብሮኔ ቦላ ኦꬆይሳꬆካ ዳቢሬ ቦላኔ ኢዚ ካዎዛ ቦላ ኦꬂዳ።
JOS 10:40 ሄሳꬆካ ኢያሶይ ዙምቡላቲ ዳሪዛ ቢታ፥ ኔጌቤ፥ ኣርሼይ ዉሊዛ ባጋራ ዲዛ ጋꬋ ቢታኔ ዙማ ላዴታ፥ ቢታ ኡባ ካዎታራ ጋꬂ ኦይኪዴስ። ጎዳ ኢስራኤሌ ጾሳይ ኣዛዚዳ ማላ ቢታ ቦላ ሼምፖራ ዲዛ ኡባ ዲፒ ሂስቲዴስ፤ ኣይኮካ ሼምፖራ ፓጻ ኣሺቤና።
JOS 10:41 ኢያሶይ ኢስታ ቃዴሴ ባሪኔፔ ቢዲ ጋዛ ጋካናስ፥ ቃሴ ጎሼኔ ቢታፌ ዶሚዲ ጌባኦኔ ጋካናስ ኡባ ጾኒ ኦይኪዴስ።
JOS 10:42 ኢያሶይ ኢሲቶ ኦላ ኬዚዲ ሄ ካዎታኔ ኢስታ ቢታ ኡባ ጾኒዴስ። ሄሲካ ሃኒዳይ ጎዳ ኢስራኤሌ ጾሳይ ባ ዴራስ ኦሌቲዳ ጊሻሳ።
JOS 10:43 ሄሳፌ ጉዬ ኢያሶይኔ ኢስራኤሌ ኣሳይ ኡባይ ባ ዱንካኒዳሶ ጌልጌላ ሲሚዴስ።
JOS 11:1 ሃጾሬ ካዎ ያቢኔይ ኢስራኤሌ ኣሳይ ጾኒዳይሳ ሲዪዳ ዎዴ፥ ሜዶኔ ካዎ ዮባቤስ፥ ሺሚሮኔ ካታማስ፥ ኣኪሻፌ ካዎስ ኪታ ዬዲዴስ።
JOS 11:2 ሄሳꬆካ ፑዴሃ ባጋራ ሻራ ሜንꬆን ዲዛ ካዎታስ፥ ዱጌሃ ባጋን ኣራቤ ካዎታስ፥ ኣርሼይ ዉሊዛ ባጋራ ዲዛ ጋꬋ ካዎታሲኔ ኣርሼይ ዉሊዛ ባጋራ ዶሬ ዙማን ዲዛ ካዎታስ ኪቲዴስ።
JOS 11:3 ቃሴ ኣርሼይ ኬዚዛ ባጋራኔ ዉሊዛ ባጋራ ዲዛ ካናኔታስ፥ ኣሞሬታስ፥ ሂቴታስ፥ ፓሪዜታስ፥ ሻራ ሜንꬆን ዲዛ ያቡሴታሲኔ ሚጺጳ ቢታን ሄርሞኔ ዙማፔ ጋርሳ ባጋራ ዲዛ ሂዌ ካዎታስ ኪቲዴስ።
JOS 11:4 ሂስቲን ኢስቲ ባ ኦላንቻታ ኡባ ዴንꬂዲ ዳሮ ፓራታኔ ፓራ-ጋሬታ ኢሲፌ ኢስራኤሌ ኦላናስ ኤኪ ዪዳ። ኢስታስ ቆዳይ ኣባ ዶናን ዲዛ ኣንጮ ማላ ጮራ።
JOS 11:5 ሄ ካዎቲ ዉሪ ኢሲፌ ባ ዎልቃ ሚንꬂዲ ኢስራኤሌ ኦላናስ ሜሮሜ ሃꬃ ማታን ዱንካኒዳ።
JOS 11:6 ጎዳይ ኢያሶስ፥ «ኔኒ ኢስታስ ባቦፋ! ታኒ ዎንቶ ሃኒ ዎዴ ኢስታ ኡባ ሃይቂዳ ኣሳ ማላ ሂስታ ኢስራኤሌ ኩሼን ኣꬃ ኢማና። ኔኒ ኢስታ ፓራታ ኡባ ጊልዳያና፤ ኢስታ ፓራ-ጋሬታካ ታማን ጹጋና» ጊዴስ።
JOS 11:7 ሂስቲን ኢያሶይኔ ኢዛ ኦላንቻቲ ኡባይ ኢስቲ ቆፖንታ ዲሺን ሜሮሜ ሃꬃ ማታን ኢስታ ቦላ ፑቱ ጊዲ ኢስታ ኦሊዳ።
JOS 11:8 ጎዳይ ኢስታ ኢስራኤሌታ ኩሼን ኣꬂ ኢሚዴስ፤ ሂስቲን ኢስራኤሌቲ ኢስታ ጾኒዲ ጊታ ሲዶና ቢታ ኤፊዛ ኦጌራ፥ ማሲራፎቴ-ማይማ ጋካናስ ቃሴካ ኣርሼይ ሞኪዛ ባጋራ ሚጺጳ ሾባ ጋካናስ ዬዴꬂዳ። ኢስታፌ ኢሲ ኣሲካ ሼምፖራ ፓጻ ኣቲቤና።
JOS 11:9 ኢያሶይ ጎዳይ ኢዛ ኣዛዚዳይሳ ኡባ ኢስታ ቦላ ፖሊዴስ፤ ኢስታ ፓራታካ ጊልዳይዴስ፤ ኢስታ ፓራ-ጋሬታካ ታማን ጹጊዴስ።
JOS 11:10 ሄ ዎዴ ኢያሶይ ጉዬ ሲሚዲ ሃጾሬ ካታማ ኦይኪዴስ፤ ሄ ካታማ ካዎዛካ ጊꬃ ማሻን ሲፊዴስ፤ ሃጾሬ ካታማስ ሄ ዎዴ ዲዛ ካዎቴꬃታ ኡባ ቦላ ኣላፌቴꬂ ዴስ።
JOS 11:11 ሄ ካታማን ዲዛ ኣሳ ኡባ ጊꬃ ማሻን ሲፊዳ፤ ሼምፖራ ፓጻ ዲዛ ኡባ ኢሲኖካ ኣሾንታ ዎꬊዳ፤ ካታማዮካ ታማን ጹጊዳ።
JOS 11:12 ጎዳ ኣይሌ ሙሴይ ኣዛዚዳ ማላ ኢያሶይ ሄ ካታማታኔ ኢስታ ካዎታ ኡባ ꬋይሲዴስ፤ ጊꬃ ማሻንካ ሲፊዴስ።
JOS 11:13 ጊዲኮካ ኢያሶይ ሃጾሬ ካታማ ጹጎይሳፌ ኣቲን ኢስራኤሌ ኣሳይ ዙማታ ቦላ ኬጼቲዳ ካታማታ ጹጊቤና።
JOS 11:14 ኢስራኤሌ ኣሳይ ሄ ካታማታፔ ቦንቂዳ ሚሽ ኡባኔ ሜሄ ኡባ ባንታስ ኤኪዳ፤ ጊዶ ኣቲን ኣሳ ጊꬃ ማሻን ꬋይሲዳ፤ ሼምፖራ ፓጻ ዲዛ ኢሲኖካ ኣሺቤቴና።
JOS 11:15 ጎዳይ ባ ኣይሌ ሙሴ ኣዛዚዳ ማላ ሙሴይካ ኢያሶ ኣዛዚዴስ። ሂስቲን ኢያሶይካ ኣዛዞዛ ፖሊዴስ፤ ጎዳይ ሙሴስ ኣዛዚዳ ኡባፌ ኢዚ ኦꬆንታ ኣጊዳ ኣይ ሚሺካ ዴና።
JOS 11:16 ሄሳꬆ ሂስቲዲ ኢያሶይ ሄ ቢታ ኡባ ጌዜ ቢታ፥ ኔጌቤ ቢታ፥ ጎሼኔ ቢታ፥ ኣርሼይ ዉሊዛሶ ባጋራ ዲዛ ጋꬋኔ ኣራቤ ቢታ ቃሴካ ኢስራኤሌ ጌዜኔ ጋꬋ ኡባ ሺሺ ኦይኪዴስ።
JOS 11:17 ሄሲካ ሴይሬ ጋካናስ ዲዛ ሃላቄ ዙማፔ ቢዲ ሄርሞኔ ዙማፔ ዳንኤ ባጋራ ሊባኖሴ ዙሌን ባኣሊ-ጋዴ ጋካናስ ዲዛ ቢታ ኡባ ጋኪዴስ። ኢስታ ካዎታካ ኡባ ኦይኪዲ ዎꬊዴስ።
JOS 11:18 ኢያሶይ ዳሮ ዎዴ ሄ ካዎታ ኡባራ ኦሌቲሼ ጋምኢዴስ።
JOS 11:19 ጌባኦኔን ዲዛ ሂዌታፔ ኣቲን ሃራ ካታማይ ኢሶይኔ ኢስራኤሌታራ ሳሮቴꬃን ዴኣና ጫቄቲቤና፤ ኢስራኤሌቲ ኡባታካ ኦሊ ኦይኪዳ።
JOS 11:20 ጎዳይ ሙሴ ኣዛዚዳ ማላ ኢያሶይ ኢስታስ ቃꬌቶንታ ኡባ ዎꬊዴስ። ጋሶይካ ኢስቲ ኢስራኤሌታራ ኦሌታና ማላ ጎዳይ ኢስታ ዎዚና ዳሚሲዴስ።
JOS 11:21 ሄ ዎዴ ኢያሶይ ቢዲ፥ ጌዜ ቢታን ኬብሮኔ ካታማን፥ ዳቢሬ ካታማን፥ ኣናቤ ካታማን፥ ዩሁዳኒኔ ኢስራኤሌ ጌዜ ቢታ ኡባን ዲዛ ኤናቄ ዛሬታ ኡባኔ ኢስታ ካታማ ኡባ ꬋይሲዴስ።
JOS 11:22 ኢስታፌ ጉꬃቲ ጻላ ጋዛን፥ ጌቴኒኔ ኣሽዶዴን ኣቲዳ፤ ጊዶ ኣቲን ኢስራኤሌን ሼምፖራ ፓጻ ኣቲዳ ኤናቄ ዜሬꬂ ዴና።
JOS 11:23 ጎዳይ ሙሴ ኣዛዚዳ ማላ ኢያሶይ ቢታ ኡባ ኦይኪዴስ፤ ሂስቲዲ ኢስራኤሌ ኣሳስ ኢስታ ቆሞን ቆሞን ሻኪ ኢሚዴስ፤ ሄሳፌ ጉዬ ቢታይ ኦላፔ ሼምፒዴስ።
JOS 12:1 ኢስራኤሌ ኣሳይ ዮርዳኖሴ ሻፋፔ ኣርሼይ ሞኪዛ ባጋራ ዲዛ ኣራቤ ቢታ ኡባ ኦይኪዲ ኣርኖኔ ዙሌራ ቢዲ ሄርሞኔ ዙማ ጋካናስ ዲዛ ሄ ዴሬ ካዎታ ጾኒዲ ዎꬂ ኤኪዴስ። ሄ ጾኔቲዳ ካዎቲ ሃይሳፌ ካሊ ጻፌቲዳይታ።
JOS 12:2 ሃሴቦኔ ካታማን ኡቲዲ ኣይሲዛ ኣሞሬታ ካዎይ ሲሆኔ። ኢዚ ኣርኖኔ ሾባ ላንቄን ዲዛ ኣሮኤሬ ዙሌራ ካንꬂ ቢዲ ኣሞኔታ ዛዋ ያቦቄ ሻፋ ጋካናስ ሃሪዴስ፤ ሄሲ ጋላኣዴ ቢታፌ ባጋ ጉጂ ኤኬስ።
JOS 12:3 ቃሴካ ኣርሼይ ሞኪዛ ባጋራ ዮርዳኖሴ ሾባፌ ቢዲ ጋሊላ ኣባ ጋካናስ፥ ቤቲ-ያሺሞቴ ባጋራ ቢዲ ማጺኔ ኣባፌ ዱጌሃ ባጋራ ዲዛ ፒዝጋ ዙማስ ዳንኤ ባጋ ጋካናስ ዲዛሶዛ ሃሪዴስ።
JOS 12:4 ኣስታሮቴኒኔ ኤዲራኤን ኡቲዲ ሃሪዛ ኤራፋይሜ ዜሬꬃታፔ ዉርሴꬃ ቦላ ካዎቲዳይ ባሳኔ ካዎ ኣጌ።
JOS 12:5 ኢዚ ሄርሞኔ ዙማ፥ ሳላካ፥ ባሳኔ ቢታ ኡባ፥ ቢዲ ጌሹሬታኔ ማኢካቴ ዛዋ ጋካናስ፥ ቃሴካ ጋላኣዴ ቢታፌ ባጋ ኤኪ ቢዲ ሃሴቦኔ ካዎ ሲሆኔ ዛዋ ጋካናስ ሃሪዴስ።
JOS 12:6 ጎዳ ኣሽካራ ሙሴይኔ ኢስራኤሌ ኣሳይ ሃ ካዎታ ጾኒዳ፤ ሂስቲዲ ጎዳ ኣይሌ ሙሴይ ኢስታ ቢታ ኦሮቤሌ ቆሞታስ፥ ጋዴ ቆሞታሲኔ ሚናሴ ቆሞታፔ ባጋይታስ ጺንጾ ጊዳና ማላ ሻኪ ኢሚዴስ።
JOS 12:7 ኢያሶይኔ ኢስራኤሌ ኣሳይ ዮርዳኖሴ ሻፋፔ ኣርሼይ ዉሊዛ ባጋን ዲዛ ካዎታ ኡባ ጾኒዳ። ሄይቲ ሃሪዛ ዛዋይ ሊባኖሴ ሾባን ዲዛ ባኣሊ-ጋዴፔ ዶሚዲ ሴይሬን ሃላቄ ዙማ ጋኬስ፤ ኢያሶይ ሄ ቢታታ ሻኪዲ ኢስራኤሌ ቆሞታስ ጺንጾ ሂስቲ ኢሚዴስ።
JOS 12:8 ሄ ቢታቲ፥ ጌዜ ዴሬ፥ ኣርሼይ ዉሊዛሶ ባጋን ዲዛ ዙምቡላታ ላዴ፥ ኣራቤ ዙማታ ላዴ፥ ባዞ ቢታኔ ኔጌቤ ቢታ። ሄ ቢታቲ ካሴ ሂቴቲ፥ ኣሞሬቲ፥ ካናኔቲ፥ ፓሪዜቲ፥ ሂዌቲኔ ያቡሴቲ ዴኢዛ ቢታ።
JOS 12:9 ኢስራኤሌ ኣሳይ ጾኒዳ ካዎቲ ሃይሳፌ ካሊ ዲዛይታ፤ ኢያርኮ ካዎ፥ ቤቴሌ ማታን ዲዛ ኣዬ ካዎ፥
JOS 12:10 ዬሩሳላሜ ካዎ፥ ኬብሮኔ ካዎ፥
JOS 12:11 ያርሙቴ ካዎ፥ ላኪሼ ካዎ፥
JOS 12:12 ኤጊሎኔ ካዎ፥ ጌዜሬ ካዎ፥
JOS 12:13 ዳቢሬ ካዎ፥ ቤቲ-ጋዴራ ካዎ፥
JOS 12:14 ሆርማ ካዎ፥ ኣራዴ ካዎ፥
JOS 12:15 ሊቢና ካዎ፥ ኣዱላሜ ካዎ፥
JOS 12:16 ማቄዳ ካዎ፥ ቤቴሌ ካዎ፥
JOS 12:17 ታጱሄ ካዎ፥ ሄፌሬ ካዎ፥
JOS 12:18 ኣፌቄ ካዎ፥ ላሻሮኔ ካዎ፥
JOS 12:19 ሜዶኔ ካዎ፥ ሃጾሬ ካዎ፥
JOS 12:20 ሺሚሮኔ-ሚሮኔ ካዎ፥ ኣኪሻፌ ካዎ፥
JOS 12:21 ታኢናኬ ካዎ፥ ማጊዶ ካዎ፥
JOS 12:22 ቃዴሴ ካዎ፥ ቃርሜሎሴን ዲዛ ዮቂናኣሜ ካዎ፥
JOS 12:23 ዙምቡላታ ቦላ ዲዛ ዶሬ ካዎ፥ ጌልጌላን ዲዛ ጎይሜ ካዎ፥
JOS 12:24 ቲርጻ ካዎ። ሄይቲ ኢሲ ቦላ 31 ካዎታ።
JOS 13:1 ኢያሶይ ጪሚን ኢዛስ ላይꬃይ ኬሂ ቢዳ ዎዴ ጎዳይ፥ «ኔኒ ኬሃ ጪማዳሳ፤ ላይꬃይካ ኔስ ኬሂ ቢዴስ፤ ጊዶ ኣቲን ቡሮ ኦይኬቶንታ ዳሮ ቢታይ ዴስ።
JOS 13:2 ቡሮ ኦይኬቲቤና ቢታቲ ሃይታ፤ ፊሊስጼሜታ ቢታኔ ጌሹሬታ ቢታ ኡባታ፥
JOS 13:3 ጊብጼፔ ኣርሼይ ሞኪዛ ባጋራ ዲዛ ሺሆሬ ሻፋፔ ዶሚዲ፥ ፑዴሃ ባጋራ ዲዛ ኣቃሮኔ ዛዋ ጋካናስ ዲዛ ቢታቲ ዉሪ ካናኔ ቢታ ማላ ቆዴቴቴስ። ኢቻሽ ፊሊስጼሜ ካዎቲ ሃሪዛ ካታማቲ ጋዛ፥ ኣሽዶዴ፥ ኣስቄሎና፥ ጌቴኔ ኣቃሮኔ ጌቴቲዛይታ ጊዲሺን ሄይቲካ ኣዌታ ቢታ።
JOS 13:4 ዱጌሃ ባጋራ ካናኔታ ቢታይ ዉሪ፥ ሲዶናታስ ዲዛ ማኣሬ ጌቴቲዛሶፔ ዶሚ ቢዲ ኣሞሬታ ቢታን ዲዛ ኣፌቄ ካታማ ጋካናስ፥
JOS 13:5 ጌባሌታ ቢታ፥ ኣርሼይ ሞኪዛ ባጋራ ባኣሊ-ጋዴፔ ቢዲ ሄርሞኔ ዙማስ ዳንኤ ባጋራ ኣꬊ ቢዲ ሃማቴ ፑርዴ ጋካናስ ዲዛ ሊባኖሴ ቢታ ኡባ።
JOS 13:6 «ሊባኖሴፔ ቢዲ ማሲራፎቴ-ማይማን ዲዛ ጌዜ ዴሬን ሲዶናታ ቢታይካ ኦይኬቲቤና። ታኒ ታ ሁኤስ ኢስራኤሌ ኣሳ ሲንꬃፌ ኢስታ ጎዳ ኬሳና። ታኒ ኔና ኣዛዚዳ ማላ ኔኒ ሃ ቢታታ ኢስራኤሌ ኣሳስ ጺንጾ ሂስታ ሻካ።
JOS 13:7 ኔኒ ሃ ቢታ ኡዱፉን ቆሞታሲኔ ሚናሴ ቆሞታፔ ባጋይታስ ጊሻ» ጊዴስ።
JOS 13:8 ሚናሴ ቆሞታፔ ባጋቲ፥ ኦሮቤሌ ዛሬቲኔ ጋዴ ዛሬቲ ጎዳ ኣይሌ ሙሴይ ዮርዳኖሴ ሻፋፔ ሄ ፒንꬃን ኣርሼይ ሞኪዛሶ ባጋራ ኢስታስ ኢሚዳ ቢታ ኤኪዳ።
JOS 13:9 ኢስታ ቢታይ ኣርኖኔ ሾባ ላንቄን ዲዛ ኣሮኤሬ ካታማፔ ዶሚዲ ሄ ሾባ ጊዶን ዲዛ ካታማ ኦይኪዲ ሜዴባ ጌቴቲዛ ጌዜ ዴሬ ካንꬂ ቢዲ ዲቦኔ ጋኬስ።
JOS 13:10 ቃሴ ሃሴቦኔን ኡቲዲ ኣሞኔታ ዛዋ ጋካናስ ሃሪዳ ኣሞሬታ ካዎ ሲሆኔ ካታማታ ኡባ ጋꬂ ኦይኬስ።
JOS 13:11 ሄሳꬆካ ጋላኣዴ ቢታ፥ ጌሹሬታ ቢታ፥ ማኢካቴ ቢታ፥ ሄርሞኔ ዙማ ኡባ፥ ባሳኔ ቢታ ቢዲ ሳላካ ጋካናስ ኦይኬስ።
JOS 13:12 ሄሲካ ኣስታሮቴ ካታማኒኔ ኤዲራኤ ካታማን ዲሼ ሃሪዳ ኣጌ ካዎቴꬃ ኡባ ኦይኬስ፤ ኣጌይ ዉርሼ ኣቲዳ ኤራፋይሜ ዛሬታፔ ኢሳ። ሙሴይ ሄ ኣሳ ጾኒ ጎዲዲ ኢስታ ቢታ ኦይኪዴስ።
JOS 13:13 ጊዶ ኣቲን ኢስራኤሌ ኣሳይ ጌሹሬ ኣሳኔ ማኢካቴ ኣሳ ኬሲ ጎዶንታ ኣጊዳ ጊሻስ ኢስቲ ሃች ጋካናስ ኢስራኤሌ ኣሳ ጊዶን ዴቴስ።
JOS 13:14 ሙሴይ ሌዌ ቆሞታስ ጺንጾ ኢሚቤና፤ ጎዳይ ሙሴስ ጊዳ ማላ፥ ጎዳስ ኢስራኤሌ ጾሳስ ታማን ጹጌቲዛ ያርሾይ ኢስታስ ጺንጾ።
JOS 13:15 ሙሴይ ኦሮቤሌ ቆሞታስ ኢስታ ዛርኬን ዛርኬን ጊሼሬꬂ ኢሚዳ ቢታይ ሃይሳፌ ካሊ ዲዛይሳ።
JOS 13:16 ኢስታ ዛዋይ ኣርኖኔ ሾባ ላንቄን ዲዛ ኣሮኤሬ ካታማፔኔ ሄ ሾባ ጊዶን ዲዛ ካታማ ኦይኪዲ፥ ሜዴባ ጌዜ ዴሬ ካንꬂ ቢዲ፥
JOS 13:17 ሃሴቦኔኔ ጌዜ ዴሬን ዲዛ ካታማታ ኡባ፥ ቃሴ ዲቦኔ፥ ባሞቲ ባኣሌ፥ ቤቲ-ባኣሊ-ሜኦኔ፥
JOS 13:18 ያሃጼ፥ ቂዲሞቴ፥ ሜፋኣቴ፥
JOS 13:19 ቂሪያታይሜ፥ ሴባማ ሾባ ጊዶን ዲዛ ዙምቡላ ቦላ ዲዛ ጼሬቴ-ሻሃሬ፥
JOS 13:20 ቤቲ-ፔኦሬ፥ ፒዝጋ ዱጉንꬃታኔ ቤቲ-ያሺሞቴ።
JOS 13:21 ሄሲካ ጌዜ ቢታን ዲዛ ካታማታ ኡባኔ ሃሴቦኔ ካታማን ኡቲዲ ሃሪዳ ኣሞሬታ ካዎ ሲሆኔ ቢታ ኡባ ኦይኬስ። ሙሴይ ካዎ ሲሆኔኔ ሄ ቢታን ዲዛ ዳናታ፥ ኤዋ፥ ኤሬቄሜ፥ ጹሬ፥ ኡሬኔ ኤሬባኤ ጌቴቲዛ ሚዲያሜ ሃላቃታ ኦሊ ጾኒዴስ።
JOS 13:22 ኢስራኤሌ ኣሳይ ኦላን ዎꬊዳ ኣሳፔ ሃራ፥ ቢኦሬ ና ማሮ ባላሜካ ማሻን ሲፊዳ።
JOS 13:23 ኦሮቤሌ ቆሞታ ዛዋይ ዮርዳኖሴ ሻፋ። ኦሮቤሌ ቆሞቲ ባ ዛርኬን ዛርኬን ጊሼቲ ኤኪዳ ካታማቲኔ ጉታቲ ሄይታ።
JOS 13:24 ሙሴይ ጋዴ ቆሞታስ ኢስታ ዛርኬን ዛርኬን ጊሼሬꬂ ኢሚዳ ቢታይ ሃይሳፌ ካሊ ዲዛይሳ።
JOS 13:25 ኢስታ ዛዋይ ኢያዜሬ፥ ጋላኣዴ ካታማታ ኡባ ኤራባ ኣቻን ዲዛ ኣሮኤሬ ጋካናስ ዲዛ ኣሞኔታ ቢታፌ ባጋ፥
JOS 13:26 ሃሴቦኔፔ ቢዲ ኤራሞቴ-ሚጺጳኔ ቤጾኒሜ፥ ማሃናይሜፔ ቢዲ ዳባሬ ዛዋ፥
JOS 13:27 ኣርሼይ ሞኪዛ ባጋራ ዲዛ ዮርዳኖሴ ሾባስ ጊዶን ሃሴቦኔ ካዎ ሲሆኔ ካዎቴꬃፌ ኣቲዳይታ፥ ቤቲ-ሃራሜ፥ ቤቲ-ኒሚሬ፥ ሱኮቴኔ ጻፎኔ ጌቴቲዛ ካታማታ ኢሲፌ ጋꬂ ኦይኬስ።
JOS 13:28 ጋዴ ቆሞቲ ባ ዛርኬን ዛርኬን ጊሼቲ ኤኪዳ ካታማቲኔ ጉታቲ ሄይታ።
JOS 13:29 ሙሴይ ሚናሴ ቆሞታፔ ባጋይታስ ኢስታ ዛርኬን ዛርኬን ጊሼሬꬂ ኢሚዳ ቢታይ ሃይሳፌ ካሊ ዲዛይሳ።
JOS 13:30 ኢስታ ዛዋይ ማሃናይሜፔ ዶሚዲ ባሳኔ ቢታ ኡባ ጉጂዲ ባሳኔን ዲዛ 60 ያኢሬ ካታማታ ኡባ ኤኪዲ ባሳኔ ካዎ ኣጌይ ሃሪዛሶ ኡባ ጊዲሺን፥
JOS 13:31 ጋላኣዴፔ ባጋኔ ባሳኔን ኣጌ ካዎቴꬃስ ዋና ካታማታ ኣስታሮቴኔ ኤዲራኤ ጋኬስ። ሄይቲ ሚናሴ ና ማኪሬ ዛሬታስ ኢሜቲዳይታ ጊዲሺን ሄይቲካ ማኪሬ ናይታፔ ባጋይታስ ኢስታ ዛርኬን ዛርኬን ኢሜቲዳይታ።
JOS 13:32 ዮርዳኖሴፔ ሄ ፒንꬃን፥ ኢያርኮፌ ኣርሼይ ሞኪዛ ባጋራ ዲዛ ሞኣቤ ዴምባን ዲዛ ዎዴ ሙሴይ ሻኪዲ ኢሚዳ ቢታይ ሄሳ።
JOS 13:33 ጊዶ ኣቲን ሙሴይ ሌዌ ቆሞታስ ጺንጾ ኢሚቤና፤ ካሴ ጎዳ ኢስራኤሌ ጾሳይ ኢስታስ ዮቲዳ ማላ ኢዚ ኢስታ ጺንጾ።
JOS 14:1 ቄሴ ኤልኤዜሬይ፥ ናዌ ና ኢያሶይኔ ኢስራኤሌ ዛሬታ ኮራፒኔቲ ጊሼቺ ኢሚን ኢስራኤሌ ኣሳይ ጊሼቲ ኤኪዲ ላቲዳ ቢታይ ሃይሳፌ ካሊዛይሳ።
JOS 14:2 ጎዳይ ሙሴ ባጋራ ኣዛዚዳ ማላ ኢስቲ ጊሼቲ ኤኪዳ ቢታይ ኡዱፉን ቆሞታሲኔ ባጋይታስ ሳማን ጋኪዴስ።
JOS 14:3 ሙሴይ ናምኡ ቆሞታሲኔ ባጋታስ ዮርዳኖሴ ሻፋፔ ሄ ፒንꬃን ኣርሼይ ሞኪዛ ባጋራ ዲዛ ጋዴዛ ኢስታስ ጺንጾ ሂስቲ ኢሚዴስ፤ ጊዶ ኣቲን ሌዌ ቆሞታስ ኢስታ ጊዶን ጺንጾ ኢሚቤና።
JOS 14:4 ዮሴፌ ናይቲ ሚናሴኔ ኤፍሬሜ ጌቴቲዲ ናምኡ ዛርኬ ጊዲዳ። ሙሴይ ሌዌ ቆሞታስ ላታ ቢታ ኢሚቤና፤ ጊዶ ኣቲን ሌዌ ቆሞታስ ኢስቲ ዲዛ ካታማታኔ ኢስቲ ባ ሜሄኔ ዶርሳ ሄሚዛሶሆ ጻላ ኣቲን ሃራ ጋዴይ ኢስታስ ኢሜቲቤና።
JOS 14:5 ሄሳ ጊሻስ ጎዳይ ሙሴ ኣዛዚዳ ማላ ኢስራኤሌ ኣሳይ ቢታ ጊሼቲ ኤኪዳ።
JOS 14:6 ኢሲ ጋላስ ዩሁዳ ኣሳይ ኢያሶኮ ጌልጌላ ሺቂዴስ፤ ኢስታፌ ቄናዜ ዴሬ ኣስ ዮፊኔ ና ካሌቤይ ኢያሶስ፥ «ኑኒ ቃዴሴ ባሪኔን ዲሺን ጎዳ ኣስ ሙሴስ ኔ ጊሻሲኔ ታ ጊሻስ ዮቲዳይሳ ኔ ኤራሳ።
JOS 14:7 ጎዳ ኣይሌ ሙሴይ ቢታዮ ዎቻዳ ያና ማላ ቃዴሴ ባሪኔፔ ታና ኪቲዛ ዎዴ ታስ ላይꬃይ 40። ሄ ዎዴ ታኒ ኢዛስ ኣማንꬂዛ ዮኦ ኤካ ያዲስ።
JOS 14:8 ታናራ ቢዳ ኣሳቲ ዴራ ዎዚና ሂርጋን ኩንꬂዳ፤ ታኒ ጊዲኮ ጎዳ ታ ጾሳ ኩሜꬃ ዎዚናፔ ካላዲስ።
JOS 14:9 ሄ ጋላስ ሙሴይ፥ ‹ኔኒ ጎዳ ታ ጾሳ ኩሜꬃ ዎዚናፔ ካሊዳ ጊሻስ ኔ ቶሆይ ዬꬊዳ ቢታይ ሜርናስ ኔሲኔ ኔ ዜሬꬃስ ላታ ቢታ ጊዳና› ጊዲ ታስ ጫቂዴስ።
JOS 14:10 «ጎዳይ ሃ ዮኦዛ ሙሴስ ዮቶሶፔ ዶሚዲ ኢስራኤሌ ኣሳይ ባዞ ቢታን ቶይላቲሺን ታና 45 ላይꬅ ናጊዲ ሼምፖራ ፓጻ ዎꬂዴስ፤ ሃኢ ታ ላይꬃይ 85 ጊዲዴስ።
JOS 14:11 ጊዲኮካ ሃኢ ታስ ዲዛ ሚኖቴꬃይ ቤኒ ሙሴይ ታና ኪቲዛ ዎዴ ዲዛ ሚኖቴꬃ ማላ። ታስ ሃኢካ ኦሌታና ባናስ ቤኒ ዎልቃይኔ ሚኖቴꬂ ዴስ።
JOS 14:12 ሄሳ ጊሻስ ጎዳይ ታስ ኢማና ጊዳ ሃ ጌዜ ቢታ ሃኢ ታስ ኢማ። ሄ ዎዴ ኤናቄቲ ሄ ቢታን ዲዛይሳኔ ኢስታ ካታማቲካ ጊታኔ ጊምቤቲዳይታ ጊዲዳይሳ ኔ ሲያዳሳ፤ ጊዶ ኣቲን ጎዳይ ታናራ ጊዲኮ ኢዚ ጊዳ ማላ ታኒ ኢስታ ሄ ቢታፌ ዬዴꬃና» ጊዴስ።
JOS 14:13 ሄሳፌ ጉዬ ኢያሶይ ዮፊኔ ና ካሌቤ ኣንጂዲ ኬብሮኔ ኢዛስ ጺንጾ ሂስቲ ኢሚዴስ።
JOS 14:14 ጎዳ ኢስራኤሌ ጾሳ ኢዚ ኩሜꬃ ዎዚናፔ ካሊዳ ጊሻስ ሄ ጋላሳፌ ዶሚዲ ኬብሮኔይ ቄናዜ ዴሬ ኣስ ዮፊኔ ና ካሌቤስ ጺንጾ ጊዲዴስ።
JOS 14:15 ኬብሮኔይ ካሴ ኤናቄታ ኡባፌ ባይራ ጊዲዳ ኣርባኤ ሱንꬃን ቂሪያቴ-ኣርባኤ ጌቴታ ጼይጌታዱስ። ሄሳፌ ጉዬ ሄ ቢታያ ኦላፔ ሼምፓዱስ።
JOS 15:1 ዩሁዳ ቆሞታስ ኢስታ ዛርኬን ዛርኬን ሳማ ዬጊን ጋኪዳ ጋዴይ ቢዲ ኤዶሜራ ዛዋቲዲ፥ ዱጌሃ ባጋ ጋጻን ዲዛ ጺኔ ጌቴቲዛ ባዞ ጋኬስ።
JOS 15:2 ዱጌሃ ባጋራ ኢስታ ዛዋይ ማጺኔ ኣባስ ዱጌሃ ባጋ ጼራፔ ዶሜስ።
JOS 15:3 ኣኪራቢሜ ፑርዴራ ካንꬂዲ፥ ጺኔ ባዞራ ቢዲ ቃዴሴ ባሪኔ ዱጌሃ ባጋ ጋኬስ። ቃሴ ሄሳፌ ሄጺሮሜራ ካንꬂ ፑዴ ኣዳሬ ጋኪዲ ቃርቃኮ ሲሜስ።
JOS 15:4 ኣጺሞኔራ ካንꬂ ቢዲ ሃꬂ ባይንዳ ጊብጼ ሻፋን ጋኪዲ ሜዲቴራኔ ኣባን ዛዋቴስ። ዱጌሃ ባጋራ ዲዛ ዩሁዳ ዛዋይ ሃይሳ።
JOS 15:5 ኣርሼይ ሞኪዛሶ ባጋራ ዲዛ ዛዋይ ማጺኔ ኣባ ጊዲሺን ሄሲካ ዮርዳኖሴ ሻፋይ ኢዛን ቢ ጌሊዛሶ ጋኬስ። ፑዴሃ ባጋራ ዲዛ ዛዋይ ዮርዳኖሴ ሻፋይ ማጺኔ ኣባን ጌሊዛሶፔ ዶሚዲ፥
JOS 15:6 ፑዴ ቤቲ-ሆጊሌ ኬዚዲ ዮርዳኖሴ ሾባፌ ጋና ባጋራ ካንꬂዲ ኦሮቤሌ ና ቦሃኔ ሹቻን ዛዋቴስ።
JOS 15:7 ሂስቲዲ ዛዋዚ ኣኮሬ ሾባፌ ዳቢሬ ካታማ ፑዴ ኬዚዲ፥ ሾባፌ ዱጌ ባጋራ ዲዛ ኣዱሚሜ ፑርዴፌ ሲንꬃራ ካንꬂዲ ፑዴሃ ባጋ ጌልጌላኮ ሲሜስ። ቃሴ ኤን-ሼሚሼ ጌቴቲዛ ፑልቶዛራ ካንꬂ ቢዲ ፑዴ ኤን-ሮጌሌ ጌቴቲዛሶ ኬዜስ።
JOS 15:8 ሄሳፌ ሄኖሜ ና ሾባራ ካንꬂ ቢዲ ያቡሴታ ካታማ ዬሩሳላሜይ ዲዛሶ ዱጌሃ ባጋራ ካንꬂዲ ኤራፋይሜ ሾባስ ፑዴሃ ባጋ ጼራራ ካንꬂ ቢዲ ሄኖሜ ሾባስ ኣርሼይ ዉሊዛ ባጋራ ዲዛ ዙምቡላ ጼራ ጋኬስ።
JOS 15:9 ሄፔካ ዙምቡላ ጼራፔ ዶሚዲ ኔፍቶ ፑልቶታራ ካንꬂዲ ኤፍሮኔ ዴሬን ዲዛ ካታማታኮ ጋኬስ። ሄሳፌ ቃሴ ዱጌ ባኣላ ዎይኮ ቂሪያቴ-ዪኣሪሜ ጌቴቲዛ ካታማኮ ዎꬌስ፤
JOS 15:10 ባኣላፔ ኣርሼይ ዉሊዛ ባጋራ ዲዛ ሴይሬ ዙማኮ ሚርቄቲዲ ኪሳሎኔ ጌቴቲ ጼይጌቲዛ ዪኣሪሜ ዙምቡላስ ፑዴሃ ባጋራ ዲዛ ዱጉንꬃራ ዱጌ ቤቲ-ሼሚሼ ዎꬊዲ ቴሚና ፒኔስ።
JOS 15:11 ቃሴ ኣቃሮኔስ ፑዴሃ ባጋራ ዲዛ ዱጉንꬃራ ካንꬂዲ ሺካሮኔኮ ሚርቄቲዲ ባኣላ ዙማ ቦላራ ኣꬊ ቢዲ ያቢንኤሌ ጋኬስ፤ ሄሳፌ ጉዬ ዛዋይ ቢዲ ኣባን ኤቄስ።
JOS 15:12 ኣርሼይ ዉሊዛ ባጋራ ዲዛ ዛዋይ ሜዲቴራኔ ኣባ ጋጻ ጋኬስ። ዩሁዳ ቆሞቲ ባ ዛርኬን ዛርኬን ኤኪዳ ዛዋቲ ሃይታንታ።
JOS 15:13 ጎዳይ ኢዛ ኣዛዚዳ ማላ ኢያሶይ ዩሁዳ ጊሻፔ ሻኪዲ ኬብሮኔ ጌቴቲዛሮ ቂሪያቴ-ኣርባኤ ዮፊኔ ና ካሌቤስ ኢሚዴስ፤ ኣርባኤይ ኤናቄ ኣዋ።
JOS 15:14 ካሌቤይካ ኤናቄ ዛሬ ሄꬓታ፥ ሻሻዬ፥ ኣሂማኔኔ ታሊማዬ ኬብሮኔፔ ኬሲ ጎዲዴስ።
JOS 15:15 ሄሳፌ ጉዬ ዳቢሬ ዴሬ ቦላ ኦላስ ዴንዲዴስ፤ ዳቢሬ ካታማይ ካሴ ቂሪያቴ-ሴፌሬ ጌቴታዉስ።
JOS 15:16 ካሌቤይ፥ «ቂሪያቴ-ሴፌሬ ኦሊዲ ኦይኪዛዴስ ታኒ ታ ናዮ ኣኪሳ ኢማና» ጊዴስ።
JOS 15:17 ሄሳ ጊሻስ ካሌቤ ኢሻ ቄናዜ ና ኦቲንኤሌይ ሄ ካታማ ኦሊዲ ኦይኪዴስ፤ ሂስቲን ካሌቤይ ባ ናዮ ኢዛስ ማቾ ኢሚዴስ።
JOS 15:18 ኣኪሳይ ኦቲንኤሌ ጌሊዳፔ ጉዬ ኢዚ ኣዋይ ኢዚስ ጋዴ ኢማና ማላ ባ ኣዋ ዎሳና ማላ ባ ኣዚናስ ሚንꬃ ዮታዱስ፤ ኢዛ ሃሬዛ ቦላፌ ዎꬊን ካሌቤይ ኢዞ፥ «ታ ኔስ ኣይ ኦꬃና ማላ ኮያይ?» ጊ ኦይቺዴስ።
JOS 15:19 ኢዛካ ዛራዳ፥ «ታስ ሎኦ ኦꬃርኪ! ኔኒ ካሴ ታስ ኔጌቤን ጋዴ ኢሚዳይሳꬆ ሃኢካ ፑልቶ ሃꬃራ ዲዛ ጋዴ ታስ ኢማ» ጋዱስ። ሂስቲን ካሌቤይ ኢዚስ ፑዴራኔ ዱጌራ ዲዛ ፑልቶ ኢሚዴስ።
JOS 15:20 ዩሁዳ ቆሞታስ ኢስታ ዛርኬን ዛርኬን ጊሻስ ኢሚዳ ቢታይ ሃይሳፌ ካሊ ዲዛይሳ።
JOS 15:21 ኔጌቤ ሄራን ኤዶሜ ዛዋ ጼራን ዲዛ ዱጌሃ ባጋራ ዲዛ ዩሁዳ ቆሞታ ካታማቲ ቃብጺኤሌ፥ ኤዴሬ፥ ያጉሬ፥
JOS 15:22 ቂና፥ ዲሞና፥ ኣዳዳ፥
JOS 15:23 ቃዴሴ፥ ሃጾሬ፥ ዩቲናኔ፥
JOS 15:24 ዚፌ፥ ቴሌሜ፥ ባኣሎቴ፥
JOS 15:25 ሃጾሬ-ሃዳታ፥ ሄጺሮሜ ጌቴቲዛ ቂሪያቴ-ሃጾሬ፥
JOS 15:26 ኣማሜ፥ ሼማኤ፥ ሞላዴ፥
JOS 15:27 ሃጻሬ-ጋዳ፥ ሄሽሞኔ፥ ቤቲ-ጳሌጼ፥
JOS 15:28 ሃጻሬ-ሹኣሌ፥ ቤርሳቤሄ፥ ቢዚዮቲያ፥
JOS 15:29 ባኣላ፥ ኢዩሜ፥ ኤጼሜ፥
JOS 15:30 ኤልቶላዴ፥ ኪሲሌ፥ ሆርማ፥
JOS 15:31 ጺጊላጌ፥ ማዲማና፥ ሳንሳና፥
JOS 15:32 ሌባዎቴ፥ ሺሊሂሜ፥ ኣዪኔኔ ኣርሞኔ። ካታማቲኔ ጉታቲ ኢሲ ቦላ ናምኡ ታማኔ ኡዱፉና።
JOS 15:33 ኣርሼይ ዉሊዛ ባጋራ ዙምቡላታ ቶሆሶራ ዲዛይቲ ኤሽታኦሌ፥ ጾራኣ፥ ኣሺና፥
JOS 15:34 ዛኖሄ፥ ኤን-ጋኒሜ፥ ታጱሄ፥ ኤናሜ፥
JOS 15:35 ያርሙቴ፥ ኣዱላሜ፥ ሶኮ፥ ኣዜቄ፥
JOS 15:36 ሻኢራይሜ፥ ኣዲታይሜ፥ ጋዴሬኔ ጋዴሮታይሜ። ካታማቲኔ ጉታቲ ኢሲ ቦላ ታማኔ ኦይዳ።
JOS 15:37 ቃሴ ጺናኔ፥ ሃዳሻ፥ ሚጊዳላ-ጋዴ፥
JOS 15:38 ዲልኣኔ፥ ሚጺጳ፥ ዮቂቲኤሌ፥
JOS 15:39 ላኪሼ፥ ቦጺቃቴ፥ ኤጊሎኔ፥
JOS 15:40 ካቦኔ፥ ላሂማሴ፥ ኪቲሊሼ፥
JOS 15:41 ጋዴሮቴ፥ ቤቲ-ዳጎኔ፥ ናኢማኔ ማቄዳ። ካታማቲኔ ጉታቲ ኢሲ ቦላ ታማኔ ኡሱፑና።
JOS 15:42 ቃሴ ሊቢና፥ ኤቴሬ፥ ኣሻኔ፥
JOS 15:43 ዮፍታሄ፥ ኣሺና፥ ኒጺቤ፥
JOS 15:44 ቂኢላ፥ ኣኪዚቤኔ ማሬሻ። ካታማቲኔ ጉታቲ ኢሲ ቦላ ኡዱፉና።
JOS 15:45 ኣቃሮኔይ ባ ሄራን ዲዛ ጉታታራ፥
JOS 15:46 ሄሳꬆካ ኣቃሮኔፔ ኣርሼይ ዉሊዛ ባጋራ ዲዛ ኣሽዶዴ ጋካናስ፥
JOS 15:47 ቃሴ ኣሽዶዴይ ባ ሄራን ዲዛ ጉታታራኔ ጋዛፔ ቢዲ ሃꬂ ባይንዳ ጊብጼ ሻፋ ጋካናሲኔ ሜዲቴራኔ ጋጻፔ ሃ ሲሚን ዲዛ ካታማታኔ ጉታታ።
JOS 15:48 ዙምቡላታ ቦላ ዲዛ ካታማቲካ ሻሚሬ፥ ዬቲሬ፥ ሶኮ፥
JOS 15:49 ዳና፥ ቂሪያቴ-ሲና ዎይኮ ዳቢሬ፥
JOS 15:50 ኣናቤ፥ ኤሽታሞ፥ ኣኒሜ፥
JOS 15:51 ጎሼኔ፥ ሆሎኔኔ ጊሎ፤ ሄይቲ ታማኔ ኢሲኔቲ ኢስታ ካታማታኔ ኢስታ ጉታታ።
JOS 15:52 ቃሴ ኣራቤ፥ ዱማ፥ ኤሻኔ፥
JOS 15:53 ያኒሜ፥ ቤቲ-ታጱሄ፥ ኣፌቄ፥
JOS 15:54 ሁሚጻ፥ ኬብሮኔ ዎይኮ ቂሪያቴ-ኣርባኤኔ ጺኦሬ፤ ሄይቲ ኡዱፉናቲ ኢስታ ካታማታኔ ኢስታ ጉታታ።
JOS 15:55 ቃሴካ ማኦኔ፥ ቃርሜሎሴ፥ ዚፌ፥ ዩጻ፥
JOS 15:56 ኢዝራኤሌ፥ ዮቂዲኣሜ፥ ዛኖሄ፥
JOS 15:57 ቃይኔ፥ ጊቢኣኔ ቴሚና፤ ሄይቲ ታማቲ ኢስታ ካታማታኔ ኢስታ ጉታታ።
JOS 15:58 ቃሴ ሃሊሁሌ፥ ቤቲ-ጹሬ፥ ጋዶሬ፥
JOS 15:59 ማራቴ፥ ቤቲ-ኣኖቴኔ ኤልቲቆኔ፤ ሄይቲ ኡሱፑናቲ ኢስታ ካታማታኔ ኢስታ ጉታታ።
JOS 15:60 ሄሳꬆካ ቂሪያቴ-ዪኣሪሜ ጌቴቲዳራ ቂሪያቴ-ባኣሌኔ ኤራባ፤ ሄይቲ ናምኣቲ ኢስታ ካታማታኔ ኢስታ ጉታታ።
JOS 15:61 ባዞን ዲዛይቲ ሃይሳፌ ካሊዛይታ፤ ቤቲ-ኣራቤ፥ ሚዲና፥ ሲካካ፥
JOS 15:62 ኒቢሻኔ፥ ማጺኔ ካታማኔ ኤን-ጋዴ፤ ሄይቲ ኡሱፑናቲ ኢስታ ካታማታኔ ኢስታ ጉታታ።
JOS 15:63 ጊዶ ኣቲን ዩሁዳ ኣሳይ ዬሩሳላሜን ዲዛ ያቡሴታ ኢስቲ ዲዛሶፔ ኬሲ ጎዳና ዳንዳይቤቴና፤ ሄሳ ጊሻስ ያቡሴቲ ሃች ጋካናስካ ዩሁዳ ኣሳራ ኢሲፌ ዬሩሳላሜን ዴቴስ።
JOS 16:1 ዮሴፌ ዛሬታ ጋኪዳ ቢታይ ኢያርኮ ማታን ዮርዳኖሴ ሻፋፔ ዶሚዲ ኢያርኮ ፑልቶታፔ ኣርሼይ ሞኪዛ ባጋራ ባዞ ካንꬂዲ ጌዜቲዛ ቢታራ ኣꬊዲ ቤቴሌ ጋኬስ።
JOS 16:2 ሎዛ ጌቴቲዛ ቤቴሌፔ ዴንዲዲ ኣጻሮቴ ጌቴቲዛ ኣርኬታ ቢታ ጋኬስ።
JOS 16:3 ሄሳፌ ኣርሼይ ዉሊዛ ባጋራ ዲዛ ያፋሌጼታ ቢታ ዱጉንꬃ ዱጌ ቤቲ-ሆሮኔ ዎꬊዲ ጌዜሬራ ካንꬂ ቢዲ ጊታ ኣባን ጌሌስ።
JOS 16:4 ዮሴፌ ቆሞ ሚናሴ ዛሬቲኔ ኤፍሬሜ ዛሬቲ ባንታና ጋኪዛ ቢታ ላቲዳ።
JOS 16:5 ኤፍሬሜ ዛሬታ ኢስታ ዛርኬን ዛርኬን ጋኪዳ ቢታይ ሃይሳፌ ካሊዛይሳ፤ ኢስታ ዛዋይ ኣርሼይ ሞኪዛ ባጋራ ዲዛ ኣጻሮቴ-ኣዳሬፔ ቢዲ ጋና ቤቲ-ሆሮኔ ጋኬስ።
JOS 16:6 ሄፔ ቢዲ ዎጋ ኣባን ጌሌስ። ቃሴ ፑዴሃ ባጋራ ዲዛ ዛዋይ ሚኪማታቴፔ ኣርሼይ ሞኪዛሶ ባጋ ታናቴ-ሺሎራ ሚርቄቲ ሲሚዲ፥ ኣርሼይ ሞኪዛሶ ባጋራ ዲዛ ያኖኬ ጋኬስ።
JOS 16:7 ያኖኬፔ ዱጌ ኣጻሮቴኔ ናራቴ ዱጉንꬃ ዎꬊዲ ኢያርኮራ ካንꬂ ቢዲ ዮርዳኖሴ ሻፋን ጌሌስ።
JOS 16:8 ዛዋዚ ታጱሄፔ ኣርሼይ ዉሊዛ ባጋራ ቢዲ ቃና ሻፋራ ዎꬊ ቢዲ ሜዲቴራኔ ኣባን ጌሌስ። ኤፍሬሜ ዛሬቲ ባ ዛርኬን ዛርኬን ላቲዳ ቢታይ ሃይሳ።
JOS 16:9 ሄሲ ሚናሴ ዛሬታ ቢታፌ ኤፍሬሜ ዛሬታስ ኢሚዳ ካታማታኔ ኢስታ ጉታታ ኡባ ጋꬂ ኦይኪዴስ።
JOS 16:10 ሃይሲ ኡባይ ሃኒንካ ኤፍሬሜ ዛሬቲ ጌዜሬ ካታማን ዲዛ ካናኔ ኣሳታ ኬሲ ጎዲቤቴና። ካናኔ ኣሳቲ ሃች ጋካናስ ኤፍሬሜ ዛሬታራ ኢሲፌ ዴቴስ። ጊዶ ኣቲን ኤፍሬሜ ዛሬቲ ኢስታ ዎልቃራ ኦሲሴቴስ።
JOS 17:1 ሚናሴይ ዮሴፌስ ባይራ ና ጊዲዳ ጊሻስ ኢዛ ዛሬታ ሳማን ጋኪዳ ቢታይ ሃይሳፌ ካሊ ዲዛይሳ፤ ሚናሴስ ባይራ ናዚ ማኪሬይ ጋላኣዴታ ኣዋይ ሚኖ ኦላንቻ ጊዲዳ ጊሻስ ጋላኣዴይኔ ባሳኔይ ኢዛስ ጊሻ ጊዲዴስ።
JOS 17:2 ሄሳ ጊሻስ ሄ ቢታዚ ሃንኮ ኣቲዳ ሚናሴ ዛሬታስ ኣቢኤዜሬስ፥ ሄሌቄስ፥ ኣሲራኤሌስ፥ ሴኬሜስ፥ ሄፌሬስ፥ ሻሚዳስ ኢሜቲዴስ፤ ዮሴፌ ና ሚናሴ ዛርኬ ጊዲዳ ኣቱማቲ ሃይሳፌ ካሊ ዲዛይታ።
JOS 17:3 ጺሎፋዴይ ሄፌሬ ና፤ ሄፌሬይ ጋላኣዴ ና፤ ጋላኣዴይ ማኪሬ ና፤ ማኪሬይ ሚናሴ ና። ጺሎፋዴስ ማጫ ናይታፔ ኣቲን ኣቱማ ናይ ዴና፤ ኢዛ ማጫ ናይቲ ማሂሎ፥ ኖኦ፥ ሆጊሎ፥ ሚልኮኔ ቲርጾ ጌቴቴቴስ።
JOS 17:4 ኢስታ ቄሴ ኤልኤዜሬኮ፥ ናዌ ና ኢያሶኮኔ ሃላቃታኮ ሺቂዲ፥ «ኑኒ ኑ ኢሻታራ ጋዴ ጊሼቲ ኤካና ማላ ጎዳይ ሙሴ ኣዛዚዴስ» ጊዳ። ሄሳ ጊሻስ ጎዳይ ኣዛዚዳ ማላ ኢያሶይ ኢስታ ኣዋ ኢሻታሳራኔ ኢስታሳራ ጊሼቺ ኢሚዴስ።
JOS 17:5 ሚናሴስ ጋላኣዴፔኔ ባሳኔፔ ሃራሶን ታሙ ኬዚ ጊሼቲዛ ቢታይ ዮርዳኖሴፔ ኣርሼይ ሞኪዛ ባጋራ ዴስ።
JOS 17:6 ሚናሴ ዛሬታፔ ማጫ ናይቲካ ኣቱማ ናይታራ ኢሲፌ ቢታ ጊሼቲ ኤኪዳ ጊሻስ ጋላኣዴ ቢታይ ኣቲዳ ሚናሴ ዛሬታስ ጊዲዴስ።
JOS 17:7 ሚናሴ ዛሬታ ቢታ ዛዋይ ኣሴሬ ቢታፌ ዶሚዲ፥ ሴኬሜፔ ኣርሼይ ሞኪዛ ባጋራ ዲዛ ሚኪማታቴ ጋኬስ። ሄ ዛዋይ ሄሳፌ ቢዲ ዱጌሃ ባጋራ ካንꬂዲ ኤን-ታጱሄን ዲዛ ዴሬዛካ ጉጄስ።
JOS 17:8 ታጱሄ ቢታይ ሚናሴሳ፤ ጊዶ ኣቲን ሚናሴ ዛዋን ዲዛ ታጱሄ ካታማያ ካሴ ኤፍሬሜ ዛሬታሳ።
JOS 17:9 ሄሳፌ ካሊዲ ኢዛ ዛዋይ ቢዲ ቃና ሻፋን ጌሌስ። ሚናሴ ካታማታ ጊዶን ኤፍሬሜ ካታማቲካ ዴቴስ፤ ጊዶ ኣቲን ሚናሴ ዛዋይ ቃና ሻፋፔ ፑዴሃ ባጋራ ቢዲ ሜዲቴራኔ ኣባን ጌሌስ።
JOS 17:10 ዱጌሃ ባጋራ ዲዛ ቢታይ ኤፍሬሜሳ፤ ፑዴሃ ባጋራ ዲዛ ቢታይ ቃሴ ሚናሴሳ። ሚናሴ ቢታ ዛዋይ ቢዲ ሜዲቴራኔ ኣባ ጋኬስ፤ ፑዴሃ ባጋ ዛዋይ ኣሴሬ ጋኬስ፤ ኣርሼይ ሞኪዛ ባጋራ ዲዛ ዛዋይ ዪሳኮሬ ጋኬስ።
JOS 17:11 ዪሳኮሬ ቢታኒኔ ኣሴሬ ቢታን ቤቲ-ሻኣኔይ፥ ዪቢላኣሜይ፥ ዶሬ ኣሳይ፥ ኤን-ዶሬይ፥ ታኢናኬይኔ ማጊዶይ ባ ዩሾን ጉታታራ ኢሲፌ ሚናሴሳ፤ ሄꬓንꬆዚ ናፎቴ።
JOS 17:12 ጊዶ ኣቲን ሚናሴ ዛሬቲ ሄ ካታማታ ጾኒ ኦይካና ዳንዳይቤቴና። ጋሶይካ ካናኔ ኣሳይ ባ ኦይኪዳ ቢታ ዬዶኮ ጊ ሙርቲዳ ጊሻሳ።
JOS 17:13 ኢስራኤሌ ኣሳይ ሚኒዳ ዎዴ ካናኔ ኣሳታ ባንታስ ሃጋዚሲዳ ኣቲን ቢታፌ ኢስታ ኡባ ኬሲ ጎዲቤቴና።
JOS 17:14 ዮሴፌ ዛሬቲ ኢያሶ፥ «ጎዳይ ኑና ኣንጂን ኑኒ ቆዳን ጮራ ጊዲሺን ላታ ቢታ ሻኮን ኑስ ኣይስ ኢሲ ጊሻ ጻላ ኢማዲ?» ጊዳ።
JOS 17:15 ኢያሶይካ ኢስታስ፥ «ኢንቴ ጮራ ጊዲኮ ኤፍሬሜ ጌዜይ ፓሪዜቲኔ ኤራፋይሜቲ ዲዛ ቢታ ቢዲ ዎራ ኢንቴስ ቄጺቴ» ጊዴስ።
JOS 17:16 ዮሴፌ ዛሬቲ፥ «ጌዜ ቢታዚ ኑስ ጊዴና፤ ሄሳ ቦላካ ዴምባን ዲዛ ቤቲ-ሻኣኔኔ ሄ ሄራን ዲዛይቲ፥ ቃሴ ኢዝራኤሌ ሾባን ዲዛ ካናኔታስ ቢራታ ፓራ-ጋሬቲ ዴቴስ» ጊዳ።
JOS 17:17 ኢያሶይ ዛሪዲ ዮሴፌ ዛሬታስ ኤፍሬሜ ቆሞታሲኔ ሚናሴ ቆሞታስ፥ «ኢንቴ ጮራኔ ኬሂ ዎልቃማ፤ ኢንቴስ ኢሲ ጊሻ ጻላይ ጊዴና።
JOS 17:18 ሄሳ ጊሻስ ጌዜ ቢታይካ ኢንቴሳ፤ ቢዲ ቄጺቴ፤ ዉርሴꬃ ጋጻ ጋካናስ ዲዛይሲ ኢንቴስ ጊዳና፤ ካናኔታስ ቢራታ ፓራ-ጋሬቲ ዲኮካ፥ ኢስቲ ሚኖ ጊዲኮካ ኢንቴ ኢስታ ሄፔ ኬሳና» ጊዴስ።
JOS 18:1 ኢስራኤሌ ማባራይ ዉሪ ሴሎን ሺቂዳ፤ ጋይቶቴꬃ ዱንካኔ ሄን ቶኪዳ፤ ቢታያካ ጮኡ ጋዳ ኢስታስ ሃሬታዱስ።
JOS 18:2 ጊዶ ኣቲን ኢስራኤሌ ኣሳፔ ጋዴ ጊሻይ ጋኮንታ ኣቲዳ ላፑን ቆሞቲ ዴቴስ።
JOS 18:3 ሄሳ ጊሻስ ኢያሶይ ኢስራኤሌ ኣሳ፥ «ጎዳ ኢንቴ ኣዋታ ጾሳይ ኢንቴስ ኢሚዳ ቢታ ላቶንታ ኣይዴ ጋካናስ ኣዛሌቲ?
JOS 18:4 ኢሲ ኢሲ ቆሞፌ ሄꬑ ሄꬑ ኣሳታ ዶሪቴ። ቢታ ዩዪ ጼሊዲ ኢሲ ኢሲ ቆሞ ጋካናይሳ ታስ ጻፊ ኢማናይታ ታ ኪታና፤ ኢስቲካ ታኮ ሃ ሲሚ ያና።
JOS 18:5 ኢስቲ ሄ ቢታዮ ላፑን ኬሲ ሻካና። ዱጌሃ ባጋራ ዩሁዳይ፥ ፑዴሃ ባጋራ ዮሴፌይ ባስ ጺንጾ ሂስቲ ኦይካና።
JOS 18:6 ሃ ላፑን ኬዚ ሻኬቲዳ ቢታ ሃኖታ ጻፊዳፔ ጉዬ ታኮ ኤኪ ዪኮ ታኒ ጎዳ ኑ ጾሳ ሲንꬃን ኢንቴስ ሳማ ዬጋና።
JOS 18:7 ሌዌ ዛሬቲ ጾሳስ ኦꬂዛ ኦሶይ ኢስታስ ጺንጾ ጊዲዳ ጊሻስ ኢንቴናራ ኢስቲ ቢታ ጊሼቴቴና። ጋዴ ዛሬቲ፥ ኦሮቤሌ ዛሬቲኔ ሚናሴ ዛሬታፔ ባጋይ ዮርዳኖሴ ሻፋፔ ኣርሼይ ሞኪዛሶ ባጋራ ጎዳ ኣይሌ ሙሴይ ኢስታስ ኢሚዳ ቢታ ካሴቲ ላቲዳ» ጊዴስ።
JOS 18:8 ኣሳይ ቢታ ሃኖታ ፒልጊ ጼላናሲኔ ጻፋናስ ቡስ ዶሚሺን ኢያሶይ፥ «ቢዲ ቢታይ ሃኖታ ፒልጊ ጼሊዲ ፓቲ ጻፊዳፔ ጉዬ ሃ ታኮ ሲሚ ዪቴ። ሃይሳን ሴሎን ጎዳ ሲንꬃን ታ ኢንቴስ ሳማ ዬጋና» ጊዴስ።
JOS 18:9 ሄሳ ጊሻስ ኣሳይ ቢታ ዩዪ ጼሊዴስ፤ ካታማታራ ኢሲፌ ላፑን ኬሲ ሻኪዲ ጻꬃ ዋራቃታን ጻፊዳ፤ ሄሳፌ ጌዴ ኢያሶኮ ሴሎ ሲሚ ቢዳ።
JOS 18:10 ኢያሶይ ጎዳ ሲንꬃን ሴሎን ኢስታስ ሳማ ዬጊዴስ፤ ቢታዮ ኢስራኤሌ ኣሳስ ኢስታ ቆሞ ኬና ጊሼቺ ኢሚዴስ።
JOS 18:11 ኮይሮ ጊሻይ ቢኒያሜ ቆሞታ ኢስታ ዛርኬን ዛርኬን ጋኪዴስ። ሳማን ኢስታ ጋኪዳ ቢታይ ዲዛሶይ ዩሁዳ ዛሬታ ቢታፌኔ ዮሴፌ ዛሬታ ቢታፌ ጊዶን ጊዲሺን ሃይሳፌ ካሊዛይሳ፤
JOS 18:12 ፑዴሃ ባጋራ ኢስታ ዛዋይ ዮርዳኖሴ ሻፋፔ ዶሚዲ፥ ኢያርኮ ፑዱንꬃራ ኣꬊ ቢዲ ኣርሼይ ዉሊዛ ባጋራ ꬎቃ ቢታራ ኦይኪዲ ቤቲ-ኣዌኔራ ካንꬄስ።
JOS 18:13 ሄሳፌ ዱጌሃ ባጋራ ሎዛ ጌቴቲዛ ቤቴሌ ፑዱንꬃራ ካንꬂዲ ዱጌ ባጋራ ዲዛ ቤቲ-ሆሮኔፔ ዱጌሃ ባጋራ ዲዛ ዙማ ኣቻራ ካንꬂ ቢዲ ዱጌ ኣጻሮቴ-ኣዳሬ ጋኬስ።
JOS 18:14 ዱጌሃ ባጋራ ዲዛ ዛዋይ ቤቲ-ሆሮኔስ ሲንꬃ ባጋራ ዲዛ ዙምቡላፌ ዶሚዲ፥ ኣርሼይ ዉሊዛ ባጋራ ዱጌሃ ባጋ ሚርቄቲዲ ዩሁዳ ቆሞታ ካታማ ጊዲዳ ቂሪያቴ-ባኣሌ ዎይኮ ቂሪያቴ-ዪኣሪሜራ ካንꬂ ቤስ፤ ሄሲ ኣርሼይ ዉሊዛ ባጋስ ዛዋ።
JOS 18:15 ዱጌሃ ባጋራ ዛዋይ ቂሪያቴ-ዪኣሪሜፔ ዶሚዲ ኔፍቶ ፑልቶ ሃꬃራ ካንꬄስ።
JOS 18:16 ሄ ዛዋዚ ኤራፋይሜ ሾባፌ ፑዴሃ ባጋራ ዲዛ ሄኖሜ ና ሾባ ጊናራ ዲዛ ዙምቡላ ቶሆሶ ዎꬌስ፤ ሄፔ ያቡሴታ ካታማፔ ዱጌሃ ባጋራ ዲዛ ዱጉንꬃራ ሄኖሜ ዙሌ ዎꬊዲ ኤን-ሮጌሌራ ካንꬄስ።
JOS 18:17 ቃሴ ፑዴሃ ባጋ ሚርቄቲዲ ኤን-ሼሚሼራ ቢዲ ጌሊሎቴራ ካንꬄስ፤ ሄሳፌ ኣዱሚሜ ፑርዴ ጊናራ ዲዛ ኦሮቤሌ ና ቦሃኔ ሹቻኮ ዱጌ ዎꬌስ።
JOS 18:18 ሄሳፌ ቤቲ-ኣራቤ ፑዱንꬃራ ካንꬂዲ ዱጌ ኣራቤ ዎꬌስ።
JOS 18:19 ሄሳፌ ቃሴ ቤቲ-ሆጊሌ ፑዱንꬃፌ ፑዴሃ ባጋራ ካንꬂዲ፥ ዮርዳኖሴ ሻፋይ ጎጊ ጌሊዛሶ ማጺኔ ኣባፌ ጋና ባጋ ጋጻ ጋኬስ። ሄሲ ዱጌሃ ባጋስ ዛዋ።
JOS 18:20 ኣርሼይ ሞኪዛሶ ባጋራ ዮርዳኖሴ ሻፋይ ዛዋ። ቢኒያሜ ዛሬቲ ላቲዳ ቢታ ኡባሲካ ዛዋቲ ሄይታንታ።
JOS 18:21 ቢኒያሜ ዛሬቲ ባ ዛርኬን ዛርኬን ኤኪዳ ካታማቲ ኢያርኮ፥ ቤቲ-ሆጊሌ፥ ኣሜቅ-ኬጺጼ፥
JOS 18:22 ቤቲ-ኣራቤ፥ ዛማራይሜ፥ ቤቴሌ፥
JOS 18:23 ኣዊሜ፥ ፓራ፥ ኦፊራ፥
JOS 18:24 ካፌር-ኣሞናዬ፥ ኦፊናኔ ጌባ። ሃይቲ ባንታ ጉታታራ 12 ካታማታ።
JOS 18:25 ቃሴ ጌባኦኔ፥ ኤራማ፥ ቢኤሮቴ፥
JOS 18:26 ሚጺጳ፥ ካፊሬ፥ ሞጻ፥
JOS 18:27 ኤሬቄሜ፥ ዪርጲኤላ፥ ቴራላ፥
JOS 18:28 ጼላ፥ ሄሌፋ፥ ያቡሴታ ካታማ ዬሩሳላሜ፥ ጊቢኣኔ ቂሪያቴ-ዪኣሪሜ። ሃይቲ ባንታ ጉታታራ 14 ካታማታ። ቢኒያሜ ቆሞቲ ባንታ ዛርኬን ዛርኬን ላቲዳ ቢታይ ሃይታ።
JOS 19:1 ናምኣንꬆ ሳማይ ሲሞና ቆሞታ ኢስታ ዛርኬን ዛርኬን ጋኪዴስ። ኢስታ ጋኪዳ ቢታይ ዩሁዳ ቆሞቲ ላቲዳ ቢታይ ኢስቲ ላቲዳ ቢታ ጊዶꬂ ኡቲዴስ።
JOS 19:2 ኢስቲ ላቲዳ ካታማቲ ቤርሳቤሄ፥ ሼባኤ፥ ሞላዴ፥
JOS 19:3 ሃጻሬ-ሹኣሌ፥ ባላ፥ ኤጼሜ፥
JOS 19:4 ኤልቶላዴ፥ ባቱሌ፥ ሆርማ፥
JOS 19:5 ጺጊላጌ፥ ቤቲ-ማርካቦቴ፥ ሃጻሬ-ሱሳ፥
JOS 19:6 ቤቲ-ላባኦቴኔ ሻሩሄኔ። ሄይቲ ኡባይ 13 ካታማታኔ ኢስታ ዩሾን ዲዛ ጉታታ።
JOS 19:7 ቃሴ ኣዪኔ፥ ኣርሞኔ፥ ኤቴሬኔ ኣሻኔ ጌቴቲዛ ኦይዱ ካታማታኔ ኢስታ ዩሾን ዲዛ ጉታታ።
JOS 19:8 ባኣላቴ-ባኤሬ ዎይኮ ኔጌቤን ዲዛ ኣራማቴሜ ጋካናስ ዲዛ ካታማታ ዩሾን ዲዛ ጉታታ ኡባ ላቲዳ። ሲሞና ቆሞቲ ባ ዛርኬን ዛርኬን ጊሼቲ ኤኪዳ ቢታቲ ሄይታንታ።
JOS 19:9 ዩሁዳ ቆሞቲ ኦይኪዳ ጺንጾይ ኬሂ ኣኮ ጊዲዳ ጊሻስ ሲሞና ቆሞታስ ጺንጾ ጊዲ ኢሜቲዴስ፤ ሄሳ ጊሻስ ሲሞና ቆሞቲ ዩሁዳ ቆሞታ ጊሻፔ ጊሼቲ ኤካና ዳንዳይዳ።
JOS 19:10 ሄꬓንꬆ ሳማይ ዛቢሎኔ ቆሞታስ ኢስታ ዛርኬን ዛርኬን ጋኪዴስ። ኢስቲ ላቲዳ ቢታ ዛዋይ ሳሪዴ ጋኬስ።
JOS 19:11 ቃሴ ሄሳፌ ቢዲ ኣርሼይ ዉሊዛሶራ ማራላ ባጋራ ካንꬂ ቤስ፤ ዳባሼቴ ማታራ ዮቂናኣሜ ኣቻን ዲዛ ሻፋን ቢ ጌሌስ።
JOS 19:12 ሃራ ባጋራ ቃሴ ሳሪዴ ካታማፔ ኣርሼይ ሞኪዛሶ ባጋ ሲሚዲ ኪሲሎቴ-ታቦሬራ ካንꬂ ቢዲ ዳቢራቴራ ጌዴ ያፊኣ ቤስ።
JOS 19:13 ሄራ ጌዴ ኣርሼይ ሞኪዛ ባጋራ ጌት-ሄፌሬኔ ኤቲ-ቃጺኔ ካንꬂ ቤስ፤ ሄፔካ ጌዴ ኣርሞኔ ጋኪዲ ኒኣ ባጋ ሚርቄቴስ።
JOS 19:14 ፑዴሃ ባጋራ ሃናቶኔ ሲሚዲ ዪፍታሂኤሌ ሾባን ጋኪ ኤቄስ።
JOS 19:15 ቃሴካ ቃጻቴ፥ ናሂላሌ፥ ሺሚሮኔ፥ ኢዳሌኔ ቤቴሊሄሜ ጌቴቲዛ ካታማቲካ ዴቴስ። ኢስቲ ዉሪ 12፤ ኢስታ ዩሾን ዲዛ ጉታቲካ ኢስታን ጉጄቴቴስ።
JOS 19:16 ሃይቲ ዛቢሎኔ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ።
JOS 19:17 ኦይዳንꬆ ሳማይ ዪሳኮሬ ቆሞታ ኢስታ ዛርኬን ዛርኬን ጋኪዴስ።
JOS 19:18 ኢስታ ቢታቲ ሃይሳፌ ካሊዛይታ፤ ኢዝራኤሌ፥ ካሱሎቴ፥ ሱኔሜ፥
JOS 19:19 ሃፋራኢሜ፥ ሺኦኔ፥ ኣናሃራቴ፥
JOS 19:20 ኤራቢቴ፥ ቂሶኔ፥ ኣቤጼ፥
JOS 19:21 ኤሬሜቴ፥ ኤን-ጋኒሜ፥ ኤን-ሃዳኔ ቤቲ-ጳጼጼ።
JOS 19:22 ሄ ቢታታ ዛዋይ ታቦሬ፥ ሻሃጹሜኔ ቤቲ-ሼሚሼ ቦቺ ቢዲ፥ ዮርዳኖሴ ሻፋን ጌሌስ። ኢስቲ ኡባይ ታማኔ ኡሱፑን ካታማታ፤ ኢስታ ዩሾን ዲዛ ጉታቲካ ኢስታን ጉጄቴቴስ።
JOS 19:23 ሃይቲ ዪሳኮሬ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ።
JOS 19:24 ኢቻሻንꬆ ሳማይ ኣሴሬ ቆሞታ ኢስታ ዛርኬን ዛርኬን ጋኪዴስ።
JOS 19:25 ኢስታ ቢታቲ ሃይሳፌ ካሊዛይታ ሄልቃቴ፥ ሃሌ፥ ቤጼኔ፥ ኣኪሻፌ፥
JOS 19:26 ኣላሜሌኬ፥ ኣማዴኔ ሚሻሌ። ኣርሼይ ዉሊዛሶ ባጋራ ቃርሜሎሴራኔ ሺሆሬ-ሊቢናቴራ ዛዋቴስ።
JOS 19:27 ቃሴ ኣርሼ ኬሳሶ ባጋ ሲሚ ቤቲ-ዳጎኔኮ ሚርቄቲዲ፥ ዛቢሎኔ ቢታኔ ዪፍታሂኤሌ ሾባራ ካንꬂ ቢዲ ካቡሌ ሃዲርሳ ቦላ ዬጊዲ ፑዴሃ ባጋራ ቤቲ-ኤሜቄኔ ናኢኤሌ ቤስ።
JOS 19:28 ሄሳፌ ቃሴ ኤቢሮኔ፥ ኤራሆቤ፥ ሃሞኔኔ ቃና ፑዱንꬃ ኬዚዲ ጊታ ሲዶና ጋኬስ።
JOS 19:29 ዛዋይ ኤራማ ሲሚዳፔ ጊምቤቲዳ ጺሮሴ ካታማኮ ሚርቄቲ ጌዴ ሆሳ ሲሚዲ ኣኪዚቤ ባጋራኔ ማሂሌቤ ጌዴ ሜዲቴራኔ ኣባን ጋኪ ጌሌስ።
JOS 19:30 ሄን ኡማ፥ ኣፌቄኔ ኤራሆቤ ጌቴቲዛ ካታማቲካ ዴቴስ። ኢስቲ ኡባይ 22፤ ኢስታ ዩሾን ዲዛ ጉታቲካ ኢስታን ጉጄቴቴስ።
JOS 19:31 ሃይቲ ኣሴሬ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ።
JOS 19:32 ኡሱፑንꬃ ሳማይ ኒፍታሌሜ ቆሞታ ኢስታ ዛርኬን ዛርኬን ጋኪዴስ።
JOS 19:33 ኢስታ ዛዋይ ሄሌፌፔኔ ዛናኒሜን ዲዛ ጊታ ዎላፔ ዶሚዲ ኣዳሜ-ኔቄቤ፥ ያቢንኤሌኔ ላቁሜ ካንꬂ ቢዲ ዮርዳኖሴ ሻፋ ጌሌስ።
JOS 19:34 ዛዋዚካ ኣርሼይ ዉሊዛ ባጋራ ኣዚኖቴ-ታቦሬኮ ሚርቄቴስ፤ ሄሳፌ ቃሴ ሁቆቄ ሲሚዲ ዱጌሃ ባጋራ ዛቢሎኔ ቢታኒኔ ኣርሼይ ጌሊዛ ባጋራ ኣሴሬ ቢታን ዛዋቲዲ ኣርሼይ ኬዚዛ ባጋራ ዮርዳኖሴ ሻፋን ጌሌስ።
JOS 19:35 ጊምቤቲዳ ካታማቲካ ጺዲሜ፥ ጼራ፥ ሃማቴ፥ ኤራቃቴ፥ ኪኔሬቴ፥
JOS 19:36 ኣዳማ፥ ኤራማ፥ ሃጾሬ፥
JOS 19:37 ቃዴሴ፥ ኤዲራኤ፥ ኤን-ሃጾሬ፥
JOS 19:38 ዪሮኔ፥ ሚጊዳልኤሌ፥ ሆሬሜ፥ ቤቲ-ኣናቴኔ ቤቲ-ሼሚሼ። ኢስቲ ዉሪ 19፤ ኢስታ ዩሾን ዲዛ ጉታቲካ ኢስታን ጉጄቴቴስ።
JOS 19:39 ሃይቲ ኒፍታሌሜ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ኢስታ ዩሾን ዲዛ ጉታታ።
JOS 19:40 ላፑንꬆ ሳማይ ዳኔ ቆሞታ ኢስታ ዛርኬን ዛርኬን ጋኪዴስ።
JOS 19:41 ኢስቲ ላቲዳ ቢታቲ ጾራኣ፥ ኤሽታኦሌ፥ ኢር-ሼሜሼ፥
JOS 19:42 ሻኣልቢኔ፥ ኣያሎኔ፥ ዪታላ፥
JOS 19:43 ኤሎኔ፥ ቴሚና፥ ኣቃሮኔ፥
JOS 19:44 ኤልቴቄ፥ ጋባቶኔ፥ ባኣላቴ፥
JOS 19:45 ዩሁዳ፥ ባኔ-ባራቄ፥ ጌት-ኤርሞኔ፥
JOS 19:46 ሜያርቆኔ፥ ኤራቆኔኔ ዮጴ ካታማ ዩሾን ዲዛ ሄራታ ኡባ ኦይኬስ።
JOS 19:47 ጊዶ ኣቲን ዳኔ ቆሞታስ ኢሜቲዳ ጺንጾይ ኢስታስ ጊዶንታ ኣጊዳ ጊሻስ ላይሻ ካታማ ኦሊ ኦይኪዳ፤ ሄ ካታማን ዲዛ ኣሳ ጊꬃ ማሻን ሲፊ ዉርሲዲ ካታማ ባስ ኤኪዲ ሄን ኡቲዳ። ሄ ካታማ ሱንꬃካ ላሚዲ ባ ኣዋ ዳኔ ሱንꬃን ጼይጊዳ።
JOS 19:48 ሃይቲ ዳኔ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ።
JOS 19:49 ኢስራኤሌ ኣሳይ ባንታና ጋኪዳ ቢታ ኤኪዳፔ ጉዬ ናዌ ና ኢያሶስ ባንታ ቢታፌ ጺንጾ ጋዴ ኢሚዳ፤
JOS 19:50 ጎዳይ ኣዛዚዳ ማላኔ ኢያሶይ ኮይዛ ማላ ኤፍሬሜ ጌዜ ዴሬን ዲዛ ቴሚናቴ-ሴራሃ ጌቴቲዛ ካታማ ኢዛስ ኢሚዳ። ኢዚካ ካታማዮ ሎኤꬂዲ ባስ ዱሳሶ ኦꬂዴስ።
JOS 19:51 ቄሴ ኤልኤዜሬይ፥ ናዌ ና ኢያሶይኔ ኢስራኤሌ ቆሞታ ኮራፒኔቲ ሴሎን ጋይቶቴꬃ ዱንካኔዛ ፔንጌን ጎዳ ሲንꬃን ሳማ ዬጊዲ ጊሺዳ ጺንጾ ቢታይ ሃይሳ። ኢስቲ ቢታ ጊሼሬꬂ ጊጊዳ።
JOS 20:1 ሄሳፌ ጉዬ ጎዳይ ኢያሶ፥
JOS 20:2 «ታኒ ሙሴ ባጋራ ዮቲዳ ማላ ኣሲ ባቃቲ ኣቲዛ ካታማታ ሻካና ማላ ኢስራኤሌ ኣሳስ ዮታ፤
JOS 20:3 ኣይ ኣሲካ ኤሮንታኔ ኣኬኮንታ ኣስ ዎꬊኮ ሄ ባቃቲ ቢዲ ሱꬃ ኣጮፔ ኣታና።
JOS 20:4 ኣስ ዎꬊዳይ ሄ ካታማታፔ ኢሳኮ ባቃቲ ቢዲ ካታማ ጌሊዛ ፔንጌን ኤቂዲ፥ ሃኒዳይሳ ሄ ካታማ ጪማታስ ዮቶ። ኢስቲካ ባንታ ካታማ ኤፊዲ ኢዚ ዴኣናሶ ኢሚኮ ኢዚ ኢስታራ ሄን ዴኦ።
JOS 20:5 ሱꬅ ኣዛራና ኮይዛይ ኢዛ ካሊዲ ዪኮ ሄ ካታማ ጪማቲ ኢዛ ኣꬂ ኢሞፌቶ። ጋሶይካ ባ ሾሮዛ ኢዚ ኦዲ ሞርኬቴꬃ ጊሻስ ዎꬊቤና።
JOS 20:6 ዴራ ሲንꬃን ፒርዳስ ኢዚ ኤቃና ጋካናሲኔ ሄ ዎዴን ዲዛ ቄሴታ ሃላቃይ ሃይቃና ጋካናስ ሄ ካታማን ዴኦ። ሄሳፌ ጉዬ ባቃቲዲ ኬዚዳ ካታማ ጉዬ ሲሚዲ ባ ሶ ጌሎ» ጊዴስ።
JOS 20:7 ሂስቲን ኢስራኤሌ ኣሳይ ኒፍታሌሜ ጌዜ ዴሬ፥ ጋሊላን ዲዛ ቃዴሴ፥ ኤፍሬሜ ጌዜ ዴሬን ዲዛ ሴኬሜን ዲዛ ሻራ ሜንꬆ ቦላኔ ዩሁዳን ሻራ ሜንꬆን ዲዛ ቂሪያቴ-ኣርባኤ ዎይኮ ኬብሮኔ ዱማሲዳ።
JOS 20:8 ዮርዳኖሴ ሻፋፔ ሄ ፒንꬃን፥ ኢያርኮፌ ኣርሼይ ሞኪዛ ባጋራ ኦሮቤሌ ቆሞታ ጺንጾ ጊዶን ባዞን ꬎቃሶ ቦላ ዲዛ ባጺራ፥ ጋዴ ቆሞታ ጺንጾፌ ጋላኣዴን ዲዛ ኤራሞቴኔ ሚናሴ ቆሞታ ጺንጾፌ ባሳኔን ዲዛ ጎላኔ ዱማሲዳ።
JOS 20:9 ኢስራኤሌ ኣስ ኡባሲኔ ኢስታ ጊዶን ዲዛ ቤቴታስ ዱማሲዳ ካታማቲ ሃይታ፤ ኤሮንታ ዲሼ ኣስ ዎꬊዳ ኣይ ኣሲካ ዴራ ሲንꬃን ኤቃና ጋካናስ ሱꬅ ኣዛራና ኮይዛዴ ኩሼን ሃይቆንታ ማላ ሄ ካታማታፔ ኢሳኮ ባቃታናስ ዳንዳዬስ።
JOS 21:1 ሌዌ ዛርኬታ ካሌꬂዛይቲ ቄሴ ኤልኤዜሬኮ፥ ናዌ ና ኢያሶኮኔ ኢስራኤሌ ዛሬታ ኣዋታኮ ሺቂዳ።
JOS 21:2 ካናኔ ቢታን ዲዛ ሴሎን ኢስታስ፥ «ኑኒ ዴኣና ካታማታኔ ኑ ሜሄ ሄንꬃሶሆታ ኢንቴ ኑስ ኢማና ማላ ጎዳይ ካሴ ሙሴ ባጋራ ኣዛዚ ዎꬂዴስ» ጊዳ።
JOS 21:3 ሂስቲን ጎዳይ ኣዛዚዳ ማላ ኢስራኤሌ ኣሳይ ሌዌ ቆሞታስ ባ ላቲዳ ጺንጾታፔ ሃ ካታማታኔ ሜሄ ሄንꬃሶሆታ ቃንጺ ኢሚዳ።
JOS 21:4 ኮይሮ ሳማይ ቃኣቴ ዜሬꬃታስ ኢስታ ዛርኬን ዛርኬን ኬዚዴስ። ቄሴ ኣሮኔ ዛሬ ጊዲዳ ሌዌታስ ዩሁዳፔ፥ ሲሞናፔኔ ቢኒያሜ ቆሞታፔ 13 ካታማቲ ሳማን ጋኪዳ።
JOS 21:5 ሃንኮ ኣቲዳ ቃኣቴ ዜሬꬃታስ ኤፍሬሜፔ፥ ዳኔፔኔ ሚናሴስ ባጋ ቆሞታፔ 10 ካታማቲ ሳማን ጋኪዳ።
JOS 21:6 ጌርሾኔ ዜሬꬃታስ ዪሳኮሬፔ፥ ኣሴሬፔ፥ ኒፍታሌሜፔኔ ባሳኔን ዲዛ ሚናሴስ ባጋ ቆሞታፔ 13 ካታማቲ ሳማን ጋኪዳ።
JOS 21:7 ሜራሬ ዜሬꬃታስ ኢስታ ዛርኬን ዛርኬን ኦሮቤሌፔ፥ ጋዴፔኔ ዛቢሎኔ ቆሞታፔ 10 ካታማቲ ሳማን ጋኪዳ።
JOS 21:8 ጎዳይ ሙሴ ባጋራ ኣዛዚዳ ማላ፥ ኢስራኤሌ ኣሳይ ሃ ካታማታኔ ሜሄ ሄንꬃሶሆታ ሌዌታስ ሳማን ኢሚዳ።
JOS 21:9 ዩሁዳፔኔ ሲሞና ቆሞታፔ ሃይሳፌ ካሊ ዲዛ ካታማታ ሳማን ጋꬂዳ።
JOS 21:10 ኮይሮ ሳማይ ሌዌ ቆሞ ቃኣቴፔ ዬሌቲዳ ኣሮኔ ዛሬታስ ኬዚን ኢስታስ ኢሜቲዳ ካታማቲ ሃይሳፌ ካሊዛይታ።
JOS 21:11 ሄይቲካ ዩሁዳ ቢታን ጌዜቲዛሶን ዲዛ ኬብሮኔ ጌቴቲዛ ቂሪያቴ-ኣርባኤኔ ኢዛ ዩሾን ዲዛ ሜሄ ሄንꬃሶሆታ ኢስታስ ኢሚዳ። (ኣርባኤይ ኤናቄ ኣዋ።)
JOS 21:12 ጊዶ ኣቲን ሄ ካታማ ዩሾን ዲዛ ሜሄ ሄንꬃሶሆታኔ ሞꬃታ ዮፊኔ ና ካሌቤስ ጺንጾ ሂስቲ ኢሚዳ።
JOS 21:13 ቄሴ ኣሮኔ ዛሬታስ ኣስ ዎꬊዳ ኣሲ ባቃቲ ቢዲ ኣቲዛ ኬብሮኔኔ ሊቢና ካታማታ ኢስታ ሜሄ ሄንꬃሶሆራ ኢሲፌ ጋꬂ ኢሚዳ።
JOS 21:14 ዬቲሬኔ ኤሽታሞኣ፥
JOS 21:15 ሆሎኔኔ ዳቢሬ፥
JOS 21:16 ኣዪኔ፥ ዩጻ፥ ቤቲ-ሼሚሼኔ ኢስታ ሜሄ ሄንꬃሶሆራ ኢሲፌ ጋꬂ ኢሚዳ። ሃይቲ ኡዱፉን ካታማቲ ዩሁዳ ቆሞታፔኔ ሲሞና ቆሞታ ጺንጾፌ ጊሼቲ ኢሜቲዳይታ።
JOS 21:17 ቢኒያሜ ቆሞታፔ ጌባኦኔ፥ ጌባ፥
JOS 21:18 ኣናቶቴ፥ ኣልሞኔ ጌቴቲዛ ኦይዱ ካታማታኔ ኢስቲ ሜሄ ሄሚዛሶሆራ ኢሲፌ ጋꬂ ኢሚዳ።
JOS 21:19 ቄሴ ኣሮኔ ዜሬꬃታስ ሜሄ ሄንꬃሶሆራ ኢሲፌ ጋꬂዲ 13 ካታማታ ኢሚዳ።
JOS 21:20 ሃንኮ ኣቲዳ ሌዌ ና ቃኣቴ ዛሬታስ ኤፍሬሜ ቆሞታፔ ሃይሳፌ ካሊ ዲዛይሲ ሳማን ጋኪዴስ።
JOS 21:21 ኤፍሬሜ ጌዜ ዴሬን ዲዛ ኣስ ዎꬊዳ ኣሲ ባቃቲ ቢዲ ኣቲዛሶ ሴኬሜኔ ጌዜሬ፥
JOS 21:22 ቂቢጻይሜ፥ ቤቲ-ሆሮኔኔ ኢስታ ሜሄ ሄንꬃሶሆራ ኢሲፌ ጋꬂዲ 4 ካታማታ ኢሚዳ።
JOS 21:23 ዳኔ ቆሞታፔ ኤልቴቄ፥ ጋባቶኔ፥
JOS 21:24 ኣያሎኔ፥ ጌት-ኤርሞኔኔ ኢስታ ሜሄ ሄንꬃሶሆራ ኢሲፌ ጋꬂ 4 ካታማታ ኢሚዳ።
JOS 21:25 ሚናሴ ቆሞታስ ባጋታፔ ታኢናኬ፥ ጌት-ኤርሞኔ ሜሄ ሄንꬃሶሆታራ ኢሲፌ ጋꬂ 2 ካታማታ ኢሚዳ።
JOS 21:26 ሃይቲ 10 ካታማቲ ኡባይ ሜሄ ሄንꬃሶሆታራ ኢሲፌ ሃንኮ ኣቲዳ ቃኣቴ ዛሬታስ ኢሜቲዴስ።
JOS 21:27 ሚናሴ ዛሬታ ባጋታፔ ኣስ ዎꬊዳ ኣሲ ባቃቲ ቢዲ ኣቲዛ፥ ባሳኔን ዲዛ ጎላኔ ካታማ ሜሄ ሄንꬃሶሆራ ባኤሽቲራ ሜሄ ሄንꬃሶሆራ፥ ናምኡ ካታማታ ኡባ ኤኪዲ፥ ጌርሾኔ ዛሬ ጊዲዳ ሃራ ሌዌታስ ኢሚዳ።
JOS 21:28 ዪሳኮሬ ዛሬታፔ ቂሶኔ ሜሄ ሄንꬃሶሆራ፥ ዳቢራቴ ሜሄ ሄንꬃሶሆራ፥
JOS 21:29 ያርሙቴ ሜሄ ሄንꬃሶሆራ፥ ኤን-ጋኒሜ ሜሄ ሄንꬃሶሆራ፥ ኦይዱ ካታማታ ኡባ ኤኪዲ ኢሚዳ።
JOS 21:30 ኣሴሬ ዛሬታፔ ሚሻሌ ሜሄ ሄንꬃሶሆራ፥ ኣብዶኔ ሜሄ ሄንꬃሶሆራ፥
JOS 21:31 ሄልቃቴ ሜሄ ሄንꬃሶሆራኔ ኤራሆቤ ሜሄ ሄንꬃሶሆራ፥ ኦይዱ ካታማታ ኡባ ኤኪዲ ኢሚዳ።
JOS 21:32 ሄሳꬆካ ኒፍታሌሜ ዛሬታፔ ኣስ ዎꬊዳ ኣሲ ባቃቲ ቢዲ ኣቲዛ ጋሊላን ዲዛ ቃዴሴ ሜሄ ሄንꬃሶሆራ፥ ሃሞቲ-ዶሬ ሜሄ ሄንꬃሶሆራ፥ ቃርታ ሜሄ ሄንꬃሶሆራ፥ 3 ካታማታ ኡባ ኤኪዲ ኢስታስ ኢሚዳ።
JOS 21:33 ጌርሾኔ ዛሬታ ካታማቲኔ ኢስታ ሜሄታ ሄንꬃሶሆቲ ኡባይ ታማኔ ሄꬓ።
JOS 21:34 ኣቲዳ ሜራሬ ዛሬ ጊዲዳ ሌዌታስ ኢሜቲዳ ቢታቲ ዛቢሎኔ ዛሬታፔ ዮቂናኣሜ ሜሄ ሄንꬃሶሆራ፥ ቃርታ ሜሄ ሄንꬃሶሆራ፥
JOS 21:35 ዲሚና ሜሄ ሄንꬃሶሆራ፥ ናሂላሌ ሜሄ ሄንꬃሶሆራ፥ ኦይዱ ካታማታ ኡባ ኤኪዲ ኢሚዳ።
JOS 21:36 ኦሮቤሌ ዛሬታፔ ባጺራኔ ሜሄ ሄንꬃሶሆታ፥ ያሃጼኔ ሜሄ ሄንꬃሶሆታ፥
JOS 21:37 ቂዲሞቴኔ ኢዚ ሜሄ ሄንꬃሶሆታ፥ ሜፋኣቴኔ ሜሄ ሄንꬃሶሆታ፥ ሃይታ ኦይዱ ካታማታ ኡባ ኤኪዲ ኢስታስ ኢሚዳ።
JOS 21:38 ቃሴ ጋዴ ዛሬታፔ ኣስ ዎꬊዳ ኣሲ ባቃቲ ቢዲ ኣቲዛ፥ ጋላኣዴን ዲዛ ኤራሞቴ ሜሄ ሄንꬃሶሆራ፥ ማሃናይሜ ሜሄ ሄንꬃሶሆራ፥
JOS 21:39 ሃሴቦኔ ሜሄ ሄንꬃሶሆራ፥ ኢያዜሬ ሜሄ ሄንꬃሶሆራ፥ ሃይታ ኦይዱ ካታማታ ኡባ ኤኪዲ ኢስታስ ኢሚዳ።
JOS 21:40 ሜራሬይ ዛሬ ጊዲዳ ሃራ ሌዌታስ ጊሻን ጋኪዳ ካታማቲ ኡባይ ታማኔ ናምኣ።
JOS 21:41 ኢስራኤሌ ኣሳይ ላቲዳ ቢታን ዲዛ ሌዌታስ ኢሜቲዳ ካታማቲ ኢስታ ሜሄ ሄንꬃሶሆራ ኡባይ ኢሲ ቦላ ኦይዱ ታማኔ ኦስፑና።
JOS 21:42 ሄ ካታማታ ኡባ ዩሾን ሜሄ ሄሚዛሶሆቲ ዴቴስ። ሜሄ ሄሚዛሶሆይ ባይንዳ ካታማይ ዴና።
JOS 21:43 ሄሳꬆ ኦꬂዲ ጎዳይ ኢስታ ኣዋታስ ኢማናስ ጫቂዳ ቢታ ኡባ ኢስራኤሌ ኣሳስ ኢሚዴስ፤ ሂስቲን ኢስቲ ላቲዲ ሄን ዴኢዳ።
JOS 21:44 ጎዳይ ኢስታ ኣዋታስ ጫቂዳ ማላ ኢስታ ዩሾን ዲዛ ኡባታፔ ኢስታ ሼምፒሲዴስ። ጎዳይ ኢስታ ሞርኬታ ኡባ ኢስታስ ኣꬂ ኢሚዳ ጊሻስ ኢስታ ሞርኬታፔ ኢሶይካ ኢስታራ ኤቄታናስ ዳንዳይቤና።
JOS 21:45 ጎዳይ ኢስራኤሌ ኣሳስ ኢማና ጊዳ ሎኦ ቃላ ኡባ ፖሊዴስ ኣቲን ኢሶይኔ ሳኣን ዎꬊ ኣቲቤና።
JOS 22:1 ሄሳፌ ጉዬ ኢያሶይ ኦሮቤሌ ቆሞታ፥ ጋዴ ቆሞታኔ ሚናሴ ቆሞታፔ ባጋታ ጼይጊዴስ።
JOS 22:2 ሂስቲዲ፥ «ጎዳ ኣይሌ ሙሴይ ኢንቴና ኣዛዚዳይሳ ኡባ ናጊዴታ፤ ቃሴ ታኒካ ኣዛዚዳይሳ ሙሌራ ፖሊዴታ።
JOS 22:3 ዳሮ ዎዴፔ ዶሚዲ ሃች ጋካናስ ኢንቴ ኢንቴ ኢሻታ ዬጊቤኬታ፤ ጎዳ ኢንቴ ጾሳይ ኢንቴስ ኢሚዳ ሃዳራ ፖሊዴታ።
JOS 22:4 ሄኮ ጎዳ ኢንቴ ጾሳይ ኢንቴስ ኢሚዳ ሂዶታ ቃላ ማላ ኢንቴ ኢሻታ ሼምፒሲዴስ። ሄሳ ጊሻስ ጎዳ ኣሽካራ ሙሴይ ኢንቴስ ዮርዳኖሴ ሻፋፔ ሄ ፒንꬃን ኢሚዳ ላታ ቢታን ዲዛ ኢንቴ ሶ ሶ ሲሚቴ።
JOS 22:5 ጎዳ ኣይሌ ሙሴይ ኢንቴና ኣዛዚዳ ኣዛዞዛኔ ዎጋ ኢንቴ ናጊቴ። ጎዳ ኢንቴ ጾሳ ሲቂቴ፤ ኢዛ ኦጌታ ኡባን ሲሜሬቲቴ፤ ኢዛ ኣዛዞታ ፖሊቴ፤ ኢዛካ ሚንꬂ ኦይኪቴ፤ ኢንቴ ኩሜꬃ ዎዚናፔኔ ኩሜꬃ ሼምፖፌ ኢዛስ ኦꬃና ማላ ኢዚ ኢሚዳ ኣዛዞታኔ ዎጋታ ሚንꬂ ናጊቴ» ጊዴስ።
JOS 22:6 ሄሳፌ ጉዬ ኢያሶይ ኢስታ ኣንጂ ዬዲን ኢስቲካ ባንታ ሶ ሶ ሲሚ ቢዳ።
JOS 22:7 ሙሴይ ሚናሴ ቆሞፌ ባጋታስ ባሳኔ ቢታን ጺንጾ ኢሚዴስ፤ ሃንኮ ኣቲዳ ባጋታስ ኢያሶይ ዮርዳኖሴፔ ኣርሼይ ዉሊዛ ባጋፌ ኢስታ ኢሻታ ጊዶን ኢስታስ ጺንጾ ኢሚዴስ። ኢያሶይ ኢስታ ባንታ ሶ ሶ ሲማና ማላ ሞይዚዛ ዎዴ ኢስታ ኣንጂሼ፥
JOS 22:8 «ቤኢቴ፥ ኢንቴ ሃኢ ዳሮ ኣቆታ ኤኪዲ፥ ዳሮ ሜሄ ዉዴ፥ ቢራ፥ ዎርቃ፥ ጻርቂማላ፥ ቢራታኔ ዳሮ ማይኦ ኤኪዲ ኢንቴ ሶ ሲሚቴ። ሄሳ ጊሻስ ኢንቴ ሞርኬታፔ ዲኤቲዳይሳ፥ ኢንቴ ኢሻታራ ጊሼቲ ኤኪቴ» ጊዴስ።
JOS 22:9 ሄሳ ጊሻስ ኦሮቤሌ ቆሞቲኔ ጋዴ ቆሞቲ ሄሳꬆካ ሚናሴ ቆሞፌ ባጋቲ ኢስራኤሌ ኣሳ ካናኔን ዲዛ ሴሎን ኣጊዲ ካሴ ሙሴ ባጋራ ጎዳ ኣዛዞን ላታ ኤኪዳ ጺንጾን ጋላኣዴ ሲሚ ቢዳ።
JOS 22:10 ኦሮቤሌ ቆሞቲ፥ ጋዴ ቆሞቲኔ ሚናሴ ቆሞታፔ ባጋቲ ዮርዳኖሴ ሻፋ ማታን ካናኔ ቢታን ዲዛ ጋላኣዴ ዪዳ ዎዴ ሻፋ ማታን ጊታ ያርሾሶሆ ጊግሲዳ።
JOS 22:11 ሂስቲን ኢስቲ ኢስራኤሌ ቢታን፥ ካናኔ ዛዋን፥ ጋዴን ጊታ ያርሾሶሆ ጊግሲዳይሳ ሃራ ኢስራኤሌ ኣሳይ ሲዪዳ ዎዴ
JOS 22:12 ኩሜꬃ ኢስራኤሌ ኣሳይ ኢስታ ኦላና ባናስ ሴሎን ኢሲፌ ሺቂዴስ።
JOS 22:13 ሂስቲዲ ኢስራኤሌ ኣሳይ ቄሴ ኤልኤዜሬ ና ፊኒሃሴ፥ ጋላኣዴ ቢታን ዲዛ ኦሮቤሌ ቆሞታኮ፥ ጋዴ ቆሞታኮኔ ሚናሴ ቆሞታፔ ባጋታኮ ኪቲዴስ።
JOS 22:14 ኩሜꬃ ኢስራኤሌ ቆሞታ ባ ቆሞታ ሃላቃታፔ ኢሲ ኢሲ ኣስ ዶሪዲ፥ ታሙ ኣስ ፊኒሃሴራ ጋꬂ ዬዲዴስ። ሃይቲ ኢሶይ ኢሶይ ኢስራኤሌ ቆሞታፔ ዪዳ ባንታ ዛርኬን ዛርኬን ዶሬቲዳ ሃላቃታ።
JOS 22:15 ኢስቲ ኦሮቤሌ ቆሞቲ፥ ጋዴ ቆሞቲኔ ሚናሴ ቆሞታፔ ባጋቲ ዲዛ ጋላኣዴ ቢታ ቢዲ ኢስታስ፥
JOS 22:16 «ጎዳ ኣሳይ ኩሜꬅ ኢንቴና፥ ‹ኢስራኤሌ ጾሳ ቦላ ኣይስ ሃይሳ ማላ ኢታ ኦꬂዴቲ? ዋኒዲ ኢንቴ ሃራ ያርሾ ያርሺዛሶ ኢንቴስ ጊግሲዴቲ? ጎዳ ቦላ ዋኒ ማካሊዴቲ? ኢዛ ካሊዛይሳካ ዋኒዲ ኣጊዴቲ?
JOS 22:17 ፔኦሬን ኑኒ ኦꬂዳ ናጋራይ ኑስ ጊዴኔ? ኢስራኤሌ ዴራ ቦላ ቦሻይ ዎꬊዳ ጊዲኮካ ሃች ጋካናስካ ኑኒ ሄ ናጋራፔ ጌዪቦኮ።
JOS 22:18 ኢንቴ ሃኢካ ጎዳ ካሊዛይሳ ኣጊዲ ጉዬ ጉዬ ጌቲ? « ‹ኢንቴ ሃች ጎዳ ቦላ ማካሊኮ ኢዚ ዎንቶ ኩሜꬃ ኢስራኤሌ ዴራ ሃንቄታና።
JOS 22:19 ኢንቴ ላቲዳ ቢታይ ቱኒዳ ጊዲኮ ጎዳ ዱንካኔይ ኤቂዳ ጎዳ ቢታ ሃ ዪዲ፥ ኑናራ ጋዴ ጊሼቲ ኤኪቴ። ጊዶ ኣቲን ካሴፔ ዲዛ ጎዳ ኑ ጾሳ ያርሾሶፔ ሃራ ያርሾሶሆ ጊግሲዲ ጎዳ ቦላ ዎይኮ ኑ ቦላ ማካሎፍቴ።
JOS 22:20 ዛራሄ ና ኣካኔይ ፒላ ጊዲዳይሳ ኤኪዲ፥ ናጋራ ኦꬂዳ ጊሻስ፥ ኩሜꬃ ኢስራኤሌ ዴራ ቦላ ጎዳ ሃንቆይ ዎꬊቤኔ? ኢዛ ናጋራ ጋሶን ሃይቂዳይ ኢዛ ጻላላ ጊዴና› ጌቴስ» ጊዳ።
JOS 22:21 ሂስቲን ኦሮቤሌ ቆሞቲ፥ ጋዴ ቆሞቲኔ ሚናሴ ቆሞታፔ ባጋቲ ኢስራኤሌ ቆሞታ ሃላቃታስ ዛሪዲ፥
JOS 22:22 «ጎዳይ ዎልቃማ ጾሳይ! ጎዳይ ዎልቃማ ጾሳይ! ኑኒ ሃይሳ ኣይስ ኦꬂዳኮ ኢዚ ኤሬስ! ኑኒ ኣይስ ኦꬂዳኮ ኢንቴካ ኤራና ማላ ኮዮስ። ኑኒ ሃይሳ ኦꬂዳይ ማካላቴꬃኒኔ ጎዳስ ኣዛዜቴꬃ ኢጾን ጊዲኮ፥ ሃች ኑና ማሮፒቴ።
JOS 22:23 ኑኒ ጎዳ ካሊዛይሳ ኣጊዲ ጹጌቲዛ ያርሾ፥ ካꬃ ያርሾኔ ኢሲፌቴꬃ ያርሾ ያርሻናስ ቆፒዲ ጊግሲዳ ጊዲኮ፥ ጎዳይ ኑ ቦላ ባ ሃሎ ኬሶ።
JOS 22:24 ኑኒ ሄሳꬆ ኦꬂዳይ ሲንꬃፌ ያና ኢንቴ ዜሬꬃቲ ኑ ዜሬꬃታ፥ ‹ጎዳ ኢስራኤሌ ጾሳራ ኢንቴስ ኣዛ ጋይቶቴꬂ ዲዜ?
JOS 22:25 ኢንቴኖ ኦሮቤሌኔ ጋዴ ቆሞቶ፥ ጎዳይ ኑ ጊዶኒኔ ኢንቴ ጊዶን ዮርዳኖሴ ሻፋን ዛዋ ዛሪዳ ጊሻስ፥ ጎዳን ኢንቴና ጋꬂዛ ሚሺ ዴና› ጊዲ ኢንቴ ዛሬቲ ኑ ዛሬታ ጎዳስ ጎይኖንታ ማላ ቴቆንታ ኣጌቴና ጊ ሂርጊዶስ» ጊዳ።
JOS 22:26 «ሄሳ ጊሻስ፥ ‹ኑኒ ኑ ጊዶን ያርሾ ያርሺዛሶሆ ኣኔ ኦꬆስ፤ ጊዶ ኣቲን ጹጌቲዛ ያርሾስ ዎይኮ ሃራ ያርሾስ ጊዴና› ጊዳይ ሄሳሳ።
JOS 22:27 ኑኒ ያርሾሶሆ ጊግሲዳይ ጹጌቲዛ ያርሾ፥ ኢሲፌቴꬃ ያርሾኔ ሃራ ያርሾ ያርሺዲ፥ ጎዳስ ኢዛ ዱንካኔን ጎይኒዛይሳ ሃይሲ ያርሾሶሆዚ ኑ ጊዶኒኔ ኢንቴ ጊዶን፥ ቃሴ ኑፔ ካሊዛ ዬሌታታ ጊዶን ማርካ ጊዳና። ዎዴፔ ኢንቴ ዜሬꬃቲ ኑ ዜሬꬃታ፥ ‹ኢንቴና ጎዳን ጋꬂዛይ ኣይኮይካ ዴና› ጋናስ ዳንዳዬቴና።
JOS 22:28 ኢስቲ ኑና ዎይኮ ኑ ዜሬꬃታ ዎዴፔ ሄሳꬆ ጊኮ ኑኒ ኢስታስ ዛሪዲ፥ ‹ሄኮ! ኑ ኣዋቲ ጎዳሲ ያርሺዛሶሆ ሌሚሶ ኦꬂዳይሳ ቤኢቴ። ሃይሳ ኑ ኣዋቲ ጹጌቲዛ ያርሾኔ ሃራ ያርሾ ያርሻናስ ጊዶንታ፥ ኢንቴፌኔ ኑፔ ጊዶን ማርካ ጊዳና ማላ ጊግሲዳ› ጋና።
JOS 22:29 ጎዳ ኑ ጾሳ ዱንካኔዛ ሲንꬃን ኤቂዳ ያርሾ ያርሺዛሶሆፔ ሃራ፥ ጹጌቲዛ ያርሾ፥ ካꬃ ያርሾኔ ሃራ ያርሾ ያርሺዛሶሆ ጊግሲዲ ጎዳ ቦላ ማካሎይ ኑፔ ሃኮ!» ጊዳ።
JOS 22:30 ቄሴ ፊኒሃሲኔ ኢዛራ ዲዛ ኢስራኤሌ ቆሞታ ሃላቃቲ፥ ኦሮቤሌ፥ ጋዴኔ ሚናሴ ቆሞቲ ዮቲዳይሳ ሲዪዲ፥ ኬሂ ኡፋዬቲዳ።
JOS 22:31 ቄሴ ኤልኤዜሬ ና ፊኒሃሲ ኦሮቤሌ፥ ጋዴኔ ሚናሴ ቆሞታስ፥ «ጎዳይ ኑ ጊዶን ዲዛይሳ ኑኒ ሃች ኤሪዶስ፤ ኣይስ ጊኮ ሃ ዮኦዛ ኢንቴ ጎዳ ቦላ ማካላናስ ኦꬂቤኬታ። ኢንቴ ሃኢ ጎዳ ሃንቆፌ ኢስራኤሌ ኣሳ ኣሺዴታ» ጊዴስ።
JOS 22:32 ሄሳፌ ጉዬ ቄሴ ኤልኤዜሬ ና ፊኒሃሲኔ ዴራ ካሌꬂዛይቲ ጋላኣዴን ዲዛ ኦሮቤሌኔ ጋዴ ቆሞታራ ሃሳዬቲዳፔ ጉዬ ካናኔን ዲዛ ኢስራኤሌ ኣሳኮ ሲሚዳ፤ ሂስቲዲ ሃኒዳይሳ ኢስታስ ዮቲዳ።
JOS 22:33 ኢስራኤሌ ኣሳይ ሄሳ ሲዪዲ ኡፋይሳን ጾሳ ጋላቲዴስ። ቃሴ ኦሮቤሌ ቆሞቲኔ ጋዴ ቆሞቲ ዲዛ ቢታ ኦሊ ꬋይሳናስ ባና ጊዳይሳ ኣጊዴስ።
JOS 22:34 ኦሮቤሌይኔ ጋዴ ቆሞቲ፥ «ጎዳይ ኢዚ ጾሳ ጊዲዳይሳስ ሃይሲ ኑ ጊዶን ማርካ» ጊዲ ያርሾሶሆዛ፥ «ማርካ» ጊ ሱንꬂዳ።
JOS 23:1 ዳሮ ዎዴስ ጎዳይ ኢስራኤሌ ኣሳ ኢስታ ዩሾን ዲዛ ሞርኬታ ኡባፌ ሼምፒሲዴስ። ሄ ዎዴ ኢያሶይ ጪሚዲ ኬሂፔ ዎዴ ሱጊዴስ።
JOS 23:2 ኢያሶይ ኢስራኤሌ ኣሳ ኡባ፥ ጪማታ፥ ሹሜታ፥ ዳናታኔ ፒርዲዛይታ ኢሲፌ ጼይጊ ሺሺዲ፥ «ታኒ ጪማዲስ፥ ዎዴይካ ታስ ኬሂ ቢዴስ።
JOS 23:3 ጎዳ ኢንቴ ጾሳይ ኢንቴ ጊሻስ ሃ ካዎቴꬃታ ቦላ ኦꬂዳ ኡባ ሚሽ ኢንቴ ኢንቴ ኣይፌን ቤዪዴታ። ኢንቴ ጊሻስ ኦሌቲዳይ ጎዳ ኢንቴ ጾሳ።
JOS 23:4 ቤኢቴ፥ ዮርዳኖሴ ሻፋፔ ዶሚዲ ኣርሼይ ዉሊዛሶ ባጋን ሜዲቴራኔ ኣባ ጋካናስ ዲዛሶታ ኡባ፥ ኢንቴ ጾኒዳ ካዎቴꬃታፔ ኢንቴ ቡሮ ላቶንታ ቢታታ ታኒ ኢንቴ ቆሞታስ ሳማን ሳማን ዎስታ ጊሺዳኮ ኣኬኪቴ።
JOS 23:5 ጎዳ ኢንቴ ጾሳይ ኢስታ ኢንቴ ሲንꬃፌ ኢስቲ ዲዛሶዛፔ ኢስታ ዬዴꬃና፤ ጎዳ ኢንቴ ጾሳይ ኢንቴስ ኢሚዳ ሂዶታ ቃላ ማላ ኢንቴ ኢስታ ቢታ ላታና።
JOS 23:6 «ሚኒቴ! ሃዲርሲኔ ኡሻች ጎፒቴ፤ ሙሴ ዎጋ ማጻፋን ጻፌቲዳ ኡባ ናጋናሲኔ ኦꬃናስ ኬሂፔ ሚኔቲቴ።
JOS 23:7 ሃይታ ኢንቴ ጊዶን ኣቲዳ ካዎቴꬃታራ ኢሲፌቶፍቴ፤ ኢስታ ኤቃ ጾሳታ ሱንꬃ ጼይጎፒቴ፤ ኢስታ ሱንꬃን ጫቆፍቴ፤ ኢስታስ ኦꬆፍቴኔ ጎይኖፍቴ።
JOS 23:8 ጊዶ ኣቲን ሃች ጋካናስ ኢንቴ ኦꬂዳ ማላ ጎዳ ኢንቴ ጾሳ ሚንꬂ ኦይኪቴ።
JOS 23:9 «ጎዳይ ጊታኔ ሚኖ ካዎቴꬃታ ኢንቴ ሲንꬃፌ ጎዲ ኬሲዴስ፤ ሃች ጋካናስ ኦኒካ ኢንቴናራ ኤቄታናስ ዳንዳይቤና።
JOS 23:10 ጎዳ ኢንቴ ጾሳይ ኢንቴስ ኢሚዳ ሂዶታ ቃላ ማላ ኢዚ ኦሌቲዛ ጊሻስ ኢንቴፌ ኢሲ ኣሲ ሺ ኣስ ዬዴꬃና።
JOS 23:11 ሄሳ ጊሻስ ጎዳ ኢንቴ ጾሳ ሚኒ ሲቂቴ።
JOS 23:12 ጊዶ ኣቲን ኢንቴ ጉዬ ሲሚዲ ሃንኮ ኣቲዳ ኢንቴናራ ዲዛ ካዎቴꬃታራ ኢንቴ ኢሲፌቲኮ፥ ኤኮን ጌሎን ኢስታራ ኢሲፌ ዋላኬቲኮ፥
JOS 23:13 ጎዳ ኢንቴ ጾሳይ ሃይሳፌ ጉዬ ኢንቴ ሲንꬃፌ ኢስታ ኬሲ ጎዶንታይሳ ኢንቴ ኤራናስ ቤሴስ፤ ጎዳ ኢንቴ ጾሳይ ኢንቴስ ኢሚዳ ሃ ሎኦ ቢታይፌ ኢንቴ ꬋያና ጋካናስ ኢስቲ ኢንቴስ ዎጺማዴኔ ያርዴ ጊዳና፤ ኢንቴ ዞኮስ ሊሶ፥ ኢንቴ ኣይፌሲካ ኣጉንꬅ ጊዳና።
JOS 23:14 «ቤኢቴ ታስ ሃኢ ሃይቆ ዎዴይ ጋኪዴስ፤ ጎዳ ኢንቴ ጾሳይ ኢንቴስ ኢሚዳ ሎኦ ሂዶታ ኡባፌ ኢሲኖካ ኢዚ ኣሾንታይሳ ኢንቴ ኩሜꬃ ዎዚናፔኔ ኩሜꬃ ሼምፖፌ ኤሬታ፤ ኢዚ ኢንቴስ ኢማና ጊዳ ሂዶታይ ፓጬይ ባይንዳ ሙሌራ ፖሌቲዴስ።
JOS 23:15 ጊዶ ኣቲን ጎዳ ኢንቴ ጾሳይ ኢንቴስ ኢሚዳ ሎኦ ሂዶታ ኡባይ ሙሌራ ፖሌቲዳ ማላ ጎዳ ኢንቴ ጾሳይ ኢንቴስ ኢሚዳ ሎኦ ቢታይፌ ኢንቴና ꬋይሳና ጋካናስ ኢታ ሚሽ ኢንቴ ቦላ ኤሃና።
JOS 23:16 ጎዳ ኢንቴ ጾሳይ ኢንቴስ ኢሚዳ ጫቆ ቃላ ኢንቴ ላሊዛ ጊዲኮ፥ ቢዲ ሃራ ኤቃ ጾሳታስ ሃጋዚኮኔ ጎይኒኮ ጎዳ ሃንቆይ ኢንቴ ቦላ ታማ ማላ ኤጺ ኬዛና፤ ኢዚ ኢንቴስ ኢሚዳ ሎኦ ቢታይፌ ኢንቴ ኤሶን ꬋያና» ጊዴስ።
JOS 24:1 ሄሳፌ ጉዬ ኢያሶይ ኢስራኤሌ ቆሞታ ኡባ ሴኬሜን ሺሺዴስ። ጪማታ፥ ካሌꬂዛይታ፥ ዳናታኔ ፒርዲዛይታ ኡባ ጼይጊዴስ፤ ኢስቲካ ጾሳ ሲንꬅ ሺቂዳ።
JOS 24:2 ኢያሶይ ዴራ ኡባስ፥ «ጎዳ ኢስራኤሌ ጾሳይ፥ ‹ካሴ ኢንቴ ኣዋቲ ኣብራሃሜኔ ናኮሬ ኣዋ ታራ ጉጂዲ ኤፊራጺሴ ሻፋፔ ሄ ፒንꬃን ዴኢዳ፤ ኢስቲ ሃራ ኤቃ ጾሳታስ ጎይኒዳ።
JOS 24:3 ታኒ ጊዲኮ ኢንቴ ኣዋ ኣብራሃሜ ኤፊራጺሴ ሻፋስ ሄ ፒንꬃፌ ኤሃዲስ፤ ካናኔ ቢታንካ ካሌꬃዲስ። ኢዛ ዜሬꬃታካ ዳርሳዲስ፤ ዪሳቃካ ኢዛስ ኢማዲስ።
JOS 24:4 ዪሳቃስካ ያቆቤኔ ኤሳዌ ኢማዲስ። ኤሳዌስ ጌዜቲዛ ሴይሬ ቢታ ጺንጾ ሂስታ ኢማዲስ፤ ያቆቤይኔ ኢዛ ናይቲ ጊዲኮ ዱጌ ጊብጼ ቢዳ።
JOS 24:5 « ‹ሄሳፌ ጉዬ ሙሴኔ ኣሮኔ ኪታዲስ፤ ታ ኤሂዳ ቦሻን ጊብጼታ ኡንኤꬃዳ ኢንቴና ሄፔ ኬሳዲስ።
JOS 24:6 ታኒ ኢንቴ ኣዋታ ጊብጼፔ ኬሲን ዞኦ ኣባኮ ዪዴታ፤ ጊብጼቲ ፓራ-ጋሬታኒኔ ቶጋ ኣሳታን ኢንቴና ዞኦ ኣባ ጋካናስ ኦይካና ካሊዳ።
JOS 24:7 ኢንቴ ኣዋቲ ማዶ ዴማናስ ታኮ ዋሲዳ፤ ታኒ ኢስታፌኔ ጊብጼታፔ ጊዶን ꬉማ ዬጋዲስ፤ ሂስታዳ ኣባይ ኢስታ ቦላ ሲማና ማላኔ ኢስታ ሚታና ማላ ኦꬃዲስ። ታኒ ጊብጼታ ቦላ ኦꬂዳይሳ ኢንቴ ኢንቴ ኣይፌን ቤኢዴታ። ኢንቴካ ባዞን ዳሮ ዎዴ ዴኢዴታ።
JOS 24:8 « ‹ሄሳፌ ጉዬ ዮርዳኖሴ ሻፋፔ ኣርሼይ ሞኪዛሶ ባጋራ ዲዛ ኣሞሬታ ቢታ ታኒ ኢንቴና ኤሃዲስ። ኢስቲ ኢንቴናራ ኦሌቲን ታኒ ኢስታ ኢንቴ ኩሼን ኣꬃ ኢማዲስ፤ ታኒ ኢስታ ኢንቴ ሲንꬃፌ ꬋይሳዲስ፤ ቃሴ ኢንቴ ኢስታ ቢታ ላቲዴታ።
JOS 24:9 ሄሳፌ ጉዬ ሞኣቤ ቢታ ካዎ ጺፖራ ና ባላቄይ ኢስራኤሌ ኦላናስ ዴንዲዴስ፤ ኢንቴና ዪዲ ዶቃና ማላ ቢኦሬ ና ባላሜስ ኪታ ዬዲዴስ።
JOS 24:10 ታኒ ጊዲኮ ባላሜ ሲያና ኮያቤኬ፤ ሄሳ ጊሻስ ኢዚ ኢንቴና ዛሪ ዛሪ ኣንጂዴስ፤ ታኒካ ኢንቴና ባላቄ ኩሼፔ ኣሻዲስ።
JOS 24:11 « ‹ሄፔ ኢንቴ ዮርዳኖሴ ሻፋ ፒኒዲ ኢያርኮ ዪዴታ፤ ኣሞሬቲ፥ ፓሪዜቲ፥ ካናኔቲ፥ ሂቴቲ፥ ጌርጌሴቲ፥ ሂዌቲኔ ያቡሴቲ ኢንቴናራ ኦሌቲዳ ማላ ኢያርኮ ኣሳይ ኢንቴናራ ኦሌቲዴስ፤ ጊዶ ኣቲን ታኒ ኢስታ ኢንቴ ኩሼን ኣꬃ ኢማዲስ።
JOS 24:12 ኢንቴፌ ሲንꬄ ካዤ ኪታዳ ኢስታኔ ኣሞሬ ካዎ ናምኣታ ኢንቴ ሲንꬃፌ ጎዳዲስ። ሃይሲ ኡባይ ሃኒዳይ ኢንቴ ማሻኒኔ ኢንቴ ዎንዳፌን ጊዴና።
JOS 24:13 ኢንቴ ዳቡሮንታ ቢታኔ ኢንቴ ኬጾንታ ካታማታ ታኒ ኢንቴስ ኢማዲስ፤ ሄኮ ኢንቴ ቶኮንታ ዎይኔ ኣይፌኔ ዎጋራ ኣይፌ ሜታ› ጊዴስ።
JOS 24:14 «ሄሳ ጊሻስ ሃኢካ ጎዳስ ያዪቴ፤ ኩሜꬃ ዎዚናፔ ኣማኔቴꬃን ኢዛስ ሃሬቲቴ፤ ካሴ ኢንቴ ኣዋቲ ኤፊራጺሴ ሻፋፔ ሄ ፒንꬃኒኔ ጊብጼ ቢታን ጎይኒዳ ኤቃ ጾሳታ ኢንቴፌ ሃሲቴ፤ ጎዳስ ጻላ ጎይኒቴ።
JOS 24:15 ጎዳስ ጎይኖይ ኮሾንታ ሚሽ ሚሳቲ ኢንቴስ ቤቲኮ ካሴ ኢንቴ ኣዋቲ ሻፋፔ ሄ ፒንꬃን ዲሼ ጎይኒዳ ኤቃ ጾሳታ ዎይኮ ሃኢ ኢንቴ ዲዛ ኣሞሬቲ ጎይኒዛ ጾሳታ ጎይናና ጊዲኮ ኢንቴ ጎይናናይሳ ሃች ዶሪቴ፤ ታኒኔ ታ ኬꬃ ኣሳይ ጊዲኮ ጎዳስ ጎይናና» ጊዴስ።
JOS 24:16 ሂስቲን ኣሳይ ዛሪዲ፥ «ጎዳ ኣጊዲ ሃራ ኤቃ ጾሳታስ ጎይኖይ ኑፔ ሃኮ!
JOS 24:17 ጊብጼ ኣይሌቴꬃ ቢታፌ፥ ኑናኔ ኑ ኣዋታ ኬሲዲ ኤሂዳይ፥ ሄ ጊታ ማላታታ ኑ ሲንꬃን ኦꬂዳይ፥ ኑ ቢዛ ኦጌ ኡባኒኔ ኑ ካንꬂዳ ካዎቴꬃታ ኡባ ጊዶን ኑና ናጊዳይ ጎዳ ኑ ጾሳ።
JOS 24:18 ቃሴ ጎዳይ ሄ ቢታን ዲዛ ኣሞሬታራ ጉጂን ዴራ ኡባ ኑ ሲንꬃፌ ጎዲዴስ፤ ሄሳ ጊሻስ ኑኒ ጎዳስ ጎይናና፤ ኢዚ ኑ ጾሳ» ጊዴስ።
JOS 24:19 ኢያሶይካ ዴራስ፥ «ኢንቴ ጎዳስ ጎይናናስ ዳንዳዬኬታ፤ ኢዚ ጌሻ ጾሳ፤ ኢዚ ቃናቲዛ ጾሳ፤ ኢዚ ኢንቴ ማካላቴꬃኔ ኢንቴ ናጋራ ኣቶ ጌና።
JOS 24:20 ኢንቴ ጎዳ ኣጊዲ ኣላጋ ጾሳታስ ጎይኒኮ ኢዚ ኢንቴስ ሎኦ ኦꬂዳፔ ጉዬ ሲሚ ዎꬊዲ ኢዚ ኢንቴ ቦላ ኢታ ኦꬃናኔ ኢንቴና ꬋይሳና» ጊዴስ።
JOS 24:21 ሂስቲን ዴሬዚ ኢያሶ፥ «ኣካይ ኑኒ ጎዳስ ጻላ ጎይናና» ጊዴስ።
JOS 24:22 ሄሳፌ ጉዬ ኢያሶይ ዴራስ፥ «ኢንቴ ጎዳስ ጎይናናስ ዶሪዳ ጊሻስ ኢንቴ ሁኤስ ኢንቴ ማርካ» ጊዴስ። ኢስቲካ ዛሪዲ፥ «ኤ ኑኒ ማርካ!» ጊዳ።
JOS 24:23 ኢያሶይ፥ «ሂስቲኮ፥ ኢንቴ ጊዶን ዲዛ ኣላጋ ጾሳታ ዲጊቴ፤ ኢንቴ ዎዚና ጎዳ ኢስራኤሌ ጾሳኮ ዛሪቴ» ጊዴስ።
JOS 24:24 ዴሬዚካ ኢያሶስ፥ «ኑኒ ጎዳ ኑ ጾሳስ ጎይናና፤ ኢዛስካ ኣዛዜታና» ጊዳ።
JOS 24:25 ሄ ጋላስ ኢያሶይ ዴሬዛ ጫቄꬂዴስ፤ ኢስቲ ካላና ዎጋኔ ማራ ሄን ሴኬሜን ኢስታስ ኢሚዴስ።
JOS 24:26 ኢያሶይ ሄ ቃላታ ጾሳ ዎጋ ማጻፋን ጻፊዴስ። ሄሳፌ ጉዬ ኢሲ ጊታ ሹች ኤኪዲ ጌሽ ጊዲዳ ጎዳ ዱንካኔዛ ማታን ዲዛ ዎላ ጋርሳን ኤሲዴስ።
JOS 24:27 ኢያሶይ ኩሜꬃ ዴራስ፥ «ቤኢቴ፤ ጎዳይ ኑስ ሃሳይዳ ቃላ ኡባ ሃ ሹቻይ ሲዪዳ ጊሻስ ኢዚ ኑ ቦላ ማርካ ጊዳና። ኢንቴ ጾሳ ቦላን ማካሊኮ ሃ ሹቻይ ኢንቴ ቦላ ማርካ ጊዳና» ጊዴስ።
JOS 24:28 ሄሳፌ ጉዬ ኢያሶይ ዴራ ኡባ ባ ጺንጾን ጺንጾን ሲማና ማላ ሞይዚዴስ።
JOS 24:29 ሄሳፌ ጉዬ ጎዳ ኣይሌ፥ ናዌ ና ኢያሶስ ላይꬃይ 110 ጊዲን ሃይቂዴስ።
JOS 24:30 ኣሳይ ጋኣሼ ዙማፔ ፑዴሃ ባጋን፥ ሻራ ሜንꬆን ዲዛ ኤፍሬሜ ዴሬን ዲዛ ኢዛ ጺንጾን ቴሚናቴ-ሴራሃን ሞጊዴስ።
JOS 24:31 ኢያሶይ ፓጻ ዲዛ ዎዴ ኡባን፥ ኢያሶፔ ሲሚን ዴኢዳ ኣሳቲኔ ጎዳይ ኢስራኤሌታስ ኦꬂዳ ኦሶ ኡባ ኤሪዛ ጪማቲ ዲዛ ዎዴ ኡባን ኢስራኤሌ ኣሳይ ጎዳስ ጎይኒዴስ።
JOS 24:32 ኢስራኤሌ ኣሳይ ጊብጼ ቢታፌ ኤሂዳ ዮሴፌ ሜቄꬃ ሴኬሜን ሞጊዳ። ሄ ሶሆዛ ያቆቤይ ሴኬሜ ኣዋ ኤሞሬፔ 100 ሳቂሌ ቢራን ሻሚዴስ፤ ሂስቲን ጉዬፔ ዮሴፌ ዜሬꬃታስ ጺንጾ ጊዲዴስ።
JOS 24:33 ቃሴካ ኣሮኔ ና ኤልኤዜሬይ ሃይቂዴስ፤ ኢዚካ ሻራ ሜንꬆን ዲዛ ኤፍሬሜ ዴሬን ኢዛ ናዛ ፊኒሃሴ ሳማን ጋኪዳ ጊቢኣ ካታማን ሞጌቲዴስ።
JDG 1:1 ኢያሶይ ሃይቂዳፔ ጉዬ ኢስራኤሌ ኣሳይ፥ «ካናኔ ቢታ ኣሳ ኦላናስ ኑ ዛሬታፔ ኮይሮቲዲ ኬዛናይ ኦኔ?» ጊዲ ጎዳ ኦይቺዴስ።
JDG 1:2 ሂስቲን ጎዳይ፥ «ዩሁዳ ዛሬቲ ኮይሮቲ ኬዜቶ፤ ታኒ ቢታ ኢስታ ኩሼን ኣꬃ ኢማዲስ» ጊዴስ።
JDG 1:3 ዩሁዳ ኣሳይ ባንታ ዳቦታ ጊዲዳ ሲሞና ዛሬታ፥ «ኑኒ ካናኔታራ ኦሌታና ማላ ኑና ሻኪን ጋኪዳሶ ኑናራ ኣꬊቴ። ሄሳፌ ጉዬ ኢንቴና ሻኮን ጋኪዳሶ ኢንቴናራ ኢሲፌ ባና» ጊዳ፤ ሂስቲን ሲሞና ዛሬቲኔ ዩሁዳ ዛሬቲ ኦላስ ኢሲፌ ቢዳ።
JDG 1:4 ሂስቲን ጎዳይ ካናኔታኔ ፓሪዜታ ኢስታ ኩሼን ኣꬂ ኢሚዴስ፤ ቤዜቄን 10,000 ኣስ ዎꬊዳ።
JDG 1:5 ቤዜቄ ጌቴቲዛሶን ኣዶኒ-ቤዜቄ ዴሚዲ ኢዛራ ኦሌቲዳ፤ ሂስቲዲ ካናኔታኔ ፓሪዜታ ጾኒዳ።
JDG 1:6 ኣዶኒ-ቤዜቄይ ባቃቲሺን ጎዲ ኦይኪዲ፥ ኢዛስ ኩሼ ማንꬃ ቢራꬌታኔ ቶሆ ማንꬃ ቢራꬌታ ቃንጺ ቃንጺ ዬጊዳ።
JDG 1:7 ሂስቲን ኣዶኒ-ቤዜቄይ፥ «ኩሼ ማንꬃ ቢራꬌታኔ ቶሆ ማንꬃ ቢራꬌታ ታኒ ቃንጻ ቃንጻ ዬጊዳ ላፑን ታሙ ካዎቲ ታ ማዳፌ ዎꬊዳ ሱፓ ማጺ ሺሺዲ ሜቴስ። ካሴ ኢስታ ቦላ ታ ኦꬂዳ ጌኔ ማላ ጾሲ ታ ቦላ ኦꬂዴስ» ጊዴስ። ኢዛ ዬሩሳላሜ ኤሂን ሄን ሃይቂዴስ።
JDG 1:8 ዩሁዳ ኣሳይ ዬሩሳላሜ ኦሊ ኦይኪዴስ፤ ሂስቲዲ ኣሳ ጊꬃ ማሻን ቡሳኪ ዉርሲዲ ካታማ ታማን ጹጊዴስ።
JDG 1:9 ሄሳፌ ጉዬ ዩሁዳ ኣሳይ ጌዜን፥ ኔጌቤኒኔ ሄ ዴሬ ጋꬋን ዲዛ ካናኔታ ኦላናስ ቢዴስ።
JDG 1:10 ሂስቲዲ ካሴ ቂሪያቴ-ኣርባኤ ጌቴቲዛ ኬብሮኔ ካታማን ዲዛ ካናኔታ ኦሊዳ፤ ቃሴ ሻሻዬ፥ ኣሂማኔኔ ታሊማዬ ጌቴቲዛ ቆሞታ ጾኒዳ።
JDG 1:11 ሄሳፌ ዴንዲዲ ዩሁዳ ኣሳይ ዳቢሬ ጌቴቲዛ ካታማን ዲዛ ኣሳ ኦላናስ ቢዴስ፤ ዳቢሬ ካታማይ ካሴ፥ «ቂሪያቴ-ሴፌሬ» ጌቴቴስ።
JDG 1:12 ካሌቤይ፥ «ቂሪያቴ-ሴፌሬ ኦሊዲ ኦይኪዛዴስ ታኒ ታ ናዮ ኣኪሳ ኢማና» ጊዴስ።
JDG 1:13 ሂስቲን ካሌቤስ ካሎ ኢሻ ቄናዜ ና ኦቲንኤሌይ ሄ ካታማ ኦሊዲ ኦይኪዴስ፤ ካሌቤይካ ባ ናዮ ኣኪሳ ኢዛስ ኢሚዴስ።
JDG 1:14 ኣኪሳይ ኦቲንኤሌ ጌሊዛ ዎዴ፥ ኢዛ ባ ኣዋፔ ጋዴ ኦይቻ ኤካና ማላ ኦቲንኤሌይ ኢዞ ዞሪዴስ፤ ሂስቲን ኢዛ ባ ቶጊዳ ሜሄ ቦላፌ ዎꬋዱስ፤ ሂስቲን ካሌቤይ ኢዞ፥ «ታ ኔስ ኣይ ኦꬆ?» ጊዲ ኦይቺዴስ።
JDG 1:15 ኢዛካ፥ «ካሴ ኔ ታስ ኢሚዳ ጋዴይ ሃꬂ ባይንዳሶ ጊዲዳ ጊሻስ ፑልቶ ሃꬃራ ዲዛ ጋዴ ታስ ኢማርኪ!» ጋዱስ። ሂስቲን ካሌቤይ ኢዚስ ፑዴ ባጋራኔ ዱጌ ባጋራ ፑልቶራ ዲዛ ጋዴታ ኢሚዴስ።
JDG 1:16 ሙሴ ቦሎ ቄናዌዛ ዜሬꬃቲ ዩሁዳ ኣሳራ ዛምባይ ዳሪ ዲዛ ኢያርኮ ካታማፔ ዴንዲዳ፤ ሂስቲዲ ኣራዴ ጌቴቲዛ ካታማፔ ዱጌሃ ባጋራ፥ ኔጌቤን ዲዛ ዩሁዳ ባዞ ቢዳ፤ ሂስቲዲካ ሄን ዲዛ ኣሳ ጊዶን ኡቲዳ።
JDG 1:17 ዩሁዳ ኣሳይ ሲሞና ኣሳራ ኢሲፌ ቢዲ፥ ጻፋቴ ጌቴቲዛ ካታማን ዲዛ ካናኔታ ኦሊ ጾኒዴስ፤ ካታማዮካ ሙሌራ ꬋይሲዴስ። ሂስቲዲ ሆርማ ጊዲ ሱንꬂዴስ።
JDG 1:18 ዩሁዳ ኣሳይ ጉጂዲ ጋዛ፥ ኣስቄሎናኔ ኣቃሮኔ ካታማታ ኢስታ ዩሾን ዲዛ ዴሬታካ ኦሊ ኦይኪዴስ።
JDG 1:19 ጎዳይ ዩሁዳ ኣሳራ ዲዛ ጊሻስ፥ ዙማቲ ዳርዛሶ ጌዜ ቢታ ኢስቲ ኦይኪዳ፤ ጊዶ ኣቲን ጋርስ ዴምባቲ ኡቲዳ ቢታን ዲዛ ኣሳታስ ቢራታፔ ኦሴቲዳ ኦላ ፓራ-ጋሬቲ ዲዛ ጊሻስ፥ ዩሁዳ ኣሳይ ኢስታ ዴንꬂ ጎዳናስ ዳንዳይቤና።
JDG 1:20 ሙሴይ ጊዳ ማላን ኬብሮኔ ካታማ ካሌቤስ ኢሚዳ፤ ሂስቲን ካሌቤይ ኤናቄ ዛሬ ሄꬑ ቆሞታ ዴራፔ ዴንꬂ ጎዲዴስ።
JDG 1:21 ጊዶ ኣቲን ቢኒያሜ ዛሬቲ ዬሩሳላሜን ዲዛ ያቡሴ ኣሳታ ዴራፔ ዴንꬂ ጎዶንታ ኣጊዳ ጊሻስ ሃች ጋካናስ ያቡሴቲ ቢኒያሜ ዛሬታራ ዬሩሳላሜን ኢሲፌ ዴቴስ።
JDG 1:22 ዮሴፌ ቆሞቲ ቤቴሌ ኦላናስ ዎራጂዳ፤ ጎዳይካ ኢስታራ ዴስ፤
JDG 1:23 ኢስቲካ ቤቴሌ ካታማ ዩዪ ጾሞሲዛ ኣሳታ ኪቲዳ፤ ካሴ ሄ ካታማይ ሱንꬂ ሎዛ ጌቴቴስ።
JDG 1:24 ኪቲን ኢስቲ ካታማፔ ኬዚ ቢዛ ኢሲ ኣዴዛ ዴሚዲ፥ «ካታማ ጊዶ ዋኒ ጌላናስ ዳንዳዬቲዛኮ ኑና ቤሳ፤ ኔ ቤሲኮ ኑኒ ኔስ ኪያና» ጊዳ።
JDG 1:25 ሂስቲን ኢዚ ኢስታ ቤሲዴስ፤ ሄሳፌ ጉዬ ካታማን ዲዛ ኣሳ ጊꬃ ማሻን ቡሳኪዳ፤ ጊዶ ኣቲን ሄ ኣዴዛኔ ኢዛሶ ኣሳ ኡባ ሼምፖ ኣሺዳ።
JDG 1:26 ጉዬፔ ሄ ኣዴዚ ሂቴ ጌቴቲዛ ዴሬ ቢዲ፥ ሄን ካታማ ኤሲዴስ፤ ሄ ካታማይ ሱንꬃ ሎዛ ጊ ሱንꬂዴስ፤ ሄ ካታማያካ ሃች ጋካናስ ሄ ሱንꬃን ጼይጌታዉስ።
JDG 1:27 ሚናሴ ዛሬቲ፥ ቤቲ-ሻኣኔ፥ ታኢናኬ፥ ዶሬ፥ ዪቢላኣሜኔ ማጊዶ ካታማታኒኔ ኢስታ ዩሾን ዲዛ ሞꬃታን ዲዛ ኣሳታ ኬሲ ጎዶንታ ኣጊዳ ጊሻስ ካናኔቲ ሄን ባንታ ዴኦ ሚንꬂ ኦይኪዳ።
JDG 1:28 ኢስራኤሌ ኣሳይ ሚኒዳ ዎዴ ካናኔታ ባስ ዎልቃን ኦሲሲዳ፤ ጊዶ ኣቲን ኢስታ ሙሌራ ቢታፌ ኬሲ ጎዲቤቴና።
JDG 1:29 ኤፍሬሜ ዛሬቲካ ጌዜሬ ጌቴቲዛ ካታማን ዲዛ ካናኔታ ኬሲዲ ጎዶንታ ኣጊዳ ጊሻስ ካናኔ ኣሳቲ ሄን ኢስታራ ኢሲፌ ዱስ ዶሚዳ።
JDG 1:30 ዛቢሎኔ ዛሬቲ ቂቲሮኔ ካታማኒኔ ናሂላሌ ካታማን ዲዛ ኣሳታ ኬሲ ጎዶንታ ኣጊዳ ጊሻስ ካናኔቲ ሄን ኢስታራ ኢሲፌ ዴኢዳ፤ ጊዶ ኣቲን ዛቢሎኔ ዛሬቲ ኢስታ ባስ ዎልቃን ኦሲሲዳ።
JDG 1:31 ኣሴሬ ዛሬቲካ ኣኮን፥ ሲዶናን፥ ኣሂላቤን፥ ኣኪዚቤን፥ ሄልቤን፥ ኣፌቄኒኔ ኤራሆቤን ዲዛ ኣሳታ ኬሲ ጎዲቤቴና።
JDG 1:32 ካናኔቲ ኬዞንታ ኣጊዳ ጊሻስ ኣሴሬ ዛሬቲ ኢስታራ ሄን ኢሲፌ ዴኢዳ።
JDG 1:33 ኒፍታሌሜ ዛሬቲካ ቤቲ-ሼሚሼ ካታማኒኔ ቤቲ-ኣናቴ ካታማን ዲዛ ኣሳታ ኬሲዲ ጎዲቤቴና፤ ጊዶ ኣቲን ካናኔታራ ሄን ኢሲፌ ዴኢሺን ቤቲ-ሼሚሼኔ ቤቲ-ኣናቴ ካታማ ኣሳታ ባስ ዎልቃን ኦሲሲዳ።
JDG 1:34 ኣሞሬቲ ዳኔ ዛሬታ ፑዴ ዙማቲ ዲዛሶ ጌዜፌ ዱጌ ዴምባሶ ዎꬎንታ ማላ ዲጊዳ።
JDG 1:35 ኣሞሬቲ ሃሪ-ሄሬሴ ዴሬን፥ ኣያሎኒኔ ሻኣልቢሜ ጌቴቲዛ ካታማታን ዴኦ ሚንꬂዳ፤ ጊዶ ኣቲን ኤፍሬሜ ዛሬቲኔ ሚናሴ ዛሬቲ ሚኒ ሚኒ ቢዲ ባንታስ ዎልቃን ኦሲሲዳ።
JDG 1:36 ኣሞሬታ ዴሬ ዛዋይ ኣኪራቢሜ ጌቴቲዛሶራ ኣꬊ ቢዲ ሴላራ ካንꬂዲ ሄራ ኣꬊ ቤስ።
JDG 2:1 ጎዳ ኪታንቻይ ጌልጌላፔ ቦኪሜ ቢዲ ኢስራኤሌ ኣሳስ፥ «ታኒ ኢንቴና ጊብጼፔ ኬሳዳ ቤኒ ኢንቴ ኣዋስ ኢማና ጋዳ ታ ጫቂዳ ቢታ ኢንቴና ጌልꬃዲስ፤ ሂስታዳ ታ ኢንቴስ፥ ‹ታኒ ኢንቴናራ ጫቂዳ ጫቆ ቃላ ሙሌካ ላሚኬ።
JDG 2:2 ኢንቴ ሃ ቢታን ዲዛ ኣሳታራ ጫቆ ጫቄቶፍቴ፤ ኢስቲ ያርሺዛሶታ ላሊቴ› ጋዲስ፤ ጊዶ ኣቲን ኢንቴ ታስ ኣዛዜቲቤኬታ፤ ኣይስ ሄሳꬆ ሃኒዴቲ?
JDG 2:3 ሄሳ ጊሻስ ታኒ ኢንቴና፥ ‹ኢስታ ታኒ ኢንቴ ሲንꬃፌ ኬሳ ጎዲኬ፤ ኢስቲ ኢንቴስ ሞርኬ ጊዳና፤ ኢስታ ኤቃ ጾሳቲካ ኢንቴስ ናርጻ ማላ ጊዳና› ጋዲስ» ጊዴስ።
JDG 2:4 ጎዳ ኪታንቻይ ሄሳ ኢስራኤሌ ኣሳ ኡባስ ዮቲዳ ዎዴ ኣሳይ ባ ቃላ ꬎቁ ሂስቲዲ ዬኪዴስ።
JDG 2:5 ሄ ሶሆዛ ቦኪሜ ጊዲ ሱንꬂዴስ፤ ሂስቲዲ ሄ ሶዛን ጾሳስ ያርሾ ያርሺዴስ።
JDG 2:6 ኢያሶይ ኢስራኤሌ ኣሳ ዬዲዳፔ ጉዬ ኣሳይ ኢሶይ ኢሶይ ሻኪን ባና ጋኪዛ ቢታ ኤካናስ ቢዴስ።
JDG 2:7 ኢያሶይ ሼምፖራ ፓጻ ዲዛ ላይꬃ ኡባን ኣሳይ ጎዳስ ኦꬂዴስ፤ ኢዚ ሃይቂዳፔ ጉዬ ጎዳይ ኢስራኤሌ ኣሳስ ኦꬂዳ ጊታ ኦሶ ኡባ ቤኢዳ ጪማታ ዎዴ ኡባንካ ጎዳስ ጎይኒዛይሳ ኣጊቤና።
JDG 2:8 ጎዳ ኣይሌ ናዌ ና ኢያሶስ ላይꬃይ 110 ጊዲን ሃይቂዴስ፤
JDG 2:9 ጋኣሼ ዴሬፔ ፑዴሃ ባጋን ኤፍሬሜ ዴሬን ቦላ ጌዜ ቢታን ቴሚናቴ-ሴራሃ ጌቴቲዛሶን ዲዛ ኢዛ ጋዴን ኢዛ ሞጊዳ።
JDG 2:10 ሄ ዬሌታ ኡባይ ሃይቂዳፔ ጉዬ ጎዳኔ ኢዚ ኢስራኤሌ ኣሳስ ኦꬂዳ ሎኦ ኦሶ ኡባ ኤሮንታ ኦራꬃ ዬሌታይ ዴንዲዴስ።
JDG 2:11 ሄሳፌ ጉዬ ኢስራኤሌ ኣሳይ ጎዳ ሲንꬃን ኢታ ሚሽ ኦꬂዴስ፤ ባኣሌ ጌቴቲዛ ኤቃታስ ጎይኒዴስ።
JDG 2:12 ጊብጼ ቢታፌ ኢስታ ኬሲዳ ጎዳ፥ ባንታ ኣዋታ ጾሳ ኣጋጊዳ፤ ባንታ ሄራን ዲዛ ኣሳቲ ጎይኒዛ ኤቃታኮ ሲሚዲ ኢስታስ ጎይኒዳ፤ ሄሳን ጎዳ ሃንቄꬂዳ።
JDG 2:13 ጎዳካ ኣጊዲ ባኣሌሲኔ ኣስታሮቴስ ጎይኒዳ።
JDG 2:14 ሄሳ ጊሻስ ጎዳ ሃንቆይ ኢስራኤሌ ኣሳ ቦላ ኤጺ ኬዚዴስ፤ ዎራጂዛይቲ ቦንቃና ማላ ኢስታ ሞርኬታ ኩሼን ኣꬂ ኢሚዴስ፤ ኢስታ ሄራን ዲዛ ሞርኬታስ ኢስታ ኣꬂ ኢሚዴስ፤ ሄሳፌ ጉዬ ኢስቲ ባንታ ሞርኬታራ ኤቄታናስ ዳንዳይቤቴና።
JDG 2:15 ኢስቲ ኦላስ ኬዚዛ ዎዴ ኡባን ጎዳይ ካሴ ኢስታስ ጫቂ ዮቶይሳꬆ ኢስቲ ጾኔታና ማላ ኢዚ ኢስታ ቦላ ዴንዲዴስ፤ ሄሳፌ ዴንዶይሳን ኢስቲ ኬሂ ዋዬቲዳ።
JDG 2:16 ሄሳፌ ጉዬ ጎዳይ ኢስራኤሌ ኣሳ ቦላ ዎራጂዛይታ ኩሼፔ ኢስታ ኣሺዛ ዳናታ ኢስታስ ዴንꬂዴስ፤
JDG 2:17 ጊዶ ኣቲን ኢስራኤሌ ኣሳይ ኢስታስ ፒርዲዛ ዳናታስ ኣዛዜቲቤና፤ ኢስቲ ጎዳስ ኣማኔቶንታ ኢጺዳ፤ ኤቃ ጾሳታኮ ሲሚዲ ኢስታስ ጎይኒዳ፤ ካሴ ባንታ ኣዋታ ኦጌፔ ካሬ ኬዚዳ፤ ኢስታ ኣዋቲ ጎዳስ ኣዛዜቲዳ ማላ ኢስቲ ኣዛዜቲቤቴና።
JDG 2:18 ጎዳይ ኢስታስ ፒርዲዛ ዳናታ ዳናሲዳ ዎዴ ኡባን ኢዚ ሄ ፒርዲዛ ዳናታራ ኢሲፌ ዲዛ ጊሻስ ሄ ዳናቲ ሼምፖራ ፓጻ ዲዛ ላይꬅ ኡባን ኢስታ ሞርኬታ ኩሼፔ ኢስታ ኣሺዴስ። ዋዬይኔ ቱጋይ ኢስታ ቦላ ዳሪዳ ጋሶን ኢስቲ ዋሲዛይሳ ሲዪዲ ጎዳይ ኢስታስ ቃꬌቲዴስ።
JDG 2:19 ጊዶ ኣቲን ኢስታ ካሌꬂዛ ዳናቲ ሃይቂዳ ዎዴ ኡባን ኣሳይ ጉዬ ሲሚዲ፥ ኤቃ ጾሳታ ካሎን፥ ኢስታስ ሃጋዞኒኔ ኢስታ ጎይኖን ካሴ ኢስታ ኣዋቲ ኦꬂዳ ኢታ ኦሶፔ ኣꬊዳ ኢታ ኦሶን ሲሚ ጌሊዳ፤ ባንታ ኢታ ኦሶኔ ጌላ ኦጌ ኣጎንታ ኢጺዳ።
JDG 2:20 ሄሳ ጋሶን ጎዳ ሃንቆይ ኢስራኤሌ ካዎቴꬃ ቦላ ኤጺ ኬዚዴስ፤ ጎዳይ፥ «ሃ ኣሳይ ታኒ ካሴ ኢስታ ኣዋታራ ጌሊዳ ጫቆ ቃላ ዬꬊ ኣꬊዳ ጊሻሲኔ ታስ ኣዛዜቶንታ ኢጺዳ ጊሻስ፥
JDG 2:21 ሃቺፌ ዶሚን ኢያሶይ ሃይቂዳ ዎዴ ቢታ ቦላን ኣቲዳ ካዎቴꬃታፔ ኢሳዴካ ታኒ ኢስታ ሲንꬃፌ ኬሳ ጎዲኬ።
JDG 2:22 ሃ ኢስራኤሌ ኣሳይ ካሴ ባንታ ኣዋታ ማላ ታ ኦጌ ካሊዛኮኔ ካሎንታኮ ታኒ ኢስታ ፓጫናስ ሃይሳ ሃ ዴሬታ ታስ ኦላ ማሳራ ኦꬃዳ ኢስታን ጎኤታና» ጊዴስ።
JDG 2:23 ሄሳ ጊሻስ ጎዳይ ሄ ካዎቴꬃ ኣሳይ ኬዞንታ ጋምኣና ማላ ኦꬂዴስ። ኢዚ ኢስታ ኤሶን ዬዴꬂ ኬሲቤና፤ ኢያሶስካ ኢስታ ኣꬂ ኢሚቤና።
JDG 3:1 ሄ ዎዴ ካናኔን ኣይ ኦላካ ኦሌቲ ኤሮንታ ኢስራኤሌ ካዎቴꬃ ፓጫና ማላ ጎዳይ ሃ ኣሳታ ኣሺዴስ።
JDG 3:2 ኢዚ ሄሳ ኦꬂዳይ ሃይሳፌ ካሴ ኦላ ኦሌቲ ኤሮንታ ኢስራኤሌ ዬሌታ ኦላ ታማርሳናሳ።
JDG 3:3 ሄ ቢታን ኣቲዳ ኣሳቲ፥ ፊሊስጼሜ ካታማታ ሃሪዛ ኢቻሻታ፥ ካናኔታ ኡባ፥ ሲዶና ካታማ ኣሳታኔ ባኣሊ-ሄርሞኔ ጌቴቲዛ ዴሬፔ ዶሚዲ ሃማቴ ጋካናስ ሊባኖሴ ዙማታ ቦላ ዲዛ ሂዌታ።
JDG 3:4 ጎዳይ ሙሴ ባጋራ ካሴ ኢስራኤሌ ኣዋታስ ኢሚዳ ኣዛዞ ኢስቲ ኣዛዜቲዛኮኔ ኣዛዜቶንታኮ ሻኪ ኤራናስ ኢስታስ ፓጬ ጊዳና ማላ ሄ ኣቲዳ ኣሳታ ሄን ኣሺዴስ።
JDG 3:5 ሄሳ ጊሻስ ኢስራኤሌ ኣሳይ ካናኔታራ፥ ሂዌታራ፥ ኣሞሬታራ፥ ፓሪዜታራ፥ ሂቴታራኔ ያቡሴታራ ኢሲፌ ዴኢዴስ።
JDG 3:6 ኢስታ ማጫ ናይታ ባስ ማቾ ኤኪዳ፤ ባንታ ማጫ ናይታካ ኢስታ ኣቱማ ናይታስ ኢሚዳ፤ ኢስታ ኤቃ ጾሳታስካ ጎይኒዳ።
JDG 3:7 ኢስራኤሌ ኣሳይ ጎዳ ሲንꬃን ኢታ ሚሽ ኦꬂዴስ፤ ኢስቲ ጎዳ ባንታ ጾሳ ኣጊዲ ባኣሌኔ ኣሼሮ ጌቴቲዛ ኤቃ ጾሳታስ ጎይኒዳ።
JDG 3:8 ሄሳ ጊሻስ ጎዳ ሃንቆይ ኢስራኤሌ ኣሳ ቦላ ኤጺ ኬዚዴስ፤ ጎዳይ ማሶጴጾምያ ቢታ ካዎ ኩሻን-ኣሪሻታዬ ኩሼን ኢስታ ኣꬂ ኢሚዴስ፤ ኢስቲካ ኢዛስ ኦስፑን ላይꬅ ሃሬቲዳ።
JDG 3:9 ጊዶ ኣቲን ኢስራኤሌ ኣሳይ ጎዳስ ዋሲዳ ዎዴ ጎዳይ ኢስታ ኣሻናስ ኣሺዛዴ ኪቲዴስ፤ ኢዚካ ካሌቤስ ካሎ ኢሻ ቄናዜ ና ኦቲንኤሌ ጌቴቴስ።
JDG 3:10 ጎዳ ኣያናይ ኢዛ ቦላ ዎꬊን ኢዚ ኢስራኤሌ ዴሬ ኣይሲዛ ዳና ጊዲዴስ፤ ኢዚ ኦላስ ኬዚዳ ዎዴ ጎዳይ ማሶጴጾምያ ቢታ ካዎ ኩሻን-ኣሪሻታዬ ኢዛ ኩሼን ኣꬂ ኢሚን ኢዛ ጾኒዴስ።
JDG 3:11 ሄሳ ጊሻስ ቄናዜ ና ኦቲንኤሌይ ሃይቃና ጋካናስ ቢታይ ኦይዱ ታሙ ላይꬅ ኩሜꬅ ዎፓ ዴሚዴስ።
JDG 3:12 ኢስራኤሌ ኣሳይ ዛሬꬂዲካ ጎዳ ሲንꬃን ኢታ ሚሽ ኦꬂዴስ፤ ሄሳ ጊሻስ ጎዳይ ሞኣቤ ካዎ ኤጊሎኔይ ኢስራኤሌ ቦላ ዎልቃማና ማላ ኦꬂዴስ።
JDG 3:13 ኤጊሎኔይ ኣሞኔታኔ ኣማሌቄታ ባናራ ዴንꬂ ኤኪ ቢዲ ኢስራኤሌ ኣሳ ኦሊ ጾኒዴስ፤ ዛምባ ካታማ ጌቴቲዛ ኢያርኮ ካታማካ ኦይኪዴስ።
JDG 3:14 ኢስራኤሌ ኣሳይካ ሞኣቤ ካዎ ኤጊሎኔስ ታማኔ ኦስፑን ላይꬅ ሃሬቲዴስ።
JDG 3:15 ኢስራኤሌ ኣሳይ ጎዳኮ ዛሪ ዋሲዳ ዎዴ፥ ኢስታ ኣሺዛ ኣስ ኪቲዴስ፤ ኢዚካ ቢኒያሜ ዛሬፔ ጌራ ና ኤሁዴ ጌቴቴስ፤ ኢዚ ሃዲርሳ ኩሼን ኦꬂዛ ኣሳ፤ ኢስራኤሌ ኣሳይ ኤሁዴ ሞኣቤ ካዎ ኤጊሎኔኮ ጊራራ ኪቲዴስ።
JDG 3:16 ኤሁዴይ ናምኡ ባጋራ ቃራቲዳ ኢሲ ዋꬋ ጊዲዛ ጊꬃ ማሻ ባስ ጊግሲዴስ፤ ኡሻቻ ሚሌ ባጋራ ማይኦ ጊዶን ጊጺዴስ።
JDG 3:17 ሄሳፌ ጉዬ ሞኣቤ ካዎ ኤጊሎኔስ ጊራ ኤኪ ኤፊዲ ኢሚዴስ፤ ኤጊሎኔይ ኬሂ ኦርዴ ኣሳ።
JDG 3:18 ኤሁዴይ ጊራዛ ካዎዛስ ኢሚዳፔ ጉዬ ጊራ ቶኪዲ ቢዳ ኣሳታ ሞይዚዴስ።
JDG 3:19 ጊዶ ኣቲን ኤሁዴይ ጌልጌላ ማታን ዲዛ ማሴቲ ኤቂዳ ሹቻታ ማታፔ ኤጊሎኔኮ ጉዬ ሲሚ ቢዲ፥ «ካዎንቶ! ታኒ ኢንቴስ ዮታና ጹራ ሚሺ ዴስ» ጊዴስ። ሂስቲን ካዎይ፥ «ጮኡ ጋ!» ጊዴስ፤ ኢዛ ናጊዛይቲ ኡባይ ካሬ ኬዚዳ።
JDG 3:20 ሄ ዎዴ ካዎይ ፖቄን ዲዛ ኢሲ ጫርኪዛ ኪፊሌን ባርካ ኡቲ ዲሺን ኤሁዴይ ኢዛኮ ሺቂዲ፥ «ጾሲ ኔስ ዬዲዳ ኪታይ ዴስ» ጊዴስ፤ ካዎዚካ ባ ኡቲዳሶሆፔ ዴንዲ ኤቂዴስ።
JDG 3:21 ኤሁዴይ ሃዲርሳ ኩሼ ዬዲዲ ኡሻቻ ባጋ ሚሌፌ ጊꬃ ማሻ ሾዲዲ ካዎዛስ ኡሎን ዬዲዴስ።
JDG 3:22 ሂስቲን ጊꬃ ማሻስ ቱቴይ ኣቶንታ ኡሎ ጊዶ ጌሊዲ ዞኮራ ካንꬂ ኬዚዴስ፤ ሞꬌዚካ ማሻ ማይኢዴስ፤ ኤሁዴይ ማሻ ሾዶንታ ሄን ኣጋጊዴስ።
JDG 3:23 ሄሳፌ ጉዬ ኤሁዴይ ካሬ ኬዚዲ ኬꬃ ካሬ ኢዛ ቦላ ጎርዲ ቁልፒዴስ።
JDG 3:24 ኤሁዴይ ቢዳፔ ጉዬ ካዋ ኣይሌቲ ዪዲ ፔንጌይ ጎርዴቲዳይሳ ቤኢዳ፤ ጊዶ ኣቲን ካዎይ ጊዶ ኪፊሌን ሼሻስ ኡቶንታ ኣጌና ጊዲ ቆፒዳ።
JDG 3:25 ሳሌታና ጋካናስ ካሬን ኤቂ ናጊዳ፤ ጊዶ ኣቲን ካዎይ ፔንጌ ዶዮንታ ኢጺን ቁልፔ ኤኪዲ ፔንጌዛ ዶይዳ፤ ኢስታ ጎዳ ኣሃይ ዉይጌ ቦላ ፖርጩ ጊ ዲዛይሳ ቤኢዳ።
JDG 3:26 ኣሽካራቲ ሄን ፔንጌ ቦላ ናጎን ዲሺን ኤሁዴይ ኬሲ ኤኪዲ ማሴቲ ኤቂዳ ሹቻሶራ ኣꬊዲ ሴይሬ ጌቴቲዛሶ ባቃቲዴስ።
JDG 3:27 ኢዚ ሄ ጋኪዳ ዎዴ ኤፍሬሜ ዴሬን ቦላ ጌዜዛን ኢስራኤሌ ኣሳይ ኦላስ ሺቃና ማላ ዛዬ ፑኒዴስ፤ ኣሳይካ ኢዛ ካሊዲ ሄፔ ዱጌ ዎꬊዴስ።
JDG 3:28 ኢዚ ኢስታስ፥ «ታና ካሊቴ፤ ኣይስ ጊኮ ጎዳይ ኢንቴ ሞርኬታ፥ ሞኣቤታ ኢንቴ ኩሼን ኣꬂ ኢሚዴስ» ጊዴስ። ሂዝጊን ኢዛ ካሊ ዎꬊዲ ዮርዳኖሴ ሻፋፔ ጌዴ ሞኣቤ ፒንꬂዛ ፑርዴዛ ኦይኪዲ ኢሳዴይካ ሄራ ካንꬆንታ ማላ ዲጊዳ።
JDG 3:29 ሄ ዎዴ ሞኣቤ ኣሳፔ ታሙ ሺ ጊዲዛ ዶሬቲዳ ሚኖ ኦላንቻታ ዎꬊዳ፤ ኢሲ ኣሲካ ኬሲ ኤኪ ኣቲቤና።
JDG 3:30 ሄ ጋላስ ኢስራኤሌ ኣሳይ ሞኣቤ ኣሳ ኦሊ ጾኒዴስ፤ ሄሳ ጋሶን ቢታይ ኦስፑን ታሙ ላይꬅ ጋካናስ ዎፓ ዴሚዴስ።
JDG 3:31 ኤሁዴፔ ጉዬ ኣናቴ ና ሻምጋሬይ ዴንዲዴስ፤ ፊሊስጼሜ ዴሬፔ ኡሱፑን ጼቱ ኣስ ጪካ ጉፌን ዎꬊዲ ኢስራኤሌ ኣሳ ኣሺዴስ።
JDG 4:1 ኤሁዴይ ሃይቂዳፔ ጉዬ ኢስራኤሌ ኣሳይ ጎዳ ሲንꬃን ዛሬꬂዲካ ኢታ ሚሽ ኦꬂዴስ።
JDG 4:2 ሄሳ ጊሻስ ጎዳይ ሃጾሬ ጌቴቲዛ ካታማን ካዎቲዳ ካናኔ ካዎ ያቢኔስ ኢስታ ኣꬂ ኢሚዴስ፤ ኢዛ ኦላንቻታ ካሌꬂዛ ሲሳሪ ሃሮሼ-ሃጎዬ ጌቴቲዛ ካታማን ዴስ።
JDG 4:3 ያቢኔይ ቢራታፔ ኦሴቲዳ ኡዱፉን ጼቱ ፓራ-ጋሬቲ ኢዛስ ዲዛ ጊሻሲኔ ኢዚ ኢስራኤሌ ኣሳ ናምኡ ታሙ ላይꬅ ኩሜꬅ ኬሂ ኡንኤꬂዳ ጊሻስ ኢስቲ ማዶ ዴማናስ ጎዳኮ ዋሲዳ።
JDG 4:4 ሄ ዎዴ ላፒዶታ ማቻ ናቤ ዲቦራይ ቲንቢቴ ዮቲዛራ ኢስራኤሌ ዴራ ፒርዲዛ ዳና።
JDG 4:5 ኢዛካ ኤፍሬሜ ዴሬን ቦላ ጌዜን፥ ኤራማ ካታማፔኔ ቤቴሌ ካታማፔ ጊዶን ዲዛ ዲቦራ ዛምባ ጋርሳን ኡታዳ ፒርዳዉስ፤ ኢስራኤሌ ኣሳይ ባ ዮኦ ፒርዲሳናስ ኢዚኮ ዬስ።
JDG 4:6 ኢሲ ጋላስ ዲቦራ ኣቢኖኣሜ ና ባራቄ ኒፍታሌሜ ቢታን ዲዛ ቃዴሴ ካታማፔ ኪታዳ ጼይጊሳዱስ፤ «ጎዳ ኢስራኤሌ ጾሳይ ኔና፥ ‹ኒፍታሌሜ ዛሬፔኔ ዛቢሎኔ ዛሬፔ ታሙ ሺ ኣስ ኤካዳ ታቦሬ ዙማ ቦላ ኬዛ።
JDG 4:7 ያቢኔ ኦላንቻታ ካሌꬂዛ ሲሳራ ፓራ-ጋሬታኔ ኦላንቻታ ኤኪዲ ቂሶኔ ሻፋን ኔናራ ኦላ ጋይታናስ ያና ማላ ታኒ ኢዛ ዴንꬄꬃና፤ ታኒ ኢዛ ኔስ ኣꬃ ኢማና› ጊ ኣዛዜስ» ጋዱስ።
JDG 4:8 ባራቄይካ ኢዚስ፥ «ኔኒ ታናራ ቢኮ ታኒ ባና፤ ኔኒ ታናራ ቦንታ ኣጊኮ ታኒካ ቢኬ» ጊዴስ።
JDG 4:9 ዲቦራይካ፥ «ኤሮ፥ ቡሳ ታ ኔናራ ባና፤ ጊዶ ኣቲን ጎዳይ ሲሳራ ማጫሳ ኩሼን ኣꬂ ኢማና ጊሻስ ታ ቡሳይ ኔስ ቦንቾ ጊዴና» ጋዱስ፤ ሄሳፌ ጉዬ ዲቦራይ ዴንዳዳ ባራቄራ ኦላስ ቃዴሴ ባዱስ።
JDG 4:10 ባራቄይ ኒፍታሌሜኔ ዛቢሎኔ ዛሬታ ቃዴሴ ጼይጊን ታሙ ሺ ኣሳይ ኢዛ ካሊ ኬዚዴስ፤ ዲቦራይካ ኢዛራ ባዱስ።
JDG 4:11 ሄ ዎዴ ቄናዌ ዴሬ ኣስ ሄቤሬ ጌቴቲዛይሲ ሙሴ ቦሎ ሆባቤ ናይታ ቄናዌ ዴሬ ኣሳፔ ሻኬቲዴስ፤ ሂስቲዲ ቃዴሴኮ ሺቂዲ ዛናኒሜን ጊታ ዎላ ጋርሳን ባ ዱንካኔ ቶኪዴስ።
JDG 4:12 ኣቢኖኣሜ ና ባራቄይ ታቦሬ ዙማ ቦላ ቢዳይሳ ሲሳሪ ሲዪዲ፥
JDG 4:13 ሲሳሪካ ቢራታፔ ኦሴቲዳ ኡዱፉን ጼቱ ፓራ-ጋሬታኔ ባናራ ዲዛ ኦላንቻታ ኡባ ጼይጊሲዲ ሃሮሼ-ሃጎዬፔ ቂሶኔ ሻፋ ሺሺዴስ።
JDG 4:14 ዲቦራይ ባራቄ «ዴንዳ! ሄኮ ሃች ጎዳይ ሲሳራ ኔ ኩሼን ኣꬂ ኢሚዛ ጋላሳ። ቤያ! ጎዳይ ኔፔ ሲንꬃቲ ቤስ» ጋዱስ፤ ባራቄይ ታሙ ሺ ኣሳ ካሌꬂዲ ታቦሬ ዙማ ቦላፌ ዎꬊዴስ።
JDG 4:15 ጎዳይ ሲሳራ ኢዛ ፓራ-ጋሬታ ኡባኔ ኢዛ ኦላንቻታ ኡባ ቃራ ጊꬃ ማሻን ባራቄ ሲንꬃፌ ባቃቲሲዴስ፤ ሄሳ ጊሻስ ሲሳሪ ባ ፓራ-ጋሬፔ ዎꬊዲ ቶሆራ ባቃቲዴስ።
JDG 4:16 ባራቄይካ ሲሳራ ፓራ-ጋሬታኔ ኦላንቻታ ሃሮሼ-ሃጎዬ ጋካናስ ዬዴꬂዴስ፤ ሲሳራ ኦላንቻታፔ ኢሳዴይካ ኣቶንታ ኡባይካ ጊꬃ ማሻን ዉሪዳ።
JDG 4:17 ሄ ዎዴ ሃጾሬ ካዎ ያቢኔሲኔ ቄናዌ ዴሬ ኣስ ሄቤሬ ዜሬꬃታ ጊዶን ሎኦ ጋይቶቴꬂ ዲዛ ጊሻስ ሲሳሪ ቶሆን ባቃቲዲ ቄናዌ ዴሬ ኣስ ሄቤሬ ማቺዮ ያኤሊ ዱንካኔ ጊዶ ዎጺ ጌሊዴስ።
JDG 4:18 ያኤላ ሲሳራ ሞካናስ ኬዛዳ፥ «ታ ጎዳዉ፥ ጌላ፤ ሃ ጌላ፤ ያዮፋ» ጋዱስ፤ ኢዚ ዱንካኔ ጊዶ ኢዚኮ ጌሊን ኢዛ ባ ቡሉኮን ካማ ቆታዱስ።
JDG 4:19 ሲሳሪ፥ «ታና ሳሜስ፤ ኡዪዛ ጉꬃ ሃꬅ ኢማርኪ!» ጊዴስ፤ ማꬅ ኦቶፔ ቲጋ ኡሻዱስ፤ ሂስታዳ ሲሳራ ኢዛ ዛራ ካማ ቆታዱስ።
JDG 4:20 ሄሳፌ ጉዬ ኢዚ ኢዞ፥ «ዱንካኔዛ ፔንጌን ኤቃ፤ ኣይ ኣሲካ ዪዲ፥ ‹ሃይሳን ኣሲ ዲዜ?› ጊዲ ኔና ኦይቺኮ፥ ‹ባዋ› ጋ» ጊዴስ።
JDG 4:21 ሲሳሪ ኬሂ ዳቡርዳ ጊሻስ ꬊስኮ ሴሪዴስ፤ ሂስቲን ሄቤሬ ማቺያ ያኤላ ቆይጼኔ ዱንካኔ ꬊሽኬ ኤካዳ ሎዳራ ኢዛኮ ሺቃዱስ፤ ꬊሽኬዛካ ሃይꬃ ጮርጮሮን ኤሳዳ ዱጌ ቢታራ ሲካ ꬊሺኪን ሲሳሪ ሃይቂዴስ።
JDG 4:22 ባራቄይ ሲሳራ ኮዪሼ ዪን ያኤሌ ኢዛ ሞካናስ ካሬ ኬዛዳ፥ «ሃ ያ፤ ኔኒ ኮይዛ ኣዴዛ ታኒ ኔና ቤሳና» ጋዱስ፤ ኢዚራ ዱንካኔ ጊዶ ጌሊዲ ሲሳራ ሃይꬃ ጮርጮሮን ꬊሽኬይ ꬊሼኬቲን ኢዛ ኣሃይ ቢታ ቦላ ፖርጩ ጊ ዲዛይሳ ቤኢዴስ።
JDG 4:23 ሄ ጋላስ ጾሲ ኢስራኤሌ ኣሳይ ካናኔ ካዎ ያቢኔ ጾናና ማላ ኦꬂዴስ።
JDG 4:24 ኢስራኤሌ ኣሳይ ካናኔ ካዎ ያቢኔ ቦላ ሚኒ ሚኒ ቢዲ ዉርሴꬃን ኢዛ ꬋይሲዴስ።
JDG 5:1 ሄ ጋላስ ዲቦራይኔ ኣቢኖኣሜ ና ባራቄይ ሃይሳፌ ካሊዛ ዬꬃ ዬጺዳ።
JDG 5:2 «ካሌꬂዛይቲ ኢስራኤሌ ካሌꬂሺን፥ ዴሬይካ ባ ሼኔን ሃሬቲሺን ጎዳ ጋላቲቴ!
JDG 5:3 «ኢንቴኖ ካዎቶ! ሃይሳ ሲዪቴ! ኢንቴኖ ዴሬ ሃሪዛይቶ! ኤዝጊቴ! ታኒ ጎዳስ ዬጻና፤ ኢስራኤሌ ጎዳስ ጋላታ ማዛሙሬ ዬጻና።
JDG 5:4 «ኣቤት ጎዳዉ! ኔኒ ሴይሬ ዴሬፔ ዴንዲዳ ዎዴ፥ ኔኒ ኤዶሜ ቢታፌ ኬዚዳ ዎዴ፥ ቢታይ ቃጺዴስ። ሳሎፔ ኢራይ ቡኪዴስ፤ ኤ፥ ኢራይ ሻራታፔ ዱጌ ቡኪዴስ።
JDG 5:5 ጎዳ ኢስራኤሌ ጾሳ ሲንꬃኒኔ ሲና ጎዳ ሲንꬃን ዙማቲ ቃጺዳ።
JDG 5:6 «ኣናቴ ና ሻምጋሬ ዎዴኒኔ ያኤሌ ዎዴን ኦጌይ ሳሚዴስ፤ ዛልኣንቻቲካ ሄ ቢታራ ካንꬂ ቤቴና። ኦጌዛራ ቢዛይቲካ ኦጋ ኣጊዲ ሃራሶራ ቢዳ።
JDG 5:7 ኢስራኤሌ ማንዳራቲ ኣሲ ዶንታ ባዞ ጊዲዳ። ታኒ ዲቦራይ ኢስራኤሌ ኣሳስ ኣዮ ጊዳዳ ዴንዳና ጋካናስ ጾኒዲ ኣቲዳይ ባዋ።
JDG 5:8 ኢስራኤሌ ኣሳይ ኣላጋ ጾሳታ ዶሪዳ ዎዴ፥ ቢታን ኦላይ ዴንዲዴስ፤ ኦይዱ ታሙ ሺ ኢስራኤሌ ኦላንቻታ ጊዶን ኢሲ ጎንዳሌይ ዎይኮ ኢሲ ቶራይ ቤቲቤና።
JDG 5:9 ታ ዎዚናይ ኢስራኤሌ ዳናታራ ዴስ፤ ኣሳ ጊዶን ዶሳን ባና ኣꬂ ኢሚዳይታራ ዴስ። ጎዳይ ጋላቴቶ!
JDG 5:10 «ኢንቴኖ ኮሬቲዳ ቦꬃ ሃሬ ቶጊዛይቶ! ኢንቴኖ ሎኦ ኣራታን ኡቲ ኣሌቄቲዛይቶ! ኢንቴኖ ቶሆን ሄሜቲዛይቶ!
JDG 5:11 ሃꬃ ፑልቶታ ሄራን ዬጼቲዛ ዬꬃ ሲዪቴ፤ ኢስታ ጎዳይ ጾኒዳይሳ ኣኬኪሴስ፤ ቃሴ ኢስራኤሌ ኣሳይ ጾኒዳይሳ ናሼስ። «ጎዳ ኣሳይካ ካታማ ጌሊዛ ፔንጌታኮ ዱጌ ዎꬊዴስ።
JDG 5:12 ‹ዲቦራ! ቤጋ! ቤጋ! ቤጎታዳ ዬꬃ ዬጻ። ኔኖ፥ ኣቢኖኣሜ ና ባራቄ፥ ዴንዳ! ኔ ዲኢዳይታ ኤካዳ ሲንꬄ ጉጃ።›
JDG 5:13 «ሄሳፌ ጉዬ ኣቲዳ ኣሳቲ ሃላቃታኮ ዱጌ ዎꬊዳ። ጎዳ ኣሳቲ ኦሌታናስ ጊጊዲ ባራቄኮ ዪዳ።
JDG 5:14 ካሴ ኣማሌቄ ዛሬቲ ዲዛሶን ዲዛ ኤፍሬሜ ኣሳፔ ኢሲ ኢሲ ኣሳቲ ዪዳ። ቃሴ ሃራቲ ቢኒያሜ ዜሬꬃታፔ ኢስታ ካሊዳ። ማኪሬ ዛሬታፔ ዳናቲ፥ ዛቢሎኔ ዛሬታፔ ካዎቴꬃን ኡቲዛይቲ ዪዳ።
JDG 5:15 ዪሳኮሬ ዜሬꬃፌ ዳናቲ ዲቦሪራ ዪዳ፤ ኤ፥ ዪሳኮሬይኔ ባራቄይካ ዪዳ፤ ኢስቲካ ባራቄ ካሊዲ ዱጌ ዙሌዛ ዎꬊዳ። ጊዶ ኣቲን ኦሮቤሌ ዛሬቲ ቆፋን ሻኬቲ ዎꬊዳ፤ ያናኮኔ ዮንታኮ ሲꬊዳ።
JDG 5:16 ኔ ኣይስ ዶርሳ ዪሬ ጊዶን ኡታዲ? ዶርስ ሄሚዛይታ ዋይቄꬅ ሲያናስ ኡታዲ? ኦሮቤሌ ዛሬቲ ቆፋን ሻኬቲ ዎꬊዳ፤ ያናኮኔ ዮንታኮ ሲꬊዳ።
JDG 5:17 ጋላኣዴ ዛሬቲ ዮርዳኖሴ ሻፋፔ ሄ ፒንꬃን ኣቲዳ፤ ዳኔ ዛሬቲ ኣይስ ማርካቤ ጊዶን ጋምኢዶ? ኣሴሬ ዛሬቲ ባ ዲዛሶን ኣቲዳ፤ ሜዲቴራኔ ኣባ ላንቄንካ ዴኢዳ።
JDG 5:18 ዛቢሎኔ ዛሬቲ ባንታ ሼምፖ ሃይቆስ ኣꬂ ኢሚዳ። ኒፍታሌሜ ዛሬቲካ ኢስታꬆካ ኦላ ዴምባን ኦꬂዳ።
JDG 5:19 «ካዎቲ ዪዲ ማጊዶ ፑልቶታ ማታን ዲዛ ታኢናኬን ኦላ ኦይኬቲዳ። ካናኔ ካዎቲካ ሄን ኦሌቲዳ፤ ዲኢ ኤካናስ ኣይኮ ሚሺካ ዴሚቤቴና።
JDG 5:20 ሳሎ ጾሊንቴቲ ኢዛራ ኦሌቲዳ። ባንታ ሃኖታን ሲሳራራ ኦላ ቃቃጱ ጊዳ።
JDG 5:21 ቤኒ ቂሶኔ ሻፋ ኪጻይ ኢስታ ዴንꬂ ኤፊዴስ፤ ኢስቲካ ሃሮን ሜጬቲ ꬋይዳ፤ ታ ሼምፖዬ ሚና፤ ዎልቃንካ ሲንꬅ ጉጃ።
JDG 5:22 ሄሳፌ ጉዬ ቶጋ ኣሳቲ ቶጋን ኣዳራሲ ዪዳ። ቶጋ ፓራታ ጊሪሳይ ዳዳ ጊሪሳ ማላ።
JDG 5:23 ጎዳ ኪታንቻይ፥ ‹ሜሮዜ ቃንጊቴ! ሄን ዲዛ ኣሳ ኢሲፌ ቃንጊቴ! ጋሶይካ ኢስቲ ጎዳ ኣሳ ኦላን ማዶንታ ኢጺዳ። ዎልቃማ ኢስታ ሞርኬታራ ኦሌታናስ ኬዚቤቴና› ጊዴስ።
JDG 5:24 «ቄናዌ ዴሬ ኣስ ሄቤሬ ማቺያ ያኤላ ማጫሳ ኡባፌ ኣንጄቲዳሮ ጊዱ። ዱንካኔ ጊዶን ዲዛ ማጫሳ ኡባፌ ኢዛ ኣንጄቲዳሮ ጊዱ።
JDG 5:25 ሲሳሪ ኢዞ፥ ‹ታና ሃꬅ ኡሻ› ጊ ዎሲዴስ፤ ኢዛ ጊዲኮ ሜቃ ማꬅ ሺሻዱስ፤ ሎኦ ዋንጫን ኢዛስ ኢማዱስ።
JDG 5:26 ኢሲ ኩሼን ዱንካና ꬊሽኬ፥ ኡሻቻ ኩሼን ኦሳንቻታ ቆይጼ ኦይካዱስ፤ ሲሳራ ሁኤን ꬊሺካዱስ፤ ሃይꬃ ጮርጮሮራ ሉካ ኬሳዱስ።
JDG 5:27 ቦልቁ ጊ ኩንዲዴስ፤ ኢዚ ቶሆ ጋርሳንካ ጉፋኒዴስ፤ ሄ ኩንዲዳ ሶሆን ሃይቂዴስ።
JDG 5:28 «ሲሳራ ኣዬያ ማስኮቴራ ቤኣዱስ፤ ማስኮቴ ጾኤራካ ቲሺ ሂስታ ጼላሼ፥ ‹ታ ናዛ ፓራ-ጋሬይ ኣይስ ጋምኢዴ? ፓራ-ጋሬቲ ኤሶቲዲ ኣይስ ሲሚቤቴኔ?› ጋዳ ዋሳ ኦይቻዱስ።
JDG 5:29 ኣꬎ ኤራቴꬂ ዲዛ ኢዚ ማጫሳቲ ኢዚ ኦይሻ ዛሪዳ፤ ጊዶ ኣቲን ኢዛ ባ ቆፋን ባስ፥
JDG 5:30 ‹ኢስቲ ዲኢዲ ኤሂዳይሳ ጊሼቲ ኤኪሺን ኢሳዴ ኢሳዴ ኢሲ ኢሲ ጌላኦይ ዎይኮ ናምኡ ናምኡ ጌላኦቲ ጋኬቴስ። ሲሳራስ ኢስቲ ዱማ ዱማ ቃላሜን ኦሴቲዳ ኣሌቆ ማይኦ ኢማና፤ ቃሴ ታስካ ቆꬌን ጻጻናስ ጺሊፌን ኣሌቂዲ ሎኢዛ ማይኦታ ኤሃና› ጋዱስ።
JDG 5:31 «ኣቤት ጎዳዉ! ኔ ሞርኬቲ ኡባይ ሄሳꬆ ሃይቄቶ! ጊዶ ኣቲን ኔ ሲቆቲ ማላዶ ሞኪዛ ኣርሼዳ ጶሌቶ።» ሄሳፌ ጉዬ ቢታይ ኦይዱ ታሙ ላይꬅ ዎፓ ዴሚዴስ።
JDG 6:1 ኢስራኤሌ ኣሳይ ጎዳ ሲንꬃን ዛሬꬂዲ ኢታ ሚሽ ኦꬂዴስ፤ ሄሳ ጊሻስ ጎዳይ ኢስታ ሚዲያሜ ኣሳስ ኣꬂ ኢሚዴስ፤ ኢስቲካ ላፑን ላይꬅ ኩሜꬅ ሃሬቲዳ።
JDG 6:2 ሚዲያሜ ኣሳይ ኢስራኤሌ ኣሳ ቦላ ሚኒዳ ጊሻስ ኢስራኤሌ ኣሳይ ኢስታፌ ቆቴቲ ኣታናሶ ጎንጎሎኔ ሚጻ ጊግሲዴስ።
JDG 6:3 ኢስራኤሌ ኣሳይ ካꬅ ዜሪዛ ዎዴ ኡባን ሚዲያሜ ኣሳይ፥ ኣማሌቄ ኣሳይኔ ኣርሼይ ሞኪዛ ባጋራ ዲዛ ኣሳይ ኢስታ ቦላ ዎራጂ ዎራጂ ሜቶ ጋꬄቴስ።
JDG 6:4 ኢስቲ ሄ ቢታን ዱንካኒዲ ጋዛ ካታማ ጋካናስ ቢታ ኡባ ቦላን ሞኪዳይሳ ꬋይሴቴስ፤ ዶርሳታ፥ ሚዛታኔ ሃሬ ዉዴታ ዲኢ ኤፊዛ ጊሻስ ኢስራኤሌ ኣሳስ ኣይኮካ ኣሺ ኤሬቴና።
JDG 6:5 ባንታ ሜሄታኔ ባንታ ዱንካኔታ ኤኪዲ ቦሌይ ዪዛ ማላ ዳሪዲ ዬቴስ፤ ኢስታኔ ኢስታ ጋሜላታ ቆዳናስ ዳንዳዬቴና፤ ኢስታ ዩሳይካ ቢታ ꬋይሳናሳ።
JDG 6:6 ሚዲያሜ ኣሳይ ኢስራኤሌ ኣሳ ቦላ ሜቶ ጋꬂዳ ጊሻስ ኢስራኤሌ ኣሳይ ማዶ ዴማናስ ጎዳኮ ዋሲዴስ።
JDG 6:7 ሚዲያሜ ኣሳይ ጋꬂዳ ቆሆዛ ጋሶን ኢስራኤሌ ኣሳይ ጎዳኮ ዋሲን፥
JDG 6:8 ጎዳይ ኢስታኮ ኢሲ ናቤ ኪቲዴስ፤ ሄ ናቤዚ ኢስታስ ጎዳ ኢስራኤሌ ጾሳፌ ኤሂዳ ኪታይ፥ «ታ ኢንቴና ጊብጼ ኣይሌቴꬃፌ ኬሳዲስ።
JDG 6:9 ታኒ ኢንቴና ጊብጼ ኣሳ ኩሼፔኔ ዋዪሲዛ ኣሳ ኡባ ኩሼፔ ኣሻዲስ፤ ኢንቴ ሲንꬃፌካ ኢስታ ጎዳ ኬሳዳ ኢስታ ቢታ ኢንቴስ ኢማዲስ።
JDG 6:10 ታኒ ኢንቴና፥ ‹ታኒ ጎዳ ኢንቴ ጾሳ፤ ኢንቴ ኢስታ ቢታ ላቲዳ ኣሞሬታ ጾሳታስ ጎይኖፍቴ› ጋዳ ዮታዲስ፤ ጊዶ ኣቲን ኢንቴ ታ ቃላ ሲዮንታ ኢጺዴታ» ጌስ።
JDG 6:11 ሄሳፌ ጉዬ ጎዳ ኪታንቻይ ኦፊራ ጌቴቲዛሶን ዲዛ ኣቢኤዜሬ ዜሬꬃፌ ኢዮኣሳ ዎላ ጋርሳን ዪ ኡቲዴስ፤ ሄ ዎዴ ኢዮኣሳ ና ጌዶኒ ሚዲያሜ ኣሳፔ ቆቴታናስ ዎይኔ ጉምኢዛሶሆን ጊስቴ ቡኬስ።
JDG 6:12 ሄን ጎዳ ኪታንቻይ ኢዛስ ቆንጪዲ፥ «ሃይሶ ኔኖ፥ ሚኖ ኦላንቻዞ! ጎዳይ ኔናራ ዴስ» ጊዴስ።
JDG 6:13 ጌዶኒካ ኢዛ፥ «ታ ጎዶ! ጎዳይ ኑናራ ዲዛ ጊዲኮ ሃ ሜቶ ኡባይ ኑና ኣይስ ጋኪዴ? ኑ ኣዋቲ፥ ‹ጎዳይ ኑና ጊብጼ ቢታፌ ኬሲዴስ› ጊዲ ኑስ ዮቲዳ ማላሊሲዛ ኢዛ ኦሶቲ ኡባይ ኣዋን ዲዞ? ሃኢ ጊዲኮ ጎዳይ ኑና ሙሌካ ኣጊዴስ፤ ሚዲያሜ ኣሳ ኩሼንካ ኣꬂ ኢሚዴስ» ጊዴስ።
JDG 6:14 ሄሳፌ ጉዬ ጎዳይ ኢዛኮ ሲሚዲ፥ «ኔስ ዲዛ ጊታ ዎልቃን ባዳ ኢስራኤሌ ኣሳ ሚዲያሜ ኣሳ ኩሼፔ ኣሻዳ ኬሳ ኤካ፤ ኔና ኪቲዳይ ታና» ጊዴስ።
JDG 6:15 ጌዶኒ፥ «ታ ጎዳዉ፥ ታ ዛሬይ ሚናሴ ዛሬ ኡባፌ ኣꬊዳ ላፋ፤ ታኒካ ኑሶ ኣሳ ኡባፌ ጉꬃ፤ ሂስቲን ታኒ ኢስራኤሌ ኣሳ ዎስታዳ ኣሻናስ ዳንዳያዚና?» ጊዴስ።
JDG 6:16 ጎዳይካ፥ «ቱማፔ ታኒ ኔናራ ጊዳና፤ ኢሲ ኣስ ሾጪዛ ማላ ኔኒ ሚዲያሜ ኣሳ ሾጫዳ ጾናና» ጊዴስ።
JDG 6:17 ጌዶኒካ «ኔኒ ታናን ኡፋዬቲዳ ጊዲኮ ታናራ ሃሳይዛይ ኔና ጊዲዳይሳ ኤሪሲዛ ማላታ ታና ቤሳ።
JDG 6:18 ታኒ ጉዬ ሲማ ባዳ ኔስ ያርሾ ሚሽ ኤካ ያና ጋካናስ ሃኒፌ ሃራሶ ቦፓ» ጊዴስ። ጎዳይካ፥ «ኔኒ ሲማና ጋካናስ ታኒ ሃይሳን ናጋና» ጊዴስ።
JDG 6:19 ጌዶኒ ባሶ ቢዲ ዴይሻ ላቃ ሹኪዲ ካꬂዴስ፤ ኢሲ ታሙ ኪሎ ጊራሜ ጊዲዛ ꬊሌ ኤኪዲ ኢርሾይ ኢዛን ጌሎንታ ኡኬꬅ ኡኪዴስ፤ ኣሾዛ ሌማቴን ዎꬂዲ ጫምባዛ ኬሬን ቲጊዴስ፤ ኡባካ ኤኪ ኤፊዲ ዎላ ጋርሳን ኡቲዳ ጎዳ ኪታንቻዛስ ሺሺዴስ።
JDG 6:20 ጾሳ ኪታንቻይ ኢዛ፥ «ኣሾዛኔ ኢርሾይ ኢዛን ጌሎንታ ኡኬꬃዛ ኤካዳ ሃ ሹቻ ቦላ ዎꬃ፤ ጫምባዛካ ኢዛ ቦላ ቲጋ» ጊዴስ፤ ጌዶኒካ ኢዚ ኣዛዚዳ ማላ ኦꬂዴስ።
JDG 6:21 ጎዳ ኪታንቻይ ባ ኩሼን ኦይኪዳ ጉፌ ጼራን ኣሾዛኔ ኡኬꬃዛ ቦቺዴስ፤ ሂስቲን ታማይ ሹቻ ጊዶፌ ኬዚዲ ኣሾዛኔ ኡኬꬃዛ ሚዴስ፤ ሄሳፌ ጉዬ ጎዳ ኪታንቻይ ኢዛ ሲንꬃፌ ጌሚዴስ።
JDG 6:22 ጌዶኒ ቤይዳይ ጎዳ ኪታንቻ ጊዲዳይሳ ኣኬኪዳ ዎዴ፥ «ኡባ ሃሪዛ ጎዳዉ! ታኒ ጎዳ ኪታንቻ ታ ኣይፌን ቤኢዳ ጊሻስ ታስ ኣዬ ኣና!» ጊዴስ።
JDG 6:23 ጊዶ ኣቲን ጎዳይ፥ «ሳሮይ ኔስ ጊዶ! ያዮፋ! ኔ ሃይቃካ» ጊዴስ።
JDG 6:24 ጌዶኒካ ጎዳስ ያርሾ ያርሺዛሶ ሄን ጊግሲዲ ሄ ሶሆዛ፥ «ጎዳይ ሳሮ ጾሳ» ጊዲ ሱንꬂዴስ፤ ሄ ያርሾ ያርሺዛሶይ ኣቢኤዜሬ ዜሬꬃታስ ጊዲዳ ኦፊራን ሃች ጋካናስ ኤቂ ዴስ።
JDG 6:25 ሄ ጋላሳ ኦማርስ ጎዳይ ጌዶኔ፥ «ኔ ኣዋ ሚዛታ ጊዶፌ ሃራ ላፑን ላይꬃ ኮርማ ቦራ ኤካ፤ ኔ ኣዋይ ባኣሌ ጌቴቲዛ ኤቃስ ያርሾ ያርሺዛሶዛ ላላ፤ ኢዛ ላንቄን ዲዛ ኣሼሮ ጌቴቲዛ ማጫ ጾሳይ ሚስሌዛካ ቲፋ ሜንꬄሬꬃ ዬጋ።
JDG 6:26 ሄ ቲፌቲ ዶሬቲዳ ሚስሌዛ ቦላ ጎዳ ኔ ጾሳስ፥ ያርሾ ያርሺዛሶ ሎኤꬃ ጊጊሳ፤ ሄሳፌ ጉዬ ኔኒ ሜንꬄሬꬂዳ ኣሼሮ ጌቴቲዛ ጾሳይ ሚስሌዛ ቄራ ኤꬃዳ ናምኣንꬆ ቦራዛ ሙሌራ ጹጊዛ ያርሾ ኦꬃዳ ያርሻ» ጊዴስ።
JDG 6:27 ጌዶኒካ ባ ኣይሌታፔ ታማታ ኤኪዲ ጎዳይ ኢዛስ ዮቲዳ ማላ ኦꬂዴስ፤ ጊዶ ኣቲን ኢዚ ባ ኣዋ ሶ ኣሳሲኔ ካታማን ዲዛ ኣሳስ ያዪዳ ጊሻስ ሄሳ ጋላስ ኦꬃናይሳ ኣጊዲ ኦማርስ ኦꬂዴስ።
JDG 6:28 ማላዶ ዎንታን ካታማ ኣሳይ ዴንዲዳ ማላ ባኣሌ ጌቴቲዛ ኤቃስ ያርሾ ያርሺዛሶይ ላሌቲቺዳይሳኔ ኢዛ ላንቄን ዲዛ ኣሼሪ ሚስሌይ ሜቄሬቲ ዎꬊዳይሳ ቤኢዴስ፤ ቃሴ ኢስቲ ያርሾ ያርሺዛሶይ ጊጊዳይሳኔ ኢዛ ቦላ ናምኣንꬆ ቦራይ ያርሼቲዳይሳ ቤይዳ።
JDG 6:29 ባንታ ጊዶን፥ «ሃይሶ ሃይሳ ኦꬂዳይ ኦኔ?» ጊዲ ኢሶይ ኢሳ ኦይቺዳ፤ ኢስቲ ዩዪ ዩዪ ኦይቺዲ ሄሳ ኦꬂዳይ ኢዮኣሳ ና ጌዶኔ ጊዲዳይሳ ኤሪዳ።
JDG 6:30 ሄሳፌ ጉዬ ካታማ ኣሳይ ኢዮኣሳ፥ «ባኣሌ ጌቴቲዛ ኤቃስ ያርሾ ያርሺዛሶዛ ላሊዳ ጊሻሲኔ ኢዛ ላንቄን ዲዛ ኣሼሪ ሚስሌዛ ሜንꬄሬꬂ ዬጊዳ ጊሻስ ኑኒ ኢዛ ዎꬋና ማላ ኔ ናዛ ሃ ኬሳ» ጊዴስ።
JDG 6:31 ኢዮኣሲ ባ ቦላን ዴንዲዳ ኣሳ ኡባ፥ «ኢንቴ ባኣሌስ ሞቴቴቲ? ዎይኮ ኢንቴ ኢዛ ኣሻኔ? ኢዛ ጊሻስ ሞቴቲዛ ኣሲ ዲኮ ሳኣይ ዎንታናሺን ኢዛዴይ ሃይቆ! ባኣሌይ ጾሳ ጊዲኮ ኢዛስ ያርሾ ያርሺዛሶዛ ላሊዳዴራ ኢዚ ባርካ ሞቴቶ» ጊዴስ።
JDG 6:32 ሄሳ ጊሻስ ሄ ጋላስ ኣሳይ ጌዶኔ ሱንꬃ ዬሩባኣሌ ጊ ሱንꬂዳ፤ ቢርሼꬃይ ባኣሌይ ባ ጊሻስ ሞቴቶ ጉሳ፤ ጋሶይካ ላሌቶይሲ ኢዛስ ያርሾ ያርሺዛሶ ጊዲዳ ጊሻሳ።
JDG 6:33 ሄሳፌ ጉዬ ሚዲያሜ ቢታ ኣሳይ፥ ኣማሌቄ ቢታ ኣሳይኔ ኣርሼይ ሞኪዛ ባጋራ ዲዛ ኣሳይ ኡባይ ኢሲፌ ሺቂዲ ዮርዳኖሴ ሻፋ ፒኒዳ፤ ኢዝራኤሌ ጌቴቲዛ ሾባን ዱንካኒዳ።
JDG 6:34 ሄሳፌ ጉዬ ጎዳ ኣያናይ ጌዶኔ ቦላ ዎꬊዴስ፤ ኣቢኤዜሬ ዛሬቲ ኡባይ ባና ካላና ማላ ኢስታ ሺሻናስ ዛዬ ፑኒዴስ።
JDG 6:35 ሚናሴ ዛሬ ኡባስ ኣስ ኪቲዲ ባና ካላና ማላ ኢስታካ ጼይሲዴስ፤ ሄሳꬆካ ኣሴሬ ዛሬታስ፥ ዛቢሎኔ ዛሬታሲኔ ኒፍታሌሜ ዛሬታስ ኣስ ኪቲዴስ፤ ኢስቲካ ኢዛራ ኦላሶ ባናስ ኬዚዳ።
JDG 6:36 ሄሳፌ ጉዬ ጌዶኒ ጾሳ፥ «ታኒ ኢስራኤሌ ኣሳ ኣሻና ማላ ኔኒ ታና ዶሪዳይሳ ታስ ዮታዳሳ።
JDG 6:37 ቤያ፥ ጊስቴ ቡኪዛ ባሌን ዶርሳ ኢስኬ ታኒ ዎꬃና፤ ጻዛይ ሄ ዶርሳ ኢስኬ ቦላ ጻላ ዲዲ ቢታ ቦላ ዶንታ ኣጊኮ ኔኒ ዮቲዳ ማላ፥ ኢስራኤሌ ኣሳ ታ ኩሼን ኔ ኣሻናይሳ ታ ኤራና» ጊዴስ።
JDG 6:38 ኢዚካ ጊዳ ማላ ሃኒዴስ፤ ዎንቴꬃ ጋላስ ማላዶ ዎንታራ ዴንዲዲ ዶርሳ ኢስኬ ጉምኢዳ ዎዴ ኢሲ ሳኔ ጊዲዛ ሃꬂ ኢዛፔ ኬዚዴስ።
JDG 6:39 ጌዶኒ ቃሴካ ጾሳ፥ «ዎዜ ኔና ዛይ! ታና ሃንቄቶፋ! ኢሲቶ ታ ኔና ዛራ ኦይቻይስ፤ ዶርሳ ኣጎዛ ቦላ ሃራ ማላታ ቤሳና ማላ፤ ሄሲካ ዶርሳ ኣጎዛይ ሜላ ጊዲን ቢታይ ሃጺዲ ጻዛታና ማላ ኦꬃርኪ!» ጊዴስ።
JDG 6:40 ሄ ጋላሳ ኦማርስ ጾሲ ሄ ማላታዛ ኦꬂዴስ፤ ዎንቴꬃ ጋላስ ማላዶ ዶርሳ ኣጎዛይ ሜላ ጊዲን ቢታ ኡባይ ሃጺዴስ።
JDG 7:1 ዎንቴꬃ ጋላስ ማላዶ ዎንታራ ዬሩባኣሌ ጌቴቲዛ ጌዶኒኔ ኢዛራ ዲዛ ኣሳይ ኡባይ ዎንታ ማላዶራ ዴንዲ ቢዲ ሃሮዳ ጌቴቲዛ ፑልቶ ሃꬃ ኣቻን ዱንካኒዳ። ሚዲያሜ ቢታ ኣሳቲካ ኢስታፌ ፑዴሃ ባጋራ ሞሬ ጌቴቲዛ ዙማ ማታን ዲዛ ዙሌን ዱንካኒዳ።
JDG 7:2 ጎዳይ ጌዶኔ፥ «ሚዲያሜ ዴሬ ኣሳ ታኒ ኢንቴ ኩሼን ኣꬃ ኢሞንታ ማላ ኔናራ ዲዛ ኣሳይ ዳሪዴስ፤ ኢስራኤሌ ኣሳይ፥ ‹ኑ ዎልቃን ኣቲዶስ› ጊዲ ታ ቦላ ጬቄቶንታ ማላ ሚዲያሜ ዴሬ ኣሳ ታኒ ኢስታስ ኣꬃ ኢሚኬ።
JDG 7:3 ሄሳ ጊሻስ ሃኢ ኣሳስ፥ ‹ዎዚናይ ሂርጊዛዴይኔ ባቢዛዴይ ዲኮ ጋላኣዴ ዙማፔ ጉዬ ሲሚዲ ባሶ ባሶ ቦ› ጋዳ ኣዋጃ» ጊዴስ። ሄሳፌ ዴንዶይሳን 22,000 ኣሳይ ጉዬ ሲሚን 10,000 ኣሲ ጻላ ኣቲዴስ።
JDG 7:4 ሄሳፌ ጉዬ ጎዳይ ጌዶኔ፥ «ሃኢካ ኣሳይ ዳሪዴስ፤ ኔኒ ኢስታ ዱጌ ሃꬃ ሻፋ ዎꬃ፤ ሄን ታ ኢስታ ኔስ ፓጫዳ ሻካና፤ ታኒ፥ ‹ሃይሲ ኔናራ ቦ› ጊዛይሲ ኔናራ ቦ፤ ‹ሃይሲ ኔናራ ቦፖ› ጊዛይሲ ቦፖ» ጊዴስ።
JDG 7:5 ሄሳ ጊሻስ ጌዶኒ ኣሳ ሃꬃኮ ኤፊዴስ፤ ጎዳይ ጌዶኔ፥ «ሃ ኣሳ ጊዶፌ ጉልባቲዲ ሃꬅ ኡዪዛይታኔ ካና ማላ ኤቆን ሃꬅ ኢንጻርሳን ላማጪ ላማጪ ሂስቲዲ ኡዪዛይታ ሻካ» ጊዴስ።
JDG 7:6 ባንታ ኩሼን ሃꬃ ኤቆን ኩጳቲ ኡዪዛይታ ቆዳይ ሄꬑ ጼታ፤ ጊዶ ኣቲን ኣቲዳይቲ ኡባይ ሃꬃ ኡያናስ ጉልባቲዳ።
JDG 7:7 ጎዳይ ጌዶኔ፥ «ባንታ ኩሼን ሃꬃ ኩጳቲ ኤቆን ዲሼ ኡዪዳ ሄꬑ ጼቱ ኣሳታን ታኒ ኢንቴና ኣሻና፤ ሚዲያሜ ኣሳታ ኢንቴስ ኣꬃ ኢማና፤ ሃንኮ ኣቲዳ ኣሳይ ጊዲኮ ጉዬ ባሶ ባሶ ሲሞ» ጊዴስ።
JDG 7:8 ሄሳ ጊሻስ ጌዶኒ ጉዬ ሲሚዛ ኢስራኤሌ ኣሳ ሺንቄኔ ዛዬ ኤኪዲ 300 ኣሳታስ ኢሚዲ ሃንኮ ኣቲዳ ኣሳ ኡባ ኢስታ ሶ ኢስታ ሶ ዬዲዴስ፤ ሃ ኡባይ ሃኒዛ ዎዴ ሚዲያሜ ኦላንቻቲ ኢስታፌ ዱጌ ባጋራ ዙሌን ዱንካኒዲ ኡቲዳ።
JDG 7:9 ሄ ጋላሳ ኦማርስ ጎዳይ ጌዶኔ፥ «ታኒ ኔስ ኣꬃ ኢሚዳ ጊሻስ ዴንዳ ባዳ ኢስቲ ዱንካኒዳሶን ኢስታ ኦላ።
JDG 7:10 ኔኒ ባዳ ኦላናስ ያዪኮ ኔ ኣይሌ ፑራ ኔናራ ኤካዳ ኢስቲ ዱንካኒ ዲዛሶ ዱጌ ባ፤
JDG 7:11 ኢስቲካ ጊዛይሳ ሲያ፤ ሄሳፌ ጉዬ ኔኒ ኢስታ ሂርጋይ ባይንዳ ኦላና» ጊዴስ። ሄሳ ጊሻስ ጌዶኒ ባ ኣይሌ ፑራ ካሌꬂ ኤኪዲ ሞርኬቲ ዱንካኒ ዲዛሶ ሄራ ዎꬊዴስ።
JDG 7:12 ሄ ዎዴ ቦሌ ማላ ጮራቲዳ ሚዲያሜ ኣሳይ ኣማሌቄ ኣሳይኔ ኣርሼ ኬሳ ባጋራ ዲዛ ኣሳይ ኡባይ ሾባ ጊዶን ዱንካኒ ኡቲዴስ። ኢስታ ጋሜላቲ ኣባ ዶናን ዲዛ ኣጬ ማላ ቆዳፔ ዳሮ።
JDG 7:13 ጌዶኒ ሄ ጋኪዳ ማላ ኢሲ ቢታኔይ ባ ኣጉሜቲዳ ኣጉሞ ባ ላጌዛስ ዮቲሺን ሲዪዴስ፤ ሄ ኣጉሞዚካ፥ «ኢሲ ባንጋ ኡኬꬃያ ኤꬖታዳ ሚዲያሜ ኦላንቻቲ ዱንካኒ ዲዛሶ ያዳ ዱንካና ዴቻዱስ፤ ዱንካናይካ ላሌቲ ሚጬቲዴስ» ጊዴስ።
JDG 7:14 ኢዛ ላጌዚካ ዛሪዲ፥ «ሄሲ ኢስራኤሌ ዴሬ ኣስ ኢዮኣሳ ና ጌዶኔ ጊꬃ ማሻፌ ኣቲን ሃራ ጊዴና፤ ጾሲ ሚዲያሜ ዴሬ ኣሳኔ ኑ ኦላ ኣሳ ኡባ ጌዶኔስ ኣꬂ ኢሚዴስ» ጊዴስ።
JDG 7:15 ጌዶኒካ ሄ ቢታኔዛ ኣጉሞዛኔ ኣጉሞዛ ቢርሼꬃ ሲዪዳ ዎዴ ጉልባቲዲ ጾሳስ ጎይኒዴስ፤ ሄሳፌ ጉዬ ኢስራኤሌ ኣሳይ ዱንካኒዳሶ ጉዬ ሲሚዲ፥ «ዴንዲቴ! ጎዳይ ሚዲያሜ ኦላንቻታ ኢንቴ ኩሼን ኣꬂ ኢሚዴስ» ጊዴስ።
JDG 7:16 ሄꬑ ጼቱ ኣሳ ሄꬑ ቡቴን ሻኪዴስ፤ ኢስታስካ ሁኤን ሁኤን ኢሲ ኢሲ ዛዬኔ ጊዶን ኤጺዛ ጾምፔ ኦይኪዳ ኢሲ ኢሲ ጻሮ ኢሚዴስ።
JDG 7:17 ጌዶኒካ ኢስታስ፥ «ታኮ ሃ ጼሊዲ ታኒ ኦꬂዛይሳ ኦꬂቴ፤ ታኒ ሚዲያሜ ኦላንቻቲ ዱንካኒዳሶ ማታ ጋካዳ ኦꬂዛ ማላ ኢንቴካ ኦꬂቴ።
JDG 7:18 ታኒኔ ታናራ ዲዛይቲ ኡባቲ ዛዬ ፑኒዛ ዎዴ ኢንቴካ ኢስቲ ዱንካኒዳሶ ዩዪ ኣꬊዲ ኢንቴ ዛዬ ፑኒዲ፥ ‹ጎዳ ኦላኔ ጌዶኔ ኦላ!› ጊዲ ዋሲቴ» ጊዴስ።
JDG 7:19 ጊዲ ጊዶꬅ ጊዳና ጊሺን ናጊዛ ዛቤቲ ላሜቲዳፔ ጉዬ ጌዶኒኔ ኢዛራ ዲዛ ጼቱ ኣሳቲ ቢዲ ሚዲያሜቲ ዱንካኒዳሶ ማታ ጋኪዲ ባ ኦይኪዳ ዛዬ ዛዬ ፑኒዳ፤ ባ ኦይኪዳ ጻሮታካ ኡባ ሜንꬄሬꬂዳ።
JDG 7:20 ሃራ ባጋራ ዲዛ ናምኡ ቡቴቲካ ባ ዛዬ ዛዬ ፑኒዲ ባ ኦይኪዳ ጻሮታካ ሜንꬄሬꬂዳ፤ ሃዲርሳ ኩሼን ኤጺዛ ጾምፔ፥ ኡሻቻ ኩሼን ዛዬ ኦይኪዲ ፑኒሼ፥ «ጎዳ ኦላኔ ጌዶኔ ኦላ!» ጊዲ ዋሲዳ።
JDG 7:21 ኣሳይ ኡባይ ሚዲያሜ ኣሳቲ ዱንካኒዳሶ ዩሾን ባ ናጊዛሶን ናጊዛሶን ኤቂዳ፤ ሚዲያሜ ኦላንቻቲካ ኡባይ ዋሶ ጹሌꬂሼ ባቃቲዳ።
JDG 7:22 ሄꬑ ጼቱ ጌዶኔ ኣሳይ ባ ዛዬ ዛዬ ፑኒዳ ዎዴ ሞርኬታ ኦላንቻቲ ባንታ ጊꬃ ማሻን ኢሶይ ኢሳ ዎꬋና ማላ ጎዳይ ኦꬂዴስ፤ ሄሳ ጊሻስ ኣቲዳ ኦላንቻቲ ዜሬራ ባጋራ ጌዴ ቤቲ-ሲጼ ጌቴቲዛ ካታማራ ኣꬊ ቢዲ ጻባታ ማታን ዲዛ ኣቤሊ-ማሆሌ ጋካናስ ባቃቲዳ።
JDG 7:23 ሄሳፌ ጉዬ ጌዶኒ ኒፍታሌሜ ዛሬፔ፥ ኣሴሬ ዛሬፔኔ ሚናሴ ዛሬ ኡባፌ ኣሳ ጼይጊ ኬሲን ኢስቲካ ሚዲያሜ ዴሬ ኣሳ ዬዴꬂዳ።
JDG 7:24 ኤፍሬሜ ጌዜን ዲዛ ኣሳ ኡባኮ ጌዶኒ ኣስ ኪቲዲ፥ «ሚዲያሜ ኣሳ ኦላናስ ዱጌ ዎꬊቴ፤ ቤቲ-ባሬ ጋካናስ ዲዛ ዮርዳኖሴ ሻፋ ኢስታፌ ሲንꬃቲ ኦይኪዲ ኦጌ ዱꬂቴ» ጊዴስ። ኤፍሬሜ ኣሳይካ ኡባይ ጼይጌቲ ሺቂዲ ኢዚ ጊዳይሳꬆ ኦꬂዴስ።
JDG 7:25 ኦሬቤኔ ዛኤቤ ጌቴቲዛ ሚዲያሜ ኦላ ኣሳ ካሌꬂዛ ናምኡ ኦላ ቃራታ ኦይኪዳ፤ ኦሬቤ፥ «ኦሬቤ ዛላ» ጌቴቲዛሶን ዎꬊዳ፤ ዛኤቤ ቃሴ፥ «ዛኤቤ ዎይኔ ጉምኢዛሶሆ» ጌቴቲዛሶን ዎꬊዳ። ሄሳፌ ጉዬካ ኣቲዳ ሚዲያሜቲ ዬዴꬂዲ ኦሬቤ ሁኤኔ ዛኤቤ ሁኤ ቆꬌፔ ቃንጺ ቃንጺ ኤኪዲ ጌዶኔኮ ኤሂዳ። ሄ ዎዴ ጌዶኒ ዮርዳኖሴ ሻፋፔ ሄ ፒንꬃን ኣርሼይ ሞኪዛሶ ባጋራ ዴስ።
JDG 8:1 ሄሳፌ ጉዬ ኤፍሬሜ ኣሳይ ጌዶኔ፥ «ሚዲያሜታ ኦላናስ ባሼ ኑና ኣይስ ጼይጋቤኪ? ኑና ኣይስ ሃይሳ ማላ ኦꬃዲ?» ጊዲ ኬሂ ዋላሲዳ።
JDG 8:2 ጊዶ ኣቲን ጌዶኒ ዛሪዲ፥ «ታኒ ኦꬂዳይሳፌ ኢንቴ ኦꬂዳይ ኣꬌኔ? ታ ቆሞቲ ዉሪ ኦꬂዳ ኦሶፔ ኤፍሬሜ ኣሳፔ ጉꬃቲ ኦꬂዳ ኦሶይ ኣꬌኔ? ኤፍሬሜይ ፑሼቺ ሺሺዳይሲ ኣቢኤዜሬይ ማጺ ሺሾይሳፌ ኣꬌኔ?
JDG 8:3 ሚዲያሜ ኦላ ኣሳ ካሌꬂዛ ኦላ ቃራታ ኦሬቤኔ ዛኤቤ ጾሲ ኢንቴ ኩሼን ኣꬂ ኢሚዴስ። ሂስቲን ታ ሄሳራ ጊናቲዛ ኦሶ ኣይ ኦꬃዲና?» ጊዴስ፤ ሄሳፌ ጉዬ ኢስታ ሃንቆይ ኢርጺዴስ።
JDG 8:4 ጌዶኒኔ ኢዛራ ዲዛ 300 ኣሳይ ዮርዳኖሴ ሻፋ ዪዲ ፒኒዳ፤ ኢስቲ ኣይ ዳቡርኮካ ባንታ ሞርኬታ ዬዴꬆ ኣጊቤቴና።
JDG 8:5 ጌዶኒ ሱኮቴ ካታማ ጋኪዲ ሄ ካታማ ኣሳታስ፥ «ታኒ ሚዲያሜ ካዎታ ዜባሃኔ ጻልሙና ዬዴꬆ ቦላ ዳይስ፤ ታናራካ ዲዛ ኣሳይ ዳቡርዳ ጊሻስ ኢንቴና ሾቢስ፥ ሚዛ ካꬂ ዲኮ ኢሜርኬቲ» ጊዴስ።
JDG 8:6 ሱኮቴ ካታማ ኣይሲዛይቲ፥ «ኑኒ ኔና ካሊዛ ኦላ ኣሳስ ካꬅ ኢማና ማላ ዜባሃይኔ ጻልሙናይ ኔ ኩሼን ጌሊዶ?» ጊዳ።
JDG 8:7 ጌዶኒ ኢስታስ ዛሪዲ፥ «ሎኦ፥ ኣይኮይ ባዋ! ጎዳይ ዜባሃኔ ጻልሙና ታ ኩሼን ኣꬂ ኢሚዛ ዎዴ ታኒ ባዞ ኣጉንꬃኒኔ ጋሞን ኢንቴና ዋꬋና» ጊዴስ።
JDG 8:8 ሄሳፌ ጉዬ ፓኑኤሌ ጌቴቲዛሶ ቢዴስ፤ ሱኮቴ ኣሳ ኦይቾይሳꬆ ኦይቺዴስ፤ ፓኑኤሌ ኣሳይካ ሱኮቴ ካታማ ኣሳይ ጎይሳꬆካ ጊ ዛሪዴስ።
JDG 8:9 ኢዚካ ፓኑኤሌ ኣሳስ፥ «ታኒ ጾናዳ ሳሮ ሲሚዛ ዎዴ ኢንቴ ኢንቴ ካታማ ኢዛ ቦላ ኡቲዲ ናጊዛ ጊምቤዛ ታ ላላና» ጊዴስ።
JDG 8:10 ዜባሃይኔ ጻልሙናይ ኣርሼ ኬሳ ባጋፌ ዪዳ ኦላንቻታፔ ኣቲዳ 15,000 ኦላንቻታራ ቃሪቆሬ ጌቴቲዛ ካታማን ዴቴስ፤ ሃንኮ 120,000 ጊዲዛ ኦላ ማሳራ ኦይኪዳ ኦላንቻቲ ኦላን ሃይቂ ዉሪዳ።
JDG 8:11 ጌዶኒ ኖባሄፔኔ ዮጊባሃፔ ኣርሼይ ሞኪዛ ባጋራ ዲዛ ባዞ ጋጻ ኦጌራ ቢዲ ሄሳን ዲዛ ኦላንቻታ ቦላ ኢስቲ ኣኬኮንታ ዲሺን ኦላ ኦይኪዴስ።
JDG 8:12 ኢስቲካ ኡባይ ዳጋሚዳ፤ ሚዲያሜ ካዎቲ ዜባሃይኔ ጻልሙናይ ናምኣይካ ባቃቲዳ፤ ጊዶ ኣቲን ጌዶኒ ኢስታ ዬዴꬂ ጋኪዲ ኦይኪዴስ።
JDG 8:13 ኢዮኣሳ ና ጌዶኒ ኦላፔ ሄሬሴ ፒኒዛሶራ ሲሚዴስ።
JDG 8:14 ሱኮቴፔ ኢሲ ናቴꬃ ኣስ ኦይኪዲ ፒልጊ ኦይቺዴስ፤ ኢዚካ ሱኮቴ ኣይሲዛይታኔ ጪማታ ላፑን ታማኔ ላፑናታ ሱንꬃ ጻፊዲ ኢዛስ ኢሚዴስ።
JDG 8:15 ሄሳፌ ጉዬ ጌዶኒ ሱኮቴ ኣሳኮ ዪዲ፥ « ‹ዜባሃኔ ጻልሙና ኔኒ ዲኣቤካሺን ዳቡርዳ ኔ ኦላንቻታስ ኣይስ ካꬅ ኢማኔ?› ጊዲ ኢንቴ ታና ቂልጪዴታ፤ ሃኢ ጊዲኮ ዜባሃኔ ጻልሙና ሃይታ ቤኢቴ!» ጊዴስ።
JDG 8:16 ሄሳፌ ጉዬ ባዞ ኣጉንꬃኒኔ ኪንዲቾን ዋꬊዲ ሱኮቴ ካታማ ኣይሲዛይታ ቃጻይዴስ።
JDG 8:17 ቃሴ ፓኑኤሌን ኢዛ ቦላ ኡቲዲ ካታማ ናጊዛ ጊምቤዛ ላሊዲ ካታማን ዲዛ ኣቱማሳ ዎꬊዴስ።
JDG 8:18 ሂስቲዲ ጌዶኒ ዜባሃኔ ጻልሙና፥ «ኢንቴ ታቦሬን ዎꬊዳ ኣሳቲ ኣይ ማላ ኣሴ?» ጊዲ ኦይቺዴስ፤ ኢስቲ፥ «ኔ ማላ፤ ኢስቲ ኡባይካ ካዎ ናይታ ሚሳቴቴስ» ጊ ዛሪዳ።
JDG 8:19 ጌዶኒ፥ «ኢስቲ ታ ኢሻንታ፤ ኢስቲ ታ ኣዬይ ናይታ፤ ጾሲ ቤዪን ኢንቴ ኢስታ ዎꬎንታኮ ታኒካ ኢንቴና ዎꬊኬ ሺን» ጊዴስ።
JDG 8:20 ሄሳፌ ባስ ባይራ ናዛ ዬቴሬ፥ «ዴንዳ ኤቃዳ ሃይታ ዎꬋ!» ጊዴስ፤ ዮቶሬይካ ቡሮ ዬላጋ ና ጊዲዳ ጊሻስ ያዪዲ ባ ጊꬃ ማሻ ሾዲቤና።
JDG 8:21 ሄሳፌ ጉዬ ዜባሃይኔ ጻልሙናይ ጌዶኔ፥ «ሃይቆይ ኣቶንታሼ ዴንዳዳ ኑና ኔኒ ዎꬋ» ጊዳ፤ ሄሳ ጊሻስ ጌዶኒ ዴንዲዲ ኢስታ ዎꬊዴስ፤ ኢስታ ጋሜላታ ቆꬌን ዲዛ ኣሌቆ ሚሻታ ኡባ ኤኪዴስ።
JDG 8:22 ሄሳፌ ጉዬ ኢስራኤሌ ኣሳይ ጌዶኔ፥ «ኔኒ ኑና ሚዲያሜ ኣሳፔ ኣሺዳ ጊሻስ ኔኒ ኔፔ ጉዬ ኔ ናይኔ ኔ ና ናይ ኑና ሃሪቴ» ጊዴስ።
JDG 8:23 ጌዶኒካ፥ «ታኒ ኢንቴና ሃሪኬ፤ ታ ናይካ ኢንቴና ሃሬና፤ ጎዳይ ኢንቴና ሃሮ!» ጊዴስ።
JDG 8:24 ኢስማኤሌ ኣሳ ማላ ሚዲያሜ ቢታ ኣሳቲካ ሃይꬃን ዎርቃ ኣꬄቴስ፤ ሄሳ ጊሻስ ኢዚ ኢስታስ፥ «ኣኔ ታኒ ኢንቴና ኢሲ ሚሽ ኦይቻይስ፤ ኢንቴ ኡባይ ዲኢዲ ኤሂዳ ሃይꬃ ዎርቃ ታስ ኢሚቴ» ጊዴስ።
JDG 8:25 ኢስራኤሌ ኣሳይ ዛሪዲ፥ «ኤሮ፥ ኑ ኢማና» ጊዲ ኣፋላ ሚጪዳ፤ ኣሳይ ኡባይ ባ ዲኢዳ ሃይꬃ ዎርቃ ሄ ሚጬቲዳ ኣፋላን ዬጊዴስ።
JDG 8:26 ሄሲካ ሃራ ኣሌቆታ፥ ቆꬌን ኣꬂዛ ጎዝዳታ፥ ሚዲያሜታ ካዎቲ ማይኢዛ ኦቻ ቴራ ሚሳቲዛ ማይኦታኔ ኢስታ ጋሜላታ ቆꬌፔ ኤኬቲዳ ኣሌቆታ ጉጆንታ ጌዶኒ ኤኪዳ ሃይꬃ ዎርቃይ 20 ኪሎ ጊራሜ ጊዲዛዛ።
JDG 8:27 ጌዶኒ ዎርቃፌ ኤፉዴ ሚስሌ ጊግሲዲ ባ ዲዛ ኦፊራ ካታማን ዎꬂዴስ፤ ጉዬፔ ኢስራኤሌ ኣሳይ ኡባይ ጎዳ ኣጊዲ ሄ ኤፉዴ ሚስሌዛስ ጎይኒዴስ፤ ጌዶኔሲኔ ኢዛ ሶ ኣሳስ ሄሲ ኢስታ ኦይኪዛ ናርጻ ጊዲዴስ።
JDG 8:28 ሄሳ ማላ ሃኒዲ ሚዲያሜ ኣሳይ ኢስራኤሌ ኣሳስ ሃሬቲዴስ፤ ኢስቲ ኢስራኤሌ ኣሳ ቦላ ናምኣንꬆ ዴንዲቤቴና። ጌዶኒ ሼምፖራ ፓጻ ዲዛ ኦይዱ ታሙ ላይꬅ ኩሜꬅ ቢታይ ዎፓ ዴሚዴስ።
JDG 8:29 ኢዮኣሳ ና ዬሩባኣሌ ጌቴቲዛ ጌዶኒ ባ ሶ ጉዬ ቢዲ ባ ኬꬃን ዴኢዴስ።
JDG 8:30 ጌዶኒ ጮራ ማጫሳ ኤኪዳ ጊሻስ ኢዛስ 70 ኣቱማ ናይቲ ዴቴስ።
JDG 8:31 ቃሴ ሴኬሜ ካታማን ዲዛ ላጌꬆ ማጫሳያ ኢዛስ ኣቱማ ና ዬሊን ሱንꬃ ኣቢሜሌኬ ጊ ሱንꬂዴስ።
JDG 8:32 ኢዮኣሳ ና ጌዶኒ ኬሂ ጪሚዲ ሃይቂዴስ፤ ባ ኣዋ ኢዮኣሳ ዱፎን ሞጌቲዴስ፤ ሄ ዱፎዚ ኣቢኤዜሬ ቆሞቲ ዲዛ ኦፊራ ካታማን ዴስ።
JDG 8:33 ጌዶኒ ሃይቂዳፔ ጉዬ ኢስራኤሌ ኣሳይ ጎዳፔ ጉዬ ሲሚዲ ባኣሌ ጌቴቲዛ ኤቃ ጾሳታስ ጎይኒዴስ፤ ባኣሊ-ቢሪታ ባንታስ ጾስ ሂስቲ ጎይኒዳ።
JDG 8:34 ሂስቲዲ ኢስራኤሌ ኣሳይ ኢስታ ዩሾን ዲዛ ሞርኬታ ኡባፌ ኢስታ ኣሺዳ ጎዳ ባንታ ጾሳ ዶጊዳ።
JDG 8:35 ቃሴ ጌዶኒ ኢስራኤሌ ኣሳስ ኦꬂዳ ሎኦ ኦሶ ኡባ ኣኬኮንታ ኣጊዲ ኢዛ ኬꬃ ኣሳስ ሎኦ ኩሼ ዛሪቤቴና።
JDG 9:1 ጌዶኔ ና ኣቢሜሌኬይ ሴኬሜ ካታማን ዲዛ ባ ኣዬይ ዳቦታኮ ቢዲ ኢስታሲኔ ባ ኣዬይ ቆሞታ ኡባስ፥
JDG 9:2 «ኣኔ ሴኬሜ ካታማን ዲዛ ኣሳ ኡባ፥ ‹ጌዶኔ ናይቲ ላፑን ታማቲ ኡባይ ኢንቴና ሃሪኮ ሎኦዬ? ዎይኮ ኢሲ ኣሲ ሃሪኮ ሎኦ?› ጊዲ ኦይቺቴ። ታኒ ኢንቴስ ኣሾ ዳቦ ጊዲዳይሳ ዶጎፒቴ» ጊዴስ።
JDG 9:3 ኢዛ ኣዬይ ዳቦቲ ሃ ቃላ ኡባ ኢዛ ዶና ጊዲዲ ሴኬሜ ካታማ ኣሳስ ዮቲዳ፤ ኣቢሜሌኬይካ ኢስታስ ዳቦ ጊዲዳ ጊሻስ ሴኬሜ ኣሳይ ኢዛ ካላናስ ቆፋ ቃቺዴስ።
JDG 9:4 ኢስቲ ባኣሊ-ቢሪታ ኤቃ ኬꬃፌ 70 ሳቂሌ ቢራ ኤኪዲ ኢዛስ ኢሚዳ። ኣቢሜሌኬይ ሄ ቢራን ሹፉሮታኔ ቦንቂዛይታ ኦይኪዲ ባና ካላና ማላ ኦꬂዴስ።
JDG 9:5 ኦፊራ ጌቴቲዛሶን ዲዛ ባ ኣዋ ሶ ቢዲ ባ ኢሻታ፥ ዬሩባኣሌ ናይታ ላፑን ታማታ ኢሲ ሹቻ ቦላን ሹኪዴስ፤ ጊዶ ኣቲን ጌዶኔስ ዉርሴꬃ ካሎ ናዚ ኢዮኣታሜይ ቆቴቲዲ ሃይቆፔ ኣቲዴስ።
JDG 9:6 ሄሳፌ ጉዬ ሴኬሜ ኣሳይኔ ቤቲ-ሚሎ ኣሳይ ኢሲፌ ሺቂዲ ሴኬሜን ጎይኔቲዛ ዛላ ማታን ዲዛ ጊታ ሚꬃ ጋርስ ቢዲ ሄን ኣቢሜሌኬ ካዎꬂዳ።
JDG 9:7 ኢዮኣታሜይ ሄሳ ሲዪ ቢዲ ጋሪዛኔ ዙማ ሁኤ ኬዚዲ ባ ቃላ ꬎቁ ሂስቲዲ፥ «ኢንቴኖ ሴኬሜ ኣሳቶ! ኢንቴ ታ ጊዛይሳ ሲዪዛ ጊዲኮ ጾሲ ኢንቴ ጊዛይሳ ሲያና።
JDG 9:8 ኢሲ ጋላስ ሚꬃቲ ኡባይ ሺቂዲ ባንታ ቦላ ካዎ ካዎꬃናስ ቢዳ፤ ሂስቲዲ ዎጋራ ሚꬅ፥ ‹ሃ ያ፥ ኑ ቦላ ካዎታ› ጊዳ።
JDG 9:9 «ጊዶ ኣቲን ዎጋራ ሚꬃይ፥ ‹ታኒ ኤቃ ጾሳታኔ ኣሳታ ቦንቺሲዛ ታ ዛይቴ ኢሚዛይሳ ኣጋዳ ሚꬃታ ቦላ ካዎቶ?› ጊ ዛሪዴስ።
JDG 9:10 «ሄሳፌ ጉዬ ሚꬃቲ ባላሴ ጌቴቲዛ ሚꬃ፥ ‹ሃ ያ፥ ኑ ቦላ ካዎታ› ጊዳ።
JDG 9:11 ጊዶ ኣቲን ባላሴ ሚꬃይ፥ ‹ታኒ ማልኢዛ ሎኦ ኣይፌ ኣይፊዛይሳ ኣጋዳ ሚꬃታ ቦላ ካዎታናስ ቦ?› ጊ ዛሪዴስ።
JDG 9:12 «ሄሳ ጊሻስ ሚꬃቲ ዎይኔ ቱራ፥ ‹ሃ ያ፥ ኑ ቦላ ካዎታ› ጊዳ።
JDG 9:13 ጊዶ ኣቲን ዎይኔ ሚꬃይ፥ ‹ታኒ ጾሲኔ ኣስ ኡፋይሲዛ ዎይኔ ኡሻ ኢሚዛይሳ ኣጋዳ ሚꬃታ ቦላ ካዎታና ቦ?› ጊዴስ።
JDG 9:14 «ሄሳ ጊሻስ ዉርሴꬃን ሚꬃቲ ኡባይ ኣጉንꬅ፥ ‹ሃ ያ፥ ኑ ቦላ ካዎታ› ጊዳ።
JDG 9:15 ኣጉንꬃይካ፥ ‹ኢንቴ ቱማፔ ታና ኢንቴ ቦላ ካዎꬃናስ ኮይኮ ሃ ዪዲ ታ ኩዋን ሼምፒቴ፤ ሄሳ ኢንቴ ኢጺኮ ኣጉንꬃፌ ታማይ ኬዚዲ ሊባኖሴ ዚጋታ ሞ!› ጊዴስ።
JDG 9:16 «ኣቢሜሌኬ ኢንቴ ካዎꬂዛይ ቱማቴꬃኒኔ ሱሬቴꬃኔ? ጌዶኒ ኢንቴስ ኦꬂዳይሳ ኣኬኪዲ ኢዛሶ ኣሳስ ኢዚ ኢንቴስ ኦꬂዳይሳስ ሎኦ ኩሼ ዛሪዴቲ?
JDG 9:17 ታ ኣዋይ ኢንቴስ ኦሌቲዳይሳ ኣኬኪቴ፤ ሚዲያሜ ኣሳፔ ኢንቴና ኣሻና ጊዲ ባ ሼምፖ ሃይቆስ ኣꬂ ኢሚዴስ።
JDG 9:18 ጊዶ ኣቲን ኢንቴ ሃች ታ ኣዋ ሶ ኣሳ ቦላ ዴንዲዲ 70 ኢዛ ናይታ ኢሲ ሹቻ ቦላ ሹኪዴታ፤ ጌዶኒ ኣይሌይፌ ዬሊዳ ኣቢሜሌኬይ ኢንቴስ ዳቦ ጊዲዳ ጊሻስ ሴኬሜን ካዎሲዴታ።
JDG 9:19 ሃኢ ሲሚ ጌዶኔሲኔ ኢዛ ኬꬃ ኣሳታስ ኢንቴ ኦꬂዳ ኦሶይ ቱማቴꬃኒኔ ሱሬቴꬃን ጊዲኮ ኣቢሜሌኬራ ኢሲፌ ኡፋዬቲቴ፤ ኢዚካ ኢንቴናራ ኡፋዬቶ።
JDG 9:20 ሄሳꬆ ጊዶንታ ኣጊኮ ኣቢሜሌኬፌ ታማይ ኬዚዲ ሴኬሜ ኣሳኔ ቤቲ-ሚሎ ኣሳ ሞ፤ ሄሳꬆካ ሴኬሜ ኣሳፔኔ ቤቲ-ሚሎ ኣሳፔ ታማይ ኬዚዲ ኣቢሜሌኬ ሞ» ጊዴስ።
JDG 9:21 ኢዮኣታሜይካ ባ ኢሻ ኣቢሜሌኬስ ያዪዳ ጊሻስ ባቃቲዲ ቢኤሬ ጌቴቲዛሶ ቢዲ ሄን ኡቲዴስ።
JDG 9:22 ኣቢሜሌኬይ ኢስራኤሌ ቢታን 3 ላይꬅ ካዎቲዴስ።
JDG 9:23 ሄሳፌ ጉዬ ጾሲ ኣቢሜሌኬሲኔ ሴኬሜ ኣሳ ጊዶን ኢታ ኣያና ኪቲዴስ፤ ሴኬሜ ኣሳይካ ኣቢሜሌኬ ቦላ ማካሊ ዴንዲዴስ።
JDG 9:24 ጾሲ ሄሳ ኦꬂዳይ ኣቢሜሌኬይ ላፑን ታሙ ባ ኢሻታ ዎꬊዳ ጊሻሲኔ ኢዚ ኢስታ ሱꬃ ጉሳና ማላ ሴኬሜ ኣሳይ ኢዛ ሚንꬄꬂዳ ጊሻስ ሃሎ ኬሳናሳ።
JDG 9:25 ሴኬሜ ኣሳይ ኣማርዳ ኣሳ ዶሪዲ ዙማ ሁኤን ኣቢሜሌኬ ዎꬋናስ ዛማዲ ኡታና ማላ ኦꬂዴስ፤ ሄ ኡቲዳይቲ ኦጌራ ካንꬂዛ ኣሳ ኡባ ቦንቂዳ፤ ኣቢሜሌኬይካ ሄሳ ኡባ ሲዪዴስ።
JDG 9:26 ሄሳፌ ጉዬ ኤቤዴ ና ጋኣሌይ ባ ኢሻታራ ሴኬሜ ዪዴስ፤ ሴኬሜ ኣሳይካ ኢዛን ኣማኔቲዴስ።
JDG 9:27 ኡባይካ ባ ጋዴ ጋዴ ቢዲ ዎይኔ ቴራ ማጺዳ፤ ዎይኔ ኡሻ ኣጊዲ ጊታ ባኣሌ ቦንቺዳ፤ ባንታ ኤቃ ኬꬃ ጌሊዲ ሄን ሚሼኔ ኡዪሼ ኣቢሜሌኬ ጫዪዳ።
JDG 9:28 ኤቤዴ ና ጋኣሌይ ሴኬሜ ኣሳስ፥ «ኣቢሜሌኬይ ኢዚ ኦኔ? ኑ ሴኬሜ ኣሳይ ኢዛስ ኣዛስ ሃሬቲዞኒ? ኢዚ ጌዶኔ ናኔ ኢዛስ ኦላ ኣሳ ካሌꬂዛይ ዬሩባኣሌ ጊዴኔ? ሂስቲን ኑኒ ኢዛስ ኣዛስ ኣዛዜታኔ? ሃሬቲዛ ጊዲኮ ሴኬሜ ኣዋ ኤሞሬስ ሃሬታና።
JDG 9:29 ሃ ኣሳ ካሌꬂዛይ ታና ጊዲዳኮ ታኒ ኣቢሜሌኬ ዲጋናኮሺን። ኣቢሜሌኬ ጼይጋዳ፥ ‹ኔ ኦላንቻታ ዳርሳ ኤካዳ ኦሌታናስ ሃ ያ› ጋዳ ዮታናኮሺን!» ጊዴስ።
JDG 9:30 ኤቤዴ ና ጋኣሌይ ጊዳ ማላ ካታማ ሃሪዛ ዛቡሌይ ሲዪዳ ማላ ኬሂ ሃንቄቲዴስ።
JDG 9:31 ሄሳፌ ጉዬ ኣቢሜሌኬኮ ኣስ ጉዬራ ኪቲዲ፥ «ኤቤዴ ና ጋኣሌይኔ ኢዛ ኢሻቲ ሴኬሜ ዪዲ ካታማን ዲዛ ኣሳ ኔ ቦላ ዴንꬄꬄቴስ።
JDG 9:32 ሄሳ ጊሻስ ኔኒኔ ኔናራ ዲዛ ኣሳይ ኦማርሳራ ዴንዲዲ ጌዴ ካሬ ኬዚዲ ጌማሶን ዛማዲ ናጊቴ።
JDG 9:33 ዎንቶ ማላዶ ኣርሼይ ሞኪሺን ኢስቲ ኣኬኮንታ ካታማ ዎራጂቴ፤ ጋኣሌይኔ ኢዛራ ዲዛ ኣሳይ ኢንቴና ኦላናስ ኬዚዛ ዎዴ ኢንቴስ ዳንዳዬቲዳ ማላ ሚኒዲ ኦሌቲቴ» ጊዴስ።
JDG 9:34 ኣቢሜሌኬይኔ ኢዛራ ዲዛ ኣሳይ ኡባይ ኦማርስ ዴንዲዲ ሴኬሜፔ ካሬራ 4 ቡቴን ሻኬቲዲ ዛማዲ ኡቲዳ።
JDG 9:35 ኣቢሜሌኬይኔ ኢዛራ ዲዛ ኣሳይ ኤቤዴ ና ጋኣሌይ ኬዚዲ ካታማ ጌሊዛ ፔንጌን ኤቂዳይሳ ቤኢዲ ቆቴቲዳ ሶሆፔ ኬዚዳ።
JDG 9:36 ጋኣሌይ ኣሳ ቤኢዳ ዎዴ ዛቡሌ፥ «ጼላ! ኣሳይ ዙማ ሁኤፔ ዎꬌꬃ ቦላ ዴስ» ጊዴስ። ዛቡሌይካ፥ «ሄይቲ ኣስ ጊዴቴና፤ ዙማታ ኤሾይ ኣሳ ሚሳቲዛይሳ ቤኣዳ ጋሳ» ጊዲ ዛሪዴስ።
JDG 9:37 ጋኣሌይ ቃሴካ፥ «ጼላ! ኣሳይ ዙማስ ጊዶ ኣዳራ ዱጌ ዎꬌꬃን ዴስ፤ ሃራ ቡቴይ ቃሴ ሙሬኖ ዎላ ጌቴቲዛሶራ ዬስ» ጊዴስ።
JDG 9:38 ሄሳ ጊሻስ ዛቡሌይ ጋኣሌ፥ « ‹ኑኒ ኢዛስ ሃሬታናስ ኣቢሜሌኬይ ኦኔ?› ጊዳ ኔ ዶናይ ሃኢ ኣዋ ቢዴ? ሃይቲ ኔኒ ካꬊዳ ኣሳታ ጊዴቴኔ? ሃኢ ኬዛዳ ኢስታራ ኦሌታ!» ጊዴስ።
JDG 9:39 ጋኣሌይ ሴኬሜ ኣሳ ካሌꬂ ኬዚዲ ኣቢሜሌኬራ ኦሌቴꬅ ኦይኪዴስ።
JDG 9:40 ኣቢሜሌኬይ ዬዴꬂን ጋኣሌይ ባቃቲዴስ፤ ካታማ ጌሊዛ ፔንጌ ጋካናስ ዳሮቲ ጫዴቲዲ ኩንዲዳ።
JDG 9:41 ኣቢሜሌኬይ ኣሩማን ዴኢዴስ፤ ዛቡሌይ ጊዲኮ ጋኣሌኔ ኢዛ ኢሻታ ሴኬሜፔ ጎዴሬꬂ ኬሲዴስ።
JDG 9:42 ዎንቴꬃ ጋላስ ሴኬሜ ኣሳይ ባ ጎሻሶ ጎሻሶ ኬዚዳይሳ ኣቢሜሌኬይ ሲዪዴስ።
JDG 9:43 ሄሳፌ ጉዬ ባ ኣሳ ካሌꬂ ኬዚዴስ፤ ኣሳካ 3 ቡቴን ሻኪዲ ጌማሶን ዛማዲ ናጋና ማላ ኦꬂዴስ፤ ሴኬሜ ኣሳይካ ካታማፔ ኬዚዛይሳ ቤኢዲ ኢስታ ዎꬋናስ ቆቴቲዳሶፔ ኬዚዳ።
JDG 9:44 ኣቢሜሌኬይኔ ኢዛራ ዲዛ ቡቴይ ሲንꬅ ዎጺ ቢዲ ካታማ ጌሊዛ ፔንጌን ኤቂዳ፤ ኣቲዳ ናምኡ ቡቴቲ ጎሻሶን ዲዛ ኣሳ ኡባ ዎꬊዳ።
JDG 9:45 ጋላሳ ኩሜꬅ ኣቢሜሌኬይ ካታማ ኣሳራ ኦሌቲዲ ካታማዮ ኦይኪዴስ፤ ሄን ዲዛ ኣሳ ኡባ ዎꬊ ዉርሲዴስ፤ ካታማዮካ ላሊዲ ኢዚን ማጺኔ ዜሪዴስ።
JDG 9:46 ሴኬሜ ጊምቤ ጊዶን ዲዛ ኣሳይ ኡባይ ሄሳ ሲዪዲ ኤሊ-ቢሪታ ጌቴቲዛ ኤቃ ጾሳ ኬꬃይ ዲዛሶ ሚጻ ጊዶ ጌሊዴስ።
JDG 9:47 ኢስቲ ሄ ሶሆን ሺቂዳይሳ ኣቢሜሌኬይ ሲዪዲ፥
JDG 9:48 ኢዚኔ ኢዛራ ዲዛ ኣሳይ ኡባይ ጻልሞኔ ጌቴቲዛ ዙማ ቦላ ፑዴ ኬዚዳ፤ ኣቢሜሌኬይ ካልታ ኤኪዲ ሚꬃ ታሼ ቃንጺዲ ባ ሃሼን ቶኪዴስ፤ ባናራ ዲዛ ኣሳታካ፥ «ታኒ ኦꬂሺን ቤይዳይሳ ኢንቴካ ኤሶን ሃኢ ኦꬂቴ» ጊዴስ።
JDG 9:49 ኣሳይ ኡባይካ ሚꬃ ታሼ ቃንጺ ኤኪዲ ኣቢሜሌኬ ካሊዴስ፤ ሄ ታሼታ ሚጻ ፔንጌ ቦላ ኮሪዲ ኣሳይ ኢዛ ጊዶን ዲሺን ታማ ኦይꬂዳ፤ ሄሳ ጊሻስ ሚጻ ጊዶን ዲዛ ኣሳይ ኡባይ ሃይቂ ዉሪዴስ፤ ሄን ሃይቂዳ ኣቱማ ኣሳኔ ማጫሳ ቆዳይ 1,000 ጊዳና።
JDG 9:50 ሄሳፌ ጉዬ ኣቢሜሌኬይ ቴቤሴ ጌቴቲዛ ካታማ ቢዲ ካታማ ጊዶꬂ ኦይኪዴስ።
JDG 9:51 ሄ ካታማ ጊዶን ኢዛ ቦላ ኡቲዲ ናጊዛ ኢሲ ጊታ ጊምቤይ ዴስ። ካታማ ኣሳይ ኡባይ፥ ማጫይ፥ ኣዴይ፥ ካሌꬂዛይታራካ ኣቶንታ ሄ ጊምቤዛኮ ሄ ዎጺ ቢዲ ኢዛ ጊዶ ጌሊዳ፤ ፔንጌ ጎርዲዲ ፑዴ ጊምቤዛ ቦላ ኬዚዳ።
JDG 9:52 ኣቢሜሌኬይ ኦሌቲሼ ጊምቤዛኮ ጋኪዲ ኢዛ ታማን ጹጋናስ ጊምቤዛ ፔንጌ ሺቂዴስ።
JDG 9:53 ጊዶ ኣቲን ኢሲ ማጫሳያ ኣቢሜሌኬ ሁኤን ዎጻ ማይዴ ጌንዴርሳ ኦላዳ ኢዛ ሁኤዛ ፖንኩ ሂስታ ጳልቃ ዬጋዱስ።
JDG 9:54 ኢዛ ጎንዳሌ ኦይኪ ካሊዛ ናቴꬃዛ ኤሶን ጼይጊዲ፥ «ታና ኣሲ፥ ‹ኢዛ ማጫሲ ዎꬋዱስ› ጎንታ ማላ ኔ ጊꬃ ማሻ ኮሆፔ ሾዳዳ ታና ዎꬋ» ጊዴስ፤ ሄ ኣይሌዚካ ጫዲን ኢዚ ሃይቂዴስ።
JDG 9:55 ኢስራኤሌ ኣሳይ ኡባይ ኣቢሜሌኬይ ሃይቂዳይሳ ቤኢዲ ባ ሶ ባ ሶ ቢዴስ።
JDG 9:56 ኣቢሜሌኬይ ባ ኢሻታ ላፑን ታማታ ዎꬊዲ ባ ኣዋ ቦላ ኦꬂዳ ጎሜዛ ጾሲ ኢዛ ቦላ ዛሪዴስ።
JDG 9:57 ሄሳንካ ጾሲ ሴኬሜ ኣሳ ኢታቴꬅ ኡባ ኢስታ ቦላ ዛሪዴስ፤ ሄሳ ማላን ሃኒዲ ዬሩባኣሌ ና ኢዮኣታሜይ ቃንጊዳ ቃንጌꬂ ኢስታ ቦላ ጋኪዴስ።
JDG 10:1 ኣቢሜሌኬይ ሃይቂዳፔ ጉዬ ዶዴ ናዛ ፑዋ ና ቶላይ ኢስራኤሌ ኣሻናስ ዴንዲዴስ። ኢዚ ዪሳኮሬ ዛሬፔ ጊዲሼ ኤፍሬሜን ቦላ ጌዜን ሻሚሬ ጌቴቲዛሶን ዴኢዴስ።
JDG 10:2 ቶላይ 23 ላይꬅ ጋካናስ ኢስራኤሌ ዴራ ካሌꬂዴስ፤ ሄሳፌ ጉዬ ቶላይ ሃይቂዲ ሻሚሬን ሞጌቲዴስ።
JDG 10:3 ቶላፔ ካሊዲ ጋላኣዴ ዴሬ ኣስ ያኢሬይ ዴንዲዴስ፤ ኢስራኤሌ ኣሳ ናምኡ ታማኔ ናምኡ ላይꬅ ጋካናስ ሄሚዴስ።
JDG 10:4 ኢዛስ 30 ሃሬታ ቶጊዛ 30 ኣቱማ ናይቲ ዴቴስ፤ ኢስታስ ጋላኣዴ ቢታን 30 ካታማቲ ዴቴስ፤ ሄ ካታማቲ ሃች ጋካናስ ያኢሬ ካታማታ ጌቴቲ ጼይጌቴቴስ።
JDG 10:5 ያኢሬይ ሃይቂዲ ቃሞኔን ሞጌቲዴስ።
JDG 10:6 ኢስራኤሌ ኣሳይ ጎዳ ሲንꬃን ቃሴካ ኢታ ሚሽ ኦꬂዴስ፤ ኢስቲ ባኣሌኔ ኣስታሮቴ ጌቴቲዛ ኤቃ ጾሳታሲኔ ኣራሜ ጾሳታስ፥ ሲዶና ጾሳታስ፥ ሞኣቤ ጾሳታስ፥ ኣሞኔ ዴሬ ኤቃ ጾሳታሲኔ ፊሊስጼሜ ጾሳታስ ጎይኒዳ። ኢስቲ ባንታ ጎዳስ ጎይኒዛይሳ ኣጊዳ።
JDG 10:7 ሄሳ ጊሻስ ጎዳይ ኢስራኤሌ ኣሳ ቦላ ሃንቄቲዲ ኢስታ ፊሊስጼሜ ኣሳታሲኔ ኣሞኔ ኣሳታስ ኣꬂ ኢሚዴስ።
JDG 10:8 ሄ ላይꬅ ኢስራኤሌ ኣሳ ኢስቲ ቆሂዳኔ ዋዬቺዳ። ዮርዳኖሴ ሻፋፔ ሄ ፒንꬅ ኣርሼይ ኬዚዛ ባጋን ኣሞሬቲ ካሴ ዴኢዳ ጋላኣዴ ቢታን ዴኢዳ ኢስራኤሌ ኣሳ ኡባ ኢስቲ 18 ላይꬅ ዋዬቺዳ።
JDG 10:9 ኣሞኔ ኣሳይ ቃሴካ ዩሁዳ፥ ቢኒያሜኔ ኤፍሬሜ ዛሬታ ኦላናስ ዮርዳኖሴ ሻፋ ፒኒዳ፤ ሄሳ ጊሻስ ኢስራኤሌ ኣሳይ ኬሂ ጬጪዴስ።
JDG 10:10 ሄሳፌ ጉዬ ኢስራኤሌ ኣሳይ፥ «ኑኒ ኔና ኑ ጾሳ ኣጊዲ ባኣሌ ኤቃታስ ጎይኒዲ ኔና ቆሂዶስ» ጊዲ ጎዳስ ዋሲዳ።
JDG 10:11 ጎዳይካ ኢስታስ፥ «ጊብጼቲ፥ ኣሞሬቲ፥ ኣሞኔቲ፥ ፊሊስጼሜቲ፥
JDG 10:12 ሲዶናቲ፥ ኣማሌቄቲኔ ማኦኔ ዴሬ ኣሳቲ ኢንቴና ኡንኤꬂን ታኮ ዋሲዴታ፤ ሂስቲን ታኒ ኢንቴና ኢስታ ኩሼፔ ኣሻቤኪና?
JDG 10:13 ጊዶ ኣቲን ኢንቴ ታና ኣጊዲ ሃራ ጾሳታስ ጎይኒዴታ፤ ሄሳ ጊሻስ ታኒ ኢንቴና ሙሌካ ኣሺኬ።
JDG 10:14 ቢዲ ኢንቴ ዶሪዳ ጾሳታስ ዋሲቴ፤ ኢንቴ ሜቶቲዳ ዎዴ ኢስቲ ኢንቴና ኣሼቶ» ጊዲ ዛሪዴስ።
JDG 10:15 ጊዶ ኣቲን ኢስራኤሌ ኣሳይ ዛሬꬂዲ ጎዳ ጾሳ፥ «ኑኒ ናጋራ ኦꬂዶስ፤ ሃቺሮ ኑና ኣሻዳ ኔ ዶሶይሳ ኑ ቦላ ኦꬃ» ጊዴስ።
JDG 10:16 ኣላጋ ጾሳታ ባ ጊዶፌ ዲጊዲ ጎዳስ ጎይኒዳ፤ ኢስታ ዋዬዛ ቤኢዲ ጎዳይ ጮኡ ጊ ኣጋናስ ዳንዳይቤና።
JDG 10:17 ሄሳፌ ጉዬ ኣሞኔ ዴሬ ኦላንቻቲ ኦላስ ጊጌቲዲ ጋላኣዴን ዱንካኒዳ፤ ኢስራኤሌ ኣሳይካ ኢሲፌ ሺቂዲ ጋላኣዴን ሚጺጳ ጌቴቲዛሶን ዱንካኒዴስ።
JDG 10:18 ጋላኣዴ ቢታ ኣሳይኔ ሃላቃቲ ባንታ ጊዶን፥ «ኣሞኔ ዴሬ ኦላንቻታራ ኮይሮ ቢዲ ኦላ ኦይኬታናይ ኦኔ? ኢዛዴይ ጋላኣዴ ቢታን ዲዛ ኣሳ ኡባ ቦላ ሃላቃ ጊዶ» ጊዳ።
JDG 11:1 ኢሲ ላይማ ማጫሳይፌ ዬሌቲዳ ጋላኣዴ ዴሬ ኣስ ዮፍታሄይ ሚኖ ኦላንቻ፤ ኢዛ ኣዋይ ጋላኣዴ ጌቴቴስ።
JDG 11:2 ጋላኣዴይ ኮይሮ ኤኪዳ ማቺያካ ኢዛስ ኣቱማ ናይታ ዬላዱስ፤ ኢስቲ ዲጪ ጋኪዳ ዎዴ ባንታ ኢሻ ዮፍታሄ፥ «ኔኒ ላይማ ማች ና ጊዲዳ ጊሻስ ኑ ኣዋ ኣቆታፔ ኣይኮካ ላታካ» ጊዲ ሶፔ ኬሲ ጎዲዳ።
JDG 11:3 ሄሳ ጊሻስ ዮፍታሄይ ባ ኢሻታፔ ባቃቲዲ ጾባ ጌቴቲዛ ቢታን ዴኢዴስ፤ ኢዚ ሄን ዲሺን ኣማርዳ ዎማሌ ኣሳቲ ኢዛኮ ሺቂዲ ኢዛ ካሊዳ።
JDG 11:4 ጉꬃ ዎዴፔ ጉዬ ኣሞኔ ዴሬ ኣሳይ ኢስራኤሌ ኣሳ ኦላ ኦይኪዴስ።
JDG 11:5 ኣሞኔ ዴሬ ኣሳይ ኢስራኤሌ ኣሳራ ኦሌቲዳ ዎዴ ጋላኣዴ ቢታ ጪማቲ ጾባ ቢታፌ ዮፍታሄ ዛሪ ኤሃናስ ቢዳ።
JDG 11:6 ኢስቲ ኢዛ፥ «ሃ ያ! ኣሞኔ ዴሬ ኣሳታ ኑኒ ኦላና ማላ ኑና ካሌꬃ» ጊዳ።
JDG 11:7 ዮፍታሄይ ጋላኣዴ ጪማታ፥ «ታና ኢጺዲ ታ ኣዋ ኬꬃፌ ዬዴꬂዳይ ኢንቴና ጊዴኬቲ? ሃኢ ሜቶይ ኢንቴና ጋኪዳ ጊሻስ ታኮ ዪዴቲ?» ጊዴስ።
JDG 11:8 ጋላኣዴ ጪማቲ ኢዛ፥ «ሃኢ ጊዲኮ ኑኒ ኔኮ ሲሚዶስ፤ ጋሶይካ ኔኒ ኑናራ ባዳ ኣሞኔ ዴሬ ኣሳ ኦላና ማላኔ ጋላኣዴ ኣሳ ኡባ ቦላ ኔኒ ሃላቃ ጊዳና ማላ ኑኒ ኮዮስ» ጊዳ።
JDG 11:9 ዮፍታሄይ፥ «ኣሞኔታራ ኦሌታናስ ኢንቴ ታና ጉዬ ሶ ዛሪን ጎዳይ ኢስታ ታ ኩሼን ኣꬂ ኢሚኮ ቱሙ ኢንቴ ታና ሃላቃሳኔ?» ጊ ኦይቺዴስ።
JDG 11:10 ጋላኣዴ ጪማቲ ዮፍታሄስ፥ «ጎዳይ ኑ ጊዶን ማርካ! ኔኒ ጊዛይሳ ቱሙ ኑኒ ኦꬃና» ጊዲ ዛሪዳ።
JDG 11:11 ሄሳ ጊሻስ ዮፍታሄይ ጋላኣዴ ጪማታራ ቢዴስ፤ ዴሬዚካ ኢዛ ባ ቦላ ሃላቃኔ ባና ኣዛዚዛዴ ሂስቲ ሹሚዴስ፤ ዮፍታሄይ ሚጺጳን ጎዳ ሲንꬃን ሃ ዮኦ ኡባ ኤኮይሳ ዛሪ ቆንጪሲዴስ።
JDG 11:12 ሄሳፌ ጉዬ ዮፍታሄይ ኣሞኔ ዴሬ ኣሳታ ካዎዛኮ ኣስ ኪቲዲ፥ «ኔኒ ኑ ዴራ ቦላን ዎራጂዳይ ኔሳራ ኑሳራ ኣይ ኦሺ ዲኔ?» ጊዲ ኦይቺሲዴስ።
JDG 11:13 ዮፍታሄይ ኪቲዳ ኣሳታስ ኣሞኔ ዴሬ ካዎይ ዛሪዲ፥ «ኢስራኤሌ ኣሳይ ጊብጼ ቢታፌ ኬዚዳ ዎዴ ኣርኖኔ ሻፋፔ ዶሚዲ ያቦቄ ሻፋ ጋካናስ ቃሴ ዮርዳኖሴ ሻፋ ጋካናስ ዲዛ ታ ቢታ ኤኪዴስ፤ ሃኢ ታ ቢታ ሳሮን ዛሪቴ» ጊዴስ።
JDG 11:14 ዮፍታሄይ ናምኣንꬆ ዛሪዲ ኣሞኔ ዴሬ ካዎኮ ኣስ ኪቲዴስ።
JDG 11:15 «ኢስራኤሌ ኣሳይ ሞኣቤ ቢታ ዎይኮ ኣሞኔ ቢታ ኤኪቤና።
JDG 11:16 ኢስራኤሌ ኣሳይ ጊብጼ ቢታፌ ኬዚዳ ዎዴ ባዞራ ካንꬂ ቢዲ ዞኦ ኣባ ጋኪዴስ፤ ሄሳፌ ቃሴ ቃዴሴ ጌቴቲዛሶ ዪዴስ።
JDG 11:17 ኢስራኤሌ ኣሳይ ኤዶሜ ቢታ ካዎኮ ኣስ ኪቲዲ፥ ‹ኔ ቢታራ ኑና ኣꬃርኪ!› ጊዴስ፤ ጊዶ ኣቲን ኤዶሜ ካዎይ ኣꬆንታ ኢጺዴስ፤ ሄሳꬆካ ሞኣቤ ካዎኮ ኪቲን ኢዚካ ኣꬆንታ ኢጺዴስ፤ ሄሳ ጊሻስ ኢስራኤሌ ኣሳይ ቃዴሴን ጋምኢዴስ።
JDG 11:18 ሄሳፌ ጉዬ ባዞራ ካንꬂዲ ኢስቲ ኤዶሜኔ ሞኣቤ ቢታታ ዩዪዲ ሞኣቤ ቢታፌ ኣርሼይ ሞኪዛ ባጋራ ዪዳ፤ ኣርኖኔ ሻፋፔ ሄ ፒንꬃ ባጋራ ዲዛ ሶሆን ዱንካኒዳ፤ ጊዶ ኣቲን ኣርኖኔ ሻፋይ ሞኣቤ ዛዋ ጊዲዳ ጊሻስ ሄ ዛዋ ፒኒቤቴና።
JDG 11:19 «ሄሳፌ ጉዬ ኢስራኤሌ ኣሳይ ሃሴቦኔ ጌቴቲዛ ካታማን ዲዛ ኣሞሬታ ካዎ ሲሆኔኮ ኣስ ኪቲዴስ፤ ኢስታስ፥ ‹ዎዜ ኔና ኔ ዴሬራ ኑ ኣꬊ ባና ማላ ኑና ዲጎፋርኪ!› ጊዳ።
JDG 11:20 ጊዶ ኣቲን ሲሆኔይ ኢስራኤሌ ኣሳይ ኣꬊ ቦንታ ማላ ዲጊዴስ፤ ኢዚ ባ ኦላ ኣሳ ኡባ ሺሺዲ ያሃጼ ጌቴቲዛሶን ዱንካኒዲ ኢስራኤሌ ኣሳራ ኦላ ኦይኬቲዴስ።
JDG 11:21 ጎዳ ኢስራኤሌ ጾሳይ ሲሆኔኔ ኢዛ ዴራ ኡባ ኢስራኤሌ ኣሳ ኩሼን ኣꬂ ኢሚን ኢስቲ ጾኒዳ፤ ሄን ዴኢዳ ኣሞሬ ዴሬ ኡባ ላቲዳ።
JDG 11:22 ኣርኖኔ ሻፋፔ ቢዲ ያቦቄ ሻፋ ጋካናሲኔ ባዞፌ ቢዲ ዮርዳኖሴ ሻፋ ጋካናስ ዲዛ ኣሞሬታ ዴራ ኡባ ላቲዳ።
JDG 11:23 ሄሳ ማላ ኦꬂዲ ጎዳ ኢስራኤሌ ጾሳይ ኣሞሬ ዴሬ ኣሳ ባ ዴሬ ኢስራኤሌ ሲንꬃፌ ዬዴꬂዲ ꬋይሲዴስ፤ ሂስቲን ኔ ዛራ ኤካናስ ኔስ ኣይ ዎልቃይ ዲዜ?
JDG 11:24 ኔስ ኔ ጾስ ካሞሼይ ኢሚዛይሳ ኤካዳ ሼምፓ ኡቲኪ? ኑኒ ጊዲኮ ጎዳ ኑ ጾሳይ ኑስ ኢሚዳይሳ ኡባ ላታና።
JDG 11:25 ሂስቲን ኔኒ ጺፖራ ና ሞኣቤ ካዎ ባላቄፔ ሚናይ? ኢዚ ኢስራኤሌ ኣሳራ ኦዬቲዴ? ዎይኮ ኦሌቲዴ?
JDG 11:26 ኢስራኤሌ ኣሳይ ሃሴቦኔኔ ሄ ሄራ፥ ኣሮኤሬኔ ሄ ሄራ፥ ኣርኖኔ ሻፋ ማታን ዲዛ ካታማታ ኡባ ላቲዲ 300 ላይꬅ ዴኢዴስ፤ ሂስቲን ሄ ዎዴ ኣይስ ዛሪ ዎꬂ ኤኪቤኬቲ?
JDG 11:27 ታኒ ታ ባጋራ ኢንቴና ኣይኮካ ቆሃቤኬ፤ ጊዶ ኣቲን ታና ኦላ ኦላዳ ቆሃናስ ዴንዲዳይ ኔና፤ ፒርዲዛ ጎዳይ ሃች ኢስራኤሌ ኣሳሲኔ ኣሞኔ ኣሳስ ጊዶን ፒርዶ» ጊዴስ።
JDG 11:28 ኣሞኔ ካዎይ ጊዲኮ ዮፍታሄይ ኪቲዳ ኪታ ቆዳን ዬጊቤና።
JDG 11:29 ሄ ዎዴ ጎዳ ኣያናይ ዮፍታሄ ቦላ ዎꬊን ጋላኣዴኔ ሚናሴ ዴሬ ካንꬂዲ ጋላኣዴ ቢታን ዲዛ ሚጺጳራ ኣꬊ ቢዲ ኣሞኔ ዴሬ ቦላ ዎራጂዴስ።
JDG 11:30 ጎዳስ፥ «ኔኒ ኣሞኔታ ታ ኩሼን ኣꬃ ኢሚኮ፥
JDG 11:31 ታኒ ኦላን ጾናዳ ሶ ሲሚዛ ዎዴ ታሶፔ ታና ሞካናስ ኮይሮ ኬዚዛ ኣይ ኣሲካ ጊዲን ኢዛ ኔስ ጹጌቲዛ ያርሾ ሂስታ ሺሻና» ጊዲ ኣዲኔቲዴስ።
JDG 11:32 ሄሳፌ ጉዬ ዮፍታሄይ ኣሞኔታ ኦላናስ ዛዋ ፒኒ ቢዴስ፤ ሂስቲን ጎዳይ ኢስታ ኢዛ ኩሼን ኣꬂ ኢሚዴስ።
JDG 11:33 ኣሮኤሬፔ ዶሚዲ ሚኒቴ ሄራኒኔ ኢዛፔ ኣꬊዲ ኣቤሊ-ኬራሚሜ ጋካናስ ዲዛ ናምኡ ታሙ ካታማታ ኦሊ ꬋይሲዴስ፤ ኣሞኔ ዴሬ ኣሳይካ ኢስራኤሌታስ ሃሬቲዴስ።
JDG 11:34 ዮፍታሄይ ሚጺጳን ዲዛ ባሶ ሲሚ ዪዛ ዎዴ ኮይሮታዳ ኢዛ ናያ ካራቤ ባቃ ዬጻሼኔ ዱራሼ ኢዛ ሞካናስ ኬዛዱስ፤ ኢዚፔ ኣቲን ሃራ ናይ ኢዛስ ባዋ።
JDG 11:35 ኢዚ ኢዞ ቤኢዳ ማላ ባ ማይኦ ዳኪዲ፥ «ታ ናዬ ሃኖ ፖራ ሂስቶይን! ታና ፓላን ጋꬃዳሳ! ታና ሜቶን ዬጋዳሳ! ታኒ ጎዳስ ጋꬃና ጋዳ ኣዲና ኣዲኔታዲስ፤ ሄ ኣዲና ጋꬆንታ ኣጋናስ ዳንዳይኬ!» ጊዲ ዋሲዴስ።
JDG 11:36 ናያ፥ «ታ ኣዋዉ! ኔኒ ጎዳስ ኣዲና ኣዲኔቲዳ ጊዲኮ ጎዳይ ኔ ሞርኬ ኣሞኔ ዴራ ቦላ ኔ ሃሎ ኬሲዳ ጊሻስ ኔኒ ቃላ ጌሊዳይሳ ታ ቦላ ፖላ!» ጋዱስ።
JDG 11:37 ቃሴካ ኢዛ ባ ኣዋስ፥ «ታስ ኢሲ ሚሽ ኦꬃርኪ! ታኒ ሙሌራ ኣዚና ጌላና ዳንዳዮንታ ጊሻስ ታ ላጌታራ ባዳ ዙማታ ቦላ ታ ጌላኦቴꬃስ ዩያ ዩያ ዬካና ማላ ናምኡ ኣጊናስ ታና ዬዳርኪ!» ጋዳ ኦይቻዱስ።
JDG 11:38 ኢዚካ፥ «ባ!» ጊዲ ናምኡ ኣጊናስ ዬዲዴስ፤ ኢዛ ባ ላጌታራ ዙማ ሁኤ ኬዛዳ ባ ጌላኦቴꬃስ ኢስታራ ዬካዱስ።
JDG 11:39 ናምኡ ኣጊናፔ ጉዬ ባ ኣዋኮ ሲማ ያዱስ፤ ኢዚካ ጎዳስ ባ ኣዲኔቲዳ ኣዲና ጋꬂዴስ፤ ኢዛ ሙሌካ ኣዚና ጌሎንታ ኣታዱስ።
JDG 11:40 ሄ ዎዴፔ ዶሚዲ ኢስራኤሌታ ናቴꬃ ማጫ ናይቲ ላይꬃን ላይꬃን ኦይዱ ጋላስ ባንታ ሶፔ ሃኪ ቢዲ ጋላኣዴ ዴሬ ዮፍታሄ ናይስ ሚሼቲ ዬሆይ ሎሴ ጊዲዴስ።
JDG 12:1 ኤፍሬሜ ዴሬ ኣሳይ ኦላስ ባና ጊጌቲዲ ዮርዳኖሴ ሻፋ ፒኒዲ ጻፎኔ ጌቴቲዛ ካታማ ጋኪዳ ዎዴ ዮፍታሄስ፥ «ኣሞኔታ ኦላናስ ዛዋ ፒናዳ ባሼ ኔናራ ባና ማላ ኣይስ ኑና ጼይጋቤኪ? ሄሳ ጊሻስ ኑኒ ኔ ኬꬃ ኔ ቦላ ጎርዲዲ ታማን ጹጋና» ጊዳ።
JDG 12:2 ዮፍታሄይ ኢስታስ፥ «ታኒኔ ታ ኣሳይ ኣሞኔ ዴሬ ኣሳታራ ኬሂ ኦዬቲዳ ዎዴ ታኒ ኢንቴና ጼይጋዲስ ሺን ኢንቴ ታና ኢስታፌ ኣሺቤኬታ።
JDG 12:3 ኢንቴ ታና ኣሾንታይሳ ኤሪዳ ጊሻስ ታ ሼምፖስ ቃꬌቶንታ ዳሼ ኣሞኔታ ኦላናስ ኢስታ ዛዋ ፒና ባዲስ፤ ጎዳይ ኢስታ ታ ኩሼን ኣꬂ ኢሚዴስ። ሂስቲን ኢንቴ ሃኢ ኣይስ ታና ኦላናስ ዪዴቲ?» ጊዴስ።
JDG 12:4 ኤፍሬሜ ኣሳይ ካሴ ኢስታስ፥ «ኢንቴ ጋላኣዴን ዲዛ ኣሳቲ ካሴ ኤፍሬሜ ዛሬታፔኔ ሚናሴ ዛሬታፔ ካዲ ቤቲዲ ዪዳይታፔ ኣቲን ሃራታ ጊዴኬታ» ጊ ሚሪዛ ጊሻስ ዮፍታሄይ ጋላኣዴ ኣሳ ኡባ ሺሺዲ ኤፍሬሜ ኣሳራ ኦሌቲዴስ፤ ሂስቲን ጋላኣዴ ኣሳቲ ኦሊ ጾኒዳ።
JDG 12:5 ኤፍሬሜ ኣሳይ ባቃቶንታ ማላ ዮርዳኖሴ ሻፋ ፒኒዛ ፑርዴ ኡባ ጋላኣዴቲ ኦይኪዳ፤ ባቃታናስ ኮይዛ ኤፍሬሜ ዴሬ ኣሲ ኦኒኔ ፒናናስ ኦይቺዛ ዎዴ ጋላኣዴቲ፥ «ኔኒ ኤፍሬሜ ኣሴ?» ጊ ኦይቼቴስ። ሄ ኦይሼቲዳዴይካ፥ «ኣካይ» ጊ ዛሪኮ፥
JDG 12:6 «ኣኔ፥ ‹ሺቦሌቴ› ጋ» ጌቴስ። ጊዶ ኣቲን ኢዚ፥ «ሺ» ጊዛ ፒዳሌ ሎኤꬂ ጼይጋናስ ዳንዳዮንታ ጊሻስ፥ «ሲቦሌቴ» ጌስ፤ ሄ ዎዴ ኢዛ ኦይኪዲ ዮርዳኖሴ ሻፋ ፒኒዛ ፑርዴ ቦላ ዎꬊዳ፤ ሄ ዎዴ ሄን ኤፍሬሜ ኣሳፔ 42,000 ኣሳይ ሃይቂዴስ።
JDG 12:7 ዮፍታሄይ ኢስራኤሌ ኣሳ ቦላን ኡሱፑን ላይꬅ ኩሜꬅ ዳናቲዴስ፤ ሄሳፌ ጉዬ ዮፍታሄይ ሃይቂዲ ባ ዴሬ ጋላኣዴን ዲዛ ካታማታፔ ኢሳን ሞጌቲዴስ።
JDG 12:8 ዮፍታሄፔ ካሊዲ ቤቴሊሄሜ ኣስ ኢብጻኔይ ኢስራኤሌ ኣሳ ቦላ ፒርዲዛ ዳና ጊዲዴስ።
JDG 12:9 ኢብጻኔስ 30 ኣቱማ ናይቲኔ 30 ማጫ ናይቲ ዴቴስ፤ ኢዚ ባ ማጫ ናይታ ባ ቆሞ ጊዶንታ ኣቱማ ናይታስ ኢሚዴስ፤ ባ ኣቱማ ናይታስካ ባ ቆሞ ጊዶንታ ማጫ ናይታ ጊግሲዲ ኤሂዴስ። ኢብጻኔይ ኢስራኤሌ ቦላ ላፑን ላይꬅ ዳናቲዴስ።
JDG 12:10 ኢብጻኔይ ሃይቂዲ ቤቴሊሄሜን ሞጌቲዴስ።
JDG 12:11 ኢብጻኔፔ ካሊዲ ዛቢሎኔ ዴሬ ኣስ ኤሎኔይ ኢስራኤሌ ኣሳ ቦላ 10 ላይꬅ ዳናቲዴስ።
JDG 12:12 ሄሳፌ ጉዬ ሃይቂዲ ዛቢሎኔ ዴሬን ዲዛ ኤሎኔ ቢታን ሞጌቲዴስ።
JDG 12:13 ኤሎኔፔ ካሊዲ ፒራቶኔ ዴሬ ኣስ ሂሌሌ ና ኣብዶኔይ ኢስራኤሌ ቦላ ዳናቲዴስ።
JDG 12:14 ኣብዶኔስ 70 ሃሬታ ቶጊዛ 40 ኣቱማ ናይቲኔ 30 ናይታ ናይቲ ዴቴስ፤ ኣብዶኔይ ኢስራኤሌ ኣሳ ቦላ 8 ላይꬅ ዳናቲዴስ።
JDG 12:15 ሄሳፌ ጉዬ ፒራቶኔ ዴሬ ኣስ ሂሌሌ ና ኣብዶኔይ ሃይቂዲ ኣማሌቄ ዴሬን ጌዜ ቦላ ኤፍሬሜ ቢታን ዲዛ ፒራቶኔን ሞጌቲዴስ።
JDG 13:1 ኢስራኤሌ ኣሳይ ጎዳ ሲንꬃን ቃሴካ ኢታ ሚሽ ኦꬂዴስ። ሄሳ ጊሻስ ጎዳይ ኢስታ ኦይዱ ታሙ ላይꬃስ ፊሊስጼሜ ኣሳ ኩሼን ኣꬂ ኢሚዴስ።
JDG 13:2 ሄ ዎዴ ጾራኣ ጌቴቲዛ ካታማን ማኑሄ ጌቴቲዛ ኢሳዴይ ዴስ፤ ኢዛስ ዬሌታይ ዳኔ ባጋፌ፤ ኢዛ ማቺያ ማይኔ ጊዲዳ ጊሻስ ና ዬላቤኩ።
JDG 13:3 ኢሲ ጋላስ ጎዳ ጾሳ ኪታንቻይ ሄ ማጫሳይሲ ቆንጪዲ፥ «ቤያ! ኔኒ ና ዬሎንታ ማይኔ፤ ጊዶ ኣቲን ኔስ ሻራይ ኣታና፤ ኔኒ ኣቱማ ና ዬላና።
JDG 13:4 ሄሳ ጊሻስ ዎይኔ ጫጄ ዎይኮ ማꬆሲዛ ኡሹ ኡዮንታ ማላኔ ኣይኮ ቱና ሚሺካ ሞንታ ማላ ናጌታ።
JDG 13:5 ጋሶይካ ኔ ሻራና፤ ኣቱማ ናካ ዬላና። ናዚ ባ ኣዬይ ኡሎፔ ዶሚዲ፥ ጾሳስ ናዚራዌ ጊዲዳ ጊሻስ ማጋላይ ኢዛ ሁኤ ቦቾፎ፤ ኢዚካ ኢስራኤሌ ፊሊስጼሜ ኣሳ ኩሼፔ ኣሾ ዶማና» ጊዴስ።
JDG 13:6 ሄሳፌ ጉዬ ማጫሳያ ባዳ፥ ባ ኣዚናስ፥ «ጾሳ ኣስ ኢሶይ ታኮ ዪዴስ፤ ኢዛስ ሜꬋይካ ጾሳ ኪታንቻ ሜꬋ ማላ ኬሂ ያሺዛይሳ። ኢዚ ኣዋፔ ዪዳኮካ ታኒ ኢዛ ኦይቻቤኬ፤ ኢዚካ ባ ሱንꬃ ታስ ዮቲቤና።
JDG 13:7 ጊዶ ኣቲን ኢዚ ታና፥ ‹ኔ ሻራና፤ ኣቱማ ናካ ዬላና፤ ዬሌታና ናዚካ ኣዬይ ኡሎፔ ዶሚዲ ሃይቃና ጋካናስ፥ ጾሳስ ናዚራዌ ጊዲዛ ጊሻስ ዎይኔ ጫጄ ዎይኮ ማꬆሲዛ ኡሹ ኡዮፓ፤ ኣይኮ ቱና ሚሺካ ሞፓ› ጊዴስ» ጋዳ ዮታዱስ።
JDG 13:8 ሄሳፌ ጉዬ ማኑሄይ፥ «ኣቤት ጎዳዉ! ሄ ናዚ ዬሌቲዛ ዎዴ ኑ ኣይ ኦꬃናስ ቤሲዛኮ ኤሪሳና ማላ ኔኒ ካሴ ኪቲዳ ጾሳ ኣሲ ኑኮ ሲሚዲ ያና ማላ ኦꬃርኪ!» ጊዲ ጎዳ ጾሳ ዎሲዴስ።
JDG 13:9 ጾሲካ ማኑሄ ዎሳ ሲዪዴስ። ጾሳ ኪታንቻይካ ማጫሳያ ጋዴ ጊዶን ዲሺን ናምኣንꬆ ኢዚስ ቤቲዴስ፤ ጊዶ ኣቲን ሄ ዎዴ ኢዚ ኣዚና ማኑሄይ ኢዚራ ዴና።
JDG 13:10 ማጫሳያ ኤሶን ባ ኣዚናኮ ባዳ፥ «ቤያ! ሄ ዎዴ ታስ ቤቲዳይሲ ሃኢካ ታስ ቃሴካ ቆንጪዴስ» ጋዱስ።
JDG 13:11 ማኑሄይ ኡቲዳሶሆፔ ዴንዲ ኤቂዲ ባ ማቺዮ ካሊ ቢዲ ኣዴዚ ዲዛሶ ጋኪዲ፥ «ሄ ዎዴ ታ ማቼይራ ሃሳይዳይ ኔኔ?» ጊዲ ኦይቺዴስ። ኣዴዚካ፥ «ኤ ታናኮ!» ጊዴስ።
JDG 13:12 ማኑሄይ፥ «ኔኒ ዮቲዳ ቃላይ ፖሌቲዛ ዎዴ ሄ ዬሌቲዳ ናዛ ዴኦስ ኮሺዛ ዎጋይኔ ኢዛስ ሲንꬃፌ ዲዛ ሃልቾይ ኣዜ? ኑፔካ ኮዬቲዛዚ ኣዜ?» ጊዲ ኦይቺዴስ።
JDG 13:13 ጎዳ ጾሳ ኪታንቻይ ኢዛስ፥ «ኔ ማቺያ ታኒ ዮቲዳ ኡባ ናጌታ ፖሉ።
JDG 13:14 ዎይኔ ሚꬃፌ ቤቲዛ ኣይ ሚሺካ ሙፑ፤ ዎይኔ ጫጄ ዎይኮ ማꬆሲዛ ኡሹ ኡዩፑ፤ ቱኒዳ ኣይ ካꬂካ ሙፑ፤ ታ ኢዞ ኣዛዚዳይሳ ኡባ ፖሉ» ጊ ዮቲዴስ።
JDG 13:15 ማኑሄይ ቃሴ ጎዳ ጾሳ ኪታንቻ፥ «ኑኒ ኔስ ኢሲ ዬላጋ ዴይሽ ሹኪዲ ጊጊሳና ጋካናስ ታካርኪ» ጊዴስ።
JDG 13:16 ጎዳ ጾሳ ኪታንቻይ ዛሪዲ፥ «ኔ ታና ዎልቃን ታኪሲኮካ ኔ ሺሺዳ ቁማ ታ ሚኬ። ጊዶ ኣቲን ኔኒ ጹጌቲዛ ያርሾ ጊጊሳና ኮይኮ፥ ጎዳስ ያርሻ» ጊዴስ። ኢዚ ጎዳ ጾሳ ኪታንቻ ጊዲዳይሳ ማኑሄይ ኤሪቤና።
JDG 13:17 ማኑሄይ ጎዳ ጾሳ ኪታንቻዛስ፥ «ኔኒ ዮቲዳ ቃላይ ፖሌቲዛ ዎዴ፥ ኑ ኔስ ጋላታ ሺሻና ማላ ኔ ሱንꬂ ኦኔ?» ጊዴስ።
JDG 13:18 ኪታንቻዚካ «ታ ሱንꬃይ ማላልሳ፤ ኔኒ ታ ሱንꬃ ኣይስ ኦይቻይ?» ጊዲ ዛሪዴስ።
JDG 13:19 ማኑሄይካ ሄ ዴይሻ ላቃኔ ካꬃ ያርሾ ኤኪዲ፥ ዛላ ቦላ ጎዳስ ያርሺዴስ፤ ማኑሄይኔ ኢዛ ማቼያ ጼሊሺን ጎዳይ ማላሊሲዛ ሚሽ ኦꬂዴስ።
JDG 13:20 ያርሾ ያርሺዛሶፔ ታማ ላጮይ ፑዴ ፖፖልኡ ጊሺን ጎዳ ጾሳ ኪታንቻይ ታማ ላጮዛ ጊዶራ ሳሎ ኬዚዴስ። ማኑሄይኔ ኢዛ ማቼያ ሄሳ ቤኢዲ ሲንꬃ ጉꬅ ጉፋኒዳ።
JDG 13:21 ጎዳ ጾሳ ኪታንቻይ ማኑሄሲኔ ኢዛ ማቼይስ ናምኣንꬆ ቆንጮንታ ኣጊዳ ጊሻስ ኢዚ ጎዳ ኪታንቻ ጊዲዳይሳ ማኑሄይ ሄ ዎዴ ኤሪዴስ።
JDG 13:22 ማኑሄይ ባ ማቺዮ፥ «ጾሳ ቤኢዳ ጊሻስ ኑኒ ሃይቃናይሲ ጌሻ» ጊዴስ።
JDG 13:23 ጊዶ ኣቲን ኢዛ ዛራዳ፥ «ጎዳይ ኑና ዎꬋናስ ኮዪዳኮ ጹጌቲዛ ያርሾዛኔ ካꬃ ያርሾዛ ኑ ኩሼፔ ኤኬና፤ ዎይኮ ሄ ኡባ ኑና ቤሴና፤ ዎይኮ ሃ ዮኦታ ኑስ ዮቴና» ጋዱስ።
JDG 13:24 ማጫሳያካ ኣቱማ ና ዬላዱስ፤ ናዛ ሱንꬃካ ሳምሶኔ ጋዳ ሱንꬃዱስ። ናዚ ዲጪዴስ፤ ጎዳይካ ኢዛ ኣንጂዴስ።
JDG 13:25 ኢዚ ጾራኣፔኔ ኤሽታኦሌፔ ጊዶን ዳኔ ጉታን ዲሺን ጎዳ ጾሳ ኣያናይ ኢዛ ዴንꬄꬆ ዶሚዴስ።
JDG 14:1 ኢሲ ጋላስ ሳምሶኔይ ቴሚና ጌቴቲዛሶ ዎꬊዴስ፤ ሄንካ ኢሲ ፊሊስጼሜ ማጫ ናዮ ቤኢዴስ።
JDG 14:2 ሶ ሲሚዲ ባ ኣዋኔ ባ ኣዮ፥ «ታኒ ቴሚናን ኢሲ ፊሊስጼሜ ማጫ ናዮ ቤኣዲስ፤ ሃኢ ኢዞ ታስ ኦይቺዲ ታና ኤኪሲቴ» ጊዴስ።
JDG 14:3 ኢዛ ኣዋይኔ ኣዬያ ኢዛ፥ «ሃ ቃጻሬቲ ኤሮንታ ፊሊስጼሜ ዴሬ ባዳ ኢስታ ጊዶፌ ማቾ ኤካና ኔ ኮይዛይ ሃን ኑ ዴሬ ኣሳፔ ኔስ ማጫይ ꬋይኔ?» ጊዳ። ሳምሶኔይካ ባ ኣዋስ፥ «ታ ዎዚና ሚዳይ ኢዞ ጊዲዳ ጊሻስ ታና ኢዞ ኤኪሳ» ጊዴስ።
JDG 14:4 ፊሊስጼሜታ ኦላናስ ጎዳይ ጋሶ ኮዪዲ ሃይሳ ኢስታ ቦላ ኦꬂዛይሳ ሳምሶኔ ኣዋይኔ ኣዬያ ኤሪቤቴና፤ ሄ ዎዴ ፊሊስጼሜቲ ኢስራኤሌ ኣሳ ሃሬቴስ።
JDG 14:5 ሄሳፌ ጉዬ ሳምሶኔይ ባ ኣዋራኔ ባ ኣዬይራ ዱጌ ቴሚና ዎይኔ ሚꬂ ዲዛ ሄራ ጋኪሺን ኢሲ ዎዳላ ጋሞይ ጻጊሼ ኢዛ ቦላ ኬዚዴስ።
JDG 14:6 ጎዳ ኣያናይ ሳምሶኔ ቦላ ዎꬊዲ ኢዛስ ዎልቃ ኢሚዴስ፤ ቄሪ ዴይሻ ላቃ ማላ ባ ኩሼን ኣይኮካ ኦይኮንታ ጋሞዛ ፔꬌሬꬂ ዬጊዴስ። ሄሳካ ባ ኣዋሲኔ ባ ኣዬይስ ዮቲቤና።
JDG 14:7 ሄሳፌ ጉዬ ዱጌ ናይኮ ቢዲ ኢዞ ሃሳይሲዴስ፤ ኬሂፔ ኢዞ ዶሲዴስ።
JDG 14:8 ጉꬃ ዎዴፔ ጉዬ ኢዞ ኤካናስ ሲሚ ቢዴስ፤ ባ ዎꬊዳ ጋሞዛ ኣሃ ቤኣናስ ኦጌፔ ሼርኢ ጊዲ ቢዛ ዎዴ ጋሞዛ ኣሃ ጊዶን ማꬂ ኤስ ኤሲ ዲዛይሳ ቤኢዴስ።
JDG 14:9 ኤሳፌ ኣማርዳይሳ ካሺ ኤኪዲ ኦጌን ሚሼ ቢዴስ። ባ ኣዋኮኔ ባ ኣዬይኮ ጋኪዲ ባ ኦይኪዳ ኤሳፌ ኣማርዳይሳ ኢስታስ ኢሚን ኢስቲካ ሚዳ፤ ጊዶ ኣቲን ሳምሶኔይ ሄ ኤሳ ጋሞዛ ኣሃ ጊዶፌ ኤኪዳይሳ ኢስታስ ዮቲቤና።
JDG 14:10 ኢዛ ኣዋይ ናዮ ቤኣና ኢዚሶ ቢን ሳምሶኔይ ሄን ዲዛ ሚሺራቴꬃ ዎጋ ማላ ቡላቻ ጊግሲዴስ፤ ሄሲ ካሴሶፌ ሄ ዴራን ሎሴ ጊዲ ዲዛ ዎጋ።
JDG 14:11 ሄ ኣሳይ ኢዛ ቤኢዳ ዎዴ ኢዛ ካሳና ማላ 30 ናቴꬃ ናይታ ዶሪዲ ዬዲዳ።
JDG 14:12 ሳምሶኔይ ኢስታስ፥ «ኣኔ ኢንቴ ኤሪዛኮኔ ኢሲ ማሌꬆ ታኒ ኢንቴና ማሌꬃይስ፤ ቡላቻ ባኣሌይ ቦንቼቲዛ ላፑን ጋላሳታ ጊዶን ሃ ማሌꬆዛ ቢርሼꬃ ታስ ኢንቴ ዮቲዛ ጊዲኮ ታኒ ኢንቴስ 30 ላይኖ ቃሚሳታኔ 30 ኩሜꬃ ማይኦታ ኢማና።
JDG 14:13 ሄ ማሌꬃ ቢርሼꬂ ኢንቴና ጾኒኮ ኢንቴ ታስ 30 ላይኖ ቃሚሳታኔ 30 ኩሜꬃ ማይኦ ኢሜታ» ጊዴስ። ኢስቲ፥ «ኤሮ፥ ኔ ማሌꬆዛ ኣኔ ኑስ ዮታ» ጊዳ።
JDG 14:14 ሳምሶኔይካ ኢስታስ፥ «ሚዛይሳፌ ሜቴቲዛዚ ቤቲዴስ። ሚኖፔ ማልኦ ሚሺ ኬዚዴስ» ጊዴስ። ሄꬓንꬆ ጋላስ ጋካናስ ኢስቲ ኢዛ ማሌꬃ ቢርሼꬅ ኢማናስ ዳንዳይቤቴና።
JDG 14:15 ኦይዳንꬆ ጋላስ ኢስቲ ሳምሶኔ ማቺዮ፥ «ኣኔ ኔ ኬꬃዋ ጪማዳ ማሌꬆዛ ቢርሼꬃ ኢዚ ኑስ ዮታና ማላ ኦꬃ፤ ኔ ሂስቶንታ ኣጊኮ ኑኒ ኔናኔ ኔ ኣዋ ኬꬃ ታማን ጹጋና፤ ኢንቴ ኢንቴ ቡላቻስ ኑና ጼይጊዳይ ኑና ቦንቃናሴ?» ጊዳ።
JDG 14:16 ሄሳ ጊሻስ ሳምሶኔ ማቺያ ሂቂማ ዬካሼ ኢዛኮ ሺቃዳ፥ «ሄኮ ኔ ታና ሲቃካ ኬሃ ኢጻሳ! ኣይስ ጊኮ ኔኒ ታ ቢታ ኣሳ ማሌꬆ ማሌꬃዳ ኢዛ ቢርሼꬃ ታስ ዮታቤካ» ጋዱስ። ኢዚ ዛሪዲ፥ «ሃራይ ኣቶሺን ሃይሳ ታኒ ታ ኣዋሲኔ ታ ኣዬይስካ ዮታቤኬ፤ ሂስቲን ኣይስ ኔስ ቢርሼꬃ ዮቶ?» ጊዴስ።
JDG 14:17 ሄሳ ጋሶን ኢዛ ሚሺሬያ ቡላቻ ባኣሌይ ቦንቼቲዛ ላፑን ጋላሳታ ኡባን ዬካ ዬካዳ ሼምፖ ዲጊን ላፑንꬃ ጋላስ ማሌꬆዛ ቢርሼꬃ ኢዚስ ዮቲዴስ፤ ኢዛካ ባዳ ባ ቢታ ኣሳስ ዮታዱስ።
JDG 14:18 ላፑንꬃ ጋላስ ኣርሼይ ዉላናፔ ካሴ ካታማ ኣሳይ ሳምሶኔስ፥ «ኤሳፌ ኣꬊ ማልኢዛይ ጋሞፌ ኣꬊ ሚኒዛይ ኣዜ?» ጊዳ። ሳምሶኔይ ኢስታስ፥ «ኢንቴ ታ ኡሳይን ጎዮንታኮ፥ ታ ማሌꬆዛ ቢርሼꬃ ኤሬኬታ» ጊዴስ።
JDG 14:19 ሄሳፌ ጉዬ ጎዳ ኣያናይ ኢዛ ቦላ ዎꬊዲ ኢዛስ ዎልቃ ኢሚዴስ፤ ኢዚካ ኣስቄሎና ቢታ ዎꬊዲ 30 ኣስ ዎꬊዴስ፤ ኢስታስ ዲዛ ኡባኔ ኢስታ ማይኦካ ቃሪ ኤኪዲ ማሌꬆዛ ቢርሺዳ ኣሳታስ ኤሂዲ ኢሚዴስ። ሃኒዳ ኡባን ሃንቆ ሱሊዲ ባ ኣዋ ሶ ሲሚ ቢዴስ።
JDG 14:20 ሳምሶኔ ማቺያ ኢዛ ላጌታፔ ኢሳ ጌላዱስ።
JDG 15:1 ጉꬅ ታኪሺን ጊስቴ ማጻ ዎዴ ሳምሶኔይ ባ ማቺዮ ቤኣናስ ዴይሻ ላቃ ኤኪዲ ቢዴስ፤ ኢዚ ባ ማቼይ ኣዋስ፥ «ታኒ ታ ማቺያ ዲዛ ኪፊሌ ጌላና ኮያይስ» ጊዴስ። ኢዚ ጌሎንታ ማላ ኢዚ ኣዋይ ዲጊዴስ።
JDG 15:2 ኢዚ ኣዋይ ሳምሶኔስ፥ «ኔኒ ኢዞ ኡባራ ኢጺዳ ሚሳቲን ታኒ ኢዞ ኔ ሚዜዛስ ኢማዲስ፤ ጊዶ ኣቲን ኢዚ ካሎያ ኢዚፔካ ኣꬋ ሎኦ ጊዲዳ ጊሻስ ኢዞ ኤካ» ጊዴስ።
JDG 15:3 ሳምሶኔይ ኢዛስ፥ «ሃይሳፌ ጉዬ ፊሊስጼሜ ቢታ ኣሳ ቦላ ታኒ ኢታ ሚሽ ኦꬂኮ ሞራንቻ ጊዲኬ» ጊዴስ።
JDG 15:4 ሄፔ ኬዚ ቢዲ 300 ዎራካናታ ኦይኪዴስ፤ 2 ዎራካናታ ጎይና ኢሲፌ ጋꬂ ቃቺዲ ኢስታ ጎይናታፔ ጊዶን ዪጬቲዳ ጾምፔ ጌልꬂ ቃቺዲ ዬዲዴስ።
JDG 15:5 ሄሳፌ ጉዬ ዪጬቲዳ ጾምፔዛን ታማ ኦይꬂዲ ቡሮ ማጼቶንታ ዲዛ ፊሊስጼሜ ኣሳ ካꬃ ጊዶ ዎራካናታ ዬዲዴስ፤ ማጼቲ ዶሬቲ ኡቲዳ ካꬃ፥ ኤቆን ዲዛ ካꬃ፥ ዎጋራኔ ዎይኔ ሚꬃ ኡባ ኣሾንታ ጹጊዴስ።
JDG 15:6 ፊሊስጼሜቲ ባ ጋርሳን፥ «ሃይሳ ኦꬂዳይ ኦኔ?» ጊዲ ኢሶይ ኢሳራ ኦይሼቲዲ ኢዛ ማቺያ ኢዛ ላጌታፔ ኢሳስ ኢሜቲዳ ቴሚና ዴሬ ኣሳ ቦሎ ሳምሶኔ ጊዲዳይሳ ኤሪዳ፤ ሄሳ ጊሻስ ፊሊስጼሜ ኣሳይ ኬዚዲ ማጫሳዮኔ ኢዚ ኣዋ ታማን ጹጊዳ።
JDG 15:7 ሳምሶኔይ ኢስታስ፥ «ኢንቴ ሄሳ ኦꬂዳ ጊሻስ ታኒ ሃሎ ኬሶንታ ኣጊኬ» ጊዴስ።
JDG 15:8 ኢስታ ቦላ ኢታ ሜቶ ጋꬂዲ ዳሮታ ዎꬊዴስ፤ ሄሳፌ ጉዬ ቢዲ ኤጻሜ ጌቴቲዛሶን ዲዛ ዛላ ጎንጎሎ ጊዶ ጌሊ ኡቲዴስ።
JDG 15:9 ሄሳፌ ጉዬ ፊሊስጼሜ ኣሳይ ዪዲ ዩሁዳን ዱንካኒዴስ፤ ሌሃ ጌቴቲዛ ካታማ ዎራጂ ኦይኪዴስ።
JDG 15:10 ዩሁዳ ኣሳይ ኢስታስ፥ «ኣይስ ኑና ኦላናስ ዪዴቲ?» ጊዲ ኦይቺዳ። ኢስታስ፥ «ኑኒ ሳምሶኔ ኦይኪ ቃቻናሲኔ ኢዚ ኑ ቦላ ኦꬂዳ ማላ ኢዛ ቦላ ኦꬃናስ ዪዶስ» ጊ ዛሪዳ።
JDG 15:11 ሄሳ ጊሻስ ዩሁዳፔ 300 ኣሳይ ኤጻሜ ጌቴቲዛሶን ዲዛ ዛላ ጎንጎሎ ጊዶ ቢዲ ሳምሶኔስ፥ «ኑና ሃሪዛይቲ ፊሊስጼሜ ኣሳታ ጊዲዳይሳ ኔ ኤርኪ? ሂስቲን ሃይሳ ኑ ቦላ ኣይ ፓላ ሚሽ ኦꬃይ?» ጊዳ። ኢዚካ ዛሪዲ፥ «ኢስቲ ታ ቦላ ኦꬂዳ ማላ ታኒካ ኢስታ ቦላ ኦꬃዲስ» ጊዴስ።
JDG 15:12 ኢስቲካ ቃሴካ፥ «ኑኒ ሃይሳ ዪዳይ ኔና ቃቺዲ ፊሊስጼሜታስ ኣꬂ ኢማናሳ» ጊዳ። ሳምሶኔይ ኢስታስ፥ «ኢንቴ ኢንቴ ባጋራ ታና ዎꬎንታ ማላ ታስ ጫቂቴ» ጊዴስ።
JDG 15:13 ኢስቲ፥ «ኤኖ! ኑኒ ኔና ቃቺዲ ኢስታስ ኣꬂ ኢማናፔ ኣቲን ዎꬎኮ» ጊዲ ኢዛስ ዛሪዳ። ሄሳፌ ጉዬ ናምኡ ኦራꬃ ዎዶሮን ቃቺዲ ሄ ጎንጎሎዛ ጊዶፌ ኢዛ ኬሲ ኤፊዳ።
JDG 15:14 ሳምሶኔይ ሌሃ ቢዳ ዎዴ ፊሊስጼሜ ኣሳቲ ዎጫሚዲ ኢዛራ ጋይታናስ ዪዳ፤ ጎዳ ኣያናይ ኢዛ ቦላ ዎꬊዲ ኢዛስ ዎልቃ ኢሚዴስ፤ ኢዛ ኩሼ ቃቺ ዎꬂዳ ዎዶሮዚካ ታማን ጌሊዳ ሻሎ ማላ ዱጼሬቲ ዎꬊዴስ።
JDG 15:15 ሂስቲዲ ማታ ዎዴ ሃይቂዳ ኢሲ ሃሬ ባንቂላ ዴሚ ኤኪዲ ኢዛን 1,000 ኣስ ዎꬊዴስ።
JDG 15:16 ሳምሶኔይ፥ «ኢሲ ሃሬ ባንቂላን 1,000 ኣስ ዉርሲዳይ፥ ኣሃ ኣሃ ቦላ ዶሪዳይ ታና ሳምሶኔ» ጊ ጌሬሪዴስ።
JDG 15:17 ሄሳፌ ባ ኦይኪዳ ባንቂላዛ ኩሼፔ ዎራ ኦሊዴስ፤ ሄ ሶሆዛ፥ «ኣራማቴሜ-ሌሃ» ጊ ሱንꬂዴስ።
JDG 15:18 ሄሳፌ ጉዬ ሳምሶኔይ ኬሂ ሳሜቲዴስ፤ ሄሳ ጊሻስ ጎዳስ፥ «ኔኒ ሃይሳ ማላ ጊታ ጾኖ ታስ ኔ ኣይሌዛስ ኢማዳሳ። ሂስቲን ታኒ ሃኢ ሳሞን ሃይቆ? ቃሴ ሃ ቃጻሬቶንታይታ ኩሼን ኩንዶ?» ጊ ዋሲዴስ።
JDG 15:19 ጾሲ ሌሃን ዲዛ ቢታ ጳልቂን ኢዛፔ ሃꬂ ኬዚዴስ። ሳምሶኔይ ሄ ሃꬃፌ ኡዪዲ ኣሊዳ ጊሻስ ኢዛስ ሼምፖይ ሲሚዴስ። ሄሳ ጊሻስ ሄ ሶሆዛ፥ «ኤን-ሃቆሬ» ጊ ሱንꬂዴስ። ሄሲ ሃች ጋካናስ ሌሃን ዴስ።
JDG 15:20 ፊሊስጼሜ ኣሳይ ቢታ ሃሪዛ ዎዴ ሳምሶኔይ ኢስራኤሌ ኣሳ ቦላ ናምኡ ታሙ ላይꬅ ዳናቲዴስ።
JDG 16:1 ኢሲ ጋላስ ሳምሶኔይ ጋዛ ጊዛ ፊሊስጼሜታ ካታማ ቢዴስ፤ ሄን ኢሲ ላይማ ማጫሲዮ ቤኢዲ ኢዚራ ኣቃናስ ኢዚሶ ጌሊዴስ።
JDG 16:2 ጋዛ ካታማን ዲዛ ኣሳይ ሳምሶኔይ ኢስታ ካታማ ዪዳይሳ ሲዪዳ፤ ሂስቲዲ ካታማ ዩዪ ኣꬊዲ ኦማርስ ኩሜꬅ ካታማ ፔንጌ ናጊሼ ኣቂዳ፤ «ሳኣይ ዎንታና ጋካናስ ናጊዲ ኑኒ ኢዛ ዎꬋና» ጊዲ ኦማርስ ኩሜꬅ ዛማዲ ኣቂዳ።
JDG 16:3 ጊዶ ኣቲን ሳምሶኔይ ሄን ዚንኢዳይ ጊዲ ጊዶꬅ ጋካናስ ጻላ፤ ጊዲ ጊዶꬅ ꬊስኮፌ ዴንዲዲ ካታማ ጊምቤዛ ፔንጌ ሳንቃ፥ ቆሬ፥ ቆሲላꬃኔ ጎርዲዛ ኮላታታራ ኢሲፌ ሾዲ ቶኪ ኤኪዲ ኬብሮኔፔ ሲንꬃ ባጋራ ዲዛ ዙማ ሁኤ ኬዚዴስ።
JDG 16:4 ሄሳፌ ጉዬ ሳምሶኔይ ሶሬቄ ሾባን ዲዛ ኢሲ ዳሊሎ ጌቴቲዛ ማጫሳዮ ዶሲዴስ።
JDG 16:5 ሄሳ ጊሻስ ፊሊስጼሜታ ሃላቃቲ ኢዚኮ ዪዲ፥ «ኔኒ ኢዛ ጪማዳ፥ ሄ ዎልቃ ኡባ ኣዛፔ ኢዚ ዴሚዳኮኔ ቃሴ ኑኒ ኢዛ ዎስቲ ጾኒዲ ቃቻናስ ዳንዳይዛኮ ኦይቻ፤ ኑኒ ኢሶይ ኢሶይ ኔስ 1,100 ሳቂሌ ቢራ ኢማና» ጊዳ።
JDG 16:6 ሄሳ ጊሻስ ዳሊላይ ሳምሶኔስ፥ «ሃይሳ ኬና ዎልቃ ኔኒ ኣዋፔ ዴሚዳኮ ዎዜ ኔና ታስ ዮታርኪ! ኢሲ ኣሲ ኔና ዎስቲ ቃቺዳኮ ኔ ዳቡራኔ?» ጋዱስ።
JDG 16:7 ሳምሶኔይ፥ «ኣሲ ታና ላፑን ኢርጻ ዳፎታን ቃቺኮ ዳቡራዳ ሃራ ኣይ ኣሳ ማላካ ዎልቃይ ባይንዳዴ ጊዳና» ጊ ዛሪዴስ።
JDG 16:8 ሄሳፌ ጉዬ ፊሊስጼሜታ ሃላቃቲ ዳሊላስ ላፑን ኢርጻ ዳፎታ ኤሂዳ፤ ኢዛንካ ሳምሶኔ ቃቻዱስ።
JDG 16:9 ፊሊስጼሜ ኣሳታ ባ ቆልኣን ቆታ ዎꬃዳ፥ «ሳምሶኔ! ፊሊስጼሜ ኣሳቲ ኔ ቦላ ጋኪዳ» ጋ ጼይጋዱስ፤ ጊዶ ኣቲን ታማይ ሻሎ ሚዛ ማላ ዳፎታ ዱሴሬꬂ ዬጊዴስ፤ ሄሳ ጊሻስ ሄ ዎልቃዚ ኢዛስ ኣዋ ባጋን ዲዛኮ ኤራናስ ዳንዳይቤቴና።
JDG 16:10 ሄሳ ጊሻስ ዳሊላይ ሳምሶኔስ፥ «ሄኮ ኔኒ ታናን ካኣሳ፤ ኔኒ ታስ ዎርዶ ዮታዳሳ። ሃኢካ ኔና ዎስቲ ቃቺ ዳንዳያናኮ ዎዜ ኔና ታስ ዮታርኪ!» ጋዱስ።
JDG 16:11 ሂስቲን ኢዚ ኢዞ፥ «ኣሲ ጎኤቲቤና ኦራꬃ ዎዶሮን ታና ቃቺኮ ዳቡራዳ ሃራ ኣሳ ማላ ዎልቃይ ባይንዳዴ ጊዳና» ጊዴስ።
JDG 16:12 ዳሊላይ ኦራꬃ ዎዶሮ ኤካዳ ሳምሶኔ ቃቻዱስ። ኢዚስ ቆልኣ ጊዶን ናጌቲዛ ፊሊስጼሜ ኣሳታ ዎꬃዳ፥ «ሳምሶኔ! ፊሊስጼሜ ኣሳቲ ኔ ቦላ ጋኪዳ» ጋዱስ። ኢዚ ጊዲኮ ዎዶሮዛ ሻሎ ዱሴሬꬂዛ ማላ ባ ቄሴፔ ዱሴሬꬂ ዬጊዴስ።
JDG 16:13 ቃሴካ፥ ዳሊላይ ሳምሶኔስ፥ «ሃኖ ጋካናስ ኔ ታና ኤያ ሂስታዳ ታስ ዎርዶ ዮታዳሳ። ሃኢካ ኔና ዎስቲ ቃቺ ዳንዳያናኮ ዎዜ ኔና ታስ ዮታርኪ!» ጋዱስ። ሂስቲን ሳምሶኔይ ኢዚስ፥ «ታ ሁኤ ላፑን ዳꬃታ ቃጪናራ ጋꬃ ዳዳዳ ꬊሽኬን ቢታራ ጋꬃ ꬊሺኪኮ ሃራ ኣሳ ማላ ታኒ ዎልቃይ ባይንዳዴ ጊዳና» ጊዴስ።
JDG 16:14 ሄሳፌ ጉዬ ሳምሶኔይ ꬊስኪን ዳሊላይ ኢዛ ሁኤ ላፑን ዳꬃታ ቃጪናራ ጋꬃ ዳዳዳ ꬊሽኬን ኣꬃ ꬊሺካዱስ። ሂስታዳ፥ «ሳምሶኔ! ፊሊስጼሜ ኣሳቲ ኔ ቦላ ጋኪዳ» ጋዱስ፤ ኢዚ ጊዲኮ ꬊስኮፌ ዳጋሚ ዴንዲዲ ባ ሁኤ ቢናናዛ ꬊሽኬዛፔኔ ዎታራ ዎዶሮታፔ ሾዲ ኤኪዴስ።
JDG 16:15 ሄሳ ጊሻስ ኢዛ፥ «ኔ ታና ኣማናካሺን ዋናዳ ኔ፥ ‹ታ ኔና ሲቃዲስ› ጋይ? ኔ ታና ሃይሳራ ሄꬑቶ ባሌꬃዳሳ። ሃይሳ ማላ ዎልቃይ ኔ ኣሳቴꬃ ቦላ ኣዋ ባጋን ዲዛኮ ታስ ዮታቤካ» ጋዱስ።
JDG 16:16 ኢዚ ሃይቆ ኣሞታና ጋካናስ ዎንቲን ዎንቲን ኦይሾን ሼምፖ ꬋይሳዱስ።
JDG 16:17 ሄሳ ጊሻስ ሳምሶኔይ ኢዚስ፥ «ታ ኣዬይ ኡሎፔ ዶሚን ታኒ ጾሳስ ናዚራዌ ጊዲዳ ጊሻስ ታ ሁኤ ቢናናይ ሜዴቲ ኤሬና። ታ ሁኤ ቢናናይ ሜዴቲኮ ታ ዎልቃይ ታፔ ꬋዪን ታኒ ሃራ ኣሳ ማላ ዎልቃይ ባይንዳዴ ጊዳና» ጊዲ ባ ዎዚናን ዲዛይሳ ኡባ ኢዚስ ዮቲዴስ።
JDG 16:18 ባ ዎዚናን ዲዛይሳ ኡባ ኢዚ ዮቲዳይሳ ዳሊላይ ሻካ ኤራዳ፥ «ባ ዎዚናን ዲዛይሳ ኡባ ታስ ዮቲዳ ጊሻስ ኣኔ ኢሲቶ ሲሚዲ ዪቴ» ጋዳ ፊሊስጼሜታ ሃላቃታስ ኪታ ዬዳዱስ፤ ኢስቲካ ካሴ ኢዚስ ኢማና ጊዳ ቢራ ኤኪዲ ኢዚኮ ዪዳ።
JDG 16:19 ዳሊላይ ሳምሶኔ ባ ዎዲራ ቦላ ꬊስኪሳዱስ፤ ኢሲ ኣስ ጼይጋ ኤሃዳ ኢዛ ሁኤ ላፑን ዳꬃታ ሜዲሳዱስ፤ ኢዛ ዎልቃይካ ኢዛፔ ꬋይዴስ፤ ሄሳፌ ጉዬ ኢዛ ካዉሾ ኦይካዱስ፤
JDG 16:20 ሄሳፌ ጉዬ፥ «ሳምሶኔ! ፊሊስጼሜ ኣሳቲ ኔ ቦላ ጋኪዳ!» ጋዱስ፤ ሂስቲን ꬊስኮፌ ዳጋሚ ዴንዲዲ ካሴይሳꬆ ኦꬃና ጊ ቆፒዴስ፤ ጊዶ ኣቲን ጎዳይ ኢዛፔ ሻኬቲቾይሳ ኢዚ ኤሪቤና።
JDG 16:21 ፊሊስጼሜቲ ኢዛ ኦይኪዳፔ ጉዬ ናምኡ ኣይፌታ ዎጪ ኬሲዲ ጋዛ ካታማ ኤፊዳ፤ ጻርቂማላ ሳንሳላታን ኢዛ ቃቺዳ፤ ሄን ቃሾ ኬꬃን ዲሼ ካꬅ ጋጫና ማላ ኦꬂዳ።
JDG 16:22 ኢስቲ ኢዛ ሁኤ ቢናና ሜዲዳፔ ጉዬ ቢናናይ ሲሚ ሞኮ ዶሚዴስ።
JDG 16:23 ፊሊስጼሜታ ሃላቃቲ፥ «ኑ ጾሳይ ኑ ሞርኬዛ ሳምሶኔ ኑ ኩሼን ኣꬂ ኢሚዴስ» ጊዲ ባንታ ጾሳ ዳጎኔስ ጊታ ያርሾ ያርሻናሲኔ ኡፋዬታናስ ኢሲ ቦላ ሺቂዳ።
JDG 16:24 ኣሳይ ኡባይ ኢዛ ቤይዳ ዎዴ፥ «ኑ ቢታ ꬋይሲዳ፥ ኑ ኣሳፔ ዳሮታ ዎꬊዳ ኑ ሞርኬዛ ኑ ጾሳይ ኑ ኩሼን ኣꬂ ኢሚዴስ» ጊዲ ባንታ ጾሳ ጋላቲዳ።
JDG 16:25 ኢስቲ ኬሂ ኡፋዬቲዳ ጊሻስ፥ «ኢዛ ቦላ ኑ ሚጪ ካኣና ማላ ሳምሶኔ ሃ ኤኪ ዪቴ» ጊዳ፤ ሂስቲን ሳምሶኔ ቃሾ ኬꬃፌ ጼይጊዲ ኤሂን ኢዚ ኢስታ ሲንꬃን ካኢዴስ፤ ካኢዳፔ ጉዬ ኢዛ ናምኡ ቱሳታ ጊዶን ኤሲዳ።
JDG 16:26 ሳምሶኔይ ኢዛ ኩሼ ኦይኪዲ ካሌꬂዛ ናዛ፥ «ታኒ ኢስታን ዜምፓዳ ኤቃና ማላ ኬꬃ ቶኪዳ ቱሳታ ታና ኦይꬃ» ጊዴስ።
JDG 16:27 ኬꬃ ጊዶን ኣዴይኔ ማጫይ ኩሚ ኡቲዴስ፤ ቃሴ ፊሊስጼሜታ ሃላቃቲ ኡባቲካ ሄን ዴቴስ። ሳምሶኔይ ካኢሺን ቦላ ፖቄ ቦላ ኡቲ ጼሊዛ 3,000 ጊዲዛ ኣዴይኔ ማጫይ ዴስ።
JDG 16:28 ሄ ዎዴ ሳምሶኔይ ጎዳ ዎሲዲ፥ «ኣቤት ኡባ ሃሪዛ ጎዳዉ! ሃኢ ታና ቆፓርኪ! ኣቤት ጾሳዉ፥ ፊሊስጼሜቲ ታ ኣይፌ ናምኣታ ዎጪ ኬሲዳይሳ ሃሎ ታኒ ኬሳና ማላ ሃኢ ታና ኢሲቶ ሚንꬃርኪ!» ጊዴስ።
JDG 16:29 ሳምሶኔይ ኬꬃ ቶኪ ኦይኪዳ ጊዶ ቱሳታ ናምኣካ ኦይኪዴስ፤ ኢሳ ኡሻቻ ኩሼን፥ ኢሳ ሃዲርሳ ኩሼን ኦይኪዳፔ ጉዬ፥
JDG 16:30 «ኣኔ ታ ሼምፖይ ፊሊስጼሜታራ ኢሲፌ ꬋዮ!» ጊዲ ዋሲዴስ፤ ባስ ዲዛ ዎልቃ ኡባን ቱሳታ ሱጊን ኬꬃይ ሃላቃታ ቦላኔ ጊዶን ዲዛ ኣሳ ኡባ ቦላ ኩንዲዴስ። ሳምሶኔይ ሃይቂሼ ዎꬊዳ ኣሳይ ኢዚ ፓጻ ዲሼ ዎꬊዳ ኣሳፔ ዳሪዴስ።
JDG 16:31 ሄሳ ጊሻስ ኢዛ ኢሻቲኔ ኢዛ ዳቦቲ ኡባይ ዪዲ ኢዛ ኣሃ ኤፊዳ፤ ጾራኣ ካታማፔኔ ኤሽታኦሌ ካታማፔ ጊዶን ኢዛ ኣዋ ማኑሄ ዱፎን ሞጊዳ። ሳምሶኔይ ናምኡ ታሙ ላይꬅ ኩሜꬅ ኢስራኤሌ ዴራ ቦላ ዳናቲዴስ።
JDG 17:1 ኤፍሬሜን ቦላ ጌዜን ሚኪያሳ ጌቴቲዛ ኢሳዴይ ዴስ።
JDG 17:2 ኢሲ ጋላስ ሚኪያሲ ባ ኣዮ፥ «ኔፔ ኢሲ ኣሲ 1,100 ሳቂሌ ቢራ ካይሶቲዳ ዎዴ ኔኒ ሄ ካይሶቲዳ ቢታኔዛ ቃንጊሺን ታኒ ሲያዲስ። ቤያ! ሄ ሚሻይ ታ ኣቻን ዴስ፤ ታ ኤካዲስ» ጊዴስ። ኢዛ ኣዬያ፥ «ታ ናዞ ኔና ጾሲ ኣንጆ!» ጋዱስ።
JDG 17:3 ናዚ 1,100 ሳቂሌ ቢራ ባ ኣዬይስ ዛሪዴስ፤ ኢዛ ኣዬያ፥ «ታኒ ታ ናዛ ጊሻስ ጾሳስ ዱማሳና፤ ሄ ቢራራ ሚꬃፌ ኦሴቲዲ ቢራን ሜሼቲዳ ኤቃ ጾስ ሜꬌቶ፤ ታኒ ዛራዳ ኔስ ኢማና» ጋዱስ።
JDG 17:4 ናዚ ባ ኣዬይስ ሚሻ ዛሪን ኢዛ ኣዬያ ሄ ቢራፔ 200 ሳቂሌ ቢራ ኤካዳ ሚꬅ ማሲዲ ቢራን ቲዪ ቲይዲ ኤቃ ሚስሌ ሜꬊዛ ኢሲ ሂላዛስ ኢማዱስ፤ ሄ ኦሴቲዳ ኤቃ ጾሳ ሚስሌዚ ሚኪያሳ ሶን ኡቲዴስ።
JDG 17:5 ሚኪያሲካ ኤቃስ ጎይኒዛሶይ ዴስ፤ ኢዚ ኤፉዴኔ ቴራፊሜ ኦꬂዲ ባ ናይታፔ ኢሳ ቄሴ ጊዲ ኦꬃና ማላ ዶሪዴስ።
JDG 17:6 ሄ ዎዴ ኢስራኤሌ ቢታን ካዎይ ባይንዳ ጊሻስ ኣሲ ባና ሎኢዳ ማላ ሃኔስ።
JDG 17:7 ሄ ዎዴ ዩሁዳ ቢታን ቤቴሊሄሜ ካታማን ዲዛ ሌዌ ባጋፌ ጊዲዳ ኢሲ ናቴꬃ ኣሲ ዴስ።
JDG 17:8 ኢዛዴይካ ባስ ዳናሶ ኮያናስ ቤቴሊሄሜ ካታማፔ ዴንዲ ቢዴስ፤ ኢዚካ ኤፍሬሜ ዴሬን ቦላ ዙንቡላን ዲዛ ሚኪያሳ ሶ ጋኪዴስ።
JDG 17:9 ሚኪያሲ ኢዛስ፥ «ኔ ኣዋፔ ያዲ?» ጊ ኦይቺዴስ። ኢዚካ ዛሪዲ፥ «ታኒ ዩሁዳ ዴሬን ዲዛ ቤቴሊሄሜ ካታማፔ ያዲስ፤ ታ ቆሞይ ሌዌ። ሃኢ ታኒ ታስ ዱሳሶ ኮያይስ» ጊዴስ።
JDG 17:10 ሚኪያሲ ኢዛስ፥ «ታናራ ዴኣ፤ ታና ዞሪዛዴኔ ቄሴ ጊዳ። ታኒ ኔስ ላይꬃን ላይꬃን 10 ሳቂሌ ቢራ፥ ኩሜꬃ ማይኦኔ ሚዛ ካꬅ ኢማና» ጊዴስ።
JDG 17:11 ሄ ሌዌ ናቴꬃዚ ሚኪያሳራ ኢሲፌ ዴኣናስ ቆፋ ቃቺዴስ፤ ኢዚካ ሚኪያሳስ ዬሎ ማላ ሃኒዴስ።
JDG 17:12 ሚኪያሲ ኢዛ ባ ቄሴ ሂስቲዲ ሱንꬂን ኢዛ ሶን ዴኢዴስ።
JDG 17:13 ሚኪያሲካ፥ «ታ ሌዌ ቆሞፌ ቄሴ ዴሚዳ ጊሻስ ታስ ኡባ ሚሽ ጾሲ ሎኤꬃናይሳ ሃኢ ታ ኤራዲስ» ጊዴስ።
JDG 18:1 ዳዊቲ ሳኦሌራ ሃሳዬቲ ጊጊዳ ማላ ዮናታኔይ ዳዊቴስ ሼምፖ ላጌ ጊዲዴስ፤ ባ ሁኤ ማላ ኢዛ ሲቂዴስ።
JDG 18:2 ሄ ጋላሳፌ ዶሚዲ ሳኦሊ ዳዊቴ ባናራ ዎꬂዴስ ኣቲን ጌዴ ኢዛ ኣዋ ሶ ኢዛ ዬዲቤና። ኢስቲካ ኤፍሬሜ ዴሬን ሻራ ሜንꬆ ቦላ ዲዛ ሚኪያሳ ሶ ጋኪ ኣቂዳ።
JDG 18:3 ዮናታኔይ ዳዊቴ ባና ማላ ሲቂዳ ጊሻስ ኢዛራ ጫቄቲዴስ።
JDG 18:4 ዮናታኔይ ባ ማይኢዳ ካባዛ ኬሲዲ ኦላ ማይኦዛ፥ ጊꬃ ማሻ፥ ዎንዳፌዛኔ ዳንጮዛ ኢሚዴስ።
JDG 18:5 ሳኦሊ ኪቲዳሶ ኣዋንካ ዳዊቲ ባ ኪቴቲዳይሳ ቤሲዳ ማላ ፖሊዛ ጊሻስ ባ ኦላንቻታ ቦላ ሹሚዴስ፤ ሄሲ ዴራ ኡባኔ ሳኦሌ ኦላ ሹሜታ ኡፋይሲዴስ።
JDG 18:6 ዳዊቲ ፊሊስጼሜ ኣዴዛ ዎꬊዳፔ ጉዬ ኣሳይ ባሶ ባሶ ሲሚሺን ማጫሳቲ ካራቤኔ ማሲንቆ ኦይኪዲ ዬጺሼ፥ ካኢሼ፥ ኢሊሊሼ ካዎ ሞካናስ ኢስራኤሌ ካታማታ ኡባፌ ኬዚዳ።
JDG 18:7 ማጫሳቲካ ሶርሼኔ ኤዲሼ፥ «ሳኦሊ ሺ ዎꬊዴስ፤ ዳዊቲ ጊዲኮ ታሙ ሺ ዎꬊዴስ» ጊ ዬጺዳ።
JDG 18:8 ሃይሲ ሃ ሃኖዚ ኢዛ ኡፋይሶንታ ጊሻስ ሳኦሊ ኬሂ ሃንቄቲዴስ፤ ኢዚካ፥ «ዳዊቴስ ታሙ ሺ፥ ታስ ሺ ጻላ! ጊዳ። ሂስቲን ኢዛስ ካዎቴꬃፌ ኣቲን ኣዚ ኣቲዴ!» ጊዴስ።
JDG 18:9 ሄ ጋላሳፌ ሃ ሲሚን ሳኦሊ ዳዊቴ ሚቃይኔቴꬃ ኣይፌን ጼሎ ዶሚዴስ።
JDG 18:10 ዎንቴꬃ ጋላስ ጾሳፌ ኣዛዜቲዳ ኢታ ኣያና ዎልቃይ ሳኦሌ ቦላ ዎꬊዴስ፤ ሄ ዎዴ ዳዊቲ ካሴ ኦꬂዛይሳꬆ ባጋና ሾጪሺን ሳኦሊ ባሶን ኡቲዲ ቲንቢቴ ሃሳዬስ፤ ሳኦሊ ቶራ ባ ኩሼን ኦይኪ ኡቲዴስ፤
JDG 18:11 ኢዚካ፥ «ዳዊቴ ጎዳራ ኦይሴꬃ ጋና» ጊ ቆፒዲ ቶራዛ ኢዛ ቦላ ጾንጊዴስ፤ ጊዶ ኣቲን ዳዊቲ ናምኡቶ ኢዛ ሲንꬃፌ ሼርኢ ጊዴስ።
JDG 18:12 ዩሁዳ ቢታን ዲዛ ቂሪያቴ-ዪኣሪሜ ጌቴቲዛ ካታማፔ ኣርሼይ ዉሊዛ ባጋራ ዱንካኒዳ፤ ሄሳ ጊሻስ ሄ ሶሆይ ሃች ጋካናስ ዳኔ ሞꬅ ጌቴቴስ።
JDG 18:13 ሄሳፌ ዴንዲዲ ኤፍሬሜ ዴሬን ዙምቡላ ቦላ ዲዛ ሚኪያሳ ሶ ዪዳ።
JDG 18:14 ላይሻ ቢታ ጾሞሳናስ ቢዳ ኢቻሹ ኣሳቲ ባንታ ኢሻታስ፥ «ሃ ኬꬃታፔ ኢሳን ኤፉዴ፥ ቴራፊሜ፥ ሚꬃፌ ማሴቲዳ ሚስሌኔ ሴሪሲ ሜꬊዳ ኤቃ ጾሲ ዲዛይሳ ኤሬቲ? ሂስቲኮ ኑ ኣይ ኦꬃናስ ቤሲዛኮ ኣኔ ቆፒቴ» ጊዳ።
JDG 18:15 ኦጌፔ ሲሚዲ ሌዌ ዛሬ ጊዲዳ ዬላጋ ቄሴይ ዲዛ ሚኪያሳ ሶ ቢዲ ኢዛ ሳሮኪዳ።
JDG 18:16 ሄ ዎዴ ዳኔ ቆሞፌ ኦላስ ጊጌቲ ዪዳ 600 ኣሳይ ጊቤ ጌሊዛ ፔንጌን ኤቂዴስ።
JDG 18:17 ቄሴዚ ኢስታራ ጊቤ ፔንጌን ኤቆን ዲሺን ቢታ ጾሞሲዳ 5 ኣሳቲ ሚኪያሳ ሶ ጌሊዲ፥ ኤፉዴ፥ ቴራፊሜ፥ ሚꬃፌ ማሴቲዳ ሚስሌኔ ሴሪሲ ሜꬊዳ ኤቃ ጾሳ ኤኪዳ።
JDG 18:18 ኢስቲ ኤኪ ቢሺን ቄሴዚ ኢስታስ፥ «ዎስቴቲ?» ጊዴስ።
JDG 18:19 ኢስቲ ኢዛስ፥ «ጮኡ ጋ! ኢሲ ቃላካ ቃቶፋ! ኑናራ ባዳ ኑስ ቄሴኔ ኑና ዞሪዛዴ ጊዳ። ኢሲ ኬꬃ ኣሳስ ቄሴ ጊዳናፔ ኢስራኤሌ ዴራ ጋርሳፌ ኢሲ ቆሞሲኔ ኢሲ ዛርኬስ ኔ ቄሴ ጊዲኮ ኔስ ሎኤኔ?» ጊዳ።
JDG 18:20 ሂስቲን ቄሴዚ ኡፋዬቲዲ ኤፉዴ፥ ቴራፊሜ፥ ሚꬃፌ ማሴቲዳ ሚስሌኔ ሴሪሲ ሜꬊዳ ኤቃ ጾሳ ኤኪዲ ዴሬዛራ ኢሲፌ ቢዴስ።
JDG 18:21 ሄሳፌ ዴንዲዲ ባንታ ናይታ፥ ባንታ ሜሄኔ ባንታስ ዲዛይሳ ሲንꬅ ኣꬂ ኤኪ ካሴ ባ ዪዳሶ ጉዬ ሲሚ ቢዳ።
JDG 18:22 ኢስቲ ሚኪያሳ ኬꬃፌ ሃኪዲ ቢዳፔ ጉዬ ሚኪያሲ ባ ሾሮን ዲዛ ኣሳታ ጼይጊን ኦላስ ኬዚዳ፤ ዳኔ ኣሳታ ካሊዲ ጋኪዳ።
JDG 18:23 ሂስቲዲ ኢስቲ ጉዬራ ዋሲዳ፤ ዳኔ ቆሞፌ ዪዳ ኣሳቲ ጉዬ ሲሚዲ ሚኪያሳ፥ «ዋናዲ? ሃ ኣሳ ኡባ ኣይስ ሺሻዲ?» ጊ ኦይቺዳ።
JDG 18:24 ሚኪያሲ ዛሪዲ፥ «ታኒ ሜꬊዳ ኤቃ ጾሳታኔ ታስ ኦꬂዛ ቄሴዛ ኢንቴ ቦንቂ ኤኪቺን ታስ ሃራይ ኣዜ ኣቲዳይ? ሂስቲን ኢንቴ ታና፥ ‹ዋናዲ?› ጌቲ?» ጊዴስ።
JDG 18:25 ዳኔ ቆሞፌ ዪዳ ኦላ ኣሳቲ፥ «ኢሲ ቃላ ቃታዳ ኔና ኤራ! ሃይሳ ዪሎቲ ኡቲዳ ኣሳ ኔ ዴንꬄꬂኮ፥ ኢስቲ ኔ ቦላ ዴንዳናኔ ኔ ሶ ኣሳ ኡባ ዉርሳና» ጊዳ።
JDG 18:26 ሄሳፌ ጉዬ ዳኔ ቆሞፌ ዪዳ ኣሳቲ ባንታ ኦጌ ቢዳ። ሚኪያሲካ ኢስታራ ኤቄታናስ ዳንዳዮንታይሳ ኤሪዲ ባ ሶ ጉዬ ሲሚ ቢዴስ።
JDG 18:27 ዳኔ ቆሞፌ ዪዳ ኣሳቲ ሚኪያሲ ሜꬊዳ ጾሳታኔ ኢዛ ቄሴዛ ኤኪዲ ላይሻ ካታማን ኦናካ ሲꬎንታ ሳሮ ዲዛ ኣሳታኮ ቢዳ፤ ሄ ካታማን ዲዛ ኡባ ጊꬃ ማሻን ሱፑ ሂስቲ ዎꬊዳ፤ ካታማዮካ ታማን ጹጊዳ።
JDG 18:28 ላይሻ ካታማይ ሲዶና ካታማፔ ሃኪ ዲዛ ጊሻሲኔ ኣሳይ ሃራ ኣሳራ ጋይቲ ኤሮንታ ጊሻስ ኢስታ ኣሺዛ ኣሲ ኦኒካ ቤቲቤና፤ ላይሻ ካታማይ ቤቲ-ራሆቤ ማታን ዲዛ ዙሌን ዴስ። ዳኔ ቆሞቲ ካታማ ዛሪ ኦꬂዲ ባስ ዱሳሶ ኬሲዳ።
JDG 18:29 ሄ ካታማይሲ ካሴ ላይሻ ጌቴቲዛ ሱንꬃ ላሚዲ ያቆቤ ናይታፔ ኢሳ ሱንꬃን፥ «ዳኔ» ጊ ሱንꬂዳ።
JDG 18:30 ዳኔ ቆሞቲ ባስ ጎይናናስ ኤቃ ጾሳታ ኤሲዳ፤ ሙሴ ና ጌርሾሜፔ ዬሌቲዳ ዮናታኔ ባንታ ቄሴ ኦꬂዳ። ኢዛ ዛሬቲ ኣሳይ ዲኤቲ ቢዳ ዎዴ ጋካናስ ኢስታስ ቄሴ ጊዲዳ።
JDG 18:31 ሄሳ ማላን ሃኒዲ ጾሳ ዱንካኔይ ሴሎን ዴኢዳ ላይꬃታን ኡባን ሚኪያሲ ኦꬂዳ ኤቃ ጾሳ ሚስሌዚ ሄን ጋምኢዴስ።
JDG 19:1 ኢስራኤሌ ቢታን ካሴ ካዎይ ካዎቶንታ ዎዴ ኤፍሬሜን ዙምቡላ ቦላ ሃሆን ሌዌ ቆሞታፔ ኢሳዴይ ዴስ። ሄ ኣዴዚ ዩሁዳ ቢታን ቤቴሊሄሜ ካታማፔ ባ ላጌꬂዛ ኢሲ ማጫሳዮ ኤኪ ዪዴስ።
JDG 19:2 ጊዶ ኣቲን ኢዛ ኢዛራ ኦዬታዳ ዩሁዳ ቢታን ቤቴሊሄሜ ካታማን ዲዛ ባ ኣዋ ሶ ባዳ ሄን ኦይዱ ኣጊና ኡታዱስ።
JDG 19:3 ኢዚ ላጌꬆዚ ኢዞ ዮቲ ኣማንꬂዲ ዛሪ ኤኪ ያናስ ቆፋ ቃቺዴስ፤ ቢሼ ባ ኣይሌኔ ናምኡ ሃሬታ ኤኪዲ ቢዴስ፤ ኢዛ ሞካ ኤካዳ ባ ኣዋ ሶ ጌልꬃዱስ፤ ኢዚ ኣዋይ ኢዛ ቤኢዲ ኡፋይሳን ሞኪ ኤኪዴስ።
JDG 19:4 ናዪ ኣዋይ ኢዚ ሄን ታካና ማላ ዎሲን ኣዴዚ ሚሼኔ ኡዪሼ 3 ጋላስ ሄን ታኪዴስ።
JDG 19:5 ኦይዳንꬆ ጋላስ ማላዶ ዎንታራ ዴንዲ ባናስ ጊጌቲዳ፤ ጊዶ ኣቲን ናይ ኣዋይ ባ ናይ ላጌꬆዛስ፥ «ኔ ዳቡሮንታ ማላ ኣይኮ ዶናን ጌልꬃዳ ባ» ጊዴስ።
JDG 19:6 ሄሳ ጊሻስ ናምኡ ኣሳቲካ ኡቲዲ ኢሲፌ ሚዳኔ ኡዪዳ። ሄሳፌ ጉዬ ናይ ኣዋይ ኢዛ፥ «ሃያና፥ ሃች ኡፋዬታሼ ሃይሳን ታናራ ኣቃ» ጊዴስ።
JDG 19:7 ናይ ላጌꬆዚ ባናስ ዴንዲን ናይ ኣዋይ ኢዚ ቦንታ ኣቃና ማላ ዎሲን ሄን ኣቂዴስ።
JDG 19:8 ኢቻሻንꬆ ጋላስ ባናስ ማላዶ ዎንታራ ዴንዲን ናይ ኣዋይ ቃሴካ፥ «ኔ ዳቡሮንታ ማላ ኣይኮ ዶናን ጌልꬃዳ ባ» ጊዴስ፤ ሂስቲን ኢስቲ ናምኣይካ ካꬅ ኢሲፌ ሚዳ።
JDG 19:9 ኣዴዚ ባ ላጌꬆይራኔ ባ ኣይሌራ ባና ኬዚን ናይ ኣዋይ፥ «ሃኢ ሳኣይ ቃሚዳ ጊሻስ ሃይሳን ኡፋዬቲሼ ኣቂዲ ዎንቶ ማላዶራ ዴንዲዲ ኢንቴ ሶ ቢቴ» ጊዴስ።
JDG 19:10 ጊዶ ኣቲን ኢዚ ሄ ጋላስ ሄን ኣቃናስ ኮዮንታ ጊሻስ፥ ዴንዲዲ ጫናራ ዲዛ ናምኡ ሃሬታ፥ ባ ላጌꬆዮኔ ባ ኣይሌዛ ኤኪዲ ዬሩሳላሜ ጌቴቲዳ ያቡሴ ጋኪዴስ።
JDG 19:11 ኢስቲ ያቡሴ ማቲሺን ሳኣይ ኬሂ ቃሚዳ ጊሻስ ኣይሌዚ ባ ጎዳስ፥ «ያቡሴን ጌሊ ኣቂዲ ኣይስ ዎንቲን ቦኮኒ?» ጊዴስ።
JDG 19:12 ጎዳዚ ኢዛስ ዛሪዲ፥ «ኣካይ! ሃይሳ ኢስራኤሌ ዴሬ ካታማ ጊዶንታ ኣሳ ዴሬ ካታማን ኣቆኮ፤ ጌዴ ጊቢኣ ጋካናስ ካንꬂ ቡስ ባና» ጊዴስ።
JDG 19:13 ቃሴ ዛሬꬂዲ ባ ኣይሌዛስ፥ «ሃ ያ፥ ኑኒ ጊቢኣ ካታማን ዎይኮ ኤራማ ካታማን ኣቂዛሶ ዴሚዲ ሄን ኣቃና» ጊዴስ።
JDG 19:14 ሂስቲዲ ሲንꬅ ቡስ ጉጂዳ፤ ኢስቲ ቢዲ ቢኒያሜ ቢታን ዲዛ ጊቢኣ ካታማ ማቲሺን ኣርሼይ ዉሊዴስ።
JDG 19:15 ኢስቲ ጊቢኣ ካታማ ጌሊዲ ዱቡሺዛ ዴምባን ኡቲዳ፤ ጊዶ ኣቲን ሄፔ ኢስታ ባሶ ኤፊዲ ኣይሲዛ ኣሲ ቤቲቤና።
JDG 19:16 ሄ ጋላሳ ኦማርስ ኤፍሬሜ ዴሬ ሻራ ሜንꬆ ቦላፌ ዪዲ ጊቢኣን ዲዛ ኢሲ ጪማ ኣዴዚ ባ ጋዴን ኦꬂ ፔኢዲ ሶ ሲሚ ዪሼ ኢስቲ ዲዛሶ ጋኪዴስ፤ ሄ ዎዴ ሄ ዴሬን ዲዛ ኣሳይ ቢኒያሜ ዛሬታ፤
JDG 19:17 ጪማ ኣዴዚካ ሄ ካታማን ዲዛ ዴምባን ኡቲዳ ኣዴዛ ቤኢዲ፥ «ኔ ኣዋፔ ዪዳ ኣሴ? ኣዋ ባይ?» ጊዲ ኦይቺዴስ።
JDG 19:18 ኢማꬃዚ ዛሪዲ፥ «ኑኒ ዩሁዳ ቢታን ዲዛ ቤቴሊሄሜ ካታማፔ ዪዶስ። ሃኢ ኤፍሬሜ ዴሬን ዙምቡላ ቦላ ሃሆን ዲዛ ኑሶኔ ጾሳ ኬꬅ ቤꬃ ቦላ ዲሺን ጋዴይ ቃሚን ሃይሳን ኡቲዶስ፤ ጊዶ ኣቲን ሃኖ ጋካናስ ኑና ባሶ ኤፊ ኣይሳና ኣስ ዴሚቤኮ።
JDG 19:19 ኑ ሃሬታስ ኡቱላይኔ ሃርቆይ ዴስ፤ ታስ፥ ታናራ ዲዛይታስ ማና ሺንቄይኔ ኡዪዛ ኡሺ ዲዛ ጊሻስ ሃራ ኣይኮካ ኮሼና» ጊዴስ።
JDG 19:20 ጪማ ኣዴዚ፥ «ሃ ዪቴ ታሶን ኣቂቴ! ኢንቴ ኮይዛይሳ ኡባ ታኒ ኢንቴስ ኢማና፤ ዱቡሻ ዴምባን ኣቆፒቴ» ጊዴስ።
JDG 19:21 ሄሳ ጊሻስ ኢስታ ባ ሶ ኤፊዲ ኢስታ ሃሬታስካ ሃርቆ ዬጊዴስ። ሄሳፌ ጉዬ ኢማꬃቲ ባንታ ቶሆዛ ሜጬቲዲ ካዎ ሚዳ ኡሺካ ኡዪዳ።
JDG 19:22 ኢስቲ ኡፋዬቲሺን ካታማፔ ዎርባላ ኣሳቲ ዪዲ ኬꬃ ዩሾን ዩዪ ኣꬊዲ፥ «ካሬ ዶያ» ጊዲ ፔንጌ ቆጼꬅ ዶሚዳ፤ ኢስቲ ሄ ኬꬃ ጎዳ፥ «ሃኢ ኔሶ ጌሊዳ ኣዴዛ ሃ ኬሳ፤ ኑኒ ኢዛራ ዚንኣናስ ኮዮስ!» ጊዳ።
JDG 19:23 ኬꬃ ጎዳይ ካሬ ኬዚዲ ኢስታስ፥ «ሃኢ ታ ኢሻቶ! ሄሳ ማላ ፓላ ሚሽ ኦꬆፍቴ፤ ሃይሲ ኣዴዚ ታ ኢማꬃ።
JDG 19:24 ቤኢቴ! ታስ ጌላኦ ናያኔ ኢዛ ላጌꬆያ ሃይሳን ዴቴስ። ታኒ ኢስታ ኢንቴስ ካሬ ኬሳና፤ ሄ ዎዴ ኢስታ ኢንቴ ኮዪዳይሳ ኦꬂቴ፤ ጊዶ ኣቲን ሃ ኣዴዛ ቦላ ሄሳ ማላ ሃራሲዛ ኦሶ ኦꬆፍቴ» ጊዴስ።
JDG 19:25 ጊዶ ኣቲን ኣሳቲ ኢዚ ጊዛይሳ ሲዮንታ ኢጺዳ። ሄሳ ጊሻስ ሌዌ ዛሬዚ ባ ላጌꬆዮ ኢስታስ ካሬ ኬሲ ዬዲዴስ፤ ሳኣይ ዎንታና ጋካናስ ላሜቲ ላሜቲ ኢዚራ ዚንኢዲ ሳኣይ ዎንታና ጊሺን ዬዲዳ።
JDG 19:26 ኢዛካ ዎንታናስ ባዞይ ዞኢሺን ያዳ ኢዚ ጎዳይ ኣቂዳ ጪማ ኣዴዛ ኬꬃ ፔንጌን ኩንዳዱስ፤ ጻልቄይ ኬዛና ጋካናስ ሄሳን ፖርጩ ጋ ኢቻዱስ።
JDG 19:27 ሄ ጋላስ ማላዶ ኢዚ ጎዳዚ ዴንዲዲ ባ ኦጌ ባናስ ኬꬃ ፔንጌ ዶይዲ ኬዚሺን ኢዛ ላጌꬆያ ኬꬃ ፔንጌን ባ ኩሼ ሚጫዳ ኢቺዳሮ ቤኢዴስ።
JDG 19:28 ኢዚ ኢዞ፥ «ዴንዳ ኣኔ ቦስ!» ጊዴስ፤ ጊዶ ኣቲን ኢዛ ኢዛስ ኣይኮካ ዛራቤኩ፤ ሄሳፌ ጉዬ ኢዚ ኣሃ ሃሬዛ ቦላ ጫኒ ኤኪዲ ባሶ ቢዴስ።
JDG 19:29 ሶ ጋኪዳ ማላ ማሻ ኤኪዲ ባ ላጌꬆይ ኣሃ 12 ኬሲ ቃንጼሬꬂዴስ፤ ኩሜꬃ ኢስራኤሌ ዴራ ጋካና ማላ ኢሲ ኢሲ ቃንጾ 12 ኢስራኤሌ ቆሞታስ ዬዲዴስ።
JDG 19:30 ሄሳ ቤኢዳ ኡባይ፥ «ኢስራኤሌ ኣሳይ ጊብጼ ቢታፌ ኬዞሶፌ ሃች ጋካናስ ሃይሳ ማላ ሚሺ ሃኒቤና፤ ኑኒካ ቤዪቤኮ፤ ኣኔ ሃይሳ ኢሲፌ ኣኬኪ ዞሬቲዲ ኢሲ ሚሽ ኦꬆስ» ጊዳ።
JDG 20:1 ዳኔፔ ቤርሳቤሄ ጌቴቲዛ ካታማ ጋካናስ ጋላኣዴፔ ኢስራኤሌ ኣሳይ ኡባይ ኢሲ ኣሳ ማላ ሚጺጳ ጌቴቲዛ ካታማን ጎዳ ሲንꬃን ኢሲፌ ሺቂዴስ።
JDG 20:2 ሄ ሺቂዳ ጾሳ ኣሳራ ኢስራኤሌ ቆሞታ ካሌꬂዛ ቆሞ ሃላቃቲካ ዴቴስ። ኢስታ ጊዶን ኦላስ ጊጌቲዳ 400,000 ኦላንቻቲ ዴቴስ።
JDG 20:3 ሄ ዎዴ ኢስራኤሌ ኣሳይ ሚጺጳ ካታማን ሺቂዳይሳ ቢኒያሜ ቆሞቲ ሲዪዳ። ኢስራኤሌ ኣሳይ፥ «ሃ ኢታ ሃኖዚ ኣኔ ዋኒ ሃኒዳኮ ኑስ ዮቲቴ» ጊዴስ።
JDG 20:4 ሄሳ ጊሻስ ሃይቂዳሪ ላጌꬆ ሌዌ ቆሞዚ፥ «ታኒኔ ታ ላጌꬆያ ኦማርስ ኣቃናስ ቢኒያሜ ቢታን ዲዛ ጊቢኣ ጌቴቲዛ ካታማ ቢዶስ።
JDG 20:5 ጊቢኣ ካታማ ኣሳይ ታና ዎꬋናስ ዪዲ ታ ኣቃና ጌሊዳ ኬꬃ ኦማርስ ጊዶꬂዴስ፤ ሄሳፌ ጉዬ ታ ላጌꬆይራ ኢስቲ ዎልቃን ዚንኢን ሃይቃዱስ።
JDG 20:6 ሄ ኢዚ ኣሃ ታኒ ኤካዳ ቃንጼሬꬂዳፔ ጉዬ ኢስቲ ሃይሳ ቱናኔ ፓላ ሚሽ ኢስራኤሌን ኦꬂዳ ጊሻስ ኢስራኤሌ ኣሳይ ላቲዲ ዲዛሶን ኢሲ ኢሲ ቆሞስ ኢሲ ኢሲ ቃንጾ ዬዳዲስ።
JDG 20:7 ኢስራኤሌ ኣሳይ ኡባይ ኢንቴ ጋርሳን ኢሶይ ኢሳራ ኣኔ ዞሬቲዲ ኢንቴ ፒርዳ ኢሚቴ» ጊዴስ።
JDG 20:8 ኣሳይ ኡባይ ኢሲ ዎዚና ጊዲዲ፥ «ኑ ጊዶፌ ኦኒኔ ባ ዱንካኔ ዎይኮ ባሶ ጉዬ ሲሚ ቦፖ፤
JDG 20:9 ኑኒ ጊቢኣ ቦላ ኦꬃናይሲ ሳማ ዬጊዲ ሳማይ ኑና ጋኮሶ ጋኮሶ ኦላስ ዎራጃና።
JDG 20:10 ኩሜꬃ ኢስራኤሌ ኣሳፔ ኦላ ቢዛ ኣሳታስ ሺንቄ ቶካናስ ጼታፔ ታማታ፥ ሺያፔ ጼታታ፥ ታሙ ሺያፔ ቃሴ ሺያታ ዶራና፤ ሄሳፌ ጉዬ ኦላንቻቲ ቢኒያሜ ቢታን ዲዛ ጊቢኣ ካታማ ቢዲ ሄን ዲዛ ኣሳይ ኢስራኤሌ ቦላ ኦꬂዳ ኢታ ኦሶዛ ጊሻስ ኢስታስ ቤሲዛ ቂጻቴ ኢማና» ጊዳ።
JDG 20:11 ሄሳ ጊሻስ ኢስራኤሌ ኣሳይ ኡባይ ኢሲ ዎዚናን ጊዲዲ ኦላስ ዎራጂዴስ።
JDG 20:12 ኢስራኤሌ ዛሬቲ ቢኒያሜ ዛሬታ ኡባስ ኣስ ኪቲዳ፤ «ኢንቴ ጊዶን ኦሴቲዳ ሃ ኢታ ኦሶዚ ኣዜ?
JDG 20:13 ኑኒ ኢስታ ዎꬊዲ ኢስራኤሌፔ ሃ ኢታ ꬋይሳና ማላ ጊቢኣ ካታማን ዲዛ ሄ ዎርባላታ ኬሲዲ ኑስ ኣꬂ ኢሚቴ» ጊዳ። ጊዶ ኣቲን ቢኒያሜ ቆሞቲ ኢሻቲ ኢስራኤሌ ናይቲ ዮቲዛይሳ ሲዮንታ ኢጺዳ።
JDG 20:14 ኢስቲ ኢስራኤሌ ኣሳራ ኦሌታናስ ባ ዲዛ ካታማታፔ ካታማፔ ኬዚዲ ኢሲፌ ጊቢኣ ካታማ ሺቂዳ።
JDG 20:15 ሄ ጋላሲካ ጊቢኣ ካታማን ዲዛ ኣሳ ጊዶፌ ዱማ ዶሬቲዳ 700 ኣሳፔ ቦላራ ቢኒያሜ ካታማታፔ ዪዳ ጊꬃ ማሻን ኦሌቲዛ 26,000 ኦላንቻታ ሺሺዳ።
JDG 20:16 ሄ ኡባታ ጊዶፌ 700 ኣሳቲ ሃዲርሳ ኩሼን ኦሊዛይታ፤ ሃ ኡባቲካ ያንባርሻን ሹች ኦሊዲ ሃራይ ኣቶሺን ኢሲ ቢናናካ ሃሌቴና።
JDG 20:17 ቢኒያሜ ቆሞ ጉጆንታ ኢስራኤሌ ኣሳይ ኦላስ ጊጌቲዳ 400,000 ኦላንቻታ ሺሺዴስ።
JDG 20:18 ኢስራኤሌ ኣሳይ ቤቴሌ ቢዲ፥ «ቢኒያሜ ኣሳ ኦላናስ ኑፔ ሲንꬃቲዲ ኦኒ ኬዛኔ?» ጊዲ ጾሳ ኦይቺዴስ። ጎዳይካ፥ «ኮይሮ ዩሁዳ ቆሞይ ኬዞ» ጊዴስ።
JDG 20:19 ሄሳ ጊሻስ ዎንቴꬃ ጋላስ ማላዶ ዎንታራ ኢስራኤሌ ኣሳይ ዴንዲዲ ጊቢኣ ካታማ ማታን ዱንካኒዴስ።
JDG 20:20 ሄሳፌ ጉዬ ኢስራኤሌ ኣሳይ ቢኒያሜ ኣሳራ ኦሌታናስ ቢዴስ፤ ጊቢኣ ካታማ ማታን ኢስታራ ኦሌታናስ ያቻን ያቻን ኤቂዴስ።
JDG 20:21 ቢኒያሜ ቆሞቲ ጊቢኣ ካታማፔ ኬዚዲ ሄ ጋላስ ኢስራኤሌ ኣሳፔ 22,000 ኦላንቻታ ዎꬊዳ።
JDG 20:22 ኢስራኤሌ ኣሳይ ቢዲ ሳኣይ ቃማና ጋካናስ ጎዳ ሲንꬃን ዬኪዴስ፤ «ኑ ኢሻታራ፥ ቢኒያሜ ኣሳታራ ኦሌታናስ ናምኣንꬆ ፑዴ ቦኒ?» ጊዲ ጎዳ ኦይቺዴስ። ጎዳይካ፥ «ኤ! ኢስታራ ኦሌታናስ ፑዴ ቢቴ» ጊ ዛሪዴስ። ኢስራኤሌ ኣሳይ ኢሶይ ኢሳ ሚንꬄꬂዲ ኮይሮ ጋላስ ኢስቲ ኦላስ ያቻን ያቻን ኤቆሶዛ ሲሚ ቢ ኤቂዳ።
JDG 20:24 ናምኣንꬆ ጋላስ ኢስራኤሌ ኣሳይ ቢኒያሜ ቆሞታራ ኦሌታናስ ሺቂዴስ።
JDG 20:25 ናምኣንꬆ ጋላሲካ ቢኒያሜ ኣሳይ ጊቢኣ ካታማፔ ኬዚዲ ኢስራኤሌ ኣሳፔ ጊꬃ ማሻ ጊጺዳ 18,000 ኣስ ዎꬊዳ፤
JDG 20:26 ሄሳፌ ጉዬ ኢስራኤሌቲ ኡባይ ቤቴሌ ቢዲ ዬኪዳ፤ ሄን ጾሚዲ ሳኣይ ቃማና ጋካናስ፥ ጎዳ ሲንꬃን ኡቲዳ፤ ጎዳ ሲንꬃን ጹጌቲዛ ያርሾኔ ኢሲፌቴꬃ ያርሾ ሺሺዳ።
JDG 20:27 ሄ ዎዴ ጾሳ ጫቆ ታቦታይ ቤቴሌ ካታማን ዴስ፤ ኢስቲካ ሄን ጾሳ ሼኔ ኤራናስ ጾሳ ኦይቺዳ፤
JDG 20:28 ሄ ዎዴ ሄን ኦꬂዛይ ኣሮኔይ ዬሊዳ ኤልኤዜሬ ና ፊኒሃሴ፤ ኢስራኤሌ ኣሳይ ጎዳ፥ «ቢኒያሜ ኣስ ጊዲዳ ኑ ኢሻታራ ኦሌታናስ ቃሴካ ቢዲ ኦሌቲኖ ዎይኮ ኣጋጊኖ?» ጊዲ ኦይቺዴስ። ጎዳይ፥ «ቢዲ ኦሌቲቴ! ታኒ ኢስታ ዎንቶ ኢንቴ ኩሼን ኣꬃ ኢማና» ጊዴስ።
JDG 20:29 ሄሳፌ ጉዬ ኢስራኤሌ ኣሳይ ኣማርዳ ኦላንቻታ ጊቢኣ ካታማ ዩሾን ቆቴቲ ናጋና ማላ ኦꬂዴስ።
JDG 20:30 ሄꬓንꬆ ጋላስ ኢስራኤሌ ኦላንቻቲ ካሴይሳꬆካ ቢኒያሜ ኦላንቻታ ኦላናስ ቢዲ ጊቢኣ ካታማፔ ሲንꬃ ባጋራ ያቻን ያቻን ኤቂዳ።
JDG 20:31 ቢኒያሜ ቆሞቲ ኢስታራ ኦሌታናስ ኬዚዳ፤ ሄ ኦላ ኣሳ ካሊሼ ባ ዲዛ ካታማፔ ሃኮሶ ቢዳ፤ ካሴይሳꬆካ ቤቴሌኔ ጊቢኣ ኤፊዛ ኣሆ ኦጌታኒኔ ዴምባታን ኢስራኤሌ ኣሳፔ 30 ጊዲዛ ኣሳታ ዎꬊዳ።
JDG 20:32 ቢኒያሜ ቆሞቲ፥ «ኑኒ ካሴይሳꬆካ ኢስታ ጾኖ ቦላ ዶስ!» ጊዳ። ጊዶ ኣቲን ኢስራኤሌ ኣሳይ ባ ባጋራ፥ «ኑኒ ጉዬ ባቃቲሼ ኢስቲ ካታማፔ ኬዚ ሃካና ማላ ኣኔ ኦꬆስ» ጊዳ።
JDG 20:33 ሄሳ ጊሻስ ኢስራኤሌ ኣሳይ ኡባይ ካሴ ባ ዲዛሶፔ ጉዬ ባቃቲዲ ባኣሊ-ታማሬ ጌቴቲዛሶን ያቻን ያቻን ኤቂዳ፤ ቆቴቲ ኡቲ ናጊዛ ኢስራኤሌ ኣሳይ ጊቢኣ ዴምባፌ ኬዚዴስ፤
JDG 20:34 ኢስራኤሌ ኡባፌ ዶሬቲዳ 10,000 ኣሳቲ ጊቢኣ ቦላ ኦላ ዴንꬂዳ፤ ኦላይ ኬሂ ዎልቃሚዴስ። ሄ ኡባይ ሃኒዛ ዎዴ ባስ ꬋዮይ ማታቲዳይሳ ቢኒያሜ ቆሞቲ ኣይኮካ ኤሪቤቴና።
JDG 20:35 ኢስራኤሌቲ ቢኒያሜ ቆሞታ ቦላ ጾኖ ዴማና ማላ ጎዳይ ኦꬂዴስ። ሄ ጋላስ ኢስራኤሌ ኣሳይ ቢኒያሜ ቆሞታፔ ጊꬃ ማሻ ጊጺዳይታ 25,100 ኦላንቻታ ዎꬊዳ።
JDG 20:36 ሄሳ ጊሻስ ኢስራኤሌ ኣሳይ ባና ጾኒዳይሳ ቢኒያሜ ኣሳይ ኤሪዴስ። ኢስራኤሌ ኣሳይ ጊቢኣ ካታማ ዩሾን ዛማዲ ኡቲዳ ኦላንቻታን ኣማኔቲዳ ጊሻስ ቢኒያሜ ኣሳን ጾኔቲዳ ሚሳቲዲ ጉዬ ባቃቲዴስ።
JDG 20:37 ዛማዲ ናጊዛ ኦላንቻቲ ጊቢኣ ካታማ ኤሶን ዎጺ ጌሊዲ ካታማ ጊዶን ዴሚዳ ኡባ ዎꬊዳ።
JDG 20:38 ዛማዲዲ ናጊዛ ኢስራኤሌ ኦላንቻቲ ካታማ ጊዶን ማላታ ጊዳና ማላ ጩዋ ሻራꬆ ፑዴ ዴንꬃናስ ካሴ ሃሳዪ ዎꬂዳ።
JDG 20:39 ኦላ ዴምባን ዲዛ ኢስራኤሌ ኣሳይ ባቃቲዛሶፔ ጉዬ ሲሚዲ ኢስታ ኦሊዳ። ቢኒያሜ ኣሳቲ ኢስራኤሌ ኣሳፔ 30 ጊዲዛ ኣሳታ ዎꬊዲ፥ «ካሴይሳꬆ ሃኢካ ኑኒ ኢስታ ጾኒዶስ» ጊዲ ጬቄቲዳ።
JDG 20:40 ጊዶ ኣቲን ማላታ ጩዋይ ሻራ ማላ ካታማ ጊዶን ቱሉ ጊሺን ቢኒያሜ ቆሞቲ ጉዬ ሲሚ ጼሊዳ፤ ካታማያ ሙሌራ ታማን ጹጌቲሺን ታማ ላጮይ ፑዴ ኬዚዛይሳ ቤኢዳ።
JDG 20:41 ሄሳፌ ጉዬ ካሴ ባቃቲዛዳ ሃኒዛ ኢስራኤሌ ኣሳይ ሲሚ ዎꬊዲ ቢኒያሜ ቆሞታ ኦላ ኦይኪዴስ፤ ቢኒያሜ ቆሞቲ ኢስታስ ዉሮ ጋላስ ጊዲዳይሳ ኤሪዲ ኬሂ ዳጋሚዳ።
JDG 20:42 ሄሳ ጊሻስ ኢስቲ ኢስራኤሌ ኣሳ ሲንꬃፌ ባዞ ሲሚዲ ባቃቲዳ፤ ጊዶ ኣቲን ኦላይ ኢስታ ካሊ ጋኪዴስ፤ ካታማታፔ ኬዚዳ ኢስራኤሌ ኦላንቻቲ ጊዶ ኣꬂ ኢስታ ዎꬊ ዉርሲዳ።
JDG 20:43 ኢስራኤሌ ኣሳይ ቢኒያሜ ቆሞታ ጊዶꬂ ኦይኪዲ ጊቢኣ ካታማፔ ኣርሼይ ኬዚዛ ባጋራ ዲዛሶሆ ጋካናስ ዳሮ ዴሬ ዎꬊዳ።
JDG 20:44 ሄሳን ቢኒያሜ ቆሞታፔ 18,000 ሚኖ ኦላንቻቲ ሃይቂዳ፤
JDG 20:45 ኢስታፌ ኣቲዳይቲ ጉዬ ሲሚዲ ባዞ ካንꬂዲ ኤርሞኔ ጌቴቲዛ ዛላኮ ባቃቲዳ፤ ኢስራኤሌቲ ኢስታፌ 5,000 ኣሳታ ኦጌን ዎꬊዳ፤ ኢስታፌ ኣቲዳይታ ጊዲኦሜ ጊዛ ሶሆ ጋካናስ ዬዴꬂዲ ናምኡ ሺ ኣስ ሃራ ጉጂ ዎꬊዳ።
JDG 20:46 ሄ ጋላስ ቢኒያሜ ቢታፌ ጊꬃ ማሻን ኦሌቲዛ 25,000 ኣሳቲ ሃይቂዳ፤ ሄ ኡባቲካ ሚኖ ኦላንቻታ።
JDG 20:47 ጊዶ ኣቲን 600 ኣሳቲ ባዞ ካንꬂዲ ኤርሞኔ ዛላኮ ባቃቲዲ ሄን 4 ኣጊና ታኪዳ።
JDG 20:48 ኢስራኤሌ ኣሳይ ኣቲዳ ቢኒያሜ ኣሳኮ ጉዬ ሲሚዲ፥ ኣቱማሳኔ ማጫሳ፥ ናይታኔ ሜሄ ኡባ ዎꬊዴስ፤ ዴሚዳ ካታማታ ኡባ ታማን ጹጊዴስ።
JDG 21:1 ኢስራኤሌ ኣሳይ ሚጺጳ ጌቴቲዛሶን ሺቂዳ ዎዴ፥ «ኑ ጊዶፌ ኦኒኔ ቢኒያሜ ኣሳስ ባ ማጫ ና ማቾ ኢሞንታ ማላ» ጊዲ ጫቄቲ ኡቲዴስ።
JDG 21:2 ኢስራኤሌቲ ቤቴሌ ካታማ ቢዲ ሄን ሳኣይ ቃማና ጋካናስ ጾሳ ሲንꬃን ኡቲዳ፤ ባንታ ቃላካ ꬎቁ ሂስቲዲ ጫሞ ዬሆ ዬኪዳ።
JDG 21:3 «ኣቤት ጎዳ ኢስራኤሌ ጾሳዉ፥ ሃ ዮኦይ ኣይስ ኢስራኤሌን ሃኒዴ? ሃች ኢስራኤሌ ኣሳ ጊዶፌ ኢሲ ዛሬይ ኣይስ ፓጪዴ?» ጊዳ።
JDG 21:4 ዎንቴꬃ ጋላስ ማላዶ ዎንታራ ኢስቲ ዴንዲዲ፥ ያርሾ ያርሺዛሶ ሄን ጊግሲዲ ጹጌቲዛ ያርሾታኔ ኢሲፌቴꬃ ያርሾታ ሺሺዳ።
JDG 21:5 ሂስቲዲ ኢስራኤሌቲ፥ «ኢስራኤሌ ዛሬ ኡባፌ ጎዳ ሲንꬃን ሺቂዛሶ ዮንታ ኣቲዳ ዛሬይ ኦኔ?» ጊዲ ኦይቺዳ። ኢስቲ ሄሳ ኦይቺዳ ጋሶይካ ሚጺጳ ካታማን ጎዳ ሲንꬃን ሺቃናስ ዮንታ ኣቲዳ ኣሲ ኦኒካ፥ «ኢዚ ሙሌራ ሃይቆ» ጊዲ ካሴ ጫቂዳ ጊሻሳ።
JDG 21:6 ኢስራኤሌ ኣሳይ ባንታ ኢሻታስ፥ ቢኒያሜ ቆሞታስ ቃꬌቲዲ፥ «ሃች ኢስራኤሌፔ ኢሲ ቆሞይ ꬋይዴስ።
JDG 21:7 ኑኒ ኑ ማጫ ናይታ ኢስታስ ኢሞንታ ማላ ጎዳን ጫቂዳ ጊሻስ ሃይቆፔ ኣቲዳ ቢኒያሜ ቆሞቲ ማቾ ዴማና ማላ ኑኒ ኣይ ኦꬃኔ?» ጊዳ።
JDG 21:8 ቃሴካ ኢስታስ፥ «ኢስራኤሌ ቆሞታፔ ሚጺጳ ካታማን ጎዳ ሲንꬅ ዮንታይ ኦኔ?» ጊዲ ኦይቺዳ። ቤኢቴ! ጋላኣዴን ዲዛ ያቡሴ ጌቴቲዛ ካታማፔ ኢሳዴይካ ሺቆ ዮንታይሳ ኤሪቴ።
JDG 21:9 ኢስቲ ኣሳ ቆዲዳ ዎዴ ጋላኣዴን ዲዛ ያቡሴፔ ኢሲ ኣሲካ ቤቲቤና።
JDG 21:10 ሄሳ ጊሻስ ማባራይ 12,000 ሚኖ ኦላንቻታ ጋላኣዴን ዲዛ ያቡሴ ካታማ ኪቲዲ፥ «ቢቴ፤ ቢዲ ያቡሴን ዲዛይታ ኡባ ጊꬃ ማሻን ቡሳኪቴ፤ ማጫሳካ ጉꬃ ናይታካ ኣሾፍቴ።
JDG 21:11 ሂስቲቴ ኣዴኔ ኣዴ ጌሊዳ ማጫሳ ኡባ ዎꬊቴ» ጊዲ ኣዛዚዳ።
JDG 21:12 ያቡሴ ካታማን ዲዛ ኣሳ ኡባ 400 ጌላኦታ ዴሚዳ፤ ኢስቲካ ካናኔ ቢታን፥ ሴሎ ጌቴቲዛ ጉታ ኤኪ ኤሂዳ።
JDG 21:13 ሄሳፌ ጉዬ ኩሜꬃ ማባራይ ኤርሞኔ ዛላ ጌቴቲዛሶን ዲዛ ቢኒያሜ ቆሞታኮ ሲጌታናስ ኪታ ዬዲዳ።
JDG 21:14 ቢኒያሜ ቆሞቲ ሲሚዲ ዪዳ፤ ኢስራኤሌ ኣሳይ ያቡሴ ካታማፔ ዎꬎንታ ኤሂዳ ጌላኦታ ኢስታስ ኢሚዴስ። ጊዶ ኣቲን ጌላኦታ ቆዳይ ጉꬅ ጊዲዳ ጊሻስ ኣቱማ ኣሳ ጋኪቤና።
JDG 21:15 ጎዳይ ኢስራኤሌ ዜሬꬃ ጊዶን ዲዛ ኢሲፌቴꬃይ ዱጻና ማላ ኦꬂዳ ጊሻስ ኣሳይ ቢኒያሜ ኣሳስ ኬሂፔ ቃꬌቲዴስ።
JDG 21:16 ዴሬ ጪማቲ፥ «ቢኒያሜ ቆሞታፔ ማጫሲ ሃይቂ ዉሪዳ ጊሻስ ሃይቆፔ ኣቲዳ ኣቱማ ኣሳስ ኑኒ ማጫስ ዎስቲ ዴማኔ?
JDG 21:17 ኢስራኤሌ ኣሳ ጊዶፌ ኢሲ ቆሞይ ꬎሚ ꬋዮንታ ማላ፥ ቢኒያሜ ቆሞታፔ ኣቲዳይታስ ላቲዛይ ዳናስ ቤሴስ።
JDG 21:18 ጊዲኮኔ ኑኒ ኑ ማጫ ናይታፔ ኢስታስ ኢማናስ ዳንዳዮኮ፤ ኣይስ ጊኮ ኢስራኤሌ ኣሳይ ካሴ፥ ‹ባ ናዮ ቢኒያሜ ቆሞስ ኢሚዛ ኣሲ ቃንጌቲዳዴ ጊዶ› ጊዲ ጫቄቲ ኡቲዴስ» ጊዳ።
JDG 21:19 ሄሳፌ ጉዬ ዴሬ ካሌꬂዛ ጪማቲ፥ «ቤኢቴ፥ ላይꬃን ላይꬃን ሴሎን ጎዳ ቦንቺዛ ባኣሌይ ማቲዴስ» ጊዳ። ሴሎይ ቤቴሌፔ ፑዴሃ ባጋራ፥ ላቦናፔ ዱጌሃ ባጋራ ቤቴሌፔ ሴኬሜ ጊዶራ ኤፊዛ ኦጌፔ ኣርሼ ኬሳ ባጋራ ዴስ።
JDG 21:20 ሄ ዴራ ካሌꬂዛ ጪማቲ ቢኒያሜ ቆሞታ፥ «ቢቴ፤ ቢዲ ዎይኔ ቱራ ጊዶን ቆቴቲ ኡቲቴ!
JDG 21:21 ናጊቴ! ሴሎ ካታማ ማጫ ናይቲ ባኣሌ ጋላስ ካራቤ ኦይኪዲ ዬጺሼኔ ዱሪሼ ዪሺን ኢንቴ ዎይኔ ቱራ ጊዶፌ ኬዚቴ። ኡባይካ ሴሎ ማጫ ናይታፔ ኢንቴስ ዳፊዲ ቢኒያሜ ቢታ ኤኪ ቢቴ።
JDG 21:22 ኢስታ ኣዋቲ ዎይኮ ኢስታ ኢሻቲ ኑኮ ማጋናናስ ዪዛ ዎዴ ኑኒ ኢስታስ፥ ‹ሃኢ ሃያና! ኢስታ ኑስ ኢሚቴ፤ ኣይስ ጊኮ ኑኒ ኢስታ ሁኤን ሁኤን ጋኪዛ ማጫሳ ኦላ ሶሆፔ ዴሚቤኮ፤ ኢንቴ ዶሳን ኢሞንታ ጊሻስ ሞራንቻ ጊዴኬታ› ጋና» ጊዳ።
JDG 21:23 ቢኒያሜ ቆሞቲካ ኢስራኤሌ ጪማቲ ጊዳ ማላ ኦꬂዳ፤ ኡባይካ ሴሎን ዬጺዛ ማጫ ናይታፔ ባንታ ቆዳ ኬና ዳፊ ኤፊዳ። ኢስቲ ባንታ ላታ ቢታ ሲሚዲ ካታማታ ዎꬂ ኬጺዲ ሄን ዴኢዳ።
JDG 21:24 ሄ ዎዴ ኢስራኤሌ ኣሳይ ሄፔ ላሌቲዲ ኡባይካ ባ ቆሞኮ ቆሞኮኔ ባሶ ኣሳኮ ኣሳኮ ቢዴስ።
JDG 21:25 ሄ ዎዴ ኢስራኤሌ ቢታን ካዎይ ባዋ፤ ኣሲ ኡባይ ባስ ሎኦ ሚሳቲ ቤቶይሳ ጮ ኦꬄስ።
RUT 1:1 ኢስራኤሌ ቢታ ዳናቲ ሃሪዛ ዎዴ ሄ ቢታን ኮሻይ ዴንዲዴስ። ሂስቲን ኢሳዴይ ባ ማቾኔ ናምኡ ኣቱማ ናይታ ኤኪዲ ዩሁዳ ዴሬን ዲዛ ቤቴሊሄሜ ካታማፔ ዴንዲዲ ሞኣቤ ቢታ ቢዴስ።
RUT 1:2 ሄ ኣዴዛ ሱንꬂ ኣቢሜሌኬ፤ ማቼይ ሱንꬂ ኑሃሞ፤ ናምኡ ናይታ ሱንꬂ ማሃሎኔኔ ኬሎኔ ጌቴቴስ። ኢስቲ ዩሁዳ ቢታን ቤቴሊሄሜ ካታማን ኤፍራታ ዴሬ ኣስ ጊዲሼ ሞኣቤ ዴሬ ቢዲ ሄን ዴኢዳ።
RUT 1:3 ሄን ዲሺን ኑሃሚ ኣዚና ኣቢሜሌኬይ ሃይቂን ኢዛ ባ ና ናምኣታራ ጻላ ኣታዱስ።
RUT 1:4 ኢዚ ናይቲ ሞኣቤ ቢታ ማጫ ናይታፔ ኦርፋኔ ኡሩቶ ማቾ ኤኪዳ። ኢስቲካ ሄን ታሙ ላይꬃ ኬና ዴኢዳ።
RUT 1:5 ማሃሎኔይኔ ኬሎኔይ ናምኣቲካ ሃይቂዳ። ኑሃማ ኢዚ ኣዚናይኔ ናምኡ ናይቲ ሃይቂን ባርካ ኣታዱስ።
RUT 1:6 ኢዛ ሞኣቤን ዲሺን ጎዳይ ባ ኣሳ ሞኪ ጼሊዲ ኢስታስ ካꬅ ኢሚዳይሳ ሲያዳ ናይታ ማቼታ ናምኣታ ባናራ ኤካዳ ባ ዴሬ ሲማ ባና ኬዛዱስ።
RUT 1:7 ካሴ ባ ዲዛሶ ዬጋዳ ናይታ ማቼታ ናምኣታራ ኢሲፌ ዩሁዳ ቢታ ኤፊዛ ኦጌን ጌሊዲ ቡስ ዶሚዳ።
RUT 1:8 ሄሳፌ ጉዬ ኑሃማ ባ ናይታ ማቼታ ናምኣታስ፥ «ኢንቴ ዉሪካ ኢንቴ ኣዪኮ ኣዪኮ ሲሚቴ፤ ሃይቂዳ ኢንቴ ኣዚናታሲኔ ታስ ኢንቴ ሎኦ ኦꬂዳይሳꬆ ጎዳይካ ኢንቴስ ኢዛꬆ ኦꬆ።
RUT 1:9 ኢንቴ ኢሶይ ኢሶይ ጌላና ኣዚናሶን ጎዳይ ኢንቴስ ዎፓ ኢሞ» ጋዳ ኢስታ ዬራዱስ። ኢስቲ ባ ቃላ ꬎቁ ሂስቲዲ ዬኪዳ፤
RUT 1:10 ቃሴካ ኢስቲካ ኢዚስ፥ «ኑኒ ኔናራ ኔ ኣሳኮ ባና» ጊዳ።
RUT 1:11 ኑሃማ ኢስታስ፥ «ታ ናይቶ ጉዬ ኢንቴሶ ሲሚቴ፤ ኢንቴ ታናራ ኣይስ ቤቲ? ኢንቴስ ኣዚና ጊዳና ኣቱማ ናይታ ታ ቡሮ ዬላና ኢንቴስ ሚሳቲዜ?
RUT 1:12 ታ ናይቶ ታኒ ሃራ ኣዚና ጌሎንታ ማላ ኬሃ ጪማዲስ፤ ታኒ ሃች ኣዚና ጌላዳ ኣቱማ ና ዬሊዛኮካ፥
RUT 1:13 ኢስቲ ዲጪ ጋካናሼ ኢንቴ ኢስታ ናጋኔ? ኢስታ ናጊሼ ኢንቴ ኣዚና ጌሎንታ ጋምኣኔ? ታ ናይቶ፥ ሄሲ ሃኔና፤ ጎዳ ኩሼይ ታ ቦላ ዴንዲዳ ጊሻስ ሃይሲ ሃ ዮኦይ ኢንቴፌ ቦላራ ታስ ጫሞ» ጋዱስ።
RUT 1:14 ሄሳ ጊሻስ ኢስቲ ባ ቃላ ꬎቁ ሂስቲዲ ቃሴካ ዬኪዳ። ሂስቲን ኦርፋይ ባ ቦሎቴዮ ዬራ ኤካዳ ሲማዱስ። ጊዶ ኣቲን ኡሩታ ኢዚፔ ሻኬታና ኮዮንታ ጊሻስ ኢዞ ኢዲማ ኦይካዳ ዬዶንታ ኢጻዱስ።
RUT 1:15 ኑሃማ ኢዚስ ዛራዳ፥ «ቤያ፥ ኔ ኣዚና ኢሻ ማቼያ ባ ኣሳታኮኔ ባ ኤቃ ጾሳታኮ ሲማዱስ። ኔኒካ ኢዚራ ሲማ ባ» ጋዱስ።
RUT 1:16 ጊዶ ኣቲን ኡሩታ ዛራዳ፥ «ታኒ ኔፔ ሻኬታና ማላ ዎይኮ ኔና ኣጋዳ ጉዬ ሲማና ማላ ታና ዋዪሶፓ። ኔኒ ቢዛሶ ኣዋካ ታ ባና፤ ኔኒ ዲዛሶን ኣዋንካ ታ ዳና፤ ኔ ኣሳይ ታ ኣስ ጊዳና፤ ኔ ጾሲ ታ ጾስ ጊዳና።
RUT 1:17 ኔ ሃይቂዛሶን ታ ሃይቃና፤ ሄንካ ታኒ ሞጌታና፤ ሃይቆፔ ኣቲን ሃራይ ታና ኔፔ ሻኪኮ ጎዳይ ታ ቦላ ፒርዶ፤ ሄሳፌካ ቦላራ ሃራ ኢታ ኢዚ ታ ቦላ ኦꬆ» ጋዱስ።
RUT 1:18 ኡሩታ ኢዚራ ባናስ ባ ቆፋ ቃቺዳይሳ ኑሃማ ኤሪዳ ዎዴ ባ ጊዛይሳ ኣጋዳ ጮኡ ጋዱስ።
RUT 1:19 ሄሳፌ ጉዬ ናምኣቲካ ቤቴሊሄሜ ጋካናስ ኢሲፌ ቢዳ። ኢስቲ ቤቴሊሄሜ ጋኪዛ ዎዴ ሄ ካታማ ኣሳይ ዉሪ ኢስታ ሃኖታን ማላሌቲዴስ። ቃሴ ማጫሳቲ፥ «ሃና ኑሃሚ?» ጊዳ።
RUT 1:20 ኢዛ ዛራዳ ኢስታስ፥ «ኡባ ዳንዳይዛ ጾሲ ታ ዱሳ ዳሮ ጫሜꬂዳ ጊሻስ ታና፥ ‹ጫሞዬ!› ጊቴ ኣቲን፥ ‹ኑሃሜ› ጎፒቴ።
RUT 1:21 ታኒ ኩሜꬅ ኬዛዲስ ሺን ጎዳይ ታና ሜላ ኩሼ ዛሪዴስ። ጎዳይ ታና ኡንኤꬂዴስ፤ ኡባ ዳንዳይዛ ጎዳይ ታ ቦላ ኢታ ሚሽ ጋꬂዴስ። ሂስቲን ታና ኣይስ ኑሃሜ ጊ ጼይጌቲ?» ጋዱስ።
RUT 1:22 ሄሳፌ ጉዬ ኑሃማ ባ ና ማቾ ኡሩቲራ ሞኣቤፔ ሲማዱስ። ኢስታ ባንጋይ ማጻ ዶሜቲሺን ቤቴሊሄሜ ጋኪዳ።
RUT 2:1 ኑሃሚስ ኢዚ ኣዚና ኣቢሜሌኬ ባጋራ ዳቦቲዛ ቦኤዜ ጌቴቲዛ ኢሲ ኤሬቲዳ ዱሬ ኣሲ ዴስ።
RUT 2:2 ኢሲ ጋላስ ሞኣቤ ዴሬ ኣስ ኡሩታ ኑሃሞ፥ «ታ ኢዛ ሲንꬃን ፑላቲን ታና ፒጼ ሺሺሳና ኣስ ዴሚኮ ኣኔ ታኒ ኢዛ ካꬂ ማጼቲዛሶ ባይስ» ጋዱስ። ኑሃማካ ዛራዳ ኢዚስ፥ «ኤ ታ ናዬ ባ» ጋዱስ።
RUT 2:3 ሂስቲን ኡሩታ ባዳ ካꬅ ማጺዛ ኣሳ ጉዬፔ ፒጼ ሺሾ ዶማዱስ፤ ኢዛ ፒጼዛ ሺሺዛ ጋዴይ ኣቢሜሌኬ ዳቦ ቦኤዜ ጋዴ።
RUT 2:4 ሄ ዎዴካ ቦኤዜይ ቤቴሊሄሜ ካታማፔ ጋኪ ዎꬊዲ ካꬅ ማጺዛ ኣሳ፥ «ጎዳይ ኢንቴስ ዎልቃ ኢሞ» ጊዴስ። ኢስቲካ ዛሪዲ፥ «ጎዳይ ኣንጆ» ጊዳ።
RUT 2:5 ሂስቲን ቦኤዜይ ካꬅ ማጺዛይታስ ካቦዛ፥ «ሃና ናቴꬃ ናያ ኦናሪ?» ጊ ኦይቺዴስ።
RUT 2:6 ካቦዚ ዛሪዲ፥ «ሃና ኑሃሚራ ዪዳ ሞኣቤ ዴሬ ማጫ ና።
RUT 2:7 ኢዛ ታና፥ ‹ካꬅ ማጺዛይታ ጌዶ ካላዳ ሚርቄ ጊዶፌ ዎꬊዳ ፒጼ ሺሾ?› ጋዳ ኦይቻዱስ። ሂስታዳ ጉꬃ ዎዴ ኩዋታና ሼምፖሪፔ ኣቲን ማላዶፔ ዶማዳ ሃኢ ጋካናስ ፒጻሼ ጋምኣዱስ» ጊዴስ።
RUT 2:8 ሂስቲን ቦኤዜይ ኡሩቶ፥ «ታ ናዬ ሲያ፤ ፒጼ ሺሻናስ ሃራ ኣሳ ጋዴ ቦፓ፤ ቃሴ ሃይሳፌ ኣዋካ ቃጾፋ፤ ታስ ኦꬂዛ ማጫ ናይታራ ሃይሳን ፔኣ።
RUT 2:9 ኣቱማ ኣሳቲ ማጺዛሶ ጼላዳ ማጫ ናይታ ካላ፤ ኣዴቲ ኔና ቦቾንታ ማላ ታኒ ኢስታስ ዮታዲስ፤ ኔና ሳሚዛ ጊዲኮ ኣዴቲ ኤሂ ዎꬂዳ ሃꬃፌ ዱቃ ዱቃ ኡያ» ጊዴስ።
RUT 2:10 ኡሩታ ባ ሁኤ ቢታ ጋꬃ ዚጋዳ፥ «ታኒ ኣሳ ዴሬ ኣስ ጊዲኪና? ኔ ታስ ሚሼታና ማላ ታ ዋና ኔ ሲንꬃን ሳባ ዴማዲና?» ጋዱስ።
RUT 2:11 ቦኤዜይ ዛሪዲ፥ «ኔ ኣዚናይ ሃይቆሶፔ ኔኒ ኔ ቦሎቴይስ ኦꬂዳ ሚሽ ኡባ ታ ሲያዲስ። ቃሴ ኔኒ ኔ ኣዮ፥ ኔ ኣዋኔ ኔ ዬሌቲዳ ቢታ ኣጋዳ ሃይሳፌ ካሴ ኔ ኤሮንታ ዴራራ ዳናስ ዪዳይሲ ታስ ዮቴቲዴስ።
RUT 2:12 ኔኒ ኦꬂዳይሳ ኩሼ ጎዳይ ኔስ ዛሮ። ኔኒ ኢዛ ቄፌ ጋርሳን ኣታናስ ዪዳ ጎዳ ኢስራኤሌ ጾሳይ ኔስ ዳኮ ኢሞ» ጊዴስ።
RUT 2:13 ኡሩታ፥ «ታ ጎዶ፥ ታ ፑላቴꬂ ኔ ሲንꬃን ጉጄቲ ጉጄቲ ቢዴስ፤ ታኒ ኔ ኦሳንቻታፔ ኢሲኔይ ማላ ጊዲኬ ሺን ኔ ታስ ሎኦ ሃሳያዳ ታና ኬሃ ሚንꬄꬃዳሳ» ጋዱስ።
RUT 2:14 ቁማ ሚሺን ቦኤዜይ ኢዞ፥ «ሃ ሺቃ፤ ኡኬꬃ ኤካዳ ኡስታራ ማ» ጊዴስ፤ ሂስቲን ኢዛ ካꬅ ማጺዛይታራ ሺቃ ኡታዱስ፤ ሂስቲዲ ኢዚስ ቲያ ሃላሃስ ኢሚዴስ፤ ኢዛ ካላናሼ ጋካናስ ማዱስ፤ ቁማዚካ ፓላሂዴስ።
RUT 2:15 ቃሴካ ኢዛ ፒጼዛ ሺሻናስ ዴንዲዛ ዎዴ ቦኤዜይ ባ ኦሳንቻታ፥ «ሚርቄዛ ጋርሳፌካ ኢዛ ቆሪኮ ኢዞ ዬላቾፍቴ።
RUT 2:16 ሚርቄዛፔካ ሾዲዲ ኢዚስ ዬጊኮ ኢዛ ቆሩ፤ ኢዞ ሃንቆፍቴ» ጊዴስ።
RUT 2:17 ሄን ኡሩታ ኦማርስ ጋካናስ ፒጼዛ ዛምኢን ታሙ ኪሎ ጊዳናዚ ኬዚዴስ።
RUT 2:18 ኢዛ ሄ ካꬃ ባኣ ኤካዳ ካታማ ሲማዱስ፤ ኣይ ጊና ካꬅ ሺሺዳኮ ኢዚ ቦሎቴያ ቤኣዱስ፤ ቃሴካ ኡሩታ ካሴ ሚሺን ቲርፒ ኣቲዳይሳ ኢዚስ ኬሳ ኢማዱስ።
RUT 2:19 ሂስቲን ኢዚ ቦሎቴያ ኢዞ፥ «ሃች ኣዋን ፒጻ ፔኣዲ? ኣዋን ኦꬃ ፔኣዲ? ኔስ ሃይሳ ኪያ ኦꬂዳይሲ ኣንጄቶ» ጋዱስ። ሂስቲን ኡሩታ ኦናስ ኦꬃ ፔኢዳኮ ባ ቦሎቴይስ፥ «ታኒ ሃች ፒጻሼ ፔኢዳ ጋዴ ጎዳይ ቦኤዜ» ጋ ዮታዱስ።
RUT 2:20 ኑሃማ ባ ናዛ ማቼይስ ባ ሎኤቴꬃ፥ «ሃይቂዳይታ ቦላኔ ፓጻ ዲዛይታ ቦላ ሎኦ ኦሶ ኣጎንታ ጎዳይ ኢዛ ኣንጆ» ጋዱስ። ካሌꬃዳካ፥ «ሄ ኣዴዚ ኑስ ኣሾ ዳቦ፤ ኑና ላቲ ኣይሳናስ ቤሲዛ ኣሳፔ ኢሶይ ኢዛ» ጋዱስ።
RUT 2:21 ቃሴካ ሞኣቤ ዴሬ ኣስ ኡሩታ፥ «ኢዚ ታና፥ ‹ታ ካꬃ ማጺ ዉርሳናሼ ጋካናስ ታ ኦሳንቻታፔ ሻኬቶንታ ፒጻ› ጊዴስ» ጋዱስ።
RUT 2:22 ኑሃማ ባ ናዛ ማቾ ኡሩቶ፥ «ታ ናዬ፥ ሄሲ ኔስ ሎኦ፤ ማጫ ኦሳንቻ ኢዛይታራ ቡሲ ኔስ ሎኦ፤ ጋሶይካ ሃራ ኣሳ ጋዴ ኔ ቢኮ ኣዴቲ ኔና ቦቻና» ጋዱስ።
RUT 2:23 ሄሳ ጊሻስ ኡሩታ ቦኤዜ ማጫ ኦሳንቻታኮ ሺቃዳ ባንጋይኔ ጊስቴይ ማጼቲ ዉራና ጋካናስ ፒጻሼ ጋምኣዱስ። ቃሴ ባ ቦሎቴይራ ኢሲፌ ዴኣዱስ።
RUT 3:1 ኢሲ ጋላስ ኑሃማ ባ ናዛ ማቺዮ ኡሩቶ፥ «ታ ናዬ ኔ ሎኦ ዱስ ዳና ማላ ታ ኔስ ኮያናስ ቤሴኔ?
RUT 3:2 ኔኒ ኢስታራ ጋምኢዳ ማጫ ኦሳንቻቲ ኢዛስ ኪቴቲዛ ቦኤዜይ ኑና ኣሾን ላቲዛ ዳቦ። ሃ ሲያ፥ ኢዚ ሃች ኦማርስ ባሌን ባንጋ ቡካና።
RUT 3:3 ኔኒ ሜጬታዳ፥ ሺቶ ቲዬታዳኔ ሎኦ ማይኦ ማይኣዳ ኢዚ ቡኪዛ ባሌ ባ፤ ጊዶ ኣቲን ባዳ ቦኤዜይ ሚዲኔ ኡዪዲ ሲማና ጋካናስ ኢዛ ኣይፌን ቤቶፋ።
RUT 3:4 ኢዚ ኢቺዛሶ ሎኤꬃ ጼላዳ ኢዛስ ቶሆሶራ ኣፋላ ቃራዳ ኢዛ ቶሆሶን ኢቻ፤ ሄሳፌ ጉዬ ኔ ሃናናይሳ ኢዚ ኔስ ዮታና» ጋዱስ።
RUT 3:5 ሂስቲን ኡሩታ፥ «ኔ ጊዳይሳ ኡባ ታ ኦꬃና» ጋዱስ።
RUT 3:6 ሄሳ ጊሻስ ኡሩታ ዱጌ ባሌዛ ባዳ ኢዚ ቦሎቴያ ኢዚስ ዮቲዳይሳ ኡባ ኦꬃዱስ።
RUT 3:7 ቦኤዜይ ሚ ኡዪዲ ኡፋዬቲዳፔ ጉዬ ካꬃ ዶሬ ኣቻን ኢቺዴስ፤ ሂስቲን ኡሩታ ሎዳራ ኢዛኮ ሺቃዳ ኢዛ ኣፋላ ቶሆሶራ ቃራዳ ቶሆሶን ኢቻዱስ።
RUT 3:8 ጊዲ ጊዶꬅ ጊዲሺን ኢሲ ሚሺ ኣዴዛ ዳጋንꬂን ኢዚ ሺሬቲሺን ኢሲ ማጫሲ ኢዛ ቶሆሶራ ኢቺዳሮ ዴሚዴስ።
RUT 3:9 ኢዚካ ኢዞ፥ «ሃኔ ኔ ኦኔ?» ጊ ኦይቺን ኢዛ፥ «ታኒ ኔ ኦሳንቻዮ ኡሩቶ፤ ታና ላታና ቤሲዛ ማታ ዳቦይ ኔና ጊዲዳ ጊሻስ ኔ ማይኦ ማጫራ ታና ማይዛ» ጋዱስ።
RUT 3:10 ቦኤዜይ ዛሪዲ፥ «ታ ናዬ፥ ጎዳይ ኔና ኣንጆ! ሃይሳፌ ካሴ ኔ ኦꬆይሳፌ ሃኢ ኔ ኦꬆይሲ ኣꬌስ። ዱሬ ጊዲን ዎይኮ ማንቆ ዬላጋ ኣቱማ ኮሹ ባቤካ።
RUT 3:11 ሃኢካ ታ ናዬ ባቦፋ፤ ኔኒ ኦይቺዳይሳ ኡባ ታ ኔስ ኦꬃና፤ ጋሶይካ ታ ዴሬ ኣሳይ ዉሪ ኔኒ ሎኦ ሃኒዛ ማጫስ ጊዲዳይሳ ኤሬስ።
RUT 3:12 ታኒ ላታ ዳቦ ጊዲኮካ ኔና ላታናስ ታፔ ማቲዛ ሃራ ዳቦይ ዴስ።
RUT 3:13 ሃኢ ሃይሳን ኣቃ፤ ቢታኔዚ ኔና ላታና ኮይኮ ሎኦ፤ ኢዚ ኔና ላታና ኮዮንታ ኣጊኮ ታ ኔስ ጎዳን ጫቃይስ ታ ላታ ኤካና፤ ጋዴይ ዎንታና ጋካናስ ሃይሳን ኢቻ» ጊዴስ።
RUT 3:14 ሄሳ ጊሻስ ኡሩታ ጋዴይ ዎንታና ጋካናስ ኢዛ ቶሆሶን ኢቻዱስ፤ ቦኤዜይ፥ «ማጫሲ ካꬃ ባሌ ዪዳይሳ ኦኒካ ኤሮፖ» ጊዳ ጊሻስ ኡሩታ ኣሲ ኣስ ሻኪ ኤሮንታ ሳቴን ኮይሮታ ዴንዳዱስ።
RUT 3:15 ቦኤዜይ ኢዞ፥ «ኔ ቦላራ ማይኢዳ ማይኦዛ ሃ ቤሳ» ጊዴስ። ኢዛ ቤሲን ናምኡ ታሙ ኪሎ ጊዲዛ ባንጋ ማኪ ቆሊዲ ኢዞ ባኢሲዴስ። ኢዛካ ባኣዳ ካታማ ባዱስ።
RUT 3:16 ኡሩታ ባ ቦሎቴይኮ ቢን ኑሃማ ኢዞ፥ «ታ ናዬ ኔ ቢዳ ዮኦይ ዋኒዴ?» ጋ ኦይቺን፥ ኡሩታ ቦኤዜይ ኢዚስ ኦꬂዳይሳ ኡባ ዮታዱስ፤
RUT 3:17 ቃሴካ፥ « ‹ኔ ቦሎቴይኮ ሜላ ኩሼ ቦፓ› ጊዲ ሃይሳ 20 ኪሎ ባንጋ ታስ ኢሚዴስ» ጋዱስ።
RUT 3:18 ኑሃማካ ኢዞ፥ «ታ ናዬ፥ ቡሮ ኣዚ ሃናናኮ ኤሬታና ጋካናስ ናጋሻ፤ ኣዴዚ ዮኦዛ ሃች ዉርሶንታ ሼምፔና» ጋዱስ።
RUT 4:1 ቦኤዜይ ካታማ ፔንጌ ኣቻን ዲዛ ዱቡሻ ኬዚዲ ሄን ኡቲዴስ። ኢዚ ኡቲ ዲሺን ኢዚ ካሴ ኢዛ ጊሻስ ዮቲዳ ላታ ዳቦይ ሄራ ኣꬊዛይሳ ቤኢዲ፥ «ታ ኢሻዉ! ሃ ሲማዳ ሃይሳን ኡታ» ጊን ኣዴዚ ሲሚዲ ኡቲዴስ።
RUT 4:2 ቦኤዜይ ሄ ካታማ ጪማታፔ ታሙ ኣሳታ ጼይጊዲ፥ «ሃይሳን ኡቲቴ» ጊ ኡቲሲዴስ።
RUT 4:3 ሄሳፌ ጉዬ ቦኤዜይ ላታስ ቤሲዛ ማታ ዳቦዛስ፥ «ሞኣቤ ቢታፌ ሲማ ዪዳ ኑሃማ ኑ ኢሻ ኣቢሜሌኬ ጺንጾ ጋዴዛ ባይዛና ጋዉስ።
RUT 4:4 ኔ ሄሳ ኤራና ማላ ታ ቆፒዳ ጊሻስ ሃኢ ሃይሳን ዲዛ ኣሳ ሲንꬃኒኔ ታ ዴራ ጪማታ ሲንꬃን ጋዴዛ ኔ ሻማና ማላ ታ ኔና ቆፍሳና ኮያዲስ፤ ኔ ዎዛና ኮይኮ ዎዛናስ ዳንዳያሳ፤ ኔፔ ካሴታናስ ቤሲዛ ሃራ ኣሲ ዴና፤ ኔ ሄሳ ኦꬆንታ ኣጊኮ ኔፔ ካሊዲ ታስ ቤሲዛ ጊሻስ ታ ኤራና ማላ ታስ ዮታ» ጊዴስ። ኣዴዚካ ኢዛስ፥ «ታ ዎዛና» ጊዴስ።
RUT 4:5 ሄሳፌ ጉዬ ቦኤዜይ፥ «ሂስቲኮ ኔኒ ጋዴዛ ኑሃሚፔኔ ሞኣቤ ኣስ ኡሩቲፔ ኔ ዎዚዳ ጋላስ ሃይቂዳይሳ ሱንꬂዛ ቢታን ጼይጊሳናስ ኢዛ ማቺዮካ ኤካ» ጊዴስ።
RUT 4:6 ሂስቲን ሄ ማታ ዳቦዚካ ዛሪዲ፥ «ሄሳ ማላ ጊዲኮ ታ ጺንጾ ሜቶን ዬጋናስ ኮዮንታ ጊሻስ ታ ዎዛናስ ዳንዳይኬ፤ ኔ ዎዛ» ጊዴስ።
RUT 4:7 ቤኒ ዎዴ ኢስራኤሌ ቢታን ኦኒካ ባ ኣቆ ዎዛና ኮይኮ ዎይኮ ሃራስ ኣꬂ ኢማና ኮይኮ ሄ ዮኦዚ ሚናና ዳንዳይዛይ ናምኣፌ ኢሶይ ባ ጫማ ቶሆፔ ሾዲዲ ሃንኮይሳስ ኢሚኮ ሃኔስ። ኢስራኤሌ ቢታን ሻማ ጊዲን ዎይኮ ባይዞ ጊዲን ዮኦይ ሚኒዛይ ሄሳ ማላና።
RUT 4:8 ሄሳ ጊሻስ ላታስ ቤሲዛ ማታ ዳቦዚ ቦኤዜስ፥ «ኔ ዎዛ» ጊዲ ባ ጫማዛ ቶሆፔ ሾዲ ኢሚዴስ።
RUT 4:9 ቦኤዜይ ጪማታሲኔ ዴሬ ኡባስ፥ «ታኒ ኣቢሜሌኬ ኣቆታኔ ኢዛ ናይታ ኬሎኔኔ ማሃሎኔ ኣቆታ ኡባ ኑሃሚፔ ሻሚዳይሳስ ሃች ኢንቴ ዉሪካ ማርካ።
RUT 4:10 ቃሴ ሃይቂዳይሳ ሱንꬂ ኢስታሶ ኣሳ ሱንꬃ ጊዶፌ ዎይኮ ካታማ ኣሳ ማዝጋባፔ ꬋዮንታ ማላ፥ ኢዛ ሱንꬂ ኢዛ ጺንጾ ጋዴን ጼይጌታና ማላ ሞኣቤ ዴሬ ማጫሲዮ ማሃሎኔ ማቾ ኡሩቶ ታ ኤካዲስ፤ ሄሳስካ ሃች ኢንቴ ማርካ» ጊዴስ።
RUT 4:11 ሄሳፌ ጉዬ ካታማ ፔንጌ ዱቡሻን ዲዛ ጪማቲኔ ኣሳይ ዉሪ፥ «ኤ፥ ሃይሳስ ኑኒ ማርካ! ጎዳይ ሃኖ ኔሶ ዪዳ ማጫሳዮ፥ ኢስራኤሌ ኣሳስ ኢሲፌቴꬃን ኦꬂዳ ኤራሄሊ ማላኔ ሊያ ማላ ኦꬆ። ኔኒካ ኤፍራታን ዱሬ ኣስ ጊዳ፤ ኔ ሱንꬂ ቤቴሊሄሜን ኤሬቶ።
RUT 4:12 ጎዳይ ኔ ኬꬃ ሃ ሎኦ ዬላጋ ማጫሳይፌ ኔስ ኢሚዛ ዜሬꬃን፥ ቲኢማራ ዩሁዳስ ዬሊዳ ፓሬሴ ኬꬃ ኣሳ ማላ ኦꬆ» ጊዴስ።
RUT 4:13 ሄሳ ጊሻስ ቦኤዜይ ኡሩቶ ማቾ ኤኪዴስ፤ ጎዳይ ኢዚስ ዬሎ ኢሚን ኣቱማ ና ዬላዱስ።
RUT 4:14 ማጫሳቲካ ኑሃሞ፥ «ሃች ኔና ላታናስ ማታ ዳቦ ꬋይሶንታ ጎዳይ ጋላቴቶ!
RUT 4:15 ናዚ ኔ ሱንꬃ ኦራጺሳና! ኔ ጪሚሺንካ ኢዚ ኔና ሄማና፤ ጋሶይካ ኔና ሲቂዛራ ላፑን ኣቱማ ናፔካ ኣꬊዛራ ኔ ናዛ ማቼያ ኢዛ ዬላዱስ» ጊዳ።
RUT 4:16 ሄሳፌ ጉዬ ኑሃማ ቄሪ ናዛ ኤካ ኢዲማዱስ፤ ሂስታዳ ኢዛ ሎኣꬃ ዲቻዱስ።
RUT 4:17 ኢዚ ጉታን ዲዛ ማጫሳቲ፥ «ኑሃሚስ ኣቱማ ናይ ዬሌቲዴስ» ጊዳ፤ ኢዛ ሱንꬃካ ኢዮቤዴ ጊዳ። ኢዚ ዳዊቴ ዬሊዳ ኢሴዬ ኣዋ።
RUT 4:18 ፓሬሴ ሶ ኣሳ ዬሌታይ ሃይሳፌ ካሊ ዲዛይሳ፤ ፓሬሴይ ሄጺሮሜ ዬሊዴስ፤
RUT 4:19 ሄጺሮሜይ ኣራሜ ዬሊዴስ፤ ኣራሜይ ኣሚናዳቤ ዬሊዴስ፤
RUT 4:20 ኣሚናዳቤይ ኔኣሶኔ ዬሊዴስ፤ ኔኣሶኔይ ሳልሞኔ ዬሊዴስ፤
RUT 4:21 ሳልሞኔይ ቦኤዜ ዬሊዴስ፤ ቦኤዜይ ኢዮቤዴ ዬሊዴስ፤
RUT 4:22 ኢዮቤዴይ ኢሴዬ ዬሊዴስ፤ ኢሴዬይ ዳዊቴ ዬሊዴስ።
1SA 1:1 ኤፍሬሜ ዴሬን ኤራማቴ-ዙፊሜ ጌቴቲዛ ሻራ ሜንꬆን ዲዛ ሂልቃና ጌቴቲዛዴይ ዴስ፤ ኢዚካ ኤፍሬሜ ዴሬ ኣሳ፤ ኢዚ ዪሮሃሜ ና፥ ኤሊሁ ና፥ ቶሁ ና፥ ዙፌ ና።
1SA 1:2 ኢዛስ ሃናኔ ፊናና ጌቴቲዛ ናምኡ ማቼቲ ዴቴስ፤ ፊናናስ ናይቲ ዴቴስ፤ ሃናስ ጊዲኮ ኣይኮ ናይካ ዴና።
1SA 1:3 ሂልቃናይ ኡባ ዳንዳይዛ ጎዳ ጎይናናሲኔ ኢዛስ ያርሾ ሺሻናስ ላይꬃን ላይꬃን ባ ዲዛ ካታማፔ ፑዴ ሴሎ ኬዜስ፤ ሄን ኤሌ ና ናምኣቲ ኣፊኔይኔ ፊኒሃሲ ጎዳ ቄሴታ።
1SA 1:4 ሂልቃናይ ሴሎ ቢዲ ያርሾ ያርሺዛ ዎዴይ ጋኪዳ ዎዴ ኡባን ባ ማቾ ፊናናስ፥ ኢዚ ኣቱማ ናይታሲኔ ማጫ ናይታስ ኡባስ ኣሾዛፔ ኢስታ ጋኪዛ ጊሻ ኢስታስ ኢሜስ።
1SA 1:5 ጊዶ ኣቲን ኢዚ ሃና ሲቂዛ ጊሻስ ኣሾዛፔ ኢዚስ ናምኡ ኩሼ ኢሜስ፤ ጊዲኮካ ጎዳይ ኢዞ ማይኒሲ ዎꬂዴስ።
1SA 1:6 ጎዳይ ኢዞ ማይኒሲ ዎꬂዳ ጊሻስ ኢዚ ዳዉꬃያ ኢዞ ሃንቄꬃዉሲኔ ዪሎቻዉስ።
1SA 1:7 ሄሲካ ላይꬃን ላይꬃን ፓጬይ ባይንዳ ሃኔስ፤ ሃናይ ጎዳ ኬꬅ ዪዛ ዎዴ ኡባን ኢዛ ዬካናሼኔ ካꬃ ሙሲ ኢዞ ጾናናሼ ጋካናስ ዳዉꬃያ ኢዞ ዪሎቻዉስ።
1SA 1:8 ሄሳ ጌዶን ኢዚ ኣዚና ሂልቃናይ ኢዞ፥ «ሃኔ! ኣይስ ዬካይ? ኣይስ ካꬅ ሚኪ? ኔ ዎዚናይ ኣይስ ጬጪዜ? ታኒ ኔስ ታሙ ኣቱማ ናይታፔ ኣꬊኪና?» ጊሼ ታኪዴስ።
1SA 1:9 ኢሲ ጋላስ ኢስቲ ሴሎን ዲሼ ሚዲኔ ኡዪዳፔ ጉዬ ሃናይ ዴንዳ ኤቃዱስ። ሄ ዎዴ ቄሴ ኤሌይ ጾሳ ኬꬃ ፔንጌን ቆሲላꬃ ኣቻን ኦይዴ ቦላ ኡቴꬃን ዴስ።
1SA 1:10 ሃናይ ኢዚ ዎዚናይ ሜቂዳ ጊሻስ ሂቂማ ዬካሼ ጎዳ ዎሳዱስ።
1SA 1:11 ኢዛካ፥ «ኡባፌ ዎልቃማ ጎዳዉ ታና ኔ ኣይሌይ ካዉሻቴꬃ ኔ ሃ ጼላዳ ታና ኔ ቆፒኮኔ ታና ኔ ኣይሌዮ ባሎንታ ኔ ታስ ኣቱማ ና ኢሚኮ ኢዚ ባ ዴኦ ላይꬅ ኡባን ኔስ ጊዳና ማላ ታኒ ኢዛ ጎዳስ ኢማና፤ ማጋላይካ ኢዛ ሁኤ ቢናና ቦቼና» ጋዉስ።
1SA 1:12 ሃናይ ጎዳ ኣጎንታ ዎሳሼ ታኪን ኤሌይ ኢዚ ዶና ጼሊዴስ።
1SA 1:13 ሃናይ ኣይኮካ ቃላ ሲሶንታ ዎዚናን ዎሲዛ ጊሻስ ኢዚስ ሜቴርሻይ ጻላ ቃጼስ። ሄሳ ጊሻስ ኤሌይ ኢዞ ማꬆቲዳ ኣሳ ማላ ቆዲዴስ።
1SA 1:14 ኢዚካ ኢዞ፥ «ሃኔ ኔ ኣይዴ ጋካናስ ሃይሳꬆ ማꬆታኔ? ኔኒ ሄሳ ዎይኔ ኡሻ ኔፔ ዲጋ!» ጊዴስ።
1SA 1:15 ሃናይካ ኢዛስ፥ «ታ ጎዳዉ ታ ማꬆታቤኬ፤ ታኒ ኬሂፔ ዎዚናይ ሜቂዳ ማጫሳ፤ ሄሳ ጊሻስ ታኒ ታ ዎዚና ጎዳ ሲንꬃን ሚጫይሲፌ ኣቲን ዎይኔ ኡሹ ጊዲን ዎይኮ ሃራ ማꬆሲዛ ኡሹ ታ ኡያቤኬ።
1SA 1:16 ታኒ ሃይሳ ኬና ኣዱሳ ዎሳ ዎሲዳይ ዴጾ ሜቶይኔ ጬጬይ ታና ጋኪዳይሳፌ ዴንዲዳይሳን ጊዲዳ ጊሻስ ታና ኔ ኦሳንቻዮ ኢሲ ጎኣይ ባይንዳ ሹፉሮ ማጫሳ ማላ ቆዶፓ» ጋዱስ።
1SA 1:17 ኤሌይካ ኢዞ፥ «ሳሮን ባ፥ ኢስራኤሌ ጾሲ ኔ ዎሶይሳ ኔስ ኢሞ» ጊዴስ።
1SA 1:18 ኢዛካ ኢዛስ፥ «ኔ ኣይሌያ ኔ ሲንꬃን ቴማ ዴሙ!» ጋዱስ። ኢዛ ዴንዳዳ ባ ኦጌ ባዱስ፤ ካꬂካ ማዱስ፤ ሄሳፌ ጉዬ ኢዚ ቦላ ጬጬይ ቤቲቤና።
1SA 1:19 ዎንቴꬃ ጋላስ ሂልቃናይኔ ኢዛሶ ኣሳይ ማላዶ ዎንታራ ዴንዲዲ ጎዳ ጎይኒዳፔ ጉዬ ባንታሶ ጌዴ ኤራማ ቢዳ፤ ሂልቃናይ ባ ማቾ ሃናራ ኣቂዴስ፤ ጎዳይካ ኢዞ ቆፒዴስ።
1SA 1:20 ሂስቲን ሃናይ ቃንꬃታዱስ፤ ኢዚስ ዎዴይ ዉሪን ኣቱማ ና ዬላዱስ፤ ናዛ ሱንꬃካ፥ «ጎዳፔ ዎሳዳ ዴማዲስ ጋሼ ሳሜላ» ጋ ሱንꬃዱስ።
1SA 1:21 ሂልቃናይ ጎዳስ ላይꬃን ላይꬃን ሺሺዛ ያርሾዛ ያርሻናሲኔ ባ ኣዲኔቲዳ ኣዲና ጋꬃናስ ባሶ ኣሳ ኡባ ኤኪዲ ሴሎ ኬዚዴስ።
1SA 1:22 ጊዶ ኣቲን ሃናይ ኢስታራ ባቤኩ፤ ኢዛ ባ ኣዚናስ፥ «ዪꬋዚ ꬋንꬅ ዱꬂዳፔ ጉዬ ታኒ ኤፋዳ ጎዳ ሲንꬅ ሺሻና፤ ኢዚካ ባ ዴኦ ላይꬅ ኡባን ሄን ዴኣና» ጋ ዮታዱስ።
1SA 1:23 ኢዚ ኣዚና ሂልቃናይካ ኢዚስ፥ «ኔስ ሎኦ ሚሳቲ ቤቲዳይሳ ኦꬃ፤ ኔ ꬋንꬂ ዱꬃናሼ ጋካናስ ሃይሳን ታካ፤ ጾሲ ኔስ ኢሚዳ ሂዶታ ቃላ ጻላ ፖሎ» ጊዴስ፤ ሄሳ ጊሻስ ሃናይ ዪꬋዛ ꬋንꬅ ዱꬃናሼ ጋካናስ ባሶን ኡታዱስ።
1SA 1:24 ናዚ ꬋንꬅ ዱꬂዳፔ ጉዬ ኢዛራ ሄꬑ ላይꬃ ዎፋኖ፥ ታሙ ኪሎ ꬊሌኔ ኢሲ ሉካሞ ኩሜꬅ ዎይኔ ኡሹ ኤካዳ ጌዴ ሴሎን ዲዛ ጾሳ ኬꬅ ኤፋዱስ፤ ናዚካ ቡሮ ዪꬋ።
1SA 1:25 ኮርማዛ ሹኪዳፔ ጉዬ ዪꬋዛ ኤኪዲ ኤሌኮ ሺሺዳ።
1SA 1:26 ሃናይካ ኤሌ፥ «ታ ጎዳዉ፥ ሼምፖ ጋምኣ፤ ሃይሳን ኔ ሲንꬃን ኤቃዳ ጎዳ ዎሲዳ ማጫሳያ ታናኮ!
1SA 1:27 ሄ ዎዴ ሃይሳ ሃ ናዛ ኢማና ማላ ዎሳዲስ፤ ጎዳይካ ታ ዎሲዳይሳ ታስ ኢሚዴስ።
1SA 1:28 ሄሳ ጊሻስ ታኒካ ሃኢ ዛራዳ ጎዳስ ኢዛ ኢማይስ፤ ኢዚ ባ ዴኦ ላይꬅ ኡባን ጎዳስ ኢሜቲዳይሳ ጊዳና» ጋዱስ፤ ሄሳፌ ጉዬ ሄን ጎዳስ ጎይኒዳ።
1SA 2:1 ሃናይ፥ «ታ ዎዚናይ ጎዳን ኡፋዬቲዴስ፤ ታ ካጬይ ጾሳን ꬎቁ ꬎቁ ጊዴስ፤ ኔኒ ታና ኣሺዳ ኣሾን ታኒ ኡፋዬቲዳ ጊሻስ ታ ዶናይ ታ ሞርኬታ ቦላ ዶዬቲዴስ።
1SA 2:2 «ጎዳ ማላ ጌሺ ኦኒካ ዴና፤ ኔፔ ኣቲን ሃራይ ዴና፤ ኑ ጾሳ ማላ ዛላይ ዴና።
1SA 2:3 «ሃይሳ ማላ ኦቶሮን ሃሳዮፒቴ፤ ሃይሳ ማላ ጬቄቴꬃ ቃላይ ኢንቴ ዶናፔ ኬዞፖ፤ ጋሶይካ ጎዳይ ኢዚ ኤራ፤ ኦሶ ኡባ ኢዚ ጌዳሬስ።
1SA 2:4 «ዎልቃማታ ቶራይ ሜቄሬቲዴስ፤ ዳቡራንቻቲ ጊዲኮ ዎልቃ ዴሚዳ።
1SA 2:5 ካሴ ካሊዳይቲ ጋፊዲ ሃኢ ካꬃስ ሃሬቲዳ፤ ካሴ ጋፊዳይቲ ሃኢ ካꬅ ካሊዳ፤ ማይኔያ ሃኢ ላፑን ና ዬላዱስ፤ ዳሮ ናይታ ኣዬያ ሃኢ ዬሎ ꬋያዱስ።
1SA 2:6 «ጎዳይ ዎꬌሲኔ ፓꬄስ፤ ዱጌ ዱፎን ጌልꬄሲኔ ኬሴስ።
1SA 2:7 ጎዳይ ማንቄꬄሲኔ ዱሬሴስ፤ ካዉሼሲኔ ጊታሴስ።
1SA 2:8 ኢዚ ማንቆ ጉዱላፌ ዴንꬄስ፤ ኣይኮይካ ባይንዳ ማንቆዛ ꬎቁ ꬎቁ ሂስቴስ፤ ባ ሹሜታራካ ኢሲፌ ኡቲሴስ፤ ቦንቾ ኣራታካ ላቲሴስ። ጋሶይካ ቢታ ዮቻቲ ጎዳሳ፤ ኢዚ ኣላሜ ኢስታ ቦላ ዎꬂዴስ።
1SA 2:9 «ኢዚ ጌሻታ ቶሆ ናጌስ፤ ኢታቲ ጊዲኮ ꬉማን ዬጌታና፤ ኣሲ ባ ዎልቃን ጾኔና።
1SA 2:10 ጎዳራ ኤቄቲዛይቲ ሊቃና፤ ኢዚ ኢስታ ቦላ ሳሎፔ ጉማና፤ ጎዳይ ቢታ ጋጻ ጋካናስ ፒርዳና፤ ኢዚ ካዎዛስ ዎልቃ ኢማና፤ ኢዚ ቲዬቲዳይሳ ካጬ ꬎቁ ꬎቁ ሂስታና» ጋ ዎሳዱስ።
1SA 2:11 ሄሳፌ ጉዬ ሂልቃናይ ባሶ ኤራማ ቢዴስ። ናዚ ሳሜሊ ቄሴ ኤሌ ሲንꬃን ዲሼ ጎዳስ ሃጋዜስ።
1SA 2:12 ኤሌ ናይቲ ሹፉሮታ፤ ጎዳስካ ያዬቴና።
1SA 2:13 ሄ ዎዴ ቄሴቲ ዴራራ ዲዛ ኢሲፌቴꬃን ፖሊዛ ዎጋቲ ዴቴስ፤ ኣይ ኣሲካ ያርሾ ሺሺዛ ዎዴ ኣሾይ ዶይሴቲሺን ቄሴዛ ኦሳንቻይ ሄꬑ ኣቻራ ዲዛ ቃጴ ኤኪዲ ዬስ።
1SA 2:14 ኢዚካ ቃጴዛ ዱጌ ዲስቴዛን ዎይኮ ጻሮዛን፥ ኦቶዛን ዎይኮ ባꬃዛን ዬዴስ፤ ሄሳፌ ጉዬ ቃጴዚ ኤኪ ኬዚዳ ኣይ ኣሾካ ቄሴዚ ባስ ኤኬስ፤ ኢስቲ ሴሎ ዪዛ ኢስራኤሌ ኣሳ ኡባ ሄሳ ማላን ሞኬቴስ።
1SA 2:15 ጊዶ ኣቲን ሃንዳዚ ጹጌታናፔ ሲንꬃን ቄሴዛ ኦሳንቻይ ዪዲ ያርሾዛ ሺሺዛዴ፥ «ቄሴዚ ቃዬፔ ኣቲን ዶይሴቲዳ ኣሾ ኔፔ ኤኮንታ ጊሻስ ቄሴዛስ ጺጻና ኣሾ ታስ ኢማ» ጌስ።
1SA 2:16 ኣዴዚ፥ «ኮይሮ ሃኒዳይ ጹጌቶ፤ ሄሳፌ ጉዬ ኔ ኮይዛይሳ ኤካንዳሳ» ጊኮካ ቄሴዛ ኦሳንቻዚ፥ «ኣካይ! ሃኢ ታስ ኢማ! ኔ ኢሞንታ ኣጊኮ ታ ዎልቃራ ኤካና» ጌስ።
1SA 2:17 ጎዳስ ሺቂዛ ያርሾዛ ሄሳꬆ ሂስቲ ካꬊዛ ጊሻስ ኤሌ ናይታ ናጋራይ ጎዳ ሲንꬃን ኬሂ ዴጾ ጊዲዴስ።
1SA 2:18 ሳሜሊ ቡሮ ዮጋቴꬃን ዲሼ ላይኖፔ ዳዴቲዳ ማይኦ ማይኢዲ ጎዳ ሲንꬃን ኦꬄስ።
1SA 2:19 ኢዛ ኣያ ባ ኣዚናራ ላይꬃን ላይꬃን ሺሺዛ ያርሾ ሺሻናስ ቢዛ ዎዴ ኡባን ኢዛስ ቦላራ ማይኣናስ ቄሪ ማይኦ ዳዲሳ ኤካ ያዉስ።
1SA 2:20 ኤሌይ፥ «ዎሳን ኢዛ ጎዳፔ ዴማዳ ዛራ ጎዳስ ኢሚዳ ሃ ናዛ ቆꬌ ጎዳይ ሃ ማጫሳይፌ ሃራ ዬሎ ኔስ ኢሞ» ጊሼ ሂልቃናኔ ኢዛ ማቼዮ ኣንጄስ፤ ሄሳፌ ኢስቲ ጉዬ ባሶ ሲሚ ቢዳ።
1SA 2:21 ጎዳይ ሃና ኣንጂዴስ፤ ኢዛ ቃንꬃታዳ ሄꬑ ኣቱማ ናይታኔ ናምኡ ማጫ ናይታ ዬላዱስ፤ ዬላጋ ሳሜሊካ ጎዳ ሲንꬃን ዲጪዴስ።
1SA 2:22 ሄ ዎዴ ኤሌይ ኬሂ ጪሚዴስ፤ ኢዛ ናይቲ ኩሜꬃ ኢስራኤሌ ቦላ ኦꬂሼ ዲዛይሳ፥ ጋይቶቴꬃ ዱንካኔዛ ፔንጌን ኦꬂዛ ማጫሳታራ ኢስቲ ላይማቲዳይሳ ሲዪዴስ።
1SA 2:23 ሄሳ ጊሻስ ኢዚ ኢስታስ፥ «ኢንቴ ኦꬂዛ ኢታ ኦሶዛ ኩሜꬃ ዴራፔ ታ ሲያይስ፤ ኣይስ ሃይሳ ማላ ኦꬄቲ?
1SA 2:24 ታ ናይቶ ሊኬ ጊዴኬታ፤ ጎዳ ዴራ ጊዶን ኢንቴ ጊሻስ ላሌቲዳ ዎሬይ ሎኦ ጊዴና።
1SA 2:25 ኢሳዴይ ሃራ ኣስ ቆሂኮ ጎዳይ ኢስታ ጊዶን ፒርዴስ፤ ጊዶ ኣቲን ኣሲ ጎዳ ቆሂኮ ኦኒ ኢዛስ ጋናታኔ?» ጊ ሃንቄቲዴስ። ጊዲኮካ ጎዳይ ኢስታ ꬋይሳና ኮዪዳ ጊሻስ ኢስቲ ባንታ ኣዋ ሴራ ኤኪቤቴና።
1SA 2:26 ዬላጋ ና ሳሜሊ ጌሳኒኔ ቴማን ጎዳ ሲንꬃኒኔ ኣሳ ሲንꬃን ዲጪ ዲጪ ቢዴስ።
1SA 2:27 ሄ ዎዴ ጾሳፌ ኪቴቲዳ ኢሲ ናቤይ ኤሌኮ ዪዲ፥ «ጎዳይ፥ ‹ኔ ኣዋ ሶ ኣሳይ ካሴ ጊብጼን ፓሮኔ ኩሼን ዲዛ ዎዴ ታና ኢዛስ ቆንጪሳቤኪና?
1SA 2:28 ኢዚ ታስ ቄሴ ጊዳና ማላ፥ ታስ ያርሾ ያርሺዛሶዛ ቦላ ኢዚ ኬዛና ማላ፥ ኤጻኔ ጩዋሳና ማላ፥ ታ ሲንꬃንካ ኤፉዴ ማይኣና ማላ ኢስራኤሌ ቆሞታ ኡባ ጋርሳፌ ታ ኔ ኣዋ ዶራዲስ። ኢስራኤሌ ኣሳይ ታማን ጹጊ ሺሺዛ ያርሾ ኡባ ኔ ኣዋ ኬꬃ ኣሳስ ኢማዲስ።
1SA 2:29 ታ ኣቂዛ ኬꬃን ሺቃና ማላ ታ ኣዛዚዳ ያርሾዛኔ ካꬃዛ ኣይስ ካꬊዴቲ? ኔኒኔ ኔ ናይቲ ታ ዴሬ ኢስራኤሌይ ሺሺዳ ያርሾ ኡባፌ ሙሩታ ሙሩታ ዶሪ ሚዲ ኢንቴ ሞላቲዴታ፤ ኔካ ታፔ ኣꬃዳ ኔ ናይታ ኣይስ ቦንቻዲ?› ጌስ።
1SA 2:30 «ሄሳ ጊሻስ ጎዳ ኢስራኤሌ ጾሳይ፥ ‹ኔ ኬꬂኔ ኔ ኣዋ ኬꬃ ኣሳይ ታ ሲንꬃን ሜርናስ ሃጋዛና ማላ ሂዶታ ቃላ ኢማዲስ፤ ሃኢ ጊዲኮ ጎዳይ ሃኒፌ ጉዬ ታ ሃይሳ ኦꬂኬ፤› ታና ቦንቺዛይታ ታካ ቦንቻና፤ ታና ካꬊዛይቲ ሙሌራካ ካꬌታና።
1SA 2:31 ቤኣ ኔ ዜሬꬃ ጊዶን ጪማይ ቤቶንታ ማላ ኔ ዎልቃኔ ኔ ኣዋ ኬꬃ ኣሳ ዎልቃ ታ ሜንꬃና ዎዴይ ያና።
1SA 2:32 ኔኒ ታ ኬꬃን ሜቶ ቤኣና፤ ኢስራኤሌስ ኣይ ሎኦይ ኦሴቲኮካ ኔ ኬꬃን ሙሌካ ጪማይ ቤቴና።
1SA 2:33 ታኒ ታስ ያርሾ ያርሺዛሶዛፔ ዲጎንታ ኔ ዜሬꬃቲ፥ ሼምፖራ ፓጻ ኣታናይቲ ኔ ኣይፌታ ኣፉንꬃን ዶልጁሚሳናስ፥ ኔ ዎዚናካ ጬጬን ኩንꬃናስ ጻላ ኣታና። ጊዶ ኣቲን ሃራ ኔ ዜሬꬃቲ ኡባይ ዬላጋቴꬃን ሙልቄቲ ሃይቃና።
1SA 2:34 «ኔ ናይታ ናምኣታ ኣፊኔ ቦላኔ ፊኒሃሴ ቦላ ጋካናይሲ ኔስ ማላታ ጊዳና፤ ኢስቲ ናምኣይካ ኢሲ ጋላስ ሃይቃና።
1SA 2:35 ታ ዎዚና ማላኔ ታ ቆፋ ማላ ታስ ሃጋዛና ኣማኔቲዳ ቄሴ ታኒ ታስ ዴንꬃና፤ ኢዛ ኬꬃ ታ ሚንꬃ ኤሳና፤ ኢዚካ ታ ቲይዳይሳ ሲንꬃን ሜርናስ ሃጋዛና።
1SA 2:36 ኔ ዜሬꬃታፔ ኣቲዳ ኣይ ኣሲካ ኢሲ ሳቂሌ ቢራሲኔ ኢሲ ባርሳ ካꬃስ ጊዲ ኢዛ ሲንꬃን ጉፋኒዲ ጎይናና፤ ‹ሃቺስ ባꬊዛዝ ታ ዴማና ማላ ዛይ ታና ቄሴቴꬃ ኦሶታፔ ኣዋይሳንካ ጌልꬃርኪ!› ጊዲ ኔና ዎሳና» ጊዴስ።
1SA 3:1 ዬላጋ ና ሳሜሊ ኤሌፔ ጋርሳራ ጊዲዲ ጾሳስ ኦꬂሼ ዴስ፤ ሄ ዎዴ ቢታ ቦላ ጎዳ ቃላይ ኣልኦ፤ ኣጁታይካ ቤቲ ኤሬና።
1SA 3:2 ኢዛ ኣይፌይ ዳቡርዲ ጼላናስ ዳንዳዮንታ ኢጺዴስ፤ ኤሌይ ኢሲ ጋላሳ ኦማርስ ባ ኢቺዛሶን ኢቺ ዴስ።
1SA 3:3 ሳሜሊካ ጾሳ ታቦታይ ዲዛ ጾሳ ኬꬃን ኢቺ ዴስ፤ ሄን ዲዛ ጾምፔዚካ ቶኢቤና።
1SA 3:4 ጎዳይ ሳሜላ ጼይጊዴስ፤ ሳሜሊካ፥ «ዬ፥ ታ ሃን ዳይስ» ጊዴስ።
1SA 3:5 ኤሌኮ ዎጺ ቢዲ፥ «ኢንቴ ጼይጊን ሄኮ ያዲስ» ጊዴስ። ጊዶ ኣቲን ኤሌይ፥ «ታ ኔና ጼይጋቤኬ፤ ሲማ ባዳ ኢቻ» ጊዴስ፤ ኢዚካ ሲሚ ቢዲ ኢቺዴስ።
1SA 3:6 ቃሴካ ጎዳይ፥ «ሳሜላ!» ጊ ጼይጊዴስ፤ ሳሜሊካ ዴንዲ ኤሌኮ ቢዲ፥ «ኢንቴ ጼይጊን ሄኮ ያዲስ» ጊዴስ፤ ኤሌይካ ዛሪዲ፥ «ታ ናዞ! ታ ኔና ጼይጋቤኬ፤ ሲማዳ ኢቻ» ጊዴስ።
1SA 3:7 ሄሳፌ ካሴ ጎዳይ ኢዛስ ሃሳዪ ኤሮንታ ጊሻስ ሳሜሊ ጎዳ ጬንጉርስ ሻኪ ኤሪቤና።
1SA 3:8 ጎዳይ ሳሜላ ሄꬑቶ ጼይጊዴስ፤ ሳሜሊ ኤሌኮ ዴንዲ ቢዲ፥ «ኢንቴ ጼይጊን ሄኮ ያዲስ» ጊዴስ፤ ሄ ዎዴ ናዛ ጼይጊዳይ ጎዳ ጊዲዳይሳ ኤሌይ ኤሪዴስ።
1SA 3:9 ሄሳፌ ጉዬ ኤሌይ ሳሜላ፥ «ባዳ ኢቻ፤ ሂያፔ ኢዚ ኔና ጼይጊዛ ጊዲኮ፥ ‹ኣቤት ታ ጎዳዉ፥ ታ ኔ ኣይሌይ ሲያይስ ዮታ› ጋ» ጊዴስ። ሄሳ ጊሻስ ሳሜሊ ካሴ ባ ኢቺዛሶን ሲሚ ቢዲ ኢቺዴስ።
1SA 3:10 ጎዳይካ ዪዲ ሄን ኤቂዴስ፤ ካሴ ጼይጊዳይሳꬆካ፥ «ሳሜላ! ሳሜላ!» ጊ ጼይጊዴስ። ሳሜሊካ፥ «ጎዳዉ፥ ታ ኔ ኣይሌይ ሲያይስ፥ ዮታ» ጊዴስ።
1SA 3:11 ጎዳይካ ሳሜላ፥ «ቤኣ፥ ሲያናስ ሻጲዛ ሚሽ ታ ኢስራኤሌ ቦላ ኦꬃና።
1SA 3:12 ሄ ጋላስ ኮይሮፔ ዉርሴꬅ ጋካናስ ኤሌ ቦላኔ ኢዛሶ ኣሳ ቦላ ዮቲዳይሳ ኡባ ታ ፖላና።
1SA 3:13 ኤሌይ ኤሪዛ ናጋራ ጋሶን ኢዛሶ ኣሳታ ቦላ ሜርናስ ፒርዴታናይሳ ታ ኢዛስ ዮታ ዎꬃዲስ፤ ኢዛ ናይቲ ፓራ ሚሽ ኦꬂዳ፤ ጊዶ ኣቲን ኢዚ ኢስታ ሄ ኦሶዛ ዲጊቤና።
1SA 3:14 ሄሳ ጊሻስ፥ ‹ኤሌሶ ኣሳ ቆሆይ ያርሾን ዎይኮ ሞጎታን ሙሌካ ዉሬና› ጋዳ ካሴ ኤሌሶ ኣሳ ቦላ ጫቃ ዎꬃዲስ» ጊዴስ።
1SA 3:15 ሳሜሊ ጋዴይ ዎንታናሼ ጋካናስ ኢቺዴስ፤ ሄሳፌ ዴንዲዲ ጎዳ ኬꬃ ፔንጌታ ዶይዴስ፤ ባ ቤኢዳ ኣጁታ ኤሌስ ዮታና ባቢዴስ።
1SA 3:16 ጊዶ ኣቲን ኤሌይ ሳሜላ፥ «ታ ናዞ ሳሜላ!» ጊ ጼይጊዴስ። ሳሜሊካ፥ «ዬ» ጊ ኮዪዴስ።
1SA 3:17 ኤሌይካ፥ «ጎዳይ ኔስ ኣይ ዮቲዴ? ታፔ ቆቶፋ፤ ኢዚ ኔስ ዮቲዳሪፔ ኔ ኢሲኒዮ ቆቲኮ ጎዳይ ኔ ቦላ ቂጻቴ ዬጎ» ጊዴስ።
1SA 3:18 ሄሳ ጊሻስ ሳሜሊ ኢሲ ሚሺካ ቆቶንታ ኡባካ ኢዛስ ዮቲዴስ፤ ኤሌይካ ኢዛስ፥ «ኢዚ ጎዳ ጊዲዳ ጊሻስ ባና ሎኢዳ ማላ ኦꬆ» ጊዴስ።
1SA 3:19 ሳሜሊ ዲጪ ዲጪ ቢዴስ፤ ጎዳይ ኢዛራ ዲዛ ጊሻስ ኢዚ ዮቲዛ ቃላፔ ኢሲናካ ሳኣን ኩንዳ ኤሩኩ።
1SA 3:20 ዳኔፔ ቢዲ ቤርሳቤሄ ጋካናስ ዲዛ ኢስራኤሌ ኣሳይ ኡባይ ሳሜሊ ቱማፔ ጎዳ ናቤ ጊዲዳይሳ ኤሪዴስ።
1SA 3:21 ጎዳይ ሴሎን ጉጂ ጉጂ ቆንጪዴስ፤ ሄን ባ ቃላ ባጋራ ባና ሳሜላስ ቆንጪሲዴስ። ሳሜላ ቃላይ ኢስራኤሌ ኡባ ጋኪዴስ።
1SA 4:1 ሄ ዎዴ ኢስራኤሌ ኣሳይ ፊሊስጼሜ ኣሳ ኦላናስ ኬዚዴስ፤ ኢስራኤሌ ኣሳይ ኣቤንኤዜሬን፥ ፊሊስጼሜ ኣሳይ ኣፌቄን ዱንካኒዴስ።
1SA 4:2 ፊሊስጼሜ ኣሳይ ኢስራኤሌ ኣሳ ኦላናስ ባ ኦላንቻታ ሳልፊሲዴስ፤ ኦላዚ ኬሂ ሚኒን ኢስራኤሌ ኣሳይ ፊሊስጼሜ ኣሳን ጾኔቲዴስ። ሄ ኦላን 4,000 ጊዳና ኣሲ ኢስራኤሌፔ ሃይቂዴስ።
1SA 4:3 ኦላ ኣሳይ ባ ጉታ ጉታ ሲሚዳ ዎዴ ኢስራኤሌ ሃላቃቲ፥ «ጎዳይ ሃች ኑኒ ፊሊስጼሜታን ጾኔታና ማላ ኣዛስ ኦꬂዴ? ኑናራ ኢሲፌ ኬዚዲ ኑ ሞርኬታ ኩሼፔ ኑና ኣሻና ማላ ጎዳ ጫቆ ቃላ ታቦታ ኣኔ ሴሎፔ ኤኪ ዮስ» ጊዳ።
1SA 4:4 ሄሳ ጊሻስ ዴሬዚ ጌዴ ሴሎ ኣስ ኪቲዲ፥ ኪሩቤ ጊዶን ባ ኣራታ ቦላ ኡቲዳ ጎዳ ኡባፌ ዎልቃማ ጾሳ ጫቆ ቃላ ታቦታ ኤሂሲዳ። ኤሌ ና ናምኣቲ ኣፊኔይኔ ፊኒሃሲ ጫቆ ቃላ ታቦታራ ሄን ዴቴስ።
1SA 4:5 ጎዳ ጫቆ ቃላ ታቦታይ ጌዴ ኢስራኤሌ ኦላንቻቲ ዱንካኒ ዲዛሶ ቢ ጌሊዳ ማላ ቢታይ ቃጻናሼ ጋካናስ ኢስራኤሌ ኣሳይ ኡባይ ኡፋይሳን ዎልቃማ ዋሶ ዋሲዴስ።
1SA 4:6 ፊሊስጼሜ ኣሳይ ሄሳ ዎልቃማ ዋሶዛ ሲዪዲ፥ «ሃይሲ ኢስራኤሌ ኣሳይ ዲዛሶን ኑ ሲዪዛ ዎልቃማ ዋሶይ ኣይ ዋሶ?» ጊ ኦይቺዳ፤ ጎዳ ጫቆ ቃላ ታቦታይ ሄ ዪዳይሳ ኤሪዲ፥
1SA 4:7 ፊሊስጼሜ ኣሳይ ባቢዲ፥ «ጾሲ ኢስታ ጉታ ዪዳ ጊሻስ ኑስ ኣዬ ኣና! ሃይሳ ማላይ ኑናራ ጋይቲ ኤሬና።
1SA 4:8 ኑስ ኣዬ ኣና! ሃይታ ዎልቃማ ኤቃ ጾሳታ ኩሼፔ ኑና ኣሻናይ ኦኔ? ሃይቲ ካሴ ጊብጼ ኣሳ ባዞ ቢታን ዱማ ዱማ ቦሻን ሾጪዳ ኤቃ ጾሳታ።
1SA 4:9 ፊሊስጼሜ ኣሳዉ፥ ሚኒቴ! ኢንቴ ኣዴቴꬂ ኤሬቶ! ሂስቶንታ ኣጊኮ ኢንቴ ካሴ ኢስታ ኣይሌሲዳ ማላ ኢብራዌ ኣሳይ ኢንቴና ኣይሌሳና፤ ኢንቴ ኣዴቴꬂ ኤሬቶ፥ ኦሌቲቴ!» ጊዳ።
1SA 4:10 ሂስቲን ፊሊስጼሜ ኣሳይ ኦሌቲዴስ፤ ኢስራኤሌ ኣሳይ ጾኔቲዲ ኢሶይ ኢሶይ ባቃቲ ባ ዱንካኔን ዱንካኔን ጌሊዴስ፤ ዳሮ ኣሳይ ዉሪዴስ፤ ኢስራኤሌፔ 30,000 ኦላንቻቲ ሃይቂዳ።
1SA 4:11 ጾሳ ጫቆ ቃላ ታቦታይካ ዲኤቲዴስ፤ ኤሌ ና ናምኣቲ ኣፊኔይኔ ፊኒሃሲ ሃይቂዳ።
1SA 4:12 ሄ ጋላስ ኢሲ ቢኒያሜ ዴሬ ኣሲ ባ ማይኦ ዳኪዲ ባ ሁኤ ቦላ ጉዱላ ላሊዲ ኦላሶፔ ዎꬃን ሴሎ ዪዴስ።
1SA 4:13 ኣዴዚ ሄ ጋኪዳ ማላ ጾሳ ጫቆ ቃላ ታቦታ ጊሻስ ባ ዎዚናን ጬጪሼ ዲዛ ኤሌይ ኦጌ ኣቻን ባ ኦይዴ ቦላ ኡቲዲ ናጌ ቦላ ዴስ፤ ኣዴዚካ ጌዴ ካታማ ጌሊዲ ሃኒዳ ኡባ ዮቲን ኣሳይ ሲዪዲ ካታማ ዋሶን ቃꬂዴስ።
1SA 4:14 ኤሌይካ ዋሶዛ ሲዪዲ፥ «ሄሲ ኣዛ ዋሶ?» ጊ ኦይቺዴስ፤ ኣዴዚ ኤሶን ዪዲ ኤሌስ ዮቲዴስ።
1SA 4:15 ሄ ዎዴ ኤሌስ ላይꬃይ 98 ጊዲዳ ጊሻስ ኢዛ ኣይፌቲ ጼላናስ ዳንዳይቤቴና።
1SA 4:16 ኣዴዚ ኤሌስ፥ «ታኒ ሃኢ ኦላሶፔ ዩስ ያይስ፤ ሃች ኦላፔ ኬሳ ኤካ ያዲስ» ጊዴስ። ኤሌይካ፥ «ታ ናዞ! ሂስቲን ኣዜ ዋኒዳይ?» ጊ ኦይቺዴስ።
1SA 4:17 ዎሬዛ ኤሂዳ ኣዴዚ፥ «ኢስራኤሌ ኣሳይ ፊሊስጼሜ ኣሳ ሲንꬃፌ ባቃቲዴስ፤ ኦላ ኣሳፔ ዳሮይ ዉሪዴስ፤ ሄሳꬆካ ኔ ና ናምኣቲ ኣፊኔይኔ ፊኒሃሲ ሃይቂዳ፤ ጾሳ ጫቆ ቃላ ታቦታይ ዲኤቲዴስ» ጊዴስ።
1SA 4:18 ኣዴዚ ጾሳ ጫቆ ቃላ ታቦታ ጊሻስ ዮቲዳ ማላ፥ ኤሌይ ጊምቤ ፔንጌ ኣቻን ኡቲዳ ኦይዴዛ ቦላፌ ዞኮ ቦላ ኩንዲዴስ፤ ኢዚ ጬጋ ጊዲዳ ጊሻሲኔ ኢዛስ ጉባይ ዴጾ ጊዲዳ ጊሻስ ቆꬌፔ ሜቂ ሃይቂዴስ፤ ኢዚ ኢስራኤሌ ኣሳ ቦላ 40 ላይꬅ ፒርዲዴስ።
1SA 4:19 ሄ ዎዴ ኢዛ ናዛ ፊኒሃሴ ማቻ ሻራራ ዳዉስ፤ ኢዛ ዬላናስ ዎዴይ ዉሪዴስ፤ ኢዛ ጾሳ ጫቆ ቃላ ታቦታይ ዲኤቲዳይሳ፥ ኢዚ ኣዚና ኣዋይ ሃይቂዳይሳኔ ባ ኣዚና ሃይቆካ ሲዪዳ ማላ ሚጻይ ሚኒን ጉልባታ ዬላዱስ።
1SA 4:20 ኢዛ ሼምፖ ኬዛና ሃኒሺን ኢዚ ኣቻን ዲዛ ማጫሳቲ፥ «ኣይኮይ ባ፤ ኣቱማ ና ዬላዳሳ» ጊዳ፤ ኢዛ ጊዲኮ ዛሮ ኢማቤኩ፤ ኤዝጋ ሲያቤኩ።
1SA 4:21 ጾሳ ጫቆ ቃላ ታቦታይ ዲኤቲዳ ጊሻስ ኢዚ ኣዚናይኔ ኣዚናዛ ኣዋይ ሃይቂዳ ጊሻስ፥ «ቦንቾይ ኢስራኤሌፔ ሻኬቲዴስ» ጋሼ ናዛ፥ «ኢካቦዴ» ጋ ሱንꬃዱስ።
1SA 4:22 ቃሴካ፥ «ጾሳ ጫቆ ቃላ ታቦታይ ዲኤቲዳ ጊሻስ ቦንቾይ ኢስራኤሌፔ ሻኬቲዴስ» ጋዱስ።
1SA 5:1 ፊሊስጼሜ ኣሳይ ጫቆ ቃላ ታቦታ ዲኢዳፔ ጉዬ ኣቤንኤዜሬፔ ኣሽዶዴ ኤፊዳ።
1SA 5:2 ሄፔካ ኤቃ ጾስ ዳጎኔኮ ጌልꬂዲ ሄን ዎꬂዳ።
1SA 5:3 ኣሽዶዴ ዴሬ ኣሳይ ዎንቴꬃ ጋላስ ማላዶራ ዴንዲዲ ጼሊሺን ዳጎኔይ ጾሳ ጫቆ ቃላ ታቦታ ሲንꬃን ጉፋኒ ዲዛይሳ ቤኢዳ፤ ኢስቲ ኢዛ ዴንꬂዲ ካሴ ኢዚ ዲዛሶን ዎꬂዳ።
1SA 5:4 ቃሴ ዎንቴꬃ ጋላስ ማላዶራ ዴንዲዲ ጼሊሺን ዳጎኔይ ጾሳ ጫቆ ቃላ ታቦታ ሲንꬃን ቢታ ቦላ ጉፋኒ ዴስ፤ ኢዛ ሁኤይኔ ኢዛ ኩሼቲ ፔንጌ ቦላ ሜቄሬቲ ዎꬊን ሃንኮ ኣቲዳ ኣሳቴꬃይ ጻላ ዴስ።
1SA 5:5 ሃች ጋካናስ ዳጎኔ ቄሴታ ጊዲን ሃራ ኣሽዶዴን ዲዛ ዳጎኔ ኤቃታ ኬꬃ ጌሊዛ ኡባታ ቶሆይ ሄሜቲ ኣꬋና ማላ ኣቲን ኢዛ ፔንጌ ዬꬎንታ ማላ ኦሴቲዳይ ሄሳ ጋሶና።
1SA 5:6 ጎዳ ኩሼይ ኣሽዶዴ ዴሬ ቦላኔ ኢዛ ጉታታ ቦላ ዴጺዴስ፤ ኢዚካ ኢስታ ቦላ ባሽ ኤሂዴስ፤ ኪጻን ሾጪዴስ።
1SA 5:7 ኣሽዶዴ ኣሳቲ ሄሳ ቤኢዳ ዎዴ፥ «ኢዛ ኩሼይ ኑ ቦላኔ ኑ ጾሳ ዳጎኔ ቦላ ዴጺዳ ጊሻስ ኢስራኤሌ ጾሳ ጫቆ ቃላ ታቦታይ ኑ ኣቻን ጋምኣናስ ቤሴና» ጊዳ።
1SA 5:8 ሄሳፌ ጉዬ ፊሊስጼሜ ዴሬ ኣይሲዛይታ ኡባ ጼይጊሲዲ «ኢስራኤሌ ጾሳ ጫቆ ቃላ ታቦታ ዎስቲኖ?» ጊ ኦይቺዳ። ኢስቲካ ዛሪዲ፥ «ኢስራኤሌ ጾሳ ጫቆ ቃላ ታቦታ ጌቴ ኤፍቴ» ጊዳ። ሄሳ ጊሻስ ኢስራኤሌ ጾሳ ጫቆ ቃላ ታቦታ ኤፊዳ።
1SA 5:9 ጊዶ ኣቲን ኢስቲ ጫቆ ቃላ ታቦታ ሄ ኤፊዳፔ ጉዬ ጾሳ ኩሼይ ካታማይ ቦላ ዴጺዲ ጊታ ሺሮ ኢስታ ቦላ ኤሂዴስ፤ ዪꬋኔ ጪማ ጎንታ ዴራ ኪጻን ሾጪዴስ።
1SA 5:10 ሄሳ ጊሻስ ጾሳ ጫቆ ቃላ ታቦታ ኣቃሮኔ ዬዲዳ፤ ታቦታይ ሄ ጋኪ ጌሊሺን ኣቃሮኔ ዴሬይ፥ «ኢስራኤሌ ጾሳ ጫቆ ቃላ ታቦታ ኢስቲ ኑ ቦላ ኤሂዳይ ኑናኔ ኑ ዴራ ዉርሳናሳ» ጊዲ ዋሲዳ።
1SA 5:11 ጎዳ ኩሼይ ኢስታ ቦላ ኬሂ ዴጺዳ ጊሻስ ሃይቆይ ካታማዮ ኬሂ ዳጋንꬂዴስ፤ ሂስቲን ኣሳይ ፊሊስጼሜ ዴሬ ኣይሲዛይታ ኡባ ጼይጊዲ፥ «ኢስራኤሌ ጾሳ ጫቆ ቃላ ታቦታ ኑ ቢታፌ ኬሲቴ፤ ባ ዴሬ ሲሞ፤ ሂስቶንታ ኣጊኮ ኑናኔ ኑ ዴራ ኢዚ ዉርሳና» ጊዳ።
1SA 5:12 ሃይቆንታ ፓጻ ኣቲዳይታ ኪጻ ሃርጌይ ዋዪሲዛ ጊሻስ ካታማይ ዋሶይ ሳሎ ጋኪዴስ።
1SA 6:1 ጎዳ ጫቆ ቃላ ታቦታይ ፊሊስጼሜን ላፑን ኣጊና ኡቲዴስ።
1SA 6:2 ፊሊስጼሜቲ ቄሴታኔ ማሮታ ጼይጊዲ፥ «ጎዳ ጫቆ ቃላ ታቦታዛ ኑ ዎስቲኖ? ካሴ ኢዚ ዲዛሶ ኑ ዎስቲ ዛራናኮ ኣኔ ኑስ ዮቲቴ» ጊዳ።
1SA 6:3 ኢስቲካ፥ «ኢስራኤሌ ጾሳ ጫቆ ቃላ ታቦታ ኢንቴ ዛሪዛ ጊዲኮ ቆሆስ ሺቂዛ ያርሾራ ኢሲ ቦላ ጋꬂ ዬዲቴ ኣቲን ጮ ሜላ ዬዶፍቴ፤ ሄ ዎዴ ኢንቴ ፓጻና፤ ኢዛ ኩሼይ ኢንቴ ቦላ ኣይስ ዴጺዳኮ ኢንቴ ኤራና» ጊዳ።
1SA 6:4 ፊሊስጼሜቲ፥ «ኑኒ ቆሆ ያርሾስ ዬዳናይሲ ኣይ ጊዳና ቤሲዜ?» ጊ ኦይቺዳ፤ ኢስቲካ ዛሪዲ፥ «ኢንቴና ጊዲን ዎይኮ ኢንቴ ሃላቃታ ሾጪዳይ ኢሲ ቆሞ ባሻ ጊዲዳ ጊሻስ ፊሊስጼሜታ ኣይሲዛይታ ቆዳን ዎርቃፌ ኦሴቲዳ ኢቻሹ ኪጻ ሚስሌታኔ ዎርቃፌ ኦሴቲዳ ኢቻሹ ኤጬሬ ሚስሌታ ዬዲቴ።
1SA 6:5 ኢንቴ ቢታ ꬋይሳናስ ኪቴቲዳ ኤጬሬታኔ ኪጻ ሚስሌታ ኦꬂዲ ኢስራኤሌ ጾሳ ቦንቾስ ኢሚቴ፤ ኢንቴ ሄሳꬆ ኦꬂኮ ኦኔ ኤሪዛይ ኢዚ ባ ኩሼ ኢንቴ ቦላፌ፥ ኢንቴ ጾሳታ ቦላፌኔ ኢንቴ ቢታ ቦላፌ ዴንꬃናዝ ጊዳና።
1SA 6:6 ኢንቴ ጊብጼ ዴሬ ማላኔ ጊብጼ ካዎ ማላ ኢንቴ ዎዚና ኣይስ ሹቻሴቲ? ኢስቲ ኢስራኤሌ ኣሳ ዬዲዳይ ጾሳይ ኢስታ ቦላ ዎልቃማ ሃንቆ ጋꬂን ጊዴኔ?
1SA 6:7 ሄሳ ጊሻስ ኦራꬃ ጋሬኔ ቃምባራይ ኢስታ ሞርጌን ዎꬎንታ ናምኡ ꬋንꬂዛ ሚዛታ ጊግሲቴ፤ ጋሬዛ ቦላ ዋጺቴ፤ ኢስታ ማራታ ጊዲኮ ሶ ዛሪቴ።
1SA 6:8 ጎዳ ጫቆ ቃላ ታቦታ ጋሬዛ ቦላ ጫኒቴ፤ ጫቆ ቃላ ታቦታ ሚሌን ዲዛ ሳጺኔዛ ጊዶን ኢንቴ ቆሆ ያርሾስ ዬዲዛ ዎርቃ ሚስሌታ ዎꬂዲ ኢዚ ባ ኮዪዳ ኦጌራ ባና ማላ ዬዳጊቴ።
1SA 6:9 ጊዶ ኣቲን ኢዚ ኣዋ ባናኮ ጼሊቴ፤ ኢዚ ቤቲ-ሼሚሼ ባጋራ ካሴ ባ ዪዳ ዴሬ ቢዛ ጊዲኮ፥ ሃይሳ ዎልቃማ ሜቶዛ ኑ ቦላ ጋꬂዳይ ጎዳ። ኢዚ ሄ ቦንታ ኣጊኮ ሜቶዚ ኑ ቦላ ዲንጋቴ ጋኪዴስ ኣቲን ኢዛ ኩሼይ ኑና ሾጮንታይሳ ኑ ኤራና» ጊዳ።
1SA 6:10 ኢስቲካ ኢስታስ ዮቴቲዳ ማላ ኦꬂዳ፤ ናምኡ ሚዛታ ኤኪዲ ኢስታ ቦላ ጋሬዛ ዋጺዳ፤ ኢስቲ ማራታ ኬꬃ ጎርዲዳ።
1SA 6:11 ጎዳ ጫቆ ቃላ ታቦታ፥ ዎርቃፌ ኦሴቲዳ ኤጬሬ ሚስሌታኔ ኪጻ ሚስሌታ ጋሬዛ ቦላ ጫኒዳ።
1SA 6:12 ሄሳፌ ጉዬ ሚዛቲ ኦጌ ኦይኪ ቢሼ ሂምባ! ሂምባ! ጊሼ ሲቲ ጊዲ ቤቲ-ሼሚሼ ጋካናስ ቢዳ፤ ፊሊስጼሜ ዴሬ ኣይሲዛይቲካ ቤቲ-ሼሚሼ ዛዋ ጋካናስ ካሊ ቢዳ።
1SA 6:13 ሄ ዎዴ ቤቲ-ሼሚሼ ኣሳይ ዙሌ ጊዶን ባንታ ጊስቴ ጫኪሼ ዴቴስ፤ ኢስቲ ꬎቁ ጊ ጫቆ ቃላ ታቦታ ቤኢዲ ኬሂ ኡፋዬቲዳ።
1SA 6:14 ጋሬዚካ ዪዲ ቤቲ-ሳሚሴን ዲዛ ኢያሶ ጋዴን ዲዛ ኢሲ ጊታ ዛላ ማታን ኤቂዴስ፤ ዴሬዚ ጋሬዛ ሚꬃ ቄሪዲ ናምኡ ሚዛታ ጹጌቲዛ ያርሾ ሂስቲ ጎዳስ ሺሺዴስ።
1SA 6:15 ሌዌቲካ ጎዳ ጫቆ ቃላ ታቦታ ሚሌን ዎርቃ ሚሻቲ ኢዛ ጊዶን ዲዛ ሳጺኔዛራ ጋꬂ ኤፊዲ ዎጋ ዛላዛ ቦላ ዎꬂዳ፤ ሄ ጋላሲካ ቤቲ-ሼሚሼ ዴሬይ ጎዳስ ጹጌቲዛ ያርሾ ሺሺዳ፤ ያርሾታካ ያርሺዳ።
1SA 6:16 ፊሊስጼሜታ ኣይሲዛ ኢቻሻቲ ሄሳ ኡባ ቤይዳፔ ጉዬ ሄ ጋላስ ኣቃሮኔ ሲሚዳ።
1SA 6:17 ፊሊስጼሜቲ ቆሆ ያርሾስ ጊዲ ጎዳስ ዬዲዳ ኪጻ ሚስሌን ኦሴቲዳ ዎርቃቲ ኢሶይ ኣሽዶዴ ጊሻስ፥ ኢሶይ ጋዛ ጊሻስ፥ ኢሶይ ኣስቄሎና ጊሻስ፥ ኢሶይ ጌቴ ጊሻሲኔ ኢሶይ ኣቃሮኔ ጊሻስ ሺቂዳይታ።
1SA 6:18 ዎርቃፌ ኦሴቲዳ ኤጬሬ ሚስሌታ ቆዳይ፥ ኢቻሹ ፊሊስጼሜ ኣይሲዛይቲ ሃሪዛ ካታማታኔ ኢስታፌ ካሬራ ዲዛ ጉታታ ቆዳ ሊኬ። ቤቲ-ሳሚሴ ዴሬ ኣስ ኢያሶ ጋዴን ጎዳ ጫቆ ቃላ ታቦታ ኢስቲ ኢዛ ቦላ ዎꬂዳ ዎጋ ዛላዚ ሃች ጋካናስካ ማርካ።
1SA 6:19 ጊዶ ኣቲን ቤቲ-ሼሚሼ ኣሳይ ጎዳ ጫቆ ቃላ ታቦታ ቃሪ ቤኢዳ ጊሻስ ኢስታ ጊዶፌ ጉꬃታ ሾጪዲ 70 ኣሳታ ዎꬊዴስ፤ ጎዳይ ኢስታ ኬሂ ሾጪዳ ጊሻስ ዴሬይ ዬኪዴስ።
1SA 6:20 ሄሳ ጊሻስ ቤቲ-ሼሚሼ ኣሳይ፥ «ሂስቲን ሃይሳ ጎዳ፥ ጌሻ ጾሳ ሲንꬃን ኤቃናስ ዳንዳይዛይ ኦኔ? ጫቆ ቃላ ታቦታዚ ሃይሳፌ ኬዚዲ ኦናኮ ባኔ?» ጊዳ።
1SA 6:21 ሄሳፌ ጉዬ ቂሪያቴ-ዪኣሪሜ ቢታ ቃስታኔ ኪቲዲ፥ «ፊሊስጼሜ ኣሳቲ ጎዳ ጫቆ ቃላ ታቦታ ኑኮ ዛሪዳ ጊሻስ ሃ ዱጌ ዎꬊ ኤኪዲ ፑዴ ኢንቴ ሄራ ኬዚቴ» ጊዳ።
1SA 7:1 ቂሪያቴ-ዪኣሪሜ ኣሳቲካ ዱጌ ዎꬊዲ ጎዳ ጫቆ ቃላ ታቦታ ኤኪዲ ፑዴ ባንታ ሄራ ኤፊዲ ዙምቡላ ሁኤን ዲዛ ኣቢናዳቤሶን ዎꬂዳ፤ ጎዳ ጫቆ ቃላ ታቦታ ናጋና ማላ ኢዛ ና ኤልኤዜሬ ዱማሲዳ።
1SA 7:2 ጫቆ ቃላ ታቦታይ ኣዱሳ ዎዴ ቂሪያቴ-ዪኣሪሜን ዴኢዴስ፤ ኢሲ ቦላ 20 ላይꬅ ሄን ጋምኢዴስ፤ ኢስራኤሌ ኣሳይ ኡባይ ጬጪዴስ። ጎዳካ ኮዪዴስ።
1SA 7:3 ሳሜሊ ኢስራኤሌ ዴራ፥ «ኢንቴ ኩሜꬃ ዎዚናፔ ጎዳኮ ሲሚዛ ጊዲኮ ሃራ ኤቃ ጾሳታኔ ኣስታሮቴ ኢንቴ ጊዶፌ ዲጊቴ፤ ኢንቴና ጎዳስ ኣꬂ ኢሚቴ፤ ኢዛስ ጻላ ጎይኒቴ፤ ኢዚ ኢንቴና ፊሊስጼሜታ ኩሼፔ ኬሲ ኤካና» ጊዴስ።
1SA 7:4 ሄሳ ጊሻስ ኢስራኤሌ ኣሳይ ባኣሌኔ ኣስታሮቴ ኤቃ ጾሳታ ባንታ ጊዶፌ ዲጊዲ ጎዳስ ጻላ ጎይኒዳ።
1SA 7:5 ሄሳፌ ጉዬ ሳሜሊ፥ «ታ ኢንቴ ጊሻስ ሄን ጎዳ ዎሳና ማላ ኢስራኤሌ ኣሳ ኡባ ሚጺጳን ሺሺቴ» ጊዴስ።
1SA 7:6 ኢስራኤሌ ኣሳይ ሚጺጳን ሺቂዳ ዎዴ ሃꬅ ዱቂዲ ጎዳ ሲንꬃን ጉሲዴስ፤ ሄ ጋላሲካ ጾሚዳ፤ «ኑኒ ጎዳ ቆሂዶስ» ጊዲ ፓጺዳ። ሳሜሊ ሚጺጳን ፒርዲሼ ዴራ ኣይሲዴስ።
1SA 7:7 ኢስራኤሌ ኣሳይ ሚጺጳን ሺቂዳይሳ ፊሊስጼሜ ኣሳይ ሲዪዳ ዎዴ፥ ፊሊስጼሜ ኣይሲዛይቲ ኢስታ ኦላናስ ኬዚዳ፤ ኢስራኤሌቲ ሄሳ ሲዪዳ ዎዴ ፊሊስጼሜታስ ባቢዳ።
1SA 7:8 ሳሜላስ፥ «ጎዳ ኑ ጾሳይ ኑና ፊሊስጼሜታ ኩሼፔ ኣሻና ማላ ኑ ጊሻስ ኢዛኮ ኣጎንታ ዎሳ» ጊዳ።
1SA 7:9 ሳሜሊካ ኢሲ ꬋሚዛ ዶርሳ ላቃ ኤኪዲ ሹኪዴስ፤ ሙሌራካ ጹጌቲዛ ያርሾ ሂስቲ ጎዳስ ሺሺዴስ፤ ኢስራኤሌ ጊሻስ ጎዳኮ ዎሲዴስ፤ ጎዳይካ ኢዛ ዎሳ ሲዪዴስ።
1SA 7:10 ሳሜሊ ጹጌቲዛ ያርሾዛ ያርሺዛ ዎዴ ፊሊስጼሜቲ ኢስራኤሌታ ኦላናስ ኬዚ ዪዳ፤ ጊዶ ኣቲን ሄ ጋላስ ጎዳይ ፊሊስጼሜታ ቦላ ዎልቃማ ዳዳ ጊርስ ዳዳሲዳ ጊሻስ ኬሂ ኤቲ ባቲ ጊዳ፤ ጾኔቲዲካ ኢስራኤሌታ ሲንꬃፌ ባቃቲዳ።
1SA 7:11 ኢስራኤሌ ኣሳይ ሚጺጳፌ ኬዚዲ ፊሊስጼሜ ኣሳ ኦጌ ቦላ ዎꬊሼ ዎꬊሼ ቤቲ-ካሬፔ ዳንኤ ባጋራ ዲዛሶ ጋካናስ ዬዴꬂዳ።
1SA 7:12 ሄሳፌ ጉዬ ሳሜሊ ኢሲ ሹች ኤኪዲ ሚጺጳሲኔ ሼኔስ ጊዶን ኤሲዴስ፤ «ሃች ጋካናስ ጎዳይ ኑና ማዲዴስ» ጊሼ ኣቤንኤዜሬ ጊ ሱንꬂዴስ።
1SA 7:13 ሄሳꬆን ፊሊስጼሜ ኣሳይ ጾኔቲዳ ጊሻስ ናምኣንꬆ ኢስራኤሌ ኣሳ ቦላ ፊሊስጼሜቲ ዎራጂቤቴና፤ ሳሜሊ ሼምፖራ ፓጻ ዲዛ ላይꬅ ኡባን ጎዳ ኩሼይ ፊሊስጼሜታ ቦላ ዴጺዴስ።
1SA 7:14 ፊሊስጼሜቲ ኢስራኤሌታ ኩሼፔ ዎꬂ ኤኪዳ ካታማቲ ኣቃሮኔፔ ቢዲ ጌቴ ጋካናስ ኢስራኤሌታስ ሲሚዳ፤ ኢስቲ ሃሪዛ ቢታቲ ኡባይ ፊሊስጼሜታ ኩሼፔ ላኣ ኬዚዳ፤ ኢስራኤሌታ ጊዶኒኔ ኣሞሬታ ጊዶን ሳሮይ ዴስ።
1SA 7:15 ሳሜሊ ሼምፖራ ፓጻ ዲዛ ላይꬅ ኡባን ኢስራኤሌ ኣሳ ኡባስ ፒርዲዴስ።
1SA 7:16 ላይꬃን ላይꬃን ሳሜሊ ቤቴሌ፥ ጌልጌላኔ ሚጺጳ ቢዲ ኢስራኤሌ ኣሳስ ፒርዴስ።
1SA 7:17 ሄሳፌ ጉዬ ኤራማን ዲዛ ባሶ ሲሚዲ ሄንካ ኢስራኤሌ ኣሳስ ፒርዴስ፤ ሄን ጎዳስ ያርሾ ያርሺዛሶ ኦꬂዴስ።
1SA 8:1 ሳሜሊ ጪሚዳ ዎዴ ባ ናይታ ናምኣታ ኢስራኤሌ ቦላ ፒርዳና ማላ ሹሚዴስ።
1SA 8:2 ኢዛስ ባይራ ናዚ ኢዩኤሌ ጌቴቴስ፤ ካሎዚ ኣቢያ ጌቴቴስ፤ ኢስቲ ቤርሳቤሄን ፒርዴቴስ።
1SA 8:3 ጊዶ ኣቲን ናይቲ ባንታ ኣዋ ኦጌ ካሊቤቴና፤ ቤሶንታ ጎኣ ዴማናስ ጊሼ ኦጌፔ ኬዚዳ፤ ማጋንጾ ኤኪዲ ፒርዳ ጌላሲዳ።
1SA 8:4 ሄሳ ጊሻስ ኢስራኤሌ ጪማቲ ዉሪ ኢሲ ቦላ ሺቂዲ ሳሜሊ ዲዛሶ ኤራማ ዪዳ።
1SA 8:5 ኢስቲካ ሳሜላስ፥ «ኔኒ ጪማዳሳ፤ ኔ ናይቲ ኔ ሎሴ ካሌቴና፤ ሄሳ ጊሻስ ሃራ ካዎቴꬃቲ ኦꬂዛ ማላ ኑና ካሌꬂዛ ካዎ ኑስ ካዎꬃ» ጊዳ።
1SA 8:6 ጊዶ ኣቲን፥ «ኑና ካሌꬂዛ ካዎ ኑስ ካዎꬃ» ጊዳይሲ ሳሜላ ሚሺሲዳ ጊሻስ ሳሜሊ ጎዳ ዎሲዴስ።
1SA 8:7 ጎዳይካ ሳሜላስ ዛሪዲ፥ «ታ ኢስታስ ካዎ ጊዶንታ ማላ ኢስቲ ካꬊዳይ ታና ኣቲን ኔና ጊዶንታ ጊሻስ ዴሬዚ ጊዛይሳ ኡባ ሲያ።
1SA 8:8 ታ ኢስታ ጊብጼ ቢታፌ ኬሶሶፌ ሃኖ ጋካናስ ታና ኣጊዲ ሃራ ኤቃ ጾሳታስ ጎይኒሼ ኦꬂዳ ማላ ኔ ቦላካ ኦꬄቴስ።
1SA 8:9 ኔኒ ጊዲኮ ኢስቲ ኔና ጊዛይሳ ሲያ፤ ኢስታ ቦላ ካዎቲዳይሲ ኢስታ ቦላ ኣይ ኦꬃናኮ ኢስታ ኤሪሳ ቤሲዛ ማላ ኢስታስ ሚንꬃ ዮታ» ጊዴስ።
1SA 8:10 ሳሜሊካ ካዎ ካዎꬃናስ ኦይቺዳ ዴራስ ጎዳ ቃላ ኡባ ዮቲዴስ።
1SA 8:11 ኢስታስ፥ «ኢንቴ ቦላ ካዎታና ካዎዚ ኢንቴ ቦላ ኦꬃናይሲ ኢንቴ ኣቱማ ናይታ ኡባ ኤኪዲ ፓራ-ጋሬ ላጊዛይታኔ ቶጋንቻታ ኬሳና፤ ኢስቲ ፓራ-ጋሬታ ሲንꬃን ዎጻና።
1SA 8:12 ኢስታ ጊዶፌ ኢሶታ ኢሶታ ሻላቃታ፥ ማቶ ሃላቃታ፥ ሃምሳ ሃላቃታ ሂስታና፤ ባጋታ ኢዛ ጋዴ ጎያና ማላኔ ኢዛ ካꬅ ሺሻና ማላ፥ ኦላ ማሳራታኔ ፓራ-ጋሬስ ጊዲዛ ሚሻታ ኦꬂዛይታ ሂስታና።
1SA 8:13 ኢንቴ ማጫ ናይታ ኤኪዲ ሺቶ ኬሲሳና፤ ዎጼ ካꬅሳናኔ ሶሎ ኡኪሳና።
1SA 8:14 ኢንቴ ጋዴፔ፥ ዎይኔ ጋዴፔኔ ዎጋራ ቶኪዛ ጋዴፔ ሎኦሶ ሎኦሶ ኤኪዲ ባ ሹሜታስ ኢማና።
1SA 8:15 ኢዚ ኢንቴ ካꬃፌኔ ኢንቴ ዎይኔ ሚꬃፌ ታማፌ ኢሳ ባ ካዎቴꬃን ዲዛ ባ ኦሳንቻታሲኔ ባ ሹሜታስ ኢማና።
1SA 8:16 ኣቱማኔ ማጫ ኢንቴ ኣይሌታ፥ ኢንቴ ሜሄፔ ዶሬቲዳ ሎኦታ ሎኦታ ባስ ሂስታና።
1SA 8:17 ዶርሳ ዉዴፔኔ ዴይሻ ዉዴፔ ታማፌ ኢሲ ኩሼዛ ባስ ኤካና፤ ኢንቴ ኢንቴ ሁኤራ ኢዛ ኣይሌታ ጊዳና።
1SA 8:18 ሄሲ ኢንቴ ቦላ ጋኪዳ ዎዴ ኢንቴ ዶሲዲ ዶሪዳ ካዎዛፔ ዴንዲዳይሳን ዋሳና። ጊዶ ኣቲን ጎዳይ ሄ ጋላስ ኢንቴ ዋሶ ሲዬና» ጊዴስ።
1SA 8:19 ዴሬይ ጊዲኮ ሳሜሊ ሃሳይዛ ቃላዛ ዉዳን ዬጎንታ ኢጺዲ፥ «ጊዴና፤ ኑስ ካዎይ ካዎታና ማላ ኮዮስ።
1SA 8:20 ሃራ ዴሬታ ማላ ኑኒካ ኑና ካሌꬂዛዴ፥ ኑ ሲንꬃራ ቢዛዴኔ ኑስ ኦሌቲዛ ካዎይ ዲዛ ካዎቴꬅ ጊዳና» ጊዳ።
1SA 8:21 ሳሜሊካ ዴሬዚ ጊዛይሳ ኡባ ሲዪዴስ፤ ሄሳ ዛሪዲ ጎዳስ ዮቲዴስ።
1SA 8:22 ጎዳይካ፥ «ኢስቲ ጊዛይሳ ሲያ፤ ካዎካ ኢስታስ ካዎꬃ» ጊዴስ፤ ሄሳፌ ጉዬ ሳሜሊ ኢስራኤሌ ኣሳ፥ «ኢሶይ ኢሶይ ኢንቴ ዪዳ ካታማ ካታማ ሲሚ ቢቴ» ጊዴስ።
1SA 9:1 ቢኒያሜ ቆሞታፔ ቂሴ ጌቴቲዛ ኢሲ ኤሬቲዳ ኣሲ ዴስ፤ ኢዚካ ኣቢኤሌ ና፥ ጺሮሬ ና፥ ቢኮራቴ ና፥ ቢኒያሜ ዴሬ ኣስ ኣፌቄ ና።
1SA 9:2 ቂሴስ ሳኦሌ ጌቴቲዛ ናቴꬃ ናይ ዴስ፤ ኢስራኤሌ ኣሳ ጋርሳፌ ማላኒኔ ሱሬቴꬃን ኢዛ ጋኪዛይ ዴና፤ ጌሳን ሃራ ኣሳይ ኡባይ ኢዛስ ሃሼፔ ኣꬌና።
1SA 9:3 ሄ ዎዴ ሳኦሌ ኣዋ ቂሴ ሃሬቲ ꬋይዳ፤ ሂስቲን ቂሴይ ባ ና ሳኦሌ፥ «ኣሽካራታ ጊዶፌ ኢሳ ኤካ ባዳ ሃሬታ ኮያ» ጊ ኣዛዚዴስ።
1SA 9:4 ሄሳ ጊሻስ ዙምቡላቲ ዲዛ ኤፍሬሜ ዴሬኒኔ ሻሊሻ ሄራን ዩዪ ኮዪዳ፤ ጊዲኮካ ሃሬታ ዴሚቤቴና። ሄፔ ዴንዲዲ ሻኢሊሜ ዛዋራ ካንꬂ ቢዳ፤ ሃሬቲ ጊዲኮ ሄንካ ዴቴና፤ ቃሴካ ቢኒያሜ ꬋሳራ ካንꬂ ቢዳ፤ ሄንካ ዴማና ዳንዳይቤቴና።
1SA 9:5 ሄፔካ ዴንዲዲ ዙፌ ዛዋ ጋኪዳ ዎዴ ሳኦሊ ባናራ ዲዛ ኣሽካራዛስ፥ «ሃኒ ዎዴ ታ ኣዋይ ሃሬታስ ቆፋ ኣጊዲ ኑ ጊሻስ ጬጬ ዶማና ጊሻስ ሃ ያ ኣኔ ጉዬ ሲሞስ» ጊዴስ።
1SA 9:6 ጊዶ ኣቲን ኣሽካራዚ ኢዛ፥ «ቤኣ፥ ሃኖ ካታማይን ጾሳ ኣሲ ዴስ፤ ኢዚካ ኬሂ ቦንቼቲዳ ኣሳ፤ ኢዚ ዮቲዛ ዮኦ ኡባይ ኢዚ ጊዳ ማላ ፖሌቴስ። ኑ ኣዋራ ባናስ ቤሲዛኮ ኢዚ ኑስ ዮታና ጊሻስ ኣኔ ሄ ኢዛኮ ቦስ» ጊዴስ።
1SA 9:7 ሳኦሊካ ኢዛስ ዛሪዲ፥ «ቤꬃ ኑ ባናሺን ኑ ኢዛስ ኣይ ኢማኔ? ሉካሞን ኑ ኦይኪዳ ሺንቄይካ ዉሪዴስ፤ ኑኒ ጾሳ ኣሳስ ኢሞታ ኢሚዛ ሚሺ ዴና፤ ሂስቲን ኑስ ኣዚ ዲዜ?» ጊዴስ።
1SA 9:8 ኣሽካራዚካ፥ «ታስ ኢሲ ሳቂሌ ቢራስ ጪጎይ ዴስ፤ ኑ ኣዋ ባጋ ኦጌራ ባናኮ ኢዚ ኑስ ዮታና ማላ ታስ ዲዛ ሚሻዮ ጾሳ ኣሳስ ኢማና» ጊዲ ናምኣንꬆ ዛሪ ዮቲዴስ።
1SA 9:9 ሃይሳፌ ሲንꬃን ኢስራኤሌ ዴሬን ኢሲ ኣሲ ጾስ ኦይቻና ቢሼ፥ «ኣኔ ሃ ዪቴ፥ ኣጁታ ዮቲዛዴኮ ኣኔ ቦስ» ጊዴስ፤ ሃኢ ናቤ ጌቴቲዛዴይ ቤኒ ዎዴ ካዪዛዴ ጌቴቴስ።
1SA 9:10 ሳኦሊካ ኣይሌዛስ፥ «ሎኦኮ! ሃያ ኣኔ ቦስ» ጊዴስ። ሄሳ ጊሻስ ጾሳ ኣሲ ዲዛ ካታማ ቢዳ።
1SA 9:11 ኢስቲ ካታማዮ ጌላና ሃኒሺን ዲዛ ዙምቡላይ ቦላ ፑዴ ኬሳን ዲሺን ሃꬅ ዱቃናስ ቢዛ ጌላኦታ ዴሚዲ፥ «ኣጁታ ዮቲዛይሲ ሃይሳን ዲዜ?» ጊ ኦይቺዳ።
1SA 9:12 ኢስቲካ ዛሪዲ፥ «ኤ ዴስ፤ ቤኢቴ ኢንቴ ሲንꬃን ዴስ፤ ኤሶን ቢቴ፤ ዴሬይ ጎይኒዛ ዙምቡላዛ ቦላ ያርሾ ሺሻና ጊሻስ ሃች ቡሮ ኑ ካታማ ዪዴስ፤
1SA 9:13 ኢንቴ ጌዴ ካታማ ጌሊዳ ማላ ኢዚ ካꬅ ማናስ ፑዴ ዙምቡላ ቦላ ኬዛናፔ ሲንꬃን ኢንቴ ኢዛ ዴማና፤ ያርሾዛ ኣንጃናይ ኢዛ ጊዲዳ ጊሻስ ኢዚ ያናሼ ጋካናስ ዴሬዚ ሙስ ዶሜና፤ ሄሳፌ ጉዬ ሃንኮ ጼይጌቲዳ ዴሬዚ ማና፤ ሃኢራ ኬዚቴ፤ ሄራካ ኢንቴ ኢዛ ዴማና» ጊዳ።
1SA 9:14 ኢስቲካ ፑዴ ካታማዮ ኬዚዳ፤ ኢስቲ ካታማዮ ቢ ጌሊሺን ሳሜሊ ጎይኒዛሶሆ ፑዴ ዙምቡላ ቦላ ኬዛናስ ቢሼ ኢስቲ ዲዛ ባጋ ዪዴስ።
1SA 9:15 ሳኦሊ ያናፔ ኢሲ ጋላሳፌ ሲንꬃን ጎዳይ ሳሜላስ ቆንጪሲ ዎꬂዴስ።
1SA 9:16 ጎዳይ፥ «ዎንቶ ሃኒ ዎዴ ቢኒያሜ ዴሬፔ ኢሲ ኣስ ኔኮ ኪታና፤ ታ ዴሬ ኢስራኤሌ ቦላ ካዎታና ማላ ቲያ፤ ኢዚካ ታ ዴራ ፊሊስጼሜታ ኩሼፔ ዎꬂ ኤካና፤ ቤኣ ኢስታ ዋሶይ ታኮ ጋኪዳ ጊሻስ ቦላፌ ታኒ ታ ዴራ ሞካ ጼላዲስ» ጊዴስ።
1SA 9:17 ሳሜሊ ሳኦሌ ቤኢዳ ማላ ጎዳይ፥ «ሄኮ ታ ኔስ ዮቲዳ ኣዴዚ ሃይሳ፤ ኢዚ ታ ዴራ ኣይሳና» ጊዴስ።
1SA 9:18 ሳኦሊካ ጊምቤዛ ፔንጌን ዲዛ ሳሜላኮ ሺቂዲ፥ «ኣጁታ ዮቲዛይሳ ኬꬂ ኣዋን ዲዛኮ ታስ ዮታንዲ?» ጊዴስ።
1SA 9:19 ሳሜሊ ኢዛስ፥ «ኣጁታ ዮቲዛይሲ ታና፤ ሃች ኢንቴ ታናራ ማና ጊሻስ ፑዴ ጎይኒዛሶሆ ዙምቡላ ቦላ ኬዚቴ፤ ዎንቶ ማላዶ ታ ኔና ሞይዛና፤ ኔ ዎዚናን ዲዛይሳካ ታ ዮታና።
1SA 9:20 ሄꬑ ጋላሳፌ ሲንꬃን ꬋይዳ ሃሬቲ ቤቲዳ ጊሻስ ኔ ኢስታስ ጬጮፓ፤ ኢስራኤሌ ኣሳ ኡባ ኣሞይ ኮይዛይ ኔናኔ ኔ ኣዋ ኬꬃ ኣሳ ኡባ ጊዴኔ?» ጊዴስ።
1SA 9:21 ሳኦሊካ፥ «ታኒ ኢስራኤሌ ኣሳ ጋርሳን ኡባፌ ቆዳን ጉꬅ ጊዲዳ ቢኒያሜ ቆሞታፔ ኢሳ ጊዲኪና? ታ ዛርኬይ ቢኒያሜ ቆሞታ ጋርሳን ጉꬅ ጊዴኔ? ሂስቲን ሃይሳ ማላ ዮኦ ኔ ታስ ኣይስ ዮታይ?» ጊዴስ።
1SA 9:22 ሄሳፌ ጉዬ ሳሜሊ ሳኦሌኔ ኢዛ ኣሽካራዛ ኣዳራሻ ኬꬅ ኤሂዴስ፤ ጼይጌቲዳ ሄꬑ ታሙ ጊዲዛ ኣሳፔ ቦላራ ቦንቾሶን ኡቲሲዴስ።
1SA 9:23 ሳሜሊ ካꬅ ካꬂዛይሳ፥ «ሃይሳ ዱማ ዎꬃ ጋዳ ታ ኔስ ኢሚዳ ቢሊቴ ኣሾዛ ኣኔ ሃ ኤሃ» ጊዴስ።
1SA 9:24 ካꬅ ካꬂዛይሲካ ጌዳ ኣሾዛ ኩሜꬅ ኤሂዲ ሳኦሌ ሲንꬃን ዎꬂዴስ፤ ሳሜሊ ኢዛ፥ «ሃይሲ፥ ‹ታኒ ኢማꬅ ጼይጋዲስ› ጊዳሶፌ ዶሚዲ ኢሲ ሚሺ ሃናናሼ ጋካናስ ታ ናጌ ዎꬂን ኔስ ዱማቲ ኡቲዳ ሚሽ ጊዲዳ ጊሻስ ማ» ጊዴስ። ሳኦሊካ ሄ ጋላሳ ኦማርሲ ሳሜላራ ኢሲፌ ሚዴስ።
1SA 9:25 ሄ ጎይኒዛ ዙምቡላዛ ቦላፌ ዱጌ ካታማ ዎꬊዳፔ ጉዬ ሳሜሊ ባ ኬꬃን ዲዛ ፖቄዛ ቦላ ሳኦሌራ ሃሳይዴስ።
1SA 9:26 ማላዶ ዴንዲዳ፤ ሳሜሊ ሳኦሌ ፖቄዛ ቦላፌ ጼይጊዲ፥ «ታ ኔና ሞይዛና ጋይስ ጊጌታ» ጊዴስ። ሳኦሊካ ጊጌቲዳ ማላ ሳሜላራ ኢሲፌ ኦይኬቲዲ ካሬ ኬዚዳ።
1SA 9:27 ኢስቲ ቢዲ ካታማይ ዉርሴꬅ ማቲሺን ሳሜሊ ሳኦሌስ፥ «ኔ ኣይሌዚ ኑፔ ሲንꬃቲ ባና ማላ ኔ ኢዛስ ዮታ» ጊዴስ። ኣሽካራዚካ ኢዚ ዮቲዳ ማላ ኦꬂዴስ፤ ሄሳፌ ጉዬ ሳሜሊ ሳኦሌ፥ «ኔኒ ጊዲኮ ኔስ ጾሳፌ ኪቴቲዳ ኪታ ታ ኔስ ዮታና ማላ ጉꬃ ዎዴስ ሃኒን ናጋሻ» ጊዴስ።
1SA 10:1 ሳሜሊ ዛይቴ ቢሪሌ ኤኪዲ ዛይቴዛ ሳኦሌ ሁኤን ጉሲዳፔ ጉዬ ዬሪ ኤኪዴስ፤ ሄሳፌ ጉዬ፥ «ባ ጺንጾ ቦላ ኔ ሃሪዛዴ ጊዳና ማላ ጾሲ ኔና ዶሪቤኔ?
1SA 10:2 ሃች ኔ ታፔ ሻኬታ ቢሺን ቢኒያሜ ꬋሳን ዲዛ ጼልጻሆ ጌቴቲዛሶን ዲዛ ኤራሄሊ ዱፎ ኣቻን ዲዛ ናምኡ ኣሳታራ ኔ ጋይታና፤ ኢስቲካ፥ ‹ኔ ኮይዛ ሃሬቲ ቤቲዳ፤ ሃኢ ኔ ኣዋይ ሃሬታስ ቆፒዛይሳ ኣጊዲ ታ ናዛ ጊሻስ ታ ኣይ ኦꬂን ኪያኔ? ጊሼ ጬጬን ዴስ› ጋና።
1SA 10:3 «ኔኒካ ሲንꬅ ጉጃ ጉጃ ባዳ ታቦሬን ዲዛ ጊታ ዛፌዛሶ ጋካናስ ባና፤ ሄንካ ሄꬑ ኣሳቲ ኢሶይ ሄꬑ ዴይሻ ላቃ፥ ናምኣንꬆዚ ሄꬑ ኡኬꬅ፥ ሄꬓንꬆዚ ዎይኔ ኡሺ ኩሚዳ ሉካሞ ኦይኪዲ ጾሳኮ ቤቴሌ ኬዚሼ ኔናራ ጋይታና።
1SA 10:4 ኢስቲ ኔና ሳሮኪ ሲሚዲ ናምኡ ኡኬꬅ ኔስ ኢማና፤ ኔካ ኢስታፌ ኤካና።
1SA 10:5 «ሄሳፌ ጉዬ ኔኒ ፊሊስጼሜ ኦላንቻቲ ዲዛሶ ጾሳ ዙማ ጊቢኣ ኬዛና፤ ኔ ካታማዮ ጋኪዳ ማላ ናቤታ ዱላታይ፥ ማሲንቆን፥ ካራቤን፥ ዲንኬኒኔ ዲꬃን ኣዣቤቲዲ ቲንቢቴ ዮቲሼ ዙምቡላን ጎይኒዛሶፔ ዱጌ ዎꬊሺን ኔ ኢስታ ዴማና።
1SA 10:6 ኔ ቆፖንታ ዲሺን ጎዳ ኣያናይ ዎልቃን ኩሚዲ ኔ ቦላ ዎꬋና፤ ኔካ ኢስታራ ቲንቢቴ ሃሳያ ዶማና፤ ኔኒ ሃራ ኣስ ሚሳታ ላሜታና።
1SA 10:7 ሃይቲ ማላታቲ ኔ ቦላ ፖሌቲዛ ዎዴ ጾሲ ኔናራ ዲዛ ጊሻስ ኔ ኩሼይ ኦꬃና ዳንዳይዛ ኡባ ኦꬃ።
1SA 10:8 «ታፔ ሲንꬃታዳ ዱጌ ጌልጌላ ዎꬋ፤ ታኒካ ጹጌቲዛ ያርሾኔ ኢሲፌቴꬃ ያርሾ ሺሻናስ ኔኮ ያና፤ ጊዶ ኣቲን ታ ኔኮ ያዳ ኔ ኣይ ኦꬃና ቤሲዛኮ ታ ዮታናሼ ጋካናስ ላፑን ጋላስ ኔ ታካና ቤሴስ» ጊዴስ።
1SA 10:9 ሳኦሊ ሳሜላፔ ሻኬቲ ባና ጊሺን ጾሲ ሳኦሌ ዎዚና ላሚዴስ፤ ማላታቲ ኡባይ ሄ ጋላስ ፖሌቲዳ።
1SA 10:10 ሳኦሊ ጊቢኣ ጋኪሺን ናቤታ ዱላታይ ኢዛ ዴሚዴስ፤ ጾሳ ኣያናይ ዎልቃን ኩሚዲ ኢዛ ቦላ ዎꬊዴስ፤ ኢዚካ ኢስታራ ቲንቢቴ ሃሳይዴስ።
1SA 10:11 ካሴ ኢዛ ኤሪዛይቲ ኡባይ ኢዚ ናቤታራ ቲንቢቴ ሃሳይሺን ቤኢዲ ኢስቲ ባንታ ጊዶን፥ «ቂሴ ናዛ ኣዜ ቦቺዳይ? ሳኦሊ ናቤታ ባጋ?» ጊሼ ኢሶይ ኢሳ ኦይቺዳ።
1SA 10:12 ሄ ዴሬን ዴኢዛ ኢሲ ኣዴዚ፥ «ኢስታ ኣዋይች ኢዚ ኦኔ?» ጊ ኦይቺዴስ፤ ሄሳ ጊሻስ፥ «ሳኦሊካ ናቤታ ባጋፌ?» ጊዛ ቶሴ ቃላ ጊዲዴስ።
1SA 10:13 ሳኦሊ ቲንቢቴ ሃሳዪ ጊጊዳፔ ጉዬ ጎይኒዛሶሆ ፑዴ ዙምቡላ ቦላ ኬዚዴስ።
1SA 10:14 ሄ ዎዴ ሳኦሌስ ኣዋ ኢሻይ ሳኦሌኔ ኢዛ ኣሽካራ፥ «ኢንቴ ኣዋን ዴቲ?» ጊ ኦይቺዴስ፤ ኢስቲካ፥ «ኑኒ ሃሬታ ኮያና ቢዶስ፤ ጊዶ ኣቲን ኢስቲ ቤቶንታ ኢጺን ሳሜላኮ ቢዶስ» ጊዳ።
1SA 10:15 ሳኦሌ ኣዋ ኢሻዚካ፥ «ሃያና ሳሜሊ ኔስ ዮቲዳይሳ ታስ ዮታርኪ!» ጊዴስ።
1SA 10:16 ሳኦሊካ ዛሪዲ ኢዛስ፥ «ኑስ ሃሬቲ ቤቲዳይሳ ቆንጪሲ ዮቲዴስ» ጊዴስ፤ ጊዶ ኣቲን ኢዚ ካዎታናይሳ ሳሜሊ ኢዛስ ዮቶይሳ ባ ኣዋ ኢሻዛስ ዮቲቤና።
1SA 10:17 ሳሜሊ ኢስራኤሌ ዴራ ጎዳ ሲንꬅ ሚጺጳ ጼይጊዲ፥
1SA 10:18 ኢስታስ፥ «ጎዳ ኢስራኤሌ ጾሳይ፥ ‹ታኒ ኢስራኤሌ ኣሳ ጊብጼፔ ኬሳዲስ፤ ጊብጼን ኢንቴ ኡንኤቲ ዲዛሶፔ፥ ሃራ ካዎቴꬃታ ኩሼፔ ታ ኢንቴና ኣሻዲስ› ጌስ።
1SA 10:19 ሃች ጊዲኮ ኢንቴ ሜቶፔኔ ዋዬፔ ኢንቴና ኣሺዳ ኢንቴ ጾሳ ካꬊዲ፥ ‹ሃኔና ኑስ ካዎ ካዎꬃ› ጊዴታ። ሄሳ ጊሻስ ኢንቴ ቆሞን ቆሞኒኔ ኢንቴ ዛርኬን ዛርኬን ጎዳ ሲንꬅ ሺቂቴ» ጊዴስ።
1SA 10:20 ሄሳፌ ጉዬ ሳሜሊ ኢስራኤሌ ቆሞታ ኡባ ሺሺን ቢኒያሜ ቆሞይ ዶሬቲዴስ።
1SA 10:21 ካሊዲካ ቢኒያሜ ቆሞታ ኢስታ ዛርኬን ዛርኬን ሺሺዴስ፤ ማጺሬ ዛርኬይ ዶሬቲዴስ፤ ዉርሴꬃን ቂሴ ና ሳኦሊ ዶሬቲዴስ፤ ጊዶ ኣቲን ኮዪሺን ኢዚ ቤቲቤና።
1SA 10:22 ኣሳቲካ፥ «ኣዴዚ ዪዴ?» ጊ ኦይቺዳ፤ ጎዳይካ፥ «ኤ፥ ዪዴስ፤ ጊዶ ኣቲን ሳኦሊ ሚሻታ ጊዶን ቆቴቲ ኡቲዴስ» ጊዴስ።
1SA 10:23 ኢስቲካ ዎጺ ቢዲ ኢዚ ቆቴቲ ዲዛሶፔ ኤኪ ዪዳ፤ ኢዚ ዴራ ጊዶን ኤቂዳሼ ጌሳን ኢዛራ ሊኬቲዛ ኣሲ ዶንታ ጊሻስ ኣሲ ኡባይ ኢዛስ ሃሼፔ ጋርሳን ኣቴስ።
1SA 10:24 ሳሜሊካ ኩሜꬃ ዴሬዛ፥ «ጎዳይ ዶሪዳይሳ ቤዬቲ? ዴራ ኡባ ጊዶን ኢዛራ ጊኒዛ ኣሲ ዴና» ጊዴስ፤ ዴሬዚ ባ ቃላ ꬎቁ ሂስቲዲ፥ «ካዎይ ሜርናስ ካዎቶ!» ጊዴስ።
1SA 10:25 ሳሜሊካ ካዎስ ቤሲዛ ዎጋኔ ማራ ዴራስ ቆንጪሲዳፔ ጉዬ ማጻፋን ጻፊዲ ጎዳ ሲንꬃን ዎꬂዴስ፤ ሄሳፌ ጉዬ ሳሜሊ ኣሳ ኡባ ባሶ ባሶ ባና ማላ ዬዲዴስ።
1SA 10:26 ሳኦሊካ ባሶ ጊቢኣ ቢዴስ፤ ጾሲ ኢስታ ዎዚና ቦቺዳ ጊታ ኣሳቲ ኢዛራ ኢሲፌ ቢዳ።
1SA 10:27 ኢሲ ኢሲ ሹፉሮ ኣሳቲ፥ «ሃይሳ ማላ ኣሲ ኑና ኣሻና ዳንዳይዜ?» ጊዲ ኢዛ ካꬊዳ፤ ኢዛስ ኣይኮ ኢሞታካ ኤሂቤቴና፤ ሳኦሊ ጊዲኮ ጮኡ ጊዴስ።
1SA 11:1 ኣሞኔ ዴሬ ኣስ ናኦሴይ ኬዚዲ ያቢሴ ጋላኣዴ ጊዶꬂዴስ፤ ያቡሴ ኣሳይ ኡባይ፥ «ኔ ኑናራ ጫቄታ፤ ኑኒ ኔስ ሃሬታና» ጊዳ።
1SA 11:2 ናኦሴይ ኢስታስ፥ «ታ ኢንቴናራ ጫቄታናይ ኢንቴፌ ኢሳ ኢሳ ኡሻቻ ኣይፌ ዎጫ ኬሳዳ ኢስራኤሌ ኣሳ ኡባ ካዉሺዳፔ ጉዬና» ጊ ዛሪዴስ።
1SA 11:3 ያቡሴ ዴሬ ጪማቲ፥ «ኩሜꬃ ኢስራኤሌ ኣሳስ ኑ ኪታ ዬዳናስ ላፑን ጋላስ ኑስ ባሬ ኢማ፤ ኑና ኣሺዛ ኣሲ ꬋይኮ ኑ ኔስ ሃሬታና» ጊዳ።
1SA 11:4 ኪቴቲ ቢዳይቲ ሳኦሊ ዲዛሶ ጊቢኣ ቢ ጋኪዲ ሄሳ ዴሬዛስ ዮቲዳ ማላ ዴሬዚ ኡባይ ባ ቃላ ꬎቁ ሂስቲዲ ዬኪዴስ።
1SA 11:5 ሄ ዎዴ ሳኦሊ ጎሻሶፔ ቦራታ ላጊ ዪሼ፥ «ሃይሲ ኣሳይ ኣዛስ ዬኪዜ?» ጊ ኦይቺዴስ፤ ኢስቲካ ያቡሴ ኣሳይ ኢስታስ ጊዳይሳ ኢዛስ ዮቲዳ።
1SA 11:6 ሳኦሊ ሄሳ ሲዪዳ ማላ ጾሳ ኣያና ዎልቃይ ኢዛ ቦላ ዎꬊዴስ፤ ሳኦሊ ኬሂ ሃንቄቲዴስ።
1SA 11:7 ዋጻ ቦራታ ቃንጼሬꬂዴስ፤ ኢስታ ኣሾዛካ ኪቴቲዛ ኣሳታ ቦላ ኢስራኤሌ ኣሳ ኡባኮ ዬዲሼ፥ «ሳኦሌኔ ሳሜላ ካሎንታ ኢጺዛ ኣሲ ዲኮ ኢዛ ቦራታይሳꬆካ ቃንጼሬꬃና» ጊዴስ፤ ዳሮ ዳጋማይ ጎዳ ማታፔ ዴራ ቦላ ዎꬊዴስ፤ ዴሬዚ ኢሲ ዎዚና ጊዲዲ ኬዚዴስ።
1SA 11:8 ሳኦሊ ቤዜቄን ባ ኦላ ኣሳ ሺሺን ኣሳ ቆዳይ ኢስራኤሌፔ 300,000፥ ዩሁዳፔ 30,000 ጊዲዴስ።
1SA 11:9 ያቡሴፔ ኪቴቲ ዪዳ ኣሳታስ፥ « ‹ዎንቶ ኣርሼይ ሆኢሺን ኢንቴ ላኣ ዬዴታና› ጊዲ ኢስታስ ዮቲቴ» ጊዳ። ኪቴቲዳይቲ ቢዲ ሄሳ ያቢሴ ኣሳስ ዮቲን ኣሳይ ኡፋይሳን ጉፒዴስ።
1SA 11:10 ያቡሴ ኣሳይ ኣሞኔ ኣሳስ፥ «ዎንቶ ኑ ኢንቴስ ኩሼ ኢማና፤ ኢንቴካ ኢንቴስ ሎኦ ሚሳቲዳዝ ኑ ቦላ ኦꬃና ዳንዳዬታ» ጊዳ።
1SA 11:11 ዎንቴꬃ ጋላስ ሳኦሊ ባ ኦላ ኣሳ ሄꬑ ኬሲ ሻኪዴስ፤ ጋዴይ ዎንታና ጊሺን ኣሞኔ ጉታ ሜንꬂ ጌሊዲ ጻልቄይ ዎꬋና ጋካናሼ ዲፒ ሂስቲዳ፤ ሼምፖራ ፓጻ ኣቲዳይቲ ጊዲኮ ናምኡ ኣሲ ኢሲፌ ዴኣናስ ዳንዳዮንታሼ ጋካናስ ላሌቲዳ።
1SA 11:12 ሄሳፌ ጉዬ ዴሬዚ፥ « ‹ሳኦሊ ኑ ቦላ ዋኒ ካዎታና ዳንዳይዜ!› ጊዳይቲ ኦናንቴ? ሄይታንታ ኑኒ ዎꬋና ማላ ሃ ኑኮ ኤሃ!» ጊዳ።
1SA 11:13 ሳኦሊ ጊዲኮ፥ «ሃች ጎዳይ ኢስራኤሌ ኣሺዳ ጋላስ ጊዲዳ ጊሻስ ሃቻ ጋላሳን ኦኒካ ሃይቆፎ» ጊዴስ።
1SA 11:14 ሄሳፌ ጉዬ ሳሜሊ ዴራ፥ «ሃ ዪቴ ኣኔ ጌልጌላ ቦስ፤ ኢዛ ካዎቴꬃካ ሚንꬆስ» ጊዴስ።
1SA 11:15 ዴሬዚ ዉሪ ጌልጌላ ቢዴስ፤ ሳኦሌ ካዎቴꬃካ ጎዳ ሲንꬃን ሚንꬂዴስ፤ ዴሬዚካ ሄን ጎዳ ሲንꬃን ኢሲፌቴꬃ ያርሾ ሺሺዴስ፤ ሳኦሊኔ ኢስራኤሌ ኣሳይ ኡባይ ጊታ ባኣሌ ኦꬂዳ።
1SA 12:1 ሳሜሊ ኩሜꬃ ኢስራኤሌ ዴራስ፥ «ቤኢቴ ኢንቴ ጊዳይሳ ኡባ ሲያዳ ታ ኢንቴስ ካዎ ካዎꬃዲስ።
1SA 12:2 ካዎ ጊዲ ኢንቴና ካሌꬃናዴ ቤኢቴ ዴሚዴታ፤ ታስ ዎዴይ ቢዴስ፤ ታስ ሁኤይካ ፑሉሚዴስ፤ ታ ናይቲካ ኢንቴናራ ዴቴስ፤ ናቴቴꬃፌ ዶማዳ ታ ኢንቴና ካሌꬃሼ ጋምኣዲስ።
1SA 12:3 ቤኢቴ፥ ሃኢ ታ ኢንቴ ሲንꬃን ኤቃዲስ፤ ጎዳ ሲንꬃኒኔ ኢዚ ቲይዳዴ ሲንꬃን ታ ቦላ ዎꬂዛዚ ዲኮ ማርካቲቴ፤ ኦና ቦራ ኤካዲና? ኦና ሃሬ ኤካዲና? ኦና ባሌꬃዲና? ኦና ቦላ ጌኔ ኦꬃዲና? ቤኢዲ ቤኦንታዴ ማላ ሃናናስ ኦናፔ ማጋንጾ ማዲና? ሃይታንታ ኡባፌ ኢሳ ታ ኦꬂዳ ጊዲኮ ታ ኢንቴስ ዛራና» ጊዴስ።
1SA 12:4 ኢስቲካ፥ «ኔ ኑና ባሌꬃቤካ ዎይኮ ጌኔ ኑ ቦላ ኦꬃቤካ፤ ኣይ ኣሳ ኩሼፔካ ኢሲ ሚሽ ኤካቤካ» ጊ ዛሪዳ።
1SA 12:5 ሳሜሊካ፥ «ታ ቦላ ኢንቴ ኣይ ዎሶካ ዴሞንታይሳስ ጎዳይኔ ኢዚ ቲይዳይሲ ሃች ኢንቴ ቦላ ማርካ» ጊዴስ። ዴሬዚካ «ኤ ኢዚ ማርካ» ጊዴስ።
1SA 12:6 ሂስቲን ሳሜሊ ዴሬዛስ፥ «ሙሴኔ ኣሮኔ ዶሪዳይ፥ ካሴ ኢንቴ ኣዋታካ ጊብጼፔ ኬሲዳይ ጎዳ።
1SA 12:7 ሃኢካ ኢንቴሲኔ ኢንቴ ኣዋታስ ኦꬂዳ ጺሎ ኦሶ ኡባ ጊሻስ ጎዳ ሲንꬃን ታ ኢንቴና ሞቲዛ ጊሻስ ሃይሳን ኤቂቴ።
1SA 12:8 «ያቆቤይኔ ኢዛሶ ኣሳይ ጊብጼ ጌሊዳፔ ጉዬ ኢንቴ ኣዋቲ ማዶ ዴማናስ ጎዳኮ ዋሲዳ፤ ጎዳይካ ኢንቴ ኣዋታ ጊብጼፔ ኬሲዲ ሃይሳ ሃ ሶሆዛን ዳና ማላ ኦꬂዳ ሙሴኔ ኣሮኔ ኪቲዴስ።
1SA 12:9 «ኢስቲ ጊዲኮ ጎዳ ባንታ ጾሳ ባሊዳ፤ ሄሳ ጊሻስ ኢዚ ሃጾሬ ዴሬ ኦላ ጋዳዋ ሲሳራስ፥ ፊሊስጼሜሲኔ ሞኣቤ ካዎስ ኢስታ ኣꬂ ኢሚዴስ። ኢስቲካ ኢስራኤሌ ኣሳ ጾኒዳ።
1SA 12:10 ሄሳፌ ጉዬ ኢስታስ፥ ‹ኑኒ ናጋራ ኦꬂዶስ፤ ኑኒ ጎዳ ኣጊዲ ባኣሌሲኔ ኣስታሮቴስ ጎይኒዶስ፤ ሃኢ ጊዲኮ ኑና ኑ ሞርኬታ ኩሼፔ ኣሻ፤ ኑ ኔስ ጎይናና!› ጊዲ ጎዳኮ ዋሲዳ።
1SA 12:11 ሄሳፌ ጉዬ ጎዳይ ዬሩባኣሌ፥ ባራቄ፥ ዮፍታሄኔ ሳሜላ ኪቲዲ ኢንቴ ሳሮን ዳና ማላ ኢንቴ ዩሾን ዲዛ ኢንቴ ሞርኬታ ኩሼፔ ኢንቴና ኬሲ ኤኪዴስ።
1SA 12:12 «ኣሞኔ ካዎ ናኦሴይ ኢንቴ ቦላ ዴንዲዳይሳ ኢንቴ ቤኢዲ ጎዳ ኢንቴ ጾሳይ ኢንቴስ ካዎ ጊዲኮካ፥ ‹ጊዴና፤ ኑና ሃሪዛ ካዎ ኑ ኮዮስ› ጊዴታ።
1SA 12:13 «ኢንቴ ኦይቺዳይሳኔ ዶሪዳ ካዎዛ ቤኢቴ ጎዳይ ኢንቴ ቦላ ካዎꬂዴስ።
1SA 12:14 ኢንቴ ጎዳስ ያዪኮ ጎይኒኮ፥ ኢዛስ ኣዛዜቲኮኔ ኢዛ ኣዛዞ ቦላ ማካሎንታ ኣጊኮ፥ ሄሳꬆካ ኢንቴኒኔ ኢንቴ ቦላ ካዎቲዳ ካዎዚ ጎዳ ኢንቴ ጾሳ ካሊኮ ኢንቴስ ሎኦ ጊዳና።
1SA 12:15 ጊዶ ኣቲን ኢንቴ ጎዳስ ኣዛዜቶንታ ኢጺዲ ኢዛ ኣዛዞ ቦላ ማካሊኮ፥ ኢዛ ኩሼይ ኢንቴ ኣዋታ ቦላ ዴጺዳ ማላ ኢንቴ ቦላካ ዴጻና።
1SA 12:16 «ሄሳ ጊሻስ ኢንቴ ሚኒ ኤቂቴ፤ ጎዳይ ኢንቴ ሲንꬃን ኦꬂዛ ሃ ጊታ ሚሻ ጼሊቴ!
1SA 12:17 ሃይሲ ሃኢ ጊስቴ ማጻ ዎዴ ጊዴኔ? ዳዳኔ ኢራ ዬዳና ማላ ታኒ ጎዳኮ ዋሳና፤ ኢንቴካ ኢንቴስ ካዎይ ካዎታና ማላ ኢንቴ ኦይቾይሳን ጎዳ ሲንꬃን ኣይ ኬና ኢታ ኦሶ ኦꬂዳኮ ሄ ዎዴ ኢንቴ ኤራና» ጊዴስ።
1SA 12:18 ሄሳፌ ጉዬ ሳሜሊ ጎዳኮ ዋሲዴስ፤ ሄ ጋላሲካ ጎዳይ ዳዳኔ ኢራ ዬዲዴስ። ሄሳ ጊሻስ ዴሬዚ ጎዳሲኔ ሳሜላስ ኬሂ ያዪዴስ።
1SA 12:19 ዴሬዚ ኡባይ ሳሜላ፥ «ኑ ኦꬂዳ ሃራ ናጋራይ ጉጾንታ ዲሺን ኑስ ካዎይ ካዎታና ማላ ኦይቺዳይሳን ሃራ ኢታ ሚሽ ጉጂ ኦꬂዳ ጊሻስ ኑ ሃይቆንታ ማላ ኑስ ኔ ኣይሌታስ ጎዳ ኔ ጾሳ ዎሳ» ጊዳ።
1SA 12:20 ሳሜሊካ ኢስታስ፥ «ባቦፍቴ፤ ሃይሳ ሃ ኢታ ኡባ ኦꬂዴታ፤ ጊዶ ኣቲን ኢንቴ ኩሜꬃ ዎዚናፔ ጎዳስ ጎይኒቴ፤ ጎዳ ካላናፔ ጉዬ ጎፒቴ።
1SA 12:21 ኢንቴና ጎኣናስ ዎይኮ ኣሻናስ ዳንዳዮንታ ሹፉሮ ሚሻታ ካሎፍቴ፤ ኢስቲ ሃዳ።
1SA 12:22 ጎዳይ ኢንቴና ባ ዴሬ ሂስታናስ ዶሲዳ ባ ጊታ ሱንꬃ ጊሻስ ባ ዴራ ኣጌና።
1SA 12:23 ሄሳፌካ ቦላራ ታ ኢንቴስ ዎሶንታ ኣጋዳ ታ ጎዳ ቆሃናይሲ ታፔ ሃኮ። ታኒ ሎኦኔ ሱሬ ኦጌ ኢንቴና ታማርሳና።
1SA 12:24 ኢንቴ ጊዲኮ ጎዳስ ያዪቴ፤ ኩሜꬃ ዎዚናፔ ኣማኔቴꬃን ኢዛስ ጎይኒቴ፤ ኢዚ ኢንቴስ ኦꬂዳ ጊታ ዮኦታ ባሎፒቴ።
1SA 12:25 ኢንቴ ናጋራ ኦሶን ሚኒ ኤቂዛ ጊዲኮ ኢንቴካ፥ ኢንቴ ካዎይካ ꬋያና» ጊዴስ።
1SA 13:1 ሳኦሊ ካዎቲሺን ኢዛስ ላይꬃይ ሄꬑ ታማ። ኢዚ ኢስራኤሌ ኦይዱ ታማኔ ናምኡ ላይꬅ ሃሪዴስ።
1SA 13:2 ሳኦሊ ኢስራኤሌ ኣሳፔ 3,000 ኣስ ዶሪዴስ፤ 2,000 ኣሲ ዙምቡላይ ዳሪዛ ቤቴሌኒኔ ማኪማሴን ሳኦሌራ፥ 1,000 ኣሲ ቢኒያሜ ዴሬ ጊቢኣን ዮናታኔራ ዴስ፤ ሃንኮ ዴሬዚ ባሶ ባሶ ባና ማላ ሞይዚዴስ።
1SA 13:3 ዮናታኔይ ጌባን ዲዛ ፊሊስጼሜ ኦላ ኣሳይ ዲዛሶ ሾጪዴስ፤ ፊሊስጼሜ ኣሳይካ ሄሳ ሲዪዴስ፤ ሳኦሊካ፥ «ኢብራዌ ኣሳይ ሲዮ!» ጊዲ ዴራ ቦላ ዛዬ ፑኒሲዴስ።
1SA 13:4 ሄሳ ጊሻስ ኢስራኤሌ ኣሳይ ኡባይ፥ «ሳኦሊ ፊሊስጼሜ ኦላ ኣሳይ ዲዛሶ ሾጪዴስ፤ ኢስራኤሌ ኣሳይ ፊሊስጼሜ ኣሳ ኣቻን ቱና ሚሻ ማላ ኢጼቲዴስ» ጊዛ ዎሬ ሲዪዴስ፤ ዴሬዚካ ሳኦሌ ካላናስ ጌልጌላን ሺቂዴስ።
1SA 13:5 ፊሊስጼሜ ኣሳይ 3,000 ፓራ-ጋሬ፥ 6,000 ቶጋንቻታ፥ ቆዳይ ባይንዳ ኣባ ሻሚንታ ማላ ዳሪዳ ኦላ ኣስ ኤኪዲ ኢስራኤሌ ኦላናስ ሺቂዴስ፤ ኦላስ ኬዚዲካ ቤቲ-ኣዌኔፔ ኣርሼይ ሞኪዛ ባጋራ ዲዛ ማኪማሴን ኡቲዳ።
1SA 13:6 ኢስራኤሌቲ ዲዛ ሃኖታይ ኬሂ ሂርጊሲዛዝ ጊዲዳይሳኔ ኢስታ ኦላ ኣሳይካ ዳሮ ጬጬን ዲዛይሳ ቤኢዲ ጎንጎሎይ ዲዛሶን፥ ዎራይ ዲዛሶን፥ ዛላይ ዲዛሶን፥ ኣፎይ ዲዛሶኒኔ ኦላይ ዲዛሶ ኡባን ቆቴቲዳ።
1SA 13:7 ኢስራኤሌ ኣሳፔ ኢሲ ኢሲ ኣሳቲ ዮርዳኖሴ ፒኒዲ ጋዴኔ ጋላኣዴ ዴሬ ቢዳ። ሳኦሊ ጊዲኮ ጌልጌላን ታኪዴስ፤ ኢዛራ ኢሲፌ ዲዛ ኦላ ኣሳይ ኡባይ ባቢ ኮኮሪዴስ።
1SA 13:8 ኢዚካ ሳሜሊ ኢዛስ ኢሚዳ ባሬዛ ማላ ላፑን ጋላስ ጋካናሼ ናጊዴስ፤ ጊዶ ኣቲን ሳሜሊ ጌልጌላ ዪቤና፤ ሄሳፌ ጉዬ ሳኦሌ ኦላ ኣሳይ ላሌቴꬅ ኦይኪዴስ።
1SA 13:9 ሄሳ ጊሻስ ሳኦሊ፥ «ጹጌቲዛ ያርሾዛኔ ኢሲፌቴꬃ ያርሾዛ ሃ ኤሂቴ» ጊዴስ፤ ሄሳፌ ጉዬ ጹጌቲዛ ያርሾዛ ኢዚ ያርሺዴስ።
1SA 13:10 ኢዚ ያርሾዛ ያርሺ ጊጊዳ ማላ ሄራካ ሳሜሊ ጋኪ ዎꬊዴስ፤ ሳኦሊ ኢዛ ሞኪ ኤካና ኬዚዴስ።
1SA 13:11 ሳሜሊ፥ «ኔ ኣይ ኦꬃዲ?» ጊዲ ኢዛ ኦይቺዴስ፤ ሳኦሊካ ኢዛስ፥ «ኦላ ኣሳይ ላሌቲዳይሳ፥ ኔካ ባሪዳ ሳቴን ዮንታ ኣጊዳይሳ፥ ፊሊስጼሜ ኣሳይ ማኪማሴን ሺቂዳይሳ ቤኣዲስ፤
1SA 13:12 ‹ሄሳ ጊሻስ ፊሊስጼሜ ኣሳይ ዱጌ ጌልጌላ ታ ቦላ ያና፤ ታኒ ጎዳፔ ቴማይ ያና ማላ ዎሳቤኬ› ጋ ቆፓዲስ፤ ሄሳ ጊሻስ ጹጌቲዛ ያርሾ ሺሻናይሲ ታስ ኣቶንታዝ ጊዲዴስ» ጊ ዛሪዴስ።
1SA 13:13 ሳሜሊካ ኢዛስ፥ «ኔስ ቤሶንታዝ ኦꬃዳሳ፤ ጎዳ ኔ ጾሳይ ኔስ ኢሚዳ ኣዛዞ ናጋቤካ፤ ኔ ናጊዳኮ ኢስራኤሌ ቦላ ኔ ካዎቴꬃይ ሜርናስ ሚኒ ዳናሺን።
1SA 13:14 ሃኢ ጊዲኮ ኔ ካዎቴꬃይ ሚኒ ኤቄና፤ ቤኣ ጎዳይ ባ ዎዚና ማላ ሃኒዛ ኣስ ዴሚዴስ፤ ኔኒ ጎዳ ኣዛዞ ናጎንታ ኢጺዳ ጊሻስ ኢዚ ዴሬዛ ካሌꬂዛዴ ጊዳና ማላ ዶሪዴስ» ጊዴስ።
1SA 13:15 ሄሳፌ ጉዬ ሳሜሊ ጌልጌላፔ ዴንዲዲ ቢኒያሜይ ኣይሲዛ ዴሬን ዲዛ ፑዴ ጊቢኣ ኬዚዴስ፤ ሳኦሊካ ባናራ ኢሲፌ ዲዛ ኣሳታ ቆዲዴስ፤ ኢስታ ቆዳይካ 600 ጊዲዴስ።
1SA 13:16 ፊሊስጼሜቲ ማኪማሴን ዱንካኒ ኡቲዳ ዎዴ ሳኦሊ፥ ኢዛ ና ዮናታኔይኔ ኢስታራ ኢሲፌ ዲዛ ኣሳቲ ቢኒያሜይ ኣይሲዛ ጌባ ዴሬን ዴቴስ።
1SA 13:17 ዎራጂዛይቲ ሄꬑ ጩጋን ሻኬቲዲ ፊሊስጼሜታ ጉታፔ ኬዚዳ፤ ኢሲ ጩጋዚ ሹኣሌይ ኣይሲዛ ቢታ ኦፊራ ቢዴስ።
1SA 13:18 ናምኣንꬆ ጩጋዚ ቤቲ-ሆሮኔ ቢዴስ፤ ሄꬓንꬆ ጩጋዚ ባዞ ቢታ ጊናራ ሲቦዬ ዙሌራ ዱጌ ቤሲዛ ዛዋ ዩዪዴስ።
1SA 13:19 ፊሊስጼሜቲ፥ «ኢስራኤሌቲ ባንታስ ማሻ ዎይኮ ቶራ ኦꬆፌቶ» ጊዳ ጊሻስ ኩሜꬃ ኢስራኤሌ ቢታን ዎጋጬይ ዴና።
1SA 13:20 ሄሳ ጊሻስ ኢስራኤሌ ኣሳይ ኡባይ ባንታ ማራሻኔ ጾይሌ ቆጺሳናስ፥ ባ ቤዪጼታኔ ባጫታ ፖሺሳናስ ዱጌ ፊሊስጼሜ ዴሬ ዎꬌቴስ።
1SA 13:21 ላይዳኔ ቤዪጼ ቃሴ ቦራ ላጊዛ ቢራታ ሌች ፖሺሳናስ ኦይዱ ጊራሜ ጊዲዛ ሳቂሌ ቢራ ጪጌቴስ፤ ኢስቲ ባንታ ማራሻኔ ጾይሌ ቆጺሳናስ ሄሳስ ናምኡ ኩሼ ጊዲዛዝ ጪጌቴስ።
1SA 13:22 ሄሳ ጊሻስ ኦላዚ ዴንዲዳ ጋላስ ሳኦሌፔኔ ኢዛ ና ዮናታኔፔ ኣቲን ኢስታራ ኢሲፌ ኬዚዳ ኦላንቻታ ጊዶን ማሻ ዎይኮ ቶራ ኦይኪዳ ኢሲ ኣሲካ ዴና።
1SA 13:23 ሄ ዎዴ ፊሊስጼሜታፔ ኢሲ ጩጋዚ ማኪማሴ ፑርዴን ኣꬊ ኡቲዴስ።
1SA 14:1 ኢሲ ጋላስ ሳኦሌ ና ዮናታኔይ ኢዛ ጎንዳሌ ኦይኪዛ ናቴꬃዛ፥ «ሃ ያ፤ ሃራ ባጋራ ዲዛ ፊሊስጼሜ ኦላንቻታ ጉታ ኣኔ ፒኖስ» ጊዴስ፤ ጊዶ ኣቲን ሄሳ ባ ኣዋስ ዮቲቤና።
1SA 14:2 ሄ ዎዴ ሳኦሊ ጊቢኣፔ ማታን ሚጌሮኔ ጌቴቲዛሶን ኦሮማኔ ሚꬃ ጋርሳን ዱንካኒ ኡቲዴስ፤ ኡሱፑን ጼት ጊዲዛ ኣሳቲ ኢዛራ ዴቴስ።
1SA 14:3 ኤፉዴ ማይኢዛ ቄሴ ኣካያይ ኢስታራ ዴስ፤ ኢዚካ ሴሎን ጎዳ ቄሴ ጊዲ ዲዛ ኤሌ ና፥ ፊኒሃሴ ና፥ ኢካቦዴ ኢሻ ኣሂጹቤ ና። ጊዶ ኣቲን ዮናታኔይ ኢስታ ጊዶን ዶንታይሳ ኤሪዳ ኣሲ ዴና።
1SA 14:4 ዮናታኔይ ፊሊስጼሜ ኦላንቻቲ ዱንካኒ ዲዛሶ ፒናና ኮዪዳ ፑርዴዛ ቦላ ሃዲርሳራኔ ኡሻቻራ ኮይሮይሲ ቦጼጼ፥ ናምኣንꬆዚ ሴኔ ጌቴቲዛ ናምኡ ዞልዶ ዛላቲ ዴቴስ።
1SA 14:5 ኢሲ ዛላዚ ፑዴሃ ባጋራ ማኪማሴ ጊናራ ዴስ፤ ናምኣንꬆዚ ዱጌሃ ባጋራ ጌባ ጊናራ ዴስ።
1SA 14:6 ዮናታኔይ ኢዛስ ጎንዳሌ ኦይኪዛ ናቴꬃዛ፥ «ሃ ያ፤ ቃጻሬቶንታ ኦላንቻታ ጉታ ኣኔ ፒኖስ፤ ጎዳይ ኑ ጊሻስ ኦሌታናኮ ኦኔ ኤሪዛይ፤ ጎዳይ ጉꬃ ኣሳን ጊዲን ዳሮ ኣሳን ኣሻና ጊኮ ኢዛ ዲጋናይ ዴና» ጊዴስ።
1SA 14:7 ኢዛስ ጎንዳሌ ኦይኪዛ ናቴꬃዚ፥ «ኔ ዎዚናን ቆፒዳ ኡባ ኦꬃ፤ ጉዬ ጎፓ፤ ታኒካ ኩሜꬃ ዎዚናፔ ኔናራ ዳይስ» ጊዴስ።
1SA 14:8 ዮናታኔይ ኢዛስ፥ «ሂስቲኮ ሃያ፤ ኣሳይ ዲዛሶ ፒኒዲ ኣኔ ኣሳስ ቤቶስ።
1SA 14:9 ኢስቲካ፥ ‹ኑኒ ኢንቴኮ ባና ጋካናስ ኑና ሄን ናጊቴ› ጊኮ ኑኒ ዲዛሶን ዲዲ ኢስታ ናጋና፤ ፑዴ ኢስታኮ ኬዞኮ።
1SA 14:10 ጊዶ ኣቲን ኢስቲ ኑና፥ ‹ፑዴ ኑኮ ኬዚቴ› ጊኮ ጎዳይ ኢስታ ኑ ኩሼን ኣꬂ ኢሚዳይሳስ ሄሲ ማላታ ጊዲዛ ጊሻስ ኑ ኢስታኮ ፑዴ ኬዛና» ጊዴስ።
1SA 14:11 ኢስቲ ናምኣቲ ፊሊስጼሜ ኦላንቻታስ ቤቲዳ ማላ ፊሊስጼሜቲ፥ «ኣሶ ቤኢቴ፤ ኢብራዌቲ ካሴ ባንቲ ቆቴቲዳ ኦላፌ ኬሳ ቦላ ዴቴስ» ጊዴስ።
1SA 14:12 ሄሳፌ ጉዬ ፊሊስጼሜታ ሄራን ዲዛ ኦላ ኣሳይ፥ «ኣኔ ሃ ኑኮ ኬዚቴ፤ ኑ ኢንቴና ኢሲ ሚሽ ቤሲ ኣጋና» ጊዲ ዮናታኔ ቦላኔ ኢዛ ጎንዳሌ ኦይኪዛ ናቴꬃዛ ቦላ ዋሲዳ። ሄሳ ጊሻስ ዮናታኔይ ኢዛ ጎንዳሌ ኦይኪዛይሳ፥ «ጎዳይ ኢስታ ኢስራኤሌታ ኩሼን ኣꬂ ኢሚዳ ጊሻስ ሃ ያ ታና ካላ» ጊዴስ።
1SA 14:13 ዮናታኔይ ዙሚዲ ባስ ጎንዳሌ ኦይኪዛይሳ ካሌꬂ ኤኪዲ ኬዚዴስ፤ ፊሊስጼሜቲ ዮናታኔ ኩሼን ኩንዲዳ፤ ኢዛስ ጎንዳሌ ኦይኪዛይሲ ኢዛ ጉዬራ ካሊሼ ኢስታ ዎꬊዴስ።
1SA 14:14 ዮናታኔይኔ ኢዛ ጎንዳሌ ኦይኪዛይሲ ኮይሮ ጋላስ ኢሲ ዋጻ ፔይሺዛ ጋዴን ናምኡ ታሙ ጊዲዛ ኣስ ዎꬊዳ።
1SA 14:15 ጉታ ጊዶን ዴራ ቦላኒኔ ጎሻታ ቦላን ሺሮይ ዴንዲዴስ፤ ካምቤ ናጊዛይቲኔ ዳፋ ጋꬂዛይቲ ኡባይ ኮኮሪዳ፤ ቢታይካ ቃጺዴስ። ሄ ሺሮዚካ ጾሳፌ ኪቴቲዴስ።
1SA 14:16 ቢኒያሜይ ኣይሲዛ ጊቢኣን ዲዛ ሳኦሌ ዛቤቲ፥ ፊሊስጼሜ ኦላንቻቲ ዱማ ዱማ ባጋራ ላሌቲሺን ቤኢዳ።
1SA 14:17 ሳኦሊ ባናራ ዲዛ ኣሳታስ፥ «ኣኔ ኦላንቻታ ቆዲቴ፤ ኑ ጊዶፌ ኦኒ ቢዳኮ ቤኢቴ» ጊዴስ። ኢስቲ ቆዲዛ ዎዴ ዮናታኔይኔ ኢዛ ጎንዳሌ ኦይኪዛይሲ ሄን ዴቴና።
1SA 14:18 ሳኦሊካ ኣካያ፥ «ጾሳ ጫቆ ቃላ ታቦታ ሃ ኤካ ያ» ጊዴስ፤ ሄ ዎዴ ታቦታዚ ኢስራኤሌ ኣሳ ማታን ዴስ።
1SA 14:19 ሳኦሊ ቄሴዛስ ዮቶ ቦላ ዲሺን ፊሊስጼሜታ ሺሮዚ ጉጂ ጉጂ ቢዴስ፤ ሄሳ ጊሻስ፥ «ኣጋጋ፤ ኔ ኩሼ ሃ ዛራ» ጊዴስ።
1SA 14:20 ሄሳፌ ጉዬ ሳኦሊኔ ኢዛ ኦላንቻቲ ኢሲ ቦላ ኦላስ ቢዳ፤ ኢስቲካ ፊሊስጼሜቲ ባንታ ማሻን ቡሳኬቲሼ ጊታ ሺሮ ጋርሳን ዲዛይሳ ቤኢዳ።
1SA 14:21 ሃይሳፌ ሲንꬃን ፊሊስጼሜታ ሚሌን ኤቂዲ ኢስታራ ኢስታ ጉታ ቢዳ ኢብራዌቲ ሳኦሌራኔ ዮናታኔራ ዲዛ ኢስራኤሌ ኣሳኮ ሲሚ ጌሊዳ።
1SA 14:22 ኤፍሬሜ ጌዜን ቆቴቲ ዲዛ ኢስራኤሌ ኣሳይ ኡባይ ፊሊስጼሜ ኣሳይ ባቃቲሼ ዲዛይሳ ሲዪዲ ሚንꬂዲ ካሌቲ ካሌቲ ዬዴꬂዴስ።
1SA 14:23 ሄ ዎዴ ጎዳይ ኢስራኤሌ ኣሺዴስ፤ ኦላዚ ቤቲ-ኣዌኔራ ካንꬂ ቢዴስ።
1SA 14:24 ሳኦሊ፥ «ሃች ታ ሞርኬታ ቦላ ሃሎ ኬሳናፔ ሲንꬃን ኦማርስ ጋካናስ ካꬅ ሚዳ ኣሲ ቃንጌቲዳዴ ጊዶ» ጊዲ ኢዚ ዴሬዛ ጫቄꬂዳ ጊሻስ ሄ ጋላስ ኢስራኤሌ ኣሳይ ጬጬን ፔኢዴስ፤ ሄሳ ጊሻስ ዴራፔ ኢሳዴይካ ካꬅ ዶናን ጌልꬂቤና።
1SA 14:25 ኦላ ኣሳይ ኡባይ ዎራ ጊዶ ጌሊሺን ኤሲ ቢታ ቦላ ቤቲዴስ።
1SA 14:26 ዴሬዚ ዎራ ጊዶ ጌሊዛ ዎዴ ኤሳ ኢሊሎይ ጾኬቲዛይሳ ቤኢዴስ። ጊዲኮካ ጫቆዛስ ያዪዳ ጊሻስ ባ ኩሼ ባ ዶናኮ ሺሺዳ ኣይ ኣሲካ ዴና።
1SA 14:27 ጊዶ ኣቲን ኢዛ ኣዋይ ዴራ ጫቂሲ ዎꬂዳይሳ ዮናታኔይ ሲዪቤና፤ ሄሳ ጊሻስ ኢዚ ባ ኩሼን ኦይኪዳ ጉፌዛ ጼራ ኤሳ ኢሊሎዛ ጊዶ ዬዲ ኤኪዲ ባ ኩሼራ ባꬊን ኢዛስ ኣይፌይ ጼሊዴስ።
1SA 14:28 ሄሳፌ ጉዬ ኢሲ ዎታዳራዚ፥ «ኔ ኣዋይ ኦላ ኣሳ፥ ‹ሃች ካꬅ ዶናን ጌልꬂዳ ኣሲ ኦኒካ ቃንጌቲዳዴ ጊዶ› ጊዲ ሚንꬂ ጫቄꬂዴስ። ኣሲ ኡባይ ዳቡርዳይ ሄሳ ጋሶና» ጊዴስ።
1SA 14:29 ዮናታኔይካ፥ «ታ ኣዋይ ቢታ ቦላ ሜቶ ሜꬊዴስ፤ ሃኖ ኤሳይፌ ታ ጉꬅ ባꬊዳ ዎዴ ታ ኣይፌይ ዋኒ ጼሊዳኮ ቤኢቴ!
1SA 14:30 ዴሬዚ ባ ሞርኬታፔ ዲኢ ኤኪዳይሳፌ ሚዳኮ ሃች ኣይ ማላ ሎኦሺን ኣቲዴ! ሃይቂዳ ፊሊስጼሜታ ቆዳይ ኣይ ማላ ዳሮ ጊዳናሺን ኣቲዴ!» ጊዴስ።
1SA 14:31 ሄ ጋላስ ኢስራኤሌ ኣሳይ ማኪማሴፔ ቢዲ ኣያሎኔ ጋካናስ ፊሊስጼሜ ኣሳ ሾጪዳፔ ጉዬ ኬሂ ዳቡርዴስ።
1SA 14:32 ሄሳ ጊሻስ ኣሳይ ዶርሳ፥ ቦራኔ ማራታ ዲኢ ኤሂዲ ቢታ ቦላ ሹኪዲ ዪቄቲሼ ሱꬃራ ሚዴስ።
1SA 14:33 ሄሳፌ ጉዬ ሳኦሌስ፥ «ቤኣ ኣሳይ ዪቄቲሼ ሱꬃራ ሚዲ ጎዳ ቆሂሼ ዴስ» ጊ ዮቴቲዴስ። ሳኦሊካ፥ «ኢንቴ ዎጋ ሜንꬂዴታ፤ ሄሳ ጊሻስ ኢሲ ጊታ ሹች ቡሉሊሲዲ ሃ ታስ ኤሂቴ» ጊዴስ።
1SA 14:34 ኢዚካ፥ «ዴራ ጊዶን ዩዪ ዩዪዲ፥ ‹ኢንቴ ኢሶይ ኢሶይ ኢንቴ ቦራታኔ ኢንቴ ዶርሳታ ሃ ኤሂቴ፤ ሃይሳን ሹኪ ሚቴ፤ ጊዶ ኣቲን ኣሾዛ ሱꬃራ ጋꬂ ሚዲ ጎዳ ቆሆፒቴ› ጊ ዮቲቴ» ጊዴስ። ሄሳ ጊሻስ ሄ ጋላሳ ኦማርስ ኢሶይ ኢሶይ ባ ቦራ ኤሂዲ ሄን ሹኪዴስ።
1SA 14:35 ሳኦሊካ ያርሾ ያርሺዛሶ ጊግሲዴስ፤ ያርሾ ያርሺዛሶ ኦꬂሺን ሃይሲ ኢዛስ ኮይሮ።
1SA 14:36 ሳኦሊ፥ «ኦማርሳራ ፊሊስጼሜታ ካሊ ዎꬊዲ ዎንታናሼ ጋካናስ ኢስታ ቦንቆስ፤ ኢስታፌ ኢሲ ኣሲካ ሼምፖራ ፓጻ ኣጎኮ» ጊዴስ። ኢስቲካ፥ «ኔስ ሎኦ ሚሳቲ ቤቲዛ ኡባ ኦꬃ» ጊ ዛሪዳ። ቄሴይ ጊዲኮ፥ «ኣኔ ሃን ጾስ ኦይቾስ» ጊዴስ።
1SA 14:37 ሄ ዎዴ ሳኦሊካ፥ «ፊሊስጼሜ ኣሳታ ካላዳ ዱጌ ዎꬎ? ኢስራኤሌታ ኩሼን ኔ ኢስታ ኣꬃ ኢማኔ?» ጊ ጾስ ኦይቺዴስ፤ ጊዶ ኣቲን ጾሲ ሄ ጋላስ ኢዛስ ኣይ ዛሮካ ኢሚቤና።
1SA 14:38 ሄሳ ጊሻስ ሳኦሊ፥ «ኦላንቻታ ካሌꬂዛ ኡባቶ፥ ሃ ሺቂቴ፤ ሃች ኣይ ናጋራይ ኦሴቲዳኮ ኣኔ ሻኪ ኤሮስ።
1SA 14:39 ኢስራኤሌ ኣሺዳ ዴኦ ጎዳይ ቤኢን ታ ና ዮናታኔይ ቆሆ ኦꬂዳ ጊዲኮካ ሃይቃና ቤሴስ» ጊዴስ። ጊዶ ኣቲን ዴራ ጊዶፌ ኢዛስ ዛሮ ኢሚዳይ ኢሳዴይካ ዴና።
1SA 14:40 ሄሳፌ ጉዬ ሳኦሊ ኢስራኤሌ ኣሳ ኡባ፥ «ኢንቴ ዉሪካ ሄ ባጋራ ኤቂቴ፤ ታኒኔ ታ ና ዮናታኔይ ሃ ባጋራ ኤቃና» ጊዴስ። ኣሳይካ፥ «ኤሮ ኔና ሎኦይሳ ኦꬃ» ጊ ዛሪዴስ።
1SA 14:41 ሂስቲን ሳኦሊ፥ «ታስ ሱሬ ዛሮ ኢማ» ጊ ጎዳ ኢስራኤሌ ጾሳኮ ዎሲዴስ፤ ሳማዚ ሳኦሌ ቦላኔ ዮናታኔ ቦላ ዎꬊዴስ፤ ዴሬዚ ጺሊ ኬዚዴስ።
1SA 14:42 ሳኦሊካ፥ «ታ ቦላኔ ታ ና ዮናታኔ ቦላ ሳማ ዬጊቴ» ጊዴስ፤ ሳማዚካ ዮናታኔ ቦላ ዎꬊዴስ።
1SA 14:43 ሄሳፌ ጉዬ ሳኦሊ ዮናታኔ፥ «ኣኔ ኔ ኦꬂዳይሳ ታስ ዮታ» ጊዴስ፤ ዮናታኔይካ፥ «ታኒ ታ ጉፌ ጼራን ጉꬃ ኤሳ ኢሊሎ ኤካዳ ታ ዶናን ጌልꬂዳ ጊሻስ ሄኮ ታኒ ሃይቃናስ ጊጌታ ኡታዲስ» ጊዴስ።
1SA 14:44 ሳኦሊካ፥ «ኢታ ሚሽ ታ ቦላ ኤሂዳ ዮናታኔ! ኔኒ ሃይቆንታ ኣጊኮ ጎዳይ ታ ቦላ ፒርዶ» ጊዴስ።
1SA 14:45 ጊዶ ኣቲን ዴሬዚ ሳኦሌስ፥ «ኢስራኤሌ ዴራስ ሃይሳ ጊታ ጾኖ ኤሂዳ ዮናታኔይ ሃይቃናስ ቤሲዜ? ቤሴና፤ ጾሲ ኢዛ ማዲን ሃች ኢዚ ሃይሳ ኦꬂዳ ጊሻስ ዴኦ ጎዳይ ቤኢን ኢዛ ሁኤ ቢናናፌ ኢሲናካ ቢታ ቦላ ኩንዱኩ» ጊዳ፤ ሄሳን ኣሳይ ዮናታኔ ኣሺን ዮናታኔይ ሃይቆፔ ኣቲዴስ።
1SA 14:46 ሂስቲን ሳኦሊ ፊሊስጼሜታ ዬዴꬂዛይሳ ኣጊ ሲሚዴስ፤ ኢስቲካ ባንታ ዴሬ ሲሚዳ።
1SA 14:47 ሳኦሊ ኢስራኤሌ ኣሳ ቦላ ካዎቲዳፔ ጉዬ ባ ዩሾን ዲዛ ባ ሞርኬታ ሞኣቤታ፥ ኣሞኔታ፥ ኤዶሜታ፥ ጾባ ካዎታኔ ፊሊስጼሜታ ኦሊዴስ። ቢዳሶን ቢዳሶን ኡባን ጾኒዴስ።
1SA 14:48 ሚኒ ኦሌቲዲ ኣማሌቄታ ጾኒዴስ፤ ኢስራኤሌታ ቦንቂዛይታ ኩሼፔ ኬሲ ኤኪዴስ።
1SA 14:49 ሳኦሌ ኣቱማ ናይቲ ዮናታኔ፥ ዪሺዌኔ ማልኬሹኣ፤ ማጫ ናይቲ ባይራያ ሜሮቦ፥ ካሎያ ሚልኮሎ ጌቴቴቴስ።
1SA 14:50 ሳኦሌ ማቼያ ኣኪማሴ ቢዮ ኣሂናሆሞ ጌቴታዉስ፤ ኢዛስ ኦላ ጋዳዋዚ ኢዛ ኣዋ ኢሻ ኔሬ ና ኣቢኔሬ ጌቴቴስ።
1SA 14:51 ሳኦሌ ኣዋ ቂሴይኔ ኣቢኔሬ ኣዋ ኔሬይ ኣቢኤሌ ናይታ።
1SA 14:52 ሳኦሌ ካዎቴꬃ ዎዴ ኡባን ፊሊስጼሜታራ ጫሞ ኦላይ ዴስ፤ ሄሳ ጊሻስ ሚኖ ኣስ ዎይኮ ቃራ ኣስ ቤኢዳ ዎዴ ኡባን ኢዛዴ ባኮ ኤሂዲ ኦላንቻታ ጊዶ ጌልꬄስ።
1SA 15:1 ሳሜሊ ሳኦሌ፥ «ባ ዴሬ ኢስራኤሌ ቦላ ታ ኔና ቲያዳ ካዎሳና ማላ ጎዳይ ታና ኪቲዴስ፤ ሄሳ ጊሻስ ጎዳፔ ዪዳ ኪታ ኤዝጋ።
1SA 15:2 ጎዳይ ኡባፌ ዎልቃማ ጾሳይ፥ ‹ኢስራኤሌይ ጊብጼፔ ኬዚዳ ዎዴ ኣማሌቄቲ ኢስታራ ኦጌ ቦላ ኤቄቲዳ ጊሻስ ታ ኢስታ ቃጻያና።
1SA 15:3 ሃኢካ ባ፤ ኣማሌቄታ ኦላ! ኢስታስ ዲዛ ሚሽ ሙሌራ ꬋይሳ፤ ኢሲ ሚሺካ ኣሾፋ፤ ኣቱማኔ ማጫ፥ ናኔ ዪꬋ፥ ሜሄታኔ ዶርሳታ፥ ጋሜላኔ ሃሬ ዎꬋ› ጌስ» ጊዴስ።
1SA 15:4 ሄሳ ጊሻስ ሳኦሊ ኣሳ ጺላኢሜ ጌቴቲዛሶን ሺሺዲ ቆዲዴስ፤ ኢስቲካ ኢስራኤሌፔ 200,000 ዎታዳራታ፥ ዩሁዳፔ 10,000 ዎታዳራታ ጊዲዳ።
1SA 15:5 ሳኦሊ ኣማሌቄታ ካታማ ቢዲ ኢሲ ዙሌ ጊዶን ዛማዲ ኡቲዴስ።
1SA 15:6 ኢዚካ ቄናዌ ዴሬ ኣሳ፥ «ኢስራኤሌ ኣሳይ ጊብጼ ቢታፌ ኬዚዳ ዎዴ ኢንቴ ኢስታስ ኪያቲዳ ጊሻስ ታ ኢስታራ ኢንቴና ኢሲፌ ꬋይሶንታ ማላ ኣማሌቄታፔ ሃኪቴ፤ ኢስታፌካ ሻኬቲቴ» ጊዴስ። ሂስቲን ቄናዌ ኣሳቲ ኣማሌቄታፔ ሻኬቲዳ።
1SA 15:7 ሂስቲን ሳኦሊ ኣማሌቄታ ሃዊላፔ ዴንꬂዲ ኣርሼይ ሞኪዛ ባጋራ ጊብጼን ዲዛ ሹራ ጋካናስ ኦሊዴስ።
1SA 15:8 ኣማሌቄታ ካዎ ኣጋጌ ሼምፖራ ፓጻ ዲኢዴስ፤ ዴራ ኡባ ቃራ ማሻን ሲፊዴስ።
1SA 15:9 ጊዶ ኣቲን ሳኦሊኔ ኢዛ ኦላ ኣሳቲ ኣጋጌ፥ ሎኦ ዶርሳታኔ ሜሄታ፥ ኦሃላ ማሪኔ ላቃ፥ ሎኦ ሎኦ ጊዲዳ ኡባ ዎꬎንታ ኣጋጊዳ፤ ሄይታንታ ኡባ ዎꬋናስ ኮዪቤቴና፤ ጊዶ ኣቲን ሌቄቲዳይታኔ ሹፉሮታ ꬋይሲዳ።
1SA 15:10 ሃይሳፌ ጉዬ ጎዳ ቃላይ ሳሜላኮ ዪዲ፥
1SA 15:11 «ታኒ ሳኦሌ ካዎꬂዳ ጊሻስ ሞꬌታዲስ፤ ጋሶይካ ኢዚ ታና ካሎ ኣጊዲ ጉዬ ሲሚዳ ጊሻሲኔ ታ ኣዛዞ ፖሎንታ ኣጊዳ ጊሻሳ» ጊዴስ። ሳሜሊ ኬሂ ጬጪዲ ኦማርስ ኩሜꬅ ጎዳኮ ዋሲዴስ።
1SA 15:12 ሳሜሊ ዎንታ ማላዶራ ዴንዲዲ ሳኦሌራ ጋይታና ቢዴስ፤ ጊዶ ኣቲን፥ «ሳኦሊ ቃርሜሎሴ ቢዴስ፤ ሄን ባና ሃሳኢሲዛ ሃዉልቴ ኤሲዳፔ ጉዬ ዱጌ ጌልጌላ ዎꬊዴስ» ጌቴቲ ኢዛስ ዮቴቲዴስ።
1SA 15:13 ሳሜሊ ሳኦሌ ዴሚን ሳኦሊ፥ «ጎዳይ ኔና ኣንጆ፤ ጎዳ ኣዛዞ ታ ፖላዲስ» ጊዴስ።
1SA 15:14 ሳሜሊ ኢዛ፥ «ሂስቲን ሃይሲ ታ ሃይꬃን ሴቴቲዛ ዶርሳታ ዋሶይኔ ቦራታ ጻጎይ ኣዜ?» ጊ ኦይቺዴስ።
1SA 15:15 ሳኦሊ፥ «ኦላ ኣሳይ ኣማሌቄ ኣሳፔ ዲኢ ኤሂዳይታኮ፤ ሎኦ ሎኦ ዶርሳታኔ ቦራታ ጎዳ ኔ ጾሳስ ያርሻናስ ዎꬎንታ ፓጻ ኣሺዳይታ፤ ሃንኮይሳ ጊዲኮ ሙሌራ ꬋይሲዶስ» ጊ ዛሪዴስ።
1SA 15:16 ሳሜሊ ሳኦሌስ፥ «ሲያ፤ ቃማ ኦማርስ ጎዳይ ታስ ዮቲዳይሳ ኣኔ ታ ኔስ ዮታይስ» ጊዴስ። ሳኦሊካ፥ «ኤሮ ኣኔ ዮታ» ጊዴስ።
1SA 15:17 ሳሜሊ ኢዛስ፥ «ኔኒ ኔ ቆፋን ጉꬅ ጊዲኮካ ኔ ኢስራኤሌ ኣሳ ካሌꬂዛዴ ጊዳቤኪ? ጎዳይ ኔና ቲይዲ ኢስራኤሌ ቦላ ካዎꬂዴስ።
1SA 15:18 ጎዳይ ኔና፥ ‹ባዳ ሄይታ ናጋራንቻታ ኣማሌቄ ኣሳ ሙሌራ ꬋይሳ፤ ዲፒ ሂስታ ꬋይሳናሼ ጋካናስ ኦላ› ጊዲ ኪቲዴስ።
1SA 15:19 ሂስቲን ኔ ኣይስ ጎዳስ ኣዛዜታቤኪ? ዲኦይሳ ሺሻናስ ዮራታዳ ኣይስ ጎዳ ሲንꬃን ኢታ ኦꬃዲ?» ጊዴስ።
1SA 15:20 ሳኦሊ ኢዛስ፥ «ታኒ ጎዳስ ኣዛዜታዲስ፤ ኢዚ ታና ኪቲዳ ማላ ባዲስ፤ ኣማሌቄ ኣሳ ሙሌራ ꬋይሳዳ ኢስታ ካዎ ኣጋጌ ኤካ ያዲስ።
1SA 15:21 ኦላ ኣሳይ ጊዲኮ ዲኤቲዳይሳፌ ጎዳስ ዱማቲዳይታ ጊዶፌ ሎኦ ሎኦ ዶርሳታኔ ቦራታ ጌልጌላን ጎዳ ኔ ጾሳስ ያርሻናስ ኤኪዳ» ጊዴስ።
1SA 15:22 ሳሜሊ፥ «ጎዳ ቃላስ ኣዛዜቲን ኢዛ ኡፋይሲዛይሳ ማላ ጎዳይ ጹጌቲዛ ካꬃ ያርሾኒኔ ሃራ ያርሾን ኡፋዬቲ ኤሪዜ? ሄኮ ኣዛዜቴꬂ ያርሾፌ፥ ኤዝጊ ሲሲ ꬋርሾ ሃንዳፌ ኣꬌስ።
1SA 15:23 ማካላይ ማሮꬆ ማላ ናጋራ፤ ኣጋ ኢጻይ ኤቃ ጾሳስ ጎይኖ ማላ ኢታ፤ ኔኒ ጎዳ ቃላ ካꬊዳ ጊሻስ ኢዚካ ኔኒ ካዎ ጊዶንታ ማላ ኔና ካꬊዴስ» ጊዴስ።
1SA 15:24 ሄሳፌ ጉዬ ሳኦሊ ሳሜላስ፥ «ታኒ ናጋራ ኦꬃዲስ፤ ጎዳ ኣዛዞኔ ኔ ኢሚዳ ዎጋ ሞራዲስ፤ ታኒ ዴራስ ያዪዳ ጊሻስ ኢስታስ ኣዛዜታዲስ።
1SA 15:25 ሃኢካ ኔኒ ታ ናጋራ ኣቶ ጋና ማላኔ ጎዳስ ጎይናናስ ኔ ታናራ ኢሲፌ ሲማ ባና ማላ ታ ኔና ዎሳይስ» ጊዴስ።
1SA 15:26 ጊዶ ኣቲን ሳሜሊ ኢዛስ፥ «ታ ኔናራ ሲማ ቢኬ፤ ኔኒ ጎዳ ቃላ ካꬋዳሳ፤ ጎዳይካ ኔ ኢስራኤሌ ቦላ ካዎቶንታ ማላ ኔና ካꬊዴስ» ጊዴስ።
1SA 15:27 ሳሜሊ ባና ጉዬ ሲሚሺን ሳኦሊ ኢዛ ኣፋላ ጼራ ኦይኪን ኣፋላዚ ዳኬቲዴስ።
1SA 15:28 ሳሜሊ፥ «ጎዳይ ሃች ኢስራኤሌ ካዎቴꬅ ኔ ኩሼፔ ዳኪዴስ፤ ኔፔ ሎኢዛ ኔ ሾራስ ኣꬂ ኢሚዴስ።
1SA 15:29 ኢስራኤሌ ቦንቾ ጊዲዳ ጎዳይ ዎርዶቴና፤ ሞꬌቴና፤ ጋሶይካ ሞꬌታናስ ኢዚ ኣሴ ጊዴና» ጊዴስ።
1SA 15:30 ሳኦሊ፥ «ታኒ ናጋራ ኦꬃዲስ፤ ጊዶ ኣቲን ታ ዴሬዛ ሃላቃታ ሲንꬃኒኔ ኢስራኤሌ ኣሳ ሲንꬃን ታና ቦንቻርኪ! ጎዳ ኔ ጾሳስ ጎይናናስ ታናራ ኢሲፌ ሲማርኪ!» ጊዴስ።
1SA 15:31 ሄሳ ጊሻስ ሳሜሊ ኢዛራ ኢሲፌ ሲሚዴስ፤ ሳኦሊካ ጎዳስ ጎይኒዴስ።
1SA 15:32 ሄሳፌ ጉዬ ሳሜሊ፥ «ኣማሌቄ ካዎ ኣጋጌ ታስ ሃ ኤሂቴ» ጊዴስ፤ ኣጋጌይ፥ «ቱማፔ ሃይቆይ ሃይሳ ማላ ጫሞ?» ጊ ኮኮሪሼ ዪዴስ።
1SA 15:33 ሳሜሊካ፥ «ኔ ማሻይ ማጫሳታ ዬሎይ ባይንዳ ኣሺዳይሳꬆ ኔ ኣያካ ማጫሳታ ጊዶን ዬሎይ ባይንዳሮ ጊዳና» ጊሼ ኣጋጌ ጌልጌላን ጎዳ ሲንꬃን ቃንጼሬꬂ ዬጊዴስ።
1SA 15:34 ሄሳፌ ጉዬ ሳሜሊ ኤራማ ቢዴስ፤ ሳኦሊ ጊዲኮ ባሶ ፑዴ ጊቢኣ ኬዚዴስ።
1SA 15:35 ሳሜሊ ሳኦሌስ ዬኪኮካ ኢዚ ሃይቃናሼ ጋካናስ ናምኣንꬆ ኢዛ ቤኣናስ ቢቤና፤ ጎዳይ ሳኦሌ ኢስራኤሌ ቦላ ካዎꬂዳ ጊሻስ ሞꬌቲዴስ።
1SA 16:1 ጎዳይ ሳሜላስ፥ «ኢስራኤሌ ቦላ ካዎቲ ዶንታ ማላ ታ ካꬊዳ ሳኦሌስ ኔ ኣዉዴ ጋካናስ ዬካኔ? ቤቴሊሄሜ ዴሬ ኣስ ኢሴዬኮ ታ ኔና ኪታና ጊሻስ ባሼ ካጬን ዛይቴ ኩንꬃ ኤካ ባ፤ ታ ኢዛ ናይታ ጊዶፌ ኢሶይ ካዎ ጊዳና ማላ ዶራዲስ» ጊዴስ።
1SA 16:2 ሳሜሊ ጊዲኮ፥ «ሳኦሊ ሲዪኮ ታና ዎꬋና፤ ሂስቲን ታ ዋና ባና ዳንዳያዚና?» ጊዴስ። ጎዳይ ዛሪዲ፥ «ኢሲ ኡሱ ኤካ ባዳ፥ ‹ጎዳስ ያርሻናስ ያዲስ› ጋ።
1SA 16:3 ያርሾሶሆ ኢሴዬ ጼይጋ፤ ሄሳፌ ጉዬ ኔ ኦꬃናይሳ ታ ኔና ቤሳና፤ ታ ኔስ ዮቲዛዴ ኔ ቲያና» ጊዴስ።
1SA 16:4 ሳሜሊ ጎዳይ ጊዳይሳ ኦꬂዴስ፤ ኢዚ ቤቴሊሄሜ ጋኪዳ ዎዴ ካታማ ጪማቲ ኮኮሪሼ ኢዛራ ጋይታናስ ዪዳ፤ ኢስቲካ ኢዛ፥ «ኔ ሳሮስ ያዲ?» ጊ ኦይቺዳ።
1SA 16:5 ሳሜሊካ ዛሪዲ፥ «ኤ ሳሮሳ፤ ታኒ ጎዳስ ያርሾ ሺሻናስ ያዲስ፤ ኢንቴካ ኢንቴና ጌሺዲ ታናራ ያርሾሶሆ ሃ ዪቴ» ጊዴስ። ሄሳፌ ጉዬ ኢሴዬኔ ኢዛ ናይታ ዱማሲዴስ፤ ያርሾሶሆ ያና ማላካ ጼይጊዴስ።
1SA 16:6 ኢስቲ ሄ ጋኪሺን ሳሜሊ ኤልያቤ ቤኢዲ፥ «ቤኢቴ፤ ቱሙካ ጎዳይ ቲይዳይሲ ጎዳ ሲንꬃን ኤቂዴስ» ጊ ቆፒዴስ።
1SA 16:7 ጊዶ ኣቲን ጎዳይ ሳሜላ፥ «ታኒ ሃይሳ ካꬊዳ ጊሻስ ኔ ኢዛስ ማላ ዎይኮ ጌሳ ጼሎፋ፤ ጎዳይ ኣሲ ጼሊዛ ማላ ጼሌና፤ ኣሲ ካሬ ባጋ ሃኖታ ቤኤስ፤ ጎዳይ ጊዲኮ ዎዚና ጼሌስ» ጊዴስ።
1SA 16:8 ሄሳፌ ጉዬ ኢሴዬይ ኣቢናዳቤ ጼይጊዲ ሳሜላ ሲንꬃራ ኣꬋና ማላ ኦꬂዴስ፤ ጊዶ ኣቲን ሳሜሊ፥ «ጎዳይ ሃይሳካ ዶሪቤና» ጊዴስ።
1SA 16:9 ካሊዲካ ኢሴዬይ ሻማሃ ኤሂዴስ፤ ሳሜሊ፥ «ኢዛካ ጎዳይ ዶሪቤና» ጊዴስ።
1SA 16:10 ኢሴዬይ ባ ላፑን ናይታ ሳሜላ ሲንꬅ ሺሺዴስ፤ ጊዶ ኣቲን ሳሜሊ፥ «ጎዳይ ሃይታንታካ ዶሪቤና» ጊዴስ።
1SA 16:11 ሄሳፌ ጉዬ ሳሜሊ ኢሴዬ፥ «ኔ ናይቲ ሃይታንታ ጻላ?» ጊ ኦይቺዴስ። ኢሴዬይካ፥ «ኡባፌ ካሎዚ ቡሮ ዪቤና፤ ሃኢ ኢዚ ዶርሳታ ሄሚሼ ዴስ» ጊ ዛሪዴስ። ሳሜሊካ፥ «ኣኔ ኪታዳ ኤሂሳ፤ ኢዚ ያናሼ ጋካናስ ኑ ኡቶኮ» ጊዴስ።
1SA 16:12 ሂስቲን ኢሴዬይ ኪቲዲ ኤሂሲዴስ፤ ኢዚ ኣሪሳ፥ ኣይፌራ ሎኢዛ ፑላንቻኔ ማላ ሎኦ ና። ጎዳይ ሳሜላስ፥ «ታኒ ዶሪዳይ ሃይሳ፥ ዴንዳዳ ቲያ» ጊዴስ።
1SA 16:13 ሳሜሊካ ካጬዛን ዲዛ ዛይቴዛ ኤኪዲ ኢዛ ኢሻታ ሲንꬃን ኢዛ ቲይዴስ። ሄ ጋላሳፌ ዶሚዲ ጎዳ ኣያናይ ዳዊቴ ቦላ ኬሂ ዎልቃን ዎꬊዴስ፤ ሳሜሊ ጉዬ ሲሚ ኤራማ ቢዴስ።
1SA 16:14 ጎዳ ኣያናይ ሳኦሌፔ ሃኪዳ ጊሻስ ጎዳፔ ኣዛዜቲዳ ኢታ ኣያናይ ዋዪሲሼ ዴስ።
1SA 16:15 ሳኦሌ ኦሳንቻቲ፥ «ቤኣ፤ ጎዳፔ ኪቴቲዳ ኢታ ኣያናይ ኔና ዋዪሲሼ ዴስ።
1SA 16:16 ሄሳ ጊሻስ ባጋና ሾጪ ዳንዳይዛ ኣስ ኮያና ማላ ኑ ጎዳይ ባ ሲንꬃን ኤቂዛ ኦሳንቻታ ኣዛዞ፤ ሂስቲኮ ጎዳፔ ኣዛዜቲዳ ኢታ ኣያናይ ኔ ቦላ ዪዛ ዎዴ ኔስ ኢዚ ባጋና ሾጫና፤ ኔስካ ሎኦ ጊዳና» ጊዳ።
1SA 16:17 ሄሳ ጊሻስ ሳኦሊ ባ ኣሽካራታ፥ «ባጋና ሎኤꬂ ሾች ዳንዳይዛዴ ታስ ኮዪ ኤሂቴ» ጊዴስ።
1SA 16:18 ኢዛ ኦሳንቻታፔ ኢሶይ፥ «ሎኤꬂ ባጋና ሾች ዳንዳይዛ ቤቴሊሄሜ ዴሬ ኣስ ኢሴዬ ናዛ ቤኣዲስ፤ ኢዚ ቃራኔ ኦላንቻ፥ ኣኬካንቻኔ ኡፋይሲዛ ቃላ ሃሳይዛዴ፤ ጎዳይካ ኢዛራ ዴስ» ጊዴስ።
1SA 16:19 ሄሳፌ ጉዬ ሳኦሊ፥ «ኔ ዶርሳታኮን ዲዛ ኔ ና ዳዊቴ ዬዳ» ጊዲ ኢሴዬኮ ቃስታኔታ ኪቲዴስ።
1SA 16:20 ኢሴዬይ ቡዴና፥ ሉካሞ ኩሜꬃ ዎይኔ ኡሹ ሃሬ ቦላ ጫኒዲ፥ ዴይሻ ላቃ ጉጂ ኦይꬂዲ ባ ና ዳዊቴ ሳኦሌኮ ዬዲዴስ።
1SA 16:21 ዳዊቲ ሳኦሌኮ ዪዲ ኢዛስ ሃጋዞ ዶሚዴስ፤ ሳኦሊካ ኢዛ ኬሂ ዶሲዴስ፤ ኢዚካ ሳኦሌ ጎንዳሌ ቶኪዛዴ ጊዲዴስ።
1SA 16:22 ሄሳፌ ጉዬ ሳኦሊ፥ «ታኒ ዳዊቴ ዶሲዳ ጊሻስ ኢዚ ማታን ዲሼ ሃጋዛና ማላ ታስ ኢማርኪ!» ጊዲ ኢሴዬኮ ኪቲዴስ።
1SA 16:23 ጎዳፔ ኣዛዜቲዲ ኢታ ኣያናይ ሳኦሌ ቦላ ዪዛ ዎዴ ዳዊቲ ባጋና ሾጪሺን ሳኦሌስ ሎኤስ፤ ኢታ ኣያናይካ ኢዛ ቦላፌ ሃኬስ።
1SA 17:1 ፊሊስጼሜቲ ባ ኦላንቻታ ኦላስ ዩሁዳ ቢታን ሶኮን ሺሺ ዎꬂዳ፤ ኢስቲካ ኢስኮቴፔኔ ኣዜቄፔ ጊዶን ዲዛ ኤፍሲ-ዴሚሜን ዱንካኒ ኡቲዳ።
1SA 17:2 ሳኦሊኔ ኢስራኤሌቲ ሺቂዲ ኤላ ዙሌን ዱንካኒዳ፤ ፊሊስጼሜታራ ኦሌታናስ ሶሆ ሶሆ ኦይኪዳ።
1SA 17:3 ኢሲ ባጋ ዙምቡላዛ ፊሊስጼሜቲ፥ ሃንኮ ባጋ ዙምቡላዛ ኢስራኤሌቲ ኦይኪዳ፤ ኢስታፌ ጊዶን ዙሌይ ዴስ።
1SA 17:4 ጌቴፔ ዪዳ ኢዛስ ጌሳይ ኡሱፑን ዋꬋ ጊዲዛ ጎልያዴ ጌቴቲዛ ኢሲ ኦላ ቃራዚ ፊሊስጼሜታ ጉታፔ ኬዚዴስ።
1SA 17:5 ኢዚ ጻርቂማላፔ ኦሴቲዳ ቆቤ ሁኤን ዎꬂዴስ፤ 5,000 ሳቂሌ ጊዲ ዴጺዛ ጻርቂማላፔ ኦሴቲዳ ጹሩሬ ማይኢዴስ።
1SA 17:6 ባ ሱሌዛን ጻርቂማላፔ ኦሴቲዳ ጋምባሌ ዎꬂዲ ባ ሃሼን ጻርቂማላፔ ኦሴቲዳ ጺንቃ ቶራ ኦይኪዴስ።
1SA 17:7 ኢዛ ቶራስ ቶማይ ዎንዲራሼ ማላ ኦርዴ፤ ኢዛስ ቶራ ኣይፌዚ ላፑን ኪሎ ኬና ዴጼስ፤ ኢዛ ኦላ ሚሽ ቶኪዛይሲ ኢዛፔ ሲንꬃን ሲንꬃን ቤስ።
1SA 17:8 ጎልያዴይ ያቻን ኤቂዳ ኢስራኤሌ ኣሳ ቦላ፥ «ኢንቴ ኦላስ ሳልፊ ኬዚዳይ ኣዛሴ? ታኒ ፊሊስጼሜ ኣስ ጊዲሺን ኢንቴ ሳኦሌ ኣይሌታ ጊዴኬቲ? ኣኔ ኢንቴ ጊዶፌ ኢሳዴ ዶሪቴ፤ ኢዚካ ኣኔ ሃ ታ ዲዛሶ ዎꬎ።
1SA 17:9 ኢዚ ታናራ ኦሌታናሲኔ ታና ዎꬋናስ ዳንዳይኮ ኑኒ ኢንቴስ ኣይሌታ ጊዳና፤ ጊዶ ኣቲን ታኒ ኢዛ ጾኒዛ ጊዲኮኔ ኢዛ ዎꬊዛ ጊዲኮ ኢንቴ ኑስ ኣይሌታ ጊዲዲ ሃሬታና» ጊ ናጪዴስ።
1SA 17:10 ሂስቲዲ ፊሊስጼሜ ዴሬ ኣዴዚ፥ «ሃች ታኒ ኢስራኤሌ ኦላንቻታራ ኤቄታና፤ ኣኔ ኦሌታና ኣስ ኢሚቴ!» ጊዴስ።
1SA 17:11 ሳኦሊኔ ኢስራኤሌ ኣሳይ ኡባይ ሃ ፊሊስጼሜ ኣዴዚ ሃሳይዳ ቃላ ሲዪዲ ኬሂ ባቢዳኔ ዳጋሚዳ።
1SA 17:12 ዳዊቲ ዩሁዳ ቢታን ቤቴሊሄሜን ዲዛ ኤፍራታ ዴሬ ኣስ ኢሴዬ ና፤ ኢሴዬስ ኦስፑን ኣቱማ ናይቲ ዴቴስ፤ ኢዚ ሳኦሌ ካዎቴꬃ ዎዴ ጪማኔ ዎዴይ ኬሂ ቢዳ ኣሳ።
1SA 17:13 ኢሴዬስ ባይራ ና ሄꬓቲ ሳኦሌ ካሊዲ ኦላስ ቢዳ፤ ባይራዚ ኤልያቤ፥ ናምኣንꬆዚ ኣቢናዳቤ፥ ሄꬓንꬆዚ ሻማሃ።
1SA 17:14 ዳዊቲ ኢስታ ኡባፌ ካሎ፤ ኢዛስ ባይራ ኢሻቲ ሄꬓቲ ሳኦሌ ካሊዲ ኦላስ ቢዳ።
1SA 17:15 ዳዊቲ ጊዲኮ ባ ኣዋ ዶርስ ሄማናስ ሳኦሌ ማታፔ ቤቴሊሄሜ ሲሜሬቲሼ ዴስ።
1SA 17:16 ሄ ፊሊስጼሜ ኣዴዚ 40 ጋላስ ኩሜꬅ ኦማርሲኔ ማላዶ ኬዚ ቤቲ ቤቲ ሲሜስ።
1SA 17:17 ሄ ዎዴ ኢሴዬይ ባ ናዛ ዳዊቴ፥ «ሃይሳ ሃላሄቲዳ ታሙ ኪሎ ቲያኔ ታሙ ሶሎ ኔ ኢሻታስ ኢስቲ ኦላስ ዱንካኒ ኡቲዳሶ ኤሌ ጋꬃ።
1SA 17:18 ሃይታ ታሙ ላሉካ ፒላ ኢስታ ኣዛዚዛይሳስ ኢሲፌ ኤካ ባ፤ ኔ ኢሻቲ ዋኒ ዲዛኮ ቤኣዳ ኢስቲ ሎኦ ዲዛይሳ ኤሪሲዛ ማላታ ታስ ኤካ ያ።
1SA 17:19 ኢስቲካ ሳኦሌራኔ ኢስራኤሌ ኣሳ ኡባራ ጊዲዲ ኤላ ዙሌን ፊሊስጼሜታራ ኦሌቲሼ ዴቴስ» ጊዴስ።
1SA 17:20 ዳዊቲ ዎንቴꬃ ጋላስ ማላዶራ ዶርሳታ ሄሚዛ ኣሳስ ኣጊዲ ኢሴዬይ ኢዛ ኣዛዚዳ ማላ ሺንቄዛ ኤኪ ቢዴስ። ኦላንቻቲ ኦሌታናስ ጬቄቲሼ ሶሆ ሶሆ ኦይኪሺን ኢስቲ ዱንካኒ ኡቲዳሶ ጋኪዴስ።
1SA 17:21 ኢስራኤሌቲኔ ፊሊስጼሜቲ ሶሆ ሶሆ ኦይኪዲ ቲራን ጋይታናስ ዛማዲ ኡቲ ናጌቴስ።
1SA 17:22 ዳዊቲ ባ ኤፊዳ ሺንቄዛ ናጊዛይሳ ማታን ዎꬂዲ ኣሳይ ኦሌቲዛሶ ዎጺዴስ፤ ባ ኢሻታ ዴሚዲ ኢስታ ሎኤቴꬅ ኦይቺዴስ።
1SA 17:23 ኢዚ ኢስታራ ሃሳያን ዲሺን ጌቴፔ ዪዳ ፊሊስጼሜ ኦላ ቃራ ጎልያዴይ ኦላ ኣሳ ጊዶፌ ኬዚዲ ካሴ ባ ሎሲዳ ማላ ባልቡቂሺን ዳዊቲ ሲዪዴስ።
1SA 17:24 ኢስራኤሌ ኣሳይ ኡባይ ኣዴዛ ቤኢዳ ማላ ኬሂ ባቢዲ ኢዛ ሲንꬃፌ ባቃቲዴስ።
1SA 17:25 ኢስራኤሌ ኣሳይ ባንታ ጊዶን ኢሶይ ኢሳራ፥ «ሃይሲ ኡባ ጋላስ ኢስራኤሌራ ኤቄቲዛይሳ ቤኤቲ? ሃ ኣዴዛ ዎꬊዳዴስ ካዎይ ዳሮ ኣቆታ ኢማና፤ ባ ናዮካ ኢዛስ ማቾ ኢማና፤ ኢዛ ኣዋ ኬꬃካ ኢስራኤሌን ጊራ ቃንጺሴና» ጊ ሃሳዬቴቴስ።
1SA 17:26 ዳዊቲ ባ ኣቻን ኤቂዳ ኣሳታ፥ «ኣኔ ሃይሳ ፊሊስጼሜ ኣዴዛ ዎꬊዲ ሃይሳ ሃ ካዉሻቴꬃ ኢስራኤሌ ቦላፌ ዲጊዳዴስ ኣዚ ኦሴታኔ? ቃሴካ ዴኦ ጎዳ ኦላንቻታራ ኤቄታናስ ሃይሲ ቃጻራ ቃንጼቶንታ ፊሊስጼሜዚ ኢዚ ኦኔ?» ጊ ኦይቺዴስ።
1SA 17:27 ኢስቲካ ኢዛስ፥ «ኢዛ ዎꬋና ኣሳስ ኦሴታናይ ሃይሳ» ጊዲ ካሴ ሃሳይዳይሳ ዛሪ ዮቲዳ።
1SA 17:28 ኢዛስ ባይራ ኢሻ ኤልያቤይ ዳዊቲ ኣሳታራ ሃሳይሺን ሲዪዲ፥ «ኣይስ ሃ ዎꬋዲ? ሄ ኣማርዳ ዶርሳታካ ባዞን ኦናስ ኣጋ ያዲ? ኔ ኦቶሮቴꬃኔ ኔ ዎዚና ኢታቴꬃ ታ ኤራይስ፤ ኔ ዪዳይ ኦላ ቤያናስ ጻላ» ጊዲ ኬሂ ሃንቄቲዴስ።
1SA 17:29 ዳዊቲ፥ «ሂስቲን ታ ኣይ ኦꬃዲና? ኦይቻናስ ዳንዳይኪና?» ጊ ዛሪዴስ።
1SA 17:30 ሄሳፌ ጉዬ ሃራ ኣሳኮ ሲሚዲ ሲንꬃን ኦይቾ ኦይሻ ኦይቺዴስ፤ ኣሳቲካ ሲንꬃ ኣሳቲ ዛሪዳ ማላ ኢዛስ ዛሪዳ።
1SA 17:31 ዳዊቲ ሃሳይዳ ዮኦይ ሳኦሌ ሃይꬃን ዎꬊዴስ፤ ሳኦሊካ ኪቲ ጼይጊዴስ።
1SA 17:32 ዳዊቲካ ሳኦሌ፥ «ሃይሳ ፊሊስጼሜ ኣዴዛፔ ዴንዲዳይሳን ኦና ዎዚናይካ ዳጋሞፎ፤ ኔ ኣይሌዚ ቢዲ ኦላና» ጊዴስ።
1SA 17:33 ሳኦሊ ዛሪዲ፥ «ኔኒ ቡሮ ኢሲ ኣይፌ ና፤ ኣዴዚ ጊዲኮ ናቴቴꬃፌ ዶሚዲ ኦላራ ሜዜቲዳ ጊሻስ ኬዛዳ ሃ ፊሊስጼሜ ኣዴዛራ ኤቄታና ዳንዳያካ» ጊዴስ።
1SA 17:34 ጊዶ ኣቲን ዳዊቲ ሳኦሌስ፥ «ታኒ ኔ ኣይሌይ ታ ኣዋ ዶርሳታ ሄሚዛ ዎዴ ጋሞይ ዎይኮ ዛርዶይ ዪዲ ዉዴ ሜሃ ጊዶፌ ኢሲ ዶርስ ኤኪ ቢሺን፥
1SA 17:35 ታኒ ካላ ባዳ ኢዛ ሾጫዳ ዶናፔ ዬጊሳይስ፤ ኢዚ ታ ቦላ ሲሚሺን ኢዛ ሲጺናꬃ ጩላ ኦይካዳ ሾጫ ዎꬋይስ።
1SA 17:36 ታኒ ኔ ኣይሌይ ጋሞኔ ዛርዶ ዎꬋዲስ፤ ሃይሲ ቃጻራ ቃንጼቶንታ ፊሊስጼሜዚ ዴኦ ጾሳ ኦላንቻታራ ኤቄቲዳ ጊሻስ ኢዛ ዉርሴꬂ ኢስታፌ ኢሳ ማላ ጊዳና።
1SA 17:37 ታና ጋሞፌኔ ዛርዶ ኣቻፌ ኣሺዳ ጎዳይ ሃኢካ ሃ ፊሊስጼሜ ኣዴዛ ኩሼፔ ኣሻና» ጊዴስ፤ ሳኦሊካ ዛሪዲ፥ «ባ፥ ጎዳይ ኔናራ ጊዶ» ጊዴስ።
1SA 17:38 ሄሳፌ ጉዬ ሳኦሊ ባ ኦላ ማይኦ ዳዊቴ ማይዚዴስ፤ ቲራን ማይኢዛ ጹሩሬካ ማይዚዴስ፤ ጻርቂማላፔ ኦሴቲዳ ቆቤ ኢዛ ሁኤን ዎꬂዴስ።
1SA 17:39 ዳዊቲ ሄሳ ማላ ኦላ ማይኦ ማይኢ ኤሮንታ ጊሻስ ጊꬃ ማሻ ኦላ ማይኦዛ ቦላ ዳንጪዲ ሄሜታናስ ፓጪ ጼሊዴስ። ኢዚካ ሳኦሌስ፥ «ሃይሳፌ ካሴ ሃይሳ ማላ ሎሴይ ባይንዳ ጊሻስ ሃይሳꬆ ሃናዳ ባናስ ዳንዳይኬ» ጊዴስ፤ ሄሳ ጊሻስ ኦላ ማይኦታ ኡባ ኬሲ ዬጊዴስ።
1SA 17:40 ሄሳፌ ጉዬ ባ ጉፌዛ ኦይኪዲ ኢቻሽ ሙሉሙቄ ሹቻታ ካንቼፌ ዶሪ ኤኪዲ ባ ሄንꬃ ኮሮጆን ዬጊዴስ፤ ሂስቲዲ ባ ያንባርሻ ኦይኪዲ ፊሊስጼሜ ኣዴዛኮ ሺቂዴስ።
1SA 17:41 ፊሊስጼሜ ኣዴዚ ባ ጎንዳሌ ቶኪዛይሳ ሲንꬄ ኣꬂዲ ዳዊቴኮ ማቲ ማቲ ቢዴስ።
1SA 17:42 ኢዚ ዳዊቴ ቲሺ ሂስቲ ጼሊሺን ካይሻ፥ ማላ ሎኦኔ ቄሪ ኢሲ ኣይፌ ና ጊዲዳ ጊሻስ ኢዛ ካꬊዴስ።
1SA 17:43 ፊሊስጼሜ ኣዴዚ ዳዊቴ፥ «ላ፥ ኔኒ ጉፌ ኤካዳ ታ ቦላ ያናስ ታ ኔስ ካኔ?» ጊዲ ባ ኤቃ ጾሳ ሱንꬃን ቃንጊዴስ።
1SA 17:44 ቃሴካ፥ «ኣኔ ሃ ታኮ ያ! ኔ ኣሾ ታ ሳሎ ካፎታሲኔ ዶኣታስ ኣꬃ ኢማና» ጊዴስ።
1SA 17:45 ዳዊቲ ፊሊስጼሜ ኣዴዛስ፥ «ኔኒ ጊꬃ ማሻ፥ ቶራኔ ጺንቃ ቶራ ኤካዳ ታ ቦላ ያሳ፤ ታኒ ጊዲኮ ኔ ኢዛራ ኤቄቲዳ ኢስራኤሌ ኦላንቻታ ጾሳን፥ ኡባ ዳንዳይዛ ጎዳ ሱንꬃን ኔ ቦላ ባይስ።
1SA 17:46 ሃች ጎዳይ ኔና ታ ኩሼን ኣꬂ ኢማና፤ ታ ኔና ሾጫ ዬጋና፤ ታ ኔ ቆꬌ ቃንጻ ዬጋና፤ ሃች ታኒ ፊሊስጼሜ ኦላንቻታ ኣሃ ሳሎ ካፎታሲኔ ሳኣ ዶኣታስ ኣꬃ ኢማና፤ ኣላሜ ኡባይ ኢስራኤሌን ጾሲ ዲዛይሳ ኤራና።
1SA 17:47 ሃይሳን ሺቂዳ ኡባይ ጎዳይ ኣሺዛይ ማሻን ዎይኮ ቶራን ጊዶንታይሳ ኤራና፤ ኦሊዛይ ጎዳ ጊዲዳ ጊሻስ ኢዚ ኢንቴና ኡባታካ ኑ ኩሼን ኣꬂ ኢማና» ጊዴስ።
1SA 17:48 ፊሊስጼሜ ኣዴዚ ኢዛ ሾጫናስ ሺቂን ዳዊቲ ኢዛራ ኤቄታናስ ጌዴ ኦላ ዴምባ ዎጺ ጌሊዴስ።
1SA 17:49 ዳዊቲ ባ ኩሼ ኮሮጆን ዬዲዲ ኢሲ ሹች ኤኪዲ ꬋይቂዴስ፤ ፊሊስጼሜዛስ ኮንኬን ዬጊዴስ፤ ሹቻዚ ኢዛ ኮንኬዛ ቶርጲ ጌሊዴስ፤ ፊሊስጼሜ ኣዴዚካ ሲንꬃ ጉꬅ ኩንዲዴስ።
1SA 17:50 ሄሳꬆ ሂስቲዲ ዳዊቲ ፊሊስጼሜ ኣዴዛ ሹቻኒኔ ያንባርሻን ጫዲ ዎꬊ ጾኒዴስ።
1SA 17:51 ዳዊቲ ዎጺ ቢዲ ኣዴዛ ቦላ ኬዚ ኤቂዴስ፤ ሄሳፌ ጉዬ ፊሊስጼሜዛ ማሻ ኮሆዛፔ ሾዲ ኤኪዲ ኢዛ ዎꬊዲ ኢዛ ቆꬌካ ማሻን ቃንጺዴስ ፤ ፊሊስጼሜ ኣሳይ ኢስታ ኦላ ቃራይ ሃይቂዳይሳ ቤኢዲ ባቃቲዳ።
1SA 17:52 ሄሳፌ ጉዬ ኢስራኤሌ ኣሳይኔ ዩሁዳ ኣሳይ ዴንዲ ማጉሊሼ ጌቴ ፔንጌፌ ዴንꬂዲ ኣቃሮኔ ፔንጌ ጋካናስ ዬዴꬂዳ፤ ፊሊስጼሜታ ኣሃይ ሻኢራይሜፔ ቢዲ ጌቴ ጋካናስ፥ ሄፔካ ቢዲ ኣቃሮኔ ጋካናስ ዲዛ ኦጌ ቦላ ኩንዲዴስ።
1SA 17:53 ኢስራኤሌ ኣሳይ ፊሊስጼሜታ ዬዴꬂ ሲሚዲ ኢስታ ጉታን ዲዛ ሚሽ ኡባ ቦንቂዴስ።
1SA 17:54 ዳዊቲ ፊሊስጼሜ ኣዴዛ ሁኤ ዬሩሳላሜ ኤኪ ዪዴስ፤ ጊዶ ኣቲን ፊሊስጼሜታ ኦላ ሚሻታ ባ ዱንካኔ ጊዶን ዎꬂዴስ።
1SA 17:55 ዳዊቲ ፊሊስጼሜ ኣዴዛራ ኤቄታናስ ቢዛ ዎዴ ሳኦሊ ቤኢዲ ባ ኦላንቻታ ኣዛዚዛ ኣቢኔሬ፥ «ኣቢኔሬ፥ ሃይሲ ናዚ ኦና ና?» ጊ ኦይቺዴስ። ኣቢኔሪ፥ «ካዎ፥ ኔ ኣሾ፤ ታ ኤሪኬ» ጊ ዛሪዴስ።
1SA 17:56 ካዎዚ፥ «ሃ ናቴꬃ ናዚ ኦና ናኮ ካሌታ ጋካ» ጊዴስ።
1SA 17:57 ዳዊቲ ፊሊስጼሜ ኣዴዛ ዎꬊ ሲሚዳ ማላ ኣቢኔሪ ኢዛ ኤኪዲ ካዎዛ ሲንꬅ ሺሺዴስ። ሄ ዎዴ ዳዊቲ ጎልያዴ ሁኤዛ ባ ኩሼን ኦይኪ ኡቲዴስ።
1SA 17:58 ሳኦሊ ኢዛ፥ «ሃይሶ ኔ ኦና ና?» ጊ ኦይቺዴስ። ዳዊቲ፥ «ታኒ ኔ ኣይሌ ቤቴሊሄሜ ዴሬ ኣስ ኢሴዬ ና» ጊዴስ።
1SA 18:1 ዳዊቲ ሳኦሌራ ሃሳዪ ጊጊዳ ማላ ዮናታኔይ ዳዊቴስ ሼምፖ ላጌ ጊዲዴስ፤ ባና ማላ ኢዛ ሲቂዴስ።
1SA 18:2 ሄ ጋላሳፌ ዶሚዲ ሳኦሊ ዳዊቴ ባናራ ዎꬂዴስ፤ ኢዚ ባ ኣዋ ሶ ቦንታ ማላ ዲጊዴስ።
1SA 18:3 ዮናታኔይ ኢዛ ዎዚናፔ ሲቂዳ ጊሻስ ዳዊቴራ ጫቄቲዴስ።
1SA 18:4 ዮናታኔይ ባ ማይኢዳ ካባ ኬሲዲ ባ ኦላ ማይኦራ፥ ባ ጊꬃ ማሻ፥ ባ ዎንዳፌዛኔ ባ ዳንጮዛ ዳዊቴስ ኢሚዴስ።
1SA 18:5 ሳኦሊ ኢዛ ኪቲዛሶ ኣዋካ ጊዲን ዳዊቲ ባ ኪቴቲዳይሳ ቤሲዛ ማላ ፖሊዛ ጊሻስ ባ ኦላንቻታ ቦላ ኢዛ ሹሚዴስ፤ ሄሲ ኡባ ዴራኔ ሳኦሌ ኦላ ሹሜታ ኡፋይሲዴስ።
1SA 18:6 ዳዊቲ ፊሊስጼሜ ኣዴዛ ዎꬊዳፔ ጉዬ ኣሳይ ባሶ ባሶ ሲሚሺን ማጫሳቲ ካራቤኔ ማሲንቆ ኤኪዲ ዬጺሼ፥ ጉፒሼኔ ኢሊሊሼ ካዎ ሳኦሌ ሞካናስ ኢስራኤሌ ካታማታፔ ኬዚዳ።
1SA 18:7 ማጫሳቲ፥ «ሳኦሊ ሺ ዎꬊዴስ! ዳዊቲ ጊዲኮ ታሙ ሺ ዎꬊዴስ» ጊዲ ሶሬን ዬጺዳ።
1SA 18:8 ሄሲ ኢዛ ኡፋይሶንታ ኣጊዳ ጊሻስ ሳኦሊ ኬሂ ሃንቄቲዴስ፤ ኢዚካ፥ «ኢስቲ ዳዊቴስ ታሙ ሺ፥ ታስ ኢሲ ሺ ጻላ ጊዳ! ሂስቲን ኢዛስ ካዎቴꬃፌ ኣቲን ሃራይ ኣዜ ኣቲዳይ!» ጊዴስ።
1SA 18:9 ሳኦሊ ሄ ጋላሳፌ ዶሚዲ ዳዊቴ ኢታ ኣይፌን ጼሎ ኦይኪዴስ።
1SA 18:10 ዎንቴꬃ ጋላስ ጾሳፌ ኣዛዜቲዳ ኢታ ኣያናይ ሳኦሌ ቦላ ዎꬊዴስ፤ ሄ ዎዴ ዳዊቲ ካሴ ኢዚ ኡባ ዎዴ ኦꬂዛይሳ ማላ ባጋና ሾጪሺን ሳኦሊ ባሶን ኡቲዲ ጎሻ ማላ ሃሳይሼ ቶራ ኦይኪ ዴስ።
1SA 18:11 ኢዚካ፥ «ዳዊቴ ጎዳራ ጋꬃ ኦይሴꬃና» ጊ ቆፒዲ ቶራዛ ኢዛ ቦላ ጾንጊዴስ፤ ዳዊቲ ጊዲኮ ናምኡቶ ኢዛ ሲንꬃፌ ሼርኢ ጊዴስ።
1SA 18:12 ጎዳይ ኢዛፔ ሻኬቲዲ ዳዊቴራ ጊዲዳ ጊሻስ ሳኦሊ ዳዊቴስ ባቢዴስ።
1SA 18:13 ሄሳ ጊሻስ ዳዊቴ ባ ኣቻፌ ሃሲዲ ሻላቃቴꬃን ሹሚዴስ። ዳዊቲካ ኦላ ኣሳ ካሌꬂዲ ኢስታ ሲንꬃን ኬዜሲኔ ጌሌስ።
1SA 18:14 ጎዳይ ኢዛራ ዲዛ ጊሻስ ኢዚ ኦꬂዛ ሚሺ ኡባይ ሃኔስ።
1SA 18:15 ሳኦሊካ ዳዊቴስ ኡባ ሚሺ ሃኒዛይሳ ቤኢዳፔ ጉዬ ኢዛስ ባቢዴስ።
1SA 18:16 ኩሜꬃ ኢስራኤሌይኔ ዩሁዳይ ጊዲኮ ዳዊቴ ዶሲዳ፤ ኢስታ ሲንꬃን ኬዚዲ፥ ጌሊዲ ካሌꬂዛይ ኢዛ።
1SA 18:17 ሳኦሊ ዳዊቴ፥ «ኔኒ ኦላ ሚና ኦሌቲኮ ታ ና ባይራዮ ሜሮቦ ታ ኔስ ማቾ ኢማና» ጊዴስ፤ ሳኦሊ ባ ዎዚናን፥ «ፊሊስጼሜ ኣሳይ ባ ኩሼ ኢዛ ቦላ ዎꬆ ኣቲን ታኒ ኢዛ ቦቺኬ» ጊ ዎꬂዴስ።
1SA 18:18 ዳዊቲ ጊዲኮ ሳኦሌስ፥ «ካዎ ቦሎ ጊዳናስ ታ ኦኔ? ታሶ ኣሳይ ጊዲን ታ ኣዋ ኬꬂ ኢስራኤሌ ኣሳ ኣቻን ኣዜ?» ጊዴስ።
1SA 18:19 ጊዶ ኣቲን ሳኦሌ ና ሜሮባ ዳዊቴ ጌላና ዎዴይ ጋኪሺን ማሆላቴ ዴሬ ኣስ ኣዲርኤሌስ ኢሜታዱስ።
1SA 18:20 ሄ ዎዴ ሳኦሌ ና ሚልኮላ ዳዊቴ ዶሳዱስ፤ ሳኦሊካ ሄሳ ሲዪዲ ኡፋዬቲዴስ።
1SA 18:21 ሳኦሊ ባ ዎዚናራ፥ «ኢዛስ ዎጺማዴ ጊዳና ማላ፥ ኢዚ ፊሊስጼሜታ ኩሼን ኣꬊ ኢሜቲዲ ꬋያና ማላ ታ ኢዞ ኢዛስ ኢማና» ጊ ቆፒዴስ። ሄሳ ጊሻስ ሳኦሊ ዳዊቴ፥ «ሄኮ ኔኒ ታናራ ቦሎታናስ ቃሴካ ቃዳ ዴማዳሳ» ጊዴስ።
1SA 18:22 ሄሳፌ ጉዬ ሳኦሊ ባ ሹሜታስ፥ «ዳዊቴስ፥ ‹ሄኮ ካዎዚ ኔናን ኡፋዬቲዴስ፤ ኢዛ ሹሜቲካ ኔና ዶሴቴስ፤ ሄሳ ጊሻስ ኔ ኢዛስ ቦሎ ጊዳ› ጊዲ ኢዛስ ጹሪቴ» ጊ ኣዛዚዴስ።
1SA 18:23 ኢስቲ ሄሳካ ዳዊቴስ ዛሪ ዛሪ ዮቲዳ፤ ዳዊቲ ጊዲኮ፥ «ካዎራ ቦሎቴꬅ ኢንቴ ላፋ ሚሻ ማላ ቆዲዴቲ? ታኒ ኬሃ ማንቆኔ ኣሳ ማታን ዳሮ ኤሬቶንታ ኣሳ» ጊዴስ።
1SA 18:24 ሳኦሌ ሹሜቲ ዳዊቲ ጊዳይሳ ኢዛስ ዮቲን፥
1SA 18:25 ሳኦሊ፥ «ዳዊቴ፥ ‹ካዎዛ ናዪ ጊሻስ ኔፔ ጪሎሻ ኮይዛይ ባ ሞርኬታ ቦላ ሃሎ ኬሳናስ ፊሊስጼሜ ኣሳፔ ጼቱ ኣሳ ኣቱማቴꬅ ቃንጻ ኤሃዳ ኢማናይሳፌ ኣቲን ሃራ ኮዬና› ጊዲ ዮቲቴ» ጊዴስ። ሳኦሊ ሄሳ ቆፒዳይ ዳዊቲ ቢዲ ፊሊስጼሜታ ኩሼን ኩንዳና ማላ ኮይዛ ጊሻሳ።
1SA 18:26 ካዎዛ ሹሜቲ ሄሳ ዳዊቴስ ዮቲን ካዎራ ቦሎቴꬂ ኢዛ ኡፋይሲዴስ። ሄሳ ጊሻስ ባሪዳ ባሬይ ኣꬎንታ ዲሺን፥
1SA 18:27 ዳዊቲኔ ኢዛራ ዲዛ ኣሳቲ ቢዲ ፊሊስጼሜ ኣሳፔ ናምኡ ጼት ዎꬊዳ፤ ካዎዛስ ቦሎ ጊዳናስ ቃንጺ ኤሂዳ ኣቱማቴꬃ ኢስታ ቆዳ ማላ ካዎዛስ ኢሚዴስ፤ ሄሳፌ ጉዬ ሳኦሊ ባ ና ሚልኮሎ ዳዊቴስ ኢሚዴስ።
1SA 18:28 ሳኦሊ ጎዳይ ዳዊቴራ ዲዛይሳኔ ኢዛ ና ሚልኮላ ዳዊቴ ሲቂዳይሳ ኤሪዲ፥
1SA 18:29 ሳኦሊ ካሴፔ ኣꬂ ባቢዴስ፤ ሃይቃናሼ ጋካናስ ኢዛስ ሞርኬ ጊዲዴስ።
1SA 18:30 ፊሊስጼሜ ኦላ ጋዳዋቲ ካሴ ኬዚዛ ማላ ኦላስ ኬዜቴስ፤ ዳዊቲ ኣቲዳ ሳኦሌ ኦላ ጋዳዋታፔ ቦላራ ጾኖ ዴሚዴስ፤ ሄሳ ጊሻስ ኢዛ ሱንꬂ ኬሂ ኤሬቲዴስ።
1SA 19:1 ሳኦሊ ዳዊቴ ዎꬋና ማላ ባ ና ዮናታኔሲኔ ባ ሹሜታስ ዮቲዴስ፤ ዮናታኔይ ጊዲኮ ዳዊቴ ኬሂ ሲቄስ፤
1SA 19:2 «ታ ኣዋ ሳኦሊ ኔና ዎꬋናስ ኦጌ ኮሻን ዴስ፤ ኔ ዎንቶ ማላዶ ቆቴታ ኣታናሶ ባ፤ ሄንካ ታካሻ።
1SA 19:3 ታኒካ ኬዛዳ ኔኒ ዲዛ ጋዴን ታ ኣዋ ኣቻን ኤቃና፤ ኔ ጊሻስ ታ ኢዛራ ሃሳያና፤ ኢዛ ቆፋ ኤራዳ ኔስ ዮታና» ጊዴስ።
1SA 19:4 ዮናታኔይ ባ ኣዋ ሳኦሌስ፥ «ካዎይ ባ ኦሳንቻ ዳዊቴ ቦላ ኢታ ሚሽ ኦꬆፎ፤ ኢዚ ኔና ቆሂቤና፤ ኢዚ ኦꬂዳይሲ ኔና ዳሮ ጎኢዛ ሚሻ።
1SA 19:5 ዳዊቲ ፊሊስጼሜ ኣዴዛ ባ ሼምፖ ባይዚዲ ዎꬊዴስ፤ ጎዳይ ኩሜꬃ ኢስራኤሌስ ጊታ ጾኖ ኢሚዴስ፤ ኔካ ሄሳ ቤኣዳ ኡፋዬታዳሳ። ሂስቲን ኔ ኢዛ ጮ ሃዳ ዎꬋናስ ዳዊቴ ማላ ጌሻ ኣሳ ቦላ ኣይስ ቆሆ ኦꬃይ?» ጊዲ ዳዊቴ ጊሻስ ሎኤቴꬂ ዮቲዴስ።
1SA 19:6 ሳኦሊ ዮናታኔይ ጊዛይሳ ኤዝጊ ሲዪዳፔ ጉዬ፥ «ዴኦ ጎዳይ ቤኢን፥ ዳዊቲ ኣሳ ኩሼን ሃይቄና» ጊ ጫቂዴስ።
1SA 19:7 ሄሳ ጊሻስ ዮናታኔይ ዳዊቴ ጼይጊዲ ሃሳዬቲዳ ዮኦታ ኡባ ኢዛስ ዮቲዴስ፤ ኢዛ ሳኦሌኮ ኤሂዴስ፤ ዳዊቲ ካሴይሳꬆ ኢዛ ሲንꬃን ኤቂዴስ።
1SA 19:8 ቃሴካ ሃራ ኦላይ ዴንዲዴስ፤ ዳዊቲ ፊሊስጼሜ ኣሳ ኦሊዴስ፤ ኢስቲ ኢዛ ሲንꬃፌ ባቃታናሼ ጋካናስ ኬሂ ሾጪዴስ።
1SA 19:9 ጊዶ ኣቲን ሳኦሊ ቶራ ኦይኪዲ ባሶን ዲሺን ጎዳፔ ኢታ ኣያናይ ኢዛ ቦላ ዎꬊዴስ፤ ሄ ዎዴ ዳዊቲ ባ ዲꬅ ዲጼስ፤
1SA 19:10 ሳኦሊ ኢዛ ጎዳራ ጋꬂ ኦይሴꬃና ጊዲ ባ ቶራ ኢዛ ቦላ ጾንጊዴስ፤ ጊዶ ኣቲን ዳዊቲ ሼርኢ ጊን ሳኦሊ ጾንጊዳ ቶራይ ጎዳን ኤቂዴስ፤ ሄ ጋላሳ ኦማርስ ዳዊቲ ኢዛፔ ኬሲ ኤኪ ኣቲዴስ።
1SA 19:11 ሳኦሊ ዳዊቴ ኬꬅ ዩዪ ኣꬊዲ ኢዛ ዎꬋና ኣሳታ ኪቲዴስ፤ ዳዊቴ ማቻ ሚልኮላ ጊዲኮ፥ «ኔኒ ኔ ሼምፖ ኣሻናስ ባቃቶንታ ኣጊኮ ዎንቶ ሃይቃሳ» ጋዳ ሚንꬃ ዮታዱስ።
1SA 19:12 ሚልኮላ ዳዊቴ ማስኮቴራ ኬሳ ዬዳዱስ፤ ኢዚካ ኬሲ ኤኪ ኣቲዴስ።
1SA 19:13 ሄሳፌ ጉዬ ሚልኮላ ኤቃ ሚስሌ ኤካዳ ኢዛ ሂጻ ቦላ ኢሺሳዱስ፤ ሁኤሶራ ዴይሻ ኢስኬ ቦርኮꬅ ዎꬃዱስ፤ ማይኦራካ ካማዱስ።
1SA 19:14 ሳኦሊ ዳዊቴ ኦይካና ኣሳታ ኪቲ ዬዲን ሚልኮላ፥ «ኢዚ ሳኬቴስ» ጋዱስ።
1SA 19:15 ሳኦሊ ኣሳቲ ዳዊቴ ቢዲ ቤኣና ማላ ዛሪ ዬዲዴስ፤ ሳኦሊ፥ «ታ ኢዛ ዎꬋና ማላ ሂጻራ ኢዛ ታስ ሃ ኤሂቴ» ጊዴስ።
1SA 19:16 ኪቴቲዳ ኣሳይ ኢዛኮ ቢ ጌሊሺን ኤቃ ሚስሌይ ኢዛ ሂጻ ቦላ ኢቺን ሁኤሶራ ዴይሻ ኢስኬ ቦርኮꬂ ዴስ።
1SA 19:17 ሳኦሊ ሚሊኮሎ፥ «ኔ ሂስታ ባሌꬃዳ ታ ሞርኬይ ታፔ ኬሲ ኤካና ማላ ኣዛስ ኦꬃዲ?» ጊ ኦይቺዴስ። ሚልኮላካ፥ « ‹ታ ኬሳ ኤካ ኣታና ማላ ታና ማዳ፤ ኣካይ ጊኮ ታ ኔና ዎꬋና› ጊዴስ» ጋ ዛራዱስ።
1SA 19:18 ዳዊቲ ባቃቲ ኣቲዳፔ ጉዬ ጌዴ ኤራማን ዲዛ ሳሜላኮ ቢዴስ፤ ሳኦሊ ኢዛ ቦላ ኦꬂዳይሳ ኡባ ኢዛስ ዮቲዴስ። ሄሳፌ ጉዬ ኢዚኔ ሳሜሊ ኔዋቴን ኡቲዳ።
1SA 19:19 ሳኦሌስካ፥ «ሄኮ ዳዊቲ ኤራማን ዲዛ ኔዋቴን ዴስ» ጊዲ ኢዛስ ዮቲዳ።
1SA 19:20 ሄሳ ጊሻስ ኢዚ ዳዊቴ ኦይካናስ ኣሳታ ኪቲ ዬዲዴስ። ጊዶ ኣቲን ናቤቲ ሺቂዲ ሳሜሊ ካሌꬂሺን ቲንቢቴ ሃሳይዛይሳ ቤኢዲ ጾሳ ኣያናይ ሳኦሌ ኣሳ ቦላ ዎꬊን ኢስቲካ ቲንቢቴ ዮቲዳ።
1SA 19:21 ሳኦሊካ ሄሲ ኢዛስ ዮቴቲዳ ማላ ሃራ ኣሳታ ኪቲ ዬዲዴስ፤ ኢስቲካ ቲንቢቴ ዮቲዳ። ሳኦሊ ሄꬓንꬆካ ሃራ ኣስ ኪቲ ዬዲዴስ፤ ኢስቲካ ዛሪዲ ቲንቢቴ ዮቲዳ።
1SA 19:22 ዉርሴꬃን ኢዚ ባ ሁኤራ ኤራማ ቢዴስ፤ ሄፔካ ሴኩን ዲዛ ጊታ ሃꬅ ኤሊሲዛ ኦላኮ ጋኪዳ ማላ፥ «ሳሜሊኔ ዳዊቲ ኣዋን ዲዞ?» ጊ ኦይቺዴስ። ኢሲ ኣሲ ኢዛስ፥ «ኤራማን ዲዛ ኔዋቴን ዴቴስ» ጊ ዮቲዴስ።
1SA 19:23 ሄሳ ጊሻስ ሳኦሊ ኤራማን ዲዛ ኔዋቴ ቢዴስ፤ ጾሳ ኣያናይ ኢዛ ቦላካ ዎꬊዴስ። ኢዚ ቢዲ ኔዋቴ ጋካናሼ ቲንቢቴ ዮቲሼ ቢዴስ።
1SA 19:24 ኢዚካ ባ ማይኦ ኬሲ ዬጊዲ ሳሜላ ሲንꬃን ቲንቢቴ ዮቲዴስ። ሄሳꬆ ኢዚ ኩሜꬃ ጋላሲኔ ኩሜꬃ ኦማርስ ካሎ ኢቺዴስ። ዴሬይ ኢዛ፥ «ሳኦሊ ናቤታፔ ኢሳ ማላ ቆዴቲዴ?» ጊዳይ ሄሳ ጊሻሳ።
1SA 20:1 ሄሳፌ ጉዬ ዳዊቲ ኤራማን ዲዛ ኔዋቴ ዙሌፌ ዮናታኔኮ ባቃቲ ቢዲ፥ «ታ ኣይ ኦꬃዲና? ታ ኣይ ቆሆ ኦꬃዲና? ኔ ኣዋይ ታና ዎꬋናስ ኮይዛይ ታ ኢዛ ሲንꬃን ኣይ ኢታ ኦꬂኔ?» ጊዲ ኢዛ ኦይቺዴስ።
1SA 20:2 ዮናታኔይካ፥ «ሄሲ ኔ ቦላ ሙሌካ ሃኖፖ! ኔ ሃይቃካ! ታ ኣዋይ ጉꬅ ጊዲን ዳሮ ጊዲን ኣይ ሚሺካ ሲንꬃቲ ታስ ዮቶንታ ኦꬂ ኤሬና፤ ሂስቲን ታ ኣዋይ ሃይሳ ታፔ ኣይስ ቆቲዜ? ዮኦይ ሄሳ ማላ ጊዴና!» ጊ ዛሪዴስ።
1SA 20:3 ዳዊቲካ ኢዛስ፥ «ታኒ ኔ ሲንꬃን ቦንቼቲዳይሳ ኔ ኣዋይ ሎኤꬂ ኤሬስ፥ ሄሳ ጊሻስ ኢዚ ባ ዎዚናራ፥ ‹ዮናታኔይ ሚሼቶንታ ማላ ሃይሳ ኤራናስ ቤሴና› ጊዴስ። ጊዶ ኣቲን ታኒ ዴኦ ጎዳይ ቤዪን! ታ ኔ ሼምፖን ጫቃይስ! ታስ ሃይቃናስ ኢሲ ታንጎይ ጻላ ኣቲዴስ» ጊ ዛሪዴስ።
1SA 20:4 ዮናታኔይካ፥ «ታ ኔስ ኦꬃና ማላ ኔ ኮይዛ ኣይ ሚሺካ ታ ኔስ ኦꬃና» ጊዴስ።
1SA 20:5 ሂስቲን ዳዊቲ፥ «ዎንቶ ኣጊና ጼሮ ባኣሌ ጊዲዳ ጊሻስ ታኒ ዎንቶ ካዎራ ኢሲፌ ማናስ ቤሴስ። ጊዶ ኣቲን ዎንቶ ፔይን ኦማርስ ጋካናስ ታኒ ዎራ ጊዶን ቆቴታሻና።
1SA 20:6 ኔ ኣዋይ ታና ኮይኮ፥ ‹ኢዛ ዳቦቲ ላይꬃን ላይꬃን ሺሺዛ ያርሾ ሺሺዛ ጋላስ ጊዲዳ ጊሻስ ዳዊቲ ባ ሶ ኣሳኮ ቤቴሊሄሜ ባናስ ፒቃዴ ታና ሚንꬂ ኦይቺዴስ› ጋዳ ዮታ።
1SA 20:7 ኢዚካ፥ ‹ኤሮ ሎኦ› ጊኮ ታና ኔ ኦሳንቻ ሂርጊሲዛ ሚሺ ዴና፤ ኢዚ ሃንቄቲዛ ጊዲኮ ኢዚ ታ ቦላ ኢታ ቆፒዳይሳ ኔ ኤራና።
1SA 20:8 ኔኒ ጊዲኮ ታስ ኔ ኣሽካራስ ኪያቴꬅ ቤሳ፤ ታና ኔ ኣሽካራራ ኔኒ ጎዳ ሲንꬃን ጫቄቲዳ ጊሻስ ታ ሞሪዳ ጊዲኮ ታና ኔኒ ዎꬋ ኣቲን ኣይስ ኔ ኣዋስ ታና ኣꬃ ኢማይ?» ጊዴስ።
1SA 20:9 ዮናታኔይካ ዛሪዲ፥ «ሃይሲ ኔፔ ሃኮ! ታ ኣዋይ ኔ ቦላ ኢታ ቆፒዳይሳ ኤሪዳኮ ታ ኔስ ዋና ዮቲኪና?» ጊዴስ።
1SA 20:10 ዳዊቲካ ኢዛ፥ «ኔ ኣዋይ ታ ጊሻስ ኔስ ኢታ ቃላ ዛሪኮ ሄሳ ታስ ኦኒ ዮታኔ?» ጊ ኦይቺዴስ።
1SA 20:11 ዮናታኔይካ ኢዛስ፥ «ኣኔ ሃያ! ዴምባ ኬኦስ!» ጊዴስ፤ ናምኣይካ ኦይኬቲዲ ካሬ ኬዚዳ።
1SA 20:12 ሄሳፌ ጉዬ ዮናታኔይ ዳዊቴስ፥ «ጎዳ ኢስራኤሌ ጾሳይ ታ ቦላ ማርካ ጊዶ፤ ዎንቶ ታኒ ታ ኣዋ ፒልጋ ኦይቻዳ ዎንቶ ዎይኮ ዎንቶፔይና ሃኒ ዎዴ ታ ኔስ ኪታና፤ ኢዚ ኔ ጊሻስ ሎኦ ቆፒዛ ጊዲኮ ታ ሄሳ ኔና ኤሪሳና።
1SA 20:13 ጊዶ ኣቲን ታ ኣዋይ ኔ ቦላ ኢታ ቆፒን፥ ሄሳ ታ ኔና ኤሪሶንታ ኣጊኮኔ ኔ ሳሮን ኢዛ ኩሼፔ ኬሳ ኤካ ባና ማላ ታ ኦꬆንታ ኣጊኮ፥ ታ ኣዋይ ኔ ቦላ ጋꬃናስ ቆፒዳ ኢታ ዮኦዛፔ ኣꬊዳ ኢታ ጎዳይ ታ ቦላ ጋꬆ፤ ካሴ ጎዳይ ታ ኣዋራ ዲዛይሳꬆ ኔናራካ ዶ።
1SA 20:14 ኔኒካ ታኒ ሼምፖራ ፓጻ ዲዛ ዎዴ ኣሳ ኩሼን ሃይቆንታ ማላ ኔ ታስ ጎዳ ኪያቴꬅ ኦꬃ።
1SA 20:15 ጎዳይ ዳዊቴ ሞርኬታ ቢታ ቦላፌ ፒቲ ꬋይሲዛ ዎዴካ ኔ ሎኦ ኦሶይ ታሶ ኣሳስ ሙሌካ ፓጮፎ» ጊዴስ።
1SA 20:16 ሄሳ ጊሻስ ዮናታኔይ፥ «ዳዊቴ ሞርኬታ ቦላ ጎዳይ ፒርዶ!» ጊዲ ዳዊቴ ሶ ኣሳራ ጫቄቲዴስ።
1SA 20:17 ዮናታኔይ ዳዊቴ ባ ሼምፖ ማላ ሲቂዛ ጊሻስ፥ ሲቆፔ ዴንዲዳይሳን ዳዊቴ ዛሬꬂ ጫቂሲዴስ።
1SA 20:18 ሄሳፌ ቃሴ ዮናታኔይ ዳዊቴ፥ «ዎንቶይ ኣጊና ጼሮን ቦንቼቲዛ ባኣሌ ጋላሳ፤ ኔ ኡቲዛሶን ኣሲ ꬋይኮ ኔ ባይንዳይሲ ኤሬታና።
1SA 20:19 ዎንቶፔይና ኦማርሳ ዎዴ ሃይሲ ሜቶይ ሜꬌቲዳ ጋላስ ካሴ ቆቴቲዳሶ ባዳ ኤዜሌ ሹቻ ኣቻን ታካሻ።
1SA 20:20 ታኒ ቃሴ ኢሲ ሚሻ ቦላ ማሊ ጼሊዲ ጾንጊዛ ኣሳ ማላ ሄꬑ ዪሽ ሹቻ ኣቻን ዱካና።
1SA 20:21 ሄሳፌ ጉዬ ታኒ፥ ‹ዪሻታ ኤካ ያ› ጋዳ ኢሲ ና ኪታና። ናዛካ፥ ‹ዪሻቲ ኔፔ ሃ ባጋራ ዴቴስ፤ ባዳ ሃ ኤካ ያ› ታ ጊኮ ዴኦ ጎዳይ ቤዪን! ኔና ኢታ ሚሺ ዴሜና፤ ሜቶይካ ዴና፤ ኬዛዳ ሃያ።
1SA 20:22 ጊዶ ኣቲን ታኒ ናዛስ፥ ‹ሄኮ ዪሻቲ ኔፔ ሄኒ ባጋራ ዴቴስ!› ጊኮ፥ ኔ ባና ማላ ጎዳይ ኮዪዳ ጊሻስ ኔ ቢዛሶ ባ።
1SA 20:23 ኑኒ ኢሶይ ኢሳራ ሃሳዬቲዳ ዮኦዛ ጊሻስ ጎዳይ ኑ ጊዶን ሜርናስ ማርካ» ጊዴስ።
1SA 20:24 ሄሳ ጊሻስ ዳዊቲ ዎራ ጊዶን ቆቴቲዴስ። ኣጊና ጼሮን ጼሮን ቦንቼቲዛ ባኣሌ ጋላስ ካዎ ሳኦሊ ጊቢራ ማናስ ኡቲዴስ።
1SA 20:25 ካዎዚ ካሴ ባ ኡቲዛሶን ጎዳ ኣቻን ኡቲዴስ፤ ኣቢኔሪ ኢዛፔ ካሊዲ ኡቲዴስ፤ ዮናታኔይካ ካዎዛፔ ሲንꬃ ባጋራ ኡቲዴስ፤ ዳዊቲ ኡቲዛሶይ ጊዲኮ ሜላ ዴስ።
1SA 20:26 ሳኦሊ፥ «ዳዊቲ ዎጋይ ጊዛይሳꬆ ኢዚ ዪዲ ጌዮንታ ማላ ኢሲ ሜቶን ጋይቶንታ ኣጊቤና፤ ቱማፔ ኢዚ ጌዪቤና» ጊዲ ቆፒዳ ጊሻስ ሄ ጋላስ ኣይኮካ ቃቲቤና።
1SA 20:27 ኣጊና ጼሮ ባኣሌይ ኣꬊን ዎንቴꬃ ጋላሲካ ዳዊቲ ኡቲዛሶይ ሜላ ዴስ፤ ሂስቲን ሳኦሊ ባ ናዛ ዮናታኔ፥ «ኢሴዬ ናይ ቃማካ ሃቺካ ሃይሳ ጊቢራን ኣይስ ቤቶንታ ኣጊዴ?» ጊዲ ኦይቺዴስ።
1SA 20:28 ዮናታኔይካ ኢዛስ፥ «ዳዊቲ ቤቴሊሄሜ ባናስ ታና ሚንꬂ ዎሲዴስ።
1SA 20:29 ኢዚካ፥ ‹ኑ ሶ ኣሳይ ካታማ ጊዶን ያርሾ ያርሺዛ ጊሻሲኔ ታ ኢሻይ ታኒ ሄን ቤታና ማላ ታና ኣዛዚዳ ጊሻስ ታ ባና፤ ኔ ታስ ሚሼቲኮ ታ ኢሻታ ቤያናስ ባና ማላ ታና ዬዳርኪ!› ጊ ዎሲዴስ፤ ኢዚ ሄሳ ጊሻስ ካዎ ጊቢራዛሶን ቤቶንታ ኣጊዴስ» ጊ ዛሪዴስ።
1SA 20:30 ሳኦሊ ዮናታኔ ኬሂ ሃንቄቲዲ፥ «ሃይሶ ጌላኔ ማካላንቻ ማጫሳይ ናዞ! ኔስ ኔ ሁኤስ ካዉሻቴꬅ ቃሴ ኔ ኣዬይስካ ዬላቴꬅ ጊዲዳ ኢሴዬ ናዛራ ኔ ላጌቲዛይሳ ታ ኤሪኪና!
1SA 20:31 ኢሴዬ ናይ ሼምፖራ ፓጻ ዲዛ ዎዴን ኣይዴካ ኔኒኔ ኔ ካዎቴꬃይ ሚኔኬታ። ኢዚ ሃይቃና ቤሲዛ ጊሻስ ኣስ ዬዳዳ ታስ ሃ ኤካ ያ!» ጊዴስ።
1SA 20:32 ዮናታኔይ፥ «ኢዚ ኣዛስ ሃይቂዜ? ኣይ ሞሮ ኦꬂዴ?» ጊዲ ባ ኣዋ ሳኦሌ ኦይቺዴስ።
1SA 20:33 ሳኦሊካ ዮናታኔ ዎꬋናስ ባ ቶራ ኢዛ ቦላ ጾንጊን ዮናታኔይ ኢዛ ኣዋይ ዳዊቴ ዎꬋናስ ባ ዎዚናን ቃቺ ዴንዲዳይሳ ኤሪዴስ።
1SA 20:34 ዮናታኔይካ ኬሂ ሃንቄቲዲ ካꬃ ሚዛ ማዳፌ ዴንዲዴስ፤ ኢዛ ኣዋይ ዳዊቴ ካዉሺዳ ጊሻስ ኣጊና ጼሮ ባኣሌ ቦንቺዳ ዎንቴꬃ ጋላስ ኣይኮ ካꬂካ ሚቤና።
1SA 20:35 ዎንቴꬃ ጋላስ ማላዶራ ኢሲ ቄሪ ና ካሌꬂ ኤኪዲ ካሴ ዳዊቴራ ባሬቲዳሶ ቢዴስ።
1SA 20:36 ናዛካ፥ «ኔ ዎጻ ባዳ ታ ዬዲዛ ዪሻታ ኢስቲ ዎꬊዳሶፔ ኮያ» ጊዴስ፤ ናዚካ ቡሮ ዎꬃን ዲሺን ዮናታኔይ ኢሲ ዪሽ ናዛፔ ቦላራ ሲንꬃ ኣꬂ ዬዲዴስ።
1SA 20:37 ናዚካ ዮናታኔይ ዬዲዳ ዪሻዚ ዎꬊዳሶ ጋኪሺን ዮናታኔይ ጼይጊዲ፥ «ዪሻዚ ኔፔ ኣꬊ ቢዴስ ዴኔ?» ጊዴስ።
1SA 20:38 ኢዚካ፥ «ኤሌላ! ዎጻ! ኤቆፋ!» ጊ ዋሲ ዮቲዴስ፤ ናዚካ ዪሻታ ሺሺዲ ባ ጎዳኮ ሲሚዴስ።
1SA 20:39 ሄሳ ሄ ጹራ ዮኦዛ ኤሪዛይ ዮናታኔፔኔ ዳዊቴፔ ኣቲን ናዚ ኣይኮካ ኤሪቤና።
1SA 20:40 ሄሳፌ ጉዬ ዮናታኔይካ ኦላ ሚሻ ሄ ናዛስ ኢሚዲ፥ «ኔኒ ሃይሳ ኤካዳ ጌዴ ካታማ ሲማ ባ» ጊዴስ።
1SA 20:41 ናዚካ ቢዳፔ ጉዬ ዳዊቲ ሹቻፌ ዱጌሃ ባጋራ ቆቴቲ ዲዛሶፔ ኬዚዲ ዮናታኔ ሲንꬃን ሄꬑቶ ዱጌ ቢታ ቦላ ጉፋኒ ዚጊዴስ። ሄሳፌ ጉዬ ኢሶይ ኢሳራ ዬሬቲዳ፤ ናምኣይካ ዬኪዳ፤ ዳዊቲ ኬሂ ዬኪዴስ።
1SA 20:42 ሄሳፌ ጉዬ ዮናታኔይ ዳዊቴስ፥ « ‹ኔሲኔ ታስ፥ ኔ ዜሬꬃሲኔ ታ ዜሬꬃስ ጊዶን ጎዳይ ሜርናስ ማርካ› ጊዲ ኑ ላጌቴꬂ ሚናና ማላ ኑኒ ጾሳ ሱንꬃን ጫቄቲዳ ጊሻስ ኔ ሃኢ ሳሮን ባ» ጊዴስ። ሄሳፌ ጉዬ ዳዊቲ ዴንዲ ቢዴስ፤ ዮናታኔይካ ካታማ ሲሚ ቢዴስ።
1SA 21:1 ዳዊቲ ቄሴ ኣሂሜሌኬይ ዲዛሶ ኖቤ ቢዴስ፤ ኣሂሜሌኬይካ ኮኮሪሼ ዳዊቴራ ጋይታናስ ዪዲ፥ «ኔና ኔርካ ኤሂዳይ ኣዜ? ኣሲ ባይንዳ ኣይስ ኔርካ ያዲ?» ጊዲ ኦይቺዴስ።
1SA 21:2 ዳዊቲ ቄሴ ኣሂሜሌኬስ፥ «ካዎዚ፥ ‹ታኒ ዪዳይ ሚሻ ጊሻሲኔ ታኒ ኢሚዳ ኣዛዞ ጊሻስ ኦኒካ ኣይኮካ ኤሮፖ› ጊ ኣዛዚዴስ። ታና ካሊዛይታራ ታኒ ኣዋን ጋይታናኮ ኢስታስ ዮታ ዎꬃዲስ።
1SA 21:3 ሂስቲን ሃኢ ኔ ኩሼን ኣዚ ዲዜ? ኢቻሹ ኡኬꬅ ዎይኮ ዲዛ ኣይ ሚሺ ዲኮካ ታስ ኢማ?» ጊዴስ።
1SA 21:4 ቄሴዚካ፥ «ጮ ኣሲ ሚዛ ካꬂ ታኮን ዴና፤ ኔና ካሊዛይቲ ማታ ዎዴ ማጫሳታራ ጋይቶንታ ባንታና ጌሻቴꬃን ናጊዲ ጋምኢዳ ጊዲኮ ሃይሳን ጾሳስ ዱማቲ ኡቲዳ ኡኬꬂ ዴስ» ጊዴስ።
1SA 21:5 ዳዊቲካ ቄሴዛስ ዛሪዲ፥ «ካሴ ሎሴ ጊዲዳ ማላ ታኒ ኬዚዳ ዎዴፔ ዶሚን ኑኒ ማጫሳፌ ናጌቲዶስ፤ ጮ ቄሪ ኦሶስ ቢሼካ ታናራ ዲዛይቲ ባንታና ጌሻቴꬃን ናጌቴስ። ሂስቲን ሃች ዋኒዲ ኣꬌኔ!» ጊዴስ።
1SA 21:6 ሄሳ ጊሻስ ቄሴዚ ጎዳስ ዱማቲዳ ኡኬꬃ ዴንꬂዲ ዳዊቴስ ኢሚዴስ፤ ጎዳ ሲንꬃፌ ዴንዲዲ ሆኦ ካꬃን ላሜቲዳ ኡኬꬃፌ ኣቲን ሃራ ካꬂ ሄን ዴና።
1SA 21:7 ሄ ጋላስ ሳኦሌ ኦሳንቻታፔ ሜሄ ሄሚዛይታ ኣላፌዚ ኤዶሜ ኣስ ዶይቄይ ሄን ጎዳ ሲንꬃን ታካና ማላ ዎꬂዳ።
1SA 21:8 ዳዊቲ ኣሂሜሌኬ፥ «ካዎዛ ጉዳይ ታና ኤሶሲዳ ጊሻስ ታ ጊꬃ ማሻ ጊዲን ዎይኮ ሃራ ኦላ ሚሽ ኤካ ያቤኬ፤ ሃይሳን ኔ ኣቻን ቶራይ ዎይኮ ጊꬃ ማሻይ ዴኔ?» ጊዲ ኦይቺዴስ።
1SA 21:9 ቄሴ ኣሂሜሌኬይ ኢዛስ፥ «ኔኒ ኤላ ሾባን ዎꬊዳ ፊሊስጼሜ ኣስ ጎልያዴ ማሻይ ሃን ዴስ፤ ኢዚካ ኤፉዴፔ ጉዬ ባጋራ ጫርቃን ጻጼቲ ኡቲዴስ፤ ኔ ኢዛ ኮይኮ ኤካ፤ ኢዛፔ ኣቲን ሃራይ ኦላ ሚሺ ሃን ዴና» ጊ ዛሪዴስ። ዳዊቲካ፥ «ኢዛ ማላይ ሃራይ ዶንታ ጊሻስ ኔኒ ኢዛ ታስ ሃማ!» ጊዴስ።
1SA 21:10 ሄ ጋላስ ዳዊቲ ሳኦሌፔ ባቃቲዲ ጌቴ ዴሬ ካዎ ኣንኩሴኮ ቢዴስ፤
1SA 21:11 ኣንኩሴ ኦሳንቻቲ፥ «ሃይሲ ሄ ቢታይ ካዎ ዳዊቴ ጊዴኔ? « ‹ሳኦሊ ሺ ዎꬊዴስ፤ ዳዊቲ ጊዲኮ ታሙ ሺ ዎꬊዴስ› ጊ ማጉሊሼ ኣሳይ ሳቢዳይሲ ሃይሲ ኢዛ ጊዴኔ?» ጊዳ።
1SA 21:12 ዳዊቲ ዮኦዛ ባ ዎዚናን ኦይኪዲ ጌቴ ካዎ ኣንኩሴስ ኬሂ ባቢዴስ።
1SA 21:13 ሄሳ ጊሻስ ኢስታ ሲንꬃን ዎዚናይ ባቄቲዳ ኣሳ ማላ ጊዲዴስ፤ ኢስቲ ኢዛ ኦይኪዳ ማላ ካታማይ ፔንጌ ኢቢꬅ ቃጬሬꬂሼ ቡቻ ቦላራ ባ ሳሶ ጎጊሲሼ ጎሻ ኣሳ ማላ ጊዲዴስ።
1SA 21:14 ኣንኩሴይ ባ ኦሳንቻታ፥ «ሃይሳ ኣዴዛ ኣኔ ጼሊቴ፤ ኢዚ ጎሻኮ! ሂስቲን ኣይስ ታኮ ኤሂዴቲ?
1SA 21:15 ኢዚ ታ ኣቻን ጎያና ማላ ኢንቴ ታኮ ሃይሳ ኤሂዳይ ታስ ሃይሳ ማላ ጎሺ ꬋይኔ? ሃይሳ ማላ ኣሲ ታ ኬꬅ ጌላናስ ቤሲዜ?» ጊዴስ።
1SA 22:1 ዳዊቲ ጌቴፔ ኣዱላሜ ጎንጎሎን ቢዴስ፤ ኢዛ ኢሻቲኔ ኢዛ ኣዋ ሶ ኣሳይ ሄሳ ሲዪዲ ዱጌ ኢዚ ዲዛሶ ዎꬊዳ።
1SA 22:2 ሜቶቲዳይቲ፥ ኣጮራ ዲዛይቲኔ ዱሳይ ኢቲዳይቲ 400 ጊዳና ኣሳቲ ኢዛኮ ሺቂዳ፤ ኢዚካ ኢስታ ካሌꬂዛይሳ ጊዲዴስ።
1SA 22:3 ዳዊቲ ሄፔ ዴንዲዲ ሞኣቤ ዴሬን ዲዛ ሚጺጳ ቢዴስ፤ ሞኣቤ ካዎስ፥ «ጾሲ ታስ ኦꬃናይሳ ታ ኤራና ጋካናስ ታ ኣዋይኔ ታ ኣያ ሃ ዪዲ ኔ ኣቻን ዳና ማላ ፒቃዴ ኢማርኪ!» ጊዴስ።
1SA 22:4 ኢዚካ ኢስታ ሞኣቤ ካዎ ኣቻን ዎꬂዴስ፤ ዳዊቲ ሚጻን ዲዛ ላይꬃታ ኩሜꬅ ኢስቲ ሄን ጋምኢዳ።
1SA 22:5 ጊዶ ኣቲን ናቤ ጋዴይ ዳዊቴ፥ «ሚጻን ጋምኦፋ፤ ዩሁዳ ቢታ ጌላ» ጊዴስ። ሄሳ ጊሻስ ዳዊቲ ዴንዲ ቢዲ ሄሬቴ ዎራን ጌሊዴስ።
1SA 22:6 ሳኦሊ ዳዊቲኔ ኢዛራ ዲዛ ኣሳይ ቤቲዳይሳ ሲዪዲ ጊቢኣ ዙምቡላ ቦላ ዲዛ ታማርሲኬ ጌቴቲዛ ሚꬃ ጋርሳን ባ ቶራ ኩሼን ኦይኪ ኡቲ ዲሺን ኢዛ ሹሜቲ ኡባይ ኢዛ ዩዪ ኣꬊ ኤቂዳ።
1SA 22:7 ሳኦሊ ኢስታስ፥ «ኢንቴኖ ቢኒያሜ ኣሳቶ ሲዪቴ! ኢሴዬ ናይ ጎሻ ጋዴኔ ዎይኔ ቶኪዛሶሆ ኢንቴስ ቱሙ ኢማኔ? ኢዚ ኢንቴና ኡባታካ ሻላቃታኔ ማቶ ሃላቃታ ሂስቲ ሹማኔ?
1SA 22:8 ኢንቴ ታ ቦላ ዱላቲዳይ ሃይሳሴ? ታ ናዚ ኢሴዬ ናዛራ ጫቄቲዳይሳ ኦኒካ ታስ ዮቲቤና፤ ኢዚ ሃች ኦꬂዛይሳ ኡባ፥ ታ ናዚ ታ ኦሳንቻዛ ታ ቦላ ዴንꬄꬂዳይሳ ኢንቴፌ ኦኒካ ታስ ሚሼቲዲ ዮቲቤና» ጊዴስ።
1SA 22:9 ሄ ዎዴ ሄን ዲዛ ሳኦሌ ሹሜታራ ኤቂ ዲዛ ኤዶሜ ኣስ ዶይቄይ፥ «ኢሴዬ ናይ ኖቤን ዲዛ ኣሂጹቤ ና ኣሂሜሌኬኮ ዪሺን ቤኣዲስ።
1SA 22:10 ኣሂሜሌኬይ ኢዛ ጊሻስ ጎዳ ኦይቺዴስ፤ ሂስቲዲ ሺንቄኔ ፊሊስጼሜ ኣስ ጎልያዴ ጊꬃ ማሻ ኢዛስ ኢሚዴስ» ጊ ዮቲዴስ።
1SA 22:11 ሄሳፌ ጉዬ ካዎዚ ቄሴ ኣሂጹቤ ና ቄሴ ኣሂሜሌኬ፥ ኖቤን ዲዛ ቄሴታ ባ ኣዋ ኬꬃ ኣሳ ኡባስ ኪታ ዬዲ ጼይጊን ኡባይካ ካዎዛኮ ዪዳ።
1SA 22:12 ሳኦሊ፥ «ሃይሶ ኣሂጹቤ ናዉ! ሲያ» ጊዴስ። ኣሂሜሌኬይካ፥ «ኤሮ፥ ታ ጎዳዉ» ጊዴስ።
1SA 22:13 ሳኦሊካ፥ «ሃች ኢዚ ታ ቦላ ኦꬂዛ ኡባꬆ፥ ታ ቦላ ማካሊዛይሳꬆኔ ታ ጌዶን ኤቂዛይሳꬆ ካꬂኔ ማሻ ኢሚዲ ኢዛስ ጾስ ዎሲዲ ኢሴዬ ናራ ታ ቦላ ኣይስ ዱላቲዴቲ?» ጊዴስ።
1SA 22:14 ኣሂሜሌኬይ ካዎዛስ፥ «ካዎዛ ቦሎይ፥ ኔ ቦንቾ ዛቤታ ኣዛዚዛይሲኔ ኔሶ ኣሳ ኣቻን ኬሂ ቦንቼቲዳ ዳዊቴ ሚሳቲዛ ኣማኔቲዳ ኦሳንቻይ ኔ ኦሳንቻታ ጋርሳን ዲዛይ ኦኔ?
1SA 22:15 ታ ኢዛስ ጾስ ኦይቺሺን ሄ ጋላሳይ ኮይሮ ጋላሴ? ሙሌካ ጊዴና፤ ሃይሳ ሃ ዮኦዛ ኔ ኦሳንቻይ ታ ኤሪዛ ኣይኮ ሚሺ ባይንዳ ጊሻስ ካዎይ ታና ባ ኦሳንቻዛ ዎይኮ ታ ኣዋ ሶ ኣሳፔ ኦናካ ሞራንቻ ኬሶፎ» ጊዴስ።
1SA 22:16 ካዎዚ ዛሪዲ ኢዛስ፥ «ኣሂሜሌኬ! ኔኒኔ ኔ ኣዋ ሶ ኣሳይ ኡባይ ሃይቃንዴታ!» ጊዴስ።
1SA 22:17 ሄሳፌ ጉዬ ካዎዚ ባ ኣቻን ኤቂዳ ዛቤታ፥ «ሃይቲካ ጎዳ ቄሴቲ ዳዊቴራ ኢሲኖ ጊዲዲ ኢዚ ባቃቲዳይሳ ታስ ዮቶንታ ኣጊዳ ጊሻስ ኢስታ ጊዶꬂ ዎꬊቴ» ጊ ኣዛዚዴስ። ካዎ ሹሜቲ ጊዲኮ ባ ኩሼ ጎዳ ቄሴታ ቦላ ዴንꬂዲ ሾጫናስ ኮዪቤቴና።
1SA 22:18 ካዎዚ ዶይቄ፥ «ሂስቲኮ ኔኒ ቄሴታ ጊዶꬃዳ ዎꬋ» ጊ ኣዛዚዴስ፤ ኤዶሜ ኣስ ዶይቄይ ኢስታ ጊዶꬂ ዎꬊዴስ፤ ኢዚ ሄ ጋላስ ኤፉዴ ማይኢዳ 85 ቄሴታ ዎꬊዴስ።
1SA 22:19 ቄሴታ ኖቤ ካታማን ማሻን ዉርሲዴስ፤ ሄን ዲዛ ማጫሳታኔ ኣቱማታ፥ ናይታኔ ቡሮ ꬋሚዛይታ፥ ሄሳꬆካ ቦራታኔ ሃሬታ፥ ዶርሳታ ኡባ ጊꬃ ማሻን ሲፊዴስ።
1SA 22:20 ጊዶ ኣቲን ኣሂጹቤ ና ኣሂሜሌኬ ናይ ኣቢያታሬይ ኬሲ ኤኪዲ ዳዊቴኮ ባቃቲዴስ።
1SA 22:21 ኢዚካ ሳኦሊ ጎዳ ቄሴታ ዎꬊዳይሳ ዳዊቴስ ዮቲዴስ።
1SA 22:22 ዳዊቲ ኣቢያታሬስ ዛሪዲ፥ «ሄ ዎዴ ኤዶሜ ኣስ ዶይቄይ ሄን ዲዛ ጊሻስ ኢዚ ሳኦሌስ ዮታናይሳ ታ ኤራዲስ፤ ዉሪዳ ኢንቴሶ ኣሳ ኡባ ጊሻስ ታ ኦይሼታና።
1SA 22:23 ኔ ሃኢ ታናራ ዳሻ፤ ባቦፋ፤ ኔ ሼምፖ ዎꬋና ኮይዛዴይ ታ ሼምፖ ዎꬋና ኮይዛዴ ማላ፤ ኔኒ ታናራ ኢሲፌ ሳሮን ዴኣንዳሳ» ጊዴስ።
1SA 23:1 ሄሳፌ ጉዬ፥ «ፊሊስጼሜ ኣሳይ ቂኢላን ኦላ ዴንꬂዲ ቡኬቲዛ ካꬃ ባሌፔ ቦንቂሼ ዴቴስ» ጊዲ ዳዊቴስ ዮቲዳ።
1SA 23:2 ዳዊቲ፥ «ሃይሳ ፊሊስጼሜ ኣሳ ኦሎ?» ጊዲ ጎዳ ኦይቺዴስ። ጎዳይካ፥ «ባ፤ ፊሊስጼሜታ ሾጫ፤ ቂኢላካ ኣሻ» ጊዴስ።
1SA 23:3 ዳዊቴ ኣሳይ ጊዲኮ፥ «ሃይሳን ዩሁዳ ቢታን ዲሼ ባቦስ፤ ፊሊስጼሜ ኦላንቻታ ኦላናስ ቂኢላ ቢዛ ጊዲኮ ኣይ ማላ ኑና ባቢሳኔ?» ጊዳ።
1SA 23:4 ዳዊቲ ቃሴካ ጎዳ ዛሪ ኦይቺዴስ፤ ጎዳይካ ኢዛስ፥ «ታኒ ፊሊስጼሜ ኣሳ ኔ ኩሼን ኣꬃ ኢማና፤ ሄሳ ጊሻስ ኔ ዱጌ ቂኢላ ዎꬋ» ጊዴስ።
1SA 23:5 ሄሳ ጊሻስ ዳዊቲኔ ኢዛ ካሊዛይቲ ቂኢላ ቢዲ ፊሊስጼሜ ኣሳ ኦሊዳ፤ ኢስታ ሜሄካ ዲኢዳ፤ ፊሊስጼሜታ ቦላ ጊታ ቆሆ ጋꬂዳ፤ ዳዊቲ ቂኢላ ዴራ ኣሺዴስ።
1SA 23:6 ኣሂሜሌኬ ና ኣቢያታሬይ ዳዊቴኮ ቂኢላ ባቃቲሼ ባ ኩሼን ኤፉዴ ኦይኪ ቢዴስ።
1SA 23:7 ዳዊቲ ቂኢላ ቢዳይሳ ሳኦሊ ሲዪዲ፥ «ዳዊቲ ሳንቃኔ ቢራታ ኮላታቲ ዲዛ ካታማ ጌሊዳይሲ ኢዚ ባርካ ባና ቃቺዳ ማላ ጊዲዳ ጊሻስ ኢዛ ጾሲ ታ ኩሼን ኣꬂ ኢሚዴስ» ጊዴስ።
1SA 23:8 ሄሳ ጊሻስ ሳኦሊ ባ ኦላንቻታ ጼይጊዲ ዱጌ ቂኢላ ዎꬊዲ ዳዊቴኔ ኢዛ ኦላ ኣሳ ጊዶꬃና ማላ ኣዛዚዴስ።
1SA 23:9 ዳዊቲካ ሳኦሊ ኢዛ ቦላ ኢታ ቆፒዳይሳ ኤሪዲ ቄሴ ኣቢያታሬ፥ «ኤፉዴዛ ሃማ» ጊዴስ።
1SA 23:10 ሄሳፌ ጉዬ ዳዊቲ፥ «ጎዳ ኢስራኤሌ ጾሳዉ! ሳኦሊ ቂኢላ ዪዲ ታ ጋሶን ካታማዮ ꬋይሳናስ ቆፒዳይሳ ኔ ኣይሌይ ታ ሎኤꬃ ሲያዲስ።
1SA 23:11 ሂስቲን ቂኢላ ኣሳይ ታና ሳኦሌስ ኣꬂ ኢማኔ? ታኒ ኔ ኣይሌይ ሲዪዳይሳ ማላ ሳኦሊ ሃ ዱጌ ዎꬋኔ? ጎዳ ኢስራኤሌ ጾሳዉ! ታስ ኔ ኣይሌዛስ ኔ ዮታና ማላ ታ ኔና ዎሳይስ» ጊዴስ። ጎዳይካ፥ «ኤ ኢዚ ዱጌ ዎꬋና» ጊዴስ።
1SA 23:12 ዳዊቲ ቃሴካ፥ «ቂኢላ ኣሳይ ታናኔ ታ ኣሳ ሳኦሌስ ኣꬂ ኢማኔ?» ጊ ኦይቺዴስ። ጎዳይካ፥ «ኤ ኢስቲ ኢንቴና ኣꬂ ኢማና» ጊዴስ።
1SA 23:13 ሄሳ ጊሻስ ዳዊቲኔ 600 ጊዲዛ ኣሳቲ ቂኢላፔ ዴንዲዲ ባናስ ዳንዳይዛ ኡባሶ ቢዳ፤ ዳዊቲ ቂኢላፔ ባቃቶይሳ ሳኦሊ ሲዪዲ ሄ ቡሳ ኣጋጊዴስ።
1SA 23:14 ዳዊቲ ባዞን ዲዛ ሚጻታኒኔ ዚፌ ባዞን ዙምቡላታ ቦላ ዴኢዴስ፤ ሳኦሊ ኢዛ ኡባ ጋላስ ካሌቴስ፤ ጊዶ ኣቲን ጾሲ ዳዊቴ ኢዛስ ኣꬂ ኢሚቤና።
1SA 23:15 ዳዊቲካ ዚፌ ባዞን ሆሬሼ ጌቴቲዛሶን ዲሼ ሳኦሊ ኢዛ ዎꬋናስ ዪዳይሳ ቤኢዴስ።
1SA 23:16 ሳኦሌ ና ዮናታኔይ ዳዊቲ ዲዛሶ ቢዲ ጾሳ ሱንꬃን ኢዛ ሚንꬄꬂዴስ።
1SA 23:17 ኢዚካ፥ «ባቦፋ! ታ ኣዋ ሳኦሊ ባ ኩሼ ኔ ቦላ ዎꬄና፤ ኔኒ ኢስራኤሌ ቦላ ካዎታና፤ ኔፔ ካላዳ ታ ናምኣንꬆ ካዎ ጊዳና፤ ታ ኣዋ ሳኦሊካ ሄሳ ኤሬስ» ጊዴስ።
1SA 23:18 ናምኣይካ ጎዳ ሲንꬃን ጫቄቲዳ፤ ሄሳፌ ጉዬ ዮናታኔይ ባሶ ሲሚ ቢዴስ፤ ዳዊቲ ጊዲኮ ሄን ሆሬሼን ኡቲዴስ።
1SA 23:19 ዚፌ ኣሳይ ሳኦሌኮ ጊቢኣ ኬዚዲ፥ «ሄኮ ዳዊቲ ዬሴሞኔፔ ዱጌሃ ባጋራ ሃካሊያ ዙምቡላ ቦላ ዲዛ ሆሬሼ ሚጻታን ቆቴቲ ዴስ ጊዴኔ?
1SA 23:20 ኣቤት ካዎ ሃኢ ጊዲኮ ኔና ኡፋይሲዳ ጋላስ ያ ኣቲን ካዎዛስ ኑ ኢዛ ኣꬂ ኢማና ዶስ» ጊዳ።
1SA 23:21 ሳኦሊ ኢስታስ፥ «ኢንቴ ታስ ሚሼቲዳ ጊሻስ ጎዳይ ኢንቴና ኣንጆ!
1SA 23:22 ሃኢ ሲሚ ቢዲ ኢዚ ኣዋን ዲዛኮ ኤሪቴ፤ ሄን ኢዛ ቤኢዳ ኣስ ሻኪ ኤሪቴ፤ ኢዚ ኬሂ ጪንጫ ኣስ ጊዲዳይሳ ታ ሲያዲስ።
1SA 23:23 ኢዚ ቆቴቲዛሶሆታ ኡባ ቤኢዳፔ ጉዬ ቆንጬራ ቤሲዛ ሃኖታ ኤኪ ታኮ ዪቴ፤ ታኒካ ኢንቴናራ ባና፤ ኢዚ ዴꬅ ዶ ኣቲን ዩሁዳ ቆሞታ ጊዶን ኢዚ ጌሊዳ ኦላፌ ታ ጌላ ኬሳና» ጊዴስ።
1SA 23:24 ሄሳ ጊሻስ ኣሳቲ ሳኦሌፔ ሲንꬃቲ ዴንዲዲ ዚፌ ቢዳ፤ ሄ ዎዴ ዳዊቲኔ ኢዛራ ዲዛ ኣሳቲ ዬሴሞኔፔ ዱጌሃ ባጋራ ኣራቤን ዲዛ ማኦኔ ባዞን ዴቴስ።
1SA 23:25 ሳኦሊኔ ኢዛ ኣሳቲ ዳዊቴ ኮያና ቢዳ፤ ዳዊቲካ ሄሳ ሲዪዲ ዱጌ ዛላኮ ዎꬊዲ ማኦኔ ባዞን ኡቲዴስ። ሳኦሊ ሄሳ ሲዪዳ ማላ ዳዊቴ ጎዲሼ ማኦኔ ባዞ ቢ ጌሊዴስ።
1SA 23:26 ሳኦሊ ዙማስ ኢሲ ባጋራ ጊዲ ጎዲሺን ዳዊቲኔ ኢዛራ ዲዛ ኣሳቲ ዙማስ ሃንኮ ባጋራ ሳኦሌፔ ኣታናስ ዎጼቴስ። ሳኦሊኔ ሳኦሌ ኦላንቻቲ ዳዊቴኔ ኢዛራ ዲዛ ኣሳታ ኦይካናስ ኡንኤꬂዳሺን፥
1SA 23:27 ኢሲ ኣሲ ቃስታኔ ሳኦሌኮ ዪዲ፥ «ፊሊስጼሜቲ ዴራ ቦላ ዎራጂዳ ጊሻስ ኤሶን ጋካ» ጊዴስ።
1SA 23:28 ሂስቲን ሳኦሊ ዳዊቴ ጎዲዛይሳ ኣጊዲ ፊሊስጼሜታራ ኦሌታናስ ቢዴስ፤ ሄሳ ጊሻስ ሄ ሶሆዛ፥ «ሻኬቴꬃ ዛላ» ጊ ሱንꬂዳ።
1SA 23:29 ዳዊቲ ሄፔ ፑዴ ኬዚዲ ኤን-ጋዴ ሚጻታን ኡቲዴስ።
1SA 24:1 ሳኦሊ ፊሊስጼሜታ ኦሊ ሲሚዳፔ ጉዬ፥ «ቤኣ ዳዊቲ ኤን-ጋዴ ባዞን ዴስ» ጊዲ ኢዛስ ዮቲዳ።
1SA 24:2 ሄሳ ጊሻስ ሳኦሊ ኩሜꬃ ኢስራኤሌፔ ዶሬቲዳ 3,000 ኣስ ኤኪዲ ዳዊቴኔ ኢዛራ ዲዛ ኣሳታ ኮያናስ፥ «ዎራ ዴይሻታ ዛላ» ጌቴቲዛሶ ማታ ቢዴስ።
1SA 24:3 ሳኦሊ ኦጌ ዶናን ዶርሳቲ ኣቂዛሶ ጋኪዳ ዎዴ ሄን ጎንጎሎ ዴሚዲ ሼሽ ኡታና ጌሊዴስ፤ ዳዊቲኔ ኢዛ ካሊዛይቲ ጎንጎሎዛስ ጊዶን ቆቴቲ ኡቲዳ።
1SA 24:4 ዳዊቴ ካሊዛይቲ ዳዊቴስ፥ «ጎዳይ፥ ‹ኔ ዶሲዳይሳ ኦꬃና ማላ ኔ ሞርኬዛ ታ ኔ ኩሼን ኣꬃ ኢማና› ጊዲ ካሴ ኔስ ዮቲዳ ጋላሳያ ሃቻ» ጊዳ። ዳዊቲ ቲራን ጎሼቲ ቢዲ ሳኦሌ ማይኦ ጼራፔ ኦኒካ ኤሮንታ ቃንጺ ኤኪዴስ።
1SA 24:5 ጊዶ ኣቲን ዳዊቲ ሳኦሌ ማይኦ ጼራ ቃንጺዳይሳን ኢዛ ዎዚናይ ኬሂ ጬጪዴስ።
1SA 24:6 ኣሳታስካ፥ «ጎዳይ ቲይዳ ታ ጎዳ ቦላ ሄሳ ማላ ኦሶ ኦꬃናፔኔ ኢዚ ቲይዳይሳ ቦላ ታ ኩሼ ዴንꬃናፔ ጎዳይ ታና ናጎ» ጊዴስ።
1SA 24:7 ዳዊቲ ኣሳ ሃ ቃላን ሴሪዴስ፤ ሳኦሌ ቦላካ ኢስቲ ሜቶ ጋꬃናይሳ ኮዪቤና፤ ሳኦሊካ ጎንጎሎዛ ጊዶፌ ኬዚ ቢዴስ።
1SA 24:8 ሄሳፌ ጉዬ ዳዊቲ ጎንጎሎዛ ጊዶፌ ኬዚዲ ሳኦሌ፥ «ታ ጎዳ ካዎ!» ጊ ጼይጊዴስ፤ ሳኦሊካ ጉዬ ሲሚ ጼሊሺን ዳዊቲ ባ ኩሼ ዴንꬂዲ ዚጊሺን ቤኢዴስ፤
1SA 24:9 ዳዊቲ ሳኦሌስ፥ «ኣሳይ፥ ‹ቤያ ዳዊቲ ኔ ቦላ ኢታ ኦꬃና ኮዬስ› ጊሺን ኔ ኣይስ ኢስታ ሲያይ?
1SA 24:10 ሃች ጎንጎሎ ጊዶን ኔና ታ ኩሼን ዎስቲ ኣꬂ ኢሚዳኮ ሄኮ ኔኒ ኔ ኣይፌራ ቤኣዳሳ፤ ኢሲ ኢሲ ኣሳቲ ታ ኔና ዎꬋና ማላ ዴንꬄꬂዳ፤ ጊዶ ኣቲን ታኒ፥ ‹ጎዳይ ቲይዳ ታ ጎዳ ቦላ ታ ኩሼ ዎꬂኬ› ጋዳ ታ ኔስ ቃꬌታዲስ።
1SA 24:11 ታ ኣዋዉ ኔ ማይኦዛ ጼራፔ ቃንጼቲዳይሳ ሃይሳ ታ ኩሼን ቤኣ! ኔስ ማይኦ ጼራፔ ቃንጻ ኤካዲስ ኣቲን ኔና ዎꬋቤኬ። ሃኢካ ታኒ ኢታቴꬅ ዎይኮ ማካላቴꬅ ኦꬆንታይሳ ኔ ኤራ፤ ሄሳ ኔ ዎዚናን ዎꬃ፤ ታ ኔ ቦላ ኢታ ኦꬃቤኬ፤ ኔኒ ጊዲኮ ታ ሼምፖ ꬋይሳናስ ጎዳሳ።
1SA 24:12 «ጎዳይ ኔ ጊዶኒኔ ታ ጊዶን ፒርዶ። ኔኒ ኢታ ኦꬂዳ ጊሻስ ጎዳይ ኔ ቦላ ሃሎ ኬሶ ኣቲን ታ ኔ ቦላ ኩሼ ዎꬂኬ።
1SA 24:13 ካሴ ዎዴ ቶሴን፥ ‹ኢታ ኦꬂዛይታፔ ኢታይ ኬዜስ› ጌቴቲዛ ማላ ሃኢ ታ ኩሼይ ኔና ቦቼና።
1SA 24:14 «ኢስራኤሌ ካዎይ ኦና ቦላ ኬኢዴ? ኔኒ ኦና ጎዳይ? ሃይቂዳ ካና ዎይኮ ካስቶሌ ጎዳይ?
1SA 24:15 ሃኢካ ኑ ጊዶን ጎዳይ ዳና ጊዲ ፒርዶ። ታ ዮኦዛ ጼሊዲ ታ ጊሻስ ኢዚ ሞቴቶ። ታናካ ኔ ኩሼፔ ኬሲ ኤኪዲ ታ ቱማቴꬃ ኢዚ ቆንጪሶ» ጊዴስ።
1SA 24:16 ዳዊቲ ሄሳ ሃሳይዲ ዉርሲዳ ማላ ሳኦሊ፥ «ታ ና ዳዊቴ! ኣዳፌ ሃይሲ ኔ ቃላ?» ጊዲ ዬኪሼ ኦይቺዴስ።
1SA 24:17 ካሌꬂዲ ሳኦሊ ዳዊቴስ፥ «ታ ኔ ቦላ ኢታ ኦꬂሺን ኔ ታስ ሎኦ ኦꬂዳ ጊሻስ ኔ ታፔ ጺሎ።
1SA 24:18 ኔ ታስ ኦꬂዳ ሎኦ ሚሺ ሄኮ ታስ ዮታዳሳ፤ ጎዳይ ታና ኔ ኩሼን ኣꬂ ኢሚዴስ ሺን ኔ ታና ዎꬋቤካ።
1SA 24:19 ባ ሞርኬ ዴሚዲ ኢዛ ቦላ ቆሆ ጋꬆንታ ዲሼ ዬዲዛይ ኦኔ? ኔኒ ሃች ታስ ኦꬂዳ ኪያቴꬃ ኩሼ ጎዳይ ኔስ ዛሮ።
1SA 24:20 ቤያ ቱማፔ ኔኒ ካዎታናይሳኔ ኢስራኤሌ ካዎቴꬂ ኔ ኩሼን ሚናናይሳ ታ ኤራይስ።
1SA 24:21 ኔኒ ታ ዜሬꬃታ ꬋይሶንታ ማላኔ ታ ሱንꬅ ታ ኣዋ ኬꬃፌ ꬋይሶንታ ማላ ጎዳ ሱንꬃን ጫቃ» ጊዴስ።
1SA 24:22 ዳዊቲካ ሳኦሌስ ጫቂዴስ። ሄሳፌ ጉዬ ሳኦሊ ባ ሶ ሲሚ ቢዴስ፤ ዳዊቲኔ ኢዛ ካሊዛይቲ ካሴ ባ ቆቴቲዛ ሚጻን ሲሚ ኬኢዳ።
1SA 25:1 ሳሜሊ ሃይቂዴስ፤ ኩሜꬃ ኢስራኤሌ ኣሳይ ኢሲ ቦላ ሺቂዲ ኢዛስ ዬኪዴስ፤ ሄሳፌ ጉዬ ኤራማን ዲዛ ኢዛሶ ኤፊዲ ኢዛ ሄን ሞጊዳ። ሄሳፌ ጉዬ ዳዊቲ ዱጌ ማኦኔ ባዞ ቢዴስ።
1SA 25:2 ማኦኔ ቢታን ቃርሜሎሴን ኣቆታራ ዲዛ ኢሲ ዱሬ ኣሲ ዴስ፤ ኢዛስ 1,000 ዴይሻቲኔ ኢስኬይ ቃንጼቲዛ 3,000 ዶርሳቲ ዴቴስ።
1SA 25:3 ኣዴዛ ሱንꬂ ናባሌ፥ ማቼይ ሱንꬂ ኣቢጋሎ ጌቴቴስ። ኢዛ ኣኬካንቻኔ ኬሃ ማላ ሎኦ ማጫሳ፤ ኢዚ ኣዚናዚ ጊዲኮ ቦዛኔ ኢታ ኦꬂዛ ኣሳ። ኢዚ ካሌቤ ባጋ ኣሳ።
1SA 25:4 ዳዊቲ ባዞን ዲሼ ናባሌይ ባ ዶርሳታ ኢስኬ ቃንጺዛይሳ ሲዪዴስ።
1SA 25:5 ኢዚካ ታሙ ናቴꬃ ናይታ፥ «ናባሌኮ ፑዴ ቃርሜሎሴ ኬዚቴ፤ ታ ሳሮካ ኢዛስ ጋꬂቴ።
1SA 25:6 ኢዛስ፥ ‹ሼምፖ ጋምኣ! ሳሮይ ኔስ ጊዶ፤ ሳሮይ ኔሶ ኣሳሲኔ ኔስ ጊዲዳ ኡባስ ጊዶ።
1SA 25:7 ሃኢ ኔኒ ዶርሳታ ኢስኬ ቃንጺዛይሳ ታኒ ሲያዲስ። ኔ ሜሄዛ ሄሚዛይቲ ካሴ ኑናራ ዲዛ ዎዴ ኡባን ኑ ኢስታ ቦላ ኣይኮ ኢታካ ጋꬂቤኮ። ኢስቲ ቃርሜሎሴን ዲዛ ዎዴ ኡባን ኢስታፌ ꬋይዳ ኢሲ ሚሺካ ዴና።
1SA 25:8 ሄሳ ኔኒ ኔ ኦሳንቻታ ኦይቻ፤ ኢስቲ ኔስ ዮታና። ሃች ኑኒ ሎኦ ጋላስ ዪዳ ጊሻስ ሃ ናቴꬃ ናይቲ ኔ ሲንꬃን ቦንቼቴቶ። ሾቤ ኔና ኔ ኣይሌታሲኔ ኔ ና ዳዊቴስ ኔስ ዳንዳዬቲዛ ማላ ኑስ ኢማ› ጊቴ» ጊዴስ።
1SA 25:9 ዳዊቲ ኪቲዳ ኣሳቲ ሄ ጋኪዳ ማላ ዳዊቴ ኪታ ናባሌስ ዮቲዳፔ ጉዬ ዛሮ ናጎ ዶሚዳ።
1SA 25:10 ናባሌይ ዳዊቴ ኦሳንቻታስ፥ «ዳዊቲ ኢዚ ኦኔ? ኢሴዬ ናይ ኢዚ ኦኔ? ሃይሳ ሃ ዎዴዛን ባንታ ጎዳታፔ ባቃቲ ቢዛ ኦሳንቻቲ ዳሮ።
1SA 25:11 ሂስቲን ታኒ ታ ካꬂኔ ታ ሃꬅ፥ ታ ዶርሳታ ኢስኬ ቃንጺዛይታስ ታ ሹኪዳ ኣሾ ኢስቲ ኣዋፔ ዪዳኮ ኤሬቶንታ ኣሳስ ታኒ ኣዛስ ኢሞ?» ጊዴስ።
1SA 25:12 ዳዊቲ ኪቲዳ ኣሳቲ ጉዬ ሲሚ ቢዲ ጋኪዳ ማላ ናባሌይ ኢስታስ ጊዳይሳ ኡባ ዳዊቴስ ዮቲዳ።
1SA 25:13 ዳዊቲካ ኣሳታስ፥ «ኣኔ ኡባቲካ ኢንቴ ጊꬃ ማሻ ጊጺቴ» ጊዴስ። ሄሳ ጊሻስ ኡባይካ ባ ማሻ ማሻ ጊጺዳ፤ ዳዊቲካ ባ ማሻ ጊጺዴስ። 400 ጊዳና ኣሲ ዳዊቴራ ኬኢሺን 200 ጊዳና ኣሲ ኢስታ ሚሻ ናጋናስ ጉዬ ኣቲዴስ።
1SA 25:14 ናባሌ ኣይሌታፔ ኢሶይ ኢዛ ማቾ ኣቢጋሊስ፥ «ቤኣ፥ ዳዊቲ ባ ዲዛ ባዞፌ ኑ ጎዳኮ ኣስ ሳሮካራ ጋꬂ ዬዲዴስ። ጊዶ ኣቲን ኢዚ ኢስታ ጫሽ ካልሲዴስ።
1SA 25:15 ሃ ኣሳቲ ኬሂ ሎኦ ኣሳ፤ ኑ ቦላ ኣይ ቆሆካ ጋꬂቤቴና። ባዞን ኑ ኢስታራ ዲዛ ዎዴ ኑስ ኣይኮይካ ꬋይቤና።
1SA 25:16 ኑኒ ኑ ሜሄታ ሄሚሼ ኢስታራ ዲዛ ዎዴ ኡባን ጋላስ ጊዲን ኦማርስ ኢስቲ ኑስ ዲርሳ ጊዲዳ።
1SA 25:17 ሃኢ ኑ ጎዳ ቦላኔ ኢዛሶ ኣሳ ቦላ ሜቶይ ኣላንꬂሼ ዲዛ ጊሻስ ኔኒ ዩሻ ቆፓዳ ኦꬃናስ ቤሲዛይሳ ኦꬃ። ኢዚ ጊዲኮ ሄሳ ማላ ቦዛ ኣስ ጊዲዳ ጊሻስ ኢዛስ ጻሊ ዮታና ኢሳዴይካ ዴና» ጊዴስ።
1SA 25:18 ኣቢጋላ ጋምኦንታ ዳሼ ኤሌላዳ 200 ሶሎ፥ 2 ሉካሞ ኩሜꬃ ዎይኔ ኡሹ፥ 5 ዶርሳ ኣሾ ጺጻ፥ 17 ኪሎ ቲያ ጫጫ፥ 100 ዉርጮ ዎይኔ ኣይፌኔ 200 ባላሴ ሚꬃ ኣይፌፔ ኡኬቲዳ ቄሪ ኡኬꬅ ኢሲ ቦላ ሺሻ ኤካዳ ሃሬ ቦላ ጫናዱስ።
1SA 25:19 ሄሳፌ ጉዬ ባ ኣይሌታ፥ «ኢንቴ ታፔ ሲንꬃቲ ቢቴ፤ ታኒካ ኢንቴ ጉዬራ ጋካና» ጋዱስ። ጊዶ ኣቲን ባ ኣዚና ናባሌስ ኣይኮካ ዮታቤኩ።
1SA 25:20 ኢዛ ባ ሃሬዛ ቶጋዳ ዱጌ ዙሌዛ ዎꬊሺን ዳዊቲኔ ኢዛ ካሊዛይቲ ኢዚኮ ዱጌ ዎꬊዳ፤ ኢዛካ ኢስታ ዴማዱስ።
1SA 25:21 ዳዊቲ፥ «ኢዛ ሚሻፌ ኢሲናካ ꬋዮንታ ማላ ሃይሳ ኣዴዛ ኣቆታ ባዞ ቢታን ታ ናጊዳይ ጮ ሃዳ ጊዲዴስ። ታ ኢዛስ ሎኦ ኦꬂዳይሳ ኩሼ ኢዚ ታስ ኢታ ዛሪዴስ።
1SA 25:22 ዎንቶ ማላዶ ኢዛ ኣሳፔ ኢሳዴካ ታ ሼምፖራ ፓጻ ኣጊኮ ጾሲ ታ ቦላ ሄሳ ማላ ኦꬆ፤ ሄሳፌካ ኣꬊዛ ኢታ ሚሽ ኦꬆ» ጊዴስ።
1SA 25:23 ኣቢጋላ ዳዊቴ ዴሚዳ ማላ ሄራካ ሃሬዛ ቦላፌ ዎꬋዳ ዳዊቴ ሲንꬃን ጉፋናዳ ኩሼ ዴንꬃዱስ።
1SA 25:24 ኢዛ ሄን ዳዊቴ ቶሆ ቦላ ኩንዳዳ፥ «ታ ጎዶ! ኢዛ ሞሮይ ታ ቦላ ቆዴቶ፤ ሾቤ ታኒ ኔ ኣይሌይ ኔስ ዮታና ጊዛይሳ ሲያርኪ!
1SA 25:25 ታ ጎዶ! ሄሳ ቦዛ ናባሌ ፓጻ ሚሻን ቆዶፓ! ኣዴዛስ ሱንꬃ ቢርሼꬂ ኤያ ጉስ ጊዲዳ ጊሻስ ኢዚካ ባ ሱንꬃ ማላ ኤያ! ኤያቴꬂካ ኢዛራ ጋምኢዴስ። ታኒ ኔ ኣይሌያ ጊዲኮ ኔ ታ ጎዳይ ኪቲዳ ናቴꬃታ ቤያቤኬ።
1SA 25:26 «ታ ጎዶ! ዴኦ ጎዳይ ቤዪን! ኔ ኣሾ። ሱꬅ ጉሳናፔኔ ኔርካ ኔ ሃሎ ኬሳናፔ ኔና ናጊዳይ ጎዳ። ሃኢካ ኔ ሞርኬቲኔ ታ ጎዳ ቆሃና ኮይዛይቲ ኡባይ ናባሌ ማላ ጊዴቶ።
1SA 25:27 ታ ኔ ኣይሌያ ታ ጎዳስ ኤሂዳ ሃ ኢሞታይ ኔና ካሊዛ ሃ ናቴꬃታስ ኢሜቶ።
1SA 25:28 ታ ጎዳይ ኦላ ኦሌቲዛ ጊሻስ ጎዳይ ታ ጎዳ ካዎቴꬃ ቱማፔ ኢዚ ሜርናስ ኢዛስ ሚንꬃና። ሄሳ ጊሻስ ታና ኔ ኣይሌይ ቆሆ ታስ ኣቶ ጋ። ኔኒ ሼምፖራ ፓጻ ዲዛ ዎዴ ኡባን ኢታቴꬂ ኔፔ ቤቶፎ።
1SA 25:29 ኣይ ኣሲካ ኔ ሼምፖ ꬋይሳናስ ጎዲኮካ ታ ጎዳ ሼምፖይ ዴኦን ዲዛይታ ኢሲፌቴꬃ ጊዶን ጎዳ ኔ ጾሳ ማታን ሳሮን ናጌታና። ጊዶ ኣቲን ኔ ሞርኬታ ሼምፖ ሹች ያንባርሻን ጫዲዛ ማላ ጫዳና።
1SA 25:30 ጎዳይ ታ ጎዳስ ኢሚዳ ሂዶታ ቃላ ማላ ሎኦ ሚሽ ኡባ ኦꬂዳ ዎዴኔ ኢስራኤሌ ቦላካ ኢዚ ኔና ካዎꬂዳ ዎዴ፥
1SA 25:31 ኔኒ ሃዳን ጉሲዳ ሱꬂ ዎይኮ ኔ ኩሼን ኔኒ ሃሎ ኬሲዳዚ ዶንታ ጊሻስ ታ ጎዳይ ዎዚናን ጬጫና ሃኖይኔ ሞꬌታና ሚሺ ዴና። ጎዳይ ኔስ ሎኦ ኦꬂዳ ዎዴ ታና ኔ ኣይሌዮ ባሎፓ» ጋዱስ።
1SA 25:32 ዳዊቲካ ኣቢጋሊስ፥ «ሃች ኔ ታናራ ጋይታና ማላ ኔና ታኮ ኪቲዳ ጎዳ ኢስራኤሌ ጾሳይ ጋላቴቶ።
1SA 25:33 ታኒ ኣሳ ሱꬅ ጉሶንታ ማላኔ ታ ኩሼን ሃሎ ኬሶንታ ማላ ሃች ኔ ታና ናጊዳ ጊሻሲኔ ኔ ሎኦ ቆፋ ጊሻስ ኔኒካ ኣንጄታ።
1SA 25:34 ታ ኔ ቦላ ሜቶ ጋꬆንታ ማላ ታና ናጊዳ ዴኦ ጎዳ ኢስራኤሌ ጾሳይ ቤዪን! ኔኒ ሃይሳꬆ ኤሶን ታኮ ያዳ ታና ዴሞንታኮ ጋዴይ ዎንታናስ ናባሌስ ኢሲ ኣቱማ ናይካ ኣቴና» ጊዴስ።
1SA 25:35 ሄሳፌ ጉዬ ኣብጋላ ዳዊቴስ ኤሂዳ ኢሞታ ኢዚ ኩሼፔ ኤኪዲ፥ «ኔኒ ኔ ሶ ሳሮን ባ፤ ኔ ጊዳይሳ ታ ሲያዲስ፤ ኔ ታና ኦይቺዳይሳ ታ ኦꬃና» ጊዴስ።
1SA 25:36 ኣቢጋላ ጉዬ ሶ ሲማ ቢሺን ናባሌይ ካዎ ኬꬃን ጊጊዛ ጊቢራ ማላ ጊቢራ ጊግሲዳይሳ ቤያዱስ። ኢዚካ ኬሂ ማꬆቲዲ ኡፋይሳን ኩሚ ኡቲዴስ። ሄሳ ጊሻስ ጋዴይ ዎንታናሼ ጋካናስ ኢዛስ ኣይኮካ ዮታቤኩ።
1SA 25:37 ዎንቴꬃ ጋላስ ኡሻ ማꬆይ ኢዛ ኣጊዳፔ ጉዬ ኢዛ ሃኖዛ ኡባ ኢዛስ ዮቲን፥ ኢዛ ዎዚናይካ ኬሂ ዳጋሚዲ ጮኡ ጊዴስ። ኢዛ ቦላይ ሹቻ ማላ ኣሃ ኬዚዴስ።
1SA 25:38 ታሙ ጋላሳታፔ ጉዬ ጎዳይ ቦሻን ናባሌ ሾጪን ኢዚ ሃይቂዴስ።
1SA 25:39 ዳዊቲካ ናባሌይ ሃይቂዳይሳ ሲዪዳ ዎዴ፥ «ናባሌይ ታና ጫዪዳ ጊሻስ ታስ ሃሎ ኬሲዳይኔ ታና ባ ኣይሌዛ ኢታ ኦꬆንታ ማላ ናጊዳ ጎዳይ ጋላቴቶ፤ ናባሌይ ኦꬂዳ ኢታ ሚሽ ኢዛ ሁኤን ዛሪዴስ» ጊዴስ። ሄሳፌ ጉዬ ዳዊቲ ኣቢጋላ ኢዛ ማቾ ጊዳና ማላ ኦይሻ ኣስ ኪቲዴስ።
1SA 25:40 ኢዛ ኣይሌቲካ ቃርሜሎሴ ቢዲ ኣቢጋሊስ፥ «ኔ ኢዛስ ማቾ ጊዳና ማላ ኔና ኤካናስ ዳዊቲ ኑና ኔኮ ኪቲዴስ» ጊዴስ።
1SA 25:41 ኢዛካ ዴንዳ ኤቃዳ ሲንꬃ ጉꬅ ጉፋና ኩሼ ዴንꬃዳ፥ «ሄኮ ታኒ ኔ ጋራዴያ ኔስ ሃጋዛናሲኔ ኔ ኣይሌታ ቶሆ ሜጫናስ ጊጋ ኡታዲስ» ጋዱስ።
1SA 25:42 ኣቢጋላ ሄራካ ሃሬ ቶጋዳ ባ ጋራዴ ኢቻሻታ ካሌꬃ ኤካዳ ዳዊቴ ኣይሌታራ ባዳ ዳዊቴስ ማቾ ጊዳዱስ።
1SA 25:43 ሄሳꬆካ ዳዊቲ ኢዝራኤሌን ዬሌቲዳ ኣሂናሆሞ ኤኪዴስ፤ ናምኣቲካ ኢዛ ማቾ ጊዲዳ።
1SA 25:44 ሳኦሊ ጊዲኮ ዳዊቴ ማቾ ባ ና ሚልኮሎ ጋሊሜ ዴሬን ዬሌቲዳ ላይሻ ና ፓሊጼስ ኢሚዴስ።
1SA 26:1 ዚፌ ኣሳይ ሳኦሊ ዲዛሶ ዪዲ፥ «ቤኢቴ ዳዊቲ ዬሴሞኔ ጊናራ ዲዛ ሃካሊያ ዙምቡላ ቦላ ቆቴቲዴስ» ጊዲ ዮቲዳ።
1SA 26:2 ሄሳ ጊሻስ ሳኦሊካ ዴንዲዲ ኢስራኤሌ ኣሳ ጋርሳፌ ዶሬቲዳ 3,000 ኦላ ኣሳታ ባናራ ኤኪዲ ዳዊቴ ኮሽ ዱጌ ዚፌ ባዞ ዎꬊዴስ።
1SA 26:3 ሳኦሊ ዬሴሞኔ ጊናራ ዲዛ ሃካሊያ ዙምቡላ ቦላ ኦጌ ዶናን ዱንካኒ ኡቲዴስ፤ ዳዊቲ ጊዲኮ ባዞን ዴስ። ዳዊቲ ሳኦሊ ሄ ጋካናስ ኢዛ ካሊ ዪዳይሳ ኤሪዲ፥
1SA 26:4 ጾሞሲዛይታ ዬዲዲ ሳኦሌ ዩሳ ሻኪ ኤሪዴስ።
1SA 26:5 ዳዊቲ ዴንዲዲ ሳኦሊ ዱንካኒ ዲዛሶ ቢዴስ፤ ሳኦሊኔ ኢዛ ኦላ ኣሳ ሃላቃ፥ ኔሬ ና ኣቢኔሪ ዲዛሶ ቢ ቤኢዴስ። ሳኦሊ ባ ዱንካኒ ዲዛሶን ኣሳ ጊዶን ꬊስኮን ዲሺን ኢዛ ኦላ ኣሳይ ኢዛ ጊዶꬂ ዎꬂዴስ።
1SA 26:6 ዳዊቲ ሂቴ ዴሬ ኣስ ኣሂሜሌኬኔ ጹሪያ ና ኢዮኣቤ ኢሻ ኣቢሳዬ፥ «ታናራ ዱጌ ሳኦሊ ዲዛሶ ዎꬋናይ ኦኔ?» ጊ ኦይቺዴስ። ኣቢሳዬይካ፥ «ታ ኔናራ ዎꬋና» ጊዴስ።
1SA 26:7 ሄሳ ጊሻስ ዳዊቲኔ ኣቢሳዬይ ሳኦሌ ኦላ ኣሳይ ዲዛሶ ቢዳ፤ ኢስቲ ቢሺን ሳኦሊ ሄን ꬊስኮን ዴስ፤ ኢዛ ቶራይ ኢዛ ሁኤሶን ቢታን ኤቂ ዴስ፤ ኣቢኔሪኔ ኢዛ ኦላንቻቲ ኢዛ ዩሾን ꬊስኪዳ።
1SA 26:8 ኣቢሳዬይ ዳዊቴስ፥ «ጾሲ ሃች ኔ ሞርኬ ኔ ኩሼን ዬጊዴስ፤ ሃኢ ታ ኢዛ ኢሲቶ ጫዳ ቢታራ ሲካይስ፤ ታ ናምኣንꬃናስ ኣይኮካ ኮሼና» ጊዴስ።
1SA 26:9 ዳዊቲ ኣቢሳዬ፥ «ዎꬎፓ፤ ጎዳይ ቲይዳዴ ቦላ ባ ኩሼ ዴንꬂዲ ሱꬃፌ ጌሽ ጊዲዳ ኣሲ ኦኔ?
1SA 26:10 ዴኦ ጎዳይ ቤኢን፥ ጎዳይ ኢዛ ዎꬋና፤ ዎይኮ ኢዛ ዎዴይ ዉሪን ኢዚ ሃይቃና፤ ዎይኮ ኢዚ ኦላን ሃይቃና።
1SA 26:11 ጎዳይ ቲይዳይሳ ቦላ ታኒ ታ ኩሼ ዎꬃናፔ ጎዳይ ታና ናጎ! ጊዶ ኣቲን ኢዛ ሁኤሶን ዲዛ ቶራኔ ሃꬃራ ዲዛይሳ ሃ ኤካ ያ፥ ኣኔ ቦስ» ጊዴስ።
1SA 26:12 ሄሳ ጊሻስ ዳዊቲ ሳኦሌ ሁኤሶን ዲዛ ቶራኔ ሃꬂ ኢዛን ዲዛ ሚሻ ኤኪዴስ፤ ሄሳፌ ጉዬ ቢዳ፤ ሄሲ ሃኒሺን ቤኢዳይ፥ ኤሪዳይ ዎይኮ ꬊስኮፌ ቤጊዳይ ኦኒካ ዴና። ጎዳ ኣቻፌ ዎልቃማ ꬊስኮይ ኢስታ ቦላ ዎꬊዳ ጊሻስ ኡባይካ ꬊስኪዳ።
1SA 26:13 ሄሳፌ ጉዬ ዳዊቲ ሄ ፒንꬂ ፒኒዲ ዙምቡላ ጼራን ሃኪ ኤቂዴስ፤ ኢስቲ ናምኣይ ኢሶይ ኢሳፌ ኬሂ ሃኪዳ።
1SA 26:14 ዳዊቲ ባ ኦላ ኣሳኔ ኔሬ ና ኣቢኔሬ፥ «ኣቢኔሬ! ታ ኔና ጼይጊዛይሳ ሲዪኪ?» ጊ ጼይጊዴስ። ኣቢኔሪ ኢዛስ፥ «ካዎ ቦላ ኔ ካጫናስ ኔ ኦኔ?» ጊ ዛሪዴስ።
1SA 26:15 ዳዊቲ ኢዛስ፥ «ኔ ሚኖ ኣሳ፤ ኢስራኤሌ ጋርሳን ኔ ማላይ ኦኔ? ሄኮ ኣሲ ኔ ጎዳ ካዎዛ ዎꬋናስ ዪዴስ፤ ሂስቲን ኔኒ ኔ ጎዳ ካዎዛ ኣይስ ናጋቤኪ?
1SA 26:16 ኔ ሎኦ ኦꬃቤካ፤ ዴኦ ጎዳይ ቤኢን! ኔኒኔ ኔ ኣሳቲ ሃይቃና ቤሴታ፤ ጋሶይካ ጎዳይ ቲይዳ ኢንቴ ጎዳ ናጊቤኬታ፤ ኣኔ ጼላ፤ ኢዛ ሁኤሶን ዲዛ ካዎ ቶራይኔ ሃꬅ ኦይኪዛ ሚሻዚ ኣዋን ዲዞ?» ጊዴስ።
1SA 26:17 ሳኦሊ ዳዊቴ ጬንጉርስ ጊዲዳይሳ ሻኪ ኤሪዲ፥ «ታ ና ዳዊቴ! ሃይሲ ኔ ጬንጉርሴ?» ጊዴስ። ዳዊቲካ፥ «ታ ጎዶ፥ ኤ ታ ጬንጉርሳ» ጊ ዛሪዴስ።
1SA 26:18 ካሌꬂዲካ፥ «ታ ጎዳይ ባ ኦሳንቻ ኣይስ ጎዲዜ? ኣይ ኦꬃዲና? ኣይ ቆሃዲና?
1SA 26:19 ሃኢካ ታ ጎዳ ካዎይ፥ ባ ኣይሌዛ ጬንጉርስ ኤዝጊ ሲዮ፤ ጎዳይ ኔና ታ ቦላ ዴንꬄꬂዳ ጊዲኮ ኢዚ ያርሾ ሞ፤ ጊዶ ኣቲን ሃይሳ ኣሲ ኦꬂዳ ጊዲኮ ጎዳ ኣቻን ቃንጌቲዳይታ ጊዴቶ፤ ጋሶይካ፥ ‹ባ፥ ባዳ ሃራ ኤቃታስ ጎይና› ጊዲ ጎዳ ኣቻን ጺንጾይ ዶንታ ማላ ሃች ዬዴꬂዳ።
1SA 26:20 ኣሲ ዙማ ቦላ ኩራቾ ጎዲዛ ማላ ኢስራኤሌ ካዎይ ካስቶሌ ኮያና ኬዚዳ ጊሻስ ታ ሱꬃይ ጎዳ ሲንꬃፌ ሃኪዲ ቢታ ቦላ ጉካና ማላ ኦꬆፋ» ጊዴስ።
1SA 26:21 ሳኦሊካ፥ «ታ ና ዳዊቴ! ታ ቆሃዲስ፤ ሃች ታ ሼምፖያ ኔ ሲንꬃን ዲዛ ጊሻስ ሃይሳፌ ጉዬ ታ ኔና ቆሂኬ፤ ኣዳፌ ታኒ ኤያ ኦሶ ኦꬃዲስ፤ ኬሃካ ባሌታዲስ» ጊዴስ።
1SA 26:22 ዳዊቲካ ኢዛስ፥ «ካዎ ኔ ቶራ ሃይሳ ቤያ፤ ኔ ናቴꬃታፔ ኢሳዴይ ዪዲ ኤኮ።
1SA 26:23 ጎዳይ ኢሳስ ኢሳስ ኢዛ ጺሎቴꬃ ማላኔ ኢዛ ኣማኔቴꬃ ማላ ኢዛስ ቃንጾ፤ ታኒ ጊዲኮ ሃች ጎዳይ ኔና ታ ኩሼን ኣꬂ ኢሚን ታኒ ጎዳይ ቲይዳይሳ ቦላ ታ ኩሼ ዴንꬃቤኬ።
1SA 26:24 ቤኣ ኔ ሼምፖይ ታ ኣይፌ ሲንꬃን ቦንቼቲዳ ማላ ታ ሼምፒያካ ጎዳ ሲንꬃን ቦንቼቲዳሮ ጊዱ፤ ኢዚ ታና ሜቶ ኡባፌ ኣሾ» ጊ ዛሪዴስ።
1SA 26:25 ሄሳፌ ጉዬ ሳኦሊ ዳዊቴስ፥ «ታ ና ዳዊቴ! ኔ ኣንጄቲዳይሳ ጊዳ፤ ኔ ጊታ ሚሽ ኦꬃና፤ ኢዚካ ኔስ ሃናና» ጊዴስ። ሄሳፌ ጉዬ ዳዊቲ ባ ቢዛሶ ቢን ሳኦሊ ባሶ ሲሚዴስ።
1SA 27:1 ዳዊቲ ጊዲኮ ባ ዎዚናራ፥ «ሃ ጋላሳታፔ ኢሲ ጋላስ ሳኦሌ ኩሼን ሃይቆይ ታስ ኣቶንታ ጊሻስ ፊሊስጼሜ ዴሬ ባቃታይ ታና ኣሻና፤ ሄሳፌ ጉዬ ሳኦሊ ታና ኢስራኤሌ ጋርሳፌ ጎዲዛይሳ ኣጋጋና፤ ታኒካ ኢዛ ኩሼፔ ኬሳ ኤካና» ጊ ቆፒዴስ።
1SA 27:2 ሄሳ ጊሻስ ዳዊቲኔ ኢዛራ ዲዛ 600 ኣሳይ ዴንዲዲ ጌቴ ካዎ ማኦኬ ና ኣንኩሴኮ ቢዳ።
1SA 27:3 ዳዊቲኔ ኢዛራ ዲዛ ኣሳይ ኣንኩሴ ማታን ዴኢዳ፤ ኢሶይ ኢሶይ ባሶ ኣሳራ ዴስ፤ ዳዊቲካ ባ ማቼታ ናምኣታራ ኢዝራኤሌ ዴሬ ማጫስ ኣሂናሆሚራኔ ካሴ ናባሌ ማቾ ቃርሜሎሴ ዴሬ ማጫስ ኣቢጋሊራ ዴስ።
1SA 27:4 ሳኦሊ ዳዊቲ ጌቴ ባቃቲዳይሳ ሲዪዲ ኢዛ ጎዲዛይሳ ኣጋጊዴስ።
1SA 27:5 ሄሳፌ ጉዬ ዳዊቲ ኣንኩሴስ፥ «ኔ ሲንꬃን ታ ቦንቾ ዴሚዳ ጊዲኮ ሃኖ ዴሬዪን ዲዛ ካታማታፔ ኢሲኔይን ታ ዳና ማላ ታስ ሶሆ ኢማ። ታ ኔ ኣይሌይ ኔ ዲዛ ካታማን ኔናራ ዋና ዳኔ?» ጊዴስ።
1SA 27:6 ሄሳ ጊሻስ ሄ ጋላስ ኣንኩሴይ ኢዛስ ጺጊላጌ ኢሚዴስ፤ ሄ ዎዴፔ ዶሚን ጺጊላጌይ ዩሁዳ ካዎታ ጺንጾ ጊዳዱስ።
1SA 27:7 ዳዊቲ ፊሊስጼሜ ዴሬን ኢሲ ላይꬂኔ ኦይዱ ኣጊና ጋምኢዴስ።
1SA 27:8 ሄ ዎዴ ዳዊቲኔ ኢዛ ኣሳቲ ኬዚዲ ጌሹሬ፥ ጌሪዛዌኔ ኣማሌቄ ኦሊ ኦይኪዳ። ሃ ዴሬቲ ቤኒፔ ዶሚዲ ሹራፔ ቢዲ ጊብጼ ጋካናስ ዴኢዳ።
1SA 27:9 ዳዊቲ ቢታዮ ኦሊዳ ዎዴ ኣቱማስ ጊዲን ማጫስ ቢታ ቦላ ኣሺቤና። ጊዶ ኣቲን ዶርሳታ፥ ሚዛታ፥ ሃሬታኔ ጋሜላታ ሄሳꬆካ ማይኦታካ ኤኪ ኣንኩሴኮ ሲሚ ቢዴስ።
1SA 27:10 ኣንኩሴይካ፥ «ሃች ኦና ቦላ ዎራጂዴቲ?» ጊ ኦይቺን ዳዊቲ፥ «ዩሁዳፔ ዱጌሃ ባጋራ፥ ዎይኮ ዬራሂምኤሌስ ዱጌሃ ባጋራ፥ ዎይኮ ቄናዌታፔ ዱጌሃ ባጋራ ዴስ» ጊዛ ዛሮ ኢሚዴስ።
1SA 27:11 ዳዊቲ፥ «ኢዚ ኑ ቦላ ሃይሳ ሃይሳ ኦꬂዴስ ጊዲ ዮታና» ጊዲ ቆፒዳ ጊሻስ ኣቱማስ ጊዲን ዎይኮ ማጫ ሼምፖራ ፓጻ ኣሺ ጌቴ ኤኪ ዪቤና። ኢዚ ፊሊስጼሜ ዴሬን ዲዛ ዎዴ ኡባን ሄሳꬆ ኦሶይ ኢዛስ ሎሴ ጊዲዴስ።
1SA 27:12 ኣንኩሴይ ባ ዎዚናራ፥ «ኢዚ ባ ዴሬ ኢስራኤሌ ኣሳይ ኢዛ ኬሂፔ ኢጻና ማላ ኦꬂዳ ጊሻስ ኢዚ ታስ ሜርናስ ኦሳንቻ ጊዳና» ጊ ቆፒዳ ጊሻስ ዳዊቴ ኣማኒዴስ።
1SA 28:1 ሄ ዎዴ ፊሊስጼሜ ኣሳይ ኢስራኤሌ ኣሳ ኦላናስ ባ ኦላንቻታ ሺሺዴስ። ኣንኩሴይካ ዳዊቴ፥ «ኔኒኔ ኔ ኣሳይ ታናራ ኢሲፌ ኦላስ ኬዛናይሳ ኤሪቴ» ጊዴስ።
1SA 28:2 ዳዊቲካ፥ «ታኒ ኔ ኦሳንቻይ ኣይ ኦꬃናኮ ኔኒ ኔ ሁኤራ ቤኣንዳሳ» ጊዴስ። ኣንኩሴይካ፥ «ኤሮ ሎኦኮ! ታ ዲዛ ላይꬅ ኡባን ታ ኔና ታስ ቦንቾ ዛቤ ሂስታና» ጊዴስ።
1SA 28:3 ሄ ዎዴ ሳሜሊ ሃይቂ ጋምኢዴስ፤ ኢስራኤሌ ኣሳይ ኡባይ ኢዛ ካታማን ኤራማን ዬኪዲ ሞጊዴስ፤ ሳኦሊ ማሮታኔ ሞይቲሌ ሃሳይሲዛይታ ካሴ ዴሬፔ ጎዲዴስ።
1SA 28:4 ፊሊስጼሜ ኣሳይ ኢሲ ቦላ ሺቄቲ ዪዲ ሱኔሜን ኡቲን ሳኦሊ ቃሴ ኢስራኤሌ ኣሳ ኡባ ሺሺዲ ጊልቦኣ ዙማ ቦላ ኡቲዴስ።
1SA 28:5 ሳኦሊ ፊሊስጼሜ ኦላ ኣሳ ቤኢዲ ባቢዴስ፤ ኢዛ ዎዚናይ ኬሂፔ ሂርጊዴስ።
1SA 28:6 ኢዚ ጎዳ ኦይቺን ጎዳይ ኢዛስ ኣጉሞን ጊዲን ዎይኮ ኡሪሜን ዎይኮ ናቤታ ባጋራ ዛሮ ኢሚቤና።
1SA 28:7 ሳኦሊካ ባ ኦሳንቻታ፥ «ኣኔ ሃይቂዳ ኣስ ዴንꬂዛ ማጫስ ታስ ኮዪቴ፤ ታኒ ባዳ ኢዞ ኦይቻና» ጊዴስ። ኢስቲካ ኢዛስ፥ «ሄኮ ሃይቂዳ ኣስ ዴንꬂዛ ማጫሳያ ኤን-ዶሬን ዳዉስ» ጊዳ።
1SA 28:8 ሄሳ ጊሻስ ሳኦሊ ባ ማይኦ ላሚ ሃራ ማይኦ ማይኢዲ፥ ባ ሜꬋካ ላሚዲ ናምኡ ኣሳታራ ኢሲፌ ኦማርስ ማጫሳይኮ ቢዴስ፤ ኢዚካ ኢዞ፥ «ታስ ሞይቲሌታ ኦይቻርኪ፤ ታ ኔስ ዮቲዛዴ ዴንꬃርኪ» ጊዴስ።
1SA 28:9 ማጫሳያ ጊዲኮ፥ «ሄኮ ሳኦሊ ማሮታኔ ሞይቲሌ ዴንꬂ ሃሳይሲዛይታ ቢታፌ ኢዚ ዎስቲ ꬋይሲዳኮ ኢዚ ኢስታ ቦላ ኦꬂዳይሳ ኔ ኤራሳ፤ ሂስቲን ኔ ታና ዎꬊሳናሲኔ ታ ሼምፖስ ዎጺማዴ ዎꬃናስ ኣይስ ኮያይ?» ጋዱስ።
1SA 28:10 ሳኦሊካ ኢዚስ፥ «ዴኦ ጎዳይ ቤኢን ሃይሲ ሃ ዮኦዚ ኔ ቦላ ቂጻቴ ኤሄና» ጊ ጫቂዴስ።
1SA 28:11 ማጫሳያካ፥ «ኔስ ኦና ዴንꬆ?» ጋዳ ኦይቻዱስ። ኢዚካ፥ «ታስ ሳሜላ ዴንꬃ» ጊዴስ።
1SA 28:12 ማጫሳያካ ሳሜላ ቤኢዳ ማላ ባ ቃላ ꬎቁ ሂስታ ዋሳዱስ፤ ሳኦሌስ፥ «ኔ ሳኦሌ ጊዳ ኡታዳ ታና ኣዛስ ባሌꬃዲ?» ጋዱስ።
1SA 28:13 ካዎዚካ፥ «ባቦፋ፤ ሃኢ ኔስ ኣዜ ቤቲዛይ?» ጊዴስ። ኢዛካ፥ «ኢሲ ኣያናይ ቢታፌ ፑዴ ኬዚሺን ቤኣዲስ» ጋዱስ።
1SA 28:14 ኢዚካ፥ «ኢዛስ ሜꬋይ ኣይ ሚሳቲዜ?» ጊ ኦይቺዴስ። ኢዛካ፥ «ካባ ማይኢዳ ኢሲ ጪማ ቢታኔይ ፑዴ ኬሳ ቦላ ዴስ» ጋዱስ። ሳኦሊካ ማጫሳያ ቤኢዳይሲ ሳሜላ ጊዲዳይሳ ኤሪዴስ፤ ቢታ ቦላ ጉፋኒዲ ኢዚስ ኩሼ ዴንꬂዴስ።
1SA 28:15 ሳሜሊካ ሳኦሌስ፥ «ታና ዱፎፔ ዴንꬃዳ ኣይስ ሼምፖ ዲጋይ?» ጊዴስ። ሳኦሊ፥ «ታኒ ኬሃ ጬጫዲስ፤ ፊሊስጼሜቲ ታና ኦሊሼ ዴቴስ፤ ጾሲ ታፔ ሃኪዴስ፤ ናቤታ ባጋራ ጊዲን ዎይኮ ኣጉሞን ታስ ዛሪቤና። ሄሳ ጊሻስ ታ ኣይ ኦꬃና ቤሲዛኮ ኔ ታስ ዮታና ማላ ኔና ጼይጋዲስ» ጊዴስ።
1SA 28:16 ሳሜሊ ኢዛስ፥ «ሂስቲን ጎዳይ ኔፔ ሃኪኮ፥ ኔስ ኢዚ ሞርኬ ጊዲኮ ኔ ታና ኣይስ ኦይቻይ?
1SA 28:17 ጎዳይ ታ ባጋራ ኔስ ዮቲዳይሳ ፖሊዴስ፤ ጎዳይ ኔ ካዎቴꬃ ኔ ኩሼፔ ዎꬂ ኤኪዲ ኔ ሾሮ ዳዊቴስ ኢሚዴስ።
1SA 28:18 ኔኒ ጎዳስ ኣዛዜቶንታ ኣጊዳ ጊሻሲኔ ሱሊዛ ኢዛ ሃንቆዛ ኔ ኣማሌቄታ ቦላ ፖሎንታ ኣጊዳ ጊሻስ ጎዳይ ሃች ሃይሳ ኔ ቦላ ኦꬂዴስ።
1SA 28:19 ጎዳይ ኔናኔ ኢስራኤሌታ ፊሊስጼሜታስ ኣꬂ ኢማና፤ ኔኒኔ ኔ ናይቲ ዎንቶ ታናራ ጊዳንዴታ፤ ቃሴካ ጎዳይ ኢስራኤሌ ኦላንቻታ ፊሊስጼሜታስ ኣꬂ ኢማና» ጊ ዛሪዴስ።
1SA 28:20 ሳሜሊ ዮቲዳ ቃላፔ ዴንዲዳይሳን ሳኦሊ ባቦን ኩሚዲ ሄራካ ቢታ ቦላ ፖርጩ ጊ ኩንዲዴስ። ኩሜꬃ ጋላሲኔ ኦማርስ ካꬅ ሞንታ ጊሻስ ኢዛስ ዎልቃይ ኢጺዴስ።
1SA 28:21 ማጫሳያ ሳኦሌኮ ያዱስ፤ ኢዚ ኬሂ ዳጋሚዳይሳ ቤያዳ ኢዛስ፥ «ሄኮ፥ ታኒ ኔ ኦሳንቻያ ኔ ቃላ ሲያዲስ፤ ታ ሼምፖ ባይዛዳ ኔ ታስ ዮቲዳይሳ ፖላዲስ።
1SA 28:22 ሃኢ ታኒ ኔ ኣሽካራያ ዮቲዛይሳ ሲያርኪ! ኔ ሚኔታዳ ባና ማላ ሃኖ ታ ኔስ ሺሺዛ ጉꬃ ካꬂዮ ማ» ጋዱስ።
1SA 28:23 ሳኦሊ፥ «ሚኬ» ጊዲ ኢጺዴስ። ጊዶ ኣቲን ኢዛራ ዲዛ ኣሳቲ ማጫሳይራ ጊዲዲ ሚንꬂ ዎሲን ኢስታ ቃላ ሲዪዴስ፤ ቢታ ቦላፌ ዴንዲዲ ሂጻ ቦላ ኡቲዴስ።
1SA 28:24 ማጫሳያ ባሶን ኦሃላ ማሪ ዲዛይሳ ኤሌላ ኤካዳ ሹካዱስ፤ ጉꬃ ꬊሌ ኤካ ሙኑቃዱስ፤ ኢርሾይ ጌሎንታ ኡኬꬅ ኡካዱስ።
1SA 28:25 ሂስታዳ ሳኦሌሲኔ ኢዛራ ዲዛ ኣሳታ ሲንꬅ ኣꬃዱስ፤ ኢስቲካ ሚዳፔ ጉዬ ሄ ጋላሳ ኦማርስ ዴንዲ ቢዳ።
1SA 29:1 ኢስራኤሌ ኣሳይ ኢዝራኤሌ ሾባን ዲዛ ኢሲ ፑልቶ ኣቻን ኡቲ ዲሺን ፊሊስጼሜ ኣሳይ ባንታ ኦላንቻታ ኡባ ኣፌቄ ጌቴቲዛሶን ሺሺዴስ።
1SA 29:2 ፊሊስጼሜ ኣይሲዛይቲ ጼቱኔ ሺ ኣስ ጊዲዲ ዱማ ዱማ ቆዴቲዲ ኦላስ ኬዚዳ፤ ዳዊቲኔ ኢዛራ ዲዛይቲ ቃሴ ኣንኩሴራ ኢሲፌ ጉዬራ ካሊ ቢዳ።
1SA 29:3 ፊሊስጼሜታ ኣይሲዛይቲ ኢስታ ቤኢዲ፥ «ሃይቲ ኢብራዌ ኣሳቲ ሃይሳን ኣይ ኦꬂዞ?» ጊዲ ኣንኩሴ ኦይቺዳ። ኣንኩሴይካ ኢስታስ፥ «ሃይሲ ኢስራኤሌ ካዎ ሳኦሌ ኦሳንቻ ዳዊቴ ጊዴኔ? ኢዚ ታናራ ዱስ ዶሚን ላይꬂ ኣꬊዴስ፤ ኢዚ ታ ጋርስ ዪ ጌሎሶፌ ሃች ጋካናስ ኣይ ሞሮካ ኢዛ ቦላ ዴማቤኬ» ጊ ዛሪዴስ።
1SA 29:4 ጊዶ ኣቲን ፊሊስጼሜታ ኣይሲዛይቲ ኣንኩሴ ቦላ ሃንቄቲዲ፥ «ሃይሳ ኣዴዛ ካሴ ኔ ኢሚዳሶ ጌዴ ጉዬ ዛራ ዬዳ፤ ኦሌቲዛ ዎዴ ሲሚ ኑ ቦላ ዴንዶንታ ማላ ኑናራ ኢሲፌ ኦላሶ ባናስ ቤሴና፤ ኢዚ ኑ ኣሳፔ ዎꬊዲ ኢስታ ሁኤ ቃንጺ ኤኪ ቦንታ ኣጊኮ ባ ጎዳራ ዋኒ ሲጌታናስ ዳንዳይዜ?
1SA 29:5 ሃይሳፌ ካሴ ማጫሳይ ዬꬃን ኤዲሼኔ ሶርሼ፥ « ‹ሳኦሊ ሺ ዎꬊዴስ፥ ዳዊቲ ታሙ ሺ ዎꬊዴስ› ጌቴቲ ኢዛ ጊሻስ ዬጼቲዳ ዳዊቲ ሃይሳ ዴኔ?» ጊዳ።
1SA 29:6 ሄሳ ጊሻስ ኣንኩሴይ ዳዊቴ ባኮ ጼይጊዲ፥ «ዴኦ ጎዳይ ቤኢን ኔኒ ታስ ኣማኔቲዳ ኣሳ፤ ኔኒ ታኮ ዪዳ ዎዴፔ ዶሚን ሃኖ ጋካናስ ኣይኮ ሞሮካ ታ ኔ ቦላ ቤኦንታ ጊሻስ ኔኒ ታናራ ኢሲፌ ኦላስ ኬዚዳኮ ታኒ ኡፋዬታና፤ ጊዶ ኣቲን ዴራ ኣይሲዛይቲ ኔና ኮዪቤቴና።
1SA 29:7 ሃኢ ጊዲኮ ኔኒ ጉዬ ሲማ ሳሮን ባ፤ ፊሊስጼሜታ ኣይሲዛይታ ኡፋይሶንታዝ ኣይ ሚሺካ ኦꬆፋ» ጊ ዮቲዴስ።
1SA 29:8 ዳዊቲካ፥ «ታ ጎዳዉ፥ ታ ኣይ ኢታ ኦꬃዲና? ታ ሃ ዪዳ ዎዴፔ ዶሚን ሃኖ ጋካናስ ኔ ኦሳንቻዛ ቦላ ኣይ ሚሽ ዴማዲ? ሂስቲን ታኒ ታ ጎዳ ካዎዛ ሞርኬታ ኣይስ ኦሊኪና?» ጊ ኦይቺዴስ።
1SA 29:9 ኣንኩሴይ ዳዊቴስ ዛሪዲ፥ «ታ ሲንꬃን ኔኒ ጾሳ ኪታንቻ ማላ ሎኦ ጊዲዳይሳ ታ ኤራይስ፤ ጊዶ ኣቲን ፊሊስጼሜ ዴሬታ ኣይሲዛይቲ፥ ‹ኢዚ ኑናራ ኦላሶ ባናስ ቤሴና› ጊዳ።
1SA 29:10 ሃኢ ጊዲኮ ኔናራ ኢሲፌ ዪዳ ኔ ጎዳ ኦሳንቻታራ ኢሲ ቦላ ዎንቶ ማላዶ ጻልቄይ ዎꬊዳ ማላ ካሴ ኢንቴ ዲዛሶ ጌዴ ጉዬ ሲሚ ቢቴ» ጊዴስ።
1SA 29:11 ሄሳ ጊሻስ ዳዊቲኔ ኢዛራ ዲዛ ኣሳቲ ጉዬ ፊሊስጼሜታ ዴሬ ሲማናስ ዎንታራ ዴንዲ ቢዳ፤ ፊሊስጼሜቲካ ፑዴ ኢዝራኤሌ ኬዚዳ።
1SA 30:1 ሄꬓንꬆ ጋላስ ዳዊቲኔ ኢዛራ ዲዛ ኣሳይ ጺቂላጌ ጋኪዳ፤ ኣማሌቄ ኣሳይ ኔጌቤኔ ጺጊላጌ ኦሊ ኦይኪዳ፤ ሂስቲዲ ጺቂላጌ ጹጊዳ።
1SA 30:2 ማጫሳታ፥ ሄን ዲዛ ናቴꬃታኔ ጪማታ ኡባ ዲኢ ኤፊዳ ኣቲን ኢስታፌ ኢሳዴካ ዎꬊቤቴና።
1SA 30:3 ዳዊቲኔ ኢዛራ ዲዛ ኣሳቲ ጺቂላጌ ጋኪዳ ማላ ካታማያ ጹጌቲዳይሳ፥ ኢስታ ማቼቲ፥ ኢስታ ኣቱማ ናይቲኔ ኢስታ ማጫ ናይቲ ዲኤቲ ቢዳይሳ ኤሪዳ።
1SA 30:4 ሄ ዎዴ ዳዊቲኔ ኢዛራ ዲዛ ኣሳቲ ኢስታስ ቃላይ ሾሪቃና ጋካናስ ባንታ ቃላ ꬎቁ ሂስቲ ዬኪዳ።
1SA 30:5 ኢዝራኤሌ ዴሬ ኣስ ኣሂናሆማኔ ካሴ ቃርሜሎሴ ዴሬ ኣስ ናባሌ ማቾ ኣቢጋላ ሃይቲ ዳዊቴ ማቾ ናምኣቲካ ዲኤቲዳ።
1SA 30:6 ኢዛራ ዲዛ ኣሳይ ባንታ ኣቱማ ናይታ ጊሻሲኔ ባንታ ማጫ ናይታ ጊሻስ ዪሎቲዲ ኢዛ ሹቻን ጫዳናስ ዞሬቲዳ፤ ሂስቲን ዳዊቲ ኬሂ ጬጪዴስ፤ ጊዶ ኣቲን ዳዊቲ ጎዳ ባ ጾሳን ሚኔቲዴስ።
1SA 30:7 ሄሳፌ ጉዬ ዳዊቲ ኣሂሜሌኬ ና ቄሴ ኣቢያታሬ፥ «ኤፉዴዛ ታስ ሃ ኤካ ያ» ጊዴስ፤ ኣቢያታሬይካ ኤፉዴዛ ኢዛስ ኤሂዴስ።
1SA 30:8 ዳዊቲ ጎዳ፥ «ሃይታ ዲኢ ኤፊዛ ኦላንቻታ ካሎ? ታ ኢስታ ጋካ ኦይካኔ?» ጊ ኦይቺዴስ። ጎዳይ ኢዛስ፥ «ኤ ካላ! ኔ ኢስታ ጋካ ኦይካና፤ ኢስቲ ዲኢ ኤፊዳይሳ ኔ ዛራና» ጊዴስ።
1SA 30:9 ሂስቲን ዳዊቲኔ ኢዛራ ዲዛ 600 ኣሳይ ቦሶሬ ሻፋ ዪዳ፤ ጉꬃቲ ቦሶሬ ሻፋን ታኪዳ።
1SA 30:10 ናምኡ ጼቱ ኣሳቲ ኬሂ ዳቡርዳ ጊሻስ ሻፋ ፒናና ዳንዳይቤቴና። ጊዶ ኣቲን ዳዊቲኔ ኢዛራ ኣቲዳ 400 ኣሳይ ካሊ ቢዴስ።
1SA 30:11 ኢስቲካ ባዞ ቢታን ጊብጼ ዴሬ ኣስ ኢሳ ዴሚዲ ኢዛ ዳዊቴኮ ኤኪ ዪዳ፤ ኢዛስ ሚዛ ካꬂኔ ኡዪዛ ሃꬅ ኢሚዳ።
1SA 30:12 ቃሴካ ባላሴፔ ኡኬቲዳ ቄሪ ኡኬꬃ ሜንꬆኔ ሜሊዳ ናምኡ ዛቢቤ ዉርጮታ ኢዛስ ኢሚዳ። ሄꬑ ጋላሲኔ ሄꬑ ኦማርስ ኣይኮ ካꬂካ ሞንታ ጊሻሲኔ ሃꬂካ ኡዮንታ ጊሻስ ሃይታ ሚዳፔ ጉዬ ኢዛስ ሼምፖይ ሲሚዴስ።
1SA 30:13 ዳዊቲ ኢዛ፥ «ኔ ኦና ኦሳንቻ? ኔ ዪዳይ ኣዋፔ?» ጊ ኦይቺዴስ፤ ኢዚካ፥ «ታኒ ጊብጼ ኣሳ፤ ታኒ ኢሲ ኣማሌቄ ዴሬ ኣሳስ ኣይሌ፤ ታኒ ሳኬቲዳ ጊሻስ ሄꬑ ጋላሳፌ ካሴ ታ ጎዳይ ታና ዬጊ ኣጊ ቢዴስ።
1SA 30:14 ኬሊቴታስ ዱጌሃ ባጋራ ዲዛ ዴሬ፥ ዩሁዳይ ኣይሲዛ ዴሬኔ ካሌቤስ ዱጌሃ ባጋራ ዲዛ ቢታ ዎራጂዲ ጺጊላጌ ካታማ ታማን ጹጊዶስ» ጊ ዛሪዴስ።
1SA 30:15 ዳዊቲካ፥ «ሃኢ ኔ ታና ሄ ዎራጂዳ ኦላንቻቲ ዲዛሶ ካሌꬃ ጋꬃኔ?» ጊ ኦይቺዴስ። ኢዚካ ዳዊቴስ ዛሪዲ፥ «ኔ ታና ዎꬎንታ ማላኔ ታ ጎዳስ ኣꬃ ኢሞንታ ማላ ታስ ጾሳን ጫቃ፤ ሂስቲኮ ሄ ዎራጂዳ ኦላንቻቲ ዲዛሶታ ታ ኔና ጋꬃና» ጊዴስ።
1SA 30:16 ሄሳፌ ጉዬ ኢዚ ዳዊቴ ካሌꬂ ኤፊ ጋꬂሺን ዎራጂዳይቲ ፊሊስጼሜፔኔ ዩሁዳፔ ዲኢ ኤኪዳ ዳሮ ሚሻፌ ዴንዲዳይሳን ዱማ ዱማሶን ሚሼ፥ ኡዪሼ፥ ዬጺሼኔ ጉፒሼ ዴቴስ።
1SA 30:17 ዳዊቲ ሄ ጋላሳ ኦማርሳፌ ዶሚዲ ዎንቴꬃ ጋላሳ ኦማርስ ጋካናስ ኢስታ ኦሊዴስ፤ ጋሜላ ቶጊዲ ባቃቲዳ 400 ናቴꬃታፔ ኣቲን ኢስታፌ ኬሲ ኤኪ ኣቲዳይ ሃራይ ዴና።
1SA 30:18 ዳዊቲ ኣማሌቄ ኣሳይ ኤኪ ቢዳይሳ ኡባ ዬጊሲዴስ፤ ባ ማቼታ ናምኣታ ዎꬂ ኤኪዴስ።
1SA 30:19 ዳዊቲ ጉꬃታ ጊዲን ጊታታ፥ ኣቱማ ናይታ ጊዲን ማጫ ናይታ፥ ዲኤቲዳዝ ጊዲን ሃራ ሚሽ፥ ኣማሌቄቲ ኤፊዳይሳፌ ኢሲናካ ፓጮንታ ዛሪዴስ።
1SA 30:20 ቃሴካ ዳዊቲ ዶርሳ ዉዴታ፥ ዴይሻ ዉዴታ፥ ሚዛ ዉዴታ ኡባ ኤኪዴስ፤ ኣሳይካ፥ «ሃይሲ ኡባይ ዳዊቲ ዲኢዳይሳ» ጊሼ ሄ ዉዴ ሜሄዛ ሃንኮ ሜሄታፔ ሲንꬅ ኣꬂ ላጊዳ።
1SA 30:21 ሄሳፌ ጉዬ ዳዊቲ ኬሂ ዳቡርዲ ካላናስ ዳንዳዮንታ ጊሻስ ቦሶሬ ሻፋን ኢስታፌ ጉዬ ኣቲዳ 200 ኣሳታኮ ሲሚ ዪዴስ፤ ኢስቲካ ዳዊቴኔ ኢዛራ ዲዛ ኣሳ ሞካናስ ኬዚዳ፤ ዳዊቲኔ ኢዛራ ዲዛ ኣሳይ ኢስታኮ ጋኪዳ ማላ ዳዊቲ ኢስታ ሳሮኪዴስ።
1SA 30:22 ጊዶ ኣቲን ዳዊቴ ካሊዛይታ ጊዶፌ ኢታ ኣሳቲኔ ሹፉሮ ኣሳቲ ኡባይ፥ «ኢስቲ ኑናራ ኦላሶ ቦንታ ኣጊዳ ጊሻስ ኑ ዲኢ ኤሂዳይሳፌ ኢስታስ ኢሞኮ፤ ጊዶ ኣቲን ኢስቲ ኢሶይ ኢሶይ ባ ማቼታኔ ባ ናይታ ኤኪ ባናስ ዳንዳዬቴስ» ጊዳ።
1SA 30:23 ዳዊቲ ዛሪዲ፥ «ታ ኢሻቶ! ኑና ናጊዳይ፥ ኑ ቦላ ዪዳ ኦላ ኑ ኩሼን ኣꬂ ኢሚዳይ ጎዳ፤ ኢዚ ኑስ ኢሚዳ ሚሻን ኢንቴ ሃይሳꬆ ኦꬃናስ ቤሴና።
1SA 30:24 ኢንቴ ጊዛይሳ ኦኔ ኤካናይ? ኦላ ሚሻ ናጊዛይታ ጊሻይኔ ኦላስ ቢዳይታ ጋኪዛ ጊሻይ ዱማቴና፤ ኡባይካ ኢሲ ጊና ጊሼታና» ጊዴስ።
1SA 30:25 ዳዊቲ ሄዴፔ ዶሚዲ ሃኖ ጋካናስ ሃይሳ ኢስራኤሌስ ዎጋኔ ማራ ሂስቲ ዎꬂዴስ።
1SA 30:26 ዳዊቲ ጺጊላጌ ዪዳ ዎዴ ኢዛስ ሲቆ ላጌ ጊዲዳ ዩሁዳ ጪማታስ፥ «ኢንቴስ ጎዳ ሞርኬታፔ ኑ ዲኢ ኤኪዳይሳ ሃይሳ ኢንቴስ ኢሞታ ቤኢቴ» ጊዲ ዲኢ ኤሆይሳፌ ኢስታስ ሻኪ ዬዲዴስ።
1SA 30:27 ሄሳካ ቤቴሌን፥ ኤራሞቴፔ ዱጌሃ ባጋን ዲዛይታሲኔ ዬቲሬን ዲዛይታስ፥
1SA 30:28 ኤሪኦሬን፥ ሲፊሞቴን፥ ኤሽታሞኣኔ
1SA 30:29 ኤራካሌን ዲዛይታስ ሄሳꬆካ ዬራሂምኤሌ ቆሞቲኔ ቄናዌቲ ዲዛ ካታማታን ዲዛይታስ፥
1SA 30:30 ሆርማን፥ ቦራሳኔን፥ ኣታኬን
1SA 30:31 ኬብሮኔን ሄሳꬆካ ዳዊቲኔ ኢዛራ ዲዛይቲ ዩዪዳሶን ዲዛይታ ኡባታስ ዬዲዴስ።
1SA 31:1 ሄ ዎዴ ፊሊስጼሜ ኣሳይ ኢስራኤሌ ኣሳ ኦሊዴስ፤ ኢስራኤሌ ኣሳይ ኢስታ ሲንꬃፌ ባቃቲዴስ፤ ዳሮ ኣሳይ ጊልቦኣ ዙማ ቦላ ጫዴቲ ሃይቂዴስ።
1SA 31:2 ፊሊስጼሜ ኣሳይ ቃሴ ሳኦሌኔ ኢዛ ናይታ ካሌቲ ጋኪዲ ዮናታኔ፥ ኣቢናዳቤኔ ማልኬሹኣ ዎꬊዳ።
1SA 31:3 ኦላዚ ሳኦሌ ቦላ ሚኒዴስ፤ ዎንዳፌን ዱኪዛይቲ ኢዛ ዱኪዲ ኬሂ ማዱንꬂዳ።
1SA 31:4 ሳኦሊ ባ ጎንዳሌ ኦይኪዛይሳስ፥ «ሃይቲ ቃጻሬቶንታይቲ ታና ጫዶንታ ማላኔ ካዉሾንታ ማላ ኔኒ ኔ ማሻን ታና ጫዳ» ጊዴስ። ኢዛስ ጎንዳሌ ቶኪዛይሲ ኬሂ ባቢዳ ጊሻስ ጫዶንታ ኢጺዴስ። ሂስቲን ሳኦሊ ባርካ ባ ጊꬃ ማሻ ቦላ ኩንዲ ሃይቂዴስ።
1SA 31:5 ኢዛ ጎንዳሌዛ ኦይኪዛይሲ ሳኦሊ ሃይቂዳይሳ ቤኢዲ ኢዚካ ባ ጊꬃ ማሻ ቦላ ኩንዲዲ ኢዛራ ኢሲፌ ሃይቂዴስ።
1SA 31:6 ሳኦሊኔ ኢዛ ና ሄꬓቲ፥ ኢዛ ጎንዳሌ ኦይኪዛይሲኔ ኢዛራ ዲዛ ኣሳቲ ኡባይ ሄ ጋላስ ሃይቂዳ።
1SA 31:7 ዙሌዛፔ ሄ ፒንꬃኒኔ ዮርዳኖሴ ሻፋፔ ፒንꬃን ዲዛ ኢስራኤሌ ኣሳይ፥ ኢስራኤሌ ኦላንቻቲ ባቃቲዛይሳ፥ ሳኦሊኔ ኢዛ ናይቲ ሃይቂዳይሳ ቤይዳ ዎዴ ባንታ ካታማታ ዬዲ ባቃቲዳ፤ ፊሊስጼሜ ኣሳይ ዪዲ ሄ ካታማታን ኡቲዳ።
1SA 31:8 ዎንቴꬃ ጋላስ ፊሊስጼሜ ኣሳይ ሃይቂዳ ኣሳ ቦላፌ ኦላ ሚሻ ቃራታናስ ዪዛ ዎዴ ሳኦሊኔ ኢዛ ና ሄꬓቲ ጊልቦኣ ዙማ ቦላ ኩንዲዳይታ ቤኢዳ።
1SA 31:9 ሄሳፌ ጉዬ ሳኦሌ ቆꬌ ቃንጺዲ፥ ኢዛ ኦላ ሚሻካ ቃራቲ ኤኪዲ፥ ሚሺራቾዛ ባንታ ኤቃ ጾሳታ ኬꬃን ኬꬃኒኔ ባንታ ዴራ ጊዶን ኣዋጃና ማላ ፊሊስጼሜ ዴሬ ኡባኮ ቃስታኔ ዬዲዳ።
1SA 31:10 ኢዛ ኦላ ሚሻታ ኣስታሮቴ ጌቴቲዛ ኤቃ ጾሳ ኬꬃን ዎꬂዳ፤ ቃሴ ኢዛ ኣሃዛ ቤቲ-ሳኔ ካታማ ጊምቤ ቦላ ካቂዳ።
1SA 31:11 ጋላኣዴን ዲዛ ያቡሴ ኣሳይ ፊሊስጼሜ ኣሳይ ሳኦሌ ቦላ ኦꬂዳይሳ ሲዪዳ ዎዴ፥
1SA 31:12 ኦላ ቃራቲ ኡባይ ኦማርሳራ ቤቲ-ሳኔ ቢዳ፤ ሳኦሌ ኣሃኔ ኢዛ ናይታ ኣሃ ጊምቤዛ ቦላፌ ዎꬂዳ፤ ሂስቲዲ ያቡሴ ካታማ ኤሂዲ ታማን ጹጊዳ።
1SA 31:13 ሄሳፌ ጉዬ ኢስታ ሜቄꬃታ ኤኪዲ ያቡሴን ካታማ ጊዶን ዲዛ ታማርሲኬ ጌቴቲዛ ሚꬃ ጋርሳን ሞጊዳ፤ ሂስቲዲ ላፑን ጋላስ ጾሚዳ።
2SA 1:1 ሳኦሊ ሃይቂዳፔ ጉዬ ዳዊቲ ኣማሌቄ ኣሳ ኦሊ ጾኒዲ ሲሚዴስ፤ ጺጊላጌንካ ናምኡ ጋላስ ጋምኢዴስ።
2SA 1:2 ሄꬓንꬆ ጋላስ ዳኬቲዳ ማይኦ ማይኢዲ ባ ሁኤ ቦላ ጉዱላ ላሊዲ ኢሲ ናቴꬃ ና ዳይሲ ሳኦሌ ጉታፔ ዪዴስ። ዳዊቴኮ ጋኪዳ ማላ ዛቁልꬅ ዚርጺ ጊዲ ቦንቾስ ኩሼ ዴንꬂዴስ።
2SA 1:3 ዳዊቲካ ኢዛ፥ «ኔ ኣዋፔ ያዲ?» ጊዲ ኦይቺዴስ። ኢዚ ቃሴ፥ «ታኒ ኢስራኤሌ ኣሳይ ዲዛሶፔ ኬሳ ኤካ ያዲስ» ጊዴስ።
2SA 1:4 ዳዊቲ ቃሴ ኢዛ፥ «ኣዜ ዋኒዳይ ኣኔ ታስ ኡባ ዮታ» ጊዲ ኦይቺዴስ። ኢዚካ ዳዊቴስ፥ «ኣሳዚ ኦላሶፔ ባቃቲዴስ፤ ዳሮይ ኩንዲዴስ፤ ሳኦሊኔ ኢዛ ና ዮናታኔይ ሃይቂዳ» ጊዴስ።
2SA 1:5 ሄሳፌ ጉዬ ዳዊቲ ዎሬዛ ኢዛስ ዮቲዳ ናዛ፥ «ሳኦሊኔ ኢዛ ና ዮናታኔይ ሃይቂዳይሳ ኣዛን ኤራዲ?» ጊ ኦይቺዴስ።
2SA 1:6 ዎሬዛ ኢዛስ ዮቲዳ ናቴꬃ ናዚ ኢዛስ ዛሪዲ፥ «ቶሮንታ ዳሼ ታኒ ፑዴ ጊልቦኣ ዙማ ቦላ ኬዛዲስ፤ ሳኦሊ ሄን ባ ቶራ ቦላ ዜምፒ ዲሺን ፓራ-ጋሬቲኔ ቶጋ ኣሳይ ጎዴሬꬂሼ ኢዛ ቦላ ጋኪ ዎꬊዳ።
2SA 1:7 ኢዚካ ጉዬ ሲሚ ጼሊዲ ታና ቤኢዲ ጼይጊዴስ፤ ታኒካ፥ ‹ታ ኔስ ኣይ ኦꬆ?› ጋዲስ።
2SA 1:8 «ኢዚካ ታና፥ ‹ኔ ኦኔ?› ጊ ኦይቺዴስ። ታኒካ ኢዛስ፥ ‹ታኒ ኣማሌቄ ኣሳ› ጋዳ ዮታዲስ።
2SA 1:9 «ኢዚካ ታስ፥ ‹ታ ሃይቃናስ ቶቃይስ፤ ጊዶ ኣቲን ታስ ሼምፖይ ኬዞንታ ኢጺዴስ፤ ዛይ ሃ ያ፤ ታና ሼምፒሳ› ጊዴስ።
2SA 1:10 ሂስቲን ታኒ ኢዚ ኩንዲቺዳፔ ጉዬ ኣቶንታይሳ ኤራዳ ታ ኢዛኮ ሺቃዳ ኢዛ ዎꬋዲስ። ኢዛ ሁኤ ቦላ ዲዛ ካላቻዛኔ ኢዛ ቄሴ ሳጋዮዛ ኤካዳ ሄኮ ታ ጎዳስ ኤሃዲስ» ጊዴስ።
2SA 1:11 ሄሳፌ ጉዬ ዳዊቲኔ ኢዛራ ዲዛ ኣሳይ ኡባይ ባንታ ማይኦ ዳኪዳ።
2SA 1:12 ኢስቲ ማሻን ሲፌቲዳ ጊሻስ ሳኦሌሲኔ ኢዛ ና ዮናታኔስ፥ ጎዳ ኦላንቻታሲኔ ኩሜꬃ ኢስራኤሌ ኣሳስ ካዮቲዳ፥ ዬኪዳኔ ኦማርስ ጋካናስ ጾሚዳ።
2SA 1:13 ዳዊቲ ቃሴ ሄ ዎሬዛ ኢዛስ ኤሂዳ ናቴꬃዛ፥ «ኔ ኣዋፔ ያዲ?» ጊ ኦይቺዴስ። ናዚካ፥ «ታኒ ኔ ዴሬን ቤቲ ዲዛ ኣማሌቄ ኣሳ ና» ጊዴስ።
2SA 1:14 ዳዊቲ ቃሴ፥ «ሂስቲን ኔኒ ጎዳይ ቲይዳይሳ ꬋይሳናስ ኔ ኩሼ ዋና ጻላ ዴንꬃዲ?» ጊ ኦይቺዴስ።
2SA 1:15 ሄሳፌ ጉዬ ዳዊቲ ናቴꬃታፔ ኢሳ ጼይጊዲ፥ «ኔኒ ኢዛኮ ሺቃዳ ኢዛ ዎꬋ» ጊዴስ። ሄ ናቴꬃዚ ኣማሌቄዛ ጫዲ ዎꬊዴስ።
2SA 1:16 ዳዊቲካ ኣማሌቄዛ፥ « ‹ጎዳይ ቲይዳይሳ ታኒ ዎꬋዲስ› ጋዳ ኔ ቦላ ኔርካ ኔ ማርካቲዳ ጊሻስ ኔ ሱꬃ ጎሜይ ኔ ቦላ ጊዶ!» ጊዴስ።
2SA 1:17 ዳዊቲ ሳኦሌ ጊሻሲኔ ዮናታኔ ሃይቆ ጊሻስ ዚላሊሼ ዬኪዴስ።
2SA 1:18 ቃሴካ፥ «ዎንዳፌ ሚላስ» ጌቴቲዛ ዚላሳ ዩሁዳ ዴራ ታማርሳና ማላ ኣዛዚዴስ። ሄሲ ያሻሬ ማጻፋን ጻፌቲ ኡቲዴስ።
2SA 1:19 «ሃይሶ ኢስራኤሌ! ኔ ቦንቾይ ዙምቡላታ ቦላ ጫዴቲ ሃይቂዴስ፤ ኦላ ቃራቲ ዋኒ ሃይሳꬆ ኩንዲዶ!
2SA 1:20 «ፊሊስጼሜ ማጫ ናይቲ ኡፋዬቶንታ ማላ፥ ቃጻሬቶንታ ኣሳ ማጫ ናይቲ ኢሊሎንታ ማላ፥ ሃይሳ ጌቴን ዎሬሶፒቴ፤ ኣስቄሎናንካ ኣዋጆፍቴ።
2SA 1:21 «ኢንቴኖ ጊልቦኣ ዙማቶ! ኢንቴ ቦላ ኢራይ ቡኮፎ፤ ጻዛይካ ኢንቴ ቦላ ዶፖ፤ ያርሾስ ጊዲዛ ካꬂ ኢንቴ ጎሻ ቢታን ሞኮፎ። ሄን ኦላ ቃራዛ ጎንዳሌይ ቱኒዴስ፤ ሳኦሌ ጎንዳሌይ ሃይሳፌ ጉዬን ዛይቴን ቁጬቴና።
2SA 1:22 ዮናታኔ ዎንዳፌይ ዎꬎንታ ሲሚ ኤሬና፤ ሳኦሌ ማሻይካ ሞርኬ ቃንጼሬꬂ ዬጌስ፤ ዎልቃማታካ ሜንꬄሬꬂ ዬጌስ፤ ኢዛ ሞርኬታካ ዎꬊዴስ።
2SA 1:23 «ሳኦሊኔ ዮናታኔይ ሼምፖራ ፓጻ ዲሼ ሲቄቲዛይታኔ ቆፋን ጋይቲዛይታ። ሃይቂሼካ ሻኬቶንታይታ፤ ጎሌ ካፎፔ ፒላቲዛይታ፤ ጋሞፌካ ሚኒዛይታ።
2SA 1:24 «ኢንቴኖ ኢስራኤሌ ማጫሳቶ! ኦቻ ቴራ ሚሳቲዛ ኣልኦ ቃሚሳ ኢንቴና ማይዚዳ፤ ኢንቴ ማይኦዛ ዎርቃ ጺባቤን ኣሌቂሲዳ፤ ሳኦሌስ ዬኪቴ።
2SA 1:25 «ኦላ ቃራቲ ዋኒ ሃይሳ ማላ ኦላሶን ኩንዲዶ! ዮናታኔይ ኔ ዙምቡላታ ቦላ ጫዴቲ ሃይቂዴስ።
2SA 1:26 ታ ኢሻ ዮናታኔ! ታኒ ኔ ጊሻስ ካዮታዲስ፤ ኔ ታስ ኬሃ ኣልኦኮሺን፤ ኔ ሲቆይ ታና ማላሊሲዛዛኮሺን ማጫ ሲቆፔካ ኬሂ ኣꬌስኮሺን።
2SA 1:27 «ኦላ ቃራቲ ዋኒ ኩንዲዶ! ኦላ ማሳራቲካ ዋኒ ሃዳ ጊዳኔ!»
2SA 2:1 ሄሳፌ ጉዬ ዳዊቲ፥ «ታኒ ዩሁዳ ካታማታፔ ኢሲኔይን ቦ?» ጊዲ ጎዳ ኦይቺዴስ። ጎዳይካ፥ «ኤ ባ» ጊዴስ። ዳዊቲ ዛሪዲ፥ «ካታማታፔ ኣዋሪን ቦ?» ጊ ኦይቺዴስ። ጎዳይ ቃሴ፥ «ኬብሮኔ ባ» ጊዴስ።
2SA 2:2 ሂስቲን ዳዊቲ ባ ማቼታ ናምኣታራ ኬብሮኔ ቢዴስ። ኢስቲካ ኢዝራኤሌን ዬሌቲዳ ኣሂናሆሞኔ ቃርሜሎሴ ዴሬ ኣስ ሃይቂዳ ናባሌ ማቾ ኣቢጋሎ።
2SA 2:3 ሄሳꬆካ ዳዊቲ ባናራ ዲዛ ኣሳ ኢስታሶ ኣሳራ ኢሲፌ ጋꬂ ኤሂዴስ። ኢስቲካ ኬብሮኔ ካታማታን ኡቲዳ።
2SA 2:4 ሄሳፌ ጉዬ ዩሁዳ ኣሳይ ኬብሮኔ ዪዴስ። ሄን ዳዊቴ ቲይዲ ዩሁዳ ዴራ ቦላ ካዎꬂዳ። ጋላኣዴ ዴሬን ያቡሴ ኣሳይ ሳኦሌ ኣሃ ሞጊዳይሳ ዳዊቴስ ዮቲን፥
2SA 2:5 ኢዚካ ጋላኣዴን ያቡሴ ዴሬ ኣሳስ ሄሳ ኢዛስ ዮታና ማላ ቃስታኔ ኣስ ዬዲዲ፥ «ሃይሳ ማላ ኦꬂዲ ኢንቴ ጎዳ ሳኦሌ ሞጊዲ ኢንቴ ሎኤቴꬅ ቤሲዳ ጊሻስ ጎዳይ ኢንቴና ኣንጆ።
2SA 2:6 ሃኢካ ጎዳይ ኢንቴስ ባ ሚኖ ሲቆኔ ኣማኔቴꬅ ቆንጪሶ፤ ኢንቴ ኦꬂዳ ሎኤቴꬃ ጊሻስ ታኒካ ኢንቴስ ሎኦ ሚሽ ኦꬃና።
2SA 2:7 ሄሳ ጊሻስ ሚኒቴ፤ ጎቢቴ፤ ኢንቴ ጎዳይ ሳኦሊ ሃይቂዳ ጊሻስ ዩሁዳ ኣሳይ ታና ቲይዲ ባ ቦላ ካዎꬂዴስ» ጊዴስ።
2SA 2:8 ሄ ዎዴ ሳኦሌ ኦላ ኣሳ ኣዛዚዛ ኔሬ ና ኣቢኔሪ ሳኦሌ ና ኢያቡስቴ ኤኪዲ ማሃናይሜ ፒንꬂዴስ።
2SA 2:9 ኢዛካ ጋላኣዴ፥ ኣሴሬ፥ ኢዝራኤሌ፥ ኤፍሬሜ፥ ቢኒያሜ ቦላኔ ኩሜꬃ ኢስራኤሌ ቦላ ካዎꬂዴስ።
2SA 2:10 ሳኦሌ ና ኢያቡስቴይ ኢስራኤሌ ቦላ ካዎቲሺን ኢዛስ ላይꬃይ ኦይዱ ታሙ፤ ኢዚ ናምኡ ላይꬅ ሃሪዴስ። ዩሁዳ ኣሳይ ጊዲኮ ዳዊቴ ካሊዴስ።
2SA 2:11 ዳዊቲ ኬብሮኔን ኡቲዲ ኢስራኤሌ ኣሳ ላፑን ላይꬂኔ ኡሱፑን ኣጊና ሃሪዴስ።
2SA 2:12 ኔሬ ና ኣቢኔሪ ሳኦሌ ና ኢያቡስቴ ኦሳንቻታራ ኢሲ ቦላ ማሃናይሜፔ ዴንዲዲ ጌባኦኔ ቢዳ።
2SA 2:13 ኢስታካ ጹሪያ ና ኢዮኣቤይኔ ዳዊቴ ኣሳቲ ኬኢዲ ጌባኦኔ ኤሌ ሃꬃ ኣቻን ጋይቲዳ። ኢሲ ባጋይ ሃꬃፌ ሄ ፒንꬃን፥ ባጋይ ሃꬃፌ ሃ ፒንꬃን ኡቲዳ።
2SA 2:14 ሄሳፌ ጉዬ ኣቢኔሪ ኢዮኣቤስ፥ «ኣኔ ኑ ባጋፌኔ ኢንቴ ባጋፌ ናቴꬃ ናይቲ ዴንዲዲ ኑ ሲንꬃን ኦላ ቲራን ጋይቴቶ» ጊዴስ። ኢዮኣቤይ፥ «ኤሮ ጋይቴቶ» ጊዴስ።
2SA 2:15 ሄሳ ጊሻስ ቢኒያሜ ባጋፌ ኢያቡስቴስ ታማኔ ናምኡ ኣሲ ቆዴቲዴስ። ዳዊቴ ባጋፌካ ታማኔ ናምኡ ኣሲ ቆዴቲዴስ።
2SA 2:16 ሄሳፌ ጉዬ ኢሶይ ኢሶይ ባ ሞርኬ ሁኤ ኦይኪዲ ማሻን ሚሌራ ጫዲሼ ኢሲፌ ኦይኬቲ ኩንዲዳ። ሄሳ ጊሻስ ጌባኦኔን ዲዛ ሄ ቢታዚ፥ «ማሻ ቢታ» ጌቴቲዴስ።
2SA 2:17 ሄ ጋላሳ ኦላይ ኬሂ ዴጾ፤ ኣቢኔሪኔ ኢስራኤሌ ኣሳይ ዳዊቴ ኣሳን ጾኔቲዳ።
2SA 2:18 ጹሪያ ኣቱማ ና ሄꬓቲ ኢዮኣቤይ፥ ኣቢሳዬይኔ ኣሳሄሌይ ሄን ዴቴስ። ኣሳሄሌይ ዎራን ዲዛ ጌኔሳ ማላ ዎꬃስ ፒላታ።
2SA 2:19 ኢዚ ኣቢኔሬ ኦይካናስ ሃዲርስ ኡሻች ጎንታ ኢዛ ጌዶራ ካሊዴስ።
2SA 2:20 ኣቢኔሪ ጉዬ ሲሚ ጼሊዲ፥ «ኣሳሄሌ! ኔኔ!» ጊ ኦይቺዴስ። ኢዚካ፥ «ኤ ታናኮ!» ጊ ዛሪዴስ።
2SA 2:21 ሂስቲን ኣቢኔሪ ኢዛ፥ «ኔኒ ታ ጌዶፔ ሃዲርሳ ባጋ ዎይኮ ኡሻቻ ባጋ ሲማዳ ናቴꬅ ኢሳፌ ኢዛ ኦላ ማሳራ ቦንቃ ኤካ» ጊዴስ። ጊዶ ኣቲን ኣሳሄሌይ ካሌቲዲ ኢዛ ጌዶፔ ዱጾንታ ኢጺዴስ።
2SA 2:22 ቃሴካ ኣቢኔሪ ኢዛስ፥ «ኔ ታ ጌዶ ካሌቲዛይሳ ኣጊኮ ኔስ ሎኦ፤ ታኒ ኔና ኣይስ ቢታራ ኦይሴꬆ? ሂስቲዳ ታኒ ኔ ኢሻ ኢዮኣቤ ኣይፌሶ ꬎቁ ጋዳ ዎስታ ጼሎ?» ጊዴስ።
2SA 2:23 ኣሳሄሌይ ጊዲኮ ኢዛ ካሌቴꬅ ኣጊቤና፤ ሄሳ ጊሻስ ኣቢኔሪ ባ ቶራ ጼራን ኢዛስ ኡሎን ጫዲን ቶራዚ ኢዛስ ዞኮዛራ ካንꬂ ኬዚዴስ። ኣሳሄሌይ ሄን ጋዴ ቦላ ኩንዲዳ ማላ ሄራካ ሃይቂዴስ። ኦኒካ ኣሳሄሌይ ኩንዲ ሃይቂዳሶ ጋኪሼ ኤቂ ኤኬስ።
2SA 2:24 ኢዮኣቤይኔ ኣቢሳዬይ ጊዲኮ ኣቢኔሬ ካሌቲዳ፤ ኢዛ ጎዴሬꬂሼ ጌባኦኔ ባዞ ኤፊዛ ኦጌዛራ ኣዬ ማታን ዲዛ ኣማ ዙምቡላ ሄራ ጋኪሺን ኣርሼይ ዉሊዴስ።
2SA 2:25 ሄሳፌ ቢኒያሜ ኣሳይ ኣቢኔሬኮ ሺቂዲ ዙምቡላዛ ጼራን ኢሲኖ ጊዲዲ ሳልፊዴስ።
2SA 2:26 ኣቢኔሪ ኢዮኣቤ ጼይጊዲ፥ «ኑኒ ሜርናስ ኦላ ኦሌቲሼ ዳኔ? ኢዛስ ዉርሴꬃ ጋቴይ ጫሞ ጊዲዳይሳ ኔ ዋናዳ ኤሮንታ ኣጋዲ? ኔ ኣሳይ ባ ኢሻታ ጎዲዛይሳ ኣጋና ማላ ኔ ኢስታስ ኣዛዞ ኢሞንታይ ኣዉዴ ጋካናሴ?» ጊዴስ።
2SA 2:27 ኢዮኣቤይካ ዛሪዲ፥ «ዴኦ ጾሳይ ቤዪን፥ ኔ ሃይሳ ዮቶንታ ኣጊዳኮ ኣሳይ ዎንታና ጋካናሼ ባ ኢሻታ ጎዶ ኣጌና» ጊዴስ።
2SA 2:28 ሄሳፌ ጉዬ ኢዮኣቤይ ባ ዛዬ ፑኒዴስ፤ ኣሳይካ ኡባይ ኢስራኤሌ ጎዲዛይሳ ኣጊዴስ። ኦላዚ ሄሳን ኤቂዴስ።
2SA 2:29 ኣቢኔሪኔ ኢዛ ኣሳይ ኦማርሳራ ኣራቤራ ካንꬂ ቢዳ፤ ሄፔ ዮርዳኖሴ ሻፋ ፒኒዲ ኡባይካ ቢቲሮኔራ ካንꬂ ማሃናይሜ ዪዳ።
2SA 2:30 ሄሳፌ ጉዬ ኢዮኣቤይ ኣቢኔሬ ጎዲዛይሳ ኣጊ ሲሚዲ ኢዚ ዴሬዛ ሺሺዳ ዎዴ ዳዊቴ ኣሳ ጊዶፌ ኣሳሄሌይ ኣቲን ሃራይ ታማኔ ኡዱፉን ኣሲ ꬋይዳይሲ ኤሬቲዴስ።
2SA 2:31 ዳዊቴ ኣሳይ ጊዲኮ ቢኒያሜ ኣሳፔ ኣቢኔሬ ካሊዛ 330 ኣስ ዎꬊዴስ።
2SA 2:32 ኢዮኣቤይኔ ኢዛራ ዲዛ ኣሳይ ኣሳሄሌይ ኩንዲዳሶሆፔ ኢዛ ኣሃ ዴንꬂዲ ቤቴሊሄሜን ኢዛ ኣዋ ዱፎን ሞጊዳ። ሄሳፌ ጉዬ ኦማርስ ኩሜꬅ ሄሜቲሼ ኣቂዲ ቡሮ ጋዴይ ዎንቲሺን ኬብሮኔ ጋኪዳ።
2SA 3:1 ሳኦሌ ኬꬃ ጊዶኒኔ ዳዊቴ ኬꬃ ጊዶን ዲዛ ኦላይ ዳሮ ዎዴ ጋምኢዴስ፤ ዳዊቴ ባጋይ ሚኒ ሚኒ ቢሺን ሳኦሌ ባጋይ ዳቡሪ ዳቡሪ ቢዴስ።
2SA 3:2 ዳዊቲ ኬብሮኔን ዲሺን ኢዛስ ኡሱፑን ኣቱማ ናይቲ ዬሌቲዳ፤ ኢዛስ ባይራ ናዚ ኢዝራኤሌ ዴሬ ኣስ ኣሂናሆምፔ ኣሚኖኔይ ዬሌቲዴስ።
2SA 3:3 ናምኣንꬆ ናዚ ቃርሜሎሴ ዴሬ ኣስ ናባሌ ማቾ ኣቢጋሊፔ ኪልኣቤይ ዬሌቲዴስ፤ ሄꬓንꬆ ናዚ ጌሹሬ ካዎ ታሊማዬ ቢዮ ማኢኪፔ ኣቤሴሎሜይ ዬሌቲዴስ።
2SA 3:4 ኦይዳንꬆ ናዚ ኣዶኒያሲ ሃጊቲፔ ዬሌቲዴስ፤ ኢቻሻንꬆ ናዚ ሻፋጺያይ ኣቢጻሊፔ ዬሌቲዴስ፤
2SA 3:5 ኡሱፑንꬆ ናዚ ዳዊቴ ማቾ ኤግሊፔ ዪቲራሜይ ዬሌቲዴስ፤ ሃይቲ ዳዊቲ ኬብሮኔን ዲሺን ኢዛስ ዬሌቲዳይታ።
2SA 3:6 ሳኦሌ ኬꬂኔ ዳዊቴ ኬꬂ ኦሌቲሼ ዲዛ ዎዴ ኣቢኔሪ ሳኦሌ ኬꬃን ባ ዎልቃ ሚንꬂሼ ዴስ።
2SA 3:7 ሳኦሊ ኣያ ቢዮ ኤርጺፎ ላጌꬆ ኦይኪዴስ፤ ኢያቡስቴይ ኣቢኔሬ፥ «ኔ ኣይስ ታ ኣዋ ላጌꬆይራ ኣቃዲ?» ጊዴስ።
2SA 3:8 ኣቢኔሪ ኢያቡስቴ ሃሳያን ኬሂ ሃንቄቲዳ ጊሻስ፥ «ዩሁዳ ማዳናስ ታኒ ጎሻ ካኔ? ሃች ጋካናስ ታኒ ኔ ኣዋ ሳኦሌ ኬꬃስ፥ ኢዛ ኢሻታሲኔ ኢዛ ዳቦታስ ታ ኣማኔቴꬅ ፓጪንቻቤኬ፤ ኔናካ ዳዊቴስ ኣꬃ ኢማቤኬ፤ ጊዶ ኣቲን ኔኒ ሃኢ ሃኖ ሃ ማጫሳይራ ታ ሃኒዳ ሚሻስ ታና ሞታይ?
2SA 3:9 ጎዳይ ሳኦሌ ኬꬃፌ ካዎቴꬃ ዎꬂ ኤኪዲ ዳኔፔ ቢዲ ቤርሳቤሄ ጋካናስ ዲዛ ኢስራኤሌ ቦላኔ ዩሁዳ ቦላ ዳዊቴ ካዎቴꬃ ጫቂ ዎꬂዳ ጫቆዛ ታ ፖሎንታ ኣጊኮ ጾሲ ኣቢኔሬ ቦላ ኢታ ሚሽ ኤሆ» ጊዴስ።
2SA 3:11 ኢያቡስቴይ ኣቢኔሬስ ኬሂ ባቢዳ ጊሻስ ዛሪዲ ኢሲ ቃላ ጶቃናስ ዳንዳይቤና።
2SA 3:12 ሄሳፌ ጉዬ ኣቢኔሪ ዳዊቴስ፥ «ሃና ቢታያ ኦናሴ? ታናራ ቃላ ጌላ፤ ቤኣ ኢስራኤሌ ኡባይ ኔኮ ሲማና ማላ ታ ኔና ማዳና» ጊ ዮታና ማላ ኦጋꬅ ዬዲዴስ።
2SA 3:13 ዳዊቲካ፥ «ኤሮ ሎኦ፤ ታ ኔናራ ቃላ ጌላና፤ ጊዶ ኣቲን ታ ኔፔ ኢሲ ሚሽ ኮያይስ፤ ሄሲካ ኮይሮ ታኮ ያሼ ሳኦሌ ቢዮ ሚልኮሎ ኔ ታስ ኤካ ያና ማላ ኮያይስ፤ ሂስቶንታ ኣጊኮ ታኮ ዮፓ» ጊዴስ።
2SA 3:14 ሄሳፌ ጉዬ ዳዊቲ፥ «ፊሊስጼሜ ኣስ ጼታታ ኣቱማቴꬃ ጪሎሻ ጪጋዳ ኤኪዳ ታ ማቾ ሚልኮሎ ታስ ኢማ» ጊዲ ሳኦሌ ና ኢያቡስቴኮ ባ ቃስታኔታ ኪቲዴስ።
2SA 3:15 ሄሳ ጊሻስ ኢያቡስቴይ ባ ቃስታኔታ ኪቲዲ ኢዚ ኣዚና ላይሻ ና ፓልቲኤሌሶፔ ኬሲ ኤኪዴስ።
2SA 3:16 ኢዚ ኣዚናይ ባሂሪሜ ጋካናስ ዬኪሼ ኢዞ ካሊ ቢዴስ። ሄሳፌ ጉዬ ኣቢኔሪ፥ «ሃኢ ኔስ ጊዳና! ጉዬ ኔሶ ሲማ» ጊዴስ።
2SA 3:17 ኣቢኔሪ ኢስራኤሌ ጪማታራ ዞሬቲሼ ኢስታስ፥ «ካሴ ኣꬊዳ ዎዴን ዳዊቲ ኢንቴ ቦላ ካዎታና ማላ ኮዪዴታ።
2SA 3:18 ጎዳይ ዳዊቴስ፥ ‹ታ ኣይሌ ዳዊቴ ባጋራ ታኒ ታ ዴራ ኢስራኤሌ ኢስታ ሞርኬታ ኩሼፔኔ ፊሊስጼሜታ ኩሼፔ ኣሻና› ጊዛ ሂዶታ ቃላ ኢሚ ዎꬂዳ ጊሻስ ሃይሳ ኢንቴ ሃኢራ ኦꬂቴ» ጊዴስ።
2SA 3:19 ሄሳꬆካ ኣቢኔሪ ቢኒያሜ ቆሞታስ ባርካ ቢዲ ሃይሳ ዮቲዴስ፤ ሄሳፌ ጉዬ ኢስራኤሌ ኣሳይ ቢኒያሜ ኬꬃ ኣሳይ ኡባይ ኦꬃናስ ኮዪዳ ኡባ ዳዊቴስ ዮታናስ ኬብሮኔ ቢዴስ።
2SA 3:20 ኣቢኔሪ 20 ኣሳታራ ዳዊቲ ዲዛሶ ኬብሮኔ ቢዴስ፤ ዳዊቲካ ኣቢኔሬሲኔ ኢዛራ ዲዛ ኣስ ኡባስ ጊቢራ ጊግሲዴስ።
2SA 3:21 ሄሳፌ ጉዬ ኣቢኔሪ ዳዊቴስ፥ «ኔናራ ኢስቲ ጫቄታና ማላ፥ ኔ ዎዚናይካ ኣሞቲዳ ማላ ኔ ኡባ ሃራና ማላ ኤሶን ባዳ ታ ጎዳ ካዎዛስ ኩሜꬃ ኢስራኤሌ ኣኔ ሺሻይስ» ጊዴስ። ሄሳ ጊሻስ ዳዊቲ ኣቢኔሬ ሞይዚዴስ፤ ኢዚካ ሳሮን ቢዴስ።
2SA 3:22 ኢዮኣቤይኔ ዳዊቴ ኣሳይ ሄ ዎዴ ዳሮ ሚሽ ዲኢ ኤኪዲ ኦላፔ ሲሚዳ። ኣቢኔሪ ጊዲኮ ዳዊቲ ሳሮን ኢዛ ሞይዚዳ ጊሻስ ኬብሮኔን ዴና።
2SA 3:23 ኢዮኣቤይኔ ኢዛራ ኢሲፌ ዲዛ ኦላንቻ ኡባይ ሄ ጋኪዳ ማላ ኔሬ ና ኣቢኔሪ ካዎዛኮ ዪዳይሳ፥ ካዎዚ ኢዛ ሞይዚዳይሳኔ ኢዚካ ሳሮን ኬዚ ቢዳይሳ ኢዮኣቤይ ሲዪዴስ።
2SA 3:24 ሄሳ ጊሻስ ኢዮኣቤይ ካዎዛኮ ጌሊዲ፥ «ሃይሲ ኔ ኦꬂዳይሲ ኣዜ? ኣኔ ኣቢኔሪ ኔ ኩሼን ጌሊን ዋናዳ ኔ ኢዛ ሳሮን ሞይዛ ዬዳዲ?
2SA 3:25 ኔሬ ና ኣቢኔሬ ኔ ኤራሳ፤ ኢዚ ዪዳይ ኔና ባሌꬃናስ፥ ኔ ዋና ኬዚዛኮኔ ጌሊዛኮ ኤራናሲኔ ኔ ኦꬂዛ ኡባ ዎቻናስ ዪዴስ» ጊዴስ።
2SA 3:26 ሄሳፌ ጉዬ ኢዮኣቤይ ዳዊቴ ኣቻፌ ኬዚዴስ፤ ኣቢኔሬ ኤኪ ያና ማላ ኣስ ኪቲዴስ፤ ኪቴቲዳ ቃስታኔቲ ኢዛ ሴይሬን ዲዛ ሃꬃ ኦላ ማታ ጋኪሺን ዛሪዳ፤ ሄሲ ሃኒሺን ዳዊቲ ኤሪቤና።
2SA 3:27 ኣቢኔሪ ጉዬ ኬብሮኔ ሲሚዳ ዎዴ ኢዮኣቤይ ኢዛ ጻላ ሃሳይሳና ኮይዛ ኣስ ሚሳቲዲ ኢሲ ባጋ ሼርኢ ሂስቲዲ ጌዴ ጊምቤዛ ፔንጌ ኤፊዴስ፤ ሄን ባ ኢሻ ኣሳሄሌ ሱꬅ ኣዛራና ኮዪዲ ኢዛስ ኡሎን ጫዲ ዎꬊዴስ።
2SA 3:28 ሄሳፌ ጉዬ ኣቢኔሬ ዎꬊዳይሳ ዳዊቲ ሲዪዲ፥ «ታኒኔ ታ ካዎቴꬃይ ኔሬ ና ኣቢኔሬ ሱꬃፌ ጎዳ ሲንꬃን ሜርናስ ጌሻ።
2SA 3:29 ኢዛ ሱꬃይ ኢዮኣቤ ሁኤኒኔ ኢዛ ኣዋ ኬꬃ ኡባ ቦላ ጊዶ፤ ኣሳቴꬃፌ ሃꬂ ጎጊሲዛ ሃርጌይ ዎይኮ ጉፌን ካልኣቲዛ ዎቤይ ዎይኮ ማሻን ሃይቂዛይ ዎይኮ ሚዛዚ ꬋዪን ኮሻቲዛይ ኢዮኣቤ ኬꬃፌ ꬋዮፖ» ጊዴስ።
2SA 3:30 ኣቢኔሪ ጌባኦኔን ኦሌቲዳ ኦላን ኢዮኣቤሲኔ ኣቢሳዬ ኢሻ ኣሳሄሌ ዎꬊዳ ጊሻስ ኢስቲካ ኣቢኔሬ ዎꬊዳ።
2SA 3:31 ሄሳፌ ጉዬ ዳዊቲ ኢዮኣቤሲኔ ኢዛራ ኢሲፌ ዲዛ ኣሳ ኡባስ፥ «ኢንቴ ማይኦ ዳኪዲ፥ ማቃ ማይኢዲ ኣቢኔሬ ሲንꬃን ዬኪቴ» ጊዴስ። ዳዊቲ ባ ሁኤራ ኣሃ ኣዣቢዴስ።
2SA 3:32 ሂስቲዲ ኣቢኔሬ ኣሃ ኤፊዲ ኬብሮኔን ሞጊዳ፤ ካዎዚ ኣቢኔሬ ዱፎ ቦላ ዋሲ ዬኪዴስ፤ ዴሬዚካ ሄሳꬆ ዬኪዴስ።
2SA 3:33 ካዎዚ ኣቢኔሬ ጊሻስ ካዮ ሚላስ ሚላሊዴስ፤ «ኣቢኔሬ! ሹፉሮ ኣሳ ማላ ዋና ሃይቃዲ?
2SA 3:34 ኔ ኩሼቲ ቃሼቲቤቴና፤ ኔ ቶሆቲ ኣግሪሞቄን ጌሊቤቴና፤ ኣሲ ኢታ ኣሳ ሲንꬃን ኩንዲዛ ማላ ኔካ ሄሳꬆ ኩንዳዳሳ።» ዴሬዚ ኡባይ ቃሴ ዛሪ ዬኪዴስ።
2SA 3:35 ሄሳፌ ጉዬ ዴሬ ኡባይ ካꬅ ዶናን ጌልꬂዛ ዎዴ ዳዊቴኮ ዪዲ ኢዚ ካꬅ ማና ማላ ሚንꬂ ዎሲዳ። ጊዶ ኣቲን ዳዊቲ፥ «ኣርሼይ ዉላናሼ ጋካናስ ካꬅ ዎይኮ ሃራ ሚሽ ዶናን ታ ጌልꬂኮ ጾሳይ ሃይሳ ማላ ታ ቦላ ኤሆ፤ ሃይሳፌካ ኣꬊዛ ሚሽ ታ ቦላ ኤሆ» ጊ ጫቂዴስ።
2SA 3:36 ዴሬዚ ኡባይ ሄሳ ቤኢዲ ኡፋዬቲዴስ፤ ኣዳፌካ ካዎዛ ሃኖይ ዴሬዛ ኡፋይሲዴስ።
2SA 3:37 ሄሳꬆካ ሄ ጋላስ ዴሬዚ ኡባይኔ ኩሜꬃ ኢስራኤሌይ ካዎዛ ኩሼይ ኔሬ ና ኣቢኔሬ ሃይቆን ባይንዳይሳ ኤሪዴስ።
2SA 3:38 ሄሳፌ ጉዬ ካዎዚ ባ ዴራስ፥ «ሃች ኢስራኤሌን ዳናይኔ ጊታ ኣሲ ሃይቂዳይሳ ኤሪቤኬቲ?
2SA 3:39 ታ ቲዬቲዳ ካዎ ጊዲኮካ ሃች ታ ላፋቴꬂ ታስ ኤሬቲዴስ፤ ሃይቲ ጹሪያ ናይቲ ታስ ዎልቃቲዳ። ጎዳይ ኢታ ኦꬂዳዴስ ኢዛ ኦሶ ማላ ኢሞ» ጊዴስ።
2SA 4:1 ኣቢኔሪ ኬብሮኔን ሃይቂዳይሳ ሳኦሌ ና ኢያቡስቴይ ሲዪዳ ማላ ኬሂ ያዪዴስ፤ ኢስራኤሌ ዴሬይካ ዳጋሚዴስ።
2SA 4:2 ሄ ዎዴ ሳኦሌ ና ኢያቡስቴስ ካሌꬂዛ ናምኡ ኣሳቲ ዴቴስ፤ ኢስቲካ ባኣናኔ ኤሬካቤ ጌቴቴቴስ፤ ኢስቲ ቢኒያሜ ቆሞታፔ ቢኤሮቴ ዴሬ ዬሌታ ጊዲዳ ኣርሞኔ ናይታ፤ ቢኤሮቴይ ቢኒያሜ ካታማታፔ ኢሲኔይ ማላ ቆዴታዉስ።
2SA 4:3 ቢኤሮቴ ኣሳይ ጌቲሜ ባቃቲ ቢዲ ሃች ጋካናስ ሄን ቤቴ ኣስ ጊዲዲ ዴስ።
2SA 4:4 ሳኦሌ ና ዮናታኔስ ናምኡ ቶሆቲ ሲሊዳ ኢሲ ናይ ዴስ፤ ሳኦሌ ሃይቆይኔ ዮናታኔ ሃይቆ ዎሬይ ኢዝራኤሌፔ ኢዛኮ ጋኪዛ ዎዴ ኢዛስ ላይꬃይ ኢቻሻ። ኢዚካ ቶሆ ሲላ ጊዲዳይ ሄ ዎዴ ኢዛ ዲቺዛራ ኤካዳ ኤሶን ባቃቲሺን ኩንዲዳ ጊሻሳ። ኢዛ ሱንꬂ ሜምፌቦስቴ ጌቴቴስ።
2SA 4:5 ሄ ዎዴ ቢኤሮቴ ዴሬ ኣስ ኣርሞኔ ናይቲ ኤሬካቤይኔ ባኣናይ ኢያቡስቴኮ ባና ዴንዲዳ፤ ኢዚ ጋላሳ ሼምፖ ኤካናስ ባ ሂጻ ቦላ ኢሼቻን ዲሺን ሴታ ጋላስ ኣዋይ ሴሊሺን ኢዛኮ ጋኪዳ።
2SA 4:6 ጊስቴ ኮይዛ ኣስ ሚሳቲዲ ኬꬃ ጊዶ ጌሊዲ ኢዛስ ኡሎን ጫዲዳ። ሄሳፌ ጉዬ ኤሬካቤይኔ ኢዛ ኢሻ ባኣናይ ሉሹ ጊ ኬዚ ቢዳ።
2SA 4:7 ኢስቲ ሶ ጌሊዳይ ኢያቡስቴይ ባ ኣልጋ ኪፊሌን ኢቺ ዲሺና፤ ኢስቲ ኢዛ ጫዲ ዎꬊዳፔ ጉዬ ኢዛ ሁኤ ቃንጺ ኤኪዲ ኩሜꬃ ኦማርስ ኣራቤ ኦጌራ ቢዳ።
2SA 4:8 ኢያቡስቴ ሁኤ ዳዊቴኮ ኬብሮኔ ኤፊዲ ካዎዛስ፥ «ኔና ዎꬋና ኮይዛ ኔ ሞርኬ ሳኦሌ ና ኢያቡስቴ ሁኤ ሃይሳ ቤኣ፤ ሄኮ ጎዳይ ሃች ታ ጎዳ ካዎዛ ጊሻስ ሳኦሌ ቦላኔ ኢዛ ዜሬꬃ ቦላ ሃሎ ኬሲዴስ» ጊዳ።
2SA 4:9 ዳዊቲካ ቢኤሮቴ ዴሬ ኣስ ኣርሞኔ ናይታ ኤሬካቤሲኔ ኢዛ ኢሻ ባኣናስ፥ «ታና ሜቶፔ ኣሺዳ ዴኦ ጾሳይ ቤኢን፥
2SA 4:10 ታስ ሚሺራቾ ቃላ ኤሂዳ ኢዛስ ሚሳቲን፥ ‹ሄኮ ሳኦሊ ሃይቂዴስ› ጊዲ ታስ ዮቲዳዴ ኦይካዳ ጺጊላጌን ዎꬋዲስ። ሂስቲኮ ሄ ኣዴዛስ ታ ኢሚዳ ሞጎታይ ሄሳ።
2SA 4:11 ሂስቲን ባ ኬꬃን ባ ኣልጋ ቦላ ኢቺ ሼምፒዛ ጺሎ ኣስ ዎꬊዳ ኢታ ኣሳታስ ኢታ ቂጻቴ ኢማና ቤሴኔ? ኢዛ ሱꬃ ኢንቴ ኩሼፔ ኣጫናሲኔ ኢንቴና ቢታፌ ꬋይሳናስ ታስ ቤሴኔ?» ጊዴስ።
2SA 4:12 ሄሳ ጊሻስ ዳዊቲ ባ ኣሳታ ኣዛዚን ኢስቲ ሄይታ ዎꬊዳ፤ ኢስታ ኩሼኔ ቶሆ ቃንጺዲ ኬብሮኔን ዲዛ ኤሌ ሃꬃ ኣቻን ካቂዳ፤ ኢያቡስቴ ሁኤ ቃንጺ ኤኪዲ ኬብሮኔን ዲዛ ኣቢኔሬ ዱፎዛ ኣቻን ሞጊዳ።
2SA 5:1 ኢስራኤሌ ኣሳይ ኡባይ ኬብሮኔ ዳዊቴኮ ቢዲ፥ «ሄኮ ኑኒ ኔ ሜቄꬃታኔ ኔ ኣሾታ።
2SA 5:2 ካሴ ሳኦሊ ኑ ቦላ ካዎቲ ዲዛ ዎዴ ኢስራኤሌ ኦላ ኣሳ ካሌꬂዛይ ኔና፤ ጎዳይ፥ ‹ታ ዴሬ ኢስራኤሌ ናጋናይ ኔና፤ ኢስታ ካሌꬃናይ ኔና ጊዳና› ጊዲ ኔስ ዮቲ ዎꬂዴስ» ጊዳ።
2SA 5:3 ሄሳ ጊሻስ ኢስራኤሌ ኣሳ ካሌꬂዛይቲ ኡባይ ኬብሮኔ ዪዳ፤ ካዎ ዳዊቲ ኬብሮኔን ጎዳ ሲንꬃን ኢስታራ ጫቆ ቃላ ጌሊዴስ፤ ኢስቲካ ዳዊቴ ቲይዲ ኢስራኤሌ ቦላ ካዎꬂዳ።
2SA 5:4 ዳዊቲ ካዎቲሺን ኢዛስ ላይꬃይ 30፤ ኢዚ 40 ላይꬅ ዴራ ኣይሲዴስ።
2SA 5:5 ኢዚ ኬብሮኔን ኡቲዲ ዩሁዳ ቦላ ላፑን ላይꬂኔ ኡሱፑን ኣጊና፥ ዬሩሳላሜን ኡቲዲ ኩሜꬃ ኢስራኤሌ ቦላኔ ዩሁዳ ቦላ 33 ላይꬅ ካዎቲዴስ።
2SA 5:6 ካዎዚኔ ኢዛ ኣሳይ ዬሩሳላሜን ዲዛ ያቡሴ ኣሳ ኦላናስ ሄ ቢዳ። ያቡሴ ኣሳይካ ዳዊቴ፥ «ዳዊቲ ሃይሳን ጌላና ዳንዳዬና» ጊ ቆፒዳ ጊሻስ ዳዊቴስ፥ «ሃራይ ኣቶሺን ቆቄቲኔ ዎቤቲ ኔና ቴቃና፤ ሄሳ ጊሻስ ኔ ሃ ጌላካ» ጊዳ።
2SA 5:7 ጊዶ ኣቲን ዳዊቲ ጺዮኔ ሚጻ ኦይኪዴስ፤ ሂናካ ሃኢ ዳዊቴ ካታማ ጌቴቲዛሶሆዮ።
2SA 5:8 ሄ ጋላስ ዳዊቲ፥ «ያቡሴ ኣሳ ጾናና ኮይዛይ፥ ዳዊቴ ሞርኬ ጊዲዳ ዎቤታኮኔ ቆቄታኮ ጋካናስ ሃꬅ ፒኒዛ ፑርዴራ ፑዱንꬃ ኬዛናስ ቤሴስ» ጊዴስ፤ ሄሳ ጊሻስ፥ «ዎቤቲኔ ቆቄቲ ካዎ ኬꬅ ጌሌቴና» ጌቴቲዴስ።
2SA 5:9 ሄሳፌ ጉዬ ዳዊቲ ሚጻዮ ባስ ዱሳሶ ሂስቲዴስ፤ ኢዞ፥ «ዳዊቴ ካታማ» ጊ ሱንꬂዴስ። ዳዊቲ ሚሎፔ ዶሚዲ ኢዞ ጊዶ ኣꬂዲ ዩዪ ኣꬋናስ ጊምቢዴስ።
2SA 5:10 ጎዳይ ኡባፌ ዎልቃማ ጾሳይ ኢዛራ ዲዛ ጊሻስ ዳዊቲ ኡባ ዎዴ ሚኒ ሚኒ ቢዴስ።
2SA 5:11 ሄ ዎዴ ጺሮሴ ካዎ ኪራሜይ ዳዊቴኮ ኣስ ኪታ ዬዲዴስ፤ ሄሳꬆካ ዚጋ ሚꬅ ማሲዛ ሂላንቻታኔ ሹች ማሲዛ ሂላንቻታ ዬዲዴስ፤ ኢስቲካ ዳዊቴስ ካዎ ኬꬅ ኬጺዳ።
2SA 5:12 ጎዳይ ኢስራኤሌ ቦላ ኢዛ ካዎቴꬃ ሚንꬂዳይሳ፥ ባ ዴራ ኢስራኤሌ ጊሻስ ኢዛ ካዎቴꬃ ኣሲዳይሳ ዳዊቲ ኤሪዴስ።
2SA 5:13 ዳዊቲ ኬብሮኔፔ ቢዳፔ ጉዬ ካሴይታ ቦላ ዬሩሳላሜን ሃራ ላጌꬆታ ዎꬂዴስ፤ ማቼታካ ኤኪዴስ፤ ሃራ ኣቱማ ናይቲኔ ማጫ ናይቲ ኢዛስ ዬሌቲዳ።
2SA 5:14 ኢዚ ዬሩሳላሜን ዬሊዳ ናይቲ፥ ሻሙኤ፥ ሾባቤ፥ ናታኔ፥ ሶሎሞኔ፥
2SA 5:15 ኢያቤሄሬ፥ ኤልሹኤ፥ ኔፌጌ፥ ናፊያ፥
2SA 5:16 ኤልሻማ፥ ኤልኣዳኔ ኤልፋሌጼ ጌቴቴቴስ።
2SA 5:17 ዳዊቲ ኢስራኤሌ ኣሳ ቦላ ካዎቲዳይሳ ፊሊስጼሜ ኣሳይ ሲዪዲ ኢዛ ኮያናስ ጊጺ ዴንዲዴስ፤ ሄሳ ሲዪዲ ዳዊቲ ዱጌ ባ ሚጻ ዎꬊዴስ።
2SA 5:18 ሄ ዎዴ ፊሊስጼሜ ኣሳይ ዪዲ ኤራፋይሜ ሾባን ላሌቲ ዱንካኒዴስ።
2SA 5:19 ሄሳ ጊሻስ ዳዊቲ ጎዳ፥ «ባዳ ፊሊስጼሜ ኣሳራ ኦሌቶ? ኔ ኢስታ ታ ኩሼን ኣꬃ ኢማኔ?» ጊ ኦይቺዴስ። ጎዳይካ ኢዛ፥ «ኤ ባ፤ ቱማፔ ፊሊስጼሜታ ታኒ ኔ ኩሼን ኣꬃ ኢማና» ጊዴስ።
2SA 5:20 ሄሳ ጊሻስ ዳዊቲ ባኣሊ-ፓራጺሜ ቢዲ ፊሊስጼሜ ኣሳ ኦሊ ጾኒዴስ፤ ኢዚካ፥ «ዲኦ ሃꬂ ꬉቂ ኬዚዲ ላሊዛ ማላ፥ ጎዳይ ታ ሞርኬታ ታ ሲንꬃፌ ላሊዴስ» ጊዴስ። ሄሳ ጋሶን ሄ ሶሆዛ ሱንꬂ ባኣሊ-ፓራጺሜ ጌቴቲዴስ።
2SA 5:21 ፊሊስጼሜ ኣሳይ ባ ኤቃ ጾሳታ ዬጊ ኣጊዲ ባቃቲዳ ጊሻስ ዳዊቲኔ ኢዛ ካሊዛ ኣሳይ ዲኢ ኤኪ ቢዳ።
2SA 5:22 ፊሊስጼሜ ኣሳይ ቃሴካ ዪዲ ኤራፋይሜ ሾባን ላሌቲ ዱንካኒዴስ።
2SA 5:23 ሄሳ ጊሻስ ዳዊቲ ጎዳ ኦይቺዴስ፤ ጎዳይካ ኢዛስ፥ «ኢስታፌ ጉዬ ባጋራ ኢስታ ጊዶꬃዳ ባላሳኔ ሚꬃፌ ሲንꬃ ባጋራ ባዳ ኢስታራ ጋይታ ኣቲን ኢስቲ ዲዛሶ ሲቲ ጋ ኬዞፓ።
2SA 5:24 ባላሳኔ ሚꬃ ጼራ ቦላራ ኦላ ጊሪስ ሲዪዛ ዎዴ ጎዳይ ፊሊስጼሜ ኦላ ኣሳ ኦላናስ ኔፔ ካሴቲ ኬዚዴስ ጉስ ጊዲዳ ጊሻስ ሄ ዎዴ ኤሶታዳ ሲንꬅ ሲቲ ጋ ባ» ጊዴስ።
2SA 5:25 ሄሳ ጊሻስ ዳዊቲ ጎዳይ ኢዛ ኣዛዚዳ ማላ ኦꬂዴስ፤ ፊሊስጼሜ ኣሳካ ጌባፔ ቢዲ ጌዜሬ ጋካናስ ጎዲ ጎዲ ሾጪዴስ።
2SA 6:1 ቃሴካ ዳዊቲ ኢስራኤሌ ኣሳፔ ዶሬቲዳ 30,000 ኣስ ሺሺዴስ።
2SA 6:2 ኢዚኔ ኢዛራ ዲዛ ኣሳይ ኡባይ ኪሩቤ ቦላ ኡቲዳ ጎዳ ኡባፌ ዎልቃማ ጾሳ ሱንꬃን ጼይጌቲዳ ጾሳ ጫቆ ቃላ ታቦታ ኤሃናስ ባኣሊ-ዩሁዳ ጌቴቲዛሶ ቢዳ።
2SA 6:3 ጾሳ ጫቆ ቃላ ታቦታዛ ኦራꬃ ፓራ-ጋሬን ዎꬂዳ፤ ዙምቡላ ቦላ ዲዛ ኣቢናዳቤ ኬꬃፌ ኬሲ ኤሂዳ፤ ፓራ ላጊዛይቲ ኣሚናዳቤ ና ኦዛኔ ኣሂዮ።
2SA 6:4 ጾሳ ጫቆ ቃላ ታቦታዚ ፓራ-ጋሬዛ ቦላ ዲሺን ኣሂዮይ ኢዛፔ ሲንꬃራ ቤስ።
2SA 6:5 ዳዊቲኔ ኢስራኤሌ ኣሳይ ኡባይ ዬꬃን፥ ዲꬃን፥ ማሲንቆን፥ ካራቤን፥ ጺናጺሌኒኔ ዳላን ባስ ዲዛ ዎልቃ ኡባን ጎዳ ሲንꬃን ጉፒዳ (ካኢዳ)።
2SA 6:6 ኢስቲ ናኮኔ ካꬃ ባሌ ጋኪሺን ቦራቲ ꬉጴቲዳ ጊሻስ ኦዛይ ባ ኩሼ ዬዲዲ ጫቆ ቃላ ታቦታዛ ኦይኪዴስ።
2SA 6:7 ኦዛይ ሄሳ ጻላቴꬃን ኦꬂዳ ጊሻስ ጎዳ ሃንቆይ ኢዛ ቦላ ኤጺዴስ፤ ሄሳ ጊሻስ ጾሳይ ኢዛ ዎꬊዴስ፤ ኢዚካ ሄን ጾሳ ጫቆ ቃላ ታቦታ ኣቻን ሃይቂዴስ።
2SA 6:8 ጎዳ ሃንቆይ ኦዛ ዎꬊዳ ጊሻስ ዳዊቲ ሙዞቲዴሲኔ ጬጪዴስ፤ ሄ ሶሆዚ ሃች ጋካናስ፥ «ፓሬሴ-ኦዛኔ» ጌቴቴስ።
2SA 6:9 ዳዊቲ ሄ ጋላስ ጎዳስ ባቢዳ ጊሻስ፥ «ጎዳ ጫቆ ቃላ ታቦታይ ዋኒ ታኮ ያኔ?» ጊዴስ።
2SA 6:10 ሄሳ ጊሻስ ዳዊቲ ጎዳ ጫቆ ቃላ ታቦታ ባናራ ዳና ማላ ዳዊቴ ካታማ ኤኪ ባና ኮዪቤና፤ ሄሳ ጊሻስ ኦጌ ላሚዲ ጌቴ ዴሬ ኣስ ኣቢዳሬ ሶ ኤፊሲዴስ።
2SA 6:11 ጎዳ ጫቆ ቃላ ታቦታይ ጌቴ ዴሬ ኣስ ኣቢዳሬ ኬꬃን ሄꬑ ኣጊና ኡቲዴስ፤ ጎዳይ ኣቢዳሬኔ ኢዛሶ ኣሳ ኡባ ኣንጂዴስ።
2SA 6:12 ሄ ዎዴ፥ «ጾሳ ጫቆ ቃላ ታቦታ ጋሶን ጎዳይ ኣቢዳሬ፥ ኢዛሶ ኣሳኔ ኢዛስ ዲዛ ኡባ ኣንጂዴስ» ጊዲ ዳዊቴስ ዮቲዳ። ሄሳ ጊሻስ ዳዊቲ ሄ ቢዲ፥ ጾሳ ጫቆ ቃላ ታቦታ ኣቢዳሬሶፔ ዳዊቴ ካታማ ጊታ ኡፋይሳን ኤፊዴስ።
2SA 6:13 ሄ ጎዳ ጫቆ ቃላ ታቦታ ቶኪዳ ኣሳቲ ኡሱፑን ታንጎ ቢዳ ቆዳን ኢሲ ቦራይኔ ኢሲ ሞꬎ ማሪ ያርሼቴስ።
2SA 6:14 ዳዊቲ ላይኖፔ ዳዴቲዳ ኤፉዴ ባ ጼሳን ጊጺዲ ኩሜꬃ ዎልቃን ጎዳ ሲንꬃን ማጉሊዴስ።
2SA 6:15 ሄሳ ማላን ዳዊቲኔ ኩሜꬃ ኢስራኤሌ ኣሳይ ኡፋይሳን ኢሊሊሼኔ ዛዬ ፑኒሼ ጎዳ ጫቆ ቃላ ታቦታ ፑዴ ኤሂዳ።
2SA 6:16 ጎዳ ጫቆ ቃላ ታቦታይ ዳዊቴ ካታማ ጌሊሺን ሳኦሌ ና ሚልኮላ ማስኮቴራ ጼላዱስ፤ ካዎ ዳዊቲ ጎዳ ሲንꬃን ጉፒሺኒኔ ዱሪሺን ቤኣዳ ባ ዎዚናራ ኢዛ ካꬋዱስ።
2SA 6:17 ሄሳፌ ጉዬ ጎዳ ጫቆ ቃላ ታቦታ ኤሂዲ ዳዊቲ ኢዛስ ቶኪዳ ዱንካኔዛ ጊዶን ኢዛስ ጊግሲዳሶሆዛን ዎꬂዳ፤ ዳዊቲካ ጹጌቲዛ ያርሾኔ ኢሲፌቴꬃ ያርሾ ጎዳ ሲንꬃን ሺሺዴስ።
2SA 6:18 ዳዊቲ ጹጌቲዛ ያርሾዛኔ ኢሲፌቴꬃ ያርሾዛ ሺሺዳፔ ጉዬ ዴሬዛ ኡባፌ ዎልቃማ ጎዳ ሱንꬃን ኣንጂዴስ።
2SA 6:19 ኢስራኤሌ ባጋ ጊዲዳ ኣስ ኡባስ፥ ኣቱማሲኔ ማጫስ ኢሳስ ኢሳስ ኢሲ ኢሲ ኡኬꬅ፥ ኢሲ ኢሲ ሙጾ ኣሾኔ ኢሲ ኢሲ ዛቢቤ ኮምፓ ኢሚዴስ፤ ሄሳፌ ኡባይካ ባሶ ባሶ ቢዳ።
2SA 6:20 ዳዊቲ ባሶ ኣሳ ኣንጃናስ ባሶ ሲሚ ቢን ሳኦሌ ና ሚልኮላ ኢዛ ሞካና ኬዛዳ፥ «ሃች ኢስራኤሌታ ካዎይ ጊታ ኣሳታ ጋራዴታ ሲንꬃን ጮ ላፋ ኣሳ ማላ ካሎ ቤቶይ ኢዛስ ቦንቾ ጊዲኔ?» ጋዱስ።
2SA 6:21 ዳዊቲካ ኢዚስ፥ «ኤ፥ ኔ ኣዋፔኔ ታ ኬꬃን ዲዛ ኡባፌ ኣꬂዲ ጎዳ ዴሬ ኢስራኤሌ ኣይሳና ማላ ታና ዶሪዳ ጎዳ ሲንꬃን ማጉላዲስ፤ ሃኢካ ታ ማጉላና።
2SA 6:22 ሄሳፌካ ቦላራ ካሴፔ ኣꬃዳ ታናቴꬃ ካዉሻና፤ ሄሳፌ ኣꬋዳ ካꬌቲዳዴ ጊዳና፤ ጊዶ ኣቲን ኔ ካꬊዳ ጋራዴታ ሲንꬃን ታ ቦንቼታና» ጊዴስ።
2SA 6:23 ሳኦሌ ና ሚልኮላ ሃይቃናሼ ጋካናስ ና ዬላቤኩ።
2SA 7:1 ካዎዚ ባ ካዎቴꬃ ኬꬃን ዎፑ ጊ ኡቲዳፔኔ ጎዳይ ኢዛ ዩሾን ዲዛ ኢዛ ሞርኬታፔ ሼምፒሲዳፔ ጉዬ፥
2SA 7:2 ናቤ ናታኔስ፥ «ሄኮ ታኒ ዚጋፔ ኬጼቲዳ ካዎቴꬃ ኬꬃን ዳይስ፤ ጾሳ ጫቆ ቃላ ታቦታይ ጊዲኮ ዱንካኔን ዴስ» ጊዴስ።
2SA 7:3 ናታኔይካ፥ «ጎዳይ ኔናራ ጊዲዳ ጊሻስ ኔ ቆፒዳ ኡባ ኦꬃ» ጊዴስ።
2SA 7:4 ሄ ጋላሳ ኦማርስ ጎዳ ቃላይ ናታኔኮ ዪዲ፥
2SA 7:5 «ኔኒ ባዳ ታ ኣይሌ ዳዊቴስ፡ ታ ኢዛን ዳና ኬꬅ ኔ ኬጻካ።
2SA 7:6 ታኒ ኢስራኤሌ ኣሳ ጊብጼፔ ኬሶሶፌ ዶማዳ ሃች ጋካናስ ዱንካኔ ታስ ኣቆሶ ሂስታዳ ኢሲሶፔ ሃራሶ ዩያ ዩያ ዴኣዲስ ኣቲን ኬꬃን ዴኣቤኬ።
2SA 7:7 ታኒ ኢስራኤሌ ኣሳራ ቢዳሶ ኡባን ታ ዴሬ ኢስራኤሌ ናጋና ማላ ታ ኣዛዚን ካሌꬂዛይታፔ ኢሳ፥ ‹ኔ ታስ ዚጋ ሚꬃፌ ኣይስ ኬጻቤኪ?› ጊዳዴይ ዲዜ?
2SA 7:8 «ሃኢካ ታ ኣይሌ ዳዊቴስ ኡባፌ ዎልቃማ ጎዳይ፡ ታ ዴሬ ኢስራኤሌ ኔ ኣይሳና ማላ ታ ኔና ዴንꬃዲስ፤ ዶርስ ሄሚዛሶሆፔ ታ ኔና ኤካዲስ።
2SA 7:9 ኔ ቢዳሶ ኡባን ታ ኔናራ ጊዳዲስ፤ ኔ ሞርኬታ ኡባ ታ ኔ ሲንꬃፌ ꬋይሳዲስ፤ ሃኢካ ኢስታ ሱንꬃይ ቢታ ቦላ ኬሂ ኤሬቲዳ ዳሮ ጊታ ኣሳታፔ ኢሳ ሱንꬃ ማላ ታ ኔ ሱንꬃ ꬎቂሳና።
2SA 7:10 ኢዛስ ቡዞ ዱሳሶይ ዳና ማላ ሃይሳፌ ቃጾንታ ማላ ታ ዴሬ ኢስራኤሌስ ሶሆ ኢማናኔ ሚንꬃና። ሃይሳፌ ካሴ ሃኒዳ ማላ ሃይሳፌ ጉዬ ኢታ ዴሬይ ኢስታ ኡንኤꬄና።
2SA 7:11 ታ ዴሬ ኢስራኤሌ ካሌꬂዛይታ ታ ሹሚዳ ዎዴፔ ዶሚዲ ኢስቲ ኢዛ ቦላ ኦꬂዳይሳꬆ ሃይሳፌ ጉዬ ኢዛ ቦላ ኦሴቴና፤ ሄሳꬆካ ኔ ሞርኬታ ኡባፌ ታ ኔና ናጋና። ጎዳይ ባ ሁኤራ ኬꬅ ኔስ ኬጻናይሳ ኢዚ ዮቴስ።
2SA 7:12 ኔ ላይꬃ ዉርሳዳ ካሴ ኔ ኣዋታኔ ጋይቲዛ ዎዴ ኔና ላታና ዜሬꬅ ታ ኔፔ ኬሳና፤ ኢዛ ካዎቴꬃካ ታ ሚንꬃና።
2SA 7:13 ታ ሱንꬃስ ኬꬅ ኬጻናይ ኢዛ፤ ታኒካ ኢዛ ካዎቴꬃ ሜርናስ ሚንꬃና።
2SA 7:14 ታ ኢዛስ ኣዋ ጊዳና፤ ኢዚካ ታስ ና ጊዳና፤ ኢዚ ሞሮ ኦꬂኮ ኣስ ሙሪዛ ጉፌራ ታ ኢዛ ሙራና፤ ኣሳ ናይ ሊሶን ጋራፌቲዛ ማላ ታ ኢዛ ጋራፋና።
2SA 7:15 ታ ማሮቴꬃ ኔፔ ካሴ ዲዛ ሳኦሌፔ ሃሲዳይሳꬆ ታ ኢዛፔ ሃሲኬ።
2SA 7:16 ኔ ኬꬃይኔ ኔ ካዎቴꬂ ታ ሲንꬃን ሜርናስ ሚኒ ዳና፤ ኔ ካዎቴꬃ ኣራታይካ ሜርናስ ሚኒ ዳና» ጊዴስ።
2SA 7:17 ናታኔይ ሃይሳ ኣጁታ ቃላ ኩሜꬅ ዳዊቴስ ዮቲዴስ።
2SA 7:18 ሃይሳፌ ጉዬ ካዎ ዳዊቲ ጌሊ ጎዳ ሲንꬃን ኡቲዲ፥ «ኡባ ሃሪዛ ጎዳዉ! ኔ ታና ሃይሳስ ጋꬃናስ ታ ኦኔ? ታሶ ኣሳይካ ኣዜ?
2SA 7:19 ኡባ ሃሪዛ ጎዳዉ፥ ሃይሲ ኔ ሲንꬃን ጉꬅ ጊዲሺን ኔ ጊዲኮ ኔ ኣይሌዛሶይ ሲንꬃፌ ሃናናይሳ ዮታዳሳ፤ ኡባ ሃሪዛ ጎዳዉ! ኔ ኣሳራ ጋይቲዛ ሎሴ ኦጌይ ሃይሴ?
2SA 7:20 «ዳዊቲ ኔና ሃይሳፌ ቦላራ ሃራ ኣይ ጋና ዳንዳይዜ? ኡባ ሃሪዛ ጎዳዉ፥ ኔ ኣይሌዛ ኔ ኤራሳ።
2SA 7:21 ኔ ቃላዛ ጊሻሲኔ ኔ ዎዚና ቆፋ ማላ ኔ ሃይሳ ጊታ ሚሽ ኦꬃዳሳ፤ ኔ ኣይሌዚ ኤራና ማላ ቆንጪሳዳሳ።
2SA 7:22 «ኡባ ሃሪዛ ጎዳዉ፥ ኔ ኣይ ማላ ጊታ! ሙሌካ ኔና ሚሳቲዛይ ኦኒካ ዴና፤ ኑኒ ኑ ሃይꬃራ ሲዪዳ ማላ ኔፔ ኣቲን ሃራ ጾሲ ዴና።
2SA 7:23 «ባ ዴሬ ጊዳና ማላ ኢዛ ኣሻናስ ጾሲ ኢዛፔ ሲንꬃራ ቢዳ ዴሬይ፥ ባ ሱንꬃስ ኦꬃና ማላ ካዎቴꬃታኔ ኢስታ ኤቃ ጾሳታ ባ ሲንꬃፌ ጎዲዲ ጊታኔ ያሺሲዛ ማላታ ኦꬂዲ ጊብጼፔ ዎዚ ኤኪዳ ኔ ዴሬ ኢስራኤሌ ማላይ ቢታ ቦላ ኦኒ ዲዜ?
2SA 7:24 ኔ ዴሬዛ ኢስራኤሌ ሜርናስ ኔስ ቡዞ ዴሬ ኦꬃዳ ሚንꬃዳሳ፤ ጎዳዉ፥ ኔ ኢዛ ጾስ ጊዳዳሳ።
2SA 7:25 «ሃኢካ ጎዳ ጾሳዉ፥ ኔኒ ኔ ኣይሌዛሲኔ ኢዛ ኬꬃስ ኢሚዳ ሂዶታ ሜርናስ ናጋ፤ ኔ ዮቲዳ ማላካ ፖላ፤
2SA 7:26 ሄሳ ጊሻስ ኔ ሱንꬂ ሜርናስ ጊታ ጊዳና፤ ኣሳይካ፥ ‹ኡባፌ ዎልቃማ ጎዳይ ኢስራኤሌ ጾሳ› ጋና። ኔ ኣይሌ ዳዊቴ ኬꬃይ ኔ ሲንꬃን ሚኖ ጊዳና።
2SA 7:27 «ኣቤት ኡባፌ ዎልቃማ ጎዳዉ፥ ኢስራኤሌ ጾሳዉ፥ ‹ታ ኔስ ኬꬅ ኬጻና› ጋዳ ሄሳ ታስ ኔ ኣይሌዛስ ቆንጪሳዳሳ። ሄሳ ጊሻስ ኔ ኣይሌዚ ሃ ዎሳዮ ዎሳናስ ባ ዎዚናን ጻሊዴስ።
2SA 7:28 ኣቤት ኡባ ሃሪዛ ጎዳዉ! ኔኒ ጾሳ፤ ኔ ቃላይካ ኣማኔቲዳይሳ፤ ሃይሳ ሎኦ ሚሽ ኦꬃናስ ኔኒ ኔ ኣይሌዛስ ሂዶታ ኢማዳሳ።
2SA 7:29 ኢዚ ኔ ሲንꬃን ሜርናስ ሚኒ ዳና ማላ፥ ሃኢካ ኔ ኣይሌዛ ኬꬅ ኣንጃርኪ! ኣቤት ኡባ ሃሪዛ ጎዳዉ! ሃይሳ ኔርካ ኔ ዮታዳሳ፤ ኔ ኣንጆን ኔ ኣይሌዛ ኬꬂ ሜርናስ ኣንጄታና» ጊዴስ።
2SA 8:1 ሄሳፌ ጉዬ ዳዊቲ ፊሊስጼሜ ኣሳ ጾኒዴስ፤ ባ ሼኔ ጋርሳን ኣይሲዴስ፤ ሜቴጊ-ኣማ ጌቴቲዛ ካታማዮ ፊሊስጼሜታ ኩሼፔ ዎꬂ ኤኪዴስ።
2SA 8:2 ሄሳꬆካ ዳዊቲ ሞኣቤታ ጾኒዴስ፤ ኢስታ ቢታ ቦላ ኢሺሲዲ ዎዶሮን ዋꬊ ጼሊዴስ፤ ዋꬊ ጼሊዳይታፔ ናምኡ ኩሼ ጊዲዛይታ ኢዚ ዎꬊን ኢሲ ኩሼ ጊዲዛይቲ ፓጻ ኣቲዳ፤ ሄሳ ጊሻስ ሞኣቤ ኣሳይ ዳዊቴስ ሃሬቲዴሲኔ ኢዛስ ጊሪዴስ።
2SA 8:3 ሄሳፌካ ሃራ ዳዊቲ ኤፊራጺሴ ሻፋ ማታን ዲዛ ዴሬዛ ዛሪ ኦይካና ቢዲ፥ ጾባ ካዎ ኤራሆቤ ና ሃዳዲኤዜሬ ኦሊ ጾኒዴስ።
2SA 8:4 ዳዊቲ ኢዛፔ 1,000 ፓራ-ጋሬታ፥ 7,000 ቶጋንቻታ፥ 20,000 ኦላንቻታ ዲኢዴስ፤ 100 ፓራ-ጋሬታ ጻላ ኣሺዲ ሃንኮይታ ኡባ ጊልዳዪ ዬዲዴስ።
2SA 8:5 ዳማስቆ ኣራሜን ዲዛ ጾባ ካዎ ሃዳዲኤዜሬ ማዳናስ ዪዳ ዎዴ ዳዊቲ ኢስታፌ 22,000 ኣስ ዎꬊዴስ።
2SA 8:6 ሄሳፌ ጉዬ ዳማስቆን ዲዛ ኣራሜን ባ ኦላ ኣሳታ ካምቤ ጊግሲዴስ። ኣራሜ ኣሳይ ኢዛስ ሃሬቲዴሲኔ ጊሪዴስ፤ ጎዳይ ዳዊቲ ቢዳሶ ኡባን ኢዛስ ጾኖ ኢሚዴስ።
2SA 8:7 ሃዳዲኤዜሬ ሹሜቲ ኦይኪዳ ዎርቃ ጎንዳሌታ ዳዊቲ ኤኪዲ ዬሩሳላሜ ኤፊዴስ።
2SA 8:8 ካዎ ዳዊቲ ቤጻሄኔ ቤሮታዬ ጌቴቲዛ ሃዳዲኤዜሬ ካታማታፔ ኬሂፔ ዳሮ ጻርቂማላ ዴንꬂ ኤፊዴስ።
2SA 8:9 ሃማቴ ዴሬ ካዎ ቶኡዪ ዳዊቲ ኩሜꬃ ሃዳዲኤዜሬ ኦላ ኣሳ ጾኒዳይሳ ሲዪዳ ዎዴ፥
2SA 8:10 ቶኡዪ ሃዳዲኤዜሬራ ኡባ ዎዴ ኦሌቲሼ ዲዛ ጊሻስ ሳሮካኔ ኢዚ ሃዳዲኤዜሬ ጾኒዳ ጾኖ ቆንጪሳናስ ባ ና ኢዮራሜ ካዎ ዳዊቴኮ ኪቲ ዬዲዴስ፤ ኢዚካ ቢራፔ፥ ዎርቃፌኔ ጻርቂማላፔ ኦሴቲዳ ሚሻታ ኤኪ ዪዴስ።
2SA 8:11 ካዎ ዳዊቲ ካሴ ባ ጊሪሲዳ ካዎታፔ ጌሊዳ ቢራኒኔ ዎርቃን ኦꬂዳ ማላ ሃይታ ሃ ሚሻታካ ጎዳስ ዱማሲዴስ።
2SA 8:12 ኢዛስ ጊሪዳ ካዎቲ፥ ኤዶሜ፥ ሞኣቤ፥ ኣሞኔ ኣሳ፥ ፊሊስጼሜ ኣሳኔ ኣማሌቄ ኣሳ። ሄሳꬆካ ጾባ ካዎ ኤራሆቤ ና ሃዳዲኤዜሬፔ ዲኢ ኤኪዳይሳ ጎዳስ ዱማሲዴስ።
2SA 8:13 ማጺኔ ሾባ ጌቴቲዛሶን ዳዊቲ ኤዶሜ ኣሳፔ 18,000 ኣስ ዎꬊ ሲሚዳፔ ጉዬ ኢዛ ሱንꬃይ ኬሂ ናሼቲዴስ።
2SA 8:14 ኩሜꬃ ኤዶሜን ኦላንቻታ ካምቤ ጊግሲዴስ፤ ኤዶሜ ኣሳይ ኡባይ ዳዊቴስ ሃሬቲዴስ፤ ዳዊቲ ቢዳሶ ኡባን ጎዳይ ኢዛስ ጾኖ ኢሚዴስ።
2SA 8:15 ዳዊቲ ኩሜꬃ ኢስራኤሌ ቦላ ካዎቲዴስ፤ ዴራስ ሱሬ ፒርዳኔ ዎጋ ኤሲዴስ።
2SA 8:16 ጹሪያ ና ኢዮኣቤይ ኦላንቻታ ሃላቃ፤ ኣሂሉዴ ና ኢዮሳፊጼይ ታሪኬ ጻፌ።
2SA 8:17 ቃሴ ኣሂጹቤ ና ሳዶቄይኔ ኣቢያታሬ ና ኣሂሜሌኬይ ቄሴ፤ ሳራያይ ጻፌ።
2SA 8:18 ዮዳሄ ና ባናያይ ኬሊቴ ኣሳሲኔ ፔሊቴ ኣሳስ ሃላቃ፤ ዳዊቴ ኣቱማ ናይቲ ካዎቴꬃ ኬꬃን ዞሬ ኢሚዛይታ።
2SA 9:1 ዳዊቲ፥ «ዮናታኔ ጊሻስ ጋዳ ታኒ ኢዛስ ኪያቴꬅ ኦꬃና ማላ ሳኦሌ ሶ ኣሳፔ ኣቲዳ ኣሲ ዲዜ?» ጊ ኦይቺዴስ።
2SA 9:2 ሄ ዎዴ ሳኦሌ ሶን ጺባ ጌቴቲዛ ኢሲ ኣይሌይ ዴስ፤ ኢዚ ዳዊቴኮ ባና ማላ ኢዛስ ኣሳይ ዮቲዴስ። ካዎዚካ ኢዛ፥ «ጺባ ጌቴቲዛይ ኔኔ?» ጊ ኦይቺዴስ። ኢዚካ፥ «ኤ ታና ኔ ኦሳንቻዛ» ጊዴስ።
2SA 9:3 ካዎዚካ፥ «ጾሳ ኪያቴꬅ ታ ኢዛስ ኦꬃና ማላ ሳኦሌ ሶ ኣሳፔ ኣቲዳ ኣሲ ዴኔ?» ጊ ኦይቺዴስ። ጺባይካ ካዎዛስ፥ «ዮናታኔስ ቶሆ ሲሊዳ ኢሲ ናይ ዴስ» ጊዴስ።
2SA 9:4 ካዎዚካ፥ «ኢዚ ኣዋን ዲዜ?» ጊ ኦይቺዴስ፤ ጺባይካ፥ «ሎዲባሬ ጌቴቲዛሶን ኣምኤሌ ና ማኪሬሶን ዴስ» ጊ ዛሪዴስ።
2SA 9:5 ሄሳ ጊሻስ ካዎ ዳዊቲ ሜምፌቦስቴ ሎዲባሬፔ ኣምኤሌ ና ማኪሬ ሶፔ ኪቲ ኤሂሲዴስ።
2SA 9:6 ሳኦሌ ናዛ ዮናታኔ ና ሜምፌቦስቴይ ዳዊቴኮ ዪዲ ኢዛ ቦንቾስ ቢታ ቦላ ጉፋኒዲ ሳሮኪዴስ። ዳዊቲ ኢዛ፥ «ሜምፌቦስቴ!» ጊ ጼይጊዴስ። ኢዚካ፥ «ሄኮ ኔ ኦሳንቻዚ ሃን ዳይስ» ጊዴስ።
2SA 9:7 ዳዊቲካ ኢዛ፥ «ባቦፋ፤ ኔ ኣዋ ዮናታኔ ጊሻስ ጋዳ ታኒ ኔስ ኪያቴꬅ ኦꬃና፤ ኔ ማይዛ ሳኦሌ ቢታ ሙሌራ ታ ኔስ ዛራና፤ ኔኒ ኡባ ዎዴ ታ ማዳፌ ማንዳሳ» ጊዴስ።
2SA 9:8 ሜምፌቦስቴይ ቢታ ቦላ ጉፋኒዲ፥ «ሃይቂዳ ካና ማላ ቆዴቲዳ ታስ ኔ ሃይሳ ኬና ኦꬃናስ ኔ ኦሳንቻይ ታ ኦኔ?» ጊዴስ።
2SA 9:9 ሄሳፌ ጉዬ ካዎዚ ሳኦሌ ኣይሌ ጺባ ጼይጊዲ፥ «ሳኦሌሲኔ ኢዛሶ ኣሳስ ዲዛ ሚሽ ኡባ ኔ ጎዳ ናዛ ና ሜምፌቦስቴስ ኢማዲስ።
2SA 9:10 ኔኒ፥ ኔ ናይቲኔ ኔ ኦሳንቻቲ ኢንቴ ጎዳ ናዛ ናይ ባስ ዴማና ማላ ኢዛ ጋዴ ኢዛስ ጎዪዲ ካꬅ ኢዛስ ጌልꬂቴ፤ ኔ ጎዳ ናዛ ና ሜምፌቦስቴይ ጊዲኮ ኣይ ዎዴካ ታ ማዳፌ ማና» ጊዴስ። ሄ ዎዴ ጺባስ 15 ኣቱማ ናይቲኔ 20 ኦሳንቻቲ ዴቴስ።
2SA 9:11 ሄሳፌ ጉዬ ጺባይ ካዎዛስ፥ «ታ ጎዳ ካዎ! ኔ ኦሳንቻ ኔ ኣዛዚዳ ኡባ ኔ ኣይሌይ ፖላና» ጊዴስ። ሄሳ ጊሻስ ሜምፌቦስቴይ ካዎዛ ናይታፔ ኢሳ ማላ ጊዲዲ ዳዊቴ ማዳፌ ሚሼ ዴኢዴስ።
2SA 9:12 ሜምፌቦስቴስ ሚካ ጌቴቲዛ ኢሲ ጉꬃ ናይ ዴስ፤ ጺባሶ ኣሳይ ኡባይ ሜምፌቦስቴስ ኦꬂሼ ጋምኢዴስ።
2SA 9:13 ሜምፌቦስቴይ ኡባ ዎዴ ካዎ ማዳፌ ሚዛ ጊሻስ ዬሩሳላሜን ዴኢዴስ፤ ኢዛስ ናምኡ ቶሆቲ ሲላ።
2SA 10:1 ሄሳፌ ጉዬ ኣሞኔታ ካዎይ ሃይቂዴስ፤ ኢዛ ና ሃኖኔይ ኢዛሶሆን ካዎቲዴስ።
2SA 10:2 ዳዊቲካ፥ «ኢዛ ኣዋይ ታስ ኪያ ኦꬂዳይሳꬆ ታኒካ ናኦሴ ና ሃኖኔስ ኢዛ ኩሼ ዛራና» ጊ ቆፒዴስ። ሄሳ ጊሻስ ኢዛ ኣዋ ሃይቆ ጊሻስ ሚሼቲዳይሳ ዮታና ማላ ዳዊቲ ኣስ ኪቲዴስ፤ ዳዊቲ ዬዲዳ ኣሳቲ ቢዲ ኣሞኔ ዴሬ ጋኪዳ ማላ፥
2SA 10:3 ኣሞኔ ዴሬ ሹሜቲ ባ ጎዳ ሃኖኔ፥ «ዳዊቲ ባስ ሴቴቲዳ ሚሻ ቆንጪሳናስ ኣስ ኪቲዳይ ኔ ኣዋ ቦንቻናስ ኪቲዳ ኔስ ሚሳቲዜ? ኢዚ ኪቲዳ ኣሳቲ ካታማዮ ፓጪ ጼላናስ፥ ጾሞሳናሲኔ ꬋይሳናስ ጊዴኔ?» ጊዳ።
2SA 10:4 ሄሳ ጊሻስ ሃኖኔይ ዳዊቴ ኣሳታ ኦይኪዲ ኢሳ ኢሳ ቡች ባጋሲ ሜዲዴስ፤ ኢስቲ ማይኢዳ ማይኦዛካ ፑዴ ጼሳ ጋꬂ ቃንጺ ዬዲዴስ።
2SA 10:5 ኣሳቲ ኬሂ ዬላቲዳይሳ ዳዊቲ ሲዪዳ ጊሻስ ኣስ ኢስታስ ኪቲዴስ፤ ካዎዚ፥ «ኢንቴ ቡቻይ ዲጫናሼ ጋካናስ ኢያርኮን ጋምኢዲ ሄሳፌ ጉዬ ሲሚ ዪቴ» ጊዴስ።
2SA 10:6 ኣሞኔ ኣሳይ ዳዊቲ ኢስታ ኢጺዳይሳ ኤሪዲ ቤት-ኤራኣቤፔኔ ጾባፌ 20,000 ኣራሜፔ ቶሆራ ቢዛ ዎታዳራታ ሄሳꬆካ ካዎ ማኢካይ 1,000 ኣሳራ ቃሴካ ጾባፌ 12,000 ኣስ ቃጻሪዳ።
2SA 10:7 ዳዊቲ ሄሳ ሲዪዲ ኢዮኣቤ ኩሜꬃ ኦላ ኣሳራ ጋꬂ ዬዲዴስ።
2SA 10:8 ኣሞኔ ኣሳይ ኬዚዲ ባ ካታማ ጌሊዛ ፔንጌ ቦላ ሳልፌን ኤቂዴስ፤ ጾባ ኣሳይ፥ ኤራሆቤ ኣሳይ፥ ሄሳꬆካ ጾቢያ ኣሳይኔ ማኢካ ኣሳይ ዴምባ ቦላ ዱማ ሳልፊዳ።
2SA 10:9 ኢዮኣቤይካ ጉዬራኔ ሲንꬃራ ኦላይ ባና ጊዶꬂዳይሳ ቤኢዲ ኢስራኤሌ ጋርሳን ኤሬቲዳ ኦላንቻታፔ ጉꬃታ ዶሪዲ ኣራሜ ኦላንቻታ ሲንꬃን ኣꬂ ኤሲዴስ።
2SA 10:10 ሃንኮ ኣቲዳ ኦላንቻታ ባ ኢሻ ኣቢሳዬ ኢስታ ቦላ ሹሚዲ ኣሞኔ ኣሳ ሲንꬃን ኤሲዴስ።
2SA 10:11 ኢዮኣቤይካ፥ «ኣራሜ ኣሳይ ታ ቦላ ሚኒኮ ኔ ያዳ ታና ማዳ፤ ኣሞኔ ኣሳይ ኔ ቦላ ሚኒኮ ታ ባዳ ኔና ማዳና።
2SA 10:12 ሄሳ ጊሻስ ሚና! ኑኒ ኑ ዴሬዛሲኔ ኑ ጾሳ ካታማታስ ኣኔ ሚኒ ኦሌቶስ፤ ጎዳይ ባና ሎኢዳ ማላ ኦꬆ» ጊዴስ።
2SA 10:13 ሄሳፌ ጉዬ ኢዮኣቤይኔ ኢዛራ ዲዛ ኦላ ኣሳይ ኣራሜ ኣሳ ኦላናስ ጌዴ ሲንꬅ ሆርዶፊዴስ፤ ኣራሜ ኣሳይ ኢስታ ሲንꬃፌ ባቃቲዴስ።
2SA 10:14 ኣራሜ ኣሳይ ባቃቲዳይሳ ኣሞኔ ኣሳይ ቤኢዲ ኢስቲካ ኣቢሳዬ ሲንꬃፌ ባቃቲዲ ጌዴ ካታማይ ጊዶ ጌሊዳ፤ ሄሳ ጊሻስ ኢዮኣቤይ ኣሞኔ ኣሳ ኦሊዛይሳ ኣጋጊዲ ጉዬ ዬሩሳላሜ ሲሚዴስ።
2SA 10:15 ኣራሜ ኣሳይ ኢስራኤሌ ኣሳን ጾኔቲዳይሳ ቤኢዲ ቃሴካ ኢሲ ቦላ ሺቂዳ።
2SA 10:16 ሃዳዲኤዜሬ ኣሳታ ኪቲዲ ሻፋፔ ሄ ፒንꬃን ዲዛ ኣራሜ ኣሳ ኤሂሲዴስ፤ ኢስቲካ ሃዳዲኤዜሬ ኦላ ኣሳ ኣዛዚዛ ሶባኬ ኣላፌቴꬃን ኤላሜ ቢዳ።
2SA 10:17 ዳዊቲ ሄሳ ሲዪዲ ኩሜꬃ ኢስራኤሌ ኣሳ ሺሺዴስ፤ ሄሳፌ ጉዬ ዮርዳኖሴ ፒኒዲ ኤላሜ ቢዴስ፤ ኣራሜ ኣሳይ ኦላስ ጊጌቲዲ ዳዊቴራ ቲራን ጋይቲዴስ።
2SA 10:18 ጊዶ ኣቲን ኢስቲ ኢስራኤሌ ሲንꬃፌ ባቃቲዳ፤ ዳዊቲ ኢስታፌ 700 ፓራ-ጋሬ ኣሳታኔ 40,000 ቶሆን ቢዛ ኦላንቻታ ዎꬊዴስ። ሄሳꬆ ኢስቲ ኦላ ኣሳ ኣዛዚዛ ሶባኬካ ጫዲ ማዱንꬂዳ ጊሻስ ኢዚ ሄን ሃይቂዴስ።
2SA 10:19 ሃዳዲኤዜሬፔ ጋርሳራ ዲዛ ካዎቲ ኡባይ ኢስራኤሌ ኣሳን ጾኔቲዳይሳ ቤኢዲ ኢስራኤሌ ኣሳራ ሳሮቴꬅ ሜꬊዲ ኢስታስ ሃሬቲዳ። ሄሳ ጊሻስ ኣራሜ ኣሳይ ኣሞኔ ኣሳ ማዳናስ ባቢዴስ።
2SA 11:1 ካዎቲ ኦላስ ኬዚዛ ኦፊንꬃ ኣጊናታን ዳዊቲ ኢዮኣቤ ካዎ ሹሜታራኔ ኩሜꬃ ኦላንቻታራ ጋꬂ ኦላስ ዬዲዴስ፤ ኢስቲካ ኣሞኔ ዴሬ ኣሳ ꬋይሲዳ፤ ኤራባ ካታማዮ ጊዶꬂዳ፤ ጊዶ ኣቲን ሄ ዎዴ ዳዊቲ ዬሩሳላሜን ኣቲዴስ።
2SA 11:2 ኢሲ ጋላስ ቢላሄ ዎዴ ዳዊቲ ꬊስኮፌ ቤጊዲ ካዎ ኬꬃ ፖቄ ቦላ ኬዚዲ ሲሜሬቲሼ ኢሲ ማጫሳያ ባ ቦላ ሜጬቲሺን ቤኢዴስ፤ ማጫሳያ ኬሃ ማላ ሎኦ።
2SA 11:3 ዳዊቲ ኣስ ኪቲዲ ማጫሳይ ጊሻስ ኦይሼቺዴስ፤ ኣዴዚካ፥ «ሃና ሂቴ ዴሬ ኣስ ኦሪዮ ማቾ ኤልኣሜ ቢዮ ቤርሳቤሆ ጊዴኬ?» ጊዴስ።
2SA 11:4 ሄሳፌ ጉዬ ዳዊቲ ኣስ ዬዲዲ ኢዞ ባኮ ኤሂሲን ኢዚ ዲዛሶ ጌላዱስ፤ ሂስቲን ኢዚራ ዚንኢዴስ፤ ሄ ዎዴ ኢዛ ማጫ ናስ ዪዛ ኣጊና ዎጋፔ ጌያ ኡታዱስ።
2SA 11:5 ማጫሳያ ቃንꬃታዳ ዳዊቴስ፥ «ታ ኔስ ሻራዲስ» ጋሼ ኪታ ዬዳዱስ።
2SA 11:6 ሄሳፌ ጉዬ ዳዊቲ ኢዮኣቤስ፥ «ሂቴ ዴሬ ኣስ ኦሪዮ ሃ ታኮ ዬዳ» ጊ ኪቲዴስ፤ ኢዮኣቤይካ ኦሪዮ ዳዊቴኮ ዬዲዴስ።
2SA 11:7 ኦሪዮይ ዳዊቴኮ ዪን ዳዊቲ ኢዮኣቤኔ ኦላንቻታ ሳሮቴꬅ ኦይቺዴስ፤ ሄሳꬆካ ኦላዚ ዋኒ ኦሌቲዛኮ ኢዛ ኦይቺዴስ።
2SA 11:8 ሄሳፌ ጉዬ ዳዊቲ ኦሪዮ፥ «ኣኔ ኔኒ ኔሶ ባዳ ቶሆ ሜጬታ» ጊዴስ፤ ኦሪዮይ ካዎ ኬꬃፌ ሞይዜቲ ቢዴስ፤ ካዎዚ ሞጎታ ካꬅ ጌዶራ ኢዛስ ዬዲዴስ።
2SA 11:9 ጊዶ ኣቲን ኦሪዮይ ባ ጎዳ ኦሳንቻታ ኡባራ ካዎ ኬꬃ ጊቤ ፔንጌ ቦላ ኢቺዴስ ኣቲን ባሶ ቢቤና።
2SA 11:10 ዳዊቲ፥ «ኦሪዮይ ባሶ ቢቤና» ጊዛይሳ ሲዪዳ ማላ ኦሪዮ፥ «ኔ ቡሮ ኦጌፔ ጌሎ ቦላ ዳሳ ዲኪ? ኔሶ ኣይስ ባቤኪ?» ጊ ኦይቺዴስ።
2SA 11:11 ኦሪዮይካ ዳዊቴስ፥ «ታቦታይ፥ ኢስራኤሌ ኣሳይኔ ዩሁዳ ኣሳይ ዱንካኔን ዲሺን፥ ታ ጎዳ ኢዮኣቤይኔ ታ ጎዳ ኣሳይ ጮ ዴምባ ቦላ ዲሺን ታኒ ማናሲኔ ኡያናስ ቃሴካ ታ ማቼይራ ኣቃናስ ዋና ታሶ ቦ? ኢንቴ ኣሾ! ታ ሃይሳ ማላ ኦꬂኬ» ጊዴስ።
2SA 11:12 ዳዊቲካ ኢዛስ፥ «ኤሮ፥ ኔ ሃች ሃይሳን ኣቂኮ ዎንቶ ታ ኔና ሞይዛና» ጊዴስ። ሄሳ ጊሻስ ኦሪዮይ ሄ ጋላሲኔ ዎንቴꬃ ጋላስ ዬሩሳላሜን ታኪዴስ።
2SA 11:13 ዎንቴꬃ ጋላስ ዳዊቲ ባ ዲዛሶን ኢዛስ ጊቢራ ጊግሲዲ ሚዚ፥ ኡሺ ካልሲዲ ኢዛ ማꬆሲዴስ፤ ጋዴይ ቃሚሺን ኦሪዮይ ጋዴን ኦንጌቲ ዲዛ ሂጻን ኢቻናስ ኢዛ ጎዳ ኣይሌቲ ዲዛሶ ቢዴስ ኣቲን ባሶ ቢቤና።
2SA 11:14 ጋዴይ ዎንቲሺን ዳዊቲ ኢዮኣቤስ ዳብዳቤ ጻፊዲ ኦሪዮ ቦላ ዬዲዴስ።
2SA 11:15 ዳብዳቤዛን፥ «ኦሪዮ ኦላይ ሚኒዛሶን ኤሳ፤ ሄን ኢዚ ጫዴቲ ሃይቃና ማላ ኣጋጊዲ ባቃቲቴ» ጊ ጻፊዴስ።
2SA 11:16 ሄሳ ጊሻስ ኢዮኣቤይ ካታማዮ ጊዶꬂዳ ዎዴ ኬሂ ኤቄቲዛ ኦላንቻቲ ዲዛ ሚጻን ኦሪዮ ኤሲዴስ።
2SA 11:17 ካታማዪን ዲዛ ኣሳይ ኬዚዲ ኢዮኣቤራ ኦላ ዳንጺዴስ፤ ዳዊቴ ኦላንቻታፔ ጉꬃቲ ኩንዲዳ፤ ሄሳꬆካ ሂቴ ዴሬ ኣስ ኦሪዮይ ሃይቂዴስ።
2SA 11:18 ኢዮኣቤይ ኦላሶን ሃኒዳ ኡባ ዳዊቴስ ኪቲ ዬዲዴስ።
2SA 11:19 ኪቴቲ ቢዛይሳስ፥ «ሃይሳ ኦላ ሃኖታ ኔ ካዎዛስ ዮቲዳፔ ጉዬ፥
2SA 11:20 ካዎዚ ኔ ቦላ ሃንቄቲዲ፥ ‹ኢንቴ ኦሌታናስ ኣይስ ሄሳ ማላ ካታማይኮ ኬሂ ሺቂዴቲ? ጊምቤዛ ካራራ ኢንቴ ቦላ ዎንዳፌ ዱካናይሳ ኤሬኬቲ?
2SA 11:21 ዬሩቤሼቴ ና ኣቢሜሌኬ ኢሲ ማጫሳያ ቴቤሴን ጊምቤዛ ካራራ ዎጻ ማይዴ ዬዳዳ ዎꬋቤኬ? ሂስቲን ኢንቴ ኣይስ ሄሳ ኬና ጌዴ ጊምቤዛኮ ሺቂዴቲ?› ጊ ኦይቺኮ ኔኒካ ኢዛስ ዛራዳ፥ ‹ሂቴ ዴሬ ኣስ ኔ ኦሳንቻ ኦሪዮይ ሃይቂዴስ› ጋዳ ዮታ» ጊዴስ።
2SA 11:22 ሄሳ ጊሻስ ኪቴቲዳ ኣዴዚ ዴንዲ ቢዴስ፤ ሄ ቢ ጋኪዳ ማላ ኢዮኣቤይ ዬዲዳ ኪታ ኡባ ዳዊቴስ ዬዲዴስ።
2SA 11:23 ኪቴቲ ቢዳይሲ ዳዊቴስ፥ «ኣሳቲ ኑ ቦላ ዎልቃሚዲ ኑና ኦላናስ ዴምባ ጋካናስ ዪዳ፤ ጊዶ ኣቲን ኑኒ ኢስታ ካታማይ ፔንጌ ጋካናስ ጎዲዶስ።
2SA 11:24 ሄሳፌ ጉዬ ዎንዳፌ ዱኪዛ ኣሳቲ ጊምቤዛ ቦላ ኡቲዲ ኔ ኣይሌታ ጊዲዳ ኑ ቦላ ዎንዳፌ ዱኪዳ፤ ካዎዛ ኦሳንቻታፔ ጉꬃታ ዎꬊዳ፤ ኔ ኦሳንቻ ሂቴ ዴሬ ኣስ ኦሪዮይካ ሃይቂዴስ» ጊዴስ።
2SA 11:25 ዳዊቲ ኪቴቲ ዪዳይሳስ፥ «ኔኒ ኢዮኣቤስ፥ ‹ኣይ ዎዴ ጊዲንካ ማሻይ ኢሲቶ ሄሳፌ ዎይኮ ሃይሳፌ ሜስ፤ ሄሳ ጊሻስ ሃይሳ ሃ ሃኖዛን ካዮቶፋ፤ ካታማዮ ኦላ ኦይካናሲኔ ꬋይሳናስ ሚና› ጋዳ ሚንꬄꬃ» ጊዴስ።
2SA 11:26 ኦሪዮ ማቼያ ኢዚ ኣዚናይ ሃይቂዳይሳ ሲያዳ ኬሃ ሚሼታዳ ኢዛስ ዬካዱስ።
2SA 11:27 ካዮቴꬃ ዎዴይ ኣꬊዳፔ ጉዬ ዳዊቲ ኪቲ ኤሂሲዲ ኢዞ ባስ ማቾ ኤኪዴስ፤ ኢዛ ዳዊቴስ ኣቱማ ና ዬላዱስ፤ ጊዶ ኣቲን ዳዊቲ ኦꬂዳ ኦሶይ ጎዳ ኡፋይሲቤና።
2SA 12:1 ጎዳይ ናቤ ናታኔ ዳዊቴኮ ኪቲዴስ፤ ኢዚካ ዳዊቴኮ ቢዲ፥ «ኢሲ ካታማን ናምኡ ኣሳቲ ዴቴስ፤ ኢስታፌ ኢሶይ ዱሬ፤ ሃንኮይሲ ማንቆ።
2SA 12:2 ዱሬዛስ ኬሂ ዳሮ ዶርሳቲኔ ሚዛቲ ዴቴስ።
2SA 12:3 ጊዶ ኣቲን ማንቆዛስ ኢዚ ሻሚዳ ዶርሳ ላቃ ኢሲኔይፔ ኣቲን ሃራይ ዴና፤ ኢዚ ኢዞ ባ ናይታራ ኣልኢሲ ዲቺዴስ፤ ኢዛራ ኢሲፌ ማዉስ፤ ኢሲፌ ኡያዉስ፤ ኢዛ ኪኦን ኢቻዉስ፤ ኢዛ ኢዛስ ዬሎ ማላ።
2SA 12:4 «ኢሲ ጋላስ ዱሬዛሶ ኢማꬂ ዪዴስ፤ ዱሬ ኣዴዚ ባ ዶርሳታፔ ዎይኮ ሚዛታፔ ኤኪዲ ሄ ኢማꬃዛስ ሚዛ ካꬅ ጊጊሳና ኮዪቤና፤ ጊዶ ኣቲን ማንቆዛ ላቃዮ ኤፊዲ ባሶ ዪዳ ኢማꬃዛስ ካꬂ ጊግሲዴስ» ጊዴስ።
2SA 12:5 ዳዊቲ ሄሳ ኦꬂዳይሳ ቦላ ኬሂ ሃንቄቲዲ ናታኔስ፥ «ዴኦ ጎዳይ ቤኢን ሃይሳ ኦꬂዳዴስ ሃይቆይ ቤሴስ!
2SA 12:6 ኢዚ ሃይሳ ማላ ኦሶ ኦꬂዳ ጊሻሲኔ ቃꬌታይ ባይንዳ ጊሻስ ሄ ላቃይ ጊሻስ ኦይዱ ኩሼ ቃንጻና ቤሴስ» ጊዴስ።
2SA 12:7 ሄሳፌ ጉዬ ናታኔይ ዳዊቴስ ዛሪዲ፥ «ሄ ቢታኔዚ ኔና! ጎዳ ኢስራኤሌ ጾሳይ ኔና፥ ‹ኔኒ ኢስራኤሌ ቦላ ካዎ ጊዳና ማላ ታ ኔና ቲያዲስ፤ ሳኦሌ ኩሼፔካ ኔና ኣሻዲስ።
2SA 12:8 ኔ ጎዳ ኬꬃ ታ ኔስ ኢማዲስ፤ ታ ኔ ጎዳ ማቼታካ ኔ ሾጳ ጋርስ ጌልꬃዲስ፤ ኢስራኤሌ ኬꬃኔ ዩሁዳ ኬꬃ ታ ኔስ ኢማዲስ፤ ሃይቲ ኡባይ ኔስ ጉጺዳኮ ታ ኔስ ሄይታፔ ቦላራ ጉጃናኮሺን።
2SA 12:9 ሂስቲን ኢዛ ሲንꬃን ኢታ ሚሽ ኦꬃዳ ጎዳ ቃላ ኣይስ ካዉሻዲ? ሂቴ ዴሬ ኣስ ኦሪዮ ማሻን ሲፋዳሳ፤ ኢዛ ማቼዮ ኔስ ኤካዳሳ፤ ኢዛካ ኣሞኔታ ማሻን ዎꬊሳዳሳ።
2SA 12:10 ኔኒ ታና ካዉሺዳ ጊሻሲኔ ሂቴ ዴሬ ኣስ ኦሪዮ ማቾ ኔስ ኤኪዳ ጊሻስ ኔ ኬꬃፌ ሜርናስ ማሻይ ሻኬቴና› ጌስ።
2SA 12:11 «ጎዳይ ኔና፥ ‹ቤኣ ኔ ኬꬃፌ ኔ ቦላ ኢታ ሚሽ ታ ዴንꬃና፤ ኔ ኣይፌይ ቤኢሺን ኔ ማቼታ ኤካዳ ኔስ ማታ ጊዲዳ ኢሳዴስ ታ ኣꬃ ኢማና፤ ኢዚካ ሴታ ጋላስ ኔ ማቼታራ ዚንኣና።
2SA 12:12 ኔኒ ካሴ ሃይሳ ጌማን ኦꬃዳሳ፤ ታኒ ጊዲኮ ኢስራኤሌ ኡባ ሲንꬃን ጋላስ ፖኦይ ዲሺን ቆንጪሳና› ጌስ» ጊዴስ።
2SA 12:13 ሄሳፌ ጉዬ ዳዊቲ ናታኔስ፥ «ታኒ ጎዳ ኬሃ ቆሃዲስ» ጊዴስ፤ ናታኔይ ኢዛስ ዛሪዲ፥ «ጎዳይ ኔ ናጋራ ዉርሲዳ ጊሻስ ኔ ሃይቃካ፤
2SA 12:14 ጊዶ ኣቲን ኔ ሃይሳ ኦꬂን ሞርኬቲ ጎዳ ኬሂ ካዉሻና ማላ ኔ ኦꬂዳ ጊሻስ ኔስ ዬሌቲዳ ናዚ ሃይቃና» ጊዴስ።
2SA 12:15 ናታኔይ ባሶ ሲሚ ቢዳፔ ጉዬ ኦሪዮ ማቼያ ዳዊቴስ ዬሊዳ ናዛ ቦላ ጎዳይ ኢታ ሃርጌ ዬጊዴስ።
2SA 12:16 ዳዊቲ ባ ናዛ ጊሻስ ጾሳ ዎሲዴሲኔ ጾሚዴስ። ሄሳፌ ጉዬ ጌዴ ባ ኪፊሌ ጌሊዲ ኦማርስ ኦማርስ ቃንጾንታ ሳኣ ቦላ ኢቺ ኣቂዴስ።
2SA 12:17 ኢዛ ካዎቴꬃ ኬꬃ ጪማቲ ኢዛ ሳኣፔ ዴንꬃናስ ኢዛ ማታን ኤቂዳ፤ ኢዚ ጊዲኮ ዴንዶንታ ኢጺዴስ፤ ኢስቲ ሚሺን ኣይኮካ ሚቤና።
2SA 12:18 ላፑንꬃ ጋላስ ናዚ ሃይቂዴስ፤ ዳዊቴ ኦሳንቻቲ፥ «ናዚ ፓጻ ዲሺን ኑ ዮቲን ኑ ጊዛ ሲዪቤና፤ ሂስቲን ኑ ሃኢ ናዛ ሃይቆ ኢዛስ ዎስቲ ዮታና ዳንዳይዞኒ? ኢዚ ባርካ ባ ቦላ ቆሆ ጋꬃና ዳንዳዬስ» ጊ ቆፒዲ ዮታናስ ባቢዳ።
2SA 12:19 ኢዛ ኦሳንቻቲ ጋርሳራ ሳሱኬቲ ሃሳይዛይሳ ዳዊቲ ቤኢዲ ናዚ ሃይቂዳይሳ ኤሪዴስ፤ ሄሳ ጊሻስ፥ «ናዚ ሃይቂዴ?» ጊዲ ኢስታ ኦይቺዴስ። ኢስቲካ ኢዛስ፥ «ኤ ሃይቂዴስ» ጊዳ።
2SA 12:20 ሄ ዎዴ ዳዊቲ ሳኣ ቦላፌ ዴንዲዲ፥ ሜጬቲዲ፥ ጎርፔቲዲኔ ማይኦ ላሚዳፔ ጉዬ ጎዳ ኬꬅ ቢ ጎይኒዴስ። ሄሳፌ ጉዬ ኢዚ ባ ኪፊሌ ጌሊዴስ፤ ባስ ቁማ ኢማና ማላ ኢዚ ኦይቺን ኢሚዳ ቁማ ሚዴስ።
2SA 12:21 ኢዛ ኦሳንቻቲ ኢዛ፥ «ሃይሳꬆ ኣይስ ኦꬃዲ? ናዚ ሼምፖራ ፓጻ ዲሺን ጾማዳሳኔ ዬካዳሳ፤ ጊዶ ኣቲን ናዚ ሃይቂዳፔ ጉዬ ኔ ዴንዳዳ ካꬅ ማዳሳ» ጊዳ።
2SA 12:22 ዳዊቲ ኢስታስ፥ «ኤ ቱማ፥ ናዚ ሼምፖራ ፓጻ ዲዛ ዎዴ፥ ‹ጎዳይ ታስ ኣቶ ጊዲ ናዛ ሼምፖራ ፓጻ ዎꬃናኮን ጋዳ ጾማዲሲኔ ዬካዲስ።›
2SA 12:23 ሃኢ ጊዲኮ ናዚ ሃይቂን ታ ኣዛስ ጾሞ? ታ ኢዛ ሃ ዛራናስ ዳንዳያዚና? ታ ኢዛኮ ባና ኣቲን ኢዚ ሃ ታኮ ሲሜና!» ጊዴስ።
2SA 12:24 ሄሳፌ ጉዬ ዳዊቲ ባ ማቼዮ ቤርሳቤሆ ሚንꬄꬂዴስ፤ ኢዚኮ ጌሊዲ ኢዚራ ኣቂዴስ፤ ኢዛካ ኢዛስ ኣቱማ ና ዬላዱስ፤ ናዛ፥ «ሶሎሞኔ» ጊ ሱንꬂዴስ፤ ጎዳይካ ኢዛ ዶሲዴስ፤
2SA 12:25 ጎዳይ ናዛ ዶሲዳ ጊሻስ ኢዛ ሱንꬂ ዪዲዲያ ጌቴቲ ጼይጌታና ማላ ናቤ ናታኔ ባጋራ ቃላ ኪቲዴስ።
2SA 12:26 ሄ ዎዴ ኢዮኣቤይ ኣሞኔታ ካታማ ኤራባ ኦሊዲ ካዎቴꬃ ኬꬃ ሚጻ ኦይኪዴስ።
2SA 12:27 ሄሳፌ ጉዬ ኢዮኣቤይ ዳዊቴኮ ኣስ ኪቲ ዬዲዲ፥ «ታኒ ኤራባ ኦላዳ ሃꬂ ዲዛ ካታማዮ ኦይካዲስ፤
2SA 12:28 ሃኢ ኔኒ ኣቲዳ ኦላንቻታ ሺሻ ኤካዳ ካታማዮ ጊዶꬃ ኦይካ፤ ኔ ሂስቶንታ ኣጊኮ ካታማዮ ታ ኦይኪኮ ኢዛ ታ ሱንꬃን ጼይጌታና» ጊዴስ።
2SA 12:29 ሄሳ ጊሻስ ዳዊቲ ኩሜꬃ ኦላንቻታ ሺሺ ኤኪ ቢዲ ኤራባ ኦሊ ኦይኪዴስ።
2SA 12:30 ኢስታ ካዎዛ ካላቻ ኢዛ ሁኤፔ ኤኪዴስ፤ ሄ ካላቻዚ ኢሲ ሜክሊቴ ዎርቃ ጊዲሺን ቦንቼቲዳ ኢንቁን ኣሌቄቲዴስ፤ ዳዊቲ ሄ ካላቻዛ ባ ሁኤን ጎጺዴስ፤ ዳዊቲ ካታማይፔ ኬሂ ዳሮ ሚሽ ዲኢ ኤኪዴስ።
2SA 12:31 ሄን ዲዛ ዴራ ኬሲዲ ኢስታ ማጋዜን፥ ጾይሌኒኔ ካልታን ጎኤቲዲ ኦሶ ኦꬃና ማላ ዎልቃꬂ ኦሲሲዴስ፤ ሄሳꬆካ ጹቤ ሜꬊሲዴስ። ሄሳ ማላ ኦሶይ ሃራ ኣሞኔታ ካታማታ ኡባን ኦሴታና ማላ ኦꬂዴስ። ሄሳፌ ጉዬ ዳዊቲኔ ኢዛ ኦላንቻቲ ኡባይ ዬሩሳላሜ ሲሚዳ።
2SA 13:1 ዳዊቴ ና ኣቤሴሎሜስ ቲኢማሮ ጌቴቲዛ ማላ ሎኦ ሚቻ ዳዉስ፤ ዳዊቴ ና ኣሚኖኔይ ኢዞ ዶሲዴስ።
2SA 13:2 ኣሚኖኔይ ባ ሚቾ ቲኢማሮ ዶሲዳ ጋሶን ሳኬታናሼ ጋካናስ ጬጪዴስ፤ ኢዛ ጌላኦ ጊዲዳ ጊሻስ ኢዚ ኢዚራ ኣቃና ዳንዳይቤና።
2SA 13:3 ኣሚኖኔስ ኢዮናዳቤ ጌቴቲዛ ላጌይ ዴስ፤ ኢዚ ዳዊቴ ኢሻ ሻሜኤ ና፤ ኢዮናዳቤይ ኬሂ ጌኔ ኣሳ።
2SA 13:4 ኢዚ ኣሚኖኔ፥ «ኔ ጊልቃ ጊልቃ ኣቂዛ ጋሶይካ ኣዛኮን ታስ ኣይስ ዮቲኪ!» ጊ ኦይቺዴስ። ኣሚኖኔይ፥ «ታ ኢሻ ኣቤሴሎሜ ሚቾ ቲኢማሮ ዶሲዳ ጊሻስ ጊልቃዲስ» ጊዴስ።
2SA 13:5 ኢዮናዳቤይካ ኢዛስ፥ «ሂስቲኮ ኔኒ፥ ‹ታኒ ሳኬታዲስ› ጋዳ ሂጻን ኬዛ ኢቻ፤ ኔ ኣዋይ ኔና ኦይቻና ዪሺን፥ ‹ታ ሚቾ ቲኢማራ ያዳ ታስ ሚዛ ሚሽ ጊጊሳ ኢሚዳኮ ታና ሎኤስ፤ ካꬃካ ሃይሳን ታ ጼሊሺን ጊጊሳዳ ባ ኩሼራ ኢዛ ታና ባርሳና ማላ ኣዛዛርኪ!› ጋዳ ኢዛ ኦይቻ» ጊዴስ።
2SA 13:6 ሂስቲን ኣሚኖኔይ ሳኬቲዳ ኣስ ሚሳቲዲ ኢቺዴስ፤ ካዎዚ ኢዛ ኦይቻና ዪን ኣሚኖኔይ ኢዛ፥ «ታ ሚቾ ቲኢማራ ያዳ ታ ቤኢሺን ሶሎ ኡካዳ ባ ኩሼራ ታና ባርሳና ማላ ታ ኔና ዎሳይስ» ጊ ኦይቺዴስ።
2SA 13:7 ዳዊቲ፥ «ኔ ኢሻ ኣሚኖኔሶ ባዳ ኢዛስ ማና ካꬅ ጊጊሳ» ጊዲ ቲኢማሪስ ዮታና ማላ ካዎ ኬꬅ ኪቲዴስ።
2SA 13:8 ሄሳ ጊሻስ ቲኢማራ ኢዚ ኢሻ ኣሚኖኔይ ኢቺ ዲዛሶ ባዱስ፤ ጉꬃ ቡኬሶ ኤካዳ ሙኑቂዳፔ ጉዬ ኢዚ ቤኢሺን ጊጊሳዳ ኡካዱስ።
2SA 13:9 ሄሳፌ ጉዬ ባሼዛ ኬሳዳ ሶሎዛ ኢዛስ ሺሻዱስ፤ ጊዶ ኣቲን ኢዚ ማና ኮዪቤና። ኣሚኖኔይ፥ «ኡባ ኣሳ ሃይሳፌ ኬሲቴ» ጊዴስ፤ ዲዛ ኣሳይ ኡባይካ ኢዛ ዬጊ ኬዚዴስ።
2SA 13:10 ሄሳፌ ጉዬ ኣሚኖኔይ ቲኢማሮ፥ «ታና ባርሳና ማላ ካꬃ ሃ ታ ኢቺዳ ኪፊሌ ኤካ ያ» ጊዴስ፤ ቲኢማራ ባ ጊግሲዳ ቁማ ኤካዳ ባ ኢሻ ኣሚኖኔይ ኢቺዳ ኪፊሌ ጌላዱስ።
2SA 13:11 ጊዶ ኣቲን ኢዛ ቁማ ኢዛስ ሺሺን ኢዚ ኢዞ ጩርፑ ሂስቲ ኦይኪዲ፥ «ታ ሚቼዬ! ኣኔ ኢሲፌ ዚንኦስ» ጊዴስ።
2SA 13:12 ኢዛካ ዛራዳ ኢዛስ፥ «ታ ኢሻዞ ታ ኔና ሾቢስ፥ ኣጋ፤ ሄሲ ሃኔና፤ ታና ዎልቃራ ኦይኮፋ፤ ሃይሳ ማላ ሚሺ ኢስራኤሌን ኦሴቲ ኤሬና፤ ሃይሳ ዬላቺዛ ኦሶ ኦꬆፋ።
2SA 13:13 ታ ሃይሳፌ ጉዬ ዋናኔ? ታ ካዉሻቴꬃ ቶካዳ ታ ኣዋ ጌላኔ? ኔኒካ ኢስራኤሌን ካዉሻ ኣሳታፔ ኢሳ ማላ ቆዴታና ጊዲኪ? ዲጫ ዛይ ካዎዛስ ዮታ፤ ኢዚ ታ ኔና ጌሎንታ ማላ ዲጌና» ጋዱስ።
2SA 13:14 ኢዚ ጊዲኮ ኢዛ ጊዛይሳ ሲያና ኮዪቤና፤ ኢዚ ኢዚፔ ኬሂ ሚኖ ጊዲዳ ጊሻስ ኢዞ ዎልቃራ ኦይኪዲ ኢዚ ጌላኦቴꬃ ኤኪዴስ።
2SA 13:15 ሄሳፌ ጉዬ ኣሚኖኔይ ኢዞ ኬሂ ኢጺዴስ፤ ኡባካ ካሴ ኢዞ ሲቆሪፔ ቦላራ ኢጺዴስ። ኣሚኖኔይ፥ «ኪቻ ታ ኣቻፌ ኬዛ!» ጊዴስ።
2SA 13:16 ኢዛካ፥ «ሄሲ ሃኔና! ኔኒ ታና ኬሳ ዬዶይ ካሴ ኔ ታ ቦላ ጋꬂዳ ቆሆዛፔ ኣꬃዳ ታና ቆሃሳ!» ጋዱስ፤ ኢዚ ጊዲኮ ኢዛ ጊዛይሳ ኤኪቤና።
2SA 13:17 ኢዚ ባ ኣይሌዛ ጼይጊዲ፥ «ሃኖ ማጫሳዮ ኬሳዳ ካራ ጎርዳ» ጊዴስ።
2SA 13:18 ሄሳ ጊሻስ ኢዛ ጌሎንታ ማላ ካሬዛ ጎርዲዴስ፤ ሄ ዎዴ ጌላኦ ጊዲዳ ካዎ ናይቲ ማይኢዛ ኣሌቆ ማይኦ ማይኣ ኡታዱስ።
2SA 13:19 ቲኢማራ ባ ሁኤን ቢዲንꬅ ላላዱስ፤ ኣሌቆ ማይኦዛካ ዳካዱስ፤ ሄሳፌ ጉዬ ባ ሁኤ ባቃ ኦይካዳ ዬካሼ ባዱስ።
2SA 13:20 ኢዚ ኢሻ ኣቤሴሎሜይ ኢዞ፥ «ሄሲ ኔ ኢሻ ኣሚኖኔይ ኔናራ ታኪዴ? ታ ሚቼዬ ኣኔ ሃኢ ጮኡ ጋ፤ ኢዚ ኔ ኢሻ ጊዲዳ ጊሻስ ኔ ጬጮፓ» ጊዴስ። ቲኢማራ ባ ኢሻ ኣቤሴሎሜሶን ሳዮ ጊዳ ኡታዱስ።
2SA 13:21 ካዎ ዳዊቲ ሄ ሃኖዛ ሲዪዲ ኬሂ ሃንቄቲዴስ፤
2SA 13:22 ኣቤሴሎሜይ ኣሚኖኔ ቦላ ኢታ ጊዲን ሎኦ ጊዲን ኢሲ ቃላካ ጶቂቤና፤ ጋሶይካ ኣሚኖኔይ ኢዛ ሚቾ ቲኢማሮ ካዉሺዳ ጊሻስ ኬሂ ኢጺዴስ።
2SA 13:23 ናምኡ ላይꬃፌ ጉዬ ኣቤሴሎሜይ ኤፍሬሜ ꬋሳ ማታን ዲዛ ባኣሊ-ሃጾሬ ካታማን ባ ዶርሳታ ኢስኬ ቃንጺሼ ሄን ካዎ ኣቱማ ናይቲ ቤታና ማላ ጼይጊዴስ።
2SA 13:24 ኣቤሴሎሜይ ካዎዛኮ ቢዲ፥ «ሄኮ ኔ ኣይሌይ ባ ዶርሳታ ኢስኬ ቃንጺሼ ዴስ፤ ሄሳ ጊሻስ ካዎዚኔ ኢዛ ሹሜቲ ኢስታስ ሎኦ ሼኔ ጊዲኮ ታስ ሄን ቤቴቶ» ጊ ሾቢዴስ።
2SA 13:25 ካዎዚካ፥ «ታ ናዞ! ኑ ኡባይ ባናስ ቤሴና፤ ኑ ኔስ ቶሆ ጊዳና» ጊዴስ። ኣቤሴሎሜይ ሚንꬂ ዎሲንካ ካዎዚ ባና ኮዪቤና፤ ጊዶ ኣቲን ኢዛ ኣንጂዲ ሞይዚ ዬዲዴስ።
2SA 13:26 ኣቤሴሎሜይ፥ «ሂስቲኮ ታ ኢሻ ኣሚኖኔይ ኑናራ ባና ማላ ኣዛዛ» ጊዴስ። ካዎዚ፥ «ኢዚ ኢንቴናራ ኣይስ ባኔ?» ጊ ኦይቺዴስ።
2SA 13:27 ጊዶ ኣቲን ኣቤሴሎሜይ ኢዛ ሚንꬂ ዎሲዳ ጊሻስ ዳዊቲ ኣሚኖኔይኔ ሃንኮ ኣቱማ ናይቲ ኡባይ ኢዛራ ኢሲፌ ባና ማላ ኦꬂዴስ።
2SA 13:28 ኣቤሴሎሜይ ባ ኣይሌታስ፥ «ኣሚኖኔይ ዎይኔ ኡሻ ኡዪዲ ማꬆታናሼ ጋካናስ ናጌቲቴ፤ ሄሳፌ ጉዬ ታኒ ኢንቴና፥ ‹ኣሚኖኔ ሾጪቴ› ጊዛ ዎዴ ኢንቴ ኢዛ ዎꬊቴ፤ ኢንቴና ኣዛዚዳይ ታና ጊዲዳ ጊሻስ ባቦፍቴ፥ ሚኒቴ፥ ጻሊቴ» ጊ ኣዛዚዴስ።
2SA 13:29 ኣቤሴሎሜ ኣይሌቲ ኢስታ ጎዳይ ኢስታ ኣዛዚዳይሳ ኣሚኖኔ ቦላ ፖሊዳ፤ ሄሳፌ ጉዬ ካዎዛ ናይቲ ኡባይ ባ ባቁሎ ባቁሎ ቶጊዲ ባቃቲዳ።
2SA 13:30 ኢስቲ ቡሮ ኦጌ ቦላ ዲሺን፥ «ኣቤሴሎሜይ ካዎዛ ናይታ ኡባ ዎꬊ ዉርሲዴስ፤ ኢሳዴይካ ኣቲቤና» ጊዛ ዎሬይ ዳዊቴኮ ጋኪዴስ።
2SA 13:31 ካዎዚ ዴንዲ ኤቂዲ ባ ማይኦ ዳኪዴስ፤ ቢታ ቦላ ጉፋኒዴስ፤ ኢዛ ማታን ኤቂ ዲዛ ኢዛ ኣይሌቲ ኡባይ ባንታ ማይኦ ዳኪዳ።
2SA 13:32 ጊዶ ኣቲን ዳዊቴ ኢሻ ሻሜኤ ና ኢዮናዳቤይ፥ «ካዎ ናይታ ኡባ ዎꬊ ዉርሲዳ ሚሳቲሲዲ ታ ጎዳይ ቆፖፎ፤ ኢዛ ሚቾ ቲኢማሮ ዎልቃንꬂ ኦይኪዳ ዎዴፔ ዶሚዲ ኣቤሴሎሜይ ጊጺ ዴንዲዳ ዮኦ ጊዲዳ ጊሻስ ኣሚኖኔይ ጻላ ሃይቂዴስ።
2SA 13:33 ሃይቂዳይ ኣሚኖኔ ጻላ ጊዲዳ ጊሻስ፥ ‹ካዎ ናይቲ ኡባይ ሃይቂዳ› ጌቴቲዳይሳ ካዎይ ታ ጎዳይ ኣማናናስ ቤሴና» ጊዴስ።
2SA 13:34 ኣቤሴሎሜይ ኤሶን ባቃቲዴስ። ዛቤ ናጊዛይሲ ꬎቁ ጊ ጼሊሺን ኢዛፔ ኣርሼይ ዉሊዛ ባጋራ ዲዛ ኦጌራ ዳሮ ኣሳቲ ዙማ ሚሌራ ዱጌ ዎꬊሺን ቤኢዴስ። ዛቤ ናጊዛይሲ ቢዲ ካዎዛስ፥ «ሆሮናዬ ባጋራ ዙምቡላታ ቲጻራ ኣሳይ ዱጌ ቢሺን ታ ቤኣይስ» ጊ ዮቲዴስ።
2SA 13:35 ኢዮናዳቤይ ዳዊቴስ፥ «ቤኣ ካዎ ናይቲ ዪዳ፤ ካሴ ኔ ኣይሌይ ጊዳይሳ ማላ ሃኒዴስ» ጊዴስ።
2SA 13:36 ኢዚ ቡሮ ዮቲ ዉርሶንታ ዲሺን ካዎዛ ናይቲ ዋሲሼኔ ዬኪሼ ጌሊዳ፤ ሄሳꬆካ ካዎዚኔ ኢዛ ኦሳንቻቲ ኡባይ ኬሂፔ ዬኪዳ።
2SA 13:37 ኣቤሴሎሜይ ጋንጊዲ ጌሹሬ ካዎ ኣሚሁዴ ና ታሊማዬኮ ቢዴስ፤ ጊዶ ኣቲን ዳዊቲ ሃይቂዳ ናዛ ጊሻስ ኡባ ዎዴ ዬኪሼ ጋምኢዴስ።
2SA 13:38 ኣቤሴሎሜይ ጋንጊዲ ጌሹሬ ቢዲ ሄን 3 ላይꬅ ኡቲዴስ።
2SA 13:39 ካዎ ዳዊቲ ባ ና ኣሚኖኔ ሃይቆን ጋኪዳ ካዮቴꬃፌ ሚኔቲዳፔ ጉዬ ኣቤሴሎሜኮ ባና ኢዛ ዎዚናይ ዴንዲዴስ።
2SA 14:1 ካዎ ዳዊቲ ኣቤሴሎሜ ላሞቲዳይሳ ጹሪያ ና ኢዮኣቤይ ኤሪዴስ።
2SA 14:2 ሄሳ ጊሻስ ኢዮኣቤይ ኢሲ ኣስ ቴቁሄ ኪቲዲ ኢሲ ዎዚናማ ማጫስ ኤሂሲዴስ፤ ኢዞ፥ «ኔኒ ካዮቲዛ ኣስ ሚሳታናስ ካዮ ማይኦ ማይኣ፤ ቂባቴ ቲዬቶፋ፤ ሃይቂዳ ኣሳስ ዳሮ ዎዴ ካዮታሼ ዲዛ ማጫስ ሚሳታ ቤታ።
2SA 14:3 ሄሳፌ ጉዬ ካዎዛኮ ባዳ ታ ኔስ ዮቲዛይሳ ኢዛስ ዮታ» ጊዲ ኢዛ ዮታና ቃላታ ኢዮኣቤይ ኢዚስ ዮቲዴስ።
2SA 14:4 ቴቁሄ ዴሬ ማጫሳያ ካዎዛኮ ጌላዱስ፤ ሲንꬃ ጉꬅ ጉፋናዳ ቦንቾ ሳሮካ ኢሚዳፔ ጉዬ፥ «ካዎንቶ ታና ማዲቴ!» ጋዱስ።
2SA 14:5 ካዎዚካ ኢዞ፥ «ኔና ኣዜ ሜቲዳይ?» ጊ ኦይቺዴስ። ኢዛካ ዛራዳ፥ «ታኒ ቱማፔ ኣዚናይ ሃይቂዳ ኣምኦ።
2SA 14:6 ታስ ኔ ኣይሌይስ ናምኡ ኣቱማ ናይቲ ዴቴስ፤ ናምኣቲ ባ ጋርሳን ኢሶይ ኢሳራ ዴምባን ኦዬቲዳ፤ ኢስታ ኣሼቺዛይ ባይንዳ ጊሻስ ኢሶይ ሃንኮይሳ ሾጪ ዎꬊዴስ።
2SA 14:7 ሂስቲን ዳቦቲ ኡባይ ኔ ኣይሌይ ቦላ ዴንዲዲ፥ ‹ባ ኢሻ ዎꬊዳይሳ ኑስ ሃ ኣꬃ ኢማ፤ ኢዚ ባ ኢሻ ዎꬊዳ ጊሻስ ኑኒካ ኢዛ ዎꬋና፤ ሄሳፌ ጉዬ ኔኒ ላታይ ባይንዳሮ ጊዳና› ጌቴስ፤ ሄሳ ጊሻስ ታስ ኣቲዳ ኢሲ ጾምፔዛ ꬋይሲዲ ታ ኣዚናዛ ቢታ ቦላ ሱንꬂ ባይንዳኔ ዛሬይ ባይንዳ ꬎንꬅ ኬሳና ሃኔቴስ» ጋዱስ።
2SA 14:8 ካዎዚካ ማጫሳዮ፥ «ኔኒ ሲማ ኔሶ ባ፤ ታ ኔ ኦይሻ ጊሻስ ቤሲዛ ኣዛዞ ኢማና» ጊዴስ።
2SA 14:9 ጊዶ ኣቲን ቴቁሄ ዴሬ ማጫሳያ፥ «ታ ጎዳ ካዎ! ቆሆዚ ታ ቦላኔ ታ ኣዋ ኬꬃን ጋኮ፤ ካዎይኔ ኢዛ ኣራታይ ቆሆፔ ጌዪዳይታ ጊዴቶ» ጋዱስ።
2SA 14:10 ካዎዚካ ኢዚስ፥ «ኦኒካ ኔ ቦላ ኢሲ ሚሽ ሃሳይዛ ጊዲኮ ሃ ታኮ ኤካ ያ፤ ዛሪ ኔና ዋዪሴና» ጊዴስ።
2SA 14:11 ኢዛ፥ «ሱꬅ ኣጪዛይቲ ታ ናዛ ዎꬊዲ ካሴፔ ኣꬊዛ ቆሆ ጋꬆንታ ማላ ካዎይ ጎዳ ባ ጾሳ ዎሶ» ጋዱስ። ካዎዚካ ኢዚስ፥ «ጎዳይ ቤኢን፥ ኔ ናዛ ሁኤ ኢስኬፌ ኢሲናካ ቦሼቱኩ» ጊ ጫቂዴስ።
2SA 14:12 ሄሳፌ ጉዬ ማጫሳያ፥ «ታ ኔ ኣይሌያ ታ ጎዳስ ካዎስ ኢሲ ቃላ ዮታና ማላ ኤሮ ጋርኪ!» ጋዱስ፤ ኢዚካ፥ «ኤሮ ዮታ» ጊዴስ።
2SA 14:13 ማጫሳያ ዛራዳ ኢዛስ፥ «ኔኒ ሃይሳ ማላ ዮኦ ጾሳ ዴራ ቦላ ኣዛስ ቆፓዲ? ካዎዚ ዴሬፔ ጎዴቲ ቤቴ ቢዳ ባ ናዛ ዛሪቤና፤ ሂስቲን ሄሳ ኢዚ ዮቲሼ ባርካ ባ ቦላ ፒርዲቤኔ?
2SA 14:14 ቢታን ጉኪዳ ሃꬂ ሲሞንታይሳꬆ ኑኒ ኡባይካ ሃይቆስ፤ ጾሲ ቢታፌ ጎዴቲዳ ኣሲ ኢዛ ሲንꬃፌ ባቃቲ ቢዳሶን ኣቶንታ ማላ ሲሚ ያና ኦጌ ኢዛስ ጊጊሴስ ኣቲን ኢዛ ሼምፖይ ꬋያና ማላ ኮዬና።
2SA 14:15 «ሃኢካ ታ ሃይሳ ዪዳይ ዴሬዚ ታና ባቢሲዳ ጊሻስ ሄሳ ታ ጎዳስ ካዎስ ዮታናሳ፤ ታ ኔ ኣይሌያ፥ ‹ታ ካዎዛስ ዮታና፤ ኢዚካ ታ ኦይቺዳይሳ ፖላናስ ዳንዳይዛ ጊዳና።
2SA 14:16 ጾሲ ኑስ ኢሚዳ ጺንጾፌ ታናኔ ታ ናዛ ሾዳናስ ዴንዲዳ ኣዴዛ ኩሼፔ ካዎዚ ባ ኦሳንቻዮ ኣሻናስ ኤኖ ጋና› ጋ ቆፓዲስ።
2SA 14:17 «ሃኢካ ታ ኔ ኣይሌያ፥ ‹ካዎይ ታ ጎዳዚ ሎኦ ኢታፔ ሻኪ ኤሮን ጾሳ ኪታንቻ ማላ ጊዲዳ ጊሻስ ታ ጎዳ ካዎዛ ቃላይ ታና ሚንꬄꬆ፤ ጎዳ ኔ ጾሳይ ኔናራ ጊዶ› ጋይስ» ጋዱስ።
2SA 14:18 ሄሳፌ ጉዬ ካዎዚ ማጫሳዮ፥ «ታኒካ ኔና ኦይቺዛ ኦይሻታስ ዛሮ ታፔ ቆቶፋ» ጊዴስ። ማጫሳያካ፥ «ኤሮ፥ ታ ጎዳይ ካዎይ ኦይቻ» ጋዱስ።
2SA 14:19 ካዎዚካ ዛሪዲ ኢዞ፥ «ሃ ኡባን ኢዮኣቤ ኩሼይ ዴኔ?» ጊ ኦይቺዴስ። ማጫሳያ ዛራዳ፥ «ታ ጎዳ ካዎዞ ኔ ኣሾ፤ ታ ጎዳ ካዎይ ሃሳይዳ ኡባፌ ሃዲርሲኔ ኡሻች ጊዛይ ዴና፤ ኤ ታ ሃይሳ ኡባ ሃሳያና ማላ ታና ኣዛዚዳይኔ ሃ ኡባ ቃላይ ኔ ኣይሌይ ዶናን ሃሳዬታና ማላ ታና ኪቲዳይ ኔ ኦሳንቻ ኢዮኣቤ።
2SA 14:20 ኔ ኦሳንቻ ኢዮኣቤይ ሃይሳ ኦꬂዳይ ዲዛ ሃኖታ ላማና ኮዪዳ ጊሻሳ፤ ጊዶ ኣቲን ታ ጎዳስ ጾሳ ኪታንቻታስ ዲዛ ኣꬎ ኤራቴꬂ ዲዛ ጊሻስ ቢታይ ቦላ ሃኒዛ ሚሽ ኡባ ኢዚ ኤሬስ» ጋዱስ።
2SA 14:21 ካዎዚካ ኢዮኣቤስ፥ «ኤሮ ሎኦ፤ ኤሮ፤ ባዳ ናቴꬃዛ ኣቤሴሎሜ ዛራ ኤካ ያ» ጊዴስ።
2SA 14:22 ኢዮኣቤይካ ቦንቾ ሳሮካ ካዎዛስ ቆንጪሳናስ ዱጌ ቢታ ቦላ ጉፋኒዲ ሳሮኪዴስ፤ ካዎዛ ኣንጂዴስ፤ ካሌꬂዲ ኢዮኣቤይ፥ «ካዎዚ ባ ኦሳንቻዛ ዎሳ ኤኪዳ ጊሻስ ኔ ኣይሌይ ኔ ሲንꬃን ቴማ ዴሚዳይሳ ሃች ኤሪዴስ» ጊዴስ።
2SA 14:23 ሄሳፌ ጉዬ ኢዮኣቤይ ጌሹሬ ቢዲ ኣቤሴሎሜ ዬሩሳላሜ ዛሪ ኤሂዴስ።
2SA 14:24 ካዎይ ጊዲኮ፥ «ባሶ ቦ፤ ኢዚ ታ ኣይፌሶ ቤኣናስ ዳንዳዬና» ጊዴስ፤ ሄሳ ጊሻስ ኣቤሴሎሜይ ባሶ ቢዴስ፤ ካዎዛ ኣይፌሶካ ቤኢቤና።
2SA 14:25 ኣቤሴሎሜ ማላ፥ ማላ ሎኦይ ኩሜꬃ ኢስራኤሌ ኣሳ ጋርሳንካ ዴና፤ ኢዛስ ሁኤ ቢናናፔ ቢዲ ቶሆ ጹጉንꬅ ጋካናስ ቦሬይ ዴና።
2SA 14:26 ሁኤ ኢስኬይ ኢዛ ዴጺሺን ላይꬃን ኢሲቶ ጫኪሴስ፤ ጫኬቲዳ ቢናናዚ ካዎ ኬꬃ ሜዛኔን ዎꬂሺን 200 ሳቂሌ ዴጼስ።
2SA 14:27 ኣቤሴሎሜስ ቲኢማሮ ጌቴቲዛ ኢሲ ማጫ ናይኔ ሄꬑ ኣቱማ ናይቲ ዬሌቲዳ። ማጫ ናያ ኬሃ ማላ ሎኦ።
2SA 14:28 ኣቤሴሎሜይ ካዎዛ ቤኦንታ ዬሩሳላሜን ናምኡ ላይꬅ ኡቲዴስ።
2SA 14:29 ሄሳፌ ጉዬ ኢዮኣቤይ ካዎዛኮ ባና ማላ ኣቤሴሎሜይ ጼይጊሲዴስ፤ ኢዮኣቤይ ጊዲኮ ኢዛኮ ያና ኮዪቤና፤ ናምኣንꬆካ ዛሪዲ ጼይጊሲዴስ፤ ኢዮኣቤይ ያና ኮዪቤና።
2SA 14:30 ሂስቲን ኣቤሴሎሜይ ባ ኣይሌታስ፥ «ቤኢቴ፤ ኢዮኣቤ ጋዴይ ታ ጋዴራ ꬋሳ፤ ኢዛ ጋዴን ማጻ ጋኪዳ ባንጋይ ዴስ፤ ቢዲ ኢዛን ታማ ዬዲቴ» ጊዴስ፤ ሄሳ ጊሻስ ኣቤሴሎሜ ኣይሌቲ ቢዲ ኢዮኣቤ ካꬃ ታማን ጹጊዳ።
2SA 14:31 ሄሳፌ ጉዬ ኢዮኣቤይ ኣቤሴሎሜሶ ቢዲ፥ «ኔ ኣይሌቲ ኣይስ ታ ካꬃ ታማን ጹጊዶ?» ጊ ኦይቺዴስ።
2SA 14:32 ኣቤሴሎሜይ ኢዮኣቤስ ዛሪዲ፥ «ታኒ ኪቲን ኔኒ ዮንታ ኢጺዳ ጊሻሳ፤ ሃኖ ጋካናስ ታ ሄን ዲዛኮ ታስ ሎኦ ጊዳና ጊዴስ ጋዳ ኔ ካዎስ ዮታና ማላ፥ ‹ታ ኔና ካዎዛኮ ዬዳና ኮያዳ ኔና ሃያ› ጋዳ ጼይጊሳዲስ፤ ሃኢ ጊዲኮ ታ ካዎዛ ኣይፌሶ ቤኣና ኮያይስ፤ ኣይ ሞሮይ ታ ቦላ ቤቲኮ ኢዚ ታና ዎꬎ» ጊዴስ።
2SA 14:33 ኢዮኣቤይ ካዎዛኮ ቢዲ ሄሳ ኢዛስ ዮቲዴስ፤ ሄሳፌ ጉዬ ካዎዚ ኣቤሴሎሜ ጼይጊሲዴስ፤ ኢዚካ ዪዲ ካዎዛ ሲንꬃን ጉፋኒዲ ሳሮኪዴስ፤ ካዎዚካ ኣቤሴሎሜ ዬሪ ኤኪዴስ።
2SA 15:1 ሄሳፌ ጉዬ ኣቤሴሎሜይ ፓራ-ጋሬኔ ፓራታ፥ ሄሳꬆካ ኢዛፔ ሲንꬃራ ዎጻናስ 50 ኣሳታ ባስ ጊግሲዴስ።
2SA 15:2 ኣቤሴሎሜይ ማላዶ ዎንታራ ዴንዲዲ ካታማ ፔንጌ ጌልꬂዛ ኦጌ ጋጻን ኤቂ ናጌስ። ኣይ ኣሲካ ባ ሚሻ ካዎስ ማጋኒዲ ፒርዲሳና ዪዛ ዎዴ ኡባን ኣቤሴሎሜይ ኢዛዴ ባኮ ጼይጊ ጼይጊዲ፥ «ኔ ኣዋ ካታማፔ ያዲ?» ጊ ኦይቼስ፤ ሄ ኦይሼቲዳ ኣዴዚካ፥ «ታ ኔ ኦሳንቻይ ኢስራኤሌ ቆሞታ ጋርሳፌ ኢሳፌ ያዲስ» ጊ ዛሬስ።
2SA 15:3 ሄሳፌ ጉዬ ኣቤሴሎሜይ ኢዛስ፥ «ቤኣ! ኔ ማጋናዚ ሊኬኔ ቤሲዛዛ፤ ጊዶ ኣቲን ካዎ ዎካሌታፔ ሃይሳ ጼላና ኣሲ ኔስ ዴና» ጌስ።
2SA 15:4 ካሌꬂዲካ፥ «ታኒ ሃኖ ቢታይ ቦላ ፒርዲዛ ዳና ጊዳ ሹሜቲዳኮ ኣዜ ዲዛይ? ማጋናይ ዎይኮ ሞቶይ ዲዛ ኣሲ ኡባይ ታኮ ዪዲ ሱሬ ፒርዳ ዴማና ማላ ታ ኦꬃናኮሺን» ጌስ።
2SA 15:5 ሄሳꬆካ ኣይ ኣሲካ ኢዛኮ ሺቂዲ ሳሮኪዛ ዎዴ ኣቤሴሎሜይ ባ ኩሼን ኢዲሚ ኦይኪዲ ዬሬስ።
2SA 15:6 ካዎዛኮ ሱሬ ፒርዳ ዴማናስ ዪዛ ኢስራኤሌ ኣሳ ኡባኮ ኣቤሴሎሜይ ሄሳꬆ ሃኒ ሃኒ ሺቂዛ ጊሻስ ኢስራኤሌ ኣሳ ዎዚና ኤኪዴስ።
2SA 15:7 ኦይዱ ላይꬃፌ ጉዬ ኣቤሴሎሜይ ካዎዛ፥ «ታኒ ኣዲኔቲዳ ኣዲና ጋꬃናስ ኬብሮኔ ባናስ ታስ ፒቃዴ ኢማ።
2SA 15:8 ታኒ ኔ ኦሳንቻይ ኣራሜ ዴሬን ጌሹሬን ዳሼ፥ ‹ጎዳይ ታና ዬሩሳላሜ ዛሪዛ ጊዲኮ ጎዳስ ኬብሮኔን ጎይናና› ጋ ኣዲኔታዲስ» ጊዴስ።
2SA 15:9 ካዎዚ ኢዛ፥ «ሳሮን ባ» ጊዴስ፤ ሄሳ ጊሻስ ኣቤሴሎሜይ ኬብሮኔ ቢዴስ።
2SA 15:10 ሄሳፌ ጉዬ ኣቤሴሎሜይ፥ «ኢንቴ ዛዬ ጊሪስ ሲዪዛ ዎዴ፥ ‹ኣቤሴሎሜይ ኬብሮኔን ካዎቲዴስ› ጊቴ ጋና ኦሳንቻታ ኩሜꬃ ኢስራኤሌ ቆሞታ ኡባ ጊዶን ቆታራ ዎꬂዴስ» ጊዴስ።
2SA 15:11 ዬሩሳላሜፔ 200 ኣሳቲ ኢዛራ ኢሲፌ ቢዳ፤ ኢስቲ ኢማꬃቴꬅ ጼይጌቲዲ ኣሽኬቴꬃን ቢዳ ኣቲን ኢስቲ ዮኦዛ ጊሻስ ኣይኮካ ኤሪዛ ሚሺ ዴና።
2SA 15:12 ኣቤሴሎሜይ ያርሾዛ ሺሺዛ ዎዴ ዳዊቴ ዞሪዛ ጊሎ ዴሬ ኣስ ኣክጾፌሌ ባ ቢታ ጊሎፔ ኢዛኮ ያና ማላ ኪቲዴስ፤ ሄሳ ጊሻስ ሴራዚ ሚኒዴስ፤ ኣቤሴሎሜ ካሊዛይታ ቆዳይ ጉጄቲ ጉጄቲ ቢዴስ።
2SA 15:13 ኪቴቲዛይሲ ዪዲ፥ «ኢስራኤሌ ኣሳ ዎዚናይ ኣቤሴሎሜራ ዴስ» ጊዲ ዳዊቴስ ዮቲዴስ።
2SA 15:14 ሄሳፌ ጉዬ ዳዊቲ ባ ሹሜ ኡባታስ፥ «ዴንዲቴ፤ ኣኔ ባቃቶስ፤ ኑ ሂስቶንታ ኣጊኮ ኑፔ ኢሳዴይካ ኣቤሴሎሜ ኩሼፔ ኬሲ ኤኪ ኣቴና፤ ሃኢራ ኑ ሃይሳፌ ኬዛና ቤሴስ፤ ኑ ሂስቶንታ ኣጊኮ ካሌቲ ዪዲ ኑና ኦይኪኮ ኢዚ ኑና ꬋይሳና፤ ካታማዮካ ማሻን ሲፋና» ጊዴስ።
2SA 15:15 ካዎዛ ሹሜቲካ፥ «ኑ ካዎይ ኮዪዳይሳ ኡባ ኦꬃናስ ኑኒ ኔ ኦሳንቻቲ ጊጌቲ ኡቲዶስ» ጊ ዛሪዳ።
2SA 15:16 ካዎዚ ባሶ ኣሳ ኩሜꬃራ ኬዚ ቢዴስ፤ ካዎቴꬃ ኬꬃ ናጋና ማላ 10 ላጌꬆታ ዎꬂዴስ።
2SA 15:17 ሄሳ ጊሻስ ካዎይ ኩሜꬃ ኣሳራ ሃኪ ቢዳፔ ጉዬ ሄን ኢሲሶን ኤቂዳ።
2SA 15:18 ኣሳይ ኡባይ ኬሊቴቲኔ ፔሊቴቲ ሄሳꬆካ ጌቴፔ ኢዛራ ዪዳ 600 ኣሳታ ጉጂን ሳልፊዲ ካዎዛ ሲንꬅ ኣꬊዳ።
2SA 15:19 ካዎዚ ጌቴ ዴሬ ኣስ ኢታዬይ፥ «ኔ ኑናራ ኣይስ ያዲ? ሲማዳ ካዎ ኣቤሴሎሜራ ኢሲፌ ኡታ፤ ኔኒ ኔ ሁኤስ ኔ ቢታፌ ዲኤታ ዪዳ ኢማꬃ።
2SA 15:20 ኔኒ ሃኢ ዚኔ ያዳሳ፤ ሂስቲን ታ ታስ ኣዋ ቢዛኮ ኤሮንታ ዳሼ ኔ ኑናራ ቶይላታና ማላ ኣይስ ኦꬆ? ኣኔ ሃኢ ኔኒ ኔ ኣሳታ ኤካዳ ጉዬ ሲማ፤ ሎኤቴꬂኔ ኣማኔቴꬃይ ኔናራ ጊዶ» ጊዴስ።
2SA 15:21 ጊዶ ኣቲን ኢታዬይ፥ «ዴኦ ጎዳይ ቤኢን፥ ሄሳꬆካ ታ ጎዳ ካዎ ኣሾ፤ ዴኦ ጊዲን ሃይቆ ጊዲን ኣዋንካ ታ ጎዳ ካዎይ ሃኒዛይሳ ታኒ ኔ ኣይሌዚ ሃናና» ጊ ዛሪዴስ።
2SA 15:22 ዳዊቲካ ኢታዬ፥ «ሂስቲኮ ሲንꬅ ኣꬋ ባ» ጊዴስ፤ ሄሳ ጊሻስ ጌቴ ዴሬ ኣስ ኢታዬይ ባ ኣሳታኔ ባናራ ዲዛ ባሶ ኣሳታ ኤኪ ቢዴስ።
2SA 15:23 ዴሬይ ኡባይ ኣꬊ ቢዛ ዎዴ ሄ ዴሬ ኣሳይ ዋሲሼ ዬኪዴስ፤ ካዎዚ ቄዲሮኔ ዙሌዛ ፒኒዴስ፤ ኣሳይ ኡባይ ፒኒዲ ባዞ ቢታ ቢዴስ።
2SA 15:24 ሳዶቄይካ ሄን ዴስ፤ ኢዛራ ኢሲፌ ዲዛ ሌዌቲ ኡባይ ጾሳ ጫቆ ቃላ ታቦታ ቶኪዳ፤ ኢስቲካ ዛሪዲ ጾሳ ጫቆ ቃላ ታቦታዛ ዎꬂዳ፤ ኣቢያታሬይ ኣሳይ ኩሜꬅ ካታማዮ ዬዲ ኬዛናሼ ጋካናስ ያርሾ ሺሺዴስ።
2SA 15:25 ሄሳፌ ጉዬ ካዎዚ ሳዶቄ፥ «ኔኒ ጾሳ ጫቆ ቃላ ታቦታዛ ኤካዳ ጉዬ ካታማዮ ሲማ። ታኒ ጎዳ ሲንꬃን ኣዮቲዳ ጊዲኮ ኢዚ ታና ዛሪዲ ታቦታዛኔ ኢዛ ኣቆሶዛ ታ ቤኣና ማላ ጋꬃና።
2SA 15:26 ጊዶ ኣቲን ኢዚ፥ ‹ታ ኔናን ኡፋዬታቤኬ› ጊዛ ጊዲኮ ባስ ሎኦ ሚሳቲ ቤቲዳይሳ ታ ቦላ ኦꬆ፤ ታኒ ኤካናስ ጊጌታ ኡታዲስ» ጊዴስ።
2SA 15:27 ቃሴካ ካዎዚ ቄሴ ሳዶቄ፥ «ኔኒ ናቤ ጊዲኪ? ሂስቲኮ ኔኒ ኔ ና ኣኪማሴኔ ኣቢያታሬ ና ዮናታኔ ኔናራ ኤካዳ ሳሮን ጉዬ ካታማዮ ሲማ፤ ኔኒኔ ኣቢያታሬይ ናምኣቲ ኢንቴ ናይታ ኤኪዲ ቢቴ።
2SA 15:28 ታኒካ ኔፔ ዎሬ ሲያና ጋካናስ ባዞን ዲዛ ሻፋ ፒኒዛሶን ናጋና» ጊዴስ።
2SA 15:29 ሄሳ ጊሻስ ሳዶቄይኔ ኣቢያታሬይ ጾሳ ጫቆ ቃላ ታቦታ ጉዬ ዬሩሳላሜ ዛሪዲ ሄን ታኪዳ።
2SA 15:30 ጊዶ ኣቲን ዳዊቲ ዬኪሼ ፑዴ ዳብራዛይቴ ዙማ ፑዱንꬃ ኬዚዴስ፤ ባ ሁኤ ጉሉንቲዲ ሜላ ቶሆራ ዴስ፤ ኢዛራ ኢሲፌ ዲዛ ኣሳይ ኡባይ ኢዛይሳꬆ ባንታ ሁኤ ጉሉንቲዲ ዬኪሼ ፑዱንꬃ ኬዜቴስ።
2SA 15:31 ሄ ዎዴ፥ «ሴራ ጊዶን ኣቤሴሎሜራ ዲዛይ ኣክጾፌሌ» ጊ ዳዊቴስ ዮቲዳ፤ ሄሳ ጊሻስ ዳዊቲ፥ «ኣቤት ጎዳዉ! ኣክጾፌሌ ዞሬዛ ሃዳ ሂስታርኪ» ጊ ዎሲዴስ።
2SA 15:32 ዳዊቲ ዴሬይ ጾሳ ጎይኒዛሶሆ ፑዴ ዙማ ካራ ጋኪሺን ኣርኬ ዴሬ ኣስ ሁሼይ ባ ማይኦ ዳኪዲ ባ ሁኤ ቦላ ጉዱላ ላሊዲ ኢዛራ ጋይታናስ ዪዴስ።
2SA 15:33 ሄሳፌ ጉዬ ዳዊቲ ኢዛ፥ «ኔኒ ታናራ ኢሲፌ ቢኮ ታስ ቶሆ ጊዳና፤
2SA 15:34 ጊዶ ኣቲን ኔኒ ጉዬ ካታማዮ ሲማዳ ኣቤሴሎሜስ፥ ‹ታ ኔ ኣይሌ ጊዳና፤ ካሴ ታኒ ኔ ኣዋስ ኣይሌ ጊዲዳ ማላ ሃቺካ ታ ኔስ ሃጋዛና› ጋዳ ኣክጾፌሌ ዞሬ ኔ ላላዳ ታና ማዳና።
2SA 15:35 ቄሴቲ ሳዶቄይኔ ኣቢያታሬይ ሄን ኔናራ ዳና ዴቴኔ? ካዎ ኬꬃፌ ኔ ሲዪዳይሳ ኡባ ኢስታስ ዮታ።
2SA 15:36 ሳዶቄ ና ኣኪማሲኔ ኣቢያታሬ ና ዮናታኔይ ናምኡ ኣቱማ ናይቲ ሄን ኢስታራ ዴቴስ። ኔ ሲዪዛ ኡባ ታስ ኢስታ ቦላ ኪታ ዬዳ» ጊዴስ።
2SA 15:37 ሄሳ ጊሻስ ዳዊቴስ ሲቆ ላጌ ሁሼይ ኣቤሴሎሜይ ዬሩሳላሜ ጌሊዳ ማላ ሄ ጋኪዴስ።
2SA 16:1 ዳዊቲ ዙማፔ ጉꬅ ኣꬊ ቢዳ ማላ ጺባ ጌቴቲዛ ሜምፌቦስቴ ኦሳንቻይ 200 ሶሎ፥ ዛቢቤፔ ኡኬቲዳ ቄሪ ኡኬꬅ ጼታታ፥ ባላሴፔ ኡኬቲዳ 100 ቄሪ ኡኬꬂኔ ኢሲ ሉካሞ ኩሜꬅ ዎይኔ ኡሺ ጫኔቲዳ ናምኡ ሃሬታ ላጊ ኤኪዲ ኢዛራ ጋይታና ዪዴስ።
2SA 16:2 ዳዊቲ ጺባ፥ «ሃይሳ ኡባ ኣዛስ ኤሃዲ?» ጊ ኦይቺዴስ። ጺባይካ፥ «ሃሬታ ካዎ ኬꬃ ኣሳቲ ቶጋና ማላ፥ ሶሎዛኔ ኡኬꬃታ ናቴꬃቲ ማና ማላ፥ ዎይኔ ኡሻዛ ባዞን ዳቡሪዳ ኣሳይ ኡያና ማላ ኤሃዲስ» ጊዴስ።
2SA 16:3 ሄሳፌ ጉዬ ካዎዚ፥ «ኔ ጎዳ ናዚ ኣዋኔ?» ጊ ኦይቺዴስ። ጺባይ ዛሪዲ፥ «ኢዚ፥ ‹ኢስራኤሌ ኣሳይ ሃች ታ ኣዋ ካዎቴꬅ ታስ ዛራና› ጊ ቆፒዳ ጊሻስ ሃኢ ዬሩሳላሜን ኡቲዴስ» ጊዴስ።
2SA 16:4 ሄሳፌ ጉዬ ካዎዚ ጺባስ፥ «ካሴ ሜምፌቦስቴስ ዲዛይ ኡባይ ሃይሳፌ ጉዬ ኔሳ» ጊዴስ፤ ጺባይ፥ «ዳሮ ኣሽኬቴꬃን ሲንꬃ ጉꬅ ጉፋናዳ ታ ኔስ ኩሼ ዴንꬃና፤ ካዎ ታ ጎዳዉ ኔ ሲንꬃን ታስ ኣዮቴꬂ ቤቶ» ጊዴስ።
2SA 16:5 ካዎ ዳዊቲ ባሂሪሜ ጋኪሺን ሳኦሌ ኬꬃ ኣሳ ቆሞፌ ኢሳዴይ ፑቱ ጊዴስ፤ ኢዚካ ጌራ ና ሺምኤ፤ ኢዚ ዶቂሼ ኬዚዴስ።
2SA 16:6 ካዎዛ ዎታዳራቲኔ ካዎ ቦንቾ ናጊዛ ዛቤቲ ኡባይ ዳዊቴፔ ሃዲርሳ ባጋራኔ ኡሻቻ ባጋራ ዲሺንካ ዳዊቴ ቦላኔ ኢዛ ሹሜታ ቦላ ሹች ጫዲዴስ።
2SA 16:7 ሺምኤይ ኢዛ ዶቂሼ፥ «ኬዛ! ሃይሳፌ ኬዛ! ሃይሶ ሼምፖ ዎꬊዳይሶ! ሃይሶ ኢታዞ!
2SA 16:8 ኢዛፔ ኔ ካዎቴꬃ ዎꬃ ኤኪዳ ሳኦሌ ኬꬃ ኣሳ ኡባ ሱꬃ ጎዳይ ኔ ቦላ ዛሪሼ ዴስ። ጎዳይ ኔ ካዎቴꬃ ኔ ና ኣቤሴሎሜስ ኣꬂ ኢሚዴስ፤ ኔኒ ሼምፖ ዎꬊዳ ኣስ ጊዲዳ ጊሻስ ቤያ ኔ ቦላ ሜቶይ ዪዴስ» ጊዴስ።
2SA 16:9 ሄሳፌ ጉዬ ጹሪያ ና ኣቢሳዬይ ካዎዛስ፥ «ሃይሲ ሃይቄꬃ ካናይ፥ ካዎዛ ታ ጎዳ ዎስቲ ዶቂዜ? ታ ፒና ባዳ ኢዛ ቆꬌ ቃንጻና» ጊዴስ።
2SA 16:10 ጊዶ ኣቲን ካዎዚ፥ «ኢንቴኖ ጹሪያ ናይቶ! ኢንቴና ታናራ ጋꬂዛ ኣይ ሚሽ ዲዜ? ጎዳይ፥ ‹ዳዊቴ ዶቃ› ጊን ኢዚ ታና ዶቂዛ ጊዲኮ፥ ‹ሃይሳ ኣይስ ኦꬃዲ?› ጊዲ ኢዛ ኦይቻና ዳንዳይዛይ ኦኔ?» ጊዴስ።
2SA 16:11 ሄሳፌ ጉዬ ዳዊቲ ኣቢሳዬኔ ባ ሹሜታ ኡባ፥ «ታ ጉልባቴፔ ኬዚዳ ታ ናዚ ታና ꬋይሳና ኮይኮ፥ ሃይሳ ቢኒያሜ ቆሞዛ ጊሻስ ኣይስ ማላሌቴቲ? ሄሳ ጊሻስ ኣጋጊቴ! ጎዳይ ኢዛ ዶቃ ጊዲ ዬዲዳ ጊዲኮ ዶቆ።
2SA 16:12 ጎዳይ ታ ካዉሻቴꬃ ቤኢዲ ሃቻ ዶቄꬃ ጊሻስ ኢዚ ታስ ሎኦ ኦꬃናኮ ኦኔ ኤሪዛይ» ጊዴስ።
2SA 16:13 ሄሳ ጊሻስ ዳዊቲኔ ኢዛራ ዲዛ ኣሳይ ባ ኦጌ ሲንꬅ ጉጂዴስ፤ ሺምኤይ ኢዛ ጊናራ ዲዛ ላዳራ ቢሼ ዶቄስ፥ ሹች ጫዴሲኔ ቢታ ኢዛ ቦላ ላሌስ።
2SA 16:14 ካዎዚኔ ኢዛራ ኢሲፌ ዲዛ ኣሳቲ ኡባይ ባንቲ ባና ጊ ቆፒዳሶ ጋኪዳ፤ ኬሂ ዳቡሪዳ ጊሻስ ሄን ሼምፒዳ።
2SA 16:15 ሄ ዎዴ ኣቤሴሎሜይኔ ኢስራኤሌ ኣሳይ ኡባይ ዬሩሳላሜ ዪዳ፤ ኣክጾፌሌይ ኢዛራ ኢሲፌ ዴስ።
2SA 16:16 ዳዊቴ ላጌ ኣርኬ ዴሬ ኣስ ሁሼይ ኣቤሴሎሜኮ ዪዲ፥ «ካዎ! ሜርናስ ካዎታ! ካዎ! ሜርናስ ካዎታ!» ጊዴስ።
2SA 16:17 ኣቤሴሎሜይ ሁሼስ፥ «ኔ ላጌዛስ ዲዛ ኣማኔቴꬃይ ኔስ ሃኖ ጻላ? ኔ ኣይስ ኔ ላጌዛራ ባቤኪ?» ጊ ኦይቺዴስ።
2SA 16:18 ሁሼይ ኣቤሴሎሜስ ዛሪዲ፥ «ሄሳ ታ ዎስታ ኦꬃኔ? ታኒ ጎዳን፥ ሃ ዴሬዛኒኔ ኢስራኤሌ ኣሳ ኡባን ዶሬቲዳዴ ባጋ ጊዳና፤ ኢዛዴራ ኢሲፌ ዳና።
2SA 16:19 ሂስቲን ታ ኢዛ ናዛስ ሃጋዞንታ ኦናስ ሃጋዞ? ኔ ኣዋስ ታ ሃጋዚዳ ማላ ኔስካ ሃጋዛና» ጊዴስ።
2SA 16:20 ኣቤሴሎሜይ ኣክጾፌሌ፥ «ኣኔ ኑስ ዞሬ ኢማ፤ ኑ ኣይ ኦꬂኖ?» ጊዴስ።
2SA 16:21 ኣክጾፌሌይ ኢዛስ ዛሪዲ፥ «ካዎ ኬꬃ ናጋና ማላ ኔ ኣዋይ ኣጊ ቢዳ ኢዛ ላጌꬆታራ ጌላ ዚንኣ፤ ሄሳፌ ጉዬ ኔኒ ኔ ኣዋ ኬሃ ኢጺዳይሳ ኩሜꬃ ኢስራኤሌይ ሲዪኮ ኔናራ ዲዛ ኡባታ ቄሴይ ሚናና» ጊዴስ።
2SA 16:22 ሄሳ ጊሻስ ኣቤሴሎሜስ ፖቄ ቦላ ዱንካኔ ቶሊዳ፤ ሄን ኩሜꬃ ኢስራኤሌ ዴሬይ ቤኢሺን ባ ኣዋ ላጌꬆታራ ዚንኢዴስ።
2SA 16:23 ሄ ዎዴ ኣክጾፌሌይ ኢሚዛ ዞሬይ ኡባይ ጾሳ ቃላይ ዞሪዛይሳ ሚሳቲ ቆዴቴስ፤ ዳዊቲኔ ኣቤሴሎሜይ ኣክጾፌሌ ዞሬ ሄሳꬆ ሂስቲ ኤኬቴስ።
2SA 17:1 ሄሳፌ ጉዬ ኣክጾፌሌይ ኣቤሴሎሜስ፥ «ኔ ኣዋ ዬዴꬃናስ 12,000 ኣስ ታ ዶራዳ ሃች ኦማርስ ዬዳና።
2SA 17:2 ኢዚ ዳቡሪዲ ዎልቃ ኢጼቲዳ ዎዴ ታ ኢዛ ቦላ ዳፋ ዬጋናኔ ሺሮ ዬዳና፤ ሂስቲኮ ኢዛራ ኢሲፌ ዲዛ ዴሬይ ኢዛ ኣጊዲ ባቃታና፤ ታኒ ካዎዛ ጻላ ዎꬋና።
2SA 17:3 ዴራ ኡባ ኔኮ ዛራና፤ ኔኒ ኮይዛይ ኢሲ ኣሳ ሃይቆ ጋሶን ኡባ ዴራ ኔኮ ዛራና ማላ ኦꬃና፤ ሄሳፌ ጉዬ ዴሬይ ሳሮን ዳና» ጊዴስ።
2SA 17:4 ኢዛ ዞሬዚ ኣቤሴሎሜኔ ኢዛራ ዲዛ ኢስራኤሌ ጪማታ ኡባ ኡፋይሲዴስ።
2SA 17:5 ኣቤሴሎሜይ ጊዲኮ፥ «ቃሴ ኣኔ ኣርኬ ዴሬ ኣስ ሁሼ ጼይጊዲ ኢዚ ጊዛይሳካ ሲዮስ» ጊዴስ።
2SA 17:6 ሁሼይ ኢዛኮ ዪን ኣቤሴሎሜይ ኢዛስ፥ «ኣክጾፌሌይ ኑስ ሃይሳ ሃ ዞሬዛ ሺሺዴስ፤ ሂስቲን ኑኒ ኢዛ ኦꬂኖ? ኣካይ ጊኮ ኣኔ ኔ ቆፋ ኑስ ዮታ» ጊዴስ።
2SA 17:7 ሁሼይካ ኣቤሴሎሜ፥ «ኣክጾፌሌይ ኔስ ኢሚዳ ዞሬይ ሃኒ ዎዴ ኔና ኬሲ ኤኬና።
2SA 17:8 ኔ ኣዋይኔ ኢዛ ኦላንቻቲ ሚኖ ኦላንቻታኔ ማራቲ ኢዚፔ ቦንቄቲቺዳ ዛርዶ ማላ ኢስቲ ባቢሲዛይሳ ኔካ ኤራሳ፤ ሄሳፌ ቦላራካ ኔ ኣዋይ ኦላን ኬሂ ሎሂዳ ኣሳ፤ ኦማርስ ባ ኦላንቻታራ ኣቄና፤
2SA 17:9 ሃኒ ዎዴ ኢዚ ኢሲ ጎንጎሎ ጊዶን ዎይኮ ሃራሶን ቆቴቲ ኡቲዳ ጊዳና። ኢዚ ሲንꬃቲዲ ኣሳ ቦላ ዳፋ ዬጊን ኔ ኣሳታፔ ጉꬃቲ ሃይቂኮ ሄሳ ሲዪዳ ኡባይ፥ ‹ኣቤሴሎሜ ካሊዳ ኦላንቻቲ ዉሪዳ› ጊ ሃሳያና።
2SA 17:10 ኔ ኣዋይ ሚኖ ኦላንቻ፥ ኢዛራ ኢሲፌ ዲዛይቲካ ኦላ ቃራታ ጊዲዳይሳ ኢስራኤሌ ኣሳይ ኡባይ ኤሪዛ ጊሻስ ዎዚናይ ጋሞ ዎዚና ማላ ሙርታ ጌቴቲዳ ዎታዳራይካ ባቦን ባቂባቃና።
2SA 17:11 «ሄሳ ጊሻስ ታ ኔና ዞሪዛ ዞሬይ ሃይሳ፤ ኢዛስ ቆዳይ ኣባ ሻሚንታ ማላ ዳሪዳ ዳኔፔ ቢዲ ቤርሳቤሄ ጋካናስ ዲዛ ኢስራኤሌ ኣሳይ ኡባይ ኔኮ ሺቂኮ ኔኒ ኔ ሁኤራ ኦላ ካሌꬃ።
2SA 17:12 ሂስቲኮ ኢዚ ጌሊዳሶ ኡባ ጌሊዲ ኢዛ ቦላ ዳፋ ዬጋና፤ ጻዛይ ቢታ ቦላ ዎꬊዛ ማላ ኑ ኢዛ ቦላ ዎꬋና፤ ኢዛ ጊዲን ኢዛራ ዲዛ ኣሳታፔ ኢሳዴይካ ኬሲ ኤኪ ኣቴና።
2SA 17:13 ኢዚ ቢዲ ኢሲ ካታማይን ጌሊኮ ኢስራኤሌይ ኡባይ ዎዶሮ ኤኪ ቢዲ ኢሲ ሹቺካ ሄን ኣቶንታሼ ጋካናስ ካታማዮ ዱጌ ላሊ ዬጋና» ጊዴስ።
2SA 17:14 ኣቤሴሎሜይኔ ኢስራኤሌ ኣሳይ ኩሜꬅ፥ «ኣክጾፌሌ ዞሬፔ ኣርኬ ዴሬ ኣስ ሁሼ ዞሬይ ሎኤስ» ጊዳ፤ ጎዳይ ኣቤሴሎሜ ቦላ ባሽ ኤሃናስ ሎኦ ጊዲዳ ኣክጾፌሌ ዞሬይ ኤኬቶንታ ማላ ኦꬂዴስ።
2SA 17:15 ሁሼይ ቄሴ ሳዶቄኔ ኣቢያታሬ፥ «ኣክጾፌሌይ ኣቤሴሎሜይኔ ኢስራኤሌ ጪማቲ ኣይ ኣይ ኦꬃናስ ቤሲዛኮ ኢስታ ዞሪዴስ፤ ታኒ ጊዲኮ ሃይሳ ሃይሳ ኦꬂቴ ጋ ዞራዲስ።
2SA 17:16 ሃኢ ኢዛስ ኤሶን ኪቲዲ፥ ‹ባዞን ዲዛ ሻፋ ፑርዴን ኣቆንታ ማላ፥ ጋምኦንታ ኔ ኤሶን ፒናናስ ቤሴስ፤ ኔ ሂስቶንታ ኣጊኮ ካዎዚኔ ኢዛራ ዲዛ ዴሬይ ኡባይ ኢንቴ ሚቴታና› ጊዲ ዳዊቴስ ዮቲቴ» ጊዴስ።
2SA 17:17 ሄ ዎዴ ዮናታኔይኔ ኣኪማሲ ካታማ ጌሊኮ ኢስቲ ቤታና ኤን-ሮጌሌን ናጌቴስ፤ ኢሲ ጌላኦ ኣይሌ ዳራ ሄ ባዳ ኢስታስ ዮቲን ኢስቲ ሄሳ ኤፊዲ ካዎ ዳዊቴስ ዮቴቴስ።
2SA 17:18 ጊዶ ኣቲን ኢሲ ናቴꬅ ዳይሲ ኢስታ ቤኢዲ ኣቤሴሎሜስ ዮቲዴስ፤ ሄሳ ጊሻስ ናምኣቲካ ኤሶን ዴንዲዲ ባሂሪሜን ዲዛ ኢሲ ኣዴዛሶ ቢዳ፤ ኣዴዛ ጊቤ ጊዶን ኦላይ ዲዛ ጊሻስ ኢስቲ ሄ ኦላን ዎꬊዳ።
2SA 17:19 ሄ ኣዴዛ ማቼያ ሚጪዛ ሚሽ ኤሃዳ ኢዛ ቦላ ካꬅ ሚጫዱስ፤ ሄሳ ኦኒካ ኤሪቤና።
2SA 17:20 ኣቤሴሎሜ ኣሳቲ ሄ ማጫሳይኮ ዪዲ፥ «ኣኪማሲኔ ዮናታኔይ ኣዋን ዲዞ?» ጊ ኦይቺዳ። ማጫሳያ ኢስታስ፥ «ሻፋ ፒኒ ቢዳ» ጋዱስ፤ ኢስቲካ ኮዪን ꬋይዳ ጊሻስ ጉዬ ዬሩሳላሜ ሲሚዳ።
2SA 17:21 ኣሳቲ ቢዳፔ ጉዬ ሃ ናምኣቲ ኦላፌ ኬዚዲ ቢዳ፤ ካዎ ዳዊቴስ፥ «ኣክጾፌሌይ ኔ ቦላ ሂዝጊ ሂዝጊ ኣሳ ዴንꬄꬂዛ ጊሻስ ዴንዳዳ ኤሶን ጌዴ ሻፋ ፒና» ጊዳ።
2SA 17:22 ሄሳ ጊሻስ ዳዊቲኔ ኢዛራ ኢሲፌ ዲዛ ዴሬይ ኡባይ ዴንዲ ዮርዳኖሴ ፒኒዳ፤ ጋዴይ ዎንቲሺን ዮርዳኖሴ ፒኖንታይ ኦኒካ ዴና።
2SA 17:23 ኣክጾፌሌይ ኢስቲ ኢዛ ዞሬዛ ኤኮንታ ኢጺዳይሳ ቤኢዲ ባ ሃሬዛ ጫኒ ኤኪዲ ባ ኬꬂ ዲዛ ካታማ ቢዴስ፤ ባሶ ማራሲ ጊግሲዳፔ ጉዬ ባ ኩሼን ጩሌቲ ሃይቂዴስ፤ ሄሳꬆ ሃይቂዲ ባ ኣዋ ዱፎን ሞጌቲዴስ።
2SA 17:24 ኣቤሴሎሜይ ኩሜꬃ ኢስራኤሌ ኣሳራ ዮርዳኖሴ ፒኒሺን ዳዊቲ ማሃናይሜ ጋኪዴስ።
2SA 17:25 ኣቤሴሎሜይ ኢዮኣቤ ሶሆን ኣማሳ ኦላንቻታ ሃላቃ ሂስቲ ሹሚዴስ፤ ኣማሲ ኢስራኤሌ ዴሬ ኣስ ዮቶሬ ና፤ ዮቶሬይ ኢዮኣቤ ኣዮ፥ ጹሪያ ሚቾ፥ ናኦሴ ቢዮ ኣቢጋሎ ማቾ ኤኪዴስ።
2SA 17:26 ኢስራኤሌቲኔ ኣቤሴሎሜይ ጋላኣዴን ዱንካኒዳ።
2SA 17:27 ዳዊቲ ማሃናይሜ ጋኪሺን ኣሞኔ ካታማ ኤራባፔ ዪዳ ናኦሴ ና ሾቤይ፥ ሎዲባሬፔ ዪዳ ኣምኤሌ ና ማኪሬኔ ኤሮጊሊሜፔ ዪዳ ጋላኣዴ ዴሬ ኣስ ባርዚሌይ፥
2SA 17:28 ሂጻ ሚንጻፌታ፥ ሼልኤታኔ ማና ሚሻታ ኤኪ ዪዳ፤ ሄሳꬆካ ጊስቴኔ ባንጋ፥ ꬊሌኔ ቲያ ጫጫ፤ ባኤላኔ ሚሲራ፥
2SA 17:29 ኤስ፥ ሜቃ ማꬅ፥ ዶርሳታኔ ፒላ ዳዊቴሲኔ ዴራስ ኢስቲ ማና ማላ ኤሂዳ። ኢስቲ ሄሳ ኦꬂዳይ፥ «ዴሬዚ ባዞ ቢታን ኮሻቲዴስ፤ ዳቡርዴስ፤ ሳሜቲዴስ» ጊዳ ጊሻሳ።
2SA 18:1 ዳዊቲ ባናራ ዲዛ ዴራ ቆዲዴስ፤ ኢስታ ቦላ ሻላቃታኔ ማቶ ሃላቃታ ሹሚዴስ።
2SA 18:2 ሄሳፌ ጉዬ ዳዊቲ ጪጎ ጊዲዛ ባ ኦላንቻታ ኢዮኣቤ፥ ናምኣንꬆ ጪጎዛ ኢዮኣቤ ኢሻ ጹሪያ ና ኣቢሳዬ፥ ሄꬓንꬆ ጪጎዛ ጌቴ ዴሬ ኣስ ኢታዬ ኣዛዞን ኣቃና ማላ ኪቲዴስ። ካዎዚ ባ ኦላንቻታስ፥ «ቱማፔ ታኒካ ኢንቴናራ ኬዛና» ጊዴስ።
2SA 18:3 ኣሳቲ ጊዲኮ ኢዛ፥ «ኔኒ ኑናራ ኬዛናስ ቤሴና፤ ኑና ባቃቲሲዛ ሚሺ ዲኮ ኣሳይ ሄሳ ጊታ ሚሻን ቆዴና፤ ሃራይ ኣቶሺን ኑፔ ባጋይ ሃይቂኮካ ኢስቲ ዉዱ ጌቴና፤ ኔኒ ኔርካ ኑፔ ታሙ ሺያታፔ ኣꬋሳ፤ ሄሳ ጊሻስ ኔኒ ካታማን ኡታዳ ኑና ማዲኮ ሎኦ» ጊዳ።
2SA 18:4 ካዎዚካ፥ «ኢንቴስ ሎኦ ሚሳቲ ቤቲዛ ኡባ ታ ኦꬃና» ጊዴስ። ሄሳ ጊሻስ ዴሬይ ኡባይ ጼታን ጼታን፥ ሺያን ሺያን ሻኬቲ ሻኬቲ ሳልፊ ኬዚዛ ዎዴ ካዎዚ ጊምቤዛ ፔንጌን ኤቂ ዴስ።
2SA 18:5 ካዎዚ ኢዮኣቤ፥ ኣቢሳኔ ኢታዬ፥ «ታ ጊሻስ ጊዲ ታ ናዛ ኣቤሴሎሜ ቦላ ኢሲ ሜቶካ ጋꬆፍቴ» ጊ ኣዛዚዴስ። ካዎዚ ባ ና ኣቤሴሎሜ ጊሻስ ኣዛዚዛይታስ ኢሳስ ኢሳስ ኣዛዞ ኢሚሺን ኡባ ኦላንቻቲካ ሲዪዳ።
2SA 18:6 ኦላንቻቲ ኢስራኤሌ ኦላናስ ሳልፊዲ ኬዚዳ፤ ኦላዛ ኤፍሬሜ ዎራ ጊዶን ኦሌቲዳ።
2SA 18:7 ሄን ኢስራኤሌ ኣሳይ ዳዊቴ ኦላ ኣሳን ጾኔቲዴስ፤ ሄ ጋላስ ኬሂ ዳሮቲ ሃይቂዳ፤ 20,000 ኣሲ ሃይቂዴስ።
2SA 18:8 ኦላይ ዴራ ጋርሳን ኣኪ ኣኪ ቢዴስ፤ ሄ ጋላስ ኦላይ ዉርሲዳይሳፌ ዎራይ ሚቲ ꬋይሲዳ ኣሳይ ዳሬስ።
2SA 18:9 ሄ ዎዴ ኣቤሴሎሜይ ዳዊቴ ኣሳራ ቶሮንታ ዲሼ ጋይቲዴስ፤ ኣቤሴሎሜይ ባቁሎ ቶጊዲ ጪፒ ጊዳ ሃጋይ ዲዛ ዎላ ጋርሳራ ኣꬊ ቢሺን ኣቤሴሎሜ ሁኤ ቢናናይ ሃጋን ኦይኬቲዴስ፤ ኢዚ ቶጊዳ ባቁሎያ ኣꬋ ቢን ኢዚ ሳሎፔኔ ሳኣፔ ጊዶን ካቄቲ ኣቲዴስ።
2SA 18:10 ኢሳዴይ ኢዛ ቤኢዲ ኢዮኣቤስ፥ «ሄኮ ታኒ ኣቤሴሎሜይ ዎላ ቦላ ካቄቲ ዲዛይሳ ቤኣዲስ» ጊዴስ።
2SA 18:11 ኢዮኣቤይ ባስ ዮቲዳ ኣዴዛስ ዛሪዲ፥ «ኣይ ጋዲ? ሂስቲን ኔ ቤኢዳ ማላ ኣይስ ሄራካ ዎꬋዳ ቢታን ዬጋቤኪ? ኔ ሄሳꬆ ኦꬂዳኮ ታ ኔስ ታሙ ሳቂሌ ቢራኔ ኦላ ቃራታ ቃባቶ ኢማናኮሺን» ጊዴስ።
2SA 18:12 ጊዶ ኣቲን ኣዴዚ ዛሪዲ፥ «ኑኒ ሲዪሺን ካዎዚ፥ ‹ናቴꬃዛ ኣቤሴሎሜ ቦላ ቆሆይ ጋኮንታ ማላ ታ ጊሻስ ጊዲ ሚንꬂ ናጊቴ› ጊዲ ኔና፥ ኣቢሳኔ ኢታዬ ኣዛዚዳ ጊሻስ 1,000 ሳቂሌ ቢራ ኔ ታስ ኢሚዳኮካ ታኒ ታ ኩሼ ካዎዛ ናዛ ቦላ ዎꬂኬ።
2SA 18:13 ሃራ ባጋራ ታኒ ታ ሼምፖስ ሚሼቶንታ ኣጋዳ ታ ኢዛ ዎꬊዳኮ ካዎዛፔ ቆቴቲ ኣቲዛ ሚሺ ባይንዳ ጊሻስ ኔኒ ኔ ባጋራ ታኮ ሺቃካ» ጊዴስ።
2SA 18:14 ኢዮኣቤይ ኣዴዛስ፥ «ሃይሳፌ ጉዬ ሃይሳ ማላ ሃሳያን ታ ኔናራ ዎዴ ዉርሲኬ» ጊዴስ፤ 3 ቶራ ኤኪ ቢዲ ኣቤሴሎሜይ ሚꬃ ቦላ ካቄቲ ዲዛሶን ቡሮ ሼምፖ ኬዞንታ ዲሺን ቶራታ ጾንጊዲ ኢዛስ ዎዚና ኣይፌን ጫዲዴስ።
2SA 18:15 ሄሳꬆካ ኢዮኣቤ ኣዣቢዛ ታማቲ፥ ኣቤሴሎሜ ጊዶꬂ ጫዲ ዎꬊዳ።
2SA 18:16 ሄሳፌ ጉዬ ኢዮኣቤይ ዛዬ ፑኒዲ ኢስታ ዲጊዳ ጊሻስ ኦላንቻቲ ኢስራኤሌ ዬዴꬂዛይሳ ኣጊዳ።
2SA 18:17 ኣቤሴሎሜ ዎራ ጊዶ ኤፊዲ ጪማ ኦላን ዬጊዳ፤ ጊታ ሹቻታ ኢዛ ቦላ ዶሪዳ። ሄ ዎዴ ኢስራኤሌ ኣሳይ ኡባይ ባሶ ባሶ ባቃቲዴስ።
2SA 18:18 ኣቤሴሎሜይ፥ «ታ ሱንꬅ ጼይጊሲዛ ናይ ታስ ዴና» ጊዲ ኢዛ ሃሳኢሳና ማላ ሼምፖራ ፓጻ ዲዛ ዎዴ ካዎ ዙሌ ጌቴቲዛሶን ባ ሱንꬃን ሃዉልቴ ኤሲ ዎꬂዳ ጊሻስ ሄ ሶሆዚ ሃች ጋካናስ ኣቤሴሎሜ ሃዉልቴ ጌቴቴስ።
2SA 18:19 ሄ ዎዴ ሳዶቄ ና ኣኪማሲ፥ «ጎዳይ ኢዛ ሞርኬታ ቦላ ኮሜ ኮጺዳይሳ ዎጻ ባዳ ታኒ ካዎዛስ ሚሺራቾ ዮታና» ጊዴስ።
2SA 18:20 ኢዮኣቤይ፥ «ሃች ሚሺራቾ ቃላ ኤፋናይ ኔና ጊዳካ፤ ካዎዛ ናይ ሃይቂዳ ጊሻስ ሃች ጊዶንታ ሃራ ጋላስ ኤፋንዳሳ» ጊዴስ።
2SA 18:21 ሄሳፌ ጉዬ ኢዮኣቤይ ቶጵያ ዴሬ ኣዴዛስ፥ «ኔ ቤኢዳይሳ ባዳ ካዎዛስ ዮታ» ጊዴስ፤ ቶጵያ ዴሬ ኣዴዚ ኢዮኣቤስ ኩሼ ዴንꬂ ቤሲዲ ዎጺ ቢዴስ።
2SA 18:22 ሳዶቄ ና ኣኪማሲ ኢዮኣቤስ፥ «ባ ሃና ሃኖ፤ ኣኔ ዛይ ሃይሳ ቶጵያ ኣዴዛ ጌዶራ ታኒካ ዎጻይስ» ጊዴስ። ኢዮኣቤይ ጊዲኮ፥ «ኔ ኣይስ ባና ኮያዲ? ኔስ ኢሞታ ኢሚሲዛ ኣይ ሚሺራቾ ኤካዳ ባይ?» ጊዴስ።
2SA 18:23 ኣኪማሲካ፥ «ባ ሃና ሃኖ፤ ታ ባና ኮያይስ» ጊዴስ። ሄሳ ጊሻስ ኢዮኣቤይ፥ «ሂስቲኮ ዎጻ!» ጊዴስ። ሄሳፌ ጉዬ ኣኪማሲ ዴምባን ዲዛ ኦጌዛራ ዎጺ ቶጵያ ዴሬ ኣዴዛፔ ሲንꬃቲ ቢዴስ።
2SA 18:24 ዳዊቲ ካሬ ባጋ ፔንጌፌኔ ጊዶ ፔንጌፌ ጊዶን ዲሺን ዛቤዚ ዲርሳ ጊምቤ ቦላ ዲዛ ሻኮ ካራ ኬዚዲ ካሬ ጼሊሼ ኢሲ ኣሲ ባርካ ዎጺዛይሳ ቤኢዴስ።
2SA 18:25 ናጊዛይሲ ጼይጊዲ ሄሳ ካዎዛስ ዮቲዴስ፤ ካዎዚካ፥ «ባርካ ዪዛዴ ጊዲኮ ሎኦ ሚሺራቾ ኤኪ ዪዛዴ ጊዳና» ጊዴስ፤ ኣዴዚ ማቲ ማቲ ዪዴስ።
2SA 18:26 ቃሴካ ናጊዛይሲ ሃራ ኣሲ ዎጺሺን ቤኢዴስ፤ ዛቤዛካ ጼይጊዲ፥ «ሄኮ ሃራ ኣሲ ባርካ ዎጺ ዪሼ ዴስ» ጊዴስ። ካዎዚ፥ «ሄሳዴይካ ሎኦ ዎሬ ኤኪ ዪዛ ጊዳና ቤሴስ» ጊዴስ።
2SA 18:27 ናጊዛይሲ፥ «ኮይሮይሳ ዎꬂ ሳዶቄ ና ኣኪማሴ ዎꬅ ሚሳቴስ» ጊዴስ። ካዎዚ፥ «ኢዚ ሎኦ ኣሳ፤ ኢዚ ሚሺራቾ ቃላ ኤኮንታ ዬና» ጊዴስ።
2SA 18:28 ኣኪማሲ ኬሂ ዋሲዲ ካዎዛስ፥ «ኡባ ሚሺካ ኢንጄቲዴስ» ጊዴስ፤ ሄሳፌ ጉዬ ቢታ ቦላ ዛቁልꬅ ዚርጺ ጊዴስ፤ ካዎዛሲካ ኩሼ ዴንꬂዲ፥ «ታ ጎዳ ካዎዛ ቦላ ባንታ ኩሼ ዴንꬂዳ ኣሳታ ኣꬂ ኢሚዳ ጎዳ ኔ ጾሳይ ጋላቴቶ!» ጊዴስ።
2SA 18:29 ካዎዚካ ኢዛ፥ «ታ ና ኣቤሴሎሜይ ሎኦ ዲዜ?» ጊ ኦይቺዴስ። ኣኪማሲካ፥ «ኢዮኣቤይ ካዎዛ ኦሳንቻዛኔ ታና ኔ ኣይሌዛ ኪቲሺን ጊታ ሺሮ ቤኣዲስ፤ ጊዶ ኣቲን ኢዚ ኣዛኮ ታ ኤራቤኬ» ጊዴስ።
2SA 18:30 ካዎዚካ ኢዛ፥ «ኣኔ ኢሲ ባጋ ኣꬋ ኤቃ» ጊዴስ። ኢዚካ ኣꬊ ኤቂዴስ።
2SA 18:31 ሄሳፌ ጉዬ ቶጵያ ዴሬ ኣዴዚ ጋኪዲ፥ «ታ ጎዳ ካዎ፥ ሚሺራቾ! ጎዳይ ሃች ኔ ቦላ ዴንዲዳ ሞርኬታ ኡባፌ ኔና ኣሺዴስ» ጊዴስ።
2SA 18:32 ካዎዚካ ቶጵያ ዴሬ ኣዴዛ፥ «ታ ና ኣቤሴሎሜይ ሎኢ ዲዜ?» ጊ ኦይቺዴስ። ቶጵያ ዴሬ ኣዴዚካ፥ «ታ ጎዳ ካዎዛ ሞርኬቲኔ ኔና ቆሃና ኔ ቦላ ዴንዲዛ ኡባቲ ሄ ናቴꬃዛ ማላ ጊዴቶ» ጊዴስ።
2SA 18:33 ካዎዚ ኬሂ ጬጪዴስ፤ ጊምቤዛ ፔንጌ ቦላ ዲዛ ፖቄ ቦላ ኬዚዲ ሄን ዬኪዴስ፤ ቢሼካ፥ «ታ ና ኣቤሴሎሜ! ታ ና ኣቤሴሎሜ! ኔ ጊሻስ ታ ሃይቃርኪና! ታ ና ኣቤሴሎሜ ዎ! ታ ና ኣቤሴሎሜ ዎ!» ጊዴስ።
2SA 19:1 ኢዮኣቤስ፥ «ካዎ ዳዊቲ ባ ና ኣቤሴሎሜ ጊሻስ ዬኪሼኔ ካዮቲሼ ዴስ» ጌቴቲ ዮቴቲዴስ።
2SA 19:2 ካዎዚ፥ «ባ ናዛ ጊሻስ ካዮቴስ» ጊዛይሳ ሄ ጋላስ ኦላንቻቲ ሲዪዳ ጊሻስ ሄ ጋላሳ ጾኖይ ኩሜꬃ ኦላንቻታ ማታን ጬጬን ላሜቲ ፔኢዴስ።
2SA 19:3 ሄ ጋላስ ኦላፔ ዬላቲሼ ካታማ ጌሊዛ ኣሳ ማላ ዴሬይካ ሻጴቲሼ ካታማ ጌሊዴስ።
2SA 19:4 ካዎዚ ባ ኣይፌሶ ካሚ ዎꬂዲ፥ «ታ ና ኣቤሴሎሜ ዎ! ታ ና ኣቤሴሎሜ ዎ» ጊሼ ዚላሊዴስ።
2SA 19:5 ሄሳፌ ጉዬ ኢዮኣቤይ ካዎዛሶ ጌሊዲ፥ «ኔ ሼምፖ፥ ኔ ኣቱማ ናይታ ሼምፖ፥ ኔ ማጫ ናይታ ሼምፖ፥ ኔ ማቼታኔ ኔ ላጌꬆታ ሼምፖ ኣሺዳ ኣሳታ ሃች ኔ ዬላቻዳሳ።
2SA 19:6 ኔና ኢጺዛይታ ኔ ዶሳሳ፤ ቃሴ ኔና ዶሲዛይታ ኢጻሳ፤ ኔ ኦላ ጋዳዋቲኔ ኢስታ ዎታዳራቲ ኔስ ኣይኮካ ጊዶንታይሳ ሄኮ ሃች ኔ ቆንጪሳዳሳ፤ ሃች ኣቤሴሎሜይ ሼምፖራ ፓጻ ዲን ኑ ኡባይ ዉሪዳኮ ኔ ኡፋዬታናይሳ ታ ቤኣዲስ።
2SA 19:7 ሃኢ ዴንዳዳ ካሬ ኬዛ ኣሳ ሚንꬄꬃ፤ ኔ ኬዞንታ ኢጺኮ ሃ ኦማርሳይን ኢሲ ኣሲካ ኔናራ ጊዶንታይሳ ታ ጎዳ ሱንꬃን ጫቃይስ፤ ሄሲ ኔስ ናቴቴꬃፌ ዶሚን ሃይሳ ጋካናስ ኔ ቦላ ጋኪዳ ኢታ ዮኦታ ኡባፌ ኣꬎ ሜቶ ኔ ቦላ ጋꬃና» ጊዴስ።
2SA 19:8 ሄሳ ጊሻስ ካዎዚ ፔንጌ ላንቄን ኡቲን ዴሬዛስ፥ «ሄኮ ካዎዚ ፔንጌ ላንቄን ኡቲዴስ» ጌቴቲ ዮቴቲን ዴሬዚ ኡባይ ካዎዛኮ ዪዴስ። ሄ ዎዴ ኩሜꬅ ኢስራኤሌ ኣሳይ ባሶ ባሶ ባቃቲዴስ።
2SA 19:9 ኩሜꬃ ኢስራኤሌ ቆሞቲ፥ ዴሬዚካ ባ ጋርሳን ኢሶይ ኢሳራ ማርሼቲሼ፥ «ካዎዚ ኑና ኑ ሞርኬታ ኩሼፔ ኬሲ ኤኪዴስ፤ ፊሊስጼሜታ ኩሼፔካ ኑና ኣሺዳይ ኢዛ፤ ሃኢ ጊዲኮ ኣቤሴሎሜ ጋሶን ዴሬፔ ባቃቲ ቢዴስ።
2SA 19:10 ኢዚ ኑና ሃራና ማላ ኑ ቲይዳ ኣቤሴሎሜይ ጊዲኮ ኦላን ሃይቂዴስ። ሂስቲን ኢንቴ ካዎዛ ሲሞ ጊሻስ ኣይስ ጮኡ ጌቲ?» ጊዴስ።
2SA 19:11 ካዎ ዳዊቲ ቄሴ ሳዶቄሲኔ ኣቢያታሬስ ኪታ ዬዲሼ፥ «ዩሁዳ ጪማታስ፥ ‹ኩሜꬃ ኢስራኤሌን ሃሳዬቲዛ ዮኦ ኡባይ ካዎዚ ዲዛሶን ኢዛስ ጋኪዳ ጊሻስ ካዎዛ ካዎቴꬃ ኬꬅ ዛራናስ ኢንቴ ዋኒዲ ዉርሴꬃ ኣስ ጊዴቲ?
2SA 19:12 ኢንቴ ታ ሜቄꬃታ፥ ታ ኣሾታኔ ታ ኢሻታ፤ ሂስቲን ኢንቴ ካዎዛ ዛራናስ ዋኒዲ ዉርሴꬃ ኣስ ጊዴቲ?› ጊቴ።
2SA 19:13 «ቃሴ ኣማሲ፥ ‹ኔኒካ ታ ሜቄꬂኔ ታ ኣሾ ጊዲኪ? ሃኒፌ ዶሚዲ ኔ ዴኦ ዉርሴꬅ ጋካናስ ኢዮኣቤ ቆꬌ ታ ኦላንቻታ ኣዛዚዛዴ ኦꬆንታ ኣጊኮ ጾሲ ታ ቦላ ኢታ ሚሽ ኦꬆ፤ ሄሳፌካ ኣꬊዛ ኢታ ሚሽ ታ ቦላ ኤሆ› ጊዴስ» ጊዲ ዮቲቴ።
2SA 19:14 ኢዚካ ዩሁዳ ኣሳ ኡባ ዎዚና ኢሲ ኣሳ ዎዚና ማላ ሂስቲ ዲኢዴስ፤ ኢስቲካ ኢዛስ፥ «ኔኒ ኔ ኣሳ ኡባራ ሲማ» ጊዲ ኪታ ዬዲዳ።
2SA 19:15 ካዎዚ ሄሳፌ ጉዬ ሲሚዲ ዮርዳኖሴ ጋካናስ ዪዴስ። ሄ ዎዴ ዩሁዳ ኣሳይ ካዎዛ ኤኪዲ ዮርዳኖሴ ፒንꬃናስ ጌልጌላ ጋካናስ ቢዴስ።
2SA 19:16 ባሂሪሜ ዴሬ ኣስ ጌራ ና ቢኒያሜ ቆሞ ሺምኤይ ካዎ ዳዊቴ ሞካናስ ዩሁዳ ኣሳራ ኢሲፌ ኤሶን ዎꬊዴስ።
2SA 19:17 ኢሲ ሺ ቢኒያሜ ቆሞቲ፥ ሄሳꬆካ ሳኦሌሶ ኦሳንቻ ጺባስ 15 ኣቱማ ናይቲኔ 20 ኣይሌቲ ኢዛራ ኢሲፌ ዴቴስ። ሄሳፌ ጉዬ ካዎዚ ዲዛሶ ዮርዳኖሴ ኤሶን ዎꬊዳ።
2SA 19:18 ካዎዛሶ ኣሳ ኤሃናሲኔ ኢዚ ኮዪዳ ኡባ ኦꬃናስ ኢስቲ ዞኮራ ፒኒዳ። ጌራ ና ሺምኤይ ዮርዳኖሴ ፒኒዴስ፤ ካዎዛ ሲንꬃን ጉፋኒዲ፥
2SA 19:19 «ታ ጎዳዉ ታ ኔና ቆሂዳይሳ ቆዶፓ፤ ታ ጎዳ ካዎ ኔ ዬሩሳላሜፔ ኬዚዳ ጋላስ ታ ኦꬂዳ ሞሮዛ ማራ፤ ኔ ዎዚናን ዎꬆፋ።
2SA 19:20 ታኒ ኔ ኦሳንቻይ ኦꬂዳ ናጋራ ኤሪዛ ጊሻስ ሃች ታ ጎዳ ካዎዛ ሞካናስ ዮሴፌ ኬꬃ ኣሳ ኡባፌ ኮይሮታ ያዲስ» ጊዴስ።
2SA 19:21 ሄሳፌ ጉዬ ጹሪያ ና ኣቢሳዬይ፥ «ሺምኤይ ጎዳን ቲዬቲዳዴ ኢዚ ጫዪዳ ጊሻስ ኢዛስ ሃይቆይ ቤሴኔ?» ጊዴስ።
2SA 19:22 ዳዊቲካ፥ «ኢንቴኖ ጹሪያ ናይቶ፤ ኢንቴናራ ታና ኣዚ ጋꬂዜ? ኢንቴ ሃች ታስ ሞርኬ ጊዲዴታ! ኣይ ኣሲካ ሃች ኢስራኤሌፔ ሃይቃና ቤሲዜ? ሄሲ ታ ኢስራኤሌ ቦላ ካዎቲዳይሳ ታ ኤሪዳ ጋላስ ጊዴኔ?» ጊዴስ።
2SA 19:23 ሄሳ ጊሻስ ካዎዚ ሺምኤ፥ «ኔኒ ሃይቃካ» ጊዴስ፤ ሄሳ ካዎዚ ጫቆን ሚንꬂዴስ።
2SA 19:24 ሳኦሌ ና ሜምፌቦስቴይ ካዎዛ ሞካናስ ዱጌ ዎꬊዴስ፤ ካዎዚ ቤቲ ቦሶፌ ዶሚዲ ሲሚ ዪዳ ጋላስ ጋካናስ ባ ቶሆስ ቤሲዛ ሚሽ ኦꬂቤና፤ ባ ቡቼካ ሜዴቲቤና፤ ባ ማይኦካ ሜጪቤና።
2SA 19:25 ኢዚ ካዎዛ ሞካናስ ዬሩሳላሜፔ ዪን ካዎዚ ኢዛ፥ «ሜምፌቦስቴ፥ ኔ ታናራ ኣዛስ ቦንታ ኣጋዲ?» ጊ ኦይቺዴስ።
2SA 19:26 ኢዚካ ዛሪዲ፥ «ታ ጎዳ ካዎ! ታ ኔ ኦሳንቻይ ቶሆ ሲላ ጊዲዳ ጊሻስ፥ ‹ታኒ ካዎዛራ ባና ማላ ታ ሃሬይ ታስ ኮሬቶ፤ ታ ኢዛ ቦላ ኡታ ባና› ጋዲስ፤ ጊዶ ኣቲን ታ ኦሳንቻ ጺባይ ታና ባሌꬂዴስ።
2SA 19:27 ታ ጎዳ ካዎ ሲንꬃን ታና ኔ ኦሳንቻዛ ሱንꬅ ሞሪዴስ፤ ኣይዴ ጊዲንካ ታ ጎዳይ ካዎይ ኔኒ ጾሳ ኪታንቻ ማላ ጊዲዳ ጊሻስ ኔና ሎኢዳ ኡባ ኦꬃ።
2SA 19:28 ታ ኣዋ ኬꬃስ ኡባስ ሃይቆይ ቤሲሺን ኔኒ ጊዲኮ ታና ኔ ኦሳንቻዛ ኔ ማዳፌ ሚዛይታራ ኢሲፌ ኡቲሳዳሳ፤ ሃይሳፌ ሃራይ ታስ ሃኖ ጋዳ ካዎዛ ኦይቻናስ ታ ኦኔ?» ጊዴስ።
2SA 19:29 ካዎዚካ፥ «ኔ ኣይስ ዮኦ ዳርሳይ? ኔኒኔ ጺባይ ኢዛ ጋዳ ኡባ ኢንቴ ጊሼቲ ኤካና ማላ ታ ኣዛዛዲስ» ጊዴስ።
2SA 19:30 ሜምፌቦስቴይ ካዎዛ፥ «ታ ጎዳ ካዎ! ኢዚ ሃሹ ሎኦን ሲሚዴስ፤ ኡባካ ኢዚ ኤኮ» ጊዴስ።
2SA 19:31 ሄሳꬆካ ጋላኣዴ ዴሬ ኣስ ባርዚሌይ ኤሮጊሊሜ ዎራዳፔ ካዎዛ ሞይዛናስ ኢዛራ ኢሲፌ ዮርዳኖሴ ፒኒዴስ።
2SA 19:32 ሄ ዎዴ ባርዚሌይ ዎዴ ሱጊዳ 80 ላይꬃ ጪማ፤ ኢዚ ኬሂ ዱሬ ጊዲዳ ጊሻስ ካዎዚ ማሃናይሜን ዲሺን ኢዛስ ማና ሚሽ ኤሂዴስ።
2SA 19:33 ካዎዚ ባርዚሌ፥ «ታናራ ፒናዳ ዬሩሳላሜን ኢሲፌ ዳ፤ ታ ኔና ሄማና» ጊዴስ።
2SA 19:34 ባርዚሌይ ጊዲኮ ካዎዛስ፥ «ታኒ ካዎዛራ ዬሩሳላሜን ኣይ ኬና ላይꬅ ዳናስ ቦ?
2SA 19:35 ታኒ ሃኢ 80 ላይꬃ ጪማ፤ ሂስቲን ታኒ ኢታኔ ኪያ ሻካ ኤራና ዳንዳያኔ? ሃይሳፌ ጉዬ ኔ ኣይሌይ ሚዛይሳኔ ኡዪዛይሳ ማልኦ ሻኪ ኤራኔ? ኣቱማ ናይታ ጬንጉርሲኔ ማጫ ናይታ ጬንጉርስ ሃኢ ታ ሲያና ዳንዳያኔ? ሂስቲን ኔ ኣይሌይ ታ ጎዳ ካዎዛስ ኣይስ ቦላራ ሃራ ቶሆ ጊዳኔ?
2SA 19:36 ኔ ኣይሌይ ካዎዛራ ፒኒዲ ጉꬃ ኦጌ ባና፤ ካዎይ ሄሳ ኩሼ ታስ ዛራንዴ?
2SA 19:37 ታ ዲዛ ካታማን ሃይቃዳ ታ ኣዋኔ ታ ኣዬይ ዱፎ ኣቻን ታ ሞጌታና ማላ ኔ ኣይሌዛ ኔ ሞይዚኮ ኢዚ ሲሞ፤ ጊዶ ኣቲን ኔ ኣይሌ ኬሜኣሜይ ታ ጎዳ ካዎዛራ ፒኖ፤ ሂስቲኮ ኔና ሎኢዳ ሚሽ ኔ ኢዛስ ኦꬃ» ጊዴስ።
2SA 19:38 ካዎዚካ፥ «ኬሜኣሜይ ታናራ ፒናና፤ ኔና ኡፋይሲዛ ሚሽ ኡባ ታ ኢዛስ ኦꬃና፤ ኔ ታፔ ኮይዛ ኣይ ሚሺካ ታ ኔስ ኦꬃና» ጊዴስ።
2SA 19:39 ሄሳ ጊሻስ ዴሬዚ ኡባይ ዮርዳኖሴ ፒኒዴስ፤ ሄሳፌ ጉዬ ካዎዚ ፒኒዴስ። ካዎዚ ባርዚሌ ዬሪ ኤኪዲ ኣንጂዴስ፤ ባርዚሌይካ ባሶ ሲሚ ቢዴስ።
2SA 19:40 ካዎዚ ጌልጌላ ቢሺን ኬሜኣሜይ ኢዛራ ኢሲፌ ቢዴስ፤ ዩሁዳ ኦላንቻቲ ኡባይኔ ኢስራኤሌ ኦላንቻታፔ ባጋይ ካዎዛ ኣዣቢዲ ፒንꬂዳ።
2SA 19:41 ሄራካ ኢስራኤሌ ኣሳይ ኡባይ ካዎዛኮ ዪዲ፥ «ኑ ኢሻቲ ዩሁዳ ኣሳቲ ካዎዛ ጋርሳራ ባንታርካ ኢዛኔ ኢዛሶ ኣሳታ፥ ኢዛ ካሊዛይታራ ዮርዳኖሴ ኣይስ ፒንꬂዶ?» ጊዳ።
2SA 19:42 ዩሁዳ ኣሳይ ኡባይ ኢስራኤሌ ኣሳስ፥ «ኑ ሃይሳ ኦꬂዳይ ካዎዚ ኑስ ማታ ዳቦ ጊዲዳ ጊሻሳ፤ ሂስቲን ሃይሲ ኢንቴና ሃንቄꬂዜ? ኑኒ ካዎፔ ኤኪ ሚዳ ሚሺ ዲዜ? ኑኒ ኣይ ሚሽ ኤኪዶኒ?» ጊዳ።
2SA 19:43 ሄሳፌ ጉዬ ኢስራኤሌ ኣሳይ ዩሁዳ ኣሳስ፥ «ኑና ካዎዛፔ ታሙ ኩሼይ ጋኬስ፤ ሄሳፌ ቦላራካ ኢንቴፌ ኑስ ኣꬊዛ ማታይ ዴስ፤ ሂስቲን ኢንቴ ኑና ኣዛስ ካꬊዴቲ? ኑ ካዎዚ ሲማና ማላ ኮይሮ ኦይቺዳይ ኑና ጊዶኮኒ?» ጊዳ። ጊዶ ኣቲን ዩሁዳ ኣሳይ ኢሚዳ ዛሮይ ኢስራኤሌ ኣሳይ ኢሚዳ ዛሮፔ ኬሂ ሚኖ።
2SA 20:1 ሄ ዎዴ ቢኒያሜ ቆሞታ ጊዶፌ ቢኪሬ ና ሼባኤ ጌቴቲዛ ኮፋ ኣሲ ዴስ፤ ኢዚ ዛዬ ፑኒሼ፥ «ኑስ ዳዊቴራ ጋይቶቴꬂ ዴና፤ ኢሴዬ ናኮን ኑስ ጺንጾይ ዴና፤ ኢስራኤሌ ኣሳዉ! ኔ ዱንካኔን ዱንካኔን ሲማ!» ጊ ዋሲዴስ።
2SA 20:2 ሄሳ ጊሻስ ኢስራኤሌ ኣሳይ ኡባይ ዳዊቴ ካዲዲ ቢኪሬ ና ሼባኤ ካሊዴስ፤ ጊዶ ኣቲን ዩሁዳ ኣሳይ ዮርዳኖሴፔ ዶሚዲ ዬሩሳላሜ ጋካናስ ባንታ ካዎዛፔ ሻኬቶንታ ኢሲፌ ቢዳ።
2SA 20:3 ዳዊቲ ዬሩሳላሜን ዲዛ ባ ካዎቴꬃ ኬꬅ ሲሚዳ ዎዴ ባ ካዎቴꬃ ኬꬃ ናጋና ማላ ካሴ ኢዚ ዎꬂ ቢዳ ታሙ ላጌꬆ ማጫሳታ ኤኪዴስ፤ ኢስቲ ኢሲ ኬꬃን ናጌቲ ዳና ማላ ናጌ ዎꬂዴስ፤ ኢስታስ ኮሺዛ ቃላባካ ኢሚዴስ። ጊዶ ኣቲን ኢስታራ ኣቂቤና፤ ኢስቲ ሃይቃናሼ ጋካናስ ኣምኢ ማላ ባንታርካ ዱማ ዴኢዳ።
2SA 20:4 ሄሳፌ ጉዬ ካዎዚ ኣማሳስ፥ «ዩሁዳ ኣሳይ ኡባይ ሄꬑ ጋላሳ ጊዶን ታኮ ያና ማላ ጼይጋ፤ ኔካ ኔ ሁኤራ ቤታ» ጊዴስ።
2SA 20:5 ኣማሲ ዩሁዳ ጼይጋና ቢዴስ፤ ጊዶ ኣቲን ካዎዚ ባሪዳ ጋላሳታፔ ኬሂ ታኪዴስ።
2SA 20:6 ዳዊቲ ኣቢሳዬስ፥ «ሃኢ ኣቤሴሎሜፔ ቦላራ ቢኪሬ ና ሼባኤይ ዳሮ ሜቶ ኑ ቦላ ጋꬃና ኮይዛ ጊሻስ ኔ ጎዳ ዎታዳራታ ኤካዳ ኢዛ ዬዴꬃ፤ ኔ ሂስቶንታ ኣጊኮ ሚጻይ ዲዛ ካታማታ ዴሚዲ ኑፔ ኬሲ ኤኪ ኣታና» ጊዴስ።
2SA 20:7 ሄሳ ጊሻስ ኢዮኣቤ ዎታዳራቲ፥ ኬሊቴቲ፥ ፔሊቴቲኔ ዎልቃማ ኦላንቻቲ ኡባይ ኣቢሳዬ ኣዛዞን ኬዚዳ፤ ኢስቲ ዬሩሳላሜፔ ኬዚዳይ ቢኪሬ ና ሼባኤ ዬዴꬃናሳ።
2SA 20:8 ኢስቲ ጌባኦኔን ዎጋ ዛላ ማታን ዲሺን ኣማሲ ኢስታራ ጋይታና ኬዚዴስ፤ ኢዮኣቤይ ኦላ ማይኦ ማይኢዲ ጊꬃ ማሻ ኮሆዛራ ጊጺ ኡቲዴስ፤ ኢዚ ሲንꬄ ታንጊዳ ማላ ማሻዚ ኮሆዛፔ ኬዚ ጋዴን ዎꬊዴስ።
2SA 20:9 ኢዮኣቤይካ ኣማሳ፥ «ታ ኢሻዞ ኔ ኣይ ማላ ዳይ?» ጊዴስ፤ ሂስቲዲ ኢዮኣቤይ ዬሪዛ ኣስ ሚሳቲዲ ባ ኡሻቻ ኩሼን ኣማሳ ቡች ኦይኪዴስ።
2SA 20:10 ጊዶ ኣቲን ኣማሲ ኢዮኣቤ ኩሼን ማሻይ ዲዛይሳ ኣኬኮንታ ኣጊዳ ጊሻስ ባና ናጊቤና። ሂስቲን ኢዮኣቤይ ኢዛ ኡሎን ጫዲዴስ፤ ኢዛ ማራጬይ ቢታ ቦላ ዎሎሉ ጊዴስ፤ ኢዮኣቤይ ሃራ ጉጆንታ ዲሺን ኣማሲ ሄራካ ሼምፖ ኬዚዴስ። ሄሳፌ ጉዬ ኢዮኣቤይኔ ኢዛ ኢሻ ኣቢሳዬይ ቢኪሬ ና ሼባኤ ጎዴሬꬆ ዶሚዳ።
2SA 20:11 ኣማሳ ኣሃ ኣቻን ኤቂዳ ኢዮኣቤ ዎታዳራታፔ ኢሶይ፥ «ኢዮኣቤ ዶሲዛይኔ ዳዊቴስ ጊዲዳ ኡባይ ኢዮኣቤ ካሎ!» ጊዴስ።
2SA 20:12 ሄ ዎዴ ኣማሳ ኣሃይ ሱꬃን ሞሬቲዲ ኦጌስ ጊዶ ኣዳን ፖርጩ ጊ ዴስ። ሄራ ኣꬊ ቢዛ ዎታዳራቲ ኡባይ ኤቂ ጼሊሺን ሄ ኣዴዚ ቤኢዲ ኣሃዛ ማታ ጋኪዳ ዎታዳራቲ ኡባይ ኤቂ ጼሊዛይሳ ኣኬኪዴስ፤ ኣማሳ ኣሃዛ ኦጌ ቦላፌ ጎሻ ጊዶ ኤፊዲ ማይኦ ኢዛ ቦላ ዬጊዴስ።
2SA 20:13 ኣሃዚ ኦጌፔ ዴንዲዳፔ ጉዬ ኣሳይ ኡባይ ቢኪሬ ና ሼባኤ ጎዳናስ ኢዮኣቤ ካሊ ቢዴስ።
2SA 20:14 ሼባኤይ ኢስራኤሌ ናይታ ቆሞታ ኡባ ጊዶራ ካንꬂዲ ኣቤሊ-ቤቲ-ማኢካኔ ቤሬ ዴሬ ዪዴስ። ቤሬ ኣሳይ ኢሲ ቦላ ሺቄቲዲ ኢዛ ካሊዴስ።
2SA 20:15 ኢዮኣቤራ ዲዛ ዎታዳራቲ ዪዲ ኣቤሊ-ቤቲ-ማኢካን ሼባኤ ጊዶꬂዳ፤ ካታማፔ ካሬ ባጋራ ዩዪ ኣꬋናስ ጊምቤዛስ ፑዴ ጼራ ጋካናስ ቢታ ዶሪዳ፤ ኢስቲ ጊምቤዛ ላላናስ ኬሂ ሾጪዛ ዎዴ፥
2SA 20:16 ሄ ካታማይን ኢሲ ዎዚናማ ማጫሲ ዲዛራ ባ ቃላ ꬎቁ ሂስታዳ «ኣሶ ሲዪቴ! ሲዪቴ! ኢዮኣቤስ ታ ዮታና ሚሺ ዲዛ ጊሻስ ኢዚ ሃ ያና ማላ ኢዛስ ዮቲቴ!» ጋዱስ።
2SA 20:17 ኢዮኣቤይ ኢዚኮ ቢን ማጫሳያ ኢዛስ፥ «ኢዮኣቤይ ኔኔ?» ጋ ኦይቻዱስ። ኢዚካ ኢዚስ ዛሪዲ፥ «ኤ ታና» ጊዴስ። ኢዛካ ኢዛስ «ሂስቲኮ ታኒ ኦሳንቻያ ጊዛይሳ ኤዝጋ» ጋዱስ። ኢዚ ቃሴ፥ «ኤሮ ታ ኤዝጋ ሲያይስ» ጊዴስ።
2SA 20:18 ኢዛካ ዛራዳ ኢዛስ፥ «ቤኒ ዎዴ ኣሳይ፥ ‹ዞሬ ኦይቻናስ ኣቤሌ ካታማ ቢቴ!› ጌስ፤ ኢስቲ ጊዳ ማላካ ፖሌቴስ።
2SA 20:19 ሄ ካታማያ ጊታ ካታማ፤ ኢስራኤሌን ሳሮይ ኩሚዳራኔ ኣማኔቲዳ ካታማያ ኢዞ፤ ሂስቲን ኔኒ ኢስራኤሌን ኣዮ ጊዲዳሮ ꬋይሳና ኮያሳ። ጎዳ ጺንጾዮ ሚታናስ ኣይስ ኔ ኮያይ?» ጋዱስ።
2SA 20:20 ኢዮኣቤይካ ኢዚስ፥ «ሄሲ ታፔ ሃኮ! ሚቶይኔ ꬋይሲ ሃኢካ ታፔ ሃኮ!
2SA 20:21 ዮኦይ ሄሳ ማላ ጊዴና፤ ሄን ዙማዛን ኤፍሬሜ ጌዜፌ ቢኪሬ ና ሼባኤ ጌቴቲዛይሲ ካዎ ዳዊቴ ቦላ ባ ኩሼ ዴንꬂዴስ፤ ኢንቴ ሄ ኣዴዛ ጻላ ታስ ኣꬂ ኢሚኮ ታኒ ሃኖ ካታማዮ ዬዳ ባና» ጊዴስ። ማጫሳያካ ዛራዳ ኢዮኣቤስ፥ «ኣዴዛ ሁኤ ቃንጺዲ ኔስ ጊምቤ ቦላራ ካሬ ዬጋና» ጋዱስ።
2SA 20:22 ሄሳፌ ጉዬ ማጫሳያ ጪንጫቴꬃን ኩሚዳ ባ ዞሬ ኡባ ዴራኮ ኤካ ባዱስ። ኢስቲካ ቢኪሬ ና ሼባኤ ሁኤዛ ቃንጺዲ ኢዮኣቤስ ካሬ ኦሊዳ። ሂስቲን ኢዮኣቤይ ዛዬ ፑኒዴስ፤ ኣሳይካ ካታማይፔ ሃኪ ቢዳ። ኡባ ባጋራካ ላሌቲ ባሶ ባሶ ቢዳ። ኢዮኣቤይ ካዎዛኮ ዬሩሳላሜ ሲሚ ቢዴስ።
2SA 20:23 ኢዮኣቤይ ኢስራኤሌ ኦላንቻታ ኡባ ቦላ ኣዛዚዛዴ ጊዲዴስ፤ ዮዳሄ ና ባናያይ ቃሴ ኬሊቴታ ቦላኔ ፔሊቴታ ቦላ ሃላቃ ጊዲዴስ።
2SA 20:24 ኣዶራሜይ ዎልቃ ኦሶ ኦꬂዛይታ ቦላ ሃላቃ ጊዲዴስ። ኣሂሉዴ ና ኢዮሳፊጼይ ታሪኬ ጻፊዛዴ ጊዲዴስ።
2SA 20:25 ሼባኤይ ካዎ ኬꬃስ ጻፌ ጊዲሺን ሳዶቄይኔ ኣቢያታሬይ ቄሴ ጊዲዳ።
2SA 20:26 ሄሳꬆካ ያኢሬ ዴሬ ኣስ ኢራይ ዳዊቴ ዞሪዛዴ ጊዲዴስ።
2SA 21:1 ዳዊቴ ካዎቴꬃ ዎዴ ሄꬑ ላይꬅ ኩሜꬅ ኢታ ኮሻይ ቢታ ቦላ ዴንዲዴስ፤ ሄሳ ጊሻስ ዳዊቲ ጎዳ ኦይቺዴስ፤ ጎዳይካ ኢዛስ፥ «ሳኦሊ ጌባኦኔ ኣሳ ዎꬊ ዉርሲዳ ጊሻስ ኢዛ ቦላኔ ኢዛሶ ኣሳ ቦላ ሱꬃ ኣጮይ ዴስ» ጊዴስ።
2SA 21:2 ካዎዚ ጌባኦኔ ኣሳ ጼይጊ ሃሳይሲዴስ፤ ጌባኦኔቲ ኣሞሬታፔ ኣቲዳይታ ኣቲን ኢስራኤሌ ዴሬ ኣስ ጊዴቴና፤ ኢስራኤሌ ኣሳይ ካሴ ኢስቲ ናጋናስ ጫቂዳ ጊዲኮካ ሳኦሊ ኢስራኤሌ ኣሳሲኔ ዩሁዳ ኣሳስ ሚሼቲዛ ጊሻስ ጌባኦኔታ ሙሌራ ꬋይሳናስ ኮዪዴስ።
2SA 21:3 ሄሳ ጊሻስ ዳዊቲ ጌባኦኔ ኣሳ፥ «ታ ኢንቴስ ኣይ ኦꬆ? ጎዳ ጺንጾ ኢንቴ ኣንጃና ማላ ናጋራ ኡባስ ታ ኣይ ኦꬃና ቤሲዜ?» ጊ ኦይቺዴስ።
2SA 21:4 ጌባኦኔ ኣሳይ ኢዛስ ዛሪዲ፥ «ሳኦሌፔ ጊዲን ኢዛሶ ኣሳፔ ቢራ ዎይኮ ዎርቃ ኦይቻናስ ማታይ ዴና፤ ቃሴካ ኑኒ ኢስራኤሌፔ ኦናካ ዎꬋናስ ማታይ ዴና» ጊዳ። ዳዊቲካ፥ «ሂስቲን ታ ኢንቴስ ኣይ ኦꬆ?» ጊ ኦይቺዴስ።
2SA 21:5 ኢስቲካ፥ «ኑኒ ላሌታና ማላኔ ኢስራኤሌ ጊዶን ኣዋንካ ዶንታ ማላ ኑ ቦላ ጌኔ ኦꬂዲ ኑና ꬋይሲዳዴ
2SA 21:6 ዜሬꬃፌ ላፑን ኣቱማ ናይቲ ኑስ ኢሜቴቶ። ኑኒካ ጎዳን ዶሬቲዳ ሳኦሌ ዴሬ ጊቢኣን ጎዳ ሲንꬃን ኢስታ ካቃና» ጊ ዛሪዳ። ሂስቲን ካዎዚ፥ «ኤሮ ታ ኢማና» ጊዴስ።
2SA 21:7 ካዎ ዳዊቲ ሳኦሌ ና ዮናታኔ ጊዶኒኔ ባ ጊዶን ጎዳ ሲንꬃን ጫቄቲዳ ጫቆ ጊሻስ ጊዲ ሳኦሌ ናዛ ዮናታኔ ና ሜምፌቦስቴ ሃይቆፔ ኣሺዴስ።
2SA 21:8 ጊዶ ኣቲን ካዎዚ ኣያ ቢዮ ኤርጺፋይ ሳኦሌስ ዬሊዳ 2 ኣቱማ ናይታ ኣርሞኔኔ ሜምፌቦስቴ፥ ኢስታራካ ኢሲ ቦላ ሳኦሌ ቢያ ሜሮባ ማሆላቴ ዴሬ ኣስ ባርዚሌ ና ኣዲርኤሌስ ዬሊዳ 5 ኣቱማ ናይታ ኤኪ ቢዴስ።
2SA 21:9 ኢስታ ጌባኦኔ ኣሳታስ ኣꬂ ኢሚዴስ፤ ጌባኦኔቲ ኢስታ ዎꬊዲ ዙምቡላታ ቦላ ጎዳ ሲንꬃን ካቂዳ፤ ላፑናቲ ኢሲ ቦላ ሃይቂዳ፤ ኢስቲ ሃይቂዳይ ካꬃ ሺሾ ዎዴ ኮይሮ ጋላስ፥ ባንጋይ ማጻ ዶሜቲዳ ጋላሳ።
2SA 21:10 ሄሳፌ ጉዬ ኣያ ቢዮ ኤርጺፋይ ማቃ ኤካዳ ዛላ ቦላ ዱንካናዱስ፤ ካꬃ ሺሾ ኮይሮ ጋላሳፌ ቢዲ ኢራይ ቡካናሼ ጋካናስ፥ ጋላስ ሳሎ ካፎቲ ቦቾንታ ማላ፥ ኦማርስ ዎራ ዶኣቲ ቦቾንታ ማላ ናጋሼ ሄን ጋምኣዱስ።
2SA 21:11 ሳኦሌ ላጌꬆያ ኣያ ቢዮ ኤርጺፋይ ኦꬂዳይሳ ዳዊቲ ሲዪዳ ዎዴ፥
2SA 21:12 ቢዲ ሳኦሌ ሜቄꬃኔ ኢዛ ና ዮናታኔ ሜቄꬃ ያቡሴ ጋላኣዴ ኣሳፔ ኤኪዴስ። ያቡሴ ኣሳይ፥ ኢስቲ ካቂዳሶፔ ቤቲ-ሳኔ ዱቡሻፔ ቆታራ ኤኪ ቢዳ።
2SA 21:13 ዳዊቲ ሳኦሌ ሜቄꬂኔ ኢዛ ና ዮናታኔ ሜቄꬅ ሄፔ ኤሂዴስ። ሄሳꬆካ ሄ ሃይቂዳ ኣሳታ ሜቄꬅ ሺሺዳ።
2SA 21:14 ሳኦሌ ሜቄꬂኔ ኢዛ ና ዮናታኔ ሜቄꬅ ቢኒያሜ ቢታን ጼላ ጌቴቲዛሶን ኢዛ ኣዋ ቂሴ ዱፎን ሞጊዳ፤ ካዎዚ ኣዛዚዳይሳካ ኡባ ኦꬂዳ። ሄሳፌ ጉዬ ቢታይስ ኢስቲ ዎሲዳ ዎሳ ጾሲ ሲዪዴስ።
2SA 21:15 ቃሴካ ፊሊስጼሜሲኔ ኢስራኤሌስ ጊዶን ኦላይ ዴንዲዴስ፤ ዳዊቲካ ባ ኣሳራ ፊሊስጼሜ ኣሳ ኦላናስ ዱጌ ዎꬊዴስ፤ ኢዚ ሄን ዳቡርዴስ።
2SA 21:16 ኤራፋዬ ዜሬꬃታፔ ኢሶይ ኤሽቢ-ቤኖቤ ጌቴቲዛ ኣሲ ዴስ፤ ኢዚ ጻርቂማላፔ ኦሴቲዳ 300 ሳቂሌ ዴጺዛ ቶራኔ ኦራꬃ ማሻ ጊጺ ኡቲዴስ፤ ኢዚካ ዳዊቴ ዎꬋና ቆፒዴስ።
2SA 21:17 ጊዶ ኣቲን ጹሪያ ና ኣቢሳዬይ ዳዊቴ ሼምፖ ኣሻናስ ዪዲ ፊሊስጼሜ ኣዴዛ ጫዲ ዎꬊዴስ። ሄሳፌ ጉዬ ዳዊቴ ኣሳቲ፥ «ኢስራኤሌ ጾምፔይ ቶኦንታ ማላ ሃይሳፌ ጉዬ ኔ ኑናራ ኦላሶ ኬዛና ቤሴና» ጊ ጫቂዳ።
2SA 21:18 ሄሳፌ ጉዬ ጎቤ ጌቴቲዛሶን ፊሊስጼሜ ኣሳራ ኦላይ ዴንዲዴስ። ሄ ዎዴ ሁሼ ዴሬ ኣስ ሲቢካዬይ ኤራፋዬ ዜሬꬃታፔ ሳፌ ዎꬊዴስ።
2SA 21:19 ጎቤን ፊሊስጼሜታራ ዴንዲዳ ሃራ ኦላን ቤቴሊሄሜ ዴሬ ኣስ ጃር-ኦርጊሜ ና ኤልያኔይ ኢዛስ ቶራ ቶማይ ዎንዲራሼ ሚꬅ ሊኪዛይሳ ጌቴ ዴሬ ኣስ ጎልያዴ ዎꬊዴስ።
2SA 21:20 ቃሴካ ጌቴን ዴንዲዳ ኦላን ኢዛስ ኢሲ ኢሲ ኩሼ ቦላኔ ኢሲ ኢሲ ቶሆ ቦላ ኡሱፑን ቢራꬌይ፥ ኢሲ ቦላ ናምኡ ታማኔ ኦይዱ ቢራꬌቲ ዲዛ ኢሲ ዎልቃማ ኣሲ ዴስ፤ ኢዚ ኤራፋዬ ዜሬꬃ።
2SA 21:21 ኢዚ ኢስራኤሌ ኣሳራ ኤቄቲሺን ዳዊቴ ኢሻ ሺምኤ ና ዮናታኔይ ኢዛ ዎꬊዴስ።
2SA 21:22 ሃይቲ ኦይዳቲ ጌቴን ዲዛ ኤራፋዬ ዜሬꬃታ፤ ኢስቲካ ዳዊቴ ኩሼኒኔ ኢዛ ኣሳታ ኩሼን ኩንዲዳ።
2SA 22:1 ጎዳይ ዳዊቴ ኢዛ ሞርኬታ ኡባ ኩሼፔኔ ሳኦሌ ኩሼፔ ኣሺዳ ዎዴ ዳዊቲ ሃይሳፌ ካሊዛ ማዛሙሬ ጎዳ ቦንቾስ ዬጺዴስ፤
2SA 22:2 «ጎዳይ ታስ ዛላ፥ ታስ ሚጻኔ ታና ኣሺዛዴ።
2SA 22:3 ታ ጾሳይ ታ ጌሜቲዛ ዛላ፥ ታስ ጎንዳሌኔ ኣቶቴꬃ ካጬ፤ ኢዚ ታስ ሚኖ ሚጻ፤ ታስ ዜምፖኔ ታና ኣሺዛዴ፤ ኔ ታና ማካላንቻታፔ ኣሻሳ።
2SA 22:4 ጋላታይ ቤሲዛ ጎዳ ታ ጼይጋይስ፤ ታኒ ታ ሞርኬታፔካ ኣታይስ።
2SA 22:5 «ሃይቆ ዳምባላይ ታና ጊዶꬂዴስ፤ ꬋይሲዛ ዲኦይ ታና ሚቲዴስ።
2SA 22:6 ሲኦሌ ዎዶሮይ ታ ቦላ ጻጼቲዴስ፤ ሃይቆ ዎጺማዴይ ታስ ዋጼቲዴስ።
2SA 22:7 ታ ጬጪዳ ዎዴ ጎዳ ጼይጋዲስ፤ ታ ጾሳኮ ዋሳዲስ። ኢዚ ባ ኬꬃን ዲሼ ታ ጬንጉርሳ ሲዪዴስ፤ ታ ዋሶይ ኢዛ ሃይꬃን ጌሊዴስ።
2SA 22:8 «ኢዚ ሃንቄቲዳ ጊሻስ ቢታያ ኮኮራዱሲኔ ሺሮታዱስ፤ ሳሎታ ዮቺ ዛኢዴሲኔ ቃጺዴስ።
2SA 22:9 ኢዛ ሲꬌፔ ሃንቆ ጩዋይ ጩዋቲዴስ፤ ኢዛ ዶናፔ ጹጊዛ ታማይ ኤጺዴስ፤ ታማ ቦንቆይካ ኬዚዴስ።
2SA 22:10 ሳሎታ ዳኪ ዎꬊዴስ፤ ኢዛ ቶሆ ጋርሳን ꬊፒ ጊዳ ሻራይ ዴስ።
2SA 22:11 ኢዚ ኪሩቤ ቦላ ኡቲዲ ፒራꬊዴስ፤ ጫርኮ ቄፌ ቦላ ኡቲዲ ፑዴ ፓሊዴስ።
2SA 22:12 ꬉማይ ኢዛ ጊዶꬂዴስ፤ ꬊፒ ጊዳ ኢራ ሻራይ ኢዛ ጌንꬂዴስ።
2SA 22:13 ኢዛ ሲንꬃን ዲዛ ፖኦዛፔ ዋዋጪ ጊዛ ዎልቃንꬂ ኬዚዴስ።
2SA 22:14 ጎዳይ ሳሎታፔ ጉሚዴስ፤ ኡባፌ ꬎቃ ጾሳ ጬንጉርስ ሲሲዴስ።
2SA 22:15 ባ ዪሻ ዱኪዲ ባ ሞርኬታ ላሊዴስ፤ ዎልቃንꬅ ዬዲዲ ኢስታ ሺሮሲዴስ።
2SA 22:16 ጎዳ ሴራፔኔ ኢዛ ሲꬌፔ ኬዚዛ ሃንቆ ጩዋፔ ዴንዲዳይሳን፥ ኣባ ጊዶን ዲዛ ዙሌቲ ቤቲዳ፤ ሳኣ ዮቻቲ ቆንጪዳ።
2SA 22:17 «ቦላፌ ባ ኩሼ ዬዲዲ ታና ኦይኪዴስ፤ ጪማ ሃꬃታ ጊዶፌካ ታና ኬሲዴስ።
2SA 22:18 ሚኖ ሞርኬታፔ፥ ታኒ ኢስታራ ኤቄታና ዳንዳዮንታ ባሊጋራታፔ ታና ኣሺዴስ።
2SA 22:19 ታ ሜቶቲዳ ጋላስ ታ ቦላ ዪዳ፤ ጊዶ ኣቲን ጎዳይ ታና ካፊዴስ።
2SA 22:20 ኢዚ ታና ኣኮሶ ኬሲዴስ፤ ታናን ኡፋዬቲዳ ጊሻስ ኢዚ ኢስታ ኣሺዴስ።
2SA 22:21 «ጎዳይ ታስ ታ ጺሎቴꬃ ማላ ኦꬄስ፤ ታ ጺሎቴꬃ ማላ ታስ ኩሼ ዛሪዴስ።
2SA 22:22 ጎዳ ኦጌ ታ ናጊዳ ጊሻስ ታኒ ጾሳፌ ሼርኢ ጋዳ ኢታ ኦꬃቤኬ።
2SA 22:23 ኢዛ ዎጋ ኡባይ ታ ሲንꬃን ዴስ፤ ኢዛ ማራፔካ ሃራሶ ሲማቤኬ።
2SA 22:24 ኢዛ ሲንꬃን ቦሬይ ባይንዳ ዴኣዲስ፤ ታናካ ናጋራፔ ናጋዲስ።
2SA 22:25 ጎዳይ ታ ጺሎቴꬃ ማላ፥ ኢዛ ሲንꬃን ዲዛ ጌሻቴꬃ ማላ ታስ ኩሼ ዛሪዴስ።
2SA 22:26 «ኣማኔቲዳይታስ ኔካ ኣማኔቲዳይሳ፥ ሱሬታስ ኔኒ ሱሬ ጊዲዳይሳ ቤሳሳ።
2SA 22:27 ጌሻታስ ኔኒ ጌሽ ጊዲዳይሳ፥ ማካላ ኣሳስ ኔኒ ማካላ ጊዲዳይሳ ቤሳሳ።
2SA 22:28 ኔኒ ቆሄቲዳ ዴራ ኣሻሳ፤ ጊዶ ኣቲን ኔ ኣይፌይ ካዉሻናስ ኦቶራንቻታ ጼሌስ።
2SA 22:29 ኣቤት ጎዳዉ! ኔኒ ታስ ጾምፔ፤ ጎዳይ ታ ꬉማ ፖኢሴስ።
2SA 22:30 ኔ ማዶን ሞርኬታ ኦላ ሲንꬅ ሱጋ ሱጋ ባና፤ ታኒ ታ ጾሳ ዎልቃን ጊምቤዛ ቦላራ ጻላይስ።
2SA 22:31 «ጾሳ ኦጌይ ኩሜꬃ፤ ጎዳ ቃላይ ሙሩታ፤ ኢዛን ኣማኔቲዳይታ ኡባስ ኢዚ ጎንዳሌ።
2SA 22:32 ጎዳፔ ኣቲን ሃራ ጾሲ ኦኔ? ኑ ጾሳፌ ኣቲን ዛላይ ኦኔ?
2SA 22:33 ታስ ዎልቃ ኢሚዛይሲ፥ ታ ኦጌካ ሱሪሲዛይሲ ኢዚ ታ ጾሳ።
2SA 22:34 ታ ቶሆታ ጌኔሳ ቶሆ ማላ ፒላቲሴስ፤ ꬎቃሶሆታን ታና ሚንꬂ ኤሴስ።
2SA 22:35 ታ ኩሼታ ኦላ ታማርሴስ፤ ታ ቄሴቲ ጻርቂማላ ዎንዳፌ ዚንቄቴስ።
2SA 22:36 ኔ ኣቶቴꬃ ጎንዳሌ ታስ ኢማዳሳ፤ ኔ ካፎይ ታና ጊታሲዴስ።
2SA 22:37 ታ ታንጎ ኣሳዳሳ፤ ታ ቶሆቲካ ꬉጴቲቤቴና።
2SA 22:38 «ታ ሞርኬታ ዬዴꬃ ꬋይሳዲስ፤ ኢስቲ ዲፒ ጋናሼ ጋካናስ ጉዬ ጋቤኬ።
2SA 22:39 ሙሌራ ታ ኢስታ ꬋይሳዲስ፤ ሲሚዲካ ኤቃናስ ዳንዳይቤቴና፤ ታ ቶሆ ጋርሳንካ ኩንዲዳ።
2SA 22:40 ኦላስ ታስ ዎልቃ ኢማዳሳ፤ ታናራ ኤቄቲዛይታ ታ ቶሆ ጋርሳን ኔ ጉልባቲሳዳሳ።
2SA 22:41 ታ ሞርኬቲ ጉዬ ሲሚ ባቃታና ማላ ኦꬃዳሳ፤ ታና ኢጺዛይታ ꬋይሳዳሳ።
2SA 22:42 ኢስቲ ማዶ ዴማናስ ዋሲዳ፤ ጊዶ ኣቲን ኢስታ ማዲዳይ ዴና፤ ኢስቲ ጎዳኮ ዋሲዳ፤ ጊዶ ኣቲን ኢዚ ኢስታስ ዛሪቤና።
2SA 22:43 ጉዱላ ማላ ኢስታ ሊቂሳ ጋጫዲስ፤ ኦጌን ዲዛ ኡርቃ ማላ ኢስታ ጊንዳዲሲኔ ዬꬌታዲስ።
2SA 22:44 «ታ ዴሬይ ቆፒዳ ዳፋፔ ታና ኣሻዳሳ፤ ካዎቴꬃታስ ታና ሁኤ ሂስታዳሳ። ታ ኤሮንታ ኣሳይ ታስ ሃሬቲዴስ።
2SA 22:45 ኣላጋቲ ታና ሾባናስ ዪዳ፤ ኢስቲ ታና ሲዪዳ ማላ ታስ ኣዛዜቴቴስ።
2SA 22:46 ኣላጋቲ ባቢዳ፤ ባንታ ሚጻፔ ኮኮሪሼ ዪዳ።
2SA 22:47 «ጎዳይ ዴኦ ጾሳ፤ ታ ዛላይ ኢዚ ኣንጄቶ፤ ታ ኣቶቴꬃ ዛላይ ታ ጾሳይ ꬎቁ ꬎቁ ጎ።
2SA 22:48 ታ ጊሻስ ሃሎ ኬሲዛ ጾሳይ፥ ካዎቴꬃታ ታስ ሃሪሲዛይ ኢዛ።
2SA 22:49 ኢዚ ታ ሞርኬታ ኩሼፔ ታና ኬሴስ፤ ታ ሞርኬታፔ ታና ꬎቁ ꬎቁ ሂስታዳሳ፤ ሜንጼ ኢታታፔ ታና ኣሻዳሳ።
2SA 22:50 ኣቤት ታ ጎዳዉ! ካዎቴꬃታ ጊዶን ታ ኔና ጋላታና፤ ኔ ሱንꬃስ ጋላታ ማዛሙሬ ታ ዬጻና።
2SA 22:51 ኢዚ ካዎዛስ ጊታ ጾኖ ኢሜስ፤ ባ ቲይዳ ዳዊቴሲኔ ኢዛ ዜሬꬃስ፥ ባ ሜርና ኪያቴꬅ ቤሴስ።»
2SA 23:1 ዳዊቲ ዉርሴꬃን ሃሳይዳ ቃላይ ሃይሳፌ ካሊዛይሳ፤ «ያቆቤ ጾሳን ቲዬቲዳይሲ፥ ኡባፌ ꬎቃ ጾሳይ ꬎቁ ꬎቁ ሂስቲዳ ኣሲ፥ ኢስራኤሌን ዶሴቲዳ ዬꬃንቻይ፥ ኢሴዬ ና ዳዊቴ ቲንቢቴ ቃላይ ሃይሳ፤
2SA 23:2 «ጎዳ ኣያናይ ታ ባጋራ ሃሳይዴስ፤ ኢዛ ቃላይ ታ ዶናን ዴስ።
2SA 23:3 ኢስራኤሌ ጾሲ ሃሳይዴስ፤ ኢስራኤሌ ዛላይ ታስ፥ ‹ኣሳ ጺሎቴꬃን ሃሪዛይ፥ ጾሳ ያሻቴꬃን ኣይሲዛይ፥
2SA 23:4 ኢዚ ሻራይ ባይንዳሶን፥ ማላዶ ጻልቄይ ኬዚዛ ዎዴ ዲዛ ፖኦ ማላ፤ ኢዚ ቢታ ቦላ ማታ ፑርጪሲዛ ጻልቄ ማላ፥ ኢራይ ቡኪ ኣꬊሺን ኬኢዛ ኣዋ ማላ› ጊዴስ።
2SA 23:5 «ታ ኬꬂ ጾሳ ማታን ሊኬ ጊዴኔ? ኡባ ሚሽ ጊግሲዲኔ ናጊዲ፥ ታናራ ሜርና ጫቆ ቃላ ጌሊዳይ ኢዛ ጊዴኔ? ታ ኣቶቴꬃ ፖሎ ጋꬃናይ ታ ኣሞ ኡባ ታስ ኢማናይ ኢዛ ጊዴኔ?
2SA 23:6 ጊዶ ኣቲን ኢታ ኣሳቲ ኡባይ፥ ኩሼን ሺሻና ዳንዳዬቶንታ ኣጉንꬃ ማላ ዎራ ዎꬋና።
2SA 23:7 ኣጉንꬅ ቦቺዛ ኡባስ፥ ቢራታ ዎይኮ ቶራ ቶማ ኮሼስ፤ ኢስቲ ባ ዲዛሶን ሙሌራ ታማን ጹጌታና።»
2SA 23:8 ዳዊቴስ ኤሬቲዳ ቃራ ኣሳታ ሱንꬂ ሃይሳፌ ካሊዛይሳ፤ ኮይሮይሲ ታሂኪሞኔ ዴሬ ኣስ ዮሼቢ-ባሼቤቴ ጊዲሺን ኢዚ ሄꬑ ሃላቃታስ ሃላቃ፤ ኢዚካ ኢሲ ኦላን ባ ቶራ ጾንጊዲ 800 ኣስ ዎꬊዳ ቃራ።
2SA 23:9 ናምኣንꬆዚ ኣሂሆሄ ዴሬ ኣስ ዶዴ ና ኤልኤዜሬ፤ ኦሌታናስ ኢሲ ቦላ ሺቂዳ ፊሊስጼሜ ኣሳይ ኤቄቲዛ ዎዴ ኢስራኤሌ ኣሳይ ባቃቲዴስ፤ ዳዊቴራ ዲዛ ሄꬑ ቃራታ ጋርሳፌ ኢሶይ ኢዛ።
2SA 23:10 ኢዚ ጊዲኮ ባ ኤቂዳሶ ዬዲቤና፤ ኢዛ ኩሼይ ኣርጋጫናሼኔ ማሻራ ኢሲፌ ኦይኬታናሼ ጋካናስ ፊሊስጼሜታ ኦሊዴስ፤ ሄ ጋላስ ጎዳይ ኢዛስ ጊታ ጾኖ ኢሚዴስ። ባቃቲ ቢዳ ኦላንቻቲ ሃይቂዳ ኣሳፔ ኦላ ሚሺኔ ማይኦ ጻላ ቃራታናስ ኤሌኤዜሬኮ ጉዬ ሲሚዳ።
2SA 23:11 ሄꬓንꬆዚ ሃራሬ ዴሬ ኣስ ኣጌ ና ሻማ፤ ፊሊስጼሜቲ ሌሃን ኩሜꬅ ሚሲራይ ዜሬቲዳ ጋዴን ኢስቲ ኢሲ ቦላ ሺቂ ዲሺን ኢስራኤሌ ኦላንቻቲ ፊሊስጼሜታ ሲንꬃፌ ባቃቲዳ።
2SA 23:12 ሻማይ ጊዲኮ ባ ኤቂዳሶ ዬዲቤና፤ ሄ ኦላ ኤቄቲዲ ፊሊስጼሜታ ዎꬊዴስ፤ ሄ ጋላስ ጎዳይ ጊታ ጾኖ ኢሚዴስ።
2SA 23:13 ካꬃ ሺሾ ዎዴ ፊሊስጼሜ ኦላንቻቲ ኤራፋይሜ ዙሌን ዱንካኒ ኡቲዳሼ ሄꬑ ታሙ ሃላቃታፔ ሄꬓቲ ዳዊቲ ዲዛሶ ኣዱላሜ ጎንጎሎ ዪዳ።
2SA 23:14 ሄ ዎዴ ዳዊቲ ሚጻ ጊዶን ዴስ፤ ፊሊስጼሜ ኦላንቻቲ ቤቴሊሄሜን ዴቴስ።
2SA 23:15 ዳዊቲ ላሞቲዲ፥ «ቤቴሊሄሜ ፔንጌ ኣቻን ዲዛ ኦላ ሃꬃፌ ታስ ኦኔ ኤሃናይ!» ጊዴስ።
2SA 23:16 ሄሳ ጊሻስ ኤሬቲዳ ኦላ ቃራ ሄꬓቲ ፊሊስጼሜ ኦላንቻታ ጊዶራ ካንꬂ ቢዲ ቤቴሊሄሜ ፔንጌ ኣቻን ዲዛ ሃꬃ ኦላፌ ዱቂ ዳዊቴስ ኤሂዳ፤ ኢዚ ጊዲኮ ጎዳ ሲንꬃን ያርሾ ሂስቲ ጉሲዴስ ኣቲን ኡዪቤና።
2SA 23:17 «ኣቤት ጎዳዉ! ሃይሳ ማላ ኦሶ ታ ዎስታ ኦꬆ? ሃይሲ ታፔ ሃኮ! ሃይሲ ባንታ ሼምፖ ቦላ ፒርዲዳ ኣሳታ ሱꬅ ዴኔ?» ጊዲ ዳዊቲ ኡያና ኮዪቤና፤ ሄኮ ኤሬቲዳ ሄꬑ ኦላ ቃራቲ ኦꬂዳ ጎባቴꬃ ኦሶይ ሄሳ።
2SA 23:18 ጹሪያ ና ኢዮኣቤ ኢሻ ኣቢሳዬይ ሄꬑ ኤሬቲዳ ኦላ ቃራታስ ሃላቃ፤ ሄꬑ ጼቱ ኣሳ ቦላ ባ ቶራ ጾንጊዲ ዎꬊዳኔ ሃ ሄꬑ ቃራታ ማላ ኤሬቲዳ ጎባ ኣሳ።
2SA 23:19 ኣቢሳዬይ ሄꬓታፔ ቦላራ ኬሂ ኤሬቲዳ ኣስ ጊዴኔ? ኢዚ ኢስታፌ ጊዶንታ ኣጊኮካ ኢዚ ኢስታስ ሃላቃ።
2SA 23:20 ሃራ ኤሬቲዳ ቃራይ ቃብጺኤሌ ዴሬ ኣስ ዮዳሄ ና ባናያይ ጊታ ኤሬቲዳ ኦሶ ኦꬂዴስ። ኢዚካ ናምኡ ኤሬቲዳ ሞኣቤ ኣሳታ ዎꬊዴስ፤ ቃሴካ ሻቺ ቡኪዳ ጋላስ ኦላ ጊዶ ጌሊዲ ጋሞ ዎꬊዴስ።
2SA 23:21 ሄሳꬆካ ኢሲ ጊታ ጊብጼ ኣስ ዎꬊዴስ፤ ሄ ጊብጼ ኣዴዚ ባ ኩሼን ቶራ ኦይኪዴስ፤ ጊዶ ኣቲን ባናያይ ኢዛራ ኦሌታናስ ጉፌ ኦይኪዲ ኢዛኮ ቢዴስ፤ ጊብጼ ኣዴዛ ኩሼፔ ኢዛ ቶራ ዎꬂ ኤኪዲ ኢዛ ቶራን ኢዛ ዎꬊዴስ።
2SA 23:22 ዮዳሄ ና ባናያ ጎባቴꬂ ሄሳ፤ ኢዚካ ኤሬቲዳ ሄꬑ ቃራ ኣሳታ ማላ ኤሬቲዳ ጎባ ኣሳ።
2SA 23:23 ኢዚ ሄ ሄꬑ ታሙ ኣሳታፔ ኣꬊ ቦንቼቲዳዴ፤ ጊዶ ኣቲን ኤሬቲዳ ሄꬑ ቃራ ኣሳታ ማላ ሳቤቴና። ዳዊቲ ባናያ ባ ቦንቾ ዛቤታ ቦላ ሹሚዴስ።
2SA 23:24 ሄ ሄꬑ ታማታፔ ባጋይታ ሱንꬂ ሃይሳፌ ካሊዛይሳ። ኢዮኣቤ ኢሻ ኣሳሄሌ፥ ቤቴሊሄሜ ዴሬ ኣስ ዶዴ ና ኤልያኔ፥
2SA 23:25 ሃራሬ ዴሬ ኣስ ሻማሃ፥ ሃራሬ ዴሬ ኣስ ኤሊቃ፥
2SA 23:26 ፓሊጼ ዴሬ ኣስ ሄሌጼ፥ ቴቁሄ ዴሬ ኣስ ኢቄሻ ና ኢራ፥
2SA 23:27 ኣናቶቴ ዴሬ ኣስ ኣቢኤዜሬ፥ ሁሼ ዴሬ ኣስ ሜቡናዬ፥
2SA 23:28 ኣሂሆሄ ዴሬ ኣስ ጻልሞኔ፥ ናጾፌ ዴሬ ኣስ ማሂራዬ፥
2SA 23:29 ናጾፌ ዴሬ ኣስ ባኣና ና ሄሌቤ፥ ቢኒያሜ ባጋፌ ጊቢኣ ዴሬ ኣስ ኤሪባዬ ና ኢታዬ፥
2SA 23:30 ፒራቶኔ ዴሬ ኣስ ባናያ፥ ጋኣሼ ዙሌ ኣስ ሂዳዬ፥
2SA 23:31 ኣራቤ ዴሬ ኣስ ኣቢ-ኤልቦኔ፥ ባርሁሜ ዴሬ ኣስ ኣዚሞቴ፥
2SA 23:32 ሻልቦኔ ዴሬ ኣስ ኤሊያሂቤ፥ ያሼኔ ናይታ፥ ዮናታኔ፥
2SA 23:33 ሃራሬ ዴሬ ኣስ ሻማሃ ና፥ ሃራሬ ዴሬ ኣስ ሻራሬ ና ኣሂኣሜ፥
2SA 23:34 ማኢካቴ ዴሬ ኣስ ኣሃሲባ ና ኤልፋሌጼ፥ ጊሎ ዴሬ ኣስ ኣክጾፌሌ ና ኤልኣሜ፥
2SA 23:35 ቃርሜሎሴ ዴሬ ኣስ ሄጺሮ፥ ኣራቤ ዴሬ ኣስ ፓራዬ፥
2SA 23:36 ጾባ ዴሬ ኣስ ናታኔ ና ዪጊኣሌ፥ ጋዴ ዴሬ ኣስ ባኔ፥
2SA 23:37 ኣሞኔ ዴሬ ኣስ ዛላቃ፥ ጹሪያ ና ኢዮኣቤስ ጎንዳሌ ኦይኪዛ ቢኤሮቴ ዴሬ ኣስ ናሂራዬ፥
2SA 23:38 ያቲሬ ዴሬ ኣስ ኢራ፥ ያቲሬ ዴሬ ኣስ ጋሬቤ፥
2SA 23:39 ሄሳꬆካ ሂቴ ዴሬ ኣስ ኦሪዮ፥ ኢስቲ ኢሲ ቦላ ሄꬑ ታማኔ ላፑና።
2SA 24:1 ቃሴካ ጎዳይ ኢስራኤሌ ኣሳ ቦላ ኬሂ ሃንቄቲዴስ፤ ኢስታ ቦላ ዳዊቴ ዴንꬄꬂዲ፥ «ባ! ኢስራኤሌ ኣሳኔ ዩሁዳ ኣሳ ቆዳ!» ጊዴስ።
2SA 24:2 ሄሳ ጊሻስ ካዎዚ ኢዮኣቤኔ ኢዛራ ዲዛ ኦላ ኣሳ ኣዛዚዛይታ፥ «ዳኔፔ ቢዲ ቤርሳቤሄ ጋካናስ ዲዛ ኢስራኤሌ ቆሞታ ኡባታኮ ቢቴ፤ ኢስታ ቆዳይ ኣይ ኬና ጊዲዳኮ ኑ ኤራና ማላ ኦላ ኣሳታ ማዝጋቢቴ» ጊዴስ።
2SA 24:3 ኢዮኣቤይ ካዎዛስ፥ «ጎዳ ኔ ጾሳይ ኦላ ኣሳ ጼቱ ኩሼ ዳሪሶ፤ ታ ጎዳ ካዎ ኣይፌይ ሄሳ ጋኪ ቤዮ፤ ጊዶ ኣቲን ታ ጎዳ ካዎይ ሄሳꬆ ኦꬃናስ ኣይስ ኮዪዴ?» ጊዴስ።
2SA 24:4 ጊዲኮካ ካዎዛ ቃላይ ኢዮኣቤኔ ኦላ ኣሳ ኣዛዚዛይታ ጾኒዳ ጊሻስ ኢስራኤሌ ኦላ ኣሳ ማዝጋባናስ ኢዛ ሲንꬃፌ ኬዚ ቢዳ።
2SA 24:5 ኢስቲ ዮርዳኖሴ ሻፋ ፒኒዳፔ ጉዬ ሾባዛ ጊዶን ዲዛ ካታማፔ ዱጌሃ ባጋራ ዲዛ ኣሮኤሬ ማታን ዱንካኒዳ፤ ሄፔካ ጋዴ ባጋራ ኣꬊ ኢያዜሬ ቢዳ።
2SA 24:6 ሄፔ ጋላኣዴኔ ሂቴ ዴሬን ዲዛ ቃዴሴ ኣሳኮ ቢዳ፤ ቃሴ ዳኒ-ጃኔራ ዩዪዲ ሲዶና ቢዳ።
2SA 24:7 ቃሴ ጺሮሴ ሚጻ፥ ሂዌታ ካታማታኔ ካናኔታ ካታማታ፥ ዉርሴꬃን ዩሁዳፔ ዱጌሃ ባጋራ ዲዛ ቤርሳቤሄ ቢዳ።
2SA 24:8 ቢታዮ ኡዱፉን ኣጊናኔ ናምኡ ታሙ ጋላስ ኡባ ዩዪ ጼሊዳፔ ጉዬ ዬሩሳላሜ ሲሚዳ።
2SA 24:9 ኢዮኣቤይ ኦላ ኣሳ ቆዳ ኡባ ካዎዛ ኤሪሲዴስ፤ ኢስራኤሌን 800,000 ዩሁዳን 500,000 ማሻ ሾዲ ኦሌታና ዳንዳይዛቲ ቤቲዳ።
2SA 24:10 ዳዊቲ ኦላንቻታ ቆዲዳፔ ጉዬ ባ ዎዚናራ ሞꬌቲዲ፥ «ታ ጊታ ናጋራ ኦꬃዲስ፤ ሃኢካ ጎዳዉ! ታና ኔ ኣይሌዛ ኔ ማራና ማላ ታ ኔና ዎሳይስ፤ ሃኢካ ጎዳዉ ታኒ ኔ ኣይሌይ ጊታ ባላ ኦሶ ኦꬂዳ ጊሻስ ማራርኪ?» ጊዴስ።
2SA 24:11 ዎንቴꬃ ጋላስ ዳዊቲ ዴንዳናፔ ሲንꬃን ጎዳ ቃላይ ዳዊቴስ ኣጁታ ዮቲዛ ናቤይ ጋዴኮ ዪዲ፥
2SA 24:12 «ባዳ ዳዊቴስ፥ ‹ጎዳይ ኔና ኢስታፌ ኢሲኒዮ ዶራና ማላ ሄꬑ ዮኦታ ሺሻዲስ፤ ታ ኔ ቦላ ኦꬃና ማላ ኢሲኒዮ ዶራ› ጊዴስ» ጋዳ ዮታ።
2SA 24:13 ጋዴይ ዳዊቴኮ ቢዲ፥ «ኔ ቢታ ቦላ ሄꬑ ላይꬃ ኮሻይ ዮ ጋይ? ዎይኮ ኔ ሞርኬቲ ኔና ሄꬑ ኣጊና ጋካናስ ጎዲን ባቃታና ኮያይ? ዎይኮ ኔ ቢታ ቦላ ሄꬑ ጋላስ ኩሜꬅ ኢታ ሃርጌይ ዮ ጋይ? ሄሳ ጊሻስ ታና ኪቲዳይሳስ ታ ኣይ ዛሮ ኢማናኮ ቆፓ» ጊዴስ።
2SA 24:14 ዳዊቲ ጋዴስ፥ «ታኒ ኬሃ ጬጫዲስ፤ ኢዛ ማሮቴꬃይ ጊታ ጊዲዳ ጊሻስ ጎዳ ኩሼን ኑ ኩንዳና ኣቲን ታ ኣሳ ኩሼን ኩንዲኬ» ጊዴስ።
2SA 24:15 ሄሳ ጊሻስ ጎዳይ ሄ ጋላሳ ማላዶፔ ዶሚዲ ባ ባሪዳ ጋላስ ጋካናስ ኢስራኤሌ ቦላ ኢታ ሃርጌ ዬዲዴስ፤ ሄሳ ጋሶን ዳኔፔ ቢዲ ቤርሳቤሄ ጋካናስ 70,000 ኣሲ ዉሪዴስ።
2SA 24:16 ጎዳ ኪታንቻይ ዬሩሳላሜ ዲፒ ሂስቲዲ ꬋይሳናስ ባ ኩሼ ዬዲን ኣሳ ቦላ ጋኪዳ ቆሆይ ጎዳ ቃꬌꬂዴስ፤ ሂስቲን ዴሬዛ ዉርሲዛ ኪታንቻዛ፥ «ጊዳና! ኣጋ!» ጊዴስ። ሄ ዎዴ ጎዳ ኪታንቻይ ያቡሴ ዴሬ ኣስ ኦርና ባሌ ኣቻን ኤቂ ዴስ።
2SA 24:17 ዳዊቲ ዴሬዛ ቦላ ቦሻ ጋꬂዛ ኪታንቻዛ ቤኢዲ ጎዳስ፥ «ናጋራ ኦꬂዳይ ታና፥ ባሌቲዳይ ታና፤ ሃይቲ ጊዲኮ ዶርሳታ፤ ኢስቲ ኣይ ሞሪዶ? ኔ ኩሼይ ታ ቦላኔ ታ ኬꬃ ቦላ ጊዶ» ጊዴስ።
2SA 24:18 ሄ ጋላስ ጋዴይ ዳዊቴኮ ቢዲ፥ «ፑዴ ያቡሴ ዴሬ ኣስ ኦርና ባሌ ኬዛዳ ጎዳስ ያርሾ ያርሻናሶ ጊጊሳ» ጊዴስ።
2SA 24:19 ሄሳ ጊሻስ ዳዊቲ ጎዳይ ጋዴ ባጋራ ኢዛስ ኣዛዚዳ ማላ ኬዚዴስ።
2SA 24:20 ኦርናይ ዱጌ ሲሚ ጼሊሺን ካዎዚኔ ኢዛ ዴሬዚ ባኮ ዪዛይሳ ቤኢዴስ፤ ኢዚ ካሬ ኬዚዲ ኢዛስ ቢታ ቦላ ሆኪ ዚጊዴስ።
2SA 24:21 ኦርናይካ፥ «ካዎ! ታ ጎዳዉ ታኮ ኢንቴ ኣይሌዛኮ ኣይስ ዪዴቲ?» ጊዴስ። ዳዊቲ ዛሪዲ፥ «ዴራ ቦላ ያና ቦሻይ ሲማና ማላ ጎዳስ ያርሾ ያርሺዛሶ ጊጊሳናስ ኔ ባሌዛ ሻማና ያዲስ» ጊዴስ።
2SA 24:22 ኦርናይካ ዳዊቴስ፥ «ካዎይ! ታ ጎዳይ ባና ሎኢዳይሳ ኤኪዲ ያርሾ ሺሾ፤ ጹጌቲዛ ያርሾስ ቦራቲ ዴቴስ፤ ኤሶ ሚꬃስ ካꬅ ቡኪዛ ሎዳኔ ቦራ ቃምባራይ ዴስ።
2SA 24:23 ካዎ! ታኒ ኦርናይ ሃይሳ ኡባ ካዎስ ኢማይስ» ጊዴስ፤ ቃሴካ ኦርናይ፥ «ጎዳ ኔ ጾሳይ ኔኮ ጼሎ» ጊዴስ።
2SA 24:24 ካዎዚ ጊዲኮ ኦርናስ፥ «ሄሳꬆ ሃኖፖ፤ ዋጋዛ ታ ኔስ ቃንጻና ቤሴስ። ጎዳ ታ ጾሳስ ሚሼ ቃንጾንታ ያርሾ ሺሺኬ» ጊዴስ። ሄሳ ጊሻስ ዳዊቲ ባሌዛኔ ቦራታ 50 ሳቂሌን ሻሚዴስ።
2SA 24:25 ሄን ዳዊቲ ያርሾ ያርሺዛሶ ጊግሲዴስ፤ ጹጌቲዛ ያርሾኔ ኢሲፌቴꬃ ያርሾ ያርሺዴስ፤ ሄሳፌ ጉዬ ጎዳይ ቢታይ ጊሻስ ሺቂዳ ዎሳ ሲዪዴስ። ኢስራኤሌ ቦላ ዪዳ ቦሻዚ ሲሚዴስ።
1KI 1:1 ካዎ ዳዊቲ ኬሂ ጪሚዳ ጊሻስ ኢዛስ ኦꬂዛይቲ ኢዛ ሜጎፔ ኣሻናስ ማይኦ ኢዛ ቦላ ኮሪን ኣይኮካ ኢዛ ሆኣናስ ዳንዳይቤና።
1KI 1:2 ሄሳ ጊሻስ ኢዛስ ኦꬂዛይቲ፥ «ካዎ! ኔናራ ዴኣሼ ኔና ሎኤꬃ ናጋና ማላ ኢሲ ጌላኦ ኔስ ኮዪ ኤሂኖ? ኢዛ ኔናራ ኣቂኮ ኔና ሆኣና» ጊዳ።
1KI 1:3 ኢስራኤሌ ቢታ ኡባን ኮዪዲ ኣቢሻጎ ጌቴቲዛ ኢሲ ማላ ሎኦ ጌላኢዮ ሱኔሜ ካታማፔ ዴሚዲ ካዎዛስ ኤሂዳ።
1KI 1:4 ኢዛካ ኬሃ ማላ ሎኦ፤ ካዎዛራ ዳሼ ኢዛስ ኦꬃሼ ኢዛ ሎኤꬃ ኦይካዱስ፤ ጊዶ ኣቲን ኢዚ ኢዞ ኤኪቤና።
1KI 1:5 ሃጊቲ ና ኣዶኒያሲ፥ «ታ ካዎታና ኮያይስ» ጊ ዴንዲዴስ፤ ፓራ-ጋሬታኔ ፓራታ ቃሴካ ኢዛፔ ሲንꬄ ሲንꬄ ባናስ 50 ኣሳታ ጊግሲዴስ።
1KI 1:6 ኢዛ ኣዋይካ፥ «ኣይስ ሃይሳꬆ ኦꬃይ?» ጊ ሙሌካ ሴሪ ኤሬና። ኣዶኒያሲ ኬሂፔ ማላ ሎኦ ኣሳ፤ ኢዚ ኣቤሴሎሜስ ካሎ ኢሻ።
1KI 1:7 ኣዶኒያሲ ጹሪያ ና ኢዮኣቤራኔ ቄሴ ኣቢያታሬራ ሃ ዮኦዛ ዞሬቲዴስ፤ ኢስቲካ ኢዛ ማዳናስ ቆፋ ቃቺዳ።
1KI 1:8 ጊዶ ኣቲን ቄሴ ሳዶቄይ፥ ዮዳሄ ና ባናያይ፥ ናቤ ናታኔይ፥ ሺምኤይ፥ ኤራኤይኔ ዳዊቴ ናጊዛ ዛቤቲ ኢዛ ቆፋ ኤኪቤቴና።
1KI 1:9 ኢሲ ጋላስ ኣዶኒያሲ ኤን-ሮጌሌ ካታማ ማታን ዞሄሌቴ ዛላ ጌቴቲዛሶን ዶርሳታ፥ ቦራታኔ ኦሃላ ማራታ ያርሺዴስ። ካዎ ናይታ፥ ባ ኢሻታ ካዎ ሹሜ ጊዲዳ ዩሁዳ ኣሳታ ኡባ ጼይጊዴስ።
1KI 1:10 ጊዶ ኣቲን ናቤ ናታኔ፥ ባናያ፥ ካዎ ናጊዛ ዛቤታኔ ባ ኢሻ ሶሎሞኔ ጼይጊቤና።
1KI 1:11 ሄሳፌ ጉዬ ናታኔይ ሶሎሞኔ ኣዮ ቤርሳቤሆ፥ «ኑ ጎዳ ዳዊቲ ኤሮንታ ዲሺን ሃጊቲ ና ኣዶኒያሲ ካዎቲዳይሳ ኔ ሲያቤኪ?
1KI 1:12 ሃኢ ኔኒ ኔ ሼምፖኔ ኔ ናዛ ሶሎሞኔ ሼምፖ ዎስታ ኣሻናኮ ኣኔ ታ ኔና ዞራይስ።
1KI 1:13 ካዎ ዳዊቴኮ ባዳ፥ ‹ካዎ፥ ታ ጎዳዉ! ታስ ኔ ኣይሌይስ ኔ ና ሶሎሞኔይ ታፔ ጉዬን ካዎታና፤ ታ ኣራታንካ ኢዚ ኡታና ጋዳ ጫቃቤኪ? ሂስቲን ኣዶኒያሲ ዋኒ ካዎቲዴ?› ጋ ኦይቻ።
1KI 1:14 ኔኒ ካዎዛራ ሄን ሃሳያን ዲሺን ታ ጌላዳ ኔ ጊዳይሲ ቱሙ ጊዲዳይሳ ቆንጪሳና» ጊዴስ።
1KI 1:15 ሱኔሜ ካታማፔ ዪዳ ኣቢሻጋ ጪሚዳ ካዎዛ ሄሚዛ ኢልፒኔ ጊዶ ቤርሳቤሃ ካዎዛ ሃሳይሳናስ ጌላዱስ።
1KI 1:16 ቤርሳቤሃ ካዎዛ ሲንꬃን ዛቁላዳ ባ ኩሼ ዴንꬃዱስ፤ ቃሴካ ኢዛ ሲንꬃን ጉልባታዱስ። ካዎዚካ ኢዞ፥ «ኣይ ኮያይ?» ጊዲ ኦይቺዴስ።
1KI 1:17 ቤርሳቤሃ ኢዛስ፥ «ታ ጎዳዉ! ታስ ኔ ኣይሌይስ፥ ‹ታፔ ጉዬን ኔ ና ሶሎሞኔይ ካዎታና፤ ታ ኣራታንካ ኢዚ ኡታና› ጋዳ ጎዳን፥ ኔ ጾሳን ኔኒ ጫቃዳሳ።
1KI 1:18 ጊዶ ኣቲን ሃኢ ኣዶኒያሲ ካዎቲዴስ፤ ኔኒ ታ ጎዳይ ካዎይ ሄሳ ኤራካ።
1KI 1:19 ኢዚ ኬሂ ዳሮ ሜሄታ፥ ኦሃላ ማራታኔ ዶርሳታ ያርሺዴስ፤ ያርሺሼ ካዎ ናይታ ኡባ፥ ቄሴ ኣቢያታሬኔ ኦላ ጋዳዋ ኢዮኣቤ ጼይጊዴስ፤ ጊዶ ኣቲን ኔ ኣይሌዛ ሶሎሞኔ ጼይጊቤና።
1KI 1:20 ታ ጎዳዉ፥ ካዎ! ኔፔ ጉዬ ኔ ካዎቴꬃ ኣራታን ኦኒ ኡታናኮ ኤራናስ ኢስራኤሌ ኣሳ ኡባ ኣይፌይ ኔና ጼሊ ኡቲዴስ።
1KI 1:21 ሂስቶንታ ኣጊኮ ታ ጎዳ ካዎይ ሃይቂዲ ባ ኣዋታን ጋይቲዛ ዎዴ ታኒኔ ታ ና ሶሎሞኔይ ሞሮ ኦꬂዳ ኣሳ ማላ ቆዴታና» ጋዱስ።
1KI 1:22 ቤርሳቤሃ ቡሮ ካዎዛራ ሃሳያን ዲሺን ናቤ ናታኔይ ጋኪ ዎꬊዴስ።
1KI 1:23 ካዎዛስ፥ «ናቤ ናታኔይ ዪዴስ» ጊዲ ዮቲዳ፤ ኢዚካ ካዎዛ ሲንꬃን ጉፋኒዲ ባ ኩሼ ዴንꬂዴስ።
1KI 1:24 ሄሳፌ ጉዬ ናታኔይ፥ «ታ ጎዳ ካዎ! ኔፔ ጉዬ ኣዶኒያሲ ካዎታና ማላኔ ኔ ኣራታን ኡታና ማላ ኤሪሳዲ?
1KI 1:25 ሃች ኢዚ ዱጌ ቢዲ ኬሂ ዳሮ ሜሄታ፥ ኦሃላ ማራታኔ ዶርሳታ ያርሺሼ ካዎ ናይታ ኡባ፥ ኦላ ጋዳዋታኔ ቄሴ ኣቢያታሬ ጼይጊዴስ፤ ኢዚ ሃኢ ኢዛራ ሚሼኔ ኡዪሼ፥ ‹ካዎ ኣዶኒያሲ ሜርናስ ካዎቶ!› ጌꬃ ቦላ ዴቴስ።
1KI 1:26 ጊዶ ኣቲን ታና ኔ ኣይሌ፥ ቄሴ ሳዶቄ፥ ዮዳሄ ና ባናያኔ ኔ ኣይሌ ሶሎሞኔ ጼይጊቤና።
1KI 1:27 ታ ጎዳ ካዎ! ኔፔ ጉዬራ ኔ ካዎቴꬃ ኣራታን ኦኒ ኡታናኮ ኔ ኣይሌታ ኤሪሶንታ ዳሼ ሃይሳ ኣዶኒያሲ ካዎታና ማላ ኦꬂዳይ ኔኔ?» ጊዴስ።
1KI 1:28 ሂስቲን ካዎ ዳዊቲ፥ «ቤርሳቤሆ ታስ ጼይጊቴ» ጊዴስ፤ ኢዛካ ካዎዚ ዲዛሶ ጌላዳ ኢዛ ሲንꬃን ኤቃዱስ።
1KI 1:29 ሄ ዎዴ ካዎዚ ኢዚስ፥ «ታና ሜቶ ኡባፌ ኣሺዳ ዴኦ ጎዳይ ቤዪን!
1KI 1:30 ጎዳን፥ ኢስራኤሌ ጾሳን ታኒ ኔስ ጫቂዳ ጫቆዛ ቱሙ ሃች ፖላና፤ ታፔ ጉዬን ኔ ና ሶሎሞኔይ ካዎታና፤ ታ ካዎቴꬃ ኣራታን ኢዚ ኡታና» ጊ ጫቂዴስ።
1KI 1:31 ቤርሳቤሃ ካዎዛ ሲንꬃን ጉፋናዳ ባ ኩሼ ዴንꬃዱስ፤ «ታ ጎዳ፥ ካዎ ዳዊቲ ሜርናስ ካዎቶ!» ጋዱስ።
1KI 1:32 ሄሳፌ ጉዬ ካዎ ዳዊቲ፥ «ታስ ቄሴ ሳዶቄ፥ ናቤ ናታኔኔ ዮዳሄ ና ባናያ ጼይጊቴ» ጊዴስ፤ ሂስቲን ኢስቲ ካዎዛ ሲንꬅ ሺቂዳ።
1KI 1:33 ካዎዚ ኢስታስ፥ «ታ ኣይሌታ ኢንቴናራ ኤኪ ቢዲ ታ ና ሶሎሞኔ ታ ባቁሎ ቶጊሲዲ ዱጌ ጊዮኔ ኤፍቴ።
1KI 1:34 ሄን ቄሴ ሳዶቄይኔ ናቤ ናታኔይ ኢዛ ቲይዲ ኢስራኤሌ ኣሳ ቦላ ካዎꬄቶ፤ ሄሳፌ ጉዬ ዛዬ ፑኒዲ ኢንቴ ቃላ ꬎቁ ሂስቲዲ፥ ‹ካዎ ሶሎሞኔይ ሜርናስ ካዎቶ!› ጊቴ።
1KI 1:35 ሄሳፌ ጉዬ ኢንቴ ኢዛ ኣዣቢዲ ሃ ፑዴ ኬዚቴ፤ ኢዚ ዪዲ ታ ካዎቴꬃ ኣራታን ኡቶ፤ ኢዚ ታ ሶሆን ኡቲዲ ዴራ ኣይሶ፤ ታኒ ኢስራኤሌ ዴራ ቦላኔ ዩሁዳ ዴራ ቦላ ኢዛ ሹማዲስ» ጊዴስ።
1KI 1:36 ዮዳሄ ና ባናያይ ካዎዛስ ዛሪዲ፥ «ኣሚን! ታ ጎዳ ካዎዛ፥ ጎዳይ፥ ጾሳይ ሚንꬆ!
1KI 1:37 ጎዳይ፥ ታ ጎዳ ካዎዛራ ጊዲዳ ማላ ሶሎሞኔራካ ጊዶ፤ ኢዛ ካዎቴꬃ ኣራታ ታ ጎዳ ካዎ ዳዊቴ ኣራታፔካ ኣꬂዲ ጊታሶ» ጊዴስ።
1KI 1:38 ሄሳ ጊሻስ ቄሴ ሳዶቄይ፥ ናቤ ናታኔይ፥ ዮዳሄ ና ባናያይ፥ ኬሊቴቲኔ ፔሊቴቲ ሶሎሞኔ ካዎ ዳዊቴ ባቁሎ ቶጊሲዲ ዱጌ ጊዮኔ ኣዣቢ ኤፊዳ።
1KI 1:39 ቄሴ ሳዶቄይ ጋይቶቴꬃ ዱንካኔፔ ዛይቴ ካጬዛ ኤኪዲ ሶሎሞኔ ቲይዲ ካዎꬂዴስ፤ ሄሳፌ ጉዬ ዛዬ ፑኒዳ፤ ኡባ ኣሳይካ ባ ቃላ ꬎቁ ሂስቲዲ፥ «ካዎ ሶሎሞኔይ ሜርናስ ካዎቶ!» ጊዳ።
1KI 1:40 ኣሳይ ኡባይካ ኢዛ ኣዣቢዲ ፑዴ ቢዴስ፤ ኢስቲ ዲንኬ ፑኒ ፑኒ ካኢሼ ኬሂ ኡፋዬቲዳ፤ ኣሳ ሆምቦጬꬃን ቢታይ ቃጺዴስ።
1KI 1:41 ኣዶኒያሲኔ ኢዛራ ዲዛ ኢማꬃቲ ጊቢራ ሚ ዉርሲሼ ሄሳ ሲዪዳ፤ ኢዮኣቤይ ዲንኬዛ ጊሪሳ ሲዪዲ፥ «ሃይሲ ካታማን ሴቴቲዛ ጊሪሳይ ኣዜ?» ጊ ኦይቺዴስ።
1KI 1:42 ኢዚ ቡሮ ሃሳያን ዲሺን ቄሴ ኣቢያታሬ ና ዮናታኔይ ጋኪ ዎꬊዴስ። ሂስቲን ኣዶኒያሲ፥ «ኣኔ ሃ ጌላ፤ ኔ ማላ ኣማኔቲዳ ኣሲ ሎኦ ዎሬ ኤኪ ዮንታ ኣጌና» ጊዴስ።
1KI 1:43 ዮናታኔይካ ዛሪዲ፥ «ቺ፥ ዮኦይ ሙሌካ ሄሳ ማላ ጊዴና፤ ኑ ጎዳይ ካዎ ዳዊቲ ሶሎሞኔ ካዎꬂዴስ።
1KI 1:44 ኢዛ ኣዣባና ማላ ካዎይ ቄሴ ሳዶቄ፥ ናቤ ናታኔ፥ ዮዳሄ ና ባናያ፥ ኬሊቴታኔ ፔሊቴታ ኢዛራ ዬዲዴስ፤ ኢስቲ ኢዛ ካዋ ባቁሎ ቶጊሲዳ።
1KI 1:45 ቄሴ ሳዶቄይኔ ናቤ ናታኔይ፥ ጊዮኔን ኢዛ ቲይዲ ካዎꬂዳ፤ ሄፔ ኢስቲ ሆምቦጪሼ ፑዴ ቢዳ፤ ሄሳን ካታማይ ኮሹሜስ፤ ሃኢ ኢንቴ ሲዪዛ ኮሹንቻይ ሄሳ።
1KI 1:46 ሄሳፌ ቦላራካ ሶሎሞኔይ ካዎቴꬃ ኣራታን ኡቲዴስ።
1KI 1:47 ቃሴ ካዎ ሹሜቲ ኑ ጎዳ ካዎ ዳዊቴኮ ዪዲ፥ ‹ኔ ጾሳይ ሶሎሞኔ ሱንꬃ ኔ ሱንꬃፌ ꬎቁ ሂስቶ! ኢዛ ካዎቴꬃ ኣራታካ ኔይሳፌ ኣꬌꬅ ሂስቶ!› ጊዲ ኣንጂዳ፤ ሂስቲን ካዎይ ባ ኣልጋን ዲሼ ሆኪ ጾሳስ ጎይኒሼ፥
1KI 1:48 ‹ታ ካዎቴꬃ ኣራታን ኡቲዲ ታ ሶሆን ካዎቲዛይሳ ታና ሃች ታ ኣይፌን ቤሲዳ ጎዳ ኢስራኤሌ ጾሳይ ጋላቴቶ!› ጊዴስ» ጊ ዮቲዴስ።
1KI 1:49 ሄሳ ሲዪዲ ኣዶኒያሲ ጼይጊዳ ኢማꬃቲ ኡባይ ዳጋሚ ዴንዲዲ ላሌቲዳ።
1KI 1:50 ኣዶኒያሲ ጊዲኮ ሶሎሞኔስ ያዪዲ ቢ ያርሺዛሶዛ ካጬታ ኦይኪዴስ።
1KI 1:51 ሄሳፌ ጉዬ ኣሳይ ሶሎሞኔስ፥ «ኣዶኒያሲ ካዎ ሶሎሞኔስ ያዪዲ ያርሺዛሶዛ ካጬታ ኦይኪዲ፥ ‹ካዎ ሶሎሞኔይ ታና ባ ኣይሌዛ ጊꬃ ማሻን ዎꬎንታ ማላ ታስ ሃች ጫቆ› ጌስ» ጊዲ ዮቲዳ።
1KI 1:52 ሶሎሞኔይ ዛሪዲ፥ «ኢዚ ባ ሄሜꬅ ሎኤꬂኮ ሃራይ ኣቶሺን ኢዛ ሁኤ ቢናናፔ ኢሲናካ ጋዴን ዎꬉኩ፤ ጊዶ ኣቲን ኢዛ ቦላ ኢታቴꬂ ቤቲኮ ኢዚ ሃይቃና» ጊዴስ።
1KI 1:53 ሄሳፌ ጉዬ ካዎ ሶሎሞኔይ ኣስ ኪቲን ኢስቲ ቢዲ ኢዛ ያርሾ ያርሺዛሶፔ ዱጌ ዎꬂዳ፤ ሂስቲን ኣዶኒያሲ ዪዲ ሶሎሞኔስ ዚጊዴስ፤ ሶሎሞኔይካ ኢዛ፥ «ጌዴ ኔሶ ባ» ጊዴስ።
1KI 2:1 ዳዊቲ ሃይቂዛ ዎዴይ ማቲን ባ ና ሶሎሞኔ ጼይጊዲ ኢዛስ ባሴ ባዚዴስ፤
1KI 2:2 ዳዊቲ፥ «ታኒ ሃይቃና ዎዴይ ማቲዴስ፤ ሄሳ ጊሻስ ሚና፤ ኣስ ጊዳ።
1KI 2:3 ጎዳ ኔ ጾሳ ኣዛዞ ናጋ፤ ኢዛ ኦጌታን ሄሜታ፤ ሙሴ ዎጋን ጻፌቲዳ ማላ ኢዛ ኣዋጃታ፥ ኣዛዞታ፥ ዎጋታኔ ማራታ ናጋ፤ ሂስቲኮ ኔኒ ኦꬂዛ ሚሽ ኡባይኔ ኔኒ ቢዛ ሶሆ ኡባይ ኔስ ኢንጄታና።
1KI 2:4 ጎዳይ ታስ፥ ‹ኔ ዜሬꬃቲ ባንታ ኦጌ ናጊኮ፥ ታ ሲንꬃን ባንታ ኩሜꬃ ዎዚናፔኔ ባንታ ኩሜꬃ ሼምፖፌ ኣማኔቲዲ ሄሜቲኮ ኔ ዜሬꬃፌ ኢስራኤሌ ካዎታ ኣራታን ኡቲዛ ኣስ ሙሌካ ꬋይሲኬ› ጊዳ ሂዶታ ቃላ ፖላና።
1KI 2:5 «ጹሪያ ና ኢዮኣቤይ ታ ቦላ ኦꬂዳይሳ ሄሳꬆካ ኢስራኤሌ ኦላ ጋዳዋታ ናምኣታ፥ ኔሬ ና ኣቢኔሬኔ ዮቶሬ ና ኣማሳ ቦላ ኦꬂዳይሳ ኔኒ ኔ ሁኤራ ኤራሳ፤ ኢስቲ ኦላ ዎዴ ዎꬊዳይሳስ ሃሎ ኬሳናስ ኦላይ ባይንዳ ሳሮ ዎዴ ኢዚ ኢስታ ዎꬊዲ ሄ ሱꬃን ባ ጼሳ ቃባቶኔ ባ ቶሆ ጫማ ቱኒሲዴስ።
1KI 2:6 ኦꬃና ቤሲዛይሳ ኣꬎ ኤራቴꬃን ኦꬃ፤ ኢዚ ጬጊዲ ሳሮ ዱፎን ጌሎንታ ማላ ኦꬃ።
1KI 2:7 «ታኒ ኔ ኢሻ ኣቤሴሎሜፔ ባቃቲዛ ዎዴ ኢስቲ ታስ ሚሌ ጊዲዳ ጊሻስ ጋላኣዴ ቢታን ዲዛ ባርዚሌ ናይታስ ሎኦ ኦꬃ፤ ኢስቲ ኔ ማዳን ሚዛ ኣሳራ ኢሲፌ ሜቶ።
1KI 2:8 «ታኒ ማሃናይሜ ቢዳ ዎዴ ታና ኢታ ቃንጌꬅ ቃንጊዳ ቢኒያሜ ቢታን ባሂሪሜ ካታማፔ ዪዳ ጌራ ና ሺምኤይ ኔናራ ዲዛይሳ ሃሳኣ፤ ኢዚ ታና ሞካናስ ዮርዳኖሴ ሻፋ ዱጌ ዪዳ ዎዴ፥ ‹ታኒ ኔና ዎꬊኬ› ጋዳ ኢዛስ ጎዳን ጫቃዲስ።
1KI 2:9 ጊዶ ኣቲን ሃኢ ኔኒ ኢዛ ጺሎ ኣሳ ማላ ቆዶፓ፤ ኔስ ኣꬎ ኤራቴꬂ ዲዛ ጊሻስ ኦꬃናስ ቤሲዛ ዮኦታ ኔ ኤራሳ፤ ኢዛ ፑሉንꬃ ሱꬃራ ዱጌ ዱፎን ጌልꬃ» ጊዴስ።
1KI 2:10 ሄሳፌ ጉዬ ዳዊቲ ሃይቂዲ ባ ኣዋታን ጋይቲዴስ፤ ባ ካታማን ዬሩሳላሜን ሞጌቲዴስ።
1KI 2:11 ዳዊቲ ኬብሮኔን 7 ላይꬅ፥ ዬሩሳላሜን 33 ላይꬅ፥ ኢሲ ቦላ ኢስራኤሌን 40 ላይꬅ ካዎቲዴስ።
1KI 2:12 ሶሎሞኔይ ባ ኣዋ ዳዊቴ ካዎቴꬃ ኣራታን ኡቲዴስ፤ ኢዛ ካዎቴꬂካ ኬሂ ሚኒዴስ።
1KI 2:13 ሃጊቲ ና ኣዶኒያሲ ሶሎሞኔ ኣዮ ቤርሳቤሂኮ ቢዴስ፤ ቤርሳቤሃ ኢዛ፥ «ኔኒ ታኮ ሳሮስ ያዲ?» ጋዳ ኦይቻዱስ። ኢዚካ ኢዚስ፥ «ኤ፤ ሳሮስ ያዲስ» ጊዴስ።
1KI 2:14 ቃሴካ ጉጂዲ፥ «ታ ኔስ ዮታና ዮኦይ ዴስ» ጊዴስ። ኢዛካ ኢዛስ፥ «ኣኔ ዮታ» ጋዱስ።
1KI 2:15 ኣዶኒያሲ ኢዚስ፥ «ካዎታናስ ቤሲዛይ ታና ጊዲዳይሳኔ ኢስራኤሌ ኣሳይ ኡባይ ታና ባ ቦላ ካዎꬃናስ ባ ኣይፌ ታ ቦላ ዬጊዳይሳ ኔ ኤራሳ። ጊዶ ኣቲን ዮኦቲ ጎዳፔ ጊዲዳ ጊሻስ ላሜቲ ዎꬊን ካዎቴꬃይ ታ ኢሻስ ዩዪዴስ።
1KI 2:16 ሃኢ ታ ኔና ኢሲ ሚሽ ኦይቺኮ ኔ ታስ ኣካይ ጎፓ» ጊዴስ። ኢዛካ፥ «ኣኔ ኦይቻ» ጋዱስ።
1KI 2:17 ኢዚካ፥ «ካዎ ሶሎሞኔይ ኔ ኦይቺዳ ሚሽ ኣካይ ጎንታ ጊሻስ ሱኔሜ ዴሬ ማጫሳዮ ኣቢሻጎ ጌቴቲዛ ጌላኢዮ ታና ኤኪሳና ማላ ኢዛ ታስ ኦይቻርኪ!» ጊዴስ።
1KI 2:18 ቤርሳቤሃካ ዛራዳ፥ «ዳሮ ሎኦ፤ ታኒ ሄሳ ካዎዛስ ዮታና» ጋዱስ።
1KI 2:19 ሄሳ ጊሻስ ቤርሳቤሃ ኣዶኒያሳ ኪታ ዮታናስ ካዎ ሶሎሞኔኮ ጌሊን ካዎዚ ኢዞ ሞካናስ ዴንዲ ኤቂዲ ኢዞ ሳሮኪዳፔ ጉዬ ሲሚዲ ባ ካዎቴꬃ ኣራታን ኡቲዴስ። ቃሴ ባ ኣዮ ኡቲሳናስ ሃራ ኣራታ ኤሂሲዲ ኢዞ ባፔ ኡሻቻ ባጋራ ኡቲሲዴስ።
1KI 2:20 ኢዛ ኡቲዳፔ ጉዬ፥ «ታ ኔና ኦይቺዛ ቄሪ ሚሺ ዳዉስ፤ ኔ ኢዞ ታስ ኤሮ ጋርኪ!» ጋዱስ። ካዎዚካ ዛሪዲ ኢዚስ፥ «ታ ኣዬ፥ ታ ኔና ዬላሲኬ፤ ኔ ኮዪዳይሳ ኦይቻ» ጊዴስ።
1KI 2:21 ኢዛካ ኢዛስ፥ «ሱኔሜ ዴሬፔ ዪዳ ኣቢሻጎ ኔ ኢሻ ኣዶኒያሲ ኤካና ማላ ኢዛስ ኢማርኪ!» ጋዱስ።
1KI 2:22 ካዎ ሶሎሞኔይ ዛሪዲ ባ ኣዮ፥ «ሱኔሜ ዴሬፔ ዪዳ ኣቢሻጎ ጻላ ኔኒ ኣዶኒያሳስ ኣይስ ኦይቻይ? ኢዚ ታስ ባይራ ጊዲዳ ጊሻስ ኢዛስ ታ ካዎቴꬃካ ኦይቻናይሳ ኣጋዳሳ! ሄሳꬆካ ኢዛስ ጻላ ጊዶንታ ዲሺን ቄሴ ኣቢያታሬሲኔ ጹሪያ ና ኢዮኣቤስካ ኦይቻናይሳ ኣጋዳሳ!» ጊዴስ።
1KI 2:23 ካዎ ሶሎሞኔይ ጎዳን ጫቂዲ፥ «ኣዶኒያሲ ሃይሳ ኦይቺዳ ጊሻስ ታኒ ኢዛ ዎꬎንታ ኣጊኮ ጎዳይ ታና ዎꬎ!
1KI 2:24 ሃኢ ታና ታ ኣዋ ዳዊቴ ካዎቴꬃ ኣራታን ኡቲሲዲ ባ ኢሚዳ ሂዶታ ማላ ታ ካዎቴꬃ ሚንꬂዳ ጎዳይ ቤዪን ኣዶኒያሲ ሃች ሃይቃና!» ጊዴስ።
1KI 2:25 ሄሳ ጊሻስ ካዎ ሶሎሞኔይ ዮዳሄ ና ባናያ ኣዛዚን ኢዚ ቢዲ ኣዶኒያሳ ዎꬊዴስ።
1KI 2:26 ሄሳፌ ጉዬ ካዎ ሶሎሞኔይ ቄሴ ኣቢያታሬ፥ «ኔኒ ኔ ዴሬ ኣናቶቴ ሲማ ባ፤ ኔስ ሃይቆይ ቤሴሲሺን ኔና ታኒ ሃኢ ዎꬊኬ። ኣይስ ጊኮ ኔኒ ታ ኣዋ ዳዊቴ ሲንꬃን ኡባ ሃሪዛ ጎዳ ታቦታ ቶካዳሳ፤ ቃሴ ታ ኣዋራ ሜቶ ኤካዳሳ» ጊዴስ።
1KI 2:27 ጎዳይ ሴሎን ቄሴ ኤሌ ኬꬃ ኣሳ ጊሻስ ዮቲዳይሳ ፖላናስ ሶሎሞኔይ ኣቢያታሬ ጎዳስ ቄሴቴꬃን ኦꬂዛሶፔ ዲጊዴስ።
1KI 2:28 ኣቤሴሎሜራ ጊዶንታ ኣዶኒያሳራ ኢሲፌ ዙፔቲዳ ኢዮኣቤኮ ሃ ዮኦይ ጋኪዴስ፤ ሂስቲን ኢዮኣቤይ ጎዳ ዱንካኔኮ ባቃቲ ቢዲ ያርሺዛሶ ካጬታ ኦይኪዴስ።
1KI 2:29 ኢዮኣቤይ ጎዳ ዱንካኔኮ ባቃቲ ቢዲ ያርሺዛሶዛ ላንቄን ዲዛይሳ ካዎ ሶሎሞኔስ ዮቲዳ፤ ሂስቲን ሶሎሞኔይ ዮዳሄ ና ባናያ፥ «ባዳ ኢዛ ዎꬋ!» ጊ ኣዛዚዴስ።
1KI 2:30 ባናያይ ጎዳ ዱንካኔዛ ጊዶ ጌሊዲ ኢዮኣቤ፥ «ካዎይ ኔና፥ ‹ሃይሳፌ ኬዛ› ጌስ» ጊዴስ። ጊዶ ኣቲን ኢዚ ዛሪዲ፥ «ታ ሃይሳን ሃይቃና ኣቲን ኬዚኬ» ጊዴስ። ባናያይ ካዎዛስ፥ «ኢዮኣቤይ ታስ ኢሚዳ ዛሮይ ሄሳ» ጊዲ ዮቲዴስ።
1KI 2:31 ካዎ ሶሎሞኔይ ባናያ፥ «ኢዚ ጊዳ ማላ ዎꬋዳ ሞጋ! ሂስታዳ ኢዮኣቤይ ጺሎታ ሱꬅ ጉሲዳ ጎሜፔ ታናኔ ታ ኣዋ ኬꬃ ጌሻ።
1KI 2:32 ታ ኣዋ ዳዊቲ ኤሮንታ ዲሺን ኢዮኣቤይ ናምኡ ኣሳታ ጊꬃ ማሻን ዎꬊዳ ሱꬃ ጊሻስ ጎዳይ ኢዛ ኦሶ ማላ ኢዛስ ዛራና፤ ኢስራኤሌ ኦላ ጋዳዋ ኔሬ ና ኣቢኔሪኔ ዩሁዳ ኦላ ጋዳዋ ዮቶሬ ና ኣማሲ ኢስቲ ናምኣይካ ኢዛፔ ኬሂ ሱሬ ኣሳ።
1KI 2:33 ኢስታ ሱꬃ ኣጮይ ሜርናስ ኢዮኣቤ ቦላኔ ኢዛ ዜሬꬃ ቦላ ጊዶ፤ ጊዶ ኣቲን ዳዊቴ ቦላኔ ኢዛ ኬꬃ ኣሳ ቦላ፥ ኢዛ ዜሬꬃታ ቦላኔ ኢዛ ካዎቴꬃ ኣራታ ቦላ ሜርናስ ጎዳ ሳሮይ ጊዶ» ጊዴስ።
1KI 2:34 ሄሳ ጊሻስ ዮዳሄ ና ባናያይ ፑዴ ኬዚዲ ኢዮኣቤ ዎꬊን ኢዚ ባዞን ዲዛ ባ ጋዴን ሞጌቲዴስ።
1KI 2:35 ካዎ ሶሎሞኔይ ዮዳሄ ና ባናያ ኢዮኣቤ ሶሆን ኦላ ጋዳዋ ሂስቲዲ ሹሚዴስ፤ ቃሴ ኣቢያታሬ ሶሆን ቄሴ ሳዶቄ ሹሚዴስ።
1KI 2:36 ሄሳፌ ጉዬ ካዎ ሶሎሞኔይ ሺምኤስ ኪቲዲ፥ «ኔስ ዬሩሳላሜን ኬꬅ ኬጻዳ ሄን ዴኣ፤ ሄፔ ሃራሶ ኣዋካ ቦፓ።
1KI 2:37 ኔኒ ካታማፔ ኬዛዳ ቄዲሮኔ ሾባ ፒኒዳ ጋላስ ሃይቃናይሳ ኤራ፤ ኔ ሱꬃ ጎሜይ ኔና ኦይካና» ጊዴስ።
1KI 2:38 ሺምኤይ ዛሪዲ ካዎዛስ፥ «ኔኒ ጊዛይሲ ሎኦ፤ ታኒ ኔ ኣይሌይ ኔኒ ታ ጎዳይ ካዎይ ጊዳይሳ ታ ፖላና» ጊዴስ። ኢዚካ ዬሩሳላሜን ዳሮ ዎዴ ዴኢዴስ።
1KI 2:39 ጊዶ ኣቲን ሄꬑ ላይꬃፌ ጉዬ ሺምኤ ኣይሌታፔ ናምኣቲ ቤቲዲ ማኢካ ና ጌቴ ካዎ ኣንኩሴኮ ቢዳ፤ ሄ ዎሬይ፥ «ኔ ኣይሌቲ ጌቴን ዴቴስ» ጌቴቲዲ ሺምኤስ ዮቴቲዴስ።
1KI 2:40 ሄሳ ሲዪዲ ሺምኤይ ባ ሃሬ ኮሪ ኤኪዲ ባ ኣይሌታ ኮያናስ ኣንኩሴኮ ጌቴ ቢዲ ባ ኣይሌታ ኤኪ ዪዴስ።
1KI 2:41 ሺምኤይ ዬሩሳላሜፔ ጌቴ ካታማ ቢዲ ሲሚዳይሳ ሶሎሞኔይ ሲዪዲ፥
1KI 2:42 ሺምኤ ጼይጊሲ ሺሺዲ፥ « ‹ዬሩሳላሜፔ ኬዛዳ ሃራሶ ቢዛ ጊዲኮ ኔ ሃይቃና› ጋዳ ጎዳ ሱንꬃን ጫቄꬃዳ ኔስ ሚንꬃ ዮታቤኪና? ሄ ዎዴ ኔኒ፥ ‹ኔ ጊዛይሲ ሎኦ፤ ኤኖ፥ ታ ኣዛዜታና› ጋዳሳ።
1KI 2:43 ሂስቲን ጎዳስ ጫቂዳ ጫቆኔ ታ ኣዛዞ ኣይስ ናጋቤኪ?» ጊዴስ።
1KI 2:44 ቃሴካ ካዎይ ሺምኤስ፥ «ታ ኣዋ ዳዊቴ ቦላ ኔኒ ኦꬂዳ ኢታ ኦሶ ኡባ ኔ ዎዚናይ ኤሬስ። ሃኢ ጊዲኮ ኔ ኢታ ኦሶ ማላ ጎዳይ ኔስ ዛራና።
1KI 2:45 ጊዶ ኣቲን ካዎ ሶሎሞኔይ ኣንጄታና፤ ዳዊቴ ካዎቴꬃ ኣራታይካ ጎዳ ሲንꬃን ሜርናስ ሚኒ ዳና» ጊዴስ።
1KI 2:46 ሄሳፌ ጉዬ ካዎዚ ዮዳሄ ና ባናያ ኣዛዚን ቢዲ ሺምኤ ዎꬊዴስ። ሄሳ ጋሶን ካዎቴꬃይ ሶሎሞኔ ኩሼን ሚኒ ዴኢዴስ።
1KI 3:1 ሶሎሞኔይ ጊብጼ ካዎ ፓሮኔራ ላጌቲዲ ኢዛ ናዮ ማቾ ኤኪዴስ፤ ካዎ ኬꬃ፥ ጎዳ ኬꬃኔ ዬሩሳላሜ ዩሾን ዲዛ ዲርሳ ጊምቢ ፖላናሼ ጋካናስ ኢዞ ኤሂዲ ዳዊቴ ካታማን ዎꬂዴስ።
1KI 3:2 ጎዳ ሱንꬃስ ጾሳ ኬꬅ ኬጼታናሼ ጋካናስ ኣሳይ ያርሾ ዙምቡላታ ቦላ ሺሼስ።
1KI 3:3 ሶሎሞኔይ ጎዳ ሲቄስ፤ ባ ኣዋ ዳዊቴ ዎጋ ማላ ዴስ፤ ጊዶ ኣቲን ዙምቡላታ ቦላ ያርሾ ያርሼሲኔ ኤጻኔ ጩዋሴስ።
1KI 3:4 ጌባኦኔይ ኡባፌ ኣꬊ ኤሬቲዳ ያርሾሶሆ ጊዲዳ ጊሻስ ካዎ ሶሎሞኔይ ያርሾ ያርሻናስ ሄ ቢዴስ፤ ሶሎሞኔይ 1,000 ሜሄ ኤሂዲ ሄን ጹጌቲዛ ያርሾ ያርሺዴስ።
1KI 3:5 ጎዳይ ሶሎሞኔስ ጌባኦኔን ኦማርስ ኣጉሞን ቆንጪዴስ፤ ጾሲ ኢዛስ፥ «ታ ኔስ ኢማና ማላ ኔ ኮይዛ ኣይ ሚሺካ ታና ኦይቻ» ጊዴስ።
1KI 3:6 ሶሎሞኔይ ኢዛስ፥ «ታ ኣዋ ዳዊቲ ኔ ሲንꬃን ጺሎቴꬃን፥ ቱማቴꬃኒኔ ሱሬቴꬃ ዎዚናን ሲሜሬቲዳ ጊሻስ ኔ ኣይሌዛ ጊታ ኪያቴꬅ ቤሳዳሳ፤ ኔኒ ሄ ጊታ ኪያቴꬃ ኣጎንታ ሃች ኢዛ ካዎቴꬃ ኣራታን ኡቲዛ ኣቱማ ና ኢዛስ ኢማዳሳ።
1KI 3:7 «ኣቤት ጎዳዉ፥ ታ ጾሳዉ! ኔኒ ታና ኔ ኣይሌዛ፥ ታ ኣዋ ዳዊቴ ሶሆን ካዎሳዳሳ፤ ጊዶ ኣቲን ታኒ ቡሮ ዬላጋ ጊዲዳ ጊሻስ ኣሳ ዎስታ ኣይሳናኮ ታ ኤሪኬ።
1KI 3:8 ታኒ ኔ ኣይሌይ ኔኒ ዶሪዳ ኣሳ ጊዶኒኔ ቆዳይ ባይንዳ ኬሂ ዳሮ ኣሳ ጊዶን ዴኣይስ።
1KI 3:9 ሄሳ ጊሻስ ታኒ ኔ ኣሳ ኣይሳናስ ሎኦኔ ኢታ ሻካዳ ኤራና ማላ ታስ ኔ ኣይሌዛስ ኣኬኪዛ ዎዚና ኢማ፤ ሂስቶንታ ኣጊኮ ሃ ጊታ ዴሬዛ ኦኒ ካሌꬃና ዳንዳይዜ?» ጊዴስ።
1KI 3:10 ሶሎሞኔይ ሄሳ ኦይቺዳ ጊሻስ ጎዳይ ኡፋዬቲዴስ።
1KI 3:11 ቃሴካ ጾሳይ ኢዛ፥ «ኔኒ ኔስ ላይꬂ ኣዱቃና ማላ ዎይኮ ዱሬታና ማላ፥ ዎይኮ ኔ ሞርኬቲ ሃይቃና ማላ ጊዶንታ ዴራ ዎጋራ ኣይሳናስ ኣꬎ ኤራቴꬅ ኦይቺዳ ጊሻስ፥
1KI 3:12 ሄሳ ኔ ኦይቺዳይሳ ታ ኔስ ኢማና፤ ኔፔ ካሴ ኦናስካ ኢሜቶንታኔ ኔፔ ጉዬ ኦኒካ ዴሞንታ ኣꬎ ኤራቴꬃኒኔ ኣኬካይ ኩሚዳ ዎዚና ታ ኔስ ኢማና።
1KI 3:13 ሄሳፌካ ቦላራ ኔ ዴኦ ላይꬃን ኡባን ካዎታ ጊዶን ኔናራ ጊናቲዛ ካዎይ ዶንታ ማላ ኔኒ ታና ኦይቾንታ ዱሬቴꬂኔ ቦንቾ ታ ኔስ ኢማና።
1KI 3:14 ኔ ኣዋ ዳዊቲ ታ ኦጌራ ቢዳ ማላ ኔካ ታ ኦጌራ ቢኮ፥ ታ ዎጋኔ ታ ኣዛዞታ ናጊኮ ኔ ላይꬅ ታ ኣዱሳና» ጊዴስ።
1KI 3:15 ሄሳፌ ጉዬ ሶሎሞኔይ ꬊስኮፌ ቤጊዲ ሄሲ ኣጉሞ ጊዲዳይሳ ኣኬኪዴስ፤ ኢዚ ዬሩሳላሜ ሲሚ ቢዲ ጎዳ ጫቆ ቃላ ታቦታ ሲንꬃን ኤቂዴስ፤ ጹጌቲዛ ያርሾኔ ኢሲፌቴꬃ ያርሾ ያርሺዴስ። ሂስቲዲ ባ ሹሜ ኡባታስ ጊቢራ ኬሲዴስ።
1KI 3:16 ሄ ዎዴ ላይማን ኣቂዛ ናምኡ ማጫሳቲ ካዎ ሶሎሞኔኮ ዪዲ ኢዛ ሲንꬃን ኤቂዳ።
1KI 3:17 ኢስታፌ ኢሲኒያ፥ «ታ ጎዶ! ታኒኔ ሃ ማጫሳያ ኢሲ ኬꬃን ዶስ፤ ሄን ኢዛ ታናራ ኢሲፌ ዲሺን ታኒ ና ዬላዲስ።
1KI 3:18 ታ ዬሊዳ ሄꬓንꬆ ጋላስ ኢዛካ ና ዬላዱስ፤ ሄ ኬꬃን ኑ ናምኣታፔ ኣቲን ሃራይ ኦኒካ ዴና።
1KI 3:19 «ኢሲ ጋላሳ ኦማርስ ሃና ማጫሳያ ባ ናዛ ቦላ ኢቺን ናዚ ሃይቂዴስ።
1KI 3:20 ሂስቲን ኢዛ ጊዶꬅ ዴንዳዳ ታኒ ኔ ኣሽካሪያ ꬊስኮን ዲሺን ታ ናዛ ታ ኪኦፔ ኤካ ኤፋዳ ባ ኪኦን ዎꬃዱስ፤ ቃሴ ሃይቂዳ ባ ናዛ ኤሃዳ ታ ኪኦን ዎꬃዱስ።
1KI 3:21 ዎንቲን ታኒ ታ ናዛ ꬋንꬃናስ ዴንዲሺን ሃይቂ ቤቲዴስ፤ ጊዶ ኣቲን ታኒ ማላዶ ፖኦን ቲሺ ሂስታ ጼሊን ታ ዬሎዛ ጊዶንታይሳ ታ ኤራዲስ» ጋዱስ።
1KI 3:22 ሃንኮ ናምኣንꬆ ማጫሳያ ቃሴ፥ «ቺ! ፓጻ ዲዛ ናዚ ታይሳ፤ ሃይቂዳ ናዚ ኔይሳ» ጋዱስ። ጊዶ ኣቲን ኮይሮ ማጫሳያ ዛራዳ፥ «ቺ! ሃይቂዳ ናዚ ኔይሳ፤ ፓጻ ዲዛ ናዚ ታይሳ» ጋዱስ፤ ኢስቲ ናምኣይካ ካዎ ሲንꬃን ሄሳꬆ ጊሼ ፓላሜቲዳ።
1KI 3:23 ካዎ ሶሎሞኔይ ኢስታስ፥ «ሃ ማጫሳያ፥ ‹ፓጻ ዲዛ ናዚ ታይሳ፤ ሃይቂዳ ናይ ኔይሳ› ጋዉስ፤ ሃንኮራካ፥ ‹ቺ! ሃይቂዳይሲ ኔ ናዛ፤ ፓጻ ዲዛ ናዚ ታ ናዛ› ጋዉስ» ጊዴስ።
1KI 3:24 ካዎዚካ፥ «ታስ ጊꬃ ማሻ ኤኪ ዪቴ» ጊዴስ፤ ሂስቲን ኢስቲ ኢዛስ ጊꬃ ማሻ ኤሂዳ።
1KI 3:25 ሄ ዎዴ ካዎዚ፥ «ፓጻ ዲዛ ናዛ ናምኡ ኬሲ ጳልቂዲ ኢሲ ባጋ ኢሲኔይስ፥ ኢሲ ባጋ ሃንኮርስ ኢሚቴ» ጊ ኣዛዚዴስ።
1KI 3:26 ፓጻ ዲዛ ናዛ ኣያ ባ ናዛስ ኬሃ ሚሼቲዛ ጊሻስ ካዎዛስ፥ «ታ ጎዶ! ፓጻ ዲዛ ናዛ ኢዚስ ኢማጋ! ዎꬎፓርኪ!» ጋዱስ። ጊዶ ኣቲን ሃንኮራ፥ «ኔስካ ታስካ ኢሜቶፎ፤ ናምኡ ኬዚ ሻኬቶ» ጋዱስ።
1KI 3:27 ሄሳፌ ጉዬ ካዎዚ፥ «ሃ ፓጻ ዲዛ ናዛ ሃ ኮይሮ ማጫሳይስ ኢሚቴ፤ ናዛ ዎꬎፒቴ፤ ናዛ ኣያ ሃኖኮ!» ጊዲ ፒርዲዴስ።
1KI 3:28 ኣሳስ ጺሎቴꬃን ፒርዳናስ ኢዛስ ኣꬎ ኤራቴꬃይ ጾሳፌ ኢሜቲዳይሳ ቤኢዳ ጊሻስ ኢስራኤሌ ኣሳይ ኡባይ ካዎይ ፒርዲዳ ፒርዳ ሲዪዳ ዎዴ ካዎዛስ ኬሂፔ ያዪዴስ።
1KI 4:1 ካዎ ሶሎሞኔይ ኢስራኤሌ ቢታ ኡባ ቦላ ካዎቲዴስ።
1KI 4:2 ኢዚ ሹሚዳ ኣላፌቲ ሃይሳፌ ካሊ ጻፌቲዳይታ። ሳዶቄ ና ኣዛሪያሲ ቄሴ።
1KI 4:3 ሺሻ ናይቲ ኤሊሆሬፊናይኔ ኣካያይ ዋና ጻፌታ፤ ኣሂሉዴ ና ኢዮሳፊጼይ ታሪኬ ጻፌ፤
1KI 4:4 ዮዳሄ ና ባናያይ ኦላ ጋዳዋ፤ ሳዶቄይኔ ኣቢያታሬይ ቄሴታ፤
1KI 4:5 ናታኔ ና ኣዛሪያሲ ዴሬ ኣይሲዛይታስ ኣላፌ፤ ናታኔ ና ዛቡዴይ ቄሴኔ ካዎስ ማታ ዞራንቻ፤
1KI 4:6 ኣሂሻሬይ ካዎ ኬꬃ ኣላፌ፤ ኣቢዳ ና ኣዶኒራሚ ኡንኤቲዲ ዎልቃ ኦሶ ኦꬂዛይታ ኣላፌ።
1KI 4:7 ቃሴ ሶሎሞኔስ ኢስራኤሌ ቢታ ኡባን ታማኔ ናምኡ ዴሬታ ኣይሲዛይቲ ዴቴስ፤ ኢስቲ ካዎሲኔ ካዎሶን ዲዛ ኣሳ ኡባስ ሚዛ ካꬅ ሺሺዛይታ፤ ኢስቲ ታራን ታራን ላይꬃ ጊዶን ኢሲ ኢሲ ኣጊናስ ጊዲዛ ካꬅ ኤሄቴስ።
1KI 4:8 ኢስታ ሱንꬂኔ ኢስታ ኣይሲዛ ዞኔቲ ሃይሳፌ ካሊዲ ጻፌቲዳ። ቤኒ-ሁሬይ ኤፍሬሜ ጌዜ ኣይሴስ።
1KI 4:9 ቤኒ-ዲቃሬይ ማቃጻ፥ ሻኣልቢሜ፥ ቤቲ-ሼሚሼኔ ኤሎኔኔ ቤቲ-ሃናኔ ዴሬታ ኣይሴስ።
1KI 4:10 ቤኒ-ሄሴዲ ኣሩቦቴ ዴሬን ዲዛ ሶኮኔ ሄፌሬ ዴሬ ኡባ ኣይሴስ።
1KI 4:11 ቤኒ-ኣቢናዳቢ ናፎቲ-ዶሬ ቢታ ኣይሴስ፤ ኢዚካ ሶሎሞኔ ናዮ ጻፊቲ ኣዚና።
1KI 4:12 ኣሂሉዴ ና ባኣናይ ታኢናኬኔ ማጊዶ ዴሬ፥ ጳርታኔፔ ዱጌ ቢዲ ኢዝራኤሌን ዲዛ ቤቲ-ሻኣኔ ጋካናስ፥ ሄፔካ ቢዲ ዮቂማኣሜ ፒኒዲ ኣቤሊ-ማሆሌ ዴሬ ጋካናስ ዲዛይሳ ኣይሴስ።
1KI 4:13 ቤኒ-ጌቤሪ ጋላኣዴን ዲዛ ኤራሞቴ ዴሬ፥ ጋላኣዴን ሚናሴ ና ያኢሬ ዴሬታ፥ ኢዛ ዩሾን ጊምቤኔ ጊምቤ ፔንጌታን ጻርቂማላ ቢራታ ኮላታቲ ዲዛ 60 ጊታ ካታማታኔ ባሳኔ ቢታን ዲዛ ኣርጎባ ዴሬ ኣይሴስ።
1KI 4:14 ኢዶ ና ኣሂናዳቢ ማሃናይሜ ዴሬ ኣይሴስ።
1KI 4:15 ኣሂማኣሲ ኒፍታሌሜ ዴሬ ኣይሴስ፤ ኢዚ ሶሎሞኔ ናዮ ባሴማቲ ኣዚና።
1KI 4:16 ሁሼ ና ባኣናይ ኣሴሬኔ ባኣሎቴ ዴሬ ኣይሴስ።
1KI 4:17 ፓሩሄ ና ኢዮሳፊጼይ ዪሳኮሬ ዴሬ ኣይሴስ።
1KI 4:18 ኤላ ና ሺምኤይ ቢኒያሜ ዴሬ ኣይሴስ።
1KI 4:19 ኡሬ ና ጌቤሪ ጋላኣዴ ቢታን ዲዛ ኣሞሬታ ካዎ ሲሆኔ ዴሬኔ ባሳኔ ካዎ ኣጌ ዴሬ ኣይሴስ። ሄ ዴሬታ ኡባ ኣይሲዛይታ ቦላ ኣላፌቴꬂ ዲዛ ኢሲ ኣሲ ዴስ።
1KI 4:20 ዩሁዳ ኣሳ ቆዳይኔ ኢስራኤሌ ኣሳ ቆዳይ ኣባ ሻሚንታ ማላ ጮራቲዴስ፤ ኢስቲ ሚሼኔ ኡዪሼ ኡፋይሳን ዴኢዳ።
1KI 4:21 ሶሎሞኔይ ኤፊራጺሴ ሻፋፔ ዶሚዲ ፊሊስጼሜ ቢታ ጋካናስ፥ ሄሳፌካ ቦላራ ጊብጼ ዛዋ ጋካናስ ዲዛ ካዎቴꬃታ ኡባ ሃሪዴስ፤ ሄ ቢታ ኣሳቲ ኢዛስ ጊራ ጊሪዳ፤ ኢስቲ ኢዚ ዲዛ ላይꬅ ኡባን ኢዛስ ሃሬቲዳ።
1KI 4:22 ሶሎሞኔስ ሃች ሃች ቁማስ 50 ኮንታሌ ሙሩታ ꬊሌ፥ 100 ኮንታሌ ꬊሌ፥
1KI 4:23 ꬊኬቲዳ 10 ቦራታ፥ ዬዳ ሚዛ 20 ቦራታኔ 100 ዶርሳታ፥ ኢስታ ቦላካ ጮፎሾታ፥ ጋራታ፥ ጌኔሳታኔ ሎኦ ካፎታ ኮሼስ።
1KI 4:24 ሶሎሞኔይ ኤፊራጺሴ ሻፋፔ ኣርሼይ ዉሊዛ ባጋራ ዲዛ ካዎቴꬃታ ኡባ ቲፊሳ ካታማፔ ዶሚዲ ጋዛ ካታማ ጋካናስ ሃሪዴስ፤ ባ ዩሾን ዲዛ ኡባ ዴሬታራካ ሳሮን ዴኢዴስ።
1KI 4:25 ሶሎሞኔይ ዴኢዳ ላይꬅ ኡባን ዳኔፔ ቢዲ ቤርሳቤሄ ጋካናስ ዩሁዳ ኣሳይኔ ኢስራኤሌ ኣሳይ ኡባይ ባ ዎይኔ ቱራ ኩዋኒኔ ባ ኤꬃ ኩዋን ዎፓን ኡቲዳ።
1KI 4:26 ሶሎሞኔስ ፓራ-ጋሬታ ጎቺዛ 40,000 ፓራቲኔ 12,000 ቶጋ ኣሳቲ ዴቴስ።
1KI 4:27 ሄ ዞኔታ ኣይሲዛይቲ ባና ጋኪዳ ኣጊናን ታራን ታራን ካዎ ሶሎሞኔሲኔ ኢዛ ማዳፌ ማናስ ዪዳ ኣሳስ ኡባስ ኣይኮካ ፓጪሶንታ ሺሼቴስ።
1KI 4:28 ቃሴካ ጋሬ ጎቺዛ ፓራቲኔ ሃንኮ ፓራቲ ባንጋኔ ሃርቆ ኤሂዲ ዎꬂዛሶን ዎꬄቴስ።
1KI 4:29 ጾሳይ ሶሎሞኔስ ኣꬎ ኤራቴꬅ፥ ኬሂ ጊታ ኣኬካኔ ዛዋይ ባይንዳ ኤራቴꬅ ኢሚዴስ።
1KI 4:30 ሶሎሞኔስ ዲዛ ኣꬎ ኤራቴꬃይ ኣርሼይ ሞኪዛ ባጋራ ዲዛይታ ኣꬎ ኤራቴꬃፌኔ ጊብጼታስ ዲዛ ኣꬎ ኤራቴꬃ ኡባፌካ ኣꬌꬃ።
1KI 4:31 ኢዚ ኣሳ ኡባፌ ኣꬎ ኤራንቻ፤ ቃሴ ኢዚ ኤዚራሄ ኣስ ኤታኔፔ፥ ማሆላ ናይታፔ ሄማኔፔ፥ ካልኮሌፔኔ ዳሪዳፔካ ኣꬎ ኤራንቻ፤ ኢዛ ጎባቴꬂ ኢዛ ዩሾን ዲዛ ካዎቴꬅ ኡባን ሲዬቲዴስ።
1KI 4:32 ኢዚ 3,000 ሌሚሶታ ሃሳይዴስ፤ ቃሴካ 1,005 ዬꬃታ ዬጺዴስ።
1KI 4:33 ሶሎሞኔይ ሊባኖሴ ዚጋፔ ቢዲ ኬꬃ ጊምቤ ቦላ ሞኪዛ ሂሶጴ ሚꬅ ጋካናስ ዲዛ ዶዛታ ጊሻስ ዮቲዴስ፤ ሄሳꬆካ ሜሄታ፥ ዶኣታ፥ ካፎታ፥ ሳኣራ ጎሼቲዛ ሜꬌቴꬃታ ጊሻሲኔ ሞሌታ ጊሻስ ታማርሲዴስ።
1KI 4:34 ኢዛ ኣꬎ ኤራቴꬃ ሲዪዳ ሳኣ ካዎታ ኡባፌ ኪቴቲዳይቲ ኢዛ ኣꬎ ኤራቴꬃ ሲያናስ ዪዳ።
1KI 5:1 ጺሮሴ ካዎ ኪራሜይ ዳዊቴራ ባ ዲዛ ላይꬅ ኡባን ሲቆን ጋምኢዳ ጊሻስ ሶሎሞኔይ ባ ኣዋ ዳዊቴ ሶሆን ካዎታናስ ቲዬቲዳይሳ ሲዪዲ ባ ኦሳንቻታ ሶሎሞኔኮ ኪቲዴስ።
1KI 5:2 ሶሎሞኔይካ ኪራሜስ ዛሪዲ፥
1KI 5:3 «ታ ኣዋ ዳዊቴ ቦላ ኡባሶራ ዴንዲዳ ኦላ ጋሶን ጎዳይ ኢዛ ሞርኬታ ኢዛ ቶሆፔ ጋርሳራ ሃሪሳና ጋካናስ ጎዳ ባ ጾሳ ሱንꬃስ ኬꬄ ኢዚ ኬጻና ዳንዳዮንታ ኣጊዳይሳ ኔ ኤራሳ።
1KI 5:4 ሃኢ ጊዲኮ ጎዳ ታ ጾሳይ ታስ ኡባሶራ ሳሮቴꬅ ኢሚዳ ጊሻስ ታስ ሞርኬይ ዎይኮ ኢታ ሚሺ ዴና።
1KI 5:5 ጎዳይ ታ ኣዋ ዳዊቴስ፥ ‹ታኒ ኔ ሶሆን ኔ ካዎቴꬃ ኣራታን ካዎꬂዛ ኔ ናይ ታ ሱንꬃስ ኬꬅ ኬጻና› ጊዳ ማላ ታኒ ጎዳ ታ ጾሳ ሱንꬃስ ጾሳ ኬꬅ ኬጻናስ ቆፓዲስ።
1KI 5:6 ሄሳ ጊሻስ ሊባኖሴፔ ዚጋ ታስ ቃንጺዛ ኣሳታ ኣዛዛ፤ ታ ኣሳቲ ኔ ኣሳታራ ኦꬃና፤ ኔ ኣሳታስ ኔኒ ቃንጻ ጊዳ ዳሞዛ ታኒ ቃንጻና። ሲዶና ኣሳ ማላ ሚꬃ ቃንጾ ሂላ ኑ ኣሳይ ኤሮንታይሳ ኔኒ ኤራሳ» ጊ ኪቲዴስ።
1KI 5:7 ኪራሜይ ሶሎሞኔ ኪታዛ ሲዪዲ ኬሂፔ ኡፋዬቲዲ፥ «ሃ ዎልቃማ ዴራ ኣይሳናስ ዳዊቴስ ኣꬎ ኤራቴꬃን ኩሚዳ ና ኢሚዳ ጎዳይ ሃች ጋላቴቶ» ጊዴስ።
1KI 5:8 ሄሳፌ ጉዬ ኪራሜይ ሶሎሞኔስ፥ «ኔኒ ታስ ኪቲዳ ኪታይ ታና ጋኪዴስ። ኔኒ ኮዪዳይሳ ኡባ ታኒ ኦꬃና፤ ዚጋ ሙዴꬃታኔ ጺዳ ሙዴꬃታ ታኒ ኔስ ሺሻና።
1KI 5:9 ታ ኣሳይ ሙዴꬃታ ሊባኖሴፔ ዱጌ ኣባ ማታ ጋካናስ ሚያና፤ ታኒካ ኢስታ ቃቻ ጫናዳ ኣባ ቦላራ ቶኬቲዲ ኔኒ ማላቲዳሶ ጋꬃዳ ታ ቢርሺሳና፤ ኔኒ ሄፔ ኤካዳ ኔ ባጋራ ታ ካዎቴꬃ ኬꬃን ዲዛ ኣሳስ ሚዛ ካꬅ ዬዳዳ ታ ኣሞ ኩንꬃ» ጊ ኪቲዴስ።
1KI 5:10 ሄሳꬆ ኦꬂዲ ኪራሜይ ሶሎሞኔይ ኮዪዳ ኬና ዚጋ ሙዴꬃታኔ ጺዳ ሙዴꬃታ ኡባ ሺሺዴስ።
1KI 5:11 ሶሎሞኔይካ ካዎ ኪራሜ ካዎቴꬃ ኬꬃን ዲዛ ኣሳታስ ቃላባ ጊዳና ማላ 20,000 ኮንታሌ ጊስቴኔ ሙሩታ ዎጋራ ዛይቴ 400,000 ሊቲሮ ላይꬃን ላይꬃን ፓጬይ ባይንዳ ኪራሜስ ሺሼስ።
1KI 5:12 ጎዳይ ሶሎሞኔስ ኢሚዳ ሂዶታ ቃላ ማላ ኢዛስ ኣꬎ ኤራቴꬅ ኢሚዴስ። ኪራሜሲኔ ሶሎሞኔስ ሎኦ ጋይቶቴꬂ ዲዛ ጊሻስ ባንታ ጊዶን ጫቄቲዳ።
1KI 5:13 ካዎ ሶሎሞኔይ ኢስራኤሌ ኣሳ ኡባፌ 30,000 ጋባራታ ዶሪዴስ።
1KI 5:14 ኣዶኒራሜ ኢስታ ቦላ ሃላቃ ሂስቲ ሹሚዴስ። ጋባራታካ ታሙ ታሙ ሺያን ሻኪ ሄꬑ ኬሲዴስ፤ ኢሲ ኢሲ ቡቴይ ኢሲ ኣጊና ሊባኖሴን ኦꬃና ማላኔ ናምኡ ኣጊና ባሶን ባሶን ሼምፓና ማላ ታራ ኦይꬂዴስ።
1KI 5:15 ሶሎሞኔስ ቶሆ ቶኪዛ 70,000 ኣሳቲኔ ሹች ቄሪዛ 80,000 ኣሳቲ ጌዜን ዴቴስ።
1KI 5:16 ቃሴካ ኦሶዛ ኣዋቴꬃን ካሌቲ ኦሲሲዛ 33,000 ኣላፌቲ ዴቴስ።
1KI 5:17 ኢስቲካ ካዎ ሶሎሞኔይ ኣዛዚን ጾሳ ኬꬃስ ዮች ጊዳና ማላ ዎጋ ሙሩታ ሹቻታ ቄሪዲ ማሲዳ።
1KI 5:18 ኩሼ ሂላቴꬅ ኤሪዛ ሶሎሞኔ ኣሳቲ፥ ኪራሜ ኣሳቲኔ ጌባሌ ኣሳቲ ጾሳ ኬꬃስ ኮሺዛ ሚꬂኔ ሹች ቄሪ ጊግሲዳ።
1KI 6:1 ኢስራኤሌ ኣሳይ ጊብጼ ቢታፌ ኬዚዳ ኦይዱ ጼታኔ ኦስፑን ታማንꬃ ላይꬃን ሶሎሞኔይ ኢስራኤሌ ቦላ ካዎቲዳ ኦይዳንꬆ ላይꬃን ዚፌ ጌቴቲዛ ናምኣንꬆ ኣጊናን ጎዳ ኬꬅ ኬጾ ዶሚዴስ።
1KI 6:2 ሶሎሞኔይ ጎዳስ ኬጺዳ ኬꬃስ ኣዱሳቴꬃይ 60 ዋꬋ፥ ጎምፓይ 20 ዋꬋ፥ ꬎቃቴꬃይ 30 ዋꬋ።
1KI 6:3 ጾሳ ኬꬃ ዳራንቻዛ ጎምፓይ 20 ዋꬋ ጊዲሺን ኢዛስ ኣዱሳቴꬃይ 10 ዋꬋ ካሬ ኬዜስ።
1KI 6:4 ጾሳ ኬꬃስ ሶ ባጋራ ኣኪዲ ካሬ ባጋራ ጹሚዳ ማስኮቴቲ ዴቴስ።
1KI 6:5 ጾሳ ኬꬃ ዩሾን ኡባፌ ዱማቲዳ ጊዶ ቆልኣ ኪፊሌ ጎዳራ ኦይሴꬂዲ ሃራ ኪፊሌታ ኬጺዴስ፤
1KI 6:6 ፖቄዛስ ጋርሳ ኪፊሌዛ ጎምፓይ 5 ዋꬋ፥ ቦላ ናምኣንꬆ ኪፊሌዛ ጎምፓይ 6 ዋꬋ፥ ቦላ ሄꬓንꬆ ኪፊሌዛ ጎምፓይ 7 ዋꬋ፤ ኣይኮይካ ጾሳ ኬꬃ ጊምቤዛ ካንꬂ ጌሎንታ ማላ ኢዛ ዩሾን ካሬ ባጋራ ኬላታ ኬሊዴስ።
1KI 6:7 ጾሳ ኬꬃዚ ጊምቤቲዳ ሹቻቲ ማሴቲ ጊጊዳይ ሄን ባ ዲዛሶን ጊዲዳ ጊሻስ ጾሳ ኬꬃይ ኬጼቲሺን ናሪቃ ጊሪሲ፥ ካልታ ጊሪሲ ዎይኮ ሃራ ቢራታታ ጊሪሲ ጾሳ ኬꬃ ሄራን ሴቴቲቤና።
1KI 6:8 ፖቄዛስ ጋርሳ ኪፊሌዛ ጌሊዛ ፔንጌይ ጾሳ ኬꬃፌ ዱጌሃ ባጋራ ዴስ፤ ሄፔ ፑዴ ናምኣንꬆ ፖቄዛኔ ሄꬓንꬆ ፖቄዛ ባናስ ዬꬊ ዬꬊ ኬዚዛ ኬቺ ዴስ።
1KI 6:9 ሄሳꬆ ኦꬂዲ ሶሎሞኔይ ኬꬃ ኬጺ ፖሊዴስ፤ ሂስቲዲ ካራዛ ሶ ባጋራ ዚጋ ሳንቃን ካሚዴስ።
1KI 6:10 ቃሴ ጾሳ ኬꬃ ዩሾን ኢስታስ ꬎቃቴꬃይ ኢቻሹ ኢቻሹ ዋꬋ ጊዲዳ ኪፊሌታ ኬጺዴስ፤ ሂስቲዲ ጾሳ ኬꬃ ጎዳራ ዚጋ ሳንቃን ኦይሴꬂዴስ።
1KI 6:11 ጎዳ ቃላይ ሶሎሞኔኮ ዪዴስ፤
1KI 6:12 ሂስቲዲ፥ «ሃይሳ ኔኒ ኬጺዳ ጾሳ ኬꬃን ታ ዎጋ፥ ታ ኣዛዞኔ ማራ ኔ ናጊኮ ታኒ ኔ ኣዋ ዳዊቴስ ኢሚዳ ሂዶታ ቃላ ኔ ባጋራ ፖላና።
1KI 6:13 ሂስታዳ ታኒ ኢስራኤሌ ኣሳ ጊዶን ዴኣና፤ ታኒ ታ ዴራ ኢስራኤሌ ዬጋ ኣጊኬ» ጊዴስ።
1KI 6:14 ሶሎሞኔይ ጾሳ ኬꬃ ኬጺ ጊጊዴስ።
1KI 6:15 ጾሳ ኬꬃ ጎዳ ሶ ባጋራ ዚጋ ሳንቃን ካሚዴስ፤ ዉይጌዛ ቃሴ ጺዳ ሳንቃፌ ኦꬂዴስ።
1KI 6:16 ጾሳ ኬꬃ ጊዶን ጉዬ ባጋራ 20 ዋꬋዚ ኡባፌ ዱማቲዳ ጊዶ ቆልኣ ጊዳና ማላ ዉይጌፔ ቢዲ ካራ ጋካናስ ዚጋ ሳንቃን ጎርዲዴስ።
1KI 6:17 ሄ ኡባፌ ዱማቲዳ ጊዶ ቆልኣፌ ሲንꬃ ባጋራ ዲዛ ዉይጌዛስ ኣዱሳቴꬃይ 40 ዋꬋ።
1KI 6:18 ጾሳ ኬꬃስ ሶ ባጋይ ፑꬊዛ ጪሻታኒኔ ጪሻታ ሚስሌን ኣሌቄቲዴስ፤ ጊዶ ባጋራ ዚጋ ሳንቃን ካሜቲዳ ጊሻስ ሙሌካ ጊምቤ ሹቺ ቤቴና።
1KI 6:19 ሶሎሞኔይ ጫቆ ታቦታ ዎꬃናስ ኡባፌ ዱማቲዳ ጊዶ ቆልኣ ጊግሲዴስ።
1KI 6:20 ኡባፌ ዱማቲዳ ጊዶ ቆልኣ ኣዱሳቴꬃይ 20 ዋꬋ፥ ጎምፓይ 20 ዋꬋ፥ ꬎቃቴꬃይ 20 ዋꬋ። ሶሎሞኔይ ሄ ኡባፌ ዱማቲዳ ጊዶ ቆልኣስ ሶ ባጋ ሙሩታ ዎርቃን ሜሺዴስ፤ ዚጋፔ ኦሴቲዳ ያርሾ ያርሺዛሶዛካ ዎርቃን ሜሺዴስ።
1KI 6:21 ሶሎሞኔይ ጾሳ ኬꬃስ ጊዶ ባጋዛ ሙሩታ ዎርቃን ሜሺዴስ፤ ዎርቃን ሜሼቲዳ ኡባፌ ዱማቲዳ ጊዶ ቆልኣስ ሲንꬃ ባጋራ ዎርቃ ሳንሳላታን ኣሌቂሲዴስ።
1KI 6:22 ሂስቲዲ ኬꬃስ ሶ ጊዶዛ ዎርቃን ሜሺዴስ፤ ሄሳꬆካ ኡባፌ ዱማቲዳ ጊዶ ቆልኣዛን ዲዛ ያርሾሶዛ ሙሩታ ዎርቃን ሜሺዴስ።
1KI 6:23 ኡባፌ ዱማቲዳ ጊዶ ቆልኣዛን ዎꬃናስ ኢሳስ ኢሳስ ጌሳይ 10 ዋꬋ ጊዲዛ ናምኡ ኪሩቤ ሚስሌታ ዎጋራ ሚꬃፌ ማሲዲ ጊግሲዴስ።
1KI 6:24 ኮይሮ ኪሩቤዛ ቄፌይ ኢሶይ ኢቻሹ ዋꬋ፤ ናምኣንꬆዚ ኢቻሹ ዋꬋ፤ ኮይሮ ቄፌ ጼራፔ ቢዲ ናምኣንꬆ ቄፌዛ ጼራ ጋካናስ ታሙ ዋꬋ።
1KI 6:25 ናምኣንꬆ ኪሩቤዛ ቄፌይካ ታሙ ዋꬋ፤ ናምኡ ኪሩቤታ ሜꬋይኔ ጉባይ ኢሲ ጊና።
1KI 6:26 ኢሲ ኢሲ ኪሩቤ ጌሳይ ታሙ ዋꬋ።
1KI 6:27 ሶሎሞኔይ ጾሳ ኬꬃን ዲዛ ኡባፌ ዱማቲዳ ጊዶ ቆልኣን ኪሩቤታ ዎꬂዴስ፤ ኢስታ ቄፌይ ሚጬቲ ኡቲዴስ፤ ኢሲ ኪሩቤዛ ቄፌይ ኢሲ ባጋ ጎዳ ቦቺሺን ሃንኮ ኪሩቤዛ ቄፌይ ሃንኮ ባጋ ጎዳ ቦቼስ፤ ኢስታ ናምኣታ ቄፌይ ሶ ጊዶን ኢሶይ ኢሳራ ጋይቴስ።
1KI 6:28 ሶሎሞኔይ ኪሩቤታካ ዎርቃን ሜሺዴስ።
1KI 6:29 ኡባፌ ዱማቲዛ ጊዶ ቆልኣዛ ሶ ባጋራኔ ካሬ ባጋራ ጎዳ ኪሩቤ ሚስሌታን፥ ዛምባ ሚስሌታኒኔ ጪሻ ሚስሌታን ኣሌቂሲዴስ።
1KI 6:30 ቃሴካ ኡባፌ ዱማቲዳ ጊዶ ቆልኣዛኔ ጾሳ ኬꬃ ዉይጌዛ ኡባ ዎርቃን ሜሺዴስ።
1KI 6:31 ኡባፌ ዱማቲዳ ጊዶ ቆልኣ ጌሊዛሶዛስ ፔንጌዛ ዎጋራ ሚꬃፌ ሳንቃታ ጊግሲዴስ፤ ቆሲላꬃታሲኔ ቆሬታስ ኢቻሹ ዞዜይ ዴስ።
1KI 6:32 ዎጋራ ሚꬃፌ ኦሴቲዳ ናምኡ ሳንቃታ ኪሩቤ ሚስሌታን፥ ዛምባታ ሚስሌታኒኔ ጪሻ ሚስሌታን ኣሌቂሲዴስ፤ ሄይታ ኡባ ዎርቃን ሜሺዴስ።
1KI 6:33 ሄሳꬆካ ጾሳ ኬꬃ ጌሊዛሶ ፔንጌዛን ዎጋራፔ ኦሴቲዳ ኦይዱ ዞዜራ ዲዛ ቆሲላꬅ ኤሲዴስ።
1KI 6:34 ናምኡ ናምኡ ሳንቃቲ ማጻፋን ኢሲ ቦላ ኦይኬቲዳ ናምኡ ሳንቃታ ጊግሲዴስ።
1KI 6:35 ኢስታ ቦላ ኪሩቤ ሚስሌታ፥ ዛምባ ሚስሌታኔ ጪሻ ሚስሌታ ሜꬊዴስ፤ ሄ ሚስሌታ ሙሩታ ዎርቃን ሜሺዴስ።
1KI 6:36 ጾሳ ኬꬃን ጊዶ ዉይጌን ማሴቲዳ ሹች ሄꬑ ማራን ሊጪዴስ፤ ቃሴ ኢሲ ማራን ዚጋ ሳንቃ ሊጪዴስ።
1KI 6:37 ሶሎሞኔይ ካዎቲዳ ኦይዳንꬆ ላይꬃን፥ ዚፌ ጌቴቲዛ ናምኣንꬆ ኣጊናን ጎዳ ኬꬃ ዮቺ ዬጌቲዴስ።
1KI 6:38 ሶሎሞኔይ ካዎቲዳ ታማኔ ኢሲንꬃ ላይꬃን፥ ቡሌ ጌቴቲዛ ኦስፑንꬃ ኣጊናን ጾሳ ኬꬃይ ካሴ ኬጻናስ ቆፒዳ ማላ ኬጼቲ ጊጊዴስ፤ ሶሎሞኔይ ጾሳ ኬꬃ ላፑን ላይꬃን ኬጺ ኩንꬂዴስ።
1KI 7:1 ሶሎሞኔይ ባ ኬꬅ ኬጺ ጊጋናስ 13 ላይꬅ ኤኪዴስ።
1KI 7:2 ሊባኖሴ ዎራ ጌቴቲዛ ካዎቴꬃ ኬꬅ ኬጺዴስ፤ ሄ ኬꬃስ ኣዱሳቴꬃይ 100 ዋꬋ፥ ጎምፓይ 50 ዋꬋ ጌሳይ 30 ዋꬋ፤ ኦይዱ ማራን ኤቂዳ ዚጋ ቱሳቲ ቱቂ ኦይኪዳ ዚጋፔ ኦሴቲዳ ዞንጋልꬃቲ ዴቴስ።
1KI 7:3 ቱሳቲ ቶኪ ኦይኪዛ ጌዴ ዎꬊዛ ሚꬃቲ ዴቴስ፤ ኢሲ ማራ ቦላ 15 ዞንጋልꬃቲ ዴቴስ፤ ሄይቲ ኢሲ ቦላ ኦይዱ ታማኔ ኢቻሻ። ሄ ዞንጋልꬃታፔ ቦላራ ካራ ካሚዛ ዚጋ ሳንቃቲ ዴቴስ።
1KI 7:4 ሄ ኬꬃ ማስኮቴቲ ሄꬑ ማራን ꬎቁ ጊ ኦሴቲዳ፤ ኢስቲ ኢሶይ ኢሳራ ጊናን ዴቴስ።
1KI 7:5 ፔንጌታሲኔ ማስኮቴታስ ኦይዱ ዞዜራ ዲዛ ቆሲላꬃቲ ዴቴስ፤ ማስኮቴቲ ሄꬑ ማራን ኦሴቲዳ፤ ኢስቲ ኢሶይ ኢሳራ ጊናን ዴቴስ።
1KI 7:6 ሶሎሞኔይ ዳሮ ቱሳታራ ዲዛ ኬꬄ ጌቴቲዛ ኬꬅ ኬጺዴስ፤ ሄ ኬꬃስ ኣዱሳቴꬃይ 50 ዋꬋ፥ ጎምፓይ 30 ዋꬋ፤ ሲንꬃ ባጋራ ቱሳን ኡቲዳ ካራይ ዲዛ ኣሲ ሲሜሬቲዛ ዳራንቻይ ዴስ።
1KI 7:7 ቃሴ ኢዚ ፒርዳ ፒርዳናስ ኡቲዛ ሺሎታ ኬꬅ ኬጺዴስ፤ ሄ ኬꬃይ ዉይጌፔ ቢዲ ካራ ጋካናስ ዚጋ ሳንቃን ጎርዴቲዴስ።
1KI 7:8 ፒርዳ ኬꬃፌ ጉዬ ባጋራ ዲዛ ዛጎን ካዎቴꬃ ኬꬃ ባስ ዳናሶ ሃንኮ ኬꬃ ማላ ኦꬂ ኬጺዴስ፤ ሶሎሞኔይ ባ ማቾ ፓሮኔ ናዪስ ሄሳ ማላ ካዎቴꬃ ኬꬅ ኬጺ ኢሚዴስ።
1KI 7:9 ሄ ኬꬃቲ ኡባይ ካሬፔ ቢዲ ጊታ ዛጎዛ ጋካናስ፥ ዮቻፌ ቢዲ ካራ ጋካናስ ጊናን ጊናን ቃንጼቲ ማሴቲዳ ሹቻታን ኬጼቲዳ።
1KI 7:10 ዮቻዚካ ዎꬊዳይ 10 ዋꬋኒኔ 8 ዋꬋን ሎኢ ማሴቲዳ ጊታ ሹቻታና።
1KI 7:11 ኢዛፔ ቦላ ባጋራ ሚጼን ሚጼን ማሴቲዳ ሎኦ ሹቻቲኔ ዚጋ ሳንቃቲ ዴቴስ።
1KI 7:12 ጾሳ ኬꬃ ዉይጌይ ያኔ ሃ ሲሜሬቲዛ ዳራንቻራ ጉጂን ጊታ ዛጎዛ ማላ ሎኢ ማሴቲዳ ሄꬑ ዩሾ ሹቻን፥ ኢሲ ዩሾ ዚጋ ሳንቃን ጊምቤቲዴስ።
1KI 7:13 ካዎ ሶሎሞኔይ ኪቲዲ ኪራሜ ጌቴቲዛ ኣስ ጺሮሴ ካታማፔ ኤሂሲዴስ።
1KI 7:14 ኒፍታሌሜ ቆሞፌ ጊዲዳ ኪራሜ ኣያ ኣምኦ፤ ኢዛ ኣዋይ ጺሮሴ ኣሳ፤ ጻርቂማላ ኦሶንካ ኤሬቲዳ ሂላንቻ፤ ኪራሜይ ጻርቂማላ ቆጺዛ ሂላቴꬂ ዲዛ ኣሳ፤ ኢዚ ጻርቂማላፔ ቆጺዲ ኬሲዛ ኦሶ ኡባን ኣኬካን፥ ኤራቴꬃኒኔ ሂላቴꬃን ኬሂ ሎሂዳ ኣሳ፤ ኢዚካ ካዎ ሶሎሞኔኮ ዪዲ ባስ ኢሜቲዳ ኦሶ ኡባ ኦꬂዴስ።
1KI 7:15 ኪራሜይ ኢሲ ኢሲ ጌሳይ 18 ዋꬋ፥ ዩዪ ኣꬋናስ ኦርዴቴꬃይ 12 ዋꬋ ጊዲዳ ናምኡ ጻርቂማላ ቱሳታ ኦꬂዴስ።
1KI 7:16 ሄሳꬆካ ቱሳታ ጼራን ዎꬃናስ ናምኡ ቁስቴታ ጻርቂማላፔ ሴሪሲዲ ኦꬂዴስ፤ ኢሲ ኢሲ ቁስቴይ ኢቻሽ ዋꬋ ኣዱቄስ።
1KI 7:17 ቱሳ ሁኤን ዲዛ ቁስቴታስ ኣሌቆ ጊዳና ማላ ኢሲ ቁስቴስ ጊቴ ሚሳቲዛ ላፑን ሳንሳላታ ኦꬂዴስ።
1KI 7:18 ቱሳታ ቦላ ዲዛ ቁስቴታ ኣሌቂሳናስ ኢሲ ኢሲ ጊቴ ሳንሳላታ ዩሾን ናምኡ ማራን ኦሮማኔታ ኦሲሲዴስ፤ ናምኡ ቁስቴታስካ ሄሳꬆ ኦꬂዴስ።
1KI 7:19 ዳራንቻን ኤቂዳ ቱሳታ ሁኤን ዲዛ ቁስቴታ ኣዱሳቴꬃይ 4 ዋꬋ፤ ኢስታ ቦላ ሱፌ ጪሽ ሚሳቲዛ ጪሺ ዴስ።
1KI 7:20 ናምኡ ቱሳታ ሁኤ ቦላ ዲዛ ጊቴ ሳንሳላታታፔ ካሊዲ ዲዛ ኤꬖይ ኡቲዳሶሆፔ ቦላ ባጋራ 200 ኦሮማኔ ቴራ ሚስሌቲ ናምኡ ማራን ዩዪ ኣꬊ ዴቴስ።
1KI 7:21 ኪራሜይ ሄ ናምኡ ቱሳታ ሄ ሃ ሲሜሬቲዛሶን ጾሳ ኬꬃ ዳራንቻን ኤሲዴስ፤ ዱጌሃ ባጋራ ኤሲዳ ቱሳ ያኪኔ ፥ ፑዴሃ ባጋራ ኤሲዳይሳ ቦኤዜ ጊ ሱንꬂዴስ።
1KI 7:22 ቱሳታ ሁኤን ዲዛ ቁስቴቲ ሱፌ ጪሽ ሚሳቴቴስ፤ ሄሳ ማላን ቱሳታ ኦሶይ ፖሌቲዴስ።
1KI 7:23 ኪራሜይ ኢዛስ ሜꬋይ ኤꬖ ማላ ጊታ ጋባቴ ጻርቂማላፔ ሴሪሲ ሜꬊዴስ፤ ሄ ጊታ ጋባቴዛ ዶናይ ሃ ጋጻፔ ያ ጋጻ ጋካናስ 10 ዋꬋ፤ ጌሳይ 5 ዋꬋ፤ ዩዪ ኣꬋናስ ቃሴ 30 ዋꬋ።
1KI 7:24 ጊታ ጎንጌዛ ዶናን ካሬ ባጋራ ዚቂ ጊዲ ኢዛራ ኦይኬቲ ሜꬌቲዳ ጎሴ ሚስሌቲ ዴቴስ፤ ሄ ሚስሌቲ ናምኡ ማራን ኢሲ ኢሲ ዋꬋን ታማይ ታማይ ዩዪ ኣꬋናስ ሹዬቲዴስ።
1KI 7:25 ሄ ጊታ ጋባቴይ ጻርቂማላፔ ሜꬌቲዳ 12 ቦራ ሚስሌታ ዞኮን ኡቲዴስ፤ ቦራታ ሚስሌታፔ ሄꬓቲ ፑዴሃ ባጋ፥ ሄꬓቲ ኣርሼይ ዉሊዛ ባጋ፥ ሄꬓቲ ዱጌሃ ባጋ፥ ሄꬓቲ ቃሴ ኣርሼይ ሞኪዛ ባጋ ሲሚ ኡቲዳ፤ ጊታ ጋባቴዚ ኢስታ ቦላ ኡቲዴስ፤ ኢስታስ ጉዬ ባጋይ ጊዶ ሲሚ ኡቲዴስ።
1KI 7:26 ሄ ጊታ ጎንጌዛስ ኦርዴቴꬃይ ኩሼ ቃኣ ሊኬ፤ ኢዛ ዶናይ ጪሻ ሚሳቲዲ ዋንጫ ሚሳቴስ፤ ሄ ጊታ ጋባቴዚ 40,000 ሊቲሮ ጊዲዛ ሃꬅ ኦይኬስ።
1KI 7:27 ኪራሜይ ቃሴ ዱማ ዱማ ሚሻታ ዎꬂዛ ታሙ ጋሬታ ጻርቂማላፔ ሜꬊዴስ፤ ሄ ጋሬታስ ኢሳስ ኢሳስ ኣዱሳቴꬃይ 4 ዋꬋ፥ ጎምፓይ 4 ዋꬋ፥ ጌሳይ 3 ዋꬋ።
1KI 7:28 ሄ ጋሬቲ ሄሳꬆ ኦሴቲዳ፤ ፑዴ ኤቂዳ ኦይዱ ቢራታታ ቦላ ፒዲ ጊዳ ሎቻ ጻርቂማላቲ ኦይኬቲ ኡቲዳ።
1KI 7:29 ሄ ጻርቂማላታ ቦላ ጋሞታ፥ ቦራታኔ ኪሩቤታ ሚሳቲሲዲ ሜꬊዳ ሚስሌቲ ዴቴስ፤ ጋሞታ ሚስሌታፔኔ ቦራታ ሚስሌታፔ ቦላ ባጋራኔ ጋርሳ ባጋራ ቆጼቲ ጊጊዳ ጪሻ ኤንጩርሳ ሚስሌቲ ዴቴስ።
1KI 7:30 ሚሻታ ኢስታ ቦላ ዎꬂዛ ጻርቂማላፔ ኦሴቲዳ ኦይዱ ጋሬቲ ዴቴስ፤ ሄ ጋሬቲ ጌንዴራና ማላ ኦይኪዳ ማርጮቲ ዴቴስ፤ ሄሳꬆካ ኦይዱ ባጋራ ሜቻ ጎንጌይ ኢስታ ቦላ ኡቲዛ ጻርቂማላፔ ኦሴቲዳ ጪሻ ኤንጩርሳታን ኣሌቄቲ ኡቲዳ።
1KI 7:31 ሜቻ ጎንጌዛ ቆꬌ ጌሳይ ኢሲ ታꬋኮ፤ ቃሴ ጎንጌዛ ጌሳይ ኢሲ ዋꬋ ማላ፤ ኢዚካ ኤꬖ ማላ፤ ጎንጌዛ ቆꬌይ ሚስሌታን ኣሌቄቲ ኡቲዴስ፤ ኢዛ ቶኪ ኦይኪዳ ኦይዱ ጉላይ ዴስ ኣቲን ኤꬖ ዴና።
1KI 7:32 ኦይዱ ጋሬታስ ኢሳስ ኢሳስ ጌሳይ ኢሲ ዋꬋኔ ባጋ፤ ሄ ጋሬቲ ሎቻ ጻርቂማላፔ ጋርሳ ባጋራ ዴቴስ፤ ጋሬቲ ኢስታ ቦላ ሚሼ ዎꬂዛሶታራ ኢሲፌ ማርጮን ኦይኬቲ ኡቲዳ።
1KI 7:33 ጋሬቲ ኦላ ፓራ-ጋሬ ሚሳቴቴስ፤ ጋሬታ ኢሲ ቦላ ጋꬂ ዋጺዛ ማርጮቲ፥ ቻርኬቲኔ ታጎቲ ኡባይካ ጻርቂማላፔ ኦሴቲዳ።
1KI 7:34 ሄ ጋሬታ ኡባ ዞዜታስካ ኢስታ ቶሆሶራ ቶሆሶራ ኢስታራ ኢሲኖ ጊዲ ኦይኬቲዲ ጻርቂማላፔ ሜꬌቲዳ ዜምፖቲ ዴቴስ።
1KI 7:35 ኢሲ ኢሲ ጋሬዛ ሁኤ ዩሾን ኢዛስ ጌሳይ ኢሲ ዋꬋስ ባጋ ፒሬሜይ ዴስ፤ ዜምፖቲኔ ሎቻ ጻርቂማላቲ ጋሬዛራ ኦይኬቲ ኢሲኖ ጊዲ ኦሴቲዳ።
1KI 7:36 ሃ ዜምፖታፔኔ ሎቻ ጻርቂማላታፔ ጊዶን ዲዛ ሃንኮ ኣቲዳ ሶሆቲ ኡባይ ኪሩቤታን፥ ጋሞታኒኔ ዛምባታ ሚስሌታን ኣሌቄቲ ኡቲዳ፤ ቃሴ ኢስታ ዩሾይ ጪሻ ኤንጩርሳ ሚስሌን ኣሌቄቲ ኡቲዴስ።
1KI 7:37 ታሙ ጋሬቲካ ሄሳꬆ ኦሴቲዳ፤ ኢስቲ ሴሪዲ ሜꬌቲዳ ሚሻይ ኢሲኖ ጊዲዳ ጊሻስ ኢስታ ጌሳይኔ ሜꬋይ ኢሲ ማላ።
1KI 7:38 ኪራሜይ ታሙ ሜቻ ጎንጌታ ጻርቂማላፔ ሜꬊዴስ፤ ኢሲ ኢሲ ጎንጌ ጎምፓይ 4 ዋꬋ ጊዲዲ፥ 880 ሊቲሮ ሃꬅ ኦይኬስ፤ 10 ጋሬታስ ሁኤን ሁኤን ኢሲ ኢሲ ሜቻ ጎንጌይ ዴስ።
1KI 7:39 ኪራሜይ ኢቻሽ ጋሬታ ጾሳ ኬꬃስ ፑዴሃ ባጋራ፥ ኢቻሻታ ቃሴ ጾሳ ኬꬃስ ዱጌሃ ባጋራ ዎꬂዴስ፤ ቃሴ ጻርቂማላፔ ኦሴቲዳ ጊታ ጋባቴዛ ጾሳ ኬꬃፌ ዱጌሃ ባጋራ ኣርሼይ ሞኪዛ ባጋራ ጉላ ቦላ ኤሲዴስ።
1KI 7:40 ቃሴ ኪራሜይ ጻሮታ፥ ቃጴታኔ ዲስቴታ ሜꬊዴስ፤ ሂስቲዲ ካዎ ሶሎሞኔስ ጎዳ ኬꬃ ኦሶታ ሃይሳፌ ካሊዛይሳ ማላ ኦꬂ ፖሊዴስ።
1KI 7:41 ሄይቲካ ናምኡ ቱሳታ፤ ሄ ቱሳታ ሁኤ ቦላ ዎꬂዛ ኤꬖ ማላ ኦሴቲዳ ናምኡ ቁስቴታ፥ ቱሳታ ቦላ ዲዛ ቁስቴታ ኣሌቂሲዛ ናምኡ ጊቴ ማላ ሳንሳላታታ፥
1KI 7:42 ቁስቴታ ቦላኔ ቱሳታ ቦላ ናምኡ ማራን ኦሴቲዳ ጊቴ ማላ ሳንሳላታታ፥ ኣሌቂሲዛ 400 ኦሮማኔ ቴራ ሚስሌታ፥
1KI 7:43 ታሙ ጋሬታ፥ ታሙ ሜቻ ጎንጌታ፥
1KI 7:44 ጊታ ጎንጌዛኔ ኢዛ ቶኪዳ 12 ቦራ ሚስሌታ፥
1KI 7:45 ጻሮታ፥ ቃጴታኔ ዲስቴታ። ኪራሜይ ካዎ ሶሎሞኔይ ጎዳ ኬꬃ ኦሶስ ጎኤታና ማላ ሃ ሚሻታ ኡባ ቁጬቲዲ ጾልቂዛ ጻርቂማላፔ ኦꬂዴስ።
1KI 7:46 ካዎ ሶሎሞኔይ ሱኮቴፔኔ ጳርታኔፔ ጊዶን ዮርዳኖሴ ዴምባን ዴኢዛ ጻርቂማላ ሴሪሲዛሶን ሃይታ ኡባ ኦሲሲዴስ።
1KI 7:47 ጻርቂማላፔ ሜꬌቲዳ ሃ ሚሻይ ኡባይ ኬሂ ዳሮ ጊዲዳ ጊሻስ ሶሎሞኔይ ኢዛ ሜዛኒሲቤና፤ ሄሳ ጊሻስ ሃ ሜꬌቲዳ ሚሻቲ ኣይ ኬና ዴጾኮ ኤሬቲቤና።
1KI 7:48 ቃሴካ ሶሎሞኔይ ጎዳ ኬꬃ ጊዶን ጎኤታና ማላ ኦሲሲዳ ሚሻቲ ኡባይ ሃይሳፌ ካሊዛይታ። ዎርቃፌ ኦሴቲዳ ያርሾ ያርሺዛሶ፥ ጎዳ ሲንꬃን ዎꬂዛ ኡኬꬃቲ ኡቲዛ ዎርቃ ጻራጴዛ፥
1KI 7:49 ኡባፌ ዱማቲዳ ጊዶ ቆልኣፌ ሲንꬃን ኢቻሻቲ፥ ኡሻቻ ባጋራ ኢቻሻቲ፥ ሃዲርሳ ባጋራ ኤቂዳ ዎርቃፌ ኦሴቲዳ ጾምፔ ዎꬂዛ ባላታ፥ ጪሻታ፥ ጾምፔታኔ ቃጴታ፥
1KI 7:50 ጹኣታ፥ ጾምፔ ቶይሲዪዛይታ፥ ጻሮታ፥ ኤጻኔ ኢስታ ቦላ ጩዋሲዛይታ፥ ታማ ኤኪዛ ሚሻታኔ፥ ኡባፌ ዱማቲዳ ጊዶ ቆልኣ ፔንጌታሲኔ ጾሳ ኬꬃ ፔንጌታስ ጊዲዛ ማጻፋታ። ሃ ሚሻቲ ኡባይ ዎርቃፌ ኦሴቲዳ።
1KI 7:51 ካዎ ሶሎሞኔይ ጎዳ ኬꬃ ኦሶ ኡባ ፖሊዳፔ ጉዬ ኢዛ ኣዋ ዳዊቲ ጎዳስ ዱማሲ ዎꬂዳ ቢራ፥ ዎርቃኔ ሃራ ሚሻታካ ኡባ ኤሂዲ ጾሳ ኬꬃ ሚሽ ሚንጂዛሶን ዎꬂዴስ።
1KI 8:1 ሄሳፌ ጉዬ ካዎ ሶሎሞኔይ ታቦታዛ ዳዊቴ ካታማ ጺዮኔፔ ኬሲዲ ጾሳ ኬꬅ ኤሃናስ ኢስራኤሌ ጪማታ፥ ኮራፒኔታኔ ኢስራኤሌ ኬꬃ ኣሳ ሃላቃታ ባ ዲዛሶ ዬሩሳላሜ ካታማ ሺሺዴስ።
1KI 8:2 ኤታኒሜ ጌቴቲዛ ላፑንꬃ ኣጊናን ዳሴ ባኣሌይ ቦንቼቲዛ ዎዴ ኢስራኤሌ ኣቱማ ኣሳይ ኡባይ ካዎ ሶሎሞኔኮ ሺቂዴስ።
1KI 8:3 ኢስራኤሌ ጪማቲ ኡባይ ሺቂን ቄሴቲ ታቦታዛ ዴንꬂ ቶኪዳ።
1KI 8:4 ሌዌቲኔ ቄሴቲ ታቦታ፥ ዱንካኔዛኔ ኢዛ ጊዶን ዲዛ ጌሻ ሚሻታ ኡባ ቶኪዲ ኤሂዳ።
1KI 8:5 ካዎ ሶሎሞኔይኔ ኢዛራ ዲዛ ኢስራኤሌ ኣሳይ ኩሜꬅ ታቦታ ሲንꬃን ሺቂዲ ቆዳናስ ዳንዳዬቶንታ ጮራ ዶርሳታኔ ቦራታ ያርሺዳ።
1KI 8:6 ሄሳፌ ጉዬ ቄሴቲ ታቦታ ጾሳ ኬꬃ ጊዶን ዲዛ ኡባፌ ዱማቲዳ ጊዶ ቆልኣን ኪሩቤ ሚስሌታ ቄፌታፔ ጋርሳ ባጋራ ዎꬂዳ።
1KI 8:7 ሚጬቲ ኡቲዳ ኪሩቤታ ቄፌቲ ታቦታኔ ታቦታ ቶኪዛ ሚꬃ ካሚዳ።
1KI 8:8 ቶሆ ሚꬃቲ ኬሂፔ ኣዱሳ ጊዲዳ ጊሻስ ኢስታ ጼራይ ኡባፌ ዱማቲዳ ጊዶ ቆልኣፌ ሲንꬃ ባጋራ ዲሼ ቤቴቴስ፤ ጊዶ ኣቲን ኡባፌ ዱማቲዳ ጊዶ ቆልኣስ ሲንꬃ ባጋራ ጊዶንታ ሃራ ባጋራ ዲዛይታስ ቤቴቴና፤ ኢስቲ ሃኖ ጋካናስ ሄን ዴቴስ።
1KI 8:9 ኢስራኤሌ ኣሳይ ጊብጼ ቢታፌ ኬዚዳ ዎዴ ጎዳይ ኢስታራ ጫቄቲዳ ሲና ዙማ ቦላ ሙሴይ ታቦታ ጊዶን ዎꬂዳ ማሴቲዳ ናምኡ ሹቻታፔ ኣቲን ሃራይ ኣይኮ ሚሺካ ባዋ።
1KI 8:10 ቄሴቲ ጌሻሶዛፔ ኬዚን ሻራይ ጎዳ ኬꬅ ኩሚ ኡቲዴስ።
1KI 8:11 ሄ ሻራ ጊዶን ዲዛ ጾሳ ቦንቾይ ሶሆዛ ኩሚዳ ጊሻስ ቄሴቲ ባንታ ኦሶ ኦꬃናስ ዳንዳይቤቴና።
1KI 8:12 ሄሳፌ ጉዬ ሶሎሞኔይ፥ «ኣቤት ጎዳዉ፥ ኔኒ፥ ‹ታኒ ꬉማ ሻራን ዴኣና› ጋዳሳ።
1KI 8:13 ሄኮ ታኒ ኔኒ ኢዛን ሜርናስ ዴኣና ማላ ጊታ ኬꬅ ኬጻዲስ» ጊ ዎሲዴስ።
1KI 8:14 ኢስራኤሌ ኣስ ኡባይ ዱላታን ኩሚ ኤቂዲሺን ካዎይ ኢስታኮ ሲሚዲ፥
1KI 8:15 «ጎዳ ኢስራኤሌ ጾሳይ ጋላቴቶ! ታ ኣዋ ዳዊቴስ ባ ዶናን ዮቲዳ ሂዶታ ቃላ ባ ኩሼን ፖሊዴስ፤ ሄ ኢዚ ኢሚዳ ሂዶታይ፥
1KI 8:16 ‹ታ ዴራ ኢስራኤሌ ታኒ ጊብጼ ቢታፌ ኬሲዳ ጋላሳፌ ዶሚን ታ ሱንꬃይ ኢዛን ጼይጌታና ማላ ጾሳ ኬꬅ ኬጻናስ ኢስራኤሌ ቆሞታ ካታማታፔ ኢሳካ ዶራቤኬ፤ ጊዶ ኣቲን ታ ዴራ ኢስራኤሌ ካሌꬃና ማላ ዳዊቴ ዶራዲስ› ጌስ።
1KI 8:17 «ታ ኣዋ ዳዊቲ ጎዳ ኢስራኤሌ ጾሳ ሱንꬃስ ጾሳ ኬꬅ ኬጻናስ ባ ዎዚናን ቆፒዴስ።
1KI 8:18 ጎዳይ ታ ኣዋ ዳዊቴስ፥ ‹ኔኒ ታ ሱንꬃስ ጾሳ ኬꬅ ኬጻናስ ኔ ዎዚናን ቆፒዳይሲ ሎኦ፤
1KI 8:19 ጊዶ ኣቲን ጾሳ ኬꬃ ኬጻናይ ኔና ጊዳካ፤ ታ ሱንꬃስ ጾሳ ኬꬅ ኬጻናይ ኔ ጉልባቴፔ ዬሌታና ኔ ና› ጊዴስ።
1KI 8:20 «ጎዳይ ባ ኢሚዳ ሂዶታ ቃላ ፖሊዴስ፤ ጎዳይ ኢሚዳ ሂዶታ ቃላ ማላ ታኒ ታ ኣዋ ዳዊቴ ሶሆን ካዎታዳ ኢስራኤሌ ካዎቴꬃ ኣራታን ኡታዲስ። ቃሴካ ጎዳ ኢስራኤሌ ጾሳ ሱንꬃስ ጾሳ ኬꬅ ኬጻዲስ።
1KI 8:21 ጎዳይ ኑ ኣዋታ ጊብጼፔ ኬሲዳ ዎዴ ኢስታራ ጫቄቲዳ ጫቆ ቃላይ ኢዛን ዲዛ ታቦታይ ዳናሶ ታ ኢዛ ጊዶን ጊጊሳዲስ» ጊ ኣንጂዴስ።
1KI 8:22 ሄሳፌ ጉዬ ሶሎሞኔይ ጎዳስ ያርሾ ያርሺዛሶ ሲንꬃን ኩሜꬃ ኢስራኤሌ ዴራ ዱላታይ ዲዛሶን ኤቂዲ ባ ኩሼ ፑዴ ሳሎ ዴንꬂዴስ፤
1KI 8:23 ሂስቲዲ፥ «ኣቤት ጎዳዉ፥ ኢስራኤሌ ጾሳዉ! ቦላ ሳሎን ዎይኮ ጋርሳ ሳኣን ኔ ማላ ጾሲ ዴና፤ ባ ኩሜꬃ ዎዚናን ኔ ሲንꬃን ሚኒ ኤቂዳ ኔ ኦሳንቻታስ ኔ ጫቂዳ ቃላ ናጊዛይኔ ኔ ሚኖ ሲቆዛ ቆንጪሲዛይ ኔና።
1KI 8:24 ኔ ኣሽካራስ ታ ኣዋ ዳዊቴስ ኔኒ ኦꬃና ጋዳ ኢሚዳ ሂዶታ ናጋዳሳ፤ ኔኒ ካሴ ኔ ዶናን ዮቲዳ ሂዶታ ቃላ ኔ ኩሼን ሃች ፖላዳሳ።
1KI 8:25 «ሃኢካ ኣቤት ጎዳዉ፥ ኢስራኤሌ ጾሳዉ! ኔኒ ኔ ኣሽካራስ ታ ኣዋ ዳዊቴስ፥ ‹ኔኒ ታ ሲንꬃን ሲሜሬቲዳ ማላ ኔ ናይቲካ ታ ሲንꬃን ሲሜሬቲኮ ታ ሲንꬃን ኢስራኤሌ ካዎቴꬃ ኣራታን ኡቲዛ ኣሲ ሙሌካ ꬋዬና› ኔኒ ጊዳ ቃላ ፖላ።
1KI 8:26 ሃኢካ ኣቤት ኢስራኤሌ ጾሳዉ! ኔኒ ኔ ኣሽካራስ ታ ኣዋ ዳዊቴስ ኢሚዳ ሂዶታ ቃላይ ፖሌቶ።
1KI 8:27 «ቱማፔ ጾሲ ሳኣ ቦላ ዴኢ ኤሪዜ? ቤኣ ሳሎይ፥ ሳሎታፔ ቦላን ዲዛ ሳሎይካ ኔና ኦይካና ዳንዳዬና፤ ሂስቲን ሃይሲ ታ ኬጺዳ ጾሳ ኬꬃይ ኔስ ኣይ ጊዳኔ!
1KI 8:28 ጊዲኮካ ኣቤት ጎዳዉ፥ ታ ጾሳዉ! ታኒ ኔ ኣሽካራይ ሃች ዎሲዛይሳኔ ሾቢዛይሳ ኔኒ ኤዝጋ።
1KI 8:29 ኔኒ፥ ‹ታ ሱንꬃይ ሄ ሶሆን ዳና› ጊዳ ሃይሳ ጾሳ ኬꬃ ኔ ኣይፌይ ኦማርሲኔ ጋላስ ጼሎ፤ ታኒ ኔ ኣሽካራይ ሃይሳ ኬꬃኮ ሲማዳ ዎሲዛ ዎሳ ኔኒ ሲያ።
1KI 8:30 ታኒ ኔ ኣሽካራይኔ ኔ ዴሬ ኢስራኤሌይ ሃይሳ ጾሳ ኬꬃኮ ሲሚዲ ሾቢ ዎሲዛ ዎሳ ኔ ሲያ፤ ኔ ዱሳሶን ሳሎን ዳሼ ሲያዳ ኑስ ኣቶ ጋ።
1KI 8:31 «ኢሲ ኣሲ ባ ላጌ ቆሂዲ ካሺ ጊን ኢዛ ጫቄꬃናስ ኤሂን ሃይሳ ጾሳ ኬꬃ ጊዶን ዲዛ ያርሺዛሶዛ ሲንꬃን ኢዚ ጫቂኮ፥
1KI 8:32 ኔኒ ሳሎን ዳሼ ሄሳ ሲያዳ ፖላ፤ ኔ ኣይሌታ ጊዶን ፒርዳ ቆሂዳዴስ ኢዛ ኦሶ ማላ ኢዛስ ዛራ፤ ጺሎዛስ ኢዛ ጺሎቴꬃ ቆንጪሳዳ ሻቱሚሳ።
1KI 8:33 «ኔ ዴሬ ኢስራኤሌይ ኔና ቆሂዳ ጋሶን ባ ሞርኬታን ጾኔቲዲ ኢስቲ ኔኮ ሲሚዲ ኔ ሱንꬃ ጼይጊኮ ሃ ጾሳ ኬꬃን ኔና ዎሲኮኔ ኔና ሾቢኮ፥
1KI 8:34 ኔኒ ሳሎን ዳሼ ሲያ፤ ኔ ዴሬ ኢስራኤሌ ናጋራ ኣቶ ጋ፤ ሂስታዳ ኔኒ ኢስታ ኣዋታስ ኢሚዳ ቢታዮ ኢስታ ዛራ ጌልꬃ።
1KI 8:35 «ኔ ኣሳይ ኔ ቦላ ኦꬂዳ ናጋራ ጋሶን ሳሎይ ጎርዴቲን ኢራይ ቡኮንታ ኢጺኮ፥ ኢስቲ ሃይሳ ኬꬃኮ ሲሚ ኔ ሱንꬃ ጼይጊ ዎሲኮ፥ ኢስቲ ባንታ ናጋራፔ ሲሚኮ ኔኒ ኢስታ ዎሳ ሳሎን ዳሼ ሲያ።
1KI 8:36 ሂስታዳ ኔ ኣሽካራ ኢስራኤሌ ዴራ ናጋራ ኣቶ ጋ፤ ኢስቲ ሄሜታናስ ቤሲዛ ሎኦ ኦጌ ኢስታ ታማርሳ፤ ሄሳፌ ጉዬ ኔኒ ኔ ዴራ ላቲሲዳ ቢታን ኢራ ቡኪሳ።
1KI 8:37 «ቢታ ቦላን ኮሻይ ዎይኮ ኢታ ሃርጌይ፥ ዎይኮ ኩቱልኤይ ሾጪኮ ዎይኮ ቆይኮ፥ ዎይኮ ቦሌይ፥ ዎይኮ ጉምባሮይ ቢታ ቦላን ዪኮ፥ ዎይኮ ሞርኬይ ኢስታ ካታማታ ዶዲኮ፥ ዎይኮ ኣይ ባሺካ ዎይኮ ሃርጌይ ዪኮ፥
1KI 8:38 ኔ ዴሬ ኢስራኤሌፔ ኦኒካ ባ ዎዚናን ኡንኤቲዳይሳ ኤሪዲ ባ ኩሼታ ሃ ጾሳ ኬꬃኮ ሚጪዲ ሾቢ ዎሲኮ፥
1KI 8:39 ኔኒ ኢስታ ዎሳ ሳሎን ዳሼ ሲያዳ ኢስታ ናጋራ ኣቶ ጋ፤ ሂስታዳ ኢስታስ ኦꬃ፤ ኔኒ ጻላ ኣሳ ኡባ ዎዚና ኤሪዛ ጊሻስ ኢዛዴ ኦሶ ኦሶ ማላ ኢዛስ ኢማ።
1KI 8:40 ሂስቲኮ ኔኒ ኑ ኣዋታስ ኢሚዳ ቢታን ዲዛ ዎዴ ኡባን ኢስቲ ኔስ ያያና።
1KI 8:41 «ኔ ዴሬ ኢስራኤሌ ጊዶንታይቲ ኔ ጊታ ሱንꬃ ጊሻስ ሲዪዲ ሃሆ ቢታፌ ዪዳ ካሬ ዴሬ ኣሲ ዲኮ፥
1KI 8:42 ኣሳይ ሃሆፔ ዪዛይ ኔ ጊታ ሱንꬃ ጊሻስ፥ ኔ ሚኖ ቄሴ ጊሻሲኔ ሚጬቲዳ ኔ ኩሼ ጊሻስ ሲዪዳ ጊሻሳ። ሂስቲኮ ሃይሳ ጾሳ ኬꬃን ዎሳናሲኔ ጎይናናስ ዪኮ፥
1KI 8:43 ኔኒ ኔ ዲዛሶን ሳሎን ዳሼ ሲያ፤ ኔ ኣሳቲ ኢስራኤሌቲ ኤሪዛ ማላ ሳኣን ዲዛ ኣሳይ ኡባይ ኔ ሱንꬃ ኤራና ማላኔ ኔስ ያያና ማላ፥ ቃሴ ታኒ ኬጺዳ ሃ ጾሳ ኬꬃይ ኔስ ጎይኖሶ ጊዲዳይሳ ኢስቲ ኤራና ማላ፥ ሄ ካሬ ቢታ ኣሲ ኔና ዎሲዛይሳ ኢዛስ ፖላ።
1KI 8:44 «ኔ ዴሬይ ባንታ ሞርኬታ ኦላና ማላ ኔኒ ኪቲዳሶ ኣዋካ ቢዲ ኢስቲ ኔኒ ዶሪዳ ሃ ካታማን ታኒ ኔ ሱንꬃስ ኬጺዳ ጾሳ ኬꬃኮ ሲሚዲ ኔና ጎዳ ዎሲኮ፥
1KI 8:45 ኔኒ ኢስታ ዎሳኔ ሾቤꬃ ሳሎን ዳሼ ሲያዳ ኢስታ ማዳ።
1KI 8:46 «ናጋራ ኦꬆንታ ኣሲ ባይንዳ ጊሻስ ኢስቲ ናጋራ ኦꬂን ኔኒ ኢስታ ቦላ ሃንቄታዳ ሞርኬታስ ኢስታ ኣꬃ ኢሚን ሞርኬቲካ ኢስታ ዲኢዲ ሃኮ ዎይኮ ማታ ጊዲን ባንታ ቢታ ኤኪ ኤፊን፥
1KI 8:47 ኢስቲ ባ ዲኤቲዳ ቢታን ዲሼ ባንታ ዎዚናን ናጋራፔ ሲሚኮ፥ ኢስቲ ሄን ዲኤቲ ቢዳ ዴሬን ዲሼ፥ ‹ኑኒ ናጋራ ኦꬂዶስ፤ ኔና ቆሂዶስ፤ ኢታ ሚሺካ ኦꬂዶስ› ጊዲ ኔና ሾቢኮ፥
1KI 8:48 ባንታና ዲኢዲ ኤፊዳ ሞርኬታ ቢታን ዲሼ ኢስቲ ባንታ ኩሜꬃ ዎዚናፔኔ ባንታ ኩሜꬃ ሼምፖፌ ኔኮ ሲሚኮ፥ ኔኒ ኢስታ ኣዋታስ ኢሚዳ ኢስታ ቢታኮ፥ ኔኒ ዶሪዳ ካታማይኮኔ ታኒ ኔ ሱንꬃስ ኬጺዳ ጾሳ ኬꬃኮ ሲሚዲ ኔና ዎሲኮ፥
1KI 8:49 ኔኒ ኢስታ ዎሳኔ ሾቤꬃ ሳሎን ዳሼ ሲያዳ ኢስታ ማዳ።
1KI 8:50 ኔ ዴሬይ ኦꬂዳ ናጋራኔ ኔና ቆሂዳ ቆሆዛ ኣቶ ጋ፤ ኢስቲ ዲኢዲ ኤፊዳ ኣሳይ ኢስታስ ቃꬌታና ማላ ኦꬃ።
1KI 8:51 ጋሶይካ ኢስቲ ቢራታ ሴሪሲዛ ኢቶኔ ታማ ማላ ጊዲዳ ጊብጼ ቢታፌ ኔኒ ኔስ ሻካ ኬሲዳ ኔ ዴሬታኔ ኔ ጺንጾታ።
1KI 8:52 «ታኒ ኔ ኣሽካራይኔ ኔ ዴሬ ኢስራኤሌይ ሾቢዛይሳ ኔ ኣይፌይ ጼሎ፤ ቃሴ ኢስቲ ዋሲዛ ዎዴ ኣይዴካ ኔኒ ኢስታ ዋሶ ኣላ።
1KI 8:53 ኣቤት ጎዳዉ፥ ታ ጾሳዉ! ኔኒ ኑ ኣዋታ ጊብጼፔ ኬሲዳ ዎዴ ኔ ኣሽካራ ሙሴ ባጋራ ዮቲዳ ማላ ኢስታ ኔኒ ሳኣን ዲዛ ካዎቴꬃታ ኡባ ጊዶፌ ኔስ ጺንጾ ጊዳና ማላ ዱማሳዳሳ» ጊዲ ዎሲዴስ።
1KI 8:54 ሶሎሞኔይ ዎሳኔ ሾቤꬃ ጎዳኮ ሺሺዳፔ ጉዬ ባ ኩሼ ፑዴ ሳሎ ዴንꬂዲ ያርሾ ያርሺዛሶ ሲንꬃን ጉልባቲዳሶፔ ዴንዲ ኤቂዴስ።
1KI 8:55 ኩሜꬃ ኢስራኤሌ ዱላታ ዴራ ኡባስ ባ ቃላ ꬎቁ ሂስቲዲ፥
1KI 8:56 «ኢዚ ካሴ ኢሚዳ ሂዶታ ቃላ ማላ ባ ዴሬ ኢስራኤሌስ ሼምፖ ኢሚዳ ጎዳስ ጋላታይ ጊዶ፤ ኢዚ ባ ኣሽካራ ሙሴ ባጋራ ኢሚዳ ሂዶታ ቃላ ኡባ ፖሊዴስ።
1KI 8:57 ጎዳ ኑ ጾሳይ ካሴ ኑ ኣዋታራ ዲዛ ማላ ኑናራካ ዴኦ፤ ኢዚ ኑና ሙሌካ ኣጎፎ ዎይኮ ዬጎፎ።
1KI 8:58 ኑኒ ኢዛ ኦጌታ ኡባን ሄሜታና ማላኔ ኢዚ ኑ ኣዋታስ ኢሚዳ ኣዛዞታ፥ ዎጋታኔ ማራታ ናጋና ማላ ኑ ዎዚና ባኮ ዛሮ።
1KI 8:59 ሃች ሃች ዴኦስ ኮሺዛ ማላ፥ ጎዳይ ታና ባ ኣሽካራኔ ባ ዴራ ኢስራኤሌ ማዳና ማላ፥ ታኒ ጎዳ ሲንꬃን ዎሳዳ ጊዳ ሃ ቃላቲ ቃማኔ ጋላስ ጎዳ፥ ኑ ጾሳኮ ሺቄቶ።
1KI 8:60 ሄሲካ ሳኣን ዴኢዛ ኣሳይ ኡባይ ጾሲ ጻላ ጎዳ ጊዲዳይሳኔ ኢዛፔ ኣቲን ሃራ ጾሲ ባይንዳይሳ ኢስቲ ኤራና ማላሳ።
1KI 8:61 ሃቻይሳꬆካ ኢንቴ ኢዛ ዎጋን ዳና ማላኔ ኢዛ ኣዛዞታ ናጋና ማላ ጎዳስ፥ ኑ ጾሳስ ኢንቴ ዎዚናይ ኣማኔቲዛ ጊዶ» ጊ ኣንጂዴስ።
1KI 8:62 ሄሳፌ ጉዬ ካዎዚኔ ኢስራኤሌ ኣሳይ ኡባይ ኢሲፌ ጎዳ ሲንꬃን ያርሾ ያርሺዳ።
1KI 8:63 ሶሎሞኔይ ጎዳስ ኢሲፌቴꬃ ያርሾ ያርሻናስ 22,000 ቦራታኔ 120,000 ዶርሳታ ሺሺዴስ። ሄሳꬆ ኦꬂዲ ካዎዚኔ ኢስራኤሌ ኣሳይ ኡባይ ጎዳ ኬꬃ ኣንጂሲዳ።
1KI 8:64 ካዎ ሶሎሞኔይ ጾሳ ኬꬃስ ሲንꬃ ባጋን ዴኢዛ ዴምባስ ጊዶ ኣዳ ሄ ጋላስ ዱማሲዴስ። ሄን ጹጌቲዛ ያርሾ፥ ካꬃ ያርሾኔ ኢሲፌቴꬃ ያርሾፌ ሃንዳዛ ያርሺዴስ። ኢዚ ሄሳ ኦꬂዳይ ጎዳ ሲንꬃን ዴኢዛ ጻርቂማላፔ ኦሴቲዳ ያርሾ ያርሺዛ ሶሆይ ጹጌቲዛ ያርሾ፥ ካꬃ ያርሾኔ ኢሲፌቴꬃ ያርሾፌ ሃንዳዛ ያርሻናስ ጉጺዳ ጊሻሳ።
1KI 8:65 ሄ ዎዴ ሶሎሞኔይኔ ኢስራኤሌ ኣሳይ ኡባይ ላፑን ጋላስ ዳሴ ባኣሌ ቦንቺዳ፤ ቃሴካ ሃራ ላፑን ጋላስ ጉጂዲ ኢሲ ቦላ ታማን ኦይዱ ጋላስ ቦንቺዳ፤ ኢስራኤሌ ዛዋን ሃማቴ ፒኒዛ ፑርዴፌ ቢዲ ጊብጼ ሻፋ ጋካናስ ዴኢዛ ጮራ ኣሳይ ጎዳ ኑ ጾሳ ሲንꬃን ባኣሌ ቦንቻናስ ሺቂዴስ።
1KI 8:66 ዎንቴꬃ ጋላስ ካዎይ ኣሳ ሞይዚዴስ፤ ኣሳይ ካዎዛ ኣንጂዲ ጎዳይ ባ ኣይሌ ዳዊቴሲኔ ባ ኣሳ ኢስራኤሌስ ኦꬂዳ ኪያቴꬃን ዎዚናፔ ኡፋዬቲሼ ባሶ ባሶ ቢዴስ።
1KI 9:1 ሶሎሞኔይ ጎዳ ኬꬂኔ ካዎ ኬꬅ ኬጺ ጊጊዲ ባ ኦꬃናስ ኣሞቲዳ ኣሞ ኡባ ፖሊዳፔ ጉዬ፥
1KI 9:2 ጌባኦኔ ካታማን ካሴ ቆንጪዳ ማላ ጎዳይ ናምኣንꬆ ኢዛስ ቆንጪዴስ።
1KI 9:3 ሂስቲዲ ጎዳይ ኢዛስ፥ «ኔኒ ታ ሲንꬃን ዎሲዳ ዎሳኔ ሾቤꬃ ታኒ ሲያዲስ፤ ኔኒ ኬጺዳ ጾሳ ኬꬃይ ሜርናስ ታ ሱንꬃይ ኢዛን ጼይጌታና ማላ ኦꬃዳ ታኒ ጌሻዲስ፤ ታ ኣይፌይኔ ታ ዎዚናይ ኡባ ዎዴ ሃ ኬꬃን ዳና።
1KI 9:4 «ኔኒ ጊዲኮ ኔ ኣዋ ዳዊቲ ሲሜሬቲዳ ማላ ቦሬይ ባይንዳ ሱሬቴꬃን ታ ሲንꬃን ሲሜሬቲኮ፥ ታ ኣዛዞ ኡባ ኦꬂኮኔ ታ ዎጋኔ ታ ማራ ኔ ናጊኮ፥
1KI 9:5 ታኒ ኔ ኣዋ ዳዊቴስ፥ ‹ኢስራኤሌ ካዎቴꬃ ኣራታን ኡቲዛ ኣስ ኔኒ ሙሌካ ꬋያካ› ጊዳ ማላ ኔ ካዎቴꬃ ኣራታ ኢስራኤሌ ቦላ ሜርናስ ሚንꬃ ኤሳና።
1KI 9:6 «ጊዶ ኣቲን ኔኒ ዎይኮ ኔ ናይቲ ታና ካሎ ኣጊዲ ጉዬ ሲሚኮ፥ ታኒ ኢንቴና ኣዛዚዳ ታ ኣዛዞኔ ታ ዎጋ ናጎንታ ኣጊኮ፥ ሃራ ጾሳታስ ኦꬃናሲኔ ጎይናናስ ቢኮ፥
1KI 9:7 ኢስራኤሌ ዴራ ካሴ ታኒ ኢሚዳ ቢታፌ ꬎቃላና፤ ታኒ ታ ሱንꬃስ ዱማሲዳ ሃ ጾሳ ኬꬃካ ኣጋጋና፤ ሄሳፌ ጉዬ ኢስራኤሌ ኣሳይ ካዎቴꬃታ ኡባ ጊዶን ቂꬌሲኔ ሚቻስ ኣታና።
1KI 9:8 ሃይሲ ሃ ጾሳ ኬꬃይ ማላሊሲዛዝ ጊዲኮካ ላሌቲዲ ዶሬ ጊዳና፤ ቢዛይ ዪዛይ ዉሪ ሚጪሼ፥ ‹ሃኖ ፖራ! ጎዳይ ሃ ቢታኔ ሃይሳ ጾሳ ኬꬃ ኣይስ ሃይሳꬆ ኦꬂዴ?› ጊ ቂꬋና።
1KI 9:9 ኣሳይ፥ ‹ኢስታ ኣዋታ ጊብጼፔ ኬሲዳ ጎዳ ባንታ ጾሳ ኣጊዲ ኢስቲ ሃራ ጾሳታ ካሊዳ ጊሻሲኔ ኢስታስ ጎይኒዳ ጊሻስ ጎዳይ ኢስታ ቦላ ሃ ኢታ ሚሽ ኡባ ኤሂዴስ› ጊዲ ዛራና» ጊዴስ።
1KI 9:10 ሶሎሞኔይ ጾሳ ኬꬃኔ ካዎ ኬꬃ ኬጺ ጊጊዳ ናምኡ ታማንꬃ ላይꬃ ዉርሴꬃን፥
1KI 9:11 ጺሮሴ ካዎ ኪራሜይ ኢዛስ ኮሺዛ ጺዳ፥ ዚጋኔ ዎርቃ ኡባ ኢሚዳ ጊሻስ ጋሊላን ዲዛ ናምኡ ታሙ ካታማታ ሶሎሞኔይ ኢዛስ ኢሚዴስ።
1KI 9:12 ጊዶ ኣቲን ኪራሜይ ጺሮሴ ካታማፔ ኬዚዲ ሶሎሞኔይ ኢዛስ ኢሚዳ ካታማታ ቤኣናስ ቢዳ ዎዴ ኢዚ ካታማታን ኡፋዬቲቤና።
1KI 9:13 ሂስቲን ኪራሜይ ሶሎሞኔ፥ «ታ ኢሻዉ! ሃይቲ ኔኒ ታስ ኢሚዳይቲ ኣይ ካታማ?» ጊዴስ። ሄሳ ጊሻስ ኢዚ ሄ ካታማታ ካቡሌ ጊ ጼይጊዴስ፤ ሄ ሄራይ ሃች ጋካናስካ ሄ ሱንꬃን ጼይጌቴስ።
1KI 9:14 ኪራሜይ 4,000 ኪሎ ጊራሜ ዎርቃ ካዎ ሶሎሞኔስ ዬዲዴስ።
1KI 9:15 ጎዳ ጾሳ ኬꬃ፥ ባ ኬꬃ፥ ኬላ፥ ዬሩሳላሜ ካታማ ጊምቤ፥ ሃጾሬ፥ ማጊዶኔ ጌዜሬ ካታማታ ጊምባናስ ካዎ ሶሎሞኔስ ጋባራቲ ዴቴስ።
1KI 9:16 ጊብጼ ካዎ ፓሮኔይ ካሴ ጌዜሬ ካታማ ቦላ ዳፋ ጋꬂዲ ኦሊ ኦይኪዴስ፤ ሂስቲዲ ካታማ ታማን ጹጊዴስ፤ ኢዚን ዲዛ ካናኔ ኣሳ ዎꬊዲ ሶሎሞኔ ጌሊዳ ባ ናይስ ዎይቶ ኢሚዴስ፤
1KI 9:17 ሶሎሞኔይካ ጌዜሬ ካታማ ዛሪ ኬጺዴስ። ሄሳꬆካ ቃሴ ሶሎሞኔይ ጋርሳ ቤቲ-ሆሮኔ፥
1KI 9:18 ባኣላቴ፥ ዩሁዳ ባዞን ዴኢዛ ታጺሞሬ ካታማ ኤሲዴስ፤
1KI 9:19 ሺንቄ ሚንጂ ዎꬂዛ ካታማታ ኡባ፥ ባ ፓራታኔ ፓራ-ጋሬታ ዎꬂዛ ካታማታኔ ዬሩሳላሜን፥ ሊባኖሴኒኔ ባ ሃሪዛ ቢታ ኡባን ኬጻናስ ኣሞቲዳ ኡባ ኬጺዴስ።
1KI 9:20 ኣሞሬታፔ፥ ሂቴታፔ፥ ፓሪዜታፔ፥ ሂዌታፔኔ ያቡሴታፔ ኣቲዳ ኣሳቲ ኡባይ ኢስራኤሌ ኣስ ጊዴቴና።
1KI 9:21 ኢስታ ኢስራኤሌ ኣሳቲ ቢታፌ ዉርሲ ꬋይሳናስ ዳንዳዮንታ ኣጊን ሄ ቢታን ኣቲዳ ኣሳታ ዜሬꬃታ፤ ሶሎሞኔይ ኢስታ ሻኪ ኣይሌሲዲ ጋባራቴꬃን ኦሲሲዴስ፤ ኢስቲ ሃች ጋካናስካ ኣይሌቴꬃን ኦꬄቴስ።
1KI 9:22 ጊዶ ኣቲን ሶሎሞኔይ ኢስራኤሌ ኣሳፔ ኦናካ ኣይሌቴꬃን ኦሲሲቤና፤ ኢስቲ ኢዛስ ኦሳንቻታ፥ ኦላንቻታ፥ ኦላንቻታ ሃላቃታኔ ጋዳዋታ፥ ፓራ-ጋሬታ ላጊዛይታ ሃላቃታኔ ፓራ ኣሳታ ጊዲዲ ኦꬂዳ።
1KI 9:23 ሄይቲካ ሶሎሞኔይ ኬጺሲዛ ኬꬃ ካሌቲ ኬጺሲዛይታ፤ ኢስታስካ ቆዳይ ኢቻሽ ጼታኔ ኢቻሽ ታማ።
1KI 9:24 ጊብጼ ካዎ ናያ ዳዊቴ ካታማፔ ሶሎሞኔይ ኢዚስ ኬጺሲዳ ኬꬃ ፑዴ ቢዳፔ ጉዬ ሶሎሞኔይ ኢዚስ ኬላ ኬሊዴስ።
1KI 9:25 ሶሎሞኔይ ጎዳስ ኦሲሲዳ ያርሾሶዛ ቦላ ጹጌቲዛ ያርሾኔ ኢሲፌቴꬃ ያርሾ ላይꬃን ሄꬑቶ ያርሼስ፤ ጎዳ ሲንꬃን ኤጻኔካ ጩዋሴስ፤ ሂስቲዲ ጾሳ ኬꬃ ኦሶ ፖሊዴስ።
1KI 9:26 ሄሳፌ ጉዬ ካዎ ሶሎሞኔይ ኤዶሜ ቢታን ዞኦ ኣባ ዶናን ኤላቴ ጌቴቲዛ ካታማ ማታን ዲዛ ኤጺዮን-ጋቢሬን ማርካቤታ ሜꬊዴስ።
1KI 9:27 ካዎ ኪራሜይ ሶሎሞኔ ኣሳታራ ኦꬃና ማላ ማርካቤ ላጎን ሎሂዳ ባ ኣሳታ ኪቲዴስ።
1KI 9:28 ሂስቲን ኢስቲ ኦፊሬ ቢታ ቢዲ 14,000 ኪሎ ጊራሜፔ ዳሪዛ ዎርቃ ካዎ ሶሎሞኔስ ኤኪ ዪዳ።
1KI 10:1 ሳባ ካዎያ ጎዳይ ሶሎሞኔስ ኢሚዳ ኣꬎ ኤራቴꬃ ሲያዳ ዴጾ ኦይሻታ ኤካዳ ኢዛ ፓጫናስ ያዱስ።
1KI 10:2 ጊታ ኣዣባን ሺቶ፥ ኬሂ ዳሮ ዎርቃኔ ኣልኦ ሹቻ ዳሮ ጋሜላታን ጫናዳ ዬሩሳላሜ ጋኪዳፔ ጉዬ ሶሎሞኔኮ ጌላዳ ባ ዎዚናን ዲዛ ኦይሻ ኡባ ሺሻዱስ።
1KI 10:3 ሶሎሞኔይ ኢዛ ኦይቺዳይሳ ኡባ ዛሪዴስ፤ ኢዚስ ቢርሼቶንታ ኢዛፔ ጌሚ ኣቲዳይ ኣይኮይካ ባ።
1KI 10:4 ሳባ ካዎያ ሶሎሞኔስ ኢሜቲዳ ኣꬎ ኤራቴꬃ፥ ኢዚ ኬጺዳ ካዎቴꬃ ኬꬃ፥
1KI 10:5 ኢዛ ማዳን ሺቂዛ ቁማ፥ ኢዛ ሹሜቲ ኡቲዛ ኡቴꬃ፥ ኢዛ ኣሽካራቲ ኦꬂዛ ኦሶኔ ማይኢዛ ማይኦ፥ ኢዛስ ኡሹ ዱቂዛይታኔ ጎዳ ኬꬃን ኢዚ ሺሺዛ ጹጌቲዛ ያርሾዛ ቤኣዳ ኬሃ ማላሌታዱስ።
1KI 10:6 ሄሳፌ ጉዬ ኢዛ ካዎዛስ፥ «ኔ ኦꬂዛ ኦሶኔ ኔ ኣꬎ ኤራቴꬃ ጊሻስ ታኒ ታ ዴሬን ዳሼ ሲዪዳይሲ ቱማ።
1KI 10:7 ጊዶ ኣቲን ታኒ ያዳ ታ ኣይፌን ቤኣናሼ ጋካናስ ኢስቲ ታስ ዮቲዳይሳ ኣማናቤኬ፤ ታስ ኣሳይ ዮቲዳይሲ ታ ቤኢዳይሳስ ባጋ ጊዴና፤ ኔ ኣꬎ ኤራቴꬃይኔ ዱሬቴꬂ ታ ሲዪዳይሳፌ ቦላ።
1KI 10:8 ኡባ ዎዴ ኔ ሲንꬃን ኤቂዲ ኔ ኣꬎ ኤራቴꬃ ሲዪዛ ሹሜታሲኔ ኔ ኦሳንቻታስ ቃዳይ ኣይ ማላ ሎኦ!
1KI 10:9 ኔናን ኡፋዬቲዲ ኔና ኢስራኤሌ ካዎታ ኣራታን ኡቲሲዳ ጎዳ ኔ ጾሳይ ጋላቴቶ! ጎዳይ ኢስራኤሌ ኣሳ ሜርናስ ሲቂዳ ጊሻስ ሱሬ ፒርዳይኔ ጺሎቴꬂ ዳና ማላ ኢዚ ኔና ካዎꬂዴስ» ጋዱስ።
1KI 10:10 ሂስታዳ ካዎያ 4,000 ኪሎ ጊራሜ ዴጺዛ ዎርቃ፥ ኬሂ ዳሮ ሺቶኔ ኣልኦ ሹች ካዎዛስ ኢማዱስ። ሳባ ካዎያ ካዎ ሶሎሞኔስ ኢሚዳይሳ ኬና ዳሮ ሺቶ ሄሳፌ ሲሚን ኦኒካ ኤሂቤና።
1KI 10:11 (ካዎ ኪራሜ ማርካቤቲ፥ ኦፊሬፔ ዎርቃ ኤሂዳይቲ ሄፔ ሳንዳሌ ጌቴቲዛ ኬሂ ዳሮ ሚꬂኔ ኣልኦ ሹች ኤሂዳ።
1KI 10:12 ካዎ ሶሎሞኔይ ሄ ሳንዳሌዛፔ ጎዳ ኬꬃሲኔ ካዎ ኬꬃስ ቱቄታ፥ ዬጺዛይታስ ዲꬂኔ ማሲንቆ ሜꬊሲዴስ። ሄሳ ማላ ሳንዳሌይ ሄ ጋላሳፌ ሃ ሲሚን ዪ ኤሬና፤ ቤቲካ ኤሬና።)
1KI 10:13 ካዎ ሶሎሞኔይ ካዎይ ኢማናስ ቤሲዛ ኢሞታፔ ሃራ፥ ሳባ ካዎያ ኣሞታዳ ኢዛ ኮዪዳይሳኔ ኦይቺዳይሳ ኡባ ኢዚስ ኢሚዴስ፤ ሄሳፌ ጉዬ ሳባ ካዎያ ባ ኣዣባራ ዴንዳዳ ባ ዴሬ ሲማዱስ።
1KI 10:14 ሶሎሞኔይ ላይꬃን ላይꬃን ኤኪዛ ዎርቃይ 23,000 ኪሎ ጊራሜ ኬና ጊዴስ።
1KI 10:15 ሄሲካ ቃራጻፔ፥ ዛልኤን ጌሊዛ ዎꬌፔ፥ ኣራቤ ቢታ ካዎታ ኡባፌኔ ኢስራኤሌ ቢታ ሃሪዛይታፔ ኤኪዳ ጊራ ጉጄና።
1KI 10:16 ሶሎሞኔይ 200 ዎጋ ጎንዳሌታ ኦሲሲዴስ፤ ኢሲ ኢሲ ጎንዳሌይ ላፑን ኪሎ ጊራሜ ጊዲዛ ዎርቃን ሜሺሲዴስ።
1KI 10:17 ቃሴካ ኢዚ 300 ቄሪ ጎንዳሌታ ኦሲሲዴስ፤ ኢሲ ኢሲ ጎንዳሌ ናምኡ ኪሎ ጊራሜ ጊዲዛ ዎርቃን ሜሺሲዴስ፤ ካዎይ ሄ ጎንዳሌታ ሊባኖሴ ዎራ ጌቴቲዛ ኬꬃን ዎꬂዴስ።
1KI 10:18 ቃሴካ ካዎይ ጊታ ኣራታ ዳንጋርሳ ዛሌፔ ኦሲሲዲ ሙሩታ ዎርቃን ሜሺዴስ።
1KI 10:19 ሄ ኣራታይ ዲዛሶ ፑዴ ኬዛናስ ኡሱፑን ꬌካቲ ዴቴስ፤ ሄ ኣራታይ ጉዬ ሁኤሶ ባጋራ ኤꬖ ሚሳቴስ፤ ኣራታስ ናምኡ ባጋራካ ቄሴ ዜምፒሲዛሶቲ ዴቴስ፤ ሄ ዜምፒዛሶታ ሚሌን ጋሞ ሚስሌ ናምኣቲ ኤቂዳ።
1KI 10:20 ኡሱፑን ꬌካታስ ሃዲርሳ ባጋራኔ ኡሻቻ ባጋራ ኡሱፑን ኡሱፑን ጋሞ ሚስሌቲ ኤቂዳ፤ ሙሌራ 12 ሚስሌቲ ዴቴስ፤ ሃይሳ ማላ ኣራታይ ሃራ ኣዋ ዴሬ ካዎታንካ ኦሴቲቤና።
1KI 10:21 ካዎ ሶሎሞኔይ ኡሹ ኡዪዛ ዋንጫ ኡባይ ዎርቃፌ ኦሴቲዴስ፤ ሊባኖሴ ዎራ ጌቴቲዛ ካዎ ኬꬃን ዲዛ ሚሺ ኡባይካ ሙሩታ ዎርቃፌ ኦሴቲዴስ፤ ካዎ ሶሎሞኔ ዎዴን ቢራይ ሂራይሶ ጊዲዳ ጊሻስ ቢራፔ ኦሴቲዳ ሚሺ ሙሌካ ዴና።
1KI 10:22 ካዎ ሶሎሞኔስ ኪራሜ ማርካቤታራ ኢሲፌ ዎጋ ጊታ ኣባ ቦላራ ቢዛ ታርሴሴ ዛልኤ ማርካቤቲ ዴቴስ፤ ሄ ማርካቤቲ ዎርቃ፥ ቢራ፥ ዳንጋርሳ ዛሌ፥ ጌሌሾታኔ ቃሬታ ጫኒ ኤኪዲ ሄꬑ ላይꬃን ላይꬃን ኢሲቶ ኤሄቴስ።
1KI 10:23 ካዎ ሶሎሞኔይ ዱሬቴꬃኒኔ ኣꬎ ኤራቴꬃን ቢታ ቦላ ዲዛ ካዎታ ኡባፌ ኣꬌስ።
1KI 10:24 ቢታ ቦላ ዲዛ ኣሳይ ኡባይ ጾሲ ሶሎሞኔ ዎዚናን ዎꬂዳ ኣꬎ ኤራቴꬃ ሲያናስ ኢዛኮ ያና ኮዬቴስ።
1KI 10:25 ላይꬃን ላይꬃን ኢዛኮ ዪዛ ኣሲ ኡባይ ቢራፔኔ ዎርቃፌ ኦሴቲዳ ሚሽ፥ ማይኦ፥ ኦላ ሚሽ፥ ሺቶ፥ ፓራታኔ ባቁሎታ ኢዛስ ኢሞታ ኤኪ ዬስ።
1KI 10:26 ሶሎሞኔይ ፓራ-ጋሬታኔ ፓራታ ሺሺዴስ፤ ኢዛስ 1,400 ፓራ-ጋሬቲኔ 12,000 ፓራቲ ዴቴስ፤ ኢዚ ኢስታ ፓራ-ጋሬታ ካታማታኒኔ ባናራ ዬሩሳላሜን ዎꬂዴስ።
1KI 10:27 ካዎይ ዬሩሳላሜን ቢራይ ሹቻꬆ ኮሬታና ማላ፥ ዚጋይካ ሻራ ሜንꬆን ሞኪዛ ኤꬃꬆ ጮራታና ማላ ኦꬂዴስ።
1KI 10:28 ሶሎሞኔ ፓራቲ ጊብጼፔኔ ቃዌፔ ዪዳ፤ ካዎ ዛልኣንቻቲ ኢስታ ቃዌፔ ሻሚ ሻሚ ኤሄቴስ።
1KI 10:29 ኢስቲ ኢሲ ኢሲ ፓራ-ጋሬ 600 ሳቂሌ ቢራን፥ ኢሲ ኢሲ ፓራ 150 ሳቂሌ ቢራን ጊብጼፔ ሻሚ ሻሚ ኤሄቴስ፤ ሂስቲዲ ሂቴ ካዎታሲኔ ኣራሜ ካዎታስ ኤፊ ባይዜቴስ።
1KI 11:1 ካዎ ሶሎሞኔይ ዳሮ ኣላጋ ቢታ ማጫሳታ ሲቂዴስ፤ ሄይቲካ ጊብጼ ካዎ ቢዬይ ቦላ ጉጂን ሞኣቤ ማጫሳታ፥ ኣሞኔ ማጫሳታ፥ ኤዶሜ ማጫሳታ፥ ሲዶና ማጫሳታኔ ሂቴ ዴሬ ማጫሳታ።
1KI 11:2 ጎዳይ ኢስራኤሌ ኣሳስ፥ «ኢስቲ ኢንቴ ዎዚና ቱማፔ ባንታ ኤቃ ጾሳታኮ ዛሮንታ ማላ ኢንቴ ሄ ኣሳታራ ኤኮኒኔ ጌሎን ዋላኬቶፍቴ» ጊ ዮቲ ዎꬂዴስ፤ ጊዶ ኣቲን ሶሎሞኔይ ኢስታራ ሲቆን ዋጼቲዴስ።
1KI 11:3 ሶሎሞኔስ ካዎታፔ ዬሌቲዳ 700 ማቼቲኔ 300 ላጌꬆቲ ዴቴስ፤ ሄ ማጫሳቲ ኢዛ ዎዚናይ ጾሳ ዎጋፔ ካሬ ኬዛና ማላ ኦꬂዳ።
1KI 11:4 ሶሎሞኔይ ጪሚ ጪሚ ቢሺን ኢዛ ማቼቲ ኢዛ ዎዚና ሃራ ጾሳታኮ ዛሪዳ፤ ሂስቲን ኢዛ ኣዋ ዳዊቲ ኩሜꬃ ዎዚናፔ ጎዳ ባ ጾሳ ሲቂዳ ማላ ኢዚ ሲቂቤና።
1KI 11:5 ሶሎሞኔይ ኣስታሮቴ ጌቴቲዛ ሲዶናታ ኤቃ ጾሳይሲኔ ሃራሲዛ ኣሞኔታ ጾሳ ሞሎኬስ ጎይኒዴስ።
1KI 11:6 ሂስቲዲ ሶሎሞኔይ ጎዳ ሲንꬃን ኢታ ኦሶ ኦꬂዴስ፤ ባ ኣዋ ዳዊቴ ማላ ዉርሴꬅ ጋካናስ ጎዳ ካሊቤና።
1KI 11:7 ሄሳፌ ጉዬ ሶሎሞኔይ ሃራሲዛ ሞኣቤታ ጾሳ ካሞሼሲኔ ኣሞኔታ ጾሳ ሞሎኬስ ዬሩሳላሜፔ ኣርሼይ ሞኪዛ ባጋን ዲዛ ዙምቡላታ ቦላ ጎይኒዛሶታ ጊግሲዴስ።
1KI 11:8 ኢስቲ ባንታ ኤቃ ጾሳታስ ሄን ኤጻኔ ጩዋሲዛይታሲኔ ያርሾ ሺሺዛ ሃራ ማቼታስካ ሄሳꬆካ ኦꬂዴስ።
1KI 11:9 ኢዛስ ናምኡቶ ቆንጪዳ ጎዳ ኢስራኤሌ ጾሳፌ ሶሎሞኔ ዎዚናይ ሃራሶ ሲሚዳ ጊሻስ ጎዳይ ኢዛ ቦላ ሃንቄቲዴስ።
1KI 11:10 ሃራ ጾሳታ ካሎንታ ማላ ጎዳይ ሶሎሞኔ ኣዛዚዴስ፤ ኢዚ ጎዳ ኣዛዞ ናጊቤና።
1KI 11:11 ሄሳ ጊሻስ ጎዳይ ሶሎሞኔስ፥ «ኔ ሃይሳ ኦꬂዳ ጊሻስ፥ ታ ኢሚዳ ጫቆ ቃላኔ ታ ኢሚዳ ማራ ኔኒ ናጎንታ ኢጺዳ ጊሻስ፥ ታኒ ኔ ካዎቴꬃ ኔፔ ዎꬃ ኤካዳ ኔ ኣይሌታፔ ኢሳስ ኢማና።
1KI 11:12 ጊዲኮካ ኔ ኣዋ ዳዊቴ ጊሻስ ጋዳ ኔ ካዎቴꬃ ላይꬃን ጊዶንታ ኔ ናዛ ካዎቴꬃ ላይꬃን ታኒ ሃይሳ ኦꬃና።
1KI 11:13 ኔ ናዛፔ ጊዲኮካ ካዎቴꬃ ኢዛፔ ሙሌራ ዎꬃ ኤኪኬ፤ ታ ኣሽካራ ዳዊቴ ጊሻሲኔ ታኒ ዶሪዳ ካታማ ዬሩሳላሜ ጊሻስ ኢሲ ቆሞ ታ ኢዛስ ኢማና» ጊዴስ።
1KI 11:14 ሄሳፌ ጉዬ ጎዳይ ኤዶሜ ካዎታ ዛሬፔ ሃዳዴ ሞርኬ ሂስቲ ሶሎሞኔ ቦላ ዴንꬂዴስ።
1KI 11:15 ሃይሳፌ ካሴ ዳዊቲ ኤዶሜ ኣሳታራ ኦሌቲዳ ዎዴ ሃይቂዳይታ ሞጊሳናስ ፑዴ ቢዳ ኦላ ጋዳዋ ኢዮኣቤይ፥ ኤዶሜን ዲዛ ኣቱማሳ ኡባ ዎꬊ ዉርሲዴስ።
1KI 11:16 ኤዶሜን ዲዛ ኣቱማሳ ኡባ ꬋይሳና ጋካናስ ኢዮኣቤይኔ ኢስራኤሌ ኣሳይ ኡባይ ሄን ኡሱፑን ኣጊና ኡቲዴስ።
1KI 11:17 ጊዶ ኣቲን ሄ ዎዴ ሃዳዴይ ዬላጋቴꬃን ዲሼ ባ ኣዋስ ኦꬂዛ ኤዶሜ ኦሳንቻታፔ ጉꬃታራ ጊብጼ ቢታ ባቃቲዴስ።
1KI 11:18 ኢስቲ ሚዲያሜፔ ዴንዲዲ ፓራኔ ቢታ ቢዳ፤ ፓራኔፔ ባንታናራ ኣሳ ኤኪዲ ጊብጼ ካዎ ፓሮኔኮ ቢዳ። ካዎዚ ሃዳዴስ ኬꬂኔ ጋዴ ኢሚዴስ፤ ማና ካꬂካ ኣዛዚዴስ።
1KI 11:19 ካዎ ፓሮኔይ ሃዳዴ ኬሂ ዶሲዳ ጊሻስ ባ ማቾ ጻፊኔሲ ሚቼዮ ኢዛስ ማቾ ኢሚዴስ።
1KI 11:20 ጻፊኔሲ ሚቺያ ኢዛስ ጋኑባቴ ጌቴቲዛ ና ዬላዱስ፤ ጻፊኔሴ ኢዛ ካዎ ኬꬃን ዲቻዱስ፤ ጋኑባቴይ ሄን ካዎ ናይታራ ኢሲፌ ዲጪዴስ።
1KI 11:21 ሃዳዴይ ጊብጼን ዲሼ ዳዊቲ ሃይቂ ባ ኣዋታን ጋይቲዳይሳኔ ኦላ ጋዳዋ ኢዮኣቤይካ ሃይቂዳይሳ ሲዪዴስ፤ ሂስቲዲ ሃዳዴይ ካዎዛስ፥ «ታኒ ታ ቢታ ሲማና ማላ ታና ዬዳ» ጊዴስ።
1KI 11:22 ካዎይ ኢዛ፥ «ኔስ ሃይሳን ኣዚ ፓጪን ኔኒ ኔ ቢታ ሲማ ባና ኮያይ?» ጊዲ ኦይቺዴስ። ሂስቲን ሃዳዴይ፥ «ታስ ኣይኮይካ ፓጪቤና፤ ጊዲኮካ ታኒ ባና ማላ ታስ ኤሮ ጋርኪ!» ጊዴስ።
1KI 11:23 ሄሳꬆካ ጾሳይ ጾባ ካዎ ሃዳዲኤዜሬፔ ባቃቲ ቢዳ ኤልኣዳ ና ኤራዞኔ ጌቴቲዛይሳ ሶሎሞኔ ቦላ ሞርኬ ሂስቲ ዴንꬂዴስ።
1KI 11:24 ዳዊቲ ጾባ ቢታ ኦላንቻታ ꬋይሲዳ ዎዴ ኤራዞኔይ ባቃቲዳ ኣሳ ሺሺዲ ፓንጋታ ሃላቃ ጊዲዴስ፤ ኢስቲ ዳማስቆ ቢዲ ሄን ኢዛ ካዎꬂዳ።
1KI 11:25 ሃዳዴይ ጋꬂዳ ሜቶዛ ቦላ ጉጂዲ ሶሎሞኔይ ዴኢዳ ላይꬅ ኡባን ኤራዞኔይ ኢስራኤሌታስ ሞርኬ ጊዲዴስ፤ ኤራዞኔይ ኣራሜን ካዎቲዲ ኢስራኤሌታራ ኤቄቲዴስ።
1KI 11:26 ቃሴካ ናባጼ ና ኢዮርባኣሜይ ሶሎሞኔ ቦላ ማካላቴꬃን ዴንዲዴስ፤ ኢዚ ሶሎሞኔ ሹሜታፔ ኢሳ ጊዲሺን ኤፍሬሜ ቢታ ጻሬዴፔ ዪዴስ፤ ኢዛ ኣዬያ ጺሩኦ ጌቴቲዛ ኣምኤዮ።
1KI 11:27 ኢዚ ካዋ ቦላ ማካላቴꬃን ዴንዲዳ ጋሶይካ ሶሎሞኔይ ጊምቤስ ኬላ ኬሊሲዴሲኔ ባ ኣዋ ዳዊቴ ካታማ ዩሾን ዲዛ ጊምቤዛስ ፓጬሶ ኩንꬂዴስ።
1KI 11:28 ኢዮርባኣሜይ ኦሶዛስ ኬሂ ሂላቴꬂ ዲዛ ናቴꬃ ኣሳ፤ ሶሎሞኔይ ሃ ናቴꬃዚ ኦሶዛ ኣይ ማላ ኦꬂዛኮ ቤኢዲ ጋባራ ኦꬂ ኣቂዛ ዮሴፌ ቆሞታ ቦላ ኣላፌ ኦꬂ ሹሚዴስ።
1KI 11:29 ኢሲ ጋላሲ ኢዮርባኣሜይ ዬሩሳላሜ ካታማፔ ቢሺን ሴሎፔ ዪዳ ናቤ ኣካያይ ኢዛራ ኦጌን ጋይቲዴስ። ሄ ዎዴ ኣካያይ ኦራꬃ ማይኦ ማይኢ ኡቲዴስ። ሄ ሶሆዛን ኢስቲ ናምኣይ ጻላ ዴቴስ።
1KI 11:30 ኣካያይ ባ ማይኢዳ ሴሎ ማይኦዛ ታማኔ ናምኡ ኬሲ ፖሺ ዬጊዴስ።
1KI 11:31 ሂስቲዲ ኢዮርባኣሜስ፥ «ሃይታ ፖሼቲዳ ታማታ ኔስ ኤካ። ጋሶይካ ጎዳ ኢስራኤሌ ጾሳይ፥ ‹ቤኣ፥ ታኒ ካዎቴꬃ ሶሎሞኔ ኩሼፔ ፖሻዳ ታሙ ቆሞታ ኔስ ኢማና።
1KI 11:32 ጊዶ ኣቲን ታ ኣሽካራ ዳዊቴ ጊሻሲኔ ኢስራኤሌ ቆሞታ ኡባ ጊዶፌ ታኒ ዶሪዳ ዬሩሳላሜ ካታማ ጊሻስ ኢሲ ቆሞ ኢዛስ ኣጋና።
1KI 11:33 ታ ሃይሳ ኦꬃናስ ጋሶይካ ሶሎሞኔይ ታና ኣጊዲ ሲዶናታ ጾስ ኣስታሮቴስ፥ ሞኣቤታ ጾስ ካሞሼሲኔ ኣሞኔታ ጾስ ሞሎኬስ ጎይኒዳ ጊሻሳ፤ ቃሴካ ታ ኦጌን ሄሜቶንታ፥ ታ ሲንꬃን ሱሬ ኦሶ ኦꬆንታ ኣጊዲ ኢዛ ኣዋ ዳዊቲ ናጊዳ ማላ ታ ዎጋታኔ ማራታ ናጎንታ ኢጺዳ ጊሻሳ።
1KI 11:34 « ‹ጊዲኮካ ታኒ ካዎቴꬃ ሶሎሞኔ ኩሼፔ ኡባ ኤኪኬ፤ ታኒ ኢዛ ዶሪዳ ጊሻሲኔ ታ ኣዛዞኔ ታ ዎጋ ናጊዳ ታ ኣሽካራ ዳዊቴ ጊሻስ ሶሎሞኔይ ሼምፖራ ፓጻ ዴኢዳ ዎዴ ኡባን ኢዚ ሃራና ማላ ኦꬃዲስ።
1KI 11:35 ሄሳፌ ጉዬ ታኒ ካዎቴꬃ ኢዛ ናዛ ኩሼፔ ዎꬃ ኤካዳ ታሙ ቆሞታ ኔስ ኢማና።
1KI 11:36 ታ ሱንꬂ ኢዛን ጼይጌታና ማላ ታ ዶሪዳ ዬሩሳላሜ ካታማን ኡባ ዎዴካ ታ ኣሽካራ ዳዊቴ ዛሬይ ፖኦ ጊዳና ማላ ታኒ ኢሲ ቆሞ ኢዛ ናዛስ ኢማና።
1KI 11:37 « ‹ጊዶ ኣቲን ኔና ታኒ ታስ ኤካና፤ ኔ ዎዚናይ ኣሞቲዳ ኡባ ኔ ሃራና፤ ኢስራኤሌ ቦላካ ኔ ካዎታና።
1KI 11:38 ታ ኣይሌ ዳዊቲ ኦꬂዳ ማላ ታ ኣዛዞታ ኡባ ኔ ፖሊኮ፥ ታ ኦጌን ኔ ሄሜቲኮ፥ ታ ዎጋታኔ ማራታ ኔ ናጊኮ ታ ሲንꬃን ሱሬ ሃንኮ ታኒ ኔናራ ጊዳና፤ ታ ዳዊቴስ ኦꬂዳ ማላ ኔ ካዎቴꬃካ ሚንꬃና። ኢስራኤሌካ ታኒ ኔስ ኢማና።
1KI 11:39 ሶሎሞኔ ናጋራ ጊሻስ ዳዊቴ ዜሬꬃታ ታኒ ቃጻያና፤ ጊዶ ኣቲን ሜርናስ ጊዴና› ጌስ» ጊዴስ።
1KI 11:40 ሄሳ ጊሻስ ሶሎሞኔይ ኢዮርባኣሜ ዎꬋናስ ኮዪዴስ፤ ጊዶ ኣቲን ኢዮርባኣሜይ ጊብጼ ካዎ ሺሻቄኮ ባቃቲ ቢዲ ሶሎሞኔይ ሃይቃና ጋካናስ ጊብጼን ታኪዴስ።
1KI 11:41 ሶሎሞኔይ ሃኒዳ ሃራይ፥ ኢዚ ኦꬂዳ ኡባይ፥ ኢዛስ ኣꬎ ኤራቴꬃይ ሶሎሞኔ ታሪኬ ማጻፋን ጻፌቲ ኡቲዴስ።
1KI 11:42 ሶሎሞኔይ ኢስራኤሌ ኡባ ቦላ ዬሩሳላሜን 40 ላይꬅ ካዎቲዴስ።
1KI 11:43 ሄሳፌ ጉዬ ሶሎሞኔይ ሃይቂዲ ባ ኣዋታን ጋይቲዴስ፤ ባ ኣዋ ዳዊቴ ካታማንካ ሞጌቲዴስ። ኢዛ ና ኤሮቢኣሜይ ኢዛሶሆን ካዎቲዴስ።
1KI 12:1 ኢስራኤሌ ኣሳይ ኡባይ ኤሮቢኣሜ ካዎꬃናስ ሴኬሜ ቢዳ ጊሻስ ኢዚካ ሄ ቢዴስ።
1KI 12:2 ካዎ ሶሎሞኔፔ ባቃቲዲ ጊብጼን ዴኢዛ ናባጼ ና ኢዮርባኣሜይ ሄሳ ሲዪዲ ጊብጼፔ ሲሚ ዪዴስ።
1KI 12:3 ሂስቲን ኢስራኤሌ ኣሳይ ኢዮርባኣሜስ ኪታ ዬዲ ጼይጊሲን ኢዚኔ ኢስራኤሌ ማባራይ ኡባይ ኤሮቢኣሜኮ ቢዲ፥
1KI 12:4 «ኔ ኣዋይ ኑና ዴጾ ቃምባራ ቶሲዴስ፤ ጊዶ ኣቲን ሃኢ ኔኒ ኢዚ ኑና ኦሲሲዛ ዎልቃማ ኦሶኔ ዴጾ ቃምባራ ኑስ ካዉሻርኪ! ሂስቲኮ ኑኒ ኔስ ሃሬታና» ጊዳ።
1KI 12:5 ሂስቲን ኤሮቢኣሜይ ኢስታስ፥ «ቢቴ፤ ቢዲ ሄꬓንꬆ ጋላስ ሲሚዲ ታኮ ዪቴ» ጊን ኣሳይ ቢዴስ።
1KI 12:6 ሄሳፌ ጉዬ ካዎ ኤሮቢኣሜይ ኢዛ ኣዋ ሶሎሞኔይ ሼምፖራ ፓጻ ዲዛ ዎዴ ሶሎሞኔ ዞሪዛ ጪማታ ዞሬ ኦይቺዴስ። ኢዚ ኢስታስ፥ «ሃ ኣሳስ ኣይ ጋዳ ዛራ ጌቲ?» ጊ ኦይቺዴስ።
1KI 12:7 ሂስቲን ጪማቲ ኤሮቢኣሜ፥ «ሃች ኔኒ ኣሳስ ኣይሌ ጊዳዳ ኦꬂኮ፥ ኢስቲ ኦይቺዛይሳስ ኔኒ ሎኦ ቃላ ዛሪኮ፥ ኡባ ዎዴ ኢስቲ ኔስ ኣሽካራ ጊዳና» ጊዳ።
1KI 12:8 ጊዶ ኣቲን ኤሮቢኣሜይ ጪማቲ ዞሪዳ ዞሬዛ ኣጊዲ ኢዛራ ዲጪዲ ኢዛስ ኦꬂዛ ዬላጋ ኣሳታ ዞሬ ኦይቺዴስ።
1KI 12:9 ኢዚ ኢስታስ፥ «ኢንቴ ታና ኣይ ዞሬቲ? ‹ኔ ኣዋይ ኑና ቶሲዳ ዴጾ ቃምባራ ኑስ ካዉሻርኪ› ጊዛ ሃ ዴሬዛስ ኣይ ጋዳ ዛሮ?» ጊ ኦይቺዴስ።
1KI 12:10 ኢዛራ ዲጪዳ ዬላጋቲ፥ « ‹ኔ ኣዋይ ኑና ዴጾ ቃምባራ ቶሲዴስ፤ ሃኢ ጊዲኮ ኔኒ ኑስ ካዉሻርኪ› ጊዛ ኣሳስ፥ ‹ታ ጊልኢ ቢራꬌይ ታ ኣዋ ጼሳፌ ኦርዴስ።
1KI 12:11 ታ ኣዋይ ኢንቴ ቦላ ዴጾ ቃምባራ ዎꬂዴስ፤ ታኒ ጊዲኮ ሄሳፌካ ኣꬃዳ ዴጼꬃና። ታ ኣዋይ ኢንቴና ሊሶን ዋꬊዴስ፤ ታኒ ጊዲኮ ኢንቴና ማሲማሶ ማላ ዱኪዛ ሊሶን ዋꬋና› ጋዳ ዛራ» ጊዳ።
1KI 12:12 ሄሳፌ ጉዬ ካዎ ኤሮቢኣሜይ፥ «ሄꬓንꬆ ጋላስ ሲሚዲ ታኮ ዪቴ» ጊዳ ማላካ፥ ኢዮርባኣሜይኔ ኡባ ኣሳይ ሄꬓንꬆ ጋላስ ሲሚ ዪዳ።
1KI 12:13 ሂስቲን ካዎይ ጪማታ ዞሬ ኢጺዲ ዴራ ሃንቄꬂዛ ዛሮ ኢሚዴስ።
1KI 12:14 ዬላጋታ ዞሬ ኤኪዲ፥ «ታ ኣዋይ ኢንቴ ቦላ ዴጾ ቃምባራ ዎꬂዴስ፤ ታኒ ጊዲኮ ሄሳፌካ ኣꬃ ዴጼꬃና። ታ ኣዋይ ኢንቴና ሊሶን ዋꬊዴስ፤ ታኒ ጊዲኮ ኢንቴና ማሲማሶ ማላ ዱኪዛ ሊሶን ዋꬋና» ጊ ዛሪዴስ።
1KI 12:15 ካዎይ ኣሳይ ጊዛይሳ ሲዮንታ ኢጺዴስ፤ ጋሶይካ ጎዳይ ሴሎፔ ዪዳ ናቤ ኣካያ ባጋራ ካሴ ናባጼ ና ኢዮርባኣሜስ ዮቲዳ ቃላይ ፖሌታና ማላ ሃይሲ ጎዳፔ ሃኒዴስ።
1KI 12:16 ኢስራኤሌ ኣሳይ ኡባይ ካዎይ ኢስቲ ጊዛይሳ ሲዮንታ ኢጺዳይሳ ኤሪዲ ካዎዛስ፥ «ዳዊቴራ ኑና ጋꬂዛ ጋሶይካ ኣዜ? ኢሴዬ ናዛፔ ኑ ኣይ ኤካኔ! ኢስራኤሌ ኣሳዉ! ኢንቴ ሶ ኢንቴ ሶ ሲሚቴ! ሃኢ ጊዲኮ ዳዊቴ ኔ ኬꬃ ኔ ናጋ!» ጊዳ። ሂስቲዲ ኢስራኤሌ ኣሳይ ኡባይ ባንታ ሶ ባንታ ሶ ሲሚዳ።
1KI 12:17 ኤሮቢኣሜይካ ዩሁዳ ካታማታን ዲዛ ኢስራኤሌ ኣሳ ቦላ ካዎቲዴስ።
1KI 12:18 ሄሳፌ ጉዬ ካዎ ኤሮቢኣሜይ ባ ጋባራታ ሃላቃ ኣዶራሜ ኢስራኤሌ ኣሳኮ ኪቲን ኢስቲ ሹቻን ጫዲ ዎꬊዳ። ሂስቲን ካዎ ኤሮቢኣሜይ ባ ፓራ-ጋሬ ቦላ ኤሶን ኬዚ ኡቲዲ ዬሩሳላሜ ባቃቲዴስ።
1KI 12:19 ሄዴፔ ዶሚዲ ሃች ጋካናስ ኢስራኤሌ ቆሞታፔ ታማቲ ዳዊቴ ዛሬፔ ካዎቲዳ ካዎታ ቦላ ማካሊዳ።
1KI 12:20 ኢዮርባኣሜይ ጊብጼፔ ሲሚዳይሳ ኢስራኤሌ ኣሳይ ኡባይ ሲዪዲ ኢዛ ባንታ ዱላታኮ ጼይጊሲዲ ኢስራኤሌ ቦላ ካዎꬂዳ፤ ዳዊቴ ዛሬፔ ካዎቲዳ ካዎታስ ኣማኔቲዲ ኣቲዳይ ዩሁዳ ቆሞ ጻላ።
1KI 12:21 ሶሎሞኔ ና ኤሮቢኣሜይ ዬሩሳላሜ ካታማ ጋኪዳ ማላ ኢስራኤሌ ቢታ ኣሳራ ኦሌቲዲ ካዎቴꬃ ባስ ዛራና ማላ ዩሁዳ ቆሞፌኔ ቢኒያሜ ቆሞፌ ዶሬቲዳ 180,000 ኦላንቻታ ሺሺዴስ።
1KI 12:22 ሄ ዎዴ ጾሳ ቃላይ ጾሳ ኣስ ሻማኤኮ ዪዲ፥
1KI 12:23 «ሶሎሞኔ ና፥ ዩሁዳ ካዎ ኤሮቢኣሜስ፥ ዩሁዳኔ ቢኒያሜ ቆሞታሲኔ ኣቲዳ ኣሳ ኡባስ፥
1KI 12:24 ጎዳይ ኢንቴና፥ ‹ኢንቴ ዳቦ ኢስራኤሌታራ ኦሌታናስ ቦፒቴ። ሃይሳ ታኒ ኦꬂዳ ጊሻስ ኢንቴ ኡባይካ ኢንቴ ሶ ኢንቴ ሶ ሲሚቴ› ጌስ ጋዳ ዮታ» ጊዴስ። ሂስቲን ኢስቲ ጎዳ ቃላ ሲዪ ሲሚ ሶ ቢዳ።
1KI 12:25 ሄሳፌ ጉዬ ኢዮርባኣሜይ ኤፍሬሜን ሻራ ሜንꬆን ዲዛ ሴኬሜን ሚጻ ጊግሲ ኡቲዴስ፤ ሄሳፌ ኬዚ ቢዲ ፓኑኤሌን ሚጻ ጊግሲዴስ።
1KI 12:26 ኢዮርባኣሜይ ባ ዎዚናን፥ «ካዎቴꬃይ ዳዊቴ ዜሬꬃስ ሲማና።
1KI 12:27 ሃ ኣሳይ ጎዳ ጾሳ ኬꬃን ያርሾ ያርሻናስ ዬሩሳላሜ ካታማ ቢዛ ጊዲኮ፥ ኢስቲ ቃሴ ባንታ ጎዳ ካዎ ኤሮቢኣሜኮ ሲማና። ኢስቲ ታና ዎꬊዲ ዩሁዳ ካዎ ኤሮቢኣሜኮ ሲማና» ጊ ቆፒዴስ።
1KI 12:28 ሄሳ ጊሻስ ካዎይ ዞሬቲዳፔ ጉዬ ዎርቃፌ ኦሴቲዳ ማራ ሚስሌ ናምኣታ ሜꬊዲ ኣሳስ፥ «ኢስራኤሌ ኣሳዉ! ኢንቴ ሃይሳ ጋካናስ ዬሩሳላሜ ቦይሲ ጊዳና። ቤኢቴ ኢንቴና ጊብጼፔ ኬሲዳ ኢንቴ ጾሳቲ ሃይታንታ!» ጊዴስ።
1KI 12:29 ኢስታፌ ኢሳ ቤቴሌን፥ ኢሳ ቃሴ ዳኔን ኤሲዴስ።
1KI 12:30 ማራ ሚስሌስ ጎይናናስ ኣሳይ ዳኔ ጋካናስ ቢዳ ጊሻስ ሃ ዮኦይ ኢስታስ ናጋራ ጊዲዴስ።
1KI 12:31 ኢዮርባኣሜይ ዙምቡላታ ቦላን ጎይኒዛሶሆን ኤቃ ሚስሌታ ኦꬂዴስ፤ ዴራ ጊዶፌ ሌዌ ቆሞ ጊዶንታይታ ቄሴ ሂስቲ ሱንꬂዴስ።
1KI 12:32 ካሴ ዩሁዳን ቦንቺዛይሳꬆ ኦስፑንꬃ ኣጊናን ታማኔ ኢቻሻንꬃ ጋላሳን ባኣሌይ ቦንቼታና ማላ ኢዮርባኣሜይ ዎጋ ዎꬂዲ ያርሾ ያርሺዴስ። ኢዚ ባ ኦሲሲዳ ማራ ሚስሌታስ ቤቴሌን ዲዛ ያርሾ ሶሆታን ያርሾ ያርሺዴስ። ቃሴ ዙምቡላታ ቦላ ጎይኒዛሶታን ባ ኦሲሲዳ ኤቃ ሚስሌታስ ቄሴታ ቤቴሌን ሹሚዴስ።
1KI 12:33 ኢዚ ባ ዶሪዳ ኦስፑንꬃ ኣጊናን ታማኔ ኢቻሻንꬃ ጋላስ ቤቴሌ ቢዲ ሄ ጋላስ ኢስራኤሌ ኣሳስ ባኣሌ ጊዳና ማላ ኣዋጂዴስ፤ ሂስቲዲ ኤጻኔ ጩዋሳናስ ፑዴ ያርሾ ያርሺዛሶ ኬዚዴስ።
1KI 13:1 ኢዮርባኣሜይ ኤጻኔ ጩዋሳናስ ያርሾ ያርሺዛሶ ማታን ኤቂዲሺን ጎዳ ቃላን ኪቴቲዳ ጾሳ ኣሲ ዩሁዳፔ ቤቴሌ ዪዴስ።
1KI 13:2 ጎዳይ ኣዛዚዳ ቃላ ማላ ያርሾ ያርሺዛሶዛ ኤቄቲሼ፥ «ሃይሶ ያርሾ ያርሺዛሶዞ! ጎዳይ ኔስ፥ ‹ዳዊቴ ዜሬꬃፌ ኢዮሲያሳ ጌቴቲዛ ኢሲ ናይ ዬሌታና። « ‹ኢዚ ሃኢ ሃይሳ ዙምቡላ ቦላ ጎይኒዛሶታን ያርሾ ሺሺዛ ቄሴታ ኔ ቦላ ያርሻና፤ ኢስታ ሜቄꬃካ ኔ ቦላ ጹጋና› ጌስ» ጊዴስ።
1KI 13:3 ሄ ጋላስ ጾሳ ኣሲ ማላታ ኢሚዲ፥ «ጎዳይ ዮቲዳ ማላታይ ሃይሳ፤ ‹ሃ ያርሾሶዚ ጳልቄታና፤ ኢዛ ቦላን ዲዛ ቢዲንꬃይካ ዎራ ላሌታና› » ጊዴስ።
1KI 13:4 ካዎ ኢዮርባኣሜይ ጾሳ ኣሲ ቤቴሌን ዲዛ ያርሺዛሶዛ ቦላ ዋሲዳይሳ ሲዪዳ ዎዴ፥ ያርሺዛሶዛ ቦላ ባ ኩሼ ሚጪዲ፥ «ሃይሳ ኣዴዛ ኦይኪቴ!» ጊዴስ። ጊዶ ኣቲን ኢዚ ሚጪዳ ኩሼዛ ጉዬ ባኮ ዛራናስ ዳንዳይቤና።
1KI 13:5 ቃሴካ ሄ ጾሳዴይ ጎዳ ቃላን ኢሚዳ ማላታ ማላ ያርሾሶዚ ጳልቄቲ ዎꬊዴስ፤ ኢዛ ቦላ ዲዛ ቢዲንꬃይካ ላሌቲዴስ።
1KI 13:6 ሂስቲን ካዎ ኢዮርባኣሜይ ጾሳዴዛ፥ «ታ ኩሼይ ካሴይሳꬆ ሃናና ማላ ታስ ጋናታዳ ጎዳ ኔ ጾሳ ታስ ዎሳርኪ!» ጊዴስ። ሄሳ ጊሻስ ጾሳዴዚ ካዎዛስ ጋናቲዲ ጎዳ ዎሲን ካዎዛ ኩሼይ ሲሚዲ ካሴይሳ ማላ ሃኒዴስ።
1KI 13:7 ካዎይ ጾሳዴዛ፥ «ታናራ ታሶ ሄꬋ፤ ካꬂካ ማ። ቃሴ ታኒ ኔስ ኢሞታ ኢማና» ጊዴስ።
1KI 13:8 ጊዶ ኣቲን ጾሳዴዚ ካዎዛስ፥ «ሃራይ ኣቲን ኔኒ ኔ ኣቆታፔ ባጋ ታስ ኢሚዳኮካ ታኒ ኔናራ ቢኬ፤ ሃይሳን ካꬂካ ሚኬ፤ ሃꬂካ ኡዪኬ።
1KI 13:9 ጋሶይካ ጎዳ ቃላይ ታና፥ ‹ኔኒ ካꬂካ ሞፓ፤ ሃꬂካ ኡዮፓ፤ ኔ ዪዳ ኦጌራካ ሲማዳ ቦፓ› » ጊዴስ።
1KI 13:10 ሄሳ ጊሻስ ኣዴዚ ካሴ ባ ቢዳ ኦጌራ ጊዶንታ ሃራ ኦጌራ ቤቴሌ ሲሚዴስ።
1KI 13:11 ቲንቢቴ ዮቲዛ ኢሲ ጪማ ናቤይ ቤቴሌ ካታማን ዴስ፤ ኢዛ ናይቲ ቤቴሌን ሄ ጋላስ ጾሳዴዚ ኦꬂዳ ኡባ ሚሺኔ ካዎዛካ ኢዚ ኣይ ጊዳኮ ቢዲ ባንታ ኣዋስ ዮቲዳ።
1KI 13:12 ሂስቲን ኣዋይ ኢስታስ፥ «ኣዋ ኦጌራ ቢዴ?» ጊዴስ፤ ዩሁዳፔ ዪዳ ጾሳ ኣሲ ቢዳ ኦጌዛ ባንታ ኣዋ ቤሲዳ።
1KI 13:13 ሄሳፌ ጉዬ ኢዚ ባ ናይታ፥ «ታስ ኣኔ ሃሬ ኮሪቴ» ጊን ኢስቲ ኢዛስ ሃሬ ኮሪን ቶጊዴስ።
1KI 13:14 ሂስቲዲ ጾሳዴዛ ጌዶ ካሊ ቢዴስ፤ ኢሲ ዎላ ኩዋን ኡቲዳይሳ ዴሚዲ፥ «ዩሁዳፔ ዪዳ ጾሳዴዚ ኔኔ?» ጊ ኦይቺዴስ። ኢዚካ፥ «ኤ ታናኮ!» ጊዴስ።
1KI 13:15 ሂስቲን ሄ ጪማ ናቤዚ ኢዛ፥ «ቁማ ማናስ ታናራ ታሶ ሄꬋ» ጊዴስ።
1KI 13:16 ጾሳዴዚ ዛሪዲ፥ «ታኒ ጉዬ ሲማዳ ኔናራ ባናስ፥ ዎይኮ ሃይሳን ኔናራ ካꬅ ማናስ፥ ዎይኮ ሃꬅ ኡያናስ ዳንዳይኬ።
1KI 13:17 ኣይስ ጊኮ ጎዳ ቃላይ ታና፥ ‹ኔኒ ሄ ሶሆን ካꬂካ ሞፓ፤ ሃꬂካ ኡዮፓ፤ ኔ ዪዳ ኦጌራካ ሲማ ቦፓ› ጊ ኣዛዚዴስ» ጊዴስ።
1KI 13:18 ጪማ ናቤዚ ጊዲኮ፥ «ታኒካ ኔ ማላ ቲንቢቴ ዮቲዛዴ፤ ኪታንቻይ ጎዳ ቃላን ታና፥ ‹ካꬅ ኢዚ ማና ማላኔ ሃꬅ ኡያና ማላ ኢዛ ዛራዳ ኔ ሶ ኔናራ ኤካ ባ› ጊዴስ» ጊ ዮቲዴስ። ጊዶ ኣቲን ጪማ ናቤዚ ሄሳ ኢዛስ ዎርዶ ዮቲዴስ።
1KI 13:19 ሄሳ ጊሻስ ጾሳዴዚ ኢዛራ ሲሚዲ ኢዛ ሶን ሚዴሲኔ ኡዪዴስ።
1KI 13:20 ኢስቲ ማዳን ኡቲዳሺን ጎዳ ቃላይ ዛሪ ኤሂዳ ጪማ ናቤዛኮ ዪዴስ።
1KI 13:21 ሂስቲን ዩሁዳፔ ዪዳ ጾሳ ናቤዛስ፥ «ጎዳይ ኔና፥ ‹ኔኒ ጾሳ ቃላ ካዉሻዳሳ፤ ጎዳ ኔ ጾሳይ ኔና ኣዛዚዳ ኣዛዞካ ናጋቤካ።
1KI 13:22 ሄ ሶሆን ሞፓ ዎይኮ ኡዮፖ ጊዳ ሶሆ ጉዬ ሲማ ባዳ ሄን ካꬂካ ማዳሳ፤ ሃꬂካ ኡያዳሳ። ሄሳ ጊሻስ ኔ ኣሃይ ኔ ኣዋታ ዱፎን ሞጌቴና› ጌስ» ጊሼ ዋሲ ዮቲዴስ።
1KI 13:23 ጾሳ ኣሲ ሚዲኔ ኡዪ ጊጊዳፔ ጉዬ ቲንቢቴ ዮቲዛይሲ ባ ጉዬ ዛሪ ኤሂዳ ናቤዛስ ሃሬ ኮሪዴስ።
1KI 13:24 ሂስቲን ኢዚ ኦጌራ ቢሺን ጋሞይ ጋይቲዲ ኢዛ ዎꬊዴስ። ኢዛ ኣሃይ ኦጌን ፖርጩ ጊዴስ፤ ሃሬይኔ ጋሞይ ናምኣይካ ኢዛ ላንቄን ኤቂዳ።
1KI 13:25 ሄ ኦጌራ ኣꬊዛ ኣሳይ ኣሃይ ፖርጩ ጊ ኢቺዳይሳኔ ጋሞይካ ኢዛ ላንቄን ኤቂዳይሳ ቤኢዲ ጪማ ናቤዚ ዲዛ ካታማን ቢዲ ዮቲዳ።
1KI 13:26 ቢዛሳፔ ኣዴዛስ ቲንቢቴ ዮቲዲ ጉዬ ዛሪዳ ጪማ ናቤዚ ሄሳ ሲዪዳ ዎዴ፥ «ሄሲ ጎዳ ቃላስ ኣዛዜቶንታ ኢጺዳ ጾሳ ኣሳ። ሄሳ ጊሻስ ጎዳ ቃላይ ኢዛስ ካሴቲዲ ዮቲዳይሳ ማላ ጎዳይ ኢዛ ጋሞስ ኣꬂ ኢሚን ጋሞይ ኢዛ ሜንꬄሬꬂ ዎꬊዴስ» ጊዴስ።
1KI 13:27 ሄሳፌ ጉዬ ጪማ ኣዴዚ ባ ናይታ፥ «ታስ ሃሬ ኮሪቴ» ጊዴስ። ሂስቲን ኢስቲ ኢዛስ ሃሬ ኮሪዳ።
1KI 13:28 ናቤዚ ቢሼ ኣሃይ ኦጌ ቦላ ፖርጩ ጊ ኢቺዳ ጋሞይኔ ሃሬይ ኢዛ ማታን ኤቂዳይሳ ዴሚዴስ። ጋሞዚ ኣሃ ሚቤና፤ ሃሬዛካ ቦቺቤና።
1KI 13:29 ጪማ ናቤዚ ጾሳ ናቤዛ ኣሃ ዴንꬂዲ ሃሬዛ ቦላ ጫኒዴስ፤ ዬካናሲኔ ሞጋናስ ጉዬ ባ ካታማ ኤኪ ኤሂዴስ።
1KI 13:30 ሂስቲዲ ባስ ጊግሲ ዎꬂዳ ዱፎን ኣሃ ዎꬂዲ፥ «ታ ኢሻዞ! ታ ኢሻዞ!» ጊዲ ኢዛስ ዬኪዳ።
1KI 13:31 ሞጊ ሲሚዳፔ ጉዬ ባ ናይታስ፥ «ታኒ ሃይቂዛ ዎዴ ጾሳ ኣሲ ሞጌቲዳ ዱፎን ታና ሞጊቴ፤ ታ ሜቄꬃታካ ኢዛ ሜቄꬃታ ላንቄን ዎꬂቴ።
1KI 13:32 ጋሶይካ ቤቴሌን ዲዛ ያርሾ ያርሺዛሶዛ ቦላ፥ ሳማሪያ ካታማታኒኔ ዙምቡላታ ቦላ ዲዛ ጎይኒዛሶሆታ ቦላ ጎዳ ቃላ ማላ ኢዚ ዋሲ ዮቲዳይሲ ቱሙ ፖሌታና» ጊ ዮቲዴስ።
1KI 13:33 ሃይሲ ኡባይ ሃንኮካ ኢዮርባኣሜይ ባ ኢታ ኦጌፔ ሲሚቤና፤ ሄሳፌ ቦላራካ ዙምቡላታ ቦላ ዲዛ ያርሾሶታን ኦꬃናስ ዴሬ ኡባፌ ቄሴታ ሹሚዴስ፤ ቄሴ ጊዳናስ ኮይዛ ኦናካ ዙምቡላታ ቦላ ያርሺዛሶሆታን ዎꬂዴስ።
1KI 13:34 ሃይሲ ሃ ናጋራይ ኢዮርባኣሜ ኬꬃ ኣሳ ባሻሲኔ ቢታ ቦላፌ ꬋይሳናስ ጋሶ ጊዲዴስ።
1KI 14:1 ሄ ዎዴ ኢዮርባኣሜ ና ኣቢያይ ሃርጊዴስ።
1KI 14:2 ሂስቲን ኢዮርባኣሜይ ባ ኬꬃዮ፥ «ዴንዳ፤ ዴንዳዳ ኔኒ ኢዮርባኣሜ ኬꬃዮ ጊዲዳይሳ ኦኒኔ ኤሮንታ ማላ፥ ኔ ማይኦ ላማ፤ ሂስታዳ ሴሎ ባ። ታኒ ሃ ኣሳ ቦላ ካዎታናይሳ ታስ ዮቲዳ ናቤ ኣካያይ ሄን ዴስ።
1KI 14:3 ታሙ ኡኬꬅ፥ ጉꬃ ዳቦኔ ኢሲ ኦቶ ኤስ ኤካዳ ኢዛኮ ባ፤ ኢዚ ናዛ ቦላ ጋካናይሳ ኔስ ዮታና» ጊዴስ።
1KI 14:4 ኢዮርባኣሜ ኬꬃያ ኢዚ ጊዳ ማላ ኦꬃዱስ፤ ዴንዳዳ ኣካያ ሶ ሴሎ ባዱስ። ኣካያይ ጪሚዳ ጊሻስ ኢዛ ኣይፌይ ዶልጁሚዲ ዴሜና።
1KI 14:5 ጊዶ ኣቲን ጎዳይ ኣካያስ፥ «ኢዮርባኣሜ ኬꬃ ኣዬያ ሃርጊዛ ባ ናዛ ጊሻስ ኔና ኦይቻናስ ሃራ ማጫስ ሚሳታዳ ኔኮ ያና፤ ኔኒ ኢዚስ ሃይሳ ሃይሳ ጋዳ ዮታ» ጊዴስ።
1KI 14:6 ሄሳ ጊሻስ ኣካያይ ማጫሳያ ፔንጌ ጌሊሺን ሲዪዲ፥ «ኢዮርባኣሜ ኬꬃ ኣዬ! ኣኔ ሃ ጌላ። ኣይስ ሃራ ኣስ ሚሳታዲ? ታኒ ኢታ ዮኦ ኔስ ዮታናስ ኪቴታዲስ።
1KI 14:7 ኔኒ ኢዮርባኣሜኮ ባዳ ጎዳ ኢስራኤሌ ጾሳይ ኔና፥ ‹ታኒ ኔና ኣሳ ጊዶፌ ዴንꬃዳ ታ ዴሬ ኢስራኤሌ ቦላ ካዎꬃዲስ።
1KI 14:8 ታኒ ዳዊቴ ዛሬፔ ካዎቴꬃ ዎꬃ ኤካዳ ኔስ ኢማዲስ፤ ጊዶ ኣቲን ኔኒ ታ ኣሽካራ ዳዊቴ ማላ ጊዳካ፤ ኢዚ ታ ኣዛዞ ናጊዴሲኔ ታ ሲንꬃን ሱሬ ሚሽ ጻላ ኦꬂሼ ባ ኩሜꬃ ዎዚናን ታና ካሊዴስ።
1KI 14:9 ኔፔ ካሴ ሲንꬃን ዲዛይቲ ኡባይ ኦꬂዳ ኢታፔ ኣꬊዛ ኢታ ኔኒ ኦꬃዳሳ፤ ኔኒ ኔስ ቢራታፔ ሴሪሳዳ ኤቃ ጾሳታ ሜꬋዳሳ። ታ ሃንቆ ዴንꬄꬃዳሳ፤ ሂስታዳ ታና ጉዬ ኦላዳሳ።
1KI 14:10 « ‹ሄሳ ጋሶን ታኒ ኢዮርባኣሜ ኬꬃ ኣሳ ቦላ ꬋዮ ኤሃና። ኢስራኤሌ ቢታን ኢዮርባኣሜ ኬꬃ ኣሳፔ ኣይሌ ጊዲን ዎይኮ ጎቃ ጊዲን፥ ኣቱማስ ኡባ ꬋይሳና፤ ታኒ ኢዮርባኣሜ ኬꬃ ኣሳ ኬፌይ ቢዲንꬅ ኬዛና ጋካናስ ጹጊዛ ማላ ጹጋና።
1KI 14:11 ኢዮርባኣሜ ዛሬፔ ካታማን ሃይቂዳይታ ካናይ ማና፤ ጋጻሬን ሃይቂዳይታ ካፎይ ማና፤ ሃይሳ ዮቲዳይ ታና ጎዳ!› ጊዴስ።
1KI 14:12 «ኔኒ ጊዲኮ ሃኢ ዴንዳዳ ኔሶ ባ። ኔኒ ካታማ ጋኪዳ ማላ ናዚ ሃይቃና።
1KI 14:13 ኢስራኤሌ ኡባይ ናዛስ ዬኪዲ ሞጋና፤ ጎዳ ኢስራኤሌ ጾሳ ሲንꬃን ኢዮርባኣሜ ኬꬃ ኣሳፔ ሃ ናዛ ቦላ ጻላ ሎኦ ሚሺ ቤቲዳ ጊሻስ ዎጋን ሞጌታናይ ኢዛ ጻላ።
1KI 14:14 «ሄሳፌ ጉዬ ኢዮርባኣሜ ኬꬃ ኣሳ ꬋይሲዛ ካዎ፥ ጎዳይ ባስ ኢስራኤሌ ቦላ ዴንꬃና፤ ሄሲካ ሃኢ ሃናና።
1KI 14:15 ሃꬃ ጊዶን ቃጺዛ ማቃ ማላ ጎዳይ ሄ ዎዴ ኢስራኤሌታ ሾጪዲ ቃꬃና። ኣሼሮ ጌቴቲዛ ኤቃ ጾሳይ ሚስሌ ኤሲዲ ጎዳ ሃንቄꬂዳ ጊሻስ ኢስታ ኣዋታስ ኢዚ ኢሚዳ ሎኦ ቢታፌ ኢስታ ዲጋና፤ ሂስቲዲ ኢስታ ኤፊራጺሴ ሻፋፔ ሄ ፒንꬃን ላላና።
1KI 14:16 ኢዮርባኣሜይ ኦꬂዳ ናጋራ ጋሶኒኔ ኢስራኤሌ ኣሳ ኢዚ ኦሲሲዳ ናጋራ ጊሻስ ጎዳይ ኢስራኤሌ ዬጊ ኣጋና» ጊዴስ።
1KI 14:17 ሄሳፌ ጉዬ ኢዮርባኣሜ ኬꬃ ኣያ ዴንዳ ባዳ ቲርጻን ባ ኬꬃ ፔንጌ ጋኪዳ ማላ ናዚ ሃይቂዴስ።
1KI 14:18 ናቤ ኣካያ ባጋራ ጎዳይ ዮቲዳ ማላ ኢስራኤሌ ኣሳይ ኡባይ ኢዛስ ዬኪዲ ሞጊዴስ።
1KI 14:19 ኣቲዳ ኢዮርባኣሜ ታሪኬይ፥ ኢዚ ኦꬂዳ ኦሶቲ፥ ኢዚ ኦሌቲዳ ኦላቲኔ ኢዚ ኣይሲዳ ኣይሶ ዎጋቲ ኢስራኤሌ ካዎታ ታሪኬ ማጻፋን ጻፌቲ ኡቲዳ።
1KI 14:20 ኢዮርባኣሜይ 22 ላይꬅ ካዎቲዴስ፤ ሄሳፌ ጉዬ ሃይቂዲ ባ ኣዋታን ጋይቲዴስ። ኢዛሶሆን ኢዛ ና ናዳቤይ ካዎቲዴስ።
1KI 14:21 ሶሎሞኔ ና ኤሮቢኣሜይ ዩሁዳን ካዎቲዴስ፤ ኤሮቢኣሜይ ካዎቲዛ ዎዴ ኢዛስ ላይꬃይ 41። ጎዳይ ባ ሱንꬃይ ጼይጌታና ማላ ኢስራኤሌ ቆሞታ ካታማታ ኡባ ጊዶፌ ዶሪዳ ዬሩሳላሜ ካታማን ኤሮቢኣሜይ 17 ላይꬅ ካዎቲዴስ። ኢዛስ ኣዬይ ሱንꬂ ናኢሞ፤ ኢዛካ ኣሞኔ ቢታ ኣሳ።
1KI 14:22 ዩሁዳ ኣሳቲ ጎዳ ሲንꬃን ኢታ ሚሽ ኦꬂዳ፤ ባንቲ ኦꬂዳ ናጋራን ኢስቲ ባንታ ኣዋታፔ ኣꬂዲ ጎዳፔ ዴጾ ሃንቆ ባ ቦላ ዴንꬄꬂዳ።
1KI 14:23 ቃሴካ ኢስቲ ባንታስ ጎይኒዛ ꬎቃሶሆታ፥ ኤቃ ሹቻታኔ ኣሼሮ ጌቴቲዛ ጾሳይ ሚስሌታ ዙምቡላታ ቦላኔ ጊታ ሚꬃታ ጋርሳን ኤሲዳ።
1KI 14:24 ሃራይ ኣቲን ኢስቲ ጎይኒዛሶሆታን ጎይኖ ዎጋ ኦꬂዲ ፓራ ላይማቴꬃ ዎጋታ ፖሊዛ ኣሳቲ ዴቴስ። ጎዳይ ኢስራኤሌታ ሲንꬃፌ ኬሲ ዬዴꬂዳ ካዎቴꬃቲ ሜዜቲዳ ማላ ሃራሲዛ ኦሶታ ኡባ ኢስራኤሌ ኣሳቲ ኦꬂዳ።
1KI 14:25 ኤሮቢኣሜይ ካዎቲዳ ኢቻሻንꬆ ላይꬃን ጊብጼ ካዎ ሺሻቂ ዬሩሳላሜ ካታማ ቦላ ዎራጂዴስ።
1KI 14:26 ሂስቲዲ ጾሳ ኬꬃኒኔ ካዎ ኬꬃን ዲዛ ቡቁራ፥ ሶሎሞኔይ ቆጺሲዳ ዎርቃ ጎንዳሌታራ ኡባ ቦንቂ ኤኪዲ ቢዴስ።
1KI 14:27 ካዎ ኤሮቢኣሜይ ሄ ጎንዳሌታ ጊሻስ ጻርቂማላፔ ጎንዳሌታ ኦሲሲዲ ኢስታ ናጊዲ ዎꬃና ማላ ካዎ ኬꬃ ናጊዛ ዛቤታ ሃላቃታስ ኢሚዴስ።
1KI 14:28 ካዎዚ ጾሳ ኬꬅ ቢዛ ዎዴ ኡባን ናጊዛይቲ ጎንዳሌታ ኦይኬቴስ፤ ሄፔ ሲሚዲ ኢስታ ዛቤታ ሃላቃ ኬꬃን ዛሪ ዎꬄቴስ።
1KI 14:29 ኤሮቢኣሜይ ኣይሲዳ ኣይሶ ዎጋቲኔ ኢዚ ኦꬂዳ ኡባ ኦሶቲ ዩሁዳ ካዎታ ታሪኬ ማጻፋን ጻፌቲ ኡቲዳ።
1KI 14:30 ኤሮቢኣሜይኔ ኢዮርባኣሜይ ባ ዎዴ ኡባን ባ ጊዶን ኦሌቲሼ ዴኢዳ።
1KI 14:31 ኤሮቢኣሜይ ሃይቂዲ ባ ኣዋታን ጋይቲዴስ፤ ኢዚ ዳዊቴ ካታማን ዲዛ ባ ኣዋታ ዱፎን ሞጌቲዴስ። ኢዛ ኣዬይ ሱንꬂ ናኢሞ፤ ኢዛካ ኣሞኔ ቢታ ኣሳ። ኤሮቢኣሜ ሶሆን ኢዚ ና ኣቢያይ ካዎቲዴስ።
1KI 15:1 ናባጼ ና ኢዮርባኣሜይ ካዎቲዳ ታማኔ ኦስፑንꬃ ላይꬃን ኣቢያይ ዩሁዳን ካዎቲዴስ።
1KI 15:2 ኣቢያይ ዬሩሳላሜን ሄꬑ ላይꬅ ካዎቲዴስ፤ ኢዛ ኣዬያ ኣቤሴሎሜ ቦሎቶ፤ ኢዚ ሱንꬃይካ ማኢኮ።
1KI 15:3 ኢዚ ካሴ ኢዛ ኣዋይ ኦꬂዳ ናጋራ ኡባ ኦꬂዴስ፤ ኢዛ ዎዚናይ ኢዛ ማይዛ ዳዊቴ ዎዚናይ ኩሜꬅ ኣማኔቲዳ ማላ ጎዳ ባ ጾሳስ ኩሜꬅ ኣማኔቲቤና።
1KI 15:4 ጊዲኮካ ኢዛፔ ጉዬ ዬሩሳላሜን ካዎታና ማላኔ ዬሩሳላሜ ሳሮቴꬃ ናጋና ማላ ጎዳ ኢዛ ጾሳይ ዳዊቴ ጊሻስ ኣቢያስ ኢሲ ኣቱማ ና ኢሚዴስ።
1KI 15:5 ጎዳይ ሄሳ ኦꬂዳይ ዳዊቲ ሂቴ ኣስ ኦሪዮ ቦላ ኦꬂዳ ናጋራይፔ ኣቲን ጎዳ ሲንꬃን ሱሬ ሚሽ ኦꬂዴስ፤ ባ ዴኦ ላይꬅ ኡባን ጎዳ ኣዛዞታፔ ካሬ ኬዚቤና።
1KI 15:6 ኣቢያይ ካዎቲዳ ላይꬅ ኡባን ኣቢያ ኣሳራኔ ኤሮቢኣሜ ኣሳራ ባንታ ጊዶን ኦሌቲሼ ዴኢዳ።
1KI 15:7 ኣቢያይ ኦꬂዳ ሃራ ሚሻቲ ኡባይ ዩሁዳ ካዎታ ታሪኬ ማጻፋን ጻፌቲ ኡቲዳ። ኣቢያይኔ ኢዮርባኣሜይ ባንታ ጊዶን ኦሌቲሼ ዴኢዳ።
1KI 15:8 ኣቢያይ ሃይቂዲ ባ ኣዋታን ጋይቲዴስ፤ ኢዚ ዳዊቴ ካታማን ሞጌቲዴስ። ኢዛ ሶሆንካ ኢዛ ና ኣሲ ካዎቲዴስ።
1KI 15:9 ኢስራኤሌ ካዎ ኢዮርባኣሜይ ካዎቲዳ ናምኡ ታማንꬃ ላይꬃን ኣሲ ዩሁዳን ካዎቲዴስ።
1KI 15:10 ኣሲ ዬሩሳላሜን 41 ላይꬅ ካዎቲዴስ፤ ኢዛ ኣዋ ኣያ ኣቤሴሎሜ ቢዮ ማኢኮ።
1KI 15:11 ኣሲ ባ ማካኩሌ ዳዊቲ ኦꬂዳ ማላ ጎዳ ሲንꬃን ሱሬ ሚሽ ኦꬂዴስ።
1KI 15:12 ጎይኖ ዎጋ ፖላናስ ፓራ ላይማ ላይማቲዛይታ ኣሲ ባ ቢታፌ ꬋይሲዴስ፤ ኢዛፔ ካሴ ዴኢዳ ካዎቲ ኦꬂዳ ኤቃ ጾሳ ሚስሌታ ኡባ ꬎቃሌሬꬂ ዬጊዴስ።
1KI 15:13 ኢዛ ኣዋ ኣያ ማኢካ ኣሼሮ ጌቴቲዛ ሃራሲዛ ኤቃ ሚስሌ ሜꬊዳ ጊሻስ ጎዳቴይንታ ጌቴቲዛ ቦንቾፌ ኢዞ ዲጊዴስ። ኣሲ ሄ ኤቃ ሚስሌዛ ቃንጼሬꬂዲ ቄዲሮኔ ዙሌን ጹጊዴስ።
1KI 15:14 ኣሲ ዙምቡላታ ቦላ ጎይኒዛሶሆታ ኡባ ꬋይሶንታ ኣጊኮካ ኢዚ ባ ዴኢዳ ላይꬅ ኡባን ጾሳስ ዎዚናፔ ኣማኔቲዛ ኣስ ጊዲ ዴኢዴስ።
1KI 15:15 ኢዚኔ ኢዛ ኣዋይ ጾሳስ ዱማሲ ዎꬂዳ ቢራ፥ ዎርቃኔ ሃራ ሚሻታ ኤሂዲ ጎዳ ጾሳ ኬꬃ ጊዶን ዎꬂዴስ።
1KI 15:16 ዩሁዳ ካዎ ኣሲኔ ኢስራኤሌ ካዎ ባሼይ ባንታ ዴኦ ላይꬅ ኡባን ኦሌቲሼ ዴኢዳ።
1KI 15:17 ኢስራኤሌ ካዎ ባሼይ ዩሁዳ ቦላ ዎራጂዲ ዩሁዳ ካዎ ኣሳ ቢታ ጌሎንታ ማላኔ ኬኦንታ ማላ ቴቃናስ ኤራማ ካታማ ዩዪ ኣꬋናስ ሚጻ ሂስቲ ጊምቢዴስ።
1KI 15:18 ሄሳ ጋሶን ካዎ ኣሲ ጎዳ ጾሳ ኬꬃኒኔ ባ ካዎቴꬃ ኬꬃን ኣቲዳ ዎርቃኔ ቢራ ኡባ ኬሲዲ ባ ኦሳንቻታ ኩሼን ዎꬂዴስ። ሂስቲዲ ሄዚዮናሳ ና ጻብሪሞና ናዛስ ዳማስቆ ካታማን ዴኢዛ ኣራሜ ካዎ ቤኒ-ሃዳዴስ ኢሞታ ሂስቲ ዬዲዴስ።
1KI 15:19 ሂስቲዲ ኢዛስ፥ «ካሴ ታ ኣዋሲኔ ኔ ኣዋስ ኢስታ ጊዶን ጫቆ ቃላይ ዲዛ ማላ ሃኢ ታ ጊዶኒኔ ኔ ጊዶንካ ጫቆ ቃላይ ዴኦ፤ ሄኮ ቢራኔ ዎርቃ ታኒ ኔስ ኢሞታ ኢማናስ ዬዳዲስ። ኢስራኤሌ ካዎ ባሼይ ባ ኦላንቻታ ታ ቢታፌ ኬሳና ማላ ኔኒ ካሴ ኢዛራ ጫቄቲዳ ጫቆ ቃላ ላላ» ጊዴስ።
1KI 15:20 ቤኒ-ሃዳዴይ ካዎ ኣሲ ጊዳ ቃላ ኤኪዲ ባ ኦላ ጋዳዋታ ኢስራኤሌ ካታማታ ኦላናስ ዬዲዴስ፤ ኢስቲ ኢዮኔ፥ ዳኔ፥ ኣቤሊ-ቤቲ-ማኢካ ጌቴቲዛ ካታማታ፥ ቃሴ ኒፍታሌሜኔ ጌንሴሬጼ ኡባ ኦሊ ኦይኪዴስ።
1KI 15:21 ካዎ ባሼይ ሄሳ ሲዪዲ ኤራማ ካታማ ጊምቢዛይሳ ኣጊዲ ቲርጻ ጌቴቲዛ ካታማ ጉዬ ሲሚዴስ።
1KI 15:22 ሄሳፌ ጉዬ ካዎ ኣሲ ዩሁዳን ዴኢዛ ኣሳይ ኡባይ ኣቶንታ ኬዛና ማላ ኣዋጂሲዴስ፤ ባሼይ ካሴ ሄን ጎኤቲዛ ሹቻኔ ሚꬃ ኤራማፔ ሚዪዳ። ካዎ ኣሲ ሚጺጳኒኔ ቢኒያሜ ቢታን ዴኢዛ ጌባ ኢዛን ሚንꬂ ጊምቢዴስ።
1KI 15:23 ኣሲ ሃኒዳ ሃኖታቲ፥ ኢዛ ሚኖቴꬅ ኡባይ፥ ኢዚ ኦꬂዳ ኦሶቲኔ ኢዚ ኤሲዳ ካታማቲ ዩሁዳ ካዎታ ታሪኬ ማጻፋን ጻፌቲ ኡቲዳ። ጊዶ ኣቲን ኢዚ ጪሚዳ ዎዴ ቶሆ ሳኬቲዴስ።
1KI 15:24 ኣሲ ሃይቂዲ ባ ኣዋታን ጋይቲዴስ፤ ባ ማካኩሌ ዳዊቴ ካታማንካ ሞጌቲዴስ። ኢዛ ና ኢዮሳፊጼይ ኢዛሶሆን ካዎቲዴስ።
1KI 15:25 ዩሁዳ ካዎ ኣሲ ካዎቲዳ ናምኣንꬆ ላይꬅ ኢዮርባኣሜ ና ናዳቤይ ኢስራኤሌን ካዎቲዴስ፤ ኢዚ ኢስራኤሌ ቢታ ናምኡ ላይꬅ ሃሪዴስ።
1KI 15:26 ናዳቤይ ካሴ ባ ኣዋይ ናጋራ ኦꬂዳ ኢስራኤሌ ኣሳይ ናጋራ ኦꬃና ማላ ካሌꬂዴስ።
1KI 15:27 ሄ ዎዴ ናዳቤይኔ ኢዛ ኦላንቻቲ ፊሊስጼሜን ዲዛ ጋባቶኔ ካታማ ዶዲ ዲሺን ዪሳኮሬ ዛሬ ጊዲዳ ኣካያ ና ባሼይ ናዳቤ ቦላ ዴንዲዲ ኢዛ ዎꬊዴስ።
1KI 15:28 ዩሁዳ ካዎ ኣሲ ካዎቲዳ ሄꬓንꬆ ላይꬃን ባሼይ ናዳቤ ዎꬊዲ ኢዛሶሆን ካዎቲዴስ።
1KI 15:29 ባሼይ ካዎቲዳ ማላ ኢዮርባኣሜ ሶ ኣሳ ኡባ ዎꬊ ዉርሲዴስ፤ ጎዳይ ሴሎፔ ዪዳ ባ ኣሽካራ ናቤ ኣካያ ባጋራ ዮቲዳ ማላ ኢዮርባኣሜ ኬꬃ ኣሳይ ኡባይ ሃይቂ ዉሪዴስ።
1KI 15:30 ሄሲ ሃኒዳይ ኢዮርባኣሜይ ባ ሁኤን ኦꬂዳ ናጋራ ጊሻስ፥ ኢስራኤሌ ኣሳ ኢዚ ኦሲሲዳ ናጋራ ጊሻሲኔ ጎዳ ኢስራኤሌ ጾሳ ሃንቄꬂዳ ጊሻሳ።
1KI 15:31 ናዳቤይ ሃኒዳ ሃኖታቲኔ ኢዚ ኦꬂዳ ኦሶቲ ኡባይ ኢስራኤሌ ካዎታ ታሪኬ ማጻፋን ጻፌቲ ኡቲዳ።
1KI 15:32 ዩሁዳ ካዎ ኣሲኔ ኢስራኤሌ ካዎ ባሼይ ባንታ ላይꬅ ኡባን ኦሌቲሼ ዴኢዳ።
1KI 15:33 ዩሁዳ ካዎ ኣሲ ካዎቲዳ ሄꬓንꬆ ላይꬃን ኣካያ ና ባሼይ ኢስራኤሌ ኣሳ ኡባ ቦላ ካዎቲዴስ፤ ኢዚ ቲርጻ ካታማን 24 ላይꬅ ካዎቲዴስ።
1KI 15:34 ኢዮርባኣሜይ ኢስራኤሌ ኣሳ ኦሲሲዳ ናጋራ ኦꬂዲኔ ኢዛ ኦጌን ሄሜቲዲ ባሼይ ጎዳ ሲንꬃን ኢታ ሚሽ ኦꬂዴስ።
1KI 16:1 ሃናኒያ ና ኢዩ ባጋራ ጎዳ ቃላይ ባሼ ቦላ ሂዝጊሼ ዪዴስ፤
1KI 16:2 «ታኒ ኔና ጉዱላፌ ዴንꬃዳ ታ ዴራ ኢስራኤሌ ቦላ ካዎሳዲስ፤ ጊዶ ኣቲን ኔኒ ኢዮርባኣሜይ ቢዳ ኦጌራ ባዳ ታ ዴሬ ኢስራኤሌ ናጋራ ኦሲሳዳሳ፤ ሂስታዳ ታ ኢስታ ናጋራን ሃንቄታና ማላ ታና ዴንꬄꬃዳሳ።
1KI 16:3 ሄሳ ጊሻስ ታኒ ባሼኔ ኢዛ ኬꬃ ኣሳ ሙሌራ ꬋይሳና፤ ታኒ ኔ ኬꬃ ኣሳ ናባጼ ና ኢዮርባኣሜ ኬꬃ ኣሳ ማላ ኦꬃና።
1KI 16:4 ባሼ ዛሬ ካታማን ሃይቂዛ ኦናካ ካናይ ማና፤ ቃሴ ጋጻሬን ሃይቂዛ ኦናካ ካፎይ ማና» ጊዴስ።
1KI 16:5 ባሼይ ሃኒዳ ሃኖታይ፥ ኢዚ ኦꬂዳ ኦሶይኔ ኢዛ ሚኖቴꬃይ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
1KI 16:6 ባሼይ ሃይቂዲ ባ ኣዋታን ጋይቲዴስ፤ ቲርጻ ካታማን ሞጌቲዴስ። ኢዛ ና ኤላይ ኢዛሶሆን ካዎቲዴስ።
1KI 16:7 ጎዳይ ሃናኒያ ና ናቤ ኢዩ ባጋራ ባሼ ቦላኔ ኢዛ ሶ ኣሳ ቦላ ቲንቢቴ ዮቲዳ ጋሶይካ ባሼይ ኦꬂዳ ናጋራ ጊሻስ፥ ኢዮርባኣሜይኔ ኢዛ ሶ ኣሳይ ኦꬂዳ ኢታ ኦሶ ማላ ጎዳ ሲንꬃን ኦꬂዳ ጊሻሲኔ ኢዮርባኣሜ ሶ ኣሳ ኡባ ዎꬊ ꬋይሲዳ ጊሻሳ።
1KI 16:8 ዩሁዳ ካዎ ኣሲ ካዎቲዳ 26 ላይꬃን ባሼ ና ኤላይ ኢስራኤሌን ካዎቲዴስ። ቲርጻ ካታማን ኢዚ ናምኡ ላይꬅ ካዎቲዴስ።
1KI 16:9 ካዎ ሹሜኔ ኢዛ ፓራ-ጋሬታፔ ባጋ ኣዛዚዛ ዚሚሬይ ካዎ ቦላ ማካላቴꬃን ዴንዲዴስ። ሄ ዎዴ ካዎ ኤሊ ቲርጻን ዲዛ ካዎ ኬꬃስ ሹሜ ጊዲ ዲዛ ኣርጻሶን ማꬆቲ ዴስ።
1KI 16:10 ዩሁዳ ካዎ ኣሲ ካዎቲዳ 27 ላይꬃን ዚሚሬይ ኣርጻሶ ጌሊዲ ካዎ ኤላ ዎꬊዲ ኢዛሶሆን ካዎቲዴስ።
1KI 16:11 ዚሚሬይ ካዎቲዲ ካዎቴꬃ ኣራታን ኡቲዳ ማላ ባሼ ሶ ኣሳ ኡባ ዎꬊዴስ። ባሼስ ዳቦ ጊዲን ዎይኮ ላጌ ጊዲን ኢሳዴካ ኣሺቤና።
1KI 16:12 ናቤ ኢዩ ባጋራ ጎዳይ ባሼ ቦላ ሃሳይዳ ቃላ ማላ ዚሚሬይ ባሼ ሶ ኣሳ ኡባ ዎꬊዴስ።
1KI 16:13 ሄሲ ሃኒዳይ ባሼይኔ ኢዛ ና ኤላይ ባንታ ኤቃ ጾሳስ ጎይኖን ኦꬂዳ ናጋራ ኡባ ጋሶኒኔ ኢስራኤሌ ኣሳ ኦሲሲዳ ናጋራ ጋሶን ጎዳ ኢስራኤሌ ጾሳ ሃንቄꬂዳ ጊሻሳ።
1KI 16:14 ኤላይ ሃኒዳ ሃራ ሃኖታቲኔ ኢዚ ኦꬂዳ ኦሶቲ ኡባይ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
1KI 16:15 ዩሁዳ ካዎ ኣሲ ካዎቲዳ 27 ላይꬃን ዚሚሬይ ቲርጻን ላፑን ጋላስ ጻላ ካዎቲዴስ። ሄ ዎዴ ኢስራኤሌ ኦላንቻቲ ጋባቶኔ ጌቴቲዛ ፊሊስጼሜ ካታማ ዶዲዲ ኡቲዳ።
1KI 16:16 ሄን ዶዲ ኡቲዳ ኢስራኤሌቲ ዚሚሬይ ካዎዛ ቦላ ዴንዲዲ ኢዛ ዎꬊዳይሳ ሲዪዳ ማላ ኦላ ጋዳዋ ኦሚሬ ሄ ጋላሲካ ሄ ሶሆን ኢስራኤሌ ቦላ ካዎꬂዳ።
1KI 16:17 ኦሚሬይኔ ኢዛራ ዲዛ ኢስራኤሌ ኣሳይ ኡባይ ጋባቶኔ ካታማፔ ፑዴ ኬዚዲ ቲርጻ ካታማ ዶዲዳ።
1KI 16:18 ካታማዚ ኦይኬቲዳይሳ ቤኢዳ ማላ ዚሚሬይ ካዎ ኬꬃ ጊዶን ዲዛ ሚጻን ጌሊዲ ካዎ ኬꬃን ታማ ኦይꬂዲ ሄን ኢዛን ሃይቂዴስ።
1KI 16:19 ሄሲ ሃኒዳይ ኢዮርባኣሜይ ኦꬂዳ ናጋራኔ ኢስራኤሌ ኣሳ ኦሲሲዳ ናጋራ ካሊዲ ዚሚሬይ ጎዳ ሲንꬃን ኢታ ሚሽ ኦꬂዳ ጊሻሳ።
1KI 16:20 ዚሚሬይ ሃኒዳ ሃራ ሃኖቲኔ ኢዚ ኦꬂዳ ማካላ ኦሶይ ኡባይ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
1KI 16:21 ሄ ዎዴ ኢስራኤሌ ኣሳይ ናምኡ ኬዚ ሻኬቲዴስ። ኣሳፔ ባጋይ ጊናቴ ና ቲቢኔ ካዎꬃና ኮዪን ባጋይ ቃሴ ኦሚሬ ካዎꬃናስ ኮዪዴስ።
1KI 16:22 ኦሚሬ ማዲዛ ኣሳይ ጊናቴ ና ቲቢኔ ማዲዛ ኣሳፔ ሚኒዴስ። ሄሳ ጊሻስ ቲቢኔይ ሃይቂን ኦሚሬይ ካዎቲዴስ።
1KI 16:23 ዩሁዳ ካዎ ኣሲ ካዎቲዳ 31 ላይꬃን ኦሚሬይ ኢስራኤሌ ኣሳ ቦላ ካዎቲዲ 12 ላይꬅ ሃሪዴስ፤ ሂስቲዲ 6 ላይꬅ ቲርጻ ሃሪዴስ።
1KI 16:24 ኦሚሬይ ሳማሪያን ዲዛ ዙምቡላ ሼሜሬፔ 6,000 ሳቂሌ ቢራን ሻሚዲ ካታማ ኬጺዴስ። ሂስቲዲ ሄ ካታማዛ ካሴ ዙምቡላ ጎዳ ሱንꬃን ሳማሪያ ጊዲ ሱንꬂዴስ።
1KI 16:25 ጊዶ ኣቲን ኦሚሬይ ጎዳ ሲንꬃን ኢታ ሚሽ ኦꬂዴስ፤ ኢዚ ባፔ ካሴ ዴኢዳ ካዎታ ኡባታፔካ ኣꬊዳ ናጋራ ኦꬂዴስ።
1KI 16:26 ናባጼ ና ኢዮርባኣሜይ ኦꬂዳ ናጋራኔ ኢስራኤሌ ኣሳ ኦሲሲዳ ናጋራ ኦሚሬይ ካሊዴስ፤ ሄ ኤቃ ጾሳስ ጎይኒዛ ሃኖታይ ጎዳ ኢስራኤሌ ጾሳ ሃንቄꬂዴስ።
1KI 16:27 ኦሚሬይ ሃኒዳ ሃራ ሃኖታይ፥ ኢዚ ኦꬂዳ ኦሶቲኔ ኢዛ ሚኖቴꬃይ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
1KI 16:28 ኦሚሬይ ሃይቂዲ ባ ኣዋታን ጋይቲዴስ፤ ሳማሪያ ካታማንካ ሞጌቲዴስ። ኢዛ ና ኣካቤይ ኢዛሶሆን ካዎቲዴስ።
1KI 16:29 ዩሁዳ ካዎ ኣሲ ካዎቲዳ 38 ላይꬃን ኦሚሬ ና ኣካቤይ ኢስራኤሌን ካዎቲዴስ፤ ኦሚሬ ና ኣካቤይ ሳማሪያ ካታማን ኢስራኤሌ ቦላ 22 ላይꬅ ካዎቲዴስ።
1KI 16:30 ኦሚሬ ና ኣካቤይ ባፔ ካሴ ዎዴ ዴኢዳ ካዎታ ኡባታይሳፌካ ኣꬊዳ ኢታ ሚሽ ጎዳ ሲንꬃን ኦꬂዴስ።
1KI 16:31 ናባጼ ና ኢዮርባኣሜይ ኦꬂዳ ናጋራ ላፋ ሚሽ ጊዲ ቆፎ ጻላ ጊዶንታ ሲዶናታ ካዎ ኤቲባኣሌ ናዮ ኤልዛቤሎ ባስ ማቾ ኤኪዲ ባኣሌ ጌቴቲዛ ኤቃ ጾሳስ ሃጋዚዴሲኔ ጎይኒዴስ።
1KI 16:32 ሳማሪያ ካታማን ኢዚ ኬጺሲዳ ኤቃ ጾሳ ባኣሌ ኬꬃን ያርሾ ያርሺዛሶ ኬጺዴስ።
1KI 16:33 ቃሴ ኣካቤይ ኣሼሮ ጌቴቲዛ ጾሳይ ሚስሌ ኤሲዲ ባፔ ካሴ ዴኢዳ ካዎታ ኡባታፔ ኣꬂዲ ጎዳ ኢስራኤሌ ጾሳ ሃንቄꬂሲዛ ናጋራ ኦꬂዴስ።
1KI 16:34 ኣካቤ ካዎቴꬃ ዎዴ ቤቴሌፔ ዪዳ ሂኤሌይ ኢያርኮ ካታማ ዛሪ ኤሲዴስ። ናዌ ና ኢያሶ ባጋራ ጎዳይ ዮቲዳ ማላ ሂኤሌይ ኢያርኮ ኬጻናስ ዮች ዬጊዛ ዎዴ ኣብራሜ ጌቴቲዛ ኢዛስ ባይራ ናዚ ሃይቂዴስ፤ ጊምቤ ፔንጌታ ጌልꬂዛ ዎዴ ሳጉቤ ጌቴቲዛ ኢዛስ ዉርሴꬃ ካሎ ናዚ ሃይቂዴስ።
1KI 17:1 ጋላኣዴን ቴሲቤ ጌቴቲዛሶፔ ዪዳ ናቤ ኤላሲ ካዎ ኣካቤስ፥ «ታኒ ኢዛስ ኦꬂዛ ጎዳ ኢስራኤሌ ጾሳይ ቤዪን ሃይሳፌ ያና ላይꬃታን ታኒ ዮቶንታ ዲሺን ሳኣን ኢራይ ቡኬና ዎይኮ ጻዛይካ ጻዛቴና» ጊዴስ።
1KI 17:2 ሄሳፌ ሲሚን ጎዳ ቃላይ ናቤ ኤላሳኮ ዪዲ ኢዛስ፥
1KI 17:3 «ሃይሳፌ ዴንዳዳ ኣርሼይ ሞኪዛ ባጋ ባ፤ ሄን ዮርዳኖሴ ሻፋፔ ኣርሼይ ሞኪዛ ባጋራ ዲዛ ኮራቴ ሻፋ ማታን ቆቴታ።
1KI 17:4 ኔኒ ሄ ሻፋፔ ሃꬅ ኡያና፤ ቁሮቲ ኔና ሄን ቁማ ሚዛና ማላ ታኒ ኢስታ ኣዛዛዲስ» ጊዴስ።
1KI 17:5 ኤላሲካ ጎዳይ ጊዳ ማላ ቢዴስ፤ ዮርዳኖሴ ሻፋፔ ኣርሼይ ሞኪዛ ባጋራ ዲዛ ኮራቴ ሻፋ ቢዲ ሄን ኡቲዴስ።
1KI 17:6 ማላዶኔ ኦማርስ ቁሮቲ ኡኬꬂኔ ኣሾ ኤላሳስ ኤሂዳ፤ ሃꬂካ ሄ ሻፋፔ ኡዪሼ ዴኢዴስ።
1KI 17:7 ቢታን ኢራይ ቡኮንታ ኣጊዳ ጊሻስ ጉꬃ ዎዴፔ ጉዬ ሻፋዚ ሜሊዴስ።
1KI 17:8 ሄሳፌ ጉዬ ጎዳ ቃላይ ኤላሳኮ ዪዲ፥
1KI 17:9 «ሃይሳፌ ዴንዳዳ ሲዶናን ዲዛ ሲራፍታ ባዳ ሄን ዴኣሻ። ኢሲ ኣምኤ ማጫሳያ ኔና ቁማ ሚዛና ማላ ታኒ ኣዛዛዲስ» ጊዴስ።
1KI 17:10 ሄሳፌ ጉዬ ኤላሲ ዴንዲዲ ሲራፍታ ቢዴስ፤ ኢዚ ቢዲ ካታማ ፔንጌ ጋኪዳ ማላ ኢሲ ኣምኤ ማጫሳያ ሚꬅ ማጺዛሮ ዴሚዴስ፤ ኤላሲ ኢዞ ጼይጊዲ፥ «ዛይ ታስ ኡያና ሃꬅ ኤካ ያርኪ!» ጊ ዎሲዴስ።
1KI 17:11 ማጫሲያ ሃꬃ ኤሃናስ ቢሺን ኢዚ ኢዞ ጼይጊዲ፥ «ዛይ ታስ ኣይኮ ባꬊዛ ሚሽ ኤካ ያርኪ!» ጊዴስ።
1KI 17:12 ሂስቲን ማጫሳያ ኢዛስ፥ «ጎዳ ኔ ጾሳይ ቤዪን ታስ ኦቶን ዲዛ ኩጳ ꬊሌይፌኔ ጻሮን ዲዛ ጉꬃ ዛይቴይፔ ኣቲን ሃራይ ኣይኮይካ ዴና። ታኒ ሃይሳ ዪዳይ ጉꬃ ሚꬅ ሚጻ ሶ ሲማዳ ሂኖካ ታኒኔ ታ ናዚ ኢሲቶ ኡኪ ሚዲ ሃይቃናሳ» ጋዱስ።
1KI 17:13 ኤላሲካ ማጫሳይስ ዛሪዲ፥ «ኣይኮይ ባዋ፥ ያዮፋ፤ ሶ ባዳ ኔ ጊዳ ማላ ኦꬃ፤ ጊዶ ኣቲን ካሴታዳ ኔ ꬊሌፌ ጉꬃ ኡኬꬅ ኡካዳ ታስ ኤካ ያ፤ ሄሳፌ ጉዬ ኔሲኔ ኔ ናዛስ ኡካ።
1KI 17:14 ጋሶይካ ጎዳ ኢስራኤሌ ጾሳይ፥ ‹ሳኣ ቦላን ጎዳይ ኢራ ቡኪሳና ጋካናስ ꬊሌዚ ኦቶፔ ዉሬና፤ ዛይቴዚካ ጻሮፔ ሙሌካ ዉሬና› ጌስ» ጊዴስ።
1KI 17:15 ማጫሲያካ ባዳ ኤላሲ ዮቲዳ ማላ ኦꬃዱስ፤ ሄሳ ማላን ኤላሲ፥ ኣምኤያኔ ኢዚ ሶ ኣሳይ ዳሮ ዎዴስ ጊዲዛ ካꬅ ዴሚዳ።
1KI 17:16 ኣይስ ጊኮ ጎዳይ ኤላሳ ባጋራ ዮቲዳ ቃላ ማላ ኦቶፔ ꬊሌይ ዉሪቤናኔ ጻሮፔ ዛይቴይ ሙሌካ ዉሪቤና።
1KI 17:17 ጉꬃ ዎዴፔ ጉዬ ሄ ኣምኤይ ናይ ሃርጊዴስ፤ ሃርጌዚ ሚኒ ሚኒ ቢን ናዚ ሃይቂዴስ።
1KI 17:18 ማጫሳያ ኤላሳ፥ «ሃይሶ ጾሳ ኣሶ! ታ ኔስ ኣይ ኢታ ኦꬃዲና? ኔኒ ታ ናጋራ ታና ሃሳኢሳዳ ታ ናዛ ዎꬋናስ ታኮ ያዲ?» ጋዱስ።
1KI 17:19 ኤላሲካ ኢዚስ ዛሪዲ፥ «ኣኔ ናዛ ታስ ሃማ» ጊዴስ። ናዛ ኢዚ ኪኦፔ ኤኪዲ ፑዴ ባ ዴኢዛ ፖቄ ኬሲዲ ባ ሂጻን ኢሺሲዴስ።
1KI 17:20 ሂስቲዲ ጎዳስ፥ «ኣቤት ጎዳዉ፥ ታ ጾሳዉ፥ ቃሴ ሃኖ ታኒ ኢዚኮን ዴኢዛ ኣምኤ ሚሺራይ ናዛ ዎꬋዳ ኢዚ ቦላካ ሜቶ ኤሃይ?» ጊዲ ዋሲዴስ።
1KI 17:21 ሄሳፌ ሲሚዲ ናዛ ቦላ ሄꬑቶ ዛቁሊዲ ጎዳስ፥ «ኣቤት ጎዳዉ፥ ታ ጾሳዉ! ሃ ናዛ ሼምፖ ዛራ» ጊዲ ዋሲዴስ።
1KI 17:22 ሂስቲን ጎዳይ ኤላሳ ዋሶ ሲዪዴስ። ናዛ ሼምፖይካ ሲሚን ናዚ ፓጺዴስ።
1KI 17:23 ኤላሲ ናዛ ኤኪዲ ፖቄዛፔ ዱጌ ዎꬊዴስ፤ ናዛ ኣዬይስ ኢሚዲ፥ «ቤኣ! ኔ ናዚ ፓጺዴስ» ጊዴስ።
1KI 17:24 ሄሳፌ ጉዬ ሚሺሬያ ኤላሳ፥ «ኔኒ ጾሳ ኣስ ጊዲዳይሳኔ ኔ ዶናፔ ኬዚዛ ጎዳ ቃላይ ቱሙ ጊዲዳይሳ ታኒ ሃኢ ኤራዲስ» ጋዱስ።
1KI 18:1 ኢራይ ꬋዮሶፌ ሄꬓንꬆ ላይꬃን፥ ዳሮ ዎዴፔ ጉዬን ጎዳይ ኤላሳ፥ «ባዳ ካዎ ኣካቤስ ቆንጫ። ታኒ ሃ ቢታ ቦላ ኢራ ቡኪሳና» ጊዴስ።
1KI 18:2 ሂስቲን ኤላሲ ኣካቤስ ቤታናስ ዴንዲ ቢዴስ። ሄ ዎዴ ሳማሪያን ዎልቃማ ኮሻይ ዴስ።
1KI 18:3 ኣካቤይ ባ ካዎቴꬃ ኬꬃን ኣላፌቴꬃን ኣዛዚዛ ኣብዲዩ ጼይጊዴስ። ኣብዲዩይ ጎዳስ ኬሂ ያዪዛ ኣሳ።
1KI 18:4 ኤልዛቤላ ጎዳ ናቤታ ዎꬊሲዛ ዎዴ ኣብዲዩይ ኢስታፌ ጼታታ ኤኪዲ ናምኡ ኬሲ ሻኪዴስ፤ ኢቻሽ ታማታ ኢሲ ጎንጎሎን ሃንኮ ኣቲዳ ኢቻሽ ታማታ ሃራ ጎንጎሎን ኤፊ ቆቲዲ ካꬂኔ ሃꬅ ኢስታስ ኢሚሼ ጋምኢዴስ።
1KI 18:5 ኣካቤይ ኣብዲዩ ጼይጊዲ፥ «ኦኒ ኤሪዜ ኑኒ ማታ ዴሚዲ ፓራታኔ ባቁሎታ ዎꬎንታ ማላ ኣሻናኮ ሳኣን ፑልቶይ ዲዛሶ ኡባኔ ሻፋይ ዲዛሶ ኡባ ባ» ጊዴስ።
1KI 18:6 ሄሳ ጊሻስ ባ ባናሶ ባናሶ ሻኬቲ ቢዳ፤ ኣካቤይ ኢሲ ባጋራ ባርካ ቢዴስ፤ ቃሴ ኣብዲዩይካ ሃራ ባጋራ ቢዴስ።
1KI 18:7 ኣብዲዩይ ቢሼ ኦጌ ቦላ ኤላሳራ ጋይቲዴስ። ኣብዲዩይ ኤላሳ ጊዲዳይሳ ኤሪዲ ቢታ ቦላ ጉፋኒዲ፥ «ታ ጎዳ ኤላሳ! ኣዳፌ ሃይሲ ኔኔ?» ጊዴስ።
1KI 18:8 ኤላሲ ኢዛስ፥ «ኤ ታናኮ! ኔኒ ባዳ፥ ‹ኤላሲ ሃይሳን ዴስ› ጋዳ ኔ ጎዳስ ዮታ» ጊዴስ።
1KI 18:9 ሂስቲን ኣብዲዩይ ኤላሳስ፥ «ታኒ ኔና ኣይ ቆሂኔ ኔኒ ታና ኔ ኣይሌዛ ሃይቃና ማላ ኣካቤ ኩሼን ኣꬃ ኢሚዛይ?
1KI 18:10 ኔ ጎዳይ ዴኦ ጾሳይ ቤዪን ታ ጎዳይ ኔና ኮይሳናስ ኪቶንታ ዴሬይ ዎይኮ ካዎቴꬂ ሙሌካ ባዋ። ኢስቲ፥ ‹ኤላሲ ሃይሳን ዴና› ጊዛ ዎዴ ኔኒ ሃይሳን ባይንዳይሲ ቱማ ጊዲዳይሳ ኤራናስ ኣካቤይ ዴሬ ሃሪዛይታ ጫቂሲዴስ።
1KI 18:11 ሃኢ ታኒ ታ ጎዳኮ ባዳ፥ ‹ኤላሲ ሃይሳን ዴስ› ጋና ማላ ኔ ኮያሳ።
1KI 18:12 ታኒ ኔፔ ሻኬታ ቢዛ ዎዴ ጎዳ ኣያናይ ኔና ዴንꬂዲ ኣዋ ኤፋናኮ ታ ኤሪኬ፤ ታኒ ኣካቤስ ዮቲዳፔ ጉዬ ኢዚ ኔና ዴሞንታ ኣጊኮ ታና ዎꬋና፤ ታኒ ኔ ኣሽካራይ ናቴꬃፌ ዶማዳ ጎዳስ ያዪዛ ኣሳ።
1KI 18:13 ኤልዛቤላ ጎዳ ሱንꬃን ቲንቢቴ ዮቲዛይታ ዎꬊሲዛ ዎዴ ታኒ ኢስታፌ ጼቱ ኣሳታ ኤካዳ ኢቻሽ ታሙ ኢቻሽ ታሙ ኢሲ ጎንጎሎን ቆታዳ ቁማ ሚዛዲሲኔ ሃꬂካ ኡሻዲስ። ሂስቲን ሄሳ ታኒ ኦꬂዳይሳ ኔኒ ታ ጎዳይ ሲያቤኪ?
1KI 18:14 ሃኢ ታኒ ታ ጎዳኮ ባዳ፥ ‹ኤላሲ ሃይሳን ዴስ› ጋና ማላ ኔ ኮያሳ። ሂስቲኮ ኢዚ ታና ዎꬋና» ጊዴስ።
1KI 18:15 ኤላሲካ ኢዛስ፥ «ታኒ ኢዛስ ኣዛዜቲዛ ኡባፌ ዎልቃማ ጎዳይ ቤዪን ቱማፔ ታኒ ሃች ኣካቤ ኣይፌን ቤታና» ጊዴስ።
1KI 18:16 ኣብዲዩይ ኣካቤራ ጋይታናስ ቢዲ ኣካቤስ ዮቲን ኣካቤይ ኤላሳራ ጋይታናስ ቢዴስ።
1KI 18:17 ኣካቤይ ኤላሳ ዴሚዲ፥ «ኢስራኤሌ ቢታ ቡልኣካ ካኢዛይ ኔኔ?» ጊዴስ።
1KI 18:18 ኤላሲ ኣካቤስ፥ «ጎዳ ኣዛዞ ኣጊዲ ባኣሌ ኤቃታስ ጎይኒዲ ቢታ ቡልኣኪዛይ ኔናኔ ኔ ኣዋ ሶ ኣሳ ኣቲን ኢስራኤሌ ቢታ ቡልኣኪዛይ ታና ጊዲኬ።
1KI 18:19 ሃኢ ኢስራኤሌ ኣሳ ኡባ ቃርሜሎሴ ዙማ ቦላ ታናራ ጋይታና ማላ ጼይጋ፤ ቃሴ ኤልዛቤሊ ማዳፌ ሚዛይታ 450 ባኣሌ ናቤታኔ 400 ኣሼሪ ናቤታ ሺሻ» ጊዴስ።
1KI 18:20 ሄሳ ጊሻስ ኣካቤይ ኪቲዲ ኢስራኤሌ ኣሳ ኡባኔ ናቤታ ቃርሜሎሴ ዙማ ቦላ ሺሺዴስ።
1KI 18:21 ኤላሲ ሺቂዳ ኣሳኮ ቢዲ፥ «ኢንቴ ኣይዴ ጋካናስ ናምኡ ቆፋን ዳኔ? ጎዳይ ጾሳ ጊዲኮ ኢዛ ካሊቴ! ዎይኮ ባኣሌይ ጾሳ ጊዲኮ ኢዛ ካሊቴ» ጊዴስ። ዴሬዚ ጊዲኮ ኢሲ ቃላካ ቃቲቤና።
1KI 18:22 ሄሳፌ ጉዬ ኤላሲ ዴራስ፥ «ጎዳ ናቤታፔ ታ ጻላ ኣታዲስ፤ ባኣሌስ ኦይዱ ጼታኔ ኢቻሽ ታሙ ናቤቲ ዴቴስ።
1KI 18:23 ኣኔ ኑስ ናምኡ ኮርማ ቦራታ ኢሚቴ፤ ሄ ኮርማታፔ ኢሳ ኢስቲ ዶሬቶ፤ ኮርማ ሹኪዲ ቃንጼሬꬄቶ፤ ሂስቲዲ ኣሾዛ ሚꬃ ቦላ ዎꬄቶ፤ ጊዶ ኣቲን ታማ ኤꬆፌቶ። ታኒካ ናምኣንꬆ ኮርማ ጊጊሳዳ ሚꬃ ቦላ ዎꬃና፤ ሂስታዳ ታማካ ኤꬂኬ።
1KI 18:24 ኢንቴ ኢንቴ ጾሳ ሱንꬅ ጼይጊቴ፤ ታኒካ ጎዳኮ ዎሳና፤ ሱንꬃ ጼይጊን ሲዪዲ ያርሾዛ ሚዛ ታማ ኪቲዛይሲ ጾስ ጊዶ» ጊዴስ። ሂስቲን ኣሳይ፥ «ሃይሲ ሎኦ ቆፋ» ጊዲ ኤኪዴስ።
1KI 18:25 ሄሳ ጊሻስ ኤላሲ ባኣሌ ናቤታስ፥ «ኢንቴ ጮራ ጊዲዳ ጊሻስ ኢሲ ኮርማ ዶሪ ኤኪዲ ኮይሮቲ ጊግሲቴ። ሂስቲዲ ኢንቴ ጾሳ ሱንꬃ ጼይጊቴ ኣቲን ኢዛን ታማ ኤꬆፍቴ» ጊዴስ።
1KI 18:26 ኢስቲ ባስ ኢሜቲዳ ኮርማ ኤኪዲ ጊግሲዳ። ማላዶፔ ሴታ ጋላስ ጋካናስ ባኣሌ ሱንꬃ ጼይጊዲ፥ «ሃኢ ባኣሌ! ኑ ዎሳ ሲያ» ጊዲ ዎሲዳ፤ ጊዶ ኣቲን ሲዬቲዛ ጬንጉርሲ ዴና፤ ዛሮ ኢሚዛይካ ዴና። ሂስቲን ባንቲ ጊግሲዳ ያርሺዛሶ ዱሪሼ ዩዪዳ።
1KI 18:27 ሳኣይ ሴታ ጋላስ ጊዲን ኤላሲ፥ «ኢንቴ ቃላ ꬎቁ ሂስቲዲ ዎሲቴ! ኢዚ ጾስ ጊዴኔ! ኢዚ ቆፋን ሼኪዳኮ ኦኔ ኤሪዛይ፥ ዎይኮ ኢዛስ ኦሶይ ዳሪዳኮ፥ ዎይኮ ማንዳሪዳኮ፥ ዎይኮ ꬊስኪዳ ጊዲኮ ዴንꬃናስ ኮሼስ!» ጊዲ ኢስታ ቦላ ቂልጪ ካኢዴስ።
1KI 18:28 ሄሳ ጊሻስ ባንታ ቃላ ꬎቁ ሂስቲዲ ዎሲዳ። ቃሴ ካሴ ባንታ ጎይኒዛ ዎጋ ማላ ባንታ ቦላራ ሱꬃይ ጎጋና ጋካናስ ቶራኒኔ ማሻን ባና ማዱንꬂዳ።
1KI 18:29 ሴታ ጋላሲ ኣꬊን ኦማርሳ ያርሾ ሺሺዛ ዎዴይ ጋካናስ ኢስቲ ሃፓኔ ቡራ ቲንቢቴ ሃሳይዳ ሺን ኣይኮ ዛሮካ ዴሚቤቴና፤ ኢስታ ጬንጉርሳ ሲዪዲ ዛሮ ኢሚዛይ ባዋ።
1KI 18:30 ሂስቲን ኤላሲ ኡባ ኣሳስ፥ «ሃ ታኮ ሺቂቴ» ጊን ኣሳይ ኢዛኮ ሺቂዴስ፤ ጎዳሲ ያርሾ ያርሺዛሶዚ ላሌቲዳይሳ ዛሪ ጊምቢዴስ።
1KI 18:31 ጎዳ ቃላይ ያቆቤኮ ዪዲ፥ «ኔ ሱንꬂ ኢስራኤሌ ጌቴታና» ጊዲ ዮቲዳ ያቆቤ ናይታ ቆሞታ ቆዳን ኤላሲ ታማኔ ናምኡ ሹቻታ ኤኪዴስ።
1KI 18:32 ሂስቲዲ ጎዳ ሱንꬃስ ሄ ሹቻታን ያርሾሶሆ ጊምቢዴስ፤ ያርሾ ያርሺዛሶዛ ዩዪ ኣꬋናስ ታማኔ ኦይዱ ሊቲሮ ሃꬅ ኦይኪዛ ኦላ ቦኪዴስ።
1KI 18:33 ሄሳፌ ጉዬ ያርሾ ያርሺዛሶዛ ቦላ ሚꬅ ጊግሲ ዎꬂዲ ኮርማ ኣሾዛ ቆሞን ቆሞን ቃንጼሬꬂዲ ሚꬃ ቦላ ዎꬂዴስ። ሂስቲዲ ኣሳ፥ «ኦይዱ ባꬃታን ሃꬅ ኩንꬂዲ ጹጋና ያርሾዛ ቦላኔ ሚꬃ ቦላ ጉሲቴ» ጊን ኢስቲ ጉሲዳ።
1KI 18:34 ዛሪዲካ ኤላሲ ኣሳታ፥ «ናምኣንꬆካ ጉጂቴ» ጊን ኢስቲ ናምኣንꬆካ ጉጂዳ። ቃሴካ ኤላሲ ኣሳታ፥ «ሄꬓንꬆዛካ ጉጂቴ» ጊን ሄꬓንꬆካ ጉጂዳ።
1KI 18:35 ሃꬃይ ያርሾ ያርሺዛሶ ኦላ ኩሚ ጎጊዴስ።
1KI 18:36 ኦማርሳ ዎዴ ያርሾ ሺሺዛ ዎዴይ ጋኪን ናቤ ኤላሲ ያርሾሶሆ ሺቂዲ፥ «ኣቤት ጎዳዉ! ኣብራሃሜ ጾሳዉ፥ ዪሳቃ ጾሳዉ፥ ኢስራኤሌ ጾሳዉ፥ ኔኒ ኢስራኤሌ ጾሳ ጊዲዳይሲ፥ ታኒካ ኔ ኣይሌ ጊዲዳይሲኔ ታኒ ሃይሳ ኡባ ኔ ቃላን ኦꬂዳይሲ ሃች ኤሬቶ።
1KI 18:37 ኣቤት ጎዳዉ! ኔኒ ጎዳይ ቱማ ጾሳ ጊዲዳይሳኔ ኔኒ ኢስታ ዎዚና ኔኮ ዛሮ ቦላ ዲዛይሳ ሃ ኣሳይ ኤራና ማላ ኔኒ ታ ዎሳ ሲያ፤ ሲያዳካ ታስ ዛሮ ኢማ!» ጊዴስ።
1KI 18:38 ሂስቲን ጎዳ ታማይ ዎꬊዲ ጹጊዛ ያርሾ፥ ሚꬃ፥ ሹቻኔ ቢታ ሚዴስ፤ ኦላ ጊዶን ዲዛ ሃꬃካ ላጪዴስ።
1KI 18:39 ኣሳይ ኡባይ ሄሳ ቤኢዳ ዎዴ ጉፋኒዲ፥ «ጎዳይ ጾሳ! ጎዳይ ኢዚ ጻላ ቱሙ ጾሳ!» ጊዳ።
1KI 18:40 ሄሳፌ ጉዬ ኤላሲ ኢስታስ፥ «ባኣሌ ናቤታ ኦይኪቴ። ኢስታፌ ኢሲ ኣሲካ ኬሲ ኤኪ ቦፖ» ጊዴስ፤ ሂስቲን ዴሬዚ ኢስታ ኦይኪዴስ፤ ኤላሲ ኢስታ ቂሶኔ ሻፋ ኤፊዲ ሹኪሲዴስ።
1KI 18:41 ኤላሲ ኣካቤስ፥ «ዎልቃማ ኢራ ጉንꬃይ ሲዬቲዛ ጊሻስ ኬዛ ባዳ ማ፥ ኡያ» ጊዴስ።
1KI 18:42 ሄሳ ጊሻስ ኣካቤይ ማናሲኔ ኡያናስ ቢዴስ። ጊዶ ኣቲን ኤላሲ ቃርሜሎሴ ዙማ ጼራ ኬዚዲ ባ ሁኤ ጉልባቴታ ጊዶ ዱጌ ጌልꬂዲ ጹጉኒዴስ።
1KI 18:43 ሄሳፌ ጉዬ ኤላሲ ባ ኣሽካራ፥ «ባ፤ ፑዴ ኬዛዳ ኣኔ ኣባኮ ዛራ ጼላ» ጊዴስ። ኣሽካራዚካ ቢ ጼሊዲ ኢዛስ፥ «ኣይኮይካ ዴና» ጊዴስ። ኤላሲ ባ ኣሽካራ፥ «ባዳ ጼላ» ጊዲ ላፑንቶ ኣዛዚዴስ።
1KI 18:44 ኣሽካራዚ ላፑንꬆዛን፥ «ቤኣ! ኣሳ ኩሼ ኬና ሻራይ ኣባፌ ኬዚሼ ዴስ» ጊዴስ። ሂስቲን ኤላሲ ባ ኣሽካራ፥ «ባ፤ ባዳ ኣካቤ፥ ‹ኢራይ ኔና ቤꬅ ዲጎንታ ማላ ኔ ፓራ-ጋሬን ኡታዳ ዱጌ ኔ ሶ ዎꬋ› ጋዳ ዮታ» ጊዴስ።
1KI 18:45 ጉꬅ ጋምኢሺን ኢራ ሻራይ ሳሎ ꬊፒ ሂስቲዴስ፤ ጫርኮይ ጫርኪዴስ፤ ዎልቃማ ኢራይካ ቡኪዴስ። ኣካቤይ ፓራ-ጋሬን ኡቲዲ ኢዝራኤሌ ካታማ ቢዴስ።
1KI 18:46 ጎዳ ዎልቃይ ኤላሳ ቦላ ዎꬊዴስ፤ ኤላሲ ባ ማይኦ ፑዴ ማርጺዲ ኢዝራኤሌ ካታማ ጋካናስ ኣካቤፔ ሲንꬃን ሲንꬃን ዎጺዴስ።
1KI 19:1 ኤላሲ ኦꬂዳ ኦሶ ኡባ፥ ባኣሌ ናቤታካ ጊꬃ ማሻን ኢዚ ዎስቲ ዎꬊሲዳኮ ኣካቤይ ኤልዛቤሊስ ዮቲዴስ።
1KI 19:2 ሂስቲን ኤልዛቤላ፥ «ኔኒ ሄ ናቤታ ቦላ ኦꬆይሳꬆ ታኒካ ኔ ሼምፖ ዎንቶ ሃኒ ዎዴ ኢዚꬆ ኦꬆንታ ኣጊኮ ጾሳቲ ሄሳፌካ ኣꬊዛ ኢታ ታ ቦላ ጋꬄቶ» ጋዳ ቃስታኔ ኤላሳስ ዬዳዱስ።
1KI 19:3 ሂስቲን ኤላሲ ባቢዲ ባ ሼምፖ ኣሻናስ ዩሁዳ ቢታን ዲዛ ቤርሳቤሄ ጋካናስ ቤቲዴስ፤ ባ ኣሽካራካ ሄን ኣጊዴስ።
1KI 19:4 ኢሲ ጋላሳ ኦጌ ባዞን ሄሜቲዴስ። ቢሼ ሳንካራ ሚꬃ ኩዋ ጋርሳን ኡቲዲ፥ «ኣቤት ጎዳዉ! ታስ ጊዳና፤ ታኒ ታ ኣዋታፔ ኣꬊኬ። ታ ሼምፖዮ ኔ ኤካ» ጊዲ ሃይቆ ኣሞቲ ዎሲዴስ።
1KI 19:5 ሄሳፌ ጉዬ ሳንካራ ኩዋን ኢቺዲ ꬊስኪዴስ፤ ኢዚ ሄን ꬊስኮን ዲሺን ኢሲ ኪታንቻይ ኢዛ ቦቺዲ፥ «ዴንዳዳ ሃይሳ ማ» ጊዴስ።
1KI 19:6 ሂስቲን ዴንዲዲ ኢዚ ጼሊዛ ዎዴ ሴላን ኡኬቲዳ ኮምፓኔ ኦቶራ ዲዛ ሃꬅ ባ ሁኤሶፔ ዴሚዴስ፤ ኢዛፔ ሚ ኡዪዳፔ ጉዬን ሲሚ ꬊስኪዴስ።
1KI 19:7 ጎዳ ኪታንቻይ ናምኣንꬆካ ዪ ኤላሳ ቤጎꬂዲ፥ «ኔኒ ባናሶይ ሃሆ ጊዲዳ ጊሻስ ዴንዳዳ ማ» ጊዴስ።
1KI 19:8 ሂስቲን ኤላሲ ዴንዲዲ ሚዴሲኔ ኡዪዴስ። ኤላሲ ካꬃ ሚ ሚኒዲ ጾሳ ዙማ ኮሬቤ ጋካናስ ኦይዱ ታሙ ጋላሲኔ ኦይዱ ታሙ ኦማርስ ሄሜቲዴስ።
1KI 19:9 ሄን ዲዛ ጎንጎሎ ጊዶ ጌሊዲ ኣቂዴስ። ጎዳ ቃላይ ኢዛኮ ዪዲ፥ «ኤላሳ! ሃይሳን ኣይ ኦꬃይ?» ጊዴስ።
1KI 19:10 ሂስቲን ኤላሲ፥ «ኡባፌ ዎልቃማ ጎዳ ጾሳስ ታኒ ኬሃ ዚልኤታዲስ፤ ጋሶይካ ኢስራኤሌ ኣሳይ ኔናራ ጫቄቲዳ ጫቆዛ ሜንꬂዴስ፤ ኔስ ያርሾ ያርሺዛሶሆታካ ላሊዴስ፤ ኔ ናቤታካ ጊꬃ ማሻን ዎꬊዴስ፤ ታኒ ታርካ ኣታዲስ ሺን ሃኢ ታናካ ዎꬋና ኮዬቴስ» ጊዴስ።
1KI 19:11 ጎዳይ ኢዛስ፥ «ሄሳፌ ኬዛ ባዳ ዙማ ጼራን ታ ሲንꬃን ኤቃ፤ ጎዳይ ሄራ ኣꬋና» ጊዴስ። ሄሳፌ ጉዬ ዎልቃማ ጫርኮይ ዙማታ ጳልቄሬꬂዴስ፤ ዛላታካ ኪንቼሬꬂ ዬጊዴስ፤ ጎዳይ ጊዲኮ ሄ ጫርኮዛ ጊዶን ዴና። ሄ ጫርኮዛፔ ሲሚን ቢታይ ቃጺዴስ፤ ጎዳይ ሄ ቢታ ቃꬃንካ ዴና።
1KI 19:12 ቢታ ቃꬃፌ ሲሚን ታማይ ኬዚዴስ፤ ጊዶ ኣቲን ጎዳይ ታማ ጊዶን ዴና። ታማፔ ሲሚን ሳሱኬꬃ ጬንጉርሲ ሲዬቲዴስ።
1KI 19:13 ኤላሲ ሄሳ ሲዪዲ ባ ማይኢዳ ሃሼ ማይኦን ባ ኣይፌሶ ካሚዴስ። ሂስቲዲ ካሬ ኬዚ ጎንጎሎዛ ፔንጌን ኤቂዴስ። ሄሳፌ ጉዬ፥ «ኤላሳ! ሃይሳን ኣይ ኦꬃይ?» ጊዛ ጬንጉርስ ሲዪዴስ።
1KI 19:14 ኤላሲ ዛሪዲ፥ «ኡባፌ ዎልቃማ ጎዳ ጾሳስ ታኒ ኬሃ ዚልኤታዲስ፤ ጋሶይካ ኢስራኤሌ ኣሳይ ኔናራ ጫቄቲዳ ጫቆዛ ሜንꬂዴስ፤ ኔስ ያርሾ ያርሺዛሶሆታካ ላሊዴስ፤ ኔ ናቤታካ ጊꬃ ማሻን ዎꬊዴስ፤ ታኒ ታርካ ኣታዲስ ሺን ሃኢ ታናካ ዎꬋና ኮዬቴስ» ጊዴስ።
1KI 19:15 ሂስቲን ጎዳይ ኤላሳስ ዛሪዲ፥ «ኔ ካሴ ዪዳ ኦጌዛራ ሲማዳ ዳማስቆ ባዞ ባ። ሄ ባ ጋካዳ ኣዛሄሌይ ኣራሜ ቦላ ካዎታና ማላ ኢዛ ቲያ።
1KI 19:16 ቃሴካ ኒሚሼ ና ኢዩ ኢስራኤሌ ቦላ ካዎታና ማላ ቲያ። ሄሳꬆካ ኔ ሶሆን ናቤ ጊዳና ማላ ኣቤሊ-ማሆሌ ዴሬ ኣስ ሳፋጼ ና ኤልሳኤ ቲያ።
1KI 19:17 ኣዛሄሌ ማሻፌ ኬሲ ኤኪ ኣቲዳይሳ ኢዩይ ዎꬋና፤ ቃሴ ኢዩ ማሻፌ ኬሲ ኤኪ ኣቲዳይሳ ኤልሳኢ ዎꬋና።
1KI 19:18 ባኣሌስ ጉልባቶንታይታኔ ባ ዶናን ባኣሌ ጌቴቲዛ ኤቃ ሚስሌዛ ዬሮንታ ኣቲዳ 7,000 ኣስ ታኒ ኢስራኤሌን ታስ ኣሻና» ጊዴስ።
1KI 19:19 ኤላሲ ሄፔ ዴንዲ ቢሺን ሳፋጼ ና ኤልሳኢ ታማኔ ናምኡ ዋጻ ቦራን ጎዪሺን ዴሚዴስ፤ ታማኔ ናምኣንꬃ ዋጻ ቦራታን ኤልሳኢ ጎዬስ። ኤላሲ ኢዛኮ ሺቂዲ ባ ሃሼ ማይኦ ኢዛ ቦላ ዬጊዴስ።
1KI 19:20 ኤልሳኢ ቦራታ ኣጊዲ ኤላሳኮ ዎጺ ቢዲ፥ «ታኒ ታ ኣዋኔ ታ ኣዮ ሳሮ ጋዳ ሞይሴታ ሲማዳ ታ ኔና ካላና ማላ ታና ዬዳርኪ!» ጊዴስ። ሂስቲን ኤላሲ ኤልሳኤ፥ «ባዳ ያ! ታ ኔና ኣይዴ ዲጋዲና?» ጊዴስ።
1KI 19:21 ሄሳ ጊሻስ ኤልሳኢ ኣጊ ጉዬ ሲሚዲ ናምኡ ቦራታ ሹኪዴስ፤ ቦራ ሚሻታ ቄሪዲ ኢዛን ኣሾዛ ዶይሲዴስ፤ ሄ ካጺዳ ኣሾዛ ዴራስ ኣꬂን ኣሳይ ሚዴስ። ሄሳፌ ጉዬ ዴንዲ ቢዲ ኤላሳ ካሊዴሲኔ ኤላሳ ማዲዴስ።
1KI 20:1 ኣራሜ ካዎ ቤኒ-ሃዳዴይ ባ ኦላንቻታ ኡባ ኢሲፌ ሺሺዴስ። ሄꬑ ታማኔ ናምኡ ካዎታን፥ ኢስታ ፓራታኒኔ ፓራ-ጋሬታን ማዴቲዲ ፑዴ ቢዲ ሳማሪያ ካታማ ዎራጂ ዶዲዴስ።
1KI 20:2 ጌዴ ካታማ ጊዶ ኢስራኤሌ ካዎ ኣካቤኮ ቃስታኔታ ኪቲን ኢስቲ ቢዲ፥
1KI 20:3 «ቤኒ-ሃዳዴይ፥ ‹ኔ ቢራይኔ ኔ ዎርቃይ ታሳ፤ ኔ ማቼታፔኔ ኔ ናይታፔ ሎኢዛይቲ ታሳ› ጌስ» ጊዳ።
1KI 20:4 ሂስቲን ኢስራኤሌ ካዎይካ ዛሪዲ፥ «ኤ፥ ታ ጎዳ ካዎ! ኔኒ ጊዳ ማላ ታኒካ ታስ ዲዛ ኡባይ ኔሳ» ጊዴስ።
1KI 20:5 ቃሴካ ቃስታኔቲ ናምኣንꬆ ዪዲ፥ «ኔና ቤኒ-ሃዳዴይ፥ ‹ታኒ ካሴ ኔናኔ ኔ ቢራ፥ ኔ ዎርቃ፥ ኔ ማቼታኔ ኔ ናይታ ታስ ሼꬋና ማላ ኪታዲስ።
1KI 20:6 ሄሳꬆካ ዎንቶ ሃኒ ዎዴ ኔ ካዎቴꬃ ኬꬃኔ ኔ ሹሜታ ኬꬅ ቆጪሪ ጼላና ማላ ታ ሹሜታ ዬዳና። ኢስቲካ ኔስ ዴስ ጊዛ ፓያ ሚሽ ባ ኩሼ ዬዲ ኤካና› ጊዴስ» ጊዳ።
1KI 20:7 ኢስራኤሌ ካዎይ ሄ ቢታ ጪማታ ኡባ ጼይጊ ሺሺዲ፥ «ቤኢቴ ሃይሲ ኣዴዚ ኦሽ ኮዪዲ ታ ማቼታ፥ ታ ናይታ፥ ታ ቢራኔ ታ ዎርቃ ኤካናስ ኦይቺን ታ ኢዛ ዲጋቤኬ» ጊዴስ።
1KI 20:8 ሂስቲን ጪማቲኔ ዴሬዚ ኡባይ ኣካቤ፥ «ኢዚ ጊዛ ሚሽ ሲያዳ ኤኖ ጎፓ!» ጊዳ።
1KI 20:9 ሄሳ ጊሻስ ቤኒ-ሃዳዴይ ኪቲዳ ቃስታኔታስ ኣካቤይ፥ «ኢንቴ ታ ጎዳ ካዎዛስ፥ ‹ኔኒ ኮይሮ ኪቲዳ ኪታ ታኒ ፖላና፤ ጊዶ ኣቲን ሃኢ ኪታ ታኒ ፖላናስ ዳንዳይኬ› ጌስ ጊዲ ዮቲቴ» ጊዴስ። ሂስቲን ኪቴቲ ዪዳ ቃስታኔቲ ሲሚ ቢዲ ቤኒ-ሃዳዴስ ዮቲዳ።
1KI 20:10 ሄሳፌ ጉዬ ቤኒ-ሃዳዴይ ሃራ ቃስታኔታ ዬዲዲ፥ «ታና ካሊዛ ኣሳ ሳማሪያ ካታማ ጉዱላይ ኢሲ ኢሲ ኩች ጋኪኮ ጾሳቲ ታና ዎꬌቶ» ጊዴስ።
1KI 20:11 ኢስራኤሌ ካዎይ ኪቴቲ ዪዳይታስ፥ « ‹ቱሙ ኦላንቻይ ኦላፔ ሲሚዲ ጋይሬስ ኣቲን ቡሮ ኦላስ ቢሼ ጋይሬና› ጊዲ ዮቲቴ» ጊዴስ።
1KI 20:12 ቤኒ-ሃዳዴይኔ ካዎቲ ባንታ ዱንካኔታ ጊዶን ኡሹ ኡዪሼ ሄሳ ሄ ኪታ ሲዪዳ፤ ካዎ ቤኒ-ሃዳዴይ ባ ኦላንቻታ፥ «ኦላስ ጊጌቲቴ» ጊ ኣዛዚን ኦላንቻቲ ካታማ ኦላናስ ጊጌቲዳ።
1KI 20:13 ሄ ዎዴ ኢሲ ናቤይ ኢስራኤሌ ካዎ ኣካቤኮ ቢዲ፥ «ጎዳይ ኔና፥ ‹ሃይሳ ዳሮ ኦላ ኣሳ ቤኣይ? ታኒ ሃች ኢስታ ኔ ኩሼን ኣꬃ ኢሚኮ ታኒ ጎዳ ጊዲዳይሳ ኔ ሄሳን ኤራና› ጌስ» ጊዴስ።
1KI 20:14 ኣካቤይ፥ «ኦላስ ሲንꬃቲ ኬዛናይ ኦኔ?» ጊዴስ። ናቤዚካ፥ «ኣዉራጃን ኣዉራጃን ዲዛ ኦላ ጋዳዋቲ ኬዜቶ» ጊዴስ። ሂስቲን ካዎይ፥ «ኦላ ኦኒ ዶሞ ጋይ?» ጊዴስ። ናቤዚካ፥ «ኔኒ ዶማ» ጊዴስ።
1KI 20:15 ሄሳ ጊሻስ ኣካቤይ ኣዉራጃን ኣዛዚዛ 232 ኦላ ጋዳዋታ ሺሺዴስ። ቃሴ ኣቲዳ 7,000 ኢስራኤሌ ኦላንቻታ ሺሺዴስ።
1KI 20:16 ቤኒ-ሃዳዴይ ባና ማዲዛ 32 ካዎታራ ኢሲፌ ዱንካኔን ኡቲ ኡዪሼ ማꬆቲ ዲሺን ሴታ ጋላስ ኢስራኤሌ ኦላንቻቲ ኦላስ ኬዚዳ።
1KI 20:17 ኣዉራጃን ኣዛዚዛ ዬላጋ ሞኮኔቲ ኦላስ ኮይሮ ኬዚ ቢዳ። ቤኒ-ሃዳዴይ ዩዪ ዎቺዛይታ ኪቲን ኢስቲ ሲሚዲ ኢዛስ፥ «ሳማሪያፔ ኣሳይ ኬዚዲ ዪሼ ዴስ» ጊ ዮቲዳ።
1KI 20:18 ቤኒ-ሃዳዴይካ፥ «ኢስቲ ሳሮስ ጊዲን ዎይኮ ኦላስ ዪኮካ ኢስታ ሼምፖራ ፓጻ ኦይኪዲ ሃ ኤሂቴ» ጊዴስ።
1KI 20:19 ኣዉራጃን ኣዛዚዛ ዬላጋ ሞኮኔቲ ካታማፔ ጋጻ ኬዚዳ፤ ኢስራኤሌ ኦላንቻቲካ ኢስታ ካሊዲ ኬዚዳ።
1KI 20:20 ኡባቲካ ባናራ ቲራን ጋይቲዳ ሞርኬታ ኡባ ዎꬊዳ። ሂስቲን ኣራሜ ኣሳይ ባቃቲን ኢስራኤሌ ኣሳይ ካሊ ካሊዲ ኢስታ ዬዴꬂዴስ። ቃሴ ኣራሜ ካዎ ቤኒ-ሃዳዴይ ቶጋ ኣሳታራ ባ ፓራን ኬሲ ኤኪዲ ቢዴስ።
1KI 20:21 ኢስራኤሌ ካዎ ኣካቤይ ኦላ ሲንꬅ ሲንꬅ ሱጊ ቢዲ ፓራታኔ ፓራ-ጋሬታ ዲኢ ኤኪዴስ፤ ኣራሜ ኣሳካ ዲፒ ሂስቲዴስ።
1KI 20:22 ሄሳፌ ጉዬ ናቤዚ ኢስራኤሌ ካዎኮ ዪዲ፥ «ዪዛ ላይꬃ ኦፊንꬃን ኣራሜ ካዎይ ኔና ኦላናስ ሲሚ ያና ጊሻስ ሚና! ኔ ኣይ ኦꬃና ቤሲዛኮ ሻካ ኤራ» ጊዴስ።
1KI 20:23 ሄ ዎዴ ኣራሜ ካዎ ዞሪዛ ሹሜቲ፥ «ኢስታ ጾሳቲ ዙማ ጾሳታ፤ ኢስቲ ኑስ ዎልቃሚዳይካ ሄሳሳ። ኑኒ ኢስታራ ዴምባን ኦላ ጋይቲዛኮ ሲꬌይ ባይንዳ ኢስታ ጾናና።
1KI 20:24 ሃኢ ጊዲኮ ኢሲ ሚሽ ኦꬃ፤ ካዎታ ኡባ ኢስታ ካዎቴꬃፌ ዴንꬃዳ ኢስታሶሆን ሃራ ዎꬃ።
1KI 20:25 ኑኒ ኢስራኤሌታራ ዴምባን ኦሌታናሲኔ ጾናናስ ዳንዳያና ማላ ኔስ ካሴ ዉሪዳ ኦላንቻታ ሶሆን ኦላንቻታ፥ ፓራታ ሶሆን ፓራታ፥ ፓራ-ጋሬታ ሶሆን ፓራ-ጋሬታ ዛራ ጊጊሳ» ጊዳ። ሂስቲን ኢዚካ ኢስታ ዞሬዛ ኤኪዲ ሄሳꬆ ኦꬂዴስ።
1KI 20:26 ዪዛ ላይꬃ ኦፊንꬂ ጋኪን ቤኒ-ሃዳዴይ ኣራሜ ኦላንቻታ ሺሺዲ ኢስራኤሌታራ ኦሌታናስ ኣፌቄ ጌቴቲዛ ካታማ ቢዴስ።
1KI 20:27 ኢስራኤሌ ኦላንቻቲካ ሺንቄኔ ኦላ ሚሽ ኤኪዲ ኢስታራ ኦሌታናስ ናምኡ ቡቴ ጊዲዲ ኬዚዳ። ኣራሜ ኦላንቻቲ ቢታ ጋዳ ማይኢ ኡቲን ኢስራኤሌ ኦላንቻቲ ጊዲኮ ናምኡ ጉꬃ ዴይሻ ዉዴታ ማላ ኢስታፌ ሲንꬃ ባጋራ ዱንካኒ ኡቲዳ።
1KI 20:28 ጾሳ ናቤ ኢሶይ ኢስራኤሌ ካዎዛኮ ቢዲ፥ «ጎዳይ፥ ‹ኣራሜ ኣሳቲ ጎዳይ ዙማታ ጾሳፌ ኣቲን ዴምባታ ጾስ ጊዴና፤ ጊዳ ጊሻስ ሃ ኬንቺዳ ኦላንቻታ ኡባ ታኒ ኔ ኩሼን ኣꬃ ኢማና። ሄ ዎዴ ታኒ ጎዳ ጊዲዳይሳ ኔኒኔ ኔ ኣሳይ ኤራና› ጌስ» ጊዴስ።
1KI 20:29 ኣራሜቲኔ ኢስራኤሌ ኣሳይ ኢሶይ ኢሳኮ ሲሚ ዛማዲ ኡቲዲ ላፑን ጋላስ ጋካናስ ጋምኢዴስ። ላፑንꬃ ጋላሳን ኦላ ኦይኬቲዲ ሄ ጋላስ ኢስራኤሌ ኣሳይ ኣራሜ ኣሳፔ 100,000 ኦላንቻታ ዎꬊዴስ።
1KI 20:30 ኢስታፌ ኣቲዳይቲ ኣፌቄ ካታማ ባቃቲዳ፤ ሄን ካታማ ጊምቤይ 27,000 ኣሳ ቦላ ኩንዲዲ ዎꬊዴስ። ቤኒ-ሃዳዴይካ ሄ ካታማ ባቃቲ ቢዲ ኢሲ ኢልፒኔ ኬꬃ ጊዶን ቆቴቲዴስ።
1KI 20:31 ኢዛ ሹሜቲ ኢዛ፥ «ኢስራኤሌ ካዎቲ ማሪዛይታ ጊዲዳይሳ ኑኒ ሲዪዶስ፤ ሃኢ ማቃ ማይኢዲ፥ ዎዶሮ ኑ ሁኤን ጻጺዲ ኣኔ ኢስራኤሌ ካዎኮ ቦስ። ኢዚ ኔ ሼምፖ ኣሻናኮ ኦኔ ኤሪዛይ» ጊዳ።
1KI 20:32 ሂስቲን ኢስቲ ማቃ ማይኢዲ፥ ዎዶሮ ባንታ ሁኤን ጻጺዲ፥ ኢስራኤሌ ካዎኮ ቢዲ ኢዛ፥ «ኔ ኣሽካራ ቤኒ-ሃዳዴይ ኔና፥ ‹ሃኢ ታና ዎꬎፓርኪ› ጌስ» ጊዳ። ሂስቲን ካዎዚ፥ «ኢዚ ሃኖ ጋካናስ ፓጻ ዲዜ? ኢዚ ታስ ኢሻ» ጊዴስ።
1KI 20:33 ኣሳይ ኢዚ ጊዳ ቃላ ኤሌሲ ሎኦ ቆፋን ኤኪዲ፥ «ኤ፥ ቤኒ-ሃዳዴይ ኔ ኢሻ» ጊዳ። ካዎዚ ኢስታስ፥ «ኣኔ ቢዲ ኢዛ ታኮ ኤኪ ዪቴ» ጊዴስ። ቤኒ-ሃዳዴይ ኬዚ ዪን ኣካቤይ ኢዛ ፑዴ ባ ፓራ-ጋሬ ቦላ ኬዚ ኡታና ማላ ኦꬂዴስ።
1KI 20:34 ቤኒ-ሃዳዴይ ኣካቤ፥ «ታ ኣዋይ ኔ ኣዋፔ ኤኪዳ ካታማታ ታኒ ኔስ ዛራና። ታ ኣዋይ ባስ ሳማሪያን ጊያ ኤሲዳ ማላ ኔኒካ ዳማስቆ ካታማን ኔስ ጊያ ኤሳና ዳንዳያሳ» ጊዴስ። ኣካቤይካ ኢዛስ፥ «ሃይሳን ኔ ጫቆ ቃላ ዎꬂዛ ጊዲኮ ታኒ ኔና ዬዳና» ጊዴስ። ሄሳ ጊሻስ ኢዛራ ጫቆ ቃላ ጌሊን ዬዲዴስ።
1KI 20:35 ናቤታ ናይታፔ ኢሶይ ጎዳ ቃላስ ኣዛዜቲዲ ባ ላጌዛ፥ «ታና ሾጫ» ጊዴስ፤ ጊዶ ኣቲን ላጌዚ ሾጮንታ ኢጺዴስ።
1KI 20:36 ሄሳ ጊሻስ ናቤዚ ኢዛ፥ «ኔኒ ጎዳስ ኣዛዜቶንታ ኢጺዳ ጊሻስ ኔኒ ታፔ ሻኬታ ቢዳ ማላ ጋሞይ ኔና ዎꬋና» ጊዴስ። ኣዴዚ ናቤዛፔ ሻኬቲ ቢዳ ማላ ጋሞይ ኢዛራ ጋይቲዲ ዎꬊዴስ።
1KI 20:37 ናቤዚ ሃራ ኣስ ዴሚዲ፥ «ዲጫ ኣኔ ታና ሾጫ» ጊዴስ። ሂስቲን ኣዴዚ ኢዛ ሾጪ ማዱንꬂዴስ።
1KI 20:38 ሄሳፌ ጉዬ ናቤዚ ኦጌ ቦላ ቢ ኤቂዲ ካዎዛ ናጎ ዶሚዴስ፤ ኤሬቶንታ ማላ ባ ሁኤ ቁራጬ ቢርሺዲ ባ ሲንꬅ ካሚዴስ።
1KI 20:39 ካዎይ ኦጋራ ካንꬂ ቢሺን ናቤዚ ካዎዛ፥ «ታኒ ኔ ኣሽካራይ ዎልቃማ ኦላ ኦሌቴꬃን ዲሺን ኢሲ ኣሲ ታኮ ዪዲ፥ ‹ሃ ዲኤቲዳ ኣዴዛ ናጋ። ኢዚ ኬሲ ኤኪ ቢዛ ጊዲኮ ኔ ኢዛስ ጊጊዳ ዎጺማዴን ጌላሳ ዎይኮ 3,000 ሳቂሌ ቢራ ቃንጻሳ› ጊዴስ።
1KI 20:40 ታስ ኔ ኣሽካራዛስ ኦሶይ ዳሪን ታኒ ያኔ ሃ ጊሺን ኣዴዚ ኬሲ ኤኪ ቢቺዴስ» ጊዴስ። ሂስቲን ኢስራኤሌ ካዎይ፥ «ኔኒ ኔርካ ፒርዳዳሳ፤ ሄ ፒርዳይካ ኔ ቦላ ፖሌታና» ጊዴስ።
1KI 20:41 ናቤዚ ባ ሲንꬅ ካሚዳ ቁራጬዛ ቃሪ ዬጊዴስ፤ ኢስራኤሌ ካዎዚ ሄ ኣዴዚ ናቤታፔ ኢሳ ጊዲዳይሳ ሄራካ ኤሪዴስ።
1KI 20:42 ናቤዚ ካዎዛስ፥ «ጎዳይ፥ ‹ታኒ ኢዚ ሃይቃና ቤሴስ ጊዳ ኣዴዛ ኔኒ ዬዲዳ ጊሻስ ኢዛ ዎጺማዴን ኔ ጌላና፤ ኢዛ ዴሬይ ጌላና ዎጺማዴዛን ኔ ዴሬይ ጌላና› ጌስ» ጊዴስ።
1KI 20:43 ሂስቲን ኢስራኤሌ ካዎይ ዪሎቲሼኔ ሃንቄቲሼ ሳማሪያ ካታማን ዲዛ ባ ካዎቴꬃ ኬꬅ ሲሚዴስ።
1KI 21:1 ኢዝራኤሌ ዴሬ ኣስ ናቡቴስ ሳማሪያ ካዎ ኣካቤ ኬꬃ ማታን ዎይኔ ቶኪዛሶሆይ ዴስ።
1KI 21:2 ኣካቤይ ናቡቴስ፥ «ታ ኬꬃ ማታን ዲዛ ጊሻስ ታኒ ታስ ኣታኪልቴሶሆ ሂስታና ኮይዛ ጊሻስ ኔኒ ዎይኔ ቶኪዛሶሆዛ ታስ ኢማ። ኢዛ ጊሻስ ኔስ ታኒ ሃራ ሎኦ ዎይኔ ጋዴ ኢማና፤ ዎይኮ ኔኒ ዶሲኮ ኢዛ ዋጋ ታኒ ኔስ ቃንጻና» ጊዴስ።
1KI 21:3 ሂስቲን ናቡቴይ ኣካቤስ፥ «ታኒ ታ ኣዋታፔ ላቲዳ ጺንጾ ኔስ ኢሚሲዛዛፔ ጎዳይ ታና ኣሾ» ጊዴስ።
1KI 21:4 ኢዝራኤሌ ኣስ ናቡቴይ፥ «ታኒ ታ ኣዋታፔ ላቲዳ ጺንጾ ኔስ ኢሚኬ» ጊዳ ጊሻስ ኣካቤይ ዪሎቲሼኔ ላንጪሼ ባ ሶ ቢዴስ። ሂስቲዲ ባ ሂጻን ጎዳኮ ሲሚ ኢቺዲ ካꬅ ሞንታ ኢጺዴስ።
1KI 21:5 ኢዛ ማቻ ኤልዛቤላ ኢዛኮ ጌላዳ፥ «ኔኒ ሃይሳ ኬሃ ኣዛስ ዪሎታዲ? ኣይስ ካꬅ ሞንታ ኢጻዲ?» ጋ ኦይቻዱስ።
1KI 21:6 ኣካቤይ ኢዚስ፥ «ኢዝራኤሌ ኣስ ናቡቴ ታኒ፥ ‹ኔኒ ዎይኔ ቶኪዛሶሆዛ ታስ ባይዛ፤ ዎይኮ ኔ ዶሲኮ ኢዛ ጊሻስ ታኒ ኔስ ሃራ ዎይኔ ቶኪዛሶሆ ኢማና› ጊን ኢዚ፥ ‹ታኒ ታ ዎይኔ ቶኪዛሶሆዛ ኔስ ኢሚኬ› ጊዴስ። ሂስቲን ታኒ ሄሳ ጊሻስ ዪሎታዲስ» ጊዴስ።
1KI 21:7 ኢዛ ማቻ ኤልዛቤላ ኢዛስ፥ «ኔኒ ኢስራኤሌ ቦላ ካዎ ጊዳ ኡታዳ ሃይሳꬆ ሃናይ? ዴንዳዳ ካꬅ ማ! ዎዚናፔካ ኡፋዬታ! ኢዝራኤሌ ኣስ ናቡቴይ ዎይኔ ቶኪዛሶሆዛ ታኒ ኔስ ኢማና» ጋዱስ።
1KI 21:8 ሄሳ ጊሻስ ኤልዛቤላ ኣካቤ ሱንꬃን ዳብዳቤ ጻፋዳ ኢዛ ማታሜን ሾጫዳ ናቡቴይ ዲዛ ካታማን ዲዛ ጪማታሲኔ ሹሜታስ ዬዳዱስ።
1KI 21:9 ሄ ዳብዳቤዛ ጊዶን፥ «ኢሲ ጋላሳ ጾማ ኣዋጂቴ፤ ሂስቲዲ ናቡቴ ኣሳ ጊዶን ቦንቾ ሶሆን ኡቲሲቴ።
1KI 21:10 ሄሳፌ ጉዬ ዎርዶ ማርካ ናምኣታ ኢዛ ሲንꬃን ኡቲሲቴ፤ ኢስታስ፥ ‹ናቡቴይ ካዎኔ ጾስ ጫዪዴስ› ጊዲ ኢዛ ቦላ ማርካቴቶ። ሂስቲኮ ኢንቴ ኢዛ ካታማፔ ካሬ ኬሲዲ ሹቻን ጫዲ ዎꬊቴ» ጋዳ ጻፋዱስ።
1KI 21:11 ሄሳ ጊሻስ ናቡቴይ ዲዛ ካታማን ዲዛ ጪማቲኔ ሹሜቲ ኤልዛቤላ ኢስታስ ጻፊዳ ዳብዳቤዛ ማላ ፖሊዳ።
1KI 21:12 ኢስቲካ ኢሲ ጋላሳ ጾማ ኣዋጂዲ ናቡቴ ኣሳ ጊዶን ቦንቾ ሶሆን ኡቲሲዳ።
1KI 21:13 ሄሳፌ ጉዬ ዎርዶ ማርካ ናምኣቲ ዪዲ ኢዛ ሲንꬃን ኡቲዳ፤ ሂስቲዲ ዴራ ሲንꬃን፥ «ናቡቴይ ካዎኔ ጾስ ጫዪዴስ» ጊ ዎርዶ ማርካ ማርካቲን ናቡቴ ካታማፔ ካሬ ኬሲዲ ሹቻን ጫዲ ዎꬊዳ።
1KI 21:14 ሄሳፌ ጉዬ ጪማቲ ኤልዛቤሊኮ ኪቲዲ፥ «ናቡቴይ ሹቻን ጫዴቲ ሃይቂዴስ» ጊዳ።
1KI 21:15 ናቡቴይ ሹቻን ጫዴቲ ሃይቆይሳ ኤልዛቤላ ሲዪዳ ማላ ኣካቤስ፥ «ናቡቴይ ሃይቂዳ ጊሻስ ካሴ ኢዚ፥ ‹ኔስ ሚሻን ባይዚኬ› ጊ ኢጺዳ ዎይኔ ቶኪዛሶሆዛ ዴንዳ ባዳ ኔስ ጺንጾ ሂስታ ኤካ» ጋዱስ።
1KI 21:16 ኢዝራኤሌ ኣስ ናቡቴይ ሃይቂዳይሳ ኣካቤይ ሲዪዲ ናቡቴ ዎይኔ ቶኪዛሶሆዛ ባስ ኤካናስ ዴንዲዲ ዱጌ ቢዴስ።
1KI 21:17 ሄሳፌ ጉዬ ቴሲቤ ኣስ ኤላሳኮ ጎዳ ቃላይ ዪዲ፥
1KI 21:18 «ሳማሪያን ካዎቲዳ ኢስራኤሌ ካዎ ኣካቤራ ጋይታናስ ዱጌ ዎꬋ። ኢዚ ሃኢ ናቡቴይ ዎይኔ ቶኪዛሶሆዛ ኤካናስ ቢዲ ሄን ዴስ።
1KI 21:19 ኔኒ ኢዛስ፥ ‹ናቡቴ ዎꬋዳ ኢዛ ጺንጾ ላታኔ?› ጌስ። ቃሴካ ኢዛስ፥ ‹ናቡቴ ሱꬃ ካናቲ ላጪዳሶን ኔ ሱꬃካ ካናቲ ላጫና› ጌስ ጎዳይ ኔና» ጊዴስ።
1KI 21:20 ኣካቤይካ ኤላሳስ ዛሪዲ፥ «ሃኢ ታ ሞርኬዞ ታና ዴማይቻዲ?» ጊዴስ። ሂስቲን ኤላሲ፥ «ኤ፥ ታኒ ኔና ዴማይቻዲስ፤ ጋሶይካ ኔኒ ጎዳ ሲንꬃን ኢታ ሚሽ ኦꬃናስ ኔናቴꬃ ናጋራስ ባይዛዳሳ።
1KI 21:21 ጎዳይ ኔና፥ ‹ሲያ፥ ታኒ ኔ ቦላ ኢታ ሚሽ ኤሃና። ኔ ዜሬꬃ ሙሌራ ꬋይሳና፤ ታኒ ኢስራኤሌ ቢታን ኣካቤ ኬꬃ ኣሳፔ ኣይሌ ጊዲን ዎይኮ ጎቃ ጊዲን ኣዴፌ ኢሳካ ኣሾንታ ፒታ ꬋይሳና።
1KI 21:22 ኔኒ ኢስራኤሌ ኣሳ ናጋራ ኦሲሲዳ ጊሻሲኔ ታና ሃንቄꬂዳ ጊሻስ ታኒ ኔ ሶ ኣሳ ናባጼ ና ኢዮርባኣሜ ሶ ኣሳ ማላኔ ኣካያ ና ባሼ ሶ ኣሳ ማላ ኦꬃና› ጌስ።
1KI 21:23 «ቃሴካ ጎዳይ ኤልዛቤሊ ጊሻስ፥ ‹ኢዝራኤሌ ካታማ ጊምቤ ላንቄን ካናቲ ኤልዛቤሎ ማና› ጌስ።
1KI 21:24 ኣካቤ ዛሬፔ ካታማ ጊዶን ሃይቂዳ ኦናካ ካናይ ማና፤ ቃሴ ጋጻሬን ሃይቂዳይታ ሳሎ ካፎቲ ማና» ጊዴስ።
1KI 21:25 ኢዛ ማቻ ኤልዛቤላ ዴንꬄꬂን ጎዳ ሲንꬃን ኢታ ሚሽ ኦꬃናስ ባናቴꬃ ናጋራስ ባይዚዳ ኣካቤ ማላ ኣሲ ሙሌካ ዴና።
1KI 21:26 ጎዳይ ኢስራኤሌ ኣሳ ሲንꬃፌ ጎዲ ኬሲዳ ኣሞሬቲ ኦꬂዳ ማላ ኢዚካ ኤቃ ጾሳታ ጎይኖን ኬሂ ሃራሲዛ ቱና ሚሻታ ኦꬂዴስ።
1KI 21:27 ኣካቤይ ሃ ዮኦዛ ሲዪዳ ማላ ባ ማይኦ ፖሺ ዬጊዲ ማቃ ማይኢ ጾሚዴስ። ማቃ ማይኢዳ ማላ ኢቺዴስ፤ ጬጪሼካ ዩዪዴስ።
1KI 21:28 ሄሳፌ ጉዬ ጎዳ ቃላይ ቴሲቤ ኣስ ኤላሳኮ ዪዲ፥
1KI 21:29 «ኣካቤይ ባናቴꬃ ታ ሲንꬃን ዎስቲ ካዉሺዳኮ ቤኣይ? ኢዚ ታ ሲንꬃን ባናቴꬃ ካዉሺዳ ጊሻስ ታኒ ሃ ሜቶዛ ኢዛ ዎዴን ኢዛ ቦላ ኤሂኬ። ጊዶ ኣቲን ታኒ ኢዛ ና ዎዴን ኢዛ ሶ ኣሳ ቦላ ሃ ሜቶዛ ኤሃና» ጊዴስ።
1KI 22:1 ኣራሜይኔ ኢስራኤሌይ ባ ጋርሳን ኦላ ኦሌቶንታ ሄꬑ ላይꬅ ሳሮን ዴኢዳ።
1KI 22:2 ሄꬓንꬆ ላይꬃን ዩሁዳ ካዎ ኢዮሳፊጼይ ኢስራኤሌ ካዎ ቤኣናስ ቢዴስ።
1KI 22:3 ኢስራኤሌ ካዎይ ባ ሹሜታስ፥ «ጋላኣዴን ዲዛ ኤራሞቴ ካታማይ ኑስ ጊዲዳይሳኔ ኑኒ ሃኖ ጋካናስ ሄ ካታማ ኣራሜ ካዎፔ ዎꬂ ኤካናስ ኑ ኣይኮካ ኦꬆንታይሳ ኢንቴ ኤሬኬቲ?» ጊዴስ።
1KI 22:4 ቃሴካ ኢዚ ኢዮሳፊጼ፥ «ጋላኣዴን ዲዛ ኤራሞቴ ካታማ ኦላናስ ታናራ ባኔ?» ጊ ኦይቺዴስ። ሂስቲን ኢዮሳፊጼይ ኢስራኤሌ ካዎስ፥ «ኤ! ታኒ ኔ ማላ፤ ታ ዴሬይ ኔ ዴሬ ማላ፤ ታ ፓራቲካ ኔ ፓራታ ማላ» ጊዴስ።
1KI 22:5 ቃሴካ ኢዮሳፊጼይ ኢስራኤሌ ካዎስ፥ «ጊዲኮካ ኔኒ ካሴታዳ ጎዳ ኦይቻ» ጊዴስ።
1KI 22:6 ኢስራኤሌ ካዎይ ቲንቢቴ ዮቲዛ ኦይዱ ጼቱ ናቤታ ሺሺዲ፥ «ጋላኣዴን ዲዛ ኤራሞቴ ካታማ ኦላናስ ቦዬ ቦፖ?» ጊዲ ኢስታ ኦይቺዴስ። ኢስቲካ፥ «ባ! ኣይስ ጊኮ ሄ ካታማ ካዎዛ ጎዳይ ኔ ኩሼን ኣꬂ ኢማና» ጊዳ።
1KI 22:7 ኢዮሳፊጼይ ዛሪዲ፥ «ኑኒ ጎዳ ኦይቻና ማላ ሃራ ናቤይ ባዌ?» ጊዴስ።
1KI 22:8 ኢስራኤሌ ካዎ ኢዮሳፊጼስ ዛሪዲ፥ «ኑኒ ኢዛ ባጋራ ጎዳ ኦይቻናስ ዳንዳይዛ ኢሲ ሃራ ኣሲ ዴስ፤ ኢዚ ዪሚላ ና ሚኪያሳ። ጊዶ ኣቲን ታኒ ኢዛ ኢጻዲስ፤ ኣይስ ጊኮ ኢዚ ኡባ ዎዴካ ታ ጊሻስ ኢታ ሚሽ ዮቴሲፌ ኣቲን ሎኦ ሚሽ ዮቲ ኤሬና» ጊዴስ። ኢዮሳፊጼይ ኢስራኤሌ ካዎስ፥ «ካዎይ ሄሳꬆ ጎፖ!» ጊዴስ።
1KI 22:9 ሄሳፌ ጉዬ ኢስራኤሌ ካዎይ ባ ሹሜታፔ ኢሳ ጼይጊዲ፥ «ዪሚላ ና ሚኪያሳ ኤሶን ኤካ ያ» ጊዴስ።
1KI 22:10 ኢስራኤሌ ካዎይኔ ዩሁዳ ካዎ ኢዮሳፊጼይ ባንታ ካዎቴꬃ ማይኦ ማይኢዲ፥ ሳማሪያ ካታማ ጌሊዛ ፔንጌ ማታን ዲዛ ካꬃ ባሌን ባንታ ካዎቴꬃ ኣራታን ኡቲዳ፤ ናቤቲ ኡባይ ኢስታ ሲንꬃን ቲንቢቴ ዮቲዳ።
1KI 22:11 ኢስታፌ ኢሶይ ኪንኣኔ ና ሳዶቄይ ቢራታፔ ካጬታ ጊግሲዲ ኣካቤስ፥ «ጎዳይ፥ ‹ኣራሜ ኣሳይ ꬋያና ጋካናስ ኔኒ ኢስታ ሃ ካጬታን ቃይጫና› ጌስ» ጊዴስ።
1KI 22:12 ሃንኮ ናቤቲ ኡባይካ፥ «ጋላኣዴን ዲዛ ኤራሞቴ ካታማ ባዳ ኦላ፤ ኦላዳካ ጾና። ኣይስ ጊኮ ጎዳይ ሄ ካታማ ካዎዛ ኩሼን ኣꬂ ኢማና» ጊዲ ኢሲ ቃላን ሃሳይዳ።
1KI 22:13 ሄሳፌ ጉዬ ሚኪያሳ ጼይጋናስ ኪቴቲ ቢዳ ኣዴዚ ኢዛ፥ «ቤኣ፥ ቲንቢቴ ዮቲዛ ኡባቲ ኢሲ ዶና ጊዲዲ፥ ‹ካዎይ ሃ ኦላ ጾናና› ጊዲ ዮቲዳ። ኔኒካ ኢስታይሳꬆ ዮታ» ጊዴስ።
1KI 22:14 ጊዶ ኣቲን ሚኪያሲ ሄ ኣዴዛስ፥ «ዴኦ ጎዳይ ቤኢን ጎዳይ ታስ ዮቶሮ ጻላ ታ ኢዛስ ዮታና» ጊዴስ።
1KI 22:15 ሚኪያሲ ካዎዛኮ ጋኪዳ ማላ ካዎዚ ኢዛ፥ «ሚኪያሳ! ኑኒ ጋላኣዴን ዲዛ ኤራሞቴ ካታማ ኦላናስ ቦኒዬ ቦፒኖ?» ጊዲ ኦይቺዴስ። ሚኪያሲ ካዎዛስ፥ «ኤ ባዳ ኦላ፤ ኦላዳካ ጾና። ጎዳይ ሄ ካታማ ካዎዛ ኔ ኩሼን ኣꬂ ኢማና» ጊዴስ።
1KI 22:16 ካዎዚ ጊዲኮ ኢዛስ፥ «ኔኒ ጎዳ ሱንꬃን ቱማፔ ኣቲን ሃራ ሚሽ ታስ ዮቶንታ ማላ ታኒ ኔና ኣፑንቶ ጫቄꬃናስ ኮሺዜ?» ጊዴስ።
1KI 22:17 ሚኪያሲ፥ «ኢስራኤሌ ኦላንቻቲ ኡባይ ሄንꬃንቻይ ባይንዳ ዶርሳታ ማላ ላሌቲ ዲሺን ቤኣዲስ። ጎዳይ ኢስታስ፥ ‹ሃይሳ ዴራስ ጎዳይ ባዋ። ኢስቲ ኡባይካ ባንታ ሶ ባንታ ሶ ሳሮን ቤቶ› ጌስ» ጊዴስ።
1KI 22:18 ኢስራኤሌ ካዎ ኢዮሳፊጼይ፥ « ‹ኢዚ ታ ጊሻስ ኢታፔ ኣቲን ሎኦ ሚሽ ዮቲ ኤሬና› ጋዳ ካሴ ኔስ ዮታቤኪና?» ጊዴስ።
1KI 22:19 ሚኪያሲ ዛሪዲ፥ «ሂስቲኮ ጎዳይ ጊዛይሳ ሲያ! ጎዳይ ባ ካዎቴꬃ ኣራታን ኡቲን ሳሎ ኦላንቻቲ ኡባይ ኢዛ ኡሻቻራኔ ሃዲርሳራ ኤቂዳይታ ታኒ ቤኣዲስ።
1KI 22:20 ጎዳይ፥ ‹ኣካቤይ ጋላኣዴን ዲዛ ኤራሞቴ ካታማ ቢዲ ሄን ሃይቃና ማላ ኢዛ ባሌꬃናይ ኦኔ?› ጊዴስ። ኢሶይ ሃይሳ ኢሶይ ሄሳ ጊዛ ዱማ ዱማ ቃላ ሃሳይዳ።
1KI 22:21 ዉርሴꬃን ኢሲ ኣያናይ ኬዚ ጎዳ ሲንꬃን ኤቂዲ፥ ‹ታኒ ኢዛ ባሌꬃና› ጊዴስ።
1KI 22:22 «ጎዳይ ኣያናዛ፥ ‹ኔ ኢዛ ዎስታ ባሌꬃኔ?› ጊዴስ። «ኣያናዚካ፥ ‹ታኒ ኬዛ ባዳ ኢዛ ናቤቲ ኡባቲ ዎርዶ ሃሳያና ማላ ኦꬃና› ጊዴስ። «ሂስቲን ጎዳይ፥ ‹ኤሮ ሃኢ ኬዛዳ ባ! ባዳ ባሌꬃ፤ ኢዚ ኔስ ሃናና› » ጊዴስ።
1KI 22:23 ሄሳ ጊሻስ ሚኪያሲ፥ «ጎዳይ ሃይታ ኔ ናቤታ ኡባታ ዶናን ዎርዶ ኣያና ዎꬂዴስ፤ ኣይስ ጊኮ ጎዳይ ኔ ቦላ ባሽ ኤሃናስ ዮቲዴስ» ጊዴስ።
1KI 22:24 ሄሳፌ ጉዬ ኪንኣኔ ና ሴዴቂያሲ ሺቂዲ ሚኪያሳ ሻጋላን ባቃ ሻዪዲ፥ «ጎዳ ኣያናይ ታፔ ኣዋ ባጋራ ኣꬊ ቢዲ ኔስ ዮቲዴ?» ጊዲ ኦይቺዴስ።
1KI 22:25 ሚኪያሲካ ዛሪዲ፥ «ሄሳ ኔኒ ቆልኣን ቆቴታና ጌሊዛ ጋላስ ኤራና» ጊዴስ።
1KI 22:26 ሄሳፌ ጉዬ ኢስራኤሌ ካዎይ ባ ኦላንቻታፔ ኢሳ ኣዛዚሼ፥ «ሚኪያሳ ኦይኪዲ ካታማ ሃሪዛ ኣሞኔሲኔ ካዎዛ ና ኢዮኣሳስ ጉዬ ዛሪቴ።
1KI 22:27 ሂስቲዲ ካዎዚ፥ ‹ታ ሎኦን ሲማናሼ ጋካናስ ሃይሳ ኣዴዛስ ሜላ ኡኬꬂኔ ሃꬅ ኣቲን ሃራ ኢሞንታ ማላ› ጌስ» ጊዴስ።
1KI 22:28 ሚኪያሲ ኢዛስ፥ «ኔኒ ሳሮን ሲሚዛ ጊዲኮ ጎዳይ ታ ዶናራ ሃሳይቤና» ጊዴስ። ቃሴካ ሚኪያሲ፥ «ሃይሳን ዲዛ ኣሳይ ሃይሳ ታ ጊዛ ቃላ ዎዚናን ዎꬂቴ» ጊዴስ።
1KI 22:29 ሄሳፌ ጉዬ ኢስራኤሌ ካዎ ኣካቤይኔ ዩሁዳ ካዎ ኢዮሳፊጼይ ጋላኣዴን ዲዛ ኤራሞቴ ካታማ ቢዳ።
1KI 22:30 ኢስራኤሌ ካዎይ ኢዮሳፊጼስ፥ «ታኒ ማይኦ ላማዳ ሃራ ኣስ ሚሳታዳ ኦላን ጌላና፤ ኔ ጊዲኮ ኔ ካዎቴꬃ ማይኦ ማይኣ» ጊዴስ። ሄሳ ጊሻስ ኢስራኤሌ ካዎይ ባ ማይኦ ላሚ ሃራ ኣስ ሚሳቲዲ ቆቴቲ ኦላዛ ጊዶ ጌሊዴስ።
1KI 22:31 ኣራሜ ካዎይ ባ ፓራ-ጋሬታ ኣዛዚዛ 32 ሹሜታ፥ «ኢስራኤሌ ካዎዛራፔ ኣቲን ጉꬅ ጊዲን ጊታ ጊዲን ሃራ ኦናራካ ኦሌቶፍቴ» ጊ ኣዛዚዴስ።
1KI 22:32 ፓራ-ጋሬታ ኣዛዚዛይቲ ኢዮሳፊጼ ቤኢዳ ማላ፥ «ኣዳፌ ሃይሲ ኢስራኤሌ ካዎዛኮ!» ጊዳ። ሂስቲዲ ኦላ ኦይካናስ ኢዛ ጊዶꬂዳ፤ ኢዮሳፊጼይ ዋሲዴስ።
1KI 22:33 ኢዚ ዋሲን ፓራ-ጋሬታ ኣዛዚዛይቲ ኢዚ ኢስራኤሌ ካዎዛ ጊዶንታይሳ ኤሪዲ ኢዛ ጎዲዛይሳ ኣጊዳ።
1KI 22:34 ኢሳዴይ ጮ ባ ዎንዳፌ ኦላንቻታ ቦላ ዬዲን ኢስራኤሌ ካዎዛስ ኦላ ማይኦይ ጋይቲዛሶራ ዱኪዴስ፤ ሄሳ ጊሻስ ኢስራኤሌ ካዎይ ባ ጋሬዛ ላጊዛይሳስ፥ «ጋሬዛ ጉዬ ዛራዳ ታና ኦላ ጊዶፌ ኬሳ፤ ኣይስ ጊኮ ታኒ ኢታ ጫች ጫዴታዲስ» ጊዴስ።
1KI 22:35 ሄ ጋላስ ኦላይ ሱሊሼ ፔኢን ኢስራኤሌ ካዎ ኣካቤይ ባ ፓራ-ጋሬ ጊዶን ዜምፒዲ ኣራሜ ኣሳ ሲንꬃን ታኪዴስ። ኢዛ ሱꬃይ ፓራ-ጋሬዛ ቦላ ጉኪሺን ሄ ጋላሳ ኦማርስ ካዎዚ ሃይቂዴስ።
1KI 22:36 ኣርሼይ ዉላናስ ማቲሺን ኦላ ኣሳ ጊዶን፥ «ኣሳይ ኡባይ ባ ካታማ ካታማ ቦ! ኣሳይ ኡባይ ባ ዴሬ ዴሬ ሲሞ!» ጊዛ ዋሶይ ሲዬቲዴስ።
1KI 22:37 ሄሳፌ ጉዬ ኢስቲ ካዎዛ ሳማሪያ ካታማ ኤፊዲ ሞጊዳ።
1KI 22:38 ላይማቲዛይቲ ሜጬቲዛ ኤሌ ሃꬃን ፓራ-ጋሬዛ ሜጪዳ። ጎዳይ ካሴ ዮቲዳ ቃላ ማላካ ኢዛ ሱꬃ ካናቲ ላጪዳ።
1KI 22:39 ኣካቤይ ሃኒዳ ሃራ ሃኖቲ፥ ኢዚ ኦꬂዳይሲ ኡባይ፥ ዳንጋርሳ ዛሌን ካዎ ኬꬃ ኢዚ ኬጺዳይሲኔ ኢዚ ጊምቢዳ ካታማታ ሃኖቲ ኡባይ ኢስራኤሌ ካዎታ ታሪኬ ማጻፋን ጻፌቲ ኡቲዳ።
1KI 22:40 ኣካቤይ ሃይቂዲ ባ ኣዋታን ጋይቲዴስ፤ ኢዛ ና ኣካዚያሲ ኢዛሶሆን ካዎቲዴስ።
1KI 22:41 ኢስራኤሌ ካዎ ኣካቤይ ካዎቲዳ ኦይዳንꬆ ላይꬃን ኣሳ ና ኢዮሳፊጼይ ዩሁዳን ካዎቲዴስ።
1KI 22:42 ኢዚ ካዎቲዛ ዎዴ ኢዛስ ላይꬃይ 35፤ ኢዚ ዬሩሳላሜን 25 ላይꬅ ካዎቲዴስ፤ ኢዛ ኣዬያ ሺሊሄ ና ኣዙቦ ጌቴታዉስ።
1KI 22:43 ኢዮሳፊጼይ ባ ኣዋ ኣሳ ኦጌ ኡባ ካሊዴስ፤ ኢዚ ሄ ኦጌፔ ሼርኢ ጊቤና፤ ጎዳ ሲንꬃን ሱሬ ሚሽ ኦꬂዴስ። ጊዲኮካ ꬎቃሶሆን ዲዛ ኤቃስ ጎይኒዛሶሆታ ꬋይሲቤና፤ ኣሳይ ሄ ሶሆታን ያርሾ ሺሾኔ ኤጻኔ ጩዋሴꬅ ኣጊቤና።
1KI 22:44 ኢዮሳፊጼይ ኢስራኤሌ ካዎራ ሲጋን ዴኢዴስ።
1KI 22:45 ኢዮሳፊጼይ ሃኒዳ ሃራ ሃኖቲ፥ ኢዛ ሚኖቴꬃይኔ ኢዚ ኦሌቲዳ ኦላይ ዩሁዳ ካዎታ ታሪኬ ማጻፋን ጻፌቲ ኡቲዴስ።
1KI 22:46 ኤቃ ጾሳታ ኬꬃን ፓራ ላይማ ላይማቲዛይታ ካሴ ኢዛ ኣዋ ኣሲ ꬋይሲሺን ኣቲዳይታ ቢታፌ ꬋይሲዴስ።
1KI 22:47 ሄ ዎዴ ኤዶሜ ቢታን ካዎይ ባዋ፤ ሄ ቢታይ ዩሁዳ ካዎይ ዎꬂዳዴን ሃሬቴስ።
1KI 22:48 ኦፊሬ ቢታ ቢዲ ዎርቃ ኤሃና ማላ ኢዮሳፊጼይ ጊታ ማርካቤታ ሜꬊዴስ፤ ጊዶ ኣቲን ሄ ማርካቤቲ ኤጺዮን-ጋቢሬን ሜቂ ኣቲዳ ጊሻስ ሙሌካ ሄ ባና ዳንዳይቤቴና።
1KI 22:49 ሄ ዎዴ ኣካቤ ና ኣካዚያሲ ኢዮሳፊጼስ፥ «ታ ኣሳይ ኔ ኣሳራ ኢሲፌ ማርካቤን ቢኮቺ?» ጊ ኦይቺን ኢዮሳፊጼይ ኢጺዴስ።
1KI 22:50 ኢዮሳፊጼይ ሃይቂዲ ባ ኣዋታን ጋይቲዴስ። ኢስቲ ሞጌቲዳ ባ ኣዋ ዳዊቴ ካታማን ሞጌቲዴስ። ኢዛ ና ኢዮራሜይ ኢዛሶሆን ካዎቲዴስ።
1KI 22:51 ዩሁዳ ካዎ ኢዮሳፊጼይ ካዎቲዳ ታማኔ ላፑንꬃ ላይꬃን ኣካቤ ና ኣካዚያሲ ኢስራኤሌ ቦላ ሳማሪያን ካዎቲዴስ፤ ኢስራኤሌ 2 ላይꬅ ሃሪዴስ።
1KI 22:52 ኣካዚያሲ ጎዳ ሲንꬃን ኢታ ሚሽ ኦꬂዴስ፤ ኢዚካ ባ ኣዋ፥ ባ ኣዮኔ ኢስራኤሌ ኣሳ ናጋራ ኦሲሲዳ ናባጼ ና ኢዮርባኣሜ ኦጌ ካሊዴስ።
1KI 22:53 ኣካዚያሲ ካሴ ኢዛ ኣዋይ ኦꬂዳይሳꬆ ኢዚካ ባኣሌስ ኦꬂዴሲኔ ጎይኒዴስ፤ ኢዚ ሄሳንካ ጎዳይ፥ ኢስራኤሌ ጾሳይ ሃንቄታና ማላ ኦꬂዴስ።
2KI 1:1 ኣካቤይ ሃይቂዳፔ ጉዬ ሞኣቤ ዴሬይ ኢስራኤሌ ዴሬ ቦላ ዴንዲዴስ።
2KI 1:2 ሄ ዎዴ ኣካዚያሲ ሳማሪያን ዲዛ ባ ኢልፒኔ ፖቄ ቦላፌ ማስኮቴራ ዱጌ ኩንዲዲ ሳኬቲዴስ፤ ሄሳ ጊሻስ ኢዚ፥ «ኣኔ ኢንቴ ቢዲ ታ ሳኮዛ ጊሻስ ታ ፓጻናኮ ኣቃሮኔ ኤቃ ጾሳ ባኣሊ-ዜቡላ ታስ ኦይቺቴ» ጊዲ ኣስ ኪቲዴስ።
2KI 1:3 ጎዳ ኪታንቻይ ቴሲቤ ዴሬ ኣስ ናቤ ኤላሳስ፥ «ኔኒ ዴንዳዳ ሳማሪያ ካዎይ ኪቲዳ ኣሳታራ ጋይታናስ ኬዛ ባዳ ሄ ኣሳታስ፥ ‹ኢንቴ ኣቃሮኔ ኤቃ ጾሳ ባኣሊ-ዜቡላ ኦይቻናስ ቢዛይ ኢስራኤሌን ጾሲ ባይንዳ ጊሻሴ?› ጋዳ ኢስታ ኦይቻ።
2KI 1:4 ሄሳ ጊሻስ ጎዳይ፥ ‹ኔ ኢቺዳ ሂጻፔ ዴንዳካ፤ ቱማፔ ኔ ሃይቃና› ጌስ» ጊዴስ፤ ሄሳፌ ጉዬ ኤላሲ ቢዴስ።
2KI 1:5 ኪቴቲ ቢዳ ኣሳቲ ካዎዛኮ ጉዬ ሲሚ ዪን ኢዚ ኢስታስ፥ «ኣይስ ሲሚ ዪዴቲ?» ጊ ኦይቺዴስ።
2KI 1:6 ኢስቲካ ኢዛስ፥ «ኢሳዴይ ኑናራ ጋይታናስ ዪዲ ጎዳይ፥ ‹ኢንቴ ኢንቴና ኪቲ ዬዲዳይሳኮ ሲሚ ቢዲ ኣቃሮኔ ኤቃ ጾሳ ባኣሊ-ዜቡላ ኦይቻናስ ኔኒ ኣስ ኪቲዳይ ኢስራኤሌን ጾሲ ባይንዳ ጊሻሴ? ሄሳ ጊሻስ ኔ ኢቺዳ ሂጻፔ ዴንዳካ፤ ቱማፔ ኔ ሃይቃና› ጊዴስ» ጊዳ።
2KI 1:7 ካዎዚካ ኢስታስ፥ «ኢንቴናራ ጋይታና ዪዲ ኢንቴስ ሄሳꬆ ጊዳይ ኢዚ ኣይ ማላ ኣሴ?» ጊዲ ኦይቺዴስ።
2KI 1:8 ኢስቲካ ኢዛስ፥ «ኑስ ዮቲዳይሲ ኢስኬራ ዲዛ ማይኦ ማይኢዴስ ፤ ጼሳን ዳፎ ዳንጪዴስ» ጊዳ። ካዎዚ ኢስታስ፥ «ታ ኢዛ ኤራዲስ፤ ሄሲ ቴሲቤ ዴሬ ኣስ ኤላሳ» ጊዴስ።
2KI 1:9 ሄሳፌ ጉዬ ካዎዚ ሃምሳ ሃላቃዛ ኢቻሽ ታሙ ዎታዳራታራ ኤላሳኮ ዬዲዴስ። ሃምሳ ሃላቃዚ ኤላሲ ዲዛ ዙምቡላ ሁኤ ኬዚዲ፥ «ሃይሶ ጾሳ ኣሶ! ካዎይ ኔና ሃ ዱጌ ዎꬋ ጌስ» ጊዴስ።
2KI 1:10 ኤላሲካ ዛሪዲ ሃምሳ ሃላቃዛስ፥ «ታኒ ጾሳ ኣስ ጊዲኮ ሳሎፔ ታማይ ዎꬊዲ ኔናኔ ኔናራ ዲዛ 50 ኣሳ ሞ!» ጊዴስ። ሄሳፌ ጉዬ ታማይ ሳሎፔ ዎꬊዲ ሃምሳ ሃላቃዛኔ ኢዛራ ዲዛ ኣሳ ኡባ ዲፒ ሂስቲዴስ።
2KI 1:11 ካዎዚ ቃሴ ሃራ ሃምሳ ሃላቃኔ ኢቻሽ ታሙ ዎታዳራታ ኪቲዴስ፤ ሃምሳ ሃላቃዚካ፥ «ሃይሶ ጾሳ ኣሶ! ካዎይ ኔና ኤሶን ሃ ዎꬋ ጌስ» ጊዴስ።
2KI 1:12 ኤላሲካ ዛሪዲ፥ «ታኒ ጾሳ ኣስ ጊዲኮ ታማይ ሳሎፔ ዎꬊዲ ኔናኔ ኔናራ ዲዛ 50 ኣሳ ሞ!» ጊዴስ፤ ሄሳፌ ጉዬ ታማይ ሳሎፔ ዎꬊዲ ኢዛኔ ኢዛራ ዲዛ ኣሳ ዲፒ ሂስቲዴስ።
2KI 1:13 ሄሳ ጊሻስ ካዎዚ ሄꬓንꬆ ሃምሳ ሃላቃዛኔ ኢዛራ 50 ኣስ ዬዲዴስ፤ ሃ ሄꬓንꬆ ሃምሳ ሃላቃዚ ቢዲ ኤላሳ ሲንꬃን ጉልባቲዲ፥ «ኣቤት ጾሳ ኣሶ! ታ ሼምፖይኔ ሃይታ ኔ ኣይሌ ኢቻሽ ታማታ ሼምፖይ ኔ ሲንꬃን ቦንቼቶ።
2KI 1:14 ሃይሳፌ ካሴ ሳሎፔ ዎꬊዳ ታማይ ናምኡ ሃምሳ ሃላቃታኔ ኢስታራ ዲዛ ኣሳታ ኡባ ሚዴስ፤ ሃኢ ጊዲኮ ታ ሼምፒያ ኔ ሲንꬃን ቦንቼቱ» ጊዴስ።
2KI 1:15 ጎዳ ኪታንቻዚ ኤላሳ፥ «ኔኒ ኢዛራ ዱጌ ዎꬋ፤ ኢዛስካ ባቦፋ!» ጊዴስ። ሄሳ ጊሻስ ኤላሲ ኢዛራ ኢሲፌ ካዎዛኮ ዱጌ ዎꬊዴስ።
2KI 1:16 ኢዚ ካዎዛስ፥ «ጎዳይ፥ ‹ኔኒ ኣቃሮኔ ኤቃ ጾሳ ባኣሊ-ዜቡላ ኔ ጊሻስ ኦይቻናስ ኣሳታ ኪታ ዬዲዳይ ኢስራኤሌን ጾሲ ባይንዳ ጊሻሴ? ኔኒ ሄሳ ኦꬂዳ ጊሻስ ሃኢ ኔ ኢቺዳ ሂጻፔ ሙሌካ ዴንዳካ፤ ቱሙ ኔ ሃይቃና› ጊዴስ» ጊዲ ዮቲዴስ።
2KI 1:17 ሄሳ ጊሻስ ኤላሲ ኢዛስ ዮቲዳ ጎዳ ቃላ ማላ ኣካዚያሲ ሃይቂዴስ። ኣካዚያሳስ ኣቱማ ናይ ባይንዳ ጊሻስ ኢዮሳፊጼ ና ኢራሜይ ዩሁዳ ዴሬ ቦላ ካዎቲዳ ናምኣንꬆ ላይꬃን ኢዛ ኢሻ ኢዮራሜይ ኢዛሶሆን ካዎቲዴስ።
2KI 1:18 ኣካዚያሲ ባ ዎዴን ኦꬂዳ ኦሶቲኔ ኢዚ ፖሊዳ ኦሶቲ ኡባይካ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 2:1 ጎዳይ ኤላሳ ጎቴ ጫርኮራ ፑዴ ሳሎ ኤፋና ዎዴይ ጋኪን ኤላሲኔ ኤልሳኢ ጌልጌላፔ ዴንዲዲ ኢሲፌ ቢሼ ዴቴስ።
2KI 2:2 ኤላሲ ኤልሳኤስ፥ «ጎዳይ ታና ቤቴሌ ኪቲዳ ጊሻስ ኔኒ ሃን ሃይሳን ታካሻ» ጊዴስ። ኤልሳኢ ኢዛስ ዛሪዲ፥ «ዴኦ ጎዳይ ቤዪን ኔ ኣሾ ታ ኔፔ ሻኬቲኬ» ጊ ጫቂዴስ፤ ሂስቲን ኢሲፌ ዱጌ ቤቴሌ ዎꬊዳ።
2KI 2:3 ቤቴሌን ዲዛ ናቤታ ማባራይ ኤልሳኤኮ ቢዲ፥ «ጎዳይ ኔ ጎዳ ኤላሳ ሃች ኔፔ ሻኪ ኤካናይሳ ኔ ኤራዲ?» ጊዳ። ኤልሳኢካ፥ «ኤ ኤራዲስ፤ ኢንቴ ኣኔ ጮኡ ጊቴ» ጊዴስ።
2KI 2:4 ቃሴካ ኤላሲ ኤልሳኤስ፥ «ሃይሶ ኤልሳኤ! ጎዳይ ታና ኢያርኮ ኪቲዳ ጊሻስ ኔ ሃን ሃይሳን ታካሻ» ጊዴስ። ኢዚካ ኢዛስ ዛሪዲ፥ «ዴኦ ጾሳይ ቤዪን፥ ኔ ኣሾ ታ ኔፔ ሻኬቲኬ» ጊ ጫቂዴስ፤ ሄሳ ጊሻስ ኢዛራ ኢሲፌ ኢያርኮ ዎꬊዳ።
2KI 2:5 ኢያርኮን ዲዛ ናቤታ ማባራይ ኤልሳኤኮ ሺቂዲ፥ «ጎዳይ ኔ ጎዳ ኤላሳ ሃች ኔፔ ሻኪ ኤካናይሳ ኔ ኤራዲ?» ጊዳ። ኢዚካ ኢስታስ፥ «ኤ ኤራዲስ፤ ኣኔ ኢንቴ ጮኡ ጊቴ» ጊዴስ።
2KI 2:6 ሄሳፌ ጉዬ ኤላሲ፥ «ጎዳይ ታና ዮርዳኖሴ ኪቲዳ ጊሻስ ኔኒ ሃን ሃይሳን ታካሻ» ጊዴስ፤ ኢዚካ ኢዛስ ዛሪዲ፥ «ዴኦ ጎዳይ ቤዪን፥ ኔ ኣሾ ታ ኔፔ ሻኬቲኬ» ጊዴስ። ሄሳ ጊሻስ ናምኣቲካ ኢሲፌ ቢዳ።
2KI 2:7 ናቤታ ማባራ ጋርሳፌ ኢቻሽ ታማይ ቢዲ ኤላሲኔ ኤልሳኢ ኤቂ ዲዛሶ ጊናራ ዮርዳኖሴ ፒንꬃን ሃኪ ኤቂዳ።
2KI 2:8 ኤላሲ ባ ካባ ቃሪ ኤኪዲኔ ጻጺዲ ኢዛራ ሃꬃ ሾጪዴስ፤ ሄሳፌ ጉዬ ሃꬃይ ሃዲርሲኔ ኡሻች ሻኬቲ ዎꬊዴስ። ናምኣይካ ቦሉማ ቢታራ ፒኒዳ።
2KI 2:9 ኢስቲ ፒኒ ኬዚዳፔ ጉዬ ኤላሲ ኤልሳኤ፥ «ታ ኔስ ኣይ ኦꬃና ማላ ኔ ኮይዛኮ ታ ኔፔ ሻኬቶንታ ዲሺን ኣኔ ታስ ዮታ» ጊዴስ። ኤልሳኢካ፥ «ኔ ኣያናይ ታ ቦላ ናምኡ ዳኮ ጊዳና ማላ ታ ኔና ዎሳይስ» ጊዴስ።
2KI 2:10 ኤላሲካ፥ «ዴጾ ሚሽ ኦይቻዳሳ፤ ጊዲኮካ ታኒ ኔፔ ሻኬታ ቢዛ ዎዴ ኔ ታና ቤኢኮ ኔ ጊዳ ማላ ኔስ ሃናና፤ ኔ ቤኦንታ ኣጊኮ ሄሲ ኔስ ሃኔና» ጊዴስ።
2KI 2:11 ኢስቲ ሃሳይሼ ሎዳራ ቢሺን ታማ ፓራ-ጋሬቲኔ ታማ ፓራቲ ኢስቲ ቆፖንታ ዲሺን ኢስታ ጊዶን ጌሊዲ ናምኣታካ ሻኪ ዬጊዳ፤ ኤላሲ ጎቴ ጫርኮን ፑዴ ሳሎ ቢዴስ።
2KI 2:12 ኤልሳኢ ሄሳ ቤኢዲ፥ «ታ ኣዋዉ! ታ ኣዋዉ! ኢስራኤሌ ፓራ-ጋሬታኔ ቶጋንቻታ!» ጊዲ ዋሲዴስ፤ ሄሳፌ ጉዬ ናምኣንꬆ ኤላሳ ቤዪቤና፤ ሄሳፌ ሲሚዲ ባ ማይኦ ናምኡ ኬሲ ዳኪዴስ።
2KI 2:13 ኤላሳፔ ዎꬊዳ ካባዛ ኤኪዲኔ ጉዬ ሲሚ ቢዲ ዮርዳኖሴ ሻፋ ኣቻን ኤቂዴስ።
2KI 2:14 ኤላሳፔ ዎꬊዳ ካባን ሃꬃ ሾጪሼ፥ «ጎዳይ ኤላሳ ጾሳይ ኣዋን ዲዜ?» ጊዴስ፤ ኢዚ ሃꬃ ሾጪን ሃዲርሲኔ ኡሻች ሻኬቲ ዎꬊን ፒኒዴስ።
2KI 2:15 ኢያርኮፌ ቢዲ ሄሳ ቤይዳ ባጋ ናቤቲ፥ «ኤላሳ ኣያናይ ኤልሳኤ ቦላ ሼምፒዴስ» ጊዳ፤ ኢዛራ ጋይታናስ ቢዲ ኢዛ ሲንꬃን ዚቂ ጊዲ ባንታ ኩሼ ዴንꬂዳ።
2KI 2:16 ሄሳፌ ጉዬ፥ «ሄኮ ኔ ኣይሌታስ ኑስ 50 ሚኖ ኣሳቲ ዴቴስ፤ ኦኔ ኤሪዛይ ጎዳ ኣያናይ ኔ ጎዳዛ ዴንꬂ ኤፊዲ ኢሲ ዙማ ቦላ ዎꬂዳኮ ዎይኮ ኢሲ ዙሌ ሶሆን ጌልꬂ ዎꬂዳኮ ቢዲ ኮዬቶ» ጊዳ። ኤልሳኢካ፥ «ሄሳꬆ ሃኔና፤ ኣስ ኪቶፍቴ» ጊዴስ።
2KI 2:17 ሃኔና ጉሲ ኢዛ ዬላቻና ጋካናስ ኢዛ ኡንኤꬂዳ፤ ሄሳ ጊሻስ፥ «ኣኔ ዬዲቴ» ጊዴስ፤ ኢስቲካ 50 ኣስ ዬዲን ሄ ኣሳቲ ሄꬑ ጋላስ ኩሜꬅ ኮዪዲ ዴሚቤቴና።
2KI 2:18 ኢስቲ ኢያርኮን ዲዛ ኤልሳኤኮ ሲሚን ኢዚ ኢስታስ፥ «ታ ኢንቴና ቦፒቴ ጋቤኪና?» ጊዴስ።
2KI 2:19 ሄ ካታማይን ዲዛ ኣሳይ ኤልሳኤ፥ «ሄኮ ኔኒ ኑ ጎዳይ ቤኢዛ ማላ ሃና ካታማያ ዱሳስ ኢንጄ፤ ጊዶ ኣቲን ሃꬂ ኢታ ጊዲዳ ጊሻስ ቢታያ ኣይፌ ኢሙኩ» ጊዳ።
2KI 2:20 ኢዚካ ኢስታስ፥ «ኣኔ ኢንቴ ኦራꬃ ኦቶን ማጺኔ ጉጂዲ ሃ ታስ ኤኪ ዪቴ» ጊዴስ፤ ኢዚ ጊዳ ማላ ኤኪ ዪዳ።
2KI 2:21 ሄሳፌ ጉዬ ኢዚ ፑልቶ ሃꬂ ዲዛሶ ቢዲ ፑልቶዛን ማጺኔ ዬጊዲ፥ «ጎዳይ፥ ‹ታኒ ሃይሳ ሃꬃ ፓꬃዲስ፤ ሃይሳፌ ጉዬ ኢዚ ሃይቆስ ጋሶ ጊዴና፤ ቢታያካ ኣይፌ ኢሞንታ ማላ ዲጌና› ጌስ» ጊዴስ።
2KI 2:22 ኤልሳኢ ጊዳ ማላካ ሃꬃዚ ሃች ጋካናስ ፓጺ ኣቲዴስ።
2KI 2:23 ኤልሳኢ ሄፔ ዴንዲ ቤቴሌ ኬዚዴስ፤ ኢዚ ቡሮ ቢሼ ኦጌን ዲሺን ካታማፔ ኬዚዳ ናቴꬃቲ፥ «ሃይሶ ቦኣ ኣዴዞ! ኬዛ ኪቻ!» ጊሼ ኢዛ ቂꬊዳ።
2KI 2:24 ኤልሳኢካ ጉዬ ሲሚ ኢስታ ጼሊዲ ጎዳ ሱንꬃን ኢስታ ቃንጊዴስ፤ ሄሳፌ ጉዬ ናምኡ ማጫ ዛርዶቲ ዎራፔ ኬዚዲ ናቴꬃ ናይታፔ ኦይዱ ታማኔ ናምኣታ ሜንꬄሬꬂ ዬጊዳ።
2KI 2:25 ኢዚ ፑዴ ቃርሜሎሴ ዙማ ቦላ ኬዚዴስ፤ ሄፔ ሳማሪያ ሲሚዴስ።
2KI 3:1 ዩሁዳ ካዎ ኢዮሳፊጼይ ካዎቲዳ ታማኔ ኦስፑንꬃ ላይꬃን ኣካቤ ና ኢዮራሜይ ኢስራኤሌ ቦላ ሳማሪያን ካዎቲዲ 12 ላይꬅ ሃሪዴስ።
2KI 3:2 ኢዚ ጎዳ ሲንꬃን ኢጼቲዳ ዳሮ ኢታ ሚሽ ኦꬂዴስ፤ ሄ ኢታ ኦሶዚካ ካሴ ኢዛ ኣያኔ ኢዛ ኣዋይ ኦꬂዳ ኢታ ኦሶዛ ማላ ጊዴና፤ ኢዛ ኣዋይ ኦሲሲዳ ባኣሌ ሃዉልቴዛ ዲጊዴስ።
2KI 3:3 ጊዶ ኣቲን ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራን ኢዚ ኦይኬቲዴስ፤ ኢዛፔካ ሻኬቲቤና።
2KI 3:4 ሄ ዎዴ ሞኣቤ ካዎ ሜሻይ ሃሬስ፤ ኢዚ 100,000 ላቃታኔ 100,000 ꬋርሾታ ኢስኬ ኢስራኤሌ ካዎስ ጊሬስ።
2KI 3:5 ኣካቤይ ሃይቂዳፔ ጉዬ ሞኣቤ ካዎይ ኢስራኤሌ ካዎ ቦላ ማካሊዴስ።
2KI 3:6 ሄሳ ጊሻስ ሄ ዎዴ ካዎ ኢዮራሜይ ሳማሪያፔ ዴንዲ ቢዲ ኢስራኤሌ ኣሳ ኡባ ኢሲ ቦላ ሺሺዴስ።
2KI 3:7 ዩሁዳ ካዎ ኢዮሳፊጼስ፥ «ሞኣቤ ካዎይ ታ ቦላ ማካሊዳ ጊሻስ ኔ ታናራ ኢዛ ኦላናስ ባኔ?» ጊ ኢዛኮ ኣስ ኪታ ዬዲዴስ። ኢዚካ ዛሪዲ፥ «ኤ ታ ኔናራ ኦላናስ ባና፤ ታኒ ኔ ማላ፤ ታ ዴሬይካ ኔ ዴሬዛ ማላ፤ ታ ፓራቲካ ኔ ፓራታ ማላ» ጊ ዛሪዴስ።
2KI 3:8 ኢዮሳፊጼይ፥ «ኑኒ ኦላስ ኣዋ ባጋራ ባኔ?» ጊ ኦይቺዴስ። ኢዮራሜይ ዛሪዲ ኤዶሜ ባዞራ ካንꬂ ባና ጊዴስ።
2KI 3:9 ሄሳ ጊሻስ ኢስራኤሌ ካዎይ፥ ዩሁዳ ካዎይኔ ኤዶሜ ካዎይ ኢሲፌ ኦላ ዎራጃናስ ዴንዲዳ። ላፑን ጋላሳፌ ጉዬ ኦላንቻታሲኔ ሜሄታስ ኡያና ሃꬂ ꬋይዴስ።
2KI 3:10 ኢስራኤሌ ካዎዚ፥ «ኣዬ ኣና! ጎዳይ ኑና ሄꬑ ካዎታ ሞኣቤስ ኣꬂ ኢማናስ ጼይጊዴ?» ጊዴስ።
2KI 3:11 ኢዮሳፊጼይ ጊዲኮ፥ «ኢዛ ባጋራ ጎዳ ኦይቻና ማላ ጎዳ ናቤይ ሃይሳን ዴኔ?» ጊዲ ኦይቺዴስ። ኢስራኤሌ ኦላንቻታ ጋዳዋታፔ ኢሶይ፥ «ካሴ ኤላሳ ኩሼ ሜጪሲዛ ሳፋጼ ና ኤልሳኢ ሃይሳን ዴስ» ጊ ዮቲዴስ።
2KI 3:12 ኢዮሳፊጼይካ ዛሪዲ፥ «ጎዳ ቃላይ ኢዛ ማታን ዳና» ጊዴስ። ሄሳ ጊሻስ ኢስራኤሌ ካዎ፥ ኢዮሳፊጼይኔ ኤዶሜ ካዎይ ኢሲፌ ኢዛኮ ዱጌ ዎꬊዳ።
2KI 3:13 ኤልሳኢካ ኢስራኤሌ ካዎስ፥ «ኔና ኑናራ ጋꬂዛ ሚሺ ኣዚ ዲን ያዲ? ኔ ሃኢ ካሴ ኔ ኣዋ ናቤቲኔ ኔ ኣዬይ ናቤቲ ዲዛሶ ባ» ጊዴስ። ኢስራኤሌ ካዎዚ ኢዛስ ዛሪዲ፥ «ሄሲ ሃኔና፤ ሞኣቤ ኩሼን ኑና ኣꬂ ኢማናስ ሄꬑ ካዎታ ኢሲ ቦላ ጼይጊዳይ ጎዳ» ጊዴስ።
2KI 3:14 ኤልሳኢካ ኢዛስ፥ «ታ ኢዛስ ሃጋዚዛ ጎዳይ ቤዪን፥ ታ ዩሁዳ ካዎ ኢዮሳፊጼ ቦንቾንታኮ ኔና ቤያናስ ኮይኬ፤ ዉዱካ ጊኬ።
2KI 3:15 ኣኔ ሃኢ ታስ ባጋና ዲጺዛይሳ ኤኪ ዪቴ» ጊዴስ። ባጋና ዲጺዛይ ዲጺሺን ጎዳ ኩሼይ ኤልሳኤ ቦላ ዪዴስ።
2KI 3:16 ኤልሳኢ፥ «ጎዳይ፥ ‹ሃይሳ ሃ ሾባን ዳሮ ኦላታ ቦኪቴ።
2KI 3:17 ጫርኮካ፥ ኢራካ ቤኤኬታ፤ ጊዶ ኣቲን ሃ ሾባዛን ሃꬂ ኩማና፤ ኢንቴ፥ ኢንቴ ሚዛቲኔ ኢንቴ ሜሄቲ ሃꬅ ኡያና› ጌስ።
2KI 3:18 ሃይሲ ጎዳስ ላፋ ሚሻ። ኢዚ ሞኣቤ ኣሳ ኢንቴ ኩሼን ኣꬂ ኢማና።
2KI 3:19 «ጊምቤቲዳ ካታማታኔ ሎኢዛ ኢስታ ካታማታ ኡባ ኢንቴ ጾኒ ኦይካና። ሎኢዛ ኢስታ ሚꬃታ ኢንቴ ቃንጻና፤ ኢስታ ፑልቶታካ ሙሌራ ኢንቴ ቱጫና፤ ካꬅ ሎኤꬂ ኢሚዛ ጋዴዛ ኢንቴ ሹቻን ሞራና» ጊዴስ።
2KI 3:20 ዎንቴꬃ ጋላስ ያርሾይ ያርሼቲዛ ሳቴን ኤዶሜ ባጋራ ሃꬂ ዲኦ ማላ ዪን ቢታያ ሃꬅ ጻላ ጊዳዱስ።
2KI 3:21 ሄ ዎዴ ካዎቲ ኢስታ ኦላናስ ዪዳይሳ ሞኣቤ ኣሳይ ኡባይ ሲዪዲ ናይ ጊዲን ጪማይ ኦላ ሚሽ ኦይካናስ ዳንዳይዛ ኡባይ ጼይጌቲ ኬዚዲ ባንታ ዛዋ ቦላ ኤቂዲ ናጎ ኦይኪዳ።
2KI 3:22 ዎንቴꬃ ጋላስ ማላዶ ዎንታራ ኢስቲ ዴንዲሺን ሃꬃ ቦላ ዎꬊዳ ጻልቄይ ጾልቂዴስ፤ ፒንꬃን ዲዛ ሞኣቤ ዴሬዛስ ኣይፌን ሃꬂ ሱꬃ ማላ ዞኢ ቤቲዴስ።
2KI 3:23 ሄሳ ጊሻስ ኢስታስ፥ «ሄሲ ሱꬃኮ! ሲꬌይ ባይንዳ ካዎቲ ባ ጋርሳን ኦሌቲዲ ኢሶይ ኢሳ ሹኪዳ፤ ሄሳ ጊሻስ ሞኣቤ ኣሳዉ! ዲኦ ሺሻናስ ሲሚቴ» ጊዳ።
2KI 3:24 ሞኣቤ ኣሳይ ኢስራኤሌ ኣሳይ ዲዛሶ ኬዚሺን ኢስራኤሌ ኣሳይ ዴንዲዲ ኢስታ ኦሊዴስ፤ ሞኣቤቲ ኢስታ ሲንꬃፌ ባቃቲዳ፤ ሄሳፌ ጉዬ ኢስራኤሌ ኣሳይ ሞኣቤ ቦላ ዎራጂዲ ኢስታ ዲፒ ሂስቲዴስ።
2KI 3:25 ኢስታ ካታማታ ሙሌራ ꬋይሲዳ፤ ሎኦ ካꬃ ጋዴቲካ ሹቻን ካሜታና ጋካናስ ኢሶይ ኢሶይ ኢሲ ኢሲ ሹች ጋዴዛን ዬጊዴስ፤ ፑልቶታካ ሙሌራ ቱጪዳ፤ ሎኦ ሎኦ ሚꬃታ ኡባካ ቃንጺ ቃንጺ ዬጊዳ፤ ቂሬ-ሄሬሴቴ ጌቴቲዛራ ጻላ ባ ሹቻራ ኣታዱስ፤ ኢዞ ጊዲኮካ ያንባርሻን ኦሌቲዛ ኦላንቻቲ ጊዶꬂዲ ኦሊዳ።
2KI 3:26 ሞኣቤ ካዎይ ኢዛ ኦላ ኣሳይ ጾኔታናይሳ ኤሪዳ ማላ ጊꬃ ማሻ ጊጺዳ 700 ኣስ ባናራ ኤኪዲ ኤዶሜ ካዎይ ዲዛሶ ሜንꬂ ጌላናስ ዳፌቲዴስ፤ ጊዶ ኣቲን ኢስቲ ጊዳ ማላ ኢስታስ ሃኒቤና።
2KI 3:27 ሄሳፌ ጉዬ ኢዛፔ ካሊ ካዎታናይሳ ባስ ባይራ ናዛ ኤኪ ቢዲ ካታማይ ጊምቤዛ ቦላ ጹጌቲዛ ያርሾ ሂስቲ ያርሺዴስ፤ ኢስራኤሌ ቦላ ዎልቃማ ሃንቆይ ጋኪዴስ፤ ሂስቲን ኢስቲ ሄፔ ኬዚዲ ጉዬ ባ ዴሬ ሲሚዳ።
2KI 4:1 ናቤታ ማባራ ጋርሳፌ ኢሳ ማቼያ፥ «ኔስ ሃጋዚዛ ታ ኣዚናይ ሃይቂዴስ፤ ኢዚ ጎዳስ ያዪዛ ኣስ ጊዲዳይሳ ኔ ኤራሳ፤ ሃኢ ጊዲኮ ኣጮ ጎዳይ ታ ኣቱማ ናይታ ናምኣታካ ባስ ኣይሌ ሂስቲ ኤኪ ባናስ ዪ ኡቲዴስ» ጋዳ ኤልሳኤስ ዋሳዱስ።
2KI 4:2 ኤልሳኢካ ኢዚስ፥ «ሂስቲን ታ ኔስ ኣይ ኦꬃና ማላ ኮያይ? ኔሶን ኣዚ ዲዛኮ ኣኔ ታስ ዮታ» ጊዴስ። ኢዛካ ኢዛስ፥ «ታስ ኔ ኦሳንቻይስ ጉꬃ ዛይቴፔ ኣቲን ታሶን ሃራይ ኣይኮይካ ዴና» ጋዱስ።
2KI 4:3 ኤልሳኢካ ኢዚስ፥ «ሂስቲኮ ኔኒ ሃኢ ባዳ ኔ ሾሮታ ኡባታ ሶፔ ጉꬅ ጊዶንታ ዳሮ ኦቶታ ጋርጻ ሺሻ።
2KI 4:4 ኔ ናይታ ኡባታራ ሶ ጌላዳ ካሬ ኢንቴ ቦላ ጎርዳ፤ ዛይቴዛካ ኔ ጋርጻ ኤሂዳ ኦቶታ ኡባን ዱቃ፤ ኢሲ ኢሲ ኦቶይ ኩሚዳ ማላ ኢሲ ባጋን ዎꬃ» ጊዴስ።
2KI 4:5 ሄሳ ጊሻስ ኢዛ ናቤዛ ሄን ኣጋ ባዳ ሶ ጌላዳ ካሬ ባ ቦላኔ ባ ናይታ ቦላ ጎርዳዱስ፤ ናይቲ ኢዚስ ኦቶታ ሺሺን ኢዛ ዛይቴዛ ቲጌꬅ ዶማዱስ።
2KI 4:6 ኦቶቲ ኡባይ ኩሚዳፔ ጉዬ ኢዛ ባ ናዛ፥ «ሃራ ኦቶ ታስ ኤካ ያ!» ጋዱስ። ኢዚካ ዛሪዲ፥ «ሃራ ኦቶይ ባዋ» ጊዴስ፤ ሄሳፌ ጉዬ ዛይቴዚ ጎጊዛይሳ ኣጊዴስ።
2KI 4:7 ኢዛካ ባዳ ሄሳ ጾሳ ናቤዛስ ዮታዱስ፤ ኢዚ ኢዚስ፥ «ኔ ባዳ ዛይቴዛ ባይዛዳ ኔ ኣጮዛ ቃንጻ፤ ኔኒ ኣጮዛ ቃንጺን ኣቲዳይሲ ኔሲኔ ኔ ናይታስ ቃላባ ጊዶ» ጊዴስ።
2KI 4:8 ኢሲ ጋላስ ኤልሳኢ ሱኔሜ ቢዴስ፤ ሄን ኢሲ ዱሬ ማጫሲ ዳራ ዳዉስ፤ ኤልሳኢ ኢዚ ሶን ቁማ ማና ማላ ሚንꬃ ዎሳዱስ፤ ኢዚ ካሴ ሄራ ኣꬊ ቢዛ ዎዴ ቁማ ማናስ ኢዚ ሶ ጌሌስ።
2KI 4:9 ሄ ማጫሳያ ባ ኣዚናስ፥ «ሃይሲ ኡባ ዎዴ ኑ ፔንጌራ ኣꬊ ቢዛ ኣዴዚ ጌሺኔ ጾሳ ኣስ ጊዲዳይሳ ታ ኤራይስ።
2KI 4:10 ሄሳ ጊሻስ ቦላ ፖቄን ኢሲ ጉꬃ ኪፊሌይን ኑ ኢዛስ ሂꬃ፥ ጻራጴዛ፥ ኦይዴኔ ፓኖሴ ጊግሲዲ ሄን ዎꬆስ፤ ኢዚ ኑኮ ዪዛ ዎዴ ኡባን ኢዛስ ሼምፖሶ ጊዳና» ጋዱስ።
2KI 4:11 ኢሲ ጋላስ ኤልሳኢ ዪዲ ባ ሼምፒዛ ኪፊሌይን ጌሊዲ ሼምፓናስ ጌዲ ጊዴስ።
2KI 4:12 ባ ኣይሌዛ ጊያዜ፥ «ባዳ ሱኔሜ ማጫሳዮ ጼይጋ» ጊዴስ። ኢዚ ኢዞ ጼይጊን ያዳ ኢዛ ሲንꬃን ኤቃዱስ።
2KI 4:13 ኤልሳኢ፥ «ጊያዜስ፥ ‹ኔኒ ኑ ጊሻስ ጋዳ ዳሮ ዋያዳሳ፤ ኔስ ኣዚ ኦሴታና ማላ ኮያይ? ካዎዛስ ጊዲን ኦላንቻታ ኣዛዚዛይሳስ ኑ ኔ ጊሻስ ዮታና ሚሺ ዲዜ?› ጋዳ ኢዞ ኦይቻ» ጊዴስ። ማጫሳያካ ዛራዳ፥ «ታኒ ታ ዳቦ ጊዶን ዳይስ» ጋዱስ።
2KI 4:14 ኤልሳኢካ ጊያዜስ፥ «ሂስቲን ኢዚስ ኣይ ኦꬃኔ?» ጊዲ ኦይቺዴስ፤ ጊያዜይካ፥ «ኢዚስ ዬሎይ ዴና፤ ኢዚ ኣዚናዚ ጬጊዴስ» ጊዴስ።
2KI 4:15 ኤልሳኢካ ኢዛስ፥ «ሂስቲኮ ኣኔ ኔኒ ኢዞ ሃ ጼይጋ» ጊዴስ፤ ኢዚ ኢዞ ጼይጊን ኢዛ ያዳ ፔንጌ ቦላ ኤቃዱስ።
2KI 4:16 ኤልሳኢካ ኢዚስ፥ «ኔኒ ላይꬅ ሃኒ ዎዴ ኣቱማ ና ኢዲማና» ጊዴስ። ኢዛካ ኢዛስ፥ «ጊዴና ታ ጎዶ! ኔኖ ጾሳ ኣሶ! ኔኒ ኔ ኦሳንቻይስ ታስ ዎርዶቶንታ ማላ» ጋዱስ።
2KI 4:17 ማጫሳያካ ቃንꬃታዱስ፤ ኤልሳኢ ኢዚስ ዮቲዳ ማላካ ኢዚ ጊዳ ዎዴን ኣቱማ ና ዬላዱስ።
2KI 4:18 ናዚካ ዲጪዴስ፤ ኢሲ ጋላስ ኢዛ ኣዋይ ካꬅ ሺሺዛይታራ ዲሺን ናዚ ሄ ቢዴስ።
2KI 4:19 ኢዚ ባ ኣዋስ፥ «ታ ሁኤ! ታ ሁኤ!» ጊዴስ። ኣዋዚካ ባ ኣይሌዛስ፥ «ናዛ ባኣ ኤፋዳ ኢዛ ኣዬይኮ ጋꬃ» ጊዴስ።
2KI 4:20 ኣሽካራዚካ ናዛ ባኢ ኤፊዲ ኣዬይኮ ጋꬂዴስ፤ ናዚ ሴታ ጋላስ ጋካናስ ባ ኣዬይ ኪኦን ኡቲዴስ፤ ሄሳፌ ጉዬ ሃይቂዴስ።
2KI 4:21 ኢዛ ኣያ ፑዴ ኬዛዳ ጾሳ ናቤዛ ሂጻን ኢዛ ኢሺሳዱስ፤ ካሬ ኢዛ ቦላ ጎርዳዳ ኬዛዱስ።
2KI 4:22 ሄሳፌ ጉዬ ባ ኣዚና ጼይጋዳ፥ «ታኒ ጾሳ ናቤዛኮ ኤሶን ጋካዳ ሲማና ጋካናስ ኢሲ ኦሳንቻኔ ኢሲ ሃሬ ታስ ዬዳርኪ!» ጋዱስ።
2KI 4:23 ኢዚ ኣዚናዚካ፥ «ኔ ሃች ኢዛኮ ባናስ ኣይስ ኮያዲ? ሃች ኣጊና ጼሮ ዎይኮ ሳምባታ ጋላስ ጊዴና» ጊዴስ። ኢዛካ ዛራዳ፥ «ኤ ሄሲ ሊኬሺን ታ ቡስ ባና» ጋዱስ።
2KI 4:24 ሄሳፌ ጉዬ ሃሬዛ ኮራ ኤካዳ ኦሳንቻዛ፥ «ኤሌ ኤሌ ላጋ፤ ታ ኔስ ዮቶንታ ዲሺን ሎዱ ሂስቶፋ» ጋዱስ።
2KI 4:25 ሄሳ ጊሻስ ኢዛ ጾሳ ናቤዚ ዲዛሶ ፑዴ ቃርሜሎሴ ዙማ ቦላ ኬዛዱስ። ጾሳ ናቤዚካ ኢዞ ሃሆን ቤኢዲ ባ ኦሳንቻ ጊያዜ፥ «ሴኪ ሱኔሜ ማጫሳዮ ቤያይ!
2KI 4:26 ኣኔ ኢዚኮ ዎጻ ባዳ፥ ‹ኣዜ! ሎኦ ጊዴኔ? ኔ ኣዚናይ ሎኦ ጊዴኔ? ኔ ናዚ ሎኦ ጊዴኔ?› ጋዳ ኢዞ ኦይቻ» ጊዴስ። ኢዛካ ኢዛስ፥ «ኡባይካ ሎኦ» ጋዱስ።
2KI 4:27 ኢዛ ጾሳ ናቤዚ ዲዛ ዙማ ቦላ ጋኪዳ ማላ ኢዛ ቶ ቦላ ጻጼታዱስ፤ ጊያዜይ ኢዞ ዬዲሳናስ ቢሺን ጾሳ ናቤዚ ጊያዜ፥ «ኢዛ ዳሮ ኡንኤቲዳ ጊሻስ ኣጋ፤ ኢዞ ቦቾፋ፤ ጎዳይ ሃይሳ ታፔ ኣዛስ ጌንꬂዳኮ ሃይሲ ታስ ጌሊቤና» ጊዴስ።
2KI 4:28 ኢዛ፥ «ታ ጎዶ! ታ ኔና ታስ ና ኢማ ጋዳ ኦይቻዲና? ጮ ሃዳ ሂዶታ ኔ ታስ ኢሞንታ ማላ ታ ኔስ ዮታቤኪና?» ጋዱስ።
2KI 4:29 ኤልሳኢ ጊያዜስ፥ «ሂስቲኮ ኔኒ ኔ ጊꬅ ሚንꬃ ጊጻዳ ሃይሳ ታ ጉፌዛ ኤካዳ ዎጻ፤ ኦጌ ቦላ ኣሴ ዴሚኮካ ሳሮኮፋ፤ ኦኒካ ኔና ሳሮ ጊኮ ዛራ ሳሮኮፋ፤ ሃይሳ ታ ጉፌዛ ኤፋዳ ናዛ ሲንꬃን ዎꬃ» ጊዴስ።
2KI 4:30 ናዛ ኣያ ቃሴ፥ «ዴኦ ጎዳይ ቤዪን ኔ ኣሾ! ታ ኔና ኣጋዳ ሙሌካ ቢኬ» ጋዱስ፤ ሄሳ ጊሻስ ኤልሳኢ ዴንዲዲ ኢዞ ካሊዴስ።
2KI 4:31 ጊያዜይካ ኢስታፌ ሲንꬃቲ ቢዲ ጉፌዛ ናዛ ሲንꬃን ዎꬂዴስ፤ ጊዶ ኣቲን ኣይኮ ቃላይ ሲዬቲቤና፤ ማላታይካ ቤቲቤና፤ ሄሳ ጊሻስ ጊያዜይ ጉዬ ኤልሳኤኮ ሲሚ ቢዲ፥ «ናዚ ቤጊቤና» ጊዴስ።
2KI 4:32 ኤልሳኢ ሶ ጌሊዲ ናዚ ሃይቂዲ ኢዛ ሂꬃ ቦላ ኢቺ ዲዛይሳ ቤኢዴስ።
2KI 4:33 ኢዚ ጊዶ ጌሊዲ ካሬዛ ባ ቦላኔ ናዛ ቦላ ጎርዲዲ ጎዳ ዎሲዴስ።
2KI 4:34 ሂꬃ ቦላ ኬዚዲ ናዛ ቦላ ዛቁሊዲ ባ ዶና ኢዛ ዶናራ፥ ባ ኣይፌ ኢዛ ኣይፌራ፥ ባ ኩሼ ኢዛ ኩሼራ ጋꬂ ዎꬂዴስ፤ ናዛ ቦላ ሙሌራ ኢዚ ዛቁሊን ናዛ ቦላይ ሆኢ ሆኢ ቢዴስ።
2KI 4:35 ኤልሳኢ ዴንዲዲ ኬꬃ ጊዶን ያኔ ሃ ሲሜሬቲዳፔ ጉዬ ሂꬃን ኬዚዲ ቃሴካ ናዛ ቦላ ሙሌራ ዛቁሊዴስ፤ ናዚ ላፑንቶ ꬊሺን ኢዛ ኣይፌቲ ጼሊዳ።
2KI 4:36 ኤልሳኢ ጊያዜ ጼይጊዲ፥ «ሱኔሜ ማጫሳዮ ሃ ጼይጋ» ጊዴስ፤ ኢዚካ ኢዞ ጼይጊዴስ፤ ኢዛ ያ ጋኪዳ ማላ፥ «ሄይ ኔ ናዛ ኤካ» ጊዴስ
2KI 4:37 ኢዛካ ጌላዳ ኢዛ ቶ ቦላ ኩንዳዱስ፤ ዱጌ ቢታን ጉፋናዳ ባ ናዛ ኤካ ኬዛዱስ።
2KI 4:38 ኤልሳኢ ኣጊ ጌልጌላ ሲሚዴስ፤ ሄ ዴሬዛን ኮሻይ ዴስ። ናቤታ ማባራይ ኢዛ ሲንꬂ ሺቂ ዲሺን ኤልሳኢ ባ ኦሳንቻዛ፥ «ዎጋ ዲስቴ ታማ ቦላ ዎꬃዳ ሃይሳ ኣሳስ ዎጼ ካꬃ» ጊዴስ።
2KI 4:39 ኢስታ ጋርሳፌ ኢሶይ ሳንꬄ ሚሳቲዛ ሃይꬃታ ማጻናስ ጌዴ ዴምባ ኬዚዲ ባዞን ሞኪዛ ቱራ ዴሚዲ ሄ ቱራዛፔ ጎሴ ሚሳቲዛ ኣይፌ ባ ማይኦን ማጺ ኤኪዲ ሲሚዴስ፤ ኢዛ ኣንጪዲ ዲስቴን ኬሚዴስ ሺን ኢዚ ኣዛኮ ኦኒካ ኤሪቤና።
2KI 4:40 ኣሳይ ማና ማላ ዎጼዚ ዱቄቲ ኬዚዴስ፤ ኣሳይ ቡሮ ባꬊዳ ማላ፥ «ጾሳ ናቤዞ! ዲስታ ጊዶን ዎꬊዛ ማርዜይ ዴስ!» ጊዲ ዋሲዳ፤ ማናስካ ዳንዳይቤቴና።
2KI 4:41 ኤልሳኢካ፥ «ኣኔ ታስ ꬊሌ ኤኪ ዪቴ» ጊዴስ። ሄ ꬊሌዛካ ኤኪዲ ዲስቴዛን ጉጂዲ፥ «ኣሳይ ማና ማላ ኣሳስ ኢሚቴ» ጊዴስ። ዲስቴዛን ቆሆ ጋꬂዛ ሚሺ ቤቲቤና።
2KI 4:42 ኢሳዴይ ሻቻ ባንጋፌ ካጺዳ ናምኡ ታሙ ቁንቶኔ ጉꬃ ቲያ ቄሪ ሉካሞን ኤኪዲ ባኣሊ-ሻሊሻፔ ጾሳ ናቤኮ ዪዴስ። ኤልሳኢካ ባ ኣይሌዛስ፥ «ኣሳይ ማና ማላ ኣሳስ ኢማ» ጊዴስ።
2KI 4:43 ኣሽካራዚካ፥ «ታኒ ሃኖ ዎስታ ጼቱ ኣሳስ ጋꬆ?» ጊዲ ኢዛ ኦይቺዴስ። ኤልሳኢ ጊዲኮ ኢዛስ፥ «ኣሳይ ማና ማላ ኢስታስ ኢማ፤ ጎዳይ፥ ‹ኢስቲ ሚ ካሊን ኢስታፌ ፓላሃና› ጌስ» ጊዴስ።
2KI 4:44 ሄሳፌ ጉዬ ኢዚ ኣሳስ ሺሺዴስ፤ ጎዳይ ጊዳ ማላካ ኣሳይ ሚ ካሊን ፓላሂ ኣቲዴስ።
2KI 5:1 ሄ ዎዴ ኒኢማኔይ ኣራሜ ካዎ ኦላንቻታ ኣዛዚዛይሳ፤ ጎዳይ ኢዛ ባጋራ ኣራሜ ዴሬይ ጾኖ ዴማና ማላ ኦꬂዳ ጊሻስ ኢዚ ባ ጎዳ ኣቻን ዳሮ ጊታኔ ቦንቼቲዳ ኣሳ። ኢዚ ኦላ ቃራ ጊዲኮካ ኢንቺራቻ ሃርጌይ ኢዛ ቦላ ዎꬊዴስ።
2KI 5:2 ፓንጋቲ ኣራሜፔ ኬዚዲ ኢስራኤሌ ዴሬፔ ኢሲ ጌላኦዮ ዲኢ ኤፊን ኢዛ ኒኢማኔሲኔ ማቼይስ ሃጋዛዉስ።
2KI 5:3 ኢዛ ባ ጎዳቴይስ፥ «ታ ጎዳይ ሳማሪያን ዲዛ ናቤዛኮ ቢዲ ኢዛ ዴሚዳኮ ኢዚ ሃይሳ ኢንቺራቻ ሃርጌዛፔ ኢዛ ፓꬃናኮሺን» ጋዱስ።
2KI 5:4 ኒኢማኔይካ ባ ጎዳዛኮ ቢዲ ኢስራኤሌ ዴሬፔ ዪዳ ናያ ኢዛስ ዮቶይሳ ዛሪ ዮቲዴስ።
2KI 5:5 ኣራሜ ካዎዚካ ኢዛስ፥ «ሂስቲኮ ኔ ሃኢ ኤሶን ባ፤ ታኒካ ኢስራኤሌ ካዎስ ዳብዳቤ ጻፋና» ጊዴስ፤ ሄሳ ጊሻስ ኒኢማኔይ ኢዛስ 30,000 ሳቂሌ ቢራ፥ 6,000 ሳቂሌ ዎርቃኔ 10 ኩሜꬃ ማይኦ ኤኪ ቢዴስ።
2KI 5:6 ኢስራኤሌ ካዎዛስ ኢዚ ኤኪ ቢዛ ዳብዳቤዚ፥ «ኔ ኢዛ ኢንቺራቻ ሃርጌዛፔ ፓꬃና ማላ ታኒ ሃይሳ ዳብዳቤዛራ ጋꬃ ታ ኦሳንቻ ኒኢማኔ ኔኮ ዬዳዲስ» ጊዛዛ።
2KI 5:7 ኢስራኤሌ ካዎዚ ዳብዳቤዛ ናባቢዳ ማላ ባ ማይኦ ዳኪዲ «ታኒ ኢዛ ኢንቺራቻ ሃርጌፌ ፓꬃና ማላ ኢዚ ታኮ ዬዳናስ ታኒ ዎꬋዳ ፓꬃና ዳንዳይዛ ጾሴ? ሃይሳ ኢዚ ታናራ ኦዬታና ኮይዛይሳ ቤኢቴ» ጊዴስ።
2KI 5:8 ጾሳ ኣሲ ኤልሳኢ ኢስራኤሌ ካዎይ ባ ማይኦ ዳኪዳይሳ ሲዪዳ ማላ፥ «ኔኒ ኔ ማይኦ ኣዛስ ዳካዲ? ኣዴዚ ሃ ታኮ ዮ፤ ሄሳፌ ጉዬ ናቤይ ኢስራኤሌን ዲዛይሳ ኢዚ ኤራና» ጊዛ ኪታ ዬዲዴስ።
2KI 5:9 ሄሳ ጊሻስ ኒኢማኔይ ባ ፓራ-ጋሬን ኡቲዲ ኤልሳኤ ኬꬃ ፔንጌ ጋኪ ኤቂዴስ።
2KI 5:10 ኤልሳኢካ ኢዛ፥ «ባዳ ዮርዳኖሴ ሻፋን ላፑንቶ ጌላ ሜጬታ፤ ኔ ኣሾይ ፓጻና፤ ኔካ ጌያና» ጊዲ ኢዛስ ዮታና ማላ ኣስ ኪታ ዬዲዴስ።
2KI 5:11 ኒኢማኔይ ጊዲኮ ሃንቄቲዲ፥ «ኢዚ ታኮ ዪ ኤቂዲ ጎዳ ባ ጾሳ ሱንꬅ ጼይጊዲ ኢዚ ባ ኩሼን ታ ኢንቺራቻዛ ቦሼሬꬂዲ ታና ኢንቺራቻ ሃርጌዛፔ ፓꬃንዴ ጋ ቆፓዲስ።
2KI 5:12 ሃይሳስ ሃይሳስ ጊዲኮ ዳማስቆ ሻፋቲ ኣማናይኔ ፋርፋሬይ ኣዋንካ ዲዛ ኢስራኤሌ ዴሬ ሃꬃታፔ ሎኤቴኔ? ሜጬቴꬂ ሜጬቴꬅ ጊዲኮ ኢስታን ሜጬታ ጌይኪና?» ጊሼ ሃንቄቲ ሲሚዴስ።
2KI 5:13 ኒኢማኔ ኣሽካራቲ ኢዛኮ ሺቂዲ፥ «ጎዶ ናቤዚ ሃይሳፌካ ጊታ ሚሽ ኔስ ዮቲዳኮ ኔኒ ኢዚ ጊዳይሳ ኦꬂኪ? ሂስቲን ኔና፥ ‹ሃኢ ሜጬታዳ ጌያ› ጊን ኢዛን ኔና ሜቶꬂዳይ ኣዜ?» ጊዳ።
2KI 5:14 ሄሳ ጊሻስ ኒኢማኔይ ዱጌ ሻፋን ዎꬊዲ ጾሳ ናቤዚ ኢዛስ ዮቲዳ ማላ ዮርዳኖሴን ላፑንቶ ጌሊ ኬዚዴስ፤ ኢዛ ቦላይካ ጌዪዲ ጉꬃ ና ቦላ ማላ ጊዲዴስ።
2KI 5:15 ሄሳፌ ጉዬ ኒኢማኔይ ባና ካሊ ዪዳ ኣሳ ኡባራ ጌዴ ጾሳ ናቤኮ ሲሚ ቢዴስ፤ ኢዛ ሲንꬃን ኣꬊ ኤቂዲ፥ «ሄኮ ኢስራኤሌ ዴሬንፔ ኣቲን ኩሜꬃ ኣላሜን ኡባን ሃራ ጾሲ ባይንዳይሳ ታኒ ኤራዲስ፤ ሄሳ ጊሻስ ኔኒ ታፔ ኔ ኣይሌዛፔ ኢሞታ ኤካና ማላ ታ ኔና ዎሳይስ» ጊዴስ።
2KI 5:16 ናቤዚካ ኢዛስ፥ «ታኒ ኢዛስ ሃጋዚዛ ዴኦ ጎዳይ ቤዪን ታ ኔፔ ሄሳ ኤኪኬ» ጊዴስ። ኒኢማኔይ ኢዛ ሜቶꬂ ዎሲንካ ኤልሳኢ ኢዛ ኢሞታ ኤኪቤና።
2KI 5:17 ኒኢማኔይ ኢዛስ፥ «ኔኒ ታ ኢሚዛ ኢሞታ ኤኮንታ ኢጺኮ፥ ጎዳፔ ኣቲን ሃራ ኣይ ጾሳስካ ጹጌቲዛ ያርሾ ዎይኮ ሃራ ያርሾ ታ ያርሾንታ ጊሻስ ናምኡ ባቁሎ ጫና ቢታ ታ ኤካ ባናይሳ ኔ ታና ዲጎንታ ማላ ታ ኔና ዎሳይስ።
2KI 5:18 ጊዶ ኣቲን ጎዳይ ኢሲ ሚሻ ጊሻስ ታና ኔ ኣይሌዛ ማሮ፤ ሄሲካ ታ ጎዳይ ጎይናናስ ኣርሞኔ ኤቃ ጾሳ ሶ ጌሊሺን ታ ቄሴ ኢዚ ኦይኪ ማዲሼ ኢዛይሳꬆ ታኒካ ሄን ጎይኒኮ ኣርሞኔ ኤቃ ጾሳ ሶን ታ ጎይኒዳይሳስ ጎዳይ ታና ኔ ኣይሌዛ ማሮ» ጊዴስ።
2KI 5:19 ኤልሳኢካ ኢዛ፥ «ሳሮን ባ» ጊዴስ። ኒኢማኔይ ኢዛፔ ጉꬅ ሃኪ ቢዳ ማላ፥
2KI 5:20 ጾሳ ናቤዛ ኣሽካራ ጊያዜይ፥ «ታ ጎዳይ ሃይሲ ኣራሜ ዴሬ ኣስ ኒኢማኔይ ኢዛስ ኤሂዳይሳ ኤኮንታ ጮ ሜላ ዬዲዴስ፤ ዴኦ ጎዳይ ቤዪን ታ ኢዛ ካላ ባዳ ኢዛፔ ኢሲ ሚሽ ኤካናስ ቤሴስ» ጊ ቆፒዴስ።
2KI 5:21 ሄሳ ጊሻስ ጊያዜይ ኒኢማኔ ካሊ ቢዴስ፤ ኒኢማኔይ ጊያዜይ ኢዛኮ ዎꬃን ካሊ ዪዛይሳ ቤኢዲ ኢዛ ሃሳይሳናስ ፓራ-ጋሬዛፔ ጋዴን ዎꬊዲ፥ «ኣዜ ሎኦ ጊዴኔ?» ጊዲ ኢዛ ኦይቺዴስ።
2KI 5:22 ጊያዜይካ ኢዛስ፥ «ኡባይካ ሎኦሺን ታ ጎዳይ ኔና፥ ‹ናቤታ ማባራፔ ናምኡ ናቴꬃቲ ቦላ ኤፍሬሜ ጌዜፌ ሃ ታኮ ኣይኮካ ታ ቆፖንታ ዪዳ ጊሻስ 3,000 ቢራኔ ናምኡ ኩሜꬃ ማይኦ ኢስታስ ኢማ› ጋዳ ዮታ» ጊዲ ታና ኔኮ ኪቲዴስ።
2KI 5:23 ኒኢማኔይካ «ሂስቲኮ 6,000 ሳቂሌ ቢራ ሄይ ኤካ» ጊዲ ጊያዜ ሚንꬂ ዎሲዴስ። ሄሳፌ ጉዬ 6,000 ሳቂሌ ቢራ ኤኪ ናምኡ ካራጺቴን ጌልꬂ ቃቺዲ ናምኡ ኩሜꬃ ማይኦዛ ጉጂ ኤኪዲ ናምኡ ኣይሌታ ኦይꬂዴስ። ኢስቲካ ሄሳ ቶኪ ኤኪዲ ጊያዜፔ ሲንꬄ ኣꬊ ቢዳ።
2KI 5:24 ጊያዜይ ቢዲ ፑዴ ዙምቡላ ቦላ ጋኪዳ ማላ ሚሻዛ ኣይሌታፔ ኤኪዲ ባ ኬꬃን ዎꬂዴስ፤ ሂስቲዲ ኣሳታ ሞይዚን ኣሳቲ ሲሚ ቢዳ።
2KI 5:25 ሄሳፌ ጉዬ ጊያዜይ ጌሊዲ ባ ጎዳ ኤልሳኤ ሲንꬃን ኣꬊ ኤቂዴስ። ኤልሳኢካ ኢዛ፥ «ጊያዜ ኔ ኣዋ ባዲ?» ጊዲ ኢዛ ኦይቺዴስ። ጊያዜይካ ኢዛስ፥ «ታ ኔ ኣይሌይ ኣዋካ ባቤኬ» ጊ ዛሪዴስ።
2KI 5:26 ጊዶ ኣቲን ኤልሳኢ ኢዛስ፥ «ሄ ኣዴዚ ኔናራ ጋይታናስ ኢዚ ባ ፓራ-ጋሬዛፔ ዎꬊሺን ታ ኣያናይ ኔናራ ቢቤኔ? ሂስቲን ሃይሲ ዎዴዚ ሚሼኔ ማይኦ፥ ዎጋራ ሚꬂኔ ዎይኔ ቶኪዛሶሆ፥ ዶርሳ ዉዴኔ ሜሄ ዉዴ፥ ኣቱማኔ ማጫ ኣይሌታ ኤኪዛ ዎዴ?
2KI 5:27 ሄሳ ጊሻስ ኒኢማኔ ኢንቺራቻይ ኔ ቦላ ኣꬋና፤ ሜርና ጋካናስ ኔስ ዜሬꬃፌ ዜሬꬃን ኣꬋና» ጊዴስ። ሄሳፌ ጉዬ ጊያዜይ ኤልሳኤ ሲንꬃፌ ኬዚ ቢዴስ፤ ኢንቺራቻ ሃርጌይ ኢዛ ቦላ ሻቻ ማላ ቦꬂዴስ።
2KI 6:1 ናቤታ ማባራይ ኤልሳኤ፥ «ሄኮ ሃኢ ኑስ ኔ ሲንꬃን ኡቲዛሶይ ኡንኢዴስ፤
2KI 6:2 ሄሳ ጊሻስ ኑኒ ዱጌ ዮርዳኖሴ ቢዲ ኑስ ኢሲ ኢሲ ቱስ ቃንጺ ኤኪ ያና፤ ኑ ኢዛን ዳናስ ኬꬅ ኬጻና» ጊዳ፤ ኢዚካ ኢስታስ፥ «ኤሮ ቢቴ» ጊዴስ።
2KI 6:3 ኢስታ ጊዶፌ ኢሳዴይ ኢዛ፥ «ኔኒ ኔ ኦሳንቻታራ ኢሲፌ ቢኪ?» ጊዴስ። ኤልሳኢካ፥ «ኤሮ ታ ባና» ጊዴስ።
2KI 6:4 ኢዚ ኢስታራ ኢሲፌ ቢዴስ፤ ኢስቲካ ቢዲ ዮርዳኖሴን ሚꬅ ቃንጾ ኦይኪዳ።
2KI 6:5 ኢስታ ጋርሳፌ ኢሶይ ሚꬃ ቃንጺሺን ካልታዚ ኩሼፔ ኬሲ ኤኪዲ ሃꬃ ጊዶ ጌሊዴስ፤ ኢዚካ፥ «ታ ጎዶ ታኒ ፓላን ጋካዲስ! ታኒ ኣሳፔ ጋርጻ ኤኪዳ ካልታኮ!» ጊ ዋሲዴስ።
2KI 6:6 ኤልሳኢካ፥ «ኣዋ ባጋራ ጌሊዴ?» ጊዲ ኢዛ ኦይቺዴስ። ኢዚ ጌሊዳሶዛ ቤሲን ኤልሳኢ ሚꬅ ሜንꬂ ኤኪዲ ዱጌ ሃꬃ ጊዶ ዬጊዲ ካልታዚ ፑዴ ሃꬃ ቦላ ቶኬታና ማላ ኦꬂዴስ።
2KI 6:7 ሄሳፌ ጉዬ፥ «ኣኔ ሃኢ ኬሳዳ ኤካ» ጊዴስ፤ ኣዴዚ ኩሼ ዬዲዲ ካልታዛ ኤኪዴስ።
2KI 6:8 ሄ ዎዴ ኣራሜ ካዎይ ኢስራኤሌራ ኦሌቴስ፤ ኢዚ ባ ኦላንቻታ ሃላቃታራ ኢሲፌ ዞሬቲዳፔ ጉዬ፥ «ሃይሳን ታ ኡታና» ጊዴስ።
2KI 6:9 ጾሳ ናቤዚ፥ «ኣራሜ ኣሳይ ሄሳራ ዱጌ ዎꬊዳ ጊሻስ ሄራ ኔ ኣꬎንታ ማላ ናጌታ» ጊዲ ኢስራኤሌ ካዎዛስ ኪታ ዬዲዴስ።
2KI 6:10 ሄሳ ጊሻስ ኢስራኤሌ ካዎዚ ጾሳ ኣሲ ኢዛስ ዮቲዳሶሆዛ ጾሞሳና ማላ ኣስ ኪቲዴስ፤ ኤልሳኢካ ካዎዚ ሄይታንታ ማላ ሶሆታፔ ባና ናጋና ማላ ዛሪ ዛሪ ቆፍሲዴስ።
2KI 6:11 ሄሲ ኣራሜ ካዎዛ ኬሂ ሼኔቺዳ ጊሻስ ባ ኦላንቻታ ኣዛዚዛይታ ባኮ ጼይጊ ሺሺዲ፥ «ኑ ጊዶፌ ኢስራኤሌ ካዎራ ላጌቲዛ ኣሲ ዲዛይሳ ኢንቴ ታስ ኣይስ ዮቴኬቲ?» ጊ ኦይቺዴስ።
2KI 6:12 ኦላንቻታ ኣዛዚዛይታፔ ኢሶይ፥ «ታ ጎዳ ካዎ! ኑ ባጋፌ ኦኒካ ዴና፤ ጊዶ ኣቲን ኔኒ ኔ ኢልፒኔን ዳሼ ሃሳይዛይሳ ኢሲኖካ ኣሾንታ ኢስራኤሌ ካዎስ ዮቲዛ ኣሲ ኢስራኤሌ ዴሬን ናቤ ኤልሳኢ ዴስ» ጊዴስ።
2KI 6:13 ካዎዚካ፥ «ታኒ ኣስ ዬዳዳ ኢዛ ኦይꬃና ማላ ኢዚ ኣዋን ዲዛኮ ኢዚ ዲዛሶ ኮዪቴ» ጊዲ ኣዛዚዴስ። ሄሳፌ ጉዬ፥ «ኢዚ ዶታኔን ዴስ» ጊዛ ዎሬይ ኢዛኮ ጋኪዴስ።
2KI 6:14 ሄሳ ጊሻስ ኢዚ ፓራታ፥ ፓራ-ጋሬታኔ ዳሮ ኦላንቻታ ሄ ዬዲዴስ። ሄይቲካ ቢዲ ካታማዮ ኦማርስ ጊዶꬂዳ።
2KI 6:15 ጾሳ ናቤዛስ ኣይሌይ ዎንታራ ኢዚ ካሬ ኬዚሺን ፓራታኒኔ ፓራ-ጋሬታን ሚኒዳ ዎልቃማ ኦላንቻቲ ካታማዮ ዩዪ ኣꬊ ዲዛይሳ ቤኢዲ፥ «ጎዶ! ኑ ኣይ ኦꬂኮ ሎኦ?» ጊዲ ኦይቺዴስ።
2KI 6:16 ናቤዚካ፥ «ኑናራ ዲዛይቲ ኢስታራ ዲዛይታፔ ኣꬊዛ ጊሻስ ባቦፋ» ጊዴስ።
2KI 6:17 ኤልሳኢካ፥ «ኣቤት ጎዳዉ! ኢዚ ባ ኣይፌራ ቤኣና ማላ ኔ ኢዛ ኣይፌታ ዶያ» ጊ ዎሲዴስ፤ ጎዳይ ኢዛ ኣይሌዛ ኣይፌታ ዶይኢዴስ፤ ኢዚ ጼሊሺን ታማ ፓራቲኔ ፓራ-ጋሬቲ ኤልሳኤ ዩሾን ዙማን ኩሚዳይሳ ቤኢዴስ።
2KI 6:18 ኣራሜ ኦላ ኣሳይ ዱጌ ዎꬊዲ ኢዛኮ ዪሺን ኤልሳኢ ቤኢዲ፥ «ጎዶ! ኔ ሃይሳ ዴራ ቆቂሳ» ጊዲ ዎሲዴስ፤ ሄሳ ጊሻስ ኤልሳኢ ዎሲዳ ማላ ጎዳይ ኢስታ ቆቂሲዴስ።
2KI 6:19 ኤልሳኢካ ኢስታስ፥ «ኦጌይ ሃይሳራ ዴና፤ ካታማያካ ሃኖ ጊዲኩ፤ ታኒ ኢንቴና ኢንቴ ኮይዛዴኮ ካሌꬃ ጋꬃና፤ ሃ ታና ካሊቴ» ጊዴስ። ሄሳፌ ጉዬ ኢስታ ካሌꬂ ኤኪዲ ሳማሪያ ኤፊዴስ።
2KI 6:20 ኢስቲ ቢዲ ሄ ካታማዮ ጌሊን ኤልሳኢ «ጎዳዉ! ሃይቲ ጼላና ማላ ኔ ኢስታ ኣይፌ ዶያ» ጊዴስ። ጎዳይካ ኢስታ ኣይፌ ዶይዴስ፤ ኢስቲካ ባንቲ ሳማሪያ ጊዶን ዲዛይሳ ቤኢዳ።
2KI 6:21 ኢስራኤሌ ካዎዚ ኢስታ ቤኢዲ፥ «ታ ኣዋዉ! ታ ኢስታ ዎꬎ? ኢሲ ቦላ ዲፒ ሂስቶ?» ጊዲ ኤልሳኤ ኦይቺዴስ።
2KI 6:22 ኤልሳኢካ፥ «ዎꬎፓ፤ ኔ ማሻኒኔ ቶራን ዲኣ ኤሂዳይታ ዎꬋናስ ኔስ ቤሲዜ? ኣኔ ኔ ሃኢ ኢስታስ ማናዚኔ ኡያናዝ ኢማ፤ ኢስቲ ሚዲኔ ኡዪዲ ጌዴ ባ ጎዳኮ ቤቶ!» ጊዴስ።
2KI 6:23 ሄሳ ጊሻስ ጊታ ጊቢራ ኢስታስ ጊግሲን ሚዳፔኔ ኡዪዳፔ ጉዬ ጌዴ ኢስታ ጎዳኮ ኢስታ ሞይዚ ዬዲን ቢዳ። ኣራሜ ኦላንቻቲ ናምኣንꬆ ኢስራኤሌ ቦላ ዎራጂቤቴና።
2KI 6:24 ጉꬃ ዎዴፔ ጉዬ ኣራሜ ካዎ ቤኒ-ሃዳዴይ ባ ኦላንቻታ ኢሲ ቦላ ሺሺዴስ፤ ኬዚ ቢዲ ሳማሪያ ጊዶꬂዴስ።
2KI 6:25 ኢዚ ሄ ካታማዮ ጊዶꬂዳ ማላ ኢሲ ሃሬ ሁኤይ 80 ሳቂሌ ቢራ፥ ናምኡ ጼቱ ጊዲዛ ሃራጴ ሺያይ ኢቻሽ ሳቂሌ ቢራን ባይዜታና ጋካናስ ዴሬዛን ጊታ ኮሻይ ዴንዲዴስ።
2KI 6:26 ኢስራኤሌ ካዎዚ ጊምቤ ቦላራ ሄሜቲሺን ኢሲ ማጫሳያ ባ ቃላ ꬎቁ ሂስታዳ፥ «ታ ጎዳ ካዎ! ታና ማዳርኪ!» ጋዱስ።
2KI 6:27 ካዎዚካ ኢዚስ፥ «ጎዳይ ኔና ማዶንታ ታ ኔና ዎስታ ማዳና ዳንዳያዚና? ታ ኔና ማዳናይ ታ ካꬃ ባሌዛፔዬ ታ ዎይኔ ጉምኢዛሶሆፔ?» ጊ ዛሪዴስ።
2KI 6:28 ቃሴካ፥ «ኔና ሜቲዳይ ኣዜ?» ጊዲ ኢዞ ኦይቺዴስ፤ ኢዛካ ካዎዛስ፥ «ሃና ማጫሳያ ታና፥ ‹ኑኒ ሃች ኢሲፌ ማናስ ኔ ናዛ ሃ ኤካ ያ፤ ዎንቶ ቃሴ ታ ናዛ ኢሲፌ ማና› ጋዱስ።
2KI 6:29 ሂስቲን ታ ናዛ ዶይሲ ሚዶስ። ዎንቴꬃ ጋላስ ቃሴ ኑ ማና ማላ፥ ‹ኔ ናዛ ሃ ኤካ ያ› ታ ጊን ኢዛ ባ ናዛ ቆታ ዲጋዱስ» ጋዱስ።
2KI 6:30 ካዎዚካ ማጫሳያ ጊዛይሳ ሲዪዲ ባ ማይኢዳ ማይኦዛ ዳኪ ዬጊዴስ፤ ካሴ ኢዚ ጊምቤዛ ቦላራ ያኔ ሃ ሲሜሬቲሺን ኢዚ ባ ማይኢዳ ማይኦዛፔ ጋርሳራ ማቃ ማይኢዳይሳ ኣሳይ ቤኢዴስ።
2KI 6:31 ካዎዚካ፥ «ሳፋጼ ና ኤልሳኤ ቆꬌፔ ጩካ ዬጎንታ ኣይሲኮ ጾሲ ታ ቦላ ሄሳ ኦꬆ፤ ሄሳፌካ ቦላራ ኢታ ሚሽ ታ ቦላ ኦꬆ» ጊዲ ማንዲዴስ።
2KI 6:32 ሄ ዎዴ ኤልሳኢ ባ ሶን ዴስ፤ ጪማ ኣሳይካ ኢዛራ ዴስ። ካዎዚ ኢሲ ኣሲ ኢዛፔ ሲንꬃቲ ባና ማላ ኪቲዴስ፤ ሄ ኪቴቲዳ ኣዴዚ ቢ ጋኮንታ ዲሺን ኤልሳኢ ባናራ ዲዛ ጪማታስ፥ «ሃይሲ ሼምፖ ዎꬊዛይሲ ታ ቆꬌ ቃንጻናስ ኣስ ዬዲዳይሳ ቤዬቲ? ኢዚ ኪቶይሲ ሃ ጋኪሺን ኢዚ ሃ ጌሎንታ ማላ ፔንጋ ጎርዲቴ። ኢዛ ጌዶራ ሲዬቲዛይሲ ኢዛ ጎዳዛ ቶሆ ጊሪስ ጊዴኔ?» ጊዴስ።
2KI 6:33 ኤልሳኢ ጪማታራ ሃሳያ ቦላ ዲሺን ኪቴቲ ዪዳይሲ ዱጌ ኢዛኮ ዎꬊዴስ፤ ካዎዚካ ጋኪዲ፥ «ሃይሲ ሜቶዚ ጎዳፔ ዪዴስ፤ ሂስቲን ሃኢ ታኒ ጎዳፔ ኣይ ናጋዚና?» ጊዴስ።
2KI 7:1 ኤልሳኢካ ኢዛስ፥ «ሂስቲኮ ኔኒ ኣኔ ጎዳ ቃላ ሲያ፤ ጎዳይ፥ ዎንቶ ሃኒ ዎዴ ሃኖ ሃ ሳቴዪን ሳማሪያ ካታማ ፔንጌን ሄꬑ ኪሎ ሎኦ ጊስቴ ꬊሌይ ዎይኮ ኡሱፑን ኪሎ ባንጋይ ኢሲ ሳቂሌን ባይዜታና» ጊዴስ።
2KI 7:2 ካዎዛስ ኬሂ ማታ ጊዲዳ ኦላንቻታ ሃላቃዚ ናቤዛ፥ «ሃራይ ኣቲን ጎዳይ ሳሎ ማስኮቴ ዶይዳኮካ ሄሲ ሃናኔ?» ጊ ኦይቺዴስ። ኤልሳኢካ ኢዛስ፥ «ኢዚ ሃኒን ኔ ኢዛ ኔ ኣይፌራ ቤኣና፤ ጊዶ ኣቲን ኢዛፔ ኣይኮካ ኔ ዶናን ጌልꬃካ» ጊዴስ።
2KI 7:3 ሄ ዎዴ ኢንቺራቻ ሃርጌራ ዲዛ ኦይዱ ኣሳቲ ሄ ካታማይስ ጌሊዛ ፔንጌ ኣቻን ዴቴስ፤ ሄይቲ ባ ጋርሳን ኢሶይ ኢሳስ፥ «ኑኒ ኣዛስ ሃይቃና ጋካናስ ሃይሳን ጋምኢዞኒ?
2KI 7:4 ጌዴ ካታማዮ ኑ ጌላና ጊኮ ሄን ኮሻይ ዲዛ ጊሻስ ኑኒ ኮሻን ሃይቃና፤ ሃን ሃይሳን ዲኮካ ኑስ ሃይቆይ ኣቴና፤ ኣራሜ ኦላንቻታ ጊዶ ኣኔ ጮኡ ጊዲ ቦስ፤ ኢስቲ ጮኡ ጊኮ ኑ ኣታና፤ ዎꬊኮካ ሄን ሃይቃና» ጊዳ።
2KI 7:5 ሄሳፌ ጉዬ ጋዴይ ሌምኢ ሌምኢሺን ኢስቲ ዴንዲዲ ኣራሜ ኦላንቻቲ ዲዛ ሄራ ቢ ጋኪሺን ሄን ኢሳዴይካ ዴና።
2KI 7:6 ሄሲ ሃኒዳ ጋሶይካ ጎዳይ ኣራሜ ኦላ ኣሳይ ሲያና ማላ ፓራ-ጋሬታ ጊሪስ፥ ቶጋ ፓራ ጊሪስ ሄሳꬆካ ዳሮ ኦላ ኣሳ ጊሪስ ኣራሜ ኣሳ ሲሲዳ ጊሻስ ኣሳይ ባ ጋርሳን ኢሶይ ኢሳ፥ «ሄኮ ኢስራኤሌ ካዎይ ኑ ቦላ ሜቶ ዬጋናስ ሂቴ ዴሬ ካዎሲኔ ጊብጼ ዴሬ ካዎስ ሚሼ ኢሚዲ ኑ ቦላ ኤሂዴስ» ጊዳ።
2KI 7:7 ሄሳፌ ጉዬ ሳኣይ ቃማና ጊሺን ባንቲ ዲዛሶፔ ዴንዲዲ ባንታ ዱንካኔታ፥ ፓራታኔ ሃሬታ ኤኮንታ ዬጊ ኣጊዲ ባንታ ሼምፖ ጻላ ኣሻናስ ሄራ ባቃቲ ቢዳ።
2KI 7:8 ሄ ኢንቺራቻ ሃርጋንቻቲ ሄ ኣሳይ ዲዛ ሄራ ጋኪዲ ዱንካኔታፔ ኢሳን ጌሊዲ ሚዳኔ ኡዪዳ፤ ሄሳፌ ጉዬ ቢራ፥ ዎርቃኔ ማይኦ ቢዲ ቆቲዳ፤ ሲሚዲካ ሃራ ሃራ ዱንካኔታን ጌሊዲ ሃራ ዳሮ ሚሻታካ ኤኪ ቢዲ ቆቲዳ።
2KI 7:9 ኢስቲ ባንታ ጋርሳን ኢሶይ ኢሳ፥ «ሃይሲ ኑ ኦꬂዳይሲ ሎኦ ጊዴና፤ ሃይሲ ጋላሳይ ሚሺራቾ ዮቲዛ ጋላሳ፤ ኑኒ ጊዲኮ ኑስ ጻላ ሂስቲዶስ። ሃይሳፌ ዎንታና ጋካናስ ኑ ጮኡ ጊኮ ኑ ሞራንቻ ጊዶስ፤ ሄሳ ጊሻስ ኣኔ ካዎሶ ኤሶን ቢዲ ሃይሳ ዮቶስ» ጊዳ።
2KI 7:10 ሄሳ ጊሻስ ኢስቲ ቢዲ ካታማዮ ጌሊዛ ፔንጌ ናጊዛይታ ዋሲ ጼይጊዲ፥ «ኑኒ ኣራሜ ኣሳይ ዲዛሶ ቢ ጌሊዶስ፤ ሄን ቃሼቲ ዲዛ ፓራቲኔ ሃሬቲ ኣቲን ሃራይ ኢሲ ኣሲካ ዴና፤ ኣይ ኣሳ ቃላይካ ሴቴቲቤና፤ ዱንካናይካ ባ ዲዛ ማላ ዴስ» ጊዲ ዮቲዳ።
2KI 7:11 ፔንጌዛ ናጊዛይቲካ ሄሳ ሲዪዲ ባ ሲዪዳይሳ ኣሳስ ዛሪ ዮቲዳ፤ ሄ ዎሬዚ ቢዲ ካዎ ኬꬃን ሴቴቲዴስ።
2KI 7:12 ካዎዚ ዎንታ ማላዶ ዴንዲዲ ባ ኦላንቻታ ሃላቃታስ፥ «ኣራሜ ኣሳይ ኑና ኣይ ኦꬂዳኮ ታ ኢንቴስ ዮታይስ፤ ኑኒ ጋፊዳይሳ ኢስቲ ኤሪዛ ጊሻስ፥ ‹ኢስቲ ሃ ኬዞንታ ኣጌቴና፤ ኢስቲ ኬዚኮ ኑ ኢስታ ሼምፖራ ፓጻ ኦይኪ ዲኣና፤ ሂስቲዲ ጌዴ ኢስታ ካታማዮ ሲቲ ጊዲ ኑ ጌላና› ጊዲ ጌዴ ዴሬ ጊዶን ቆቴታናስ ካሴ ዲዛሶፔ ኬዚዳ» ጊዴስ።
2KI 7:13 ኦላንቻታ ሃላቃታፔ ኢሶይ፥ «ጉꬃ ኣሳቲ ካታማ ጋርሳን ኣቲዳ ፓራታፔ ኢቻሻታ ኤኪ ቤቶ፤ ኢስታ ሳማይ ሄን ኣቲዳ ኢስራኤሌ ኣሳ ሳማራ ኢሲኖ፤ ኢስቲ ናጊዛይ ዲኮ ሃይቂ ዉሪዳ ኢስራኤሌ ኣሳꬆ ሃይቆ ጻላ፥ ሄሳ ጊሻስ ኑ ኣኔ ኢስታ ኪቲ ዬዲዲ ሃኒዳይሳ ቤዮስ» ጊዴስ።
2KI 7:14 ሄሳ ጊሻስ ናምኡ ፓራ-ጋሬታ ፓራታራ ዶሪዳ፤ ካዎዚካ «ኢንቴ ቢዲ ሃኒዳዝ ኡባካ ጼሊቴ» ጊዲ ኣራሜ ኦላንቻታ ጉዬራ ባና ማላ ኣꬂ ዬዲዴስ።
2KI 7:15 ኢስቲካ ዮርዳኖሴ ሻፋ ጋካናስ ኢስታ ካሊ ቢዳ። ኣራሜ ኣሳይ ኤሶን ባቃቲሼ ዬጊ ቢዳ ማይኦኔ ሚሻታ ኦጌይ ዲዛሶን ዲዛሶን ላሌቲዳይሳ ዴሚዳ፤ ሄ ኪቴቲዳይቲካ ጉዬ ሲሚዲ ባ ቤይዳይሳ ካዎዛስ ዮቲዳ።
2KI 7:16 ሄሳፌ ጉዬ ዴሬዚ ኬዚዲ ኣራሜ ኦላንቻታስ ዲዛ ኣቆታ ባስ ኤኪዴስ፤ ሄሳ ጊሻስ ካሴ ጎዳይ ዮቲዳ ማላ ሄꬑ ኪሎ ጊስቴ ꬊሌይ ዎይኮ ኡሱፑን ኪሎ ባንጋይ ኢሲ ሳቂሌን ባይዜቲዴስ።
2KI 7:17 ሄ ዎዴ ካዎዛስ ኬሂ ማታ ጊዲዳ ኦላንቻታ ሃላቃዛ ካዎይ ጊምቤዛ ፔንጌ ናጋና ማላ ሹሚዴስ፤ ሂስቲን ዴሬይ ኬዚዛ ካታማ ፔንጌን ሱጌቲሼ ኢዛ ዬꬌሬꬂዴስ። ሄ ጾሳ ናቤይ ካሴ ካዎዚ ኢዛኮ ዪን ዮቲዳ ማላ ኢዛ ኦላንቻታ ኣዛዚዛይሲ ሃይቂዴስ።
2KI 7:18 ሄሳꬆካ ጾሳ ናቤዚ ካዎዛስ፥ «ዎንቶ ሃኒ ዎዴ ሳማሪያ ፔንጌን ሄꬑ ኪሎ ጊስቴ ꬊሌይ ዎይኮ ኡሱፑን ኪሎ ባንጋይ ኢሲ ሳቂሌን ባይዜታና» ጊዳ ማላ ፖሌቲዴስ።
2KI 7:19 ኦላንቻታ ኣዛዚዛይሲ ጾሳ ናቤዛስ፥ «ሃራይ ኣቲን ጎዳይ ሳሎ ማስኮቴ ዶይዳኮ ሄሲ ሃናኔ?» ጊዳ ጊሻስ ጾሳ ናቤዚ «ኔኒ ሄሳ ኔ ኣይፌራ ቤያና ጊዶ ኣቲን ኔ ኢዛፔ ኣይኮካ ማካ» ጊዲ ካሴ ኢዛስ ዛሮ ኢሚዴስ።
2KI 7:20 ጌሊዛ ፔንጌ ቦላ ዴሬይ ኢዛ ዬꬌቲን ኢዚ ሃይቂዳ ጊሻስ ካሴ ዮቴቲዳ ቲንቢቴይ ኢዛ ቦላ ፖሌቲዴስ።
2KI 8:1 ሄ ዎዴ ካሴ ኤልሳኢ ኢዚ ናዛ ሃይቆፔ ዴንꬂዳ ማጫሳይስ ጾሲ፥ «ሃ ቢታ ቦላ ላፑን ላይꬃ ኮሻይ ዴንዳና ማላ ጎዳይ ቃቺዳ ጊሻስ ኔኒ ዴንዳ፤ ሄ ዎዴይ ኣꬋና ጋካናስ ኔሶ ኣሳራ ኔ ዳናሶ ባሻ» ጊዴስ።
2KI 8:2 ማጫሳያካ ጾሳ ናቤዚ ኢዚስ ዮቲዳ ማላ ሃናዱስ፤ ባ ሶ ኣሳራ ዴንዳ ባዳ ፊሊስጼሜ ዴሬን ላፑን ላይꬅ ኡታዱስ።
2KI 8:3 ላፑን ላይꬃፌ ጉዬ ፊሊስጼሜ ዴሬፔ ባ ዴሬ ሲማዱስ፤ ባ ኬꬃ ጊሻሲኔ ባ ጋዴ ጊሻስ ካዎዛስ ኣቤት ጋናስ ኢዛኮ ባዱስ።
2KI 8:4 ሄ ዎዴ ካዎዚ ጾሳ ናቤዛ ኣይሌ ጊያዜ፥ «ኤልሳኢ ካሴ ኦꬂዳ ጊታ ሚሻታ ኔ ኣኔ ታስ ዮታ» ጊ ኦይቺሼ ጋምኢዴስ።
2KI 8:5 ኤልሳኢ ኢዚ ናዛ ሃይቆፔ ዴንꬂዳ ናዛ ኣያ ባ ኬꬃ ጊሻሲኔ ባ ጋዴ ጊሻስ ካዎዛስ ዋሳናስ ካዎዛኮ ጌሊዳ ዎዴ ኤልሳኢ ኢዚ ናዛ ሃይቆፔ ዎስቲ ዴንꬂዳኮ ጊያዜይ ካዎዛስ ዮቲዴስ። ጊያዜይካ ካዎዛስ፥ «ታ ጎዳ ካዎ! ኢዚ ናዛ ኤልሳኢ ዴንꬂዳ ማጫሳያ ሃኖ፤ ኢዚ ሃይቆፔ ዴንꬂዳ ናዚካ ሃይሳ» ጊዴስ።
2KI 8:6 ካዎዚ ሄሳ ሄ ዮኦዛ ጊሻስ ኢዞ ኦይቺን ኢዛካ ዮታዱስ። ሄሳፌ ጉዬ ካዎዚ፥ «ካሴ ኢዚ ሚሺኔ ኢዛ ዬጋ ቦሶፌ ሃ ሲሚን ሃኖ ጋካናስ ኢዚ ጋዴን ካጺዳ ካꬂ ሙሌራ ኔ ኢዚስ ዛራ» ጊዲ ሹሜታፔ ኢሳ ኣዛዚዴስ።
2KI 8:7 ኤልሳኢ ዳማስቆ ቢዴስ፤ ሄ ዎዴ ኣራሜ ካዎ ቤኒ-ሃዳዴይ ሳኬቲዴስ፤ ካዎዛስ፥ «ጾሳ ኣሲ ሃ ዪዴስ» ጊዲ ዮቲዳ።
2KI 8:8 ኢዚካ ኣዛሄሌ፥ «ኔኒ ኣይኮ ኩሼ ጌንꬆ ኤካ ባዳ ጾሳዴዛራ ጋይታ። ኢዛ ባጋራ፥ ‹ታኒ ሃይሳ ሃርጌዛፔ ፓጻኔ?› ጋዳ ኣኔ ጎዳ ኦይቻ» ጊዴስ።
2KI 8:9 ኣዛሄሌይካ ዳማስቆን ዲዛ ሎኦ ሚሻታ ኡባፌ ኦይዱ ታሙ ጋሜላን ጫኒ ኤኪዲ ኤልሳኤራ ጋይታናስ ቢዴስ፤ ኢዛ ሲንꬃን ቢ ኤቂዲ፥ «ኔ ና ኣራሜ ካዎ ቤኒ-ሃዳዴይ፥ ‹ሃይሳ ሃ ሃርጌዛፔ ታ ፓጻኔ?› ጊዲ ታና ኔኮ ዬዲዴስ» ጊዴስ።
2KI 8:10 ኤልሳኢካ ዛሪዲ፥ «ኔኒ ባዳ ኢዛስ፥ ‹ኔኒ ፓጻ ፓጻና› ጋ። ጊዶ ኣቲን ኢዚ ሃይቃናይሳ ጎዳይ ታና ቤሲዴስ» ጊ ዛሪዴስ።
2KI 8:11 ኢዚ ዬላታና ጋካናስ ኣዛሄሌይ ኢዛ ቲሺ ሂስቲ ጼሊዴስ፤ ሄሳፌ ጉዬ ጾሳ ናቤዚ ኣይፉንꬅ ጉሲዴስ።
2KI 8:12 ኣዛሄሌይካ፥ «ታ ጎዳይ ኣይስ ዬኪዜ?» ጊ ኦይቺዴስ። ኤልሳኢካ ዛሪዲ ኢዛስ፥ «ኔኒ ኢስራኤሌ ኣሳ ቦላ ጋꬃና ቆሆዛ ታ ኤሪዛ ጊሻስ ዬካይስ፤ ኔ ኢስታ ሚጻታ ታማን ጹጋና፤ ኢስታ ናቴꬃ ናይታካ ማሻን ዎꬋና፤ ኢስታስ ቄሪ ናይታካ ቢታ ቦላ ዲንጬሬꬃና፤ ሻራ ማጫሳታ ኡሎ ኔ ዳካና» ጊዴስ።
2KI 8:13 ኣዛሄሌይካ፥ «ታኒ ካና ማላ ቆዴቲዛ ኔ ኣይሌይ ሄሳ ማላ ዎልቃማ ኦሶ ኦꬃናስ ዋና ዳንዳያኔ?» ጊዴስ። ኤልሳኢካ ዛሪዲ ኢዛስ፥ «ኔኒ ኣራሜ ቦላ ካዎታናይሳ ታና ጎዳይ ቤሲዴስ» ጊዴስ።
2KI 8:14 ሄሳፌ ጉዬ ኣዛሄሌይ ኤልሳኤ ኣቻፌ ጌዴ ባ ጎዳኮ ሲሚ ቢዴስ፤ ቤኒ-ሃዳዴይካ ኢዛ፥ «ኤልሳኢ ኔስ ኣይ ጊ ዮቲዴ?» ጊ ኦይቺዴስ። ኣዛሄሌይካ ዛሪዲ ኢዛስ፥ «ቱማፔ ኔኒ ሃርጌዛፔ ፓጻናይሳ ኢዚ ታስ ዮቲዴስ» ጊዴስ።
2KI 8:15 ኢዚ ዎንቴꬃ ጋላስ ኦርዴ ማይኦ ኤኪዲ ሃꬃን ማꬊ ኬሲ ኤኪ ኢዛራ ካዎዛ ኣይፌሶ ጎዚዴስ፤ ካዎዚ ሄሳ ጌዶን ሃይቂዴስ፤ ኣዛሄሌይካ ኢዛሶሆን ካዎቲዴስ።
2KI 8:16 ኢስራኤሌ ካዎ ኣካቤ ና ኢዮራሜይ ካዎቲዳ ኢቻሻንꬆ ላይꬃን ኢዮሳፊጼ ና ኢዮራሜይ ዩሁዳ ዴሬን ካዎቲዴስ።
2KI 8:17 ኢዚ ካዎቲሺን ኢዛስ ላይꬃይ 32፤ ኢዚ ዬሩሳላሜን ኡቲዲ 8 ላይꬅ ዴራ ሃሪዴስ።
2KI 8:18 ኢዛ ማቼያ ኣካቤ ና ጊዲዳ ጊሻስ ኣካቤሶ ኣሳይ ኦꬂዳ ማላ ኢዚካ ኢስራኤሌ ካዎታ ኦጌ ካሊዴስ፤ ጎዳ ሲንꬃንካ ኢታ ሚሽ ኦꬂዴስ።
2KI 8:19 ጊዶ ኣቲን ጎዳይ ባ ኣይሌዛ ዳዊቴ ጊሻስ ጊዲ ዩሁዳ ꬋይሳናስ ኮዪቤና። ጋሶይካ ዳዊቴሲኔ ኢዛ ዜሬꬃስ ጾምፔ ꬋይሶንታ ማላ ካሴ ሂዶታ ኢሚ ዎꬂዴስ።
2KI 8:20 ኢዮራሜ ካዎቴꬃ ላይꬃን ኤዶሜይ ዩሁዳ ቦላ ዴንዲዲ ባስ ሃራ ካዎ ካዎꬂዴስ።
2KI 8:21 ሄሳ ጊሻስ ኢዮራሜይ ፓራ-ጋሬታ ኡባ ሺሺዲ ጻኢሬ ቦላ ዎራጂዴስ፤ ኤዶሜ ዴሬ ኣሳይ ኢዛኔ ፓራ-ጋሬታ ኣዛዚዛይታ ጊዶꬂዴስ፤ ኢዚኔ ፓራ-ጋሬ ኣዛዚዛይቲ ጊዲኮ ጊዶꬅ ዴንዲዲ ባና ጊዶꬂዳይታ ጾኒ ኬዚ ቢዳ፤ ኢዛ ኦላንቻቲ ባቃቲዲ ጉዬ ሲሚዳ።
2KI 8:22 ኤዶሜይካ ሃች ጋካናስ ዩሁዳ ቦላ ማካሊዳ ማላ ዴስ፤ ሄ ዎዴ ሊቢናይካ ማካሊዴስ።
2KI 8:23 ኢዮራሜ ካዎቴꬃ ዎዴ ሃኒዳ ሃራ ሚሽ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 8:24 ኢዮራሜይካ ካሴ ባ ኣዋታን ጋይቲዴስ፤ ኢስታꬆካ ዳዊቴ ካታማን ሞጌቲዴስ፤ ኢዛ ና ኣካዚያሲ ኢዛሶሆን ካዎቲዴስ።
2KI 8:25 ኢስራኤሌ ካዎ ኣካቤ ና ኢዮራሜይ ካዎቲዳ ታማኔ ናምኣንꬆ ላይꬃን ኢዮራሜ ና ኣካዚያሲ ዩሁዳን ካዎቲዴስ።
2KI 8:26 ኣካዚያሲ ካዎቲዛ ዎዴ ኢዛስ ላይꬃይ 22። ኢዚ ዬሩሳላሜን ኡቲዲ ዴራ ኢሲ ላይꬅ ሃሪዴስ፤ ኢዛ ኣያ ጎቶሊያ ጌቴታዉስ፤ ኢዛካ ኢስራኤሌ ካዎ ኦሚሬስ ናዛ ና።
2KI 8:27 ኣካዚያሲ ኣካቤሶ ኣሳራ ቦሎቲዳ ጊሻስ ኣካቤሶ ኣሳይ ኦꬂዳ ማላ ኢዚካ ኣካቤሶ ኣሳ ኦጌ ካሊዴስ፤ ጎዳ ሲንꬃንካ ኢታ ኦꬂዴስ።
2KI 8:28 ኣካዚያሲ ኣካቤ ና ኢዮራሜራ ኢሲፌ ኣራሜ ካዎ ኣዛሄሌ ቦላ ዎራጃናስ ጋላኣዴን ዲዛ ኤራሞቴ ቢዴስ፤ ኣራሜ ኣሳይ ሄን ኢዮራሜ ማዱንꬂዴስ።
2KI 8:29 ሄሳ ጊሻስ ካዎ ኢዮራሜይ ኤራሞቴን ኣዛሄሌራ ኦሌቲዳ ኦላዛን ኣራሜ ኣሳይ ኢዛ ማዱንꬂዳ ማዱንꬃፌ ፓጻናስ ኢዝራኤሌ ሲሚዴስ። ሄሳፌ ጉዬ ኣካቤ ና ኢዮራሜይ ሳኬቲዳ ጊሻስ ዩሁዳ ካዎ ኢዮራሜ ና ኣካዚያሲ ኢዛ ኦይቻናስ ዱጌ ኢዝራኤሌ ዎꬊዴስ።
2KI 9:1 ናቤ ኤልሳኢ ናቤታ ማባራ ጋርሳፌ ኢሳ ጼይጊዲ፥ «ኔ ጊꬅ ሎኤꬃ ጊጻዳ ሃይሳ ዛይቴ ጹኣ ኤካዳ ጋላኣዴን ዲዛ ኤራሞቴ ባ።
2KI 9:2 ኔኒ ሄ ባ ጋካሼ ኒሚሼስ ናዛ ና ኢዮሳፊጼ ና ኢዩ ኮያ። ኔ ጌዴ ኢዛኮ ሺቃዳ ኢዛ ኢዛ ላጌታፔ ዱማ ሻካዳ ጌዴ ኢልፒኔን ጌልꬃ።
2KI 9:3 ሄሳፌ ቃሴ ሄ ጹኣን ዲዛ ዛይቴዛ ኢዛ ሁኤን ጉሳዳ፥ ‹ጎዳይ ኔና፥ ሄኮ ታ ኢስራኤሌ ቦላ ኔ ካዎታና ማላ ቲያዲስ› ጌስ ጋዳ ኣዋጃ፤ ሄሳፌ ካሬዛ ዶያዳ ዎጻ፤ ሙሌካ ታኮፋ» ጊዴስ።
2KI 9:4 ሄሳ ጊሻስ ሄ ዬላጋ ናቤዚ ጋላኣዴን ዲዛ ኤራሞቴ ቢዴስ።
2KI 9:5 ኢዚ ሄ ቢ ጋኪዳ ማላ ኦላ ጋዳዋቲ ኢሲ ቦላ ኡቲ ዲሺን ኢዚ፥ «ሹሜዞ፥ ታ ኔኮ ኪቴታ ያዲስ» ጊዴስ። ኢዩይካ «ኑፔ ኦናኮ ያዲ?» ጊዲ ኢዛ ኦይቺዴስ፤ ኢዚካ ዛሪዲ፥ «ሹሜዞ፥ ኔኮ ያዲስ» ጊዴስ።
2KI 9:6 ኢዩይካ ዴንዲ ኤቂዲ ጌዴ ሶ ጌሊዴስ፤ ሄሳፌ ጉዬ ናቤዚ ኢዛ ሁኤን ዛይቴዛ ጉሲዲ ኢዛስ፥ «ጎዳ ኢስራኤሌ ጾሳይ፥ ‹ጎዳ ዴሬ ኢስራኤሌ ቦላ ኔ ካዎታና ማላ ታ ኔና ቲያዲስ።
2KI 9:7 ታ ኦሳንቻታ ናቤታ ሱꬃ ሄሳꬆካ ጎዳ ኦሳንቻታ ሱꬃ ኡባ ጊሻስ ኤልዛቤሊ ቦላ ታ ሃሎ ኬሳና ማላ ኔኒ ኔ ጎዳ ኣካቤሶ ኣሳ ሾጫ።
2KI 9:8 ኣካቤሶ ኣሳይ ሙሌራ ꬋያና፤ ኣይሌ ጊዲን ዎይኮ ኢዛ ዬሎ ጊዲን ኢስራኤሌን ዲዛይሳ ኢዛስ ዉርሴꬃን ዬሌቲዳ ኣቱማ ናካ ኣካቤሶፔ ፒታ ꬋይሳና።
2KI 9:9 ሃይሳፌ ጉዬ ታኒ ኣካቤ ኬꬅ ናባጼ ና ኢዮርባኣሜ ኬꬃ ማላኔ ኣካያ ና ባሼ ኬꬃ ማላ ኦꬃና።
2KI 9:10 ኤልዛቤሎ ጊዲኮ ኢዝራኤሌ ጋዴ ጊዶን ካናቲ ኢዞ ማና፤ ኢዚ ኣሃይ ሞጌቴና› ጌስ» ጊ ዮቲዳ ማላ ካሬ ዶዪ ዬጊዲ ዎጺዴስ።
2KI 9:11 ኢዩይ ኬዚዲ ባ ላጌ ኦላ ጋዳዋታኮ ጋኪዳ ማላ ኢስታፌ ኢሶይ፥ «ኡባይካ ሎኦ? ሄሲ ጎሻዚ ኔኮ ኣይ ኤካና ዪዴ?» ጊዲ ኢዛ ኦይቺዴስ። ኢዩይካ ኢዛስ፥ «ኣዴዛካ ጊዲን ዎይኮ ኢዚ ዮቲዳይሳ ኢንቴካ ኤሬታ» ጊ ዛሪዴስ።
2KI 9:12 ኢስቲካ ኢዛስ፥ «ሄሲ ሊኬ ጊዴና፤ ሄሳ ኣጋዳ ኣኔ ቱማዮ ኑስ ዮታ» ጊዳ። ኢዩይካ ኢስታስ፥ «ኢዚ ታስ ዮቲዳይ ሃይሳ፥ ‹ጎዳይ ኔኒ ኢስራኤሌ ቦላ ካዎታና ማላ ታ ኔና ቲያዲስ› ጌስ» ጊዴስ።
2KI 9:13 ሄሳፌ ጉዬ ኡባይካ ባንታ ማይኦ ቃሪ ቃሪ ዬጊዲ ኢዚ ባና ኦጌዛ ቦላ ሚጪዳ፤ ቃሴካ ዛዬ ዛዪዲ፥ «ኢዩይ ካዎቲዴስ» ጊዳ።
2KI 9:14 ሄሳ ጊሻስ ኒሚሼስ ናዛ ና ኢዮሳፊጼ ና ኢዩይ ኢዮራሜ ቦላ ዴሬ ዴንꬄꬂዴስ። ሄ ዎዴ ኢዮራሜይኔ ኢስራኤሌ ኣሳይ ኡባይ ጋላኣዴን ዲዛ ኤራሞቴ ዴሬ ኣራሜ ካዎ ኣዛሄሌ ኩሼፔ ኣሻናስ ናጌቴስ።
2KI 9:15 ካዎ ኢዮራሜይ ኣራሜ ካዎ ኣዛሄሌራ ኦላን ጋይቲን ኣራሜ ኣሳይ ኢዛ ጫዲ ማዱንꬂዳ፤ ኢዚ ሄ ማዱንꬃፌ ፓጻናስ ጉዬ ኢዝራኤሌ ሲሚ ቢዴስ። ኢዩይካ፥ «ኢንቴ ቆፋይ ሄሳ ማላ ጊዲኮ ሃይሳ ዮኦዛ ኢዝራኤሌ ቢዲ ዮቶንታ ማላ ኦኒካ ሃኖ ካታማይፔ ኬሲ ኤኪ ቦንታ ማላ ናጊቴ» ጊዴስ።
2KI 9:16 ሄሳፌ ጉዬ ኢዚ ባ ፓራ-ጋሬን ኡቲዲ ኢዝራኤሌ ጋካናስ ሆርዶፊዴስ። ኢዚ ሄሳꬆ ኦꬂዳይ ኢዮራሜይ ሄን ኢቺ ዲዛ ጊሻሲኔ ዩሁዳ ካዎ ኣካዚያሲካ ኢዛ ኦይቻናስ ዱጌ ኢዛኮ ዎꬊዳ ጊሻሳ።
2KI 9:17 ኢዝራኤሌ ጊምቤ ቦላ ዲዛ ሻኮዛን ኤቂ ናጊዛይሲ ኢዩ ዎታዳራቲ ኢዛኮ ማቲዳይሳ ቤኢዲ፥ «ኦላ! ኦላ! ዎታዳራቲ ጋኪዳ» ጊ ዋሲዴስ። ኢዮራሜይካ፥ «ኢሲ ቶጋንቻይ ጼይጌቲ ቢዲ ኢስታራ ጋይታና ማላ ዬዲዲ፥ ‹ኢንቴ ሳሮስ ዪዴቲ?› ጊዲ ኦይቻና ማላ ኣዛዚዴስ» ጊዲ ኣዛዚዴስ።
2KI 9:18 ቶጋንቻዚ ኢዩራ ጋይታናስ ፓራ ዬዲ ቶጊ ቢዲ «ካዎይ ኢንቴና፥ ‹ሳሮስ ዪዴቲ?› ጌስ» ጊዴስ። ኢዩይካ፥ «ሳሮቴꬃ ጊሻስ ቆፓናይ ኔና ጊዳካ! ሄሳ ኣጋጋዳ ሃ ታ ጉዬ ኣꬋዳ ታና ካላ» ጊዴስ። ናጊዛይሲካ «ኪቴቲዲ ቢዳይሲ ኢስታኮ ጋኪዴስ ሺን ሃ ሲሚ ዪቤና» ጊዴስ።
2KI 9:19 ሄሳ ጊሻስ ካዎዚ ሃራ ቶጋንቻ ዬዲዴስ፤ ኢዚ ቢዲ ኢስታኮ ጋኪዳ ማላ፥ «ካዎይ ኢንቴና፥ ‹ኢንቴ ሳሮስ ዪዴቲ?› ጌስ» ጊዴስ። ኢዩይካ ኢዛስ፥ «ሳሮቴꬃ ጊሻስ ቆፓናይ ኔና ጊዳካ! ሄሳ ኣጋዳ ሃ ታ ጉዬ ኣꬋዳ ታና ካላ» ጊዴስ። ናጊዛይሲካ «ኪቴቲ ቢዳይሲ ቢዲ ኢስታኮ ጋኪዴስ ሺን ሃ ጉዬ ሲሚ ዪቤና» ጊዴስ።
2KI 9:20 ናጊዛይሲካ «ኪቴቲ ዪዛይሲ ኢስታኮ ጋኪዴስ ሺን ሄ ኢዚካ ሃ ሲሚ ዪቤና፤ ዎታዳራታ ካሌꬂዛይሳ ፓራ-ጋሬዛ ላጎይ ሊኬ ኒሚሼ ና ኢዩ ላጎ ማላ፤ ኢዚ ላጊሼ ጎሻ ኣሳ ማላ ላጌስ» ጊዴስ።
2KI 9:21 ኢዮራሜይካ፥ «ኣኔ ታ ፓራ-ጋሬዛ ታስ ጊግሲቴ» ጊዲ ኣዛዚዴስ። ፓራ-ጋሬዚ ጊጊዳ ማላ ኢስራኤሌ ካዎ ኢዮራሜይኔ ዩሁዳ ካዎ ኣካዚያሲ ባንታ ፓራ-ጋሬን ኡቲዲ ኢዩራ ጋይታናስ ቢዳ፤ ኢዝራኤሌ ዴሬ ኣስ ናቡቴ ጺንጾ ጋዴን ጋይቲዳ።
2KI 9:22 ኢዮራሜይ ቡሮ ኢዩ ቤይዳ ማላ፥ «ኢዩ ኔ ሳሮን ያዲ?» ጊዲ ኢዛ ኦይቺዴስ። ኢዩይካ፥ «ኔ ኣዮ ኤልዛቤሊ ኤቃ ጾሳታስ ጎይኖይኔ ሙሬኖይ ሃይሳꬆ ዳሪ ዲሺን ኣይ ሳሮይ ዲዜ!» ጊ ዛሪዴስ።
2KI 9:23 ኢዮራሜይ ባ ፓራ-ጋሬዛ ጉዬ ዛሪ ባቃቲሼ፥ «ኣካዚያሳ! ሃይሲ ካዶ» ጊዴስ።
2KI 9:24 ሄሳፌ ጉዬ ኢዩይ ባ ዎንዳፌ ዪሻን ኢዮራሜስ ባቂናቴን ጫዲዴስ። ዪሻዚ ካንꬂ ቢዲ ኢዛስ ዎዚና ጫዲዳ ጊሻስ ኢዚ ፓራ-ጋሬዛ ጊዶን ቦልቁ ጊ ኩንዲዴስ።
2KI 9:25 ኢዩይካ ፓራ-ጋሬዛ ላጊዛይሳ ኣላፌ ቢዲቃሬስ፥ «ኔ ኢዛ ዴንꬃዳ ኢዝራኤሌ ዴሬ ኣስ ናቡቴ ጺንጾ ጋዴን ዬጋ፤ ኔኒኔ ታኒ ኑ ፓራ-ጋሬታ ቦላ ኡቲዲ ኢዛ ኣዋ ኣካቤ ካሊ ቢሺን ጎዳይ ሃይሳ ካሴቲ ዮቲዳይሳ ኣኔ ኔ ኣኬካ፤
2KI 9:26 ጎዳይ፥ ‹ታኒ ዚኔ ናቡቴ ሱꬂኔ ኢዛ ናይታ ሱꬅ ቤያዲስ። ኔኒ ሃይሳ ሃ ጋዴዛን ሃሎ ኬሳና ማላ ካሴታ ጊጊሳዲስ› ጌስ፤ ሃኢካ ጎዳ ቃላይ ካሴቲ ዮቲዳ ማላ ዴንꬃዳ ሃይሳ ሃ ጎሻ ጊዶን ዬጋ» ጊዴስ።
2KI 9:27 ዩሁዳ ካዎ ኣካዚያሲ ሄሳ ቤኢዲ ጌዴ ቤቲ-ሃጋኔ ኤፊዛ ኦጌዛራ ባቃቲዴስ፤ ኢዩይካ ኢዛ ጎዲሼ ባ ቃላ ꬎቁ ሂስቲዲ፥ «ኢዛካ ዎꬊቴ» ጊዴስ። ኢስቲካ ዪቢላኣሜ ካታማ ኣቻን ጉሬ ፑዱንꬃ ኦጌ ኬኢሺን ፓራ-ጋሬ ቦላ ዲዛይሳ ጫዲ ማዱንꬂዳ፤ ጊዶ ኣቲን ኢዚ ማጊዶ ባቃቲ ቢዲ ሄን ሃይቂዴስ።
2KI 9:28 ኢዛ ኦሳንቻቲ ኢዛ ኣሃ ፓራ-ጋሬ ቦላ ዎꬂዲ ዬሩሳላሜ ኤፊዳ፤ ዳዊቴ ካታማን ካሴ ኢዛ ኣዋታ ዱፎን ሞጊዳ።
2KI 9:29 ኣካዚያሲ ኢስራኤሌ ካዎ ኣካቤ ና ኢዮራሜይ ካዎቲዳ ታማን ኢሲንꬆ ላይꬃን ዩሁዳን ካዎቲዴስ።
2KI 9:30 ሄሳፌ ጉዬ ኢዩይ ጌዴ ኢዝራኤሌ ቢዴስ፤ ኤልዛቤላ ሄሳ ሲያዳ፥ ባ ኣይፌሶ ቲዬታዳ፥ ባ ሁኤ ሎኤꬃ ጊጊሳዳ ማስኮቴራ ዱጌ ጼላዱስ።
2KI 9:31 ኢዩይ ጊምቤዛ ካንꬂ ጌሊዳይሳ ቤኣዳ፥ «ኔ ጎዳ ዎꬊዳ ዚሚሬ! ኔ ሳሮስ ያዲ?» ጋ ኦይቻዱስ።
2KI 9:32 ኢዩይ ኢዞ ፑዴ ጼሊዲ፥ «ኔ ኦኔ?» ታናራ ማዴታናይ ኦኔ? ጊሼ ዋሲ ጼይጊዴስ። ኢዚ ዋሲን ናምኡ ዎይኮ ሄꬑ ጉንዱላቲ ዱጌ ኢዛኮ ጼሊዳ።
2KI 9:33 ኢዩይካ ኢስታስ፥ «ኢዞ ሃ ዱጌ ኦሊቴ!» ጊዴስ። ኢስቲካ ኢዞ ዱጌ ዛሪ ኦሊዳ። ፓራቲ ኢዞ ዱሬቲን ኢዚ ሱꬃይ ጊምቤዛ ቦላኔ ፓራታ ቦላ ፒንጺዴስ።
2KI 9:34 ኢዩይ ሶ ጌሊዲ ሚዴሲኔ ኡዪዴስ፤ ሄሳፌ ጉዬ፥ «ኣይ ጊዲኮካ ኢዛ ካዎ ና ጊዲዳ ጊሻስ ሃኖ ቃንጌቲዳ ማጫሳዮ ሎኤꬂ ሞጊቴ» ጊዴስ።
2KI 9:35 ኢስቲ ኢዞ ሞጋና ኬዚሺን ኢዚስ ሁኤ ሜቄꬃታፔ፥ ኩሼ ሜቄꬃታፔኔ ቶሆ ሜቄꬃታፔ ኣቲን ሃራ ዴሚቤቴና።
2KI 9:36 ኢስቲ ሲሚዲ ኢዛስ ሄሳ ዮቲን ኢዩይ፥ «ጎዳይ ባ ኣይሌዛስ ቴሲቤ ዴሬ ኣስ ኤላሳስ፥ ‹ኢዝራኤሌ ቢታን ጎሻ ጋዴ ጊዶን ካናቲ ኤልዛቤሊ ኣሾ ማና።
2KI 9:37 ኢዚ ኣሾይ ኢዝራኤሌ ቢታን ጎሻ ጋዴስ ኢጊሳ ጊዳና፤› ሄሳ ጊሻስ ኣይ ኣሲካ፥ ‹ሃና ኤልዛቤሎ ጋናስ ዳንዳዬና› ጊ ዮቲዳ ቃላይ ሃይሳ» ጊዴስ።
2KI 10:1 ሄ ዎዴ ኣካቤስ ሳማሪያን 70 ኣቱማ ናይቲ ዴቴስ፤ ሄሳ ጊሻስ ኢዩይ ዳብዳቤ ጻፊዲ ኢዝራኤሌን ዲዛ ሹሜታስ፥ ጪማታሲኔ ኣካቤ ናይታ ዲቺዛይታስ ኪታ ሳማሪያ ዬዲዴስ። ኢዚ ዬዲዳ ኪታዛ ቃላይ፥
2KI 10:2 «ኢንቴ ጎዳዛ ናይቲ ኢንቴናራ ዲዛ ጊሻሲኔ ፓራ-ጋሬቲኔ ፓራቲ፥ ጊምቤቲዳ ካታማቲኔ ኦላ ሚሻይ ኢንቴስ ዲዛ ጊሻስ ሃይሲ ኪታ ዳብዳቤዚ ኢንቴኮ ጋኪዳ ማላ ሄራካ፥
2KI 10:3 ኢንቴ ጎዳዛ ናይታ ጊዶፌ ኡባፌ ኣꬊዛዴኔ ሃይሲ ኢዛስ ቤሴስ ጊዛዴ ዶሪዲ ኢዛ ኣዋ ካዎቴꬃ ኣራታን ኡቲሲቴ፤ ሄሳፌ ጉዬ ካሴ ኢንቴ ጎዳዛ ኬꬃ ጊሻስ ኦሌቲቴ» ጌስ።
2KI 10:4 ኢስቲ ጊዲኮ ዳሮ ባቢዳ ጊሻስ፥ «ናምኡ ካዎቲ ኢዛራ ኦሌቲዲ ዳንዳዮንታይሳ ኑኒ ኢዛ ዎስቲ ዳንዳያኔ?» ጊዳ።
2KI 10:5 ሄሳ ጊሻስ ካዎቴꬃ ኬꬃን ኣዛዚዛይሲ፥ ሄ ካታማዮ ኣይሲዛይሲ፥ ዴሬ ጪማቲኔ ካዎዛ ናይታ ዲቺዛይቲ፥ «ኑኒ ኔ ኣይሌቲ ኔኒ ጊዳይሳ ኡባካ ፖላና፤ ኑኒ ሃራ ኦናካ ካዎሶኮ፤ ኔኒ ኔና ሎኢዳዝ ኡባካ ኦꬃ» ጊዲ ሄ ኪታዛ ኢዩስ ዬዲዳ።
2KI 10:6 ሄሳፌ ጉዬ ኢዩይ፥ «ሂስቲኮ ኢንቴ ታ ባጋ ጊዲኮኔ ታስ ኣዛዜቲዛይታ ጊዲኮ ኢንቴ ጎዳዛ ናይታ ሁኤ ቃንጺ ቃንጺ ኤኪዲ ዎንቶ ሃኒ ዎዴ ኢዝራኤሌ ጋኪቴ» ጊዲ ኢስታስ ቃሴካ ጻፊዴስ። ሄ ዎዴ ካዎዛ ናይቲ ላፑን ታማቲ ሄ ካታማይን ዲዛ ዳሮ ኤሬቲዳ ኢስታ ዲቺዛ ኣሳታኮን ዴቴስ።
2KI 10:7 ሄ ዳብዳቤዚ ኢስታኮ ጋኪዳ ማላ ናይታ ዲቺዛይቲ ካዎ ናይታ ላፑን ታማታ ኡባ ዎꬊዳ፤ ሄ ናይታ ሁኤ ቃንጺ ቃንጺ ኬሼን ኤኪዲ ኢዩስ ኢዝራኤሌ ዬዲዳ።
2KI 10:8 ኪቴቲ ቢዳይሲ ቢ ጋኪዳ ማላ ኢዩስ፥ «ካዎዛ ናይታ ሁኤዛ ኤሂዳ» ጊን ኢዩይ፥ «ዎንቶ ማላዶ ጋካናስ ካታማ ጌሊዛ ፔንጌን ናምኡሶን ዶሪ ዎꬂቴ» ጊ ኣዛዚዴስ።
2KI 10:9 ዎንቴꬃ ጋላስ ማላዶ ኢዩይ ኬዚ ዴሬዛ ሲንꬃን ኤቂዲ፥ «ኢንቴ ጺሎ፤ ታ ጎዳ ቦላ ዴራ ዴንꬄꬂዳይኔ ዎꬊዳይ ታና። ጊዶ ኣቲን ሃይታ ኡባ ዉርሲዳይ ኦኔ?» ጊዴስ።
2KI 10:10 ሄሳ ጊሻስ ጎዳይ ካሴ ኣካቤሶ ኣሳ ቦላ ዮቲዳ ቃላፔ ኢሲኔያካ ጮ ቢታ ቦላ ዎꬋ ኣቶንታይሳ ኢንቴ ኤሪቴ። ጎዳይ ካሴ ባ ኣይሌ ኤላሳ ባጋራ ዮቲዳይሳ ፖሊዴስ።
2KI 10:11 ኢዩይ ኣካቤሶ ኣሳፔ ኣቲዳ ኣሳ ኡባ፥ ጊታ ኣሳ ኡባ፥ ማታ ላጌታኔ ኢዛ ቄሴታ ኢሲኖካ ኣሾንታ ኢዝራኤሌን ዎꬊዴስ።
2KI 10:12 ኢዩይ ሄፔ ዴንዲዲ ሳማሪያ ቢዴስ፤ ኢዚ ቢዲ ቤት-ኤኬዴ ጌቴቲዛሶን ዶርሳ ሄሚዛይታሶ ቢ ጋኪሼ፥
2KI 10:13 ዩሁዳ ካዎ ኣካዚያሳስ ኣሾ ዳቦታፔ ኣማርዳይታ ዴሚዲ፥ «ኢንቴ ኦናንቴ?» ጊ ኦይቺዴስ። ኢስቲካ ኢዛስ፥ «ኑኒ ኣካዚያሳስ ኣሾ ዳቦታ፤ ኑኒ ካዎዛሶ ኣሳታኔ ጎዳቴይ ናይታ ኦይቻናስ ሃ ዱጌ ዪዶስ» ጊዳ።
2KI 10:14 ኢዚካ፥ «ሃይታ ሼምፖራ ፓጻ ኦይኪቴ!» ጊ ኣዛዚዴስ፤ ሄሳ ጊሻስ ኢስቲ ሼምፖራ ፓጻ ኦይኪ ኤፊዲ ቤት-ኤኬዴ ሃꬃ ኦላ ኣቻን ኦይዱ ታማኔ ናምኡ ኣሳታፔ ኢሳዴካ ኣሾንታ ዎꬊዳ።
2KI 10:15 ኢዚ ሄፔ ዴንዲ ቢሺን ኤሬካቤ ና ኢዮናዳቤይ ባኮ ቢዛይሳ ኦጌ ቦላ ዴሚዴስ፤ ኢዩይካ ኢዛ ሳሮኪዲ፥ «ታ ዎዚናይ ኔና ኣማኒዛይሳ ማላ ኔ ዎዚናይ ታና ኣማኒዜ?» ጊዲ ኢዛ ኦይቺዴስ፤ ኢዮናዳቤይካ፥ «ኤ ኣማኔስ» ጊዴስ፤ ኢዩይካ፥ ሂስቲኮ «ኣኔ ታ ኩሼ ኦይካ» ጊዴስ፤ ኢዚካ ኢዛ ኩሼ ኦይኪዴስ፤ ሄሳፌ ጉዬ ኢዩይ ባ ፓራ-ጋሬ ቦላ ካፊ ኬሲዴስ።
2KI 10:16 ኢዩይካ ኢዛ፥ «ኣኔ ኢሲፌ ቦስ፤ ታኒ ጎዳስ ሱሬ ዎዚናፔ ቆፓ ኦꬂዳይሳ ቤኣ» ጊዴስ። ሄሳፌ ጉዬ ኢዛ ፓራ-ጋሬን ዎꬂ ኤኪዲ ቢዴስ።
2KI 10:17 ኢዩይ ቢዲ ሳማሪያ ጋኪዲ ሄን ኣካቤሶ ኣሳፔ ኣቲዳይታ ኡባካ ዎꬊዴስ፤ ካሴ ናቤ ኤላሳስ ዮቴቲዳ ጎዳ ቃላ ማላ ኡባካ ዎꬊ ዉርሲዴስ።
2KI 10:18 ሄሳፌ ጉዬ ኢዩይ ዴራ ኡባ ኢሲ ቦላ ሺሺዲ፥ «ካሴ ኣካቤይ ባኣሌስ ጉꬃራ ኦꬂዴስ፤ ኢዩይ ጊዲኮ ሄሳፌ ኣꬎ ኦꬃና።
2KI 10:19 ሃኢ ኢንቴ ባኣሌ ናቤታ፥ ኦሳንቻታኔ ቄሴታካ ኡባ ታስ ጼይጊቴ፤ ታኒ ባኣሌስ ዎልቃማ ያርሾ ያርሻና ጊሻስ ኢሳዴይካ ኣቶፎ፤ ዮንታ ኣቲዛዴይ ሼምፖራ ፓጻ ዳናስ ዳንዳዬና» ጊዴስ። ኢዩይ ባ ባጋራ ሄሳ ኦꬂዳይ ባኣሌ ኦሳንቻታ ኡባ ꬋይሳናስ ጌኔ ቆፋ ሃልቺዳ ጊሻሳ።
2KI 10:20 ኢዩይ፥ «ባኣሌ ቦንቻናስ ዴሬዛ ጼይጊ ሺሺቴ» ጊዴስ፤ ኣሳይካ ሄሳ ዴራስ ኤሪሲዴስ።
2KI 10:21 ሄሳፌ ጉዬ ኩሜꬃ ኢስራኤሌ ኣሳስ ኪታ ዬዲዴስ፤ ባኣሌስ ሃጋዚዛይቲ ኡባይ ዪዳ፤ ኢስታፌ ኦኒካ ኣቲቤና፤ ኡባይካ ባኣሌ ጌቴቲዛ ኤቃ ጾሳሶ ጌሊዳ፤ ኣሳይ ባኣሌ ኬꬃ ጪፒ ጊ ኩሚዴስ።
2KI 10:22 ኢዩይ ማይኦ ኬꬃ ኣላፌዛ፥ «ባኣሌ ኦሳንቻታ ኡባስ ማይኦ ኬሳ» ጊዴስ፤ ኢዚካ ማይኦዛ ኢስታስ ኬሲዴስ።
2KI 10:23 ሄሳፌ ጉዬ ኢዩይ ኤሬካቤ ና ኢዮናዳቤራ ባኣሌ ጌቴቲዛ ኤቃ ጾሳ ኬꬅ ጌሊዴስ። ባኣሌ ኦሳንቻታስ፥ «ባኣሌስ ሃጋዚዛይታፔ ኣቲን ጎዳስ ሃጋዚዛይቲ ሃይሳን ኢንቴናራ ዲዛኮ ኣኔ ቆሪቴ» ጊዴስ።
2KI 10:24 ሄሳፌ ጉዬ ጹጌቲዛ ያርሾኔ ሃራ ያርሾካ ያርሻና ጌሊዳ፤ ኢስቲ ጌሊዳ ማላ ኢዩይ ኢስታስ፥ «ታ ኢንቴስ ኣꬃ ኢሚዳ ኣሳታፔ ኢሳዴይካ ኬሲ ኤኪኮ ኢዚ ኬሲ ኤካና ማላ ኦꬂዳይ ኢዛዴሶሆን ጌላና» ጊ ሚንꬂ ዮቲዲ ካሬራ 80 ኣስ ጊግሲ ዎꬂዴስ።
2KI 10:25 ኢዩይ ጹጌቲዛ ያርሾዛ ሺሺዳፔ ጉዬ ናጊዛይታኔ ኦላ ጋዳዋታ፥ «ጌሊዲ ዎꬊቴ፤ ኦኒካ ኬሲ ኤኮፎ» ጊ ኣዛዚዴስ። ኢስቲካ ኢሲኖካ ኣሾንታ ማሻራ ዉርሲዳ፤ ናጊዛይቲኔ ኦላ ጋዳዋቲ ኣሳ ኣሃ ካሬ ኬሲ ኦሊዳ፤ ሄሳፌ ጉዬ ባኣሌ ጌቴቲዛ ኤቃ ጾሳ ኬꬃስ ቆልኣ ጊዶ ጌሊዳ።
2KI 10:26 ኣሳይ ጎይናና ማላ ሹቻፌ ማሴቲ ጊጊዳ ሚስሌታ ባኣሌ ጌቴቲዛ ኤቃ ጾሳ ኬꬃፌ ካሬ ኬሲ ጹጊዳ።
2KI 10:27 ባኣሌስ ጎይኒዛ ሚስሌዛ ቆጼሬꬂዳ፤ ኢዛን ባኣሌስ ጎይኒዛ ኬꬃካ ላሊዳ፤ ሄሳ ሄ ሶሆዛ ሃች ጋካናስ ዴሬይ ሼሽ ኡቲዛሶ ኬሲዴስ።
2KI 10:28 ኢዩይ ሄሳꬆ ኦꬂዲ ባኣሌስ ጎይኒዛይሳ ኢስራኤሌ ዴሬፔ ꬋይሲዴስ።
2KI 10:29 ጊዶ ኣቲን ኢዩይ ናባጼ ና ኢዮርባኣሜይ ቤቴሌኒኔ ዳኔን ዎርቃፌ ኦሴቲዳ ማራ ሚስሌታስ ኢስራኤሌ ኣሳይ ጎይናና ማላ ኣሳ ኦሲሲዳ ናጋራፔ ሃኪቤና።
2KI 10:30 ጎዳይ ኢዩስ፥ «ኔኒ ታ ሲንꬃን ሎኦ ኦꬂዳ ጊሻሲኔ ኣካቤ ኬꬃ ቦላ ጋካና ማላ ታ ዎዚናን ዲዛይሳ ኡባካ ኔ ፖሊዳ ጊሻስ ኔ ዜሬꬃይ ቢዲ ኦይዳንꬆ ዬሌታ ጋካናስ ኢስራኤሌ ቦላ ካዎታና» ጊዴስ።
2KI 10:31 ጊዶ ኣቲን ኢዩይ ጎዳ ኢስራኤሌ ጾሳ ዎጋ ባ ኩሜꬃ ዎዚናፔ ናጊቤና፤ ኢዮርባኣሜይካ ኢስራኤሌ ኣሳ ኦሲሲዳ ናጋራፔ ሃኪቤና።
2KI 10:32 ሄ ዎዴ ጎዳይ ኢስራኤሌ ቢታ ጉꬂ ጉꬂ ኤፎ ዶሚዴስ። ኣዛሄሌይ ኢስራኤሌ ኣሳ ሄ ጋጻፔ ሃ ጋጻ ጋካናስ ኦሊ ጾኒዴስ።
2KI 10:33 ሄሲካ ዮርዳኖሴፔ ኣርሼይ ሞኪዛ ባጋራ ዲዛ ጋላኣዴ ዴሬ ኡባ ጊዲሺን ኣርኖኔ ሻፋ ኣቻን ዲዛ ኣሮኤሬፔ ቢዲ ጋዴ ዴሬ፥ ኦሮቤሌ ዴሬ፥ ሚናሴ ዴሬ ጋላኣዴኔ ባሳኔ ጋካናሳ።
2KI 10:34 ሃንኮ ኣቲዳይሲ ኢዩ ካዎቴꬃ ላይꬃን ሃኒዳይሲኔ ኢዚ ኦꬂዳ ኦሶ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 10:35 ኢዩይ ካሴ ባ ኣዋታ ማላ ሃይቂዴስ፤ ኢዛ ሳማሪያን ሞጊዳ፤ ኢዛ ና ኢዮኣካዚ ኢዛሶሆን ካዎቲዴስ።
2KI 10:36 ኢዩይ ሳማሪያን ዲሼ ኢስራኤሌ ቦላ 28 ላይꬅ ካዎቲዴስ።
2KI 11:1 ኣካዚያሳ ኣያ ጎቶሊያይ ባ ናዛ ሃይቆ ሲያዳ ካዎ ኬꬃ ኣስ ኡባካ ዎꬋ ꬋይሳዱስ።
2KI 11:2 ካዎ ኢዮራሜ ና ኣካዚያሳ ሚቾ ዮሳቤታ ሃይቃና ሺቂ ኡቲዳ ካዎ ናይታ ጊዶፌ ኣካዚያሳ ናዛ ኢዮኣሳ ካይሳ ኤካዱስ። ኢስቲ ኢዛ ዎꬎንታ ማላ ጎቶሊያፔ ኢዛ ቆታ ኤካዳ ኢዛኔ ኢዛ ናጊዛሮ ኢሲ ኢልፒኔ ኬꬃን ጌልꬃ ቆታዱስ።
2KI 11:3 ጎቶሊያይ ዴሬዛ ሃሪዛ ዎዴካ ኢዚ ባና ናጊዛሪራ 8 ላይꬅ ጎዳ ኬꬃን ቆቴቲዴስ።
2KI 11:4 ላፑንꬆ ላይꬃን ዮዳሄይ ኪታ ዬዲዲ ካራ ዴሬ ኣሲኔ ዛቤ ናጊዛይታ ኣዛዚዛ ማቶ ሃላቃታ ኢዚ ዲዛሶሆ ጎዳ ኬꬅ ያና ማላ ኣዛዚዴስ፤ ኢዚ ኢስታራ ጫቄቲዲ ጎዳ ኬꬃን ጫቄꬂዴስ፤ ሄሳፌ ጉዬ ካዋ ናዛ ኢስታ ቤሲዴስ።
2KI 11:5 ኢዚ ኢስታስ፥ «ኢንቴ ኦꬃናይ ሄꬑ ኬዚ ሻኬቲዲ ሳምባታ ጋላስ ዛቤ ናጊዛይታ ጋርሳፌ ኮይሮይሲ ካዎ ኬꬅ ናጎ።
2KI 11:6 ናምኣንꬆ ሻኮዚ ሱሬ ጌቴቲዛ ፔንጌዛ ናጎ፤ ጾሳ ኬꬅ ታራን ታራን ናቤታፔ ጉዬ ባጋራ ዲዛ ፔንጌዛ ናጎ።
2KI 11:7 ኢንቴስ ካሴካ ዶሴ ጊዲዳ ማላ ሳምባታ ጋላስ ዛቤ ናጎፔ ሼምፒዳይቲ ኡባይ ሄꬓፌ ናምኡ ኩሼቲ ካዎዚ ኢዛን ዲዛ ጾሳ ኬꬃዛ ናጊቴ።
2KI 11:8 ኢንቴ ኡባይካ ኢንቴ ማሳራ ማሳራ ኦይኪዲ ካዎዛ ዩሾን ኤቂቴ፤ ኢንቴኮ ሺቂዛ ኣሲ ዲኮ ሃይቆ» ጊዴስ።
2KI 11:9 ማቶ ሃላቃቲ ቄሴ ዮዳሄይ ኣዛዚዛይሳ ኡባካ ኦꬂዳ፤ ኢስታፌ ኢሶይ ኢሶይ ሳምባታ ጋላስ ዛቤ ናጋናስ ጌሊዛይቲኔ ዛቤ ናጊዲ ኬዚዛይቲ ባና ካሊዛይታ ካሌꬂ ኤኪዲ ቄሴ ዮዳሄኮ ጋኪ ዎꬊዳ።
2KI 11:10 ቄሴዚካ ጾሳ ኬꬃን ዲዛ ካዎ ዳዊቴ ቶራዛኔ ጎንዳሌዛ ማቶ ሃላቃታስ ኢሚዴስ።
2KI 11:11 ዎታዳራቲካ ኢሶይ ኢሶይ ባ ማሳራ ኤኪዲ ጾሳ ኬꬃዛስ ዱጌሃ ባጋፌ ዶሚዲ ፑዴሃ ጋካናስ ያርሾ ያርሺዛሶኔ ጾሳ ኬꬃ ማታን ካዎዛ ዩሾን ኤቂዳ።
2KI 11:12 ዮዳሄይካ ካዎ ናዛ ኢዚ ዲዛሶሆፔ ኬሲዲ ኢዛ ሁኤን ካላቻ ጎጺዴስ፤ ጫቆ ቃላ ማጻፋካ ኢዛስ ኢሚዴስ፤ ኢዛ ቲይዲ ካዎꬂዳይሳ ኣዋጂዴስ፤ ሄሳፌ ጉዬ ዴሬዚ፥ «ካዎይ 1,000 ላይꬅ ካዎቶ» ጉሳን ባ ኩሼ ባቂዲ ባ ኡፋይሳ ꬎቃ ቃላን ዋሲ ኤሪሲዴስ።
2KI 11:13 ጎቶሊያይካ ኦላ ኣሳ ዋሶዛኔ ዴሬዛ ዋሶዛ ሲያዳ ዴሬዚ ዲዛሶ ጾሳ ኬꬃኮ ባዱስ።
2KI 11:14 ሄኮ ካሴ ዲዛ ዎጋ ማላ ካዎዚ ቱሳ ማታን ኤቂዳይሳ ኢዛ ሹሜቲኔ ዛዬ ፑኒዛይቲ ኢዛ ኣቻን ዲዛይሳ ቤኣዱስ፤ ዴሬይ ኡባይ ኡፋይሳን ጉፔሲኔ ዛዬካ ዛዬስ። ጎቶሊያይ ባ ማይኢዳ ማይኦዛ ዳካ ዬጋዳ፥ «ሃይሲ ካዶ፤ ሃይሲ ካዶ!» ጋ ዋሳዱስ።
2KI 11:15 ቄሴ ዮዳሄይ ኦላ ኣሳታ ኣዛዚዛይታ ማቶ ሃላቃታ፥ «ቡቴን ቡቴን ሳልፊዳ ኣሳ ጋርሳፌ ኢዞ ሃራሶ ኬሲቴ፤ ኢዞ ካሊዛይታ ማሻን ቡሳኪቴ» ጊዲ ኣዛዚዴስ፤ ሄሲካ ሃኒዳይ ቄሴዚ ካሴ፥ «ኣሲ ጾሳ ኬꬃን ሃይቃና ቤሴና» ጊዳ ጊሻሳ።
2KI 11:16 ሄሳ ጊሻስ ኢዛ ፓራቲ ካዎ ኬꬅ ጌሊዛ ሶ ቢ ጋኪሺን ኦይኪዲ ኢዞ ሄን ዎꬊዳ።
2KI 11:17 ዮዳሄይካ ኣሳይ ጎዳ ዴሬ ጊዳና ማላ ጾሳ ሲንꬃኒኔ ካዎዛ ሲንꬃን ዴሬዛሲኔ ጎዳስ ጊዶን ጫቆ ቃላይ ዳና ማላ ኦꬂዴስ። ሄሳꬆካ ካዎዛሲኔ ዴሬዛስ ጊዶን ጫቆ ቃላ ዎꬂዴስ።
2KI 11:18 ኣሳይ ኡባይካ ቢዲ ባኣሌ ጌቴቲዛ ኤቃ ጾሳ ኬꬅ ላሊዴስ፤ ያርሾሶዛኔ ሚስሌታ ኡባ ሜንꬄሬꬂ ዬጊዴስ፤ ባኣሌ ቄሴ ማታኔካ ያርሾ ያርሺዛሶሆታ ሲንꬃን ዎꬊዴስ። ሄሳፌ ጉዬ ቄሴ ዮዳሄይ ጾሳ ኬꬃ ናጊዛ ዛቤታ ዎꬂዴስ።
2KI 11:19 ሄሳፌ ጉዬ ማቶ ሃላቃታ፥ ካራ ዴሬ ዎታዳራታ፥ ዛቤታ፥ ሄ ዴሬ ኣስ ኡባ ኤኪ ዪዴስ፤ ኡባይካ ኢሲ ቦላ ካዎዛ ጎዳ ኬꬃፌ ኬሲ ኤፊዲ ዛቤ ናጊዛይታ ጊምቤ ፔንጌፌ ዱጌ ባጋራ ዲዛ ካዎ ኬꬅ ኤፊ ጌልꬂዳ። ካዎዚካ ባ ካዎቴꬃ ኣራታ ቦላ ኡቲዴስ
2KI 11:20 ሄ ዴሬ ኣሳይ ኡባይካ ኡፋዬቲዴስ፤ ጎቶሊያይ ካዎ ኬꬃ ጊዶን ማሻን ሲፌቲዳ ጊሻስ ካታማያ ሲርጲ ጋዱስ።
2KI 11:21 ኢዮኣሲ ካዎቲሺን ኢዛስ ላይꬃይ ላፑና።
2KI 12:1 ኢዩይ ካዎቲዳ ላፑንꬃ ላይꬃን ኢዮኣሲ ካዎቲዴስ፤ ኢዚ ዬሩሳላሜን ኡቲዲ 40 ላይꬅ ሃሪዴስ፤ ኢዛ ኣያ ሳቢዮ ጌቴቲዛራ ቤርሳቤሄ ካታማን ዬሌታዱስ።
2KI 12:2 ቄሴ ዮዳሄይ ታማርሲዛ ዎዴ ኡባን ኢዮኣሲ ጎዳ ሲንꬃን ሎኦ ሚሽ ኦꬂዴስ።
2KI 12:3 ጊዶ ኣቲን ዙምቡላታ ቦላን ጎይኒዛሶሆታ ꬋይሲቤና፤ ዴሬዚካ ሄ ሶሆታን ያርሾ ሺሾኔ ኤጻኔ ጩዋሴꬅ ጉጂ ጉጂ ቢዴስ።
2KI 12:4 ኢዮኣሲ ቄሴታ፥ «ዴሬዛ ቆዳን ሺቂዳ ሚሻ፥ ኣዲናን ጌሊዳ ሚሻ ቃሴካ ኣሳይ ባ ሼኔን ጎዳ ኬꬃስ ኢሚዳ ዱማ ዱማ ሚሻ ኡባ ኢሲሶ ሺሺቴ።
2KI 12:5 ቄሴቲ ኢሶይ ኢሶይ ሚሻዛ ሺሺዛይታ ኩሼፔ ኤኬቶ፤ ሄ ሚሻዚ ኮሺዛ ማላ ጾሳ ኬꬃ ጊዶን ሞሬቲዳ ሶሆታ ኦራጺሳና ኬዞ» ጊዴስ።
2KI 12:6 ጊዶ ኣቲን ኢዮኣሲ ካዎቲን ቢዲ ናምኡ ታማኔ ሄꬓንꬆ ላይꬂ ጋካናስ ቄሴቲ ጾሳ ኬꬃዛ ጋርሳን ሞሬቲዳ ሶሆታ ኦራጺሲቤቴና።
2KI 12:7 ሄሳ ጊሻስ ኢዮኣሲ ቄሴ ዮዳሄኔ ሃራ ቄሴታካ ባኮ ጼይጊ ሺሺዲ፥ «ኣይስ ጾሳ ኬꬃ ጊዶን ሞሬቲዳይታ ዛሪ ሎኤꬆንታ ኣጊዴቲ?» ጊ ኦይቺዴስ። ቃሴካ፥ «ሃይሳፌ ሲንꬃን ሚሻይ ጾሳ ኬꬃዛ ጊዶን ሞሬቲዳይሳ ኦራጺሳናስ ኬዞ ኣቲን ሚሻ ኦይኪዛ ኣሳታፔ ኤኮፍቴ» ጊዴስ።
2KI 12:8 ቄሴቲካ ሄሳፌ ጉዬ ዴራፔ ሚሼ ሺሾንታ ማላኔ ጾሳ ኬꬃካ ባንታርካ ኦራጺሶንታ ማላ ቃላ ቃቺዳ።
2KI 12:9 ሄሳፌ ጉዬ ቄሴ ዮዳሄይ ኢሲ ሳጺኔ ኤኪዲ ኢዛስ ካማዛ ሉኪዲ ጾኤ ኬሲዴስ፤ ኤፊዲ ጾሳ ኬꬃን ጌሊዛሶፔ ኡሻቻ ባጋራ ያርሾ ያርሺዛሶሆዛ ኣቻን ዎꬂዴስ። ካሬዛ ናጊዛ ቄሴቲካ ጾሳ ኬꬃስ ዪዛ ሚሽ ኡባካ ሄ ሳጺኔዛን ጌልꬄቴስ።
2KI 12:10 ሳጺኔዛ ጊዶን ዳሮ ሚሺ ዲዛይሳ ቤዪ ቤኢዲ ካዎዛ ጻፌዚኔ ቄሴታ ሃላቃይ ዪዲ ዪዲ ጾሳ ኬꬃስ ዪዳ ሚሻ ቆዲ ቆዲዲ ካራጺቴን ጌልꬂ ቃቺ ዎꬄቴስ።
2KI 12:11 ሄ ሚሻዛ ሜዛኔይ ኤሬቲዳፔ ጉዬ ጎዳ ኬꬃዛ ኦሶ ኣላፌቴꬃን ኦሲሳና ማላ ሚሻዚ ዶሬቲዳ ኣሳታስ ኢሜቴስ፤ ሄሲካ ጾሳ ኬꬃ ኬጺዛ ኣናጼታስ፥ ጊምቤ ጊምቢዛይታስ፥
2KI 12:12 ሹች ማሲዛይታስ፥ ሹቻፌ ዱማ ዱማ ሜꬋ ጊግሲዛይታሲኔ ጾሳ ኬꬃ ኦራጺሳናስ ሚꬃሲኔ ማሴቲዳ ሹቻስ ኬዜስ።
2KI 12:13 ጾሳ ኬꬃዛስ ጌሊዳ ሚሻፌ ጊዲኮ ጾሳ ኬꬃስ ሶ ጊዶ ኦሶስ ኮሺዛ ቢራ ጹኣታ፥ ታማ ቃጴታ፥ ዲስቴታ፥ ዲንኬታኔ ሃራ ዎርቃፌ ጊዲን ቢራፔ ኦሴቲዛ ሚሻታስ ኬዚቤና።
2KI 12:14 ሄ ሚሻፌ ጾሳ ኬꬃዛ ኦራጺሲዛይታስ ጻላ ቃንጼቲዴስ።
2KI 12:15 ኬꬃ ኦራꬂዛ ኣሳታስ ሚሽ ቃንጻናስ ዶሬቲዳ ኣሳቲ ሙሌራ ኣማኔቲዳይታ ጊዲዳ ጊሻስ ኢስታ ካሊ ጼሊዛዴ ኮሺቤና።
2KI 12:16 ቆሆ ጊሻስ ሺቂዛ ያርሾይኔ ናጋራ ጊሻስ ሺቂዛ ያርሾይ ጊዲኮ ሃይቲ ቄሴታስ ጊዲዳ ጊሻስ ጾሳ ኬꬃ ጌሌቴና።
2KI 12:17 ሄ ዎዴ ኣራሜ ካዎ ኣዛሄሌይ ኬዚዲ ጌቴ ቦላ ሜቶ ጋꬂዲ ኢዞ ኦይኪዴስ፤ ቃሴካ ዬሩሳላሜ ቦላ ሜቶ ዬጋናስ ሄ ሲሚዴስ።
2KI 12:18 ዩሁዳ ካዎ ኢዮኣሲ ጊዲኮ ካሴ ኢዛ ኣዋቲ ዩሁዳ ካዎቲ ኢዮሳፊጼይ፥ ኢዮራሜይ፥ ኣካዚያሲ ጾሳስ ዱማ ሻኪዳ ሚሻታ ኡባ ኢዚ ባርካ ሻኪ ዎꬂዳ ዱማቲዳ ኢሞታታ ሄሳꬆካ ጾሳ ኬꬃኒኔ ካዎ ሚሻታ ዎꬂዛ ሚንጃ ኬꬃን ቤቲዳ ዎርቃ ኡባ ኢሲ ቦላ ሺሺዲ ኣራሜ ካዎ ኣዛሄሌስ ዬዲዴስ፤ ኣዛሄሌይ ዬሩሳላሜ ዩስ ኣጊዲ ጉዬ ሲሚዴስ።
2KI 12:19 ኢዮኣሲ ባ ካዎቴꬃ ላይꬃታን ኦꬂዳ ሃራ ኦሶቲኔ ኢዚ ፖሊዳ ሃኖቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 12:20 ኢዛ ሹሜቲካ ኢዛ ቦላ ዴንዲዳ፤ ዱጌ ሲላ ዎꬂዛ ኦጌዛ ቦላ ቤቴሚሎኔን ኢዛ ዎꬊዳ።
2KI 12:21 ኢዛ ዎꬊዳይቲካ ሹሜቲ ሺምኣታ ና ዮዛካሬኔ ሾሜሬዬ ና ዮዛባዴ፤ ኢዚ ሃይቂዲ ካሴ ባ ኣዋታ ኡባታ ማላ ዳዊቴ ካታማን ሞጌቲዴስ፤ ኢዛ ና ኣማሲያሲ ኢዛሶሆን ካዎቲዴስ።
2KI 13:1 ዩሁዳ ካዎ ኣካዚያሳ ና ኢዮኣሲ ካዎቲዳ ናምኡ ታማኔ ሄꬓንꬆ ላይꬃን ኢዩ ና ኢዮኣካዚ ሳማሪያ ካታማን ኢስራኤሌ ቦላ ካዎቲዴስ፤ ኢዚ 17 ላይꬅ ሃሪዴስ።
2KI 13:2 ኢዚካ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራ ካሊዲ ጎዳ ሲንꬃን ኢታ ኦሶ ኦꬂዴስ፤ ሄሳ ሄ ኦሶዛፔ ሲሚቤና።
2KI 13:3 ጎዳ ሃንቆይ ኢስራኤሌ ቦላ ታማ ማላ ኤጺዴስ፤ ሄሳ ጊሻስ ኣራሜ ካዎ ኣዛሄሌይኔ ኢዛ ና ቤኒ-ሃዳዴይ ዲዛ ዎዴ ኡባን ጎዳይ ኢስራኤሌታ ኢስታ ኩሼን ኣꬂ ኢሚዴስ።
2KI 13:4 ሄሳፌ ጉዬ ኢዮኣካዚ ጎዳ ዎሲዴስ፤ ጎዳይካ ኣራሜ ካዎይ ኢስራኤሌ ዎስቲ ሜቶꬂዳኮ ቤኢዳ ጊሻስ ኢዛ ዎሳ ሲዪዴስ።
2KI 13:5 ሄሳ ጊሻስ ጎዳይ ኢስራኤሌ ኣሺዛ ኣስ ኢስታስ ኢሚዴስ፤ ኢስቲካ ኣራሜ ኣሳ ኡንኤቴꬃፌ ኬሲ ኤኪዳ፤ ካሴ ማላካ ባንታ ኬꬃን ኬꬃን ዱስ ኦይኪዳ።
2KI 13:6 ጊዶ ኣቲን ካሴ ኢስራኤሌ ባሌꬂዳ ኢዮርባኣሜ ኬꬃ ናጋራፔ ሲሚቤቴና፤ ሲንꬅ ጉጂ ጉጂ ቢዳ። ኣሼሪ ሚስሌ ቱሳስ ሳማሪያን ጉጂ ጎይኒዳ።
2KI 13:7 ኢዮኣካዜ ኦላ ኣሳፔ 50 ቶጋ ኣሳቲ፥ ታሙ ፓራ-ጋሬቲኔ 10,000 ዎታዳራቲ ጻላ ኣቲዳ፤ ሃይሲ ሃኒዳይ ኣራሜ ካዎይ ኣቲዳይታ ኡባ ዲፒ ሂስቲ ꬋይሲዲ ባሌፔ ኬኢዛ ሱላ ማላ ኦꬂዳ ጊሻሳ።
2KI 13:8 ኢዮኣካዚ ባ ካዎቴꬃ ላይꬃታን ኦꬂዳዚ፥ ፖሊዳዚኔ ሃኒዳ ሃኖታቲ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 13:9 ኢዮኣካዚ ካሴ ባ ኣዋታ ማላ ሃይቂዴስ፤ ሳማሪያንካ ሞጌቲዴስ፤ ኢዛ ና ኢዮኣሲ ኢዛሶሆን ካዎቲዴስ።
2KI 13:10 ዩሁዳ ካዎ ኢዮኣሲ ካዎቲዳ ሄꬑ ታማኔ ላፑንꬃ ላይꬃን ኢዮኣካዜ ና ዮኣሲ ሳማሪያ ካታማን ኢስራኤሌ ቦላ ካዎቲዲ 16 ላይꬅ ዴራ ሃሪዴስ።
2KI 13:11 ኢዚካ ጎዳ ሲንꬃን ኢታ ኦሶ ኦꬂዴስ፤ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራ ኡባፌ ሃኪቤና፤ ጌዴ ጉጂ ጉጂ ቢዴስ።
2KI 13:12 ዮኣሲ ባ ካዎቴꬃ ላይꬃታን ኦꬂዳዚ፥ ፖሊዳዚኔ ሃኒዳ ሃኖታቲ ኡባይ ሄሳꬆካ ዩሁዳ ካዎ ኣማሲያሳራ ኦሌቲዳ ኦላይ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 13:13 ዮኣሲ ካሴ ባ ኣዋታ ማላ ሃይቂዴስ፤ ሳማሪያን ኢስራኤሌ ካዎቲ ሞጌቲዳሶን ሞጌቲዴስ፤ ኢዮርባኣሜይ ኢዛሶሆን ካዎቴꬃ ኣራታን ኡቲዴስ።
2KI 13:14 ሄ ዎዴ ኤልሳኢ ሃርጊዲ ሼምፖ ቦላ ዴስ። ኢስራኤሌ ካዎ ኢዮኣሲ ኢዛ ኦይቻና ዱጌ ዎꬊዲ ኢዛስ ዬኪዴስ፤ «ኦላ! ታ ኣዋዉ! ኦላ! ታ ኣዋዉ! ኔኒ ኢስራኤሌስ ፓራ-ጋሬኔ ቶጋንቻ!» ጊ ዋሲዴስ።
2KI 13:15 ኤልሳኢካ፥ «ኢሲ ዎንዳፌኔ ዪሻታ ሃ ኤካ ያ» ጊዴስ፤ ኢዚካ ኤሂዴስ።
2KI 13:16 ኢስራኤሌ ካዎዛ፥ «ኔ ኩሼን ዎንዳፌዛ ኦይካ» ጊዴስ፤ ኢዚ ዎንዳፌዛ ባ ኩሼን ኦይኪን ኤልሳኢ ባ ኩሼ ካዎዛ ኩሼ ቦላ ዎꬂዴስ።
2KI 13:17 ቃሴካ፥ «ኣርሼይ ሞኪዛ ባጋራ ዲዛ ማስኮቴዛ ዶያ» ጊዴስ፤ ኢዚካ ዶይዴስ፤ ኤልሳኢካ ኢዛስ፥ «ኣኔ ሃኢ ዎንዳፌዛ ዱካ» ጊዴስ፤ ኢዚካ ዱኪዴስ። «ጎዳስ ጾኖ ዎንዳፌ! ኣራሜይ ኢዛን ጾኔታና ዎንዳፌ!» ጊዴስ። ኤልሳኢ ዛሪዲ፥ «ኔኒ ኣራሜ ኣሳ ኣፌቄን ሙሌራ ጾናና» ጊዴስ።
2KI 13:18 ቃሴካ፥ «ኣኔ ዎንዳፌታ ኤካ» ጊዴስ፤ ካዎዚካ ኤኪዴስ። ኤልሳኢካ፥ «ኣኔ ሃይሳ ቢታ ጫዳ» ጊዴስ፤ ኢዚካ ሄꬑቶ ጫዲዲ ኣጋጊዴስ።
2KI 13:19 ጾሳ ኣሲ ኢዛ ቦላ ሃንቄቲዲ፥ «ኔኒ ቢታዛ ኢቻሹቶ ዎይኮ ኡሱፑንቶ ጫዳናስ ቤሴስ፤ ኔ ሂስቲዳኮ ኣራሜ ኣሳ ጾናዳ ሙሌራ ꬋይሳና፤ ሃኢ ጊዲኮ ኔ ኢዛ ሄꬑቶ ጻላ ጾናና» ጊዴስ።
2KI 13:20 ኤልሳኢካ ሃይቂዴስ፤ ኣሳይ ኢዛ ሞጊዴስ። ሄ ዎዴ ሞኣቤ ኣሳይ ላይꬃን ላይꬃን ኦፊንꬃ ኣጊናታን ኢስራኤሌ ኣሳ ቦላ ኦላስ ዎራጄቴስ።
2KI 13:21 ኢሲቶ ኢሲ ኢስራኤሌ ኣሲ ሃይቂዳይሳ ሞጊሼ ሜቶ ጋꬃናስ ዛማዲ ኡቲዳ ኣሳታ ዲንጋቴ ዴሚዳ፤ ሄሳ ጊሻስ ሃይቂዳይሳ ኣሃዛ ኤልሳኤ ዱፎን ዬጊዳ፤ ኣሃዚካ ኤልሳኤ ሜቄꬂ ቦቺዳ ማላ ሄራካ ፓጺዲ ኣዴዚ ባ ቶሆን ኤቂዴስ።
2KI 13:22 ኢዮኣካዜ ካዎቴꬃ ዎዴ ኡባን ኣራሜ ካዎ ኣዛሄሌይ ኢስራኤሌ ኣሳ ኬሂ ኡንኤꬄስ።
2KI 13:23 ጎዳይ ጊዲኮ ኢስታስ ቃꬌቲዴስ፥ ሚሼቲዴሲኔ ባ ሲንꬂካ ኢስታኮ ዛሪዴስ። ሄሲካ ኣብራሃሜራ፥ ዪሳቃራኔ ያቆቤራ ካሴ ጌሊዳ ጫቆ ቃላ ጊሻሳ። ሃች ጋካናስ ኢዚ ኢስታ ꬋይሳናስ ኮዪቤና፤ ኢዚ ኢስታ ባ ሲንꬃፌ ዲጊቤና።
2KI 13:24 ኣራሜ ካዎ ኣዛሄሌይ ሃይቂዴስ፤ ኢዚ ሃይቂን ኢዛ ናዚ ቤኒ-ሃዳዴይ ኢዛሶሆን ካዎቲዴስ።
2KI 13:25 ሄሳፌ ጉዬ ኢዮኣካዜ ና ዮኣሲ፥ ኢዛ ኣዋ ኩሼፔ ኣዛሄሌይ ኦሊ ኤኪዳ ካታማታ ኣዛሄሌ ና ቤኒ-ሃዳዴፔ ዛሪ ኤኪዴስ፤ ኢዮኣሲ ሄꬑቶ ኢዛ ጾኒዴስ፤ ኢስራኤሌ ካታማታ ሄሳ ማላን ዛሪ ኦይኪዴስ።
2KI 14:1 ኢስራኤሌ ካዎ ኢዮኣካዜ ና ዮኣሲ ካዎቲዳ ናምኣንꬆ ላይꬃን ዩሁዳ ካዎ ኢዮኣሳ ና ኣማሲያሲ ካዎቲዴስ።
2KI 14:2 ኢዚ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን ኡቲዲ 29 ላይꬅ ሃሪዴስ፤ ኢዛ ኣያ ዮሃኣዳኖ ጌቴቲዛ ዬሩሳላሜ ማጫሳ።
2KI 14:3 ኣማሲያሲ ጎዳ ሲንꬃን ሎኦ ሚሽ ኦꬂዴስ፤ ጊዶ ኣቲን ካሴ ኢዛ ኣዋ ዳዊቲ ኦꬆይሳ ማላ ኦꬂቤና፤ ኡባ ሚሺካ ባ ኣዋ ኢዮኣሲ ኦꬆይሳꬆ ኦꬂዴስ።
2KI 14:4 ዙምቡላታ ቦላ ዲዛ ጎይኒዛሶቲ ኪቺቤቴና፤ ኣሳይ ዙምቡላታ ቦላ ያርሾ ሺሾኔ ኤጻኔ ጩዋሴꬅ ኤሲቤና።
2KI 14:5 ኣማሲያሲ ባ ካዎቴꬃ ሚንꬂ ኦይኪዳፔ ጉዬ ባ ኣዋ ዎꬊዳ ሹሜታ ዎꬊዴስ።
2KI 14:6 ጊዶ ኣቲን ሙሴ ዎጋ ማጻፋን ጎዳይ፥ «ኣሲ ባ ኦꬂዳ ናጋራን ሃይቆ ኣቲን ኣዋቲ ባንታ ናይታ ናጋራን፥ ናይቲ ባንታ ኣዋታ ናጋራን ሃይቆፌቶ» ጊዲ ኣዛዚዳ ጊሻስ ካሴ ሼምፖ ዎꬊዳይታ ናይታ ዎꬊቤና።
2KI 14:7 ኣማሲያሲ፥ «ማጺኔ ሾባ» ጌቴቲዛሶን ኤዶሜ ኣሳፔ 10,000 ዉርሲዴስ፤ ሴላ ኦሊ ኦይኪዲ ሃች ጋካናስ ዮቂቲኤሌ ጌቴቲዛ ሱንꬅ ኢሚዴስ።
2KI 14:8 ሄሳፌ ጉዬ ኣማሲያሲ ኢዩስ ናዛ ና ኢዮኣካዜ ና ኢስራኤሌ ካዎ ዮኣሳኮ፥ «ሃ ያ፤ ኣኔ ኦላዛ ቲራን ጋይቶስ» ጊዲ ቃስታኔ ዬዲዴስ።
2KI 14:9 ኢስራኤሌ ካዎ ዮኣሲ ዩሁዳ ካዎ ኣማሲያሴስ፥ «ኢሲ ሊባኖሴ ኪንዲቾይ ኢሲ ሊባኖሴ ዚጋ፥ ‹ኔ ናዮ ታ ናዛስ ማቾ ኢማ› ጊዴስ። ሄሳፌ ጉዬ ኢሲ ሊባኖሴፔ ዎራ ዶኣይ ዪዲ ኪንዲቾዛ ባ ቶሆን ዬꬊዴስ።
2KI 14:10 ቱማካ ኔ ኤዶሜ ጾናዳሳ፤ ጊዲኮካ ኔ ዎዚናይ ዎጋይ ባይንዳ ኦቶሬቶፎ፤ ኔ ኢዛ ጾኒዳ ጊሻስ ዛራꬌቶፋ፤ ሼምፓ ኡታ! ኔኒ ኔ ኩንዴꬂኔ ዩሁዳ ኩንዴꬅ ኣይስ ኮያይ?» ጊ ኪቲዴስ።
2KI 14:11 ጊዶ ኣቲን ኣማሲያሲ ኢዚ ጊዛይሳ ሲዮንታ ኢጺዴስ፤ ሄሳ ጊሻስ ኢስራኤሌ ካዎ ዮኣሲ ኦላስ ኬዚዴስ፤ ኢዚኔ ዩሁዳ ካዎ ኣማሲያሲካ ዩሁዳ ዴሬን ቤቲ-ሼሚሼፔ ሲንꬃ ባጋን ኦላ ዳንጺዳ።
2KI 14:12 ዩሁዳይ ኢስራኤሌን ጾኔቲዴስ፤ ኣሳይ ኢሶይ ኢሶይ ባሶ ባሶ ባቃቲዴስ።
2KI 14:13 ኢስራኤሌ ካዎይ ዮኣሲ ኣካዚያሳስ ናዛ ና ኢዮኣሳ ናዛ ዩሁዳ ካዎ ኣማሲያሳ ቤቲ-ሼሚሼን ዲኢዴስ። ሄሳፌ ጉዬ ዮኣሲ ዬሩሳላሜ ቢዴስ፤ ኤፍሬሜ ጊምቤ ፔንጌፌ ዶሚዲ ጉላ ፔንጌ ጌቴቲዛሶ ጋካናስ ኣዱሳቴꬃይ 400 ዋꬋ ጊዲዳ ጊምቤዛ ላሊዴስ።
2KI 14:14 ጎዳ ኬꬃኒኔ ካዎ ሚንጃ ኬꬃን ዲዛ ዎርቃ፥ ቢራኔ ሄን ቤቲዳ ሚሽ ኡባ ኤኪዲ ዲኤቲዳ ኣሳካ ኦይኪ ኤኪዲ ሳማሪያ ሲሚዴስ።
2KI 14:15 ዮኣሳ ካዎቴꬃ ላይꬃታን ኦሴቲዳዚ፥ ፖሌቲዳዚኔ ሃኒዳ ሃኖቲ ኡባይ ዩሁዳ ካዎ ኣማሲያሳራ ኦሌቲዳ ኦላይ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 14:16 ዮኣሲ ሃይቂዲ ባ ኣዋታን ጋይቲዴስ፤ ካሴ ኢስራኤሌ ካዎቲ ሞጌቲዛ ሳማሪያን ካዎታ ዱፎን ሞጌቲዴስ፤ ኢዛ ና ኢዮርባኣሜይ ኢዛሶሆን ካዎቲዴስ።
2KI 14:17 ዮኣሳ ናዚ ዩሁዳ ካዎ ኣማሲያሲካ ኢስራኤሌ ካዎ ኢዮኣካዜ ና ኢዮኣሲ ሃይቂዳፔ ጉዬ 15 ላይꬅ ዴኢዴስ።
2KI 14:18 ኣማሲያሳ ካዎቴꬃ ላይꬃታን ሃኒዳ ሃኖቲ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 14:19 ዬሩሳላሜ ኣሳይ ኣማሲያሳ ቦላ ሴሪ ዴንዲዳ ጊሻስ ኢዚ ጌዴ ላኪሼ ባቃቲ ቢዴስ፤ ጊዶ ኣቲን ኢስቲ ባ ባጋራ ኢዛ ካሌቲዛ ኣስ ኪቲዲ ዎꬊሲዳ።
2KI 14:20 ኢዛ ኣሃዚካ ፓራን ጫኔቲ ዪዲ ዳዊቴ ካታማን ካሴ ኢዛ ኣዋቲ ሞጌቲዛሶን ዬሩሳላሜን ሞጌቲዴስ።
2KI 14:21 ሄሳፌ ጉዬ ዩሁዳ ዴሬ ኡባይ 16 ላይꬃ ና ኣዛሪያሳ ኤኪዲ ኢዛ ኣዋ ኣማሲያሳ ሶሆን ካዎꬂዳ።
2KI 14:22 ኣማሲያሲ ሃይቂዲ ባ ኣዋታን ጋይቲዳፔ ጉዬ ኣዛሪያሲ ኤላቴ ዛሪ ኦꬂዲ ዩሁዳን ጋጊዴስ።
2KI 14:23 ኢዮሲያሳ ና ኣማሲያሲ ዩሁዳን ካዎቲዳ ታማኔ ኢቻሻንꬆ ላይꬃን ኢስራኤሌ ካዎ ዮኣሳ ና ኢዮርባኣሜይ ሳማሪያን ካዎቲዴስ፤ 41 ላይꬅ ጋካናስ ሃሪዴስ።
2KI 14:24 ኢዚ ጎዳ ሲንꬃን ኢታ ሚሽ ኦꬂዴስ፤ ናባጼ ና ኢዮርባኣሜይ ካሴ ኢስራኤሌ ኣሳ ኦሲሲዳ ናጋራፔ ጉዬ ሲሚቤና።
2KI 14:25 ጎዳ ኢስራኤሌ ጾሳይ ጌት-ሄፌሬ ናቤ ኣማቴ ና ባ ኣይሌ ዮናሳ ባጋራ ዮቲዳ ማላ ሃማቴ ኣꬊዛ ፑርዴፌ ቢዲ ሃይቆ ኣባ ጋካናስ ዲዛ ኢስራኤሌ ዛዋ ዛሪሲዳይ ኢዮርባኣሜ።
2KI 14:26 ኣይሌ ጊዲን ዎይኮ ጎቃ ጊዲን ኢስራኤሌን ዲዛይ ኡባይካ ኬሂ ዋዬቲዛይሳ ጎዳይ ቤኢዴስ፤ ኢስታ ማዲዛይካ ዴና።
2KI 14:27 ጊዶ ኣቲን ጎዳይ ኢስራኤሌ ሱንꬃ ቢታ ቦላፌ ꬋይሳና ጊዲ ካሴ ዮቲቤና ጊሻስ ዮኣሳ ና ኢዮርባኣሜን ኤቂዲ ኢስታ ኣሺዴስ።
2KI 14:28 ኢዮርባኣሜ ካዎቴꬃ ላይꬃታን ኢዚ ኦꬂዳዚ፥ ሃኒዳ ሃኖቲኔ ኦሌቲዳ ኦላቲ ሄሳꬆካ ካሴ ዩሁዳይ ሃሪዛሶታ ዳማስቆኔ ሃማቴ ኢዚ ኢስራኤሌስ ዎስቲ ዛሪዳኮ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 14:29 ኢዮርባኣሜይ ሃይቂዲ ባ ኣዋታን ጋይቲዴስ፤ ኢዛ ና ዛካራሲ ኢዛሶሆን ካዎቲዴስ።
2KI 15:1 ኢስራኤሌ ካዎ ኢዮርባኣሜይ ካዎቲዳ ናምኡ ታማኔ ላፑንꬃ ላይꬃን ዩሁዳ ካዎ ኣማሲያሴ ና ኣዛሪያሲ ካዎቲዴስ።
2KI 15:2 ኢዚ ካዎቲዛ ዎዴ ኢዛስ ላይꬃይ 16፤ ኢዚ ዬሩሳላሜ ኢቻሽ ታማኔ ናምኡ ላይꬅ ሃሪዴስ፤ ኢዛ ኣያ ዪኮልያይ ዬሩሳላሜ ማጫሳ።
2KI 15:3 ካሴ ኢዛ ኣዋ ኣማሲያሲ ኦꬆይሳꬆ ኣዛሪያሲካ ጎዳ ሲንꬃን ሎኦ ኦሶ ኦꬂዴስ።
2KI 15:4 ጊዶ ኣቲን ዙምቡላታ ቦላ ጎይኒዛሳሆቲ ꬋይቤቴና፤ ኣሳይካ ሄን ያርሾ ሺሾኔ ኤጻኔ ጩዋሴꬅ ኣጊቤና።
2KI 15:5 ጎዳይ ካዎዛ ኢዚ ሃይቃና ጋካናስ ኢዛ ቦላ ኢንቺራቻ ሃርጌ ዬጊዴስ፤ ኢዚካ ኣሳፔ ሻኬቲዲ ዱማ ኬꬃን ኡቲዴስ፤ ሄ ዎዴ ኢዛ ካዎቴꬃ ኬꬃ ኣላፌቴꬃን ዴራ ኣይሲዛይ ካዎዛ ና ኢዮኣታሜ።
2KI 15:6 ኣዛሪያሳ ካዎቴꬃ ላይꬃን ኦሴቲዳዚኔ ሃኒዳ ሃኖቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 15:7 ኣዛሪያሲ ሃይቂዲ ባ ኣዋታን ጋይቲዴስ፤ ዳዊቴ ካታማን ኢዛ ኣዋታ ዱፎ ማታን ኢዛ ሞጊዳ፤ ኢዛ ና ኢዮኣታሜይ ኢዛሶሆን ካዎቲዴስ።
2KI 15:8 ዩሁዳ ካዎ ኣዛሪያሲ ካዎቲዳ ሄꬑ ታማኔ ኦስፑንꬃ ላይꬃን ኢዮርባኣሜ ና ዛካራሲ ሳማሪያ ካታማን ኢስራኤሌን ካዎቲዴስ፤ 6 ኣጊናካ ሃሪዴስ።
2KI 15:9 ካሴ ኢዛ ኣዋይ ኦꬆይሳꬆ ኢዚካ ጎዳ ሲንꬃን ኢታ ሚሽ ኦꬂዴስ፤ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ኢዚ ሲሚቤና።
2KI 15:10 ያቡሴ ና ሻሎሜይ ዛካራሳ ቦላ ዴንዲዲ ዴራ ሲንꬃን ኢዛ ቦላ ሜቶ ጋꬂ ዎꬊዴስ፤ ኢዛ ሶሆንካ ካዎቲዴስ።
2KI 15:11 ዛካራሳ ካዎቴꬃ ላይꬃታን ኦሴቲዳ ሃራ ሚሻቲካ ኢስራኤሌ ካዎታ ታሪኬ ማጻፋን ጻፌቲዳ።
2KI 15:12 ካሴ ጎዳይ ኢዩስ፥ «ኔ ናይቲ ኦይዳንꬃ ዬሌታ ጋካናስ ኢስራኤሌ ካዎቴꬃ ኣራታን ኡታና» ጊዲ ዮቲዳ ቃላይ ፖሌቲዴስ።
2KI 15:13 ዩሁዳ ካዎ ኦዚያይ ካዎቲዳ ሄꬑ ታማኔ ኡዱፉንꬆ ላይꬃን ያቡሴ ና ሻሎሜይ ኢስራኤሌ ቦላ ካዎቲዴስ። ሳማሪያን ኡቲዲ ኢሲ ኣጊና ዴራ ሃሪዴስ።
2KI 15:14 ጋዴ ና ሚናሄሚ ቲርጻፌ ኬዚ ሳማሪያ ቢዲ ሜቶ ጋꬂዴስ፤ ያቡሴ ና ሻሎሜ ዎꬊዲ ኢዛሶሆን ካዎቲዴስ።
2KI 15:15 ሻሎሜ ካዎቴꬃ ላይꬃታን ኦሴቲዳ ሃራ ኦሶቲኔ ኢዚ ዴንꬄꬂዳ ዮኦቲ ኢስራኤሌ ካዎታ ታሪኬ ማጻፋን ጻፌቲዳ።
2KI 15:16 ሄ ዎዴ ሚናሄሚ ቲርጻፌ ኬዚዲ ቲፊሳ ካታማ ኣሳኔ ሄ ሄራን ዲዛ ኣሳ ኡባ ቦላ ሜቶ ጋꬂዴስ፤ ኢዚ ሄሳꬆ ኦꬂዳይ ኢስቲ ሄ ካታማይ ፔንጌታ ዶዮንታ ኢጺዳ ጊሻሳ፤ ቲፊሳ ኣሳ ዎꬊዴሲኔ ሻራራ ዲዛ ማጫሳታ ኡባታ ኡሎ ዳኪዴስ።
2KI 15:17 ዩሁዳ ካዎ ኣዛሪያሲ ካዎቲዳ ሄꬑ ታማኔ ኡዱፉንꬆ ላይꬃን ጋዴ ና ሚናሄሚ ኢስራኤሌ ቦላ ካዎቲዴስ፤ ኢዚ ሳማሪያን ኡቲዲ 10 ላይꬅ ሃሪዴስ።
2KI 15:18 ኢዚ ጎዳ ሲንꬃን ኢታ ሚሽ ኦꬂዴስ፤ ኢዚ ባ ዲዛ ላይꬅ ኡባን ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ሲሚቤና።
2KI 15:19 ሄሳፌ ጉዬ ኣሶሬ ካዎ ቴሊጌሊቴሊፌሊሶሬይ ቢታዮ ኦሊ ኦይኪዴስ፤ ሚናሄሚካ ባስ ማዶ ዴማናሲኔ ባ ካዎቴꬃን ዲዛ ባ ዛዋ ሚንꬃናስ ጊዲ 1,000 ሳቂሌ ቢራ ኢዛስ ኢሚዴስ።
2KI 15:20 ሚናሄሚ ሄ ሚሻ ኢስራኤሌ ኣሳይ ኬሴቲ ሺሻና ማላ ኦꬂዴስ፤ ኢዚ ሄሳꬆ ኦꬂዳይ ሚሻዛ ኣሶሬ ካዎስ ኢማና ማላ ዱሬ ኣሳይ ኢሶይ ኢሶይ 50 ሳቂሌ ቢራ ኬሳና ማላ ዎልቃꬂዴስ፤ ሄሳ ጊሻስ ኣሶሬ ካዎይ ሄ ዴሬን ጋምኦንታ ባ ዴሬ ሲሚ ቢዴስ።
2KI 15:21 ሚናሄሜ ካዎቴꬃ ላይꬃን ኦሴቲዳ ሃራ ኦሶቲኔ ሃኒዳ ሃኖቲ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 15:22 ሚናሄሚ ሃይቂዲ ባ ኣዋታን ጋይቲዴስ፤ ኢዛ ና ፊቃሴያሲ ኢዛሶሆን ካዎቲዴስ።
2KI 15:23 ዩሁዳ ካዎ ኣዛሪያሲ ካዎቲዳ ኢቻሽ ታማንꬃ ላይꬃን ሚናሄሜ ና ፊቃሴያሲ ሳማሪያ ካታማን ኢስራኤሌ ቦላ ካዎቲዲ 2 ላይꬅ ሃሪዴስ።
2KI 15:24 ፊቃሴያሲ ጎዳ ሲንꬃን ኢታ ኦꬂዴስ፤ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ሲሚቤና።
2KI 15:25 ኢዛ ኦላ ኣሳ ሃላቃታፔ ኢሶይ ኤሮሜሊዮ ና ፋቁሄይ ኢዛ ቦላ ዴንዲዴስ፤ ጋላኣዴፔ 50 ኣስ ባ ቦላ ኤኪ ቢዲ ሳማሪያን ካዎ ኬꬃን ዲዛ ሚጻን ፊቃሴያሴ፥ ኣርጎባኔ ኣራያራ ኢሲፌ ዎꬊዲ ኢዛሶሆን ካዎቲዴስ።
2KI 15:26 ፊቃሴያሳ ካዎቴꬃ ላይꬃን ኦሴቲዳ ሃራ ኦሶቲኔ ሃኒዳ ሃኖቲ ኡባይ ኢስራኤሌ ካዎታ ታሪኬ ማጻፋን ጻፌቲዴስ።
2KI 15:27 ዩሁዳ ካዎ ኣዛሪያሲ ካዎቲዳ ኢቻሽ ታማኔ ናምኣንꬆ ላይꬃን ኤሮሜሊዮ ና ፋቁሄይ ሳማሪያ ካታማን ኢስራኤሌ ኣሳ ቦላ ካዎቲዴስ፤ 20 ላይꬅ ካዎቲዴስ።
2KI 15:28 ኢዚካ ጎዳ ሲንꬃን ኢታ ሚሽ ኦꬂዴስ፤ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ሲሚቤና።
2KI 15:29 ኢስራኤሌ ካዎ ፋቁሄይ ካዎቲ ዲዛ ላይꬃታን ኣሶሬ ካዎ ቴሊጌሊቴሊፌሊሶሬይ ዪዲ ኢዮኔ፥ ኣቤሊ-ቤቲ-ማኢካ፥ ያኖኬ፥ ቃዴሴ፥ ሃጾሬ፥ ጋላኣዴ፥ ጋሊላኔ ኒፍታሌሜ ዴራካ ኢሲፌ ጋꬂ ኦይኪዴስ። ኣሳካ ዲኢ ኤኪዲ ኣሶሬ ዴሬ ኤፊዴስ።
2KI 15:30 ሄሳፌ ጉዬ ኤላ ና ሆሴኤይ ኤሮሜሊዮ ና ፋቁሄ ቦላ ዴሬዛ ዴንꬂዴስ፤ ኢዛ ቦላ ሜቶ ጋꬂዲ ዎꬊዴስ፤ ኦዚያ ና ኢዮኣታሜይ ካዎቲዳ ናምኡ ታማንꬃ ላይꬃን ሆሴኤይ ፋቁሄ ሶሆን ካዎቲዴስ።
2KI 15:31 ፋቁሄ ካዎቴꬃ ላይꬃታን ኦሴቲዳ ሃራ ኦሶቲኔ ሃኒዳ ሃኖቲ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
2KI 15:32 ኢስራኤሌ ካዎ ኤሮሜሊዮ ና ፋቁሄይ ካዎቲዳ ናምኣንꬆ ላይꬃን ዩሁዳ ካዎ ኦዚያ ና ኢዮኣታሜይ ካዎቲዴስ።
2KI 15:33 ኢዚ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን ኡቲዲ 16 ላይꬅ ሃሪዴስ። ኢዛ ኣያ ሳዶቄ ና ኢዬሩሶ ጌቴታዉስ።
2KI 15:34 ኢዚ ካሴ ባ ኣዋ ኦዚያይ ኦꬂዳ ማላ ጎዳ ሲንꬃን ሎኦ ኦሶ ኦꬂዴስ።
2KI 15:35 ጊዶ ኣቲን ዙምቡላታ ቦላን ጎይኒዛሶሆቲ ኪቺቤቴና፤ ኣሳይ ሄን ያርሾ ሺሾኔ ኤጻኔ ጩዋሴꬅ ኣጊቤና። ኢዮኣታሜይ ጎዳ ኬꬃስ ፑዴ ባጋ ፔንጌዛ ዛሪ ጊግሲዴስ።
2KI 15:36 ኢዮኣታሜ ካዎቴꬃ ላይꬃታን ኦሴቲዳ ሃራ ኦሶቲኔ ሃኒዳ ሃኖቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 15:37 ሄ ዎዴ ጎዳይ ኣራሜ ካዎ ኤራሶኔይኔ ኤሮሜሊዮ ና ፋቁሄይ ዩሁዳ ኦላና ማላ ኦꬂዴስ።
2KI 15:38 ኢዮኣታሜይ ሃይቂዲ ባ ኣዋታን ጋይቲዴስ፤ ካሴ ኢዛ ኣዋቲ ሞጌቲዳ ዱፎን ባ ኣዋ ዳዊቴ ካታማን ሞጌቲዴስ። ኢዛ ና ኣካዜይ ኢዛሶሆን ካዎቲዴስ።
2KI 16:1 ኤሮሜሊዮ ና ፋቁሄይ ካዎቲዳ ታማኔ ላፑንꬃ ላይꬃን ዩሁዳ ካዎ ኢዮኣታሜ ና ኣካዜይ ካዎቲዴስ።
2KI 16:2 ኣካዜይ ካዎቲዛ ዎዴ ኢዛስ ላይꬃይ 20፤ ኢዚ ዬሩሳላሜን ኡቲዲ 16 ላይꬅ ሃሪዴስ። ኢዛ ኣዋ ዳዊቲ ሎኦ ኦꬂዳ ማላ ጎዳ ሲንꬃን ሎኦ ኦꬂቤና።
2KI 16:3 ኢዚ ካሴ ኢስራኤሌ ካዎታ ካሊዴስ፤ ሄሳፌካ ቦላራ ጎዳይ ኢስራኤሌ ኣሳ ሲንꬃፌ ጎዲ ኬሲዳ ካዎቴꬃታ ቱናቴꬃ ካሊዲ ባ ና ታማን ጹጌቲዛ ያርሾስ ሺሺዴስ።
2KI 16:4 ሄሳꬆካ ዙምቡላታ ቦላን ጎይኒዛሶታን፥ ፖጎኖታ ሁኤኒኔ ሃጋይ ዳዪዳ ሚꬃታ ጋርሳን ያርሾ ያርሺዴሲኔ ኤጻኔ ጩዋሲዴስ።
2KI 16:5 ኣራሜ ካዎ ኤራሶኔይኔ ኢስራኤሌ ካዎ ኤሮሜሊዮ ና ፋቁሄይ ዬሩሳላሜ ኦላናሲኔ ኣካዜ ጊዶꬃናስ ኬዚዳ፤ ጊዶ ኣቲን ኢስቲ ኢዛ ጾናናስ ዳንዳይቤቴና።
2KI 16:6 ሄ ዎዴ ኣራሜ ካዎ ኤራሶኔይ ዩሁዳ ኣሳ ጎዲ ዬዲዲ ኤላቴ ቢታ ኣራሜስ ዛሪዴስ፤ ሄሳፌ ጉዬ ኤዶሜ ኣሳይ ኤላቴ ዪዲ ሃች ጋካናስ ሄን ዴስ።
2KI 16:7 ሄሳ ጋሶን ኣካዜይ ኣሶሬ ካዎ ቴሊጌሊቴሊፌሊሶሬስ፥ «ታኒ ኔስ ሃጋዚዛዴኔ ኔ ና፤ ሄሳ ጊሻስ ኔኒ ሃ ያዳ ታና ኦሊዛ ኣራሜ ካዎፔኔ ኢስራኤሌ ካዎ ኩሼፔ ኣሻ» ጊዲ ቃስታኔ ኪቲዴስ።
2KI 16:8 ኣካዜይ ጎዳ ኬꬃኒኔ ባ ካዎቴꬃ ኬꬃን ዲዛ ቢራኔ ዎርቃ ኣሶሬ ካዎስ ኪያቴꬅ ዬዲዴስ።
2KI 16:9 ኣሶሬ ካዎዚካ ኣካዜይ ኢዛ ዎሲዳ ዎሳ ኤሮ ጊ ኤኪዲ ዳማስቆ ጾኒ ኦይኪዴስ። ኣሳካ ዲኢ ኤኪዲ ቂሬ ጌቴቲዛሶሆ ኤፊዴሲኔ ኤራሶኔካ ዎꬊዴስ።
2KI 16:10 ሄሳፌ ጉዬ ካዎ ኣካዜይ ኣሶሬ ካዎዛ ቴሊጌሊቴሊፌሊሶሬራ ጋይታናስ ዳማስቆ ቢዴስ፤ ሄን ዳማስቆን ዲዛ ያርሾ ያርሺዛሶሆዛ ቤኢዲ ኢዛስ ኣይፌ ዮኦዛ ፓቴꬃ ቆፋራ ጋꬂ ፒልጊዲ ቄሴ ኦሪያስ ዬዲዴስ።
2KI 16:11 ቄሴ ኦሪያይ ካዎ ኣካዜይ ዳማስቆፌ ኢዛስ ዬዲዳ ፓቴꬃ ቆፋ ፒልጊ ዬዲዳይሳ ማላ ያርሾ ያርሺዛሶዛ ኦꬂዴስ፤ ካዎ ኣካዜይ ሲሚ ያናፔ ካሴቲዲ ኦሶዛ ጊጊዴስ።
2KI 16:12 ካዎዚ ዳማስቆፌ ሲሚ ዪዲ ሄ ያርሾሶሆዛ ቤኢዴስ። ኢዚ ሺቂዲ ያርሾ ሺሻናስ ያርሾሶዛ ቦላ ኬዚዴስ።
2KI 16:13 ሄሳፌ ጉዬ ጹጌቲዛ ያርሾኔ ካꬃ ያርሾ ያርሺዛሶሆዛ ቦላ ሺሺዴስ፤ ኡሻ ያርሾካ ኢዛ ቦላ ጉሲዴስ፤ ኢሲፌቴꬃ ያርሾ ሱꬂካ ኢዛ ቦላ ዉጺዴስ።
2KI 16:14 ያርሾ ያርሻናስ ኦራꬅ ኦሴቲዳሶዛፔኔ ጾሳ ኬꬃፌ ጊዶን ጎዳ ሲንꬃን ኤቂ ዲዛ ጻርቂማላፔ ኦሴቲዳ ያርሾሶዛ ካዎ ኣካዜይ ኢዚ ዲዛሶፔ ዴንꬂዲ ኦራꬅ ኦሴቲዳ ያርሾሶሆዛፔ ፑዴሃ ባጋራ ዎꬂዴስ።
2KI 16:15 ሄሳፌ ጉዬ ካዎ ኣካዜይ ቄሴ ኦሪያ፥ «ሃይሳ ጊታ ኦራꬃ ያርሾሶሆዛ ቦላ ጹጌቲ ያርሼቲዛ ማላዶ ያርሾዛኔ ኦማርሳን ያርሼቲዛ ካꬃ ያርሾዛ፥ ቃሴ ጹጌቲ ያርሼቲዛ ካዎዛ ያርሾዛኔ ካꬃ ያርሾዛ፥ ሄሳꬆካ ኩሜꬃ ዴሬዛ ጊሻስ ጹጌቲዛ ያርሾ፥ ካꬃ ያርሾኔ ኡሻ ያርሾ ሺሻ፤ ጹጌቲዛ ያርሾ ሱꬃታኔ ሃራ ያርሾ ሱꬃታ ያርሾ ያርሺዛይሳ ቦላ ዉጻ፤ ጊዶ ኣቲን ጻርቂማላፔ ኦሴቲዳ ያርሾሶሆዚ ታኒ ዎጋ ኦይቻናስ ጎኤቲዛሶ ጊዶ» ጊ ኣዛዚዴስ፤
2KI 16:16 ቄሴ ኦሪያይ ካዎ ኣካዜይ ኢዛ ኣዛዚዳ ማላ ኦꬂዴስ።
2KI 16:17 ካዎ ኣካዜይካ ሄ ሚሌራኔ ሃ ሚሌራ ዲዛ ሳንቃታ ሾዲ ኤኪዴስ፤ ሚሽ ኢዛ ቦላ ዎꬂ ዩሺዛ ጋሬዛ ቦላፌ ሜቻ ሳኔታ ዲጊዴስ። ጊታ ጎንጌዛ ጋርሳ ባጋራ ቶኪ ኦይኪዳ ጻርቂማላፔ ኦሴቲዳ 12 ኮርማ ሚስሌታ ቦላፌ ሎቻ ሹቻ ቦላ ዎꬂዴስ።
2KI 16:18 ኣሶሬ ካዎ ኡፋይሳናስ ጊዲ ሳምባታ ጋላስ ካዎ ኣራታይ ሚጬታና ማላ ጾሳ ኬꬃን ꬎቁ ጊ ኦሴቲዳሶዛኔ ካዎቲ ጎዳ ኬꬅ ጌሊዛሶፔ ካሬ ባጋራ ዲዛ ፔንጌዛ ዴንꬂዴስ።
2KI 16:19 ኣካዜ ካዎቴꬃ ላይꬃን ኦሴቲዳ ሃራ ኦሶቲኔ ሃኒዳ ሃኖቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 16:20 ኣካዜይ ሃይቂዲ ባ ኣዋታን ጋይቲዴስ፤ ኢስቲ ሞጌቲዛሶን ዳዊቴ ካታማን ሞጌቲዴስ፤ ኢዛ ና ሂዝቂያሲ ኢዛሶሆን ካዎቲዴስ።
2KI 17:1 ዩሁዳ ካዎ ኣካዜይ ካዎቲዳ ታማኔ ናምኣንꬆ ላይꬃን ኤላ ና ሆሴኤይ ሳማሪያ ካታማን ኢስራኤሌ ቦላ ካዎቲዴስ፤ 9 ላይꬂካ ዴሬዛ ሃሪዴስ።
2KI 17:2 ኢዚካ ጎዳ ሲንꬃን ኢታ ሚሽ ኦꬂዴስ፤ ጊዶ ኣቲን ኢዛፔ ሲንꬃን ኢስራኤሌን ካዎቲዳይቲ ኦꬂዳይሳ ኬና ጊዴና።
2KI 17:3 ኣሶሬ ካዎ ሳሊሚናሶሬይ ኢዛራ ኦሌታናስ ዪዴስ፤ ሆሴኤይ ኢዛስ ሃሬቲዴሲኔ ጊሪዴስ።
2KI 17:4 ሆሴኤይ ጊብጼ ካዎ ሲጎሬኮ ኪታ ዬዲዳ ጊሻሲኔ ካሴ ኢዚ ኣሶሬ ካዎስ ላይꬃን ላይꬃን ጊራ ጊሪዛይሳ ዲጊዳ ጊሻስ ኣሶሬ ካዎይ ሆሴኤይ ኢዛ ካዲዳይሳ ኤሪዴስ፤ ሄሳ ጊሻስ ሳሊሚናሶሬይ ኢዛ ኦይኪ ቃሾ ኬꬃን ዬጊዴስ።
2KI 17:5 ኣሶሬ ካዎይ ዴሬዛ ሙሌራ ዎራጂዴስ። ሳማሪያ ዛሪ ዛሪ ሄꬑ ላይꬅ ጊዶꬂዴስ።
2KI 17:6 ሆሴኤይ ካዎቲዳ ኡዱፉንꬆ ላይꬃን ኣሶሬ ካዎይ ሳማሪያ ኦይኪዴስ። ኢስራኤሌ ኣሳ ዲኢ ኤኪዲ ኣሶሬ ዴሬ ዴንꬂ ኤፊዴስ። ሄይታካ ኣላሄን፥ ጎዛን ሃቦሬ ሻፋ ማታኒኔ ሜዶኔ ካታማታን ኤፊ ዎꬂዴስ።
2KI 17:7 ሃይሲ ኡባይ ኢስታ ቦላ ጋኪዳይ ጊብጼ ካዎ ፓሮኔስ ሃሬቴꬃፌ ኬሲዳ ጎዳ ባንታ ጾሳ ኢስቲ ቆሂዳ ጊሻሲኔ ሃራ ኤቃ ጾሳታስ ጎይኒዳ ጊሻሳ።
2KI 17:8 ጎዳይ ኢስታ ሲንꬃፌ ጎዲ ኬሲዳ ካዎቴꬃቲኔ ኢስራኤሌ ካዎቲ ሄ ቢታዮ ጌልꬂዳ ኢታ ሎሴታ ኢስቲ ካሊዳ።
2KI 17:9 ኢስራኤሌ ኣሳይ ጎዳ ባንታ ጾሳ ቦላ ኢታ ሚሽ ጌማራ ኦꬂዳ፤ ናጊዛሶሆታፔ ዶሚዲ ሚጻራ ጊጊ ዲዛ ካታማ ጋካናስ ኣሳይ ዲዛ ሶሆን ኡባን ዙምቡላታ ቦላ ባንታስ ጎይናናሶሆ ኦꬂዳ።
2KI 17:10 ዙምቡላቲኔ ዳሻ ሚꬃቲ ዲዛሶን ዲዛሶን ኤቃ ጾሳታ ቱሲኔ ኣሼሪ ሚስሌ ቱስ ኤሲዳ።
2KI 17:11 ጎዳይ ኢስታ ሲንꬃፌ ጎዲ ኬሲዳ ካዎቴꬃቲ ኦꬂዛይሳꬆ ዙምቡላታ ቦላ ኤጻኔ ጩዋሲዳ፤ ጎዳ ሃንቄꬂዛ ኢታ ኦሶ ኦꬂዳ።
2KI 17:12 ጎዳይ ኢስታስ፥ «ሃይሳ ኢንቴ ኦꬃናስ ቤሴና» ጊዲ ዮቲንካ ኢስቲ ኤቃ ጾሳታስ ጎይኒዳ።
2KI 17:13 ጊዲኮካ ጎዳይ ኢስታስ፥ «ኢንቴ ቢዛ ኢታ ኦጌፔ ሲሚቴ! ካሴ ኢንቴ ኣዋቲ ኦꬃናስ ታኒ ኣዛዚዳ ዎጋ ማላኔ ታ ኦሳንቻ ናቤታ ባጋራ ታ ኢንቴስ ዮቲዳ ዎጋ ማላ ታ ኣዛዞታኔ ታ ማራታ ናጊቴ» ጊዲ ናቤታ ባጋራኔ ኣጁታ ቤኢዛ ኣሳታ ባጋራ ኢስራኤሌሲኔ ዩሁዳስ ሚንꬂ ዮቲ ዎꬂዴስ።
2KI 17:14 ጊዶ ኣቲን ኢስቲ ሲዪቤቴና፤ ኢስቲ ጎዳ ባንታ ጾሳን ኣማኔቶንታ ኢጺዳ ባንታ ኣዋታ ማላ ባ ዎዚና ሙሚሲዳ።
2KI 17:15 ኢዛ ማራ፥ ኢዚ ኢስታ ኣዋታራ ጌሊዳ ጫቆ ቃላኔ ኢዚ ኢስታስ ሚንꬂ ዮቲዳ ቃላ ካꬊዳ፤ ሃዳ ጊዲዳ ኤቃ ጾሳታ ካሊዳ፤ ባንታስካ ሃዳ ጊዲዳ፤ ጎዳይ ኢስታስ፥ «ኢስቲ ኦꬂዛይሳ ኢንቴ ኦꬆፍቴ» ጊዲ ኣዛዚንካ ኢስቲ ባንታ ዩሾን ዲዛ ካዎቴꬃታ ካሊዳ፤ ኢስቲ ኦꬆንታ ማላ ጎዳይ ዲጊዳይሳ ፖሊዳ ኣቲን ኣጊቤቴና።
2KI 17:16 ጎዳይ ኢስታ ጾሳይ ኢስታ ኣዛዚዳይሳ ኡባ ፖሊቤቴና፤ ማራ ሚስሌ ናምኣታኔ ኣሼሪ ሚስሌ ኦꬂዳ። ሳሎ ጾሊንቴሲኔ ባኣሌስ ጎይኒዳ።
2KI 17:17 ሄሳꬆካ ባ ኣቱማ ናይታኔ ባ ማጫ ናይታ ታማን ጹጊዛ ያርሾስ ሺሺዳ፤ ማሮꬂዳኔ ሙሬኒዳ፤ ጎዳ ሲንꬃን ኢታ ኦሶ ኦꬃናስ ባንታናቴꬃ ባይዚዳ፤ ኢዛካ ሃንቆስ ዴንꬄꬂዳ።
2KI 17:18 ሄሳ ጊሻስ ጎዳይ ኢስታ ቦላ ኬሂ ሃንቄቲዴስ፤ ዩሁዳ ቆሞቲ ጻላ ኣታፌ ሃንኮ ኢስራኤሌ ዴራ ባ ሲንꬃፌ ሃሲዴስ።
2KI 17:19 ዩሁዳ ቆሞቲ ጊዲኮካ ካሴ ኢስራኤሌፔ ኤኪዳ ሎሴታ ካሊዳ ኣቲን ጎዳ ባንታ ጾሳ ኣዛዞታ ናጊቤቴና።
2KI 17:20 ሄሳ ጊሻስ ጎዳይ ኢስራኤሌ ኣሳ ኡባካ ኣጊዴስ፤ ኡንኤꬂዴሲኔ ባ ሲንꬃፌ ዲጋናሼ ጋካናስ ዲኢዛይታ ኩሼን ኣꬂ ኢሚዴስ።
2KI 17:21 ኢዚ ኢስራኤሌ ኣሳ ዳዊቴ ኬꬃፌ ሻኪዳፔ ጉዬ ኢስቲ ናባጼ ና ኢዮርባኣሜ ካዎꬂዳ፤ ኢዮርባኣሜይካ ኢስራኤሌይ ጎዳ ካሎንታ ማላ ባሌꬂዲ ጊታ ናጋራ ኦሲሲዴስ።
2KI 17:22 ኢስራኤሌ ኣሳይካ ኢዮርባኣሜ ናጋራን ሚኒ ኤቂዴስ፤ ሄሳፌ ሲሚቤና።
2KI 17:23 ጎዳይ ባ ኣይሌታ ናቤታ ባጋራ ኢስታስ ካሴ ሚንꬂ ዮቲዳ ማላ ባ ሲንꬃፌ ኢስታ ዲጋና ጋካናስ ኢስቲ ናጋራ ኦሶ ጉጂ ጉጂ ቢዳ፤ ሄሳ ጊሻስ ኢስራኤሌ ዴሬይ ባ ዴሬፔ ዲኤቲ ኣሶሬ ዴሬ ቢዴስ፤ ሃኢካ ሄን ዴስ።
2KI 17:24 ኣሶሬ ካዎይ ዴሬዛ ባቢሎኔፔ፥ ኩታፔ፥ ኣዋፔ፥ ሃማቴፔኔ ሴፋርዋይሜ ካታማፔ ሺሺ ኤሂዲ ካሴ ኢስራኤሌ ኣሳይ ዲዛሶን ዳና ማላ ሳማሪያ ካታማታን ዎꬂዴስ። ኢስቲካ ሳማሪያ ባስ ላቲዲ ሄ ካታማታን ዱስ ኦይኪዳ።
2KI 17:25 ኢስቲ ሄን ዱስ ዶሚዳ ማላ ጎዳስ ጎይኖ ኣጋጊዳ፤ ሄሳ ጊሻስ ጎዳይ ጋሞታ ኢስታ ቦላ ዬዲዴስ፤ ጋሞቲ ኢስታፌ ኣማርዳይታ ሜንꬄሬꬂ ዎꬊዳ።
2KI 17:26 ኣሶሬ ካዎስ፥ «ኔኒ ሳማሪያ ካታማታን ኤፋ ዎꬂዳ ኣሳይ ሄ ካዎቴꬃ ጾሳይ ኣይ ኮይዛኮ ኤሪቤና፤ ሄሳ ጊሻስ ጾሲ ኣሳ ሜንꬄሬꬂ ዎꬊዛ ጋሞታ ዬዲዴስ» ጊዛ ዎሬይ ጋኪዴስ።
2KI 17:27 ሄሳፌ ጉዬ ኣሶሬ ካዎዚ፥ «ኢንቴ ሳማሪያፔ ዲኢ ኤሂዳ ቄሴታፔ ኢሳ ጉዬ ሄ ዴሬ ዛሪ ኤፊዲ ሄ ዴሬ ጾሳይ ኣይ ኮይዛኮ ዴሬዛ ኢዚ ታማርሶ» ጊዲ ኣዛዚዴስ።
2KI 17:28 ሄሳ ጊሻስ ሳማሪያፔ ኢስቲ ዲኢ ኤፊዳ ቄሴታፔ ኢሶይ ቤቴሌ ሲሚዲ ኣሳይ ጎዳስ ዎስቲ ጎይናናኮ ታማርሲዴስ።
2KI 17:29 ጊዲኮካ ኣሳይ ባ ዛርኬን ዛርኬን ባ ዲዛ ካታማን ካታማን ባስ ጾስ ሜꬊዴስ፤ ሄሳካ ካሴ ሳማሪያ ዴሬ ኣሳይ ዙምቡላታ ቦላ ጎይኒዛሶሆታን ኤፊ ኤፊ ኤሲዴስ።
2KI 17:30 ባቢሎኔፔ ዪዳይቲ ሱኮቴ-ቤኖቴ ኦꬂዳ፤ ኩታፔ ዪዳይቲ ኔሪጋሌ ኦꬂዳ፤ ሃማቴፔ ዪዳይቲ ኣሽማቴ ኦꬂዳ፤
2KI 17:31 ኣዌቲ ኤሊባዛሬኔ ታሪታቄ ጌቴቲዛ ኤቃ ጾሳታ ኦꬂዳ። ሴፋርዋይሜፔ ዪዳይቲ ኣዲራሜሌኬኔ ኣናሜሌኬ ጌቴቲዛ ኤቃ ጾሳታስ ባንታ ናይታ ጹጌቲዛ ያርሾስ ሺሺዳ።
2KI 17:32 ጎዳስ ጎይኒዳ፤ ጊዶ ኣቲን ኢሲ ኢሲ ቆሞቲ ካሴ ባ ዪዳ ዴራ ሎሴ ካሊዳ፤ ዙምቡላታ ቦላ ዲዛ ኤቃ ጾሳታ ሃጋዚዛ ቄሴታ ሹሚዳ።
2KI 17:33 ኢስቲ ኢሲ ባጋራ ጎዳስ ጎይኒሼ ሃራ ባጋራ ቃሴ ካሴ ባንታ ካዎቴꬃ ሎሴ ማላ ባንታ ኤቃ ጾሳታስ ጎይኔቴስ።
2KI 17:34 ሄ ሎሴዛ ሃች ጋካናስ ኣጊቤቴና፤ ጎዳስ ቤሲዛ ማላ ጎይኔቴና፤ ኢስራኤሌ ጊ ጼይጊዳ ያቆቤ ቆሞታስ ኢዚ ኢሚዳ ማራታኔ ዞሬታ፥ ዎጋታኔ ኣዛዞታ ካሌቴና።
2KI 17:35 ጎዳይ ካሴ ኢስራኤሌ ኣሳታራ ጫቆ ቃላ ጌሊዛ ዎዴ፥ «ኢንቴ ሃራ ጾሳታስ ጎይኖፍቴ፥ ኢስታስ ያይኖፍቴ፤ ኢስታስ ሃጋዞፒቴኔ ኢስታስ ያርሾፍቴ።
2KI 17:36 ጊዶ ኣቲን ኢንቴ ጎይናናስ ቤሲዛይ ባ ጊታ ዎልቃኒኔ ሚጬቲዳ ባ ኩሼን ኢንቴና ጊብጼ ቢታፌ ኬሲዳ ጎዳስ ጻላ ጊዶ። ኢንቴ ኢዛስ ጻላ ጎይኒቴኔ ኢዛስ ያርሺቴ።
2KI 17:37 ኢዚ ኢንቴስ ጻፊዳ ማራታኔ ዞሬታ፥ ዎጋታኔ ኣዛዞታ ኣይ ዎዴካ ሎኤꬂ ናጊቴ። ሃራ ኤቃ ጾሳታስ ጎይኖፍቴ።
2KI 17:38 ታኒ ኢንቴናራ ጫቄቲዳ ጫቆዛ ባሎፒቴ፤ ኤቃ ጾሳስ ጎይኖፍቴ።
2KI 17:39 ኢንቴ ሞርኬታ ኡባ ኩሼፔ ኢንቴና ኣሺዛይ ኢዛ ጊዲዳ ጊሻስ ጎዳ ኢንቴ ጾሳስ ጎይኒቴ» ጊ ኣዛዚ ዎꬂዴስ።
2KI 17:40 ጊዶ ኣቲን ኢስቲ ካሴ ባንታ ሎሴን ሚኒ ኤቂዳ ኣቲን ሲሚቤቴና።
2KI 17:41 ሃይቲ ሃ ዴሬቲ ኢሲ ባጋራ ጎዳስ ጎይኒኮካ ሃራ ባጋራ ቃሴ ባ ጊግሲዳ ኤቃ ጾሳታስ ሃጋዜቴስ። ኢስታ ናይቲኔ ኢስታስ ናይታ ናይቲካ ካሴ ኢስታ ኣዋቲ ኦꬂዳ ማላ ሃኢካ ኢዛꬆ ኦꬄቴስ።
2KI 18:1 ኢስራኤሌ ካዎ ኤላ ና ሆሴኤይ ካዎቲዳ ሄꬓንꬆ ላይꬃን ዩሁዳ ካዎ ኣካዜ ና ሂዝቂያሲ ካዎቲዴስ።
2KI 18:2 ኢዚ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን ኡቲዲ 29 ላይꬅ ሃሪዴስ። ኢዛ ኣዬያ ዛካራሳ ና ኣቢዮ ጌቴታዉስ።
2KI 18:3 ኢዛ ኣዋ ዳዊቲ ጎዳ ሲንꬃን ኦꬂዳ ማላ ኢዚካ ሎኦ ኦꬂዴስ።
2KI 18:4 ዙምቡላታ ቦላ ዲዛ ኤቃ ጾሳታ ሜንꬄሬꬂ ዬጊዴስ፤ ኣሼሪ ሚስሌ ቱሳታካ ቃንጼሬꬂ ዬጊዴስ፤ ቃሴ ሙሴይ ጻርቂማላፔ ኦꬂዳ ሾሻካ ሜንꬄሬꬂዴስ፤ ጋሶይካ ሄ ዎዴይ ጋካናስካ ኢስራኤሌ ኣሳይ ኢዛስ ኤጻኔ ጩዋሲሼ ጋምኢዳ ጊሻሳ፤ ሄ ሾሻ ሱንꬃይ ናሁሽታን ጌቴቴስ።
2KI 18:5 ሂዝቂያሲካ ጎዳ ኢስራኤሌ ጾሳን ኣማኔቲዴስ፤ ኢዛፔ ካሴ ጊዲን ዎይኮ ጉዬፔ ካዎቲዳ ዩሁዳ ካዎታ ኡባታን ኢዛ ማላይ ዴና።
2KI 18:6 ኢዚ ጎዳራ ኦይኬቲ ኡቲዴስ፤ ኢዚ ጎዳ ካሎፔ ጉዬ ጊቤና፤ ጎዳይ ሙሴስ ኢሚዳ ኣዛዞታካ ናጊዴስ።
2KI 18:7 ጎዳይ ኢዛራ ዲዛ ጊሻስ ኢዚ ኦꬂዛ ሚሽ ኡባይ ኢዛስ ፖሌቲዴስ፤ ኢዚ ኣሶሬ ካዎራ ኤቄቲዲ ኢዛስ ጊራ ጊሮንታ ኢጺዴስ።
2KI 18:8 ቢዲ ጋዛ ዛዋ ጋካናሲኔ ፊሊስጼሜ ኣሳይ ናጊዛ ሻኮይ ዲዛሶ ጋካናስ ጊምቤቲ ኡቲዳ ካታማዮ ጾኒ ኦይኪዴስ።
2KI 18:9 ሂዝቂያሲ ባ ካዎቲዳ ኦይዳንꬃ ላይꬃን፥ ኢስራኤሌ ካዎ ኤላ ና ሆሴኤይ ካዎቲዳ ላፑንꬃ ላይꬃን ኣሶሬ ካዎ ሳሊሚናሶሬይ ሳማሪያ ቢዲ ካታማዮ ጊዶꬂዴስ።
2KI 18:10 ሄꬓንꬆ ላይꬃ ዉርሴꬃን ኦይኪዴስ፤ ሳማሪያይ ኦይኬቲዳይ ሂዝቂያሲ ካዎቲዳ ኡሱፑንꬃ ላይꬃን ሆሴኤይ ኢስራኤሌ ቦላ ካዎቲዳ ኡዱፉንꬃ ላይꬃና።
2KI 18:11 ኣሶሬ ካዎይ ኢስራኤሌ ኣሳ ዲኢ ኣሶሬ ኤፊዲ ኣላሄን፥ ጎዛኔ ጊዶን፥ ሃቦሬ ሻፋ ኣቻኒኔ ሜዶኔ ካታማታን ዎꬂዴስ።
2KI 18:12 ሄሲ ኢስታ ቦላ ጋኪዳ ጋሶይካ ካሴ ጎዳ ኣይሌ ሙሴይ ኢስታስ ዮቲዳ ቃላ ኡባ ኢስቲ ሲዮንታ ኢጺዲ ጫቆ ቃላ ላሊዳ ጊሻሳ፤ ኢዛ ኣዛዞታካ ዎዚናን ዎꬂ ሲዪቤቴናኔ ፖሊቤቴና።
2KI 18:13 ሂዝቂያሳይ ካዎቲዳ ታማኔ ኦይዳንꬃ ላይꬃን ኣሶሬ ካዎ ሴናኪሬሜይ ጊምቤቲ ዲዛ ዩሁዳ ካታማታ ኡባ ቦላ ሜቶ ጋꬂ ኦይኪዴስ።
2KI 18:14 ሄሳ ጊሻስ ዩሁዳ ካዎ ሂዝቂያሲ፥ «ቆሂዳይ ታና፤ ኔ ታፔ ሲማርኪ! ታ ኔስ ኔ ኦይቺዳ ሚሺ ኡባካ ቃንጻና» ጊዲ ላኪሼን ዲዛ ኣሶሬ ካዎዛስ ሄ ኪታ ዬዲዴስ። ኣሶሬ ካዎዚ ዩሁዳ ካዎ ሂዝቂያሳስ፥ «ኔ ታስ 10,000 ኪሎ ቢራኔ 1,000 ኪሎ ዎርቃ ዬዳ» ጊ ዛሪዴስ።
2KI 18:15 ሄሳ ጊሻስ ሂዝቂያሲ ጾሳ ኬꬃኒኔ ባ ካዎቴꬃ ኬꬃን ዲዛ ቢራ ኡባ ኢዛስ ኢሚዴስ።
2KI 18:16 ሄ ዎዴ ዩሁዳ ካዎ ሂዝቂያሲ ጾሳ ኬꬃ ሳንቃታ ቦላኔ ቆሲላꬃታ ቦላ ሜሼቲዳ ዎርቃታ ኣሶሬ ካዎስ ሾዲ ሾዲ ኢሚዴስ።
2KI 18:17 ኣሶሬ ካዎይ ላኪሼፔ ባ ኦላንቻታ ኣዛዚዛይታስ ዋና ጋዳዋዛ፥ ኢዛፔ ካሊ ዲዛ ጋዳዋዛኔ ኦላንቻታ ካሌꬂዛ ጋዳዋዛ ዳሮ ኦላንቻታራ ዩሁዳ ካዎይ ዲዛሶ ዬሩሳላሜ ኪቲ ዬዲዴስ። ኢስቲካ ዬሩሳላሜ ቢዲ ማይኦ ሜጪዛይሳ ጋዴ ጊዶ ኤፊዛ ኦጌ ቦላ ጋና ባጋን ዲዛ ኤሌ ሃꬂ ዪዛ ዛራ ጊዶꬂዳ።
2KI 18:18 ካዎዛኮ ዬዲዳ፤ ሄሳፌ ጉዬ ካዎቴꬃ ኬꬃን ዋና ኣዛዚዛ ኪልቂያሳ ና ኤልያቄሜይ፥ ጻፌዚ ሼቢናይ፥ ሄሳꬆካ ታሪኬ ጻፊዛ ኣሳፌ ና ዮኣሂ ኢዛኮ ቢዳ።
2KI 18:19 ኦላንቻታ ካሌꬂዛ ጋዳዋዚ ኢስታስ፥ «ኢንቴ ሂዝቂያሳስ፥ ‹ጊታ ኣሶሬ ካዎይ ኔና፥ ሃይሳ ማላ ኔ ዎዚና ሚንꬂዳይ ኣዜ?
2KI 18:20 ኔኒ ታስ ኦላ ኤራቴꬂኔ ዎልቃይ ዴስ ጋሳ፤ ጊዶ ኣቲን ሄሲ ዎሬ ጻላ፤ ኔኒ ታ ቦላ ማካሊዳይ ኦናን ኣማኔታዳ?
2KI 18:21 ኔኒ ኢዚን ኣማኔቲዛ ጊብጼይ ኢዚን ዜምፒሺን ሜቂ ዎꬊዲ ኩሼን ኤቂዛ ዲንጬቲዳ ማቃ ማላ፤ ጊብጼ ካዎ ፓሮኔይካ ባናን ኣማኔቲዛ ኣሳ ኡባሲካ ሄሳ ማላ› ጊዲ ዮቲቴ።
2KI 18:22 ቃሴካ ኔኒ፥ ‹ኑ ኣማኔቲዛይ ጎዳ ኑ ጾሳና› ጋዳ ታስ ዮታናስ ኮይኮ ሂዝቂያሲ ዩሁዳኔ ዬሩሳላሜ፥ ‹ኢንቴ ጎይናናስ ቤሲዛይ ሃይሳ ዬሩሳላሜን ዲዛ ያርሾሶዛ ሲንꬃና› ጊዲ ዙምቡላታ ቦላ ዲዛ ጎይኒዛሶሆታኔ ያርሺዛሶሆታ ላሊዳይ ኢዛ ጊዴኔ?
2KI 18:23 «ኢዚ ኔስ ሃንኮ ታ ጎዳዛ ኣሶሬ ካዎራ ማንዴታ፤ ኔኒ ቶጋንቻታ ዴማና ዳንዳይኮ ታ ኔስ 2,000 ቶጋ ፓራታ ኢማና።
2KI 18:24 ኔኒ ጬቄቲዛይ ጊብጼ ፓራ-ጋሬታኒኔ ጊብጼ ፓራታን ጊዲኮካ ታ ጎዳዛፔ ጋርሳራ ዲዛ ኦላንቻታ ሹሜታፔ ሃራይ ኣቶሺን ኢሳ ኔ ዎስታ ዛራና ዳንዳያይ?
2KI 18:25 ሄሳፌ ቦላራ ታኒ ሜቶ ኔ ቦላ ጋꬃዳ ሃኖ ሶሆዮ ꬋይሳናስ ጎዳ ሼኔይ ባይንዳ ዪዳ ሚሳቲዜ? ታኒ ሃኖ ዴሬዮ ዎራጃ ꬋይሳና ማላ ታስ ዮቲዳይ ጎዳ» ጊዴስ።
2KI 18:26 ሄሳፌ ጉዬ ኪልቂያሳ ና ኤልያቄሜይ፥ ሼቢናይኔ ዮኣሂ ኦላንቻታ ካሌꬂዛይሳስ፥ «ኑኒ ኤሪዛ ጊሻስ ኔ ኑስ ኣራሜ ቃላራ ዮታ፤ ጊምቤዛ ቦላ ዲዛ ኣሳቲ ሲዪዛ ጊሻስ ኢብራዌታ ቃላራ ኑስ ዮቶፓ» ጊዳ።
2KI 18:27 ኦላንቻታ ጋዳዋዚ ዛሪዲ፥ «ታ ጎዳይ ታና ኪቲዳይ ኢንቴሲኔ ኢንቴ ጎዳስ ጻላ ዮታናሴ? ሃንኮ ኣሳይካ ኢንቴይሳꬆ ቡሮ ባርካ ባ ሺ ማና ማላኔ ባርካ ባ ሼሽ ኡያናስ ጊምቤዛ ቦላ ዲዛይታራ ዮታናስ ጊዴኔ?» ጊዴስ።
2KI 18:28 ሄሳፌ ጉዬ ኦላንቻታ ጋዳዋዚ ኤቂዲ ባ ቃላ ꬎቁ ሂስቲዲ ኢብራዌታ ቃላራ፥ «ኢንቴ ሃኢ ጊታ ኣሶሬ ካዎ ቃላ ሲዪቴ!
2KI 18:29 ካዎይ፥ ‹ሂዝቂያሲ ኢንቴና ታ ኩሼፔ ኣሻናስ ዳንዳዮንታ ጊሻስ ኢዚ ኢንቴና ባሌꬆፎ› ጌስ።
2KI 18:30 ቃሴካ ሂዝቂያሲ ኢስታስ፥ ‹ጎዳይ ኑና ኣሻናይሳስ ሲꬌይ ዴና፤ ሃና ካታማያ ኣሶሬ ካዎስ ኣꬋ ኢሜቱኩ› ጊዲ ኢንቴ ጎዳን ኣማኔታና ማላ ኢዚ ኢንቴስ ዮቲዳይሳ ኣማኒ ኤኮፍቴ።
2KI 18:31 «ሂዝቂያሲ ኢንቴና ጊዛይሳ ሲዮፒቴ፤ ኣሶሬ ካዎይ፥ ‹ታናራ ኢንቴስ ሳሮቴꬅ ሜꬊቴ፤ ኢንቴ ታስ ኩሼ ኢሚቴ፤ ሄሳፌ ጉዬ ኢንቴፌ ኢሶይ ኢሶይ ባ ባላሴ ሚꬃ ኣይፌኔ ባ ዎይኔ ሚꬃ ኣይፌ ማና፤ ባ ሃꬃ ኦላፌ ሃꬅ ኡያና።
2KI 18:32 ሄሲካ ሃናናይ ታኒ ኢንቴና ጌዴ ኢንቴ ቢታዮ ሚሳቲዛ ሶሆ ካꬂኔ ዎይኔ ኡሺ፥ ዳቦይኔ ዎይኔ ኣታኪልቴይ፥ ዎጋራ ሚꬂኔ ኤሲ ዲዛሶታ ኢንቴና ጌልꬃና ጋካናሳ፤ ኢንቴ ሃይቆ ኣጊዲ ዴኦ ዶሪቴ› ጌስ። ሂዝቂያሲ ኑና ጎዳይ ኣሻና ጊዲ ኢንቴና ባሌꬂዛ ጊሻስ ኢንቴ ኢዚ ጊዛይሳ ሲዮፒቴ።
2KI 18:33 ኣሶሬ ካዎ ኩሼፔ ቢታ ቦላ ዲዛ ጾሳታፔ ባ ካዎቴꬅ ኣሺዳይ ኦኔ?
2KI 18:34 ሃማቴ ኤቃ ጾሳቲኔ ኣርፋዴ ኤቃ ጾሳቲ ኣኔ ኣዋን ዲዞ? ሴፋርዋይሜ፥ ሄና ኤቃ ጾሳቲኔ ኢዋ ኤቃ ጾሳቲ ሂስቲን ኣዋ ጋኪዶ? ኢስቲ ሳማሪያ ታ ኩሼፔ ኣሺዶ?
2KI 18:35 ሃይታ ሃ ዴሬታ ኤቃ ጾሳታፔ ባ ዴሬ ታ ኩሼፔ ኣሻና ዳንዳይዳይ ኦኔ? ሂስቲን ጎዳይ ዬሩሳላሜ ታ ኩሼፔ ዎስቲ ዎꬂ ኤካና ዳንዳይዜ?» ጊዴስ።
2KI 18:36 ጊዶ ኣቲን ዴሬዚ ጮኡ ጊዴስ፤ ኢዛስ ኣይኮካ ዛሪቤና፤ ካዎዚ፥ «ኢንቴ ኢዛስ ዛሮ ኢሞንታ ማላ» ጊ ካሴ ኣዛዚ ዎꬂዴስ።
2KI 18:37 ሄሳፌ ጉዬ ካዎቴꬃ ኬꬃ ኣዛዚዛ ኪልቂያሳ ና ኤልያቄሜይ፥ ጻፌ ሼቢናይኔ ታሪኬ ጻፌ ኣሳፌ ና ዮኣሂ ባንታ ማይኦ ዳኪ ዬጊዳ፤ ሂዝቂያሳኮ ቢዲ ኦላንቻታ ጋዳዋዚ ኢስቲ ጊዳይሳ ኢዛስ ዮቲዳ።
2KI 19:1 ካዎ ሂዝቂያሲ ሄሳ ሲዪዲ ባ ማይኦ ዳኪዴስ፤ ማቃ ማይኢዲ ጾሳ ኬꬅ ጌሊዴስ።
2KI 19:2 ሄሳፌካ ካዎቴꬃ ኬꬃን ኣዛዚዛ ኤልያቄሜይ፥ ጻፌ ሼቢናይኔ ዋና ቄሴቲ ማቃ ማይኢዲ ኣሞጼ ና ናቤ ኢሳያሳኮ ባና ማላ ኡባ ኪቲ ዬዲዴስ።
2KI 19:3 ኢስቲካ ኢዛስ፥ «ሂዝቂያሲ፥ ‹ሃና ጋላሳያ ሜቶ፥ ሚሬኔ ካዉሻቴꬃ ጋላስ፤ ሃና ጋላሳያ ናይ ዬሌታናስ ኣያ ኬሃ ሚጻታሼ ዬላ ዬጋናስ ዎልቃ ꬋይዳ ጋላሳ።
2KI 19:4 ዴኦ ጾሳ ካዉሻናስ ባ ጎዳ ኣሶሬ ካዎይ ዬዲዳ ጋዳዋ ቃላ ኡባካ ጎዳ ኔ ጾሳይ ሲዪዳ ጊዳና፤ ኢዚ ሲዪዳ ቃላ ጊሻስ ጎዳ ኔ ጾሳይ ኢዛ ሃንቃና ማላ ኔኒ ሼምፖራ ፓጻ ዲዛ ኣሳስ ጾሳ ዎሳርኪ!› ጊዴስ» ጊዳ።
2KI 19:5 ካዎ ሂዝቂያሳ ሹሜቲ ኢሳያሳኮ ዪዳ ዎዴ፥
2KI 19:6 ኢሳያሲ ኢስታስ፥ «ኢንቴ ኢንቴ ጎዳስ፥ ‹ጎዳይ ኔስ ኣሶሬ ካዎ ኦሳንቻቲ ታ ቦላ ጫሻ ቃላ ሃሳይዳይሳ ሲያዳ ባቦፋ፤
2KI 19:7 ታኒ ኢዛ ቦላ ሄሳ ማላ ኣያና ዬዳና፤ ኢዚካ ዎሬ ሲዪዲ ጉዬ ባ ዴሬ ሲሚ ባና፤ ኢዚ ሄን ማሻን ሃይቃና ማላ ታ ኢዛ ኦꬃና› ጊ ዮቲቴ» ጊዴስ።
2KI 19:8 ኦላንቻታ ጋዳዋዚካ ኣሶሬ ካዎይ ላኪሼፔ ዴንዲ ቢዳይሳ ሲዪዲ ጉዬ ሲሚዴስ፤ ካዎዚ ሊቢናራ ኦሌቲሺን ዴሚዴስ።
2KI 19:9 ሄ ዎዴ ቶጵያ ዴሬ ዬሌታ ጊዲዳ ጊብጼ ካዎ ቲራቄይ ኢዛ ኦላናስ ዩሳ ቦላ ዲዛይሳ ሴናኪሬሜይ ሲዪዴስ፤ ሄሳ ጊሻስ ዛሬꬂዲ ሂዝቂያሳኮ ቃስታኔታ ቦላ ዳብዳቤ፥
2KI 19:10 «ኢንቴ ቢዲ ዩሁዳ ካዎ ሂዝቂያሳስ፥ ‹ኔ ኢዛን ኣማኔቲዛ ጾሳይ ዬሩሳላሜይ ኣሶሬ ኩሼን ኩንዱኩ› ጊዲ ኔና ባሌꬆፎ።
2KI 19:11 ሃይሳፌ ካሴ ኣይዴካ ኣሶሬ ካዎቲ ዴሬ ኡባ ቦላ ኣይ ኦꬂዳኮ ኔ ሲያዳሳ፤ ኢዚ ኢስታ ሙሌራ ꬋይሲዴስ፤ ሂስቲን ኔኒ ኬሳ ኤካዳ ኣታናዝ ኔስ ሚሳቲዜ?
2KI 19:12 ካሴ ታ ኣዋቲ ꬋይሲዳ ካዎቴꬃታ ጎዛኔን፥ ካራኔን፥ ኤራፋሴን ሄሳꬆካ ታላሳሬን ዲዛ ኤዴኔ ኣሳታ ኢስታ ኤቃ ጾሳቲ ኢስታ ኣሺዶ?
2KI 19:13 ሃማቴ ካዎቲኔ ኣርፋዴ ካዎቲ ሃኢ ኣዋን ዲዞ? ሴፋርዋይሜ ካታማ ካዎዚ ኣዋን ዲዜ? ቃሴካ ሄና ካዎይኔ ኢዋ ካዎቲ ሃኢ ኣዋን ዲዞ?» ጊ ኪቲዴስ።
2KI 19:14 ሂዝቂያሲ ዳብዳቤዛ ቃስታኔታ ኩሼፔ ኤኪ ናባቢዴስ፤ ሄሳፌ ጉዬ ፑዴ ጎዳ ኬꬅ ኬዚዲ ዳብዳቤዛ ጎዳ ሲንꬃን ሚጪዴስ።
2KI 19:15 ሄሳፌ ጉዬ ሂዝቂያሲ ጎዳኮ፥ «ኪሩቤ ቦላ ኔ ኣራታን ኡቲዳ ጎዳ ኢስራኤሌ ጾሶ! ቢታ ቦላ ዲዛ ኡባ ቦላ ጾሲ ኔና፤ ሳሎኔ ሳኣ ሜꬊዳይ ኔና።
2KI 19:16 ጎዳዉ! ሃኢ ኔኒ ኔ ሃይꬅ ዬጋዳ ሃይሳ ሲያ፤ ኔኒ ኔ ኣይፌታካ ዶያዳ ጼላ፤ ሴናኪሬሜይ ዴኦ ጾሳ ጫያናስ ኪቲዳ ቃላ ኤዝጋ።
2KI 19:17 «ኣቤት ጎዳዉ፤ ኣሶሬ ካዎቲ ሃይታ ካዎቴꬃታኔ ኢስቲ ቢታ ቱሙካ ꬋይሲዳ፤
2KI 19:18 ኢስታ ኤቃ ጾሳታካ ታማን ዬጊ ጹጊ ꬋይሲዳ፤ ኢስቲካ ኣሳ ኩሼን ሚꬃፌኔ ሹቻፌ ኦሴቲዳይታ ኣቲን ጾስ ጊዴቴና።
2KI 19:19 ሃኢካ ጎዳዉ ኑ ጾሳዉ! ኔኒ ጻላ ጾሳ ጊዲዳይሳ ሃ ቢታ ቦላ ዲዛ ካዎቴꬃቲ ኤራና ማላ ኢዛ ኩሼፔ ኑና ኣሻ» ጊ ዎሲዴስ።
2KI 19:20 ሄሳፌ ጉዬ ኣሞጼ ና ኢሳያሲ ካዎ ሂዝቂያሳስ ሃይሳፌ ካሊ ዲዛ ኪታ ዬዲዴስ። «ጎዳ ኢስራኤሌ ጾሳይ፥ ‹ኣሶሬ ካዎ ሴናኪሬሜ ቦላ ኔ ዎሲዳ ዎሳ ታኒ ሲያዲስ› ጊዴስ።
2KI 19:21 ሄሳ ጊሻስ ጎዳይ ኢዛ ቦላ ዮቲዳ ቃላይ ሃይሳ። «ጌላኦ ጺዮኔ ናያ ኔና ካꬋዱሲኔ ካዉሻዱስ፤ ዬሩሳላሜ ናያ ኔ ኢዚ ቦላራ ፒራꬋ ቢሺን ባ ቆꬌ ኔ ቦላ ቃꬃዉስ።
2KI 19:22 ሂስቲን ኔ ጫዪዳይኔ ካዉሺዳይ ኦኔ? ኔኒ ኔ ቃላ ꬎቁ ሂስቲዳይ ኦና ቦላ? ኔ ኦቶሬቴꬃን ዴሬቃ ጼሊዛይ ኦና ቦላ? ኢስራኤሌ ጌሻዛ ቦላዬ!
2KI 19:23 ኔኒ ቃስታኒዳይታ ባጋራ ጎዳ ቦላ ጫሽ ኮራዳሳ። ኔኒ፥ ‹ታኒ ታስ ዲዛ ዳሮ ፓራ-ጋሬታን ፑዴ ꬎቃ ዙማታ ቦላ ኬዛዲስ፤ ሊባኖሴ ዙማስ ጼራ ጋካዲስ፤ ሄፔ ኣዱሳ ዚጋ ሚꬃታኔ ዶሬቲዳ ጺዳ ሚꬃታካ ቃንጻዳሳ፤ ታኒ ኢዛስ ዉርሴꬃ ዛዋኔ ꬊፒ ጊዳ ዎራን ጋካዲስ።
2KI 19:24 « ‹ታኒ ሃራ ዴሬታንካ ሃꬃ ኦላ ቦካዲስ፤ ኢስታፌ ሃꬅ ኡያዲስ፤ ታኒ ታ ቶሆ ጫማታን ዬꬋዳ ጊብጼ ቢታ ፑልቶታ ሜሊሳዲስ› ጋዳሳ።
2KI 19:25 «ዳሮ ዎዴፔ ሲንꬃን ኔኒ ጊምቤቲዳ ካታማታ ቆቆፋዳ፥ ሹቻ ኬላ ኬሳና ማላ፥ ታኒ ቆፋ ቃቻ ዎꬂዳይሳ ሲያቤኪ? ቤኒ ሃልቻ ዎꬂዳይሳ ሃኢ ፖላይስ።
2KI 19:26 ሄን ዲዛ ኣሳ ዎልቃይካ ጪንጊ ዉሪዴስ፤ ኢስቲ ዳጋሚዲ ዬላ ማይኢዳ፤ ጮ ሜላ ዴምባን ሞኪዳ ኣታኪልቴ ማላ፥ ቡሮ ጻጶ ዬዶንታ ጫሬቻ ማላ፥ ኬꬃ ቦላ ሞኪዲ ቡሮ ዲጮንታ ሹሊዳ ማታ ማላ ጊዲዳ።
2KI 19:27 «ኔ ኣዋን ኡቲዛኮ፥ ኔ ኣይዴ ያዳ ኣይዴ ቢዛኮ ኔ ታ ቦላ ሃንቄቲዳይሳ ታ ኤራይስ።
2KI 19:28 ኔ ታ ቦላ ሃንቄቲዳ ጊሻሲኔ ኔ ካꬌይ ታ ሃይꬃን ዎꬊዳ ጊሻስ ታኒ ኔ ሲꬌን ዳፎ ዬጋና፤ ታኒ ኔና ቢጻላ ባርሳና፤ ኔ ዪዳ ኦጌራ ኔና ጉዬ ዛራና።
2KI 19:29 «ሂዝቂያሳ! ሄሳስ ማላታይ ሃይሳፌ ካሊዛይሳ፤ « ‹ሃ ላይꬅ ዎꬊ ማꬊዳይሳ፤ ዪዛ ላይꬅ ኣዛባ ማንዴታ፤ ሄꬓንꬃ ላይꬃን ዜሪዳይሳ ማጻንዴታ፤ ዎይኔ ቱራ ቶኪዲ ኢዛ ኣይፌ ማንዴታ።
2KI 19:30 ሃኢካ ዳዊቴ ኬꬃፌ ጫሻ ኣቲዳይቲ ባንታ ጻጶ ዱጌ ዬዳና፤ ቦላራካ ኣይፌ ኢማና።
2KI 19:31 ዬሩሳላሜን ሼምፖራ ፓጻ ኣቲዳይቲ፥ ጺዮኔ ዙማን ሃይቆፔ ኣቲዳይቲ ኢስቲ ኬዛና። ጎዳ ኡባፌ ዎልቃማ ጾሳ ዚልኤቴꬂ ሄሳ ኦꬃና።›
2KI 19:32 «ጎዳይ ኣሶሬ ካዎ ጊሻስ፥ « ‹ኢዚ ሃኖ ሃ ካታማዮ ሙሌካ ጌሌና፤ ኢሲ ቶራካ ጾንጌና፤ ጎንዳሌ ኦይኪዲ ኢዚኮ ሺቄና፤ ኢዞ ቢታ ዶሬን ጊዶꬄና።
2KI 19:33 ኢዚ ባ ዪዳ ኦጌራ ሲሚ ባና፤ ሃ ካታማዮ ሙሌራ ሲሚ ጌሌና።
2KI 19:34 ታ ጊሻሲኔ ታ ኣይሌ ዳዊቴ ጊሻስ ጋዳ ሃኖ ካታማዮ ታኒ ጎንዳላ ኣሻና› ጌስ።»
2KI 19:35 ሄ ጋላሳ ኦማርስ ጎዳ ኪታንቻይ ኬዚዲ ኣሶሬ ኣሳይ ዱንካኒ ኡቲዳሶሆን 185,000 ኣስ ዎꬊዴስ፤ ዎንቴꬃ ጋላስ ኣሳይ ዴንዲሺን ሄራ ኡባን ኣሃይ ኩሚዴስ።
2KI 19:36 ኣሶሬ ካዎ ሴናኪሬሜይ ሄፔ ዴንዲ ቢዴስ፤ ጉዬ ናናዌ ሲሚ ቢዲ ሄን ኡቲዴስ።
2KI 19:37 ኢሲ ጋላስ ኒስራኬ ጌቴቲዛ ባ ኤቃ ጾሳ ኬꬅ ጌሊዲ ኢዚ ሄን ጎይኒሺን ኢዛ ናይቲ ኣዲራሜሌኬይኔ ሳርሳሬይ ኢዛ ማሻን ሲፊ ዎꬊዳ፤ ሄፔ ኬሲ ኤኪዲ ኣራራቴ ጋካናስ ባቃቲዳ፤ ኢዛ ና ኣሴራዶኔይ ኢዛሶሆን ካዎቲዴስ።
2KI 20:1 ሄ ዎዴ ሂዝቂያሲ ዳሮ ሳኬቲዲ ሼምፖ ቦላ ዲሺን ኣሞጼ ና ናቤ ኢሳያሲ ኢዛኮ ቢዲ፥ «ጎዳይ ኔና፥ ‹ኔ ሃይቃና፤ ኔ ሃይሳፌ ጉዬ ሼምፖራ ፓጻ ዴኣካ። ሄሳ ጊሻስ ኔሶ ጊጊሳ› ጌስ» ጊዴስ።
2KI 20:2 ሂዝቂያሲካ ጌዴ ጎዳ ባጋ ሲሚዲ ጎዳኮ ዎሲሼ፥
2KI 20:3 «ኣቤት ጎዳዉ! ታኒ ኔ ሲንꬃን ኣማኔቴꬃን፥ ኩሜꬃ ዎዚናፔ ሄሜቲዳይሳኔ ኔና ኡፋይሲዛዝ ኦꬂዳይሳ ታስ ቆፓ» ጊዲ ጫሞ ዬሆ ዬኪዴስ።
2KI 20:4 ኢሳያሲ ቡሮ ካዎ ኬꬃ ዛጎ ካንꬂ ቢሺን ጎዳ ኣቻፌ ኢዛስ፥
2KI 20:5 «ኔኒ ጉዬ ሲማዳ ታ ዴሬዛ ሃላቃ ሂዝቂያሳስ፥ ‹ካሴ ጎዳይ ኔ ኣዋ ዳዊቴ ጾሳይ ታ ኔ ዎሳ ሲያዲስ፤ ኔ ኣፉንꬃካ ቤያዲስ፤ ታኒ ኔና ፓꬃና። ሃቺፌ ዶሚን ሄꬑ ጋላሳታፌ ጉዬ ኔኒ ፑዴ ጎዳ ኬꬅ ኬዛና።
2KI 20:6 ታ ኔ ላይꬃ ቦላ 15 ላይꬅ ጉጃና፤ ኔናኔ ሃኖ ካታማዮ ኣሶሬ ካዎ ኩሼፔ ኣሻና፤ ታኒ ታ ጊሻሲኔ ታ ኣይሌ ዳዊቴ ጊሻስ ጋዳ ሃኖ ሃ ካታማዮ ናጋና› ጋ» ጊዛ ቃላይ ዪዴስ።
2KI 20:7 ሄሳፌ ጉዬ ኢሳያሲ፥ «ታስ ባላሴ ሚꬃ ቴራ ኤኪ ዪቴ» ጊዴስ፤ ሂስቲን ኢስቲ ቂናኢዲ ኢዛስ ኪጻ ቦላ ዎꬂን ኢዚ ፓጺዴስ።
2KI 20:8 ሂዝቂያሲ፥ «ጎዳይ ታና ፓꬃናይሳሲኔ ሄꬑ ጋላሳፌ ጉዬ ታኒ ጎዳ ኬꬅ ኬዛናይሳስ ማላታይ ኣዜ?» ጊዲ ኢሳያሳ ኦይቺዴስ።
2KI 20:9 ኢሳያሲካ ኢዛስ ዛሪዲ፥ «ጎዳይ ባ ጊዳ ቃላ ፖላናይሳስ ማላታይ ሃይታፔ ኢሳ፤ ሃይሲ ኩዋዚ 10 ኬች ሲንꬅ ቦ ጋይ? ዎይኮ ታሙ ኬች ጉዬ ቦ ጋይ?» ጊ ኦይቺዴስ።
2KI 20:10 ሂዝቂያሲ ኢዛስ፥ «ኩዋይ 10 ኬች ሲንꬅ ቡሲ ሜቴና፤ ሄሳፌ ኩዋይ ጉዬ ሲማና ማላ ኦꬃ» ጊ ዮቲዴስ።
2KI 20:11 ናቤ ኢሳያሲ ሄሳፌ ጉዬ ፑዴ ጎዳስ ዋሲዴስ፤ ጎዳይካ ኣካዜይ ኦꬂዳ ኬቻ ቦላ ዎꬊዳ ኩዋዛ 10 ኬች ጉዬ ሲማና ማላ ኦꬂዴስ።
2KI 20:12 ሄ ዎዴ ባቢሎኔ ካዎ ባልዳኔ ና ማሮዶኬ-ባልዳኔይ ሂዝቂያሲ ሳኬቲዳይሳ ሲዪዳ ጊሻስ ሂዝቂያሳስ ዳብዳቤኔ ኢሞታ ዬዲዴስ።
2KI 20:13 ሂዝቂያሲካ ቃስታኔታ ሞኪ ኤኪዲ ባ ሚሽ ኡባ ዎꬂዛ ኬꬃን ዲዛ ቢራ፥ ዎርቃ፥ ዱማ ቆሞ ሳዎታ፥ ኣልኦ ዛይቴ፥ ኦላ ማሳራታ ኢዛን ዎꬂዛ ሚንጃ ኬꬃታኔ ሃራ ኣቲዳ ሚንጃ ኬꬃን ዲዛይታ ኡባ ኢስታ ቤሲዴስ። ባ ካዎቴꬃ ኬꬃኒኔ ባ ካዎቴꬃን ዲዛ ሚሽ ኡባፌ ሂዝቂያሲ ቤሶንታ ኣጊዳዚ ዴና።
2KI 20:14 ሄሳፌ ጉዬ ኢሳያሲ ሂዝቂያሳኮ ቢዲ፥ «ሃይቲ ኣሳቲ ኣዋፔ ዪዶ? ኔስ ኣይ ዮቲዶ?» ጊ ኦይቺዴስ። ሂዝቂያሲ፥ «ሃይቲ ሃሆ ዴሬ ባቢሎኔፔ ዪዳ» ጊዴስ።
2KI 20:15 ናቤዚካ ኢዛ፥ «ኔ ካዎቴꬃ ኬꬃፌ ኣይ ቤይዶ?» ጊ ኦይቺዴስ፤ ሂዝቂያሲካ ኢዛስ፥ «ኢስቲ ታ ካዎቴꬃ ኬꬃን ዲዛ ሚሽ ኡባ ቤይዳ፤ ታኒ ሚሽ ኢስታን ዎꬂዛ ኬꬃታፔ ታ ቤሶንታ ኣሺዳሶይ ሙሌካ ዴና» ጊዴስ።
2KI 20:16 ሄሳፌ ጉዬ ኢሳያሲ ሂዝቂያሳስ፥ «ኔኒ ጎዳ ቃላ ሲያ፤
2KI 20:17 ጎዳይ፥ ‹ኔ ካዎቴꬃ ኬꬃን ዲዛይ ኡባይ ካሴ ኔ ኣዋቲ ሃኖ ጋካናስ ሺሺዳይ ኡባይካ ባቢሎኔ ዲኤቲ ባና ዎዴይ ያናይሲ ኣቴና፤ ኢሲ ሚሺካ ኣቴና› ጌስ።
2KI 20:18 ኔፔ ዬሌቲዳ ኔ ናይታፔ ባጋቲ ዲኤቲዲ ባናኔ ባቢሎኔ ዴሬን ኢስቲ ካዎ ኬꬃን ጉንዱላታ ጊዲ ዳና» ጊዴስ።
2KI 20:19 ሂዝቂያሲካ፥ «ኔ ዮቲዳ ጎዳ ቃላይ ሎኦ» ጊዴስ። ኢዚ ሄሳꬆ ጊዳይ፥ «ታ ፓጻ ዲዛ ዎዴ ታስ ሳሮቴꬂኔ ዎፓይ ዲኮ ሄሳፌ ጉዬ ባ ዶሳ ሃኖ» ጊ ቆፒዳ ጊሻሳ።
2KI 20:20 ሂዝቂያሳ ካዎቴꬃ ላይꬃታን ሃኒዳ ሃራ ሚሻቲ፥ ኢዚ ኦꬂዳ ኦሶ ኡባይ፥ ሃꬅ ካታማ ጌልꬃናስ ኢዚ ዛሪሲዳ ዛራይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 20:21 ሂዝቂያሲ ሃይቂዲ ባ ኣዋታን ጋይቲዴስ፤ ኢዛ ና ሚናሴይ ኢዛሶሆን ካዎቲዴስ።
2KI 21:1 ሚናሴይ ካዎቲዛ ዎዴ ኢዛስ ላይꬃይ 12፤ ኢዚ ዬሩሳላሜን ኡቲዲ 55 ላይꬅ ሃሪዴስ፤ ኢዛ ኣያ ሃፌሴቦ ጌቴታዉስ።
2KI 21:2 ሚናሴይ ጎዳይ ኢስራኤሌ ሲንꬃፌ ጎዲ ኬሲዳ ሃራሲዛ ካዎቴꬃታ ሎሴ ካሊዲ ጎዳ ሲንꬃን ኢታ ኦሶ ኦꬂዴስ።
2KI 21:3 ካሴ ኢዛ ኣዋ ሂዝቂያሲ ዙምቡላታ ቦላ ዲዛ ኤቃ ጾሳታ ኬꬅ ላሊዳይሳ ዛሪ ኬጺዴስ፤ ኢስራኤሌ ካዎ ኣካቤይ ኦꬆይሳꬆ ኢዚካ ባኣሌስ ያርሾ ያርሺዛሶ ጊግሲዴስ። ኣሼሪ ሚስሌ ቱስ ኤሲዴስ፤ ሄሳꬆካ ሳሎ ጾሊንቴታስካ ጎይኒዴስ።
2KI 21:4 ጎዳይ፥ «ታኒ ታ ሱንꬃ ዬሩሳላሜን ዎꬃና» ጊዳ ጾሳ ኬꬃን ያርሾታ ያርሺዛሶሆታ ኦꬂዴስ።
2KI 21:5 ጾሳ ኬꬃ ዛጎ ናምኣታን ሳሎ ጾሊንቴታስ ጎይናናሶሆታ ጊግሲዴስ።
2KI 21:6 ባ ናዛ ጹጌቲዛ ያርሾ ሂስቲ ሺሺዴስ፤ ሂስቲዲ ሙሬኒዛይታ፥ ማሮታ፥ ሞይቲሌ ሃሳይሲዛይታኔ ኣያና ካዪዛይታ ዞሬ ኦይቺዴስ፤ ጎዳ ሃንቄꬂዛ ኢታ ሃኖታ ኢዛ ሲንꬃን ኦꬂዴስ።
2KI 21:7 ኢዚ ባ ማሲ ጊግሲዳ ኣሼሪ ሚስሌዛ ጾሳ ኬꬃ ጊዶን ዎꬂዴስ። ሄሲካ ጎዳይ ካሴ ዳዊቴ ና ሶሎሞኔስ፥ «ታኒ ሃይሳ ጾሳ ኬꬃኒኔ ኢስራኤሌ ቆሞታ ኡባታ ጋርሳፌ ዶሪዳ ዬሩሳላሜን ታ ሱንꬃ ሜርናስ ሄን ዎꬃና።
2KI 21:8 ጊዲኮካ ታኒ ኢስታ ኣዛዚዳይሳ ኡባካ ኢስቲ ሚኒ ፖሌቶኔ ታ ኣይሌ ሙሴይ ካሴ ኢስታስ ኢሚዳ ዎጋዛ ኢስቲ ፖሊ ናጌቶ ኣቲን ሃይሳፌ ጉዬ ኢስራኤሌ ኣሳ ካሴ ኢስታ ኣዋታስ ኢሚዳ ቢታፌ ኢስቲ ኬዚዲ ዋዬታና ማላ ታ ኦꬂኬ» ጊዳ ቃላይ ሃይሳ ሃ ሶሆዛ ጊሻሳ።
2KI 21:9 ዴሬዚ ጊዲኮ ሄሳ ሲዪቤና፤ ካሴ ጎዳይ ꬋይሲዳ ካዎቴꬃታፔካ ቦላራ ኢስቲ ኢታ ኦꬃና ማላ ሚናሴይ ኣሳ ባሌꬂዴስ።
2KI 21:10 ጎዳይ ባ ኣይሌ ናቤታ ባጋራ ሂዝጊ ዮቲዴስ፤
2KI 21:11 «ዩሁዳ ካዎ ሚናሴይ ሃይሳ ሹኒዛ ኢታ ናጋራ ኦꬂዴስ፤ ኢዚ ካሴ ባፔ ካሴ ዲዛ ኣሞሬ ዴሬ ኣሳፔካ ቦላራ ኢታ ኦꬂዴስ። ዩሁዳ ኣሳካ ኤቃታን ባሌꬂዴስ።
2KI 21:12 ሄሳ ጊሻስ ጎዳ ኢስራኤሌ ጾሳይ ሲዪዳዴ ሃይꬃስ ኢቲዛ ሜቶ ታኒ ዬሩሳላሜ ቦላኔ ዩሁዳ ቦላ ዬዳና።
2KI 21:13 ታኒ ሳማሪያስ ጊግሲዳ ዋꬋ ዎዶሮ፥ ታኒ ኣካቤሶ ኢዛራ ጊናሳ ጼሊዳ ቱምቤዛካ ዬሩሳላሜ ቦላ ዬዳና፤ ኣሲ ሳኔ ሜጪ ጉፋንꬂዛ ማላ ታኒካ ዬሩሳላሜ ሜጫ ꬋይሳና።
2KI 21:14 ጫሻ ኣቲዳ ታ ጺንጾታ ታኒ ኣጋና፤ ታኒ ኢስታ ኢስታ ሞርኬታስ ኣꬃ ኢማና፤ ኢስቲ ባ ሞርኬታስ ዲኦ ሚሽ ጊዳና።
2KI 21:15 ታኒ ሄሳꬆ ኦꬂዛ ጋሶይካ ኢስቲ ካሴ ባ ኣዋቲ ጊብጼፔ ኬዞሶፌ ሃኖ ጋካናስ ኢስቲ ታ ሲንꬃን ኢታ ኦሶ ኦꬂዲ ታና ሃንቆስ ዴንꬄꬂዳ ጊሻሳ» ጊዴስ።
2KI 21:16 ሃራፔካ ሚናሴይ ዩሁዳ ኣሳይ ጾሳ ሲንꬃን ኢታ ኦꬃና ማላ ኢስቲ ናጋራ ኦሲሲዳ ናጋራፔ ሃራካ ዬሩሳላሜስ ሃ ጋጻፔ ሄ ጋጻ ጋካናስ ጺሎ ጊዲዳ ዳሮ ኣሳ ሱꬅ ጉሲዴስ።
2KI 21:17 ሚናሴ ካዎቴꬃ ዎዴ ሃኒዳ ሃራ ሚሽ ባ ኦꬂዳ ናጋራ ቦላ ጉጂዲ ኢዚ ኦꬂዳይ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 21:18 ሚናሴይ ካሴ ባ ኣዋታ ማላ ሃይቂዴስ፤ ኢዚ ኦዛ ኣታኪልቴ ጊዶን ዲዛ ዱፎን ሞጌቲዴስ፤ ኢዛ ናዚ ኣሞኔይካ ኢዛሶሆን ካዎቲዴስ።
2KI 21:19 ኣሞኔይ ካዎቲሺን ኢዛስ ላይꬃይ 22፤ ኢዚ ዬሩሳላሜን ኡቲዲ 2 ላይꬅ ሃሪዴስ። ኢዛ ኣያ ሜሶላሞ ጌቴታዉስ፤ ኢዛ ያጺባ ዴሬ ኣስ ሃሩሴ ና።
2KI 21:20 ኢዛ ኣዋ ሚናሴይ ኦꬆይሳꬆ ኢዚካ ጎዳ ሲንꬃን ኢታ ሚሽ ኦꬂዴስ።
2KI 21:21 ካሴ ባ ኣዋይ ቢዳ ኦጌዛራ ኢዚካ ቢዴስ፤ ካሴ ባ ኣዋይ ጎይኒዳ ኤቃ ጾሳታስ ጎይኒዴሲኔ ኢስታስ ሆኪ ጉልባቲዴስ።
2KI 21:22 ካሴ ባ ጎዳ ጾሳ ኣጋጊዴስ፤ ኢዚ ጎዳ ኦጌን ቢቤና።
2KI 21:23 ኣሞኔ ዴሬ ሹሜቲ ማካሊዳ፤ ካዎዛካ ካዎቴꬃ ኬꬃ ጊዶን ዎꬊዳ።
2KI 21:24 ሄሳፌ ጉዬ ሄ ዴሬ ኣሳይ ካዎ ኣሞኔ ቦላ ዴንዲዲ ኢዛ ዎꬊዴስ፤ ኢዛ ናዛ ኢዮሲያሳካ ኢዛሶሆን ካዎꬂዳ።
2KI 21:25 ኣሞኔይ ካዎቲ ዲዛ ዎዴ ሃኒዳ ሃራ ኦሶይ ኢዚ ፖሊዳይ ኡባይካ ዩሁዳ ካዎታ ታሪኬ ማጻፋታን ጻፌቲ ዴስ ጊዴኔ?
2KI 21:26 ኢዚ ኦዛ ኣታኪልቴ ጊዶን ዲዛ ዱፎን ሞጌቲዴስ፤ ኢዛ ናዚ ኢዮሲያሲ ኢዛሶሆን ካዎቲዴስ።
2KI 22:1 ኢዮሲያሲ ካዎቲዛ ዎዴ ኢዛስ ላይꬃይ 8። ኢዚ ዬሩሳላሜን ኡቲዲ 31 ላይꬅ ሃሪዴስ፤ ኢዛ ኣያ ቦጺቃቴ፥ ዴሬ ኣስ ኣዳያ ና ዪዲዶ ጌቴታዉስ።
2KI 22:2 ኢዮሲያሲ ጎዳ ሲንꬃን ሎኦ ኦꬂዴስ፤ ካሴ ኢዛ ኣዋ ዳዊቲ ቢዳ ኦጌራ ቢዴስ፤ ሃዲርሲካ ኡሻቺካ ጊቤና።
2KI 22:3 ኢዚ ካዎቲዳ ታማኔ ኦስፑንꬃ ላይꬃን ኢዮሲያሲ ማሹላሜ ናዛ ና ኣጻሊያ ናዛ ጻፌዛ ሳፋኔ ጎዳ ኬꬅ ኪቲዲ፥
2KI 22:4 «ኔኒ ቄሴታ ሃላቃ ኪልቂያሳኮ ባ፤ ባዳ ፔንጌ ናጊዛይቲ ዴራፔ ጎዳ ኬꬃስ ሺሺዲ ጌልꬂዳ ሚሻይ ኣይ ኬናኮ ኪልቂያሲ ቆዳና ማላ ኦꬃ።
2KI 22:5 ሄሲካ ጎዳ ኬꬃ ኦሶዛ ካሊ ኦሲሳና ማላ ሹሜቲዳ ኣሳታስ ኢሜቶ፤ ኢስቲካ ጎዳ ኬꬅ ኦራꬂዛ ኦሳንቻታስ ኢሜቶ።
2KI 22:6 ኢስቲ ሚሻ ኣናጼታስ፥ ጊምቤ ጊምቢዛይታሲኔ ሹች ማሲዛይታስ ቃንጼቶ። ሄሲካ ጾሳ ኬꬃ ኢዛራ ኦራጺሳና ሳንቃታኔ ማሴቲዳ ሹቻታካ ሻሜቶ።
2KI 22:7 ኣሳቲ ኣማኔቲዳይታ ጊዲዳ ጊሻስ ኢስታስ ኢሜቲዳ ሚሻ ካላናስ ኮሼና» ጊዴስ።
2KI 22:8 ቄሴታ ሃላቃ ኪልቂያሲ ጻፌ ሳፋኔስ፥ «ታኒ ዎጋ ማጻፋ ጎዳ ኬꬃ ጊዶን ዴማዲስ» ጊዲ ኢዛስ ኢሚዴስ፤ ኢዚካ ማጻፋዛ ኤኪዲ ናባቢዴስ።
2KI 22:9 ሄሳፌ ጉዬ ጻፌዚ ሳፋኔይ ካዎዛኮ ቢዲ፥ «ኔ ሹሜቲ ጎዳ ኬꬃ ጊዶን ዲዛ ሚሻዛ ኬሲዲ ጎዳ ኬꬃ ናጌቲ ኬጺሲዛ ኣሳታስ ኢሚዳ» ጊዴስ።
2KI 22:10 ሄሳፌ ጉዬ ጻፌዚ ሳፋኔይ ካዎዛስ፥ «ቄሴታ ሃላቃ ኪልቂያሲ ታስ ማጻፋ ኢሚዴስ» ጊ ዮቲዴስ። ሳፋኔይካ ሄ ማጻፋዛፔ ካዎዛስ ናባቢዴስ።
2KI 22:11 ካዎዚካ ዎጋ ማጻፋዛ ቃላ ሲዪዲ ባ ማይኦ ዳኪዴስ።
2KI 22:12 ሄሳፌ ጉዬ ቄሴ ሃላቃ ኪልቂያሳ፥ ሳፋኔ ና ኣኪቃሜ፥ ሚካያ ና ኣኪቦሬ፥ ጻፌ ሳፋኔኔ ካዎዛስ ማታ ኦሳንቻ ኣሳያ፥
2KI 22:13 «ኢንቴ ቢዲ ታ ጊሻስ፥ ዴራ ጊሻሲኔ ዩሁዳ ኣሳ ጊሻስ ሃይሳ ማጻፋን ጻፌቲዳይሲ ኣይ ጊዛኮ ጎዳ ኦይቺቴ፤ ጋሶይካ ኑ ኣዋቲ ሃይሳ ማጻፋዛ ቃላስ ኣዛዜቶንታ ኢጺዳ ጊሻስ፥ ኑ ጊሻስ ኢዛን ጻፌቲዳይሳ ኡባካ ኢስቲ ፖሎንታ ኣጊዳ ጊሻስ ሃኢ ኑ ቦላ ጎዳ ሃንቆይ ዎልቃማ» ጊ ኣዛዚዴስ።
2KI 22:14 ቄሴ ኪልቂያሲ፥ ኣኪቃሜይ፥ ኣኪቦሬይ፥ ሳፋኔይኔ ኣሳያይ ናቤ ሁልዳኖ ኦይቻና ቢዳ፤ ሁልዳና ሃራሴ ናዛ ቴቁዌ ና ማይኦ ናጊዛ ሻሎሜ ማቾ፤ ኢዛ ዬሩሳላሜ ጊዶን ናምኣንꬆ ጉታን ዳዉስ።
2KI 22:15 ናቤያካ፥ «ጎዳ ኢስራኤሌ ጾሳይ ኢንቴና ታኮ ኪቲዳ ኣዴዛስ፥
2KI 22:16 ‹ጎዳይ ዩሁዳ ካዎዚ ናባቢዳ ማጻፋን ጻፌቲዳ ባሻ ኡባ ታኒ ሃይሳ ሃ ሶሆዛ ቦላኔ ዴራ ቦላ ኤሃና።
2KI 22:17 ኣሳይ ታና ኣጊዲ ሃራ ኤቃ ጾሳታስ ኤጻኔ ጩዋሲዳ ጊሻስ፥ ኢስቲ ባ ኩሼን ኦꬂዳ ኤቃ ጾሳታን ታና ሃንቄꬂዳ ጊሻስ ታ ሃንቆይ ሃይሳ ሃ ሶሆዛን ታማ ማላ ኤጺሼ ዴኣና ኣቲን ቶኤና› ጌስ ጊዲ ዮቲቴ።
2KI 22:18 ጎዳ ኦይቻናስ ኢንቴና ሃ ኪቲ ዬዲዳ ዩሁዳ ካዎዛስ ሃይሳፌ ካሊዛይሳ ዮቲቴ፤ ‹ኔኒ ሲዪዳ ዮኦዛ ጊሻስ ጎዳ ኢስራኤሌ ጾሳይ፥
2KI 22:19 ኢስቲ ቃንጌታናይሳኔ ꬋያናይሳ ታኒ ሃይሳ ሃ ሶሆዛ ቦላኔ ዴሬዛ ቦላ ካሴ ዮቲዳይሳ ኔኒ ሲያዳ ኔ ዎዚናይ ሜቂን ኔናቴꬃ ጎዳ ሲንꬃን ካዉሻዳኔ ኔ ማይኦካ ዳካዳ ታ ሲንꬃን ኔ ዬኪዳ ጊሻስ ጎዳይ ኔና ሲያዲስ።
2KI 22:20 ሄሳ ጊሻስ ታኒ ኔና ኔ ኣዋታን ጋꬃና፤ ኔኒ ሳሮን ዱፎን ጌላና፤ ታኒ ሃይሳ ሃ ዴራ ቦላ ኤሃና ሜቶዛ ኔ ኣይፌይ ቤኤና› ጌስ ጊ ዮቲቴ» ጋዱስ። ሄ ቢዳ ቃስታኔቲ ዛሮዛ ካዎዛስ ኤኪ ቢዳ።
2KI 23:1 ሄሳፌ ጉዬ ካዎዚ ዩሁዳኒኔ ዬሩሳላሜን ዲዛ ጪማ ኣስ ኡባ ጼይጊዴስ፤
2KI 23:2 ዩሁዳ ኣሳይኔ ዬሩሳላሜን ዲዛ ኣሳይ ኡባይ ቄሴቲኔ ናቤቲ ኡባፌ ናፔ ጪማ ጋካናስ ኡባ ጎዳ ኬꬅ ኤኪ ዪዴስ፤ ጎዳ ኬꬃፌ ቤቲዳ ጫቆ ቃላ ማጻፋ ኢስቲ ባንታ ሃይꬃን ሲያና ማላ ኡባ ናባቢዴስ።
2KI 23:3 ካዎዚ ዎርቃ ቱሳ ኣቻን ጎዳ ሲንꬃን ኤቂዲ ጎዳ ካላናስ ኢዛ ኣዛዞታ፥ ማራታኔ ዎጋታ ባ ኩሜꬃ ዎዚናፔ ኩሜꬃ ሼምፖፌ ናጋናስ ሃይሳ ማጻፋዛን ጻፌቲዳ ጫቆዛ ሚንꬃናስ ጎዳ ሲንꬃን ኦራጺሲዴስ። ሄሳፌ ጉዬ ዴሬዚ ኡባይካ ጫቆ ቃላዛስ ባንታ ኣማኔቴꬃ ቆንጪሲዳ።
2KI 23:4 ካዎዚ ባኣሌስ፥ ኣሼርሲኔ ሳሎ ጾሊንቴታስ ኡባስ ኦሴቲዳ ሚሻታ ጎዳ ኬꬃፌ ኬሳና ማላ ቄሴታ ሃላቃ ኪልቂያሳስ፥ ኢዛፔ ካሊ ናምኣንꬆ ማራን ዲዛ ቄሴታኔ ጾሳ ኬꬃ ፔንጌ ናጊዛ ዛቤታ ኣዛዚዴስ። ሄ ሚሻታካ ዬሩሳላሜፔ ካሬ ኬሲዲ ዱጌ ቄዲሮኔ ሾባን ዲዛ ዴምባን ጹጊዴስ፤ ቢዲንꬃካ ቤቴሌ ኤፊዴስ።
2KI 23:5 ዩሁዳ ካታማታኒኔ ዬሩሳላሜ ዩሾን ዲዛ ዙምቡላታ ቦላ ኤጻኔ ጩዋሳና ማላ ካሴ ዩሁዳ ካዎቲ ኤቃ ጾሳታስ ሹሚዳ ቄሴታካ ጎዲዴስ፤ ሄሳꬆካ ባኣሌስ፥ ኣዋ ኣርሼስ፥ ኣጊናስ፥ ኡጬቲ ዲዛ ጾሊንቴታሲኔ ሳሎ ጾሊንቴ ኡባስ ኤጻኔ ጩዋሲዛይታ ዲጊዴስ።
2KI 23:6 ኣሼሪ ሚስሌ ጎዳ ኬꬃፌ ኬሲዲ ዬሩሳላሜፔ ካሬራ ዲዛ ጌዴ ቄዲሮኔ ሾባ ኤፊዲ ሄን ጹጊዴስ፤ ጋጪ ሊቂሲዲ ዴራ ዱፎን ላሊዴስ።
2KI 23:7 ጎዳ ኬꬃ ጊዶን ጎይኖ ዎጋ ኦꬂዲ ኣዴይ ኣዴራ ፓራቲዛ ኪፊሌታኔ ማጫሳቲ ኣሼርሲ ማይኦስ ሱቂዛ ኪፊሌታ ላሊዴስ።
2KI 23:8 ኢዮሲያሲ ቄሴታ ኡባ ዩሁዳ ካታማ ጋርሳፌ ዬሩሳላሜ ኬሲዴስ። ጌባፔ ዶሚዲ ቤርሳቤሄ ጋካናስ ቄሴቲ ኢስታ ቦላ ኤጻኔ ጩዋሲዛ ዙምቡላታ ቱኒሲዴስ። ካታማይስ ሃዲርሳ ባጋራ ዲዛ ካታማዮ ሃሪዛ ኢያሶ ፔንጌ ኣቻራ ዲዛ ፔንጌታን ጎይኒዛሶሆታ ላሊዴስ።
2KI 23:9 ዙምቡላታ ቦላ ጎይኒዛሶታ ዬሩሳላሜን ጎዳስ ያርሾሶሆታ ሃጋዞንታ ኣጊኮካ ቄሴ ጊዲዳ ባ ኢሻታራ ኢርሾይ ቦቾንታ ኡኬꬅ ሜቴስ።
2KI 23:10 ሄኖሜ ና ሾባን ዲዛ ቶፌቴ ጌቴቲዛ ጎይኒዛሶሆዛ ቱኒሲዴስ፤ ኣይ ኣሲካ ኣቱማ ና ጊዲን ዎይኮ ማጫ ና ሞሎኬስ ታማን ጹጊ ያርሾንታ ማላሳ።
2KI 23:11 ዩሁዳ ካዎቲ ጎዳ ኬꬄ ጌሊዛ ሶሆን ኣዋ ኣርሼስ ጎይናናስ ኢሚዳ ፓራታ ሄፔ ዲጊዴስ። ሄይቲካ ናታን-ሜሌኬ ጌቴቲዛ ኢሲ ሹሜዛ ኬꬃ ማታን ዲዛ ዱቡሻን ዴቴስ። ኢዮሲያሲካ ኣዋ ኣርሼስ ጎይናና ማላ ኢሜቲዳ ፓራ-ጋሬታ ታማን ጹጊዴስ።
2KI 23:12 ዩሁዳ ካዎቲ ፑዴ ኣካዜ ኢልፒኔ ኣቻን ፖቄ ቦላ ኦꬂዳ ያርሾሶሆታ፥ ሚናሴይ ጎዳ ኬꬃ ዛጎ ናምኣታን ኦሲሲዳ ያርሾሶሆታ ዲጊዴስ፤ ቲንቼሬꬂ ዬጊዴስ፤ ሄ ቲንቼꬃካ ዴንꬂ ኤፊዲ ቄዲሮኔ ሾባን ዬጊዴስ።
2KI 23:13 ሄሳꬆካ ዬሩሳላሜፔ ኣርሼይ ሞኪዛ ባጋራ ቱናቴꬃ ዙማፔ ዱጌሃ ባጋን ኢስራኤሌ ካዎ ሶሎሞኔይ ሲዶናታ ቱናቴꬃ ጾስ ኣስታሮቴስ፥ ሞኣቤታ ቱናቴꬃ ጾስ ካሞሼስ፥ ኣሞኔታ ቱናቴꬃ ጾስ ሞሎኬስ ዙምቡላታ ቦላ ኦሲሲዳ ጎይኒዛሶሆታ ካዎዚ ቱኒሲዴስ።
2KI 23:14 ሃኢካ ኢዮሲያሲ ኣሳይ ኢስታስ ጎይኒዛ ሹቻ ሃዉልቴታ ሜንꬄሬꬂ ዬጊዴስ፤ ኣሼሪ ሚስሌ ቱሳታካ ቃንጼሬꬂ ዬጊዴስ፤ ሄ ሶሆታካ ኣሳ ሜቄꬅ ኩንꬂዴስ።
2KI 23:15 ኢስራኤሌ ኣሳ ናጋራ ኦሲሲዳ ናባጼ ና ኢዮርባኣሜይ ኦꬂዳ ያርሾሶሆዛ፥ ቤቴሌን ዙምቡላ ቦላ ጎይኒዛሶሆዛ፥ ያርሾ ያርሺዛሶሆዛ ኢዛ ቦላ ዲዛ ዙምቡላ ሄሳꬆካ ላሊዴስ፤ ሹቻታካ ሜንꬄሬꬂ ዬጊዴስ፤ ꬊሌ ማላካ ሊቂሲዴስ፤ ኣሼሪ ሚስሌ ቱሳካ ጹጊዴስ።
2KI 23:16 ኢዮሲያሲ ዩሺ ጼሊዛ ዎዴ ዙምቡላ ቦላ ዲዛ ዱፎታ ቤኢዴስ፤ ሜቄꬃታ ዱፎታፔ ኬሲዲ ጾሳ ኣሲ ካሴ ዮቲዳ ማላ ጎዳ ቃላይ ፖሌታና ማላ ያርሾ ያርሺዛሶሆዛ ቱኒሳናስ ኢዛ ቦላ ጹጊዴስ።
2KI 23:17 ካዎዚካ፥ «ሴኪ ዱፎ ቦላ ታ ቤኢዛ ሃዉልቴዚ ኦና ሃዉልቴ?» ጊ ኦይቺዴስ። ሄ ካታማይን ዲዛ ኣሳይ፥ «ዩሁዳፔ ዪዲ ሃኢ ኔ ኦꬂዳይሲ ኡባይ ቤቴሌን ያርሾ ያርሺዛሶሆዛ ቦላ ጋካናይሳ ዮቲዳ ጾሳ ኣሳ ዱፎ» ጊዳ።
2KI 23:18 ኢዮሲያሲካ፥ «ኣኔ ሄሳ ቦቾፍቴ፤ ሄ ኣዴዛ ሜቄꬅ ኢዚ ዲዛሶሆፔ ኦኒካ ቃꬆፎ» ጊዴስ። ሄሳ ጊሻስ ኢዛ ሜቄꬂኔ ሳማሪያፔ ዪዳ ናቤዛ ሜቄꬂ ካሴ ዲዛ ማላ ቦቾንታ ኣጋጊዳ።
2KI 23:19 ኢዮሲያሲ ቤቴሌን ኦꬂዳ ማላ ሳማሪያ ካታማን ዙምቡላታ ቦላ ኢስራኤሌ ካዎቲ ካሴ ኦሲሲዳይታኔ ጎዳ ሃንቄꬂዳ ኤቃ ጾሳ ኬꬃታ ኡባ ꬋይሲዴሲኔ ቱኒሲዴስ።
2KI 23:20 ኢዮሲያሲ ሄይታ ዙምቡላታ ቦላ ጎይኒዛሶሆታን ኦꬂዛ ቄሴታ ኡባ ያርሾ ያርሺዛሶሆታ ቦላ ሹኪዴስ፤ ሄ ያርሾሶሆታ ቦላካ ኣሳ ሜቄꬅ ጹጊዴስ፤ ሄሳፌ ጉዬ ዬሩሳላሜ ሲሚዴስ።
2KI 23:21 ካዎዚ ኩሜꬃ ዴራስ፥ «ሃይሳ ኢዛ ጫቆ ማጻፋን ጻፌቲዳ ማላ ጎዳ ኢንቴ ጾሳ ፓዚጋ ባኣሌ ቦንቺቴ» ጊዲ ኣዛዚዴስ።
2KI 23:22 ካሴ ኢስራኤሌ ካሌꬂዳ ዳናታ ዎዴፔ ዶሚዲ ኢስራኤሌ ካዎታኔ ዩሁዳ ካዎታ ዎዴ ኡባን ሄሳ ማላ ፓዚጋ ባኣሌይ ቦንቼቲ ኤሬና።
2KI 23:23 ኢዮሲያሲ ካዎቲዲ ታማን ኦስፑንꬃ ላይꬃን ሃይሲ ሃ ፓዚጋዚ ዬሩሳላሜን ጎዳስ ቦንቼቲዴስ።
2KI 23:24 ሄሳፌ ቦላራ ኢዮሲያሲ ሞይቲሌ ሃሳይሲዛይታ፥ ኣያናታ ጼይጊዛይታ፥ ኣሲ ባ ሁኤን ሁኤን ጎይኒዛ ጾሳታ፥ ኤቃ ጾሳታ፥ ዩሁዳኒኔ ዬሩሳላሜን ቤቲዳ ሃራ ሻቲዛ ሚሽ ኡባ ꬋይሲዴስ፤ ኢዚ ሄሳꬆ ኦꬂዳይካ ቄሴ ኪልቂያሲ ጎዳ ኬꬃ ጊዶፌ ዴሚዳ ማጻፋን ጻፌቲ ዲዛ ዎጋይ ፖሌታና ማላሳ።
2KI 23:25 ካሴ ሙሴ ዎጋን ጻፌቲዳ ማላ ባ ኩሜꬃ ዎዚናፔ፥ ባ ኩሜꬃ ሼምፖፌ፥ ባ ኩሜꬃ ዎልቃፌ ጎዳኮ ሲሚዳ ኢዮሲያሳ ማላ ካዎይ ኢዛፔ ሲንꬃን ጊዲን ዎይኮ ኢዛፔ ጉዬን ሙሌካ ዴንዲቤና።
2KI 23:26 ጊዶ ኣቲን ሃይሲ ኡባይ ሃኒንካ ሚናሴይ ጎዳ ሃንቄꬃናስ ኦꬂዳ ኢታ ኦሶ ኡባ ጋሶን ጎዳይ ዩሁዳ ቦላ ሃንቄቲዳ ታማ ማላ ባቢሲዛ ሃንቆዛፔ ኢርጺቤና።
2KI 23:27 ሄሳ ጊሻስ ጎዳይ፥ «ታኒ ኢስራኤሌ ታ ሲንꬃፌ ዲጎይሳꬆ ዩሁዳካ ታ ሲንꬃፌ ዲጋና፤ ታኒ ዶሪዳ ዬሩሳላሜ ካታማዮ፥ ‹ታ ሱንꬂ ሄን ዴኣና› ጋዳ ታኒ ካሴ ዮቲዳ ጾሳ ኬꬂዮ ታ ዬጋ ኣጋና» ጊዴስ።
2KI 23:28 ኢዮሲያሳ ካዎቴꬃ ላይꬃን ኦሴቲዳ ኦሶቲ፥ ሃኒዳ ሃኖቲኔ ኦሴቲዳ ሃራ ኦሶቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 23:29 ኢዮሲያሲ ካዎቴꬃን ዲዛ ዎዴ ጊብጼ ካዎ ፋሮን-ኒካይ ኣሶሬ ካዎ ማዳናስ ጌዴ ኤፊራጺሴ ሻፋ ቢዴስ፤ ካዎ ኢዮሲያሲካ ኢዛራ ኦሌታናስ ኬዚዴስ፤ ጊዶ ኣቲን ፋሮን-ኒካይ ኢዛራ ቲራን ጋይቲዲ ኢዛ ማጊዶን ዎꬊዴስ።
2KI 23:30 ኢዮሲያሳ ኦሳንቻቲ ኢዛ ኣሃዛ ማጊዶፌ ፓራ-ጋሬን ዬሩሳላሜ ኤኪ ኤሂዲ ኢዛ ዱፎን ሞጊዳ። ኢዛ ዴሬ ኣሳይ ኢዮሲያሳ ና ኢዮኣካዜ ኤፊዴስ፤ ቲይዲ ኢዛ ኣዋ ሶሆን ኢዛ ካዎꬂዳ።
2KI 23:31 ኢዮኣካዚ ካዎቲዛ ዎዴ ኢዛስ ላይꬃይ 23፥ ኢዚ ዬሩሳላሜን ኡቲዲ 3 ኣጊና ሃሪዴስ፤ ኢዛ ኣያ ኣምጻሎ ጌቴታዉስ። ኢዛ ሊቢና ዴሬ ኣስ ኤርማሳ ና።
2KI 23:32 ካሴ ኢዛ ኣዋቲ ኦꬆይሳꬆ ኢዚካ ጎዳ ሲንꬃን ኢታ ሚሽ ኦꬂዴስ።
2KI 23:33 ኢዚ ዬሩሳላሜን ኡቲዲ ካዎቶንታ ማላ ፋሮን-ኒካይ ሃማቴ ዴሬን ኤሬቢላ ጌቴቲዛሶን ኢዛ ሳንሳላታን ቃቺዴስ። ዩሁዳ ቦላ 3,400 ኪሎ ቢራኔ 34 ኪሎ ዎርቃ ጊራ ዬጊዴስ።
2KI 23:34 ካዎ ፋሮን-ኒካይ ኢዮሲያሳ ና ኤልያቄሜ ኢዛ ኣዋ ሶሆን ካዎꬂዴስ፤ ኢዛ ሱንꬃካ ላሚዲ ኢዮኣቄሜ ጊ ሱንꬂዴስ። ጊዶ ኣቲን ኢዮኣካዜ ዲኢ ጊብጼ ኤፊዴስ፤ ሂስቲን ኢዚ ሄን ሃይቂዴስ።
2KI 23:35 ኢዮኣቄሜይካ ፓሮን-ኒካይ ኢዛ ኦይቺዳ ቢራኔ ዎርቃ ኢዛስ ቃንጺዴስ፤ ኢዚ ሄሳ ኦꬃናስ ቢታ ቦላ ጊራ ዬጊዴስ፤ ሄ ዴሬ ኣሳይ ባ ዎልቃ ዎልቃ ማላ ቢራኔ ዎርቃ ጊራና ማላ ኦꬂዴስ።
2KI 23:36 ኢዮኣቄሜይ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን ኡቲዲ 11 ላይꬅ ሃሪዴስ። ኢዛ ኣያ ዜቢዶ ጌቴታዉስ፤ ኢዛ ኡሩሜ ዴሬ ኣስ ፓዳያ ና።
2KI 23:37 ኢዮኣቄሜይ ካሴ ኢዛ ኣዋቲ ኦꬂዳ ማላ ጎዳ ሲንꬃን ኢታ ሚሽ ኦꬂዴስ።
2KI 24:1 ኢዮኣቄሜይ ካዎቲዛ ዎዴ ባቢሎኔ ካዎ ናቡካዳናጾሬይ ዩሁዳ ቦላ ዎራጂዴስ፤ ኢዮኣቄሜይካ ኢዛስ 3 ላይꬅ ጊሪዴስ። ሄሳፌ ጉዬ ኢዚ ባ ቆፋ ላሚዲ ናቡካዳናጾሬ ቦላ ማካሊዴስ።
2KI 24:2 ጎዳይ ባቢሎኔፔ፥ ኣራሜፔ፥ ሞኣቤፔኔ ኣሞኔፔ ፓንጋታ ኢዮኣቄሜ ቦላ ዬዲዴስ። ጎዳይ ባ ኦሳንቻታ ናቤታ ባጋራ ካሴ ዮቲዳ ቃላ ማላ ኢስቲ ዩሁዳ ꬋይሳና ማላ ሃይታ ዬዲዴስ።
2KI 24:3 ኢዚ ኢስታ ባ ሲንꬃፌ ሃሳና ማላ ሃይቲ ሃ ዮኦቲ ኡባይ ጎዳይ ኣዛዚዳ ማላ ዩሁዳ ቦላ ፖሌታና ዳንዳይዳ፤ ሄሲካ ሚናሴይ ኦꬂዳ ናጋራ ጊሻሲኔ ኢዚ ፖሊዳ ሃኖ ኡባ ጊሻሳ፤
2KI 24:4 ቃሴካ ኢዚ ጺሎ ሱꬅ ጉሲዳ ጊሻሳ። ዬሩሳላሜይካ ጺሎ ሱꬃን ኩማና ማላ ኢዚ ኦꬂዳ ጊሻስ ጎዳይ ኢዛ ማራናስ ኮዪቤና።
2KI 24:5 ኢዮኣቄሜ ካዎቴꬃ ላይꬃን ሃኒዳ ሃኖቲኔ ኦሴቲዳ ሃራ ኦሶቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
2KI 24:6 ኢዮኣቄሜይካ ሃይቂዲ ባ ኣዋታን ጋይቲዴስ፤ ኢዛ ና ኢዮኣኪኔይ ኢዛሶሆን ካዎቲዴስ።
2KI 24:7 ባቢሎኔ ካዎይ ሃꬂ ባይንዳ ጊብጼ ሻፋታፔ ቢዲ ኤፊራጺሴ ሻፋ ጋካናስ ኢዚ ሃሪዛ ዴሬታ ኡባ ኢዛ ኩሼፔ ዎꬂ ኤኪዳ ጊሻስ ጊብጼ ካዎዚ ባ ዴሬፔ ዛሪ ኦላ ኦሌታናስ ኬዚቤና።
2KI 24:8 ኢዮኣኪኔይ ካዎቲዛ ዎዴ ኢዛስ ላይꬃይ 18፤ ኢዚ ዬሩሳላሜን ኡቲዲ 3 ኣጊና ሃሪዴስ፤ ኢዛ ኣያ ኔሂሺቶ ጌቴታዉስ፤ ኢዛ ዬሩሳላሜ ኣስ ኤልናታኔ ና።
2KI 24:9 ካሴ ኢዛ ኣዋይ ኦꬆይሳꬆካ ኢዮኣኪኔይ ጎዳ ሲንꬃን ኢታ ኦሶ ኦꬂዴስ።
2KI 24:10 ሄ ዎዴ ባቢሎኔ ካዎ ናቡካዳናጾሬ ኦላ ጋዳዋቲ ዬሩሳላሜ ዪዲ ካታማዮ ጊዶꬂዳ።
2KI 24:11 ኦላ ጋዳዋቲ ካታማዮ ጊዶꬂዛ ዎዴ ናቡካዳናጾሬይ ባ ሁኤራ ሄ ካታማዮ ዪዴስ።
2KI 24:12 ዩሁዳ ካዎ ኢዮኣኪኔ ኣያ፥ ኢዛ ኣዣባቲ፥ ዳናቲኔ ሹሜቲ ኡባይ ባንታ ኩሼ ባቢሎኔ ካዎስ ኢሚዳ፤ ባቢሎኔ ካዎይ ካዎቲዳ ኦስፑንꬃ ላይꬃን ኢዮኣኪኔ ዲኢ ኤኪ ቢዴስ።
2KI 24:13 ጎዳይ ካሴቲ ዮቲዳ ማላ ናቡካዳናጾሬይ ጾሳ ኬꬃኒኔ ካዎ ኬꬃን ዲዛ ኣቆታ ኡባ ዴንꬂ ኤፊዴስ። ኢስራኤሌ ካዎ ሶሎሞኔይ ጎዳ ኬꬃስ ዎርቃፌ ኦሲሲዳ ሚሽ ኡባ ኤኪ ቢዴስ።
2KI 24:14 ቃሴካ ዬሩሳላሜ ኣሳ ኡባ፥ ኦላ ጋዳዋታኔ ኦላንቻታ ኡባ፥ ሂላንቻታኔ ዎጋጬታ ኡባ ኢሲ ቦላ 10,000 ኣስ ዲኢ ኤኪ ባ ዴሬ ኤፊዴስ፤ ሄን ዴሬዛን ኣቲዳይቲ ፑꬃ ማንቆታ ጻላ።
2KI 24:15 ናቡካዳናጾሬይ ኢዮኣኪኔ ዲኢ ኤኪዲ ባቢሎኔ ኤፊዴስ፤ ሄሳꬆካ ካዎዛ ኣዬዮ፥ ኢዛ ማቼታ፥ ኢዛ ሹሜታኔ ዴሬን ኤሬቲዳ ጊታ ኣሳታ ዬሩሳላሜፔ ባቢሎኔ ኤፊዴስ።
2KI 24:16 ቃሴካ ባቢሎኔ ካዎይ ሚኖኔ ኦላስ ጋኪዳ 7,000 ኦላንቻታ፥ 1,000 ሂላንቻታኔ ዎጋጬታ ኢሲ ቦላ ዲኢ ኤኪዲ ባቢሎኔ ኤፊዴስ።
2KI 24:17 ሄሳፌ ጉዬ ኢዮኣኪኔ ኣዋ ኢሻ ማታኒያ ኢዛሶሆን ካዎꬂዴስ፤ ኢዛ ሱንꬃ ላሚዲ ሴዴቂያሳ ጊ ሱንꬂዴስ።
2KI 24:18 ሴዴቂያሲ ካዎቲዛ ዎዴ ኢዛስ ላይꬃይ 21፤ ኢዚ ዬሩሳላሜን ኡቲዲ 11 ላይꬅ ሃሪዴስ፤ ኢዛ ኣያ ኣምጻሎ ጌቴታዉስ፤ ኢዛ ሊቢና ኣስ ኤርማሳ ቢዮ።
2KI 24:19 ኢዮኣቄሜይ ኦꬂዳ ማላ ኢዚካ ጎዳ ሲንꬃን ኢታ ሚሽ ኦꬂዴስ።
2KI 24:20 ሃይሲ ኡባይ ዬሩሳላሜ ቦላኔ ዩሁዳ ቦላ ጋካናስ ዳንዳይዳይ ጎዳ ሃንቆ ጋሶና፤ ዉርሴꬃን ኢዚ ኢስታ ባ ሲንꬃፌ ሃሲዴስ። ሴዴቂያሲ ባቢሎኔ ካዎ ቦላ ማካሊዴስ።
2KI 25:1 ዩሁዳ ካዎ ሴዴቂያሲ ካዎቲዳ ኡዱፉንꬃ ላይꬃን ታማንꬃ ኣጊናን ታማንꬃ ጋላስ ባቢሎኔ ካዎ ናቡካዳናጾሬይ ባ ኦላንቻታ ኡባ ኤኪዲ ዬሩሳላሜ ቦላ ዎራጂዴስ፤ ካታማይ ጊምቤፌ ካሬ ባጋራ ዩዪ ኣꬊ ጊዶꬂ ኡቲዳ።
2KI 25:2 ካታማያካ ሴዴቂያሲ ካዎቲ ዲዛ ታማኔ ኢሲንꬃ ላይꬅ ጋካናስ ሄሳꬆ ጊዶꬄታ ኡታዱስ።
2KI 25:3 ኦይዳንꬃ ኣጊናን ኡዱፉንꬆ ጋላስ ካታማይ ጊዶን ዴንዲዳ ኮሻይ ዳሮ ሚኒዳ ጊሻስ ኣሳስ ዶናን ባꬊዛዚ ꬋይዴስ።
2KI 25:4 ባቢሎኔ ኦላንቻቲ ካታማዮ ጊዶꬂ ኡቲዲ ኢሲ ባጋራ ካታማይ ጊምቤ ሜንꬂ ጌሊዳ፤ ዩሁዳ ኦላንቻቲ ኡባይካ ካዎ ኣታኪልቴ ኣቻን ዲዛ ናምኡ ጊምቤታ ጊዶራ ዲዛ ፔንጌዛራ ካንꬂዲ ኦማርሳራ ዱጌ ዮርዳኖሴ ሾባ ጋካናስ ባቃቲዳ።
2KI 25:5 ጊዶ ኣቲን ባቢሎኔ ኦላንቻቲ ካዎዛ ካሌቲዲ ኢያርኮ ዴምባን ጋኪዳ። ኦላንቻቲ ኡባይ ካዎዛ ኣጋጊ ላሌቲዳ።
2KI 25:6 ካዎዚካ ሄን ኦይኬቲዴስ፤ ሄ ዎዴ ኢዛ ኤሬቢላን ዲዛ ባቢሎኔ ካዎዛኮ ኤሂዳ፤ ኢዛ ቦላ ፒርዳይ ፒርዴቲዴስ።
2KI 25:7 ሴዴቂያሲ ባ ኣይፌን ቤኢሺን ኢዛ ናይታ ዎꬊዳ፤ ሄሳፌ ጉዬ ኢዛ ኣይፌ ናምኣታ ዎጪ ኬሲዲ ጻርቂማላ ሳንሳላታራ ቃቺ ባቢሎኔ ዴሬ ኤፊዳ።
2KI 25:8 ባቢሎኔ ካዎ ናቡካዳናጾሬይ ካዎቲዳ ታማኔ ኡዱፉንꬃ ላይꬃን ኢቻሻንꬃ ኣጊናን ላፑንꬃ ጋላሳን ኢዛስ ቦንቾ ዛቤታ ኣዛዚዛይሲኔ ባቢሎኔ ካዎዛስ ዳሮ ꬎቃ ሹሜ ጊዲዳ ናቡዛራዳኔይ ዬሩሳላሜ ዪዴስ።
2KI 25:9 ጎዳ ኬꬅ፥ ካዎቴꬃ ኬꬃኔ ዬሩሳላሜን ዲዛ ኬꬃታ ኡባ ጹጊዴስ፤ ኤሬቲዳ ጊታ ኬꬃታካ ታማን ጹጊዴስ።
2KI 25:10 ካዎ ቦንቾ ናጊዛይታ ኣዛዚዛይሳ ካሊዳ ኩሜꬃ ባቢሎኔ ኦላንቻቲ ዬሩሳላሜ ዩሾን ዲዛ ጊምቤዛ ላሊ ዬጊዳ።
2KI 25:11 ካዎ ቦንቾ ናጊዛይታ ኣዛዚዛይሲ ሄ ካታማይን ጫሻ ኣቲዳይታ፥ ባ ኩሼ ባቢሎኔ ካዎስ ኢሚዳይታ ኡባ ዲኢ ኤኪዲ ባቢሎኔ ኤፊዴስ።
2KI 25:12 ጊዲኮካ ናቡዛራዳኔይ ኣሳ ጋርሳፌ ፑቴሳ ማንቆታፔ ኣማርዳይታ ዎይኔ ቶካና ማላኔ ጋዴ ጎያና ማላ ሄን ኣጊዴስ።
2KI 25:13 ባቢሎኔ ዴሬ ኣሳይ ጻርቂማላፔ ኦሴቲዳ ቱሳታ፥ ጎዳ ኬꬃ ጊዶን ዲዛ ሚሻታ ኢስታ ቦላ ዎꬂዲ ያኔ ሃ ዩሺዛ ጋሬታኔ ሃꬅ ኢዛን ዎꬂዛ ጻርቂማላፔ ኦሴቲዳ ጋባቴዛ ሜንꬄሬꬂ ዬጊዲ ባቢሎኔ ኤኪ ቢዳ።
2KI 25:14 ሄሳꬆካ ቄሪ ጻሮታ፥ ታማ ኦይሴꬂዛ ሚሻታ፥ ቢዲንꬅ ካሺዛ ሚሻታ፥ ጪልፋታ፥ ጾሳ ኬꬃ ጊዶን ጎኤቲዛ ጻርቂማላፔ ኦሴቲዳ ሚሻታ ኡባ ኤኪ ቢዳ።
2KI 25:15 ካዎ ቦንቾ ናጊዛ ዛቤታ ኣዛዚዛይሲ ሙሩታ ዎርቃፌኔ ቢራፔ ኦሴቲዳ ጹኣታኔ ዉጺዛ ሚሻስ ጎኤቲዛ ሼልኤታ ኤኪ ቢዴስ።
2KI 25:16 ሶሎሞኔይ ጾሳ ኬꬃን ጎኤታናስ ጊዲ ጻርቂማላፔ ኦሲሲዳ ናምኡ ቱሳቲ፥ ሃꬅ ኦይኪዛ ጊታ ጋባቴኔ ሚሽ ኢስታ ቦላ ዎꬂ ዩሺዛ ጋሬቲ ኬሂ ዴጺዛይታ።
2KI 25:17 ቱሳቲ ኢሶይ ኢሶይ 18 ዋꬋ ጊዲሺን ጻርቂማላፔ ኦሴቲዳ ቁስቴይ ዴስ፤ ሄ ቁስቴዛ ኣዱሳቴꬃይ ሄꬑ ዋꬋ ጊዲሺን ዩዪ ኣꬋናስ ጻርቂማላፔ ኦሴቲዳ ሳንሳላታኔ ኦሮማኔ ሚꬃ ኣይፌ ሚሳቴቴስ፤ ሃንኮ ኣቲዳ ቱሳዚካ ኮይሮይሳ ማላ።
2KI 25:18 ካዎ ቦንቾ ናጊዛይታ ኣዛዚዛይሲ ቄሴታ ሃላቃ ሳራያ፥ ኢዛፔ ካሊ ዲዛ ቄሴ ሶፎናሳኔ ፔንጌ ናጊዛ 3 ዛቤታ ቃቺ ኤኪ ቢዴስ።
2KI 25:19 ሄ ዎዴ ጋካናስ ካታማይ ጊዶን ኣቲዳይታፔ ኦላንቻታ ሃላቃኔ ካዎ ዞሪዛ 5 ኣሳታ ኤኪ ቢዴስ፤ ቃሴ ዴራ ጊዶፌ ኦላስ ኣሳ ዶሪዛ ኦላ ጋዳዋ ጻፌዛ፥ ጻፌዛስ ካታማይ ጊዶን ዲዛ 60 ኣሳታ ኤኪ ቢዴስ።
2KI 25:20 ካዎ ቦንቾ ናጊዛይታ ኣዛዚዛ ናቡዛራዳኔይ ሄይታ ኡባ ኤሬቢላን ዲዛ ባቢሎኔ ካዎዛኮ ኤፊዴስ።
2KI 25:21 ካዎዚካ ሄ ኣሳ ሃማቴ ቢታን ሄን ኤሬቢላን ዎꬂሲዴስ። ዩሁዳይ ባ ቢታፌ ሄሳ ማላን ዲኤቲ ቢዴስ።
2KI 25:22 ባቢሎኔ ካዎ ናቡካዳናጾሬይ ሳፋኔስ ናዛ ና ኣኪቃሜ ና ጎዶሊያሳ ጫሻ ኣቲዳ ዩሁዳ ኣሳ ቦላ ሹሚዴስ።
2KI 25:23 ኩሜꬃ ኦላንቻታ ጋዳዋቲኔ ኢስታ ኣሳቲ ባቢሎኔ ካዎይ ጎዶሊያሳ ዴራ ኣይሳናስ ሹሚዳይሳ ሲዪዲ ኢዚ ዲዛሶ ሚጺጳ ጋካናስ ዪዳ፤ ኢስቲካ ናታኒያ ና ኢስማኤሌ፥ ቃሬሃ ና ዮሃናኔ፥ ናጾፌ ዴሬ ኣስ ታኒሁሜታ ና ሳራያ፥ ማኢካቴ ዴሬ ኣስ ያኢዛኔያኔ ኢስታ ኣሳታ።
2KI 25:24 ጎዶሊያሲካ፥ «ኢንቴ ባቢሎኔ ዴሬ ሹሜታስ ባቦፍቴ፤ ኢንቴ ሃይሳ ሃ ዴሬዛን ዲቴ፤ ባቢሎኔ ካዎስ ሃጋዚቴ፤ ሂስቲኮ ኢንቴስ ሃኒዛ ሚሺ ኡባይካ ጊጋ ጊዳና» ጊ ሄ ቃላን ኢስታራ ጫቄቲዴስ።
2KI 25:25 ጊዶ ኣቲን ላፑንꬃ ኣጊናን ካዎ ዜሬꬅ ጊዲዳ ኤልሻማስ ናዛ ና ናታኒያ ና ኢስማኤሌይ ባናራ ታሙ ኣሳታ ኤኪ ዪዲ ጎዶሊያሳ፥ ኢዛራ ሚጺጳን ኢሲፌ ዲዛ ዩሁዳ ኣሳታኔ ባቢሎኔ ዴሬ ኣሳታ ዎꬊዴስ።
2KI 25:26 ባቢሎኔ ኣሳስ ባቢዳ ጊሻስ ጋሼይ፥ ጊታይ ኣቶንታ ኡባይካ ኦላ ጋዳዋታራ ቤቴ ጊብጼ ቢዳ።
2KI 25:27 ዩሁዳ ካዎ ኢዮኣኪኔይ ዲኤቲዳ ሄꬑ ታማኔ ላፑንꬃ ላይꬃን ታማኔ ናምኣንꬆ ኣጊናን ናምኡ ታማኔ ላፑንꬃ ጋላስ ዮሪ-ማሮዴቄይ ባቢሎኔን ካዎቲዳ ላይꬅ ኢዮኣኪኔ ቃሾፔ ቢርሺ ዬዲዴስ።
2KI 25:28 ሎኦ ቃላን ኢዛ ሃሳይሲዴስ፤ ካሴ ኢዛራ ኢሲፌ ባቢሎኔን ዲዛ ካዎታፔ ቦላራ ኢዛስ ቦንቾ ሶሆ ኢሚዴስ።
2KI 25:29 ኢዮኣኪኔይካ ቃሾ ኬꬃን ዲሼ ማይኢዛ ማይኦ ቃሪ ዬጊዴስ፤ ሃይቃና ጋካናስ ኡባ ዎዴ ካዎዛ ማዳፌ ሚሼ ጋምኢዴስ።
2KI 25:30 ካዎዚ ኢዮኣኪኔስ ኢዚ ሃይቃና ጋካናስ ሃቺስ ሃቺስ ጊዲዛ ቃላባ ኢዛስ ኢሚዴስ።
1CH 1:1 ኣዳሜይ ሴቴ ዬሊዴስ፤ ሴቴይ ሄኖሴ ዬሊዴስ፤ ሄኖሴይ ቃይናኔ ዬሊዴስ።
1CH 1:2 ቃይናኔይ ማላልኤሌ ዬሊዴስ፤ ማላልኤሌይ ያሬዴ ዬሊዴስ።
1CH 1:3 ያሬዴይ ሄኖኬ ዬሊዴስ፤ ሄኖኬይ ማቱሳላ ዬሊዴስ፤ ማቱሳላይ ላሜኬ ዬሊዴስ።
1CH 1:4 ላሜኬይ ኖሄ ዬሊዴስ፤ ኖሄይ ሴሜ፥ ካሜኔ ያፌቴ ዬሊዴስ።
1CH 1:5 ያፌቴይ፥ ጎሜሬ፥ ማጎጌ፥ ማዳዬ፥ ያዋኔ፥ ቱባሌ፥ ሜሼኬኔ ቲራሴ ጌቴቲዛ ኣቱማ ናይታ ዬሊዴስ።
1CH 1:6 ጎሜሬ ናይቲ ኣሽኬናዜ፥ ኤሬፋሲቴኔ ቶጋርማ።
1CH 1:7 ያዋኔ ናይቲ ኤሊሼ፥ ታርሴሴ፥ ኪቲሜኔ ኦሮዳሂሜ።
1CH 1:8 ካሜ ኣቱማ ናይቲ ኩሼ፥ ሚጺራይሜ፥ ፑጼኔ ካናኔ።
1CH 1:9 ኩሼ ናይቲ ሴባ፥ ሃዊላ፥ ሳባ፥ ኤራኢሜኔ ሳቢቴካ፤ ኤራኢሜ ኣቱማ ናይቲ ሳባኔ ዳዳኔ።
1CH 1:10 ኩሼይ ናሙሩዴ ዬሊዴስ፤ ናሙሩዴይካ ኣላሜ ቦላ ኤሬቲዳ ዎልቃማ ኦላንቻ ጊዲዴስ።
1CH 1:11 ሚጺራይሜይ ሉዲሜታ፥ ኣናሜታ፥ ላሃቤታ፥ ናፍቱሄታ፥
1CH 1:12 ጳጺሮሴታ፥ ካሲሉሄታኔ ፊሊስጼሜ ዛሬታ ዬሊዳ ካፍቶሬታ ዬሊዴስ።
1CH 1:13 ካናኔይ ባይራ ና ሲዶናሲኔ ኢዛ ካሎ ሂቴስ ኣዋ፤
1CH 1:14 ቃሴካ ካናኔይ ያቡሴታስ፥ ኣሞሬታስ፥ ጌርጌሴታስ፥
1CH 1:15 ሂዌታስ፥ ኣርቄታስ፥ ሲኔታስ፥
1CH 1:16 ኣርዋዴታስ፥ ጻማሬታሲኔ ሃማቴታስ ኣዋ።
1CH 1:17 ሴሜ ናይቲ፥ ኤላሜ፥ ኣሶሬ፥ ኣርፋኪሲዴ፥ ሉዴ፥ ኣራሜ፥ ኡጼ፥ ሁሌ፥ ጌቴሬኔ ሜሼኬ፤
1CH 1:18 ኣርፋኪሲዴይ ሼላሄ ዬሊዴስ፤ ሼላሄይ ኤቦሬ ዬሊዴስ፤
1CH 1:19 ኤቦሬይ ናምኡ ኣቱማ ናይታ ዬሊዴስ፤ ኢሶይ ዬሌቲዳ ዎዴ ሳኣይ ሻኬቲዳ ጊሻስ ኢዛ ሱንꬂ ፔሌጌ ጌቴቲዴስ፤ ናምኣንꬆዚ ዮቂጻኔ ጌቴቲዴስ።
1CH 1:20 ዮቂጻኔይ ኣልሞዳዴ፥ ሼሌፌ፥ ሃጻርማዌቴ፥ ዬራሄ
1CH 1:21 ሃዶራሜ፥ ኡዛሌ፥ ዲቂሌ
1CH 1:22 ኤባሌ፥ ኣቢማኤሌ፥ ሳባ፥
1CH 1:23 ኦፊሬ፥ ሃዊላኔ ዮባቤ ዬሊዴስ፤ ሃይቲ ዉሪካ ዮቂጻኔ ናይታ።
1CH 1:24 ሴሜፔ ቢዲ ኣብራሃሜ ጋካናስ ዲዛ ዬሌታ ዛርኬይ ሃይሳፌ ካሊ ዲዛይታ ኦይኬስ፤ ኢስቲካ ሴሜ፥ ኣርፋኪሲዴ፥ ሼላሄ፥
1CH 1:25 ኤቦሬ፥ ፔሌጌ፥ ኤራኤ፥
1CH 1:26 ሳሩጌ፥ ናኮሬ፥ ታራኔ
1CH 1:27 ጉዬፔ ኣብራሃሜ ጌቴቲዳ ኣብራሜ።
1CH 1:28 ኣብራሃሜይ ዪሳቃኔ ኢስማኤሌ ዬሊዴስ።
1CH 1:29 ኣብራሃሜይ ኣጋሪፔ ኢስማኤሌ ዬሊዴስ፤ ኢስማኤሌይ ዬሊዳ ባይራ ናዛ ሱንꬂ ኔባዮቴ ጊዲሺን ኢዛ ካሎቲ ቄዳሬ፥ ኣዲቢኤሌ፥ ሚቢሳሜ፥ ሚሺማኤ፥ ዱማ፥ ማሳ፥ ሃዳዴ፥ ቴማ፥
1CH 1:31 ዪጹሬ፥ ናፊሻኔኔ ቄዲማ ጌቴቴቴስ።
1CH 1:32 ኬጹራይ ኣብራሃሜስ ዬሊዳ ኡሱፑን ኣቱማ ናይቲ ዚሚራኔ፥ ዮቂሻኔ፥ ማዳ፥ ሚዲያኔ፥ ዪሺባቄኔ ሹሃ ጌቴቴቴስ። ዮቂሻኔይ ሳባኔ ዳዳኔ ጌቴቲዛ ናምኡ ኣቱማ ናይታ ዬሊዴስ።
1CH 1:33 ሚዲያኔይካ ኤፋ፥ ኤፌሬ፥ ሄኖኬ፥ ኣቢዳኤኔ ኤልዳኤ ጌቴቲዛ ኢቻሹ ኣቱማ ናይታ ዬሊዴስ፤ ሃይቲ ኡባይ ኬጹራ ዜሬꬃታ።
1CH 1:34 ኣብራሃሜይ ሳራፔ ዪሳቃ ዬሊዴስ፤ ዪሳቂ ኤሳዌኔ ኢስራኤሌ ዬሊዴስ።
1CH 1:35 ኤሳዌይ ኤልፋዜ፥ ኤራኡኤሌ፥ ያኡሼ፥ ያኢላሜኔ ቆሬ ዬሊዴስ።
1CH 1:36 ኤልፋዜይ ቴማኔ፥ ኦማሬ፥ ጻፌ፥ ጋኢታሜ፥ ቄናዜ፥ ቴሚናኤኔ ኣማሌቄ ጌቴቲዛ ኣቱማ ናይታ ዬሊዴስ።
1CH 1:37 ኤራኡኤሌይ ናሃቴ፥ ዛራሄ፥ ሻማሃኔ ሚዛሄ ጌቴቲዛ ኣቱማ ናይታ ዬሊዴስ።
1CH 1:38 ኤዶሜን ኮይሮ ዴኢዳ ሴይሬ ኣቱማ ናይቲ ሎጻ፥ ሾባሌ፥ ጺባኦኔ፥ ኣና፥ ዲሾ፥ ኤጼሬኔ ዲሻኔ።
1CH 1:39 ሎጻኔ ኣቱማ ናይቲ ሆሬኔ ሆማሜ፤ ቴሚናኣ ሎጻኔስ ሚቾ።
1CH 1:40 ሾባሌ ኣቱማ ናይቲ ኣሊዋ፥ ማናሃቴ፥ ኤባሌ፥ ሼፌኔ ኦናሜ። ጺባኦኔ ኣቱማ ናይቲ ኣያኔ ኣና።
1CH 1:41 ኣናይ ዲሾኔ ዬሊዴስ፤ ዲሾኔ ኣቱማ ናይቲ ሄምዳ፥ ኤሺባኔ፥ ዪቲራኔኔ ካራኔ።
1CH 1:42 ኤጼሬ ኣቱማ ናይቲ ቢሊሃኔ፥ ዛኢዋኔኔ ያቂኔ። ዲሻኔ ኣቱማ ናይቲ ኡጼኔ ኣራኔ።
1CH 1:43 ኢስራኤሌን ኣይ ካዎይካ ካዎታናፔ ካሴ ኤዶሜ ቢታን ካዎቲዳ ካዎቲ ሃይሳፌ ካሊ ጻፌቲዳይታ። ቢኦሬ ና ቤላይ ካዎቲዴስ፤ ኢዛ ካታማ ሱንꬃይ ዲናቤ።
1CH 1:44 ቤላይ ሃይቂን ኢዛፔ ካሊዲ ቦጺራ ዴሬ ኣስ ዛራሄ ና ዮባቤይ ካዎቲዴስ።
1CH 1:45 ዮባቤይ ሃይቂን ኢዛፔ ካሊዲ ቴማኔ ዴሬ ኣስ ሁሻሜይ ካዎቲዴስ።
1CH 1:46 ሁሻሜይ ሃይቂን ኢዛፔ ካሊዲ ሞኣቤ ዴሬን ሚዲያሜታ ጾኒዳ ባዳዴ ና ሃዳዴይ ካዎቲዴስ፤ ኢዛ ካታማያ ኣዊቴ ጌቴታዉስ።
1CH 1:47 ሃዳዴይ ሃይቂን ኢዛፔ ካሊዲ ማሲሬቄ ዴሬ ኣስ ሻኡሌይ ካዎቲዴስ።
1CH 1:48 ሻኡሌይ ሃይቂን ኢዛፔ ካሊዲ ኤፊራጺሴ ሻፋ ማታን ዲዛ ኤራሆቦቴ ዴሬ ኣስ ሳኦሊ ካዎቲዴስ።
1CH 1:49 ሳኦሊ ሃይቂን ኢዛፔ ካሊዲ ኣኪቦሬ ና ባኣሊ-ሃናኔይ ካዎቲዴስ።
1CH 1:50 ባኣሊ-ሃናኔይ ሃይቂን ኢዛፔ ካሊዲ ፓኡ ዴሬ ኣስ ሃዳዴይ ካዎቲዴስ፤ ኢዛ ማቼያካ ማሄጻቢኤላ ሜዛሃቤ ና ማጺሬዳ ቢዮ፤ ሄሳፌ ጉዬ ሃዳዴይ ሃይቂዴስ።
1CH 1:51 ኤዶሜን ኬሂ ኤሬቲዛ ሃላቃቲ ቴሚናኤ፥ ኣሊዋ፥ ዬቴቴ፥
1CH 1:52 ኦሆሊባሜ፥ ኤላ፥ ፒኖኔ፥
1CH 1:53 ቄናዜ፥ ቴማኔ፥ ሚቢዛሬ፥
1CH 1:54 ማጊዲኤሌኔ ኢራሜ ጌቴቴቴስ።
1CH 2:1 ያቆቤይ 12 ኣቱማ ናይታ ዬሊዴስ፤ ሄይቲካ ኦሮቤሌ፥ ሲሞና፥ ሌዌ፥ ዩሁዳ፥ ዪሳኮሬ፥ ዛቢሎኔ፥
1CH 2:2 ዳኔ፥ ዮሴፌ፥ ቢኒያሜ፥ ኒፍታሌሜ፥ ጋዴኔ ኣሴሬ።
1CH 2:3 ዩሁዳይ ካናኔ ዴሬ ኣስ ሹኣ ቢይፔ ኤራ፥ ኦናኔኔ ሴላ ጌቴቲዛ ሄꬑ ኣቱማ ናይታ ዬሊዴስ፤ ኢዛስ ባይራ ናዚ ኤራይ ጎዳ ሲንꬃን ኢታ ኣስ ጊዲዳ ጊሻስ ጎዳይ ኢዛ ቦሻን ዎꬊዴስ።
1CH 2:4 ዩሁዳይካ ባ ናዛ ማቾ ቲኢማሪፔ ፓሬሴኔ ዛራሄ ጌቴቲዛ ናምኡ ኣቱማ ናይታ ዬሊዴስ፤ ዩሁዳይ ኢቻሽ ኣቱማ ናይታ ዬሊዴስ።
1CH 2:5 ፓሬሴይካ ሄጺሮሜኔ ሃሙሌ ጌቴቲዛ ናምኡ ኣቱማ ናይታ ዬሊዴስ።
1CH 2:6 ዛራሄይ ኢቻሹ ኣቱማ ናይታ ዬሊዴስ፤ ሄይቲካ ዚሚሬ፥ ኤታኔ ሄማኔ፥ ካልኮሌኔ ዳራ።
1CH 2:7 ዛራሄ ዜሬꬃፌ ጊዲዳ ካርሜ ና ኣካኔይ ጾሳስ ዱማቲዳ ዲኦ ሚሻፌ ካይሶቲዲ ቆቲዳ ጊሻስ ኢስራኤሌ ዴራ ቦላ ሜቶ ኤሂዴስ።
1CH 2:8 ኤታኔይካ ኣዛሪያ ጌቴቲዛ ኢሲ ኣቱማ ና ዬሊዴስ።
1CH 2:9 ሄጺሮሜይ ሄꬑ ኣቱማ ናይታ ዬሊዴስ፤ ሄይቲካ ዬራሂምኤሌ፥ ኣራሜኔ ካሉቤ።
1CH 2:10 ኣራሜይ ኣሚናዳቤ ዬሊዴስ፤ ኣሚናዳቤይ ዩሁዳ ናይታስ ሃላቃ ጊዲዳ ኔኣሶኔ ዬሊዴስ።
1CH 2:11 ኔኣሶኔይ ሳላሞ ዬሊዴስ፤ ሳላሞይካ ቦኤዜ ዬሊዴስ።
1CH 2:12 ቦኤዜይ ኢዮቤዴ ዬሊዴስ፤ ኢዮቤዴይካ ኢሴዬ ዬሊዴስ።
1CH 2:13 ኢሴዬ ባይራ ናዚ ኤልያቤ፤ ኤልያቤ ካሎቲ ኣቢናዳቤ፥ ሺምኣ፥
1CH 2:14 ናቲናኤሌ፥ ኤራዴ፥
1CH 2:15 ኦጼሜኔ ዳዊቴ።
1CH 2:16 ኢስታ ሚቼቲ ጹሪያኔ ኣቢጋሎ ጌቴቴቴስ፤ ጹሪያይ ኣቢሳዬ፥ ኢዮኣቤኔ ኣሳሄሌ ጌቴቲዛ ሄꬑ ኣቱማ ናይታ ዬላዱስ።
1CH 2:17 ኣቢጋላ ኢስማኤሌ ዜሬꬃፌ ጊዲዳ ዮቶሬስ ኣማሳ ጌቴቲዛ ኣቱማ ና ዬላዱስ።
1CH 2:18 ሄጺሮሜ ና ካሌቤይ ኣዙቦ ጌቴቲዛሮ ማቾ ኤኪዲ ዪርኣቶ ጌቴቲዛ ማጫ ና ዬሊዴስ፤ ዪርኣታካ ዬሼሬ፥ ሾባቤኔ ኣርዶኔ ጌቴቲዛ ሄꬑ ኣቱማ ናይታ ዬላዱስ።
1CH 2:19 ኣዙባ ሃይቂዳፔ ጉዬ ካሌቤይ ኤፍራቶ ማቾ ኤኪዲ ሁሬ ጌቴቲዛ ኣቱማ ና ዬሊዴስ።
1CH 2:20 ሁሬይካ ኡሬ ጌቴቲዛ ኣቱማ ና ዬሊዴስ፤ ኡሬይ ባስሊኤሌ ዬሊዴስ።
1CH 2:21 ሄጺሮሜይ ኢዛስ 60 ላይꬅ ኩሚሺን ጋላኣዴ ኣዋ ማኪሬ ናዮ ማቾ ኤኪዲ ሳጉቤ ዬሊዴስ።
1CH 2:22 ሳጉቤይካ ያኢሬ ዬሊዴስ፤ ያኢሬይ ጋላኣዴ ዴሬን ዲዛ 23 ካታማታ ኣይሴስ።
1CH 2:23 ጊዶ ኣቲን ጌሹሬይኔ ኣራሜይ ቄናቴኒኔ ኢዚ ሄራን ዲዛ 60 ቄሪ ካታማታኔ ያኢሬ ካታማታ ኦሊ ኦይኪዳ፤ ሄይቲ ኡባይካ ጋላኣዴ ኣዋ ማኪሬ ዜሬꬃታ።
1CH 2:24 ሄጺሮሜይ ካሌቤ ኤፍራታ ጌቴቲዛሶን ሃይቂዳፔ ጉዬ ኢዛ ማቻ ኣቢያይ ቴቁሄ ኣዋ ኣሺሁሬ ኢዛስ ዬላዱስ።
1CH 2:25 ሄጺሮሜስ ባይራ ናዚ ዬራሂምኤሌይ 5 ኣቱማ ናይታ ዬሊዴስ፤ ሄይታፔ ባይራዚ ኤራማ፥ ኢዛ ካሎቲ ቡና፥ ኦሬ፥ ኦጼሜኔ ኣካያ ጌቴቴቴስ።
1CH 2:26 ዬራሂምኤሌስ ኣጻሮ ጌቴቲዛ ሃራ ማቻ ዳዉስ፤ ኢዛ ኦናሜ ኣዮ።
1CH 2:27 ዬራሂምኤሌስ ባይራ ና ኤራማይ ማጼ፥ ያሚኔኔ ኤቄሬ ጌቴቲዛ ኣቱማ ናይታ ዬሊዴስ።
1CH 2:28 ኦናሜይ ሻማዬኔ ያዳ ጌቴቲዛ ኣቱማ ናይታ ዬሊዴስ፤ ሻማዬይ ናዳቤኔ ኣቢሹሬ ጌቴቲዛ ኣቱማ ናይታ ዬሊዴስ።
1CH 2:29 ኣቢሹሬይካ ኣቢሃይሎ ጌቴቲዛሮ ማቾ ኤኪዲ ኣሂባኔኔ ሞሊዴ ዬሊዴስ።
1CH 2:30 ናዳቤይ ሴሌዴኔ ኣፋይሜ ዬሊዴስ፤ ሴሌዴይ ጊዲኮ ና ዬሎንታ ሃይቂዴስ።
1CH 2:31 ኣፋይሜይ ዩሺኤ ዬሊዴስ፤ ዩሺኤይ ሼሻኔ ዬሊዴስ፤ ሼሻኔይ ኣሂላዬ ዬሊዴስ።
1CH 2:32 ሻማዬ ኢሻ ያዳይ ዮቶሬኔ ዮናታኔ ዬሊዴስ፤ ዮቶሬይ ጊዲኮ ና ዬሎንታ ሃይቂዴስ።
1CH 2:33 ዮናታኔይ ፓሌቴኔ ዛዛ ጌቴቲዛ 2 ኣቱማ ናይታ ዬሊዴስ፤ ሄይቲ ዉሪካ ዬራሂምኤሌ ዜሬꬃታ።
1CH 2:34 ሼሻኔስ ማጫ ናይታፔ ኣቲን ሃራ ኣቱማ ናይ ዴና፤ ኢዛስ ኦꬂዛ ጊብጼ ዴሬ ኣስ ያራሃ ጌቴቲዛ ኦሳንቻይ ዴስ።
1CH 2:35 ሼሻኔይ ባ ማጫ ናዮ ያራሃስ ማቾ ጊዳና ማላ ኢሚዴስ፤ ኢዛካ ኢዛስ ኣታዬ ጌቴቲዛ ኣቱማ ና ዬላዱስ።
1CH 2:36 ኣታዬይ ናታኔ ዬሊዴስ፤ ናታኔይ ዛባዴ ዬሊዴስ፤
1CH 2:37 ዛባዴይ ኤፊላሌ ዬሊዴስ፤ ኤፊላሌይ ኢዮቤዴ ዬሊዴስ፤
1CH 2:38 ኢዮቤዴይ ኢዩ ዬሊዴስ፤ ኢዩይ ኣዛሪያሳ ዬሊዴስ፤
1CH 2:39 ኣዛሪያሲ ሄሌጼ ዬሊዴስ፤ ሄሌጼይ ኤልኣሳ ዬሊዴስ፤
1CH 2:40 ኤልኣሳይ ሲስማዬ ዬሊዴስ፤ ሲስማዬይ ሻሎሜ ዬሊዴስ፤
1CH 2:41 ሻሎሜይ ዪቃሚያኔ ኤልሻማ ዬሊዴስ።
1CH 2:42 ዬራሂምኤሌ ኢሻ ካሌቤይ ባይራ ናዛ ሜሻ ዬሊዴስ፤ ሜሻይ ዚፌ ዬሊዴስ፤ ዚፌይ ማሬሻ ዬሊዴስ፤ ማሬሻይካ ኬብሮኔ ዬሊዴስ።
1CH 2:43 ኬብሮኔይካ ቆሬ፥ ታጱሄ፥ ኤሬቄሜኔ ሼማኤ ጌቴቲዛ ኣቱማ ናይታ ዬሊዴስ።
1CH 2:44 ሼማኤይካ ኤራሃሜ ዬሊዴስ፤ ኤራሃሜይ ኤሬቄሜ ዬሊዴስ፤ ኤሬቄሜይ ሻማዬ ዬሊዴስ።
1CH 2:45 ሻማዬይ ማኦኔ ዬሊዴስ፤ ማኦኔይካ ቤቲ-ጹሬ ዬሊዴስ።
1CH 2:46 ካሌቤስ ኤፎ ጌቴቲዛ ላጌꬆ ማቻ ዳዉስ፤ ካሌቤይ ኢዚፔ ካራኔ፥ ሞዛኔ ጋዛዜ ጌቴቲዛ ሃራ 3 ኣቱማ ናይታ ዬሊዴስ፤ ሃራኔይካ ጋዛዜ ጌቴቲዛ ሃራ ኣቱማ ና ዬሊዴስ።
1CH 2:47 ያሂዳይ ኤርጌሜ፥ ኢዮኣታሜ፥ ጌሻኔ፥ ፓሌጼ፥ ኤፋኔ ሻኣፌ ጌቴቲዛ ኣቱማ ናይታ ዬሊዴስ።
1CH 2:48 ካሌቤስ ማኢካ ጌቴቲዛ ላጌꬆ ማቻ ዳዉስ፤ ኢዛካ ሼቤሬኔ ቲሪሃና ጌቴቲዛ ኣቱማ ናይታ ዬላዱስ።
1CH 2:49 ቃሴካ ማኢካ ሻኣፌኔ ሻዋ ዬላዱስ፤ ሻኣፌይ ማዲማና ዬሊዴስ፤ ሻዋይ ማኪባኔኔ ጊቢኣ ዬሊዴስ። ካሌቤስ ኣኪሳ ጌቴቲዛ ማጫ ናይ ዳዉስ።
1CH 2:50 ካሌቤይ ዬሊዳ ሃራ ናይቲ ሃይሳፌ ካሊ ዲዛይታ፤ ካሌቤይ ኤፍራቲፔ ባይራ ናዛ ኡሬ ዬሊዴስ፤ ኡሬይ ቂሪያቴ-ዪኣሪሜ ኣዋ ሾባሌ።
1CH 2:51 ቤቴሊሄሜ ኣዋ ሳላሞኔ ቤቲ-ጋዴራ ኣዋ ሃሬፌ ዬሊዴስ።
1CH 2:52 ቂሪያቴ-ዪኣሪሜ ኣዋ ሾባሌ ዜሬꬃቲ፥ ሄሮሄቴኔ ማናሃቴ ቆሞታፔ ባጋታ።
1CH 2:53 ቃሴካ ቂሪያቴ-ዪኣሪሜ ዛርኬቲ ያቲሬታ፥ ፑቴታ፥ ሹማቴታ፥ ሚሺራታ፥ ጾራኣታኔ ኤሽታኦሌታ።
1CH 2:54 ሳላሞ ናይቲ ቤቴሊሄሜ፥ ናጾፌታ፥ ኣጺሮታ፥ ቤት ኢዮኣቤ፥ ማናሃቴታፔ ባጋታኔ ሃጾሬታ።
1CH 2:55 ያቤጼ ካታማን ዲዛ ጻፊዛይታ ዛሬቲ ቃሴ ቲርኣታ፥ ሺምኣታኔ ሱኮቴ፤ ሃይቲ ኤሬካቤታ ኣዋ ሃማቴፔ ዬሌቲዳ ቄናዌታ።
1CH 3:1 ዳዊቲ ኬብሮኔን ዲሼ ዬሊዳ ኣቱማ ናይታ ሱንꬂ ሃይሳፌ ካሊ ዲዛይታ፤ ባይራ ና ኣሚኖኔ ኢዝራኤሌ ዴሬ ማጫስ ኣሂናሆምፔ ዬሊዴስ፤ ኢዛ ካሎ ዳኔላ ቃርሜሎሴ ዴሬ ማጫስ ኣቢጋሊፔ ዬሊዴስ።
1CH 3:2 ሄꬓንꬆዛ ኣቤሴሎሜ ጌሹሬ ካዎ ታሊማዬ ና ማኢኪፔ ዬሊዴስ። ኦይዳንꬆዛ ኣዶኒያሳ ሃጊቲፔ ዬሊዴስ።
1CH 3:3 ኢቻሻንꬆዛ ሻፋጺያ ኣቢጻሊፔ ዬሊዴስ ኡሱፑንꬆዛ ዪቲራሜ ኤግሊፔ ዬሊዴስ።
1CH 3:4 ሃይቲ ኡሱፑናቲ ዳዊቲ ኬብሮኔን ላፑን ላይꬂኔ ባጋ ዴራ ኣይሲዛ ዎዴ ዬሌቲዳ፤ ዳዊቲ ዬሩሳላሜን 33 ላይꬅ ካዎቲዴስ።
1CH 3:5 ኢዚ ሄን ዲሼ ዬሊዳ ኣቱማ ናይቲ ሃይሳፌ ካሊ ዲዛይታ፤ ኣምኤሌ ና ቤርሳቤሃ ሺምኣ፥ ሾባቤ፥ ናታኔኔ ሶሎሞኔ ጌቴቲዛ ኦይዱ ኣቱማ ናይታ ኢዛስ ዬላዱስ።
1CH 3:6 ቃሴ ሃራ ኡዱፉን ኣቱማ ናይቲ ኢዛስ ዴቴስ፤ ሄይቲካ ኢያቤሄሬ፥ ኤልሱኤ፥ ኤልፋሌጼ
1CH 3:7 ኖጋሄ፥ ኔፌጌ፥ ናፊያ፥
1CH 3:8 ኤልሻማ፥ ኤልኣዳኔ ኤልፋሌጼ ጌቴቲዛይታ።
1CH 3:9 ሄይታፔካ ሃራ ዳዊቲ ጋራዴታፔ ዬሊዳ ኣቱማ ናይቲ ዴቴስ፤ ኢስታስካ ቲኢማሮ ጌቴቲዛ ሚቻ ዳዉስ።
1CH 3:10 ካዎ ሶሎኖኔይ ኤሮቢኣሜ ዬሊዴስ፤ ኤሮቢኣሜይ ኣቢያ ዬሊዴስ፤ ኣቢያይ ኣሳ ዬሊዴስ፤ ኣሳይ ኢዮሳፊጼ ዬሊዴስ፤
1CH 3:11 ኢዮሳፊጼይ ኢዮራሜ ዬሊዴስ፤ ኢዮራሜይ ኣካዚያሳ ዬሊዴስ፤ ኣካዚያሲ ኢዮኣሳ ዬሊዴስ፤
1CH 3:12 ኢዮኣሲ ኣማሲያሴ ዬሊዴስ፤ ኣማሲያሲ ኣዛሪያሴ ዬሊዴስ፤ ኣዛሪያሲ ኢዮኣታሜ ዬሊዴስ፤
1CH 3:13 ኢዮኣታሜይ ኣካዜ ዬሊዴስ፤ ኣካዜይ ሂዝቂያሳ ዬሊዴስ፤ ሂዝቂያሲ ሚናሴ ዬሊዴስ፤
1CH 3:14 ሚናሴይ ኣሞኔ ዬሊዴስ፤ ኣሞኔይ ኢዮሲያሳ ዬሊዴስ፥
1CH 3:15 ኢዮሲያሲ ኦይዱ ኣቱማ ናይታ ዬሊዴስ፤ ባይራዚ ዮሃናኔ፥ ኢዛ ካሎቲ ኢዮኣቄሜ፥ ሴዴቂያሳኔ ሻሎሜ፤
1CH 3:16 ኢዮኣቄሜይ ኢኮኒያኔኔ ሴዴቂያሳ ዬሊዴስ።
1CH 3:17 ባቢሎኔ ዲኤቲ ቢዳ ኢኮኒያኔ ናይቲ ሳላቲያሌ፥
1CH 3:18 ማሊክራሜ፥ ፓዳያ፥ ሼናጻሬ፥ ዪቃሚያ፥ ሆሻሜኔ ናዳቢያ ጌቴቲዛይታ።
1CH 3:19 ፓዳያይ ዜሩባቤሌኔ ሺምኤ ዬሊዴስ፤ ዜሩባቤሌይካ ማሹላሜ፥ ሃናኒያኔ ኢስታ ሚቾ ሻሎሚቶ ዬሊዴስ።
1CH 3:20 ቃሴካ ሃራ ኢቻሽ ኣቱማ ናይቲ ኢዛስ ዴቴስ፤ ሄይቲካ ሃሹቤ፥ ኦሄሌ፥ ባራካዬ፥ ሃሳዲያኔ ዮሻቢ-ሄሲዴ።
1CH 3:21 ሃናኒያይ ፓላጺያኔ ዬሻኢያ ጌቴቲዛ ናምኡ ኣቱማ ናይታ ዬሊዴስ፤ ዬሻኢያይካ ኤራፋያ ዬሊዴስ፤ ኤራፋያይ ኦርናኔ ዬሊዴስ፤ ኦርናኔይ ኣብዲዩ ዬሊዴስ፤ ኣብዲዩይ ሻካኒያ ዬሊዴስ።
1CH 3:22 ሻካኒያይካ ሻማኤ ዬሊዴስ፤ ሻማኤይ ሃጹሼ፥ ዪጊኣሌ፥ ባርያሄ፥ ናራያኔ ሳፋጼ ጌቴቲዛይታ 5 ኣቱማ ናይታ ዬሊዴስ፤ ሻካኒያ ዜሬꬃቲ ኩሜꬂ ኡሱፑና።
1CH 3:23 ናራያይ ኤልዮኤናዬ፥ ሂዝቂያሳኔ ኣዚርቃሜ ጌቴቲዛ 3 ኣቱማ ናይታ ዬሊዴስ።
1CH 3:24 ኤልዮኤናዬይ ሆዳዬ፥ ኤልያሼቤ፥ ፔላያ፥ ኣቁቤ፥ ዮሃናኔ፥ ዳላያኔ ኣናኔ ጌቴቲዛ 7 ኣቱማ ናይታ ዬሊዴስ።
1CH 4:1 ዩሁዳ ዜሬꬃቲ ፓሬሴ፥ ሄጺሮሜ፥ ካርሜ፥ ሁሬኔ ሾባሌ።
1CH 4:2 ሾባሌይ ኤራኣዬ ዬሊዴስ፤ ኤራኣዬይካ ያሃቴ ዬሊዴስ፤ ያሃቴይካ ጾራኣታስ ኮይሮ ኣዋ ጊዲዳይታ ኣሁማዬኔ ላሃዴ ዬሊዴስ።
1CH 4:3 ሁሬይ ባ ኣዮ ኤፍራታስ ባይራ ና፤ ሁሬይ ቤቴሊሄሜ ዬሊዴስ፤ ኤጻሜ ኣቱማ ናይቲ ኢዝራኤሌ፥ ዩሺማኔ ዪዲባሼ፤ ኢስታስ ሚቻ ሃጺሌሊፖኖ ጌቴታዉስ፤ ፓኑኤሌይ ጋዶሬ ዬሊዴስ። ኤዜሬይ ሁሼ ዬሊዴስ፤ ሃይቲ ሁሬ ዛሬታ።
1CH 4:5 ቴቁሄ ኣዋ ኣሺሁሬስ ሄሎኔ ናኢሮ ጌቴቲዛ ናምኡ ማቼቲ ዴቴስ።
1CH 4:6 ኣሺሁሬይ ናኢሮ ጌቴቲዛ ባ ማቼይፌ ኣሁዛሜ፥ ሄፌሬ፥ ቴሜናኔ ኣሃሺታሬ ጌቴቲዛ ኣቱማ ናይታ ዬሊዴስ።
1CH 4:7 ቃሴካ ሄሊፔ ጼሬቴ፥ ጾሃሬ፥ ኤቲናኔ ቆጼ ዬሊዴስ።
1CH 4:8 ሃቆጼይ ኣኑቤ፥ ጾባቤኔ ሃሩሜ ና ኣሃርሄሌ ዜሬꬃታስ ኣዋ።
1CH 4:9 ያቤጼይ ባ ኢሻታ ጊዶን ኬሂ ቦንቼቲዳ ኣስ ጊዲዴስ፤ ኢዛ ኣያ፥ «ታኒ ኢታ ሚጻን ዬሊዳይሳ» ጋሼ ኢዛ፥ «ያቤጼ» ጋ ሱንꬃዱስ።
1CH 4:10 ያቤጼይካ፥ «ኣቤት ጎዳዉ! ኔ ታና ኣንጃ፤ ኔ ታ ዴራ ኣሳ፤ ኔ ኩሼይ ታናራ ዴኦ፤ ታና ሜቶፔኔ ቆሆፔ ኣሻ» ጊዲ ኢስራኤሌ ጾሳ ዎሲዴስ፤ ጾሲካ ኢዚ ዎሲዳይሳ ኢዛስ ኢሚዴስ።
1CH 4:11 ሹሃሃ ኢሻ ካሉቤይ ማሂሬ ዬሊዴስ፤ ማሂሬይ ኤሽቶኔ ዬሊዴስ።
1CH 4:12 ኤሽቶኔይ ቤቲ-ራፋ፥ ፋሳሄኔ ኢር-ናሃሼ ኣዋ ታሂና ጌቴቲዛ ኣቱማ ናይታ ዬሊዴስ፤ ታሂናይ ናኣሼ ጌቴቲዛ ካታማ ኤሲዴስ፤ ሄይታ ዜሬꬃቲ ካሴ ኣራካ ጌቴቲዛ ዴሬን ዴቴስ።
1CH 4:13 ቃናዜይ ኦቲንኤሌኔ ሳራያ ጌቴቲዛ ናምኡ ኣቱማ ናይታ ዬሊዴስ፤ ኦቲንኤሌይካ ሃታቴኔ ማኦኖታዬ ጌቴቲዛ ናምኡ ኣቱማ ናይታ ዬሊዴስ።
1CH 4:14 ማኦኖታዬይ ኦፊራ ዬሊዴስ። ሳራያይካ ኩሼ ሂላንቻቲ ዲዛ ጌሃሪሺሞ ጌቴቲዛ ካታማዮ ኤሲዳ ኢዮኣቤ ዬሊዴስ።
1CH 4:15 ዮፊኔ ና ካሌቤይ ኢሮ፥ ኤላኔ ናኤማ ጌቴቲዛ ኣቱማ ናይታ ዬሊዴስ፤ ኤላይ ቄናዜ ዬሊዴስ።
1CH 4:16 ዩሃሌልኤሌይ ዚፌ፥ ዚፋ፥ ቲሪያኔ ኣሳርኤሌ ጌቴቲዛ ኣቱማ ናይታ ዬሊዴስ።
1CH 4:17 ኤዚራይ ዮቶሬ፥ ሜሬዴ፥ ኤፌሬኔ ያሎኔ ዬሊዴስ፤ ሜሬዴይ ጊብጼ ካዎ ናዮ ቢትዮ ማቾ ኤኪዲ ማራሞ ጌቴቲዛ ማጫ ናዮ፥ ሻማዬኔ ኤሽታሞኣ ኣዋ ዪሺባ ዬሊዴስ።
1CH 4:18 ሜሬዴይ ጋዶሬ ኣዋ ያሬዴ፥ ሶኮ ኣዋ ሄቤሬ፥ ዛኖሄ ኣዋ ዪቁቲኤሌ ኣይሁዳ ዴሬ ማጫሳይፌ ዬሊዴስ፤ ሄይቲካ ጊብጼ ካዎ ናዮ ቢትያ ሜሬዴስ ዬሊዳ ዛሬታ።
1CH 4:19 ሆዲያይ ናሃሞ ሚቾ ኤኪዴስ፤ ኢዛ ጋሪሚቴ ዴሬ ኣስ ቂኢላ ኣዋኔ ማኢካቴ ዴሬ ኣስ ኤሽታሞኣ ኣዋ ዬላዱስ።
1CH 4:20 ሺሞኒ ኣሚኖኔ፥ ኤራኔ፥ ቤኒ-ሃናኔኔ ቲሎኔ ዬሊዴስ፤ ዪሺኤይ ዞሄቴኔ ቤኒ-ዞሄቴ ዬሊዴስ።
1CH 4:21 ዩሁዳ ና ሴላ ዛሬቲ ሌካ ኣዋ ኤራ፥ ማሬሻ ኣዋ ላዳኔ ቤቲ-ኣሺቤኣ ካታማን ዴኢዛ ላይኖ ዳዲዛይታ ቆሞታስ ኣዋ።
1CH 4:22 ሃራቲ ቃሴ ዮቂሜ፥ ኢዮኣሳ፥ ያሹቢሊሄሜ፥ ሞኣቤ ቢታ ሃሪዳ ሳራፋኔ ኮዜቤ ካታማ ኣሳታ፤ (ሃ ዬሌታታ ታሪኬ ማዝጋባይ ቤኒሶፌ ዴስ።)
1CH 4:23 ኢስቲ ካዎ ኬꬃ ኦሶስ ኡርቃ ሜꬊዛይታ ጊዲዲ ካሴ ናጻሜኔ ጋዴሬ ጌቴቲዛ ካታማታን ዴኢዳ።
1CH 4:24 ሲሞኒ ናሙኤሌ፥ ያሚኔ፥ ያሪቤ፥ ዛራሄኔ ሻኡሌ ዬሊዴስ።
1CH 4:25 ሻኡሌይካ ሻሎሜ ዬሊዴስ፤ ሻሎሜይ ሚቢሳሜ ዬሊዴስ፤ ሚቢሳሜይ ሚሺማኤ ዬሊዴስ።
1CH 4:26 ሚሺማኤይ ሃሙኤሌ ዬሊዴስ፤ ሃሙኤሌይ ዛኩሬ ዬሊዴስ፤ ዛኩሬይ ሺምኤ ዬሊዴስ፤
1CH 4:27 ሺምኤይ ታማኔ ኡሱፑን ኣቱማ ናይታኔ ኡሱፑን ማጫ ናይታ ዬሊዴስ፤ ኢዛ ኢሻቲ ጊዲኮ ዳሮ ናይታ ዬሊቤቴና፤ ሄሳ ጊሻስ ሲሞና ዛርኬቲ ዩሁዳ ዛርኬታ ማላ ዳሪቤቴና።
1CH 4:28 ሲሞና ዛሬቲ ቤርሳቤሄ ካታማኒኔ ሞላዴ፥ ሃጻሬ-ሹኣሌ፥
1CH 4:29 ቢሊሃ፥ ኤጼሜ፥ ቶላዴ፥
1CH 4:30 ባቱኤሌ፥ ሆርማ፥ ጺጊላጌ፥
1CH 4:31 ቤቲ-ማርካቦቴ፥ ሃጻሬ-ሱሲሜ፥ ቤቲ-ባሬኔ ሻኢራይሜ ካታማታን ዴኢዳ፤ ዳዊቲ ካዎታና ጋካናስ ሄይቲ ኢስታ ካታማታ ጊዲዳ።
1CH 4:32 ቃሴ ኢስታ ሞꬃቲ ኤጻሜ፥ ኣዪኔ፥ ኣርሞኔ፥ ቶኬኔኔ ኣሻኔ፤ ኢስቲ ሙሌራ ኢቻሽ ካታማታ።
1CH 4:33 ባኣላ ጋካናስ ሃ ካታማታ ዩሾን ዲዛ ሞꬃቲ ኡባይ ኢስታ ቦላ ጉጄቴቴስ፤ ሄይቲ ኢስቲ ዴኢዳሶሆታኔ ኢስታ ዬሌታታ ማራን ማዝጋባን ጻፊ ኦይኪዳ።
1CH 4:34 ሲሞና ዛሬታ ሃላቃቲ ሃይሳፌ ካሊ ጻፌቲዳይታ፤ ኢስቲካ ማሾባቤ፥ ያምላኬ፥ ኣማሲያሴ ና ዮሻ፥
1CH 4:35 ኢዩኤሌ፥ ዮሺቢያ ና ኢዩ፥ (ሳራያ ና ዮሺቢያ፥ ኣሳኤሌ ና ሳራያ፥)
1CH 4:36 ኤልዮኤናዬ፥ ያኮቤ፥ ሾሃያ፥ ኣሳያ፥ ኣዲኤሌ፥ ያሺምኤሌ፥ ባናያኔ ዚዛ።
1CH 4:37 ዚዛይ ሺፍኣ ና፥ ሺፍኣይ ኣሎኔ ና፥ ኣሎኔይ ዬዳያ ና፥ ዬዳያይ ሺሚሬ ና፥ ሺሚሬይ ሻማኤ ና።
1CH 4:38 ሃይሳፌ ቦላን ጻፌቲዳ ኣሳቲ ባንታ ዛርኬታስ ዛርኬታስ ኮራፒኔታ፤ ኢስታሶ ኣሳታ ዜሬꬂ ኬሂፔ ጮራቲ ጮራቲ ቢዴስ።
1CH 4:39 ኢስቲ ባንታ ሜሄታስ ሄንꬃሶሆ ኮያናስ ጋዶሬ ጌሊዛሶ ማታን ዲዛ ሾባፌ ኣርሼይ ሞኪዛ ባጋራ ዲዛሶታ ጋካናስ ቢዳ።
1CH 4:40 ኢስቲ ሄን ኬሂፔ ኣራዳኔ ሎኦ ሄንꬃሶሆ ዴሚዳ፤ ሄ ቢታያ ዎፓይኔ ሳሮይ ኩሚዳ ኣሆ ቢታ፤ ካሴ ሄን ካሜ ዜሬꬃቲ ዴቴስ።
1CH 4:41 ሃይሳፌ ቦላራ ኢስታ ሱንꬃይ ጻፌቲዳ ሲሞና ዛሬቲ ዩሁዳ ካዎ ሂዝቂያሳ ዎዴ ጋዶሬ ቢታ ቢዲ ሄን ዲዛ ካሜ ዜሬꬃታኔ ማኡኔ ኣሳታ ኦሊዲ ꬋይሲዳይታ፤ ሂስቲዲ ሄ ቢታን ኢስታ ሜሄታስ ሄሚዛሶሆይ ዲዛ ጊሻስ ሲሞና ዛሬቲ ሃች ጋካናስ ሄን ኡቲዳ።
1CH 4:42 ሲሞና ዛሬታፔ 500 ኣሳቲ ሴይሬ ዙማኮ ቢዳ፤ ኢስታ ሃላቃቲ ፓላጺያ፥ ናራያ፥ ኤራፋያኔ ኡዚኤሌ፤ ሄይታንቲ ዪሺኤ ናይታ።
1CH 4:43 ካሴ ባቃቲ ኣቲዳ ኣማሌቄ ኣሳታ ሲሞና ዛሬቲ ꬋይሲዳ፤ ኢስቲ ሃች ጋካናስ ሄ ቢታን ዴቴስ።
1CH 5:1 ያቆቤስ ኮይሮ ባይራ ና ኦሮቤሌ ዜሬꬃቲ ሃይሳፌ ካሊ ዲዛይታ፤ ኦሮቤሌይ ባ ኣዋ ሂጻ ቱኒሲዳ ጊሻስ ኢዛ ባይራቴꬃ ማታይ ዮሴፌ ዜሬꬃታስ ኢሜቲዴስ፤ ሄሳፌ ዴንዶይሳን ኢዛ ዜሬꬃቲ ባይራቴꬃ ማራን ጻፌቲቤቴና።
1CH 5:2 ባይራቴꬃ ማታይ ዮሴፌ ዜሬꬃታስ ኢሜቲኮካ ዩሁዳይ ባ ኢሻታ ጊዶን ሚኖ ጊዲዳ ጊሻስ ዴሬ ኣይሲዛዴይ ኢዛ ዜሬꬃፌ ኬዚዴስ።
1CH 5:3 ያቆቤስ ባይራ ና ኦሮቤሌ ኣቱማ ናይቲ ሄኖኬ፥ ፓሉ፥ ሄጺሮሜኔ ካርሜ ጌቴቲዛይታ።
1CH 5:4 ኢዩኤሌ ናይ ሻማኤ፥ ሻማኤ ናይ ጎጌ፥ ጎጌ ናይ ሺምኤ፥
1CH 5:5 ሺምኤ ናይ ሚኪያሳ፥ ሚኪያሳ ናይ ኤራኣዬ፥ ኤራኣዬ ናይ ባኣሌ፥
1CH 5:6 ባኣሌ ናይ ቤኤራ። ኦሮቤሌ ቆሞስ ኮራፒኔ ጊዲዳ ቤኤራ ኣሶሬ ካዎ ቴሊጌሊቴሊፌሊሶሬይ ዲኢ ኤኪ ቢዴስ።
1CH 5:7 ባኤራ ዛሬቲ ባንታ ዬሌታ ማዝጋባን ጻፌቲዳ ኦሮቤሌ ዜሬꬃታ ሃላቃቲ ዪኢኤሌ፥ ዛካራሳኔ ቤላ።
1CH 5:8 ቤላይ ኣዛዛ ና፤ ኣዛዚ ሼማኤ ና፤ ሼማኤይ ኢዩኤሌ ና፤ ኢዩኤሌ ዛሬቲ ኣሮኤሬፔ ቢዲ ኔቦኔ ባኣሊ-ሜኦኔ ጋካናስ ዱንካኒ ኡቲዳ።
1CH 5:9 ኦሮቤሌ ዛሬታ ሜሄይ ጋላኣዴን ጮራቲዳ ጊሻስ ኢስቲ ሄፔ ኣርሼይ ሞኪዛ ባጋን ዲዛ ኤፊራጺሴ ሻፋፔ ቢዲ ባዛስ ጋጻ ጋካናስ ዱንካኒ ኡቲዳ።
1CH 5:10 ሳኦሌ ካዎቴꬃ ላይꬃን ኣጋሪ ዛሬቲ ኦሮቤሌ ዛሬታራ ኦሌቲን ኦሮቤሌ ዛሬቲ ጾኒዳ፤ ሂስቲዲ ጋላኣዴፔ ኣርሼይ ሞኪዛ ባጋራ ዲዛ ኣጋሪ ዛሬታ ቢታን ዱንካኒ ኡቲዳ።
1CH 5:11 ጋዴ ዛሬቲ ኦሮቤሌ ዛሬታፔ ፑዴሃ ባጋራ ቢዲ ሳላካ ጋካናስ ዲዛ ባሳኔ ቢታን ዱንካኒ ኡቲዳ።
1CH 5:12 ኮይሮ ዜሬꬃታ ሃላቃይ ኢዩኤሌ፤ ናምኣንꬆ ዜሬꬃታ ሃላቃይ ሻፋሜ፤ ቃሴካ ባሳኔን ዱንካኒ ኡቲዳይታ ሃላቃይ ያኢናዬኔ ሳፋጼ።
1CH 5:13 ሃንኮ ኣቲዳ ላፑን ዛርኬታ ሃላቃቲ፥ ሚካኤሌ፥ ማሹላሜ፥ ሼባኤ፥ ዮራዬ፥ ዪካኔ፥ ዚኣኔ ኤቦሬ።
1CH 5:14 ሃይቲ ኣቢኤሌ ናይቲ ቡዜ ዛሬታ፤ ቡዜይ ያሂዳ ዬሊዴስ፤ ያሂዳይ ዬሺሻዬ ዬሊዴስ፤ ዬሺሻዬይ ሚካኤሌ ዬሊዴስ፤ ሚካኤሌይ ጋላኣዴ ዬሊዴስ፤ ጋላኣዴይ ያሮሃ ዬሊዴስ፤ ያሮሃይ ሁሬ ዬሊዴስ፤ ሁሬይ ኣቢሃይሌ ዬሊዴስ።
1CH 5:15 ኢስታ ዛርኬታ ሃላቃይ ጉኔ ናዛ ኣቢኤሌ ና ኣሂ።
1CH 5:16 ሃይቲ ዉሪካ ባሳኔኒኔ ጋላኣዴን ሄ ዴሬ ካታማታኒኔ ላሻሮኔ ቢታ ሜሄ ሄሚዛሶሆ ኡባን ዱንካኒ ኡቲዳ።
1CH 5:17 ሃይታ ኡባታ ዜሬꬃቲ ዩሁዳ ካዎ ኢዮኣታሜ ዎዴኒኔ ኢስራኤሌ ካዎ ኢዮርባኣሜ ዎዴ ዛሬታ ማዝጋባን ጻፌቲዳ።
1CH 5:18 ኦሮቤሌሲ፥ ጋዴ ቆሞታሲኔ ሚናሴ ቆሞፌ ባጋታስ 44,760 ሚኖ ኦላንቻቲ ዴቴስ፤ ኢስቲካ ጎንዳሌ ኦይꬅ፥ ማሻ ኦይꬂኔ ዎንዳፌን ኦሌቴꬅ ኤሪዛ ሚኖ ኦላንቻታ።
1CH 5:19 ሄይቲካ ኣጋሬታራ፥ ዪጹሬታራ፥ ናፊሻኔራኔ ናዳቤ ዴሬ ኣሳራ ኦሌታናስ ዎራጂዳ።
1CH 5:20 ባ ኣማኖ ጾሳ ቦላ ዬጊዲ ኢዚ ኢስታ ማዳና ማላ ጾሳ ዎሲዳ። ጾሲካ ኢስታ ዎሳ ሲዪዲ ኣጋሬታኔ ኢስታራ ዲዛ ሃራታ ኢስታ ኩሼን ኣꬂ ኢሚዴስ።
1CH 5:21 ኢስቲ ባንታ ሞርኬታ ኩሼፔ 50,000 ጋሜላ፥ 250,000 ዶርሲኔ 2,000 ሃሬታ ዲኢዳ፤ ሄሳꬆካ 100,000 ኣስ ዲኢ ኤኪዳ።
1CH 5:22 ኦላዚ ጾሳፌ ጊዲዳ ጊሻስ ዳሮቲ ሃይቂዳ፤ ጾኒዳይቲ ጉዬፔ ዲኤቴꬃ ላይꬂ ዉራና ጋካናስ ሄ ኣሳታ ሶን ኡቲዳ።
1CH 5:23 ሚናሴ ቆሞታፔ ባጋ ዛሬቲ ባሳኔፔ ዶሚዲ ባኣሊ-ሄርሞኔ፥ ሳኒሬኔ ሄርሞኔ ዙማ ጋካናስ ዲዛ ዴሬን ዱንካኒ ኡቲዳ፤ ኢስቲ ሄን ጮራቲ ጮራቲ ቢዳ።
1CH 5:24 ኢስታ ዛርኬታ ሃላቃቲ ኤፌሬ፥ ዪሺኤ፥ ኤልኤሌ፥ ኣዛሪኤሌ፥ ኤርማሳ፥ ሆዳዬኔ ያሂዳኤሌ፤ ሄይቲ ዉሪካ ባ ዛርኬን ዛርኬን ኤሬቲዳ ኣሳታ፥ ሃላቃታኔ ኦላ ቃራታ።
1CH 5:25 ጊዶ ኣቲን ኢስቲ ባንታ ኣዋታ ጾሳስ ኣማኔቲቤቴና፤ ጾሲ ኢስታ ሲንꬃፌ ꬋይሲዳ ሄ ቢታ ኣሳቲ ጎይኒዛ ኤቃ ጾሳታስ ጎይኖን ላይማቲዳ።
1CH 5:26 ሄሳ ጊሻስ ኢስራኤሌ ጾሳይ ኣሶሬ ካዎ ፑሌ ዎይኮ ቴሊጌሊቴሊፌሊሶሬ ዴንꬄꬂዲ ኦሮቤሌ ቆሞታ፥ ጋዴ ቆሞታኔ ሚናሴ ቆሞታፔ ባጋ ዲኢ ኤፋና ማላ ኦꬂዴስ፤ ኢዚ ሄይታንታ ኣላሄ፥ ሃቦሬ፥ ሃራኔ ጎዛኔ ሻፋ ሄራን ዴኣና ማላ ኦꬂዴስ፤ ኢስቲ ሃች ጋካናስ ሄን ዴቴስ።
1CH 6:1 ሌዌ ናይቲ ጌርሾኔ፥ ቃኣቴኔ ሜራሬ።
1CH 6:2 ቃኣቴ ናይቲ ኣሚራሜ፥ ዪጺሃሬ፥ ኬብሮኔኔ ኡዚኤሌ።
1CH 6:3 ኣሚራሜ ናይቲ ኣሮኔ፥ ሙሴኔ ማራሞ። ኣሮኔ ኣቱማ ናይቲ ናዳቤ፥ ኣቢሁ፥ ኤልኤዜሬኔ ኢታማሬ።
1CH 6:4 ኤልኤዜሬይ ፊኒሃሴ ዬሊዴስ፤ ፊኒሃሲ ኣቢሹኣ ዬሊዴስ፤
1CH 6:5 ኣቢሹኣይ ቡቃ ዬሊዴስ፤ ቡቃይ ኡዜ ዬሊዴስ፤
1CH 6:6 ኡዜይ ዛራሂያ ዬሊዴስ፤ ዛራሂያይ ማራዮቴ ዬሊዴስ፤
1CH 6:7 ማራዮቴይ ኣማሪያ ዬሊዴስ፤ ኣማሪያይ ኣሂጹቤ ዬሊዴስ፤
1CH 6:8 ኣሂጹቤይ ሳዶቄ ዬሊዴስ፤ ሳዶቄይ ኣኪማሴ ዬሊዴስ፤
1CH 6:9 ኣኪማሲ ኣዛሪያሴ ዬሊዴስ፤ ኣዛሪያሲ ዮሃናኔ ዬሊዴስ፤
1CH 6:10 ዮሃናኔይ ኣዛሪያሴ ዬሊዴስ፤ ኣዛሪያሲ ካዎ ሶሎሞኔይ ዬሩሳላሜን ኬጺሲዳ ጾሳ ኬꬃን ቄሴቴꬃን ኦꬂዴስ።
1CH 6:11 ኣዛሪያሲ ኣማሪያ ዬሊዴስ፤ ኣማሪያይ ኣሂጹቤ ዬሊዴስ፤
1CH 6:12 ኣሂጹቤይ ሳዶቄ ዬሊዴስ፤ ሳዶቄይ ሻሎሜ ዬሊዴስ፤
1CH 6:13 ሻሎሜይ ኪልቂያሳ ዬሊዴስ፤ ኪልቂያሲ ኣዛሪያሴ ዬሊዴስ፤
1CH 6:14 ኣዛሪያሲ ሳራያ ዬሊዴስ፤ ሳራያይ ኢዮሳዶቄ ዬሊዴስ።
1CH 6:15 ጎዳይ ዩሁዳ ኣሳኔ ዬሩሳላሜ ኣሳ ናቡካዳናጾሬን ዲኢሲዳ ዎዴ ኢዮሳዶቄይካ ኢስታራ ዲኤቲ ቢዴስ።
1CH 6:16 ሌዌ ኣቱማ ናይቲ ጌርሾኔ፥ ቃኣቴኔ ሜራሬ።
1CH 6:17 ጌርሾኔ ናይቲ ሊቢናኔ ሺምኤ፤
1CH 6:18 ቃኣቴ ናይቲ ኣሚራሜ፥ ዪጺሃሬ፥ ኬብሮኔኔ ኡዚኤሌ፤
1CH 6:19 ሜራሬ ናይቲ ማሂሌኔ ሙሼ፤ ባንታ ኣዋ ኬꬃን ኬꬃን ጻፌቲዳ ሌዌ ዛርኬቲ ሃይሳፌ ካሊ ዲዛይታ፤
1CH 6:20 ጌርሾኔ ዜሬꬃታ፤ ጌርሾኔይ ሊቢና ዬሊዴስ፤ ሊቢናይ ያሃቴ ዬሊዴስ፤ ያሃቴይ ዚማ ዬሊዴስ፤
1CH 6:21 ዚማይ ዮኣሃ ዬሊዴስ፤ ዮኣሂ ኢዶ ዬሊዴስ፤ ኢዶይ ዛራሄ ዬሊዴስ፤ ዛራሄይ ዬኣቲሬ ዬሊዴስ፤
1CH 6:22 ቃኣቴ ዜሬꬃታ፤ ቃኣቴይ ኣሚናዳቤ ዬሊዴስ፤ ኣሚናዳቤይ ቆሬ ዬሊዴስ፤ ቆሬይ ኣሲሬ ዬሊዴስ፤
1CH 6:23 ኣሲሬይ ሂልቃና ዬሊዴስ፤ ሂልቃናይ ኣቢያሳፌ ዬሊዴስ፤ ኣቢያሳፌይ ኣሲሬ ዬሊዴስ፤
1CH 6:24 ኣሲሬይ ታሃቴ ዬሊዴስ፤ ታሃቴይ ኡርኤሌ ዬሊዴስ፤ ኡርኤሌይ ኦዚያ ዬሊዴስ፤ ኦዚያይ ሳኦሌ ዬሊዴስ።
1CH 6:25 ሂልቃና ዜሬꬃታ፤ ሂልቃናይ ኣማሳዬኔ ኣሂሞቴ ዬሊዴስ፤
1CH 6:26 ኣሂሞቴይ ሂልቃና ዬሊዴስ፤ ሂልቃናይ ጾፋዬ ዬሊዴስ፤ ጾፋዬይ ናሃቴ ዬሊዴስ፤
1CH 6:27 ናሃቴይ ኤልያቤ ዬሊዴስ፤ ኤልያቤይ ዪሮሃሜ ዬሊዴስ፤ ዪሮሃሜይ ሂልቃና ዬሊዴስ።
1CH 6:28 ሳሜሊ ናምኡ ኣቱማ ናይታ ዬሊዴስ፤ ባይራዚ ኢዩኤሌ፤ ኢዛ ካሎዚ ኣቢያ።
1CH 6:29 ሜራሬ ዜሬꬃታ፤ ሜራሬይ ማሂሌ ዬሊዴስ፤ ማሂሌይ ሊቢና ዬሊዴስ፤ ሊቢናይ ሺምኤ ዬሊዴስ፤ ሺምኤይ ኡዛሄ ዬሊዴስ፤
1CH 6:30 ኡዛሄይ ሺምኣ ዬሊዴስ፤ ሺምኣይ ሃጊያ ዬሊዴስ፤ ሃጊያይ ኣሳያ ዬሊዴስ።
1CH 6:31 ዳዊቲ ጫቆ ቃላ ታቦታ ዬሩሳላሜ ኤሂዳፔ ጉዬ ጎዳ ጾሳ ኬꬃን ዬꬃ ዬጺዛይታስ ሃላቃታ ሹሚዴስ።
1CH 6:32 ካዎ ሶሎሞኔይ ዬሩሳላሜን ጎዳ ጾሳ ኬꬃ ኬጻናሼ ጋካናዉ ጋይቶቴꬃ ዱንካኔ ፔንጌን ዬꬃ ዬጺሼ ጋምኢዳ፤ ባስ ኢሜቲዳ ኦሶ ማራን ማራን ኦꬂ ፖሊሼ ዴኢዳ።
1CH 6:33 ባንታ ናይታራ ኢሲፌ ዬጺዛይቲ ሃይሳፌ ካሊ ጻፌቲዳይታ፤ ቃኣቴ ዛርኬታፔ ዬጺዛይ ሄማኔ፤ ሄማኔይ ኢዩኤሌ ና፤ ኢዩኤሌይ ሳሜላ ና፤
1CH 6:34 ሳሜሊ ሂልቃና ና፤ ሂልቃናይ ዪሮሃሜ ና፤ ዪሮሃሜይ ኤልኤሌ ና፤ ኤልኤሌይ ቶሃ ና፤
1CH 6:35 ቶሂ ዙፌ ና፤ ዙፌይ ሂልቃና ና፤ ሂልቃናይ ማሃቴ ና፤ ማሃቲ ኣማሳዬ ና፤
1CH 6:36 ኣማሳዬይ ሂልቃና ና፤ ሂልቃናይ ኢዩኤሌ ና፤ ኢዩኤሌይ ኣዛሪያሴ ና፤ ኣዛሪያሲ ሶፎናሳ ና፤
1CH 6:37 ሶፎናሲ ታሃቴ ና፤ ታሃቴይ ኣሲሬ ና፤ ኣሲሬይ ኣቢያሳፌ ና፤ ኣቢያሳፊ ቆሬ ና፤
1CH 6:38 ቆሬይ ዪጺሃሬ ና፤ ዪጺሃሬይ ቃኣቴ ና፤ ቃኣቴይ ሌዌ ና፤ ሌዌይ ኢስራኤሌ ና።
1CH 6:39 ኤማኔ ዳቦ ኣሳፌይ ኢዛስ ኡሻቻ ባጋራ ኤቂዲ ኦꬄስ፤ ኣሳፌይ ባራካዬ ና፤ ባራካዬይ ሺምኣ ና፤
1CH 6:40 ሺምኣይ ሚካኤሌ ና፤ ሚካኤሌይ ባኣሴያ ና፤ ባኣሴያይ ማልኪያ ና፤
1CH 6:41 ማልኪያይ ኤታኔ ና፤ ኤታኔይ ዛራሄ ና፤ ዛራሄይ ኣዳያ ና፤
1CH 6:42 ኣዳያይ ኤታኔ ና፤ ኤታኔይ ዚማ ና፤ ዚማይ ሺምኤ ና፤
1CH 6:43 ሺምኣይ ያሃቴ ና፤ ያሃቴይ ጌርሾሜ ና፤ ጌርሾሜይ ሌዌ ና።
1CH 6:44 ኢስታስ ሃዲርሳ ባጋራ ኢስታ ዳቦ ሜራሬ ዛርኬቲ ኤቄቴስ፤ ኤታኔይ ቂሻ ና፤ ቂሺ ኣቢዴ ና፤ ኣብዴይ ማሉኬ ና፤
1CH 6:45 ማሉኬይ ሃሻቢያ ና፤ ሃሻቢያይ ኣማሲያሳ ና፤ ኣማሲያሲ ኪልቂያሳ ና፤
1CH 6:46 ኪልቂያሲ ኣሞዜ ና፤ ኣሞዜይ ባኔ ና፤ ባኔይ ሼሜሬ ና፤
1CH 6:47 ሼሜሬይ ማሂሌ ና፤ ማሂሌይ ሙሼ ና፤ ሙሼይ ሜራሬ ና፤ ሜራሬይ ሌዌ ና።
1CH 6:48 ኢስታስ ኢሻንታ ጊዲዳ ሃንኮ ሌዌ ቆሞቲ ጾሳ ኬꬃን ጋይቶቴꬃ ዱንካኔን ኦሴቲዛ ሃራ ኦሶ ኡባስ ዶሬቲዳ።
1CH 6:49 ኣሮኔይኔ ኢዛ ናይቲ ጊዲኮ ጾሳ ኣይሌ ሙሴይ ኣዛዚዳ ማላ ኢስራኤሌ ዴራ ናጋራ ዉርሳናስ ኡባፌ ዱማቲዳ ጊዶ ቆልኣን ኦሴቲዛ ኦሶታ ኡባስ፥ ያርሾ ያርሺዛሶዛ ቦላ ጹጌቲዛ ያርሾ ያርሻናሲኔ ኤጻኔ ጩዋሲ ያርሺዛሶዛ ቦላ ኤጻኔ ጩዋሳናስ ኢስታስ ኣዋቴꬂ ኢሜቲዴስ።
1CH 6:50 ኣሮኔ ናይታ ዛርኬቲ ሃይሳፌ ካሊ ጻፌቲዳይታ፤ ኣሮኔ ናይ ኤልኤዜሬ፤ ኤልኤዜሬ ናይ ፊኒሃሴ፤ ፊኒሃሴ ናይ ኣቢሹኣ፤
1CH 6:51 ኣቢሹኣ ናይ ቡቃ፤ ቡቃ ናይ ኡዜ፤ ኡዜ ናይ ዛራሂያ፤
1CH 6:52 ዛራሂያ ናይ ማራዮቴ፤ ማራዮቴ ናይ ኣማሪያ፤ ኣማሪያ ናይ ኣሂጹቤ፤
1CH 6:53 ኣሂጹቤ ናይ ሳዶቄ፤ ሳዶቄ ናይ ኣኪማሴ።
1CH 6:54 ኣሮኔ ናይታስ ኢሜቲዳ ዱሳ ሶሆቲ ሃይሳፌ ካሊ ጻፌቲዳ፤ ኮይሮ ሳማይ ቃኣቴ ባጋታስ ኬዚዴስ፤
1CH 6:55 ኢስታስ ዩሁዳ ቢታን ዲዛ ኬብሮኔኔ ኢዛ ሄራን ዲዛ ሜሄ ሄሚዛሶሆታ ኢሚዳ።
1CH 6:56 ኬብሮኔ ዩሾን ዲዛ ጎሻ ጋዴቲኔ ሞꬃቲ ዮፊኔ ና ካሌቤስ ኢሜቲዳ።
1CH 6:57 ኣሮኔ ናይታስ ሼምፖ ዎꬊዳዴይ ባቃቲ ቢዲ ኣቲዛ ካታማታ፥ ኬብሮኔ፥ ዬቲሬ፥ ሊቢናኔ ሜሄ ሄሚዛሶሆታ፥ ኤሽታሞኣኔ ሜሄ ሄሚዛሶሆታ፥
1CH 6:58 ሂሌኔኔ ሜሄ ሄሚዛሶሆታ፥ ዳቢሬኔ ሜሄ ሄሚዛሶሆታ፥
1CH 6:59 ኣሻኔኔ ሜሄ ሄሚዛሶሆታ፥ ቤቲ-ሼሚሼኔ ሜሄ ሄሚዛሶሆታ ኢሚዳ።
1CH 6:60 ቃሴ ቢኒያሜ ቆሞታ ጋዴፔ ጌባኔኔ ሜሄ ሄሚዛሶሆታ፥ ኣሌሜቴኔ ሜሄ ሄሚዛሶሆታ፥ ኣናቶቴኔ ሜሄ ሄሚዛሶሆታ ኢሚዳ፤ ኣሮኔ ናይታስ ኢሜቲዳ ካታማቲ ሙሌራ ታማኔ ሄꬓ።
1CH 6:61 ኣርሼይ ዉሊዛ ባጋራ ዲዛ ሚናሴ ዛርኬ ባጋቲ ኦይኪዳ ጋዴዛፔ 10 ካታማቲ ሃንኮ ኣቲዳ ቃኣቴ ዛርኬታስ ኢሜቲዳ።
1CH 6:62 ዪሳኮሬ ዛርኬታ ቢታፌ፥ ኣሴሬ ዛርኬታ ቢታፌ፥ ኒፍታሌሜ ዛርኬታ ቢታፌኔ ባሳኔን ዲዛ ሚናሴ ዛርኬታ ቢታፌ 13 ካታማታ ጌርሾኔ ዛርኬታስ ኢሚዳ።
1CH 6:63 ኦሮቤሌ ዛርኬታ ቢታፌ፥ ጋዴ ዛርኬታ ቢታፌኔ ዛቢሎኔ ዛርኬታ ቢታፌ 12 ካታማታ ሜራሬ ዛርኬታስ ሳማን ኢሚዳ።
1CH 6:64 ሄሳꬆ ኦꬂዲ ኢስራኤሌ ኣሳይ ሌዌታስ ሃ ካታማታኔ ኢስታ ሄራን ዲዛ ሜሄ ሄንꬃሶሆታ ኢሚዴስ።
1CH 6:65 ሃይሳፌ ቦላራ ሱንꬃይ ኢስታስ ጼይጌቲዳ ካታማታ ዩሁዳ ዛርኬታፔ፥ ሲሞና ዛርኬታፔ፥ ቢኒያሜ ዛርኬታፔ ሃራ ካታማታን ኦꬆይሳ ማላ ሳማ ዬጊዲ ኢስታ ጋኪዳይሳ ጊሻ ኢሚዳ።
1CH 6:66 ቃኣቴ ዛርኬታ ጊዶፌ ኢሲ ኬꬃ ኣሳታስ ኤፍሬሜ ዛርኬታ ጋኪዳ ቢታፌ ካታማታኔ ሜሄ ሄሚዛሶሆ ኢሚዳ።
1CH 6:67 ኢስታስ ሼምፖ ዎꬊዳዴይ ባቃቲ ቢዲ ኣቲዛ ካታማታ፥ ኤፍሬሜ ዴሬን ጌዜ ቢታን ዲዛ ሴኬሜኔ ሜሄ ሄሚዛሶሆታ፥ ጌዜሬኔ ሜሄ ሄሚዛሶሆታ፥
1CH 6:68 ዮቂማኣሜኔ ሜሄ ሄሚዛሶሆታ፥ ቤቲ-ሆሮኔኔ ኢዛ ሜሄ ሄሚዛሶሆታ፥
1CH 6:69 ኣያሎኔኔ ሜሄ ሄሚዛሶሆታ፥ ጌት-ኤርሞኔኔ ሜሄ ሄሚዛሶሆታ ኢሚዳ።
1CH 6:70 ሚናሴ ዛርኬታ ባጋፌ ኣኔሬኔ ሜሄ ሄሚዛሶሆታኔ ባላማኔ ሜሄ ሄሚዛሶሆታ ኤኪዲ ቃኣቴ ዛርኬታፔ ኣቲዳይታስ ኢሚዳ።
1CH 6:71 ሚናሴ ዛርኬታ ባጋፌ ባሳኔን ዲዛ ጎላኔኔ ሜሄ ሄሚዛሶሆታኔ ኣስታሮቴኔ ሜሄ ሄሚዛሶሆታ ኤኪዲ ጌርሾኔ ዛርኬታስ ኢሚዳ።
1CH 6:72 ቃሴ ዪሳኮሬ ዛርኬታፔ ቃዴሴኔ ሜሄ ሄሚዛሶሆታ፥ ዳቢራቴኔ ሜሄ ሄሚዛሶሆታ፥
1CH 6:73 ኤራሞቴኔ ሜሄ ሄሚዛሶሆታኔ ኣኔማኔ ሜሄ ሄሚዛሶሆታ ኤኪዲ ኢስታስ ኢሚዳ።
1CH 6:74 ኣሴሬ ዛርኬታፔ ማሻላኔ ሜሄ ሄሚዛሶሆታ፥ ኣብዶኔኔ ሜሄ ሄሚዛሶሆታ፥
1CH 6:75 ሁቆቄኔ ሜሄ ሄሚዛሶሆታኔ ኤራሆቤኔ ሜሄ ሄሚዛሶሆታ ኤኪዲ ኢስታስ ኢሚዳ።
1CH 6:76 ሄሳꬆካ ኒፍታሌሜ ዛርኬታፔ ጋሊላን ዲዛ ቃዴሴኔ ሜሄ ሄሚዛሶሆታ፥ ሃሞኔኔ ሜሄ ሄሚዛሶሆታኔ ቂሪያታይሜኔ ሜሄ ሄሚዛሶሆታ ኤኪዲ ኢስታስ ኢሚዳ።
1CH 6:77 ኣቲዳ ሜራሬ ዛርኬታስ ዛቢሎኔ ዛርኬታፔ ኣርሞኔኔ ሜሄ ሄሚዛሶሆታኔ ታቦሬኔ ሜሄ ሄሚዛሶሆታ ኤኪዲ ኢሚዳ።
1CH 6:78 ቃሴ ኦሮቤሌ ዛርኬታፔ ኢያርኮ ጊናን፥ ዮርዳኖሴፔ ሄ ፒንꬃን ኣርሼይ ዉሊዛ ባጋራ፥ ባዞን ዲዛ ባጺራኔ ሜሄ ሄሚዛሶሆታ፥ ያሃጼኔ ሜሄ ሄሚዛሶሆታ፥
1CH 6:79 ቂዲሞቴኔ ሜሄ ሄሚዛሶሆታኔ ሜፋኣቴኔ ሜሄ ሄሚዛሶሆታ ኤኪዲ ኢስታስ ኢሚዳ።
1CH 6:80 ጋዴ ዛርኬታፔ ጋላኣዴን ዲዛ ኤራሞቴኔ ሜሄ ሄሚዛሶሆታ፥ ማሃናይሜኔ ሜሄ ሄሚዛሶሆታ፥
1CH 6:81 ሃሴቦኔኔ ሜሄ ሄሚዛሶሆታኔ ኢያዜሬኔ ሜሄ ሄሚዛሶሆታ ኤኪዲ ኢስታስ ኢሚዳ።
1CH 7:1 ዪሳኮሬስ ኦይዱ ኣቱማ ናይቲ ዴቴስ፤ ሄይቲካ ቶላ፥ ፑዋ፥ ያሹቤኔ ሺሚሮኔ ጌቴቲዛይታ።
1CH 7:2 ቶላ ናይቲ ኡዜ፥ ኤራፋያ፥ ዪሪኤሌ፥ ያሂማዬ፥ ዪቢሳሜኔ ሳሜላ፤ ኢስቲካ ቶላ ዛርኬታ ሃላቃታ፤ ኢስቲ ዎልቃማኔ ሚኖ ኦላንቻታ፤ ካዎ ዳዊቴ ዎዴ ኢስታ ቆዳይ 22,600።
1CH 7:3 ኡዜይ ዪዚራሄያ ዬሊዴስ፤ ዪዚራሄያይ ሚካኤሌ ዬሊዴስ፤ ሚካኤሌይ ኣብዲዩ ዬሊዴስ፤ ኣብዲዩይ ኢዩኤሌ ዬሊዴስ፤ ኢዩኤሌይ ዪሺያ ዬሊዴስ፤ ሃ ኢቻሻቲካ ባሶ ኣሳታስ ሃላቃ።
1CH 7:4 ኢስታስ ዳሮ ማቼቲኔ ናይቲ ዲዛ ጊሻስ ኢስታሶ ኣሳ ዛርኬታፔ ኦላስ ጋኪዳ ኦላንቻታ ቆዳይ 36,000 ጊዲዴስ።
1CH 7:5 ዪሳኮሬ ዛርኬታፔ ኦላስ ጋኪዳ ኦላንቻቲ ማዝጋባን ቆዴቲዲ 87,000 ጊዲዳ።
1CH 7:6 ቢኒያሜስ ሄꬑ ናይቲ ዴቴስ፤ ኢስቲካ ቤላ፥ ቤኬሬኔ ዪዲኤሌ።
1CH 7:7 ቤላ ናይቲ ኤጺቦኔ፥ ኡዜ፥ ኡዚኤሌ፥ ያርሞቴኔ ኢሬ፤ ሃ ኢቻሻቲካ ባሶ ኣሳታስ ሃላቃታ፤ ባ ዬሌታ ዛርኬታ ማዝጋባን 22,034 ዎልቃማኔ ሚኖ ኦላንቻቲ ማዝጋቤቲዳ።
1CH 7:8 ቤኬሬ ናይቲ ዚሚራ፥ ኢዮኣሳ፥ ኤልኤዜሬ፥ ኤልዮኤናዬ፥ ኦሚሬ፥ ያርሞቴ፥ ኣቢያ፥ ኣናቶቴኔ ኣሌሜቴ፤ ሃይቲ ኡባቲ ቤኬሬ ናይታ።
1CH 7:9 ኢስቲ ኡባይ ባሶ ኣሳታስ ሃላቃታ፤ ባ ዬሌታ ዛርኬታ ማዝጋባን 20,200 ዎልቃማኔ ሚኖ ኦላንቻቲ ማዝጋቤቲዳ።
1CH 7:10 ዪዲኤሌ ናይ ቢሊሃኔ፤ ቢሊሃኔ ናይቲ ያኡሼ፥ ቢኒያሜ፥ ኤሁዴ፥ ኪንኣኔ፥ ዜታኔ፥ ታርሴሴኔ ኣኪሻሆሬ፤
1CH 7:11 ሃይቲ ኡባቲ ዪዲኤሌ ናይታ፤ ኢስቲ ባሶ ኣሳታስ ሃላቃታ፤ ባ ዬሌታ ዛርኬታ ማዝጋባን 17,200 ዎልቃማኔ ሚኖ ኦላንቻቲ ማዝጋቤቲዳ።
1CH 7:12 ሹፊሜይኔ ሁፒሜይ ኢሬ ዜሬꬃታ፤ ሁሺሜይ ኣሄሬ ዜሬꬃ።
1CH 7:13 ኒፍታሌሜ ናይቲ ያሂጼሌ፥ ጉኔ፥ ዬጺሬኔ ሻሎሜ፤ ሃይቲ ቢሊሃ ዜሬꬃታ።
1CH 7:14 ሚናሴ ዛሬቲ ሃይሳፌ ካሊ ጻፌቲዳይታ፤ ሚናሴይ ኣራሜ ቢታፌ ኤኪዳ ጋራዴያ ዬሊዳ ኣቱማ ናይቲ ኣሲራኤሌኔ ጋላኣዴ ኣዋ ማኪሬ።
1CH 7:15 ማኪሬይ ሁፒሜኔ ሹፊሜ ባጋፌ ማኢኮ ማቾ ኤኪዴስ፤ ኢዛ ሚቼይ ሱንꬂካ ማኢኮ ጌቴቴስ፤ ማኪሬ ዛሬ ጺሎፋዴይ ማጫ ናይታ ጻላ ዬሊዴስ።
1CH 7:16 ማኪሬ ማቻ ማኢካይ ኣቱማ ናይታ ዬላዱስ፤ ባይራ ናዛ ፓሬሻ፥ ኢዛ ካሎዛ ሼሬሼ ጋ ሱንꬃዱስ። ፔሬሻ ናይቲ ኡላሜኔ ኤሬቄሜ።
1CH 7:17 ኡላሜ ናይ ባዳኔ፤ ሃይቲ ሚናሴ ና ማኪሬ ና ጋላኣዴ ዛሬታ።
1CH 7:18 ጋላኣዴ ሚቺያ ሃሞሌኬታ ኢሻዉ፥ ኣቢኤዜሬኔ ማሂሌ ዬላዱስ።
1CH 7:19 ሻሚዳ ናይቲ ኣሂያኔ፥ ሴኬሜ፥ ሊቂሃኔ ኣንኣሜ።
1CH 7:20 ኤፍሬሜ ናይ ሹቱላ፤ ሹቱላ ናይ ባሬዴ፤ ባሬዴ ናይ ታሃቴ፤ ታሃቴ ናይ ኤልኣዴ፤ ኤልኣዴ ናይ ታሃቴ፤
1CH 7:21 ታሃቴ ናይ ዛባዴ፤ ዛባዴ ናይ ሹቱላ። ኤፍሬሜ ና ኤዜሬይኔ ኤላዴይ ሜሄ ካይሳና ጌቴ ዴሬ ቢን ሄ ቢታ ኣሳቲ ኢስታ ዎꬊዳ።
1CH 7:22 ሄሳ ጊሻስ ኢስታ ኣዋ ኤፍሬሜይ ዳሮ ዎዴ ካዮቲዴስ፤ ሂስቲን ኢዛ ዳቦቲ ዪዲ ኢዛ ሚንꬄꬂዳ።
1CH 7:23 ሄሳፌ ጉዬ ኢዚ ባ ማቼይራ ጋይቲዴስ፤ ሂስቲን ኢዛ ሻራዳ ኣቱማ ና ዬላዱስ፤ ኢዛ ኬꬃን ጋኪዳ ኢታ ሜቶዛ ጋሶን ናዛ ባሪሄ ጊ ሱንꬂዴስ።
1CH 7:24 ኤፍሬሜስ ሼኢሮ ጌቴቲዛ ማጫ ናይ ዳዉስ፤ ኢዛካ ፑዴ ቤቲ-ሆሮኔ፥ ዱጌ ቤቲ-ሆሮኔኔ ኡዜን-ሼኢራ ጌቴቲዛ ካታማታ ኤሳዱስ።
1CH 7:25 ኤፍሬሜስ ኤርፋሃ ጌቴቲዛ ሃራ ኣቱማ ናይ ዴስ፤ ኤርፋሃ ናይ ኤሬሼፋ፤ ኤሬሼፋ ናይ ቴላሄ፤ ቴላሄ ናይ ታሃኔ፤
1CH 7:26 ታሃኔ ናይ ላዳኔ፤ ላዳኔ ናይ ኣሚሁዴ፤ ኣሚሁዴ ናይ ኤልሻማ፤
1CH 7:27 ኤልሻማ ናይ ናዌ፤ ናዌ ናይ ኢያሶ።
1CH 7:28 ኤፍሬሜ ዛሬታ ዱሳሶይኔ ኢስታ ቢታይ ቤቴሌ ዩሾን ዲዛ ካታማታ፥ ኣርሼይ ሞኪዛ ባጋራ ናኢራኔ፥ ኣርሼይ ዉሊዛ ባጋራ ጌዜሬ፥ ሴኬሜ፥ ኣዬኔ ኢስታ ዩሾን ዲዛ ካታማታ።
1CH 7:29 ቃሴካ ሚናሴ ዛሬታ ቢታ ዛዋን ቤቲ-ሻኣኔ፥ ታኢናኬ፥ ማጊዶ፥ ዶሬኔ ኢስታ ዩሾን ዲዛ ካታማታ፤ ኢስራኤሌ ና ዮሴፌ ዛሬቲ ሃ ካታማታን ዴኢዳ።
1CH 7:30 ኣሴሬ ናይቲ ዪሚኔ፥ ዪሺዌ፥ ዪሺዋኔ ባሪሄ፤ ኢስታ ሚቻ ሴራሆ ጌቴታዉስ።
1CH 7:31 ባሪሄ ናይቲ ሄቤሬኔ ቢሪዛዋቴ ኣዋ ማልኪኤሌ።
1CH 7:32 ሄቤሬ ናይቲ ያፋሌጼ፥ ሾሜሬኔ ሆታሞ፤ ኢስታ ሚቻ ሹኦ ጌቴታዉስ።
1CH 7:33 ያፋሌጼ ናይቲ ፓሳኬ፥ ቢሚሃሌኔ ኣሺዋቴ፤ ሃይቲ ያፋሌጼ ናይታ።
1CH 7:34 ያፋሌጼ ኢሻ ሼሜሬ ናይቲ ኣሂ፥ ኤሮሂጋ፥ ያሁቤኔ ኣራሜ።
1CH 7:35 ኢዛ ኢሻ ሆታሞ ናይቲ ጾፋሃ፥ ዪሚኔ፥ ሼሌሼኔ ኣማሌ።
1CH 7:36 ጾፋሃ ናይቲ ሱሃ፥ ሃርኔፌሬ፥ ሹኣሌ፥ ቤሬ፥ ዪሚሬ፥
1CH 7:37 ቤጼሬ፥ ሆዳ፥ ሻማ፥ ሺላሼ፥ ዪቲራኔኔ ባኤራ።
1CH 7:38 ዮቶሬ ናይቲ ዮፊኔ፥ ፒስፓኔ ኣሬ።
1CH 7:39 ኡሌ ናይቲ ኣራሄ፥ ሃንኤሌኔ ኤሪጺያ።
1CH 7:40 ሃይቲ ኡባይ ኣሴሬ ዛሬታ፤ ኢስቲ ባሶ ኣሳታስ ሃላቃታ፤ ባ ዬሌታ ዛርኬታ ማዝጋባን 26,000 ዎልቃማኔ ሚኖ ኦላንቻቲ ማዝጋቤቲዳ።
1CH 8:1 ቢኒያሜስ ባይራ ናዚ ቤላ፤ ኢዛ ካሎቲ ኣሺቤሌ፥ ኣሂራሄ፥
1CH 8:2 ኖሃ፥ ኤራፌ።
1CH 8:3 ቤላ ዛሬቲ ኣዳሬ፥ ጌራ፥ ኣቢሁዴ፥
1CH 8:4 ኣቢሹኣ፥ ናኢማኔ፥ ኣሆዋ፥
1CH 8:5 ጌራ፥ ሻፋሜኔ ሁራሜ።
1CH 8:6 ኤሁዴ ዛሬቲ ናኢማኔ፥ ኣካያኔ ጌራ፤ ኢስቲ ጌባን ዲዛ ባንታ ኬꬃ ኣሳታስ ሃላቃታ፤ ሄሳፌ ጉዬ ኢስቲ ማናሃቴ ቢታ ዲኤቲ ቢዳ፤ ኦዛኔ ኣሂሁዴ ኣዋ ጌራይ ኢስታስ ሃላቃ።
1CH 8:8 ሻሃራይሜይ ባ ማቼታ ሁሺሞኔ ባኢሮ ኣንጂ ዬዲዳፔ ጉዬ ሞኣቤ ቢታን ኣቱማ ናይታ ዬሊዴስ።
1CH 8:9 ሻሃራይሜ ባ ማቾ ሆዴሺፔ ዮባቤ፥ ዚቢያ፥ ሜሼ፥ ማልካሜ፥
1CH 8:10 ያኡጼ፥ ሳኪያኔ ሚርማ ዬሊዴስ፤ ኢዛ ናይቲ ኡባይ ባሶ ኣሳታስ ሃላቃ ጊዲዳ።
1CH 8:11 ቃሴ ባ ማቾ ሁሺሚፔ ኣሂጹቤኔ ኤልፓኤሌ ዬሊዴስ።
1CH 8:12 ኤልፓኤሌ ናይቲ ኤቦሬ፥ ሚሻሜኔ ሼሜዴ፤ ሼሜዲ ኦኖ ካታማታ፥ ሎዳ ካታማታኔ ኢስታ ዩሾን ዲዛ ቄሪ ካታማታ ኤሲዴስ።
1CH 8:13 ባሪሄይኔ ሼማኤይ ኣያሎኔ ካታማን ዲዛ ባንታ ኬꬃ ኣሳታስ ሃላቃ ጊዲዳ፤ ኢስቲ ጌቴ ካታማን ዲዛ ኣሳ ዬዴꬂዳ።
1CH 8:14 ባሪሄ ዛሬቲ ኣሂዮ፥ ሻሻቄ፥ ያርሞቴ፥
1CH 8:15 ዛባዲያ፥ ኣራዴ፥ ኤዴሬ፥
1CH 8:16 ሚካኤሌ፥ ዪሺጳኔ ዮሃ ጌቴቴቴስ።
1CH 8:17 ኤልፓኤሌ ዛሬቲ ዛባዲያ፥ ማሹላሜ፥ ሂዝቃ፥ ሄቤሬ፥
1CH 8:18 ዪሺማራዬ፥ ዩዚላኤኔ ዮባቤ።
1CH 8:19 ሺምኤ ዛሬቲ ያቂሜ፥ ዚኪሬ፥ ዛብዴ፥
1CH 8:20 ኤልኤናዬ፥ ኤልናዬ፥ ኤልኤሌ፥
1CH 8:21 ኣዳያ፥ ቢራዬኔ ሺሚራቴ።
1CH 8:22 ሻሻቄ ዛሬቲ ዪሺጳ፥ ኤቦሬ፥ ኤልኤሌ፥
1CH 8:23 ኣብዶኔ፥ ዚኪሬ፥ ሃናኔ፥
1CH 8:24 ሃናኒያ፥ ኤላሜ፥ ኣንቶቴያ፥
1CH 8:25 ዪፊዳዬኔ ፓኑኤሌ።
1CH 8:26 ዪሮሃሜ ዛሬቲ ሻሚሻራዬ፥ ሻሃሪያ፥ ኣታሊያ፥
1CH 8:27 ያኢሬሼ፥ ኤላሳኔ ዚኪሬ።
1CH 8:28 ሃይቲ ኡባቲ ባ ኬꬃ ኣሳታስ ሃላቃታ፤ ባ ዜሬꬃ ዛርኬቲ ጻፌቲ ዲዛ ዬሩሳላሜን ዴቴስ።
1CH 8:29 ጌባኦኔ ኣዋ ዪኢኤሌይ ጌባኦኔ ካታማን ዴስ፤ ኢዛ ማቼይ ሱንꬂካ ማኢኮ።
1CH 8:30 ኢዛስ ባይራ ናዚ ኣብዶኔ ጌቴቴስ፤ ኢዛ ካሎቲ ጹሬ፥ ቂሴ፥ ባኣሌ፥ ኔሬይ ናዳቤ፥
1CH 8:31 ጋዶሬ፥ ኣሂዮ፥ ዜኩሬኔ
1CH 8:32 ሺሜኤ ኣዋ ሚቂሎቴ፤ ሃይቲ ኡባቲ ባ ዳቦታ ማታን ዬሩሳላሜን ዴቴስ።
1CH 8:33 ኔሬይ ቂሴ ዬሊዴስ፤ ቂሴይ ሳኦሌ ዬሊዴስ፤ ሳኦሊ ዮናታኔ፥ ማልኬሹኣ፥ ኣቢናዳቤኔ ኤሺባኣሌ ዬሊዴስ።
1CH 8:34 ዮናታኔ ናይ ማሪባ-ባኣሌ፤ ማሪባ-ባኣሌይ ሚኪያሳ ዬሊዴስ።
1CH 8:35 ሚኪያሳ ኣቱማ ናይቲ ፒቶኔ፥ ሜሌኬ፥ ታሬኣኔ ኣካዜ።
1CH 8:36 ኣካዜይ ያሆኣዴ ዬሊዴስ፤ ያሆኣዲ ኣሌሜቴ፥ ኣዚሞቴኔ ዚሚሬ ዬሊዴስ፤ ዚሚሬይ ሞዛ ዬሊዴስ፤
1CH 8:37 ሞዛይ ቢኒኤ ዬሊዴስ፤ ቢኒኤይ ኤራፋዬ ዬሊዴስ፤ ኤራፋዬይ ኤልኣሳ ዬሊዴስ፤ ኤልኣሲ ኣዜሌ ዬሊዴስ።
1CH 8:38 ኣዜሌስ 6 ኣቱማ ናይቲ ዴቴስ፤ ሄይቲካ ኣዚርቃሜ፥ ቦኬሬ፥ ኢስማኤሌ፥ ሻኣሪያ፥ ኣብዲዩኔ ሃናኔ፤ ሃይቲ ኡባይ ኣዜሌ ናይታ።
1CH 8:39 ኣዜሌ ኢሻ ኤሼቄስ ሄꬑ ኣቱማ ናይቲ ዴቴስ፤ ባይራዚ ኡላሜ ካሎቲ ያኡሼኔ ኤልፋሌጼ።
1CH 8:40 ኡላሜ ናይቲ ዎልቃማኔ ሚኖ ኦላንቻታ፤ ኢስቲካ ዎንዳፌን ዱኮ ኤሪዛይታ፤ ኡላሜስ 150 ኣቱማ ናይቲኔ ናይታ ናይቲ ዴቴስ። ሃይቲ ኡባቲ ቢኒያሜ ዛሬታ።
1CH 9:1 ኢስራኤሌ ኣሳይ ኡባይ ባ ዬሌታ ዛርኬን ዛርኬን ጻፌቲዴስ፤ ሃ ታሪኬይ ኢስራኤሌ ካዎታ ማጻፋን ጻፌቲ ኡቲዴስ። ዩሁዳ ኣሳይ ባ ናጋራ ጋሶን ባቢሎኔ ቢታ ዲኤቲ ቢዴስ።
1CH 9:2 ዲኤቲ ቢዳሶፔ ኮይሮ ሲሚዲ ባንታ ቢታን ኡቲዳይቲ ቄሴታ፥ ሌዌታ፥ ጾሳ ኬꬃን ዎልቃ ኦሶ ኦꬂዛይታኔ ኢስራኤሌ ኣሳፔ ጉꬃታ።
1CH 9:3 ዩሁዳ ዛሬታፔ፥ ቢኒያሜ ዛሬታፔ፥ ኤፍሬሜ ዛሬታፔኔ ሚናሴ ዛሬታፔ ጉꬃቲ ዬሩሳላሜን ዴኢዳ።
1CH 9:4 ዩሁዳ ና ፓሬሴ ዛርኬፌ ኡታዬይ ዬሩሳላሜን ኡቲዳይታስ ሃላቃ፤ ኡታዬይ ኣሚሁዴ ና፤ ኣሚሁዴይ ኢሚሬ ና፤ ኢሚሬይ ባኔ ና።
1CH 9:5 ዩሁዳ ና ሴሎ ዛሬታፔ ኣሳያይኔ ኢዛ ናይቲ ዬሩሳላሜን ዲዛይታስ ሃላቃታ።
1CH 9:6 ዩሁዳ ና ዛራሄ ዛሬታፔ ዪኢኤሌይ ዬሩሳላሜን ዲዛይታስ ሃላቃ። ዩሁዳ ዛሬቲ ቆዲን ሙሌራ 690።
1CH 9:7 ዬሩሳላሜን ዴኢዳ ቢኒያሜ ዛርኬ ሃላቃቲ ሃይሳፌ ካሊ ጻፌቲዳ፤ ሃላቃ ሳሉይ ማሹላሜ ና፤ ሃላቃ ማሹላሜይ ሆዳዬ ና፤ ሃላቃ ሆዳዬይ ሃሳኑኤ ና።
1CH 9:8 ሃላቃ ዪቤናዬይ ዪሮሃሜ ና። ሃላቃ ኤላይ ኡዜ ና፤ ኡዚ ሚኪሬ ና። ሃላቃ ማሹላሜይ ሻፋጺያ ና፤ ሻፋጺያ ኤራኡኤሌ ና፤ ኤራኡኤሌይ ዪቢናዬ ና።
1CH 9:9 ቢኒያሜ ዛሬታ ቆዳይ ሙሌራ 956፤ ሄይቲ ኡባይ ባ ኬꬃ ኣሳታስ ሃላቃታ።
1CH 9:10 ዬሩሳላሜን ዴኢዳ ቄሴቲ ሃይሳፌ ካሊዲ ጻፌቲዳይታ፤ ኢስቲ ያዳያ፥ ዮሃሪቤ፥ ያኪኔኔ
1CH 9:11 ጾሳ ኬꬃን ሃላቃቲዳ ኣዛሪያሳ፤ ኣዛሪያሲ ኪልቂያሳ ና፤ ኪልቂያሲ ማሹላሜ ና፤ ማሹላሜይ ሳዶቄ ና፤ ሳዶቄይ ማራዮቴ ና፤ ማራዮቴይ ኣሂጹቤ ና።
1CH 9:12 ሃራቲ ቃሴ ዪሮሃሜ ና ኣዳያኔ ኣዲኤሌ ና ማኢሳያ፤ ዪሮሃሜይ ፓሽኩሬ ና፤ ፓሽኩሬይ ማልኪያ ና። ኣዲኤሌይ ያሂዜሬ ና፤ ያሂዜሬይ ማሹላሜ ና፤ ማሹላሜይ ማሺሌሚቴ ና፤ ማሺሌሚቴይ ኢሜሬ ና።
1CH 9:13 ባንታሶ ኣሳታስ ሃላቃቲዳ ቄሴቲ 1,760፤ ሃይቲ ጾሳ ኬꬃን ኦሴቲዛ ኦሶስ ጋኪዳ ኣሳታ።
1CH 9:14 ዬሩሳላሜን ዴኢዳ ሌዌቲ ሃይሳፌ ካሊ ጻፌቲዳይታ፤ ሃሹቤ ና ሻማኤይ ሜራሬ ዛርኬ፤ ሃሹቤይ ኣዚርቃሜ ና፤ ኣዚርቃሜይ ሃሻቢያ ና።
1CH 9:15 ባቂባቂሬ፥ ሄሬሼ፥ ጋላሌኔ ማታኒያ፤ ማታኒያይ ሚካ ና፤ ሚኪያሲ ዚኪሬ ና፤ ዚኪሬይ ኣሳፌ ና።
1CH 9:16 ሃራቲ ቃሴ ናጾፌታ ሞꬃታን ኡቲዳ ኣብዲዩኔ ባራካዬ። ኣብዲዩይ ሻማኤ ና፤ ሻማኤይ ጋላሌ ና፤ ጋላሌይ ኤዶታኔ ና። ባራካዬይ ኣሳ ና፤ ኣሲ ሂልቃና ና።
1CH 9:17 ጾሳ ኬꬃ ፔንጌ ናጊዛ ዛቤቲ ሻሎሜ፥ ኣቁቤ፥ ጻልሞኔ፥ ኣሂማኔኔ ኢስታ ዳቦታ፤ ሻሎሜይ ኢስታስ ሃላቃ።
1CH 9:18 ሃ ዜሬꬃቲ ኣርሼይ ሞኪዛ ባጋራ ዲዛ ካዎ ፔንጌ ጌቴቲዛሶዛ ናጌቴስ፤ ሃይሳፌ ካሴ ኢስቲ ሌዌቲ ዱንካኒ ኡቲዳሶ ጌልꬂዛ ፔንጌ ናጌቴስ።
1CH 9:19 ሻሉሜይ ኣቢያሳፌ ናዛ ቆሬ ና፤ ኢዚ ቆራሃ ዛርኬ ኣሳ። ቆሬ ዜሬꬃቲ ካሴ ጎዳ ጾሳ ዱንካኔ ናጊዳ ማላ ሻሎሜይኔ ቆራሃ ዛርኬ ጊዲዳ ኢዛ ዳቦቲ ጾሳ ኬꬃ ናጌቴስ።
1CH 9:20 ኤልኤዜሬ ና ፊኒሃሲ ቤኒ ዎዴ ቆራሃ ዛርኬታ ሃላቃ፤ ጎዳይ ኢዛራ ዴስ።
1CH 9:21 ቃሴካ ማሼሌሚያ ና ዛካራሲ ዱንካኔ ፔንጌ ናጌስ።
1CH 9:22 ፔንጋ ናጋናስ ዶሬቲዳይቲ ሙሌራ 212፤ ሃይታንቲ ባንታ ካታማን ካታማን ቆዴቲዲ ጻፌቲዳ፤ ኢስታ ዛሬታስ ሃ ኣዋቴꬃ ኢሚዳይ ካዎ ዳዊቴኔ ናቤ ሳሜላ።
1CH 9:23 ሄሳ ጊሻስ ኢስቲኔ ኢስታ ናይቲ ጾሳ ኬꬃ ዱንካኔ ፔንጌዛ ናጌቴስ።
1CH 9:24 ዛቤቲ ኣርሼይ ዉሊዛ ባጋራ፥ ሞኪዛ ባጋራ፥ ፑዴሃ ባጋራኔ ዱጌሃ ባጋራ ኤቂዲ ናጌቴስ።
1CH 9:25 ሄ ካታማታን ዲዛ ኢስታ ዳቦቲ ላፑንꬃ ጋላስ ላሜቲ ላሜቲ ናጊሼ ኢስታ ማዳናስ ቤሴስ።
1CH 9:26 ፔንጌ ናጊዛ ዛቤታ ሃላቃታፔ ኦይዱ ሌዌቲ ጾሳ ኬꬃ፥ ኢዛ ጊዶን ዲዛ ኪፊሌታኔ ሚንጃ ኬꬃ ኣዋቴꬃን ናጌቴስ።
1CH 9:27 ጾሳ ኬꬃ ናጊዛይኔ ቃሴ ማላዶ ማላዶ ካሬ ዶይዛይቲ ኢስታ ጊዲዳ ጊሻስ ሄን ኣቄቴስ።
1CH 9:28 ኢስታፌ ጉꬃቲ ጾሳ ኬꬃ ኦሶስ ጎኤቲዛ ሚሻታ ኣዋቴꬃን ናጌቴስ፤ ሄ ሚሻታ ካሬ ኬሲዛ ዎዴኔ ሶ ጌልꬂዛ ዎዴ ኢስቲ ቆዴቴስ።
1CH 9:29 ቃሴ ኢስታፌ ኢሶቲ ኢሶቲ ጾሳ ኬꬃ ጊዶን ጎኤቲዛ ሃራ ሚሻታ፥ ሊቆ ꬊሌዛ፥ ዎይኔ ኡሻዛ፥ ዛይቴዛ፥ ኤጻኔዛኔ ሳዎታ ኣዋቴꬃን ናጌቴስ።
1CH 9:30 ጊዶ ኣቲን ቄሴታ ናይታፔ ኢሶቲ ኢሶቲ ሳዎዛ ጌዳሪ ጌዳሪ ዋላኬቴስ።
1CH 9:31 ቆሬ ዛርኬፌ ሻሎሜስ ባይራ ና ሌዌ ማቲቲያስ ያርሾ ኡኬꬅ ኡካናስ ኣዋቴꬂ ዴስ።
1CH 9:32 ቃኣቴ ዛርኬ ጊዲዳ ኢስታ ዳቦታፔ ጉꬃታስ ሳምባታን ሳምባታን ጻራጴዛ ቦላ ዎꬂዛ ያርሾ ጊጊሳና ኣዋቴꬂ ዴስ።
1CH 9:33 ሌዌ ዛሬታፔ ኣማርዳ ሃላቃቲ ጾሳ ኬꬃን ዬጺዛይታ፤ ኢስቲ ኦማርሲኔ ጋላስ ኦꬂዛ ጊሻስ ሃራ ኦሶ ኦሴቴና፤ ኢስቲ ጾሳ ኬꬃ ጊቤ ጊዶን ዲዛ ኬꬃታን ዴኤቴስ።
1CH 9:34 ሃይቲ ኡባይ ሌዌ ቆሞታስ ሃላቃቲ ባንታ ዛርኬን ዛርኬን ጻፌቲዲ ዬሩሳላሜን ዴቴስ።
1CH 9:35 ጌባኦኔ ኣዋ ዪኢኤሌይ ጌባኦኔ ካታማን ዴኢዴስ፤ ኢዛ ኬꬃ ኣዬይ ሱንꬂ ማኢኮ።
1CH 9:36 ኢዛስ ባይራ ናዚ ኣብዶኔ፤ ኢዛ ካሎቲ ጹሬ፥ ቂሴ፥ ባኣሌ፥ ኔሬ፥ ናዳቤ፥
1CH 9:37 ጋዶሬ፥ ኣሂዮ፥ ዛካራሳኔ ሚቂሎቴ።
1CH 9:38 ሚቂሎቴይ ሺሜኤ ዬሊዴስ፤ ኢስቲካ ባንታ ዳቦታ ማታን ዬሩሳላሜን ዴኢዳ።
1CH 9:39 ኔሬይ ቂሴ ዬሊዴስ፤ ቂሴይ ሳኦሌ ዬሊዴስ። ሳኦሌይ ዮናታኔ፥ ማልኬሹኣ፥ ኣቢናዳቤኔ ኤሺባኣሌ ዬሊዴስ፤
1CH 9:40 ዮናታኔ ናይ ማሪባ-ባኣሌ፤ ማሪባኣሌይ ሚኪያሳ ዬሊዴስ።
1CH 9:41 ሚኪያሳ ናይቲ ፒቶኔ፥ ሜሌኬ፥ ቴሬኣኔ ኣካዜ።
1CH 9:42 ኣካዜይ ያኢሬ ዬሊዴስ፤ ያኢሬይ ኣሌሜቴ፥ ኣዚሞቴኔ ዚሚሬ ዬሊዴስ፤ ዚሚሬይ ሞዛ ዬሊዴስ፤
1CH 9:43 ሞዛይ ቢኒኤ ዬሊዴስ፤ ቢኒኤይ ኤራፋያ ዬሊዴስ፤ ኤራፋያይ ኤልኣሳ ዬሊዴስ፤ ኤልኣሲ ኣዜሌ ዬሊዴስ።
1CH 9:44 ኣዜሌስ ኡሱፑን ኣቱማ ናይቲ ዴቴስ፤ ሄይቲካ ኣዚርቃሜ፥ ቦኬሬ፥ ኢስማኤሌ፥ ሻኣሪያ፥ ኣብዲዩኔ ሃናኔ፤ ሃይቲ ኡባይ ኣዜሌ ናይታ።
1CH 10:1 ፊሊስጼሜ ኣሳቲ ኢስራኤሌ ኣሳታራ ኦሌቲዳ፤ ኢስራኤሌ ኣሳቲ ፊሊስጼሜ ኣሳታ ሲንꬃፌ ባቃቲዳ፤ ኢስራኤሌታፔ ዳሮቲ ጊልቦኣ ዙማ ሁኤን ሃይቂዳ።
1CH 10:2 ፊሊስጼሜ ኣሳቲ ሳኦሌኔ ኢዛ ናይታ ዬዴꬂ ጋኪዲ ኢዛ ናይታ ዮናታኔ፥ ኣቢናዳቤኔ ማልኬሹኣ ዎꬊዳ።
1CH 10:3 ኦላይ ሳኦሌ ዩዪ ኣꬊዲ ኡንኤꬂዴስ፤ ኦላንቻቲ ኢዛ ዎንዳፌን ዱኪ ማዱንꬂዳ።
1CH 10:4 ሳኦሊ ባ ኦላ ማሳራ ቶኪዛ ዎታዳራዛ፥ «ሃ ቃጻሬቶንታ ፊሊስጼሜ ኣሳቲ ዪዲ ታ ቦላ ካኦንታ ማላ ኔ ጊꬃ ማሻን ታና ዎꬋ» ጊዴስ። ጊዶ ኣቲን ኢዛ ኦላ ማሳራ ቶኪዛ ዎታዳራዚ ኬሂ ያዪዳ ጊሻስ ኢጺዴስ፤ ሂስቲን ሳኦሊ ባ ጊꬃ ማሻ ቦላ ኩንዲዲ ሃይቂዴስ።
1CH 10:5 ኢዛ ኦላ ማሳራ ቶኪዛይሲ ሳኦሊ ሃይቂዳይሳ ቤኢዳፔ ጉዬ ኢዚካ ባ ጊꬃ ማሻ ሳኣን ኤሲዲ ኢዛ ቦላ ኩንዲ ሃይቂዴስ።
1CH 10:6 ሄሳꬆ ሃኒዲ ሳኦሊ፥ ኢዛ ናይቲ ሄꬓቲኔ ኢዛሶ ኣሳቲ ኡባይ ሄ ጋላስ ኢሲፌ ሃይቂዳ።
1CH 10:7 ዙሌዛን ዴኢዛ ኢስራኤሌ ኣሳቲ ኡባይ ባንታ ኦላንቻቲ ባቃቲዳይሳ፥ ሳኦሊኔ ኢዛ ናይቲ ሃይቂዳይሳ ቤኢዲ ኢስቲካ ባንታ ካታማታ ኣጊዲ ጋንጊዳ፤ ፊሊስጼሜ ኣሳቲ ዪዲ ሄ ካታማታ ኦይኪዳ።
1CH 10:8 ዎንቴꬃ ጋላስ ፊሊስጼሜቲ ኦላ ማሳራታ ሃይቂዳይታ ቦላፌ ቃሪ ኤካናስ ዪዲ ሳኦሊኔ ኢዛ ናይቲ ጊልቦኣ ዙማ ሁኤን ሃይቂዳይሳ ዴሚዳ።
1CH 10:9 ሂስቲዲ ኢስቲ ሳኦሌ ሁኤ ቃንጺ ኤኪዲኔ ኢዛ ኦላ ማሳራ ቃሪ ኤኪዳ፤ ሄሳፌ ጉዬ ባንታ ኤቃ ጾሳታሲኔ ባንታ ዴራስ ሃ ጾኖ ሚሺራቾዛ ኣዋጃና ማላ ፊሊስጼሜ ቢታ ኡባስ ኣስ ኪቲ ዬዲዳ።
1CH 10:10 ኢስቲ ሳኦሌ ኦላ ማሳራታ ባንታ ኤቃ ጾሳታ ኬꬃታን ዎꬂዳ፤ ኢዛ ሁኤዛ ባንታ ኤቃ ጾሳ ዳጎኔ ኬꬃን ካቂዳ።
1CH 10:11 ፊሊስጼሜ ኣሳቲ ሳኦሌ ቦላ ኦꬂዳይሳ ኡባ ጋላኣዴን ዲዛ ያቡሴ ካታማ ኣሳቲ ሲዪዳ ዎዴ፥
1CH 10:12 ሚኖ ኣሳቲ ቢዲ ሳኦሌ ኣሃኔ ኢዛ ናይታ ኣሃ ኤኪዲ ያቡሴ ካታማ ኤሂዳ፤ ሂስቲዲ ያቡሴን ዲዛ ጊታ ሚꬃ ጋርሳን ሞጊዳ፤ ሄሳፌ ጉዬ 7 ጋላስ ጾሚዳ።
1CH 10:13 ሳኦሊ ጎዳስ ኣማኔቲቤና፤ ኢዛ ቃላካ ናጎንታ ኢጺዲ ሞይቲሌ ጼይጊዛይታ ዞሬ ኦይቺዳ ጊሻስ ሃይቂዴስ።
1CH 10:14 ሄሳ ጋሶን ጎዳይ ኢዛ ዎꬊዲ ኢዛ ካዎቴꬃ ኢሴዬ ና ዳዊቴስ ኣꬂ ኢሚዴስ።
1CH 11:1 ሄሳፌ ጉዬ ኢስራኤሌ ኣሳይ ኡባይ ኢሲፌ ዳዊቴኮ ኬብሮኔ ቢዲ፥ «ኑኒ ኢሲ ኣሾኔ ኢሲ ሜቄꬃ፤
1CH 11:2 ካሴ ሳኦሌ ካዎቴꬃ ዎዴካ ኢስራኤሌ ኣሳ ኦላስ ካሌꬂዳይ ኔና፤ ጎዳ ኔ ጾሳይ ኔና፥ ‹ታ ዴራ ኢስራኤሌ ኔኒ ሄማና፤ ኢስታ ቦላካ ኔኒ ካዎታና› ጊዴስ» ጊዳ።
1CH 11:3 ሄሳ ጊሻስ ኢስራኤሌ ጪማቲ ኡባይ ካዎ ዳዊቴኮ ኬብሮኔ ካታማ ዪዳ፤ ኢዚ ኢስታራ ኬብሮኔን ጎዳ ሲንꬃን ጫቄቲዴስ፤ ጎዳይ ሳሜላ ባጋራ ሃሳይዳ ቃላ ማላ ዳዊቲ ኢስራኤሌ ቦላ ካዎታና ማላ ቲይዳ።
1CH 11:4 ዳዊቲኔ ኢስራኤሌ ኣሳይ ኡባይ ዬሩሳላሜ ካታማ ቢዳ፤ ሄ ዎዴ ያቡሴ ኣሳቲ ሄን ዲዛ ጊሻስ ሄ ካታማያ ያቡሴ ጌቴታዉስ።
1CH 11:5 ያቡሴ ኣሳቲ ዳዊቴ፥ «ኔኒ ሃ ካታማ ሙሌካ ጌላካ» ጊዳ፤ ጊዲኮካ ዳዊቲ ጺዮኔን ዲዛ ኢስታ ሚጻ ኦይኪዴስ፤ ሂስቲን ኢዛ ዳዊቴ ካታማ ጌቴታዱስ።
1CH 11:6 ዳዊቲ፥ «ኮይሮቲ ቢዲ ያቡሴ ኣሳታ ሾጪዛዴይ ኦላ ጋዳዋ ጊዳና» ጊዴስ፤ ሂስቲን ጹሪያ ና ኢዮኣቤይ ኮይሮቲ ቢ ኦሊዳ ጊሻስ ኦላ ጋዳዋ ጊዲዴስ።
1CH 11:7 ዳዊቲ ሄ ሚጻዮ ባስ ዱሳሶ ሂስቲዳ ጊሻስ ሚጻያ ዳዊቴ ካታማ ጌቴታዱስ።
1CH 11:8 ዳዊቲ ሄ ካታማይ ዩሾን ኬቻታ ኬጪዲ ካታማዮ ዛሪ ኬጺዴስ፤ ኣቲዳ ካታማ ቃሴ ኢዮኣቤይ ዛሪዲ ኬጺዴስ።
1CH 11:9 ኡባፌ ዎልቃማ ጎዳይ ኢዛራ ዲዛ ጊሻስ ዳዊቲ ሚኒ ሚኒ ቢዴስ።
1CH 11:10 ሚኖ ጊዲዳ ዳዊቴ ኦላንቻቲ ሃይሳፌ ካሊዲ ጻፌቲዳ፤ ኢስቲካ ሃንኮ ኢስራኤሌ ኣሳታራ ጊዲዲ ጎዳይ ኢዛስ ኢሚዳ ሂዶታ ቃላ ማላ ኢዛ ካዎቴꬃይ ኣካና ማላ ኬሂ ማዲዳኔ ሚንꬄꬂዳ።
1CH 11:11 ሚኖ ጊዲዳ ዳዊቴ ኦላንቻታፔ ኮይሮይሲ ሃኪሞኔ ዛርኬፌ ጊዲዳ ያሾቢኣሜ፤ ኢዚ ኦላ ጋዳዋ ሄꬓታስ ሃላቃ፤ ኢዚ ኢሲቶ ኦላን 300 ኣስ ዎꬊዴስ።
1CH 11:12 ሄ ሄꬑ ሚኖ ኦላንቻታፔ ናምኣንꬆዚ ኣሂሆሄ ዛርኬፌ ዶዴ ና ኤልኤዜሬ።
1CH 11:13 ፊሊስጼሜ ኣሳቲ ኦሌታናስ ኤፍሲ-ዴሚሜ ጌቴቲዛሶ ሺቂዳ ዎዴ ኣላዛሬይ ዳዊቴራ ኢሲፌ ዴስ፤ ባንጋይ ኩሚዳ ጎሻ ጋዴ ጊዶን ኢስራኤሌ ኦላንቻቲ ፊሊስጼሜታ ሲንꬃፌ ባቃቲዳ።
1CH 11:14 ጊዶ ኣቲን ኢዚኔ ኢዛ ካሊዛይቲ ሄን ሶሆ ኦይኪዲ ፊሊስጼሜ ኣሳታራ ኤቄቲዳ፤ ጎዳይ ኢስታስ ዎልቃማ ጾኖ ኢሚዴስ።
1CH 11:15 ፊሊስጼሜ ኦላንቻቲ ኤራፋይሜ ሾባን ዱንካኒ ዲዛ ዎዴ 30 ሃላቃታፔ ሄꬓቲ ዳዊቲ ዲዛሶ ኣዱላሜ ጎንጎሎ ማታን ዲዛ ዛላኮ ዎꬊዳ።
1CH 11:16 ሄ ዎዴ ዳዊቲ ሚጻ ጊዶን ዴስ፤ ፊሊስጼሜ ኦላንቻታ ቡቴይ ቤቴሊሄሜን ዴስ።
1CH 11:17 ዳዊቲ ሃꬅ ኡያናስ ኣሞቲዲ፥ «ቤቴሊሄሜ ካታማ ፔንጌ ላንቄን ዲዛ ፑልቶ ሃꬃፌ ታና ኦኔ ኡሻናይ!» ጊዴስ።
1CH 11:18 ሄꬑ ሚኖ ዳዊቴ ኦላንቻቲ ፊሊስጼሜ ኣሳቲ ዱንካኒ ኡቲዳሶሆራ ካንꬂ ቢዲ ቤቴሊሄሜ ካታማ ፔንጌን ዲዛ ፑልቶዛፔ ሃꬅ ዱቂዲ ዳዊቴስ ኤሂዳ፤ ጊዶ ኣቲን ዳዊቲ ኡዮንታ ኢጺዲ ሄ ሃꬃ ጎዳ ሲንꬃን ጉሲዴስ።
1CH 11:19 ሂስቲዲ፥ «ሃይሳ ማላ ኦሶፔ ታና ጾሲ ናጎ! ታ ሃይሳ ኡይኮ ባ ሼምፖ ባይዚዲ ኤሂዳ ኣሳታ ሱꬅ ኡሻ ማላ ጊዴኔ?» ጊዴስ፤ ሄሳ ጊሻስ ዳዊቲ ሄ ሃꬃ ኡዪቤና፤ ሄ ሄꬑ ሚኖ ኦላንቻቲ ሄሳ ኦꬂዳ።
1CH 11:20 ኢዮኣቤ ኢሻ ኣቢሳዬይ ሄꬓታስ ሃላቃ፤ ኢዚ ባ ቶራን 300 ኣሳታ ኦሊ ዎꬊዴስ፤ ሄሳ ጋሶን ኢዚካ ሄꬓታ ማላ ኤሬቲዴስ።
1CH 11:21 ኢዚ ሄꬓታራ ቆዴቶንታ ኣጊኮካ ኢስታፌ ኣꬊዳ ቦንቾ ዴሚዴስ፤ ኢስታስካ ሃላቃ ጊዲዴስ።
1CH 11:22 ቃብጺኤሌፔ ዪዳ ዮዳሄ ና ባናያይ ኤሬቲዳ ኦላንቻኔ ዎልቃማ ሚሽ ኦꬂዳ ኣሳ፤ ኢዚ ናምኡ ኤሬቲዳ ሞኣቤ ቢታ ኣሳታ ዎꬊዴስ፤ ቃሴ ሻቺ ዳሪዳ ኢሲ ጋላስ ጎንጎሎ ጊዶ ጌሊዲ ጋሞ ዎꬊዴስ።
1CH 11:23 ባናያይ ኢዛስ ጌሳይ ኢቻሹ ዋꬋ ጊዲዛ ጊብጼ ቢታ ኣስ ዎꬊዴስ፤ ሄ ጊብጼ ኣዴዛ ኩሼን ሼማኔ ዎንዲራሼ ኬና ቶራይ ዴስ፤ ባናያይ ጊዲኮ ጉፌ ኦይኪ ቢዲ ኢዛ ኩሼን ዲዛ ቶራ ዳፊ ኤኪዲ ኢዛ ቶራን ኢዛ ዛሪ ዎꬊዴስ።
1CH 11:24 ዮዳሄ ና ባናያይ ሃይታንታ ኦꬂዴስ፤ ኢዚካ ሄꬓታ ማላ ኤሬቲዳ ኣስ ጊዲዴስ።
1CH 11:25 ኢዚ ሄꬓታራ ቆዴቶንታ ኣጊኮካ 30 ኦላንቻታፔ ኣꬊ ቦንቼቲዴስ፤ ዳዊቲ ኢዛ ባና ናጊዛይታ ቦላ ሃላቃ ሂስቲ ሹሚዴስ።
1CH 11:26 ኣሳ ጊዶን ዲዛ ሚኖ ኦላንቻቲ ሃይሳፌ ካሊ ዲዛይታ፥ ኢዮኣቤ ኢሻ ኣሳሄሌ፥ ቤቴሊሄሜ ኣስ ዶዴ ና ኤልያኔ፥
1CH 11:27 ሃሮዴ ኣስ ሻሞቴ፥ ፒሎኔ ኣስ ሄሌጼ፥
1CH 11:28 ቴቁሄ ኣስ ኢቄሻ ና ኢራ፥ ኣናቶቴ ኣስ ኣቢኤዜሬ፥
1CH 11:29 ሁሼ ኣስ ሲቢካዬ፥ ኣሂሆሄ ኣስ ኤላዬ፥
1CH 11:30 ናጾፌ ኣስ ማሂራዬ፥ ናጾፌ ኣስ ባኣና ና ሄሌዴ፥
1CH 11:31 ቢኒያሜ ዛርኬፌ ጊቢኣ ኣስ ኤሪባዬ ና ኢታዬ፥ ፒራቶኔ ኣስ ባናያ፥
1CH 11:32 ጋኣሼ ሾባ ኣስ ሁራዬ፥ ኣራቤ ኣስ ኣቢኤሌ፥
1CH 11:33 ባሂሩሜ ኣስ ኣዚሞቴ፥ ሻልቦኔ ኣስ ኤሊያሂቤ፥
1CH 11:34 ጊዞኔ ኣስ ሃሼሜ፥ ሃራሬ ዴሬ ኣስ ሻጌ ና ዮናታኔ፥
1CH 11:35 ሃራሬ ዴሬ ኣስ ሳካሬ ና ኣሂኣሜ፥ ኡሬ ና ኤልፋሌ፥
1CH 11:36 ማኬሬ ዴሬ ኣስ ሄፌሬ፥ ፒሎኔ ዴሬ ኣስ ኣካያ፥
1CH 11:37 ቃርሜሎሴ ኣስ ሄጺሬ፥ ኤዝባዬ ና ናኢራዬ፥
1CH 11:38 ናታኔ ኢሻ ኢዩኤሌ፥ ኣጋሬ ና ሚቢሃሬ፥
1CH 11:39 ኣሞኔ ኣስ ዛላቃ፥ ጹሪያ ና ኢዮኣቤ ኦላ ማሳራ ቶኪዛ ቢኦሮቴ ኣስ ናሂራዬ፥
1CH 11:40 ያቲሬ ኣስ ኢራ፥ ያቲሬ ኣስ ጋሬቤ፥
1CH 11:41 ሂቴ ኣስ ኦሪዮ፥ ኣሂላዬ ና ዛባዴ፥
1CH 11:42 ኦሮቤሌ ዛርኬፌ ሺዛ ና ኣዲኔ፤ ኢዚ ኦሮቤሌ ዛርኬታሲኔ ባናራ ኢሲፌ ዲዛ 30 ኣሳታስ ሃላቃ።
1CH 11:43 ማኢካ ና ሃናኔ፥ ሚታኔ ኣስ ኢዮሳፊጼ፥
1CH 11:44 ኣሽታሮቴ ኣስ ኡዚያ፥ ኣሮኤሬ ዴሬ ኣስ ሆታሞ ናይታ ሻሜኔ ዪኢኤሌ፥
1CH 11:45 ሺሚሬ ና ዪዲኤሌኔ ኢዛ ኢሻ ቲዜቴ ዴሬ ኣስ ዮሃ፥
1CH 11:46 ማሃዌ ኣስ ኤልኤሌ፥ ኤልናሜ ናይታ ዪሪባያኔ ዮሻያ፥ ሞኣቤ ዴሬ ኣስ ዪቲማ፥
1CH 11:47 ኤልኤሌ፥ ኢዮቤዴኔ ጾቤ ዴሬ ኣስ ያኢሲኤሌ።
1CH 12:1 ዳዊቲ ቂሴ ና ሳኦሌፔ ባቃቲዲ ጺጊላጌን ኡቲዳ ዎዴ ኢዛኮ ዪዳ ኣሳቲ ሃይሳፌ ካሊዛይታ፤ ኢስቲካ ካሴ ኦላ ዎዴ ኢዛ ማዲዳ ኦላ ቃራታ ጊዶን ዴቴስ።
1CH 12:2 ኢስቲ ኡሻቻ ኩሼኒኔ ሃዲርሳ ኩሼን ዎንዳፌ ዱካናሲኔ ያንባርሼ ꬋይቃናስ ዳንዳይዛ ኦላንቻታ፤ ኢስቲካ ቢኒያሜ ዛሬ ጊዲዳ ሳኦሌስ ኣሾ ዳቦታ።
1CH 12:3 ኢስታ ሃላቃይ ጊቢኣ ኣስ ሻማኤ ና ኣሂኤዜሬኔ ኢዮኣሳ። ሃራቲ ቃሴ ኣዚሞቴ ና ዪዚኤሌኔ ፓሌጼ፥ ባራኬ፥ ኣናቶቴ ኣስ ኢዩ፥
1CH 12:4 ኤሬቲዳ 30 ኦላንቻታስ ሃላቃኔ ኤሬቲዳ ኦላንቻ ጌባኦኔ ዴሬ ኣስ ዪሺማኤ፥ ኤርማሳ፥ ያሃዚኤሌ፥ ዮሃናኔ፥ ጋዴሬ ዴሬ ኣስ ዮዛባዴ፥
1CH 12:5 ኤልኡዛዬ፥ ያርሞቴ፥ ባኣሊያ፥ ሻማሪያ፥ ሃሪፌ ኣስ ሻፋጺያ፥
1CH 12:6 ቆሬ ኣስ ሂልቃና፥ ዪሺያ፥ ኣዛሪኤሌ፥ ዮኤዜሬኔ ያሾቢኣሜ፥
1CH 12:7 ጋዶሬ ኣስ ዪሮሃሜ ና ዮኤሌኔ ዛባዲያ።
1CH 12:8 ዳዊቲ ባዞን ባቃቲ ኣቲዛሶን ዲዛ ዎዴ ጋዴ ዛርኬታፔ ኦላንቻቲ ኢዛኮ ዪዳ፤ ኢስቲካ ሚኖኔ ኦላስ ጊጌቲዳ ኣሳታ፤ ቃሴካ ጎንዳሌኔ ቶራ ኦይꬅ ዳንዳይዛይታ፤ ኢስታ ኣይፌሶይ ጋሞ ማላ ባቢሴስ፤ ኢስቲ ዙማ ቦላ ጉፒዛ ጌኔሳ ማላ ፒላቴቴስ።
1CH 12:9 ኢስታ ሃላቃይ ኮይሮይሲ ኤዜሬ፥ ናምኣንꬆዚ ኣብዲዩ፥ ሄꬓንꬆዚ ኤልያቤ፥
1CH 12:10 ኦይዳንꬆዚ ሚሺማኔ፥ ኢቻሻንꬆዚ ኤርማሳ፥
1CH 12:11 ኡሱፑንꬆይ ኣታዬ፥ ላፑንꬆዚ ኤልኤሌ፥
1CH 12:12 ኦስፑንꬆዚ ዮሃናኔ፤ ኡዱፉንꬆዚ ኤልዛባዴ፤
1CH 12:13 ታማንꬆዚ ኤርማሳ፤ ታማኔ ኢሲንꬆዚ ማኪባናዬ።
1CH 12:14 ሃይቲ ጋዴ ዛርኬታ ጋርሳን ኦላንቻታ ሃላቃታ፤ ኢስታፌ ዳሮቲ ሻላቃታ ማላ፥ ኣማርዳይቲ ማቶ ሃላቃታ ማላ ቆዴቲዳ።
1CH 12:15 ዮርዳኖሴ ሻፋይ ኪጻ ሳሎ ሼምፒዳ ኮይሮ ኣጊናን ፒኒዲ ዙላፌ ኣርሼይ ሞኪዛ ባጋራኔ ኣርሼይ ዉሊዛ ባጋራ ዱንካኒ ኡቲዳ ኣሳ ኡባ ዬዴꬂዳ።
1CH 12:16 ቢኒያሜ ዛርኬታፔኔ ዩሁዳ ዛርኬታፔ ኣማርዳ ኣሳቲ ዳዊቲ ዲዛሶ ሚጻ ዪዳ።
1CH 12:17 ሂስቲን ዳዊቲ ኢስታራ ጋይታና ኬኢዲ፥ «ኢንቴ ታና ማዳናስ ሳሮን ታኮ ዪዳ ጊዲኮ ታ ኢንቴና ኡፋይሳን ሞካ ኤካና፤ ጊዶ ኣቲን ኢንቴ ታና ታ ሞርኬታስ ኣꬂ ኢማናስ ዪዳ ጊዲኮ ኑ ኣዋታ ጾሳይ ሃይሳ ቤኢዲ ፒርዶ!» ጊዴስ።
1CH 12:18 ሄሳፌ ጉዬ 30 ኣሳታ ሃላቃ ኣማሳዬ ቦላ ጾሳ ኣያናይ ዎꬊን ኢዚ፥ «ዳዊቴ! ኑኒ ኔይታ! ኢሴዬ ና ዳዊቴ! ኑኒ ኔናራ ኢሲፌ ዶስ! ኔሲኔ ኔና ማዲዛይታስ ሳሮይ ጊዶ! ኔ ጾሳይ ኔና ማዳና» ጊዴስ። ሄሳ ጊሻስ ዳዊቲ ሞኪ ኤኪዲ ባ ኦላንቻታ ቦላ ሃላቃ ሂስቲዴስ።
1CH 12:19 ዳዊቲ ፊሊስጼሜታራ ኢሲፌ ጊዲዲ ሳኦሌ ኦላናስ ቢዳ ዎዴ ሚናሴ ዛርኬፌ ኣማርዳ ኣሳቲ ዳዊቴኮ ቢዲ ኢዛ ቆሚዳ፤ ጊዶ ኣቲን፥ «ዳዊቲኔ ኢዛ ኦላንቻቲ ኢስታ ካዎዛ ሳኦሌስ ኣꬂ ኢማናኮ» ጊ ሂርጊዳ ጊሻስ ፊሊስጼሜ ኣሳቲ ኬሂ ዞሬቲዳፔ ጉዬን ኢስታ ጉዬ ጺጊላጌ ዛሪዳ።
1CH 12:20 ዳዊቲ ጺጊላጌ ካታማ ሲሚሺን ኢዛ ማዳናስ ሚናሴ ዛርኬታፔ ኬዚ ዪዳ ሻላቃቲ ኣዲናሄ፥ ዮዛባዴ፥ ዪዲኤሌ፥ ሚካኤሌ፥ ዮዛባዴ፥ ኤሊሁኔ ጺልታዬ።
1CH 12:21 ኢስቲ ኡባቲካ ኤሬቲዳ ሚኖ ኦላንቻታ ጊዲዳ ጊሻስ ዳዊቴ ኦላ ዎታዳራታ ቦላ ሃላቃታ ጊዲዳ፤ ዳዊቴ ሞርኬታ ኦሊዲ ኢዛ ማዲዳ።
1CH 12:22 ዳዊቴ ኦላንቻቲ ጾሳ ኦላንቻታ ማላ ጮራታና ጋካናስ ኢዛ ማዲዛ ኣሳይ ጋላስ ጋላስ ጉጄቴስ።
1CH 12:23 ጎዳይ ኢሚዳ ሂዶታ ቃላ ማላ ሳኦሌ ካዎቴꬃ ዳዊቴስ ዛራናስ ዳዊቴኮ ኬብሮኔ ዪዳ ኦላ ታማርዳ ዎታዳራታ ቆዳይ ሃይሳፌ ካሊዛይሳ፤
1CH 12:24 ጎንዳሌኔ ቶራ ኦይኪዲ ኦላስ ጊጌቲዳ ዩሁዳ ዛርኬቲ ኡሱፑን ሺያኔ ኦስፑን ጼታ።
1CH 12:25 ሲሞና ዛርኬፌ ኦላስ ጊጊዳ ሚኖኔ ዎልቃማ ኦላንቻቲ ላፑን ሺያኔ ኢሲ ጼት።
1CH 12:26 ሌዌ ዛርኬፌ ኦይዱ ሺያኔ ኡሱፑን ጼት፥
1CH 12:27 ኣሮኔ ዛርኬታ ሃላቃ ዮዳሄ ጉጂን ሄꬑ ሺያኔ ላፑን ጼት።
1CH 12:28 ኤሬቲዳ ኦላንቻ ሳዶቄ ዳቦታ ጊዶፌ ኢዛራ ጉጂን ናምኡ ታማኔ ናምኣ።
1CH 12:29 ቢኒያሜ ዛርኬፌ ሳኦሌ ዳቦቲ ሄꬑ ሺያ። ጊዶ ኣቲን ቢኒያሜ ዛርኬፌ ዳሪዛ ባጋቲ ሳኦሌ ኬꬃ ኣሳስ ሄ ዎዴይ ጋካናስ ኣማኔቲዛይታ።
1CH 12:30 ኤፍሬሜ ዛርኬፌ ባንታ ኣዋታ ኬꬃን ኤሬቲዳ ሚኖቲ ናምኡ ታሙ ሺያኔ ኦስፑን ጼት።
1CH 12:31 ዳዊቴ ካዎꬃናስ ዶሬቲዳ ሚናሴ ዛርኬ ባጋፌ ታማኔ ኦስፑን ሺያ።
1CH 12:32 ኢስራኤሌ ኣሳይ ኣይ ኦꬃናስ ቤሲዛኮ ዎዴዛ ሻኪ ኤሪዛ ኣꬎ ኤራንቻቲኔ ዪሳኮሬ ዛርኬ ሃላቃቲ ናምኡ ጼት፤ ኢስታራ ዪዳ ኢስታ ዳቦቲ ኡባይ ኢስታስ ኣዛዜቴቴስ።
1CH 12:33 ኦላ ሜዜቲዳይቲ፥ ኦላ ማሳራ ኡባን ኦሌታናስ ዳንዳይዛይቲኔ ዎዚናይ ባላቶንታ ዳዊቴ ማዳናስ ዪዳ ዛቢሎኔ ባጋቲ ኢቻሽ ታሙ ሺያ።
1CH 12:34 ኒፍታሌሜ ዛርኬታስ ኢሲ ሺያ ሃላቃቲ ዴቴስ፤ ጎንዳሌኔ ቶራ ኦይኪዳ ሄꬑ ታማኔ ላፑን ሺ ኣሳቲ ኢስታራ ኢሲፌ ዴቴስ።
1CH 12:35 ዳኔ ዛርኬፌ ኦላስ ጊጌቲዳ ኣሳቲ ናምኡ ታማኔ ኦስፑን ሺያኔ ኡሱፑን ጼት።
1CH 12:36 ኣሴሬ ዛርኬፌ ኦላ ሜዜቲዲ ጊጌቲዳ ኦላንቻቲ ኦይዱ ታሙ ሺያ።
1CH 12:37 ዮርዳኖሴ ሻፋፔ ኣርሼይ ሞኪዛ ባጋን ዲዛ ኦሮቤሌ ዛርኬታፔ፥ ጋዴ ዛርኬታፔኔ ሚናሴ ዛርኬ ባጋፌ ዱማ ዱማ ቆሞ ማሳራ ኦይኪዲ ዪዳ ኣሳቲ ጼታኔ ናምኡ ታሙ ሺያ።
1CH 12:38 ሃ ኦላስ ጊጊዳ ኦላንቻቲ ኡባይ ዳዊቴ ኢስራኤሌ ቦላ ካዎꬃናስ ባንታ ቆፋ ኢሲ ቦላ ቃቺዲ ኬብሮኔ ካታማ ዪዳ፤ ቃሴ ሃንኮ ኣቲዳ ኢስራኤሌ ዴሬ ኡባይ ዳዊቴ ካዎꬃናስ ኢሲ ዎዚናን ጊዲዴስ።
1CH 12:39 ኢስታ ዳቦቲ ኢስታስ ኮሺዛይሳ ጊግሲ ዎꬂዳ ጊሻስ ሚሼኔ ኡዪሼ ዳዊቴኮን ሄꬑ ጋላስ ጋምኢዳ።
1CH 12:40 ኢስራኤሌ ኣሳስ ጊታ ኡፋይስ ጊዲዛ ጊሻስ ኢስታ ሾሮፔ ዶሚዲ ሃኮን ዲዛ ዪሳኮሬፔ፥ ዛቢሎኔፔኔ ኒፍታሌሜፔ ኣሳይ ኣቶንታ ካꬅ፥ ꬊሌ፥ ባላሴኔ ዛቢቤ ኮምፓ፥ ዎይኔ ኡሺኔ ዎጋራ ዛይቴ ሃሬን፥ ባቁሎን፥ ጋሜላኒኔ ቦራን ጫኒዲ ኤሂዴስ፤ ቃሴካ ኢስቲ ሹኪ ማና ማላ ሚዛታኔ ዶርሳታ ኤኪ ዪዳ።
1CH 13:1 ሄሳፌ ጉዬ ዳዊቲ ሻላቃታራ፥ ማቶ ሃላቃታራኔ ኦላንቻ ሃላቃታ ኡባታራ ዞሬቲዴስ።
1CH 13:2 ሂስቲዲ ኢስራኤሌ ኣሳ ኡባስ፥ «ኢንቴስ ሎኦ ሚሳቲዛይሳ ጊዲኮኔ ጎዳ ኑ ጾሳ ሼኔ ጊዲኮ ኢስራኤሌ ቢታን ማታኒኔ ሃኮን ዲዛ ኑ ኢሻቲ ቃሴካ ባንታ ካታማታኒኔ ባንታ ሜሄ ሄሚዛሶሆታን ዲዛ ቄሴቲኔ ሌዌቲ ኑናራ ኢሲፌ ሺቃና ማላ ኣኔ ኪታ ዬዶስ።
1CH 13:3 ሳኦሌ ካዎቴꬃ ዎዴ ኑኒ ዬጊ ኣጊዳ ኑ ጾሳ ታቦታ ኣኔ ዛሪዲ ኤሆስ» ጊዴስ።
1CH 13:4 ዳዊቲ ዮቲዳይሲ ኣማንꬂዛዝ ጊዲዳ ጊሻስ ኣሳይ ኢዛ ቆፋ ኤኪዴስ።
1CH 13:5 ሄሳ ጊሻስ ዳዊቲ ጾሳ ታቦታ ቂሪያቴ-ዪኣሪሜፔ ኤሃና ማላ ጊብጼ ዛዋፔ ዶሚዲ ሃማቴ ፑርዴ ጋካናስ ዲዛ ኢስራኤሌ ኣሳ ኡባ ሺሺዴስ።
1CH 13:6 ዳዊቲኔ ኢስራኤሌ ኣሳይ ኡባይ ኪሩቤታፔ ጊዶን ባ ኣራታ ቦላ ኡቲዳ ጎዳ ሱንꬃን ጼይጌቲዳ ጾሳ ታቦታ ኤሃናስ ዩሁዳ ቢታን ዲዛ ባኣላ ጌቴቲዛ ቂሪያቴ-ዪኣሪሜ ካታማ ቢዳ።
1CH 13:7 ጾሳ ታቦታዛ ኣቢናዳቤ ሶፔ ኦራꬃ ፓራ-ጋሬ ቦላ ዎꬂ ኤሂዳ፤ ፓራ-ጋሬዛ ላጊዛይቲ ኦዛኔ ኣሂዮ።
1CH 13:8 ዳዊቲኔ ኢስራኤሌ ኣሳይ ኡባይ ዲꬃን ማሲንቆን፥ ካራቤን፥ ዳላኒኔ ጹሩምባን ባንታ ኩሜꬃ ዎልቃን ጾሳ ሲንꬃን ኡፋዬቲዲ ቦንቺዳ።
1CH 13:9 ኢስቲ ኪዶና ጌቴቲዛሶን ዲዛ ካꬃ ባሌዛኮ ጋኪዳ ዎዴ ጫኒዳ ቦራቲ ባርጋጊ ꬉጴቲን ኦዛይ ታቦታዛ ኣሻናስ ኩሼ ዬዲዴስ።
1CH 13:10 ኢዛ ኩሼይ ታቦታዛ ቦቺዳ ጊሻስ ጎዳ ሃንቆይ ኦዛ ቦላ ኤጺ ኬዚዴስ፤ ሄሳ ጊሻስ ኢዚ ሄን ጎዳ ሲንꬃን ሃይቂዴስ።
1CH 13:11 ጎዳይ ሃንቄቲዲ ኦዛ ዎꬊዳ ጊሻስ ዳዊቲ ካዮቲዴስ፤ ሃች ጋካናስ ሄ ሶሆይ ኦዛ ሜቆሶ ጌቴቴስ።
1CH 13:12 ሄ ጋላስ ዳዊቲ ጾሳስ ያዪዳ ጊሻስ፥ «ጾሳ ታቦታ ታኮ ዎስታ ኤሃናስ ዳንዳያዚና?» ጊዴስ።
1CH 13:13 ሄሳ ጊሻስ ዳዊቲ ታቦታዛ ባናራ ኤፋናፔ ጌቴ ዴሬ ኣስ ኣቢዳሬሶ ኤፊዴስ።
1CH 13:14 ጾሳ ታቦታይ ኣቢዳሬሶን ኢዛሶ ኣሳታራ ሄꬑ ኣጊና ጋምኢዴስ፤ ጎዳይ ኢዛ ኬꬃ ኣሳኔ ኢዛስ ዲዛ ሚሽ ኡባ ኣንጂዴስ።
1CH 14:1 ጺሮሴ ካዎ ሁራሜይ ዳዊቴስ ካዎ ኬꬅ ኬጻና ማላ ኪታ ኣሳታ፥ ሹች ማሲዛይታኔ ኣናጼታ ዚጋ ሚꬃራ ዳዊቴኮ ዬዲዴስ።
1CH 14:2 ጎዳይ ኢስራኤሌ ቦላ ኢዛ ካዎꬂዳይሳኔ ባ ኣሳ ኢስራኤሌ ጊሻስ ኢዛ ካዎቴꬃ ꬎቁ ሂስቲ ቦንቺዳይሳ ዳዊቲ ኣኬኪዴስ።
1CH 14:3 ሄሳፌ ጉዬ ዳዊቲ ዬሩሳላሜን ሃራ ማቼታ ጉጂ ኤኪዲ ኣቱማ ናይታኔ ማጫ ናይታ ዬሊዴስ።
1CH 14:4 ዳዊቲ ዬሩሳላሜን ዬሊዳ ኣቱማ ናይቲ ሻሙኤ፥ ሾባቤ፥ ናታኔ፥ ሶሎሞኔ፥
1CH 14:5 ኢያቤሄሬ፥ ኤልሹኤ፥ ኤልፓሌጼ፥
1CH 14:6 ኖጋሄ፥ ኔፌጌ፥ ናፊያ፥
1CH 14:7 ኤልሻማኤ፥ ቤኤልያዴኔ ኤልፋሌጼ።
1CH 14:8 ዳዊቲ ኢስራኤሌ ኡባ ቦላ ካዎ ጊዲዲ ቲዬቲዳይሳ ፊሊስጼሜ ኣሳይ ሲዪዲ ኡባይ ዳዊቴ ኦይካናስ ኬኢዴስ፤ ዳዊቲ ሄሳ ሲዪዲ ኢስታራ ኦሌታናስ ኬዚዴስ።
1CH 14:9 ፊሊስጼሜ ኣሳይ ኤራፋይሜ ዙሌዛ ዪዲ ዎራጂዴስ።
1CH 14:10 ዳዊቲካ፥ «ታኒ ባዳ ፊሊስጼሜታ ኦሎ? ኔኒ ኢስታ ታ ኩሼን ኣꬃ ኢማኔ?» ጊ ጾሳ ኦይቺዴስ። ሂስቲን ጎዳይ ኢዛስ፥ «ኤ ባዳ ኦላ፤ ታኒ ኢስታ ኔስ ኣꬃ ኢማና» ጊዴስ።
1CH 14:11 ሂስቲን ዳዊቲኔ ኢዛራ ዲዛ ኣሳይ ባኣሊ-ፓራጺሜ ጌቴቲዛሶ ቢዲ ሄን ኢስታ ኦሊ ጾኒዳ፤ ዳዊቲ፥ «ዲኦ ሃꬂ ሾዲ ኤፊዛ ማላ ጾሲ ታ ሞርኬቲ ታ ኩሼን ሾዴታና ማላ ኦꬂዴስ» ጊዴስ፤ ሄሳ ጊሻስ ሄ ሶሆዛ ሱንꬂ ባኣሊ-ፓራጺሜ ጌቴቲዴስ።
1CH 14:12 ፊሊስጼሜቲ ባንታ ኤቃ ጾሳታ ሄን ዬጊ ቢዳ። ሂስቲን ዳዊቲ ኢስታ ኤቃ ጾሳታ ታማን ጹጋና ማላ ኣዛዚዴስ።
1CH 14:13 ፊሊስጼሜ ኣሳይ ናምኣንꬆ ዪዲ ሄ ሾባ ዎራጂዴስ።
1CH 14:14 ዳዊቲ ጾሳ ናምኣንꬆ ዛሪ ኦይቺዴስ፤ ሂስቲን ጾሲ ኢዛስ፥ «ኔኒ ኢስታ ቦላ ሲቲ ጋዳ ቦፓ። ኢስታ ጊዶꬃዳ ኤꬃ ሚꬃስ ሲንꬃ ባጋራ ኢስታ ኦላናስ ጊጌታ።
1CH 14:15 ኤꬃ ሚꬃዛ ጼራን ሳልፌ ጊሪስ ኔኒ ሲዪዳ ዎዴ ኦላናስ ኤሌ ኬዛ፤ ጋሶይካ ሄሲ ፊሊስጼሜ ኦላንቻታ ሾጫናስ ጾሳይ ኔፔ ሲንꬃን ኬዚዳ ጊሻሳ ጉሳ» ጊዴስ።
1CH 14:16 ሄሳ ጊሻስ ጾሳይ ኣዛዚዳ ማላ ዳዊቲ ኦꬂዴስ። ጌባኦኔፔ ቢዲ ጌዜሬ ጋካናስ ኢስራኤሌ ኣሳይ ፊሊስጼሜ ኦላንቻታ ዲፒ ሂስቲዴስ።
1CH 14:17 ሄሳ ጋሶን ዳዊቴ ጎባቴꬂ ቢታ ኡባን ናሼቲዴስ። ጎዳይ ካዎቴꬃቲ ኡባይ ዳዊቴስ ያያና ማላ ኦꬂዴስ።
1CH 15:1 ዳዊቲ ባ ሱንꬃን ጼይጌቲዳ ካታማን ባስ ኬꬃታ ኬጺዴስ፤ ጾሳ ታቦታሲካ ሶሆ ጊግሲዲ ዱንካኔ ኤሲዴስ።
1CH 15:2 ሄሳፌ ጉዬ ዳዊቲ፥ «ጾሳ ታቦታ ቶካናሲኔ ሜርናስ ጾሳስ ሃጋዛና ማላ ጎዳይ ዶሪዳ ሌዌታፔ ኣቲን ሃራ ኣሲ ኦኒካ ጾሳ ታቦታ ቶኮፎ» ጊ ኣዛዚዴስ።
1CH 15:3 ዳዊቲ ጎዳ ታቦታስ ጊግሲዳ ሶሆ ታቦታዛ ኤሃና ማላ ኢስራኤሌ ኣሳ ኡባ ዬሩሳላሜን ሺሺዴስ።
1CH 15:4 ቃሴካ ኣሮኔ ዛሬታኔ ሌዌታ ጼይጊ ሺሺዴስ፤
1CH 15:5 ቃኣቴ ዜሬꬃታፔ ሃላቃ ጊዲዳ ኡርኤሌኔ ኢዛ ዳቦታፔ ኢሲ ጼታኔ ናምኡ ታማ፤
1CH 15:6 ሜራሬ ዜሬꬃታፔ ሃላቃ ኣሳያኔ ኢዛ ዳቦታፔ ናምኡ ጼታኔ ናምኡ ታማ፤
1CH 15:7 ጌርሾኔ ዜሬꬃታፔ ሃላቃ ኢዩኤሌኔ ኢዛ ዳቦታፔ ኢሲ ጼታኔ ሄꬑ ታማ፤
1CH 15:8 ኤልጻፋኔ ዜሬꬃታፔ ሃላቃ ሻማኤኔ ኢዛ ዳቦታፔ ናምኡ ጼታ፤
1CH 15:9 ኬብሮኔ ዜሬꬃታፔ ሃላቃ ኤልኤሌኔ ኢዛ ዳቦታፔ ኦስፑን ታማ፤
1CH 15:10 ኡዚኤሌ ዜሬꬃታፔ ሃላቃ ኣሚናዳቤኔ ኢዛ ዳቦታፔ ኢሲ ጼታኔ ታማኔ ናምኣ።
1CH 15:11 ሄሳፌ ጉዬ ዳዊቲ ቄሴታ ሳዶቄኔ ኣቢያታሬ፥ ቃሴ ሌዌታ ኡርኤሌ፥ ኣሳያ፥ ኢዩኤሌ፥ ሻማኤ፥ ኤልኤሌኔ ኣሚናዳቤ ጼይጊዴስ።
1CH 15:12 ሂስቲዲ ኢስታስ፥ «ኢንቴ ሌዌ ኬꬃ ኣሳታስ ሃላቃታ ጊዲዳ ጊሻስ ኢንቴና ጌሺቴ፤ ሄሳፌ ጎዳ ኢስራኤሌ ጾሳ ታቦታ ታ ኢዛስ ጊግሲዳሶ ኤሂቴ።
1CH 15:13 ካሴካ ኢንቴ ሌዌ ቆሞቲ ጾሳ ታቦታ ቶኮንታ ኣጊዳ ጊሻሲኔ ኑኒካ ኢዛ ዎጋ ማላ ዎስቲ ኤፋናኮ ጾሳ ኦይቾንታ ኣጊዳ ጊሻስ ጎዳ ኑ ጾሳይ ኑና ቃጻይዴስ» ጊዴስ።
1CH 15:14 ሄሳ ጊሻስ ጎዳ ኢስራኤሌ ጾሳ ታቦታ ኤሃናስ ቄሴቲኔ ሌዌቲ ባንታና ጌሺዳ።
1CH 15:15 ጎዳይ ሙሴ ባጋራ ካሴ ኣዛዚዳ ማላ ሌዌቲ ጾሳ ታቦታ ቶሆ ሚꬃራ ባንታ ሃሼን ቶኪዳ።
1CH 15:16 ሄሳፌ ጉዬ ዲꬂኔ ማሲንቆ ዲጺሼ፥ ዳላ ቃꬂሼ፥ ኡፋይሳ ማዛሙሬ ዬጻና ማላ ሌዌታ ካሌꬂዛይቲ ባንታ ዳቦታ ጋርሳፌ ኣስ ዶራና ማላ ዳዊቲ ኣዛዚዴስ።
1CH 15:17 ሄሳ ጊሻስ ሌዌቲ ኢዩኤሌ ና ሄማኔ፥ ኢዛ ዳቦታፔ ባራካዬ ና ኣሳፌኔ ኢስታ ኢሻንታፌ ሜራሬ ዛርኬ ቂሲያ ና ኤታኔ ሹሚዳ።
1CH 15:18 ቃሴ ናምኣንꬆ ማራን ዛካራሳ፥ ያኢዚኤሌ፥ ሻሚራሞቴ፥ ዪሂኤሌ፥ ኡኔ፥ ኤልያቤ፥ ባናያ፥ ማኢሳያ፥ ማቲቲያ፥ ኤልፋሌሁ፥ ሚቂኔያኔ ፔንጌ ናጊዛይታ ኦቤድ-ኤዶሜኔ ዪኢኤሌ ሱንꬂዳ።
1CH 15:19 ጻርቂማላ ዳላ ꬎቁ ሂስቲ ጊሪሲ ሲሳና ማላ ሄማኔ፥ ኣሳፌኔ ኤታኔ ሱንꬂዳ።
1CH 15:20 ቃሴ ማሲንቆ ካኣና ማላ ዛካራሳ፥ ያኢዚኤሌ፥ ሻሚራሞቴ፥ ዪሂኤሌ፥ ኡኔ፥ ኤልያቤ፥ ማኢሳያኔ ባናያ ሱንꬂዳ።
1CH 15:21 ዲꬅ ኦርዴራ ሾጫና ማላ ማቲቲያ፥ ኤልፋሌሁ፥ ሚቂኔያ፥ ኦቤድ-ኤዶሜ፥ ዪኢኤሌኔ ኣዛዚያ ሱንꬂዳ።
1CH 15:22 ሌዌታ ሃላቃ ካናኒያ ዬꬃስ ኢሞታይ ኢዛስ ዲዛ ጊሻስ ዬጺዛይታ ታማርሳና ማላ ሱንꬂዳ።
1CH 15:23 ባራካዬይኔ ሂልቃናይ ታቦታ ዱንካኔ ፔንጌ ናጋናስ ዶሬቲዳ።
1CH 15:24 ቃሴ ቄሴቲ ሼባኒያ፥ ኢዮሳፊጼይ፥ ናቲናኤሌይ፥ ኣማሳዬይ፥ ዛካራሲ፥ ባናያይኔ ኤልኤዜሬይ ጾሳ ታቦታ ሲንꬃን ጹሩምባ ፑናናስ ዶሬቲዳ፤ ኦቤድ-ኤዶሜይኔ ዪሂያይ ታቦታ ናጋናስ ዶሬቲዳ።
1CH 15:25 ሄሳፌ ጉዬ ዳዊቲ፥ ኢስራኤሌ ጪማቲኔ ሻላቃቲ ጎዳ ታቦታ ኦቤድ-ኤዶሜ ሶፔ ኤሃናስ ኡፋዬቲዲ ቢዳ።
1CH 15:26 ጫቆ ቃላ ታቦታ ቶኪዳ ሌዌታ ጾሳይ ማዲዳ ጊሻስ ኢስቲ ላፑን ኮርማ ቦራታኔ ላፑን ꬋርሾታ ያርሺዳ።
1CH 15:27 ዳዊቲ፥ ታቦታ ቶኪዳ ሌዌቲ ኡባይ፥ ዬꬃ ዬጺዛይቲኔ ኢስታ ሃላቃ ካናኒያ ቃጪናፔ ዳዴቲዳ ላይኖ ማይኢዳ፤ ቃሴካ ዳዊቲ ሌኤ ቃጪናፔ ዳዴቲዳ ኤፉዴ ማይኢዴስ።
1CH 15:28 ሂስቲዲ ኢስራኤሌ ኡባይ ሆምቦጪሼ ጹሩምባኔ ዛዬ ፑኒሼ፥ ዳላ ጊሪሲሼ፥ ዲꬂኔ ማሲንቆ ዲጺሼ ጎዳ ታቦታ ኤሂዳ።
1CH 15:29 ጫቆ ቃላ ታቦታይ ዳዊቴ ካታማ ጌሊሺን ካዎ ዳዊቲ ኡፋዬቲዲ ዱሪሺኒኔ ካኢሺን ሳኦሌ ናያ ሚልኮላ ማስኮቴራ ሞካ ጼላዳ ካዎ ዳዊቴ ባ ዎዚናራ ካꬋዱስ።
1CH 16:1 ኢስቲ ጾሳ ታቦታ ኤሂዲ ዳዊቲ ታቦታ ዎꬃናስ ቶሊዳ ዱንካኔዛ ጊዶን ዎꬂዳ፤ ሂስቲዲ ጹጌቲዛ ያርሾኔ ኢሲፌቴꬃ ያርሾ ጾሳስ ያርሺዳ።
1CH 16:2 ዳዊቲ ጹጌቲዛ ያርሾዛኔ ኢሲፌቴꬃ ያርሾ ያርሺዳፔ ጉዬ ጎዳ ሱንꬃን ዴሬዛ ኣንጂዴስ።
1CH 16:3 ሄሳፌ ጉዬ ኢስራኤሌ ኣሳ ኡባስ፥ ማጫሳሲኔ ኣቱማሳስ፥ ሁኤን ሁኤን ኢሲ ኢሲ ጉꬃ ኡኬꬅ፥ ኢሲ ኢሲ ቃንጾ ኣሾኔ ኢሲ ኢሲ ዛቢቤ ኮምፓ ጊሺዴስ።
1CH 16:4 ጎዳ ታቦታ ሲንꬃን ኦꬃና ማላኔ ጎዳ ኢስራኤሌ ጾሳ ዎሳናስ፥ ሳባናሲኔ ጋላታናስ ዳዊቲ ሌዌ ቆሞታፔ ጉꬃታ ሱንꬂዴስ።
1CH 16:5 ሌዌታ ሃላቃይ ኣሳፌ፤ ኢዛፔ ጋርሳራ ዛካራሳ፤ ዛካራሳራ ዲዛይቲ ዪኢኤሌ፥ ሻሚራሞቴ፥ ዪሂኤሌ፥ ማቲቲያ፥ ኤልያቤ፥ ባናያኔ ኦቤድ-ኤዶሜኔ ዪኢኤሌ፤ ሄይቲ ማሲንቆኔ ዲꬅ ዲጻና ማላ ሱሚዳ፤ ኣሳፊ ጊዲኮ ዳላ ቃꬃናስ ሱሚዴስ።
1CH 16:6 ቄሴ ባናያይኔ ያሃዚኤሌይ ጾሳ ታቦታ ሲንꬃን ኡባ ዎዴ ዛዬ ፑናና ማላ ሱሚዳ።
1CH 16:7 ሄ ጋላስ ዳዊቲ ካሴቲዲ ኣሳፌሲኔ ኢዛራ ኦꬂዛ ላጌታስ ጎዳ ጋላቲዛ ዬꬃ ኢሚዴስ።
1CH 16:8 ጎዳ ጋላቲቴ፤ ኢዛ ሱንꬃ ጼይጊቴ፤ ኢዚ ኦꬂዳ ኡባ ካዎቴꬃታስ ዮቲቴ።
1CH 16:9 ኢዛ ሳቢቴ፤ ጋላታ ዬꬃካ ኢዛስ ዬጺቴ፤ ኢዚ ኦꬂዳ ማላሊሲዛ ኦሶ ኡባ ዮቲቴ።
1CH 16:10 ኢዛ ጌሻ ሱንꬃን ቦንቺቴ፤ ጎዳ ኮይዛይታ ዎዚናይ ኡፋዬቶ።
1CH 16:11 ጎዳኔ ኢዛ ዎልቃ ጾሞሲቴ፤ ኡባ ዎዴ ኢዛ ኮዪቴ።
1CH 16:12 ኢዚ ኦꬂዳ ማላሊሲዛ ኦሶታ፥ ማላታታኔ ኢዛ ፒርዳ ኣኬኪቴ።
1CH 16:13 ኢንቴኖ ጾሳ ኣይሌ ኢስራኤሌ ዜሬꬃቶ! ኢንቴኖ ዶሬቲዳ ያቆቤ ናይቶ!
1CH 16:14 ኢዚ ጎዳይ ኑ ጾሳ፤ ኢዛ ፒርዳይ ኡባ ቦላና።
1CH 16:15 ባ ጫቂዳ ቃላ ሜርናስ፥ ባ ኣዛዚዳይሳካ ሺ ዬሌታ ጋካናስ ቆፔስ።
1CH 16:16 ኣብራሃሜስ ጫቂዳ ጫቃ፥ ዪሳቃስ ኢሚዳ ሂዶታ ቃላ፥
1CH 16:17 ያቆቤስ ዎጋ ጊዳና ማላ፥ ኢስራኤሌሲካ ሜርና ጫቆ ቃላ ጊዳና ማላ ሚንꬂዴስ።
1CH 16:18 «ካናኔይ ኔስ ጺንጾ ጊዳና ማላ ታ ኔና ላቲሳና» ጊዴስ።
1CH 16:19 ኢስቲ ቆዳን ጉꬅ ጊዲ ዲዛ ዎዴ፥ ዴራሲካ ኢማꬅ ጊዲ ዲዛ ዎዴ፥
1CH 16:20 ኢሲ ዴሬፔ ሃራ ዴሬ፥ ኢሲ ካዎቴꬃፌ ሃራ ካዎቴꬅ ቶይላቲዳ።
1CH 16:21 ኦኒካ ኢስታ ኡንኤꬃና ማላ ኣꬂ ኢሚቤና፤ ኢስታ ጊሻስ ካዎታ ሴሪዴስ፤
1CH 16:22 «ታ ቲይዳይታ ቦቾፍቴ፤ ታ ናቤታ ቆሆፒቴ» ጊዴስ።
1CH 16:23 ቢታ ኡባይ ጎዳስ ዬጺቴ፤ ኢዚ ኣሺዛይሳ ሃች ሃች ዮቲቴ።
1CH 16:24 ካዎቴꬃታስ ኢዛ ቦንቾ ኣዋጂቴ፤ ኢዚ ኦꬂዳ ማላሊሲዛ ሚሻታ ዴሬ ኡባስ ዮቲቴ።
1CH 16:25 ጎዳይ ጊታ፤ ኢዛስ ቤሲዛ ጋላታይካ ꬎቃ፤ ጾሳታ ኡባፌ ኣꬌስ፤ ኢዛስ ያያናስ ቤሴስ።
1CH 16:26 ኣይዛቤታ ጾሳቲ ኡባይ ኤቃ ጾሳታ፤ ጎዳይ ጊዲኮ ሳሎታ ሜꬊዳ ጾሳ።
1CH 16:27 ቦንቾይኔ ቴማይ ኢዛስ ዴስ፤ ሚኖቴꬂኔ ኡፋይሲ ኢዛ ኬꬃን ዴስ።
1CH 16:28 ኢንቴኖ ኣሳ ዛሬ ኡባቶ! ጎዳ ሳቢቴ፤ «ቦንቾይኔ ዎልቃይ ጎዳሳ» ጊ ዮቲቴ።
1CH 16:29 ጎዳ ሱንꬃስ ቤሲዛ ቦንቾ ኢሚቴ፤ ያርሾ ኤኪዲ ኢዛ ሲንꬅ ሺቂቴ፤ ኢዛ ጌሻቴꬃ ቦንቾ ጊሻስ ጎዳስ ጎይኒቴ።
1CH 16:30 ቢታን ዲዛ ኣስ ኡባይ ኢዛ ሲንꬃን ኮኮሪቴ፤ ሳኣይ ሚኒ ኤቂዴስ፤ ሙሌካ ቃጼና።
1CH 16:31 ሳሎቲ ኡፋዬቴቶ! ሳኣይካ ሃሹ ጎ! ካዎቴꬃታ ጊዶን ኢስታስ፥ «ጎዳይ ካዎቲዴስ!» ጌቶ።
1CH 16:32 ኣባይኔ ኢዛ ጊዶን ዲዛ ኡባይ ጉሜቶ፤ ዴምባቲኔ ኢስታ ቦላ ዲዛ ኡባቲ ኡፋዬቴቶ።
1CH 16:33 ኢዚ ቢታ ቦላ ፒርዳናስ ያና። ሄ ዎዴ ዎራ ሚꬃቲ ጎዳ ጾሳ ሲንꬃን ኡፋይሳን ዬጻና።
1CH 16:34 ጎዳይ ኪያ፤ ኢዛ ማሮቴꬃይካ ሜርናሳ፤ ሄሳ ጊሻስ ጎዳ ጋላቲቴ።
1CH 16:35 «ኣቤት ኑና ኣሺዛ ጎዳዉ! ኑና ኣሻ፤ ኔ ጌሻ ሱንꬃ ኑ ጋላታና ማላ፥ ኑ ኔና ጋላታን ቦንቻና ማላ ካዎቴꬃታ ጊዶፌ ኑና ሺሻዳ ኣሻ» ጊቴ።
1CH 16:36 ጎዳ ኢስራኤሌ ጾሳይ ሜርናፔ ሜርና ጋካናስ ጋላቴቶ! ሄሳፌ ጉዬ ዴሬ ኡባይ፥ «ኣሚን» ጊዲ ጎዳ ጋላቲዴስ።
1CH 16:37 ጎዳ ታቦታ ሲንꬃን ሃች ሃች ጎይኖስ ኮሺዛዝ ኡባ ዎዴ ኢስቲ ኦꬃና ማላ ዳዊቲ ኣሳፌኔ ኢዛ ዳቦታ ዎꬂዴስ።
1CH 16:38 ቃሴካ ኦቤድ-ኤዶሜኔ ኢዛ ዳቦታ ኡሱፑን ታማኔ ኦስፑናታ ኢስታራ ኦꬃና ማላ ዎꬂዴስ፤ ኤዶታኔ ና ኦቤድ-ኤዶሜኔ ሆሳ ዲርሳ ፔንጌ ናጋና ማላ ዎꬂዴስ።
1CH 16:39 ቄሴ ሳዶቄኔ ኢዛራ ኦꬂዛ ቄሴቲ ጌባኦኔን ꬎቃሶሆን ዲዛ ጎዳ ዱንካኔዛ ሲንꬃን ኦꬃና ማላ ሄን ዎꬂዴስ።
1CH 16:40 ጋሶይካ ጎዳይ ኢስራኤሌስ ኢሚዳ ዎጋ ማላ ኢስቲ ኡባ ዎዴ ጹጌቲዛ ያርሾይ ያርሼቲዛሶን ማላዶኔ ኦማርስ ጹጌቲዛ ያርሾ ያርሻናሳ።
1CH 16:41 ኢዛ ማሮታይ ሜርናስ ጊዲዳ ጊሻስ ጎዳ ጋላታና ማላ ሄማኔ፥ ኤዶታኔኔ ዶሬቲዳ ሃራታ ዳዊቲ ኢስታራ ኢሲፌ ኤሲዴስ።
1CH 16:42 ሄማኔሲኔ ኤዶታኔስ ጹሩምባ ፑናናስ፥ ዳላ ጊሪሳናሲኔ ዬꬃ ዬጺሼ ጎኤቲዛ ሃራ ማሳራታ ቦላ ኣዋቴꬂ ኢስታስ ኢሜቲዴስ፤ ኤዶታኔ ናይቲ ዲርሳ ፔንጌ ናጋና ማላ ኣላፌቴꬂ ኢሜቲዴስ።
1CH 16:43 ሄሳፌ ጉዬ ኡባ ኣሳይ ባሶ ባሶ ቢዴስ፤ ዳዊቲካ ባሶ ኣሳ ኣንጃናስ ሶ ሲሚዴስ።
1CH 17:1 ዳዊቲ ባ ካዎቴꬃ ኬꬃን ዴኢሼ፥ ናቤ ናታኔስ፥ «ታኒ ዚጋፔ ኬጼቲዳ ኬꬃን ዴኣይስ፤ ጊዶ ኣቲን ጾሳ ጫቆ ቃላ ታቦታይ ጊዲኮ ዱንካኔ ጊዶን ዴስ» ጊዴስ።
1CH 17:2 ናታኔይ ቃሴ ዳዊቴስ፥ «ኦꬃናስ ኔ ዎዚናን ኔ ቆፒዳይሳ ኡባ ኦꬃ፤ ጾሲ ኔናራ ዴስ» ጊዴስ።
1CH 17:3 ጊዶ ኣቲን ሄ ጋላሳ ኦማርስ ጾሳ ቃላይ ናታኔኮ ዪዲ፥
1CH 17:4 «ባ፤ ባዳ ታ ኣይሌ ዳዊቴስ ጎዳይ ኔስ ጊዛይሲ ታ ኢዛን ዴኣና ኬꬅ ኬጻናይ ኔና ጊዳካ።
1CH 17:5 ታኒ ኢስራኤሌታ ጊብጼፔ ኬሲዳ ጋላሳፌ ዶማዳ ሃች ጋካናስ፥ ዱንካናፔ ዱንካኔን፥ ቃሴ ኢሲ ሶሆፔ ሃራ ሶሆ ዩያዳ ዴኣይስ ኣቲን ኬꬃን ዴኣቤኬ።
1CH 17:6 ታኒ ኢስራኤሌ ኣሳ ኡባራ ዩዪዳ ሶሆ ኡባን ታ ዴራ ሄማናስ ታኒ ኣዛዚዳ ኢስራኤሌ ዳናታፔ ኦናስካ፥ ‹ታስ ዚጋ ሚꬃፌ ኬꬅ ኣይስ ኬጺቤኬቲ?› ጋዳ ኦይቺዳ ዎዴይ ዲዜ?
1CH 17:7 «ሄሳ ጊሻስ ሃኢካ ኔኒ ታ ኣይሌ ዳዊቴስ፥ ኡባፌ ዎልቃማ ጾሲ ኔና፥ ‹ታ ዴራ ኢስራኤሌ ኣይሳና ማላ ኔኒ ዶርሳ ሄሚዛሶሆፔ ታ ኔና ዴንꬃ ኤካዲስ።
1CH 17:8 ኔኒ ቢዳ ሶሆ ኡባን ታኒ ኔናራ ኢሲፌ ጊዳዲስ፤ ኔ ሞርኬታ ኡባ ኔ ሲንꬃፌ ዲጋዲስ፤ ሃኢካ ታኒ ሃ ሳኣን ኤሬቲዳ ጊታ ኣሳታ ሱንꬃ ማላ ኔ ሱንꬃ ጊታሳና።
1CH 17:9 ታኒ ታ ኣሳ ኢስራኤሌስ ዳናሶሆ ኢማና፤ ኢስታስ ዱሳሶሆ ኢሚዳፔ ጉዬ ኢስቲ ቃጾንታ ማላ ታ ኦꬃና፤ ኢታ ኣሳቲ ካሴ ኢስታ ኡንኤꬂዳይሳꬆ ሃይሳፌ ጉዬ ኢስታ ኡንኤꬄቴና።
1CH 17:10 ሃይሳፌ ካሴ ታ ዴራ ኢስራኤሌ ካሌꬂዛይታ ታ ሱንꬂዳ ዎዴ ካሴ ኢታቲ ኡንኤꬂዳይሳꬆ ሃይሳፌ ጉዬ ኡንኤꬄቴና፤ ኢንቴ ሞርኬታ ኡባ ታ ካዉሻና፤ ታኒ ጾሳይ ኔስ ኬꬅ ኬጻናይሳ ዮታይስ።
1CH 17:11 ኔ ጪማዳ ካሴ ሃይቂዳ ኔ ኣዋታን ጋይቲዛ ዎዴ ታኒ ኔ ናይታፔ ኢሳ ዴንꬃዳ ኔ ሶሆን ካዎꬃና፤ ኢዛ ካዎቴꬃካ ታ ሚንꬃና።
1CH 17:12 ታስ ኬꬅ ኬጻናይ ኢዛ፤ ታኒ ኢዛ ካዎቴꬃ ኣራታ ሜርናስ ሚንꬃ ኤሳና።
1CH 17:13 ታኒ ኢዛስ ኣዋ ጊዳና፤ ኢዚካ ታስ ና ጊዳና፤ ኔፔ ካሴ ካዎቲዳ ሳኦሌፔ ታኒ ታ ማሮቴꬃ ዴንꬂዳ ማላ ኢዛፔ ሙሌካ ዴንꬂኬ።
1CH 17:14 ታኒ ኢዛ ታ ኣሳ ቦላኔ ታ ካዎቴꬃ ቦላ ሜርናስ ሱንꬃና፤ ኢዛ ካዎቴꬃ ኣራታይካ ሜርናስ ሚኒ ኤቃና› ጋዳ ዮታ» ጊዴስ።
1CH 17:15 ናታኔይ ጾሳይ ኢዛስ ኣጁታን ቆንጪሲዳ ቃላ ኡባ ዳዊቴስ ዮቲዴስ።
1CH 17:16 ሄሳፌ ጉዬ ካዎ ዳዊቲ ዱንካኔን ጌሊዲ ጎዳ ሲንꬃን ኡቲዴስ፤ ሂስቲዲ፥ «ኣቤት ጎዳዉ፥ ጾሳዉ! ኔኒ ሃይሳ ኡባ ታስ ኦꬃናስ ታኒ ኦኔ? ታሶ ኣሳይካ ኣዜ?
1CH 17:17 ኣቤት ጾሳዉ! ሃይሲ ኔ ኣይፌ ሲንꬃን ጉꬃ ሚሳቲን ኔ ኣይሌ ዛሬቲ ሲንꬃፌ ያና ላይꬃታን ሃናናይሳ ዮታዳሳ፤ ኔኒ ታና ጊታ ኣሳታፔ ꬎቁ ሂስታ ጼላዳሳ።
1CH 17:18 ኔኒ ታና ኔ ኣይሌዛ ቦንቺዳ ጊሻስ ታኒ ዳዊቲ ሃይሳፌ ቦላራ ኣይ ጋና ዳንዳያዚና? ኔኒ ታና ኔ ኣይሌዛ ኤራሳ።
1CH 17:19 ኣቤት ጎዳዉ! ኔ ኣይሌዛ ጊሻስ ኔ ዎዚና ቆፋ ማላ ሃ ጊታ ሚሻታ ኡባ ኦꬃዳ ሃ ጊታቴꬃ ኡባ ታና ኤሪሳዳሳ።
1CH 17:20 «ኣቤት ጎዳዉ! ኔ ማላይ ሃራይ ባዋ፤ ኑኒ ኑ ሃይꬃን ሲዪዳ ማላ ኔፔ ኣቲን ሃራ ጾሲ ዴና።
1CH 17:21 ኔኒ ጾሲ ጊብጼ ቢታፌ ኬሲዳ ኔ ዴራ ሲንꬃፌ ካዎቴꬃታ ጎዳዳ ጊታኔ ያሺሲዛ ሚሽ ኔ ሱንꬃስ ኦꬃና ማላ፥ ዴራካ ኔስ ዎዛና ማላ ኔ ኢስታስ ኦꬂዳይሳꬆ ኔ ዴሬ ኢስራኤሌ ማላ ዴሬይ ቢታ ቦላ ሃራይ ዲዜ?
1CH 17:22 ኔኒ ኔ ዴራ ኢስራኤሌ ሜርናስ ኔስ ሂስታዳሳ፤ ኣቤት ጎዳዉ ኔኒካ ኢስታ ጾሳ ጊዳዳሳ።
1CH 17:23 «ኣቤት ጎዳዉ! ኔኒ ኔ ኣይሌዛሲኔ ኢዛ ዜሬꬃታስ ኢሚዳ ሂዶታ ሜርናስ ሚንꬃ፤ ኔኒ ኢሚዳ ሂዶታ ቃላካ ፖላ።
1CH 17:24 ሄሳ ኔ ኦꬃናይ ኔ ሱንꬂ ሚኒ ዳና ማላኔ ሜርናስ ጊታ ጊዳና ማላሳ፤ ሄሳፌ ጉዬ ኣሳይ፥ ‹ኡባፌ ዎልቃማ ጾሳይ ቱሙካ ኢስራኤሌ ጾሳ› ጋና ጌስ፤ ኔ ኣይሌ ዳዊቴ ዛሬቲ ኔ ሲንꬃን ሚኒ ኤቃና።
1CH 17:25 «ኣቤት ታ ጾሳዉ፥ ‹ኔኒ ታስ ኔ ኣይሌዛስ ኬꬅ ኬጻና ጋ ዮታዳሳ፤ ሄሳ ጊሻስ ታኒ ኔ ኣይሌይ ኔና ዎሳናስ ጻላዲስ።
1CH 17:26 ኣቤት ጎዳዉ! ኔኒ ቱሙ ጾሳ፤ ሃ ሎኦ ሂዶታ ቃላ ኔ ኣይሌዛስ ኢማዳሳ።
1CH 17:27 ኔ ሲንꬃን ሜርናስ ዳና ማላ ኔ ኣይሌዛ ኬꬅ ኣንጃናስ ኔ ኮያዳሳ፤ ኣቤት ጎዳዉ! ኔኒ ኣንጂዳይ ሜርናስ ኣንጄቲዳዴ ጊዳና› ጊ ዎሴስ» ጊዴስ።
1CH 18:1 ሄሳፌ ጉዬ ዳዊቲ ፊሊስጼሜታ ጾኒ ሃሪዴስ፤ ሂስቲዲ ጌቴ ካታማኔ ኢዛ ዩሾን ዲዛ ሞꬃታ ፊሊስጼሜ ኣሳታ ኩሼፔ ዎꬂ ኤኪዴስ።
1CH 18:2 ሂስቲን ሞኣቤ ዴሬ ኣሳይ ኢዛስ ሃሬቲዲ ጊራ ኤሂዴስ።
1CH 18:3 ሄሳፌ ጉዬ ዳዊቲ ኤፊራጺሴ ሻፋ ሄራን ዲዛ ዴሬታ ኦይካና ቢዳ ዎዴ ጾባ ካዎ ሃዳዲኤዜሬ ኦሊ ጾኒዲ ሃማቴ ጋካናስ ዲዛ ቢታ ኦይኪዴስ።
1CH 18:4 ዳዊቲ ሃዳዲኤዜሬፔ 1,000 ፓራ-ጋሬታ፥ 7,000 ቶጋ ኣሳታኔ 20,000 ቶሆን ቢ ኦሌቲዛ ዎታዳራታ ዲኢዴስ፤ ዳዊቲ 100 ጋሬታስ ጊዲዛ ፓራታ ኣሺዲ ሃራ ፓራታ ኡባስ ጋዴ ጻጶ ጊልዳይዴስ።
1CH 18:5 ዳማስቆ ካታማን ዲዛ ኣራሜ ኣሳቲ ጾባ ዴሬ ካዎ ሃዳዲኤዜሬ ማዳናስ ዪዳ ዎዴ ዳዊቲ ኢስታፌ 22,000 ኣስ ዎꬊዴስ።
1CH 18:6 ሄሳፌ ጉዬ ኣራሜ ቢታን ዳማስቆ ካታማን ኦላንቻቲ ዱንካኒ ኡታናሶ ጊግሲዴስ፤ ሂስቲን ኣራሜ ዴሬ ኣሳቲ ዳዊቴስ ሃሬቲዲ ጊሪዳ፤ ዳዊቲ ቢዳሶ ኡባን ጎዳይ ኢዛስ ጾኖ ኢሚዴስ።
1CH 18:7 ካዎ ዳዊቲ ሃዳዲኤዜሬ ኦላንቻታ ሃላቃቲ ኦይኪዳ ዎርቃ ጎንዳሌታ ዎꬂ ኤኪዲ ዬሩሳላሜ ኤፊዴስ።
1CH 18:8 ቃሴካ ዳዊቲ ሃዳዲኤዜሬይ ሃሪዛ ጺባሃኔፔኔ ኩና ካታማፔ ኬሂ ዳሮ ጻርቂማላ ኤኪዴስ፤ ሶሎሞኔይ ሄ ጻርቂማላታ ጊታ ጋባቴ፥ ቱሳታኔ ዱማ ዱማ ሚሻታ ሜꬊሲዴስ።
1CH 18:9 ዳዊቲ ጾባ ዴሬ ካዎ ሃዳዲኤዜሬ ኦላንቻታ ኡባ ጾኒዳይሳ ሃማቴ ካዎ ቶኡዪ ሲዪዴስ።
1CH 18:10 ሂስቲዲ ባናራ ኦሌቲሼ ጋምኢዳ ሃዳዲኤዜሬ ዳዊቲ ኦሊ ጾኒዳ ጊሻስ ኢዛ ሃሹ ጋናሲኔ ሳሮካናስ ቶኡዪ ባ ናዛ ሃዶራሜ ካዎ ዳዊቴኮ ኪቲዴስ፤ ሃዶራሜይ ዎርቃፌ፥ ቢራፔኔ ጻርቂማላፔ ኦሴቲዳ ሚሻታ ኢዛስ ኤኪ ዪዴስ።
1CH 18:11 ካዎ ዳዊቲ ኤዶሜፔ፥ ሞኣቤፔ፥ ኣሞኔ ኣሳታፔ፥ ፊሊስጼሜታፔኔ ኣማሌቄ ኣሳታፔ ዲኢ ኤኪዳ ቢራኔ ዎርቃ ሃ ሚሻታራ ኢሲፌ ጋꬂ ጎዳስ ዱማሲዴስ።
1CH 18:12 ጹሪያ ና ኣቢሳዬይ ኤዶሜ ኣሳፔ 18,000 ኣስ ማጺኔ ሾባን ዎꬊዴስ።
1CH 18:13 ሄሳፌ ጉዬ ዳዊቲ ኤዶሜን ኦላንቻቲ ዱንካኒ ኡታናሶ ጊግሲዴስ፤ ሂስቲን ሄ ቢታ ኣሳቲ ኡባይ ዳዊቴስ ሃሬቲዲ ጊሪ ኣቂዳ፤ ዳዊቲ ቢዳሶ ኡባን ጎዳይ ኢዛስ ጾኖ ኢሚዴስ።
1CH 18:14 ዳዊቲ ኢስራኤሌ ዴራ ኡባ ቦላ ካዎቲዴስ፤ ዴራ ኡባ ጺሎቴꬃኒኔ ሱሬ ፒርዳን ኣይሲዴስ።
1CH 18:15 ጹሪያ ና ኢዮኣቤይ ኦላ ጋዳዋ፤ ኣሂሉዴ ና ኢዮሳፊጼይ ማዝጋባ ኬꬃ ኣላፌ።
1CH 18:16 ኣሂጹቤ ና ሳዶቄይኔ ኣቢያታሬ ና ኣቢሜሌኬይ ቄሴ፤ ሱሳሃይ ዋና ጻፌ፤
1CH 18:17 ዮዳሄ ና ባናያይ ኬሊቴታሲኔ ፔሊቴታስ ሃላቃ፤ ካዎ ዳዊቴ ኣቱማ ናይቲ ኢዛ ካዎቴꬃን ꬎቃ ሹሜታ።
1CH 19:1 ሄሳፌ ጉዬ ኣሞኔታ ካዎ ናኦሴይ ሃይቂን ኢዛ ናዚ ኢዛሶሆን ካዎቲዴስ።
1CH 19:2 ዳዊቲ፥ «ኢዛ ኣዋ ናኦሴይ ታስ ሎኦ ኦꬂዳ ማላ ታኒ ኢዛ ና ሃኖኔስ ሎኦ ኦꬃና» ጊ ቆፒዴስ፤ ሄሳ ጊሻስ ኢዛ ኣዋ ሃይቆዛ ጊሻስ ኢዛ ሚንꬄꬃናስ ዳዊቲ ኣስ ኪቲዴስ። ዳዊቲ ኪቲዳይቲ ሃኖኔ ሚንꬄꬃናስ ኣሞኔ ቢታ ጋኪዳ ዎዴ፥
1CH 19:3 ኣሞኔ ዴሬ ሹሜቲ ሃኖኔ፥ «ዳዊቲ ሃ ኣሳታ ኪቲዳይ ኔ ኣዋ ቦንቺዲ ኔና ሚንꬄꬃናስ ሚሳቲዜ? ኢዚ ሃ ኣሳታ ኪቲዳይ ቢታዮ ጾሞሲ ጼላናሲኔ ኦሊ ኦይካናሳ» ጊዳ።
1CH 19:4 ሂስቲን ሃኖኔይ ዳዊቲ ኪቲዳ ኣሳታ ኦይኪዲ ኢስታ ቡቻ ሜዲዴስ፤ ኢስታ ማይኦካ ኢስታ ካሎይ ቤታናሼ ጋካናስ ዳኪዲ ኢስታ ዴሬ ዛሪ ዬዲዴስ።
1CH 19:5 ኢስቲ ኬሂ ዬላቲዳ ጊሻስ ዳዊቲ ሄሳ ሲዪዲ ኢስታራ ጋይታና ማላ ሃራ ኣስ ኢስታኮ ኪቲዲ፥ «ኢንቴ ቡቺ ዲጫና ጋካናስ ኢያርኮ ካታማን ዴኢሺቴ፤ ሄሳፌ ጉዬ ሃ ዪቴ» ጊዴስ።
1CH 19:6 ኣሞኔቲ ዳዊቴ ማታን ባ ኢጼቲዳይሳ ኤሪዳ ዎዴ ሃኖኔይኔ ኣሞኔቲ ሜስጴጾሚያፔ፥ ኣራሜ ዴሬ ማኢካፌኔ ጾባፌ ፓራ-ጋሬታኔ ቶጋንቻታ ቃጻራናስ 34,000 ኪሎ ጊራሜ ጊዲዛ ሳቂሌ ቢራ ዬዲዳ።
1CH 19:7 ሂስቲዲ 32,000 ፓራ-ጋሬታ፥ ቶጋ ኣሳታ፥ ማኢካ ካዎኔ ኢዛ ኦላንቻታ ቃጻሪዳ፤ ኢስቲካ ዪዲ ሜዴባን ዱንካኒ ኡቲዳ፤ ቃሴ ኣሞኔቲ ባንታ ካታማታፔ ሺቄቲዲ ኦላስ ኬዚዳ።
1CH 19:8 ዳዊቲ ሄሳ ሲዪዲ ኢዮኣቤኔ ኦላንቻታ ኡባ ዬዲዴስ።
1CH 19:9 ኣሞኔቲ ካታማ ፔንጌን ኬኢዲ ኦላስ ያዲዳ፤ ኢስታ ማዳናስ ዪዳ ካዎቲካ ባስ ሶሆ ኦይኪዲ ዴምባን ዱንካኒዳ።
1CH 19:10 ኢዮኣቤይ ኦላይ ሲንꬃራኔ ጉዬራ ዶዲ ኡቲዳይሳ ቤኢዲ ኢስራኤሌ ኣሳ ኡባፌ ኤሬቲዳ ኦላ ቃራታ ዶሪ ኤኪዲ ኣራሜ ዴሬ ኦላንቻታ ሲንꬃን ሳልፊሲዴስ።
1CH 19:11 ኣቲዳ ኣሳታ ኢዛ ኢሻ ኣቢሳዬይ ካሌꬃና ማላ ኣዛዚዲ ኣሞኔታ ሲንꬃን ሳልፊሲዴስ።
1CH 19:12 ኢዮኣቤይ ባ ኢሻ ኣቢሳዬስ፥ «ኣራሜ ኣሳቲ ታ ቦላ ሚኒኮ ኔኒ ያዳ ታና ማዳ፤ ኣሞኔ ኣሳቲ ኔ ቦላ ሚኒዛ ጊዲኮ ታኒ ያዳ ኔና ማዳና።
1CH 19:13 ሃኢ ኔኒ ሚና! ኑ ዴራ ጊሻሲኔ ኑ ጾሳ ካታማታ ጊሻስ ኣኔ ሚኒ ኦሌቶስ፤ ጎዳይ ባና ሎኦይሳ ኦꬆ» ጊዴስ።
1CH 19:14 ሄሳፌ ጉዬ ኢዮኣቤይኔ ኢዛራ ዲዛ ኦላንቻቲ ኣራሜ ዎታዳራታራ ኦሌታናስ ቢን ኣራሜ ዎታዳራቲ ኢስታ ሲንꬃፌ ባቃቲዳ።
1CH 19:15 ኣራሜ ዎታዳራቲ ባቃቲዳይሳ ኣሞኔ ዎታዳራቲ ቤኢዳ ዎዴ ኢስቲካ ኢዛ ኢሻ ኣቢሳዬ ሲንꬃፌ ጉዬ ባቃቲዲ ካታማ ጌሊዳ፤ ሄሳፌ ጉዬ ኢዮኣቤይ ዬሩሳላሜ ሲሚዴስ።
1CH 19:16 ኣራሜ ኣሳቲ ኢስራኤሌ ኣሳታን ጾኔቶይሳ ኤሪዳ ዎዴ ቃስታኔ ኪቲዲ ኤፊራጺሴ ሻፋፔ ሄ ፒንꬃን ዲዛ ኣራሜ ኣሳታ ኤሂሲዳ፤ ጾባ ካዎ ሃዳዲኤዜሬስ ኦላ ጋዳዋ ጊዲዳ ሾባኬይ ኢስታ ካሌꬄስ።
1CH 19:17 ዳዊቲ ሄሳ ሲዪዳ ዎዴ ኢስራኤሌ ኦላንቻታ ኡባ ሺሺዲ ዮርዳኖሴ ሻፋ ፒኒዲ ኣራሜ ኣሳታራ ኦሌታናስ ኢስታ ሲንꬃን ሳልፊዴስ፤ ሂስቲን ኢስቲ ኢዛራ ኦሌቲዳ።
1CH 19:18 ጊዶ ኣቲን ኣራሜ ኣሳቲ ኢስራኤሌታ ሲንꬃፌ ባቃቲዳ፤ ዳዊቲ 7,000 ፓራ-ጋሬታኔ 40,000 ቶሆን ቢ ኦሌቲዛ ዎታዳራታ ዎꬊዴስ፤ ኢስታ ኦላ ጋዳዋ ሾባኬካ ዎꬊዴስ።
1CH 19:19 ሃዳዲኤዜሬ ኣሳይ ኢስራኤሌታን ጾኔቲዳይሳ ኤሪዲ ዳዊቴራ ሲጌቲዲ ኢዛስ ሃሬቲዴስ፤ ሄሳፌ ሲሚን ኣራሜ ኣሳይ ኣሞኔ ኣሳ ማዳናስ ዶሲቤና።
1CH 20:1 ኦፊንꬃን ካዎቲ ኦላስ ኬዚዛ ዎዴ ኢዮኣቤይ ኦላንቻታ ካሌꬂ ቢዲ ኣሞኔ ዴሬ ꬋይሲዴስ፤ ኤራቤ ካታማካ ዶዲ ኡቲዴስ፤ ጊዶ ኣቲን ዳዊቲ ዬሩሳላሜን ታኪዴስ፤ ኢዮኣቤይ ኤራባ ካታማ ኦሊ ላሊዴስ።
1CH 20:2 ሄሳፌ ጉዬ ዳዊቲ ዪዲ ኢስታ ካዎዛ ሁኤፔ ዎርቃ ካላቻ ኤኪዴስ፤ ካላቻዚ 34 ኪሎ ጊራሜ ጊዲዴስ፤ ኢዛ ጊዶን ኢንቁ ጌቴቲዛ ኣልኦ ሹቺ ዴስ፤ ሄ ካላቻ ኤኪዲ ዳዊቴ ሁኤን ጎጺዳ፤ ቃሴ ዳዊቲ ሄ ካታማፔ ኬሂ ዳሮ ሚሽ ዲኢ ኤኪዴስ።
1CH 20:3 ሄን ዴኢዛ ዴራ ኬሲዲ ማጋዜ፥ ጾይሌኔ ካልታ ኦይꬂ ኦሲሲዴስ፤ ኣሞኔን ዲዛ ሃራ ካታማታን ዲዛ ኣሳታካ ዳዊቲ ሄሳꬆ ኦሲሲዴስ፤ ሄሳፌ ጉዬ ዳዊቲኔ ኢዛ ኦላንቻቲ ኡባይ ዬሩሳላሜ ሲሚዳ።
1CH 20:4 ሄሳፌ ሲሚን ፊሊስጼሜ ኣሳታራ ጌዜሬን ኦላይ ዴንዲዴስ፤ ሄ ዎዴ ሁሼ ዴሬ ኣስ ሲቢካዬይ ኤራፋይሜ ዜሬ ጊዲዳ ሲፋዬ ዎꬊዴስ፤ ሂስቲን ፊሊስጼሜቲ ጾኔቲዳ።
1CH 20:5 ሄሳፌ ጉዬ ፊሊስጼሜታራ ሃራ ኦላይ ዴንዲዴስ፤ ሄ ዎዴ ኢዚ ኦይኪዛ ቶራ ቶማይ ሻማኔ ዎንዲራሼ ኬና ጊዲዳ ጌቴ ካታማፔ ዪዳ ጎልያዴ ኢሻ ላሂሜ ያኢሬ ና ኤልያኔይ ዎꬊዴስ።
1CH 20:6 ቃሴካ ሃራ ኦላይ ጌቴ ካታማን ዴንዲዴስ፤ ሄን ኢዛስ ኩሼኒኔ ቶሆን ኡሱፑን ኡሱፑን ቢራꬌቲ ኢሲ ቦላ 24 ቢራꬌቲ ዲዛ ኤራፋዬ ዜሬꬃፌ ጊዲዳ ጉባኔ ጌሳ ኣዱሳ ኣሲ ዴስ።
1CH 20:7 ሄ ኣዴዚ ኢስራኤሌታ ቦላ ኤቄቲዳ ዎዴ ዳዊቴ ኢሻ ሺምኣ ና ዮናታኔይ ኢዛ ዎꬊዴስ።
1CH 20:8 ሃይታንቲ ጌቴ ካታማን ዲዛ ኤራፋዬ ዛሬታ፤ ኢስቲ ኡባይ ዳዊቴ ኩሼኒኔ ኢዛ ኣሳ ኩሼን ሃይቂዳ።
1CH 21:1 ጻላኤይ ኢስራኤሌ ኣሳ ቦላ ሜቶ ኤሃናስ ኮዪዲ ዳዊቲ ኢስራኤሌ ኣሳ ቆዳና ማላ ዴንꬄꬂዴስ።
1CH 21:2 ዳዊቲ ኢዮኣቤኔ ኦላንቻታ ሃላቃታ፥ «ዳኔፔ ቢዲ ቤርሳቤሄ ጋካናስ ዲዛ ኢስራኤሌ ኣሳ ቆዲቴ፤ ሂስቲዲ ኣሳ ቆዳይ ኣፑናኮ ታና ኤሪሲቴ» ጊዴስ።
1CH 21:3 ኢዮኣቤይ ጊዲኮ ኢዛስ፥ «ጎዳይ ሃኢ ዲዛ ኢስራኤሌ ኣሳ ቦላ ጼቱ ኩሼ ጉጆ! ታ ጎዳ ካዎ! ኢስቲ ኡባይ ታ ጎዳ ኣይሌታ ዴቴኔ? ታ ጎዳይ ሃይሳ ማላ ኦꬃናስ ኣይስ ኮዪዴ? ኢስራኤሌ ካዎቴꬃ ኣይስ ሞራንቻ ኬሲዜ?» ጊዴስ።
1CH 21:4 ጊዶ ኣቲን ካዎዛ ቃላይ ኢዮኣቤ ጾኒዴስ፤ ሂስቲን ኢዮኣቤይ ኬዚ ኢስራኤሌ ቢታ ኡባ ዩዪ ኣꬊ ዬሩሳላሜ ሲሚዴስ።
1CH 21:5 ኢዮኣቤይ ቆዲዳ ኣሳ ቆዳ ዳዊቴስ ኢሚዴስ፤ ኢስራኤሌፔ 1,100,000 ዩሁዳፔ 47,000 ኦላናስ ዳንዳይዛይታ ዴሚዴስ።
1CH 21:6 ኢዮኣቤይ ካዎዛ ኣዛዞን ሃራሴቲዳ ጊሻስ ሌዌታ ቆሞታኔ ቢኒያሜ ቆሞታ ቆዲቤና።
1CH 21:7 ሄ ኣዛዞዚ ጾሳ ማታን ኢታ ጊዲዳ ጊሻስ ጾሲ ኢስራኤሌ ኣሳ ቃጻይዴስ።
1CH 21:8 ሄሳፌ ጉዬ ዳዊቲ ጾሳስ፥ «ታኒ ሃ ኦሶዛን ኔና ኬሃ ቆሃዲስ፤ ታኒ ባላ ኦꬂዳ ጊሻስ ታና ኔ ኣይሌዛ ቆሆ ኣቶ ጋና ማላ ታ ኔና ዎሳይስ» ጊዴስ።
1CH 21:9 ጎዳይ ዳዊቴ ናቤ ጋዴስ፥
1CH 21:10 «ባዳ ዳዊቴ፥ ‹ጎዳይ ኔና ታኒ ኔ ዶራና ማላ ኔ ሲንꬃን ሄꬑ ሚሻታ ዎꬃዲስ፤ ታኒካ ኔ ዶሪዳይሳ ኦꬃና› ጊዴስ» ጋዳ ዮታ።
1CH 21:11 ሂስቲን ጋዴይ ዳዊቴኮ ቢዲ፥ «ጎዳይ ኔ ሲንꬃን ዎꬆይሳፌ ኢሳ ዶራ፤
1CH 21:12 ሄꬑ ላይꬃ ኮሻ፥ ዎይኮ ሄꬑ ኣጊና ኩሜꬅ ኔ ሞርኬታን ጎዴቴꬅ፥ ዎይኮ ሄꬑ ጋላስ ኢታ ሃርጌ ኤሂዛ ጾሳ ማሻይ ቢታ ቦላ ዪን ኢስራኤሌ ኡባ ቦላ ሃይቆ ኤሂዛ ጾሳ ኪታንቻ ዩስ፥ ሄሳ ጊሻስ ታና ኪቲዳ ጾሳስ ታ ኣይ ዛራ ዮታናኮ ሄይታንታፌ ኔ ዶሮይሳ ታስ ዮታ» ጊዴስ።
1CH 21:13 ዳዊቲ ጋዴስ፥ «ታ ዶራናስ ኬሃ ሜቶታዲስ፤ ጊዲኮካ ጎዳ ጾሳ ማሮታይ ኬሂ ጊታ ጊዲዳ ጊሻስ ኣሳ ኩሼን ኩንዳናፔ ጾሳ ኩሼን ኩንዴꬂ ታስ ሎኦ» ጊዴስ።
1CH 21:14 ሄሳ ጊሻስ ጎዳይ ኢታ ሃርጌ ዬዲን ኢስራኤሌፔ 70,000 ኣሲ ሃይቂዴስ።
1CH 21:15 ሄሳፌ ጉዬ ጎዳይ ዬሩሳላሜ ꬋይሳናስ ኪታንቻ ኪቲዴስ፤ ጊዶ ኣቲን ኪታንቻዚ ዬሩሳላሜ ꬋይሳናስ ሺቂ ኡቲዳሺን ጎዳይ ቤኢዲ ሚሼቲዴስ፤ ꬋይሳና ዪዳ ኪታንቻ፥ «ኣጋ! ኢስታ ቦላ ጋኪዳ ባሻይ ጊዳና» ጊዴስ። ሄ ዎዴ ጎዳ ጾሳ ኪታንቻይ ያቡሴ ዴሬ ኣስ ኦርና ባሌ ማታን ኤቂዴስ።
1CH 21:16 ኪታንቻዚ ባ ጊꬃ ማሻ ኩሼን ኦይኪዲ ዬሩሳላሜ ꬋይሳናስ ሳሎፔኔ ሳኣፔ ጊዶን ኤቂዳይሳ ዳዊቲ ꬎቁ ጊ ቤኢዴስ፤ ሄሳፌ ጉዬ ዳዊቲኔ ጪማቲ ማቃ ማይኢዲ ቢታ ቦላ ጉፋኒዳ።
1CH 21:17 ዳዊቲ ጾሳስ፥ «ኣሳይ ቆዴታና ማላ ኦꬂዳይ ታና ጊዲኪና? ናጋራ ኦꬂዳይኔ ቆሂዳይ ታና፤ ሂስቲን ሃይቲ ዶርሳቲ ኣይ ኦꬂዶ? ኣቤት ታ ጎዳ ጾሳዉ! ኔ ኩሼይ ታ ቦላኔ ታ ኬꬃ ኣሳ ቦላ ጊዶ ኣቲን ሃ ቦሻዛ ኔ ዴራ ቦላ ዬዶፋ» ጊዴስ።
1CH 21:18 ሄሳፌ ጉዬ ጎዳ ጾሳ ኪታንቻይ ጋዴስ፥ «ዳዊቲ ፑዴ ያቡሴ ዴሬ ኣስ ኦርና ባሌ ቢዲ ጎዳ ጾሳስ ያርሾ ያርሺዛሶ ኦꬃና ማላ ዮታ» ጊ ኣዛዚዴስ።
1CH 21:19 ዳዊቲ ጋዴይ ጎዳ ጾሳ ሱንꬃን ዮቶይሳꬆ ኦꬃናስ ቢዴስ።
1CH 21:20 ሄ ዎዴ ኦርናይኔ ኢዛ ናይቲ ባሌን ጊስቴ ቡኪሼ ጉዬ ሲሚ ጼሊዲ ኪታንቻ ቤኢዳ፤ ሂስቲዲ ኢዛራ ዲዛ ኦይዱ ኣቱማ ናይቲ ቆቴቲዳ።
1CH 21:21 ዳዊቲ ኦርናኮ ዪን ኦርናይ ኢዛ ቤኢዲ ባሌዛፔ ጋጻ ኬኢዲ ዳዊቴስ ዚጊዴስ።
1CH 21:22 ሄሳፌ ጉዬ ዳዊቲ ኦርናስ፥ «ዴራ ቦላ ዪዳ ቦሻይ ኪቻና ማላ ታኒ ጎዳ ጾሳስ ያርሾ ያርሺዛሶ ኦꬃናስ ኔ ባሌዛ ታስ ባይዛርኪ! ታኒ ኔስ ኩሜꬃ ዋጋ ቃንጻና» ጊዴስ።
1CH 21:23 ሂስቲን ኦርናይ ዳዊቴስ፥ «ኔስ ኤካ፤ ታ ጎዳይ ካዎይ ባና ኡፋይሲዛይሳ ኦꬆ፤ ሄኮ ጹጌቲዛ ያርሾስ ቦራታ፥ ኤሶስ ካꬅ ቡኪዛ ሎዳታ፥ ካꬃ ያርሾ ጊዳና ማላ ጊስቴ ኢማና፤ ሃይታ ኡባታካ ታ ኔስ ኢማና» ጊዴስ።
1CH 21:24 ጊዶ ኣቲን ካዎ ዳዊቲ ኦርናስ፥ «ሄሲ ሃኔና! ታኒ ኩሜꬃ ዋጋ ቃንጻዳ ሻማና፤ ታኒ ኔይሳ ጮ ሜላ ኤካዳ ጎዳ ጾሳስ ያርሾ ሺሺኬ፤ ቃሴ ታ ሻሞንታ ሚሽ ጹጌቲዛ ያርሾ ኦꬃ ሺሺኬ» ጊዴስ።
1CH 21:25 ሄሳ ጊሻስ ዳዊቲ ሄ ባሌዛስ 600 ዎርቃፌ ኦሴቲዳ ቢራ ኢሚዴስ።
1CH 21:26 ሄሳፌ ጉዬ ዳዊቲ ሄን ጎዳ ጾሳስ ያርሾ ያርሺዛሶ ኦꬂዲ ጹጌቲዛ ያርሾኔ ኢሲፌቴꬃ ያርሾ ሺሺዴስ፤ ኢዚ ጎዳ ጾሳ ዎሲን ጹጌቲዛ ያርሾ ያርሺዛሶዛ ቦላ ሳሎፔ ታማ ዬዲዲ ኢዛ ኦይሻ ዛሪዴስ።
1CH 21:27 ሂስቲን ጎዳይ ኪታንቻ ኣዛዚን ኪታንቻዚ ባ ጊꬃ ማሻ ኮሃን ጌልꬂዴስ።
1CH 21:28 ዳዊቲ ጎዳይ ያቡሴ ዴሬ ኣስ ኦርና ካꬃ ባሌን ኢዛስ ዛሪዳይሳ ቤኢዲ ሄን ያርሾ ሺሺዴስ።
1CH 21:29 ሙሴይ ባዞን ጊግሲዳ ጎዳ ጾሳ ዱንካኔይኔ ጹጌቲዳ ያርሾ ያርሺዛሶዚ ጌባኦኔ ዙምቡላ ቦላ ዴስ።
1CH 21:30 ዳዊቲ ጾሳ ኪታንቻይ ኦይኪዳ ጊꬃ ማሻስ ያዪዳ ጊሻስ ሄ ቢዲ ጎዳ ኦይቻናስ ዳንዳይቤና።
1CH 22:1 ሄሳ ጊሻስ ዳዊቲ፥ «ጎዳ ጾሳ ኬꬂኔ ኢስራኤሌ ኣሳይ ጹጌቲዛ ያርሾ ያርሺዛሶይ ሃይሳን ዴስ» ጊዴስ።
1CH 22:2 ካዎ ዳዊቲ ኢስራኤሌ ቢታን ዲዛ ሃራ ዴሬ ኣሳይ ኢሲ ቦላ ሺቃና ማላ ኣዛዚዴስ፤ ኢስታ ጊዶፌ ጾሳ ኬꬃ ኬጻናስ ማሴቲዳ ሹች ጊጊሳናስ ሹች ቄሪዛይታ ጊግሲዴስ።
1CH 22:3 ዳዊቲ ጊምባ ፔንጌታስ ሚሲማሬኔ ማጻፋ ጊዳና ማላ ዳሮ ቢራታኔ ሜዛኔፔ ቦላ ጊዲዳ ኬሂ ዳሮ ጻርቂማላ ጊግሲዴስ።
1CH 22:4 ሲዶና ኣሳይኔ ጺሮሴ ኣሳይ ዳሮ ዚጋ ሚꬅ ኤሂዛ ጊሻስ ቆዳይ ባይንዳ ኬሂ ዳሮ ዚጋ ሚꬅ ጊግሲዴስ።
1CH 22:5 ዳዊቲ፥ «ታ ና ሶሎሞኔይ ዬላጋኔ ኦሳራ ሜዜቶንታይሳ፤ ጎዳ ጾሳስ ኬጼታና ኬꬃይ ቢታ ኡባን ኤሬቲዳ ሎኦኔ ፑላ ኬꬅ ጊዳናስ ቤሴስ፤ ሄሳ ጊሻስ ኢዛስ ኮሺዛይሳ ታኒ ጊጊሳና» ጊዴስ፤ ዳዊቲ ሃይቃናፔ ሲንꬃን ዳሮ ሚሽ ጊግሲዴስ።
1CH 22:6 ሄሳፌ ጉዬ ዳዊቲ ባ ና ሶሎሞኔ ጼይጊዲ ጎዳ ኢስራኤሌ ጾሳ ኬꬃ ኬጻና ማላ ኣዛዚዴስ።
1CH 22:7 ዳዊቲ ሶሎሞኔ፥ «ታ ናዞ፥ ታኒ ጎዳ ታ ጾሳ ቦንቾስ ኬꬄ ኬጻናስ ታ ዎዚናን ቆፓዲስ።
1CH 22:8 ጊዶ ኣቲን ጎዳ ጾሳ ቃላይ ታና፥ ‹ኔኒ ዳሮ ሱꬅ ጉሳዳሳ፤ ዳሮ ኦላካ ኦሌታዳሳ፤ ኔኒ ሳኣ ቦላ ታ ሲንꬃን ዳሮ ሱꬅ ጉሲዳ ጊሻስ ኔኒ ታስ ኬꬄ ኬጻና ማላ ኮይኬ› ጊዴስ።
1CH 22:9 ጊዲኮካ፥ ‹ሳሮኒኔ ዎፓን ኣይሲዛ ና ኔ ዬላና፤ ኡባ ባጋራ ዲዛ ሞርኬታፔ ታ ኢዛ ሼምፒሳና፤ ኢዛ ሱንꬂካ ሶሎሞኔ ጌቴታና፤ ኢዛ ካዎቴꬃ ላይꬅ ኡባን ታኒ ኢስራኤሌስ ሳሮኔ ዎፓ ኢማና።
1CH 22:10 ኢዚ ታ ቦንቾስ ኬꬄ ኬጻና፤ ኢዚ ታስ ና ጊዳና፤ ታኒካ ኢዛስ ኣዋ ጊዳና፤ ኢዛ ካዎቴꬃ ኣራታይ ኢስራኤሌ ቦላ ሜርናስ ሚኒ ዳና› ጊዲ ሂዶታ ኢሚዴስ።
1CH 22:11 «ሃኢካ ታ ናዞ! ጎዳይ ኔናራ ጊዶ፤ ኢዚ ኔስ ኢሚዳ ሂዶታ ቃላ ማላ ጎዳ ኔ ጾሳ ኬꬅ ኬጻናሲኔ ፖላናስ ኔና ጋꬆ።
1CH 22:12 ጎዳይ ኔና ኢስራኤሌ ቦላ ካዎꬂዳ ዎዴ ጎዳ ኔ ጾሳ ዎጋ ኔኒ ናጋና ማላ ጾሲ ኔስ ኣꬎ ኤራቴꬂኔ ኣኬካ ኢሞ።
1CH 22:13 ጎዳይ ሙሴ ባጋራ ኢስራኤሌስ ኢሚዳ ዎጋኔ ማራ ኔ ናጊኮ ኡባይካ ኔስ ኢንጄ ጊዳና፤ ኣይኮይ ባ፥ ያዮፋ፥ ሚና፥ ሙርታ፥ ሂዶታ ቃንጾፋ።
1CH 22:14 «ታኒ ታ ዎልቃይ ጋꬂዳ ማላ ጎዳ ጾሳ ኬꬄ ኬጻናስ 3,400 ኪሎ ጊራሜ ጊዲዛ ዎርቃኔ 34,000 ኪሎ ጊራሜ ጊዲዛ ቢራ ሺሻዲስ፤ ቃሴካ ኬሂ ዳሮ ጻርቂማላኔ ቢራታ፥ ሚꬂኔ ሹች ጊጊሳዲስ፤ ሄሳ ቦላ ጉጂሲዛይሳ ኔኒ ጉጃ።
1CH 22:15 ኔ ማታን ዱማ ዱማ ኦሶ ኤሪዛ ሂላቲ ዴቴስ፤ ሹች ቄሪዛይቲኔ ማሲዛይቲ፥ ኣናጼቲኔ ኡባ ኦሶ ኦꬃናስ ዳንዳይዛ ሂላቲ ዴቴስ።
1CH 22:16 ዎርቃ፥ ቢራ፥ ጻርቂማላኔ ቢራታ ኦሶን ኤሬቲዳ ዱማ ዱማ ሂላቲ ኔስ ዴቴስ፤ ሃኢ ኔኒ ኦሶዛ ዶማ፤ ጎዳይ ኔናራ ጊዶ» ጊዴስ።
1CH 22:17 ዳዊቲ ኢስራኤሌ ዴራ ካሌꬂዛይታ ኡባ ባ ና ሶሎሞኔ ማዳና ማላ፥
1CH 22:18 «ጎዳ ኢንቴ ጾሳይ ሃይሳ ጋካናስ ኢንቴናራ ዴስ ጊዴኔ? ኢዚ ኢንቴና ኡባሶራ ሼምፒሲቤኔ? ሃ ቢታን ዲዛ ኣሳ ኢዚ ታ ኩሼን ኣꬂ ኢሚዳ ጊሻስ ሃ ቢታያ ጎዳ ጾሳሲኔ ኢዛ ዴራስ ሃሬታዱስ።
1CH 22:19 ሄሳ ጊሻስ ጎዳ ኢንቴ ጾሳ ኮያናስ ኢንቴ ዎዚናኔ ኢንቴ ሼምፖ ኢሚቴ፤ ጎዳ ጾሳ ቦንቾስ ኬጼቲዳ ኬꬃን ጾሳ ታቦታኔ ጾሳስ ዱማቲዳ ሚሻታ ኤሂዲ ዎꬃና ማላ ኢንቴ ዴንዲዲ ጎዳ ኬꬄ ኬጺቴ» ጊ ኣዛዚዴስ።
1CH 23:1 ዳዊቲ ጬጊዳ ዎዴ ባ ና ሶሎሞኔ ኢስራኤሌ ቦላ ካዎꬂዴስ።
1CH 23:2 ዳዊቲ ኢስራኤሌ ካሌꬂዛ ኡባታ፥ ቄሴታኔ ሌዌታ ኢሲፌ ሺሺዴስ።
1CH 23:3 ኢስታስ ላይꬃይ ሄꬑ ታማኔ ሄሳፌካ ቦላራ ጊዲዳ ኣቱማ ኣሳታ ሌዌታፔ ቆዲዴስ፤ ኢስታ ቆዳይ ኩሜꬅ 38,000 ጊዲዴስ።
1CH 23:4 ሃይታንታፌ 24,000 ጾሳ ኬꬃ ኦሶ ካሌቲ ጼላና ማላ ኣዋቴꬅ ኢስታስ ኢሚዴስ፤ ቃሴ 6,000 ኣሳታስ ሹሜታኔ ፒርዳ ዳናታ ሂስቲ ዎꬂዴስ።
1CH 23:5 ኦይዱ ሺያታስ ጊምቤዛ ፔንጌ ናጋና ማላ ኣዋቴꬅ ኢሚዴስ፤ ኣቲዳ ኦይዱ ሺያታስ ባ ኦꬂዳ ዬꬃ ማሳራታን ጎዳ ጾሳ ጋላታና ማላ ሱንꬂዴስ።
1CH 23:6 ዳዊቲ ሌዌይ ዬሊዳ ኣቱማ ናይታ ጌርሾኔ፥ ቃኣቴኔ ሜራሬ ኢስታ ዛርኬን ዛርኬን ሄꬑ ኬሲ ሻኪዴስ።
1CH 23:7 ጌርሾኔይ ዬሊዳ ኣቱማ ናይቲ ላዳኔኔ ሺምኤ።
1CH 23:8 ላዳኔ ኣቱማ ናይቲ ሄꬓ፤ ኢስቲካ ዪሂኤሌ፥ ዜታሜኔ ኢዩኤሌ።
1CH 23:9 ሺምኤ ኣቱማ ናይቲ ሄꬓ፤ ኢስቲካ ሻሎሚቴ፥ ሃዚኤሌኔ ሃራኔ፤ ሄይቲ ላዳኔ ዛርኬታስ ሃላቃታ።
1CH 23:10 ሺምኤ ኣቱማ ናይቲ፥ ያሃቴ፥ ዚና፥ ያኡሼኔ ባሪሄ።
1CH 23:11 ባይራዚ ያሃቴ፥ ካሎዚ ዚና፤ ያኡሼሲኔ ባሪሄስ ዳሮ ኣቱማ ናይቲ ባይንዳ ጊሻስ ኢሲ ኬꬃ ኣሳ ማላ ቆዴቲዳ።
1CH 23:12 ቃኣቴስ ኦይዱ ኣቱማ ናይቲ ዴቴስ፤ ሄይቲካ ኣሚራሜ፥ ዪጺሃሬ፥ ኬብሮኔኔ ኡዚኤሌ።
1CH 23:13 ኣሚራሜ ኣቱማ ናይቲ ኣሮኔኔ ሙሴ፤ ኣሮኔይኔ ኢዛ ዜሬꬃቲ ጾሳ ኬꬃን ጎኤቲዛ ሚሻታ ሜርናስ ዱማሳና ማላ፥ ጾሳስ ያርሾ ሺሻና ማላ፥ ጾሳ ሲንꬃን ሃጋዛና ማላኔ ኢዛ ሱንꬃን ዴራ ሜርናስ ኣንጃና ማላ ዱማቲዳ።
1CH 23:14 ጾሳ ኣስ ሙሴ ኣቱማ ናይቲካ ሌዌ ቆሞታ ማላ ቆዴቲዳ።
1CH 23:15 ሙሴ ናይቲ ጌርሾሜኔ ኤልኤዜሬ።
1CH 23:16 ጌርሾሜ ናይታስ ሃላቃይ ባይራ ናዛ ሹባኤሌ።
1CH 23:17 ኤልኤዜሬስ ኢሲ ኣቱማ ናይ ጻላ ዴስ፤ ኢዚካ ኤራሃቢያ፤ ኤራሃቢያስ ጊዲኮ ዳሮ ኣቱማ ናይቲ ዴቴስ።
1CH 23:18 ዪጺሃሬ ናይታስ ሃላቃይ ባይራ ናዛ ሻሎሚቴ።
1CH 23:19 ኬብሮኔ ናይታፔ ባይራዚ ዪሪያ፥ ናምኣንꬆዚ ኣማሪያ፥ ሄꬓንꬆዚ ያሃዚኤሌ፥ ኦይዳንꬆዚ ዮቂማኣሜ።
1CH 23:20 ኡዚኤሌ ኣቱማ ናይታፔ ባይራዚ ሚኪያሳ፥ ካሎዚ ዪሺያ።
1CH 23:21 ሜራሬ ኣቱማ ናይቲ ማሂሌኔ ሙሼ፤ ማሂሌ ኣቱማ ናይቲ ኤልኤዜሬኔ ቂሴ።
1CH 23:22 ኤልኤዜሬይ ማጫ ና ጻላ ዬሊዲ ኣቱማ ና ዬሎንታ ሃይቂዴስ፤ ሄሳ ጊሻስ ኢስቲ ባንታ ኣዋ ኢሻ ቂሴ ናይታ ጌሊዳ።
1CH 23:23 ሙሼ ኣቱማ ናይቲ ሄꬓ፤ ሄይቲካ ማሂሌ፥ ኤዴሬኔ ያርሞቴ።
1CH 23:24 ሃይታንቲ ኡባይ ባሶ ኣሳታኒኔ ባ ዛርኬታን ጼይጌቲዳ፤ ሌዌ ዛሬቲ ኢሶይ ኢሶይ ባ ሱንꬃን ማዝጋቤቲዳ፤ ኢስታስ ላይꬃይ ናምኡ ታማኔ ሄሳፌ ቦላ ጊዲዳይቲ ጾሳ ኬꬃን ኦꬄቴስ።
1CH 23:25 ዳዊቲ፥ «ኢስራኤሌ ጎዳ ጾሲ ባ ኣሳ ሼምፒሲዴስ፤ ዬሩሳላሜን ሜርናስ ዴኣና።
1CH 23:26 ሃይሳፌ ጉዬ ሌዌቲ ዱንካኔዛኔ ኢዛ ጊዶን ጎኤቲዛ ሚሻታ ቶካናስ ቤሴና» ጊዴስ።
1CH 23:27 ዳዊቲ ዉርሴꬃን ኢሚዳ ኣዛዞ ማላ ኢስታስ ላይꬃይ ናምኡ ታማኔ ሄሳፌ ቦላራ ጊዲዳ ሌዌቲ ቆዴቲዳ።
1CH 23:28 ሌዌታ ኦሶይ ጾሳ ኬꬃን ኣሮኔ ዜሬꬃታ ኦሶን ኦꬂ ማዶ፥ ጾሳ ኬꬃ ጊዶዛኔ ጊቤዛ ሎኤꬂ ናጎ፥ ጾሳ ኬꬃ ኦሶስ ዱማቲዳ ሚሻታ ሎኤꬂ ኦይꬂኔ ጾሳ ኬꬃን ዲዛ ሃራ ኦሶታካ ሎኤꬂ ኦሶ።
1CH 23:29 ቃሴካ ጾሳ ሲንꬃን ዎꬂዛ ኡኬꬃስ፥ ካꬃ ያርሾስ ሺሺዛ ꬊሌስ፥ ሙኑቃናስ፥ ኢርሾይ ባይንዳ ኡኬቲዛ ኡኬꬅ ኡካናስ፥ ማኪዛዛሲኔ ሜዛኒዛዛስ ኣላፌቴꬂ ኢስታስ ኢሜቲዴስ።
1CH 23:30 ሄሳꬆካ ኢስቲ ኡባ ጋላስ ማላዶኔ ኦማርስ ጎዳ ጾሳ ሲንꬃን ኤቂዲ ጋላታናሲኔ ቦንቻናስ፥
1CH 23:31 ሳምባታ ጋላስ፥ ኣጊናይ ዶሚዛ ኮይሮ ጋላሳታን፥ ባኣሌ ጋላሳታን ዎጋ ቆዳ ማላ ጎዳ ጾሳ ሲንꬃን ኡባ ዎዴ ጹጌቲ ሺቂዛ ያርሾ ሺሻናስ፥
1CH 23:32 ጋይቶቴꬃ ዱንካኔኔ ጾሳ ኬꬅ ናጋናስ፥ ኢዛ ጊዶን ኦሴቲዛ ጎይኖ ዎጋታ ፖሊሺን ባ ዳቦ ኣሮኔ ዜሬꬃታ ማዳናስ ኣዋቴꬂ ኢሜቲዴስ።
1CH 24:1 ኣሮኔ ናይታ ጩጋይ ሃይሳፌ ካሊዛይሳ፤ ኣሮኔ ናይቲ ናዳቤ፥ ኣቢሁ፥ ኤልኤዜሬኔ ኢታማሬ።
1CH 24:2 ናዳቤይኔ ኣቢሁይ ና ዬሎንታ ባ ኣዋፔ ካሴቲ ሃይቂዳ፤ ሄሳ ጊሻስ ኤልኤዜሬይኔ ኢታማሬይ ቄሴ ጊዲዳ።
1CH 24:3 ዳዊቲ ኤልኤዜሬ ዛርኬፌ ሳዶቄኔ ኢታማሬ ዛርኬፌ ኣሂሜሌኬራ ጊዲዲ ኣሮኔ ዛሬታ ኢስታ ኦሶን ኦሶን ማዳና ማላ ሻኪ ዎꬂዴስ።
1CH 24:4 ኤልኤዜሬ ዛሬ ሃላቃቲ ኢታማሬ ዛሬ ሃላቃታፔ ዳሮ ጊዲዳ ጊሻስ ኤልኤዜሬ ዛሬቲ ታማኔ ኡሱፑን ጩጋን ሻኬቲን፥ ኢታማሬ ዛሬቲ ኦስፑን ጩጋን ሻኬቲዳ።
1CH 24:5 ጾሳ ኬꬃ ካሌꬂዛይቲኔ ጾሳ ጪማቲ ኤልኤዜሬ ዛሬታ ጊዶኒኔ ኢታማሬ ዛሬታ ጊዶን ዲዛ ጊሻስ ኦናካ ማዶንታ ኦሶዛ ሳማን ሻኪዳ።
1CH 24:6 ሌዌ ዛሬ ናቲናኤሌ ና ጻፌዚ ሻማኤይ ካዎዛ ሲንꬃኒኔ ኢዛ ሹሜታ ሲንꬃን፥ ቄሴ ሳዶቄ ሲንꬃኒኔ ኣቢያታሬ ና ኣሂሜሌኬ ሲንꬃን፥ ቄሴታ ሲንꬃኒኔ ሌዌታሶ ኣሳ ሃላቃታ ሲንꬃን ኢስታ ሱንꬃ ጻፊዴስ፤ ሂስቲን ኤልኤዜሬ ኬꬃ ኣሳታ ሃላቃታፔ ኢሶይኔ ኢታማሬ ኬꬃ ኣሳታ ሃላቃታፔ ኢሶይ ባንታ ታራን ታራን ሳማ ኬሲዳ።
1CH 24:7 ሃ ኣሳቲ ሳማ ኬሲን ኮይሮ ሳማይ ዮሃሪቤ ጋኪዴስ፤ ናምኣንꬆዚ ያዳያ ጋኪዴስ፤
1CH 24:8 ሄꬓንꬆዚ ሃሪሜ ጋኪዴስ፤ ኦይዳንꬆዚ ሳኦሪሜ ጋኪዴስ።
1CH 24:9 ኢቻሻንꬆዚ ማልኪያ ጋኪዴስ፤ ኡሱፑንꬆዚ ሚያሚኔ ጋኪዴስ፤
1CH 24:10 ላፑንꬆዚ ሃቆጼ ጋኪዴስ፤ ኦስፑንꬆዚ ኣቢያ ጋኪዴስ፤
1CH 24:11 ኡዱፉንꬆዚ ኢያሶ ጋኪዴስ፤ ታማንꬆዚ ሻካኒያ ጋኪዴስ፤
1CH 24:12 ታማን ኢሲንꬆዚ ኤልያሼቤ ጋኪዴስ፤ ታማን ናምኣንꬆዚ ያቂሜ ጋኪዴስ፤
1CH 24:13 ታማን ሄꬓንꬆዚ ሁፓ ጋኪዴስ፤ ታማን ኦይዳንꬆዚ ያሼባኣቤ ጋኪዴስ፤
1CH 24:14 ታማን ኢቻሻንꬆዚ ቢልጋ ጋኪዴስ፤ ታማን ኡሱፑንꬆዚ ኢሜሬ ጋኪዴስ፤
1CH 24:15 ታማን ላፑንꬃዚ ሄዚሬ ጋኪዴስ፤ ታማን ኦስፑንꬆዚ ሃፊጼጼ ጋኪዴስ፤
1CH 24:16 ታማን ኡዱፉንꬆዚ ፓታያ ጋኪዴስ፤ ናምኡ ታማንꬃዚ ሂዚቄላ ጋኪዴስ፤
1CH 24:17 ናምኡ ታማን ኢሲንꬆዚ ያኪኔ ጋኪዴስ፤ ናምኡ ታማን ናምኣንꬆዚ ጋሙሌ ጋኪዴስ፤
1CH 24:18 ናምኡ ታማን ሄꬓንꬆዚ ዳላያ ጋኪዴስ፤ ናምኡ ታማን ኦይዳንꬆዚ ማኣዚያ ጋኪዴስ።
1CH 24:19 ኢስራኤሌ ጎዳይ ኢስታ ኣዛዚዳ ማላኔ ካሴ ኢስታ ኣዋ ኣሮኔይ ኢስታስ ዎꬂዳ ዋጋ ማላ ኢስቲ ጾሳ ኬꬅ ጌሊዛ ዎዴ ኦꬃና ማላ ኢሜቲዳ ዎጋይ ሃይሳ።
1CH 24:20 ኣቲዳ ሃራ ሌዌ ዛሬቲ ኣሚራሜ ናይታፔ ሼቡኤሌ፥ ሼቡኤሌ ናይታፔ ዬሂዳዬ።
1CH 24:21 ኤራሃቢያ ናይታፔ ባይራ ናዛ ዪሺያ።
1CH 24:22 ዪጺሃሬታፔ ሻሎሚቴ፤ ሻሎሚቴ ናይታፔ ያሃቴ።
1CH 24:23 ኬብሮኔ ናይታፔ ኮይሮዚ ዪሪያ፥ ናምኣንꬆዚ ኣማሪያ፥ ሄꬓንꬆዚ ያሃዚኤሌ፥ ኦይዳንꬆዚ ዮቂማኣሜ።
1CH 24:24 ኡዚኤሌ ናይታፔ ሚኪያሳ ና ሻሚሬ።
1CH 24:25 ሚኪያሳ ኢሻ ዪሺያ ናይታፔ ዛካራሳ።
1CH 24:26 ሜራሬ ኣቱማ ናይቲ ማሂሌ፥ ሙሼኔ ያኢዜ።
1CH 24:27 ያኢዜ ኣቱማ ናይቲ ቤኖ፥ ሾሃሜ፥ ዛኩሬኔ ኢቢሬ።
1CH 24:28 ማሂሌ ኣቱማ ናይቲ ኤልኤዜሬኔ ቂሴ፤ ኤልኤዜሬስ ኣቱማ ናይ ዴና።
1CH 24:29 ቂሴስ ዬራሂምኤሌ ጌቴቲዛ ኢሲ ኣቱማ ናይ ዴስ።
1CH 24:30 ሙሼስ ማሂሌ፥ ኤዴሬኔ ያርሞቴ ጌቴቲዛ ሄꬑ ኣቱማ ናይቲ ዴቴስ። ሃይታንቲ ባሶ ኣሳን ኣሳን ቆዴቲዳ ሌዌ ዛሬታ።
1CH 24:31 ኢስታ ኢሻ ኣሮኔ ናይቲ ኦꬆይሳꬆ ካዎ ዳዊቴ ሲንꬃን፥ ሳዶቄ ሲንꬃን፥ ኣሂሜሌኬ ሲንꬃን፥ ሄሳꬆካ ቄሴታሶ ኣሳታ ሃላቃቲኔ ሌዌታሶ ኣሳታ ሃላቃቲ ዲዛሶን ሳማ ዬጊዳ፤ ባይራዛፔ ቢዲ ዉርሴꬅ ጋካናስ ዲዛይታስ ኢሲ ጊና ሳማ ዬጊዳ።
1CH 25:1 ዳዊቲኔ ኦላ ጋዳዋቲ ኣሳፌ ናይታፔ፥ ሄማኔ ናይታፔኔ ኤዶታኔ ናይታፔ ማሲንቆን፥ ዲꬃኒኔ ዳላን ኣዋጂሼ ቲንቢቴ ዮቲዛይታ ዶሪ ዎꬂዳ፤ ሃይሳ ሃ ኦሶዛ ኦꬃና ማላ ዶሬቲዳ ኣሳታ ሱንꬂ ሃይሳፌ ካሊ ዲዛይሳ።
1CH 25:2 ኣሳፌ ናይታፔ ዛኩሬ፥ ዮሴፌ፥ ናታኒያኔ ኣሼርኤሌ፤ ሃይቲ ኣሳፌ ናይቲ ካዎይ ኣዛዚን ቲንቢቴ ዮቲዛ ኣሳፌፔ ጋርሳራ ኣዛዜቴቴስ።
1CH 25:3 ኤዶታኔ ናይታፔ ጎዶሊያሳ፥ ጼሬ፥ ዬሻኢያ፥ ሺምኤ፥ ሃሻቢያኔ ማቲቲያ፤ ሃ ኡሱፑናቲ ማሲንቆን ጎዳ ጋላቲሼኔ ቦንቺሼ ቲንቢቴ ዮቲዛ ባ ኣዋ ኤዶታኔፔ ጋርሳራ ኣዛዜቴቴስ።
1CH 25:4 ሄማኔ ናይታፔ ቡቂያ፥ ማታኒያ፥ ኡዚኤሌ፥ ሹባኤሌ፥ ያርሞቴ፥ ሃናኒያ፥ ሃናኔ፥ ኤልኣታ፥ ጊዶልቴ፥ ኤሮማምቴ-ኤዜሬ፥ ዮሺባቃሼ፥ ማሎታ፥ ሆቲሬኔ ማሂዚኦቴ።
1CH 25:5 ሃይቲ ኡባቲካ ካዎዛስ ቲንቢቴ ዮቲዛ ሄማኔ ናይታ፤ ጾሳይ ኢዛስ ኢማና ጊዳ ማላ ሄማኔ ꬎቁ ꬎቁ ሂስታናስ ሃ 14 ኣቱማ ናይታኔ 3 ማጫ ናይታ ኢዛስ ኢሚዴስ።
1CH 25:6 ሃይቲ ኡባይ ጎዳ ኬꬃን ዳላ ጊሪሲሼ፥ ማሲንቆኔ ዲꬅ ዲጺሼ ባንታ ኣዋፔ ጋርሳራ ጾሳ ኬꬃን ኦꬄቴስ። ኣሳፌይ፥ ኤዶታኔይኔ ሄማኔይ ካዎዛፔ ጋርሳራ ኣዛዜቲሼ ዴቴስ።
1CH 25:7 ሃይቲ ባ ዳቦታራ ጊዲዲ ጎዳ ሲንꬃን ሺቂዛ ዬꬃ ታማር ሎሂዳይታ፤ ኢስታ ቆዳይ ሙሌራ ናምኡ ጼታኔ ኦስፑን ታማኔ ኦስፑና።
1CH 25:8 ኢስቲ ባንታ ኦሶ ሻኪ ኤራናስ ጪማኔ ና፥ ኣስታማሬኔ ታማሬ ጊ ሻኮንታ ኢሲ ጊና ሳማ ዬጊዳ።
1CH 25:9 ኮይሮ ሳማይ ኣሳፌ ባጋፌ ጊዲዳ ዮሴፌ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12፤ ናምኣንꬆ ሳማይ ጎዶሊያሳስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:10 ሄꬓንꬆ ሳማይ ዛኩሬስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:11 ኦይዳንꬆ ሳማይ ዬጺሬስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:12 ኢቻሻንꬆ ሳማይ ናታኒያስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:13 ኡሱፑንꬆ ሳማይ ቡቂያስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:14 ላፑንꬆ ሳማይ ኣሼርኤሌስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:15 ኦስፑንꬆ ሳማይ ዬሻኢያስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:16 ኡዱፉንꬆ ሳማይ ማታኒያስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:17 ታማንꬆ ሳማይ ሺምኤስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:18 ታማኔ ኢሲንꬆ ሳማይ ኣዛሪኤሌስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:19 ታማኔ ናምኣንꬆ ሳማይ ሃሻቢያስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:20 ታማኔ ሄꬓንꬆ ሳማይ ሼቡኤሌስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:21 ታማኔ ኦይዳንꬆ ሳማይ ማቲቲያስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:22 ታማኔ ኢቻሻንꬆ ሳማይ ያርሞቴስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:23 ታማኔ ኡሱፑንꬃ ሳማይ ሃናኒያስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:24 ታማኔ ላፑንꬃ ሳማይ ዮሺባቃሼስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:25 ታማኔ ኦስፑንꬃ ሳማይ ሃናኔስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:26 ታማኔ ኡዱፉንꬆ ሳማይ ማሎታስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:27 ናምኡ ታማንꬆ ሳማይ ኤልኣታስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:28 ናምኡ ታማኔ ኢሲንꬆ ሳማይ ሆቲሬስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:29 ናምኡ ታማኔ ናምኣንꬆ ሳማይ ጊዶልቴስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:30 ናምኡ ታማኔ ሄꬓንꬆ ሳማይ ማሂዚኦቴስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 25:31 ናምኡ ታማኔ ኦይዳንꬆ ሳማይ ኤሮማምቴ-ኤዜሬስ፥ ኢዛ ናይታሲኔ ኢዛ ዳቦታስ ኬዚዴስ፤ ኢስታስ ቆዳይ 12።
1CH 26:1 ጾሳ ኬꬃ ፔንጌ ናጊዛይቲ ሃይሳፌ ካሊዛይታ። ቆሬ ባጋፌ ኣሳፌ ናይታ ጋርሳን ቆሬ ና ማሼሌሚያ።
1CH 26:2 ማሼሌሚያ ናይቲ፥ ኮይሮይ ዛካራሳ፥ ናምኣንꬆዚ ዪዲኤሌ፥ ሄꬓንꬆዚ ዛባዲያ፥ ኦይዳንꬆዚ ያቲንኤሌ፥
1CH 26:3 ኢቻሻንꬆዚ ኤላሜ፥ ኡሱፑንꬆዚ ዪሆሃናኔ፥ ላፑንꬆዚ ኤልሆኤናዬ።
1CH 26:4 ጾሲ ኦቤድ-ኤዶሜ ኣንጂዳ ጊሻስ ኢዚ ኦስፑን ኣቱማ ናይታ ዬሊዴስ፤ ኮይሮዚ ሻማኤ፥ ናምኣንꬆዚ ዪሆዛባዴ፥ ሄꬓንꬆዚ ዮኣሃ፥ ኦይዳንꬆዚ ሳካሬ፥ ኢቻሻንꬆዚ ናቲናኤሌ፥
1CH 26:5 ኡሱፑንꬆዚ ኣምኤሌ፥ ላፑንꬆዚ ዪሳኮሬ፥ ኦስፑንꬆዚ ፒላቴ።
1CH 26:6 ቃሴ ኦቤድ-ኤዶሜ ና ሻማኤይካ ኣቱማ ናይታ ዬሊዴስ፤ ኢስቲ ኤሬቲዳ ሚኖ ኣስ ጊዲዳ ጊሻስ ባንታ ኣዋ ኬꬃን ሃላቃ ጊዲዳ።
1CH 26:7 ሻማኤ ናይቲ ኦቲኔ፥ ኤራፋኤሌ፥ ኢዮቤዴኔ ኤልዛባዴ፤ ኢስታ ኢሻቲ ኤሊሁይኔ ሳማኬይ ኤሬቲዳ ሚኖ ኣሳታ።
1CH 26:8 ሃይቲ ኡባቲ ኦቤድ-ኤዶሜ ዛሬታ፤ ኢስታስ፥ ኢስታ ናይቲኔ ኢስታ ዳቦቲ ኦሶስ ኬሂ ሚኖ ኣሳታ፤ ኦቤድ-ኤዶሜ ዛሬቲ ሙሌራ ኡሱፑን ታማኔ ናምኣ።
1CH 26:9 ማሼሌሚያስ ኤራቴꬂ ኩሚዳ ሚኖ ናይቲኔ ዳቦቲ ዴቴስ፤ ኢስቲ ሙሌራ ታማኔ ኦስፑና።
1CH 26:10 ሜራሬ ባጋፌ ጊዲዳ ሆሳስካ ኣቱማ ናይቲ ዴቴስ፤ ኢሶይ ሺሚሬ፤ ኢዚ ባይራ ጊዶንታ ኣጊኮካ ኢዛ ኣዋይ ኢዛ ባይራሲዴስ።
1CH 26:11 ናምኣንꬆዚ ኪልቂያሳ፥ ሄꬓንꬆዚ ጻባሊያ፥ ኦይዳንꬆዚ ዛካራሳ፤ ሆሳ ናይቲኔ ኢዛ ዳቦቲ ሙሌራ ታማኔ ሄꬓ።
1CH 26:12 ጾሳ ኬꬃ ፔንጌ ናጊዛይቲ ባንታ ኬꬃ ኣሳ ሃላቃታ ጋርሳን ጩጋን ጩጋን ሻኬቲዲ ኢስታ ዳቦቲ ኦꬆይሳꬆ ጾሳ ኬꬃ ኦሶ ኦꬃናስ ባ ታራን ታራን ኡቲዳ።
1CH 26:13 ፔንጌታ ኡባ ናጋናስ ባንታ ኬꬃን ኬꬃን ጪማኔ ዮጋ ጎንታ ኢሲ ቦላ ሳማ ኬሲዳ።
1CH 26:14 ኣርሼይ ሞኪዛ ባጋራ ዲዛ ፔንጌዛ ናጋናስ ሳማይ ሼሌሚያስ ኬዚዴስ፤ ፑዴሃ ባጋራ ዲዛ ፔንጌዛ ናጋናስ ሳማይ ሎኦ ዞሪዛ ኢዛ ና ዛካራሳስ ኬዚዴስ።
1CH 26:15 ዱጌሃ ባጋራ ዲዛ ፔንጌዛ ናጋናስ ሳማይ ኦቤድ-ኤዶሜስ ኬዚዴስ፤ ሚንጃ ኬꬃ ናጋናስ ሳማይ ኢዛ ናይታ ጋኪዴስ።
1CH 26:16 ኣርሼይ ዉሊዛ ባጋራ ዲዛ ፔንጌዛኔ ጋና ኦጌ ባጋራ ዲዛ ሼሌኬቴ ፔንጌ ናጋናስ ሳማይ ሹፊሜሲኔ ሆሳስ ኬዚዴስ።
1CH 26:17 ኢሲ ባጋራ ናጊዛ ዛቤታ ጊናራ ሃራ ዛቤይ ዴስ፤ ሃች ሃች ኣርሼይ ሞኪዛ ባጋራ ኡሱፑን ዛቤቲ፥ ፑዴሃ ባጋራ ኦይዱ ዛቤቲ፥ ሚንጃ ኬꬃ ናጋናስ ናምኡ ዛቤቲ፥
1CH 26:18 ኣርሼይ ዉሊዛ ባጋራ ዲዛ ዱቡሻ ዴምባን ናምኡ ዛቤ ቃሴካ ኦጌ ቦላ ኦይዱ ዛቤ ጊዲዲ ናጌቴስ።
1CH 26:19 ቆሬ ዛሬታሲኔ ሜራሬ ዛሬታስ ፔንጌ ናጋናስ ኢሜቲዳ ኢስታ ኦሶ ጊሻይ ሄሳ።
1CH 26:20 ሌዌ ባጋፌ ኣካያይ ጾሳ ኬꬃ ጊዶን ዲዛ ሚንጃ ኬꬃኔ ጾሳስ ዱማሲ ዎꬂዳ ኢሞታታ ናጋናስ ኣዋቴꬂ ኢዛስ ኢሜቲዴስ።
1CH 26:21 ዪሂኤሌ ኣዋ ላዳኔይ ጌርሾኔ ባጋፌ ጊዲዳ ኢዛ ናይቲ ባሶ ኬꬃ ኣሳታስ ሃላቃታ።
1CH 26:22 ዪሂኤሌ ና ዜታሜሲኔ ኢዛ ኢሻ ኢዩኤሌስ ጾሳ ኬꬃ ጊዶን ዲዛ ሚንጃ ኬꬃ ናጋናስ ኣዋቴꬂ ኢሜቲዴስ።
1CH 26:23 ኣሚራሜ ዛሬታስ፥ ዪጺሃሬ ዛሬታስ፥ ኬብሮኔ ዛሬታሲኔ ኡዚኤሌ ዛሬታስ ኢስታ ጊሻ ኦሶይ ኢሜቲዴስ።
1CH 26:24 ሙሴ ና ጌርሾሜ ዛሬፔ ጊዲዳ ሹባኤሌስ ሚንጃ ኬꬃ ናጊዛይታ ቦላ ኣላፌቴꬂ ኢሜቲዴስ።
1CH 26:25 ኢዚ ጌርሾሜ ኢሻ ኤልኤዜሬ ባጋራ ሻሎሚቴስ ዳቦቴስ፤ ኤልኤዜሬይ ኤራሃቢያ ዬሊዴስ፤ ኤራሃቢያይ ዬሻኢያ ዬሊዴስ፤ ዬሻኢያይ ኢዮራሜ ዬሊዴስ፤ ኢዮራሜይ ዚኪሬ ዬሊዴስ፤ ዚኪሬይ ሻሎሚቴ ዬሊዴስ።
1CH 26:26 ካዎ ዳዊቲ፥ ኢዛሶ ኣሳታ ሃላቃቲ፥ ሻላቃቲ፥ ማቶ ሃላቃቲኔ ኦላ ጋዳዋቲ ጾሳስ ዱማሲ ዎꬂዳ ሚሻታ ኡባ ናጋናስ ሻሎሚቴሲኔ ኢዛ ዳቦታስ ኣዋቴꬂ ኢሜቲዴስ።
1CH 26:27 ካሴ ኦላን ዲኢ ኤሂዳ ሚሻፌ ባጋ ጾሳ ኬꬃ ጊጊሳናስ ዱማሲ ዎꬂዳ።
1CH 26:28 ቃሴ ናቤ ሳሜሊ፥ ቂሴ ና ሳኦሊ፥ ኔሬ ና ኣቢኔሪኔ ጹሪያ ና ኢዮኣቤይ ካሴ ዱማሲ ዎꬂዳ ሚሽ ኡባኔ ሃራ ጾሳ ኬꬃ ሚሻታ ኡባ ሻሎሚቴይኔ ኢዛ ዳቦቲ ናጌቴስ።
1CH 26:29 ዪጺሃሬ ዛሬታፔ ካናኒያሲኔ ኢዛ ናይታስ ጾሳ ኬꬃፌ ካሬ ባጋራ ዲዛ ኦሶታን ኢስራኤሌ ኣሳ ኣሳናሲኔ ኢስታ ቦላ ፒርዳናስ ኣዋቴꬂ ኢሜቲዴስ።
1CH 26:30 ኬብሮኔ ዛሬፔ ሃሻቢያይኔ ኢዛ ዳቦቲ 1,700 ሚኖ ኣሳቲ ዮርዳኖሴ ሻፋፔ ሄ ፒንꬃን ኣርሼይ ዉሊዛ ባጋራ ዲዛ ኢስራኤሌ ኣሳ ቦላ ጎዳ ኦሶሲኔ ካዎ ኦሶስ ሹሜቲዳ።
1CH 26:31 ኬብሮኔ ዛሬታፔ ኢስታሶ ኣሳ ማዝጋቤዛን ጻፌቲዳ ማላ ዪሪያይ ኢስታስ ሃላቃ ጊዲዴስ፤ ካዎ ዳዊቲ ካዎቲዳ ኦይዱ ታማንꬃ ላይꬃን ማዝጋቤ ፒልጊ ጼሊሺን ጋላኣዴ ዴሬን ኢያዜሬ ጌቴቲዛሶን ኬብሮኔ ኣሳታፔ ሚኖ ኣሳቲ ቤቲዳ።
1CH 26:32 ዪሪያስ ሚኖኔ ሶ ኣሳታስ ሃላቃ ጊዲዳ 2,700 ዳቦቲ ዴቴስ፤ ካዎ ዳዊቲ ኢስቲ ጾሳ ኦሶ ኦꬃናሲኔ ካዎ ኦሶ ኦꬃና ማላ ኦሮቤሌ ቆሞታ ቦላ፥ ጋዴ ቆሞታ ቦላኔ ሚናሴ ቆሞታፔ ባጋታ ቦላ ሹሚዴስ።
1CH 27:1 ባንታ ቡቴን ቡቴን ላይꬅ ኩሜꬅ ኣጊናን ኣጊናን ካዎዛሲኔ ዴራስ ታራን ታራን ኦꬂዛ ኢስራኤሌ ኬꬃ ኣሳታ ሃላቃቲ፥ ሻላቃቲኔ ማቶ ሃላቃቲ፥ ኦላ ጋዳዋቲ ሃይሳፌ ካሊዛይታ፤ ኢሲ ኢሲ ቡቴን 24,000 ኣሲ ዴስ።
1CH 27:2 ኮይሮ ኣጊናን ኦꬂዛ ቡቴዛስ ኣላፌይ ዛብዲኤሌ ና ያሾቢኣሜ፤ ኢዛ ቡቴዛን 24,000 ኣሲ ዴስ።
1CH 27:3 ያሾቢኣሜይ ፓሬሴ ዛሬ፤ ኢዚ ኮይሮ ኣጊናን ኦላስ ኬኢዛ ሃላቃታስ ጋዳዋ።
1CH 27:4 ናምኣንꬆ ኣጊናን ኦꬂዛ ቡቴዛስ ኣላፌይ ኣሂሆሄ ዴሬ ኣስ ዶዴያ፤ ኢዛ ቡቴዛን 24,000 ኣሲ ዴስ፤ ሃ ቡቴዛ ኢዛፔ ጋርሳራ ካሌꬂዛይ ሚቂሎቴ።
1CH 27:5 ሄꬓንꬆ ኣጊናን ኦꬂዛ ቡቴዛስ ኣላፌይ ቄሴ ዮዳሄ ና ባናያ፤ ኢዛ ቡቴዛን 24,000 ኣሲ ዴስ።
1CH 27:6 ባናያይ 30 ኣሳታፔ ኣꬊ ኤሬቲዳ ሚኖ ኣስ ጊዲዳ ጊሻስ ኢዚ ኢስታ ቦላ ሃላቃ ጊዲዴስ፤ ኢዛ ና ኣሚዛባዴይ ኢዛፔ ጋርሳራ ኣዛዚዛዴ ጊዲዴስ።
1CH 27:7 ኦይዳንꬆ ኣጊናን ኦꬂዛ ቡቴዛስ ኣላፌይ ኢዮኣቤ ኢሻ ኣሳሄሌ፤ ኢዛ ቡቴዛን 24,000 ኣሲ ዴስ፤ ኢዛሶሆን ኣላፌቲዳይ ኢዛ ና ዛባዲያ።
1CH 27:8 ኢቻሻንꬆ ኣጊናን ኦꬂዛ ቡቴዛስ ኣላፌይ ዪጺራ ኣስ ሻሚሁቴ፤ ኢዛ ቡቴዛን 24,000 ኣሲ ዴስ።
1CH 27:9 ኡሱፑንꬆ ኣጊናን ኦꬂዛ ቡቴዛስ ኣላፌይ ቴቁሄ ኣስ ኢቄሻ ና ኢራ፤ ኢዛ ቡቴዛን 24,000 ኣሲ ዴስ።
1CH 27:10 ላፑንꬆ ኣጊናን ኦꬂዛ ቡቴዛስ ኣላፌይ ኤፍሬሜ ዛሬፔ ፒሎኔ ዴሬ ኣስ ሄሌጼ፤ ኢዛ ቡቴዛን 24,000 ኣሲ ዴስ።
1CH 27:11 ኦስፑንꬆ ኣጊናን ኦꬂዛ ቡቴዛስ ኣላፌይ ሁሼ ኣስ ሲቢካዬ፤ ኢዚ ዛራሄ ዛሬፔ ዪዴስ፤ ኢዛ ቡቴዛን 24,000 ኣሲ ዴስ።
1CH 27:12 ኡዱፉንꬆ ኣጊናን ኦꬂዛ ቡቴዛስ ኣላፌይ ቢኒያሜ ዛሬፔ ኣናቶቴ ኣስ ኣቢኤዜሬ፤ ኢዛ ቡቴዛን 24,000 ኣሲ ዴስ።
1CH 27:13 ታማንꬆ ኣጊናን ኦꬂዛ ቡቴዛስ ኣላፌይ ዛራሄ ዛሬፔ ናጾፌ ዴሬ ኣስ ማሂራዬ፤ ኢዛ ቡቴዛን 24,000 ኣሲ ዴስ።
1CH 27:14 ታማኔ ኢሲንꬆ ኣጊናን ኦꬂዛ ቡቴዛስ ኣላፌይ ኤፍሬሜ ዛሬፔ ፒራቶኔ ኣስ ባናያ፤ ኢዛ ቡቴዛን 24,000 ኣሲ ዴስ።
1CH 27:15 ታማኔ ናምኣንꬆ ኣጊናን ኦꬂዛ ቡቴዛስ ኣላፌይ ኦቲንኤሌ ዛሬፔ ናጾፌ ዴሬ ኣስ ሄልዳዬ፤ ኢዛ ቡቴዛን 24,000 ኣሲ ዴስ።
1CH 27:16 ኢስራኤሌ ኣሳ ጋርሳን ቆሞታ ቆሞታ ቦላ ሹሜቲዳ ኦላ ጋዳዋቲ ሃይሳፌ ካሊዲ ጻፌቲዳይታ። ኦሮቤሌ ቆሞ ቦላ ሱሚዳይ ዚኪሬ ና ኤልኤዜሬ። ሲሞና ቆሞ ቦላ ሱሚዳይ ማኢካ ና ሻፋጺያ።
1CH 27:17 ሌዌ ቆሞ ቦላ ሱሚዳይ ቃሙኤሌ ና ሃሻቢያ። ኣሮኔ ዛርኬ ቦላ ሱሚዳይ ሳዶቄ።
1CH 27:18 ዩሁዳ ቆሞ ቦላ ሱሚዳይ ዳዊቴ ኢሻ ኤሊሁ። ዪሳኮሬ ቆሞ ቦላ ሱሚዳይ ሚካኤሌ ና ኦሚሬ።
1CH 27:19 ዛቢሎኔ ቆሞ ቦላ ሱሚዳይ ኣብዲዩ ና ዪሺማኤ። ኒፍታሌሜ ቆሞ ቦላ ሱሚዳይ ኣዛሪኤሌ ና ያርሞቴ።
1CH 27:20 ኤፍሬሜ ቆሞ ቦላ ሱሚዳይ ኣዛዚያ ና ሆሴኤ። ዮርዳኖሴ ሻፋፔ ኣርሼይ ዉሊዛ ባጋን ዲዛ ሚናሴ ቆሞ ባጋታ ቦላ ሱሚዳይ ፓዳያ ና ኢዩኤሌ።
1CH 27:21 ዮርዳኖሴ ሻፋፔ ኣርሼይ ሞኪዛ ባጋን ጋላኣዴን ዲዛ ሚናሴ ቆሞ ባጋታ ቦላ ሱሚዳይ ዛካራሳ ና ኢዶ። ቢኒያሜ ቆሞ ቦላ ሱሚዳይ ኣቢኔሬ ና ያኢሲኤሌ።
1CH 27:22 ዳኔ ቆሞ ቦላ ሱሚዳይ ዪሮሃሜ ና ኣዛሪኤሌ። ሃይቲ ኢስራኤሌ ኣሳ ጋርሳን ቆሞታ ቆሞታ ካሌꬂዛ ኦላ ጋዳዋታ።
1CH 27:23 ጎዳይ፥ «ታኒ ኢስራኤሌ ኣሳ ሳሎ ጾሊንቴ ማላ ጮራሳና» ጊዲ ሂዶታ ቃላ ኢሚዳ ጊሻስ ዳዊቲ ናምኡ ታማኔ ሄሳፌ ጋርሳራ ጊዲዳ ኣሳ ቆዲቤና።
1CH 27:24 ጹሪያ ና ኢዮኣቤይ ኣሳ ቆዳ ዶሚዴስ ሺን ፖሊቤና፤ ኣሳ ቆዲዳ ጋሶን ጎዳይ ኢስራኤሌ ኣሳ ቦላ ሃንቄቲዴስ፤ ሄሳ ጊሻስ ኢስታ ቆዳይ ካዎ ዳዊቴ ታሪኬ ማዝጋባን ጻፌቲቤና።
1CH 27:25 ካዎ ኬꬃን ቡቁራ ዎꬂዛ ሚንጃ ኬꬃ ኣላፌይ ኣዲኤሌ ና ኣዚሞቴ። ጋጻሬታን፥ ካታማታን፥ ሞꬃታኒኔ ናጌሶ ሚጻታን ዲዛ ሚንጃ ኬꬃታ ኣላፌይ ኦዚያ ና ዮናታኔ።
1CH 27:26 ጎሻንቻታ ኣላፌይ ካሉቤ ና ኤዚሬ።
1CH 27:27 ዎይኔ ሚꬅ ቶኪዛሶሆታ ኣላፌይ ኤራማቴ ዴሬ ኣስ ሺምኤ፤ ዎይኔ ኡሹ ሚንጂዛሶታ ኣላፌይ ሻፋሜ ዴሬ ኣስ ዛብዴ።
1CH 27:28 ሻራ ሜንꬆታን ዙምቡላታ ጻጶን ዲዛ ዎጋራ ሚꬂኔ ዎላ ሚꬃታ ናጋናስ ኣላፌቴꬂ ጋዴሬ ዴሬ ኣስ ባኣሊ-ሃናኔስ ኢሜቲዴስ፤ ዛይቴ ሚንጂዛ ኬꬃ ኣላፌቴꬂ ኢዮኣሳስ ኢሜቲዴስ።
1CH 27:29 ላሻሮኔ ዴምባን ሄሜቲዛ ዉዴ ሜሄታ ኣላፌቴꬂ ሳሮኔ ኣስ ሺጺራያስ ኢሜቲዴስ፤ ሾባን ሄሜቲዛ ዉዴ ሜሄታ ኣላፌቴꬂ ኣዲላያ ና ሳፋጼስ ኢሜቲዴስ።
1CH 27:30 ጋሜላታ ቦላ ኣላፌቴꬂ ኢስማኤሌ ኣስ ኦቢላስ ኢሜቲዴስ። ሃሬታ ቦላ ኣላፌቴꬂ ሜሮኖቴ ኣስ ዬሂዳዬስ ኢሜቲዴስ።
1CH 27:31 ዶርሳ ዉዴታኔ ዴይሻ ዉዴታ ናጋና ኣላፌቴꬂ ኣጋሪ ዛሬፔ ጊዲዳ ያዚዜስ ኢሜቲዴስ፤ ሃይቲ ኡባይ ካዎ ዳዊቴ ኣቆታ ናጋናስ ኣላፌቴꬅ ኤኪዳ።
1CH 27:32 ዳዊቴ ኣዋ ኢሻይ ዮናታኔይ ጻፌ፥ ኣኬካንቻ ኣሳኔ ዞሪዛ ኣሳ፤ ሃኪሞኔ ና ዪሂኤሌይ ካዎ ናይታ ዲቺዛዴ።
1CH 27:33 ኣክጾፌሌይ ቃሴ ካዎዛ ዞሪዛዴ፤ ኣርኬ ዴሬ ኣስ ሁሼይ ካዎስ ሲቆ ላጌ።
1CH 27:34 ኣክጾፌሌፔ ጉዬ ባናያ ና ዮዳሄይኔ ኣቢያታሬይ ካዎ ዞራንቻ ጊዲዳ፤ ኢዮኣቤይ ካዎ ኦላንቻታ ሃላቃታስ ጋዳዋ ጊዲዴስ።
1CH 28:1 ኢስራኤሌ ቦላ ኣላፌቴꬂ ዲዛ ኣሳቲኔ ኤሬቲዳ ኣሳቲ ኡባይ ዬሩሳላሜን ሺቃና ማላ ካዎ ዳዊቲ ኣዛዚዴስ፤ ሄሳ ጊሻስ ኦላ ኣሳ ቆሞን ቆሞን ካሌꬂዛ ሃላቃቲ፥ ካዋ ኦላንቻታ ካሌꬂዛ ኦላ ጋዳዋቲ፥ ሻላቃቲ፥ ማቶ ሃላቃቲ፥ ካዎ ኣቆታኔ ሜሄታ፥ ኢዛ ናይታ ኣቆታኔ ሜሄታ ቦላ ኣላፌቴꬂ ዲዛይቲ፥ ካዎ ኬꬃ ሹሜቲ፥ ኤሬቲዳ ኦላ ቃራቲኔ ጊታ ኣሳቲ ኡባይ ዬሩሳላሜን ሺቂዳ።
1CH 28:2 ሂስቲን ካዎ ዳዊቲ ዴንዲ ኤቂዲ፥ «ታ ኢሻንቶ፥ ታ ኣሳቶ፥ ሲዪቴ! ኑ ጎዳ ታቦታይ ኡቲዛሶኔ ኑ ጾሳ ቶሆይ ሼምፒዛሶ ጾሳ ኬꬅ ኬጻናስ ታ ዎዚናን ቆፓዳ ሃልቾ ኬሳዲስ፤ ኬጻናስ ኮሺዛ ሚሻታካ ጊጊሳዲስ።
1CH 28:3 ጊዶ ኣቲን ጾሳይ ታና፥ ‹ኔኒ ኦላንቻኔ ሱꬅ ጉሲዳ ኣስ ጊዲዳ ጊሻስ ታ ሱንꬃስ ኬꬅ ኬጻካ› ጊዴስ።
1CH 28:4 ታኒ ኢስራኤሌ ቦላ ሜርናስ ካዎታና ማላ ጎዳ ኢስራኤሌ ጾሳይ ታ ኣዋ ኬꬃ ኣሳ ኡባፌ ታና ዶሪዴስ፤ ካሌꬃና ማላ ኮይሮ ዩሁዳ ቆሞ ዶሪዴስ፤ ዩሁዳ ቆሞፌ ታ ኣዋ ሶ ኣሳ ዶሪዴስ፤ ታ ኣዋ ናይታ ጊዶፌ ታና ዶሪዲ ኢስራኤሌ ኡባ ቦላ ታ ካዎታና ማላ ኢዛስ ሼኔ ጊዲዴስ።
1CH 28:5 ጎዳይ ታስ ጮራ ናይታ ኢሚዴስ፤ ታ ናይታ ኡባፌ ጎዳ ጾሳ ካዎታ ኣራታን ኡቲዲ ኢስራኤሌ ቦላ ካዎታና ማላ ታ ና ሶሎሞኔ ዶሪዴስ።
1CH 28:6 «ቃሴካ ጎዳይ ታና፥ ‹ታ ኬꬃ ኬጻናይኔ ታ ዛጎዛ ጊጊሳናይ ኔ ና ሶሎሞኔ፤ ኢዚ ታስ ና ጊዳና ማላ ታ ኢዛ ዶራዲስ፤ ታኒካ ኢዛስ ኣዋ ጊዳና።
1CH 28:7 ኢዚ ሃኢ ኦꬂዛይሳꬆ ሲንꬃፌካ ታ ኣዛዞኔ ታ ዎጋ ሚኒ ናጊኮ ታ ኢዛ ካዎቴꬃ ሜርናስ ሚንꬃና› ጊዴስ።
1CH 28:8 «ሄሳ ጊሻስ ሃኢካ ጎዳ ዴሬ ዱላታይ፥ ኢስራኤሌ ኣሳይ ኡባይ ቤኢሺኒኔ ኑ ጾሳይ ሲዪሺን፥ ኢንቴ ጎዳ ኣዛዞ ኡባ ኢንቴ ሚንꬂዲ ናጋና ማላ ታኒ ኢንቴስ ዮታይስ፤ ሂስቲኮ ኢንቴ ሃ ሎኦ ቢታ ላታናኔ ኢንቴ ናይታካ ሜርናስ ላቲሳና።
1CH 28:9 «ታ ና ሶሎሞኔ፥ ኔ ኣዋ ጾሳ ኤራ! ኔኒ ኩሜꬃ ዎዚናኒኔ ሎኦ ቆፋን ኢዛስ ኦꬃ፤ ጎዳይ ዎዚና ኡባ ፒልጊ ጼሌስ፤ ጊዶ ቆፋ ኡባ ኢዚ ኤሬስ፤ ኔኒ ኢዛ ኮይኮ ኢዚ ኔስ ቤታና፤ ጊዶ ኣቲን ኔ ኢዛ ኣጊዛ ጊዲኮ ኢዚካ ኔና ሜርናስ ኣጋጋና።
1CH 28:10 ጾሳ ኬꬅ ኬጻናስ ጎዳይ ኔና ዶሪዳይሳ ዶጎፓ፤ ሚናዳ ኦሶዛ ኦꬃ» ጊዴስ።
1CH 28:11 ሃይሳፌ ጉዬ ዳዊቲ ባ ና ሶሎሞኔስ ጾሳ ኬꬃ ኬጻናስ ጊግሲዳ ሃልቾዛ ኢሚዴስ፤ ዳራንቻ፥ ቡቁራ ዎꬂዛ ሚንጃ ኬꬃ፥ ፖቄዛኔ ጊዶ ኪፊሌታ፥ ናጋራ ዉርሲዛሶዛ ዎስቲ ኬጻናኮ ቤሲዛ ሃልቾዛ ኢሚዴስ።
1CH 28:12 ቃሴካ ዳዊቲ ባ ዎዚናን ዲዛ ቆፋ ጾሳ ኬꬃ ዛጎ፥ ኢዛ ዩሾን ዲዛ ኪፊሌታ፥ ጾሳ ኬꬃ ቡቁራ ሚሻታ ዎꬂዛ ሚንጃ ኬꬃታ ሃልቾዛ ኢሚዴስ።
1CH 28:13 ሄሳꬆካ ዳዊቲ ቄሴታ ጊሻ ኦሶኔ ሌዌታ ጊሻ ኦሶ፥ ጾሳ ኬꬃን ኦꬂዛ ኦሶታስ ጎኤቲዛ ሚሻታ ዎስቲ ጎኤታናኮ ቤሲዛ ኣዛዞ ኢሚዴስ።
1CH 28:14 ቃሴካ ዳዊቲ ዱማ ዱማ ሚሻታ ሜꬋናስ ኣይ ኬና ዎርቃኔ ኣይ ኬና ቢራ ኮሺዛኮ ጻፊዲ ሶሎሞኔስ ኢሚዴስ።
1CH 28:15 ሄይቲካ ዎርቃ ጾምፔታ ዎꬂዛ ባላኔ ዎርቃ ጾምፔታ፥ ቢራ ጾምፔታ ዎꬂዛ ባላኔ ቢራ ጾምፔታ፥
1CH 28:16 ጾሳ ሲንꬃን ኡኬꬅ ዎꬂዛ ዎርቃ ጻራጴዛታ፥ ቢራ ጻራጴዛታ፥
1CH 28:17 ዎርቃ ቃጴታ፥ ዎርቃ ኬሬታ፥ ዎርቃ ዋንጫታ፥ ዎርቃ ጻሮታ፥ ቢራ ጻሮታኔ
1CH 28:18 ኤጻኔ ጩዋሳናስ ሙሩታ ዎርቃ፥ ጎዳ ታቦታ ቦላ ባንታ ቄፌ ሚጪዲ ካሚዛ ኪሩቤታ ዎꬂዛ ዎርቃ ጋሬ ቤሲዛ ሃልቾ ኢሚዴስ።
1CH 28:19 ዳዊቲ፥ «ጎዳይ ባ ኩሼ ታ ቦላ ዎꬂዲ ሃ ጻፌቲዳ ሃልቾ ኡባ ታና ኤሪሲዴስ» ጊዴስ።
1CH 28:20 ሃይሳፌ ጉዬ ዳዊቲ ባ ና ሶሎሞኔ፥ «ኣይኮይ ባዋ ሚና! ኦሶዛ ዶማ! ጎዳ ታ ጾሳይ ኔናራ ዲዛ ጊሻስ ያዮፋ፤ ሂዶታካ ቃንጾፋ! ጾሳ ኬꬃ ኦሶይ ፖሌታና ጋካናስ ጾሳይ ኔና ዬጌናኔ ኣጌና።
1CH 28:21 ጾሳ ኬꬃ ኦሶስ ቄሴቲኔ ሌዌቲ ጊጌቲ ኡቲዳ፤ ኡባ ሂላቴꬅ ኤሪዛ ኣሳቲ ኔና ኦሶ ኡባን ማዳና፤ ሹሜቲኔ ኣሳይ ኡባይ ኔስ ኡባ ሚሻንካ ኣዛዜታና» ጊዴስ።
1CH 29:1 ሃይሳፌ ጉዬ ካዎ ዳዊቲ ሺቂዳ ኣስ ኡባስ፥ «ጾሳይ ዶሪዳይ ታ ና ሶሎሞኔ፤ ኢዚ ዬላጋኔ ኦሶስ ኢማꬃ፤ ሃ ኬጼታና ኬꬃይ ኣሳ ኬꬅ ጊዶንታ ጾሳ ኬꬅ ጊዲዳ ጊሻስ ኦሶዚ ዴጾ።
1CH 29:2 ታኒ ታስ ዲዛ ዎልቃ ኬና ታ ጾሳ ኬꬃስ ዎርቃን ኦሴታናይሳስ ዎርቃ፥ ቢራን ኦሴታናይሳስ ቢራ፥ ጻርቂማላን ኦሴታናይሳስ ጻርቂማላ፥ ቢራታን ኦሴታናይሳስ ቢራታኔ ሚꬃን ኦሴታናይሳስ ሚꬅ ጊጊሳ ዎꬃዲስ፤ ቃሴ ማርጊዴ፥ ኢምኔቤሬዴ፥ ዱማ ዱማ ሜꬋይ ዲዛ ኣሌቆ ሹቻታ፥ ኣልኦ ሹቻታኔ ኢንቁታ ጊጊሳ ዎꬃዲስ።
1CH 29:3 ታ ጾሳ ኬꬃ ታኒ ኬሂፔ ሲቂዛ ጊሻስ ታኒ ታ ጾሳ ኬꬃዛስ ጊግሲዳይሳፌ ሃራ ታስ ቡዞ ዲዛ ዎርቃፌኔ ቢራፔ ጌሻ ኬꬃስ ኢማዲስ።
1CH 29:4 ጾሳ ኬꬃ ጊምቤዛ ኣሌቂሳናስ 100,000 ኪሎ ጊራሜ ጊዲዛ ሙሩታ ዎርቃኔ 240,000 ኪሎ ጊራሜ ጊዲዛ ሙሩታ ቢራ ኢማዲስ።
1CH 29:5 ኦሳ ኦꬃና ሂላታስ ኮሺዛ ሚሽ፥ ዎርቃን ኦሴታናይሳስ ዎርቃ፥ ቢራን ኦሴታናይሳስ ቢራ ኢማዲስ፤ ሂስቲን ሃች ኢንቴፌ ባና ባ ሼኔን ጎዳስ ኣꬂ ኢማናይ ኦኔ?» ጊዴስ።
1CH 29:6 ሂስቲን ኢስራኤሌ ኣሳስ ቆሞታ ኮራፒኔቲ፥ ቆሞታስ ቆሞታስ ኦላ ጋዳዋቲ፥ ሻላቃቲ፥ ማቶ ሃላቃቲኔ ካዎ ኦሳንቻታ ሃላቃቲ ባንታ ሼኔን ባስ ዲዛይሳ ኢሚዳ።
1CH 29:7 ኢስቲ ጾሳ ኬꬃ ኦሶስ 170,000 ኪሎ ጊራሜ ጊዲዛ ዎርቃ፥ 340,000 ኪሎ ጊራሜ ጊዲዛ ቢራ፥ 670,000 ኪሎ ጊራሜ ጻርቂማላኔ 3,400,000 ኪሎ ጊራሜ ጊዲዛ ቢራታ ኢሚዳ።
1CH 29:8 ኣልኦ ሹቺ ዲዛ ኣሳይ ኡባይ ቡቁራ ሚሻታ ናጊዛ ሌዌ ጌርሾኔ ዛሬ ጊዲዳ ዪሂኤሌ ባጋራ ጎዳ ሚንጃ ኬꬅ ኤሂ ኢሚዳ።
1CH 29:9 ኣሳይ ባ ሼኔን ባ ኩሜꬃ ዎዚናፔ ጎዳስ ኢሚዳ ጊሻስ ኡፋዬቲዴስ፤ ካዎ ዳዊቲካ ኬሂ ኡፋዬቲዴስ።
1CH 29:10 ሄሳ ጊሻስ ዳዊቲ ዱላታ ሺቂዳ ኣሳ ሲንꬃን፥ «ኣቤት ኑ ኣዋ ጎዳ ኢስራኤሌ ጾሳዉ! ሜሪፔ ሜርና ጋካናስ ኔስ ጋላታይ ጊዶ።
1CH 29:11 ኣቤት ጎዳዉ! ሳሎኒኔ ሳኣን ዲዛ ኡባይ ኔሳ፤ ጊታቴꬂ፥ ዎልቃይ፥ ቦንቾይ፥ ቴማይኔ ፑላቴꬂ ኔሳ።
1CH 29:12 ዱሬቴꬂኔ ቦንቾይ ኔፔ ቤቴስ፤ ኡባይካ ኔስ ሃሬቴስ። ዎልቃይኔ ሚኖታይ ኔ ኩሼና፤ ኔኒ ኣሳ ኡባ ጊታሳናሲኔ ሚንꬃናስ ዳንዳያሳ።
1CH 29:13 ሃኢካ ኑ ጾሳዉ! ኑኒ ኔና ጋላቶስ፤ ኔ ቦንቾ ሱንꬃካ ሳቦስ» ጊዲ ጎዳ ጋላቲዴስ፤
1CH 29:14 ዳዊቲ፥ «ኡባይ ኔፔ ቤቲዴስ፤ ኑ ኔስ ዛሪ ኢሚዳይ ኔ ኩሼፔ ኤኪዳይሳ፤ ሂስቲን ኑኒ ሃይሳ ማላ ኢሞታ ኢማናስ ታኒኔ ታ ኣሳይ ኦኔ?
1CH 29:15 ካሴ ኑ ኣዋታ ማላ ኑኒካ ኔ ሲንꬃን ቤቴኔ ኢማꬃታ፤ ሃ ሳኣ ቦላን ኑ ዴኦ ላይꬃይ ሂዶታይ ባይንዳ ኩዋ ማላ ኤሌ ኣꬌስ።
1CH 29:16 ኣቤት ጎዳ ኑ ጾሳዉ! ኔ ጌሻ ሱንꬃስ ኬꬄ ኬጻናስ ሺሺዳ ኡባይ ኔፔ ቤቲዳዛ፤ ሃይሲ ኡባይ ኔሳ።
1CH 29:17 «ታ ጾሳዉ! ኔኒ ዎዚና ፒልጋ ጼሊዛይሳኔ ሱሬቴꬅ ዶሲዛይሳ ታኒ ኤራይስ፤ ታኒ ታ ሱሬ ዎዚናኒኔ ሎኦ ሼኔን ሃይሳ ኡባ ኢማዲስ፤ ሃይሳን ዲዛ ኔ ኣሳይካ ኔስ ባ ሎኦ ሼኔን ኢሚዲ ኡፋዬቲዳይሳ ታኒ ቤኣዲስ።
1CH 29:18 ኣቤት ጎዳዉ! ኑ ኣዋ ኣብራሃሜ፥ ዪሳቃኔ ኢስራኤሌ ጾሳዉ! ኔ ኣሳ ዎዚናን ሃ ጊታ ሲቆዛ ሜርናስ ናጋ፤ ኢስታ ዎዚናይ ኔስ ኣማኔቲ ዳና ማላ ናጋ።
1CH 29:19 ኔ ዎጋ፥ ኔ ኣዛዞኔ ማራታ ናጋና ማላ ታኒ ጊጊሳ ዎꬂዳ ሚሻታን ጾሳ ኬꬃ ኢዚ ኬጻና ማላ ታ ና ሶሎሞኔስ ኩሜꬃ ዎዚና ኢማ» ጊ ዎሲዴስ።
1CH 29:20 ሄሳፌ ጉዬ ዳዊቲ ዱላታ ሺቂዳ ኣሳስ፥ «ጎዳ ኢንቴ ጾሳ ጋላቲቴ» ጊዴስ፤ ሂስቲን ኡባ ኣሳይ ጎዳ ባንታ ኣዋታ ጾሳ ጋላቲዳ፤ ጎዳ ሲንꬃን ጉፋኒዲ ጎይኒዳኔ ካዋ ቦንቺዳ።
1CH 29:21 ዎንቴꬃ ጋላስ ኣሳይ ጎዳስ ያርሾ ሺሺዳ፤ ጹጌቲዛ ያርሾካ ያርሺዳ፤ ሄሲካ 1,000 ኮርማታ፥ 1,000 ꬋርሾታ፥ 1,000 ዶርሳ ላቃታ፥ ኡሻ ያርሾኔ ሃራ ያርሾታራ ኢሲፌ ኢስራኤሌ ኣሳ ጊሻስ ሺሺዳ።
1CH 29:22 ኣሳይ ሄ ጋላስ ጎዳ ሲንꬃን ኬሂፔ ኡፋዬቲሼ ሚዴሲኔ ኡዪዴስ፤ ሂስቲዲ ኣሳይ ካዎ ዳዊቴ ና ሶሎሞኔይ ካዎቲዳይሳ ናምኣንꬆ ቆንጬራ ኤሪዳ፤ ኢዚ ዴራ ኣይሳና ማላ ጎዳ ጾሳ ሲንꬃን ዛይቴን ቲይዳ፤ ሳዶቄካ ኢስታስ ቄሴ ጊዳና ማላ ጎዳ ሲንꬃን ቲይዳ።
1CH 29:23 ሄሳፌ ጉዬ ሶሎሞኔይ ባ ኣዋ ዳዊቴ ሶሆን ጎዳ ካዎቴꬃ ኣራታን ኡቲዴስ፤ ኢዛስ ኡባ ሚሺ ኤኖ ጊዴስ፤ ኢስራኤሌ ኡባይካ ኢዛስ ኣዛዜቲዴስ።
1CH 29:24 ኦላ ጋዳዋቲ፥ ኤሬቲዳ ሚኖ ኣሳቲኔ ካዎ ዳዊቴ ናይቲ ካዎ ሶሎሞኔስ ኣዛዜታናስ ቃላ ጌሊዳ።
1CH 29:25 ጎዳይ ሶሎሞኔ ኢስራኤሌ ኣሳ ኡባ ሲንꬃን ꬎቁ ꬎቁ ሂስቲዴስ፤ ኢዛፔ ካሴ ኢስራኤሌ ካዎታስ ኢሜቲቤና፤ ቦንቾ ሶሎሞኔስ ኢሚዴስ።
1CH 29:26 ኢሴዬ ና ዳዊቲ ኢስራኤሌ ኡባ ሃሪዴስ።
1CH 29:27 ዳዊቲ ኬብሮኔን 7 ላይꬅ፥ ዬሩሳላሜን 33 ላይꬅ ካዎቲዴስ፤ ኢሲ ቦላ ኢስራኤሌ 40 ላይꬅ ሃሪዴስ።
1CH 29:28 ዳዊቲ ዳሮ ላይꬅ ዴኢዲ ዱሬቲዲ፥ ቦንቼቲዲ፥ ሎኦ ጪማ ጪሚዲ ሃይቂዴስ፤ ኢዛሶሆን ኢዛ ና ሶሎሞኔይ ካዎቲዴስ።
1CH 29:29 ዳዊቴ ካዎቴꬃ ላይꬃን ኮይሮፔ ዶሚዲ ዉርሴꬅ ጋካናስ ኦሴቲዳይሳ ናቤ ሳሜሊ፥ ናቤ ናታኔይኔ ናቤ ጋዴይ ጻፊዳ ታሪኬ ማጻፋታን ጻፌቲ ኡቲዴስ።
1CH 29:30 ኢዚ ዎስቲ ሃሪዳኮ፥ ኢዚ ዋኒዳ ዎልቃማ ኣሳኮ፥ ኢዚ ኣይ ሃኒዳኮ፥ ኢስራኤሌ ኣሳይኔ ሄራን ዲዛ ካዎቴꬃቲ ኡባይ ኣይ ሃኒዳኮ ሄ ማጻፋታን ጻፌቲ ዴስ።
2CH 1:1 ዳዊቴ ና ካዎ ሶሎሞኔይ ባ ካዎቴꬃን ሚኒዴስ፤ ጎዳ ኢዛ ጾሳይ ኢዛራ ጊዲዳ ጊሻስ ኢዛ ኬሂፔ ጊታሲዴስ።
2CH 1:2 ሶሎሞኔይ ኢስራኤሌ ኡባ፥ ሻላቃታ፥ ማቶ ሃላቃታ፥ ዳናታ፥ ኢስራኤሌ ኣሳ ካሌꬂዛ ኡባታኔ ሶ ኣሳ ሃላቃታ ጼይጊ ሺሺዴስ።
2CH 1:3 ሄሳፌ ጉዬ ሶሎሞኔይኔ ሺቂዳ ኣሳይ ኡባይ ጌባኦኔን ዴኢዛ ጎይኒዛ ꬎቃ ሶሆ ቢዴስ፤ ኣይስ ጊኮ ጎዳ ኣይሌ ሙሴይ ባዞን ኦꬂዳ ጾሳ ዱንካኔይ ሄን ዴስ።
2CH 1:4 ካሴ ዳዊቲ ጾሳ ታቦታስ ዬሩሳላሜን ዱንካኔ ቶሊዴስ፤ ጾሳ ታቦታ ቂሪያቴ-ዪኣሪሜ ካታማፔ ባ ጊግሲ ዎꬂዳ ሶሆ ኤሂዴስ።
2CH 1:5 ሁሬስ ናዛ ና፥ ኡሬ ና ባስሊኤሌይ ጻርቂማላፔ ኦꬂዳ ያርሾሶይ ጌባኦኔን ጎዳ ዱንካኔዛ ሲንꬃን ዴስ። ሶሎሞኔይኔ ሺቂዳ ኣሳይ ጎዳስ ሄን ጎይኒዳ።
2CH 1:6 ሶሎሞኔይ ጾሳ ዱንካኔዛ ሲንꬃን ዴኢዛ ጻርቂማላፔ ኦሴቲዳ ያርሾሶዛኮ፥ ጎዳ ሲንꬅ ቢዲ፥ 1,000 ጹጌቲዛ ያርሾ ያርሺዴስ።
2CH 1:7 ሄ ጋላሳ ኦማርስ ጾሲ ሶሎሞኔስ ቆንጪዲ፥ «ታ ኔስ ኣይ ኢማና ማላ ኮያይ?» ጊዴስ።
2CH 1:8 ሂስቲን ሶሎሞኔይ ጾሳ፥ «ኔኒ ታ ኣዋ ዳዊቴስ ጊታ ኪያቴꬅ ኦꬃዳሳ፤ ታናካ ኢዛሶሆን ካዎꬃዳሳ።
2CH 1:9 ሃኢካ ኣቤት ታ ጎዳ ጾሳዉ! ኔ ታና ሳኣን ዴኢዛ ጉዱላ ማላ ጮራቲዳ ኣሳ ቦላ ካዎꬂዳ ጊሻስ ካሴ ኔ ታ ኣዋ ዳዊቴስ ጊዳ ቃላይ ፖሌቶ።
2CH 1:10 ታኒ ሃ ዴራ ካሌꬃና ማላ ኣꬎ ኤራቴꬂኔ ኣኬካ ታስ ኢማ፤ ሂስቶንታ ኣጊኮ ሃይሳ ጊታ ዴራ ኔይሳ ኦኒ ኣይሳናስ ዳንዳይዜ?» ጊዴስ።
2CH 1:11 ጾሲካ ሶሎሞኔስ፥ «ኔኒ ዱሬቴꬅ፥ ዎይኮ ኣቆታ ዴማናስ፥ ዎይኮ ቦንቼታናስ፥ ዎይኮ ኔ ሞርኬቲ ሃይቃና ማላ፥ ዎይኮ ኔስ ኣዱሳ ላይꬂ ኢሜታና ማላ ኦይቻቤካ፤ ጊዶ ኣቲን ኔ ዎዚና ኣሞይ ታኒ ኔና ኢስታ ቦላ ካዎꬂዳ ታ ኣሳ ኣይሳናስ ኣꬎ ኤራቴꬂኔ ኣኬካ ጊዲዳ ጊሻስ፥
2CH 1:12 ታኒ ኔስ ኣꬎ ኤራቴꬂኔ ኣኬካ ኢማና፤ ቃሴ ኔፔ ካሴ ዴኢዳ ካዎታስ ዎይኮ ኔፔ ጉዬን ያና ካዎታስካ ባይንዳ ዱሬቴꬅ፥ ኣቆታኔ ቦንቾ ታኒ ኔስ ኢማና» ጊዴስ።
2CH 1:13 ሄሳፌ ጉዬ ሶሎሞኔይ ጾሳ ዱንካኔይ ጌባኦኔን ዴኢዛ ዙምቡላፌ ዬሩሳላሜ ሲሚዲ ኢስራኤሌ ቦላ ካዎቲዴስ።
2CH 1:14 ሶሎሞኔይ ፓራ-ጋሬታኔ ፓራታ ሺሺዴስ፤ ኢዛስ 100 ፓራ-ጋሬቲኔ 12,000 ፓራቲ ዴቴስ፤ ኢዚ ኢስታ ፓራ-ጋሬታ ካታማታኒኔ ባ ዴኢዛ ዬሩሳላሜ ካታማን ዎꬂዴስ።
2CH 1:15 ካዎዚ ዎርቃኔ ቢራ ዬሩሳላሜን ሹቻ ማላ ኮሪዴስ፤ ዚጋካ ሻራ ሜንꬆን ዲጪዛ ኤꬃ ሚꬃꬆ ጮራታና ማላ ኦꬂዴስ።
2CH 1:16 ሶሎሞኔ ፓራቲ ጊብጼፔኔ ቃዌ ጌቴቲዛሶሆፔ ዪዳ፤ ካዎዛ ዛልኣንቻቲ ኢስታ ቃዌፔ ሻሚ ኤሂዳ።
2CH 1:17 ኢስቲ ኢሲ ኢሲ ፓራ-ጋሬ 600 ሳቂሌ ቢራን፥ ኢሲ ኢሲ ፓራ 150 ሳቂሌ ቢራን ጊብጼፔ ሻሚ ሻሚ ኤሂዲ ሂቴታ ካዎታሲኔ ኣራሜ ካዎታስ ባይዜቴስ።
2CH 2:1 ሶሎሞኔይ ጎዳ ሱንꬃስ ጾሳ ኬꬅ ኬጻናሲኔ ባስ ካዎቴꬃ ኬꬅ ኬጻናስ ቆፋ ቃቺዴስ።
2CH 2:2 ሄሳ ጊሻስ ሶሎሞኔይ ቶሆ ቶሳናስ 70,000 ኣሳታኔ ዙምቡላታ ቦላን ሹች ቆኣናስ 80,000 ኣሳታ ዶሪዴስ፤ ቃሴ ኢስታ ኦሲሳናስ 3,600 ኣሳታ ኢስታ ቦላ ሹሚዴስ።
2CH 2:3 ሄሳፌ ጉዬ ሶሎሞኔይ ጺሮሴ ካዎ ሁራሜስ ኪታ ዬዲዴስ፤ ሄሲካ፥ «ታ ኣዋይ ዳዊቲ ባስ ካዎቴꬃ ኬꬅ ኬጻናስ ኔኒ ዚጋ ዬዲዳ ማላ ታስካ ዬዳ።
2CH 2:4 ሃኢ ታኒ ታ ጎዳ ሱንꬃስ ኬꬅ ኬጻና ጊጌቴꬃን ዳይስ። ታኒ ሳዎ ቶንጉ ጊዛ ኤጻኔ ጩዋሳናስ፥ ኡባ ዎዴ ጎዳ ሲንꬃን ኡኬꬅ ዎꬃናሲኔ ኡባ ዎዴ ማላዶኔ ኦማርስ፥ ሳምባታታን፥ ኣጊና ጼሮን ኮይሮ ጋላሳታኒኔ ኑኒ ጎዳ ቦንቺዛ ዱማ ዱማ ባኣሌ ጋላሳታን ጹጌቲዛ ያርሾ ያርሻናስ፥ ሄ ኬꬃ ዱማሳና ቆፓዲስ፤ ሄሲ ኢስራኤሌ ኣሳይ ሜርናስ ኦꬃና ማላ ኢሜቲዳ ኣዛዞ።
2CH 2:5 «ኑ ጾሳይ ሃራ ጾሳታ ኡባፌ ጊታ ጊዲዳ ጊሻስ ታኒ ኬጻናስ ጊጌቲዛ ጾሳ ኬꬃይካ ጊታ።
2CH 2:6 ጊዶ ኣቲን ሳሎይኔ ሳሎፔ ቦላራ ዲዛ ሳሎታ ꬎቃቴꬂ ኢዛ ኤኬና፤ ሂስቲን ኢዛስ ኬꬅ ኬጻናስ ዳንዳይዛይ ኦኔ? ኢዛ ሲንꬃን ኤጻኔ ጩዋሲዛሶፔ ኣቲን ኢዛስ ኬꬅ ኬጻናስ ታኒ ኦኔ?
2CH 2:7 «ሃኢካ ታ ኣዋይ ዳዊቲ ጊግሲዳ ዩሁዳኒኔ ዬሩሳላሜን ታናራ ዴኢዛ ሂላንቻታራ ኢሲፌ ጊዲዲ ኦꬃናስ ዎርቃ፥ ቢራ፥ ጻርቂማላ፥ ቢራታ፥ ዞኦ ማይኦ፥ ኦቻ ቴራ ሚሳቲዛ ማይኦኔ ሳሎ ሚሳቲዛ ማይኦ ጊጊሶ ሂላቴꬅ ኤሪዛ ኣስ ታስ ዬዳ።
2CH 2:8 «ኔ ኣሳቲ ሊባኖሴፔ ሚꬃ ቃንጾ ኤሪዛይታ ጊዲዳይሳ ታኒ ኤራይስ፤ ሄሳ ጊሻስ ኔኒ ታስ ሊባኖሴፔ ዚጋ፥ ጺዳኔ ሳንዳሌ ሚꬅ ዬዳ። ታ ኣሳቲ ኔ ኣሳታራ ኢሲፌ ኦꬃና።
2CH 2:9 ታኒ ኬጻና ጾሳ ኬꬃይ ጊታኔ ማላሊሲዛዝ ጊዲዛ ጊሻስ ኢስቲ ታስ ዳሮ ሚꬅ ጊጊሳና።
2CH 2:10 ሚꬃ ቃንጺዛ ኔ ኣይሌታስ ታኒ 20,000 ኮንታሌ ጊስቴኔ 20,000 ኮንታሌ ባንጋ፥ ቃሴ 400,000 ሊቲሮ ዎይኔ ኡሺኔ 400,000 ሊቲሮ ዎጋራ ዛይቴ ኢማና።»
2CH 2:11 ጺሮሴ ካዎ ሁራሜይ ሶሎሞኔስ፥ «ጎዳይ ባ ኣሳ ሲቂዛ ጊሻስ ኢዚ ኔና ኢስታ ቦላ ካዎꬂዴስ» ጊዲ ዳብዳቤ ዬዲዴስ።
2CH 2:12 ሁራሜይ ቃሴካ፥ «ጎዳ ጾሳ ኬꬃኔ ባስ ካዎቴꬃ ኬꬅ ኬጻና ማላ ኣꬎ ኤራንቻ፥ ኣኬካንቻኔ ዎዚናማ ና ካዎ ዳዊቴስ ኢሚዳ ሳሎኔ ሳኣ ሜꬊዳ ጎዳ ኢስራኤሌ ጾሳይ ጋላቴቶ።
2CH 2:13 «ሄኮ ታኒ ኔስ ሂላንቻኔ ኣኬካንቻ ጊዲዳ ሁራም-ኣቤ ዬዳዲስ።
2CH 2:14 ኢዛስ ኣዬያ ዳኔ ቆሞ፤ ኣዋይ ጺሮሴ ዴሬ ኣሳ፤ ኢዚ ዎርቃ፥ ቢራ፥ ጻርቂማላ፥ ቢራታ፥ ሹቻ ኦሶኔ ሚꬃ ኦሶ፥ ቃሴካ ኦቻ ቴራ ሚሳቲዛ ማይኦ፥ ሳሎ ሚሳቲዛ ማይኦ፥ ዞኦ ማይኦኔ ላይኖ ጊጊሶ ሂላቴꬅ ኤሬስ። ሄሳꬆካ ዱማ ዱማ ኣሌቆታ ኬሲዲ ዮቲዳ ማላ ኡባ ኦꬃናስ ሂላቴꬃን ሎሂዳ ኣሳ፤ ሄሳ ጊሻስ ኩሼ ሂላቴꬂ ዲዛ ኔ ኣሳታራኔ ካሴ ኔ ኣዋ ዳዊቴስ ኦꬂዳ ኣሳታራ ኢዛ ኦሲሳ።
2CH 2:15 «ኔኒ ታ ጎዳይ ኢማና ጊዳ ጊስቴዛኔ ባንጋ፥ ዛይቴዛኔ ዎይኔ ኡሻ ታ ኣይሌታስ ዬዳ።
2CH 2:16 ኔኒ ሊባኖሴፔ ኮዪዳ ኬና ሚꬅ ኑኒ ቃንጺ ቃሺሲዲ ኣባ ቦላራ ዎጎሎን ኔኮ ዮጴ ዬዳና። ኔኒ ሄፔ ዬሩሳላሜ ጋካናስ ኤፊሳና ዳንዳያሳ» ጊዴስ።
2CH 2:17 ኢዛ ኣዋ ዳዊቲ ካሴ ቆዲዳ ማላ፥ ሶሎሞኔይ ኢስራኤሌ ቢታን ዴኢዛ ሃራ ቢታ ኣሳ ኡባ ቆዲዴስ፤ ሂስቲን ኢስታ ቆዳይ 153,600 ጊዲዴስ።
2CH 2:18 ሶሎሞኔይ ሄ ኣሳፔ 70,000 ቶሆ ቶካና ኣስ፥ 80,000 ጌዜን ሹች ቆኣና ኣስ ዶሪዴስ፤ ቃሴ ኢስታ ኦሲሳናስ 300 ኣሳታ ሱንꬂዴስ።
2CH 3:1 ሶሎሞኔ ኣዋ ዳዊቲ ጎዳ ጾሳ ኬꬅ ኬጼታና ሶሆ ሞሪያ ዙማ ቦላ ዬሩሳላሜን ጊግሲ ዎꬂዴስ። ሄ ሶሆይ ጎዳይ ዳዊቴስ ቆንጪዳ፥ ያቡሴ ኣስ ኦርናይ ካꬅ ቡኪዛ ባሌ።
2CH 3:2 ሶሎሞኔይ ባ ካዎቲዳ ኦይዳንꬆ ላይꬃን፥ ናምኣንꬆ ኣጊናን ናምኣንꬆ ጋላስ ጾሳ ኬꬃ ኬጻናስ ዶሚዴስ።
2CH 3:3 ሶሎሞኔይ ጾሳ ኬꬃ ኬጻናስ ዬጊዳ ዮቻይ ቤኒ ዎዴ ዋꬋን ኣዱሳቴꬃይ 60 ዋꬋ፤ ጎምፓይ 20 ዋꬋ።
2CH 3:4 ጾሳ ኬꬃ ጌሊዛሶን ዴኢዛ ዳራንቻ ጎምፓይ ኬꬃ ኬና 20 ዋꬋ፤ ጌሳይ 20 ዋꬋ። ኢዛስ ሶ ባጋራ ሙሩታ ዎርቃን ሜሺዴስ።
2CH 3:5 ጾሳ ኬꬃስ ዋና ኪፊሌዛ ጺዳ ጻላ ሊጪዲ ካሚዴስ፤ ሂስቲዲ ሙሩታ ዎርቃን ሜሺዴስ፤ ዛምባ ሚሳቲዛ ሚስሌኒኔ ሳንሳላታ ሚሳቲዛ ሚስሌን ኣሌቂሲዴስ።
2CH 3:6 ጾሳ ኬꬃካ ኣልኦ ሹቻን ኣሌቂሲዴስ፤ ኢዚ ኣሌቂሲዳ ዎርቃይ ፓሪዋይሜ ቢታፌ ዪዳ ዎርቃ።
2CH 3:7 ጎዳታ፥ ታጎታታ፥ ቆሲላꬃታኔ ፔንጌታ ዎርቃን ሜሺዴስ፤ ቃሴ ጎዳታ ቦላ ኪሩቤታ ሚስሌ ኦꬂዴስ።
2CH 3:8 ሶሎሞኔይ ኡባፌ ዱማቲዛ ጊዶ ቆልኣ ኬጺዴስ፤ ሄ ሶሆዛስ ኣዱሳቴꬃይ 20 ዋꬋ፤ ጎምፓይ 20 ዋꬋ። ሄ ሶሆዛ ጎዳ 20,000 ኪሎ ጊራሜ ሙሩታ ዎርቃን ሜሺዴስ።
2CH 3:9 ኢስቲ ጎኤቲዳ ሚሲማሬይ 570 ጊራሜ ዎርቃፌ ኦሴቲዴስ። ፖቄዛን ዴኢዛ ኪፊሌታካ ዎርቃን ሜሺዴስ።
2CH 3:10 ሶሎሞኔይ ኡባፌ ዱማቲዛ ጊዶ ቆልኣን ናምኡ ኪሩቤታ ሚስሌ ጊግሲዲ ዎርቃን ሜሺዴስ።
2CH 3:11 ሄ ኪሩቤታ ቄፌይ ሚጬቲዲ 20 ዋꬋ፥ ኮይሮ ኪሩቤዛስ ኮይሮ ቄፌይ ኢቻሹ ዋꬋ ጊዲዲ ጾሳ ኬꬃስ ጎዳ ቦቼስ፤ ናምኣንꬆ ቄፌዚካ ኢቻሹ ዋꬋ ጊዲዲ ሃንኮ ኪሩቤዛ ቄፌ ቦቼስ።
2CH 3:12 ናምኣንꬆ ኪሩቤዛስ ኮይሮ ቄፌይ ኢቻሹ ዋꬋ ጊዲዲ፥ ጾሳ ኬꬃስ ጎዳ ቦቼስ፤ ናምኣንꬆ ቄፌይካ ኢቻሹ ዋꬋ ጊዲዲ ኮይሮ ኪሩቤዛ ቄፌ ቦቼስ።
2CH 3:13 ሃ ናምኡ ኪሩቤታ ቄፌይ ሚጬቲዲ 20 ዋꬋ ጊዲዴስ፤ ኢስቲ ባንታ ሲንꬃ ዋና ኪፊሌዛኮ ዛሪዲ ባንታ ቶሆን ኤቂዳ።
2CH 3:14 ሶሎሞኔይ ሳሎ ሚሳቲዛ ማይኦፌ፥ ኦቻ ቴራ ሚሳቲዛ ማይኦፌ፥ ዞኦ ማይኦፌኔ ሌኤ ላይኖፔ ማጋላሻ ኦꬂዲ ኢዛ ቦላ ኪሩቤታ ሚስሌ ሜꬊዴስ።
2CH 3:15 ሶሎሞኔይ ጾሳ ኬꬃስ ሲንꬃን ኢሳ ኢሳ ጌሳይ 35 ዋꬋ ኣዱቂዛ ናምኡ ቱሳታ ሜꬊሲዲ ኢስታ ሁኤን 5 ዋꬋ ቁስቴ ዎꬂዴስ።
2CH 3:16 ቃሴ ሳንሳላታ ጊቴ ማላ ሜꬊሲዲ ቱሳታ ጼራ ኦይሴꬂዴስ፤ ሂስቲዲ 100 ኦሮማኔ ቴራ ሚስሌታ ሜꬊሲዲ ሳንሳላታ ቦላ ኦይሴꬂዴስ።
2CH 3:17 ቱሳታፔ ኢሳ ጾሳ ኬꬃስ ሲንꬃን ፑዴሃ ባጋራ፥ ናምኣንꬆዛ ዱጌሃ ባጋራ ኤሲዴስ፤ ዱጌሃ ባጋራ ዴኢዛ ቱሳ፥ «ያኪኔ» ጊ ሱንꬂዴስ፤ ፑዴሃ ባጋራ ዴኢዛ ቱሳ፥ «ቦኤዜ» ጊ ሱንꬂዴስ።
2CH 4:1 ሄሳፌ ጉዬ ሶሎሞኔይ ኣዱሳቴꬃይ 20 ዋꬋ፥ ጎምፓይ 20 ዋꬋ፥ ጌሳይ 10 ዋꬋ ጊዲዛ ያርሾ ያርሺዛሶ ጻርቂማላፔ ኦሲሲዴስ።
2CH 4:2 ቃሴ ጻርቂማላ ሴሪሲዲ ጎምፓይ ያ ጋጻፔ ሃ ጋጻ ጋካናስ 10 ዋꬋ፥ ጌሳይ 5 ዋꬋኔ ዩዪ ኣꬋናስ 30 ዋꬋ ጊዲዛ ጊታ ጋባቴ ሜꬊሲዴስ።
2CH 4:3 ጊታ ጋባቴ ዶናን ካሬ ባጋራ ዚቂ ጊዲ ኢዛራ ኦይኬቲ ሜꬌቲዳ ሚስሌቲ ዴቴስ፤ ሄ ሚስሌቲ ናምኡ ማራን ዴኢዛ ቦራታ ሚስሌታ።
2CH 4:4 ሄ ጊታ ጋባቴይ ጻርቂማላፔ ሜꬌቲዳ ቦራ ሚስሌ ታማኔ ናምኣታ ዞኮን ኡቲዴስ። ቦራታፔ ሄꬓቲ ፑዴሃ ባጋ፥ ሄꬓቲ ኣርሼይ ዉሊዛ ባጋ፥ ሄꬓቲ ዱጌሃ ባጋ፥ ሄꬓቲ ቃሴ ኣርሼይ ሞኪዛ ባጋ ሲሚ ጼሊዛ ሚሳቴቴስ። ጊታ ጋባቴይ ኢስታ ቦላ ኡቲዴስ፤ ኢስቲ ኡባይ ኢሶይ ኢሳስ ዱጫ ዛሪ ዎꬂዳ።
2CH 4:5 ጊታ ጋባቴዚ ኢሲ ታꬋኮ ኬና ኦርዴ፤ ኢዛ ዶናይ ፒጫ፤ ቃሴ ጪሺ ጪዪዳ ሚሳቴስ። ሄ ጊታ ጋባቴዚ 60,000 ሊቲሮ ጊዲዛ ሃꬅ ኦይኬስ።
2CH 4:6 ሶሎሞኔይ ቃሴካ ኢስታን ሜጬቲዛ 10 ሳኔታ ኦሲሲዴስ፤ ሂስቲዲ 5 ዱጌሃ ባጋራ፥ ቃሴ 5 ፑዴሃ ባጋራ ዎꬂዴስ። ኢስታን ጹጌቲዛ ያርሾ ኣሾይ ሜጬቴስ፤ ጊዶ ኣቲን ጊታ ጋባቴዛ ሃꬃን ቄሴቲ ሜጬቴስ።
2CH 4:7 ሄሳፌ ጉዬ ሶሎሞኔይ ኢስታስ ኢሜቲዳ ሃልቾ ማላ ጾምፔ ዎꬂዛ 10 ባላታ ዎርቃፌ ኦሲሲዲ፥ 5 ፑዴሃ ባጋራ፥ 5 ዱጌሃ ባጋራ ጾሳ ኬꬃ ጊዶን ዎꬂዴስ።
2CH 4:8 ቃሴካ ኢዚ 10 ጻራጴዛታ ኦሲሲዲ 5 ፑዴሃ ባጋራ፥ 5 ዱጌሃ ባጋራ ጾሳ ኬꬃ ጊዶን ዎꬂዴስ፤ 100 ጻሮታካ ዎርቃፌ ሜꬊሲዴስ።
2CH 4:9 ሶሎሞኔይ ቄሴታስ ጊዶ ዛጎኔ ካሬ ባጋን ጊታ ዛጎ ጊግሲዴስ፤ ዛጎዛስ ፔንጌታ ጊግሲዲ ፔንጌታ ጻርቂማላን ሜሺዴስ።
2CH 4:10 ጊታ ጋባቴዛ ጾሳ ኬꬃፌ ዱጌሃ ባጋራ ኣርሼይ ሞኪዛ ባጋን ዎꬂዴስ።
2CH 4:11 ሁራም-ኣቤይ ኬሬታ፥ ቃጴታኔ ጻሮታ ሜꬊዴስ፤ ሂስቲዲ ሁራም-ኣቤይ ካዎ ሶሎሞኔስ ጾሳ ኬꬃን ጎኤቲዛ ሚሻታ ኦሶ ፖሊዴስ።
2CH 4:12 ኢዚ ኦꬂዳ ሚሻቲካ ናምኡ ቱሳታ፥ ቱሳታ ጼራን ዎꬂዛ ሳኔ ማላ ናምኡ ቁስቴታ፥ ቱሳታ ቦላ ዴኢዛ ናምኡ ቁስቴታ ኣሌቂሲዛ ናምኡ ጊቴ ማላ ሳንሳላታታ፥
2CH 4:13 ኢሲ ኢሲ ቁስቴ ቦላ ናምኡ ማራን ጻርቂማላፔ ሜꬌቲዳ ኢሲ ኢሲ ጼት ኦሮማኔ ቴራ ሚስሌታ፥ ሙሌራ 400 ኦሮማኔ ቴራ ሚስሌታ፥
2CH 4:14 ኢስታን ሚሻታ ዎꬂዛ 10 ጋሬታ፥ 10 ሜቻ ጋባቴታ፥
2CH 4:15 ጊታ ጋባቴዛኔ ኢዛፔ ጋርሳን ዴኢዛ 12 ቦራታ ሚስሌታ፥
2CH 4:16 ኬሬታ፥ ቃጴታ፥ ጻሮታኔ ሃራ ሚሻታ ኡባ። ሁራም-ኣቤይ ካዎ ሶሎሞኔስ ጾሳ ኬꬃ ኦሶስ ሜꬊዳ ሃ ሚሻታ ኡባ ቁጬቲዳ ጻርቂማላፔ ሜꬊዴስ።
2CH 4:17 ካዎ ሶሎሞኔይ ሱኮቴፔኔ ጻሬዴፔ ጊዶን ዮርዳኖሴ ዙሌን ዴኢዛ ጻርቂማላ ሴሪሲዛ ሶሆን ሃይታንታ ኡባ ኦሲሲዴስ።
2CH 4:18 ጻርቂማላፔ ሜꬌቲዳ ሃ ሚሻቲ ኡባይ ኬሂ ዳሮ ጊዲዳ ጊሻስ ኣይ ኬና ዴጺዛኮ ኤሬቲቤና።
2CH 4:19 ቃሴካ ሶሎሞኔይ ጾሳ ኬꬃን ዴኢዛ ሚሻታ ኡባ ዎርቃፌ ሜꬊሲዴስ፤ ሄይቲካ ዎርቃፌ ኦሴቲዳ ያርሾ ያርሺዛሶ፥ ጾሳ ሲንꬃን ዎꬂዛ ኡኬꬂ ኢዛ ቦላ ኡቲዛ ጻራጴዛ፥
2CH 4:20 ኢስታስ ኢሜቲዳ ዎጋ ማላ ኡባፌ ኣꬊዛ ጊዶ ቆልኣ ሲንꬃን ፖኣና ማላ ጾምፔ ዎꬂዛ ዎርቃ ባላታ፥ ኢስታ ዎርቃ ጾምፔታ፥
2CH 4:21 ሙሩታ ዎርቃፌ ኦሴቲዳ ጪሻ ሚስሌታ፥ ጾምፔታኔ ቃጴታ፥
2CH 4:22 ጾምፔዛ ቶይሲዛ ሚሻታ፥ ጻሮታ፥ ኤጻኔ ጩዋሲዛ ሚሻታኔ ታማ ኤኪዛ ሚሻታ። ሃ ሚሻቲ ኡባይ ሙሩታ ዎርቃፌ ኦሴቲዳ። ጾሳ ኬꬃስ ካሬ ባጋ ፔንጌታኔ ኡባፌ ዱማቲዛ ጊዶ ቆልኣ ጌሊዛ ፔንጌታ ዎርቃን ሜሺዴስ።
2CH 5:1 ሶሎሞኔይ ጎዳስ ጾሳ ኬꬃ ኦሶ ኡባ ፖሊዳፔ ጉዬ ኢዛ ኣዋ ዳዊቲ ጎዳስ ዱማሲ ዎꬂዳ ቢራ፥ ዎርቃኔ ሃራ ሚሻታ ኡባ ኤሂዲ፥ ጾሳ ኬꬃን ቡቁራ ሚሽ ዎꬂዛ ሚንጃ ኬꬃን ዎꬂዴስ።
2CH 5:2 ሄሳፌ ጉዬ ካዎ ሶሎሞኔይ ጎዳ ጾሳ ታቦታ ዳዊቴ ካታማን ጺዮኔፔ ኤሃና ማላ ኢስራኤሌ ጪማታ፥ ኮራፒኔታኔ ኬꬃ ኣሳ ዬሩሳላሜ ካታማ ሺሺዴስ።
2CH 5:3 ኢስራኤሌ ኣሳይ ኡባይ ላፑንꬃ ኣጊናን፥ ዳሴ ባኣሌይ ቦንቼቲዛ ዎዴ ካዎዛኮ ሺቂዴስ።
2CH 5:4 ኢስራኤሌ ጪማቲ ኡባይ ሺቂን ሌዌቲ ታቦታ ዴንꬂዳ።
2CH 5:5 ቄሴቴꬃን ኦꬂዛ ሌዌቲ ታቦታ፥ ጾሳ ዱንካኔኔ ዱንካኔዛ ጊዶን ዴኢዛ ጌሻ ሚሻታ ኡባ ቶኪዲ ኬኢዳ።
2CH 5:6 ካዎ ሶሎሞኔይኔ ኢዛራ ኢሲፌ ዴኢዛ ኢስራኤሌ ዱላታይ ኩሜꬅ ታቦታ ሲንꬃን ሺቂዲ ቆዳናስ ዳንዳዬቶንታ ጮራ ዶርሳታኔ ቦራታ ያርሺዳ።
2CH 5:7 ሄሳፌ ጉዬ ቄሴቲ ጎዳ ታቦታ ጾሳ ኬꬃን ኡባፌ ዱማቲዛ ጊዶ ቆልኣን ኤሂዲ ኪሩቤታ ሚስሌታ ቄፌታፔ ጋርሳን ዎꬂዳ።
2CH 5:8 ሚጬቲ ኡቲዳ ኪሩቤታ ቄፌቲ ታቦታኔ ታቦታ ቶኪዛ ካሶታ ካሚዳ።
2CH 5:9 ካሶቲካ ኬሂፔ ኣዱሳ ጊዲዳ ጊሻስ ኢስታ ጼራይ ኡባፌ ዱማቲዛ ጊዶ ቆልኣስ ሲንꬃ ባጋራ ቤቴቴስ፤ ጊዶ ኣቲን ጾሳ ኬꬃፌ ካሬራ ቤቴቴና። ኢስቲ ሃች ጋካናስ ሄን ዴቴስ።
2CH 5:10 ኢስራኤሌ ኣሳይ ጊብጼ ቢታፌ ኬዚዳ ዎዴ ጎዳይ ኢስታራ ጫቄቲዳ ኮሬቤ ዙማን ሙሴይ ዎꬂዳ ናምኡ ሎቻ ሹቻታፔ ኣቲን ታቦታ ጊዶን ሃራይ ኣይኮይካ ዴና።
2CH 5:11 ቄሴቲ ጾሳ ኬꬃፌ ኬዚዳ፤ ሄን ዴኢዛ ቄሴቲ ኡባይ ባንቲ ኦꬂዛ ማራን ማራን ጊዶንታ ኣጊኮካ ኡባይካ ባንታና ጎዳስ ዱማሲዳ።
2CH 5:12 ዬꬃ ዬጺዛ ሌዌቲ ኡባይ፥ ኣሳፌይ፥ ሄማኔይ፥ ኤዶታኔይ፥ ኢስታ ናይቲኔ ኢስታ ዳቦቲ ኡባይ ሎኦ ላይኖ ማይኢዲ ዳላታ፥ ዲꬃታኔ ማሲንቆታ ኦይኪዲ ያርሾ ያርሺዛሶዛፔ ኣርሼይ ሞኪዛ ባጋራ ኤቂዳ፤ 120 ቄሴቲ ጹሩምባታ ፑናናስ ኢስታ ኣጃቢ ኤቂዳ።
2CH 5:13 ኢስቲ ኡባይ ጹሩምባ ፑኒሼ ዳላታ ቃꬂሼ፥ ዲꬃታ ዲጺሼኔ ሃራ ካኢዛ ሚሻታን ካኢሼ፥ «ጎዳይ ኪያ! ኢዛ ማሮቴꬂካ ሜርናሳ» ጊ ዬꬃን ሳቢዳ። ሄ ዎዴ ጾሳ ኬꬃ ሻራይ ኩሚዴስ።
2CH 5:14 ጎዳ ቦንቾ ሻራይ ጾሳ ኬꬅ ኩሚ ኡቲዳ ጊሻስ ቄሴቲ ባንታ ኦሶ ኦꬃናስ ዳንዳይቤቴና።
2CH 6:1 ሄሳፌ ጉዬ ሶሎሞኔይ፥ «ኣቤት ጎዳዉ! ‹ጊርዲ ጊዳ ꬉማ ጋርሳን ታኒ ዴኣይስ› ጋዳ ኔ ዮታ ዎꬃዳሳ።
2CH 6:2 ሄኮ ታኒ ኔ ኢዛን ሜርናስ ዴኣና ማላ ኔስ ሎኦ ኬꬅ ኬጻዲስ» ጊዴስ።
2CH 6:3 ኢስራኤሌ ኣሳይ ኩሜꬅ ኤቂዲሺን ካዎይ ኢስታኮ ሲሚዲ ኢስታ ኣንጂዴስ።
2CH 6:4 ሂስቲዲ ኢስታስ፥ «ጎዳ ኢስራኤሌ ጾሳይ ጋላቴቶ! ታ ኣዋ ዳዊቴስ ኢሚዳ ሂዶታ ቃላ ባ ኩሼን ፖሊዴስ፤ ሄ ሂዶታ ቃላን፥
2CH 6:5 ‹ታኒ ታ ዴራ ኢስራኤሌ ጊብጼፔ ኬሲዳ ጋላሳፌ ዶሚን ታ ሱንꬂ ኢዛን ጼይጌታና ማላ ጾሳ ኬꬅ ኬጻናስ ኢስራኤሌ ቆሞታ ጊዶን ኣይ ካታማካ ዶራቤኬ፤ ዎይኮ ታ ዴራ ኢስራኤሌ ካሌꬃና ማላ ኦናካ ዶራቤኬ።
2CH 6:6 ሃኢ ጊዲኮ ታ ሱንꬂ ዬሩሳላሜን ጼይጌታና ማላ ታኒ ዬሩሳላሜ ዶራዲስ፤ ቃሴ ታ ዴራ ኢስራኤሌ ካሌꬃና ማላ ዳዊቴ ዶራዲስ› ጊዴስ።
2CH 6:7 «ታ ኣዋ ዳዊቲ ጎዳስ ኢስራኤሌ ጾሳ ሱንꬃስ ኬꬅ ኬጻናስ ባ ዎዚናን ቆፒዴስ።
2CH 6:8 ጊዶ ኣቲን ጎዳይ ታ ኣዋ ዳዊቴ፥ ‹ኔኒ ታ ሱንꬃስ ኬꬅ ኬጻናስ ኔ ዎዚናን ቆፒዳ ጊሻስ ሎኦ ኦꬃዳሳ።
2CH 6:9 ጊዲኮካ ጾሳ ኬꬃ ኬጻናይ ኔና ጊዳካ፤ ታ ሱንꬃስ ጾሳ ኬꬃ ኔ ዬሊዳ ኔ ናይ ታስ ኬጻና› ጊዴስ።
2CH 6:10 «ሃኢካ ጎዳይ ባ ጊዳ ሂዶታ ቃላ ፖሊዴስ፤ ሄሳ ጊሻስ ታኒ ታ ኣዋ ዳዊቴ ሶሆዛን ካዎታዲሲኔ ሃኢ ኢስራኤሌ ካዎቴꬃ ኣራታን ኡታዲስ፤ ቃሴ ጎዳ ኢስራኤሌ ጾሳ ሱንꬃስ ኬꬅ ኬጻዲስ።
2CH 6:11 ጎዳይ ኢስራኤሌ ኣሳራ ጫቄቲዳ ጫቆ ቃላይ ጻፌቲዳ ሎቻ ሹቻቲ ዴኢዛ ታቦታካ ኢዛ ጊዶን ዎꬃዲስ» ጊዴስ።
2CH 6:12 ሶሎሞኔይ ኣዱሳቴꬃይ 5 ዋꬋ፥ ጎምፓይ 5 ዋꬋኔ ጌሳይ 3 ዋꬋ ጊዲዳ ማዲራኬ ጻርቂማላፔ ጊግሲዲ ዛጎ ጊዶን ኤሲ ዎꬂዴስ። ሄሳፌ ጉዬ ሶሎሞኔይ ኩሜꬃ ኢስራኤሌ ኣሳይ ዴኢዛሶን ጾሳስ ያርሾ ያርሺዛሶ ሲንꬃን ኤቂዴስ፤ ባ ኩሼካ ፑዴ ሳሎ ሚጪዲ ኢስራኤሌ ዴሬ ኩሜꬃ ሲንꬃን ጉልባቲዴስ።
2CH 6:14 ሂስቲዲ፥ «ኣቤት ጎዳዉ፥ ኢስራኤሌ ጾሳዉ! ሳሎን ዎይኮ ሳኣን ኔ ማላ ጾሲ ዴና። ባንታ ኩሜꬃ ዎዚናፔ ኔ ሲንꬃን ሄሜቲዛ ኔ ኣይሌታስ ኔ ማሮቴꬃኔ ኔ ጫቂዳ ጫቆ ቃላ ናጋሳ።
2CH 6:15 ኔ ኣይሌ ታ ኣዋ ዳዊቴስ ኔኒ ኦꬃና ጋዳ ዮቲዳ ቃላ ናጋዳሳ፤ ኔኒ ካሴ ኔ ዶናን ዮቲዳ ቃላ ኔ ኩሼን ሃች ፖላዳሳ።
2CH 6:16 ሃኢካ ኣቤት ጎዳዉ፥ ኢስራኤሌ ጾሳዉ! ኔኒ ኔ ኣሽካራ፥ ታ ኣዋ ዳዊቴስ፥ ‹ኔኒ ታ ሲንꬃን ሄሜቲዳ ማላ ኔ ናይቲካ ታ ዎጋን ሄሜታናስ ባንታ ኦጌ ናጊኮ፥ ኢስራኤሌ ካዎታ ኣራታን ኡቲዛ ኣስ ኔኒ ሙሌካ ꬋያካ› ጊዳ ቃላ ሚንꬃ።
2CH 6:17 ኣቤት ጎዳዉ፥ ኢስራኤሌ ጾሳዉ! ኔኒ ኔ ኣይሌ ዳዊቴስ ኢሚዳ ሂዶታ ቃላይ ሃኢካ ፖሌቶ።
2CH 6:18 «ጊዶ ኣቲን ጾሳይ ቱማፔ ኣሳራ ኢሲፌ ሃ ሳኣን ዴኣኔ? ቤኣ፥ ሳሎቲ፥ ሳሎታፔ ቦላን ዴኢዛ ሳሎቲካ ኔና ኦይካናስ ዳንዳዬቴና። ሂስቲን ሃይሲ ታኒ ኬጺዳ ጾሳ ኬꬃይ ኔስ ኣይ ኬና ጉጻንዴሻ!
2CH 6:19 ጊዲኮካ ኣቤት ጎዳዉ፥ ታ ጾሳዉ! ኔ ኣይሌዛ ታ ዎሳኔ ሾቤꬃ ኔኒ ኤዝጋ። ታኒ ኔ ኣይሌይ ኔ ሲንꬃን ዎሲዛ ዎሳኔ ሾቤꬃ ሲያ።
2CH 6:20 ኔኒ፥ ‹ታ ሱንꬂ ኢዛን ጼይጌታና› ጊዳ ሃ ጾሳ ኬꬃኮ ኔ ኣይፌይ ቃማኔ ጋላስ ጼሎ። ታኒ ኔ ኣይሌይ ኔ ኬꬃኮ ሲማዳ ዎሲዛ ዎሳ ኔኒ ሲያ።
2CH 6:21 ታኒ ኔ ኣይሌይኔ ኔ ዴሬ ኢስራኤሌይ ሃ ኔ ኬꬃኮ ሲሚ ዎሲዛ ዎሳ ኔኒ ሲያ። ኔኒ ዴኢዛሶን ሳሎን ዳሼ ሲያዳ ኑስ ኣቶ ጋ።
2CH 6:22 «ኢሲ ኣሲ ባ ላጌ ቆሂዲ ካሺ ጊኮ፥ ኢዚ ጫቃና ማላ ኢዚ ኦይሼቲኮ ሃ ጾሳ ኬꬃ ጊዶን ዴኢዛ ያርሾ ያርሺዛሶዛ ሲንꬃን ኢዚ ጫቂኮ፥
2CH 6:23 ኔኒ ሳሎን ዳሼ ሲያ፤ ሲያዳካ ኦꬃ። ሞራንቻ ቦላ ኢዛ ኦሶ ማላ ኔ ኣይሌታ ጊዶን ፒርዳ፤ ጺሎዛስ ኢዛ ጺሎቴꬃ ማላ ዛራ።
2CH 6:24 «ኔ ዴሬ ኢስራኤሌይ ኔና ቆሂዳ ጋሶን ባ ሞርኬታ ሲንꬃን ጾኔቲዲ፥ ኢስቲ ኔኮ ሲሚዲ ሃይሳ ጾሳ ኬꬃን ኔ ሱንꬃ ጼይጊዲ ኔና ዎሲኮኔ ኔና ሾቢኮ፥
2CH 6:25 ኔኒ ሳሎን ዴኣሼ ሲያ። ኔ ዴራ ኢስራኤሌ ናጋራካ ኣቶ ጋ፤ ሂስታዳ ኔኒ ካሴ ኢስታ ኣዋታሲኔ ኢስታስ ኢሚዳ ቢታ ኢስታ ጉዬ ዛራ።
2CH 6:26 «ኔ ዴሬይ ኔና ቆሂዳ ጋሶን ሳሎይ ጎርዴቲን ኢራይ ቡኮንታ ኢጺኮ፥ ኢስቲ ሃ ሶሆዛኮ ሲሚ ዎሲኮ፥ ኔኒ ኢስታ ኡንኤꬂዳ ጊሻስ ኔ ሱንꬃ ጼይጊዲ ባንታ ናጋራፔ ሲሚኮ፥
2CH 6:27 ኔኒ ሳሎን ዴኣሼ ሲያ። ኔ ኣይሌታ ናጋራኔ ኔ ዴራ ኢስራኤሌ ናጋራ ኣቶ ጋ። ኢስቲ ሄሜታናስ ቤሲዛ ሎኦ ኦጌዛ ኢስታ ታማርሳ፤ ሂስታዳ ኔኒ ኔ ኣሳስ ጺንጾ ሂስታ ኢሚዳ ቢታን ኢራ ቡኪሳ።
2CH 6:28 «ቢታ ቦላን ኮሻይ ዎይኮ ኢታ ሃርጌይ ዪኮ፥ ዎይኮ ካꬃ ሎቤይ፥ ዎይኮ ኩቱልኤይ፥ ዎይኮ ቦሌይ፥ ዎይኮ ጉምባሮይ ባሺኮ፥ ዎይኮ ሞርኬይ ኢስታ ካታማታ ዶዲኮ፥ ዎይኮ ኣይ ማላ ዳፋይ ዎይኮ ሃርጌይ ዪኮ፥
2CH 6:29 ኔ ዴሬ ኢስራኤሌ ኣሳ ጋርሳፌ ኦኒካ ኢዛስ ሜቶይኔ ሳኮይ ኤሬቲን ኢዚ ባ ኩሼ ሃ ኬꬃኮ ሚጪ ዎሲኮ፥
2CH 6:30 ኔኒ ሳሎን ዴኣሼ ሲያዳ ኢዛ ናጋራ ኣቶ ጋ፤ ኣሳ ኡባ ዎዚና ሻካ ኤሪዛይ ኔና ጻላ ጊዲዳ ጊሻስ ኢሳስ ኢሳስ ኢዛ ኦሶ ማላ ኢማ።
2CH 6:31 ሂስቲኮ ኔኒ ካሴ ኑ ኣዋታስ ኢሚዳ ቢታን ዴኢዛ ዎዴ ኡባን ኢስቲ ኔስ ያዪዲ ኔ ኦጌራ ባና።
2CH 6:32 «ሄሳꬆካ ኔ ዴሬ ኢስራኤሌ ጊዶንታ ሃራ ዴሬ ኣሲ ኔ ጊታ ሱንꬃ ጊሻሲኔ ኔኒ ኔ ዴራስ ኦꬂዳ ማላሊሲዛ ኦሶታ ጊሻስ፥ ሃኮ ቢታፌ ዪዲ ሃ ጾሳ ኬꬃኮ ሲሚ ዎሲኮ፥
2CH 6:33 ኔኒ ሳሎን ዴኣሼ ሲያ፤ ሂስታዳ ሃ ሳኣ ኣሳይ ኡባይ ኔ ዴራ ኢስራኤሌ ማላ ኔ ሱንꬃ ኤሪዲ ኔስ ያያና ማላ፥ ታኒ ኬጺዳ ሃ ጾሳ ኬꬃይ ኔ ሱንꬂ ኢዛን ጼይጌቲዛ ሶሆ ጊዲዳይሳ ኢስቲ ኤራና ማላ ሃራ ኣላጋ ቢታ ኣሲ ኔና ዎሲዛ ሚሽ ኡባ ፖላ።
2CH 6:34 «ኔ ኣሳይ ባንታ ሞርኬታ ኦላና ማላ ኔኒ ኪቲዳሶ ኣዋካ ቢዲ ኢስቲ ኔኒ ዶሪዳ ሃ ካታማይን ታኒ ኔ ሱንꬃስ ኬጺዳ ጾሳ ኬꬃኮ ሲሚዲ ኔና ዎሲኮ፥
2CH 6:35 ኢስታ ዎሳኔ ሾቤꬃ ሳሎን ዳሼ ኔኒ ሲያ፤ ኢስቲ ኔና ዎሲዳይሳካ ኔኒ ኢስታስ ኢማ።
2CH 6:36 «ናጋራ ኦꬆንታ ኣሲ ባይንዳ ጊሻስ ኢስቲ ኔና ቆሂዳ ጋሶን ኔኒ ኢስታ ቦላ ሃንቄታዳ ሃኮ ጊዲን ዎይኮ ማታ ቢታ ጊዲን ኢስታ ዲኢ ኤፊዛ ሞርኬታስ ኣꬃ ኢሚኮ፥
2CH 6:37 ኢስቲ ሄ ዲኤቲዳ ቢታን ዴኢሼ ባ ዎዚናይ ሜቂን ማሮቴꬃን ሲሚኮ፥ ቃሴ ሄ ዲኤቲዳ ቢታን ዲሼ፥ ‹ኑኒ ናጋራ ኦꬂዶስ፤ ቆሂዶስ፥ ኢታ ሚሺካ ኦꬂዶስ› ጊዲ ኔስ ሾቢኮ፥
2CH 6:38 ባንታና ዲኢዲ ኤፊዳ ሞርኬታ ቢታን ዲሼ፥ ኢስቲ ባንታ ኩሜꬃ ዎዚናፔኔ ባንታ ኩሜꬃ ቆፋፔ ኔኮ ሲሚኮ፥ ኔኒ ኢስታ ኣዋታስ ኢሚዳ ኢስታ ቢታኮ፥ ኔኒ ዶሪዳ ካታማኮኔ ታኒ ኔ ሱንꬃስ ኬጺዳ ጾሳ ኬꬃኮ ሲሚዲ ኔና ዎሲኮ፥
2CH 6:39 ኔኒ ኢስታ ዎሳኔ ሾቤꬃ ሳሎን ዳሼ ሲያ። ኢስቲ ኔና ዎሲዳይሳካ ኢስታስ ኢማ፤ ኔና ቆሂዳ ኔ ዴራ ናጋራ ኣቶ ጋ።
2CH 6:40 «ሃኢካ ኣቤት ታ ጾሳዉ! ሃ ሶሃን ዎሲዛ ዎሳ ኔ ኣይፌይ ጼሎ፤ ኔ ሃይꬂካ ሲዮ።
2CH 6:41 «ኣቤት ጎዳ ጾሳዉ! ዴንዳ! ኔ ዎልቃስ ማላታ ጊዲዳ ኔ ታቦታራ ኔ ሼምፒዛ ኬꬃን ጌላ። ኣቤት ጎዳ ጾሳዉ! ኔ ቄሴቲ ኣቶቴꬃ ማይኤቶ፤ ኔ ጌሻ ኣሳቲካ ኔ ኪያቴꬃን ኡፋዬቴቶ።
2CH 6:42 ኣቤት ጎዳ ጾሳዉ! ኔኒ ቲይዳ ካዎዛ ኣጎፋ። ኔ ኣሽካራ ዳዊቴስ ኢሚዳ ማሮቴꬃ ሃሳኣ» ጊ ዎሲዴስ።
2CH 7:1 ሶሎሞኔይ ዎሳ ፖሊዳ ማላ ሳሎፔ ታማይ ዎꬊዲ ጹጌቲዛ ያርሾዛኔ ሃራ ያርሾዛ ሚዴስ። ሂስቲን ጎዳ ቦንቾይ ጾሳ ኬꬃ ኩሚዴስ።
2CH 7:2 ጎዳ ቦንቾይ ጾሳ ኬꬃ ኩሚዳ ጊሻስ ቄሴቲ ጾሳ ኬꬅ ጌላናስ ዳንዳይቤቴና።
2CH 7:3 ኢስራኤሌ ኣሳይ ኡባይ ታማይ ሳሎፔ ዎꬊሺኒኔ ጎዳ ቦንቾይ ጾሳ ኬꬃ ኩሚሺን ቤኢዲ ቢታን ጉፋኒዲ ጎይኒሼ፥ «ጎዳይ ኪያ! ኢዛ ማሮቴꬂካ ሜርናሳ» ጊዲ ጎዳ ጋላቲዴስ።
2CH 7:4 ሄሳፌ ጉዬ ካዎዚኔ ኡባ ኣሳይ ጎዳ ጾሳ ሲንꬃን ያርሾ ያርሺዴስ።
2CH 7:5 ካዎ ሶሎሞኔይ 22,000 ኮርማታኔ 120,000 ዶርሳታ ያርሺዴስ፤ ሂስቲዲ ካዎዚኔ ኡባ ኣሳይ ጾሳ ኬꬃ ኣንጂዴስ።
2CH 7:6 ቄሴቲካ ባንታስ ጊጊዳሶሆን ኤቂን ሌዌቲ ቃሴ ካዎ ዳዊቲ ጎዳ ሳባናስ ካሴ ኦꬂዳ ዬꬃ ዬጺዛ ሚሻ ኦይኪ ኢስታ ሲንꬃን ኤቂዲ፥ «ኢዛ ማሮቴꬂ ሜርናሳ» ጊ ዬጺሼ ጎዳ ጋላቲዳ፤ ቄሴቲ ሌዌታ ሲንꬃን ኤቂዲ ጹሩምባ ፑኒሺን ኢስራኤሌ ኣሳይ ኡባይ ኤቂዴስ።
2CH 7:7 ሶሎሞኔይ ጻርቂማላፔ ኦꬂዳ ያርሾ ያርሺዛሶዚ ጹጌቲዛ ያርሾ፥ ካꬃ ያርሾ፥ ሜሄ ሃንዳ ያርሾ ኦይካና ዳንዳዮንታ ጊሻስ ጾሳ ኬꬃ ሲንꬃን ዲዛ ዛጎዛ ጎዳስ ዱማሲዴስ፤ ሄ ሶሆዛን ጹጌቲዛ ያርሾ፥ ኢሲፌቴꬃ ያርሾኔ ሜሄ ሃንዳ ያርሺዴስ።
2CH 7:8 ሄ ዎዴ ሶሎሞኔይኔ ኢስራኤሌ ኣሳይ ኡባይ ላፑን ጋላስ ጋካናስ ባኣሌዛ ቦንቺዳ፤ ኢስራኤሌ ዛዋን ዲዛ ሃማቴ ፒኒዛሶፔ ቢዲ ጊብጼ ሻፋ ጋካናስ ዲዛ ጮራ ኣሳይ ሄን ሺቂዴስ።
2CH 7:9 ኣሳይ ያርሾ ያርሺዛሶዛ ላፑን ጋላስ ዱማሲዲኔ ቃሴ ላፑን ጋላስ ኣንጂሶ ባኣሌ ቦንቺዳፔ ጉዬ ኦስፑንꬃ ጋላስ ዉርሴꬃን ዱማ ሺቆ ሺቂዴስ።
2CH 7:10 ሄሳፌ ጉዬ ሶሎሞኔይ ላፑንꬃ ኣጊናን ናምኡ ታማኔ ሄꬓንꬆ ጋላስ ኣሳ ሞይዚዴስ፤ ጎዳይ ዳዊቴስ፥ ሶሎሞኔሲኔ ባ ኣሳ ኢስራኤሌስ ኦꬂዳ ኪያቴꬃን ኣሳይ ኡፋዬቲሼኔ ዎዚናፔ ፓሽኪ ጊዲ ባ ሶ ባ ሶ ቢዴስ።
2CH 7:11 ሶሎሞኔይ ጾሳ ኬꬃኔ ካዎቴꬃ ኬꬃ ኬጺዲ ዉርሲዴስ፤ ሶሎሞኔይ ጎዳ ኬꬃሲኔ ባ ካዎ ኬꬃስ ባ ዎዚናን ቆፒዳይሳ ኡባ ፖሊዴስ።
2CH 7:12 ሄሳፌ ጉዬ ጎዳይ ሶሎሞኔስ ኦማርስ ቆንጪዲ፥ «ታኒ ኔ ዎሳ ሲያዲስ፤ ታኒ ሃ ሶሆዛ ታስ ያርሾይ ያርሼቲዛ ኬꬅ ጊዳና ማላ ዶራዲስ።
2CH 7:13 ታኒ ኢራይ ቡኮንታ ማላ ሳሎ ጎርዲኮ ዎይኮ ሳኣ ካꬃ ማና ማላ ቦሌ ኣዛዚኮ፥ ዎይኮ ታ ኣሳ ጊዶን ኢታ ሃርጌ ታ ዬዲኮ፥
2CH 7:14 ታ ሱንꬃን ጼይጌቲዳ ታ ኣሳይ ባንታናቴꬃ ካዉሺዲ ዎሲኮ፥ ኢስቲ ታና ኮዪዲ ባንታ ኢታ ኦጌፔ ሲሚኮ፥ ታኒ ሳሎን ዳዳ ኢስታ ዎሳ ሲያና፤ ሂስታዳ ኢስታ ናጋራ ኣቶ ጋና፤ ኢስታ ቢታካ ታ ፓꬃና።
2CH 7:15 ሃኢካ ሃ ሶሆን ዎሴቲዛ ዎሳ ታ ኣይፌይ ጼላና፤ ታ ሃይꬃቲካ ኤዝጊ ሲያና።
2CH 7:16 ታ ሱንꬂ ኢዛን ሜርናስ ዴኣና ማላ ሃ ኬꬃ ታ ዶራዳ ጌሻዲስ፤ ታ ኣይፌይኔ ታ ዎዚናይ ኡባ ዎዴ ሄን ዴኣና።
2CH 7:17 «ኔኒካ ካሴ ኔ ኣዋ ዳዊቴ ማላ ታ ሲንꬃን ሄሜቲኮ፥ ታ ኔና ኣዛዚዳ ኡባ ኔ ኦꬂኮ፥ ታ ኔስ ኢሚዳ ዎጋኔ ማራ ኔ ናጊኮ፥
2CH 7:18 ታኒ ካሴ ኔ ኣዋ ዳዊቴስ፥ ‹ኢስራኤሌ ሃሪዛይ ኔ ዜሬꬃፌ ሙሌካ ꬋዬና› ጋዳ ታ ጫቂዳ ማላ ኔ ካዎቴꬃ ኣራታ ታ ሚንꬃና።
2CH 7:19 «ጊዶ ኣቲን ኢንቴ ታና ካላናይሳ ኣጊዲ ጉዬ ሲሚኮ፥ ታኒ ኢንቴና ኣዛዚዳ ታ ኣዛዞታኔ ታ ዎጋታ ኣጊዲ ሃራ ጾሳታስ ኦꬃናሲኔ ጎይናናስ ኢንቴ ቢኮ፥
2CH 7:20 ታኒ ካሴ ኢንቴስ ኢሚዳ ቢታፌ ኢንቴና ꬎቃላና፤ ታኒ ታ ሱንꬃስ ዱማሲዳ ኬꬃካ ዬጋ ኣጋና፤ ታኒ ኢዛ ካዎቴꬃታ ኡባ ጊዶን ቂꬌሲኔ ቂልጫስ ኬሳና።
2CH 7:21 ሃይሲ ጾሳ ኬꬃዚ ሃኢ ኬሂፔ ማላሊሲዛዝ ጊዲኮካ ኢዛ ማታራ ካንꬂ ቢዛ ኡባይ ዳጋሚዲ፥ ‹ጎዳይ ሃ ቢታዮኔ ሃ ኬꬃ ኣይስ ሃይሳ ማላ ኦꬂዴ?› ጋና።
2CH 7:22 ሂስቲን ኣሳይ፥ ‹ኢስታ ኣዋታ ጊብጼፔ ኬሲዳ ጎዳ ባንታ ጾሳ ኣጊዲ ኢስቲ ሃራ ጾሳታ ካሊዳ ጊሻስ፥ ኢስታስ ኦꬂዳ ጊሻሲኔ ኢስታስ ጎይኒዳ ጊሻስ ጎዳይ ኢስታ ቦላ ሃ ኢታ ሚሽ ኡባ ኤሂዴስ› ጊዲ ዛራና» ጊዴስ።
2CH 8:1 ሶሎሞኔይ ጾሳ ኬꬃኔ ባ ካዎቴꬃ ኬꬃ ኬጺዳ ናምኡ ታማንꬃ ላይꬃ ዉርሴꬃን፥
2CH 8:2 ካዎ ሁራሜይ ኢሚዳ ካታማታ ሶሎሞኔይ ዛሪ ኬጺዲ ኢስራኤሌ ኣሳ ሄ ካታማታን ዎꬂዴስ።
2CH 8:3 ሄሳፌ ጉዬ ሶሎሞኔይ ሃማቴኔ ጾባ ጌቴቲዛ ቢታታ ቢዲ ዎራጂ ኦይኪዴስ።
2CH 8:4 ሂስቲዲ ባዞን ዴኢዛ ታጺሞሬ ካታማኔ ኡባ ሚሽ ኢስታን ሚንጂዛ ካታማታ ሃማቴ ቢታን ኬጺዴስ።
2CH 8:5 ቃሴካ ሶሎሞኔይ ቦላ ቤቲ-ሆሮኔኔ ጋርሳ ቤቲ-ሆሮኔ ጌቴቲዛ ካታማታ ዛሪ ኤሲዴስ፤ ሄ ካታማቲ ዲርሳይ ፔንጌይኔ ኮላታይ ዴኢዛ ዲሬቲ ኡቲዳ ካታማታ።
2CH 8:6 ባኣላቴ ካታማ፥ ሚሽ ሚንጂዛ ካታማታ ኡባ፥ ባ ፓራታኔ ፓራ-ጋሬታ ዎꬂዛ ካታማታ ኡባኔ ኢዚ ኬጻናስ ኣሞቲዳ ኡባ ዬሩሳላሜን፥ ሊባኖሴኒኔ ባ ሃሪዛ ቢታ ኡባን ኬጺዴስ።
2CH 8:7 ሂቴታፔ፥ ኣሞሬታፔ፥ ፓሪዜታፔ፥ ሂዌታፔኔ ያቡሴታፔ ኣቲዳ ኣሳይ ኡባይ ኢስራኤሌ ዛሬ ጊዴቴና፤
2CH 8:8 ኢስቲ ኢስራኤሌ ኣሳይ ꬋይሲሺን ሄ ቢታን ኣቲዳ ኣሳታ ዛሬታ። ሶሎሞኔይ ኢስታ ጋባራቴꬃን ኦሲሲዴስ፤ ኢስቲ ሃች ጋካናስካ ጋባራቴꬃን ኦꬄቴስ።
2CH 8:9 ጊዶ ኣቲን ሶሎሞኔይ ባ ኦሶስ ኢስራኤሌ ኣሳፔ ኦናካ ኣይሌሲቤና፤ ኢስቲ ጊዲኮ ኦላንቻታ፥ ኦላ ጋዳዋታ፥ ፓራ-ጋሬታ ላጊዛይታ ሃላቃታኔ ቶጋ ኣሳታ ጊዲዲ ኦꬂዳ።
2CH 8:10 ቃሴ ኢስታፌ 250 ሹሜቲ ካዎ ሶሎሞኔስ ኦꬂዛ ጋባራታ ጼሊ ኦሲሴቴስ።
2CH 8:11 ሄሳፌ ጉዬ ሶሎሞኔይ፥ «ጎዳ ታቦታይ ጌሊዳ ሶሆይ ጌሽ ጊዲዳ ጊሻስ ታ ማቻ ኢስራኤሌ ካዎ ዳዊቴ ኬꬃን ዴኣናስ ቤሱኩ» ጊዲ ጊብጼ ካዎ ፓሮኔ ቢዮ ዳዊቴ ካታማፔ ዴንꬂዲ ኢዚ ኢዚስ ኬጺ ዎꬂዳ ካዎ ኬꬃን ኤሂዴስ።
2CH 8:12 ሶሎሞኔይ ሄ ዎዴ ጾሳ ኬꬃ ሲንꬃን ጎዳስ ጊግሲዳ ያርሾ ያርሺዛሶን ጹጌቲዛ ያርሾ ያርሺዴስ።
2CH 8:13 ሙሴይ ያርሾ ጊሻስ ኣዛዚዳ ዎጋ ማላ ሃች ሃች፥ ሳምባታን ሳምባታን፥ ኣጊናይ ዶሚዳ ኮይሮ ጋላሲኔ ላይꬃን ቦንቼቲዛ ሄꬑ ባኣሌታን ሄይቲካ ኡኬꬃ ባኣሌን፥ ካꬃ ሺሾ ባኣሌኒኔ ዳሴ ባኣሌን ጎዳስ ጹጌቲዛ ያርሾ ያርሺዴስ።
2CH 8:14 ኢዛ ኣዋ ዳዊቲ ካሴ ኣዛዚዳ ማላ ቄሴታ ኢስታ ኦሶን ኦሶን ሻኪ ሱንꬂዴስ፤ ጋላስ ጋላስ ዬꬃን ሳባና ማላኔ ቄሴታ ማዳና ማላ ሌዌታ ሻኪዲ ሱንꬂዴስ። ቃሴካ ጾሳ ኣስ ዳዊቲ ኣዛዚዳ ማላ ጾሳ ኬꬃ ፔንጌ ናጊዛ ዛቤታ ኢስታ ኦሶን ኦሶን ሻኪዲ ሱንꬂዴስ።
2CH 8:15 ካሴ ዳዊቲ ቡቁራ ሚንጂዛ ኬꬃ ጊሻሲኔ ሃራ ኣላሌታ ጊሻስ ቄሴታኔ ሌዌታስ ኢሜቲዳ ኣዛዞታፔ ኢሲኖካ ኣሾንታ ኡባ ፖሊዴስ።
2CH 8:16 ሶሎሞኔይ ሃልቺዳ ኦሶ ኡባይ ኦሴቲ ዉሪዴስ፤ ጾሳ ኬꬃስ ዮቺ ዬጌቲዳ ዎዴፔ ዶሚዲ፥ ፖሌታና ጋካናስ ኦሶ ኡባይ ሎኦ ኦሴቲዴስ።
2CH 8:17 ሄሳፌ ጉዬ ካዎ ሶሎሞኔይ ኤዶሜ ቢታን ዞኦ ኣባ ዶናን ዴኢዛ ኤጺዮን-ጋቢሬኔ ኤላቴ ጌቴቲዛ ካታማታ ቢዴስ።
2CH 8:18 ካዎ ሁራሜይ ማርካቤታኔ ማርካቤ ላጎን ሎሂዳ ባ ኣሳታ ሶሎሞኔስ ዬዲዴስ፤ ሂስቲን ኢስቲ ሶሎሞኔ ኣሳታራ ኢሲፌ ኦፊሬ ቢታ ቢዲ ሄፔ 15,000 ኪሎ ጊራሜ ጊዲዛ ዎርቃ ካዎ ሶሎሞኔስ ኤኪ ዪዳ።
2CH 9:1 ሳባ ካዎያ ሶሎሞኔ ጎባቴꬃ ሲያዳ፥ ዴጾ ኦይሻታ ኤካዳ ኢዛ ፓጫናስ ሳዎ፥ ኬሂ ዳሮ ዎርቃኔ ኣልኦ ሹቻታ ጋሜላታን ጫናዳ ዳሮ ኣዣባራ ዬሩሳላሜ ጋካዳ ሶሎሞኔ ሲንꬅ ኣꬋዱስ። ሂስታዳ ባ ዎዚናን ዲዛይሳ ኡባ ሶሎሞኔስ ዮታዱስ።
2CH 9:2 ሶሎሞኔይ ኢዛ ኦይቺዳ ኡባ ኢዚስ ዮቲዴስ፤ ኢዚ ኢዚስ ቢርሾንታ ኢዛፔ ጌሚ ኣቲዳ ኣይ ሚሺካ ዴና።
2CH 9:3 ሳባ ካዎያ ሶሎሞኔ ኣꬎ ኤራቴꬃ፥ ኢዚ ኬጺዳ ካዎቴꬃ ኬꬃ፥
2CH 9:4 ኢዛ ማዳን ሺቂዛ ቁማ፥ ኢዛ ሹሜቲ ኡቲዛ ኡቴꬃ፥ ኢዛ ኣሽካራቲ ኦꬂዛ ኦሶኔ ማይኢዛ ማይኦዛ፥ ኢዛ ኡሹ ቲጊዛይቲ ማይኢዛ ማይኦዛኔ ጎዳ ኬꬃን ኢዚ ጹጊዛ ያርሾዛ ቤኣዳ ኬሃ ማላሌታዱስ።
2CH 9:5 ሄሳፌ ጉዬ ኢዛ ካዎዛ፥ «ኔ ኦሶ ጊሻሲኔ ኔ ኣꬎ ኤራቴꬃ ጊሻስ ታኒ ታ ዴሬን ዳሼ ሲዪዳይሲ ቱማ።
2CH 9:6 ጊዶ ኣቲን ታኒ ያዳ ታ ኣይፌን ቤኣና ጋካናስ ኢስቲ ታስ ዮቲዳ ኡባ ኣማናቤኬ። ኔ ኣꬎ ኤራቴꬃፌ ባጋይካ ታስ ዮቴቲቤና፤ ቱማፔ ታኒ ሲዮይሳፌ ኔ ኣꬎ ኤራቴꬃይ ኬሂ ኣꬌስ።
2CH 9:7 ኡባ ዎዴ ኔ ሲንꬃን ኤቂዲ ኔ ኣꬎ ኤራቴꬃ ሲዪዛ ኔ ሹሜቲኔ ኔ ኣይሌቲ ኣይ ማላ ኣንጄቲዳ ኣሴ!
2CH 9:8 ኔናን ኡፋዬቲዲ ባ ካዎቴꬃ ኣራታን ኡቲሲዳ ኔ ጎዳይ ጋላቴቶ! ኔ ጾሳይ ኢስራኤሌ ኣሳ ሲቂዳ ጊሻሲኔ ሜርናስ ሚንꬂ ኤሳናስ ኮዪዳ ጊሻስ ሱሬ ፒርዳይኔ ጺሎቴꬂ ኣካና ማላ ኢስታ ቦላ ኔና ካዎꬂዴስ» ጋዱስ።
2CH 9:9 ሂስታዳ ካዎያ 4,000 ኪሎ ጊራሜ ጊዲዛ ዎርቃ፥ ኬሂ ዳሮ ሳዎኔ ኣልኦ ሹቻታ ካዎዛስ ኢማዱስ፤ ሳባ ካዎያ ካዎ ሶሎሞኔስ ኢሚዳ ሳዎ ሚሳቲዛ ሳዎይ ሙሌካ ዴና።
2CH 9:10 ሁራሜ ኣሳቲኔ ሶሎሞኔ ኣሳቲ ኦፊሬፔ ዎርቃ፥ ሳንዳሌ ሚꬂኔ ኣልኦ ሹቻታ ኤሂዳ።
2CH 9:11 ካዎ ሶሎሞኔይ ሄ ሳንዳሌ ሚꬃፌ ጾሳ ኬꬃኔ ካዎቴꬃ ኬꬃ ጌሊዛሶ ꬌካታኔ ዬꬃ ዬጺዛይታስ ማሲንቆኔ ዲꬅ ኦሲሲዴስ። ሃይሳ ማላ ሚሺ ካሴ ዩሁዳ ቢታን ቤቲ ኤሬና።
2CH 9:12 ካዎ ሶሎሞኔይ ሳባ ካዎያ ኣሞቲዳይሳኔ ኢዛ ኦይቺዳ ኡባ ኢዚስ ኢሚዴስ፤ ኢዛ ሶሎሞኔስ ኤሂዳይሳፌ ዳሮ ኢዚ ኢዚስ ኢሚዴስ። ሄሳፌ ጉዬ ሳባ ካዎያ ባ ኣዣባዛራ ዴንዳዳ ባ ዴሬ ሲማዱስ።
2CH 9:13 ሶሎሞኔይ ላይꬃን ላይꬃን ኤኪዛ ዎርቃይ 23,000 ኪሎ ጊራሜ።
2CH 9:14 ሄሲ ዛልኣንቻታፔ ኤኪዳ ቃራጻ፥ ኣራቢያ ቢታ ካዎታ ኡባፌኔ ኢስራኤሌ ቢታ ሃሪዛይታፔ ኤኪዳ ዎርቃኔ ቢራ ጉጂቤና።
2CH 9:15 ካዎ ሶሎሞኔይ 200 ዎጋ ጎንዳሌታ ቆጺሲዲ ዎርቃፌ ሜꬊሲዴስ፤ ኢሲ ኢሲ ጎንዳሌን ላፑን ኪሎ ጊራሜ ጊዲዛ ዎርቃይ ጌሊዴስ።
2CH 9:16 ቃሴካ ኢዚ 300 ቄሪ ጎንዳሌታ ቆጺሲዲ ዎርቃፌ ሜꬊሲዴስ፤ ኢሲ ኢሲ ቄሪ ጎንዳሌን ናምኡ ኪሎ ጊራሜ ጊዲዛ ዎርቃይ ጌሊዴስ፤ ካዎይ ሄ ጎንዳሌታ፥ «ሊባኖሴ ዎራ ኬꬅ» ጌቴቲዛ ኬꬃን ዎꬂዴስ።
2CH 9:17 ቃሴካ ካዎዚ ዳንጋርሳ ዛሌፔ ኢሲ ጊታ ካዎ ኣራታ ኦሲሲዲ ሙሩታ ዎርቃን ሜሺዴስ።
2CH 9:18 ካዎቴꬃ ኣራታይ ዴኢዛሶ ፑዴ ኬኣናስ ዬꬊዛ ኡሱፑን ꬌካቲ ዴቴስ። ቶሆን ዬꬋናስ ካዎቴꬃ ኣራታራ ጋꬂዲ ዎርቃፌ ኦሴቲዳ ኦይዴይ ዴስ። ኣራታስ ናምኡ ባጋራካ ቄሴ ዜምፒሲዛ ሶሆቲ ዴቴስ፤ ሄ ናምኡ ሶሆታ ላንቄን ያ ባጋራኔ ሃ ባጋራ ኤቂዳ ኢሲ ኢሲ ጋሞ ሚስሌይ ዴስ።
2CH 9:19 ሄ ኣራታ ፑዴ ኬኢዛሶ ኡሱፑን ꬌካታን ያ ባጋራኔ ሃ ባጋራ ኢሲ ኢሲ ጋሞ ሚስሌይ፥ ሙሌራ 12 ሚስሌቲ ዴቴስ። ሄሳ ማላ ካዎቴꬃ ኣራታይ ሃራ ካዎቴꬃን ኣዋንካ ኦሴቲቤና።
2CH 9:20 ካዎ ሶሎሞኔይ ኢስታን ኡሹ ኡዪዛ ሚሻቲ ኡባይ ዎርቃፌ ኦሴቲዳ፤ «ሊባኖሴ ዎራ» ጌቴቲዛ ኬꬃን ዴኢዛ ሚሻቲ ኡባይካ ሙሩታ ዎርቃፌ ኦሴቲዳ። ሶሎሞኔ ዎዴ ቢራይ ሙሌካ ጎኢዛ ሚሻ ማላ ቆዴቶንታ ጊሻስ ቢራፔ ኦሴቲዳ ሚሺ ሙሌካ ዴና።
2CH 9:21 ካዎዛስ ሁራሜ ኣሳቲ ላጊዛ ዛልኤ ማርካቤቲ ዴቴስ፤ ሄ ማርካቤቲ ዎርቃ፥ ቢራ፥ ዳንጋርሳ ዛሌ፥ ቃሬታኔ ጌሌሾታ ጫኒ ኤኪዲ ሄꬑ ላይꬃፌ ኢሲቶ ታርሴሴ ሲሜቴስ።
2CH 9:22 ካዎ ሶሎሞኔይ ዱሬቴꬃኒኔ ኣꬎ ኤራቴꬃን ሳኣን ዴኢዛ ካዎታ ኡባፌ ኣꬌስ።
2CH 9:23 ሳኣን ዴኢዛ ካዎቲ ኡባይ ኢዛ ሲንꬅ ኣꬋናሲኔ ጾሲ ኢዛ ዎዚናን ዎꬂዳ ኣꬎ ኤራቴꬃ ሲያናስ ኮዬቴስ።
2CH 9:24 ላይꬃን ላይꬃን ዪዛ ኡባይ ኢዛስ ኢማናስ ዎርቃኔ ቢራ ሚሻታ፥ ማይኦታ፥ ኦላ ሚሻታ፥ ዱማ ዱማ ሳዎ፥ ፓራታኔ ባቁሎታ ኤኪ ዬቴስ።
2CH 9:25 ሶሎሞኔ ፓራታሲኔ ጋሬታስ 4,000 ጋጻታይ ዴስ፤ ቃሴ 12,000 ፓራቲ ኢዛስ ዴቴስ። ሶሎሞኔይ ሄ ፓራ-ጋሬታ ካታማታኒኔ ባናራ ዬሩሳላሜን ዎꬂዴስ።
2CH 9:26 ሶሎሞኔይ ኤፊራጺሴ ሻፋፔ ዶሚዲ ፊሊስጼሜ ቢታኔ ጊብጼ ዛዋ ጋካናስ ዴኢዛ ካዎታ ኡባ ሃሪዴስ።
2CH 9:27 ካዎይ ዬሩሳላሜን ቢራይ ሹቻꬆ ኮሬታና ማላ፥ ዚጋይካ ሻራ ሜንꬆን ዲጪዛ ኤꬃꬆ ጮራታና ማላ ኦꬂዴስ።
2CH 9:28 ሶሎሞኔስ ፓራታ ጊብጼፔኔ ሃራ ቢታ ኡባፌ ኤሄቴስ።
2CH 9:29 ኮይሮፔ ዉርሴꬅ ጋካናስ ሶሎሞኔ ካዎቴꬃ ላይꬃን ሃኒዳ ሃራ ሚሺ ኡባይ ቲንቢቴ ዮቲዛ ናታኔ ታሪኬ ማጻፋን፥ ቲንቢቴ ዮቲዛ ሴሎኔ ዴሬ ኣስ ኣካያ ማጻፋኒኔ ናባጼ ና ኢዮርባኣሜ ጊሻስ ቲንቢቴ ዮቲዳ ኢዶይ ቤኢዳ ኣጁታ ማጻፋን ጻፌቲ ኡቲዴስ።
2CH 9:30 ሶሎሞኔይ ኢስራኤሌ ኡባ ቦላ ዬሩሳላሜን 40 ላይꬅ ካዎቲዴስ።
2CH 9:31 ሄሳፌ ጉዬ ሶሎሞኔይ ሃይቂዲ ካሴ ባ ኣዋታን ጋይቲዴስ፤ ባ ኣዋ ዳዊቴ ካታማን ሞጌቲዴስ፤ ኢዛ ና ኤሮቢኣሜይ ኢዛሶሆን ካዎቲዴስ።
2CH 10:1 ኢስራኤሌ ኣሳይ ኡባይ ኤሮቢኣሜ ካዎꬃናስ ሴኬሜ ካታማ ቢዳ ጊሻስ ኢዚካ ሄ ቢዴስ።
2CH 10:2 ካዎ ሶሎሞኔፔ ባቃቲዲ ጊብጼን ዴኢዛ ናባጼ ና ኢዮርባኣሜይ ሄሳ ሲዪዲ ጊብጼፔ ሲሚ ዪዴስ።
2CH 10:3 ኢስራኤሌ ኣሳይ ኢዮርባኣሜስ ኪታ ዬዲ ጼይጊዴስ፤ ኢዚኔ ኢስራኤሌ ኣሳይ ኡባይ ኤሮቢኣሜኮ ቢዲ፥
2CH 10:4 «ካሴ ኔ ኣዋይ ኑና ዴጾ ቃምባራ ቶሲዴስ፤ ሃኢ ኔኒ ኢዚ ኑና ኦሲሲዳ ዎልቃማ ኦሳኔ ዴጾ ቃምባራ ኑስ ካዉሺኮ ኑኒ ኔስ ሃሬታና» ጊዳ።
2CH 10:5 ሂስቲን ኤሮቢኣሜይ ኢስታስ፥ «ቢቴ፤ ቢዲ ሄꬓንꬆ ጋላስ ታኮ ሲሚ ዪቴ» ጊዴስ። ኣሳይካ ሲሚዲ ቢዴስ።
2CH 10:6 ሄሳፌ ጉዬ ካዎ ኤሮቢኣሜይ ባ ኣዋ ሶሎሞኔይ ፓጻ ዴኢዛ ዎዴ ሶሎሞኔ ዞሪዛ ጪማታ ዞሬ ኦይቺዴስ። ኢዚ ኢስታስ፥ «ታ ሃይሳ ሃ ኣሳስ ኣይ ጋ ዛሮ?» ጊዲ ኦይቺዴስ።
2CH 10:7 ጪማቲካ ኤሮቢኣሜ፥ «ኔኒ ሃ ኣሳስ ኪዪኮ፥ ኢስታ ኡፋይሲኮ ኢስታስ ሎኦ ቃላ ዛሪኮ ኢስቲ ኡባ ዎዴካ ኔስ ሃሬታና» ጊዳ።
2CH 10:8 ጊዶ ኣቲን ኤሮቢኣሜይ ጪማቲ ዞሪዳ ዞሬዛ ኣጊዲ ኢዛራ ዲጪዲ ኢዛስ ኦꬂዛ ዬላጋ ኣሳታ ዞሬ ኦይቺዴስ።
2CH 10:9 ኢዚ ኢስታስ፥ «ኢንቴ ታና ኣይ ዞሬቲ? ‹ኔ ኣዋይ ኑና ቶሲዳ ዴጾ ቃምባራ ኑስ ካዉሻርኪ!› ጊዛ ሃ ኣሳስ ኣይ ዛሮ?» ጊዲ ኦይቺዴስ።
2CH 10:10 ኢዛራ ዲጪዳ ዬላጋቲ ኢዛስ፥ « ‹ኔ ኣዋይ ኑና ዴጾ ቃምባራ ቶሲዴስ፤ ኔኒ ጊዲኮ ኑስ ካዉሻርኪ!› ጊዛ ኣሳስ፥ ‹ታ ጊልኢ ቢራꬌይ ታ ኣዋ ጼሳፌ ኦርዳዉስ።
2CH 10:11 ታ ኣዋይ ኢንቴስ ቃምባራ ዴጼꬂዴስ፤ ታኒ ጊዲኮ ሄሳፌካ ኣꬃዳ ዴጼꬃና። ታ ኣዋይ ኢንቴና ሊሶን ሾጪዴስ፤ ታኒ ጊዲኮ ኢንቴና ማሲማሶ ማላ ዱኪዛ ሊሶን ዋꬋና› ጋዳ ዛራ» ጊዳ።
2CH 10:12 ሄሳፌ ጉዬ ካዎ ኤሮቢኣሜይ፥ «ሄꬓንꬆ ጋላስ ሲሚዲ ታኮ ዪቴ» ጊዳ ማላካ ኢዮርባኣሜይኔ ኣሳይ ኡባይ ሄꬓንꬆ ጋላስ ሲሚዲ ዪዳ።
2CH 10:13 ሂስቲን ካዎ ኤሮቢኣሜይ ኢስታስ ሃንቆን ዛሪዴስ። ጪማታ ዞሬ ኣጊዲ፥
2CH 10:14 ዬላጋቲ ዞሪዳ ዞሬዛ ካሊዴስ፤ ሂስቲዲ፥ «ታ ኣዋይ ኢንቴስ ቃምባራ ዴጼꬂዴስ፤ ታኒ ጊዲኮ ሄሳፌካ ኣꬃ ዴጼꬃና። ታ ኣዋይ ኢንቴና ሊሶን ሾጪዴስ፤ ታኒ ጊዲኮ ኢንቴና ማሲማሶ ማላ ዱኪዛ ሊሶን ሾጫና» ጊ ዛሪዴስ።
2CH 10:15 ጎዳይ ሴሎ ኣስ ኣካያ ባጋራ ካሴ ናባጼ ና ኢዮርባኣሜስ ዮቲዳ ቃላይ ፖሌታና ማላ ሄሲ ጾሳፌ ሃኒዳ ጊሻስ ካዎዚ ኣሳይ ጊዛይሳ ሲዮንታ ኢጺዴስ።
2CH 10:16 ኢስራኤሌ ኣሳይ ኡባይ ካዎዚ ኢስታ ጊዛይሳ ኢስቲ ሲዮንታ ኢጺዳይሳ ቤኢዲ ካዎዛ፥ «ዳዊቴዛፔ ኑና ኣዚ ጋካኔ? ኢሴዬ ናራ ኑስ ኣይ ጋይቶቴꬂ ዲዜ! ኢስራኤሌ ኣሳዉ! ኢንቴ ሶ ኢንቴ ሶ ቢቴ! ኤሮቢኣሜ ኔ ሶ ናጋ!» ጊዴስ። ሄሳ ጊሻስ ኢስራኤሌ ኣሳይ ኡባይ ባ ሶ ባ ሶ ቢዴስ።
2CH 10:17 ኤሮቢኣሜይ ጊዲኮ ዩሁዳ ቢታን ዴኢዛ ኢስራኤሌ ኣሳ ቦላ ካዎቲዴስ።
2CH 10:18 ሄሳፌ ጉዬ ካዎ ኤሮቢኣሜይ ባ ጋባራታ ሃላቃ ኣዶኒራሜ ኢስራኤሌ ኣሳኮ ኪቲዴስ፤ ኢስቲ ኢዛ ሹቻን ጫዲ ዎꬊዳ። ሂስቲን ካዎ ኤሮቢኣሜይ ባ ፓራ-ጋሬ ቦላ ኤሶን ኬኢ ኡቲዲ ዬሩሳላሜ ባቃቲዴስ።
2CH 10:19 ሄዴፔ ዶሚዲ ሃች ጋካናስ ኢስራኤሌ ዛሬታፔ ታማቲ ዳዊቴ ዛሬፔ ካዎቲዳ ካዎታ ቦላ ማካሊዳ።
2CH 11:1 ኤሮቢኣሜይ ዬሩሳላሜ ካታማ ጋኪዳ ዎዴ ኢስራኤሌ ቢታ ኣሳራ ኦሌቲዲ ካዎቴꬃ ባስ ዛራና ማላ፥ ዩሁዳ ቆሞፌኔ ቢኒያሜ ቆሞፌ ዶሬቲዳ 180,000 ኦላንቻታ ሺሺዴስ።
2CH 11:2 ጊዶ ኣቲን ጎዳ ቃላይ ጾሳ ኣስ ሻማኤኮ ዪዲ፥
2CH 11:3 «ሶሎሞኔ ና ዩሁዳ ካዎ ኤሮቢኣሜስ ዩሁዳኒኔ ቢኒያሜን ዴኢዛ ኢስራኤሌ ኣሳ ኡባስ፥
2CH 11:4 ‹ጎዳይ ኢንቴና፥ ኢንቴ ኢሻንታራ ኦሌታናስ ቦፒቴ፤ ሄሳ ታኒ ኦꬂዳ ጊሻስ ኢንቴ ኡባይካ ኢንቴ ሶ ኢንቴ ሶ ሲሚቴ› ጌስ ጋዳ ዮታ» ጊዴስ። ሂስቲን ኢስቲ ጎዳ ቃላ ሲዪዲ ኢዮርባኣሜ ኦላናስ ቢዛይሳ ኣጊዲ ሲሚዳ።
2CH 11:5 ኤሮቢኣሜይ ዬሩሳላሜን ኡቲዲ ሃይሳፌ ካሊዲ ጻፌቲዳ ዩሁዳኔ ቢኒያሜ ካታማታስ ሚጻታ ጊምቢዴስ።
2CH 11:6 ሄ ካታማቲ ቤቴሊሄሜ፥ ኤጻሜ፥ ቴቁሄ፥
2CH 11:7 ቤቲ-ጹሬ፥ ሶኮ፥ ኣዱላሜ፥
2CH 11:8 ጌቴ፥ ማሬሻ፥ ዚፌ፥
2CH 11:9 ኣዶራኢሜ፥ ላኪሼ፥ ኣዜቄ፥
2CH 11:10 ጾራኣ፥ ኣያሎኔኔ ኬብሮኔ።
2CH 11:11 ኤሮቢኣሜይ ካታማታ ሚጻታ ሚንꬂዲ፥ ሃላቃታ ኢስታን ዎꬂዴስ፤ ቃሴ ቁማ፥ ዛይቴኔ ዎይኔ ኡሹ ሄን ሺሺዴስ።
2CH 11:12 ሄ ጊምቤቲዳ ካታማታ ኡባን ጎንዳሌታኔ ቶራታ ሺሺዲ ኢስታ ኬሂፔ ሚንꬂዴስ፤ ሄሳꬆ ኦꬂዲ ዩሁዳኔ ቢኒያሜ ቢታታ ሃሪ ዴኢዴስ።
2CH 11:13 ኢስራኤሌ ኡባን ዴኢዛ ቄሴቲኔ ሌዌቲ ኡባይ ባንቲ ዴኢዛሶፔ ኤሮቢኣሜኮ ዪዳ።
2CH 11:14 ኢስቲ ቄሴ ጊዲዲ ጎዳስ ኦꬆንታ ማላ ኢዮርባኣሜይኔ ኢዛ ናይቲ ዲጊዳ ጊሻስ ሌዌቲ ባንታ ሄንꬃ ጋዴኔ ባንታ ሶሆ ኣጊዲ ዩሁዳኔ ዬሩሳላሜ ዪዳ።
2CH 11:15 ኢዮርባኣሜይ ጎይኒዛ ꬎቃሶሆታን ሃራ ቄሴታ ሱንꬂዴስ፤ ሂስቲን ኢስቲ ኢዚ ሜꬊዳ ዴይሻ ሚስሌታሲኔ ማራ ሚስሌታስ ቄሴ ጊዲዲ ኦꬂዳ።
2CH 11:16 ጊዶ ኣቲን ኢስራኤሌ ቆሞታ ኡባፌ ኢስራኤሌ ጎዳስ ባንታ ዎዚናፔ ጎይናናስ ኮይዛይቲ ጎዳ ባንታ ኣዋታ ጾሳስ ያርሾ ያርሻናስ ሌዌታ ጌዶ ካሊዲ ዬሩሳላሜ ዪዳ።
2CH 11:17 ኢስታ ዩሳይ ዩሁዳ ካዎቴꬃ ሚንꬂዴስ፤ ኢስቲ ሄꬑ ላይꬅ ኩሜꬅ ሶሎሞኔ ና ኤሮቢኣሜ ማዲዳ፤ ኢስቲ ካዎ ዳዊቴ ኦጌኔ ካዎ ሶሎሞኔ ኦጌ ካሊዲ ሳሮ ዴኢዳ።
2CH 11:18 ኤሮቢኣሜይ ማሂላቶ ማቾ ኤኪዴስ፤ ማሂላቲ ኣዋይ ዳዊቴ ና ያርሞቴ፤ ኢዚ ኣያ ኢሴዬ ና ኤልያቤ ቢዮ ኣቢሃይሎ።
2CH 11:19 ማሂላታ ኤሮቢኣሜስ ያኡሼ፥ ሻማሪያኔ ዛሃሜ ጌቴቲዛ ኣቱማ ናይታ ዬላዱስ።
2CH 11:20 ሄሳፌ ጉዬ ኣቤሴሎሜ ቢዮ ማኢኮ ማቾ ኤኪዴስ፤ ማኢካ ኤሮቢኣሜስ ኣቢያ፥ ኣታዬ፥ ዚዛኔ ሻሎሚቴ ዬላዱስ።
2CH 11:21 ኤሮቢኣሜይ ባ ማቼታፔኔ ባ ላጌꬆ ማቼታ ኡባፌ ኣቤሴሎሜ ቢዮ ማኢኮ ኣꬂ ሲቂዴስ። ኢዛስ 18 ማቼቲኔ 60 ላጌꬆ ማቼቲ ዴቴስ፤ ኢዚ 28 ኣቱማ ናይታኔ 60 ማጫ ናይታ ዬሊዴስ።
2CH 11:22 ኤሮቢኣሜይ ማኢኪ ና ኣቢያ ባፔ ጉዬን ካዎꬃናስ ቆፒዳ ጊሻስ፥ ኢዛ ኢሻንታ ቦላ ሃላቃ ኦꬂ ሱንꬂዴስ።
2CH 11:23 ኤሮቢኣሜይ ጪንጪዲ ባ ኣቱማ ናይታ ዩሁዳኔ ቢኒያሜ ቢታታ ኡባን ዴኢዛ ጊምቤቲዳ ካታማታ ኡባን ሻኪ ሻኪ ዎꬂዲ ኢስታስ ኮሺዛ ሚሽ ኡባ ኢሚዴስ፤ ቃሴ ኢስታ ጮራ ማቼታ ኤኪሲዴስ።
2CH 12:1 ኤሮቢኣሜ ካዎቴꬃይ ሚኒ ኤቂዳ ዎዴ ኢዚኔ ኢስራኤሌ ኣሳይ ኡባይ ጎዳ ዎጋ ዬጊ ኣጊዳ።
2CH 12:2 ኢስቲ ጎዳስ ኣማኔቶንታ ኢጺዳ ጊሻስ ኤሮቢኣሜይ ካዎቲዳ ኢቻሻንꬆ ላይꬃን ጊብጼ ካዎ ሺሻቂ ዬሩሳላሜ ካታማ ቦላ ዎራጂዴስ።
2CH 12:3 ኢዛራ ኢሲፌ ጊብጼፔ ዪዳይ 1,200 ፓራ-ጋሬታ፥ 60,000 ፓራ ኣሳታኔ ቆዳይ ባይንዳ ሊቢያ ኦላንቻታ፥ ሱካ ኦላንቻታኔ ቶጵያ ኦላንቻታ።
2CH 12:4 ካዎ ሺሻቂ ጊምቤቲዳ ዩሁዳ ካታማታ ኦሊ ኦይኪዲ ዬሩሳላሜ ካታማ ጋካናስ ካንꬂ ቢዴስ።
2CH 12:5 ሄሳፌ ጉዬ ናቤ ሻማኤይ ሺሻቄስ ባቢዲ ዬሩሳላሜን ሺቂ ኡቲዳ ዩሁዳ ካሌꬂዛይታኮኔ ኤሮቢኣሜኮ ዪዲ፥ «ጎዳይ፥ ‹ኢንቴ ታና ኣጊዴታ፤ ሄሳ ጊሻስ ታኒካ ኢንቴና ሺሻቄ ኩሼን ኣꬃ ኢማዲስ› ጌስ» ጊዴስ።
2CH 12:6 ካዎ ኤሮቢኣሜይኔ ኢስራኤሌ ካሌꬂዛይቲ ባንታና ካዉሺዲ፥ «ጎዳይ ጺሎ» ጊዳ።
2CH 12:7 ኢስቲ ባንታና ካዉሺዳይሳ ጎዳይ ቤኢዲ ሻማኤ ባጋራ ጎዳይ፥ «ኢስቲ ባንታና ካዉሺዳ ጊሻስ ታኒ ኢስታ ኣሻና ኣቲን ꬋይሲኬ። ታ ሃንቆይ ሺሻቄ ባጋራ ዬሩሳላሜ ቦላ ዬና።
2CH 12:8 ጊዲኮካ ኢስቲ ታስ ሃሬቴꬃሲኔ ሃራ ቢታ ካዎታስ ሃሬቴꬃስ ጊዶን ዲዛ ዱማቴꬃ ሻኪ ኤራና ማላ ኢስቲ ሺሻቄስ ሃሬታና» ጊዴስ።
2CH 12:9 ሄሳ ጊሻስ ጊብጼ ካዎ ሺሻቂ ዬሩሳላሜ ካታማ ኦሊዲ ጾሳ ኬꬃኒኔ ካዎ ኬꬃን ዴኢዛ ቡቁራ ሚሽ ኡባ ኤኪዴስ። ቃሴ ሶሎሞኔይ ዎርቃፌ ኦሲሲዳ ጎንዳሌታካ ኤኪ ኤፊዴስ።
2CH 12:10 ኢዚ ኤፊዳ ዎርቃ ጎንዳሌታ ጊሻስ ካዎ ኤሮቢኣሜይ ጻርቂማላፔ ሃራ ጎንዳሌታ ኦሲሲዲ ካዎ ኬꬃ ፔንጌ ናጊዛይታ ሃላቃዚ ኣላፌቴꬃን ኦይካና ማላ ኢሚዴስ።
2CH 12:11 ካዎይ ጎዳ ኬꬃ ጌሊዛ ዎዴ ኡባን ዛቤቲ ሄ ጎንዳሌታ ኦይኪዲ ኢዛ ኣጃቤቴስ፤ ሄሳፌ ጉዬ ጎንዳሌታ ዛሪዲ ዛቤታ ኬꬃን ዎꬄቴስ።
2CH 12:12 ኤሮቢኣሜይ ባና ካዉሺዳ ጊሻስ ኢዚ ኡባራ ꬋዮንታ ማላ ጎዳ ሃንቆይ ኢዛፔ ሲሚዴስ። ዩሁዳ ቢታስ ኡባ ሚሺ ኢንጄቲዴስ።
2CH 12:13 ካዎ ኤሮቢኣሜይ ዬሩሳላሜን ሚኒ ካዎቲዴስ፤ ኤሮቢኣሜይ ካዎቲሺን ኢዛስ ላይꬃይ 41 ጊዲዴስ፤ ጎዳይ ባ ሱንꬃ ሄን ዎꬃናስ ኢስራኤሌ ቢታ ኡባፌ ዶሪዳ ዬሩሳላሜ ካታማን 17 ላይꬅ ካዎቲዴስ። ኤሮቢኣሜ ኣዬያ ኣሞኔ ዴሬ ኣስ ናኢሞ።
2CH 12:14 ኤሮቢኣሜይ ጎዳ ዎዚናፔ ኮዮንታ ጊሻስ ኢታ ሚሽ ኦꬂዴስ።
2CH 12:15 ኤሮቢኣሜይ ኮይሮፔ ዉርሴꬅ ጋካናስ ሃኒዳይሲኔ ኢዛ ዬሌታ ማራይ ናቤ ሻማኤ ታሪኬ ማጻፋኒኔ ኢዶይ ቤኢዳ ኣጁታ ማጻፋን ጻፌቲ ኡቲዴስ። ኤሮቢኣሜይኔ ኢዮርባኣሜይ ኡባ ዎዴ ኦሌቲሼ ዴኢዳ።
2CH 12:16 ኤሮቢኣሜይ ሃይቂዴስ፤ ዳዊቴ ካታማንካ ሞጌቲዴስ፤ ኢዛሶሆን ኢዛ ና ኣቢያይ ካዎቲዴስ።
2CH 13:1 ካዎ ኢዮርባኣሜይ ኢስራኤሌን ካዎቲዳ 18 ላይꬃን ኣቢያይ ዩሁዳን ካዎቲዴስ።
2CH 13:2 ኣቢያይ ዬሩሳላሜን ሄꬑ ላይꬅ ካዎቲዴስ። ኢዛ ኣዬይ ሱንꬂ ሚካዮ፤ ሚካያ ጊቢኣፔ ዪዳ ኡርኤሌ ቢዮ። ኣቢያይኔ ኢዮርባኣሜይ ኦሌቲሼ ዴኢዳ።
2CH 13:3 ኣቢያይ ዶሬቲዳ 400,000 ሚኖ ኦላንቻታ ኤኪዲ ኦላናስ ኬኢን ኢዮርባኣሜይካ ዶሬቲዳ 800,000 ሚኖ ኦላንቻታ ኤኪዲ ኣቢያራ ኦሌታናስ ኬኢዴስ።
2CH 13:4 ሄሳፌ ጉዬ ኣቢያይ ኤፍሬሜ ጌዜን ዴኢዛ ዛማራይሜ ዙማ ሁኤን ኤቂዲ፥ «ሃይሶ ኢዮርባኣሜ! ቃሴካ ኢንቴኖ ኢስራኤሌ ኣሳቶ! ኡባይካ ታኒ ጊዛይሳ ሲዪቴ!
2CH 13:5 ኢስራኤሌ ጎዳይ ዳዊቲኔ ኢዛ ዜሬꬃቲ ኢስራኤሌ ቦላ ሜርናስ ካዎታና ማላ፥ ዳዊቴራ ኢዚ ላሜቶንታ ማጺኔ ጫቆ ጫቄቲዳይሳ ኢንቴ ኤሬኬቲዬ?
2CH 13:6 ጊዶ ኣቲን ዳዊቴ ና ሶሎሞኔ ኣሽካራ፥ ናባጼ ና ኢዮርባኣሜይ ዴንዲዲ ባ ጎዳ ቦላ ማካሊዴስ።
2CH 13:7 ኤሮቢኣሜይ ጋዚዶንታ ዬላጋቴꬃን ኢስታራ ኤቄታናስ ዳንዳዮንታ ዎዴ ፓꬆንታ ሹፉሮ ኣሳቲ ኢዮርባኣሜኮ ሺቂዲ ሶሎሞኔ ና ኤሮቢኣሜ ቦላ ሚኒዳ።
2CH 13:8 «ሃኢካ ጎዳይ ዳዊቴ ዜሬꬃታስ ኢሚዳ ካዎቴꬃራ ኢንቴ ኤቄታናስ ቆፔታ፤ ኢንቴ ሄሳ ቆፒዛይ ኢንቴስ ኬሂፔ ጮራ ኦላንቻቲ ዲዛ ጊሻሲኔ ኢንቴስ ጾሳታ ጊዳና ማላ ኢዮርባኣሜይ ዎርቃፌ ኦሲሲዳ ማራ ሚስሌቲ ኢንቴናራ ዲዛ ጊሻሳ።
2CH 13:9 ኣሮኔ ዛሬ ጊዲዲ ጎዳስ ኦꬂዛ ቄሴታኔ ሌዌታ ኢንቴ ዬዴꬂዴታ። ሂስቲዲ ሃራ ቢታ ኣሳይ ኦꬂዛ ማላ ኢንቴስ ሃራ ቄሴታ ሱንꬂዴታ። ባና ዱማሳናስ ኢሲ ኮርማ ቦራኔ ላፑን ꬋርሾ ኤኪዲ ዪዛ ኦኒኔ ዎርዶ ጾሳታስ ቄሴ ጊዳና ማላ ሱንꬄታ።
2CH 13:10 «ኑስ ጊዲኮ ጎዳይ ኑ ጾሳ፤ ኑኒ ኢዛ ኣጊቤኮ። ኣሮኔ ዛሬ ጊዲዲ ጎዳስ ኦꬂዛ ቄሴቲ ኑስ ዴቴስ፤ ሌዌቲ ኢስታ ማዴቴስ።
2CH 13:11 ኢስቲ ኡባ ጋላሲ ማላዶኔ ኦማርስ ጎዳስ ጹጌቲዛ ያርሾ ያርሼቴሲኔ ሳዊዛ ኤጻኔ ጩዋሴቴስ። ጎዳ ሲንꬃን ዎꬂዛ ኡኬꬃ ጌሻ ጻራጴዛ ቦላ ዎꬄቴስ። ኦማርስ ኦማርስ ፖኢሳና ማላ ዎርቃፌ ኦሴቲዳ ጾምፔታ ዎꬂዛ ባላን ዎꬂዲ ጊጊሴቴስ። ጋሶይካ ኑኒ ጎዳ ኑ ጾሳ ኣዛዞታ ናጎስ፤ ኢንቴ ጊዲኮ ኣጋጊዴታ።
2CH 13:12 ቤኢቴ፥ ጾሲ ኑናራ ዴስ፤ ኢዚ ኑና ካሌꬂዛዴ። ኦላ ዛዬ ፑኒዛ ኢዛ ቄሴቲካ ኑናራ ዴቴስ፤ ኑኒ ኢንቴናራ ኦላ ዶማናስ ኢስቲ ዛዬ ፑናና። ኢስራኤሌ ኣሳዉ! ኢንቴስ ሎኦንታ ጊሻስ ኢንቴ ኣዋታ ጎዳራ ኦሌቶፍቴ!» ጊዴስ።
2CH 13:13 ሄ ዎዴ ኢዮርባኣሜይ ባ ኦላንቻታፔ ጉꬃቲ ኢስታፌ ጉዬራ ዛማዲ ናጋና ማላ ዬዲዴስ። ሃንኮ ኣቲዳ ኢስራኤሌ ኦላንቻቲ ዩሁዳ ኦላንቻታራ ቲራን ጋይታና ማላ ኦꬂዴስ።
2CH 13:14 ዩሁዳ ኦላንቻቲ ጉዬ ሲሚ ጼሊዛ ዎዴ ኢስታ ኦላናስ ዪዳይቲ ጉዬራኔ ሲንꬃራ ዴኢዛይሳ ቤኢዲ ጎዳኮ ዋሲዳ፤ ቄሴቲካ ባ ዛዬ ፑኒዳ።
2CH 13:15 ሄሳፌ ጉዬ ዩሁዳ ኦላንቻቲ ኦላስ ማጉሊሼ ጬቄቲዳ፤ ሄ ዎዴ ጾሳይ ኢዮርባኣሜኔ ኢስራኤሌ ኣሳ ኡባ ኣቢያ ሲንꬃኒኔ ዩሁዳ ሲንꬃን ሾጪዴስ።
2CH 13:16 ኢስራኤሌ ኦላንቻቲ ዩሁዳ ኦላንቻታ ሲንꬃፌ ባቃቲን ጾሲ ኢስታ ዩሁዳ ኦላንቻታ ኩሼን ኣꬂ ኢሚዴስ።
2CH 13:17 ኣቢያይኔ ኢዛ ኦላንቻቲ ኢስታ ሱፑ ሂስቲዳ፤ ኢስራኤሌ ኦላንቻታፔ 500,000 ዶሬቲዳ ኦላንቻቲ ሃይቂዳ።
2CH 13:18 ኢስራኤሌ ኣሳይ ሄ ዎዴ ካዉዪዴስ፤ ዩሁዳ ኣሳይ ጎዳ ባንታ ኣዋታ ጾሳን ኣማኔቲዳ ጊሻስ ኢስታ ጾኒዴስ።
2CH 13:19 ኣቢያይ ኢዮርባኣሜ ዬዴꬂዲ ኢዛፔ ቤቴሌ ካታማ፥ ዪሻኔ ካታማ፥ ኤፍሮኔ ካታማ ኢስታ ሞꬃታራ ጋꬂ ኦይኪዴስ።
2CH 13:20 ኣቢያይ ዴኢዳ ላይꬅ ኡባን ኢዮርባኣሜይ ሲሚዲ ሚኒቤና፤ ጎዳይ ኢዮርባኣሜ ዴቺን ሃይቂዴስ።
2CH 13:21 ጊዶ ኣቲን ኣቢያይ ሚኒ ሚኒ ቢዴስ። ኣቢያይ 14 ማቼታ ኤኪዲ 22 ኣቱማ ናይታኔ 16 ማጫ ናይታ ዬሊዴስ።
2CH 13:22 ኣቢያይ ኦꬂዳ ሃራቲ፥ ኢዚ ሃኒዳዚኔ ኢዚ ጊዳዚ ኡባይ ናቤ ኢዶ ታሪኬ ማጻፋን ጻፌቲ ኡቲዴስ።
2CH 14:1 ኣቢያይ ሃይቂዴስ፤ ዳዊቴ ካታማንካ ሞጌቲዴስ፤ ኢዛሶሆን ኢዛ ና ኣሲ ካዎቲዴስ፤ ኢዚ ካዎቲዳ ዎዴ ቢታይ ታሙ ላይꬅ ዎፓ ዴሚዴስ።
2CH 14:2 ኣሲ ጎዳ ባ ጾሳ ሲንꬃን ሎኦኔ ሱሬ ሚሽ ኦꬂዴስ።
2CH 14:3 ኣሲ ኣላጋ ጾሳታስ ያርሺዛሶሆታኔ ጎይኒዛ ꬎቃሶሆታ ꬋይሲዴስ። ጎይናናስ ሹቻፌ ኦሴቲዳ ቱሳታካ ሜንꬄሬꬂዴስ፤ ኣሼሮ ጌቴቲዛ ኤቃ ጾሳይ ሚስሌታካ ቃንጼሬꬂ ዬጊዴስ።
2CH 14:4 ዩሁዳ ኣሳይ ጎዳ ባንታ ኣዋታ ጾሳ ኮያና ማላ፥ ኢዛ ዎጋኔ ኢዛ ኣዛዞታ ናጋና ማላ ኣሲ ኣዛዚዴስ።
2CH 14:5 ቃሴ ጎይኒዛ ꬎቃሶሆታኔ ኤጻኔ ጩዋሲዛ ሶሆታ ዩሁዳ ካታማ ኡባፌ ꬋይሲዴስ። ሂስቲን ኢዛ ካዎቴꬃ ላይꬃን ቢታይ ዎፓ ዴሚዴስ።
2CH 14:6 ካዎ ኣሲ ዩሁዳን ዴኢዛ ካታማታስ ሚጻታ ሜꬊዴስ። ጎዳይ ኢዛ ሼምፒሲዳ ጊሻስ ቢታይካ ሼምፒዴስ፤ ሄ ላይꬃታን ኢዛራ ኦኒካ ኦሌቲቤና።
2CH 14:7 ኣሲ ዩሁዳ ኣሳ፥ «ኣኔ ኑኒ ሃ ካታማታ ኬጾስ፤ ኬጺዲ ኢስታ ዩሾን ሚጻታ፥ ጊምቤታ፥ ፔንጌታኔ ፔንጌታ ጎርዲዛ ኮላታታ ኦꬆስ። ኑኒ ኑ ጎዳ ኮዪዳ ጊሻስ ቢታያ ሃኢካ ኑሳ። ኑኒ ኢዛ ኮዪዳ ጊሻስ ኢዚ ኑስ ኡባ ባጋራ ዎፓ ኢሚዴስ» ጊዴስ፤ ሄሳ ጊሻስ ኢስቲ ካታማታ ኬጺ ፖሊዳ።
2CH 14:8 ኣሳስ ዎጋ ጎንዳሌታኔ ቶራታ ኦይኪዛ 300,000 ኦላንቻቲ ዩሁዳ ዛሬፔ ዴቴስ፤ ቃሴ ቄሪ ጎንዳሌታ ኦይኪዛይቲኔ ዎንዳፌ ዱኪዛይቲ 280,000 ኦላንቻቲ ቢኒያሜ ዛሬፔ ዴቴስ። ሃይታንቲ ኡባይካ ሚኖ ኦላንቻታ።
2CH 14:9 ዛራሄ ጌቴቲዛ ኢሲ ቶጵያ ኣሲ 1,000,000 ኦላንቻታኔ 300 ፓራ-ጋሬታ ኤኪዲ ዩሁዳ ኦላናስ ዪዲ ማሬሻ ጋኪዴስ።
2CH 14:10 ኣሲካ ኢዛራ ኦሌታናስ ኬኢዲ ባ ኦላንቻታ ማሬሻ ማታን ዴኢዛ ጻፋቴ ዙሌን ሶሆ ሶሆ ኦይꬂዴስ።
2CH 14:11 ሄሳፌ ጉዬ ኣሲ ጎዳ ባ ጾሳ፥ «ኣቤት ጎዳዉ! ዎልቃይ ባይንዳ ኦላንቻቲ ዎልቃማ ኦላንቻታ ጾናና ማላ ማዲዛይ ኔፔ ኣቲን ሃራይ ባዋ! ኣቤት ጎዳዉ ኑ ጾሳዉ! ኑኒ ኔናን ኣማኔቲዲ ሃ ጮራ ኦላንቻታራ ኔ ሱንꬃን ኦሌታናስ ዪዳ ጊሻስ ኑና ማዳ። ኣቤት ጎዳዉ! ኔኒ ኑ ጾሳ፤ ኔና ኣሲ ጾኔና» ጊዲ ዎሲዴስ።
2CH 14:12 ሄሳ ጊሻስ ጎዳይ ኣሳ ሲንꬃኒኔ ዩሁዳ ኦላንቻታ ሲንꬃን ቶጵያ ኦላንቻታ ሾጪዴስ፤ ሂስቲን ቶጵያ ኦላንቻቲ ባቃቲዳ።
2CH 14:13 ኣሲኔ ኢዛራ ዴኢዛ ኦላንቻቲ ኢስታ ጌራሬ ጋካናስ ዬዴꬂዳ። ቶጵያ ኦላንቻታፔ ዳሮይ ሃይቂዳ ጊሻስ ኢስቲ ሲሚዲ ሚናናሲኔ ኦሌታናስ ዳንዳይቤቴና። ሄሳꬆ ሃኒዲ ቶጵያ ኦላንቻቲ ጎዳኒኔ ኢዛ ኦላንቻታን ጾኔቲዳ። ካዎ ኣሳ ኦላንቻቲካ ዳሮ ሚሽ ዲኢዳ።
2CH 14:14 ጌራሬ ዩሾን ዴኢዛ ካታማታ ኡባ ቦላ ኬሂ ዳጋንꬂዛ ሚሺ ጎዳ ማታፔ ዎꬊዳ ጊሻስ ኣሲኔ ኢዛ ኦላንቻቲ ካታማታ ꬋይሲዳ፤ ኬሂ ዳሮ ሚሽ ሄፔ ቦንቂ ኤኪዳ።
2CH 14:15 ቃሴ ሜሄ ሄሚዛይታ ሞꬃታ ኦሊዲ ዳሮ ዶርስ፥ ዴይሺኔ ጋሜላ ዲኢ ኤኪዲ ዬሩሳላሜ ሲሚዳ።
2CH 15:1 ኦዴዴ ና ኣዛሪያሳ ቦላ ጾሳ ኣያናይ ዎꬊዴስ።
2CH 15:2 ኢዚካ ኣሳራ ጋይታናስ ቢዲ፥ «ኣሳ፥ ዩሁዳ ኣሳዉ! ቢኒያሜ ኣሳዉ ኢንቴ ኡባይካ ሲዪቴ! ኢንቴ ጎዳራ ኢሲፌ ዴኢኮ ኢዚካ ኢንቴናራ ዴኣና። ኢንቴ ኢዛ ኮይኮ ኢዚ ኢንቴስ ቤታና፤ ኢንቴ ኢዛ ኣጊኮ ኢዚካ ኢንቴና ኣጋና።
2CH 15:3 ኢስራኤሌ ኣሳይ ቱሙ ጾሲ፥ ታማርሲ ቄሴይኔ ዎጋይ ባይንዳ ዳሮ ዎዴ ዴኢዴስ።
2CH 15:4 ጊዶ ኣቲን ባንታና ሜቶይ ጋኪዳ ዎዴ ኢስቲ ጎዳ ኢስራኤሌ ጾሳኮ ሲሚዲ ኢዛ ኮዪን ኢዚ ኢስታስ ቤቲዴስ።
2CH 15:5 ሄ ዎዴ ቢታ ኡባ ቦላን ዳሮ ሺሮይ ዲዛ ጊሻስ ኣሲ ሳሮን ኬዚ ጌላናስ ኣማንꬄና።
2CH 15:6 ጾሲ ኢስታ ዱማ ዱማ ሜቶን ዬጊዳ ጊሻስ ዴሬይ ካዎቴꬃ ቦላ፥ ካታማይካ ካታማ ቦላ ዴንዲዲ ኢሶይ ኢሳ ꬋይሴስ።
2CH 15:7 ኢንቴ ጊዲኮ ኢንቴ ኦꬂዳ ኦሶስ ዎይቶይ ዴኢዛ ጊሻስ ሚኒቴ! ላፎፒቴ!» ጊዴስ።
2CH 15:8 ኦዴዴ ና ናቤ ኣዛሪያሲ ዮቲዳ ቃላ ሲዪዲ ኣሲ ሚኒዴስ። ኣሲ ዩሁዳኔ ቢኒያሜ ቢታታ ኡባፌኔ ኤፍሬሜ ጌዜን ኢዚ ኦሊ ኦይኪዳ ካታማታፔ ሃራሲዛ ኤቃ ሚስሌታ ꬋይሲዴስ። ሄሳፌ ጉዬ ጾሳ ኬꬃ ሲንꬃን ዴኢዛ ጎዳስ ያርሾ ያርሺዛሶሆዛካ ኦራꬂዴስ።
2CH 15:9 ጎዳይ ኢዛ ጾሲ ኢዛራ ዴኢዛይሳ ቤኢዳ ጊሻስ ዳሮ ኣሳይ ኢስራኤሌፔ ኢዛኮ ዪዴስ፤ ኣሲ ዩሁዳ ኣሳኔ ቢኒያሜ ኣሳ ኡባ፥ ኢስታራ ዴኢዛ ኤፍሬሜ ዛሬታ፥ ሚናሴ ዛሬታኔ ሲሞና ዛሬታ ሺሺዴስ።
2CH 15:10 ኣሲ ካዎቲዳ ታማኔ ኢቻሻንꬆ ላይꬃን፥ ሄꬓንꬆ ኣጊናን ሄ ኣሳይ ዬሩሳላሜን ሺቂዴስ።
2CH 15:11 ሄ ዎዴ ዲኢ ኤሂዳይሳፌ 700 ኮርማታ፥ 7,000 ዶርሲኔ ዴይሽ ጎዳስ ያርሺዳ።
2CH 15:12 ጎዳ ባንታ ኣዋታ ጾሳ ባንታ ኩሜꬃ ዎዚናፔኔ ባንታ ኩሜꬃ ሼምፖፌ ኮያናስ ቃላ ጌሊዳ።
2CH 15:13 «ጎዳ ኢስራኤሌ ጾሳ ኮዮንታ ኣሲ ጉꬅ ጊዲን ጊታ ጊዲን፥ ኣቱማ ጊዲን፥ ማጫ ጊዲን ሃይቆ» ጊዲ ጫቂዳ።
2CH 15:14 ሄሳ ቦላ ጉጂዲ ዛዬን፥ ዲንኬኒኔ ኢሊሊሳን ባንታ ቃላ ꬎቁ ሂስቲዲ ጎዳስ ጫቂዳ።
2CH 15:15 ኢስቲ ኩሜꬃ ዎዚናፔ ጫቂዳ ጊሻስ ሄ ጫቆዛን ዩሁዳ ኣሳይ ኡባይ ኡፋዬቲዴስ፤ ጾሳ ኢስቲ ላሞቲዲ ኮዪን ኢዚ ኢስታስ ቤቲዴስ። ጎዳይ ኢስታስ ኡባ ባጋራካ ዎፓ ኢሚዴስ።
2CH 15:16 ካዎ ኣሲ ባ ኣዋ ኣያ ማኢካ ኣሼሮ ጌቴቲዛ ጾሳይስ ሃራሲዛ ኤቃ ሚስሌ ሜꬊዳ ጊሻስ ኢዞ ካዎ ኣዬቴꬃ ቦንቾፌ ዲጊዴስ። ኣሲ ሄ ኤቃ ሚስሌዛ ቃንጼሬꬂ ሜንꬄሬꬂዲ፥ ቄዲሮኔ ዙሌን ጹጊዴስ።
2CH 15:17 ጎይኒዛ ꬎቃሶሆታ ኣሲ ኢስራኤሌ ቢታፌ ሙሌራ ꬋይሶንታ ኣጊኮካ ኢዚ ባ ዴኢዳ ላይꬅ ኡባን ጎዳስ ዎዚናፔ ኣማኔቲዛ ኣስ ጊዲዲ ዴኢዴስ።
2CH 15:18 ኢዚኔ ኢዛ ኣዋይ ጾሳስ ዱማሲ ዎꬂዳ ቢራ፥ ዎርቃኔ ዱማ ዱማ ሚሻታ ኤሂዲ ጾሳ ኬꬃ ጊዶን ዎꬂዴስ።
2CH 15:19 ኣሲ ካዎቲዳ 35 ላይꬅ ጋካናስ ኦላይ ዴና።
2CH 16:1 ኣሲ ካዎቲዳ 36 ላይꬃን ኢስራኤሌ ካዎ ባሼይ ዩሁዳ ቦላ ዎራጂዴስ፤ ሂስቲዲ ዩሁዳ ካዎ ኣሳኮ ኦኒካ ጌሎንታ ማላኔ ኬዞንታ ማላ ቴቃናስ ኤራማ ካታማ ዩዪ ኣꬋናስ ሚንꬂ ጊምቢዴስ።
2CH 16:2 ሄሳ ጋሶን ካዎ ኣሲ ጾሳ ኬꬃኔ ባ ካዎቴꬃ ኬꬃ ቡቁራ ሚንጂዛሶፔ ዎርቃኔ ቢራ ኤኪዲ ዳማስቆ ካታማን ዴኢዛ ኣራሜ ካዎ ቤኒ-ሃዳዴስ ኩሼ ጌንꬆ ዬዲዴስ።
2CH 16:3 ሄ ኩሼ ጌንꬆዛ ዬዲሼ፥ «ካሴ ታ ኣዋራኔ ኔ ኣዋራ ጫቄቲዳ ማላ ኣኔ ታናራኔ ኔናራ ጫቄቶስ፤ ሄኮ ታኒ ኔስ ቢራኔ ዎርቃ ዬዳዲስ። ኢስራኤሌ ካዎ ባሼይ ባ ኦላንቻታ ታ ቢታፌ ኬሳና ማላ፥ ኔኒ ካሴ ኢዛራ ጫቄቲዳ ጫቆዛ ላላ» ጊዴስ።
2CH 16:4 ቤኒ-ሃዳዴይ ካዎ ኣሲ ጊዳይሳን ኩዪዲ፥ ባ ኦላ ጋዳዋታ ኢስራኤሌ ካታማታ ኦላናስ ዬዲዴስ። ሄይቲ ኢዮኔ፥ ዳኔ፥ ኣቤሊ-ማይሜ ጌቴቲዛ ካታማታኔ ኒፍታሌሜ ቢታን ዴኢዛ ሚሻ ሚንጂዛ ካታማታ ኡባ ኦሊ ኦይኪዳ።
2CH 16:5 ባሼይ ሄሳ ሲዪዲ፥ ኤራማ ካታማ ጊምቢዛይሳ ኣጊዴስ።
2CH 16:6 ሄሳፌ ጉዬ ካዎ ኣሲ ዩሁዳ ኣሳ ኡባ ሺሺን ኣሳይ ባሼይ ካሴ ሄን ጎኤቲዛ ሹቻኔ ሚꬃ ኤራማፔ ሚዪዴስ። ሂስቲን ኢዚ ጌባኔ ሚጺጳ ጌቴቲዛ ካታማታ ኢዛን ሚንꬂዲ ጊምቢዴስ።
2CH 16:7 ሄ ዎዴ ናቤ ሃናኒያይ ዩሁዳ ካዎ ኣሳኮ ቢዲ፥ «ኔኒ ኣራሜ ካዎን ኣማኔታዳ፥ ጎዳ ኔ ጾሳን ኣማኔቶንታ ጊሻስ ኣራሜ ካዎ ኦላንቻቲ ኔ ኩሼፔ ኬሲ ኤኪዳ።
2CH 16:8 ቶጵያ ኣሳቲኔ ሊቢያ ኣሳቲ፥ ጮራ ፓራ-ጋሬቲኔ ፓራቲ ዴኢዛ ዳሮ ኦላንቻታ ጊዴቴኔ? ጊዶ ኣቲን ኔኒ ጎዳን ኣማኔቲዳ ጊሻስ ጎዳይ ኢስታ ኔ ኩሼን ኣꬂ ኢሚዴስ።
2CH 16:9 ባ ኩሜꬃ ዎዚናፔ ጎዳ ኣማኔቲዛ ኣስ ሚንꬄꬃናስ ጎዳ ኣይፌይ ሳኣ ቦላን ኡባሶ ጼሌስ። ኔኒ ሃ ዮኦዛን ኤያቴꬃ ኦሶ ኦꬂዳ ጊሻስ ሃቺፌ ዶሚን ኔፔ ኦላይ ዱጼና» ጊዴስ።
2CH 16:10 ሄሳ ጋሶን ኣሲ ናቤዛ ቦላ ዳሮ ሃንቄቲዲ ቃሾ ኬꬃን ዬጊዴስ። ቃሴካ ኣሲ ሄ ዎዴ ኣሳፔ ጉꬃታ ኬሂ ኡንኤꬂዴስ።
2CH 16:11 ኣሲ ኦꬂዳ ሚሻቲ ኮይሮፔ ዉርሴꬅ ጋካናስ ዩሁዳ ካዎታኔ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
2CH 16:12 ኣሲ ካዎቲዳ 39 ላይꬃን ቶሆ ሳኬቲዴስ፤ ኢዛስ ሳኮይ ኬሂ ሚኒኮካ ኢዚ ኣኪሜታ ኮዪዴሲፌ ኣቲን ጎዳ ኮዪቤና።
2CH 16:13 ኣሲ ባ ካዎቲዳ 41 ላይꬃን ካሴ ባ ኣዋቲ ሃይቂዳ ማላ ሃይቂዴስ።
2CH 16:14 ኣሲ ባስ ዳዊቴ ካታማን ሹች ዎጪዲ ጊግሲዳ ዱፎን ዎꬂዳ። ሂስቲዲ ዱማ ዱማ ሺቶይኔ ሳዎይ ዴኢዛ ኣርሳ ቦላ ኢዛ ኣሃ ዎꬂዳ። ኢዛ ቦንቾስ ዳሮ ሚꬅ ዶሪዲ ታማ ኤꬂሼ ኬሂ ዬኪዳ።
2CH 17:1 ኣሳ ና ኢዮሳፊጼይ ኢዛሶሆን ካዎቲዴስ፤ ኢዮሳፊጼይ ኢስራኤሌ ኦላናስ ሚኒዴስ።
2CH 17:2 ጊምቤቲ ኡቲዳ ዩሁዳ ካታማታ ኡባን ኦላንቻታ ዎꬂዴስ፤ ቃሴ ዩሁዳ ቢታኒኔ ኢዛ ኣዋ ኣሲ ኦሊ ኦይኪዳ ኤፍሬሜ ቢታ ካታማታን ዎꬂዴስ።
2CH 17:3 ኢዚ ቡሮ ዬላጋቴꬃ ላይꬃን ባ ኣዋ ዳዊቴ ኦጌ ካሊዳ ጊሻስ ጎዳይ ኢዮሳፊጼራ ጊዲዴስ፤ ኢዚ ባኣሌ ኤቃታ ጎይኒቤና።
2CH 17:4 ኢስራኤሌ ኣሳይ ኦꬂዛይሳ ኣጊዲ ባ ኣዋ ጾሳ ኮዪዴስ፤ ኢዛ ኣዛዞካ ፖሊዴስ።
2CH 17:5 ሄሳ ጊሻስ ጎዳይ ኢዛ ካዎቴꬃ ሚንꬂዴስ፤ ዩሁዳ ኣሳይ ኡባይ ኢዮሳፊጼስ ኢሞታ ኤሂዴስ፤ ሂስቲን ኢዚ ኬሂፔ ዱሬቲዴሲኔ ቦንቼቲዴስ።
2CH 17:6 ኢዮሳፊጼይ ጎዳስ ዎዚናፔ ኦꬂዛ ኣስ ጊዲዴስ፤ ሄሳꬆካ ጎይኒዛ ꬎቃሶሆታኔ ኣሼሮ ጌቴቲዛ ኤቃ ጾሳይ ሚስሌታ ዩሁዳ ቢታፌ ꬋይሲዴስ።
2CH 17:7 ኢዮሳፊጼይ ባ ካዎቲዳ ሄꬓንꬆ ላይꬃን ዩሁዳ ካታማታን ታማርሳና ማላ ባ ኦሳንቻታ ቤኒ-ሃይሌ፥ ኣብዲዩ፥ ዛካራሳ፥ ናቲናኤሌኔ ሚካያ ኪቲዴስ።
2CH 17:8 ቃሴ ኢስታራ ኢሲፌ ሌዌታ ሻማኤ፥ ናታኒያ፥ ዛባዲያ፥ ኣሳሄሌ፥ ሻሚራሞቴ፥ ዮናታኔ፥ ኣዶኒያሳ፥ ጾቢያኔ ጾባዶኒያ ዬዲዴስ፤ ቃሴካ ቄሴታፔ ኤልሻማኔ ኢዮራሜ ኢስታራ ኢሲፌ ኪቲዴስ።
2CH 17:9 ኢስቲ ኡባይ ጎዳ ዎጋ ማጻፋ ባንታናራ ኤኪዲ ዩሁዳ ቢታን ዴኢዛ ካታማታ ኡባ ቢዲ ያን ኣሳ ታማርሲዳ።
2CH 17:10 ዩሁዳ ቢታ ዩሾን ዴኢዛ ካዎቴꬃታ ኡባ ጎዳይ ያሺሲን ኢስቲ ኢዮሳፊጼራ ኦሌቲቤቴና።
2CH 17:11 ፊሊስጼሜ ኣሳታፔ ጉꬃቲ ኢሞታኔ ጊራ ቢራ ኢዮሳፊጼስ ኤሂዳ፤ ቃሴ ኣራቤቲካ ኢዛስ 7,700 ꬋርሾኔ 7,700 ኦርጌታ ኤሂዳ።
2CH 17:12 ሄሳ ጊሻስ ኢዮሳፊጼይ ኬሂፔ ሚኒ ሚኒ ቢዴስ። ኢዚ ዩሁዳን ሚጻታኔ ኢስታን ሚንጃ ሚሽ ዎꬂዛ ካታማታ ኦꬂዴስ።
2CH 17:13 ኢዚ ሄ ካታማታን ዳሮ ሚሽ ሚንጂዴስ። ኢዚ ኤሬቲዳ ሚኖ ኦላንቻታ ዬሩሳላሜን ዎꬂዴስ።
2CH 17:14 ኢስቲ ባንታ ቆሞን ቆሞን ሃይሳፌ ካሊ ጻፌቲዳይታ። ዩሁዳ ቆሞፌ ሻላቃ ኣዲናሄኔ ኢዛራ 300,000 ሚኖ ኦላንቻቲ ዴቴስ።
2CH 17:15 ኣዲናሄ ካሊዲ ዴኢዛ ሃላቃ ዪሆሃናኔኔ ኢዛራ 280,000 ሚኖ ኦላንቻቲ ዴቴስ።
2CH 17:16 ሄሳፌ ካሊዲ ጎዳ ኦሶስ ባ ሼኔን ባና ኣꬂ ኢሚዳ ዚኪሬ ና ኣማሲያራ 200,000 ሚኖ ኦላንቻቲ ዴቴስ።
2CH 17:17 ቢኒያሜ ቆሞፌ ሃላቃ ኤልኣዳኔ ኢዛራ ዎንዳፌኔ ጎንዳሌ ኦይኪዳ 200,000 ሚኖ ኦላንቻቲ ዴቴስ።
2CH 17:18 ኤልዳኤ ካሊዲ ዴኢዛ ሃላቃ ዪሆዛባዴኔ ኢዛራ ኦላ ባናስ ጊጼቲዳ 180,000 ኦላንቻቲ ዴቴስ።
2CH 17:19 ሃ ኡባ ኦላንቻቲ ካዎዛስ ዬሩሳላሜን ኦꬂዛይታ፤ ኢስታ ቆዳይ ዩሁዳን ዴኢዛ ጊምቤቲዳ ካታማታን ኡባን ካዎዚ ዎꬂዳ ኦላንቻታ ጉጄና።
2CH 18:1 ኢዮሳፊጼይ ኬሂፔ ዱሬቲዴሲኔ ቦንቼቲዴስ፤ ቃሴ ኣካቤራካ ቦሎቲዴስ።
2CH 18:2 ኣማርዳ ላይꬃፌ ጉዬን ኢዮሳፊጼይ ኣካቤ ቤኣናስ ሳማሪያ ቢዴስ። ኣካቤይ ኢዛሲኔ ኢዛራ ኢሲፌ ዴኢዛ ኣሳስ ዳሮ ዶርሳታኔ ቦራታ ሹኪዴስ፤ ሂስቲዲ ኢዮሳፊጼይ ጋላኣዴን ዲዛ ኤራሞቴ ካታማ ኦላናስ ባናራ ባና ማላ ኣማንꬂዴስ።
2CH 18:3 ኢስራኤሌ ካዎ ኣካቤይ ዩሁዳ ካዎ ኢዮሳፊጼ፥ «ጋላኣዴን ዲዛ ኤራሞቴ ኦላናስ ታናራ ባኔ?» ጊ ኦይቺዴስ። ኢዮሳፊጼይ፥ «ኤ፥ ኔኒ ኦላ ባናስ ጊጊዛ ዎዴ ኣዉዴካ ኑኒ ኔናራ ባና። ታ ኦላንቻቲ ኔ ኦላንቻታ ማላ» ጊዴስ።
2CH 18:4 ቃሴካ ኢዮሳፊጼይ ኢስራኤሌ ካዎስ፥ «ጊዶ ኣቲን ኔኒ ካሴታዳ ጎዳ ኦይቻ» ጊዴስ።
2CH 18:5 ሄሳ ጊሻስ ኢስራኤሌ ካዎዚ ቲንቢቴ ዮቲዛ 400 ናቤታ ሺሺዲ፥ «ታኒ ጋላኣዴን ዲዛ ኤራሞቴ ካታማ ኦላናስ ቦዬ ቦፖ?» ጊዲ ኢስታ ኦይቺዴስ። ሂስቲን ኢስቲ፥ «ጾሳይ ሄ ካታማዛ ካዎ ኩሼን ኣꬂ ኢማና ጊሻስ ባ!» ጊዳ።
2CH 18:6 ኢዮሳፊጼይ ጊዲኮ፥ «ኑኒ ኦይቻና ማላ ጎዳ ናቤይ ሃራይ ዴኔ?» ጊዴስ።
2CH 18:7 ኢስራኤሌ ካዎዚ ኢዮሳፊጼስ፥ «ኑኒ ኢዛ ባጋራ ጎዳ ሼኔ ኦይቻናስ ኢሲ ኣሲ ዱሳ ዴስ፤ ጊዶ ኣቲን ኢዚ ኡባ ዎዴካ ታ ጊሻስ ኢታ ሚሽ ዮቴሲፌ ኣቲን ሎኦ ሚሽ ዮቲ ኤሮንታ ጊሻስ ታ ኢዛ ኢጻይስ፤ ሄሲካ ዪሚላ ና ሚኪያሳ» ጊዴስ። ኢዮሳፊጼይ፥ «ካዎይ ሄሳ ማላ ጋናስ ቤሴና!» ጊዴስ።
2CH 18:8 ሄሳፌ ጉዬ ኢስራኤሌ ካዎዚ ባ ሹሜታፔ ኢሳ ጼይጊዲ፥ «ባዳ ዪሚላ ና ሚኪያሳ ኤሶን ኤካ ያ» ጊዴስ።
2CH 18:9 ኢስራኤሌ ካዎይኔ ዩሁዳ ካዎ ኢዮሳፊጼይ ባንታ ካዎቴꬃ ማይኦ ማይኢዲ ሳማሪያ ካታማ ጌሊዛ ፔንጌን ዲዛ ባሌን ባንታ ካዎቴꬃ ኣራታን ኡቲን ናቤቲ ኡባይ ኢስታ ሲንꬃን ቲንቢቴ ዮቴቴስ።
2CH 18:10 ኢስታፌ ኢሶይ ኪንኣኔ ና ሴዴቂያሲ ቢራታፔ ካጬታ ጊግሲዲ ኣካቤስ፥ «ጎዳይ፥ ‹ኣራሜ ኣሳቲ ꬋያና ጋካናስ ኔኒ ኢስታ ሃ ካጬታን ቃይጫና› ጌስ» ጊዴስ።
2CH 18:11 ሃንኮ ናቤቲ ኡባይ፥ «ጎዳይ ሄ ካታማ ካዎ ኩሼን ኣꬂ ኢማና ጊሻስ ጋላኣዴን ዲዛ ኤራሞቴ ካታማ ባዳ ኦላ ኦይካ» ጊዲ ኢሲ ማላ ቃላ ዮቲዳ።
2CH 18:12 ሄሳፌ ጉዬ ሚኪያሳ ጼይጋናስ ኪቴቲ ቢዳይሲ ኢዛ፥ «ቤኣ፥ ሃንኮ ናቤቲ ኡባይ ኢሲ ቃላን፥ ‹ካዎዚ ሃ ኦላ ጾናና› ጊዲ ዮቲዳ፤ ሄሳ ጊሻስ ሃያና ኔ ዮቲዛ ቃላይካ ኢስታ ቃላ ማላ ጊዶ፤ ኔኒካ ካዎ ኡፋይሲዛ ሎኦ ቃላ ዮታ» ጊዴስ።
2CH 18:13 ሚኪያሲ ጊዲኮ፥ «ዴኦ ጎዳይ ቤኢን፥ ታ ጾሳይ ዮቶሮ ታኒ ዮታና» ጊዴስ።
2CH 18:14 ሚኪያሲካ ካዎዛኮ ዪዳ ዎዴ ካዎዚ ኢዛ፥ «ሚኪያሳ፥ ኑኒ ጋላኣዴን ዲዛ ኤራሞቴ ኦላናስ ቦኒዬ ቦፒኖ?» ጊዲ ኦይቺዴስ። ሚኪያሲ ካዎዛስ፥ «ቢዲ ጾኒቴ፤ ኢስቲ ኔ ኩሼን ኣꬊ ኢሜታና» ጊዴስ።
2CH 18:15 ሂስቲን ካዎዚ ኢዛስ፥ «ኔኒ ጎዳ ሱንꬃን ቱማፔ ኣቲን ሃራ ሚሽ ታስ ዮቶንታ ማላ ታኒ ኔና ኣፑንቶ ጫቄꬃናስ ኮሺዜ?» ጊዴስ።
2CH 18:16 ሄሳፌ ጉዬ ሚኪያሲ፥ «ኢስራኤሌ ኦላንቻቲ ኡባይ ሄንꬃንቻይ ባይንዳ ዶርሳ ማላ ዙማታ ቦላ ላሌቲዳይታ ታኒ ቤኣዲስ፤ ጎዳይ ኢስታስ፥ ‹ሃይታስ ጎዳይ ባዋ፤ ኢስቲ ኡባይካ ባንታ ሶ ባንታ ሶ ሳሮ ቤቶ› ጌስ» ጊዴስ።
2CH 18:17 ሂስቲን ኢስራኤሌ ካዎይ ኢዮሳፊጼስ፥ « ‹ኢዚ ታ ጊሻስ ኢታፔ ኣቲን ሎኦ ቲንቢቴ ዮቲ ኤሬና› ጋዳ ታኒ ኔስ ዮታቤኪና?» ጊዴስ።
2CH 18:18 ሚኪያሲ ካሌꬂዲ፥ «ሃኢካ ጎዳይ ጊዛይሳ ሲያ! ጎዳይ ባ ካዎቴꬃ ኣራታን ኡቲን ሳሎ ኦላንቻቲ ኡባይ ኢዛፔ ኡሻቻ ባጋራኔ ሃዲርሳ ባጋራ ኤቂዳይሳ ታኒ ቤኣዲስ።
2CH 18:19 ጎዳይ፥ ‹ኢስራኤሌ ካዎ ኣካቤይ ጋላኣዴን ዲዛ ኤራሞቴ ካታማ ቢዲ ሄን ሃይቃና ማላ ኢዛ ባሌꬃናይ ኦኔ?› ጊዴስ፤ ሂስቲን ኢሶይ ሃራ ቆፋ ሺሺን ሃንኮይሲ ሃራ ቆፋ ሺሺዴስ።
2CH 18:20 ሄሳፌ ጉዬ ኢሲ ኣያናይ ኬዚ ጎዳ ሲንꬃን ኤቂዲ፥ ‹ታኒ ኢዛ ባሌꬃና› ጊዴስ። ጎዳ ጾሲ፥ ‹ኔ ኢዛ ዎስታ ባሌꬃኔ?› ጊ ኦይቺዴስ።
2CH 18:21 «ሂስቲን ኣያናዚ፥ ‹ታኒ ባዳ ኡባ ናቤታ ዶናን ዎርዶ ኣያና ጊዳና› ጊዴስ። ጎዳይ፥ ‹ሂስቲኮ ባዳ ባሌꬃ፤ ኔስ ሃናና› ጊዴስ።
2CH 18:22 «ጎዳይ ኔ ቦላ ባሽ ኤሃናስ ቃቺዳ ጊሻስ ሃ ናቤታ ዶናን ዎርዶ ኣያና ዎꬂዴስ» ጊዴስ።
2CH 18:23 ሄሳፌ ጉዬ ኪንኣኔ ና ሴዴቂያሲ ሺቂዲ ሚኪያሳስ ቂንጻሌን ባቃ ሻዪዲ፥ «ጎዳ ኣያናይ ታፔ ኣዋ ባጋራ ኣꬊዲ ኔስ ዮቲዴ?» ጊዴስ።
2CH 18:24 ሚኪያሲ ኢዛስ፥ «ኔኒ ቆቴታናስ ቆልኣ ጌሊዛ ጋላስ ኔ ኢዛ ዴማና» ጊዴስ።
2CH 18:25 ሄሳፌ ጉዬ ኢስራኤሌ ካዎዚ ኢስታስ፥ «ሚኪያሳ ኦይኪዲ ካታማ ኣይሲዛ ኣሞኔሲኔ ታ ና ኢዮኣሳስ ኤፊ ኢሚቴ።
2CH 18:26 ሂስቲዲ ሃይሳ ኣዴዛ ቃሾ ኬꬅ ጌልꬂቴ፤ ታኒ ሳሮ ሲማና ጋካናስ ሜላ ኡኬꬂኔ ሃꬃፌ ኣቲን ሃራ ኣይኮካ ኢሞፍቴ» ጊዴስ።
2CH 18:27 ሚኪያሲካ ኢዛስ፥ «ቱሙ ኔኒ ሳሮ ሲሚዛ ጊዲኮ ጎዳይ ታናን ሃሳይቤና ጉሳ!» ጊዴስ፤ ካሌꬂዲካ ሚኪያሲ፥ «ሃይሳን ዲዛይቲ ኡባይ ታ ዮቲዳይሳ ኡባ ዎዚናን ዎꬂቴ» ጊዴስ።
2CH 18:28 ሄሳፌ ጉዬ ኢስራኤሌ ካዎይኔ ዩሁዳ ካዎ ኢዮሳፊጼይ ጋላኣዴን ዲዛ ኤራሞቴ ካታማ ኦላና ቢዳ።
2CH 18:29 ኢስራኤሌ ካዎ ኢዮሳፊጼ፥ «ታኒ ታ ማይኦ ላማዳ ሃራ ኣስ ሚሳታዳ ኦላስ ጌላና፤ ኔኒ ጊዲኮ ኔ ካዎ ካዎቴꬃ ማይኦ ማይኣ» ጊዴስ፤ ሂስቲዲ ኢስራኤሌ ካዎይ ባ ማይኦ ላሚዲ ሃራ ኣስ ሚሳቲዲ ኦላሶ ጌሊዴስ።
2CH 18:30 ሄ ዎዴ ኣራሜ ካዎይ ባ ፓራ-ጋሬታ ኣዛዚዛይታ፥ «ኢስራኤሌ ካዎ ጻላ ኦሊቴ ኣቲን ሃራ ጉꬅ ጊዲን ጊታ ኣሳራ ኦሌቶፍቴ» ጊ ኣዛዚዴስ።
2CH 18:31 ፓራ-ጋሬታ ኣዛዚዛይቲ ኢዮሳፊጼ ቤኢዲ፥ «ሃይሲ ኢስራኤሌ ካዎ» ጊዲ ኢዛ ጫዳናስ ጊዶꬂዳ፤ ሂስቲን ኢዮሳፊጼይ ዋሲዴስ፤ ጎዳይካ ኢዛ ማዲዴስ፤ ጾሲ ኢስታ ኢዛ ቦላፌ ጉዬ ዛሪዴስ።
2CH 18:32 ፓራ-ጋሬታ ኣዛዚዛይቲ ኢዚ ኢስራኤሌ ካዎ ጊዶንታይሳ ቤኢዲ ኢዛ ዬዴꬂዛይሳ ኣጊ ሲሚዳ።
2CH 18:33 ጊዲኮካ ኢሶይ ባ ዎንዳፌ ኦላንቻታ ቦላ ዱኪን ዎንዳፌዚ ቃዳ ማላ ጹሩሬይ ጋይቲዛሶን ዲዛ ጾኤራ ዬዲዲ ኢስራኤሌ ካዎዛ ጫዲዴስ፤ ሂስቲን ካዎዚ ባ ፓራ-ጋሬዛ ላጊዛይሳ፥ «ታኒ ጫዴቲዳ ጊሻስ ታና ኦላፔ ዛራ ኬሳ» ጊዴስ።
2CH 18:34 ሄ ጋላስ ኦላይ ዳንጺዳ ማላ ፔኢዴስ፤ ኢስራኤሌ ካዎ ኣካቤይ ባ ፓራ-ጋሬ ቦላ ኣርሼይ ዉላናሼ ጋካናስ ዜምፒ ፔኢዴስ፤ ሄሳፌ ጉዬ ኣርሼይ ዉሊሺን ሃይቂዴስ።
2CH 19:1 ሄሳፌ ጉዬ ካዎ ኢዮሳፊጼይ ባ ካዎቴꬃ ኬꬅ ዬሩሳላሜ ሳሮን ሲሚዴስ።
2CH 19:2 ሂስቲን ናቤ ሃናኒያ ና ኢዩይ ኢዛራ ጋይታናስ ቢዲ ካዎ ኢዮሳፊጼ፥ «ኔኒ ኢታታ ማዳናስ ዎይኮ ጎዳ ኢጺዛይታ ሲቃናስ ቤሲዜ? ሄሳ ጊሻስ ጎዳ ሃንቆይ ኔ ቦላ ዪዴስ።
2CH 19:3 ጊዲኮካ ኣሼሮ ጌቴቲዛ ኤቃ ጾሳይ ሚስሌታ ቢታፌ ኔ ዲጊዳ ጊሻሲኔ ጾሳ ኮያናስ ኔ ዎዚና ጊግሲዳ ጊሻስ ኔኒ ሎኦ ኦꬃዳሳ» ጊዴስ።
2CH 19:4 ኢዮሳፊጼይ ዬሩሳላሜን ዴኢዴስ። ቃሴ ኢዮሳፊጼይ ቤርሳቤሄፔ ዶሚዲ፥ ኤፍሬሜ ጌዜ ጋካናስ፥ ኣሳ ጊዶን ዩዪዲ፥ ኢስታ ኣዋታ ጎዳኮ ዴራ ዛሪዴስ።
2CH 19:5 ዩሁዳ ቢታን ዴኢዛ ጊምቤቲዳ ካታማታን ኡባን ዳናታ ሹሚዴስ።
2CH 19:6 ሂስቲዲ ዳናታስ፥ «ኢንቴ ፒርዳና ፒርዳይ ኣሳስ ጊዶንታ ኢንቴ ፒርዲዛ ዎዴ ኡባን ኢንቴናራ ዲዛ ጎዳስ ጊዲዳ ጊሻስ ኬሂ ናጌቲዲ ፒርዲቴ።
2CH 19:7 ሃኢካ ኢንቴ ጎዳስ ያዪቴ፤ ጎዳ ኑ ጾሳ ማታን ናቆ ፒርዳይ፥ ማዶ ፒርዳይኔ ማታኤ ሙሲ ባይንዳ ጊሻስ ኢንቴ ኦꬂዛ ኡባን ናጌቲዲ ኦꬂቴ» ጊዴስ።
2CH 19:8 ኢዮሳፊጼይ ዬሩሳላሜን ጎዳ ዎጋ ፖሊሳናሲኔ ኣሳ ጊዶን ዴንዲዛ ዮኦታ ፒርዳና ማላ ሌዌታፔ፥ ቄሴታፔኔ ኢስራኤሌ ኬꬃ ኣሳ ሃላቃታፔ ኣማርዳ ኣሳታ ሹሚዴስ። ኢስቲካ ዬሩሳላሜን ዴኢዳ።
2CH 19:9 ሄሳፌ ጉዬ ኢዮሳፊጼይ ኢስታስ፥ «ጎዳስ ያሻቴꬃን፥ ኣማኔቴꬃኒኔ ኩሜꬃ ዎዚናን ኦꬂቴ።
2CH 19:10 ባ ካታማን ካታማን ዴኢዛ ኢንቴ ኢሻቲ ሼምፖ ዎꬎ ጊሻስ፥ ዎይኮ ዎጋ ጊሻስ፥ ዎይኮ ኣዛዞ ጊሻስ፥ ዎይኮ ኣዋጃ ጊሻስ፥ ዎይኮ ፒርዳስ ኢንቴኮ ኤሂኮ፤ ኢስቲ ጎዳ ቆሆንታ ማላ ኢስታ ሴሪቴ። ኢንቴ ኢስታ ሴሪኮ ኢዛ ሃንቆይ ኢንቴ ቦላኔ ኢንቴ ኢሻንታ ቦላ ዬና፤ ኢንቴ ሄሳꬆ ኦꬂኮ ኢንቴ ሁኤስ ኢንቴ ሞራንቻ ጊዴኬታ።
2CH 19:11 ጎዳ ባጋ ዮኦ ኡባስ ኣዋቲዛይ ቄሴታ ሃላቃ ኣማሪያ፤ ቃሴ ካዎ ባጋ ዮኦ ኡባስ ኣዋቲዛይ ዩሁዳ ዛሬታ ሃላቃ ኢስማኤሌ ና ዛባዲያ። ሌዌቲ ኢንቴ ሲንꬃን ማታይ ዲዛ ኣሳ ማላ ኦꬃና። ኢንቴ ሚኒዲ ኦꬂቴ፤ ሱሬ ሃኒዛይታራ ጎዳይ ኢሲፌ ጊዶ» ጊዲ ኣዛዚዴስ።
2CH 20:1 ሄሳፌ ጉዬ ሞኣቤቲኔ ኣሞኔቲ ቃሴ ኢስታራ ኢሲፌ ማኡኔታፔ ኣማርዳይቲ ኢዮሳፊጼ ቦላ ዎራጂዳ።
2CH 20:2 ኣማርዳ ኣሳቲ ኢዮሳፊጼኮ ዪዲ፥ «ማጺኔ ኣባፌ ሄ ፒንꬃን ዲዛ ኣራሜ ቢታፌ ዳሮ ኦላንቻቲ ኔና ኦላናስ ዪዲ ሃጻጾኔ ታማሬ ጌቴቲዛ ኤን-ጋዴን ዴቴስ» ጊዳ።
2CH 20:3 ሂስቲን ኢዮሳፊጼይ ኬሂ ያዪዲ ጎዳ ኦይቻናስ ባ ቆፋ ቃቺዲ ዩሁዳ ቢታን ኡባን ጾማ ኣዋጂዴስ።
2CH 20:4 ዩሁዳ ኣሳይ ኡባይ ጎዳፔ ማዶ ኮያናስ ኢሲ ቦላ ሺቂዴስ፤ ኢስቲ ጎዳፔ ማዶ ኮያናስ ዩሁዳ ካታማታ ኡባፌ ዪዳ።
2CH 20:5 ኢዮሳፊጼይ ዩሁዳ ኣሳይኔ ዬሩሳላሜ ኣሳይ ሺቂዳ ዱላታ ጊዶን ጾሳ ኬꬃ ሲንꬃን ዲዛ ኦራꬃ ዛጎዛን ኤቂዲ፥
2CH 20:6 «ኣቤት ጎዳ ኑ ጾሳዉ! ሳሎን ዴኢዛ ጾሳይ ኔና! ሳኣን ዴኢዛ ካዎቴꬃታ ኡባ ሃሪዛይ ኔና! ዎልቃይኔ ማታይ ኔስ ዲዛ ጊሻስ ኔናራ ኤቄታናስ ዳንዳይዛይ ዴና።
2CH 20:7 ኣቤት ኑ ጾሳዉ! ካሴ ሃ ቢታን ዴኢዛይታ ኔ ዴሬ ኢስራኤሌ ሲንꬃፌ ዬዴꬃዳ ኔ ሲቂዛ ኣብራሃሜ ዜሬꬃታስ ሜርናስ ኢሚዳይ ኔና!
2CH 20:8 ኢስቲ ሃ ቢታን ዴኢዳ፤ ኢስቲ ሃይሳን ኔ ሱንꬃስ ጾሳ ኬꬅ ኬጺዲ፥
2CH 20:9 ‹ኑ ቦላ ፒርዳ ማሻይ፥ ዎይኮ ኢታ ሃርጌይ፥ ዎይኮ ኮሻይ ኑ ቦላ ጋኪኮ ኔ ሱንꬃይ ኢዛን ጼይጌቲዳ ሃ ጾሳ ኬꬃ ሲንꬃኒኔ ኔ ሲንꬃን ኤቂዲ ኑ ሜቶዛ ጊሻስ ኔኮ ዋሳና፤ ኔካ ኑ ዋሶ ሲያዳ ኑና ኣሻና› ጊዳ።
2CH 20:10 «ኢስራኤሌ ዴሬይ ጊብጼፔ ኬዚዳ ዎዴ ኢስቲ ቢታ ዎራጆንታ ማላ ኔ ዲጊን ኢስራኤሌ ኣሳይ ꬋይሶንታ ኣጊን ሄን ኣቲዳ ኣሞኔ ኣሳይ፥ ሞኣቤ ኣሳይኔ ኤዶሜ ኣሳይ ኑ ቦላ ዎራጂዳ።
2CH 20:11 ኑኒ ኦꬂዳይሳስ ኢስቲ ኑስ ዛሪዳይሳ ቤኣ፤ ኔኒ ኑስ ኢሚዳ ጺንጾ ቢታፌ ኢስቲ ኑና ዬዴꬃናስ ዪዳ።
2CH 20:12 ኣቤት ኑ ጾሳዉ፥ ኔኒ ኢስታ ቦላ ፒርዲኪ? ኣይስ ጊኮ ኑና ኦላናስ ዪዳ ሃ ዳሮ ኦላንቻታራ ኦሌታናስ ኑስ ዎልቃይ ባዋ፤ ኑኒ ኦꬃናይሳካ ኤሮኮ፤ ጊዶ ኣቲን ኑ ኣይፌቲ ኔና ጼሌቴስ» ጊዴስ።
2CH 20:13 ዩሁዳ ኣሳይ ኡባይ ባንታ ማቼታራ፥ ባንታ ናይታራ፥ ባንታ ዪꬋ ናይታራ ኢሲ ቦላ ጎዳ ሲንꬃን ኤቂዳ።
2CH 20:14 ሄሳፌ ጉዬ ዛካራሳ ና ያሃዚኤሌይ ዱላታ ጊዶን ኤቂ ዲሺን ጎዳ ኣያናይ ኢዛ ቦላ ዎꬊዴስ፤ ዛካራሲ ባናያ ና፤ ባናያይ ዪኢኤሌ ና፤ ዪኢኤሌይ ማታኒያ ና፤ ማታኒያይ ሌዌ ቆሞ ኣሳፌ ዛርኬ።
2CH 20:15 ጎዳ ኣያናይ ያሃዚኤሌ ቦላ ዎꬊን፥ «ካዎ ኢዮሳፊጼ፥ ዩሁዳኒኔ ዬሩሳላሜን ዲዛ ኣሳይ ኡባይ ሲዪቴ! ጎዳይ ኢንቴና፥ ‹ኦላ ኦሌታናይ ጾሳ ኣቲን ኢንቴና ጊዶንታ ጊሻስ ሃ ዳሮ ኦላንቻታ ጋሶን ያዮፍቴኔ ዳጋሞፍቴ።
2CH 20:16 ዎንቶ ኢንቴ ኢስታ ኦላናስ ዱጌ ዎꬊቴ፤ ኢስቲካ ኢንቴናራ ኦሌታናስ ዚዜ ፑዱንꬃ ኬዛና፤ ኢንቴ ኢስታ ዪሩኤሌ ባዞን ዲዛ ዙሌዛ ዉርሴꬃን ዴማና።
2CH 20:17 ሃ ኦላ ኦሌታናይ ኢንቴና ጊዴኬታ፤ ኢንቴ ሶሆ ሶሆ ኦይኪ ኤቂዲ ጎዳይ ኢንቴና ኣሺዛይሳ ቤኢቴ፤ ዩሁዳኒኔ ዬሩሳላሜን ዲዛ ኣሳዉ ያዮፍቴኔ ዳጋሞፍቴ! ኢስታራ ኦሌታናስ ዎንቶ ኬዚቴ፤ ጎዳይ ኢንቴናራ ጊዳና› ጌስ» ጊዴስ።
2CH 20:18 ኢዮሳፊጼይ ጋዴን ጉፋኒ ጎይኒዴስ፤ ዩሁዳ ኣሳይኔ ዬሩሳላሜ ኣሳይ ኡባይ ጎዳ ሲንꬃን ጉፋኒ ጎይኒዴስ።
2CH 20:19 ቃኣቴ ዛርኬታፔኔ ቆሬ ዛርኬታፔ ኣማርዳ ሌዌቲ ኤቂዲ ባንታ ቃላ ꬎቁ ሂስቲዲ ጎዳ ኢስራኤሌ ጾሳ ጋላቲዳ።
2CH 20:20 ኢስቲ ማላዶ ዎንታራ ዴንዲዲ ቴቁሄ ባዞ ባና ኬዚዳ፤ ኢስቲ ኦጌ ኬዚዳ ማላ ኢዮሳፊጼይ ዴንዲ ኤቂዲ፥ «ዩሁዳኔ ዬሩሳላሜ ኣሳዉ ታኒ ጊዛይሳ ኤዝጊ ሲዪቴ፤ ጎዳን ኢንቴ ጾሳን ኣማኔቲቴ፤ ኢንቴ ሚናና፤ ቃሴ ናቤታ ቃላን ኣማኔቲቴ፤ ዮኦ ኡባይ ኢንቴስ ኢንጄታና» ጊዴስ።
2CH 20:21 ኢዮሳፊጼይ ኣሳራ ዞሬቲዳፔ ጉዬን ዬꬃ ዬጺዛይታኔ ጎዳ ጌሻቴꬃ ቦንቾዛ ሳቢዛይቲ ባንታ ሴሎ ማይኦ ማይኢዲ ኦላንቻታ ሲንꬃራ ቢሼ፥ «ጎዳ ጋላቲቴ! ኢዛ ማሮቴꬃይ ሜርናሳ» ጊዲ ዬጻና ማላ ኣዛዚዴስ።
2CH 20:22 ኢስቲ ዬꬃ ዬꬂኔ ሳባ ዶሚዳ ማላ ዩሁዳ ኦላናስ ዪዳ ኣሞኔታ ቦላ፥ ሞኣቤታ ቦላኔ ኤዶሜታ ቦላ ጎዳይ ቆፖንታ ኦላ ዴንꬂዴስ።
2CH 20:23 ኣሞኔቲኔ ሞኣቤቲ ኤዶሜታ ቦላ ዴንዲዲ ኢስታ ሙሌራ ꬋይሲዳፔ ጉዬን ባንታ ጊዶን ኢሶይ ኢሳ ꬋይሳናስ ዴንዲዳ።
2CH 20:24 ዩሁዳ ኣሳይ ዱጌ ባዞዛ ቆንጬን ቤሲዛሶ ዪዲ ጮራ ኦላንቻታ ቤኢሺን ቢታይ ጋዴይ ኣሃ ጻላ ጊዲዳይሳ ቤኢዳ፤ ኢስታፌ ኢሲ ኣሲካ ኣቲቤና።
2CH 20:25 ሄሳፌ ጉዬ ኢዮሳፊጼይኔ ኢዛ ኣሳይ ዲኦ ሚሽ ሺሻናስ ቢዲ ዳሮ ኣቆታ፥ ዱማ ኦላ ማሳራታ፥ ማይኦታኔ ሃራ ኣልኦ ሚሻታ ዴሚዳ፤ ኢስቲ ዲኦይሳ ኡባ ቶኪ ኤፋናስ ዳንዳይቤቴና፤ ዲኤቲዳ ሚሻይ ኬሂፔ ዳሮ ጊዲዳ ጊሻስ ሄሳ ሺሻናስ ሄꬑ ጋላስ ኤኪዴስ።
2CH 20:26 ኢስቲ ኦይዳንꬆ ጋላስ ካሴ ጎዳ ጋላቲዳ ዙሌን ሺቂዳ፤ ሄሳፌ ዴንዶይሳን ሄ ሶሆዚ ጋላታ ዙሌ ጌቴቲዴስ።
2CH 20:27 ሄሳፌ ጉዬ ጎዳይ ኢስቲ ባ ሞርኬታ ቦላ ኡፋዬታና ማላ ኦꬂዳ ጊሻስ ዩሁዳ ኣሳይኔ ዬሩሳላሜ ኣሳይ ኡባይ ኢዮሳፊጼይ ካሌꬂን ኡፋዬቲሼ ዬሩሳላሜ ሲሚዳ።
2CH 20:28 ኢስቲ ዬሩሳላሜ ጋኪዳ ማላ ዲꬅ ዲጺሼ፥ ማሲንቆ ሾጪሼኔ ዛዬ ፑኒሼ ጾሳ ኬꬅ ቢዳ።
2CH 20:29 ጎዳይ ኢስራኤሌ ሞርኬታ ኦሊዳይሳ ቢታ ቦላ ዴኢዛ ካዎቴꬃቲ ኡባይ ሲዪዳ ዎዴ ኢስቲ ጾሳስ ያዪዳ።
2CH 20:30 ጾሳይ ኢዮሳፊጼስ ኡባ ባጋራ ሼምፖ ኢሚዳ ጊሻስ ኢዛ ካዎቴꬃይ ዎፓ ዴሚዴስ።
2CH 20:31 ኢዮሳፊጼይ ዩሁዳን ካዎቲዛ ዎዴ ኢዛ ላይꬃይ 35፤ ኢዚ ዬሩሳላሜን ናምኡ ታማን ኢቻሽ ላይꬅ ካዎቲዴስ፤ ኢዛ ኣዬያ ሺሊሄ ቢዮ ኣዙቦ ጌቴታዉስ።
2CH 20:32 ኢዮሳፊጼይ ባ ኣዋ ኣሳ ኦጌን ሄሜቲዴስ፤ ኢዚ ሄ ኦጌፔ ሼርኢ ጊቤና፤ ጎዳ ሲንꬃን ኢዚ ሱሬ ሚሽ ኦꬂዴስ።
2CH 20:33 ጊዶ ኣቲን ጎይኒዛ ꬎቃሶሆታ ኡባ ꬋይሲቤና፤ ኣሳይካ ቡሮ ባ ኩሜꬃ ዎዚናፔ ባ ኣዋታ ጾሳኮ ሲሚቤና።
2CH 20:34 ኢዮሳፊጼይ ሃኒዳ ሃራይ ኮይሮፔ ዉርሴꬅ ጋካናስ ኢስራኤሌ ካዎታ ታሪኬ ማጻፋን፥ ሃናኒያ ና ኢዩ ታሪኬ ማጻፋን ጻፌቲ ኡቲዴስ።
2CH 20:35 ኢሲ ዎዴ ዩሁዳ ካዎ ኢዮሳፊጼይ ኢታ ሚሽ ኦꬂዳ ኢስራኤሌ ካዎ ኣካዚያሳራ ኢሲፌ ኦꬃናስ ጫቄቲዴስ።
2CH 20:36 ሂስቲዲ ኢዮሳፊጼይ ኢዛራ ዛልኢዛ ጊታ ማርካቤታ ኦሲሳናስ ሃሳዬቲ ጊጊዴስ፤ ሄ ማርካቤታ ኤጺዮን-ጋቢሬን ኦሲሲዳ።
2CH 20:37 ሄሳፌ ጉዬ ማሬሻፔ ዪዳ ዶዳዌ ና ኤልኤዜሬይ፥ «ኔኒ ኣካዚያሳራ ኢሲፌ ኦꬃና ጫቄቲዳ ጊሻስ ጎዳይ ኔ ኦሶዛ ꬋይሳና» ጊዲ ኢዮሳፊጼስ ቲንቢቴ ዮቲዴስ፤ ማርካቤቲካ ሜቄሬቲዳ፤ ሄሳፌ ዴንዶይሳን ዛልኤስ ታርሴሴ ባናስ ዳንዳይቤቴና።
2CH 21:1 ሄሳፌ ጉዬ ኢዮሳፊጼይ ሃይቂዴስ፤ ካሴ ባ ኣዋቲ ሞጌቲዳሶን ዳዊቴ ካታማን ሞጌቲዴስ፤ ኢዛሶሆን ኢዛ ና ኢዮራሜይ ካዎቲዴስ።
2CH 21:2 ኢዮራሜ ኢሻቲ ኣዛሪያሳ፥ ዪሂኤሌ፥ ዛካራሳ፥ ኣዛሪያ፥ ሚካኤሌኔ ሻፋጺያ፤ ሃይቲ ኡባይ ዩሁዳ ካዎ ኢዮሳፊጼ ናይታ።
2CH 21:3 ኢስታ ኣዋ ኢዮሳፊጼይ ኢስታስ ዳሮ ቢራ፥ ዎርቃኔ ኣልኦ ሚሽ ኢሚዴስ፤ ቃሴ ጊምቤቲዳ ዩሁዳ ካታማታካ ኢሚዴስ፤ ጊዶ ኣቲን ኢዮራሜይ ባ ኣዋስ ባይራ ና ጊዲዳ ጊሻስ ካዎቴꬃ ኢዛስ ኢሚዴስ።
2CH 21:4 ኢዮራሜይ ባ ኣዋ ካዎቴꬃ ኤኪዲ ሚኒዳ ዎዴ ባ ኢሻታ ኡባታኔ ኢሲ ኢሲ ኢስራኤሌ ሃላቃታፔ ኣማርዳይታ ጊꬃ ማሻን ዎꬊዴስ።
2CH 21:5 ኢዮራሜይ ካዎቲሺን ኢዛስ ላይꬃይ 32፤ ኢዚ ዬሩሳላሜን 8 ላይꬅ ካዎቲዴስ።
2CH 21:6 ኢዮራሜይ ኣካቤ ናዮ ኤኪዳ ጊሻስ ኣካቤሶ ኣሳይ ሄሜቲዳይሳንካ ካሴ ኢስራኤሌ ካዎታ ኦጌራ ቢዴስ፤ ጎዳ ሲንꬃንካ ኢታ ሚሽ ኦꬂዴስ።
2CH 21:7 ጊዲኮካ ጎዳይ ካሴ ዳዊቴስ ጫቂዳ ቃላ ጊሻስ ዳዊቴ ዜሬꬃ ꬋይሳናስ ኮዪቤና፤ ዳዊቴሲኔ ኢዛ ዜሬꬃስ ሜርናስ ꬋዮንታ ጾምፔይ ዳና ማላ ሂዶታ ቃላ ኢሚ ዎꬂዴስ።
2CH 21:8 ኢዮራሜይ ካዎቲዳ ዎዴ ኤዶሜ ኣሳይ ዩሁዳ ካዎ ቦላ ማካሊዲ ባንታስ ሃራ ካዎ ካዎꬂዳ።
2CH 21:9 ሄሳ ጊሻስ ኢዮራሜይ ባ ኦላ ጋዳዋታኔ ባ ፓራ-ጋሬታ ኡባ ኤኪዲ ኤዶሜ ቢታ ኦላናስ ቢዴስ፤ ኤዶሜ ኣሳይ ኢዛኔ ኢዛ ፓራ-ጋሬታ ሃላቃታ ጊዶꬂዴስ፤ ጊዶ ኣቲን ኢዮራሜይኔ ኢዛ ኦላንቻቲ ኦማርሳራ ባና ጊዶꬂዳይታ ሾጪዲ ኬሲ ኤኪ ቢዳ።
2CH 21:10 ሄ ዎዴፔ ዶሚዲ ሃች ጋካናስ ኤዶሜ ኣሳይ ዩሁዳ ኣሳስ ሃሬቲቤና። ኢዮራሜይ ባ ኣዋታ ጎዳ ኣጊዳ ጊሻስ ሊቢና ኣሳይ ቃሴ ሄ ዎዴ ዩሁዳ ካዎ ቦላ ማካሊዴስ።
2CH 21:11 ኢዮራሜይ ቃሴ ዩሁዳን ዙምቡላታ ቦላ ጎይኒዛሶሆታ ጊግሲዲ ዬሩሳላሜን ዲዛ ኣሳይ ላይማታና ማላ ኦꬂዴስ፤ ዩሁዳ ኣሳካ ባሌꬂዴስ።
2CH 21:12 ሄሳፌ ጉዬ ናቤ ኤላሲ ኢዮራሜስ ዳብዳቤ ጻፊዲ፥ «ጎዳይ ኔ ኣዋ ዳዊቴ ጾሳይ፥ ‹ኔኒ ኔ ኣዋ ኢዮሳፊጼ ኦጌን ዎይኮ ዩሁዳ ካዎ ኣሳ ኦጌን ሄሜቲዛይሳ ኣጋዳሳ፤
2CH 21:13 ጊዶ ኣቲን ኢስራኤሌ ካዎታ ኦጌን ሄሜታዳሳ፤ ኣካቤሶ ኣሳይ ኦꬂዳ ማላ ዩሁዳኒኔ ዬሩሳላሜን ዴኢዛይቲ ላይማታና ማላ ባሌꬃዳሳ፤ ቃሴካ ኔፔ ሎኢዛ ኔ ኣዋ ኬꬃ ኣሳኔ ኔ ኢሻታ ዎꬋዳሳ።
2CH 21:14 ሄሳ ጊሻስ ጎዳይ ኔ ኣሳ፥ ኔ ናይታ፥ ኔ ማቼታኔ ኔስ ዴኢዛ ኡባ ሚሻ ዎልቃማ ቦሻን ሾጫና።
2CH 21:15 ኔኒካ ሃች ሃች ኢቲ ኢቲ ቢዛ ኢታ ኡሎ ሃርጌ ሃርጋና፤ ሄ ሃርጌዚ ዉርሴꬃን ኔስ ማራጬ ካሬ ጎቺ ኬሳና› ጌስ» ጊዴስ።
2CH 21:16 ሄሳፌ ጉዬ ጎዳይ ፊሊስጼሜታኔ ቶጵያ ማታን ዴኢዛ ኣራቤታ ኢዮራሜ ኦላና ማላ ዴንꬄꬂዴስ።
2CH 21:17 ኢስቲካ ዩሁዳ ቦላ ዎራጂዳ፤ ሂስቲዲ ካዎ ኬꬃን ዴኢዛ ሚሽ ኡባ፥ ካዎ ኣቱማ ናይታኔ ኢዛ ማቼታ ዲኢዳ፤ ኢዛ ናይታ ኡባፌ ካሎ ኣካዚያሳፔ ኣቲን ሃራ ኢሲ ናይካ ኢዛስ ኣቲቤና።
2CH 21:18 ሄሳ ኡባፌ ጉዬ ፓጻናስ ዳንዳዮንታ ኡሎ ሃርጌን ጎዳይ ኢዮራሜ ሾጪዴስ።
2CH 21:19 ኡሎ ሃርጌዚ ሚኒ ሚኒ ቢን ናምኣንꬆ ላይꬅ ዉርሴꬃ ቦላ ኢዛ ማራጬይ ካሬ ኬዚን ዋዬ ቤዪ ሃይቂዴስ፤ ኢዛ ሞጎ ዎዴ ኣሳይ ካሴ ኢዛ ኣዋታስ ኦꬂዛ ማላ ኢዛ ቦንቾስ ሚꬅ ዶሪዲ ታማ ኤꬂቤና።
2CH 21:20 ኢዮራሜይ ካዎቲሺን ኢዛስ ላይꬃይ 32፤ ኢዚ ዬሩሳላሜን 8 ላይꬅ ካዎቲዴስ፤ ኢዚ ሃይቂን ኦኒካ ኢዛስ ቃꬌቲቤና፤ ኢዛ ዳዊቴ ካታማን ሞጊዳ ኣቲን ካዎታ ዱፎን ሞጊቤቴና።
2CH 22:1 ኣራቤታራ ዎራጃ ዪዳይቲ ኢዮራሜስ ባይራ ናይታ ኡባ ዎꬊዳ ጊሻስ ዬሩሳላሜ ኣሳይ ኢዮራሜስ ዉርሴꬃ ና ኣካዚያሳ ኢዛሶሆን ካዎꬂዴስ፤ ሄሳ ጊሻስ ኢዮራሜ ና ኣካዚያሲ ዴራ ቦላ ካዎቲዴስ።
2CH 22:2 ኣካዚያሲ ካዎቲሺን ኢዛስ ላይꬃይ 22፤ ኢዚ ዬሩሳላሜን ኢሲ ላይꬅ ካዎቲዴስ፤ ኢዛ ኣዬይ ሱንꬂ ጎቶሊያ፤ ኢዛ ኦሚሬስ ናዛ ና።
2CH 22:3 ኣካዚያሲ ኢታቴꬃን ባና ማላ ኢዛ ኣዬያ ዞሪዛ ጊሻስ ኢዚካ ኣካቤሶ ኣሳታ ማላ ኢታ ኦጌ ካሊዴስ።
2CH 22:4 ኢዛ ኣዋይ ሃይቂዳፔ ጉዬ ኣካቤሶ ኣሳይካ ኢዚ ኢታ ኦጌ ካላና ማላ ዞሪዛ ጊሻስ ኣካቤሶ ኣሳ ማላ ኢዚካ ጎዳ ሲንꬃን ኢታ ሚሽ ኦꬂዴስ።
2CH 22:5 ኣካዚያሲ ኣካቤሶ ኣሳ ዞሪዛ ካሊዲ ኣካቤ ና ኢስራኤሌ ካዎ ኢዮራሜራ ኢሲፌ ኣራሜ ካዎ ኣዛሄሌ ኦላናስ ጋላኣዴን ዲዛ ኤራሞቴ ካታማ ቢን ኣራሜ ኣሳቲ ኢዮራሜ ጫዲ ማዱንꬂዳ።
2CH 22:6 ኣራሜ ካዎ ኣዛሄሌራ ኢዚ ኦሌቲሺን ኣራሜ ኣሳቲ ኢዛ ኤራሞቴን ጫዲን ማዱንጾይሳፌ ፓጻናስ ኢዝራኤሌ ካታማ ሲሚ ቢዴስ። ሄሳፌ ጉዬ ኢዮራሜ ና ዩሁዳ ካዎ ኣዛሪያሲ ኣካቤ ና ኢዮራሜይ ጫዴቲዳይሳ ኦይቻናስ ዱጌ ኢዝራኤሌ ካታማ ቢዴስ።
2CH 22:7 ኣካዚያሲ ኢዮራሜ ኦይቻናስ ቢዳይሳ ጾሲ ኢዚ ሃይቃና ማላ ጋሶ ኦꬂዴስ፤ ኣካዚያሲ ኢዮራሜ ቤኣናስ ቢ ጋኪዳ ማላ ኣካቤ ዛሬ ꬋይሳናስ ጎዳይ ቲይዳ ኒሚሼ ና ኢዮ ሞካናስ ናምኣይ ኢሲፌ ኬዚዳ።
2CH 22:8 ኢዩይ ኣካቤ ዛሬታ ቦላ ፒርዳ ፖሊዳ ማላ ኣካዚያሳ ኣዣቢዛ ዩሁዳ ዳናታኔ ኢዛ ዳቦታፔ ኣቱማ ናይታ ዴሚዲ ዎꬊዴስ።
2CH 22:9 ሄሳፌ ጉዬ ኢዩይ ኣካዚያሳ ኮያና ቢዴስ፤ ኣካዚያሲ ሳማሪያን ቆቴቲ ኡቲዳሶሆፔ ኣሳቲ ኢዛ ዴሚዲ ኢዮኮ ኤሂ ዎꬊዳ፤ ኢዚ «ባ ኩሜꬃ ዎዚናፔ ጎዳ ኮዪዳ ኢዮሳፊጼ ና» ጊዲ ሞጊዳ። ሄሳ ጋሶን ኣካዚያሳ ሶ ኣሳፔ ካዎቴꬃ ኦይካናስ ዳንዳይዛይ ኦኒካ ዴና።
2CH 22:10 ኣካዚያሳ ኣዬያ ጎቶሊያይ ባ ናዚ ሃይቆይሳ ቤኣዳ ዩሁዳን ዲዛ ካዎ ኬꬃ ኣሳታ ኡባ ዎꬋዱስ።
2CH 22:11 ጊዶ ኣቲን ካዎ ኢዮራሜ ቢያ ዪሆሼባ ሃይቃናስ ዴኢዛ ካዎ ናይታፔ ኣካዚያሳ ና ኢዮኣሳ ካይሳ ኤፋዳ ኢዛ ዲቺዛሪራ ኢሲፌ ኢልፒኔን ቆታዱስ፤ ካዎ ኢዮራሜ ናያ፥ ኣካዚያሳ ሚቼያ፥ ቄሴ ዮዳሄ ማቺያ፥ ዪሆሼባ ጎቶሊያ ዎꬎንታ ማላ ናዛ ቆታዱስ።
2CH 22:12 ጎቶሊያይ ቢታ ሃሪዛ ዎዴ ኡባን ናዚ ኢስታ ማታን ጾሳ ኬꬃን ኡሱፑን ላይꬅ ቆቴቲ ጋምኢዴስ።
2CH 23:1 ላፑንꬃ ላይꬃን ዮዳሄይ ሚኒዲ ማቶ ሃላቃታ ዪሮሃሜ ና ኣዛሪያሳ፥ ዪሆሃናኔ ና ኢስማኤሌ፥ ኢዮቤዴ ና ኣዛሪያሳ፥ ኣዳያ ና ማኢሳያኔ ዚኪሬ ና ኤልሻፋጼ ሺሺዲ ኢስታራ ጫቄቲዴስ።
2CH 23:2 ኢስቲ ዩሁዳ ቢታ ኡባ ዩዪዲ ካታማታን ዴኢዛ ሌዌታኔ ኢስራኤሌ ዛሬ ሃላቃታ ኡባ ኤኪዲ ዬሩሳላሜ ዪዳ።
2CH 23:3 ሄሳፌ ጉዬ ሄ ሺቂዳ ኣሳይ ኡባይ ጾሳ ኬꬃን ካዎዛራ ጫቄቲዳ፤ ዮዳሄይ ሄ ኣሳ፥ «ጎዳይ ካሴ ዳዊቴ ዜሬꬃስ ኢሚዳ ሂዶታ ቃላ ማላ ሄኮ ካዎዛ ናዚ ካዎቶ።
2CH 23:4 ኢንቴ ኦꬃናስ ቤሲዛይ ሃይሳ፤ ሳምባታ ጋላሳን ሃ ኬꬃ ጌሊዛ ቄሴታፔኔ ሌዌታፔ ሳይሶቲ ፔንጌዛ ናጊቴ፤
2CH 23:5 ቃሴ ሳይሶቲ ካዎ ኬꬃ ናጊቴ፤ ዮቻ ዲርሳ ፔንጌ ጌቴቲዛሶ ፔንጌዛ ናጊቴ፤ ሃንኮ ኣቲዳ ኣሳይ ኡባይ ጾሳ ኬꬃ ዛጎን ዴቶ።
2CH 23:6 ኢስታ ኦሶ ታራይ ጋኪዳ ቄሴታፔኔ ኦꬂዛ ሌዌታፔ ኣቲን ኦኒካ ጾሳ ኬꬅ ጌሎፖ፤ ኢስቲ ጌሽ ጊዲዳ ጊሻስ ጌሌቶ፤ ሃራ ኣሳይ ጊዲኮ ኡባይ ጎዳ ኣዛዞ ናጊዲ ኬꬃፌ ካሬራ ዴቶ።
2CH 23:7 ሌዌቲ ኡባይ ባንታ ኦላ ማሳራ ባንታ ኩሼን ኩሼን ኦይኪዲ ካዎዛ ጊዶꬂ ኤቄቶ፤ ካዎዚ ኬዚሺኒኔ ጌሊሺን ኡባን ኢዛራ ኢሲፌ ዴቶ፤ ጾሳ ኬꬅ ጌሊዛ ኦናካ ዎꬊቴ» ጊዴስ።
2CH 23:8 ሌዌቲኔ ዩሁዳ ኣሳይ ኡባይ ቄሴ ዮዳሄይ ኣዛዚዳይሳ ኡባ ኦꬂዳ፤ ቄሴ ዮዳሄይ ናጊዛይታፔ ኦናካ ኬሲ ዬዶንታ ጊሻስ ኢሶይ ኢሶይ ሳምባታ ጋላስ ኦሶ ጌሊዛይታኔ ኦሶፔ ኬዚዛ ባ ኣሳታ ኤኪ ቤስ።
2CH 23:9 ሄሳፌ ጉዬ ቄሴ ዮዳሄይ ጾሳ ኬꬃን ዴኢዛ፥ ቤኒ ካዎ ዳዊቴ ቶራታ፥ ዎጋ ጎንዳሌታኔ ቄሪ ጎንዳሌታ ማቶ ሃላቃታስ ኢሚዴስ።
2CH 23:10 ኣሳይ ኡባይ ኦላ ማሳራ ባ ኩሼን ባ ኩሼን ኦይኪዳ ማላ ጾሳ ኬꬃስ ዱጌሃፔ ቢዲ ፑዴሃ ጋካናስ፥ ያርሾ ያርሺዛሶ ማታኒኔ ጾሳ ኬꬃ ማታን ካዎዛ ዩሾን ኤቃና ማላ ቄሴ ዮዳሄይ ኦꬂዴስ።
2CH 23:11 ሄሳፌ ጉዬ ዮዳሄይኔ ኢዛ ኣቱማ ናይቲ ካዎዛ ና ኢዮኣሳ ካሬ ኬሲዲ ኢዛ ሁኤን ካላቻ ጎጺዳ፤ ሂስቲዲ ጫቆ ቃላ ማጻፋ ኢዛስ ኢሚዲ ካዎꬂዳ፤ ኢዛ ቲይዲካ፥ «ካዎይ ሜርናስ ካዎቶ!» ጊ ዋሲዳ።
2CH 23:12 ኣሳይ ዎጺሼኔ ካዎ ሳቢሼ ሆምቦጪዛይሳ ጎቶሊያይ ሲያዳ ኣሳኮ ጾሳ ኬꬅ ባዱስ።
2CH 23:13 ካዎዚ ባ ጌሊዛሶ ፔንጌን ዲዛ ቱቄዛ ማታን ኤቂዳይሳ ቤኣዱስ፤ ሃላቃቲኔ ጹሩምባ ፑኒዛይቲ ካዎዛ ማታን ዴቴስ፤ ዩሁዳ ኣሳይ ኡባይ ኡፋዬቲዲ ጹሩምባ ፑኔቴስ፤ ዬꬃ ዬጺዛይቲካ ሲንꬄ ኣꬊዲ ባንታስ ዴኢዛ ዬꬃ ሚሻን ጋላቴቴስ፤ ጎቶሊያይ ባ ማይኦ ዳካዳ፥ «ሃይሲ ማካላ! ሃይሲ ማካላ!» ጋዳ ዋሳዱስ።
2CH 23:14 ቄሴ ዮዳሄይ ኦላንቻታ ሃላቃታ፥ «ኣታሎ ጾሳ ኬꬃን ዎꬎፒቴ! ኢዞ ያራኔ ሃራ ሳልፊዳ ሳልፌታ ጊዶን ዎꬂዲ ካሬ ኬሲቴ፤ ኢዞ ኣሻናስ ካጃሊዛ ኣሲ ዲኮ ዎꬊቴ!» ጊዴስ።
2CH 23:15 ሄሳ ጊሻስ ኢስቲ ኢዞ ኦይኪዲ ካዎ ኬꬃ ጊቤን ፓራ ፔንጌ ጌቴቲዛሶን ዎꬊዳ።
2CH 23:16 ሄሳፌ ጉዬ ዮዳሄይ፥ ዴሬዚኔ ካዎዚ ጎዳ ዴሬ ጊዳናስ ጫቂዳ።
2CH 23:17 ሄ ዎዴ ኡባ ኣሳይ ባኣሌ ጌቴቲዛ ኤቃ ጾሳ ኬꬃ ላሊዲ ያርሾዛኔ ኤቃ ጾሳታ ሚስሌታ ኪንቼሬꬂዳ፤ ቃሴ ማታኔ ጌቴቲዛ ባኣሌ ቄሴ ያርሾ ያርሺዛሶዛ ሲንꬃን ዎꬊዳ።
2CH 23:18 ዮዳሄይ ሙሴ ዎጋን ጻፌቲዳይሳ ማላኔ ዳዊቲ ኣዛዚዳ ማላ ኡፋይሳን ዬጺሼ ጹጌቲ ሺቂዛ ጎዳ ያርሾዛ ሺሻና ማላ ዳዊቲ ሹሚዳ ቄሴታሲኔ ሌዌታስ ጾሳ ኬꬃን ኦꬃና ኣዋቴꬅ ኢስታስ ኢሚዴስ።
2CH 23:19 ኣይ ሚሻንካ ቱኒዳ ኣሲ ጾሳ ኬꬃ ጊቤ ፔንጌ ጌሎንታ ማላ ዛቤ ዎꬂዴስ።
2CH 23:20 ማቶ ሃላቃቲ፥ ሹሜቲ፥ ዴሬ ኣይሲዛይቲ ሄ ቢታ ኣስ ኡባቲ ዮዳሄራ ቢዲ ካዎዛ ጾሳ ኬꬃፌ ዱጌ ካዎቴꬃ ኬꬃን ዎꬂዳ፤ ቆሞ ባጋ ፔንጌዛራ ካዎ ኬꬅ ጌሊዲ ካዎዛ ካዎቴꬃ ኣራታን ኡቲሲዳ።
2CH 23:21 ዩሁዳ ኣሳይ ኡባይ ኡፋዬቲዴስ፤ ጎቶሊያ ማሻን ሲፊ ዎꬊዳ ጊሻስ ካታማያ ዎፑ ጋዱስ።
2CH 24:1 ኢዮኣሲ ካዎቲዛ ዎዴ ኢዛስ ላይꬃይ ላፑና፤ ኢዚ ዬሩሳላሜን 40 ላይꬅ ካዎቲዴስ፤ ኢዛ ኣዬይ ሱንꬂ ዚቢዮ፤ ኢዛ ቤርሳቤሄ ካታማፔ ዪዳ ኣሳ።
2CH 24:2 ቄሴ ዮዳሄይ ዴኢዳ ላይꬅ ኡባን ኢዮኣሲ ጎዳ ኡፋይሲዛ ሚሽ ኦꬂዴስ።
2CH 24:3 ዮዳሄይ ኢዮኣሳ ናምኡ ማቼታ ኤኪሲዴስ፤ ኢስቲካ ኢዛስ ኣቱማ ናይታኔ ማጫ ናይታ ዬሊዳ።
2CH 24:4 ሄሳፌ ጉዬ ኢዮኣሲ ጾሳ ኬꬃ ኦራꬃናስ ቆፒዴስ።
2CH 24:5 ኢዮኣሲ ቄሴታኔ ሌዌታ ሺሺዲ፥ «ዩሁዳ ካታማታ ቢዲ ኢንቴ ጾሳ ኬꬃ ላይꬃን ላይꬃን ኦራꬃናስ ኢስራኤሌ ኡባፌ ሚሽ ሺሺቴ፤ ሃይሳ ኤሶን ኦꬂቴ» ጊዴስ። ጊዶ ኣቲን ሌዌቲ ጋምኢዳ።
2CH 24:6 ሄሳ ጊሻስ ካዎይ ቄሴታ ሃላቃ ዮዳሄ ጼይጊዲ፥ «ጎዳ ኣይሌይ ሙሴይኔ ኢስራኤሌ ኣሳይ ጾሳ ዱንካኔ ኦሶስ ኬሶ ሺሻናስ ቤኒ ዎጋ ዎꬆይሳ ዬሩሳላሜ ኣሳፔኔ ዩሁዳ ኣሳፔ ኬሶ ሺሻናስ ኣይስ ሌዌታ ዴንꬄꬃቤኪ?» ጊዴስ።
2CH 24:7 ሄ ዎዴ ሄ ኢታ ማጫስ ጎቶሊያ ናይቲ ጾሳ ኬꬃ ሜንꬂ ጌሊዲ ሄን ዴኢዛ ጌሻ ሚሻታ ኡባ ኤኪዲ ባኣሌ ኤቃ ጾሳታስ ጎይናናስ ጎኤቲዳ።
2CH 24:8 ሄሳ ጊሻስ ካዎይ ሌዌታ ኣዛዚን ኢስቲ ሳጺኔ ጊግሲዲ ጾሳ ኬꬃ ፔንጌፌ ካሬ ባጋራ ዎꬂዳ።
2CH 24:9 ጾሳ ኣይሌ ሙሴይ ባዞን ዴኢሼ ኢስራኤሌ ኣሳፔ ሺሻና ማላ ኣዛዚዳ ኬሶዛ ጎዳስ ኤሃና ማላ ዩሁዳኒኔ ዬሩሳላሜን ሌዌቲ ኣዋጂዳ።
2CH 24:10 ሂስቲን ሹሜቲኔ ኣሳይ ኡባይ ኡፋዬቲ ኬሲዳ ሚሻዚ ሳጺኔ ኩማና ጋካናስ ኢዛን ዬጊዳ።
2CH 24:11 ሳጺኔዚ ሌዌታ ባጋራ ካዎ ሹሜታኮ ጋኪን ኢዛ ጊዶን ዳሮ ሚሺ ዳጋቲዳይሳ ኢስቲ ቤኢዳ ዎዴ ኡባን ካዎ ጻፌይኔ ቄሴታ ሃላቃይ ዪዲ ሳጺኔፔ ሚሻ ኬሲዲ ሳጺኔዛ ኢዛሶሆን ዛሪ ዎꬄቴስ፤ ኢስቲ ኡባ ጋላስ ሄሳ ማላ ኦꬂዲ ዳሮ ሚሽ ዳጋሲዳ።
2CH 24:12 ሄ ሚሻ ካዎይኔ ዮዳሄይ ጾሳ ኬꬃ ኦሶ ኦሲሳናስ ሱሚዳ ኣሳታስ ኢሚዳ፤ ሂስቲን ኢስቲ ኢዛን ጾሳ ኬꬃ ኦራꬃናስ ሹች ማሲዛይታኔ ኣናጼታ፥ ቃሴ ቢራታኔ ጻርቂማላ ኦሳንቻታ ቃጻሪዳ።
2CH 24:13 ኦሳንቻቲ ሚኖ ጊዲዳ ጊሻስ ጾሳ ኬꬃይ ሞሬቲዳይሳ ሚኒ ኦꬂዲ ባንታ ኩሼን ካሴይሳ ማላ ኦራጺሲ ኬጺዳ።
2CH 24:14 ኦሳንቻቲ ኬꬃ ኦራꬂ ጊጊዳፔ ጉዬ ፓላሂዳ ዎርቃኔ ቢራ ካዎዛኮኔ ዮዳሄኮ ኤሂዳ፤ ኢስቲካ ሄ ዎርቃኒኔ ቢራን ጾሳ ኬꬃ ጊዶ ኦሶስ ማዲዛ ሚሻታ፥ ጹጌቲዛ ያርሾስ ጎኤቲዛ ሳኔታኔ ሃራ ዱማ ዱማ ሚሻታ ኦሲሲዳ። ዮዳሄይ ሼምፖራ ፓጻ ዲዛ ላይꬅ ኡባን ጾሳ ኬꬃን ጹጌቲዛ ያርሾይ ኡባ ዎዴ ያርሼቴስ።
2CH 24:15 ዮዳሄይ ኬሂ ጪሚዲ ሃይቂዴስ፤ ኢዚ ሃይቂሺን ኢዛስ ላይꬃይ ጼታኔ ሄꬑ ታማ።
2CH 24:16 ዮዳሄይ ኢስራኤሌን ጾሳሲኔ ጾሳ ኬꬃስ ሎኦ ሚሽ ኦꬂዳ ጊሻስ ዳዊቴ ካታማን ካዎታ ዱፎን ሞጊዳ።
2CH 24:17 ዮዳሄይ ሃይቂዳፔ ጉዬ ዩሁዳ ሹሜቲ ዪዲ ካዎዛስ ባ ኣማኔቴꬃ ቆንጪሲዳ፤ ኢዚካ ኢስታ ኤኪዴስ።
2CH 24:18 ኢስቲ ጎዳ ባንታ ኣዋታ ጾሳ ኬꬃ ኣጊዲ ኣሼሪ ሚስሌታሲኔ ኤቃ ጾሳታስ ጎይኒዳ፤ ኢስቲ ኦꬂዳ ሞሮ ጊሻስ ዩሁዳ ቦላኔ ዬሩሳላሜ ቦላ ጾሳ ሃንቆይ ዎꬊዴስ።
2CH 24:19 ኣሳይ ባኮ ሲማና ማላ ጎዳይ ናቤታ ኢስታኮ ኪቲዴስ፤ ናቤቲካ ኢስታ ቦላ ማርካቲዳ፤ ጊዶ ኣቲን ኢስቲ ጊዛይሳ ሲዮንታ ኢጺዳ።
2CH 24:20 ሄሳፌ ጉዬ ቄሴ ዮዳሄ ና ዛካራሳ ቦላ ጾሳ ኣያናይ ዎꬊዴስ፤ ሂስቲን ዛካራሲ ኣሳ ሲንꬃን ኤቂዲ፥ «ጾሳይ፥ ‹ጎዳ ኣዛዞ ኢንቴ ኣይስ ሞሬቲ? ሄሲ ኢንቴስ ሎኦ ጊዴና› ጌስ፤ ኢንቴ ጎዳ ኣጊዳ ጊሻስ ኢዚካ ኢንቴና ኣጊዴስ» ጊዴስ።
2CH 24:21 ሂስቲን ኣሳይ ኢዛ ቦላ ማቄቲዴስ፤ ካዎዚ ኢስታ ኣዛዚን ጾሳ ኬꬃ ዛጎን ሹቻን ጫዲ ዎꬊዳ።
2CH 24:22 ካዎ ኢዮኣሲ ዛካራሳ ኣዋይ ዮዳሄይ ባስ ኦꬂዳ ኪያቴꬃ ሃሳኦንታ ኣጊዲ ኢዛ ና ዛካራሳ ዎꬊሲዴስ፤ ዛካራሲ ሃይቂሼ፥ «ጎዳይ ሃይሳ ቤኢዲ ሃሎ ኬሶ» ጊዴስ።
2CH 24:23 ሄ ላይꬃ ዉርሴꬃን ኣራሜ ኦላንቻቲ ኢዮኣሳ ኦላናስ ዪዳ፤ ሂስቲዲ ዩሁዳ ቦላኔ ዬሩሳላሜ ቦላ ዎራጂዲ ዴራ ካሌꬂዛይታ ኡባ ዎꬊዲ ኢስታፌ ዲኢዳ ሚሽ ኡባ ዳማስቆን ዴኢዛ ባንታ ካዎስ ዬዲዳ።
2CH 24:24 ኣራሜ ኦላንቻቲ ቆዳን ጉꬅ ጊዲኮካ ጎዳይ ኬሂፔ ዳሮ ዴሬ ኢስታ ኩሼን ኣꬂ ኢሚዴስ፤ ዩሁዳ ኣሳይ ጎዳ ባንታ ኣዋታ ጾሳ ኣጊዳ ጊሻስ ኢዮኣሳ ቦላ ፒርዴቲዴስ።
2CH 24:25 ኣራሜ ኦላንቻቲ ኢዮኣሳ ማዱንꬂዲ ዬጊ ኣጊ ቢዳ፤ ቄሴ ዮዳሄ ናዛ ሱꬃ ጊሻስ ኢዛ ሹሜቲ ኢዛ ቦላ ማቄቲዲ ኢዚ ሃርጌ ሂጻን ዲሺን ዎꬊዳ፤ ኢዚ ሃይቂን ዳዊቴ ካታማን ሞጊዳ ኣቲን ኢዛ ካዎታ ዱፎን ሞጊቤቴና።
2CH 24:26 ኢዮኣሳ ቦላ ማቄቲዳይቲ ኣሞኔ ዴሬ ማጫስ ሺምኣቲ ና ዛባዴኔ ሞኣቤ ዴሬ ማጫስ ሺሚሪቲ ና ዪሆዛባዴ።
2CH 24:27 ኢዮኣሳ ናይታ ታሪኬይ፥ ኢዛ ጊሻስ ዮቴቲዳ ቲንቢቴቲኔ ጾሳ ኬꬃ ኦራጾ ታሪኬይ ካዎታ ታሪኬ ማጻፋን ጻፌቲ ኡቲዴስ፤ ኢዮኣሲ ሃይቂን ኢዛሶሆን ኢዛ ና ኣማሲያሲ ካዎቲዴስ።
2CH 25:1 ኣማሲያሲ ካዎቲሺን ኢዛስ ላይꬃይ 25፤ ኢዚ ዬሩሳላሜን 29 ላይꬅ ካዎቲዴስ፤ ኢዛ ኣያ ዬሩሳላሜ ማጫስ ዮሃኣዳኖ ጌቴታዉስ።
2CH 25:2 ኣማሲያሲ ጎዳ ሲንꬃን ሱሬ ሚሽ ኦꬂዴስ፤ ጊዶ ኣቲን ኩሜꬃ ዎዚናፔ ጊዴና።
2CH 25:3 ኣማሲያሲ ካዎቴꬃ ሚንꬂ ኦይኪዳፔ ጉዬ ባ ኣዋ ዎꬊዳ ሹሜታ ዎꬊዴስ።
2CH 25:4 ካሴ ጎዳይ ሙሴ ዎጋ ማጻፋን፥ «ናይቲ ኦꬂዳ ናጋራ ጊሻስ ኣዋታ ዎꬋናስ ቤሴና፤ ቃሴ ኣዋቲ ኦꬂዳ ናጋራ ጊሻስ ናይታ ዎꬋናስ ቤሴና፤ ኣሲ ኡባይ ባ ኦꬂዳ ናጋራን ናጋራን ሃይቃናስ ቤሴስ» ጊዲ ኣዛዚዳ ማላ ዎꬊዴስ ኣቲን ኢስታ ናይታ ዎꬊቤና።
2CH 25:5 ኣማሲያሲ ዩሁዳ ኣሳ ሺሺዲ ባንታ ኣዋታ ኬꬃን ኬꬃን ሻላቃታኔ ማቶ ሃላቃታ ሹሚዲ ኩሜꬃ ዩሁዳ ቦላኔ ቢኒያሜ ቦላ ዎꬂዴስ፤ ኢስታስ ላይꬃይ ናምኡ ታማኔ ሄሳፌ ቦላራ ጊዲዳይታ ሺሺዲ ጎንዳሌኔ ቶራ ኦይኪዲ ኦሌታናስ ዳንዳይዛ 300,000 ኣሳታ ዴሚዴስ።
2CH 25:6 ቃሴካ ኢስራኤሌፔ 100,000 ኦላንቻታ 3,400 ኪሎ ጊራሜ ጊዲዛ ቢራን ቃጻሪዴስ።
2CH 25:7 ጊዶ ኣቲን ጾሳ ኣስ ኢሶይ ኣማሲያሴኮ ዪዲ «ካዎ! ጎዳይ ኢስራኤሌራኔ ኤፍሬሜ ኣሳራ ዶንታ ጊሻስ ኢስራኤሌ ኦላንቻቲ ኔናራ ኦላስ ቦፔቶ።
2CH 25:8 ኔኒ ሚና ኦሌቲኮካ ማዳናሲኔ ዬጊ ኣጋናስ ዎልቃይ ጾሳፌ ጊዲዳ ጊሻስ ጾሲ ኔና ኔ ሞርኬታ ሲንꬃን ዬጊ ኣጋና» ጊዴስ።
2CH 25:9 ኣማሲያሲ ጾሳ ናቤዛስ፥ «ሂስቲን ታኒ ኢስራኤሌ ኦላንቻታስ ቃንጺዳ ሄ ቢራይ ኡባይ ዋናኔ?» ጊዲ ኦይቺዴስ። ናቤዚካ ኢዛስ፥ «ጎዳይ ኔስ ሄሳፌ ኣꬂዲ ኢማናስ ዳንዳዬስ» ጊ ዛሪዴስ።
2CH 25:10 ሄሳ ጊሻስ ኣማሲያሲ ኤፍሬሜፔ ባኮ ዪዳ ኦላንቻቲ ባንታ ሶ ሶ ባና ማላ ሞይዚዴስ፤ ሂስቲን ኢስቲ ዩሁዳ ኣሳ ቦላ ኬሂፔ ሃንቄቲሼ ባንታ ሶ ሶ ሲሚዳ።
2CH 25:11 ሄሳፌ ጉዬ ኣማሲያሲ ባና ሚንꬂዲ ባ ኦላንቻታ ካሌꬂ ኤኪዲ ማጺኔ ሾባ ቢዴስ፤ ኢዛ ኦላንቻቲ ሴይሬ ኣሳፔ 10,000 ኦላንቻታ ዎꬊዳ።
2CH 25:12 ቃሴካ ሃራ 10,000 ኦላንቻታ ዲኢ ኤፊዲ ኢሲ ዎጋ ዛላ ሁኤ ቦላ ኬሲዲ ዱጌ ዛሪ ጌንዴሪሲን ኡባይካ ዲንጬቲዳ።
2CH 25:13 ጊዶ ኣቲን ሄ ዎዴ ኣማሲያሲ ባናራ ኦላስ ኬኦንታ ማላ ጉዬ ዬዲዳ ኢስራኤሌ ኦላንቻቲ ሳማሪያፔ ቢዲ ቤቲ-ሆሮኔ ጋካናስ ዲዛ ዩሁዳ ካታማታ ዎራጂዲ 3,000 ኣስ ዎꬊዳ፤ ኬሂ ዳሮ ሚሼካ ዲኢዳ።
2CH 25:14 ኣማሲያሲ ኤዶሜ ኣሳታ ዎꬊዲ ሲሚሼ ሴይሬ ኣሳ ኤቃ ጾሳታ ሚስሌታ ኤኪዲ ዪዴስ፤ ሄ ሚስሌታ ባስ ኤቃ ጾስ ሂስቲ ኤሲዲ ኢስታስ ጎይኒዴስ፤ ያርሾካ ሺሺዴስ።
2CH 25:15 ሄሳ ጊሻስ ጎዳ ሃንቆይ ኣማሲያሳ ቦላ ኤጺ ኬዚዴስ፤ ሂስቲን ጎዳይ ኢሲ ናቤ ኢዛኮ ኪቲን ናቤዚ ቢዲ፥ «ባንታ ኣሳ ኔ ኩሼፔ ኣሻናስ ዳንዳዮንታ ኤቃ ጾሳታስ ኔኒ ኣይስ ጎይናዲ?» ጊዴስ።
2CH 25:16 ናቤዚ ዮቶ ቦላ ዲሺን ካዎዚ፥ «ኔኒ ካዎ ዞራና ማላ ኑኒ ኔና ዶሪዶኒ? ጮኡ ጊኪ! ሃይቃና ኮያይ?» ጊዴስ። ሂስቲን ናቤዚ ጮኡ ጊ ኤኪዲ፥ «ኔኒ ሃይሳ ኦꬂዳ ጊሻሲኔ ታኒ ኔና ዞሪዳይሳ ኔ ሲዮንታ ጊሻስ ጾሲ ኔና ꬋይሳና ቃቺዳይሳ ታኒ ኤራይስ» ጊዴስ።
2CH 25:17 ሄሳፌ ጉዬ ዩሁዳ ካዎ ኣማሲያሲ ባና ዞሪዛ ኣሳታራ ዞሬቲዲ ኢስራኤሌ ካዎ ኢዩስ ናዛ ና ኢዮኣካዜ ና ኢዮኣሳስ፥ «ኣኔ ሃ ያ ቲራን ጋይቶስ» ጊ ኪታ ዬዲዴስ።
2CH 25:18 ኢስራኤሌ ካዎ ኢዮኣሲ ዩሁዳ ካዎ ኣማሲያሳስ፥ «ሊባኖሴን ዴኢዛ ኪንዲቾይ ሊባኖሴን ዴኢዛ ዚጋኮ፥ ‹ኔ ናዮ ታ ናዛስ ማቾ ኢማ› ጊ ኪታ ዬዲዴስ፤ ጊዶ ኣቲን ሊባኖሴን ዴኢዛ ኢሲ ዶኣይ ካንꬂ ቢሼ ኪንዲቾዛ ዬꬊዴስ።
2CH 25:19 ኔኒካ፥ ‹ቤኣ፥ ኤዶሜ ቢታ ኣሳ ጾናዲስ› ጋዳ ኔ ዎዚናን ኔና ናሻዳሳኔ ኦቶሬታዳሳ፤ ጊዶ ኣቲን ሃኢ ኔኒ ኔሶን ዎፑ ጋዳ ሼምፓ ኡታ፤ ኔ ቦላኔ ኔ ቢታ ዩሁዳ ቦላ ሜቶኔ ባሽ ኣይስ ጼይጋይ?» ጊ ዛሪዴስ።
2CH 25:20 ጊዶ ኣቲን ኣማሲያሲ ኢስታ ሲዮንታ ኢጺዴስ፤ ኢስቲ ኤዶሜ ጾሳታስ ጎይኒዳ ጊሻስ ጾሳይ ኢስታ ኢስታ ሞርኬታ ኩሼን ኣꬂ ኢማናስ ኮዪዴስ።
2CH 25:21 ሄሳ ጊሻስ ኢስራኤሌ ካዎ ኢዮኣሲ ኦላናስ ኬዚን ኢዚኔ ዩሁዳ ካዎ ኣማሲያሲ ዩሁዳን ዴኢዛ ቤቲ-ሼሚሼ ጌቴቲዛ ካታማን ኦላ ቲራን ቲራን ጋይቲዳ።
2CH 25:22 ኢስራኤሌ ኣሳይ ዩሁዳ ኣሳ ሾጪን ዩሁዳ ኣሳይ ኡባይ ባቃቲዲ ባ ሶ ባ ሶ ቢዴስ።
2CH 25:23 ሄሳፌ ጉዬ ኢስራኤሌ ካዎ ኢዮኣሲ ኣካዚያሳስ ናዛ ና፥ ኢዮኣሳ ና፥ ዩሁዳ ካዎ ኣማሲያሳ ቤቲ-ሼሚሼፔ ዲኢ ኤኪዲ ዬሩሳላሜ ኤሂዴስ፤ ሂስቲዲ ዬሩሳላሜ ዲርሳ ጊምቤ፥ ኤፍሬሜ ፔንጌፌ ቢዲ ጉላ ፔንጌ ጋካናስ ዴኢዛ 400 ዋꬋ ጊዲዛ ሶሆዛ ላሊዴስ።
2CH 25:24 ጾሳ ኬꬃን ዴኢዛ ዎርቃኔ ቢራ ኡባ ኦቤድ-ኤዶሜ ዜሬꬃይ ናጊዛ ሚሻኔ ካዎ ኬꬃን ዴኢዛ ሚሻ ኡባ ኤኪዴስ፤ ቃሴ ኦይሶ ኤኬቲዳ ኣሳታካ ኤኪዲ ሳማሪያ ሲሚዴስ።
2CH 25:25 ኢዮኣካዜ ና፥ ኢስራኤሌ ካዎ ኢዮኣሲ ሃይቂዳፔ ጉዬ ኢዮኣሳ ና ዩሁዳ ካዎ ኣማሲያሲ 15 ላይꬅ ዴኢዴስ።
2CH 25:26 ኣማሲያሴ ካዎቴꬃ ላይꬃን ኮይሮፔ ዉርሴꬅ ጋካናስ ኦሴቲዳ ሃራ ኦሶቲ ኡባይ ዩሁዳ ካዎታ ታሪኬ ማጻፋኒኔ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
2CH 25:27 ኣማሲያሲ ጎዳ ካሎ ኣጊዳፔ ጉዬ ኢስቲ ኢዛ ቦላ ዬሩሳላሜን ማቄቲዳ ጊሻስ ላኪሼ ካታማ ባቃቲዴስ፤ ጊዶ ኣቲን ኢዛ ጌዶ ካሌቲዛ ኣስ ኪቲዲ ኢዛ ላኪሼን ዎꬊዳ።
2CH 25:28 ሂስቲዲ ኢዛ ኣሃ ፓራን ጫኒ ኤሂዲ ዩሁዳ ካታማን ኢዛ ኣዋታኮን ሞጊዳ።
2CH 26:1 ሄሳፌ ጉዬ ዩሁዳ ኣሳይ ኡባይ 16 ላይꬅ ጊዲዛ ና፥ ኦዚያ ኢዛ ኣዋ ኣማሲያሳ ሶሆን ካዎꬂዴስ።
2CH 26:2 ኢዛ ኣዋ ኣማሲያሲ ሃይቂዳፔ ጉዬ ኤላቴ ካታማ ዛሪ ኬጺዲ ዩሁዳራ ጋꬂ ጊምቢዴስ።
2CH 26:3 ኦዚያይ ካዎቲሺን ኢዛስ ላይꬃይ 16፤ ኢዚ ዬሩሳላሜን 52 ላይꬅ ካዎቲዴስ፤ ኢዛ ኣያ ዪኮልያ ጌቴቲዛራ ዬሩሳላሜ ማጫሳ።
2CH 26:4 ኢዛ ኣዋ ኣማሲያሲ ኦꬂዳ ማላ ኢዚካ ጎዳ ሲንꬃን ሱሬ ሚሽ ኦꬂዴስ።
2CH 26:5 ጾሳ ያሻቴꬃ ባና ታማርሲዳ ዛካራሲ ሼምፖራ ፓጻ ዲሺን ኢዚ ጾሳ ኮዪዳ ኬና ጎዳይ ኢዛስ ኡባ ሚሽ ኢንጄሲዴስ።
2CH 26:6 ኦዚያይ ፊሊስጼሜታራ ኦሌታናስ ኬዚዲ ጌቴ፥ ያቢኔኔ ኣሽዶዴ ካታማታ ዲርሳ ላሊዴስ፤ ሂስቲዲ ኣሽዶዴ ካታማ ማታኒኔ ፊሊስጼሜ ዴሬ ጊዶን ካታማታ ኤሲዴስ።
2CH 26:7 ኦዚያይ ፊሊስጼሜታ፥ ጉርባኣሌን ዴኢዛ ኣራቤታኔ ማኡኔታ ጾናና ማላ ጾሲ ኢዛ ማዲዴስ።
2CH 26:8 ኣሞኔ ኣሳቲ ኦዚያስ ጊሪዳ፤ ኢዚ ኬሂፔ ሚኒዳ ጊሻስ ኢዛ ጎባቴꬂ ጊብጼ ዛዋ ጋካናስ ሲዬቲዴስ።
2CH 26:9 ቃሴ ኦዚያይ ዬሩሳላሜን ጉላ ፔንጌን፥ ዙሌዛ ፔንጌኒኔ ጊምቤዛ ጉላን ሻኮታ ኦꬂዲ ናጊሲዴስ።
2CH 26:10 ኢዛስ ሻራ ሜንꬆኒኔ ጋꬋን ጮራ ሜሄይ ዲዛ ጊሻስ ሄን ናጋናስ ሻኮታ ጊምቢዴስ፤ ዳሮ ሃꬃ ኦላታካ ቦኪዴስ፤ ኢዚ ቃሴ ጎሽ ዶሲዛ ጊሻስ ሻራ ሜንꬆታኒኔ ኣራዳ ጋዴን ኢዛስ ዳሮ ጎሻንቻቲኔ ዎይኔ ቶኪዛይቲ ዴቴስ።
2CH 26:11 ቃሴ ኦዚያስ ኦላስ ጊጊዳኔ ኬሂ ሎሂዳ ዳሮ ኦላንቻቲ ዴቴስ፤ ኢስታስ ጋዳዋይ ካዎ ሹሜ ጊዲዳ ሃናኒያ፤ ኦላንቻታ ጻፌይ ዪኢኤሌይኔ ሃላቃ ማኢሳያይ ኦላንቻታ ሱንꬃ ማዝጋባን ጻፊዳ።
2CH 26:12 ባንታ ኣዋታ ኬꬃ ካሌꬂዛይታ ኡባ ቆዳይ ናምኡ ሺያኔ ኡሱፑን ጼታ።
2CH 26:13 ካዎ ሞርኬታራ ኦሌቲዲ ባንታ ኩሜꬃ ዎልቃን ካዎ ማዳናስ ኬዚዛ 307,500 ኦላንቻቲ ኢስታ ኩሼን ዴቴስ።
2CH 26:14 ኦዚያይ ሄ ኡባ ኦላንቻታስ ጎንዳሌ፥ ቶራ፥ ሁኤን ዎꬂዛ ቢራታ ቆቤ፥ ጹሩሬ፥ ዎንዳፌ፥ ያንባርሺኔ ሹች ጊግሲዴስ።
2CH 26:15 ዬሩሳላሜን ዴኢዛ ኩሼ ሂላ ኤሪዛ ኣሳታ ካዎ ኦዚያይ ኣዛዚዲ ዎሼ ጊምቤታ፥ ሻኮታ፥ ጉላታን ናጊዛሶታ ቦላ ኡቲዲ ዎንዳፌ ዱኪዛ ሚሻታኔ ጊታ ጊታ ሹቻታ ኦሊዛ ሚሻታ ሜꬊሲዴስ፤ ጾሲ ኢዛ ማዲን ኢዚ ኬሂፔ ሚኒዴስ፤ ኢዛ ጎባቴꬂ ኡባሶ ጋኪዲ ሲዬቲዴስ።
2CH 26:16 ጊዶ ኣቲን ኦዚያይ ሚኒዳ ዎዴ ኦቶሬቲዴስ፤ ኢዛ ኦቶሮይ ኢዛ ኩንዲሲዴስ፤ ኢዚ ኤጻኔ ያርሺዛሶን ኤጻኔ ጩዋሳናስ ጾሳ ኬꬅ ጌሊዲ ጾሳ ቆሂዴስ።
2CH 26:17 ቄሴ ኣዛሪያሲኔ ዎዚና ሙርታ ጊዲዳ ጎዳ ቄሴ ኦስፑን ታማቲ ኢዛ ካሊ ጌሊዳ።
2CH 26:18 ኢስቲካ ኢዛራ ቆንጬን ኤቄቲሼ፥ «ኦዚያ! ጎዳስ ኤጻኔ ጩዋሴꬂ ዱማቲዳ ኣሮኔ ዜሬꬃታስ ኣቲን ኔስ ቤሴና፤ ኔኒ ጾሳ ቆሂዳ ጊሻስ ጾሳ ኬꬃፌ ኬዛ! ጎዳ ኣቻፌ ሃይሲ ኔስ ቦንቾ ኤሄና» ጊዳ።
2CH 26:19 ኦዚያይ ኤጻኔ ጩዋሳናስ ባ ኩሼን ኦይኪዳ ማላ ቄሴታ ቦላ ሃንቄቲዴስ፤ ጾሳ ኬꬃን ኤጻኔ ያርሺዛሶዛ ሲንꬃን ቄሴታ ቦላ ኢዚ ሃንቄቲሺን ኢዛስ ሊጴ ቦላ ኢንቺራቻ ሃርጌይ ዎꬊዴስ።
2CH 26:20 ቄሴታ ሃላቃ ኣዛሪያሲኔ ሃራ ቄሴቲ ኡባይ ኢዛኮ ጼሊዛ ዎዴ ኢዛ ሊጴ ቦላ ኢንቺራቻ ሃርጌይ ዎꬊዳይሳ ቤኢዳ፤ ሄሳ ጊሻስ ኢዛ ኤሶን ኬꬃፌ ኬሲዳ፤ ጎዳይ ኢዛ ኡንኤꬂዳ ጊሻስ ኢዚካ ኤሶቲ ኬዚዴስ።
2CH 26:21 ካዎ ኦዚያይ ሃይቃና ጋካናስካ ሄ ሃርጌዛራ ዴኢዴስ፤ ጾሳ ኬꬃ ጌሎንታ ማላ ቴቄቲዴስ፤ ሄ ሃርጌዛ ጋሶን ዱማ ኬꬃን ባርካ ዴኢዴስ፤ ሄ ዎዴ ኢዛ ና ኢዮኣታሜይ ካዎቴꬃ ኬꬃ ኣይሶዛ ኣዋቴꬃ ኤኪዲ ዴራ ኣይሶ ዶሚዴስ።
2CH 26:22 ኦዚያ ካዎቴꬃ ላይꬃን ኮይሮፔ ቢዲ ዉርሴꬅ ጋካናስ ሃኒዳ ሃራ ኦሶታ ኡባ ኣሞጼ ና ናቤ ኢሳያሲ ጻፊዴስ።
2CH 26:23 ኦዚያይ ባ ኣዋታꬆ ሃይቂዴስ፤ ኣሳይ ኢዛ፥ «ኢንቺራቻ ሃርጌራ ዴስ» ጊዲ ካዎታ ዱፎ ማታን ሞጊዴስ፤ ኢዛ ና ኢዮኣታሜይ ኢዛሶሆን ካዎቲዴስ።
2CH 27:1 ኢዮኣታሜይ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን 16 ላይꬅ ካዎቲዴስ፤ ኢዛ ኣያ ሳዶቄ ቢዮ ኢዬሩሶ ጌቴታዉስ።
2CH 27:2 ካሴ ኢዛ ኣዋ ኦዚያይ ኦꬂዳይሳ ማላ ኢዚካ ጎዳ ሲንꬃን ሱሬ ሚሽ ኦꬂዴስ፤ ጊዶ ኣቲን ኢዛ ኣዋይ ጾሳ ኬꬅ ጌሊዳ ማላ ኢዚ ጌሊቤና፤ ኣሳይ ጊዲኮ ናጋራ ኦሶ ኣጊቤና።
2CH 27:3 ኢዮኣታሜይ ጾሳ ኬꬅ ጌሊዛሶ ቆሞ ባጋ ፔንጌ ዛሬꬂዲ ኦꬂዴስ፤ ቃሴ ኦፌሌ ባጋራ ዲዛ ጊምቤዛ ዳሮ ሎኤꬆ ኦሶ ኦꬂዴስ።
2CH 27:4 ዩሁዳ ዙምቡላታ ቦላ ካታማታ ኦꬂዴስ፤ ዎራታ ጊዶን ሚጻታኔ ኣዱሳ ጊምቤታ ጊምቢዴስ።
2CH 27:5 ኢዮኣታሜይ ኣሞኔ ካዎራ ኦሌቲዲ ጾኒዴስ፤ ኣሞኔቲ ሄ ላይꬂ 3,400 ኪሎ ጊራሜ ዴጺዛ ቢራ፥ 10,000 ኮንታሌ ጊዲዛ ጊስቴኔ 10,000 ኮንታሌ ጊዲዛ ባንጋ ኢዛስ ጊሪዳ። ኣሞኔቲ ናምኣንꬆ ላይꬂኔ ሄꬓንꬆ ላይꬂ ሄሳꬆካ ኤሂዲ ኢዛስ ጊሪዳ።
2CH 27:6 ኢዮኣታሜይ ባ ጎዳ ሲንꬃን ኣማኔቴꬃን ሲሜሬቲዳ ጊሻስ ኬሂፔ ሚኒ ሚኒ ቢዴስ።
2CH 27:7 ኢዮኣታሜ ካዎቴꬃ ላይꬃን ሃኒዳ ሃኖቲ፥ ኢዚ ኦሌቲዳ ኦላቲ ኡባይኔ ኢዚ ኦꬂዳ ኦሶ ኡባይ ኢስራኤሌ ካዎታኔ ዩሁዳ ካዎታ ታሪኬ ማጻፋን ጻፌቲ ኡቲዴስ።
2CH 27:8 ኢዚ ካዎቲሺን ኢዛስ ላይꬃይ 25፤ ኢዚ ዬሩሳላሜን 16 ላይꬅ ካዎቲዴስ።
2CH 27:9 ኢዮኣታሜይ ባ ኣዋታꬆ ሃይቂዴስ፤ ዳዊቴ ካታማን ሞጌቲዴስ፤ ኢዛሶሆን ኢዛ ና ኣካዜይ ካዎቲዴስ።
2CH 28:1 ኣካዜይ ካዎቲዛ ዎዴ ኢዛስ ላይꬃይ 20፤ ኢዚ ዬሩሳላሜን 16 ላይꬅ ካዎቲዴስ፤ ኢዛ ኣዋ ዳዊቲ ጎዳ ሲንꬃን ሱሬ ሚሽ ኦꬂዳ ማላ ኣካዜይ ኦꬂቤና፤
2CH 28:2 ኢዚ ኢስራኤሌ ካዎታ ኦጌ ካሊዴስ፤ ባኣሌስ ጎይናናስ ኤቃ ሚስሌታ ሜꬊዴስ።
2CH 28:3 ቃሴ ጎዳይ ኢስራኤሌ ኣሳ ሲንꬃፌ ጎዲ ኬሲዳ ኣሳታ ዴኦ ዎጋ ካሊዲ ሄኖሜ ና ሾባን ኤጻኔ ጩዋሲዴስ፤ ባ ዬሊዳ ኣቱማ ናይታካ ጹጊ ያርሺዴስ።
2CH 28:4 ኣካዜይ ኣሳይ ጎይኒዛ ዙምቡላታ ቦላ፥ ዙማታ ቦላኒኔ ሚꬃታ ጋርሳን ያርሾ ያርሺዴሲኔ ኤጻኔ ጩዋሲዴስ።
2CH 28:5 ሄሳ ጊሻስ ኢዛ ጎዳ ጾሳይ ኢዛ ኣራሜ ካዎ ኩሼን ኣꬂ ኢሚዴስ፤ ኢስቲ ኢዛ ጾኒዲ ኢዛ ኣሳፔ ዳሮ ኣሳ ዲኢ ዳማስቆ ኤፊዳ፤ ቃሴካ ጎዳይ ኢዛ ኢስራኤሌ ካዎ ኩሼን ኣꬂ ኢሚን ካዎዚ ኢታ ሾች ሾጪዴስ።
2CH 28:6 ዩሁዳ ኣሳይ ጎዳ ባንታ ኣዋታ ጾሳ ኣጊዳ ጊሻስ ኤሮሜሊዮ ና ፋቁሄይ ዩሁዳ ኦላንቻታፔ 120,000 ኦላንቻታ ኢሲ ጋላስ ዎꬊዴስ።
2CH 28:7 ኤፍሬሜ ዛሬ ጊዲዳ ሚኖ ኦላንቻ ዚኪሬይ ካዎዛ ና ማኢሳያ፥ ካዎ ኬꬃስ ኣዋቲዛ ኣዚርቃሜኔ ካዎፔ ካሊ ዴኢዛ ሹሜዛ ሂልቃና ዎꬊዴስ።
2CH 28:8 ኢስራኤሌ ኣሳይ ባንታ ዳቦታፔ 200,000 ኣዚናራ ዲዛ ማጫሳታ፥ ኣቱማ ናይታኔ ማጫ ናይታ ዲኢዳ፤ ቃሴ ኢስቲ ኬሂፔ ዳሮ ሚሽ ዲኢ ኤኪዲ ሳማሪያ ኤፊዳ።
2CH 28:9 ኦዴዴ ጌቴቲዛ ጎዳ ናቤይ ሳማሪያን ዴስ፤ ኦዴዲ ሳማሪያ ዪዛ ኦላንቻታራ ጋይታናስ ኬዚዲ፥ «ቤኢቴ፥ ኢንቴ ኣዋታ ጎዳይ ዩሁዳ ሃንቄቲዳ ጊሻስ ኢንቴ ኩሼን ኣꬂ ኢሚዴስ፤ ጊዶ ኣቲን ኢንቴካ ዎጋይ ባይንዳ ሃንቆ ሃንቄቲዲ ኢስታ ዉርሲዴታ።
2CH 28:10 ሃኢካ ዩሁዳ ኣሳይኔ ዬሩሳላሜ ኣሳይ ኢንቴስ ማጫኔ ኣቱማ ኣይሌ ጊዲዲ ሃሬታና ማላ ቆፔታ፤ ኢንቴካ ኢስታ ማላ ሃኒዲ ጎዳ ኢንቴ ጾሳ ቶቺቤኬቲ?
2CH 28:11 ሄሳ ጊሻስ ሃኢ ኢንቴ ታኒ ጊዛይሳ ሲዪቴ፤ ጎዳፔ ባቢሲዛ ሃንቆይ ኢንቴ ቦላ ዎꬊዳ ጊሻስ ኢንቴ ዲኢዲ ቃቺዳ ኢንቴ ዳቦታ ዛሪ ዬዲቴ» ጊዴስ።
2CH 28:12 ሄሳፌ ጉዬ ኤፍሬሜ ዛሬታ ሃላቃታፔ ኦይዳቲ፥ ዪሆሃናኔ ና ኣዛሪያሲ፥ ማሺሌሚቴ ና ባራካዬይ፥ ሻሎሜ ና ሂዝቂያሳኔ ሃዲላዬ ና ኣማሲ ኦላፔ ሲሚዳይታ ቦላ ዴንዲዳ።
2CH 28:13 ሂስቲዲ፥ «ሄ ዲኢዳ ኣሳታ ኢንቴ ሃ ኤሆፒቴ! ኢንቴ ኤሂዛ ጊዲኮ ካሴ ኑኒ ጎዳ ቦላ ኦꬂዳ ናጋራኔ ቆሆ ቦላ ሃራ ቆሆ ጉጄታ፤ ኑ ቆሆይ ካሴካ ዳሪ ኡቲዳ ጊሻስ ኢስራኤሌ ቦላ ጎዳ ሃንቆይ ዎꬊዴስ» ጊዳ።
2CH 28:14 ሄሳ ጊሻስ ኦላንቻቲ ዲኢ ኤሂዳ ኣሳታ ሃላቃታ ሲንꬃኒኔ ኩሜꬃ ዴራ ሲንꬃን ዬዲዳ፤ ዲኢ ኤሂዳ ሚሻካ ዛሪ ሼꬊዳ።
2CH 28:15 ሄሳፌ ጉዬ ሱንꬃይ ሃይሳፌ ቆሞን ጻፌቲዳ ኣሳቲ ዴንዲ ኤቂዲ ዲኤቲዳ ኣሳታ ኤኪዲ ኢስታ ጊዶን ካሎ ዲዛይታ ዲኢ ኤኪዳ ማይኦፌ ኢስታ ማይዚዳ፤ ኢስቲ ሄ ኣሳታስ ማይኦኔ ጫማ ኢሚዳ፤ ቃሴ ኢስታ ሚዚዳኔ ኡሺዳ፤ ኢስታ ማዱንꬃካ ዛይቴ ቲይዳ፤ ኢስታ ጊዶፌ ዳቡርዳይታ ሃሬ ቶጊሲዲ ኢስታ ኢሻንታኮ ዛምባ ካታማ ጌቴታ ጼይጌቲዛ ኢያርኮ ካታማ ኤፊዲ ጉዬ ሳማሪያ ሲሚዳ።
2CH 28:16 ሄ ዎዴ ካዎ ኣካዜይ ኣሶሬ ካዎይ ባና ማዳና ማላ ኪታ ዬዲዴስ።
2CH 28:17 ጋሶይካ ኤዶሜ ኣሳይ ናምኣንꬆ ዩሁዳ ቦላ ዎራጂዲ ዳሮ ኣስ ዲኢ ኤፊዳ ጊሻሳ።
2CH 28:18 ፊሊስጼሜ ኣሳቲ ቃሴ ዩሁዳ ሻራ ሜንꬆኒኔ ኔጌቤ ባዞን ዴኢዛ ካታማታ ዎራጂዲ ቤቲ-ሼሚሼ፥ ኣያሎኔ፥ ጋዴሮቴ፥ ሶኮ፥ ቴሚና፥ ጊሚዞኔ ኢስታ ዩሾን ዲዛ ሞꬃታ ኡባ ኦይኪዲ ሄን ዴኢዳ።
2CH 28:19 ዩሁዳ ካዎ ኣካዜይ ዩሁዳ ኣሳ ናጋራ ኦሲሲዳ ጊሻሲኔ ጎዳስ ኣማኔቶንታ ኣጊዳ ጊሻስ ጾሲ ዩሁዳ ካዉሺዴስ።
2CH 28:20 ሄሳ ጊሻስ ኣሶሬ ካዎ ቴሊጌሊቴሊፌሊሶሬይ ኣካዜኮ ዪዲ ሃራ ሜቶ ሜꬊዴስ ኣቲን ማዲቤና።
2CH 28:21 ኣካዜይ ጾሳ ኬꬃፌ፥ ካዎ ኬꬃፌኔ ሹሜታፔ ኣማርዳ ሚሻታ ኤኪዲ ኣሶሬ ካዎስ ኢሚንካ ኢዛ ማዲቤና።
2CH 28:22 ካዎ ኣካዜይ ሜቶቲዳ ዎዴ ጎዳስ ኣማኔታናይሳ ኣጊ ኣጊ ቢዴስ።
2CH 28:23 ኢዚካ፥ «ኣራሜ ካዎታ ጾሳቲ ኢስታ ማዲዳ ጊሻስ ታናካ ኢስታ ማዳና ማላ ታኒ ኢስታስ ያርሻና» ጊዲ ባና ጾኒዳ ዳማስቆ ጾሳታስ ያርሺዴስ፤ ጊዶ ኣቲን ሄ ጾሳቲ ኢዛሲኔ ኢስራኤሌ ኣሳ ኡባስ ባሽ ኤሂዳ።
2CH 28:24 ኣካዜይ ጾሳ ኬꬃ ሚሻ ኡባ ኢሲሶ ሺሺዲ ኪንቼሬꬂዴስ፤ ሂስቲዲ ጾሳ ኬꬃ ፔንጌታ ጎርዲዲ ዬሩሳላሜን ዎጋ ኦጌታ ቲጻን ቲጻን ባስ ያርሾሶታ ኤሲዴስ።
2CH 28:25 ኣካዜይ ዩሁዳ ካታማታን ሃራ ኤቃ ጾሳታስ ያርሾ ጹጋናስ ዙምቡላታ ቦላ ጎይኒዛሶታ ጊግሲዴስ፤ ሄሳን ጎዳ ባ ኣዋታ ጾሳ ሃንቄꬂዴስ።
2CH 28:26 ኣካዜ ካዎቴꬃ ላይꬃን ኮይሮፔ ቢዲ ዉርሴꬅ ጋካናስ ኦሴቲዳ ሃራ ኦሶቲኔ ኢዛ ሃኖይ ኡባይ ዩሁዳ ካዎታ ታሪኬ ማጻፋኒኔ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
2CH 28:27 ኣካዜይ ባ ኣዋታꬆ ሃይቂዴስ፤ ዬሩሳላሜ ካታማን ኢዛ ሞጊዳ፤ ጊዶ ኣቲን ኢስራኤሌ ካዎታ ዱፎን ሞጌቲቤና፤ ኢዛ ና ሂዝቂያሲ ኢዛሶሆን ካዎቲዴስ።
2CH 29:1 ሂዝቂያሲ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን 29 ላይꬅ ካዎቲዴስ፤ ኢዛ ኣያ ዛካራሳ ና ኣቢዮ ጌቴታዉስ።
2CH 29:2 ኢዛ ኣዋ ዳዊቲ ጎዳ ሲንꬃን ሎኦ ኦꬂዳ ማላ ኢዚካ ሎኦ ኦꬂዴስ።
2CH 29:3 ሂዝቂያሲ ባ ካዎቲዳ ኮይሮ ላይꬃን ኮይሮ ኣጊናን ጾሳ ኬꬃ ፔንጌታ ዶይዲ ኦራꬂዴስ።
2CH 29:4 ቄሴታኔ ሌዌታ ጾሳ ኬꬃስ ኣርሼይ ሞኪዛ ባጋራ ዲዛ ዳባባን ሺሺዴስ።
2CH 29:5 ሂስቲዲ፥ «ሌዌቶ! ታኒ ጊዛይሳ ሲዪቴ! ሃኢራ ኤሶን ኢንቴና ጌሺቴ፤ ኢንቴ ኣዋታ ጾሳ ኬꬃካ ጌሺቴ፤ ቱና ሚሽ ኡባ ጾሳ ኬꬃፌ ዲጊቴ።
2CH 29:6 ካሴ ኑ ኣዋቲ ኣማኔቲቤቴና፤ ኑ ጎዳ ሲንꬃን ኢታ ሚሽ ኦꬂዳ፤ ኢዛካ ኣጊዳ፤ ጎዳይ ዴኢዛሶፔ ባንታ ሲንꬂ ሃራሶ ዛሪዲ ኢዛስ ዞኮ ቤሲዳ።
2CH 29:7 ኢስቲ ቃሴ ጾሳ ኬꬃ ፔንጌታ ጎርዲዳ፤ ጾምፔታ ቶይሲዳ፤ ኢስራኤሌ ጎዳስ ኤጻኔ ጩዋሲቤቴና፤ ዎይኮ ኢዛ ኬꬃንካ ጹጌቲዛ ያርሾካ ያርሺቤቴና።
2CH 29:8 ሄሳ ጊሻስ ጎዳ ሃንቆይ ዩሁዳ ቦላኔ ዬሩሳላሜ ቦላ ዎꬊዴስ፤ ኢንቴ ኢንቴ ኣይፌን ቤኢዳይሳꬆ ጎዳይ ኢስታ ዳጋማስ፥ ሚቻሲኔ ቂꬌስ ኣꬂ ኢሚዴስ።
2CH 29:9 ሄሳ ጋሶን ኑ ኣዋቲ ጊꬃ ማሻን ሲፌቲዳ፤ ኑ ኣቱማ ናይቲ፥ ኑ ማጫ ናይቲኔ ኑ ማቼቲ ዲኤቲዳ።
2CH 29:10 «ሃኢ ጊዲኮ ባቢሲዛ ኢዛ ሃንቆይ ኑ ቦላፌ ኪቻና ማላ ታኒ ጎዳ ኢስራኤሌ ጾሳራ ጫቄታናስ ታ ዎዚናን ቆፓዲስ።
2CH 29:11 ታ ናይቶ! ኢንቴ ጎዳ ሲንꬃን ኤቂዲ ኦꬃና ማላ ኢዛ ኦሳንቻ ጊዳና ማላኔ ኢዛስ ኤጻኔ ጩዋሳና ማላ ኢንቴና ኢዚ ዶሪዳ ጊሻስ ዉዳይ ባይንዳይታ ጊዶፒቴ» ጊዴስ።
2CH 29:12 ሄ ሶሆን ዴኢዛ ሌዌቲ ሃይሳፌ ካሊዲ ጻፌቲዳ። ቃኣቴ ዛርኬፌ ኣማሳዬ ና ማሃቴኔ ኣዛሪያሳ ና ኢዩኤሌ። ሜራሬ ዛርኬታፔ ኣቢዴ ና ቂሴኔ ዩሃሌልኤሌ ና ኣዛሪያሳ። ጌርሾኔ ዛርኬፌ ዚማ ና ዮኣሃኔ ኢዛ ና ኤዴኔ።
2CH 29:13 ኤልጻፋኔ ዛርኬፌ ሺሚሬኔ ዪኢኤሌ። ኣሳፌ ዛርኬፌ ዛካራሳኔ ማታኒያ።
2CH 29:14 ሄማኔ ዛርኬፌ ዪሂኤሌኔ ሺምኤ። ኤዶታኔ ዛርኬፌ ሻማኤኔ ኡዚኤሌ።
2CH 29:15 ኢስቲ ባንታ ኢሻታ ሺሺዲ ባንታና ጌሺዳፔ ጉዬ ካዎዚ ጎዳ ቃላይ ጊዛ ማላ ኢስታ ኣዛዚን ኢስቲ ጾሳ ኬꬃ ጌሻናስ ጌሊዳ።
2CH 29:16 ሄሳ ጊሻስ ቄሴቲ ጾሳ ኬꬃ ጌሻናስ ጊዶ ጌሊዲ ሄን ዲዛ ቱና ሚሽ ኡባ ኬሲዲ ጾሳ ኬꬃ ዛጎ ኤሂዳ፤ ሌዌቲ ቶኪ ኤፊዲ ቄዲሮኔ ሾባን ኦሊዳ።
2CH 29:17 ኢስቲ ኮይሮ ኣጊናን፥ ኮይሮ ጋላስ ጾሳ ኬꬃ ጌሾ ዶሚዲ ሄ ኣጊናን ኦስፑንꬃ ጋላስ ዳራንቻ ጋኪዳ፤ ሃራ ኦስፑን ጋላሳን ጾሳ ኬꬃ ጌሺዳ፤ ሃ ጌሾ ዎጋዚ ኮይሮ ኣጊናን ታማኔ ኡሱፑንꬃ ጋላስ ፖሌቲዴስ።
2CH 29:18 ሄሳፌ ጉዬ ኢስቲ ካዎ ሂዝቂያሳኮ ጌሊዲ፥ «ኑኒ ጾሳ ኬꬃ ኡባ፥ ጹጌቲዛ ያርሾ ያርሺዛሶዛኔ ያርሾስ ጎኤቲዛ ሚሻታ፥ ጎዳ ሲንꬃን ዎꬂዛ ጻራጴዛኔ ሄ ጻራጴዛ ቦላ ኡቲዛ ሚሻታ ኡባ ጌሺዶስ።
2CH 29:19 ቃሴ ካዎ ኣካዜይ ካዎቲዲ ዴኢዛ ዎዴ ጾሳስ ኣማኔቶንታ ኣጊዲ ኤፊዳ ሚሻታ ኡባ ኑኒ ዛሪዲ ጌሺዶስ፤ ቤኣ ኑኒ ጌሺዳ ሚሻቲ ኡባይ ጎዳስ ያርሾ ያርሺዛሶዛ ሲንꬃን ዴቴስ» ጊዳ።
2CH 29:20 ካዎ ሂዝቂያሲ ዎንቴꬃ ጋላስ ጉራራ ዴንዲዲ ካታማ ሃላቃታ ሺሺዲ ኢስታራ ኢሲፌ ጾሳ ኬꬅ ቢዴስ።
2CH 29:21 ኢስቲ ካዎቴꬃ ጊሻስ፥ ጾሳ ኬꬃ ጊሻሲኔ ዩሁዳ ኣሳ ጊሻስ፥ 7 ኮርማ ቦራታ፥ 7 ꬋርሾታ፥ 7 ማጫ ዶርሳ ላቃታኔ 7 ዴይሻ ኮርቤታ ናጋራ ያርሾስ ኤሂዳ፤ ኣሮኔ ዜሬꬅ ጊዲዳ ቄሴቲ ጎዳስ ያርሾ ያርሺዛሶን ሄይታ ያርሻና ማላ ካዎዚ ኣዛዚዴስ።
2CH 29:22 ቄሴቲ ኮርማ ቦራታ፥ ꬋርሾታኔ ዶርሳ ላቃታ ሹኪዲ ኢስታ ሱꬃ ያርሾ ያርሺዛሶዛ ቦላ ኣራጪዳ፤
2CH 29:23 ናጋራ ያርሾስ ሺቂዛ ዴይሻ ኦርጌታ ካዎዛ ሲንꬂኔ ዱላታስ ሺቂዳ ኣሳ ሲንꬅ ኤሂን ኢስቲ ኡባይ ባንታ ኩሼ ኦርጌታ ቦላ ዎꬂዳ።
2CH 29:24 ካዎዚ ኢስቲ ጹጌቲዛ ያርሾኔ ናጋራ ያርሾ ያርሻና ማላ ኣዛዚዳ ጊሻስ ቄሴቲ ኦርጌታ ሹኪዲ ኢስራኤሌ ኣሳ ኡባ ናጋራ ዉርሳናሲኔ ጹጌቲዛ ያርሾ ሂስቲ ኢስታ ሱꬃ ያርሾ ያርሺዛሶዛ ቦላ ዉጺዳ።
2CH 29:25 ሄሳፌ ጉዬ ጎዳይ ካዎስ ቲንቢቴ ዮቲዛ ጋዴ ባጋራ፥ ናቤ ናታኔ ባጋራኔ ካዎ ዳዊቴ ባጋራ ኣዛዚዳ ኣዛዞ ሂዝቂያሲ ካሊዲ ሌዌታ ዳላ፥ ዲꬂኔ ማሲንቆ ኦይꬂዲ ጾሳ ኬꬃን ኤሲዴስ።
2CH 29:26 ሌዌቲ ዳዊቲ ካሴ ማዛሙሬ ዬጺዛ ሚሻታ ኦይኪን ቄሴቲ ቃሴ ዛዬታ ኦይኪዲ ጊጌቲ ኤቂዳ።
2CH 29:27 ሄሳፌ ጉዬ ኢስቲ ጹጌቲዛ ያርሾ ያርሻና ማላ ሂዝቂያሲ ኣዛዚዴስ፤ ጹጌቲዛ ያርሾዚ ዶሜቲዛ ዎዴ ዛዬታኒኔ ካዎ ዳዊቴ ዬꬃ ሚሻታን ኣዣቤቲዲ ጎዳስ ማዛሙሬ ዶሚዳ።
2CH 29:28 ጹጌቲዛ ያርሾይ ፖሌታና ጋካናስ ዬጺዛይቲ ዬጺሺን፥ ዛዬ ፑኒዛይቲ ፑኒሺን ኩሜꬃ ኢስራኤሌይ ጎይኒዴስ።
2CH 29:29 ቄሴቲ ያርሾዛ ያርሺ ፖሊዳፔ ጉዬ ካዎዚኔ ኢዛራ ዲዛ ኣሳይ ኡባይ ጉልባቲዲ ጎይኒዴስ።
2CH 29:30 ካዎ ዳዊቲኔ ናቤ ኣሳፌይ ጻፊዳ ጋላታ ዬꬃ ጎዳስ ዬጻና ማላ ካዎ ሂዝቂያሲኔ ሃላቃቲ ሌዌታ ኣዛዚዳ፤ ሂስቲን ሌዌቲ ኡፋይሳን ጋላቲሼ ጉልባቲዲ ጎይኒዳ።
2CH 29:31 ሄሳፌ ጉዬ ሂዝቂያሲ ኣሳ፥ «ሃኢ ኢንቴ ኢንቴና ጎዳስ ዱማሲዴታ፤ ኢንቴ ሺቂዲ ያርሾኔ ጋላታ ኢሞታ ጾሳ ኬꬃ ኤሂቴ» ጊዴስ፤ ሄሳ ጊሻስ ሺቂዳ ኣሳይ ያርሾኔ ጋላታ ኢሞታ ኤሂዳ፤ ቃሴ ኣማርዳ ኣሳቲ ባ ሼኔን ጹጌቲዛ ያርሾ ኤሂዳ።
2CH 29:32 ሄ ሺቂዳ ኣሳይ ኤሂዳ ጹጌቲዛ ያርሾዛ ቆዳይ 70 ኮርማ ቦራታ፥ 100 ꬋርሾታኔ 200 ꬋርሾ ላቃታ፤ ሄይቲ ኡባይ ጎዳስ ጹጌቲ ሺቂዛ ያርሾስ ኢሜቲዳይታ።
2CH 29:33 ቃሴ ያርሾስ ሺቂዳ ኮርማ ቦራቲ 600፥ ዶርሲኔ ዴይሺ ሄꬑ ሺ።
2CH 29:34 ጊዶ ኣቲን ጹጌቲዛ ያርሾ ኡባ ሹኪዲ ጋልባ ሾቂ ኬሳናስ ዲዛ ቄሴቲ ቆዳን ኬሂ ጉꬅ ጊዲዳ ጊሻስ ኦሶይ ዉራና ጋካናሲኔ ሃራ ቄሴቲ ባንታ ሁኤ ጌሻና ጋካናስ፥ ኢስታ ዳቦ ጊዲዳ ሌዌቲ ኢስታ ማዲዳ። (ሌዌቲ ባና ጌሻናስ ቄሴታፔ ቦላራ ባና ናጊዛይታ።)
2CH 29:35 ጹጌቲዛ ያርሾ፥ ኢሲፌቴꬃ ያርሾ ሃንዳኔ ጹጌቲዛ ያርሾራ ኢሲፌ ያርሼቲዛ ኡሻ ያርሾቲ ኬሂ ዳሮ። ሄሳꬆ ሃኒዲ ጾሳ ኬꬃ ኦሶይ ናምኣንꬆ ዛሪ ዶሚዴስ።
2CH 29:36 ሄሳፌ ጉዬ ሂዝቂያሲኔ ኡባ ኣሳይ ሄ ኦሶዛ ኤሶን ፖላና ማላ ጾሲ ኢስታ ማዲዳ ጊሻስ ኬሂፔ ኡፋዬቲዳ።
2CH 30:1 ጎዳ ኢስራኤሌ ጾሳ ፓዚጋ ባኣሌ ቦንቻናስ ኢስራኤሌ ኣሳይ ኡባይኔ ዩሁዳ ኣሳይ ኡባይ ዬሩሳላሜን ዴኢዛ ጾሳ ኬꬅ ያና ማላ ሂዝቂያሲ ኪቲዴስ፤ ቃሴ ኤፍሬሜ ኣሳሲኔ ሚናሴ ኣሳስ ዳብዳቤ ጻፊዴስ።
2CH 30:2 ካዎይ፥ ሃላቃቲኔ፥ ዬሩሳላሜን ሺቂዳ ኣሳይ ኡባይ ፓዚጋ ባኣሌ ናምኣንꬆ ኣጊናን ቦንቻናስ ቆፋ ቃቺዳ።
2CH 30:3 ቆዳን ጉꬃ ቄሴቲ ጻላ ባና ጌሺዳ ጊሻሲኔ ዳሮ ኣሲካ ዬሩሳላሜን ሺቆንታ ጊሻስ ኣሳይ ፓዚጋ ዎዴራ ኮይሮ ኣጊናን ቦንቻናስ ዳንዳይቤና።
2CH 30:4 ካዎዚኔ ዴሬዚ ሄ ቆፋይ ሎኦ ጊዲዳይሳ ቤኢዴስ።
2CH 30:5 ካሴ ዎጋን ኣዛዜቲዳ ማላ ፓዚጋ ባኣሌዚ ዳሮ ዎዴ ዳሮ ኣሳታን ቦንቼቲ ኤሮንታ ጊሻስ ኢስራኤሌ ጎዳ ፓዚጋ ባኣሌ ዬሩሳላሜን ቦንቻናስ ቤርሳቤሄፔ ቢዲ ዳኔ ጋካናስ ዲዛ ኢስራኤሌ ኣሳይ ኡባይ ያና ማላ ኣዋጃናስ ቆፋ ቃቺዳ።
2CH 30:6 ካዎዚኔ ኢዛ ሹሜቲ ኣዛዚን ኪቴቲዳይቲ ኢስራኤሌ ዴራሲኔ ዩሁዳ ዴራስ ኡባስ፥ «ኢስራኤሌ ኣሳዉ! ኣሶሬ ካዎታ ኩሼፔ ኬሲ ኤኪዲ ኣቲዳ ኢንቴኮ ጾሲ ሲማና ማላ ኢንቴካ፥ ጎዳ ኣብራሃሜ፥ ዪሳቃኔ ያቆቤ ጾሳኮ ሲሚቴ!
2CH 30:7 ኢንቴ ኤሪዛ ማላ ኢስቲ ቂꬌስ ኬዛናሼ ጋካናስ ባንታ ኣዋታ ጎዳስ ኣማኔቶንታ ኢጺዳ ኢንቴ ኣዋታ ማላኔ ኢንቴ ኢሻታ ማላ ጊዶፒቴ።
2CH 30:8 ኢንቴ ጎዳስ ኣዛዜቲቴፔ ኣቲን ካሴ ኢንቴ ኣዋታ ማላ ዎዚና ሙሜ ጊዶፒቴ! ኢዚ ሜርናስ ዱማሲዳ ኬꬃ ሃ ዪቴ። ኬሂ ያሺዛ ኢዛ ሃንቆይ ኢንቴፌ ሲማና ማላ ጎዳስ ሃጋዚቴ።
2CH 30:9 ኢንቴ ኢንቴ ጎዳኮ ሲሚኮ ጎዳ ኢንቴ ጾሳይ ቃꬌቲዛዴኔ ማሪዛዴ ጊዲዳ ጊሻስ ኢንቴ ኢሻታኔ ኢንቴ ናይታ ዲኢ ኤፊዳይታ ሲንꬃን ኢስቲ ማሮቴꬅ ዴሚዲ ሃ ቢታ ሲማና፤ ኢንቴ ኢዛኮ ሲሚኮ ኢዚ ባ ሲንꬅ ኢንቴኮ ዛራና» ጊዛ ዳብዳቤ ኤፊዳ።
2CH 30:10 ኪቴቲዳይቲ ኤፍሬሜ ቢታኔ ሚናሴ ቢታ ካንꬂዲ ዛቢሎኔ ቢታ ጋካናስ ካታማፔ ካታማ ቢዳ፤ ጊዶ ኣቲን ሄ ካታማታን ዴኢዛ ኣሳቲ ኢስታ ካꬊዲ ኢስታ ቦላ ሚጪዳኔ ቂልጪዳ።
2CH 30:11 ጊዲኮካ ኣሴሬ ኣሳታፔ፥ ሚናሴ ኣሳታፔኔ ዛቢሎኔ ኣሳታፔ ጉꬃቲ ባንታና ካዉሺዲ ዬሩሳላሜ ዪዳ።
2CH 30:12 ካዎዚኔ ኢዛ ሹሜቲ ጎዳ ቃላይ ጊዳ ማላ ኣዛዚዳይሳ ዩሁዳ ኣሳይ ኢሲ ዎዚናን ኣዛዜታና ማላ ጾሳ ኩሼይ ዩሁዳ ኣሳ ቦላ ዴስ።
2CH 30:13 ናምኣንꬆ ኣጊናን ኡኬꬃ ባኣሌ ቦንቻናስ ኬሂ ዳሮ ኣሳይ ዬሩሳላሜን ሺቂዴስ።
2CH 30:14 ኢስቲ ዴንዲዲ ዬሩሳላሜን ዴኢዛ ያርሺዛሶሆታ ዴንꬂዲ ኤጻኔ ያርሺዛሶሆታ ኡባ ዲጊዲ ቄዲሮኔ ዙሌ ኤፊ ኦሊዳ።
2CH 30:15 ሄሳፌ ጉዬ ናምኣንꬆ ኣጊናን ታማኔ ኦይዳንꬆ ጋላስ ፓዚጋ ዶርስ ሹኪዳ፤ ባና ጌሾንታ ቄሴቲኔ ሌዌቲ ዬላቲዲ ባና ጌሺዳ፤ ሂስቲዲ ጹጌቲዛ ያርሾ ጾሳ ኬꬃ ኤሂዳ።
2CH 30:16 ሄሳፌ ጉዬ ጾሳ ኣስ ሙሴ ዎጋ ማላ ጾሳ ኬꬃ ጊዶን ባንታ ሶሆን ሶሆን ኤቂዳ፤ ሂስቲዲ ቄሴቲ ሌዌታ ኩሼፔ ኤኪዳ ሱꬃ ዉጺዳ።
2CH 30:17 ሄ ዱላታ ጊዶን ባና ጌሾንታ ዳሮ ኣሳቲ ዲዛ ጊሻስ ካሴ ዲዛ ዎጋ ማላ ባና ጌሾንታይታሲኔ ባንታ ያርሾ ዶርሳ ላቃ ጾሳስ ሺሻናስ ዳንዳዮንታ ኡባታስ ፓዚጋ ዶርሳ ሌዌቲ ሹካናስ ቤሴስ።
2CH 30:18 ኤፍሬሜ፥ ሚናሴ፥ ዪሳኮሬ፥ ዛቢሎኔ ቆሞታፔ ዳሮ ኣሳቲ ዎጋይ ኣዛዚዛ ማላ ባና ጌሾንታይሳ ጊዲኮካ፥ ፓዚጋ ባኣሌ ጊቢራ ሚዳ፤ ሄሳ ጊሻስ ካዎ ሂዝቂያሲ፥
2CH 30:19 «ኣቤት ኣሳ ኡባስ ኪያ ጎዳዉ፥ ሃይቲ ካሴ ዎጋይ ጊዛ ማላ ባና ጌሾንታይታ ጊዲኮካ ኢስቲ ጎዳ ባንታ ኣዋታ ጾሳ ኮያናስ ባ ዎዚና ጊግሲዳ ኣሳታስ ኔ ኣቶ ጋ» ጊዲ ዎሲዴስ።
2CH 30:20 ጎዳይ ሂዝቂያሳ ዎሳ ሲዪዲ ኢስታስ ኣቶ ጊዴስ።
2CH 30:21 ዬሩሳላሜን ሺቂዳ ኢስራኤሌ ኣሳይ ኡኬꬃ ባኣሌዛ ጊታ ኡፋይሳን ላፑን ጋላስ ቦንቺዴስ፤ ሌዌቲኔ ቄሴቲ ዬꬃ ሚሻታን ዬጺሼ ጋላስ ጋላስ ጎዳ ጋላቲዳ።
2CH 30:22 ሄሳፌ ጉዬ ሂዝቂያሲ ጎዳ ኦሶን ኣኬካራ ዲዛ ሌዌታ ኡባ ሚንꬄꬂዴስ። ሌዌቲ ኡባይ ባንታስ ኢሜቲዳ ጊሻስ ኢሲፌቴꬃ ያርሾ ያርሺሼ ጎዳ ባንታ ኣዋታ ጾሳ ጋላቲሼ፥ ሚሼኔ ኡዪሼ ባኣሌዛ ላፑን ጋላስ ቦንቺዳ።
2CH 30:23 ዱላታ ሺቂዳ ኣሳይ ኡባይ ካሊዛ ላፑን ጋላሳታን ባኣሌዛ ዛሪ ቦንቻናስ ቆፋ ቃቺዳ፤ ሄሳ ጊሻስ ኣሳይ ባኣሌዛ ሃራ ላፑን ጋላስ ኡፋዬቲሼ ቦንቺዴስ።
2CH 30:24 ዩሁዳ ካዎ ሂዝቂያሲ ሺቂዳ ዴራስ 1,000 ኮርማ ቦራታ፥ 7,000 ዶርሳታኔ ዴይሻታ ኢሚዴስ፤ ቃሴ ኢዛ ሹሜቲ 1,000 ኮርማ ቦራታ፥ 10,000 ዶርሳታኔ ዴይሽ ኢሚዳ፤ ኬሂፔ ዳሮ ቄሴቲካ ባንታና ጌሺዳ።
2CH 30:25 ኩሜꬃ ዩሁዳ ኣሳይ፥ ቄሴቲ፥ ሌዌቲ፥ ኢስራኤሌፔ ዱላታ ዪዳ ኣሳይ ኡባይኔ ካሴ ኢስራኤሌ ቢታፌ ዪዲ ዩሁዳ ቢታን ዲዛ ኣሳይ ኡባይ ኡፋዬቲዳ።
2CH 30:26 ኢስራኤሌ ካዎ ዳዊቴ ና ሶሎሞኔ ካዎቴꬃ ዎዴፔ ሃ ሲሚን ሃች ጋካናስ ዬሩሳላሜን ሃይሳ ማላ ባኣሌይ ቦንቼቲ ኤሮንታ ጊሻስ ዬሩሳላሜን ኣሳይ ኬሂፔ ኡፋዬቲዴስ።
2CH 30:27 ሄሳፌ ጉዬ ቄሴቲኔ ሌዌቲ ዴንዲ ኤቂዲ ዴራ ኣንጂዳ፤ ጾሳይ ኢስቲ ጊዛይሳ ሲዪዴስ፤ ኢስታ ዎሳይካ ሳሎ ኬꬅ ጾሳኮ ጋኪዴስ።
2CH 31:1 ሃይሲ ኡባይ ፖሌቲዳፔ ጉዬ ሄን ዲዛ ኢስራኤሌ ኣሳይ ዩሁዳ ካታማታ ዪዲ ጎይኔቲዛ ሹቻታ ሜንꬄሬꬂ ዬጊዳ፤ ኣሼሮ ጌቴቲዛ ኤቃ ጾሳይ ሚስሌታ ቃንጼሬꬂ ኦሊዳ፤ ቃሴካ ዩሁዳ ቢታን፥ ቢኒያሜ ቢታን፥ ኤፍሬሜ ቢታኒኔ ሚናሴ ቢታን ዲዛ ዙምቡላታ ቦላ ጎይኒዛሶታኔ ያርሾ ያርሺዛሶሆታ ꬋይሲዳ፤ ኢስራኤሌ ኣሳይ ሄሳ ኡባ ኦꬂዳፔ ጉዬ ባንታ ካታማ ካታማኔ ባንታሶ ባንታሶ ሲሚዳ።
2CH 31:2 ሂዝቂያሲ ቄሴታኔ ሌዌታ ኢስታ ኦሶ ማራን ማራን ሻኪ ኤሲዴስ፤ ኢስታ ኦሶይ ጹጌቲዛ ያርሾ ሺሾ፥ ኢሲፌቴꬃ ያርሾ ሺሾ፥ ጾሳ ኬꬃን ሃጋዞ፥ ጎዳ ጋላቶኔ ሳቦ።
2CH 31:3 ጎዳ ዎጋን ጻፌቲዳ ማላ ማላዶኔ ኦማርስ፥ ሳምባታን ሳምባታን፥ ኣጊናይ ጼሪን ኮይሮ ጋላሳታኒኔ ዱማ ዱማ ባኣሌታ ጋላስ ጹጌቲ ሺቂዛ ያርሾዛ ካዎዚ ባ ሚሻፌ ኢሚዴስ።
2CH 31:4 ባንታ ኩሜꬃ ዎዴዛ ጎዳ ኦሶስ ጎኤታና ማላ ቄሴቲኔ ሌዌቲ ዬሩሳላሜን ዲዛ ኣሳይ ኢስታስ ኮሺዛይሳ ኢማና ማላ ካዎዚ ኣዛዚዴስ።
2CH 31:5 ሂዝቂያሲ ሄሳ ኣዛዚዳ ማላ ኢስራኤሌ ኣሳይ ካꬃፌ፥ ዎይኔ ኡሻፌ፥ ዛይቴፔ፥ ኤሳፌኔ ጎዪ ሺሺዳ ካꬃ ኣይፌፔ ጼራ ጎዳስ ኪያቴꬃን ኢሚዳ፤ ባንታስ ዴኢዛ ኡባ ሚሻፌካ ኬሂ ዳሮ ኣስራታ ኤሂዳ።
2CH 31:6 ዩሁዳ ካታማታን ዴኢዛ ኢስራኤሌ ኣሳይኔ ዩሁዳ ኣሳይ ሚዛታፔ፥ ዶርሳታፔ፥ ዴይሻታፔኔ ጎዳ ባንታ ጾሳስ ኢስቲ ዱማሲ ዎꬂዳ ሚሽ ኡባፌ ኣስራታ ኤሂ ኩንꬂዳ።
2CH 31:7 ኢስቲ ሄꬓንꬆ ኣጊናን ሺሾ ዶሞይሳ ላፑንꬃ ኣጊናን ፖሊዳ።
2CH 31:8 ካዎ ሂዝቂያሲኔ ኢዛ ሹሜቲ ሺቂዳይሳ ዪ ቤኢዲ ጎዳ ጋላቲሼ ዴራ ኣንጂዳ።
2CH 31:9 ሄሳፌ ጉዬ ሂዝቂያሲ ሺቂዳ ኢሞታ ጊሻስ ቄሴታኔ ሌዌታ ኦይቺዴስ።
2CH 31:10 ሂስቲን ሳዶቄ ዛሬፔ ቄሴታ ሃላቃ ኣዛሪያሲ ሂዝቂያሳስ፥ «ኣሳይ ባንታ ኢሞታ ጾሳ ኬꬅ ኤሆ ዶሞሶፌ ኑስ ጊዲ ፓላሂዛዝ ዴሚዶስ፤ ጎዳይ ባ ኣሳ ኣንጂዳ ጊሻስ ሃይሳ ኬና ቲርፓይ ኣቲዴስ» ጊዴስ።
2CH 31:11 ሄሳፌ ጉዬ ሂዝቂያሲ ጾሳ ኬꬃን ሚንጃ ኬꬅ ጊጊሳና ማላ ኣሳ ኣዛዚን ኢስቲካ ጊግሲዳ።
2CH 31:12 ሂስቲን ኣሳይ ኢሞታ፥ ባስ ዲዛይሳፌ ኣስራታኔ ጎዳስ ዱማሲ ዎꬂዳይሳ ኣማኔቲ ኤሂ ጌልꬂዳ፤ ሄሳስ ኣዋቴꬂ ሌዌ ቆሞታፔ ካናኒያስ ኢሜቲዴስ፤ ኢዛፔ ጋርሳራ ኢዛ ኢሻ ሺምኤስ ኣዋቴꬂ ኢሜቲዴስ።
2CH 31:13 ካዎ ሂዝቂያሲኔ ጾሳ ኬꬃን ኣላፌ ኣዛሪያሲ ኣዛዚን ካናኒያፔኔ ኢዛ ኢሻ ሺምኤ ጋርሳራ ጊዲዲ ኦꬃና ማላ ዪሂኤሌ፥ ኣዛዚያ፥ ናሃቴ፥ ኣሳሄሌ፥ ያርሞቴ፥ ዮዛባዴ፥ ኤልኤሌ፥ ዪሲማኬ፥ ማሃቴኔ ባናያ ሹሚዳ።
2CH 31:14 ኣርሼይ ሞኪዛ ባጋ ፔንጌዛ ናጊዛ ሌዌ ዪሚኔ ና ቆሬይ ባ ዶሳን ጾሳስ ኤሂዳ ኢሞታታኔ ሙጹዋታታ ጾሳስ ዱማቲዳ ሚሻታ ሻኪ ሻኪ ኢማናስ ኣዋቴꬂ ኢሜቲዴስ።
2CH 31:15 ቄሴቲ ዴኢዛ ካታማታን ጊታፔ ጉꬅ ጋካናስ ዲዛ ባንታ ኢሻታስ ኣማኔቲዲ ኢስታ ኦሶ ማራ ማላ ሻኪ ሻኪ ኢማናስ ኤዴኔ፥ ሚኒያሚኔ፥ ኢያሶ፥ ሻማኤ፥ ኣማሪያኔ ሻካኒያይ ቆሬፔ ጋርሳራ ሹሚዳ።
2CH 31:16 ሄሳፌ ቦላራ ኢስታስ ሱንꬃይ ኢስታስ ዬሌታ ማዝጋቤን ጻፌቲዳይቲኔ ሃች ሃች ዱማ ዱማ ኦሶታ ኦꬃናስ ኢሜቲዳ ኣላፌቴꬃ ማራኒኔ ኢስታስ ኢሜቲዳ ኦሳ ፖላናስ ጾሳ ኬꬅ ጌላናስ ዳንዳይዛይታስ፥ ኢስታስ ላይꬃይ ሄꬑኔ ሄሳፌ ቦላራ ጊዲዳ ኣቱማ ናይታስ ጊሺዳ።
2CH 31:17 ባንታ ኣዋታ ኬꬃን ኬꬃን ቆዴቲ ኡቲዳ ቄሴታስካ ኢሚዳ፤ ቃሴ ላይꬃይ ናምኡ ታማኔ ሄሳፌ ቦላራ ጊዲዳ ሌዌታስ ኢስታስ ኢሜቲዳ ኣላፌቴꬃ ማራኒኔ ኢስታስ ኢሜቲዳ ኦሶዛ ማላ ሻኪ ሻኪ ኢሚዳ።
2CH 31:18 ሃ ዬሌታ ማዝጋባን ዲዛ ኩሜꬃ ኢስራኤሌ ማባራስ ቄሪ ናይታስ፥ ኣቱማ ናይታሲኔ ማጫ ናይታስ ኢማናስ ባና ኣማኔቴꬃን ዱማሲዳ።
2CH 31:19 ቃሴ ባንታ ካታማታ ዩሾን ዲዛ ጎሻ ጋዴታን ዎይኮ ሃራ ካታማታን ዲዛ ኣሮኔ ዛርኬ ጊዲዳ ቄሴታስ፥ ቄሴታ ዛሬ ጊዲዳ ኣቱማ ኣሳታ ኡባሲኔ ባንታ ዬሌታን ቆዴቲዳ ሌዌታ ኡባስ ኢስታ ጋኪዳ ቁማ ሻካናስ ኣሳቲ ሹሜቲዳ።
2CH 31:20 ካዎ ሂዝቂያሲ ጎዳ ባ ጾሳ ሲንꬃን ሱሬ፥ ሎኦኔ ቱማ ጊዲዳ ሚሽ ዩሁዳ ቢታ ኡባን ኦꬂዴስ።
2CH 31:21 ሂዝቂያሲ ጾሳ ኬꬃስ ኦꬂዳ ኦሶ ኡባን ዎጋኒኔ ኣዛዞን ጻፌቲዳይሳ ማላ ጾሳ ባ ኩሜꬃ ዎዚናፔ ኮዪዳ ጊሻስ ኢዛስ ኡባ ሚሺ ኢንጄቲዴስ።
2CH 32:1 ካዎ ሂዝቂያሲ ጎዳስ ኣማኔቲዲ ሃ ኦሶታ ኦꬂ ፖሊዳፔ ጉዬን ኣሶሬ ካዎ ሴናኪሬሜይ ዩሁዳ ቢታ ቦላ ዎራጂዴስ፤ ሂስቲዲ ባስ ኦይካናስ ቆፒዲ ጊምቤቲ ኡቲዳ ካታማታ ዶዲዴስ።
2CH 32:2 ሴናኪሬሜይ ዬሩሳላሜ ኦላናስ ቆፒዲ ዪዳይሳ ሂዝቂያሲ ቤኢዳ ዎዴ፥
2CH 32:3 ካታማፔ ካሬራ ጎጊዛ ፑልቶ ሃꬃ ዜራናስ ባ ኦሳንቻታኔ ባ ሚኖ ኣሳታ ዞሬ ቤሲን ኢስቲ ኢዛ ማዲዳ።
2CH 32:4 ሄሳ ጊሻስ ዳሮ ኣሳቲ ሺቂዲ፥ «ኣሶሬ ካዎቲ ዪዲ ኣይ ሃꬂካ ዴሞፌቶ» ጊዲ ሄ ሄራን ዴኢዛ ፑልቶ ሃꬃታ ቱጪዳ፤ ጎጊዛ ሻፋታካ ጎርዲዳ።
2CH 32:5 ሄሳፌ ጉዬ ሂዝቂያሲ ሚኒ ኦꬂዲ ላሌቲዳ ዲርሳ ጊምቤዛ ኡባ ዛሬꬂዲ ጊምቢዴስ፤ ሂስቲዲ ኢዛ ቦላ ሻኮታ ኬጺዴስ፤ ሄ ዲርሳ ጊምቤዛፔ ካሬ ባጋራ ሃራ ዲርሳ ጊምቢዴስ፤ ቃሴ ዳዊቴ ካታማ ጊምቤይ ኩንዶንታ ማላ ካሬ ባጋራ ኬጪዴስ፤ ዳሮ ኦላ ማሳራታኔ ጎንዳሌታ ኦꬂዴስ።
2CH 32:6 ሂስቲዲ ኦላ ጋዳዋታ ኣሳ ቦላ ሹሚዴስ፤ ኢስታ ኡባ ካታማ ፔንጌዛ ማታን ዲዛ ዴምባን ሺሺዲ፥
2CH 32:7 «ሃያና ሚኒቴ! ጻላ ጊዲቴ! ኑናራ ዲዛይሲ ኢስታራ ዲዛይሳፌ ኣꬌስ፤ ሄሳ ጊሻስ ኣሶሬ ካዎሲኔ ኢዛ ኦላንቻታስ ባቦፍቴ፤ ዳጋሞፍቴ።
2CH 32:8 ኢዛራ ዲዛይቲ ኣሾ ማይኢዳ ኣስ ጊዲሺን ኑናራ ዲዛይ ጊዲኮ ኑና ማዲዛኔ ኑ ሞርኬታ ኦሊዛ ጎዳ ኑ ጾሳ» ጊዲ ሚንꬄꬂዴስ። ዩሁዳ ካዎ ሂዝቂያሲ ዮቲዳ ቃላን ኣሳይ ሚኔቲዴስ።
2CH 32:9 ሄሳፌ ጉዬ ኣሶሬ ካዎ ሴናኪሬሜይ ባ ኦላንቻታ ኡባራ ኢሲፌ ላኪሼ ካታማ ዶዲዲ ዩሁዳ ካዎ ሂዝቂያሳኮኔ ዬሩሳላሜን ዴኢዛ ዩሁዳ ኣሳ ኡባኮ ቃስታኔ ኣስ ኪቲዴስ።
2CH 32:10 ሂስቲዲ፥ «ኣሶሬ ካዎ ሴናኪሬሜይ፥ ‹ኢንቴኖ ሃ ዶዴቲ ኡቲዳ ዬሩሳላሜ ካታማን ዴኢዛ ኣሳቶ! ኦናን ኣማኔቴቲ?› ጊዴስ።
2CH 32:11 ሂዝቂያሲ፥ ‹ጎዳ ኑ ጾሳይ ኑና ኣሶሬ ካዎ ኩሼፔ ኣሻና› ጊሼ ኢንቴና ባሌꬂዲ ኮሻኒኔ ሳሞን ዬጋናስ ጊዴኔ?
2CH 32:12 ጎይኒዛ ꬎቃሶሆታኔ ያርሾ ያርሺዛሶሆታ ዲጊዲ ዩሁዳ ኣሳኔ ዬሩሳላሜ ኣሳ፥ ‹ኢንቴ ኢሲሶን ያርሺቴኔ ጎይኒቴ› ጊዳይ ሃ ሂዝቂያሳ ጊዴኔ?
2CH 32:13 «ታኒኔ ታ ኣዋቲ ሃራ ዴሬ ካዎቴꬃታ ኡባ ቦላ ኦꬂዳይሳ ኢንቴ ኤሬኬቲ? ሄ ካዎቴꬃታ ጾሳቲ ባንታ ቢታ ታ ኩሼፔ ኣሻናስ ዳንዳይዶ?
2CH 32:14 ታ ኣዋቲ ꬋይሲዳ ሃ ካዎቴꬃታ ጾሳታ ኡባ ጊዶን ባ ኣሳ ታ ኩሼፔ ኣሻናስ ዳንዳይዳይ ኦኔ? ሂስቲን ኢንቴ ጾሳይ ኢንቴና ታ ኩሼፔ ዎስቲ ኣሻናስ ዳንዳይዜ?
2CH 32:15 ሄሳ ጊሻስ ሃኢካ ሂዝቂያሲ ኢንቴና ባሌꬆፎ ዎይኮ ሃይሳꬆ ጪሞፎ፤ ኣይስ ጊኮ ኢዛ ኣሳ ታ ኩሼፔ ዎይኮ ታ ኣዋታ ኩሼፔ፥ ኣዋ ዴሬ ኣሳ ዎይኮ ካዎቴꬃታ ጾሳቲ ባንታ ዴራ ኣሻናስ ዳንዳይዳይ ባይንዳ ጊሻስ ሂዝቂያሳን ኣማኔቶፍቴ፤ ሂስቲን ኢንቴ ጾሲ ኢንቴና ታ ኩሼፔ ኣሻናስ ዋኒ ዳንዳይዜ?» ጊዴስ።
2CH 32:16 ሴናኪሬሜ ሹሜቲ ጎዳ ቦላኔ ኢዛ ኣይሌ ሂዝቂያሳ ቦላ ሃራ ዳሮ ኢታ ሚሺካ ሃሳይዳ።
2CH 32:17 ሳናኪሬሚ ቃሴካ ጎዳ ኢስራኤሌ ጾሳ ጫዪሼ፥ «ሳኣ ቦላን ዴኢዛ ካዎቴꬃታ ጾሳቲ ባንታ ኣሳ ታ ኩሼፔ ኣሻናዉ ዳንዳዮንታ ኣጊዳ ማላ ሂዝቂያሳ ጾሳይካ ባ ኣሳ ታ ኩሼፔ ኣሼና» ጊዛ ዳብዳቤ ጻፊዴስ።
2CH 32:18 ሴናኪሬሜ ኦሳንቻቲ ካታማ ዲኣናስ ኮዪዲ ዲርሳ ጊምቤዛ ቦላ ኡቲዳ ዬሩሳላሜ ኣሳ ያሺሳናሲኔ ዳጋንꬃናስ ባንታ ጬንጉርስ ꬎቁ ሂስቲዲ ኢብራዌታ ቃላን ዋሲዳ።
2CH 32:19 ኣሳ ኩሼን ኦሴቲዳ ኤቃ ጾሳታ ቦላ ሃሳይዳ ማላ ዬሩሳላሜ ጾሳ ቦላካ ሃሳይዳ።
2CH 32:20 ሄሳፌ ጉዬ ካዎ ሂዝቂያሲኔ ኣሞጼ ና ናቤ ኢሳያሲ ሃይሳ ጊሻስ ዎሲሼ ፑዴ ሳሎ ዋሲዳ።
2CH 32:21 ሂስቲን ጎዳይ ኪታንቻ ዬዲዲ ኣሶሬ ካዎይ ዱንካኒዳሶን ዴኢዛ ኦላንቻታ፥ ኦላ ጋዳዋታኔ ሃላቃታ ꬋይሲዴስ፤ ሄሳ ጊሻስ ኣሶሬ ካዎዚ ካዉዪዲ ባ ዴሬ ሲሚዴስ፤ ሂስቲዲ ባ ኤቃ ጾሳ ኬꬅ ጌሊዳ ማላ ኢዛ ኣቱማ ናይቲ ኢዛ ጊꬃ ማሻን ሲፊዳ።
2CH 32:22 ሄሳꬆ ኦꬂዲ ጎዳይ ሂዝቂያሳኔ ዬሩሳላሜን ዴኢዛ ኣሳ ኣሶሬ ካዎ ሴናኪሬሜ ኩሼፔኔ ሃራ ሞርኬታ ኡባ ኩሼፔ ኣሺዴስ፤ ሂስቲዲ ኢስታ ዩሾን ዲዛ ኣሳ ኡባፌ ኢስታ ናጊዴስ።
2CH 32:23 ዳሮ ኣሳቲ ጎዳስ ኢሞታ ቃሴ ዩሁዳ ካዎ ሂዝቂያሳሲካ ኢሞታ ኤኪዲ ዬሩሳላሜ ዪዳ፤ ሄ ዎዴፔ ዶሚዲ ካዎቴꬃታ ኡባ ሲንꬃን ሂዝቂያሲ ꬎቁ ꬎቁ ጊዴስ።
2CH 32:24 ሄ ዎዴ ሂዝቂያሲ ሃርጊዲ ሃይቃና ማቲዴስ፤ ሄሳ ጊሻስ ጎዳ ዎሲን ጾሲ ኢዛ ፓꬃናስ ማላታራ ዛሮ ኢሚዴስ።
2CH 32:25 ጊዶ ኣቲን ሂዝቂያሲ ኦቶሬቲዳ ጊሻስ ጎዳይ ኢዛስ ኪዪዳ ኪያቴꬃ ጊሻስ ኢዛ ጋላቲቤና፤ ሄሳ ጊሻስ ኢዛ ቦላ፥ ዩሁዳ ቦላኔ ዬሩሳላሜ ቦላ ጎዳ ሃንቆይ ዎꬊዴስ።
2CH 32:26 ጊዲኮካ ሂዝቂያሲኔ ዬሩሳላሜን ዲዛ ኣሳይ ባ ዎዚና ኦቶሬቴꬃ ኣጊዲ ባና ካዉሺዳ፤ ሄሳፌ ጉዬ ጎዳ ሃንቆይ ሂዝቂያሳ ካዎቴꬃ ዎዴ ኡባን ኢስታ ቦላ ዎꬊቤና።
2CH 32:27 ሂዝቂያሳስ ኬሂፔ ዳሮ ዱሬቴꬂኔ ቦንቾይ ዲዛ ጊሻስ ቢራስ፥ ዎርቃስ፥ ኣልኦ ሹቻስ፥ ሳዎስ፥ ጎንዳሌሲኔ ሃራ ኣልኦ ሚሻ ኡባስ ሚንጃ ኬꬅ ኬጺዴስ።
2CH 32:28 ሄሳꬆካ ካꬅ፥ ዎይኔ ኡሺኔ ዛይቴ ዎꬃና ኬꬃታኔ ዱማ ዱማ ሜሄታ፥ ዶርሳታኔ ዴይሻታ ዎꬃና ኬꬅ ኬጺዴስ።
2CH 32:29 ጾሳይ ኢዛስ ዳሮ ዱሬቴꬅ ኢሚዳ ጊሻስ ካታማታ ኬጺዲ ዳሮ ዴይሻ፥ ዶርሳ ዉዴታኔ ዳሮ ሜሄታ ሺሺዴስ።
2CH 32:30 ሂዝቂያሲካ ፑዴ ባጋራ ዲዛ ጊዮኔ ፑልቶ ሃꬃ ቴቂዲ ዛሪ ዛሪዲ ዱጌ ዛሪ ኣርሼይ ዉሊዛ ባጋ ዱጌ ዳዊቴ ካታማ ዬዲዴስ፤ ኢዚ ኦꬂዳይሲ ኡባይ ሎኦ ፖሌቲዴስ።
2CH 32:31 ጊዶ ኣቲን ዩሁዳ ቢታን ሃኒዳ ማላሊሲዛ ማላታ ጊሻስ ኦይቻናስ ባቢሎኔ ሃሪዛይቲ ኪቲዳ ኣሳቲ ሂዝቂያሳኮ ዪዳ ዎዴ ጾሲ ኢዛ ፓጫናሲኔ ኢዛ ዎዚናን ዲዛይሳ ኡባ ኤራናስ ኢዛ ዬዲ ቤሲዴስ።
2CH 32:32 ሂዝቂያሲ ባ ካዎቴꬃ ዎዴን ኦꬂዳ ኦሶቲኔ ኢዚ ጾሳስ ኦꬂዳ ሎኦ ኦሶቲ ኣሞጼ ና ናቤ ኢሳያሳ ቲንቢቴ ማጻፋን፥ ዩሁዳ ካዎታ ማጻፋኒኔ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
2CH 32:33 ሂዝቂያሲ ካሴ ባ ኣዋታ ማላ ሃይቂዲ ካሴ ዳዊቴ ዛሬቲ ሞጌቲዛ ꬎቃሶሆን ሞጌቲዴስ፤ ኢዚ ሃይቂን ዩሁዳ ኣሳይ ኡባይኔ ዬሩሳላሜን ዲዛ ኣሳይ ኡባይ ኢዛ ቦንቺዴስ፤ ኢዛ ና ሚናሴይ ኢዛሶሆን ካዎቲዴስ።
2CH 33:1 ሚናሴይ ካዎቲዛ ዎዴ ኢዛስ ላይꬃይ 12፤ ኢዚ ዬሩሳላሜን 55 ላይꬅ ካዎቲዴስ።
2CH 33:2 ጎዳይ ኢስራኤሌ ኣሳ ሲንꬃፌ ጎዲ ኬሲዳ ኣሳቲ ኦꬂዛ ሄ ሃራሲዛ ሎሴታ ካሊዲ ኢዚካ ጎዳ ሲንꬃን ኢታ ሚሽ ኦꬂዴስ።
2CH 33:3 ሚናሴይ ባ ኣዋ ሂዝቂያሲ ላሊዳ ጎይኒዛ ꬎቃሶሆታ ዛሬꬂዲ ኬጺዴስ፤ ባኣሌስ ያርሺዛሶሆታኔ ኣሼሮ ጌቴቲዛ ኤቃ ጾሳይ ሚስሌታ ሜꬊዴስ፤ ቃሴ ሳሎ ጾሊንቴታ ኡባሲካ ሆኪ ጎይኒዴስ።
2CH 33:4 ጎዳይ፥ «ታ ሱንꬃይ ሜርናስ ዬሩሳላሜን ዴኣና» ጊ ዎꬂዳ ጾሳ ኬꬃን ሚናሴይ ኤቃ ጾሳታስ ያርሺዛሶሆታ ጊግሲዴስ።
2CH 33:5 ጾሳ ኬꬃን ዴኢዛ ናምኡ ዛጎታን ሳሎ ጾሊንቴታ ኡባስ ያርሺዛሶሆታ ጊግሲዴስ።
2CH 33:6 ሄኖሜ ና ሾባን ባ ኣቱማ ናይታ ታማን ጹጊዲ ያርሺዴስ፤ ኢዚ ባ ሁኤንካ ቢቲዛዴ፥ ጎጂዛዴኔ ማሮꬂዛዴ ጊዲዲ ሞይቲሌ ጼይጊዛይታኔ ኢታ ኣያናታራ ሃሳዬቲዛይታ ዞሬ ኦይቺዴስ፤ ጎዳ ሲንꬃን ኢዚ ዳሮ ኢታ ሚሽ ኦꬂዲ ኢዛ ሃንቄꬂዴስ።
2CH 33:7 ሄሳፌ ጉዬ ባ ሜꬊዳ ኤቃ ሚስሌዛ ጾሳ ኬꬃ ጊዶን ኤሲዴስ፤ ሄ ጾሳ ኬꬃይ ጾሲ ዳዊቴሲኔ ኢዛ ና ሶሎሞኔስ፥ «ሃ ጾሳ ኬꬃኒኔ ኢስራኤሌ ኡባ ጊዶፌ ታኒ ዶሪዳ ዬሩሳላሜን ታኒ ታ ሱንꬃ ሜርናስ ጼይጊሳና።
2CH 33:8 ታኒ ኢስራኤሌ ኣሳ ሙሴ ባጋራ ኣዛዚዳ ኣዛዞ፥ ዎጋኔ ማራ ኡባ ኢስቲ ናጊ ፖሊኮ ታኒ ኢስታ ኣዋታስ ኢሚዳ ቢታፌ ኢስታ ቶሆ ሾዲሲኬ» ጊዴስ።
2CH 33:9 ጊዶ ኣቲን ሚናሴይ ዩሁዳ ኣሳኔ ዬሩሳላሜ ኣሳ ባሌꬂዴስ፤ ሂስቲን ኢስታ ጎዳይ ኢስራኤሌ ኣሳ ሲንꬃፌ ꬋይሲዳ ካዎቴꬃቲ ኦꬂዳ ኢታፔ ኣꬊዳ ኢታ ኦꬂዳ።
2CH 33:10 ጎዳይ ሚናሴሲኔ ኢዛ ኣሳስ ሃሳይዴስ፤ ጊዶ ኣቲን ኢስቲ ኢዛ ሃሳያ ሲዮንታ ኢጺዳ።
2CH 33:11 ሄሳ ጊሻስ ጎዳይ ኣሶሬ ካዎ ኦላ ጋዳዋታ ኢስታ ቦላ ዴንꬂዴስ፤ ሂስቲን ኢስቲ ሚናሴ ሲꬌን ዳፎ ኣꬂዳ፤ ጻርቂማላ ሳንሳላታን ቃቺዲ ባቢሎኔ ቢታ ኤፊዳ።
2CH 33:12 ሚናሴይ ቱጋቲዳ ዎዴ ጎዳ ባ ጾሳ ኮዪዴስ፤ ባ ኣዋታ ጾሳ ሲንꬃን ባናቴꬃ ኬሂፔ ካዉሺዴስ።
2CH 33:13 ሚናሴይ ጾሳ ዎሲዳ ዎዴ ጾሳይ ኢዛስ ዎሴቲዴስ፤ ኢዛ ዋትዋቶዛካ ሲዪዴስ፤ ሂስቲዲ ዬሩሳላሜን ኢዛ ካዎቴꬃን ዛሪ ዎꬂዴስ። ሄሳን ጎዳይ ኢዚ ጾስ ጊዲዳይሳ ሚናሴይ ኤሪዴስ።
2CH 33:14 ሄሳፌ ጉዬ ሚናሴይ ዙሌን ዲዛ ጊዮኔ ፑልቶዛስ ኣርሼይ ዉሊዛ ባጋፌ ዶሚዲ ሞሌ ፔንጌ ጋካናስ ዲዛ ዳዊቴ ካታማስ ካሬ ባጋራ ዲዛ ጊምቤዛ ኦፌሌ ዙምቡላ ጊዶ ዬጊዲ ካሴይሳፌ ꬎቁ ሂስቲ ጊምቢዴስ፤ ጊምቤቲ ኡቲዳ ዩሁዳ ካታማታ ኡባን ኦላ ጋዳዋታ ዎꬂዴስ።
2CH 33:15 ኣላጋ ጾሳታኔ ኤቃ ሚስሌ ጾሳ ኬꬃፌ ዲጊዴስ፤ ጾሳ ኬꬃን ዲዛ ዙምቡላ ቦላኔ ዬሩሳላሜን ኢዚ ኦꬂዳ ያርሾሶታ ኡባ ላሊዴስ፤ ሄ ካታማፔ ካሬ ኬሲ ኦሊዴስ።
2CH 33:16 ቃሴካ ሚናሴይ ጎዳስ ያርሺዛሶዛ ኦራጺሲዴስ፤ ኢሲፌቴꬃ ያርሾኔ ጋላታ ያርሾ ኢዛን ያርሺዴስ፤ ዩሁዳ ኣሳካ ጎዳስ ኢስራኤሌ ጾሳስ ጎይናና ማላ ኣዛዚዴስ።
2CH 33:17 ኣሳይ ጎይኒዛ ዙምቡላታ ቦላ ያርሾ ያርሺዛይሳ ኣጎንታ ኢጺኮካ ኢስቲ ያርሺዛይ ኢሲ ጎዳ ባንታ ጾሳሳ።
2CH 33:18 ሚናሴይ ባ ካዎቴꬃ ላይꬃታን ኦꬂዳ ኦሶቲ፥ ኢዚ ባ ጾሳ ዎሲዳ ዎሳይኔ ጎዳ ኢስራኤሌ ጾሳ ሱንꬃን ናቤቲ ኢዛስ ዮቲዳይሲ ኢስራኤሌ ካዎታ ታሪኬ ማጻፋን ጻፌቲ ኡቲዴስ።
2CH 33:19 ቃሴ ኢዛ ዎሳይኔ ጾሳይ ኢዛስ ዎሴቲዳይሲ፥ ኢዚ ኦꬂዳ ናጋራይኔ ናቆይ ኡባይ ሚናሴይ ባና ካዉሻናፔ ካሴ ኦꬂዳ ዙምቡላታ ቦላ ጎይኒዛሶቲ፥ ኢዚ ኤሲዳ ኣሼሪ ሚስሌቲኔ ኤቃ ጾሳቲ ኡባይ ናቤታ ታሪኬ ማጻፋን ጻፌቲ ኡቲዳ።
2CH 33:20 ሚናሴይ ባ ኣዋታꬆ ሃይቂዴስ፤ ሂስቲን ሚናሴ ኢዛ ካዎቴꬃ ኬꬃን ሞጊዳ፤ ኢዛ ና ኣሞኔይ ኢዛሶሆን ካዎቲዴስ።
2CH 33:21 ኣሞኔይ ካዎቲዛ ዎዴ ኢዛስ ላይꬃይ 22፤ ኢዚ ዬሩሳላሜን ናምኡ ላይꬅ ካዎቲዴስ።
2CH 33:22 ኢዛ ኣዋ ሚናሴይ ኦꬂዳ ማላ ኢዚካ ጎዳ ሲንꬃን ኢታ ሚሽ ኦꬂዴስ፤ ኢዛ ኣዋ ሚናሴይ ኦሲሲዳ ኤቃ ሚስሌታ ኡባስ ጎይኒዴሲኔ ኢስታስ ያርሺዴስ።
2CH 33:23 ጊዶ ኣቲን ኢዛ ኣዋ ሚናሴይ ባናቴꬃ ካዉሺዳ ማላ ኢዚ ባናቴꬃ ጎዳ ሲንꬃን ካዉሺቤና፤ ኣሞኔይ ሞሮ ቦላ ሞሮ ጌዴ ጉጂ ጉጂ ቢዴስ።
2CH 33:24 ኣሞኔ ሹሜቲ ኢዛ ቦላ ማቄቲዲ ኢዛ ካዎቴꬃ ኬꬃ ጊዶን ኢዛ ዎꬊዳ።
2CH 33:25 ሄሳፌ ጉዬ ሄ ዴሬ ኣሳቲ ካዎ ኣሞኔ ቦላ ማቄቲዲ ኡባታ ዎꬊዳ፤ ሂስቲዲ ኣሞኔ ሶሆን ኢዛ ና ኢዮሲያሳ ካዎꬂዳ።
2CH 34:1 ኢዮሲያሲ ካዎቲዛ ዎዴ ኢዛስ ላይꬃይ 8፤ ኢዚ ዬሩሳላሜን 31 ላይꬅ ካዎቲዴስ።
2CH 34:2 ኢዮሲያሲ ጎዳ ሲንꬃን ሱሬ ሚሽ ኦꬂዴስ፤ ኡሻቺኔ ሃዲርስ ጎንታ ባ ኣዋ ዳዊቴ ኦጌራ ቢዴስ።
2CH 34:3 ኢዚ ካዎቲዳ ኦስፑንꬃ ላይꬃን ቡሮ ዬላጋ ዲሼ ባ ኣዋ ዳዊቴ ጾሳስ ጎይኖ ዶሚዴስ፤ ቃሴካ ኢዚ ካዎቲዳ ታማን ናምኣንꬆ ላይꬃን ዙምቡላታ ቦላ ጎይኒዛሶታ፥ ኣሼሮ ጌቴቲዛ ኤቃ ጾሳይ ሚስሌታ ማሲ ጊግሲዳኔ ሴሪሲ ሜꬊዳ ሚስሌታ ዩሁዳፔኔ ዬሩሳላሜፔ ꬋይሶ ዶሚዴስ።
2CH 34:4 ኢዛ ኣዛዞን ኣሳይ ባኣሌስ ያርሺዛሶሆታኔ ኢስታ ቦላ ዲዛ ኤጻኔ ጩዋሲዛሶታካ ላሊዳ፤ ኣሼሪ ሚስሌታ፥ ማሲ ጊግሲዳ ኤቃታኔ ሴሪሲ ሜꬊዳ ሚስሌታ ኪንቼሬꬂ ሊቂሲዲ ኢስታስ ያርሺዛ ኣሳታ ዱፎ ቦላ ላሊዳ።
2CH 34:5 ቃሴ ኢዮሲያሲ ኢስታ ቄሴታ ሜቄꬅ ሄ ኢስቲ ጎይኒዛ ያርሾሶታ ቦላ ጹጊዴስ፤ ሂስቲዲ ዩሁዳኔ ዬሩሳላሜ ጌሺዴስ።
2CH 34:6 ሚናሴ ቢታን፥ ኤፍሬሜ ቢታኒኔ ሲሞና ቢታን ቢዲ ኒፍታሌሜ ቢታ ጋካናስ ዴኢዛ ካታማታኔ ላሌቲዳ ሶሆታ ኡባን ሄሳꬆ ኦꬂዴስ።
2CH 34:7 ኢዮሲያሲ ያርሺዛሶሆታ፥ ኣሼሪ ሚስሌታኔ ኤቃ ሚስሌታ ኪንቼሬꬂ ሊቂሲዴስ፤ ኢስራኤሌ ቢታን ኡባን ኤጻኔ ጩዋሲዛ ሚሻታ ኡባ ሜንꬄሬꬂዴስ፤ ሄሳፌ ጉዬ ኢዮሲያሲ ዬሩሳላሜ ሲሚዴስ።
2CH 34:8 ኢዮሲያሲ ካዎቲዳ ታማን ኦስፑንꬃ ላይꬃን ቢታኔ ጾሳ ኬꬃ ጌሺዳፔ ጉዬ ጎዳ ባ ጾሳ ኬꬃ ኦራጺሳና ማላ ኣጻሊያ ና ሳፋኔ፥ ዬሩሳላሜ ካታማ ሃሪዛ ማኢሳያኔ ኢዮኣካዜ ና፥ ዋና ጻፌዛ ዮኣሃ ኪቲዴስ።
2CH 34:9 ኪቴቲዳይቲ ኡባታ ሃላቃ ቄሴ ሂልቂያሳኮ ዪዳ፤ ፔንጌ ናጊዛ ሌዌቲ ሚናሴፔ፥ ኤፍሬሜፔ፥ ኣቲዳ ኢስራኤሌ ኣሳ ኡባፌ፥ ዩሁዳፔ፥ ቢኒያሜፔኔ ዬሩሳላሜን ዲዛይታፔ ካሴ ሺሺዲ ጾሳ ኬꬃስ ኤሂዳ ሚሻ ሂልቂያስ ኢሚዳ።
2CH 34:10 ሄሳፌ ጉዬ ኢስቲ ጾሳ ኬꬃ ኦራጺሲ ኬጻናስ ኣላፌቴꬂ ኢሜቲዳ ኣሳታስ ኢሚዳ፤ ኢስቲካ ጾሳ ኬꬃ ኦራጺሲ ኬጺዳይታስ ጪጊዳ።
2CH 34:11 ቃሴ ዩሁዳ ካዎቲ ላሊዳ ጊምቤ ኬꬃ ሎኤꬃናስ ማሴቲዳ ሹቻታኔ ሚꬅ ሻማና ማላ ኣናጼታሲኔ ጊምቤ ጊምቢዛይታስ ኢሚዳ።
2CH 34:12 ኢስቲካ ኦሶዛ ኣማኔቴꬃን ኦꬂዳ፤ ኢስታ ኣዋቴꬃን ኦሲሲዛ ሌዌቲ ሜራሬ ዛርኬፌ ያሃቴኔ ኣብዲዩ፥ ቃኣቴ ዛርኬፌ ማሹላሜኔ ዛካራሳ። ዬꬃ ሚሽ ሎኤꬂ ኤሪዛ ሌዌቲ ኡባይ፥
2CH 34:13 ዎልቃ ኦሶ ኦꬂዛይታስ ኣላፌ ጊዲዲ ዱማ ዱማ ኦሶስ ሱሚዳይታ ኦሲሴቴስ፤ ቃሴ ኣማርዳ ሌዌቲ ጻፌታ፥ ሃላቃታኔ ፔንጌ ናጊዛይታ ጊዲዳ።
2CH 34:14 ኢስቲ ጾሳ ኬꬅ ጌሊዳ ሚሻ ኬሲዛ ዎዴ ቄሴ ሂልቂያይ ጎዳይ ሙሴ ባጋራ ኢሚዳ ዎጋ ማጻፋ ዴሚዴስ።
2CH 34:15 ሂልቂያሲ ጻፌ ሳፋኔስ፥ «ታኒ ጾሳ ኬꬃፌ ሃይሳ ዎጋ ማጻፋዛ ዴማዲስ» ጊዲ ሄ ማጻፋ ሳፋኔስ ኢሚዴስ።
2CH 34:16 ሳፋኔይካ ማጻፋ ካዎዛኮ ኤፊዲ፥ «ኔ ሹሜቲ ኔ ኣዛዚዳ ኣዛዞ ኡባ ኦꬄቴስ።
2CH 34:17 ጾሳ ኬꬃን ዲዛ ሚሻ ኡባ ኤኪዲ ኦሲሲዛ ኣላፌታሲኔ ኦሳንቻታስ ኢሚዳ» ጊዲ ዮቲዴስ።
2CH 34:18 ቃሴካ ጻፌ ሳፋኔይ ካዎዛስ፥ «ቄሴ ሂልቂያሲ ታስ ማጻፋ ኢሚዴስ» ጊዴስ፤ ሳፋኔይካ ማጻፋዛ ካዎዛ ሲንꬃን ናባቢዴስ።
2CH 34:19 ካዎዚ ዎጋ ማጻፋ ቃላይ ናባቤቲን ሲዪዲ ጬጪሼ ባ ማይኦ ዳኪዴስ፤
2CH 34:20 ሄሳፌ ጉዬ ካዎይ ሂልቂያሳስ፥ ሳፋኔ ና ኣኪቃሜስ፥ ሚኪያሳ ና ኣብዶኔስ፥ ጻፌ ሳፋኔሲኔ ካዎ ኦሳንቻ ኣሳያስ ሃይሳፌ ካሊዛ ኣዛዞታ ኢሚዴስ።
2CH 34:21 ኢዚ ኢስታስ፥ «ቢዲ ታ ጊሻስ፥ ኢስራኤሌኒኔ ዩሁዳን ኣቲዳ ኣሳ ጊሻስ፥ ሃ ቤቲዳ ማጻፋ ጊዶን ጻፌቲዳ ቃላ ጊሻስ ጎዳ ኦይቺቴ፤ ካሴ ኑ ኣዋቲ ጾሳ ዎጋስ ኣዛዜቶንታ ኢጺዳ ጊሻሲኔ ሃ ማጻፋን ጻፌቲዳ ዎጋ ማላ ሲሜሬቶንታ ኣጊዳ ጊሻስ ኑ ቦላ ኬሂ ጊታ ሃንቆይ ጾሳፌ ዪዴስ» ጊዴስ።
2CH 34:22 ሂስቲን ሂልቂያሲኔ ካዎይ ኪቲዳ ኣሳቲ ናቤ ሁልዳኒኮ ቢዳ፤ ሁልዳና ሃሲራሃ ና፥ ቲቂዋ ና፥ ጾሳ ኬꬃ ማይኦ ናጊዛ ሻሎሜ ማቾ። ኢዛ ፑዴሃ ባጋራ ዬሩሳላሜ ካታማን ዴኣዉስ። ሄ ቢዳ ኣሳቲ ኢዚስ ሃ ዮኦዛ ቆንጪሲ ዮቲዳ።
2CH 34:23 ናቤያካ ኢስታስ፥ «ጎዳ ኢስራኤሌ ጾሳይ፥ ‹ኢንቴና ታኮ ኪቲዳ ኣዴዛስ ዮቲቴ› ጌስ።
2CH 34:24 ጎዳይ ‹ቤኢቴ፥ ዩሁዳ ካዎ ሲንꬃን ናባቤቲዳ ማጻፋን ጻፌቲዳ ኢታ ቃንጌꬅ ኡባ፥ ሃ ሶሆዛ ቦላኔ ሃ ሶሆዛን ዲዛ ኣሳ ቦላ ኤሃና ሃናይስ።
2CH 34:25 ኢስቲ ታና ኣጊዲ ሃራ ጾሳታስ ኤጻኔ ጩዋሲዳ፤ ሂስቲዲ ኢስቲ ባንታ ኩሼን ኦꬂዳ ኦሶ ኡባን ታና ሃንቄꬂዳ፤ ሄሳ ጊሻስ ታ ሃንቆይ ሃይሳ ሃ ሶሆዛ ቦላ ኤጺ ኬዛና፤ ሙሌካ ቶኤና› ጌስ።
2CH 34:26 «ጎዳ ኦይቻናስ ኢንቴና ኪቲዳ ዩሁዳ ካዎ፥ ‹ኔ ሲዪዳ ቃላ ጊሻስ ጎዳ ኢስራኤሌ ጾሳይ፥
2CH 34:27 ሃ ሶሆዛ ቦላኔ ሃ ሶሆን ዲዛ ኣሳ ቦላ ጾሳይ ሃሳይዳይሳ ኔኒ ሲዪዳ ዎዴ ኔ ዎዚናይ ሜቂን ታ ሲንꬃን ኔናቴꬃ ኔ ካዉሺዳ ጊሻስ፥ ኔና ኔ ዚቂ ሂስቲዳ ጊሻሲኔ ኔ ማይኦ ዳካዳ ታ ሲንꬃን ኔ ዬኪዳ ጊሻስ ታኒ ኔ ዋሶ ሲያዲስ።
2CH 34:28 ሄሳ ጊሻስ ታኒ ኔና ኔ ኣዋታኮ ጋꬃና፤ ኔካ ሳሮን ሞጌታና፤ ታኒ ሃ ሶሆዛ ቦላኔ ሃይሳን ዲዛ ኣሳ ቦላ ኤሃና ኢታ ሚሽ ኔ ኣይፌይ ቤኤና› ጌስ» ጋዱስ። ኢዛ ጊዳ ቃላ ኤኪ ቢዲ ካዎዛስ ዮቲዳ።
2CH 34:29 ሄሳፌ ጉዬ ካዎ ኢዮሲያሲ ኪቲዲ ዩሁዳ ጪማታኔ ዬሩሳላሜ ጪማታ ኡባ ሺሺዴስ።
2CH 34:30 ካዎይ ጾሳ ኬꬅ ፑዴ ኬዚዴስ፤ ዩሁዳ ኣሳይ ኡባይ፥ ዬሩሳላሜን ዲዛ ኣሳይ፥ ቄሴቲኔ ሌዌቲ፥ ጉꬃፌ ጊታ ጋካናሲ ዲዛ ኣሳይ ኡባይ ኢዛራ ኢሲፌ ፑዴ ኬዚዳ። ጾሳ ኬꬃፌ ቤቲዳ ጫቆ ቃላ ማጻፋ ካዎይ ኢስቲ ሲዪሺን ናባቢዴስ።
2CH 34:31 ሄሳፌ ጉዬ ካዎይ ባ ቱሳ ማታን ኤቂዲ ጎዳ ካላና ማላ ኢዛ ዎጋ፥ ኣዛዞኔ ማራ ባ ኩሜꬃ ዎዚናኒኔ ባ ኩሜꬃ ሼምፖን ናጋናስ፥ ቃሴ ሃ ማጻፋን ጻፌቲዳ ጫቆ ቃላ ማላ ኦꬃናስ ጎዳ ሲንꬃን ጌፒዴስ።
2CH 34:32 ዬሩሳላሜኒኔ ቢኒያሜ ዴሬን ዲዛ ኣሳ ኡባ ሄ ጫቆ ቃላ ናጋና ማላ ጌፊሲዴስ፤ ሂስቲን ዬሩሳላሜን ዲዛ ኣሳይ ጾሳ ባንታ ኣዋታ ጾሳ ኣዛዞን ጫቆ ቃላይ ጊዛ ማላ ኦꬂዳ።
2CH 34:33 ኢዮሲያሲ ኢስራኤሌ ቢታ ኡባፌ ሃራሲዛ ኤቃ ጾሳታ ኡባ ዲጊዴስ፤ ሂስቲዲ ሄን ዲዛ ኡባ ኣሳይ ጎዳስ ባንታ ጾሳስ ጎይናና ማላ ኦꬂዴስ። ኢዮሲያሲ ዴኢዳ ላይꬅ ኡባን ኢስቲ ጎዳ ባንታ ኣዋታ ጾሳ ካሎ ኣጊዲ ጉዬ ሲሚቤቴና።
2CH 35:1 ሄሳፌ ጉዬ ኢዮሲያሲ ዬሩሳላሜን ጎዳስ ፓዚጋ ባኣሌ ቦንቺዴስ፤ ኮይሮ ኣጊናን ታማኔ ኦይዳንꬆ ጋላስ ፓዚጋ ዶርሳ ሹኪዴስ።
2CH 35:2 ኢዮሲያሲ ቄሴታ ኢስታ ኦሶን ኦሶን ሱንꬂዴስ፤ ሂስቲዲ ኢስቲ ጾሳ ኬꬃ ኦሶ ሚኒ ኦꬃና ማላ ሚንꬄꬂዴስ።
2CH 35:3 ጎዳስ ባና ዱማሲዲ ኢስራኤሌ ኡባ ታማርሲዛ ሌዌታስ፥ «ጫቆ ቃላ ታቦታ ካዎ ዳዊቴ ና ሶሎሞኔይ ኦሲሲዳ ጾሳ ኬꬃን ዎꬂቴ፤ ሄሳፌ ጉዬ ታቦታ ኢንቴ ሃሼን ቶካናስ ኮሼና፤ ሃኢካ ጎዳ ኢንቴ ጾሳሲኔ ኢስራኤሌ ኣሳስ ኦꬂቴ።
2CH 35:4 ኢስራኤሌ ካዎ ዳዊቲኔ ኢዛ ና ሶሎሞኔይ ጻፊዳ ኣዛዞ ማላ ኢንቴ ኣዋታ ዛርኬን ቡቴን ቡቴን ኢንቴና ጊግሲቴ።
2CH 35:5 «ኢንቴ ሌዌቲ ኢንቴ ዳቦ ኢስራኤሌ ዛርኬታ ማዳና ማላ ኢንቴ ኬꬃ ኣሳን ኣሳን ሻኬቲዲ ጌሻሶሆን ኤቂቴ፤
2CH 35:6 ፓዚጋ ዶርሳታካ ሹኪቴ፤ ኢንቴና ጌሺቴ፤ ጎዳይ ሙሴ ባጋራ ኣዛዚዳ ቃላ ኢስቲ ፖላና ማላ ኢንቴ ዳቦታስ ዶርሳታ ጊግሲቴ» ጊዴስ።
2CH 35:7 ኢዮሲያሲ ሄን ዲዛ ኣሳስ ፓዚጋ ያርሾስ 30,000 ዶርሳታኔ ዴይሻታ ኢሚዴስ፤ ቃሴ 3,000 ኮርማታ ካዎይ ባ ዉዴፔ ኢሚዴስ።
2CH 35:8 ካዎ ሹሜቲካ ኣሳስ፥ ቄሴታሲኔ ሌዌታስ ባንታስ ዲዛይሳፌ ባ ዶሳን ኢሚዳ፤ ጾሳ ኬꬃ ሃላቃቲ ሂልቂያሲ፥ ዛካራሲኔ ዪሂኤሌይ ፓዚጋ ያርሾስ 2,600 ዶርሳታኔ ዴይሻታ ቄሴታስ ኢሚዳ፤ ቃሴ 300 ኮርማታካ ኢሚዳ።
2CH 35:9 ሌዌታ ሃላቃቲ ካናኒያይ፥ ኢዛ ኢሻ ሻማኤይ፥ ናቲናኤሌይ፥ ቃሴ ሃሻቢያይ፥ ዪኢኤሌይኔ ዮዛባዴይ ፓዚጋ ያርሾስ 5,000 ዶርሳታኔ ዴይሻታ ሌዌታስ ኢሚዳ፤ ቃሴ 500 ኮርማታካ ኢሚዳ።
2CH 35:10 ፓዚጋ ባኣሌስ ኡባ ሚሺ ጊጊዳፔ ጉዬ ካዎይ ኣዛዚዳ ማላ ቄሴቲ ባንታ ሶሆን ሶሆን፥ ሌዌቲካ ባንታ ቡቴን ቡቴን ኤቂዳ።
2CH 35:11 ፓዚጋ ዶርሳቲ ሹኬቲዳ፤ ቄሴቲ ሱꬃ ኤኪዲ ዉጺዳ፤ ሌዌቲ ጋልባ ሾቂ ኬሲዳ።
2CH 35:12 ሄሳፌ ጉዬ ሙሴ ማጻፋን ጻፌቲዳ ማላ ኣሳይ ጎዳስ ጹጌቲዛ ያርሾስ ጊጊዳ ዶርሳታ ኣሾዛ ሌዌቲ ባ ኬꬃ ኣሳን ኣሳን ሻኬቲ ኡቲዳ ኢስራኤሌ ዛርኬታስ ኢሚዳ፤ ኢስቲ ኮርማታካ ሄሳꬆ ኦꬂዳ።
2CH 35:13 ሌዌቲ ዎጋይ ጊዛ ማላ ሹኬቲዳ ፓዚጋ ያርሾዛ ታማን ጺጺዳ፤ ጌሻ ያርሾታ ጻሮን፥ ኦቶኒኔ ዲስቴን ዶይሲዳ፤ ሂስቲዲ ካጾይሳ ሄራካ ኢስራኤሌ ዛርኬታስ ጊሼሬꬂዳ።
2CH 35:14 ሄሳፌ ጉዬ ሌዌቲ ባንታሲኔ ኣሮኔ ዛሬፔ ጊዲዳ ቄሴታስ ፓዚጋ ያርሾ ጊግሲዳ፤ ኣይስ ጊኮ ሄ ቄሴቲ ጹጌቲዛ ያርሾኔ ሃንዳ ሺሺ ያርሻናስ ጊዶꬅ ጋካናስ ኦꬄቴስ።
2CH 35:15 ዳዊቲ፥ ኣሳፊ፥ ሄማኒኔ ካዎ ናቤ ኤዶታኔይ ካሴ ኣዛዚዳ ማላ ዬꬃ ዬጺዛ ኣሳፌ ዛርኬቲ ባ ዲዛሶን ዲዛሶን ዴቴስ፤ ፔንጌ ናጊዛይቲካ ባ ናጊዛ ፔንጌ ፔንጌ ናጌቴስ፤ ኢስታ ዳቦ፥ ሌዌቲ ኢስታስ ጊግሲዳ ጊሻስ ኢስቲ ባ ናጊዛሶፔ ኣጊ ቢቤቴና።
2CH 35:16 ጎዳስ ኦꬂዛ ኦሶ ኡባይ፥ ፓዚጋ ባኣሌ ቦንቾይኔ ጹጌቲዛ ያርሾ ጎዳስ ያርሺዛሶ ቦላ ያርሾይ፥ ካዎ ኢዮሲያሲ ኣዛዚዳ ማላ ሃኒዲ ሄ ጋላስ ጊጊዴስ።
2CH 35:17 ሄን ሺቂዳ ኢስራኤሌ ኣሳይ ሄ ጋላስ ፓዚጋ ባኣሌ ቦንቺዴስ፤ ኢስቲ ኡኬꬃ ባኣሌካ ላፑን ጋላስ ቦንቺዳ።
2CH 35:18 ናቤ ሳሜላ ዎዴፔ ሃ ሲሚን ሄሳ ማላ ፓዚጋ ባኣሌይ ኢስራኤሌን ቦንቼቲ ኤሬና። ኢዮሲያሲ፥ ቄሴታራኔ ሌዌታራ፥ ሄ ሶሆን ሺቂዳ ዩሁዳ ኣሳራ፥ ኢስራኤሌ ኣሳ ኡባራኔ ዬሩሳላሜን ዴኢዛ ኣሳራ ቦንቺዳ ማላ ፓዚጋ ባኣሌ ካሴ ኢስራኤሌ ካዎታፔ ቦንቺዳይ ኢሶይኔ ባዋ።
2CH 35:19 ሃ ፓዚጋ ባኣሌይ ኢዮሲያሲ ካዎቲዳ ታማኔ ኦስፑንꬃ ላይꬃን ቦንቼቲዴስ።
2CH 35:20 ሃ ኡባፌ ጉዬን ኢዮሲያሲ ጾሳ ኬꬃ ጊዶ ማራሲ ጊግሲዳ ዎዴ ጊብጼ ካዎ ኒካይ ኤፊራጺሴ ሻፋ ማታን ዴኢዛ ካርካሚሼ ጌቴቲዛሶ ኦሌታናስ ኬዚዴስ፤ ኢዮሲያሲ ኢዛራ ኦሌታናስ ኬዚዴስ።
2CH 35:21 ጊዶ ኣቲን ኒካይ ኢዮሲያሳኮ ኣስ ኪቲዲ፥ «ዩሁዳ ካዎ! ታናኔ ኔና ኦሺዛይ ኣዜ? ታኒ ዪዳይ ታ ሞርኬታ ኦላናሳፌ ኣቲን ኔና ኦላናስ ጊዴና። ታ ሞርኬታ ታኒ ኤሶን ኦላና ማላ ጾሲ ታና ኣዛዚዴስ። ጾሲ ኔና ꬋይሶንታ ማላ ታናራ ዲዛ ጾሳራ ኤቄቲዛይሳ ኣጋ» ጊዴስ።
2CH 35:22 ጊዶ ኣቲን ኢዮሲያሲ ጾሲ ኒካ ባጋራ ኢዛስ ዮቲዳይሳ ሲዮንታኔ ጉዬ ሲሞንታ ኢጺዲ ኦላስ ኬዚዴስ፤ ባ ካዎቴꬃ ማይኦ ላሚዲ ማጊዶ ዴምባን ኦሌታናስ ኬዚዴስ።
2CH 35:23 ሂስቲን ዎንዳፌን ዱኪዛ ኣሳቲ ካዎ ኢዮሲያሳ ዎንዳፌን ዱኪዳ፤ ካዎይ ባ ኦላ ጋዳዋታስ፥ «ታኒ ኢታ ጫች ጫዴታዲስ፤ ታና ኦላ ጊዶፌ ኬሲቴ» ጊዴስ።
2CH 35:24 ኢስቲ ኢዮሲያሳ ኢዛ ፓራ-ጋሬፔ ዴንꬂዲ ኢዛስ ዲዛ ሃራ ፓራ-ጋሬን ዎꬂዲ ዬሩሳላሜ ኤፊን ኢዚ ሄን ሃይቂዴስ፤ ባ ኣዋታ ዱፎን ሞጌቲዴስ፤ ዩሁዳ ኣሳይኔ ዬሩሳላሜ ኣሳይ ኡባይ ኢዛስ ዬኪዴስ።
2CH 35:25 ኤርማሲ ኢዮሲያሳስ ዚላሳ ጊንጾ ጻፊዴስ፤ ሃኖ ጋካናስ ዬሆ ዬኪዛ ማጫሳቲኔ ኣቱማሳቲ ኢዮሲያሳ ቆፒ ቆፒዲ ዬኪዛ ዎዴ፥ ሃ ኤርማሲ ኬሲዳ ዚላሳ ጊንጾዛ ዚላሲ ኢስራኤሌ ቢታን ሎሴ ጊዲዴስ፤ ሄ ዚላሳ ጊንጾዚ ኢስራኤሌታ ዚላሳ ጊንጾ ማጻፋን ጻፌቲ ኡቲዴስ።
2CH 35:26 ኢዮሲያሳ ካዎቴꬃ ዎዴ ኦሴቲዳ ሃራ ኦሶቲ፥ ጎዳ ዎጋ ማጻፋን ጻፌቲዳ ማላ ኢዚ ኦꬂዳ ሎኦ ኦሶቲ፥
2CH 35:27 ኮይሮፔ ዉርሴꬅ ጋካናስ ኢዚ ኦꬂዳ ኦሶቲ ኡባይ ኢስራኤሌ ካዎታኔ ዩሁዳ ካዎታ ታሪኬ ማጻፋን ጻፌቲ ኡቲዴስ።
2CH 36:1 ሄሳፌ ጉዬ ሄ ቢታ ኣሳይ ኢዮሲያሳ ና ኢዮኣካዜ ዶሪዲ ኢዛ ኣዋ ሶሆን ዬሩሳላሜን ካዎꬂዳ።
2CH 36:2 ኢዮኣካዚ ካዎቲዛ ዎዴ ኢዛስ ላይꬃይ 23፤ ኢዚ ዬሩሳላሜን ሄꬑ ኣጊና ካዎቲዴስ።
2CH 36:3 ሄሳፌ ጉዬ ጊብጼ ካዎይ ዮኣካዜ ዬሩሳላሜን ኢዛ ካዎቴꬃ ኣራታፔ ዎꬂዴስ፤ 3,400 ኪሎ ጊዲዛ ሳቂሌ ቢራኔ 34 ኪሎ ጊዲዛ ዎርቃ ዩሁዳ ኣሳ ጊሪሲዴስ።
2CH 36:4 ጊብጼ ካዎይ ኢዮኣካዜ ኢሻ ኤልያቄሜ ዩሁዳ ቦላኔ ዬሩሳላሜ ቦላ ካዎꬂዴስ፤ ኢዛ ሱንꬃካ ላሚዲ ኢዮኣቄሜ ጊ ሱንꬂዴስ፤ ሂስቲዲ ኢዮኣቄሜ ኢሻ ኢዮኣካዜ ጊብጼ ኤፊዴስ።
2CH 36:5 ኢዮኣቄሜይ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን ታማኔ ኢሲ ላይꬅ ካዎቲዴስ፤ ጎዳ ባ ጾሳ ሲንꬃን ኢታ ሚሽ ኦꬂዴስ።
2CH 36:6 ባቢሎኔ ካዎ ናቡካዳናጾሬይ ኢዛ ኦሊ ኦይኪዲ ባቢሎኔ ኤፋናስ ጻርቂማላ ሳንሳላታን ቃቺዴስ።
2CH 36:7 ናቡካዳናጾሬይ ቃሴ ጾሳ ኬꬃ ሚሻ ኤኪ ባቢሎኔ ኤፊዲ ባ ካዎቴꬃ ኬꬃን ዎꬂዴስ።
2CH 36:8 ኢዮኣቄሜ ካዎቴꬃ ላይꬃን ኦሴቲዳ ሃራሲዛ ኦሶቲኔ ኢታ ኦሶቲ ኡባይ፥ ኢስራኤሌ ካዎታኔ ዩሁዳ ካዎታ ታሪኬ ማጻፋን ጻፌቲ ኡቲዴስ፤ ኢዛ ና ኢዮኣኪኔይ ኢዛሶሆን ካዎቲዴስ።
2CH 36:9 ኢዮኣኪኔይ ካዎቲዛ ዎዴ ኢዛስ ላይꬃይ ታማኔ ኦስፑና፤ ኢዚ ዬሩሳላሜን ሄꬑ ኣጊናኔ ታሙ ጋላስ ካዎቲዴስ። ኢዚ ጎዳ ሲንꬃን ኢታ ሚሽ ኦꬂዴስ።
2CH 36:10 ኦፊንꬃ ዎዴ ካዎ ናቡካዳናጾሬይ ኣስ ኪቲዲ ኢዮኣኪኔኔ ጎዳ ኬꬃን ዲዛ ኣልኦ ሚሻታ ኢዛራ ኢሲፌ ባቢሎኔ ኤፊሲዴስ፤ ሂስቲዲ ኢዛ ኣዋ ኢሻ ሴዴቂያሳ ዩሁዳ ቦላኔ ዬሩሳላሜ ቦላ ካዎꬂዴስ።
2CH 36:11 ሴዴቂያሲ ካዎቲዛ ዎዴ ኢዛስ ላይꬃይ 21፤ ኢዚ ዬሩሳላሜን ታማኔ ኢሲ ላይꬅ ካዎቲዴስ።
2CH 36:12 ጎዳ ባ ጾሳ ሲንꬃን ኢዚ ኢታ ሚሽ ኦꬂዴስ፤ ቃሴ ጎዳ ቃላ ዮቲዳ ናቤ ኤርማሳ ሲንꬃን ባና ካዉሺቤና።
2CH 36:13 ቃሴ ባስ ኣማኔታና ማላ ጾሳ ሱንꬃን ጫቄꬂዳ ካዎ ናቡካዳናጾሬ ቦላ ማካሊዴስ፤ ጎዳ ኢስራኤሌ ጾሳኮ ሲሞንታ ኢጺዲ ባ ዎዚና ሙሚሲዲ ባ ሞርጌ ሚንꬂዴስ።
2CH 36:14 ሄሳፌ ቦላራካ ቄሴቲኔ ዴራ ካሌꬂዛ ኣሳቲ ሙሌካ ኣማኔቶንታ ኢጺዲ ጌዴ ኢቲ ኢቲ ቢዳ፤ ኢስቲ ሃራ ካዎቴꬃቲ ኦꬂዛ ሃራሲዛ ሎሴታ ካሊሼ ጎዳ ኬꬃ ዬሩሳላሜን ዲዛ ጌሻ ቱኒሲዳ።
2CH 36:15 ጎዳይ ኢስታ ኣዋታ ጾሳይ ባ ኣሳሲኔ ባ ዲዛሶስ ቃꬌቲዛ ጊሻስ ባ ናቤታ ኢስታስ ዛሪ ዛሪ ኪቲዴስ።
2CH 36:16 ጊዶ ኣቲን ጾሳ ሃንቆይ ኢስታ ቦላ ዪን ፓጻቴꬂ ኢስታስ ቤቶንታ ኢጻናሼ ጋካናስ ኢስቲ ጎዳይ ኪቲዳይታ ቂꬊዳ፤ ኢዛ ቃላ ካꬊዳኔ ናቤታካ ካዉሺዳ።
2CH 36:17 ሄሳ ጊሻስ ጎዳይ ባቢሎኔ ካዎ ኢስታ ቦላ ዴንꬂዲ ኤሂዴስ፤ ሂስቲን ጾሳ ኬꬃ ጊዶን ኢዚ ኢስታ ዬላጋ ኣቱማ ናይታ ማሻን ሱፑ ሂስቲዴስ፤ ዬላጋ ኣቱማ ናይታ፥ ዎይኮ ጌላኦታ፥ ዎይኮ ጪማታ፥ ዎይኮ ጬጋታ ጾሲ ኢስታ ኡባ ናቡካዳናጾሬ ኩሼን ኣꬂ ኢሚዴስ።
2CH 36:18 ባቢሎኔ ካዎይ ጾሳ ኬꬃን ዲዛ ጊታኔ ጉꬃ ሚሻታ ኡባ፥ ጎዳ ኬꬃን ዲዛ ኣቆታ፥ ካዎ ኣቆታኔ ኢዛ ሹሜታ ኣቆታ ኡባ ዲኢ ኤኪዲ ባቢሎኔ ኤፊዴስ።
2CH 36:19 ሄሳፌ ጉዬ ባቢሎኔ ኦላንቻቲ ጾሳ ኬꬃ ታማን ጹጊዳ፤ ዬሩሳላሜ ዲርሳ ጊምቤዛካ ላሊዳ፤ ካዎቴꬃ ኬꬃታ ታማን ጹጊዳ፤ ሄን ዴኢዛ ኣልኦ ሚሻታ ኡባካ ꬋይሲዳ።
2CH 36:20 ማሻፌ ኣቲዳይታ ካዎዚ ዲኢ ኤኪዲ ባቢሎኔ ኤፊዴስ፤ ፓሪሴ ካዎቴꬃይ ሚናና ጋካናስ ኢስቲ ኢዛሲኔ ኢዛ ናይታስ ኣይሌ ጊዲዳ።
2CH 36:21 ሄሳን ጎዳይ ናቤ ኤርማሳ ባጋራ ዮቲዳ ቃላይ ፖሌታና ማላ ቢታይ 70 ላይꬅ ኩሜꬅ ኣሲ ባይንዳ ሶሆ ጊዲዳ ጊሻስ ሼምፒዴስ፤ ሂስቲን ቢታይ ሳምባታ ሼምፖ ዴሚዴስ።
2CH 36:22 ፓሪሴ ካዎ ቂሮሲ ካዎቲዳ ኮይሮ ላይꬃን ናቤ ኤርማሳ ባጋራ ጎዳይ ሃሳይዳይሳ ፖሊዴስ። ፓሪሴ ካዎ ቂሮሲ ባ ካዎቴꬃ ጊዶን ኡባሶን ኣዋጃይ ኣዋጄቲዲ ጻፌቲ ኡታና ማላ ጎዳይ ኢዛ ኣያና ዴንꬄꬂዴስ።
2CH 36:23 ኢዚካ፥ «ፓሪሴ ካዎ ቂሮሲ፥ ‹ጎዳይ ሳሎ ጾሳይ ሃ ሳኣ ካዎቴꬃታ ኡባ ታስ ኢሚዴስ፤ ቃሴ ዩሁዳን ዴኢዛ ዬሩሳላሜን ታኒ ኢዛስ ኬꬃ ኬጻና ማላ ታና ኣዛዚዴስ፤ ጾሳ ኣስ ጊዲዳ ኦኒኔ ኢንቴ ጊዶን ዲኮ ሄ ቦ፤ ጎዳይ ኢዛ ጾሲ ኢዛራ ጊዶ!› » ጊ ኣዋጂዴስ።
EZR 1:1 ቂሮሲ ፓሪሴ ዴሬን ካዎቲዳ ኮይሮ ላይꬅ ጾሳይ ቂሮሳ ኣያና ዴንꬄꬂዲ ኢዚ ባ ካዎቴꬃ ኡባን ኣዋጃ ኣዋጂዲኔ ሄ ኣዋጃ ጻፊ ዎꬃና ማላ ኦꬂዴስ፤ ሄሲካ ሃኒዳይ ካሴ ናቤ ኤርማሳ ባጋራ ጾሲ ዮቲዳ ቃላይ ፖሌታና ማላሳ።
EZR 1:2 ፓሪሴ ካዎ ቂሮሲ ኣዋጃን ኬሲዳ ኣዛዞይ፥ «ጎዳ ሳሎ ጾሳይ ታና ቢታ ካዎቴꬃታ ኡባ ኣይሳና ማታ ታስ ኢሚዴስ፤ ዩሁዳ ቢታን ዲዛ ጾሳ ኬꬅ ዬሩሳላሜን ታ ኢዛስ ኬጻና ማላ ኣዛዚዴስ።
EZR 1:3 ኢንቴ ጊዶፌ ጾሳ ኣስ ጊዲዳይሳራ ጾሲ ጊዶ፤ ዩሁዳ ዴሬን ዲዛ ዬሩሳላሜ ካታማ ቢዲ ጎዳ ኢስራኤሌ ጾሳ ኬꬃ ኬጾ።
EZR 1:4 ሃይቆፔ ኣቲዲ ባ ዴሬ ሲሚዛይታስ ሄን ባ ዲዛሶን ኣቲዛይቲ ዬሩሳላሜን ዲዛ ጾሳ ኬꬃ ኬጾስ ኢሚዛ ኢሞታፔ ቦላራ ቢራ፥ ዎርቃ፥ ሜሄታኔ ሃራ ሚሻታ ጉጂ ኢሞን ማዴቶ፤ ሄሲካ ኢስቲ ባንታ ዶሳን ኢሚዛ ኢሞታ ጊዶ» ጌስ።
EZR 1:5 ሄሳፌ ጉዬ ዩሁዳኔ ቢኒያሜ ዜሬꬃታ ዳናቲ፥ ቄሴቲ፥ ሌዌቲኔ ጾሳይ ዎዚና ዴንꬄꬂዳ ኣሳይ ዉሪ ሲሚ ባናሲኔ ዬሩሳላሜን ዲዛ ጾሳ ኬꬃ ዛሪ ኬጻና ጊጌቲ ዴንዲዳ።
EZR 1:6 ዶꬃቲካ ዉሪ ባ ኪያቴꬃን ኢሚዳ ኢሞታ ቦላ ጉጂዲ ቢራፔኔ ዎርቃፌ ኦሴቲዳ ሚሻታ፥ ዱማ ዱማ ሶ ጊዶን ጎኤቲዛ ሚሻታኔ ሜሄታ ጾሳ ኬꬃን ሙጹዋታ ጊዲዛ ሃራ ጎኢዛ ሚሻታ ኢሚ ማዲዳ።
EZR 1:7 ካዎ ቂሮሲ ካሴ ካዎ ናቡካዳናጾሬይ ዬሩሳላሜን ዲዛ ጾሳ ኬꬃፌ ቦንቂ ኤኪ ኤፊዲ ባ ኤቃ ጾሳ ኬꬃን ዎꬂዳ ጾሳ ሚሻ ኡባ ዛሪ ኢሚዴስ።
EZR 1:8 ፓሪሴ ካዎ ቂሮሲ ሚንጃ ኬꬃ ዳና ሚቲራዳጹ ባጋራ ጾሳ ኬꬃ ሚሻቲ ያና ማላኔ ዩሁዳ ዴሬ ኣይሲዛ ሴሳቢሳሬስ ሼꬊዴስ።
EZR 1:9 ሲሚዳ ሚሻቲ ሃይሳፌ ካሊ ዲዛይታ፤ ዎርቃፌ ኦሴቲዳ ሳኔቲ 30፥ ቢራፔ ኦሴቲዳ ሳኔቲ 1,000 ሃራ ዱማ ዱማ ሳኔቲ 29፤
EZR 1:10 ዎርቃፌ ኦሴቲዳ ጉቃ ሳኔቲ 30 ቢራፔ ኦሴቲዳ ቄሪ ሳኔቲ 410 ጎኢዛ ሃራ ሚሻቲ 1,000።
EZR 1:11 ሴሳቢሳሬይ ዲኤቲዳ ኣሳታራ ጊዲዲ ባቢሎኔፔ ዬሩሳላሜ ሲሚ ዪሼ ኤኪ ኬዚዳ ሚሻ ቆዳይ ኢሲ ቦላ 5,440።
EZR 2:1 ባቢሎኔ ካዎ ናቡካዳናጾሬይ ባቢሎኔ ዴሬ ዲኢ ኤፊዳይታፔ ዩሁዳኔ ዬሩሳላሜ ካታማታ ሲሚዳ ኣሳቲ ሃይሳፌ ካሊ ዲዛይታ፤
EZR 2:2 ዲኤቴꬃፌ ሲሚ ዪዳ ኣሳታስ ዳና ጊዲ ዪዳይቲ ዜሩባቤሌ ኢያሶ፥ ናሂሚያ፥ ሳራያ፥ ማርዲኪዮሳ፥ ባልሻኔ፥ ሚሲፋሬ፥ ቢጉዋዬ፥ ኤሬሁሜኔ ባኣና ጌቴቲዛይታ። ባ ዴሬ ሲሚዳ ኢስራኤሌ ኣሳ ቆዳይ ሃይሳፌ ካሊ ዲዛይሳ፤
EZR 2:3 ፓሮሴ ዜሬꬃቲ 2,172፥
EZR 2:4 ሻፋጺያ ዜሬꬃቲ 372፥
EZR 2:5 ኣራሄ ዜሬꬃቲ 775፥
EZR 2:6 ኢያሶፔኔ ኢዮኣቤ ናይታፔ ፓሃቴ-ሞኣቤ ዜሬꬃቲ 2,812፥
EZR 2:7 ኤላሜ ዜሬꬃቲ 1,254፥
EZR 2:8 ዛቶ ዜሬꬃቲ 945፥
EZR 2:9 ዛካዬ ዜሬꬃቲ 760፥
EZR 2:10 ባኔ ዜሬꬃቲ 642፥
EZR 2:11 ቤባዬ ዜሬꬃቲ 623፥
EZR 2:12 ኣዝጋዴ ዜሬꬃቲ 1,222፥
EZR 2:13 ኣዶንቃሜ ዜሬꬃቲ 666፥
EZR 2:14 ቢጉዋዬ ዜሬꬃቲ 2,056፥
EZR 2:15 ኣዲኔ ዜሬꬃቲ 454፥
EZR 2:16 ሂዝቂያሳ ና ኣጻሬ ዜሬꬃቲ 98፥
EZR 2:17 ቤሳዬ ዜሬꬃቲ 323፥
EZR 2:18 ዮራ ዜሬꬃቲ 112፥
EZR 2:19 ሃሹሜ ዜሬꬃቲ 223፥
EZR 2:20 ጋቤሬ ዜሬꬃቲ 95፥
EZR 2:21 ዲኤቴꬃፌ ሲሚዳ ኣሳታ ጊዶፌ ካሴ ኢስታ ኣዋቲ ዲዛ ካታማቲኔ ሄ ካታማታን ዲዛ ኣሳ ቆዳይ ሃይሳፌ ካሊ ዲዛይሳ፤ ቤቴሊሄሜ ካታማ ኣሳቲ 123፥
EZR 2:22 ናጾፌ ካታማ ኣሳቲ 56፥
EZR 2:23 ኣናቶቴ ካታማ ኣሳቲ 128፥
EZR 2:24 ኣዚሞቴ ካታማ ኣሳቲ 42፥
EZR 2:25 ቂሪያቴ-ዪኣሪሜ፥ ካፊሬኔ ቢኤሮቴ ኣሳቲ 743፥
EZR 2:26 ኤራማኔ ጌባ ኣሳቲ 621፥
EZR 2:27 ማኪማሴ ካታማ ኣሳቲ 122፥
EZR 2:28 ቤቴሌኔ ኣዬ ካታማ ኣሳቲ 223፥
EZR 2:29 ኔቦ ካታማ ኣሳቲ 52፥
EZR 2:30 ሜጌቢሴ ካታማ ኣሳቲ 156፥
EZR 2:31 ሃራ ኤላሜ ካታማ ኣሳቲ 1,254፥
EZR 2:32 ሃሪሜ ካታማ ኣሳቲ 320፥
EZR 2:33 ሎዳ፥ ሃዲዴኔ ኦኖ ካታማ ኣሳቲ 725፥
EZR 2:34 ኢያርኮ ካታማ ኣሳቲ 345፥
EZR 2:35 ሳናኣ ካታማ ኣሳቲ 3,630፥
EZR 2:36 ዲኤቴꬃፌ ሲሚዳ ቄሴ ዜሬꬃቲ ሃይሳፌ ካሊ ዲዛይታ፤ ኢያሶ ዜሬꬃታፔ ያዳያ ዜሬꬃቲ 973፥
EZR 2:37 ኢሜሬ ዜሬꬃቲ 1,052፥
EZR 2:38 ፓሽኩሬ ዜሬꬃቲ 1,247፥
EZR 2:39 ሃሪሜ ዜሬꬃቲ 1,017፥
EZR 2:40 ዲኤቴꬃፌ ሲሚዳ ሌዌ ዛሬቲ ሃይሳፌ ካሊ ዲዛይታ፤ ሆዳዬፔ ጊዲዳ ኢያሶኔ ቃዲምኤሌ ዜሬꬃቲ 74፥
EZR 2:41 ጾሳ ኬꬃን ዬጺዛ ኣሳፌ ዜሬꬃቲ 128፥
EZR 2:42 ጾሳ ኬꬃ ናጊዛ ጻልሞኔ፥ ኣጻሬ፥ ሻሎሜ፥ ኣቁቤ፥ ሃጺጼኔ ሾባዬ ዜሬꬃቲ 139፥
EZR 2:43 ዲኤቴꬃፌ ሲሚዲ ጾሳ ኬꬃ ኦሶስ ዶሬቲዳ ቆሞቲ ሃይሳፌ ካሊ ዲዛይታ፤ ጺሃ፥ ሃሱጳኔ ጻባኦቴ ዜሬꬃታ፥
EZR 2:44 ቂሮሴ፥ ሲኣሃኔ ፓዶኔ ዜሬꬃታ፥
EZR 2:45 ሌባና፥ ሃጋቤኔ ኣቁቤ ዜሬꬃታ፥
EZR 2:46 ሃጋቤ፥ ሻሚላዬኔ ሃናኔ ዜሬꬃታ፥
EZR 2:47 ጊዴሌ፥ ጋሃሬኔ ኤራኣዬ ዜሬꬃታ፥
EZR 2:48 ኤራሶኔ፥ ኔቆዳኔ ጋዛሜ ዜሬꬃታ፥
EZR 2:49 ኦዛ፥ ፋሳሄኔ ቤሳዬ ዜሬꬃታ፥
EZR 2:50 ኣሴኔ፥ ማኡኔኔ ኔፍሲሜ ዜሬꬃታ፥
EZR 2:51 ባቂቡቄ፥ ሃቁፋኔ ሃሪሁሬ ዜሬꬃታ፥
EZR 2:52 ባጺሎታ፥ ማሂዳኔ ሃርሻ ዜሬꬃታ፥
EZR 2:53 ባርቆሳ፥ ሲሳራኔ ቴማሄ ዜሬꬃታ፥
EZR 2:54 ኔጺሃኔ ሃጺፋ ዜሬꬃታ።
EZR 2:55 ዲኤቴꬃፌ ሲሚዳ ሶሎሞኔ ኣይሌታ ዜሬꬃፌ፥ ሶጻዬ፥ ሶፌሬቴ፥ ፋሩዳ፤
EZR 2:56 ያኢላ፥ ዳርቆኔ፥ ጊዴሌ፥
EZR 2:57 ሻፋጺያ፥ ሃጺላ፥ ፖኬሬቴ-ሃጼባሜኔ ኣሚ ጌቴቲዛይታ።
EZR 2:58 ጾሳ ኬꬃ ኦሳንቻታ ባጋቲኔ ሶሎሞኔ ኦሳንቻታ ዜሬꬃ ቆዳይ ኢሲ ቦላ 392።
EZR 2:59 ሃይሳፌ ካሊ ዲዛይቲ ቴሊ-ሜላ፥ ቴሊ-ሃርሻ፥ ኪሩቤ፥ ኣዳና፥ ኢሜሬ ጌቴቲ ጼይጌቲዛ ካታማታፔ ዬሩሳላሜ ሲሚዳይታ፤ ጊዶ ኣቲን ኢስታ ጊዲን ዎይኮ ኢስታ ኣዋቲ ኢስራኤሌ ዜሬꬅ ጊዲዳይሳ ሻኪ ኤሪሳናስ ዳንዳይቤቴና።
EZR 2:60 ሃ ኣሳቲ ዳላያ፥ ጾቢያኔ ኔቆዳ ቆሞታ ጊዶን ጉጄቴቴስ፤ ኢስታ ቆዳይካ 652፤
EZR 2:61 ሃባዬይ፥ ሃቆጼይኔ ባርዚሌይ ቄሴታ ዜሬꬃታ፤ ጊዶ ኣቲን ካሴ ኢስታ ኣዋቲ ኦና ጊዲዳኮኔ ኢስቲ ኤሮንታ ኣጊዳ ጊሻስ ቄሴቴꬃ ኦሶ ኦꬆንታ ማላ ዲጌቲዳ።
EZR 2:63 ዴሬ ኣይሲዛይሲ ኡሪሜኒኔ ቱሚሜ ጌቴቲዛ ጾሳ ሼኔ ኦይቺዛ ቄሴይ ዴንዳና ጋካናስ ጾሳስ ዱማቲዳ ካꬃፌ ኢስቲ ሞንታ ማላ ኣዛዚዴስ።
EZR 2:64 ሄሳ ማላን ዲኤቴꬃፌ ሲሚዳ ኣሳታ ታይቦይ ኢሲ ቦላ 42,360።
EZR 2:65 ኢስታ ማጫሳታኔ ኣቱማ ኦሳንቻታ ታይቦይ ኢሲ ቦላ 7,337፤ ቃሴካ ዬꬃ ዬጺዛ ማጫሳቲኔ ኣቱማሳቲ ኢሲ ቦላ 200።
EZR 2:66 ኢስታስ 736 ፓራቲኔ 245 ባቁሎቲ፥
EZR 2:67 ኦይዱ ጼታኔ ሄꬑ ታማኔ ኢቻሹ ጋሜላቲኔ 6,720 ሃሬቲ ኢስታስ ዴቴስ።
EZR 2:68 ሃ ዲኤቲዳ ኣሳቲ ሲሚዲ ዬሩሳላሜን ዲዛ ጾሳ ኬꬅ ጋኪዳ ዎዴ ኢሲ ኢሲ ዛርኬ ኮራፒኔቲ ጾሳ ኬꬂ ካሴ ባ ዲዛሶን ኬጼታና ማላ ባ ሼኔን ሙጹዋታ ኢሚዳ።
EZR 2:69 ኢስቲ ባስ ዳንዳዬቲዛ ማላ ጾሳ ኬꬃ ኦሶስ ኬሴቲ ኢሚዳ ኢሞታይ ኢሲ ቦላ 500 ኪሎ ዎርቃ፥ 2,786 ኪሎ ቢራ፥ ቄሴታስ ቤሲዛ ማይኦ 100 ኢሚዳ።
EZR 2:70 ቄሴቲ፥ ሌዌቲ፥ ዬꬃ ዬጺዛይቲ፥ ጾሳ ኬꬅ ናጊዛይቲኔ ጾሳ ኬꬃ ኦሳንቻቲ ባ ማታን ዲዛ ካታማን ኡቲዳ፤ ቃሴ ኣቲዳ ኢስራኤሌ ኣሳቲ ካሴ ኢስታ ኣዋቲ ኢዛን ዴኢዛ ካታማን ኡቲዳ።
EZR 3:1 ላፑንꬆ ኣጊናን ኢስራኤሌቲ ባንታ ካታማን ካታማን ዲዛሶፔ ኢሲ ቆፋን ጊዲዲ ዬሩሳላሜን ሺቂዳ።
EZR 3:2 ሄሳፌ ጉዬ ኢዮሳዶቄ ና ኢያሶይኔ ኢዛራ ኦꬂዛ ቄሴቲ ቃሴካ ሳላቲያሌ ና ዜሩባቤሌይኔ ኢዛ ዳቦቲ ኢዛራ ኢሲፌ ጾሳ ኣስ ጊዲዳ ሙሴ ዎጋ ማጻፋን ካሴ ጻፌቲዳ ማላ ጹጌቲዛ ያርሾ ሺሻናስ ኢስራኤሌ ጾሳስ ያርሺዛሶን ያርሾ ያርሻናስ ዳንዳይዳ።
EZR 3:3 ዲኤቴꬃፌ ሲሚ ዪዳ ኣሳይ ሄ ቢታን ዲዛ ኣሳ ኤቄቴꬃፌ ዴንዲዳይሳን ባቢኮካ ካሴ ያርሾ ያርሺዛሶዛ ዛሪ ጊግሲዳ፤ ሄሳፌ ጉዬ ማላዶኔ ኦማርስ ኡባ ዎዴ ፓጬይ ባይንዳ ጾሳስ ያርሾ ያርሺዳ።
EZR 3:4 ሄሳፌ ጉዬ ዎጋይ ኣዛዚዛ ማላ ዳሴ ባኣሌ ቦንቺዳ። ኢሲ ኢሲ ጋላሳስ ቤሲዛ ያርሾካ ሺሺዳ።
EZR 3:5 ቃሴ ኡባ ጋላስ ጹጌቲዛ ያርሾ፥ ኣጊናን ኣጊናን ያርሺዛ ያርሾኔ ጎዳስ ጌሻ ባኣሌታን ያርሼቲዛ ያርሾ ኡባ ያርሺዳ፤ ቃሴካ ኣሳይ ባ ዶሳን ጾሳስ ኢሚዛ ኢሞታ ኡባ ሺሺዳ።
EZR 3:6 ላፑንꬆ ኣጊናይ ጌሊዳ ማላ ኮይሮ ጋላሳን ጾሳስ ጹጌቲዛ ያርሾ ሺሾ ዶሚዳ፤ ጊዶ ኣቲን ጾሳ ኬꬃ ኦሶይ ዶሜቲቤና።
EZR 3:7 ሄሳፌ ጉዬ ዴሬይ ሹቻን ኬጺዛይታሲኔ ኣናጼታስ ጪጌቲዛ ሚሽ ኢሚዴስ፤ ቃሴ ሊባኖሴፔ ዚጋ ሚꬅ ቃንጺዲ ዮጴ ኣባ ፒንꬂዲ ዬዳና ማላኔ ካꬅ፥ ኡሺኔ ዎጋራ ዛይቴ ጺሮሴኒኔ ሲዶናን ዲዛ ኣሳታስ ዬዲዳ፤ ሄሲ ኡባይ ፓሪሴ ካዎ ቂሮሲ ፒቃዴ ኢሚዳ ማላ ሃኒዴስ።
EZR 3:8 ዬሩሳላሜን ዲዛ ጾሳ ኬꬃይ ካሴ ዲዛሶ ኣሳይ ጋኪዳፔ ናምኣንꬆ ላይꬃን፥ ናምኣንꬆ ኣጊናን፥ ሳላቲያሌ ና ዜሩባቤሌኔ ኢዮሳዶቄ ና ኢያሶራ ሃራ ኣቲዳ ኢሻቲ ሄይቲካ ቄሴታ፥ ሌዌታኔ ኢስታራ ኢሲፌ ዲኤቴꬃፌ ሃ ዬሩሳላሜ ሲሚ ዪዳ ኣሳይ ኡባይ ኢሲ ቦላ ኦሶ ዶሚዳ፤ 20 ላይꬅ ጋኪዳይቲኔ ሄሳፌ ቦላ ጊዲዳ ሌዌቲ ዉሪ ጾሳ ኬꬃ ኦሶ ኣዋቴꬃን ኦሲሳና ማላ ዶሬቲዳ።
EZR 3:9 ሌዌ ኢያሶ፥ ኢዛ ናይቲኔ ዳቦቲ፥ ቃዲምኤሌይኔ ዩሁዳሄ ዜሬꬃ ባጋ ጊዲዳ ኣቱማ ናይቲ ዉሪ ኢሲፌ ጊጌቲዲ ጾሳ ኬꬃ ናምኣንꬆ ኬጻና ኣዋቴꬅ ኤኪዳ፤ ሄናዳዴ ዜሬꬃፌ ጊዲዳ ሌዌቲኔ ኢስታ ኢሻቲ ኢስታ ማዲዳ።
EZR 3:10 ኦሳንቻቲ ጾሳ ኬꬃ ዮች ዬጊዳ ዎዴ ቄሴቲ ባ ቄሴቴꬃ ማይኦ ማይኢዲኔ ዲንኬ ማላ ዬꬃ ሚሽ ኦይኪዲ ቃሴ ኣሳፌ ዜሬꬃፌ ጊዲዳ ሌዌቲ ዳላ ኦይኪዲ ኢስራኤሌ ካዎ ዳዊቴ ዎዴሶፔ ዎጋ ጊዲዲ ዪዳ ማላ ጾስ ዚሬን ኤቂዲ ጋላቲዳ።
EZR 3:11 ኣሳይካ ዉሪ፥ «ጾሳይ ኪያ ጾሳ፤ ኢዚ ኢስራኤሌ ኣሳ ሲቂዛ ሲቆይ ሜርናሳ» ጊዛ ማዛሙሬ ጾሳ ቦንቾስ ዬጺዳ፤ ጾሳ ኬꬃ ዮች ዬስ ዶሚሺን ኣሳይ ዉሪ ባ ቃላ ꬎቁ ሂስቲዲ ኢሊሊሼ ጾሳ ጋላቲዴስ።
EZR 3:12 ጪማ ቄሴታፔኔ ሌዌ ባጋታፔ ዳሮቲ፥ ዛርኬታፔ ኮራፒኔቲ ካሴ ጾሳ ኬꬃ ኦሶ ባ ኣይፌን ቤይዳ ጊሻስ ሃኢ ኬጼቲዛ ጾሳ ኬꬃስ ዮቻ ቤኢዲ ባ ቃላ ꬎቁ ሂስቲ ዬኪዳ፤ ሄን ዲዛ ሃራ ኣሳቲ ቃሴ ባንታ ቃላ ꬎቁ ሂስቲዲ ኢሊሊዳ።
EZR 3:13 ሄሳ ጋሶን ኡፋይሳ ዋሶይኔ ዬሆይ ኢሲ ቦላ ዋላኬቲዲ ሃሆን ሴቴቲዴስ፤ ጊዶ ኣቲን ኣሳይ ዬሆ ዋሶኔ ኡፋይሳ ኢሊሊሳ ሻኪ ኤራና ዳንዳይቤና።
EZR 4:1 ዲኤቴꬃፌ ሲሚዳ ኣሳይ ኢስራኤሌ ጾሳ ኬꬃ ኬጺሺን ዩሁዳ ኣሳሲኔ ቢኒያሜ ኣሳስ ሞርኬ ጊዲዳይቲ ሲዪዳ።
EZR 4:2 ሄሳፌ ዴንዲዳይሳን ዜሩባቤሌኮኔ ኮራፒኔታኮ ዪዲ «ኑኒካ ኢንቴ ማላ ኢንቴ ጾሳ ጎይኒዛይታ፤ ኣሶሬ ዴሬ ካዎ ኣሴራዶኔይ ኑና ሃ ቢታ ኤሆሶፌ ዶሚዲ ኢዛስ ያርሺሼኔ ጎይኒሼ ጋምኢዶስ፤ ሄሳ ጊሻስ ሃኢ ኑኒካ ኢንቴናራ ኢሲፌ ኬጻና» ጊዳ።
EZR 4:3 ጊዶ ኣቲን ዜሩባቤሌይ፥ ኢያሶይኔ ኮራፒኔቲ ኡባይ «ኑ ጎዳ ጾሳ ኬꬃ ኬጻናስ ኢንቴና ኑናራ ጋꬂዛ ሚሺ ባዋ፤ ፓሪሴ ካዎ ቂሮሲ ኑና ኣዛዚዳ ማላ ኢስራኤሌ ጾሳ ኬꬃ ኑ ኑርካ ኬጻና» ጊ ዛሪዳ።
EZR 4:4 ሄሳፌ ጉዬ ሄ ዴሬን ዲዛ ኣሳቲ ኣይሁዳ ኣሳታ ሂዶታ ቃንጺሶኒኔ ባቢሶን ጾሳ ኬꬃ ኬጾንታ ማላ ዲጎ ኦይኪዳ።
EZR 4:5 ፓሪሴ ካዎ ቂሮሴ ካዎቴꬃ ላይꬃፌ ዶሚዲ ካዎ ዳሪዮሳ ካዎቴꬃ ላይꬅ ጋካናስ ኢስቲ ኬጾንታ ማላ ኢስታ ꬉጴꬃናስ ዞሪዛ ኣሳታስ ማጋንጾ ኢሚዳ።
EZR 4:6 ካዎ ኣርጼኪሲሲ ካዎቲዳ ኮይሮ ላይꬅ ዩሁዳኒኔ ዬሩሳላሜን ዴኢዛ ኢስራኤሌ ኣሳ ቦላ ኢስታ ሞርኬቲ ሞቶ ዳብዳቤ ጻፊዳ።
EZR 4:7 ፓሪሴ ካዎ ኣርጼኪሲሲ ካዎቲዳ ዎዴ ኢዛራ ቢሺላሜ፥ ሚቲራዳጹ፥ ጻቢኤሌራ ኦꬂዛ ላጌቲ ኢዛራ ኢሲፌ ጊዲዲ ሞቶ ዳብዳቤ ካዎ ኣርጼኪሲሴስ ጻፊዳ ዳብዳቤዚ ኣራማይኬ ቃላኒኔ ፒዳሌን ጻፌቲዲ ናባቤታና ማላ ዬዴቲዴስ።
EZR 4:8 ዴሬ ኣይሲዛ ኤሬሁሜይኔ ጻፌዚ ሲሚሳዬይ ዬሩሳላሜ ጊሻስ ካዎ ኣርጼኪሲሴስ ሃይሳፌ ካሊዛይሳ ጻፊዳ።
EZR 4:9 «ዳብዳቤዛ ጻፊዳይ ዴሬ ኣይሲዛ ኤሬሁሜ፥ ጻፌዛ ሲሚሳዬ፥ ኤላሜ ቢታን ዲዛ ሱሳፔ፥ ኤርኬፌኔ ባቢሎኔፔ ዪዲ ፒርዲዛ ዳናታፔኔ ኢስታራ ኢሲፌቴꬂ ዲዛይታፔ፥
EZR 4:10 ቃሴካ ጊታኔ ዎልቃማ ካዎ ኣሲናፌሬይ ዬሌቲዳ ዴሬፔ ሃራሶ ኤሂዲ ሳማሪያ ካታማኒኔ ኤፊራጺሴ ሻፋ ፒኒዲ ኣርሼይ ዉሊዛ ባጋራ ዳና ማላ ዎꬂዳ ሃራ ኣሳታራ ኢሲፌ ጻፊዳ ዳብዳቤ» ጊዳ።
EZR 4:11 ዳብዳቤዛስ ኣይፌ ዮኦይ ካዎ ኣርጼኪሲሴስ፥ ኤፊራጺሴ ሻፋፔ ኣርሼይ ዉሊዛ ባጋራ ዲዛ ኔ ኦሳንቻታፔ ዬዴቲዳ ዳብዳቤይ፥
EZR 4:12 «ካዎ! ኔ ኣቻፌ ኑኮ ዪዳ ኣይሁዳ ኣሳቲ ዬሩሳላሜ ቢዲ ሄ ኢታኔ ቱና ካታማዮ ዛሪዲ ኦሶ ቦላ ዴቴስ፤ ጊምቤዛካ ዛሪዲ ሎኤꬆኒኔ ዮቻ ዬጌꬃ ቦላ ዴቴስ።
EZR 4:13 ሄሳ ጊሻስ ሃ ካታማያ ሲማ ኦሴቲኮኔ ኢዚ ጊምቤይ ጊምቤቲ ጊጊኮ ኣሳይ ዉሪ ኔስ ጊሪዛ ጊራኔ ቃራጻ ቃንጾንታይሳ ኔ ኤራ፤ ኔ ካዎቴꬃ ቦንቾስ ኢሜቲዛ ኢሞታይ ጉጺ ጉጺ ባናይሲ ኔስ ኤሬቶ።
EZR 4:14 ኑኒካ ኔ ካዎቴꬃፌ ጎኤቲዛይታ ጊዲዳ ጊሻስ ኔ ቦንቾይ ቦሼቲሺን ኑ ቤዪሼ ጮኡ ጋናስ ቤሴና ጊዲ ሃ ኪታ ኔስ ዬዲዶስ።
EZR 4:15 ሄሳ ጊሻስ ካሴ ኢንቴ ኣዋታ ታሪኬይ ኢዛን ጻፌቲ ዲዛ ማጻፋይ ጼሌታና ማላ ቆፊሶስ፤ ሃ ካታማያ ኡባ ማካላንቻ፥ ካዎታሲኔ ዴሬታስ ሜቶ ሜꬊዛ ካታማ ጊዲዳይሳ ኔ ሄ ማጻፋፔ ዴማና፤ ካሴፔ ዶሚዲ ሄ ካታማይ ኣሳይ ማካላንቻ፤ ካታማያ ሾጬታ ꬋይዳይ ሃይሳ ጋሶና።
EZR 4:16 ሄሳፌ ዴንዲዳይሳን ሃ ካታማያ ናምኣንꬆ ሲማ ኦሴቲኮኔ ኢዚ ጊምቤይ ጊምቤቲ ጊጊዳፔ ጉዬ ኔ ካዎቴꬃን ኤፊራጺሴ ሻፋፔ ሄ ፒንꬃን ዲዛ ዴሬታ ኔ ኣይሳናይሲ ሜቶ ጊዲዳይሳኔ ኔስ ኣይኮ ሚሺካ ሄ ፒንꬃን ባይንዳይሳ ኑ ኔስ ቆንጪሶስ» ጌስ።
EZR 4:17 ካዎዚካ ዳብዳቤዛ ዛሮ «ዴሬ ኣይሲዛ ኤሬሁሜስ፥ ጻፌዛ ሲሚሳዬስ፥ ቃሴ ሳማሪያኒኔ ኤፊራጺሴ ሻፋ ፒንꬃን ዲዛ ኔናራ ኢሲፌ ኦꬂዛይታስ ሳሮይ ጊዶ።
EZR 4:18 «ኢንቴ ዬዲዳ ዳብዳቤይ ቢርሼቲ ናባቤቲን ታ ሲያዲስ፤
EZR 4:19 ሄሳፌ ዴንዲዳይሳን ሎኤꬂ ፒልጊ ጼላና ማላ ኣዛዛዲስ፤ ፒልጌꬃን ቤቲዳይ ዬሩሳላሜይ ካሴፔ ዶማዳ ካዎ ካዎቴꬃ ቦላ ማካላሼ ዲዛሮ፤ ማካላንቻታሲኔ ኢታ ኦꬂዛይታስ ጊዲዳይሳ ቆንጪሴስ።
EZR 4:20 ሄሲካ ዉሪ ሃንኮካ ዬሩሳላሜይ ኤፊራጺሴ ሻፋፔ ሄ ፒንꬃን ዲዛ ዴሬታ ቃራጻኔ ጊራ ጪጊሲዛ ዎልቃማ ካዎቲ ካዎቲዳ ዴሬ።
EZR 4:21 ሄሳ ጊሻስ ታ ሃራ ኣዛዞ ኪታና ጋካናስ ሄ ኣሳቲ ካታማዛ ዛሪ ኦꬆንታ ማላ ዮቲቴ።
EZR 4:22 ኑ ካዎ ኦሶ ቦላ ኣይኮ ሜቶይካ ጋኮንታ ማላ ኢንቴስ ኢዛ ኣላፌቴꬃ ኣዛሎንታ ናጌቲቴ» ጊ ኪቲዴስ።
EZR 4:23 ካዎ ኣርጼኪሲሴ ዛሮ ዳብዳቤይ ኤሬሁሜስ፥ ሲሚሳዬሲኔ ኢስታራ ኦꬂዛይታስ ጋኪ ናባቤቲዳ ማላ ሄራካ ዬሩሳላሜ ቢዲ ካታማ ኦꬆንታ ማላ ኣሳ ዎልቃራ ቴቂዳ።
EZR 4:24 ሄሳ ጊሻስ ዳሪዮሲ ፓሪሴ ዴሬን ካዎቲዳ ናምኣንꬆ ላይꬅ ጋካናስ ጾሳ ኬꬃ ኦሶይ ዶሜቲዳ ማላ ኤቂ ኣቲዴስ።
EZR 5:1 ሄ ዎዴ ናምኡ ናቤቲ ሃጌይኔ ኢዶ ና ዛካራሲ ዬሩሳላሜኒኔ ዩሁዳ ዴሬን ዴኢዛ ኣይሁዳ ኣሳስ ጾሳ ኬꬃ ኦሶ ጊሻስ ባ ጎዳ ኢስራኤሌ ጾሳ ሱንꬃን ቲንቢቴ ዮቲዳ።
EZR 5:2 ሳላቲያሌ ና ዜሩባቤሌይኔ ኢዮሳዶቄ ና ኢያሶይ ሄ ናቤታ ቃላ ሲዪዳፔ ጉዬ ዬሩሳላሜን ዲዛ ጾሳ ኬꬅ ዛሪ ኬጾ ኦይኪዳ፤ ናምኡ ናቤቲካ ኢስታ ማዲሼ ኢስታራ ዴቴስ።
EZR 5:3 ሄ ዎዴ ኤፊራጺሴ ሻፋ ፒንꬃን ኣርሼይ ዉሊዛ ባጋራ ዴሬ ኣይሲዛ ታቴናዬይኔ ሳቴርቦዚናይ ቃሴካ ኢስታራ ኢሲፌ ኦꬂዛ ዳናቲ ዬሩሳላሜ ዪዲ «ኢንቴስ ሃ ጾሳ ኬꬃ ኬጻናሲኔ ጊምቤዛ ኦራጺሳናስ ኦኒ ኢንቴስ ፒቃዴ ኢሚዴ?» ጊ ኦይቺዳ።
EZR 5:4 ቃሴ ሃይሳ ጾሳ ኬꬃ ኬጺዛ ኣሳታ ሱንꬅ ኤራናስ ኦይቺዳ።
EZR 5:5 ጊዶ ኣቲን ኣይሁዳ ዳናታ ጾሲ ናጊዛ ጊሻስ ፓሪሴ ካዎ ዳሪዮሳስ ኪታይ ጋኪን ሄ ኪታዛስ ዛሮይ ያና ጋካናስ ኦሶ ኣጊቤቴና።
EZR 5:6 ኤፊራጺሴ ሻፋ ፒንꬃን ኣርሼይ ዉሊዛ ባጋራ ዴሬ ኣይሲዛ ታቴናዬይኔ ሳቴርቦዚናይ ቃሴካ ኢስታራ ኢሲፌ ኦꬂዛ ዳናቲ ካዎ ዳሪዮሳስ ጻፊ ዬዲዳ ዳብዳቤይ ሃይሳፌ ካሊ ዲዛይሳ፤
EZR 5:7 «ቦንቼቲዳ ካዎ ዳሪዮሳ! ኔ ኣይሲዛ ዴራሲኔ ኔስ ሳሮይ ጊዶ፤
EZR 5:8 ኑኒ ዩሁዳ ቢታ ቢዲ ጊታ ጾሳ ኬꬃይ ጊታ ማሴቲዳ ሹቻኒኔ ሚꬃን ኬጼቲዳይሳ ቤይዳይሲ ኔስ ኤሬቶ፤ ሄ ኦሶዚካ ጪማቲ ካሌꬂሺን ማራኒኔ ኤሶን ኦሴቴꬃ ቦላ ዴስ።
EZR 5:9 «ኑኒካ ዴሬዛ ካሌꬂዛይታ፥ ‹ሃይሳ ጾሳ ኬꬃ ዛሪ ኬጻናሲኔ ጊምባ ኦራጺሳናስ ኦኔ ኢንቴስ ፒቃዴ ኢሚዳይ?› ጊ ኦይቺዶስ።
EZR 5:10 ሃይሳ ኦሶዛ ኣዋቴꬃን ኦሲሲዛይ ኦናንታኮ ኤሪዲ ኑ ኔስ ቆንጪሳናስ ኢስታ ሱንꬃካ ኦይቺዶስ።
EZR 5:11 «ኢስቲካ ኑስ፥ ‹ኑኒ ሳሎኔ ሳኣ ሜꬊዳ ጾሳ ኦሳንቻታ፤ ሄሳ ጊሻስ ዳሮ ላይꬃፌ ካሴ ጊታ ኢስራኤሌ ካዎይ ኬጺዳ ጾሳ ኬꬃ ኑኒ ዛሪዲ ሃኢ ኦሶ ቦላ ዶስ፤
EZR 5:12 ጊዶ ኣቲን ካሴ ኑ ኣዋቲ ሃይሳ ሳሎ ጾሳ ሃንቄꬂዳ ጋሶን ካላዳዌ ቢታ ኣስ ባቢሎኔ ካዎ ናቡካዳናጾሬን ጾኒሲዴስ፤ ካዎ ናቡካዳናጾሬይ ጾሳ ኬꬃ ላሊዲ ኣሳ ዲኢ ባቢሎኔ ኤፊዴስ።
EZR 5:13 ሄሳፌ ጉዬ ቃሴ ባቢሎኔ ዴሬን ካዎ ቂሮሲ ካዎቲዳ ኮይሮ ላይꬅ ሃይሳ ጾሳ ኬꬃ ኬጻና ማላ ኣዛዚዴስ።
EZR 5:14 ናቡካዳናጾሬይ ዬሩሳላሜፔ ካሴ ጾሳ ኬꬃፌ ዲኢ ኤፊዲ ባቢሎኔን ዲዛ ኤቃ ኬꬃታን ዎꬂዳ ዎርቃፌኔ ቢራፔ ኦሴቲዳ ጌሻ ሚሻታ ኡባ ካዎ ቂሮሲ ዩሁዳ ዴሬ ኣይሲዛ ሴሳቢሳሬ ባጋራ ዛሪ ኑስ ኢሚዴስ።
EZR 5:15 ሄሲካ ዴሬ ኣይሲዛ ዳና ሳቢሳሬይ ጌሻ ሚሻታ ኤሂዲ ዬሩሳላሜን ዲዛ ጾሳ ኬꬃን ዎꬃና ማላኔ ጾሳ ኬꬃይ ካሴ ባ ዲዛሶን ዛሪ ኬጼታና ማላ ካዎ ቂሮሲ ኢዛ ኣዛዚዴስ።
EZR 5:16 ሄሳ ጊሻስ ሴሳቢሳሬይ ዪዲ ጾሳ ኬꬃ ዮቻ ዬጊዳፔ ጉዬ ኦሶዚ ኦሴቲ ኦሴቲ ሲንꬄ ባና ማላ ሃኒዲ ሃይሳ ጋካናስ ጾሳ ኬꬃ ኦሶይ ኦሴቴꬃ ቦላ ዴስ፤ ጊዶ ኣቲን ጾሳ ኬꬃ ኦሶይ ኦሴቲ ጊጊቤና› ጊዳ።
EZR 5:17 «ካዎ! ሂያ ቱማፔ ሃ ጾሳ ኬꬃይ ዬሩሳላሜን ኦሴታና ማላ ካዎ ቂሮሲ ኣዛዚዳ ኣዛዞይ ዲዛኮ ባይንዳኮ ሻኪ ኤራናስ ባቢሎኔን ካዎ ኬꬃን ማዝጋቤን ጻፌቲ ዲዛይሳ ፒልጊሳ ጼሊሳዳ ኔ ኣይ ጋ ቃቺዳኮ ኑና ኤሪሳና ማላ ዎሶስ» ጊ ጻፊዳ።
EZR 6:1 ባቢሎኔን ካዎ ሚንጃ ኬꬃን ዲዛ ማዝጋባቲ ዉሪ ፒልጌቲ ጼሌታና ማላ ካዎ ዳሪዮሲ ኣዛዚዴስ፤
EZR 6:2 ጊዶ ኣቲን ባቢሎኔ ካታማን ጊዶንታ ሜዶኔ ዴሬን ኣሂሚቴ ካታማን ኢሲ ጻꬃ ማጻፋይ ቤቲዴስ፤ ኢዛን ጻፌቲዳ ቃላይ፥
EZR 6:3 «ቂሮሲ ካዎቲዳ ኮይሮ ላይꬅ ዬሩሳላሜን ዲዛ ጾሳ ኬꬂ ጹጌቲዛ ያርሾይኔ ሃራ ዱማ ዱማ ያርሾቲ ሺቂዛሶ ጊዲዲ ኦሴታና ማላ ኣዛዞ ኢሚዴስ፤ ጾሳ ኬꬃ ኣዱሳቴꬂ 27 ሜቲሬ ጊዲሺን ኣሆቴꬃዚ 27 ሜቲሬ ጊዳናስ ቤሴስ።
EZR 6:4 ጊምቤቲካ ሹቻፌ ኦሴቲዳ ሄꬑቶ ዩዪ ኣꬊዳ ጊምቤታ ሁኤን ኢሲቶ ዩዪ ኣꬊ ሚꬃን ኩዬቶ፤ ሄ ኦሶዛስ ኮሺዛ ሚሽ ካዎዛ ሚንጃ ኬꬃፌ ኢሜቶ።
EZR 6:5 ቃሴ ሃይሳፌ ሲንꬄ ካዎ ናቡካዳናጾሬይ ዬሩሳላሜን ጾሳ ኬꬃፌ ዲኢ ኤኪዳ ዎርቃፌኔ ቢራፔ ኦሴቲዳ ጾሳ ኬꬃ ሚሻቲ ሲሚዲ ዬሩሳላሜን ኦሴቲዛ ጾሳ ኬꬃን ኢስታስ ቤሲዛሶን ኡቴቶ» ጌስ።
EZR 6:6 ካዎ ዳሪዮሲ ሃይሳፌ ካሊ ዲዛ ኪታ ኣꬂዴስ፤ «ኤፊራጺሴፔ ኣርሼይ ዉሊዛ ባጋራ ዲዛ ዴሬ ኣይሲዛ ታቴናዬስ፥ ሳቴርቦዚናዬሲኔ ኢንቴናራ ኢሲፌ ኦꬂዛ ኡባቲ ጾሳ ኬꬃ ኦሶን ጋኮፍቴ፤
EZR 6:7 ኢንቴ ኦሶዛ ꬉጴꬆንታ ማላ ናጌቲቴ፤ ኣይሁዳታ ኣይሲዛይሲኔ ኣይሁዳታ ካሌꬂዛይቲ ጾሳ ኬꬃ ካሴ ኢዚ ዲዛሶን ዛሪ ኬጼቶ።
EZR 6:8 ሃይሳ ጋሶን ኢንቴ ጾሳ ኬꬃ ኦሶ ማዳና ማላ ታ ኢንቴና ኣዛዛዲስ፤ ሃ ኦሶዛስ ኮሺዛ ሚሽ ካዎ ሚንጃ ኬꬃፌኔ ኤፊራጺሴፔ ኣርሼይ ዉሊዛ ባጋራ ዲዛ ዴሬፔ ካዎስ ሺቂዛ ጊራ ሚሻፌ ኬዚዲ ኢስታስ ኢሜቶ፤ ኦሶዚካ ꬉጴታና ቤሴና።
EZR 6:9 ቃሴካ ዬሩሳላሜን ዲዛ ቄሴቲ ኢንቴስ ዮቲዛ ማላ ጋላስ ጋላስ ሳሎ ጾሳስ ያርሾ ሺሻና ማላ ኢንቴፌ ኮዬቲዛ ሚርጎታ፥ ꬋርሾታ፥ ꬋርሾ ላቃታ፥ ቃሴካ ሙጹዋታስ ጊዲዛ ጊስቴ፥ ማጺኔ፥ ዎይኔ ኡሹኔ ዎጋራ ዛይቴ ኡባ ፓጬይ ባይንዳ ኢስታስ ኢሚቴ።
EZR 6:10 ሃ ኡባስ ጋሶይካ ሳሎ ጾሳይ ኡፋይሳን ኤኪዛ ያርሾ ኢስቲ ሺሺሼ ካዎሲኔ ኢዛ ኣቱማ ናይታ ጊሻስ ዎሳና ማላሳ።
EZR 6:11 ሃይሳፌ ሃራ ታ ኢንቴና ኤሪሳና ኮይዛ ሚሺ ታ ኢሚዛ ኣዛዞ ኤኮንታይኔ ኣዛዜቶንታይ ዲኮ ኢዛ ኬꬃ ቱሳ ሾዲዲ ሄ ቱሳ ጼራ ማሲዲ ሄ ማሴቶ ቱሳ ጼራን ካቄቶ፤ ኢዛ ሶዚካ ላሌቲዲ ቡራ ኦሎሶ ጊዶ።
EZR 6:12 ሃ ኣዛዞዛ ኢጺዲ ዬሩሳላሜን ዲዛ ጾሳ ኬꬃ ላላና ኮይዛ ኣይ ካዎኔ ዴሬ ኡባ ባ ሱንꬃይ ጼይጌታና ማላ ዬሩሳላሜ ዶሪዳ ጾሳይ ꬋይሶ፤ ሃይሳ ኣዛዞዛ ኢሚዳይ ታና ካዎ ዳሪዮሳ ጊዲዳ ጊሻስ ኡባይ ፖሌታና ቤሴስ።»
EZR 6:13 ሄሳፌ ጉዬ ዴሬ ኣይሲዛ ታቴናዬ፥ ሳቴርቦዚናዬይኔ ኢስታራ ኢሲፌ ኦꬂዛ ዳናቲ ካዎይ ኣዛዚዳ ማላ ኡባ ፖሊዳ።
EZR 6:14 ኣይሁዳታ ካሌꬂዛይቲ፥ ናቤ ሃጌይኔ ዛካራሲ ሚንꬄꬂን ጾሳ ኬꬃ ኦሶ ኤሌሲ ኦꬂዳ፤ ኢስራኤሌ ጾሳ ሼኔን ፓሪሴ ካዎ ቂሮሲ፥ ዳሪዮሲኔ ኣርጼኪሲሲ ኣዛዚዳ ማላ ጾሳ ኬꬃ ኦሶ ፖሊዳ።
EZR 6:15 ኢስቲ ጾሳ ኬꬃ ኦሶ ፖሊዳ ዎዴይ ካዎ ዳሪዮሲ ካዎቲዳ ኡሱፑንꬆ ላይꬃን ኣዳሬ ኣጊናን ሄꬓንꬆ ጋላሳና።
EZR 6:16 ሄሳፌ ጉዬ ኢስራኤሌ ዴሬይ፥ ቄሴቲ፥ ሌዌቲ፥ ቃሴ ዲኤቴꬃፌ ሲሚዳ ኣሳይ ኡባይ ጾሳ ኬꬃ ኣንጂሶ ባኣሌዛ ኡፋይሳን ቦንቺዴስ።
EZR 6:17 ኢስቲካ ባኣሌዛ ቦንቾስ ጊዲዛ 100 ሚርጎታ፥ 200 ꬋርሾታኔ 400 ꬋርሾ ላቃታ ያርሾስ ሺሺዳ፤ ናጋራ ያርሾስ 12 ዴይሻ ኮርቤታ ኢስራኤሌ ኣሳ ኢሳ ኢሳ ዛርኬ ሱንꬃን ሺሺዳ።
EZR 6:18 ሙሴ ማጻፋን ጻፌቲዳ ዎጋ ማላ ዬሩሳላሜን ኬጼቲዳ ጾሳ ኬꬃን ኦሶስ ቄሴታኔ ሌዌታ ኢስታስ ቤሲዛ ማራን ማራን ዎꬂዳ።
EZR 6:19 ዲኤቲዳሶፔ ሲሚዳ ኣሳቲ ኮይሮ ኣጊናይ ጌሊዳ ማላ ታማኔ ኦይዳንꬆ ጋላስ ፓዚጋ ባኣሌ ቦንቺዳ።
EZR 6:20 ቄሴቲኔ ሌዌቲ ዉሪ ዎጋዚ ጊዛ ማላ ባና ጌሺዳ፤ ሌዌቲካ ፓዚጋ ባኣሌ ቦንቺዛ ዎዴ ዲኤቴꬃፌ ሲሚዳ ኣሳታሲኔ ቄሴታስ፥ ቃሴ ባንታ ጊሻስ ሺቂዳ ሜሄታ ሹኪዳ።
EZR 6:21 ዲኤቴꬃፌ ሲሚዳ ኢስራኤሌ ኣሳቲኔ ሄ ካዎቴꬃን ዲዛ ኣይዛቤታ ዎጋ ኣጊዲ ጎዳ ኢስራኤሌ ጾሳ ጎይኒዛ ኡባታራ ፓዚጋ ካꬃ ሚዳ።
EZR 6:22 ጾሳይ ኣሶሬ ካዎ ላሚዲ ኢስራኤሌ ጎዳይ ኢዛን ጋላቴቲዛ ጾሳ ኬꬃ ዛሪ ኬጻና ማላ ኢስታ ኦሶን ማዲዳ ጊሻስ ላፑን ጋላስ ኩሜꬅ ኡኬꬃ ባኣሌ ኡፋይሳን ቦንቺዳ።
EZR 7:1 ዳሮ ዎዴፔ ጉዬ ኣርጼኪሲሲ ፓሪሴ ዴሬን ካዎቲዳ ዎዴ ኢዝራ ጌቴቲዛ ኣሲ ዴስ፤ ኢዚካ፥ ሳራያ ና፥ ሳራያይ ኣዛሪያሳ ና፥ ኣዛሪያይ ኪልቂያሳ ና፥ ኪልቂያሲ ሻሎሜ ና፥
EZR 7:2 ሻሎሜይ ሳዶቄ ና፥ ሳዶቄይ ኣሂጹቤ ና፥ ኣሂጹቤይ ኣማሪያ ና፥
EZR 7:3 ኣማሪያይ ኣዛሪያሳ ና፥ ኣዛሪያሲ ማራዮታ ና፥ ማራዮቴይ ዛራሂያ ና፥
EZR 7:4 ዛራሂያይ ኡዜ ና፥ ኡዜይ ቡቃ ና፥
EZR 7:5 ቡቃይ ኣቢሹኣ ና፥ ኣቢሹኣይ ፊኒሃሴ ና፥ ፊኒሃሲ ኤልኤዜሬ ና፥ ኤልኤዜሬይ ቄሴታ ሃላቃ ኣሮኔ ና።
EZR 7:6 ኢዝራይካ ባቢሎኔፔ ዬሩሳላሜ ዪዴስ፤ ኢዚካ ጎዳ ኢስራኤሌ ጾሲ ሙሴስ ኢሚዳ ዎጋ ሎኤꬂ ኤሪዛ ኣስታማሬ፤ ጾሳ ዎልቃይ ኢዛራ ዲዛ ጊሻስ ካዎዚ ኢዚ ኦይቺዳይሳ ኡባ ኢሚዴስ።
EZR 7:7 ቃሴ ኣርጼኪሲሲ ካዎቲዳ ላፑንꬃ ላይꬃን ቄሴታፔ፥ ሌዌታፔ፥ ዬጺዛይታፔ፥ ጾሳ ኬꬅ ናጊዛ ዛቤታፔ፥ ኦሳንቻታፔኔ ኢስራኤሌ ኣሳፔ ኢሲ ኢሲ ኣሳታ ጉጂዲ ኢዝራራ ኢሲፌ ዬሩሳላሜ ዪዳ።
EZR 7:8 ኢዝራይ ካዎ ኣርጼኪሲሲ ካዎቲዳ ላፑንꬃ ላይꬃን ኢቻሻንꬆ ኣጊናን ዬሩሳላሜ ጋኪዴስ።
EZR 7:9 ጊታ ጾሳ ዎልቃይ ኢዛ ቦላ ዲዛ ጊሻስ ባቢሎኔፔ ኮይሮ ኣጊናን ኮይሮ ጋላስ ዴንዲዲ ኢቻሻንꬆ ኣጊናን ኮይሮ ጋላስ ዬሩሳላሜ ጋኪዴስ።
EZR 7:10 ኢዝራይ ባ ዴኦ ኡባን ጾሳ ዎጋ ፒልጊ ኤራናስ፥ ኦꬃናሲኔ ጾሳ ኣዛዞታኔ ዎጋታ ኩሜꬃ ኢስራኤሌ ናይታ ታማርሳናስ ባናቴꬃ ኣꬂ ኢሚዴስ።
EZR 7:11 ጎዳይ ኢስራኤሌ ኣሳታስ ኢሚዳ ዎጋኔ ኣዛዞ ሎኤꬂ ኤሪዛ ኣስታማሬ ጊዲዳ ኢዝራስ ካዎ ኣርጼኪሲሲ ኢሚዳ ዳብዳቤይ ሃይሳፌ ካሊ ዲዛይሳ፤
EZR 7:12 ካዎታስ ካዎ ኣርጼኪሲሴፔ ሳሎ ጾሳ ዎጋ ፒልጊ ጼሎን ኬሂ ኤራንቻ ጊዲዳ ዎጋ ታማርሲዛ ቄሴ ኢዝራ! ሳሮይ ኔስ ጊዶ፤
EZR 7:13 ታ ካዎቴꬃ ጋርሳን ኣቂዛ ኣሳቲኔ ኔናራ ዬሩሳላሜ ሲማና ኮይዛ ኢስራኤሌ ኣሳቲ፥ ቄሴቲኔ ሌዌቲ ኡባይ ሲማና ማላ ፒቃዴ ኢማዲስ።
EZR 7:14 ቃሴ ኔ ኩሼን ዲዛ ጾሳ ዎጋ ማላ ዩሁዳኒኔ ዬሩሳላሜን ፖሌቲዛይሳ ካሌታዳ ኔ ሎኤꬃ ጼላና ማላ ታና ዞሪዛ ላፑን ኣሳታን ኪቴታዳሳ።
EZR 7:15 ሃራይ ቃሴ ዬሩሳላሜይ ኢዛስ ዱሳሶ ጊዲዳ ኢስራኤሌ ጾሳስ ታኒኔ ታናራ ኢሲፌ ዞሪዛይቲ ኑ ዶሳን ኢሚዳ ቢራኔ ዎርቃ ኤካዳ ባ።
EZR 7:16 ሃይሳ ቦላ ጉጃዳ ኔኒ ባቢሎኔ ዴሬን ሺሺዛ ዎርቃኔ ቢራ፥ ኢስራኤሌ ኣሳቲኔ ቄሴቲ ዬሩሳላሜን ዲዛ ጎዳ ኢንቴ ጾሳ ኬꬃን ሺቃና ማላ ኢሚዛ ኢሞታ ሚሽ ኡባ ኤካዳ ባ።
EZR 7:17 ሄ ሚሻዛን ዬሩሳላሜን ዲዛ ጎዳ ኢንቴ ጾሳ ኬꬃን ያርሾስ ጊዳና ማላ ሚርጎታ፥ ꬋርሾታ፥ ꬋርሾ ላቃታ፥ ቃሴ ሙጹዋታስ ጊዲዛ ካꬂኔ ዎይኔ ኡሹ ኡባ ሻማዳ ያርሾ ሺሻ።
EZR 7:18 ሄሳፌ ቲርፒ ኣቲዛ ቢራኔ ዎርቃ ኢንቴ ጾሳ ሼኔ ማላ ኔኒኔ ኔ ዴሬ ኣሳቲ ኢንቴ ዶሲዛ ኦሶስ ጎኤቲቴ።
EZR 7:19 ኔ ጾሳ ኬꬃን ኦꬃና ማላ ኔስ ሃዳራ ኢሜቲዳ ሚሻታ ኡባ ዬሩሳላሜን ዲዛ ጎዳ ሲንꬃን ሺሻ።
EZR 7:20 ሄሳፌ ቦላራ ኔ ጾሳ ኬꬃ ኦሶስ ኮሺዛ ኣይ ሚሺካ ካዎ ሚንጃ ኬꬃፌ ኤካናስ ዳንዳያሳ።
EZR 7:21 «ኤፊራጺሴ ሻፋ ፒንꬃን ኣርሼይ ዉሊዛ ባጋራ ካዎ ሚሻ ቦላ ኣዋቴꬂ ዲዛይቲ ኢንቴ ዉሪ ሳሎ ጾሳ ዎጋ ታማርሲዛ ቄሴ ኢዝራይ ኢንቴና ኦይቺዛ ሚሽ ኡባ ኢንቴ ኢዛስ ኤሶን ኢማና ማላ ታኒ ካዎ ኣርጼኪሲሲ ኣዛዛዲስ።
EZR 7:22 ሄꬑ ሺያኔ ኦይዱ ጼቱ ኪሎ ጊዲዛ ቢራ፥ ታሙ ሺ ኪሎ ጊዲዛ ጊስቴ፥ ናምኡ ሺ ሊቲሮ ጊዲዛ ኡሹ፥ ናምኡ ሺ ሊቲሮ ጊዲዛ ዎጋራ ዛይቴኔ ኮሺዛ ኬና ማጺኔ ኢሚቴ።
EZR 7:23 ካዎዛ ቦላኔ ኢዛ ናይታ ቦላ ሃንቆይ ዮንታ ማላ ሳሎ ጎዳይ ባ ኬꬃ ኦሶስ ኣዛዚዛይሳ ኡባ ሚኒ ፖላና ኮሼስ።
EZR 7:24 ቃሴ ቄሴታፔ፥ ሌዌታፔ፥ ዬጺዛይታፔ፥ ዛቤታፔ፥ ጾሳ ኬꬃን ኮሺዛ ሚሻን ኦꬂዛ ኣሳታ ኡባታፔ ቃራጻኔ ጊራ ቃንጺሳናስ፥ ዎልቃን ሃራ ሚሽ ኦሲሳናስ ኢስታ ቦላ ኢንቴስ ማታይ ባይንዳይሳ ታ ኢንቴና ኤሪሳይስ።
EZR 7:25 «ኢዝራ! ኔ ጾሳይ ኔስ ኢሚዳ ኣꬎ ኤራቴꬃ ማላ ካላሼ ኤፊራጺሴ ሻፋ ፒንꬃን ዲዛ ዴሬ ኡባስ ኔኒ ጾሳ ዎጋ ኤሪዛ ዳናታኔ ፒርዲዛይታ ዶራ፤ ጾሳ ዎጋ ኤሮንታይታስ ኔኒ ኔ ጾሳ ዎጋ ታማርሳ።
EZR 7:26 ኔኒ ጾሳ ዎጋስ ዎይኮ ካዎ ዎጋ ኡባስ ኣዛዜቶንታ ኣሲ ዲኮ ኢዛዴይ ሃይቆን ዎይኮ ዴሬፔ ጎዴቴꬃን ዎይኮ ኢዛ ሃሮ ቦንቃን ዎይኮ ቃሾን ቃጻዬቶ።»
EZR 7:27 ኢዝራይ፥ «ዬሩሳላሜን ዲዛ ጾሳ ኬꬃይ ሃይሳꬆ ቦንቼታና ማላ ካዎዛ ኤኖ ሂስቲዳ ጎዳ ኑ ኣዋታ ጾሲ ጋላቴቶ።
EZR 7:28 ታኒ ካዎ ኣቻኒኔ ኢዛ ዞራንቻታ ኣቻን፥ ዎልቃማ ዳናታ ኣቻን ዶሴታና ማላ ኦꬂዳ ጾሳይ ጋላቴቶ። ጎዳ ታ ጾሳ ዎልቃይ ታናራ ዲዛ ጊሻስ ኢስራኤሌፔ ኮራፒኔቲ ታናራ ኢሲፌ ጊዲዲ ዬሩሳላሜ ሲማና ማላ ዞሪዲ ታ ታማርሳና ማላ ታና ማዲዴስ» ጊ ጾሳ ጋላቲዴስ።
EZR 8:1 ካዎ ኣርጼኪሲሲ ካዎቴꬃን ኣይሲዛ ዎዴን ታናራ ባቢሎኔ ዴሬፔ ሲሚዳ ኮራፒኔታ ሱንꬂ ሃይሳፌ ካሊ ዲዛይሳ፤
EZR 8:2 ፊኒሃሴ ዜሬꬃታፔ ጌርሾሜ፥ ኢታማሬ ዜሬꬃታፔ ዳኔላ፥ ዳዊቴ ዜሬꬃታፔ ሃጹሼ፥
EZR 8:3 ኢዚካ ሻካኒያ ና፥ ፓሮሴ ዜሬꬃታፔ ዛካራሲኔ ኢስታ ሶ ኣሳታፔ 150 ኣዴቲ ጻፌቲዳ፤
EZR 8:4 ፓሃቴ-ሞኣቤ ዜሬꬃታፔ ዛራሂያ ና ኤልሆኤናዬይኔ 200 ኣቱማሳቲ፥
EZR 8:5 ዛቶ ዜሬꬃታፔ ያሃዚኤሌ ና ሻካኒያራ 300 ኣቱማሳቲ፥
EZR 8:6 ኣዲኔ ዜሬꬃታፔ ዮናታኔ ና ኤቤዴኔ 50 ኣቱማሳቲ፥
EZR 8:7 ኤላሜ ዜሬꬃታፔ ኣታሊያ ና ዬሻኢያኔ ኢዛራ 70 ኣቱማሳቲ፥
EZR 8:8 ሻፋጺያ ዜሬꬃታፔ ሚካኤሌ ና ዛባዲያኔ ኢዛራ 80 ኣቱማሳቲ፥
EZR 8:9 ኢዮኣቤ ዜሬꬃታፔ ዉርሴꬃታ ሱንꬃይ ዪሂኤሌ ና ኣብዲዩኔ ኢዛራ 218 ኣቱማሳቲ፥
EZR 8:10 ባኔ ዜሬꬃታፔ ዮስፒያ ና ሻሎሚቴኔ ኢዛራ 160 ኣቱማሳቲ፥
EZR 8:11 ቤባዬ ዜሬꬃታፔ ኢዛ ና ዛካራሳኔ 28 ኣቱማሳቲ፥
EZR 8:12 ኣዝጋዴ ዜሬꬃታፔ ሃቆጼ ና ዮሃናኔኔ ኢዛራ 110 ኣቱማሳቲ፥
EZR 8:13 ኣዶንቃሜ ዜሬꬃታፔ ዉርሴꬃታ ሱንꬃይ፥ ኤልፋሌጼ፥ ዪኢኤሌ፥ ሻማኤኔ ኢስታራ 60 ኣቱማሳቲ፥
EZR 8:14 ቢጉዋዬ ዜሬꬃታፔ ኡታዬ፥ ዛኩሬኔ ኢስታራ 70 ኣቱማሳቲ ሲሚዳ።
EZR 8:15 ታኒ ኢዝራይ ኩሜꬃ ዴሬዛ ኣሂዋ ጎጊዛ ሃꬃ ሻፋ ኣች ሺሻዳ ሄን ሄꬑ ጋላስ ጋምኢዶስ፤ ሄ ሺቆዛን ቄሴታፔ ኣቲን ሃራ ሌዌ ዜሬꬃቲ ባይንዳይሳ ኤራዲስ፤
EZR 8:16 ሄሳ ጊሻስ ታኒ ዴራ ካሌꬂዛ ኡዱፉን ኣሳታ ኤልኤዜሬ፥ ኣርኤሌ፥ ሻማኤ፥ ኤልናታኔ፥ ያሪቤ፥ ኤልናታኔኔ፥ ናታኔ፥ ዛካራሳኔ ማሹላሜ፤ ቃሴካ ናምኡ ኣስታማሬታ ዮያሪቤኔ ኤልናታኔ ጌቴቲዛይታ ጼይጊሳዲስ።
EZR 8:17 ኢስታካ ካስፒያ ዴሬን ሃላቃ ጊዲዳ ኢዶኮ ኪታዲስ፤ ኢዶይኔ ኢዛ ዳቦቲ ጾሳ ኬꬃን ኦꬂዛ ኦሳንቻቲ ኑስ ጾሳ ኬꬃን ኦꬃና ኣስ ዬዳና ማላ ኦꬃዲስ።
EZR 8:18 ጊታ ጾሳ ዎልቃይ ኑናራ ዲዛ ጊሻስ ኢስቲ ሎኦ ኤራቴꬂ ዲዛይሳ ማሂሌ ዜሬꬃታፔ ኢስራኤሌ ና ሌዌ ዛሬ ጊዲዳ ሼሬቢያ ዬዲዳ፤ ኢዚካ 18 ባ ኣቱማ ናይታኔ ባ ኢሻታ ካሌꬂ ኤኪዲ ኑኮ ዪዴስ።
EZR 8:19 ቃሴ ሜራሬ ዜሬꬃታፔ ሃሻቢያኔ ዬሻኢያ ጌቴቲዛ 20 ዳቦታራ ኑኮ ዬዲዳ።
EZR 8:20 ኢዛ ቦላ ጉጂዲ ኢስታስ ካሴ ኣዋቲ ሌዌታ ዜሬꬃታ ማዳና ማላ ካዎ ዳዊቲኔ ኢዛራ ኢሲፌ ኦꬂዛ ዳናቲ ፒቃዴ ኢሚዳ፤ ሄን 220 ኦሳንቻቲ ዴቴስ፤ ኢስቲካ ባ ሱንꬃን ጻፌቲዳ።
EZR 8:21 ጾሲ ኑ ኦጌ ሎኤꬃና ማላ፥ ኑናኔ ኑ ናይታ ቃሴካ ኑስ ዲዛዝ ኡባ ናጋና ማላ ኢዛ ሲንꬃን ኑናቴꬃ ዚቂ ኦꬂዲ ዎሳናስ ኣሂዋ ሻፋ ኣቻን ጾማ ኣዋጃዲስ።
EZR 8:22 ሃይሳፌ ሲንꬃን ታ ካዎ ኣርጼኪሲሲ ኤሪሲዛ ዎዴ «ኑ ጾሳይ ኢዛን ኣማኔቲዛይታ ኡባ ኣንጄስ፤ ኢዛ ኣጊዛይታ ጊዲኮ ኬሂ ቃጻዬስ» ጋዳ ታ ቆንጪሲዳ ጊሻስ ኑናራ ኦጌን ጋጋና ሞርኬታፔ ኑና ናጋና ማላ ካዎዛ ዎታዳራታኔ ቶጋ ኣሳታ ኢማ ጋዳ ኦይቺዳኮ ዬላታናኮሺን።
EZR 8:23 ሄሳ ጊሻስ ጾሳይ ባርካ ኑና ናጋና ማላ ጾማኒኔ ዎሳን ሺቂዶስ፤ ኢዚካ ኑ ዎሳ ሲዪዴስ።
EZR 8:24 ካሌꬂዛ ቄሴታ ጊዶፌ ሼሬቢያ፥ ሃሻቢያኔ ሃራታ 10 ኣሳታ ዶራዲስ።
EZR 8:25 ሄሳፌ ጉዬ ካዎዚኔ ኢዛ ዞራንቻቲ፥ ሹሜቲኔ ሄን ዲዛ ኢስራኤሌ ኣሳቲ ዉሪ ኑ ጾሳ ኬꬃ ኦሶስ ኢሚዳ ቢራ፥ ዎርቃኔ ሃራ ዱማ ዱማ ሚሻታ ኡባ ሜዛኔን ዎꬃዳ ኢስታስ ኢማዲስ።
EZR 8:26 ታ ኢስታስ ኢሚዳ ጾሳ ኬꬃ ሚሻቲ ሃይሳፌ ካሊ ዲዛይታ፤ 22,000 ኪሎ ጊዲዛ ቢራ፥ 70 ኪሎ ጊዲዛ ቢራፔ ኦሴቲዳ ጼቱ ሚሻታ፥ 3,400 ኪሎ ጊዲዛ ዎርቃ፤
EZR 8:27 ኦስፑን ኪሎኔ 400 ጊራሜ ጊዲዛ ዎርቃፌ ኦሴቲዳ ሼልኤታኔ ዎርቃፌ ኦሴቲዳ ማላይ ጾልቂዛ ጻርቂማላፔ ኦሴቲዳ 2 ሼልኤታ።
EZR 8:28 ታኒካ ኢስታስ፥ «ኢንቴኒኔ ሃ ሚሻቲ ጾሳስ ዱማቲዳይታ፤ ቢራይኔ ዎርቃይ ኢንቴ ኣዋታ ጾሳሳ፤ ሄሲካ ኢንቴ ኢንቴ ሼኔኒኔ ኡፋይሳን ኢሚዛ ዱማ ኢሞታ።
EZR 8:29 ዬሩሳላሜን ዲዛ ጾሳ ኬꬃ ጋꬃን ባ ኪፊሌን ኪፊሌን ዲዛ ቄሴ ሃላቃታ፥ ሌዌታ ዳናታሲኔ ኢስራኤሌ ዜሬꬃ ሃላቃታ ሲንꬃን ኢንቴ ሜዛኔን ዎꬂ ኢማና ጋካናስ ሎኤꬂ ናጊቴ» ጋዲስ።
EZR 8:30 ሄሳፌ ጉዬ ቄሴቲኔ ሌዌቲ ጌዳሬቲዳ ቢራ፥ ዎርቃኔ ሃራ ጾሳ ኬꬃ ሚሻታ ዬሩሳላሜን ዲዛ ጾሳ ኬꬅ ኤፋናስ ኣላፌቴꬅ ኤኪዳ።
EZR 8:31 ኮይሮ ኣጊናይ ጌሊዳ ማላ ታማኔ ናምኣንꬆ ጋላስ ዬሩሳላሜ ባናስ ኑኒካ ኣሂዋ ሻፋ ኣቻፌ ዴንዲዶስ፤ ኑ ጾሳ ኩሼይ ኑናራ ዲዛ ጊሻስ ኑ ቢዛ ኦጌን ዲዛ ሞርኬታፔኔ ፓንጋታፔ ኑና ኣሺዴስ።
EZR 8:32 ዬሩሳላሜ ጋኪዲ ሄን ሄꬑ ጋላስ ሼምፒዶስ፤
EZR 8:33 ኦይዳንꬆ ጋላስ ቢዲ ቢራ፥ ዎርቃኔ ጾሳ ኬꬃ ሚሻታ ጾሳ ኬꬃን ጌዳሪዲ ኡሪያ ና ቄሴ ሜርሞቴስ ኢሚዶስ፤ ፊኒሃሴ ና ኤልኤዜሬይ፥ ቃሴካ ሌዌ ኢያሶ ና ዮዛባዴይኔ ቢኑዌ ና ኖኣዲያይ ኢዛራ ኢሲፌ ዴቴስ።
EZR 8:34 ኡባ ሚሻይ ሄራካ ታይቤቲዳፔ ጉዬ ጌዳሬቲዲ ዎጋራ ጻፌቲዴስ።
EZR 8:35 ሄሳፌ ጉዬ ዲኤቴꬃፌ ሲሚዳይቲ ኢስራኤሌ ጾሳስ ያርሾ ጊዲዛይሳ 12 ሚርጎታ፥ 96 ꬋርሾታ፥ 77 ꬋርሾ ላቃታ ቃሴካ ናጋራ ዲጋናስ ሺቂዛ ያርሾስ 12 ኦርጌታ፤ ሃይሲ ኡባይ ጾሳስ ጹጌቲ ሺቂዛ ያርሾ።
EZR 8:36 ካዎዛ ኣዛዞ ኢዛ ጋርሳን ፖሊዛ ዳናታሲኔ ኤፊራጺሴ ሻፋ ፒንꬃን ዲዛ ዴሬ ኣይሲዛይታስ ኢሚዳ፤ ኢስቲካ ዴራኔ ጾሳ ኬꬃ ኦሶ ማዲዳ።
EZR 9:1 ሃ ሚሻቲ ፖሌቲዳፔ ጉዬ ኢስራኤሌ ካሌꬂዛይታፔ ኢሲ ኢሲ ዳናቲ ታኮ ዪዲ፥ «ቄሴቲ፥ ሌዌቲኔ ኢስራኤሌ ዴሬይ ባ ዶꬃን ዲዛ ኣሞኔን፥ ሞኣቤን፥ ጊብጼን ዲዛ ኣሳታራኔ ካናኔ ኣሳ፥ ሂቴ ኣሳ፥ ፓሪዜ ኣሳ፥ ያቡሴ ኣሳኔ ኣሞሬ ኣሳ ቱናቴꬃፌ ባንታና ናጊቤቴና፤ ሄ ኣይዛቤቲ ኦꬂዛ ማላ ቱና ኦሶ ኦꬂዳ።
EZR 9:2 ባንታሲኔ ባንታ ናይታስ ኣይዛቤታፔ ማቾ ኤኪዳ፤ ሄሳፌ ዴንዲዳይሳን ዱማ ጊዲዳ ጾሳ ዴራ ኣይዛቤታራ ዋላኪ ቱኒሲዳ፤ ሃይሳ ቱና ኦሶዛስ ዋና ኣይፌ ጊዲዳይቲ ካሌꬂዛይታኔ ሃላቃታ» ጊዳ።
EZR 9:3 ታኒካ ሄሳ ሲዪዳ ማላ ታ ቦንቾ ማይኦዛኔ ካባ ዳካዲስ፤ ቃሴካ ታኒ ታ ሁኤ ቢናናኔ ቡቻ ቡጫዳ ኬሃ ሙዞታ ኡታዲስ።
EZR 9:4 ታኒ ኦማርሳ ዎዴ ሺቂዛ ያርሾይ ሺቃና ጋካናስ ዳጋማኒኔ ሙዞቴꬃን ጋምኣዲስ፤ ዲኤቴꬃፌ ሲሚዳ ኣሳይ ባ ኦꬂዳ ናጋራፔ ዴንዲዳይሳን ኢስራኤሌ ጾሳይ ዮቲዳ ቃላ ሲዪዳ ኣሳይ ኡባይ ዳጋሚዲ ያዪሼ ታ ዲዛሶ ሺቂዴስ።
EZR 9:5 ሄሳፌ ጉዬ ኦማርሳ ዎዴ ያርሾይ ሺቂዛ ዎዴ ዳኬቲዳ ታ ማይኦዛ ማይኢዳ ማላ ሙዞታሼ ጉልባታዳ ጎዳ ታ ጾሳኮ ታ ኩሼ ፑዴ ዴንꬃዳ ሂዝጋ ዎሳዲስ፤
EZR 9:6 «ታ ጾሳዉ! ኑ ናጋራይ ኑፔ ዳሮ ጊዲዳይሳኒኔ ኑ ሞሮይ ሳሎ ጋኪዳይሳ ጊሻስ ታኒ ኔኮ ፑዴ ꬎቁ ጋዳ ጼላናዉ ባባይሲኔ ዬላታይስ።
EZR 9:7 ካሴ ኑ ኣዋታፔ ዶሚዲ ሃች ጋካናስ ኑ ኬሂ ዳሮ ሞሮ ኦꬂዶስ፤ ኑ ናጋራፔ ዴንዲዳይሳን ኑኒ፥ ኑ ካዎቲኔ ኑ ቄሴቲ ኣላጋ ካዎታ ኩሼን ኩንዲዶስ፤ ሄሳፌ ዴንዲዳይሳን ማሻስ ኢሜቲዶስ፤ ኑ ሃሮይካ ቦንቄቲዴስ፤ ኑ ቃሼቲዲ ዲኤቲ ቢዶስ፤ ሃች ኑ ዲዛይሳ ማላ ዉርሴꬅ ጋካናስ ካዉዪዶስ።
EZR 9:8 ጎዳዉ ኑ ጾሳዉ! ኔኒ ኑ ኣይፌ ፖኢሳዳሳ፤ ሄኮ ሃኢ ጉꬃ ዎዴ ኔ ሲንꬃን ቦንቾ ዴሚዲ ኑፔ ጉꬃቲ ኣይሌቴꬃ ቃምባራ ጋርሳፌ ኬዚዲ ሃኖ ጌሻ ቢታይ ቦላ ኑ ሳሮን ዳና ማላ ኦꬃዳሳ፤ ኑኒ ኣይሌቴꬃ ቃምባራ ጋርሳን ኩንዲኮካ ኔ ኑስ ኦራꬃ ዴኦ ኢማዳሳ።
EZR 9:9 ኑ ኣይሌ ጊዲኮካ ኑ ጾሳይ ኑኒ ኣይሌ ጊዲ ኣታና ማላ ኣጋቤካ፤ ኔኒ ፓሪሴ ካዎቲ ኑስ ቃꬌታና ማላኔ ፓጻ ዲሼ ኣይሌቴꬃፌ ኬዚዲ ካሴ ላሌቲዳ ጾሳ ኬꬃ ኑ ዛሪ ኬጻና ማላኔ ሃይሳ ዩሁዳኒኔ ዬሩሳላሜን ኑ ሳሮ ዳና ማላ ኦꬃዳሳ።
EZR 9:10 «ጊዶ ኣቲን ኑ ጾሳዉ! ሃይሳ ጋካናስ ሃኒዳ ሚሻ ኡባስ ኑ ኣይ ጋኔ? ሄኮ ሃኢካ ኔ ኣዛዞ ሞሪዶስ።
EZR 9:11 ሃ ኣዛዞቲካ ኔ ኣይሌ ናቤታ ባጋራ ኢሜቲዳይታ፤ ናቤቲ ካሴ፥ ‹ኢንቴ ላታና ቢታያ ቱና ኦሶፔ ዴንዲዳይሳን ኢዚን ዴኢዛ ኣሳይ ጋጻፔ ጋጻ ጋካናስ ሃራሲዛ ኦሶኒኔ ቱናቴꬃን ኩማና ማላ ኦꬂዳ።
EZR 9:12 ሄሳ ጊሻስ ኢንቴ ሚኖ ጊዳና ማላ ሄ ቢታይ ኣይፌ ማና ማላኔ ሜርናስ ኢንቴ ኢንቴ ናይታ ላቲሳና ማላ ኢንቴ ማጫ ናይታ ኢስታ ኣቱማ ናይታስ ኢሞፍቴ፤ ኢስታ ማጫ ናይታካ ኢንቴ ኣቱማ ናይታስ ኤኮፍቴ፤ ኢስቲ ዱሬታና ማላኔ ሳሮን ዳና ማላ ቃላ ጌሎፒቴ› ጊ ታማርሲዳ።
EZR 9:13 «ሃይሲ ኑ ቦላ ጋኪዳ ሜቶይ ኑ ኦꬂዳ ኢታ ኦሶፔኔ ሞሮፔ ዴንዲዳይሳና፤ ጊዲኮካ ኔኒ ኑ ጾሳይ ኑና ቃጻይዳይ ኑ ቃጻዬታናስ ቤሲዛይሳፌ ጉꬃ፤ ሄሳፌካ ቦላራ ኑ ሃይቆፔ ኣቲዲ ሼምፖራ ፓጻ ዳና ማላ ኦꬃዳሳ።
EZR 9:14 ሂስቲን ቃሴ ኑኒ ኔ ኣዛዞታ ዬꬊ ኣꬊ ሃ ኢታ ኦꬂዛ ማካላ ኣሳታራ ዋኒ ኤኬታኔኔ ጌሌታኔ? ሃ ኢታ ኦሶዛ ጋሶን ኑ ዜሬꬅ ኣሾንታ ኔ ሃንቆን ኔ ꬋይሲኪዬ?
EZR 9:15 ጎዳ ኢስራኤሌ ጾሳዉ! ኔኒ ቱሙ ፒርዲዛ ጾሳ፤ ጊዶ ኣቲን ኑኒ ጉꬃቲ ꬋዮፔ ኣቲዲ ዴኦን ዳና ማላ ኦꬃዳሳ፤ ኑኒ ኔ ሲንꬂ ሺቃና ቤሲዛይታ ጊዶኮሺን ሄኮ ኑኒ ኑ ሞሮራ ኔ ሲንꬂ ሺቂዶስ።»
EZR 10:1 ኢዝራይ ጾሳ ኬꬃ ፔንጌን ጉልባቲዲ ዬኪ ዎሲሼኔ ኦሴቲዳ ናጋራ ኡባ ጾሳስ ፓጺሺን ኣቱማሳቲ፥ ማጫሳቲኔ ናይታራ ጉጂን ዳሮ ኢስራኤሌ ዴሬይ ኢዛ ዩዪ ኣꬊ ኢታ ዬሆ ዬኪዳ።
EZR 10:2 ሄሳፌ ጉዬ ኤላሜ ዜሬꬃታፔ ዪሂኤሌ ና ሻካኒያይ ኢዝራ፥ «ኑኒ ኑ ዴሬን ዲዛ ኣይዛቤ ማጫሳታ ኤኪዳ ጊሻስ ኑኒ ጾሳ ሲንꬃን ኣማኔቲቤኮ፤ ጊዶ ኣቲን ሃኢካ ኢስራኤሌስ ሂዶታይ ዴስ።
EZR 10:3 ሃኢ ሃ ኣላጋ ማጫሳታ ኢስታ ናይታራ ጋꬂ ዬዳናስ ጾሳ ሲንꬃን ጫቆ ቃላ ጌሎስ፤ ጎዶ ኔኒኔ ኑ ጾሳ ኣዛዞ ቦንቺዛ ሃራ ኣሳቲ ኢሚዛ ዞሬ ኡባ ኑ ፖላና፤ ቃሴ ጾሳ ዎጋይ ኣዛዚዛይሳ ኡባ ኑ ኦꬃና።
EZR 10:4 ሃይሳ ፖላናስ ኣላፌቴꬂ ኔስ ዲዛ ጊሻስ ዴንዳ፤ ኑኒካ ኔና ማዳና፤ ኣይኮይ ባ ሚና!» ጊዴስ።
EZR 10:5 ኢዝራይ ዴንዲዲ ቄሴ ሃላቃቲ፥ ሌዌቲኔ ሃንኮ ኣቲዳ ዴሬ ካሌꬂዛይቲ ሻካኒያይ ሺሺዳ ቆፋ ኤኪዳይሳ ኢዛስ ቆንጪሳና ማላ ጫቄꬂዲ ኦሶ ዶሚዴስ።
EZR 10:6 ሄሳፌ ጉዬ ኢዝራይ ጾሳ ኬꬃስ ሲንꬃ ባጋፌ ዴንዲዲ ኤልያሼቤ ና ዪሆሃናኔይ ዲዛ ኪፊሌ ጌሊዴስ፤ ዲኤቲዳ ኣሳታስ ኣማኖይ ꬋዪን ኢስቲ ኦꬂዳ ሞሮ ጊሻስ ኩሜꬃ ኦማርስ ሙዞቲሼ ጋዴ ዎንቲሲዴስ፤ ካꬂኔ ሃꬅ ባ ዶናኮ ሺሾንታ ጾሚዴስ።
EZR 10:7 ሄሳፌ ጉዬ ዲኤቴꬃፌ ሲሚዳ ኣሳይ ዬሩሳላሜን ሺቃና ማላ ዩሁዳኒኔ ዬሩሳላሜ ኡባን ኣዋጄቲዴስ።
EZR 10:8 ሄሲ ዉሪካ ዴሬ ኣይሲዛይታ ዞሬኒኔ ኣዛዞን ቃሼቲዳ ማላ ሄꬑ ጋላሳ ጊዶን ሃ ሺቆዛን ሺቆንታ ኣቲዳዴይ ኦኒካ ዲኮ ኢዚ ሃሪዳዚ ዉሪ ቦንቄቲን ዲኤቴꬃፌ ሲሚዳ ኣሳታ ሺቆፔ ጎዴታና ማላ ዮቴቲዴስ።
EZR 10:9 ሄ ጼይሳዚ ጼይጌቲዳ ማላ ሄꬑ ጋላሳ ጋርሳን ዩሁዳኒኔ ቢኒያሜ ዴሬን ዴኢዛ ኣሳይ ዉሪ ኡዱፉንꬆ ኣጊናን ናምኡ ታማንꬃ ጋላስ ዬሩሳላሜ ዪዲ ጾሳ ኬꬃ ካሬን ዲዛ ዴምባን ሺቂዳ፤ ሄ ሺቂዳ ኣሳይ ኣሾንታ ዱላታፔኔ ሄ ዎዴ ቡኪዛ ዎልቃማ ኢራፔ ዴንዲዳይሳን ኮኮሪሼ ሲዪዴስ።
EZR 10:10 ቄሴ ኢዝራይ ኤቂዲ፥ «ኢንቴ ኢንቴ ኣማኖ ፓጪሲ ቤቲዴታ፤ ኣይዛቤ ማጫሳታፔ ማቼታ ኢንቴ ኤኪዳ ጊሻስ ኢስራኤሌ ኣሳ ቆሆ ቦላ ቆሆ ጉጂዴታ።
EZR 10:11 ሃኢፔ ዶሚዲ ካሴ ኢንቴ ኣዋታ ጾሳ ሲንꬃን ኢንቴ ናጋራ ፓጺቴ፤ ኢዚ ኡፋዬቲዛ ሚሽ ኡባ ኦꬂቴ፤ ኑ ዴሬን ዲዛ ኣይዛቤ ኣሳታፔ ሻኬቲቴ፤ ኢንቴ ኤኪዳ ሄ ማጫሳታ ኣንጂ ዬዲቴ» ጊዴስ።
EZR 10:12 ሺቂዳ ዴሬይ ዉሪ ባ ቃላ ꬎቁ ሂስቲዲ «ኔ ጊዛይሳ ኡባ ኑ ኦꬃና!
EZR 10:13 ጊዶ ኣቲን ሄኮ ሺቂዳ ኣሳይ ዳሮ፤ ቃሴካ ዴጾ ኢራይ ቡኪዛ ጊሻስ፥ ኢዛን ጌላና ኬꬂ ባይንዳ ጊሻስ ሃይሳን ኤቃናስ ዳንዳዮኮ፤ ሄሳ ቦላ ቃሴ ኑፔ ዳሮቲ ሃ ናጋራን ጌሊዳ ጊሻስ ኢሲ ቃማኒኔ ናምኡ ቃማን ሃ ዮኦዚ ዉራና ዳንዳዬና።
EZR 10:14 ሄሳ ጊሻስ ኑ ሃላቃቲ ዬሩሳላሜን ታኪዲ ሃ ዮኦዛ ሎኤꬂ ጼሌቶ፤ ሄሳፌ ጉዬ ኣይዛቤ ማጫሳታ ኤኪዳይቲ ዉሪ ባንቲ ዲዛ ካታማን ዲዛ ካሌꬂዛይታራኔ ዳናታራ ጊዲዲ ባሬይ ኢሜቲዳ ጋላስ ባስ ኢሜቲዳ ፒርዳ ኤኬቶ፤ ሄሳꬆ ኦꬂኮ ጾሳ ሃንቆይ ሄሳን ኢርጻና» ጊዴስ።
EZR 10:15 ሃይሲ ዮቴቲን ማሹላሜይኔ ሌዌ ሳባታይ ሄ ዮቴቲዳ ቆፋ ኤቄቲን ኢስታ ቆፋ ማዲዳይቲ ኣሳሄሌ ና ዮናታኔኔ ቴቁዌ ና ያሂጼሌ ጻላ ጊዲሺን ሃንኮ ዴሬይ ቆፋዛን ኩዪዴስ።
EZR 10:16 ዲኤቴꬃፌ ሲሚዳ ዴሬ ኡባይ ሃይሳ ቆፋዛ ኤሮ ጊ ኤኪዴስ፤ ሄሳ ጊሻስ ቄሴ ኢዝራይ ሃ ኦሶዛ ኦሲሲዛይታ ኮራፒኔታ ዶሪዲ ኢስታ ሱንꬅ ጻፊ ዎꬂዴስ፤ ኢስቲካ ታማንꬃ ኣጊናይ ጌሊዳ ኮይሮ ጋላስ ሄ ዮኦዛ ፒልጊ ጼሎ ኦይኪዳ።
EZR 10:17 ካሊዛ ላይꬃን ኮይሮ ኣጊናን ኮይሮ ጋላስ ኣይዛቤ ማጫሳታ ኤኪዳ ኣሳታ ዮኦ ፒልጊ ጼሊ ኦንጊዳ።
EZR 10:18 ኣይዛቤ ማጫሳታ ኤኪዳ ኣሳታ ሱንꬂ ሃይሳፌ ካሊ ዲዛይሳ፤ ቄሴ ዜሬꬃታፔ፥ ኢዮሳዶቄ ናይታ ጊዲዳ ኢያሶፔኔ ኢዛ ኢሻታፔ ባጋፌ ማኢሳያ፥ ኤልኤዜሬ፥ ያሪቤኔ ጎዶሊያሳ፤
EZR 10:19 ኢስቲ ባ ማቼታ ኣንጂ ዬዳና ማላ ቃላ ጌሊዳፔ ጉዬ ባንታ ቆሆ ያርሾስ ꬋርሾ ኤኪ ኤሂዳ።
EZR 10:20 ኢሜሬ ዜሬꬃፌ፥ ሃናኒያኔ ዛባዲያ፥
EZR 10:21 ሃሪሜ ዜሬꬃፌ፥ ማኢሳያ፥ ኤላሳ፥ ሻማኤ፥ ዪሂኤሌኔ ኦዚያ፤
EZR 10:22 ፓሽኩሬ ዜሬꬃፌ፥ ኤልዮኤናዬ፥ ማኢሳያ፥ ኢስማኤሌ፥ ናቲናኤሌ፥ ዮዛባዴኔ ኤልኣሳ፤
EZR 10:23 ሌዌታ ዜሬꬃታፔ፥ ዮዛባዴ፥ ሺምኤ፥ ቃሊጻ ጌቴቲ ጼይጌቲዛ ቄላያ፥ ፓታያ፥ ዩሁዳኔ ኤልኤዜሬ፤
EZR 10:24 ዬꬃ ዬጺዛይታ ባጋፌ፥ ኤልያሼቤ ጾሳ ኬꬃ ጊቤ ናጊዛይታ ባጋፌ፥ ሻሎሜ፥ ቴሌሜኔ ኡሪ፤
EZR 10:25 ሃራ ኢስራኤሌ ኣሳፔ፥ ፓሮሴ ዜሬꬃፌ፥ ኤራሚያ፥ ዪዚያ፥ ማልኪያ፥ ሚያሚኔ፥ ኤልኤዜሬ፥ ማልኪያኔ ባናያ፤
EZR 10:26 ኤላሜ ዜሬꬃፌ፥ ማታኒያ፥ ዛካራሳ፥ ዪሂኤሌ፥ ኣቢዴ፥ ያርሞቴኔ ኤላሳ፤
EZR 10:27 ዛቶ ዜሬꬃፌ፥ ኤልዮኤናዬ፥ ኤልያሼቤ፥ ማታኒያ፥ ያርሞቴ፥ ዛባዴኔ ኣዚዛ፤
EZR 10:28 ቤባዬ ዜሬꬃፌ፥ ዪሆሃናኔ፥ ሃናኒያ፥ ዛባዬኔ ኣትላዬ፤
EZR 10:29 ባኔ ዜሬꬃፌ፥ ማሹላሜ፥ ማሉኬ፥ ኣዳያ፥ ያሹቤ፥ ሼኣሌኔ ኤራሞቴ፥
EZR 10:30 ፓሃቴ-ሞኣቤ ዜሬꬃፌ፥ ኣዳና፥ ካላሌ፥ ባናያ፥ ማኢሳያ፥ ማታኒያ፥ ባስሊኤሌ፥ ቢኑዌኔ ሚናሴ፤
EZR 10:31 ሃሪሜ ዜሬꬃፌ፥ ኤልኤዜሬ፥ ዪሺያ፥ ማልኪያ፥ ሻማኤ፥ ሲሞና፥ ቢኒያሜ፥ ማሉኬኔ ሻማሪያ፤
EZR 10:33 ሃሹሜ ዜሬꬃፌ፥ ማታኒያ፥ ማታታ፥ ዛባዴ፥ ኤልፋሌጼ፥ ዬርማዬ፥ ሚናሴኔ ሺምኤ፤
EZR 10:34 ባኔ ዜሬꬃፌ፥ ማኢዳዬ፥ ኣሚራሜ፥ ኡእሌ፥ ባናያ፥ ባዲዬ ኬሉሄ፥ ዋኒያ፥ ሜርሞቴ፥ ኤልያሼቤ፥ ማታኒያ፥ ማቲኒያኔ ያኢሴ
EZR 10:38 ባኔ ዜሬꬃፌ፥ ሺምኤ፥ ሼሌሚያ፥ ናታኔ፥ ኣዳያ፥ ማኪናዳባዬ፥ ሻሻዬ፥ ሻራዬ፥ ኣዛሪኤሌ፥ ሼልሚያ፥ ሻማሪያ፥ ሻሎሜ፥ ኣማሪያኔ ዮሴፌ፤
EZR 10:43 ኔቦ ዜሬꬃፌ፥ ዪኢኤሌ፥ ማቲቲያ፥ ዛባዴ፥ ዜቢኔ፥ ያዳያ፥ ኢዩኤሌኔ ባናያ፤
EZR 10:44 ሃይቲ ዉሪ ኣይዛቤ ማጫሳታ ባስ ማቾ ኤኪዳይታ፤ ኢስቲካ ኣይዛቤ ማጫሳታ ኣንጂዲ ኢስታ ናይታራ ጋꬂ ዬዲዳ።
NEH 1:1 ሃካሊያ ና ናሂሚያይ ሃሳይዳ ቃላይ ሃይሳፌ ካሊ ዲዛይሳ፤ ኣርጼኪሲሲ ፓሪሴ ዴሬን ካዎቲዳ ናምኡ ታማንꬃ ላይꬃን ኪሶሌ ጌቴቲ ጼይጌቲዛ ኣጊናን ታ ናሂሚያይ ዋና ካታማ ሱሳን ዳይስ።
NEH 1:2 ታ ኢሻታፔ ኢሲ ሃናኒያ ጌቴቲዛይሲ ሃራ ኣሳታ ካሌꬂዲ ዩሁዳፔ ታኮ ዪዴስ፤ ታኒ ኢስታ ዬሩሳላሜ ጊሻሲኔ ዲኤቲዲ ባቢሎኔ ቦንታ ሄን ኣቲዳ ኣሳ ጊሻስ ኦይቻዲስ።
NEH 1:3 ኢስቲካ ታስ፥ «ዲኤቲዲ ባቢሎኔ ቢታ ቦንታ ኣቲዳ ኣይሁዳቲ ጊታ ሜቶኒኔ ዋዬ ጊዶን ዴቴስ፤ ዬሩሳላሜ ጊምቤቲ ላሌቲዲ ኩንዲዳ፤ ቃሴ ጊምቤዛ ጎርዲዛ ፔንጌቲ ታማን ጹጌቲዳ» ጊዳ።
NEH 1:4 ሃይሳ ኡባ ሲዪዳፔ ጉዬ ኡታዳ ዬካዲስ፤ ዳሮ ጋላስ ጾማኒኔ ሙዞቴꬃን ጋምኣዳ ጾሳ ሂዝጋ ዎሳዲስ፥
NEH 1:5 «ሳሎ ጎዳዉ! ኔና ዶሲዛይታራኔ ኔ ኣዛዞ ናጊዛይታራ ሜርናስ ኔኒ ኔ ጫቆ ቃላ ናጊዛ ጊታኔ ያሺሲዛ ጾሳ።
NEH 1:6 ጾሳዉ! ኔ ኣይሌ ጊዲዳ ኢስራኤሌ ኣሳስ ኪያና ማላ ጋላሲኔ ኦማርስ ታ ዎሲዛ ዎሳ ሲያ፤ ታናካ ቆፓ፤ ኑኒ ኢስራኤሌ ኣሳይ ኦꬂዳ ናጋራ ታኒ ኔስ ፓጻይስ፤ ቱማፔ ታኒኔ ካሴ ኑ ኣዋቲ ናጋራ ኦꬂዶስ።
NEH 1:7 ኔኒ ኔ ኣይሌ ሙሴስ ኢሚዳ ኣዛዞዛኔ ዎጋዛ ኑኒ ናጎንታ ኣጊዳ ጊሻስ ኔና ቆሂዶስ።
NEH 1:8 «ኔ ሙሴስ፥ ‹ኢንቴኖ ኢስራኤሌ ኣሳዉ! ኢንቴ ታና ኣማኖን ካሎንታ ኣጊኮ ታኒ ኢንቴና ካዎቴꬃታ ጊዶን ላላና፤ ጊዶ ኣቲን ኢንቴ ታኮ ሲሚዲ ታ ኣዛዞ ፖሊዛ ጊዲኮ ታ ኢንቴና ቢታ ጋጻን ኢንቴ ላሌቲዳ ጊዲኮካ ታ ሱንꬃይ ጼይጌታና ማላ ታ ዶሪዳሶ ሺሻዳ ዛራ ታ ኤሃና› ጋዳ ዮቲዳ ቃላ ቆፓ።
NEH 1:10 «ጾሳዉ! ሃይቲ ሃይሳፌ ካሴ ኔኒ ኔ ጊታ ዎልቃኒኔ ሚኖ ቄሴን ዎዚዳ ኔ ኦሳንቻታኔ ኔ ዴሬታ።
NEH 1:11 ጎዳዉ! ሃኢካ ታ ዎሲዛ ዎሳ ሲያ፤ ኔና ዶሲዲ ቦንቻና ኮይዛ ኦሳንቻታ ዎሳ ኤዝጋ፤ ቃሴ ሃይሳ ካዎዛ ሲንꬃን ታስ ቴማቴꬅ ኢማዳ ሃች ታኒ ኔ ኦሳንቻዚ ኦꬃና ኮይዛይሳ ታስ ፖሊሳ።» ታኒ ሄ ዎዴ ካዎሶን ዎይኔ ኡሹ ጋሴꬂዛ ኣሳ።
NEH 2:1 ካዎ ኣርጼኪሲሲ ካዎቲዳ ናምኡ ታማንꬆ ላይꬃን ኒሳኔ ጌቴቲዛ ኣጊናን ጋላሳታፔ ኢሲ ጋላስ ካዎዛስ ዎይኔፔ ኦሴቲዳ ኡሹ ዱቃ ኢማዲስ፤ ሄ ዎዴፔ ኣቲን ካሴ ታ ጬጪሺን ካዎዚ ቤዪ ኤሮንታ ጊሻስ፥ «ኢሲ ሜቶይ ኔ ቦላ ጋኪን ኣቲን ሳኬቶንታ ጮ ሜላ ኔ ኣይፌሶይ ዋኒ ላሜቲዴ?» ጊ ኦይቺዴስ።
NEH 2:3 ታኒካ ኬሃ ባባሼ፥ «ካዎ! ኔ ሜርናስ ካዎታ! ካሴ ኑ ኣዋቲ ኢዛን ሞጌቲዳ ካታማይ ላሌቲዲኔ ሄ ካታማ ጊምቤ ፔንጌይ ታማን ጹጌቲ ꬋይሺን ታኒ ዋናዳ ጬጪኪና!» ጋዲስ።
NEH 2:4 ካዎዚ ታና፥ «ሂስቲን ሃኢ ኔ ኮይዛይ ኣዜ?» ጊ ኦይቺዴስ፤ ታኒካ ሳሎ ጾሳኮ ዎሲዳፔ ጉዬ፥
NEH 2:5 ካዋስ፥ «ካዎ! ታኒ ኔና ኡፋይሲዛ ጊዲኮ ቃሴ ታ ኦይሾ ኔ ኤኪዛ ጊዲኮ ካሴ ታ ኣዋቲ ሞጌቲዳሶ ዩሁዳ ዴሬ ባዳ ሄ ካታማዮ ዛራዳ ኬጻና ማላ ታና ዬዳርኪ» ጋ ዎሳይስ።
NEH 2:6 ሄ ዎዴ ካዋ ማቼያ ኢዛ ማታን ኡታ ዲሺን ካዎዚ ታና፥ «ኔ ባና ኦጌይ ኣፑን ጋላስ ዉርሳኔ? ቃሴ ኔ ኣይ ዎዴ ሲማኔ?» ጊ ኦይቺን ታኒ ኣፑን ጋላስ ጋምኣናኮኔ ኣይዴ ሲማናኮ ዮታዲስ።
NEH 2:7 ሄሳፌ ጉዬ ታ ዩሁዳ ዴሬ ፒና ባና ማላ ኤፊራጺሴ ሻፋፔ ኣርሼይ ዉሊዛ ባጋራ ዲዛ ዴሬ ኣይሲዛይታስ፥ «ኣꬊ ቦ» ጊዛ ዳብዳቤይ ታስ ጻፌቲ ኢሜታና ማላ ካዎዛ ዎሳዲስ፤
NEH 2:8 ካዎ ዎራ ናጊዛ ኣሳፌ ጌቴቲዛዴይ ጾሳ ኬꬃ ጊምቤ ፔንጌታስ፥ ካታማ ጊምቤ ፔንጌታሲኔ ታ ኢዛን ዴኣናሶ ኬጻናስ ሚꬅ ቃንጺሺን ዲጎንታ ማላ ኣዛዚዛ ዳብዳቤ ታስ ኢማና ማላ ኦይቻዲስ፤ ጾሳ ኪያቴꬂ ታናራ ዲዛ ጊሻስ ካዎዛ ታ ኦይቺዳ ኡባ ኢሚዴስ።
NEH 2:9 ካዎዚ ኣማርዳ ኦላ ሞኮኔቲኔ ፓራን ኦሌቲዛይቲ ታናራ ባና ማላ ኪቲዴስ፤ ታኒ ኤፊራጺሴ ሻፋ ፒንꬃን ኣርሼይ ዉሊዛ ባጋራ ዲዛ ዴሬ ኣይሲዛይታኮ ጋኪዳ ማላ ካዎዚ ዬዲዳ ዳብዳቤዛ ኢማዲስ።
NEH 2:10 ጊዶ ኣቲን ቤቲ-ሆሮኔ ካታማ ኣስ ጊዲዳ ሳንባላጼይኔ ኣሞኔ ዴሬ ኣይሲዛ ጾቢያይ ኢስራኤሌ ዴራ ሳሮቴꬃስ ሎኦ ሚሽ ኦꬂዛ ኣሲ ዪዳይሳ ሲዪዲ ኬሂ ሃንቄቲዳ።
NEH 2:11 ታኒካ ዬሩሳላሜ ባዳ ሄꬑ ጋላስ ጋምኢዳፔ ጉዬ፥
NEH 2:12 ዬሩሳላሜ ካታማን ታ ኦꬃናይሳ ጾሲ ታስ ቆንጪሲዳይሳ ታ ኦናስካ ዮቶንታ ታ ዎዚናን ኦይካ ጋምኢዳፔ ጉዬ ጉꬃ ኣሳታ ታናራ ካሌꬃ ኤካዳ ኦማርሳፌ ጊዲ ጊዶꬅ ባዲስ፤ ሄ ዎዴ ኑስ ዲዛ ቶጋ ሜሄይ ታ ቶጊዳይሳፌ ሃራይ ባዋ።
NEH 2:13 ጊዶꬅ ዙሌ ፔንጌራ ኬዛዳ ዳዌ ፑልቶ ጌቴቲዛሶራ ፒናዳ ዱጌ ባጋን ቡራ ዬጊዛሶራ ኣꬋ ባሼ ላሌቲዳ ካታማኔ ታማን ኤጺ ꬋይዳ ጊምቤ ፔንጌታ ቤያዲስ።
NEH 2:14 ሄሳፌ ጉዬ ካላዳ ኣርሼይ ሞኪዛሶስ ፑዴሃ ባጋራ ዲዛ፥ «ፑልቶ ሃꬃ ጊምቤ ፔንጌ» ጌቴቲዛሶራ ካዎ ኤሌ ሃꬃኮ ባዲስ፤ ጊዶ ኣቲን ታኒ ቶጊዳ ቶጋ ሜሄይ ላሌቲዳ ጊምባ ላሌꬃ ቦላራ ኣꬊ ቢዛ ኦጌይ ዴና።
NEH 2:15 ሄሳ ጊሻስ ኦማርስ ቄዲሮኔ ሻፋ ዎꬋዳ ጊምቤታ ጼላሼ ባዲስ፤ ዉርሴꬃን ካሴ ታ ዪዳ ኦጌዛራ ጉዬ ሲማዳ ሾባ ጊምቤ ፔንጌ ባጋራ ካታማ ሲማ ጌላዲስ።
NEH 2:16 ዴራን ዲዛ ዳናታፔ ኢሳዴይካ ታ ኣዋ ቢዳኮ ኣይ ኦꬂዳኮ ኤሪዳይ ኦኒካ ዴና፤ ሃራይ ኣቶሺን ኣይሁዳታፔ ቄሴታስ፥ ካሌꬂዛይታስ፥ ዳናታስ ዎይኮ ታናራ ኦꬂዛ ሃራ ኣሳታፔ ኦናስካ ኣይኮካ ዮታቤኬ።
NEH 2:17 ሃይሳፌ ጉዬ፥ «ኣኔ ኑስ ዲዛ ሜቶ ጼሊቴ! ዬሩሳላሜይ ላሌቲዳ ላሌꬂ ዶሬ ጊዲዴስ፤ ኢዚ ጊምቤዛ ፔንጌቲካ ታማን ጹጌቲ ꬋይዳ፤ ሄሳ ጊሻስ ኣኔ ዴንዲዲ ካታማዛ ጊምቤ ዛሪ ጊምቦስ፤ ኑ ቦላ ጋኪዳ ዬላቴꬃካ ኣኔ ዲጎስ» ጋዲስ።
NEH 2:18 ቃሴ ጾሳ ኪያቴꬂ ታናራ ዲዛይሳኔ ኢዚ ታና ዎስቲ ማዲዳኮ ካዎዚ ታስ ዮቲዳይሳ ኡባ ታ ኢስታስ ዮታዲስ፤ ኢስቲ «ኣኔ ቃሴካ ዛሪ ኦꬆስ!» ጊዳፔ ጉዬ፥ ኦሶ ኦꬃና ጊጌቲዳ።
NEH 2:19 ጊዶ ኣቲን ሆሮኔ ኣስ ሳንባላጼይ፥ ኣሞኔ ዴሬ ሹሜ ጾቢያይኔ ኣራቤ ዴሬ ኣስ ጌሻሜይ ኑ ኦሶስ ኬሲዳ ቆፋታ ሲዪዳ ዎዴ ኑ ቦላ ናጪ ሚጪሼ፥ «ሃይሲ ኢንቴ ኦꬂዛይሲ ኣዜ? ዎይኮ ካዎዛ ቦላ ማካላና ኮዬቲ?» ጊ ኦይቺዳ።
NEH 2:20 ታኒካ፥ «ኑ ኦꬂዛ ኦሶዛን ሳሎ ጾሲ ኑና ማዳና፤ ሄሳ ጊሻስ ኑኒ ኢዛ ኦሳንቻቲ ዴንዲዲ ኦꬃና፤ ኢንቴስ ጊዲኮ ዬሩሳላሜን ኣይ ሚሻንካ ኢንቴና ጋꬂዛ ዎጋይኔ ኢንቴ ቆፌታና ታሪኬይ ኢንቴስ ዴና!» ጋ ኢስታስ ዛራዲስ።
NEH 3:1 ካታማዛ ዲርሳይ ጊምቤቲዳይ ሃይሳፌ ካሊ ዲዛይሳ ማላ፤ ቄሴታ ሃላቃ ኤልያሼቤይኔ ኢዛራ ኦꬂዛ ቄሴቲ፥ «ዶርሳታ ፔንጌ» ጌቴቲዛ ጊምቤ ፔንጌዛ ዛሪ ጊምቢዲ ጾሳስ ዱማሲዳ፤ ኢዛስ ፔንጌታካ ጊግሲዳ፤ ጊምቤዛካ «ጼቱ» ጌቴቲ ጼይጌቲዛ ናጌሶ ጊምቤዛኔ «ሃናኒኤሌ ጊምቤ» ጌቴቲ ጼይጌቲዛ ሻኮ ጊምቤዛኮ ጋካናስ ጾሳስ ዱማሲዳ።
NEH 3:2 ኢዛፔ ካሊ ዲዛይሳ ኢያርኮ ኣሳቲ ኦꬂሺን ኢዛፔ ካሊዛይሳ ኢሚሬ ና ዛኩሬይ ዛሪ ኦꬂዴስ።
NEH 3:3 ሃሲናኣ ዜሬꬃቲ ሞሌ ጊምቤ ፔንጌ ጌቴቲዛሶ ዛሪ ኦꬂዳ፤ ቱሳታካ ኤሲዳ፤ ፔንጌታካ ጌልꬂዳ፥ ፔንጌታ ጎርዲዛ ቁልፔታኔ ኮላታታ ጊግሲዳ።
NEH 3:4 ኢዛፔ ካሊ ዲዛይሳ ሃቆጼ ናዛ ና ኡሪያ ና ሜርሞቴይ ዛሪ ኦꬂዴስ፤ ካሊ ዲዛይሳ ሜሼዛቤሌ ናዛ ና ባራካዬ ና ማሹላሜይ ዛሪ ኦꬂዴስ፤ ኢዛፔ ካሊ ዲዛይሳ ባኣና ና ሳዶቄይ ዛሪ ኦꬂዴስ።
NEH 3:5 ኢዛፔ ካሊ ዲዛይሳ ቴቁሄ ካታማ ኣሳቲ ዛሪ ኦꬂዳ፤ ጊዶ ኣቲን ሄ ካታማን ዲዛ ሹሜቲ ኢስታ ኦሲሲዛ ኣሳቲ ኢስታስ ጊሻ ኢሚዳ ኦሶዛ፥ «ኦꬆኮ!» ጊ ኢጺዳ።
NEH 3:6 ፋሳሄ ና ዮያዳኤይኔ ቤሲዲያ ና ማሹላሜይ ዪሻኔ ጋልኣ ጊምቤ ፔንጌ ዛሪ ኦꬂዳ፤ ቃሴ ቱሳታካ ኤሲዳ፤ ፔንጌ ጌልꬂዳ፤ ፔንጌታስ ቁልፔታኔ ኮላታታ ጌልꬂዳ።
NEH 3:7 ሄሳፌ ካሊ ዲዛይሳ ጌባኦኔ ካታማ ኣስ ማላጺያራኔ ሜሮኖቴ ዴሬ ኣስ ያዶኔራ ዛሪ ኦꬂዳ። ቃሴካ ጌባኦኔኔ ሚጺጳ ካታማ ኣሳቲካ ኢስታራ ኢሲፌ ጊዲዲ ኤፊራጺሴ ሻፋ ፒንꬃን ኣርሼይ ዉሊዛ ባጋራ ዲዛ ዴሬ ኣይሲዛይ ዴኢዛሶ ጋካናስ ዲዛይሳ ዛሪ ጊምቢዳ።
NEH 3:8 ኢዛፔ ካሊ ዲዛይሳ ዎርቃ ቆጺዛ ሃርሃያ ና ኡዚኤሌይ ዛሪ ኦꬂዴስ፤ ካሊ ዲዛይሳ ሺቶ ኬሲዛ ሃናኒያይ ዛሪ ኦꬂዴስ፤ ሃ ኣሳቲ ዬሩሳላሜን፥ «ኣሆ ጊምቤ» ጌቴቲዛሶ ጋካናስ ዲዛይሳ ኡባ ዛሪ ኦꬂዳ።
NEH 3:9 ኢስታፌ ካሊ ዲዛይሳ ኦꬂዳይ ዬሩሳላሜ ዎራዳ ሄካ ባጋ ሻኪ ኣይሲዛ ኡሬ ና ኤራፋያይ ዛሪ ኦꬂዴስ።
NEH 3:10 ሃሩማፌ ና ዬዳያይ ባ ኬꬃ ፔንጌ ጊናን ዲዛይሳ ዛሪ ኦꬂዴስ፤ ካሊ ዲዛይሳ ሃሻቢናዬ ና ሃጹሼይ ዛሪ ኦꬂዴስ።
NEH 3:11 ሃሪሜ ና ማልኪያይኔ ፓሃቴ-ሞኣቤ ና ሃሹቤይ ሄሳፌ ካሊ ዲዛይሳ፥ «ኢቶኔ ጊምቤ» ጌቴቲ ጼይጌቲዛይሳ ዛሪ ኦꬂዳ።
NEH 3:12 ዬሩሳላሜ ዎራዳስ ኣቲዳ ሄካ ባጋ ኣይሲዛ ሃሉሄሼ ና ሻሎሜይ ካሊ ዲዛይሳ ዛሪ ኦꬂሺን ኢዛ ማጫ ናይቲ ኢዛ ማዲዳ።
NEH 3:13 ሃኖኔኒኔ ዛኖሄን ዲዛ ኣሳይ ኢሲፌ ማዴቲዲ ዙሌ ጊምቤ ፔንጌ ዛሪ ኦꬂዳ፤ ቃሴ ኢዛስ ፔንጌታ ጌልꬂዳ፤ ቁልፔታኔ ኮላታታ ጌልꬂዳ፤ ቡራ ዬጌꬃሶ ጋካናስ ኣዱሳቴꬃይ 1,000 ዋꬋ ጊዲዳ ጊምቤ ዛሪ ኦꬂዳ።
NEH 3:14 ቤቲ-ሃካሪሜ ዎራዳ ኣይሲዛ ኤሬካቤ ና ማልኪያይ፥ «ቡራ ዬጊዛ ጊምቤ ፔንጌ» ጌቴቲዛይሳ ዛሪ ኦꬂዴስ፤ ቃሴ ኢዛስ ፔንጌታ ጌልꬂዴስ፤ ፔንጌታስካ ቁልፔኔ ኮላታታ ጌልꬂዴስ።
NEH 3:15 ሚጺጳ ዎራዳ ኣይሲዛ ኮሊ-ሆዜ ና ሻሎሜይ፥ «ፑልቶ ሃꬃ ጊምቤ ፔንጌ» ጌቴቲዛ ጊምቤዛ ዛሪ ኦꬂዴስ፤ ቃሴ ኢዛስ ካማ ኦꬂዳፔ ጉዬ ጎርዲዛ ፔንጌታ ጌልꬂዴስ፤ ፔንጌታስካ ቁልፔታኔ ኮላታታ ጌልꬂዴስ፤ ሼላሄ ኤሌ ሃꬃ ባጋራ ካዎ ኣታኪልቴሶፔ ኦይኪዲ ካዎ ዳዊቴ ካታማ ጋካናስ ዎꬊ ቢዛ ኬላ ዛሪ ኬሊዴስ።
NEH 3:16 ቤቲ-ጹሬ ዎራዳ ሄካ ባጋ ኣይሲዛ ኣዚቡቄ ና ናሂሚያይ ዳዊቴ ዱፎሶ ጋካናስ፥ ኤሌ ሃꬅ ጌቴቲዛሶዛ ጋካናሲኔ ኦላ ቃራቲ ዲዛሶ ጋካናስ ዲዛይሳ ዛሪ ኦꬂዴስ።
NEH 3:17 ጊምቤዛ ኦሶን ዲዛ ሌዌ ዜሬꬃታ ሱንꬂ ሃይሳፌ ካሊ ዲዛይሳ፤ ባኔ ና ኤሬሁሜይ ኢዛፔ ካሊ ዲዛይሳ ዛሪ ኦꬂዴስ፤ ቃሴ ቂኢላ ዎራዳ ሄካ ባጋ ኣይሲዛ ሃሻቢያይ ባ ዎራዳ ሱንꬃን ካሊ ዲዛይሳ ዛሪ ኦꬂዴስ።
NEH 3:18 ሄሳፌ ካሊ ዲዛይሳ ሃንኮ ኣቲዳ ቂኢላ ዎራዳስ ሄካ ባጋ ኣይሲዛ ሄናዳዴ ና ባዌይ ዛሪ ኦꬂዴስ።
NEH 3:19 ሚጺጳ ዎራዳ ኣይሲዛ ኢያሶ ና ኤዜሬይ ኦላ ሚሻታ ዎꬂዛ ኬꬃ ሲንꬃ ባጋን ዲዛይሳፌ ቢዲ ጊምቤዛስ ጉላ ጋካናስ ዲዛይሳ ኡባ ዛሪ ኦꬂዴስ።
NEH 3:20 ዛካዬ ና ባሮኬይ ዋና ቄሴ ኤልያሼቤሶ ፔንጌ ጋካናስ ዲዛይሳ ዛሪ ኦꬂዴስ።
NEH 3:21 ሃቆጼስ ናዛ ና ጊዲዳ ኡሪያ ና ሜርሞቴይ ኤልያሼቤ ፔንጌፌ ቢዲ ኢዛ ኬꬃ ዉርሴꬅ ጋካናስ ዲዛይሳ ዛሪ ኦꬂዴስ።
NEH 3:22 ሄሳፌ ካሊ ዲዛ ጊምቤዛ ዬሩሳላሜ ዩሾን ዲዛ ቄሴቲ ዛሪ ኦꬂዳ።
NEH 3:23 ኢስታፌ ካሊዛይሳ ቢኒያሜይኔ ሃሹቤይ ባንታ ኬꬃ ሲንꬃራ ዲዛ ጊምቤዛ ዛሪ ኦꬂዳ፤ ቃሴ ኣናኒያ ናዛ ና ማኢሳያ ና ኣዛሪያሲ ባ ኬꬃ ሲንꬃ ባጋራ ዲዛ ጊምቤዛ ዛሪ ኦꬂዴስ።
NEH 3:24 ሄናዳዴ ና ቢኑዌይ ኣዛሪያሳ ሶፔ ዶሚዲ ጊምቤዛ ጉላ ጋካናስ ዲዛይሳ ዛሪ ኦꬂዴስ።
NEH 3:25 ኡጻዬ ና ፓላሌይ ጊምቤዛ ጉላፔ ቢዲ ዛቤ ናጌሶ ማታን ፑዴ ባጋራ ዲዛ ካዎ ኬꬃ ጊምቤ ሲንꬅ ጋካናስ ዲዛይሳ ኡባ ዛሪ ኦꬂዴስ።
NEH 3:26 ሄሳፌ ካሊ ዲዛይሳ ፓሮሴ ና ፓዳያይ፥ «ኦፌሌ» ዙምቡላን ዲዛ ጾሳ ኬꬃ ኦሳንቻቲ ሃꬃ ፔንጌ ጌቴቲዛሶፔ ቢዲ ኣርሼይ ኬዚዛ ባጋ ጋካናስ ዲዛ ጊምቤዛ ዛሪ ኦꬂዴስ።
NEH 3:27 ሄሳፌ ካሊ ዲዛይሳ ቴቁሄ ኣሳይ ሃራ ቃሴካ ጾሳ ኬꬃ ናጌስ ኦሴቲዳ ጊታ ጊምቤፌ ዶሚዲ፥ «ኦፌሌ» ማታን ዲዛ ጊምቤ ጋካናስ ዲዛይሳ ዛሪ ኦꬂዳ።
NEH 3:28 ሃንኮ ቄሴቲ ኢሶይ ኢሶይ ባ ኬꬃ ፔንጌን ዲዛይሳ ካሊ ካሊዲ ፓራ ጊምቤ ፔንጌ ጌቴቲዛሶፔ ፑዴ ባጋራ ዲዛይሳ ዛሪ ኦꬂዳ።
NEH 3:29 ኢሜሬ ና ሳዶቄይ ባ ኬꬃ ሲንꬃን ዲዛይሳ ኦꬂሺን ኣርሼይ ሞኪዛ ባጋራ ዲዛ ጊምቤዛ ፔንጌ ናጊዛ ሻካኒያ ና ሻማኤይ ካሊ ዲዛይሳ ዛሪ ኦꬂዴስ።
NEH 3:30 ሼሌሚያ ና ሃናኒያይኔ ጻላፌስ ኡሱፑንꬃ ና ሃኖኔይ ኢስታስ ናምኣንꬆ ዩሾ ኢሜቲዳይሳ ዛሪ ኦꬂዳ። ባራካዬ ና ማሹላሜይ ባ ኬꬃስ ሲንꬃ ባጋራ ዲዛይሳ ዛሪ ኦꬂዴስ።
NEH 3:31 ሄሳፌ ካሊ ዲዛይሳ ዎርቃ ቆጺዛ ማልኪያይ ጊምቤዛ ጉላፔ ዶሚዲ ፑዴ ጼራ ባጋራ ዲዛሶ ጋካናስ ዛሪ ኦꬂዴስ፤ ቃሴካ ሄ ናጊዛሶ ፔንጌ ጌቴቲዛሶ ባጋራ ጾሳ ኬꬃ ኦሳንቻቲኔ ዛልኣንቻቲ ጎኤቲዛሶ ጋካናስ ዲዛይሳ ዛሪ ኦꬂዴስ።
NEH 3:32 ዎርቃ ቆጺዛ ኣሳቲኔ ዛልኣንቻቲ ጊምቤዛ ጉላፔ ዶሚዲ ዶርሳታ ፔንጌ ጌቴቲዛሶ ጋካናስ ዲዛይሳ ዛሪ ኦꬂዳ።
NEH 4:1 ኑኒ ጊምቤዛ ኦሶ ዶሚዳይሳ ሳንባላጼይ ሲዪዲ ኬሂ ዪሎቲዲ ኑና ናጫናስ ዴንዲዴስ።
NEH 4:2 ባ ላጌታኔ ሳማሪያ ዎታዳራታ ሲንꬃን፥ «ሃይቲ ላፋ ኣይሁዳቲ ኣይ ኦꬃና ቆፒዶ? ባ ካታማ ጊምቤዛ ዛሪ ኦꬃና ቆፒዞ? ያርሾ ሺሻናስ ኮዪዞ? ኦሶዛ ኢሲ ጋላስ ፖላናስ ኢስታስ ሚሳቲዜ? ጊምቤስ ጊዲዛ ሹቻታ ካሴ ጹጌቲ ላሌቲዳ ጊምቤ ጋርሳፌ ኬሲ ጊምባናስ ዳንዳይዞ?» ጊዲ ናጪዴስ።
NEH 4:3 ኢዛ ማታን ኤቂዳ ኣሞኔ ዴሬ ኣስ ጾቢያይ ባ ባጋራ፥ «ኢስቲ ዋኒዳ ጊምቤ ጊምባና ዳንዳይዞ? ኢስቲ ጊምቢዳ ጊምቤዛ ቦላ ሃራይ ኣቶሺን ዎራካናይ ኬዚዳኮ ላሌታና!» ጊዲ ናጪዴስ።
NEH 4:4 ታኒካ፥ «ጎዳዉ! ኢስቲ ኑና ኣይ ማላ ናጪዛኮ ኔ ሃይሳ ቤያ፤ ኢስታ ጫሺ ጌዴ ኢስታ ቦላ ሲሞ፤ ኢስታስ ዲዛ ሃሮይ ቦንቄቲን ኣላጋ ቢታን ቤቴ ኣስ ጊዴቶ!
NEH 4:5 ኢስቲ ኦꬂዳ ኢታ ኦሶዛ ጊሻስ ኔ ኢስታ ማሮፓ፤ ላሌቲዳይሳ ኑኒ ዛሪ ኦꬂዳ ጊሻስ ኢስቲ ኑና ጫሻን ካዉሺዳ ቆሆዛ ኔ ባሎፓ» ጋ ዎሳዲስ።
NEH 4:6 ኣሳይ ዎዚናፔ ኦꬂዛ ጊሻስ ጊምቤዛ ኦሶይ ኤሶራ ባጋ ጋኪዴስ።
NEH 4:7 ሳንባላጼይ፥ ጾቢያይ፥ ኣራቤ ዴሬ ኣሳይ፥ ኣሞኔ ዴሬ ኣሳይኔ ኣሽዶዴ ዴሬ ኣሳይ ኡባይ ኑኒ ዬሩሳላሜ ጊምቤዛ ዛሪ ሎኤꬂ ኦꬂዳ ጊምቤታ ጊዶን ኣቲዳ ጾኤታ ኡባ ቱጪሺን ሲዪዲ ኬሂ ሃንቄቲዳ።
NEH 4:8 ሄሳ ጊሻስ ኢስቲ ኢሲ ቦላ ጊዲዲ ዬሩሳላሜ ዪዲ ኦላናሲኔ ሜቶ ሜꬋናስ ኑ ቦላ ሴሪዳ።
NEH 4:9 ጊዶ ኣቲን ኑኒ ኑ ጎዳኮ ዎሲዶስ፤ ኦማርሲኔ ጋላስ ኢስታራ ኤቄታናስ ዳንዳይዛ ኣሳታ ዎꬂዶስ።
NEH 4:10 ሄ ዎዴ ዩሁዳ ኣሳቲ፥ «ቶሆይ ኑና ኢጼꬂዴስ፤ ቡሮ ኦሴታናስ ቤሲዛሶይ ዳሮይ ዴስ፤ ሄሳ ጊሻስ ጊምቤዛ ኦꬃናስ ዳንዳዮኮ» ጊዳ።
NEH 4:11 ኑ ሞርኬቲ፥ «ኑ ኢስታ ጊዶ ጌሊዲ ኢስታ ዎꬊዲ ኦሶዛ ቴቃና ጋካናስ ኤሬቴናኔ ቤዬቴና» ጊ ቆፒዳ።
NEH 4:12 ኑ ሞርኬታ ማታን ዲዛ ኣይሁዳቲ ኑኮ ዪዲ ሞርኬቲ ኑና ኦላና ጊዛይሳ ኑስ ዛሪ ዛሪ ዮቲዳ።
NEH 4:13 ሄሳ ጊሻስ ኣሳ ጊዶፌ ጊꬃ ማሻ፥ ቶራኔ ዎንዳፌ ኦይኪዳ ኣሳ፥ ዳቦፌ ዳቦፌ ጊጊሳዳ ጊምቤይ ኦሴቲ ፖሌቶንታሶስ ጉዬ ባጋራ ናጋና ማላ ኦꬃዲስ።
NEH 4:14 ኣሳይ ኬሂ ሂርጊዛይሳ ታኒ ቤያዳ ካሌꬂዛይታ፥ ዳናታኔ ሃራ ኣሳታ ኡባ፥ «ባቦፍቴ! ያሺዛ ዎልቃማ ጾሳ ቆፒቴ! ኢንቴ ዳቦታስ፥ ናይታስ፥ ማቼታሲኔ ሃሮታስ ኦሌቲቴ!» ጋዲስ።
NEH 4:15 ኑ ሞርኬቲ ኑና ቆሃና ጊዲ ባ ጋርሳን ሴሬቲ ጫቄቲዳይሲ ኑኮ ጋኪዳይሳ ሲዪዲኔ ጾሳይካ ኢስታ ቆፋ ሃዳ ኦꬂዳይሳ ኢስቲ ኤሪዳፔ ጉዬ ኑኒ ኡባይ ጊምቤዛ ኦሶ ጌዴ ሲንꬄ ጉጂዶስ።
NEH 4:16 ሄ ዎዴፔ ዶሚዲ ታ ኣሳታፔ ባጋቲ ኦꬂሺን፥ ባጋቲ ቲራን ዎꬂዛ ኦላ ማይኦ ማይኢዲ፥ ቶራ ኦይኪዲ፥ ጎንዳሌኔ ዎንዳፌ ኦይኪዲ ዛቤ ጊዲ ናጋና ማላ ኦꬃዲስ፤ ኦላ ኣሳ ካሌꬂዛይቲ ዩሁዳ ኣሳፔ ጉዬራ ኤቂዲ ናጌቴስ።
NEH 4:17 ዲርሳ ጊምቢዛይታ ኡባ ሚንꬄꬄቴስ፤ ቶኪዛይቲካ ኢሲ ኩሼን ኦላ ማሳራ ኦይኪ ናጌቲሼ ሃንኮ ኩሻራ ኦꬄቴስ።
NEH 4:18 ዲርሳ ጊምቢዛ ኣሳይ ዉሪካ ኦꬂሼ ባ ጊꬃ ማሻ ጊጺዲ ኦꬄቴስ፤ ቃሴ ዛዬ ፑኒዛይሲ ታ ኣቻፌ ሻኬቲ ኤሬና።
NEH 4:19 ዴሬዛስ፥ ካሌꬂዛይታሲኔ ሹሜታስ፥ «ጊምቤዛ ኦሶይ ኬሂ ጊታኔ ኣሆ ጊዲዳ ጊሻስ ኑኒ ኑ ጋርሳን ኢሶይ ኢሶይ ሃኪ ሃኪ ኦꬂዛ ጊሻስ ኢሶይ ኢሳራ ጋይታናስ ዳንዳዬቴና።
NEH 4:20 ኢንቴ ዛዬይ ፑኔቲሺን ሲዪዳ ማላ ሃ ታኮ ሺቂቴ፤ ኑ ጎዳይ ኑ ጊሻስ ኦሌታና» ጋዲስ።
NEH 4:21 ሄሳ ጊሻስ ዉሪ ማላዶ ዎንታ ዶሚዲ ኦማርስ ጾሊንቴይ ኬዛና ጋካናስ ባጋይ ኦꬂሺን ባጋይ ቃሴ ኦላ ማሳራ ጊጺዲ ናጌስ።
NEH 4:22 ሄ ዎዴ ታኒ ኣሳስ፥ «ኦማርስ ናጊሼኔ ጋላስ ኦሶ ኦꬂ ማዳና ማላ ኢሲ ኢሲ ኣሲ ባ ኦሳንቻራ ዬሩሳላሜን ጋምኦ» ጋዲስ።
NEH 4:23 ታኒ፥ ታ ላጌቲ፥ ዛቤቲ፥ ሃራ ኦሳንቻቲ ኡባይካ ኦማርስ ኑ ቦላፌ ማይኦ ቃሪ ኤሮኮ፤ ቃሴ ሃꬅ ዱቃና ቢሼ ማሳራ ሃሼፔ ዎꬂ ኤሮኮ።
NEH 5:1 ኢሲ ዎዴ ኣዴቲኔ ኢስታ ማቼቲ ባ ባጋ ጊዲዳ ኣይሁዳ ኣሳታ ሞሮ ጊሻስ ናሂሚያስ ኬሂ ዋሲዳ።
NEH 5:2 ኢስታ ጊዶፌ ኢሲ ኢሲ ኣሳቲ፥ «ኑኒ ኑ ናይታራ ኢሲ ኢሲ ኬꬃን ዳሮ ኣሲ ዲዛ ጊሻስ ኑ ሼምፖ ኣሻናስ ካꬅ ኮዮስ» ጊዳ።
NEH 5:3 ቃሴካ ሃራቲ፥ «ኑ ቦላ ጋኪዳ ዎልቃማ ኮሻፔ ዴንዲዳይሳን ሼምፖ ኣሺዛ ካꬅ ዴማና ጊዲ ኑስ ዲዛ ጋዴ፥ ዎይኔ ኣታኪልቴኔ ኑ ኬꬅ ኡባ ኦይꬃና ጋኪዶስ» ጊዳ።
NEH 5:4 ባጋይቲ ቃሴካ፥ «ኑ ጋዴ ጊሻሲኔ ኑ ኣታኪልቴ ጊሻስ ካዎይ ኑና ጊራ ኦይቺን ኢዛ ቃንጻናስ ኣሳፔ ሚሽ ታልኢ ኤኪዶስ፤
NEH 5:5 ኑ ዜሬꬂኔ ኣይሁዳ ዜሬꬂ ኢሲኖ፤ ኑ ናይታሲኔ ኢስታ ናይታስ ኣይኮ ዱማቴꬂካ ባዋ፤ ጊዶ ኣቲን ኑ ዬሊዳ ናይታ ዶሳይ ባይንዳ ኣይሌቴꬃስ ኣꬂ ኢሚዶስ፤ ቃሴ ኑ ማጫ ናይታፔ ኢሲ ኢሲኖቲ ኣይሌ ጊዲዳ፤ ኑ ጋዴይኔ ዎይኔ ኣታኪልቴይ ኑፔ ኤኬቲዳ ጊሻስ ኑስ ዎልቃይ ባይንዳይታ ጊዲዶስ» ጊዲ ባንታ ሚሻ ቃንጊዳ።
NEH 5:6 ታኒካ ኢስቲ ቃንጊዳ ቃላ ሲያዳ ኬሃ ሃንቄታዲስ።
NEH 5:7 ታኒ ኦꬃና ቤሲዛዝ ታ ዎዚናን ቃቻዳ ዴሬ ካሌꬂዛይታ፥ «ሄኮ ኢንቴ ኢንቴ ኢሻታ ቆሂዲ ኢስታፌ ዲች ሜታ» ጋዳ ኬሃ ሃንቄታዲስ፤ ሄ ሜቶዛ ቢርሻናስ ጋዳ ኣሳ ኢሲ ቦላ ሺሻዳ፥
NEH 5:8 «ኣይዛቤታስ ባይዜቲዳ ኢንቴ ባጋ ጊዲዳ ኣይሁዳታ ዎዛናስ ኑስ ኑስ ዳንዳዬቲዳ ማላ ኦꬂዶስ፤ ጊዶ ኣቲን ኢንቴ ኢንቴ ኢሻታ ኣይዛቤታስ ኣꬂ ባይዜታ» ጋዳ ሃንቃዲስ፤ ካሌꬂዛይቲካ ጋናዚ ꬋዪን ጮኡ ጊዳ።
NEH 5:9 ቃሴካ ካሌꬃዳ ኢስታስ፥ «ሃይሲ ኢንቴ ኦꬂዳ ኦሶዚ ዎጋ ጊዴና! ኢንቴ ጾሳስ ያዪዲ ሎኦ ኦሶ ኦꬃናስ ቤሴስ፤ ሄሳꬆ ኢንቴ ኦꬂዳኮ ኑ ሞርኬ ጊዲዳ ኣይዛቤቲ ኑና ናጫናስ ዳንዳዬቴናኮሺን።
NEH 5:10 ታኒ ታናራ ኦꬂዛ ታ ላጌቲኔ ታስ ኦꬂዛ ታ ኦሳንቻቲ ኣሳታስ ሚሼ ጊዲን ዎይኮ ካꬅ ጊዲን ታልኤ ኢሚዶስ፤ ሄሳ ጊሻስ፥ ‹ኢንቴ ታልኢ ኤኪዳይሳ ዲቻ ዛሪቴ› ጊ ኦይሾይ ኑፔ ኣቶ።
NEH 5:11 ኢንቴ ሚሽ ጊዲን፥ ካꬅ ጊዲን ዎይኔኔ ዎጋራ ዛይቴ ጊዲን ኢስታስ ኢንቴ ታልኢ ኢሚዳ ኡባ ዲቻ ኣጋጊቴ፤ ኢስታ ጋዴ፥ ዎይኔኔ ዎጋራ ዛይቴ፥ ኢስታ ኣታኪልቴኔ ኢስታ ኬꬃ ኡባ ኢስታስ ኤሌሲ ዛሪቴ!» ጋዲስ።
NEH 5:12 ካሌꬂዛይቲካ፥ «ኔ ኑና ኣዛዚዳ ማላ ኑ ኦꬃና፤ ኢስታፌ ኑ ኤኪዳ ሚሽ ኡባ ዛራና፤ ኑፔ ኢስቲ ታልኢዳ ሚሽ ኑስ ጪጊቴ ጊዲ ኦይቾኮ» ጊዳ። ታኒካ ታኮ ቄሴታ ጼይጋዳ፥ ካሌꬂዛይቲ ባ ኦꬃና ጊዳ ቃላ ፖላናስ ኢስቲ ጫቂሳና ማላ ኢስታስ ዮታዲስ።
NEH 5:13 ሄሳፌ ጉዬ ታ ማይኢዳ ማይኦ ኬሳ ቆቆፋዳ፥ «ኣይ ኣሲካ ኢንቴ ጊዶፌ ባ ጌሊዳ ቃላ ፖሎንታ ኣጊዛ ጊዲኮ ጾሲ ኢዛ ኬꬂኔ ሃሮ ሃይሳዳ ሜላ ኣሾ!» ታ ጊን ሄን ዲዛ ኣሳይ ዉሪ ኢሲ ቃላራ፥ «ኣሚን» ጊዲ ጾሳ ጋላቲዴስ፤ ካሌꬂዛይቲካ ባ ጫቂዳ ቃላ ፖሊዳ።
NEH 5:14 ካዎ ኣርጼኪሲሲ ካዎቲዳ ናምኡ ታማንꬆ ላይꬃፌ ዶሚዲ ሄꬑ ታማኔ ናምኡ ላይꬅ ጋካናስ ዲዛ 12 ላይꬃታ ጊዶን ታኒ ዩሁዳ ዴሬ ኩሜꬅ ኣይሲዛ ኣስ ጊዳ ኡታዳ ታና ጊዲን ታ ዳቦታ ጊዲን ዴሬ ኣይሲዛዴስ ቤሲዛ ሚሽ ኣይኮካ ጎኤቲቤኮ።
NEH 5:15 ቃሴካ ታፔ ካሴ ዴሬ ኣይሲዛይቲ ኡባይ ዴራ ቦላ ጊታ ቶሆ ጊዲዲ ጋላስ ጋላስ ሚዛዚኔ ኡዪዛዚ ኢዛፔ ኣቲን ቦላራካ ኦይዱ ታሙ ሳቂሌ ቢራ ጪጊሲዳ፤ ሃራይ ኣቶሺን ኢስታ ኣይሌቲካ ዴራ ቦላ ኬሂ ጎዳቲዲ ዋዪሲዳ፤ ጊዶ ኣቲን ታኒ ጾሳስ ያዪዛ ጊሻስ ሄሳꬆ ኦꬃቤኬ።
NEH 5:16 ታስ ዲዛ ዎልቃ ኡባ ዬሩሳላሜ ጊምቤ ዛራ ጊምባናስ ኢማዲስ ኣቲን ታስ ኣይኮ ጋዴካ ሃራቤኬ፤ ታ ኦሳንቻቲካ ኡባይ ሄ ኦሶዛን ታናራ ኢሲፌ ኦꬂዳ።
NEH 5:17 ኑ ማታን ዲዛ ካዎቴꬃታፔ ዪዳ ኣሳቲ ኣቲን ታናራ ታ ካꬅ ሚዛይቲ ኣይሁዳ ኣሳቲኔ ዴሬ ካሌꬂዛይቲ ኢሲ ቦላ 150።
NEH 5:18 ጋላስ ጋላስ ኢሲ ቦራ፥ ዶሬቲዳ ኡሱፑን ዶርሲኔ ዳሮ ኩቶታ ሹካ ኢስታስ ሺሻይስ፤ ቃሴካ ታሙ ጋላሳፌ ኢሲ ጋላስ ሎኦ ዎይኔ ኡሹ ኢስታስ ጊጊሳይስ፤ ጊዶ ኣቲን ዴራ ቦላ ቶሆይ ዳሪዳይሳ ታ ኤሪዛ ጊሻስ ዴሬ ኣይሲዛዴስ ቤሲዛ ሚሽ ታስ ኦይቻቤኬ።
NEH 5:19 ታ ጎዳዉ! ታኒ ሃ ዴራስ ኦꬂዳ ሎኦ ኦሶ ማላ ኔ ታስ ኪያቴꬅ ኦꬃ።
NEH 6:1 ሳንባላጼይ፥ ጾቢያይ፥ ኣራቤ ዴሬ ኣስ ጌሻሜይኔ ሃራ ኑ ሞርኬቲካ ታኒ ጊምቤዛ ጊምባ ዉርሲዳይሳኔ ኦሴቶንታ ኣቲዳ ፓጬሶይ ባይንዳይሳ ሲዪዳ፤ ጊዶ ኣቲን ታኒ ቡሮ ጊምቤ ፔንጌታስ ሳንቃታ ጌልꬃቤኬ።
NEH 6:2 ሄሳፌ ዴንዲዳይሳን ሳንባላጼይኔ ጌሻሜይ፥ «ኦኖ ዴምባን ኢሲ ሄራን ያዳ ኑናራ ጋይታ» ጊዲ ኪታ ታስ ዬዲዳ፤ ኢስቲ ሄሳ ጊዳይ ታ ቦላ ቆሆ ጋꬃናሳ።
NEH 6:3 ታኒካ፥ «ታስ ዳሮ ኦሶይ ዲዛ ጊሻስ ኦሳ ኣጋዳ ኢንቴ ጊዛሶ ባና ዳንዳይኬ፤ ታ ኣጋ ቢን ኦሶይ ኣይስ ኤቂዜ?» ጋዳ ታኮ ኪቴቲ ዪዳ ኣሳታስ ዮታ ዬዳዲስ።
NEH 6:4 ሄሳ ማላ ኪታ ታስ ኢስቲ ኦይዱቶ ዛሪ ዛሪ ኪቲን ታኒካ ኢስታስ ካሴይሳꬆ ዛራ ዬዳዲስ።
NEH 6:5 ቃሴካ ሳንባላጼይ ኢቻሻንꬆ ዩሾ ባ ኣይሌታፔ ኢሳ ቦላ ማታሜይ ሾጬቶንታኔ ጮ ዶያ ዲዛ ዳብዳቤ ታስ ዬዲዴስ።
NEH 6:6 ኢዚ ዬዲዳ ዳብዳቤዚ፥ «ኔኒኔ ኣይሁዳ ኣሳቲ ማካላቴꬅ ዴንꬄꬃናስ ቆፒዳይሳኔ ኢንቴ ጊምቤዛ ጊምቢዛይሲ ኑ ሄራን ዲዛ ካዎቴꬃ ኣቻን ዎሬቲዛይሳ ጌሻሜይ ሲዪዲ ታስ ዮቲዴስ፤ ቃሴ ኔ ካዎታና ቆፒዳይሳኔ
NEH 6:7 ኔ ዩሁዳ ካዎ ጊዲዳይሳ ዬሩሳላሜን ኣሳይ ኣዋጃና ማላ ናቤታ ኔ ጊግሲዳይሳ ጌሻሜይ ታስ ዮቲዴስ፤ ሄሳ ካዎዚ ሲያናይሲ ኤሬቲዳ ሚሽ ጊዲዳ ጊሻስ ታኒኔ ኔኒ ኢሲፌ ጋይቲዲ ሄ ዮኦዛ ቦላ ኑ ሃሳዬቲዳኮ ሎኦ» ጌስ።
NEH 6:8 ታኒካ፥ «ሃይሲ ኔ ጊዛይሲ ቱሙ ጊዶንታ ኔኒ ኔፔ ሜꬋ ኤኪዳ ዎርዶ ዮኦ» ጋ ዛራዲስ።
NEH 6:9 ኡባይካ፥ «ኢስታ ኩሼይ ኢጼቲኮ ኦሶይ ፖሌቶንታ ኣታና» ጊዲ ታና ሂርጊሳናስ ፓጪዳ፤ ታኒ ጊዲኮ፥ «ታ ጾሳዉ! ታ ዎዚና ኔኒ ሚንꬃ» ጋዳ ዎሳዲስ።
NEH 6:10 ሄ ዎዴ ኢዛ ቦላ ኢዛ ኬꬃ ካሬይ ጎርዴቲን ዲዛ ማሄጻቢኤሌ ናዛ ና ዳላያ ና ሻማያኮ ባዲስ፤ ኢዚካ «ኔና ዎꬋና ኦማርሳታፔ ኢሲ ኦማርስ ዪዛ ጊሻስ ታኒኔ ኔኒ ጾሳ ኬꬅ ጌሊ ኑ ቦላ ፔንጌታ ጎርዲዲ ኣኔ ቆቴቶስ» ጊዴስ።
NEH 6:11 ጊዶ ኣቲን ታኒ፥ «ታ ማላ ኣሲ ባቃቲ ቆቴቲ ኤሪዜ? ታ ማላ ኣሲ ባ ሼምፖ ኣሻና ጊዲ ጾሳ ኬꬅ ጌሊ ቆቴታና ቤሲዜ? ሃይሳꬆ ኡባካ ታ ሃኒኬ!» ጋ ዛራዲስ።
NEH 6:12 ሃ ዞሬዛ ታ ዩሻ ቆፒሺን ሻማያይ ሃይሳ ማላ ዎርዶ ዮኦ ታስ ዮታና ማላ ጾቢያይኔ ሳንባላጼይ ሚሻን ኢዛ ባሌꬂዳ ጊሻስ ኣቲን ኢዚ ጾሳፌ ኪቴቲዳ ኣስ ጊዶንታይሳ ታ ሻካ ኤራዲስ።
NEH 6:13 ኢዚ ሚሻን ሻሜቲዲ ሄሳꬆ ኦꬂዳይ ታና ባቢሲዲ ናጋራ ኦሲሳናሲኔ ታ ሱንꬅ ሞሬታና ማላ ኮዪዳ ጊሻሳ።
NEH 6:14 ታኒካ፥ «ጾሳዉ! ጾቢያይኔ ሳንባላጼይ ኦꬂዳይሳ ኔ ቤያ፤ ቃሴ ኢስታ ቦላካ ኔ ፒርዳ፤ ኖኣዶ ጌቴቲዛ ማጫሳ ናቤያኔ ሃራ ዎርዶ ናቤቲ ታና ባቢሳና ጊዲ ኦꬂዳ ኦሶ ኡባ ኔ ቆፓ» ጋዳ ዎሳዲስ።
NEH 6:15 ኦሶዚ ዶሜቲዳፔ ኢቻሽ ታማኔ ናምኣንꬆ ጋላስ ኤሉሌ ጌቴቲዛ ኣጊናይ ጌሊን ናምኡ ታማኔ ኢቻሻንꬃ ጋላስ ጊምቤዛ ኦሶ ኡባይ ኦሴቲ ጊጊዴስ።
NEH 6:16 ኑ ዩሾን ዲዛ ካዎቴꬃ ጊዶን ዲዛ ኑ ሞርኬቲ ኦሶዚ ጾሲ ማዲን ፖሌቲዳይሳ ሲዪዲ ኬሂ ሂርጊዲ ያዪዳ።
NEH 6:17 ሄ ዎዴ ዩሁዳ ዴሬ ካሌꬂዛይቲ ጾቢያስ ዳሮ ዳብዳቤ ጻፊን ኢዚ ኢስታስ ዛሮ ጻፊዴስ።
NEH 6:18 ጋሶይካ ኣራሄ ና ሻካኒያይ ጾቢያ ቦሎ ጊዲዳ ጊሻሲኔ ኢዛ ና ዪሆሃናኔይካ ባራካዬ ና ማሹላሜ ናዮ ማቾ ኤኪዳ ጊሻስ ዩሁዳ ዴሬፔ ዳሮ ኣሳይ ኢዛራ ጫቆ ቃላ ጌሊዴስ።
NEH 6:19 ሄ ኣሳቲ ጾቢያይ ኦꬂዳ ሎኦ ኦሶታ ታ ሲንꬃንካ ናሺዳ፤ ታ ጊዛይሳካ ኡባ ኢዛስ ኤፊ ኤፊ ዮቴቴስ፤ ሄሳፌ ዴንዲዳይሳን ኢዚካ ታና ባቢሳና ጊዲ ዳብዳቤታ ዳሮ ዎዴ ዬዲዴስ።
NEH 7:1 ጊምባ ኦሶይ ኦሴቲ ጊጊዴስ፤ ፔንጌ ሳንቃቲ ባ ዲዛሶን ዲዛሶን ጌሊዳ፤ ጾሳ ኬꬃ ናጊዛ ዛቤታስ፥ ዬꬃ ዬጺዛይታሲኔ ሌዌ ባጋታስ ኢስታ ጊሻ ጊሻ ኦሶይ ኢሜቲዴስ።
NEH 7:2 ታኒካ ዬሩሳላሜ ካታማ ኣይሳና ማላ ታ ኢሻ ሃናኔኔ ሚጻ ናጊዛ ሃናኒያ ዶራ ዎꬃዲስ፤ ጺሎቴꬃኒኔ ጾሳስ ያሻቴꬃን ሃናኒያይ ማላይ ዴና።
NEH 7:3 ታ ኢስታስ ዬሩሳላሜ ጊምቤ ፔንጌቲ ጻልቄይ ኬዛና ጋካናስ ዶዬቶንታ ማላኔ ኣርሼይ ዉሊዛ ዎዴ ዛቤቲ ባሶ ባናፔ ሲንꬃን ጊምባ ፔንጌታ ሎኤꬂ ጎርዳና ማላ ኣዛዛዲስ፤ ቃሴካ ዬሩሳላሜን ዲዛ ኣሳ ጊዶፌ ናጊዛ ዛቤታ ዴሬይ ዶሪዲ ዎꬃና ማላ ኢስታፌ ባጋይታ ኢሲ ኢሲ ሄራስ ኣላፌ ኦꬂ ዎꬃና ማላኔ ሃንኮ ኣቲዳይታ ባንታ ኬꬃ ካሬን ናጋና ማላ ዮታዲስ።
NEH 7:4 ዬሩሳላሜይ ኣሆኔ ጊታ ካታማ፤ ጊዶ ኣቲን ኢዚን ዲዛ ኣሳ ቆዳይ ጉꬅ ጊዲዳ ጊሻስ ዳሮ ኬꬃቲ ቡሮ ኬጼቲቤቴና።
NEH 7:5 ጾሳይ ዴሬዛ፥ ዴራ ኣይሲዛይታኔ ሹሜታ ታ ሺሻዳ ኢስታ ዬሌታ ዛርኬይ ዋኒ ዋኒ ጻፌቲዳኮ ታ ጼላና ማላ ታና ቆፍሲዴስ፤ ሄሳ ጊሻስ ካሴ ዲኤቴꬃፌ ሲሚዳ ኣሳታ ማዝጋባ ዴማዲስ፤ ታ ዴሚዳ ማዝጋባይ ሃይሳፌ ካሊዛይሳ፤
NEH 7:6 ባቢሎኔ ካዎ ናቡካዳናጾሬይ ዲኢዲ ባ ዴሬ ኤፊዳ ኣሳታፔ ጉዬ ባ ካታማ ካታማ ዬሩሳላሜኔ ዩሁዳ ሲሚዳ ኣሳቲ ሃይሳፌ ካሊዛይታ፤
NEH 7:7 ኢስቲ ሲሚሺን ኢስታ ካሌꬂ ኤሂዳ ኣሳቲ ዜሩባቤሌ፥ ኢያሶ፥ ናሂሚያ፥ ኣዛሪያሳ፥ ኤራኢሜ፥ ናሆሜ፥ ማርዲኪዮሳ፥ ባልሻኔ፥ ሚሲፋሬ፥ ቢጉዋዬ፥ ኑሁሜኔ ባኣና።
NEH 7:8 ዲኤቴꬃፌ ሲሚዳ ኢስራኤሌ ኣሳ ዛርኬፌ ጻፌቲዳ ዜሬꬃታ ቆዳይ ሃይሳፌ ካሊዛይሳ፤ ፓሮሴ ዜሬꬃፌ 2,172፤
NEH 7:9 ሻፋጺያ ዜሬꬃፌ 372፤
NEH 7:10 ኣራሄ ዜሬꬃፌ 652፤
NEH 7:11 ኢያሶፔኔ ኢዮኣቤ ዜሬꬅ ጊዲዳ ፓሃቴ-ሞኣቤ ዜሬꬃቲ 2,818።
NEH 7:12 ኤላሜ ዜሬꬃፌ 1,254፤
NEH 7:13 ዛቶ ዜሬꬃፌ 845፤
NEH 7:14 ዛካዬ ዜሬꬃፌ 760፤
NEH 7:15 ቢኑዌ ዜሬꬃፌ 648፤
NEH 7:16 ቤባዬ ዜሬꬃፌ 628፤
NEH 7:17 ኣዝጋዴ ዜሬꬃፌ 2,322፤
NEH 7:18 ኣዶንቃሜ ዜሬꬃፌ 667፤
NEH 7:19 ቢጉዋዬ ዜሬꬃፌ 2,067፤
NEH 7:20 ኣዲኔ ዜሬꬃፌ 655፤
NEH 7:21 ሂዝቂያሳ ጌቴቲ ጼይጌቲዛ ኣጻሬ ዜሬꬃፌ 98፤
NEH 7:22 ሃሹሜ ዜሬꬃፌ 328፤
NEH 7:23 ቤሳዬ ዜሬꬃፌ 324፤
NEH 7:24 ሃርፔ ዜሬꬃፌ 102፤
NEH 7:25 ጌባኦኔ ዜሬꬃፌ 95፤
NEH 7:26 ካሴ ኢስታ ኣዋቲ ሃይሳፌ ካሊዛ ካታማታን ዲዛይቲ ዲኤቴꬃፌ ሲሚዳ፤ ቤቴሊሄሜፔኔ ናጾፌ ዴሬ ኣሳታፔ 188፤
NEH 7:27 ኣናቶቴ ዴሬ ኣሳታፔ 128፤
NEH 7:28 ቤቲ-ኣዚሞቴ ዴሬ ኣሳታፔ 42፤
NEH 7:29 ቂሪያቴ-ዪኣሪሜ፥ ካፊሬኔ ቢኤሮቴ ዴሬ ኣሳታፔ 743
NEH 7:30 ኤራማፔኔ ጌባ ዴሬ ኣሳታፔ 621፤
NEH 7:31 ማኪማሴ ዴሬ ኣሳታፔ 122፤
NEH 7:32 ቤቴሌፔኔ ኣዬ ዴሬ ኣሳታፔ 123፤
NEH 7:33 ኔቦ ጌቴቲዛ ናምኣንꬆ ዴሬን ዲዛ ኣሳታፔ 52፤
NEH 7:34 ኤላሜ ጌቴቲዛ ናምኣንꬆ ዴሬን ዲዛ ኣሳታፔ 1,254፥
NEH 7:35 ሃሪሜ ዴሬ ኣሳታፔ 320፤
NEH 7:36 ኢያርኮ ዴሬ ኣሳታፔ 345፤
NEH 7:37 ሎዳ፥ ሃዲዴኒኔ ኦኖ ዴሬ ኣሳታፔ 721፤
NEH 7:38 ሳናኣ ዴሬ ኣሳታፔ 3,930።
NEH 7:39 ዲኤቴꬃፌ ሲሚዳ ቄሴታ ዜሬꬃቲ ሃይሳፌ ካሊ ዲዛይታ፤ ኢያሶ ዜሬꬅ ጊዲዳ ያዳያ ዜሬꬃፌ 973፥
NEH 7:40 ኢሜሬ ዜሬꬃፌ 1,052፥
NEH 7:41 ፓሽኩሬ ዜሬꬃፌ 1,247፥
NEH 7:42 ሃሪሜ ዜሬꬃፌ 1,017።
NEH 7:43 ዲኤቴꬃፌ ሲሚዳ ሌዌ ዜሬꬃቲ ሃይሳፌ ካሊ ዲዛይታ፤ ሆዳዬ ዜሬꬅ ጊዲዳ ኢያሶፔኔ ቃዲምኤሌ ዜሬꬃፌ 704።
NEH 7:44 ዲኤቴꬃፌ ሲሚዳ ዬꬃ ዬጺዛይቲ ሃይሳፌ ካሊ ዲዛይታ፤ ኣሳፌ ዜሬꬃታፔ 148።
NEH 7:45 ዲኤቴꬃፌ ሲሚዳ ጾሳ ኬꬃ ፔንጌ ናጊዛ ዛቤታ ዜሬꬃቲ ሃይሳፌ ካሊ ዲዛይታ፤ ጻልሞኔ፥ ኣጻሬ፥ ሻሎሜ፥ ኣቁቤ፥ ሃጺጼኔ ሾባዬ ዜሬꬃታፔ 138።
NEH 7:46 ዲኤቴꬃፌ ሲሚዳ ጾሳ ኬꬃ ኦሳንቻታ ዜሬꬃቲ ሃይሳፌ ካሊ ዲዛይታ፤ ጺሃ፥ ሃሱጳ፥ ጻባኦቴ፥
NEH 7:47 ቂሮሴ፥ ሲኣ፥ ፓዶኔ፥
NEH 7:48 ሌባና፥ ሃጋቤ፥ ሻሚላዬ፥
NEH 7:49 ሃናኔ፥ ጊዴሌ፥ ጋሃሬ፥
NEH 7:50 ኤራኣዬ፥ ኤራሶኔ፥ ኔቆዳ፥
NEH 7:51 ጋዛሜ፥ ኦዛ፥ ፋሳሄ፥
NEH 7:52 ቤሳዬ፥ ማኡኔ፥ ናፋሺሲሜ፥
NEH 7:53 ባቂቡቄ፥ ሃቁፋ፥ ሃሪሁሬ፥
NEH 7:54 ባጺልቴ፥ ማሂዳ፥ ሃርሻ፥
NEH 7:55 ባርቆሳ፥ ሲሳራ፥ ቴማሄ፥
NEH 7:56 ኔጺሃ፥ ሃጺፋ።
NEH 7:57 ዲኤቴꬃፌ ሲሚዳ ሶሎሞኔ ኦሳንቻታ ዜሬꬃቲ ሃይሳፌ ካሊ ዲዛይታ፤ ሶጻዬ፥ ሶፌሬቴ፥ ፔሪዳ፥
NEH 7:58 ያኢላ፥ ዳርቆኔ፥ ጊዴሌ፥
NEH 7:59 ሻፋጺያ፥ ሃጺላ፥ ፖኬሬቴ-ሃጼባሜኔ ኣሞኔ።
NEH 7:60 ዲኤቴꬃፌ ሲሚዳ ጾሳ ኬꬃ ኦሳንቻታ ቆዳይኔ ሶሎሞኔ ኦሳንቻታ ቆዳይ ኢሲ ቦላ 392።
NEH 7:61 ቴሊ-ሜላ፥ ቴሊ-ሃርሻ፥ ኪሩቤ፥ ኣዶኔኔ ኢሜሬ ጌቴቲዛ ጋጻሬ ካታማታፔ ሲሚዳይቲ ዳላያ፥ ጾቢያኔ ኔቆዳ ዜሬꬃታ ቆዳይ ኢሲ ቦላ 642፤ ጊዶ ኣቲን ሄይቲ ኡባይ ኢስራኤሌ ዜሬꬅ ጊዲዳይሳ ኤሪሳናስ ዳንዳይዛ ሚሺ ዴና።
NEH 7:63 ሃይሳፌ ካሊ ዲዛ ቄሴታ ዜሬꬃቲ ካሴ ባ ኣዋታ ዜሬꬃ ዛርኬ ሻኪ ኤሪሳናስ ዳንዳይቤቴና፤ ኢስቲካ ሃባዬ፥ ሃቆጼ፥ ባርዚሌ፤ ቄሴታ ባጋ ጊዲዳ ባርዚሌዬስ ካሴ ኣዋይ ጋላኣዴ ዴሬን ዬሌቲዳ ባርዚሌ ዜሬꬃፌ ኢሲ ማጫሳዮ ኤኪዳ ጊሻስ ባ ማቼይ ኣዋ ቆሞ ሱንꬃን ጼይጌታና ዳንዳይዴስ። ካሴ ባ ኣዋታ ዬሌታ ዛርኬ ሻኪ ኤሪሳናስ ዳንዳዮንታ ኣጊዳ ጊሻስ ጌዮንታ ኣሳ ማላ ቆዴቲዲ ቄሴቴꬃን ኦꬃናስ ዳንዳይቤቴና።
NEH 7:65 ሄሳ ጊሻስ ዩሁዳ ዴሬ ኣይሲዛዴይ ኡሪሜኒኔ ቱሚሜን ጾሳስ ኦꬂዛ ቄሴይ ዴንዳና ጋካናስ ጾሳስ ሺቂዛ ያርሾፌ፥ ካꬃፌ ኦኒካ ማናስ ዳንዳዮንታይሳ ኢስታስ ዮቲዴስ።
NEH 7:66 ዲኤቴꬃፌ ሲሚዳ ኣሳ ኩሜꬃ ቆዳይ ኢሲ ቦላ 42,360
NEH 7:67 ቃሴካ ኢስታ ኦሳንቻታ፥ ማጫሳታኔ ኣቱማሳታ ቆዳይ 7,337 ቃሴ ማዛሙሬ ዬጺዛ ማጫሳቲኔ ኣቱማሳታ ቆዳይ ኢሲ ቦላ 245
NEH 7:68 ፓራቲ 736፥ ባቁሎቲ 245
NEH 7:69 ጋሜላቲ 435፥ ሃሬቲ 6,720።
NEH 7:70 ኢሲ ኢሲ ኬꬃ ኣዋቲ ጾሳ ኬꬃ ኦሶስ ኢሞታ ሺሺዳ፤ ኢስታ ጊዶፌ ዴሬዛ ኣይሲዛይሲ ጌዳራን 8 ኪሎኔ ባጋ ጊዲዛ ዎርቃ፥ 50 ጉቃ ሳኔ፥ 530 ቄሴታ ማይኦ ኢሚዴስ።
NEH 7:71 ኬꬃ ኣዋቲካ ጌዳራን 168 ኪሎ ጊዲዛ ዎርቃኔ 1,250 ኪሎ ጊዲዛ ቢራ ኢሚዳ።
NEH 7:72 ኣቲዳ ኣሳቲ 168 ኪሎ ጊዲዛ ዎርቃ 1,100 ኪሎ ጊዲዛ ቢራኔ 67 ቄሴታ ማይኦታካ ኢሚዳ።
NEH 7:73 ቄሴቲ፥ ሌዌቲ፥ ጾሳ ኬꬃ ጊቤ ናጊዛ ዛቤቲ፥ ዬꬃ ዬጺዛይቲ ዴራፔ ዳሪዛ ባጋይኔ ጾሳ ኬꬃን ኦꬂዛይቲ ኡባይ ኢሲ ቦላ ኢስራኤሌ ዴሬ ኣሳይ ባ ካታማን ካታማን ጌሊ ዴኢዴስ።
NEH 8:1 ኢስራኤሌ ዴሬይ ላፑንꬃ ኣጊናን ባ ዲዛ ካታማን ካታማን ኡቲዴስ፤ ሄ ኣጊናን ኮይሮ ጋላስ ዬሩሳላሜን ሃꬃ ፔንጌ ጌቴቲዛሶን ጋꬃ ባጋራ ኣሳይ ኢሲ ዎዚናን ጊዲዲ ኢሲ ቦላ ሺቂዴስ፤ ኢስቲካ ጾሳ ዎጋ ማጻፋ ኤራንቻ ጊዲዳ ኣስታማሬ ኢዝራይ ጾሳይ ኢስራኤሌስ ኣዛዚዳ ዎጋ ማጻፋ ኢስታስ ኤሃና ማላ ኦይቺዳ።
NEH 8:2 ሄሳ ጊሻስ ኢዝራይ ላፑንꬃ ኣጊናይ ጌሊዳ ኮይሮ ጋላስ ሎኤꬂ ኣኬካናዉ ዳንዳይዛ ኣሲ ኡባይ፥ ማጫይ፥ ኣቱማይ ዉሪ ሺቂዳሶ ዎጋ ማጻፋ ኤኪ ዪዴስ።
NEH 8:3 ሄ ዴምባን ኢዝራይ ጊምቤ ፔንጌ ጌቴቲዛይሳ ማታን ኤቂዲ ዎንታ ማላዶፔ ሴታ ጋላስ ጋካናስ ዎጋ ማጻፋ ኣኬካናስ ዳንዳይዛ ኣሳ ኡባ ሲንꬃን ባ ቃላ ꬎቁ ሂስቲ ናባቢዴስ፤ ዴሬይ ዉሪ ሎኤꬂ ሲዪዴስ።
NEH 8:4 ሄ ኦሶዛስ ኢንጄ ጊዳና ማላ ኢዝራይ ሚꬃፌ ኦሴቲዳ ꬎቃሶሆን ኤቂዴስ፤ ኢዛስ ኡሻቻ ባጋራ ኤቂዳ ኣሳቲ ማቲቲያ፥ ሼማኤ፥ ኣናያ፥ ኡሪያ፥ ሂልቂያኔ ማኢሳያ ጊዲሺን ሃዲርሳ ባጋራ ኤቂዳይቲ ፓዳያ፥ ሚሻኤሌ፥ ማልኪያ፥ ሃሹሜ፥ ሃሺባዳኔ፥ ዛካራሳኔ ማሹላሜ።
NEH 8:5 ኢዝራይ ꬎቁ ጊዲ ኦሴቲዳ ማዲራኬዛ ቦላ ኬዚ ኤቂዳ ዎዴ ኣሳይ ዉሪ ኢዛ ቲሺ ሂስቲ ጼሊዴስ፤ ኢዚ ዎጋ ማጻፋ ዶይዳ ማላ ኡባ ኣሳይ ባ ኡቲዳሶሆፔ ዴንዲ ኤቂዴስ።
NEH 8:6 ኢዝራይ ጊታ ጾሳ ጋላቲዴስ፤ ኣሳይ ዉሪ ባ ኩሼ ፑዴ ዴንꬂዲ «ኣሚን! ኣሚን!» ጊ ዛሪዴስ፤ ቢታ ቦላ ዉሪ ጉፋኒዲ ጾሳስ ጎይኒዴስ።
NEH 8:7 ሄሳፌ ጉዬ ኣሳይ ባ ዲዛሶን ዲዛሶን ዴንዲ ኤቂዴስ፤ ሃይሳፌ ካሊ ሱንꬃይ ጻፌቲዳ ሌዌ ባጋቲ ዎጋ ማጻፋ ዴራስ ናባቢዳ፤ ኢስቲካ ኢያሶ፥ ባኔ፥ ሼሬቢያ፥ ያሚኔ፥ ኣቁቤ፥ ሳባታ፥ ሆዲያ፥ ማኢሳያ፥ ቃሊጻ፥ ኣዛሪያሳ፥ ዮዛባዴ፥ ሃናኔኔ ፓላዬ።
NEH 8:8 ኢስቲካ ኣሳስ ናባቤቲዳ ጾሳ ዎጋ ማጻፋይ ሎኢ ጌላና ማላ ሎኤꬂ ቢርሺ ዮቲዳ።
NEH 8:9 ጾሳ ዎጋ ኣሳይ ሲዪዳ ማላ ዬኪዳ ጊሻስ ዴሬ ኣይሲዛ ናሂሚያይ፥ ቄሴኔ ዎጋ ሎኤꬂ ኤሪዛ ኢዝራይ፥ ዴራ ታማርሲዛ ሌዌ ባጋቲ «ሃና ጋላሳያ ኢንቴ ጾሳስ ዱማቲዳ ጋላስ ጊዲዳ ጊሻስ ጬጮፒቴኔ ዬኮፍቴ» ጊዳ።
NEH 8:10 ናሂሚያይ፥ «ቢዲ ሎኦ ካꬅ ሚቴ፤ ቃሴ ማልኢዛ ኡሹ ኡዪ ኡፋዬቲቴ፤ ኣይኮይ ባይንዳይታስ ኢንቴስ ዲዛይሳፌ ኢሚቴ፤ ሃይሲ ኑ ጾሳስ ኣንጄቲዳ ጋላሳ፤ ጾሳ ኡፋይሳይ ኢንቴስ ዎልቃ ጊዲዳ ጊሻስ ጬጮፒቴ» ጊዴስ።
NEH 8:11 ሌዌ ባጋቲ፥ «ሃ ኣንጄቲዳ ጋላስ ኢንቴ ጬጫና ቤሴና» ጊዲ ዴራ ሃይዚሲዳ።
NEH 8:12 ኣሳይ ባ ሲዪዳ ቃላ ሎኤꬂ ኤሪዳ ጊሻስ ባሶ ቢዲ ካꬅ ሚዲኔ ሃꬅ ኡዪ ኡፋዬቲዲ ባስ ዲዛ ካꬃፌ ሃራታስ ሻኪ ኢሚዴስ።
NEH 8:13 ላፑንꬆ ኣጊናን ናምኣንꬆ ጋላስ ኮራፒኔቲ ቄሴታራኔ ሌዌ ባጋታራ ኢሲፌ ጊዲዲ ጾሳ ዎጋ ታማራናስ ጻፌ ኢዝራኮ ቢዳ።
NEH 8:14 ኢስራኤሌ ኣሳይ ላፑንꬃ ኣጊናን ቦንቼቲዛ ዳሴ ባኣሌዛን ዳሴ ጊዶን ኡታና ማላ ጾሲ ሙሴ ባጋራ ኢሚዳ ኣዛዞዚ ዎጋ ማጻፋን ጻፌቲ ዲዛይሳ ዴሚዳ።
NEH 8:15 ሄሳ ጊሻስ ኣሳይ ባ ዲዛ ካታማን ካታማኒኔ ዬሩሳላሜን ቢዲ፥ «ፑዴ ዙማታ ቦላ ኬዚቴ፤ ዛይቴይ ኬዚዛ ዎጋራ ሚꬂኔ ዎራ ዎጋራ ሚꬃ ሃጋ፥ ባርሲኔቴ ጌቴቲዛ ሚꬅ፥ ዛምባ ሃጋታ ኤሂዲ ዳሴ ዬጊቴ» ጊ ኣዋጃና ማላኔ ዮታና ማላ ካሴ ዎጋ ማጻፋን ጻፌቲዳ ማላ ኣዛዚዳ።
NEH 8:16 ሄሳ ጊሻስ ኣሳይ ሚꬃ ሃጋታ ቃንጺ ኤኪ ኤሂዲ ባ ኬꬃ ፖቄ ቦላን፥ ጾሳ ኬꬃ ፔንጌን ዲዛ ዴምባኒኔ ሃꬃ ፔንጌ ጌቴቲዛ ዴምባን፥ ሄሳꬆካ ኤፍሬሜ ፔንጌን ዲዛ ዴምባን ዳሴ ዬጊዳ።
NEH 8:17 ዲኤቴꬃፌ ሲሚዳ ኣሳይ ዉሪ ዳሴ ዬጊዲ ኢዛ ጊዶን ኡቲዴስ፤ ሄሲካ ናዌ ና ኢያሶ ዎዴፔ ሃ ሲሚን ኮይሮ ሃኒዴስ፤ ሄሳ ጊሻስ ኣሳይ ዉሪ ኢሶይ ኢሶይ ኬሂ ኡፋዬቲዴስ።
NEH 8:18 ባኣሌዚ ዶሜቲዳ ጋላሳፌ ቢ ዉራና ጋላስ ጋካናስ ኢዝራይ ጾሳ ዎጋ ማጻፋፔ ኡባ ዎዴ ጋላስ ጋላስ ኢሲ ኢሲ ኪፊሌ ኣሳስ ናባቢዴስ፤ ባኣሌዛካ ላፑን ጋላስ ጋካናስ ቦንቺዳ፤ ኦስፑንꬆ ጋላስ ዎጋዚ ኣዛዚዛ ማላ ባኣሌዛ ዉርሴꬃን ሞይዞ ባኣሌ ኦꬂዳ።
NEH 9:1 ሄ ኣጊናን ናምኡ ታማኔ ኦይዳንꬆ ጋላስ ኢስራኤሌ ኣሳይ ኢሲ ቦላ ሺቂዲ ባ ናጋራ ጊሻስ ኬሂ ሞꬌቲዳይሳኔ ጬጪዳይሳ ቆንጪሲናስ ማቃ ማይኢዲ ባ ሁኤ ቦላ ጉዱላ ላሊዲ ጾሚዴስ።
NEH 9:2 ኢስራኤሌ ኣሳይ ኣላጋ ኣሳ ኡባፌ ባና ሻኪዴስ፤ ሄሳፌ ጉዬ ኣሳይ ዉሪ ዴንዲ ኤቂዲ ኢስቲኔ ካሴ ኢስታ ኣዋቲ ኦꬂዳ ናጋራ ኡባ ፓጺዳ።
NEH 9:3 ሄን ኢስቲ ኤቂዳ ማላ ዲሺን ኢስታ ጾሳ ዎጋ ማጻፋይ ሄꬑ ሳቴ ኩሜꬅ ኢስታስ ናባቤቲዴስ፤ ቃሴ ሃራ ሄꬑ ሳቴ ኩሜꬅ ኢስቲ ባ ናጋራ ፓጺሼ ጎዳስ ባ ጾሳስ ሆኪ ጎይኒዳ።
NEH 9:4 ሌዌ ባጋታስካ ኤቂዛ ማዲራኬይ ዴስ፤ ሄ ማዲራኬዛ ቦላ ኢያሶይ፥ ባኔይ፥ ቃዲምኤሌይ፥ ሼባኒያይ፥ ቡኔይ፥ ሼሬቢያይ፥ ባኔይኔ ካናኔይ ኤቂዲ ባ ቃላ ꬎቁ ሂስቲዲ ጎዳ ባንታ ጾሳኮ ዎሲዳ።
NEH 9:5 ኢያሶ፥ ቃዲምኤሌ፥ ባኔ፥ ሃሻቢናዬ፥ ሼሬቢያ፥ ሆዲያ፥ ሼባኒያኔ ፓታያ ጌቴቲዛ ሌዌ ባጋ ኣሳቲ፥ «ኢንቴ ዴንዲ ኤቂዲ ሜርና ጎዳ ኢንቴ ጾሳ ጋላቲቴ፤ ጋላታፔኔ ኣንጆፌ ꬎቁ ꬎቁ ጊዳ ቦንቼቲዳ ጾሳ ሱንꬃ ሳቢቴ» ጊዳ።
NEH 9:6 ሄሳፌ ጉዬ ኢስራኤሌ ኣሳይ፥ «ጾሶ፥ ኔ ጻላ ጎዳ፤ ሳሎኔ ሳሎ ቦላ ዲዛይታ፥ ሳኣኔ ሳኣ ቦላ ዲዛይታ፥ ጊታ ኣባኔ ኢዛ ጊዶን ዲዛይታ ኡባ ሜꬊዳይ ኔና። ኡባስ ዴኦ ሼምፖ ኢማዳሳ፤ ሳሎ ሜꬌቴꬃቲ ኡባይ ኔስ ጎይኔቴስ።
NEH 9:7 ጎዳዉ፥ ኔኒ ጾሳ! ኔኒ ኣብራሜ ኡሬ ጌቴቲዛ ካላዳዌ ዴሬፔ ዶራዳ ጼይጋ ኬሳዳሳ፤ ኢዛ ሱንꬃካ ኣብራሃሜ ጋዳሳ።
NEH 9:8 ኢዚ ኔስ ኣማኔቲዳ ኣስ ጊዲዳይሳ ቤያዳ ኢዛራ ጫቄታዳሳ፤ ካናኔ ኣሳይ፥ ሂቴ ኣሳይ፥ ኣሞሬ ኣሳይ፥ ፓሪዜ ኣሳይ፥ ያቡሴ ኣሳይኔ ጌርጌሴ ኣሳይ ኢዛን ዲዛ ቢታ፥ ኢዛ ዜሬꬃታስ ዱሳ ቢታ ጊዳና ማላ ላቲሳናስ ጫቆ ቃላ ጌላዳሳ፤ ኔኒ ጺሎ ጊዲዳ ጊሻስ ኔ ጫቆ ቃላ ሚንꬃ ናጋዳሳ።
NEH 9:9 «ኔኒ ኑ ኣዋታ ቦላ ካሴ ጊብጼ ቢታን ጋኪዳ ዋዬዛ ቤያዳሳ፤ ኢስቲ ዞኦ ኣባ ማታን ዲሼ ማዶ ኮዪዲ ኔና ዎሲዳ ዎሳ ሲያዳሳ።
NEH 9:10 ጊብጼ ካዎ ቦላ፥ ሹሜታ ቦላኔ ሄ ቢታን ዲዛ ኣሳ ኩሜꬃ ቦላ ጊታ ማላታታ ቆንጪሳ ቤሳዳሳ። ሄሳ ኔ ኦꬂዳይ ካሴ ኑ ኣዋታ ጊብጼ ኣሳይ ኣይ ማላ ኢስታስ ሜንጼ ኢቲዲ ዋዪሲዳኮ ኔ ቤኢዳ ጊሻሳ፤ ኔ ሄሳ ኦꬆይሳ ጋሶን ሃች ጋካናስ ኔ ሱንꬃይ ቦንቾን ጼይጌታና ማላ ኦꬃዳሳ።
NEH 9:11 ኢስታ ሲንꬃን ኣባ ናምኡ ኬሳ ሻካዳ፥ ሜላ ቢታራካ ኢስታ ፒንꬃዳሳ፤ ሹች ዱጌ ጪማ ሃꬃ ጊዶን ዬጊዛ ማላ ኢስታ ጎዲዛይታ ጪማ ሃꬃ ጊዶ ዬጋዳሳ።
NEH 9:12 ጋላስ ቱሳ ማላ ኤቂዳ ሻራን፥ ኦማርሲ ቱሳ ማላ ታማን ፖኢሳዳ ኢስቲ ባናስ ቤሲዛ ኦጌራ ባና ማላ ካሌꬃዳሳ።
NEH 9:13 «ሳሎፔ ዱጌ ሲና ዙማ ቦላ ዎꬋዳ ኔ ዴሬዛ ሃሳይሳዳሳ፤ ሎኦ ዎጋታኔ ሱሬ ቲሚርቴታ ኔ ኢስታስ ኢማዳሳ።
NEH 9:14 ጌሻ ኔ ሳምባታ ኢስቲ ቦንቻና ማላ ታማርሳዳሳ፤ ኔ ኣዛዞታ፥ ዎጋታኔ ማራታ ኔ ኦሳንቻ ሙሴ ባጋራ ኢስታስ ኢማዳሳ።
NEH 9:15 ኢስቲ ጋፌቲዳ ዎዴ ሳሎፔ ካꬅ ኢማዳሳ፤ ኢስቲ ሳሜቲዳ ዎዴ ሃꬅ ዛላፌ ኢስታስ ፑልቲሳዳሳ፤ ቃሴ ኔ ኢስታስ ኢማና ጋዳ ጫቂዳ ቢታ ጌሊዲ ኤካና ማላ ኣዛዛዳሳ።
NEH 9:16 «ካሴ ኑ ኣዋቲ ኦቶራንቻኔ ዎዚና ሙሜ ጊዲዳ ጊሻስ ኔ ኣዛዞ ናጊቤቴና፤
NEH 9:17 ኔስ ኣዛዜቲቤቴና፤ ኔ ኢስታስ ኦꬂዳ ጊታ ማላታካ ኡባ ዶጊዳ፤ ዎዚና ሙሜ ጊዲዳ፤ ቃሴ ጉዬ ጊብጼ ኣይሌቴꬃን ዛራና ማላ ባንታና ካሌꬂዛ ኣስ ዶሪዳ። ጊዶ ኣቲን ኔኒ ሲቆን ኩሚዳ ጾሳ፥ ሃንቆስ ታኪዛ ጾሳ፥ ኣቶ ጊዛ ጾሳ፥ ኪያኔ ማሪዛ ጎዳ ጊዲዳ ጊሻስ ኔ ኢስታ ኣጋቤካ።
NEH 9:18 ማራ ሌሚሶን ባስ ኤቃ ጾስ ኦꬂዲ፥ ‹ጊብጼ ቢታፌ ኑና ካሌꬂዲ ኬሲዳ ጾሲ ሃይሳኮ!› ጊዳ። ኔ ሱንꬃካ ኣይ ማላ ሞሮ ሞሪዶ!
NEH 9:19 «ኔ ማሮታይ ጊታ ጊዲዳ ጊሻስ ኢስቲ ሄን ባዞ ቢታን ꬋዪ ኣታና ማላ ኣጋቤካ፤ ጊዶ ኣቲን ኢስቲ ጋላስ ቱሳ ማላ ሻራን ኦማርስ ቱሳ ማላ ታማን ኢስቲ ባናስ ቤሲዛ ኦጌራ ኢስታ ካሌꬆ ኣጋቤካ።
NEH 9:20 ሎኦ ጊዲዳ ኔ ኣያና ኢስታ ታማርሳና ማላ ኢማዳሳ፤ ኢስታስ ማና ማላ ማና፥ ኡያና ማላ ሃꬅ ኢማዳሳ።
NEH 9:21 ኦይዱ ታሙ ላይꬅ ኩሜꬅ ኢስታ ባዞ ቢታን ማዳዳ ኢስታስ ኮሺዛ ሚሼ ኢሲኖካ ዲጋቤካ፤ ኢስቲ ማይኢዳ ማይኦይ ዉሪቤና፤ ቃሴ ኢስታ ቶሆይካ ፑሪቤና።
NEH 9:22 «ኢስታ ዴራ ዩዪ ኣꬊ ዲዛ ዴሬታኔ ኢስቲ ካዎቴꬃታ ኡባ ጾኒዲ ሄ ቢታ ኤካና ማላ ኦꬃዳሳ፤ ሄሳ ጊሻስ ካዎ ሲሆኔይ ኣይሲዛ ሃሴቦኔ ጌቴቲዛ ቢታኔ ካዎ ኣጌይ ኣይሲዛ ባሳኔ ጌቴቲዛ ቢታ ጾኒዲ ላቲዳ።
NEH 9:23 ኢስታስ ቆዳይ ሳሎ ጾሊንቴ ማላ ዳሪዳ ናይታ ኢማዳሳ፤ ካሴ ኢስታ ኣዋታስ ኔ ኢማና ጋ ቃላ ጌሊዳ ቢታ ኢስቲ ጾኒ ላታና ማላ ኦꬃዳሳ።
NEH 9:24 ኢስታ ናይቲ ካናኔ ቢታ ጾኒ ላቲዳ፤ ሄ ቢታን ዲዛ ኣሳታ ኔኒ ጾናዳሳ፤ ኢስታ ካዎታ ቦላኔ ካናኔ ቢታን ዲዛ ኣሳታ ቦላ ባ ዶሲዳ ማላ ኦꬃና ማላ ዎልቃ ኢማዳሳ።
NEH 9:25 ቃሴ ሎኢ ጊምቤቲዳ ካታማታኔ ኣራዳ ቢታ፥ ሎኦ ሚሽ ኢስታን ኩሚዳ ኬꬃታ፥ ሃꬃ ኦላታኔ ዎይኔ ኣታኪልቴይ ቶኬቲዛ ጋዴ፥ ዎጋራ ሚꬃታኔ ዳሮ ኣይፌ ኣይፊዛ ሚꬃታ ላቲዳ፤ ሚዲኔ ኡዪዲ ሞꬊዳ፤ ኔኒ ኔ ኪያቴꬃን ኢሚዳ ሎኦ ሚሻን ዉሪ ኡፋዬቲዳ።
NEH 9:26 «ጊዶ ኣቲን ኢስቲ ኔ ቦላ ማካሊዳ፤ ‹ኔ ቃላስካ ኣዛዜቶኮ› ጊዳ፤ ኔ ዎጋ ሲዮኮ ጊዲ ኔስ ዞኮ ዛሪዳ፤ ቃሴ ኢስቲ ኔኮ ዛራና ጊዲ ሴሪ ታማርሲዳ ናቤታ ዎꬊዳ፤ ኡባ ዎዴ ኔ ቦላ ጫሻ ቃላ ሃሳይዳ።
NEH 9:27 ሄሳ ጊሻስ ኢስታ ሞርኬቲ ኢስታ ጾኒዲ ሃራና ማላ ኣꬃ ኢማዳሳ፤ ሞርኬቲካ ኢስታ ሜቶꬂዳ፤ ኢስቲ ባንታና ሜቲዳ ዎዴ ኔኮ ዋሲዳ፤ ኔካ ኢስታ ዋሳ ሳሎን ዳዳ ሲያዳሳ፤ ኔ ማሮቴꬃ ጊታቴꬃፌ ዴንዲዳይሳን ኢስታ ሞርኬታፔ ኣሻና ካሌꬂዛይታ ዬዳዳሳ።
NEH 9:28 «ጊዶ ኣቲን ሳሮ ዴሚዳ ዎዴ ቃሴካ ሲሚ ናጋራ ኦꬂዳ፤ ሄሳ ጊሻስ ኔ ኢስታ ሞርኬታስ ኣꬃ ኢማዳሳ፤ ኢስታ ሞርኬቲካ ኢስታ ሃሪዳ፤ ጊዶ ኣቲን ኔ ማዳና ማላ ጊዲ ኔኮ ሲሚ ዎሲዳ ዎዴ ሳሎን ዳሼ ኢስታ ዎሳ ሲያዳሳ፤ ኔኒ ኔ ቃꬌቴꬃፌ ዴንዲዳይሳን ኢስታ ኡባ ዎዴ ማዳዳሳ።
NEH 9:29 ኔ ቃላኮ ሲማና ማላ ኔኒ ኢስታ ሴራዳሳ፤ ጊዶ ኣቲን ባ ኦቶሮቴꬃፌ ዴንዲዳይሳን ኔ ኣዛዞታ ካꬊዳ፤ ኢስቲ ኣዛዜቲዳኮ ኢስታስ ዴኦ ኢሚዛ ኔ ዎጋታ ቦላ ናጋራ ኦꬂዳ። ኢስታ ዎዚናይ ሙሚዳ ጊሻስ ባ ሲንꬅ ሃራሶ ዛሪዳ፤ ቃሴ ባ ዎዚና ሙሚሲዲ ኔ ኣዛዞታ ኢጺዳ።
NEH 9:30 ዳሮ ላይꬅ ኔ ኢስታ ዳንዳያዳሳ፤ ኢስታ ታማርሳና ማላ ናቤታ ኔ ኣያናን ኢስታስ ዴንꬃዳሳ፤ ጊዶ ኣቲን ኢስቲ ሎኤꬂ ሲዪቤቴና፤ ሄሳ ጊሻስ ኢስታ ዴሬ ማታን ዲዛ ኣሳቲ ጾናና ማላ ኢስታ ኣꬃ ኢማዳሳ።
NEH 9:31 ጊዶ ኣቲን ኔ ማሮቴꬃ ጊታቴꬃፌ ዴንዲዳይሳን ኢስታ ኣጋቤካ፤ ኔ ኪያኔ ኣቶ ጊዛ ጾሳ ጊዲዳ ጊሻስ ኢስታ ꬋይሳቤካ።
NEH 9:32 ጊታ፥ ዎልቃማኔ ያሺዛ ኑ ጾሳዉ! ኔኒ ኔ ጫቆ ቃላኔ ሜርና ጋካናዉ ዲዛ ኔ ሲቆ ናጋሳ፤ ኑ ቦላ፥ ኑ ካዎታ ቦላኔ ኑና ካሌꬂዛይታ ቦላ ኑ ቄሴታ ቦላኔ ኑ ናቤታ ቦላ ኑ ኣዋታ ቦላ፥ ቃሴካ ዴሬ ኡባ ቦላ፥ ኣሶሬ ካዎታፔ ዶሚዲ ሃች ጋካናስ ጋኪዳ ሜቶ ኡባ ኔ ቆፓ።
NEH 9:33 ኔ ኑና ቃጻያና ጋዳ ኔ ኦꬂዳይሲ ዉሪ ሊኬ፤ ኑኒ ናጋራ ኦꬂኮካ ኔኒ ኔ ኣማኔቴꬃን ሚና ኤቃዳሳ።
NEH 9:34 ካሴ ኑ ኣዋቲኔ ኑ ካዎቲ፥ ኑና ካሌꬂዛይቲኔ ኑ ቄሴቲ ኔ ዎጋ ናጊቤቴና፤ ቃሴ ኔ ኢስታስ ኢሚዳ ኣዛዞታኔ ሴራ ዞሬ ሲዪቤቴና።
NEH 9:35 ኔ ኢስታ ካዎቴꬃን ኢስታስ ጊታ ኣንጆ ኢማዳሳ፤ ኣራዳኔ ኣሆ ቢታ ኢስታስ ኢማዳሳ፤ ጊዶ ኣቲን ኢስቲ ባ ናጋራፔ ሲሚዲ ኔስ ጎይኒቤቴና።
NEH 9:36 ሄሳፌ ዴንዲዳይሳን ኔ ኑ ኣዋቲ ኣይፌዮ ማና ማላኔ ሎኦ ሚሻን ኡፋዬታና ማላ ኔ ኢስታስ ኢሚዳ ቢታን ሃች ኑ ኣይሌ ጊዲዶስ።
NEH 9:37 ኑኒ ናጋራ ኦꬂዳ ጋሶን ኔኒ ኑ ቦላ ካዎꬂዳ ካዎቲ ኑ ቢታ ኣንጆ ኡባ ኢስቲ ጎኤቴቴስ፤ ቃሴ ኑ ቦላኔ ኑ ሜሄታ ቦላ ባ ኮዪዳ ማላ ኦꬄቴስ፤ ሄሳፌ ዴንዲዳይሳን ኑኒ ሃኢ ጊታ ዋዬ ቦላ ዶስ።
NEH 9:38 «ሃኒዳ ዮኦ ኡባስ ኑኒ ኢስራኤሌ ኣሳይ ቃላን ጋጊዳይሳ ጻፊ ዎꬃናስ ቃላ ቃቺዶስ፤ ኑ ቃቺን ጻፌቲዳ ቃላ ቦላ ኑና ካሌꬂዛይቲ፥ ሌዌ ባጋቲኔ ኑ ቄሴቲ ባ ማታሜ ሾጪዳ» ጊዳ።
NEH 10:1 ማታሜ ሾጪዳይቲ ሃካሊያ ና ዴሬ ኣይሲዛ ናሂሚያ፥ ሴዴቂያሳ፥
NEH 10:2 ቄሴታ ባጋፌ ሳራያ፥ ኣዛሪያሳ፥ ኤርማሳ
NEH 10:3 ፓሽኩሬ፥ ኣማሪያ፥ ማልኪያ፥
NEH 10:4 ሃጹሼ፥ ሼባኒያ፥ ማሉኬ፥
NEH 10:5 ሃሪሜ፥ ሜርሞቴ፥ ኣብዲዩ፥
NEH 10:6 ዳኔላ፥ ጊንቶኔ፥ ባሮኬ፥
NEH 10:7 ማሹላሜ፥ ኣቢያ፥ ሚያሚኔ፥
NEH 10:8 ማኣዚያ፥ ቢልጋዬኔ ሻማኤ።
NEH 10:9 ሌዌ ባጋታፔ ኣዛኒያ ና ኢያሶ፥ ሄናዳዴ ዛሬፔ ቢኑዌ፥ ቃዲምኤሌ፥
NEH 10:10 ኢስታ ኢሻታፔ ሼባኒያ፥ ሆዲያ፥ ቃሊጻ፥ ፓላዬ፥ ሃናኔ፥
NEH 10:11 ሚካ፥ ኤራሆቤ፥ ሃሻቢያ፥
NEH 10:12 ዛኩሬ፥ ሼሬቢያ፥ ሼባኒያ፥
NEH 10:13 ሆዲያ፥ ባኔኔ ቤኒኔ።
NEH 10:14 ዴሬ ኣይሲዛይታ ባጋፌ ፓሮሴ፥ ፓሃቴ-ሞኣቤ፥ ኤላሜ፥ ዛቶ፥ ባኔ፥
NEH 10:15 ቡኔ፥ ኣዝጋዴ፥ ቤባዬ፥
NEH 10:16 ኣዶኒያሳ፥ ቢጉዋዬ፥ ኣዲኔ፥
NEH 10:17 ኣጻሬ፥ ሂዝቂያሳ፥ ኣዙሬ፥
NEH 10:18 ሆዲያ፥ ሃሹሜ፥ ቤሳዬ፥
NEH 10:19 ሃርፔ፥ ኣናቶቴ፥ ኔባዬ፥
NEH 10:20 ማጊፒኣሼ፥ ማሹላሜ፥ ሄዚሬ፥
NEH 10:21 ሜሼዛቤሌ፥ ሳዶቄ፥ ያዱኤ፥
NEH 10:22 ፓላጺያ፥ ሃናኔ፥ ኣናያ፥
NEH 10:23 ሆሴኤ፥ ሃናኒያ፥ ሃሹቤ፥
NEH 10:24 ሃሉሄሼ፥ ፒሊሄ፥ ሾቤቄ፥
NEH 10:25 ኤሬሁሜ፥ ሃሻቢኔ፥ ማኢሳያ፥
NEH 10:26 ኣካያ፥ ሃናኔ፥ ኣናኔ፥
NEH 10:27 ማሉኬ፥ ሃሪሜኔ ባኣና።
NEH 10:28 «ኣቲዳ ኣሳይ፥ ቄሴቲ፥ ሌዌ ባጋቲ፥ ጾሳ ኬꬃ ጊቤ ናጊዛ ዛቤቲ፥ ዬꬃ ዬጺዛይቲኔ ጾሳ ኬꬃ ኦሳንቻቲ ቃሴካ ጾሳ ዎጋስ ኣዛዜታና» ጊዲ ኣይዛቤታፔ ባና ሻኪዳ ኣሳቲ ባ ማቼታራ፥ ባ ኣቱማ ናይታራኔ ማጫ ናይታራ ኢሲፌ ጊዲዲ ኤሪዛይቲኔ ኣኬኪዛይቲ ኡባይ ጫቂዳ፤
NEH 10:29 ባና ካሌꬂዛይታራ ኢሲፌ ጊዲዲ ጾሳ ኣይሌ ሙሴ ባጋራ ኢሜቲዳ ኣዛዞታ፥ ፒርዳኔ ዎጋ ናጋና ጊዲ ቃላ ጌሊዳ፤ «ሄሳꬆ ኦꬆንታ ኣጊኮ ኑና ጎሞ፤
NEH 10:30 ኑ ዴሬ ሄራን ዲዛ ኣይዛቤታፔ ማቾ ኑ ናይታስ ኤኮንታ ማላኔ ኑ ማጫ ናይታ ጌዴ ኢሞንታ ማላ ጫቆስ።
NEH 10:31 «ኣይዛቤቲ ባ ዴሬፔ ሳምባታ ጋላስ ዎይኮ ሃራ ባኣሌታን ካꬅ ዎይኮ ኣይ ሚሺካ ዛልኤስ ኤኪ ዪኮ ኢስታፌ ሻሞኮ። ላፑንꬆ ላይꬃን ላይꬃን ኑ ጋዴ ሼምፒሳናስ ጎዮኮ፤ ኑ ታልኤ ኢሚዳ ኣጮዛካ ዛሪ ኤኮኮ።
NEH 10:32 «ላይꬃን ላይꬃን ጾሳ ኬꬃ ኦሶስ ማዲዛ ቢራ ሄꬓፌ ኢሲ ኩሼ ኑ ኤሂ ኢማና።
NEH 10:33 ሄሳꬆካ ጾሳ ኬꬃ ኦሶስ ቤሲዛ ሚሻታ ኩንꬂዲ ሺሻና፤ ሄይቲካ ዱማቲዳ ኡኬꬅ፥ ጋላስ ጋላስ ሺቂዛ ያርሾ ካꬅ፥ ጹጌቲዛ ያርሾስ ጊዲዛ ሜሄታ፥ ሳምባታ ጋላሳታን፥ ኣጊናይ ጋኪሺኒኔ ሃራ ባኣሌ ጋላሳታን ሺቂዛ ሃራ ጌሻ ያርሾ ኡባ፥ ኢስራኤሌ ኣሳ ናጋራ ዉርሳናስ ሺቃና ቤሲዛ ሚሺኔ ጾሳ ኬꬃ ኦሶስ ኮሺዛ ሚሻታ ኡባ ኢማና።
NEH 10:34 «ያርሾ ጊሻስ ሙሴ ዎጋን ጻፌቲዳ ማላ ጎዳ ኑ ጾሳስ ሺቂዛ ያርሾ ጹጋናስ ቤሲዛ ኤሶ ሚꬅ ሺሻና ቤሲዛ ቆሞቲ ኦናንታኮ ኤራናስ ኑኒ ዴሬይ ቄሴቲኔ ሌዌ ባጋቲ ላይꬃን ላይꬃን ሳማ ዬጊዲ ዮኦዛ ቃቾስ።
NEH 10:35 «ላይꬃን ላይꬃን ኑ ካꬃታኔ ሚꬃ ኣይፌታ ማጺ ሺሺዛ ዎዴ ኮይሮ ጋኪዛ ሻቻስ ጼራ ጾሳ ኬꬅ ኤፊ ኢማና።
NEH 10:36 «ኑፔ ኢሶይ ኢሶይ ኮይሮ ዬሌቲዳ ኣቱማ ናይታ ጾሳ ዎጋይ ኣዛዚዛ ማላ ኢስታ ጾሳስ ዱማሳና፤ ጾሳ ኬꬃን ኦꬂዛ ቄሴታስ ኢማና፤ ቃሴ ኑ ሚዛታፔ፥ ኑ ዶርሳታፔ፥ ኑ ዴይሻታፔ ኮይሮ ዬሌቲዛ ማራታኔ ላቃታ ኡባ ጾሳስ ዱማ ሻካና።
NEH 10:37 «ኑኒ ካꬅ ሺሺዛ ዎዴ ኮይሮ ጋኪዛ ካꬃ ꬊሌፌ፥ ዱማ ዱማ ሜቴቲዛ ሚꬃ ኣይፌፔ፥ ኦራꬃ ዎይኔ ኡሻፌኔ ዎጋራ ዛይቴ ኡባፌ ጼራ ጾሳ ኬꬃን ኦꬂዛ ቄሴታስ ኤሂ ኢማና፤ ኑ ጎሻ ጋዴይ ዲዛሶን ዲዛሶን ካጺዛ ካꬃፌ ጊራ ቃንጺሲዛ ሌዌ ባጋታስ ታማፌ ኢሲ ኩሼ ኢማና።
NEH 10:38 ኣስራታይ ሺቂዛ ዎዴ ኣሮኔ ዜሬꬃፌ ጊዲዳ ቄሴይ ሌዌ ባጋታራ ኢሲፌ ኤኬቴስ፤ ሌዌ ባጋቲ ጾሳ ኬꬃ ኦሶስ ሺሺዳ ኣስራታፔ ታማፌ ኢሲ ኩሼ ጾሳ ኬꬃ ሚሺ ኡቲዛ ሚንጃ ኬꬃን ዎꬄቴስ።
NEH 10:39 ኢስራኤሌ ኣሳይኔ ሌዌ ባጋቲ ካꬅ፥ ዎይኔ ኡሹኔ ዎጋራ ዛይቴ ኢሞታ ጾሳ ኬꬃ ሚሻቲ ኡቲዛሶኒኔ ቄሴቲ፥ ጾሳ ኬꬃ ጊቤ ናጊዛ ዛቤቲኔ ዬꬃ ዬጺዛይቲ ሼምፒዛ ሚንጃ ኬꬃን ኤሂ ዎꬄቶ። «ሄሳ ጊሻስ፥ ‹ኑ ጾሳ ኬꬃ ኦሶ ኑና ኣይ ሜቲዴ!› ጊ ኣጎኮ» ጊዲ ጫቂዳ።
NEH 11:1 ዴራ ካሌꬂዛይቲ ዬሩሳላሜን ዴኢዳ፤ ቃሴካ ሃንኮ ታሙ ኬꬃ ኣሳፔ ኢሲ ኬꬃ ኣሲ ጌሽ ጊዲዳ ዬሩሳላሜ ካታማን ዳናይታስ ሳማ ዬጊ ዶሪዳ፤ ሃንኮ ኣቲዳ ኣሳይ ጊዲኮ ዱማ ዱማ ካታማታ ባስ ዴꬃሶ ኦꬂዴስ፤
NEH 11:2 ኣሳይካ፥ «ዬሩሳላሜን ዳና» ጊዲ ባ ሼኔን ዴንዴቲዳ ኣሳ ኡባ ኣንጂዴስ።
NEH 11:3 ሃራ ጉታታኒኔ ካታማታን ዴኢዛ ኢስራኤሌ ኣሳይ፥ ቄሴቲ፥ ሌዌ ባጋቲ፥ ጾሳ ኬꬃ ኦሳንቻቲኔ ሶሎሞኔ ኣይሌታ ዜሬꬃቲ ባ ሃሮይ ዲዛሶን ዲዛሶን ዴኢዳ፤ ሃይሳፌ ካሊ ጻፌቲዳይቲ ዬሩሳላሜን ዴኢዛ ዩሁዳ ዴሬ ካሌꬂዛ ኣሳታ።
NEH 11:4 ዩሁዳ ዛርኬፌ ዪዳ ካሌꬂዛይቲ ፓሬሴ ዜሬꬃፌ ጊዲዳይቲ ማላልኤሌ ና፥ ሻፋጺያ ና፥ ኣማሪያ ና፥ ዛካራሳ ና፥ ኦዚያ ና፥ ኣታዪያ፥
NEH 11:5 ሴሎ ዜሬꬃፌ ዛካራሳ ና፥ ዮያሪቤ ና፥ ኣዳያ ና፥ ኦዚያ ና፥ ኮሊ-ሆዜ ና፥ ባሮኬ ና፥ ማኢሳያ።
NEH 11:6 ዬሩሳላሜን ኡቲዳ ፓሬሴ ዜሬꬃታፔ ኤሬቲዳ ዎልቃማ ኣሳቲ 468።
NEH 11:7 ቢኒያሜ ዜሬꬃታፔ፥ ዬሻኢያ ና፥ ኢቲኤሌ ና፥ ማኢሳያ ና፥ ቆላያ ና፥ ፓዳያ ና፥ ዮኤዴ ና፥ ማሹላሜ ና፥ ሳሉዬ፥
NEH 11:8 ሳሉስ ማታ ዳቦቲ፥ ጋባያኔ ሳላዬ፥ ዬሩሳላሜን ዴኢዛ ቢኒያሜ ዜሬꬃቲ ኢሲ ቦላ 928።
NEH 11:9 ዚኪሬ ና ኢዩኤሌይ ኢስታ ካሌꬂዛይሳ ጊዲሺን ሃሳኑኤ ና ዩሁዳይ ኢዛፔ ጋርሳራ ካታማ ኣይሲዛ ናምኣንꬆ ዳና።
NEH 11:10 ቄሴታ ባጋፌ፥ ዮያሪቤ ና፥ ያዳያ ና፥ ያኪኔ ና፥
NEH 11:11 ጾሳ ኬꬃ ሃላቃ ጊዲዳ ኣሂጹቤ ና፥ ማራዮታ ና፥ ሳዶቄ ና፥ ማሹላሜ ና፥ ኪልቂያሳ ና ሳራያ፥
NEH 11:12 ኢስታራ ኢሲፌ ጾሳ ኬꬃ ኦሶ ኦꬂዳ ኣሳይ ኢሲ ቦላ 822፤ ማልኪያ ና፥ ፓሽኩሬ ና፥ ዛካራሳ ና፥ ኣሞዛኔ ና፥ ፓላሊያ ና፥ ዪሮሃሜ ና ኣዳያ፥
NEH 11:13 ሃ ዜሬꬃታ ጊዶፌ 242 ኮራፒኔታ። ኢሜሬ ና፥ ማሺሌሚቴ ና፥ ኣሂዛያ ና፥ ኣዛሪኤሌ ና፥ ኣማሺሳ፥
NEH 11:14 ሃ ዜሬꬃታ ጊዶፌ ኤሬቲዳ ዎታዳራቲ 128፤ ኢስታ ካሌꬂዛይ ሃጊዶሌሜ ና ዛብዲኤሌ።
NEH 11:15 ሌዌ ባጋፌ፥ ቡኔ ና፥ ሃሻቢያ ና፥ ኣዚርቃሜ ና፥ ሃሹቤ ና ሻማኤ፥
NEH 11:16 ሳባታይኔ ዮዛባዴ ጌቴቲዛ ኤዌ ባጋታ ካሌꬂዛይቲ ጾሳ ኬꬃስ ካሬ ባጋራ ኦሴቲዛ ኡባ ኦሶስ ኣላፌታ።
NEH 11:17 ዛብዴ ና፥ ሚካ ና ማታኒያ፥ ዬꬃ ዬጺዛይታ ሃላቃ ጊዲዳ ኣሳፌ ና፥ ባ ኢሻታፔ ናምኣንꬆዛ ባቂቡቂያ፥ ሻሙኤ ና ጊዲዳ ኣቢዳ ና፥ ጋላሌ ና፥ ኤዶታኔ ና።
NEH 11:18 ሌዌ ዜሬꬃታፔ 284 ኣሳቲ ጌሻ ካታማ ዬሩሳላሜን ዴኢዳ።
NEH 11:19 ጾሳ ኬꬃ ጊቤ ናጊዛ ዛቤቲ፥ ኣቁቤ፥ ጻልሞኔኔ ኢስታራ ኢሲፌ ኦꬂዛ ዛቤቲ 172።
NEH 11:20 ሃንኮ ኢስራኤሌ ኣሳይ፥ ቄሴቲኔ ሌዌ ባጋቲ ዉሪ ባ ጋዴን ጋዴን ዩሁዳ ካታማ ጊዶን ዴኢዳ።
NEH 11:21 ጾሳ ኬꬃ ኦሳንቻቲ ዬሩሳላሜስ ኢሲ ባጋራ ዲዛ ኦፌሌ ጌቴቲዛ ꬎቃሶሆን ዴቴስ፤ ጺሃይኔ ጊሻፋ ጌቴቲዛይቲ ኢስታስ ሃላቃታ።
NEH 11:22 ዬሩሳላሜን ሌዌታ ባጋ ሃላቃ ሚካ ና፥ ማታኒያ ና፥ ሃሻቢያ ና፥ ባኔ ና፥ ኡዜይ ጾሳ ኬꬃን ዬꬃ ዬጺዛይታ ሃላቃ ጊዲዳ ኣሳፌ ዜሬꬃ።
NEH 11:23 ኢስቲ ጋላስ ጋላስ ጾሳ ኬꬃን ዬጼቲዛ ዬꬃ ማራን ማራን ታራ ኦይኪ ዬጻና ማላ ካዎፔ ኢዛስ ኢሜቲዳ ኣዛዞይ ዴስ።
NEH 11:24 ዩሁዳ ዛርኬን ዛራሄ ዛሬፔ ሜሼዛቤሌ ና ፓታያይ ፓሪሴ ካዎቴꬃ ጊዶን ዲዛ ኢስራኤሌ ዴራ ኮሺዛ ዮኦታስ ካዎ ኢንዲራሴ።
NEH 11:25 ዩሁዳ ኣሳፔ ኢሶቲ ኢሶቲ ባ ጋዴ ማታን ዲዛ ካታማታ ቂሪያቴ-ኣርባኤኒኔ ኢዛ ማታን ዲዛ ጉታታን፥ ዲቦኒኔ ኢዛ ሄራን ዲዛ ጉታታን ቃሴ ዪቂቢጼኤሌኒኔ ኢዛ ሄራን ዲዛ ጉታታን ኡቲዳ።
NEH 11:26 ሃራይ ቃሴ ኢያሶ፥ ሞላዴ፥ ቤቲ-ጳሌጼ፥
NEH 11:27 ሃጻሬ-ሹኣሌ ጌቴቲዛ ካታማታን ዴቴስ፤ ቤርሳቤሄኒኔ ኢዚ ሄራን ዲዛ ቄሪ ካታማቲካ ኢስታስ ዱሳሶ፤
NEH 11:28 ጺጊላጌ ካታማን ሃራፔካ ሜኮናኒኔ ኢዚ ሄራን ዲዛ ጉታታን፥
NEH 11:29 ኤን-ሪሞናን፥ ጾራኣን፥ ያርሙቴን፥
NEH 11:30 ዛኖሄን፥ ኣዱላሜኒኔ ሄ ካታማታ ማታን ዲዛ ጉታታ ኡባሶን ዴቴስ፤ ቃሴ ላኪሼኒኔ ኢዚ ማታን ዲዛ ጋዴታን፥ ኣዜቄኒኔ ኢዚ ማታን ዲዛ ጉታቲ ዉሪ ኢስታስ ዱሳሶ፤ ሄሳꬆካ ዩሁዳ ዴሬ ኣሳይ ዱጌ ባጋራ ቤርሳቤሄፔ ቢዲ ፑዴ ባጋ ሄኖሜ ሾባፌ ሃ ሲሚን ዲዛሶን ኡቲዳ።
NEH 11:31 ቃሴካ ቢኒያሜ ዜሬꬃቲ፥ ጌባን፥ ማኪማሴን፥ ኣዬን፥ ቤቴሌኒኔ ኢዚ ሄራን ዲዛ ጉታታን ዴቴስ፤
NEH 11:32 ቃሴ ኣናቶቴን፥ ኖቤን፥ ኣናኒያን፥
NEH 11:33 ሃጾሬን፥ ኤራማን፥ ጌቲሜ፥
NEH 11:34 ሃዲዴን፥ ጼቦኢሜን፥ ናባላጼን፥
NEH 11:35 ሎዳኒኔ፥ ኦኖን ሄሳꬆካ «ኩሼ ሂላንቻታ ሾባ» ጌቴቲዛሶ ኡባይ ኢስታስ ዱሳሶ።
NEH 11:36 ዩሁዳ ዴሬ ጋርሳን ዲዛ ሌዌ ባጋታፔ ባጋይቲ ቢኒያሜ ዴሬራ ኢሲፌ ኡቲዳ።
NEH 12:1 ሳላቲያሌ ና ዜሩባቤሌኔ ቄሴታ ሃላቃ ኢያሶራ ዲኤቴꬃፌ ሲሚዳ ቄሴታ ሱንꬂኔ ሌዌታ ሱንꬂ ሃይሳፌ ካሊዛይሳ፤ ቄሴቲ፥ ሳራያ፥ ኤርማሳ፥ ኢዝራ፥
NEH 12:2 ኣማሪያ፥ ማሉኬ፥ ሃጹሼ፥
NEH 12:3 ሻካኒያ፥ ኤሬሁሜ፥ ሜርሞቴ፥
NEH 12:4 ኢዶ፥ ጊንቶዬ፥ ኣቢያ፥
NEH 12:5 ሚያሚኔ፥ ማኣዲያ፥ ቢልጋ፥
NEH 12:6 ሻማኤ፥ ዮያሪቤ፥ ያዳያ፥
NEH 12:7 ሳሉ፥ ኣሞኬ፥ ኪልቂያሳ፥ ያዳያ። ሃይታንቲ ቄሴታ ሃላቃ ኢያሶ ዎዴን ባ ባጋ ቄሴታ ካሌꬂዛ ቄሴታ።
NEH 12:8 ሌዌታ፥ ጋላታ ዬꬃ ዬጺሲዛይታስ ኣላፌ ጊዲዲ ሌዌቲ፥ ኢያሶ፥ ቢኑዌ፥ ቃዲምኤሌ፥ ሼሬቢያ፥ ዩሁዳኔ ማታኒያ።
NEH 12:9 ባቂቡቂያ፥ ኡኔኔ ሃራ ሌዌ ባጋፌ ጊዲዳ ኢስታ ኢሻቲ ኢስታራ ኢሲፌ ሶሬኒኔ ኤዶን ኢሶይ ኢሳፌ ኤኪ ዬጼቴስ።
NEH 12:10 ኢያሶይ ኢዮኣቄሜ ዬሊዴስ፤ ኢዮኣቄሜይ ኤልያሼቤ ዬሊዴስ፤ ኤልያሼቤይ ዮያዳኤ ዬሊዴስ።
NEH 12:11 ዮያዳኤይ ዮናታኔ ዬሊዴስ፤ ዮናታኔይ ያዱኤ ዬሊዴስ።
NEH 12:12 ኢዮኣቄሜይ ቄሴታ ሃላቃቴꬃን ዲዛ ዎዴ ቄሴቲኔ ኢስታ ሃላቃቲ ሃይሳፌ ካሊዛይታ፤ ሳራያ ዜሬꬃፌ ማራዬ፥ ኤርማሳ ዜሬꬃፌ ሃናኒያ፥
NEH 12:13 ኢዝራ ዜሬꬃፌ ማሹላሜ፥ ኣማሪያ ዜሬꬃፌ ዪሆሃናኔ፥
NEH 12:14 ማሉኬ ዜሬꬃፌ ዮናታኔ፥ ሼባኒያ ዜሬꬃፌ ዮሴፌ፥
NEH 12:15 ሃሪሜ ዜሬꬃፌ ኣዳና፥ ማራዮታ ዜሬꬃፌ ሂልቂያ፥
NEH 12:16 ኢዶ ዜሬꬃፌ ዛካራሳ፥ ጊንቶኔ ዜሬꬃፌ ማሹላሜ፥
NEH 12:17 ኣቢያ ዜሬꬃፌ ዚኪሬ፥ ሚኒያሚኔፔኔ ሞኣዲያ ዜሬꬃፌ ፒልጻዬ፥
NEH 12:18 ቢልጋ ዜሬꬃፌ ሻማኤ፥ ሻማኤ ዜሬꬃፌ ዮናታኔ፥
NEH 12:19 ዮያሪቤ ዜሬꬃፌ ማታኒያ፥ ያዳያ ዜሬꬃፌ ኡዜ፥
NEH 12:20 ሳላዬ ዜሬꬃፌ ቃላዬ፥ ኣሞኬ ዜሬꬃፌ ኤቦሬ፥
NEH 12:21 ኪልቂያሳ ዜሬꬃፌ ሃሻቢያ፥ ያዳያ ዜሬꬃፌ ናቲናኤሌ፥
NEH 12:22 ቄሴታሶ ኣሳ ሱንꬂኔ ሌዌ ባጋ ኣሳታስ ሶ ኣሳ ሱንꬂ ሃይሳፌ ካሊ ዲዛይሳ፤ ኤልያሼቤ፥ ዮያዳኤ፥ ዮሃናኔኔ ያዱኤ ጌቴቲዛ ቄሴታ ሃላቃቲ ዲዛ ዎዴ ሌዌ ባጋታ ሶ ኣሳታ ሃላቃቲኔ ቄሴታ ሶ ኣሳታ ሃላቃቲ ሻኬቲ ኤሬቲዛ ማዝጋቤይ ዴስ፤ ሄሲካ ፓሪሴ ዴሬ ካዎ ዳሪዮሲ ካዎቲ ዲዛ ዎዴና።
NEH 12:23 ጊዶ ኣቲን ሌዌ ባጋታ ሶ ኣሳታ ሃላቃታፔ ቆንጬን ማዝጋቤቲዲ ኤሬቲዳይቲ ኤልያሼቤስ ናዛ ና ዮሃናኔይ ሃይቃና ጋካናስ ዲዛ ዎዴን ጻላ።
NEH 12:24 ሃሻቢያይ፥ ሼሬቢያይ፥ ኢያሶይ፥ ቢኑዌይኔ ቃዲምኤሌይ ካሌꬂዛ ሌዌ ባጋቲ ናምኡ ኬዚ ሻኬቲዳ። ሄ ናምኡ ባጋቲካ ጾሳ ኣሲ ካዎ ዳዊቲ ኣዛዚዳ ኣዛዞ ማላ ጾሳስ ጋላታ ዬꬃ ሶሬኒኔ ኤዶን ኢሶይ ኢሳፌ ኤኪ ዬጺሼ ሺሺዳ።
NEH 12:25 ጾሳ ኬꬃ ጊምቤ ፔንጌ ኣቻን ኦሴቲዳ ሚሽ ዎꬂዛ ሚንጃ ኬꬅ ናጊዛ ዛቤቲ ማታኒያ፥ ባቂቡቂያ፥ ኣብዲዩ፥ ማሹላሜ፥ ጻልሞኔኔ ኣቁቤ ጌቴቲዛይታ።
NEH 12:26 ሄይቲ ኢዮሳዶቄ ናዛ ና ኢያሶ ና ኢዮኣቄሜ ዴሬ ኣይሲዛ ናሂሚያ፥ ቄሴኔ ዎጋ ኬሂ ኤሪዛ ቄሴ ኢዝራንቲ ዲዛ ዎዴ ዶሬቲዳ ኦሳንቻቲ ዴቴስ።
NEH 12:27 ዬሩሳላሜ ካታማ ጊምቤይ ኣንጄቲዛ ጋላስ ሌዌ ባጋቲ ዳላን፥ ባጋናኒኔ ማሲንቆን ዬጺዲ ቦንቻና ማላ ኢስቲ ዲዛሶፔ ዲዛሶፔ ኮዬቲዲ ዪዳ።
NEH 12:28 ሄ ባኣሌዛ ቦንቻና ሌዌ ባጋፌ ዬጺዛይቲ ዉሪ ባ ዲዛሶፔ ዬሩሳላሜ ሄራፔኔ ናጾፌ ቢታን ዲዛ ሄራታፔ፥
NEH 12:29 ዬሩሳላሜ ዩሾን ኢስቲ ባንታስ ዱሳሶ ኦꬂዳ ጊሻስ ዬጺዛይታ ቤቲ-ጋልጋላፔ፥ ጌባፔኔ ኣዚሞቴፔ ሺሺዲ ኤሂዳ።
NEH 12:30 ቄሴቲኔ ሌዌ ባጋቲ ባ ጊሻስ፥ ዴራ ጊሻስ፥ ካታማ ጊምቤዛ ጊሻሲኔ ጊምቤዛ ፔንጌታ ጊሻስ ጌሾ ዎጋ ኦꬂዳ።
NEH 12:31 ታኒ ናሂሚያይ ዩሁዳ ዴሬ ካሌꬂዛይቲ ጊምባ ቦላ ኬዛና ማላ ሂስቲዳፔ ጉዬ ሎኤꬂ ዬꬃ ዬጺዛይቲ ናምኡ ቡቴን ሻኬቲዲ ዬጻና ማላ ኦꬃዲስ፤ ኮይሮ ቡቴዚ ጊምባስ ሁኤ ቦላ ኬዚዲ ኡሻቻ ባጋራ ዲዛ፥ «ቡራ ዬሳሶ» ኣꬊ ቢዳ።
NEH 12:32 ኢስታካ ሆሻኢያይኔ ዩሁዳ ዴሬ ካሌꬂዛይታፔ ባጋቲ ካሊዳ።
NEH 12:33 ሃራቲ ቃሴ ኢስታራ ዲዛ ኣዛሪያሲ፥ ኢዝራይ፥ ማሹላሜይ፥
NEH 12:34 ዩሁዳይ፥ ቢኒያሜይ፥ ሻማኤይ፥ ኤርማሲ ሳልፊዲ ኣꬊዳ፤
NEH 12:35 ዛዬ ፑኒዛ ቄሴቲ፥ ቃሴካ ኣሳፌ ና፥ ዛኩሬ ና፥ ሚካያ ና፥ ማታኒያ ና፥ ሻማኤ ና፥ ዮናታኔ ና ዛካራሲ ኢስታራ ኣꬊዳ።
NEH 12:36 ዛካራሳ ዜሬꬂ ሻማኤይ፥ ኣዛሪኤሌይ፥ ሚላላይ፥ ጊላላይ፥ ማኣዳይ፥ ናቲናኤሌይ፥ ዩሁዳይኔ ሃናኒያይ ጾሳ ኣስ ዳዊቲ ኢዛን ዬጺዛ ዬꬃ ሚሽ ኤኪ ካሊዳ፤ ሄ ቡቴዛ ካሌꬂዛይ ዎጋ ሎኤꬂ ኤሪዛ ቄሴ ኢዝራ።
NEH 12:37 ፑልቶ ሃꬃ ፔንጌኮ ጋኪዳፔ ጉዬ ዳዊቴ ካታማ ኤፊዛ ኦጌ ኦይኪዳ፤ ጊምባ ቦላ ዲዛ ኬቻታ ፑዴ ኬዚዲ ካዎ ዳዊቴ ካዎቴꬃ ኬꬃ ኣቻራ ኣꬊዲ ሄ ካታማይስ ኣርሼይ ኬዚዛ ባጋራ ዲዛ ሃꬃ ጊምቤ ፔንጌ ሲሚዳ።
NEH 12:38 ሃንኮ ዬꬃ ዬጺዛ ቡቴዚ ጊምባ ቦላራ ሃዲርሳ ባጋ ኣꬊ ቢዴስ፤ ታኒካ ባጋ ኣሳራ ሃ ቡቴዛ ካላዲስ፤ ኢቶኔ ጊምቤ ጌቴቲዛሶራ ካንꬂዲ ጌዴ ኣሆ ጊምቤዛኮ ጋኪዶስ።
NEH 12:39 ቃሴ ኑ ሄሳፌ ኣꬊ ኤፍሬሜ ጊምቤ ፔንጌ፥ ዪሻና ጊምቤ ፔንጌ፥ ሞሌ ጊምቤ ፔንጌ ጌቴቲዛሶኔ ሃናኒኤሌ ጊምቤ፥ ጼቱ ጊምቤታኔ ዶርሳታ ጊምቤ ፔንጌ ጌቴቲዛሶታ ጋኪዶስ፤ ጾሳ ኬꬃ ማታን ዲዛ ዛቤታ ጊምቤ ፔንጌ ጌቴቲዛሶዛ ጋኪዲ ሳልፌዛ ጊጊዶስ።
NEH 12:40 ሃይሳꬆ ናምኡ ቡቴ ሳልፌዚ ጾሳ ዬꬃን ጋላቲሼ ታናራ ዲዛ ዴራ ካሌꬂዛይታራ ጾሳ ኬꬂ ዲዛሶ ዛዋ ጋኪዶስ፤
NEH 12:41 ታ ዲዛ ሳልፌዛን ጹሩምባ ፑኒዛ ቄሴቲ ሃይሳፌ ካሊ ዲዛይታ፤ ኤልያቄሜ፥ ማኢሳያ፥ ሚኒያሚኔ፥ ሚካያ፥ ኤልዮኤናዬ፥ ዛካራሳኔ ሃናኒያ፤
NEH 12:42 ኢስታካ ካሊዛይቲ ማኢሳያ፥ ሻማኤ፥ ኤልኤዜሬ፥ ኡዜ፥ ዪሆሃናኔ፥ ማልኪያ፥ ኤላሜኔ ኤዜሬ፤ ሄይቲ ባ ኤቂዛሶ ኤቂዛሶ ኦይኪዳ፤ ዬጺዛይቲ ዪዚራሄያይ ካሌꬂን ባ ቃላ ꬎቁ ሂስቲዲ ዬጺዳ።
NEH 12:43 ሄ ጋላስ ኣሳይ ዳሮ ያርሾ ሺሺዴስ፤ ጾሳይ ኢዛ ኡፋይሲዳ ጊሻስ ዴሬዚ ኬሂ ኡፋዬቲዴስ፤ ማጫሳይኔ ናይቲካ ኢስታራ ኢሲፌ ኡፋዬቲዳ፤ ዬሩሳላሜን ሃኒዳ ኢሊሊሳ ቃላይ ሃሆን ሲዬቲዴስ።
NEH 12:44 ሄ ዎዴ ጾሳ ኬꬃ ኦሶስ ኢሜቲዛ ኣስራታኔ ላይꬃን ላይꬃን ኮይሮ ጋኪዛ ካꬃ ጼራኔ ሜቴቲዛ ዱማ ዱማ ሚꬃታ ኣይፌ ጼራ ዎꬂዛ ኬꬅ ናጊዛ ዛቤታ ዶሪዳ፤ ሄ ኣሳቲ ዱማ ዱማ ካታማታ ማታን ዲዛ ጎሻ ጋዴፔ ዎጋይ ኣዛዚዛ ማላ ቄሴታሲኔ ሌዌ ባጋታስ ኢሜታና ቤሲዛይሳ ሺሻና ኣላፌቴꬅ ኢስታስ ዴስ፤ ኩሜꬃ ዩሁዳ ኣሳይ ቄሴታ ቦላኔ ሌዌ ባጋታ ቦላ ኬሂ ኡፋዬቲዳ።
NEH 12:45 ኢስቲ ኡፋዬቲዳይካ ጾሳይ ኢስታ ኣዛዚዳ ቄሴቲኔ ሌዌቲ ፖላናስ ቤሲዛ ዎጋኔ ጌሾ ዎጋታ ኦꬂዳ ጊሻሳ፤ ጾሳ ኬꬃን ዬጺዛይቲኔ ጾሳ ኬꬃ ናጊዛ ዛቤቲካ ዳዊቲኔ ኢዛ ና ሶሎሞኔይ ካሴ ዎꬂዳ ዎጋ ማላ ኢስታፌ ናጌቲዛ ኦሶ ኦꬂ ፖሊዳ።
NEH 12:46 ካሴ ካዎ ዳዊታፔኔ ኣሳፌ ዎዴፔ ዶሚዲ ዬꬃ ዬጺዛይታሲኔ ጋላታ ዬꬃን ጾሳ ቦንቺዛ ኣሳታ ካሌꬂዛይቲ ዴቴስ።
NEH 12:47 ዜሩባቤሌ ዎዴኒኔ ናሂሚያ ዎዴን ኩሜꬃ ኢስራኤሌ ኣሳይ ጾሳ ኬꬃን ዬጺዛይታሲኔ ናጊዛ ዛቤታስ ጋላስ ጋላስ ኢሜታና ቤሲዛይሳ ኢሜቴስ፤ ሃንኮ ሌዌ ባጋታይሳ ዱማ ኢሜቴስ፤ ሌዌ ባጋቲካ ኣሮኔ ዜሬꬃፌ ጊዲዳ ቄሴታስ ቤሲዛይሳ ኢሜቴስ።
NEH 13:1 ሄ ዎዴ ኣሳይ ዉሪ ሙሴ ማጻፋይ ናባቤቲን ሲዪሼ፥ «ሞኣቤ ኣሳይኔ ኣሞኔ ኣሳይ ጾሳ ኣሳራ ሜርና ጋካናስ ዋላኬቶፌቶ» ጊዛሶ ጋኪ ዴሚዴስ።
NEH 13:2 ሃ ኣዛዞዚ ኢሜቲዳ ጋሶይካ ኢስራኤሌ ኣሳይ ጊብጼ ቢታፌ ኬዚ ቢዛ ዎዴ ሞኣቤ ዴሬ ኣሳይኔ ኣሞኔ ዴሬ ኣሳይ ካꬂኔ ሃꬅ ኢስራኤሌ ኣሳ ዲጊዳ ጊሻሳ፤ ሄሳፌ ቦላራካ ኢስራኤሌ ኣሳ ዶቃና ማላ ባላሜ ጌቴቲዛዴስ ሚሽ ኢሚዳ፤ ጊዶ ኣቲን ጾሳይ ሄ ዶቄꬃዛ ኣንጆን ላሚዴስ።
NEH 13:3 ሄ ዎጋ ቃላዛ ኢስራኤሌ ኣሳይ ሲዪዳ ዎዴ ኣላጋ ጊዲዳ ኣሳ ባ ጊዶፌ ሻኪ ኬሲዳ።
NEH 13:4 ጾሳ ኬꬃ ሚሻታ ዎꬂዛ ኪፊሌታስ ኣላፌ ጊዲዳ ቄሴ ኤልያሼቤስ ዳሮ ላይꬃፌ ዶሚዲ ጾቢያራ ሚኖ ጋይቶቴꬂ ዴስ፤
NEH 13:5 ሄሳፌ ዴንዲዳይሳን ካꬃ ሙጹዋታ፥ ኤጻኔ፥ ጾሳ ኬꬃን ዲዛ ዱማ ዱማ ሚሻታፔ፥ ካꬃፌ፥ ዎይኔ ኡሻፌኔ ዎጋራ ዛይቴፔ ኬሲዲ ሌዌ ባጋታስ፥ ጾሳ ኬꬃን ዬጺዛይታሲኔ ናጊዛ ዛቤታስ ኢሜቲዛ ኣስራታይኔ ቄሴታስ ኢሜቲዛ ሙጹዋታ ዎꬃናስ ኦሴቲዳ ኣሆ ኪፊሌዛ ጾቢያይ ኢዛን ዳና ማላ ኤልያሺቤይ ኢዛስ ኢሚዴስ።
NEH 13:6 ሃይሲ ኡባይ ሃኒሺን ታ ዬሩሳላሜን ዲኬ፤ ጋሶይካ ካዎ ኣርጼኪሲሲ ባቢሎኔን ካዎቲዳ ሄꬑ ታማኔ ናምኣንꬆ ላይꬃን ታኒ ጉዬ ሲማ ባቢሎኔ ዴሬ ባዲስ፤ ጊዶ ኣቲን ጉꬃ ዎዴፔ ጉዬ ካዎዛ ፒቃዴ ኦይቻዲስ፤
NEH 13:7 ኦይቻዳካ ዬሩሳላሜ ሲማዲስ፤ ታ ሄ ጋኪዳ ማላ ኤልያሼቤይ ጾቢያስ ጾሳ ኬꬃ ጊቤ ጊዶን ኢዚ ዳና ማላ ኢዛስ ኢሲ ኪፊሌ ኢሚዳይሳ ሲያዲስ።
NEH 13:8 ሄሳ ጊሻስ ሃንቄታዳ ጾቢያስ ዲዛ ሚሽ ኡባ ኢዚ ጌልꬂዳ ኪፊላፔ ካሬ ኬሳ ኬሳ ኦላዲስ።
NEH 13:9 ኪፊሌቲካ ዎጋይ ጊዛይሳꬆ ጌያና ማላኔ ጾሳ ኬꬃ ሚሻቲ፥ ካꬃ ሙጹዋታቲኔ ኤጻኔቲ ሲሚ ባ ካሴ ዲዛሶ ጌላና ማላ ኣዛዛዲስ።
NEH 13:10 ቃሴ ኣሳይ ጾሳ ኬꬃን ዬጺዛይታሲኔ ሌዌ ባጋታስ ኮሺዛይሳ ኢሞንታ ኣጊዳ ጊሻስ ዬሩሳላሜፔ ጾሳ ኦሳ ኣጊዲ ካሴ ባ ዲዛ ጎሻ ጋዴ ጎዪ ዳናስ ጉዬ ሲሚ ቢዳይሳ ኤራዲስ።
NEH 13:11 ሄሳ ጊሻስ ታኒ ሃላቃታ፥ «ጾሳ ኬꬃ ኦሶ ኣይስ ኣጊዴቲ?» ጋዳ ሃንቄታዲስ፤ ሄሳፌ ጉዬ ሌዌ ባጋታኔ ዬጺዛይታ ጼይጋዳ ካሴ ኢስቲ ጾሳ ኬꬃን ኦꬂዛ ኦሶዛ ሲሚ ኦꬃና ማላ ዛራ ጌልꬃዲስ።
NEH 13:12 ሄሳፌ ጉዬ ኢስራኤሌ ኣሳይ ዉሪ ባ ካꬃፌ፥ ዎይኔ ኡሻፌኔ ዎጋራ ዛይቴፔ ኢስታፌ ኮዬቲዛ ታማፌ ኢሲ ኩሼ ኬሲዲ ጾሳ ኬꬃ ሚሽ ዎꬂዛ ሚንጃ ኬꬅ ኤሆ ዶሚዴስ።
NEH 13:13 ታኒ ቄሴ ሼሌሚያ፥ ዎጋ ኤራንቻ ሳዶቄይኔ ሌዌ ባጋፌ ፓዳያ ሚሽ ዎꬂዛ ሚንጃ ኬꬃስ ኣላፌ ሂስታ ዶራዲስ፤ ማታኒያ ናዛ ና ዛኩሬ ና ሃናኔይ ኢስታ ማዳና ማላ ዎꬃዲስ፤ ሃ ኣሳቲ ዉሪ ባ ኢሻታስ ኮሺዛ ሚሼታ ሻኪ ሻኪ ኢማናስ ኣማኔቲዳይታ።
NEH 13:14 ታ ጎዶ! ኔ ኬꬃይኔ ኔ ኬꬃ ኦሶይ ሱሬ ባና ማላ ታ ኣማኔቴꬃን ኦꬂዳ ሎኦ ኦሶዛ ቆፓዳ ኔ ታስ ኪያቴꬅ ኦꬃ።
NEH 13:15 ሄ ዎዴ ዩሁዳ ዴሬ ኣሳይ ሳምባታ ጋላስ ዎይኔ ኣይፌፔ ዎይኔ ጉምኢሺን ቤያዲስ፤ ቃሴ ካꬅ፥ ዎይኔ ኡሹ፥ ዎይኔ ኣይፌ፥ ባላሴ ኣይፌኔ ሃራ ሚሻታካ ሃሬን ጫኒዲ ዬሩሳላሜ ኤሂሺን ቤያዳ ናምኣንꬆ ሳምባታ ጋላስ ኣይኮካ ዛልኦንታ ማላ ጋዳ ሚንꬃ ዮታዲስ።
NEH 13:16 ዬሩሳላሜን ዲዛ ጺሮሴ ዴሬ ኣሳቲ ሞሌኔ ሃራ ሃራ ዛልኤ ሚሻታ ኤሂዲ ሳምባታ ጋላስ ዬሩሳላሜን ዲዛ ዩሁዳ ዴሬ ኣሳስ ባይዜቴስ፤
NEH 13:17 ሄሳ ጊሻስ ታኒ ኣይሁዳ ካሌꬂዛይታ ሃንቄታዳ «ሃይሳ ኢንቴ ኦꬂዛ ኢታ ኦሶዛ ኡባ ቤኢቴ! ሄኮ ኢንቴ ሳምባታ ቱኒሲሼ ዴታ፤
NEH 13:18 ኑ ጾሳይ ኑ ቦላኔ ሃ ካታማ ቦላ ኤሂዳ ሃንቆይ ካሴ ኢንቴ ኣዋቲ ሃይሳ ማላ ኢታ ኦሶ ኦꬂዳ ጊሻስ ጊዴኔ? ሃኢካ ኢንቴ ሳምባታ ቦንቾንታ ጊሻስ ጾሳ ሃንቆ ኢስራኤሌ ዴራ ቦላ ዴንꬄꬄታ» ጋዲስ።
NEH 13:19 ሄሳፌ ጉዬ ሳምባታይ ጌላናፔ ሲንꬃ ጋላስ ጋዴይ ሌምኢ ሌምኢሺን ዬሩሳላሜ ፔንጌቲ ጎርዴቲዲ ሳምባታይ ኣꬋና ጋካናስ ዶዬቶንታ ማላ ታኒ ኣዛዛዲስ፤ ቃሴ ሳምባታ ጋላስ ኣይኮ ሚሼ ዛልኣና ኤኪ ዮንታ ማላ ታ ኦሳንቻታፔ ኢሶታ ኢሶታ ጊምባ ፔንጌ ናጋና ማላ ዛቤ ዎꬃዲስ።
NEH 13:20 ዱማ ዱማ ሚሻታ ኤሂ ዛልኢዛ ዛልኣንቻቲ ኢሲቶ ዎይኮ ናምኡቶ ማላ ኣርባ ኦማርስ ዬሩሳላሜ ጊምቤስ ካሬ ባጋራ ኣቂዳ፤
NEH 13:21 ታኒካ ኢስታስ፥ «ኢንቴ ማላዶ ዎንታራ ጌላናስ ቆፒዲ ጊምባፌ ካሬ ባጋራ ኣቂዛይሲ ኢንቴና ማዴና፤ ቃሴ ኢንቴ ሄሳ ማላ ኦሶ ናምኣንꬆ ኦꬂዛ ጊዲኮ ታ ኢንቴ ቦላ ታ ዎልቃ ቤሳና» ጋዳ ሚንꬃ ዮታዲስ፤ ሄሳፌ ዶሚዲ ሳምባታ ጋላስ ዩስ ኣጊዳ።
NEH 13:22 ሄሳፌ ጉዬ ሌዌቲ ባንታና ጌሺዲ ሳምባታ ጋላስ ዱማቴꬃን ናጌቲዛይሳ ኤሪሳናስ ጊምባ ፔንጌታ ናጋና ማላ ኢስታ ኣዛዛዲስ። ታ ጾሳዉ! ሃይሳ ኡባ ጊሻስ ታና ቆፓ፤ ቃሴ ኔኒ ኔ ሚኖ ሲቆዛን ታና ማዳና ማላ ታ ኔና ዎሳይስ።
NEH 13:23 ሄ ዎዴ ኣይሁዳ ኣሳፔ ዳሮቲ ኣሽዶዴ፥ ኣሞኔኔ ሞኣቤ ዴሬፔ ማጫሳታ ማቾ ባስ ኤኪዳይሳ ኤራዲስ።
NEH 13:24 ኢስታ ናይታፔ ባጋቲ ኣሽዶዴ ዴሬ ቃላኔ ኢሲ ኢሲ ሃራ ዴሬ ቃላን ሃሳዬቴስ ኣቲን ኣይሁዳ ዴሬ ቃላን ሃሳያና ዳንዳይቤቴና።
NEH 13:25 ታኒ ሄ ኣሳታ ሃንቃዳ ቃንጋዲስ፤ ዋꬋዲሲኔ ኢስታ ሁኤ ቢናናካ ቡጫዲስ፤ ሄሳፌ ጉዬ ኢስታ ጊዲን ኢስታ ናይቲ ኣላጋ ኣሳታራ ኤኬቶንታ ማላኔ ጌሌቶንታ ማላ ጾሳ ሱንꬃን ጫቄꬃዲስ።
NEH 13:26 ቃሴ ኢስታስ፥ «ኢስራኤሌ ካዎ ሶሎሞኔይ ናጋራ ኦꬂዳይ ሃይሳ ማላ ኣላጋ ኣሳታፔ ማቾ ኤኮን ጊዴኔ? ዳሮ ካዎቴꬃ ጊዶን ኢዛ ማላ ካዎይ ቤቲቤና፤ ጾሳይ ኢዛ ዶሲዳ ጊሻስ ኢስራኤሌ ዴሬ ቦላ ካዎꬂዴስ፤ ጊዶ ኣቲን ኣላጋ ዴሬ ማጫሳቲ ኢዚ ናጋራ ኦꬃና ማላ ካሌꬂዳ።
NEH 13:27 ሂስቲን ኢንቴ ኣላጋ ካዎቴꬃ ማጫሳታ ኤኮን ሃይሳ ማላ ጊታ ሞሮ ኦꬆይሳኔ ኢንቴ ኑ ጎዳስካ ኣማኔቶንታ ኣጎይሳ ኑ ሲያና ቤሲዜ?» ጋዲስ።
NEH 13:28 ቄሴ ኤልያሼቤ ናይታፔ ኢሶይ ዮዳሄ ጌቴቲዛይሲ ቤቲ-ሆሮኔ ካታማ ኣሲ ሳንባላጼ ናዮ ባስ ማቾ ኤኪዴስ፤ ሄሳ ጊሻስ ዮዳሄይ ዬሩሳላሜ ዬዲ ባና ማላ ጎዳዲስ።
NEH 13:29 «ታ ጾሳዉ! ሃይቲ ቄሴቴꬃ ዎጋ፥ ቄሴታራኔ ሌዌ ባጋታራ ኔ ካሴ ዎꬂዳ ጫቆ ቃላ ኢስቲ ዎስቲ ቱኒሲዳኮ ሃይሳ ጾሶ ኔ ጼላ!» ጋ ዎሳይስ።
NEH 13:30 ኢስቲ ኣላጋ ዴሬ ቱናቴꬃፌ ባና ጌሻና ማላ ታ ኦꬃዲስ፥ ቄሴቲኔ ሌዌ ባጋቲ ባ ኦሶ ኦሶ ኤሪ ኦꬃና ማላ ዎጋ ጊጊሳዲስ።
NEH 13:31 ቃሴ ያርሾ ጹጋናስ ኤሶ ሚꬅ ኮሺዛ ዎዴን ኤሃና ማላ ጊጊሳዲስ፤ ኣሳይካ ባ ሺሺዛ ካꬃፌኔ ኣይፊዛ ሚꬃ ኣይፌፔ ኮይሮ ጋኪዳ ጼራ ዎስቲ ሺሻናስ ቤሲዛኮ ማራ ኦይꬃዲስ፤ ታ ጾሳዉ! ኔ ሎኤቴꬃን ሃይሳ ታ ኦꬂዳ ሎኦ ኦሶዛ ጊሻስ ታና ቆፓ።
EST 1:1 ካዎ ኣርጼኪሲሲ ሂንዴ ቢታፌ ቶጵያ ቢታ ጋካናስ ዲዛ 127 ዴሬታ ሃሪዛ ዎዴ ሃይሳፌ ካሊዛይሲ ሃኒዴስ፤
EST 1:2 ሄ ዎዴ ካዎ ኣርጼኪሲሲ ሱሳ ጊምቤን ዲዛ ካዎቴꬃ ኣራታ ቦላ ኡቲ ሃሪዴስ።
EST 1:3 ኢዚ ካዎቲዳ ሄꬓንꬆ ላይꬃን፥ ባ ሞኮኔታሲኔ ሹሜታ ኡባስ ጊታ ጊቢራ ጊግሲዴስ። ሄ ጊቢራሶን ሜዶኔኔ ፓሪሴ ዴሬ ኦላ ጋዳዋቲ፥ ዳናቲኔ ኣዉራጃ ሞኮኔቲ ቤቲዳ።
EST 1:4 ኢስታስ ካዎዚ ባ ካዎቴꬃ ዱሬቴꬃ 180 ጋላስ ኩሜꬅ ቤሲዴስ።
EST 1:5 ሄ ጋላሳታፔ ጉዬ ካዎዚ ሱሳ ካታማን ጉꬃታፔ ቢዲ ጊታ ኣሳታ ኡባስ፥ ባ ካዎቴꬃ ኬꬃን፥ ዩዪ ኣꬋናስ ኣታኪልቴይ ዲዛ ዛጎዛን 7 ጋላስ ኩሜꬅ ጊቢራ ኦꬂዴስ።
EST 1:6 ሄ ዛጎዛን ቦꬂኔ ሳሎ ሚሴቲዛ ላይኖፔ ዳዴቲዳ ማጋላሻቲ ዴቴስ። ኢስቲካ ቢራ ቃላባቴን፥ ቦꬃ ላይኖኒኔ ኦቻ ቴራ ሚሳቲዛ ዎዶሬታን ዳልዳች ቱሳታ ቦላ ካቄቲ ኡቲዳ። ቦꬂኔ ዞኦ ቃላሜን ዋንጫርካቲ ኡቲዳ ዳልዳቻፌ፥ ዙላ ሚሳቲዛ ቃላሜታፔኔ ሃራ ቦንቾ ሹቻታፔ ኦሴቲዳ ዉይጌን ዎርቃፌኔ ቢራፔ ኦሴቲዳ ዲንኬ ኣልጋቲ ዴቴስ።
EST 1:7 ዎይኔ ኡሻዚካ ኢሶይ ኢሳፌ ዱማቲዛ ዎርቃ ዋንጫን ሺቄስ። ካዎዛ ኪያቴꬃፌ ዴንዲዳይሳን ካዎቴꬃ ኬꬃን ዎይኔ ኡሻዚ ጊዲ ፓላሂዴስ።
EST 1:8 ካዎዚ ኢሶይ ኢሶይ ኮዪዳ ማላ ኢማና ማላ ዎይኔ ኡሻ ዱቂዛይታ ኡባ ኣዛዚዴስ። ካዎዚ ኣዛዚዳ ማላ ኢሶይ ኢሶይ ባ ዳንዳይዳ ኬና ኡያና ማላ ኢሜቲዴስ።
EST 1:9 ጎዳቴያ ኣስጺና ካዎ ኣርጼኪሲሴ ካዎቴꬃ ኬꬃን ሄሳꬆካ ማጫሳታስ ጊቢራ ጊጊሳዱስ።
EST 1:10 ጊቢራዚ ዶሜቲዳ ላፑንꬃ ጋላስ፥ ካዎ ኣርጼኪሲሲ ዎይኔ ኡሻን ኡፋዬቲዳ ጊሻስ ኢዛስ ኦꬂዛ ላፑን ጉንዱላታ ማሁማኔ፥ ቢዛቴ፥ ሃርቦኔ፥ ቢጊታ፥ ኣባጊታ፥ ዜታሬኔ ካርካሴ ኣዛዚዴስ።
EST 1:11 ሄሲካ ጎዳቴያ ኣስጺና ኡፋይሲዛሮኔ ማላ ሎኦ ጊዲዳ ጊሻስ ዴሬይኔ ጊታ ሞኮኔቲ ኢዞ ቤኣና ማላ ኢዛ ካላቻ ባ ሁኤን ዎꬃዳ ካዎዛ ሲንꬅ ያና ማላ ኦꬂዳ።
EST 1:12 ጊዶ ኣቲን ካዎዛ ኦሳንቻቲ ካዎዚ ኣዛዚዳ ማላ ኢዚስ ዮቲን ጎዳቴያ ኣስጺና ባና ኮያቤኩ። ሂስቲን ካዎዚ ኬሂ ሃንቄቲዴስ፤ ዳሮ ዪሎቲዴስ።
EST 1:13 ሱሬኔ ቱማ ፒርዳ ፒርዳናስ ኤራንቻታፔ ዞሬ ኦይሾይ ካዎዛስ ሎሴ ጊዲዳ ጊሻስ ዎዴ ሃኖቴꬅ ኤሪዛ ኤራንቻታራ ዞሬቲዴስ።
EST 1:14 ሄይቲካ ካርሻና፥ ሻታሬ፥ ኣዲማቴ፥ ታርሴሴ፥ ሜሬሴ፥ ማርሴናኔ ማሙካ ጌቴቲዛ ፓሪሴኒኔ ሜዶኔን ኤሬቲዳ ጊታ ኣሳቲ ካዎቴꬃ ጋርሳን ꬎቃሶሆን ዲዛይታ።
EST 1:15 ካዎዚካ ኢስታስ፥ «ታኒ፥ ካዎ ኣርጼኪሲሲ፥ ታ ኦሳንቻታ ባጋራ ታ ኪቲን ኢዛ ታ ኣዛዞ ፖሎንታ ኣጊዳ ጊሻስ ዎጋይ ጊዛ ማላ ጎዳቴዮ ኣስጺኒ ቦላ ኣይ ኦꬂኖ?» ጊ ኦይቺዴስ።
EST 1:16 ሄሳፌ ጉዬ ማሙካይ ካዎዛሲኔ ሞኮኔታስ፥ «ጎዳቴያ ኣስጺና ካዎዛ ጻላ ጊዶንታ ሞኮኔታ ኡባኔ ካዎ ኣርጼኪሲሴ ካዎቴꬃ ጋርሳን ዲዛ ዴራ ኡባ ቆሃዱስ።
EST 1:17 ሃይሲ ጎዳቴያ ኦꬂዳይሲ ሃራታ ሃይꬃን ሴቴቲኮ ኢስቲ ባ ኣዚናታ ካꬋና፤ ‹ካዎ ኣርጼኪሲሲ ጎዳቴያ ኣስጺና ኢዛኮ ያና ማላ ጼይጊን ዮንታ ኢጻዱስ› ጋና።
EST 1:18 ሃኖ ሃቻ ጋላሳይን ጎዳቴይ ሃኖ ሲዪዳ ፓሪሴታኔ ሜዶኔ ዴሬ ሞኮኔታ ማቼቲ ኡባይ ካዎዛስ ሞኮኔታ ኡባስ ሄሳꬆ ዛራና። ኢዚ ሄሳꬆ ሃንኮ ፓጬይ ባይንዳ ጋላሲኔ ኦማርስ ኦሺ ሜꬌታና።
EST 1:19 «ሃይሲ ዮኦዚ ካዎዛ ኡፋይሲዛ ጊዲኮ ሃይሳፌ ጉዬ ኣስጺና ካዎ ኣርጼኪሲሴኮ ሙሌካ ጌሎንታ ማላ ካዎ ማታፔ ኣዋጃይ ኬዞ፤ ሄሲካ ሻሬቶንታ ፓሪሴኔ ሜዶኔ ዎጋ ማላ ጻፌቶ፤ ሄሳꬆካ ካዎዚ ጎዳቴቴꬃ ቦንቾዛ ኢዚፔ ኤኪዲ ኢዚፔ ሎኢዛ ሃራ ማጫሳስ ኢሞ።
EST 1:20 ሄሳፌ ጉዬ ካዎዛ ኣዋጃይ ኢዚ ሃሪዛ ኩሜꬃ ዴራ ቦላ ዮቴቲኮ ጉꬃታፔ ቢዲ ጊታታ ጋካናስ ዲዛ ማጫሳይ ኡባይ ባ ኣዚና ቦንቻና» ጊ ዛሪዴስ።
EST 1:21 ካዎዚኔ ሞኮኔቲ ኡባይ ሄ ዞሬዛን ኡፋዬቲዳ፤ ካዎዚካ ማሙካይ ሺሺዳ ቆፋዛ ፖሊዴስ።
EST 1:22 ኡባይካ ባሶ ኣስ ኣይሳና ማላ ኪታ ዬዲዴስ፤ ሄ ኪታዚካ ባ ዴሬ ቃላ ማላኔ ጻፊዛ ዎጋ ማላ ጻፌቲዲ ዴሬ ኡባስ ጋኪዴስ።
EST 2:1 ሄሳፌ ጉዬ ካዎ ኣርጼኪሲሲ ኢዛ ሃንቆይ ኢርጺዳፔ ጉዬ ኣስጺና ኦꬂዳይሳኔ ኢዚካ ኢዚ ቦላ ኬሲዳ ኣዋጃ ቆፒዴስ።
EST 2:2 ሄ ዎዴ ካዎዛ ኣቻን ዶሴቲዳ ኦሳንቻቲ፥ «ካዎዛስ ሎኦ ጌላኦታ ኮዪቴ።
EST 2:3 ሄይታ ሎኦ ጌላኦታ ኡባታ ሱሳ ጊምቤን ዲዛ ማጫሳታ ዱሳሶ ኤሃና ማላ፥ ካዎዚ ባ ሃሪዛ ዴሬታ ኡባን ዳናታ ሹሞ፤ ኢስቲካ ማጫ ኡባታስ ኣላፌ ጊዲዳ ካዎዛ ጉንዱላ ሄጌ ኣላፌቴꬃ ጋርሳን ዴቶ፤ ኢስታ ማላይ ኢቶንታ ማላ ናጌቶ።
EST 2:4 ሄሳፌ ጉዬ ካዎዛ ኡፋይሲዛ ጌላኦያ ኣስጺኒ ጊሻስ ጎዳቶ ጊዱ» ጊዳ። ሄ ዞሬዚ ካዎዛ ኡፋይሲዴስ፤ ኢስቲ ጊዳ ማላካ ኦꬂዴስ።
EST 2:5 ሄ ዎዴ ቢኒያሜ ቆሞፌ ቂሴ ና፥ ሺምኤ ና፥ ያኢሬ ና ማርዲኪዮሳ ጌቴቲዛ ኣይሁዳ ዴሬ ኣሳፔ ኢሳዴይ ሱሳ ጊምቤን ዴስ።
EST 2:6 ኢዚካ ባቢሎኔ ካዎ ናቡካዳናጾሬይ ዲኢ ኤፊዳይታፔ ዩሁዳ ካዎ ኢኮኒያኔራ ዬሩሳላሜፔ ዲኤቲ ቢዳ ኣሳታፔ ኢሳ።
EST 2:7 ማርዲኪዮሳ ኣዋ ኢሻስ ሃዴሶ ጌቴቲዛ ቢያ ዳዉስ፤ ኢዚስ ኣዋይኔ ኣያ ባይንዳ ጊሻስ ኢዞ ዲቺዳይ ኢዛ። ሃና ኣስቴሮ ጌቴቲዛራ ኣሳቴꬃን ጊዲን ሜꬋን ኬሃ ሎኦ። ኢዚ ኣዋይኔ ኢዚ ኣያ ሃይቂዳፔ ጉዬ ማርዲኪዮሲ ኢዞ ባ ና ማላ ዲቺዴስ።
EST 2:8 ካዎዛ ኣዛዞይኔ ኣዋጃይ ኬዚዳ ዎዴ ዳሮ ጌላኦታ ኤፊዲ ሱሳ ካታማን ናጊዛ ሄጌስ ኢሚዳ፤ ኣስቴሮካ ካዎ ኬꬅ ኤፊዲ ማጫሳታ ናጊዛ ሄጌስ ሃዳራ ኢሜታዱስ።
EST 2:9 ናያ ኢዛ ኡፋይሳዱስ፤ ኢዚካ ኢዞ ዶሲዴስ፤ ኢዚካ ኢዚስ ማላ ሎኤꬂዛ ዱማ ቆሞ ካꬅ ሄራካ ኢዚስ ኢሚዴስ። ካዎቴꬃ ኬꬃፌ ዶሬቲዳ ላፑን ኣይሌታ ኢዚስ ጊግሲዲ ኢዞኔ ኢዚ ኣይሌታ ዳሮ ኢዛን ማጫሳታ ናጊዛ ዶሬቲዳሶ ኤፊዴስ።
EST 2:10 ማርዲኪዮሲ ኢዚስ ካሴቲዲ ዮቲዳ ማላ ኣስቴራ ኣይሁዳ ኣስ ጊዲዳይሳ ኦሲካ ዮታቤኩ።
EST 2:11 ቃሴካ ማርዲኪዮሲ ኣስቴሪ ሎኤቴꬃኔ ኢዚስ ጊዲዛይሳ ኤራና ጊዲ፥ ማጫሳ ኬꬃ ሲንꬃራ ጋላሳን ጋላሳን ያኔ ሃ ሄሜቴስ።
EST 2:12 ጌላኦቲ ካዎዛኮ ጌላናፔ ካሴቲዲ ኢሲ ላይꬅ ኩሜꬅ ꬊኬቴቴስ፤ ላይꬃፌ ኮይሮ ኡሱፑን ኣጊና ኩሜꬅ ኢስታ ቦላይ ሊቂ ሎኣና ማላ ካርቤኔ ቲዬቲዛ ዛይቴ ጎኤቴቴስ፤ ካሊዛ ኡሱፑን ኣጊናታን ዱማ ዱማ ሺቶታኔ ዱማ ዱማ ሲንꬅ ቲዪዛ ቃላሜታ ጎኤቴቴስ።
EST 2:13 ሄሳፌ ጉዬ ኢሲ ጌላኦያ ካዎዛኮ ጌሊዛ ዎዴይ ጋኪኮ፥ ባ ኮዪዳ ኣይ ሚሺካ ኤካዳ ማጫሳቲ ናጌቲ ዲዛ ኬꬃፌ ኬዛዳ ካዎዛኮ ጌላዉስ።
EST 2:14 ኦማርስ ጌላዳ ካዎዛራ ኣቂዳፔ ዎንቴꬃ ጋላስ ሃራሶን ማጫሳቲ ናጌቲ ዲዛሶ ኤፌቴስ። ሄን ካዎዛ ላጌꬆታስ ኣላፌ ጊዲዳ ካዎዛ ኬꬃን ኦꬂዛ ጉንዱላ ሻሺጋዜ ኣዋቴꬃ ጋርሳን ናጌታዉስ፤ ካዎዚ ኢዞ ዶሲዲ ኢዚ ሱንꬃን ጼይጎንታ ኣጊኮ ዛራ ካዎዛኮ ጌሉኩ።
EST 2:15 ማርዲኪዮሲ ባ ና ማላ ዲቺዳ ኢዛስ ኣዋ ኢሻ ኣቢኤሌ ቢያ ኣስቴራ ካዎዛኮ ጌሊዛ ታራይ ኢዞ ጋኪን ማጫሳቲ ናጌቲ ዲዛ ኬꬃ ኣላፌ ሄጌይ ኢዚስ ዮቲዳይሳፌ ኣቲን ሃራ ኣይኮካ ኦይቻቤኩ። ኣስቴራ ኢዞ ቤኢዛ ኣስ ኡባ ሲንꬃን ኣዮታ ቤታዱስ።
EST 2:16 ኣርጼኪሲሲ ካዎቲዳ ላፑንꬃ ላይꬃን፥ ቴቤቴ ጌቴቲዛ ታማንꬃ ኣጊናን ኣስቴሮ ካዎ ኬꬅ ኤፊዳ።
EST 2:17 ሄ ዎዴ ካዎዚ ሃራ ማጫሳ ኡባፌ ኣስቴሮ ኣꬂ ዶሲዴስ፤ ሃራ ጌላኦታ ኡባፌ ቦላራ ኢዛ ካዎ ማታን ኣዮታዱሲኔ ዶሴታዱስ። ሄሳ ጊሻስ ኢዚ ሁኤን ጎዳቴቴꬃ ካላቻ ጎጺዴስ። ኣስጺኒ ጎዳቴቴꬃ ኢዚስ ኢሚዴስ።
EST 2:18 ሄሳፌ ጉዬ ካዎዚ ኣስቴሪ ቦንቾ ጊሻስ ባ ሞኮኔታሲኔ ባ ሹሜታ ኡባስ ጊታ ጊቢራ ጊግሲዴስ። ሄ ባኣሌዚ ኢዚ ኣይሲዛሶ ኡባን ቦንቼታና ማላ ኣዋጂሲዴስ። ኢሞታካ ባ ኪያቴꬃ ማላ ኢስታስ ኢሚዴስ።
EST 2:19 ጌላኦቲ ናምኣንꬆ ሺቄቲ ኡቲዳሼ ማርዲኪዮሲ ካዎ ኬꬃ ፔንጌ ናጊሼ ኡቲዴስ።
EST 2:20 ኣስቴራ ማርዲኪዮሲ ኢዚስ ዮቲዳ ማላ ባ ቆሞኔ ባ ዴሬዛ ቆታዱስ፤ ኢዛ ሄሳ ኦꬂዳ ጋሶይካ ማርዲኪዮሲ ካሴ ኢዞ ዲቺዛ ዎዴ ኢዛ ኦꬂዛ ማላ ሃኢካ ኢዛ ዞሬ ኤካሼ ዲዛ ጊሻሳ።
EST 2:21 ማርዲኪዮሲ ካዎ ኬꬃ ፔንጌ ናጊዛ ኦላንቻታ ሃላቃ ናምኣቲ ጋባታይኔ ቴሬሻይ ካዎዛ ቦላ ሃንቄቲዲ ካዎዛ ዎꬋናስ ዱላቲዳ።
EST 2:22 ማርዲኪዮሲ ኢስቲ ሴሪዳይሳ ጋኪ ኤሪዲ ጎዳቶ ኣስቴሪስ ዮቲዴስ፤ ኢዛካ ማርዲኪዮሳፔ ሲዪዳይሳ ካዎዛስ ቆንጪሳ ዮታዱስ።
EST 2:23 ዮኦዛ ፒልጊሺን ቱሙ ጊዲ ቤቲዴስ፤ ሄ ናምኡ ሹሜቲ ካቄቲ ሃይቃና ማላ ኢስታ ቦላ ፒርዴቲዴስ፤ ሄሲ ኡባይ ካዎዛ ሲንꬃን ታሪኬ ማጻፋን ጻፌቲዴስ።
EST 3:1 ሄሳፌ ጉዬ ካዎ ኣርጼኪሲሲ ኣጋጌ ዴሬ ኣስ ሃማዳቴ ና ሃማ ꬎቁ ꬎቁ ሂስቲዲ ሃራ ሹሜታፔ ቦላራ ኢዛስ ማታ ኢሚዲ ቦንቺዴስ።
EST 3:2 ኣሳይ ኢዛ ቦንቻና ማላ ካዎይ ኣዛዚ ዎꬂዳ ጊሻስ ካዎ ኬꬃ ፔንጌን ኦꬂዛ ሹሜቲ ኡባይ ሃማስ ጉልባቲዲ ኢዛስ ቦንቾ ሳሮካ ኢሜቴስ። ጊዶ ኣቲን ማርዲኪዮሲ ኢዛስ ጉፋኒ ጎይኒቤናኔ ቦንቾ ሳሮካ ኢሚቤና።
EST 3:3 ሄሳ ጊሻስ ካዎ ኬꬃ ፔንጌን ኦꬂዛ ካዎ ኦሳንቻቲ ማርዲኪዮሳ፥ «ካዎ ኣዛዞ ኣይስ ሜንꬃይ?» ጊዲ ኢዛ ኦይቺዳ።
EST 3:4 ሄሳካ ጋላስ ጋላስ ኢዛስ ዮቲሼ ታኪዳ፤ ጊዶ ኣቲን ኢዚ ኢስቲ ዮቲዛይሳ ኤካናስ ኮዪቤና። ኢዚ ኣይሁዳ ኣስ ጊዲዳይሳ ኢስታስ ዮቲዳ ጊሻስ፥ «ማርዲኪዮሳ ሃኖይ ኣይዴ ጋካናስ ሄሳꬆ ሃናናኮ ቤኣና» ጊዲ ሄሳ ሃማስ ዮቲዳ።
EST 3:5 ማርዲኪዮሲ ኢዛስ ጉልባቲ ጎይኖንታይሳኔ ኢዛ ቦንቾንታይሳ ቤኢዲ ኬሂፔ ሃንቄቲዴስ።
EST 3:6 ሃራፔካ ማርዲኪዮሲ ኦናንታ ባጋኮኔ ሻኪ ኤሪዳፔ ጉዬ ማርዲኪዮሳ ጻላ ዎꬎይ ቄሪ ሚሻ ማላ ቆዲዴስ። ሄሳ ጊሻስ ሃማይ ኣርጼኪሲሴ ካዎቴꬃ ጋርሳን ዲዛ ማርዲኪዮሳ ባጋ ጊዲዳ ኣይሁዳታ ኡባ ꬋይሳና ኦጌ ኮዪዴስ።
EST 3:7 ካዎ ኣርጼኪሲሲ ካዎቲዳ ታማኔ ናምኣንꬆ ላይꬃን፥ ኒሳኔ ጌቴቲዛ ኮይሮ ኣጊናን፥ ኣይሁዳታ ዎꬋና ኣጊናኔ ጋላሳ ኤራና ማላ፥ ፑሪሜ ጌቴቲዛ ሳማ ሃማይ ዲዛሶን ዬጊዳ። ሳማዚካ ኣዳሬ ጌቴቲዛ ታማኔ ናምኣንꬆ ኣጊናን ዬጌቲዴስ።
EST 3:8 ሄሳፌ ጉዬ ሃማይ ካዎ ኣርጼኪሲሴስ፥ «ኔ ካዎቴꬃ ጋርሳን ዲዛ ዴሬ ኡባን ላሌቲ ጋኪዳ ኢሲ ዴሬይ ዴስ፤ ሄ ዴራሲካ ሃራ ዴሬታ ኡባፌ ዱማቲዛ ሎሴይ ዴስ፤ ካዎ ዎጋስካ ኣዛዜቴቴና፤ ሄሳ ጊሻስ ሃ ዴሬዛ ጮኡ ጊ ቤሶይ ካዎዛስ ኪዬና።
EST 3:9 ሃይሲ ዮኦይ ካዎዛ ኡፋይሲዛ ጊዲኮ ኢስታ ꬋይሳና ኣዋጃይ ኬዞ፤ ታኒካ ሃይሳ ሃ ኦሶዛ ኦꬃና ኣሳታስ 340,000 ኪሎ ሜዛኒዛ ቢራ ካዎ ሚንጃ ኬꬃን ጌልꬃና» ጊዴስ።
EST 3:10 ሄሳ ጊሻስ ካዎዚ ባ ሚዲጋ ማታሜዛ ቢራꬌፌ ኬሲዲ ኣይሁዳታስ ሞርኬ ጊዲዳ ኣጋጌ ዴሬ ኣስ ሃማዳቴ ና ሃማስ ኢሚዴስ።
EST 3:11 ካዎዚ ሃማ፥ «ኔ ኢማና ጊዳ ሚሻ ኔ ኣቻን ኦይካ፤ ዴራካ ኔ ዶሲዳ ማላ ኦꬃ» ጊዴስ።
EST 3:12 ሂስቲን ኮይሮ ኣጊናን፥ ታማኔ ሄꬓንꬆ ጋላሳን ሃማይ ካዎ ጻፌታ ኡባ ጼይጊዴስ። ኢስቲካ ሃማ ኣዛዞዛ ኡባ ኣዉራጃን ኣዉራጃን ጻፌቲዛ ፒዳሌኒኔ ዴራ ዴራ ቃላ ማላ ካዎዛ ሹሜታስ ዱማ ዱማ ኣዉራጃ ኣይሲዛይታሲኔ ዱማ ዱማ ዴሬታ ኣይሲዛ ሞኮኔታስ ጻፊዳ። ሃይሲ ካዎ ኣርጼኪሲሴ ሱንꬃን ጻፌቲዲ ኢዛ ማታሜን ሾጬቲዴስ።
EST 3:13 ኣዳሬ ጌቴቲዛ ታማኔ ናምኣንꬆ ኣጊናን፥ ታማኔ ሄꬓንꬆ ጋላስ ናቴꬅ፥ ጪማ፥ ማጫኔ ዪꬋ ሻኮንታ ኩሜꬃ ኣይሁዳቲ ሄ ጋላስ ꬋያና ማላ፥ ሃይቃና ማላኔ ዲፒ ጋና ማላ፥ ኢስታ ኣቆታይካ ቦንቄታና ማላ፥ ካዎቴꬃ ጋርሳን ዲዛ ኣዉራጃታ ኡባ ጋካና ማላ ቃስታኔታ ኩሼን ኢሜቲዴስ።
EST 3:14 ኡባ ኣዉራጃን ዲዛ ዴራስ ኤሬታና ማላ፥ ኢስቲካ ሄ ጋላሳስ ጊጌቲ ኡታና ማላ፥ ኮይሮ ኣዋጃዛፔ ዱቄቲዲ ዎጋይ ኬዛና ማላኔ ኩሜꬃ ኣዉራጃ ጋካና ማላ ኪቴቲዴስ።
EST 3:15 ቃስታኔቲ ካዎዛ ኣዛዞን ኤሶቲ ኬዚዳ፤ ኣዋጃዚካ ሱሳ ጊምቤን ኣዋጄቲዴስ፤ ካዎዚኔ ሃማይ ኡያናስ ኡቲዳ፤ ጊዶ ኣቲን ሱሳ ካታማያ ሺሮታዱስ።
EST 4:1 ማርዲኪዮሲ ሃ ሃኒዳ ኡባ ኤሪዳፔ ጉዬ ባ ማይኦ ዳኪዴስ፤ ማቃ ማይኢዲ፥ ባ ሁኤ ቦላ ቢዲንꬅ ላሊዲ፥ ባ ቃላ ꬎቁ ሂስቲ ጫሞ ዬሆ ዬኪሼ ካታማይ ጊዶ ጌሊዴስ።
EST 4:2 ማቃ ማይኢዳ ኣሲ ካዎቴꬃ ኬꬅ ጌላናስ ዳንዳዮንታ ጊሻስ ኢዛስ ፔንጌ ጋካናስ ቢዴስ።
EST 4:3 ካዎዛ ኣዋጃይኔ ኢዛ ኣዛዞይ ጋኪዳ ኣዉራጃታ ኡባን ኣይሁዳታ ጋርሳን ጊታ ጬጬይ ሜꬌቲዴስ፤ ሂስቲን ጾሚዳ፤ ዬኪዳ፤ ዋሲዳ፤ ዳሮቲካ ማቃ ማይኢዲ ቢዲንꬃ ቦላ ኢቺዳ።
EST 4:4 ጎዳቶ ኣስቴሪ ዳንጋጺሬቲኔ ኢዞ ናጊዛ ጉንዱላቲ ዪዲ ማርዲኪዮሳ ጊሻስ ኢዚስ ዮቲን ኢዛ ኬሃ ጬጫዱስ፤ ሂስታዳ ማቃ ቆꬌ ኢዚ ማይኣና ማይኦ ዬዳዱስ፤ ጊዶ ኣቲን ኢዚ ኤኪቤና።
EST 4:5 ሄሳፌ ጉዬ ኣስቴራ ኢዚስ ኦꬃና ማላ ካዎይ ዎꬂዳ ጉንዱላታፔ ሃታካ ጼይጋዳ ማርዲኪዮሳ ኣይ ሜቶይ ጋኪዳኮኔ ኣይስ ሄሳꬆ ኢዚ ሃኒዛኮ ሻኪ ኤራና ማላ ኪታዱስ።
EST 4:6 ሂስቲን ሃታካይ ካዎ ኬꬅ ጌሊዛ ፔንጌን ዲዛ ካታማይ ዛጎ ማርዲኪዮሳኮ ዪዴስ።
EST 4:7 ማርዲኪዮሲ ባ ቦላ ጋኪዳይሳ ኡባ ቆንጪሲ ኢዛስ ዮቲዴስ። ቃሴካ ሃማይ ኣይሁዳታ ꬋይሳናስ ካዎ ሚንጃ ኬꬅ ጌልꬃናስ ጌፒዳ ሚሻ ሊኬካ ኣሾንታ ጌሺ ዮቲዴስ።
EST 4:8 ኣይሁዳታ ꬋይሳናስ ሱሳ ጊምቤን ኬዚዳ ኣዋጃፔ ዱቄቲዳይሳ ኣስቴሮ ቤሳናሲኔ ኢዚስ ፓቲ ዮታና ማላ ኢሚዴስ። ኢዛካ ካዎዛኮ ጌላዳ ባ ዴራ ጊሻስ ማሮቴꬅ ኦይቻና ማላኔ ጋናታና ማላ፥ ኢዚ ሚንꬂ ኢዚስ ዮታና ማላ ኢዛ ቆፍሲዴስ።
EST 4:9 ሃታካይ ሲሚ ዪዲ ማርዲኪዮሲ ኢዛስ ዮቲዳይሳ ኡባ ኣስቴሪስ ዮቲዴስ።
EST 4:10 ኢዛካ ሃታካይ ማርዲኪዮሳስ፥
EST 4:11 «ካዎዛ ኣይሌቲኔ ኢዛ ኣዉራጃን ዲዛ ኣሳይ ኡባይ ማጫ ጊዲን፥ ኣቱማ ጊዲን፥ ኦኒካ ካዎዚ ጼይጎንታ ዲሺን ካዎዚ ዲዛሶ ጌሊዛዴስ ካዎዛፔ ኢሲ ዎጋይ ዲዛይሳ ኤሬስ፤ ሄ ዎጋዛካ ሜንꬂዳዴይ ሃይቄስ። ኣሲ ሄሳ ማላ ሃይቆፔ ኣታና ዳንዳይዛይ ካዎዚ ዎርቃ ጉፌዛ ዴንꬂ ቤሲሺና። ታኒ ካዎዛኮ ጌላናስ ጼይጌቶሶፌ ሃች ጋካናስ ሄꬑ ታሙ ጋላሳፌ ኣꬊዴስ» ጊ ዮታና ማላ ኢዛስ ዮታዱስ።
EST 4:12 ኣስቴሪ ኪታይ ማርዲኪዮሳ ጋኪን፥
EST 4:13 ኢዚ ኢዚስ፥ «ኔኒ ካዎ ኬꬃን ዲዛ ጊሻስ ሃንኮ ኣይሁዳ ኣሳይ ꬋይሺን ኔ ጻላ ኣታና ኔስ ሚሳቶፖ፤
EST 4:14 ኔኒ ሃይሳ ማላ ዎዴን ጮኡ ጊኮ ኣይሁዳታስ ማዶይኔ ኣሻናይ ሃራሶፔ ያና። ኔኒኔ ኔ ኣዋ ኬꬃ ኣሳይ ጊዲኮ ꬋያና፤ ቃሴካ ኔኒ ጎዳቶ ጊዲዳይ ሃይሳ ማላ ዎዴሳኮኔ ኦኔ ኤሪዛይ?» ጊዛ ዛሮ ዬዲዴስ።
EST 4:15 ሄሳፌ ጉዬ ኣስቴራ ማርዲኪዮሳስ፥
EST 4:16 «ባዳ ሱሳን ዲዛ ኣይሁዳ ኣሳ ኡባ ኢሲሶ ሺሻ። ሂስቲዲ ታስ ጾሚቴ፤ ሄꬑ ጋላሲኔ ሄꬑ ኦማርስ ጋካናስ ሞፒቴኔ ኡዮፒቴ። ታኒኔ ታ ዳንጋጺሬቲ ሄሳꬆ ጾማና፤ ሄሲ ፖሌቲዳፔ ጉዬ ሃኖዚ ዎጋፔ ካሬራ ጊዲኮካ ታኒ ካዎዛኮ ጌላና፤ ታኒ ሃይቂኮካ ሃይቃና» ጊዛ ዛሮ ዬዳዱስ።
EST 4:17 ሂስቲን ማርዲኪዮሲ ሲሚ ቢዲ ኣስቴራ ኣዛዚዳ ኡባ ፖሊዴስ።
EST 5:1 ሄꬓንꬆ ጋላስ ኣስቴራ ባ ቦንቾ ማይኦዛ ማይኣዳ ካዎዛ ኣራታስ ሲንꬃ ባጋራ ዲዛ ካዎቴꬃ ኬꬃስ ጊዶ ዳባባን ጌላ ኤቃዱስ። ካዎዚ ጌዴ ኬꬃ ጌሊዛሶ ጊናራ ባ ኣራታ ቦላ ኡቲ ዴስ።
EST 5:2 ጎዳቴያ ኣስቴራ ዳባባን ኤቂዳሮ ካዎዚ ቤኢዲ ኡፋዬቲዴስ። ባ ኩሼን ኦይኪዳ ዎርቃ ጉፌዛ ኢዚስ ዴንꬂዴስ፤ ኣስቴራካ ሺቃዳ ጉፌዛ ጼራ ቦቻዱስ።
EST 5:3 ሄሳፌ ጉዬ ካዎዚ ኢዞ፥ «ጎዳቶ ኣስቴሬ፥ ኣይስ ያዲ? ቃሴ ታ ኔስ ኣይ ኦꬃና ማላ ኮያይ? ታ ካዎቴꬃፌ ባጋ ጊዲኮካ ታ ኔስ ኢማና» ጊዴስ።
EST 5:4 ኣስቴራ ዛራዳ፥ «ካዎዞ! ኔና ኡፋይሲዛይሳ ጊዲኮ፥ ታኒ ኔስ ጊግሲዳ ጊቢራ ማናስ ኔኒኔ ሃማይ ጊቢራሶን ቤቴርኬቲ» ጋዱስ።
EST 5:5 ካዎዚካ፥ «ኑኒ ኣስቴራ ጊዳይሳ ፖላና ማላ ሃማ ኤሶን ጼይጊቴ» ጊዴስ። ሄሳ ጊሻስ ካዎዚኔ ሃማይ ኣስቴራ ጊግሲዳ ጊቢራሶ ቢዳ።
EST 5:6 ኢስቲ ዎይኔ ኡሹ ኡዪሺን ቃሴካ ካዎዚ ኣስቴሮ፥ «ኣኔ ኔ ኮይዛይሲ ኣዜ? ኢዚ ኔስ ኢሜታና፤ ቃሴካ ኔ ሃራ ኦይቺዛይ ኣዜ? ታ ካዎቴꬃፌ ባጋ ጊዲኮካ ታ ኔስ ኢማና» ጊዴስ።
EST 5:7 ኣስቴራካ ኢዛስ ዛራዳ፥
EST 5:8 «ታ ዎሳይኔ ታ ኦይሻይ ሃይሳፌ ካሊዛይሳ፤ ታኒ ካዎ ማታን ኣዮቴꬅ ዴሚዳ ጊዲኮኔ ታ ኮዪዳይሳ ኢሞይኔ ታ ዎሳ ፖሎይ ካዎዛ ኡፋይሲዛ ጊዲኮ ካዎዚኔ ሃማይ ታ ጊግሲዛ ጊቢራን ዎንቶ ታስ ቤቴቶ፤ ሂስቲኮ ታኒ ካዎዚ ኦይቺዳ ኦይሻስ ዛሮ ኢማና» ጋዱስ።
EST 5:9 ሄ ጋላስ ሃማይ ካዎዛ ኣቻፌ ኡፋዬቲሼ ኬዚ ቢዴስ፤ ጊዶ ኣቲን ኢዚ ማርዲኪዮሳ ካዎዛ ፔንጌን ቤኢሺን ኢዚ ኡቶሳፔ ዴንዶንታ ኢጺዳይሳኔ ኢዛስ ቦንቾ ኢሞንታ ኣጊዳይሳ ቤኢዳ ማላ ኢዛ ሃንቆይ ማርዲኪዮሳ ቦላ ታማ ማላ ኤጺዴስ።
EST 5:10 ጊዲኮካ ሃማይ ጮ ጌንጬጪዲ ባሶ ቢዴስ። ባ ላጌታኔ ባ ማቾ ዞሳራ ጼይጊሲዲ ኢሲ ቦላ ሺሺዳፔ ጉዬ፥
EST 5:11 ሃማይ ባ ዱሬቴꬃኔ ጊታቴꬃ፥ ባ ናይታ ዳሮቴꬃ፥ ካዎዚ ኢዛ ኣይ ማላ ቦንቺዳኮ፥ ሃንኮ ሞኮኔታፔኔ ሹሜታፔ ኣይ ማላ ኢዛ ꬎቂሲዳኮ ናሼቲ ዮቲዴስ።
EST 5:12 ሃማይ፥ «ሄሳ ጻላ ጊዴና፤ ጎዳቴያ ኣስቴራ ጊግሲዳ ጊቢራሶን ቤታናስ ታፔ ኣቲን ሃራይ ጼይጌቲቤና። ዎንቶስ ካዎዛራ ታና ጻላ ጼይጋዱስ።
EST 5:13 ጊዶ ኣቲን ኣይሁዳ ዴሬ ኣስ ማርዲኪዮሲ ካዎዛ ፔንጌን ኡቲዳይሳ ታ ቤኢሺን ሃይሲ ኡባይካ ታና ኡፋይሴና» ጊዴስ።
EST 5:14 ኢዛ ማቼያ ዞሳራይኔ ኢዛ ላጌቲ ኡባይ፥ «ኔኒ 50 ዋꬋ ኣዱሳ ኮጫ ኤሲሳ፤ ሂስታዳ ዎንቶ ዎንታራ ማርዲኪዮሲ ሄ ኮጫ ቦላ ካቄታና ማላ ካዎዛስ ዮታ። ሄሳፌ ጉዬ ኡፋዬታሼ ካዎዛራ ኢሲፌ ጊቢራሶ ባንዳሳ» ጊዳ። ሄ ቆፋዚ ሃማ ኬሂ ኡፋይሲን ካቃናሶዛካ ጊግሲዴስ።
EST 6:1 ሄ ጋላሳ ኦማርስ ካዎዚ ꬊስኮ ꬋዪ ኣቂዴስ፤ ሄሳ ጊሻስ ባ ካዎቴꬃ ላይꬃን ጻፌቲዳ ታሪኬ ማጻፋቲ ሺቂዲ ናባቤታና ማላ ኣዛዚዴስ።
EST 6:2 ሄን ፔንጌ ናጊዛ ካዎዛ ኦላ ጋዳዋታፔ ናምኣቲ ጋባታይኔ ቴሬሻይ ካዎ ኣርጼኪሲሴ ዎꬋናስ ዞሬቲ ኡቲዳይሳ ማርዲኪዮሲ ዮቲን ጻፌቲ ኡቲዳይሲ ቤቲዴስ።
EST 6:3 ካዎዚካ፥ «ሂስቲን ኢዚ ሃይሳ ኦꬂዳ ጊሻስ ኢዛስ ኢሜቲዳ ቦንቾይኔ ሱንꬂ ኣዜ?» ጊ ኦይቺዴስ። ኢዛ ማታ ላጌቲ፥ «ኢዛስ ኣይኮይካ ኦሴቲቤና» ጊዳ።
EST 6:4 ካዎዚ ዛሪዲ፥ «ዛጎዛን ኦኔ ዲዛይ?» ጊ ኦይቺዴስ። ሄ ዎዴ ሃማይ ማርዲኪዮሳ ኢዛ ቦላ ካቃናስ ካዎዛስ ዮታና ቢዲ ካሬ ባጋራ ዲዛ ካዎ ኬꬃ ዛጎ ቡሮ ጋኬꬃ ቦላ ዴስ።
EST 6:5 ኢዛስ ማታ ኦሳንቻቲ፥ «ሄኮ ሃማይ ዛጎዛን ኤቂዴስ» ጊዳ። ካዎዚካ፥ «ሃ ጌላ ጊቴ» ጊዴስ።
EST 6:6 ሃማይ ጌሊዳፔ ጉዬ ካዎዚ፥ «ካዎይ ቦንቻና ኮዪዳ ኣሳስ ኣይ ኦꬃና ቤሲዜ?» ጊ ኦይቺዴስ። ሃማይ፥ «ካዎይ ቦንቻናይ ታፔ ሃራይ ኦኔ?» ጊ ባ ዎዚናን ቆፒዴስ።
EST 6:7 ሄሳ ጊሻስ ካዎዚ ኢዛስ ዛሪዲ፥ «ካዎይ ቦንቻና ዶሲዳ ኣሳስ፥
EST 6:8 ካዎዚ ኢዛ ማይዚዛ ካዎቴꬃ ማይኦይ፥ ካዎ ካላቻ ኢዛ ሁኤን ዎꬂን ካዎይ ቶጊዛ ፓራይ ኢዛስ ዮ።
EST 6:9 ሄሳፌ ጉዬ ማይኦዚኔ ፓራዚ ኬሂፔ ቦንቼቲዳ ካዎ ሹሜታፔ ኢሳ ኩሼን ኢሜቶ። ካዎዚ ቦንቻና ዶሲዳዴ ማይዜቶ፤ ኢዛ ፓራ ቶጊሲዲ ካታማይስ ዋና ዋና ኦጌታ ዩሺሼ፥ ‹ካዎይ ቦንቻና ኮዪዳዴስ ሃይሳꬆ ኦሴቴስ› ጌቶ» ጊዴስ።
EST 6:10 ካዎዚ ዛሪዲ ሃማ፥ «ኣኔ ኤሶን ባ! ማይኦዛኔ ፓራ ኤካዳ ካዎ ፔንጌን ኡቲዳ ኣይሁዳ ኣስ ማርዲኪዮሳስ ኔ ጊዳ ማላ ኦꬃ፤ ኔ ጊዳይሳፌ ኢሲናካ ፓጮንታ ማላ» ጊ ኣዛዚዴስ።
EST 6:11 ሄሳ ጊሻስ ሃማይ ካዎቴꬃ ማይኦ ማይዚዲ ፓራ ቶጊሲዴስ፤ ዎጋ ኦጌታን ካሌꬂሼ፥ «ካዎይ ቦንቻናስ ዶሲዳ ኣሳስ ሃይሲ ኦሴቲዴስ» ጊ ኢዛ ሲንꬃን ኣዋጂዴስ።
EST 6:12 ሄሳፌ ጉዬ ማርዲኪዮሲ ካዎዛ ፔንጌ ሲሚዴስ፤ ጊዶ ኣቲን ሃማይ ጬጪሼ ባ ሁኤ ጉሉንቲዲ ኤሶን ባሶ ሲሚ ቢዴስ።
EST 6:13 ባ ቦላ ጋኪዳ ኡባ ባ ማቾ ዞሳራሲኔ ባ ላጌታስ ኡባስ ዮቲዴስ። ኢዛ ዞራንቻቲኔ ኢዛ ማቾ ዞሳራይ ኢዛስ፥ «ኔ ኢዛ ሲንꬃን ካዉሽ ዶሚዳ ማርዲኪዮሳስ ዜሬꬃይ ኣይሁዳታ ባጋፌ ጊዲኮ ኔ ኢዛራ ኤቄታዳ ዳንዳያካ፤ ሲꬌይ ባይንዳ ኔ ꬋያና» ጊዳ።
EST 6:14 ኢስቲ ኢዛራ ቡሮ ሄሳ ሃሳያን ዲሺን ካዎ ጉንዱላቲ ዪዲ ኣስቴራ ጊግሲዳ ጊቢራስ ሃማ ኤሶን ኤኪ ቢዳ።
EST 7:1 ሂስቲን ካዎዚኔ ሃማይ ጎዳቴዮ ኣስቴሪ ጊቢራ ማናስ ቢዳ።
EST 7:2 ሄ ናምኣንꬆ ጋላሳ ጊቢራስ ቢዲ ኢስቲ ዎይኔ ኡሻ ኡዪሺን ካዎይ ቃሴካ፥ «ጎዳቴዬ ኣስቴሬ! ኔኒ ዎሲዛይ ኣዜ? ታ ኔስ ኢማና። ቃሴ ኔኒ ታና ኦይቺዛይ ኣዜ? ሃራይ ኣቶ ታ ካዎቴꬃፌ ባጋ ጊዲኮካ ታኒ ኔስ ኢማና» ጊዴስ።
EST 7:3 ጎዳቴያ ኣስቴራ ዛራዳ፥ «ካዎ! ኔኒ ታናን ኡፋዬቲዳ ጊዲኮ፥ ቃሴ ኔ ጊታቴꬃ ኡፋይሲዳ ጊዲኮ ታ ሼምፖዮኔ ታ ዴሬዛ ኣሻ፤ ታ ዎሳይኔ ታ ኦይሻይ ሃይሳ።
EST 7:4 ጋሶይካ ታኒኔ ታ ዴሬይ ባሻስ፥ ሹካሲኔ ꬋይሳስ ባይዜቲዶስ። ኑኒ ማጫቲኔ ኣዴቲ ኣይሌቴꬃስ ጻላ ባይዜቲዳኮ ታኒ ዶናካ ጶቂኬ፤ ሄሲ ካዎ ሜቶꬃናስ ቤሶንታ ዮኦ» ጋዱስ።
EST 7:5 ካዎ ኣርጼኪሲሲ ዛሪዲ፥ «ሄሳ ኦꬃናስ ጻሊዳይ ኦኔ? ሄ ቢታኔይ ኣዋን ዲዜ?» ጊዲ ጎዳቴዮ ኣስቴሮ ኦይቺዴስ።
EST 7:6 ኣስቴራካ፥ «ኑ ባልጋራኔ ኑ ሞርኬ ጊዲዳ ሃ ኢታ ኣስ ሃማ» ጋዱስ። ሄ ዎዴ ሃማይ ካዎዛ ሲንꬃኒኔ ጎዳቴይ ሲንꬃን ኬሂ ዳጋሚዴስ።
EST 7:7 ካዎዚ ኬሂ ሃንቄቲዲ ባ ኡቲዳሶሆፔ ዴንዲ ኤቂዴስ፤ ባ ኡሻ ኣጋጊዲ ካዎ ኬꬃ ኣታኪልቴይ ዲዛሶዛ ቢዴስ። ጊዶ ኣቲን ሃማይ ካዎይ ኢዛ ቦላ ኢታ ሚሽ ኤሃናስ ቃቺዳይሳ ኤሪዳ ጊሻስ ጎዳቴያ ኣስቴራ ኢዛ ሃይቆፔ ኣሻና ማላ ዎሳናስ ጉዬ ኣቲዴስ።
EST 7:8 ካዎዚ ካዎ ኬꬃ ኣታኪልቴይ ዲዛሶሆፔ ሲሚዲ ጊቢራ ኬꬅ ጌሊዛ ዎዴ ሃማይ ጎዳቴዮ ኣስቴሪፔ ማሬታና ጊዲ ኢዛ ኡቲዳ ኣርጄታ ቦላን ጉፋኒዳይሳ ቤኢዴስ። ሄሳፌ ጉዬ ካዎዚ ኬሂ ሃንቄቲዴስ፤ ባ ቃላካ ꬎቁ ሂስቲዲ፥ «ሃይሲ ኣዴዚ ታ ኣይፌይ ቤኢሺን ታ ኬꬃን ጎዳቴዮ ኦይካና ኮይዜ?» ጊዴስ። ካዎዚ ቡሮ ሄሳ ሃሳያ ቦላ ዲሺን ካዎ ጉንዱላቲ ዪዲ ሃማ ኣይፌሶ ጎዚዳ።
EST 7:9 ሄሳፌ ጉዬ ኢስታ ጊዶፌ ሃርቦኔ ጌቴቲዛ ጉንዱላይ፥ «ካዎ! ኔና ሃይቆፔ ኣሺዳ ማርዲኪዮሳ ካቃና ጊዲ ሃማይ ኤሲዳ ኢቻሽ ታሙ ዋꬋ ኮጫይ ኢዛሶን ዴስ» ጊዴስ። ካዎዚ ዛሪዲ፥ «ሃማ ኤፊዲ ሄ ኮጫ ቦላ ካቂቴ!» ጊ ኣዛዚዴስ።
EST 7:10 ሄሳ ጊሻስ ማርዲኪዮሳ ካቃና ጊዲ ጊግሲዳ ኮጫ ቦላ ኤፊዲ ሃማ ካቂዳ፤ ሄሳፌ ጉዬ ካዎዛ ሃንቆይ ኢርጺዴስ።
EST 8:1 ኣይሁዳታ ሞርኬ ሃማይ ካቄቲዳ ጋላስ ካዎ ኣርጼኪሲሲ ሃማ ሃሮ ኡባ ጎዳቴዮ ኣስቴሪስ ኣꬂ ኢሚዴስ። ቃሴ ማርዲኪዮሲ ኢዚስ ማታ ዳቦ ጊዲዳይሳ ኣስቴራ ካዎዛስ ዮታዱስ። ሄሳ ጊሻስ ሄ ጋላሳፌ ዶሚዲ ማርዲኪዮሲ ካዎዛኮ ጌላናዉ ዳንዳይዴስ።
EST 8:2 ካዎዚ ሃማፔ ዛሪ ኤኪዳ ባ ማታሜ ሚዲጋዛ ማርዲኪዮሳስ ኢሚዴስ። ሂስቲን ኣስቴራ ሃማ ኣቆታ ቦላ ማርዲኪዮሳስ ኣዋቴꬅ ኢማዱስ።
EST 8:3 ሄሳፌ ጉዬ ኣስቴራ ዬካሼ ካዎዛ ቶሆ ቦላ ኩንዳዳ ኣጋጌ ዛሬ ሃማይ ኣይሁዳታ ቦላ ቃቺዳ ኢታ ማቆይ ኦሶን ፔኦንታ ማላ ካዎዛ ዎሳዱስ።
EST 8:4 ሂስቲን ካዎዚ ባ ዎርቃ ጉፌ ኢዚስ ሚጪን ኢዛ ዴንዳ ኤቃዳ፥
EST 8:5 ኢዛስ፥ «ካዎዞ! ታ ኔ ሲንꬃን ኣዮቴꬅ ዴሚዳ ጊዲኮ፥ ቃሴ ታ ኔና ኡፋይሲዳ ጊዲኮ፥ ታ ኦይቺዳ ኦይሻይ ካዎ ሲንꬃን ኤኬቲዛ ጊዲኮ፥ ካዎይ ኣይሲዛ ዴሬ ኡባን ዲዛ ኣይሁዳታ ꬋይሳናስ ኣጋጌ ዛሬ ሃማዳቴ ና ሃማይ ኬሲዳ ኣዋጃ ሻራናስ ሃራ ኣዋጃ ኬሳና ማላ ታ ኔና ዎሳይስ።
EST 8:6 ሃ ቦሻይ ዉሪ ታ ዴራ ቦላ ጋኪሺን ታኒ ዋና ጮኡ ጋ ጼላና ዳንዳያዚና? ቃሴ ታ ዳቦቲካ ꬋይሺን ታኒ ዋና ጮኡ ጋ ጼላና ዳንዳያዚና?» ጋዱስ።
EST 8:7 ሄሳፌ ጉዬ ካዎ ኣርጼኪሲሲ ጎዳቶ ኣስቴሪሲኔ ኣይሁዳ ኣስ ማርዲኪዮሳስ፥ «ሃማይ ኣይሁዳታ ዎꬋናስ ኣዋጃ ኬሲዳ ጊሻስ ታኒ ሚꬃ ኮጫ ቦላ ኢዛ ካቂሲዳይሳኔ ኢዛ ሃሮካ ኡባ ጎዳቶ ኣስቴሪስ ኢሚዳይሳ ኢንቴ ኤሬታ።
EST 8:8 ጊዲኮካ ካዎ ሱንꬃን ጻፌቲዲ ኢዛ ቃላባቴ ማታሜን ሾጬቲዳ ዳብዳቤይ ሻሬታና ዳንዳዮንታ ጊሻስ ኢንቴካ ኢንቴ ባጋራ ኣይሁዳታስ ሎኦ ሚሳቲ ቤቲዛ ሃራ ኣዋጃ ካዎዛ ሱንꬃን ጻፊዲ ካዎዛ ቃላባቴ ማታሜን ሾጪቴ» ጊዴስ።
EST 8:9 ሲዋና ጌቴቲዛ ሄꬓንꬆ ኣጊናን፥ ናምኡ ታማኔ ሄꬓንꬆ ጋላሳን፥ ማርዲኪዮሲ ካዎ ኬꬃ ጻፌታ ጼይጊዲ ኣይሁዳታስ፥ ሂንዴፌ ቶጵያ ጋካና ዲዛ 127 ዴሬታ ሃሪዛ ዳናታስ፥ ሃራ ሹሜታስ ቢዛ ዳብዳቤ ጻፊሲዴስ። ሄ ዳብዳቤቲ ኢስታ ቃላን ቃላኒኔ ጻፌቲዛ ማራን ቃሴ ኣይሁዳታ ቃላኒኔ ኢስታ ጻፎ ማራ ማላ ጻፌታና ማላ ኦꬂዴስ።
EST 8:10 ማርዲኪዮሲ ሄ ኣዋጃታ ኡባ ካዎ ኣርጼኪሲሴ ሱንꬃን ጻፊሲዲ፥ ኢዛ ቃላባቴ ማታሜን ሾጪዴስ፤ ሂስቲዲ ካዎስ ጋራኤቲዳ ፒላታ ፓራታ ቶጊዛ ቃስታኔታ ቦላ ኡባ ዴራስ ዬዲዴስ።
EST 8:11 ካዎዛ ኣዋጃይ ኡባ ካታማታን ዲዛ ኣይሁዳቲ ባ ዲዛሶን ዲዛሶን ኢሲ ቦላ ሺቃና ማላኔ ባንታ ሞርኬታራ ኤቄታና ማላ፥ ሄሳꬆካ ባ ቦላ፥ ባ ማቼታ ቦላኔ ባ ናይታ ቦላ ሜቶ ጋꬂዛ ኣይ ዴሬ ኣስ ጊዲን ዎይኮ ጊጼቲዳ ኦላንቻታ ዎይኮ ካዎቴꬃታ ጊዲን ኢስቲ ዛሪ ዎꬋና ማላ፥ ꬋይሳና ማላኔ ሞርኬታ ኣቆታ ቦንቃና ማላ ማታ ኢሚዴስ።
EST 8:12 ካዎ ኣርጼኪሲሲ ሃሪዛ ቢታ ኡባን ኣይሁዳቲ ሄሳ ኦꬃናስ ቃቺዳ ጋላሳይ ኣዳሬ ጌቴቲዛ ታማኔ ናምኣንꬆ ኣጊናን ታማኔ ሄꬓንꬆ ጋላሳና።
EST 8:13 ኣይሁዳቲ ባ ሞርኬታ ቦላን ሃሎ ኬሳናስ ሄ ጋላስ ጊጌቲ ኡታና ማላ ካዎዛ ኣዋጃፌ ዱቄቲዳ ዎጋይ ኡባ ዴሬን ኣሳይ ኤራና ማላ ኣዋጄቲዴስ።
EST 8:14 ኪቴቲዛይቲ ካዎ ኬꬃ ፓራታ ቶጊዲ ካዎዛ ኣዛዞ ጋꬃናስ ኤሶቲዲ ቢዳ። ቃሴ ሱሳ ጊምቤንካ ሃ ኣዋጃይ ኣሳ ኡባስ ዮቴቲዴስ።
EST 8:15 ማርዲኪዮሲ ሳሎ ሚሳቲዛኔ ቦꬃ ቃጪናን ዳዴቲዳ ካዎ ማይኦ ማይኢዲ፥ ጊታ ዎርቃ ካላቻ ጎጺዲ፥ ሎኦ ፑቶፌኔ ኦቻ ቴራ ሚሳቲዛ ፑቶፌ ዳዴቲዳ ሴሎ ማይኦ ማይኢዲ ካዎዛ ሲንꬃፌ ኬዚዴስ። ሱሳ ካታማያ ኡፋዬታዳ ኢሊላዱስ።
EST 8:16 ሄሲ ኣይሁዳታስ ኡፋይሳ ጋላሲኔ ካሳ ጋላስ፥ ጋላታ ጋላሲኔ ቦንቾ ጋላስ ጊዲዴስ።
EST 8:17 ካዎዛ ኣዋጃይ ጋኪዳ ዴሬታኒኔ ካታማታ ኡባን ኣይሁዳታስ ኡፋይሲኔ ሚቻ፥ ጊቢራ ጋላሲኔ ካሳ ጋላስ ጊዲዴስ፤ ሃራ ካዎቴꬃቲ ኡባይ ኣይሁዳታስ ባቢዳ ጊሻስ ኣይሁዳቴꬃን ላሜቲዳ።
EST 9:1 ኣዳሬ ጌቴቲዛ ታማኔ ናምኣንꬆ ኣጊናን ታማኔ ሄꬓንꬆ ጋላሳይ ጋኪዴስ። ሄ ጋላሳይ ካዎይ ኮይሮ ኬሲዳ ኣዋጃ ዎዴ ኣይሁዳታ ሞርኬቲ ኢስታ ጾናና ጊዳ ጋላሳ። ጊዶ ኣቲን ዮኦዚ ላሜቲን ኣይሁዳቲ ባንታ ሞርኬታ ጾኒዳ።
EST 9:2 ካዎ ኣርጼኪሲሴ ካዎቴꬃ ጋርሳን ዲዛ ኣይሁዳቲ ዉሪ ባንታና ቆሃናዉ ኮይዛ ኡባ ꬋይሳናስ ባንታ ካታማን ካታማን ኢሲፌ ሺቂዳ። ሃራ ዴሬ ካዎቴꬃቲ ኡባይ ኢስታስ ባቢዳ ጊሻስ ኢስታራ ኣይ ኣሲካ ኤቄታናዉ ዳንዳይቤና።
EST 9:3 ዴሬ ሃሪዛይቲኔ ኣይሲዛ ጊታ ኣሳቲ፥ ማታይ ዲዛይቲኔ ሹሜቲ ኡባይ ማርዲኪዮሳስ ባቢዳ ጊሻስ ኣይሁዳታ ማዲዳ።
EST 9:4 ማርዲኪዮሲ ካዎ ኬꬃን ኤሬቲዳዴ ጊዲዴስ፤ ኢዛ ጎባቴꬂ ዴሬ ኡባን ሴቴቲዴስ፤ ኢዛ ዎልቃይካ ሚኒ ሚኒ ቢዴስ።
EST 9:5 ኣይሁዳቲ ባንታ ሞርኬታ ኡባ ማሻን ሲፊዳ፥ ዎꬊዳ፥ ꬋይሲዳ፥ ባንታና ኢጺዛይታ ቦላ ባንታና ሎኢዳ ማላ ኦꬂዳ።
EST 9:6 ዋና ካታማ ሱሳን 500 ኣስ ዎꬊ ꬋይሲዳ።
EST 9:7 ቃሴ ኢስቲ ፓርሻንዳቴ፥ ዳሊፎኔ፥ ኣስፓቴ፥
EST 9:8 ፖራቴ፥ ኣዳሊያ፥ ኣሪዳቴ፥
EST 9:9 ፓርማሺቴ፥ ኣርሳዬ፥ ኣርዳያኔ ዋይዛቴ ጌቴቲዛይታ ዎꬊዳ።
EST 9:10 ሃይቲ ኣይሁዳታስ ሞርኬ ጊዲዳ ሃማዳቴ ና ሃማይ ዬሊዳ ታሙ ኣቱማ ናይታ። ጊዶ ኣቲን ኣይሁዳቲ ኢስታ ኣቆታን ባንታ ኩሼ ጌልꬂቤቴና።
EST 9:11 ኣይሁዳቲ ሱሳ ካታማን ዎꬊዳ ኣሳ ቆዳይ ኣፑናኮ ሄ ጋላሲካ ካዎስ ዮቴቲዴስ።
EST 9:12 ሂስቲን ካዎይ ጎዳቴዮ ኣስቴሮ፥ «ኣይሁዳቲ ዋና ካታማ ጊዲዳ ሱሳን ጻላ 500 ኣሳታኔ ሃማ ናይታ ታማታ ዎꬊ ꬋይሲዳ። ሃንኮ ኣቲዳ ካዎይ ሃሪዛ ዴሬታን ኣይ ኦꬂዶሻ! ሃኢች ኔ ሃራ ኣይ ዎሳይ? ኢዚካ ኔስ ኢሜታና፤ ኔ ኦይሻይ ኣዜ? ኢዚካ ኔስ ኢሜታና» ጊዴስ።
EST 9:13 ኣስቴራ ዛራዳ፥ «ሃይሲ ሃ ቆፋይ ካዎዛ ኡፋይሲዛ ጊዲኮ፥ ሱሳ ካታማን ዲዛ ኣይሁዳቲ ሃች ኦꬂዳ ማላ ዎንቶካ ኦꬄቶ። ቃሴ ሃማ ናይታ ታማታ ኣሃካ ሚꬃ ቦላን ካቃና ማላ ኣዛዛ» ጋዱስ።
EST 9:14 ሂስቲን ካዎዚ ሄሲ ሃናና ማላ ኣዛዚዴስ፤ ኣዋጃይካ ሱሳ ካታማን ናምኣንꬆ ኣዋጄቲን ሃማ ናይታ ታማታ ኣሃይ ካቄቲዴስ።
EST 9:15 ኣዳሬ ጌቴቲዛ ኣጊናን ታማኔ ኦይዳንꬆ ጋላስ ሱሳ ካታማን ዲዛ ኣይሁዳቲ ቃሴካ ኢሲ ቦላ ሺቂዲ ቃሴካ 300 ኣስ ዎꬊዳ፤ ጊዶ ኣቲን ኢስታ ኣቆታን ባንታ ኩሼ ጌልꬂቤቴና።
EST 9:16 ሄ ዎዴ ካዎይ ሃራ ዴሬታን ዲዛ ኣይሁዳቲካ ባና ኣሻናሲኔ ባንታ ሞርኬታራ ኤቄታናስ ኢሲ ቦላ ሺቂዳ። ኢስቲካ 75,000 ኣስ ዎꬊዳ፤ ጊዶ ኣቲን ኢስታ ኣቆታን ባንታ ኩሼ ጌልꬂቤቴና።
EST 9:17 ሄሲ ኡባይ ኣዳሬ ጌቴቲዛ ኣጊናን ታማኔ ሄꬓንꬃ ጋላስ ሃኒዴስ፤ ሂስቲዲ ታማኔ ኦይዳንꬃ ጋላስ ጊቢራ ጋላሲኔ ኡፋይሳ ጋላስ ኦꬂዲ ሼምፒዳ።
EST 9:18 ጊዶ ኣቲን ሱሳ ካታማን ዲዛ ኣይሁዳቲ ታማኔ ሄꬓንꬆኔ ታማኔ ኦይዳንꬆ ጋላሳታን ዎꬊሼ ፔኢዲ ታማኔ ኢቻሻንꬆ ጋላስ ጊቢራ ጋላሲኔ ኡፋይሳ ጋላስ ኦꬂዲ ሼምፒዳ።
EST 9:19 ሄሳ ጊሻስ ጋጻሬ ጊዶን ዲዛ ኣይሁዳቲ ሃች ጋካናስካ ኣዳሬ ጌቴቲዛ ኣጊናን ታማኔ ኦይዳንꬆ ጋላስ ጊቢራ ጋላስ፥ ኡፋይሳ ጋላሲኔ ኢሶይ ኢሳስ ኢሞታ ኢሚዛ ጋላስ ሂስቲ ቦንቼቴስ።
EST 9:20 ማርዲኪዮሲ ሃይሳ ሃ ታሪኬዛ ጻፊዴስ፤ ካዎ ኣርጼኪሲሲ ሃሪዛ ዴሬታ ኡባን፥ ሃሆኒኔ ማታን ዲዛ ኣይሁዳ ኡባስ ዳብዳቤዛ ዬዲዴስ።
EST 9:21 ማርዲኪዮሲ ዬዲዳ ዳብዳቤይ ኣይሁዳቲ ላይꬃን ላይꬃን ኣዳሬ ጌቴቲዛ ኣጊናን ታማኔ ኦይዳንꬆኔ ታማኔ ኢቻሻንꬆ ጋላሳታን ባኣሌ ቦንቻናሳ።
EST 9:22 ሄ ጋላሳቲ ኣይሁዳቲ ባንታ ሞርኬታፔ ኣቲዲ ሼምፖ ዴሚዳ ጋላሳታ፤ ቃሴ ሄ ኣጊናይካ ኢስታ ካዮቴꬃይኔ ሂዶታ ቃንጾይ ኡፋይሳኒኔ ካሳን ላሜቲዳ ኣጊና፤ ሄ ጋላሳታን ኡፋዬቲሼ ጊቢራ፥ ኢሶይ ኢሳስ ካꬃ ኢሞታ ኢሚሼኔ ማንቆታ ማዲሼ ቦንቻና ማላ ኢስታስ ዳብዳቤ ጻፊዴስ።
EST 9:23 ሄሳ ጊሻስ ኣይሁዳቲ ማርዲኪዮሲ ኢሚዳ ኣዛዞ ኤኪዲ ኢስቲ ቦንቻናስ ዶሚዳ ባኣሌ ላይꬃን ላይꬃን ኣጎንታ ቦንቻናስ ቃቺዳ።
EST 9:24 ኣጋጌ ዛሬ ሃማዳቴ ና ሃማይ ኣይሁዳታ ኡባታ ሞርኬይ ኢስታ ꬋይሳናስ ካሴ ማቄቲዲ ኢስታ ኡባ ዎꬋና ኣጊናኔ ጋላሳ ኤራና ማላ፥ «ፑሪሜ» ጌቴቲዛ ሳማ ዬጊሲዴስ።
EST 9:25 ሄ ማቆይ ካዎዛ ማታን ኤሬቲዳፔ ጉዬ ሃማይ ኣይሁዳታ ቦላ ማቄቲዳ ኢታ ማቆይ ዉሪ ጉዬ ሲሚዲ ኢዛ ቦላ ፖሌታና ማላ ኢዚኔ ኢዛ ናይቲ ሚꬃ ቦላ ካቄታና ማላ ጹፌን ኣዛዚዴስ።
EST 9:26 ሄሳ ጊሻስ ሃ ጋላሳቲ ፑሪሜ ጌቴቲ ጼይጌቲዳ፤ ሃይሳ ዳብዳቤዛን ኢስታስ ጻፌቲዳ ኡባ ጋሶን ኢስቲ ባ ኣይፌን ቤኢዳይሳ ጋሶኒኔ ኢስታ ቦላን ጋኪዳይሳ ጋሶን፥
EST 9:27 ኣይሁዳቲ ባንታስ፥ ባንታ ዜሬꬃታሲኔ ኣይሁዳ ጊዳናስ ኮይዛ ኡባታስ፥ ማርዲኪዮሲ ኢስቲ ኣዛዚዳ ማላ ላይꬃን ላይꬃን ሃ ጋላሳታን ቃንጾንታ ቦንቻና ማላ ዎጋይ ዎꬊዴስ።
EST 9:28 ቃሴ ሃ ፑሪሜ ጋላሳቲ ዬሌታን ዬሌታን፥ ኬꬃን ኬꬃን፥ ዴሬን ዴሬኒኔ ካታማን ካታማን ቦንቼታናሲኔ ቆፌታናስ ቤሴስ ጊ ቃቺዳ፤ ጋሶይካ ጋላሳቲ ቦንቼቶንታ ኣቶንታ ማላኔ ዬሌታ ጋርሳፌ ኢስታ ቆፍሲዛ ሚሺ ꬋዮንታ ማላሳ።
EST 9:29 ሄሳፌ ጉዬ ኣቢኤሌ ቢያ ጎዳቴያ ኣስቴራ ኣይሁዳ ዴሬ ኣስ ማርዲኪዮሳራ ኢሲፌ ካሴ ማርዲኪዮሲ ፑሪሜ ጊሻስ ጻፊዳ ዳብዳቤዛ ሚንꬃናስ ባስ ዲዛ ማታ ቆንጪሲዛ ዳብዳቤ ጻፋ ዬዳዱስ።
EST 9:30 ኣርጼኪሲሲ ሃሪዛ 127 ዴሬን ዲዛ ኣይሁዳታስ ኡባስ ሳሮይኔ ዎፓይ ጊዶ ጊዛ ዳብዳቤ ሳሮካራ ጋꬂ ዬዲዴስ።
EST 9:31 ቃሴ ኢስቲ ካሴ ጾማናሲኔ ካዮታናስ ዎጋ ኬሲዳ ማላ፥ ኢስታኔ ኢስታ ዜሬꬃቲ ሃይሳ ፑሪሜ ጋላሳታ ላይꬃን ላይꬃን ዎጋ ሂስቲ ቦንቻና ማላ ሄ ዳብዳቤቲ ቆንጪሴቴስ። ሄሲ ኣይሁዳ ዴሬ ኣስ ማርዲኪዮሲ ጎዳቴዮ ኣስቴሪራ ናምኣስ ኢሲ ቦላ ጊግሲ ኬሲዳ ኣዛዞ።
EST 9:32 ጎዳቶ ኣስቴሪ ኣዋጃይ ፑሪሜ ባኣሌ ዎጋ ሚንꬄስ፤ ሄሲካ ማዝጋባን ጻፌቲዴስ።
EST 10:1 ካዎ ኣርጼኪሲሲ ባ ሃሪዛ ዴሬ ኡባ ቦላ ቢዲ ኣባ ላንቄ ጋካናስ ዲዛይታ ቦላ ጊራ ዬጊዴስ።
EST 10:2 ኢዚ ኦꬂዳ ጊታኔ ዎልቃማ ኦሶቲ ኡባይ ቃሴ ማርዲኪዮሳካ ዎስቲ ꬎቁ ሂስቲ ቦንቺዳኮ ቆንጪሲዛ ታሪኬይ ሜዶኔኔ ፓሪሴ ካዎታ ታሪኬ ማጻፋን ጻፌቲዴስ።
EST 10:3 ኣይሁዳ ዴሬ ኣስ ማርዲኪዮሲ ካዎ ኣርጼኪሲሴፔ ቦንቾን ናምኣንꬆ ማራን ዴስ፤ ኢዚ ኣይሁዳቲ ሳሮቴꬃኒኔ ሂርጋይ ባይንዳ ዳና ማላ ኬሂ ዳቡርዳ ኣስ ጊዲዳ ጊሻስ ኢዚ ኣይሁዳታንካ ኬሂ ቦንቼቲዳኔ ዶሴቲዳ ኣሳ።
JOB 1:1 ኡጼ ጌቴቲዛ ዴሬን ኢሲ ኢዮቤ ጌቴቲዛ ኣሲ ዴስ። ኢዚካ ኢታ ኡባፌ ሃኪዳዴ፤ ዎሶይ ኢዛ ቦላ ባይንዳዴ፤ ጾሳስ ያዪዛዴኔ ሱሬ ኣሳ።
JOB 1:2 ኢዛስ ላፑን ኣቱማ ናይቲኔ ሄꬑ ማጫ ናይቲ ዴቴስ።
JOB 1:3 ሃሮ ባጋራካ ኢዛስ 7,000 ዶርሳቲ፥ 3,000 ጋሜላቲ፥ 500 ዋꬃ ቦራቲኔ 500 ሃሬቲ ዴቴስ፤ ቃሴካ ኬሂ ዳሮ ኣይሌቲ ዴቴስ። ኣርሼይ ሞኪዛሶ ባጋራ ኢዛ ማላ ዱሬኔ ጊታ ኣሲ ሃራይ ዴና።
JOB 1:4 ኢዮቤ ኣቱማ ናይቲ ኢሶይ ኢሶይ ባሶን ታራን ታራን ዲጊሳ ጊግሲዲ ኢሲፌ ሺቂ ኡፋዬቴቴስ፤ ሄꬑ ሚቼታካ ባንታኮ ጼይጊሲዲ ኢስታራ ኢሲፌ ሜቴሲኔ ኡዬቴስ።
JOB 1:5 ዲጊሳ ጋላሳቲ ኣꬊዳፔ ጉዬ ኢዮቢ ዎንታራ ዴንዲዲ ባ ናይታ ጼይጊሲዲኔ ኢሳ ኢሳ ሱንꬃን ያርሾ ሺሼስ። ኢዚ ሄሳꬆ ኦꬂዛይ፥ «ታ ናይቲ ጌሊ ጊዳ ጾሳ ጫዪዲ ኣዉኮራ ናጋራ ኦꬂዳኮኔ!» ጉሳ ሂርጋን ናይታ ናጋራፔ ጌሻናስ ጊዲ ኦꬄስ። ኢዮቢ ሃይሳ ያርሾ ዎጋ ቃንጾንታ ኡባ ዎዴ ኦꬄስ።
JOB 1:6 ጋላሳታፔ ኢሲ ጋላስ ሳሎ ኪታንቻቲ ጎዳ ሲንꬅ ሺቂዳ ዎዴ ጻላኤይካ ኢስታራ ኢሲፌ ሺቂዴስ።
JOB 1:7 ጾሲካ፥ «ኣዋፔ ያዲ?» ጊዲ ጻላኤ ኦይቺዴስ። ጻላኤይካ፥ «ሳኣ ጋጻ ኡባ ያኔ ሃ ዩዬሬታዳ ያዲስ» ጊዲ ጎዳስ ዛሪዴስ።
JOB 1:8 ጎዳይ ጻላኤዛ፥ «ታ ኣይሌዛ ኢዮቤ ሎኤꬃ ቤያዲ? ኢዛ ማላ ኣማኔቲዳኔ ሱሬ ኣስ ቢታ ቦላ ቤቲቤና፤ ኢዚ ኢታ ኡባፌ ሃኪዲ ታስ ያዪዛ ሱሬ ኣሳ» ጊዴስ።
JOB 1:9 ጻላኤይካ ዛሪዲ፥ «ኢዮቢ ኔስ ጾሳስ ጮ ያዪዜ?
JOB 1:10 ኢዚ ኔስ ያዪዛይ ኔኒ ኢዛኔ ኢዛ ናይታ፥ ኢዛስ ዲዛ ሃሮ ኡባ ሎኤꬃ ናጊዳ ጊሻሳ፤ ኢዚ ኦꬂዛ ኦሶዛ ኩሜꬅ ኣንጂዳ ጊሻሲኔ ዳሮ ዉዴ ሜሄታ ኔ ኢዛስ ኢሚዳ ጊሻስ ጊዴኔ?
JOB 1:11 ኣኔ ኔ ኩሼ ዬዳዳ ኢዛስ ዲዛይሳ ኡባ ኔ ꬋይሲዳኮ ቱማ ኢዚ ኔና ቆንጬን ጫያና» ጊዴስ።
JOB 1:12 ጎዳይካ ጻላኤስ፥ «ኤሮ ኣኔ ኢዮቤ ቦላ ኢሲ ሜቶካ ጋꬆፋ ኣቲን ኢዛስ ዲዛ ሃሮዛ ቦላ ኔ ኮዪዳዚ ኦꬃናዉ ዳንዳያሳ» ጊዴስ። ሄሳፌ ጉዬ ጻላኤይ ጾሳ ሲንꬃፌ ኬኢዲ ቢዴስ።
JOB 1:13 ጋላሳታፔ ኢሲ ጋላስ ኢዮቤ ናይቲ ባይራ ኢሻሶን ዉሪ ሺቂዲ ሚዲኔ ዎይኔ ጫጄ ኡዪዲ ኡፋዬቴቴስ።
JOB 1:14 ሄ ጋላስ ኢሶይ ኪቴቲ ዪዲ፥ «ኑኒ ቦራታ ዋጺዲ ጎዪሺን፤ ሃሬቲካ ኑ ማታ ዴምባን ሄሜቲሺን፥
JOB 1:15 ሳባ ዴሬ ኣሳቲ ዪዲ ኑ ቦላ ኦላ ዴንꬂዲ ኡባካ ዲኢ ኤኪ ቢዳ፤ ኔ ኣይሌታ ኡባታካ ማሻን ዎꬊዳ፤ ታኒ ጻላላ ኣታዳ ሃኒዳ ኡባ ኔስ ዮታናስ ያዲስ» ጊዴስ።
JOB 1:16 ኮይሮ ኪታንቻይ ባ ሃሳይዛ ሃሳያ ቡሮ ኦንጎንታ ዲሺን ናምኣንꬆ ኪታንቻይ ዪዲ፥ «ዶርሳታኔ ሄሚዛ ሄንꬃንቻ ኡባ ዎልቃንꬅ ሳሎፔ ዎꬊዲ ዎꬊዴስ፤ ታኒ ጻላ ኣታዳ ሃኒዳ ኡባ ኔስ ዮታናስ ያዲስ» ጊዴስ።
JOB 1:17 ሃይሳ ኪታንቻይ ሃሳዪ ኦንጎንታ ሃራ ኪታንቻይ ዪዲ፥ «ሄꬑ ቡቴን ሻኬቲዳ ቦንቂዛ ካላዳዌ ኣሳቲ ዪዲ ቆፖንታ ዲሺን ኑ ቦላ ኢታ ሜቶ ጋꬂዳ፤ ጋሜላታ ኡባ ዲኢ ኤፊቺዳ፤ ኔ ኣይሌታ ኡባ ማሻን ዎꬊዳ፤ ታኒ ጻላ ኣታዳ ሃኒዳ ሚሽ ኡባ ኔስ ዮታናስ ያዲስ» ጊዴስ።
JOB 1:18 ሃይሳ ሃ ኪታንቻይ ሃሳዪ ኦንጎንታ ሃራ ኪታንቻይ ዪዲ፥ «ኔ ናይቲ ኡባቲካ ባንታስ ባይራ ኢሻሶን ሺቂዲ ሚሼኔ ዎይኔ ጫጄ ኡዪሼ ኡፋዬቲዛ።
JOB 1:19 ባዞፌ ዪዳ ጎቴ ጫርኮይ ቆፖንታ ዲሺን ዪዲ ኬꬃ ኩሜꬅ ሺሬቺ ዬጊዴስ፤ ኬꬃዚካ ኢስታ ቦላ ዎꬊን ዉሪካ ሃይቂዳ፤ ታኒ ጻላ ኣታዳ ሃኒዳ ሚሽ ኡባ ኔስ ዮታናስ ያዲስ» ጊዴስ።
JOB 1:20 ሄሳፌ ጉዬ ኢዮቢ ዴንዲዲ ካዮቲዲ ባ ማይኦዛ ዳኪዴስ፤ ባ ሁኤ ቡሉሲዴስ፤ ቢታን ጉፋኒ ጎይኒዴስ።
JOB 1:21 «ታኒ ታ ኣዬይ ኡሎፔ ካሎ ዬሌታዲስ፤ ሃይቂዛ ዎዴካ ካሎ ባና፤ ጎዳይ ኢሚዴስ፤ ጎዳይ ኤኪዴስ፤ ጎዳ ሱንꬂ ጋላቴቲዳዝ ጊዶ» ጊዴስ።
JOB 1:22 ሃ ፓጬይ ኡባይ ኢዮቤ ቦላ ጋኪንካ ኢዚ ኡባካ ናጋራ ኦꬂቤና፤ ጾሳ ቦላካ ጫሞ ቃላ ኬሲቤና።
JOB 2:1 ጋላሳታፔ ኢሲ ጋላስ ሳሎ ኪታንቻቲ ጾሳ ሲንꬅ ሺቂዛ ዎዴ ጻላኤይካ ኢስታራ ኢሲፌ ሺቂዴስ።
JOB 2:2 ጎዳይካ፥ «ኣዋፔ ያዲ?» ጊዲ ጻላኤ ኦይቺዴስ። ጻላኤይካ፥ «ቢታ ኡባ ቦላ ያኔ ሃ ሲሜሬታዳ ያዲስ» ጊዴስ።
JOB 2:3 ጎዳይካ ጻላኤ፥ «ታ ኣይሌዛ ኢዮቤ ሎኤꬃ ቤያዲ? ኢዛ ማላ ኣማኔቲዳይኔ ኪያ ኣስ ቢታ ቦላ ቤቴና፤ ኢዚ ኢታ ኡባፌ ሃኪዲ ታስ ያዪዛ ሱሬ ኣሳ፤ ኢዛ ꬋይሳናስ ኔ ዳንዳያና ማላ ታ ኔስ ኣꬃ ኢማና ማላ ኔ ታና ዴንꬄꬂዳይ ሃዳና። ቤያ ኢዮቢ ጊዲኮ ሃኖ ጋካናስ ባ ሱሬቴꬃን ሚኒ ኤቂዴስ» ጊዴስ።
JOB 2:4 ጻላኤይካ፥ «ጋልባ ጊሻስ ጋልባ» ጊዛይሳ ማላ «ኣሲ ባ ኣሾ ኣሻናስ ጊሼ ባስ ዲዛይሳ ኡባ ኢሜስ።
JOB 2:5 ሃኢ ጊዲኮ ኔ ኩሼ ኢዛ ቦላ ሚጫዳ ኢዛስ ኩሜꬃ ኣሳቴꬃ ቦላ ቆሆ ኔ ጋꬂዳኮ ቱማ ኔና ቆንጬራ ጫያና» ጊዴስ።
JOB 2:6 ጎዳይካ ጻላኤዛ፥ «ኣኔ ሎኦ፤ ዎꬎ ዎꬎፓ ኣቲን ኢዛ ቦላ ኔ ኮዪዳይሳ ኦꬃናስ ዳንዳያሳ» ጊዴስ።
JOB 2:7 ሄሳፌ ጉዬ ጻላኤይ ጾሳ ሲንꬃፌ ኬኢዲ ኢዮቤስ ሁኤ ቢናናፔ ዶሚዲ ቶሆ ጹጉንꬅ ጋካናዉ ዎልቃማ ማዱንꬃን ዋዬታና ማላ ኦꬂዴስ።
JOB 2:8 ሄሳፌ ዴንዲዳይሳን ኢዮቢ ቢዲንꬃ ቦላ ኡቲዲ ባ ማዱንꬃ ኮንኣን ቃች ዶሚዴስ።
JOB 2:9 ኢዮቤስ ማቼያ፥ «ሃኢካ ጾሳ ቦላ ዲዛ ኔ ኣማኖዚ ሚኖ ዲዜ? ጾሳ ጫያዳ ሃይቃ!» ጋዱስ።
JOB 2:10 ኢዮቢካ፥ «ዋናዳ ኤያ ማጫሳ ሃሳያ ሃሳያይ? ጾሲ ሎኦ ሚሽ ኢሚዛ ዎዴ ኡፋይሳን ኤኮስ፤ ሃኢ ጊዲኮ ኢታ ኢዚ ኑ ቦላ ኤሂሺን ኢዛ ቦላ ዙዙማናስ ቤሲዜ?» ጊዴስ። ኢዮቢ ሃ ኡባ ሜቶይኔ ዋዬይ ኢዛ ቦላ ጋኪንካ ኢዚ ጾሳ ቦላ ኢታ ሚሽ ሃሳይዲ ናጋራ ኦꬂቤና።
JOB 2:11 ቴማኔ ዴሬ ኣስ ኤልፋዜ፥ ሹሃ ዴሬ ኣስ ቤሊዳዲኔ ናኢማኔ ዴሬ ኣስ ዞፋሬ ጌቴቲዛ ሄꬑ ላጌቲ ኢዮቤስ ዴቴስ። ኢስቲካ ኢዮቤ ቦላ ጋኪዳ ሜቶዛ ሲዪዳ ዎዴ ኢዛስ ኢስቲ ቃꬌቶይሳ ቆንጪሳናሲኔ ኢዛ ሚንꬄꬃናስ ባንታ ዴሬፔ ጼይጌቲዲ ኢሲፌ ኢዮቤኮ ዪዳ።
JOB 2:12 ቡሮ ሃኮራ ዪሺን ኢዮቤ ቤኢዳ፤ ጊዶ ኣቲን ኢዚ ኢዮቤ ጊዲዳይሳ ሻኪ ኤራናስ ዳንዳይቤቴና። ኢስታስ ዎዚናይ ሜቂን ኢዛስ ሚሼቲዲ ባንታ ማይኦዛ ዳኪዳ፤ ጉዱላዛ ኤኪዲ ፑዴ ሳሎ ላሊዳ፤ ባንታ ሁኤንካ ማኪዲ ኣዳፌ ዋሲዲ ዬሆ ዶሚዳ።
JOB 2:13 ኢዛስ ዋዬዛ ዳራ ቤኢዳ ጊሻስ ኣይኮ ሃሳዮንታ ኢዛራ ላፑን ጋላሳኔ ላፑን ኦማርስ ቢታ ቦላ ኡቲዲ ጋምኢዳ።
JOB 3:1 ሃይሳፌ ጉዬ ኢዮቢ ሃሳያ ዶሚዴስ፤ ባ ዬሌቲዳ ጋላሳ፥
JOB 3:2 «ታኒ ታ ኣዬይ ኡሎን ሜꬌቲዳ ኦማርሳያኔ ታኒ ዬሌቲዳ ጋላሳያ ቃንጌቲዳይታ ጊዴቶ!
JOB 3:4 ሄ ጋላሳይ ꬉማን ላሜቶ፤ ሳሎ ጾሳይ ኢዛ ቆፖፎ፤ ፖኦይ ሙሌካ ኢዛን ቤቶፎ።
JOB 3:5 ሻሩማኒኔ ጊርዲ ጊዳ ꬉማን ካሜቲዳይሳ ጊዶ፤ ሻራይ ካሚን ꬉማይ ኢዛ ፖኦ ሚቶ።
JOB 3:6 ሄ ጋላሳ ኦማርሳዮ ጊርዲ ጊዳ ꬉማይ ካሞ፤ ላይꬃ ጋላሳታራ ኢሲፌ ታይቤቶፎ፤ ኣጊናታ ቆዳን ጌሊ ቆፌቶፎ።
JOB 3:7 ሄ ጋላሳ ኦማርሳይ ኣይኮይ ባይንዳዝ ጊዶ፤ ኡፋይሳ ቃላይካ ኢዛን ሴቴቶፎ።
JOB 3:8 ሌዋታኔ ጌቴቲዛ ዶኣ ቃሴꬃናስ ዳንዳይዛይቲ፥ ጋላሳታ ቃንጊዛይቲ፥ ሄ ጋላሳዮ ቃንጌቶ።
JOB 3:9 ሄ ጋላሳ ኦማርስ ባካሌ ጾሊንቴቲ ꬉሜቶ፤ ፖኦ ሂዶታይ ኢዛን ቤቶፎ፤ ዎንታ ጻልቄይ ኢዛን ጻልቆፎ።
JOB 3:10 ታ ኣይፌታፔ ሜቶ ጌንꬃና፥ ታ ኣዬይ ኡሎ ታ ቦላ ጎርዶንታ ኣጊዳ ጊሻስ ሄ ጋላሳይ ቃንጌቲዳይሳ ጊዶ።
JOB 3:11 «ታ ኣዬይ ኡሎን ዳሼ ሃꬄ ጊዳ ኣቲዳኮ ኣዜ! ታ ኣዬይ ኡሎፔ ኬኢዳ ማላ ኣይስ ሃይቃቤኪና?
JOB 3:12 ጉልባቴቲ ታና ሞኪ ኤካናስ፥ ꬋንꬃቲካ ታና ꬋንꬃናስ ኣይስ ቤቲዶ?
JOB 3:13 ሃኢ ታኒ ሳሮን ኢቺዳኮ፥ ꬊስካዳካ ሼምፖ ዴማናኮሺን።
JOB 3:14 ሃኢ ላሌቲ ቤቲዛይታ ባስ ኬጺዳ ቢታ ካዎታራኔ ዞሪዛይታራ ታ ꬊስካዳ ሼምፖ ዴማናኮሺን።
JOB 3:15 ባ ኬꬃ ዎርቃኒኔ ቢራን ኩንꬂዳ፤ ዳናታራ ታ ኢሲፌ ሼምፓናኮሺን።
JOB 3:16 ቃሴካ ኣይስ ቢታ ጋርሳን ሞጌቲዳ ኣዉጫያ፥ ዎይኮ ኢሲ ጋላሳ ፖኦ ሙሌካ ቤኦንታ ና ማላ ኣይስ ጊዳቤኪና?
JOB 3:17 ሄን ኢታታ ዋዪሶይ ኣታና፤ ዳቡርሲዛ ኦሶን ዴኢዳይቲ ሼምፓና።
JOB 3:18 ቃሼቲ ዲዛ ኣሳቲካ ሳሮ ዴማና፤ ባና ኦሲሲዛ ኣሳታ ሃንቆ ቃላ ሲያናይሳፌካ ኣታና።
JOB 3:19 ላፋቲኔ ጊታ ኣሳቲ ኢሲፌ ቤታና፤ ኣይሌቲካ ሄን ባ ጎዳታፔ ዎዜታና።
JOB 3:20 «ጾሲ ኡንኦ ቦላ ዲዛይታስ ፖኦ፥ ዱሳዚ ጫሞ ቆፋን ኩሚዳዴስ ዴኦ ኣይስ ኢሚዜ?
JOB 3:21 ሃይቆ ላሞቲዛይታሲኔ ቆቴቲ ዲዛ ኣቆፔ ኣꬂ ኮዪዲ ዴሞንታይታስ ዴኦ ኣይስ ኢሚዜ?
JOB 3:22 ዱጌ ዱፎን ጌሊሼ ኡፋዬቲዛይታስ ዴኦይ ኣይስ ኢሜቲዜ?
JOB 3:23 ኢዚ ቢዛ ኦጌይ ኢዛዴፌ ጌሜቲዳዴሲኔ ጾሲ ጎርዲ ዎꬂዳ ኣሳስ ፖኦይ ኣይስ ኢሜቲዜ?
JOB 3:24 ዬሆይ ታስ ካꬅ ጊዲዴስ፤ ዋሶይካ ታስ ጎጊዛ ሃꬃ ማላ ጊዲዴስ።
JOB 3:25 ታ ያዪዳ ሚሽ ታ ቦላ ዪዴስ፤ ታ ዳጋሚዳይሲካ ታ ቦላ ጋኪዴስ።
JOB 3:26 ታ ጊዶን ሂርጋይ ጻላ ዲዛ ጊሻስ ሳሮይ፥ ዎፓይኔ ሼምፖይ ዴና» ጊ ቃንጊዴስ።
JOB 4:1 ቴማኔ ዴሬ ኣስ ኤልፋዜይ ሂዝጊ ዛሪዴስ፤
JOB 4:2 «ኢዮቤ! ኢሲ ኣሲ ኔ ቦላ ዎልቃꬂ ሃሳይኮ ኢዛዴ ኔ ዳንዳያን ኤዝጋኔ? ሃሳያናፔ ኣቲን ኦኒ ኣጋኔ?
JOB 4:3 ኔኒ ዳሮ ኣሳታ ታማርሳዳሳ፤ ዳቡርዳ ቄሴታካ ሚንꬃዳሳ።
JOB 4:4 ካሴ ኔ ቃላቲ ꬉጴቲዛይታ ማዴቴስኮሺን፤ ኔኒ ኮኮሪዛ ጉልባቴታካ ሚንꬃሳኮሺን።
JOB 4:5 ሃኢ ጊዲኮ ሜቶይ ኔ ቦላ ጋኪዳ ጊሻስ ሂዶታይ ባይንዳዴ ጊዳዳሳ፤ ሜቶይካ ኔ ቦላ ሚኒዳ ጊሻስ ሂዶታ ቃንጻዳሳ።
JOB 4:6 ጾሳስ ኔ ያዪዛ ያሻይ ኣማንꬂዛዝ ጊዴኔ? ኔ ሱሬ ኦጌቲካ ኔስ ሂዶታታ ዴቴኔ?
JOB 4:7 ጺሎ ኣስ ጊዲ ዲሺን ኢዛ ሜቶይ ጋኪዳዴይ፥ ሱሬ ኣስ ጊዲ ዲሼ ቲምኢ ጊ ꬋይዳዴይ፥ ዲኮ ኣኔ ቆፓ።
JOB 4:8 ታኒ ኣኬኪዳ ማላ፥ ኢታቴꬅ ጎዪዲ ሜቶ ዜሪዛይቲ ሄይታንቲ ባ ኦꬆሮ ሺሻና።
JOB 4:9 ኢስቲ ጾሳ ፔኖን ꬋያና፤ ኢዛ ሃንቆ ዳምባላን ኢስቲ ዲፒ ጊ ꬋያና።
JOB 4:10 ኢታቲ ጋሞ ማላ ጻጋና፤ ባ ቃላ ꬎቁ ኦꬂዲ ዋሳና፤ ጾሲ ጊዲኮ ኢስታስ ኣቻ ሜንꬄሬꬃና።
JOB 4:11 ጋሞይ ሻንካቲዲ ሚዛዝ ꬋይዳ ዎዴ ሃይቂዛ ማላ ኢስቲካ ሃይቃና፤ ጋሞ ማራቲካ ላሌቲዛ ማላ ኢስታ ናይቲካ ላሌታና፤
JOB 4:12 ጋላሳፌ ኢሲ ጋላስ ጹራ ጊዲዳ ኪታይ ታኮ ዪዴስ፤ ሄሳ ሄ ኪታዛ ሳሱኬꬃን ታ ሲያዲስ።
JOB 4:13 ኣሳይ ኦማርስ ዎልቃማ ꬊስኮ ሴሪዳ ዎዴ፥ ታና ኢታ ኣጉሞይ ኣጉንꬂዴስ።
JOB 4:14 ባቦይኔ ኮኮርሲ ታና ኦይኪን፥ ታስ ሜቄꬃቲ ኡባይ ኮኮራና ማላ ኦꬂዴስ።
JOB 4:15 ኣያናይ ታ ሲንꬃራ ኣꬊዴስ፤ ዳጋማፔ ዴንዲዳይሳን ታ ሃሳይ ኤቂዴስ።
JOB 4:16 ሄንካ ኢሲ ሚሺ ኤቂ ዲዛይሳ ቤያዲስ፤ ቲሺ ኦꬃ ጼላዲስ ሺን ኢዚ ኣዛኮ ሻካ ኤራናዉ ዳንዳያቤኬ። ሄሳፌ ጉዬ ጮኡ ጊዳሶሆፔ ሂዝጊዛ ቃላ ሲያዲስ፥
JOB 4:17 ‹ጾሳ ሲንꬃን ጺሎ ጊዲ ቤታናስ ዳንዳይዛ ኣሲ ዲዜ? ዎይኮ ባና ሜꬊዳይሳ ሲንꬃን ጌሻ ኣሲ ቤታኔ?
JOB 4:18 ጾሲ ባስ ኦꬂዛይታን ኣማኔቶንታ ኣጊኮ፥ ባ ኪታንቻታ ቦላካ ኢዚ ሞሮ ሚሽ ዴሚዛዝ ጊዲኮ፥
JOB 4:19 ሂስቲን ሃራꬎይ ሞንታ ዲሺን ላሌቲዛ ኢስታ ዮቻይ ቢታፌ ጊዲዳ ኡርቃፌ ኦሴቲዳ ኬꬃ ጊዶን ዲዛይታ ቦላ ዋኒ ኣማኔታኔ?
JOB 4:20 ማላዶፔኔ ኦማርሳፌ ጊዶን ኢስቲ ሜቄሬታና፤ ኤሬቶንታ ዲሺን ኢስቲ ሜርናስካ ꬋያና።
JOB 4:21 ቶሌ ꬊሽኬይ ሾዴቲቺዳ ዱንካኔ ማላ ኢስቲ ኤራቴꬂ ባይንዳ ሃይቃና።›
JOB 5:1 «ኢዮቤ! ኔ ጼይጊን ኔስ ኮያናዴይ ዲኮ ጼይጋ፤ ኔስ ማዶ ኢማና ማላ ኪታንቻታፔ ኣዋይሳኮ ጼላይ?
JOB 5:2 ኤያ ኣስ ዪሎይ ዎꬋና፤ ቃናቴይካ ኣስ ꬋይሳና።
JOB 5:3 ኤያ ኣሲ ሚኒዲ ዲሺን ቤያዲስ፤ ጊዶ ኣቲን ኢዛ ኣቆይ ቆፖንታ ዲሺን ጾሳ ሃንቆን ላሌቲዴስ።
JOB 5:4 ኢዛ ናይቲካ ባ ዴኦዛስ ኣማንꬂዛዝ ዴሜቴና፤ ዱቡሻንካ ኢስታ ጊሻስ ሃሳይዛ ኣስ ኢስቲ ዴሞንታ ጊሻስ ኢስታ ቦላ ቆሆይ ጋካና።
JOB 5:5 ኢዚ ዜሪዳ ካꬃካ ኮሻቲዳ ኣሳቲ ማና፤ ሃራይ ኣቲን ኣጉንꬃ ጊዶን ሞኪዳይሳካ ኢዛስ ኣሼቴና፤ ሳሜቲ ኡቲዳ ኣሳቲ ኢዛ ሃሮዛ ኤካናስ ኣሞቴቴስ።
JOB 5:6 ሜቶይ ጮ ቢታፌ ዴንዴና፤ ዋዬይካ ጋዴፔ ጮ ኬዜና።
JOB 5:7 ታማ ፊንጼꬂ ቦንቆፌ ዴንዲዲ ፑዴ ፊንጺዛ ማላ፥ ኣሲካ ዋዬስ ዬሌቴስ።
JOB 5:8 «ታኒ ኔና ጊዲዳኮ ጾሳ ዎሳና፤ ታ ሜቶ ኡባ ኢዛስ ቆንጪሳና።
JOB 5:9 ኢዚ ቆዳይ ባይንዳ ማላሊሲዛ ሚሽ፥ ፒልጊን ጋኬቶንታ ጊታ ሚሽ ኦꬄስ።
JOB 5:10 ቢታ ቦላ ኢራ ቡኪሴስ፤ ጎሻታካ ሃꬃን ሹጊሴስ።
JOB 5:11 ካዉዪዳይታ ቦንቾን ꬎቁ ሂስቴስ፤ ሙዞቲዛይታ ሚንꬄꬂዲ ኡፋይሴስ።
JOB 5:12 ኢስታ ኦሶይ ፖሌቶንታ ማላ ጌኔ ኣሳታ ቆፋ ሃዳ ኦꬄስ።
JOB 5:13 ጪንጫታ ኢስታ ጌኔ ኦሶዛን ዛሪ ኦይኬስ። ጌኔ ኣሳታ ቆፋካ ኤሶራ ꬋይሴስ።
JOB 5:14 ጋላሳይ ኢስታስ ꬉማ ጊዴስ፤ ቡሮ ሴታ ጋላሳን ኦማርስ ꬉማ ጊዶን ዲዛ ማላ ኢስቲ ታታፌታና።
JOB 5:15 ማንቆታ ኢስታ ሞርኬታ ማሻፌ ኣሼስ፤ ሜቶታንቻታካ ዋዪሲዛይታ ኩሼፔ ኬሲ ኤኬስ።
JOB 5:16 ማንቆታስ ሂዶታ ኢሜስ፤ ማካላቴꬂካ ቢታ ቦላፌ ꬋይሴስ።
JOB 5:17 «ጾሲ ሴሪዛ ኣሲ ኣንጄቲዳይሳ፤ ሄሳ ጊሻስ ኡባ ዳንዳይዛ ጾሳ ሴራ ሌቆፋ።
JOB 5:18 ጾሲ ማዱንꬂኮካ ዛሪዲ ፓꬄስ፤ ኢዚ ሜንꬄስ፤ ባ ኩሼን ዛሪዲ ኮሌስ።
JOB 5:19 ኡሱፑን ቆሞ ቦሻፔ ኔና ኣሺ ኤካና፤ ላፑንꬃዛንካ ኣይ ቆሆይካ ኔ ቦላ ጋኬና።
JOB 5:20 ኮሻ ላይꬃን ኢዚ ኔና ሼምፖራ ፓጻ ዎꬃና፤ ኦላ ላይꬃንካ ኢዚ ኔና ሃይቆፔ ኣሻና።
JOB 5:21 ጾሲ ኔና ኢታ ኢንጻርሳፌ ናጋና፤ ቦሻይ ኔ ቦላ ዪኮካ ያያካ።
JOB 5:22 ዎልቃማታ ቆሆይኔ ኮሻይ ኔና ዳጋንꬄና፤ ቢታ ዶኣታስካ ኔ ያያካ።
JOB 5:23 ኔ ጎዪዛ ጋዴን ኔና ሹቺ ዋዪሴና፤ ዶኣታራካ ኔ ሳሮን ዳና።
JOB 5:24 ኔ ኬꬃን ሳሮይ ኩማናይሳ ኔ ሻካ ኤራና፤ ኔ ሜሄ ጼሊሺን ኣቆፔ ፓጬና።
JOB 5:25 ኔ ዜሬꬃይ ዳራናይሳ ኔ ኤራና፤ ኔ ዜሬꬃይካ ዴምባን ዲዛ ማታ ማላ ዳራና።
JOB 5:26 ካꬂ ካጺዲ ማጼቲዛይሳ ማላ ኔካ ሎኤꬃ ጪማዳ ዱፎን ባና።
JOB 5:27 ኑኒ ሃይሳ ኡባ ፒልጊዲ ቱሙ ጊዲዳይሳ ኤሪዶስ፤ ኔኒካ ኣኬካዳ ሃይሳ ኦሶን ፔይሻ።»
JOB 6:1 ሃይሳፌ ጉዬ ኢዮቢ ሂዝጊ ዛሪዴስ፤
JOB 6:2 «ታ ሙዞቴꬂ ጌዳሬቲ ኡቲዳኮ ኣዜ ዲዛይ! ታ ሜቶይ ኡባይ ጌዳራን ጌዳሬቲ ኡቲዳኮ ኣዜ ዲዛይ!
JOB 6:3 ኣባ ላንቄን ዲዛ ኣጬፔ ኣꬊ ዴጻናኮሺን፤ ሄሳ ጊሻስ ዳንዳያይ ፓጪዳ ታ ሃሳያይ ኔና ማላሊሳናስ ቤሴና።
JOB 6:4 ኡባ ዳንዳይዛ ጾሳይ ታና ባ ዪሻታን ጫዲዴስ፤ ኢስታ ማርዜቲካ ታ ኣሳቴꬃ ጊዶን ላሌቲዳ፤ ዳጋንꬂዛ ጾሳ ቦሻይ ታ ዩሾን ዩዪ ኣꬊዴስ።
JOB 6:5 ቱማፔ ሃርዲዳይ ጪሊላ ማታ ዴሚዲ ጫጊ ኤሪዜ? ቦራይካ ባሶ ማታ ዴሚኮ ጻጊ ኤሪዜ?
JOB 6:6 ማጺኔይ ጌሎንታ ማልኦንታ ካꬂ ሜቴቲዜ? ጱጱሌ ሃꬂ ማልኢዜ?
JOB 6:7 ሃይሳ ማላ ካꬅ ማናስ ኮይኬ፤ ሙሲ ኣቲን ኩሼንካ ቦቺኬ።
JOB 6:8 «ታ ኣሞቲዛይሳ ጾሲ ታስ ኢሚዳኮ ኣዜ ዲዛይ! ኢዚ ታ ዋሶ ሲዪዳኮ ኣዜ ዲዛይ!
JOB 6:9 ሃይሳ ኡባፌ ኢዛስ ሼኔ ጊዲን ኢዚ ታና ሜንꬄሬꬂ ዬጊዛኮ! ባ ኩሼዛ ዬዲዲ ኢዚ ታና ꬋይሲዳኮ!
JOB 6:10 ሼምፖ ኢሞንታ ኣይ ሃርጌይ ታና ሳኪኮካ ታኒ ኡፋይሳን ጉፓና፤ ታኒ ጌሻዛ ቃላ ኣይ ዎዴንካ ካዳቤኬ፤
JOB 6:11 «ዴኦን ዴኣና ማላ ዳንዳይዛ ኣይ ሚኖቴꬂ ታስ ዲዜ? ሂዶታይ ባይንዳ ኣጊኮ ኣይስ ዴኣዚና?
JOB 6:12 ታኒ ሹቻ ማላ ሚኖ? ታ ኣሳቴꬃይካ ጻርቂማላꬆ ሚኖ?
JOB 6:13 ታና ማዳናስ ታስ ኣይኮ ዎልቃይ ዴና፤ ታስ ዲዛ ዎልቃይ ኡባይ ኤኬቲቺዴስ።
JOB 6:14 «ኡባ ዳንዳይዛ ጾሳስ ያሽ ኣጊዳዴሲኔ ዳቡርዳዴስካ ኢዛ ላጌይ ኢዛስ ኪያቴꬅ ቤሳናስ ኮሼስ።
JOB 6:15 ታ ኢሻቲ ጊዲኮ ሃሮይ ሃሮቲ ዎꬊዳፔ ጉዬ ሜሊዛ ኣማንꬆንታ ሻፋታ ማላ ባሌꬂዛይታ።
JOB 6:16 ሻፋታን ባልጎ ባልጎ ሻቺ ኩሜስ።
JOB 6:17 ቦኔ ኣጊናታን ጊዲኮ ማዪ ꬋዬስ፤ ሻፋቲካ ሃꬂ ባይንዳ ሜላታ ጊዴቴስ።
JOB 6:18 ጫና ሜሄታ ላጊ ኦጌራ ቢዛ ኣሳቲ ሃꬅ ኮሻስ ኦጌፔ ኬኢ ባዞ ቢታ ጌሊዲ ቶይሉ ቶይሊሼ ꬋዬቴስ።
JOB 6:19 ቴማ ቢታፌ ቢዛ ማንዳራ ኣሳቲ ሃꬄ ኮዬቴስ፤ ሳባ ዴሬ ዛልኣንቻቲካ ሃꬄ ዴማናስ ሂዶታ ኦꬄቴስ።
JOB 6:20 ባንቲ ኣማኔቲ ኡቲዳ ሻፋቲ ሜሊዳይሳ ቤኢዲ ሂዶታ ቃንጼቴስ፤ ሃꬃኮ ጋኪዛ ዎዴ ዪሎቴቴስ።
JOB 6:21 ኢንቴካ ታስ ሃይታ ሃ ሻፋታ ማላ፤ ታ ቦላ ጋኪዳ ሜቶዛ ቤኢዲ ጌዴ ጉዬ ባቃቲዴታ።
JOB 6:22 ሂስቲን ታ ኢንቴና ሄሳ ዎይኮ ሃይሳ ታስ ኢሚቴ፥ ዎይኮ ኢንቴ ሃሮዛፔ ኬሲዲ ታና ኣሺቴ ጋዲና?
JOB 6:23 ቃሴ ታ ሞርኬታ ኩሼፔ ታና ኣሺቴ፤ ዎይኮ ታና ዋዪሲዛይታ ኩሼፔ ታና ኬሲ ኤኪቴ ጋዲና?
JOB 6:24 «ታና ታማርሲቴ፤ ታኒካ ጮኡ ጋና፤ ታ ሞሮዛካ ታና ቤሲቴ።
JOB 6:25 ቱማ ቃላይ ጫሞ ጊዲኮካ ኤኬቴስ፤ ኢንቴ ዋላሳይ ጊዲኮ ኣይኮስካ ጎኤና።
JOB 6:26 ኢንቴ ታ ሃሳያ ጫርኮ ማላ ቆዴታ፤ ሂስቲኮ ሂዶታ ቃንጺዳ ታስ ዛሮ ኢማናስ ኣይስ ኮዬቲ?
JOB 6:27 ዪኦ ናይታ ቦላ ሳማ ዬጌታ፤ ኢንቴ ኢንቴ ሲቆ ላጌታ ባይዛናስ ሚሻን ማርሼቴቲ?
JOB 6:28 «ኣኔ ታና ሃ ጼሊቴ፤ ኢንቴ ሲንꬃን ታ ዎርዶታዲና?
JOB 6:29 ኢንቴስ ቆሆ ጊዶንታ ማላ ሲሚቴ፥ ታኒ ሊኬ ኣሳኮ!
JOB 6:30 ቱሙካ ታ ኢንጻርሳን ቆሆይ ቤታኔ? ታ ዶናይካ ጌኔ ሚሽ ሻኪ ኤራናስ ዳንዳዬኔ?
JOB 7:1 «ኣሳስ ቢታ ዱሳይ ባጼ ዱስ ዴኔ? ኢስታስ ጋላሳይካ ኡኔ ኦꬂዛ ኦሳንቻታ ጋላሳ ማላ ጊዴኔ?
JOB 7:2 ኢስቲካ ኩዋ ጋርሳን ሼምፓናስ ኣሞቲዛ ኦሳንቻታኔ ባ ዳሞዛ ኤካናስ ናጊዛ ኡኔ ኣሳ ማላ ጊዴቴኔ?
JOB 7:3 ታ ዳቡርዳ ኣጊናቲ ታስ ጎኣይ ባይንዳይታ ጊዲዳ፤ ሜቶ ኦማርሳቲካ ታስ ቆፋ ኦማርስ ጊዲዳ።
JOB 7:4 ኢቺዛ ዎዴ ኣዉዴ ዴንዳንዲናሻ ጋዳ ቆፓይስ፤ ኦማርሳይካ ጊዲኮ ታስ ጌዴ ኣዱቄስ፤ ታኒካ ዎንታና ጋካናስ ሃ ሄ ሺሬታሼ ኣቃይስ።
JOB 7:5 ታስ ኩሜꬃ ኣሳቴꬃይ ጉጹኔን ኩሚዴስ፤ ታስ ኣሾይካ ማዱንጺ ጎጊዴስ፤ ታስ ማዱንꬃይካ ꬉቂዲ ኡዛዜስ።
JOB 7:6 ታ ላይꬃታ ጋላሳቲ ዳꬃ ሞቄ ጾንጌꬃፌ ኤሶቴቴስ፤ ኢሲ ሂዶታይ ባይንዳ ዉርሴꬅ ጋኬቴስ።
JOB 7:7 ታ ጎዳዉ! ታ ሼምፖያ ፔኖ ማላ ጊዲዳይሳ ቆፓ፤ ሃይሳፌ ጉዬ ኡባካ ሎኦ ሚሽ ዴሚኬ።
JOB 7:8 ሃኢ ታና ቤኢዛይሲ ናምኣንꬆ ዛሪዲ ቤዬና፤ ኢዚ ኮይዛ ጊዲኮካ ታና ዴማናዉ ዳንዳዬና።
JOB 7:9 ሻራይ ላሌቲ ꬋይዛይሳ ማላ ሃይቂዲ ዱፎን ቢዛ ኣሲ ሃ ሲሚዲ ዬና።
JOB 7:10 ናምኣንꬆ ዛሪዲ ባሶ ሲሜና፤ ኢዛዴ ኤሪዛይቲ ኡባይ ኢዛ ባሌታና።
JOB 7:11 «ሃይሳፌ ጉዬ ጮኡ ጊኬ! ታስ ኣያናይ ጬጪዳይሳፌ ዴንዲዳይሳን ታ ሃሳያይስ፤ ታ ሼምፖያ ኢራዬቲዳ ጊሻስ ዙዙማይስ።
JOB 7:12 ሃይሳ ሊኬ ናጌቲዛዴ ኔ ታና ኦꬂዳይ ታኒ ኣባዬ? ዎይኮ ኣባ ጊዶን ዲዛ ዶኣዬ?
JOB 7:13 ታ ሂጻይ ታና ሚንꬄꬄስ፤ ታ ኢቺዛሶይ ታ ሳኮዛ ባሌꬄስ ጋዳ ታ ቆፓዲስ።
JOB 7:14 ኔኒ ጊዲኮ ታና ኣጉሞን ያሺሳሳ፤ ኣጁታንካ ዳጋንꬃሳ።
JOB 7:15 ሃይሳ ሜቶይ ዳሪዳ ኣሳቴꬃ ቶካዳ ዳናፔ ታ ጩሌታ ሃይቃናይሳ ዶራይስ።
JOB 7:16 ሂዶታ ቃንጻዲስ፤ ዳናስካ ታ ኮይኬ፤ ታስ ላይꬃይካ ቃንꬅ ጊዲዳ ጊሻስ ታና ኣጋጋ።
JOB 7:17 «ኔ ሶሆ ኢማናሲኔ ቆፓናስ ኣሲ ኣዜ?
JOB 7:18 ዎንታን ዎንታን ፒልጋና ማላ፥ ዎዴን ዎዴንካ ኔ ፓጫና ማላ ኣሲ ኣዜ?
JOB 7:19 ጩች ሚቲዛ ጉꬃ ዎዴካ ታስ ኢሚኪ?
JOB 7:20 ኣሳ ካሌቲዛ ጎዳዉ! ታኒ ናጋራ ኦꬆይሳን ኔኒ ኣይ ቆሄታዲ? ኣይስ ታ ቦላ ኔ ቶራ ዛራዲ? ኣይስ ሃይሳ ኬና ታ ኔና ዴጻዲና?
JOB 7:21 ኡባካ ታ ናጋራ ኣቶ ጊኪ? ታ ኦꬂዛ ቆሆ ታፔ ዲጊኪ? ታ ዱፎን ጌላና ዎዴይ ጋኪዴስ፤ ሃይሳፌ ጉዬ ኔ ታና ኮዪዳኮካ ታ ቤቲኬ።»
JOB 8:1 ሹሃ ዴሬ ኣስ ቤሊዳዴ ጌቴቲዛይሲ ሂዝጊዲ ዛሪዴስ፤
JOB 8:2 «ኔ ዶናፔ ኬኢዛ ቃላቲ ጎቴ ጫርኮ ማላ፤ ኣዉዴ ጋካናስ ሃይሳꬆ ኔ ሃሳያኔ?
JOB 8:3 ጾሲ ፒርዳ ቦካሲ ኤሪዜ? ኡባ ዳንዳይዛ ጾሳይ ጺሎቴꬅ ቦካሲ ኤሪዜ?
JOB 8:4 ኔ ናይቲ ጾሳ ቆሂዳ ጊዲኮ፥ ኢስቲ ባንታ ፒርዳ ኤኪዳ ጉሳ።
JOB 8:5 ጊዲኮካ ኔ ጾሳኮ ሲሚኮ፥ ኡባ ዳንዳይዛ ጾሳ ዎሲኮ፥
JOB 8:6 ሱሬኔ ጌሽ ጊዲኮ ኢዚ ኤሶቲ ኔስ ቤሲዛ ሶሆን ኔና ዛራና።
JOB 8:7 ኔ ዶሜꬃይ ጉꬅ ሚሳቲኮካ፥ ኔስ ፖሎይ ኬሂ ሎኦ ጊዳና።
JOB 8:8 «ኣኔ ካሴ ዬሌታ ኦይቻ፤ ካሴ ኣዋቲ ጋኪዳሶዛ ፒልጋ ጼላ።
JOB 8:9 ኑ ላይꬃዚ ቡሮ ጉꬅ ጊዲዳ ጊሻስ ኑኒ ኣይኮካ ኤሮኮ፤ ኑ ላይꬃይካ ኤሾ ማላ ኣꬊዛዛ።
JOB 8:10 ኢስቲ ኔስ ታማርሲዛይሲኔ ኔስ ዮቲዛይሲ ባ ኣኬኪዛይሳፌ ኤኪዲ ጊዴኔ?
JOB 8:11 ቱሙካ ጫሬይ ባይንዳሶን ሻጫ ማታይ ሞኪ ኤሪዜ? ሃꬂ ባይንዳሶን ማርጮይ ጪሊሊዜ?
JOB 8:12 ሃይሲ ሃኖንታ ኣጊኮ ዲጪዲ ቡች ጋካናፔ ሲንꬃን ቡሮ ጪሊላን ዲሼ ሜሌስ።
JOB 8:13 ጾሳ ዶጊዛ ኣሳታ ኡባ ዉርሴꬃይ ሄሳ ማላ ሃናና፤ ጾሲ ባዋ ጊዛ ኣሳታ ሂዶታይ ቃንጼታና።
JOB 8:14 ኣቻሮ ኬꬃ ማላ ሚሻን ኣማኔቴቴስ፤ ኢስቲ ሂዶታ ኦꬂዛ ሚሺ ዲኮካ ካዉሻራ ꬋያና።
JOB 8:15 ኣቻሮ ኬꬃ ቦላ ኢስቲ ዜምፒዛ ጊዲኮ ኢዚ ሚኒ ኤቄና፤ ኣቻሮ ኬꬃዛ ኢዚ ኦይኪኮ ዱጼሬቲ ዎꬋና።
JOB 8:16 ሃꬃ ካሊዳ ሃሩማይ ሆኦ ዴሚዲ ዳዬስ፤
JOB 8:17 ጻጶዛ ሹቻ ሙሄ ጊዶን ዬዴስ፤ ዛላ ዛኣን ጻጴስ።
JOB 8:18 ባ ዲዛሶፔ ሾዴቲዛ ዎዴ ኢዚ ዲዛሶዚ ኤሬቴና።
JOB 8:19 ኢዛ ዉርሴꬂ ሄሳ ማላ ጊዴስ፤ ሃራ ማታቲ ቢታፌ ዶሌቴስ።
JOB 8:20 «ጾሲ ዎሶይ ባይንዳ ኣሳታ ኦሌና፤ ኢታ ኣሳታ ቄሴ ሚንꬄና።
JOB 8:21 ሄሳ ጊሻስ ኔኒካ ኡፋይሳን ሚጫና ማላኔ ‹ኢሊላና› ማላ ኢዚ ኦꬃና።
JOB 8:22 ኔና ኢጺዛ ኣሳቲ ጊዲኮ ዬላ ማይኣና፤ ኢታ ኣሳታ ኬꬂካ ꬋያና።»
JOB 9:1 ኢዮቢ ሂዝጊ ዛሪዴስ፤
JOB 9:2 «ኤ! ታኒ ሃይሲ ቱሙ ጊዲዳይሳ ኤራይስ፤ ጊዶ ኣቲን ኣሲ ጾሳ ሲንꬃን ዋኒ ጺሎ ጊዳናስ ዳንዳይዜ?
JOB 9:3 ኢዛራካ ኦኒ ማርሼታናስ ዳንዳይዜ? ኢዚ ኢሲ ሺ ኦይሾታ ኦይቺዛ ጊዲኮ ኢስታፌ ኢሲኖካ ዛራናስ ዳንዳይዛዴይ ዴና።
JOB 9:4 ጾሲ ኤራንቻኔ ዎልቃማ፤ ኢዛራ ኤቄቲዲ ጾኔቶንታይ?
JOB 9:5 ኣኬኮንታ ዙማታ ኮኮርሳና፤ ባ ሃንቆዛንካ ሺሬቺ ዬጋና።
JOB 9:6 ጾሲ ቢታ ዲዛሶፔ ኮኮርሳና፤ ቢታ ቱሳታካ ቃሴꬃና።
JOB 9:7 ኣዋ ኣርሼይ ሞኮንታ ማላ ኦꬃናዉ ዳንዳዬስ፤ ጾሊንቴቲካ ፖኢሶንታ ማላ ኦꬃና።
JOB 9:8 ኦኒካ ማዶንታ ዲሺን ሳሎታ ሚጪዳይ ኢዛ፤ ኢዚ ኣባ ዳምባላ ቦላ ሄሜቴስ።
JOB 9:9 ዛርዶ፥ ኦሪዮኒኔ ፒሊያዲሴ ጌቴቲዛ ጾሊንቴታ፥ ቃሴካ ዱጌ ባጋራ ዲዛ ዳሮ ጾሊንቴታ፥ ሳሎ ቦላ ሜꬊ ዎꬂዳይ ጾሳ።
JOB 9:10 ኢዚ ኦꬂዛ ማላሊሲዛ ሚሻታ ኑኒ ፒልጊዲ ኣኬካናዉ ዳንዳዮኮ፤ ኢዚ ፖሊዛ ማካላ ሚሻታ ኑኒ ቆዳናዉ ዳንዳዮኮ።
JOB 9:11 «ጾሲ ታ ማታራ ኣꬊኮካ ታ ዴሚኬ፤ ሃ ታኮ ሺቂኮካ ሻካዳ ኤሪኬ።
JOB 9:12 ኢዚ ባ ኮዪዳይሳ ኤኪኮ ኦኒካ ኢዛ ዲጌና፤ ‹ኣይስ ሃይሳꬆ ኦꬃይ?› ጊዲ ኢዛ ኦይቻናስ ጻሊዛይ ዴና።
JOB 9:13 ጾሳይ ባ ሃንቆዛፔ ጉዬ ሲሜና፤ ኤራኣቤ ጌቴቲዛ ኣባ ጊዶ ዶኣታ ማዲዛይቲካ ኢዛ ቶሆ ጋርሳን ጉልባታና።
JOB 9:14 «ሂስቲን ታኒ ኢዛስ ዛሮ ዋና ኢማና ዳንዳያዚና? ኢዛራ ማርሼታናስ ኣይ ቃላ ታ ዴማኔ?
JOB 9:15 ጌሽ ጊዳ ታ ቤቲዳኮካ፤ ታ ቦላ ፒርዲዛዴይ ታና ማራና ማላ ዎሳና ኣቲን ኢዛስ ዛሮ ኢማናስ ጻሊኬ።
JOB 9:16 ታ ኢዛ ሱንꬃ ጼይጊኮ ኢዚ ዛሮ ታስ ኢሚዛ ጊዲኮካ ታ ማጋና ኢዚ ሲያና ጋዳ ታ ኣማኔቲኬ።
JOB 9:17 ኢዚ ታና ጎቴ ጫርኮን ሊቂሳና፤ ኣይኮ ጋሶይካ ባይንዳ ታስ ማዱንꬃ ሃ ዳርሳና።
JOB 9:18 ሼምፖ ታ ዛራና ዎዴይ ጋካናስካ ታስ ሼምፖ ኢሜና፤ ታ ሼምፖን ዋዬ ኩንꬂዴስ።
JOB 9:19 ታስ ዲዛ ዎልቃን ታ ኢዛራ ባጼታና ጎንታ ማላ ዎልቃን ኢዛራ ኤቄቲዲ ዳንዳያናይ ዴና፤ ታ ሞቴታዳ ኢዛ ላꬃና ጎንታ ማላ ኢዛ ፒርዲዛ ኣሳታኮ ሺሻናስ ዳንዳይዛ ኣሲ ዴና።
JOB 9:20 ታኒ ጌሺኔ ጺሎኮሺን ታ ሃሳያይ ታና ቆሃንቻ ኬሴስ፤ ታ ሃሳይዛ ሃሳያቲ ኡባይ ታ ቦላ ፒርዴቴስ።
JOB 9:21 «ኣይኮካ ታኒ ቦሬይ ባይንዳዴ ጊዲኮካ ታ ጊሻስ ቆፒኬ፤ ታ ሼምፖዮካ ሃራሴታይስ።
JOB 9:22 ጾሲ ጺሎዛኔ ቆሃንቻዛካ ꬋይሲዛ ጊሻስ ኣይኮ ዱማቴꬂካ ዴና ታ ጊዳይ ሄሳ ጊሻሳ።
JOB 9:23 ኣሲ ኢታ ሜቶን ዉርሺን ኢዚ ጌሻ ኣሳ ሜቶ ቂꬌስ።
JOB 9:24 ቢታይ ኢታ ኣሳታ ኩሼን ኣꬊ ኢሜቲሺን ኢዚ ፒርዲዛ ኣሳታ ኣይፌ ጎዜስ፤ ሃይሳ ኦꬂዳይ ጾሳ ጊዶንታ ኣጊኮ ሃራይ ኦኔ?
JOB 9:25 «ታ ላይꬃቲ ዎጺዛይታፔ ሃ ኣꬊ ኤሶቴቴስ፤ ኣይኮ ኡፋይሲካ ታ ዴሞንታ ኣꬌቴስ።
JOB 9:26 ኢስቲካ ሶኬ ጊዛይሳፌ ኦሴቲዳ ዎጎሎ ማላ ኤሶቴቴስ፤ ባቂ ኤኪዛ ጎሌ ካፎ ማላ ኤሶቴቴስ።
JOB 9:27 ታኒ ታ ዙዙንꬃ ባላና፤ ‹ታ ሲንꬃካ ካሬꬆ ኣጋዳ ኣኔ ፖኢሳ ቤሳይስ› ጊኮ፥
JOB 9:28 ጾሲ ታና ጌሽ ኦꬂዲ ቆዶንታይሳ ታኒ ኤሪዛ ጊሻስ ሜቶይኔ ዋዬይ ታ ቦላ ጋካና ጋዳ ያያይስ።
JOB 9:29 ሂስቲን ታ ቆሃንቻ ጌቴታ ቆዴቲዳ ጊዲኮ ታስ ሃዳ ዳቡራይ ኣዛሴ?
JOB 9:30 ታኒ ታ ኣሳቴꬃ ሳሙናን ሜጪዛ ጊዲኮ፥ ታ ኩሼዛካ ኬሃ ጌሺዛ ጊዲኮ፥
JOB 9:31 ሃ ኡባ ኦꬂንካ ኔኒ ዱጌ ኢታ ጪማን ታና ኦላና፤ ታ ማይኦቲካ ታና ሻቴታና።
JOB 9:32 ኢዚ ታ ማላ ኣስ ጊዶንታ ጊሻስ፥ ፒርዲዛ ኣሳታኮ ቢዲ ፒርዴቶስ ጋናዉ ዳንዳይኬ።
JOB 9:33 ኑ ቦላ ባ ኩሼዛ ጋꬂ ዎꬂዲ ፒርዲ ኑና ሻኪዛ ኣሲ ኑ ጊዶን ዲዛኮ፥
JOB 9:34 ኢዛ ቴማቴꬂ ታና ሂርጊሶንታ ማላ ጾሲ ባ ጉፌዛ ታ ቦላፌ ዴንꬂዳኮ፥
JOB 9:35 ታኒ ኢዛስ ያዮንታ ሃሳያናኮሺን፤ ሃኢ ጊዲኮ ታ ዲዛ ሃኖን ዳሼ ሃሳያና ዳንዳይኬ።
JOB 10:1 «ዱሲ ታና ሳሌꬂዴስ፤ ታ ዴኢዛ ጫሞ ዴኦዛ ቆንጬን ሲሳና።
JOB 10:2 ታኒ ጾሳ ሂዝጋና፤ ታ ቦላ ኔስ ላንጬይ ዲኮ ታስ ቆንጪሳ ኣቲን ታ ቦላ ፒርዶፋ!
JOB 10:3 ሃይሳ ሊኬ ኔ ታና ሜቶꬆይሲ ኔስ ዎጋ? ኔኒ ኔርካ ሜꬊዳ ኣሳ ኔ ካꬋናስ ኔስ ቤሲዜ? ኢታ ኣሳታ ዱላታይ ኔና ኡፋይሲዜ?
JOB 10:4 ኔ ኣይፌይ ኣሳ ኣይፌ ማላ? ዎይኮ ኔ ኣሳꬆ ጼላይ?
JOB 10:5 ኔ ዎዴቲ ኣሳይሳ ማላ? ዎይኮ ኔ ላይꬃቲ ኣሳ ላይꬃ ማላ ቃንꬄ?
JOB 10:6 ኣይስ ኔ ታ ቆሆዛ ጼላይ? ኣይስ ኔ ታ ናጋራካ ካላ ካላዳ ኣጎንታ ኢጻይ?
JOB 10:7 ታኒ ቆሆንታይሳኔ ኔ ኩሼፔ ኦኒካ ታና ኣሾንታይሳ ኔ ኤራሳ።
JOB 10:8 ታስ ሜꬋኔ ማላ ኢሚ ሜꬊዳይ ኔ ኩሼታ፤ ሂስቲን ሃኢ ሃ ኩሼቲ ታና ዛሪ ላሊ ꬋይሳኔ?
JOB 10:9 ማና ሚሻ ማላ ኔ ታና ቢታፌ ሜꬎይሳ ቆፓ፤ ሂስቲን ሃኢ ኔ ታና ጉዱላ ማላ ሊቂሳኔ?
JOB 10:10 ታና ማꬃ ማላ ቲጋዳ፥ ሜቆ ማꬃ ማላ ኢርኪሳ ኦꬃዳሳ።
JOB 10:11 ታ ኣሳቴꬃ ጋልባኒኔ ኣሾን ካማዳሳ፤ ሜቄꬃኒኔ ሻያን ጋꬃ ኦይꬃዳሳ።
JOB 10:12 ዴኦኔ ሜርና ሲቆ ታስ ኢማዳሳ፤ ኔ ናጎይካ ታ ኣያና ሚንꬂዴስ።
JOB 10:13 «ሄኮ ሃይታ ሃ ሚሻታ ኔ ዎዚናን ቆታ ዎꬃዳ ዳሳ፤ ኔ ቆፋይካ ሃይሳ ጊዲዳይሳ ታ ኤራዲስ።
JOB 10:14 ታ ቆሂዳ ጊዲኮ ኔ ኣይፌቲ ቤያና፤ ታ ናጋራ ጊሻስ ታና ቃጻዮንታ ኣꬋካ።
JOB 10:15 ታ ናጋራ ኦꬂዳኮ ኤሶራ ሜቶ ጊዶን ኩንዳና፤ ሎኦ ሚሽ ኦꬂዳ ጊዲኮካ ጋላቴቲኬ፤ ታ ጊልቂን ዬላይ ታና ጋኪዴስ።
JOB 10:16 ታ ኦቶሬቲዳኮ ኔ ታና ጋሞ ማላ ሻንካታዳ ኦይካና፤ ኔ ታና ቆሃናስ ዛራ ዛራ ሻንካታና።
JOB 10:17 ታ ቦላ ማርካቲዛ ኣሳታ ኔ ኡባ ጋላስ ዴማና፤ ታ ቦላ ኔ ሃንቆይ ጌዴ ዳሪ ዳሪ ባና፤ ኔኒ ታና ቆሃናስ ኡባ ጋላስ ኦራꬃ ቆፋታ ኦላ ኣሳታ ማላ ታ ቦላ ዴንꬃሳ።
JOB 10:18 «ታ ጎዳ ጾሳዉ! ኣይስ ታ ዬሌታና ማላ ኦꬃዲ? ኦኒካ ታና ቤኦንታ ታ ሃይቃይቺዳኮ ሎኦኮሺን!
JOB 10:19 ታ ሜꬌቶንታ ኣታርኪና፤ ታኒ ታ ኣዬይ ኡሎፔ ዱፎን ቢዳኮ ታስ ሎኦ ጊዳናኮሺን!
JOB 10:20 ታ ዳና ላይꬃያ ቃንꬅ ጊዴኬ? ሄ ቃንꬃ ላይꬃይን ጉꬃራ ታ ኡፋዬታና ማላ ታና ኣጋርኪ!
JOB 10:21 ሄሲካ ታኒ ናምኣንꬆ ሃ ሲማናስ ዳንዳዮንታ ጊርዲ ጊዳ ꬉማሶ ባናፔ ሲንꬃና።
JOB 10:22 ታ ባናሶዚ ꬉማ ኩዋይኔ ሺሮይ ኩሚዳ ቢታ፤ ሄን ዲዛ ፖኦዚ ꬉማ ማላ።»
JOB 11:1 ናኢማኔ ዴሬ ኣስ ዞፋሬይ ሂዝጊዴስ፤
JOB 11:2 «ሃይሳ ሃ ሃዳ ቃላታስ ኡባስ ዛሮ ኢሚዛይ ባዬ? ኣሲ ሃሳያ ዳሮን ጺሎ ጊዳና ዳንዳይዜ?
JOB 11:3 ኢዮቤ! ኔ ሃሳይዳ ሃዳ ሃሳያታስ ዛሮይ ኢሜቶንታ ሚሳቲዜ? ኔ ሃይሳ ማላ ቂልጪሺን ኔና ሴራና ኣሲ ባይንዳዝ ሚሳቲዜ?
JOB 11:4 ኔ ቆፋን፥ ‹ታኒ ጺሎ› ጋሳ፤ ጾሳስካ፥ ‹ኔ ሲንꬃን ታኒ ጌሻ› ጋሳ።
JOB 11:5 ጾሲ ኔስ ሃሳይዳኮኔ ሊኬ ዛሮ ኢሚዳኮ ኣዜ ዲዛይ!
JOB 11:6 ኤራቴꬃስ ኦጌይ ዳሮ ጊዲዳ ጊሻስ፥ ጾሳይ ኔስ ኤራቴꬃ ጹራ ቆንጪሲዳኮ ኣዜ ዲዛይ! ሄሳ ጊሻስ ጾሲ ኔና ቃጻዪዛይ ኔስ ቤሲዛይሳፌ ጉꬃራ ጊዲዳይሳ ኤራ።
JOB 11:7 «ኔኒ ጾሳስ ጪማ ጊዲዳ ጹራ ኤራናስ ዳንዳያይ? ኡባ ዳንዳይዛ ጾሳ ፒልጋዳ ጋካናዉ ዳንዳያይ?
JOB 11:8 ኢዛ ጊታቴꬃይ ሳሎፔ ቦላ፤ ኔኒ ኣይ ኦꬃናዉ ዳንዳያይ? ኢዛ ጪማቴꬃይካ ሲኦሌፔካ ዚቃ፤ ኔኒ ኣይ ኤራይ?
JOB 11:9 ጾሳ ጊታቴꬃይ ቢታፌ ዳሬስ፤ ኣባፌ ኣኬስ።
JOB 11:10 ጾሲ ዪዲ ቃቺኮ፥ ጌዴ ፒርዳ ኬꬅ ሺሺዳኮ ኦኔ ኢዛ ዲጋናይ?
JOB 11:11 ጾሲ ጎኦንታ ኣሳታ ኤሬስ፤ ኢዚ ቆሆ ቤዪሼ ጮኡ ጊዲ ጼሌና።
JOB 11:12 ኤያ ኣሲ ኤራንቻ ጊዳናፔ ሃሬይ ኣስ ጊዲዲ ዬሌታናይሲ ካዉያና፤
JOB 11:13 ጊዲኮካ ኔኒ ኔ ዎዚና ሱሪሲኮ፥ ኔ ኩሼዛ ሚጫዳ ፑዴ ጾሳኮ ዎሲኮ፥
JOB 11:14 ኔኒ ናጋራፔ ሃኪኮ፥ ኢታ ሚሺካ ኔሶን ቤቶንታ ማላ ኔ ኦꬂኮ፥
JOB 11:15 ሄ ዎዴ ꬎቁ ጋዳ ዬላይ ባይንዳ ኡባ ሚሽ ኔ ቤያና፤ ዬላይ ባይንዳ ሚና ኤቃናዉ ዳንዳያሳ።
JOB 11:16 ኔ ሜቶዛ ኡባ ኔ ዶጋና፤ ኔ ኣኬኪዛይካ ኣꬊ ቢቺዳ ሃሮ ሃꬃ ማላ ጊዳና።
JOB 11:17 ኔ ሼምፖያ ሴታ ጋላሳ ኣዋፔ ኣꬋዳ ፖኣና፤ ꬉማይካ ዎንታ ፖኦ ማላ ጊዳና።
JOB 11:18 ኔስ ሂዶታይ ዲዛ ጊሻስ ኔኒካ ኣማኔታዳ ዳና፤ ጾሲ ኔና ናጊዛ ጊሻስ ኔኒ ሂርጋይ ባይንዳ ዎፑ ጋዳ ዳና።
JOB 11:19 ኔ ኦናስካ ባቦንታ ኢቻና፤ ዳሮ ኣሳቲካ ኔ ሲንꬃን ቦንቾ ዴማናስ ኮያና።
JOB 11:20 ኢታታ ኣይፌይ ቆቃና፤ ኢስቲ ኣታና ኦጌቲ ኡባይ ጎርዳ ጊዳና፤ ኢስታ ዉርሴꬃይካ ሃይቆ።»
JOB 12:1 ኢዮቢ ሂዝጊ ዛሪዴስ፤
JOB 12:2 «ቱሙካ ኢንቴ ኬሂ ኤራንቻታ፤ ኢንቴ ሃይቂሺንካ ኤራቴꬂ ኢንቴናራ ኢሲፌ ሃይቃና ሚሳቴስ።
JOB 12:3 ጊዶ ኣቲን ታስካ ኢንቴይሳ ማላ ኣኬካይ ዴስ፤ ታኒ ኢንቴፌ ኣይ ሚሻንካ ጉጺኬ፤ ኢንቴ ሃሳይዳይሳ ኣሲ ኡባይ ኤሬስ።
JOB 12:4 «ታ ጾሳ ጼይጊን ታስ ኢዚ ዛሪዳ ዎዴይ ዴስ፤ ሃኢ ታኒ ታ ላጌታስ ቂꬌስ ጊዳዲስ፤ ታኒ ሞሮይ ባይንዳ ጺሎ ኣሳ ኡባስ ቂꬌስ ኣታዲስ።
JOB 12:5 ሜቶይ ኢዛ ቦላ ጋኮንታ ኣሳ ማታን ሜቶቲዳ ኣሳ ሜቶ ሌቃናይሲ ካዉሻ ሚሻ፤ ጊዶ ኣቲን ኩንዳናስ ጋንዲጋርዛዴ ሱጊ ዬጌታ።
JOB 12:6 ባ ኤቃ ጾሳታ ጎይኒዛይቲ፥ ካይሶቲኔ ጾሳ ካዲዳ ኣሳቲካ ሳሮን ዴቴስ።
JOB 12:7 «ጊዲኮካ ሜዶሳታ ኦይቻ፤ ኢስቲ ኔና ታማርሳና፤ ሳሎ ካፎታ ኦይቻ፤ ኢስቲ ኔስ ዮታና።
JOB 12:8 ዎይኮ ቢታይስ ዮታ፤ ኢዛካ ኔና ታማርሳና፤ ኣባ ጊዶ ሞሌቲካ ኔስ ዮታና።
JOB 12:9 ሃይሳ ኡባ ጊዶፌ ጾሳ ኩሼይ ሃይሳ ኦꬂዳይሳ ኤሮንታይ ኦኔ?
JOB 12:10 ሼምፖራ ፓጻ ዲዛ ሜꬌቴꬂ ኡባይኔ ኢሲ ኢሲ ኣሳ ሼምፖይ ጾሳ ማታ ጊዶን ዴስ።
JOB 12:11 ኢንጻርሲ ካꬃ ቃና ሻኪ ኤሪዛይሳ ማላ፥ ሃይꬂካ ሃሳያ ቆሞታ ሻኪ ኤሬስ።
JOB 12:12 ኤራቴꬃይ ጪማቴꬃን፥ ኣኬካይካ ላይꬃ ኣዱሳቴꬃን ቤቴቴስ።
JOB 12:13 «ጾሳስ ጊዲኮ ኣꬎ ኤራቴꬂኔ ዎልቃይ ዴስ፤ ዞሬይኔ ኣኬካይ ኢዛ ማታፔ ቤቴቴስ።
JOB 12:14 ጾሲ ላሊዳይሳ ኦኒካ ዛሪ ኬጻናዉ ዳንዳዬና፤ ጾሲ ቃቺዳይሳ ኦኒካ ቢርሻናዉ ዳንዳዬና።
JOB 12:15 ጾሲ ኢራ ዲጊኮ ኮሻ ጊዳና፤ ኢራ ቡኪሲኮ ቃሴ ቢታይ ሃሮን ሜጬታና።
JOB 12:16 ጾሲ ሚኖኔ ጾኒዛዴ፤ ባሌቲዛዴይኔ ባሌꬂዛዴይ፥ ናምኣቲካ ኢዛ ጎዳቴꬃ ጋርሳና።
JOB 12:17 ኢዚ ዞሪዛይታ ኤራቴꬅ ዲጋና፤ ዴሬ ካሌꬂዛይታ ኢዚ ኤያ ኦꬃና።
JOB 12:18 ኢዚ ካዎታ ካዎቴꬃ ኣራታፔ ዎꬃና፤ ቃሾ ኣሳ ማላ ዳንጮ ቢርሺሳና።
JOB 12:19 ቄሴታፔ ኢስታ ቄሴቴꬃ ዎꬂ ኤኪዲ ኢስታ ጎዳና፤ ጎዳቴꬃ ቦላ ዲዛይታ ኢስታ ጎዳቴꬃፌ ዲጋና።
JOB 12:20 ኣማኔቲዳ ኣሳታ ጮኡ ኦꬃና፤ ጪማታፔካ ኣኬካ ዲጋና።
JOB 12:21 ጊታ ኣሳታ ዬላቻና፤ ዎልቃማታ ዎልቃ ዲጋና።
JOB 12:22 ꬉማሶን ቆቴቲዳ ጹራ ቆንጪሳና፤ ሳካና ꬉማ ፖኦን ላማና።
JOB 12:23 ካዎታካ ጊታሳና፤ ዛሪዲካ ꬋይሳና፤ ካዎቴꬃካ ዳርሳና፤ ዛሪዲካ ላላና።
JOB 12:24 ካሌꬂዛይታስ ኣኬካይ ፓጫና ማላኔ ኦጌይ ባይንዳ ባዞ ቢታን ቶይላታና ማላ ኢዚ ኦꬃና።
JOB 12:25 ፖኦይ ባይንዳ ꬉማሶን ኢስቲ ꬉጴታና ማላኔ ማꬆቲዳ ኣሳ ማላ ኢስቲ ጋዲጋዳና ማላ ኦꬃና።
JOB 13:1 «ሄኮ ሃይሳ ኡባ ታ ኣይፌይ ቤዪዴስ፤ ታ ሃይꬂካ ሲዪዲ ኣኬኪዴስ።
JOB 13:2 ኢንቴ ኤሪዛይሳ ኬና ታኒካ ኤራይስ፤ ታ ኣይኮንካ ኢንቴፌ ጉጺኬ።
JOB 13:3 ጊዲኮካ ታ ሃሳያይ ኡባ ዳንዳይዛ ጾሳራ፤ ታ ኢዛራካ ማርሼታና።
JOB 13:4 ኢንቴ ጊዲኮ ዎርዶን ኩሚዴታ፤ ኦናካ ፓꬃናዉ ዳንዳዮንታ ኣኪሜታ ማላ።
JOB 13:5 ሃይሳ ኡባፌ ኢንቴ ጮኡ ጊዳኮ ኤራንቻታ ሚሳቲ ቤታናኮሺን!
JOB 13:6 ታኒ ሺሺዛ ማርሼ ቃላ ሲዪቴ፤ ታ ቆሆካ ታኒ ዮቲሺን ጮኡ ጊዲ ኤዝጊቴ።
JOB 13:7 ጾሳ ሱንꬃን ኣይስ ዎርዶ ሃሳዬቲ? ባሌꬆን ኢንቴ ጾሳ ኡፋይሳና ኢንቴስ ሚሳቲዜ?
JOB 13:8 ኢዛ ቤሶንታ ኦጌራ ማዴቲ? ኢዛስ ጻባቃ ኤቃንዴቲ?
JOB 13:9 ጾሲ ኢንቴና ቆሪዳኮ ኢሲ ሎኦ ሚሽ ኢንቴፌ ዴማንዴሻ? ኢንቴ ኣሳታ ኤይሲዛይሳ ማላ ጾሳካ ኤይሳናዉ ዳንዳያና ኢንቴስ ሚሳቲዜ?
JOB 13:10 ኢንቴ ጌማራ ዎርዶ ማዲኮ ቱማፔ ጾሲ ኢንቴና ሃንቃና።
JOB 13:11 ኢዛ ቦንቾይ ኢንቴና ያሼኔ? ኢዛ ቴማይካ ኢንቴና ዳጋንꬄኔ?
JOB 13:12 ኢንቴ ሌሚሶን ሃሳይዛ ሃሳያቲ ቢዲንꬃ ማላ ጎኣይ ባይንዳይታ፤ ኢንቴ ማርሼቴꬃይካ ማና ሚሻ ማላ ሜቄሬታና።
JOB 13:13 ኣኔ ጮኡ ጊቴ! ታኒ ሃሳያና ማላ ታስ ጊሻ ኢሚቴ፤ ሄሳፌ ጉዬ ባ ዶሶይሳ ሃኖ።
JOB 13:14 «ታኒ ኣች ሳጻዳ ጌንጬጫሼ ዲዛይ ኣዛሴ? ታ ሼምፖያካ ታ ኩሼን ዳዉስ።
JOB 13:15 ሄሳ ጊሻስ ጾሲ ታና ዎꬋና ኮይኮካ ታፔ ኣቲዛ ሚሺ ኣይኮይካ ዴና፤ ጊዲኮካ ታ ሃኖዛ ኢዛስ ኤሪሳና።
JOB 13:16 ናጋራንቻ ኣሲ ጾሳ ሲንꬂ ሺቃናስ ዳንዳዮንታ ጊሻስ ኦኔ ኤሪዛይ ሃይሲ ታ ጻላቴꬂ ፓጻናስ ጋሶ ጊዳናስ ዳንዳዬስ።
JOB 13:17 ኣኔ ታ ሃሳይዛ ቃላታ ዎጋራ ኤዝጊቴ፤ ታ ዶናራ ታ ማርካቲዛይሳ ሲዪቴ።
JOB 13:18 ታ ማርሼቴꬃ ሎኤꬃ ጊጊሳዳ ሺሻዲስ፥ ኢዚ ታስ ፒርዳናይሳካ ታ ኤራይስ።
JOB 13:19 ታና ሞቲዛይ ዲኮ ታኒ ማርሼቶንታ ጮኡ ጋዳ ሃይቃና።
JOB 13:20 «ጎዳዉ! ታ ኔ ሲንꬃፌ ቆቴቶንታ ማላ ሄይታ ናምኡ ሚሻታ ታስ ኦꬃ።
JOB 13:21 ሄይቲካ ኔ ሃንቆ ቄሴታ ታ ቦላፌ ዴንꬃ፤ ያሺሲዛ ኔ ታማን ታና ዳጋንꬆፋ።
JOB 13:22 ጾሳዉ! ኮይሮ ኔ ሃሳያ፤ ታ ኔስ ዛሮ ኢማና፤ ታኒካ ሃሳያና፤ ኔካ ዛሮ ኢማ።
JOB 13:23 ኤሮ ጊዶ ታ ኦꬂዳ ናጋራይኔ ቆሆይ ኣይ ሊኬ? ኣኔ ታ ሞሮዛኔ ታ ናጋራ ታና ኤሪሳ።
JOB 13:24 ኔ ሲንꬃ ታፔ ጌንꬃዳ ታና ኔ ሞርኬ ማላ ኣዛስ ቆዳይ?
JOB 13:25 ጫርኮይ ቆቆፊዛ ቦንጮ ማላኔ ሜላ ሃፓ ማላ ኔ ኣይስ ታና ያሺሴꬃን ጎዳይ?
JOB 13:26 ታ ቦላ ኔ ጻፊዳ ሞቶይ ኬሂ ጫሞ፤ ታኒ ዬላጋቴꬃን ኦꬂዳ ቆሆዛካ ታስ ኣጋቤካ።
JOB 13:27 ኔ ታ ቶሆታ ዱሩማታ ጊዶን ቃቻዳሳ፤ ታ ታንጎ ኡባ ዎዴ ኔ ካሌታሳ፤ ታ ጌዶን ኔ ኤቃሳ።
JOB 13:28 «ሄሳ ጊሻስ ታኒ ዎቂዳ ሚሻ ማላ ጊዳዳ ኣታና፤ ባዳይ ሚዳ ማይኦ ማላካ ታ ꬋያና።
JOB 14:1 «ኣሾ ማይኢዳ ኣሳስ ላይꬃይ ቃንꬃ፤ ሄሲካ ሜቶን ኩሚዴስ።
JOB 14:2 ጪሻ ማላ ቤቲዲ ሄራካ ቆኬስ፤ ኤሾ ማላ ዳሮ ጋምኦንታ ሄራ ኣꬌስ።
JOB 14:3 ሂስቲን ኔኒ ሃይሳ ማላ ኣሳ ሜꬌቴꬃ ካሌታይ? ኔ ሲንꬂካ ፒርዳስ ሺሻኔ?
JOB 14:4 ቱና ሚሻፌ ጌሻ ሚሽ ዴማናስ ዳንዳይዛዴይ ኦኒካ ዴና።
JOB 14:5 ኣሳ ላይꬃስ ዎꬊዳ ዛዋይ ዴስ፤ ኣሲ ዳና ኣጊናቲካ ኔ ማታን ቆዳን ዴቴስ፤ ኔኒካ ዎꬂዳ ላይꬃ ዛዋፔ ኣꬊዛዴይ ዴና።
JOB 14:6 ኡኔቲ ኣቂዛዴይ ባ ኦꬃና ጋላሳ ኦሶዮ ፖሊዲ ኡፋዬቲዛ ማላ፥ ኣሲካ ባ ዳቡራ ጋላሳን ኡፋዬታና ማላ ኔ ኣይፌ ኢዛ ቦላፌ ዴንꬃ።
JOB 14:7 ቃንጼቲዳ ሚꬃ ኡꬃስካ ሂዶታይ ዴስ፤ ናምኣንꬆ ሲሚ ኣጫናሲኔ ሃጋታ ኬሳናስ ዳንዳዬስ።
JOB 14:8 ኣይኮካ ጻጶቲ ቢታ ጊዶን ጪሚኮካ፥ ኣኖይካ ቢታ ጊዶን ሙሲኮ፥
JOB 14:9 ኢርጻ ዴሚኮ ናምኣንꬆ ኣጬስ፤ ኦራꬅ ቶኬቲዳ ሚꬃ ማላ ሃጋታ ኬሴስ።
JOB 14:10 ኣሲ ጊዲኮ ሃይቂዲ ካሴ ባይንዳ ማላ ሃኔስ፤ ሃይቂዳፔ ጉዬ ኣዋን ቤታኔ?
JOB 14:11 ኣባ ሃꬂ ዉሪዛ ማላ፥ ሻፋ ሃꬂካ ሜሊዛ ማላ፥
JOB 14:12 ኣሲካ ሄሳ ማላ ሃይቂዳፔ ጉዬ ሃ ሲሜና፤ ሳሎይ ኣꬋናሼ ጋካናስ ዴንዴና፤ ꬊስኮፌካ ቤጌና።
JOB 14:13 «ሃይቂዳይታ ጊዶን ኔ ታና ቆቲዳኮ ኣዜ ዲዛይ! ኔ ሃንቆዚ ኣꬋና ዎዴይ ጋካናስ ኔ ታና ቆቲዳኮ! ቃጻሮ ጋላስ ቃቻዳ ኔ ታና ቆፒዳኮ!
JOB 14:14 ኣሲ ሃይቂዳፔ ጉዬ ኣሾራ ፓጻ ዳናስ ዳንዳይዜ? ታስ ዎዴይ ላሜታና ጋካናስ፥ ታ ሃይሳ ባጼ ላይꬃ ጌንጫ ኣꬃና።
JOB 14:15 ሄ ዎዴ ኔኒ ታና ጼይጋና፤ ታኒካ ኔስ፥ ‹ዬ› ጋና፤ ኔ ሜꬌታ ጊዲዳ ታና ቤያናስ ኔ ላሞታና።
JOB 14:16 ሄኮ ሃኢ ኔ ታ ሄሜታ ካሌታሳ፤ ጊዲኮካ ታ ናጋራ ቆፓካ።
JOB 14:17 ታ ቆሆይ ካራጺቴን ጹንቴታና፤ ታ ናጋራካ ኔ ካማና።
JOB 14:18 «ዙማይ ሃሮቲዛ ማላኔ ዎዲዛ ማላ፥ ዛላይካ ባ ዲዛሶፔ ꬎቃሌቲዛ ማላ፥
JOB 14:19 ሃꬂ ሹች ዎጪዲ ኦንጊዛ ማላ፥ ዲኦይ ቢታ ሜጪዛ ማላ ኔኒካ ኣሳ ሂዶታ ꬋይሳሳ።
JOB 14:20 ኔ ዎልቃይ ሜርናስ ኢዛዴ ቦላ ሚኔስ፤ ኢዚካ ካሴ ባይንዳ ማላ ሃኔስ፤ ኔ ኢዛ ሜꬋካ ላማዳ ኔ ሲንꬃፌ ꬋይሳሳ።
JOB 14:21 ኢዛ ናይቲ ቦንቾ ዴሚዳኮካ ኢዚ ኤሬና፤ ካዉዪዛኮካ ኢዚ ጼሌና።
JOB 14:22 ኢዛስ ኢዛ ኣሳቴꬃ ዋዬዚ ሲዬቴስ፤ ኢዚካ ባ ሜቶዛ ጊሻስ ጻላ ዬኬስ።»
JOB 15:1 ቴማኔ ዴሬ ኣስ ኤልፋዜይ ሂዝጊዴስ፤
JOB 15:2 «ቱሙ ኤራ ኣሲ ጫርኮ ማላ ኩሼን ኦይኬቶንታ ሚሽ ሃሳዪ ኤሪዜ? ኢዛ ኡሎን ቆሂዛ ቆፋይ ዳናስ ቤሲዜ?
JOB 15:3 ኤራ ኣሲ ኣይኮ ጎኦንታ ቃላታኒኔ ጎኣይ ባይንዳ ሃሳያን ማርሼቲዜ?
JOB 15:4 ኔኒ ጾሳስ ያዪዛይሳ ኣጋዳሳ፤ ጾሳስ ቤሲዛ ጎይኖዛካ ዲጋሳ።
JOB 15:5 ኔ ቆሃንቻ ጊዲዳይሲ ኔ ሃሳያን ኤሬቴስ፤ ጊዶ ኣቲን ጪንጫቴꬃ ሃሳያን ካማናስ ባጼታሳ።
JOB 15:6 ኔ ቦላ ፒርዲዛይ ኔ ዶናፔ ኣቲን ታና ጊዲኬ፤ ኔ ሃሳያይ ኔናቴꬃ ቆንጪሴስ።
JOB 15:7 «ኣሳፔ ሲንꬃን ዬሌቲዳይ ኔኔ? ዙማቲ ሜꬌታናፔ ሲንꬃን ኔ ዬሌታዲ?
JOB 15:8 ቱሙ ጾሳ ጹራ ሲያዲ? ኣሳ ኤራቴꬅ ኤሪዛይ ኔና ጻላ ኔስ ሚሳቲዜ?
JOB 15:9 ኑኒ ኤሪዛይሳፌ ዱማ ሚሽ ኔ ኤሪዛይሲ ኣዜ? ኑ ኤሪዛይሳፌ ኔስ ቆንጪዳ ዱማ ሚሺ ኣዜ?
JOB 15:10 ዬሌታን ኔ ኣዋፔ ጪሚዛ ሁኤይ ፑሉሚዳ ጪማቲ ቆፋን ኑናራ ዴቴስ።
JOB 15:11 ኑ ባጋራ ኔስ ዮቴቲዛ ጾሳፌ ኢሜቲዳ ሚንꬄꬆይ ኔስ ጊዴኔ?
JOB 15:12 ኔና ኔ ዎዚናይ ኣይስ ሃራሶ ኤፊዜ? ኣይስ ሃንቆን ዴሬቃ ጼላይ?
JOB 15:13 ሃይሳꬆ ኦሶን ጾሳ ቦላ ኔ ኣያና ዴንꬄꬃዳሳ። ሃይሳ ማላ ሃንቆ ቃላ ሃሳያናዉ ጋካዳሳ።
JOB 15:14 «ኣሲ ጌሽ ጊዳናስ ዳንዳይዜ? ኣሾ ማይኢዳይ ጺላናስ ዳንዳይዜ?
JOB 15:15 ጾሳይ ባ ኪታንቻታ ቦላ ኣማኔቴና፤ ሳሎይካ ኢዛ ሲንꬃን ጌሽ ጊዴና።
JOB 15:16 ሞሬቲዳይኔ ቱኒዳይ ናጋራካ ሃꬃ ማላ ኡዪዛ ኣሲ ኣይ ማላ ኢታ?
JOB 15:17 «ኢስታ ኣዋቲ ቆቶንታ ኢስታስ ኦꬂዳይሳ፥ ኤራንቻቲ ቆንጪሲዳይሳ፥ ታኒካ ፒልጊዳይሳ ታ ኔና ኤሪሳይስ፤ ሲያ ታ ኔስ ዮታይስ።
JOB 15:19 ቢታያ ኢስታስ ጻላ ኢሜታዱስ፤ ኢማꬃቲካ ኢስታ ጊዶን ዋላኬቲቤቴና።
JOB 15:20 ኣስ ዋዪሲሼ ዴኢዛ ኢታ ኣሲ ባ ላይꬃ ኩሜꬃን ዋዬቲሼ ዳና።
JOB 15:21 ዳጋንꬂዛ ጊሪስ ኢዚ ባ ሃይꬃን ሲያና፤ ኡባ ሚሺ ሳሮ ሚሳቲዲ ኢዛስ ቤቲዛ ዎዴ ኢዛ ꬋይሲዛ ሚሺ ኢዛ ቦላ ያና።
JOB 15:22 ኢዛስ ቃዳይ ማሻን ሃይቆ ጊዲዳ ጊሻስ፥ ꬉማፔ ኣታና ሂዶታይ ኢዛስ ዴና።
JOB 15:23 ካፎስ ዎራ ኣቲዳ ካꬃ ማላ ኢዚ ዎራ ኣታና፤ ኢዚ ꬋያና ꬉማ ጋላሳይ ኢዛኮ ማቲዳይሳ ኢዚ ኤሬስ።
JOB 15:24 ሜቶይኔ ጬጬይ ኢዛ ያሻና፤ ኦላስ ጊጌቲዳ ካዎ ማላ ኢዛ ቦላ ሚናና።
JOB 15:25 ሃይሲ ሃናናይ ጾሳ ቦላ ባ ኩሼ ዴንꬂዳ ጊሻሳ፤ ኡባ ዳንዳይዛ ጾሳ ቦላ ጻሊዳ ጊሻሳ።
JOB 15:26 ኢዚ ባ ኦርዴኔ ሚኖ ጎንዳሌ ኤኪዲ ጾሳራ ኤቄታና ኬዚዴስ።
JOB 15:27 «ኢዛ ኣይፌይ ሞꬌን ጎዜቲዴስ፤ ኢዛ ጼሳይካ ኦርዲዴስ።
JOB 15:28 ሃይሲ ሃ ኣዴዚ ሙሌራ ኩንዲዲ ꬋይዳ ካታማታን፥ ላሌታናስ ማቲዳ ካይሳ ኬꬃታ ጊዶን ዴስ።
JOB 15:29 ዱሬቴና፤ ኢዛ ሃሮይካ ዳሮ ዎዴ ጋምኤና፤ ቢታ ቦላካ ኣኬና።
JOB 15:30 ꬉማፔ ኣቲ ባናዉ ዳንዳዬና፤ ታማ ላጮይ ሃጋታ ሜሊሲዳይሳ ማላኔ ጪሻቲካ ጫርኮን ቆኪዳ ሚꬃ ማላ ጊዳና።
JOB 15:31 ሃዳ ሚሻን ኣማኔቲሼ ባና ባርካ ባሌꬆፎ፤ ሄሳንካ ኢዚ ጎኣይ ባይንዳይሳ ጊዲ ኣታና።
JOB 15:32 ኢዚ ዎዴይ ጋኮንታ ዲሺን ኡꬃይ ሜሊዛ ማላኔ ሃጋቲካ ጪሊሎንታ ሚꬃ ማላ ሃናና።
JOB 15:33 ኢዚ ቡሮን ካጾንታ ዲሼ ኣይፌዚ ቆቆፌቲዛ ዎይኔ ሚꬃ ማላኔ ጪሻይ ቆቆፌቲዛ ዎጋራ ሚꬃ ማላ ጊዳና።
JOB 15:34 ጾሳ ጾሳቴꬃ ኤሮንታ ኣሳታስ ዜሬꬂ ዴኤና፤ ጉቦን ኦሴቲዳ ኬꬃቲካ ታማን ዲፒ ጊ ጹጌታና።
JOB 15:35 ሃይሳ ማላ ኣሳቲ ጌኔ ሚሽ ቆፔቴስ፤ ሜቶካ ሜꬌቴስ፤ ኢስታ ዎዚናይካ ባሌꬆን ኩሚዴስ።»
JOB 16:1 ኢዮቢካ ሂዝጊ ዛሪዴስ፤
JOB 16:2 «ታኒ ሃይሳ ማላ ሃሳያ ዳሮ ዎዴ ሲያዲስ፤ ኢንቴ ሳሌꬂዛ ዞራንቻታ።
JOB 16:3 ሃይሳ ኢንቴ ሃዳ ሃሳያስ ዉርሴꬂ ባዬ? ሃይሳ ላጌ ታናራ ማርሼታና ማላ ኢንቴና ዴንꬄꬂዳይ ኣዜ?
JOB 16:4 ኢንቴ ታ ሶሆን ታኒ ኢንቴ ሶሆን ጊዲዳኮ ካꬌን ታኒ ሁኤ ቃꬃዳ ሃኢ ኢንቴ ጊዛይሳ ኡባ ኢንቴ ቦላ ሎኤꬃ ሃሳያናኮሺን።
JOB 16:5 ሄሳ ማላካ ታ ዶናን ኢንቴና ሚንꬄꬃናኔ ሚንꬃናስ ዳሮ ሃሳያናኮሺን።
JOB 16:6 «ጊዶ ኣቲን ዳሮ ሃሳይኮካ ታ ሃርጌይ ሃ ሎኤና፤ ጮኡ ጋ ዳንዳይኮካ ታ ዋዬይ ታፔ ኪቼና።
JOB 16:7 ጾሳዉ! ታና ኣሳቴꬃፌ ካሬ ኬሳዳሳ፥ ታ ዴሬ ኣሳ ኡባ ꬋይሳዳሳ።
JOB 16:8 ታ ኣሳቴꬃይ ጉንዶይሲ ታ ቦላ ዴንዲዲ ኔኒ ናጋራንቻ ጊዲ ታ ቦላ ማርካቴስ።
JOB 16:9 ጾሲ ታና ሃንቂዲ ታ ኣሳቴꬃ ቃንጼሬꬂዴስ፤ ታና ኢጺዲ ባ ኣች ታ ቦላ ጋርጪዴስ፤ ታ ሞርኬይ ባ ኣይፌ ታ ቦላ ማጺ ኬሲዴስ።
JOB 16:10 ኣሳይ ታ ዩሾን ሺቄቲዲ ታ ቦላ ጬቄቲዴስ፤ ታና ቂꬌ ቃላን ባቂዳ።
JOB 16:11 ጾሲ ታና ኢታ ኣሳታስ ኣꬂ ኢሚዴስ፤ ማካላንቻታ ኩሼን ዬጊዴስ።
JOB 16:12 ታ ሳሮን ዳይሲኮሺን ጊዲኮካ ጾሲ ባ ሃንቆዛን ታና ሜንꬄሬꬂዴስ፤ ታ ቆꬌ ጩሊ ኦይኪዲ ታና ዳቡርሲዴስ፤ ባ ቆፋ ታ ቦላ ፖሊዴስ።
JOB 16:13 ዎንዳፋንቻቲ ታና ጊዶꬂዳ፤ ቃꬌቴꬂ ባይንዳ ታ ኪላሆታ ቃንጼሬꬂዳ፤ ታ ጪዬዛካ ቢታ ቦላ ጉሲዳ።
JOB 16:14 ኢዚ ታና ዛሪ ዛሪ ማዱንꬂዴስ፤ ሚኖ ኦላንቻ ማላ ዚዚሚ ዪዲ ታና ሾጪዴስ።
JOB 16:15 «ታ ካዮቴꬃስ ማቃ ሲካ ማይኣዲስ፤ ጉዱላ ቦላ ጉፋናዲስ።
JOB 16:16 ታ ኣይፌሶይ ዬኮን ዞኢዴስ፤ ሳካና ꬉማይ ታ ሲጲንꬅ ካሚዴስ።
JOB 16:17 ሃይሲ ኡባይ ሃንሺን ታ ኦꬂዳ ቆሆይ ዴና፤ ታኒ ታ ዎሳ ጾሳኮ ሺሺዛይ ዎዚና ጌሻቴꬃና።
JOB 16:18 «ቢታዞ! ታና ጋኪዳ ቆሆዛ ኔ ካሞፋ! ሱሬ ፒርዳ ጊሻስ ታ ሺሺዛ ማጋናይ ካሜቲ ኣታና ማላ ኔ ኦꬆፋ!
JOB 16:19 ሄኮ ታስ ማርካቲዛዴይኔ ኣፋካቶ ኤቂዛዴይ ሳሎን ዴስ።
JOB 16:20 ታ ላጌቲ ታና ሌቆን ጼሌቴስ፤ ታኒ ጊዲኮ ፑዴ ጾሳስ ዬካይስ።
JOB 16:21 ኣስ ኣሳራ ጋꬂ ሃሳይሲዲ ማቃዪንꬂዛዴይ ዲዛይሳ ማላ፤ ኣስ ጾሳራ ጋꬂ ማቃዪንꬂዛ ኣሲ ዲዳኮ ኣዜ ዲዛይ?
JOB 16:22 «ታ ላይꬃስ ዉርሴꬃይ ጋኬስ፤ ታ ሃ ሲማ ዮንታሶ ባናስ ጉꬃ ዎዴይ ጻላ ኣቲዴስ።
JOB 17:1 «ታ ኣያናይ ዳቡርዴስ፤ ታ ዳና ላይꬃይካ ፖሌታናዉ ማቲዴስ፤ ዱፎይካ ታና ናጌስ።
JOB 17:2 ታና ቂꬊዛይቲ ታና ዩዪ ኣꬊዳ፤ ታ ኣይፌይካ ኢስቲ ኢጺዛይሳ ጼሌስ።
JOB 17:3 ታ ጾሳዉ! ኔፔ ኣቲን ታስ ኤቃናይ ሃራይ ዴና፤ ኔኒ ኔ ሁኤራ ታስ ዋሴ ጊዳ።
JOB 17:4 ኢስቲ ፒልጊዲ ኣኬካናዉ ዳንዳዮንታ ማላ ኢስታ ቆፋ ጎርዳዳሳ፤ ሄሳ ጊሻስ ኢስቲ ጾናና ማላ ኦꬆፋ።
JOB 17:5 ሚሼ ዴማናዉ ጊዲ ባ ላጌዛ ኣꬂ ኢሚዛ ኣሳ ናይታ ቦላ ጎሜይ ጋካና።
JOB 17:6 «ጾሲ ታና ኣሳስ ካሳ ሚሽ ኦꬂዴስ፤ ኣሳይ ኢዛዴ ቦላ ጩቲዛ ኣሳ ማላ ጊዳዲስ።
JOB 17:7 ኣፉንꬃፌ ዴንዲዳይሳን ታ ኣይፌቲ ዶልጁሚዳ፤ ኩሜꬃ ታ ኣሳቴꬃይካ ኤሾ ማላ ጊዲዴስ።
JOB 17:8 ጺሎ ኣሳቲ ሃይሳን ዳጋሜቲዳ፤ ጌሻቲ ጾሳ ኣማኖንታ ኣሳታ ቦላ ሃንቄቲዳ።
JOB 17:9 ጊዶ ኣቲን ጺሎቲ ቱማ ኦጌፔ ካሬ ኬኤቴና፤ ጌሻቲ ሚኖቴꬃ ቦላ ሚኖቴꬂ ጉጄቴስ።
JOB 17:10 «ኢንቴ ኡባይካ ናምኣንꬆ ዪዲ ታ ሲንꬃን ማርሼቲኮ፤ ኢንቴ ጊዶፌ ኢሲ ኣኬካራ ዲዛ ኣስ ዴሚኬ።
JOB 17:11 ታ ላይꬃይ ዉሪዴስ፤ ታ ቆፋይኔ ታስ ዎዚና ኣሞይ ሃዳ ጊዲ ኣቲዴስ።
JOB 17:12 ሃይቲ ሃ ኣሳቲ ኦማርሳ ጋላስ ጌቴስ፤ ፖኦዛ ቃሴ ꬉማና ሃኔስ ጌቴስ።
JOB 17:13 ሃይሳፌ ጉዬ ታስ ዲዛ ቃዳይ ዱጌ ሃይቂዳ ኣሳቲ ዲዛሶ ዱፎን ዎꬌꬃ፤ ያን ꬉማሶን ታኒ ታ ሂጻ ኦንጋና።
JOB 17:14 ዱፎ፥ ‹ታ ኣዋዉ!› ጋዳ ታ ጼይጋና፤ ታና ሚዛ ጉጹኔታ ታኒ፥ ‹ታ ኣዬ፥ ታ ሚቼዬ!› ጋዳ ጼይጋና።
JOB 17:15 ሂስቲን ታስ ኣይ ሂዶታይ ዲዜ? ታስ ሂዶታ ጊዲዛ ሚሽ ኦኔ ታስ ጼላናይ?
JOB 17:16 ታኒ ዱጌ ሲኦሌ ዎꬊሺን ሂዶታይ ታናራ ኢሲፌ ዎꬋኔ? ኢሲፌካ ዱጌ ዱፎን ኑ ጌላኔ?»
JOB 18:1 ሹሃ ዴሬ ኣስ ቤሊዳዲ ሂዝጊ ዛሪዴስ፤
JOB 18:2 ኢዮቤ! ኔ ኣይስ ሃይሳ ማላ ሃሳያ ዳርሳይ? ኣኔ ኤዝጋ፤ ኑኒካ ሃሳዮስ።
JOB 18:3 ኔኒ ኑና ኣይስ ሜሄታ ማላ ቆዳይ፤ ኔኒ ኣይስ ኑና ቱሌታ ማላ ኣኬኮንታ ኣስ ኦꬃ ጼላይ?
JOB 18:4 ኔኒ ሃንቄቲኮ ኔና ቆሃሳ ኣቲን ኔ ሃንቆዛን ቢታይ ሜላ ኣቴና። ዛላቲካ ባ ዲዛሶፔ ቃጼቴና።
JOB 18:5 ናጋራንቻ ጾምፔይ ቶኣና፤ ታማ ላጮይካ ናምኣንꬆ ቤቴና፤
JOB 18:6 ኢዛ ዱንካኔ ጊዶን ዲዛ ፖኦይ ቶኣና፤ ፖኦዚካ ꬉማና።
JOB 18:7 ኢዛስ ሚኖ ታንጎይ ቃሚ ቃሚ ባና፤ ጌኔ ቆፒዛዴ ቆፋይ ኢዛ ዛሪ ኩንዲሳና።
JOB 18:8 ኢዚ ባርካ ቢዲ ዎጺማዴን ጌላና፤ ኢዛ ቶሆይካ ጊቴን ቃጼታና።
JOB 18:9 ዎጺማዴይ ኢዛ ቂርጴ ኦይካና፤ ሄንካ ዋጺ ኣሻና።
JOB 18:10 ሳኣ ቦላ ያርዴ ዎዶሮይ ሚጬቲዴስ፤ ኢዛ ኦጌንካ ዎጺማዴይ ጊጌቲዴስ።
JOB 18:11 «ያሺ ኢዛ ጊዶꬂዴስ፤ ጉዬራ ካሊ ካሊ ጎዴሬꬄስ።
JOB 18:12 ኢዛ ዎልቃይ ኮሻን ዉሪዴስ፤ ቦሻይካ ኢዛ ꬋይሳናስ ጊጌቲዴስ።
JOB 18:13 ሃርጌይ ኢዛ ኣሳቴꬃ ጊልቂሳና፤ ሃይቆይካ ሙሌራ ኤኪ ባና።
JOB 18:14 ሂርጋይ ባይንዳ ኣማኔቲ ዲዛ ኬꬃፌ ኢዚ ጎዴታና፤ ኣስ ኡባ ሃሪዛ ሃይቆይ ኢዛ ኤካና።
JOB 18:15 ኢዛ ኬꬃን ኣይ ሚሺካ ኣቴና፤ ኢዚ ኣቂዛሶዛንካ ዲኔ ታማይ ላሌታና።
JOB 18:16 ጻጶፔ ሜሊዛ ሚꬃ ማላኔ ሃጋቲካ ሜቄሬቲዛ ሚꬃ ማላ ጊዳና።
JOB 18:17 ቢታ ቦላ ኢዛ ቆፒዛ ኣሲ ዴና፤ ኢዛ ጎባቴꬂካ ቢታፌ ꬋያና።
JOB 18:18 ኢዚ ፖኦሶፔ ጌዴ ꬉማን ጎዴታና፤ ቢታ ቦላፌ ኢዚ ኪቻና።
JOB 18:19 ኢዛ ዳቦታ ጊዶፌ ኢዛ ላታና ዬሌታይ ቤቴና፤ ኢዛ ባቻንካ ዛሬይ ኢዛስ ኣቴና።
JOB 18:20 ኡሻቻ ባጋራኔ ሃዲርሳ ባጋራ ዲዛ ኣሳይ፤ ኢዛ ቦላ ጋኪዳ ሜቶዛ ጊሻስ ኬሂ ባቢዲ ኮኮራና።
JOB 18:21 ኣይ ዎዴካ ኢታ ኣሳታ ዉርሴꬃይ ሄሳ ማላ፤ ጾሳስ ያዮንታ ኣሳ ቃዳይ ሃይሳ።»
JOB 19:1 ኢዮቢ ሂዝጊ ዛሪዴስ፤
JOB 19:2 «ኢንቴ ታና ኣዉዴ ጋካናስ ዋዪሳንዴቲ? ኣዉዴ ጋካናስ ዮኦን ታስ ሜቄꬅ ሜንꬃንዴቲ?
JOB 19:3 ሄኮ ኢንቴ ታና ታሙቶ ጫዬታ፤ ታና ካዉሺሼካ ዬላቴኬታ።
JOB 19:4 ቱሙካ ታኒ ባሌቲዳ ጊዲኮ ታ ባላይ ታና ጻላ ቆሃና።
JOB 19:5 ቱሙ ኢንቴ ኢንቴና ꬎቂሲዲ ታ ካዉሻቴꬃ ኢንቴስ ማርሼ ሚሽ ኦꬄታ።
JOB 19:6 ጊዲኮካ ሃይሳ ኡባ ሜቶዛ ታ ቦላ ጋꬂዳይኔ፥ ጊቴ ጊዶ ታና ዬጊዳይ ጾሳ ጊዲዳይሳ ኢንቴ ኤራና ማላ ታ ኮያይስ።
JOB 19:7 ታ ቆሄታዲስ ጋዳ ዎሲን ታና ሲዪዛ ኣስ ዴማቤኬ፤ ታ ቃላ ꬎቁ ኦꬃዳ ማጋኒኮካ ሱሬ ፒርዳ ዴማቤኬ።
JOB 19:8 ጾሲ ታስ ኦጌዛ ጎርዲዳ ጊሻስ ኣꬋናሶይ ዴና፤ ታ ባናሶዛካ ꬉማን ጎርዲዴስ።
JOB 19:9 ታ ቦንቾዛ ታ ሁኤፔ ቃሪዲ ታና ካዉሺዴስ።
JOB 19:10 ታ ኣሳቴꬃ ኡባሶራ ቆጼሬꬂዲ ሙሌራ ላሊዴስ፤ ታስ ዲዛ ሂዶታ ጻጶፔ ሾዴቲዲ ኩንዲዛ ሚꬃ ማላ ኦꬂዴስ።
JOB 19:11 ጾሲ ታና ሃንቄቲዲ ጊታ ሜቶ ታ ቦላ ጋꬂዴስ፤ ባስ ሞርኬ ማላ ታና ቆዲዴስ።
JOB 19:12 ታና ꬋይሳናስ ባ ኦሳንቻታ ኪቲዴስ፤ ታስ ዱንካኔዛ ዩዪ ኣꬊዲ ታና ጊዶꬂዳ።
JOB 19:13 «ጾሲ ታ ኢሻቲ ታፔ ሃካና ማላ ኦꬂዴስ፤ ታና ኤሪዛ ኣሳቲ ኡባይ ታና ኣሳ ዴሬ ኣስ ኬሲዳ።
JOB 19:14 ታ ዳቦቲ ታፔ ሃኪዳ፤ ታ ላጌቲካ ታና ባሊዳ።
JOB 19:15 ታኒ ታሶን ኢማꬃቴꬅ ሞካ ኤኪዳይቲ ኡባይ ታና ባሊዳ፤ ታ ጋራዴቲ ታና ኢማꬃ ማላ ቆዲዳ፤ ኣላጋ ማላካ ጼሊዳ።
JOB 19:16 ታኒ ታ ኦሳንቻዛ ጼይጊሺን ኢዚ ታስ ኮዬና፤ ‹ታና ማዳርኪ› ጋ ታ ዋሲሺንካ ኤሮ ጌና።
JOB 19:17 ታ ማቻ ታፔ ኬኢዛ ፔኖዛ ሻቴታዱስ፤ ታ ኢሻቲካ ሃራሬቲዳ።
JOB 19:18 ቄሪ ናይቲካ ታና ካꬌቴስ፤ ታና ቤኢዛ ዎዴ ታ ቦላ ቂልጬቴስ።
JOB 19:19 ታስ ማታ ላጌቲካ ታና ሻቴቲዳ፤ ታ ሲቆቲ ታ ቦላ ሞርኬ ጊዲ ዴንዲዳ።
JOB 19:20 ታስ ኣሾዚ ዉሪን ጋልባዚ ሜቄꬃራ ኦይኬቲዴስ፤ ታና ሺሺን ኣታዲስ።
JOB 19:21 «ታ ሲቆቶ! ጾሳ ኩሼይ ታና ሾጪዳ ጊሻስ ኣኔ ዛይ ታስ ሚሼቲቴ! ታስ ቃꬌቲቴ!
JOB 19:22 ጾሲ ታና ጎዶይሳ ማላ ኢንቴካ ታና ኣዛስ ጎዴቲ? ሃይሳ ጋካናስ ኢንቴ ታና ዋዪሲዳይሲ ጊዴኔ?
JOB 19:23 ሃይሳ ጋካናስ ታ ሃሳይዳ ቃላ ኣኬኪዛይኔ ማጻፋን ጻፊዛ ኣሲ ዲዛኮ ታና ኣይ ማላ ኡፋይሳኔሺን!
JOB 19:24 ኢስኪርቶኒኔ ኢርሳሴን ጻፌቲዲ ዎይኮ ሹቻ ቦላ ዎጬቲ ኡቲዲ ሜርናስ ዳና ማላ ኦꬂዳኮ ኣይ ማላ ታና ኡፋይሳንዴሺን!
JOB 19:25 ጊዶ ኣቲን ታና ኣሺዛይሲ ፓጻ ዴኢዛ ማላ ዉርሴꬃ ዎዴን ታና ዎዛናስ ቢታ ቦላ ኢዚ ኤቃናይሳ ታኒ ኤራይስ።
JOB 19:26 ታስ ጋልባዚ ሜቴቲ ዉሪኮካ ታኒ ታ ኣሳቴꬃፌ ሻኬታዳ ታኒ ጾሳ ቤያናይሳ ኤራይስ።
JOB 19:27 ሃራ ኣስ ጊዶንታ ኢዛካ ታኒ ታ ሁኤን ታ ኣይፌራ ቤያና፤ ታ ዎዚናይካ ሄ ጋላሳዮ ኬሂ ላሞቴስ።
JOB 19:28 «ታ ሲቆቶ! ታና ዋላሲዲ ዋዪሳናስ፥ ‹ሃይሳ ሜቶዛ ኢዚ ባርካ ባስ ኤሂዴስ› ጊዲ ሃሳዬታ።
JOB 19:29 ጾሳ ሃንቆይ ማሻን ቃጻዬቴꬃን ጋꬂዛ ጊሻስ ማሻይ ኢንቴና ሞንታ ማላ ናጌቲቴ። ጾሳ ፒርዳይ ዲዛይሳካ ኤሪቴ።»
JOB 20:1 ናኢማኔ ዴሬ ኣስ ዞፋሬይ ሂዝጊ ዛሪዴስ፤
JOB 20:2 «ኢዮቤ! ታና ዪሎ ቆፋይ ኔ ቦላ ዛሮ ኢማና ማላ ሱጊዴስ፤ ሄሳ ጊሻሳ ታ ሃሳያናዉ ኤሶቲዳይ።
JOB 20:3 ታኒ ታና ካዉሺዛ ሴራ ሲያይስ፤ ታ ኣኬኪዛ ኣኬካዚ ታና ኔስ ዛሮ ኢማ ኢማ ጌስ።
JOB 20:4 «ኣሲ ቢታ ቦላ ቤቶሶፌ ዶሚዲ ካሴፔ ሃይሳ ማላ ጊዶይሳ ኔ ኤራይ?
JOB 20:5 ኢታ ኣሳ ጬቄቴꬂ ጉꬃ ዎዴሳ፤ ጾሳ ካዲዛ ኣሳታስ ዲዛ ኡፋይሳይ ቂጲዳ ኣይፌይ ጼላና ጋካናሳ።
JOB 20:6 ኢታ ኣሲ ኣይኮካ ኦቶሬቲዲ ሳሎ ጋኪኮካ፥ ኢዛ ሁኤይ ሻራ ጋኪ ቦቺንካ፥
JOB 20:7 ኢዚ ባ ሼሻ ኡቴꬃ ማላ ሙሌራ ፒቴታና፤ ካሴ ኢዛ ቤዪሼ ዲዛ ኣሳቲካ፥ ‹ኢዚ ኣዋን ዲዜ ጋኔ?›
JOB 20:8 ኣጉሞ ማላ ቲምኢ ጊ ꬋይዛ ጊሻስ ቤቴና፤ ኦማርሳ ኤሉንꬃ ማላ ኢዚ ꬋያና።
JOB 20:9 ኢዚ ዲዛሶፔ ኤሾራ ꬋይዛ ጊሻስ፥ ኢሲቶ ኢዛ ቤኢዳ ኣስ ናምኣንꬆ ዛሪ ቤዬና።
JOB 20:10 ኢዛ ናይቲ ኣዳሺዲ ኢስታ ኣዋይ ማንቆታፔ ጌኔራ ቦንቂዳ ሚሻ ዛራና።
JOB 20:11 ዎልቃን ኩሚዳ ዬላጋቴꬃ ኣሳቴꬃይ ጉꬃ ዎዴፔ ጉዬ ቢታ ጊዳና።
JOB 20:12 «ኢታቴꬂ ኢዛ ዶናን ካꬃ ማላ ኣይ ማልኢኮካ ባ ኢንጻርሳን ኢዚ ላጪ ጼሊኮካ፥
JOB 20:13 ዉሮንታ ማላ ዶናን ጮሚሼ ጋምኢኮካ
JOB 20:14 ኢዛ ኡሎ ጊዶን ጫሞን ላሜታና፤ ኢዛስ ሾሻ ማርዜ ማላ ጊዳና።
JOB 20:15 ኢታ ኣሲ ባ ሚዳ ሚሻ ኡንኤቲ ዛራና፤ ኡሎ ጊዶን ዲዛይሳካ ጾሲ ኢዛ ጮሻና።
JOB 20:16 ኢታ ኣሲ ሚዛይሲ ዉሪ ኢዛስ ሾሻ ማርዜ ማላ ጊዳና፤ ሾሻ ማርዜ ማላ ጊዲዲ ኢዛ ዎꬋና።
JOB 20:17 ዎጋራ ዛይቴይ ዲኦ ማላ ጎጊሺን ኤሲኔ ማꬂ ሻፋ ሃꬃ ማላ ጎጊሺን ኢዚ ቤኦንታ ሃይቃና።
JOB 20:18 ኢዚ ባ ዳቡርዳ ዳቡራ ኣይፌ ዛሬꬂ ጌዴ ኢማና ኣቲን ባ ሁኤስ ሜና። ዛልኢዲ ኢዚ ሺሺዳ ዴኦዛንካ ኡፋዬቴና።
JOB 20:19 ሃይሲካ ሃንዛይሲ ኢዚ ማንቆታ ኡንኤꬂዳ ጊሻሲኔ ባ ኦꬆንታ ኬꬃ ጌኔን ኤኪዳ ጊሻሳ።
JOB 20:20 «ኢዛ ሂርጌቴꬃዚ ኢዛስ ሼምፖ ꬋይሲዴስ፤ ኢዚ ሺሺዳ ሃሮይካ ኢዛ ኣሻናዉ ዳንዳዬና።
JOB 20:21 ኢዛ ሃሮይ ዉሪ ቁጬቲ ዉሪዛ ጊሻስ ኢዛስ ዶናን ጌልꬃናዚካ ኣቴና።
JOB 20:22 ኣይኮካ ኢዚ ዱሬ ኣስ ጊዲንካ፤ ኢዛ ዪሎይ ጋካና፤ ዳሮ ሜቶይካ ኢዛራ ጋይታና።
JOB 20:23 ኢዚ ታ ማዳ ካላና ጊሺን ጾሲ ዎልቃማ ሃንቆ ኢዛ ቦላ ዬጋና፤ ባ ሃንቆዛካ ኢዛ ቦላ ጉሳና።
JOB 20:24 ኢዚ ቢራታ ማሻፌ ኣቲኮ ጻርቂማላ ዎንዳፌን ጫዴታና።
JOB 20:25 ዎንዳፌዚካ ዞካራ ካንꬂ ኬኣና፤ ጾጾልቁ ጊዛ ጼራዚ ኢዛስ ቲሬዛ ዱሴሬꬂዲ ኣꬋና፤ ዎልቃማ ሂርጋን ኢዛ ዎዚናይ ዳጋማና።
JOB 20:26 ኢዚ ሺሺዳ ሃሮዚ ኡባይ ጊርዲ ጊዳ ꬉማ ጊዶን ꬋያና፤ ኣሲ ኦይꬆንታ ታማይ ጹጋና፤ ኢዛሶን ኣቲዛ ሚሽ ኡባ ዲፒ ሂስታና።
JOB 20:27 ኢዚ ኦꬂዳ ናጋራ ሳሎይ ቆንጪሳና፤ ሳኣያካ ኢዛስ ሞርኬ ጊዳዳ ዴንዳና።
JOB 20:28 ጾሳስ ሃንቆ ጋላስ ኢዛ ሶን ዲዛ ሃሮይ ዉሪ ዲኦን ቁጬቲ ꬋያና።
JOB 20:29 ጾሲ ማካላንቻታስ ዎꬂዳ ቃዳይ፥ ኢታ ኣሳቲ ኤካና ዋጋይ ሃይሳ።»
JOB 21:1 ኢዮቢካ ሂዝጊ ዛሪዴስ፤
JOB 21:2 «ኣኔ ታ ሃሳያ ዎዚናፔ ኤዝጊቴ፤ ሃይሲ ኢንቴ ታና ሚንꬄꬂዳ ማላ ኢንቴስ ቆዴታና።
JOB 21:3 ኢሲቶ ሃሳያና ማላ ታስ ጊሺ ኢሚቴ፤ ሄሳፌ ጉዬ ኢንቴ ኮዪዳ ማላ ታና ቂꬋናዉ ዳንዳዬታ።
JOB 21:4 «ታኒ ኣሾ ማይኢዳ ኣሳ ቦላ ሚሼታዚና? ሂስቲን ታስ ዳንዳዮንታ ኣጊኮ ኢዛን ኣዚ ማላሊሲዜ?
JOB 21:5 ኣኔ ታኮ ሃ ጼሊቴ፤ ሃሳያይ ኢንቴና ጾናናሼ ጋካናስ ታ ሃኖዚ ኢንቴና ሻጴስ።
JOB 21:6 ታኒ ቆፒሺን ታናካ ዳጋንꬄስ፤ ታ ኣሳቴꬃካ ያሻን ኮኮሪሴስ።
JOB 21:7 «ኣይስ ኢታ ኣሳታ ላይꬃይ ኣዱቂዲ ኢስታ ሃሮይካ ዳሪዲ ቢታ ቦላ ዲዜ?
JOB 21:8 ኣይስ ኢስታ ናይቲኔ ናይታ ናይቲ ዲጪዲ ሎኢ ዲሺን ቤዪዞ?
JOB 21:9 ኢስቲ ኣይኮ ሂርጋይ ባይንዳ ሳሮን ዴቴስ፤ ጾሳፌ ቦሻይ ኢስታ ቦላ ጋኪ ኤሬና።
JOB 21:10 ኢስታ ሜሄቲካ ኢሲ ሜቶይ ባይንዳ ዬሌቴቴስ፤ ኢስታስ ሚዛቲካ ኣዉጫዮንታ ዬሌቴስ።
JOB 21:11 ባንታ ናይታ ዶርሳ ዉዴ ማላ ሄሜቴስ፤ ኢስታ ናይቲካ ጉፒ ጉፒ ካኤቴስ።
JOB 21:12 ካራቤ ባቂሼ፥ ዲꬂ ዲጺሼ፥ ዲንኬ ፑኒሼ ኡፋይሳን ዬጼቴስ።
JOB 21:13 ባንታ ላይꬃ ዎጌቴꬃኒኔ ኡፋይሳን ኣꬄቴስ፤ ዋዬቶንታ ሃ ቢታፌ ሃይቆን ሻኬቴቴስ።
JOB 21:14 «ሄሲ ሄሳꬆ ጊዲ ዲሺን ኢስቲ ጾሳ፥ ‹ኑፔ ሃካ፤ ኔ ኦጌ ኤራናስ ኑ ኮዮኮ› ጌቴስ።
JOB 21:15 ‹ኑ ኢዛስ ጎይናና ማላ ኡባ ዳንዳይዛ ጾሳይ ኢዚ ኦኔ? ኑ ኢዛ ዎሲን ኢዚ ኑና ኣይ ማዳኔ?› ጌቴስ።
JOB 21:16 ኢስቲ ሄሳ ጊዛይ ኢስታ ኩሼን ዲዛ ሃሮይ ዉሪ ኢስታ ዎልቃን ኢስታስ ሺቂዳ ሚሳቲዛ ጊሻሳ። ታኒ ጊዲኮ ኢታ ኣሳታ ቆፋ ኤኪኬ።
JOB 21:17 «ሂስቲን ኢታ ኣሳታስ ጾምፔይ ቶኢ ኤሪዜ? ቦሻይ ኢስታ ቦላ ጋኪ ኤሪዜ? ጾሲካ ኢስታ ቦላ ሃንቄቲ ኤሪዜ?
JOB 21:18 ኢስቲ ሃፓ ማላ ጫርኮን ቢዳሶይ ጉዱላ ማላ ጎቴ ጫርኮን ኢስቲ ፒቴቲ ꬋይዳ ዎዴይ ዲዜ?
JOB 21:19 ኢንቴ፥ ‹ኣዋቲ ቆሂዳ ቆሆን ጾሲ ናይታ ሃንቄቴስ› ጌታ፤ ኣኔ ጾሲ ናጋራንቻታ ቃጻዮ፤ ሄሳꬆ ሃንኮ ባንታ ቆሆ ኢስቲ ኣኬካናዉ ዳንዳዬቴስ።
JOB 21:20 ናጋራንቻቲ ባንቲ ኦꬂዳ ቆሆን ባንታ ቂጻቴ ኤኬቶ፤ ኡባ ዳንዳይዛ ጾሲ ባ ሃንቆዛ ኢስታ ቦላ ኤሆ።
JOB 21:21 ኣሲ ሃይቂዳፔ ጉዬ ባ ናይታስ ቆፒ ኤሪዜ?
JOB 21:22 «ጾሲ ጊታ ኣሳታ ቦላካ ፒርዳና፤ ሂስቲን ኣሲ ኢዛ ፒርዳ ታማርሳና ዳንዳይዜ?
JOB 21:23 ኢሲ ኢሲ ኣሳቲ ባንታ ላይꬃ ዉርሴꬂ ጋካናስ ኣይኮ ሜቶይ ኢስታ ቦላ ጋኮንታ ሚኖታኔ ሃርጌይ ባይንዳይታ ጊዲዲ
JOB 21:24 ኢስታ ቦላይ ኦርዲዲ ካይሺዳ ማላ፥ ኢስታ ሜቄꬃይካ ሺጪዳ ማላ ሃይቄቴስ።
JOB 21:25 ሃራቲ ጊዲኮ ዪሎኔ ጫሞን ኩሚዳ ማላ ሜቶን ኦይኬቲዳ ማላ ኣይኮ ሎኦ ሚሽ ቤኦንታ ሃይቄቴስ።
JOB 21:26 ኡባይካ ዱጌ ዱፎን ጌሊዲ ቢታ ጊዴቴስ፤ ጉጹኔይካ ኢስታ ላታና።
JOB 21:27 «ቤኢቴ! ታና ቆሃናስ ቆፒዲ ኢንቴ ቃቺዳ ጌኔዛ ታ ኤራይስ።
JOB 21:28 ኢንቴ፥ ‹ሃይሳ ጊታ ኣዳሶይ ኣዋኔ? ናጋራንቻዛ ዱሳሶይ ኣዋኔ?› ጌታ።
JOB 21:29 ማንዳራ ኣሳታ ኦይቺቤኬቲ? ኢስቲ ኢንቴስ ማርካቲዳ ማርካቴꬃ ኢንቴ ኤኬኬቲ?
JOB 21:30 ሄይቲ፥ ‹ኢታ ኣሳታ ቦላ ቦሻይ ዪዛ ዎዴ ቆሆይ ኢስታ ጋኬና፤ ጾሳ ሃንቆይ ቆንጪዛ ዎዴ ኢስቲ ኣቲ ባና› ጊዲ ሃሳይዳ።
JOB 21:31 ኢታ ኣስ ኢዛ ኢታቴꬃ ጊሻስ ዋላሲዛይ ኦኔ? ኢታ ኦሶዛ ጊሻስ ኢዛ ቃጻያናይ ኦኔ?
JOB 21:32 ኢዚ ሃይቂዳፔ ጉዬ ኢዛ ኣሃ ቶኪ ኤኪዲ ዱፎን ኤፌቴስ፤ ኢዛ ዱፎይካ ናጌቴስ።
JOB 21:33 ሾባን ዲዛ ቢታይ ኢዛስ ጊጋ ጊዴስ፤ ኣሳቲ ኡባይካ ኢዛ ካሌቴስ፤ ኣዳፌ ዳሮ ኣሳቲካ ኢዛፔ ሲንꬃራ ቤቴስ።
JOB 21:34 «ሂስቲን ኢንቴ ሃዳ ጊዲዳ ዮኦራ ታና ሚንꬄꬃናስ ኣይስ ቆፔቲ? ኢንቴ ታስ ኢሚዛ ዛሮቲ ኡባይ ዎርዶ።»
JOB 22:1 ቴማኔ ዴሬ ኣስ ኤልፋዜይ ሂዝጊ ዛሪዴስ፤
JOB 22:2 «ኣሲ ጾሳ ጎኣናዉ ዳንዳይዜ? ሃራይ ኣቶሺን ኤራ ኣስ ጊዲኮካ ጎኣዚ ኢዛዴሳፌ ኣቲን ጾሳስ ጊዴና።
JOB 22:3 ኔ ጺሎቴꬂ ኡባ ዳንዳይዛ ጾሳ ኣይ ጎኣኔ? ዎሶይ ባይንዳ ኔ ዴኦዚ ኢዛ ኣይ ማዳኔ?
JOB 22:4 ሂስቲን ኔ ቦላ ኢዚ ፒርዲዳይኔ ሃይሳꬆ ኔና ሃንቂዳይ ኔኒ ጾስ ያዪዛ ጊሻሴ?
JOB 22:5 ሃይሲ ኡባይ ኔና ጋኪዳይ ኔ ኢታቴꬂ ዳሪዳ ጊሻሲኔ ኔ ናጋራይ ዛዋይ ባይንዳይሳ ጊዲዳ ጊሻስ ጊዴኔ?
JOB 22:6 ኢሲ ጋሶይካ ባይንዳ ኔ ኢሻታፔ ኦይሶ ኤካዳሳ፤ ቃሴ ኢስታ ማይኦ ቃራ ኤካዳ ኢስታ ካሎ ኣሻዳሳ።
JOB 22:7 ጋፊዲኔ ሳሜቲዲ ዳቡርዳይታ ካꬂኔ ሃꬅ ዲጋዳሳ።
JOB 22:8 ኔ ጋዳዴኔ ዎልቃማ ኣስ ጊዳዳ ኢዛን ዲዛ ቦንቾ ኣስ ጊዲኮካ፥
JOB 22:9 ኔኒ ኣምኤ ማጫሳታ ሜላ ኩሼ ዬዳዳሳ፤ ዪኦ ናይቲካ ባና ኣይሳና ዴኦዛ ꬋይሳዳሳ።
JOB 22:10 ሃይሳ ጋሶን ኔና ኦይካና ዎጺማዴይ ኔና ዩዪ ኣꬊዴስ፤ ኔ ኤዝጎንታ ሜቶይ ኔና ዳጋንꬃና።
JOB 22:11 ኔና ጼሎይ ሜታና ጋካናስ ኔስ ꬉሚዴስ፤ ዲኦ ሃꬂካ ኔና ሜጪዴስ።
JOB 22:12 «ጾሳይ ꬎቃ ሳሎን ዲዛይሳ ጊዴኔ? ጾሊንቴቲ ኣይኮካ ꬎቃሶሆን ዲኮካ ኢዚ ኢስታፌ ቦላራ ዲዲ ኢስታ ጼሌስ።
JOB 22:13 ኔኒ ጊዲኮ፥ ‹ጾሲ ኣይ ኤሪዜ? ጊርዲ ጊዳ ꬉማን ኢዚ ዋኒ ኑ ቦላ ፒርዳናዉ ዳንዳይዜ?
JOB 22:14 ሳሎ ቦላን ኢዚ ሲሜሬቲሺን ꬊፒ ጊዳ ሻራይ ኢዛ ካሚዛ ጊሻስ ኢዚ ቤያናዉ ዳንዳዬና› ጋሳ።
JOB 22:15 «ናጋራንቻቲ ሲሜሬቲዛ ቤኒ ኦጌዛ ኔ ካላይ?
JOB 22:16 ኢስቲካ ዎዴይ ጋኮንታ ሲንꬃራ ቦሻን ሾጬቲዳ፤ ዲኦንካ ሜጬቲዲ ጻጶራ ꬋይዳ።
JOB 22:17 ኢስቲካ ኡባ ዳንዳይዛ ጾሳ፥ ‹ኑፔ ኔ ሃካ፤ ኔ ኑስ ኣይ ኦꬃናስ ዳንዳያይ?› ጊዳ።
JOB 22:18 ጊዲኮካ ኢስታ ኬꬃ ዱሬቴꬃን ኩንꬂዳይ ጾሳ። ሄሳ ጊሻስ ታኒ ኢታ ኣሳታ ቆፋ ኤኪኬ።
JOB 22:19 «ኪያ ኣሳቲ ኢታ ኣሳቲ ቃጻዬቲሺን ቤኢዲ ኡፋዬቴቴስ፤ ሱሬ ኣሳቲ ኢስታ ቦላ ቂልጬቴስ፥
JOB 22:20 ‹ቱንካ ኑ ሞርኬቲ ꬋይዳ፤ ኢስታ ሃሮዚ ኩሜꬅ ታማን ጹጌቲዴስ።›
JOB 22:21 «ሄሳ ጊሻስ ኢዮቤ ኔናቴꬃ ጾሳስ ሃሪሳ፤ ኢዛራካ ኔ ሳሮን ዳ፤ ኔ ሃይሳ ኦꬂኮ ሎኦ ሚሽ ዴማና።
JOB 22:22 ጾሲ ኔስ ኢሚዛ ቲሚርታ ኤካ፤ ኢዛ ቃላካ ኔ ዎዚናን ዎꬃ።
JOB 22:23 ኔናቴꬃ ኡባ ዳንዳይዛ ጾሳኮ ኔ ዛሪዳኮ፥ ኔ ካሴ ማላ ሃናና፤ ኔ ሶፔ ኢታ ኦሶ ዲጋ።
JOB 22:24 ዎርቃ ጉዱላን ኦላ፤ ኦፊሬ ዎርቃ ሻፋ ሹቻ ማላ ዎራ ኦላ።
JOB 22:25 ሄ ዎዴ ኡባ ዳንዳይዛ ጾሳይ ኔስ ዎርቃኔ ሙሩታ ቢራ ጊዳና።
JOB 22:26 ሄ ዎዴ ኡባ ዳንዳይዛ ጾሳን ኔኒ ኡፋዬታና፤ ኢዛን ኣማኔታዳ ኔ ዳና።
JOB 22:27 ኔ ኢዛኮ ዎሲዛ ዎዴ ኢዚ ኔ ዎሳ ሲያና፤ ኔ ኣዲኔቲዳይሳ ኢዛስ ጋꬃና።
JOB 22:28 ኔ ቆፋይ ኡባይ ኔስ ፖሌታና፤ ኔስ ኦጌ ኡባይ ፖኦ ጊዳና።
JOB 22:29 ጾሲ ኦቶራንቻታ ካዉሻና፤ ኣሽኬታ ጊዲኮ ኢዚ ኣሻና።
JOB 22:30 ኔኒካ ሱሬ ዎዚናይ ዲዛዴ ጊዲኮ ጾሲ ኢታ ኡባፌ ኔና ናጋና፤ ኔ ኩሼቲካ ቆሆ ኦሶፔ ጌሽ ጊዲኮ ጾሲ ኔና ኣሺ ኤካና።»
JOB 23:1 ኢዮቢካ ሂዝጊ ዛሪዴስ፤
JOB 23:2 «ሃኢካ ታ ዎዚናይ ጫሞ ቆፋኒኔ ዙዙንꬃን ኩሚዴስ፤ ጌንጬጫን ታ ዎሲንካ ኢዛ ኩሼይ ታ ቦላ ዴጺዳ ማላ ዴስ።
JOB 23:3 ኢዚ ዲዛሶታ ኤሪዳኮ ኣይ ማላ ዶሳዚናሺን፤ ጌዴ ኢዚ ዲዛሶ ጋኪዳኮ ታ ኣይ ማላ ኡፋዬታኔሺን፤
JOB 23:4 ታ ማጋና ታ ኢዛስ ሺሻናኮሺን፤ ታ ሚሻዛ ማራራ ታ ኢዛስ ሺሻናኮሺን።
JOB 23:5 ታስ ኢሜቲዛ ዛሮዛካ ታ ኤራናኮሺን፤ ታና ኢዚ ኣይ ጋናኮ ታ ኤራናኮሺን።
JOB 23:6 ሂስቲን ጾሲ ባ ጊታ ዎልቃራ ታና ፒርዳንዴሻ? ኣካይ፤ ታ ጊዛይሳ ኢዚ ኤዝጋና።
JOB 23:7 ሄንካ ሱሬ ኣሲ ኢዛራ ማርሼታና፤ ታስ ፒርዲዛ ጾሳይ ሜርናስ ታና ናጻ ኬሳና።
JOB 23:8 «ጊዶ ኣቲን ታ ኣርሼይ ሞኪዛ ባጋ ቢኮ ሄን ኢዚ ዴና፤ ኣርሼይ ዉሊዛ ባጋካ ሲሚኮ ኢዛ ዴማናዉ ዳንዳይኬ።
JOB 23:9 ኢዚ ጊዲኮ ፑዴሃን ባ ኦሳ ኦꬄስ፤ ታኒ ጊዲኮ ኢዛ ቤያናዉ ዳንዳያቤኬ፤ ዱጌ ባጋ ሲማዳካ ኢዛ ዴማናዉ ዳንዳያቤኬ።
JOB 23:10 ኢዚ ታ ታንጎ ኡባ ኤሬስ፤ ታና ኢዚ ፓጪኮካ ታኒ ዎርቃ ማላ ጌሽ ጊዳ ዲሺን ኢዚ ታና ዴማና።
JOB 23:11 ታ ቶሆቲ ኢዚ ዶሲዛ ኦጌታራ ቤቴስ፤ ባሌꬆን ሃዲርሲካ ኡሻቺካ ጊኬ።
JOB 23:12 ታኒ ኢዛ ኣዛዞታፔ ኬኢኬ፤ ኢዛ ቃላካ ታ ሚዛ ቁማፔካ ኣꬃዳ ታ ዎዚናን ናጋዲስ።
JOB 23:13 «ኢዚ ባርካ ባና ዳንዳይ ዴስ፤ ኢዛራ ኤቄታናይ ዴና፤ ኢዚ ባ ዶሲዳይሳ ኡባ ኦሶ ዳንዳዬስ።
JOB 23:14 ታ ቦላ ኢዚ ቆፒዳይሳ ኡባ ፖላና፤ ሃይሳ ሚሳቲዛ ዳሮ ቆፋቲ ዴቴስ።
JOB 23:15 ሄሳ ጊሻስ ኢዛ ሲንꬃን ኤቆይ ኬሂ ያሼስ፤ ታ ሃይሳ ቆፓዳ ያያዲስ።
JOB 23:16 ጾሲ ታስ ዎዚናይ ዳቡራና ማላ ኦꬂዴስ፤ ኡባ ዳንዳይዛ ጾሳይ ታና ዳጋንꬂዴስ።
JOB 23:17 ጊርዲ ጊዳ ꬉማይ ታ ኣይፌታ ጎዚኮካ፤ ሳካና ꬉማይ ታ ሃሳዮንታ ማላ ታና ዲጊቤና።
JOB 24:1 «ኡባ ዳንዳይዛ ጾሳይ ኣይስ ባ ፒርዳ ኢማና ጋላሳ ባሪቤኔ? ኢዛስ ኣማኔቲዳይቲ ኣዉዴ ጋካናስ ኢዛ ፒርዳ ቃላ ናጌታንዴቶ?
JOB 24:2 ኢታ ኣሳቲ ዛዋ ላሌቴስ፤ ካይሲ ኤሂዳ ዶርሳታ ሄሜቴስ።
JOB 24:3 ዪኦታ ሃሬ ቦንቄቴስ፤ ኣምኤ ማጫሳያ ቦራ ኦይꬃዱስ ጊዲ ባንታስ ኤኬቴስ።
JOB 24:4 ማንቆታ ሻቴቲዲ ጮ ኦጌፔ ጎዴቴስ፤ ኢስታ ሲንꬃፌ ባቃቲዲ ቆቴታና ማላ ኦꬄቴስ።
JOB 24:5 ማንቆቲ ባዞን ዲዛ ሃርዲዳ ማላ፥ ባንታ ናይታስ ካꬅ ኮያና ኬኢዲ ዳቡሬቴስ።
JOB 24:6 ኡኔቲዲ ሃራታስ ካꬅ ሺሺዛይታ ጊዴቴስ፤ ኢታ ኣሳታ ሃሮ ጊዲዳ ዎይኔ ቶኪዛሶሆዛን ጌዶን ኣቲዳ ፑሹሎ ማጼቴስ።
JOB 24:7 ኩሜꬃ ኦማርስ ካሎ ኢቺ ኣቄቴስ፤ ሞጬ ኣሺዛ ማይኦይ ኢስታስ ዴና።
JOB 24:8 ዙማ ቦላ ቡኪዛ ኢራን ኢስታ ኣሳቴꬃይ ሙሴስ፤ ኣቂዛሶይ ꬋዪን ዛላ ጋርስ ሺቂ ኣቄቴስ።
JOB 24:9 ኣዋይ ሃይቂዳ ናይ ኢስታስ ኣይሌ ጊዳና ማላ ኣዬይ ꬋንꬅ ዲጊዲ ቦንቄቴስ፤ ሜቶቲዳይሳ ናዛ ባ ኣጮ ጊሻስ ጊዲ ኦይሶ ኤኬቴስ።
JOB 24:10 ማንቆቲ ኣይኮ ማይኦይ ባይንዳ ፓጻ ካሎ ኦሶን ጌሌቴስ። ካꬃ ሺሾ ዎዴ ሚርቄዛ ቶኪ ሚዪሼ ባንታስ ጋፋን ሃይቄቴስ።
JOB 24:11 ኢታ ኣሳታ ጋዴን ዎጋራ ኣይፌፔ ዛይቴ ኬሴቴስ፤ ዎይኔ ሚꬃ ኣይፌፔ ጫጄ ኣጌቴሴሺን ኢስቲ ጊዲኮ ሳሜቴቴስ።
JOB 24:12 ካታማታን ሃይቃናስ ቶቂዛ ኣሳቲ ጎታሬቴስ፤ ማዱንጺዳ ኣሳቲካ ማዶ ኦይሾን ዋሴቴስ። ጾሲ ጊዲኮ ኢስታ ቦላ ኦሴቲዳ ጌኔዛ ቤዪቤና።
JOB 24:13 ፖኦ ኢጺዛ ኣሳቲ ዴቴስ፤ ፖኦይ ኣዛኮ ኤሮንታ ጊሻስ ፖኦ ኦጌ ካሌቴና።
JOB 24:14 ሼምፖ ዎꬊዛ ኡራይ ዎንቶንታ ዴንዲዲ ማንቆታኔ ሜቶታንቻታ ዎꬌስ፤ ኦማርሲካ ካይሶስ ኬዜስ።
JOB 24:15 ላይማ ኡራይ ጋዴይ ኦማርሳናይሳ ናጌቴስ፤ ኦኒካ ቤኦንታ ማላ ባ ሲንꬃ ጎዜቴስ።
JOB 24:16 ካይሶቲ ካይሶታናስ ኦማርሳራ ኬꬅ ቦኪ ጌሌቴስ፤ ጋላስ ጊዲኮ ቆቴቲ ፔኤቴስ። ፖኦካ ኢጼቴስ።
JOB 24:17 ꬉማራ ሺሮቴꬂ ኢስታ ኡፋይሲዛ ጊሻስ ኡባሲካ ጊርዲ ጊዳ ꬉማይ ኢስታስ ዎንታ ማላዶ ማላ።
JOB 24:18 «ጊዲኮካ ኢስቲ ሃꬃ ቦላ ቤቲዛ ሆሞ ማላ ጉꬃ ዎዴስ ጻላ ኢስቲ ቤታና። ኢስታ ቢታይካ ቃንጌቲዳይሳ ጊዳና፤ ኢስቲ ዎይኔ ሚꬃ ቶኪዛሶሆዛ ኦኒካ ቤና።
JOB 24:19 ሻቺ ሆኦን ማዪዲ ꬋይዛይሳ ማላ ሲኦሌይካ ናጋራንቻታ ባኮ ቦንቃ ኤካና።
JOB 24:20 ኢስታ ኣዬቲ ኡባይ ኢስታ ዶጋና፤ ኢስታ ኣሾዛካ ጉጹኔይ ማና፤ ኢታ ኣሳቲ ቆፌቶኮና፤ ሄሳꬆካ ሚꬃ ማላ ሜቄሬታና።
JOB 24:21 ሃይሲ ኡባይ ኢስታ ቦላ ጋኪዳይ ኢስቲ ዬሎንታ ማይኒዳ ማጫሳታ ቦንቂዳ ጊሻሲኔ ኢስታ ኣዚናቲ ሃይቂዳ ማጫሳታስ ኣይኮ ቃꬌቴꬂካ ቤሶንታ ጊሻሳ።
JOB 24:22 ጊዶ ኣቲን ጾሲ ባ ዎልቃን ዳናቴꬃን ዲዛ ኣሳታ ዲጋና፤ ኢስታስ ዴኦይ ጊጋ ሚሳቲኮካ ኢስታ ዱሳስ ኣማንꬂዛ ሚሺ ዴና።
JOB 24:23 ጾሲ ኢስታ ሳሮን ዳና ማላ ኦꬂኮካ፥ ኢስቲ ቢዛ ኦጌ ኡባ ቲሺ ሂስቲ ጼሌስ
JOB 24:24 ኢታ ኣሳቲ ጉꬃ ዎዴስ ዱሬታና፤ ጊዶ ኣቲን ኤሶራ ሻራፋ ማላ ሹሊ ꬋያና፤ ሹላ ካꬃ ማላ ቡጬታና።
JOB 24:25 «ሃይሳ ማላ ጊዴና ጌቴቲኮ ታኒ ዎርዳንቻታኔ ታ ሃሳይዳ ቃላይ ሊኬ ጊዶንታይሳ ኦኔ ኣማንꬃናይ?»
JOB 25:1 ሹሃ ዴሬ ኣስ ቤሊዳዴይ ሂዝጊ ዛሪዴስ፤
JOB 25:2 «ማታይኔ ያሻቴꬂ ጾሳሳ፤ ቦላን ባ ሃሪዛሶን ሳሎን ሳሮቴꬅ ሜꬋና።
JOB 25:3 ኢዛ ዎታዳራታ ቲሪፓቴꬂ ቆዴታናዉ ዳንዳይዜ? ጾሳ ፖኦይ ኢዛስ ፖኢሶንታዴይ ኦኔ?
JOB 25:4 ኣሲ ጾሳ ሲንꬃን ዋኒ ጺሎ ጊዲ ቤታናዉ ዳንዳይዜ? ኣሾ ማይኢዳ ሜꬌታ ጊዲዲ ዋኒ ጌሽ ጊዳናዉ ዳንዳይዜ?
JOB 25:5 ሄኮ ጾሳ ሲንꬃን ኣጊናይካ ሙቃ ቦꬅ ጊዴና፤ ጾሊንቴቲካ ኢዛ ሲንꬃን ጌሻታ ጊዴቴና።
JOB 25:6 ሙሳኔ ጉጹኔ ጊዳዳ ሃይቂዛ ኣሲ ሄሳፌካ ኣይ ማላ ኢታ!»
JOB 26:1 ኢዮቢ ሂዝጊ ዛሪዴስ፤
JOB 26:2 «ሃይሳ ኔ ሃሳዮይሳን ዳቡራንቻታ ማዲዳ ኔስ ሚሳቲዜ? ቄሴይ ኣርጋጪዳዴ ሚንꬂዳ ኔስ ሚሳቲዜ?
JOB 26:3 ኣꬎ ኤራቴꬂ ፓጪዳዴስ ኔ ኣይ ዞሬ ኢማዲ! ኣይ ኤራቴꬂካ ኢዛዴስ ቆንጪሳዲ!
JOB 26:4 ሂስቲን ሃይሳ ኔ ሃሳያና ማላ ኔና ማዲዳይ ኦኔ? ኔ ሃሳያና ማላ ኔና ዴንꬄꬂዳይ ኦና ኣያና!»
JOB 26:5 «ዎልቃማ ዎጋ ጊታ ኣባፌ ጋርሳን ዲዛ ሃይቂዳይታ ሼምፖቲ ዎልቃማ ኮኮርሳን ዴቴስ።
JOB 26:6 ሲኦሌይካ ጾሳ ሲንꬃን ቆንጬን ዴስ፤ ኣባዶኔ ጌቴቲዛሶዛ ኣይ ሚሺካ ካማናዉ ዳንዳዬና።
JOB 26:7 ጾሲ ፑዴሃ ባጋራ ዲዛ ሳሎዛ ጫርኮ ቦላ ሚጪዴስ፤ ቢታካ ኣይኮይ ባይንዳሶን ኩሎቲ ዳና ማላ ኦꬂዴስ።
JOB 26:8 ጾሲ ሻራቲ ሃꬅ ጹንጺ ኦይካና ማላ ኦꬄስ፤ ሃꬃፌ ዴንዶይሳን ሻራቲ ዳኬቴቴና።
JOB 26:9 ኢዚ ኡቲዛ ካዎቴꬃ ኣራታ ጌንꬃና፤ ሻራራካ ካማና።
JOB 26:10 ፖኦኔ ꬉማ ሻካናስ ዎልቃማ ዎጋ ጊታ ኣባ ሲንꬃን ሳሎዛ ዛዋ ኦꬂዲ ሚጪዴስ።
JOB 26:11 ኢዚ ሃንቂዛ ዎዴ ሳሎ ቱሳቲ ዳጋማን ኮኮሬቴስ።
JOB 26:12 ኢዚ ባ ዎልቃን ኣባ ጮኡ ኦꬄስ፤ ኢዛ ኣꬎ ኤራቴꬃይካ ኤራኣቤ ጌቴቲዛይሳ ꬋይሳና።
JOB 26:13 ባ ፔኖዛን ሳሎዛ ጌሻና፤ ጾንጌቲዛ ሾሻ ባ ኩሼን ጫዳና።
JOB 26:14 ሃይታንቲ ኡባይ ጾሲ ኦꬂዛ ኦሶታፔ ጉꬃታ፤ ኑ ሲዪዛይሲ ኢዛስ ሳሱኬꬅ ጻላ፤ ዎልቃማ ጊሪሳ ኢዛይሳ ኦኒ ኣኬካናዉ ዳንዳይዜ?»
JOB 27:1 ኢዮቢካ ባ ሃሳያ ሲንꬃዉ ጉጂዲ ሂዝጊዴስ፤
JOB 27:2 «ሱሬ ፒርዳ ዲጊዲ ታ ሼምፖዮ ኣዳፌ ጫሞ ኦꬂዳ፤ ኡባ ዳንዳይዛ ዴኦ ጾሳ ሱንꬃን ጫቃይስ፤
JOB 27:3 ጾሲ ታና ሼምፖራ ዎꬂዳ ዎዴይ ጋካናስ፥
JOB 27:4 ኡባካ ኢታ ቃላይ ታ ዶናፔ ኬኤና፤ ታ ኢንጻርሳንካ ዎርዶ ሃሳይኬ።
JOB 27:5 ኢንቴ ሃሳይዳይሲ ዉሪ ሊኬ ጋዳ ሙሌካ ኤኪኬ፤ ታ ሃይቃናሼ ጋካናስ ሱሬቴꬃን ሚና ኤቃናይሳ ኣጊኬ።
JOB 27:6 ታኒ ታ ጺሎቴꬃን ሚና ኤቃና ኣቲን ጺሎቴꬃ ኣጊኬ፤ ሼምፖራ ፓጻ ዲዛ ላይꬃ ኡባን ታ ዎዚናይ ሃ ሚሻን ሲꬌና።
JOB 27:7 «ናጋራንቻታ ቦላ ፒርዴቲዛ ማላ ታ ሞርኬታ ቦላ ፒርዴቶ፤ ታና ኢጺዛይታ ቦላካ ጌኔ ኣሳታ ቦላ ፒርዴቲዛ ማላ ፒርዴቶ።
JOB 27:8 ጾሲ ኢስታ ሼምፖዮ ኢስታ ኣሾፔ ሻኪዲ ኢስታ ላይꬃ ቃንጺዳ ዎዴ ጾሳ ካዲዳ ኣሳታስ ኣይ ሂዶታይ ዳንዴ?
JOB 27:9 ሜቶይ ኢስታ ቦላ ዪዛ ዎዴ ጾሲ ኢስታ ዋሶዛ ሲያንዴ?
JOB 27:10 ኡባ ዳንዳይዛ ጾሳን ኢስቲ ኡፋዬታንዴቶ? ዎዴን ዎዴንካ ጾሳ ሱንꬃ ጼይጋንዴቶ?
JOB 27:11 «ጾሳ ዎልቃይ ኣይ ማላ ጊታኮ ታ ኢንቴና ታማርሳና፤ ኡባ ዳንዳይዛ ጾሳይ ቆፒ ዎꬆይሳ ታ ኢንቴፌ ቆቲኬ።
JOB 27:12 ኢንቴኒካ ሃይሳ ኡባ ኤሬታ፤ ሂስቲን ሃይሳ ሃዳ ሚሽ ኣይስ ሃሳዬቲ?
JOB 27:13 «ሄኮ ኡባ ዳንዳይዛ ጾሳይ ኢታ ኣሲኔ ጌናንቻቲ ኤካና ላታይ ሃይሳፌ ካሊዛይሳ።
JOB 27:14 ኢዛ ናይቲ ቲሪፒኮካ ኦላን ዉራና፤ ኢዛ ዜሬꬃቲካ ካꬂ ꬋዪን ኮሻታና።
JOB 27:15 ሄሳፌ ኣቲዳይቲ ሃርጌን ዉራና፤ ኣምኤቲካ ኢስታስ ዬኬቴና።
JOB 27:16 ኢታ ኣሲ ቢራ ቢታ ማላ ሺሻናዉ፥ ማይኦካ ማና ቢታ ማላ ዶራናዉ ዳንዳዬስ።
JOB 27:17 ጊዶ ኣቲን ኢታ ኣሲ ሺሺዳ ማይኦዛ ጺሎ ኣሲ ማይኣና፤ ኢዚ ሺሺዳ ቢራካ ጌሻቲ ጊሼቲ ኤካና።
JOB 27:18 ኢዚ ኬጺዛ ኬꬃቲካ ኣቻሮ ኬꬃ ማላኔ ካꬅ ናጊዛዴይ ኣቂዛ ጋባ ማላ ላሌታና።
JOB 27:19 ኢታ ኣሲ ዉርሴꬃ ዎዴ ዱሬ ጊዲዲ ኢቼስ፤ ኢዚ ቤጊዛ ዎዴ ጊዲኮ ኢዛ ኣቆታይ ኡባይ ꬋይዴስ።
JOB 27:20 ዳጋማይ ኢዛ ቦላ ዲኦ ማላ ቆፖንታ ዲሺን ጋካና፤ ጊዶꬂካ ጎቴ ጫርኮይ ኢዛ ዴንꬂ ኤፋና።
JOB 27:21 ኣርሼይ ሞኪዛሶ ባጋ ጫርኮይ ኢዛሶፔ ኢዛ ፒቲ ꬋይሳና።
JOB 27:22 ኢዚ ባቃቲዲ ኣቲ ባናስ ባጼቲኮካ ጫርኮዚ ቃꬌቴꬂ ባይንዳ ኢዛ ቦላ ጌዴ ሚናና።
JOB 27:23 ጫርኮዚ ኢዛ ቦላ ኩሼ ባቂዴስ፤ ኢዚ ዲዛሶፔ ዋይቄꬃን ፒጺሪ ዬጊዴስ።
JOB 28:1 «ቱማፔ ቢታ ጋርሳን ዲዛ ማኢዲኔቲ ቦኬቲዲ ቢራ ኬኢዛሶይኔ ዎርቃይ ሴሪ ኦሴቲዛሶይ ዴስ።
JOB 28:2 ቢራታይ ቢታፌ ቤቴስ፤ ጻርቂማላይ ማኢዲኔ ሹቻፌ ሴሪዲ ኬኤስ።
JOB 28:3 ኣሳይ ꬉማ ካንꬂዲ፥ ዱጌ ቢታ ጊዶ ቦኪ ጌሊዲ ሃኪ ዲዛሶዛ ዱጌ ዎꬊዲ ጊርዲ ጊዳ ꬉማ ጊዶን ማኢዲኔ ሹቻ ኮዬቴስ።
JOB 28:4 ኣሲ ዲዛሶፔ ሃኪዲ፥ ኣሳ ቶሆይ ዬꬊ ኤሮንታሶ ጋኬቴስ። ሄንካ ጪማ ኦላ ቦኬቴስ፤ ዎዶሮ ቦላራ ኩሎቲ ኩሎቲ ዎꬊዲ ኣሳፔ ሻኬቲ ባርካ ኦꬄቴስ።
JOB 28:5 ቢታይ ሜቴቲዛ ካꬅ ኢሜስ። ኢዛስ ጊዶይ ታማን ሴሪዲ ሺሬቲ ሺሬቲ ዎꬌስ።
JOB 28:6 ሴምፔሬ ጌቴቲዛ ኣልኦ ሹቻይ ቢታን ዲዛ ሹቻታ ጊዶን ቤቴስ፤ ሄ ቢታ ጊዶንካ ዎርቃይ ቤቴስ።
JOB 28:7 ጌዴ ማኢዲኔዛኮ ኤፊዛ ኦጌ ጺሎይካ ኤሬና፤ ኣንኮታ ኣይፌይካ ቤዪቤና።
JOB 28:8 ኢታ ዶኣቲ ሄ ሶሆዛ ዬꬊቤቴና፤ ጋሞይካ ኢዛ ባጋራ ኣꬊቤና።
JOB 28:9 ኣሲ ጋዴ ጎዪሼ ሚኖ ሹቻታ ባ ኩሼን ዴንꬄስ፤ ዙማታካ ጻጶፔ ሺሪ ዬጌስ።
JOB 28:10 ዛላካ ጳልቂዲ ኢዛ ጊዶራ ኣꬋናስ ኦጌ ኬሴስ፤ ኣልኦ ጊዲዳ ማኢዲኔ ሹቻታካ ዴሜስ።
JOB 28:11 ሻፋታ ፑልቶታ ቴቄስ፤ ቢታ ጊዶን ቆታን ዲዛ ሚሻታ ቆንጬ ኬሴስ።
JOB 28:12 ሂስቲን ኣꬎ ኤራቴꬂ ኣዋፔ ቤቲዜ? ኣኬካሲካ ዲዛሶይ ኣዋ?
JOB 28:13 ኣꬎ ኤራቴꬂ ሼምፖራ ፓጻ ዲዛ ሜꬌታቲ ዲዛ ቢታን ቤቱኩ፤ ኢዚስ ቱማ ዋጋካ ኤሪዛ ኣሲ ዴና።
JOB 28:14 ‹ዎጋ ጊታ ኣባይካ ታ ጊዶን ዱኩ፤ ኣባይካ ታናራ ዱኩ› ጌስ።
JOB 28:15 ኤራቴꬂ ጌሻ ዎርቃን ሻሜቱኩ፤ ኢዚ ዋጋይካ ቢራን ሄሬጌቴና።
JOB 28:16 ኣꬎ ኤራቴꬂ ኦፊሬ ጌቴቲዛ ዎርቃፌ፥ ማርጊዴኔ ሴምፔሬ ጌቴቲዛ ኣልኦ ሹቻታፔ ኣꬋ ቦንቼቲዳሮ።
JOB 28:17 ዎርቃይኔ ጌሻ ሄሬጋይ ኢዚራ ጊናቴቴና፤ ጺንታ ዎርቃፌ ኦሴቲዳ ጌጼይካ ኢዞ ላማና።
JOB 28:18 ቦንቼቲዳ ሄሌሎይኔ ኣልማዜ ጌቴቲዛይቲ ኣꬎ ኤራቴꬃራ ጊናቴቴና፤ ኣꬎ ኤራቴꬃ ጋቴይ ሉሌ ጌቴቲዛይሳፌካ ቦላ።
JOB 28:19 ቶጳዚዮኔ ጌቴቲዛ ቶጵያ ቢታ ኢንቁይካ ኢዚራ ጊኔና፤ ኬሂ ጌዪዳ ዎርቃፌካ ኣꬋዉስ።
JOB 28:20 «ሂስቲኮ ኤራቴꬂ ኣዋፔ ያዜ? ኣኬካይካ ኣዋፔ ቤታዜ?
JOB 28:21 ሼምፖራ ፓጻ ዲዛ ሜꬌታታፔ ጌሚዳሮ፤ ሳሎራ ፒራꬊዛ ካፎቲካ ኮዪዲ ኢዞ ዴሜቴና።
JOB 28:22 ꬋዮይኔ ሃይቆይ፥ ‹ኑ ኢዚ ጊሻስ ኤሪዛይ ዎሬን ጻላ› ጌቴስ።
JOB 28:23 ኣꬎ ኤራቴꬃኮ ኤፊዛ ኦጌዛኔ ኢዛ ዲዛሶዛ ኤሪዛይ ጾሳ ጻላ።
JOB 28:24 ኢዚካ ሳኣ ጋጻ ኩሜꬅ ዴሜስ፤ ሳሎፔ ጋርሳን ዲዛይሳ ኡባ ቤዬስ።
JOB 28:25 ኢዚ ጫርኮ ዎልቃ ኦꬂዳ ዎዴ ዎጋ ጊታ ኣባ ኢዚ ማኪዳ ዎዴ፥
JOB 28:26 ኢራሲኔ ዎልቃንꬃራ ዲዛ ዳዳስ ዎጋ ዎꬂዳ ዎዴ፥
JOB 28:27 ጾሲ ኤራቴꬅ ቤዪዴስ፤ ፓጪ ጼሊዲ ኢዞ ቦንቺዴስ፤ ፒልጊ ቤኢዲ ሚንꬂ ዎꬂዴስ።
JOB 28:28 ሄ ዎዴ ኣሳስ፥ ‹ሄኮ ኤራቴꬅ ጉሲ ጾሳስ ያሻቴꬃ፤ ኣኬካ ጉሲ ኢታፔ ሃኮ› ጊዴስ።»
JOB 29:1 ኢዮቢካ ባ ሃሳያ ሲንꬅ ጉጂዲ ሂዝጊዴስ፤
JOB 29:2 «ታስ ሃኢ ዴኦዚ ካሴ ጾሲ ታና ናጊዛ ዎዴዛ ማላ ጊዲዳኮ ታና ኣይ ማላ ኡፋይሳንዴሻ!
JOB 29:3 ሄ ዎዴ ꬉማ ጊዶራ ታ ቢሺን ጾሲ ታስ ፖኢሲሺን ታኒ ፖኦን ሄሜታይሲኮሺን።
JOB 29:4 ጾሳ ማዶይ ታ ኬꬃ ካሴ ናቴቴꬃ ዎዴ ናጊዛይሳꬆ ሃኢካ ናጊዳኮ ኣዜ ዲዛይ?
JOB 29:5 ኡባ ዳንዳይዛ ጾሳይ ታናራ ዲዛ ጊሻስ ታ ናይቲ ኡባይ ታ ዩሾን ዴቴስኮሺን።
JOB 29:6 ታኒ ቶሆ ማꬃን ሜጬታናሼ ጋካናስ ዳሮ ማꬅ ዴማይስኮሺን፤ ዎጋራ ሚꬃቲ ሜላ ቢታንካ ቶኬቲዲ ዲኦ ማላ ጎጊዛ ዳሮ ዛይቴ ታስ ኢሜቴስኮሺን።
JOB 29:7 ካታማ ፔንጌ ኣቻን ዲዛ ዱቡሻ ባዳ ዱላታን ታ ኡቲዛ ዎዴ፥
JOB 29:8 ናቴꬃ ናይቲ ታና ቤኢዲ፥ ቦንቾስ ታ ሲንꬃፌ ኢሲ ባጋ ጌቴሲሺን፤ ጪማቲካ ታ ቦንቾ ጊሻስ ባ ኡቲዳሶሆፔ ዴንዲ ኤቄቴሲሺን።
JOB 29:9 ሃሳይሼ ዲዛ ዴሬ ካሌꬂዛይቲ ታና ቤኢዲ ባንታ ኩሼታን ባ ዶና ዶና ኦይኪዲ ጮኡ ጌቴስኮሺን።
JOB 29:10 ዴሬ ዳናቲካ ታኒ ዲዛሶን ጮኡ ጌቴሲሺን፤ ኢስታስ ኢንጻርሲ ኦይኬቲን ሃሳያይካ ኢስታ ጾኔስኮሺን።
JOB 29:11 ታና ሲዪዳ ኡባይ ናሺዴስ፤ ታና ቤኢዳ ኡባይ ጋላቲዴስ።
JOB 29:12 ሃይሲካ ሃኒዳይ ታኒ ማንቆታ ዎሳ ሲያዳ ኢስታ ኣሺዛይሳኔ ዪኦ ናይታ ታ ማዲዛ ጊሻሳ።
JOB 29:13 ሃይቃና ማቲዳ ኣሳታ ታ ማዲዛ ጊሻስ ታና ኢስቲ ኣንጂዳ፤ ኣምኤ ማጫሳታ ታ ማዲዛ ጊሻስ ኡፋይሳን ዬጺዳ።
JOB 29:14 ጺሎቴꬅ ማይኦ ማላ ማይኣዲስ፤ ሱሬ ፒርዳካ ካባ ማላ ጎጳ ማይኣዲስ፤ ቆቤ ማላካ ሁኤን ዎꬃዲስ።
JOB 29:15 ቆቄታስ ኣይፌ፥ ዎቤታስካ ቶሆ ጊዳዲስኮሺን።
JOB 29:16 ማንቆታስ ኣዋ፥ ታ ኤሮንታ ኣሳታስካ ኣፓካቶኮሺን።
JOB 29:17 ጌኔ ኣሳ ባንቂላ ሜንꬃዲስ፥ ኢዚ ቦንቂ ኤኪዳይሳካ ኢዛ ዶናፔ ዬጊሳዲስ።
JOB 29:18 «ታኒ፥ ‹ታ ላይꬃይ ኣንጮ ማላ ዳሪን ታኒ ታሶን ዲዛ ማላ ቦንቾን ሃይቃና› ጋዲስኮሺን።
JOB 29:19 ጻጶቲ ኡባ ዎዴ ሃꬄ ዴሚዛ ማላኔ ሃጋቲካ ጻዛን ጪሊሊዛ ሚꬃ ማላኮሺን።
JOB 29:20 ኡባ ዎዴ ታ ቦንቼቲዳ ማላ ዳይስኮሺን፤ ታ ዎልቃይካ ኡባ ዎዴ ኦራጼስኮሺን።
JOB 29:21 ኣሳይ ታ ዞሬዛ ላሞታን ጮኡ ጊዲ ኤዝጌስ።
JOB 29:22 ታ ሃሳያይ ኢስታ ኣሊዛ ጊሻስ ታፔ ጉዬራ ሃሳይዛ ኣሲ ዴና።
JOB 29:23 ጎሻንቻይ ባꬌሳ ኢራ ዴማናዉ ኣሞቲዛይሳ ማላ ኢስቲካ ታ ሃሳያ ሲያናዉ ባንታ ዶና ዶይዲ ናጌቴስኮሺን።
JOB 29:24 ታ ሚጫ ቤሲሺን ኢስቲ ኡፋዬቴቴስ፤ ታ ሲንꬃይ ፖኢሺን ጺርጶቲዳ ኢስታ ሲንꬃይ ቢርሼቴስ።
JOB 29:25 ካሴ ታ ኢስቲ ኮዪዳ ማላ ኣይሳይስኮሺን፤ ባ ኦላ ኣሳ ካሌꬂዛ ካዎ ማላ ታ ኢስታ ካሌꬃዲስኮሺን፤ ኢስቲ ሙዞቲሺን ታኒ ኢስታ ሚንꬄꬃይሲኮሺን።
JOB 30:1 «ኢስታ ኣዋቲ ታስ ዶርሳ ዉዴዛ ሄሚዛ ታ ካናታራ ሞንታ ማላ ኢስቲ ታ ካꬊዛ ኣሳታኮሺን፤ ሃኢ ጊዲኮ ላይꬃን ታፔ ናቲዛ ኣሳቲ ታ ቦላ ቂልጬቴስ።
JOB 30:2 ኢስታስ ዎልቃይ ኢጺዳ ጊሻሲኔ ኢስታ ቦላይ ጊልቂዳ ጊሻስ ኣይኮካ ታና ጎኤቴና።
JOB 30:3 ሜቶፔኔ ኮሻ ዳሮፔ ዴንዲዳይሳን ባዞ ቢታ ቢ ቢዲ ሚꬃ ጻጶ ማጼꬂ ጋንጬቴስ።
JOB 30:4 ማጺኔ ማላ ማልኢዛ ባዞን ሞኪዛ ዱማ ዱማ ሚꬃ ሃይꬃታ ማጼቴስ፤ ማልኦንታ ሳንካራ ጻጶ ቆሬሬꬂ ሜቴስ።
JOB 30:5 ኣሲ ካይሶታ ዋሲዲ ጎዲዛይሳ ማላ ኢስቲካ ዴራ ጊዶፌ ጎዴቴስ።
JOB 30:6 ኢስቲ ባንታ ዱሳሶ ሃꬂ ባይንዳ ሻፋ ጊዶን፥ ኣሲ ባይንዳ ባዞ ቢታኒኔ ኬልካ ጊዶን ቦኬቲዳ ጎንጎሎታን ዶሳይ ባይንዳ ዴኢዳ።
JOB 30:7 ዎራይ ዲዛሶ ዩዪ ዩዪ ዎራ ዶኣታ ማላ ዋሴቴስ፤ ዎራ ጋርሳን ኢሲ ቦላ ሺቄቲ ኣቄቴስ።
JOB 30:8 ባንታ ቢታፌ ጹርቃፌን ሾጬቲ ጎዴቲዳ ጊሻስ ሎኦ ሱንꬂኔ ዎዚናይ ባይንዳይታ ጊዲዲ ዴቴስ።
JOB 30:9 ሃኢ ቃሴ ኢስታ ናይቲ ዬꬃን ታና ቂꬌቴስ፤ ታኒ ኢስታ ጊዶንካ ሚጬቴꬃስ ኣታዲስ።
JOB 30:10 ታና ሻቴቲዲ ታፔ ሃኬቴስ፤ ኣይኮ ዬላይካ ባይንዳ ታ ሲንꬃን ጩቴቴቴስ።
JOB 30:11 ጾሳይ ታ ዎልቃ ዳቡርሲዲ ታና ካዉሺዳ ጊሻስ ኢስቲ ቃሴ ቢጻላይ ባይንዳ ፓራ ማላ ታ ቦላ ꬎꬉ ꬎꬌቴስ።
JOB 30:12 ታፔ ኡሻቻ ባጋራ ዬዳ ዲጪዳይቲ ታ ቦላ ዴንዲዳ፤ ታና ኦይካናስ ዎጺማዴ ዎꬂዳ፤ ታና ጊዶꬂዳ።
JOB 30:13 ታስ ኣꬊዛሶ ꬋይሲዲ ታና ዎꬋና ኮዬቴስ። ኢስቲ ሃይሳꬆ ኦꬃናይሳ ዲጋናዴይ ዴና።
JOB 30:14 ዲኦይ ሜንꬂ ጌሊዛይሳ ማላ ኢስቲካ ታና ጩጊ ጌሊዳ፤ ኡባካ ሜንꬄሬꬂዲ ታ ቦላ ዪዳ።
JOB 30:15 ጊታ ዳጋማይ ታና ጋኪዴስ፤ ታስ ዲዛ ቦንቾይ ጫርኮ ማላ ኣꬊዴስ፤ ታ ኣታና ጊዛ ሂዶታይ ሻራ ማላ ዴንዲ ꬋይዴስ።
JOB 30:16 «ታ ሼምፖያ ኬሃ ጬጫዱስ፤ ሃይቆስካ ማታዱስ።
JOB 30:17 ኦማርስ ኩሜꬅ ታ ሜቄꬃቲ ሃርጌን ዋዬቴቴስ፤ ሳኮዚካ ታስ ሼምፖ ኢሜና።
JOB 30:18 ታና ሳኪዛ ዎልቃማ ሳኮዛ ጋሶን ታ ማይኦይ ጉንዲ ሞሬቲዴስ፤ ቆꬌ ጹንꬃ ሻሚዜ ማላ ታና ጩሊ ኦይኪዴስ።
JOB 30:19 ጾሲ ታና ዱጌ ቢታን ኦሊዳ ጊሻስ ታኒ ጉዱላኔ ቢዲንꬅ ሚሳታዲስ።
JOB 30:20 ጾሶ፥ ታ ኔና ዎሳዲስ፤ ጊዶ ኣቲን ኔ ታስ ዛራቤካ፤ ታ ኤቃዳ ኔኮ ዎሳዲስ፤ ኔኒ ጊዲኮ ኔ ሲንꬃ ታኮ ዛራቤካ።
JOB 30:21 ኔ ታስ ኣዳፌ ሜንጼ ኢታዳሳ፤ ኔኒ ኔ ጊታ ዎልቃንካ ታና ጎዳዳሳ።
JOB 30:22 ኔ ታና ዴንꬃዳ ጫርኮ ቦላ ዎꬃዳሳ፤ ኢዚ ታና ዩሻና ማላካ ኦꬃዳሳ፤ ጎቴ ጫርኮይካ ታና ሺሬቺ ሺሬቺ ዬጌስ።
JOB 30:23 ኣሳ ኡባስ ቃዳ ጊዲዳ ሃይቆስ ኔ ታና ኣꬃዳ ኢማናይሳ ታ ኤራይስ።
JOB 30:24 «ኢሲ ሜቶቲዳ ኡራይ ማዶ ዴማናስ ባ ኩሼ ሚጪዲ ዎሲሺን ቱማፔ ኣይ ኣሲካ ኢዛ ቆሄና።
JOB 30:25 ታኒ ሜቶቲዳ ኣሳታስ ዬካቤኪና? ማንቆታስካ ሚሼታቤኪና?
JOB 30:26 ሎኦ ሚሽ ዴማና ጋ ታ ናጊሺን ኢታ ሚሺ ታና ጋኪዴስ፤ ፖኦይ ያና ጋ ታ ናጌቲሺን ታስ ጋላሳይ ꬉሚዴስ።
JOB 30:27 ታ ዎዚናይ ዳሮ ጬጪዴስ፤ ኣይ ሳሮካ ዴማቤኬ፤ ሜቶ ጋላሳቲካ ታ ቦላ ጋኪዳ።
JOB 30:28 ታ ቦላይ ኣዋ ጹሳን ጊዶንታ ሙዞቴꬃን ካሬጺዴስ፤ ዱላታ ኣሳ ሲንꬃን ኤቃዳ ማዶ ታስ ኦይቻይስ።
JOB 30:29 ኣሳፔ ሻኬታዳ ዎራካናታስ ኢሻ፥ ጉቶታስ ላጌ ጊዳዲስ።
JOB 30:30 ታስ ጋልባዚ ካሬጺዲ ዴንዲዴስ፤ ታስ ቦላዚካ ሚሻን ጹጌቲዴስ።
JOB 30:31 ታኒ ታ ኡፋይስ ኢስታን ቆንጪሲዛ ባጋናኔ ዛዬይ ሃኢ ታ ካዮታዳ ኬሲዛ ዚላሳ ቃላ ሲሲዛ ሚሽ ጊዲዳ።
JOB 31:1 «ሎኦ ማጫሳኮ ጼላዳ ኣሞቶንታ ማላ፤ ታኒ ታ ኣይፌታራ ጫቆ ጌላዲስ።
JOB 31:2 ቦላን ዴኢዛ ጾሳይ ኣሳስ ኣይ ቃዳ ኢማንዴሻ? ሳሎን ዲዛ ኡባ ዳንዳይዛ ጾሳፌ ኣሳስ ኢሜቲዳ ጊሻይ ኣዜሻ?
JOB 31:3 ኢታ ኣሳ ቦላ ቆሆይ፥ ናጋራንቻ ኣሳ ቦላካ ꬋዮይ ጋካናይሲ ኤሬቲዳዝ ጊዴኔ?
JOB 31:4 ጾሳይ ታ ኦꬂዛይሳ ኡባ ቤዬኔ? ታ ሄሜታካ ሻኪ ኤሬኔ?
JOB 31:5 ታኒ ዎርዶ ሃሳይዳ ጊዲኮ፥ ኣሳካ ባሌꬂዳ ጊዲኮ፤
JOB 31:6 ጾሲ ታና ሱሬ ጌዳራን ጌዳሮ። ታኒ ጺሎ ጊዲዳይሳ ሻኪ ኤሮ።
JOB 31:7 ታ ሱሬ ኦጌፔ ኬኢዳ ጊዲኮ፥ ታ ኣይፌይ ቤኢዳ ኡባ ታ ዎዚናይ ኣሞቲዳ ጊዲኮ፥ ቃሴካ ታ ኩሼይ ናጋራን ቱኒዳ ጊዲኮ፥
JOB 31:8 ታኒ ዜሪዳይሳ ሃራ ኣሲ ሞ። ታ ጫሬቻዚካ ኩሜꬂ ሾዴቲ ኦሌቶ።
JOB 31:9 «ታ ዎዚናይ ሃራ ማጫ ኣሞቲዳ ጊዲኮ፥ ታ ሾሮዛ ማቾ ላይማታናስ ኢዛ ፔንጌን ታ ዙጊዳ ጊዲኮ፥
JOB 31:10 ታ ማቻ ሃራ ኣሳስ ጋጩ፤ ቃሴካ ሃራ ኣዴይ ኢዚራ ዚንኦ።
JOB 31:11 ሃይሲካ ኬሂ ቱና፤ ዎጋንካ ቃጻይሲዛ ናጋራ።
JOB 31:12 ሃ ናጋራይ ታማ ማላ ጹጊዛ ጊሻስ ታ ሃይሳ ኦꬂዳኮ ታ ኣቆታ ጹጊ ꬋይሳናኮሺን።
JOB 31:13 «ማጫኔ ኣቱማ ጊዲዳ ታ ኣይሌቲ ታና ሞቲን ኢስታ ሞቶዛ ታ ካꬋዳ ኣጊዳ ጊዲኮ፥
JOB 31:14 ጾሲ ታና ፒርዲዛ ዎዴ ታኒ ዋናኔ? ቃሴ ኢዚ ታና ኦይቺዛ ዎዴ ታኒ ኣይ ዛሮ ኢማኔ?
JOB 31:15 ታ ኣዬይ ኡሎን ታና ሜꬊዳይሲ ታ ኣይሌታካ ሜꬊዳይ ኢዛ ጊዴኔ? ኑና ኡባታካ ኣዪ ኡሎን ሜꬊዳይ ኢዛ ዴኔ?
JOB 31:16 «ማንቆቲ ታና ዎሲን ታ ዲጋ ኤሪኬ፤ ቃሴካ ኣምኤ ማጫሳታ ሚንꬄꬆንታ ኣጋ ኤሪኬ።
JOB 31:17 ዪኦኔ ዪቶ ናይታ ኣጋዳ ታ ካꬅ ታርካ ማቤኬ።
JOB 31:18 ታኒ ታ ዬላጋቴꬃፌ ዶማዳ ታኒ ኢስታ ኣዋ ማላ ዲቻዲስ፥ ታ ዴኦ ላይꬅ ኡባን ኣምኤ ማጫሳታ ማዳዲስ።
JOB 31:19 ማይኦይ ꬋዪን ሜጎይ ዎꬊዛዴ፤ ዎይኮ ሜቶፔ ዴንዲዳይሳን ካሎ ዲዛዴ ቤያዳ፥
JOB 31:20 ታ ዶርሳታ ኢስኬፌ ኦሴቲዳ ማይኦ ታ ማይዚን፥ ኢዛዴ ሆኢን ታና ዛሪ ጋላቶንታ ኣጊዳ ዎዴይ ዴና።
JOB 31:21 ታኒ ሞቶን ኢስታ ላꬃናይሳ ኤራዳ ኣዋይ ባይንዳ ናይታ ናቂዳ ጊዲኮ፥
JOB 31:22 ታ ኩሼይ ሃሼፔ ኬኦ። ታ ቄሴይካ ኩሬዛፔ ኮልዶ።
JOB 31:23 ታኒ ጾሳ ሃንቆስ ያዪዛ ጊሻሲኔ ኢዛ ቴማቴꬃስ ያዪዛ ጊሻስ ሃይሳ ማላ ዮኦታ ኦꬃናዉ ታ ዳንዳይኬ።
JOB 31:24 «ታኒ ታስ ዲዛ ኣቆታን ኣማኔታቤኬ። ዎይኮ ፓያ ዎርቃካ ታስ ኣማኔቲዛ ሚሽ ኦꬃቤኬ።
JOB 31:25 ‹ታስ ዲዛ ኣቆይ ዳሪዴስ፤ ታኒ ዱሬቴꬃፌ ዴንዲዳይሳን ዳሮ ሚሽ ዴማዲስ› ጋዳ ኡፋዬታ ኤሪኬ።
JOB 31:26 ኣርሼ ፖኦዛ ቤያዳ፥ ኣጊና ሎኤቴꬃ ቤያዳ፥
JOB 31:27 ታ ዎዚናን ኢስታ ጌማራ ቦንቻቤኬ፤ ቃሴካ ታ ኩሼ ሚጫ ዬራዳ ኢስታስ ጎይናቤኬ።
JOB 31:28 ታኒ ሃይሳ ማላ ኦꬂዳኮ ሳሎን ዲዛ ጾሳ ካዶ ጊዲዳ ጊሻስ ሃይቲ ሃ ኦሶቲ ታ ቦላ ፒርዳ ኤሂዛ ናጋራታ።
JOB 31:29 «ታ ሞርኬታ ኩንዴꬃን ታኒ ኡፋዬታቤኬ፤ ኢታ ሚሺ ኢስታ ቦላ ጋኪሺንካ ሚጫቤኬ።
JOB 31:30 ‹ታ ሞርኬቲ ꬋዬቶ› ጋ ቃንጋዳ ናጋራ ኦꬃቤኬ።
JOB 31:31 ታኒ ኡባ ዎዴ ኢማꬃ ሞኪዛይሳ ታሶ ኣይሌቲ ታ ጊሻስ ማርካቴቴስ።
JOB 31:32 ታኒ ታ ኬꬃ ካሬ ኦጌራ ኣꬊ ቢዛ ማንዳራስ ዶያ ዎꬃዲስ። ሄሳ ጊሻስ ጋዴይ ቃሚን ዪዳ ኢማꬂ ካሬን ኣይሳ ኤሪኬ።
JOB 31:33 ታኒ ታ ሞሮ ጌንꬃቤኬ፤ ሃራ ኣሳታ ማላ ታ ናጋራካ ቆታቤኬ።
JOB 31:34 ታና ኣሳ ዳሮይ ያሺሲኒኔ ሶ ኣሳታ ካꬎይ ዳጋንꬂን ታኒ ታሶን ጮኡ ጋዳ ቆቴቲዳ ዎዴይ ዴና።
JOB 31:35 «ታ ጊዛይሳ ሲዪዛዴይ ቤቴሬኔሺን! ታኒካ ቴቄ ቃላ ሺሻናኮሺን! ኡባ ዳንዳይዛ ጾሳይ ታ ጊዛይሳ ዛሮ ኢዚ ኢሞ! ታና ሞቲዛ ሞታንቻይ ታና ሞቲዛይሳ ጻፊ ሺሺን ታ ቤያርኪናሺን!
JOB 31:36 ዎይቶ ማላ ታኒ ታ ሃሼን ቶካናኮሺን፤ ካላቻ ማላካ ታ ሁኤ ቦላ ጎጻና።
JOB 31:37 ዳናቴꬂ ዲዛ ኣሳ ማላ ጾሳ ሲንꬃን ያዮንታ ኤቃዳ ታ ኦꬂዳ ኡባ ቆንጪሳ ዮታናኮሺን።
JOB 31:38 «ኣሳ ጋዴ ዎጋይ ባይንዳ ቦንቃ ኤካዳ ታኒ ጎዪዳ ጊዲኮ፥
JOB 31:39 ሄ ጋዳ ጎዳታ ታ ሚሺሲዳ ጊዲኮ፥ ኣይኮካ ኢስታስ ኢሞንታ ዳሼ ሞኪዳ ካꬃ ታኒ ሚዳ ጊዲኮ፥
JOB 31:40 ሄ ታ ጎዪዛ ጎሻሶን ዲዛ ጊስቴ ጊሻስ ኣጉንꬂ፥ ባንጋ ጊሻስ ሻራፋይ ሞኮ» ጊዴስ። ኢዮቢ ባ ሃሳያ ሃይሳን ፖሊዴስ።
JOB 32:1 ኢዮቢ፥ «ታኒ ጺሎ ኣሳ» ጊዛ ቆፋ ላሞንታ ጊሻስ ሄꬑ ኣሳቲ ኢዛ ዞሪዛይሳ ኣጊዳ።
JOB 32:2 ኤራማ ዜሬꬃፌ ቡዜ ዴሬ ኣስ ባራኬሌ ና ኤሊሁይ ኢዮቢ ባና ጾሳፌ ኣꬂዲ ጺሊሲዳ ጊሻስ ኢዮቤ ቦላ ኬሂ ሃንቄቲዴስ።
JOB 32:3 ቃሴካ ኢዮቤ ላጌ ሄꬓቲ ኢዮቤ ቦላ ፒርዳፌ ኣቲን ኢዛ ኣማንꬂዛ ቃላ ዮቲ ኣማንꬆንታ ጊሻስ ኢስታ ቦላካ ሃንቄቲዴስ።
JOB 32:4 ኤሊሁይ ሃንኮይታፔ ዬላጋ ጊዲዳ ጊሻስ ሃንኮይቲ ባንታስ ዲዛይሳ ሃሳዪ ዉርሳናሼ ጋካናስ ኢዮቤራ ሃሳያናዉ ባ ታራ ናጎ ቦላ ዴስ።
JOB 32:5 ኢዮቤ ላጌ ሄꬓቲ ኢዮቤስ ቤሲዛ ዛሮ ኢማናስ ዳንዳዮንታይሳ ቤኢዲ ኬሂ ሃንቄቲዴስ።
JOB 32:6 ቡዜ ዴሬ ኣስ ባራኬሌ ና ኤሊሁይ፥ «ታኒ ኢንቴፌ ዬላጋ ጊዲዳ ጊሻሲኔ ኢንቴ ጪማ ጊዲዳ ጊሻስ ፖኮይኔ ያሺ ታና ኦይኪን ሃኖ ጋካናስ ታ ቆፋ ቆንጪሶንታ ጋምኣዲስ።
JOB 32:7 ‹ጪማቲ ሲንꬃቲ ሃሳዬቶ፤ ባንታ ላይꬃን ዴሚዳ ኣꬎ ኤራቴꬃፌ ታማርሴቶ› ጋ ቆፓዲስ።
JOB 32:8 ጊዶ ኣቲን ኣሳ ጊዶን ኣቂዲ ኣꬎ ኤራቴꬅ ኣሳስ ኢሚዛይ ኡባ ዳንዳይዛ ጾሳ ኣያና።
JOB 32:9 ኣስ ኣꬎ ኤራንቻ ኬሲዛይ ጪማቴꬅ ጊዴና፤ ቃሴካ ኣሲ ኣኬካናስ ዳንዳይዛይ ኢዛዴስ ላይꬂ ኣዱቂዳ ጊሻስ ጊዴና።
JOB 32:10 «ሄሳ ጊሻስ ሎኤꬂ ሲዪቴ፤ ታኒካ ታ ቆፋ ኢንቴስ ዮታና።
JOB 32:11 ኢንቴ ሃሳይዛ ዎዴ ታኒ ጮኡ ጋዳ ኤዝጋይስ፤ ኢንቴ ሃሳያና ቃላ ቆፒሺንካ ታኒ ናጋይስ።
JOB 32:12 ታኒ ኢንቴ ሃሳይዛይሳ ሎኤꬃ ሲያዲስ፤ ጊዶ ኣቲን ኢንቴፌ ኦኒካ ኢዮቢ ሞራንቻ ጊዲዳይሳ ኣማንꬂዳይኔ ቃሴካ ኢዛ ሃሳያስ ቤሲዛ ዛሮ ኢሚዳይ ዴና።
JOB 32:13 ኢዮቤ ሃሳያስ ቤሲዛ ዛሮ ኢማናስ ዳንዳይዛይ ጾሳፌ ኣቲን ኣስ ጊዶንታ ጊሻስ ኢንቴ፥ ‹ኑኒ ኣꬎ ኤራቴꬅ ዴሚዶስ› ጊዲ ጮ ሃዳ ጬቄቶፍቴ።
JOB 32:14 ኢዮቢ ማርሼቲዳይ ኢንቴናራፔ ኣቲን ታናራ ጊዴና፤ ታኒካ ኢንቴ ሃሳይዛይሳ ማላን ኢዛስ ዛሮ ኢሚኬ።
JOB 32:15 «ኢስቲ ዳጋሚዲ ሃሳይዛ ቃላይ ꬋይዳ ጊሻስ ኣይኮ ሃሳያናዉ ዳንዳይቤቴና።
JOB 32:16 ሄኮ! ኢስቲ ሃሳይዛ ሚሺ ꬋዪን ጮኡ ጊዲ ኤቂዳ፤ ሂስቲን ታኒካ ጮኡ ጋ ናጋናሲ ታስ ቤሲዜ?
JOB 32:17 ኣካይ! ጮኡ ጊኬ፤ ታኒካ ታ ባጋራ ዲዛ ዛሮዛ ኢማና፤ ታ ቆፋካ ቆንጪሳና።
JOB 32:18 ታ ሃሳያናስ ቤሲዛዚ ዳሮይ ዲዛ ጊሻስ፤ ታናን ዲዛ ኣያናይ ታና ዎልቃራ ሃሳይሴስ።
JOB 32:19 ቤኢቴ! ታኒ ሃሳዮንታ ኣጊኮ ዎይኔ ጫጄ ዎꬂዛ ኦራꬃ ሉካሞይ ሼምፒዛሶ ꬋይዲ ꬉቃናስ ፑሪዛይሳ ማላ ታ ጊዶይ ፑሪዲ ꬉቃና ጋኪዴስ።
JOB 32:20 ኣኔ! ታኒ ሃይሳፌ ሃሳያዳ ሼምፓይስ፤ ታ ዶና ዶያዳ ታኒ ሃሳያናስ ቤሴስ።
JOB 32:21 ሃይሳ ሃ ዮኦዛን ታኒ ኦናካ ማዲኬ፤ ዎይኮ ኣይ ኣሳካ ኣዳሺኬ።
JOB 32:22 ታኒ ኣስ ኣዳሾይ ሙሌካ ሃኔና፤ ታ ሄሳ ማላ ኦꬂኮ ታና ሜꬊዳይሲ ታና ሃንቃና።
JOB 33:1 «ኢዮቤ! ታ ኔስ ዮቲዛይሳ ሲያ፤ ታ ኔስ ጊዛይሳካ ኣኬካን ኤዝጋ፤
JOB 33:2 ታ ኔስ ዛሮ ኢማናስ ጊጌታ ኡታዲስ፤ ታ ዶናይካ ጊጌቲ ኡቲዴስ።
JOB 33:3 ታ ሃሳይዛ ቃላቲ ታ ዎዚና ሱሬቴꬃ ቆንጪሴቴስ፤ ታ ኢንጻርሳይ ታ ኤሪዛ ቱማ ሃሳዬስ።
JOB 33:4 ታና ሜꬊዳይ ጾሳ ኣያና፤ ታስ ዴኦ ኢሚዳይ ኡባ ዳንዳይዛ ጾሳ ኣያና።
JOB 33:5 ኔኒ ዳንዳይዛ ጊዲኮ ታ ጎይሳስ ዛሮ ኢማ፤ ኔ ጋናይሳ ጊጊሳዳ ታናራ ሃሳዬታ።
JOB 33:6 ሄኮ! ታኒ ጾሳ ሲንꬃን ኔናራ ጊና፤ ታኒካ ሜꬌቲዳይ ኡርቃፌ።
JOB 33:7 ኔኒ ታስ ያያናስ ቤሴና፤ ታኒካ ኔና ናቃናዉ ኮሼና።
JOB 33:8 ኔኒ ሃሳይዳ ኡባ ኤዝጋሼ ታ ጋምኣዲስ፤ ኔ ኢንጻርሳፌ ኬኢዳ ቃላታ ታ ሲያዲስ።
JOB 33:9 ኔኒ ሃሳያሼ፥ ‹ታኒ ቆሆይኔ ቦሬይ ባይንዳ ኣሳ፤ ታኒ ናጋራ ኦꬆንታዴኔ ጺሎ ኣሳ።
JOB 33:10 ጊዶ ኣቲን ጾሲ ታና ቃጻያናስ ጋሶ ኮዬስ፤ ታናካ ባስ ሞርኬ ማላ ቆዴስ።
JOB 33:11 ታ ቶሆታ ኢዚ ዱሩማን ዱጺ ቃቺዴስ። ታ ቢዛሶ ኡባን ታና ጼሌስ› ጋዳሳ።
JOB 33:12 «ኢዮቤ! ሃይሲ ኔ ሃሳያይ ባላ ጊዲዴስ፤ ታኒካ ኔስ ቆንጪሳናስ ኮያይስ፤ ጾሲ ኣሳ ኡባፌ ኣꬌስ።
JOB 33:13 ሂስቲን፥ ‹ኔኒ ጾሲ ኣሲ ማጋኒዛ ማጋና ሲዬና› ጋዳ ኣይስ ጾሳ ቦላ ዙዙማይ?
JOB 33:14 ኣሲ ኣኬኬናፌ ኣቲን ጾሲ ዱማ ዱማ ኦጌራ ሃሳዬስ።
JOB 33:15 ኦማርስ ኣሲ ሂጻን ኢቺ ዲዛ ዎዴ ኣሲ ኮይሮ ꬊስኮ ሴራጊዳ ዎዴ፤ ኣጉሞኒኔ ኣጁታንካ ጾሲ ሃሳዬስ።
JOB 33:16 ሄ ዎዴ ኣሲ ኢዛ ቃላ ሲያና ማላ ሃይꬃ ዶዬስ፤ ኢዚ ባ ኢሚዛ ሴራንካ ዳጋንꬄስ።
JOB 33:17 ሄሳ ማላ ኦሶን ኣሲ ናጋራ ኦꬆንታ ማላ ዲጌስ፤ ኦቶሬቴꬃካ ኢስታፌ ዴንꬄስ።
JOB 33:18 ጾሲ ኣሳ ሼምፖ ꬋዮፔ ኣሼስ፤ ባሻ ሃይቆፔካ ዎዜስ።
JOB 33:19 ዎይኮ ኣሲ ሜቄꬃን ጌሊዳ ሳኮን ዲሺን ኣሲ ባ ባላፔ ሲማና ማላ ሃርጌ ሂጻን ጾሲ ዞሬስ።
JOB 33:20 ሃይሳ ማላን ሃርጋንቻ ካꬅ ላንቃናስ ኢዛ ኢቴስ፤ ሎኦ ካꬂካ ሃራሴስ።
JOB 33:21 ጊልቃቴꬃፔ ዴንዶይሳን ኢዛስ ኣሾዚካ ዉሪዴስ፤ ሜቄꬂ ጻላ ኣቲዴስ።
JOB 33:22 ኢዛ ሼምፖይ ኬዛናሲኔ ሞጌታናስ ማቲዴስ።
JOB 33:23 «ኣሲ ሱሬ ኦጌ ቤሳናስ ሺያን ቆዴቲዛ ጾሳ ኪታንቻታፔ ኢሶይ ኢዛ ማዳናስ ዪዳኮ፥
JOB 33:24 ኪታንቻይ ኢዛስ ቃꬌቲዲ፥ ‹ኢዛ ዎዚዛዴ ታ ዴሚዳ ጊሻስ ኢዚ ዱጌ ዱፎን ዎꬎንታ ማላ ኣጋጋ!› ጊዲ ሃይቆ ኦይኪዳኮ፥
JOB 33:25 ሄሳ ጊሻስ ኢዛ ኣሳቴꬃይ፥ ቄሪ ና ኣሾ ማላ ዛሪ ኦራጻና፤ ኢዛስ ዬላጋቴꬃ ዎዴ ማላ ቃሴካ ሃናና።
JOB 33:26 ሄ ዎዴ ጾሳኮ ኢዚ ዎሳና። ኢዛ ዎሳካ ጾሲ ሲያና፤ ጾሳ ሲንꬅ ኢዚ ቤኢዲ ኡፋዬታና፤ ጾሲካ ኢዛ ዎሳስ ዛሮ ኢማና።
JOB 33:27 ኢዚ ኣሳ ሲንꬃን፥ ‹ታኒ ናጋራ ኦꬃዲስ፤ ሱሬ ጊዲዳይሳካ ጌላሳዲስ። ጾሳይ ጊዲኮ ታ ሞራ ማላ ታስ ኦꬂቤና።
JOB 33:28 ታኒ ዱፎን ጌሎንታ ማላ ታና ኣሺዴስ፤ ሄኮ ሃኢ ፓጻ ዳዳ ታኒ ፖኦ ቤያይስ› ጊ ዬጺዴስ።
JOB 33:29 «ሄኮ! ጾሲ ሃይሳ ኡባ ሚሻ ኣሳስ ዛሪ ዛሪ ኦꬄስ።
JOB 33:30 ዴኦን ዲዲ ፖኦ ቤያና ማላ ኢዛ ሼምፖ ሃይቆፔ ኣሼስ።
JOB 33:31 «ኢዮቤ! ታ ኔስ ዮቲዛይሳ ሎኤꬃ ሲያ፤ ታኒ ኔስ ዮታይስ ኣኔ ኔኒ ጮኡ ጋ።
JOB 33:32 ኔኒ ሃሳያናስ ኮይዛ ሚሺ ዲኮ ታስ ዮታ፥ ታ ኔኒ ጺሎ ጊዲዳይሳ ኔና ቤሳና ኮያይስ።
JOB 33:33 ኣካይ ጊኮ! ታኒ ሃሳይዛይሳ ጮኡ ጋዳ ሲያ፤ ታኒ ኔና ኤራቴꬅ ታማርሳና» ጊዴስ።
JOB 34:1 ኤሊሁይ ባ ሃሳያ ጉጂዲ ሂዝጊዴስ፤
JOB 34:2 «ኢንቴኖ ኣꬎ ኤራንቻቶ! ታ ኢንቴስ ሃሳይዛይሳ ሲዪቴ፤ ኢንቴኖ ኤራንቻቶ ታ ሃሳያ ኤዝጊቴ።
JOB 34:3 ኢንጻርሲ ካꬃ ማልኦ ሻኪ ኤሬስ፤ ሄሳꬆካ ሃይꬂ ዮኦ ሻኪ ኤሬስ።
JOB 34:4 ቱሙ ጊዲዳ ዮኦ ኣኔ ሻኪ ኤሮስ፤ ሎኦ ጊዲዳ ሚሺካ ኢሲፌ ታማሮስ።
JOB 34:5 «ኢዮቢ፥ ‹ታኒ ጺሎ ሺን ጾሲ ታና ሱሬ ፒርዳ ዲጊዴስ።
JOB 34:6 ታኒ ቱማንቻሺን ዎርዳንቻ ማላ ቆዴታዲስ፤ ታ ኣይኮካ ሞሮንታ ዳሼ ፓጾንታ ማዱንꬃን ዋዬታይስ› ጊዴስ።
JOB 34:7 ኢዮቤ ማላ ጾሳ ቦላ ቂልጪዛዴይ ቤታንዴሻ?
JOB 34:8 ኢዚ ኢታ ኦꬂዛይታራ ላጌቴስ፤ ኢዛስ ፔይሻይካ ኢታ ላጌታራ።
JOB 34:9 ‹ጾሳ ኡፋይሳና ጊዲ ኦሶይ ኣስ ኣይኮካ ማዴና› ጌስ።
JOB 34:10 «ኣኬኪዛ ኣሳቶ ኣኔ ታና ኤዝጊቴ! ኢታ ኦሶይ ጾሳፌ፤ ባላ ኦሶይ ኡባ ዳንዳይዛ ጾሳፌ ሃኮ!
JOB 34:11 ጾሲ ኣሳስ ኢዛዴ ኦሶ ማላ ኢሜስ፤ ኢዛስ ኢዛዴ ሄሜꬃ ማላ ኦꬄስ።
JOB 34:12 ኡባ ዳንዳይዛ ጾሳይ ሙሌካ ኢታ ሚሽ ኦꬄና፤ ኣይ ኣሳስካ ሱሬ ፒርዳ ጌላሴና።
JOB 34:13 ጾሳሲ ቢታ ሃዳራ ኢሚዳዴይ ዴና፤ ኢዛ ኣላሜ ቦላካ ሹሚዳዴይ ዴና።
JOB 34:14 ጾሲ ባ ኣያናዛኔ ባ ሼምፖዛ ባኮ ዛሪ ኤካና ኮዪዳኮ፥
JOB 34:15 ኣሾ ማይኢዳይ ኩሜꬅ ꬋያና፤ ኣሳ ዜሬꬂካ ዱጌ ቢታን ሲማና።
JOB 34:16 ኔኒ ኣኬኪዛ ጊዲኮ ሃይሳ ሲያ፤ ታ ኔስ ሃሳይዛይሳ ኤዝጋ።
JOB 34:17 ሱሬ ፒርዳ ኢጺዛዴይ ዴሬ ኣይሳናስ ዳንዳይዜ? ኔኒ ጺሎኔ ዎልቃማ ጾሳ ናጋራንቻ ኬሳይ?
JOB 34:18 ካዎታ ኢንቴ ꬋሌኬታ፤ ሹሜታካ ኢንቴ ኢታ ጋናይ ኦኔ?
JOB 34:19 ኡባቲካ ኢዛ ሜꬌታታ ጊዲዳ ጊሻስ ኢዚ ሹሜታ ሻኪ ማዴና፤ ዱሬታካ ማንቆታፔ ሻኬና።
JOB 34:20 ኢስቲ ሌላ ጊዶꬅ ቆፖንታ ሃይቃና፤ ኡባይ ኮኮሪ ꬋያና፤ ዎልቃማቲካ ኦና ኩሼይካ ቦቾንታ ኪቻና።
JOB 34:21 «ጾሲ ኣሳ ኡባ ታንጎዛ ጼሌስ፤ ኢሳ ኢሳ ሄሜꬅ ካሌቴስ።
JOB 34:22 ኢታ ኣሳቲ ቆቴታና ማላ ጊርዲ ጊዳ ꬉማይ ዴና።
JOB 34:23 ጾሲ ኣሳ ቦላ ፒርዳናስ ባሬ ኢሜና።
JOB 34:24 ዎልቃማ ዳናታ ዳናቴꬃፌ ዴንꬃናስ፥ ኢስታሶሆን ሃራ ዎꬃናስ፥ ኣይኮ ኦይሻይ ሺቆንታ ኢዚ ሄሳꬆ ኦꬄስ።
JOB 34:25 ኢዚ ኢስታ ኦሳ ኤሪዛ ጊሻስ ኢሲ ኦማርስ ኢስታ ዳናቴꬃፌ ꬋይሳና።
JOB 34:26 ኢስቲ ኦꬂዳ ማካላቴꬃ ጋሶን ኡባ ኣሳ ሲንꬃን ማካላንቻታ ቃጻዬስ።
JOB 34:27 ኢዚ ኢስታ ቃጻዪዛይሲ ኢስቲ ኢዛ ካሊዛይሳ ኣጊዳ ጊሻሳ፤ ኢዛ ኣዛዞታካ ኢስቲ ካꬊዳ ጊሻሳ።
JOB 34:28 ኢስቲ ማንቆታ ኡንኤꬂዳ፤ ፑዴ ጾሳኮ ዋሳና ማላ ኦꬂዳ። ጾሲካ ማንቆታ ዋሶዛ ሲዪዴስ።
JOB 34:29 ጾሲ ጮኡ ጊኮ ኦኔ ኢዛ ቦላ ፒርዳናይ? ኢዚ ባ ዞኮ ዛሪኮ ኦኔ ኢዛ ቤያናይ?
JOB 34:30 ሄሳꬆካ ጾሳስ ያዮንታ ዴራ ኡንኤꬂዛ ካዎይ ዴራ ቦላ ዴንዲኮ ኢዛ ኦኔ ዲጋናይ?
JOB 34:31 «ኢዮቤ! ኔኒ ኔ ናጋራ ጾሳስ ፓጻዳ ዛራ ናጋራ ኦꬂኬ ጋ ቃላ ጌላዲ?
JOB 34:32 ታ ኦꬂዳ ናጋራይ ኣዋይሳኮ ታና ታማርሳ፤ ታ ሞሪዳ ጊዲኮ ዛራዳ ኢዛꬆ ኦꬂኬ! ጋዲ?
JOB 34:33 ሂስቲን ኔኒ ማሬታናፔ ኢጺስ ጋዳ ኔኒ ሺሺዛ ቆፋ ማላ ጾሲ ኔ ኣሞዛ ኔስ ፖላና ማላ ኔ ኮያይ?
JOB 34:34 «ታና ሲዪዛ ኣሳቲ ኣኬኪዛ ኤራንቻቲካ፥
JOB 34:35 ‹ኢዮቢ ኤራቴꬂ ባይንዳ ሃሳዬስ፤ ሁኤይ ባይንዳ ሃሳያታ ሃሳዬስ› ጌቴስ።
JOB 34:36 ኢታ ኣሳታ ዛሮ ማላ ዛሪዛ ጊሻስ ኢዮቢ ዉርሴꬂ ጋካናዉ ፓጬቲዳኮ ኣዜ ዲዛይ!
JOB 34:37 ኑ ጊዶን ዎጋፔ ካሬ ኬኢዴስ፤ ጾሳ ቦላ ካꬌ ዳርሲዴስ፤ ባ ናጋራ ቦላካ ማካላቴꬅ ጉጂዴስ» ጌቴስ።
JOB 35:1 ኤሊሁይ ባ ሃሳያ ጉጂዲ ሂዝጊዴስ፤
JOB 35:2 «ኢዮቤ ኔ ኔና፥ ‹ታኒ ጾሳ ሲንꬃን ጺሎ› ጊዛይሲ ሊኬ?
JOB 35:3 ‹ናጋራ ኦꬆንታ ኣጊኮ ታ ኣይ ጎኤታኔ? ቃሴካ ኣይ ዴማኔ?› ጋዳ ኔኒ ኦይቻዳሳ።
JOB 35:4 ታኒ ኔሲኔ ኔናራ ዲዛይታስ ዛሮ ኢማና።
JOB 35:5 «ꬎቁ ጋዳ ፑዴ ሳሎ ጼላ፤ ኔፔ ꬎቁ ጊዲ ዲዛ ሻራ ኣኬካ።
JOB 35:6 ኔኒ ናጋራ ኦꬂኮ ጾሳ ኣዛን ቆሃይ? ኔኒ ኢዛ ዳርሳ ዳርሳ ቆሂኮ ኢዛ ኣይ ኦꬃናዉ ዳንዳያይ?
JOB 35:7 ኔኒ ጺሎ ጊዲኮ ኢዛስ ኣይ ኢማኔ? ኢዚ ኔፔ ኣይኮካ ኮዬና።
JOB 35:8 ኔ ናጋራ ኦꬂኮ ቆሃናይ ኔ ማላ ኣሳታ ጻላ። ኔ ሎኦ ሚሽ ኦꬂኮካ ኔ ጎኢዛይ ኣስ ጻላ።
JOB 35:9 «ኣሲ ሃራይ ዳርሲ ቆሂሺን ዋሴስ፤ ባፔ ዎልቃቲዛዴ ኩሼፔ ባና ኣሺ ኤካናዴስ ማጋኔስ።
JOB 35:10 ጊዶ ኣቲን ኢስታፌ ኦኒካ፥ ‹ታና ሜꬊዳ ጾሳይ ኣዋኔ? ሌላ ጊዶꬅ ማዛሙሬ ኢሚዛይሲ ኣዋኔ?
JOB 35:11 ሜሄታፔ ኑና ኣꬂ ታማርሲዳ፤ ሳሎ ካፎታፔካ ኣꬎ ኤራንቻታ ኦꬂዳይ ኢዛ› ጊዳይ ባዋ።
JOB 35:12 ኢስቲ ዋሴቴስ፤ ኢዚ ጊዲኮ ኢስቲ ኦቶራንቻታኔ ኢታታ ጊዲዳ ጊሻስ ኢስታስ ዛሮ ኢሜና።
JOB 35:13 ጾሲ ቱማ ዎዚናፔ ጊዶንታ ዋሶ ሲዬና፤ ኡባ ዳንዳይዛ ጾሳይ ሄሳ ማላ ኤዝጌና።
JOB 35:14 ኢዮቤ! ኔኒ ታ ጾሳ ኣይኮካ ቤኢኬ ጊኮካ፥ ኔ ሜቶይ ኢዛ ሲንꬃን ዴኢዛ ጊሻስ፥ ኔኒ ዳንዳያን ናጋና ኮሼስ።
JOB 35:15 ቃሴካ ጾሲ ኔና ባ ሃንቆን ሃንቆንታ ኣሳ ኢታቴꬃ ጮኡ ጊዲ ኣꬋና ኔስ ሚሳቲዜ?
JOB 35:16 ኢዮቤ! ኔኒ ጮ ሜላ ሃሳያ ዳርሳሳ፤ ኤራቴꬂ ባይንዳ ጮ ጋዳ ሃሳያሳ።»
JOB 36:1 ኤሊሁይ ባ ሃሳያ ጉጂዲ ሂዝጊዴስ፤
JOB 36:2 «ጾሳ ጊሻስ ታኒ ሃሳያና ሃራይ ዲዛ ጊሻስ ጉꬅ ዳንዳያዳ ታ ጊዛይሳ ሲያ።
JOB 36:3 ታኒ ዳሮሶፔ ዴሚዳ ኤራቴꬃን፥ ታና ሜꬊዳ ጾሲ ጺሎ ጊዲዳይሳ ታኒ ኔስ ኤሪሳይስ።
JOB 36:4 ታ ቃላይ ዎርዶ ጊዶንታይሳ ኔኒ ሎኤꬃ ኤራ፤ ኔናራ ሃሳያና ታስ ኩሜꬃ ኤራቴꬂ ዲዛይሳ ኤራ።
JOB 36:5 «ቱሙካ ጾሲ ዎልቃማ፤ ጊዶ ኣቲን ኦናካ ካꬌና፤ ኢዚ ኡባካ ኣኬኬስ።
JOB 36:6 ኢዚ ኢታ ኣሳታ ፓጻ ዎꬄና። ሜቶቲዳ ኣሳታስ ጊዲኮ ሱሬ ፒርዳ ፒርዴስ።
JOB 36:7 ጾሲ ጺሎ ኣሳታ ናጌስ፤ ካዎታ ማላ ቦንቾ ኣልጋን ኡቲሴስ፤ ሜርናስ ኢስታ ꬎቁ ꬎቁ ሂስቴስ።
JOB 36:8 ጊዶ ኣቲን ኣሲ ሳንሳላታን ቃሼቲኮ፥ ዎይኮ ሜቶ ጊቴን ኦይኬቲኮ፥
JOB 36:9 ኢስቲ ባ ኦቶሬቴꬃን ኦꬂዳ ናጋራ ቆንጪሴስ።
JOB 36:10 ኢስቲ ሴራ ሲያና ማላ ኢስታ ሃይꬃ ዶዬስ፤ ኢስቲ ባንታ ኢታ ኦሳፔ ሲሚዲ ማሬታና ማላ ኣዛዜስ።
JOB 36:11 ኢስቲ ጾሳስ ኣዛዜቲዲ ኦꬂኮ፥ ባንታስ ኣቲዳ ላይꬃ ዱሬቴꬃኒኔ ኡፋይሳን ኦንጋና።
JOB 36:12 ጊዶ ኣቲን ኢዛ ሲዮንታ ኢጺኮ ኢስቲ ኦላን ዉራና፤ ኢስቲ ባንታ ኤያቴꬃን ዲሼ ሃይቃና።
JOB 36:13 «ባንታ ዎዚናራ ጾሳ ካዲዛይቲ ቃጻዬቲዳ ማላ ዳና፤ ኢዚ ኢስታ ቃጻይሺንካ ኢስታ ካሌꬂዛይቲ ዎሴቴና።
JOB 36:14 ኢስቲ ባ ፖሊዛ ኢታ ላይማቴꬃ ቦሻን ꬋያና፤ ባንታ ዬላጋቴꬃ ላይꬃንካ ሙልቄቲ ሃይቃና።
JOB 36:15 ጾሲ ሜቶን ኡንኤቲዛይታ ኢስታ ሜታፔ ኣሻና፤ ኢስታ ጋኪዳ ሜታን ኢስታስ ቲሚርቴ ኢማና።
JOB 36:16 «ሃይሳ ሃ ዎዴዛን ጾሲ ኔስ ቆፒዛይ ኔና ኔ ዲዛ ሜታፔ ኬሲዲ ሎኦ ካꬂ ኩሚዳ ማዳን ኤፋናሳ።
JOB 36:17 ሃኢ ጊዲኮ ኔ ኦꬂዳ ሞራፔ ዴንዶይሳን ኔ ቦላ ፒርዴቲዳ ጊሻስ፥ ኔስ ቤሲዛ ቂጻቴ ኤኮ ቦላ ዳሳ።
JOB 36:18 ኦኒካ ኔና ዱሬቴꬃ ዳሮን ጪሞንታ ማላ፤ ማታኤንካ ኔና ባሌꬆንታ ማላ ናጌታ።
JOB 36:19 ኔስ ዲዛ ኣቆታይኔ ጎዳቴꬂ ዳሮ ጊዲኮካ ኔና ሜቶፔ ኣሼቴና።
JOB 36:20 ዴራ ዲዛሶፔ ꬋይሲዛ ꬉማ ዎዴይ ያና ማላ ኣሞቶፋ።
JOB 36:21 ኔኒ ሜቶ ጊዶን ፓጬቲዛይ ሄሳ ጋሶን ጊዲዳ ጊሻስ ሲማዳ ናጋራ ኦꬆንታ ማላ ናጌታ።
JOB 36:22 «ጾሳ ዎልቃይ ኣይ ማላ ጊታኮ ኣኬካ፤ ጾሲ ኡባፌ ኣꬎ ኣስታማሬ።
JOB 36:23 ‹ሃይሳ ኦꬃ› ጊዲ ጾሳ ኣዛዚዛ ኣሲ ዎይኮ፥ ‹ኢታ ኦሶ ኦꬃዳሳ› ጊዲ ኢዛ ዋላሲዛይ ኦኔ?
JOB 36:24 ኢዚ ኦꬂዛ ኦሳ ጊሻስ ኣሳይ ኡባ ዎዴ ዬꬃን ጋላቲዛይሳ ማላ፥ ኔኒካ ኢዛ ኦሳስ ዬꬃን ጋላታ።
JOB 36:25 ኣሳ ዜሬꬂ ኡባይ ጾሳ ኦሳ ቤዪዴስ፤ ኣሳይ ቲሺ ኦꬂ ሃኮን ቤዪዴስ።
JOB 36:26 ጾሳ ጊታቴꬃ ፒልጊዲ ጋካናስ ኑኒ ዳንዳዮኮ፤ ኢዛ ላይꬃ ቆዳይካ ኑ ኤራፔ ቦላ።
JOB 36:27 «ጾሲ ሃꬃ ኣባፌ ፑዴ ሳሎ ኤፌስ፤ ዛሪዲካ ኢራ ሳሎፔ ዱጌ ቡኪሴስ።
JOB 36:28 ኢራ ሻራፔ ኬሲዲ ዎልቃማ ኢራ ኣሳስ ቡኪሴስ።
JOB 36:29 ጊዶ ኣቲን ጾሲ ሻራ ዎስቲ ሚጪዛኮ፥ ዎልቃንꬃ ጊዶን ኡቲዲ ኢዚ ዋኒ ሃሳይዛኮ ኦኒ ኤራናዉ ዳንዳይዜ?
JOB 36:30 ጾሲ ኣባ ጪማቴꬃ ካሚዲ ኢዚ ባ ዩሾን ዎልቃንꬃ ዎስቲ ላሊዛኮ ጼላ።
JOB 36:31 ሃይሳ ማላ ኦꬂዲ ጾሲ ባ ዴራ ኣይሴስ፤ ኣሳይ ሚዛ ዳሮ ካꬃካ ሞኪሴስ።
JOB 36:32 ዎልቃንꬃ ኢዚ ባ ኩሼን ኦይኬስ፤ ኦይኪዲ ባ ዶሲዳ ባጋ ባና ማላ ኣዛዜስ።
JOB 36:33 ዳዳይ ዎልቃማ ኢራይ ያናይሳ ማላቴስ፤ ሜሄቲካ ኢራ ኡሾይ ዪዛይሳ ኤሬቴስ።
JOB 37:1 «ዎልቃማ ኡሾፔ ዴንዶይሳን ታ ዎዚናይ ኮኮሪዴስ፤ ያሻቴꬃፌ ዴንዶይሳን ፒሪ ባና ጋኪዴስ።
JOB 37:2 ኢዛ ዶናፔ ኬኢዛ ቃላ ሲዪቴ፤ ዳዳ ማላ ጉሚዛ ጊሪሳ ቃላ ሲዪቴ።
JOB 37:3 ሳሎፔ ጋርሳን ዎልቃንꬂ ዎልቃሜስ፤ ቢታ ጋጻ ጋካናዉ ኪቴስ።
JOB 37:4 ሄሳፌ ጉዬ ዎልቃማ ባ ጊሪሳ ሲሴስ፤ ያሺሲዛ ባ ጊሪሳ ዳዳ ማላ ጉንꬄስ፤ ዎልቃንꬃ ፖኦይካ ዛሪ ዛሪ ቤቴስ፤ ባ ያሺሲዛ ጊሪሳን ጉሜስ፤ ኢዚ ባ ጊሪሳ ሲሲዛ ዎዴ ዎልቃንꬃ ዲጌና።
JOB 37:5 ጾሳ ጊሪሳ ጉንꬃይ ማላሊሲዛ ጊታ ጉንꬅ ጉሜስ፤ ኑኒ ኤራናዉ ዳንዳዮንታ ጊታ ሚሻታ ኦꬄስ።
JOB 37:6 ቢታ ቦላ ሻቺ ዎꬋና ማላ ኦꬄስ፤ ዎልቃማ ኢራይካ ቡካና ማላ ኣዛዜስ።
JOB 37:7 ኢዚ ሜꬊዳ ኣሳቲ ኢዛ ኦሶ ኤራና ማላ ኡባ ኣሳይ ባንታ ኦሶዛ ኦꬆንታ ማላ ቴቄስ።
JOB 37:8 ሄ ዎዴ ዎራ ዶኣቲ፥ ባቃቲዲ ባንታ ቆቴቴꬃሶ ጌሌቴስ፤ ባንታ ጎንጎሎዛን ቆቴቴቴስ።
JOB 37:9 ዎልቃማ ጫርኮይ ፑዴሃፔ ዴንዴስ፤ ሞጪዛ ጫርኮይ ፑዴሃፔ ዬስ።
JOB 37:10 ጾሳ ፔኖይ ሃꬃ ሞጪሴስ፤ ኢዛፔ ሻች ሜꬌስ።
JOB 37:11 ሻራይ ሃꬃ ቶካና ማላ ኦꬄስ፤ ባ ጊዶን ዎልቃንꬂ ዎልቃማና ማላ ኦꬄስ።
JOB 37:12 ጎዳ ካሌꬆን ሻራቲ ቢታ ዩሾን ዩዬቴስ፤ ባንታና ማዲዛ ኣዛዞታካ ፖሌቴስ።
JOB 37:13 ጾሲ ኢራ ቡኪሲዛይ ቢታ ኢርጺሳናስ፥ ኣሳታ ቃጻያናስ ዎይኮ ባ ሲቆ ቆንጪሳናሳ።
JOB 37:14 ኢዮቤ! ኔኒ ታኪ ጋዳ ሲያ፤ ጾሲ ኦꬂዛ ማላሊሲዛ ኦሶታ ዎዚናን ዎꬃዳ ኣኬካ።
JOB 37:15 ጾሲ ሻራ ዎስቲ ኣዛዚዛኮ፥ ዎልቃንꬃካ ዎስቲ ዎልቃንꬂዛኮ ኔኒ ኤራይ?
JOB 37:16 ሻራ ሳሎ ቦላ ዎስቲ ዎꬂዳኮ፥ ማላሊሲዛ ኡባ ኤሪዛ ጾሳ ኦሶዛ ኔ ኤራይ?
JOB 37:17 ሳሎይ ጻርቂማላ ሚሳቲዛ ዎዴ፥ ዎልቃማ ባዞ ጫርኮይ ቢታ ቦላ ጫርኪዛ ዎዴ ኔኒ ሆምቤን ሴራና።
JOB 37:18 ጾሲ ሳሎ ሴሪዳ ማስቶቴ ማላ ሚጪኮ፥ ኔኒ ኢዛ ማታን ኡታዳ ማዳናዉ ዳንዳያይ?
JOB 37:19 «ኑስ ኤራይ ፓጬ ጊዲዳ ጊሻስ ኑኒ ኣይ ጊዲ ጾሳስ ዛራናኮ ኔኒ ኑና ኣኔ ታማርሳ።
JOB 37:20 ጾሳራ ሃሳያና ጋዳ ኦይቺኬ፤ ታ ኢዛ ኦይቻዳ ኣዛስ ኢዚ ታና ꬋይሳና ማላ ዴንꬄꬆ?
JOB 37:21 ጫርኮይ ሻራ ሳሎፔ ቁጪ ጌሺዛ ዎዴ፥ ኦኒካ ጾልቂዛ ኣርሼ ቲሺ ሂስቲ ጼላናስ ዳንዳዬና።
JOB 37:22 ፑዴሃፔ ዎርቃ ማላ ጾልቂዛ ፖኦይ ያና፤ ጾሲ ማላሊሲዛ ቴማን ቆንጫና።
JOB 37:23 ኡባ ዳንዳይዛ ጾሳይ ኑ ቆፋፔ ቦላ፤ ኢዛ ዎልቃይ ጊታ፤ ኢዚካ ቱሙ ፒርዲዛዴ።
JOB 37:24 ባንታ ቆፋን፥ ‹ኑኒ ኣꬎ ኤራንቻታ› ጊዛይታ ኢዚ ካꬌስ፤ ሄሳ ጊሻስ ኣሳይ ዉሪ ኢዛስ ያዬስ።»
JOB 38:1 ሃይሳፌ ጉዬ ጎዳይ ጎቴ ጫርኮ ጊዶን ጊዲዲ ኢዮቤስ ሂዝጊዴስ፥
JOB 38:2 «ሃይሲ ኤራይ ባይንዳ ሃሳያን ታ ዞሬዛ ካꬊዛይ ኢዚ ባስ ኦኔ?
JOB 38:3 ኣኔ ኣዴ ጊዲኮ ዳንጬታ ታ ሲንꬃን ኤቃ፤ ታኒ ኔና ኦይቺዛይሳ ታስ ዛራ።
JOB 38:4 ታኒ ሃይሳ ኣላሜዛ ሜꬊሺን ኔኒ ኣዋን ዳይ? ኔ ኤሪዛኔ ኣኬኪዛ ጊዲኮ ኣኔ ታስ ዮታ።
JOB 38:5 ሃይሲ ሳኣይ ኣይ ኬና ጊዳናኮ ቆፋ ቃቺዳይ ኦኔ? ሳኣ ቦላ ኢዚ ሚጼ ዎዶሮታ ሚጪዳይ ኦናኮ ኔ ኤራይ?
JOB 38:6 ቢታ ቱሳቲ ኩንዶንታ ማላ ሚንꬂ ኦይኪዳ ዎልቃይ ኣዜ? ኣላሜዛ ኦሶ ዶሚሺን ዮቻ ሹች ዬጊዳይ ኦኔ?
JOB 38:7 ባካሌ ጾሊንቴቲ ኢሲ ቦላ ዬጺዛሼ፥ ኪታንቻቲ ኡባይ ኢሊሊዛሼ ኔኒ ኣዋን ዳይ?
JOB 38:8 «ኣባይ ቢታፌ ꬉቂ ኬኢዛ ዎዴ ፑልቶ ኣይፌታ ጎርዲዳይ ኦኔ?
JOB 38:9 ኣባ ሻራን ካሚዳይ ቃሴካ ጊርዲ ጊዳ ꬉማን ጎርዲዳይ ታና።
JOB 38:10 ኣባስ ዛዋ ሜꬊዳይ ፔንጌኔ ዛዋ ዎꬂዳይ ታና።
JOB 38:11 ሃይሳ ጋካናዉ ያ! ሃይሳፌ ኣꬎፋ! ኔ ዎልቃማ ዳምባላይ፥ ‹ሃይሳን ኤቆ› ጋዲስ።
JOB 38:12 «ኢዮቤ! ኔኒ ዬሌቶሶፌ ዎንታይ ዎንታና ማላ ኣዛዛ ኤራይ? ዎንታ ፖኦስካ ሶሆ ጊጊሳ ኤራይ?
JOB 38:13 ዎንታይ ቢታ ቦላ ፖኦ ቤሳና ማላ ኢታ ኣሳቲ ቆቴቲዳሶፔ ቆንጬ ኬዛና ማላ ኔ ኢስታ ኣዛዛ ኤራይ?
JOB 38:14 ዎንታ ፖኦይ ቢታ ቃላምኤቲ ዲዛ ማይኦ ማላ ቤታና ማላ ኦꬄስ፤ ማና ሚሻ ቦላ ዲዛ ማታሜ ማላ ቆንጬን ቤሴስ።
JOB 38:15 ኢታቲ ፖኦ ዲጌቲዳ፤ ኢስቲ ማካላቴꬃን ዴንꬂዳ ኩሼይካ ሜቂዴስ።
JOB 38:16 «ኔ ዱጌ ጪማ ኣባን ዎꬋዲ? ዎጋ ጊታ ኣባ ጋርሳን ሲሜሬታ ኤራይ?
JOB 38:17 ሃይቆ ፔንጌታ ኔና ቤሲዴ? ጊርዲ ጊዳ ꬉማ ፔንጌታካ ቤያዲ?
JOB 38:18 ሳኣይ ኣይ ኬና ዳልጋ ጊዲዳኮ ኔ ኤራይ? ኣኔ ሃይሳ ኡባ ኤሪዛ ጊዲኮ ኔ ታስ ዮታ።
JOB 38:19 «ፖኦይ ዲዛሶ ኤፊዛ ኦጌይ ኣዋኔ? ቃሴካ ꬉማይ ዴኢዛሶይ ኣዋኮ ኔ ኤራይ?
JOB 38:20 ኔኒ ፖኦኔ ꬉማ ኢስቲ ዲዛሶ ዲዛሶ ኤፋናስ ዳንዳያዪ? ኢስታሶይ ዲዛሶ ኤፊዛ ኦጌዛ ኔ ኤራይ?
JOB 38:21 ኔኒ ቢታይ ሜꬌቲዛ ዎዴ ዬሌቲዳ ጊሻሲኔ ኔስ ላይꬃይካ ዳሮ ጊዲዳ ጊሻስ ኔ ኤሮንታ ኣጋካ!
JOB 38:22 ሻቺ ዎꬊዛ ኬꬃን ጌላዲዬ? ዎይኮ ኡቲዳ ሻቻ ዶሬ ቤያዲ?
JOB 38:23 ሃይሳ ሃ ሻቻዛ ታ ኦላ ጋላሳሲኔ ሜቶ ጋላሳስ ጎኤታናስ ሚንጃ ዎꬂዳዛ።
JOB 38:24 ዎልቃንꬂ ኣዋፔ ዴንዲዜ? ዎይኮ ኣርሼይ ሞኪዛ ባጋፌ ጫርኮይ ቢታ ቦላ ላሌቲዛሶ ኤፊዛ ኦጌይ ኣዋኔ?
JOB 38:25 ኢራꬆ ዎꬊዛሶ ጊግሲዳይ ዳዳይ ዋላኬቲዳ ኡሾስ ኦጌ ጊግሲዳይ ኦኔ?
JOB 38:26 ኦኒካ ባይንዳ ቢታን ኣሲካ ዶንታ ባዞን ኣሺዛይ፥
JOB 38:27 ኢራይ ቡካና ማላካ ኦꬂዛይ ኦኔ? ኣሲ ባይንዳ ሶሆዛኔ ባዞ ቢታ ሃꬅ ካልሲዳይ ቢታይካ ማታ ሞካና ማላ ኦꬂዳይ ኦኔ?
JOB 38:28 ኢራኔ ጻዛ ኢሚዛይ ኦኔ?
JOB 38:29 ሻቺኔ ኬንቾ ኢሚዛይ ኦኔ?
JOB 38:30 ኬንቾ ሃꬃ ሹቻ ማላ ሚንꬄስ፤ ኣባ ሃꬂካ ሻቻꬆ ሹቻታና ማላ ኦꬄስ።
JOB 38:31 «ፒሊያዲሴ ጌቴቲዛ ጾሊንቴታ ኢሲ ቦላ ቃቻናስ ዳንዳያይ? ኦሪዮ ጌቴቲዛ ጾሊንቴቲ ኢሲ ቦላ ኦይኬቲዳ ዎዶሮዛ ዱꬃናዉ ዳንዳያይ?
JOB 38:32 ጾሊንቴታ ኡባ ኢስታ ዎዴን ዎዴን ኬሳናዉ ዳንዳያይ? ዛርዶ ጌቴቲዛ ዶኣ ሜꬎይ ዲዛ ጾሊንቴ፥ ኢስታ ማራታራ ኔ ካሌꬃናዉ ዳንዳያይ?
JOB 38:33 ሳሎቲ ኣይ ማላ ዎጋን ኣቂዛኮ ኤራይ? ሃይሳ ሃ ዎጋዛካ ቢታ ቦላ ኦሲሳና ዳንዳያይ?
JOB 38:34 «ዳሮ ኢራ ኔስ ቡኪሳና ማላ ሻራ ኔ ኣዛዛናዉ ዳንዳያይ?
JOB 38:35 ዎልቃንꬅ ኔ ኣዛዞን ዎልቃሚዜ? ዎልቃንꬅ ኔ ዬዳናስ ዳንዳያይ? ኢስቲካ ኔስ፥ ‹ሄኮ ኑ ሃን ዶስ› ጊ ኤሪዞ?
JOB 38:36 ዎዚናስ ጪንጫቴꬅ ቆፓናስ ካሃ ኢሚዳይ ኦኔ?
JOB 38:37 ባ ኤራን ሻራታ ቆዳናስ ዳንዳይዛይ ኦኔ? ሳሎፔ ሃꬅ ዱጌ ቲጋናስ ዳንዳይዛይ ኦኔ?
JOB 38:38 ጉዱላ ኦይሴꬂዲ ጳሼ ኬሳናስ ዳንዳይዛይ ኦኔ?
JOB 38:39 «ማጫ ጋሞይ ዎራ ጊዶን ዛማዳ ኡቲዳሺን ኔ ኢዚስ ሚዛ ሚሽ ሻንካታዳ ኢማናስ ዳንዳያይ?
JOB 38:40 ዎይኮ ጋፊ ኡቲዳ ኢዚ ማራታ ካልሳናዉ ዳንዳያይ?
JOB 38:41 ቁሮቲ ጋፊዲ ቢቻሪዛ ዎዴ ኢስታ ጪዬቲካ ሚዛ ሚሽ ꬋይዲ ታኮ ዋሲዛ ዎዴ ኢስታስ ሚዛ ሚሽ ኢሚዛይ ኦኔ?
JOB 39:1 «ጌኔሳቲ ዬሊዛ ዎዴ ኔ ኤራይ? ዉሻ ጌቴቲዛ ዶኣይ ሚጻቲዲ ዬሊሺን ቤያ ኤራይ?
JOB 39:2 ኢስቲ ሴባቲዲ ኣይ ላጌ ዎዴ ጋምኢዛኮ ኣዉዴ ዬሊዛኮ ኔ ኤራይ?
JOB 39:3 ጉልባቲ ሚጻቲሼ ባንታ ማራታ ኢስቲ ዬሊዛይ ኣዉዴኮ ኔ ኤራይ?
JOB 39:4 ኢስታ ማራቲ ዎራን ዲጪዲ ሚኔቴስ፤ ኢስታፌ ሻኬቲዲ ቤቴስ፤ ቢዳፔ ጉዬ ባንታ ኣዬታኮ ሲሜቴና።
JOB 39:5 ሃርዲዳይ ዬዳ ዳና ማላ ኦꬂዳይ ኦኔ? ኢስታ ቃሾፔ ቢርሺዳይ ኦኔ?
JOB 39:6 ባዞዛ ኢስታስ ዲዛሶ ሂስታ ኢማዲስ፤ ማጺኔይ ዲዛ ዴምባን ኢስታ ዎꬃዲስ።
JOB 39:7 ካቺ ዳሪዛ ካታማታፔ ሃኪዲ ዴቴስ፤ ጉዬራ ላጊዛይቲ ቆዲዛይሳ ዶሴቴና።
JOB 39:8 ዙማታ ቦላን ፔኤቴስ፤ ሄን ባስ ጊዲዛ ጪሊላ ማታ ኮዬቴስ።
JOB 39:9 «ሜንꬂ ኔስ ኦꬃናስ ኤኖ ጋንዴ? ዎይኮ ኔ ዜꬌን ኤኖ ጊ ኤቃንዴ?
JOB 39:10 ሜንꬅ ዋጻዳ ጎሽ ጎያናዉ ዳንዳያይ?
JOB 39:11 ኢዛ ሚኖቴꬃን ኔ ኣማኔታይ? ኔስ ዴጺዛ ኦሶዛ ኢዚ ኦꬃና ማላ ኢዛስ ኣጋ ኤራይ?
JOB 39:12 ኢዚ ኔኮ ሲሚ ያና ማላ፥ ኔ ካꬅ ቡኪዛ ባሌይ ዲዛሶ ሚያናይሳ ኣማኔታይ?
JOB 39:13 «ያንቻይ ባ ቄፌ ኤሶን ሚጫዉስ፤ ጊዶ ኣቲን ሳንጋኖ ካፎ ማላ ፒራꬉኩ።
JOB 39:14 ያንቻይ ባ ጱጱሌ ቢታን ዬጋዉስ፤ ቢታ ጊዶን ኡቲዲ ሆኣና ማላ ኦꬃዉስ።
JOB 39:15 ‹ሄራ ኣꬊዛዴይ ባ ቶሆን ሜንꬄስ፤ ዎራ ዶኣቲካ ዬꬊ ሊቂሴቴስ› ጋዳ ቆፑኩ።
JOB 39:16 ባ ጪዬታስ ኣላጋ ማላ ሜንጼ ኢታዉስ፤ ኢዚ ዳቡራይ ሃዳን ኣቲኮካ ዉዳ ጉኩ።
JOB 39:17 ሃይሳꬆ ኢዚስ ጪንጫቴꬅ ꬋይሳዳ ኢዛ ኤሮንታ ማላ ኦꬂዳይ ታና።
JOB 39:18 ኢዛ ዴንዳዳ ዎጺዛ ዎዴ፥ ባናራ ጋዴ ዎጺዛ ቶጋታ ቦላ ሚጫዉስ።
JOB 39:19 «ኢዮቤ! ፓራታስ ዎልቃ ኢሚዳይኔ ኣዱሳ ጋማ ኢስታ ሞርጌን ማይዚዳይ ኔኔ?
JOB 39:20 ፓራታ ቦሌ ማላ ጉፒዛይ ኢስቲ ሃርቡቂሼ ኣሳታ ዳጋንꬃና ማላ ኦꬂዛይ ኔኔ?
JOB 39:21 ፓራቲ ኦላ ዴምባ ቶጌቲ ቢሼ፥ ባንታ ዎልቃንካ ጬቄቲሼ፥ ሎዳን ኣዳራሶ ዶሜቴስ።
JOB 39:22 ያሽ ጊዛ ሚሽ ሙሌካ ኤሬቴና፤ ኣይ ሚሺካ ኢስታ ዳጋንꬄና፤ ኢስታ ቦላ ጊꬃ ማሻ ዴንꬂዳኮካ ጉዬ ሲሜቴና።
JOB 39:23 ኢስታ ቶጊዛ ኦላንቻቲ ኦይኪዳ ኦላ ሚሻቲ፥ ዋዋጪ ጊሼ ባንታ ጊዶን ጊሬቲሼ ሲዬቴቴስ።
JOB 39:24 ዛዬይ ዛዬቲሺን ጮኡ ጊ ኤቃናዉ ዳንዳዬቴና፤ ዪሎኒኔ ሃንቆን ኩሚዲ ኦላ ዴምባ ዎጼቴስ።
JOB 39:25 ዛዬይ ፑኔቲዳ ታይቦን ኡፋይሳን ዋይቄቴስ፤ ሃኮን ዲሼ ኦላ ፔኖ ኤሬቴስ፤ ኦላ ካሌꬂዛይቲ ኢሚዛ ኣዛዞዛኔ ኦላንቻታ ጬቄቴꬃ ሲዬቴስ።
JOB 39:26 «ጺሎይ ሳሎ ቦላ ፓሊዛይ፥ ኢዚ ባ ቄፌዛ ዱጌሃ ሚጪዛይ ኔ ኤራቴꬃኔ?
JOB 39:27 ጎሌይ ፑዴ ኬኢዲ ꬎቃሶሆን ባ ኬꬅ ኬጺዛይ ኔ ኣዛዚኔ?
JOB 39:28 ጎሌይ ዛላታ ጊዶን ኣቄስ፤ ኬልካ ጊዶን ባ ኬꬅ ኬጼስ፤ ዛላቲካ ኢዛስ ቆቴቲዛሶ ጊዴቴስ።
JOB 39:29 ሄን ኡቲዲ ባስ ሚዛ ሚሽ ጼሌስ፤ ኢዛ ኣይፌቲካ ሃኮን ዲዛዝ ዴሜቴስ።
JOB 39:30 ሃይሳ ማላን ጎሌቲ ሚዛዚ ዲዛሶ ሺቄቴስ፤ ኢስታ ጪዬቲካ ሱꬅ ኡዬቴስ» ጊዴስ።
JOB 40:1 ቃሴካ ጾሲ ኢዮቤስ፥
JOB 40:2 «ኢዮቤ! ኣሲ ኡባ ዳንዳይዛ ጾሳራ ማርሼቲዲ ላꬃና ኔስ ሚሳቲዜ? ታናራ ጾሳራ ማርሼቲዛይ ኔና ጊዲዳ ጊሻስ ኣኔ ታስ ዛራ» ጊዴስ።
JOB 40:3 ኢዮቢ ዛሪዲ፥
JOB 40:4 «ጎዶ! ታኒ ኣይኮ ማዶንታ ላፋ ኣሳ፥ ሃኒፌ ጉዬ ታ ኩሼን ታ ዶና ጎርዳዳ፤ ጮኡ ጉሳፌ ኣቲን ኔስ ታ ዛራና ዛሮይ ታስ ዴና።
JOB 40:5 ታኒ ኢሲቶ ጋናይሳ ጋዲስ፤ ጊዶ ኣቲን ታስ ዛሪዛ ሚሺ ባዋ፤ ሃይሳፌ ጉዬ ኡባካ ታ ሃሳይኬ» ጊዴስ።
JOB 40:6 ሄሳፌ ጉዬ ጎዳይ ጎቴ ጫርኮ ጊዶን ጊዲዲ ኢዮቤስ ሂዝጊዴስ፥
JOB 40:7 «ኣኔ ኣዴ ጊዲኮ ዴንዳዳ ጊጼታ፤ ታ ኦይቺዛይሳ ታስ ዛራ።
JOB 40:8 ታና ፒርዳ ጌላሲዛዴ ኬሳዳ ኔና ጺሎ ኣስ ኬሳናስ ዳፌታይ?
JOB 40:9 ጾሳ ዎልቃ ማላ ሚኖ ዎልቃይ ኔስ ዲዜ? ጾሳ ቃላ ጉንꬃ ማላ ኔ ቃላይ ጉማናዉ ዳንዳይዜ?
JOB 40:10 ሄሳ ማላ ጊዲኮ ኣኔ ኔ ቦንቾኒኔ ኔ ጊታቴꬃን ዴንዳ! ኔ ቴማቴꬂኔ ጊታቴꬃ ማይኣ።
JOB 40:11 ኦቶራንቻታ ቤያዳ ካዉሻ፤ ኔ ሃንቆዛ ኢስታ ቦላ ጉሳ።
JOB 40:12 ኣኔ ሎኤꬃ ጼላዳ ኦቶራንቻታ ኡባ ዬላቻ፤ ኢታ ኦꬂዛይታ ኢስቲ ዲዛሶን ሄን ꬋይሳ።
JOB 40:13 ኢስታ ኡባ ሞጎ ማይኦን ጻጻዳ ኢሲ ቦላ ዱፎን ሞጋ።
JOB 40:14 ሄሳፌ ጉዬ ኔኒ ኔ ዎልቃን ጾኒዛይሳ ታኒ ኔስ ማርካታና።
JOB 40:15 «ታኒ ኔና ሜꬊዳይሳꬆ ሆሪቄ ጌቴቲዛ ዶኣ ሜꬋዲስ፤ ኢዚካ ቦራ ማላ ማታ ሜስ።
JOB 40:16 ኢዛስ ጼሳን ዲዛ ዎልቃ ቤያ፤ ኢዛስ ኡሎ ጊዶን ዲዛ ሻያ ሚኖቴꬃ ጼላ።
JOB 40:17 ኢዛስ ጎይናይ ሊባኖሴ ዚጋ ሚꬃ ማላ ሲቲ ጊዳይሳ፤ ኢዛስ ጌዳ ጻጶቲካ ሚኖኔ ኦርዴታ።
JOB 40:18 ኢዛ ሜቄꬃቲካ ጻርቂማላኔ ቢራታ ማርጮ ማላ ሚኖታ።
JOB 40:19 ታ ሜꬊዳ ሜꬌታ ኡባፌ ዎልቃማ፤ ታፔ ኣቲን ኢዛ ጾናናይ ሃራይ ዴና።
JOB 40:20 ዎራ ዶኣቲ ኡባይ ካኢዛ ዙማይ፥ ኢዛስ ሚዛ ሚሽ ሞኪሴስ።
JOB 40:21 ኩዋይ ዲዛ ሚꬃ ጋርሳን፥ ማቃ ጊዶኒኔ ሃꬂ ዲዛሶ ጫሬ ጊዶን ኢቼስ።
JOB 40:22 ኩዋይ ዲዛ ሚꬃቲ ኢዛ ባንታ ኩዋን ጌንꬄቴስ፤ ሻፋ ዶናን ዲጪዛ ሚꬃቲ ኢዛ ካሜቴስ።
JOB 40:23 ሻፋ ሃꬃ ኪጻስ ኢዚ ዳጋሜና፤ ዮርዳኖሴ ሻፋይ ኬሂ ኩሚዲ ጎጊንካ ኢዚ ያዬና።
JOB 40:24 ኢዛ ኣይፌታ ቶይሲዲ ኢዛ ኦይካና ኣሲ ዲዜ? ኢዛ ሲꬌካ ዳፎን ቃቺዲ ኢዛ ኦይካናስ ዳንዳይዛይ ኦኔ?
JOB 41:1 «ኔኒ ሌዋታኔ ጌቴቲዛ ኣባ ጊዶን ዲዛ ዶኣ ሞሌ ኦይኪዛ ማንጻኮን ኦይካናስ ዳንዳያይ? ዎይኮ ኢዛ ኢንጻርሳ ዎዶሮን ቃቻናስ ዳንዳያይ?
JOB 41:2 ኢዛ ሲꬌዛን ዳፎ ኣꬃዳ፥ ዎይኮ ኢዛ ጋጮዛ ማንጻኮን ጌልꬃዳ፥ ኦይካናስ ዳንዳያይ?
JOB 41:3 ኢዚ፥ ‹ታና ማራርኪ!› ጊ ኔና ዎሳኔ? ዎይኮ ሎኦ ቃላን ኔና ኦይቻንዴ?
JOB 41:4 ኔስ ሜርናስ ኣይሌ ጊዲዲ ኔስ ኦꬃናዉ ኢዚ ኔስ ቃላ ጌላኔ?
JOB 41:5 ኣሳራ ሜዜ ካፎ ማላ ኔ ኢዛ ኔናራ ሜዜሳኔ? ዎይኮ ኔስ ማጫ ናይታ ካሳና ማላ ኔ ቃቻ ዎꬃኔ?
JOB 41:6 ሞሌ ዛልኣንቻቲ ኢዛ ሻማናዉ ሚሻን ማርሼታኔ? ዎይኮ ቃንጼሬꬂዲ ኢዛ ባንታስ ጊሼታኔ?
JOB 41:7 ኢዛ ጋልባካ ኔ ኮዪዳሶራ ቶራን ጫዳ ዳካናስ ዳንዳያይ? ዎይኮ ኢዛ ሁኤዛ ሆጼ ሚሻን ጫዳ ሉካናዉ ዳንዳያይ?
JOB 41:8 ኣኔ ኔኒ ኢዛ ዳንዳያና ጊዲኮ ኩሼን ቦቻ! ኢዛራ ኔ ባጼቲዳ ባጼ ዎዴናዉካ ባላካ፤ ናምኣንꬆ ኢዛራ ኔ ባጼታናስ ካጃላካ።
JOB 41:9 ሌዋታኔ ጌቴቲዛ ኣባ ጊዶ ዶኣራ ባጼቲዲ ኢዛ ጾናና ካጃሎስ ꬋሌይ ዴና። ኢዛ ቤኢዛ ኡባይ ባቦን ኮኮሬስ።
JOB 41:10 ኢዛ ቦላ ሜቶ ጋꬃና ጉሲ፥ ሄሳ ኬና ዴጾ ጊዲኮ፥ ሂስቲን ታናራ ኤቄታናስ ጻሊዛዴይ ኢዚ ባስ ኦኔ?
JOB 41:11 ሳሎፔ ጋርሳን ዲዛ ሚሺ ዉሪካ ታሳ፤ ሂስቲን ታ ኢዛስ ዛራና ማላ ታስ ታልኢዳይ ኦኔ?
JOB 41:12 ሌዋታኔ ጌቴቲዛ ኣባ ዶኣ ጊሻስ፥ ኢዛ ሚኖ ዎልቃ ጊሻሲኔ ኢዛስ ሎኢዛ ቦላ ጊሻስ፥ ታ ቆንጪሶንታ ኣጊኬ።
JOB 41:13 ኦርዴ ጊዲዳ ኢዛ ጋልባ ሾቃናስ፥ ዎይኮ ኢዛ ባንቂላ ፖቃናስ ዳንዳይዛይ ኦኔ?
JOB 41:14 ኬሂ ያሺሲዛ ኣቻቲ ዲዛ ኢዛ ባንቂላታ ፖቃና ዳንዳይዛይ ኦኔ?
JOB 41:15 ኢዛስ ዞኮ ጋልባይ ማራራ ኡቲዳ ጎንዳሌታ ማላ፤ ኣዳፌ ሺዲ ኦይኬቲዳይታ።
JOB 41:16 ኢስቲ ኢሶይ ኢሳራ ሺጲ ጊዳ ጊሻስ ኢስታ ጊዶራ ሃራይ ኣቲን ጫርኮይካ ኣꬌና።
JOB 41:17 ኢስቲ ኡባይካ ኢሶይ ኢሳራ ኦይኬቲ ኡቲዳ ጊሻስ ኣይ ሚሺካ ኢስታ ሻካናዉ ዳንዳዬና።
JOB 41:18 ኢዚ ꬊሺዛ ዎዴ ጾጾልቁ ጊዛ ፖኦይ ቤቴስ፤ ኢዛ ኣይፌቲካ ዎንታ ማላዶ ኣርሼ ማላ ፖኤቴስ።
JOB 41:19 ኢዛ ዶናፔ ታማ ላጮይ ኬዜስ፤ ታማ ፒንጼꬂካ ላሌቲሼ ቤቴስ።
JOB 41:20 ፔንቲዛ ዲስቴይ ኡቲዳ ጮጬን ዲዛ ኣፊራይ ጩዋቲዛ ማላ፤ ኢዛ ሲꬌፔ ጩዋይ ኬዚሼ ቤቴስ።
JOB 41:21 ኢዚ ሼምፒዛ ሼምፖዛ ሴላይ ጺጺንꬃ ኦይሴꬄስ፤ ታማ ላጮይካ ኢዛ ዶናፔ ኬዜስ።
JOB 41:22 ኢዛ ሞርጌን ዎልቃይ ኩሚዳ ጊሻስ ኢዛ ሲንꬃይ ያሺሴስ።
JOB 41:23 ኢዛ ኣሾይ ዲላኣ ጊዲዳ ጊሻስ ኢዛ ቦላይ ቢራታ ማላ ሚኔስ።
JOB 41:24 ኢዛስ ቲራይ ሹቻ ማላ ሚኖ፤ ጋጪዛ ዎጻ ማላካ ሚኖ።
JOB 41:25 ሃ ዶኣዚ ዴንዲዛ ዎዴ ዎልቃማቲ ኣቶንታ ባቦን ኮኮሬቴስ።
JOB 41:26 ኣይ ማሻኒኔ ቶራን ዎይኮ ዎንዳፌኒኔ ጫዲዛዛን ኢዛ ኢስቲ ጫዲኮካ ጾኔቴና።
JOB 41:27 ኢዚ ቢራታ ማቃ ማላ ሜንꬄሬꬄስ፤ ጻርቂማላካ ሙሳ ሚꬃ ማላ ቲፌሬꬄስ።
JOB 41:28 ኢዛ ቦላ ዎንዳፌ ጾንጊኮካ ኢዚ ያዪዲ ባቃቴና፤ ያንባርሻ ሹቺካ ኢዛ ሲንꬃን ኢሺና ማላ።
JOB 41:29 ኮጼ ማታ ማላ ቆዴስ፤ ኣሲ ኢዛ ቦላ ቶራ ጾንጊሺን ቂꬌ ሚች ሚጬስ።
JOB 41:30 ኢዛስ ኡሎ ጋልባ ሃንቻዚ ኢዚ ኡርቃ ጊዶራ ቢሺን ቢታ ማራሻ ማላ ቦኬስ።
JOB 41:31 ኣባ ሃꬃ ፔንታ ማላ ፖጪሴስ፤ ኦቶን ፔንቲዛ ዛይቴ ማላ ፖꬊሴስ።
JOB 41:32 ኢዚ ኣꬊ ቢዛ ኦጌይ ፖኢሴስ፤ ኣባ ሃꬃካ ሆሞ ጮፑ ሂስቴስ።
JOB 41:33 ኢዚ ያሽ ኤሮንታ ሜꬌታ፤ ቢታ ቦላ ኢዛ ሚሳቲዛ ሜꬌታይ ሙሌካ ዴና።
JOB 41:34 ኬሂ ጊታ ጊዲዳ ሜꬌታታካ ኢዚ ካꬌስ፤ ኢዚ ዶኣ ኡባ ቦላ ካዎ።»
JOB 42:1 ሃይሳፌ ጉዬን ኢዮቢ ጾሳስ ሂዝጊ ዛሪዴስ፤
JOB 42:2 «ታ ጎዳዉ! ኔኒ ኡባ ሚሽ ኦꬃናስ ዳንዳይዛይሳ ታ ኤራዲስ፤ ኔ ቆፋካ ꬉጲ ዲጋናይ ዴና።
JOB 42:3 ታ ኤሪዛራ ኬሂ ጉꬅ ጊዲሺን ታ ዳሮ ሃሳይዛይሳ ኣዛስ ጊዲዳኮ ኔ ኦይቻዳሳ፤ ቱሙካ ታኒ ኤሮንታይሳኔ ኣኬኮንታ ኡባ ሃሳያዲስ።
JOB 42:4 ‹ታ ኦይሻ ኤዝጋ ሲያዳ ታስ ዛሮ ኢማ› ጋዳሳ።
JOB 42:5 ታ ሃኖ ጋካናስ ኔ ጊሻስ ኤሪዛይሲ ኣሳፔ ሲዮይሳን ጻላ፤ ሃኢ ጊዲኮ ታ ኣይፌታን ታ ኔና ቤያዲስ።
JOB 42:6 ሄሳፌ ዴንዲዳይሳን ታ ሃሳይዳ ሚሻቲ ታና ዬላቺዳ ጊሻስ ቢዲንꬃኒኔ ጉዱላን ኡታዳ ታ ኔፔ ማሬታና።»
JOB 42:7 ጾሲ ኢዮቤራ ሃይታንታ ኡባ ሃሳዬቲዳፔ ጉዬ ቴማኔ ዴሬ ኣስ ኤልፋዜስ፥ «ኢንቴ ታ ኣይሌ ኢዮቤ ማላ ታ ጊሻስ ሊኬ ሃሳዮንታ ጊሻስ ታኒ ኔ ቦላኔ ኔ ላጌታ ቦላ ሃንቄታዲስ።
JOB 42:8 ሄሳ ጊሻስ ሃኢ ላፑን ዎፋኖታኔ ላፑን ꬋርሾታ ኤኪዲ ታ ኦሳንቻ ኢዮቤኮ ቢቴ። ሄን ኢንቴ ናጋራ ጊሻስ ጹጌቲዛ ያርሾ ሺሺቴ። ታ ኦሳንቻ ኢዮቢ ኢንቴስ ዎሳና፤ ታኒካ ኢዛ ዎሳ ሲያዳ ኢንቴና ኢንቴ ናጋራ ማላ ቃጻይኬ። ኢንቴ ታስ ኢዮቤ ማላ ሎኦ ሚሽ ሃሳይቤኬታ» ጊዴስ።
JOB 42:9 ሄሳፌ ጉዬ ቴማኔ ዴሬ ኣስ ኤልፋዜይ፥ ሹሃ ዴሬ ኣስ ቤሊዳዲኔ ናኢማኔ ዴሬ ኣስ ዞፋሬይ ቢዲ ጾሲ ኢስታ ኣዛዚዳ ማላ ኦꬂዳ። ጾሲካ ኢዮቤ ዎሳ ሲዪዴስ።
JOB 42:10 ኢዮቢ ባ ሄꬑ ላጌታስ ዎሲዳፔ ጉዬ ጾሲ ኢዚ ዛሪ ዱሬታና ማላ ኦꬂዴስ። ካሴ ኢዛስ ዲዛይሳፌ ኣꬂዲ ዳኮ ኢዛስ ኢሚዴስ።
JOB 42:11 ሄ ዎዴ ኢዮቤ ኢሻቲ፥ ኢዛ ሚቼቲኔ ካሴ ኢዛ ኤሪዛይቲ ኡባይ ኢዛ ቤያናስ ዪዳ። ኢዛራ ኢሲፌ ኢዛሶን ካꬅ ሚዳ፤ ኢስቲ ኢዛስ ሚሼቲዛይሳ ቆንጪሲዲ ጾሲ ኢዛ ቦላ ጋꬂዳ ሜቶዛ ጊሻስ ኢዛ ሚንꬄꬂዳ። ኢሶይ ኢሶይ ቢራፔኔ ዎርቃፌ ኦሴቲዳ ሚዲጋ ኢዛስ ኢሞታ ኢሚዳ።
JOB 42:12 ጾሲ ኢዮቤስ ዉርሴꬃ ዴኦዛ ኮይሮይሳፌ ኣꬂ ኣንጂዴስ። ሄሳ ጊሻስ ኢዮቤስ 14,000 ዶርሲ፥ 6,000 ጋሜላቲ፥ 1,000 ዋꬃ ቦራቲ፥ 1,000 ማጫ ሃሬቲ ዴቴስ።
JOB 42:13 ቃሴካ ላፑን ኣቱማ ናይታኔ ሄꬑ ማጫ ናይታ ዛሪ ዬሊዴስ።
JOB 42:14 ማጫ ናይታፔ ኮይሮሮ ዪሚማ፥ ናምኣንꬃዮ ቄጺኦ፥ ሄꬓንꬆዮ ቄሬኔ-ሃፊኮ ጊዲ ሱንꬂዴስ።
JOB 42:15 ቢታ ቦላ ኢዮቤ ማጫ ናይታ ማላ ሜꬋ ሎኦ ማጫይ ቤቲቤና። ኢስታ ኣዋይ ኢስታስ ኢስታ ኢሻታራ ቢታ ላታና ማላ ሻኪ ኢሚዴስ።
JOB 42:16 ሄሳፌ ጉዬ ኢዮቢ 140 ዴኢዴስ። ባ ናይታ ኦይዳንꬆ ዬሌታ ጋካናስ ቤዪዴስ።
JOB 42:17 ኢዮቢ ዳሮ ላይꬅ ዲዲ ሎኦ ጪማ ጪሚዲ ሃይቂዴስ።
PSA 1:1 ኢታታ ዞሬን ቦንታይ፥ ዎይኮ ናጋራንቻታ ኦጌን ኤቆንታይ፥ ቂልጪዛይታ ሺቆን ኡቶንታይ ኣንጄቲዳዴ።
PSA 1:2 ሄሳ ማላ ኣሲ ጎዳ ዎጋን ኡፋዬቴስ፤ ኢዛ ዎጋ ጋላሲኔ ቃማ ቆፔስ።
PSA 1:3 ሄሳዴይ ጎጊዛ ሃꬃ ኣቻን ቶኬቲዲ፥ ሃይꬂካ ቆኮንታ ዎዴን ዎዴን ኣይፌ ኣይፊዛ ሚꬃ ማላ፤ ኢዚ ኦꬂዛ ኡባይ ኢዛስ ሃኔስ።
PSA 1:4 ጊዶ ኣቲን ኢታቲ ሄሳ ማላ ጊዴቴና፤ ጫርኮይ ፒቲ ኤፊዛ ሱላ ማላ።
PSA 1:5 ሄሳ ጊሻስ ኢታታ ቦላ ጎዳይ ፒርዳና፤ ናጋራንቻቲካ ጺሎታ ሺቆን ኤቄቴና።
PSA 1:6 ኣይስ ጊኮ ጎዳይ ጺሎታ ኦጌ ኤሬስ፤ ጊዶ ኣቲን ኢታታ ኦጌይ ኢስታ ꬋዮን ጋꬄስ።
PSA 2:1 ካዎቴꬃቲ ኣይስ ዴንዲዞ? ቃሴ ካዎቴꬃይ ኣይስ ኢታ ኦꬃናስ ማቄቲዜ?
PSA 2:2 ሳኣ ካዎቲኔ ዳናቲ ዴንዲዳ፤ ኢስቲ ጎዳ ቦላኔ ጎዳይ ቲይዳይሳ ቦላ ዴንዳናስ ኢሲፌ ዱላቲዳ።
PSA 2:3 ኢስቲ፥ «ኣኔ ኑኒ ኢስታ ሳንሳላታ ዱꬆስ፤ ኢስቲ ኑና ቃቺዛይሳካ ኬሲ ዎራ ኦሎስ» ጌቴስ።
PSA 2:4 ሳሎን ባ ኣራታ ቦላ ኡቲዳይሲ ኢስታ ቦላ ሚጬስ፤ ጎዳይ ኢስታ ቂꬌስ።
PSA 2:5 ጎዳይ ባ ሃንቆን ኢስታ ሴሬስ፤ ባ ዎልቃማ ሃንቆን ኢስታ ዳጋንꬄስ።
PSA 2:6 ጎዳይ፥ «ታኒ ታ ጌሻ ዙማ ጺዮኔ ቦላ ታ ካዎዛ ካዎꬃዲስ» ጌስ።
PSA 2:7 ሄ ካዎይ፥ «ታኒ ጎዳ ዎጋ ኣዋጃና፤ ጎዳይ ታና፥ ‹ኔኒ ታ ና፤ ታኒ ኔና ሃች ዬላዲስ።
PSA 2:8 ኔኒ ታና ኦይቻ፤ ታኒ ካዎቴꬃ ኡባ ኔስ ኢማና፤ ሳኣ ኡባይ ኔስ ጊዳና።
PSA 2:9 ኔኒ ቢራታ ጉፌን ኢስታ ቆጼሬꬃና፤ ኢስታ ኔኒ ማና ሚሺ ሜቂዛ ማላ ሜንꬄሬꬃና› ጌስ» ጊዴስ።
PSA 2:10 ሄሳ ጊሻስ ኢንቴኖ ካዎቶ ኣኬኪቴ፤ ሃ ሳኣ ሃሪዛይቶ ኢንቴ ናጌቲቴ!
PSA 2:11 ጎዳስ ያሻቴꬃን ኦꬂቴ፤ ኢዛስ ኮኮርሳን ሃሬቲቴ።
PSA 2:12 ጎዳይ ሃንቄቲን ኦጌን ኢንቴ ꬋዮንታ ማላ ኢዛስ ሱሬ ዎዚናን ጎይኒቴ፤ ኣይስ ጊኮ ኢዛ ሃንቆይ ኤሶን ኤጺ ኬዛና። ኢዛ ባንታስ ዜምፖ ኦꬂዛይቲ ኣንጄቲዳይታ።
PSA 3:1 ጎዳዉ! ታ ሞርኬቲ ኣይ ኬና ጮራቲዶ! ታ ቦላ ኣፑናቲ ዴንዲዶ!
PSA 3:2 ዳሮቲ፥ «ጾሲ ኢዛ ኣሼና» ጊዲ ታ ቦላ ሃሳይዳ።
PSA 3:3 ጊዶ ኣቲን ጎዳዉ! ኔኒ ታ ዩሾን ጎንዳሌ። ታና ቦንቺሲዛይኔ ሚንꬄꬂዛይ ኔና።
PSA 3:4 ታኒ ታ ቃላ ꬎቂሳዳ ጎዳኮ ዋሳና፤ ሂስቲኮ ኢዚ ባ ጌሻ ዙማ ቦላ ዲሼ ታ ዎሳ ሲያና።
PSA 3:5 ጎዳይ ታና ናጊዛ ጊሻስ፥ ታኒ ኢቻዳ ꬊስካይሲኔ ቤጎታይስ።
PSA 3:6 ታኒ ታና ጊዶꬂ ኡቲዳ ጮራ ሞርኬታስካ ባቢኬ።
PSA 3:7 ኣቤት ጎዳዉ! ዴንዳ! ኣቤት ታ ጾሳዉ! ታና ኣሻ! ኔኒ ታ ሞርኬታ ኡባ ባንቂላ ሾጫ፤ ኢታታ ኣቻካ ሜንꬃ።
PSA 3:8 ማዶይ ጎዳሳ፤ ጎዳዉ ኔ ኣንጆይ ኔ ዴራ ቦላ ጊዶ።
PSA 4:1 ኣቤት ታ ጺሎ ጾሳዉ! ታኒ ጼይጊዛ ዎዴ ኔ ታስ ኮያ። ታኒ ኡንኤቲዳ ዎዴ፥ ኔኒ ታና ሼምፒሳዳሳ፤ ታስ ቃꬌታዳ ታ ዎሳ ሲያ።
PSA 4:2 ኢንቴኖ ኣሳቶ! ኢንቴ ኣዉዴ ጋካናስ ታ ቦንቾ ካዉሻኔ? ኢንቴ ኣዉዴ ጋካናስ ሃዳ ሚሽ ሲቃኔ? ኢንቴ ኣዉዴ ጋካናስ ዎርዶ ሚሽ ካላኔ?
PSA 4:3 ጎዳይ ጺሎ ኣሳታ ባስ ሻኪ ዱማ ዎꬂዳይሳ ኢንቴ ኤሪቴ፤ ሄሳ ጊሻስ ታኒ ጎዳ ጼይጊዛ ዎዴ ኢዚ ታስ ሲዬስ።
PSA 4:4 ሃንቄቲቴ፤ ጊዶ ኣቲን ኢንቴ ሃንቆን ናጋራ ኦꬆፍቴ። ሂጻን ኢቺ ዲዛ ዎዴ ሲርጲ ጊዲ ኢንቴ ዎዚና ቆሪቴ።
PSA 4:5 ጎዳስ ቤሲዛ ያርሾ ያርሺቴ፤ ጎዳንካ ጾሳንካ ኣማኔቲቴ።
PSA 4:6 ዳሮቲ፥ «ኑና ሎኦ ቤሳናይ ኦኔ?» ጌቴስ፤ ኣቤት ጎዳዉ! ኔ ሎኦ ኣይፌሶይ ኑ ቦላ ፖኦ።
PSA 4:7 ካꬂኔ ዎይኔ ኡሹ ዳሮ ዴሚዲ ሃራቲ ኡፋዬቲዛይሳፌ ኣꬃዳ ኔኒ ታ ዎዚና ኡፋይሳን ኩንꬃዳሳ።
PSA 4:8 ኣቤት ጎዳዉ! ኔ ጻላ ታና ሳሮን ናጋ ኣይሲዛ ጊሻስ ታኒ ኢቻዳ ሳሮቴꬃን ꬊስካይስ።
PSA 5:1 ኣቤት ጎዳዉ! ታኒ ዮቲዛይሳ ኤዝጋ፤ ታ ኡንኦን ዎሲዛ ዎሳካ ሲያ።
PSA 5:2 ታ ካዎዞ ጾሶ! ታ ኔና ዎሲዛ ጊሻስ ታና ማዳ ጋዳ ታ ዋሲዛ ዋሶዛ ኔ ሲያ።
PSA 5:3 ኣቤት ጎዳዉ! ማላዶ ማላዶ ጉራን ኔኒ ታ ቃላ ሲያሳ። ማላዶ ማላዶ ጉራን ታኒ ታ ዎሳ ኔ ሲንꬅ ሺሻዳ፥ ኔኒ ታስ ኢሚዛ ዛሮ ኤካና ጋዳ ናጋይስ።
PSA 5:4 ኔኒ ኢታቴꬃን ኡፋዬቶንታ ጾሳ፤ ኢታቲ ኔናራ ዴኤቴና።
PSA 5:5 ጬቄቲዛይቲ ኔ ሲንꬃን ኤቄቴና፤ ኢታ ሚሽ ኦꬂዛ ኡባታ ኔኒ ኢጻሳ።
PSA 5:6 ዎርዶ ሃሳይዛይታ ኔኒ ꬋይሳሳ። ሱꬅ ጉሲዛይታኔ ጪሚዛ ኣሳታ ኔኒ ሃራሴታሳ።
PSA 5:7 ጊዶ ኣቲን ታኒ ኔ ማሮ ዳሮን ኔ ኬꬃ ጌላና። ኔ ጌሻ ኬꬃኮ ሲማዳ ቦንቾኒኔ ያሻቴꬃን ኔስ ጎይናና።
PSA 5:8 ኣቤት ጎዳዉ! ታ ሞርኬታፔ ኔ ታና ኣሻ፤ ታና ኔ ጺሎቴꬃንካ ካሌꬃ፤ ኔ ኦጌ ታ ሲንꬃን ሱሪሳ።
PSA 5:9 ኢስታ ዶናፔ ኬዚዛ ቃላይ ቱሙ ጊዴና። ኢስታ ዎዚናንካ ጌኔይ ኩሚዴስ፤ ኢስታ ዶናይ ዶዬቲዳ ዱፎ ማላ፤ ኢስቲ ባንታ ኢንጻርሳን ኣስ ጪሜቴስ።
PSA 5:10 ኣቤት ጾሶ! ኢስታ ቦላ ኔኒ ፒርዳ፤ ኢስታ ጌኔይ ኢስታ ኤኪ ቦ። ኢስታ ናጋራይ ዳሮ፤ ሄሳ ጊሻስ ኔኒ ኢስታ ጎዳ ዲጋ፤ ኣይስ ጊኮ ኢስቲ ኔ ቦላ ጌላቲዳ።
PSA 5:11 ጊዶ ኣቲን ኔናን ዜምፒዳ ኡባቲ ኡፋዬቴቶ፤ ኢስቲ ሜርናስ ኡፋይሳን ዬጼቶ። ኔ ሱንꬃ ሲቂዛ ኡባቲ ኡፋዬቴቶ፤ ኢስቲካ ኔናን ናጌቴቶ።
PSA 5:12 ኣቤት ጎዳዉ! ኔኒ ጺሎታ ኣንጃሳ፤ ኔኒ ጎንዳሌን ካሚዛ ማላ ኔ ኪያቴꬃን ኢስታ ካማሳ።
PSA 6:1 ኣቤት ጎዳዉ! ዪሎን ታና ሴሮፓ፤ ዎይኮ ኔ ሃንቆን ታና ቃጻዮፓ።
PSA 6:2 ኣቤት ጎዳዉ! ታኒ ዳቡራንቻ ጊዲዳ ጊሻስ ታና ማራ። ኣቤት ጎዳዉ! ታ ዎዚናይ ማዱንጺዳ ጊሻስ ታና ፓꬃ።
PSA 6:3 ታ ሼምፖያ ኬሃ ኡንኤታዱስ፤ ሂስቲን ጎዳዉ! ታና ማዳናስ ኔኒ ኣዉዴ ጋካናስ ጋምኣኔ?
PSA 6:4 ኣቤት ጎዳዉ! ኔኒ ሲማዳ ታና ኣሻ፤ ኔ ማሮቴꬃ ዳሮን ታና ኬሳ ኤካ።
PSA 6:5 ሃይቂዳ ኣሲ ኦኒኔ ኔና ቆፔና፤ ዱፎን ኔና ጋላቲዛይ ዴና።
PSA 6:6 ታ ጬጬን ጻላ ዳቡራዲስ፤ ኦማርስ ኦማርስ ታኒ ዬካሼ ታ ሂጻ ጫጲሳይስ፤ ታ ቦርኮꬃካ ታ ኣፉንꬃን ሙሲሳይስ።
PSA 6:7 ታ ኣይፌቲ ዳሮ ኣፉንጺዳ ጊሻስ ዳቡርዳ፤ ታ ሞርኬታ ኡባ ጋሶንካ ዴሞ ኢጺዳ።
PSA 6:8 ጎዳይ ታኒ ዬኪዛ ዬሆ ሲዪዳ ጊሻስ፥ ኢንቴኖ ኢታ ኦꬂዛ ኡባቶ! ታፔ ሃኪቴ።
PSA 6:9 ጎዳይ ታ ሾቤꬃ ቤኢዴስ፤ ታ ዎሳካ ሲዪዴስ።
PSA 6:10 ታ ሞርኬ ኡባቲ ዬላታናኔ ዳጋማና፤ ቆፖንታ ካዉዪዲ ጉዬ ሲማና።
PSA 7:1 ኣቤት ጎዳዉ! ታ ጾሳዉ ኔኒ ታስ ቆቴቲዛሶ፤ ታና ጎዲዛ ኡባፌ ኔኒ ታና ኣሻ።
PSA 7:2 ኔኒ ታና ኣሾንታ ኣጊኮ፥ ኢስቲ ታና ጋሞ ማላ ሜንꬄሬꬂዲ፥ ኦኒኔ ኣሾንታሶን ፑዜሬꬃና።
PSA 7:3 ኣቤት ጎዳዉ ታ ጾሳዉ! ታኒ ኣስ ቆሂዳ ጊዲኮ፥ ታስ ሎኦ ኦꬂዳዴስ ኢታ ዛሪዳ ጊዲኮ፥ ዎይኮ ጋሶይካ ባይንዳ ታ ሞርኬፌ ቦንቂዳ ጊዲኮ፥ ሄይታ ማላ ዮኦታፔ ኢሲኖካ ታኒ ኦꬂዳ ጊዲኮ፥
PSA 7:5 ታ ሞርኬይ ታና ጎዲ ኦይኮ፤ ታና ሳኣንካ ዬꬌሬꬆ፤ ታና ቢታን ዬጊዲ ታ ቦንቾ ካዉሾ።
PSA 7:6 ኣቤት ጎዳዉ! ኔ ሃንቆን ዴንዳ ኤቃ፤ ኤጺዛ ታ ሞርኬታ ሃንቆ ቦላ ዴንዳ፤ ታ ጾሳዉ ቤጋ፤ ቱሙ ፒርዳ ፒርዳ።
PSA 7:7 ዴሬታ ዱላታይ ኔ ዩሾዛን ሺቆ፤ ኔኒ ኢስታ ቦላ ካዎታ።
PSA 7:8 ጎዳይ ካዎቴꬃታ ቦላ ፒርዴስ። ኣቤት ጎዳዉ! ታስ ታ ጺሎቴꬃ ማላኔ ታ ሱሬቴꬃ ማላ ፒርዳ።
PSA 7:9 ቆፋኔ ዎዚና ፒልጋ ኤሪዛ ጺሎ ጾሳዉ! ኢታታ ጌኔዛ ኔኒ ꬋይሳ፤ ጊዶ ኣቲን ጺሎታ ሳሮን ናጋ።
PSA 7:10 ጾሲ ታስ ጎንዳሌ፤ ዎዚና ጺሎታ ኢዚ ኣሺዛ ጾሳ።
PSA 7:11 ጾሳይ ጺሎ ፒርዲዛ ጾሳ፤ ኢዚ ጋላስ ጋላስ ባ ሃንቆ ቆንጪሲዛ ጾሳ።
PSA 7:12 ኣሲ ባ ናጋራ ፓጺዲ ሲሞንታ ኣጊኮ፥ ጾሲ ባ ማሻ ሌፌስ፤ ኢዚ ባ ዎንዳፌዛ ዳፊ ኦይኬስ።
PSA 7:13 ኢዚ ዎꬊዛ ኦላ ሚሻታ ጊጊሴስ፤ ታማ ላጮ ማላ ፖፖልኡ ጊዛ ባ ቶራ ዪሻ ጊጊሴስ።
PSA 7:14 ኢታቴꬅ ሻሪዲ፥ ጌኔ ቃንꬃቲዳይ ዎርዶ ዬሌስ።
PSA 7:15 ሃራ ኣሳታስ ኦላ ቦኪዳ ኣሲ ባ ቦኪዳ ኦላን ሲሚ ኩንዴስ።
PSA 7:16 ኢዚ ኤሂዛ ጌኔይ ኢዛ ሁኤስ ሲሜስ፤ ኢዛ ማካላይካ ሲሚዲ ኢዛስ ጊዴስ።
PSA 7:17 ጎዳ ጺሎቴꬃ ጊሻስ ታኒ ኢዛ ጋላታና፤ ቃሴ ኡባፌ ꬎቃ ጎዳ ሱንꬃስ ታኒ ጋላታ ማዛሙሬ ዬጻና።
PSA 8:1 ኣቤት ጎዳዉ! ኑ ጎዳዉ ኔ ሱንꬂ ቢታ ኡባን ኬሂ ቦንቼቲዴስ፤ ኔኒ ኔ ቦንቾ ሳሎታፔ ቦላን ꬎቁ ꬎቁ ሂስታ ዎꬃዳሳ።
PSA 8:2 ኔኒ ኔ ሞርኬታ ጊሻስ ኔ ባልጋራኔ ኔ ቦላ ማንዲዛይሳ ሲርጲ ኦꬃናዉ ጉꬃ ናይታ ዶናኒኔ ꬋሚዛ ናይታ ዶናን ጋላታ ኩንꬃዳሳ።
PSA 8:3 ኔኒ ኔ ኩሼን ሜꬊዳ ሳሎታ፥ ሶሆን ሶሆን ኔኒ ዎꬂዳ ኣጊናኔ ጾሊንቴታ ታኒ ቤኢዛ ዎዴ፥
PSA 8:4 ኔኒ ኣሳስ ቆፓናዉ ኣሲ ኣዜ? ዎይኮ ኔኒ ኣሳ ናስ ዉዴታናዉ ኢዚ ኣዜ?
PSA 8:5 ኢዛ ኔኒ ኪታንቻታፔ ጉꬃራ ዚቂሳዳሳ፤ ቦንቾኔ ጊታቴꬃ ካላቻ ኢዛ ሁኤን ጎጺሳዳሳ።
PSA 8:6 ኢዛ ኔኒ ኔ ሜꬊዳ ሜꬌቴꬃ ኡባ ቦላን ሃሪዛዴ ኦꬃዳ ሱንꬃዳሳ፤ ኡባካ ኢዛስ ሃሪሳዳሳ።
PSA 8:7 ዶርሳታኔ ሚዛታ፥ ዶኣ ኡባ፥
PSA 8:8 ሳሎ ካፎታ፥ ኣባ ሞሌታኔ ኣባ ጊዶን ዲዛ ሜꬌታ ኡባካ ኢዛስ ሃሪሳዳሳ።
PSA 8:9 ኣቤት ኑ ጎዳ ጾሳዉ! ኔ ሱንꬂ ቢታ ኡባ ቦላ ኬሂ ቦንቼቲዴስ።
PSA 9:1 ኣቤት ጎዳዉ! ታኒ ኔና ኩሜꬃ ዎዚናፔ ጋላታና፤ ማላሊሲዛ ኔ ኦሶዛ ኡባካ ታ ዮታና።
PSA 9:2 ታኒ ኔናን ኡፋዬታናኔ ሃሹ ጋና። ኡባፌ ꬎቃ ጾሳዉ! ታኒ ኔ ሱንꬃስ ጋላታ ማዛሙሬ ዬጻና።
PSA 9:3 ኔ ቆንጪዛ ዎዴ ታ ሞርኬቲ ጉዬ ሲማና፤ ኔ ሲንꬃፌካ ꬉጴቲ ꬋያና።
PSA 9:4 ኔኒ ታስ ጺሎ ፒርዳ ፒርዳዳሳ፤ ኔኒ ጺሎቴꬃን ፒርዳሼ ኔ ካዎቴꬃ ኣራታን ኡታዳሳ።
PSA 9:5 ኔኒ ካዎቴꬃታ ሴራዳሳ፤ ኢታታካ ꬋይሳዳሳ፤ ኔኒ ኢስታ ሱንꬃ ሜሪ ሜርናስካ ቁጫ ዲጋዳሳ።
PSA 9:6 ሞርኬቲ ሜሪ ሜርናስ ꬋይዳ፤ ኢስታ ካታማታካ ሙሌራ ꬎቃላ ꬋይሳዳሳ፤ ኢስቲ ሙሌራ ዶጌቲ ኣቲዳ።
PSA 9:7 ጊዶ ኣቲን ጎዳይ ሜርናስ ካዎቲዲ ዴስ፤ ኢዚ ፒርዳናስ ባ ኣራታ ጊግሲዴስ።
PSA 9:8 ኢዚ ሃ ኣላሜዛ ጺሎቴꬃን ፒርዳና፤ ካዎቴꬃታ ቦላካ ቱማቴꬃን ፒርዳና።
PSA 9:9 ጎዳይ ኡንኤቲዳይታስ ባቃቲ ኣቲዛሶ፤ ሜቶ ዎዴታንካ ቆቴቲ ኣቲዛሶ።
PSA 9:10 ኔ ሱንꬃ ኤሪዛይቲ ኔናን ኣማኔቴቴስ፤ ኣይስ ጊኮ ጎዳዉ! ኔኒ ኔና ኮይዛይታ ዬጋ ኣጋቤካ።
PSA 9:11 ጺዮኔን ካዎቲ ኡቲዳ ጎዳስ ጋላታ ማዛሙሬ ዬጺቴ፤ ኢዚ ኦꬂዳ ኦሶ ዴሬ ኡባስ ቆንጬን ዮቲቴ።
PSA 9:12 ኣይስ ጊኮ ሱꬅ ጉሲዛይታስ ሃሎ ኬሲዛ ጾሲ ናቄቲዳይታ ዋሶዛ ኢዚ ዶጌና።
PSA 9:13 ኣቤት ጎዳዉ! ታ ሞርኬቲ ታና ዬዴꬂዛይሳ ቤኣ። ኔኒ ታስ ቃꬌታዳ ሃይቆፔ ታና ኣሻ።
PSA 9:14 ሄሲካ ታኒ ጺዮኔ ኣሳ ካሬን ኤቃዳ ኔና ጋላታናሲኔ ኔ ኣሺዳይሳን ኬሃ ኡፋዬታናሳ።
PSA 9:15 ካዎቴꬃይ ባ ቦኪዳ ኦላን ኩንዲዴስ። ኢስቲ ቆቲ ዎꬂዳ ዎጺማዴይ ኢስታ ቶሆ ኦይኪዴስ።
PSA 9:16 ጎዳይ ባ ጺሎ ፒርዳን ኤሬቲዴስ፤ ኢታ ኣሲ ባ ኩሼን ኦꬂዳ ኦሶ ዎጺማዴን ኦይኬቲዴስ።
PSA 9:17 ኢታቲ ሲኦሌን ጌላና፤ ጾሳ ዶጊዛ ካዎቴꬃይ ኡባይካ ኢስታ ማላ ሃናና።
PSA 9:18 ሂዬሳቲ ኣይዴካ ዶጌቲ ኣቴቴና፤ ዎይኮ ማንቆታ ሂዶታይ ጮ ሜርናስ ꬋዬና።
PSA 9:19 ኣቤት ጎዳዉ! ካዎቴꬃቲ ባ ዎልቃን ዴንዲዲ ኔ ቦላ ጬቄቶንታ ማላ ኔኒ ኢስታ ቦላ ፒርዳ።
PSA 9:20 ኣቤት ጎዳዉ! ኔ ኢስታ ዳጋንꬃ፤ ኢስቲ ኣስ ጊዲዳይሳ ኔኒ ኢስታ ኤሪሳ።
PSA 10:1 ኣቤት ጎዳዉ! ኔ ኣይስ ሃካዳ ኤቃይ? ሜቶ ዎዴንካ ኣይስ ጌማይ?
PSA 10:2 ኢታ ኣሳቲ ኦቶሬቴቴስ፤ ሂዬሳታካ ዬዴꬄቴስ፤ ኢስቲ ሃራስ ዎꬂዳ ዎጺማዴን ዛሪ ኦይኬቴቶ።
PSA 10:3 ኢታ ኣሲ ባ ዎዚና ኣሞን ጬቄቴስ፤ ዮራይ ጎዳ ጫዬሲኔ ካዴስ።
PSA 10:4 ኢታ ኣሲ ኦቶሬቴꬃን ጾሳ ኮዬና፤ ኢዛ ቆፋ ኡባን ጾሲ ዴና።
PSA 10:5 ኡባ ሚሺ ኢዛስ ኩሜስ፤ ኔ ዎጋይ ኢዛስ ጌሌና፤ ኦቶራንቻይ ኔ ዎጋፔ ሃኬስ፤ ሄሳ ጊሻስ ባ ሞርኬታ ቦላን ኢዚ ቂልጬስ።
PSA 10:6 ባ ዎዚናን ኢዚ፥ «ታና ኣይኮይካ ቃꬄና፤ ታና ሙሌካ ሜቶይ ጋኬና» ጊዲ ቆፔስ።
PSA 10:7 ኢዛ ዶናን ቃንጌꬂ፥ ዎርዶይኔ ማንዴይ ኩሚዴስ፤ ኢዛ ኢንጻርሳን ጌኔይኔ ባሌꬆይ ዴስ።
PSA 10:8 ዴሬ ጊዶን ጌማሶን ዙጊ ኡቴስ፤ ማዶይ ባይንዳይታ ꬋይሳናስ ናጌቴስ፤ ጺሎ ኣሳታ ጌማን ዎꬌስ።
PSA 10:9 ባ ቆቴቲዛሶን ጌሚዲ፥ ሂዬሳ ኦይካናዉ ጋሞ ማላ ዙጌስ፤ ማዶይ ባይንዳይታ ባ ዎጺማዴን ኦይኪዲ ጎቺ ኤፌስ።
PSA 10:10 ማዶይ ባይንዳይኔ ሂዬሳይ ኢዛ ኩሼን ኩንዴስ፤ ኢዚካ ኢስታ ኒፒ ሂስቲ ሜንꬄሬꬄስ።
PSA 10:11 ኢታ ኣሲ ባ ዎዚናን፥ «ጾሲ ታና ዶጊዴስ፤ ባ ሲንꬃ ታፔ ጌንꬂዴስ፤ ሙሌካ ኢዚ ታና ቤኤና» ጌስ።
PSA 10:12 ኣቤት ጎዳዉ! ዴንዳ። ጾሶ! ኔ ኩሼዛ ꬎቁ ሂስታ ዴንꬃ፤ ማዶይ ባይንዳ ሜቶታንቻታ ዶጎፓ።
PSA 10:13 ኢታ ኣሲ ጾሳ ኣይስ ካꬊዜ? ባ ዎዚናንካ፥ «ጾሲ ታና ቃጻዬና» ኣይስ ጊዜ?
PSA 10:14 ጊዶ ኣቲን ጾሶ! ኔኒ ሜቶዛኔ ዋዬዛካ ቤያሳ፤ ኔኒ ኡባ ዎዴ ማዳናስ ጊጋ ኡታዳሳ፤ ኔኒ ዪኦታ ማዳሳ፤ ማዶይ ባይንዳይቲካ ባና ኔስ ሼꬌቴስ።
PSA 10:15 ጌኔ ኣሳታ ዎልቃ ሜንꬃ፤ ኢታ ኣሳታ ዎልቃካ ሊቂሳ፤ ኢስቲ ናምኣንꬆ ኢታ ኦꬆንታ ማላ ኢስታ ኦሶ ማላ ኢስታ ቃጻያ።
PSA 10:16 ጎዳይ ሜሪፔ ሜርናስ ካዎቲዲ ዴስ፤ ሃራ ካዎቴꬃቲ ኢዛ ቢታፌ ꬋያና።
PSA 10:17 ኣቤት ጎዳዉ! ኔኒ ሂዬሳታ ኣሞ ኤራሳ፤ ኢስታ ዎሳካ ሲያዳ ሚንꬄꬃሳ።
PSA 10:18 ኦኒካ ኢስታ ያሺሶንታ ማላ ማዶይ ባይንዳይታሲኔ ዪኦታስ ኔ ፒርዳ።
PSA 11:1 ጎዳይ ታኒ ባቃታ ኣቲዛሶ፤ ሂስቲን ኢንቴ ታና ኣይስ፥ «ኔኒ ካፎ ማላ ፑዴ ዙማ ቦላ ባቃታ» ጌቲ?
PSA 11:2 ናጋራንቻቲ ዎዚና ጌሻታ ꬉማን ጫዳናስ ባንታ ዎንዳፌ ዳፊ ኦይኪዳ።
PSA 11:3 ዮቻ ሹቺ ዎዲዛ ዎዴ፥ ጺሎይ ኣይ ኦꬃናዉ ዳንዳይዜ?
PSA 11:4 ጎዳይ ባ ጌሻ ኬꬃን ዴስ፤ ሳሎን ባ ኣራታን ኡቲዲ ኣሳ ቤኤስ፤ ኢዛ ኣይፌቲ ኣሳ ፒልጊ ጼሌቴስ።
PSA 11:5 ጎዳይ ጺሎታኔ ናጋራንቻታ ፒልጊ ጼሌስ። ጊዶ ኣቲን ጌላቴꬂኔ ማካላቴꬅ ሲቂዛይታ ኢዚ ኬሂፔ ኢጼስ።
PSA 11:6 ጎዳይ ኢታታ ቦላ ኤጺዛ ታማ ቦንቆኔ ዲኔ ታማ ቡኪሳና። ꬋይሲዛ ጎቴ ጫርኮን ኢስታ ቃጻያና።
PSA 11:7 ጎዳይ ጺሎ ጊዲዳ ጊሻስ ጺሎቴꬃ ኦሶ ዶሴስ። ሱሬ ኣሳቲ ኢዛ ሲንꬅ ቤያና።
PSA 12:1 ጎዳዉ! ሎኦ ኣሲ ቢታ ቦላፌ ዉሪዳ ጊሻስ ኔ ታና ማዳርኪ፤ ዴራ ጊዶን ኣማኔቲዛ ኣሲ ዴና።
PSA 12:2 ኢሶይ ኢሳስ ዎርዶ ሃሳዬስ፤ ኢሶይ ኢሳ ዶናን ጪሜቴስ፤
PSA 12:3 ኣቤት ጎዳዉ! ባሌꬂዛ ዶና ጎርዳ፤ ኦቶሮን ሃሳይዛ ኢንጻርሳታ ቃንጻ፤
PSA 12:4 ኢስቲ፥ «ኑኒ ኑ ኢንጻርሳን ጾናና፤ ኑ ዶናይ ኑሳ፤ ኑስ ጎዳይ ኦኔ?» ጌቴስ።
PSA 12:5 ጎዳይ፥ «ሂዬሳቲ ኡንኤቲዳ ጊሻሲኔ ሜቶታንቻታ ዋሶ ጊሻስ ሃኢ ታኒ ዴንዳና፤ ታኒ ኢስቲ ኣሞቲዛ ሳሮቴꬃን ኢስታ ዎꬃና» ጌስ።
PSA 12:6 ጎዳ ቃላይ ኢዛን ዋላካይ ባይንዳ ሙሩታ፤ ጮጬ ታማን ላፑንቶ ፓጬቲ ጌዪዳ ቢራ ማላ።
PSA 12:7 ኣቤት ጎዳዉ! ኔኒ ኑና ሳሮቴꬃን ናጋ፤ ሃ ዎዴን ዲዛ ኢታ ዬሌታፔ ሜርናስ ኔ ኑና ኣሻ።
PSA 12:8 ኣሳ ጊዶን ኢታይ ቦንቼቲዳ ዎዴ ጌላቲ ኡባ ዎዴ ኦቶሬቴꬃን ሲሜሬቴቴስ።
PSA 13:1 ኣቤት ጎዳዉ! ኣዉዴ ጋካናስ ኔኒ ታና ዶጋኔ? ኔ ታና ሜርናስ ባላኔ? ኣዉዴ ጋካናስ ኔኒ ታፔ ጌማኔ?
PSA 13:2 ኣዉዴ ጋካናስ ታኒ ታ ቆፋራ ባጼታኔ? ኣዉዴ ጋካናስ ታ ዎዚናይ ጬጪሼ ዳኔ? ታ ሞርኬቲ ታ ቦላ ኣዉዴ ጋካናስ ጎባኔ?
PSA 13:3 ታ ጎዳዉ! ሃ ታኮ ጼላዳ ታስ ዛሮ ኢማ፤ ታ ኣይፌ ፖኢሳዳ፥ ሃይቆፔ ታና ኣሻ።
PSA 13:4 «ኑኒ ኢዛ ጾኒዶስ» ጊዲ፥ ታ ሞርኬቲ ጬቄቶንታ ማላ ኔ ኢስታ ቴቃ። ታ ኩንዴꬃን ኢስቲ ኡፋዬቶንታ ማላ ኔ ኢስታ ዲጋ።
PSA 13:5 ጊዶ ኣቲን ኔ ማሮቴꬃ ዳሮን ታኒ ኣማኔታይስ፤ ኔኒ ታና ኣሺዛ ጊሻስ ታኒ ኡፋዬታይስ።
PSA 13:6 ጎዳዉ! ኔ ኪያቴꬂ ታስ ዳሪዳ ጊሻስ ታኒ ኔስ ዬጻና።
PSA 14:1 ኤያቲ ባንታ ዎዚናን፥ «ጾሲ ባዋ» ጌቴስ፤ ኢስታ ዴኦይ ሞሬቲዴስ፤ ኢስቲ ሃራሲዛ ሚሽ ኦꬄቴስ፤ ኢስታ ጊዶን ሎኦ ኦꬂዛ ኢሲ ኣሲካ ዴና።
PSA 14:2 ጾሳ ኮይዛይኔ ኣኬኪዛይ ዴኢዛኮ ቤኣናስ፥ ጎዳይ ሳሎፔ ዱጌ ኣሳ ጼሌስ።
PSA 14:3 ጊዶ ኣቲን ኡባይካ ኦጌፔ ካሬ ኬኢዳ፤ ኡባይካ ሙሌራ ጎኦንታዝ ጊዲዳ፤ ሎኦ ኦꬂዛይ ኦኒኔ ዴና፤ ሃራይ ኣቶ ኢሳዴይካ ዴና።
PSA 14:4 ጎዳይ፥ «ታ ኣሳ ቦንቂ ሚዛ ኢታ ኣሳቲ ኣይኮካ ኤሬቴኔ?» ጌስ።
PSA 14:5 ጊዶ ኣቲን ጾሲ ጺሎ ኣሳታራ ዴኢዛ ጊሻስ ኢታ ኣሳቲ ሄሳን ዳጋማና።
PSA 14:6 ኢንቴ ሂዬሳታ ሃልቾ ላሌታ፤ ጊዶ ኣቲን ጎዳይ ሂዬሳቲ ባቃቲ ኣቲዛሶ ጊዴስ።
PSA 14:7 ኢስራኤሌስ ኣቶቴꬂ ጺዮኔፔ ዪዳኮ! ጎዳይ ኢስታ ዱሳ ዛሪዛ ዎዴ ያቆቤ ዜሬꬃቲ ኡፋዬታና፤ ኢስራኤሌ ኣሳይ ኡፋይሳን ጋላታና።
PSA 15:1 ኣቤት ጎዳዉ! ኔ ዱንካኔዛን ጋምኣናይ ኦኔ? ኔ ጌሻ ዙማ ቦላ ኔናራ ዴኣናይ ኦኔ?
PSA 15:2 ሱሬ ዴኦ ዴኢዛይ፥ ጺሎ ኦꬂዛይ፥ ባ ዎዚናፔ ቱማ ሃሳይዛይ፥
PSA 15:3 ኣስ ጪሞንታይ፥ ባ ላጌ ቦላ ኢታ ኦꬆንታይ፥ ባ ሾሮ ዚጊሮንታይ፥
PSA 15:4 ኢታ ኣሳታ ካꬊዛይ፥ ጊዶ ኣቲን ጎዳስ ያዪዛይታ ቦንቺዛይ፥ ኣይ ዴጺኮካ ባ ጫቂዳ ቃላ ፖሊዛይ፥
PSA 15:5 ባ ሚሻ ዲቻስ ታልኦንታይ፥ ጺሎ ኣስ ቆሃናስ ማታኤ ኤኮንታይ፥ ሃ ዮኦታ ፖሊዛዴይ ሜርናስካ ሂርጌና።
PSA 16:1 ኣቤት ጎዳዉ! ታ ባቃታ ኣቲዛሶይ ኔና፤ ኔ ኪኦን ታና ቆታ።
PSA 16:2 ታኒ ጎዳስ፥ «ኔኒ ታ ጎዳ፤ ኔፔ ኣቲን ሃራ ሎኦይ ታስ ዴና» ጋዲስ።
PSA 16:3 ሳኣን ዴኢዛ ጌሻቲ ኣይ ማላ ቦንቼቲዳይቴ! ታኒ ኢስታን ኡፋዬታይስ።
PSA 16:4 ዎርዶ ጾሳታ ካሊዛይቲ ባንታ ቦላ ሜቶ ዳርሴቴስ። ጊዶ ኣቲን ታኒ ኤቃ ጾሳታስ ሹኪኬ፤ ኢስታስ ሱንꬃካ ጼይጊኬ።
PSA 16:5 ጎዳዉ! ታስ ላታ ጺንጾይኔ ቃዳይ ኔና፤
PSA 16:6 ኔ ታስ ዋꬊዳ ዛዋይ ሎኦ ጊዲዴስ፤ ኬሂፔ ሎኦ ጺንጾይ ታና ጋኪዴስ።
PSA 16:7 ታና ዞሪዛ ጎዳ ጋላታይስ፤ ኦማርስ ታ ዎዚናይ ታና ታማርሴስ።
PSA 16:8 ታኒ ኡባቶ ጎዳ ሲንꬃሳይስ፤ ኢዚ ታ ኡሻቻን ዲዛ ጊሻስ ታኒ ኮኮሪኬ።
PSA 16:9 ሄሳ ጊሻስ ታ ዎዚናይ ኡፋዬቴስ፤ ታ ሼምፖይካ ዎፑ ጌስ፤ ታ ኣሳቴꬃይካ ሂርጋይ ባይንዳ ሼምፒ ዴስ።
PSA 16:10 ኔ ታና ሲኦሌን ኣጋካ፤ ኔ ጌሻዛ ዎቃና ማላ ኣጋካ።
PSA 16:11 ኔኒ ታና ዴኦ ኦጌ ቤሳሳ፤ ኔ ማታን ኩሜꬃ ኡፋይሲ፥ ኔስ ኡሻቻን ሜርና ኡፋይሲ ዴስ።
PSA 17:1 ኣቤት ጎዳዉ! ታ ጺሎቴꬃን ማጋኒዛ ማጋና ሲያ፤ ታ ዋሶዛ ኤዝጋ፤ ጪሞይ ባይንዳ ዎሲዛ ዎሳስ ዛሮ ኢማ።
PSA 17:2 ታስ ጺሎቴꬂ ኔፔ ዮ፤ ቱማ ኔ ኣይፌይ ጼሎ።
PSA 17:3 ኔኒ ቃማን ታና ጾሞሳዳሳ፤ ታ ዎዚና ፓጫዳሳ፤ ኔ ፓጪዳ ጊዲኮካ ታ ቦላ ኣይኮካ ዴማቤካ። ታ ኢንጻርሳይ ኢታ ሃሳይቤና።
PSA 17:4 ታኒ ሃራ ኣሳ ማላ ኢታ ቃላ ሃሳይኬ፤ ታኒ ኔ ኣዛዞ ናጊዛ ጊሻስ ጌኔ ኦጌ ካላቤኬ።
PSA 17:5 ታ ቶሆቲ ኔ ኦጌፔ ሃንዳሪሾንታ ማላ ታ ታንጎይ ኔ ኦጌፔ ካሬ ኬዚቤና።
PSA 17:6 ኣቤት ጾሳዉ! ታኒ ዎሲን ኔኒ ሲዪዛ ጊሻስ ታኒ ኔና ዎሳይስ፤ ኔ ሃይꬃ ታኮ ዛራዳ፥ ታኒ ኔስ ዮቲዛይሳ ሲያ።
PSA 17:7 ባንታ ሞርኬታፔ ባቃቲዛይታ ኔ ኡሻቻ ኩሼዛን ቆታዳ ኣሺዛይሶ! ኔ ኪያቴꬃ ማላሊሲዛ ኦጌራ ቆንጪሳ።
PSA 17:8 ኔ ኣይፌ ጪሮ ማላ ታና ናጋ፤ ኔ ቄፌታ ጊዶን ታና ቆታ።
PSA 17:9 ኡንኤꬂዛ ኢታታፔኔ ዶዲ ኡቲዳ ዎልቃማ ሞርኬታ ኩሼፔ ኔ ታና ኣሻ።
PSA 17:10 ኢስታስ ቃꬌቲዛ ዎዚናይ ባዋ፤ ኦቶሮ ሃሳያ ሃሳዬቴስ።
PSA 17:11 ታኒ ቢዛሶ ኡባን ኢስቲ ታና ዶዴቴስ፤ ታና ዱጌ ቢታን ኩንዲስ ዬጋናስ ዴሬቄቴስ።
PSA 17:12 ኢስቲ ባንታስ ሚዛ ሚሽ ኮይዛ ጋሞ ማላ፤ ዎይኮ ጌማን ዛማዲ ናጊዛ ዎዳላ ጋሞ ማላ።
PSA 17:13 ኣቤት ጎዳዉ! ዴንዳ። ታ ሞርኬታራ ኤቄታዳ ኢስታ ሾጫ፤ ኔ ማሻን ኢታታፔ ታና ኣሻ።
PSA 17:14 ኣቤት ጎዳዉ! ሄሳ ማላ ኣሳታፔ ታና ቆታ፤ ኢስታ ቃዳይ ሃ ሳኣ ዴኦ ጻላ ጊዲዛ ኣሳፔ ኔ ኩሼን ታና ኣሻ፤ ኔ ማዝጋባን ሚንጂዳ ቂጻቴፔ ኢስታ ካልሳ፤ ኢስታ ናይታስ ዳሪዲ ቲርፖ፤ ኢስታ ናይታ ናይታስካ ጊዲ ፓላሆ።
PSA 17:15 ጊዶ ኣቲን ታኒ ጺሎቴꬃን ኔ ሲንꬃ ቤያና፤ ታኒ ቤጊዛ ዎዴ ኔ ቦንቾ ቤኣዳ ኣላና።
PSA 18:1 ኣቤት ጎዳዉ! ኔ ታስ ዎልቃ ኢሚዳ ጊሻስ ታ ኔና ሲቃይስ።
PSA 18:2 ጎዳይ ታስ ዛላ፤ ታኒ ኦላፔ ናጌቲዛ ሚጻ፤ ኢዚ ታና ኣሺዛይሳ፤ ታ ጾሳይ ታኒ ኢዛን ጌሜታ ኣቲዛ ዎጋ ዛላ። ኢዚ ታስ ጎንዳሌ፤ ኢዚ ታና ኣሺዛ ካጬ፤ ታስ ኢዚ ሚኖ ዜምፖ።
PSA 18:3 ጋላታይ ቤሲዛ ጎዳ ታኒ ጼይጋይስ፤ ኢዚ ታ ሞርኬታፔ ታና ኣሼስ።
PSA 18:4 ሃይቆ ዎዶሮይ ታና ጩሊዴስ፤ ꬋይሲዛ ዲኦይ ታና ሚቲዴስ።
PSA 18:5 ዱፎ ዎዶሮይ ታና ቃቺዴስ፤ ሃይቆ ዎጺማዴይ ታ ሲንꬃን ዋጼቲዴስ።
PSA 18:6 ታና ሜቶይ ኡንኢን ጎዳ ጼይጋዲስ፤ «ታና ማዳ» ጋዳ ታ ጾሳስ ዋሳዲስ፤ ኢዚ ባ ኬꬃን ዲሼ ታ ጬንጉርሳ ሲዪዴስ፤ ታኒ ዋሲዳ ዋሶይ ኢዛ ሃይꬃን ዎꬊዴስ።
PSA 18:7 ጾሲ ሃንቄቲዳ ጊሻስ ቢታይ ቃጺዴስ፤ ዙማታ ጻጶይ ኮኮሪዴስ።
PSA 18:8 ኢዛ ሲꬌፔ ሃንቆ ጩዋይ ጩዋቲዴስ፤ ኢዛ ዶናፔ ሚዛ ታማ ላጮይ ኬዚዴስ፤ ኢዛ ዶናፔ ጹጊዛ ቦንቆይ ፑልቲዴስ።
PSA 18:9 ሳሎ ጳልቂዲ ዎꬊዴስ፤ ሄ ዎዴ ኢዛ ቶሆ ጋርሳራ ꬊፒ ጊዳ ሻራይ ዴስ።
PSA 18:10 ኪሩቤን ኡቲዲ ፓሊዴስ፤ ጫርኮ ቄፌ ኤኪዲ ፑዴ ዴንዲ ቢዴስ።
PSA 18:11 ባና ꬉማን ካሚዴስ፤ ኢዛ ዱንካኔዛ ꬊፒ ጊዳ ኢራራ ሻራይ ዶዲዴስ።
PSA 18:12 ኢዛ ሲንꬃን ዴኢዛ ጊታ ፖኦዛፔ ሻቺኔ ዎልቃንꬂ ኬኢዴስ፤ ꬊፒ ጊዳ ሻራካ ካንꬂ ኬኢዴስ።
PSA 18:13 ጎዳይ ዳዳ ማላ ሳሎፔ ጉሚዴስ፤ ኡባፌ ꬎቃ ጾሳይ ባ ጬንጉርሳ ሲሲዴስ፤ ዎልቃንꬃኒኔ ታማ ላጮን ቆንጪዴስ።
PSA 18:14 ባ ዎንዳፌዛ ዪሻ ዬዲዴስ፤ ባ ሞርኬታካ ላሊዴስ፤ ዎልቃንꬃ ፖኦ ኪቲዲ ኢስታ ዬዴꬂዴስ።
PSA 18:15 ኣቤት ጎዳዉ! ኔኒ ሴሪዳ ዎዴኔ ኔ ሃንቆይ ኤጺዳ ዎዴ፥ ጊታ ኣባቲ ኢቺዳ ቢታይ ቤቲዴስ፤ ቃሴ ሳኣ ዮቻይ ቆንጪዴስ።
PSA 18:16 ጎዳይ ቦላፌ ባ ኩሼዛ ዱጌ ዬዲዲ ታና ኦይኪዴስ፤ ጪማ ሃꬃፌ ታና ኬሲዴስ።
PSA 18:17 ኢዚ ታ ቦላ ዎልቃቲዛ ታ ሞርኬታፔ፥ ታና ኢጺዛይታፔ ኣሺዴስ።
PSA 18:18 ታና ሜቶይ ኡንኢዳ ጋላስ ኢስቲ ታ ቦላ ዴንዲዳ፤ ጊዶ ኣቲን ጎዳይ ታስ ዜምፖ ጊዲዴስ።
PSA 18:19 ኢዚ ታና ኣሆ ዴምባን ኬሲዴስ፤ ታናን ኡፋዬቲዳ ጊሻስ ታና ኣሺዴስ።
PSA 18:20 ታ ጺሎቴꬃ ማላ ጎዳይ ታስ ቃንጺዴስ፤ ታ ኩሼ ጌሻቴꬃ ማላ ኢዚ ታስ ዛሪዴስ።
PSA 18:21 ታኒ ጎዳ ኦጌ ካላዲስ፤ ታኒ ታ ጾሳ ኣጋዳ ኢታ ኦꬃቤኬ።
PSA 18:22 ታኒ ኢዛ ዎጋ ኡባ ናጋዲስ፤ ኢዛ ኣዛዞዛ ፖላናፔ ጉዬ ጋቤኬ።
PSA 18:23 ታኒ ኢዛ ሲንꬃን ሱሬ ዴኣዲስ፤ ታናቴꬃ ናጋራፔ ናጋዲስ።
PSA 18:24 ሄሳ ጊሻስ ጎዳይ ታስ ታ ጺሎቴꬃ ማላ ኢሚዴስ፤ ታ ኩሼይ ኢዛ ሲንꬃን ጌሽ ጊዲዳ ማላ ዛሪዴስ።
PSA 18:25 ኣቤት ጎዳዉ! ኣማኔቲዛይታስ ኔኒ ኣማኔታሳ፤ ሱሬታስ ኔኒ ሱሬ።
PSA 18:26 ጌሻታስካ ኔኒ ጌሻ፤ ጊዶ ኣቲን ጌላታስ ኔኒ ጌላ።
PSA 18:27 ኣሽኬታ ኔ ኣሻሳ፤ ጊዶ ኣቲን ኦቶራንቻታ ካዉሻሳ።
PSA 18:28 ኣቤት ጎዳዉ! ኔ ታስ ጾምፓሳ፤ ጾሳይ ኔኒ ታስ ꬉማ ፖኢሳሳ።
PSA 18:29 ኔ ማዲን ታኒ ታ ሞርኬታ ኦላይስ፤ ታ ጾሳ ዎልቃን ታኒ ኢስታ ጊምቤ ቦላራ ጉፓ ኣꬋይስ።
PSA 18:30 ጾሳ ኦጌይ ሱሬ፤ ጎዳ ቃላይ ኣማኔቲዛይሳ፤ ኢዛኮ ባቃቲዛ ኡባታስ ኢዚ ጎንዳሌ።
PSA 18:31 ጾሳፌ ኣቲን ሃራ ጾሲ ኦኔ? ኑ ጎዳፔ ኣቲን ሃራ ዛላይ ኦኔ?
PSA 18:32 ታስ ዎልቃ ኢሚዛይኔ ታ ኦጌ ሳሮ ኦꬂዛይ ጾሳ።
PSA 18:33 ኢዚ ታ ቶሆታ ጌኔሳ ቶሆ ማላ ሚንꬄስ፤ ታና ꬎቃሶሆታን ሳሮቴꬃን ዎꬄስ።
PSA 18:34 ኢዚ ታ ኩሼታ ኦላ ታማርሴስ፤ ሄሳ ጊሻስ ታኒ ታ ቄሴን ጻርቂማላ ዎንዳፌዛ ዳፋዳ ዱካይስ።
PSA 18:35 ኣሺዛ ኔ ጎንዳሌ ታስ ኢማዳሳ። ኔ ኡሻቻ ኩሼን ታና ዜምፒሳዳሳ፤ ታኮ ዚቂ ጋዳ ታና ጊታሳዳሳ።
PSA 18:36 ታ ኦጌ ኣሳዳሳ፤ ሄሳ ጊሻስ ታ ቶሆይ ሃንዳራሺቤና።
PSA 18:37 ታ ሞርኬታ ታኒ ዬዴꬃ ኦይካዲስ፤ ታኒ ኢስታ ꬋይሳና ጋካናስ ጉዬ ሲማቤኬ።
PSA 18:38 ኢስቲ ናምኣንꬆ ዴንዶንታ ማላ ሾጫዲስ፤ ታ ቶሆ ጋርሳንካ ኩንዲዳ።
PSA 18:39 ኦላስ ታና ዎልቃ ጊጺሳዳሳ፤ ታ ሞርኬታ ታ ሲንꬃን ጉልባቲሳዳሳ።
PSA 18:40 ታ ሞርኬታ ታ ሲንꬃፌ ጉዬ ዛራ ባቃቲሳዳሳ፤ ታና ኢጺዛይታ ታኒ ꬋይሳዲስ።
PSA 18:41 ባንታና ማዳና ማላ ዋሲዳ፤ ጊዶ ኣቲን ኦኒኔ ኢስታ ኣሺቤና። ጎዳ ኢስቲ ጼይጊዳ፤ ጊዶ ኣቲን ኢዚ ኢስታስ ኮዪቤና።
PSA 18:42 ጫርኮይ ፒቲዲ ኤፊዛ ጉዱላ ማላ ታኒ ኢስታ ኦꬃዲስ፤ ኦጌን ዴኢዛ ኡርቃ ማላካ ኢስታ ዬꬌታዲስ።
PSA 18:43 ማካላ ኣሳፔ ታና ኣሻዳሳ፤ ኔ ታና ካዎቴꬃታ ኣይሲዛዴ ሂስታ ሹማዳሳ፤ ታ ኤሮንታ ዴሬይ ታስ ሃሬቲዴስ።
PSA 18:44 ታና ኤሮንታ ኣላጋ ዴሬይ ታስ ኣዛዜቴስ፤ ኢስቲ ታ ጎባቴꬃ ሲዪዲ ታስ ዚጌቴስ።
PSA 18:45 ኢስቲ ያሻን ካሃ ꬋዬቴስ፤ ባንቲ ናጊዛ ሚጻፔ ኬዚዲ ኮኮሪሼ ታኮ ዬቴስ።
PSA 18:46 ጎዳይ ዴኦ ጾሳ! ታ ዜምፒዛ ዎጋ ዛላይ ጋላቴቶ! ታና ኣሺዳ ጾሳይ ꬎቁ ꬎቁ ጎ!
PSA 18:47 ኢዚ ታ ሃሎ ኬሲዛ ጾሳ፤ ካዎቴꬃታ ታስ ሃሪሲዛ ጾሳ።
PSA 18:48 ታ ሞርኬታፔ ታና ኣሻሳ፤ ኣቤት ጎዳዉ! ኔኒ ታ ሞርኬታ ቦላ ታና ꬎቁ ꬎቁ ሂስታሳ፤ ማካላንቻ ኣሳታፔ ኔኒ ታና ኣሻሳ።
PSA 18:49 ሄሳ ጊሻስ ታኒ ኔና ካዎቴꬃታ ሲንꬃን ጋላታና፤ ታኒ ኔ ሱንꬃ ዬꬃን ሳባና።
PSA 18:50 ጾሲ ባ ካዎꬂዳ ካዎስ ጾኖ ቦላ ጾኖ ኢሜስ። ባ ቲይዳይሳስ ኪያቴꬃ ቤሴስ፤ ዳዊቴሲኔ ኢዛ ዜሬꬃታስ ሜርናስ ሄሳꬆ ኦꬄስ።
PSA 19:1 ሳሎቲ ጾሳ ቦንቾ ዮቴቴስ፤ ሳሎ ጉፋንꬆይ ኢዛ ኩሼ ኦሶ ኣዋጄስ።
PSA 19:2 ኢሲ ጋላሳይ ሃራ ጋላሳስ ሄሳ ዮቴስ፤ ኢሲ ቃማይካ ካሊዛ ቃማስ ኤራቴꬅ ቆንጪሴስ።
PSA 19:3 ኢስታስ ሃሳያይ ዎይኮ ቃላይ ባዋ፤ ኢስታ ጬንጉርሲካ ሲዬቴና።
PSA 19:4 ጊዶ ኣቲን ኢስታ ሃሳያ ጬንጉርሲ ሳኣ ኡባን ላሌታና፤ ኢስታ ቃላይካ ቢታ ጋጻ ጋካና። ጾሲ ኣርሼስ ሳሎን ሶሆ ጊግሲዴስ።
PSA 19:5 ኣርሼይ ሚሺራይ ባ ኬꬃፌ ኬዚዛ ማላ ፖኢ ኬኤስ፤ ጋዴ ዎጺዛ ፒላታ ኣሳ ማላ ኡፋዬቴስ።
PSA 19:6 ኣርሼይ ኬሳሶፔ ዉሎሶ ጋካናስ ቤስ፤ ኢዛ ሴላፔ ጌሚ ኣታና ሚሺ ዴና።
PSA 19:7 ጎዳ ዎጋይ ሱሬ፤ ሼምፖ ዛሪ ጪልኢሴስ፤ ጎዳ ኣዛዞይ ኣማኔቲዛይሳ፤ ኣኬካይ ፓጪዳይታስ ኣꬎ ኤራቴꬅ ኢሜስ።
PSA 19:8 ጎዳ ዎጋይ ሊኬ፤ ዎዚና ኡፋይሴስ። ጎዳ ኣዛዞይ ጌሻ፤ ኣይፌ ፖኢሴስ።
PSA 19:9 ጎዳስ ያሺ ጌሻቴꬃ፤ ኢዚ ሜርናስ ኤቂዲ ዴኣና። ጎዳ ፒርዳይ ሙሌራ ቱማኔ ጺሎ።
PSA 19:10 ዎርቃፌኔ ሙሩታ ዎርቃፌ ኣꬊ ዶሴቴስ፤ ኤሳፌኔ ኤሳ ኢሊሎፔ ኣꬊ ማልኤስ።
PSA 19:11 ቃሴ ታና ኔ ኣይሌዛ ናጌታና ማላ ዞሬስ፤ ኔ ዎጋ ናጎይ ዳሮ ጎኤስ።
PSA 19:12 ባ ባላ ዴሚዛይ ኦኔ? ኣቤት ጎዳዉ! ጌሚዳ ናጋራፔ ታና ጌሻ።
PSA 19:13 ታኒ ኔ ኣይሌይ፥ ጻላቴꬃን ናጋራ ኦꬆንታ ማላ ኔኒ ታና ናጋ። ናጋራይ ታና ሃሮፖ፤ ሄ ዎዴ ታኒ ሱሬ ጊዳና፤ ጊታ ሞሮፔካ ጌያና።
PSA 19:14 ኣቤት ጎዳዉ! ታ ዜምፒዛ ዎጋ ዛላዉ! ታና ዎዚዳ ታ ጎዳዉ! ታ ዶናፔ ኬኢዛ ቃላይኔ ታ ዎዚና ቆፋይ ኔና ኡፋይሲዛይሳ ጊዶ።
PSA 20:1 ኔኒ ሜቶቲዳ ዎዴ ጎዳይ ኔ ዎሳ ሲዮ፤ ያቆቤ ጾሳ ሱንꬂ ኔና ሚንꬂ ኤሶ።
PSA 20:2 ባ ኬꬃፌ ኔስ ማዶ ኪቶ፤ ጺዮኔፔ ማዶይ ዮ።
PSA 20:3 ኔ ያርሾ ኡባ ኢዚ ኣኬኮ፤ ኔ ጹጊዛ ያርሾን ኢዚ ኡፋዬቶ።
PSA 20:4 ኔ ዎዚና ኣሞ ኔስ ኢሞ፤ ኔ ሃልቾ ኡባ ፖሎ።
PSA 20:5 ኔ ጾኒዳ ጊሻስ ኑኒ ኡፋይሳን ሆምቦጫና፤ ኑ ጾሳ ሱንꬃን ኑ ባንዲራ ꬎቁ ኦꬃና፤ ኔ ዎሳ ኡባ ጎዳይ ኔስ ኢሞ።
PSA 20:6 ጎዳይ ባ ዶሪዳ ካዎዛስ ጾኖ ኢሚዛይሳ ታኒ ሃኢ ኤራዲስ፤ ባ ኡሻቻ ኩሼዛን ኢዚ ጊታ ጾኖን ኩንꬃና፤ ባ ጌሻ ሳሎፔካ ኢዛስ ዛሮ ኢማና።
PSA 20:7 ኢሶቲ ኢሶቲ ባንታ ኦላ ፓራ-ጋሬን ኣማኔቴቴስ፤ ሃራቲ ባንታ ፓራን ጬቄቴቴስ፤ ኑኒ ጊዲኮ ኑ ጎዳ ዎልቃን ጬቄቶስ።
PSA 20:8 ኢስቲ ꬉጴቲዲ ኩንዳና፤ ኑኒ ጊዲኮ ዴንዲዲ ሚኒ ኤቃና።
PSA 20:9 ኣቤት ጎዳዉ! ካዎዛስ ጾኖ ኢማ፤ ኑኒካ ኔና ጼይጊዛ ዎዴ ሲያ።
PSA 21:1 ኣቤት ጎዳዉ! ካዎይ ኔ ኢሚዳ ዎልቃ ጊሻስ ኡፋዬቴስ፤ ኔኒ ኢሚዳ ጾኖን ኢዚ ኬሂ ሆምቦጬስ።
PSA 21:2 ኔኒ ኢዛ ዎዚና ኣሞ ኢዛስ ኢማዳሳ፤ ቃሴ ኢዚ ኔና ባ ዶናን ኦይቺዳይሳ ኔኒ ዲጋቤካ።
PSA 21:3 ኔኒ ሎኦ ኣንጆራ ኢዛ ሞካሳ፤ ጌሻ ዎርቃ ካላቻ ኢዛ ሁኣን ጎጺሳዳሳ።
PSA 21:4 ኔኒ ዴኦ ኢዛስ ኢማና ማላ ኔና ዎሲዴስ፤ ኔካ ኢዛስ ዴኦኔ ኣዱሳ ላይꬅ ኢማዳሳ።
PSA 21:5 ኔኒ ጾኖ ኢሚዳ ጊሻስ ኢዛስ ቦንቾይ ዳሪዴስ፤ ጊታቴꬂኔ ቴማ ኢዛስ ኢማዳሳ።
PSA 21:6 ኔኒ ኢዛስ ሜርና ኣንጆ ኢማዳሳ፤ ኔ ኢዛራ ዱሳን ኢዛ ኡፋይሳዳሳ።
PSA 21:7 ካዎዚ ጎዳን ኣማኔቴስ። ኡባፌ ꬎቃ ጾሳ ኪያቴꬂ ኢዛራ ዲዛ ጊሻስ ኢዚ ያዬና።
PSA 21:8 ኔ ኩሼይ ኔ ሞርኬታ ኡባ ዴማና፤ ኔ ኡሻቻይ ኔና ኢጺዛይታ ኦይካና።
PSA 21:9 ኔኒ ቆንጪዛ ዎዴ ጮጬን ኤጺዛ ታማ ማላ ኔ ኢስታ ጹጋና፤ ጎዳይ ባ ሃንቆዛ ሱሌን ኢስታ ጹጋና፤ ኢዛ ታማይካ ኢስታ ሚ ꬋይሳና።
PSA 21:10 ኔኒ ኢስታ ናይታ ቢታፌ ዲጋና፤ ኢስታ ዜሬꬃካ ዴሬፔ ዴንꬃ ꬋይሳና።
PSA 21:11 ኔ ሞርኬቲ ኔ ቦላ ጌኔን ዱላቴቴስ፤ ኢታ ሚሺካ ማቄቴቴስ፤ ጊዶ ኣቲን ኢስታስ ሃኔና።
PSA 21:12 ኔካ ኢስታ ኔ ዎንዳፌዛ ዪሻን ጎዳሳ፤ ኢስቲ ጉዬ ሲሚዲ ባቃታና ማላ ኦꬃሳ።
PSA 21:13 ኣቤት ጎዳዉ! ኔ ሚኖቴꬃይ ꬎቁ ꬎቁ ጎ፤ ኔ ጊታ ዎልቃ ጊሻስ ጋላታ ዬꬃ ዬጾስ።
PSA 22:1 ታ ጾሳዉ! ታ ጾሳዉ! ታና ኣይስ ኣጋዲ? ታና ማዳ ጋዳ ታኒ ዋሲሺን ኣይስ ሲዮንታ ኢጻዲ? ታፔካ ኣይስ ሃካዲ?
PSA 22:2 ኣቤት ታ ጾሳዉ! ጋላስ ኩሜꬅ ታ ኔኮ ዋሲሺን ኔ ሲያቤካ፤ ቃማ ኡባንካ ኔኮ ዋሶፔ ሼምፓቤኬ።
PSA 22:3 ኔ ጊዲኮ ጌሻ ካዎ፤ ኢስራኤሌ ጋላታይ ኔ ዩሾን ዴስ።
PSA 22:4 ካሴ ኑ ኣዋቲ ኔናን ኣማኔቲዳ፤ ኔናን ኣማኔቲን ኔ ኢስታ ኣሻዳሳ።
PSA 22:5 ኢስቲ ኔኮ ዋሲን ኣሻዳሳ፤ ኔናን ኣማኔቲን ኢስታ ዬላሳቤካ።
PSA 22:6 ታኒ ጉጹኔ ኣቲን ኣስ ጊዲኬ፤ ታኒ ኣሳን ካꬌቲዳዴኔ ኢጼቲዳዴ።
PSA 22:7 ታና ቤኢዳ ኡባቲ ቂꬌቴስ፤ ዛሪዲካ ኢንጻርስ ኬሲ ቂꬌቴስ፤ ባ ቆꬌካ ታ ቦላ ቃꬄቴስ።
PSA 22:8 ሂስቲዲ፥ «ኢዚ ጎዳን ኣማኔቲዴስ፤ ኣኔ ጾሲ ኢዛ ኣሾ፤ ኢዚ ኡፋዬቲዳ ጊዲኮ ኣኔ ኢዛ ማዶ» ጌቴስ።
PSA 22:9 ጊዶ ኣቲን ታ ዎጋራ ዬሌታና ማላ ማዲዳይ ኔና፤ ታኒ ታ ኣዪ ꬋንꬅ ꬋሚሺንካ ኔ ታስ ኣማኔታሳ።
PSA 22:10 ታኒ ዬሌቶሶፌ ዶማዳ ኔናን ዲጫዲስ፤ ታ ኣዬይ ኡሎፔ ዶማዳካ ኔኒ ታ ጾሳ።
PSA 22:11 ሜቶይ ታኮ ማቲ ማቲ ዪዛ ጊሻስ፥ ታና ማዲዛይካ ባይንዳ ጊሻስ ኔኒ ታፔ ሃኮፋ።
PSA 22:12 ዳሮ ሞርኬቲ ኮርማ ቦራታ ማላ ታና ጊዶꬂዳ፤ ቃይጪዛ ባሳኔ ቢታ ቦራታ ማላ ታና ዶዲዳ።
PSA 22:13 ሜንꬄሬꬂ ዬጊዲ ጻጊዛ ጋሞ ማላ ባ ዶና ታ ቦላ ዶይዳ።
PSA 22:14 ታኒ ሃꬃ ማላ ጎጋዲስ፤ ታ ሜቄꬃቲ ሶሜፔ ሶሜፔ ኮሌቲዳ። ታ ዎዚናይ ሙቃዳ ማላ ታ ጊዶን ሴሪዴስ።
PSA 22:15 ታስ ቆꬌይ ኮንኣ ማላ ሜሊዴስ፤ ታ ኢንጻርሳይ ጎንጊራꬃራ ኦይኬቲዴስ፤ ኔኒ ታና ሃይቂዳ ኣሳ ማላ ጉዱላን ዬጋዳሳ።
PSA 22:16 ካናቲ ታና ጊዶꬂዳ፤ ኢታ ኣሳቲ ታና ዶዲ ኦይኪዳ፤ ታ ኩሼታኔ ታ ቶሆታ ሺሺ ꬊሺኪዳ።
PSA 22:17 ታኒ ሜቄꬃታ ቆዳና ዳንዳያይስ፤ ታ ሞርኬቲካ ታና ጲርጺ ሂስቲ ጼሌቴስ።
PSA 22:18 ታ ማይኦዛ ጊሼቲ ኤኪዳ፤ ታ ኣዱሳ ማይኦዛን ሳማ ዬጊዳ።
PSA 22:19 ኣቤት ጎዳዉ! ኔኒ ሃኢ ታፔ ሃኮፋ። ኣቤት ታ ዎልቃዉ! ታና ማዳናስ ኤሶታ።
PSA 22:20 ታና ማሻፌ ኣሻ፤ ታ ሼምፖዮ ዎልቃማ ካናታፔ ኣሻ።
PSA 22:21 ታና ጋሞታ ዶናፔ ኣሻ፤ ቃይጪዛ ሜንꬃ ካጬዛፔ ታና ናጋ።
PSA 22:22 ታኒ ኔ ሱንꬃ ታ ኢሻታስ ዮታና፤ ኢስቲ ሺቂዳሶንካ ታ ኔና ጋላታና።
PSA 22:23 ኢንቴኖ ጎዳስ ያዪዛይቶ፥ ኢዛ ጋላቲቴ! ኢንቴኖ ያቆቤ ዜሬꬃቶ! ኡባይካ ኢዛ ቦንቺቴ! ኢንቴኖ ኢስራኤሌ ዜሬꬃቶ! ኡባቲካ ቦንቾን ኢዛስ ያዪቴ!
PSA 22:24 ኢዚ ናቄቲዳይሳ ካꬊቤና፤ ሜቶቲሺን ዬጊ ኣꬊቤና፤ ባ ሲንꬃ ኢዛፔ ጌንꬂቤና፤ ኢዚ ማዳርኪ ጊ ዋሲን ኢዛ ዋሶ ሲዪዴስ።
PSA 22:25 ኔኒ ኦꬂዳ ሎኦ ኦሶ ጊሻስ፥ ዴሬይ ሺቂዳሶን ጋላታና፤ ታ ኣዲኒዳይሳ ኔና ያዪዛ ኣሳ ሲንꬃን ጋꬃና።
PSA 22:26 ሂዬሳቲ ሚዲ ካላና። ጎዳ ኮይዛይቲ ኢዛ ጋላታና። ኢስቲ ሜርናስ ኡፋዬታና።
PSA 22:27 ሳኣ ጋጻ ጋካናስ ዲዛ ኣሳይ ኢዛ ጊሻስ ዩሺ ቆፓና፤ ጎዳኮ ሲማና። ኣሳ ዜሬ ኡባይ ኢዛስ ጎይናና።
PSA 22:28 ኣይስ ጊኮ ማታይ ኢዛሳ፤ ካዎቴꬃይ ኡባይ ኢዛስ ሃሬታና።
PSA 22:29 ሳኣ ቦላ ዲዛ ዱሬቲ ኢዛስ ጎይናና። ባና ሃይቆፔ ኣሻናዉ ዳንዳዮንታ ቢታን ባና ኣሲ ኡባይ ኢዛ ሲንꬃን ጉልባታና።
PSA 22:30 ቡሮ ያና ዬሌታይ ኢዛስ ኦꬃና፤ ሄ ዬሌታይ ካሊ ዪዛ ዬሌታስ ጎዳ ኦሶ ዮታና።
PSA 22:31 ኢስቲ ኢዛ ጺሎቴꬃ ጊሻስ ቡሮ ያና ዬሌታስ ዮታና።
PSA 23:1 ጎዳይ ታ ሄንꬃንቻ፤ ታስ ኣይኮይካ ፓጬና።
PSA 23:2 ታና ኣጫ ቆሮን ሼምፒሴስ፤ ጺሎ ሃꬂ ዲዛሶ ታና ካሌꬄስ።
PSA 23:3 ታ ዴኦ ኦራጺሴስ። ባ ሱንꬃ ጊሻስ ታና ጺሎቴꬃ ኦጌን ካሌꬄስ።
PSA 23:4 ኔኒ ታ ጎዳይ ታናራ ዲዛ ጊሻስ ታኒ ጊርዲ ጊዳ ꬉማ ሾባ ጊዶራ ቢኮካ ኢታ ሚሻስ ባቢኬ። ኔ ጉፌይኔ ጋቱማይ ታና ሚንꬄꬄስ።
PSA 23:5 ታ ሞርኬታ ሲንꬃን ታስ ማዳ ጊጊሳዳሳ፤ ታ ሁኤ ዛይቴን ቲያዳሳ፤ ታ ኡሺ ኩንꬃ ፓላሂሳዳሳ።
PSA 23:6 ኔ ኪያቴꬂኔ ኔ ማሮቴꬃይ ታ ዴኦ ላይꬃ ኡባን ታና ካላና፤ ታኒ ጎዳ ኬꬃን ሜርናስ ዳና።
PSA 24:1 ሳኣይኔ ሳኣን ኩሚዳ ኡባይ ጎዳሳ፤ ሳሎ ጉፋንꬆን ዲዛ ኡባይ ጾሳሳ።
PSA 24:2 ሳኣ ጊታ ኣባታ ቦላ ሚጪዴስ፤ ሃꬃ ቦላካ ሚንꬂዲ ኤሲዴስ።
PSA 24:3 ጎዳ ዙማ ቦላ ኬዛናይ ኦኔ? ኢዛ ጌሻሶሆን ኤቃናይ ኦኔ?
PSA 24:4 ኢዛ ኩሼይ ናጋራፔ ጌዪዳይ፥ ኢዛ ዎዚናይ ጌሻ ጊዲዳይ፥ ኤቃ ጾሳታስ ጎይኖንታይ፥ ዎርዶ ጫቆንታይ፥
PSA 24:5 ኢዚ ጎዳፔ ኣንጆ ኤካና፤ ባና ኣሺዛ ጾሳፌ ጺሎ ፒርዳ ዴማና።
PSA 24:6 ጾሳኮ ጼሊዛ ኣሳይኔ ያቆቤ ጾሳ ሲንꬅ ኮይዛ ኣሳይ ሄይታንታ ማላ።
PSA 24:7 ካሬቲ ዶዬቴቶ፤ ቦንቾ ካዎይ ጌሎ፤ ቤኒ ፔንጌቲ ኢዛ ኡፋይሳን ሞኪቴ!
PSA 24:8 ሄ ቦንቾ ካዎይ ኦኔ? ሚኖኔ ዎልቃማ ጎዳ! ኦላስካ ኢዚ ዎልቃማ ጎዳ!
PSA 24:9 ካሬቲ ዶዬቴቶ፤ ቦንቾ ካዎይ ጌሎ፤ ቤኒ ፔንጌቲ ኢዛ ኡፋይሳን ሞኪቴ!
PSA 24:10 ሃ ቦንቾ ካዎይ ኦኔ? ሄ ቦንቾ ካዎይ ሳሎ ሜꬌቴꬃ ጎዳ!
PSA 25:1 ኣቤት ጎዳዉ! ታ ኔና ዎዚናፔ ዎሳይስ።
PSA 25:2 ኣቤት ታ ጾሳዉ! ታኒ ኔናን ኣማኔታይስ፤ ታና ዬላሶፓ፤ ታ ሞርኬቲካ ታ ቦላ ጬቄቶፌቶ።
PSA 25:3 ኔና ሂዶታ ኦꬂዛይቲ ዬላቴቴና፤ ጊዶ ኣቲን ጌኔ ኦꬂዛይቲ ዬላታና።
PSA 25:4 ኣቤት ጎዳዉ! ታና ኔ ኦጌ ቤሳ፤ ኔ ጌዶ ካሎ ታና ታማርሳ።
PSA 25:5 ኔኒ ታና ኣሺዛ ጾሳ፤ ኔ ቱማቴꬃን ታና ካሌꬃኔ ታማርሳ፤ ኡባ ዎዴ ታ ሂዶታይ ኔና።
PSA 25:6 ኣቤት ጎዳዉ! ቤኒሶፌ ዲዛ ኔ ቃꬌቴꬃኔ ኔ ኪያቴꬃ ሃሳኣ።
PSA 25:7 ታ ዬላጋቴꬃ ናጋራኔ ሞሮ ሃሳኦፓ፤ ኣቤት ጎዳዉ! ኔ ጊታ ኪያቴꬃ ማላኔ ኔ ሎኤቴꬃ ኬና ታና ቆፓ፤
PSA 25:8 ጎዳይ ኪያኔ ሱሬ፤ ሄሳ ጊሻስ ናጋራንቻታ ባ ኦጌ ታማርሴስ።
PSA 25:9 ኣሽኬታ ሱሬ ኦጌራ ካሌꬄስ፤ ኢስታካ ባ ኦጌ ታማርሴስ።
PSA 25:10 ጎዳ ጫቆ ቃላኔ ማራ ናጊዛይታስ ኢዛ ኦጌይ ኡባይ ኪያኔ ቱማ።
PSA 25:11 ኣቤት ጎዳዉ! ታ ናጋራይ ኬሂ ዳሮ፤ ጊዲኮካ ኔ ሱንꬃ ጊሻስ ኣቶ ጋ።
PSA 25:12 ጎዳስ ያዪዛ ኣሲ ኦኔ? ኔ ዶራዳ ባና ኦጌዛ ኢዚ ኔና ታማርሳና።
PSA 25:13 ኢዚ ኡባ ዎዴካ ሎኦ ዱስ ዳና፤ ኢዛ ዜሬꬃቲ ቢታ ላታና።
PSA 25:14 ጎዳይ ባና ያዪዛይታፔ ባ ጹራ ቆቴና፤ ኢዚ ኢስታስ ባ ጌሊዳ ጫቆ ቃላካ ኤሪሴስ።
PSA 25:15 ጎዳይ ታ ቶሆ ናርጻፌ ኬሲ ኤኪዛ ጊሻስ፥ ታ ኣይፌይ ማዶ ዴማናስ ኡባ ዎዴ ኢዛኮ ጼሌስ።
PSA 25:16 ጎዳዉ! ታኒ ቢዛ ዲዛዴኔ ቆሄቲዳ ኣስ ጊዲዳ ጊሻስ፥ ኔ ሃ ታኮ ሲማ፤ ኔ ማሮቴꬃካ ቤሳ።
PSA 25:17 ታስ ሜቶይ ዳሪዴስ፤ ታ ሜቶዛፔ ታና ኔኒ ኬሳ።
PSA 25:18 ታ ሜቶዛኔ ታ ቱጋ ኔኒ ቤኣ፤ ታ ናጋራ ኡባ ኣቶ ጋ።
PSA 25:19 ታ ሞርኬቲ ኣይ ኬና ዳሪዳኮ ኔ ቤኣ፤ ኢስቲ ታና ኣይ ማላ ኢጺዛኮ ኔ ጼላ።
PSA 25:20 ኔኒ ታና ናጋኔ ኣሻ፤ ታ ኔናን ዜምፓዲስ፤ ኔ ታና ዬላሶፓ።
PSA 25:21 ኔ ታስ ሂዶታ ጊዲዳ ጊሻስ ሱሬቴꬃይኔ ቱማቴꬃይ ታና ናጎ።
PSA 25:22 ኣቤት ጾሳዉ! ኢስራኤሌ ኣሳ ሜቶ ኡባፌ ኔኒ ዎዛ።
PSA 26:1 ኣቤት ጎዳዉ! ታኒ ሱሬቴꬃኒኔ ሲꬌይ ባይንዳ ኔናን ኣማኔታ ዴኢዳ ጊሻስ ኔ ታስ ፒርዳ።
PSA 26:2 ኣቤት ጎዳዉ! ታና ፓጫ፤ ታ ቃንꬅ ፒልጋ፤ ታ ዎዚና ጼላ፤
PSA 26:3 ኣይስ ጊኮ ኔ ሲቆይ ታ ሲንꬃን ዴስ፤ ታኒ ኔ ቱማቴꬃ ኦጌን ሄሜታይስ።
PSA 26:4 ታኒ ባሌꬂዛ ኣሳታራ ኢሲፌ ኡቲኬ፤ ሎኦ ሚሳቲዛ ኢታታ ማባራን ጌሊኬ።
PSA 26:5 ኢታ ኦꬂዛ ኣሳታ ኢሲፌቴꬃ ታኒ ኢጻይስ፤ ኮፋ ኣሳታራ ኢሲፌ ኡቲኬ።
PSA 26:6 ኣቤት ጎዳዉ! ታናን ቆሆይ ባይንዳይሳ ቤሳናስ ታ ኩሼዛ ሜጫይስ፤ ሂስታዳ ያርሾ ያርሺዛሶዛ ዩያይስ።
PSA 26:7 ጋላታ ማዛሙሬ ዬጻይስ፤ ኔኒ ኦꬂዳ ሚሽ ኡባካ ዮታይስ።
PSA 26:8 ኣቤት ጎዳዉ! ኔኒ ዴኢዛ ኬꬃኔ ኔ ቦንቾይ ኣቂዛሶሆ ታኒ ዶሳይስ።
PSA 26:9 ታና ናጋራንቻታራ ኢሲፌ ፒርዶፋ፤ ኣስ ዎꬊዛይታራካ ኢሲፌ ታ ሼምፖ ꬋይሶፋ።
PSA 26:10 ኢስታ ኩሼን ኢታ ሃልቾይ ዴስ፤ ቃሴ ኢስታ ኡሻቻ ኩሼይ ማታኤን ኩሚዴስ።
PSA 26:11 ታኒ ጊዲኮ ቦሬይ ባይንዳ ዱስ ዳይስ፤ ታና ዎዛ፤ ታስ ቃꬌታ።
PSA 26:12 ታ ቶሆይ ዴምባሶን ኤቂዴስ፤ ታኒ ዴሬይ ሺቂዳሶን ጎዳ ጋላታና።
PSA 27:1 ጎዳይ ታስ ፖኦኔ ታና ኣሺዛይሳ፤ ሂስቲን ታኒ ኦናስ ያያኔ? ጎዳይ ታ ሼምፖይስ ኣቲዛ ሚጻ፤ ሂስቲን ታኒ ኦናስ ባባኔ?
PSA 27:2 ኢታ ኣሳቲ፥ ታ ሞርኬቲኔ ታ ባልጋራቲ ታና ዎꬋናዉ ታኮ ሆርዶፊ ዪዛ ዎዴ፥ ኢስቲ ባስ ꬉጴቲዲ ኩንዳና።
PSA 27:3 ሞርኬ ቶራይ ታና ዶዲዛኮካ ታ ዎዚናይ ያዬና፤ ኦላይ ታ ቦላ ዎራጂዳኮካ፥ ታኒ ጎዳን ኣማኔታይስ።
PSA 27:4 ታኒ ጎዳ ኢሲ ሚሽ ኦይቻይስ፤ ሄሲካ ታኒ ታ ዴኦ ላይꬅ ኡባን ጎዳ ኬꬃን ዴኣናሳ፤ ታኒ ጎዳ ቦንቾ ሎኦቴꬃ ቤኣናሳ፤ ኢዛ ኬꬃንካ ኢዛ ኮያሼ ዴኣናሳ።
PSA 27:5 ሄሳ ጊሻስ ሜቶ ጋላስ ኢዚ ታና ባ ዲዛሶን ጌንꬃና፤ ባ ዱንካኔን ታና ቆቲ ኣሻና፤ ꬎቃ ዛላ ቦላካ ኢዚ ታና ኤሳና።
PSA 27:6 ሄ ዎዴ ታና ዶዲዳ ታ ሞርኬታፔ ቦላራ ꬎቁ ꬎቁ ጋና፤ ታኒ ኢዛ ዱንካኔዛ ሲንꬃን ኡፋይሳ ያርሾ ያርሻና፤ ታኒ ጎዳስ ዲጻናኔ ዬጻና።
PSA 27:7 ኣቤት ጎዳዉ! ታኒ ኔና ጼይጊዛ ዎዴ ኔኒ ታስ ኮያ፤ ታስ ቃꬌታ፤ ታና ሲያ።
PSA 27:8 ኔኒ፥ «ታ ሲንꬃ ኮዪቴ» ጊዳ ዎዴ፥ ታ ዎዚናይ፥ «ኣቤት ጎዳዉ! ኤኖ፤ ታኒ ኔ ሲንꬃ ኮያና» ጊዴስ።
PSA 27:9 ኣቤት ታና ኣሺዛ ታ ጾሳዉ! ኔኒ ታና ማዲዛዴ፤ ኔ ሲንꬃ ታፔ ጌንꬆፋ፤ ታና ኔ ኣይሌ ሃንቄታዳ ኔፔ ሃሶፋ። ታና ኦሎፓኔ ኣጎፋ።
PSA 27:10 ታ ኣዋይኔ ታ ኣያ ታና ኣጊኮካ ጎዳይ ታና ሺሺ ኤካና።
PSA 27:11 ኣቤት ጎዳዉ! ኔ ኦጌ ታና ታማርሳ፤ ታ ሞርኬታ ጊሻስ ታና ሱሬ ኦጌራ ካሌꬃ።
PSA 27:12 ዎርዶ ማርካቲ ታ ቦላ ማካላቴꬃን ዴንዲዳ፤ ሄሳ ጊሻስ ኔ ታና ኢስታ ኢታ ኣሞስ ኣꬃ ኢሞፋ።
PSA 27:13 ታኒ ሼምፖራ ፓጻ ዳሼ ጎዳ ኪያቴꬅ ቤያናይሳ ሂዶታ ኦꬃይስ።
PSA 27:14 ጎዳን ኣማኔታ፤ ሚና፥ ሂዶታ ቃንጾፋ፥ ጎዳን ኣማኔታ።
PSA 28:1 ኣቤት ጎዳዉ! ታ ዛላዉ! ታኒ ኔና ጼይጊሺን ታስ ሲሲ ኢጾፋ፤ ታ ዋሲሺን ኔ ጮኡ ጊኮ ታኒ ዱፎን ጌሊዛ ኣሳታ ማላ ጊዳና።
PSA 28:2 ታ ኩሼዛ ኔ ጌሻ ኣቆሶ ሚጫዳ ዎሲሺኔ ታና ማዳርኪ ጋዳ ታ ዋሲሺን ኔ ሲያ።
PSA 28:3 ባ ዎዚናን ኢታ ቆፒሼ ባ ላጌታራ ሳሮቴꬅ ሃሳይዛ ኢታ ኦꬂዛይታራ ታና ኢስታራ ጋꬃ ኤፎፓ።
PSA 28:4 ኔ ኢስታስ ኢስታ ኢታቴꬃ ማላኔ ኢስታ ኦሶ ማላ ኢማ፤ ኢስታስ ኢስታ ኩሼ ኦሶ ማላ ዛራ፤ ኢስቲ ኦꬂዳ ኢታ ኦሶዛስ ሃሎ ኬሳ።
PSA 28:5 ኢስቲ ጎዳ ኦሶስ ዉዱ ጎንታ ኢጺዳ ጊሻስ፥ ኢዛ ኩሼ ኦሶታስ ሶሆ ኢሞንታ ኣጊዳ ጊሻስ፥ ኢዚ ኢስታ ላላና፤ ዛሪዲካ ኬጼና።
PSA 28:6 ታ ዎሳ ሲዪዳ ጊሻስ፥ ጎዳይ ጋላቴቶ።
PSA 28:7 ጎዳይ ታስ ዎልቃኔ ጎንዳሌ፤ ታ ዎዚናይ ኢዛን ኣማኔቴስ፤ ሄሳን ታኒ ማዴታዲስ፤ ሄሳ ጊሻስ ታ ዎዚናይ ኢዛን ኡፋዬቴስ፤ ታኒ ኢዛ ዬꬃን ሳባና።
PSA 28:8 ጎዳይ ባ ዴራስ ዎልቃ፤ ኢዚ ባ ቲይዳ ካዎዛ ኣሺዛ ሚጻ።
PSA 28:9 ጎዳዉ! ኔ ዴራ ኣሻ፤ ኔስ ጊዲዛይታ ኣንጃ፤ ኢስታ ሄንꬃንቻይ ኔና ጊዳ፤ ኔኒ ኢስታ ሜርናስካ ቶካ።
PSA 29:1 ኢንቴኖ ሳሎን ዲዛ ሜꬌታቶ! «ቦንቾይኔ ዎልቃይ ጎዳሳ» ጊዲ ዮቲቴ።
PSA 29:2 ጎዳ ቦንቾ ሱንꬃ ጋላቲቴ፤ ኢዛ ጌሻቴꬃ ቴማስ ጎዳ ጎይኒቴ።
PSA 29:3 ጎዳ ጬንጉርሳይ ሃꬃታ ቦላን ሲዬቴስ። ቦንቾ ጾሳይ ዳዳ ማላ ጉሜስ፤ ጎዳይ ጊታ ሃꬃታ ቦላን ጉሜስ።
PSA 29:4 ጎዳ ጬንጉርሳይ ዎልቃማ፤ ጎዳ ጉንꬃይ፥ «ኔስ ሆላ!» ጊሲዛዛ።
PSA 29:5 ጎዳ ጬንጉርሳይ ዚጋ ሚꬃ ሜንꬄሬꬄስ፤ ሊባኖሴ ዚጋታካ ጎዳይ ሜንꬄሬꬄስ።
PSA 29:6 ሊባኖሴ ዙማ ጋሎ ማራ ማላ ቡራቂሴስ፤ ሲሪዮኔ ዙማካ ሜንꬃ ማላ ጺኪሴስ።
PSA 29:7 ጎዳ ጬንጉርሳይ ዎልቃንꬅ ፖፖልኡ ጌስ።
PSA 29:8 ጎዳ ጬንጉርሳይ ባዞ ቃꬄስ፤ ጎዳይ ቃዴሴ ባዞ ቃꬄስ።
PSA 29:9 ጎዳ ጬንጉርሳይ ዎላታ ቃꬄስ፤ ሚꬃ ሃይꬂካ ቆቆፌስ። ኢዛ ኬꬃን ዴኢዛይቲ፥ «ቦንቾይ ጎዳስ ጊዶ» ጌቴስ።
PSA 29:10 ጎዳይ ዲኦ ሃꬃ ቦላ ባ ኣራታ ዎꬂዲ ኡቲዴስ፤ ጎዳይ ባ ካዎቴꬃ ኣልጋን ኡቲዲ ሜርናስ ሃሬስ።
PSA 29:11 ጎዳይ ባ ዴራስ ዎልቃ ኢሜስ። ባ ኣሳካ ሳሮቴꬃን ኣንጄስ።
PSA 30:1 ኣቤት ጎዳዉ! ኔኒ ታና ጪማፌ ኬሳዳሳ፤ ታ ሞርኬቲ ታ ቦላ ኡፋዬቶንታ ማላ ኦꬃዳሳ፤ ሄሳስ ታ ኔና ꬎቁ ꬎቁ ሂስታይስ።
PSA 30:2 ኣቤት ታ ጎዳዉ! ኔኒ ታና ማዳና ማላ ታ ኔኮ ዋሳዲስ፤ ኔካ ታና ፓꬃዳሳ።
PSA 30:3 ኣቤት ጎዳዉ! ታና ዱፎን ቦንታ ማላ ናጋዳሳ፤ ዱጌ ጪማ ኦላን ጌሎንታ ማላ ኔኒ ታና ኣሻዳሳ።
PSA 30:4 ኢንቴኖ ጾሳ ኣሳቶ! ጎዳስ ዬጺቴ፤ ኢዛ ጌሻ ሱንꬃካ ሳቢቴ።
PSA 30:5 ኢዛ ሃንቆይ ጉꬃ ዎዴሳ፥ ጊዶ ኣቲን ኢዛ ኪያቴꬂ ዴኦ ላይꬅ ኡባሳ፤ ኦማርስ ዬኪሼ ኣቂኮካ ማላዶ ዛዋይ ባይንዳ ኡፋይስ ጊዴስ።
PSA 30:6 ታኒ ዎፓን ዲዛ ዎዴ፥ «ታኒ ሙሌካ ኮኮሪኬ» ጋዲስ።
PSA 30:7 ኣቤት ጎዳዉ! ኔኒ ታስ ኪዪዳ ዎዴ፥ ታና ጊታ ዙማ ማላ ሚንꬃ ኤሳዳሳ፤ ጊዶ ኣቲን ኔኒ ኔ ሲንꬃ ታፔ ሃራሶ ዛሪዳ ዎዴ ታኒ ዳጋማዲስ።
PSA 30:8 ኣቤት ጎዳዉ! ታኒ ኔና ጼይጋዲስ፤ ታኒ ጎዳፔ ማሮቴꬅ ዎሳዲስ፤
PSA 30:9 «ታ ሃይቂኮ ዎይኮ ዱፎን ጌሊኮ ኔ ታፔ ኣይ ዴማኔ? ቢታን ጌሊዳ ኣሲ ኔና ጋላቲ ኤሪዜ? ኔ ኣማኔቴꬃ ሃሳዪ ኤሪዜ?
PSA 30:10 ኣቤት ጎዳዉ! ታ ዎሳ ኔ ሲያ፤ ታስ ቃꬌታ። ኣቤት ጎዳዉ! ኔ ታስ ማዶ ጊዳ» ጋዲስ።
PSA 30:11 ታ ዬሆ ዬꬃን ላማዳሳ። ካዮ ማይኦዛ ታፔ ቃራዳ ኡፋይሳ ማይኦ ታና ማይዛዳሳ።
PSA 30:12 ሄሳ ጊሻስ ታኒ ኔና ሳባናፔ ኣቲን ጮኡ ጊኬ። ኣቤት ታ ጎዳዉ! ታኒ ኔና ሜርናስ ጋላታና።
PSA 31:1 ኣቤት ጎዳዉ! ኔ ታስ ኩዋ ጊዳና ማላ ታ ኔኮ ያዲስ፤ ኣይዴካ ታና ዬላሶፓ፤ ኔ ጺሎቴꬃን ታና ኣሻ።
PSA 31:2 ኔ ሃይꬃ ታኮ ዛራ፤ ኤሶን ታና ኣሻ፤ ኔኒ ታና ጌንꬂዛ ዛላ ጊዳ፤ ታና ኣሺዛ ሚኖ ሚጻ ታስ ጊዳ።
PSA 31:3 ኤ፥ ኔኒ ታስ ዛላ፤ ታ ኢዛን ጌላ ኣቲዛ ሚጻ፤ ኔ ሱንꬃ ጊሻስ ታኒ ባና ኦጌ ቤሳኔ ካሌꬃ።
PSA 31:4 ኔኒ ታስ ዜምፖ ጊዲዛ ጊሻስ፥ ኢስቲ ታስ ዋጺ ዎꬂዳ ናርጻፌ ታና ኔ ናጋ።
PSA 31:5 ኣቤት ጎዳዉ ቱሙ ጾሳዉ! ታኒ ታ ሼምፖ ኔ ኩሼን ሃዳራ ኢማይስ፤ ኔኒ ታና ዎዛ።
PSA 31:6 ፓꬆንታ ኤቃታስ ጎይኒዛይታ ታኒ ኢጻይስ፤ ታኒ ጊዲኮ ጎዳን ኣማኔታይስ።
PSA 31:7 ታ ሜቶ ኔኒ ቤኢዳ ጊሻሲኔ ታ ቱጋ ኔኒ ኤሪዳ ጊሻስ ታኒ ኔ ሲቆን ኡፋዬታይስ።
PSA 31:8 ኔኒ ታና ታ ሞርኬታስ ኣꬃ ኢማቤካ፤ ታ ቶሆታካ ኣሆ ሶሆን ኤሳዳሳ።
PSA 31:9 ኣቤት ጎዳዉ! ታኒ ሜቶን ጌላዲስ፤ ታስ ቃꬌታ። ታኒ ዳሮ ሚሼታዲስ፤ ታ ኣይፌይ፥ ታ ኣሾይኔ ታ ሼምፖይ ዳቡርዴስ።
PSA 31:10 ታ ሼምፖያ ዋዬን ዳቡራዱስ፤ ታ ላይꬃይካ ጬጬን ዉሪዴስ። ሜቶ ዳሮን ታ ዎልቃይ ጪንጊዴስ፤ ታ ሜቄꬃቲካ ጊዶን ሴሪዳ።
PSA 31:11 ታ ሞርኬታ ኡባስ ታኒ ቂꬌ ሚሽ ጊዳዲስ፤ ታ ሾሮታስ ሚሬስ ኣታዲስ፤ ታና ኤሪዛይታስ ካꬌስ ጊዳዲስ፤ ኦጌን ታና ቤኢዳይቲካ ታፔ ባቃቴቴስ።
PSA 31:12 ታኒ ሃይቂዳ ኣሳ ማላ ዶጌታዲስ፤ ሞሆ ኦቶ ማላ ጊዳዲስ።
PSA 31:13 ታኒ ዳሮቲ ሳሱኬቲሺን ሲያዲስ፤ ዳጋማይ ኡባሶራ ዴስ፤ ኢስቲ ታ ቦላ ጌኔን ዱላቴቴስ፤ ታና ዎꬋናዉካ ማቄቴቴስ።
PSA 31:14 ጊዶ ኣቲን ጎዳዉ! ታኒ ኔናን ኣማኔታዳ፥ «ኔኒ ታ ጾሳ» ጋይስ።
PSA 31:15 ታ ዴኦ ላይꬃይ ኔ ኩሼና፤ ታና ጎዲዛ ታ ሞርኬታ ኩሼፔ ኔ ታና ኣሻ።
PSA 31:16 ኔ ኣይሌዛ ቦላ ኔ ሲንꬃ ፖኢሳ፤ ኔ ማሮቴꬃን ታና ኣሻ።
PSA 31:17 ኣቤት ጎዳዉ! ታኒ ኔና ጼይጋይስ፤ ታና ዬላሶፓ፤ ኢታቲ ጊዲኮ ዬላቴቶ፤ ዱጌ ዱፎን ጌሊዲ ሲርጲ ጌቶ።
PSA 31:18 ጺሎዛ ቦላ ኦቶሮን፥ ካꬌኒኔ ጻላቴꬃን ሃሳይዛ ጊሻስ ዎርዳንቻታ ዶና ዱዲሳ።
PSA 31:19 ኔናን ዜምፓናስ ኔኮ ሺቂዳይታሲኔ ኔስ ያዪዛይታስ ኔኒ ኣሳ ሲንꬃን ኢስታስ ኢማና ጋዳ ሚንጃ ዎꬂዳ ኪያቴꬂ ኣይ ማላ ዳሮ!
PSA 31:20 ኔኒ ኢስታ ኔ ኬꬃን ጌንꬃዳ ኣሳ ማቆፌ ኣሻሳ፤ ኔኒ ኢስታ ኔ ዲዛሶን ቆታዳ ኢታ ኢንጻርሳፌ ናጋሳ።
PSA 31:21 ታኒ ሞርኬይ ዶዲ ኦይኪዳ ካታማ ጊዶን ዲዛ ዎዴ ኢዚ ማላሊሲዛ ባ ማሮቴꬅ ታና ቤሲዳ ጊሻስ ጎዳይ ጋላቴቶ።
PSA 31:22 ታኒ ዳጋማዳ፥ «ኔ ሲንꬃፌ ኪቻዲስ» ጋዲስ። ጊዶ ኣቲን ታና ማዳና ማላ ኔና ታ ጼይጊዳ ዎዴ ታ ዋሶዛ ኔኒ ሲያዳሳ።
PSA 31:23 ኢንቴኖ ጾሳ ኣሳቶ! ጎዳ ሲቂቴ። ጎዳይ ኢዛን ኣማኔቲዛይታ ናጌስ፤ ጊዶ ኣቲን ኦቶራንቻታስ ኢስታስ ቤሲዛ ቂጻቴ ኢሜስ።
PSA 31:24 ኢንቴ ሂዶታ ጎዳን ኦꬂዳይቶ! ቤጊቴኔ ሚኒቴ።
PSA 32:1 ኢዛ ሞሮይ ኣቶ ጌቴቲዳይሲኔ ኢዛ ናጋራይ ካሜቲዳይ ኣንጄቲዳይሳ።
PSA 32:2 ጎዳይ ኢዛ ናጋራ ቆዶንታዴይኔ ኢዛ ቆፋን ባሌꬆይ ባይንዳይ ኣንጄቲዳይሳ።
PSA 32:3 ታኒ ታ ናጋራ ፓጾንታ ዳሼ ጋላስ ኩሜꬅ ጬጪን ታ ኣሳቴꬃይ ዳቡርዴስ።
PSA 32:4 ጋላሲኔ ቃማ ኔ ኩሼይ ታ ቦላ ዴጺዴስ፤ ሃꬂ ቦኔ ኣዋን ሚጪዛ ማላ ታ ዎልቃይ ጪንጊ ዉሪዴስ።
PSA 32:5 ታኒ ታ ናጋራ ኔስ ፓጻዲስ፤ ታ ቆሂዳይሳ ኔፔ ጌንꬃቤኬ፤ «ታ ሞሮዛ ጎዳስ ፓጻና» ጋዲስ። ሂስቲን ኔ ታ ናጋራ ኡባ ኣቶ ጋዳሳ።
PSA 32:6 ሄሳ ጊሻስ ጺሎ ኣሲ ኔኒ ቤቲዛ ዎዴ ኔና ዎሶ፤ ዲኦይ ኢዚ ዲዛ ሄራ ሜጪ ኤፊኮካ ኢዛ ቦቼና።
PSA 32:7 ኔኒ ታስ ቆቴቲዛሶ፤ ኔኒ ታና ሜቶፔ ናጋሳ፤ ታና ጾኖ ዬꬃን ኩንꬃዳሳ።
PSA 32:8 ጎዳይ፥ «ታኒ ኔና ታማርሳና፤ ኔኒ ባናስ ቤሲዛ ኦጌካ ኔና ኤሪሳና፤ ታኒ ኔና ዞራናኔ ናጋና።
PSA 32:9 ቢጻላኒኔ ፑሎን ሃሬቲዛ ኣኬካይ ባይንዳ ባቁሎ ማላ ዎይኮ ፓራ ማላ ኢንቴ ሃኖፒቴ» ጌስ።
PSA 32:10 ኢታታስ ቱጋይ ዳሮ፤ ጊዶ ኣቲን ጎዳን ኣማኔቲዛይታ ማሮቴꬂ ዶዴስ።
PSA 32:11 ኢንቴኖ ጺሎቶ! ጎዳን ኡፋዬቲቴኔ «ሃሹ!» ጊቴ፤ ኢንቴኖ ዎዚና ሱሬቶ! ኡፋይሳን ኢሊሊቴ!
PSA 33:1 ኢንቴኖ ጺሎቶ! ጎዳን ኡፋዬቲቴ፤ ሱሬ ኣሳቲ ኡፋይሳን ኢሊሊቴ።
PSA 33:2 ማሲንቆ ሾጪሼ ጎዳ ጋላቲቴ፤ ታሙ ሻያን ዋጼቲዳ ዲꬃን ኢዛስ ዬጺቴ።
PSA 33:3 ኦራꬃ ማዛሙሬ ኢዛስ ዬጺቴ፤ ዲꬃ ጊግሲ ሾጪቴ፤ ኡፋይሳን ኢሊሊ ጊቴ።
PSA 33:4 ጎዳ ቃላይ ቱማ፤ ኢዚ ኦꬂዛ ኦሶ ኡባይ ኣማኔቲዛይሳ።
PSA 33:5 ጎዳይ ጺሎቴꬃኔ ቱማ ፒርዳ ዶሴስ፤ ኢዛ ኪያቴꬂ ሳኣ ኩሚዴስ።
PSA 33:6 ሳሎቲ ጎዳ ቃላን ሜꬌቲዳ። ኢዛ ዶናፔ ኬዚዛ ፔኖን ሳሎን ዲዛ ሜꬌቴꬃቲ ሜꬌቲዳ።
PSA 33:7 ጊታ ኣባ ሃꬃ ኢዚ ኢሲሶን ሺሺዴስ፤ ጪማ ሃꬃ ሚንጃሶን ኤሊሲዴስ።
PSA 33:8 ሳኣን ዲዛ ኣሲ ኡባይ ጎዳስ ያዮ፤ ሳሎ ጉፋንꬆይ ጎዳ ቦንቾ።
PSA 33:9 ኣይስ ጊኮ ኢዚ ሃሳዪን ሃንዴስ፤ ኢዚ ኣዛዚን ሚኒዲ ኤቂዴስ።
PSA 33:10 ጎዳይ ካዎቴꬃታ ሃልቾ ላላና፤ ኢስታ ቆፋካ ሃዳ ኦꬃና።
PSA 33:11 ጎዳ ሃልቾይ ሜርናስ ኤቂ ዳና፤ ኢዛ ዎዚና ቆፋይካ ዬሌታፔ ዬሌታ ጋካናዉ ዳና።
PSA 33:12 ጾሲ ኢዛስ ጎዳ ጊዲዳ ካዎቴꬃይ፥ ኢዚ ባስ ዶሪዳ ዴሬይ ኣንጄቲዳ ዴሬ።
PSA 33:13 ጎዳይ ሳሎን ኡቲዲ ዱጌ ጼሌስ፤ ኣሳ ኡባካ ቤኤስ።
PSA 33:14 ጎዳይ ባ ኣራታን ኡቲዲ ሳኣን ዴኢዛ ኡባ ጼሌስ።
PSA 33:15 ኢዚ ኡባ ዎዚና ሜꬊዴስ፤ ኢስቲ ኦꬂዛ ሚሽ ኡባ ኤሬስ።
PSA 33:16 ካዎይ ባ ዎታዳራ ጮራቴꬃን ኣቴና፤ ኦላንቻይ ባ ዎልቃ ሚኖቴꬃን ኬሲ ኤኬና።
PSA 33:17 ታኒ ፓራን ጾናና ጊ ናጎይ ሃዳ፤ ኢዚ ባ ዎልቃ ሚኖቴꬃን ኦናካ ኣሻናዉ ዳንዳዬና።
PSA 33:18 ጎዳ ኣይፌቲ ኢዛስ ያዪዛይታኔ ኢዛ ሜርና ሲቆ ሂዶታ ኦꬂዛ ኣሳታ ጼሌስ።
PSA 33:19 ኢዚ ሄሳን ኢስታ ሃይቆፔ ኣሼስ፤ ኮሻ ዎዴካ ኢስታ ሼምፖራ ፓጻ ዎꬄስ።
PSA 33:20 ኑ ሼምፖያ ጎዳ ሂዶታ ኦꬃዉስ፤ ኢዚ ኑስ ማዶኔ ጎንዳሌ።
PSA 33:21 ኑኒ ጌሽ ጊዲዳ ኢዛ ሱንꬃን ኣማኔቶስ፤ ኑ ዎዚናይካ ኢዛን ኡፋዬቴስ።
PSA 33:22 ኣቤት ጎዳዉ! ኑኒ ኔናን ሂዶታ ኦꬂዛይሳ ማላ ሜርና ኔ ሲቆይ ኑናራ ጊዶ።
PSA 34:1 ታኒ ጎዳ ኡባ ዎዴ ጋላታና፤ ኢዛ ጋላታይ ኣይ ዎዴንካ ታ ዶናፔ ፓጬና።
PSA 34:2 ታኒ ጎዳን ጬቄታይስ፤ ናቄቲዳይቲ ሄሳ ሲዪዲ ኡፋዬቴቶ።
PSA 34:3 ኣኔ ታናራ ኢሲፌ ጎዳ ቦንቾስ፤ ኢዛ ሱንꬃካ ꬎቁ ꬎቁ ኦꬆስ።
PSA 34:4 ታኒ ጎዳ ኮያዲስ፤ ኢዚካ ታስ ዛሪዴስ፤ ታኒ ያዪዛ ሚሽ ኡባፌ ታና ኣሺዴስ።
PSA 34:5 ኢዛኮ ጼሊዛ ኡባ ሲንꬃይ ፖኤስ፤ ኢስቲ ሙሌካ ዬላቴቴና።
PSA 34:6 ሃ ሂዬሳይ ዋሲዴስ፤ ጎዳይ ኢዛ ዋሶዛ ሲዪዴስ፤ ሜቶ ኡባፌ ኢዛ ኣሺዴስ።
PSA 34:7 ጎዳ ኪታንቻይ ጎዳስ ያዪዛይታ ናጌስ፤ ኢዚ ኢስታ ዩሾዛን ጊዲዲ ኢስታ ኣሼስ።
PSA 34:8 ጎዳይ ኪያ ጊዲዳይሳ ዩሺ ቆፒቴ፤ ኢዛኮ ሺቂዳይ ኣንጄቲዳዴ።
PSA 34:9 ኢንቴኖ ጌሻ ኣሳቶ! ጎዳስ ያዪቴ፤ ኣይስ ጊኮ ኢዛስ ያዪዛ ኡባታስ ኣይኮይካ ፓጬና።
PSA 34:10 ጋሞቲ ሚዛዚ ꬋዪን ኮሻቴቴስ፤ ጎዳ ኮይዛይታስ ጊዲኮ ሎኦ ሚሺ ኣይኮካ ፓጬና።
PSA 34:11 ናይቶ! ሃ ዪቴ፤ ታ ጊዛዝ ሲዪቴ፤ ታኒ ኢንቴና ጎዳስ ያሻቴꬅ ታማርሳና።
PSA 34:12 ኣዱሳ ላይꬅ ዳናስ ዶሲዛይኔ ሎኦ ሚሽ ቤያናስ ኮይዛይ ኦኔ?
PSA 34:13 ኔ ኢንጻርሳ ኢታ ሃሳዮንታ ማላ ናጋ፤ ኔ ዶናፔ ዎርዶይ ኬዞንታ ማላ ናጌታ።
PSA 34:14 ኢታፔ ሻኬታ፤ ሎኦ ሚሽ ኦꬃ፤ ሳሮቴꬅ ኮያዳ ካላ።
PSA 34:15 ጎዳ ኣይፌይ ጺሎታኮ ጼሌስ፤ ቃሴ ኢዛ ሃይꬂ ኢስታ ዎሳ ኤዝጌስ።
PSA 34:16 ኢስታ ሃሳኢሲዛ ሚሽ ቢታፌ ꬋይሳና ማላ፥ ጎዳይ ኢታ ኦꬂዛይታ ባ ሃንቆ ኣይፌን ጼሌስ።
PSA 34:17 ጺሎቲ ዋሴቴስ፤ ጎዳይ ኢስታ ዋሶ ሲዬስ፤ ኢዚካ ኢስታ ሜቶ ኡባፌ ኣሼስ።
PSA 34:18 ጎዳይ ዎዚናይ ሜቂዳይታስ ማታን ዴስ፤ ቃሴ ሂዶታ ቃንጺዳይታካ ኣሼስ።
PSA 34:19 ጺሎ ኣስ ጋኪዛ ሜቶይ ዳሮ፤ ጊዶ ኣቲን ጎዳይ ኢዛ ሄ ኡባፌ ኣሼስ።
PSA 34:20 ጎዳይ ኢዛ ሚንꬂ ናጌስ፤ ኢዛ ሜቄꬃታፔ ኢሶይካ ሜቄና።
PSA 34:21 ኢታታ ኢስታ ኢታቴꬂ ዎꬋና፤ ጺሎታ ኢጺዛይቲ ፒርዴታና።
PSA 34:22 ጎዳይ ባ ኦሳንቻታ ኣሼስ፤ ኢዛኮ ባቃቲዳ ኦኒኔ ፒርዴቴና።
PSA 35:1 ኣቤት ጎዳዉ! ታናራ ኤቄቲዛይታራ ኔኒ ኤቄታ፤ ታናራ ኦሌቲዛይታራ ኔኒ ኦሌታ።
PSA 35:2 ጎንዳሌኔ ጹሩሬ ኦይካዳ፥ ታና ማዳናስ ዴንዳ።
PSA 35:3 ታና ዬዴꬂዛይታ ቦላን ኔ ቶራኔ ማሻ ዴንꬃ። ታና፥ «ታ ኔና ኣሺዛዴ» ጋ።
PSA 35:4 ታ ሼምፖዮ ዎꬋናዉ ኮይዛይቲ ዬላቴቶኔ ካዉዬቶ፤ ታ ቦላ ኢታ ኦꬃና ማቄቲዛይቲ ካዉዪዲ ጉዬ ሲሜቶ።
PSA 35:5 ጎዳ ኪታንቻይ ኢስታ ዬዴꬆ፤ ኢስቲካ ጫርኮ ሲንꬃን ዲዛ ሱላ ማላ ጊዴቶ።
PSA 35:6 ጎዳ ኪታንቻይ ኢስታ ጎዶ፤ ኢስታ ኦጌይካ ꬉማኔ ሃሊꬅ ጊዶ።
PSA 35:7 ጮ ታና ኦይካናዉ ባንታ ናርጻ ዎꬂዳ፤ ቃሴካ ጮ ታና ኩንዲሳናስ ኦላ ቦኪዳ።
PSA 35:8 ኢስቲ ቆፖንታ ዲሺን ባሺ ኢስታ ቦላ ፑቱ ጎ፤ ኢስቲ ዎꬂዳ ዎጺማዴይ ኢስታ ኦይኮ፤ ኢስቲ ኦላን ኩንዲ ꬋዬቶ።
PSA 35:9 ሄ ዎዴ ታኒ ጎዳን ኡፋዬታና፤ ኢዚ ኣሺዳ ጊሻስ ታኒ ኡፋዬታና።
PSA 35:10 ታ ኩሜꬃ ኣሳቴꬃይ ኔና፥ «ኣቤት ጎዳዉ! ቆሄቲዳይታ ቆሂዛይታ ኩሼፔ ኣሺዛይ፥ ሂዬሳታኔ ሜቶታንቻታ ቦንቂዛይታ ኩሼፔ ናጊዛይ ሃራ ኔ ማላይ ኦኔ?» ጋና።
PSA 35:11 ኢታ ኣሳቲ ታ ኦꬆንታ ሚሻን ታና ሞቲዳ፤ ታ ኤሮንታ ሚሻን ታ ቦላ ዎርዶ ማርካ ማርካሲዳ።
PSA 35:12 ታና ቢዛሲዳ፤ ታ ሎኦ ኦꬆይሳ ኩሼ ኢታ ዛሪዳ።
PSA 35:13 ጊዶ ኣቲን ታኒ ኢስቲ ሃርጊዳ ዎዴ ማቃ ማይኣዲስ፤ ታ ኣሳቴꬃ ጾማን ዳቡርሳዲስ፤ ታ ዎሳስ ዛሮይ ꬋይዴስ።
PSA 35:14 ታ ኢሻስ ዎይኮ ታ ዳቦስ ታ ሙዞቲዛ ማላ ሙዞታዲስ፤ ኣያ ሃይቂን ካዮቲዛ ኣሳ ማላ ኬሃ ዬካዲስ።
PSA 35:15 ጊዶ ኣቲን ታኒ ꬉጴቲን ኢስቲ ኡፋይሳን ኢሲ ቦላ ሺቂዳ፤ ሄ ጌኔ ኣሳቲ ታ ኤሮንታ ጋሶን ታና ዋꬊዲ ኣጎንታ ኢጺዳ።
PSA 35:16 ኢስቲ ኢታ ኣሳቲ ቂꬊዛ ማላ ታና ቂꬊዳ፤ ዪሎስ ባ ኣች ጋርጪዳ።
PSA 35:17 ኣቤት ጎዳዉ! ኔኒ ኣዉዴ ጋካናስ ታና ጮኡ ጋዳ ጼላኔ? ኢስታ ኢታ ኦሳፔ ታና ኣሻ፤ ሃ ጋሞ ማላ ኣሳታፔ ታ ኣልኦ ሼምፖዮ ዎꬃ ኤካ።
PSA 35:18 ሄ ዎዴ ጊታ ሺቆን ታ ኔና ጋላታና፤ ጮራ ኣሳ ሺቆን ታ ኔና ሳባና።
PSA 35:19 ዎርዶራ ታና ሞርኪዛይቲ ኡፋዬቶፌቶ፤ ታና ጮ ኢጺዛይቲ ታ ቦላ ቂምኦቶፔቶ።
PSA 35:20 ኢስታ ዶናፔ ሳሮ ሃሳያይ ኬዜና፤ ቢታን ጮኡ ጊዲ ዲዛ ኣሳታ ቦላ ዮኦ ቃጼꬄቴስ።
PSA 35:21 ኢስቲ ባ ዶና ታ ቦላ ዶይዲ፥ «ሄኮ ቤኣ! ኔ ኦꬆይሳ ኑኒ ኑ ኣይፌን ቤኢዶስ» ጌቴስ።
PSA 35:22 ኣቤት ጎዳዉ! ኔኒ ሃይሳ ቤያሳ፤ ሄሳ ጊሻስ ኔኒ ጮኡ ጎፓ፤ ታፔካ ሃኮፋ።
PSA 35:23 ኣቤት ጎዳዉ፥ ታ ጾሳዉ! ታ ጊሻስ ኦሌታ፤ ዴንዳ፤ ቤጋ፤ ታ ዶና ጊዳዳ ሞቴታ።
PSA 35:24 ኣቤት ጎዳዉ ታ ጾሳዉ! ኔ ጺሎቴꬃ ማላ ታስ ፒርዳ፤ ታ ሞርኬታካ ኡፋይሶፋ።
PSA 35:25 ኢስቲ ባንታስ፥ «ሃሹ፥ ሃሹ፥ ኑኒ ኑ ዎዚናን ኣሞቲዳይሲ ፖሌቲዴስ፤ ኑኒ ኢዛ ሚቲዶስ» ጋና ማላ ኦꬆፋ።
PSA 35:26 ታ ዋዬን ኡፋዬቲዛይቲ ኡባይ ዬላቴቶኔ ካዉዬቶ፤ ታ ቦላን ኦቶሬቲዛይቲ ዬላኔ ካዉሻቴꬅ ማይኤቶ።
PSA 35:27 ታኒ ሻቱሚዛይሳ ዶሲዛይቲ ኡፋዬቲዲ «ሃሹ!» ጌቶ፤ ኢስቲ ኡባ ዎዴ፥ «ባ ኣይሌዛ ሳሮቴꬃን ኡፋዬቲዛ ጎዳይ ꬎቁ ꬎቁ ጎ» ጌቶ።
PSA 35:28 ጋላስ ኩሜꬅ ታ ኢንጻርሳይ ኔ ጺሎቴꬂኔ ኔ ጋላታ ዮታና።
PSA 36:1 ኢታ ኣሲ ባ ዎዚናን ጌኔ ቆፔስ፤ ኢዛ ጊዶን ጾሳስ ያሻቴꬂ ዴና።
PSA 36:2 ኢዛ ናጋራይ ቆንጪን ኢጾንታ ማላ ኢዚ ባርካ ባና ባሌꬄስ
PSA 36:3 ኢዛ ዶናፔ ኬኢዛ ሃሳያይ ጌኔኔ ዎርዶ፤ ኣꬎ ኤራቴꬂኔ ሎኦ ኦሶ ሙሌካ ኣጊዴስ።
PSA 36:4 ኢዚ ባ ሂጻን ዲሼ ጌኔ ቆፒሼ ኣቄስ፤ ባና ሎኦ ጊዶንታ ኦጌ ካሌꬄስ፤ ኢታ ኢዚ ኢጼና።
PSA 36:5 ኣቤት ጎዳዉ! ኔ ሜርና ሲቆይ ሳሎ ጋኬስ፤ ኔ ቱማቴꬃይካ ቦላ ሻራ ማላ ꬎቄስ።
PSA 36:6 ኣቤት ጎዳዉ! ኔ ጺሎቴꬃይ ኡባፌ ꬎቃ ዙማታ ማላ፤ ኔ ፒርዳይካ ኡባፌ ዚቃ ጪማ ማላ፤ ኔኒ ኣሳካ ዶኣካ ኢታፔ ናጋሳ።
PSA 36:7 ኣቤት ጾሳዉ! ኔ ሜርና ሲቆይ ኣይ ኬና ኣልኦ! ኣሳይ ኔ ቄፌ ጊዶን ጌሚ ኣቴስ።
PSA 36:8 ኢስቲ ኔሶን ኩሚዳ ማዳፌ ሚዲ ካሌቴስ፤ ኔኒ ኔ ኣንጆ ሻፋፔ ኢስታ ኡሻሳ።
PSA 36:9 ኣይስ ጊኮ ዴኦ ፑልቶይ ኔ ኣቻን ዴስ፤ ኔ ፖኦን ኑኒ ፖኦ ቤኦስ።
PSA 36:10 ኔና ኤሪዛይታስ ኔ ሜርና ሲቆዛ ኣጎፋ፤ ሱሬታስ ኔ ኪያቴꬅ ዲጎፋ።
PSA 36:11 ኦቶራንቻታ ቶሆይ ታና ዬꬎፎ፤ ናጋራንቻታ ኩሼይ ታና ዬዴꬆፎ።
PSA 36:12 ኢታ ኣሳቲ ኩንዲዳይሳ ቤኢቴ፤ ኢስቲ ኩንዲዳ፤ ዴንዳናዉካ ዳንዳዬቴና።
PSA 37:1 ኢታ ኦꬂዛይታ ቤኣዳ ዪሎቶፓ፤ ናጋራ ኦꬂዛይታ ቃናቶፓ።
PSA 37:2 ኣይስ ጊኮ ኢስቲ ማታ ማላ ኤሶን ሜላና፤ ቦንጮ ማላ ኢስቲ ሹሊዲ ቆካና።
PSA 37:3 ኔኒ ጎዳን ኣማኔታ፤ ሎኦ ኦሶካ ኦꬃ፤ ሂስቲኮ ኔኒ ቢታ ቦላ ፓላሂን ዳና።
PSA 37:4 ጎዳን ኡፋዬታ፤ ኢዚ ኔስ ኔ ዎዚና ኣሞ ኢማና።
PSA 37:5 ኔ ኦጌ ጎዳስ ሃዳራ ኢማ፤ ኢዛን ኣማኔታ፤ ኢዚካ ኔስ ኦꬃና።
PSA 37:6 ኢዚ ኔ ጺሎቴꬃ ማላዶ ጻልቄ ማላ ኬሳና፤ ኔ ዮኦዛ ፒርዳካ ሴታ ጋላሳ ኣዋ ማላ ፖኢሳና።
PSA 37:7 ጎዳ ሲንꬃን ጮኡ ጋዳ ኢዚ ኦꬃና ጋካናስ ዳንዳያን ናጋ፤ ኢታ ኣሳቲ ዱሬቲኮኔ ኢስታ ቆፋይ ፖሌቲኮ ኔ ኢስታ ቦላ ዪሎቶፓ።
PSA 37:8 ሃንቆ ኣጋ፤ ዪሎፌ ባቃታ። ዪሎቶፓ፤ ኣይስ ጊኮ ሄሲ ኣስ ሜቶን ዬጌስ።
PSA 37:9 ኢታ ኦꬂዛይቲ ꬎቃሌቲ ꬋያና፤ ጊዶ ኣቲን ጎዳን ሂዶታ ኦꬂዛይቲ ቢታ ላታና።
PSA 37:10 ኢታ ኦꬂዛይቲ ጉꬃ ዎዴፔ ጉዬ ዴኤቴና፤ ኔኒ ኢስታ ኮዪዳኮካ ኢስቲ ቤቴቴና።
PSA 37:11 ጊዶ ኣቲን ኣሽኬቲ ቢታ ላታና፤ ኢስቲ ጊታ ሳሮቴꬃን ኡፋዬቲ ዳና።
PSA 37:12 ኢታ ኣሳቲ ጺሎታ ቦላ ማቄቴቴሲኔ ባ ኣች ጋርጬቴስ።
PSA 37:13 ጊዶ ኣቲን ጎዳይ ኢታታ ቦላን ሚጬስ፤ ኣይስ ጊኮ ኢስቲ ꬋያና ጋላሳይ ጋኪዳይሳ ኢዚ ኤሬስ።
PSA 37:14 ኢታ ኣሳቲ ሂዬሳታኔ ሜቶታንቻታ ꬋይሳናዉ፥ ሱሬቴꬃን ሄሜቲዛይታ ዎꬋናዉ ባንታ ማሻ ሾዴቴሲኔ ባንታ ዎንዳፌዛ ዳፌቴስ።
PSA 37:15 ጊዶ ኣቲን ኢስታ ማሻይ ኢስታስ ዎዚና ኣይፌን ጌላና፤ ኢስታ ዎንዳፌይካ ሜቃና።
PSA 37:16 ጺሎስ ዴኢዛ ጉꬃይ ኢታ ኣሳታስ ዲዛ ዳሮ ኣቆታፔ ኣꬌስ።
PSA 37:17 ኣይስ ጊኮ ኢታታ ዎልቃይ ሜቃና፤ ጺሎታ ጊዲኮ ጎዳይ ሚንꬄꬄስ።
PSA 37:18 ጎዳይ ሱሬ ኣሳታ ኡባ ጋላስ ናጌስ፤ ኢስታ ላታይካ ሜርናስ ኢስታስ ጊዳና።
PSA 37:19 ኢታ ዎዴን ሱሬ ኣሳቲ ዬላቴቴና፤ ኮሻ ላይꬅ ኢስቲ ካሊ ማና።
PSA 37:20 ኢታ ኣሳቲ ጊዲኮ ሃይቃና፤ ጎዳ ሞርኬቲ ባዞ ጪሻ ማላ ቆካና፤ ጩዋ ማላካ ጮ ꬋያና።
PSA 37:21 ኢታ ኣሲ ታልኢ ኤኪዲ ዛሪ ኤሬና፤ ጊዶ ኣቲን ጺሎ ኣሲ ቃꬌቲዲ ጌዴ ኢሜስ።
PSA 37:22 ጎዳን ኣንጄቲዳይቲ ቢታ ላታና፤ ጊዶ ኣቲን ኢዚ ቃንጊዳይቲ ጮ ꬋያና።
PSA 37:23 ኣሳ ኦጌይ ጎዳ ኡፋይሲኮ ጎዳይ ኢዛዴ ታንጎ ካሌꬄሲኔ ሚንꬄስ።
PSA 37:24 ኢዚ ꬉጴቲኮካ ኩንዶንታ ማላ ጎዳይ ባ ኩሼን ኦይኪ ኣሼስ።
PSA 37:25 ታኒ ካሴ ዬላጋ ሺን ሃኢ ጪማዲስ፤ ጊዶ ኣቲን ጺሎ ኣሲ ጮ ዬጌቲ ኣቲሺን፥ ዎይኮ ኢዛ ዜሬꬂ ካꬅ ዎሲ ሚሺን ታኒ ሙሌካ ቤኣ ኤሪኬ።
PSA 37:26 ኢዚ ኡባ ዎዴካ ኪያቴꬅ ኢሜስ፤ ዲቺ ባይንዳ ታልኤስ፤ ኢዛ ዛሬቲካ ኣንጆስ ጊዳና።
PSA 37:27 ኢታፔ ሃካ፤ ሎኦ ሚሽ ኦꬃ። ሂስቲኮ ኔ ኣዱሳ ላይꬅ ዴኣና።
PSA 37:28 ኣይስ ጊኮ ጎዳይ ጺሎቴꬅ ዶሴስ። ጾሳይ ባስ ኣማኔቲዳ ኣሳታ ዬጌና፤ ኢዚ ኢስታ ሜርናስካ ናጋና። ጊዶ ኣቲን ኢታታ ዜሬꬃቲ ꬎማና።
PSA 37:29 ጺሎቲ ቢታዮ ላታና፤ ኢዚን ሜርናስ ዴኣና።
PSA 37:30 ጺሎ ኣሳ ዶናይ ኣꬎ ኤራቴꬅ ዮቴስ፤ ኢዛ ኢንጻርሲካ ጺሎ ሃሳዬስ።
PSA 37:31 ኢዛ ጾሳ ዎጋይ ኢዛ ዎዚናን ዴስ፤ ኢዛ ቶሆይካ ሃርቼና።
PSA 37:32 ኢታ ኣሲ ጺሎ ኣስ ኢታ ኣይፌን ጼሌሲኔ ዎꬋናዉካ ኮዪ ካሌስ።
PSA 37:33 ጊዶ ኣቲን ጎዳይ ጺሎ ኣስ ኢዛ ኩሼን ዬጌና፤ ፒርዳስ ኤቂዛ ዎዴካ ኢዛ ኣꬂ ኢሜና።
PSA 37:34 ጎዳ ሂዶታ ኦꬃ፤ ኢዛ ኣዛዞካ ናጋ፤ ኢዚ ኔና ቢታ ላቲሳና፤ ዛሪዲካ ቦንቻና፤ ኢታ ኣሳቲ ꬎሚ ꬋይሺን ኔ ቤያና።
PSA 37:35 ታኒ ኢሲ ሜንጼ ኢታ ኣሲ ዎላ ማላ ዳዪዳይሳ ቤያዲስ።
PSA 37:36 ጊዶ ኣቲን ታኒ ሄ ሶሆራ ሲማዳ ካንꬂዛ ዎዴ ኢዚ ꬋይዴስ፤ ታ ኮዪንካ ኢዚ ቤቲቤና።
PSA 37:37 ኣኔ ሎኦ ኣስ ኣኬካ፤ ሱሬ ኣስ ቤኣ፤ ሳሮ ኣሳስ ዉርሴꬂ ሎኦ ጊዳና።
PSA 37:38 ጊዶ ኣቲን ናጋራንቻቲ ሙሌራ ꬋያና፤ ኢስቲ ዉርሴꬃን ꬎማና።
PSA 37:39 ጺሎታስ ኣቶቴꬂ ጎዳፔ ዬስ፤ ሜቶ ዎዴ ኢዚ ኢስታስ ጌሚዛሶ።
PSA 37:40 ጺሎቲ ጎዳ ጉዬ ኣꬊዳ፤ ሄሳ ጊሻስ ኢዚ ኢስታ ማዴሲኔ ኣሼስ፤ ኢታታ ኩሼፔካ ዎꬂ ኤኬስ።
PSA 38:1 ኣቤት ጎዳዉ! ኔ ሃንቆን ታና ሴሮፓ፤ ኔ ዪሎን ታና ሙሮፓ።
PSA 38:2 ኔ ዎንዳፌ ዪሺ ታና ጫዲዴስ፤ ኔ ኩሼይካ ታና ናቂ ኦይኪዴስ።
PSA 38:3 ኔ ሃንቆፌ ዴንዲዳይሳን ታ ቦላይ ፓዬና፤ ታ ናጋራ ጋሶን ታ ኣሳቴꬃይ ፓፓቲዴስ።
PSA 38:4 ታ ቆሆይ ታና ሚቲዴስ፤ ዴጾ ቶሆ ማላ ታና ናቂ ኦይኪዴስ።
PSA 38:5 ታኒ ኤያቴꬃን ኦꬂዳ ናጋራ ጋሶን ታ ማዱንꬃይ ጺንቂዴስ።
PSA 38:6 ታኒ ሆካዲሲኔ ቁናዲስ። ጋላስ ኩሜꬅ ዬካሼ ፔኣዲስ።
PSA 38:7 ታ ኣሾይ ታማ ሚሻ ማላ ጹጌስ፤ ታ ቦላይካ ፓዬና።
PSA 38:8 ታኒ ኢጼታዲሲኔ ኒፊፊ ጋዲስ፤ ታ ዎዚናይ ጬጪዳ ጊሻስ ዋሳይስ።
PSA 38:9 ኣቤት ጎዳዉ! ታ ኣሞ ኡባ ኔ ኤራሳ፤ ታኒ ጬጪዛይሲ ኔፔ ጌሚቤና።
PSA 38:10 ታስ ዎዚና ኣይፌን ጉፔስ፤ ታ ዎልቃይ ጪንጊዴስ፤ ታ ኣይፌፔ ፖኦይ ኪቺዴስ።
PSA 38:11 ታ ማዱንꬃ ጋሶን ታ ሾሮቲኔ ታ ላጌቲካ ታፔ ባቃቲዳ፤ ታ ዳቦቲካ ታፔ ሃኪዳ።
PSA 38:12 ታና ዎꬋናዉ ኮይዛይቲ ባንታ ናርጻ ታና ኦይካና ዎꬂዳ፤ ታና ቆሃናዉ ኮይዛይቲ፥ «ናጋሻ፤ ኑኒ ኔና ዴማና» ጊዲ ታ ቦላ ማንዲዳ፤ ጋላስ ኩሜꬅ ታ ቦላ ጌኔን ዱላቲዳ።
PSA 38:13 ሄ ዎዴ ታኒ ሲዮንታ ቱሌ ኣሳ ማላ ጊዳዲስ፤ ዶናካ ፖጎንታ ዱዴ ኣሳ ማላ ጊዳዲስ።
PSA 38:14 ቱማፔ ታኒ ሃይꬂ ሲዮንታ ኣሳ ማላኔ ዶናይ ሃሳዮንታ ኣሳ ማላ ጊዳዲስ።
PSA 38:15 ጊዶ ኣቲን ኣቤት ጎዳዉ! ታኒ ኔናን ሂዶታ ኦꬃይስ፤ ኣቤት ታ ጎዳዉ! ኔኒ ታስ ዛሮ ኢማ።
PSA 38:16 ታኒ ጎዳ፥ «ታ ቶሆይ ሃንዳራሺን፥ ታ ሞርኬቲ፥ ‹ኢዛስ ሃሹ› ጋና ማላኔ ታ ቦላ ጬቄታና ማላ ኦꬆፋ» ጋዳ ዎሳይስ።
PSA 38:17 ታኒ ኩንዳና ማታዲስ፤ ታ ሳኮይካ ፓጾንታ ኢጺዴስ።
PSA 38:18 ታ ናጋራይ ታና ሜቲዴስ፤ ሄሳ ጊሻስ ታ ቆሆ ታ ኔስ ፓጻይስ።
PSA 38:19 ታ ሞርኬቲ ጊታኔ ዎልቃማ፤ ታና ጮ ኢጺዛይቲ ጮራ።
PSA 38:20 ታኒ ሎኦ ኦሶ ኦꬂን ታስ ኢታ ዛሪዛይቲ ታኒ ሎኦ ካሊዛ ጊሻስ ታናራ ኤቄቴቴስ።
PSA 38:21 ኣቤት ጎዳዉ! ኔ ታና ዬጎፋ፤ ኣቤት ጾሳዉ ታፔ ኔኒ ሃኮፋ።
PSA 38:22 ኣቤት ታና ኣሺዛ ጎዳዉ! ታና ማዳናስ ኤሶታ።
PSA 39:1 ታኒ፥ «ኢንጻርሳን ናጋራ ኦꬆንታ ማላ ታኒ ታ ኦጌ ናጋና፤ ኢታ ኣሳቲ ታ ሲንꬃን ዲዛ ዎዴ ታ ዶና ጎርዳና» ጋዲስ።
PSA 39:2 ታኒ ዱዴ ማላ ጮኡ ጋዲስ፤ ሃራይ ኣቶሺን ሎኦ ሚሽ ሃሳያናፔካ ጮኡ ጋዲስ፤ ጊዶ ኣቲን ታ ዋዬይ ሃ ዳሪዴስ።
PSA 39:3 ታ ዎዚናይ ቆፋን ሴሊዴስ፤ ታ ዩሻ ቆፒሺን ታማ ማላ ኤጺ ኬዚዴስ። ሂስቲን ታኒ ሃሳያ ዶማዲስ።
PSA 39:4 «ኣቤት ጎዳዉ! ታ ዴኦ ዉርሴꬃኔ ታስ ዴኣናስ ኣቲዳ ጋላሳታ ታና ቤሳ። ቃሴ ታ ዳና ላይꬃይ ኣይ ኬና ቃንꬃኮ ታና ኤሪሳ።
PSA 39:5 ኔኒ ታ ላይꬃ ቂ ታꬋኮ ኬና ኬሳዳሳ፤ ታ ላይꬂ ኔ ሲንꬃን ቆዳን ባይንዳ ማላ፤ ቱማፔ ኣሲ ኡባይ ኢሲቶ ኣꬊ ቢዛ ጫርኮ ማላ።
PSA 39:6 ቱማፔ ኣሳ ዱሲ ኤሾ ማላ፤ ጮ ሜላ ሃዳ ሃሮ ሺሾን ዳቡሬስ፤ ጊዶ ኣቲን ኦኒ ኤካናኮ ኤሬና።
PSA 39:7 «ኣቤት ጎዳዉ! ኔፔ ኣቲን ሃራ ኦናኮ ጼሎ? ታ ሂዶታይ ኔናና።
PSA 39:8 ታ ሞሮ ኡባፌ ታና ኣሻ፤ ኤያታ ሚቻስ ታና ኬሶፋ።
PSA 39:9 ሃይሳ ኡባ ኦꬂዳይ ኔና ጊዲዳ ጊሻስ ታኒ ጮኡ ጋና፤ ዶናካ ፖጊኬ።
PSA 39:10 ኔ ቦሻ ታ ቦላፌ ዴንꬃ፤ ኔ ዎልቃማ ሾቻ ጋሶን ታ ዳቡራዲስ።
PSA 39:11 ኔኒ ኣስ ኢዛ ናጋራ ጊሻስ ሴራሳኔ ሙራሳ፤ ኢዛስ ዲዛ ኣልኦ ሚሽ ባዳ ማላ ኔ ዉርሳሳ፤ ቱማፔ ኣሲ ኡባይ ኢሲቶ ጫርኪ ኣꬊዛ ጫርኮ ማላ።
PSA 39:12 «ኣቤት ጎዳዉ! ታ ዎሳ ሲያ፤ ታና ማዳናስ ታ ዋሶዛ ኤዝጋ። ታ ኣፉንꬃ ጮኡ ጎፓ፤ ታኒ ካሴ ታ ኣዋታ ኡባ ማላ ቤቴ ኣሲኔ ኢማꬅ ጊዳዳ ኔ ኬꬃን ዳይስ።
PSA 39:13 ታኒ ጉዬ ሲማ ያናስ ዳንዳዮንታሶ ባናፔ ካሴ ጉꬃ ዎዴ ኡፋዬታና ማላ ታና ኣጋሻርኪ!» ጋዲስ።
PSA 40:1 ታኒ ጎዳ ዳንዳያን ናጋዲስ፤ ኢዚ ታኮ ሲሚዲ ታ ዎሳ ሲዪዴስ።
PSA 40:2 ጪማ ኦላፌ፥ ሚቲዛ ኡርቃፌ ታና ኬሲዴስ፤ ታ ቶሆታ ዛላ ቦላ ኤሲዴስ፤ ቃሴ ታ ሄሜꬃ ሚንꬂዴስ።
PSA 40:3 ኢዚ ታ ዶናን ኦራꬃ ማዛሙሬ ዎꬂዴስ፤ ሄ ዬꬃይ፥ «ኑ ጾሳይ ጋላቴቶ» ጊዛዛ። ዳሮቲ ቤኢዲ ያያናኔ ጎዳን ኣማኔታና።
PSA 40:4 ጎዳን ኣማኔቲዛይ፥ ኦቶራንቻታኮ ሲሞንታይ፥ ዎርዳንቻታኮ ጼሎንታይ ኣንጄቲዳዴ።
PSA 40:5 ኣቤት ታ ጎዳዉ! ኔኒ ዳሮ ማላሊሲዛ ኦሶ ኦꬃዳሳ፤ ኔናራ ሊኬቲዛይ ኦኒኔ ባዋ! ኔኒ ኑስ ቆፒዳ ሎኦ ቆፋ ኦኒኔ ቆዳናዉ ዳንዳዬና፤ ሄሲ ታኒ ዮቲን ዉሪዛዝ ጊዴና።
PSA 40:6 ኔኒ ያርሾኔ ሙጹዋታ ኮያቤካ፤ ጹጊዛ ያርሾኔ ናጋራ ያርሾካ ኔኒ ሳሞታቤካ፤ ጊዶ ኣቲን ሲያና ማላ ታስ ሃይꬃታ ዶያዳሳ።
PSA 40:7 ሄሳፌ ጉዬ ታኒ፥ «ጻꬃ ማጻፋን ታ ጊሻስ ጻፌቲዳ ማላ ሄኮ ሃኢ ታኒ ያዲስ።
PSA 40:8 ኣቤት ታ ጾሳዉ! ታኒ ኔኒ ኮይዛይሳ ኦꬃናስ ዶሳይስ፤ ኔ ዎጋይ ታ ዎዚና ጊዶን ዴስ» ጋዲስ።
PSA 40:9 ጊታ ሺቆን ታኒ ጺሎቴꬃ ሚሺራቾ ኣዋጃዲስ። ኣቤት ጎዳዉ! ኔኒ ኤሪዛ ማላካ ታኒ ታ ዶናን ዮቲዛይሳ ኣጊኬ።
PSA 40:10 ታኒ ኔ ጺሎቴꬃ ታ ዎዚናን ቆታቤኬ፤ ኔኒ ኣማኔቲዛይሳኔ ኣሺዛይሳ ታ ዮታዲስ። ቃሴ ኔ ሲቆኔ ኔ ቱማቴꬃ ጊታ ሺቆዛፔ ጌንꬃቤኬ።
PSA 40:11 ኣቤት ጎዳዉ! ኔ ማሮቴꬃ ታፔ ሃሶፋ፤ ኔ ሲቆይኔ ኔ ቱማቴꬃይ ታና ኡባ ዎዴ ናጎ።
PSA 40:12 ኣይስ ጊኮ ቆዳይ ባይንዳ ኢታ ሚሺ ታና ዶዲዴስ፤ ታ ኢታቴꬂ ዳሪዳ ጊሻስ ታ ጼላናዉ ዳንዳይኬ። ታ ኢታ ኦሶይ ታ ሁኤ ቢናናፔ ዳሪዴስ፤ ታ ዎዚናይ ታ ጊዶን ሴሪዴስ።
PSA 40:13 ኣቤት ጎዳዉ! ታና ኣሻ፤ ኣቤት ጎዳዉ! ታና ማዳናስ ኤሶታ።
PSA 40:14 ታና ዎꬋናዉ ኮይዛይቲ ሙሌካ ዬላቴቶኔ ካዉዬቶ፤ ታኒ ቆሄታናይሳ ኣሞቲዛይቲ ካዉዪዲ ጉዬ ሲሜቶ።
PSA 40:15 ታ ቦላ፥ «ኢዛስ ሃሹ! ሃሹ!» ጊዳይቲ፥ ባ ሁኤስ ዬላን ዳጋሜቶ።
PSA 40:16 ጊዶ ኣቲን ኔና ኮይዛ ኡባቲ ኔናን ኡፋዬቴቶኔ ሃሹ ጌቶ፤ ኔ ኣቶቴꬃ ዶሲዛ ኡባቲ፥ «ጎዳይ ጊታቶ!» ጌቶ።
PSA 40:17 ታኒ ሂዬሳኔ ሜቶታንቻ፤ ጎዳይ ታስ ቆፔስ፤ ታና ማዲዛይኔ ኣሺዛይ ኔና፤ ኣቤት ታ ጾሳዉ ታና ኤሶን ማዳ።
PSA 41:1 ሂዬሳስ ቆፒዛ ኣሲ ኣንጄቲዳይሳ፤ ሜቶ ጋላስ ጎዳይ ኢዛ ኣሼስ።
PSA 41:2 ጎዳይ ኢዛ ናጊዲ ፓጻ ዎꬄስ፤ ኢዚካ ቢታ ቦላ ኣንጄታና፤ ጎዳይ ኢዛ ሞርኬታስ ኢዛ ኣꬂዲ ኢሜና።
PSA 41:3 ጎዳይ ኢዚ ሃርጌቲዲ ሂጻን ዲሺን ማዴስ፤ ሳኬቲንካ ኢዛ ፓꬄስ።
PSA 41:4 ታኒ ጊዲኮ፥ «ኣቤት ጎዳዉ! ታኒ ኔና ቆሂዳ ጊሻስ ታና ማራ፤ ሃርጌፌ ታና ፓꬃ» ጋዲስ።
PSA 41:5 ታ ሞርኬቲ ታ ቦላ ኢታ ሚሽ ሃሳይዲ፥ «ኢዚ ኣዉዴ ሃይቃንዴሻ? ቃሴ ኢዛ ሱንꬃይካ ኣዉዴ ꬋያንዴሻ?» ጌቴስ።
PSA 41:6 ታና ቤያናዉ ዪዛ ኦኒካ ባ ዎዚናን ኢታ ሚሽ ሱꬂሼ ቆꬌፔ ቆሞን ሃሳዬስ፤ ካሬ ኬዚዲካ ዚጊርስ ፑኔስ።
PSA 41:7 ታና ኢጺዛ ኡባቲ ዙፔቲዲ ታ ቦላን ሳሱኬቴቴስ፤ ኢታ ሚሺ ታ ቦላ ጋካና ማላ ኣሞቴቴስ።
PSA 41:8 «ኢዛ ኢታ ሃርጌይ ኦይኪዴስ፤ ኢዚ ሄ ኢቺዳሶፔ ሙሌካ ዴንዴና» ጌቴስ።
PSA 41:9 ሃራይ ኣቲን ታኒ ኣማኔቲዛ ታ ሲቆ ላጌይ፥ ታናራ ኢሲ ማዳፌ ሚዳይ ታ ቦላ ቶሆ ዴንꬂዴስ።
PSA 41:10 ጊዶ ኣቲን ኣቤት ጎዳዉ! ኔኒ ታና ማራ፤ ታኒ ሃሎ ኬሳና ማላ ታና ሃርጌፌ ፓꬃ።
PSA 41:11 ታ ሞርኬይ ታና ጾኖንታይሳን ኔ ታና ዶሲዛይሳ ታ ኤራይስ።
PSA 41:12 ኔኒ ታና ታ ሱሬቴꬃ ጊሻስ ማዳሳ፤ ኔ ሲንꬃን ታና ሜርናስ ዎꬃሳ።
PSA 41:13 ጎዳ ኢስራኤሌ ጾሳይ ሜርናፔ ሜርና ጋካናዉ ጋላቴቶ። ኣሚን! ኣሚን!
PSA 42:1 ዉሻይ ፑልቶ ሃꬅ ላሞቲዛ ማላ፥ ኣቤት ጾሳዉ፥ ታኒካ ኔና ላሞታይስ።
PSA 42:2 «ታ ሼምፖያ ታኒ ባዳ ጾሳ ሲንꬅ ቤያናይ ኣዉዴሻ?» ጋዳ ጾሳ፥ ዴኦ ጾሳ ሳሜታዱስ።
PSA 42:3 ኣሳይ ኡባቶ፥ «ኔ ጾሲ ኣዋን ዲዜ?» ጊዛ ዎዴ ታስ ጋላሲኔ ኦማርስ ኣፉንꬂ ቁማ ጊዲዴስ።
PSA 42:4 ታ ዎዚናያ ጬጬꬃን ጊዶራ ሴራሼ ሃይታንታ ኣኬካዱስ፤ ዳሮ ዎዴ ታ ጾሳ ኬꬅ ካሌꬃሼ ኢሊሊሳኒኔ ጋላታ ዬꬃን ባኣሌ ቦንቻና ሺቂዳ ዳሮ ኣሳ ጊዶራ ታ ዋና ቢዛኮ ኣሙሳዲስ።
PSA 42:5 ታኒ ኣይስ ሂዶታ ቃንጻዚና? ቃሴ ኣይስ ጬጫዚና? ታኒ ጾሳን ኣማኔታይስ፤ ታና ኣሺዛ ታ ጾሳ ታ ቡሮ ጋላታና።
PSA 42:6 ታ ጾሳዉ! ታ ዎዚናያ ጬጫዱስ፤ ሄሳ ጊሻስ ታኒ ዮርዳኖሴ ቢታን ሄርሞኔ ዙምቡላ ሚዛሬ ዙማ ቦላ ኤቃዳ ኔና ታ ቆፓና።
PSA 42:7 ኔ ፒሳ ጉንꬃን ጪማይ ጪማስ ኣንኬስ፤ ቃሴ ኔ ዳምባላይኔ ኔ ጫርኮ ኡባይ ታ ቦላራ ኣꬊዴስ።
PSA 42:8 ጎዳይ ባ ሜርና ሲቆ ጋላስ ታስ ኪቴስ። ታኒካ ኦማርስ ኢዛስ ጋላታ ማዛሙሬ ሺሻይስ፤ ሄሲካ ታ ዴኦ ጾሳስ ሺሺዛ ዎሳ።
PSA 42:9 ታ ጾሳዉ ታስ ዛላዉ! «ኔ ታና ኣይስ ዶጋዲ? ታ ሞርኬቲ ታና ቆሂሺን ታ ጬጫሼ ኣይስ ዴኦ?» ጋይስ።
PSA 42:10 ታ ሞርኬቲ ታና ኡባ ዎዴ፥ «ኔ ጾሳይ ኣዋን ዲዜ?» ጊዲ ዮኦን ታና ጫዴቴስ፤ ሜቄꬂካ ሜንꬂ ጫዬቴስ።
PSA 42:11 ታኒ ኣይስ ሂዶታ ቃንጻዚና? ቃሴ ኣይስ ጬጫዚና? ታኒ ጾሳን ኣማኔታይስ፤ ታና ኣሺዛ ታ ጾሳ ታ ቡሮ ጋላታና።
PSA 43:1 ኣቤት ጾሳዉ! ኔ ታስ ፒርዳ፤ ጾሳ ኤሮንታ ካዎቴꬃታራ ኔ ታ ጊሻስ ሞቴታ፤ ጪሚዛ ኣሳታፔኔ ኢታ ኣሳታፔ ታና ኣሻ።
PSA 43:2 ታ ጾሳዉ! ታስ ኔ ሚኖ ሚጻ፤ ሂስቲን ኔ ታና ኣይስ ኣጋዲ? ታ ሞርኬቲ ታና ቆሂሺን ታ ጬጫሼ ኣይስ ዴኦ?
PSA 43:3 ኔ ፖኦኔ ኔ ቱማ ታስ ኪታ፤ ኢስቲ ታና ካሌꬄቶ፤ ፑዴ ጌሻ ዙማ ቦላ ኔ ዲዛሶ ታና ጋꬄቶ።
PSA 43:4 ሄ ዎዴ ታኒ ታና ኡፋይሲዛ ጾሳኮ ባና፤ ኔስ ያርሾ ያርሺዛሶዛ ባዳ ኔስ ጎይናና፤ ኣቤት ጎዳ ታ ጾሳዉ! ታኒ ዲꬃን ኔና ሳባና።
PSA 43:5 ታኒ ኣይስ ሂዶታ ቃንጻዚና? ቃሴ ኣይስ ጬጫዚና? ታኒ ጾሳን ኣማኔታይስ፤ ታና ኣሺዛ ታ ጾሳ ታ ቡሮ ጋላታና።
PSA 44:1 ኣቤት ጾሳዉ! ቤኒ ኣꬊዳ ዎዴ ኔ ኦꬂዳ ጊታ ሚሻ ኑኒ ሲዪዶስ፤ ኑ ኣዋታ ዎዴካ ኔ ኦꬂዳይሳ ኢስቲ ኑስ ዮቲዳ።
PSA 44:2 ካዎቴꬃታ ኔኒ ኔ ኩሼን ጎዳ ኬሳዳሳ፤ ኑ ኣዋታ ኢስታ ቢታን ቶካዳሳ፤ ዴራ ሊቂሳዳሳ፤ ጊዶ ኣቲን ኔ ካዎቴꬃታ ኣሳዳሳ።
PSA 44:3 ኢስቲ ባንታ ማሻን ኦሊዲ ሄ ቢታ ኦይኪቤቴና፤ ኢስቲ ጾኒዳይ ባ ቄሴ ሚኖቴꬃን ጊዴና። ጊዶ ኣቲን ኔኒ ኢስታን ኡፋዬቲዳ ጊሻስ ኔ ኡሻቻ ኩሼይ፥ ኔ ቄሴይኔ ኔ ሲንꬃ ፖኦ ዎልቃይ ሄሳ ኦꬂዴስ።
PSA 44:4 ታ ጾሳዉ ታ ካዎይ ኔና፤ ያቆቤ ዜሬꬃስ ጾኖ ኢሚዳይ ጾሶ ኔና።
PSA 44:5 ኔናን ጊዲዲ ኑ ሞርኬታ ኑ ኦሊ ጾናና፤ ኔ ሱንꬃን ኑናራ ኤቄቲዛይታ ኑኒ ዬꬋና።
PSA 44:6 ታኒ ታ ቶራን ኣማኔቲኬ፤ ታ ጊꬃ ማሻይካ ታና ኣሼና።
PSA 44:7 ጊዶ ኣቲን ኔኒ ኑና ኑ ሞርኬታፔ ኣሻሳ፤ ቃሴ ኑና ኢጺዛይታ ኔኒ ካዉሻሳ።
PSA 44:8 ኑኒ ኡባ ዎዴ ጾሳን ጬቄቶስ፤ ኔ ሱንꬃካ ሜርናስ ሳቦስ።
PSA 44:9 ሃኢ ጊዲኮ ኔ ኑና ኣጋዳሳ፤ ቃሴካ ካዉሻዳሳ፤ ኔኒ ኑ ኦላንቻታራ ኢሲፌ ኬዚዛይሳ ኣጋዳሳ።
PSA 44:10 ኑ ሞርኬታ ሲንꬃፌ ኑና ባቃቲሳዳሳ፤ ኑናራ ኤቄቲዛይቲ ኑ ኣቆታ ቦንቂዳ።
PSA 44:11 ኔኒ ኑና ዶርሳታ ማላ ሹካስ ኣꬃ ኢማዳሳ፤ ቃሴ ካዎቴꬃታ ጊዶን ኑና ላላዳሳ።
PSA 44:12 ኔኒ ኔ ኣሳ ሂራይሶን ባይዛዳሳ፤ ጊዶ ኣቲን ዎꬌ ዴማቤካ።
PSA 44:13 ኔኒ ኑና ኑ ሾሮታስ ጫሻስ፥ ቃሴ ኑ ሄራን ዲዛይታስ ቂꬌሲኔ ሚቻስ ኬሳዳሳ።
PSA 44:14 ኔኒ ኑና ካዎቴꬃታ ጊዶን ሃይሲኤስ ኬሳዳሳ፤ ኢስቲ ባንታ ሁኤ ኑ ቦላ ቃꬂ ቃꬂ ቂꬋና ማላ ኦꬃዳሳ።
PSA 44:15 ታ ኡባ ዎዴ ካዉያዲስ፤ ታ ሲንꬂ ዬላ ማይኢዴስ።
PSA 44:16 ሄ ኡባይ ታና ጋኪዳይ ታ ሞርኬቲ ታ ቦላ ሃሎ ኬሲሺን ሃራቲ ካꬊዲ ሚጪዳ ጊሻሳ።
PSA 44:17 ኑኒ ኔና ዶጎንታ ዲሺን ዎይኮ ኔ ጫቆ ቃላ ፓጪንቾንታ ዲሺን ሃይሲ ኡባይ ኑ ቦላን ጋኪዴስ።
PSA 44:18 ኑ ዎዚናይ ኔፔ ጉዬ ኡንዱዲቤና፤ ኑ ቶሆይ ኔ ኦጌፔ ጋጻ ኬዚቤና።
PSA 44:19 ጊዶ ኣቲን ኔኒ ኑና ሜንꬄሬꬃዳ ዶኣ ኦጌን ዬጋዳሳ፤ ጊርዲ ጊዳ ꬉማንካ ኦላዳሳ።
PSA 44:20 ኑ ጾሳ ሱንꬅ ኑኒ ባሊዳ ጊዲኮ ኑ ኩሼካ ኤቃ ጾሳታ ዎሳናስ ሚጪዳኮ፥
PSA 44:21 ሃይሳ ኤሮይ ጾስ ጾናኔ? ኢዚ ዎዚናን ጌሚ ዲዛ ጹራ ኡባ ኤሬስ
PSA 44:22 ጊዶ ኣቲን ኡባ ጋላስ ኔ ጊሻስ ሃይቆስ ኣꬊ ኢሜቲዶስ፤ ሹካስ ኤፊዛ ዶርሳታ ማላካ ቆዴቲዶስ።
PSA 44:23 ኣቤት ጎዳዉ ቤጋ! ኣይስ ꬊስካይ? ዴንዳ! ሜርናስ ኑና ኣጎፋ።
PSA 44:24 ኔ ሲንꬃ ኑፔ ኣይስ ጌንꬃይ? ኑ ቆሄቴꬃኔ ኑ ኡንኤቴꬃ ኣይስ ዶጋይ?
PSA 44:25 ኑኒ ዱጌ ጉዱላን ዬጌቲዶስ፤ ቢታ ቦላካ ፖርጩ ጊዶስ።
PSA 44:26 ኣቤት ጎዳዉ፥ ኑና ማዳናስ ዴንዳ! ኔ ሜርና ሲቆን ኑና ዎዛ።
PSA 45:1 ታ ዎዚናፔ ሎኦ ቆፋይ ፑልቴስ፤ ታ ጊግሲዳ ጊንጾዛ ካዎዛ ሲሳና፤ ታ ኢንጻርሳይካ ኤራንቻ ጻፌ ቢኢሬ ማላ።
PSA 45:2 ኣሳ ኡባፌ ኔኒ ኬሃ ሎኣሳ፤ ኔ ፑላን ኩሚዳ ቃላ ሃሳያሳ፤ ሄሳ ጊሻስ ጾሲ ኔና ሜርናስ ኣንጂዴስ።
PSA 45:3 ዎልቃማ ካዎ! ኔ ማሻ ጊጻ፤ ቦንቾኔ ቴማ ማይኣ።
PSA 45:4 ቱማቴꬃስ፥ ኣሽኬቴꬃሲኔ ጺሎቴꬃስ ኔ ቴማቴꬅ ማይኣዳ ኦላ ጾናናስ ሲንꬄ ሆርዶፋ፤ ኔ ኡሻቻ ኩሼይ ማላሊሲዛ ሚሽ ቤሶ።
PSA 45:5 ኔ ዪሻቲ ቃራታ፤ ኢስቲ ካዎ ሞርኬታ ዎዚና ኣይፌን ጫዳና፤ ካዎቴꬃቲ ጾኔቲዲ ኔ ቶሆ ጋርሳን ኩንዳና።
PSA 45:6 ኣቤት ጾሳዉ! ኔ ካዎቴꬃ ኣልጋይ ሜርናስ ዳና፤ ኔ ካዎቴꬃ ጉፌይካ ሱሬቴꬃ ጉፌ።
PSA 45:7 ኔኒ ጺሎቴꬅ ዶሳሳ፤ ማካላቴꬅ ኢጻሳ። ሄሳ ጊሻስ ጾሳይ፥ ኔ ጾሳይ ኔ ላጌታፔካ ኣꬂዲ ኔና ኡፋይሳ ዛይቴን ቲይዴስ።
PSA 45:8 ካርቤፌ፥ ጎዳሬ ኡꬃፌኔ ቡርጉዴፔ ኦሴቲዳ ሺቶን ኔ ማይኦይ ጫጫፌቲዲ ሳዎ ቱኑ ጌስ፤ ዳንጋርሳ ዛሌን ኣሌቄቲዳ ኔ ካዎቴꬃ ኬꬃን ዲጼቲዛ ዲꬃይኔ ማሲንቆይ ኔና ኡፋይሴስ።
PSA 45:9 ካዎቴꬃ ኬꬃን ዲዛ ማጫሳታ ጊዶን ካዎታ ማጫ ናይቲ ዴቴስ፤ ጎዳቴያ ጌሻ ዎርቃን ኣሌቄታዳ ኔፔ ኡሻቻ ባጋን ኤቃዱስ።
PSA 45:10 ታ ናዬ፥ ኤዝጋ ሲያ፤ ኔ ሃይꬃ ሃ ዬጋ። ኔ ዴራኔ ኔ ኣዋ ኬꬃ ዶጋ።
PSA 45:11 ኔ ሜꬋ ሎኦይ ካዎ ዎዚና ኤኪዴስ፤ ኢዚ ኔስ ጎዳ ጊዲዳ ጊሻስ ኔ ኢዛ ቦንቻ።
PSA 45:12 ጺሮሴ ኣሳይ ኢዚስ ኢሞታ ኤኪ ያና፤ ዱሬቲ ኔና ኣዳሻና።
PSA 45:13 ካዋ ናያ ካዎ ኬꬃ ጊዶን ኣይ ማላ ሎኣዜ! ኢዚ ማይኦይካ ዎርቃን ኣሌቂዴስ።
PSA 45:14 ባ ኣሌቆ ማይኦዛ ማይኣዳ ካዎዛኮ ባዉስ፤ ኢዚ ላጌ ጊዲዳ ጌላኦቲ ኢዞ ኣዣቢ ኢዛስ ኤኪ ዪዳ።
PSA 45:15 ኢስቲ ኡፋዬቲሼኔ ሆምቦጪሼ ዪዲ ካዎዛ ኬꬅ ጌሌቴስ።
PSA 45:16 ካዎ! ኔ ናይቲ ኔ ኣዋታ ሶሆ ላታና፤ ኔኒ ኢስታ ቢታ ኡባ ቦላን ሹማና።
PSA 45:17 ታኒ ኔ ሱንꬂ ዬሌታ ኡባን ሃሳኤታና ማላ ኦꬃና። ሄሳ ጊሻስ ኣሳይ ሜርናስ ኔና ሳባና።
PSA 46:1 ጾሲ ኑኒ ሺቂ ኣቲዛሶኔ ኑስ ዎልቃ፤ ኑና ሜቶይ ጋኪዛ ዎዴ ማዳናስ ኢዚ ኡባቶ ማታን ዴስ።
PSA 46:2 ሄሳ ጊሻስ ቢታይ ቃጺኮ፥ ዙማቲካ ዱጌ ኣባን ጌሊኮ ኑኒ ያዮኮ።
PSA 46:3 ኣባ ዳምባላይካ ጉሚዲ ሆሞቲኮ፥ ኢዛ ዎልቃማ ሃኖን ዙማቲ ኮኮርኮካ ኑኒ ዳጋሞኮ።
PSA 46:4 ጾሳ ካታማን፥ ኡባፌ ꬎቃ ጾሳይ ዲዛሶን ኡፋይሲዛ ሻፋቲ ዴቴስ።
PSA 46:5 ጾሲ ኢዚ ጊዶን ዲዛ ጊሻስ ሄ ካታማያ ቃጹኩ፤ ዎንታ ማላዶራ ጾሲ ኢዞ ማዳና።
PSA 46:6 ካዎቴꬃቲ ማካላን ዴንዲዳ፤ ካዎቲካ ኩንዲዳ፤ ኢዚ ባ ቃላ ꬎቁ ሂስቲ ሲሲዴስ፤ ቢታይካ ሴሪዴስ።
PSA 46:7 ኡባፌ ዎልቃማ ጎዳይ ኑናራ ዴስ፤ ያቆቤ ጾሲ ኑ ቆቴቲ ኣቲዛ ቆልኣ።
PSA 46:8 ሃ ዪቴ፤ ጎዳ ኦሶ ጼሊቴ፤ ኢዚ ሳኣ ዎስቲ ቡላሲዳኮ ቤኢቴ።
PSA 46:9 ኢዚ ሳኣ ጋጻፔ ጋጻ ጋካናስ ዲዛ ኦላ ቴቄስ፤ ዎንዳፌኔ ቶራ ሜንꬄስ፤ ጎንዳሌካ ታማን ጹጌስ።
PSA 46:10 ሼምፒ ኡቲቴ፤ ታኒ ጾስ ጊዲዳይሳ ኤሪቴ፤ ካዎቴꬃታ ቦላ ታ ꬎቁ ꬎቁ ጋና፤ ቢታ ቦላካ ታ ꬎቁ ꬎቁ ጋና።
PSA 46:11 ኡባፌ ዎልቃማ ጎዳይ ኑናራ ዴስ፤ ያቆቤ ጾሲ ኑ ቆቴቲ ኣቲዛ ቆልኣ።
PSA 47:1 ካዎቴꬅ ኡባይ ኢንቴ ኩሼ ባቂቴ፤ ኢንቴ ቃላ ꬎቁ ኦꬂዲ ጾሳስ ኢሊሊ ጊቴ።
PSA 47:2 ቢታ ኡባ ቦላ ባይራ ካዎይ ኡባፌ ꬎቃ ጾሳይ ኢዚ ያሺሲዛ ጾሳ።
PSA 47:3 ዴራ ኑ ጋርስ ኣꬂዴስ፤ ካዎቴꬃታካ ኑ ቶሆ ጋርሳን ሃሪሲዴስ።
PSA 47:4 ኢዚ ኑስ ላታ ቢታ ዶሪዴስ፤ ሄ ቢታይን ኢዚ ዶሲዛ ያቆቤይ ጬቄቴስ።
PSA 47:5 ኢሊሊሺን ጾሳይ ኡፋይሳን ዛዬ ፑኒሺን ጎዳይ ፑዴ ባ ኣራታን ኬዚዴስ።
PSA 47:6 ዬጺቴ፥ ጾሳስ ዬጺቴ፤ ዬጺቴ ኑ ካዎዛስ ዬጺቴ።
PSA 47:7 ጾሲ ኣላሜ ኡባስ ካዎ፤ ሄሳ ጊሻስ ጋላታ ማዛሙሬ ኢዛስ ዬጺቴ።
PSA 47:8 ጾሲ ካዎቴꬃታ ቦላ ካዎቲዴስ፤ ባ ጌሻ ኣራታ ቦላካ ኡቲዴስ።
PSA 47:9 ካዎቴꬃታ ካሌꬂዛ ዳናቲ ኣብራሃሜ ጾሳ ኣሳራ ኢሲፌ ሺቂዳ፤ ዴሬ ኡባ ካዎቲ ጾሳሳ፤ ኢዚ ኡባፌካ ቦላራ ꬎቃ።
PSA 48:1 ጎዳይ ጊታ፤ ኑ ጾሳ ካታማን ጌሻ ዙማዛን ጊታ ጋላታይ ኢዛስ ቤሴስ።
PSA 48:2 ቢታ ኡባስ ኡፋይስ ጊዲዳይ፥ ፑዴሃ ባጋራ ቤቲዛይ ꬎቃኔ ሎኦ ጊዲዳ ጺዮኔ ዙማይ ዎጋ ካዎዛ ካታማ።
PSA 48:3 ሄ ካታማ ጊምቤዛ ጊዶን፥ ኢዚ ካታማይስ ኣሺዛ ሚጻ ጊዲዳይሳ ቤሲዴስ።
PSA 48:4 ካዎቲ ባንታ ቶራንቻታራ ኢሲፌ ሺቂዳ፤ ሂስቲዲ ጺዮኖ ኦላናዉ ዪዳ።
PSA 48:5 ጊዶ ኣቲን ኢዞ ቤኢዲ ማላሌቲዳ፤ ዳጋሚዲ ጉዬ ባቃቲዳ።
PSA 48:6 ኢስቲ ሄሳን ዴኢሺን ኢስታ ያሻ ኮኮሪሲ ኦይኪዴስ፤ ሚጻይ ኦይኪዳ ማጫሳ ማላ ሚጻቲዳ።
PSA 48:7 ኣርሼይ ሞኪዛሶ ባጋ ዎልቃማ ጫርኮን ሜቂዛ ታርሴሴ ማርካቤታ ማላ ኢስታ ኮኮርሳዳሳ።
PSA 48:8 ኑኒ ሲዪዳ ማላካ፥ ኡባፌ ዎልቃማ ጎዳ ካታማን፥ ኑ ጾሳ ካታማን ኢዚ ኦꬂዳይሳ ኑ ቤኢዶስ። ጾሲ ሄ ካታማ ሜርናስ ሚንꬂ ኤሳና።
PSA 48:9 ኣቤት ጾሳዉ፥ ኔ ኬꬃ ጊዶን ኔ ሜርና ሲቆ ቆፖስ።
PSA 48:10 ኣቤት ጾሳዉ፥ ኔ ሱንꬃ ማላካ ኔ ጋላታይ ሳኣ ጋጻ ጋኪዴስ፤ ኔ ኡሻቻ ኩሼይ ጺሎቴꬃን ኩሚዴስ።
PSA 48:11 ኔ ፒርዳ ጊሻስ፥ ጺዮኔ ኣሳይ ኡፋዬቴስ፤ ዩሁዳ ካታማቲካ ኡፋይሳን ሆምቦጬቴስ።
PSA 48:12 ጺዮኔ ዩሾን ሄሜቲቴ፤ ኢዚ ጊምቤታ ዩሾን ያኔ ሃ ሲሜሬቲቴ፤ ኢዚ ሻኮታ ቆዲቴ።
PSA 48:13 ዪዛ ዬሌታስ ዮታና ማላ፥ ኢዚ ኣሆ ጊምቤዛ ኣኬኪቴኔ ኢዚ ሚጻታ ጾሞሲቴ።
PSA 48:14 ኢንቴ፥ «ሜሪ ሜርናስ ሃ ጾሳይ ኑ ጾሳ፤ ኑ ሃይቃና ጋካናስ ኢዚ ኑና ካሌꬃና» ጊዲ ዮቲቴ።
PSA 49:1 ዴሬዞ፥ ኢንቴ ኡባቲካ ሃይሳ ሲዪቴ! ኢንቴኖ ሳኣ ቦላ ዲዛ ኡባቶ! ሃይሳ ኤዝጊቴ።
PSA 49:2 ꬎቃይኔ ዚቃይ፥ ዱሬይኔ ማንቆይካ ሲዪቴ።
PSA 49:3 ታ ዎዚና ቆፋይ ኣኬካ ኢሜስ፤ ታ ዶናይ ኣꬎ ኤራቴꬃ ቃላ ሃሳዬስ፤
PSA 49:4 ታኒ ታ ሃይꬅ ሌሚሶታኮ ዛራና፤ ኢስታ ቢርሼꬃካ ታ ዲꬃን ቆንጪሳና።
PSA 49:5 ሜቶ ጋላሲ ዪዛ ዎዴኔ ኢታቴꬃን ታና ላቢዛይቲ ዶዲ ኡቲኮ ታ ኣይስ ባቦ?
PSA 49:6 ባ ኣቆታን ኣማኔቲዛይታሲኔ ባ ዱሬቴꬃ ዳሮን ጬቄቲዛይታስ ታ ኣይስ ባቦ?
PSA 49:7 ኣሲ ባርካ ባና ዎዜና፤ ዎይኮ ባ ሼምፖ ጊሻስ ጾሳስ ዋጋ ቃንጻናስ ዳንዳዬና።
PSA 49:8 ኣሳ ሼምፖ ዋጋይ ኬሂፔ ኣልኦ፤ ሼምፖ ዱꬂዛ ዋጋይ ሙሌካ ዴና።
PSA 49:9 ኣይ ዋጋ ቃንጺንካ ኢዚ ሜርናስ ዴኣና ማላ፥ ዎይኮ ኢዚ ሃይቆንታ ማላ ኦꬃናዉ ዳንዳዬና።
PSA 49:10 ኤያቲኔ ዳማቲ ሃይቂዛ ማላ ኣꬎ ኤራንቻቲካ ሃይቃና፤ ኡባይካ ባ ኣቆታ ሃራስ ዬጊ ባና፤ ሄሳ ኡባይካ ቤኣና።
PSA 49:11 ዳሮ ጋዴ ኢስቲ ባ ሱንꬃን ሃሪኮካ ኢስታስ ሜርና ኬꬃይ ዱፎ፤ ኢዚካ ኢስታስ ዬሌታፔ ዬሌታ ጋካናዉ ዱሳሶ ጊዳና።
PSA 49:12 ኣሲ ኣይ ዱሬቲኮካ ባ ዱሬቴꬃራ ካንꬄና፤ ኢዚ ዶኣ ማላ ሃይቃና።
PSA 49:13 ባናን ኣማኔቲዛ ኤያታ ቃዳይኔ ኢስታ ቃላ ካሊዛይታ ዉርሴꬃ ሳማይ ሃይሳ።
PSA 49:14 ሹካስ ቆሬቲዳ ዶርሳታ ማላ ኢስቲ ዱፎስ ዶሬቲዳ፤ ሃይቆይ ኢስታ ሄንꬃንቻ ጊዳና፤ ኢስቲ ባንታ ያሊሶ ኬꬃፌ ሃኪዲ ዱፎን ሙሳና። ሱሬ ኣሳቲ ማላዶራ ኢስታ ዱፎ ቦላራ ሲሜሬታና።
PSA 49:15 ጊዶ ኣቲን ጾሲ ታ ሼምፖ ዎዛና፤ ኢዚ ታና ሃይቆ ዎልቃፌ ኣሺ ኤካና።
PSA 49:16 ኣሲ ዱሬቲዛ ዎዴኔ ኢዛ ኣቆታይ ዳሪ ዳሪ ቢዛ ዎዴ ኢዛዴስ ያዮፋ።
PSA 49:17 ጋሶይካ ኢዚ ሃይቂሼ ኣይኮካ ኤኪ ቤና፤ ኢዛ ኣቆታይ ኢዛራ ኢሲፌ ዱፎን ጌሌና።
PSA 49:18 ኣሲ ፓጻ ዲዛ ዎዴን፥ «ታስ ኩሚዴስ» ጊኮካ፥ ኡባይ ኢዛስ ጊጊዳ ጊሻስ ጋላቴቲኮካ፥
PSA 49:19 ሲሚዲ ሙሌካ ፖኦ ቤኦንታሶ ባ ኣዋታ ማባራን ጋይቴስ።
PSA 49:20 ኣሲ ኤራቴꬂ ባይንዳ ኣይ ዱሬቲኮካ ኢዚ ዶኣ ማላ ሃይቃና።
PSA 50:1 ዎልቃማ ጎዳይ፥ ጾሳይ ሃሳዬስ፤ ኣርሼይ ሞኪዛሶፔ ዉሊዛሶ ጋካናስ ሳኣን ዲዛ ኣሳ ጼይጌስ።
PSA 50:2 ሙሌራ ሎኦ ጊዲዳ ጺዮኒፔ ጾሲ ፖኢሴስ።
PSA 50:3 ኑ ጾሲ ያና፤ ኢዚ ጮኡ ጌና። ሚዛ ታማይ ኢዛ ሲንꬃና፤ ዎልቃማ ጎቴይ ኢዛ ዩሾና።
PSA 50:4 ጾሲ ባ ኣሳ ፒርዳናስ ሳሎኔ ሳኣ ጼይጌስ።
PSA 50:5 «ታናራ ያርሾን ጫቄቲዳ ጌሻታ ታኮ ሺሺቴ» ጌስ።
PSA 50:6 ጾሲ ባርካ ፒርዲዛ ጾሳ ጊዲዳ ጊሻስ ሳሎቲ ኢዛ ጺሎቴꬃ ኣዋጄቴስ።
PSA 50:7 «ታ ኣሳዞ ኔ ሲያ! ታኒ ኔስ ዮታይስ፤ ኢስራኤሌ ኣሳዉ! ታኒ ኔ ቦላ ማርካታይስ። ታኒ ጾሳይ ኔ ጾሳ።
PSA 50:8 ኔ ያርሾ ጊሻሲኔ ኔኒ ኡባቶ ሺሺዛ ጹጌቲዛ ያርሾ ጊሻስ ታኒ ኔና ቦሪኬ።
PSA 50:9 ሄሳ ማላካ ኔ ዲርሳፌ ኮርማታ፥ ዎይኮ ኔ ጻርጳፌ ዴይሻታ ኤካናዉ ኮይኬ።
PSA 50:10 ዎራን ዲዛ ዶኣ ኡባቲ ታሳ፤ ሺ ዙማታ ቦላን ዲዛ ሜሄቲካ ታይታ።
PSA 50:11 ታኒ ዙማታ ቦላ ዲዛ ካፎታ ኡባ ኤራይስ፤ ዴምባን ዲዛ ሜꬌቴꬃቲ ኡባይ ታይታ።
PSA 50:12 ሳሎ ጉፋንꬆን ዲዛ ኡባይ ታሳ፤ ሄሳ ጊሻስ ታ ጋፊኮካ ኔስ ዮቲኬ።
PSA 50:13 ታኒ ኮርማታ ኣሾ ሚኬ፤ ዎይኮ ዴይሻታ ሱꬅ ኡዪኬ።
PSA 50:14 ጾሳስ ጋላታ ያርሾ ሺሻ፤ ኔ ኣዲና ኡባፌ ꬎቃ ጾሳስ ጋꬃ።
PSA 50:15 ሜቶ ጋላስ ኔ ታና ጼይጋ፤ ታ ኔና ኣሻና፤ ኔካ ታና ቦንቻና» ጌስ።
PSA 50:16 ጊዶ ኣቲን ጾሲ ናጋራንቻስ፥ «ታ ዎጋ ኔኒ ዛራ ዛራዳ ቢዳናስ ዎይኮ ታ ጫቆ ቃላ ኔ ዮታናስ ኔስ ኣይ ማታይ ዲዜ?
PSA 50:17 ኔ ታ ሴራ ኢጻሳ፤ ታ ቃላታካ ካꬋሳ።
PSA 50:18 ኔኒ ካይሶ ቤኢዳ ዎዴ ኢዛራ ዳቦታዳሳ፤ ላይማቲዛይታ ማባራንካ ዙፔታሳ።
PSA 50:19 ኔኒ ኔ ዶና ኢታ ሃሳያናስ ዶያዳሳ፤ ኔ ሃሳይዛ ሃሳያይ ዎርዶ ጻላ።
PSA 50:20 ኣꬎሶን ኣꬎሶን ኔ ኢሻ ዚጊራሳ፤ ኔ ኣዪ ና ሱንꬂካ ሞራሳ።
PSA 50:21 ኔኒ ሃይሳ ኡባ ኦꬂዛ ዎዴ ታኒ ጮኡ ጋዲስ፤ ሄሳ ጊሻስ ኔኒ ታና ኔ ማላ ጋዳ ቆፓዳሳ፤ ጊዶ ኣቲን ሃኢ ታኒ ኔና ዋላሳይስ፤ ቃሴካ ታ ኔና ቆንጬን ሴራይስ።
PSA 50:22 «ኢንቴኖ ጾሳ ዶጊዛይቶ! ሃይሳ ኣኬኪቴ፤ ኢንቴ ኢጺስ ጊኮ ታኒ ኢንቴና ሜንꬄሬꬃና፤ ሄ ዎዴ ኢንቴና ኦኒካ ኣሼና።
PSA 50:23 ታስ ጋላታ ኢሚዛ ኣሲ ታና ቦንቼስ። ሱሬ ኦጌራ ቢዛ ኣስ ታኒ ኣቶቴꬃ ቤሳና» ጌስ።
PSA 51:1 ኣቤት ጾሳዉ! ኔ ሜርና ሲቆዛ ማላ ታና ማራ፤ ኔ ቃꬌታ ዳሮን ታ ሞሮዛ ቁጫ።
PSA 51:2 ታ ኢታቴꬃ ኡባ ታፔ ሜጫ፤ ታ ናጋራፔካ ታና ጌሻ።
PSA 51:3 ታኒ ታ ሞሮዛ ኤራይስ፤ ታ ናጋራይካ ኡባቶ ታ ሲንꬃና።
PSA 51:4 ታ ኔና ጻላ ቆሃዲስ፤ ቃሴካ ኔ ሲንꬃን ኢታ ኦꬃዲስ። ሄሳ ጊሻስ ኔ ቃጻይዳ ቂጻቴን፥ ኔ ታ ቦላ ፒርዲዳ ፒርዳንካ ኔ ጺሎ
PSA 51:5 ታኒ ታ ኣዪ ኡሎፔ ዶማዳ ናጋራንቻ፤ ዬሌቶሶፌ ሃ ሲማዳካ ታ ሞራንቻ።
PSA 51:6 ሄኮ ኔኒ ኣሳ ዎዚናፔ ቱማ ኮያሳ፤ ሄሳ ጊሻስ ታ ጊዶ ኣሳቴꬃ ኔ ኣꬎ ኤራቴꬅ ታማርሳ።
PSA 51:7 ሂሶጴ ቦንጮን ኔኒ ታና ፒስታ፤ ታኒ ጌያና፤ ታና ሜጫ፤ ታኒ ሻቻፌ ኣꬋዳ ቦጻና።
PSA 51:8 ኔኒ ታና ኡፋይሲኔ ሃሹ ጊሲዛ ሚሽ ሲሳ፤ ኔ ሜንꬄሬꬂዳ ታ ሜቄꬃታካ ፓꬃ።
PSA 51:9 ኔ ሲንꬅ ታ ናጋራፔ ሃራሶ ዛራ፤ ታ ቆሆ ኡባካ ቁጫ ዲጋ።
PSA 51:10 ኣቤት ጾሳዉ! ኔ ታስ ጌሻ ዎዚና ሜꬋ፤ ሚኖ ኣያና ታ ጊዶን ዎꬃ።
PSA 51:11 ታና ኔ ሲንꬃፌ ኦሎፓ፤ ኔ ጌሻ ኣያና ታፔ ኤኮፋ።
PSA 51:12 ኔ ኣቶቴꬃ ኡፋይሳ ታስ ዛራዳ ኢማ፤ ኤኖ ጊሲዛ ኣያናን ኔ ታና ኩንꬃ።
PSA 51:13 ሂስቲኮ ታኒ ሞራንቻታ ኔ ኦጌ ታማርሳና፤ ሄ ናጋራንቻቲካ ኔኮ ሲማና።
PSA 51:14 ኣቤት ጾሳዉ፥ ታና ኣሺዛ ጾሳዉ! ታኒ ሼምፖ ዎꬎንታ ማላ ታና ማዳ፤ ታ ኢንጻርሳይካ ኔ ጺሎቴꬃ ጊሻስ ኢሊሊሳን ዬጾ።
PSA 51:15 ኣቤት ጎዳዉ! ታ ዶና ዶያ፤ ሂስቲኮ ታ ኢንጻርሳይ ኔና ጋላታና።
PSA 51:16 ኔኒ ያርሾን ኡፋዬቲዛኮ ታ ኔስ ያርሾ ሺሻና፤ ኔ ጊዲኮ ያርሾን ኡፋዬታካ፤ ጹጌቲዛ ያርሾ ያርሺኮካ ኔኒ ኡፋዬታካ።
PSA 51:17 ጾሳስ ሺቂዛ ያርሾይ ኣሽኬ ኣያና፤ ኣቤት ጾሳዉ! ሜቂዳ ዎዚና ኔ ካꬋካ።
PSA 51:18 ኣቤት ጾሳዉ! ኔ ዶሳን ጺዮኖ ዱሬሳ፤ ዬሩሳላሜ ጊምቤታ ጊምባ።
PSA 51:19 ሄ ዎዴ ጺሎቴꬃ ያርሾኒኔ ዉሪ ጹጌቲዛ ያርሾን ኔኒ ኡፋዬታና፤ ኮርማቲካ ኔ ያርሺዛሶን ያርሼታና።
PSA 52:1 ሃይሶ ዎልቃማዞ! ጾሲ ኔና ካꬊቺዴስ፤ ኔ ኣይስ ኢታ ኦሶን ናሼታይ? ኣይስ ኡባ ጋላስ ጬቄታይ?
PSA 52:2 ኔኖ ባሌꬆን ኩሚዳ ጌናንቻዉ! ሃራታ ꬋይሳና ቃጻሳ! ኔ ኢንጻርሳይካ ቃራ ማጋላ ማላ።
PSA 52:3 ኔኒ ሎኦ ኣጋዳ ኢታ ሲቃሳ፤ ቱማ ሃሳያናፔ ዎርዶ ሃሳያ ዶሳሳ።
PSA 52:4 ኔኖ ባሌꬆን ኩሚዳ ዎርዳንቻዞ! ኔኒ ኣስ ማዱንꬂዛ ቃላ ሲቃሳ።
PSA 52:5 ጊዶ ኣቲን ጾሲ ኔና ሜርናስ ꬋይሳና፤ ኢዚ ኔና ኔ ኬꬃፌ ቡጪ ኬሳና፤ ፓጻ ዲዛይታ ጊዶፌካ ꬎቃሊ ዲጋና።
PSA 52:6 ጺሎቲ ሃይሳ ቤኢዲ ያያና፤ ኢስቲ ኢዛ ቦላ ሂዝጊ ሚጫና፤
PSA 52:7 «ጾሳ ባስ ዜምፖ ኦꬆንታዴ፥ ባ ዱሬቴꬃ ዳሮን ኣማኔቲዛዴ ባ ኢታ ኦሶን ሚኒዛዴ ሃይሳ ቤኢቴ!» ጋና።
PSA 52:8 ጊዶ ኣቲን ኣጪዛ ዎጋራ ሚꬃ ማላ ታኒ ጾሳ ኬꬃን ኣጫይስ፤ ኢዛ ሜርና ሲቆን ታኒ ሜሪ ሜርናስ ኣማኔታይስ።
PSA 52:9 ኔኒ ኦꬂዳ ኡባስ ታኒ ኔና ሜርናስ ጋላታይስ፤ ኔ ሎኦ ጊዲዳ ጊሻስ ታ ኔ ሱንꬃን ሂዶታ ኦꬃይስ፤ ታኒ ጾሳ ዴራ ሲንꬃን ኔ ኪያቴꬃ ሳባና።
PSA 53:1 ኤያቲ ባንታ ዎዚናን፥ «ጾሲ ባዋ» ጌቴስ፤ ኢስቲ ሞሬቲዳይታ፤ ኢስታ ኦሶይካ ሃራሲዛዛ፤ ኢስታ ጋርሳፌ ሎኦ ኦꬂዛይ ዴና።
PSA 53:2 ጾሳ ኮይዛይቲኔ ኣኬኪዛይቲ ዴኢዛኮ ቤኣናዉ ጾሲ ሳሎፔ ዱጌ ኣሳ ናይታ ጼሌስ።
PSA 53:3 ኢስቲ ኡባይካ ጾሳፌ ሃኪዳ፤ ኡባይካ ኢሲፌ ቱኒዳ፤ ሎኦ ኦꬂዛ ኣሲ ዴና፤ ሃራይ ኣቶ ኢሳዴይካ ባዋ።
PSA 53:4 ጾሲ፥ «ኣሲ ካꬅ ሚዛ ማላ ታ ዴራ ቦንቂ ሚዛይቲ፥ ጾስ ዎሲ ኤሮንታይቲ፥ ሄይቲ ኢታ ኦꬂዛይቲ ዩሺ ቆፔቴኔ?» ጌስ።
PSA 53:5 ጾሲ ባ ኣሳ ሞርኪዛይታ ሜቄꬃ ላላና፤ ኢስቲ ካሴ ዳጋሚ ኤሮንታ ዳጋማ ዳጋማና። ጾሲ ኢስታ ካꬊዳ ጊሻስ ኢስቲ ዬላታና፤
PSA 53:6 ኢስራኤሌስ ኣቶቴꬂ ጺዮኔፔ ዪዳኮ! ጾሲ ባ ዴራፔ ዲኤቲዳይሳ ዛሪዛ ዎዴ ያቆቤ ዛሬቲ ኡፋዬታና፤ ኢስራኤሌ ኣሳይ ኡፋዬታና።
PSA 54:1 ኣቤት ጾሳዉ! ኔ ሱንꬃን ታና ኣሻ፤ ኔ ዎልቃን ታስ ፒርዳ።
PSA 54:2 ኣቤት ጾሳዉ! ታ ዎሳ ሲያ፤ ታ ሃሳይዛ ቃላ ኤዝጋ።
PSA 54:3 ኦቶራንቻቲ ታ ቦላ ዴንዲዳ፤ ጌናንቻቲ ታና ዎꬋናስ ኮዬቴስ። ጾሳ ዉዱ ጌቴና።
PSA 54:4 ጊዶ ኣቲን ጾሲ ታስ ማዶ፤ ጎዳይካ ታስ ዜምፖ።
PSA 54:5 ኣቤት ጾሳዉ! ታ ሞርኬታስ ኢስታ ኢታቴꬃ ማላ ኢስታስ ዛራ። ኔ ኣማኔቴꬃን ኔ ኢስታ ꬋይሳ።
PSA 54:6 ኣቤት ጎዳዉ! ታኒ ታ ዶሳን ኔስ ያርሻና፤ ኔስ ቤሲዛ ጊሻስ ታኒ ኔ ሱንꬃ ጋላታና።
PSA 54:7 ኣይስ ጊኮ ኔኒ ታና ታ ሜቶ ኡባፌ ኣሻዳሳ፤ ታ ሞርኬቲ ኩንዲሺን ታ ኣይፌን ቤያዲስ።
PSA 55:1 ኣቤት ጾሳዉ! ታ ዎሳ ሲያ፤ ታ ሾቢሺን ቄሊ ጎፓ።
PSA 55:2 ኤዝጋ፤ ታ ዎሳ ሲያ፤ ታ ቆፋን ታ ኡንኤታዲስ፤ ማራጬይ ታስ ኮኮሪዴስ።
PSA 55:3 ታ ሞርኬቲ ማንዲን ሂርጋዲስ፤ ኢታ ኣሳቲ ቆሂን ዳጋማዲስ፤ ኢስቲ ታ ቦላ ሜቶ ኤሂዳ፤ ሃንቆን ዴንዲዲ ታና ሞርኪዳ።
PSA 55:4 ታ ዎዚናይ ሂርጌስ፤ ሃይቃናኮኔ ጊዛ ዳጋማይ ታ ቦላ ዎꬊዴስ።
PSA 55:5 ያሺኔ ዳጋማይ ታና ኦይኪዴስ፤ ታ ኣሳቴꬃይ ኮኮሪዴስ።
PSA 55:6 ታኒ፥ «ታስ ሃራጴ ማላ ቄፌይ ዲዛኮ ፒራꬋ ባዳ ሼምፓና።
PSA 55:7 ታኒ ቤታ ባዳካ ባዞን ዴኣና ሺን።
PSA 55:8 ታኒ ጎቴፔኔ ኡሾፔ ኣቲዛሶ ኤሶታዳ ጋካና ሺን» ጋዲስ።
PSA 55:9 ኣቤት ጎዳዉ! ታኒ ካታማይ ጊዶን ኦሺኔ ጌኔ ቤያዲስ፤ ኢታታ ዞሬ ኔ ꬋይሳ፤ ኢስታ ቆፋካ ቡላኬሬꬃ ዬጋ።
PSA 55:10 ኢታቲ ጋላሲኔ ቃማ ካታማ ጊምቤዛ ቦላራ ዩዬቴስ፤ ኢታቴꬂኔ ጌኔይ ኢዚ ጊዶን ዴስ።
PSA 55:11 ባሺ ኢዚ ጊዶን ዴስ፤ ጌኔይኔ ጪሞይ ኢዚ ዱቡሻታፔ ሻኬቴና።
PSA 55:12 ታ ሞርኬይ ታና ጫዪዳኮ ታ ኢዛ ዳንዳያ ኣꬃናኮ፥ ታ ቦላ ጬቄቲዛይ ታና ኢጺዛዴ ጊዲዳኮ ታኒ ኢዛፔ ቆቴታና።
PSA 55:13 ጊዶ ኣቲን ሃይሳ ኡባ ታ ቦላ ኦꬂዛይ ኔና፥ ታ ላጌዛ፥ ታ ዳቦዛኔ ታ ሲቆዛ።
PSA 55:14 ኑኒ ኢሶይ ኢሳራ ኡፋይሳን ሃሳዬቲዶስ፤ ኢሲፌካ ጾሳ ሶን ሲሜሬቲዶስ።
PSA 55:15 ኢታቴꬂ ኢስታ ዎዚና ጊዶን ዲዛ ጊሻስ ታ ሞርኬታ ቦላ ቆፖንታ ሃይቆይ ጋኮ፤ ሼምፖራ ፓጻ ዲሼ ሞጌቴቶ!
PSA 55:16 ታኒ ጊዲኮ ታ ጾሳ ጼይጋይስ፤ ጎዳይ ታና ኣሼስ።
PSA 55:17 ማላዶ፥ ጋላሲኔ ኦማርስ ታኒ ዋሳይሲኔ ታ ሜቶ ኢዛስ ዮታይስ፤ ኢዚ ታ ቃላ ሲዬስ።
PSA 55:18 ዳሮቲ ታና ኤቄቲኮካ፥ ኢዚ ታና ኦላ ቶራፔ ኣሼስ።
PSA 55:19 ቤኒሶፌ ካዎቴꬃ ኣራታን ኡቲ ዲዛ ጾሳይ ታ ዎሳ ሲዪዲ ባ ኦጌ ላሞንታይታኔ ጾሳስ ያዮንታይታ ካዉሻና።
PSA 55:20 ታ ላጌዚ ባ ሲቆታ ቦላ ባ ኩሼ ዴንꬂዴስ፤ ኢስታራ ጫቄቲዳ ጫቆ ቃላካ ላሊዴስ።
PSA 55:21 ኢዛ ዶናፔ ኬዚዛ ቃላይ ኦይሳ ማላ፤ ጊዶ ኣቲን ኢዛ ዎዚናይ ጫዲዛ ቶራ ማላ፤ ኢዛ ቃላቲ ዛይቴፔካ ኣꬊ ሹጎ፤ ጊዶ ኣቲን ቃንጺዛ ማሻ ማላ።
PSA 55:22 ኔ ሜቶ ጎዳ ቦላ ዎꬃ፤ ኢዚ ኔና ሚንꬂ ናጋና፤ ኢዚ ጺሎቲ ኩንዳና ማላ ኦꬄና።
PSA 55:23 ኣቤት ጾሳዉ! ኔኒ ጊዲኮ ኢታታ ዱጌ ጪማ ኦላን ዬጋና። ሱꬅ ጉሲዛይቲኔ ባሌꬂዛይቲ ባ ዳና ላይꬃስ ባጋካ ዴቴና፤ ጊዶ ኣቲን ታኒ ኔናን ኣማኔታይስ።
PSA 56:1 ኣቤት ጾሳዉ! ኣሳይ ታና ኡንኤꬄስ፤ ታ ሞርኬቲ ታና ኡባ ዎዴ ዬዴꬄቴስ፤ ሄሳ ጊሻስ ኔ ታስ ቃꬌታ።
PSA 56:2 ታ ሞርኬቲ ኡባ ጋላስ ታና ዬዴꬄቴስ፤ ዳሮቲ ኦቶሬቴꬃን ታና ኦሌቴስ።
PSA 56:3 ታና ባቢሲዛ ዎዴ ታ ኔናን ኣማኔታይስ።
PSA 56:4 ታኒ ጾሳን ኣማኔቲዛ ጊሻስ ባቢኬ፤ ኢዚ ኢሚዳ ሂዶታ ቃላ ጊሻሲካ ኢዛ ጋላታይስ፤ ታ ጾሳን ኣማኔታይስ፤ ኣሲ ታና ኣይ ኦꬃኔ?
PSA 56:5 ኡባ ጋላስ ታ ሞርኬቲ ታፔ ሞሮ ዴማናስ ዎጼቴስ፤ ኢስቲ ኡባ ዎዴ ታና ቆሃናስ ዞሬቴቴስ።
PSA 56:6 ሺቂዲ ታ ቦላ ማቄቴቴስ፤ ዛማዲ ኡቲዲ ታና ካሌቴቴሲኔ ታ ጌዶን ኤቄቴቴስ፤ ታና ዎꬋናስካ ኮዬቴስ።
PSA 56:7 ጾሶ! ኢስታ ኢታቴꬃ ጊሻስ ኢስታ ዬዶፋ፤ ሄ ካዎቴꬃታ ኔ ሃንቆን ካዉሻ።
PSA 56:8 ኔኒ ታ ዬሆ ቤያዳሳ፤ ታ ኣፉንꬃ ማካዳሳ፤ ኡባቲካ ኔ ማዝጋባን ጻፌቲዳ።
PSA 56:9 ታኒ ኔና ጼይጊዛ ዎዴ ታ ሞርኬቲ ጉዬ ሲሜቴስ፤ ጾሲ ታናራ ዲዛይሳ ታኒ ሄሳን ኤራይስ።
PSA 56:10 ታ ኢዛ ቃላ ጋላቲዛ ጾሳን፥ ታ ኢዛ ቃላ ሳቢዛ ጎዳን፥
PSA 56:11 ታኒ ሄ ጾሳን ኣማኔቲዛ ጊሻስ ባቢኬ፤ ኣሲ ታና ኣይ ኦꬃኔ?
PSA 56:12 ኣቤት ጾሳዉ! ታኒ ኔስ ኣዲና ኣዲኔታዲስ፤ ታ ኣዲኔቶይሳ ጋላታ ያርሾ ኔስ ጋꬃና።
PSA 56:13 ኔኒ ታ ሼምፖዮ ሃይቆፔ ታ ቶሆታ ꬉጴፔ ኣሻዳሳ። ሄሳ ጊሻስ ኢዚ ሼምፖራ ፓጻ ዲዛይታስ ፖኢሲዛ ፖኦን ጾሳ ሲንꬃን ታ ሲሜሬታና።
PSA 57:1 ኣቤት ጾሳዉ! ኔ ታስ ቃꬌታ፤ ታና ማራ፤ ታ ሼምፖያ ኔናን ዜምፓዱስ፤ ባሻይ ኣꬋና ጋካናስ ታኒ ኔ ቄፌታ ጋርሳን ቆቴታና።
PSA 57:2 ኢዚ ባ ሃልቾ ማላ ታስ ፖሊዛ ኡባፌ ꬎቃ ጾሳኮ ዋሳይስ።
PSA 57:3 ጾሲ ሳሎፔ ማዶ ኪቲዲ ታና ኣሻና፤ ታና ዬꬊዛይታ ካዉሻና፤ ጾሲ ባ ሜርና ሲቆኔ ባ ቱማቴꬃ ታስ ኪታና።
PSA 57:4 ታኒ ታ ሞርኬታ ጊዶን፥ ኣስ ፑዚዲ ሚዛ ጋሞ ሚሳቲዛይታ ጊዶን ዳይስ። ኢስታ ኣቻይ ቶራኔ ዎንዳፌ ዪሻ ማላ፤ ኢስታ ኢንጻርሳይካ ቃራ ማሻ ማላ።
PSA 57:5 ኣቤት ጾሳዉ! ኔኒ ሳሎታፔ ቦላራ ꬎቁ ꬎቁ ጋ፤ ኔ ቦንቾይ ሳኣ ኡባ ኩሞ።
PSA 57:6 ኢስቲ ታ ቶሆስ ዎጺማዴ ዎꬂዳ፤ ታ ኣሳቴꬃ ኩኒሲዳ፤ ኢስቲ ታ ኦጌን ኦላ ቦኪዳ፤ ጊዶ ኣቲን ሄ ኦላን ባንታስ ኩንዲዳ።
PSA 57:7 ታ ዎዚናይ ሚኒ ዴስ፤ ኣቤት ጾሳዉ! ታ ዎዚናይ ሚኒዲ ዴስ፤ ታኒ ኔስ ዬጻናኔ ኔና ሳባና።
PSA 57:8 ታ ሼምፖዬ ቢርካ! ዲꬃቲኔ ማሲንቆቲ ቤጊቴ! ታኒካ ዎንታራ ዴንዳና።
PSA 57:9 ኣቤት ጎዳዉ፥ ታኒ ኔና ኣሳ ኡባ ሲንꬃን ጋላታና፤ ቃሴ ዴራ ጊዶን ታ ኔና ዬꬃን ሳባና።
PSA 57:10 ኔ ሜርና ሲቆይ ፑዴ ሳሎ ጋኪዴስ፤ ኔ ቱማቴꬃይካ ሳሎ ሻራ ጋኪዴስ።
PSA 57:11 ኣቤት ጾሳዉ! ኔኒ ሳሎታፔ ቦላራ ꬎቁ ꬎቁ ጋ፤ ኔ ቦንቾይ ሳኣ ኡባ ኩሞ።
PSA 58:1 ኢንቴኖ ዴሬ ሃሪዛይቶ! ኣዳካ ኢንቴ ዶናፔ ጺሎ ሃሳያይ ኬዚዜ? ኣሳ ኡባስ ጺሎ ፒርዴቲ?
PSA 58:2 ኣካይ! ኢንቴ ዎዚናን ኢታ ሚሽ ሃልቼታ፤ ኢንቴ ኩሼይ ቢታ ቦላ ማካላ ኦሶ ኦꬄስ።
PSA 58:3 ኢታቲ ባ ኣዪ ኡሎፔ ዶሚዲ ሞሮ ኦጌ ቤቴስ፤ ዬሌቲዳ ጋላሳፌ ዶሚዲ ባሌቴቴሲኔ ዎርዶቴቴስ።
PSA 58:4 ኢስቲ ሾሻ ማላ ማርዜራ ዴቴስ፤ ቱሌ ጎፔ ሾሻ ማላ ባ ሃይꬅ ቱሊሴቴስ።
PSA 58:5 ሙሬኒዛይሲ ኣይ ማላ ጪንጫ ጊዲኮካ ጎፔ ሾሺ ኢዛ ጬንጉርሳ ሲዬና።
PSA 58:6 ኣቤት ጾሳዉ! ኢስታ ኣቻ ሜንꬃ፤ ኣቤት ጎዳዉ! ጋሞታ ባንቂላ ሜንꬃ።
PSA 58:7 ኢስቲ ጉኪዛ ሃꬃ ማላ ꬋዬቶ፤ ኢስቲ ዱኪዛ ዎንዳፌ ዪሻይ ዱንኦ።
PSA 58:8 ኢስቲ ቢሼ ሙሺዛ ꬋꬌ ማላ ጊዴቶ፤ ፖኦ ቤኦንታ ኣዉጫያ ዬሌቲዳ ና ማላ ጊዴቶ።
PSA 58:9 ኣጉንꬃ ታማይ ኦቶ ሱሊሶንታ ꬋይዛ ማላ ናጋራንቻታ ኔ ኤሶን ꬋይሳ።
PSA 58:10 ናጋራንቻታ ቦላ ሃሎ ኬሲዛይሳ ቤኢዲ ጺሎቲ ኡፋዬታና። ኢታታ ሱꬃን ባ ቶሆ ሜጬታና።
PSA 58:11 ሄ ዎዴ ኣሳይ፥ «ኣዳካ ጺሎቲ ኦꬂዳ ሎኦ ኦሶስ ዎይቶይ ዴስ፤ ቱሙካ ሳኣ ቦላ ፒርዲዛ ጾሲ ዴስ» ጋና።
PSA 59:1 ኣቤት ታ ጾሳዉ! ታ ሞርኬታፔ ታና ኣሻ፤ ታ ቦላ ዴንዲዛይታፔ ታና ናጋ።
PSA 59:2 ኢታ ኦꬂዛይታፔ ታና ማዳ፤ ሱꬅ ጉሲዛ ኣሳታፔ ታና ኣሻ።
PSA 59:3 ኣቤት ጎዳዉ! ኢስቲ ታና ዎꬋናዉ ዛማዲዲ ናጊዛይሳ ቤኣ! ሜንጼ ኢታ ኣሳቲ ታኒ ሞሮኔ ናጋራ ኦꬆንታ ዲሺን ታ ቦላ ዱላቴቴስ።
PSA 59:4 ኣይኮ ሞሮ ታ ኦꬆንታ ዲሺን ታና ꬋይሳናስ ጊጌቲዳ፤ ሃይሳ ኔኒ ቤኣዳ ታና ማዳና ዴንዳ።
PSA 59:5 ኣቤት ጎዳዉ! ኡባፌ ዎልቃማ ጾሳዉ! ኔኒ ኢስራኤሌ ጾሳ፤ ካዎቴꬃታ ኡባ ቃጻያናስ ኔ ቤጋ፤ ማካላ ኦꬂዛይታ ማሮፓ።
PSA 59:6 ኢስቲ ካና ማላ ሆስካቲሼ ካታማ ጊዶን ዩዪ ፔኢዲ ኦማርስ ሲማና።
PSA 59:7 ኢስታ ዶናፔ ኬዚዛይሳ ሲዪቴ! ኢስታ ኢንጻርሳይ ማሻ ማላ፤ ኢስቲ፥ «ኦኔ ኑና ሲያናይ?» ጊ ቆፔቴስ።
PSA 59:8 ጊዶ ኣቲን ኣቤት ጎዳዉ! ኔኒ ኢስታ ቦላ ሚጫሳ፤ ካዎቴꬃታ ኡባ ካꬋሳ።
PSA 59:9 ታ ጾሳዉ! ኔ ታስ ሚጻ ጊዲዳ ጊሻስ ታ ኔናን ኣማኔታይስ።
PSA 59:10 ታ ጾሳይ ባ ሜርና ሲቆን ታናራ ጋይታና፤ ታ ሞርኬታ ኩንዴꬅ ኢዚ ታና ቤሳና።
PSA 59:11 ኣቤት ኑስ ጎንዳሌ ጊዲዳ ጎዳዉ! ታ ኣሳይ ኔኒ ሃሎ ኬሲዛይሳ ባሎንታ ማላ ኔኒ ኢስታ ዎꬋ ꬋይሶፋ፤ ጊዶ ኣቲን ኔ ዎልቃን ኢስታ ላላኔ ካዉሻ።
PSA 59:12 ኢስቲ ባንታ ዶናፔ ኬሲዛ ናጋራ ጊሻስ፥ ባንታ ኢንጻርሳ ቃላ ጊሻስ፥ ኢስቲ ቃንጊዳ ቃንጌꬃ ጊሻሲኔ ዎርዶቲዛ ጊሻስ ባንታ ኦቶሬቴꬃን ኦይኬቴቶ።
PSA 59:13 ኔ ሃንቆን ኢስታ ꬋይሳ፤ ኢስታ ሙሌራ ዲፒ ሂስታ፤ ሄ ዎዴ ጾሲ ያቆቤ ዜሬꬃ ኣይሲዛዴኔ ሳኣ ጋጻ ጋካናስ ዲዛ ዴራ ሃሪዛዴ ጊዲዳይሳ ኣሲ ኡባይ ኤራና።
PSA 59:14 ኢስቲ ካና ማላ ሆስካቲሼ ካታማ ጊዶን ዩዪ ፔኢዲ ኦማርስ ሲማና።
PSA 59:15 ኢስቲ ሚዛ ሚሽ ሃሲሼ ዩዬቴስ፤ ካሎንታ ኣጊኮ ካና ማላ ላዌቴስ።
PSA 59:16 ጊዶ ኣቲን ታኒ ኔ ዎልቃ ሳባና፤ ማላዶ ማላዶ ኔ ሜርና ሲቆ ጊሻስ ዬጻና። ኔኒ ታስ ሜቶ ጋላስ ዜምፖኔ ባቃታ ኣቲዛ ሚጻ።
PSA 59:17 ኣቤት ጾሳዉ! ታ ዎልቃይ ኔና፤ ኔ ታስ ሚጻ፤ ኔ ሜርና ሲቆን ታና ሲቃሳ፤ ሄሳ ጊሻስ ጋላታ ዬꬃን ታ ኔና ሳባና።
PSA 60:1 ኣቤት ጾሳዉ! ኔኒ ኑና ኣጋዳሳ፤ ኑና ሜንꬄሬꬃ ዬጋዳሳ፤ ኔኒ ኑና ሃንቄታዳሳ፤ ሃኢ ጊዲኮ ሲማዳ ኑና ጊጊሳ።
PSA 60:2 ኔኒ ቢታዮ ቃꬃዳ ዛኢሳዳሳ፤ ኢዛ ኮኮሪዛ ጊሻስ ኔኒ ኢዚ ዛኣ ኩንꬃ።
PSA 60:3 ኔኒ ኔ ኣሳ ሜቶ ቤሳዳሳ፤ ኔኒ ኑና ማꬆሲዛ ዎይኔ ኡሹ ኡሻዳሳ።
PSA 60:4 ኔስ ያዪዛይቲ ባንታ ሞርኬታ ዎንዳፌፔ ኣታና ማላ ማላታ ኢማዳሳ።
PSA 60:5 ኔኒ ሲቂዛይቲ ኣታና ማላ ኔ ዎልቃን ኑና ኣሻ፤ ኔኒ ኑኮ ኣላ።
PSA 60:6 ጾሲ ባ ኬꬃን ዲሼ፥ «ታኒ ጾናዳ ሴኬሜ ቢታ ሻካና፤ ቃሴ ሱኮቴ ሾባ ጊሻና።
PSA 60:7 ጋላኣዴይኔ ሚናሴይ ታይታ፤ ኤፍሬሜይ ታስ ሁኤ ቆቤ፤ ዩሁዳይ ታስ ካዎቴꬃ ጉፌ።
PSA 60:8 ሞኣቤይ ታ ሜጬቲዛሶ፤ ኤዶሜይ ታስ ጫማ ዎꬂዛሶ፤ ታኒ ፊሊስጼሜ ጾናዳ ጌሬራና» ጊዴስ።
PSA 60:9 ጊምቤቲዳ ካታማኮ ታና ኦኔ ኤፋናይ? ኤዶሜ ጋካናስ ታና ኦኔ ካሌꬃናይ?
PSA 60:10 ኣቤት ጾሳዉ! ኑና ኣጊዳይ ኔና ጊዲኪ? «ኔኒ ኑ ቶራንቻታራ ኦላስ ኬዚኬ» ጋዳሳ።
PSA 60:11 ኣሳፔ ጊዲዳ ማዶይ ሃዳ፤ ሄሳ ጊሻስ ኑ ሞርኬታ ቦላ ኑስ ጾኖ ኢማ።
PSA 60:12 ጾሳ ዎልቃን ኑ ሞርኬታ ኑኒ ጾናና፤ ኢዚ ኑ ሞርኬታ ዬꬌታና።
PSA 61:1 ኣቤት ጾሳዉ! ኔኒ ታ ዋሶዛ ሲያ፤ ታ ዎሳካ ኤዝጋ።
PSA 61:2 ታ ዎዚናይ ታሂን ቢታ ጋጻን ዳሼ ታ ኔና ጼይጋይስ፤ ታፔ ꬎቂዛ ዛላኮ ታና ካሌꬃ።
PSA 61:3 ኔኒ ታስ ጌሚዛሶኔ ታኒ ታ ሞርኬታፔ ናጌታ ኣቲዛ ሚኖ ሚጻ።
PSA 61:4 ታኒ ኔ ዱንካኔዛን ሜርናስ ዳና፤ ኔ ቄፌ ጊዶን ካሜታ ኣታና።
PSA 61:5 ኣቤት ጾሳዉ! ኔኒ ታ ኣዲና ሲያዳሳ፤ ኔ ሱንꬃ ያዪዛይቲ ላቲዛ ላታ ታስካ ኢማዳሳ።
PSA 61:6 ካዎዛ ሼምፖ ጋምኢሳ፤ ኢዛ ላይꬃ ዬሌታፔ ዬሌታ ጋꬃ።
PSA 61:7 ኢዚ ጾሳ ሲንꬃን ሜርናስ ካዎቶ፤ ኔ ሜርና ሲቆኒኔ ኔ ቱማቴꬃን ኢዛ ናጋ።
PSA 61:8 ሂስቲኮ ታኒ ታ ኣዲና ጋላስ ጋላስ ጋꬃና፤ ኔ ሱንꬃካ ኡባቶ ዬꬃን ሳባና።
PSA 62:1 ታ ሼምፖያ ጾሳን ጻላ ሼምፖ ዴማዉስ፤ ታስ ኣቶቴꬂ ኢዛፔ ዬስ።
PSA 62:2 ኢዚ ጻላ ታስ ዛላኔ ታና ኣሺዛይሳ፤ ታ ቆቴታ ኣቲዛሶ ጊዲዳ ጊሻስ ሙሌካ ሂርጊኬ።
PSA 62:3 ጪሚዲ ኩንዳና ማቲዳ ጎዳ ማላኔ ሙሲዳ ላሻ ማላ ዎልቃይ ባይንዳ ኣስ ꬋይሳናዉ ሱጊሼ ኣዉዴ ጋካናስ ዴኣንዴቲ?
PSA 62:4 ኢስቲ ኢዛ ቦንቾ ሶሆፔ ካዉሻናስ ጻላ ኮዬቴስ፤ ኢስቲ ዎርዶን ኡፋዬቴቴስ፤ ባንታ ዶናን ኣንጄቴስ፤ ጊዶ ኣቲን ባንታ ዎዚናን ቃንጌቴስ።
PSA 62:5 ታ ሼምፖዬ! ዎፑ ጋዳ ጾሳ ጻላ ናጋ፤ ታስ ሂዶታይ ኢዛፔ ያና።
PSA 62:6 ኢዚ ጻላ ታስ ዛላኔ ታና ኣሺዛይሳ፤ ታ ቆቴታ ኣቲዛሶ ጊዲዳ ጊሻስ ሙሌካ ሂርጊኬ።
PSA 62:7 ታስ ኣቶቴꬂኔ ቦንቾይ ቤቲዳይ ጾሳፌ፤ ኢዚ ታ ቆቴታ ኣቲዛሶኔ ታስ ሚኖ ዛላ።
PSA 62:8 ኣሶ! ኡባ ዎዴ ጾሳን ኣማኔቲቴ፤ ኢዚ ኑስ ቆቴቲ ኣቲዛሶ ጊዲዳ ጊሻስ ኢንቴ ዎዚና ቆፋ ኢዛስ ዮቲቴ።
PSA 62:9 ቦንቾሶፔ ዬሌቴꬂ ማዴና፤ ካꬌቲዳሶፔ ዬሌቴꬂካ ኡባይ ሃዳ። ኢስቲ ሜዛኔ ዴንꬆንታ ጫርኮ ማላ፤ ኢስቲ ኢሲ ቦላ ጫርኮ ማላ ካዉሻ።
PSA 62:10 ቦንቃን ኣማኔቶፍቴ፤ ካይሲ ሺሺዳ ዱሬቴꬃን ሂዶታ ኦꬆፍቴ። ኢንቴስ ዱሬቴꬂ ዳሪኮካ ኢንቴ ዎዚና ኢዛ ቦላ ዎꬆፍቴ።
PSA 62:11 ጾሳይ ኢሲቶ ሃሳይዴስ፤ ታኒ ናምኡ ዮኦታ ሲያዲስ፤ ሄይቲካ፥ «ዎልቃይ ጾሳሳ፤
PSA 62:12 ሜርና ሲቆይ ጾሳሳ።» ኣቤት ጎዳዉ! ኔኒ ኣስ ኡባስ ኢዛ ኦሶ ኦሶ ማላ ኢማና።
PSA 63:1 ኣቤት ጾሳዉ! ኔኒ ታ ጾሳ፤ ታ ኔና ዎዚናፔ ኮያይስ፤ ታ ኣሾይካ ኔና ኣሞቴስ። ሃꬂ ባይንዳ ሜላ ቢታይ ሃꬅ ኮይዛ ማላ ታ ኣሳቴꬃይ ኔና ሳሜቴስ።
PSA 63:2 ታኒ ኔና ጌሻሶሆን ጼላዲስ፤ ኔ ዎልቃኔ ኔ ቦንቾ ታኒ ቤኣዲስ።
PSA 63:3 ኔ ሜርና ሲቆይ ዴኦፔ ሎኤስ፤ ታ ኢንጻርሳይ ኔና ጋላቴስ።
PSA 63:4 ታ ዴኦ ላይꬃንካ ታኒ ኔና ጋላታና፤ ኔ ሱንꬃን ታ ኩሼ ፑዴ ኔኮ ዴንꬃና።
PSA 63:5 ኣሲ ሎኦ ካꬅ ሚ ካሊዲ ኡፋዬቲዛ ማላ ታ ሼምፖያ ኔናን ኡፋዬታና፤ ታኒ ታ ኢንጻርሳን ኡፋይሳ ዬꬃን ኔና ጋላታና።
PSA 63:6 ታኒ ታ ሂጻን ዳሼ ኔና ሃሳኣይስ፤ ኦማርስ ኩሜꬅ ኔ ኦሶ ዩሻ ቆፓይስ፤
PSA 63:7 ኔኒ ታና ማዲዛ ጊሻስ ታኒ ኔ ቄፌ ኩዋን ኡታዳ ኡፋይሳን ዬጻይስ።
PSA 63:8 ታ ሼምፖያ ሺጵ ጋ ካላዱስ፤ ኔ ኡሻቻ ኩሼይካ ታና ሚንꬂ ኦይኪዴስ።
PSA 63:9 ጊዶ ኣቲን ታና ዎꬋና ኮይዛይቲ ቢታ ጋርሳን ጪማ ኦላን ሞጌታና።
PSA 63:10 ኢስቲ ማሻስ ኣꬊ ኢሜታና፤ ኢስቲ ጎዳሬ ካዎ ጊዳና።
PSA 63:11 ጊዶ ኣቲን ካዎይ ጾሳን ኡፋዬታና፤ ጾሳ ሱንꬃን ጫቂዛ ኡባይ ኢዛ ጋላታና፤ ዎርዶ ሃሳይዛይታ ዶናይ ጊዲኮ ጎርዴታና።
PSA 64:1 ኣቤት ጾሳዉ! ታ ማጋና ኔኒ ሲያ፤ ታ ሼምፖዮ ዎꬋናስ ማንዲዛ ታ ሞርኬታፔ ታና ኣሻ።
PSA 64:2 ፓላ ኣሳታ ማቆፌኔ ማካላንቻታ ዱላታፔ ታና ጌንꬃ።
PSA 64:3 ኢስቲ ባንታ ኢንጻርሳ ማሻ ማላ ሌፊዳ፤ ቃሴ ማርዜ ቃላታ ዎንዳፌ ዪሻ ማላ ዱካናስ ጊግሲዳ።
PSA 64:4 ኢስቲ ቆቴቲዲ ባንታ ዎንዳፌን ጺሎ ኣስ ዱኬቴስ፤ ኣሲ ኣኬኮንታ ዲሺን ዱካናስ ጉዬ ጌቴና።
PSA 64:5 ኢስቲ ኢታ ኦꬃናስ ኢሶይ ኢሳራ ማቄቴቴስ፤ ጌማራ ዎጺማዴ ዎꬃናስ ዞሬቴቴስ፤ ኢስቲ፥ «ኑና ኦኒ ቤኣኔ?» ጌቴስ።
PSA 64:6 ኢስቲ ጌኔ ማቄቲሼ፥ «ኑኒ ሎኦ ማቆ ማቄቲዶስ» ጌቴስ፤ ሄሲካ ኣሳ ዎዚናይኔ ካሃይ ኢታን ኩሚዳይሳ ቤሴስ።
PSA 64:7 ጊዶ ኣቲን ጾሳይ ኢስታ ባ ዪሻን ዱካና፤ ኢስቲ ኣኬኮንታ ማዱንꬃና።
PSA 64:8 ኢዚ ኢስቲ ሃሳይዳ ቃላ ኢስታ ቦላ ዛራና፤ ኢስታካ ባሻን ጋꬃና፤ ኢስታ ቤኢዳ ኡባይ ኣሙሲዲ ሁኤ ቃꬃና።
PSA 64:9 ሄ ዎዴ ኣሳይ ኡባይ ጾሳስ ያያና፤ ጾሳ ኦሶ ቆንጬን ዮታና፤ ኢዚ ኦꬂዳይሳካ ዩሺ ቆፓና።
PSA 64:10 ጺሎቲ ጎዳን ኡፋዬቴቶ፤ ኢዛካ ባስ ባቃቲ ኣቲዛሶ ኦꬄቶ፤ ዎዚና ሱሬቲ ኡባይ ኢዛ ጋላቴቶ።
PSA 65:1 ኣቤት ጾሳዉ! ጺዮኔን ኔስ ጋላታይ ቤሴስ፤ ኑኒ ኔስ ኣዲኔቲዳይሳ ጋꬃና።
PSA 65:2 ኣቤት ዎሳ ሲዪዛይሶ! ኣሳይ ኡባይ ኔኮ ያና።
PSA 65:3 ኑ ናጋራይ ኑና ሚቲዴስ፤ ኔኒ ጊዲኮ ኑ ባላ ኣቶ ጋ ዉርሳዳሳ።
PSA 65:4 ኔኒ ዶሪዳዴይኔ ኔናራ ዳና ማላ ኔ ዱቡሻኮ ሺሻ ኤኪዳዴይ ኣንጄቲዳዴ፤ ኔ ጌሻሶዛፔኔ ኔ ዱንካኔ ኣንጆዛፔ ኑ ካላና።
PSA 65:5 ኣቤት ኑና ኣሺዛ ጾሳዉ ኔ ጺሎ ኦሶን ማላሊሲዛ ሚሽ ኑስ ኦꬃ፤ ሳኣ ጋጻፔ ጋጻ ጋካናስ፥ ሃሆ ኣባታፔካ ሄ ፒንꬃን ዲዛ ኣሳ ኡባስ ሂዶታይ ኔና።
PSA 65:6 ኔኒ ኔ ዎልቃ ጊጼታዳሳ፤ ዙማታካ ኔ ሚንꬃ ኤሳዳሳ።
PSA 65:7 ኔኒ ኣባ ጊሪሳኔ ዳምባላ ጉንꬃ ሲርጲ ኦꬃሳ፤ ቃሴ ዴሬይ ዴንዲዛ ዴንꬃ ኢርጺሳሳ።
PSA 65:8 ሄሳꬆ ኔኒ ኦꬂዳ ማላታ ጊሻስ፥ ሳኣ ጋጻ ጋካናስ ዴኢዛ ኣሳይ ኡባይ ኔስ፥ «ሆላ!» ጌስ። ኣርሼይ ሞኪዛሶፔ ዉሊዛሶ ጋካናስ ዲዛ ኣሳ ኡባ ኡፋይሳን ኢሊሊ ጊሳዳሳ።
PSA 65:9 ኔኒ ቢታ ናጋዳ ሃꬅ ኡሻሳ፤ ሂስታዳ ዳሮ ዱሬሳሳ፤ ኣሳስ ካꬃይ ሞካና ማላ ጾሳ ሻፋይ ሃꬃን ኩሚዴስ፤ ሄሳꬆ ኦꬃዳ ኔኒ ጊጊሳዳሳ።
PSA 65:10 ጎሻ ጋዴታስ ጊዲዛ ኢራ ኢማሳ፤ ጳሼታ ሊቂሳሳ፤ ቢታካ ፑሴ ኢራን ሹጊሳሳ፤ ጫሬቻቲ ዶሊ ዲጫና ማላ ኣንጃሳ።
PSA 65:11 ላይꬃ ካሎ ላይꬅ ኦꬃሳ፤ ኔኒ ኣꬊዳሶ ኡባይ ካꬅ ጻላ ጊዴስ።
PSA 65:12 ሜሄ ሄሚዛሶሆን ጪሊላ ማታይ ኩሚዴስ፤ ዙምቡላቲ ኡፋይሳን ኩሚዳ።
PSA 65:13 ዴምባታን ዉዴ ሜሄይ ኩሚዴስ፤ ሾባታን ካꬂ ኩሚዴስ፤ ኡባቲካ ኡፋይሳን ኢሊሊሼ ዬጼቴስ።
PSA 66:1 ሳኣን ዲዛ ኣስ ኡባይ ኢንቴ ቃላ ꬎቂሲዲ ኢሊሊሳን ጾሳ ጋላቲቴ።
PSA 66:2 «ጾሳ ሱንꬂ ቦንቼቶ!» ጊዲ ዬጺቴ፤ ቦንቾ ጋላታ ኢዛስ ኢሚቴ።
PSA 66:3 ጾሳስ፥ «ኔ ኦሶቲ ኣይ ኬና ማላሊሲዞ! ኔ ዎልቃይ ዳሮ ጊዲዳ ጊሻስ ኔ ሞርኬቲ ያሻን ኔ ሲንꬃን ኮኮሬቴስ።
PSA 66:4 ሳኣን ዲዛ ኡባይ ኔስ ጎይኔስ፤ ኔና ሳቤስ፤ ኔ ሱንꬃስ ጋላታ ማዛሙሬ ዬጼስ» ጊቴ።
PSA 66:5 ሃ ዪቴ፤ ጾሲ ኦꬂዳዝ ቤኢቴ፤ ኢዚ ኣሳ ጊዶን ማላሊሲዛ ኦሶ ኦꬂዴስ።
PSA 66:6 ኢዚ ኣባ ሃꬃ ሻኪዴስ፤ ቃሴ ቤኒ ኑ ኣዋቲ ሻፋራ ሜላ ቢታራ ቶሆን ፒኒዳ፤ ኑኒካ ኢዚ ኦꬂዳ ኦሶን ኡፋዬቲዶስ።
PSA 66:7 ኢዚ ባ ዎልቃን ሜርናስ ሃሬስ። ካዎቴꬃታ ኡባካ ባ ኣይፌን ጼሌስ፤ ሄሳ ጊሻስ ማካሊዛይቲ ኢዛ ቦላ ꬎቁ ꬎቁ ጎፔቶ።
PSA 66:8 ኣሳዉ! ኑ ጾሳ ጋላቲቴ፤ ኢንቴ ጋላታ ጬንጉርሳይ ሲዬቶ።
PSA 66:9 ኢዚ ኑና ሼምፖራ ፓጻ ዎꬂዴስ፤ ኑኒ ኩንዶንታ ማላካ ናጊዴስ።
PSA 66:10 ኣቤት ጾሳዉ! ኔኒ ኑና ፓጫ ጼላዳሳ፤ ቢራ ሴሪሲ ጌሺዛ ማላ ኑና ጌሻዳሳ።
PSA 66:11 ኔኒ ኑና ዎጺማዴን ጌልꬃዳሳ፤ ኑ ዞኮንካ ዴጾ ባኦ ባኢሳዳሳ።
PSA 66:12 ኑ ሞርኬቲ ኑና ሁኤራ ዱጌ ዬꬋና ማላ ኦꬃዳሳ፤ ኑኒ ሃꬃ ጊዶራኔ ታማ ጊዶራ ካንꬂዶስ፤ ጊዶ ኣቲን ሃኢ ኑና ኢሻሎ ሶሆ ኤሃዳሳ።
PSA 66:13 ታኒ ጹጌቲዛ ያርሾራ ኔ ጌሻሶሆ ጌላዳ ታ ኣዲና ኔስ ጋꬃና።
PSA 66:14 ታኒ ሜቶቲዳ ዎዴ ታ ዶናፔ ታ ኬሲዳይሳ ታ ኢንጻርሳን ታ ኣዲኔቲዳ ኣዲና ታ ጋꬃና።
PSA 66:15 ታኒ ኔስ ጹጌቲዛ ያርሾስ ሞꬎታ ሺሻና፤ ሳዎ ያርሾስ ꬋርሾታ፥ ኮርማታኔ ኮርቤታ ሺሻና።
PSA 66:16 ኢንቴኖ ጾሳስ ያዪዛይቶ! ኡባቲ ሃ ዪዲ ሲዪቴ፤ ጾሲ ታስ ኦꬂዳይሳ ታኒ ኢንቴስ ዮታና።
PSA 66:17 ታ ቃላ ꬎቁ ሂስታዳ ታኒ ኢዛኮ ዋሳዲስ፤ ታ ኢንጻርሳንካ ኢዛስ ጋላታ ሺሻዲስ።
PSA 66:18 ታኒ ታ ዎዚናን ናጋራ ጌንꬂዳኮ፥ ጎዳይ ታ ዎሳ ሲዬና።
PSA 66:19 ጊዶ ኣቲን ጾሲ ቱማፔ ታስ ሲዪዴስ፤ ታ ዎሳካ ኤዝጊዴስ።
PSA 66:20 ታ ዎሳ ካꬎንታ፥ ባ ሜርና ሲቆ ታፔ ሃሶንታ ጾሳይ ጋላቴቶ።
PSA 67:1 ጾሲ ኑስ ቃꬌቶኔ ኑና ኣንጆ፤ ባ ኣይፌሶ ኑ ቦላ ፖኢሶ።
PSA 67:2 ኔ ኦጌቲ ሳኣ ቦላን፥ ኣሺዛ ኔ ዎልቃይካ ካዎቴꬃታ ኡባ ጊዶን ኤሬቴቶ።
PSA 67:3 ኣቤት ጾሳዉ! ኣሳይ ኔና ጋላቶ፤ ካዎቴꬅ ኡባይ ኔስ ጋላታ ሺሾ።
PSA 67:4 ኔኒ ኣሳስ ሱሬቴꬃን ፒርዲዛ ጊሻስ ሳኣ ቦላካ ኔ ዴራ ካሌꬂዛ ጊሻስ ካዎቴꬃቲ ኡፋዬቴቶ፤ ኢሊሊሼካ ኔስ ዬጼቶ።
PSA 67:5 ኣቤት ጾሳዉ! ኣሳይ ኔና ጋላቶ፤ ካዎቴꬅ ኡባይ ኔስ ጋላታ ሺሾ።
PSA 67:6 ቢታይ ካꬅ ኢማና፤ ጾሲ፥ ኑ ጾሳይ ኑና ኣንጃና።
PSA 67:7 ጾሲ ኑና ኣንጃና፤ ሳኣ ጋጻ ጋካናስ ዲዛ ኣሳይ ኡባይ ኢዛስ ያያና።
PSA 68:1 ጾሲ ዴንዶ፤ ኢዛ ሞርኬቲ ላሌቴቶ፤ ኢዛ ኢጺዛይቲ ኢዛ ሲንꬃፌ ባቃቴቶ።
PSA 68:2 ጩዋይ ጫርኮን ላሌቲዛ ማላ ኔኒ ኢስታ ላላ፤ ሙቃዳይ ታማን ሴሪዛ ማላ፥ ኢታቲ ጾሳ ሲንꬃፌ ሴሪ ꬋዬቶ።
PSA 68:3 ጺሎቲ ጊዲኮ ኡፋዬቴቶ፤ ጾሳ ሲንꬃን ኡፋይሳን ሆምቦጬቶ፤ ቃሴካ ማጉሌቶ።
PSA 68:4 ጾሳስ ዬጺቴ፤ ኢዛ ሱንꬃስ ጋላታ ማዛሙሬ ዬጺቴ። ሻራ ቦላራ ሄሜቲዛይሳ ꬎቁ ꬎቁ ሂስቲቴ፤ ኢዛስ ሱንꬃይ ጎዳ፤ ኢንቴካ ኢዛ ሲንꬃን ኬሂ ኡፋዬቲቴ።
PSA 68:5 ጾሲ ባ ጌሻሶሆን ዲሼ ኣዋይ ባይንዳይታስ ኣዋ፤ ቃሴ ኣምኤታስካ ፒርዲዛ ዳና።
PSA 68:6 ጾሲ ባርካ ዲዛ ቢዛታስ ሶ ኣስ ኢሜስ፤ ቃሾ ኬꬃን ዲዛይታ ቢርሺዲ ኢስታ ኢሻሎን ዎꬄስ። ማካላንቻቲ ጊዲኮ ሱሊዛ ባዞን ዴኣና።
PSA 68:7 ኣቤት ጾሳዉ! ኔኒ ኔ ኣሳ ካሌꬂዳ ዎዴ፥ ኔኒ ኢስታራ ባዞ ካንꬂዳ ዎዴ፥
PSA 68:8 ሲና ጾሳ ሲንꬃን፥ ኢስራኤሌ ጾሳ ሲንꬃን ቢታይ ቃጺዴስ፤ ሳሎቲ ኢራ ዱጌ ቲጊዳ።
PSA 68:9 ኣቤት ጾሳዉ! ኔኒ ኮሺዛ ኬና ኢራ ኢማዳሳ፤ ላዳ ቢታካ ኣራዲሳዳሳ።
PSA 68:10 ኔ ዴሬዚካ ኢዞ ባስ ዱሳሶ ሂስቲዳ፤ ኣቤት ጾሳዉ! ማንቆታስ ኮሺዛዝ ኔኒ ኪያቴꬃን ኢማዳሳ።
PSA 68:11 ጎዳይ ቃላ ዬዲዴስ፤ ሄ ኪታ ዳሮ ማጫሳቲ ዴራስ ኣዋጂዳ።
PSA 68:12 ኢስቲ፥ «ካዎቲ ባ ኦላንቻታራ ዲኦ ጊሼቲ ኤኪዳ።
PSA 68:13 ዶርሳታ ናጋናስ ጉዬን ኣቲዳይቲ ቢራፔ ኦሴቲዳ ቄፌቲ ቦላራ ጾልቂዛ ዎርቃን ቲዬቲዳ ሃራጴ ሚስሌ ዴሚዳ» ጊዳ።
PSA 68:14 ኡባ ዳንዳይዛ ጾሳይ ካዎታ ላሊዳ ዎዴ፥ ጻልሞኔ ዙማ ቦላ ሻች ቡኪሲዴስ።
PSA 68:15 ባሳኔ ዙማቲ ዎጋ ጊታ ዙማታ፤ ባሳኔ ዙማታ ቦላ ዳሮ ፖጎኖቲ ዴቴስ።
PSA 68:16 ዳሮ ፖጎኖቲ ዴኢዛ ዙማቶ! ጾሲ ዳናስ ዶሪዳ ዙማዛ ኢንቴ ኣይስ ሚቃይኔን ጼሌቲ? ጎዳይ ኢዛን ሜርናስ ዴኣና።
PSA 68:17 ጾሳ ፓራ-ጋሬቲ ዳሮ ሺያን ቆዴቲዛይታ፤ ጎዳይ ሲና ዙማፔ ባ ጌሻሶሆ ዪዴስ።
PSA 68:18 ጎዳዉ! ዲኦ ኤካዳ ፑዴ ኔ ዱሳስ ኬዛዳሳ፤ ኣሳ ኡባፌ ኢሞታ ኤካዳሳ፤ ሃራይ ኣቶሺን ማካላንቻታፔካ ኤካዳሳ፤
PSA 68:19 ሃች ሃች ኑ ቶሆ ቶኪዛ ጎዳይ፥ ኑና ኣሺዛ ኑ ጾሳይ ጋላቴቶ።
PSA 68:20 ቤኢቴ! ኑ ጾሲ ኣሺዛ ጾሳ! ሃይቆፔ ኣታና ዳንዳዬቲዛይ ጎዳይ ኣሺና።
PSA 68:21 ጾሲ ቱማፔ ባ ሞርኬታ ሁኤ ኪንቻና፤ ናጋራ ኦጌን ሄሜቲዛ ጎፋራንቻታ ሁኤ ቆኤሬꬃና።
PSA 68:22 ጎዳይ፥ «ታኒ ኢንቴ ሞርኬታ ባሳኔፔ ዛራዳ ኤሃና፤ ታኒ ኢስታ ጪማ ኣባ ጊዶፌ ኬሳዳ ጉዬ ዛራና።
PSA 68:23 ኔኒ ኔ ሞርኬታ ሱꬅ ዬꬋ ኣꬋና፤ ኔ ካናቲካ ሞርኬታ ሱꬃፌ ባንታ ጊሻ ላጫና» ጊዴስ።
PSA 68:24 ኣቤት ጾሳዉ! ኔ ጾኖ ጪፍራይ ኡባን ቤቴስ፤ ታ ጾሳኔ ታ ካዎይ ኣዣባን ባ ጌሻ ሶ ጌልꬂሼ ቆንጬስ።
PSA 68:25 ዬጺዛይቲ ሲንꬃን፥ ቃሴ ካራቤ ባቂዛ ጌላኦቲ ጊዶን፥ ዲጺዛይቲ ጉዬን ኣዣቢ ቤቴቴስ።
PSA 68:26 ኢስቲ፥ «ጾሳ ኩሜꬃ ሺቆን ጋላቲቴ፤ ኢንቴኖ ኢስራኤሌ ዜሬꬃቶ ጎዳ ጋላቲቴ» ጌቴስ።
PSA 68:27 ሄ ጪፍራን ኡባፌ ካሎቲዛ ቢኒያሜ ዛሬቲ ካሌꬄቴስ። ካሊዲ ዩሁዳ ዳናቲ ባንታ ቡቴን ቡቴን ቤቴስ፤ ዉርሴꬃን ዛቢሎኔ ዳናቲኔ ኒፍታሌሜ ዳናቲ ካሌቴስ።
PSA 68:28 ኣቤት ጾሳዉ! ኔ ዎልቃ ቆንጪሳ። ሃይሳፌ ካሴ ኔ ኑስ ኦꬂዳይሳꬆ ሃኢካ ኔ ሚኖቴꬅ ኑና ቤሳ።
PSA 68:29 ዬሩሳላሜን ዲዛ ኔ ኬꬃ ጊሻስ ካዎቲ ኢሞታ ኔስ ኤኪ ያና።
PSA 68:30 ማቃ ጊዶን ዲዛ ዶኣታ ኔኒ ሴራ። ቦራታኔ ማራታ ዉዴ ሚሳቲዛ ካዎታ ኔኒ ላላ፤ ኢስቲ ጉልባቲዲ ባንታ ቢራ ኔስ ጊራና ማላ ኦꬃ፤ ኦሌታናስ ዬሞቲዛ ኣሳታ ላላ።
PSA 68:31 ጊታ ኣሳቲ ጊብጼፔ ያና፤ ቶጵያይ ባ ኩሼ ጾሳኮ ሚጫና።
PSA 68:32 ኢንቴኖ ሳኣ ካዎቴꬃቶ! ጾሳስ ዬጺቴ፤ ጎዳስ ጋላታ ማዛሙሬ ሺሺቴ።
PSA 68:33 ቤኒሶፔ ዶሚዲ ዲዛ ሳሎታፔ ቦላራ ቢዛይሳስ ዬጺቴ፤ ኢዚ ባ ዎልቃማ ጬንጉርሳ ጉንꬃን ዮቲሺን ኤዝጊ ሲዪቴ።
PSA 68:34 ኢዛ ቴማይ ኢስራኤሌ ቦላና፤ ኢዛ ዎልቃይካ ሳሎና። ሄሳ ጊሻስ ጾሳ ዎልቃ ኣዋጂቴ።
PSA 68:35 ኣቤት ጾሳዉ! ኔኒ ኔ ኬꬃፌ ቆንጫሼ ማላሊሳሳ፤ ኢስራኤሌ ጾሳይ ባ ዴራስ ሚኖቴꬂኔ ዎልቃ ኢሜስ። ጾሲ ጋላቴቶ።
PSA 69:1 ኣቤት ጾሳዉ! ሃꬃ ኪጻይ ታስ ቆꬌ ጋኪዳ ጊሻስ ኔ ታና ኣሻ።
PSA 69:2 ቶሆይ ኤቂዛሶይ ባይንዳ ጫሬን ሚቴታዲስ፤ ጪማ ሃꬃ ጊዶ ጌላዲስ፤ ሃꬃ ዳምባላይ ታና ሚታና ሃኔስ።
PSA 69:3 ታኒ ማዶ ዴማናስ ዋሳሼ ዳቡራዲስ፤ ታስ ቆꬌ ፖራንዴይካ ሜሊዴስ። ታ ጾሳ ናጎን ዲሺን ታ ኣይፌይ ባልጁሚዴስ።
PSA 69:4 ታና ሜላ ጮ ኢጺዛይቲ ታ ሁኤ ቢናናፔ ዳሮ። ዎርዶራ ታና ሞርኪዛይቲኔ ታና ꬋይሳናዉ ኮይዛይቲ ዳሪዳ። ታ ካይሳ ኤኮንታ ሚሽ ታና ቃንጻ ጊዳ።
PSA 69:5 ኣቤት ጾሳዉ! ታ ኤያቴꬃ ኔኒ ኤራሳ፤ ታ ኦꬂዳ ናጋራይ ኔፔ ቆቴቲቤና።
PSA 69:6 ኣቤት ጎዳዉ፥ ኡባፌ ዎልቃማ ጎዳዉ! ኔና ሂዶታ ኦꬂዳይቲ ዬላቶፔቶ፤ ኣቤት ኢስራኤሌ ጾሳዉ! ኔና ሚንꬂ ኮይዛይቲ ታ ጋሶን ካዉዮፌቶ።
PSA 69:7 ታኒ ጫሽ ኔ ጊሻስ ጋዳ ዳንዳያዲስ፤ ታ ኣይፌሶይ ዬላቲዴስ።
PSA 69:8 ታኒ ታ ኢሻንታስ ኢማꬅ፥ ቃሴ ታ ኣዬይ ናይታስ ኣላጋ ጊዳዲስ።
PSA 69:9 ታኒ ኔ ኬꬃስ ሚሼቲዛ ሚሾይ ታና ታማ ማላ ጹጌስ፤ ኣሳይ ኔና ጫዪዳ ጫሻይ ታና ጋኪዴስ።
PSA 69:10 ታ ጾማሼ ዬካዲስ፤ ሄሳንካ ታ ቂꬌታዲስ።
PSA 69:11 ታኒ ካዮ ማይኦ ማይኣዲስ፤ ኢስታስካ ታኒ ቶሴስ ኣታዲስ።
PSA 69:12 ታኒ ካታማ ጌሊዛ ፔንጌን ኡቲዛይታስ ዚጊርሳስ ኣታዲስ፤ ማꬆቲዛይታስ ዬꬃስ ጊዳዲስ።
PSA 69:13 ኣቤት ጎዳዉ! ታኒ ጊዲኮ ኔና ዎሳይስ። ኣቤት ጾሳዉ! ኔ ዶሪዳ ዎዴ ታ ዎሳ ሲያ፤ ኔ ሜርና ሲቆን ኔ ኣሺዛ ኣሾዛ ታና ቤሳ።
PSA 69:14 ጫሬን ሚቴቶንታ ማላ ታና ኣሻ። ታና ኢጺዛይታፔ ታና ናጋ፤ ጪማ ሃꬃፌካ ታና ኣሻ።
PSA 69:15 ዲኦ ሃꬂ ታና ኤፎፖ፤ ጪማ ኣባይ ታና ሚቶፎ፤ ጪማ ኦላይ ታ ቦላ ዎዶፎ።
PSA 69:16 ኣቤት ጎዳዉ! ኔ ሜርና ሲቆ ኪያቴꬃ ማላ ታስ ዛሮ ኢማ፤ ኔ ቃꬌታ ዳሮን ታኮ ሲማ።
PSA 69:17 ታፔ ኔ ኣይሌዛፔ ኔ ሲንꬃ ጌንꬆፋ፤ ታኒ ዋዬቲዛ ጊሻስ ታስ ኤሶን ዛሮ ኢማ።
PSA 69:18 ኔኒ ታኮ ሺቃዳ ታና ዎዛ፤ ታ ሞርኬታፔካ ታና ኬሳ ላኣ ዬዳ።
PSA 69:19 ታ ቦላ ጋኪዳ ጫሻ፥ ዬላቴꬃኔ ካዉሻቴꬃ ኔ ኤራሳ፤ ታ ሞርኬታካ ሁኤን ሁኤን ኔ ዴማሳ።
PSA 69:20 ጫሺ ታ ዎዚና ማዱንꬂን ታ ሂዶታ ቃንጻዲስ። ታስ ቃꬌቲዛ ኣስ ኮያዲስ፤ ጊዶ ኣቲን ኢሲ ኣሲካ ዴና። ታና ሚንꬄꬂዛ ኣስ ኮያዲስ፤ ጊዶ ኣቲን ኢሳዴካ ዴማቤኬ።
PSA 69:21 ታኒ ጋፊዳ ዎዴ ታስ ጫሚዛ ካꬅ ኢሚዳ። ታኒ ሳሜቲዳ ዎዴ ታስ ጫላ ጳንቂዳ ኡሹ ኢሚዳ።
PSA 69:22 ኢስቲ ሚዛ ማዳይ ኢስታስ ዎጺማዴ ጊዶ። ኢስቲ ያርሾ ያርሺዲ ሚዛ ማዳይ ኢስታስ ጊቴ ጊዶ።
PSA 69:23 ጼሎንታ ማላ ኢስታ ኣይፌይ ጎዜቶ፤ ኢስታ ዞኮይ ቁኒ ኣቶ።
PSA 69:24 ኔኒ ኔ ሃንቆዛ ኢስታ ቦላ ጉሳ፤ ኢስቲ ቆፖንታ ዲሺን ኔ ቦሻይ ኢስታ ቦላ ጋኮ።
PSA 69:25 ኢስታ ዱሳሶይ ካይስ ጊዶ፤ ኢስታ ዱንካኔን ኦኒካ ዶፖ።
PSA 69:26 ኣይስ ጊኮ ኔኒ ቃጻይዳይታ ኢስቲ ዬዴꬄቴስ፤ ቃሴ ኔኒ ማዱንꬂዳ ኣሳታ ቦላ ሜቶ ዳሪሴቴስ።
PSA 69:27 ኢስቲ ናጋራ ቦላ ናጋራ ጉጂ ጉጂ ባና ማላ ኣጋጋ፤ ኔ ኢስታ ማሮፓ።
PSA 69:28 ኢስቲ ዴኦ ማጻፋፔ ቁጬቴቶ፤ ጺሎታራ ኢሲፌ ማዝጋቤቶፌቶ።
PSA 69:29 ጊዶ ኣቲን ታኒ ሳኬታሼኔ ዋዬታሼ ዴኣይስ። ኣቤት ጾሳዉ! ኔ ታና ኣሻዳኔ ናጋ።
PSA 69:30 ታኒ ጾሳ ሱንꬃ ዬꬃን ጋላታና፤ ጋላታ ዬꬃን ኢዛ ጊታቴꬃ ቆንጪሳና።
PSA 69:31 ሃይሲ ሳንጌቶንታ ቦራፔኔ ኮርማ ያርሾፌ ኣꬊዲ ጎዳ ኡፋይሳና።
PSA 69:32 ቆሄቲዳይቲ ታና ጾሳይ ኣሺዳይሳ ቤኢዲ ኡፋዬቴቶ። ኢንቴኖ ጾሳኮ ሺቂዛይቶ ኢንቴ ዎዚናይ ሚኔቶ።
PSA 69:33 ኣይስ ጊኮ ጎዳይ ሂዬሳታ ሲዬስ፤ ቃሾ ኬꬃን ዴኢዛ ባ ኣሳካ ካꬌና።
PSA 69:34 ሳሎይኔ ሳኣይ፥ ኣባይኔ ኢዛ ጊዶን ዎጺ ቃጺዛ ኡባቲ ጾሳ ጋላቴቶ።
PSA 69:35 ጋሶይካ ጾሲ ጺዮኔ ኣሻና፤ ዩሁዳ ካታማታ ዛሪዲ ኤሳና። ኢዛ ዴሬይ ሄ ቢታ ላቲዲ ሄን ዴኣና።
PSA 69:36 ኢዛ ኦሳንቻታ ዛሬይ ሄ ቢታ ላታና፤ ኢዛ ሱንꬃ ሲቂዛይቲ ሄን ዴኣና።
PSA 70:1 ኣቤት ጾሳዉ! ታና ኣሻናዉ ታኮ ሃ ሲማ፤ ኣቤት ጎዳዉ! ታና ማዳናዉ ኤሶታ።
PSA 70:2 ታና ዎꬋናዉ ኮይዛይቲ ዬላቴቶኔ ሺሮቴቶ፤ ታኒ ቆሄታናይሳ ኣሞቲዛይቲ፥ ካዉዪዲ ጉዬ ሲሜቶ።
PSA 70:3 ታ ቦላ፥ «ኢዛስ ሃሹ! ሃሹ!» ጊዳይቲ ዬላቲዲ ጉዬ ሲሜቶ።
PSA 70:4 ጊዶ ኣቲን ኔና ኮይዛ ኡባቲ ኔናን ኡፋዬቴቶኔ ሃሹ ጌቶ፤ ቃሴ ኔ ኣቶቴꬃ ዶሲዛ ኡባቲ፥ «ጾሲ ꬎቁ ꬎቁ ጎ!» ጌቶ።
PSA 70:5 ታኒ ሂዬሳኔ ሜቶታንቻ፤ ኣቤት ጾሳዉ! ኤሶን ታኮ ጋካ። ታና ማዲዛይኔ ኣሺዛይ ኔና፤ ኣቤት ጎዳዉ! ጋምኦፋ።
PSA 71:1 ኣቤት ጎዳዉ! ኔኒ ታስ ታ ባቃታ ኣቲዛሶ፤ ሙሌካ ኔ ታና ዬላሶፓ።
PSA 71:2 ኔ ጺሎቴꬃን ታና ኬሳ ኤካ፤ ኔ ሃይꬃ ታኮ ዬጋዳ ታና ኣሻ።
PSA 71:3 ኔ ታስ ኡባ ዎዴ ጌሜታ ኣቲዛ ሚኖ ዛላ ጊዳ፤ ታና ኣሻናስ ኔ ኣዛዛ፤ ታስ ሚኖ ሚጻይኔ ዛላይ ኔና።
PSA 71:4 ኣቤት ታ ጾሳዉ! ኢታታ ኩሼፔ፥ ጌናንቻታፔኔ ሜንጼ ኢታታፔ ታና ኣሻ።
PSA 71:5 ኣቤት ኡባ ሃሪዛ ጎዳዉ! ታ ሂዶታይ ኔና፤ ዬላጋቴꬃ ዎዴፔ ዶማዳ ታ ኣማኔቲዛይ ኔና።
PSA 71:6 ታኒ ዬሌቶሶፌ ዶማዳ ታ ኔናን ዜምፓዲስ፤ ታ ኣዬይ ኡሎፔ ታ ዬሌታና ማላ ኦꬂዳይ ኔና፤ ኡባ ዎዴ ታ ኔና ጋላታይስ።
PSA 71:7 ዳሮ ኣሳይ ታና ዱማ ኣይፌን ጼሊዴስ፤ ኔኒ ጊዲኮ ታ ባቃታ ኣቲዛ ዎጋ ዛላ።
PSA 71:8 ጋላስ ኩሜꬅ ኔ ቦንቾ ታ ዮታናስ፥ ታ ዶናን ጋላታይ ኩሚዴስ።
PSA 71:9 ታኒ ጪሚዳ ዎዴን ታና ኦሎፓ፤ ታ ዎልቃይ ኢጺዳ ዎዴን ታና ኣጎፋ።
PSA 71:10 ኣይስ ጊኮ ታ ሞርኬቲ ታና ሂሊዳ፤ ታና ዎꬋናዉ ኮይዛይቲ ታ ቦላ ኢታ ማቄቲዳ።
PSA 71:11 ኢስቲ፥ «ጾሲ ኢዛ ኣጊዴስ፤ ኢዛ ኣሻናይካ ዴና፤ ሄሳ ጊሻስ ኣኔ ኢዛ ጎዲ ኦይኮስ» ጊዳ።
PSA 71:12 ኣቤት ጾሳዉ! ታፔ ሃኮፋ። ኣቤት ታ ጾሳዉ! ታና ማዳናስ ኤሌላ።
PSA 71:13 ታና ሞቲዛይቲ ዬላቲዲ ꬋዬቶ። ታና ቆሃናዉ ኮይዛይቲ ዬላኔ ካዉሻቴꬅ ማይኤቶ።
PSA 71:14 ታኒ ጊዲኮ ኡባቶ ኔና ሂዶታ ኦꬃይስ። ታኒ ጋላታ ቦላ ጋላታ ኔስ ጉጃና።
PSA 71:15 ታኒ ኣይ ሊኬ ሃሳያናኮ ኤሮንታ ኣጊኮካ ጋላስ ኩሜꬅ ታ ዶናይ ኔ ጺሎቴꬃ ጊሻሲኔ ኔ ኣቶቴꬃ ጊሻስ ሃሳዬስ፤
PSA 71:16 ኣቤት ጎዳዉ፥ ጾሳዉ! ታኒ ያዳ ኔ ዎልቃማ ኦሶ ኣዋጃና፤ ቃሴካ ኔ ጺሎቴꬃ ጻላ ዮታና።
PSA 71:17 ኣቤት ጾሳዉ! ኔኒ ታና ዬላጋቴꬃፌ ዶማዳ ታማርሳዳሳ፤ ታኒካ ሃኖ ጋካናዉ ማላሊሲዛ ኔ ኦሶዛ ኣዋጃይስ።
PSA 71:18 ኣቤት ጾሳዉ! ኔ ማታ ጉዬፔ ያና ዬሌታስ፥ ኔ ዎልቃ ጉዬፔ ያና ዴሬ ኡባስ፥ ታ ቆንጪሳና ጋካናሲኔ ታ ጪማዳ ፑሉማና ጋካናስ ኔ ታና ኣጎፋ።
PSA 71:19 ኣቤት ጾሳዉ! ኔ ጺሎቴꬃይ ሳሎ ጋኪዴስ፤ ኣቤት ጾሳዉ! ኔኒ ጊታ ሚሽ ኦꬃዳሳ፤ ኔና ሚሳቲዛይ ኦኒካ ዴና።
PSA 71:20 ኔኒ ታ ቦላ ዳሮ ሜቶ ኤሃዳሳ፤ ጊዲኮካ ኔኒ ታና ጪማ ኦላፌ ጎቻ ኬሳዳሳ፤ ታ ዴኦ ዛራ ኦራꬃዳሳ።
PSA 71:21 ኔኒ ታ ቦንቾ ካሴይሳፌ ዳርሳና፤ ኔኒ ታና ዛሬꬃዳካ ሚንꬄꬃና።
PSA 71:22 ኣቤት ታ ጾሳዉ! ኔ ቱማቴꬃ ጊሻስ ታኒ ኔና ዲꬃን ጋላታና፤ ኣቤት ኢስራኤሌ ጌሻዉ! ታኒ ማሲንቆን ኔና ሳባና።
PSA 71:23 ታ ዎዚናይ ኡፋይሳን ኩሚዲ ኔስ ዬጺዛ ዎዴ፥ ኔኒ ዎዚዳ ታ ሼምፖያ ኔስ ኢሊላዉስ።
PSA 71:24 ታ ኢንጻርሳይ ኔ ጺሎቴꬃ ጊሻስ ጋላስ ኩሜꬅ ሃሳዬስ፤ ታ ቆሄቴꬅ ኮይዛይቲ ዬላቲዳኔ ካዉዪዳ።
PSA 72:1 ኣቤት ጾሳዉ! ሱሬ ፒርዳ ካዎስ፥ ኔ ጺሎቴꬃካ ካዎ ናስ ኢማ።
PSA 72:2 ሂስቲኮ ኢዚ ኔ ዴራስ ጺሎቴꬃን ፒርዳና፤ ናቄቲዳይታሲካ ሱሬ ፒርዳና።
PSA 72:3 ዙማቲ ዱሬቴꬅ ኤሃና፤ ዙምቡላቲካ ጺሎቴꬅ ኔ ዴራስ ኤሃና።
PSA 72:4 ሜቶቲዳይታ ጊሻስ ኢዚ ሞቴታና፤ ሂዬሳታ ኢዚ ኣሻና፤ ኡንኤꬂዛይሳካ ኢዚ ሊቂሳና።
PSA 72:5 ኣዋይኔ ኣጊናይ ዲዛ ዎዴ ኡባን ኣሳይ ኢዛስ ሃሬቶ።
PSA 72:6 ካዎይ ሾቃን ቡኪዛ ኢራ ማላኔ ጋዴ ካልሲዛ ፑሴ ኢራ ማላ ጊዳና።
PSA 72:7 ኢዚ ዲዛ ላይꬅ ኡባን ጺሎይ ጪያና፤ ኣጊናይ ꬋያና ጋካናስ ቢታ ቦላ ሳሮቴꬂ ዳራና።
PSA 72:8 ኣባፌ ቢዲ ኣባ ጋካናስ፥ ኤፊራጺሴ ሻፋፔ ሳኣ ጋጻ ጋካናስ ኢዚ ሃራና።
PSA 72:9 ባዞን ሜሄ ጻላ ሃሪ ኣቂዛይቲ፥ ኢዛ ሞርኬቲ ጉዱላ ላጫና።
PSA 72:10 ታርሴሴ ካዎቲኔ ሃሩሮታ ካዎቲ ኢዛስ ጊራ ኤሃና። ሳባኔ ሳባ ካዎቲ ኢዛስ ኩሼ ጌንꬆ ኤሃና።
PSA 72:11 ካዎቲ ኡባይ ኢዛስ ጉልባታና፤ ካዎቴꬃይ ኡባይ ኢዛስ ሃሬታና።
PSA 72:12 ሜቶታንቻይ ዋሲዛ ዎዴ፥ ማንቆኔ ማዶይ ባይንዳ ኣስ ኢዚ ኣሻና።
PSA 72:13 ሂዬሳታሲኔ ማንቆታስ ኢዚ ቃꬌቴስ፤ ሜቶታንቻታ ሼምፖካ ኢዚ ሃይቆፔ ኣሼስ።
PSA 72:14 ኢስታ ሼምፖ ቆሆፔኔ ጌኔፔ ኢዚ ኣሻና፤ ኢስታ ሱꬃይ ኢዛ ሲንꬃን ኣልኦ።
PSA 72:15 ካዎይ ሼምፖ ጋምኦ፤ ሳባ ቢታ ዎርቃይ ኢዛስ ኢሜቶ። ፓጬይ ባይንዳ ኢዛስ ዎሴቶ፤ ጋላስ ኡባን ኢስቲ ኢዛ ኣንጄቶ።
PSA 72:16 ቢታን ዳሮ ካꬃይ ሞኮ፤ ዙማቲ ካꬃን ካሜቴቶ፤ ቢታይ ሊባኖሴ ማላ ካꬃ ቢታ ጊዶ፤ ማታይ ዴምባ ኩሚዛ ማላ ካታማ ኩሞ።
PSA 72:17 ካዎዛ ሱንꬂ ሜርናስ ሚኒ ዴኦ፤ ኣርሼይ ዴኢዛ ኬና ጼይጌቲሼ ጋምኦ። ካዎቴꬅ ኡባይ ኢዛ ባጋራ ኣንጄቶ፤ ዴሬ ኡባይ ኢዛ፥ «ኔ ኣንጄቲዳዴ» ጊ ኣንጆ።
PSA 72:18 ማላሊሲዛ ሚሽ ባርካ ኦꬂዛ ጎዳይ፥ ጾሳይ፥ ኢስራኤሌ ጾሳይ ጋላቴቶ።
PSA 72:19 ኢዛ ቦንቾ ሱንꬃይ ሜርናስ ጋላቴቶ፤ ቢታ ኡባይ ኢዛ ቦንቾን ኩሞ። ኣሚን! ኣሚን!
PSA 72:20 ኢሴዬ ና ዳዊቴ ዎሳይ ሃይሳን ፖሌቲዴስ።
PSA 73:1 ዎዚና ጌሽ ጊዲዳ ኢስራኤሌ ኣሳስ ጾሲ ኣይ ማላ ኪያ!
PSA 73:2 ጊዶ ኣቲን ታ ቶሆይ ꬉጴቲን ታ ኩንዳይቻዳ ጉꬃሶን ኣታዲስ።
PSA 73:3 ኣይስ ጊኮ ኢታ ኣሳታኔ ማካላንቻታ ዱሬቴꬃ ቤኣዳ ታኒካ ኢስታ ማላ ሃናናስ ኣሞታዲስ።
PSA 73:4 ኢስታስ ቱጋይ ዴና፤ ኢስታ ኣሳቴꬃይ ፓያኔ ሚኖ።
PSA 73:5 ኢስቲ ሃራ ኣሳይ ቱጋቲዛ ማላ ቱጋቴቴና፤ ሃራ ኣሳ ማላካ ሜቶቲ ኤሬቴና።
PSA 73:6 ሄሳ ጊሻስ ኢስቲ ኦቶሬቴꬅ ኣሌቆ ማላ ቆꬌን ኣꬄቴስ፤ ማካላቴꬅ ኣፋላ ማላ ማይኤቴስ።
PSA 73:7 ኢስታ ዎዚናፔ ኢታ ቆፋይ ፑልቴስ፤ ባንታ ኣይፌ ኬሲ ዴሬቄቴስ።
PSA 73:8 ኢስቲ ቂꬌቴሲኔ ኢታ ሃሳዬቴስ፤ ኢስቲ ባንታ ኦቶሮን ሃራታ ኡንኤꬃናዉ ማንዴቴስ።
PSA 73:9 ኢስቲ ሳሎን ዲዛ ጾሳ ባንታ ዶናን ጫዬቴስ፤ ሳኣን ዴኢዛ ኣሳ ባንታ ኢንጻርሳን ዱኬቴስ።
PSA 73:10 ሄሳ ጊሻስ ዴሬ ኡባይ ኢስታኮ ጎቼስ፤ ኢስቲ ዮቲዛይሳካ ኡባ ኤሶን ኣማኔቴስ።
PSA 73:11 ኢስቲ፥ «ጾሲ ኣይ ኤሪዜ? ኡባፌ ꬎቃ ጾሳስ ኤራቴꬂ ዲዜ?» ጌቴስ።
PSA 73:12 ሄኮ ኢታቲ ሃይሳ ሚሳቴቴስ፤ ኢስቲ ኡባቶ ዉዱ ጎንታይታ፤ ዱሬቴꬂ ቆꬌ ጋኪዳይታ።
PSA 73:13 ሂስቲን ታኒ ዎዚና ጌሻቴꬃን ናጊዳይሲ ታና ኣይ ማዲዴ! ታ ኩሼ ታ ጺሎቴꬃን ሜጪዳይሲ ጮ ታና ꬋሊቤና።
PSA 73:14 ጋላስ ኩሜꬅ ታኒ ሜቶ ቤያዲስ፤ ዎንቲን ዎንቲን ታኒ ቃጻዬታዲስ።
PSA 73:15 ታኒ ኢስቲ ሃሳይዛይሳ ማላ ሃሳያና ቆፒዳኮ ኔ ዴራስ ታ ኣማኔቶንታ ኣስ ጊዳና።
PSA 73:16 ታኒ ሃ ዮኦዛ ሻካ ኤራናስ ቆፓዲስ ጊዶ ኣቲን ታ ኤራፔ ቦላ ጊዲዴስ።
PSA 73:17 ሄሲካ ታኒ ጾሳ ጌሻሶሆ ጌላና ጋካናሲኔ ኢታታ ዉርሴꬃ ቤኣና ጋካናሳ።
PSA 73:18 ኣዳካ ኔ ኢስታ ሃሊጺዛሶን ዎꬃዳሳ፤ ኔኒ ኢስታ ዱጌ ባሻሶ ዬዳዳሳ።
PSA 73:19 ኢስቲ ሃሳኦንታ ኤሶን ꬋይዳ፤ ዳጋማን ኢሶይካ ኣቶንታ ዲፒ ጊዳ።
PSA 73:20 ኣቤት ጎዳዉ! ኔኒ ዴንዲዛ ዎዴ ኣሲ ꬊስኮፌ ቤጊን ꬋይዛ ኣጉሞ ማላ ኢስቲ ꬋያና።
PSA 73:21 ታኒ ዪሎቲዳ ዎዴኔ ታ ዎዚናይካ ማዱንጺዳ ዎዴ፥
PSA 73:22 ታኒ ቆፋይ ባይንዳ ዳማዲስ፤ ታኒ ኔ ሲንꬃን ሚዛ ማላ ጊዳዲስ።
PSA 73:23 ጊዶ ኣቲን ታኒ ኡባቶካ ኔናራ ዳይስ፤ ታ ኡሻቻ ኩሼዛካ ኔኒ ኦይካዳሳ።
PSA 73:24 ኔ ዞሬን ታና ካሌꬃዳሳ፤ ሄሳፌ ጉዬ ኔኒ ታና ቦንቾስ ኤፋና።
PSA 73:25 ሳሎን ኔፔ ኣቲን ታስ ሃራይ ኦኒ ዲዜ? ሳኣንካ ኔፔ ሃራ ኦናካ ኮይኬ።
PSA 73:26 ታ ዎልቃይኔ ታ ዎዚናይ ዳቡራናስ ዳንዳዬስ፤ ጊዶ ኣቲን ጾሲ ታ ዎዚናስ ሚኖቴꬂኔ ታስ ሜርና ቃዳ።
PSA 73:27 ኔፔ ሃኪዛይቲ ꬋያና፤ ኔስ ኣማኔቶንታይታ ኡባ ኔኒ ꬋይሳና።
PSA 73:28 ጊዶ ኣቲን ታስ ጾሳኮ ሺቆይ ሎኦ፤ ኔ ኦሶ ኡባ ዮታና ማላ። ታኒ ኡባ ሃሪዛ ጎዳ ታ ባቃታ ኣቲዛሶ ኦꬃዲስ።
PSA 74:1 ኣቤት ጾሳዉ! ኔኒ ኑና ሜርናስ ኣይስ ዬጋ ኣጋዲ? ሄንꬃሶሆን ዲዛ ዶርሳታ ቦላ ኔ ሃንቆይ ኣይስ ሱሊዴ?
PSA 74:2 ቤኒ ኔኒ ዶሪዳ ኔ ዴራ ኔስ ቡዞ ሂስታ ዎዚዳ ዛሬታ ሃሳኣ፤ ኔኒ ዴኢዳ ጺዮኔ ዙማ ቆፓ።
PSA 74:3 ኣኔ ላሌቲዳ ጾሳ ኬꬃዛ ዩያ ጼላ፤ ሞርኬቲ ኢዛን ዲዛ ኡባ ሚሽ ꬋይሲዳ።
PSA 74:4 ኔ ሞርኬቲ ኔ ሶን፥ «ኑኒ ጾኒዶስ» ጊዲ ጌሬሬቴስ። ጾኖ ማላታ ጊዲ ባንታ ባንዲራ ኤሲዳ።
PSA 74:5 ኢስቲ ዎራ ጊዶን ሚꬅ ቃንጻናዉ ባንታ ካልታ ꬎቁ ሂስቲ ኦይኪዳ ኣስ ሚሳቲዳ።
PSA 74:6 ሂላንቻቲ ኦꬂዳ ኣሌቆታ ካልታኒኔ ማዶሻን ሜንꬄሬꬂ ዬጊዳ።
PSA 74:7 ጾሳ ኬꬃ ታማን ጹጊዲ ꬋይሲዳ፤ ኔ ጼይጌቲዛሶዛ ቱኒሲዳ።
PSA 74:8 ኢስቲ ባንታ ዎዚናን፥ «ኢስታ ኑኒ ሙሌራ ኡንኤꬃና» ጊዲ ቆፒዳ፤ ዴራን ጾሲ ጎይኔቲዛሶሆታ ኡባ ታማን ጹጊዳ።
PSA 74:9 ኑ ሻኪ ኤራናስ ማላታይ ዴና፤ ሃይሳፌ ጉዬ ናቤይ ዴንዴና፤ ሃይሲ ኣዉዴ ጋካናዉ ሃናናኮ ኤሪዛ ኣሲ ኑ ጊዶን ዴና።
PSA 74:10 ኣቤት ጾሳዉ! ኔ ሞርኬቲ ኣዉዴ ጋካናዉ ኔ ቦላ ቂልጫኔ? ኢስቲ ኔ ሱንꬃ ሜርናስ ካꬊሼ ዳኔ?
PSA 74:11 ኔ ኩሼዛ ሚጫዳ ኣይስ ኢስታ ꬋይሲኪ? ኔ ኡሻቻ ኩሼዛ ኣይስ ሾጳ ጋርሳን ሎኮማ ኡታዲ?
PSA 74:12 ኣቤት ጾሳዉ! ቤኒፔካ ታ ካዎይ ኔና፤ ኔኒ ቢታ ቦላ ኣቶቴꬅ ኤሃዳሳ።
PSA 74:13 ኔ ጊታ ዎልቃን ኣባ ሻካዳሳ፤ ኢዛ ጊዶን ዲዛ ሚሚንቴታ ሁኤ ቆኤሬꬃዳሳ።
PSA 74:14 ሌዋታኔ ጌቴቲዛ ሚሚንቴ ሁኤታ ዲንጫዳሳ፤ ኢዛ ኣሾ ባዞን ዲዛ ሜꬌታታስ ቁማ ኦꬃ ኢማሳ ።
PSA 74:15 ኔኒ ፑልቶታኔ ካንቼታ ዶያ ዬዳዳሳ፤ ኡባ ዎዴ ጎጊዛ ሻፋታ ቃሴ ሜሊሳዳሳ።
PSA 74:16 ጋላሳይ ኔሳ፤ ቃማይካ ኔሳ፤ ቃሴ ኣርሼኔ ኣጊና ኢስቲ ዲዛሶን ሚንꬃ ዎꬂዳይ ኔና።
PSA 74:17 ቢታስ ዛዋ ዎꬂዳይ፥ ባልጎኔ ቦኔ ሜꬊዳይ ኔና።
PSA 74:18 ኣቤት ጎዳዉ! ኔ ሞርኬቲ ኔ ቦላ ዎስቲ ቂልጪዳኮ፥ ቃሴ ኤያ ኣሳቲ ኔ ሱንꬃ ዎስቲ ካꬊዳኮ ቆፓ።
PSA 74:19 ኔስ ሃሬቲዛይታ ሼምፖ ዎራ ዶኣታስ ኣꬃ ኢሞፋ፤ ሜቶቲዳ ኔ ዴራ ሜርናስ ዶጎፓ።
PSA 74:20 ቢታን ዲዛ ꬉማ ሶሆቲ ኡባይ ማካላንቻታን ኩሚዳ ጊሻስ ኔኒ ኑስ ጫቂዳ ጫቆ ቃላ ቆፓ።
PSA 74:21 ናቄቲዳይቲ ዬላቲ ሲሞፌቶ፤ ማንቆቲኔ ሜቶቲዳይቲ ኔ ሱንꬃ ጋላቴቶ።
PSA 74:22 ኣቤት ጾሳዉ! ዴንዳ! ኔኒ ኔ ሱንꬃስ ሞቴታ፤ ኤያቲ ጋላስ ኡባን ኔና ካꬊዛይሳ ቆፓ።
PSA 74:23 ኔ ሞርኬቲ ኔ ቦላ ዋሲዛ ዋሶዛ፥ ኔና ኢጺዛይቲ ኔ ቦላ ጬቄቲዛ ጬቄቴꬃኔ ኢስታ ዎጫማ ዶጎፓ።
PSA 75:1 ኣቤት ጾሳዉ! ኔና ጋላቶስ፤ ኔ ኑስ ማታ ጊዲዳ ጊሻስ ኔ ሱንꬃስ ጋላታ ሺሾስ፤ ኣሳይካ ማላሊሲዛ ኔ ኦሶ ኡባ ጊሻስ ሃሳዬስ።
PSA 75:2 ጾሲ፥ «ታ ባራ ዎꬂዳ ዎዴን ሱሬ ፒርዳ ፒርዳናይ ታና።
PSA 75:3 ሳኣይኔ ኢዛ ቦላ ዲዛ ሜꬌታ ኡባይ ቃጺዛ ዎዴ ሳኣ ቱሳታ ሚንꬃ ኤሲዳይ ታና።
PSA 75:4 ኦቶራንቻታ፥ ‹ኦቶሬቶፍቴ› ጋይስ፤ ኢታታካ፥ ‹ኢንቴ ማካሎፍቴ።
PSA 75:5 ኔ ካጬ ኦቶሮን ꬎቁ ꬎቁ ሂስቶፋ፤ ኔ ቆꬌ ቃꬃ ሃሳዮፓ› ጋይስ» ጌስ።
PSA 75:6 ቦንቾይ ኣርሼይ ሞኪዛሶፔ ዎይኮ ዉሊዛሶፔ ዎይኮ ባዞፌ ዬና።
PSA 75:7 ጊዶ ኣቲን ሱሬ ፒርዲዛይ ጾሳ፤ ኢዚ ኢሳ ቦላ ፒርዴስ፤ ኢሳ ጺሊሴስ።
PSA 75:8 ጎዳ ኩሼን ዋንጫይ ዴስ፤ ኢዛን ሆሞቲዛ ሃንቆ ዎይኔ ኡሺ ኩሚ ኡቲዴስ፤ ሄ ኡሻዛ ጌዴ ካሬ ጉሲዴስ፤ ሳኣን ዲዛ ማካላንቻቲ ሄሳ ኡዪዳ፤ ኢስቲ ኦርጮካ ኣሾንታ ጮንጎርሲዳ።
PSA 75:9 ታኒ ጊዲኮ ሃይሳ ሜርናስ ኣዋጃና፤ ያቆቤ ጾሳካ ማዛሙሬን ሳባና።
PSA 75:10 ታኒ ኢታታ ካጬ ኡባ ሜንꬃና፤ ጺሎታ ካጬ ጊዲኮ ꬎቁ ꬎቁ ሂስታና።
PSA 76:1 ጾሲ ዩሁዳን ኤሬቲዴስ፤ ኢዛ ሱንꬂካ ኢስራኤሌን ጊታ።
PSA 76:2 ኢዛ ዱንካኔይ ሳሌሜን ዴስ፤ ኢዛስ ዱሳሶይካ ጺዮኔ።
PSA 76:3 ኢዚ ሄሳን ዱኪዛ ዎንዳፌ ዪሻ፥ ጎንዳሌ፥ ጊꬃ ማሻታኔ ሃራ ኦላ ሚሻታ ሜንꬄሬꬂ ዬጊዴስ።
PSA 76:4 ኣቤት ጾሳዉ! ኔኒ ቦንቾ ማይኣዳ ጶላሳ፤ ኔ ቴማቴꬂ ጊታ ዙማታፔካ ኣꬌስ።
PSA 76:5 ጎባ ኦላንቻቲ ቦንቄቲዳ፤ ኢስታፌ ኢሶይካ ባ ኩሼ ዴንꬃና ዳንዳይቤና፤ ኢስቲ ዎልቃማ ꬊስኮ ꬊስኪዳ።
PSA 76:6 ኣቤት ያቆቤ ጾሳዉ! ኔ ሃንቆ ጋሶን ቶጋ ኣሳቲኔ ቶጋ ፓራቲ ኩንዲ ኣቲዳ።
PSA 76:7 ኣቤት ጾሳዉ! ኔኒ ያሻሳ! ኔ ሃንቆይ ሱሊዳ ዎዴ ኔ ሲንꬃን ኦኔ ኤቃናይ?
PSA 76:8 ኔኒ ሳሎፔ ፒርዳ ሲሳዳሳ፤ ቢታይ ያያዳ ሲርጲ ጋዱስ።
PSA 76:9 ኣቤት ጾሳዉ! ሃይሲ ሳኣ ቦላ ኡንኤቲዳይታ ኣሻናስ ኔኒ ፒርዳስ ዴንዲን ሃንዴስ።
PSA 76:10 ኔኒ ኣስ ሃንቂኮካ ሄሲ ኔ ቦንቾስ ጊዴስ፤ ኦላፔ ኣቲዳይቲ ኔ ባኣሌ ቦንቻና።
PSA 76:11 ጎዳ ኢንቴ ጾሳስ ኣዲኒቴ፤ ሄ ኣዲኔቲዳይሳካ ጋꬂቴ፤ ኢዛ ዩሾን ዲዛ ኡባቲ ኢዛስ ያሺሲዛ ኢሞታ ኤኪ ዪቴ።
PSA 76:12 ኢዚ ኦቶሬቲዛ ዳናታ ካዉሻና፤ ዎልቃማ ካዎታካ ኢዚ ያሺሳና።
PSA 77:1 ታኒ ታ ቃላ ꬎቁ ሂስታዳ ጾሳኮ ዋሳይስ፤ ታና ሲያና ማላ ታ ኢዛ ዎሳይስ።
PSA 77:2 ታኒ ሜቶቲዳ ጋላስ ጾሳ ኮያይስ፤ ኦማርሲካ ሼምፖንታ ታ ኩሼታ ኢዛኮ ሚጫይስ፤ ጊዲኮካ ታኒ ሚኔታናስ ዳንዳያቤኬ።
PSA 77:3 ኣቤት ጾሳዉ! ታ ኔና ቆፓሼ ጬጫይስ፤ ታ ዩሻ ቆፓሼ ኬሃ ዳቡርዴስ።
PSA 77:4 ታ ኣይፌፔ ꬊስኮ ꬋይሳዳሳ፤ ታስ ጋናዚ ꬋያና ጋካናስ ጬጫዲስ።
PSA 77:5 ታኒ ኣꬊዳ ዎዴታ ቆፓዲስ፤ ካሴ ኣꬊዳ ላይꬃታካ ሃሳኣዲስ።
PSA 77:6 ታ ዬጺዳይሳ ጊዶꬅ ዩሻ ቆፓዲስ፤ ታኒ ዎዚናን ኣኬካዲስ፤ ታ ኣያናይ ታና ዴንꬄꬂን፥
PSA 77:7 «ጎዳይ ኑና ሜርናስ ዬጊ ኣጋኔ? ሃይሳፌ ጉዬ ኑና ሎኦ ቤሴኔ?
PSA 77:8 ኑና ሲቂዛይሳ ሙሌራ ኣጊዴ? ኢዚ ዮቲዳ ሂዶታይ ሻሬቲዴ?
PSA 77:9 ጾሲ ባ ማሪዛይሳ ኣጊዴ? ሃንቆን ባ ቃꬌታ ኣጊዴ?» ጋ ኦይቻይስ።
PSA 77:10 ኡባፌ ꬎቃ ጾሳዉ! ታና ቆሂዳይ፥ ኔ ኡሻቻ ኩሼይ ካሴይሳꬆ ኑና ማዶንታ ኣጎይሳ።
PSA 77:11 ጎዳዉ! ኔ ኦሶታ ታኒ ቆፓና፤ ኔኒ ቤኒ ዎዴ ኦꬂዳ ማላሊሲዛ ኦሶታ ኡባ ታ ዩሻ ቆፓና።
PSA 77:12 ኔ ኦꬂዳ ኡባ ታኒ ዛራ ዛራዳ ቆፓና፤ ኔ ዎልቃማ ኦሶታ ኡባ ታኒ ኣኬካና።
PSA 77:13 ኣቤት ጾሳዉ! ኔ ኦጌይ ጌሻ፤ ኑ ጾሳ ማላ ሃራ ጊታ ጾሲ ኦኔ?
PSA 77:14 ኔኒ ማላሊሲዛዝ ኦꬂዛ ጾሳ፤ ዴሬታ ጊዶን ኔ ዎልቃ ቤሳሳ።
PSA 77:15 ያቆቤኔ ዮሴፌ ዜሬꬅ ጊዲዳ ኔ ዴሬታ ኔኒ ኔ ዎልቃን ዎዛዳሳ።
PSA 77:16 ኣቤት ጾሳዉ! ሃꬃቲ ኔና ቤኢዳ፤ ሃꬃቲ ኔና ቤኢዲ ያዪዳ፤ ጪማ ኣባቲካ ኮኮሪዳ።
PSA 77:17 ሻራቲ ኢራ ኢሚዳ፤ ሳሎን ዳዳይ ጉሚዴስ፤ ዎልቃንꬂ ዋዋጪ ጊዴስ።
PSA 77:18 ኔ ዳዳ ጉንꬃይ ጎቴ ጫርኮ ጊዶን ኮሺሚዴስ፤ ኔ ዎልቃንꬃ ጶሌꬂ ሳኣ ፖኢሲዴስ፤ ቢታይካ ቃጺ ኮኮሪዴስ።
PSA 77:19 ኔኒ ኣባ ጊዶራ ሄሜታሳ፤ ጪማ ኣባ ጊዶራ ካንꬃሳ፤ ጊዲኮካ ኔ ቢዳ ጌዶይ ኤሬቴና።
PSA 77:20 ሙሴኔ ኣሮኔ ኩሼን ኔኒ ኔ ዴሬዛ ዶርሳ ዉዴ ማላ ካሌꬃዳሳ።
PSA 78:1 ታ ዴሬዞ ታ ኔና ታማርሲዛይሳ ሲያ፤ ታ ዶናፔ ኬኢዛ ቃላ ኤዝጋ።
PSA 78:2 ታኒ ሃሳይዛ ሃሳያ ሌሚሶን ዶማይስ፤ ቤኒሶፌ ቆታን ዲዛ ጹራ ዮኦ ቆንጪሳይስ።
PSA 78:3 ኑ ሲዪዳይሲኔ ኑ ኤሪዳይሲ፥ ኑ ኣዋቲካ ኑስ ዮቲዳይሳ።
PSA 78:4 ሄ ዮኦታ ኑኒ ኢስታ ናይታፔ ቆቶኮ፤ ጎዳስ ቤሲዛ ጋላታ፥ ኢዛ ዎልቃኔ ማላሊሲዛ ኢዛ ኦሶ ዪዛ ዬሌታታስካ ኑኒ ዮታና።
PSA 78:5 ኢዚ ያቆቤ ዛሬታስ ኣዛዞ፥ ኢስራኤሌ ኣሳስ ዎጋ ኢሚዴስ፤ ባንታ ናይታ ሄ ዎጋታ ታማርሳና ማላ ኣዛዚዴስ።
PSA 78:6 ሄሲካ ካሊዛ ዬሌታይ ኢስታ ኤራናሳ፤ ቃሴካ ቡሮ ዬሌታና ናይቲ ኤራናሳኔ ኢስቲካ ባንታ ናይታስ ዮታናሳ።
PSA 78:7 ሄ ናይቲካ ጾሳን ኣማኔታና፤ ኢዚ ኦꬂዳ ኦሶካ ዶጌቴና፤ ኢዛ ኣዛዞታካ ኢስቲ ናጋና።
PSA 78:8 ኢስቲ ካሴ ባንታ ኣዋታ ማላ ዎዚና ሙሜኔ ማካላንቻ ጊዴቴና፤ ኢስቲ ጾሳ ሲንꬃን ሱሬ ጊዴቴና፤ ጾሳስካ ኣማኔቲቤቴና።
PSA 78:9 ኤፍሬሜ ናይቲ ኦላስ ዎንዳፌኔ ዪሽ ጊግሲ ኬዚዳ፤ ጊዶ ኣቲን ኦላ ጋላስ ጉዬ ሲሚዳ።
PSA 78:10 ኢስቲ ጾሳ ጫቆ ቃላ ናጊቤቴና፤ ኢዛ ዎጋ ማላ ዶንታ ኢጺዳ።
PSA 78:11 ኢስቲ ኢዚ ኦꬂዳ ኦሶ ባሊዳ፤ ኢዚ ኢስቲ ቤሲዳ ማላሊሲዛ ሃኖታካ ዶጊዳ።
PSA 78:12 ኢዚ ኢስታ ኣዋቲ ቤኢሺን ጊብጼ ቢታን ጻኖሴ ዴምባን ማላታ ኦꬂዴስ።
PSA 78:13 ኣባ ሻኪዲ ጊዶራ ኢስታ ፒንꬂዴስ፤ ኢዚ ሃꬃ ያኔ ሃ ሻኪዲ ጎዳ ማላ ኤሲዴስ።
PSA 78:14 ኢዚ ኢስታ ጋላስ ሻራን፥ ኦማርስ ታማ ፖኦን ካሌꬂዴስ።
PSA 78:15 ኢዚ ባዞን ዛላ ጳልቂዲ ኣባ ማላ ዳሮ ሃꬅ ኢስታ ኡሺዴስ።
PSA 78:16 ዛላፌ ሃꬅ ፑልቲሲዲ ሻፋ ማላ ዱጌ ጎጊሲዴስ።
PSA 78:17 ጊዶ ኣቲን ኢስቲ ኢዛ ቦላ ናጋራ ኦሶ ጌዴ ጉጂዳ፤ ኡባፌ ꬎቃ ጾሳ ቦላ ባዞን ማካሊዳ።
PSA 78:18 ኢስቲ ኬሂ ኣሞቲዳ ካꬅ ኦይቺዳ፤ ኤሪሼ ባ ዎዚናን ጾሳ ፓጪዳ።
PSA 78:19 ኢስቲ ጾሳ ቦላ፥ «ባዞን ጾሲ ኑስ ማና ካꬅ ኢማና ዳንዳይዜ?
PSA 78:20 ዛላ ሾጪን ፑልቶይ ኬኢዲ ሻፋ ሃꬂ ጎጊዴስ፤ ሂስቲን ኢዚ ኑስ ሚዛ ካꬅ ኢማናዉ ዳንዳይዜ? ዎይኮ ባ ኣሳስ ኣሾ ኢማናዉ ዳንዳይዜ?» ጊ ሃሳይዳ።
PSA 78:21 ጎዳይ ሄሳ ሲዪዳ ዎዴ ኢስታ ቦላ ዳሮ ሃንቄቲዴስ፤ ያቆቤ ዛሬታ ቦላ ታማይ ኤጺዴስ፤ ኢስራኤሌ ቦላ ኢዛ ሃንቆይ ዳሪ ዳሪ ቢዴስ።
PSA 78:22 ኣይስ ጊኮ ኢስቲ ጾሳን ኣማኒቤቴና፤ ኢዚ ኣሺዛይሳካ ኣማኔቲቤቴና።
PSA 78:23 ኢዚ ጊዲኮ ቦላፌ ሻራ ኣዛዚዴስ፤ ሳሎ ፔንጌታካ ዶይዴስ።
PSA 78:24 ኢስቲ ማና ማላ ኢስታስ ማና ቡኪሲዴስ፤ ሳሎፔ ካꬅ ኢስታስ ኢሚዴስ።
PSA 78:25 ኪታንቻታ ካꬅ ኣሳይ ሚዴስ፤ ጾሲ ኢስቲ ካሊ ሚን ቲርፒ ኣቲዛ ካꬅ ኢሚዴስ።
PSA 78:26 ኣርሼይ ሞኪዛ ባጋራ ሳሎፔ ጫርኮይ ጫርካና ማላ ኦꬂዴስ፤ ባ ዎልቃን ዱጌሃ ባጋ ጫርኮ ዴንꬄꬂዴስ።
PSA 78:27 ኢዚ ኣሳስ ኣሾ ጉዱላ ቢታ ማላ፥ ኣባ ዶናን ዲዛ ኣጬ ማላ ዳሮ ፒራꬊዛ ካፎታ ዬዲዴስ።
PSA 78:28 ኢስቲ ዱንካኒ ኡቲዳሶ ዱንካና ዩሾን ዎꬊዳ።
PSA 78:29 ኢስቲ ኣሞቲዳይሳ ኢስታስ ኢሚዴስ፤ ኢስቲካ ካሊ ሚዳ።
PSA 78:30 ጊዶ ኣቲን ኢስቲ ባ ሞሳ ኣꬆንታ ቡሮ ሙሳ ቦላ ዴኢሺን፥
PSA 78:31 ጾሳ ሃንቆይ ኢስታ ቦላ ዎꬊዴስ፤ ኢስታ ጊዶፌ ሚኖ ኣሳታ ዎꬊዴስ፤ ኢስራኤሌፔ ፓያ ናቴꬃታ ሙልቂዴስ።
PSA 78:32 ሃይሲ ኡባይ ሃኒንካ ኢስቲ ናጋራ ኦꬂዛይሳ ኣጊቤቴና፤ ማላሊሲዛ ኢዛ ኦሶታካ ቤኢዲ ኣማኒቤቴና።
PSA 78:33 ሄሳ ጊሻስ ኢዚ ኢስታ ላይꬃታ ፔኖ ማላ ኣꬂዴስ፤ ኢስቲ ዲዛ ዎዴታ ሂርጋን ዉርሲዴስ።
PSA 78:34 ጾሲ ኢስታፌ ጉꬃታ ዎꬊን ኣቲዳይቲ ባ ናጋራ ፓጺዳ፤ ዎዚናፔ ኮዪሼ ጾሳኮ ሲሚዳ።
PSA 78:35 ኢስቲ ጾሲ ኢስታስ ዛላ ጊዲዳይሳኔ ኡባፌ ꬎቃ ጾሲ ኢስታ ዎዚዳይሳ ሃሳኢዳ።
PSA 78:36 ጊዶ ኣቲን ኢስቲ ባንታ ኢንጻርሳን ኢዛስ ዎርዶቲዲ ባንታ ዶናን ጪሚዳ።
PSA 78:37 ኢስታ ዎዚናይ ጾሳን ሚኒ ኤቂቤና፤ ኢዚ ኢስታራ ጫቄቲዳ ጫቆን ኣማኔቲቤቴና።
PSA 78:38 ጊዶ ኣቲን ኢዚ ኢስታ ማሪዛዴ ጊዲዳ ጊሻስ ኢስታ ኢታቴꬃ ኣቶ ጊዴስ፤ ኢስታካ ꬋይሲቤና፤ ዳሮ ዎዴ ባ ሃንቆዛ ኢስታ ቦላፌ ቴቂዴስ፤ ባ ሃንቆዛ ቦሻ ኡባ ኢስታ ቦላ ዬዲቤና።
PSA 78:39 ኢሲኖ ጫርኪ ኣꬊዳፔ ጉዬ ሲሞንታ ጫርኮ ማላ ኣሾ ማይኢዳ ኣስ ጊዲዳይሳ ኣኬኪዴስ።
PSA 78:40 ኢስቲ ባዞን ኣፑንቶ ኢዛ ቦላ ማካሊዶ! ሜላ ባዞን ኣፑንቶ ኢዛ ላንጪሲዶ!
PSA 78:41 ኢስቲ ዛሪ ዛሪዲ ጾሳ ፓጪዳ፤ ኢስራኤሌ ጌሻ ማዱንꬂዳ።
PSA 78:42 ኢዚ ኢስታ ሞርኬታፔ ዎዚዳ ጋላሳታኔ ኢዛ ዎልቃ ዶጊዳ።
PSA 78:43 ኢዚ ጊብጼ ቢታን ማላታ፥ ጻኖሴ ዴምባን ማላሊሲዛዝ ኦꬂዳይሳ ቆፒቤቴና።
PSA 78:44 ኢስታ ሻፋ ሃꬃ ሱꬃን ላሚዴስ፤ ሄሳ ጊሻስ ጊብጼ ኣሳቲ ሄ ሻፋታፔ ኡያናስ ዳንዳይቤቴና።
PSA 78:45 ኢስታ ኦላናስ ኡዱንጼታኔ ኢስታ ቢታ ꬋይሳናስ ሾꬌታ ኪቲዴስ።
PSA 78:46 ኢስታስ ሞኪዳ ካꬃ ጉምባሮስ፤ ኢስቲ ኦꬂ ዳቡርዳ ካꬃ ቦሌስ ኢሚዴስ።
PSA 78:47 ኢስታ ዎይኔ ቱራ ሻቻን፥ ኢስታ ባላሴ ሚꬃታካ ኬንቾን ꬋይሲዴስ።
PSA 78:48 ኢስታ ሚዛታ ሻቻን ዎꬊዴስ፤ ኢስታ ሜሄታ ዎልቃንꬃን ጹጊ ዉርሲዴስ።
PSA 78:49 ባ ሚኖ ሃንቆ፥ ቦሻ፥ ባሺኔ ꬋይሲዛ ኪታንቻታን ኢስታ ቦላ ዬዲዴስ።
PSA 78:50 ባ ሃንቆዛስ ኦጌ ጊግሲዴስ፤ ኢስታ ኢታ ሃርጌስ ኣꬂ ኢሚዴስ፤ ጊዶ ኣቲን ሃይቆፔ ኣሺቤና።
PSA 78:51 ጊብጼን ዬሌቲዳ ባይራ ናይታ ኡባ ዎꬊዴስ፤ ካሜ ዱንካኔን ኮይሮ ዬሌቲዳ ናይታ ዉርሲዴስ።
PSA 78:52 ጊዶ ኣቲን ኢዚ ባ ኣሳ ዶርሳ ማላ ኬሲ ሄሚዴስ፤ ዉዴ ማላ ባዞን ካሌꬂዴስ።
PSA 78:53 ኢዚ ኢስታ ሳሮን ካሌꬂዴስ፤ ኢስቲካ ሂርጊቤቴና፤ ኢስታ ሞርኬታ ጊዲኮ ኣባይ ሚቲዴስ።
PSA 78:54 ሂስቲዲ ባ ጌሻ ቢታ፥ ባ ኡሻቻ ኩሼን ጾኒ ኦይኪዳ ዙማ ኤፊዴስ።
PSA 78:55 ኢዚ ኢስታ ሲንꬃፌ ካዎቴꬃ ጎዲዲ ኢስታ ቢታ ኢስራኤሌ ዛሬታስ ጊሼሬꬂ ኢሚዲ ኢስታ ላቲሲዴስ፤ ኢስራኤሌ ኣሳ ኢስታ ሞርኬታ ኬꬃን ዎꬂዴስ።
PSA 78:56 ኢስቲ ጊዲኮ ኡባፌ ꬎቃ ጾሳ ቦላ ማካሊዳ፤ ኢዛ ፓጪዲ ኢዛ ዎጋታካ ናጎንታ ኢጺዳ።
PSA 78:57 ኢስቲ ቤኒ ባንታ ኣዋታ ማላ ማካላንቻታኔ ካዲዛይታ ጊዲዳ፤ ኣማንꬆንታ ቦካ ቶማን ኤቂዳ ቶራ ማላ ጊዲዳ።
PSA 78:58 ኢስቲ ጎይኒዛ ꬎቃሶሆታን ኢዛ ዪሎቺዳ፤ ባንታ ኤቃ ጾሳታን ኢዛ ቃናቲሲዳ።
PSA 78:59 ሂስቲን ጾሲ ሄሳ ሲዪዲ ኬሂ ሃንቄቲዴስ፤ ኢስራኤሌ ሙሌራ ዬጊ ኣጋጊዴስ።
PSA 78:60 ኣሳ ጊዶን ኢዚ ቶኪዳ ዱንካና ሴሎን ባ ዲዛሶዛ ዬጊ ኣጊዴስ።
PSA 78:61 ጾሳ ዎልቃሲኔ ቦንቾስ ማላታ ጊዲዳ ታቦታ ሞርኬታ ኩሼን ኣꬂ ኢሚዴስ።
PSA 78:62 ኢዚ ባ ዴራ ቦላ ሃንቄቲዴስ፤ ኢስታ ጊꬃ ማሻስ ኣꬂ ኢሚዴስ።
PSA 78:63 ኢስታ ፓንꬃታ ታማይ ሚዴስ፤ ሂስቲን ኢስታ ጌላኦቲ ኣዚና ጌሎንታ ኣቲዳ።
PSA 78:64 ኢስታ ቄሴቲ ማሻን ዉሪዳ፤ ኢስታ ማቼቲካ ዬካናስ ዳንዳይቤቴና።
PSA 78:65 ሄሳፌ ጉዬ ጎዳይ ꬊስኮፌ ቤጊዛ ማላ ቤጊዴስ፤ ዎይኮ ዎይኔ ኡሹ ኡዪ ማꬆቲዳ ቃራይ ማꬆፌ ቤጊዛ ማላ ዴንዲዴስ።
PSA 78:66 ኢዚ ባ ሞርኬታ ሾጪዲ ጉዬ ዛሪዴስ፤ ኢስቲ ሜርናስ ዬላታና ማላ ኦꬂዴስ።
PSA 78:67 ዮሴፌ ዱንካኔ ካꬊዴስ፤ ኤፍሬሜ ቆሞታ ዶሪቤና።
PSA 78:68 ጊዶ ኣቲን ኢዚ ዩሁዳ ዛሬኔ ባ ሲቂዛ ጺዮኔ ዙማ ዶሪዴስ።
PSA 78:69 ሄሳን ኢዚ ጾሳ ኬꬃ ሳሎ ኬሲ ꬎቃን ኬጺዴስ፤ ሳኣ ማላ ሜርናስ ኤሲዴስ።
PSA 78:70 ባ ኣይሌ ዳዊቴ ዶሪዲ ዶርሳ ዉዴ ሄሚዛሶሆፔ ኤኪዴስ።
PSA 78:71 ኢዛ ዶርሳታ ሄሚዛሶሆፔ ኬሲዲ ባ ዴሬ ያቆቤኔ ባ ጺንጾ ኢስራኤሌ ሄንꬃንቻ ኦꬂዴስ።
PSA 78:72 ሂስቲን ዳዊቲካ ኢስታ ሱሬ ዎዚናን ሄሚዴስ፤ ቃሴካ ሂላን ኢስታ ካሌꬂዴስ።
PSA 79:1 ኣቤት ጾሳዉ! ካዎቴꬃቲ ኔ ቢታ ዎራጂዳ፤ ጌሻ ጊዲዳ ጾሳ ኬꬃ ቱኒሲዳ፤ ዬሩሳላሜ ላሊ ዬጊዳ።
PSA 79:2 ኢስቲ ኔ ኣይሌታ ኣሃ ሳሎ ካፎታስ ቁማ ኦꬂዲ ኢሚዳ፤ ቃሴ ኔ ጌሻ ኣሳታ ኣሾ ሳኣ ዶኣታስ ኢሚዳ።
PSA 79:3 ኢስታ ሱꬅ ዬሩሳላሜ ዩሾን ሃꬃ ማላ ጉሲዳ፤ ኢስታ ኣሃ ሞጊዛ ኣሲ ꬋይዴስ።
PSA 79:4 ኑ ሾሮታስ ኑኒ ቂልጫስ ጊዲዶስ፤ ኑ ሄራን ዲዛይታስ ቂꬌሲኔ ሚቻስ ኣቲዶስ።
PSA 79:5 ኣቤት ጎዳዉ! ሃይሲ ኣዉዴ ጋካናስ ሃናኔ? ኔኒ ሜርናስ ሃንቄታኔ? ኔ ቃናቴይ ታማ ማላ ኤጺሼ ዴኣኔ?
PSA 79:6 ኔና ኤሮንታ ዴሬታ ቦላኔ ኔ ሱንꬃ ጼይጎንታ ካዎቴꬃታ ቦላ ኔ ሃንቆዛ ጉሳ።
PSA 79:7 ኣይስ ጊኮ ኢስቲ ያቆቤ ዜሬꬃታ ዎꬊዳኔ ኢስቲ ዴኢዛሶዚካ ሙሌራ ꬋይሲዳ።
PSA 79:8 ካሴ ኑ ኣዋታ ናጋራ ኑ ቦላ ቆዶፓ፤ ኤሶን ኔ ማሮታ ኑስ ኪታ፤ ኣይስ ጊኮ ኑኒ ኬሂፔ ሜቶቲዶስ።
PSA 79:9 ኣቤት ኑና ኣሺዛ ጾሳዉ! ኔ ሱንꬃ ቦንቾ ጊሻስ ኑና ማዳ፤ ኔ ሱንꬃ ጊሻስ ኑና ኣሻ፤ ኑ ናጋራካ ኣቶ ጋ።
PSA 79:10 ካዎቴꬃቲ፥ ኣይስ «ኢስታ ጾሲ ኣዋን ዲዜ?» ጋኔ? ኔ ኣይሌታ ሱꬅ ኢስቲ ጉሲዳይሳ ኔኒ ሃሎ ኬሲዛይሳ ኑ ኣይፌይ ቤኢሺን ካዎቴꬃታ ኤሪሳ።
PSA 79:11 ቃሾ ኣሳታ ኦሌይ ኔ ሲንꬅ ጋኮ፤ ሃይቆስ ፒርዴቲዳይታ ኔ ሚኖ ቄሴን ኣሻ።
PSA 79:12 ኣቤት ጎዳዉ! ኑ ሾሮቲ ኔና ቂꬊዳይሳ ሃሎ ላፑን ኩሼ ኢስታስ ዛራ።
PSA 79:13 ሄ ዎዴ ኑኒ ኔ ዴሬቲኔ ኔስ ዉዴ ዶርሳቲ ሜርናስ ጋላታ ኔስ ኢማና፤ ዬሌታፔ ዬሌታ ጋካናስ ኔኒ ኑስ ኦꬂዳ ኦሶዛ ኑ ዮታና።
PSA 80:1 ኣቤት ኢስራኤሌ ሄንꬃንቻዉ! ዮሴፌ ናይታ ዉዴ ማላ ካሌꬂዛይሶ! ኔኒ ኑ ዎሳ ሲያ፤ ኪሩቤታ ቦላራ ዲዛ ኣራታን ኡቲዳይሶ! ኔ ፖኦን ቆንጫ።
PSA 80:2 ኤፍሬሜ፥ ቢኒያሜኔ ሚናሴ ሲንꬃን ቆንጫ ቤታ፤ ኔ ዎልቃ ዴንꬃዳ ያዳ ኑና ኣሻ።
PSA 80:3 ኣቤት ጾሳዉ! ኑና ዛራ፤ ኑኒ ኣታና ማላ ኔ ኣይፌሶ ኑስ ፖኢሳ።
PSA 80:4 ኣቤት ጎዳዉ ኡባፌ ዎልቃማ ጾሳዉ! ኔ ኣሳ ዎሳ ቦላ ኣዉዴ ጋካናስ ኔ ሃንቄታኔ?
PSA 80:5 ኔኒ ኢስታ ዬሆ ቁማ ማላ ሚዛዳሳ፤ ቃሴ ኣፉንꬃ ሃꬃ ማላ ኡሻዳሳ።
PSA 80:6 ኑ ሾሮቲ ኑ ቢታ ኤካናስ ባንታ ጊዶን ኦዬታና ማላ ኦꬃዳሳ፤ ኑ ሞርኬቲካ ኑ ቦላ ሚጪዳ።
PSA 80:7 ኣቤት ኡባፌ ዎልቃማ ጾሳዉ! ኑና ዛራ፤ ኑኒ ኣታና ማላ ኔ ኣይፌሶ ኑስ ፖኢሳ።
PSA 80:8 ኔኒ ጊብጼፔ ዎይኔ ኣኖ ኤሃዳሳ፤ ካዎቴꬃታ ዬዴꬃዳ ኢስታ ቢታን ኢዞ ቶካዳሳ።
PSA 80:9 ኔኒ ኢዚስ ቢታ ቄጻ ጊጊሳዳሳ፤ ሂስቲን ጻጶ ዬዳዳ ቢታ ኡባ ጋካዱስ።
PSA 80:10 ዙማቲ ኢዚ ኩዋን፥ ሊባኖሴ ዚጋቲ ኢዚ ሃጋታን ካሜቲዳ።
PSA 80:11 ባ ሃጋታ ሜዲቴራኔ ኣባ ጋካናስ ቃሴ ባ ጼራታ ኤፊራጺሴ ሻፋ ጋካናስ ዬዳዱስ።
PSA 80:12 ሂስቲን ኦጌራ ኣꬊዛ ኡባይ ኢዚ ኣይፌ ዱꬂ ማና ማላ ኢዚ ዩሾዛን ዲዛ ጊምቤዛ ኣይስ ላላዲ?
PSA 80:13 ባዞ ጉዱንꬂ ኢዚ ቦላ ዱሪ ካኤስ፤ ቃሴ ዎራ ዶኣቲ ኡባይ ኢዞ ሜቴስ።
PSA 80:14 ኣቤት ኡባፌ ዎልቃማ ጾሳዉ! ኔኒ ኑኮ ሲማ፤ ሳሎራ ዱጌ ጼላዳ ኑና ቤኣ፤ ሃኖ ዎይኔ ሚꬃዮ ናጋ።
PSA 80:15 ኢዛ ኔ ኡሻቻ ኩሼይ ቶኪዳ ፑቴ፤ ኔኒ ኔስ ጋዳ ዲቺዳ ኣጫ።
PSA 80:16 ሞርኬቲ ኔ ዎይኔ ቄጺዲ ታማን ጹጊዳ፤ ሄሳ ጊሻስ ኔኒ ኢስታ ኔ ሃንቆዛ ሱሌን ꬋይሳ።
PSA 80:17 ኔ ኩሼይ ኔ ኡሻቻ ባጋራ ዲዛ ኣሳ ኔኒ ኔስ ዲቺዳ ኣሳ ናጎ።
PSA 80:18 ሃይሳፌ ጉዬ ኑኒ ኔና ኣጊዲ ጉዬ ሲሞኮ፤ ኑና ሼምፖራ ፓጻ ዎꬃ፤ ኑኒካ ኔና ጋላታና።
PSA 80:19 ኣቤት ኡባፌ ዎልቃማ ጾሳዉ! ኑና ዛራ፤ ኑኒ ኣታና ማላ ኔ ኣይፌሶ ኑስ ፖኢሳ።
PSA 81:1 ኑስ ዎልቃ ጊዲዳ ጾሳስ ኡፋይሳን ዬጺቴ፤ ያቆቤ ጾሳስ ኢሊሊቴ!
PSA 81:2 ማዛሙሬ ዶሚቴ፤ ካራቤ ባቂቴ፤ ዲꬃኒኔ ማሲንቆን ሎኦ ማዛሙሬ ዬጺቴ።
PSA 81:3 ኣጊናይ ጼሪዛ ዎዴኔ ꬉማን ጌሊዛ ዎዴ ባኣሌስ ዛዬ ፑኒቴ።
PSA 81:4 ሃይሲ ኢስራኤሌስ ዎጋ፤ ያቆቤ ጾሳይ ኢሚዳ ኣዛዞ።
PSA 81:5 ጊብጼ ቢታ ኢዚ ዬዲ ኬዚዳ ዎዴ ዮሴፌ ዛሬታስ ዎጋ ሂስቲ ዎꬂዴስ፤ ታኒ ኤሮንታ ቃላራ ኢዚ ታስ፥
PSA 81:6 «ኢንቴ ሃሼፔ ቶሆ ዎꬃዲስ፤ ኢንቴ ኩሼ ዴጾ ጎሾፔ ሼምፒሳዲስ።
PSA 81:7 ኢንቴ ሜቶ ዎዴ ታና ጼይጊዴታ፤ ሂስቲን ታኒ ኢንቴና ኣሻዲስ፤ ታኒ ሻራ ጊዶራ ዳዳን ኢንቴና ኣላዲስ፤ ማሪባ ጌቴቲዛ ፑልቶ ሃꬃ ማታን ታኒ ኢንቴና ፓጫዲስ።
PSA 81:8 «ታ ዴሬዞ! ታኒ ኔና ሴሪዛይሳ ሲያ! ኢስራኤሌ ኣሳዉ! ኔ ታና ኤዝጋ ሲዪዳኮ ኣዜ ዲዛይ!
PSA 81:9 ኢንቴ ጊዶን ኣላጋ ጾሲ ዶፖ፤ ሃራ ጾሳስ ጎይኖፍቴ።
PSA 81:10 ታኒ ጎዳ ኢንቴ ጾሳ፤ ኢንቴና ጊብጼ ቢታፌ ኬሳዳ ኤሂዳይ ታና ኢንቴ ጎዳ፤ ኔ ዶና ኬሃ ሃንጋ፤ ታኒ ኔና ቱꬃና።
PSA 81:11 «ጊዶ ኣቲን ታ ኣሳቲ ታ ቃላ ሲዪቤቴና፤ ኢስራኤሌቲ ታስ ኩሼ ኢሚቤቴና።
PSA 81:12 ሄሳ ጊሻስ ታኒ ኢስቲ ባ ዎዚና ሙሜቴꬃꬆ ባ ዶሶይሳ ሃናና ማላ ኣጋጋዲስ።
PSA 81:13 «ታ ዴሬይ ታና ሲዪዳኮ! ኢስራኤሌ ኣሳይ ታ ኦጌ ካሊዳኮ!
PSA 81:14 ታኒ ኢስታ ሞርኬታ ኢስታስ ጉልባቲሳና፤ ኢስታ ባሊጋራታካ ታ ሾጫናኮሺን።
PSA 81:15 ጎዳ ኢጺዛይቲ ኢዛ ሲንꬃን ኩንዳና፤ ኢስቲ ሜርናስ ቃጻዬታና።
PSA 81:16 ጊዶ ኣቲን ታኒ ኢንቴና ሙሩታ ጊስቴ ሚዛና፤ ቃሴ ዛላፌ ኢንቴና ኤስ ካልሳና» ጊሺን ሲያዲስ።
PSA 82:1 ጾሲ ሳሎን ዲዛ ዱላታ ካሌꬄስ፤ ጾሳቲ ኡባይ ሺቂን ኢስታ ቦላ ፒርዲሼ፥
PSA 82:2 «ኢንቴ ኣዉዴ ጋካናዉ ጌላ ፒርዳ ፒርዳኔ? ኢታታካ ኣዉዴ ጋካናስ ማዳኔ?
PSA 82:3 ዎልቃይ ባይንዳይታሲኔ ዪኦታስ ቱማ ፒርዳ ፒርዲቴ፤ ማንቆኔ ናቄቲዳ ኣሳታ ማታ ናጊሲቴ።
PSA 82:4 ዳቡራንቻታኔ ሜቶታንቻታ ኣሺቴ፤ ኢታታ ኩሼፔካ ኢስታ ዎꬂ ኤኪቴ።
PSA 82:5 «ኢንቴስ ኣይኮ ኤራቴꬂኔ ኣኬካይ ዴና፤ ኢንቴ ꬉማን ሲሜሬቴታ፤ ቢታ ዮቻቲ ኡባይ ቃጼቴስ።
PSA 82:6 «ታኒ ኢንቴና፥ ‹ኢንቴ ጾሳታ፤ ኢንቴ ኡባይካ ኡባፌ ꬎቃ ጾሳ ናይታ› ጋዲስ።
PSA 82:7 ‹ጊዶ ኣቲን ኢንቴ ኣሲ ሃይቂዛ ማላ ሃይቃና፤ ቃሴ ሃራ ሃላቃቲ ኩንዲዛ ማላ ኢንቴካ ኩንዳና› ጋይስ» ጌስ።
PSA 82:8 ኣቤት ጾሳዉ! ዴንዳ! ሳኣ ቦላ ፒርዳ፤ ካዎቴꬂ ኡባይ ኔሳ።
PSA 83:1 ኣቤት ጾሳዉ! ጮኡ ጎፓ! ሲርጲ ጎፓ! ኣቤት ጾሳዉ! ቄሊ ጎፓ!
PSA 83:2 ቤኣ! ኔ ሞርኬቲ ኔ ቦላ ዴንዲዳ፤ ኔና ኢጺዛይቲ ኔ ቦላ ባ ቆꬌ ቃꬂዳ።
PSA 83:3 ኢስቲ ኔ ኣሳ ቦላ ጌማን ጌኔ ዱላቲዳ፤ ኔኒ ሲቂዛ ኣሳታ ቦላ ማቄቲዳ።
PSA 83:4 ኢስቲ፥ «ሃ ዪቴ! ኢስታ ካዎቴꬃ ꬋይሶስ፤ ኢስራኤሌ ጌቴቲዛ ሱንꬂ ሜርናስ ሃሳኤቶንታ ማላ ኦꬆስ» ጊዳ።
PSA 83:5 ኢስቲ ኢሲ ዎዚና ጊዲዲ ኢሲፌ ማቄቲዳ፤ ኔ ቦላ ዴንዳናስ ጫቄቲዳ።
PSA 83:6 ኢስቲካ ኤዶሜ ኣሳታ፥ ኢስማኤሌ ኣሳታ፥ ሞኣቤ ዛሬታ፥ ኣጋሪ ዛሬታ፥
PSA 83:7 ጌባሌ ኣሳታ፥ ኣሞኔ ኣሳታ፥ ኣማሌቄ ኣሳታ፥ ፊሊስጼሜ ኣሳታኔ ጺሮሴ ኣሳታ።
PSA 83:8 ኣሶሬ ኣሳቲ ኢስታራ ኢሲፌቴꬅ ሜꬊዳ፤ ሎጼ ዛሬታስካ ማዶ ጊዲዳ።
PSA 83:9 ኔኒ ሚዲያሜ ኣሳታ ቦላ፥ ሲሳራኔ ያቢኔ ቦላ ቂሶኔ ሻፋን ኦꬂዳ ማላ ኢስታ ቦላ ኦꬃ።
PSA 83:10 ኢስቲ ኤን-ዶሬ ጌቴቲዛሶን ꬋይዳ፤ ኢስታ ኣሃይ ሞጌቶንታ ቢታ ቦላ ዎቂዴስ።
PSA 83:11 ኦሬቤ ቦላኔ ዛኤቤ ቦላ ኦꬂዳ ማላ ኢስታ ሃላቃታ ቦላ ኦꬃ፤ ዜባሃኔ ጻልሙና ꬋይሲዳ ማላ ኢስታ ሃሪዛይታካ ኔኒ ꬋይሳ።
PSA 83:12 ሄይቲ፥ «ኑኒ ጾሳ ኣሳ ቢታ ኑስ ቡዞꬃና» ጊዳይታ።
PSA 83:13 ኣቤት ታ ጾሳዉ! ኢስታ ጉዱላ ማላ ላላ፤ ጫርኮይ ኤፊዛ ሱላ ማላ ኦꬃ።
PSA 83:14 ጻራጋይ ዎራ ሚዲ ዉርሲዛ ማላ፥ ታማ ላጮይ ዙማ ማይኢዛ ማላ፥
PSA 83:15 ጎቴን ኔ ኢስታ ዳጋንꬃ፤ ኔ ኡሾንካ ኢስታ ዬዴꬃ።
PSA 83:16 ኣቤት ጎዳዉ! ኣሳይ ኔ ሱንꬅ ኮያና ማላ ኔኒ ኢስታ ኣይፌሶ ዬላ ማይዛ።
PSA 83:17 ኢስቲ ሜርናስ ዬላቴቶ፤ ሂርጌቶኔ ካዉዪ ꬋዬቶ።
PSA 83:18 ኔ ሱንꬃይ ጎዳ ጊዲዳይሳኔ ሳኣ ኡባ ቦላ ኔኒ ጻላ ኡባፌ ꬎቃ ጾሳ ጊዲዳይሳ ኢስቲ ኤሬቶ።
PSA 84:1 ኣቤት ሜꬌቴꬃ ጎዳዉ! ኔኒ ዴኢዛሶይ ኣይ ማላ ሎኦሶ!
PSA 84:2 ታኒ ጎዳ ኬꬃ ዛጎ ላሞታይስ፤ ታኒ ኩሜꬃ ዎዚናፔ ዴኦ ጾሳስ ኡፋይሳን ዬጻይስ።
PSA 84:3 ኣቤት ኡባፌ ዎልቃማ ጎዳዉ! ታ ካዎዞ ጾሳዉ! ኔስ ያርሾ ያርሺዛሶዛ ማታን ሲኔ ካፎይ ባስ ዴኢዛሶ ዴማዱስ። ሃራጴያካ ባስ ዬሊዛሶ ኬጻዱስ።
PSA 84:4 ኔ ኬꬃን ዴኢዛይቲኔ ሜርናስ ኔና ሳቢዛይቲ ኣንጄቲዳይታ።
PSA 84:5 ባንታስ ኔና ዎልቃ ኦꬂዛይቲ፥ ጺዮኔ ኦጌ ባ ዎዚናን ኣሞቲዛይቲ ኣንጄቲዳይታ።
PSA 84:6 ባካ ጌቴቲዛ ሃꬂ ባይንዳ ሻፋራ ኢስቲ ካንꬂዛ ዎዴ ሄ ሶሆን ፑልቶይ ꬉቃና፤ ባꬌሳ ኢራይካ ቡኪዲ ቢታ ካልሳና።
PSA 84:7 ኢስቲ ዎልቃ ቦላ ዎልቃ ጉጂ ጉጂ ባና፤ ኢስቲ ጾሳ ሲንꬃን ጺዮኔን ቤታና።
PSA 84:8 ኣቤት ኡባፌ ዎልቃማ ጎዳዉ! ታ ዎሳ ኔኒ ሲያ። ኣቤት ያቆቤ ጾሳዉ! ታ ጊዛዝ ኤዝጋ።
PSA 84:9 ኣቤት ጾሳዉ! ኔኒ ዶራ ቲይዳ ኑ ካዎዛ ኣንጃ፤ ኢዚ ኑስ ጎንዳሌ ጊዲዳ ጊሻስ ኔ ኢዛ ጼላ።
PSA 84:10 ሃራሶን ሺ ጋላስ ዴኣናፔ ጾሳ ኬꬃን ኢሲ ጋላስ ዱሲ ሎኦ፤ ኢታታ ዱንካኔን ዳናፔ ጾሳ ኬꬃ ዛጎን ዛቤ ጊዴꬂ ታስ ሎኦ።
PSA 84:11 ጎዳይ ኑስ ኣርሼኔ ጎንዳሌ፤ ኢዚ ኣዮቴꬃኒኔ ቦንቾን ኑና ናጌስ፤ ሱሬቴꬃን ሄሜቲዛይታ ኢዚ ሎኦ ሚሽ ዲጌና።
PSA 84:12 ኣቤት ኡባፌ ዎልቃማ ጎዳዉ! ኔናን ኣማኔቲዛይቲ ኣንጄቲዳይታ።
PSA 85:1 ኣቤት ጎዳዉ! ኔኒ ኔ ቢታስ ኪያቴꬅ ቤሳዳሳ፤ ያቆቤ ዲኤቲዳሶፔ ዛራዳሳ።
PSA 85:2 ኔኒ ኔ ኣሳ ናቆ ኣቶ ጋዳሳ፤ ኢስታ ናጋራ ኡባ ካማዳሳ።
PSA 85:3 ኔኒ ዪሎቲዛይሳ ኡባ ኣጋዳሳ፤ ሱሊዛ ኔ ሃንቆፌካ ሲማዳሳ።
PSA 85:4 ኣቤት ኑና ኣሺዛ ጾሳዉ! ኔ ኑና ዛራ፤ ኔኒ ኑ ቦላ ላንጬቲዳይሳ ኣጋ።
PSA 85:5 ኔኒ ኑና ሜርናስ ሃንቄታኔ? ኔ ሃንቆይ ዬሌታፔ ዬሌታ ጋካናዉ ጋምኣኔ?
PSA 85:6 ኔ ኣሳይ ኔናን ኡፋዬታና ማላ፥ ኔ ኑና ኦራጺሲኪ!
PSA 85:7 ኣቤት ጎዳዉ! ኔ ሜርና ሲቆዛ ኑና ቤሳ፤ ኔኒ ኑና ኣሻ።
PSA 85:8 ታኒ ጎዳ ጾሲ ዮቲዛይሳ ሲያና፤ ኢስቲ ሲሚዲ ባላ ኦጌን ቦንታ ኣጊኮ፥ ባ ጌሻ ዴራስ ሳሮቴꬅ ኤሃናስ ሂዶታ ኢሚዴስ።
PSA 85:9 ኢዛ ቦንቾይ ኑ ቢታን ዳና ማላ ኣቶቴꬃይ ኢዛስ ያዪዛይታስ ማታን ዴስ።
PSA 85:10 ሲቆይኔ ቱማቴꬂ ኢሲፌ ሲጌቴቴስ፤ ጺሎቴꬂኔ ሳሮቴꬂ ኢሲፌ ኢዲሜቴቴስ።
PSA 85:11 ኣማኔቴꬂ ሳኣፔ ፑዴ ኬዛና፤ ጾሳ ጺሎቴꬂ ሳሎፔ ዱጌ ዎꬋና።
PSA 85:12 ቤኢቴ! ጎዳይ ሎኦ ሚሽ ኢማና፤ ኑ ቢታይካ ሎኦ ካꬅ ሞኪሳና።
PSA 85:13 ጺሎቴꬂ ኢዛፔ ሲንꬃራ ባና፤ ኢዚ ባናሶካ ኢዛስ ጊጊሳና።
PSA 86:1 ኣቤት ጎዳዉ! ታኒ ሂዬሳኔ ሜቶታንቻ ጊዲዳ ጊሻስ ታ ዋሶዛ ሲያዳ ታስ ዛሮ ኢማ።
PSA 86:2 ታኒ ኔስ ዱማ ኣስ ጊዲዳ ጊሻስ ኔ ታ ሼምፖ ናጋ፤ ኔኒ ታ ጾሳ፤ ኔናን ኣማኔቲዛ ኔ ኣይሌዛ ታና ኣሻ።
PSA 86:3 ኣቤት ጎዳዉ! ኩሜꬃ ጋላስ ታ ኔኮ ዋሲዛ ጊሻስ ኔ ታና ማራ።
PSA 86:4 ኣቤት ጎዳዉ! ታኒ ዎዚናፔ ኔና ዎሲዛ ጊሻስ ታና ኔ ኣይሌዛ ኡፋይሳ።
PSA 86:5 ኣቤት ጎዳዉ! ኔኒ ኑስ ኪያኔ ኣቶ ጊዛዴ፤ ኔና ዎሲዛ ኡባስ ኔ ሜርና ሲቆ ቤሳሳ።
PSA 86:6 ኣቤት ጎዳዉ! ታ ዎሳ ሲያ፤ ታ ሾባ ዎሲዛይሳ ኤዝጋ።
PSA 86:7 ኔ ታስ ዛሮ ኢሚዛ ጊሻስ ታኒ ሜቶ ጋላሳን ኔኮ ዋሳይስ።
PSA 86:8 ኣቤት ጎዳዉ! ኔ ማላይ ጾሳታ ጊዶን ባዋ፤ ኔ ኦሶራ ጊናቲዛ ኦሶይካ ዴና።
PSA 86:9 ኣቤት ጎዳዉ! ኔኒ ሜꬊዳ ካዎቴꬃይ ኡባይ ኔኮ ዪዲ ኔስ ጎይናና፤ ኔ ሱንꬃካ ቦንቻና።
PSA 86:10 ኔኒ ጊታ፤ ማላሊሲዛ ሚሽ ኦꬃሳ። ኔኒ ጻላ ጾሳ።
PSA 86:11 ኣቤት ጎዳዉ! ታኒ ኔ ቱማን ባና ማላ ታና ኔ ኦጌ ታማርሳ፤ ታኒ ኔ ሱንꬃስ ያያና ማላ ታስ ኢሲ ዎዚና ኢማ።
PSA 86:12 ኣቤት ጎዳ ታ ጾሳዉ! ታኒ ኔና ታ ኩሜꬃ ዎዚናፔ ጋላታና፤ ኔ ሱንꬃካ ሜርናስ ቦንቻና።
PSA 86:13 ኣይስ ጊኮ ኔ ታና ቤሲዳ ሜርና ሲቆይ ኬሂ ጊታ፤ ኔኒ ታ ሼምፖዮ ዱፎፔ ኣሻዳሳ።
PSA 86:14 ኣቤት ጾሳዉ! ኦቶራንቻቲ ታ ቦላ ዴንዲዳ፤ ታና ዎꬋና ኮዪዲ ፓንጋቲ ዱላቴቴስ፤ ኔና ዉዳንካ ዬጊቤቴና።
PSA 86:15 ጊዶ ኣቲን ኣቤት ጎዳዉ! ኔኒ ቃꬌቲዛዴኔ ማሪዛ ጾሳ፤ ሃንቄታናስ ጋምኢዛ ጾሳ፤ ኔ ሲቆይኔ ኔ ኣማኔቴꬃይ ኬሂ ዳሮ።
PSA 86:16 ታኮ ሲማዳ ታስ ቃꬌታ፤ ታስ ኔ ኣይሌዛስ ዎልቃ ኢማ፤ ኔ ኣይሌይ ናዛ ታና ኣሻ።
PSA 86:17 ኣቤት ጎዳዉ! ኔ ታና ማዲዛይሳኔ ሚንꬄꬂዛይሳ ታና ኢጺዛይቲ ቤኢዲ ዬላታና ማላ ኔ ኪያቴꬃ ማላታ ታና ቤሳ።
PSA 87:1 ጎዳ ካታማይ ጌሻ ዙማ ቦላ ኬጼቲዴስ።
PSA 87:2 ጎዳይ ጺዮኔ ፔንጌታ ያቆቤይ ዲዛሶታ ኡባፌ ኣꬂ ሲቄስ።
PSA 87:3 ሃኔ ጾሳ ካታማዬ! ጾሳይ ኔ ጊሻስ ማላሊሲዛ ሚሽ፥
PSA 87:4 «ታና ኤሪዛ ካዎቴꬃታ ጊዶፌ ጊብጼኔ ባቢሎኔ ጋꬃ ማዝጋባሼ ፊሊስጼሜ፥ ጺሮሴኔ ቶጵያ ኣሳ ጉጃና» ጌስ።
PSA 87:5 ጺዮኔ ጊሻስ፥ «ኡባ ኣሳይ ኢዚን ዬሌቲዴስ፤ ኡባፌ ꬎቃ ጾሲ ኢዞ ሚንꬂ ኤሳና» ጌቴታና።
PSA 87:6 ጎዳይ ዴራ ኡባ ማዝጋቢሼ፥ «ሃይሲ ጺዮኒን ዬሌቲዴስ» ጊዲ ጻፋና።
PSA 87:7 ዬጺዛይቲኔ ጉፒዛይቲ፥ «ኑ ኣንጆ ኡባይ ጺዮኒፔ ፑልቴስ» ጊሼ ኡፋይሳን ዬጻና።
PSA 88:1 ኣቤት ጎዳዉ! ታና ኣሺዛ ጾሳዉ! ታኒ ጋላሲኔ ኦማርስ ኔ ሲንꬃን ዬካይስ።
PSA 88:2 ታ ዋሶይ ኔ ሲንꬂ ጋኮ፤ ኔ ሃይꬅ ታ ዎሳኮ ዛራ።
PSA 88:3 ኣይስ ጊኮ ታ ዴኦይ ሜቶን ኩሚዴስ፤ ታኒ ሃይቃና ማታዲስ።
PSA 88:4 ታኒ ዱፎን ጌሊዛ ኣሳታራ ቆዴታዲስ፤ ዎልቃይ ባይንዳ ኣስ ጊዳዲስ።
PSA 88:5 ታኒ ኣሃታ ጊዶን ኦሌቲዳ ኣሳ ማላ፥ ሃይቂዲ ዱፎን ሞጌቲዳ ኣሃ ማላ፥ ታኒ ኡባካ ኔኒ ዶጊዳ ኣሳ ማላኔ ኔ ማዶፔ ዱጺዳ ኣሳ ማላ ጊዳዲስ።
PSA 88:6 ኔኒ ታና ጪማ ኦላን፥ ዱጌ ꬉማ ሶሆን ዬጋዳሳ።
PSA 88:7 ኔ ሃንቆይ ታና ዴጼስ፤ ኔ ሃንቆዛ ዳምባላይ ታና ሙሌራ ሚቲዴስ።
PSA 88:8 ኔኒ ታ ላጌታ ታፔ ሃሳዳሳ፤ ኢስቲ ታና ሹኔታና ማላ ኦꬃዳሳ፤ ታና ጊዶꬂዳ፤ ኬሳ ኤካናዉካ ዳንዳይኬ።
PSA 88:9 ኣቤት ጎዳዉ! ካዮ ጋሶን ታ ኣይፌቲ ዶልጁሚዳ፤ ኡባ ጋላስ ታኒ ኔኮ ዋሳይስ፤ ታ ኩሼታካ ኔኮ ሚጫይስ።
PSA 88:10 ኔኒ ሃይቂዳይታስ ማላሊሲዛ ሚሽ ኦꬃይ? ኢስቲ ዴንዲዲ ኔና ጋላታኔ?
PSA 88:11 ኔ ሜርና ሲቆይ ዱፎን ኔ ኣማኔቴꬃይካ ባሻሶን ዮቴቲዜ?
PSA 88:12 ኔ ማላሊሲዛ ኦሶይ ꬉማን ኤሬቲዜ? ዎይኮ ኔ ጺሎቴꬃይ ዶጌቲዳ ኣሳታ ቢታን ቤታኔ?
PSA 88:13 ኣቤት ጎዳዉ! ኔኒ ታና ማዳና ማላ ታ ኔኮ ዋሳይስ፤ ማላዶ ማላዶ ታ ዎሳይ ኔ ሲንꬅ ጋኮ።
PSA 88:14 ኣቤት ጎዳዉ! ኔኒ ታና ኣይስ ኢጻይ? ኔ ሲንꬃ ታፔ ኣይስ ጌንꬃይ?
PSA 88:15 ዬላጋቴꬃሶፌ ዶማዳ፥ ታኒ ቱጋታዲሲኔ ሃይቃና ማታዲስ፤ ኔኒ ታና ዳጋንꬂን ሂዶታ ቃንጻዲስ።
PSA 88:16 ሱሊዛ ኔ ሃንቆይ ታ ቦላ ጋኪዴስ፤ ባቢሲዛ ኔ ሃንቆይ ታና ꬋይሲዴስ።
PSA 88:17 ኢስቲ ኩሜꬃ ጋላስ ዲኦ ሃꬃ ማላ ታና ጊዶꬂዳ፤ ኢሲ ቦላ ጊዲዲ ታና ዶዲ ኦይኪዳ።
PSA 88:18 ኔኒ ታ ላጌታኔ ታ ሲቆታ ታፔ ሃሳዳሳ፤ ꬉማይ ጻላ ታስ ዳቦ ጊዲዴስ።
PSA 89:1 ኣቤት ጎዳዉ! ኔ ሜርና ሲቆ ጊሻስ ታኒ ሜርናስ ዬጻና፤ ኔ ኣማኔቴꬃ ዬሌታ ኡባስ ታ ኣዋጃና።
PSA 89:2 ታኒ ኔ ሜርና ሲቆይ ሜርናስ ኤቂዳይሳኔ ኔኒ ኔ ኣማኔቴꬃ ሳሎን ሚንꬃዳ ኤሲዳይሳ ዮታና።
PSA 89:3 ኔኒ፥ «ታኒ ዶሪዳይሳራ ጫቆ ቃላ ጌላዲስ፤ ታ ኣይሌ ዳዊቴስ፥
PSA 89:4 ‹ታኒ ኔ ዛሬታ ሜርናስ ካዎሳና፤ ኔ ካዎቴꬃ ኣልጋ ዬሌታ ኡባስ ሚንꬃና› ጋ ጫቃዲስ» ጋዳሳ።
PSA 89:5 ኣቤት ጎዳዉ! ሳሎቲ ኔኒ ኦꬂዳ ማላሊሲዛ ኦሶታ ኣዋጄቴስ፤ ጌሻታ ዱላታይ ኔ ኣማኔቴꬃ ሳቤስ።
PSA 89:6 ሳሎን ጎዳራ ሊኬታናስ ዳንዳይዛይ ኦኔ? ሳሎ ሜꬌቴꬃታ ጊዶንካ ጎዳ ማላይ ኦኔ?
PSA 89:7 ጌሻታ ሺቆን ጾሲ ያሺሲዛዴ፤ ባ ዩሾን ዲዛ ኡባፌ ኬሂ ያሺሲዛዴ።
PSA 89:8 ኣቤት ጎዳዉ! ኡባፌ ዎልቃማ ጾሳዉ! ኔ ማላ ዎልቃማይ ኦኔ? ኣቤት ጎዳዉ! ኔኒ ኡባ ሚሻን ኣማኔቲዳዴ።
PSA 89:9 ኔ ቡልኣኬቲዛ ኣባ ሴራሳ፤ ኣባ ዳምባላካ ጮኡ ኦꬃሳ።
PSA 89:10 ኔኒ ኤራኣቤ ጌቴቲዛ ኣባ ዶኣዛ ቆጼሬꬃ ዎꬋዳሳ፤ ኔ ሞርኬታ ኔ ዎልቃማ ቄሴን ላላዳሳ።
PSA 89:11 ሳሎቲ ኔይታ፤ ሳኣይካ ኔሳ፤ ቢታኔ ኢዛን ኩሚዳ ኡባ ኔኒ ሜꬋዳሳ።
PSA 89:12 ፑዴሃኔ ዱጌሃ ኔኒ ሜꬋዳሳ፤ ታቦሬኔ ሄርሞኔ ዙማቲ ኡፋይሳን ኔ ሱንꬃን ዬጼቴስ።
PSA 89:13 ኔስ ዎልቃማ ቄሴይ ዴስ፤ ኔ ቄሴይ ሚኖ፤ ኔ ኡሻቻ ቄሴይ ያሼስ።
PSA 89:14 ጺሎቴꬂኔ ሱሬ ፒርዳይ ኔ ካዎቴꬃ ኣራታስ ዮቻ፤ ማሮቴꬂኔ ኣማኔቴꬂ ኔፔ ሲንꬃራ ቤቴስ።
PSA 89:15 ኣቤት ጎዳዉ! ኢሊሊሳን ኔና ሳቢዛይቲኔ ኔ ፖኦን ሄሜቲዛይቲ ኣንጄቲዳይታ።
PSA 89:16 ኔ ሱንꬃን ኩሜꬃ ጋላስ ኡፋዬቴቴስ፤ ኔ ጺሎቴꬃ ጊሻስ ኢስቲ ኔና ꬎቁ ꬎቁ ሂስቴቴስ።
PSA 89:17 ኢስቲ ጬቄቲዛ ዎልቃይ ኔና፤ ኔ ቴማን ኢስታ ካጬይ ꬎቁ ꬎቁ ጌስ።
PSA 89:18 ኑ ጎንዳሌይ ጎዳ ኩሼና፤ ኑ ካዎይካ ኢስራኤሌ ጌሻ ኩሼና።
PSA 89:19 ቤኒ ኔኒ ኔ ኣማኔቲዳ ኣሳታስ ኣጁታን፥ «ታኒ ኦላ ቃራ ማዳዲስ፤ ዴራ ጊዶፌ ዶሬቲዳ ዬላጋ ꬎቁ ꬎቁ ሂስታዲስ።
PSA 89:20 ታ ኣይሌ ዳዊቴ ዴማዲስ፤ ታ ጌሻ ዛይቴንካ ቲያዳ ኢዛ ካዎꬃዲስ።
PSA 89:21 ታ ኩሼይ ኢዛ ማዳና፤ ታ ቄሴይካ ኢዛ ሚንꬃና።
PSA 89:22 ኢዛ ኣይ ሞርኬይ ሃሪዲ ጊሪሴና፤ ኣይ ኢታ ኣሲካ ኢዛ ቆሄና።
PSA 89:23 ታኒ ኢዛ ሞርኬታ ኢዛ ሲንꬃን ቲንቼሬꬃና፤ ኢዛ ኢጺዛይታካ ሾጫ ኒፊፊ ሂስታና።
PSA 89:24 ታ ኣማኔቴꬃይኔ ታ ሜርና ሲቆይ ኢዛራ ኢሲፌ ጊዳና፤ ታ ሱንꬃን ኢዛ ካጬይ ꬎቁ ꬎቁ ጋና።
PSA 89:25 ታኒ ኢዛ ካዎቴꬃ ሜዲቴራኔ ኣባ ጋካናስ ኣሳና። ኢዛ ዛዋካ ኤፊራጺሴኔ ጼግሮሴ ሻፋታ ጋካናስ ኣሳና።
PSA 89:26 ዳዊቲ ታና፥ ‹ኔኒ ታ ኣዋ፤ ታ ጾሳኔ ታና ኣሺዛ ዎጋ ዛላ› ጊ ጼይጋና።
PSA 89:27 ታኒ ኢዛ ታስ ባይራ ና ሂስታና፤ ሳኣን ዲዛ ካዎታ ኡባፌ ታ ኢዛ ጊታሳና።
PSA 89:28 ታኒ ታ ሲቆ ኢዛስ ሜርናስ ናጋና፤ ታኒ ኢዛስ ጌሊዳ ጫቆ ቃላ ሚንꬃና።
PSA 89:29 ታኒ ኢዛ ዛሬታ ሜርናስ ሚንꬃ ኤሳና፤ ኢዛ ካዎቴꬃ ኣራታካ ሳሎ ማላ ሜርናስ ሚንꬃ ቶካና።
PSA 89:30 «ጊዶ ኣቲን ኢዛ ዜሬꬃቲ ታ ዎጋ ኣጊኮ፥ ቃሴ ኢስቲ ታ ኣዛዞካ ናጎንታ ኢጺኮ፥
PSA 89:31 ኢስቲ ታ ዎꬂዳ ማራ ሞሪኮ፥ ታ ኣዛዞካ ቦንቾንታ ኢጺኮ፥
PSA 89:32 ታኒ ኢስታ ናጋራ ጊሻስ ኢስታ ጉፌን ቃጻያና፤ ኢስታ ሞሮ ጊሻስ ኢስታ ጹርቃፌን ሾጫና።
PSA 89:33 ጊዶ ኣቲን ታኒ ታ ሲቆ ኢዛፔ ሃሲኬ፤ ዎይኮ ታ ኣማኔቴꬅ ኢዛስ ፓጪንቺኬ።
PSA 89:34 ታኒ ጫቂዳ ጫቆ ቃላ ሚኬ፤ ታ ዶናፔ ኬኢዳ ቃላ ላሚኬ።
PSA 89:35 ታኒ ኢሲቶ ታ ጌሻ ሱንꬃን ጫቂዳ ቃላ ዳዊቴስ ዎርዶቲኬ።
PSA 89:36 ኢዛ ዛሬቲ ሜርናስ ሚኒዲ ዳና፤ ኢዛ ካዎቴꬃ ኣልጋይካ ኣዋ ኣርሼ ማላ ታ ሲንꬃን ሜርናስ ዳና።
PSA 89:37 ሳሎ ቦላ ኣማኔቲዳ ማርካ ጊዳዳ ዲዛ ኣጊና ማላ ኢዚ ሜርናስ ሚኒ ዳና» ጋዳሳ።
PSA 89:38 ጊዶ ኣቲን ሃኢ ኔኒ ቲያዳ ካዎꬂዳይሳ ቦላ ኬሃ ሃንቄታዳሳ፤ ኢዛ ካꬋዳሳኔ ዬጋ ኣጋዳሳ።
PSA 89:39 ኔኒ ኔ ኣይሌዛስ ጫቂዳ ጫቆ ቃላ ላላዳሳ፤ ኢዛ ካላቻ ባናን ኦላዳ ቱኒሳዳሳ።
PSA 89:40 ኔኒ ካታማ ጊምቤዛ ኡባ ላላዳሳ፤ ኢዛ ሚጻ ኡባ ꬋይሳዳሳ።
PSA 89:41 ኦጌራ ኣꬊዛ ኡባቲ ኢዛ ቦንቂዳ፤ ኢዚ ባ ሾሮታስ ቂꬌስ ኣቲዴስ።
PSA 89:42 ኔኒ ኢዛ ሞርኬታስ ኡሻቻዳሳ፤ ኢስታ ኡባ ኡፋይሳዳሳ።
PSA 89:43 ኔኒ ኢዛ ማሻ ቃራዛ ዱንኢሳዳሳ፤ ኦላንካ ኢዛ ማዳቤካ።
PSA 89:44 ኔኒ ኢዛ ካዎቴꬃ ጉፋ ኢዛ ኩሼፔ ዎꬃ ኤካዳሳ፤ ቃሴ ኢዛ ካዎቴꬃ ኣራታ ቢታን ኦላዳሳ።
PSA 89:45 ኔኒ ኢዛ ዬላጋቴꬃ ላይꬃ ቃንꬃዳሳ፤ ዬላካ ማይዛዳሳ።
PSA 89:46 ኣቤት ጎዳዉ! ኣዉዴ ጋካናስ ኔና ጌንꬃኔ? ኔኒ ሜርናስ ጌማኔ? ኔ ሃንቆይ ታማ ማላ ኣዉዴ ጋካናስ ኤጻኔ?
PSA 89:47 ታ ላይꬃይ ኣይ ኬና ቃንꬃኮ ቆፓ፤ ኔ ኣሳ ና ጮ ሃዳ ሜꬋዲ!
PSA 89:48 ኣሲ ሃይቆንታ ሜርናስ ሼምፖራ ፓጻ ዳናስ ዳንዳይዜ? ቃሴ ዱፎን ጌሎንታ ማላ ባና ኣሻናስ ዳንዳይዛ ኣሲ ዲዜ?
PSA 89:49 ኣቤት ጎዳዉ! ዳዊቴስ ኔ ኣማኔቴꬃን ጫቂዳ ጫቆይኔ ካሴ ኔ ሜርና ሲቆይ ኣዋን ዲዜ?
PSA 89:50 ኣቤት ጎዳዉ! ታኒ ኔ ኣይሌይ ኣይ ማላ ቦሬቲዳኮ ኔኒ ሃሳያ፤ ታኒ ኣሳ ኡባ ቦሬዛ ዎስታ ዳንዳይዳኮ ኣኔ ኔ ቆፓ።
PSA 89:51 ኣቤት ጎዳዉ! ኔ ሞርኬቲ ኔ ዶራዳ ቲይዳ ካዎዛ ጫዪዛይሳ፥ ኢዚ ቢዳሶ ኡባን ኢዛ ቂልጪዛይሳ ቆፓ።
PSA 89:52 ጎዳይ ሜሪ ሜርናስ ጋላቴቶ! ኣሚን! ኣሚን።
PSA 90:1 ጎዳዉ! ኔኒ ኑስ ዬሌታፔ ዬሌታ ጋካናስ ሺቂ ኣቲዛሶ ጊዳዳሳ።
PSA 90:2 ዙማቲ ሜꬌታናፔ ካሴ፥ ዎይኮ ኔኒ ሳኣ ኦꬃናፔ ካሴ ሜርናፔ ሜርና ጋካናሲ ኔኒ ጾሳ።
PSA 90:3 ኔኒ ኣሳ ናይታ፥ «ኣሳ ናይቶ! ጉዬ ቢታን ሲሚቴ» ጋዳ ኢስቲ ሜꬌቲዳ ቢታን ጉዬ ዛራሳ።
PSA 90:4 ሺ ላይꬂ ኔስ ኣꬊዳ ኢሲ ጋላሳ ማላ፤ ዎይኮ ኦማርሳፌ ኢሲ ሳቴ ማላ።
PSA 90:5 ኣስ ቆፖንታ ኤፊዛ ዲኦ ማላ ኔ ኤፊሺን፥ ኢስቲ ኣጉሞ ማላ ኣꬋና፤ ማላዶ ማላዶ ሞኪዛ ማታ ማላ ጪሊሌቴስ።
PSA 90:6 ማታይ ማላዶ ዲጪዲ ጪዬስ፤ ኦማርሳ ዎዴ ጊዲኮ ሹሊዲ ሜሌስ።
PSA 90:7 ኑኒ ኔ ቃንጌꬃን ዉሪዶስ፤ ኔ ሃንቆ ሱሌን ዳጋሚዶስ።
PSA 90:8 ኔኒ ኑ ኢታ ኦሶ ኔ ሲንꬃን ዎꬃዳሳ፤ ቃሴ ኑ ጌንꬂዳ ናጋራ ኔ ሲንꬃ ፖኦኮ ኣꬃዳሳ።
PSA 90:9 ኑ ዎዴ ኡባይ ኔ ሃንቆን ኣꬊዴስ፤ ኑ ላይꬃካ ኦሌን ዉርሶስ።
PSA 90:10 ኑ ዳና ላይꬃይ ላፑን ታማ፤ ዳሬስ ጊኮ ኦስፑን ታማ፤ ሄይቲካ ሜቶኒኔ ጬጬን ኩሚዳ፤ ኑ ላይꬃይ ኤሶን ኣꬌስ፤ ኑኒካ ኤሶን ባና።
PSA 90:11 ኔ ሃንቆዛ ዎልቃ ኦኔ ኤሪዛይ? ኔ ሃንቆ ሴላይ ያሼስ።
PSA 90:12 ኑ ላይꬃ ማራራ ኑ ጎኤታና ማላ ኑና ኣꬎ ኤራቴꬅ ታማርሳ።
PSA 90:13 ኣቤት ጎዳዉ! ኔ ሃንቆይ ኣዉዴ ጋካና ጋምኣኔ? ሲማ! ኔ ኣይሌታስ ቃꬌታ!
PSA 90:14 ኑ ላይꬃ ኡባን ኑኒ ኡፋዬታና ማላኔ ዬጻና ማላ ማላዶ ማላዶ ኔ ሲቆን ኑና ካልሳ።
PSA 90:15 ኔኒ ኑና ሜቶꬂዳ ጋላሳታ ኬናኔ ኑኒ ቱጋ ቤኢዳ ላይꬃታ ሊኬ ኑና ኡፋይሳ።
PSA 90:16 ኑስ ኔ ኣይሌታስ ኔ ኦሶይ ቆንጮ፤ ኔ ቦንቾይ ኑ ናይታስ ቤቶ።
PSA 90:17 ኣቤት ጎዳዉ! ኑ ጾሳዉ! ኔ ኪያቴꬂ ኑናራ ጊዶ፤ ኑ ኦꬂዛ ኡባ ኑስ ኢንጄሳ፤ ኤሮ! ኑ ኦꬂዛ ኡባ ኑስ ኢንጄሳ።
PSA 91:1 ኡባፌ ꬎቃ ጎዳን ዜምፒ ዴኢዛይ፥ ኡባ ዳንዳይዛ ጾሳ ኩዋን ኣቄስ።
PSA 91:2 ታኒ ጎዳ፥ «ኔኒ ታስ ዜምፖ፥ ሚጻኔ ታኒ ኔናን ኣማኔቲዛ ታ ጾሳ» ጋና።
PSA 91:3 ኢዚ ኔና ሻንካንቻታ ጊቴፔ፥ ዎꬊዛ ኢታ ሃርጌፌካ ኣሻና።
PSA 91:4 ኢዚ ባ ዋንጎታን ኔና ካማና፤ ኢዛ ቄፌታ ጋርሳን ኔኒ ቆቴታ ኣታና፤ ኢዛ ኣማኔቴꬃይ ኔስ ጎንዳሌኔ ዜምፖ ጊዳና።
PSA 91:5 ኔኒ ኦማርሳን ዳጋንꬂዛ ሚሻስ፥ ዎይኮ ጋላስ ጾንጌቲዛ ዪሻስ፥
PSA 91:6 ꬉማን ኦይኪዛ ሃርጌስ፥ ዎይኮ ሴታ ጋላሳን ዉርሲዛ ኢታ ሃርጌስ ያያካ።
PSA 91:7 ኢሲ ሺ ኔ ሚሌሶራ፥ ቃሴ ታሙ ሺ ኔፔ ኡሻቻ ባጋራ ኩንዳና፤ ጊዶ ኣቲን ኔና ኣይኮይካ ቦቼና።
PSA 91:8 ኔኒ ኔ ኣይፌን ጼሎ ጻላ ጼላና፤ ኢታቲካ ቃጻዬቲሺን ቤኣና።
PSA 91:9 ጎዳ ኔኒ ኔስ ባቃታ ኣቲዛሶ፥ ኡባፌ ꬎቃ ጾሳ ኔስ ዜምፖ ሂስቲዳ ጊሻስ፥
PSA 91:10 ኢታ ሚሺ ኔና ቦቼና፤ ቦሻይካ ኔ ኬꬅ ሺቄና።
PSA 91:11 ኔ ቢዛ ኦጌ ኡባን ኔና ናጋና ማላ ጾሲ ባ ኪታንቻታ ኣዛዛና።
PSA 91:12 ኔ ቶሆይ ሹቻን ꬉጴቶንታ ማላ ኪታንቻቲ ባ ኩሼን ኔና ዴንꬃና።
PSA 91:13 ኔኒ ጋሞኔ ሃሶ ሾሻ ቦላ ሄሜታና፤ ቃሴካ ዎዳላ ጋሞኔ ኢታ ሾሻ ዬꬋና።
PSA 91:14 ጎዳይ፥ «ኢዚ ታና ሲቂዳ ጊሻስ ታኒ ኢዛ ኣሻና፤ ኢዚ ታ ሱንꬃ ኤሪዳ ጊሻስ ታኒ ኢዛ ናጋና።
PSA 91:15 ኢዚ ታና ጼይጊዛ ዎዴ ታኒ ኢዛስ ኮያና፤ ኢዚ ሜቶቲዳ ዎዴ ታኒ ኢዛራ ኢሲፌ ጊዳና፤ ታኒ ኢዛ ኣሻናኔ ቦንቻና።
PSA 91:16 ታኒ ኢዛ ላይꬃ ኣዱሳና፤ ታ ኣሺዛዴ ጊዲዳይሳ ታ ኢዛ ቤሳና» ጌስ።
PSA 92:1 ጎዳ ጋላቶይ ሎኦ፤ ኣቤት ኡባፌ ꬎቃ ጾሳዉ! ኔ ሱንꬃስ ማዛሙሬ ሺሾይ ሎኦ።
PSA 92:2 ማላዶ ኔ ሜርና ሲቆ፥ ጊዶꬅ ኔ ኣማኔቴꬅ ኣዋጃይ ሎኦ።
PSA 92:3 ታሙ ሻያን ዋጼቲዳ ባጋናኒኔ ማሲንቆ ዲጺሼ ኣዋጃይ ሎኦ።
PSA 92:4 ኣቤት ጎዳዉ! ኔ ኦꬂዳ ዎልቃማ ኦሶቲ ታና ኡፋይሲዳ፤ ኔ ኩሼይ ኦꬂዳ ጊሻስ ታኒ ኡፋይሳን ዬጻይስ።
PSA 92:5 ኣቤት ጎዳዉ! ኔ ኦሶይ ኣይ ኬና ጊታ! ኔ ቆፋይካ ኣይ ኬና ጪማ!
PSA 92:6 ሄሳ ኤያ ኣሲ ኤራናዉ ዳንዳዬና፤ ዳማ ኣሲካ ኣኬካናዉ ዳንዳዬና።
PSA 92:7 ኢታቲ ማታ ማላ ዲጪኮካ፥ ጌኔ ኦꬂዛ ኡባቲ ጪይኮካ ኢስቲ ሜርናስ ꬋያና።
PSA 92:8 ጊዶ ኣቲን ኣቤት ጎዳዉ! ኔኒ ሜርናስ ኡባፌ ꬎቃ።
PSA 92:9 ኣቤት ጎዳዉ! ኔ ሞርኬቲ ꬋያና፤ ኢታ ኦꬂዛ ኡባቲ ፒስኪ ጋናይሳ ኑ ኤሮስ።
PSA 92:10 ታ ካጬዛ ሜንꬃ ካጬ ማላ ꬎቂሳዳሳ፤ ሎኦ ዛይቴንካ ታና ቲያዳሳ።
PSA 92:11 ታ ሞርኬቲ ጾኔቲዳይሳ ታ ኣይፌን ቤኣዲስ፤ ታ ባልጋራታ ኩንዴꬅ ታ ኣይፌን ቤኣዲስ።
PSA 92:12 ጺሎቲ ዛምባ ማላ ዳያና፤ ቃሴ ሊባኖሴ ጺዳ ማላ ዲጫና።
PSA 92:13 ኢስቲ ጎዳ ኬꬃን ቶኬቲዳ፤ ኢስቲ ጾሳ ኬꬃ ዛጎ ጋካናስ ዳያና።
PSA 92:14 ኢስቲ ጬጊዲካ ኣይፋና፤ ኢስቲ ኡባ ዎዴ ጪሊሊዳ ማላኔ ሚኒዳ ማላ ዳና።
PSA 92:15 ኢስቲ፥ «ጎዳይ ሊኬ፤ ኢዚ ታስ ዎጋ ዛላ፤ ኢዛ ቦላ ዎሶይ ዴና» ጋና።
PSA 93:1 ጎዳይ ካዎቲዴስ! ቴማኔ ዎልቃ ማይኢዴስ፤ ኣላሜይ ቃጾንታ ማላ ሚንꬂ ኤሲዴስ፤ ኦኒካ ኢዞ ቃꬄና።
PSA 93:2 ኔ ካዎቴꬃ ኣራታይ ቤኒሶፌ ሚኒ ኤቂዴስ፤ ኔኒ ሜርናስ ዳሳ።
PSA 93:3 ኣቤት ጎዳዉ! ጪማ ኣባይ ጉሚዴስ፤ ጪማ ኣባይ ባ ጉንꬃ ꬎቁ ሂስቲዴስ፤ ጪማ ኣባይ ዳምባላ ጉንꬅ ꬎቁ ኦꬂዴስ።
PSA 93:4 ሳሎን ዲዛ ጎዳይ ጊታ ሃꬃታ ጉንꬃፌ፥ ኣባ ዳምባላ ጉንꬃፌካ ኣꬎ ዎልቃማ።
PSA 93:5 ኣቤት ጎዳዉ! ኔ ዎጋይ ላሜቶንታ ሚኖ፤ ኔ ኬꬃይ ሜርናስ ጌሻቴꬃን ሎኢ ዳና።
PSA 94:1 ኣቤት ጎዳዉ! ኔኒ ሃሎ ኬሲዛ ጾሳ፤ ኣቤት ሃሎ ኬሲዛ ጾሳዉ! ኔ ቦንቾ ቆንጪሳ።
PSA 94:2 ኣቤት ሳኣ ፒርዲዛይሶ! ዴንዳ! ኦቶራንቻታስ ቤሲዛ ቂጻቴ ኢማ።
PSA 94:3 ኣቤት ጎዳዉ! ኢታቲ ኣዉዴ ጋካናስ ጋምኣኔ? ኢስቲ ኣዉዴ ጋካናስ ኡፋዬታኔ?
PSA 94:4 ኢታ ኦꬂዛ ኡባቲ ባንታ ኦቶሮ ቃላን ሃሳዬቴስ፤ ጮ ጬቄቴቴስ።
PSA 94:5 ኣቤት ጎዳዉ! ኢስቲ ኔ ዴራ ሊቂሴቴስ፤ ኣሳ ቶቼቴስ።
PSA 94:6 ኢስቲ ኣምኤታኔ ቤቴ ኣሳታ ዎꬌቴስ፤ ዪኦታ ሲፌቴስ።
PSA 94:7 ሂስቲዲ ኢስታስ፥ «ጎዳይ ኑና ቤኤና፤ ያቆቤ ጾሲ ኣኬኬና» ጌቴስ።
PSA 94:8 ኢንቴኖ ኣሳ ጊዶፌ ዳማቶ! ኣኬኪቴ! ኢንቴኖ ኤያቶ! ኣዉዴ ኢንቴ ኤራኔ?
PSA 94:9 ሃይꬅ ኢሚዳ ጾሲ ሲዬኔ? ኣይፌ ሜꬊዳ ጾሲ ቤኤኔ?
PSA 94:10 ካዎቴꬃ ሴሪዛይሲ ቃጻዬኔ? ኣስ ኤራቴꬅ ታማርሲዛይሲ ባስ ኤሬኔ?
PSA 94:11 ጎዳይ ኣሳ ቆፋይ ꬋሎንታይሳኔ ሃዳ ጊዲዳይሳ ኤሬስ።
PSA 94:12 ኣቤት ጎዳዉ! ኔኒ ሴሪዛዴይኔ ኔኒ ኔ ዎጋፔ ታማርሲዛ ኣሲ ኣንጄቲዳዴ።
PSA 94:13 ኢታቲ ኩንዳና ኦላይ ቦኬታና ጋካናስ፥ ኔ ኢዛ ሜቶፔ ሼምፒሳሳ።
PSA 94:14 ጎዳይ ባ ኣሳ ኦሌና፤ ኢዚ ባይታ ኣጌና።
PSA 94:15 ፒርዳይ ሲሚዲ ጺሎ ፒርዳስ ዮች ጊዳና፤ ጺሎቲ ኡባይ ቱማ ፒርዳ ካላና።
PSA 94:16 ማካላንቻታ ቦላ ታ ጊሻስ ኤቄታናይ ኦኔ? ኢታ ኦꬂዛይታራካ ታ ጊሻስ ሞቴታናይ ኦኔ?
PSA 94:17 ጎዳይ ታና ማዶንታኮ፥ ታኒ ኤሶን ዱፎን ጌላዳ ሲርጲ ጋና።
PSA 94:18 ኣቤት ጎዳዉ! ታኒ፥ «ኩንዳና ሃናይስ» ጊሺን ኔ ሜርና ሲቆይ ታና ካፊዴስ።
PSA 94:19 ታ ዎዚናይ ጬጬን ኩሚዳ ዎዴ ኔ ሚንꬄꬆይ ኡፋይስ ዳሪሴስ።
PSA 94:20 ዎጋን ዜምፒዲ ጌላ ፒርዲዛዴራ ኔኒ ዙፔታናስ ዳንዳያይ?
PSA 94:21 ጺሎ ኣሳታ ቦላ ጌኔ ዱላቴቴስ፤ ሱሬ ኣሳታ ቦላካ ሃይቆ ፒርዳ ፒርዴቴስ።
PSA 94:22 ጎዳይ ጊዲኮ ታስ ታኒ ባቃታ ኣቲዛ ሚጻ፤ ታ ጾሲ ታ ኢዛን ዜምፒዛ ዎጋ ዛላ።
PSA 94:23 ኢስታ ኢታቴꬃ ጊሻስ ኢዚ ኢስታ ቃጻያና፤ ኢስታ ናጋራ ጊሻስ ኢዚ ኢስታ ꬋይሳና፤ ጎዳ ኑ ጾሳይ ኢስታ ዲፒ ሂስታና።
PSA 95:1 ሃ ዪቴ! ኣኔ ጎዳስ ኡፋይሳን ዬጾስ፤ ኑና ኣሺዛ ዛላስ ኢሊሎስ።
PSA 95:2 ኣኔ ኢዛ ሲንꬅ ጋላታራ ሺቆስ፤ ጋላታ ማዛሙሬ ኡፋይሳን ዬጾስ።
PSA 95:3 ጋሶይካ ጎዳይ ዎልቃማ ጾሳ፥ ጾሳታ ኡባ ቦላካ ዎልቃማ ካዎ።
PSA 95:4 ቢታ ጪማቲ ኢዛ ኩሼን ዴቴስ፤ ዙማ ጼራቲካ ኢዛሳ።
PSA 95:5 ኣባ ሃꬂ ኢዛሳ፤ ሄሳ ኢዛ ኩሼቲ ሜꬊዳ፤ ቢታካ ሜꬊዳይ ኢዛ።
PSA 95:6 ሃ ዪቴ! ሆኪዲ ኣኔ ኢዛስ ጎይኖስ፤ ኑና ሜꬊዳ ጎዳ ሲንꬃን ጉልባቶስ።
PSA 95:7 ኢዚ ኑ ጾሳ፤ ኑኒ ኢዛ ቆሮን ሄሜቲዛይታ፤ ኑኒ ኢዛስ ዶርሳ ዉዴታ። ጎዳይ ኢንቴና ጊዛይሳ ሃች ሲዪቴ!
PSA 95:8 «ካሴ ኢንቴ ኣዋቲ ማሳኒኔ ማሪባን ኦꬆይሳꬆ ኢንቴ ዎዚና ሙሚሶፒቴ።
PSA 95:9 ኢስቲ ታ ኦሶ ቤኢዲካ ታናራ ኤቄቲዳኔ ታና ፓጪዳ።
PSA 95:10 ሄ ዬሌታ ቦላ ታኒ ኦይዱ ታሙ ላይꬅ ሃንቄታዲስ፤ ታኒካ፥ ‹ኢስቲ ኡባ ዎዴ ባንታ ዎዚናን ባሊዛ ኣሳ፤ ኢስቲ ታ ኦጌ ኤሪቤቴና› ጋዲስ።
PSA 95:11 ሄሳ ጊሻስ ታኒ፥ ‹ኢስቲ ታ ሼምፖሶ ሙሌካ ጌሌቴና› ጋዳ ሃንቄታ ጫቃዲስ።»
PSA 96:1 ጎዳስ ኦራꬃ ማዛሙሬ ዬጺቴ፤ ሳኣን ዴኢዛ ኣሳዉ! ኡባይ ጎዳስ ዬጺቴ።
PSA 96:2 ጎዳስ ዬጺቴ፤ ኢዛ ሱንꬃ ሳቢቴ፤ ኢዚ ኣሺዛይሳ ሃች ሃች ዮቲቴ።
PSA 96:3 ካዎቴꬃታ ጊዶን ኢዛ ቦንቾ ቆንጪሲቴ፤ ኣሳ ኡባ ጊዶን ማላሊሲዛ ኢዛ ኦሶ ኣዋጂቴ።
PSA 96:4 ጎዳይ ጊታ፤ ጊታ ጋላታይካ ኢዛስ ቤሴስ፤ ኡባ ጾሳታፔ ኣꬊዲ ኢዚ ያዬታናስ ቤሴስ።
PSA 96:5 ዴሬ ኣሳይ ጎይኒዛ ጾሳቲ ኡባይ ኤቃ ጾሳታ፤ ጊዶ ኣቲን ጎዳይ ሳሎታ ሜꬊዳ ጾሳ።
PSA 96:6 ቦንቾይኔ ቴማይ ኢዛ ዩሾን ዴስ፤ ሚኖቴꬃይኔ ፑላይ ኢዛ ኬꬃን ዴስ።
PSA 96:7 ኢንቴኖ ቢታ ቦላ ዲዛ ዴሬ ኡባቶ! ጎዳ ቦንቾ ጊሻሲኔ ኢዛ ዎልቃ ጊሻስ ጋላቲቴ።
PSA 96:8 ኢዛ ሱንꬃስ ቤሲዛ ቦንቾ ጎዳስ ኢሚቴ፤ ያርሾ ኤኪዲ ኢዛ ኬꬃ ዛጎ ጌሊቴ።
PSA 96:9 ኢዛ ጌሻቴꬃ ፑላን ጎዳስ ጎይኒቴ፤ ቢታን ዴኢዛ ኣስ ኡባይ ኢዛ ሲንꬃን ኮኮሪቴ።
PSA 96:10 ካዎቴꬃታ ጊዶን፥ «ጎዳይ ካዎቲዴስ! ሳኣይ ሚኒ ኤቂዴስ፤ ሙሌካ ቃጼና፤ ኢዚ ኣስ ኡባስ ኢሲ ጊና ፒርዳና» ጊቴ።
PSA 96:11 ሳሎይኔ ሳኣይ ኡፋዬቴቶ! ኣባይኔ ኢዛ ጊዶን ዲዛ ኡባቲ ጉሜቶ!
PSA 96:12 ጎሻ ጋዴይኔ ኢዛ ቦላ ዲዛ ኡባይ ኡፋዬቶ! ዎራን ዲዛ ሚꬅ ኡባይ ኢዛ ሲንꬃን ኡፋይሳን ዬጻና።
PSA 96:13 ኣይስ ጊኮ ጎዳይ ያና፤ ኢዚ ሳኣ ቦላን ፒርዳናስ ያና፤ ኢዚ ሃ ሳኣ ቦላ ጺሎቴꬃን፥ ኣሳ ቦላካ ቱማቴꬃን ፒርዳና።
PSA 97:1 ጎዳይ ካዎቲዴስ፤ ሳኣን ዴኢዛ ኣሳይ ኡፋዬቶ፤ ኣባ ጊዶን ዴኢዛ ሃሩሮቲ ኡፋዬቴቶ።
PSA 97:2 ሻራይኔ ሳካና ꬉማይ ኢዛ ዩዪ ኣꬊዴስ፤ ጺሎቴꬂኔ ቱማቴꬂ ኢዛ ካዎቴꬃ ኣራታስ ዮቻ።
PSA 97:3 ታማይ ኢዛፔ ሲንꬃራ ቤስ፤ ኢዛ ዩሾን ዲዛ ሞርኬታካ ጹጌስ።
PSA 97:4 ኢዛ ዎልቃንꬂ ሳኣ ፖኢሴስ፤ ቢታይ ሄሳ ቤኢዲ ቃጼስ።
PSA 97:5 ጎዳ ሲንꬃን፥ ሳኣ ኡባ ጎዳ ሲንꬃን ዙማቲ ሙቃዳ ማላ ሴሪዳ።
PSA 97:6 ሳሎቲ ኢዛ ጺሎቴꬃ ኣዋጄቴስ፤ ኣሳይ ኡባይ ኢዛ ቦንቾ ቤኤስ።
PSA 97:7 ሚስሌታስ ጎይኒዛይቲኔ ኤቃ ጾሳታን ጬቄቲዛይቲ ኡባይ ዬላቴቶ! ኤቃ ጾሳቲ ኡባይ ጎዳስ ጉልባቴቶ!
PSA 97:8 ኣቤት ጎዳዉ! ጺዮኔ ኣሳይ ኔ ጺሎ ፒርዳ ሲዪዲ ኡፋዬቴስ፤ ዩሁዳ ካታማቲካ፥ «ሃሹ» ጌቴስ።
PSA 97:9 ኣቤት ጎዳዉ! ኔኒ ሳኣ ኡባፌ ꬎቃሳ፤ ጾሳታ ኡባፌ ኔኒ ጊታታሳ።
PSA 97:10 ጎዳ ዶሲዛይቶ! ኢታ ኢጺቴ፤ ኢዚ ባስ ኣማኔቲዛይታ ሼምፖ ናጌስ፤ ቃሴካ ኢታታ ኩሼፔካ ኣሼስ።
PSA 97:11 ጺሎታስ ፖኦይ ፖኢ ፖኢ ባና፤ ዎዚና ሱሬታስ ኡፋይሲ ዳና።
PSA 97:12 ኢንቴኖ ጺሎቶ! ጎዳን ኡፋዬቲቴ፤ ጌሻ ሱንꬃ ኢዛይሳ ጋላቲቴ።
PSA 98:1 ጎዳስ ኦራꬃ ማዛሙሬ ዬጺቴ፤ ጋሶይካ ኢዚ ማላሊሲዛ ሚሽ ኦꬂዴስ፤ ኢዛ ኡሻቻ ኩሼይኔ ኢዛ ጌሻ ቄሴይ ኢዛስ ጾኖ ኢሚዴስ።
PSA 98:2 ጎዳይ ባ ኣሺዛይሳ ኤሪሲዴስ፤ ኢዚ ባ ጺሎቴꬃካ ካዎቴꬃስ ቆንጪሲዴስ።
PSA 98:3 ኢዚ ኢስራኤሌታ ሲቂዛይሳኔ ኢስታስ ኣማኔቲዛይሳ ሃሳኢዴስ፤ ሳኣ ጋጻ ጋካናስ ዲዛ ኣሳይ ኡባይ ኑ ጾሳይ ኣሺዛይሳ ቤኢዴስ።
PSA 98:4 ሳኣ ቦላን ዲዛ ኣስ ኡባይ ጎዳስ ኡፋይሳን ዬጺቴ፤ ቃላ ꬎቁ ኦꬂዲ ኡፋይሳ ዬꬃን ጋላቲቴ።
PSA 98:5 ባጋና ዲጺሼ ማዛሙሬን ጎዳ ጋላቲቴ፤
PSA 98:6 ዲንኬኔ ዛዬ ፑኒሼ ኑ ካዋ ጎዳ ሲንꬃን ኡፋይሳን ኢሊሊቴ።
PSA 98:7 ኣባይኔ ኣባ ጊዶን ኩሚዳ ኡባይ ጉሞ! ሳኣይኔ ሳኣ ቦላን ዲዛ ኡባይ ዬጾ!
PSA 98:8 ሻፋቲ ኢሲፌ ባንታ ኩሼ ባቄቶ! ዙማቲ ጎዳ ሲንꬃን ኢሲፌ ኡፋይሳን ዬጼቶ!
PSA 98:9 ጎዳይ ሳኣ ቦላን ፒርዳናስ ያና፤ ኢዚ ሃ ሳኣ ቦላ ጺሎቴꬃን ኣሳ ቦላካ ሱሬቴꬃን ፒርዳና።
PSA 99:1 ጎዳይ ካዎቲዴስ! ሄሳ ጊሻስ ኣሳይ ኮኮሮ! ኪሩቤታ ጊዶን ካዎቴꬃ ኣራታን ኡቲዴስ፤ ሄሳስ ቢታይካ ቃጾ።
PSA 99:2 ጎዳይ ጺዮኔን ጊታ፤ ካዎቴꬃ ኡባፌ ኢዚ ꬎቁ ꬎቁ ጊዴስ።
PSA 99:3 ጊታኔ ኬሂፔ ያሺሲዛ ኔ ሱንꬃ ኢስቲ ኡባይ ሳቤቶ! ኢዚ ዱማ!
PSA 99:4 ቱማ ፒርዳ ዶሲዛ ዎልቃማ ካዎ! ኔኒ ሱሬቴꬃስ ዮች ዬጋዳሳ፤ ኔኒ ያቆቤስ ቱሙ ፒርዳኔ ጺሎቴꬅ ኤሳዳሳ።
PSA 99:5 ኢዚ ዱማ ጊዲዳ ጊሻስ ጎዳ ኑ ጾሳ ꬎቁ ꬎቁ ሂስቲቴ፤ ኢዛ ቶሆ ጋርሳንካ ጉፋኒዲ ኢዛስ ጎይኒቴ።
PSA 99:6 ኢዛ ቄሴታ ጊዶፌ ሙሴይኔ ኣሮኔይ ዴቴስ፤ ሳሜሊካ ኢዛ ሱንꬃን ዎሲዳይታፔ ኢሳ፤ ኢስቲ ጎዳስ ዋሲዳ፤ ኢዚካ ኢስታ ዋሶ ኣሊዴስ።
PSA 99:7 ኢዚ ሻራ ቱሳ ጊዶራ ኢስታስ ሃሳይዴስ፤ ኢስቲ ኢዚ ኢሚዳ ማራኔ ዎጋ ናጊዳ።
PSA 99:8 ኣቤት ጎዳዉ፥ ኑ ጾሳዉ! ኔኒ ኢስታ ዎሳ ሲያዳሳ፤ ኔኒ ኢስታ ኢታቴꬃ ጊሻስ ቃጻይዳ ጊዲኮካ ኢስታስ ኣቶ ጊዳ ጾሳ።
PSA 99:9 ጎዳ ኑ ጾሳ ꬎቁ ꬎቁ ሂስቲቴ፤ ኢዛ ጌሻ ዙማ ቦላን ኢዛስ ጎይኒቴ፤ ኣይስ ጊኮ ጎዳ ኑ ጾሳይ ጌሻ ጾሳ።
PSA 100:1 ሳኣን ዴኢዛ ኣስ ኡባይ ጎዳስ ኡፋይሳን ኢሊሊቴ።
PSA 100:2 ጎዳስ ኡፋይሳን ሃጋዚቴ፤ ኡፋይሳ ዬꬃራ ኢዛ ሲንꬅ ሺቂቴ።
PSA 100:3 ጎዳይ ጾሳ ጊዲዳይሳ ኤሪቴ፤ ኑና ሜꬊዳይ ኢዛ፤ ኑኒ ኢዛይታ፤ ኑኒ ኢዛ ኣሳቲ ኢዚ ሄሚዛ ዶርሳ ዉዴታ።
PSA 100:4 ኢዛ ፔንጌ ጋላታራ፥ ኢዛ ዛጎ ሳባራ ጌሊቴ፤ ኢዛ ጋላቲቴ፤ ኢዛ ሱንꬃካ ኣንጂቴ።
PSA 100:5 ኣይስ ጊኮ ጎዳይ ኪያ፤ ኢዛ ሲቆይ ሜርናሳ፤ ኢዛ ኣማኔቴꬃይ ዬሌታፔ ዬሌታ ጋካናሳ።
PSA 101:1 ታኒ ኔ ሲቆ ጊሻሲኔ ቱማ ፒርዳ ጊሻስ ዬጻና፤ ኣቤት ጎዳዉ! ታኒ ኔስ ጋላታ ማዛሙሬ ዬጻና።
PSA 101:2 ታኒ ሱሬ ኦጌ ካላና፤ ኔኒ ታኮ ኣዉዴ ያኔ? ታኒ ታ ኬꬃን ሱሬቴꬃን ዳና።
PSA 101:3 ታኒ ታ ኣይፌራ ኢታ ሚሽ ጼሊኬ፤ ጾሳፌ ካሬ ኬዚዳ ኣሳታ ኦሶ ኢጻይስ፤ ታኒ ኢስታራ ሙሌካ ዙፔቲኬ።
PSA 101:4 ዎዚና ጌላቲ ታፔ ሃኬቶ፤ ኢታቴꬃራ ታስ ጋይቶቴꬂ ዴና።
PSA 101:5 ጌማን ባ ላጌ ዚጊርዛይሳ ታኒ ሲርጲ ኦꬃና፤ ኦቶሬቲዛይሲኔ ጬቄቲዛ ኣስ ታኒ ጮኡ ጋ ኣጊኬ።
PSA 101:6 ኢስቲ ታናራ ዳና ማላ ቢታ ቦላ ዴኢዛ ኣማኔቲዛይታ ታኒ ሎኦ ኣይፌን ጼላይስ። ሱሬቴꬃን ሄሜቲዛ ኣሲ ታስ ሃጋዛና።
PSA 101:7 ጪሞ ኦꬂዛይ ኦኒካ ታ ኬꬃን ዴና፤ ዎርዶ ሃሳይዛይ ታ ሲንꬃን ኤቄና።
PSA 101:8 ቢታን ዴኢዛ ኢታ ኣስ ኡባ ታኒ ሃች ሃች ꬋይሳና፤ ኢታ ኦꬂዛይታ ኡባ ታኒ ጎዳ ካታማፔ ꬎቃላ ꬋይሳና።
PSA 102:1 ኣቤት ጎዳዉ! ታ ዎሳ ሲያ፤ ታ ዋሶይ ኔኮ ጋኮ።
PSA 102:2 ታ ሜቶቲዳ ጋላስ ኔ ሲንꬃ ታፔ ጌንꬆፋ፤ ኔ ሃይꬃ ታኮ ዛራ፤ ታኒ ኔኮ ዋሲዛ ዎዴ ታስ ኤሶን ኣላ።
PSA 102:3 ኣይስ ጊኮ ታ ላይꬃይ ጩዋ ማላ ꬋዬስ፤ ታ ሜቄꬃይካ ታማ ቦንቆ ማላ ኤጼስ።
PSA 102:4 ታ ዎዚናይ ኣዋይ ላቢዳ ማታ ማላ ሃንዴስ፤ ታስ ቆꬌይ ካꬅ ኢጺዴስ።
PSA 102:5 ታስ ኦሌ ዳሮፔ ዴንዶይሳን ሜቄꬂ ጻላ ኣቲዴስ።
PSA 102:6 ታኒ ባዞን ዲዛ ቢያ ካፎ ዎይኮ ላሌቲዳ ኬꬃን ዴኢዛ ጉቶ ማላ።
PSA 102:7 ታኒ ኢቺን ꬊስኮይ ዬና፤ ታኒ ኬꬃ ሁኤን ባርካ ኡቲዳ ካፎ ማላ ጊዳዲስ።
PSA 102:8 ታ ሞርኬቲ ኡባ ጋላስ ታና ጫዬቴስ፤ ታና ኢሴꬂዛይቲ ታ ሱንꬅ ቃንጌቲዳ ማላ ቆዲዳ።
PSA 102:9 ታኒ ቢዲንꬅ ꬊሌ ማላ ቃምኣዲስ፤ ታ ኣፉንꬃካ ኡሻራ ዋላካ ኡያዲስ።
PSA 102:10 ኔ ሃንቆ ጋሶኒኔ ኔ ቦሻ ጋሶን ኔ ታና ፑዴ ዴንꬆሶፔ ዱጌ ኦላዳሳ።
PSA 102:11 ታ ዴኦ ላይꬃይ ኦማርሳ ዎዴ ኩዋ ማላ፤ ታኒ ማታ ማላ ሜላዲስ።
PSA 102:12 ጊዶ ኣቲን ኣቤት ጎዳዉ! ኔኒ ካዎቴꬃ ኣራታን ሜርናስ ኡታዳሳ፤ ኔ ሱንꬃይካ ዬሌታፔ ዬሌታ ጋካናስ ሃሳኤታና።
PSA 102:13 ኔኒ ጺዮኒስ ኪያቴꬅ ኦꬂዛ ዎዴይ ጋኪዳ ጊሻሲኔ ዎዴዚካ ሃኢ ጊዲዳ ጊሻስ ኔኒ ዴንዳዳ ኢዚስ ቃꬌታና።
PSA 102:14 ኔ ኦሳንቻቲ ኢዛን ዲዛ ሹቻታ ዶሴቴስ፤ ቡꬌቲዳ ቢታስካ ቃꬌቴቴስ።
PSA 102:15 ካዎቴꬃቲ ጎዳ ሱንꬃስ ያያና፤ ሳኣ ካዎቲ ኡባይ ኢዛ ቦንቻና።
PSA 102:16 ጎዳይ ጺዮኖ ዛሪ ኤሲዛ ዎዴ ኢዚ ባ ጊታቴꬃ ቤሳና።
PSA 102:17 ኢዚ ሂዬሳታ ዎሳ ሲያና፤ ኢስታ ሾቤካ ካꬌና።
PSA 102:18 ቡሮን ዬሌታናይ ጎዳ ጋላታና ማላ ሃይሲ ዪዛ ዬሌታስ ጻፌቶ።
PSA 102:19 ጎዳይ ꬎቃን ዲዛ ባ ጌሻ ሶሆፔ ዱጌ ጼሊዴስ፤ ኢዚ ሳሎፔ ዱጌ ሳኣ ቤኢዴስ።
PSA 102:20 ሄሲካ ቃሼቲዳ ኣሳታ ዋሶ ሲያናሲኔ ሃይቆስ ፒርዴቲዳ ኣሳታ ቃሾፔ ቢርሻናሳ።
PSA 102:21 ሄሳ ጊሻስ ጎዳ ሱንꬂ ጺዮኒን ዮቴታና፤ ኢዛ ጋላታይ ዬሩሳላሜን ኣዋጄታና።
PSA 102:22 ዴሬቲኔ ካዎቲ ኢሲፌ ሺቂዲ ጎዳስ ሄ ዎዴ ጎይናና።
PSA 102:23 ታኒ ናቴቴꬃን ዲሺን፥ ኢዚ ታ ሚኖቴꬃ ኦጌን ኣሺዴስ፤ ታ ዳና ላይꬃካ ቃንꬂዴስ።
PSA 102:24 ሂስቲን ታኒ፥ «ኣቤት ታ ጾሳዉ! ታኒ ዳና ላይꬃ ቡሮ ባጋሲሺን ኔ ታና ኤኮፋ። ኣቤት ጎዳዉ! ኔኒ ዬሌታፔ ዬሌታ ጋካናስ ዳሳ» ጋይስ።
PSA 102:25 ኔኒ ቤኒ ሳኣ ሜꬋዳሳ፤ ሳሎቲካ ኔ ኩሼ ኦሶ።
PSA 102:26 ሄይቲ ኡባይ ꬋያና፤ ጊዶ ኣቲን ኔኒ ሚና ዳና፤ ኢስቲ ኡባይካ ኣፋላ ማላ ዉራና፤ ኔኒ ኢስታ ጫርቃ ማላ ላማና፤ ኢስቲካ ኣꬋና።
PSA 102:27 ጊዶ ኣቲን ኣዉዴካ ኔኒ ኔና፤ ኔ ላይꬃይ ሙሌካ ዉሬና።
PSA 102:28 ኔስ ኦꬂዛይታ ናይቲ ሳሮቴꬃን ዳና፤ ኢስታ ዜሬꬃይካ ኔ ሲንꬃን ሚኒ ኤቃና።
PSA 103:1 ታ ሼምፖዬ! ጎዳ ጋላታ! ታ ኩሜꬃ ኣሳቴꬃይ ኢዛ ጌሻ ሱንꬃ ጋላቶ።
PSA 103:2 ታ ሼምፖዬ! ጎዳ ጋላታ! ኢዚ ኔስ ኦꬂዳ ኪያቴꬃ ኡባ ዶጎፓ።
PSA 103:3 ኢዚ ኔ ናጋራ ኡባ ኣቶ ጌስ፤ ኢዚ ኔ ሃርጌ ኡባፌ ኔና ፓꬄስ።
PSA 103:4 ኢዚ ኔና ዱፎን ጌሎንታ ማላ ኣሼስ፤ ሜርና ሲቆኒኔ ማሮታን ኔና ኣንጄስ።
PSA 103:5 ጎሌ ካፎꬆ ኔኒ ኦራጻና ማላ ኢዚ ኔ ኣሞ ኡባ ሎኦ ሚሻን ኩንꬃና።
PSA 103:6 ጎዳይ ናቄቲዳይታስ ጺሎ ኦꬄሲኔ ሱሬ ፒርዳ ፒርዴስ።
PSA 103:7 ኢዚ ባ ኦጌ ሙሴ ቤሲዴስ፤ ባ ኦሶካ ኢስራኤሌ ኣሳ ኤሪሲዴስ።
PSA 103:8 ጎዳይ ቃꬌቲዛዴኔ ማሪዛዴ፤ ኢዚ ሃንቄታናስ ኤሶቶንታዴ፤ ኢዛ ሲቆይ ኬሂፔ ዳሮ።
PSA 103:9 ኢዚ ኡባ ዎዴ ኑ ሞሮስ ሞቴና፤ ሜርናስካ ሃንቄቴና።
PSA 103:10 ኢዚ ኑ ናጋራ ማላ ኑስ ኦꬂቤና፤ ኑ ኢታቴꬃ ማላ ኑስ ዛሪቤና።
PSA 103:11 ሳሎይ ሳኣፔ ꬎቂዛ ማላ ጎዳስ ያዪዛይታስ ኢዛ ሲቆይ ጊታ።
PSA 103:12 ኣርሼይ ሞኪዛሶፔ ዉሊዛሶይ ሃኪዛ ማላ ጎዳይ ኑ ሞሮዛ ኑፔ ሃሲዴስ።
PSA 103:13 ኣዋይ ባ ናይታስ ቃꬌቲዛ ማላ ጎዳይ ባስ ያዪዛይታስ ቃꬌቴስ።
PSA 103:14 ኑኒ ኣዛፔ ሜꬌቲዳኮ ኢዚ ኤሬስ፤ ኑኒ ቢታ ጊዲዳይሳካ ኢዚ ኣኬኬስ።
PSA 103:15 ኣሳ ዴኦይ ጊዲኮ ማታ ማላ፤ ኢዚ ባዞ ጪሻ ማላ ጪዬስ።
PSA 103:16 ጫርኮይ ጫርኪዛ ዎዴ ቆቆፌቲ ꬋዬስ፤ ኢዚ ካሴ ዲዛሶይ ሙሌካ ኤሬቴና።
PSA 103:17 ጊዶ ኣቲን ጎዳስ ያዪዛይታስ ኢዛ ሲቆይ ሜርናፔ ሜርና ጋካናሳ፤ ኢዛ ጺሎቴꬃይካ ዬሌታፔ ዬሌታ ጋካናሳ።
PSA 103:18 ሄሲ ሃናናይ ኢዛ ጫቆ ቃላ ናጊዛይታሲኔ ኢዛ ኣዛዞ ፖላናስ ሚኔቲዛይታሳ።
PSA 103:19 ጎዳይ ባ ኣራታ ሳሎን ኤሲዴስ፤ ኢዛ ካዎቴꬃይ ኡባ ሃሬስ።
PSA 103:20 ኢንቴኖ ኢዛ ኪታንቻቶ! ኢዛ ኣዛዞ ፖሊዛ ዎልቃማቶ! ኢዚ ጊዛይሳ ኤዝጊዛይቶ! ጎዳ ጋላቲቴ።
PSA 103:21 ኢንቴኖ ሳሎን ዴኢዛ ሚኖቶ! ኢዛ ሼኔ ኦꬂዛ ኣይሌቶ! ጎዳ ጋላቲቴ።
PSA 103:22 ኢንቴኖ ኢዚ ሃሪዛ ሶሆ ኡባን ዴኢዛ ሜꬌታቶ! ኡባይካ ጎዳ ጋላቲቴ። ታ ሼምፖዬ! ጎዳ ጋላታ።
PSA 104:1 ታ ሼምፖዬ! ጎዳ ታ ጾሳ ጋላታ! ኣቤት ጎዳ ታ ጾሳዉ! ኔኒ ኣይ ኬና ጊታ! ኔኒ ቦንቾኔ ቴማ ማይኣዳሳ።
PSA 104:2 ኔኒ ኣፋላ ማላ ፖኦ ቁማኣዳሳ፤ ሳሎታካ ዱንካኔ ማላ ቶላዳሳ።
PSA 104:3 ኔ ኬꬃ ሳሎ ጉፋንꬆ ቦላን ኬጻዳሳ፤ ሻራ ኔስ ፓራ-ጋሬ ኬሳዳሳ፤ ጫርኮ ቄፌ ቶጋዳ ባሳ።
PSA 104:4 ኔኒ ጫርኮታ ኔ ኪታንቻ፥ ታማ ላጮካ ኔ ኣይሌ ኬሳሳ።
PSA 104:5 ኔኒ ሳኣ ዮቻ ቦላ ኤሳዳሳ፤ ኢዚ ሜሪ ሜርናስካ ቃጼና።
PSA 104:6 ዎጋ ጊታ ኣባ ቢታ ቦላን ኣፋላ ማላ ሚጫዳሳ፤ ሃꬂካ ጊታ ዙማታ ካሚዴስ።
PSA 104:7 ጊዶ ኣቲን ኔ ሴሪን ሃꬃቲ ኪቺዳ፤ ኔ ኣዛዞ ሲዪዲ ኤሶን ባቃቲዳ።
PSA 104:8 ኢስቲ ጊታ ዙማታፔ ዱጌ ሾባታ ዎꬊዳ፤ ኔኒ ኢስታስ ጊግሲዳሶ ጎጊዳ።
PSA 104:9 ሃꬃቲ ሲሚዲ ቢታ ካሞንታ ማላ፥ ኢስቲ ኣꬎንታ ማላ ዛዋ ኤሳዳሳ።
PSA 104:10 ኔኒ ፑልቶታ ሾባን ፑልቲሳሳ፤ ሃꬅ ዙማታ ጊዶራ ዱጌ ጎጊሳሳ።
PSA 104:11 ባዞ ዶኣቲ ኡባይ ኢዛፔ ኡዬቴስ፤ ሃሪዲዳቲካ ሳሞስ ኢዛፔ ኡዪ ኣሌቴስ።
PSA 104:12 ሳሎ ካፎቲ ሃꬃ ማታን ባንታ ኬꬃ ኬጼቴስ፤ ሚꬃ ሃጋታ ጊዶንካ ዬጼቴስ።
PSA 104:13 ኔኒ ጊታ ዙማታ ቦላን ሳሎፔ ኢራ ቡኪሳሳ፤ ቢታካ ኔ ኩሼ ኦሶ ኣይፌን ኩንꬃዳሳ።
PSA 104:14 ኔኒ ሜሄስ ማታ፥ ኣሳስ ካꬅ ሞኪሳሳ፤ ሄሳን ኣሳይ ቢታ ኦꬂዲ ካꬅ ሺሼስ።
PSA 104:15 ኣሳ ዎዚና ኡፋይሲዛ ዎይኔ፥ ሲንꬅ ሺጪሲዛ ዛይቴኔ ዎልቃ ኢሚዛ ካꬅ ዴሜስ።
PSA 104:16 ጎዳ ሚꬃቲ፥ ኢዚ ቶኪዳ ሊባኖሴ ዚጋቲ ዳሮ ኢራ ኡዪ ካሌቴስ።
PSA 104:17 ኢስታን ካፎቲ ባንታ ኬꬅ ኬጼቴስ፤ ዚጊሌቲካ ዚጋ ቦላ ኬጺዲ ዴኤቴስ።
PSA 104:18 ꬎቃ ዙማታ ቦላን ዉሻቲ ዴኤቴስ፤ ቃሴ ጉፓሌቲ ሹቻ ጎንጎሎን ቆቴቴቴስ።
PSA 104:19 ዎዳ ቆዳ ኤሪሳናስ ኔኒ ኣጊና ሜꬋዳሳ፤ ኣርሼይ ባ ዉሊዛ ዎዴ ኤሬስ።
PSA 104:20 ኔኒ ꬉማ ኤሂዛ ዎዴ ሳኣይ ቃሜስ፤ ዎራ ዶኣቲካ ኬዚዲ ዎጼሬቴቴስ።
PSA 104:21 ዎዳላ ጋሞቲ ማና ሚሻስ ዋሴቴስ፤ ኢስቲ ባንታስ ሚዛ ሚሽ ጾሳፌ ኮዬቴስ።
PSA 104:22 ኣርሼይ ሞኪዛ ዎዴ ጉዬ ሲሚዲ ባንታ ኣቆሶን ኢቼቴስ።
PSA 104:23 ሄ ዎዴ ኣሲ ባ ኦሶስ ኬዜስ፤ ሳኣይ ቃማና ጋካናስ ኦꬄስ።
PSA 104:24 ኣቤት ጎዳዉ! ኔ ኦሶይ ኣይ ኬና ዳሮ! ኔ ኣꬎ ኤራቴꬃን ኔኒ ኢስታ ኡባ ሜꬋዳሳ፤ ኔ ሜꬊዳ ሜꬌታቲ ቢታ ኩሚዳ።
PSA 104:25 ሃና ኣባያ ጊታኔ ኣሆ፤ ቆዳይ ባይንዳ ቃጺዛ ሜꬌቴꬃቲ፥ ጉꬃቲኔ ጊታቲ ኢዚን ኩሚዳ።
PSA 104:26 ኢዚ ቦላን ማርካቤቲ ሲሜሬቴቴስ፤ ቃሴ ኔኒ ሜꬊዳ ሌዋታኔ ጌቴቲዛ ሚሚንቴይ ኢዚን ካኤስ።
PSA 104:27 ኮሺዛ ዎዴ ኔ ኢስታስ ሚዛዝ ኢማና ማላ ኢስቲ ኡባይ ኔኮ ጼሌቴስ።
PSA 104:28 ኔኒ ኢስታስ ኢሚዳ ዎዴ ኢስቲ ሺሼቴስ፤ ኔኒ ኔ ኩሼፔ ዬጊን ኢስቲ ሎኦ ሚሽ ካሌቴስ።
PSA 104:29 ኔኒ ኔ ሲንꬃ ጌንꬂዛ ዎዴ ዳጋሜቴስ፤ ኔ ኢስታ ሼምፖ ኤኪዛ ዎዴ ሃይቄቴስ፤ ዱጌ ቢታንካ ሲሚ ጌሌቴስ።
PSA 104:30 ጊዶ ኣቲን ኔኒ ኢስታስ ኔ ኣያና ኪቲዳ ዎዴ ሃራቲ ሜꬌቴቴስ፤ ቢታካ ኦራጺሳሳ።
PSA 104:31 ጎዳ ቦንቾይ ሜርናስ ዴኦ፤ ጎዳይ ባ ኦሶን ኡፋዬቶ።
PSA 104:32 ኢዚ ቢታ ጼሊን ቢታይ ቃጼስ፤ ቃሴ ኢዚ ዙማታ ቦቺን ዙማቲ ጩዋቴቴስ።
PSA 104:33 ታኒ ዴኢዛ ላይꬅ ኡባን ጎዳስ ዬጻና፤ ታኒ ሼምፖራ ፓጻ ዴኢዳ ዎዴ ኡባን ታ ጾሳስ ዬጻና።
PSA 104:34 ታኒ ጎዳን ኡፋዬቲዛ ጊሻስ ታ ዎዚና ቆፋይ ኢዛ ኡፋይሶ።
PSA 104:35 ናጋራንቻቲ ቢታፌ ꬋዬቶ፤ ሃይሳፌ ሲንꬃስ ኢታቲ ዶፔቶ። ታ ሼምፖዬ! ጎዳ ጋላታ! ጎዳ ጋላታ!
PSA 105:1 ጎዳ ጋላቲቴ፤ ኢዛ ሱንꬃ ጼይጊቴ፤ ኢዚ ኦꬂዳ ኦሶታ ካዎቴꬃታ ኤሪሲቴ።
PSA 105:2 ኢዛስ ጊንጾ ጊግሲቴ፤ ጋላታ ዬꬂካ ዬጺቴ፤ ማላሊሲዛ ኢዛ ኦሶ ኡባ ዮቲቴ።
PSA 105:3 ጌሻ ሱንꬃን ኢዛይሳን ጬቄቲቴ፤ ጎዳ ኮይዛይታ ዎዚናይ ኡፋዬቶ።
PSA 105:4 ጎዳኔ ኢዛ ዎልቃ ጾሞሲቴ፤ ኡባቶ ኢዛ ሲንꬃ ኮዪቴ።
PSA 105:5 ኢንቴኖ ኢዛ ኣይሌ ኣብራሃሜ ዜሬꬃቶ! ዶሬቲዳ ያቆቤ ናይቶ! ኢዚ ኦꬂዳ ማላሊሲዛ ኦሶታ፥ ኢዛ ማላታኔ ኢዚ ፒርዲዳ ፒርዳ ኣኬኪቴ።
PSA 105:7 ኢዚ ጎዳ ኑ ጾሳ፤ ኢዛ ሱሬ ፒርዳይካ ሳኣ ኡባ ቦላ ዴስ።
PSA 105:8 ኢዚ ባ ጫቆ ቃላ ሜርናስ ባ ኣዛዚዳ ቃላ ሺ ዬሌታ ጋካናስ ናጌስ።
PSA 105:9 ኢዚ ኣብራሃሜስ ጫቂዳ ጫቆ ቃላ፥ ዪሳቃስ ኢሚዳ ቃላ ባሌና።
PSA 105:10 ሄሳ ያቆቤስ ዎጋ፥ ኢስራኤሌሲካ ሜርና ጫቆ ቃላ ሂስቲዲ ሚንꬂ ኤሲዴስ።
PSA 105:11 ቃሴካ፥ «ኔስ ካናኔ ቢታ ኢማና፤ ኢዚካ ኔ ዜሬꬃታስ ላታ ጊዳና» ጊዴስ።
PSA 105:12 ኢስቲ ቆዳን ቂ ጉꬃታኔ ካናኔ ቢታን ቤቴ ጊዲዲ ዲዛ ዎዴ፥
PSA 105:13 ኢሲ ዴሬፔ ሃራ ዴሬ፥ ኢሲ ካዎቴꬃፌ ሃራ ካዎቴꬅ ዩዪዳ።
PSA 105:14 ጾሲ ኢስታ ኦኒካ ቆሃናስ ኢሚቤና፤ ኢስታ ጊሻስ ካዎታ ሴሪሼ፥
PSA 105:15 «ታኒ ቲይዳይታ ቦቾፍቴ፤ ናቤታ ቆሆፒቴ» ጊዴስ።
PSA 105:16 ጎዳይ ቢታ ቦላ ኮሻ ዬዲዴስ። ኢስታ ካꬅ ኡባ ꬋይሲዴስ።
PSA 105:17 ጊዶ ኣቲን ኢዚ ባ ኣሳ ኣሻናስ ኢስታፌ ሲንꬃን ኣይሌቴꬃስ ባይዜቲዳ ዮሴፌ ኪቲዴስ።
PSA 105:18 ኢዛ ቶሆቲ ካቴናን ዋጼቲዳ፤ ኢዚ ሳንሳላታን ቃሼቲዴስ።
PSA 105:19 ኢዚ ካሴ ዮቲዳይሲ ፖሌታና ጋካናስ ጎዳ ቃላይ ኢዛ ፓጪዴስ።
PSA 105:20 ካዎይ ኣስ ኪቲዲ ኢዛ ቢርሺሲዴስ፤ ዴራ ሃሪዛይሲ ቃሾ ኬꬃፌ ኬሲዴስ።
PSA 105:21 ካዎዚ ኢዛ ባ ኬꬃስ ጎዳ ኦꬂዴስ፤ ባስ ዲዛ ኡባ ኣቆታ ቦላ ሹሚዴስ።
PSA 105:22 ሄሲካ ሹሜታ ማራራ ካሌꬃና ማላኔ ጊታ ኣሳታ ኣꬎ ኤራቴꬅ ታማርሳና ማላ ሱንꬂዴስ።
PSA 105:23 ሄሳፌ ጉዬ ኢስራኤሌይ ጊብጼ ጌሊዴስ፤ ያቆቤይ ካሜ ቢታን ቤቴ ኣስ ጊዲዲ ዴኢዴስ።
PSA 105:24 ጎዳይ ባ ኣሳ ኬሂ ጮራሲዴስ፤ ኢስታ ሞርኬታፔ ኢስታ ኣꬂ ሚንꬂዴስ።
PSA 105:25 ኢዚ ጊብጼ ኣሳይ ባ ኣሳ ኢጻና ማላኔ ባ ኣይሌታ ቦላ ዴንዳና ማላ ኦꬂዴስ።
PSA 105:26 ሄሳፌ ጉዬ ባ ኣይሌ ሙሴኔ ባ ዶሪዳ ኣሮኔ ኢስታኮ ኪቲዴስ።
PSA 105:27 ኢስቲ ጊብጼ ኣሳታ ሲንꬃን ጾሳ ማላታ፥ ካሜ ቢታን ማላሊሲዛ ሚሽ ኦꬂዳ።
PSA 105:28 ጎዳይ ꬉማ ኪቲዲ ሄ ቢታ ꬉሚሲዴስ፤ ጊዶ ኣቲን ጊብጼ ኣሳቲ ኢዛ ኣዛዞ ኢጺስ ጊዳ።
PSA 105:29 ኢስታ ሃꬃ ሱꬃን ላሚዲ ሞሌታ ዎꬊዴስ።
PSA 105:30 ኢስታ ቢታ ኡባ ካዎዛ ኬꬃካ ሾꬌይ ኩሚዴስ።
PSA 105:31 ኢዚ ኣዛዚን ቦጼይኔ ኡኤይ ኢስታ ቢታ ኡባ ቦላ ሾምኡሾምኢዴስ።
PSA 105:32 ኢስታ ቢታ ቦላን ኢራ ጊሻስ ሻች ዎልቃንꬃራ ቡኪሲዴስ።
PSA 105:33 ኢዚ ኢስታ ዎይኔ ቱራኔ ባላሴ ሚꬅ ኡባ ዲፒ ሂስቲዴስ፤ ኢስታ ቢታን ዴኢዛ ሚꬃታካ ሜንꬄሬꬂዴስ።
PSA 105:34 ኢዚ ኣዛዚን ቦሌይኔ ቆዳይ ባይንዳ ጉምባሮይ ኬዚዴስ።
PSA 105:35 ሂስቲዲ ኢስታ ጋዴን ሞኪዳ ካꬅ ኡባ ሚዴስ፤ ኢስታ ቢታን ዲዛ ጪሊላ ሚሽ ኡባካ ዲፒ ሂስቲዴስ።
PSA 105:36 ጎዳይ ጊብጼ ዴሬን ባይራታ ኡባ ዎꬊዴስ፤ ኮይሮ ዬሌቲዳ ናይታ ኡባካ ꬋይሲዴስ።
PSA 105:37 ሄሳፌ ጉዬ ኢዚ ኢስራኤሌ ኣሳ ዎርቃኔ ቢራ ኣሌቆራ ኬሲዴስ፤ ኢስታ ጊዶፌ ኩንዲዲ ኣቲዳይ ኦኒኔ ባዋ።
PSA 105:38 ጊብጼ ኣሳቲ ኢስታስ ዳሮ ያዪዳ ጊሻስ ኢስቲ ኬዚ ቢሺን ኡፋዬቲዳ።
PSA 105:39 ጾሳይ ኢስታ ካማናስ ሻራ ሚጪዴስ፤ ኦማርስ ኢስታስ ፖኢሳናዉ ታማ ጊግሲዴስ።
PSA 105:40 ኢስቲ ሚዛ ሚሽ ኦይቺን ኩራቾ ሚሳቲዛ ካፎታ ኢስታስ ዬዲዴስ፤ ኢስታ ሳሎ ቁማ ካሊሲዴስ።
PSA 105:41 ኢዚ ዛላ ጳልቂን ሃꬂ ፑልቲዴስ፤ ሻፋ ማላካ ዱጌ ባዞ ጎጊዴስ።
PSA 105:42 ኢዚ ባ ኣይሌ ኣብራሃሜስ ጫቂዳ ጌሻ ቃላ ሃሳኢዴስ።
PSA 105:43 ኢዚ ባ ኣሳ ኡፋይሳን፥ ባ ዶሪዳይታ ኢሊሊሳን ኬሲዴስ።
PSA 105:44 ኢዚ ኢስታስ ሃራ ካዎቴꬃታ ቢታ ኢሚዴስ፤ ሂስቲን ኢስቲ ሃራቲ ዳቡሪ ኬሲዳ ካꬃ ኣይፌ ላቲዳ።
PSA 105:45 ሄሳ ኢዚ ኦꬂዳይ ኢስቲ ኢዚ ዎꬂዳ ማራ ናጋናሳ፤ ኢዛ ዎጋካ ፖላናሳ። ጎዳ ጋላቲቴ!
PSA 106:1 ጎዳ ጋላቲቴ! ኢዚ ኪያ ጊዲዳ ጊሻስ፥ ኢዛ ሲቆይካ ሜርናስ ጊዲዳ ጊሻስ ጎዳ ጋላቲቴ።
PSA 106:2 ጎዳይ ኦꬂዳ ዎልቃማ ኦሶ ዮታናስ፥ ዎይኮ ኢዛ ጋላታ ኡባ ቆንጪሳናስ ዳንዳይዛይ ኦኔ?
PSA 106:3 ፒርዳይ ጌላቶንታ ማላ ናጊዛይቲኔ ኡባ ዎዴ ጺሎ ኦꬂዛይቲ ኣንጄቲዳይታ።
PSA 106:4 ኣቤት ጎዳዉ! ኔኒ ኔ ኣሳ ማዲዛ ዎዴ ታና ቆፓ፤ ኢስታ ኔኒ ኣሺዛ ዎዴ ታናካ ኣላ።
PSA 106:5 ሄሲካ ኔ ዶሪዳ ኣሳስ ሳኣይ ኪዪን ታኒ ቤያና ማላ፥ ኔ ኣሳ ኡፋይሳ ታኒ ኡፋዬታና ማላ፥ ኔ ናይቲ ቦንቼቲዳ ጋሶን ታኒካ ኡፋይሳን ማጉላና ማላሳ።
PSA 106:6 ኑኒ ኑ ኣዋታ ማላ ናጋራ ኦꬂዶስ፤ ሞሮኔ ኢታ ኦꬂዶስ።
PSA 106:7 ኑ ኣዋቲ ጊብጼን ዴኢዛ ዎዴ፥ ኔ ማላሊሲዛ ኦሶ ቆፒቤቴና። ኔ ሲቆ ዳሮቴꬃ ኢስቲ ኣኬኪቤቴና፤ ዞኦ ኣባ ላንቄን ማካሊዳ።
PSA 106:8 ጊዲኮካ ኢዚ ባ ሱንꬃ ጊሻስ፥ ባ ጊታ ዎልቃ ኤሪሳናስ ኢስታ ኣሺዴስ።
PSA 106:9 ኢዚ ዞኦ ኣባ ሴሪዴስ፤ ኣባይካ ሜሊዴስ፤ ባዞን ካሌꬂዛይሳ ማላ ጪማ ጊዶራ ኢስታ ካሌꬂዲ ፒንꬂዴስ።
PSA 106:10 ኢዚ ኢስታ ኢጺዛይታ ኩሼፔ ኣሺዴስ፤ ሞርኬታ ኩሼፔ ኢስታ ዎዚዴስ።
PSA 106:11 ኢስታ ሞርኬታ ሃꬂ ሚቲዴስ፤ ኢስታፌ ኢሶይካ ኣቲቤና።
PSA 106:12 ሄ ዎዴ ኢስራኤሌቲ ኢዛ ቃላ ኣማኒዳ፤ ኢዛ ዬꬃን ሳቢዳ።
PSA 106:13 ጊዲኮካ ኢስቲ ኢዚ ኦꬆይሳ ሄራካ ዶጊዳ። ኢዛ ዞሬ ናጎንታ ባንቲ ኮዪዳይሳ ኦꬂዳ።
PSA 106:14 ኢስቲ ባዞ ቢታን ኬሂ ኣሞቲዳ፤ ቃሴ ሜላ ቢታንካ ጾሳ ፓጪዳ።
PSA 106:15 ሄሳ ጊሻስ ኢዚ ኢስቲ ዎሲዳይሳ ኢሚዴስ፤ ጊዶ ኣቲን ኢስታ ሼምፖስ ጊልቃቴꬅ ኪቲዴስ።
PSA 106:16 ኣሳቲ ባዞን ዱንካኒ ዲሼ ሙሴኔ ጎዳስ ዱማቲዳ ኣይሌ ኣሮኔ ቃናቲዳ ዎዴ፥
PSA 106:17 ቢታይ ዶዬቲዲ ዳታኔ ሚቲዴስ፤ ኣብራሜ ኢዛ ኬꬃ ኣሳታራ ሞጊዴስ።
PSA 106:18 ቃሴ ኢስታ ማባራ ጊዶን ታማይ ኤጺን፥ ላጮይ ሄ ኢታ ኣሳታ ጹጊዴስ።
PSA 106:19 ኮሬቤ ዙማን ዴኢሼ ዎርቃ ሴሪሲዲ ማራ ሚስሌ ሜꬊዳ፤ ሂስቲዲ ሄ ሚሲላስ ጎይኒዳ።
PSA 106:20 ኢስቲ ባንታ ቦንቾ ጾሳ ማታ ሚዛ ሚዛ ሚስሌን ላሚዳ።
PSA 106:21 ኢስቲ ባንታና ኣሺዳ ጾሳ ዶጊዳ፤ ኢዚ ጊብጼን ጊታ ኦሶ፥
PSA 106:22 ካሜ ቢታንካ ማላሊሲዛይሳኔ ዞኦ ኣባን፥ «ሆላ!» ጊሲዛይሳ ኦꬂዳይሳ ዶጊዳ።
PSA 106:23 ሄሳ ጊሻስ ጾሲ ኢስታ ꬋይሳና ጊዴስ፤ ጊዶ ኣቲን ꬋይሶንታ ማላ ኢዛ ሃንቆዛ ዛራናስ ጾሲ ዶሪዳ ሙሴይ ጊዶን ኤቂዴስ።
PSA 106:24 ሄ ሎኦ ቢታዮ ካꬊዳ፤ ሄሳፌ ጉዬ ኢዛ ቃላን ኣማኔቲቤቴና።
PSA 106:25 ኢስቲ ባንታ ዱንካኔዛ ጊዶን ዙዙሚዳኔ ጎዳ ቃላስ ኣዛዜቶንታ ኢጺዳ።
PSA 106:26 ሄሳ ጊሻስ ኢስቲ ባዞን ኩንዲ ꬋያና ማላ፥ ኢዚ ባ ኩሼ ዴንꬂዲ ጫቂዴስ።
PSA 106:27 ኢስታ ዜሬꬃቲ ካዎቴꬃታ ጊዶን ኦሌታናይሳኔ ኢስቲ ቢታ ጋጻ ጋካናስ ላሌታናይሳ ዮቲዴስ።
PSA 106:28 ሄሳፌ ጉዬ ኢስቲ ባኣሊ-ፔኦሬን ዲዛ ኤቃስ ጎይኒዛይታራ ኢሲፌ ጋይቲዳ፤ ሼምፖይ ባይንዳ ኤቃታስ ያርሼቲዳ ያርሾዛ ሚዳ።
PSA 106:29 ኢስቲ ባንታ ኦሶን ጎዳ ሃንቄꬂዳ፤ ሂስቲን ኢስታ ጊዶን ኢታ ሃርጌይ ዎꬊዴስ።
PSA 106:30 ጊዶ ኣቲን ፊኒሃሲ ዴንዲዲ ኢስታ ሞሮዛ ፒርዲን ኢታ ሃርጌይ ኢስታ ቦላፌ ኪቺዴስ።
PSA 106:31 ሄሲካ ዬሌታፔ ዬሌታ ጋካናስ ሜርናስ ኢዛስ ጺሎቴꬅ ጊዲዲ ቆዴቲዴስ።
PSA 106:32 ማሪባ ፑልቶ ማታን ጎዳ ሃንቄꬂዳ፤ ኢስታ ጋሶን ሙሴ ቦላ ሜቶይ ጋኪዴስ።
PSA 106:33 ኣይስ ጊኮ ኢስቲ ሙሴ ዪሎሲዳ፤ ሂስቲን ኢዛ ዶናፔ ቤሶንታ ቃላይ ኬኢዴስ።
PSA 106:34 ጎዳይ ꬋይሲቴ ጊን ኢስቲ ካናኔ ኣሳታ ꬋይሲቤቴና።
PSA 106:35 ሄ ፓላፔ ኢስቲ ሄ ካዎቴꬃታራ ጌሌቲ ኤኬቲዲ ዋላኬቲዳኔ ኢስታ ዴኦ ዎጋ ካሊዳ።
PSA 106:36 ጾሳ ኣሳቲ ኢስታ ኤቃስ ጎይኒዳ፤ ሄሲካ ኢስታስ ዎጺማዴ ጊዲዴስ።
PSA 106:37 ኢስቲ ባንታ ኣቱማኔ ማጫ ናይታ ዳይዳንꬃታስ ያርሺዳ።
PSA 106:38 ኢስቲ ጺሎ ሱꬅ ካናኔ ኤቃታስ ያርሺዳ፤ ባንታ ኣቱማኔ ማጫ ናይታ ሱꬅ ጉሲዳ፤ ሄ ሱꬃን ቢታይ ቱኒዴስ።
PSA 106:39 ሄሳꬆ ኢስቲ ባንታ ኦሶን ቱኒዳኔ ላይማ ማጫሳ ማላ ባንታ ጾሳስ ኣማኔቶንታ ኢጺዳ።
PSA 106:40 ሄሳ ጊሻስ ጎዳ ሃንቆይ ኢዛ ኣሳ ቦላ ኤጺ ኬኢዴስ፤ ኢዚ ባይታ ሃራሴቲዴስ።
PSA 106:41 ኢዚ ኢስታ ሃራ ካዎቴꬃታ ኩሼን ኣꬂ ኢሚዴስ፤ ኢስታ ሞርኬቲ ኢስታ ሃሪዳ።
PSA 106:42 ኢስታ ሞርኬቲ ኢስታ ናቂዳኔ ባንታ ሼኔን ኣይሲዳ።
PSA 106:43 ኢዚ ኢስታ ዳሮቶ ኣሺዴስ፤ ጊዶ ኣቲን ኢስታ ማካላስ ጊጺ ኬዚዳ፤ ባንታ ናጋራ ጋሶን ꬋይዳ።
PSA 106:44 ጊዲኮካ ኢስቲ ዋሲዳ ዋሶዛ ሲዪዲ ኢስታ ዋዬዛ ቆፒዴስ።
PSA 106:45 ኢስታ ጊሻስ ባ ጫቆ ቃላ ሃሳኢዴስ፤ ኣጎንታ ባ ሲቆ ዳሮን ኢስታ ማሪዴስ።
PSA 106:46 ኢስታ ዲኢዳ ኡባይ ኢስታስ ቃꬌታና ማላ ኦꬂዴስ።
PSA 106:47 ኣቤት ጎዳዉ ኑ ጾሳዉ! ኑና ኣሻ። ኑኒ ኔ ጌሻ ሱንꬃ ጋላታና ማላ ካዎቴꬃታ ጊዶፌ ኑና ሺሻ።
PSA 106:48 ጎዳይ፥ ኢስራኤሌ ጾሲ ሜርናፔ ሜርና ጋካናስ ጋላቴቶ! ኣሳይ ኡባይ፥ «ኣሚን» ጎ። ጎዳ ጋላቲቴ!
PSA 107:1 ኢዚ ኪያኔ ኢዛ ሲቆይ ሜርናስ ጊዲዳ ጊሻስ ጎዳ ጋላቲቴ።
PSA 107:2 ጎዳይ ኢስታ ዎዚዳይቲ፥ ኢስታ ሞርኬታ ኩሼፔ ኢዚ ኣሺዳይቲ ሂዝጌቶ፤
PSA 107:3 ኣርሼይ ሞኪዛሶፔኔ ዉሊዛሶፔ፥ ፑዴሃፔኔ ዱጌሃፔ ዴሬ ኡባፌ ኢዚ ሺሺዳይቲ ሂዝጊ ሃሳዬቶ።
PSA 107:4 ኢስታፌ ኢሶቲ ኢሶቲ ባዞ ቢታን ቶይላቲዳ፤ ባ ዴኢዛ ካታማ ኤፊዛ ኦጌ ዴማናስ ዳንዳይቤቴና።
PSA 107:5 ኢስቲ ጋፊዳኔ ሳሜቲዳ፤ ኬሂፔ ዳቡርዳ።
PSA 107:6 ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።
PSA 107:7 ኢስቲ ዴኣና ካታማ ጋካናስ፥ ኢዚ ኢስታ ሲታ ኦጌራ ካሌꬂዴስ።
PSA 107:8 ሜርና ኢዛ ሲቆዛሲኔ ኢዚ ኣሳስ ኦꬂዳ ማላሊሲዛ ሚሻታስ ኢስቲ ጎዳ ጋላቴቶ!
PSA 107:9 ኣይስ ጊኮ ኢዚ ሳሜቲዳይታ ኡሺ ኣሊሴስ፤ ጋፊዳይታካ ሎኦ ሚሻን ካልሴስ።
PSA 107:10 ኢስታፌ ኢሶቲ ኢሶቲ ቢራታ ሳንሳላታን ቃሼቲዲ ዋዬቲዛይታ፤ ሳካና ꬉማ ጊዶንካ ኡቲዳይታ፤
PSA 107:11 ጋሶይካ ኢስቲ ጾሳ ቃላ ቦላ ማካሊዳኔ ኡባፌ ꬎቃ ጾሳ ዞሬ ካꬊዳ።
PSA 107:12 ሄሳ ጊሻስ ዎልቃ ኦሶን ኢስታ ኢጼꬂዴስ፤ ኢስቲ ዳቡሪን ኢስታ ማዲዛይ ꬋይዴስ።
PSA 107:13 ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።
PSA 107:14 ሳካና ꬉማፔ ኢስታ ኬሲዴስ፤ ኢስቲ ቃሼቲዳ ሳንሳላታካ ዱሴሬꬂዴስ።
PSA 107:15 ሜርና ኢዛ ሲቆዛሲኔ ኢዚ ኣሳስ ኦꬂዳ ማላሊሲዛ ሚሻታስ ኢስቲ ጎዳ ጋላቴቶ።
PSA 107:16 ኣይስ ጊኮ ኢዚ ጻርቂማላፔ ኦሴቲዳ ፔንጌ ሜንꬂዴስ፤ ቢራታ ኮላታታካ ቃንጼሬꬂዴስ።
PSA 107:17 ኢስታፌ ኢሶቲ ኢሶቲ ባ ማካላቴꬃ ጋሶን ኤያ ጊዲዳ፤ ባ ናጋራ ጋሶንካ ሜቶን ጌሊዳ።
PSA 107:18 ኢስታ ቆꬌይ ካꬅ ኢጺን ሃይቃና ማቲዳ።
PSA 107:19 ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።
PSA 107:20 ኢዚ ባ ቃላ ኪቲዲ ኢስታ ፓꬂዴስ፤ ዱፎ ዶናፔካ ኢስታ ኣሺዴስ።
PSA 107:21 ሜርና ኢዛ ሲቆዛሲኔ ኢዚ ኣሳስ ኦꬂዳ ማላሊሲዛ ሚሻታስ ኢስቲ ጎዳ ጋላቴቶ።
PSA 107:22 ኢስቲ ኢዛስ ጋላታ ያርሾ ያርሼቶ፤ ቃሴካ ኡፋይሳ ዬꬃን ኢዚ ኦꬂዳ ኦሶ ቆንጪሴቶ።
PSA 107:23 ኢስታፌ ኢሶቲ ኢሶቲ ማርካቤን ጊታ ኣባ ጊዶራ ቢዳ፤ ሄ ጊታ ኣባ ቦላ ባንታ ኦሶ ኦꬂዳ።
PSA 107:24 ኢስቲ ጎዳ ኦሶ ቤኢዳ፤ ኢዚ ጪማ ጋርሳን ኦꬂዳ ማላሊሲዛ ኦሶታ ጼሊዳ።
PSA 107:25 ኢዚ ኣዛዚን ጎቴ ጫርኮይ ዴንዲዴስ፤ ሂስቲን ኣባ ዳምባላይ ቃጺዴስ።
PSA 107:26 ኢስቲ ፑዴ ሳሎ ኬዚዳ፤ ሲሚዲካ ዱጌ ጪማን ጌሊዳ፤ ኢስታ ጋኪዳ ሜቶፔ ዴንዶይሳን ኢስታ ዎዚናይ ታሂዴስ።
PSA 107:27 ኢስቲ ማꬆቲዳ ኣሳ ማላ ዪጮቲዲ ጋንዲጋርዳ፤ ኢስታስ ኣኬኪዛ ዎዚናይካ ዳሚዴስ።
PSA 107:28 ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።
PSA 107:29 ኢዚ ጎቴ ጫርኮዛ ጮኡ ሂስቲዴስ፤ ኣባ ዳምባላካ ሲርጲ ሂስቲዴስ።
PSA 107:30 ጮኡ ጊዳ ጊሻስ ኢስቲ ኡፋዬቲዳ፤ ኢስቲ ኣሞቲዛ ዎዴቤን ጋꬂዴስ።
PSA 107:31 ሜርና ኢዛ ሲቆዛሲኔ ኢዚ ኣሳስ ኦꬂዳ ማላሊሲዛ ሚሻታስ ኢስቲ ጎዳ ጋላቴቶ።
PSA 107:32 ኢስቲ ኢዛ ዴሬ ዱላታን ꬎቁ ꬎቁ ሂስቴቶ፤ ቃሴ ጪማታ ሺቆን ኢዛ ጋላቴቶ።
PSA 107:33 ሻፋታ ሙሌራ ሜሊሲዴስ፤ ፑልቶቲ ፑልቶንታ ማላ ቴቂዴስ።
PSA 107:34 ሄን ዴኢዛ ኣሳ ኢታቴꬃ ጋሶን ኣራዳ ቢታዮ ኣይኮ ዶሊሶንታ ማጺኔ ቢታ ኦꬂዴስ።
PSA 107:35 ኢዚ ባዞን ሃꬅ ኤሊሲዴስ ሜላ ቢታን ፑልቶይ ꬉቃና ማላ ኦꬂዴስ።
PSA 107:36 ጋፊዳይታ ሄን ዎꬂዴስ፤ ኢስቲካ ባንታስ ዴኣና ካታማ ኬጺዳ።
PSA 107:37 ኢስቲ ባንታ ጎሻን ዜሪዳ፤ ዎይኔ ቶኪዳ፤ ዳሮ ካꬅ ሺሺዳ።
PSA 107:38 ኢዚ ኢስታ ኣንጂን ኢስቲ ኬሂ ጮራቲዳ፤ ኢስታ ሜሄታካ ጉꬂቤና።
PSA 107:39 ሜቶን፥ ዋዬኒኔ ጬጬን ጾኔቲን ኢስታ ቆዳይ ጉጺዴስ።
PSA 107:40 ጎዳይ ሃላቃታ ካዉሺዴስ፤ ኦጌይ ባይንዳ ባዞን ቶይላታና ማላ ኢስታ ኦꬄስ።
PSA 107:41 ጊዶ ኣቲን ኢዚ ሜቶታንቻታ ኢስታ ዋዬፔ ኬሲዴስ፤ ዶርሳ ዉዴ ማላ ጮራ ናይታካ ኢስታስ ኢሚዴስ።
PSA 107:42 ሱሬ ኣሳቲ ሄሳ ቤኢዲ ኡፋዬቴቴስ፤ ጊዶ ኣቲን ጌላታ ዶናይ ጎርዴታና።
PSA 107:43 ኤራ ኣሲ ሃ ዮኦዛ ባ ዎዚናን ዎꬆ፤ ኢዚካ ጎዳ ማሮቴꬅ ኣኬኮ።
PSA 108:1 ኣቤት ጾሳዉ! ታ ዎዚናይ ሚኖ፤ ታኒ ኔስ ኩሜꬃ ዎዚናፔ ዬጻናኔ ኔና ሳባና።
PSA 108:2 ታ ዲꬂኔ ማሲንቆይ ዴንዲቴ! ታኒካ ማላዶ ዎንታራ ዴንዳና።
PSA 108:3 ኣቤት ጎዳዉ! ታኒ ዴራ ጊዶን ኔና ጋላታና፤ ቃሴ ካዎቴꬃታ ጊዶን ኔስ ሳባን ዬጻና።
PSA 108:4 ኔ ሲቆይ ጊታ፤ ሳሎታፔካ ኣꬌስ። ኔ ኣማኔቴꬃይካ ፑዴ ሳሎ ጋኬስ።
PSA 108:5 ኣቤት ጾሳዉ! ሳሎታፔ ቦላራ ꬎቁ ꬎቁ ጋ! ኔ ቦንቾይ ቢታ ኡባ ጋኮ።
PSA 108:6 ኔኒ ሲቂዛይቲ ኣታና ማላ ኔ ኡሻቻ ቄሴን ኑና ኣሻ፤ ታ ዎሳ ሲያ።
PSA 108:7 ጾሲ ባ ጌሻሶሆን ዲሼ፥ «ታኒ ጾናዳ ሴኬሜ ቢታ ሻካና፤ ቃሴ ሱኮቴ ዙላ ጊሻና።
PSA 108:8 ጋላኣዴይ ታይሳ፤ ሚናሴይካ ታይሳ፤ ኤፍሬሜይ ታ ሁኤን ዎꬂዛ ቢራታ ቆቤ፤ ዩሁዳይ ታ ካዎቴꬃ ጉፌ።
PSA 108:9 ሞኣቤይ ታስ ሜቻሶ፤ ኤዶሜይ ታይሳ ጊዲዳይሳ ኤሪሳናስ ታኒ ታ ጫማ ኢዛ ቦላ ዎꬃይስ፤ ታኒ ፊሊስጼሜ ጾናዳ ጌሬራይስ» ጊዴስ።
PSA 108:10 ጊምቤቲዳ ካታማኮ ታና ኦኔ ኤፋናይ? ኤዶሜ ጋካናስ ታና ኦኔ ካሌꬃናይ?
PSA 108:11 ኣቤት ጾሳዉ! ኑና ኣጊዳይ ኔና ጊዲኪ? ኔኒ ኑ ኦላንቻታራ ኬዚኬ ጋዳሳ።
PSA 108:12 ኣሳ ማዶይ ሃዳ፤ ሄሳ ጊሻስ ኑ ሞርኬታ ቦላ ኑስ ጾኖ ኢማ።
PSA 108:13 ጾሲ ኑናራ ጊዲኮ ኑኒ ሞርኬታ ጾናና፤ ኢዚ ኑ ሞርኬታ ባ ቶሆን ዬꬋና።
PSA 109:1 ኣቤት ታኒ ጋላቲዛ ጾሳዉ! ኔኒ ታስ ጮኡ ጎፓ።
PSA 109:2 ኢታቲኔ ዎርዳንቻቲ ባ ዶና ታ ቦላ ዶይዳ፤ ታ ቦላካ ዎርዶ ሃሳይዳ።
PSA 109:3 ኢስቲ ኢጾ ቃላራ ታና ጊዶꬂዳ፤ ጋሶይካ ባይንዳ ታና ኬሂ ቆሂዳ።
PSA 109:4 ታኒ ኢስታ ሲቂሺን ኢስቲ ታና ሞቲዳ፤ ጊዶ ኣቲን ታ ዎሳይስ።
PSA 109:5 ታኒ ሎኦ ኦꬂን ታስ ኢታ ዛሪዳ፤ ታ ኢስታ ሲቂን ታና ኢጺዳ።
PSA 109:6 ኢዛ ቦላ ኢታ ዳና ሹማ፤ ኢዛ ሞቲዛይካ ኢዛ ኡሻቻን ኤቆ።
PSA 109:7 ፒርዳሶን ኢዚ ሞራንቻ ጊዲ ቤቶ፤ ኢዛ ዎሳይካ ኢዛስ ሲሚዲ ጎሜቶ!
PSA 109:8 ኢዛ ላይꬂ ቃሞ፤ ኢዛ ሹሜቴꬃካ ሃራይ ኤኮ!
PSA 109:9 ኢዛ ናይቲ ኣዋ ꬋይዲ ዪኦቴቶ፤ ኢዛ ማቼያካ ኣምኦ ጊዱ!
PSA 109:10 ኢዛ ናይቲ ዩዪ ዩዪዲ ዎሴቶ፤ ሃኢ ባ ዲዛ ላሌቲዳ ኬꬃፌካ ጎዴቴቶ!
PSA 109:11 ኢዛ ኣቆታ ኡባ ኣጮ ኣዋይ ላቶ፤ ኢዚ ዳቡርዲ ኬሲዳ ኡባ ኣላጋይ ቦንቆ!
PSA 109:12 ኦኒካ ኢዛ ማሮፖ፤ ዎይኮ ዪኦ ጊዲዳ ናይታስ ቃꬌቲዛይ ዶፖ!
PSA 109:13 ኢዛ ናይቲ ኡባይ ꬋዬቶ፤ ካሊዛ ዬሌታን ኢዛ ሱንꬂ ዶጌቶ።
PSA 109:14 ኢዛ ኣዋታ ናጋራይ ጎዳ ሲንꬃን ቆፌቶ፤ ኢዛ ኣዬይ ናጋራይ ሙሌካ ቁጬቶፎ!
PSA 109:15 ኢስታ ናጋራይ ጎዳ ሲንꬃን ኡባቶ ቤቶ፤ ኢስታ ኣኬኪሲዛ ሚሺ ቢታ ቦላ ዶፖ።
PSA 109:16 ጋሶይካ ኢዚ ማንቂዳዴ፥ ሜቶቲዛዴኔ ዎዚናይ ማዱንጺዳዴ ሃይቃና ጋካናስ ጎዲዴስ ኣቲን ኢዛ ማራናስ ቆፒቤና።
PSA 109:17 ኢዚ ቃንጋናስ ዶሲዛ ጊሻስ ኢዚ ቃንጌቶ! ኢዚ ኣንጃናስ ዶሶንታ ጊሻስ ኢዛፔ ሃኪዴስ!
PSA 109:18 ቃንጌꬅ ማይኦ ማላ ማይኢዴስ፤ ሃꬃ ማላ ኢዛስ ቦላን ጌሊዴስ፤ ዛይቴ ማላካ ሜቄꬃ ጊዶ ጌሊዴስ።
PSA 109:19 ኣፋላ ማላ ኢዛ ካሞ፤ ሳቄ ማላ ኡባ ዎዴ ኢዛ ጼሳን ዴኦ!
PSA 109:20 ሃይሲ ታና ሞቲዛይታሲኔ ታ ቦላ ኢታ ሃሳይዛይታስ ጎዳይ ኢሚዛ ዎይቶ ጊዶ!
PSA 109:21 ጊዶ ኣቲን ኣቤት ኡባፌ ꬎቃ ጎዳዉ! ኔ ሱንꬃ ጊሻስ ታና ሎኦ ኣይፌን ጼላ፤ ኔ ሲቆይ ሎኦ ጊዲዳ ጊሻስ ታና ኣሻ።
PSA 109:22 ታኒ ሂዬሳኔ ሜቶታንቻ ኣሳ፤ ታ ዎዚናይ ማዱንጺዴስ።
PSA 109:23 ታኒ ኦማርሳ ዎዴ ኩዋ ማላ ꬋያና ሃናይስ፤ ቦሌ ማላካ ቆቆፌታዲስ።
PSA 109:24 ጾሚሺን ታ ጉልባቴይ ዳቡርዴስ፤ ታ ኣሾይ ጊልቂዲ ሜቄꬅ ኣቲዴስ።
PSA 109:25 ታ ሞርኬታስ ታኒ ቂልጪዛ ሚሽ ጊዳዲስ፤ ኢስቲ ታና ቤኢዲ ባ ቆꬌ ቃꬄቴስ።
PSA 109:26 ኣቤት ጎዳዉ ታ ጾሳዉ! ታና ማዳ፤ ኔ ሜርና ሲቆ ማላ ታና ኣሻ።
PSA 109:27 ኣቤት ጎዳዉ! ሃይሳ ኔ ኩሼይ ኦꬂዳይሳኔ ኔኒ ፖሊዳይሳ ታ ሞርኬቲ ኤሬቶ።
PSA 109:28 ኢስቲ ታና ቃንጌቴስ፤ ኔኒ ጊዲኮ ታና ኣንጃሳ፤ ታ ቦላ ዴንዲዛይቲ ዬላታና፤ ጊዶ ኣቲን ታኒ ኔ ኣይሌይ ኡፋዬታና።
PSA 109:29 ታና ሞቲዛይቲ ካዉሻቴꬅ ማይኤቶ፤ ባንታ ዬላካ ኩታ ማላ ቁማኤቶ።
PSA 109:30 ታኒ ታ ኢንጻርሳን ጎዳ ኬሃ ጋላታና፤ ዳሮ ዴሬይ ሺቂዳ ዱላታን ኢዛ ሳባና።
PSA 109:31 ጋሶይካ ኢስታ ቦላ ሃይቆ ፒርዳ ፒርዲዛይታፔ ኣሻናስ ማንቆታፔ ኡሻቻ ባጋራ ኢዚ ኤቄስ።
PSA 110:1 ጎዳይ ታ ጎዳስ፥ «ታኒ ኔ ሞርኬታ ኔ ቶሆ ጋርሳን ዬꬊሳና ጋካናስ፥ ታ ኡሻቻን ኡታ» ጊዴስ።
PSA 110:2 ጎዳይ ኔስ ማታ ጉፌ ጺዮኔፔ ኪታና፤ ኔኒካ ሞርኬታ ሃራና።
PSA 110:3 ኔኒ ኔ ሞርኬታራ ኦሌቲዛ ጋላስ ኔ ኦላንቻቲ ባ ሼኔን ኔ ሚሌን ኤቃና፤ ዎንታ ማላዶ ኣዋ ማላ ጌሻቴꬃን ጶላሼ ኔ ናቴቴꬃ ኣሳይ ኔኮ ያና።
PSA 110:4 ጎዳይ፥ «ማልኬጼዴቄ ቄሴቴꬃ ማላ ኔኒካ ሜርናስ ቄሴ ጊዳና» ጊዲ ጫቂዴስ፤ ኢዚ ባ ቆፋ ላሜና።
PSA 110:5 ጎዳይ ኔ ኡሻቻን ዴስ፤ ኢዚ ባ ሃንቆ ጋላስ ካዎታ ቲንቼሬꬃና።
PSA 110:6 ካዎቴꬃታ ቦላ ኢዚ ፒርዳና፤ ኦላ ዎሳናታካ ኣሃ ጻላ ሂስታና፤ ሳኣን ኡባን ዲዛ ካዎታ ኢዚ ሜንꬄሬꬃና።
PSA 110:7 ካዎዚ ኦጌ ላንቄን ዲዛ ሃꬃ ፑልቶፌ ኡዪዲ፥ ኢዚ ባ ሁኤ ꬎቁ ꬎቁ ሂስታና።
PSA 111:1 ጎዳ ጋላቲቴ! ሱሬታ ሺቆኒኔ ዴሬ ዱላታን ታኒ ኩሜꬃ ዎዚናፔ ጎዳ ጋላታና።
PSA 111:2 ጎዳ ኦሶቲ ኣይ ኬና ጊታ! ኢስታን ኡፋዬቲዛይቲ ኡባይ ኢስቲ ዩሺ ቆፓናስ ቤሴስ።
PSA 111:3 ኢዛ ኦሶቲ ቦንቾኒኔ ቴማን ኩሚዳይታ፤ ኢዛ ጺሎቴꬂካ ሜርናስ ዴስ።
PSA 111:4 ኢዚ ባ ማላሊሲዛ ኦሶታ ሃሳኤታና ማላ ኦꬂዴስ። ኢዚ ኪያኔ ማሪዛ ጎዳ።
PSA 111:5 ባስ ያዪዛይታስ ካꬅ ኢሜስ፤ ባ ጫቆ ቃላካ ሜርናስ ቆፔስ።
PSA 111:6 ኣላጋታ ቢታ ባ ዴራስ ኢሚዲ ባ ሚኖ ኦሶዛ ባ ካዎቴꬃ ቤሲዴስ።
PSA 111:7 ኢዛ ኦሶቲ ቱማኔ ሱሬ፤ ኢዛ ዎጋቲካ ኡባይ ኣማኔቲዛይታ።
PSA 111:8 ኢስቲ ሜርናስ ኤቂ ዴኢዛይታ፤ ቱማቴꬃኒኔ ሱሬቴꬃን ኢሜቲዳ።
PSA 111:9 ኢዚ ባ ኣሳስ ኣቶቴꬅ ኢሚዴስ፤ ባ ጫቆ ቃላካ ኢስታስ ሜርናስ ኣዛዚዴስ፤ ኢዛ ሱንꬂ ጌሺኔ ያሺሲዛዛ።
PSA 111:10 ኣꬎ ኤራቴꬃስ ኮይሮይ ጎዳስ ያሻቴꬃ፤ ኢዛ ኣዛዞ ኦꬂዛይታስ ሎኦ ኣኬካይ ዴስ። ጎዳይ ሜርናስ ጋላቴቶ!
PSA 112:1 ጎዳይ ጋላቴቶ! ጎዳስ ያዪዛ ኣሲ፥ ኢዛ ኣዛዞታካ ፖላናስ ኡፋዬቲዛ ኣሲ ኣንጄቲዳይሳ።
PSA 112:2 ኢዛ ናይቲ ቢታን ዎልቃማ ጊዳና፤ ሱሬ ኣሳታ ዬሌታይ ኣንጄታና።
PSA 112:3 ኣቆታይኔ ዱሬቴꬂ ኢዛ ኬꬃን ዴስ፤ ኢዛ ጺሎቴꬃይካ ሜርናስ ዴኣና።
PSA 112:4 ኪያ፥ ቃꬌቲዛኔ ጺሎ ኦꬂዛ ሱሬ ኣሳስ ꬉማ ጊዶን ፖኦይ ፖኤስ።
PSA 112:5 ኪያቴꬃን ጮ ታልኢዛ ኣሳስ፥ ባ ኦሶ ሱሬቴꬃን ኦꬂዛ ኣሳስ ዴኦይ ኢንጄታና።
PSA 112:6 ጺሎ ኣሲ ኣዉዴኔ ኩንዴና፤ ሜርናስ ኢዚ ሃሳኤቲሼ ዴኣና።
PSA 112:7 ኢታ ሚሺ ኢዛ ዳጋንꬄና፤ ኣይስ ጊኮ ኢዛ ዎዚናይ ሂርጌና፤ ጎዳን ኣማኔቴስ።
PSA 112:8 ኢዛ ዎዚናይ ሚኖ፤ ሙሌካ ያዬና፤ ዉርሴꬃን ባ ሞርኬታ ኩንዴꬅ ኢዚ ቤኣና።
PSA 112:9 ኢዚ ሂዬሳታስ ኪያቴꬃን ኢሜስ፤ ቃሴ ኢዛ ጺሎቴꬃይ ሜርናስ ዴስ፤ ኢዛ ካጬይ ቦንቾን ꬎቁ ꬎቁ ጋና።
PSA 112:10 ኢታ ኣሲ ሄሳ ቤኢዲ ዪሎቴስ፤ ባ ኣቻ ጋርጪሼ ጮ ጊልቂ ꬋዬስ፤ ኢታታ ኣሞይ ሃዳ ጊዳና።
PSA 113:1 ጎዳይ ጋላቴቶ! ኢንቴኖ ጎዳ ኦሳንቻቶ! ጎዳ ጋላቲቴ! ኢዛ ሱንꬃካ ሳቢቴ!
PSA 113:2 ጎዳ ሱንꬂ ሃቺፌ ሜርና ጋካናስ ጋላቴቶ!
PSA 113:3 ኣርሼይ ሞኪዛሶፔ ቢዲ ዉሊዛሶ ጋካናስካ ጎዳ ሱንꬂ ጋላቴቶ!
PSA 113:4 ጎዳይ ካዎቴꬃታ ኡባፌ ጊታ፤ ኢዛ ቦንቾይካ ሳሎታፔ ꬎቃ።
PSA 113:5 ጎዳ ኑ ጾሳ ማላይ ኦኔ? ኢዚ ቦላ ꬎቃን ካዎቴꬃ ኣራታን ኡቲዴስ።
PSA 113:6 ኢዚ ሳሎታኒኔ ሳኣን ዲዛይታ ዱጌ ጼሌስ።
PSA 113:7 ኢዚ ሂዬሳ ጉዱላፌ ꬎቁ ꬎቁ ሂስቴስ፤ ሜቶታንቻካ ቢዲንꬃፌ ዴንꬄስ።
PSA 113:8 ሂስቲዲ ኢስታ ጊታ ኣሳታራኔ ዴሬ ሹሜታራ ኢሲፌ ኡቲሴስ፤
PSA 113:9 ማይኔዮ ናይታ ኣዮ ኦꬄስ፤ ቦንቺዲካ ኢዚሶን ኢዞ ኡፋይሳን ዎꬄስ፤ ጎዳይ ጋላቴቶ!
PSA 114:1 ኢስራኤሌ ኣሳይ ጊብጼ ቢታፌ ኬዚዳ ዎዴ፥ ያቆቤ ዜሬꬃይ ኣላጋ ቃላ ሃሳይዛ ቢታፌ ዬጊዲ ቢዳ ዎዴ፥
PSA 114:2 ዩሁዳ ኣሳይ ጾሳስ ጌሻ ኣስ ጊዲዴስ፤ ኢስራኤሌ ኣሳይካ ኢዛስ ሃሬቲዴስ።
PSA 114:3 ዞኦ ኣባይ ሄሳ ቤኢዲ ባቃቲዴስ፤ ዮርዳኖሴ ሻፋይካ ጉዬ ሲሚዴስ።
PSA 114:4 ዙማቲ ꬋርሾ ማላ ጉፌሬቲዳ፤ ዙምቡላቲካ ዶርሳ ላቃ ማላ ጺኪዳ።
PSA 114:5 ኣባዞ! ኔ ኣይስ ባቃታዲ? ዮርዳኖሴ ሻፋዞ! ኣይስ ጉዬ ሲማዲ?
PSA 114:6 ኢንቴኖ ዙማቶ! ꬋርሾ ማላ ኣይስ ጉፒዴቲ? ኢንቴኖ ዙምቡላቶ! ዶርሳ ላቃ ማላ ኣይስ ጺኪዴቲ?
PSA 114:7 ሃኔ ቢታዬ! ጎዳ ሲንꬃን ያቆቤ ጾሳ ሲንꬃን ኮኮራ።
PSA 114:8 ኢዚ ዛላ ኤሌ ሃꬅ ኬሲዴስ፤ ዎልቃማ ዛላ ፑልቶ ሃꬅ ኬሲዴስ።
PSA 115:1 ኣቤት ጎዳዉ! ኑ ጊሻስ ጊዶንታ ኔ ሲቆ ጊሻሲኔ ኔ ኣማኔቴꬃ ጊሻስ ኔ ሱንꬃ ቦንቻ።
PSA 115:2 ካዎቴꬃቲ ኣይስ፥ «ኢስታ ጾሲ ኣዋን ዲዜ?» ጊዞ?
PSA 115:3 ኑ ጾሳይ ሳሎን ዴስ፤ ኢዚ ባ ዶሲዳይሳ ኡባ ኦꬄስ።
PSA 115:4 ጊዶ ኣቲን ኢስታ ኤቃ ጾሳቲ ቢራፔኔ ዎርቃፌ ኣሳ ኩሼን ኦሴቲዳይታ።
PSA 115:5 ኢስታስ ዶናይ ዴስ ሺን ሃሳዬቴና፤ ኣይፌይካ ዴስ ሺን ዴሜቴና።
PSA 115:6 ኢስታስ ሃይꬂ ዴስ ሺን ሲዬቴና፤ ሲꬌይካ ዴስ ሺን ሲንጌቴና።
PSA 115:7 ኢስታስ ኩሼይ ዴስ ሺን ቦቼቴና፤ ቶሆይካ ዴስ ሺን ሄሜቴቴና፤ ኢስታ ፖራንዴይ ጬንጉርስ ኬሴና።
PSA 115:8 ኢስታ ሜꬊዛይቲኔ ኢስታን ኣማኔቲዛይቲ ኡባይ ኢስታ ማላ ጊዴቶ።
PSA 115:9 ኢንቴኖ ኢስራኤሌ ኣሳቶ! ጎዳን ኣማኔቲቴ! ኢዚ ኢንቴስ ጎንዳሌኔ ኢንቴና ማዲዛዴ።
PSA 115:10 ኢንቴኖ ኣሮኔ ዜሬꬃቶ! ጎዳን ኣማኔቲቴ! ኢዚ ኢንቴስ ጎንዳሌኔ ኢንቴና ማዲዛዴ።
PSA 115:11 ኢንቴኖ ጎዳስ ያዪዛይቶ! ጎዳን ኣማኔቲቴ! ኢዚ ኢንቴስ ጎንዳሌኔ ኢንቴና ማዲዛዴ።
PSA 115:12 ጎዳይ ኑስ ቆፔስ፤ ኢዚ ኑና ኣንጃና፤ ኢዚ ኢስራኤሌ ኣሳታኔ ኣሮኔ ዜሬꬃታካ ኣንጃና።
PSA 115:13 ጎዳስ ያዪዛይታ ኡባ ጉꬅ ጊዲን ጊታ ኢዚ ኣንጃና።
PSA 115:14 ጎዳይ ኢንቴናካ ኢንቴ ናይታካ ዳሪሶ!
PSA 115:15 ሳሎኔ ሳኣ ሜꬊዳ ጎዳይ ኢንቴና ኣንጆ!
PSA 115:16 ሳሎቲ ጾሳሳ፤ ጊዶ ኣቲን ሳኣ ኣሳ ናይታስ ኢሚዴስ።
PSA 115:17 ሃይቂዲ ዱጌ ዱፎን ጌሊዳይቲ ጎዳ ጋላታናስ ዳንዳዬቴና።
PSA 115:18 ጊዶ ኣቲን ኑኒ ሼምፖራ ፓጻ ዲዛይቲ ሃቺፌ ዶሚዲ ሜርና ጋካናስ ጎዳ ጋላታና። ጎዳይ ጋላቴቶ!
PSA 116:1 ኢዚ ታ ሾባ ዎሲዛ ዎሳ ሲዪዳ ጊሻስ ታኒ ጎዳ ዶሳይስ።
PSA 116:2 ኢዚ ባ ሃይꬅ ታኮ ዬጊዳ ጊሻስ ታኒ ዴኢዛ ዎዴ ኡባን ኢዛ ጼይጋና።
PSA 116:3 ሃይቆይ ዎጺማዴ ማላ ታና ዶዲ ኦይኪዴስ፤ ዱፎን ጌሎይ ታና ሂርጊሲዴስ። ጬጬይኔ ኡንኦይ ታና ቶሊ ኦይኪዴስ።
PSA 116:4 ሄ ዎዴ ታኒ፥ «ኣቤት ጎዳዉ! ሃዳራ! ታና ኣሻ» ጋዳ ጎዳ ሱንꬅ ጼይጋዲስ።
PSA 116:5 ጎዳይ ኪያኔ ጺሎ፤ ኑ ጾሳይ ማሪዛይሳ።
PSA 116:6 ጎዳይ ኣሽኬታ ናጌስ፤ ታኒ ሜቶቲዳ ዎዴ ኢዚ ታና ኣሺዴስ።
PSA 116:7 ታ ሼምፖዬ ኣኔ ዎፑ ጋ፤ ጎዳይ ኔስ ሎኦ ሚሽ ኦꬂዴስ።
PSA 116:8 ጎዳይ ታና ሃይቆፔ፥ ታ ኣይፌ ኣፉንꬃፌ፥ ታ ቶሆካ ꬉጴፔ ኣሺዴስ።
PSA 116:9 ሄሳ ጊሻስ ታኒ ጎዳ ሲንꬃን ሼምፖራ ፓጻ ዲዛይታ ጊዶን ሄሜታይስ።
PSA 116:10 ታ፥ «ታኒ ኬሃ ኡንኤታዲስ» ጊዛ ዎዴካ ኣማኖ ኣጋቤኬ።
PSA 116:11 ታስ ጊዛዚ ꬋዪን፥ «ኣሲ ኡባይ ዎርዶ» ጋዲስ።
PSA 116:12 ኢዚ ታስ ኪዪዳ ኪያቴꬃ ጊሻስ ታኒ ጎዳስ ኣይ ቃንጻናስ ዳንዳያዚና?
PSA 116:13 ጎዳይ ታና ኣሺዳ ጊሻስ ዎይኔ ኡሹ ጋላታስ ሺሻዳ ኢዛ ሱንꬁ ጼይጋና።
PSA 116:14 ኢዛ ዴራ ኡባ ሲንꬃን ታኒ ኣዲኒዳ ኣዲና ጎዳስ ጋꬃና።
PSA 116:15 ጌሻታ ሃይቆይ ጎዳ ሲንꬃን ቦንቾ።
PSA 116:16 ኣቤት ጎዳዉ! ታኒ ኔ ኣይሌ፤ ታኒ ኔ ኣይሌይ ና፤ ታና ቃሾፔ ቢርሻዳሳ።
PSA 116:17 ኣቤት ጎዳዉ! ታኒ ጋላታ ያርሾ ኔስ ያርሻና፤ ሂስታዳ ኔ ሱንꬃ ጼይጋና።
PSA 116:18 ኢዛ ዴራ ኡባ ሲንꬃን ታኒ ኣዲኔቲዳ ኣዲና ጎዳስ ጋꬃና።
PSA 116:19 ሄሳካ ታኒ ጋꬃናይ፥ ዬሩሳላሜን ዲዛ ጎዳ ኬꬃ ዳባባና። ጎዳይ ጋላቴቶ!
PSA 117:1 ካዎቴꬃቲ ኡባይ ጎዳ ጋላቲቴ! ኡባ ኣሳይ ኢዛ ጋላታን ሳቢቴ!
PSA 117:2 ኣይስ ጊኮ ኢዚ ባ ጊታ ሲቆ ኑና ቤሲዴስ፤ ኢዛ ኣማኔቴꬃይካ ሜርናሳ፤ ጎዳይ ጋላቴቶ!
PSA 118:1 ኢዚ ኪያኔ ኢዛ ሲቆይ ሜርናስ ጊዲዳ ጊሻስ ጎዳ ጋላቲቴ!
PSA 118:2 ኢስራኤሌ ኣሳይ፥ «ኢዛ ሲቆይ ሜርናሳ» ጎ።
PSA 118:3 ኣሮኔ ዜሬꬃቲ፥ «ኢዛ ሲቆይ ሜርናሳ» ጌቶ።
PSA 118:4 ጎዳስ ያዪዛይቲ ኡባይ፥ «ኢዛ ሲቆይ ሜርናሳ» ጌቶ።
PSA 118:5 ታኒ ኡንኤቲዳ ዎዴ ጎዳኮ ዋሳዲስ፤ ሂስቲን ኢዚ ታ ዋሶዛ ኣሊዲ ታና ኡንኦፌ ኬሲዴስ።
PSA 118:6 ጎዳይ ታናራ ዲዛ ጊሻስ ታኒ ያዪኬ። ኣሲ ታና ኣይ ኦꬃኔ?
PSA 118:7 ጎዳይ ታና ማዳናስ ታናራ ዴስ፤ ታ ሞርኬታ ጾኔቴꬃ ታኒ ኣይፌን ቤኣና።
PSA 118:8 ኣሳን ኣማኔቴꬃፌ ጎዳን ኣማኔቴꬃይ ሎኦ።
PSA 118:9 ዳናታን ኣማኔቴꬃፌ ጎዳን ኣማኔቴꬃይ ሎኦ።
PSA 118:10 ካዎቴꬃቲ ኡባይ ታና ዶዲዳ፤ ጊዶ ኣቲን ጎዳ ሱንꬃን ታኒ ኢስታ ጾናዲስ።
PSA 118:11 ኢስቲ ታና ኡባሶራ ዶዲ ኦይኪዳ፤ ጊዶ ኣቲን ጎዳ ሱንꬃን ታኒ ኢስታ ጾናዲስ።
PSA 118:12 ኢስቲ ታና ማꬂ ዶዲዛ ማላ ዶዲዳ፤ ጊዶ ኣቲን ኣጉንꬂ ኤጺዛ ማላ ኤጺ ꬋይዳ፤ ጎዳ ሱንꬃን ታኒ ኢስታ ጾናዲስ።
PSA 118:13 ታና ሱጊን ኩንዳናስ ጋንዲጋራዲስ፤ ጊዶ ኣቲን ጎዳይ ታና ማዲዴስ።
PSA 118:14 ጎዳይ ታስ ሚኖቴꬂኔ ዬꬃ፤ ታና ኣሺዛይ ኢዛ።
PSA 118:15 ጺሎታ ዱንካኔ ጊዶን ጾኖ ኢሊሊሲኔ ኡፋይሳ ዬꬂ፥ «ጎዳ ኡሻቻ ኩሼይ ዎልቃማ ሚሽ ኦꬂዴስ!» ጊሼ ሴቴቴስ።
PSA 118:16 ጎዳ ኡሻቻ ኩሼይ ꬎቁ ꬎቁ ጊዴስ! ጎዳ ኡሻቻ ኩሼይ ዎልቃማ ሚሽ ኦꬂዴስ።
PSA 118:17 ታኒ ሃይቂኬ ሼምፖራ ፓጻ ዴኣና፤ ጎዳይ ኦꬂዳ ኦሶ ቡሮፔካ ኣዋጃና።
PSA 118:18 ጎዳይ ታና ኬሂ ቃጻይዴስ፤ ጊዶ ኣቲን ሃይቆስ ኣꬂ ኢሚቤና።
PSA 118:19 ታኒ ጊዶ ጌላዳ ጎዳ ጋላታና ማላ ጺሎቴꬃ ፔንጌታ ኣኔ ታስ ዶይቴ!
PSA 118:20 ሃይሲ ጎዳ ፔንጌ፤ ኢዛራ ጺሎቲ ጻላ ጌላና።
PSA 118:21 ኔኒ ታስ ሲዪዳ ጊሻሲኔ ጾኖ ኢሚዳ ጊሻስ ታኒ ኔና ጋላታይስ።
PSA 118:22 ጊምቢዛይቲ ካꬊዲ ኢጺዳ ሹቻይ ጉላስ ሁኤን ዎꬂዛ ሹች ጊዲዴስ።
PSA 118:23 ሃይሲካ ጎዳ ኦሶ፤ ቃሴ ኑ ኣይፌሲካ ማላሊሲዛ ሚሻ።
PSA 118:24 ሃይሲ ጋላሳይ ጎዳይ ኦꬂዳ ጋላሳ፤ ኣኔ ኑኒ ኢዛን ኡፋዬቶሲኔ ኢሊሎስ።
PSA 118:25 ኣቤት ጎዳዉ! ሃኢ ኑና ኣሻርኪ! ኣቤት ጎዳዉ! ሃኢ ኑስ ኢንጄሳርኪ!
PSA 118:26 ጎዳ ሱንꬃን ዪዛ ኣሲ ኣንጄቲዳይሳ ጊዶ! ኑኒ ጎዳ ኬꬃን ኢንቴና ኣንጆስ።
PSA 118:27 ጎዳይ ጾሳ፤ ኢዚ ኑስ ፖኢሲዴስ፤ ጪሊላ ሚꬃ ሃጋታ ኦይኪቴ፤ ያርሾ ያርሺዛሶዛ ቦላ ዲዛ ካጬታኮ ጋካናስ ኬዚቴ፤ ባኣሌ ቦንቺቴ።
PSA 118:28 ኔኒ ታ ጾሳ፤ ታኒ ኔና ጋላታና፤ ኔኒ ታ ጾሳ፤ ታኒ ኔና ጊታሳና።
PSA 118:29 ኢዚ ኪያ ጊዲዳ ጊሻስ ጎዳ ጋላቲቴ! ኢዛ ሲቆይ ሜርናሳ።
PSA 119:1 ባንታ ኦጌን ቦሬይ ባይንዳይቲኔ ጎዳ ዎጋ ማላ ሄሜቲዛይቲ ኣንጄቲዳይታ።
PSA 119:2 ኢዚ ዮቲዳይሳ ኦꬂዛይቲኔ ባ ኩሜꬃ ዎዚናፔ ኢዛ ኮይዛይቲ ኣንጄቲዳይታ።
PSA 119:3 ኢስቲ ማካላ ሚሽ ኦꬄቴና፤ ጎዳ ኦጌን ሄሜቴቴስ።
PSA 119:4 ኔ ዎጋ ኣማኔቲዲ ናጋና ማላ ኔኒ ኑና ኣዛዛዳሳ።
PSA 119:5 ኔ ዎꬂዳ ዎጋ ናጋናስ ታ ኦጌይ ሚናና ማላ ታ ኣሞታይስ።
PSA 119:6 ኔ ኣዛዞታ ኡባ ታ ሎኤꬃ ኣኬኪኮ ሙሌካ ዬላቲኬ።
PSA 119:7 ኔ ጺሎ ፒርዳ ታኒ ታማርዳ ኬና ሱሬ ዎዚናፔ ኔና ጋላታና።
PSA 119:8 ታኒ ኔ ዎꬂዳ ማራታ ናጋና፤ ታና ሙሌካ ዬጎፋ።
PSA 119:9 ናቴꬂ ባ ኦጌ ጌሻቴꬃን ዎስቲ ናጋናስ ዳንዳይዜ? ኔ ቃላይ ጊዛ ማላ ዴኢኮ ዳንዳዬስ።
PSA 119:10 ታኒ ታ ኩሜꬃ ዎዚናፔ ኔና ኮያይስ፤ ኔ ኣዛዞታፔ ካሬ ኬዞንታ ማላ ታና ናጋ።
PSA 119:11 ታኒ ኔ ቦላ ናጋራ ኦꬆንታ ማላ ኔ ቃላ ታ ዎዚናን ቆታዲስ።
PSA 119:12 ኣቤት ጎዳዉ! ኔኒ ጋላቴታ! ኔ ማራ ታና ታማርሳ።
PSA 119:13 ኔ ዶናፔ ኬዚዛ ማራ ኡባ ታኒ ታ ኢንጻርሳን ዮታይስ።
PSA 119:14 ኣሲ ባ ዱሬቴꬃን ኡፋዬቲዛ ማላ ታኒ ኔኒ ኢሚዳ ማራ ካላሼ ኡፋዬታይስ።
PSA 119:15 ኔ ዎꬂዳ ዎጋታ ዩሻ ቆፓይስ፤ ታ ዎዚናካ ኔ ኦጌታን ዎꬃዲስ።
PSA 119:16 ኔ ኣዋጃይ ታና ኡፋይሴስ፤ ኔ ቃላካ ታኒ ዶጊኬ።
PSA 119:17 ታኒ ሼምፖራ ፓጻ ዴኣና ማላኔ ኔ ቃላስ ኣዛዜታና ማላ፥ ታስ ኔ ኣይሌስ ሎኦ ሚሽ ኦꬃ።
PSA 119:18 ኔ ዎጋ ጊዶን ዲዛ ማላሊሲዛ ቱማቴꬃ ታኒ ቤኣና ማላ ታ ኣይፌ ዶያ።
PSA 119:19 ታኒ ሃ ሳኣን ኢማꬃ፤ ኔ ኣዛዞታ ታፔ ጌንꬆፋ።
PSA 119:20 ታ ሼምፖያ ኡባ ዎዴ ኔ ማራ ዴማናስ ኬሃ ላሞታዱስ።
PSA 119:21 ኔ ኣዛዞዛፔ ካሬ ኬዚዛይታ፥ ኦቶሬቲዛይታኔ ቃንጌቲዛይታ ኔኒ ሴራሳ።
PSA 119:22 ታ ኔኒ ዮቲዳይሳ ናጊዳ ጊሻስ ኢስታ ጫሻኔ ካꬌዛ ታ ቦላፌ ዲጋ።
PSA 119:23 ዴሬ ካሌꬂዛይቲ ኡባቲ ታ ቦላ ማቄቲኮካ ታኒ ኔ ኣይሌይ ኔ ኣዋጃታ ዩሻ ቆፓና።
PSA 119:24 ኔ ማርካቴꬃቲ ታና ኡፋይሴቴስ፤ ኢስቲካ ታና ዞሬቴስ።
PSA 119:25 ታ ሼምፖይ ኬዛና ሃኔስ፤ ኔኒ ጊዳ ቃላ ማላ ታና ኣሻ።
PSA 119:26 ታኒ ታ ኦጌ ኡባ ኔስ ቆንጪሳዲስ፤ ኔኒ ታስ ሲያዳሳ፤ ኔ ኣዋጃታ ታና ታማርሳ።
PSA 119:27 ኔ ማራ ታና ኣኬኪሳ፤ ማላሊሲዛ ኔ ኦሶ ታ ዩሻ ቆፓና።
PSA 119:28 ታ ሼምፖያ ጬጬይ ዳሪዳ ጊሻስ ዳቡራዱስ፤ ኔኒ ጊዳ ቃላ ማላ ታና ሚንꬃ።
PSA 119:29 ባሌꬂዛ ኦጌ ታፔ ሃሳ፤ ኔ ኪያቴꬃን ኔ ዎጋ ታና ታማርሳ።
PSA 119:30 ታኒ ቱማ ኦጌ ዶራዲስ፤ ኔ ዎጋካ ታ ዎዚናን ዎꬃዲስ።
PSA 119:31 ኣቤት ጎዳዉ! ታኒ ኔ ዮቲዳይሳ ሚንꬃ ኦይካዲስ፤ ኔ ታና ዬላስ ኣꬃ ኢሞፋ።
PSA 119:32 ኔኒ ታ ዎዚና ኣሲዳ ጊሻስ ታኒ ኔ ኣዛዞ ኦጌን ዎጻይስ።
PSA 119:33 ኣቤት ጎዳዉ! ኔ ኣዋጃታ ታና ታማርሳ፤ ታኒ ዉርሴꬂ ጋካናስ ኢዛ ናጋና።
PSA 119:34 ታኒ ኔ ዎጋ ናጋና ማላኔ ኩሜꬃ ዎዚናፔ ኢዛስ ኣዛዜታና ማላ ኔኒ ታስ ኣኬካ ኢማ።
PSA 119:35 ኔ ኣዛዞይ ታና ኡፋይሴስ፤ ሄሳ ጊሻስ ኔ ኦጌን ታና ካሌꬃ።
PSA 119:36 ታ ዎዚና ቤሶንታ ጎኣስ ጊዶንታ ኔ ማራ ፖላና ማላ ዛራ።
PSA 119:37 ፓꬆንታ ሚሽ ጼሎንታ ማላ ታ ኣይፌታ ናጋ፤ ኔ ቃላ ማላ ታ ዴኦ ኦራጺሳ።
PSA 119:38 ኔስ ያያና ማላ ኔ ጌሊዳ ቃላ ታስ ኔ ኣይሌዛስ ፖላ።
PSA 119:39 ኔ ፒርዳይ ሱሬ ጊዲዳ ጊሻስ ታኒ ያዪዛ ካዉሻቴꬃፌ ታና ናጋ።
PSA 119:40 ታኒ ኔ ዎጋ ናጋናዉ ኣሞታይስ፤ ኔኒ ጺሎቴꬃን ታ ዴኦ ኦራጺሳ።
PSA 119:41 ኣቤት ጎዳዉ! ኔ ሜርና ሲቆይ ታኮ ሃ ዮ፤ ኔኒ ጊዳ ቃላ ማላ ታና ኣሻ።
PSA 119:42 ታኒ ኔ ቃላን ኣማኔታይስ፤ ታና ጫዪዛይታስካ ታኒ ዛሮ ኢማና።
PSA 119:43 ታኒ ኔ ዎጋን ሂዶታ ኦꬃዲስ፤ ቱማ ቃላ ታ ዶናፔ ꬋይሶፋ።
PSA 119:44 ታኒ ሜሪ ሜርናስካ ኔ ዎጋስ ኡባ ዎዴ ኣዛዜታና።
PSA 119:45 ታኒ ኔ ዎጋ ሲቂዛ ጊሻስ ላኣን ሲሜሬታና።
PSA 119:46 ታኒ ካዎታ ሲንꬃን ኤቃዳ ኔኒ ዮቲዳይሳ ዮታሼ ዬላቲኬ።
PSA 119:47 ታኒ ኔ ኣዛዞታ ዶሳይስ፤ ኢስታንካ ኡፋዬታይስ።
PSA 119:48 ታኒ ሲቂዛ ኔ ኣዛዞታ ቦንቻይስ፤ ኔ ኣዋጃታ ዩሻ ቆፓና።
PSA 119:49 ኔኒ ታስ ኔ ኣይሌዛስ ኢሚዳ ቃላ ቆፓ፤ ሄሳ ጊሻስ ታኒ ሄ ቃላን ሂዶታ ኦꬃይስ።
PSA 119:50 ኔ ቃላይ ታስ ዴኦ ኢሚዴስ፤ ሄሲ ሜቶ ዎዴ ታና ሚንꬄꬄስ።
PSA 119:51 ኦቶራንቻቲ ታና ኬሂ ካꬊዳ፤ ጊዶ ኣቲን ታኒ ኔ ዎጋፔ ሼርኢ ጊኬ።
PSA 119:52 ኣቤት ጎዳዉ! ቤኒሶፌ ዲዛ ኔ ዎጋ ታኒ ቆፓዲስ፤ ሄሳን ታኒ ሚኔታይስ።
PSA 119:53 ኢታቲ ኔ ዎጋስ ኣዛዜቶንታይሳ ቤኣዳ ኬሃ ሃንቄታዲስ።
PSA 119:54 ታኒ ኢማꬃቴꬃን ዴኢዛ ቢታን ኔ ዎጋይ ታስ ማዛሙሬ ጊዲዴስ።
PSA 119:55 ኣቤት ጎዳዉ! ታኒ ጊዶꬅ ኔ ሱንꬃ ቆፓይስ፤ ኔ ዎጋካ ናጋይስ።
PSA 119:56 ታ ኔ ዎጋስ ኣዛዜታና፤ ሄሲ ታስ ኦሶ ጊዲዴስ።
PSA 119:57 ኣቤት ጎዳዉ! ታ ቃዳይ ኔና፤ ታኒ ኔ ቃላስ ኣዛዜታናስ ቃቻዲስ።
PSA 119:58 ታኒ ኩሜꬃ ዎዚናፔ ኔና ኮያይስ፤ ኔኒ ጊዳ ቃላ ማላ ታስ ቃꬌታ።
PSA 119:59 ታኒ ታ ኦጌ ጾሞሳ ጼላዲስ፤ ኔ ማራ ካላናስ ሲማዲስ።
PSA 119:60 ታኒ ኔ ኣዛዞ ናጋናስ ኤሶታናፔ ኣቲን ታኪኬ።
PSA 119:61 ኢታቲ ታና ኦይካና ጊቴ ዬጊዳ፤ ታኒ ጊዲኮ ኔ ዎጋ ዶጋቤኬ።
PSA 119:62 ኔ ጺሎ ዎጋ ጊሻስ ታ ኔና ጋላታናስ ጊዶꬅ ዴንዳይስ።
PSA 119:63 ታኒ ኔስ ያዪዛይታ ኡባሲኔ ኔ ዎጋ ናጊዛይታስ ላጌ።
PSA 119:64 ኣቤት ጎዳዉ! ሳኣይ ኔ ሜርና ሲቆን ኩሚዴስ፤ ኔ ኣዋጃታ ታና ታማርሳ።
PSA 119:65 ኣቤት ጎዳዉ! ኔ ጊዳ ቃላ ማላ ታስ ኔ ኣይሌዛስ ሎኦ ኦꬃዳሳ።
PSA 119:66 ታኒ ኔ ኣዛዞታ ኣማናይስ፤ ሎኦ ፒርዳኔ ኤራቴꬅ ታና ታማርሳ።
PSA 119:67 ታ ቃጻዬታናፔ ካሴ ኔ ዎጋፔ ካሬ ኬዛዲስ፤ ሃኢ ታኒ ኔ ቃላስ ኣዛዜታና።
PSA 119:68 ኔኒ ሎኦ፤ ኔ ኦሶይካ ሎኦ፤ ሄሳ ጊሻስ ኔ ኣዋጃታ ታና ታማርሳ።
PSA 119:69 ኦቶራንቻቲ ታ ሱንꬃ ዎርዶራ ሞሪዳ፤ ጊዶ ኣቲን ታኒ ኔ ዎጋ ታ ኩሜꬃ ዎዚናፔ ናጋይስ።
PSA 119:70 ኢስታ ዎዚናይ ሙሌካ ዳሚዴስ፤ ጊዶ ኣቲን ታኒ ኔ ዎጋን ኡፋዬታይስ።
PSA 119:71 ታኒ ቃጻዬቲዳይሲ ታስ ሎኦ ጊዲዴስ፤ ኔ ዎጋ ታማራና ማላ ታና ማዲዴስ።
PSA 119:72 ዳሮ ሺ ቢራፔኔ ዎርቃፌ ኔ ዶናፔ ኬኢዳ ዎጋይ ታስ ኣꬌስ።
PSA 119:73 ታና ኔ ኩሼይ ሜꬊዴሲኔ ጊግሲዴስ፤ ኔ ኣዛዞ ታኒ ታማራና ማላ ታስ ኣኬካ ኢማ።
PSA 119:74 ታኒ ኔ ቃላ ሂዶታ ኦꬃዲስ፤ ሄሳ ጊሻስ ኔስ ያዪዛይቲ ታና ቤኢዲ ኡፋዬቴቶ።
PSA 119:75 ኣቤት ጎዳዉ! ኔ ፒርዳይ ጺሎ ጊዲዳይሳኔ ኔኒ ታና ቃጻይዳይ ኣማኔቴꬃን ጊዲዳይሳ ታኒ ኤራይስ።
PSA 119:76 ኔኒ ታስ ኔ ኣይሌዛስ ጌሊዳ ቃላ ማላ ኔ ሜርና ሲቆይ ታና ሚንꬄꬆ።
PSA 119:77 ኔ ዎጋይ ታና ኡፋይሲዛ ጊሻስ ታኒ ሼምፖራ ፓጻ ዴኣና ማላ ታስ ቃꬌታ።
PSA 119:78 ኦቶራንቻቲ ታና ዎርዶን ሞቲዛ ጊሻስ ዬላቴቶ። ታኒ ጊዲኮ ኔ ዎጋታ ዩሻ ቆፓይስ።
PSA 119:79 ኔስ ያዪዛይቲኔ ኔ ኣዛዞ ኤሪዛይቲ ኡባይ ሃ ታኮ ሲሜቶ።
PSA 119:80 ታኒ ዬላቶንታ ማላ ኔ ማራን ታ ዎዚናይ ቦሬይ ባይንዳዝ ጊዶ።
PSA 119:81 ኔ ታና ኣሻና ማላ ታ ሼምፖያ ኬሃ ላሞታዱስ፤ ታኒካ ኔ ቃላ ሂዶታ ኦꬃዲስ።
PSA 119:82 «ኣይዴ ታና ሚንꬄꬃንዴሻ?» ጉሳን ኔ ኢሚዳ ሂዶታ ቃላ ታ ናጊሺን ታ ኣይፌይ ዶልጁሚዴስ።
PSA 119:83 ጩዋን ካቂዳ ሉካሞ ማላ ጊዳዲስ፤ ጊዲኮካ ኔ ኣዋጃታ ባላቤኬ።
PSA 119:84 ታኒ ኔ ኣይሌይ ኣዉዴ ጋካናስ ዳኔ? ታና ዬዴꬂዛይታ ቦላ ኔኒ ኣዉዴ ፒርዳኔ?
PSA 119:85 ኔ ዎጋ ናጎንታ ኦቶራንቻቲ ታና ꬋይሳናስ ኦላ ቦኬቴስ።
PSA 119:86 ኔ ኣዛዞቲ ኡባይ ኣማኔቲዛይታ፤ ኣሳይ ጋሶይ ባይንዳ ዬዴꬂዛ ጊሻስ ታና ማዳ!
PSA 119:87 ኢስቲ ታና ቢታፌ ꬋይሳና ጋኪዳ፤ ጊዶ ኣቲን ታኒ ኔ ዎጋ ኣጋቤኬ።
PSA 119:88 ኔ ሜርና ሲቆን ታ ዴኦ ኦራጺሳ፤ ታኒካ ኔ ኣዛዞታ ናጋና።
PSA 119:89 ኣቤት ጎዳዉ! ኔ ቃላይ ሜርናሳ፤ ኢዚካ ሳሎን ሚኒ ዴስ።
PSA 119:90 ኔ ኣማኔቴꬃይ ዬሌታፔ ዬሌታ ጋካናስ ዴስ፤ ኔኒ ሳኣስ ዮቻ ዬጋዳሳ፤ ኢዚካ ሚኒዲ ዴስ።
PSA 119:91 ኔኒ ጊዳ ማላ ኡባይካ ሃች ጋካናስ ሚኒዲ ዴስ፤ ኣይስ ጊኮ ኡባቲካ ኔ ኣይሌታ።
PSA 119:92 ታ ሜቶቲዳ ዎዴ ꬋያይቻና ሺን ኔ ዎጋይ ታስ ኡፋይስ ጊዲዴስ።
PSA 119:93 ኔ ኣዛዞቲ ታና ሼምፖራ ፓጻ ዎꬂዳ ጊሻስ ታኒ ሙሌካ ኢስታ ዶጊኬ።
PSA 119:94 ታኒ ኔሳ፤ ታና ኣሻርኪ! ታኒ ዎጋ ናጋናዉ ኮያይስ።
PSA 119:95 ኢታቲ ታና ꬋይሳናዉ ዛማዲዲ ናጌቴስ፤ ጊዶ ኣቲን ኔኒ ዮቲዳይሳ ታኒ ዩሻ ቆፓይስ።
PSA 119:96 ፖሎ ጊዲዳ ሚሽ ኡባስ ዛዋይ ዲዛይሳ ታኒ ቤኣዲስ፤ ጊዶ ኣቲን ፖሎ ጊዲዳ ኔ ኣዛዞታስ ዛዋይ ዴና።
PSA 119:97 ታኒ ኔ ዎጋ ኣይ ኬና ሲቃዚና! ጋላስ ኩሜꬅ ታኒ ኢዛ ዩሻ ቆፓይስ።
PSA 119:98 ኔ ኣዛዞቲ ኡባ ዎዴካ ታናራ ዲዛ ጊሻስ ታ ሞርኬታፔ ኣꬂዲ ታና ኣኬካንቻ ሂስቲዳ።
PSA 119:99 ኔ ዎꬂዳ ዎጋ ዩሻ ቆፒዛ ጊሻስ ታና ታማርሲዳ ኡባፌ ዎዚናማ ጊዳዲስ።
PSA 119:100 ታኒ ኔ ኣዛዞታ ካሊዛ ጊሻስ ጪማታፔ ቦላራ ኣኬኪዛ ኣስ ጊዳዲስ።
PSA 119:101 ታኒ ኔ ቃላስ ኣዛዜታናስ ኮይዛ ጊሻስ ታ ቶሆ ኢታ ኦጌ ኡባፌ ናጋዲስ።
PSA 119:102 ኔኒ ታና ታማርሲዳ ጊሻስ ታኒ ኔ ዎጋፔ ሼርኢ ጋቤኬ።
PSA 119:103 ኔ ቃላይ ኣይ ማላ ማልኢዜ! ኤሳ ኢሊሎፔካ ኣꬊዲ ዶናን ማልኤስ።
PSA 119:104 ኔ ዎጋፔ ኣኬካ ዴማዲስ፤ ሄሳ ጊሻስ ታኒ ጌላ ኦጌ ኡባ ኢጻዲስ።
PSA 119:105 ኔ ቃላይ ታ ቶሆስ ጾምፔ፤ ታ ኦጌስካ ፖኦ።
PSA 119:106 ኔ ጺሎ ዎጋ ናጋናስ ታኒ ጫቂዳ ጫቆዛ ሚንꬃና።
PSA 119:107 ኣቤት ጎዳዉ! ታ ኬሃ ሜቶታዲስ፤ ኔኒ ጊዳ ቃላ ማላ ታና ሼምፖራ ፓጻ ዎꬃ።
PSA 119:108 ኣቤት ጎዳዉ! ታ ዶናፔ ኬዚዛ ጋላታ ያርሾዛ ኔ ኤካ፤ ኔ ዎጋ ታና ታማርሳ።
PSA 119:109 ታ ሼምፖያ ኡባ ዎዴ ሜቶ ቦላ ዳዉስ፤ ታኒ ጊዲኮ ኔ ዎጋ ባላቤኬ።
PSA 119:110 ኢታቲ ታና ኦይካናስ ዎጺማዴ ዎꬂዳ፤ ጊዶ ኣቲን ታኒ ኔ ዎጋፔ ሼርኢ ጋቤኬ።
PSA 119:111 ኔ ኢሚዳ ዎጋይ ታስ ሜርናስ ላታ፤ ታ ዎዚናይ ኢዛን ኡፋዬቴስ።
PSA 119:112 ታ ሃይቃና ጋካናስ ኔ ኢሚዳ ኣዛዞ ፖላናስ ቃላ ጌላዲስ።
PSA 119:113 ታኒ ዎዚና ባላታ ኢጻይስ፤ ጊዶ ኣቲን ኔ ዎጋ ሲቃይስ።
PSA 119:114 ኔኒ ታስ ጎንዳሌኔ ባቃታ ኣቲዛሶ፤ ታኒ ኔ ቃላ ሂዶታ ኦꬃይስ።
PSA 119:115 ታኒ ታ ጾሳ ኣዛዞ ናጋና ማላ ኢንቴኖ ኢታ ኦꬂዛይቶ! ታፔ ሃኪቴ!
PSA 119:116 ኔኒ ጊዳ ቃላ ማላ ታና ካፋ፤ ሂስቲኮ ታኒ ሼምፖራ ፓጻ ዴኣና፤ ታ ሂዶታይ ሃዳ ጊዲን ታና ዬላሶፓ።
PSA 119:117 ኔ ታና ካፋ ኦይካ፤ ሂስቲኮ ታ ሳሮን ዴኣና፤ ታኒ ኡባ ዎዴ ኔ ኣዋጃታ ፖላና።
PSA 119:118 ኔ ዎጋፔ ካሬ ኬዚዳይታ ኡባ ዬጋ ኣጋዳሳ፤ ኢስቲ ባሌꬆኒኔ ዎርዶን ኦꬂዳ ኡባይ ሃዳ ጊዳና።
PSA 119:119 ሳኣን ዴኢዛ ኢታታ ኡባ ኔኒ ቡራ ማላ ዬጋ ኣጋሳ፤ ሄሳ ጊሻስ ታኒ ኔ ኢሚዳ ኣዛዞ ዶሳዲስ።
PSA 119:120 ታ ኣሾይ ኔስ ያዪዲ ኮኮሬስ፤ ታካ ኔ ፒርዳስ ያያይስ።
PSA 119:121 ታኒ ሱሬኔ ጺሎ ሚሽ ኦꬃዲስ፤ ታና ኡንኤꬂዛይታስ ኣꬃ ኢሞፋ።
PSA 119:122 ታስ ኔ ኣይሌዛ ሎኤቴꬃስ ዋሴ ጊዳ፤ ታና ኦቶራንቻታን ኡንኤꬆፋ።
PSA 119:123 ታ ኣይፌቲ ኔ ኣሺዛይሳኔ ኔ ጺሎ ቃላ ናጊሼ ዶልጁሚዳ።
PSA 119:124 ታስ ኔ ኣይሌዛስ ኔ ሲቆዛ ኬና ኦꬃ፤ ኔ ዎጋ ታና ታማርሳ።
PSA 119:125 ታኒ ኔ ኣይሌ፤ ኔ ዎጋ ታ ኤራና ማላ ታስ ኣኬካ ኢማ።
PSA 119:126 ኣቤት ጎዳዉ! ኔ ኢሚዳ ዎጋይ ሞሬቲሼ ዴስ፤ ኔኒ ፒርዳና ዎዴያ ሃኖ።
PSA 119:127 ታኒ ኔ ኣዛዞ ዎርቃፌ ኣꬃዳ ሲቃይስ፤ ሙሩታ ዎርቃፌካ ኣꬃዳ ዶሳይስ።
PSA 119:128 ኔ ዎጋቲ ኡባይ ቱሙ ጊዲዳይሳ ኣማናዲስ፤ ሄሳ ጊሻስ ጌላ ኦጌ ኡባ ኢጻዲስ።
PSA 119:129 ኔ ዮቲዳ ቃላይ ኡባይ ማላሊሴስ፤ ሄሳ ጊሻስ ታ ሼምፖያ ኢዛ ናጋዉስ።
PSA 119:130 ኔ ቃላ ቢርሼꬃይ ፖኦ ኢሜስ፤ ኣኬካይ ፓጪዳይታስ ኣኬካ ኢሜስ።
PSA 119:131 ታኒ ኔ ቃላ ሳሜታዲስ፤ ታ ዶናካ ዶያዳ ዬሞታይስ።
PSA 119:132 ሃ ታኮ ሲማ፤ ኔ ሱንꬃ ሲቂዛይታ ኡባስ ኔኒ ኦꬂዛይሳ ማላ ታስካ ቃꬌታ።
PSA 119:133 ታ ሄሜታ ኔ ቃላ ማላ ሱሪሳ፤ ናጋራይ ሃራና ማላ ታና ኣꬃ ኢሞፋ።
PSA 119:134 ታኒ ኔ ኣዛዞ ናጋና ማላ ታና ኡንኤꬂዛይታ ኩሼፔ ዎዛ።
PSA 119:135 ታስ ኔ ኣይሌዛስ ኔ ኣይፌሶ ፖኢሳ፤ ኔ ኣዋጃታ ታና ታማርሳ።
PSA 119:136 ኔ ዎጋይ ቦንቼቶንታ ጊሻስ ታ ኣፉንꬂ ሃꬃ ማላ ጎጌስ።
PSA 119:137 ኣቤት ጎዳዉ! ኔኒ ጺሎ፤ ኔ ፒርዳይካ ሊኬ።
PSA 119:138 ኔ ኢሚዳ ኣዛዞቲ ጺሎኔ ኣማንꬂዛዛ።
PSA 119:139 ታ ሞርኬቲ ኔ ቃላ ቶቺዳ፤ ሂስቲን ኔ ቃላ ሚሻይ ታ ጎምፓን ታማ ማላ ኤጺዴስ።
PSA 119:140 ኔ ቃላይ ፓጬቲ ጌዪዳዛ፤ ታኒ ኔ ኣይሌይ ኢዛ ሲቃይስ።
PSA 119:141 ታኒ ላፋኔ ካꬌቲዳ ኣሳ፤ ጊዲኮካ ታኒ ኔ ዎጋ ዶጋቤኬ።
PSA 119:142 ኔ ጺሎቴꬃይ ሜርናስ ዴስ፤ ኔ ዎጋይካ ቱማ።
PSA 119:143 ሜቶይኔ ቱጋይ ታና ጋኪዴስ፤ ጊዶ ኣቲን ኔ ኣዛዞቲ ታና ኡፋይሴቴስ።
PSA 119:144 ኔኒ ዮቲዳይሲ ሜርናስካ ጺሎ፤ ታኒ ሼምፖራ ፓጻ ዳና ማላ ኔ ታስ ኣኬካ ኢማ።
PSA 119:145 ኣቤት ጎዳዉ! ታኒ ኩሜꬃ ዎዚናፔ ኔኮ ዋሳዲስ፤ ታና ኣላ። ታኒ ኔ ኣዋጃታስ ኣዛዜታና።
PSA 119:146 ታኒ ኔኮ ዋሳይስ፤ ኔ ታና ኣሻ፤ ታኒ ኔ ኢሚዳ ኣዛዞዛ ናጋና።
PSA 119:147 ባዞይ ዞኦንታ ዎንታራ ዴንዳዳ፥ «ታና ማዳ» ጋዳ ኔኮ ዋሳይስ፤ ኔ ታስ ጌሊዳ ቃላ ሂዶታ ኦꬃይስ።
PSA 119:148 ኔ ቃላ ዩሻ ቆፓሼ ኦማርስ ኩሜꬅ ኣይፌ ቂጶንታ ኡታ ኣቃይስ።
PSA 119:149 ኣቤት ጎዳዉ! ኔ ሲቆ ኬና ታ ቃላ ሲያ፤ ኔ ዎጋ ማላ ታና ሼምፖራ ፓጻ ዎꬃ።
PSA 119:150 ጌኔ ቆፒዛይቲ ታኮ ሺቂዳ፤ ሄይቲካ ኔ ዎጋፔ ሃኪ ዲዛይታ።
PSA 119:151 ኣቤት ጎዳዉ! ኔኒ ጊዲኮ ታ ማታን ዳሳ፤ ኔ ኣዛዞቲ ኡባይካ ቱማ።
PSA 119:152 ኔ ኢስታ ሜርናስ ሚንꬃ ኤሳዳሳ፤ ሄሳ ታኒ ቤኒፔ ዶማዳ ኔ ዎጋፔ ታማራዲስ።
PSA 119:153 ታ ቱጋ ቤያዳ ታና ኣሻ፤ ኣይስ ጊኮ ታኒ ኔ ዎጋ ዶጋቤኬ።
PSA 119:154 ኔ ታ ጊሻስ ሞቴታዳ ታና ዎዛ፤ ኔ ጊዳ ቃላ ማላ ታና ሼምፖራ ፓጻ ዎꬃ።
PSA 119:155 ኢታቲ ኔ ዎጋ ኮዮንታ ጊሻስ ኢስታስ ኣቶቴꬂ ዴና።
PSA 119:156 ኣቤት ጎዳዉ! ኔ ቃꬌታይ ዳሮ፤ ኔ ቃላ ማላ ታና ሼምፖራ ፓጻ ዎꬃ።
PSA 119:157 ታ ሞርኬቲኔ ታና ዬዴꬂዛይቲ ዳሮ፤ ጊዶ ኣቲን ታኒ ኔ ዮቲዳ ቃላፔ ሼርኢ ጋቤኬ።
PSA 119:158 ኔ ኣዛዞታ ናጎንታ ጊሻስ ታ ኣማኔቶንታይታ ቤያዳ ሻቴታዲስ።
PSA 119:159 ኣቤት ጎዳዉ! ታኒ ኔ ዎጋ ዶሲዛኮ ቤኣ፤ ኔ ሲቆ ማላ ታና ሼምፖራ ፓጻ ዎꬃ።
PSA 119:160 ኔ ቃላ ኡባይ ቱማ፤ ኔ ጺሎቴꬃ ዎጋይ ሜርናሳ።
PSA 119:161 ዴሬ ሃሪዛይቲ ታና ጮ ዬዴꬂዳ፤ ጊዶ ኣቲን ታ ዎዚናይ ኔ ቃላስ ያዬስ።
PSA 119:162 ዳሮ ሚሽ ዲኢዳ ኣሲ ኡፋዬቲዛ ማላ ኔኒ ጊዳ ቃላን ታኒ ኡፋዬታይስ።
PSA 119:163 ታኒ ዎርዶ ኢጻይሲኔ ሻቴታይስ፤ ጊዶ ኣቲን ኔ ዎጋ ሲቃይስ።
PSA 119:164 ኔ ጺሎ ፒርዳ ጊሻስ ታኒ ኔና ጋላሳን ላፑንቶ ጋላታይስ።
PSA 119:165 ኔ ዎጋ ሲቂዛይታስ ዳሮ ሳሮቴꬂ ዴስ፤ ኢስታ ꬉጲዛ ሚሺ ዴና።
PSA 119:166 ኣቤት ጎዳዉ! ታኒ ኔ ኣቶቴꬃ ኡፋይሳን ናጋይስ፤ ኔ ኣዛዞታካ ፖላይስ።
PSA 119:167 ታኒ ኔ ዮቲዳ ቃላ ናጋይስ፤ ታ ኢዛ ዳሮ ሲቃይስ።
PSA 119:168 ታኒ ኔ ዎጋሲኔ ኔ ዮቲዳ ቃላስ ኣዛዜታና፤ ታ ኦጌ ኡባይ ኔ ሲንꬃን ቆንጬ።
PSA 119:169 ኣቤት ጎዳዉ! ታ ዋሶይ ኔኮ ጋኮ፤ ኔኒ ጊዳ ቃላ ማላ ታስ ኣኬካ ኢማ።
PSA 119:170 ታ ሾቤꬂ ፑዴ ኔ ሲንꬅ ጋኮ፤ ኔኒ ጊዳ ቃላ ማላ ታና ኣሻ።
PSA 119:171 ኔ ኣዋጃታ ታና ታማርሳዳሳ፤ ሄሳ ጊሻስ ታ ሜቴርሻታፔ ጋላታይ ፑልቴስ።
PSA 119:172 ኔ ኣዛዞቲ ኡባይ ጺሎ፤ ሄሳ ጊሻስ ታ ዶናይ ኔ ቃላ ዬጾ።
PSA 119:173 ታኒ ኔ ኣዛዞታ ዶራዲስ፤ ሄሳ ጊሻስ ኔ ኩሼይ ታና ማዳናስ ጊጊ ኡቶ።
PSA 119:174 ኣቤት ጎዳዉ! ኔ ኣቶቴꬃ ታ ላሞታይስ፤ ኔ ዎጋይ ታና ኡፋይሴስ።
PSA 119:175 ታኒ ኔና ጋላታና ማላ ታና ሼምፖራ ፓጻ ዎꬃ፤ ኔ ዎጋይ ታስ ማዶ ጊዶ።
PSA 119:176 ꬋይዳ ዶርሳ ማላ ታኒ ቶይላታዲስ፤ ጊዶ ኣቲን ታኒ ኔ ዎጋ ባላቤኬ፤ ሄሳ ጊሻስ ታና ኔ ኣይሌዛ ኮያ።
PSA 120:1 ታኒ ሜቶቲዳ ዎዴ ጎዳ ጼይጋዲስ፤ ኢዚካ ታስ ኮዪዴስ።
PSA 120:2 ኣቤት ጎዳዉ! ዎርዶቲዛ ሜቴርሻታፔኔ ጪሚዛ ኢንጻርሳታፔ ታና ኣሻ።
PSA 120:3 ኢንቴኖ ዎርዳንቻቶ! ኢዚ ኢንቴና ዎስታኔ? ሄሳፌ ሃራ ኢንቴ ቦላ ኣይ ኦꬃኔ?
PSA 120:4 ኢዚ ኢንቴና ሆጼ ቶራን ጫዳና፤ ኢዚ ኢንቴና ቦንቆ ታማን ጹጋና።
PSA 120:5 ታ ሜሼኬ ዴራ ጊዶን ዳይስ፤ ቄዳሬ ዱንካኔንካ ኡቲዳ ጊሻስ ታስ ኣዬ ኣና!
PSA 120:6 ሳሮቴꬅ ኢጺዛ ኣሳታራ ታኒ ዳሮ ዎዴ ዴኣዲስ።
PSA 120:7 ታኒ ሳሮ ኮያይስ፤ ጊዶ ኣቲን ታኒ ሳሮ ሃሳይዛ ዎዴ ኢስቲ ኦሽ ኮዬቴስ።
PSA 121:1 ታኒ፥ «ማዶይ ታስ ኣዋፔ ያንዴሻ?» ጋዳ ታ ኣይፌታ ፑዴ ዙማታኮ ዴንꬃዲስ።
PSA 121:2 ታስ ማዶይ ሳሎኔ ሳኣ ሜꬊዳ ጎዳፔ ዬስ።
PSA 121:3 ኢዚ ኔ ቶሆ ሃሊጺሴና፤ ኔና ናጊዛይሲ ꬊስኬና።
PSA 121:4 ኢስራኤሌ ናጊዛይሲ ሙሌካ ኢቼናኔ ꬊስኬና።
PSA 121:5 ጎዳይ ኔና ናጊዛይሳ፤ ጎዳይ ኔስ ኡሻቻ ባጋራ ኩዋ ጊዳና።
PSA 121:6 ጋላሳ ኣዋይ ኔና ጹጌና፤ ኦማርሳ ኣጊናይካ ኔና ቆሄና።
PSA 121:7 ጎዳይ ኢታ ኡባፌ ኔና ናጋና፤ ኔ ሼምፖ ሄማና።
PSA 121:8 ጎዳይ ኔ ቡሳኔ ዩሳ ሃቺፌ ሜርና ጋካናስ ናጋና።
PSA 122:1 ኢስቲ ታና፥ «ኣኔ ጎዳ ኬꬅ ቦስ» ጊን ታኒ ኡፋዬታዲስ።
PSA 122:2 ሃኔ ዬሩሳላሜ ካታማዬ! ኑኒ ኔ ፔንጌታራ ጌሊዲ ኤቂዶስ።
PSA 122:3 ዬሩሳላሜ ካታማያ ዳንጼታ ኬጼቲዳ ሚኖ ካታማ።
PSA 122:4 ኢስራኤሌስ ኢሜቲዳ ዎጋ ማላ ኢስራኤሌ ቆሞቲ ጎዳ ሱንꬅ ጋላታናስ ሄ ባና።
PSA 122:5 ዳዊቴ ዜሬꬃፌ ካዎቲዳይቲ ፒርዳናስ ሄን ኡቲዳ።
PSA 122:6 ዬሩሳላሜ ሳሮቴꬃስ፥ «ኔና ዶሲዛይቲ ኡባይ ኢሻሎን ዴቶ፤
PSA 122:7 ኔ ጊምቤታ ጊዶን ሳሮይ ዴኦ! ኔ ካዎቴꬃ ኬꬃን ዎፓይ ኩሞ» ጊ ዎሲቴ፤
PSA 122:8 ታ ዳቦታ ጊሻሲኔ ላጌታ ጊሻስ «ኔ ጊዶን ሳሮይ ዶ!» ጋይስ።
PSA 122:9 ጎዳ ኑ ጾሳ ኬꬃ ጊሻስ ጋዳ ታኒ ኔስ ሎኦ ኣሞ ኣሞታና።
PSA 123:1 ኔኖ ሳሎ ኣራታን ኡቲዳይሶ! ታኒ ኔኮ ፑዴ ጼላይስ።
PSA 123:2 ኣሽካራይ ባ ጎዳ ኩሼ ጼሊዛ ማላ፥ ኣሽካራያካ ባ ጎዳቴይ ኩሼ ጼሊዛ ማላ፥ ኑኒካ ኢዚ ኑና ማራና ጋካናስ ኑ ጎዳኮ ፑዴ ጼሎስ።
PSA 123:3 ኣቤት ጎዳዉ! ኑ ቦላ ካꬌይ ዳሪዳ ጊሻስ ማራርኪ! ኑና ማራ።
PSA 123:4 ጬቄቲዛይታፔ ዳሮ ጫሺ ኦቶራንቻታፔ ዳሮ ካꬌይ ኑና ጋኪዴስ።
PSA 124:1 ኢስራኤሌይ፥ «ጎዳይ ኑናራ ዶንታኮ ኑ ዋናኔ?
PSA 124:2 ኑ ሞርኬቲ ኑ ቦላ ዴንዲዳ ዎዴ ጎዳይ ኑናራ ባይንዳኮ፥
PSA 124:3 ኢስታ ሃንቆይ ኑ ቦላ ታማ ማላ ኤጺዳ ዎዴ ኢስቲ ኑና ፓጻ ሚታናሺን።
PSA 124:4 ሃꬂ ኑና ኤኪ ባናሺን፤ ዲኦይ ኑና ሚታናሺን።
PSA 124:5 ኪጻ ሃꬂ ኑና ማናሺን» ጌቶ።
PSA 124:6 ኑና ኑ ሞርኬታ ኣቻን ፑዚሶንታ ኣሺዳ ጎዳይ ጋላቴቶ።
PSA 124:7 ኑኒ ሻንካንቻታ ናርጻፌ ካፎይ ኬሲ ኤኪዛ ማላ ኬሲ ኤኪዶስ፤ ያርዴይ ዱጺዴስ ኑኒካ ኬሲ ኤኪዲ ኣቲዶስ።
PSA 124:8 ሳሎኔ ሳኣ ሜꬊዳ ጎዳ ሱንꬃን ኑስ ማዶይ ዬስ።
PSA 125:1 ጎዳን ኣማኔቲዛይቲ ሜርናስ ቃጾንታ ዲዛ ጺዮኔ ዙማ ማላ።
PSA 125:2 ዙማቲ ዬሩሳላሜ ካታማ ዩሾን ዲዛ ማላ ሃቺፌ ሜርና ጋካናስ ጎዳይ ባ ዴራ ዩሾን ዴስ።
PSA 125:3 ጺሎቲ ኢታቴꬅ ታማሮንታ ማላ ኢታቲ ሃሪሼ ጺሎታ ቢታን ጋምኤቴና።
PSA 125:4 ኣቤት ጎዳዉ! ሎኦ ኣሳታሲኔ ዎዚና ሱሬ ኣሳታስ ኔ ሎኦ ኦꬃ።
PSA 125:5 ጊዶ ኣቲን ካሴ ባ ጌላ ኦጌ ሲሚዛይታ ኔኒ ኢታ ኦꬂዛይታራ ኢሲፌ ጋꬃ ቃጻያ፤ ኢስራኤሌስ ሳሮይ ጊዶ!
PSA 126:1 ጎዳይ ኑና ዲኤቲዳይታ ዛሪዲ ጺዮኔ ኤሂዳ ዎዴ ኑስ ኣጉሞ ሚሳቲዴስ።
PSA 126:2 ሄ ዎዴ ኑ ዶናይ ሚቻን ኩሚዴስ፤ ኑ ኢንጻርሲካ ኡፋይሳ ማዛሙሬ ዬጺዴስ፤ ሂስቲን ካዎቴꬃቲ ባንታ ጊዶን፥ «ጎዳይ ኢስታስ ጊታ ሚሽ ኦꬂዴስ» ጊዳ።
PSA 126:3 ቱሙካ ጎዳይ ኑስ ጊታ ሚሽ ኦꬂዴስ፤ ኑኒካ ኬሂ ኡፋዬቲዶስ።
PSA 126:4 ኣቤት ጎዳዉ! ኔጌቤ ባዞን ኢራ ቡኪሳዳ ሻፋ ሃꬃን ኩንꬂዛ ማላ ኑ ዱሳ ኦራꬃ።
PSA 126:5 ዬኪሼ ዜሪዳይቲ ኡፋይሳን ዬጺሼ ሺሻና።
PSA 126:6 ዜሬꬅ ቶኪዲ ዬኪሼ ቢዳይቲ ሚርቄታ ቶኪዲ ኡፋይሳን ዬጺሼ ሲማና።
PSA 127:1 ጎዳይ ኬꬅ ኬጾንታ ኣጊኮ ኬጺዛይቲ ጮ ሜላ ዳቡሬቴስ፤ ጎዳይ ካታማ ናጎንታ ኣጊኮ ናጊዛይቲ ጮ ሜላ ዳፌቴቴስ።
PSA 127:2 ኔኒ ኣቆታ ዴማናስ ማላዶ ዎንታራ ዴንዳ ዎጺኮኔ ጊዶꬅ ጋካናስ ኔ ዳቡርኮ ሄሲ ዉሪካ ሃዳ፤ ጎዳይ ባ ሲቂዛይታስ ሼምፖ ኢሜስ።
PSA 127:3 ናይቲ ጎዳፔ ኢሜቲዛ ኢሞታታ፤ ናይቲካ ቱማፔ ኢዛ ዎይቶ።
PSA 127:4 ኣሲ ናቴꬃን ዲሼ ዬሊዛ ኣቱማ ናይቲ ኦላንቻ ኩሼን ዲዛ ዪሻ ማላ።
PSA 127:5 ኢዛ ኮሆቲ ሄ ዪሻታን ኩሚዳይ ኣንጄቲዳዴ። ኢዚ ካታማ ፔንጌን ባ ሞርኬታራ ማርሼቲዛ ዎዴ ሻቱሜቴና።
PSA 128:1 ጎዳስ ያዪዛይቲኔ ኢዛ ኦጌን ሄሜቲዛይቲ ኡባይ ኣንጄቲዳይታ።
PSA 128:2 ኔኒ ኔ ዳቡራ ኣይፌ ማና፤ ኔ ኣንጄታናኔ ኔስ ኢንጄታና።
PSA 128:3 ኔ ማቺያ ኔሶን ኣይፊዛ ዎይኔ ማላ ጊዳና፤ ኔ ናይቲካ ኔ ማዳ ዩሾን ዎጋራ ፑቴ ማላ ጊዳና።
PSA 128:4 ጎዳስ ያዪዛ ኣሲ ሄሳꬆ ኣንጄታና።
PSA 128:5 ጎዳይ ኔና ጺዮኔፔ ኣንጆ! ኔኒ ዴኢዳ ላይꬅ ኡባን ኢዚ ኔና ዬሩሳላሜ ሎኤቴꬅ ቤሶ!
PSA 128:6 ኢዚ ኔና ናይታ ናይታ ጋꬂ ቤሶ! ኢስራኤሌስ ሳሮይ ጊዶ!
PSA 129:1 ኢስራኤሌ ኣሳይ፥ «ሞርኬቲ ታና ዬላጋቴꬃፌ ዶሚዲ ዳሮ ዎዴ ኡንኤꬂዳ።
PSA 129:2 ቱማፔ ኢስቲ ታና ዬላጋቴꬃፌ ዶሚዲ ዳሮ ዎዴ ኡንኤꬂዳ፤ ጊዶ ኣቲን ኢስቲ ታና ጾኒቤቴና።
PSA 129:3 ታ ዞኮ ጹርቃፌን ሾጪ ሾጪዲ ዎርጻፌቲዳ ጋዴ ሚሳቲሲዳ» ጎ።
PSA 129:4 ጊዶ ኣቲን ጎዳይ ጺሎ፤ ኢታታ ዎዶሮ ዱሴሬꬂዲ ታና ቢርሺ ዬዲዴስ።
PSA 129:5 ጺዮኔ ኢጺዛ ኡባይ ዬላቲዲ ጉዬ ሲሞ!
PSA 129:6 ኬꬃ ካራ ቦላ ሞኪዲ ሄራካ ሜሊዛ ማታ ማላ ጊዶ!
PSA 129:7 ሄሲ ቡጪዛይታስ ኩሼ ኩሞንታ ማታ ማላ ዎይኮ ሚርቂዛይታስካ ዳንኬ ኩሞንታ ካꬃ ማላ።
PSA 129:8 ሄ ኦጌራ ኣꬊዛይቲ፥ «ጾሲ ዎልቃ ኢሞ» ቡጪዛይቲካ፥ «ጾሲ ኣንጆ» ጎፔቶ።
PSA 130:1 ኣቤት ጎዳዉ! ታኒ ጪማ ሜቶ ጊዶን ዳሼ ኔኮ ዋሳይስ።
PSA 130:2 ኣቤት ጎዳዉ! ታ ጬንጉርሳ ሲያ፤ ታኒ ሾቢዛይሳ ኔ ሃይꬃቲ ኤዝጌቶ።
PSA 130:3 ኣቤት ጎዳዉ! ኔኒ ኑ ናጋራ ካሌታ ካሌታ ማዝጋቢዳኮ ኣቤት ጎዳዉ ኦኔ ኔ ሲንꬃን ኤቂ ዳንዳያኔ?
PSA 130:4 ጊዶ ኣቲን ኑኒ ኔና ቦንቻና ማላ ኔኒ ኑ ናጋራ ኣቶ ጋሳ።
PSA 130:5 ታኒ ጎዳ ላሞታን ናጋይስ፤ ታ ሼምፖያ ዳንዳያን ናጋዉስ፤ ኢዛ ቃላካ ሂዶታ ኦꬃዉስ።
PSA 130:6 ዛቤቲ ሳኣይ ኣዉዴ ዎንታኔሻ ጊዲ ናጊዛይሳፌካ ቦላ ታኒ ጎዳ ላሞታን ናጋይስ።
PSA 130:7 ጎዳ ኣቻን ሲቆይኔ ማሮቴꬂ ዲዛ ጊሻስ ኢስራኤሌ ኣሳዉ! ጎዳን ሂዶታ ኦꬂቴ።
PSA 130:8 ኢዚ ኢስራኤሌ ኣሳ ኢስታ ናጋራ ኡባፌ ኣሻና።
PSA 131:1 ኣቤት ጎዳዉ! ታ ዎዚናይ ኦቶሬቲቤና፤ ታኒ ኦቶሮን ጼላ ኤሪኬ፤ ታ ቆፋን ቤሶንታ ጊታቴꬃስ ኣሞታቤኬ፤ ታ ዎልቃፌ ቦላራ ዛራꬋቤኬ።
PSA 131:2 ꬋንꬅ ዱጺዳ ናይ ባ ኣዪ ኪኦን ጮኡ ጊ ኡቲዛ ማላ፥ ታ ሼምፖያ ታ ጊዶን ጮኡኔ ዎፑ ጋዱስ።
PSA 131:3 ኢስራኤሌ ኣሳዉ! ሃቺፌ ዶሚዲ ሜርና ጋካናስ ጎዳን ሂዶታ ኦꬂቴ።
PSA 132:1 ኣቤት ጎዳዉ! ዳዊቴኔ ኢዚ ዳንዳይዳ ሜቶዛ ኡባ ኔ ቆፓ።
PSA 132:2 ጎዳዉ! ኢዚ ኔስ ጫቂዳ ቃላ፥ ዎልቃማ ያቆቤ ጾሳስካ ኣዲኔቲዳ ኣዲና ቆፓ።
PSA 132:3 ኢዚካ፥ «ሃይሳፌ ሲንꬃን ታኒ ታሶ ጌሊኬ፤ ታ ሂጻንካ ኬዚኬ፤
PSA 132:4 ꬊስኮካ ꬊስኪኬ፤ ታ ኣይፌታካ ሊጲኬ።
PSA 132:5 ሄሲካ ታኒ ጎዳስ ዱሳሶ፥ ዎልቃማ ያቆቤ ጾሳስ ኣቆሶ ጊጊሳና ጋካናሳ» ጊዴስ።
PSA 132:6 ሄኮ ኑኒ ታቦታዛ ጊሻስ ኤፍራታን ዲሼ ሲዪዶስ፤ ቂሪያቴ-ዪኣሪሜ ቢታን ኢዛ ዴሚዶስ።
PSA 132:7 ኑኒ፥ «ኣኔ ኢዚ ዲዛሶ ቦስ፤ ኢዛ ቶሆይ ዬꬊዛሶን ጉፋኒዲ ኢዛስ ጎይኖስ።
PSA 132:8 «ኣቤት ጎዳዉ! ዴንዳ! ኔ ሚኖቴꬃስ ማላታ ጊዲዳ ታቦታራ ኔ ኬꬅ ጌላዳ ሼምፓ።
PSA 132:9 ኔ ቄሴቲ ጺሎቴꬅ ማይኤቶ፤ ጌሽ ጊዲዳ ኔ ኣሳቲ ኢሊሌቶ» ጊዶስ።
PSA 132:10 ኔ ኣይሌ ዳዊቴ ጊሻስ ጋዳ ኔኒ ቲይዳይሳ ዬጎፋ።
PSA 132:11 ጎዳይ ዳዊቴስ ቃንꬃፌ ጫቂዴስ፤ ላሜቶንታ ቃላን፥ «ኔ ናይታፔ ኢሳ ታኒ ኔ ኣራታን ኡቲሳና።
PSA 132:12 ኔ ናይቲ ታ ጫቆ ቃላኔ ታኒ ታማርሲዳ ቃላ ኢስቲ ናጊኮ ኢስታ ናይቲካ ኔ ካዎቴꬃ ኣራታን ሜርናስ ኡታና» ጊ ጫቂዴስ።
PSA 132:13 ጎዳይ ጺዮኖ ዶሪዴስ፤ ባስ ዴኢዛሶ ኦꬃናስ ኣሞቲዲ፥
PSA 132:14 «ሃና ታስ ሜርናስ ሼምፖሶ ጊዳና፤ ታኒ ኢዞ ዶሲዳ ጊሻስ ኢዚን ዴኣና።
PSA 132:15 ታኒ ኢዞ ኬሃ ኣንጃና፤ ኢዚን ዴኢዛ ማንቆታካ ካꬅ ካልሳና።
PSA 132:16 ታኒ ኢዚን ዲዛ ቄሴታ ኣቶቴꬅ ማይዛና፤ ኢዚን ዴኢዛ ጾሳ ኣሳቲካ ኡፋይሳን ዬጻና።
PSA 132:17 «ሃ ሶሆን ዳዊቴ ዜሬꬃፌ ካዎ ኬሳና፤ ታኒ ቲይዳይሳስ ፖኦ ጊጊሳና።
PSA 132:18 ታኒ ኢዛ ሞርኬታ ዬላቻና፤ ጊዶ ኣቲን ኢዛ ሁኣን ዴኢዛ ካዎቴꬃ ካላቻይ ጶላና» ጊዴስ።
PSA 133:1 ኢሻንቲ ኢሲፌቴꬃን ዴኢዛይሲ ኣይ ማላ ሎኦኔ ኣይ ማላ ኡፋይሲዛዜ!
PSA 133:2 ሄሲ ኣሮኔ ሁኤን ቲጊን ቡቻራ ቢዲ ኢዛ ማይኦ ማጫራ ጋካናስ ጎጊዲ ሳዎ ቱኑ ጊዛ ኣልኦ ዛይቴ ማላ።
PSA 133:3 ቃሴካ ሄርሞኔ ዙማታፔ ዱጌ ጺዮኔ ዙምቡላታ ቦላ ጾኪዛ ጻዛ ማላ፤ ጎዳይ ሄሳን ኣንጆኔ ዴኦ ሜርናስ ኣዛዚዴስ።
PSA 134:1 ኢንቴኖ ጎዳ ኣይሌቶ! ጎዳ ኬꬃን ኦማርስ ኦꬂዛይቶ! ኡባይካ ሃ ዪዲ ጎዳ ጋላቲቴ።
PSA 134:2 ጾሳ ኬꬃን ኢንቴ ኩሼ ዴንꬂዲ ጎዳ ጋላቲቴ።
PSA 134:3 ሳሎኔ ሳኣ ሜꬊዳ ጎዳይ ኢንቴና ጺዮኔፔ ኣንጆ።
PSA 135:1 ኢንቴኖ ጎዳ ኣይሌቶ! ኢዛ ጋላቲቴ! ጎዳ ሱንꬃ ሳቢቴ!
PSA 135:2 ኢንቴኖ ጎዳ ኬꬃን ኦꬂዛይቶ! ኢንቴኖ ኑ ጾሳ ኬꬃ ዛጎን ኤቂዳይቶ ጋላቲቴ!
PSA 135:3 ኢዚ ኪያ ጊዲዳ ጊሻስ ጎዳ ጋላቲቴ! ኢዚ ሎኦ ጊዲዳ ጊሻስ ኢዛ ሱንꬃስ ዬጺቴ!
PSA 135:4 ጎዳይ ያቆቤ ባስ ቡዞ ኦꬂዴስ፤ ኢስራኤሌካ ባስ ኣልኦ ሚሽ ሂስቲ ዶሪዴስ።
PSA 135:5 ጎዳይ ጊታ ጊዲዳይሳኔ ኑ ጎዳይ ጾሳታ ኡባፌ ꬎቂዛይሳ ታኒ ኤራይስ።
PSA 135:6 ሳሎኒኔ ሳኣን፥ ኣባታኒኔ ጪማታ ኡባ ጊዶንካ ጎዳይ ባ ዶሲዳይሳ ኡባ ኦꬄስ።
PSA 135:7 ካሬꬃ ሻራ ሳኣ ጋጻፔ ኢዚ ዴንꬄስ፤ ኢዚ ኢራራ ዎልቃንꬅ ኪቴስ፤ ባ ሚንጂ ዎꬂዳሶፔ ጫርኮ ኬሲ ዬዴስ።
PSA 135:8 ጊብጼ ቢታን ኣሳፔ ቢዲ ሜሄ ጋካናስ ባይራ ዬሌቲዳ ኡባ ዎꬊዴስ።
PSA 135:9 ኔኖ ጊብጼ! ፓሮኔ ቦላኔ ኢዛ ኦሳንቻታ ቦላ ኦራꬂኔ ማላሊሲዛ ሚሽ ዬዲዴስ።
PSA 135:10 ኢዚ ዳሮ ካዎቴꬃታ ꬋይሲዴስ፤ ዎልቃማ ካዎታካ ዎꬊዴስ።
PSA 135:11 ኣሞሬታ ካዎ ሲሆኔ፥ ባሳኔ ካዎ ኣጌኔ ካናኔ ካዎታ ኡባ ዎꬊዴስ።
PSA 135:12 ኢስታ ቢታካ ባ ዴራ ኢስራኤሌ ላቲሲዴስ።
PSA 135:13 ኣቤት ጎዳዉ! ኔ ሱንꬂ ሜርናስ ዳና፤ ዬሌታፔ ዬሌታ ጋካናስ ኔኒ ሃሳኤታና።
PSA 135:14 ጎዳይ ባ ኣሳስ ፒርዳና፤ ኢዚ ባ ኣይሌታስካ ቃꬌታና።
PSA 135:15 ካዎቴꬃቲ ጎይኒዛ ኤቃ ጾሳቲ ቢራፔኔ ዎርቃፌ ኣሳ ኩሼን ኦሴቲዳይታ።
PSA 135:16 ኢስታስ ዶናይ ዴስ ሺን ሃሳዬቴና፤ ኣይፌይ ዴስ ሺን ጼሌቴና።
PSA 135:17 ሃይꬂ ዴስ ሺን ሲዬቴና፤ ኢስታ ሲꬌን ፔኖይካ ዴና።
PSA 135:18 ኢስታ ሜꬊዳይቲኔ ኢስታን ኣማኔቲዛይቲ ኡባይ ኢስታ ማላ ጊዴቶ።
PSA 135:19 ኢስራኤሌ ዴሬዞ! ጎዳ ጋላቲቴ፤ ኣሮኔ ኬꬃ ኣሳቶ! ጎዳ ሳቢቴ፤
PSA 135:20 ሌዌ ኬꬃ ኣሳቶ! ጎዳ ጋላቲቴ፤ ጎዳስ ያዪዛይቶ! ኡባይ ጎዳ ጋላቲቴ።
PSA 135:21 ዬሩሳላሜን ዴኢዛ ጎዳይ ጺዮኔን ጋላቴቶ! ጎዳይ ጋላቴቶ!
PSA 136:1 ጎዳ ጋላቲቴ! ኢዚ ኪያ፤ ኢዛ ሲቆይ ሜርናሳ።
PSA 136:2 ጾሳታ ጾሳ ጋላቲቴ! ኢዛ ሲቆይ ሜርናሳ።
PSA 136:3 ጎዳ ጋላቲቴ! ኢዛ ሲቆይ ሜርናሳ።
PSA 136:4 ኢዚ ጻላ ጊታ ማላሊሲዛ ሚሽ ኦꬄስ፤ ኢዛ ሲቆይ ሜርናሳ።
PSA 136:5 ባ ሂላቴꬃን ሳሎታ ሜꬊዴስ፤ ኢዛ ሲቆይ ሜርናሳ።
PSA 136:6 ቢታ ሃꬃ ቦላን ሚጪዴስ፤ ኢዛ ሲቆይ ሜርናሳ።
PSA 136:7 ጊታ ፖኦታ ሜꬊዴስ፤ ኢዛ ሲቆይ ሜርናሳ።
PSA 136:8 ኣርሼይ ጋላስ ፖኣና ማላ ኦꬂዴስ፤ ኢዛ ሲቆይ ሜርናሳ።
PSA 136:9 ኣጊናይኔ ጾሊንቴቲ ኦማርስ ፖኢሳና ማላ ኦꬂዴስ፤ ኢዛ ሲቆይ ሜርናሳ።
PSA 136:10 ኢዚ ጊብጼ ቢታን ባይራታ ዎꬊዴስ፤ ኢዛ ሲቆይ ሜርናሳ።
PSA 136:11 ኢስራኤሌ ኣሳ ጊብጼፔ ካሌꬂ ኬሲዴስ፤ ኢዛ ሲቆይ ሜርናሳ።
PSA 136:12 ባ ሚኖ ኩሼኒኔ ባ ዎልቃማ ቄሴን ሃይሳ ኦꬂዴስ፤ ኢዛ ሲቆይ ሜርናሳ።
PSA 136:13 ዞኦ ኣባ ሻኪ ዬጊዴስ፤ ኢዛ ሲቆይ ሜርናሳ።
PSA 136:14 ኢስራኤሌ ኣሳ ሄ ኣባ ጊዶራ ፒንꬂዴስ፤ ኢዛ ሲቆይ ሜርናሳ።
PSA 136:15 ጊብጼ ካዎኔ ኢዛ ኦላንቻታ ዞኦ ኣባን ሚቲሲዴስ፤ ኢዛ ሲቆይ ሜርናሳ።
PSA 136:16 ኢዚ ባ ኣሳ ባዞራ ካሌꬂዴስ፤ ኢዛ ሲቆይ ሜርናሳ።
PSA 136:17 ጊታ ካዎታ ሾጪዴስ፤ ኢዛ ሲቆይ ሜርናሳ።
PSA 136:18 ዎልቃማ ካዎታ ዎꬊዴስ፤ ኢዛ ሲቆይ ሜርናሳ።
PSA 136:19 ኣሞሬታ ካዎዛ ሲሆኔ ዎꬊዴስ፤ ኢዛ ሲቆይ ሜርናሳ።
PSA 136:20 ቃሴ ባሳኔ ካዎዛ ኣጌ ዎꬊዴስ፤ ኢዛ ሲቆይ ሜርናሳ።
PSA 136:21 ሂስቲዲ ኢስታ ቢታ ባ ኣሳ ላቲሲዴስ፤ ኢዛ ሲቆይ ሜርናሳ።
PSA 136:22 ባ ኣይሌ ኢስራኤሌ ላቲሲዴስ፤ ኢዛ ሲቆይ ሜርናሳ።
PSA 136:23 ኑኒ ካዉዪዳ ዎዴ ኢዚ ኑና ቆፒዴስ፤ ኢዛ ሲቆይ ሜርናሳ።
PSA 136:24 ኑና ኑ ሞርኬታፔ ኣሺዴስ፤ ኢዛ ሲቆይ ሜርናሳ።
PSA 136:25 ሜꬌታ ኡባስ ሚዛዝ ኢሜስ፤ ኢዛ ሲቆይ ሜርናሳ።
PSA 136:26 ሳሎ ጾሳ ጋላቲቴ! ኢዛ ሲቆይ ሜርናሳ።
PSA 137:1 ባቢሎኔ ሻፋታ ላንቄን ኡቲዲ ኑኒ ጺዮኔ ቆፒዳ ዎዴ ዬኪዶስ።
PSA 137:2 ሄን ኑኒ ኑ ዲꬃታ ሃꬃ ማታን ዲጪዛ ሚꬃታ ቦላ ካቂዶስ።
PSA 137:3 ኑና ዲኢዳ ኣሳቲ ኑኒ ዬጺዲ ኢስታ ኡፋይሳና ማላ፥ «ጺዮኔ ዬꬃፌ ኢሳ ኣኔ ኑስ ዬጺቴ» ጊዳ።
PSA 137:4 ጎዳ ማዛሙሬ ኑኒ ኣላጋ ቢታን ዎስቲ ዬጾኒ?
PSA 137:5 ዬሩሳላሜ ካታማዬ! ታኒ ኔና ባሊኮ ታ ኡሻቻ ኩሼይ ባ ኦሶ ባሎ።
PSA 137:6 ታኒ ኔና ሃሳኦንታ ኣጊኮ ታ ኡፋይሳ ኡባፌ ኣꬃዳ ዬሩሳላሜ ዶሶንታ ኣጊኮ ታ ኢንጻርሳይ ጎንጊራꬃራ ኦይኬቶ።
PSA 137:7 ኣቤት ጎዳዉ! ዬሩሳላሜይ ኩንዲዛ ጋላስ ኤዶሜ ኣሳቲ ኦꬂዳይሳ ቆፓ፤ ኢስቲ፥ «ላሊቴ! ላሊቴ! ዮቻፌ ꬎቃሊ ꬋይሲቴ!» ጊዳይሳ ባሎፓ።
PSA 137:8 ሃኔ ባቢሎኔ ቢታዬ ኔ ꬋያና! ኔኒ ኑ ቦላ ፖሊዳ ኢታ ኦሶ ኔ ቦላ ዛሪ ኦꬂዛይ ኣንጄቲዳይሳ።
PSA 137:9 ኔ ጉꬃ ናይታ ኦይኪዲ ዛላ ቦላ ዲንጬሬꬂዛይ ኣንጄቲዳይሳ።
PSA 138:1 ኣቤት ጎዳዉ! ታኒ ታ ኩሜꬃ ዎዚናፔ ኔና ጋላታይስ፤ ጾሳታ ሲንꬃን ኔና ሳባይስ።
PSA 138:2 ኔ ጌሻ ኬꬃኮ ሲማዳ ኔና ጎይናይስ፤ ኔ ሲቆ ጊሻሲኔ ኔ ኣማኔቴꬃ ጊሻስ ታኒ ኔ ሱንꬃ ሳባይስ፤ ኔኒ ኔ ሱንꬃኔ ኔ ቃላ ኡባፌ ኣꬃዳ ꬎቁ ሂስታዳሳ።
PSA 138:3 ታኒ ጼይጊዳ ጋላስ ታስ ኮያዳሳ፤ ኔ ሚኖቴꬃን ታና ሚንꬄꬃ።
PSA 138:4 ኣቤት ጎዳዉ! ሳኣን ዲዛ ካዎቲ ኡባይ ኔ ዶናፔ ኬኢዳ ቃላ ሲዪዲ ኔና ጋላቴቶ!
PSA 138:5 ጎዳ ቦንቾይ ጊታ ጊዲዳ ጊሻስ ኢስቲ ኢዚ ኦꬂዳ ኦሶ ጊሻስ ዬጼቶ።
PSA 138:6 ጎዳይ ቦላ ꬎቃን ዲኮካ ሂዬሳታ ሎኦ ኣይፌን ጼሌስ፤ ጊዶ ኣቲን ኦቶራንቻታ ኢዚ ሃሆፔ ኤሬስ።
PSA 138:7 ታኒ ሜቶ ጊዶን ዲኮካ ኔኒ ታና ናጋሳ፤ ታ ሞርኬታ ሃንቆ ቦላ ኔ ቄሴ ዴንꬃሳ፤ ኔ ኡሻቻ ኩሼን ታና ኣሻሳ።
PSA 138:8 ጎዳይ ታስ ቆፒዳይሳ ፖላና፤ ኣቤት ጎዳዉ! ኔ ሲቆይ ሜርናሳ፤ ኔ ኩሼ ኦሶ ዬጋ ኣጎፋ።
PSA 139:1 ኣቤት ጎዳዉ! ኔኒ ታና ፒልጋ ኤራዳሳ።
PSA 139:2 ታኒ ኣዉዴ ኡቲዛኮኔ ኣዉዴ ኤቂዛኮ ኔኒ ኤራሳ፤ ኔኒ ታ ቆፋ ኡባ ሃኮፔ ኣኬካሳ።
PSA 139:3 ታኒ ቢዛሶኔ ሼምፒዛሶ ጾሞሳሳ፤ ታ ኦጌታ ኡባ ኔኒ ኤራሳ።
PSA 139:4 ኣቤት ጎዳዉ! ታኒ ታ ዶናፔ ኢሲ ቃላካ ሃሳያናፔ ካሴታዳ ኔኒ ታ ቆፋ ኡባ ኤራሳ።
PSA 139:5 ኔኒ ታ ዩሾ ኡባን ዳሳ፤ ኔ ኩሼዛን ታና ናጋሳ።
PSA 139:6 ኔ ኤራቴꬃይ ታና ኬሂፔ ማላሊሴስ፤ ታኒ ኣኬካናስ ዳንዳይዛይሳፌካ ꬎቄስ።
PSA 139:7 ታኒ ኔ ኣያናፔ ኣዋ ባናስ ዳንዳያዚና? ዎይኮ ኔ ሲንꬃፌ ኣዋ ባቃታናስ ዳንዳያዚና?
PSA 139:8 ፑዴ ሳሎ ኬኢኮ ኔኒ ሄን ዳሳ! ዱጌ ሲኦሌ ዎꬊኮካ ኔኒ ሄን ዳሳ።
PSA 139:9 ኣርሼይ ሞኪዛሶ ባጋ ፓላ ቢኮ፥ ዎይኮ ኣርሼይ ዉሊዛሶ ባጋ ሃካ ቢኮ፥
PSA 139:10 ታና ሄን ኔ ኩሼይ ካሌꬄስ፤ ኔ ኡሻቻ ኩሼይካ ታና ሚንꬂ ኦይኬስ።
PSA 139:11 ታኒ፥ «ꬉማዞ! ታና ጌንꬃ፤ ፖኦዞ! ታ ዩሾን ꬉማ» ጊኮ፥
PSA 139:12 ꬉማይ ኔና ጼሎ ዲጌና፤ ኦማርሲ ኔስ ጋላሳ ማላ ፖኤስ፤ ꬉማይኔ ፖኦይ ኔስ ኢሲ ማላ።
PSA 139:13 ኔኒ ታ ኣሳቴꬃ ኡባ ሜꬋዳሳ፤ ታ ኣዬይ ኡሎንካ ታና ቲላ ሜꬋዳሳ።
PSA 139:14 ኔኒ ታና ኬሂ ዬጋልꬂኔ ማላሊሲዛዝ ሂስታ ሜꬊዳ ጊሻስ ታ ኔና ጋላታይስ፤ ኔ ኦሶቲ ማላሊሲዛይታ! ታ ሼምፖያ ሄሳ ኡባ ኤራዉስ።
PSA 139:15 ታኒ ጌማሶን ሜꬌቲዳ ዎዴ ታ ሜቄꬃቲ ኔፔ ጌሚቤቴና፤ ታኒ ታ ኣዬይ ኡሎን ጪማ ጊዶን ሂላን ኦሴቲዛ ዎዴ፥
PSA 139:16 ታ ኣዪ ኡሎን ቡሮ ሱꬅ ጊዳ ታ ዲሺን ኔ ኣይፌቲ ቤኢዳ፤ ታ ላይꬃታፔ ኢሶይኔ ዶሜቶንታ ዲሺን ታስ ኔኒ ባሪዳ ጋላሳቲ ኡባይ ኔ ማዝጋባን ጻፌቲዳ።
PSA 139:17 ኣቤት ጾሳዉ! ኔ ታስ ቆፒዛ ቆፋይ ኣይ ማላ ሎኦ! ኢዚካ ኣይ ኬና ጮራ!
PSA 139:18 ታኒ ኢዛ ቆዲኮ ኣጬፔካ ዳሮ፤ ታ ኢቻ ቤጊዛ ዎዴ ሃኢካ ኔናራ ዴኣይስ።
PSA 139:19 ኣቤት ጾሳዉ! ኔኒ ኢታታ ሲፊዳኮ ኣዜ ዲዛይ! ሱꬅ ጉሳና ሳሜቲዛ ኣሳቲ ታፔ ሃኪቴ!
PSA 139:20 ኢስቲ ኔ ቦላ ኢታ ሚሽ ሃሳዬቴስ፤ ኔ ሞርኬቲ ኔ ሱንꬃ ሞሬቴስ።
PSA 139:21 ኣቤት ጎዳዉ! ኔና ኢጺዛይታ ታኒ ኢጺኪና? ኔ ቦላ ዴንዲዛይታ ታኒ ሃራሴቲኪና?
PSA 139:22 ታ ኢስታ ሙሌራ ኢጻይስ፤ ኢስታ ታኒ ታ ሞርኬታ ማላ ቆዳይስ።
PSA 139:23 ኣቤት ጾሳዉ! ታ ዎዚና ፒልጋዳ ኤራ፤ ታና ፓጫዳ ታ ጬጬ ቆፋካ ሻካ ኤራ።
PSA 139:24 ኣኔ ታናን ኢታይ ዴኢኮ ጼላ፤ ሂስታዳ ሜርና ኦጌራ ታና ካሌꬃ።
PSA 140:1 ኣቤት ጎዳዉ! ኢታ ኣሳታፔ ታና ኣሻ፤ ማካላንቻታፔካ ታና ናጋ።
PSA 140:2 ኢስቲ ኡባ ዎዴ ኢታ ኦꬃናስ ማቄቴቴስ፤ ኡባ ጋላሲካ ኦሽ ዴንꬃናስ ዮኦ ፒቄቴስ።
PSA 140:3 ኢስቲ ሃሶ ሾሻ ማላ ኢንጻርስ ቃራሴቴስ፤ ኢስታ ዶናፔ ጎፔ ማርዜ ማላ ቃላይ ኬዜስ።
PSA 140:4 ኣቤት ጎዳዉ! ኢታ ኣሳታ ኩሼፔ ታና ኣሻ፤ ታ ቶሆ ቃጻናስ ቆፒዛ ማካላንቻታፔካ ታና ናጋ።
PSA 140:5 ኦቶራንቻቲ ታስ ዎጺማዴ ዎꬂዳ፤ ጊቴ ጊግሲዳ፤ ታ ኦጌንካ ዲዛ ዎꬂዳ።
PSA 140:6 ታኒ ጎዳ፥ «ኔኒ ታ ጾሳ» ጋይስ። ኣቤት ጎዳዉ! ታኒ ሾቢዛይሳ ሲያ።
PSA 140:7 ኣቤት ኡባፌ ዎልቃማ ጎዳዉ! ታና ኣሺዛ ሚኖዞ! ኦላ ጋላስ ታስ ጎንዳሌ ጊዳዳሳ!
PSA 140:8 ኣቤት ጎዳዉ! ኢታታ ኣሞይ ፖሌቶፎ፤ ኢስታ ቆፋይ ፖሌታና ማላ ኦꬆፋ!
PSA 140:9 ታ ሞርኬታን ታና ጾኒሶፓ፤ ኢስቲ ቆፒዳ ኢታ ቆፋይ ኢስታ ሁኤን ጻጼቶ።
PSA 140:10 ኢስታ ቦላ ታማ ቦንቆይ ቆሌቶ፤ ኢስቲ ታማን ኦሌቴቶ፤ ሲሚ ኬዛናስ ዳንዳዮንታ ኦላን ኩንዴቶ።
PSA 140:11 ኢታ ሃሳይዛይታ ቢታይ ቶኮፎ፤ ማካላንቻታ ኢታ ሚሺ ኦይኮ።
PSA 140:12 ጎዳይ ሂዬሳታስ ፒርዲዛይሳኔ ሜቶታንቻታስ ሞቴቲዛይሳ ታ ኤራይስ።
PSA 140:13 ጺሎቲ ቱሙፔ ኔ ሱንꬃ ጋላታና፤ ሱሬቲካ ኔ ሲንꬃን ዴኣና።
PSA 141:1 ኣቤት ጎዳዉ! ታኒ ኔና ጼይጋይስ፤ ታና ማዳናስ ኤሌላ። ታኒ ኔኮ ዋሲዛ ዎዴ ታ ዋሶ ሲያ!
PSA 141:2 ታ ዎሳይ ኤጻኔ ጩዋ ማላ ኔ ሲንꬅ ሺቆ፤ ታኒ ታ ኩሼዛ ሚጪዛይሲ ኔስ ኦማርሳ ዎዴ ያርሾ ማላ ጊዶ።
PSA 141:3 ኣቤት ጎዳዉ! ታ ዶና ናጋናስ ዛቤ ዎꬃ፤ ታ ሜቴርሻታ ፔንጌን ናጊዛይሳ ኤሳ።
PSA 141:4 ሞሮ ኦꬂዛ ኣሳታራ ኢታ ኦሶ ኦꬆንታ ማላ ታ ዎዚና ኢታኮ ዛሮፓ፤ ኢስታ ጊቢራካ ታና ሚዞፓ።
PSA 141:5 ጺሎ ኣሲ ታና ቃጻዮ፤ ሄሲካ ታስ ሎኦ፤ ኢዚ ታና ሴሪኮ ሄሲ ታ ሁኤን ዛይቴ ቲዪዛ ማላ፤ ሄሳካ ታ ኢጺኬ፤ ጊዶ ኣቲን ታኒ ኡባቶካ ኢታ ኣሳታ ኦሶ ቦላ ዎሳይስ።
PSA 141:6 ኢስታ ዳናቲ ኣፎራ ዱጌ ኦሌቲዛ ዎዴ ታ ቃላይ ቱማ ጊዲዳይሳ ኢስቲ ኤራና።
PSA 141:7 ጋዴይ ጎዬቲዛ ማላኔ ጳሼይ ሊቂዛ ማላ ኢስታ ሜቄꬂካ ዱፎ ዶናን ላሌታና።
PSA 141:8 ኣቤት ጎዳዉ፥ ኡባፌ ዎልቃማ ጾሳዉ! ታ ኣይፌይ ኔና ጼሌስ፤ ታ ዜምፖይ ኔና፤ ታና ሃይቆስ ኣꬃዳ ኢሞፋ።
PSA 141:9 ኢስቲ ታስ ዎꬂዳ ዎጺማዴፔኔ ኢታ ኦꬂዛይታ ጊቴፔ ታና ናጋ።
PSA 141:10 ታ ሳሮ ኣꬊሺን ኢስቲ ባንቲ ዎꬂዳ ጊቴዛን ኦይኬቴቶ።
PSA 142:1 ታ ቃላ ꬎቁ ሂስታዳ ታኒ ጎዳኮ ዋሳይስ። ጎዳፔ ማሮቴꬅ ዎሳይስ።
PSA 142:2 ታ ቆሆዛ ኡባ ኢዛስ ማጋናይስ፤ ታ ሜቶ ኡባ ኢዛስ ዮታይስ።
PSA 142:3 ታኒ ዳቡርዳ ዎዴ ኔኒ ታ ኦጌ ኤራሳ፤ ታ ሄሜቲዛ ኦጌን ታና ኦይካናስ ዎጺማዴ ዎꬂዳ።
PSA 142:4 ታኒ ታ ዩሾ ሲማ ጼሊዛ ዎዴ ታና ማዳናይ ኦኒካ ዴና፤ ታ ባቃታ ኣታናሶይካ ዴና፤ ታ ሼምፖይስ ዉዴቲዛ ኣሲካ ዴና።
PSA 142:5 ኣቤት ጎዳዉ! ኔ ታና ማዳና ማላ ታ ኔኮ ዋሳይስ፤ ታ ዜምፖይ ኔና፤ ታ ሼምፖራ ፓጻ ዲሺን ታ ቃዳይ ኔና።
PSA 142:6 ታኒ ኬሂፔ ሂዶታ ቃንጺዳ ጊሻስ ኔ ታ ዋሶ ሲያ! ታና ጎዲዛይቲ ታፔ ዎልቃቲዳ ጊሻስ ታና ኣሻ።
PSA 142:7 ታኒ ኔ ሱንꬃ ጋላታና ማላ ታና ቃሾፔ ቢርሻ። ኔኒ ታስ ሎኦ ጊዲዳ ጊሻስ ጺሎቲ ታ ዩሾን ሺቃና።
PSA 143:1 ኣቤት ጎዳዉ! ታ ዎሳ ሲያ፤ ታ ሾቢዛይሳ ኤዝጋ፤ ኔኒ ጺሎኔ ኣማኔቲዛይሳ ጊዲዳ ጊሻስ ታስ ዛሮ ኢማ።
PSA 143:2 ኔ ሲንꬃን ጺሎ ጊዳና ኣሲ ኦኒካ ዴና፤ ታና ኔ ኣይሌዛ ፒርዳስ ሺሾፋ።
PSA 143:3 ታ ሃይቃና ጋካናስ ታ ሞርኬቲ ታና ዬዴꬂዳ፤ ታና ዲርጺዲ ቢታ ጋርስ ጌልꬂዳ፤ ካሴ ሃይቂዳ ኣሳታ ማላካ ታና ꬉማን ዎꬂዳ።
PSA 143:4 ሄሳ ጊሻስ ታኒ ዳቡራዲስ፤ ታ ዎዚናይካ ሂዶታ ቃንጺዴስ።
PSA 143:5 ታኒ ቤኒ ዎዴታ ሃሳኣይስ፤ ኔኒ ኦꬂዳ ኦሶ ኡባ ዩሻ ቆፓይስ፤ ኔ ኩሼ ኦሶታካ ኣኬካይስ።
PSA 143:6 ታኒ ታ ኩሼዛ ኔኮ ሚጫይስ፤ ሜላ ቢታይ ሃꬅ ኮይዛ ማላ ታ ሼምፖያ ኔና ሳሜታዱስ።
PSA 143:7 ኣቤት ጎዳዉ! ታኒ ዳቡራዲስ፤ ኔ ታስ ዛሮ ኢማናስ ኤሌላ! ታኒ ሃይቂዳ ኣሳታꬆ ዱጌ ዱፎን ጌሎንታ ማላ ኔ ሲንꬃ ታፔ ጌንꬆፋ።
PSA 143:8 ታኒ ኔና ኣማኔቲዛ ጊሻስ ማላዶ ማላዶ ኔ ሲቆ ታና ቤሳ፤ ታኒ ታ ሼምፖ ኔስ ሃዳራዲስ፤ ሄሳ ጊሻስ ታ ባና ኦጌ ታና ታማርሳ።
PSA 143:9 ኣቤት ጎዳዉ! ታ ኔ ጋርሳን ቆቴታዲስ፤ ታና ታ ሞርኬታፔ ኣሻ።
PSA 143:10 ኔኒ ታ ጾሳ፤ ታኒ ኔ ሼኔ ፖላና ማላ ታና ታማርሳ፤ ኔ ሎኦ ኣያናይ ታና ሱሬ ኦጌ ካሌꬆ።
PSA 143:11 ኣቤት ጎዳዉ! ኔ ሱንꬃ ጊሻስ ታና ኣሻ፤ ኔ ጺሎቴꬃን ታና ሜቶፔ ኬሳ።
PSA 143:12 ኔ ታና ሲቂዛ ጊሻስ ታ ሞርኬታ ሱፑ ሂስታ ዎꬋ፤ ታና ኔ ኣይሌዛ ኡንኤꬂዛይታ ዲፒ ሂስታ ꬋይሳ።
PSA 144:1 ታ ኩሼታ ኦላስ፥ ታ ቢራꬌታካ ጾንጌꬃስ ሎሂሲዳ ጎዳይ ታ ዛላይ ጋላቴቶ!
PSA 144:2 ኢዚ ታና ሲቂዛኔ ጌንꬂዛ ጾሳ፤ ኢዚ ታስ ሚጻኔ ታና ኣሺዛይሳ፤ ኢዚ ታ ጎንዳሌኔ ታኒ ባቃታዳ ኣቲዛሶ፤ ካዎቴꬃታካ ኢዚ ታስ ሃሪሲዛይሳ።
PSA 144:3 ኣቤት ጎዳዉ! ኔ ሃይሳ ሲሬ ቦንቻናስ ኣሲ ኣዜ? ኔ ሃይሳꬆ ኣሳስ ቆፓናዉ ኣሳ ናይ ኣዜ?
PSA 144:4 ኣሲ ኢሲቶ ጫርኪ ኣꬊዛ ጫርኮ ማላ፤ ኢዛ ላይꬃቲካ ኤሶን ꬋይዛ ኩዋ ማላ።
PSA 144:5 ኣቤት ጎዳዉ! ኔኒ ሳላ ዳካዳ ዱጌ ዎꬋ! ዙማታ ቦቻዳ ጩዋሳ!
PSA 144:6 ዎልቃንꬅ ዬዳዳ ኔ ሞርኬታ ላላ! ኔ ዎንዳፌ ዪሻን ዱካዳ ዬዴꬃ!
PSA 144:7 ቦላፌ ኔ ኩሼ ዬዳዳ፥ ታና ዎልቃማ ሃꬃፌ ጎቻ ኬሳ፤ ኣላጋ ኣሳታ ኩሼፔ ኔ ታና ኣሻ።
PSA 144:8 ኢስታ ዶናይ ዎርዶ ሃሳዬስ፤ ኢስቲ ኡሻቻ ኩሼ ዴንꬂዲ ዎርዶ ጫቄቴስ።
PSA 144:9 ኣቤት ጾሳዉ! ታኒ ኔስ ኦራꬃ ማዛሙሬ ዬጻና፤ ታሙ ሻያን ዋጼቲዳ ዲꬃን ኔስ ዬጻና።
PSA 144:10 ካዎታስ ጾኖ ኢማሳ፤ ኔ ኣይሌ ዳዊቴ ጊꬃ ማሻፌ ኣሻሳ።
PSA 144:11 ዎርዶ ሃሳይዛይታፔኔ ባ ኡሻቻ ኩሼ ዴንꬂዲ ዎርዶ ጫቂዛይታፔኔ ኣላጋታፔ ታና ኣሻኔ ናጋ።
PSA 144:12 ኑ ኣቱማ ናይቲ ባ ናቴቴꬃን ዳልቂዳልቂዲ ዲጪዛ ሚꬃ ማላ ጊዴቶ! ኑ ማጫ ናይቲካ ካዎ ኬꬃ ጉላን ኣሌቆስ ኤሲዳ ቱቄ ማላ ጊዴቶ።
PSA 144:13 ኑ ጎታራታን ዱማ ዱማ ቆሞ ካꬂ ኩሞ፤ ኑ ዶርሳቲ ሺ ላቃ ጋካናስ ዬሌቶ፤ ሄሜቲዛሶን ታሙ ሺ ጋካናዉ ዳሬቶ።
PSA 144:14 ኑ ሚዛቲ ዬሊዛይታ ጊዴቶ፤ ኢስቲ ኣዉጫዮንታ ዬሌቲዲ ጮራቴቶ። ኑና ኣሲ ዲኦፖ፤ ኑ ዛጎን ዋሶይ ሲዬቶፎ።
PSA 144:15 ሃ ኣንጆይ ኢዛ ጋኪዛ ዴሬይ ኣንጄቲዳ ዴሬ፤ ጾሲ ኢዛስ ጎዳ ጊዲዳ ዴሬይ ኣንጄቲዳ ዴሬ።
PSA 145:1 ኣቤት ታ ካዎ ጾሳዉ! ታኒ ኔና ꬎቁ ꬎቁ ሂስታና፤ ኔ ሱንꬃ ሜርናስካ ጋላታና።
PSA 145:2 ታኒ ኔና ኡባ ጋላስ ሳባና፤ ኔ ሱንꬃካ ሜርናስ ጋላታና።
PSA 145:3 ጎዳይ ጊታ፤ ጊታ ጋላታይ ኢዛስ ቤሴስ፤ ኢዛ ጊታቴꬃይ ኣሳ ቆፋፔ ቦላ።
PSA 145:4 ኢሲ ዬሌታይ ካሊዛ ዬሌታስ ኔ ኦꬂዳ ኦሶ ዮቴስ፤ ማላሊሲዛ ኔ ኦሶታካ ቆንጪሳና።
PSA 145:5 ኢስቲ ኔ ቦንቾኔ ኔ ጊታ ቴማ ሃሳያና፤ ታኒካ ማላሊሲዛ ኔ ኦሶዛ ዛራ ዛራ ቆፓና።
PSA 145:6 ኣሳይ ማላሊሲዛ ኔ ኦሶዛ ጊታቴꬃ ጊሻስ ሃሳዬታና፤ ታኒካ ኔ ጊታቴꬃ ኣዋጃና።
PSA 145:7 ኢስቲ ኔ ኪያቴꬃ ዳሮዛ ዮታና፤ ኔ ጺሎቴꬃ ኡፋይሳን ዬጻና።
PSA 145:8 ጎዳይ ቃꬌቲዛይሳኔ ማሪዛይሳ፤ ኢዚ ሃንቄታናስ ኤሶቶንታይሳኔ ሲቆይ ኩሚዳይሳ።
PSA 145:9 ጎዳይ ኡባስ ኪያ፤ ኢዚ ባ ሜꬊዳ ኡባስ ቃꬌቲዛይሳ።
PSA 145:10 ኣቤት ጎዳዉ! ሜꬌታ ኡባይ ኔና ጋላታና፤ ኔ ዴሬይ ኡባይካ ኔና ሳባና።
PSA 145:11 ኢስቲ ኔ ካዎቴꬃ ቦንቾ ጊሻስ ሃሳያና፤ ኔ ዎልቃ ጊሻስ ዮታና።
PSA 145:12 ሄሳን ኔ ዎልቃማ ኦሶታኔ ኔ ካዎቴꬃ ቴማ ቦንቾዛ ኢስቲ ኤሪሳና።
PSA 145:13 ዬሌታፔ ዬሌታ ጋካናስ ኔ ሃራና፤ ኔ ካዎቴꬃይ ሜርናሳ። ጎዳይ ባ ጊዳ ቃላን ኣማኔቲዛይሳ፤ ኢዚ ባ ኦሶ ኡባን ኪያ።
PSA 145:14 ጎዳይ ጋንዲጋርዛይታ ካፌስ፤ ኩንዲዳይታካ ዴንꬄስ።
PSA 145:15 ኡባ ኣይፌይ ኔኮ ጼሌስ፤ ኢስታስ ኮሺዛ ዎዴን ኔኒ ኢስታስ ቁማ ኢማሳ።
PSA 145:16 ኔኒ ኔ ኩሼ ሚጫዳ ሼምፖራ ፓጻ ዲዛ ኡባ ኣሞ ኩንꬃሳ።
PSA 145:17 ጎዳይ ባ ኦጌ ኡባን ጺሎ፤ ኢዚ ባ ኦሶ ኡባን ኪያ።
PSA 145:18 ጎዳይ ባና ጼይጊዛይታስ ኡባስ ማታ፤ ዎዚናፔ ጼይጊዛ ኡባስ ማታን ዴስ።
PSA 145:19 ኢዚ ባስ ያዪዛ ኡባስ ኣሞ ኩንꬄስ። ቃሴ ኢዚ ኢስታ ዋሶዛ ሲዪዲ ኢስታ ኣሼስ።
PSA 145:20 ጎዳይ ባና ሲቂዛይታ ኡባ ናጌስ፤ ጊዶ ኣቲን ኢታታ ኡባ ꬋይሳና።
PSA 145:21 ታኒ ታ ዶናን ጎዳ ጋላታና። ሜꬌታ ኡባይ ኢዛ ጌሻ ሱንꬃ ሜሪ ሜርናስ ጋላቶ!
PSA 146:1 ጎዳይ ጋላቴቶ! ታ ሼምፖዬ፥ ጎዳ ጋላታ!
PSA 146:2 ታ ዴኦ ላይꬃ ኡባን ታኒ ጎዳ ጋላታና፤ ታኒ ሼምፖራ ፓጻ ዲዛ ዎዴ ኡባን ታ ጾሳ ሳባና።
PSA 146:3 ዴሬ ኣይሲዛይታን ኣማኔቶፍቴ፤ ኣስ ኣሻናዉ ዳንዳዮንታ ኣሾ ማይኢዳ ሜꬌታታን ጬቄቶፍቴ።
PSA 146:4 ኢስታ ሼምፖይ ኬዚዛ ዎዴ ኢስቲ ቢታን ሲማና፤ ኢስታ ሃልቾይ ኡባይ ሄ ጋላስ ኣታና።
PSA 146:5 ያቆቤ ጾሳይ ማዲዛ ኣሲ ባ ሂዶታካ ባ ጎዳ ቦላ ዎꬂዳ ኣሲ ኣንጄቲዳዴ።
PSA 146:6 ጎዳይ ሳሎኔ ሳኣ፥ ጊታ ኣባኔ ኢስታ ጊዶን ዲዛ ኡባ ሜꬊዳይሳ፤ ኢዚ ባ ኣማኔቴꬃ ሜርናስ ናጊዛይሳ።
PSA 146:7 ኢዚ ቆሄቲዳይታስ ፒርዲዛይሳ፤ ጋፊዳይታ ሚዚ ካልሲዛይሳ። ጎዳይ ቃሼቲዳይታ ቢርሺ ዬዲዛይሳ፤
PSA 146:8 ጎዳይ ቆቄታ ጼሊሴስ። ጎዳይ ኩንዲዳይታ ዴንꬄስ፤ ጎዳይ ጺሎታካ ሲቄስ።
PSA 146:9 ጎዳይ ቤቴ ኣሳታ ናጌስ። ኣምኤታኔ ዪኦ ናይታ ማዴስ፤ ጊዶ ኣቲን ኢታታ ኦጌ ꬋይሴስ።
PSA 146:10 ጎዳይ ሜርናስ ካዎ፤ ጺዮኔ! ኔ ጾሲ ዬሌታፔ ዬሌታ ጋካናስ ካዎታና። ጎዳይ ጋላቴቶ!
PSA 147:1 ጎዳይ ጋላቴቶ! ኑ ጾሳ ዬꬃን ሳቦይ ኣይ ማላ ሎኦ! ኢዛ ጋላቲዛይሲ ኡፋይሴስ፤ ሄሲካ ኢዛስ ቤሴስ።
PSA 147:2 ጎዳይ ዬሩሳላሜ ኦራጺሳና፤ ኢስራኤሌፔ ቤቲዳይታካ ሺሻና።
PSA 147:3 ዎዚናይ ሜቂዳይታ ኢዚ ኮሌስ፤ ኢስታ ማዱንꬃካ ኢዚ ፓꬄስ።
PSA 147:4 ኢዚ ሳሎ ጾሊንቴታ ቆዳ ኤሬስ፤ ኢሳ ኢሳ ኢዛ ሱንꬃን ሱንꬃን ጼይጌስ።
PSA 147:5 ኑ ጎዳይ ጊታ፤ ኢዚ ኬሂፔ ዎልቃማ፤ ኢዛ ኤራቴꬃስ ዛዋይ ዴና።
PSA 147:6 ጎዳይ ካꬌቲዳይታ ቦንቼስ፤ ጊዶ ኣቲን ኢታታ ካዉሼስ።
PSA 147:7 ጎዳስ ጋላታ ማዛሙሬ ዬጺቴ፤ ኑ ጾሳስ ማሲንቆ ሾጪሼ ጋላቲቴ።
PSA 147:8 ኢዚ ሳሎ ሻራ ማይዜስ፤ ሳኣስ ኢራ ቡኪሴስ፤ ዙማታ ቦላካ ማታ ሞኪሴስ።
PSA 147:9 ሜዶሳሲኔ ቁሮ ዬሎታስ ሚዛ ሚሽ ኢዚ ኢሜስ።
PSA 147:10 ኢዚ ኡፋዬቲዛይ ፓራታ ዎልቃኒኔ ቶራንቻታ ሚኖቴꬃን ጊዴና።
PSA 147:11 ጎዳይ ባስ ያዪዛይታኒኔ ኢዛ ሲቆን ኣማኔቲዛይታን ኡፋዬቴስ።
PSA 147:12 ዬሩሳላሜ ካታማዬ! ጎዳ ጋላታ! ሃኔ ጺዮኔ! ኔ ጾሳ ሳባ!
PSA 147:13 ኢዚ ኔ ፔንጌ ኮላታ ሚንꬄስ፤ ኔ ጊዶን ዲዛ ኔ ናይታ ኣንጄስ።
PSA 147:14 ኢዚ ኔ ዛዋ ሳሮቴꬃን ናጌስ፤ ኔና ኬሂፔ ሎኢዛ ጊስቴ ካልሴስ።
PSA 147:15 ኢዚ ባ ኪታ ሳኣስ ኪቴስ፤ ኢዛ ቃላይካ ኤሶን ጋኬስ።
PSA 147:16 ኢዚ ሻች ኣፋላ ማላ ሚጬስ፤ ኬንቾካ ቢዲንꬃ ማላ ላሌስ።
PSA 147:17 ኢዚ ሻች ሹቻ ማላ ዱጌ ዬዳና፤ ሄ ሞጬዛን ኤቃናስ ኦኒኔ ዳንዳዬና።
PSA 147:18 ኢዚ ባ ቃላ ኪቲዲ ሻቻ ማዪሴስ። ኢዚ ጫርኮ ጫርኪሲን ሃꬂ ጎጌስ።
PSA 147:19 ኢዚ ባ ቃላ ያቆቤ ዜሬꬃስ ባ ማራኔ ዎጋ ኢስራኤሌ ኣሳስ ቆንጪሴስ።
PSA 147:20 ኢዚ ሄሳ ማላ ሃራ ካዎቴꬃታስ ኦꬂቤና፤ ኢስቲ ኢዛ ዎጋ ኤሬቴና። ጎዳይ ጋላቴቶ!
PSA 148:1 ጎዳይ ጋላቴቶ! ሳሎን ዴኢዛይቶ! ጎዳ ጋላቲቴ፤ ቦላ ꬎቃን ዴኢዛይቶ! ኢዛ ሳቢቴ።
PSA 148:2 ኢንቴኖ ኢዛ ኪታንቻቶ! ኡባይ ኢዛ ጋላቲቴ፤ ሳሎን ዴኢዛ ኢዛ ኦላንቻቶ! ኡባይ ኢዛ ጋላቲቴ።
PSA 148:3 ኣርሼይኔ ኣጊናይ ኢዛ ጋላቲቴ፤ ፖኢሲዛ ጾሊንቴቶ! ኡባይ ኢዛ ጋላቲቴ።
PSA 148:4 ኢንቴኖ ኡባፌ ቦላ ꬎቃን ዲዛ ሳሎቶ! ኢዛ ጋላቲቴ፤ ሳሎ ጉፋንꬆፌ ቦላራ ዲዛ ሃꬃቶ! ኢዛ ሳቢቴ።
PSA 148:5 ኢዚ ኣዛዚን ኢስቲ ኡባይካ ሜꬌቲዳ ጊሻስ ኡባቲ ጎዳ ሱንꬃ ጋላቴቶ!
PSA 148:6 ኢዚ ኢስታ ኢስቲ ዲዛሶን ሜሪ ሜርናስ ሚንꬂ ዎꬂዴስ፤ ኢዚ ኢስታስ ላሜቶንታ ዎጋ ኢሚዴስ።
PSA 148:7 ሳኣን ዴኢዛይቶ! ጎዳ ጋላቲቴ! ኣባ ጊዶን ዲዛ ጊታ ሜꬌቴꬃቲኔ ዎጋ ጊታ ኣባ ጪማቲ ኡባይካ ኢዛ ሳቢቴ።
PSA 148:8 ዎልቃንꬂኔ ሻቺ፥ ኬንቾይኔ ጉባናይ፥ ኢዛ ኣዛዞ ፖሊዛ ጎቴ ጫርኮቲ ኡባቲካ ኢዛ ጋላቲቴ።
PSA 148:9 ዙማቶ፥ ዙምቡላቶ፥ ኣይፌ ኣይፊዛ ሚꬃቶ፥ ዚጋቶ ኡባቲካ ኢዛ ጋላቲቴ።
PSA 148:10 ሜሄቶ፥ ዶኣቶ፥ ሳኣራ ጎሼቲዛ ሜꬌታቶ! ፓሊዛ ካፎቶ ኡባቲካ ኢዛ ጋላቲቴ።
PSA 148:11 ሳኣ ካዎቶ፥ ካዎቴꬃቶ! ዳናቶ፥ ዴሬ ሃሪዛይቶ! ኡባቲካ ኢዛ ጋላቲቴ።
PSA 148:12 ፓንꬃቶ፥ ጌላኦቶ፥ ጪማቶ፥ ናይቶ! ኡባቲካ ኢዛ ጋላቲቴ።
PSA 148:13 ኢዛ ሱንꬂ ኡባ ቦላ ꬎቃ፤ ኢዛ ቦንቾይ ሳኣፔኔ ሳሎፔ ቦላ፤ ሄሳ ጊሻስ ሃይቲ ኡባይ ኢዛ ሱንꬅ ጋላቴቶ።
PSA 148:14 ኢዛ ባጋ ጊዲዳ ኢስራኤሌ ኣሳቲ ኢዛ ጋላታና ማላ ኢዚ ኢስታ ካጬ ኬሲዴስ። ጎዳይ ጋላቴቶ!
PSA 149:1 ጎዳይ ጋላቴቶ! ጎዳስ ኦራꬃ ማዛሙሬ ዬጺቴ! ጌሻታ ሺቆሶን ኢዛስ ጋላታ ማዛሙሬ ዬጺቴ!
PSA 149:2 ኢስራኤሌ ኣሳቲ ባና ሜꬊዳይሳን ኡፋዬቴቶ፤ ጺዮኔ ኣሳቲ ባ ካዎዛን ኬሂፔ ኡፋዬቴቶ።
PSA 149:3 ዱሪሼ ካራቤ ባቂሼኔ ዲꬅ ዲጺሼ ኢዛ ሱንꬅ ሳቤቶ።
PSA 149:4 ጎዳይ ባ ኣሳን ኡፋዬቴስ፤ ኣሽኬታ ኣሺዲ ቦንቾን ፑላሴስ።
PSA 149:5 ሄ ፑላቴꬃን ጾሳ ኣሳቲ ኡፋይሳን ዬጼቶ፤ ጋዴይ ዎንታና ጋካናስ ኢሊሊሼ ዬጼቶ።
PSA 149:6 ኢስታ ዶናን ጾሳ ጋላታይ፥ ኢስታ ኩሼንካ ቃራ ጊꬃ ማሻይ ዴኦ።
PSA 149:7 ኢስቲ ሄሳን ካዎቴꬃታ ቦላ ሃሎ ኬሳና፤ ኣሳካ ቃጻያና።
PSA 149:8 ኢስታ ካዎታ ሳንሳላታን፥ ኢስታ ኦላ ቃራታካ ቢራታን ቃቻና።
PSA 149:9 ሄሳን ኢስታ ቦላ ጻፌቲዳ ፒርዳ ፖሊዲ ጾሳ ኣሳቲ ጾናና። ጎዳይ ጋላቴቶ!
PSA 150:1 ጎዳይ ጋላቴቶ! ጾሳ ኢዛ ኬꬃን ጋላቲቴ፤ ኢዛ ዎልቃይ ዲዛ ሳሎ ጉፋንꬆን ኢዛ ጋላቲቴ።
PSA 150:2 ኢዚ ኦꬂዳ ዎልቃማ ኦሶታ ጊሻስ ኢዛ ጋላቲቴ፤ ኢዚ ኬሂ ጊታ ጊዲዳ ጊሻስ ኢዛ ጋላቲቴ!
PSA 150:3 ዛዬን ኢዛ ጋላቲቴ፤ ባጋናኒኔ ማሲንቆን ኢዛ ጋላቲቴ።
PSA 150:4 ካራቤ ባቂሼኔ ዱሪሼ ኢዛ ጋላቲቴ፤ ታሙ ሻያን ዋጼቲዳ ዲꬃኒኔ ሱሱልኤን ኢዛ ሳቢቴ።
PSA 150:5 ዳላ ቃꬂሼ ኢዛ ጋላቲቴ፤ ዳላ ሾጪሼ ኢዛ ጋላቲቴ።
PSA 150:6 ሼምፖራ ፓጻ ዲዛ ኡባይ ጎዳ ጋላቲቴ! ጎዳይ ጋላቴቶ!
PRO 1:1 ሃይቲ ኢስራኤሌ ካዎ ዳዊቴ ና ሶሎሞኔ ሌሚሶታ።
PRO 1:2 ሌሚሶቲ ኣሳይ ኣꬎ ኤራቴꬃ፥ ሴራኔ ኤራቴꬃ ሃሳያ ኣኬካናስ ማዴቴስ።
PRO 1:3 ኢስቲካ ዴኣና ዴኦን ኣꬎ ኤራቴꬅ፥ ጺሎቴꬅ፥ ሱሬ ፒርዳኔ ሱሬ ሃኖ ታማርሲዛይታ።
PRO 1:4 ኤራቴꬂ ፓጪዳይታስ ኣኬካ፥ ናቴꬃታስ ኤራቴꬂኔ ዎዚናማቴꬅ ኢሚዛይታ።
PRO 1:5 ኣꬎ ኤራንቻቲ ሃ ሌሚሶታ ሲዪዲ ኤራቴꬅ ጉጄቴስ፤ ኣኬካንቻ ኣሳቲካ ሎኦ ዞሬታ ኤኬቴስ።
PRO 1:6 ሄሳ ማላን ሌሚሶታኔ ኢስታ ቢርሼꬃታ፥ ኣꬎ ኤራንቻታ ሃሳያኔ ኢስታ ማሌꬆ ኣኬካናስ ዳንዳዬቴስ።
PRO 1:7 ኣꬎ ኤራቴꬃስ ኮይሮይ ጎዳስ ያሻቴꬃ፤ ኤያቲ ጊዲኮ ኣꬎ ኤራቴꬂኔ ሴራ ካꬌቴስ።
PRO 1:8 ታ ናዞ! ኔ ኣዋ ዞሬ ኤዝጋ፤ ኔ ኣያ ታማርሲዛይሳካ ኣጎፋ።
PRO 1:9 ሄሲ ኔ ሁኤስ ቦንቾ ካላቻ፤ ኔስ ቆꬌን ኣꬂዛ ኣሌቆ ማላ ጊዳና።
PRO 1:10 ታ ናዞ! ኔና ናጋራንቻቲ ባሌꬂኮ ኤኖ ጎፓ።
PRO 1:11 ኢስቲ ኔና፥ «ኣኔ ሃያ፤ ኢሲፌ ቢዲ ሱꬅ ጉሳናስ ዙጎስ፤ ጺሎታካ ዎꬋናስ ቆቴቲ ኡቶስ።
PRO 1:12 ዱፎይ ሚቲዛ ማላ ኑኒካ ኣኔ ኢስታ ፓጻ ዲሺን ሚቶስ፤ ኑኒ ኢስታ ጪማ ኦላን ኦሌቲዛ ኣሳ ማላ ኣኔ ኦꬆስ።
PRO 1:13 ኑኒ ኣልኦ ሚሽ ኡባ ዴማና፤ ሂስቲዲ ኑ ኬꬃ ቦንቂ ኤኪዳ ሚሻን ኩንꬃና።
PRO 1:14 ኑናራ ዙፔታ፤ ዴሚዳዝ ኢሲፌ ጎኤታና» ጋና።
PRO 1:15 ታ ናዞ! ኢስታራ ኢሲፌ ኦጌ ሄሜቶፋ፤ ኢስቲ ቢዛ ኦጌ ባና ጋዳ ኔ ቶሆ ዴንꬆፋ።
PRO 1:16 ጋሶይካ ኢስቲ ኢታ ሚሽ ኦꬃናስ ዎጼቴስ፤ ኣሳ ሱꬅ ጉሳናስካ ጃሜቴስ።
PRO 1:17 ካፎይ ጼሊሺን ኢዛ ኦይካናስ ያርዴ ዎꬂኮ ኣይኮካ ማዴና።
PRO 1:18 ሃይቲ ሃ ኣሳቲ ባንታ ሱꬅ ጉሳናስ ዙጌቴስ፤ ባንታ ሼምፖ ዎꬋናስ ቆቴቲ ኡቴቴስ።
PRO 1:19 ቤሶንታ ኦጌራ ጎኣ ዴማናስ ዎጺዛ ኡባታ ዉርሴꬃይ ሃይሳ ማላ፤ ኢስቲ ሺሺዳ ኣቆታይ ኢስታ ሼምፖ ኤኪ ባና።
PRO 1:20 ኣꬎ ኤራቴꬃያ ኦጌ ቦላ ዴኣሼ ጼይጋዉስ፤ ዱቡሻን ባ ቃላ ꬎቁ ሂስታዳ ዋሳዉስ።
PRO 1:21 ኣꬎ ኤራቴꬃያ ጮራ ኣሲ ሺቂዛሶን ዋሳዉስ፤ ካታማ ጌሊዛ ፔንጌን ኤቃዳ፥
PRO 1:22 «ኢንቴኖ ዎዚና ፓጬቶ! ኢንቴ ኣዉዴ ጋካናስ ኤያቴꬃ ኦጌ ካላኔ? ቂልጪዛይቶ! ኢንቴ ቂልጪዛይሳን ኣዉዴ ጋካናስ ኡፋዬቴቲ? ኤያቶ! ኤራቴꬃ ኣዉዴ ጋካናስ ኢጻኔ?
PRO 1:23 ታ ሴራን ኢንቴ ሲሚዳኮ፥ ታኒ ታ ቆፋ ኢንቴስ ቆንጪሳናኮሺን፤ ታ ቃላካ ኢንቴና ታማርሳናኮሺን።
PRO 1:24 ታኒ ጼይጊዳ ዎዴ ኢንቴ ኮዮንታ ኢጺዴታ፤ ታኒ ታ ኩሼዛ ሚጪን ኦኒካ ዉዱ ጊቤና።
PRO 1:25 ታ ዞሬ ኡባ ካꬊዴታ፤ ታ ሴራካ ኤኪቤኬታ።
PRO 1:26 ሄሳ ጊሻስ ኢንቴና ሜቶይ ጋኪዛ ዎዴ ታኒ ኢንቴ ቦላ ሚጫና፤ ባሺ ኢንቴ ቦላ ጋኪዛ ዎዴ ታኒ ኢንቴ ቦላ ቂልጫና።
PRO 1:27 ባሺ ኣባ ዳምባላ ማላ ኢንቴና ቃꬂዛ ዎዴ፥ ሜቶይ ጎቴ ጫርኮ ማላ ኢንቴና ዴንꬂዛ ዎዴ፥ ቱጋይኔ ዋዬይ ኢንቴና ሚቲዛ ዎዴ ታኒ ኢንቴና ቂልጫና።
PRO 1:28 «ሄ ዎዴ ኢስቲ ታና ጼይጋና፤ ታ ጊዲኮ ኢስታስ ኮይኬ፤ ኢስቲ ታና ሚንꬂ ኮያና፤ ጊዶ ኣቲን ታና ዴሜቴና።
PRO 1:29 ኢስቲ ኤራቴꬅ ኢጺዳ፤ ጎዳስ ያሻቴꬅ ዶሪቤቴና።
PRO 1:30 ታ ዞሬ ኤካናስ ኮዪቤቴና፤ ታ ሴራ ኡባ ካꬊዳ።
PRO 1:31 ሄሳ ጊሻስ ኢስቲ ባንቲ ኦꬂዳ ኦሶ ኣይፌዛ ማና፤ ባንቲ ቆፒዳ ቆፋ ኣይፌካ ካላና።
PRO 1:32 ዎዚናይ ፓጪዳይታ ኣꬎ ኤራቴꬃፌ ሃኮይ ኢስታ ዎꬋና፤ ባላታ ዉዳ ꬋዮይ ኢስታ ꬋይሳና።
PRO 1:33 ጊዶ ኣቲን ታና ሲዪዛይቲ ኡባይ ሳሮን ዳና፤ ኣይኮ ሂርጋይ ባይንዳ ዎፓን ዳና» ጋዉስ።
PRO 2:1 ታ ናዞ! ኔኒ ታ ቃላ ሲዪኮ፥ ታ ኣዛዞካ ኔኒ ኔ ዎዚናን ዎꬂኮ፥
PRO 2:2 ኔ ሃይꬅ ኣꬎ ኤራቴꬃኮ ዛሪኮ፥ ኔ ዎዚና ኣኬካኮ ኔ ዛሪኮ፥
PRO 2:3 ሻኪ ኤሪሲዛ ኤራቴꬅ ኔ ኮይኮ፥ ኔ ቃላ ꬎቁ ሂስታዳ ኣኬካ ጼይጊኮ፥
PRO 2:4 ኢዞካ ቢራ ኮይዛ ማላ ኔ ኮይኮ፥ ቆታን ዲዛ ኣቆታ ማላ ኔ ኢዞ ሚንꬃ ኮይኮ፥
PRO 2:5 ሄ ዎዴ ኔኒ ጎዳስ ያሻቴꬅ ኣኬካና፤ ጾሳካ ሎኤꬃዳ ኤራና።
PRO 2:6 ጎዳይ ኣꬎ ኤራቴꬅ ኢሚዛ ጊሻስ ኢዛፔ ኤራቴꬂኔ ኣኬካይ ቤቴስ።
PRO 2:7 ኢዚ ሱሬታስ ጾኖ ሚንጄስ፤ ኢስታ ቦላ ዎሶይ ባይንዳይታስ ጎንዳሌ ጊዴስ።
PRO 2:8 ሱሬ ፒርዳ ኦጌ ናጌስ፤ ባስ ኣማኔቲዛይታ ሄሜꬅ ሚንꬄስ።
PRO 2:9 ሄ ዎዴ ኔኒ ጺሎቴꬅ፥ ሱሬ ፒርዳ፥ ጌላይ ባይንዳ ፒርዳኔ ሎኦ ኦጌ ኡባ ሻካ ኤራና።
PRO 2:10 ጋሶይካ ኣꬎ ኤራቴꬂ ኔ ዎዚናን ጌላና፤ ኤራቴꬃይካ ኔ ሼምፖ ኡፋይሳና።
PRO 2:11 ሻኪ ኤሮይ ኔስ ጎንዳሌ ጊዳና፤ ኣኬካይካ ኔና ናጋና።
PRO 2:12 ኣꬎ ኤራቴꬂ ኔና ኢታ ኣሳታ ኦጌፔ ኣሻና፤ ጌላ ሃሳይዛይታፔካ ኔና ናጋና።
PRO 2:13 ኢስቲ ꬉማ ኦጌን ባናስ ሱሬ ኦጌ ኣጊዛይታ፤
PRO 2:14 ኢስቲ ኢታ ኦሶን ኡፋዬቲዛይታ፤ ጌላ ኦጌን ሆምቦጪዛይታ።
PRO 2:15 ኢስታ ኦጌይ ጌላ፤ ኢስታ ሄሜታይ ሚርቄꬃ።
PRO 2:16 ኣꬎ ኤራቴꬂ ላይማ ማጫሳፌ ናጋና፤ ባ ኢንጻርሳን ጪሚዛሪፔ ኔና ኣሻና።
PRO 2:17 ኢዛ ባ ዬላጋቴꬃ ኣዚና ኣጊዳሮ፤ ጾሳ ሲንꬃን ጌሊዳ ጫቆ ቃላ ካꬊዳሮ።
PRO 2:18 ኢዚ ሶ ቤꬂ ሃይቆስ ጋꬄስ፤ ኢዚ ኦጌቲካ ሞይቲሌታ ዱላታን ጋꬄቴስ።
PRO 2:19 ኢዚኮ ጌሊዳ ኦኒካ ጉዬ ሲሜና፤ ዴኦ ኦጌካ ዴሜና።
PRO 2:20 ሄሳ ጊሻስ ኔኒ ሎኦ ኣሳታ ሌሚሶ ካላ፤ ጺሎታ ኦጌን ሄሜታ።
PRO 2:21 ሱሬ ኣሳቲ ቢታ ቦላ ጋምኣና፤ ዎሶይ ባይንዳ ኣሳቲካ ኢዚ ቦላ ሚኒ ዳና።
PRO 2:22 ጊዶ ኣቲን ኢታቲ ቢታፌ ꬋያና፤ ኣማኔቶንታይቲካ ꬎቃሌታና።
PRO 3:1 ታ ናዞ! ታኒ ኔና ታማርሲዛይሳ ዶጎፓ፤ ታ ኣዛዞታካ ኔ ዎዚናን ዎꬃ።
PRO 3:2 ኢስቲ ኔ ላይꬅ ኣዱሳና፤ ኢሻሎ ዴኦኔ ሳሮቴꬅ ኔስ ጉጃና።
PRO 3:3 ሲቆይኔ ቱማቴꬂ ኔፔ ሃኮፌቶ፤ ኢስታ ኔ ቆꬌን ቃቻ፤ ኔ ዎዚናንካ ጻፋ።
PRO 3:4 ሂስቲኮ ኔኒ ጾሳ ሲንꬃኒኔ ኣሳ ሲንꬃን ሳቤታናኔ ሎኦ ሱንꬅ ዴማና።
PRO 3:5 ኔኒ ፖሎ ዎዚናን ጎዳን ኣማኔታ፤ ኔኒ ኔ ኣኬካን ዜምፖፋ።
PRO 3:6 ኔኒ ቢዛ ኦጌ ኡባን ኢዛ ሲንꬃሳ፤ ኢዚካ ኔ ቢዛ ኦጌ ሱሪሳና።
PRO 3:7 ኔርካ ኔና ኣꬎ ኤራንቻ ጎፓ፤ ጎዳስ ያያ፤ ኢታፔካ ሃካ።
PRO 3:8 ሄሲ ኔ ቦላ ፓያ ዎꬃና፤ ኔ ሜቄꬃታካ ጻሊሳና።
PRO 3:9 ጎዳ ኔ ኣቆታን ቦንቻ፤ ቢታይ ኔስ ኢሚዛ ኣይፌ ኡባፌ ጼራ ኢዛስ ኢሞን ቦንቻ።
PRO 3:10 ኔ ሄሳꬆ ኦꬂኮ ኔ ጎታራቲ ኩሚ ፓላሃና፤ ኔኒ ዎይኔ ኡሹ ኣጊዛሶቲ ጪፒ ጊ ኩማና።
PRO 3:11 ታ ናዞ! ጎዳ ሴራ ካꬎፓ፤ ኢዚ ኔና ሃንቂዛ ዎዴካ ላንጮፋ።
PRO 3:12 ኣዋይ ባ ሲቂዛ ና ሴሪዛይሳꬆ ጎዳይካ ባ ዶሲዛ ና ሴሬስ።
PRO 3:13 ኣꬎ ኤራቴꬅ ዴማናስ ዎጺዛ ኣሲ፥ ኣኬካካ ባስ ሚሼ ኦꬂዛ ኣሲ ኣንጄቲዳዴ።
PRO 3:14 ጋሶይካ ኢዚፔ ዴሚዛ ጎኣይ ቢራፔ ዴሚዛ ጎኣፔ ኣꬌስ፤ ኢዚፔ ቤቲዛ ጎኣይ ዎርቃፌ ቤቲዛ ጎኣፔ ኣꬌስ።
PRO 3:15 ኣꬎ ኤራቴꬂ ዞኦ ኢንቁፌ ኬሂ ኣልኦ፤ ኔኒ ዴማናስ ኣሞቲዛ ኡባይ ኢዚራ ጊናቴና።
PRO 3:16 ኢዛ ኡሻቻ ኩሼን ኣዱሳ ላይꬅ፥ ሃዲርሳ ኩሼን ኣቆታኔ ቦንቾ ኦይካዱስ።
PRO 3:17 ኢዚ ኦጌቲ ኡፋይሲዛ ኦጌታ፤ ኢዛ ሄሜቲዛ ኦጌ ኡባይካ ሳሮ።
PRO 3:18 ኢዛ ባና ኢዲሚዛይታስ ዴኦ ሚꬃ፤ ኢዞ ኦይኪዛይቲካ ኣንጄታና።
PRO 3:19 ጎዳይ ባ ኣꬎ ኤራቴꬃን ሳኣ ሜꬊዴስ፤ ባ ኣኬካንካ ሳሎታ ኢስቲ ዲዛሶን ሚንꬂዴስ።
PRO 3:20 ሻፋቲ ኢዛ ኤራቴꬃን ጎጌቴስ፤ ሻራቲ ኢራ ኢሜቴስ።
PRO 3:21 ታ ናዞ! ሱሬ ፒርዳኔ ሻኪ ኤሮ ናጋ፤ ኢስቲ ኔ ሲንꬃፌ ሃኮፌቶ።
PRO 3:22 ኢስቲ ኔስ ዴኦ ጊዳና፤ ኔ ቆꬌስካ ኣሌቆ ጊዳና።
PRO 3:23 ሄ ዎዴ ኔኒ ኦጌን ሂርጋይ ባይንዳ ሄሜታና፤ ኔ ቶሆይካ ꬉጴቴና።
PRO 3:24 ኔኒ ኢቺዳ ዎዴ ባባካ፤ ኢቻዳካ ማልኦ ꬊስኮ ꬊስካና።
PRO 3:25 ኣኬኮንታ ጋኪዛ ሜቶኔ ኢታታ ቦላ ጋኪዛ ꬋይሳስ ባባካ።
PRO 3:26 ኣይስ ጊኮ ጎዳይ ኔስ ኣማኔቲዛዴ ጊዳና፤ ኔ ቶሆይ ዎጺማዴን ኦይኬቶንታ ማላ ኢዚ ኔና ናጋና።
PRO 3:27 ኔስ ማዳና ዎልቃይ ዲሺን ማዶ ቤሲዛይታስ ሎኦ ኦሶ ኣጎፋ።
PRO 3:28 ሃኢ ኔስ ዲሺን ኔ ሾሮዛስ፥ «ሲማዳ ያ፤ ታኒ ኔስ ዎንቶ ኢማና» ጎፓ።
PRO 3:29 ኔናን ኣማኔቲዲ ኔ ማታን ዲሺን ኔ ሾሮዛ ቦላ ኢታ ሚሽ ኦꬃናስ ሃልቾፋ።
PRO 3:30 ኔና ቆሆንታ ኣስ ጋሶይ ባይንዳ ጮ ሞቶፓ።
PRO 3:31 ጌኔ ኦꬂዛ ኣሳታ ቁሎፋ፤ ኢስታ ኢታ ኦጌካ ካሎፋ።
PRO 3:32 ጋሶይካ ጎዳይ ኢታ ኦꬂዛይታ ኢጼስ፤ ጊዶ ኣቲን ሱሬታስ ኢዚ ባ ዎዚና ቆፋ ቆንጪሴስ።
PRO 3:33 ጎዳ ቃንጌꬂ ኢታ ኦꬂዛይታ ኬꬃና፤ ጊዶ ኣቲን ኢዛ ኣንጆይ ጺሎታሶና።
PRO 3:34 ኦቶሬቴꬃን ቂልጪዛይታ ቦላ ጎዳይካ ቂልጬስ፤ ጊዶ ኣቲን ባንታና ካዉሺዛይታ ቦንቼስ።
PRO 3:35 ኣꬎ ኤራንቻቲ ቦንቾ ላታና፤ ኤያቲ ጊዲኮ ካዉሻቴꬃስ ኣꬊ ኢሜታና።
PRO 4:1 ታ ናይቶ! ኢንቴ ኣዋ ዞሬ ሲዪቴ፤ ዎዚናን ዎꬂ ኤዝጊቴ፤ ኣኬካካ ኢንቴስ ሚሽ ሂስቲቴ።
PRO 4:2 ታኒ ኢንቴስ ሎኦ ቲሚርቴ ኢሚዛ ጊሻስ ታ ቲሚርቴ ኣጎፍቴ።
PRO 4:3 ታኒ ታ ሁኤንካ ታ ኣዋስ ዬላጋ ና፤ ታ ኣዬይስካ ሜጺ ኢሲ ና።
PRO 4:4 ታ ኣዋይ ታና ታማርሲሼ፥ «ታ ቃላ ኩሜꬃ ዎዚናን ኦይካ፤ ታ ኣዛዞታካ ናጋ፤ ኔ ሂስቲኮ ፓጻ ዴኣና።
PRO 4:5 ኣꬎ ኤራቴꬂኔ ኣኬካ ኦይካ፤ ታ ቃላ ዶጎፓ፤ ኢዚፔካ ካሬ ኬዞፓ።
PRO 4:6 ኣꬎ ኤራቴꬅ ኣጎፋ፤ ኢዛ ኔስ ጎንዳሌ ጊዳና፤ ኢዞ ሲቃ፤ ኢዛካ ኔና ናጋና።
PRO 4:7 ኣꬎ ኤራቴꬂ ባይራ፤ ሄሳ ጊሻስ ኢዞ ዴማ። ኣኬካይ ኔ ኣቆዛ ኡባ ኤኪዛ ጊዲኮካ ኢዛ ዴማ።
PRO 4:8 ኔኒ ኣꬎ ኤራቴꬅ ቦንቻ፤ ኢዛ ኔና ꬎቁ ꬎቁ ኦꬃና፤ ኔኒ ኢዞ ኢዲማ፤ ኢዛ ኔና ቦንቻና።
PRO 4:9 ኢዛ ኔ ሁኤን ሳባ ኣኪሊሌ ዎꬃና፤ ቦንቾ ካላቻካ ኢማና» ጌስ።
PRO 4:10 ታ ናዞ! ታ ጊዛይሳ ኤዝጋ፤ ታ ቃላካ ኔ ዎዚናን ዎꬃ፤ ኔ ላይꬂ ኣዱቃና።
PRO 4:11 ታኒ ኔና ኣꬎ ኤራቴꬃ ኦጌ ካሌꬃና፤ ሱሬ ኦጌካ ቤሳና።
PRO 4:12 ኔ ሄሜታሼ ꬉጴታካ፤ ዎጺኮካ ኩንዳካ።
PRO 4:13 ታ ቲሚርቴ ሎኤꬃ ኦይካ፤ ኢዞ ዬዶፋ፤ ኢዛ ኔስ ዴኦ ጊዲዳ ጊሻስ ኢዞ ናጋ።
PRO 4:14 ናጋራንቻታ ኦጌ ዬꬎፋ፤ ኢታ ኣሳታ ኦጌንካ ሄሜቶፋ።
PRO 4:15 ኢዚፔ ሃካ፤ ኢዚን ሄሜቶፋ፤ ኢዚፔ ጉዬ ሲማ፤ ሂስታዳ ኔ ኦጌይራ ባ።
PRO 4:16 ኢስቲ ኢታ ኦꬆንታ ዲሼ ꬊስኪ ኤሬቴና፤ ኣስ ꬉጴꬆንታ ዲሺን ꬊስኮይ ኢስታ ኣይፌን ዬና።
PRO 4:17 ኢስቲ ኢታቴꬅ ካꬃ ማላ ሜቴስ፤ ጌኔካ ኡሻ ማላ ኡዬቴስ።
PRO 4:18 ጺሎታ ኦጌይ ሴታ ጋላስ ጋካናስ ፖኢ ፖኢ ቢዛ ማላዶ ጻልቄ ማላ።
PRO 4:19 ጊዶ ኣቲን ናጋራንቻታ ኦጌይ ሳካና ꬉማ ማላ፤ ኢስቲ ኣዛን ꬉጴታናኮካ ኤሬቴና።
PRO 4:20 ታ ናዞ! ታ ጊዛይሳ ኣኬካ፤ ታ ቃላካ ሎኤꬃ ኤዝጋ።
PRO 4:21 ኔ ኣይፌ ሲንꬃፌ ሃሶፋ፤ ኔ ዎዚናን ዎꬃ።
PRO 4:22 ጋሶይካ ኢስቲ ዴሚዛ ኣሳስ ዴኦ ኢሜቴስ፤ ኢስቲ ኣሳቴꬃስካ ፓያቴꬅ ኢሜቴስ።
PRO 4:23 ኡባፌካ ቦላራ ኔኒ ኔ ዎዚና ሚንꬃዳ ናጋ፤ ኣይስ ጊኮ ዴኦይ ኢዛፔ ፑልቴስ።
PRO 4:24 ኔ ዶናፔ ጌኔ ሃሳያ ዲጋ፤ ኢታ ሃሳያ ኔ ሜቴርሻፌ ሃሳ።
PRO 4:25 ኔ ኣይፌቲ ሲቲ ጊዲ ሲንꬅ ጼሌቶ፤ ቲሺ ሂስታዳ ኔ ሲንꬃን ዲዛይሳ ጼላ።
PRO 4:26 ኔ ቶሆስ ኦጌ ጊጊሳ፤ ሱሬ ኦጌ ጻላ ሄሜታ።
PRO 4:27 ኡሻች ሃዲርሲ ጎፓ፤ ኔ ቶሆ ኢታፔ ናጋ።
PRO 5:1 ታ ናዞ! ታ ኣꬎ ኤራቴꬃ ኔ ዎዚናን ዎꬃ፤ ታኒ ኣኬካን ዮቲዛ ቃላ ሎኤꬃ ኤዝጋ።
PRO 5:2 ሄሲካ ዎዚናማቴꬂ ኔስ ሚሽ ጊዳና ማላኔ ኔ ሜቴርሻቲ ኤራቴꬅ ናጋና ማላሳ።
PRO 5:3 ላይማ ማጫሳ ኢንጻርሳፌ ኤሳ ኢሊሎይ ጾኬስ፤ ኢዚ ሃሳያይ ኦይሳፌካ ኣꬊ ሹጌስ።
PRO 5:4 ጊዶ ኣቲን ኢዛ ዉርሴꬃን ጎዳሬ ኡꬃ ማላ ጫማዉስ፤ ናምኡ ባጋራ ቃንጺዛ ቃራ ማሻ ማላ።
PRO 5:5 ኢዚ ቶሆቲ ዱጌ ሃይቆሶ ቤቴስ፤ ኢዚ ታንጎይ ሲቲ ሂስቲ ዱጌ ዱፎን ካሌꬄስ።
PRO 5:6 ኢዛ ዴኦ ኦጌስ ዉዱ ጉኩ፤ ኢዚ ኦጌቲ ጌላ፤ ጊዶ ኣቲን ጌላ ጊዲዳይሳካ ኢዛ ኤሩኩ።
PRO 5:7 ታ ናይቶ! ታና ኤዝጊቴ፤ ታ ዮቲዛ ቃላፔ ኬኦፒቴ።
PRO 5:8 ኢንቴ ኦጌ ኢዚፔ ሃሲቴ፤ ኢዚ ፔንጌራካ ኣꬎፍቴ።
PRO 5:9 ሄሲካ ኢንቴ ኢንቴ ጎባቴꬃ ሃራታስ፥ ኢንቴ ላይꬃካ ሜንጼ ኢታታስ ኢንቴ ኢሞንታ ማላሳ።
PRO 5:10 ኣላጋቲ ኢንቴ ኣቆታን ካኦንታ ማላኔ ኢንቴ ዳቡራንካ ሃራ ኣሳሶይ ዱሬቶንታ ማላሳ።
PRO 5:11 ኢንቴ ኣሾይ ዉሪን፥ ኢንቴ ሜቄꬂ ጊልቂን ዉርሴꬃ ላይꬃን ኢንቴ ጎታራና።
PRO 5:12 ቃሴካ ኔኒ፥ «ታኒ ኣይስ ሴራ ኢጻዲና! ታ ዎዚናይካ ዞሬ ኣይስ ካꬊዴ!
PRO 5:13 ታና ታማርሲዛይቲ ዮቲዳይሳ ኤካቤኬ፤ ታና ዞሪዛይታ ዞሬዛካ ኤዝጋቤኬ።
PRO 5:14 ሄሳ ጊሻስ ታኒ ሺቂዳ ዱላታ ሲንꬃፌ ꬋያና ማታዲስ» ጋና።
PRO 5:15 ኔኒ ኤሊሲዳ ኔ ፑልቶ ሃꬃፌ ኡያዳ ኣሊዛ ማላ ኔ ማቼይስ ኣማኔታዳ ኢዚ ሲቆን ኣላ።
PRO 5:16 ቤታ ቤታ ማጫሲ ኡዪዛ ፑልቶ ሃꬅ ጊዶፓ።
PRO 5:17 ኔናቴꬃ ኔ ማቼይስ ናጋ፤ ሃራ ማጫሳራ ዚንኦፋ።
PRO 5:18 ኔ ማቼያ ኔስ ኣንጄቲዳ ፑልቶ ጊዱ፤ ዬላጋቴꬃን ኔኒ ኤኪዳ ኔ ማቼይራ ኡፋዬታ።
PRO 5:19 ሎኢዛ ጋራ ማላኔ ኡፋይሲዛ ጌኔሳ ማላ፥ ኢዚ ꬋንꬃቲ ኡባ ዎዴ ኔና ኣሌቶ፤ ኢዚ ሲቆይ ኔና ኡባቶ ኦይኮ።
PRO 5:20 ታ ናዞ! ላይማ ማጫሳይ ሲቆን ኣይስ ማꬆታይ? ሃራ ኣሳ ማቺራ ኣይስ ቆሜታይ?
PRO 5:21 ጋሶይካ ኣሲ ኦꬂዛ ኡባ ጎዳይ ቤዬስ፤ ኢዚ ሄሜቲዛ ሄሜታ ኡባ ፒልጊ ጼሌስ።
PRO 5:22 ናጋራንቻ ኢዚ ኦꬂዳ ናጋራይ ዛሪ ኦይኬስ። ኢዛ ናጋራ ጊቴይ ኢዛ ቃቼስ።
PRO 5:23 ኢዚ ባ ኤያቴꬃ ዳሮን ኦጌ ባላና፤ ባና ሃራና ዳንዳዮንታ ኣጊዳ ጊሻስ ኢዚ ሃይቃና።
PRO 6:1 ታ ናዞ! ኔኒ ኔ ሾሮዛስ ዋሴ ጌሊዳ ጊዲኮ፥ ሃራ ኣሳ ጊሻስ ኔኒ ኩሼ ባቃ ጫቂዳ ጊዲኮ፥
PRO 6:2 ኔኒ ጌሊዳ ቃላን ኦይኬቲዳ ጊዲኮ፥ ኔ ዶናፔ ኬኢዳ ቃላን ኔ ኦይኬቲዳ ጊዲኮ፥
PRO 6:3 ታ ናዞ! ኔኒ ኔ ሾሮዛ ኩሼን ኩንዲዳ ጊሻስ ኔና ኣሻናስ ባዳ ኢዛ ሲንꬃን ኩንዳ፤ ኔ ሾሮዛኮ ባዳ ሾባ።
PRO 6:4 ሄሳꬆ ኦꬆንታ ዳሼ ꬊስኮፋ፤ ኔ ሲጲንꬃቲ ሊጶፔቶ።
PRO 6:5 ሻንካንቻታፔ ጌኔሲ ኬሲ ኤኪ ኣቲዛ ማላ፥ ያርዴን ኦይኬቶንታ ኣቲዳ ካፎ ማላ ኔና ኣሻ።
PRO 6:6 ኔኖ ኣዛላዞ! ጩንጫሌታኮ ባ፤ ሂስታዳ ኢስታፌ ታማራዳ ኣꬎ ኤራንቻ ጊዳ።
PRO 6:7 ጩንጫሌታስ ኣዛዚዛይ ዴና፤ ኢስታ ሃሪዛይ ዴና።
PRO 6:8 ጊዶ ኣቲን ባንታስ ማና ሚሽ ቦኔ ሺሼቴስ፤ ካꬅ ሺሺዛ ዎዴ ባንታስ ካꬅ ሺሼቴስ።
PRO 6:9 ኔኖ ኣዛላዞ! ኔኒ ኣዉዴ ጋካናስ ꬊስካኔ? ꬊስኮፌካ ኔ ኣዉዴ ቤጋኔ?
PRO 6:10 «ታኒ ጉꬃራ ꬊስካ ኤካና፤ ጉꬃራ ሊጳ ዴንዳና፤ ታ ኩሼ ቦርኮታዳ ጉꬃራ ሼምፓ ኤካና» ኔ ጊሺን፥
PRO 6:11 ሄ ዎዴ ማንቆቴꬂ ፓንጋ ማላ፥ ፓጬይ ኦላ ሚሻ ኦይኪዳ ኣሳ ማላ ኔ ቦላ ፑቱ ጋና።
PRO 6:12 ዎማሌይኔ ሜንጼ ኢታ ኣሲ ዩዪ ዩዪዲ ኢታ ቃላ ሃሳይዛይ፥
PRO 6:13 ባ ኣይፌራ ቂምኦቲዛይ፥ ባ ቶሆን ቤሲዛይ፥ ባ ቢራꬌታንካ ማላቲዛይ፥
PRO 6:14 ባ ዎዚናን ኢታ ሚሽ ዎꬂ ዴንꬂ ቆፒዛይ ኣይ ዎዴካ ኦሽ ዴንꬄስ።
PRO 6:15 ሄሳ ጋሶን ባሺ ኣኬኮንታ ኢዛ ቦላ ያና፤ ኢዚ ሃሳኣይ ባይንዳ ሜቃና፤ ሜቂዲካ ፓጼና።
PRO 6:16 ጎዳይ ኢጺዛ ኡሱፑን ዮኦቲ ዴቴስ፤ ላፑንꬃዛ ኬሂ ሃራሴቴስ።
PRO 6:17 ኦቶሬቴꬃን ጼሊዛ ኣይፌ፥ ዎርዶቲዛ ኢንጻርስ፥ ጺሎ ኣሳታ ዎꬊዛ ኩሼ፥
PRO 6:18 ኢታ ሚሽ ቆፒዛ ዎዚና፥ ኢታሶ ኤሶቲዛ ቶሆታ፥
PRO 6:19 ዎርዶ ቦላ ዎርዶ ጉጂ ጉጂዲ ዮቲዛ ዎርዶ ማርካ፥ ኢሻንታ ጊዶን ኦሽ ሜꬊዛ ኣሳ።
PRO 6:20 ታ ናዞ! ኔ ኣዋ ኣዛዞ ፖላ፤ ኔ ኣያ ታማርሲዳይሳካ ኣጎፋ።
PRO 6:21 ኢስታ ኡባቶ ኔ ዎዚናን ኦይካ፤ ኔ ቆꬌንካ ቃቻ።
PRO 6:22 ኔኒ ሄሜቲዛ ዎዴ ኢስቲ ኔና ካሌꬃና፤ ኔኒ ኢቺዛ ዎዴ ኢስቲ ኔና ናጋና፤ ኔኒ ቤጎቲዛ ዎዴካ ኢስቲ ኔና ዞራና።
PRO 6:23 ኣይስ ጊኮ ሃ ኣዛዞቲ ኔስ ጾምፔ፤ ቲሚርቴቲካ ፖኦ፤ ቃሴ ሴራይካ ዴኦኮ ኤፊዛ ኦጌ።
PRO 6:24 ሃ ኣዛዞቲ ኢታ ማጫሳፌ ኔና ናጋና፤ ዶናን ጪሚዛ ሃዉሻ ማጫሳፌካ ናጋና።
PRO 6:25 ኢዚ ሎኤቴꬃ ኔ ዎዚናን ኣሞቶፋ፤ ኢዚ ቂምኦቴꬃን ኦይኬቶፋ።
PRO 6:26 ኢሲ ኣዴይ ባና ባይዛ ዲዛ ማጫሳዮ ጉꬃ ሚሻን ዴማናስ ዳንዳዬስ፤ ኣሳ ማቺ ጌዶ ካሎይ ኔስ ሼምፖ ꬋይሳና።
PRO 6:27 ኢሲ ኣሲ ታማ ኢዲሚን ኢዛ ማይኦይ ሜቴቶንታ ኣታናስ ዳንዳይዜ?
PRO 6:28 ኢሲ ኣሲ ቦንቆ ታማ ዬꬊ ቢሺን ኢዛ ቶሆይ ጹጌቶንታ ኣታና ዳንዳይዜ?
PRO 6:29 ኣሳ ማቾ ላጌꬂዛ ኣሲ ሄሳ ማላ፤ ኢዞ ቦቺዛ ኡባይ ቃጻዬቶንታ ኣቴና።
PRO 6:30 ካይሶይ ጋፋ ኣታናስ ካይሲኮ ኣሳይ ኢዛ ካꬌና።
PRO 6:31 ጊዶ ኣቲን ኢዛስ ዲዛ ኣቆታ ኡባ ኦይቺኮካ ኢዚ ኦይኬቲዳ ጊዲኮ ላፑን ኩሼ ቃንጻና ቤሴስ።
PRO 6:32 ላይማ ላይማቲዛ ኣሳስ ዎዚናይ ፓጬ፤ ሄሳዴይ ባርካ ባ ሼምፖ ꬋይሴስ።
PRO 6:33 ቡካይኔ ካዉሻቴꬂ ኢዛስ ቃዳ፤ ዬላቴꬂ ኢዛፔ ሙሌካ ቁጬቴና።
PRO 6:34 ቃናቴይ ኣዚና ሃንቄታና ማላ ዴንꬄꬄስ፤ ኢዚ ሃሎ ኬሲዛ ዎዴ ኢዛስ ቃꬌቴና።
PRO 6:35 ኢዚ ኣይ ኤዳካ ኤኬና፤ ኣይ ኬና ኢሞታይካ ኢዛ ሃንቆ ዶሺሴና።
PRO 7:1 ታ ናዞ! ታ ቃላ ናጋ፤ ታ ኣዛዞካ ኔ ዎዚናን ቁምኣ ኦይካ።
PRO 7:2 ኔ ፓጻ ዴኣና ማላ ታ ኣዛዞታ ናጋ፤ ታ ቲሚርቴዛካ ኔ ኣይፌ ጪሮ ማላ ናጋ።
PRO 7:3 ሃይታ ኔ ቢራꬌታን ቃቻ፤ ኔ ዎዚናንካ ጻፋ።
PRO 7:4 ኣꬎ ኤራቴꬅ ኔ ታስ ሚቾ ጋ፤ ኣኬካካ ኔ ታስ ዳቦ ጋ።
PRO 7:5 ኢስቲ ኔና ላይማ ማጫሳፌኔ ባ ቃላን ባሌꬂዛ ሃዉሻ ማጫሳፌ ናጋና።
PRO 7:6 ኢሲ ጋላስ ታኒ ታ ኬꬃ ማስኮቴዛራ ካሬ ጼላዲስ።
PRO 7:7 ኣኬካይ ፓጪዳ ዬላጋታ ቤኣዲስ። ኢስታ ጊዶፌ ኢሶይ ኬሂ ኤያ።
PRO 7:8 ሄ ዎዳላይ ኢዚ ሶ ኤፊዛ ኦጌ ባጋራ ኦይኪ ቢሼ ኢዚ ኬꬃ ኣቻራ ኣꬊ ቢሺን፥
PRO 7:9 ሄ ዎዴ ሳኣይ ቃማናስ ላንኪላንኪሺን፥ ꬉማይ ኣይፌ ኦይኪሺን፥
PRO 7:10 ኢሲ ማጫሳያ ኢዛ ዴማናስ ኬዛዱስ፤ ላይማ ማጫሳ ማይኦ ማይኣዳ ባሌꬃናስ ሙርታ ኬዛዱስ።
PRO 7:11 ኢዛ ጻላኔ ዬላይ ባይንዳ ማጫሳ፤ ሶሆን ዎፑ ጋዳ ኡቱኩ።
PRO 7:12 ኢዛ ኢሲቶ ኦጌን፥ ኢሲቶ ጉላን፥ ኢሲቶ ዱቡሻን ኤቃዳ ናጋዉስ።
PRO 7:13 ኢዛ ሄ ናዛ ሺሻ ኦይካዳ ዬራዉስ፤ ዬላይ ባይንዳ ኢዛ ኣይፌ ቲሺ ሂስታ ጼላሼ፥
PRO 7:14 «ታኒ ታሶን ኢሲፌቴꬃ ያርሾ ያርሻናስ ቤሴስ፤ ታኒ ታ ኣዲና ሃች ፖላዲስ።
PRO 7:15 ሂስታዳ ኔና ጼላናዉ ኬኣዲስ፤ ኔና ኬሃ ኮያዲስ፤ ሃኢ ቤያ ኔና ዴማዲስ።
PRO 7:16 ታኒ ጊብጼፔ ዪዳ ኣሌቂሲዛ ኣንሶላካ ታ ሂጻን ዬጋዲስ።
PRO 7:17 ታኒ ካርቤ፥ ኣልሙኒዬሜኔ ቃራፋ ጌቴቲዛ ሳዎታፔ ኦሴቲዳ ሺቶ ታ ሂጻን ጫጫፋዲስ።
PRO 7:18 ሃ ያ፤ ኣኔ ዎንታና ጋካናስ ሲቆ ኣሎስ፤ ቆሜቲዲካ ኡፋዬቶስ።
PRO 7:19 ታ ኬꬃዋይ ሶን ዴና፤ ሃኮ ዴሬ ቢዴስ።
PRO 7:20 ሚሽ ካራጺቴ ኩንꬂ ኤኪ ቢዳ ጊሻስ ኣጊናይ ዶርስ ዳጋንꬆንታ ሲሜና» ጋዱስ።
PRO 7:21 ሂስታዳ ባ ማልኦ ሃሳያን ኢዛ ባሌꬃዱስ፤ ባ ሊቆ ኢንጻርሳንካ ጪማዱስ።
PRO 7:22 ሹካስ ላጌቲ ቢዛ ቦራ ማላ፥ ዎጺማዴን ኦይኬታና ቢዛ ጮፎሾ ማላ ሄራካ ኣሙሶንታ ኢዞ ካሊዲ ቢዴስ።
PRO 7:23 ዎንዳፌ ዪሺ ኢዛ ቲሬ ጫዳና ጋካናስ፥ ኢዛ ሼምፖ ꬋይሳናይሳ ኤሮንታ ዲሼ ፒራꬊዲ ያርዴን ጌሊዛ ካፎ ማላ ጊዲዴስ።
PRO 7:24 ታ ናዞ! ኣኔ ሃኢ ሲያ፤ ታ ዶናፔ ኬዚዛ ቃላካ ኤዝጋ።
PRO 7:25 ኔ ዎዚናይ ኢዚኮ ቦፖ፤ ኢዛ ቢዛ ባላ ኦጌን ጌሎፓ።
PRO 7:26 ኢዛ ካዉሻዳ ኦሊዳይቲ ኡንዴና፤ ኢዛ ዎꬊዳይታ ቆዳይ ኬሂ ዳሮ።
PRO 7:27 ኢዚ ሶይ ዱፎን ኤፊዛ ኦጌ፤ ሄ ኦጌይ ዱጌ ሃይቆሶ ጋꬄስ።
PRO 8:1 ሲዪቴ! ኣꬎ ኤራቴꬃያ ባ ቃላ ዶቁ ሂስታ ጼይጌኬ? ኣኬካይካ ባ ጬንጉርሳ ꬎቁ ሂስታ ሲሴኬ?
PRO 8:2 ኦጌ ዶናን ዴኢዛ ዙምቡላታ ቦላኔ ዳጋላ ኦጌታን ኤቃዉስ።
PRO 8:3 ጊምቤዛ ላንቄን ካታማታ ጌሊዛ ፔንጌን ኤቃዳ ባ ቃላ ꬎቁ ሂስታዳ፥
PRO 8:4 ሃይቶ ኣሳቶ! ታኒ ኢንቴና ጼይጋይስ፤ ታኒ ኣሳ ዜሬꬅ ኡባ ጼይጋይስ።
PRO 8:5 ኢንቴኖ ኣኬካይ ፓጪዳይቶ! ዎዚናማ ጊዲቴ፤ ኢንቴኖ ኤያቶ ኣኬካ ዴሚቴ።
PRO 8:6 ታኒ ጎኢዛ ሚሽ ዮቲዛ ጊሻስ ኤዝጊቴ፤ ታ ዶናፔ ሱሬ ዮኦይ ኬዜስ።
PRO 8:7 ታ ዶናይ ቱማ ሃሳዬስ፤ ታ ሜቴርሻቲካ ኢታ ሚሽ ኢጼቴስ።
PRO 8:8 ታ ዶናፔ ኬዚዛ ቃላቲ ኡባይ ቱማ፤ ጌላ ዎይኮ ቦካ ጊዴቴና።
PRO 8:9 ኣኬካይ ዲዛ ኣሳስ ታ ሃሳያይ ሊኬ፤ ኤራቴꬂ ዲዛይታስ ታ ሃሳያን ዎርዶይ ዴና።
PRO 8:10 ቢራፔ ኣꬂዲ ታ ዞሬ ኤኪቴ፤ ሙሩታ ዎርቃፌ ኣꬂዲ ኤራቴꬅ ዶሪቴ።
PRO 8:11 ኣይስ ጊኮ፥ «ታኒ ኣꬎ ኤራቴꬂ ዞኦ ኢንቁፌካ ኬሃ ኣልኣይስ፤ ኔኒ ኣሞቲዛ ሚሽ ኡባይካ ታናራ ጊናታናስ ዳንዳዬና።
PRO 8:12 ታኒ ኣꬎ ኤራቴꬂ ኣኬካራ ዳይስ፤ ኤራቴꬂኔ ዎዚናማቴꬂ ታ ሚሻታ።
PRO 8:13 ጎዳስ ያሻቴꬂ ኢታ ኢጾ፤ ታኒ ኦቶሮኔ ሃላጫ፥ ሜንጼ ኢታቴꬂኔ ጌላ ሃሳያ ኢጻይስ።
PRO 8:14 ዞሬይኔ ሎኦ ፒርዳይ ታይታ፤ ታስ ኣኬካይኔ ዎልቃይ ዴስ።
PRO 8:15 ካዎቲ ታናን ካዎቴቴስ፤ ዴሬ ኣይሲዛይቲ ሱሬ ዎጋ ኬሴቴስ።
PRO 8:16 ዳናቲ ታኒ ማዲን ዴራ ኣይሴቴስ፤ ዴራ ሃሪዛ ጊታ ኣሳቲ ኡባይ ሃሬቴስ።
PRO 8:17 ታና ሲቂዛይታ ታኒ ሲቃይስ፤ ሚኒ ኮይዛይቲ ታና ዴማና።
PRO 8:18 ዱሬቴꬂኔ ቦንቾይ ታ ማታን ዴቴስ፤ ዉሮንታ ኣቆታይኔ ኢንጄይ ታ ማታና።
PRO 8:19 ኢንቴ ታፔ ዴሚዛ ጎኣይ ሙሩታ ዎርቃፌ ኣꬌስ፤ ታ ኢሞታይካ ሴሪሲ ኬሲዳ ቢራፔ ዳሬስ።
PRO 8:20 ታኒ ጺሎቴꬃ ኦጌን ሄሜታይስ፤ ሱሬ ፒርዳ ካላይስ።
PRO 8:21 ታና ሲቂዛይታስ ታኒ ዱሬቴꬅ ኢማና፤ ኢስታ ሚንጃ ኬꬃካ ታኒ ኩንꬃና።
PRO 8:22 «ጎዳይ ታና ባ ኦሶ ኡባፌ ኮይሮ ሜꬊዴስ፤ ቤኒፔካ ኢዛ ኦሳስ ኮይሮይ ታና።
PRO 8:23 ሳሎይኔ ሳኣይ ሜꬌታናፔ ካሴ ቤኒ ሜርናሶፌ ታኒ ሹሜታዲስ።
PRO 8:24 ዎጋ ጊታ ኣባቲ ባይንዳ ዎዴ፥ ሃꬃ ፑልቶቲ ꬉቃናፔ ካሴ ታኒ ዬሌታዲስ።
PRO 8:25 ዙማቲኔ ዙምቡላቲ ሜꬌታናፔ ካሴ ታኒ ዬሌታዲስ።
PRO 8:26 ጎዳይ ሳኣኔ ሳኣ ቦላ ዲዛ ዴምባታ ዎይኮ ኣላሜ ቦላ ዲዛ ጉዱላታ ሜꬋናፔ ካሴ ታኒ ዬሌታዲስ።
PRO 8:27 ጎዳይ ሳሎታ ሚጪዳ ዎዴኔ ጊታ ኣባታፔ ቦላራ ሳሎ ጉፋንꬆ ጊግሲዳ ዎዴ ታኒ ሄን ዴኣይስ።
PRO 8:28 ጎዳይ ሻራታ ቦላን ዎꬂዳ ዎዴ፥ ጊታ ኣባ ፑልቶታ ꬉሲዳ ዎዴ፥
PRO 8:29 ኣባ ሃꬃቲ ባንታስ ኢሜቲዳ ዛዋፔ ፒኒዲ ኣꬎንታ ማላ ዛዋ ዎꬂዳ ዎዴ፥ ሳኣስ ዮች ዬጊዳ ዎዴ፥
PRO 8:30 ሄ ዎዴ ታኒ ኢዛ ማታን ዋና ኦሳንቻ፤ ኡባ ጋላስ ታኒ ኡፋይሳን ኩማይስ፤ ታኒካ ኢዛ ሲንꬃን ኡፋዬታይስ።
PRO 8:31 ኢዛስ ጊዲዳ ኣላሜ ኡባን ታ ኡፋዬታይስ፤ ኣሳ ናይታንካ ታ ኡፋዬታይስ።
PRO 8:32 «ሃኢካ ታ ናይቶ! ታኒ ጊዛይሳ ኤዝጊቴ፤ ታ ኦጌ ናጊዛይቲ ኣንጄቲዳይታ።
PRO 8:33 ታ ቲሚርቴ ሲዪቴ፤ ኣꬎ ኤራንቻታ ጊዲቴ፤ ዉዳ ꬋዮፒቴ።
PRO 8:34 ታኒ ዮቲዛይሳ ሲዪዛ ኣሲ፥ ሃች ሃች ታ ፔንጌን ቤቲዛ ኣሲ፥ ታሶ ጌሊዛሶንካ ናጊዛ ኣሲ ኣንጄቲዳዴ።
PRO 8:35 ታና ዴሚዳይ ዴኦ ዴሜስ፤ ጎዳፔ ኢዚ ሳባ ዴሜስ።
PRO 8:36 ጊዶ ኣቲን ታና ዴሞንታ ኣጊዳ ኣሲ ባና ቆሄስ፤ ታና ኢጺዛ ኡባቲ ሃይቆ ሲቄቴስ» ጋዱስ።
PRO 9:1 ኣꬎ ኤራቴꬃያ ባስ ኬꬅ ኬጻዱስ፤ ኬꬃስ ላፑን ቱሳታ ኤሳዱስ።
PRO 9:2 ኢዛ ሞꬎ ሜሄ ሹካዱስ፤ ዎይኔ ኡሹ ኣጋዱስ፤ ማዳካ ጊጊሳዱስ።
PRO 9:3 ሂስታዳ ኣሳ ጼይጋናስ ባ ማጫ ኣይሌታ ኪታዱስ። ኢዛ ካታማይፔ ꬎቃ ሶን ኤቃዳ ጼይጋዱስ፤
PRO 9:4 «ኢንቴኖ! ኤራይ ፓጪዳይቶ ሃ ጌሊቴ!» ጋዱስ። ኤያታካ ኢዛ፥
PRO 9:5 «ሃ ዪዲ ታ ቁማ ሚቴ፤ ታኒ ኣጊዳ ዎይኔ ኡሻካ ኡዪቴ!
PRO 9:6 ኢንቴ ኤያቴꬃ ኦጌዛ ኣጊቴ፤ ኢንቴ ሼምፖራ ፓጻ ዴኣና፤ ኣኬካ ኦጌን ሄሜቲቴ» ጋዱስ።
PRO 9:7 ቂልጪዛ ኣስ ሴሪዛ ኣሲ ኡባይ ባስ ጫሼ ካላና፤ ኢታ ኣስ ዞሪዛዴይካ ባስ ካዉያና።
PRO 9:8 ቂልጪዛ ኣስ ዞሮፓ፤ ኔ ኢዛ ዞሪኮ ኢዚ ኔና ኢጻና። ኣꬎ ኤራንቻ ኣስ ሴራ፤ ኔ ኢዛ ሴሪኮ ኢዚ ኔና ዶሳና።
PRO 9:9 ኣꬎ ኤራንቻ ኣስ ታማርሳ፤ ሂስቲኮ ኢዚ ካሴይሳፌካ ኣꬎ ኤራንቻ ጊዳና። ጺሎ ኣስ ታማርሳ፤ ሂስቲኮ ኢዚ ኤራቴꬅ ጉጃና።
PRO 9:10 ኣꬎ ኤራቴꬃስ ኮይሮይ ጎዳስ ያሻቴꬃ፤ ጌሻዛ ኤሮይካ ኣኬካ።
PRO 9:11 ታ ጋሶን ኔስ ባሬይ ኣዱቃና፤ ኔስ ዴኦ ላይꬃይካ ጉጄታና።
PRO 9:12 ኔኒ ኣꬎ ኤራንቻ ጊዲኮ ጎኤታና፤ ኔ ቂልጪዛዴ ጊዲኮ ቆሄታና።
PRO 9:13 ኤያ ማጫሲ ዎጫማ ዳራዉስ፤ ኢዛ ባና ሃሩኩ፤ ኢዛ ኣይኮካ ኤሩኩ።
PRO 9:14 ኢዛ ባ ካሬን ኡታ ፔኣዉስ፤ ካታማ ጊዶን ꬎቃሶ ኬዛ ኡታዉስ።
PRO 9:15 ሄራ ኣꬊ ባ ኦጌ ቢዛይታ ጼይጋዉስ።
PRO 9:16 ኢዛካ ዎዚና ፓጬታስ፥ «ኢንቴኖ! ኣኬካይ ፓጪዳይቶ ታኮ ሃ ዪቴ።
PRO 9:17 ካይሲ ኡዪዛ ሃꬂ ማልኤስ፤ ጌማን ሚዛ ቁማይካ ሱኬሴስ» ጋዉስ።
PRO 9:18 ጊዶ ኣቲን ሃይቂዳ ኣሳይ ሄን ዴኢዛይሳ፥ ኢዚ ኢማꬃቲካ ዱፎ ጊዶን ዲዛይሳ ኢስቲ ኤሬቴና።
PRO 10:1 ሃይቲ ሶሎሞኔ ሌሚሶታ። ኣꬎ ኤራቴꬂ ዲዛ ናይ ባ ኣዋ ኡፋይሴስ፤ ጊዶ ኣቲን ኤያ ናይ ባ ኣዮ ጬጪሴስ።
PRO 10:2 ቤሶንታ ኦጌራ ዪዳ ኣቆታይ ጎኤና፤ ጊዶ ኣቲን ጺሎቴꬂ ሃይቆፔ ኣሼስ።
PRO 10:3 ጎዳይ ጺሎታ ጋፊሴና፤ ጊዶ ኣቲን ናጋራንቻታ ኣሞ ጫልቃሚሳና።
PRO 10:4 ኣዛላቴꬂ ማንቂሴስ፤ ሚኒ ኦሶይ ጊዲኮ ዱሬሴስ።
PRO 10:5 ኣꬎ ኤራንቻይ ካꬅ ዎዴራ ሺሼስ፤ ካꬅ ሺሺዛ ዎዴ ꬊስኪዛ ኣሲ ጊዲኮ ካዉዬስ።
PRO 10:6 ጺሎ ኣሲ ኣንጄቴስ፤ ኢታ ኣሳ ዶና ማካላቴꬂ ጎርዴስ።
PRO 10:7 ጺሎታ ሱንꬃይ ኣንጆን ጼይጌቲሼ ዳና፤ ኢታታ ሱንꬂ ጊዲኮ ዶጌታና።
PRO 10:8 ኣꬎ ኤራንቻይ ኣዛዞ ኤሮ ጊ ኤኬስ፤ ሎምኡሎምኢዛ ኤያቲ ጊዲኮ ባሻሶ ቤቴስ።
PRO 10:9 ሱሬ ኣሲ ሂርጋይ ባይንዳ ዴስ፤ ጌላ ኦጌ ቢዛ ኣሲ ጊዲኮ ባ ሞሮን ኦይኬታና።
PRO 10:10 ጌኔ ኦሶስ ቂምኦቲዛ ኣሲ ሜቶ ኤሄስ፤ ሎምኡሎምኢዛ ኤያይካ ሜቶ ኤሄስ።
PRO 10:11 ጺሎታ ሃሳያይ ዴኦ ፑልቶ፤ ኢታታ ሃሳያይ ማካላቴꬅ ጌንꬄስ።
PRO 10:12 ኢጾይ ፓላማ ዴንꬄꬄስ፤ ሲቆይ ጊዲኮ ባላ ኡባ ካሚ ኣꬌስ።
PRO 10:13 ዎዚናማ ኣሳይ ኣꬎ ኤራን ሃሳዬስ፤ ኤያ ዞኮን ጊዲኮ ጻምኣይ ሜቄስ።
PRO 10:14 ኣꬎ ኤራንቻቲ ኤራቴꬅ ዳጋሴቴስ፤ ኤያ ሃሳያይ ጊዲኮ ባሽ ጼይጌስ።
PRO 10:15 ዱሬታ ኣቆታይ ኢስታስ ጊምቤቲዳ ካታማ፤ ማንቆታ ማንቆቴꬂ ኢስታስ ꬋዮሶ።
PRO 10:16 ጺሎ ኣሳ ዳሞዛይ ዴኦ፤ ኢታ ኣሳታስ ዎꬌይ ጊዲኮ ቂጻቴ።
PRO 10:17 ሴራ ኤኪዛ ኣሲ ዴኦ ኦጌን ሄሜቴስ፤ ሴራ ኢጺዛ ኣሲ ጊዲኮ ሜቶ ቦላ ዎꬌስ።
PRO 10:18 ኢጺሼ ባ ኢጺዛይሳ ቆቲዛ ኣሲ ዎርዳንቻ፤ ዚጊርስ ዚጊርዛ ኣሲ ጊዲኮ ኤያ።
PRO 10:19 ዳሮ ሃሳያ ጊዶን ሞሮይ ꬋዬና፤ ባ ዶና ሺሺ ኤኪዛ ኣሲ ጊዲኮ ኣꬎ ኤራንቻ።
PRO 10:20 ጺሎታ ሃሳያቲ ጌሻ ቢራ ማላ፤ ኢታ ኣሳ ቆፋስ ጊዲኮ ጎኣይ ዴና።
PRO 10:21 ጺሎታ ሃሳያይ ዳሮታ ጎኤስ፤ ኤያቲ ጊዲኮ ባ ዎዚና ፓጬን ሃይቄቴስ።
PRO 10:22 ጎዳ ኣንጆይ ዱሬ ኬሴስ፤ ኢዚ ሄ ዱሬቴꬃን ሜቶ ጉጄና።
PRO 10:23 ኤያ ኣሲ ኢታ ኦሶን ኡፋዬቴስ፤ ዎዚናማ ኣሲ ጊዲኮ ኣꬎ ኤራቴꬃን ኡፋዬቴስ።
PRO 10:24 ኢታ ኣስ ሂርጊዛ ሚሽ ኢዛ ቦላ ጋካና፤ ጊዶ ኣቲን ጺሎ ኣሞይ ኢዛስ ፖሌታና።
PRO 10:25 ጎቴ ጫርኮይ ዴንዲሺን ኢታቲ ፒቴቲ ꬋያና፤ ጺሎቲ ጊዲኮ ሜርናስ ሚኒ ዳና።
PRO 10:26 ጫላይ ኣች ዚልኢሲዛ ማላኔ ጩዋይ ኣይፌ ቆሂዛ ማላ ኣዛላ ኣሲ ኪቲዳዴንታስ ሄሳ ማላ።
PRO 10:27 ጎዳስ ያሺ ላይꬅ ኣዱሴስ፤ ኢታታ ባሬይ ጊዲኮ ቃንꬃ።
PRO 10:28 ጺሎታ ሂዶታይ ኡፋይሳን ጋꬄስ፤ ኢታታ ሂዶታይ ጊዲኮ ሃዳ ጊዲ ኣቴስ።
PRO 10:29 ጎዳ ኦጌይ ጺሎታስ ባቃቲ ኣቲዛሶሆ፤ ኢታ ኦꬂዛይታስ ጊዲኮ ባሻ ሶሆ።
PRO 10:30 ጺሎቲ ሙሌካ ꬎቃሌቴቴና፤ ኢታቲ ጊዲኮ ቢታ ቦላ ዴኤቴና።
PRO 10:31 ጺሎታ ዶናይ ኣꬎ ኤራቴꬅ ሃሳዬስ፤ ጌላታ ኢንጻርሲ ጊዲኮ ቃንጼታና።
PRO 10:32 ጺሎታ ሜቴርሻይ ቤሲዛ ዮኦ ሃሳዬስ፤ ኢታ ዶናይ ጊዲኮ ቦካ ዮቴስ።
PRO 11:1 ጎዳይ ዎርዶ ጌዳራ ኢጼስ፤ ጊዶ ኣቲን ሱሬ ጌዳራን ኡፋዬቴስ።
PRO 11:2 ኦቶሮቴꬂ ካዉሻቴꬅ ካሌꬄስ፤ ኣሽኬቴꬂ ጊዲኮ ኣꬎ ኤራቴꬅ ኤሄስ።
PRO 11:3 ጺሎታ ኢስታ ሱሬቴꬂ ካሌꬄስ፤ ጊዶ ኣቲን ዎርዳንቻታ ኢስታ ዎርዶቴꬂ ꬋይሴስ።
PRO 11:4 ሃንቆ ጋላስ ዱሬቴꬂ ጎኤና፤ ጊዶ ኣቲን ጺሎቴꬂ ሃይቆፔ ኣሼስ።
PRO 11:5 ቦሬይ ባይንዳ ኣሳታ ኢስታ ጺሎቴꬂ ኢስታስ ኦጌ ሱሪሴስ፤ ጊዶ ኣቲን ኢታቲ ባንታ ኢታቴꬃን ኩንዴቴስ።
PRO 11:6 ሱሬታ ኢስታ ጺሎቴꬂ ኣሼስ፤ ጊዶ ኣቲን ማልቴቲ ባንታ ኢታ ኣሞን ኦይኬታና።
PRO 11:7 ኢታ ኣሲ ሃይቂዛ ዎዴ ኢዛ ሂዶታይ ሃዳ ጊዴስ፤ ባ ዎልቃን ኢዚ ጬቄቲዛዚ ኡባይካ ꬋዬስ።
PRO 11:8 ጺሎይ ሜቶፔ ኣቴስ፤ ጊዶ ኣቲን ሜቶይ ኢታ ኣሳ ቦላ ጋኬስ።
PRO 11:9 ኢታ ኣሲ ባ ዶናን ባ ላጌዛ ꬋይሴስ፤ ጊዶ ኣቲን ጺሎቲ ኤራቴꬃን ኬሲ ኤኪ ኣቴቴስ።
PRO 11:10 ጺሎታስ ኢንጄቲዛ ዎዴ ካታማይ ኡፋዬቴስ፤ ቃሴ ኢታቲ ꬋይዛ ዎዴ ሃሹ ጌስ።
PRO 11:11 ሱሬታ ኣንጆ ጋሶን ካታማይ ዲጬስ፤ ኢታ ሃሳያን ጊዲኮ ካታማይ ꬋዬስ።
PRO 11:12 ዎዚና ፓጬ ኣሲ ባ ሾሮዛ ካꬌስ፤ ኣኬካንቻ ኣሲ ጊዲኮ ባ ዶና ሺሺ ኤኬስ።
PRO 11:13 ዚጊርዛ ኣሲ ጹራ ላሌስ፤ ኣማኔቲዛ ኣሲ ጊዲኮ ጹራ ናጌስ።
PRO 11:14 ካሌꬆ ፓጬን ካዎቴꬂ ኩንዴስ፤ ዳሮ ዞራንቻቲ ዴኢኮ ሳሮይ ዴስ።
PRO 11:15 ኤሮንታ ኣሳስ ዋሴቲዛይ ሜቶን ጌሌስ፤ ዋሴ ጌላናስ ጫቆንታዴ ኣይኮይካ ቦቼና።
PRO 11:16 ኡሎ ኪያ ማጫሳያ ቦንቼታዉስ፤ ዎልቃꬂዛ ኣሳቲ ዱሬቴꬅ ጻላ ዱሬቴቴስ።
PRO 11:17 ኪያ ኣሲ ባና ጎኤስ፤ ሜንጼ ኢታ ኣሲ ጊዲኮ ባ ቦላ ሜቶ ኤሄስ።
PRO 11:18 ኢታ ኣሲ ዴሚዛ ዎꬌይ ዴና፤ ጺሎቴꬅ ዜሪዛ ኣሲ ጊዲኮ ሱሬ ዎይቶ ኤካና።
PRO 11:19 ጺሎይ ዴኦ ዴማና፤ ጊዶ ኣቲን ኢታቴꬅ ካሊዛ ኣሲ ሃይቃና።
PRO 11:20 ጎዳይ ኢታ ቆፋይ ዴኢዛ ኣሳታ ሻቴቴስ፤ ጊዶ ኣቲን ሱሬ ሄሜቲዛይታን ኡፋዬቴስ።
PRO 11:21 ኢታ ኣሲ ቃጻዬቶንታ ኣቴና፤ ጊዶ ኣቲን ጺሎቲ ቃጻዬቴቴና።
PRO 11:22 ኣኬካይ ፓጪዳ ማጫሳ ፑላቴꬂ ጉዱንꬃ ሲꬌን ኣꬂዳ ዎርቃ ማላ።
PRO 11:23 ጺሎታ ኣሞስ ዉርሴꬂ ሎኦ ጻላ፤ ጊዶ ኣቲን ኢታታ ኣሞስ ዉርሴꬂ ሃንቆ ጻላ።
PRO 11:24 ኢሲ ኢሲ ኣሳቲ ጮ ኪያቴꬅ ኢሜቴስ፤ ጊዶ ኣቲን ኢስታስ ኣቆይ ሃ ሃ ዳሬስ። ባጋቲ ኬሂ ኡዜቴቴስ፤ ጊዶ ኣቲን ኢስቲ ማንቂ ማንቂ ቤቴስ።
PRO 11:25 ኪያ ኣሲ ዱሬታና፤ ሃራታስ ኢሚዛይ ባስ ዎፓ ዴሜስ።
PRO 11:26 ጌማራ ካꬅ ዳጋሲዛዴ ዴሬይ ቃንጌስ፤ ኬሲ ባይዚዛዴይ ጊዲኮ ኣንጄቴስ።
PRO 11:27 ሎኦ ሚሽ ሚንꬂ ኮይዛዴ ሎኦ ሚሺ ናጌስ፤ ጊዶ ኣቲን ኢታ ሚሽ ኮይዛዴ ኢታ ሚሺ ጋኬስ።
PRO 11:28 ባ ዱሬቴꬃን ኣማኔቲዛ ኣሲ ኩንዳና፤ ጺሎቲ ጊዲኮ ሎኦ ሚꬃ ማላ ጪሊላና።
PRO 11:29 ሶ ኣሳ ቦላ ሺሮ ዴንꬂዛ ኣሲ ጎኣይ ባይንዳ ኣታና፤ ኤያቲካ ኣꬎ ኤራንቻታስ ኣይሌ ጊዳና።
PRO 11:30 ጺሎ ኣሲ ዴኦ ኣይፌ ኣይፊዛ ሚꬃ ማላ፤ ሼምፖታ ኣሺዛይ ኣꬎ ኤራንቻ።
PRO 11:31 ጺሎቲ ሳኣን ባንታ ኦሶ ዋጋ ኤኪዛ ጊዲኮ፥ ኢታቲኔ ናጋራንቻቲ ባንታ ኦሶስ ኤካና ዋጋይ ዋኒ ዳራንዴሻ!
PRO 12:1 ሴራ ዶሲዛ ኣሲ ኤራቴꬅ ዶሴስ፤ ጊዶ ኣቲን ሴራ ኢጺዛ ኣሲ ዳማ።
PRO 12:2 ሎኦ ኣሲ ጎዳፔ ሳባ ዴሜስ፤ ጊዶ ኣቲን ጎዳይ ጌናንቻታ ፒርዴስ።
PRO 12:3 ኣሲ ኢታቴꬃን ኤቂዲ ሚኒ ካንꬃናዉ ዳንዳዬና፤ ጺሎቲ ጊዲኮ ባ ዲዛሶፔ ቃጼቴና።
PRO 12:4 ዎዚናማ ማጫሳያ ባ ኬꬃዋስ ካላቻ ማላ፤ ዬላቺዛ ማቻ ባ ኣዚናስ ሜቄꬃ ጋርሳን ዲዛ ዎይዛዚሬ ሃርጌ ማላ።
PRO 12:5 ጺሎታ ቆፋይ ሱሬ፤ ኢታታ ዞሬይ ጊዲኮ ጪሞ።
PRO 12:6 ኢታታ ሃሳያይ ኣስ ዎꬌስ፤ ጺሎታ ሃሳያይ ጊዲኮ ኣስ ኣሼስ።
PRO 12:7 ኢታ ኣሳቲ ኩንዳና፤ ኢስታስ ዜሬꬂካ ኣቴና፤ ጺሎታ ዜሬꬂ ጊዲኮ ሚኒ ዳና።
PRO 12:8 ኣሲ ባ ኣꬎ ኤራቴꬃ ማላ ጋላቴቴስ፤ ጊዶ ኣቲን ጌላ ቆፋይ ዴኢዛ ኣሲ ካꬌቴስ።
PRO 12:9 ኣይኮይ ባይንዳ ዲሺን ዱሬ ኣሳ ማላ ጬቄቲዛ ኣሳፔ ባና ዚቂ ሂስቲ ባስ ኦꬂ ኣቂዛ ኣሲ ኪያ።
PRO 12:10 ጺሎ ኣሲ ባ ሜሄስ ቃꬌቴስ፤ ኢታ ኣሲ ኪያቴስ ጊኮካ ሜንጼ ኢታ።
PRO 12:11 ባ ቢታ ሚንꬂ ኦꬂዛ ኣሲ ካꬅ ካሌስ፤ ኣኬካይ ፓጪዳ ኣሲ ጎኣይ ባይንዳ ሂዶታ ጎዴስ።
PRO 12:12 ናጋራንቻቲ ኢታቲ ዲኢ ኤሂዳይሳ ኣሞቴቴስ፤ ጺሎታ ዜሬꬂ ጊዲኮ ዳያና።
PRO 12:13 ኢታ ኣሲ ባ ሃሳይዳ ኢታ ሃሳያን ኦይኬቴስ፤ ጺሎይ ጊዲኮ ሜቶፔ ኬሲ ኤኪ ኣቴስ።
PRO 12:14 ኣሲ ባ ዶናፔ ኬኢዛ ቃላን ሎኦ ሚሽ ካሌስ፤ ባ ኦꬂዳ ኦሶ ዋጋካ ዴሜስ።
PRO 12:15 ኤያ ኣሳስ ኢዚ ቢዛ ኦጌይ ኢዛስ ሎኦ ሚሳቴስ፤ ኣꬎ ኤራንቻይ ዞሬ ሲዬስ።
PRO 12:16 ኤያ ኣሳ ሃንቆይ ሄራካ ኤሬቴስ፤ ጪንጫ ኣሲ ጊዲኮ ጫሼ ዉዱ ጌና።
PRO 12:17 ሱሬ ማርካይ ቱማ ማርካቴስ፤ ዎርዶይ ጊዲኮ ዎርዶ ማርካቴስ።
PRO 12:18 ኣኬኮንታ ሃሳይዛ ሃሳያይ ቶራ ማላ ጫዴስ፤ ኣꬎ ኤራንቻ ኢንጻርሲ ጊዲኮ ፓꬄስ።
PRO 12:19 ዎርዶ ሃሳያይ ጉꬃ ዎዴሳ፤ ቱማ ሃሳያይ ጊዲኮ ሜርናሳ።
PRO 12:20 ኢታ ቆፒዛይታ ዎዚናን ባሌꬆይ ዴስ፤ ጊዶ ኣቲን ሳሮ ሚሽ ቆፒዛይታ ዎዚናን ኡፋይሲ ዴስ።
PRO 12:21 ጺሎታ ቆሆይ ጋኬና፤ ኢታቲ ጊዲኮ ሜቶ ካላና።
PRO 12:22 ጎዳይ ዎርዶ ሃሳያ ሃራሴቴስ፤ ቱማንቻታን ጊዲኮ ኡፋዬቴስ።
PRO 12:23 ኣኬካራ ዲዛ ኣሲ ባ ኤራቴꬅ ቆቴስ፤ ዎዚናይ ባይንዳ ኣሲ ባ ኤያቴꬃ ናሼስ።
PRO 12:24 ሚኒ ኦꬂዛ ኣሲ ዴሬ ሃሬስ፤ ኣዛላይ ኣይሌ ጊዴስ።
PRO 12:25 ሂርጋን ኩሚዳ ዎዚናይ ኣስ ጬጬን ዬጌስ፤ ሾንጋራ ዲዛ ሃሳያይ ጊዲኮ ኡፋይሴስ።
PRO 12:26 ጺሎ ኣሲ ባ ላጌ ሎኦ ዞሬ ዞሬስ፤ ኢታታ ዞሬይ ጊዲኮ ቱማ ኦጌፔ ሃሴስ።
PRO 12:27 ኣዛላ ኣሲ ሻንካቲዲ ኤሂዳ ኣሾዛ ጺጼና፤ ሚኒ ኦꬂዛ ኣሲ ጊዲኮ ባ ኣቆታስ ሚሼቴስ።
PRO 12:28 ጺሎቴꬃ ኦጌን ዴኦይ ዴስ፤ ሄ ኦጌን ሃይቆይ ዴና።
PRO 13:1 ኤራ ናይ ባ ኣዋ ዞሬ ዎዚናፔ ሲዬስ፤ ቂልጪዛይ ጊዲኮ ሴራ ሲዬና።
PRO 13:2 ኣሲ ባ ዶናፔ ኬኢዛ ቃላን ሎኦ ሚሽ ዴሜስ፤ ኣማኔቶንታይቲ ጊዲኮ ማካላቴꬅ ኣሞቴቴስ።
PRO 13:3 ባ ዶና ናጊዛ ኣሲ ባ ሼምፖ ናጌስ፤ ዶናን ዪዳ ማላ ሃሳይዛ ኣሲ ባና ꬋይሴስ።
PRO 13:4 ኣዛላይ ኬሂ ኣሞቴስ ሺን ኣይኮካ ዴሜና፤ ሚኒ ኦꬂዛይታ ኣሞይ ጊዲኮ ኩማና።
PRO 13:5 ጺሎ ኣሳቲ ዎርዶ ሃሳያ ኢጼቴስ፤ ኢታ ኣሳታ ሃሳያይ ጊዲኮ ዬላሴሲኔ ካዉሼስ።
PRO 13:6 ጺሎቴꬂ ሱሬ ኣስ ናጌስ፤ ኢታቴꬂ ጊዲኮ ናጋራንቻ ꬋይሴስ።
PRO 13:7 ኣይኮይ ባይንዳ ባና ዱሬ ሚሳቲሲዛ ኣሲ ዴስ፤ ሃራ ባጋራ ባስ ዳሮ ኣቆታይ ዲሺን ማንቆ ሚሳቲ ቤቲዛ ኣሲ ዴስ።
PRO 13:8 ኣሲ ባ ዱሬቴꬃን ባ ሼምፖ ዎዛና ጊዳና፤ ማንቆይ ጊዲኮ ሂርጋይ ባይንዳ ኡቴስ።
PRO 13:9 ጺሎታ ፖኦይ ኬሂ ፖኤስ፤ ኢታታ ጾምፔይ ጊዲኮ ቶኣና።
PRO 13:10 ኦቶሮይ ኦሽ ዬሌስ፤ ኣꬎ ኤራቴꬂ ጊዲኮ ዞሬ ኤኪዛይታ ማታን ዴስ።
PRO 13:11 ቤሶንታ ኦጌራ ዴሚዳ ሚሺ ꬋዪ ꬋዪ ቤስ፤ ባ ጫዋ ጉሲዲ ዴሚዳ ኣቆታይ ዳሪ ዳሪ ቤስ።
PRO 13:12 ሂዶታይ ፖሌቶንታ ጋምኢኮ ዎዚናይ ሜቄስ፤ ጊዶ ኣቲን ኣሞቲዳይሲ ፖሌቲሺን ኡፋይሴስ።
PRO 13:13 ዞሬ ካꬊዛ ኣሲ ሜቶን ጌሌስ፤ ኣዛዞ ቦንቺዛ ኣሲ ጊዲኮ ባ ዋጋ ኤካና።
PRO 13:14 ኣꬎ ኤራንቻይ ኢሚዛ ቲሚርቴይ ዴኦ ፑልቶ፤ ሄሲ ኣሲ ሃይቆ ዎጺማዴን ጌሎንታ ማላ ናጌስ።
PRO 13:15 ኣኬካይ ዴኢዛ ኣሲ ቦንቼቴስ፤ ኣማኔቶንታ ኣጎይ ባሻ ኦጌ ኤፌስ።
PRO 13:16 ኣኬኪዛ ኣሲ ኤራን ኦꬄስ፤ ኤያይ ጊዲኮ ባ ኤያቴꬃ ቆንጪሴስ።
PRO 13:17 ኢታ ኣሲ ኪቴቲኮ ሜቶን ጌሌስ፤ ኣማኔቲዳ ኣሲ ኪቴቲኮ ሳሮቴꬅ ኤሄስ።
PRO 13:18 ሴራ ኢጺዛ ኣሲ ማንቄሲኔ ካዉዬስ፤ ሃንቆ ሲዪዛ ኣሲ ጊዲኮ ቦንቼቴስ።
PRO 13:19 ኣሞይ ፖሌቲኮ ኬሂ ኡፋይሴስ፤ ኤያቲ ጊዲኮ ኢታፔ ሃካናስ ኮዬቴና።
PRO 13:20 ኣꬎ ኤራንቻታራ ሄሜቲዛ ኣሲ ኣꬎ ኤራንቻ ጊዴስ፤ ጊዶ ኣቲን ኤያታራ ሄሜቲዛ ኣሲ ሜቶን ጌሌስ።
PRO 13:21 ናጋራንቻታ ኢታ ቃዳይ ካሌስ፤ ዱሬቴꬂ ጊዲኮ ጺሎታስ ኢሜቲዛ ዎይቶ።
PRO 13:22 ሎኦ ኣሲ ባስ ና ናይታ ጋካናስ ላቲሴስ፤ ናጋራንቻ ኣቆታይ ጊዲኮ ጺሎታስ ዳጋቴስ።
PRO 13:23 ማንቆ ጋዴይ ዳሮ ካꬅ ኢማና ዳንዳዬስ፤ ጊዶ ኣቲን ሱሬ ፒርዳይ ꬋይኮ ፒቴቲ ꬋዬስ።
PRO 13:24 ሴሮንታ ዲቺዛይ ባ ና ኢጼስ፤ ጊዶ ኣቲን ሴሪ ዲቺዛይ ባ ና ዶሴስ።
PRO 13:25 ጺሎይ ካላናሼ ጋካናስ ሜስ፤ ኢታቲ ጊዲኮ ጋፊዳ ማላ ዳና።
PRO 14:1 ኣꬎ ኤራቴꬂ ዲዛ ማጫሳያ ባ ኬꬅ ኬጻዉስ፤ ኤያያ ጊዲኮ ባ ኬꬅ ባ ኩሼን ላላዉስ።
PRO 14:2 ሱሬ ሄሜቲዛ ኣሲ ጎዳስ ያዬስ፤ ጌላ ኦጌ ሄሜቲዛይ ጊዲኮ ኢዛ ካꬌስ።
PRO 14:3 ኤያ ሃሳያይ ኢዛ ዞኮስ ጋቱማ ኤሄስ፤ ኣꬎ ኤራንቻታ ኢንጻርሳይ ጊዲኮ ኢስታ ናጌስ።
PRO 14:4 ቦራይ ባይንዳሶን ጎታራይ ሜላ ዴስ፤ ጊዶ ኣቲን ኔስ ቦራታ ዎልቃን ዳሮ ካꬂ ቤቴስ።
PRO 14:5 ኣማኔቲዛ ማርካይ ኡባቶ ቱማ ማርካቴስ፤ ዎርዶ ማርካይ ጊዲኮ ዎርዶ ማርካቴስ።
PRO 14:6 ቂልጪዛይ ኣꬎ ኤራቴꬅ ኮይኮካ ዴሜና፤ ኣኬካይ ዲዛ ኣሲ ዋዬቶንታ ኤራቴꬅ ዴሜስ።
PRO 14:7 ኤያ ኣሳፔ ሃካ፤ ኣይስ ጊኮ ኔኒ ኢዛ ሃሳያፔ ኤራቴꬅ ዴማካ።
PRO 14:8 ኣኬካንቻ ኣሳስ ኣꬎ ኤራቴꬂ ባ ኦጌ ናጎ፤ ኤያታ ኤያቴꬂ ጊዲኮ ኢስታ ጪሜስ።
PRO 14:9 ኤያቲ ናጋራ ኦꬂዲ ሞꬌታናይሳ ኣጊዲ ቂልጬቴስ፤ ሱሬ ኣሳታፔ ጊዲኮ ሎኦ ቆፋይ ቤቴስ።
PRO 14:10 ኢሶይ ኢሶይ ባ ዎዚናን ዲዛ ጬጬ ኤሬስ፤ ኢዛ ኡፋይሳ ኦኒካ ኢዛራ ኮጼና።
PRO 14:11 ኢታታ ኬꬃይ ላሌታና፤ ሱሬታ ኬꬃይ ጊዲኮ ሚኒ ዴኣና።
PRO 14:12 ኣሳስ ሊኬ ሚሳቲዛ ኦጌይ ዴስ፤ ዉርሴꬃን ጊዲኮ ሃይቆስ ጋꬄስ።
PRO 14:13 ሚቻንካ ዎዚናይ ሜቂ ኤሬስ፤ ሙዞቴꬃን ኡፋይሲ ፖሌታና ዳንዳዬስ።
PRO 14:14 ባ ዎዚና ጺሎቴꬃፌ ሃሲዛይቲ ባ ኦሶ ዋጋ ኤካና፤ ሎኦ ኣሲካ ባ ሎኦ ኦሶ ዋጋ ኤካና።
PRO 14:15 ኤያ ኣሲ ኡባ ሚሽ ኣማኔስ፤ ጪንጫይ ጊዲኮ ኣኬኪዲ ታንጌስ።
PRO 14:16 ኣꬎ ኤራንቻይ ጎዳስ ያዬሲኔ ሳቲ ታንጌስ፤ ኢታፔካ ሃኬስ፤ ኤያይ ጊዲኮ ዉዳይ ባይንዳ ቢቻሬስ።
PRO 14:17 ኤሌ ሃንቄቲዛ ኣሲ ኤያ ኦሶ ኦꬄስ፤ ዮኦ ቃቺዛ ኣሲ ዶሴቴና።
PRO 14:18 ዎዚና ፓጬቲ ኤያቴꬅ ላታና፤ ኣኬካንቻቲ ጊዲኮ ኤራቴꬅ ካላቻ ማላ ጎጻና።
PRO 14:19 ኢታቲ ሎኦታ ሲንꬃን ጉልባታና፤ ናጋራንቻቲ ጺሎታ ፔንጌን ሆካና።
PRO 14:20 ማንቆታ ኢስታ ላጌቲካ ኢጼቴስ፤ ዱሬታስ ጊዲኮ ዳሮ ላጌቲ ዴቴስ።
PRO 14:21 ባ ሾሮ ካꬊዛ ኣሲ ናጋራ ኦꬄስ፤ ጊዶ ኣቲን ማንቆ ማዲዛይ ኣንጄቲዳይሳ።
PRO 14:22 ኢታ ሃልቺዛይቲ ሱሬ ኦጌፔ ካሬ ኬዜቴስ ዴቴኔ? ሎኦ ቆፒዛይቲ ጊዲኮ ሲቆኔ ኣማኔቴꬅ ኤሄቴስ።
PRO 14:23 ሚኒ ኦሶን ኡባን ዎꬌይ ዴስ፤ ሃዳ ዮኦይ ጊዲኮ ማንቂሴስ።
PRO 14:24 ኣꬎ ኤራንቻታስ ኢስታ ዱሬቴꬂ ኢስታስ ካላቻ፤ ኤያታ ኤያቴꬂ ጊዲኮ ጮ ሃዳ።
PRO 14:25 ቱሙ ማርካይ ሼምፖ ኣሼስ፤ ዎርዶ ማርካይ ጊዲኮ ባሌꬄስ።
PRO 14:26 ጎዳስ ያዪዛ ኣሳስ ሚኖ ሚጻይ ዴስ፤ ኢዛ ናይታስካ ባቃቲ ኣቲዛ ሶሆይ ዴስ።
PRO 14:27 ጎዳስ ያሺ ዴኦ ፑልቶ፤ ሃይቆ ዎጺማዴፔ ኣስ ኣሼስ።
PRO 14:28 ዴሬ ጮራቴꬃይ ካዎስ ቦንቾ፤ ዴሬ ጉꬃቴꬂ ካዎስ ባሽ ጊዴስ።
PRO 14:29 ዳንዳያንቻ ኣሳስ ጊታ ኣኬካይ ዴስ፤ ኤሌ ሃንቄቲዛ ኣሲ ጊዲኮ ባ ኤያቴꬅ ቆንጪሴስ።
PRO 14:30 ዎፑ ጊዳ ዎዚናይ ቦላስ ፓያቴꬅ ኢሜስ፤ ቃናቴይ ጊዲኮ ሜቄꬃ ጊዶን ጌሊዳ ዎይዛዚሬ ማላ።
PRO 14:31 ማንቆታ ናቂዛ ኣሲ ኢስታ ሜꬊዳይሳ ጫዬስ፤ ሜቶታንቻታስ ቃꬌቲዛ ጊዲኮ ጾሳ ቦንቼስ።
PRO 14:32 ኢታቲ ባንታ ኢታ ኦሶን ኩንዳና፤ ጊዶ ኣቲን ጺሎቲ ሃይቆ ዎዴካ ባቃቲ ኣቲዛሶይ ዴስ።
PRO 14:33 ኣኬካንቻ ኣሳ ዎዚናን ኣꬎ ኤራቴꬂ ኩሚዴስ፤ ጊዶ ኣቲን ኤያቲ ኣꬎ ኤራቴꬃ ጊሻስ ኣይኮካ ኤሬቴና።
PRO 14:34 ጺሎቴꬂ ካዎቴꬃ ꬎቁ ꬎቁ ኦꬄስ፤ ጊዶ ኣቲን ናጋራይ ኣይ ኣሲካ ካዉሼስ።
PRO 14:35 ኣꬎ ኤራቴꬂ ዲዛ ኣይሌይ ካዎ ኡፋይሴስ፤ ጊዶ ኣቲን ዬላቺዛ ኣይሌይ ባ ቦላ ሃንቆ ኤሄስ።
PRO 15:1 ሊቆ ዛሮይ ሃንቆ ኢርጺሴስ፤ ፖርዶሎ ቃላይ ጊዲኮ ሃንቆ ዴንꬄꬄስ።
PRO 15:2 ኣꬎ ኤራንቻ ኢንጻርሳፌ ኤራቴꬂ ፑልቴስ፤ ጊዶ ኣቲን ዶጋታ ዶናፔ ኤያቴꬂ ፑልቴስ።
PRO 15:3 ጎዳ ኣይፌቲ ኡባሶ ጼሌቴስ፤ ኢታታኔ ሎኦታ ኡባ ሎኤꬂ ቤኤቴስ።
PRO 15:4 ሾንጋይ ዴኢዛ ሎኦ ሃሳያይ ዴኦ ሚꬃ ማላ፤ ጊዶ ኣቲን ባሌꬆ ሃሳያይ ኣያና ቆሄስ።
PRO 15:5 ኤያይ ባ ኣዋ ሴራ ካꬌስ፤ ጊዶ ኣቲን ዞሬ ኤኪዛይ ባ ኣኬካቴꬃ ቆንጪሴስ።
PRO 15:6 ጺሎ ኣሳ ኬꬃን ዳሮ ኣቆታይ ዴስ፤ ጊዶ ኣቲን ኢታታስ ጌሊዛ ሚሺ ሜቶ ኤሄስ።
PRO 15:7 ኣꬎ ኤራንቻታ ዶናይ ኤራቴꬅ ዜሬስ፤ ኤያታ ዎዚናይ ጊዲኮ ሄሳ ማላ ዴና።
PRO 15:8 ጎዳይ ኢታታ ያርሾ ሻቴቴስ፤ ሱሬታ ዎሳይ ጊዲኮ ኢዛ ኡፋይሴስ።
PRO 15:9 ጎዳይ ኢታ ኣሳታ ኦጌ ሻቴቴስ፤ ጊዶ ኣቲን ጺሎቴꬅ ካሊዛይታ ዶሴስ።
PRO 15:10 ሱሬ ኦጌ ኣጊዲ ካሬ ኬኢዳዴ ሃንቆይ ናጌስ፤ ሴራ ኢጺዛ ኣሲ ሃይቄስ።
PRO 15:11 ዱፎኒኔ ꬋዮ ጊዶን ዲዛይሲ ጎዳ ሲንꬃን ቆንጬ፤ ሂስቲን ኣሳ ዎዚና ቆፋይ ዋኒ ኢዛፔ ጌማኔ?
PRO 15:12 ቂልጪዛ ኣሲ ሴራ ዶሴና፤ ኣꬎ ኤራንቻታፔካ ዞሬ ኦይቼና።
PRO 15:13 ዎዚና ኡፋይሲ ሲንꬅ ፖኢሴስ፤ ዎዚና ጬጬይ ጊዲኮ ኣያና ቆሄስ።
PRO 15:14 ኣኬኪዛ ዎዚናይ ኤራቴꬅ ኮዬስ፤ ጊዶ ኣቲን ዶጋታ ዶናይ ኤያቴꬅ ባንቺኬስ።
PRO 15:15 ማንቆታ ዴኦይ ኡባ ጋላሲካ ባጼ። ኡፋዬቲዛ ኣሳቲ ኡባቶካ ባንታ ዴኦን ኡፋዬቴቴስ
PRO 15:16 ኦሺ ዲዛሶን ዲዛ ጊታ ኣቆታፔ ጎዳ ያሻቴꬃራ ዲዛ ጉꬃ ኣቆታይ ኣꬌስ።
PRO 15:17 ኦሺ ዲዛሶን ሞꬎ ኣሾ ማናፔ ሲቆይ ዲዛሶን ሳንꬅ ሙሲ ኣꬌስ።
PRO 15:18 ኤሶን ሃንቄቲዛ ኣሲ ኦሽ ኬሴስ፤ ዳንዳይዛ ኣሲ ጊዲኮ ኦሽ ኢርጺሴስ።
PRO 15:19 ኣዛላ ኣሳ ኦጌይ ኣጉንꬃን ዲሬቲ ኡቲዴስ፤ ሱሬ ኣሳ ኦጌይ ጊዲኮ ባሳ ጊዴስ።
PRO 15:20 ኣꬎ ኤራራ ዲዛ ናይ ባ ኣዋ ኡፋይሴስ፤ ጊዶ ኣቲን ኤያ ናይ ባ ኣዮ ካꬌስ።
PRO 15:21 ዎዚና ፓጬ ኣሲ ባ ኤያቴꬃን ኡፋዬቴስ፤ ጊዶ ኣቲን ኣኬኪ ሱሬ ኦጌ ካሌስ።
PRO 15:22 ዞሬይ ꬋይኮ ሃልቾይ ኦጌን ኣቴስ፤ ዳሮ ዞራንቻቲ ዲዛሶን ሃልቾይ ፖሌቴስ።
PRO 15:23 ኣሲ ቤሲዛ ዛሮ ኢሚዲ ኡፋይስ ዴሜስ፤ ኮሺዛ ዎዴን ኢሜቲዳ ቃላይ ኣይ ማላ ሎኦ!
PRO 15:24 ዱጌ ዱፎን ዎꬂዛ ኦጌ ቦንታ ማላ ዴኦ ኦጌይ ኣꬎ ኤራንቻ ፑዴ ካሌꬃዉስ።
PRO 15:25 ጎዳይ ኦቶራንቻታ ኬꬃ ላሌስ፤ ጊዶ ኣቲን ኣምኤይ ዛዋ ናጌስ።
PRO 15:26 ጎዳይ ኢታታ ቆፋ ሻቴቴስ፤ ጌሻታ ቆፋይ ጊዲኮ ኢዛ ኡፋይሴስ።
PRO 15:27 ኡዜ ኣሲ ባሶ ኣሳ ቦላ ሜቶ ኤሄስ፤ ጊዶ ኣቲን ማታኤ ኢጺዛ ኣሲ ፓጻ ዳና።
PRO 15:28 ጺሎ ኣሲ ሃሳያናፔ ካሴቲዲ ቆፔስ፤ ጊዶ ኣቲን ኢታ ኣሳ ዶናፔ ኢታ ቃላይ ጎጌስ።
PRO 15:29 ጎዳይ ኢታታፔ ሃኮን ዴስ፤ ጊዶ ኣቲን ጺሎታ ዎሳ ሲዬስ።
PRO 15:30 ፓሽካ ሃኖይ ዎዚና ኡፋይሴስ፤ ሚሺራቾ ቃላይ ሜቄꬅ ጪሊሊሴስ።
PRO 15:31 ዴኦ ኢሚዛ ሴራ ኤኪዛ ኣሲ ኣꬎ ኤራንቻታራ ኢሲፌ ዳና።
PRO 15:32 ሴራ ኢጺዛ ኣሲ ባና ካꬌስ፤ ሴራ ኤኪዛ ኣሲ ጊዲኮ ኣኬካ ዴሜስ።
PRO 15:33 ጎዳስ ያሺ ኣꬎ ኤራቴꬅ ታማርሴስ፤ ቦንቼታና ኮዪዳ ኣሲ ኮይሮ ባና ካዉሻናስ ኮሼስ።
PRO 16:1 ኣሲ ባ ዎዚናን ሃልቼስ፤ ጊዶ ኣቲን ዛሮይ ጎዳፔ ቤቴስ።
PRO 16:2 ኣሲ ቢዛ ኦጌ ኡባይ ኢዛስ ሎኦ ሚሳቴስ፤ ጎዳይ ኮይሮ ዴንꬃ ቆፋ ጫዲ ጼሌስ።
PRO 16:3 ኔ ኦꬂዛ ኡባ ሃዳራ ጎዳስ ኢማ፤ ሂስቲኮ ኔ ሃልቾይ ፖሌታና።
PRO 16:4 ጎዳይ ኡባ ሚሽ ሜꬊዳ ጋሶይካ ዴስ፤ ማካላንቻታ ጊዲኮካ ባሻ ጋላሳስ ጊግሲ ዎꬂዴስ።
PRO 16:5 ጎዳይ ኦቶሬቲዛ ኡባ ሻቴቴስ፤ ኢስቲ ቃጻዬቶንታ ኣቴቴና።
PRO 16:6 ሲቆኒኔ ኣማኔቴꬃን ናጋራይ ኣቶ ጌቴቴስ፤ ጎዳስ ያሻቴꬃን ኣሲ ኢታፔ ሃኬስ።
PRO 16:7 ኣሳ ሄሜታይ ጎዳ ኡፋይሲዛዝ ጊዲኮ ኢዛ ሞርኬቲ ኢዛራ ሳሮ ዳና ማላ ኦꬄስ።
PRO 16:8 ጺሎቴꬃን ቤቲዛ ጉꬃ ሚሺ ዎርዶራ ዴሚዛ ዳሮ ዎꬌፔ ኣꬌስ።
PRO 16:9 ኣሲ ባ ዎዚናን ባ ኦꬃና ሚሽ ሃልቼስ፤ ሃልቾዚ ጎዳይ ጊኮ ፖሌቴስ።
PRO 16:10 ካዎ ሜቴርሻቲ ጾሳፌ ኤኪዳ ማታን ሃሳዬቴስ፤ ኢዛ ኢንጻርሲ ፒርዳ ጌላሳናስ ቤሴና።
PRO 16:11 ሱሬ ጌዳራቲኔ ማካ ሚሻቲ ጎዳፔ፤ ካራጺቴ ጊዶን ዲዛ ጌዳራቲ ኡባይ ኢዛ ኦሶታ።
PRO 16:12 ካዎቲ ኢታ ኦሶ ሃራሴቴቴስ፤ ኣይስ ጊኮ ካዎቴꬃ ኣራታይ ጺሎቴꬃን ኤቄስ።
PRO 16:13 ጺሎ ሃሳያን ካዎቲ ኡፋዬቴቴስ፤ ቱማ ሃሳይዛይታካ ዶሴቴስ።
PRO 16:14 ካዎ ሃንቆይ ሃይቆ ኪታንቻ ማላ፤ ኣꬎ ኤራንቻይ ጊዲኮ ሃንቆ ኢርጺሴስ።
PRO 16:15 ካዎይ ፓሽኪ ጊሺን ዴኦይ ዴስ፤ ኢዛስ ኪያቴꬂ ኢራ ቶኪዳ ባꬌሳ ሻራ ማላ።
PRO 16:16 ኣꬎ ኤራቴꬃ ዴሞይ ዎርቃ ዴሚዛይሳፌ ኣꬌስ፤ ኣኬካ ዴሞይ ቢራ ዴሞፔካ ኣꬌስ።
PRO 16:17 ሱሬታ ኦጌይ ኢታታፔ ሃኮን ዴስ፤ ባ ሄሜታ ናጊዛ ኣሲ ባ ሼምፖ ናጌስ።
PRO 16:18 ኦቶሮ ጌዶ ባሺ ካሌስ፤ ሃላጫ ጌዶካ ኩንዴꬂ ካሌስ።
PRO 16:19 ኦቶራንቻታራ ዙፔቲዲ ዲኢ ኤሂዳ ሚሽ ሻኬቲ ኤካናፔ ማንቆታራ ማንቄቴꬃን ዱሲ ኪያ።
PRO 16:20 ዞሬ ኤኪዛ ኣሲ ዱሬቴስ፤ ጎዳን ኣማኔቲዛ ኣሲ ኣንጄቲዳዴ።
PRO 16:21 ዎዚናን ኣꬎ ኤራንቻ ጊዲዳ ኣሳቲ ኣኬካንቻ ጌቴቴቴስ፤ ሎኦ ቃላይ ኤራቴꬅ ጉጄስ።
PRO 16:22 ባስ ሚሽ ኦꬂዳዴስ ኣኬካይ ዴኦ ፑልቶ፤ ዶጋታስ ጊዲኮ ኤያቴꬂ ሃንቆ ኤሄስ።
PRO 16:23 ኣꬎ ኤራንቻ ዎዚናይ ኢዛ ዶና ካሌꬄስ፤ ኢዛ ሜቴርሻቲካ ኤራቴꬅ ጉጂ ጉጂ ቤቴስ።
PRO 16:24 ሎኦ ቃላይ ኤሳ ኢሊሎ ማላ ማልኤስ፤ ቦላካ ማዴሲኔ ፓꬄስ።
PRO 16:25 ኣሳስ ሱሬ ሚሳቲዛ ኦጌይ ዴስ፤ ጊዶ ኣቲን ዉርሴꬃን ሃይቆስ ጋꬄስ።
PRO 16:26 ካꬃ ኮሺ ኣሲ ሚኒ ኦꬃና ማላ ዴንꬄꬄስ፤ ጋፋይካ ኦሶስ ሚንꬄꬄስ።
PRO 16:27 ኢታ ኣሲ ኢታቴꬅ ቆፔስ፤ ኢዛ ሃሳያይካ ጹጊዛ ታማ ማላ።
PRO 16:28 ጌላ ኣሲ ኦሽ ዴንꬄስ፤ ዚጊርሲ ኣማኔቲዛ ላጌታ ሻኬስ።
PRO 16:29 ጌኔ ኣሲ ባ ሾሮዛ ጪሜስ፤ ሎኦ ጊዶንታ ኦጌ ኢዛ ካሌꬄስ።
PRO 16:30 ኣይፌራ ቂምኦቲ ቤሲዛ ኣሲ ጌላቴꬅ ቆፔስ፤ ባ ሜቴርሻ ሳጺዛ ኣሲ ኢታሶ ቤስ።
PRO 16:31 ፑሉንꬂ ቦንቾ ካላቻ፤ ሄሲ ጺሎቴꬃ ዱሳን ቤቴስ።
PRO 16:32 ዎልቃማ ኣስ ጊዳናፔ ዳንዳያ ኣስ ጊዴꬅ ሎኦ፤ ባና ሃሪዛዴይ ካታማ ዎልቃን ሃሪዛዴፌ ኣꬌስ።
PRO 16:33 ኣሲ ሳማ ዬጌስ፤ ጊዶ ኣቲን ዉርሴꬃ ፖሎ ኢሚዛይ ጎዳ።
PRO 17:1 ኦሺ ዴኢዛሶን ዴኢዛ ጊታ ጊቢራ ማናፔ ሳሮይኔ ዎፓይ ዴኢዛሶን ኡኬꬃ ሜላ ሜꬂ ኪያ።
PRO 17:2 ኣኬካንቻ ኣይሌስ ሹፉሮ ጊዲዳ ባ ጎዳ ና ቦላ ማታይ ዴስ፤ ሂስቲዲ ኢሻንታ ማላ ኢስታራ ኢሲፌ ላቴስ።
PRO 17:3 ዎርቃይኔ ቢራይ ታማን ፓጬቲዛይሳ ማላ ጎዳይ ኣሳ ዎዚና ፒልጊ ጼሌስ።
PRO 17:4 ኢታ ኣሲ ኢታ ሃሳያ ሲዬስ፤ ዎርዳንቻይካ ጌናንቻ ሃሳያ ኤዝጌስ።
PRO 17:5 ሂዬሳታ ቦላ ቂልጪዛ ኣሲ ኢስታ ሜꬊዳይሳ ጫዬስ፤ ሃራ ኣስ ጋኪዛ ሜቶን ኡፋዬቲዛ ኣሲ ቃጻዬቶንታ ኣቴና።
PRO 17:6 ናይታ ናይቲ ጪሚዳ ኣሳታስ ካላቻ፤ ዬሊዳይቲ ባንታ ናይታስ ቦንቾ።
PRO 17:7 ሎኦ ሃሳያይ ኤያስ ጊጌና፤ ዎርዶ ሃሳያይ ዴሬ ኣይሲዛዴስ ኣይ ማላ ዴጾ!
PRO 17:8 ማታኤይ ኢሚዛዴስ ቢታ ማላ፤ ኢዚ ቢዳ ሶሆ ኡባን ኢዛስ ኢንጄታና ሚሳቴስ።
PRO 17:9 ቆሄቲዲ ባ ቆሆዛ ጌንꬂዛ ኣሲ ሲቆ ኮዬስ፤ ጊዶ ኣቲን ዮኦ ዛሪ ዛሪዲ ፒቂዛ ኣሲ ኣማኔቲዛ ላጌታ ሻኬስ።
PRO 17:10 ኤያይ ጼቱቶ ሊሶን ሾጪን ኤሪዛይሳፌ ኣኬካይ ዴኢዛ ኣሲ ጮ ሴሪን ኤሪዛይሲ ኣꬌስ።
PRO 17:11 ኢታ ኣሲ ማካላ ሚሽ ጻላ ኮዬስ፤ ሄሳ ጊሻስ ኢዛ ቦላ ሜንጼ ኢታ ኣሲ ኪቴታና።
PRO 17:12 ኤያ ኣሳራ ኢዛ ኤያቴꬃ ማላ ጋይታናፔ ማራታ ቦንቂ ኤኪቺዳ ማሄይራ ጋይቴꬂ ኪያ።
PRO 17:13 ሎኦ ኦꬂዳዴስ ኢታ ዛሪዛዴሶፔ ኢታይ ሙሌካ ꬋዬና።
PRO 17:14 ኦሽ ዶሜꬂ ኤሌ ሃꬅ ፖጊ ዬዶ ማላ፤ ሄሳ ጊሻስ ኦሺ ሜꬌታናፔ ካሴታዳ ኪቻይቻ።
PRO 17:15 ዎርዳንቻ ጺሎ ጺሎዛ ዎርዶ ጉሲ ናምኣይካ ጎዳ ሲንꬃን ኢጼቲዳ ኦሶ።
PRO 17:16 ኣꬎ ኤራቴꬅ ዴማናስ ኢዚ ኮዮንታ ጊሻስ ኤያ ኩሼን ጌሊዳ ሚሽ ኢዛ ኣይ ጎኣኔ?
PRO 17:17 ላጌይ ኣይ ዎዴካ ላጌ፤ ኢሻይካ ሜቶ ዎዴስ ዬሌቴስ።
PRO 17:18 ኣኬካይ ፓጪዳ ኣሲ ባቂ ጫቂዲ ሃራ ኣሳስ ዋሴ ጌሌስ።
PRO 17:19 ኦሽ ዶሲዛ ኣሲ ናጋራ ዶሴስ፤ ኡባቶ ባና ꬎቁ ሂስቲዛዴይ ባ ቦላ ባሽ ጼይጌስ።
PRO 17:20 ጌላ ቆፋይ ዴኢዛዴስ ኢንጄቴና፤ ዎርዶ ሃሳይዛ ኣሲካ ሜቶን ጌሌስ።
PRO 17:21 ኤያ ና ዬሎይ ጬጪሴስ፤ ኤያ ና ኣዋስ ኡፋይሲ ዴና።
PRO 17:22 ኡፋዬቲዛ ዎዚናይ ሎኦ ꬋሌ፤ ጊዶ ኣቲን ሜቂዳ ዎዚናይ ኣሳስ ዎልቃ ꬋይሴስ።
PRO 17:23 ኢታ ኣሲ ፒርዳ ጌላሳናስ ጌማን ማታኤ ኤኬስ።
PRO 17:24 ኣኬካይ ዴኢዛ ኣሲ ኣꬎ ኤራቴꬅ ባ ሲንꬃፌ ꬋይሴና፤ ጊዶ ኣቲን ኤያ ኣይፌይ ሳኣ ጋጻ ጋካናስ ዩዬስ።
PRO 17:25 ኤያ ናይ ባ ኣዋ ጬጪሴስ፤ ባና ዬሊዳ ኣዮካ ጹጌስ።
PRO 17:26 ጺሎ ኣስ ቃጻዮ ቤሴና፤ ሱሬ ኣስ ሾጮይ ሎኦ ጊዴና።
PRO 17:27 ኣማርዳ ቃላ ሃሳይዛ ኣሲ ኣꬎ ኤራንቻ፤ ዎፓ ኣያናይ ዴኢዛ ኣሲካ ኣኬካንቻ።
PRO 17:28 ኤያ ኣሲ ጮኡ ጊኮ ኣꬎ ኤራንቻ ሚሳቴስ፤ ባ ዶናካ ሺሺ ኦይኪኮ ኣኬካንቻ ሚሳቴስ።
PRO 18:1 ላጌቴꬅ ኮዮንታ ኣሲ ባ ኣሞ ካሌስ፤ ሱሬ ፒርዳካ ኡባ ፓልቄስ።
PRO 18:2 ኤያይ ባ ቆፋ ቆንጪሳናሮ ጻላ ዶሴስ፤ ጊዶ ኣቲን ሃራ ኣሳፔ ኤራ ኤካናስ ዶሴና።
PRO 18:3 ኢታቴꬂ ካꬌ ካሌꬄስ፤ ዬላቴꬂ ዪሺን ካዉሻቴꬂ ዬስ።
PRO 18:4 ኣሳ ዶናፔ ኬኢዛ ሃሳያይ ጪማ ሃꬃ ማላ፤ ኣꬎ ኤራቴꬃ ፑልቶይካ ጾንጌቲዛ ፒሳ ሃꬃ ማላ።
PRO 18:5 ኢታ ኣስ ማዲዲ፥ ጺሎዛ ፒርዳ ጌላሲዛይሲ ሎኦ ጊዴና።
PRO 18:6 ኤያ ኣሳ ዶናይ ኢዛ ቦላ ኦሽ ዴንꬄስ፤ ኢዛ ዶናፔ ኬኢዛ ቃላይ ኢዛ ቦላ ዱርቃ ጼይጌስ።
PRO 18:7 ኤያ ኣሳ ሃሳያይ ኢዛ ꬋይሴስ፤ ኢዛ ሜቴርሻቲ ኢዛስ ዎጺማዴ ጊዴቴስ።
PRO 18:8 ዚጊራንቻ ቃላይ ማልኦ ቁማ ማላ፤ ኣሳስ ዱጌ ማራጬ ጋኬስ።
PRO 18:9 ኣዛላ ኣሲ ꬋይሲዛ ኣሳስ ኢሻ።
PRO 18:10 ጎዳ ሱንꬂ ሚኖ ጊምቤ ማላ፤ ጺሎ ኣሲ ሄ ዎጺዲ ኢታፔ ኣቴስ።
PRO 18:11 ዱሬታ ዱሬቴꬂ ኢስታስ ዩሾይ ጊምቤቲዳ ካታማ ማላ፤ ኢስቲ ባንታ ዱሬቴꬃ ኬኤቶንታ ኣዱሳ ጊምቤ ማላ ቆዴቴስ።
PRO 18:12 ኣሲ ኩንዳናፔ ካሴ ኢዛ ዎዚናይ ኦቶሬቴስ፤ ኣሽኬቴꬂ ቦንቾፌ ሲንꬃቴስ።
PRO 18:13 ሎኤꬂ ሲዮንታ ዲሼ ዛሮይ፥ ኢዛዴስ ኤያቴꬂኔ ዬላ ጊዴስ።
PRO 18:14 ኣሳ ኣያናይ ሃርጌ ዳንዳያና ማላ ማዴስ፤ ጊዶ ኣቲን ኣያናይ ሜቄሬቲቺኮ ኢዛ ኦኒ ዳንዳያኔ?
PRO 18:15 ኣኬካንቻ ዎዚናይ ኤራቴꬅ ኮዬስ፤ ኣꬎ ኤራንቻ ሃይꬂ ሚንꬂ ኮዬስ።
PRO 18:16 ኢሞታይ ኢሚዛዴስ ኦጌ ዶዬስ፤ ኢዛ ጊታ ኣሳታራካ ኤሪሴስ።
PRO 18:17 ባልጋራይ ዪዲ ባ ቃላ ኢማና ጋካናስ ካሴቲዲ ዮኦ ሃሳይዳዴይ ጺሎ ሚሳቴስ።
PRO 18:18 ሳማ ዬሲ ፓላማ ቴቄስ፤ ናምኡ ዎልቃማ ባሊጋራታካ ሻኬስ።
PRO 18:19 ቆሄቲዳ ኢሻይ ጊምቤቲዳ ካታማፔ ኣꬊ ሚኔስ፤ ኢዛ ፓላማይካ ጊምቤ ፔንጌ ጎርዲዛ ሚኖ ኮላታ ማላ።
PRO 18:20 ባ ዶናን ሃሳይዳዛፔ ኣሲ ባ ኡሎ ኩንꬄስ፤ ባ ኢንጻርሳፌ ኬኢዳ ዮኦን ካሌስ።
PRO 18:21 ኢንጻርሳ ቦላ ሃይቆይኔ ዴኦ ዎልቃይ ዴስ፤ ኢዞ ዶሲዛይቲ ኢዚ ኣይፌ ሜቴስ።
PRO 18:22 ማቾ ዴሚዳ ኣሲ ሎኦ ሚሽ ዴሜስ፤ ሄሳዴይ ጎዳፔ ቦንቾ ኤኬስ።
PRO 18:23 ሂዬሳ ኣሲ ኣዳሺዲ ሃሳዬስ፤ ጊዶ ኣቲን ዱሬይ ꬌቺዲ ዛሬስ።
PRO 18:24 ላጌ ዳርሲዛ ኣሲ ባስ ሜቶ ዳሪሴስ፤ ጊዶ ኣቲን ኢሻፔ ኣꬊዲ ኣማኔቲዛ ላጌይ ዴስ።
PRO 19:1 ጌላ ዮኦ ሃሳይዛ ኢታ ኣሳፔ ባ ዴኦን ቦሬይ ባይንዳ ሂዬሳ ኣሲ ሎኦ።
PRO 19:2 ኤራቴꬂ ባይንዳ ዚልኤቴꬂ ሎኦ ጊዴና፤ ኤሶ ሄሜታይ ኦጌ ባሌꬄስ።
PRO 19:3 ኢሲ ኢሲ ኣሳይ ባ ኤያቴꬃን ባ ዴኦ ሞሬስ፤ ሂስቲዲ ጎዳ ቦላ ዪሎቴስ።
PRO 19:4 ዱሬቴꬂ ዳሮ ላጌ ሜꬌስ፤ ጊዶ ኣቲን ማንቆቴꬂ ካሴ ዲዛ ላጌ ሃሴስ።
PRO 19:5 ዎርዶ ማርካይ ቃጻዬቶንታ ኣቴና፤ ዎርዶ ፑኪዛይካ ቃጻዬቶንታ ኣቴና።
PRO 19:6 ዳሮ ኣሳይ ሎኦ ሚሳታናስ ዳና ሲንꬃን ኣላንꬄስ፤ ጮ ኢሚዛ ኣሳራ ኣሲ ኡባይ ዳቦቴስ።
PRO 19:7 ማንቆ ኢዛ ዳቦ ኡባይ ኢጼስ፤ ሂስቲን ኢዛ ላጌቲ ኣይ ኬና ኢዛፔ ባቃታኔ! ካሊ ኣዳሺዲካ ኢዚ ኢስታ ዴሜና።
PRO 19:8 ኣꬎ ኤራቴꬅ ባስ ሚሽ ኦꬂዛይ ባና ሲቄስ፤ ኣኬካ ሲቂዛዴስ ኢንጄቴስ።
PRO 19:9 ዎርዶ ማርካይ ቃጻዬቶንታ ኣቴና፤ ዎርዶ ፑኪዛይካ ꬋያና።
PRO 19:10 ኤያቲ ኢሻሎ ዱስ ዳናስ ቤሴና፤ ኣይሌይ ጎዳ ቦላ ጎዳቲኮ ሄሲ ኣይ ኬና ኢታ!
PRO 19:11 ኣꬎ ኤራቴꬂ ኣስ ዳንዳያንቻ ኬሴስ፤ ቆሆ ዬꬊ ኣꬌꬂ ቦንቾን ጋꬄስ።
PRO 19:12 ካዎ ሃንቆይ ጋሞ ጻጎ ማላ፤ ጊዶ ኣቲን ኢዛ ሲንꬃን ሳባ ዴሞይ ማታ ጪሊሊሲዛ ኢራ ማላ።
PRO 19:13 ኤያ ናይ ባ ኣዋ ባሻስ ኣꬂ ኢሜስ፤ ኦሽ ኤሂዛ ማቻ ኢራ ኣꬂዛ ኬꬃ ማላ።
PRO 19:14 ኬꬂኔ ኣቆታይ ዬሊዳይታፔ ላቴቴስ፤ ኣኬካራ ዲዛ ማቻ ጎዳፔ ቤታዉስ።
PRO 19:15 ኣዛላቴꬂ ዴጾ ꬊስኮ ኤሄስ፤ ኦሶ ኦꬆንታ ኣሲ ጋፌስ።
PRO 19:16 ኣዛዞ ናጊዛይ ባ ሼምፖ ናጌስ፤ ጊዶ ኣቲን ኢዞ ኢጺዛዴይ ሃይቄስ።
PRO 19:17 ማንቆስ ኪዪዛ ኣሲ ጎዳስ ታልኤስ፤ ጎዳይ ሄ ሎኦ ኦሶ ዋጋ ቃንጻና።
PRO 19:18 ዎዴራ ኔ ና ሴራ፤ ኢዚ ሃይቆስ ቢሺን ጮኡ ጋ ጼሎፋ።
PRO 19:19 ኤሶን ዪሎቲዛ ኣሲ ቃጻዬታናስ ቤሴስ፤ ኔኒ ኣጋ ኣꬊኮ ሃራ ዎዴካ ኔስ ሄሳꬆ ኦሶይ ኣቴና።
PRO 19:20 ዞሬ ሲያ፤ ሴራካ ኤካ። ሂስቲኮ ኔኒ ዉርሴꬃን ኣꬎ ኤራንቻ ጊዳና።
PRO 19:21 ኣሳ ዎዚናን ዳሮ ሃልቾይ ዴስ፤ ጊዶ ኣቲን ጎዳ ቆፋይ ፖሌቴስ።
PRO 19:22 ኣሳፔ ኮዬቲዛይ ሚኖ ሲቆ፤ ዎርዳንቻ ጊዳናፔ ማንቆቴꬂ ሎኦ።
PRO 19:23 ጎዳስ ያሺ ዴኦስ ካሌꬄስ፤ ሄሳ ማላ ኣሲ ዎፓን ዴስ፤ ኢታይካ ኢዛ ቦቼና።
PRO 19:24 ኣዛላይ ባ ኩሼ ማዳን ዬዴስ፤ ጊዶ ኣቲን ፑዴ ባ ዶናን ዛራናዉ ዋዬቴስ።
PRO 19:25 ቂልጪዛዴ ሾጪኮ ዎዚና ፓጬይ ኣኬካ ታማራና፤ ኣኬካንቻ ኣሳ ሴሪኮ ኢዚ ኤራቴꬅ ዴማና።
PRO 19:26 ባ ኣዋ ቦንቂዛ ናይ፥ ባ ኣዮካ ኬሲ ዬዴꬂዛ ናይ ኢዚ ዬላቴꬂኔ ካዉሻቴꬅ ኤሂዛ ና።
PRO 19:27 ታ ናዞ! ታ ዞሬ ኔ ሲዮንታ ኣጊኮ፥ ኔ ኤሪዛ ቃላካ ባላና።
PRO 19:28 ዎርዶ ማርካይ ሱሬ ፒርዳ ቦላ ቂልጬስ፤ ኢታ ኣሳ ዶናይ ኢታቴꬅ ባንቺኬስ።
PRO 19:29 ቂልጪዛይታስ ፒርዳይ፥ ኤያታ ዞኮስ ሊሶይ ጊጊ ኡቲዴስ።
PRO 20:1 ማꬆሲዛ ኡሺ ኡዪዛይ ቂልጪዛዴኔ ኤያ ጊዴስ፤ ሃይታንታን ባሌቲዳ ኡባይ ኣꬎ ኤራንቻ ጊዴና።
PRO 20:2 ካዎ ሃንቆይ ጋሞ ጻጎ ማላ፤ ኢዛ ዪሎቺዛይ ባ ሼምፖ ቦላ ፒርዴስ።
PRO 20:3 ፓላማፔ ሃኮይ ኢዛዴስ ቦንቾ፤ ጊዶ ኣቲን ኤያ ኣሲ ኡባይ ኦሻስ ኤሶቴስ።
PRO 20:4 ኣዛላ ጎሻንቻይ ዎዴራ ጎዬና፤ ካꬅ ሺሺዛ ዎዴ ሺሻናስ ኮዬስ፤ ጊዶ ኣቲን ኣይኮካ ዴሜና።
PRO 20:5 ኣሳ ዎዚና ሃልቾይ ጪማ ኦላን ዴኢዛ ሃꬃ ማላ፤ ጊዶ ኣቲን ዎዚናማ ኣሲ ሄፔ ዱቂ ኬሴስ።
PRO 20:6 ዳሮ ኣሳቲ ባንታ ኪያቴꬃ ዮቴቴስ፤ ጊዶ ኣቲን ኣማኔቲዛ ኣስ ኦኒ ዴማናስ ዳንዳይዜ?
PRO 20:7 ጺሎ ኣሲ ቦሬይ ባይንዳ ዴኦ ዴስ፤ ኢዛፔ ካሊዲ ኢዛ ናይቲካ ኣንጄቲዳይታ።
PRO 20:8 ካዎይ ፒርዳናስ ባ ካዎቴꬃ ኣልጋን ኡቲዛ ዎዴ ኢታ ኡባ ባ ኣይፌታን ሃርቂዲ ኬሴስ።
PRO 20:9 «ታ ዎዚና ጌሻዲስ፤ ታ ጌሻ፤ ታናን ናጋራይ ባዋ» ጋናይ ኦኔ?
PRO 20:10 ጎዳይ ዎርዶ ሜዛኔኔ ናምኡ ቆሞ ጌዳራ ሚሽ ኢጼስ።
PRO 20:11 ናይ ጌሺኔ ሱሬ ጊዲዛይሲ ኢዚ ኦꬂዛ ኦሶን ኤሬቴስ።
PRO 20:12 ሲዪዛ ሃይꬂኔ ጼሊዛ ኣይፌ፥ ኢስታካ ጎዳይ ሜꬊዴስ።
PRO 20:13 ꬊስኮ ሲቆፓ! ኔ ሂስቶንታ ኣጊኮ ማንቃና። ሚናዳ ኦꬃ፤ ሂስቲኮ ኔኒ ካꬅ ካላና።
PRO 20:14 ሻሚዛ ኣሲ፥ «ሃይሲ ኣልኦ! ቆሄስ!» ጌስ፤ ጊዶ ኣቲን ሻሚ ሲሚዳፔ ጉዬን፥ «ሂራይሶን ሻማዲስ» ጊዲ ጬቄቴስ።
PRO 20:15 ኤራይ ኩሚዳ ቃላ ሃሳይዛ ሜቴርሻቲ ዎርቃፌኔ ዞኦ ኢንቁፌካ ኣꬎ ጌጼ።
PRO 20:16 ኤሮንታ ኣሳስ ዋሴ ጌሊዛ ኣሳ ማይኦ ቃሪ ኤኪቴ፤ ሃዉሻ ማጫሳስ ዋሴ ጌሊዛ ኣስ ኦይኪቴ።
PRO 20:17 ዎርዶን ዴሚዳ ካꬂ ማልኤስ፤ ጊዶ ኣቲን ኣቂ ፔኢዲ ዶናን ኣጬ ጊዴስ።
PRO 20:18 ዞሬ ኤካዳ ሃልቾ ሃልቻ፤ ዞሬ ኤኮንታ ዴኣሼ ኦላስ ቦፓ።
PRO 20:19 ዚጊራንቻይ ጹራ ላሌስ፤ ሄሳ ጊሻስ ሎምኡሎምኣ ኣሳፔ ሃካ።
PRO 20:20 ባ ኣዋ ዎይኮ ባ ኣዮ ጫዪዛዴስ፥ ጾምፔይ ሳካና ꬉማን ቶኣና።
PRO 20:21 ኮይሮራ ኤሶን ቤቲዳ ኣቆታስ ዉርሴꬃን ኣንጆይ ዴና።
PRO 20:22 ኔሲ ኢታ ኦꬂዳ ኣሳስ፥ «ታኒ ኢዛስ ሃሎ ኬሳና» ጎፓ፤ ጎዳን ኣማኔታዳ ናጋ፤ ኢዚ ኔና ኣሻና።
PRO 20:23 ጎዳይ ዎርዶ ሜዛኔን ኡፋዬቴና ናምኡ ቆሞ ጌዳራ ሚሽ ኢጼስ።
PRO 20:24 ኣሳይ ባናስ ቤሲዛ ኦጌ ጎዳይ ካሌꬄስ፤ ሂስቲን ኣሲ ባርካ ባ ባና ኦጌ ዎስቲ ኣኬካናስ ዳንዳይዜ?
PRO 20:25 ኢሲ ሚሽ ኤሶቲዲ፥ «ሃይሳ ታኒ ጾሳስ ኢማና» ጊዲ ኣዲኔቲዳፔ ጉዬ ዚልኤቴꬂ ኣስ ኦይኪዛ ያርዴ።
PRO 20:26 ኣꬎ ኤራቴꬂ ዲዛ ካዎይ ማካላንቻታ ሻኪ ኤሬስ፤ ኢዚ ኢስታ ቃꬌቶንታ ቃጻዬስ።
PRO 20:27 ኣሳ ኣያናይ ጎዳ ጾምፔ፤ ሄሳ ጊሻስ ጊዶ ኣሳቴꬅ ኡባ ኢዚ ፒልጊ ጼሌስ።
PRO 20:28 ኪያቴꬂኔ ቱማቴꬂ ካዎ ናጌቴስ፤ ኢዛ ካዎቴꬃ ኣራታይካ ሲቆን ሚኔስ።
PRO 20:29 ዬላጋታ ዎልቃይ ኢስታስ ቦንቾ፤ ጪማታ ፑሉንꬂ ኢስታስ ቦንቾ።
PRO 20:30 ሚኖ ቂጻቴይ ኢታቴꬅ ዲጌስ፤ ዋꬋይ ኢታ ዎዚና ላሜስ።
PRO 21:1 ካዎ ዎዚናይ ጎዳ ኩሼን ዴስ፤ ኢዚ ኢዛ ዎዚና ጎጊዛ ሃꬃ ማላ ባ ዶሲዳሶ ዛሬስ።
PRO 21:2 ኣሲ ቢዛ ኦጌይ ኢዛዴስ ሱሬ ሚሳቴስ፤ ጎዳይ ጊዲኮ ዎዚና ፒልጊ ጼሌስ።
PRO 21:3 ያርሾፌ ቦላራ ጺሎኔ ሱሬ ፒርዳ ጎዳይ ዶሴስ።
PRO 21:4 ኦቶሮይኔ ሃላጫይ ኢታ ኣሳታ ቤሲዛ ማላታ፤ ሄሲካ ናጋራ።
PRO 21:5 ሚኖ ኦሳንቻ ሃልቾይ ዱሬሴስ፤ ጊዶ ኣቲን ቢቻሪሲ ማንቂሴስ።
PRO 21:6 ዎርዶቲዲ ዳጋሲዳ ኣቆታይ ꬋይዛ ፔንታ ማላ፤ ቃሴካ ዎꬊዛ ዎጺማዴ ማላ።
PRO 21:7 ኢታቲ ሱሬ ኦሶ ዶሶንታ ጊሻስ ኢታታ ኢስታ ማካላቴꬂ ꬋይሳና።
PRO 21:8 ሞራንቻቲ ጌላ ኦጌራ ሄሜቴቴስ፤ ጊዶ ኣቲን ጌሻቲ ሱሬ ሃኔቴስ።
PRO 21:9 ዱናማ ማቺራ ዳናፔ ኬꬃ ዳራንቻን ኣቆይ ሎኦ።
PRO 21:10 ኢታቲ ኢታ ሚሽ ኦꬃናስ ኬሂ ኣሞቴቴስ። ኢዛ ላጌይ ኢዛፔ ቃꬌታ ዴሜና።
PRO 21:11 ቂልጪዛዴይ ቃጻዬቲዳ ዎዴ ዎዚናይ ፓጪዳ ኣሲ ኣꬎ ኤራቴꬅ ታማሬስ፤ ዎዚናማ ኣሲካ ታማርዲ ኤራቴꬅ ዴሜስ።
PRO 21:12 ጺሎ ጾሳይ ኢታታሶን ኦሴቲዛ ኡባ ጫዲ ጼሌስ፤ ኢስታ ሙሌራ ꬋይሴስ።
PRO 21:13 ማንቆ ዋሶ ሲያናፔ ጊዲ ባ ሃይꬅ ቱጪኮ ኢዚካ ዋሲዛ ዎዴ ኣሊዛ ኣሲ ꬋያና።
PRO 21:14 ጌማን ኢሚዛ ኢሞታይ ሃንቆ ዶሺሴስ፤ ኣፋላ ጊዶራ ኢሚዳ ማታኤይ ሱሌ ሃንቆ ኢርጺሴስ።
PRO 21:15 ሱሬ ፒርዳይ ጺሎታ ኡፋይሴስ፤ ኢታ ኦꬂዛይታ ጊዲኮ ሺሮሴስ።
PRO 21:16 ኣኬካ ኦጌፔ ካሬ ኬዚዛ ኣሲ ሞይቲሌ ዱላታን ሼምፔስ።
PRO 21:17 ሃላጫ ዱስ ዳና ኮይዛ ኣሲ ማንቄስ፤ ኡሺኔ ሙስ ጎዲዛ ኣሲ ዱሬቴና።
PRO 21:18 ጺሎታ ቦላ ዪዳ ሜቶይ ኢታታ ቦላ ሲማና፤ ሱሬ ኣሳታ ቦላ ዪዳ ሜቶይ ኣማኔቶንታይታ ቦላ ጋካና።
PRO 21:19 ዎጫሚዛኔ ዶናቲዛ ማቺራ ዳናፔ ባዞን ዱሲ ኪያ።
PRO 21:20 ዎዚናማ ኣሳ ሶን ማልኦ ቁማይኔ ዛይቴይ ዳጋቲ ዴስ፤ ጊዶ ኣቲን ኤያ ኣሲ ባስ ዲዛይሳ፥ ባይንዳ ኡባ ዲፒ ሂስቲ ሜስ።
PRO 21:21 ጺሎቴꬂኔ ሲቆ ካሊዛዴይ ዴኦ፥ ዱሬቴꬂኔ ቦንቾ ዴሜስ።
PRO 21:22 ዎዚናማ ኣሲ ዎልቃማ ኦላንቻቲ ዲዛ ካታማ ሜንꬂ ጌሌስ፤ ኢስቲ ኣማኔቲዳ ሚጻታካ ላሊ ዬጌስ።
PRO 21:23 ባ ዶናኔ ባ ኢንጻርስ ናጊዛ ኣሲ ባና ቦሻፔ ናጌስ።
PRO 21:24 ኦቶራንቻይኔ ሃላጫ ኣሲ ቂꬋንቻ ጌቴቴስ፤ ኢዚ ኦቶሮ ሃኖ ሃኔስ።
PRO 21:25 ኣዛላ ኣሞይ ዎꬌስ፤ ኣይስ ጊኮ ኢዚ ኦꬃናስ ኮዬና።
PRO 21:26 ኣዛላይ ጋላስ ኩሜꬅ ኣሞቲሼ ፔኤስ፤ ጺሎይ ጊዲኮ ኡዜቶንታ ኢሜስ።
PRO 21:27 ኢታ ኣሳ ያርሾይ ሃራሴስ፤ ኢታ ቆፋን ሺሺዛ ጊዲኮ ኣይ ማላ ኢታ ጊዳኔ?
PRO 21:28 ዎርዶ ማርካይ ꬋያና፤ ጊዶ ኣቲን ቱሙ ማርካቲዛይ ሚኒዲ ዴኣና።
PRO 21:29 ኢታ ኣሲ ቤሶንታዝ ጻላ ጻሌስ፤ ጊዶ ኣቲን ሱሬ ኣሲ ዩሺ ቆፔስ።
PRO 21:30 ኣሲ ባ ኤራን፥ ኣኬካኒኔ ሃልቾን ጎዳራ ኤቄታናስ ዳንዳዬና።
PRO 21:31 ኦላ ጋላሳስ ፓራ ጊጊሴስ፤ ጊዶ ኣቲን ጾኖይ ጎዳፔ ዬስ።
PRO 22:1 ሎኦ ሱንꬂ ዳሮ ዱሬቴꬃፌ ኣꬌስ፤ ኣሳ ማታን ቦንቼቴꬂካ ቢራፔኔ ዎርቃፌ ኣꬌስ።
PRO 22:2 ዱሬኔ ማንቆ ኡባ ጎዳይ ሜꬊዴስ፤ ሄሳን ኢስታ ናይካ ኢሲ ጊና።
PRO 22:3 ኣኬካንቻ ኣሲ ኢታ ቤኢዲ ኣታናስ ባቃቴስ፤ ጊዶ ኣቲን ኣኬካይ ፓጪዳ ኣሲ ሜቶን ጌሊዲ ቆሄቴስ።
PRO 22:4 ኣሽኬቴꬂኔ ጎዳስ ያሺ፥ ዱሬቴꬅ፥ ቦንቾኔ ዴኦ ኢሜስ።
PRO 22:5 ኢታ ኣሳ ኦጌን ኣጉንꬂኔ ያርዴይ ዴስ፤ ጊዶ ኣቲን ባና ናጊዛ ኣሲ ሄሳፌ ሃኬስ።
PRO 22:6 ናይ ዋኒዲ ዴኣና ቤሲዛኮ ታማርሳ፤ ሂስቲኮ ኢዚ ጪሚዲካ ሄሳፌ ሃኬና።
PRO 22:7 ዱሬይ ማንቆ ሃሬስ፤ ታልኤ ኤኪዳዴይ ታልኤ ኢሚዳዴስ ኣይሌ ጊዴስ።
PRO 22:8 ኢታቴꬅ ዜሪዛ ኣሲ ዋዬ ጫኬስ፤ ኢዛ ሃንቆ ጉፌይ ꬋያና።
PRO 22:9 ኪያ ኣሲ ኣንጄቴስ፤ ባ ቁማፔካ ሂዬሳስ ኢሜስ።
PRO 22:10 ቂልጪዛ ኣስ ዲጋ፤ ሂስቲኮ ፓላማይ ኣታና፤ ኦሺኔ ጫሺካ ꬋያና።
PRO 22:11 ዎዚና ጌሻቴꬅ ዶሲዛ ኣሲኔ ዶናፔ ሎኦ ሃሳይዛ ኣሳራ ካዎይ ላጌቴስ።
PRO 22:12 ጎዳ ኣይፌቲ ኤራቴꬅ ናጌቴስ፤ ጊዶ ኣቲን ዎርዳንቻታ ቃላ ሃዳ ኬሴስ።
PRO 22:13 ኣዛላ ኣሲ፥ «ጋሞይ ካሬን ዴስ፤ ታና ኦጌን ዎꬋና» ጌስ።
PRO 22:14 ላይማ ማጫሳ ዶናይ ጪማ ኦላ ማላ፤ ጎዳይ ሃንቄቲዳ ኣሲ ኢዚን ዉሌስ።
PRO 22:15 ና ዎዚና ኤያቴꬂ ባቂ ኦይኬስ፤ ጊዶ ኣቲን ሴራ ሾች ኢዛፔ ሃሴስ።
PRO 22:16 ባስ ኣቆታ ጉጃና ጊዲ ሂዬሳ ናቂዛይኔ ዱሬሲ ኢሞታ ኢሚዛይ ናይካ ማንቃና።
PRO 22:17 ኣꬎ ኤራንቻ ዞሬ ዎዚናፔ ሲያ፤ ኔ ዎዚናይካ ታ ቲሚርቴኮ ሲሞ!
PRO 22:18 ኣይስ ጊኮ ኢስታ ኔ ዎዚናን ዎꬂኮ፥ ኔ ዶናንካ ኢስታ ኡባ ሃሳይኮ ኔ ኡፋዬታና።
PRO 22:19 ኔ ኣማኖይ ጎዳን ጊዳና ማላ ታኒ ኔና ሃች ታማርሳይስ።
PRO 22:20 ታኒ ኔሲ ዞሬኔ ኤራቴꬅ ኢሚዛ ሎኦ ቲሚርቴታ ጻፋቤኪና?
PRO 22:21 ኔና ኪቲዳይሳስ ቤሲዛ ዛሮ ዛራና ማላ፥ ታኒ ኔና ቱማኔ ኣማኔቲዳ ቃላታ ታማርሳና ማላ ጊዴኔ?
PRO 22:22 ሂዬሳታሲ ኣይኮይካ ባይንዳ ጊሻስ ኢስታ ቦንቆፋ፤ ሺሎታንካ ሜቶታንቻታ ዋዪሶፓ።
PRO 22:23 ኣይስ ጊኮ ጎዳይ ኢስታ ጊሻስ ሞቴታና፤ ኢስታ ቦንቂዳይታካ ኢዚ ቦንቃና።
PRO 22:24 ሃንቄቲዛ ኣሳራ ላጌቶፓ፤ ሃንቄታናስ ኤሶቲዛ ኣሳራካ ዙፔቶፓ።
PRO 22:25 ኔኒ ኢዛ ሃኖዛ ሜዜቲኮ፥ ጉዬፔ ኣጋናዉ ዳንዳያካ።
PRO 22:26 ዋሴ ጌላናስ ጫቆፋ፤ ኣሳ ኣጮ ቃንጻናስ ዋሴ ጌሎፓ።
PRO 22:27 ኔሲ ቃንጺዛዚ ꬋይኮ፥ ኔ ኢቺዛ ኣልጋይካ ኣቶንታ ኤኬታና።
PRO 22:28 ኔ ኣዋቲ ኤሲዳ ቤኒሶፌ ዲዛ ዛዋ ሾዶፋ።
PRO 22:29 ባ ኦሶን ሎሂዳ ኣስ ቤያዲ? ኢዚ ካዎታስ ኦꬄሲፔ ኣቲን ቤሶንታ ኣሳታስ ኦꬄና።
PRO 23:1 ኔኒ ዴሬ ሃሪዛይሳራ ካꬅ ማናስ ኡቲዳ ዎዴ፥ ኔ ሲንꬃን ዴኢዛይሳ ሎኤꬃዳ ኣኬካ።
PRO 23:2 ኔኒ ዳሮ ዮራ ኣስ ጊዲኮ፥ ኬሂፔ ናጌታ።
PRO 23:3 ኢዚ ኔና ፓጫናስ ዳንዳይዛ ጊሻስ፥ ሺቂዳ ማልኦ ቁማስ ዪቄቶፓ።
PRO 23:4 ዱሬታና ጋዳ ዳቡሮፓ፤ ሃይሳ ማላ ቆፋ ኣጋናስ ኣኬካንቻ ጊዳ።
PRO 23:5 ሄሳ ማላ ዱሬቴꬃ ቦላ ኔኒ ኔ ኣይፌ ዎꬂኮ ሄራ ꬋያና፤ ቄፌ ኬሲዳ ጎሌ ካፎ ማላ ሳሎራ ፓላና።
PRO 23:6 ኡዜ ኣሳ ካꬅ ሞፓ፤ ማልኢዛ ኢዛ ካꬅ ማናስ ኣሞቶፋ።
PRO 23:7 ቆꬌፔ ቆሞን ኢዚ ኔና፥ «ማ፤ ኡያ» ጌሲፔ ኣቲን ኢዛ ዎዚናይ ኔናራ ዴኤና።
PRO 23:8 ኔኒ ሚዳ ጉꬃ ካꬃይካ ኔና ጮሻና፤ ኔ ጋላታይካ ሃዳ ጊዳና።
PRO 23:9 ኤያራ ሃሳዮፓ፤ ኣይስ ጊኮ ኔ ኣꬎ ኤራ ሃሳያ ኢዚ ካꬋና።
PRO 23:10 ቤኒሶፌ ዲዛ ꬋሳ ሾዶፋ። ቃሴ ዪኦ ናይታ ጋዴ ሱጎፓ፤
PRO 23:11 ኣይስ ጊኮ ኢስታ ኣሺዛ ጎዳይ ሚኖ፤ ኢዚ ኢስታ ጊሻስ ኔናራ ሞቴታና።
PRO 23:12 ኔ ዎዚና ዞሬስ፥ ኔ ሃይꬃካ ኤራቴꬃ ቃላኮ ዛራ።
PRO 23:13 ኔ ና ሴራናፔ ጉዬ ጎፓ፤ ኔኒ ቂርጩንቻን ሾጪኮ ኢዚ ሃይቄና።
PRO 23:14 ኔኒ ቂርጩንቻን ሾጫ፤ ኢዛ ሼምፖ ሃይቆፔ ኣሻ።
PRO 23:15 ታ ናዞ! ኔ ዎዚናይ ኣꬎ ኤራንቻ ጊዲኮ ታ ዎዚናይካ ኡፋዬቴስ።
PRO 23:16 ኔ ኢንጻርሳይ ሱሬ ሃሳይዛ ዎዴ ታ ዎዚናይ ኡፋዬቴስ።
PRO 23:17 ናጋራንቻታ ቦላ ቃናቶፓ፤ ጊዶ ኣቲን ኡባቶ ጎዳስ ያሻቴꬅ ኣጎፋ።
PRO 23:18 ሂስቲኮ ኔስ ሲንꬃፌ ኪያና፤ ኔ ሂዶታይ ሃዳ ጊዴና።
PRO 23:19 ታ ናዞ! ሲያ፤ ዎዚናማ ጊዳ፤ ኔ ዎዚናይ ሱሬ ኦጌፔ ካሬ ኬዞፖ።
PRO 23:20 ዳሮ ዎይኔ ኡሹ ኡዪዛይታራኔ ኣሾ ሙሳስ ያሬቲዛይታራ ዙፔቶፓ።
PRO 23:21 ኣይስ ጊኮ ማꬆቲዛይቲኔ ዮራቲ ማንቃና፤ ꬊስኮ ዳሮይ ጫርቃ ማይዜስ።
PRO 23:22 ኔና ዬሊዳ ኣዋይ ዮቲዛይሳ ሲያ፤ ኔ ኣዪያካ ጬጊዳ ዎዴ ካꬎፓ።
PRO 23:23 ቱማ ሻማፌ ኣቲን ሙሌካ ባይዞፓ፤ ኣꬎ ኤራቴꬅ፥ ሴራኔ ኣኬካ ኔስ ሚሼ ኦꬃ።
PRO 23:24 ጺሎ ና ኣዋይ ኬሂፔ ኡፋዬቴስ፤ ዎዚናማ ና ዬሊዳ ኣሲካ ኢዛን ኡፋዬቴስ።
PRO 23:25 ኔ ኣዋይኔ ኔ ኣያ ኡፋዬቴቶ፤ ኔና ዬሊዳራካ ኡፋዬቱ።
PRO 23:26 ታ ናዞ! ኔ ዎዚና ሃ ታኮ ዛራ፤ ኔ ኣይፌቲ ታ ኦጌፔ ካሬ ኬዞፔቶ።
PRO 23:27 ኣይስ ጊኮ ላይማ ማጫሳያ ጪማ ኦላ ማላ፤ ላጌꬆ ማቻ ጹንꬃ ኦላ ማላ።
PRO 23:28 ኢዛ ፓንጋ ማላ ዛማዳ ናጋዉስ፤ ኣማኔቶንታ ኣዴታ ዴሬ ጊዶን ዳርሳዉስ።
PRO 23:29 «ዎ!» ጊዛ ዋሶይ ኦሴ? ጬጬይ ኦሴ? ኦሺ ኦሴ? ዙዙንꬂ ኦሴ? ጋሶይካ ባይንዳ ማዱንꬂ ኦሴ? ኣይፌይ ዞኢዛይ ኦሴ?
PRO 23:30 ዎይኔ ኡሹ ኡዪሼ ጋምኢዛይታስ ጊዴኔ? ዋላኬቲዳ ዎይኔ ኡሹ ዩዪ ዩዪ ጋንጺዛይታስ ጊዴኔ?
PRO 23:31 ዎይኔ ኡሺ ዞኢዳ ዎዴ፥ ኢዛ ሜꬋይ ቢሪሌ ጊዶን ጶሊዛ ዎዴ፥ ዱቂሺን ጮሮሩ ጊ ጌሊዛ ዎዴ ኢዛ ቲሺ ሂስታ ጼሎፋ።
PRO 23:32 ዉርሴꬃን ኢዚ ሾሻ ማላ ዱኬስ፤ ጎፔ ሾሻ ማላካ ባ ዪሻ ፑኬስ።
PRO 23:33 ኔ ኣይፌይ ቤዪ ኤሮንታዝ ቤያና፤ ኔ ዎዚናይካ ኤሉሜታና።
PRO 23:34 ኔኒ ኣባ ጊዶን ዲዛ ማርካቤ ጼራን ኢቺዳ ኣሳ ማላ ጊዳና።
PRO 23:35 ኔኒ፥ «ኢስቲ ታና ዴቺዳ፤ ጊዶ ኣቲን ታኒ ቆሄታቤኬ፤ ኢስቲ ታና ዋꬊዳ፤ ጊዶ ኣቲን ታስ ኤሬቲቤና። ሃራ ኡሻ ኡያናስ ታኒ ኣዉዴ ዴንዳንዲናሻ?» ጋና።
PRO 24:1 ታ ናዞ! ኢታ ኣሳታ ማላ ጊዳርኪና ጎፓ፤ ኢስታራ ላጌቴꬂካ ኔና ሎኦፖ።
PRO 24:2 ኢስቲ ኡባቶ ማካላ ሚሽ ማቄቴቴስ፤ ባንታ ኢንጻርሳንካ ጌኔ ሃሳዬቴስ።
PRO 24:3 ኬꬂ ኣꬎ ኤራቴꬃን ኬጼቴስ፤ ኣኬካንካ ሚኔስ።
PRO 24:4 ኤራይ ዴኢኮ፥ ኬꬂ ኣልኦኒኔ ሎኦ ሚሻን ኩሜስ።
PRO 24:5 ዎዚናማ ኣሳስ ጊታ ዎልቃይ ዴስ፤ ኤራንቻ ኣሲካ ሚኖቴꬅ ጉጄስ።
PRO 24:6 ኦላ ኦሌታናስ ኔስ ሎኦ ዞሬ ጾኖ ዴማናስካ ዳሮ ዞራንቻታ ኮሼስ።
PRO 24:7 ኤያ ኣሲ ኣꬎ ኤራቴꬃፌ ኬሂ ሃሆን ዴስ፤ ዱላታ ሲንꬃን ኤቂዲ ሃሳያና ዳንዳዬና።
PRO 24:8 ኢታ ኦꬃናስ ሃልቺዛ ኣሲ «ጌናንቻ» ጌቴቴስ።
PRO 24:9 ኤያቴꬃ ቆፋይ ናጋራ፤ ቂልጪዛዴ ኣሲ ኢጼስ።
PRO 24:10 ኔኒ ሜቶ ጋላስ ላፊኮ፥ ኔ ዎልቃይ ኣይ ማላ ጉꬄ?
PRO 24:11 ሃይቆስ ላጌቲ ቢዛይታ ኣሻ፤ ሹኬታናስ ጎሼቲ ቢዛይታ ኣሻ።
PRO 24:12 ኔኒ፥ «ታ ሃይሳ ኤሪኬ» ጊኮ፥ ዎዚና ፒልጊ ኤሪዛይሲ ኢዚ ኣኬኬኔ? ኔ ሼምፖ ናጊዛይሲ ኤሬኔ? ኣስ ኡባስ ኢዛ ኦሶ ኦሶ ማላ ኢሜኔ?
PRO 24:13 ታ ናዞ! ሎኦ ጊዲዳ ጊሻስ ኤሳ ማ፤ ኢሊሎ ኤሲ ዶናን ማልኤስ።
PRO 24:14 ኣꬎ ኤራቴꬂካ ሄሳ ማላ፤ ኢዚ ኔ ሼምፖስ ማልኦ ጊዲዳይሳ ኤራ። ኔኒ ኢዞ ዴሚዛ ጊዲኮ ዎንቶ ኔስ ዜምፖ ጊዳና፤ ኔ ሂዶታይካ ሃዳ ጊዴና።
PRO 24:15 ጺሎ ኣሳ ኬꬅ ቦንቃናስ ፓንጋ ማላ ዛማዶፓ፤ ኢዛ ኬꬃ ቦላ ሜቶ ጋꬆፋ።
PRO 24:16 ጺሎ ኣሲ ላፑንቶ ኩንዲኮካ ዴንዴስ፤ ጊዶ ኣቲን ኢታቲ ሜቶን ꬋዬቴስ።
PRO 24:17 ኔ ሞርኬይ ኩንዲዛ ዎዴ ኡፋዬቶፋ፤ ኢዚ ꬉጴቲዛ ዎዴካ ኔ ዎዚናን፥ «ሃሹ!» ጎፓ።
PRO 24:18 ኔ ሂስቶንታ ኣጊኮ ጎዳይ ሄሳ ቤኢዲ ኡፋዬቴና፤ ኢዚ ባ ሃንቆዛ ኔ ሞርኬዛ ቦላፌ ዛራና።
PRO 24:19 ኢታ ኣሳታ ኦሶን ጬጮፓ፤ ኢስታ ማላ ጊዳርኪና ጎፓ።
PRO 24:20 ኢታ ኣሳስ ሂዶታይ ባዋ፤ ኢታታ ጾምፔይ ቲፒ ጊዲ ቶኣና።
PRO 24:21 ታ ናዞ! ጎዳሲኔ ካዋስ ያያ፤ ማካሊዛይታራካ ዙፔቶፓ።
PRO 24:22 ኣይስ ጊኮ ሄሳ ማላ ኣሳታ ቆፖንታ ሜቶይ ጋኬስ፤ ካዎፔኔ ጎዳፔ ያና ሜቶ ኦኔ ኤሪዛይ?
PRO 24:23 ኣꬎ ኤራንቻቲ ጉጂዲካ ሃይሳꬆ ጊዳ፤ ፒርዲሼ ማዶ ፒርዳይ ሎኦ ጊዴና።
PRO 24:24 ሞራንቻ፥ «ኔኒ ጺሎ» ጊዛዴ ዴሬይ ቃንጌስ፤ ካዎቴꬃቲካ ኢዛ ሂሌቴስ።
PRO 24:25 ጊዶ ኣቲን ሞራንቻ፥ «ኔኒ ሞራዳሳ» ጊዛይታ ኢስታራ ሎኦ ሚሺ ጋይታና፤ ኢስታስ ኬሂ ዳሮ ኣንጆይ ያና።
PRO 24:26 ሱሬ ዛሮ ኢሞይ ዶና ዬሬቴꬃ ማላ።
PRO 24:27 ካሴታዳ ኔ ካሬን ዲዛ ኦሶ ኦꬃ፤ ኔ ጎሻ ጊጊሳ፤ ሄሳፌ ጉዬ ኔ ኬꬅ ኬጻ።
PRO 24:28 ኔ ሾሮዛ ቦላ ጋሶይ ባይንዳ ማርካቶፋ፤ ኔ ዶናንካ ጪሞፋ።
PRO 24:29 ኢዚ ታስ ኦꬂዳ ማላ ታኒ ኢዛስ ኦꬃና፤ «ታኒ ኢዛስ ኢዛ ኦሶ ኩሼ ዛራና» ጎፓ።
PRO 24:30 ታኒ ኣዛላ ኣሳ ጋዴራ ኣꬋዲስ፤ ኣኬካይ ፓጪዳ ኣሳ ዎይኔ ቱራ ጊዶራ ካንꬃዲስ።
PRO 24:31 ኡባሶን ኣጉንꬂ ሞኪዴስ፤ ጋዳ ሻራፋይ ጎዚዴስ፤ ጊምቤይካ ላሌቲዴስ።
PRO 24:32 ታኒ ቤኢዳይሳ ዩሻ ቆፓዲስ፤ ታኒ ቤዮይሳፌ ቲሚርቴ ዴማዲስ።
PRO 24:33 ኔኒ፥ «ጉꬃራ ሊጲጲ ጋይስ፤ ጉꬃራ ꬊስካ ኤካይስ፤ ኔ ኩሼዛካ ሺሻዳ ጉꬃራ ሼምፓ ኤካይስ» ጊኮ፥
PRO 24:34 ማንቆቴꬂ ኔ ቦላ ፓንጋ ማላ ያና፤ ፓጬይካ ኦላ ሚሻ ኦይኪዳ ኣሳ ማላ ፑቱ ጋና።
PRO 25:1 ዩሁዳ ካዎ ሂዝቂያሳ ኣሳቲ ዱቂዲ ጻፊዳ ሶሎሞኔ ሌሚሶቲ ሃይሳፌ ካሊዛይታ።
PRO 25:2 ጹራ ጌንꬆይ ጾሳስ ቦንቾ፤ ጹራ ፒልጊዲ ኬሶይ ካዎታስ ቦንቾ።
PRO 25:3 ሳሎታ ꬎቃቴꬃኔ ሳኣ ጪማቴꬃ ኣሲ ጋኮንታይሳ ማላ፥ ካዎታ ቆፋካ ኣሲ ፒልጊ ኤራናስ ዳንዳዬና።
PRO 25:4 ቢራፔ ቂታ ዲጋይቻ፤ ዎጋጬይካ ቆጺዲ ሎኦ ሚሽ ኬሳና።
PRO 25:5 ካዎ ሲንꬃፌ ኢታታ ዲጋይቻ፤ ሂስቲኮ ኢዛ ካዎቴꬃ ኣራታይ ጺሎቴꬃን ሚኒ ኤቃና።
PRO 25:6 ካዎ ሲንꬃን ኔና ꬎቁ ꬎቁ ሂስቶፋ፤ ጊታ ኣሳታ ጊዶን ቤታናስ ኣሞቶፋ።
PRO 25:7 ጊታ ኣሳ ሲንꬃን ኔና ካዉሻናፔ ኢዚ ባርካ ኔና፥ «ሃይሶ ꬎቁ ጋ» ጊኮ ኔስ ሎኦ።
PRO 25:8 ኔ ኣይፌዛን ቤኢዳ ኡባ ማርካታናስ ዱቡሻ ባናስ ኤሶቶፓ፤ ኣይስ ጊኮ ኔኒ ማርካታ ሲሚን፥ ሃራ ኣሲ ኔ ማርካቴꬃይ ባላ ጊዲዳይሳ ቆንጪሲኮ ኔኒ ዬላታና።
PRO 25:9 ኔሲኔ ኔ ላጌዛስ ጊዶን ፓላማይ ሜꬌቲኮ፥ ሄ ፓላማ ጋርሳን ሃራ ኣሳ ጹራ ቆንጪሶፓ።
PRO 25:10 ሂስቶንታ ኣጊኮ ኔኒ ዮቲዛይሳ ሲዪዳ ኣሲ ኔና ካዉሻና፤ ሄሳን ኔ ሱንꬃይ ናምኣንꬆ ሲሚዲ ሎኦንታ ማላ ሞሬታና።
PRO 25:11 ኮሺዛ ዎዴዛን ሃሳዬቲዳ ሊኬ ቃላይ ቢራ ቦላ ቲጌቲዳ ዎርቃ ኣሌቆ ማላ።
PRO 25:12 ኣꬎ ኤራቴꬂ ዲዛ ኣሲ ዞሪዛ ዞሬይ ኤዝጊዛ ኣሳስ ሃይꬃን ኣꬂዛ ዎርቃ ማላ፤ ዎይኮ ሙሩታ ዎርቃፌ ኦሴቲዳ ኣሌቆ ማላ።
PRO 25:13 ካꬅ ሺሺዛ ዎዴ ኢርጻ ሃꬂ ኡዪን ኣሊዛ ማላ፤ ኣማኔቲዛ ኪታንቻይ ባና ኪቲዛይታ ኡፋይሴስ።
PRO 25:14 ኢሞንታይሳ፥ «ኢማና» ጊዲ ጮ ፓፖቲዛ ኣሲ ኢራይ ባይንዳ ሻራኔ ጫርኮ ማላ።
PRO 25:15 ዳንዳያንቻ ኣሲ ዴሬ ሃሪዛዴ ዮቲ ማይዜስ፤ ሊቆ ቃላይ ሜቄꬅ ካንꬂ ጌሌስ።
PRO 25:16 ኤስ ዴሚኮ ጊናራ ማ፤ ጊዶ ኣቲን ዳርሲኮ ኔና ጹጋና።
PRO 25:17 ኔና ኡፊዲ ኢጾንታ ማላ ኔ ላጌ ሶ ኡባቶ ቦፓ።
PRO 25:18 ባ ላጌዛ ቦላ ዎርዶራ ማርካቲዛ ኣሲ ኮጼይ፥ ጊꬃ ማሻይኔ ዎንዳፌይ ኣስ ቆሂዛ ማላ ቆሄስ።
PRO 25:19 ሜቶ ዎዴ ኣማኔቶንታ ኣሳን ዜምፖይ፥ ቃጺዛ ኣቻን ጮሚዛ ማላኔ ሲሊዳ ቶሆን ሄሜቲዛ ማላ።
PRO 25:20 ጬጪ ኡቲዳ ኣሳስ ማዛሙሬ ዬጼꬂ ሜጎ ጋላስ ማይኦ ቃሪዛ ማላኔ ማዱንꬃ ቦላ ጹጊዛ ሚሽ ቲጊዛ ማላ።
PRO 25:21 ኔ ሞርኬይ ጋፊኮ ሚዛ፤ ሳሜቲኮ ኡሻ።
PRO 25:22 ኔኒ ሄሳꬆ ኦꬂኮ ኢዛ ሁኤን ታማ ቦንቆ ካሺዲ ቆሊዛዴ ማላ። ጎዳይካ ኔ ኦሶስ ዋጋ ኢማና።
PRO 25:23 ኣርሼይ ሞኪዛ ባጋ ጫርኮይ ኢራ ኤሂዛ ማላ፥ ዚጊርሲ ሃንቆ ኤሄስ።
PRO 25:24 ዱናማ ማቺራ ኢሲ ኬꬃን ዴኣናፔ ኬꬃ ዳራንቻን ዴꬂ ሎኦ።
PRO 25:25 ዳቡርዳ ኣሲ ኢርጻ ሃꬅ ኡዪዲ ኣሊዛ ማላ ሃኮ ቢታፌ ዪዛ ሎኦ ቃላይ ኡፋይሴስ።
PRO 25:26 ኢታ ኣሳ ሲንꬃን ኩንዲዛ ጺሎ ኣሲ ቡልቆቲዳ ፑልቶኔ ሞሬቲዳ ኦላ ሃꬃ ማላ።
PRO 25:27 ዳሮ ኤሳ ሙሲ ሎኦ ጊዴና፤ ሄሳꬆካ ባስ ቦንቾ ኮሺ ቦንቺሴና።
PRO 25:28 ባና ሃሮንታ ኣሲ ጊምቤይ ላሌቲዳ ካታማ ማላ።
PRO 26:1 ቦኔን ሻቺ፥ ካꬅ ሺሺዛ ዎዴንካ ኢራይ ኮሾንታይሳ ማላ፥ ኤያስ ቦንቾይ ኮሼና።
PRO 26:2 ካፎቲ ያኔ ሃ ፓሊሼ ኣስ ቆሆንታይሳ ማላ፥ ጋሶይካ ባይንዳ ቃንጊዛ ቃንጌꬂ ኣስ ጋኬና።
PRO 26:3 ፓራሲ ሊሶ፥ ሃሬስ ኣንጫፋ ኮሺዛይሳ ማላ፥ ኤያ ዞኮዛስ ዱርቃ ኮሼስ።
PRO 26:4 ኤያ ኣሳስ ኢዛ ኤያቴꬃ ማላ ዛሮፓ፤ ዛሪኮ ኔኒካ ኢዛ ማላ ጊዳና።
PRO 26:5 ጊዲኮካ ኤያስ ኢዛ ኤያቴꬃ ቤሳ፤ ሂስቶንታ ኣጊኮ ኢዚ ባና ኤራንቻ ማላ ቆዳና።
PRO 26:6 ኤያ ኣሳ ቦላ ኪታ ዬዶይ ባርካ ባ ቶሆታ ቃንጺዛይሳ ማላ፤ ዎይኮ ዎꬊዛ ማርዜ ኡሻ ማላ።
PRO 26:7 ኤያ ኣሳ ሌሚሶይ ሲሊዳ ቶሆ ማላ።
PRO 26:8 ኤያ ኣሳስ ቦንቾ ኢሞይ ያንባርሻ ቦላ ቃቺ ዎꬂዲ ዩሺዛ ሹቻ ማላ።
PRO 26:9 ኤያ ኣሳ ሌሚሶይ ማꬆቲዳ ኣሳ ኩሼን ኤቂዳ ኣጉንꬃ ማላ።
PRO 26:10 ኤያ ኣስ ዎይኮ ባስ ኦጌራ ካንꬂ ቢዛ ኣስ ኦሶስ ቃጻሪዛ ኣሲ ባ ዎንዳፌን ጮ ዴሚዳ ኣስ ዱኪ ማዱንꬂዛ ኣሳ ማላ።
PRO 26:11 ካናይ ባ ጮሺ ሲሚ ላጪዛ ማላ፥ ኤያይ ባ ኤያቴꬃ ኦሶ ዛሪ ዛሪ ዬጌስ።
PRO 26:12 ባርካ ባና፥ «ታኒ ኣꬎ ኤራንቻ» ጊዛ ኣስ ቤያዲ? ኢዛፔ ኤያ ኣሳስ ሎኦ ቃዳይ ዴስ።
PRO 26:13 ኣዛላይ፥ «ኦጌን ጋሞይ ዴስ፤ ያሺዛ ጋሞይ ዎጋ ኦጌን ዩዬስ» ጌስ።
PRO 26:14 ፔንጌይ ባ ማጻፋ ቦላን ያኔ ሃ ቃጺዛ ማላ ኣዛላይካ ባ ሂጻን ያኔ ሃ ሺሬቲ ሺሬቲ ዎꬌስ።
PRO 26:15 ኣዛላይ ባ ኩሼ ማዳን ዬዴስ፤ ጊዶ ኣቲን ፑዴ ባ ዶናን ዛራናስ ዋዬቴስ።
PRO 26:16 ኣዛላ ኣሲ ኣኬካን ዮቲዛ ላፑን ኤራንቻታፔ ባና ኣꬎ ኤራንቻ ጊዲ ቆፔስ።
PRO 26:17 ባና ጋꬆንታ ኣሳ ዮኦን ጉፒ ጌሊዛ ኣሲ ካና ሃይꬅ ኦይኪዛ ኣሳ ማላ።
PRO 26:18 ጎዪዛ ኣሲ ታማ ጺፋ ኦሊዛ ማላ ዎይኮ ዎንዳፌ ዱኪዛ ማላ፤
PRO 26:19 «ታኒ ካሳስ ኦꬃዲስ» ጊሼ ባ ላጌዛ ጪሚዛ ኣሲካ ሄሳ ማላ።
PRO 26:20 ሚꬂ ዉሪኮ ታማይ ቶኤስ፤ ዚጊርሲ ꬋይኮ ኦሺ ኣቴስ።
PRO 26:21 ጺጺንꬂ ቦንቆ ዳርሲዛይሳ ማላኔ ሚꬂ ታማ ዳርሲዛይሳ ማላ፥ ዶናማ ኣሲ ኦሽ ዳሪሴስ።
PRO 26:22 ዚጊርሳንቻ ቃላይ ማልኦ ቁማ ማላ ኣሳስ ዱጌ ማራጬ ጋኬስ።
PRO 26:23 ዎዚናን ኢታ ሚሺ ዲሺን፥ ባ ኢንጻርሳን ሊቆ ቃላ ሃሳይዛ ኣሲ ቢራን ሜሼቲዳ ማና ሚሻ ማላ።
PRO 26:24 ጌኔ ኣሲ ባ ዶናን ጪሜስ፤ ጊዶ ኣቲን ባ ዎዚናን ኢታቴꬅ ጹንቴስ።
PRO 26:25 ኢዛ ዎዚናን ላፑን ቱናቴꬂ ኩሚ ኡቲዴስ፤ ሄሳ ጊሻስ ኢዚ ሎኦ ቃላ ሃሳይኮካ ኣማኖፓ።
PRO 26:26 ኢዚ ባ ጌኔ ባሌꬆን ጌንꬃናስ ዳንዳዬስ፤ ጊዶ ኣቲን ኢዚ ኦꬂዳ ኢታቴꬂ ዱላታን ቆንጫና።
PRO 26:27 ሃራታስ ኦላ ቦኪዛ ኣሲ ሄ ኦላን ባስ ኩንዳና፤ ሃራታ ቦላ ሹች ቡሉሊዛ ኣሳ ቦላ ሄ ሹቻይ ሲሚ ኢዛ ቦላ ኩንዳና።
PRO 26:28 ዎርዶቲዛ ኢንጻርሲ ባ ቆሂዳ ኣሳታ ኢጻዉስ፤ ጪሚዛ ሜቴርሺካ ባሽ ኤሃዉስ።
PRO 27:1 ዎንቶይሳን ጬቄቶፋ፤ ዎንቶ ኣዚ ሃናናኮ ኔ ኤራካ።
PRO 27:2 ኔና ሃራ ኣሲ ጋላቶፔ ኣቲን ኔርካ ኔና ጋላቶፓ፤ ሃራ ኣሲ ኔና ሳቦፌ ኣቲን ኔኒ ኔርካ ኔና ሳቦፋ።
PRO 27:3 ሹቺ ዴጾ፤ ኣንጮይ ቶኮ፤ ጊዶ ኣቲን ኤያ ኣሲ ዴንꬂዛ ኦሺ ናምኣታፔካ ዴጼስ።
PRO 27:4 ሼኔይ ሜንጼ ኢታ፤ ሃንቆይ ሜንጼ ኢታ፤ ቃናቴ ሲንꬃን ኤቂ ዳንዳያናይ ኦኔ?
PRO 27:5 ጌሚዳ ሲቆፔ ቆንጬን ሴሪዛ ሴራይ ሎኦ።
PRO 27:6 ሞርኬይ ኔና ዳሮቶ ዬራናፔ ሲቆይ ኔና ዴቺዛይሲ ኪያ።
PRO 27:7 ካሊዳ ኣስ ኤሳ ኢሊሎይ ኢቴስ፤ ጊዶ ኣቲን ጋፊዳ ኣስ ጋራ ማላ ጫሚዛ ሚሺካ ማልኤስ።
PRO 27:8 ባ ሶ ኣጊዲ ዩዪዛ ኣሲ፥ ባ ኬꬃፌ ሃካ ፓሊዛ ካፎ ማላ።
PRO 27:9 ሺቶይኔ ኤጻኔይ ኣስ ኡፋይሲዛይሳ ማላ፥ ሲቆ ላጌ ዞሬይካ ኡፋይሴስ።
PRO 27:10 ኔ ላጌኔ ኔ ኣዋ ላጌ ኣጎፋ፤ ኔ ኢሻኮ ቦፓ። ሃሆን ዲዛ ኢሻፔ ኔስ ማታን ዲዛ ሾሮይ ኪያ።
PRO 27:11 ታ ናዞ! ኔኒ ኣꬎ ኤራንቻ ጊዳ፤ ታ ዎዚና ኡፋይሳ፤ ሂስቲኮ ታና ካꬊዛይታ ኦይሻካ ዛራና።
PRO 27:12 ጪንጫ ኣሲ ሜቶይ ዪዛ ዎዴ ቤኢዲ ቆቴቴስ፤ ጊዶ ኣቲን ኣኬካይ ፓጪዳ ኣሲ ሜቶ ጋርስ ቢ ጌሌስ፤ ሂስቲዲ ጉዬፔ ቆሄቴስ።
PRO 27:13 ኤሮንታ ኣሳስ ሁርቡታ ጌሊዛ ኣሳ ማይኦ ቃራ ኤካ፤ ሃዉሻ ማጫሳስ ዋሴ ጌሊዛ ኣሳ ማይኦ ኦይካ።
PRO 27:14 ማላዶ ዎንታራ ባ ቃላ ꬎቁ ሂስቲዲ ባ ሾሮ ኣንጆይ ቃንጌꬃ ማላ ቆዴቴስ።
PRO 27:15 ኡባ ዎዴ ኦሽ ኦዬቲዛ ማቻ ኢራ ጋላስ ፓጬይ ባይንዳ ኣꬂዛ ኬꬃ ማላ።
PRO 27:16 ጫርኮ ቴቃናስ ዎይኮ ዛይቴ ጩጩሚዲ ኦይካናስ ዳንዳዬቶንታይሳ ማላ ኢዞ ጮኡ ኦꬃናስ ዳንዳዬቴና።
PRO 27:17 ቢራታይ ቢራታ ቃራሲዛ ማላ ኣሲካ ኢሶይ ኢሳ ቃራሴስ።
PRO 27:18 ባላሴ ሚꬃዮ ኢሻልሲዲ ናጊዳ ኣሲ ኢዚ ኣይፌ ማና፤ ባ ጎዳስ ኦꬂዛ ኣሲ ቦንቼታና።
PRO 27:19 ሃꬃይ ሄሬጋꬆ ሲንꬅ ቤሲዛ ማላ ኣሳ ዎዚናይ ኢዛዴ ካንዶ ቤሴስ።
PRO 27:20 ሃይቆይኔ ባሺ ካሊ ኤሬቴና፤ ሄሳꬆካ ኣሳ ኣይፌይ ካሌና።
PRO 27:21 ቢራይኔ ዎርቃይ ታማን ፓጬቲዲ ጌይዛ ማላ ኣሲካ ባ ኤኪዛ ጋላታን ፓጬቴስ።
PRO 27:22 ኤያ ኣስ ካꬃ ማላ ኡዱላን ዬጋዳ፥ ኡዱላ ሚꬃን ጫዲዛኮካ ኢዛፔ ኤያቴꬂ ኪቼና።
PRO 27:23 ኔ ዶርሳቲ ዴኢዛ ሃኖታ ሎኤꬃዳ ኤራ፤ ኔ ዉዴካ ዎዚናፔ ሄማ።
PRO 27:24 ኣይስ ጊኮ ዱሬቴꬂ ሜርናስ ዴኤና፤ ካላቻይካ ዬሌታፔ ዬሌታ ጋካናስ ሚኒ ዴኤና።
PRO 27:25 ሜላ ማታይ ቡጬቲዳፔ፥ ኣጫ ማታይ ኬኢዳፔ፥ ዙምቡላታ ቦላን ዴኢዛ ማታይ ሺቂዳፔ ጉዬን፥
PRO 27:26 ዶርሳታ ኢስኬፌ ኔኒ ኔስ ማይኦ ኬሳና፤ ዴይሻታን ኔስ ጎሻ ጋዴ ሻማና።
PRO 27:27 ኣቲዳ ዴይሻታ ማꬂ ኔሲኔ ኔ ሶ ኣሳስ፥ ኔ ማጫ ኣይሌታስካ ቁማ ጊዳናስ ኩሚ ፓላሃና።
PRO 28:1 ኢታ ኣሲ ኦኒካ ዬዴꬆንታ ባቃቴስ፤ ጊዶ ኣቲን ጺሎይ ጋሞ ማላ ዎዚና ኩሜꬃ።
PRO 28:2 ዴሬይ ማካሊኮ ሃሪዛይ ጮራቴስ፤ ጊዶ ኣቲን ኤራ ኣሲኔ ኣኬኪዛ ኣሲ ዎጋ ኤሴስ።
PRO 28:3 ሂዬሳታ ኡንኤꬂዛ ዳናይ ካꬅ ꬋይሲዛ ዎልቃማ ኢራ ማላ።
PRO 28:4 ዎጋ ቦንቾንታ ኣሲ ሞራንቻታ ሳቤስ፤ ጊዶ ኣቲን ዎጋ ቦንቺዛይ ኢስታ ቆፋ ፓልቄስ።
PRO 28:5 ኢታ ኣሳታስ ሱሬ ፒርዳይ ጌሌና፤ ጊዶ ኣቲን ጎዳስ ጎይኒዛይቲ ኡባካ ኤሬቴስ።
PRO 28:6 ጌላ ኣስ ጊዲ ኡቲዲ ዱሬ ጊዳናፔ ቦሬይ ባይንዳ ሂዬሳ ጊዴꬂ ሎኦ።
PRO 28:7 ዎጋ ናጊዛ ናይ ኣኬካንቻ፤ ጊዶ ኣቲን ጋንጃማታራ ዙፔቲዛይ ባ ኣዋ ዬላሴስ።
PRO 28:8 ቤሶንታ ዲሾን ባ ኣቆታ ዳጋሲዛ ኣሲ ሄ ኣቆታ ሂዬሳስ ኪዪዛ ኣሳስ ሺሼስ።
PRO 28:9 ዎጋ ሲያናፔ ባ ሃይꬅ ዎራ ዛሪዛ ኣሳ ዎሳይ ጾሳ ሃራሴስ።
PRO 28:10 ሱሬታ ኢታ ኦጌ ካሌꬂዛ ኣሲ ባ ቦኪዳ ኦላን ኩንዳና፤ ጊዶ ኣቲን ጌሻ ኣሲ ሎኦ ሚሽ ላታና።
PRO 28:11 ዱሬ ኣሲ ባና ኣꬎ ኤራንቻ ጊዲ ቆፔስ፤ ጊዶ ኣቲን ኣኬካይ ዴኢዛ ሂዬሳይ ኢዛ ፓጬስ።
PRO 28:12 ጺሎቲ ጾኒዳ ዎዴ ኣሳይ ኡባይ ኡፋዬቴስ፤ ጊዶ ኣቲን ኢታቲ ማታ ኦይኪዳ ዎዴ ኣሳይ ባቃቴስ።
PRO 28:13 ባ ናጋራ ጌንꬂዛ ኣሲ ኣጬና፤ ጊዶ ኣቲን ፓጺዛይኔ ናጋራ ኣጊዛይ ማሬታና።
PRO 28:14 ጎዳስ ኡባቶ ያዪዛ ኣሲ ኣንጄቲዳዴ፤ ጊዶ ኣቲን ባ ዎዚና ዳማሲዛ ኣሲ ሜቶን ጌላና።
PRO 28:15 ሂዬሳ ሃሪዛ ኢታ ዳናይ ጻጊዛ ጋሞኔ ጉፒ ኦይኪዛ ዛርዶ ማላ።
PRO 28:16 ዎዚናይ ፓጪዳ ዳናይ ሜንጼ ኢቴስ፤ ጊዶ ኣቲን ቤሶንታ ጎኣ ኢጺዛዴይ ዳሮ ላይꬅ ዴኤስ።
PRO 28:17 ኣስ ዎꬊዳ ኣሲ ሃይቃና ጋካናስ ቶይላቲሼ ዴስ፤ ኢዛ ኦኒካ ሺሺ ኤኬና።
PRO 28:18 ቦሬይ ባይንዳ ሄሜቲዛ ኣሲ ቆሄቶንታ ኣታና፤ ጊዶ ኣቲን ጌላ ኣሲ ኢሲ ጋላስ ኩንዳና።
PRO 28:19 ባ ጋዴ ጎዪዛ ሚኖ ኣሲ ካꬅ ካሌስ፤ ጊዶ ኣቲን ሃዳ ዮኦ ካሊዛ ኣሲ ማንቆቴꬃፌ ኬኤና።
PRO 28:20 ኣማኔቲዳ ኣሲ ኬሂ ኣንጄታና፤ ጊዶ ኣቲን ዱሬታናስ ጃሚዛይ ቃጻዬቶንታ ኣቴና።
PRO 28:21 ሻኪዲ ማዶይ ሎኤና፤ ጊዶ ኣቲን ኣሲ ጉꬃ ካꬃስ ጊዲ ሞሮ ኦꬄስ።
PRO 28:22 ኡዜቲዛ ኣሲ ዱሬታናስ ጃሜስ፤ ባና ሂዬሳቴꬂ ኦይካናይሳካ ኤሬና።
PRO 28:23 ኣስ ጮ ሳቢዛ ኣሳፔ ሴሪዛ ኣሲ ጉዬፔ ዶሴቴስ።
PRO 28:24 ባ ኣዋፔኔ ባ ኣይፔ ካይሲዲ፥ «ታኒ ኣይኮካ ናጋራ ኦꬃቤኬ» ጊዛ ኣሲ ባሺዛ ኣሳራ ኢሲ ማላ።
PRO 28:25 ዪቄይ ኣሲ ኦሽ ዴንꬄስ፤ ጊዶ ኣቲን ጎዳን ኣማኔቲዛይ ኣንጄቴስ።
PRO 28:26 ባናን ኣማኔቲዛ ኣሲ ኤያ፤ ጊዶ ኣቲን ኣꬎ ኤራቴꬃን ሄሜቲዛይ ሳሮን ዴኤስ።
PRO 28:27 ሂዬሳስ ኢሚዛ ኣሳስ ፓጬና፤ ጊዶ ኣቲን ኢስቲ ቤኢሼ ቤኦንታꬆ ሃኒዛዴ ቃንጌꬂ ጋካና።
PRO 28:28 ኢታ ኣሳቲ ማታ ዴሚዛ ዎዴ ዴሬይ ባቃቴስ፤ ጊዶ ኣቲን ኢስቲ ꬋይዛ ዎዴ ጺሎቲ ጮራቴቴስ።
PRO 29:1 ዳሮ ዎዴ ሴሪን ኢጺዲ ባ ሞርጌ ዞዲሲዳ ኣሲ ሃሳኦንታ ሜቃና፤ ሄሳዴስ ፓጼቴꬂካ ዴና።
PRO 29:2 ጺሎ ኣሳቲ ማታ ኦይኪዛ ዎዴ ኣሳይ ኡፋዬቴስ፤ ጊዶ ኣቲን ኢታ ኣሳቲ ቢታ ሃሪዛ ዎዴ ኣሳይ ኦሌስ።
PRO 29:3 ኣꬎ ኤራቴꬅ ዶሲዛ ኣሲ ባ ኣዋ ኡፋይሴስ፤ ጊዶ ኣቲን ላይማታራ ላጌቲዛይ ባ ኣቆታ ꬋይሴስ።
PRO 29:4 ቱማ ፒርዲዛ ካዎይ ባ ዴሬ ዎፑ ሂስቴስ፤ ጊዶ ኣቲን ማታኤ ማናስ ዪቄቲዛይ ባ ዴራ ላሌስ።
PRO 29:5 ባ ላጌዛስ ጪሞ ሃሳይዛ ኣሲ ኢዛ ቶሆስ ዎጺማዴ ዋጼስ።
PRO 29:6 ኢታ ኣሲ ባርካ ባ ናጋራን ኦይኬቴስ፤ ጊዶ ኣቲን ጺሎ ኣሲ ኡፋዬቴሲኔ ዬጼስ።
PRO 29:7 ጺሎ ኣሲ ሂዬሳታስ ሱሬ ፒርዳይ ፒርዴታና ማላ ቆፔስ፤ ጊዶ ኣቲን ኢታ ኣሲ ሄሳ ማላ ዉዱካ ጌና።
PRO 29:8 ሚሪዛይቲ ካታማን ሺሮ ዴንꬄቴስ፤ ጊዶ ኣቲን ኣꬎ ኤራቴꬂ ዲዛ ኣሳቲ ሃንቆ ኢሪጺሴቴስ።
PRO 29:9 ኣꬎ ኤራቴꬂ ዲዛ ኣሲ ኤያ ኣሳራ ፒርዳሶ ቢኮ ኤያይ ሃንቄቴሲኔ ቂꬌስ፤ ኢዛስ ሳሮይካ ዴና።
PRO 29:10 ሱꬅ ጉሳናስ ጃሚዛ ኣሳቲ ሱሬ ኣስ ኢጼቴስ፤ ቃሴ ጺሎ ኣሳካ ዎꬋናስ ኮዬቴስ።
PRO 29:11 ኤያ ኣሲ ዛዋይ ባይንዳ ሃንቄቴስ፤ ጊዶ ኣቲን ኣꬎ ኤራንቻይ ባ ሃንቆ ሚቴስ።
PRO 29:12 ዴሬ ሃሪዛዴይ ዎርዶ ዮኦ ኤኪኮ ኢዛ ሹሜቲ ኡባይ ኢታ ጊዴቴስ።
PRO 29:13 ሂዬሳይኔ ኣስ ናቂዛዴስ ኮꬃ ሚሺ ዴስ፤ ጎዳይ ናምኣታስካ ጼሊዛ ኣይፌ ኢሚዴስ።
PRO 29:14 ኢሲ ካዎይ ሂዬሳስ ሱሬ ፒርዲኮ ኢዛ ካዎቴꬃ ኣራታይ ሜርናስ ሚኒ ዳና።
PRO 29:15 ጹንዱቂ ዲሾይ ናይታስ ኣꬎ ኤራቴꬅ ኢሜስ፤ ጊዶ ኣቲን ዬዳ ዲጪዳ ናይ ባ ኣዮ ካዉሼስ።
PRO 29:16 ኢታ ኣሳቲ ማታ ኦይኪዛ ዎዴ ናጋራይ ዳሬስ፤ ጊዶ ኣቲን ጺሎቲ ኢስታ ኩንዴꬃ ቤኣና።
PRO 29:17 ኔ ና ሴራ፤ ሂስቲኮ ኔኒ ሳሮ ዴማና፤ ኢዚ ኔና ኡፋይሳና።
PRO 29:18 ኣጁታይ ባይንዳሶን ዴሬይ ዬዳ ዳና፤ ጊዶ ኣቲን ዎጋ ናጊዛ ኣሲ ኣንጄቲዳዴ።
PRO 29:19 ኣሽካራይ ጮ ዶናን ዮቲን ጻላ ኤሬና፤ ዮኦይ ኢዛስ ጌሊዛኮካ ኢዚ ኣዛዜቴና።
PRO 29:20 ኤሶን ሃሳይዛ ኣስ ቤያይ? ኢዛፔ ኤያ ኣሳስ ሂዶታይ ዴስ።
PRO 29:21 ኣሲ ባ ኣይሌ ናቴቴꬃፌ ዶሚዲ ኣልኢሶን ዲቺኮ ዉርሴꬃን ኢዛዴ ቦላ ጬጬይ ጋካና።
PRO 29:22 ሃንቄቲዛ ኣሲ ኦሽ ዴንꬄꬄስ፤ ኤሌ ዪሎቲዛ ኣሲ ዳሮ ናጋራ ኦꬄስ።
PRO 29:23 ኦቶሮይ ኣስ ካዉሼስ፤ ጊዶ ኣቲን ኣሽኬቴꬂ ቦንቺሴስ።
PRO 29:24 ካይሶራ ዙፔቲዛ ኣሲ ባና ኢጺዛ ኣሳ፤ ቃንጊ ጫቂሲሺን ሲዪሼካ ኢዚ ጮኡ ጌስ።
PRO 29:25 ኣሳስ ያዪዛይሲ ኢዛዴስ ዎጺማዴ ጊዴስ፤ ጊዶ ኣቲን ጎዳን ኣማኔቲዛ ኣሲ ሳሮን ዴኤስ።
PRO 29:26 ዳሮቲ ዴሬ ሃሪዛይታ ሲንꬃን ኤሬታና ኮዬቴስ፤ ጊዶ ኣቲን ኣሳስ ሱሬ ፒርዳይ ጎዳ ኣቻፌ ቤቴስ።
PRO 29:27 ጺሎቲ ኣስ ባሌꬂዛይታ ሻቴቴቴስ፤ ኢታቲ ሱሬ ኣሳታ ኢጼቴስ።
PRO 30:1 ሃይሳፌ ካሊዲ ጻፌቲዳይሲ ያቄ ና ኣጉሬይ ሃሳይዳ ሌሚሶታ። ኣጉሬይ ኢቲኤሌሲኔ ኡካላስ ሃይሳ ሃሳይዴስ።
PRO 30:2 «ታኒ ኣሳ ኡባፌካ ኤያ ዳራይስ፤ ኣሳስ ዴኢዛ ኣኬካይ ታስ ባዋ።
PRO 30:3 ታኒ ኣꬎ ኤራቴꬅ ታማራቤኬ፤ ጌሻዛ ጊሻሲካ ታኒ ኤሪዛ ሚሺ ዴና።
PRO 30:4 ሳሎ ፑዴ ኬኢዲ ዱጌ ዎꬊዳይ ኦኔ? ጫርኮ ባ ኩሼን ኦይኪዳይ፥ ሃꬅ ባ ኣፋላን ዪጪዳይ ሳኣ ጋጻ ኢዛ ሶን ሶን ዎꬂዳይ ኦኔ? ኣኔ ኤሪኮ ኢዛ ሱንꬅ ታስ ዮታ፤ ኢዛ ናዛ ሱንꬂ ኦና ጌቴቲዜ?
PRO 30:5 «ጾሳይ ዮቲዛ ቃላይ ኡባይ ቱማ፤ ኢዛን ኣማኔቲዛ ኡባስ ኢዚ ጎንዳሌ።
PRO 30:6 ኢዛ ቃላ ቦላ ኣይኮካ ጉጆፋ፤ ጉጂኮ ኢዚ ኔና ሴራና፤ ኔኒ ዎርዳንቻ ጊዲዳይሳካ ኢዚ ቆንጪሳና።
PRO 30:7 «ጎዳዉ! ታኒ ኔና ናምኡ ሚሽ ኦይቻይስ፤ ታኒ ሃይቃና ጋካናስ ኢስታ ታና ዲጎፋ።
PRO 30:8 ታኒ ኣስ ጪሞንታ ማላኔ ዎርዶ ሃሳዮንታ ማላ ታና ናጋ፤ ታና ዱሬ ዎይኮ ማንቆ ሂስቶፋ፤ ጊዶ ኣቲን ሃቺስ ሃቺስ ጊዲዛ ካꬂ ታስ ኢማ።
PRO 30:9 ሂስቶንታ ኣጊኮ ታኒ ኬሃ ካላዳ ኔና ካዳና፤ ‹ጎዳይ ኢዚ ኦኔ?› ጋና፤ ዎይኮ ማንቃዳ ካይሳና፤ ሂስታዳ ታኒ ጾሳ ሱንꬃ ጫይሳና።
PRO 30:10 «ኔና ቃንጎንታ ማላኔ ኢዚ ቃንጊን ኔስ ጎሜቶንታ ማላ፥ ኣይሌ ኢዛ ጎዳ ሲንꬃን ኢታን ዴንꬆፋ።
PRO 30:11 ባ ኣዋ ቃንጊዛኔ ባ ኣዮካ ኣንጆንታ ዬሌታይ ዴስ።
PRO 30:12 ቱና ጊዲ ኡቲዲ ባንታና ጌሻ ማላ ቆዲዛ ኣሳቲ ዴቴስ።
PRO 30:13 ኦቶሮን ኩሚዳ ኣሳቲኔ ኣስ ካꬊዲ ጼሊዛ ኣሳቲ ዴቴስ።
PRO 30:14 ሂዬሳታኔ ሜቶታንቻታ ዴሬ ጊዶፌ ꬋይሳናስ ኢስታ ኣቻይ ማሻ ማላ ጊዲዳ ኢስታ ጋጊናይ ቢላማ ማላ ጊዲዳ ኣሳቲ ዴቴስ።
PRO 30:15 «ኡሎስ ናምኡ ማጫ ናይቲ ዴቴስ። ኢስቲ፥ ‹ኑስ ኢማ! ኑስ ኢማ!› ጊዲ ዋሴቴስ። ሙሌካ ካሊ ኤሮንታ ሄꬓቲ ዴቴስ፤ ኦይዳንꬆዚ ቃሴ ሙሌራ፥ ‹ጊዳና› ጊ ኤሬና።
PRO 30:16 ሄሳንቲካ ዱፎ፥ ማይኒዳ ኡሎ፥ ሃꬂ ካሊ ኤሮንታ ሜላ ቢታኔ፥ ‹ታስ ጊዳና!› ጊ ኤሮንታ ታማ።
PRO 30:17 «ባ ኣዋ ቂꬊዛ ና ኣይፌኔ፥ ባ ኣዮ ካꬊዛ ና ኣይፌ ኬልካን ዴኢዛ ቁሮቲ ዎጫና፤ ኢዛ ኣሾዛ ኣንኮቲ ማና።
PRO 30:18 ታና ኬሂ ማላሊሲዛ ሄꬑ ሚሻቲ ዴቴስ፤ ኦይዳንꬆዚ ኡባራካ ታስ ጌሌና።
PRO 30:19 ሄሳንቲካ ጎሌቲ ሳሎራ ፓሊዛ ፓሎ፥ ሾሺ ሹቻ ቦላራ ሶሎሉ ጊ ቡስ፥ ማርካቤይ ኣባ ቦላራ ቢዛ ቡስ ኣዴይ ማጫ ና ሲቆ ዴማናስ ሃኒዛ ሃኖታ።
PRO 30:20 «ላይማ ማጫሳያ ሃኒዛ ሃኖይካ ሄሳ ማላ። ኢዛ ሙሳ ማዉስ፤ ጊዶ ኣቲን ሚዳፔ ጉዬን፥ ባ ዶና ቁጫዳ፥ ‹ታኒ ኣይኮካ ሞራቤኬ› ጋዉስ።
PRO 30:21 «ሄꬑ ዮኦታን ቢታይ ቃጼስ፤ ኦይዳንꬆዛ ኡባካ ቶካናስ ዳንዳዬና።
PRO 30:22 ሄሳንቲካ ኣይሌይ ካዎቲዳ ዎዴ፥ ኤያይ ካꬅ ካሊዳ ዎዴ፥
PRO 30:23 ኣሲ ኢጺዳ ማጫሳያ ኣዴ ጌሊዳ ዎዴኔ ማጫ ኣሽካሪያ ባ ጎዳቴዮ ላቲዳ ዎዴ ሃኒዛ ሃኖታ።
PRO 30:24 «ሳኣ ቦላ ኦይዱ ጉꬃ ሜꬌታቲ ዴቴስ፤ ጊዶ ኣቲን ኢስቲ ኬሂ ኣꬎ ኤራንቻታ።
PRO 30:25 ሄሳንቲካ ጩንጫሌቲ ዎልቃይ ባይንዳ ሜꬌታ፤ ጊዶ ኣቲን ባንታስ ሚዛ ሚሽ ቦኔ ሺሺ ዳጋሴቴስ።
PRO 30:26 ጉፓሌቲ ጉꬃ ዎልቃይ ዴኢዛይታ፤ ጊዶ ኣቲን ባንታ ኬꬅ ዛላ ጊዶን ኬጼቴስ።
PRO 30:27 ቦሌታስ ካዎይ ዴና፤ ጊዶ ኣቲን ኢስቲ ኡባይካ ማራን ማራን ዛቴቴስ።
PRO 30:28 ዛሬቲ ኩሼን ኦይኪንካ ኦይኬቴቴስ፤ ጊዶ ኣቲን ኢስቲ ካዎ ኬꬃንካ ዴኤቴስ።
PRO 30:29 «ባንታ ማታ ቤሲሼ ሄሜቲዛ፥ ሄꬑ ሜꬌታቲ ዴቴስ፤ ኦይዳንꬆዚካ ፑላቲዲ ሄሜቴስ።
PRO 30:30 ሄሳንቲካ ዶኣ ኡባፌ ዎልቃማኔ ኣይኮስካ ያዪዲ ባቃቲ ኤሮንታ ጋሞ።
PRO 30:31 ማጫሳታ ጊዶን ኮሶሲ ሄሜቲዛ ኣዴ ኩቶ፥ ዴይሻ ኦርጌኔ ባ ኦላንቻታን ኣጃቤቲዳ ካዎ።
PRO 30:32 «ኔኒ ኤያዳ ኦቶሬቲዳ ጊዲኮኔ ኢታ ሚሽ ኦꬃናስ ሃልቺዳ ጊዲኮ ኣኔ ታኪ ጋዳ ቆፓ።
PRO 30:33 ማꬂ ቡኪን ኦይሲ ኬኢዛ ማላ፥ ሲꬌ ኢጪንካ ሱꬂ ዪዛ ማላ ሃንቆ ዴንꬄꬂኮ ኦሽ ሜꬌስ።»
PRO 31:1 ካዎ ሊሙኤሌ ኣያ ካዎ ሊሙኤሌ ታማርሲዳ ቲሚርቴይ ሃይሳፌ ካሊዳይሳ።
PRO 31:2 «ታ ናዞ! ታ ኡሎፔ ዎꬊዳ ታ ናዞ! ታኒ ኣዲኔታ ዬሊዳ ታ ናዞ!
PRO 31:3 ማጫሳን ኔ ዎልቃ ዉርሶፋ፤ ካዎታ ባሺዛ ሚሻን ኔ ኣካታ ꬋይሶፋ።
PRO 31:4 «ሊሙኤሌ ሃይሲ ካዎታስ ቤሴና፤ ካዎቲ ዎይኔ ኡሹ ኡያናስ ቤሴና፤ ዴሬ ኣይሲዛይቲ ማꬆሲዛ ኡሹ ያሬታናስ ቤሴና።
PRO 31:5 ኢስቲ ኡዪዛ ዎዴ ዎጋ ባሌቴቴስ፤ ቆሄቲዳይታ ማታ ሱጌቴስ።
PRO 31:6 ሃይቃና ሃኒዛይታስ ማꬆሲዛ ኡሹ ሜቶ ቦላ ዲዛይታስ ዎይኔ ኡሹ ኢሚቴ።
PRO 31:7 ኢስቲ ኡዪዲ ባንታ ማንቆቴꬃ ዶጌቶ፤ ባንታ ቱጋካ ዛሪ ቆፖፌቶ።
PRO 31:8 «ባንታ ጊሻስ ሃሳያናስ ዳንዳዮንታይታስ ኔኒ ሃሳያ፤ ሜቶታንቻታ ማታ ጊሻስ ኔኒ ሞቴታ።
PRO 31:9 ሃሳያዳ ኢስታስ ሱሬ ፒርዳ ፒርዳ፤ ሂዬሳታኔ ሜቶታንቻታ ማታ ቦንቺሳ» ጋዳ ታማርሳዱስ።
PRO 31:10 ዎዚናማ ማቾ ኦኒ ዴማናዉ ዳንዳይዜ? ኢዛ ዞኦ ኢንቁፌካ ኬሃ ኣꬋዉስ።
PRO 31:11 ኢዚ ኬꬃ ኣዋይ ኢዞ ኡባ ሚሻንካ ኣማኔስ፤ ኢዛስ ኣይኮይካ ፓጬና።
PRO 31:12 ኢዛ ባ ዴኦ ላይꬅ ኡባን ኢዛስ ሎኦ ኣቲን ኢታ ሚሽ ኦꬁኩ።
PRO 31:13 ዶርሳ ኢስኬፌኔ ታልባ ቡጻ ኤካዳ፥ ኦሶ ዶሲዛ ባ ኩሼን ሱቃዉስ።
PRO 31:14 ኢዛ ዛልኣንቻታ ማርካቤ ማላ፤ ባ ካꬅ ሃኮ ቢታፌ ኤሃዉስ።
PRO 31:15 ኢዛ ባ ሶ ኣሳስ ቁማ ካꬃናሲኔ ባ ማጫ ኣይሌታስ ኦሶ ሻካ ኢማናስ፥ ሳኣይ ቡሮ ዎንታና ጊሺን ዴንዳዉስ።
PRO 31:16 ኢዛ ባርካ ቆፓዳ ጎሻ ጋዴ ሻማዉስ፤ ባ ዴሚዳ ሚሻን ዎይኔ ቶካዉስ።
PRO 31:17 ኢዛ ሚናዳ ባ ኦሶ ፖላዉስ፤ ኢዚ ቄሴቲካ ኦሶስ ሚኖ።
PRO 31:18 ኢዛ ባ ኦሶስ ዎꬌይ ዲዛይሳ ኣኬካዉስ፤ ኦማርሲካ ኢዚ ጾምፔይ ቶኤና።
PRO 31:19 ኢዛ ባ ሊቃቃን ሱቃዉስ፥ ባ ኣፋላ ዳዳዉስ።
PRO 31:20 ኢዛ ሂዬሳታስ ባ ኩሼ ሚጫዉስ፤ ሜቶታንቻታስ ኪያቴꬅ ኢማዉስ።
PRO 31:21 ኢዚ ሶ ኣሳይ ኡባይ ሆኢዛ ማይኦ ማይኢዳ፤ ሄሳ ጊሻስ ኢዛ ሻቺ ቡኪኮካ ሂርጉኩ።
PRO 31:22 ሂꬃን ኦንጊዛ ማይኦ ኦꬃዉስ፤ ላይኖኔ ኦቻ ቴራ ሚሳቲዛ ማይኦ ማይኣዉስ።
PRO 31:23 ዴሬ ጪማቲ ዱቡሻ ሺቂዛሶን ኢዚ ኬꬃ ኣዋይ ቦንቼቲዳ ኣሳ።
PRO 31:24 ላይኖፔ ሴሎ ማይኦታ ኦꬃዳ ባይዛዉስ፤ ዛልኣንቻታስካ ዳንጮ ዳዳ ሺሻዉስ።
PRO 31:25 ኢዛ ሚኖኔ ፑላራ ዲዛ ማጫሳ፤ ኢዛ ዪዛ ላይꬃታ ኡፋይሳን ሞካዉስ።
PRO 31:26 ኣꬎ ኤራን ኢዛ ሃሳያዉስ፤ ኢዚ ኢንጻርሳፌ ሱሬ ዞሬይ ኬኤስ።
PRO 31:27 ኢዛ ባ ሶ ኣሳ ሃኖ ሎኤꬃ ካላዉስ፤ ኣዛላ ሃኖይ ኢዚ ቦላን ቤቲ ኤሬና።
PRO 31:28 ኢዚ ናይቲ ኢዞ፥ «ኣንጄቲዳሬ» ጌቴስ፤ ኢዚ ኬꬃ ኣዋይካ ኢዞ ጋላቲሼ፥
PRO 31:29 «ሎኦ ሚሽ ኦꬂዳ ዳሮ ማጫሳቲ ዴቴስ፤ ጊዶ ኣቲን ኔኒ ኢስታ ኡባፌ ኣꬋሳ» ጌስ።
PRO 31:30 ማላ ሎኦይ ባሌꬄስ፤ ፑላይካ ቆኬስ፤ ጊዶ ኣቲን ጎዳስ ያዪዛ ማጫሲ ኢዛ ኣንጄቲዳሮ።
PRO 31:31 ኢዚስ ቤሲዛ ኢሞታ ኢሚቴ፤ ኢዛ ኦꬂዳ ኦሶይ ኡባይ ዱቡሻን ኢዞ ጋላቲሶ።
ECC 1:1 ሃይሲ ዳዊቴ ና ዬሩሳላሜን ካዎቲዳ ኤራንቻዛ ቃላ።
ECC 1:2 ሄ ኤራንቻይ፥ «ኡባ ሚሺ ሃዳ፤ ሃዳፔካ ኣꬊዳ ሃዳ፤ ኡባ ሚሺካ ሃዳ» ጌስ።
ECC 1:3 ኣላሜ ቦላ ኣሳ ናይ ዳቡርዛ ዳቡራ ኡባስ ኣይ ዎꬌይ ዲዜ?
ECC 1:4 ዬሌታይ ኣꬊ ቢሺን ሃራ ዬሌታይ ዬስ፤ ጊዶ ኣቲን ቢታያ ሜርናስካ ሚና ዴኣዉስ።
ECC 1:5 ኣርሼይ ሞኬሲኔ ዉሌስ፤ ቃሴካ ባ ሞኪዛሶ ባናስ ኤሶቴስ።
ECC 1:6 ጫርኮይ ዱጌሃ ባጋ ጫርኬስ፤ ሃራ ዎዴ ፑዴሃ ባጋ ሲሜስ፤ ቃሴ ዩዪ ዩዪ ኣꬊዲ ባ ሎሲዳ ኦጌን ጌሌስ።
ECC 1:7 ሻፋ ሃꬅ ኡባይ ቢዲ ኣባን ጌሌስ፤ ጊዶ ኣቲን ኣባይ ሙሌካ ኩሚ ኤሬና፤ ሻፋ ሃꬃቲ ካሴ ባ ዪዳሶ ሲሚ ቤቴስ።
ECC 1:8 ኣሲ ሃሳያናስ ዳንዳይዛዛፔ ቦላራ ዮኦቲ ኡባይ ሳሌꬂዛዛ፤ ኣይፌይ ጼሊዲ ካሊ ኤሬና፤ ሃይꬂካ ሲዪዲ፥ «ታስ ጊዲዴስ» ጊ ኤሬና።
ECC 1:9 ካሴ ሃኒዳይ ሲሚ ኢዚ ሃናና፤ ቃሴ ሃኢ ሃኒሼ ዲዛይካ ካሴ ሃኒዳይሳ። ሄሳ ጊሻስ ሳሎ ጉፋንꬆን ኣይኮይካ ኦራꬃ ሚሺ ዴና።
ECC 1:10 ኦኒካ፥ «ቤኢቴ! ሃይሲ ኦራꬃ ሚሻ» ጊኮ ሄሲ ኦራꬃ ሚሽ ጊዴና፤ ሄሲ ኑኒ ዬሌታናፔ ካሴካ ዲዛ ሚሻ።
ECC 1:11 ቤኒ ዎዴ ሃኒዳ ሃኖታ ዛሪዲ ሃሳኢሲዛ ሚሺ ዴና፤ ሲንꬃፌ ያናይቲካ ኢስታፌ ካሊ ያናይታን ቆፌቴቴና።
ECC 1:12 ታኒ ኤራንቻዚ ዬሩሳላሜን ኢስራኤሌስ ካዎ ጊዳዳ ዴኣዲስ።
ECC 1:13 ታኒ ሳሎ ጉፋንꬆን ዲዛ ኡባ ሻካ ኤራናሲኔ ኣꬎ ኤራቴꬃን ፒልጋ ጼላናስ ታ ቆፋ ቃቻዲስ፤ ጾሲ ኣሳ ናይታ ቶሲዳ ቶሆይ ኣይ ማላ ዴጾ!
ECC 1:14 ሳሎ ጉፋንꬆን ሃኒዳ ሃኖታ ኡባ ታ ቤኣዲስ፤ ጊዶ ኣቲን ኡባይካ ሃዳ፤ ጫርኮ ኦይካና ዬዴꬂዛ ማላ።
ECC 1:15 ጌላቲዳ ሚሺ ሲቲ ጋናዉ ዳንዳዬና፤ ቃሴ ባይንዳ ሚሺ ቆዴታና ዳንዳዬና።
ECC 1:16 ታኒካ ታ ዎዚናን፥ «ታፔ ካሴ ዬሩሳላሜ ሃሪዳ ኡባታፔ ታኒ ጊታኔ ኣꬎ ኤራንቻ ጊዳዲስ፤ ታኒ ኣꬎ ኤራቴꬃኒኔ ኤራን ኬሃ ሎሃዲስ» ጋ ቆፓዲስ።
ECC 1:17 ቃሴ ታኒ ኣꬎ ኤራቴꬅ፥ ጎሻቴꬂኔ ኤያቴꬅ ሻካ ኤራናስ ኬሃ ባጼታዲስ፤ ጊዶ ኣቲን ዉርሴꬃን ሄሲካ ጫርኮ ኦይካናስ ዬዴꬂዛ ማላ ሃዳ ጊዲዳይሳ ኤራዲስ።
ECC 1:18 ኣꬎ ኤራቴꬂ ዳሪሺን ጬጬይ ዳሬስ፤ ኤራይ ዳሪዛ ዎዴካ ሜቶይ ዳሬስ።
ECC 2:1 ታኒ ታ ዎዚናን፥ «ኣኔ ታስ ጊታ ኡፋይስ ኢሚዛይ ኣዛኮ፥ ቃሴ ሎኦ ሚሺ ኣዛኮ ኤራናስ ኮያይስ» ጋ ቆፓዲስ፤ ጊዶ ኣቲን ሄሲ ሃዳ።
ECC 2:2 ቃሴካ፥ «ሚቺ ኤያቴꬃ፤ ኢሻሎሲኔ ኡፋይሳስ ኣይ ጎኣይ ዲዜ?» ጋዲስ።
ECC 2:3 ሄሲ ዉሪ ሃኒንካ ኣꬎ ኤራቴꬅ ዴማናስ ታ ዎዚናን ኣሞታዳ ታና ዎይኔ ኡሻን ኡፋይሳናሲኔ ኤያቴꬅ ኦይካናስ ባጼታዲስ፤ ቃሴ ኣሳይ ሳኣ ቦላ ዲዛ ቃንꬃ ላይꬃን ሳሎ ጉፋንꬆን ዲዛ ሚሽ ኡባ ቦላ ኦꬂዳኮ ኢስታ ጎኢዛዚ ኣዛኮ ታ ኤራና ኮያዲስ።
ECC 2:4 ሄሳ ጊሻስ ሃራ ኢሲ ጊታ ሚሻታ ኦꬃዲስ፤ ታስ ኬꬃታካ ኬጻዲስ፤ ዎይኔ ቱራካ ቶካዲስ።
ECC 2:5 ዱማ ዱማ ኣታኪልቴታ፥ ዱማ ዱማ ኣይፌ ኣይፊዛ ሚꬃታ ቶካዲስ፤ ዩዪ ኡፋዬቲዛሶ ጊጊሳዲስ።
ECC 2:6 ሄ ዲጪዛ ሚꬃታ ኡሻናስ ሃꬅ ኤሊሲዛሶ ዜራ ጊጊሳዲስ።
ECC 2:7 ኣቱማኔ ማጫ ኣይሌታ ሻማዲስ፤ ታስ ሶን ዬሌቲዳ ሃራ ኣይሌቲካ ዴቴስ፤ ታፔ ካሴ ዬሩሳላሜን ዴኢዳ ኦናፔካ ቦላራ ዳሮ ሜሄ፥ ዴይሺኔ ዶርሳ ዉዴ ሃራዲስ።
ECC 2:8 ታኒ ዱማ ዱማ ቢታታፔ ጊታ ኣሳታፔኔ ካዎታፔ ኣቆታ፥ ዎርቃኔ ቢራ ታስ ዳጋሳዲስ። ቃሴ ኣዴኔ ማጫ ዬꬃንቻታ ሺሻዲስ፤ ጉጃዳካ ኣሳ ኡፋይሳናስ ዳሮ ማጫ ናይታ ኤሃዲስ።
ECC 2:9 ሄሳ ጊሻስ ታኒ ታፔ ካሴ ዬሩሳላሜን ዴኢዳ ኦፔኔ ኣꬊዳ ጊታ ኣስ ጊዳዲስ፤ ታ ኣꬎ ኤራቴꬃይካ ታናራ ዴኢዴስ።
ECC 2:10 ታ ኣይፌይ ጼሊዳይሳ ዲጋቤኬ፤ ታ ዎዚናይ ኣሞቲዳይሳ ኡባ ዲጋቤኬ፤ ታኒ ኦꬂዳ ኡባ ታ ዎዚናይ ኡፋዬቲዴስ፤ ታ ዳቡራስ ዎꬌይ ሄሳ።
ECC 2:11 ጊዶ ኣቲን ሄሳ ኡባ ኦꬃ ሲማዳ ታኒ ኣኬኪዛ ዎዴ ታኒ ኬሃ ዴማና ጋዳ ዳቡርዳ ዳቡራ ኡባ ታ ቆፒዛ ዎዴ ኡባይካ ሃዳ፤ ሳሎ ጉፋንꬆን ኣይ ዎꬌይካ ዴና፤ ኡባይካ ጫርኮ ኦይካናስ ዬዴꬂዛ ማላ።
ECC 2:12 ሄሳፌ ጉዬ ታኒ ኣꬎ ኤራቴꬂ፥ ኤያቴꬂኔ ጎሻቴꬂ ኣዛኮ ፒልጋ ኤራናስ ቆፋ ዶማዲስ፤ ካዎ ሶሆን ካዎቲዳ ሃራ ካዎይ ካሴ ኦሴቲዳይሳፌ ሃራ ኣይ ኦꬃኔ?
ECC 2:13 ቱሙካ ፖኦይ ꬉማፔ ሎኢዛ ማላ ኣꬎ ኤራቴꬂካ ኤያቴꬃፌ ኣꬊዛይሳ ቤኣዲስ።
ECC 2:14 ኤራ ኣሳ ኣይፌይ ኢዛዴስ ሁኤ ቦላ ዴስ፤ ኤያይ ጊዲኮ ꬉማ ጊዶራ ሄሜቴስ፤ ጊዶ ኣቲን ኢስታ ናምኣ ቃዳይካ ኢሲኖ ጊዲዳይሳ ኣኬካዲስ።
ECC 2:15 ታኒ ታ ዎዚናን፥ «ኤያ ጋኪዛ ቃዳይ ታናካ ጋካና፤ ሂስቲን ታኒ ኣꬎ ኤራንቻ ጊዶይሳስ ዎꬌይ ኣዜ?» ጋዳ ቆፓዲስ። ቃሴ ታኒ ታ ዎዚናን፥ «ሃይሲ ኡባይካ ሃዳ» ጋዲስ።
ECC 2:16 ኣꬎ ኤራንቻይካ ኤያዛ ማላ ሜርናስ ሃሳኤቴና፤ ሲንꬃፌ ያና ላይꬃታን ናምኣይካ ዶጌታና፤ ኤያይ ሃይቂዛ ማላ ኣꬎ ኤራንቻሲካ ሃይቆይ ኣቴና።
ECC 2:17 ሳሎ ጉፋንꬆን ሃኒዛ ሚሺ ኡባይ ኢቲዛ ጊሻስ ሃ ሳኣ ዱሳይ ታና ኢቴስ፤ ሄሲ ኡባይካ ሃዳ፤ ጫርኮ ኦይካናስ ዬዴꬂዛ ማላ።
ECC 2:18 ሳሎ ጉፋንꬆን ታኒ ኬሃ ዳቡራ ዴሚዳ ኡባ ታፔ ጉዬን ዪዛ ዬሌታስ ዬጋዳ ቢዛ ጊሻስ ታኒ ዳቡራ ዴሚዳ ኡባይ ታና ኢቴስ።
ECC 2:19 ታፔ ጉዬራ ያናይሲ ኢዚ ኣꬎ ኤራንቻ ጊዲን ዎይኮ ኤያ ጊዲን ኦኔ ኤሪዛይ? ኢዚ ኦና ጊዲኮካ ታኒ ኬሃ ዳቡርዳይሳኔ ታ ኣꬎ ኤራቴꬃን ታኒ ዴሚዳ ኡባ ቦላ ጎዳ ጊዳና፤ ሄሲካ ሃዳ።
ECC 2:20 ሄሳ ጊሻስ ሳሎ ጉፋንꬆን ሃይሳ ኬና ኣይስ ዳቡራዲና ጋዳ ታ ዎዚናን ሂዶታ ቃንጾ ዶማዲስ።
ECC 2:21 ጋሶይካ ኣሲ ባ ኡባ ኣꬎ ኤራቴꬃን፥ ኤራኒኔ ሂላን ዳቡርዲ ዴሚዳ ኡባ ኣይኮካ ዳቡሮንታ ኣሳስ ኣጊ ቤስ፤ ሄሲካ ሃዳኔ ጊታ ቆሆ።
ECC 2:22 ሄሳ ጊሻስ ሳሎ ጉፋንꬆን ኣሲ ኬሂ ዳፌቲኮኔ ዳቡርኮ ኢዛስ ኣይ ዎꬌይ ዲዜ?
ECC 2:23 ኢዚ ባ ዴኦ ላይꬃን ዳቡርዛ ዳቡራይ ኡባይ ዋዬኔ ሜቶ ጻላ፤ ኦማርሲካ ኢዛ ጉጌይ ሼምፖ ዴሜና፤ ሄሲ ኡባይካ ሃዳ።
ECC 2:24 ኣሳስ ሙሳፌኔ ኡሻፌ ቃሴ ባ ኦꬂዳ ኦሶን ኡፋዬቴꬃፌ ሃራ ሎኢዛ ሚሺ ዴና፤ ሄሲካ ጾሳ ኩሼፔ ኢሜቲዛይሳ ታ ቤያዲስ።
ECC 2:25 ኢዛ ኣቻፌ ኢሜቶንታ ኣጊኮ ኦኒ ማናሲኔ ኡፋዬታናስ ዳንዳይዜ?
ECC 2:26 ጾሲ ባና ኡፋይሲዛ ኣሳስ ኣꬎ ኤራቴꬅ፥ ኤራቴꬂኔ ኡፋይስ ኢሜስ፤ ጊዶ ኣቲን ናጋራንቻይ ጾሳ ኡፋይሲዛይታስ ዬጊ ባና ማላ ኣቆታ ዳጋሳናሲኔ ኦꬃናስ ዎልቃ ኢሜስ፤ ሄሲካ ሃዳኔ ጫርኮ ኦይካናስ ዬዴꬂዛ ማላ።
ECC 3:1 ኡባሲካ ዎዴይ ዴስ፤ ሳሎፔ ጋርሳ ባጋራ ኦሴቲዛይሳስ ኡባስ ዎዴይ ዴስ።
ECC 3:2 ሄሳ ጊሻስ ዬሌታናስ ዎዴይ ዴስ፤ ሃይቃናስካ ዎዴይ ዴስ፤ ቶካናስ ዎዴይ ዴስ፤ ሾዳናስካ ዎዴይ ዴስ።
ECC 3:3 ዎꬋናስ ዎዴይ ዴስ፤ ኣሻናስካ ዎዴይ ዴስ፤ ላላናስ ዎዴይ ዴስ፤ ጊምባናስካ ዎዴይ ዴስ።
ECC 3:4 ዬካናስ ዎዴይ ዴስ፤ ሚጫናስካ ዎዴይ ዴስ። ካዮታናስ ዎዴይ ዴስ፤ ቃሴ ኡፋዬቲሼ ጉፓናስካ ዎዴይ ዴስ።
ECC 3:5 ሹች ላላናስ ዎዴይ ዴስ፤ ሹች ሺሻናስካ ዎዴይ ዴስ። ኢዲሜታናስ ዎዴይ ዴስ፤ ሻኬታናስካ ዎዴይ ዴስ።
ECC 3:6 ኮያናስ ዎዴይ ዴስ፤ ኣጋናሲካ ዎዴይ ዴስ። ሺሺ ኦይካናስ ዎዴይ ዴስ፤ ኬሲ ኦላናስካ ዎዴይ ዴስ።
ECC 3:7 ዳካናስ ዎዴይ ዴስ፤ ሲካናስካ ዎዴይ ዴስ። ጮኡ ጋናስ ዎዴይ ዴስ፤ ሃሳያናስካ ዎዴይ ዴስ።
ECC 3:8 ዶሳናስ ዎዴይ ዴስ፤ ኢጻናስካ ዎዴይ ዴስ። ኦላስ ዎዴይ ዴስ፤ ሳሮን ዳናስካ ዎዴይ ዴስ።
ECC 3:9 ሂስቲን ኦሳንቻይ ባ ዳፌቲ ዳቡርዳይሳፌ ኣይ ዎꬌ ዴማኔ?
ECC 3:10 ታኒ ቃሴ ኣሳ ናይቲ ዳቡርዲ ኦꬃና ማላ ጾሲ ኢሚዳ ቶሆይ ኬሂ ዴጾ ጊዲዳይሳ ቤኣዲስ።
ECC 3:11 ኡባ ሚሽ ኢዛ ዎዴን ዎዴን ሎኤꬂዲ ኦꬂዴስ። ጾሲ ኣሳ ዎዚናን ሜርናቴꬅ ዎꬂዴስ፤ ጊዲኮካ ጾሲ ኦꬂዳይሳ ኡባ ኮይሮፔ ዉርሴꬅ ጋካናስ ኣሲ ኡባ ኤራናስ ዳንዳዬና።
ECC 3:12 ሄሳ ጊሻስ ኣሲ ባ ዴኦ ላይꬃን ሎኦ ኦሶ ኦꬂዛይሳፌኔ ኡፋይሲዛዝ ኦꬂዛዛፔ ኣꬊዛ ሃራ ሚሺ ባይንዳይሳ ታኒ ኤራዲስ።
ECC 3:13 ቃሴ ኣሳስ ኢዛስ ኢዛ ዳቡራስ ዋጋ ጊዲዛይ ሚዲኔ ኡዪዲ ባና ኡፋይሲዛይሳ፤ ሄሲካ ኢዛስ ጾሳፌ ኢሜቲዳ ኢሞታ።
ECC 3:14 ጾሳይ ኦꬂዳይሲ ኡባይ ሜርናስ ዴኣናይሳ ታ ኤራይስ፤ ኢዚ ኦꬂዳይሳ ቦላ ጉጃናስ ዎይኮ ኢዛፔ ጉꬃናስ ዳንዳዬቴና። ጾሲ ሄሳ ኦꬂዳይ ኣሳይ ኢዛ ቦንቻና ማላሳ።
ECC 3:15 ሃኢ ዲዛይሲ ሃይሳፌ ካሴካ ዲዛይሳ፤ ሲንꬃፌ ሃናናይሲ ቤኒካ ዲዛይሳ፤ ጾሲ ካሴ ኣꬊዳይሳ ዛሪ ኮዬስ።
ECC 3:16 ቃሴካ ታኒ ሳሎ ጉፋንꬆን ሃራ ሚሽ ቤኣዲስ፤ ፒርዳ ሶሆን ማካላቴꬂ ዴስ፤ ሱሬ ፒርዳ ሶሆን ጌኔይ ዴስ።
ECC 3:17 ታኒካ ታ ዎዚናን፥ «ኡባ ዮኦሲኔ ኦሶስ ዎዴይ ዲዛ ጊሻስ ጾሲ ጺሎዛኔ ዎርዳንቻዛ ፒርዳስ ሺሻና» ጋዳ ቆፓዲስ።
ECC 3:18 ቃሴ ታኒ ታ ዎዚናን፥ «ኣሲ ሜሄ ማላ ጊዲዳይሳ ኢስቲ ኤራና ማላ ጾሲ ፓጬስ።
ECC 3:19 ኣሳ ቃዳይካ ሜሄይሳ ማላ፤ ናምኣ ቃዳይካ ኢሲኖ፤ ኢሶይ ሃይቂዛ ማላ ሃንኮይሲካ ሃይቄስ፤ ናምኣስካ ኢሲ ቆሞ ፔኖይ ዴስ፤ ሄሳ ጊሻስ ኢዚ ሜሄፔ ዱማቴና፤ ሄሲካ ሃዳ።
ECC 3:20 ናምኣይካ ኢሲ ሶሆ ቤቴስ፤ ናምኣይካ ቢታፌ ሜꬌቲዳ ጊሻስ ቢታን ሲሜቴስ።
ECC 3:21 ሂስቲን ኣሳ ሼምፖይ ፑዴ ሳሎ ኬዚዛይሳ፥ ሜሄታ ሼምፖይካ ዱጌ ቢታን ጌሊዛይሳ ኦኔ ኤሪዛይ?» ጋዳ ቆፓዲስ።
ECC 3:22 ሄሳ ጊሻስ ኣሲ ባ ኦꬂዳ ኦሶን ኡፋይሳፌ ሃራ ኣꬊዛ ሚሺ ባይንዳይሳ ታ ቤኣዲስ፤ ሄሲካ ኣሳስ ኢሜቲዳ ቃዳ፤ ኢዚ ሃይቂዳፔ ጉዬ ኦሴቲዳ ኦሶታ ኢዛ ዛሪ ኤሂዲ ቤሳናይ ኦኔ?
ECC 4:1 ታኒ ቃሴካ ሳሎ ጉፋንꬆን ዲዛ ቆሆ ኡባ ቤኣዲሲኔ ኣኬካዲስ፤ ቆሄቲዳይታ ኣፉንꬅ ቤኣዲስ፤ ኢስታ ሚንꬄꬂዛ ኣሲካ ዴና፤ ዎልቃይ ኢስታ ቆሂዛ ኣሳታ ኩሼን ዴስ፤ ኢስታ ሚንꬄꬂዛ ኣሲካ ዴና።
ECC 4:2 ሄሳ ጊሻስ ታኒ፥ «ሃኢ ሼምፖራ ፓጻ ዲዛይታፔ ካሴ ሃይቂዳይቲ ኪያ» ጋዲስ።
ECC 4:3 ጊዶ ኣቲን ሃ ናምኣታፔካ ቦላራ ሙሌካ ዬሌቶንታይታ ቃዳይ ሎኦ፤ ጋሶይካ ኢስቲ ሳሎ ጉፋንꬆን ኦሴቲዛ ቆሆዛ ሙሌካ ቤኢቤቴና።
ECC 4:4 ሄሳꬆካ ኣሳይ ባ ኣሞቲዳይሳ ዴማናስ ኬሂ ዳቡርዲ ኦꬄስ፤ ጊዶ ኣቲን ሄ ዳቡራይ ባ ላጌ ቦላ ቃናቴቴꬃን ዴንዶን ጊዲዳይሳ ታኒ ኣኬካዲስ። ሄሲካ ሃዳ፤ ጫርኮ ኦይካናስ ዬዴꬂዛ ማላ።
ECC 4:5 ኣዛላይ ባ ኩሼ ኢዲሚ ኡቴስ፤ ባርካ ባና ዎꬌስ።
ECC 4:6 ጮ ዳቡራኒኔ ጫርኮ ካሎን ናምኡ ኩሼ ዴማናፔ ዎፓን ቤቲዛ ኢሲ ኩጳይ ኪዬስ።
ECC 4:7 ቃሴካ ታኒ ሳሎ ጉፋንꬆን ዲዛ ሚሺ ሃዳ ጊዲዳይሳ ቤኣዲስ።
ECC 4:8 ዬሎይ ዎይኮ ኢሻይ ባይንዳ ቢዛ ኣሲ ዴስ፤ ኢዛ ዳፌቴꬃስ ዛዋይ ዴና፤ ኢዛ ኣይፌይ ኢዛስ ዲዛ ኣቆታ ካሊቤና፤ ኢዚካ፥ «ታኒ ሃይሳ ኦሲ ዳቡራዚና? ታኒ ታ ሁኤ ኡፋይሳናይሳ ኣይስ ኡዜታዚና?» ጊዴስ። ሄሲካ ሃዳኔ ቱጋ ዴኦ።
ECC 4:9 ኢስታ ኦሶይ ሎኦ ኣይፌ ኢማናስ ዳንዳይዛ ጊሻስ ኢሲኖ ጊዳናፔ ናምኡ ጊዴꬂ ሎኦ።
ECC 4:10 ቃሴ ናምኣፌ ኢሶይ ኩንዲኮ ኢሶይ ዴንꬄስ፤ ጊዶ ኣቲን ኩንዲኮ ዴንꬂዛ ላጌይ ባይንዳዴይ ኣይ ማላ ቃꬌꬂዜ!
ECC 4:11 ናምኣይ ኢሲፌ ኢቺኮ ሆኤስ፤ ጊዶ ኣቲን ባርካ ኢቺዳዴ ዋኒ ሆኣና ዳንዳይዜ?
ECC 4:12 ኣሲ ቢዛ ቆሃና ዳንዳዬስ፤ ናምኡ ጊዲኮ ኢዛራ ኤቄታና ዳንዳዬቴስ፤ ሄꬓን ዶቄቲዳ ዎዶሮይ ኤሌ ዱጼና።
ECC 4:13 ዞሬ ኤኮንታ ኤያኔ ጪማ ካዎ ጊዳናፔ ኣꬎ ኤራቴꬂ ዲዛ ናቴꬃ ማንቆይ ሎኦ።
ECC 4:14 ኣይስ ጊኮ ኢዚ ሄ ሂዬሳ ጊዲዳ ሶሆፔ ዴንዲዲ ዎይኮ ቃሾ ኬꬃፌ ኬዚዲ ባ ቢታን ካዎታናስ ዳንዳዬስ።
ECC 4:15 ታኒ ሳሎ ጉፋንꬆን ዲዛይቲኔ ሲሜሬቲዛይቲ ኡባይ ካዎ ኣራታ ላቲዛ ዬላጋ ካሊዛይሳ ቤኣዲስ።
ECC 4:16 ኢዛ ሲንꬃን ቆዳይ ባይንዳ ዴሬይ ዴስ፤ ካዎቴꬃፌ ኢዚ ኪቺዛ ዎዴ ኢዚ ኦꬂዳይሳስ ኦኒካ ኢዛ ጋላቴና። ሄሲካ ሃዳ፤ ጫርኮ ኦይካናስ ዬዴꬂዛ ማላ።
ECC 5:1 ጾሳ ኬꬅ ጌላሼ ኔ ቶሆ ሺሻ ኤካ፤ ሲያናስ ሺቆይ ኤያታ ያርሾፌ ኣꬌስ፤ ኣይስ ጊኮ ኢስቲ ባንታ ኦሶይ ኢታ ጊዲዳይሳ ኤሬቴና።
ECC 5:2 ሃሳያናዉ ኤሶቶፓ፤ ቃሴ ኢሲ ሚሽ ጾሳስ ኢማና ጋዳ ኤሶን ጌፖፋ፤ ኣይስ ጊኮ ጾሲ ሳሎን ዴስ፤ ኔኒ ጊዲኮ ሳኣን ዳሳ፤ ሄሳ ጊሻስ ኔ ሃሳያና ቃላይ ጊናራ ጊዶ።
ECC 5:3 ኦሶ ዳሮን ኣጉሞይ ቤቲዛ ማላ ሃሳያ ዳሮን ኤያቴꬃ ቃላይ ቆንጬስ።
ECC 5:4 ጾሳስ ኔኒ ኣዲኒዳ ኣዲና ጋምኦንታ ጋꬃ፤ ኤሶን ፖሎንታ ኣቲኮ ኢዚ ኡፋዬቴና፤ ሄሳ ጊሻስ ኔኒ ኣዲኔቲዳይሳ ኡባ ፖላ።
ECC 5:5 ኢሲ ሚሽ ጾሳስ ኣዲኔቲዲ ሄ ኣዲኔቲዳይሳ ጋꬆንታ ኣጋናፔ ካሴ ኣዲኔቶንታ ኣጎይ ሎኦ።
ECC 5:6 ኔና ኔ ዶናይ ናጋራን ዬጎንታ ማላ ኔ ዶና ሺሻ፤ ቃሴ ጾሳ ኬꬃ ኦሳንቻ ሲንꬅ ሺቃዳ፥ «ታ ሃይሳ ቆፖንታ ኣዲኔታዲስ» ጎፓ። ጾሳ ሃንቄꬃዳ ኔ ኦሶ ኣይስ ꬋይሲሳይ?
ECC 5:7 ዳሮ ኣጉሞይኔ ዳሮ ሃሳያይ ሃዳ፤ ሄሳ ጊሻስ ኔኒ ጾሳስ ያያ።
ECC 5:8 ዴሬ ጋርሳን ማንቆይ ሱጌቲን፥ ፒርዳይ ፓጪን፥ ማታይ ዬꬌቲን ኔ ቤኢኮ ሄይታንታን ኬሃ ማላሌቶፋ። ኢሲ ኢሲ ሃላቃስ ኢዛፔ ቦላራ ሃላቃይ ዴስ፤ ቃሴ ኡባታፔ ቦላራ ሃራ ሃላቃቲ ዴቴስ።
ECC 5:9 ቢታፌ ቤቲዛ ጎኣይ ኡባሳ፤ ካዎይካ ባ ሁኤስ ሄሳፌ ጎኤቴስ።
ECC 5:10 ቢራ ሲቂዛ ኣሳስ ቢራይ ጊዲ ኤሬና፤ ዱሬቴꬅ ኮይዛ ኣሲ ዱሬቲዲካ ካሊ ኤሬና፤ ሄሲ ኡባይካ ሃዳ።
ECC 5:11 ኣቆታይ ዳሪ ዳሪ ቢሺን ሚዛይ ዳሬስ፤ ሃሪዳዴስ ኣይፌን ቤኦፔ ሃራ ኣዛ ጎኣይ ዲዜ?
ECC 5:12 ኦሶ ኦꬂዛ ኣሲ ጉꬅ ሚኮ፥ ዳሮ ሚኮ ሳሮ ꬊስኮ ꬊስኪ ኣቄስ፤ ጊዶ ኣቲን ዱሬ ኣስ ዱሬቴꬂ ꬊስኮ ዲጌስ።
ECC 5:13 ሳሎ ጉፋንꬆን ኬሂ ጬጬሲዛ ኢታ ሚሽ ታ ቤኣዲስ፤ ሄሲካ ኢታ ዎዴን ባና ማዶ ጊዲ ኣሲ ጉዬ ዬጊ ዳጋሲዳ ሚሺ ኢዛዴስ ሜቶ፤
ECC 5:14 ዎይኮ ኢሲ ጋሶን ጮ ꬋይዛ ዱሬቴꬃ። ኢዚ ና ዬሊኮካ ሄ ዬሌቲዳይሳስ ላቲሲዛ ሚሺ ዴና።
ECC 5:15 ኣሲ ባ ኣዪ ኡሎፔ ካሎ ዬሌቲዳ ማላ ካሎ ቤስ፤ ኣይ ኬና ዳቡርኮካ ኢዚ ባ ዳቡርዳይሳፌ ኣይኮካ ኤኪቤና።
ECC 5:16 ሄሲካ ኬሂፔ ኢታ፤ ኣሲ ባ ዪዳ ማላ ሲሚ ቤስ፤ ኢዛ ዳቡራ ኡባይ ጫርኮ ኦይኪዛ ማላ ሃዳ ጊዲዛ ጊዲኮ ኢዛስ ኣይ ጎኣይ ዲዜ?
ECC 5:17 ኢዚ ባ ላይꬅ ኡባ ጬጬን፥ ዋዬን፥ ዪሎኒኔ ꬉማ ዱሳን ዉርሴስ።
ECC 5:18 ኣሳ ቃዳይ ሄሳ ጊዲዳ ጊሻስ ሳሎ ጉፋንꬆን ጾሲ ኣሲ ዴኣና ማላ ኢሚዳ ቃንꬃ ላይꬃ ጋርሳን ኣሲ ባ ዳቡርዳ ዳቡራፔ ሙሲኔ ኡሺ ሎኦኔ ቤሲዛይሳ ጊዲዳይሳ ታ ኣኬካዲስ።
ECC 5:19 ጾሳይ ኣሳስ ዱሬቴꬂኔ ኣቆ ኢሚዛይ ባ ዳቡርዳ ዋጋ ዴሚዲ ሚዲኔ ኡዪዲ ኡፋዬታናሳ። ሄሲ ጾሳፌ ኢዛስ ኢሜቲዳ ኢሞታ።
ECC 5:20 ጾሳይ ኢዛ ዎዚናን ኡባ ዎዴ ኡፋይስ ኩንꬂ ዎꬂዛ ጊሻስ ኢዚ ባ ዴኦ ላይꬃስ ዳሮ ሂርጌና።
ECC 6:1 ሳሎ ጉፋንꬆን ሃራ ኢታ ሚሽ ታኒ ቤኣዲስ፤ ሄሲካ ኣሳስ ኬሂ ዴጾ።
ECC 6:2 ኣሲ ባ ዎዚናን ኣሞቲዳ ሚሽ ዴማና ማላ ጾሲ ኣሳስ ኣቆታ፥ ዱሬቴꬂኔ ቦንቾ ኢሜስ፤ ጊዶ ኣቲን ኬꬃዋይ ኢስታን ኡፋዬታና ማላ ኩሜꬃ ማታ ኢዛስ ኢሜና፤ ኢዚ ዳቡሪ ዴሚዳይሳን ሃራይ ኡፋዬቴስ፤ ሄሲካ ሃዳኔ ኬሂ ኢታ ሚሻ።
ECC 6:3 ኢሲ ኣሲ ጼቱ ናይታ ጋካናስ ዬሊ ጪሚዲ ኣዱሳ ላይꬅ ዴኣናዉ ዳንዳዬስ፤ ጊዶ ኣቲን ኢዚ ባ ኣቆታን ኡፋዬቶንታ ኣጊኮኔ ሃይቂዲ ዎጋራ ሞጌቶንታ ኣጊኮ ኢዛፔ ኣዉጫያይ ኪያ።
ECC 6:4 ጋሶይካ ጮ ሃዳ ዪዲ ꬉማን ቤስ፤ ኢዛ ሱንꬂካ ꬉማን ካሜቲዴስ።
ECC 6:5 ኢዚ ኤሮንታኔ ፖኦ ቤኦንታ ኣጊኮካ ሄ ኣዴዛፔ ኢዛስ ኣꬎ ዎፓይ ዴስ።
ECC 6:6 ኡፋይሲ ባይንዳ ዲሺን ናምኡ ሺ ላይꬅ ዴኢኮካ ኢዛስ ኣዛ ጎኣይ ዲዜ? ዉርሴꬃን ናምኣይካ ኢሲ ሶሆ ባና ዴቴኔ?
ECC 6:7 ኣሲ ዳቡርዲ ኦꬂዛ ኡባይ ኡሎሳ፤ ጊዶ ኣቲን ኢዛ ኣሞይ ሙሌካ ካሊ ኤሬና።
ECC 6:8 ሂስቲን ኣꬎ ኤራንቻይ ኤያፔ ኣዛን ኣꬊዜ? ማንቆይ ሃራታ ሲንꬃን ዋኒ ሲሜሬታናኮ ኤሮይ ኢዛ ኣይ ማዲዜ?
ECC 6:9 ኣሞን ቶይላታናፔ ኣይፌን ቤኦይ ኪያ፤ ሄሲካ ሃዳኔ ጫርኮ ኦይካናስ ዬዴꬂዛ ማላ
ECC 6:10 ሃኢ ዲዛ ኡባስ ካሴቲ ሱንꬂ ኢሜቲ ኡቲዴስ፤ ኣሲ ሃናናዚ ኤሬቲ ኡቲዴስ፤ ኣሲ ባፔ ሚኒዛይሳራ ባጼቴና።
ECC 6:11 ሃሳያይ ዳሪሺን ሃዳ ዮኦይ ዳሬስ፤ ሂስቲን ሄሲ ኣስ ኣይ ጎኣኔ?
ECC 6:12 ሃዳኔ ኤሾ ማላ ኤሌ ኣꬊዛ ጉꬃ ላይꬃታን ኣሳስ ሎኦ ሚሺ ሃናናይሳ ኤሪዛይ ኦኔ? ቃሴካ ኢዚ ሃይቂዳፔ ጉዬ ሳሎ ጉፋንꬆን ሃኒዛ ሚሽ ኢዛስ ዮታና ዳንዳይዛይ ኦኔ?
ECC 7:1 ሎኦ ሺቶፌ ሎኦ ሱንꬂ ኣꬌስ፤ ዬሌታ ጋላሳፌ ሃይቆ ጋላሲ ሎኦ።
ECC 7:2 ጊቢራ ኬꬅ ቡሳፌ ዬሆ ኬꬅ ቡሲ ሎኦ፤ ጋሶይካ ሃይቆይ ኣስ ኡባስ ዉርሴꬃ፤ ሼምፖራ ፓጻ ዲዛ ኣሲ ኡባይ ሄሳ ባ ዎዚናን ዎꬃናስ ቤሴስ።
ECC 7:3 ሚቻፌ ካዮይ ኪያ፤ ጋሶይካ ካዮይ ሲንꬅ ካሬꬂኮካ ዎዚና ፖኢሴስ።
ECC 7:4 ኣꬎ ኤራንቻ ዎዚናይ ካዮ ኬꬃን ዴስ፤ ኤያታ ዎዚናይ ጊዲኮ ኡፋይሳ ኬꬃን ዴስ።
ECC 7:5 ኤያቲ ሳቢሼ ዬጺዛ ዬꬅ ሲያናፔ ኣꬎ ኤራንቻይ ሴሪዛ ሴራ ኤዝጎይ ሎኦ።
ECC 7:6 ኤያታ ሚቺ ኦቶ ጋርሳን ኤጺሼ ꬉቄቲዛ ኣጉንꬃ ማላ፤ ሄሲካ ሃዳ።
ECC 7:7 ጌኔ ኦሶይ ኣꬎ ኤራንቻ ኤያ ኬሴስ፤ ማጋንጾይ ኣሳስ ዎዚና ሞሬስ።
ECC 7:8 ኢሲ ሚሻስ ዶሜꬃፌ ዉርሴꬂ ኪያ፤ ቃሴ ኦቶራንቻፌ ዳንዳያንቻይ ኪያ።
ECC 7:9 ኤያታ ሃንቆይ ኢስታ ኪኦ ጋርሳን ዲዛ ጊሻስ ኔኒ ሃንቆስ ኤሶቶፓ።
ECC 7:10 ኔኒ፥ «ሃ ዎዴይ ካሴ ኣꬊዳ ዎዴታፔ ኣይስ ሎኢዴ?» ጋ ኦይቾፋ፤ ሄይታንታ ማላ ኦይሻታ ኦይሾይ ኣꬎ ኤራቴꬅ ጊዴና።
ECC 7:11 ኣꬎ ኤራቴꬂ ሎኦ ጺንጾ ማላ፤ ኢዛ ጎኣይ ፖኦ ቤኢዛ ኣስ ኡባሳ።
ECC 7:12 ሚሺ ኣስ ኢታፔ ካሚ ኣሺዛ ማላ ኣꬎ ኤራቴꬂ ኣሼስ። ሄሳፌ ቦላራካ ኣꬎ ኤራቴꬂ ኬꬃ ኣዋ ሼምፖ ናጌስ።
ECC 7:13 ኣኔ ጾሳይ ኦꬂዳይሳ ዎዚናን ዎꬃ! ኢዚ ቦካሲዳይሳ ኦኒ ሉሊሳና ዳንዳይዜ?
ECC 7:14 ኔስ ዎዴይ ሎኢሺን ኡፋዬታ፤ ጊዶ ኣቲን ዎዴይ ኢቲሺን ሃይሳ ዎዚናን ዎꬃ፤ ጾሲ ኢሳ ኦꬂዳ ማላ ሃራካ ኦꬂዴስ፤ ሄሳ ጊሻስ ኣሲ ሲንꬃፌ ሃናና ሚሽ ኣይኮካ ፒልጊዲ ኤራና ዳንዳዬና።
ECC 7:15 ናጋራንቻይ ባ ናጋራራ ኣዱሳ ላይꬅ ዴኢሺን፥ ጺሎይ ባ ጺሎቴꬃራ ኤሶን ሃይቂሺን ሃዳ ጊዲዳ ታ ዴኦ ላይꬃታን ሃይታ ቤኣዲስ።
ECC 7:16 ሄሳ ጊሻስ ኔ ꬋዮንታ ማላ ኬሃ ጺሎ፥ ዎይኮ ኬሃ ኣꬎ ኤራንቻ ጊዶፓ።
ECC 7:17 ቃሴ ኬሃ ኢታ ኣስ፥ ዎይኮ ኡባ ኤያ ኣስ ጊዶፓ፤ ኔ ኣይስ ዎዴይ ባይንዳ ሃይቃይ?
ECC 7:18 ኢሳ ኦይኪዲ ሃንኮይሳካ ዬዶንታ ኣጎይ ሎኦ፤ ጾሳስ ያዪዛ ኣሲ ሺካላቴꬅ ኢጼስ።
ECC 7:19 ኣꬎ ኤራቴꬂ ኣꬎ ኤራንቻስ ኢሚዛ ዎልቃይ ኢሲ ካታማን ዴሬ ሃሪዛ ታማታፔ ኣꬌስ።
ECC 7:20 ናጋራ ኦꬆንታ ሙሌራ ሱሬ ኦሶኒኔ ጺሎቴꬃን ጻላ ካንꬂዛ ኣሲ ቢታ ቦላ ዴና።
ECC 7:21 ሃሳዬቲዛ ቃላ ኡባ ሃይꬅ ዬጋ ሲዮፓ፤ ኔ ሂስቶንታ ኣጊኮ ኔ ኣሽካራይ ኔና ቃንጊሺን ኔ ሲያንዳሳ።
ECC 7:22 ቃሴ ኔኒካ ኔ ሁኤን ሃራታ ቃንጎይሳ ኔ ዎዚናይ ኤሬስ።
ECC 7:23 ሃይሳ ኡባ ታኒ ኣꬎ ኤራቴꬃን ፒልጋ ጼላዳ፥ «ታኒካ ኣꬎ ኤራንቻ ጊዳናስ ቃቻዲስ» ጋዲስ። ጊዶ ኣቲን ታኒ ጊዳ ማላ ሃኒቤና።
ECC 7:24 ኣꬎ ኤራቴꬂ ኣይ ጊዲኮካ ኬሂ ጪማኔ ሃኮ፤ ሂስቲን ኦኒ ጋኪ ኤራና ዳንዳይዜ?
ECC 7:25 ሄሳ ጊሻስ ኣꬎ ኤራቴꬂኔ ዮኦቲ ሃኒዛይሳ ፒልጋ ኤራናስ፥ ጻናኣናስ ናጋራ ኢታቴꬂኔ ኤያቴꬂ ጎሻቴꬅ ጊዲዳይሳ ኣኬካናስ ታ ዎዚናን ዩሻ ቆፓዲስ።
ECC 7:26 ኢዚስ ዎዚናይ ዎጺማዴ ማላ፥ ኢዚ ኩሼቲ ኣግሪሞቄ ማላኔ ያርዴ ማላ ጊዲዳ ሃይቆፔ ኢታ ማጫስ ቤኣዲስ፤ ኢዚፔ ኬሲ ኤካናይ ጾሳስ ያዪዛ ኣስ ጻላ፤ ናጋራንቻ ኣስ ጊዲኮ ያርዴን ኦይካዉስ።
ECC 7:27 ኣꬎ ኤራንቻዚ፥ «ታኒ ካላ ፒልጋ ጼላዳ ዴሚዳ ሃራ ሚሺ ሃይሳፌ ካሊዛይሳ። ዮኦቲ ሃኒዛይሳ ሂላቴꬃን ፒልጊዲ ዴማናስ ኢሳ ኢሳ ቦላ ጉጆ፤
ECC 7:28 ሄሲካ ታኒ ሃች ጋካናስ ፒልጋሼ ꬋይዳይሳ ሺ ኣቱማሳፔ ኢሲ ሱሬ ኣስ ዴማዲስ። ጊዶ ኣቲን ሃይታንታ ጊዶፌ ኢሲ ሱሬ ማጫስ ዴማቤኬ።
ECC 7:29 ታኒ ሃይሳ ኡባፌ ኢሲ ሚሽ ታማራዲስ፤ ጾሲ ኣስ ሱሬ ሂስቲ ሜꬊዴስ፤ ጊዶ ኣቲን ኣሲ ዳሮ ጊቴቲዳዝ ጊግሲዴስ» ጊዴስ።
ECC 8:1 ዮኦታ ቢርሻና ዳንዳይዛ ኣꬎ ኤራንቻ ማላ ኣሲ ኦኔ? ዮኦታ ኡባ ቢርሼꬅ ኤሪዛይ ኦኔ? ኣꬎ ኤራቴꬂ ኣሳ ኣይፌሶ ፖኢሴስ፤ ጺርጶቲዳ ሲንꬂካ ቢርሼስ።
ECC 8:2 ኔ ካሴ ጾሳ ሲንꬃን ጫቂዳ ጊሻስ ካዎስ ኣዛዜታ።
ECC 8:3 ካዎ ሲንꬃፌ ኤሶን ኬዞፓ፤ ኢዚ ባ ዶሲዳይሳ ኦꬃናስ ዳንዳይዛ ጊሻስ ኢታ ኦሶስ ዙፔቶፓ።
ECC 8:4 ኡባ ሚሽ ኦꬃናስ ካዎስ ማታይ ዲዛ ጊሻስ፥ «ሃይሳ ኣይስ ኦꬃይ?» ጊዲ ኢዛ ኦይቻናስ ዳንዳይዛይ ኦኔ?
ECC 8:5 ኢዛስ ኣዛዜቲዛ ኣሲ ኡባይ ቆሄቴና፤ ኣꬎ ኤራቴꬂ ዲዛ ዎዚናይ ሊኬ ዎዴኔ ቤሲዛ ኦሶ ኦጌ ሻኪ ኤሬስ።
ECC 8:6 ኣስ ሜቶይ ኬሂ ኡንኤꬂኮካ ኡባ ሚሻስካ ሊኬ ዎዴይኔ ቤሲዛ ኦሶ ኦጌይ ዴስ።
ECC 8:7 ሲንꬃፌ ሃናናይሳ ኤሪዛይ ዴና፤ ሄሳ ጊሻስ ሲንꬃፌ ሃናናይሳ ዮታናስ ዳንዳይዛይ ኦኔ?
ECC 8:8 ኣሲ ባ ሼምፖ ናጊ ኣሻናስ ዳንዳዬና፤ ዎይኮ ባ ሃይቃና ጋላሳ ቦላ ማታይ ዲዛ ኣሲ ዴና፤ ኦላ ጋላስ ኦኒካ ኦላ ዬጊዲ ጉዬ ሲሞንታይሳ ማላ ኢታ ኦሶይካ ባናራ ሜዜቲዳይታ ዬዴና።
ECC 8:9 ሳሎ ጉፋንꬆን ሃኒዛ ሚሽ ኡባ ታኒ ፒልጋ ቤኣዲስ፤ ኣሲ ኣስ ቆሃናስ ዳናቲዛ ዎዴይ ዴስ።
ECC 8:10 ቃሴ ኢታቲ ቦንቾን ሞጌቲሺኒኔ ጌሻ ካታማን ሳቤቲሺን፥ ጾሳ ኣሳቲ ጌሻ ካታማን ዶጌቲሺን ታ ቤኣዲስ፤ ሄሲ ኡባይካ ሃዳ።
ECC 8:11 ኢታ ኦꬂዳ ኣሳ ቦላ ኤሶን ፒርዶንታ ኣጊኮ ኣሳ ዎዚናይ ኢታ ኦꬃና ሃልቾን ኩሜስ።
ECC 8:12 ናጋራንቻይ ጼቱቶ ኢታ ሚሽ ኦꬂሺን ኢዛ ላይꬃይ ኣዱቂኮካ፥ ጾሳ ቦንቺዛይታሲኔ ጾሳ ያዪዛይታስ ሎኦይ ሃናናይሳ ታ ኤራይስ።
ECC 8:13 ጊዶ ኣቲን ኢታቲ ጾሳስ ያዮንታ ጊሻስ ሎኦ ሚሺ ኢስታስ ሃኔና፤ ኢስታ ላይꬂ ኤሾ ማላ ኤሌ ኣꬋና።
ECC 8:14 ሳኣ ቦላ ኦሴቲዛ ሃራይ ሃዳ ሚሺ ዴስ፤ ሄሲካ ጺሎቲ ኢታታስ ቤሲዛ ቂጻቴ፥ ኢታቲ ጺሎታስ ቤሲዛ ሎኦ ሚሽ ኤኬቴስ። ሄይቲ ኡባይካ ሃዳ።
ECC 8:15 ሳሎ ጉፋንꬆን ኣሳስ ሙሳፌ፥ ኡሻፌኔ ኡፋዬቴꬃፌ ኣꬊዛ ሃራ ሚሺ ባይንዳ ጊሻስ ባ ዴኦ ላይꬃን ኡፋዬቴꬂ ሎኦ ጋዲስ፤ ሄሳ ጊሻስ ጾሲ ሳሎ ጉፋንꬆን ኢዛስ ኢሚዳ ላይꬃታን ኢዚ ባ ኦሶን ኡፋዬታና።
ECC 8:16 ታኒ ኣꬎ ኤራቴꬅ ኤራናሲኔ ኣሲ ሃ ሳኣ ቦላን ኦማርሲኔ ጋላስ ꬊስኮይ ባይንዳ ዳቡርዛ ዳቡራ ኤራናስ ታ ዎዚናን ፒልጋዲስ።
ECC 8:17 ሄሳፌ ጉዬ ጾሲ ኦꬂዳ ኡባ ቤኣዲስ፤ ሳሎ ጉፋንꬆን ኦሴቲዛ ሚሽ ኦኒካ ኤሬና፤ ኣሲ ኬሂ ዳፌቲዲ ፒልጊ ጼሊኮካ ኢዛ ቢርሼꬃ ዴማናስ ዳንዳዬና። ኣꬎ ኤራንቻይ፥ «ታ ኤራይስ» ጊኮካ ኡባ ኤራናስ ዳንዳዬና።
ECC 9:1 ሄሳ ጊሻስ ሃ ኡባ ዮኦታ ታ ዎዚናን ቆፓዳ ኣꬎ ኤራንቻቲኔ ጺሎቲ ኦꬂዛ ኦሶይ ጾሳ ኩሼና፤ ጊዶ ኣቲን ኣሲ ሲንꬃፌ ባና ናጊዛይሲ ሲቆ ጊዲን ዎይኮ ኢጾ ጊዲን ኤሬና።
ECC 9:2 ጺሎታ ዎይኮ ናጋራንቻታ ጊዲን፥ ሱሬታ ዎይኮ ኢታታ ጊዲን፥ ጌሻታ ዎይኮ ቱናታ ጊዲን፥ ያርሾ ሺሺዛይታ ዎይኮ ያርሾ ሺሾንታይታ ጊዲን ኡባታሲካ ዉርሴꬃ ቃዳይ ኢሲኖ። ሎኦ ኣሳስ ሃኒዛይሳ ማላ ናጋራንቻስካ ሃኔስ፤ ጫቂዛይሳስ ሃኒዛይሳ ማላካ ጫቆስ ባቢዛይታስ ሃኔስ።
ECC 9:3 ሳሎ ጉፋንꬆን ኡባ ቦላ ጋኪዛ ኢታቴꬂ ሃይሳ፤ ኡባስ ዉርሴꬃ ቃዳይ ኢሲኖ፤ ሄሳፌ ቦላራካ ኣሳ ዎዚናይ ኢታቴꬃን ኩሚዴሲኔ ጎዪዴስ፤ ዉርሴꬃንካ ሃይቂዳ ኣሳን ጋይቴስ።
ECC 9:4 ሃይቂዳ ጋሞፌ ፓጻ ዲዛ ካናይ ኪያ፤ ሄሳꬆካ ሼምፖራ ፓጻ ዲዛይታ ጊዶን ዲዛ ኣሳስ ሂዶታይ ዴስ።
ECC 9:5 ሼምፖራ ፓጻ ዲዛ ኣሲ ባ ሃይቃናይሳ ኤሬስ፤ ጊዶ ኣቲን ሃይቂዳይቲ ኣይኮካ ኤሬቴና፤ ኢስታ ቆፍሲዛ ሚሺ ኡባይ ዶጌቴስ፤ ኢስቲ ጎኤታና ሚሺካ ዴና።
ECC 9:6 ኢስታ ሲቆይ፥ ኢጾይኔ ቃናቴይ ኡባይ ኢስታራ ኢሲፌ ꬋይዴስ። ሄሳ ጊሻስ ሳሎ ጉፋንꬆን ሃኒዛ ሚሽ ኡባን ኣይኮ ቃዳይካ ኢስታስ ዴና።
ECC 9:7 ባዳ ኔ ካꬅ ኡፋይሳን ማ፤ ኔ ዎይኔ ኡሻካ ኔ ዎዚናይ ኡፋዬቲሺን ኡያ፤ ኣይስ ጊኮ ጾሲ ኔ ኦꬂዳ ኦሶን ኡፋዬቴስ።
ECC 9:8 ኡባ ዎዴ ኔ ማይኦይ ቦꬅ ጊዶ፤ ኔ ሁኤይካ ዛይቴን ቲዬቶ።
ECC 9:9 ሳሎ ጉፋንꬆን ጾሲ ኔስ ኢሚዳ ጉꬅ ጊዲዳ ኔ ዴኦ ላይꬃታ ኡባን ኔ ሲቂዛ ኔ ማቼይራ ኡፋይሳን ዴኣ፤ ኣይስ ጊኮ ሳሎ ጉፋንꬆን ኔ ዴኦኒኔ ኔ ዳቡርዳ ዳቡራ ኡባን ሃይሲ ኔስ ቃዳ።
ECC 9:10 ኔ ኩሼይ ኦꬃናስ ዴሚዳይሳ ኡባ ኔ ኩሜꬃ ዎልቃን ኦꬃ፤ ኣይስ ጊኮ ኔኒ ባና ዱፎን ኦሶይ፥ ሃልቾይ፥ ኤራቴꬂኔ ኣꬎ ኤራቴꬂ ዴና።
ECC 9:11 ታኒ ሳሎ ጉፋንꬆን ሃራ ሚሽ ቤኣዲስ፤ ዎꬃን ጾኖይ ፒላታታስ ኦላን ጾኖይ ዎልቃማታስ ጊዴና፤ ካꬂ ኣꬎ ኤራንቻታስ፥ ዱሬቴꬂ ኪጳታንቻታስ፥ ሳባይ ኤራንቻታስ ጊዴና፤ ጊዶ ኣቲን ኡባቲካ ዎዴይኔ ቃዳይ ጋꬂዳ ማላ ሃኔቴስ።
ECC 9:12 ቃሴካ ባ ዎዴ ኤሪዛ ኣሲ ዴና፤ ካፎይ ያርዴን ጌሊዛ ማላ፥ ሞሌይ ጊቴን ኦይኬቲዛ ማላ፥ ኣሲካ ቆፖንታ ዲሺን ዪዛ ኢታ ዎዴታን ኦይኬቴስ።
ECC 9:13 ሄሳꬆካ ታና ኬሂ ማላሊሲዳ ሃይሳ ኣꬎ ሌሚሶ ሳሎ ጉፋንꬆን ቤኣዲስ።
ECC 9:14 ሄሲካ ኢሲ ቢታን ኣማርዳ ኣሳቲ ዴኢዛ ቄሪ ካታማይ ዳዉስ፤ ሄ ካታማዮ ኦላናስ ኢሲ ዎልቃማ ካዎይ ዎራጂ ዶዲዴስ፤ ኢዚ ዩሾን ሚጻ ጊግሲዴስ።
ECC 9:15 ሄ ካታማይን ኣꬎ ኤራንቻ ጊዲዳ ኢሲ ማንቆ ኣሲ ዴስ፤ ኢዚ ባ ኣꬎ ኤራቴꬃን ሄ ካታማዮ ኣሺዴስ። ጊዶ ኣቲን ሄ ማንቆዛስ ኦኒካ ቆፒቤና።
ECC 9:16 ሄሳ ጊሻስ ታኒ፥ «ኣꬎ ኤራቴꬂ ዎልቃፌ ኣꬌስ» ጋዲስ። ጊዲኮካ ሄ ማንቆዛስ ዲዛ ኣꬎ ኤራቴꬃዚ ካꬌቲዴስ፤ ኢዛ ቃላይካ ሲዬቲቤና።
ECC 9:17 ኤያታ ኣይሲዛ ዳና ዋሶፔ ኣꬎ ኤራንቻይ ሊቆን ሃሳይዛ ቃላይ ሴቴቴስ።
ECC 9:18 ኣꬎ ኤራቴꬂ ኦላ ሚሻፌ ኣꬌስ፤ ጊዶ ኣቲን ኢሲ ናጋራንቻይ ዳሮ ሎኦ ሚሽ ꬋይሴስ።
ECC 10:1 ሃይቂዳ ኡዱንጼቲ ሺቶ ዜቄꬄቴስ፤ ሄሳꬆካ ጉꬃ ኤያቴꬂ ኣꬎ ኤራቴꬂኔ ቦንቾ ካዉሼስ።
ECC 10:2 ኣꬎ ኤራንቻ ዎዚናይ ኢዛ ኡሻች ካሌꬄስ፤ ጊዶ ኣቲን ኤያ ዎዚናይ ሃዲርስ ካሌꬄስ።
ECC 10:3 ኤያይ ኦጌ ቢሺን ኢዛስ ኣኬካይ ፓጬስ፤ ባ ኤያቴꬃ ኦናስካ ቆንጪሴስ።
ECC 10:4 ኔ ጎዳይ ኔ ቦላ ሃንቄቲኮ ኔ ሶሆ ዬዶፋ፤ ጋሶይካ ዳንዳያይ ጊታ ሃንቆ ጮኡ ሂስቴስ።
ECC 10:5 ሳሎ ጉፋንꬆን ታኒ ቤኢዳ ኢታ ሚሺ ዴስ፤ ሄሲካ ዴሬ ሃሪዛዴፌ ኬዚዛ ባላ።
ECC 10:6 ኤያቲ ኬሂ ꬎቃሶሆን ኡቲን ዱሬቲ ሂርኪ ዚቃ ሶሆን ኡቲዳ።
ECC 10:7 ኣይሌቲ ዳናታ ማላ ቶጋን ቢሺን ዳናቲ ቃሴ ኣይሌታ ማላ ቶሆን ቢሺን ቤኣዲስ።
ECC 10:8 ኦላ ቦኪዛ ኣሲ ሄ ኦላን ኢዚ ኩንዳና፤ ቃሴ ዲርሳ ላሊዛ ኣስ ሾሺ ዱካና።
ECC 10:9 ሹች ꬎቃሊዛይ ሄ ሹቻን ዴሼቴስ፤ ቃሴ ሚꬅ ቄሪዛይ ሄ ሚꬃን ቆሄቴስ።
ECC 10:10 ዱንኤ ካልታ ሌፎንታ ኦꬂኮ ዳሮ ዎልቃ ዉርሴስ፤ ጊዶ ኣቲን ሂላን ኦꬂኮ ኦሶዛ ኣይፊሴስ።
ECC 10:11 ሾሺ ሙሬኖን ጃላናፔ ሲንꬃን ዱኪኮ ሙሬኒዛዴ ኣይኮካ ጎኤና።
ECC 10:12 ኣꬎ ኤራንቻ ዶናፔ ኬዚዛ ቃላይ ፑላን ኩሚዳዛ፤ ጊዶ ኣቲን ኤያይ ባርካ ባ ኢንጻርሳን ꬋዬስ።
ECC 10:13 ኮይሮፔ ዶሚዲ ኢዛ ቃላይ ኤያቴꬃ፤ ዉርሴꬃንካ ኢታ ጎሽ ጊዴስ።
ECC 10:14 ኤያይ ሃሳያ ዳሪሴስ፤ ቡሮፔ ሃናናይሳ ኤሪዛይ ዴና፤ ሃይቂዳዴስ ኢዛፔ ጉዬን ሃናናይሳ ኦኔ ኢዛስ ዮታና ዳንዳይዛይ?
ECC 10:15 ኤያ ኦሶይ ኦꬂዛዴ ዳቡርሴስ፤ ኢዚ ካታማ ጋꬂዛ ኦጌ ኤሬና።
ECC 10:16 ሃኔ ኔ ካዎይ ዬላጋ ጊዲዳሬ! ኔ ዳናቲ ዎንታራ ጊቢራ ጊግሲዛ ቢታዬ ኔስ ኣዬ ኣና!
ECC 10:17 ሃኔ ኔ ካዎይ ቦንቼቲዳ ዛሬፔ ጊዲዳሬ! ማꬆታናስ ጊዶንታ ሚኔታናስ ኮሺዛ ዎዴ ሚዛ ዳናቲ ዲዛ ቢታዬ! ኔኒ ኣንጄቲዳሮ።
ECC 10:18 ኣዴይ ኣዛላ ጊዲኮ ካራይ ያርጳቴስ፤ ኢዛ ኩሼቲ ዳቡርኮ ኬꬂ ኣꬄስ።
ECC 10:19 ጊቢራይ ሚጪሴስ፤ ዎይኔ ኡሺ ኣስ ኡፋይሴስ፤ ሚሺ ዲኮ ሚሺ ሃኔስ።
ECC 10:20 ቆፋንካ ጊዲን ካዎ ካꬎፓ፤ ኔ ኣቂዛ ኪፊሌን ዳሼ ዱሬ ቃንጎፋ፤ ቄፌን ፒራꬊዛራ ኔ ጊዛይሳ ኤፋ ጋꬃና ዳንዳያዉስ።
ECC 11:1 ኔ ካꬅ ሃꬃን ዬጋ፤ ዳሮ ጋላሳታፔ ጉዬ ኔኒ ዛራ ዴማና።
ECC 11:2 ኔስ ዲዛ ኣቆ ላፑን ዎይኮ ኦስፑን ሶሆን ሻኬሬꬃ ዎꬃ፤ ኣይስ ጊኮ ቢታ ቦላ ኣይ ኢታይ ያናኮ ኔኒ ኤራካ።
ECC 11:3 ሻራይ ካሬጺኮ ቢታ ቦላ ኢራይ ቡኬስ። ሚꬂ ፑዴሃ ዎይኮ ዱጌሃ ኩንዲኮ ባ ኩንዲዳሶን ኢቺ ኣቴስ።
ECC 11:4 ጫርኮ ሃኖታ ናጊዛይ ዜሬና፤ ቃሴ ሻራ ማሊዛይ ባ ካꬅ ሺሼና።
ECC 11:5 ጫርኮይ ኣዋራ ቢዛኮ ኢዛ ኦጌ ኤራካ፤ ቃሴ ሼምፖይ ዎይኮ ኣያናይ ኣዪ ኡሎን ዲዛ ሜꬌታ ጊዶን ዋኒ ጌሊዛኮ ኔ ኤራካ። ሄሳꬆካ ኡባ ሜꬊዳ ጾሳ ኦሶ ኔ ሻካ ኤራና ዳንዳያካ።
ECC 11:6 ማላዶራ ኔ ዜሬꬅ ዜራ፤ ኦማርሲካ ኔ ኩሼይ ኦሶ ቢርሾፎ፤ ጋሶይካ ሃይሲ ዎይኮ ሄሲ፥ ዎይኮ ናምኣይ ሎኣናኮ፥ ዎይኮ ኣዋይሲ ኣይፋናኮ ኔ ኤራካ።
ECC 11:7 ፖኦይ ሎኦ፤ ኣዋ ኣይፌ ቤኦይ ኣይፌ ኡፋይሴስ።
ECC 11:8 ኣሲ ኬሂ ኣዱሳ ላይꬅ ሃ ሳኣን ዴኢኮ ሄ ኡባንካ ኡፋዬቶ። ጊዶ ኣቲን ꬉማ ጋላሳቲ ዳሪዛ ጊሻስ ቆፖ፤ ቡሮ ያና ሚሺ ኡባይካ ሃዳ።
ECC 11:9 ሃይሶ ዬላጋዞ! ኔ ናቴቴꬃ ላይꬃን ኡፋዬታ፤ ኔ ናቴቴꬃ ላይꬃን ኔ ዎዚናን ኡፋዬታ፤ ኔ ኣይፌይ ጼሊዳ ኡባኔ ኔ ዎዚናይ ኣሞቲዳ ኡባ ፖላ፤ ጊዶ ኣቲን ኔ ኦꬂዳ ኦሶ ኡባ ጊሻስ ጾሲ ኔና ፒርዳስ ሺሻናይሳ ኤራ።
ECC 11:10 ሄሳ ጊሻስ ኔ ዎዚናፔ ጬጬ ሃሳ፤ ኢታ ሚሺካ ኔፔ ዲጋ፤ ጋሶይካ ናቴቴꬂኔ ዬላጋቴꬂ ኤሌ ኣꬋና።
ECC 12:1 ሜቶ ጋላሳቲ ዮንታ ዲሺን ኔኒ፥ «ታና ኡፋይሴቴና» ጊዛ ዎዴቲ ጋኮንታ ዲሺን ኔ ዬላጋቴꬃ ላይꬃን ኔና ሜꬊዳይሳ ቆፓ።
ECC 12:2 ኣዋይኔ ፖኦይ፥ ኣጊናይኔ ጾሊንቴይ ꬉሞንታ ዲሺን፥ ኢራይ ቡኪ ሲሚን ሻራይ ኪቾንታ ዲሺን ኔና ሜꬊዳይሳ ቆፓ።
ECC 12:3 ኬꬅ ናጊዛይቲ ኮኮሪዛ ዎዴ፥ ሚኖቲ ኩኒዛ ዎዴ፥ ጋጪዛይቲ ቆዳን ጉꬅ ጊዲዳ ጊሻስ ጋቼ ኣጊዛ ዎዴ፥ ማስኮቴራ ጼሊዛይቲ ዶልጁሚዛ ዎዴ፥
ECC 12:4 ዱቡሻሶ ኤፊዛ ኦጌቲ ጎርዴቲዛ ዎዴ፥ ዎጻይ ሎጬቲዲ ጊሬꬅ ኣጊዛ ዎዴ፥ ካፎ ዋሶይ ኣስ ዴንꬂዛ ዎዴ፥ ኢስታ ዬꬂካ ዳቡርዛ ዎዴ፥
ECC 12:5 ፑዱንꬅ ኬሲ ጾኒዛ ዎዴ፥ ኦጌ ቡሲ ባቢሲዛ ዎዴ፥ ኦቾሎኔይ ጪዪዛ ዎዴ፥ ቦሌይ ባርካ ባና ጎቺዛ ዎዴ፥ ኣሳፔ ኣሞይ ꬋይዛ ዎዴ ኣሲ ባ ሜርና ኬꬅ ባና፤ ዬኪዛይቲካ ባሌን ዩያና።
ECC 12:6 ቢራ ሳንሳላታይ ዱጾንታ ዲሺን፥ ዎርቃ ሳኔይ ሜቆንታ ዲሺን፥ ሃꬃ ኦቶይ ፑልቶ ኣቻን ሜቆንታ ዲሺን፥ ሃꬅ ኦላፌ ኬሲዛ ዋጉምቦይ ሜቄሬቶንታ ዲሺን፥
ECC 12:7 ቢታይ ዱጌ ቢታን ሲሞንታ ዲሺን፥ ሼምፖይ ኢሚዳ ጾሳኮ ሲሞንታ ዲሺን፥ ኔና ሜꬊዳ ጾሳኮ ሲማ።
ECC 12:8 ኤራንቻዚ፥ «ሃዳ! ሃዳፔካ ሃዳ! ኡባይካ ሃዳ!» ጌስ።
ECC 12:9 ኤራንቻዚ ባ ሁኤስ ኣꬎ ኤራንቻ ጻላ ጊዶንታ ኣሳካ ኤራቴꬅ ታማርሲዴስ። ዳሮ ሌሚሶታ ፒልጊ ጼሊዳፔ ጉዬን ማራን ማራን ጊግሲዴስ።
ECC 12:10 ኤራንቻዚ ሱሬ ቃላ ዴማናስ ፒልጊዴስ፤ ኢዚ ጻፊዳይሲ ሱሬኔ ቱማ።
ECC 12:11 ኣꬎ ኤራንቻ ቃላይ ጪካ ማላ ሆጼ፤ ቃሴ ኢዛ ቶሴቲካ ኣዳፌ ꬊሽኬቲዳ ꬊሽኬ ማላ፤ ሄይቲካ ኢሲ ሄንꬃንቻፌ ኢሜቲዳይታ።
ECC 12:12 ታ ናዞ! ሃ ኡባፌ ቦላራ ኣይ ሚሻፌካ ናጌታ፤ ኣይኮካ ጉጆፋ፤ ዳሮ ማጻፋታ ጻፊኮካ ዉርሴꬂ ዴና፤ ጺናቴ ዳሮይ ቦላ ዳቡርሴስ።
ECC 12:13 ሄኮ ኡባ ሚሺ ዮቴቲዴስ፤ ዮኦ ኡባስ ኩሺ ሃይሳ፤ ጾሳስ ያያ፤ ኢዛ ኣዛዞ ናጋ፤ ሄሲካ ኣሳ ናስ ኢሜቲዳ ኩሜꬃ ኦሶ።
ECC 12:14 ጾሳይ ኦሶ ኡባ ቦላ፥ ጌሚዳ ዮኦ ኡባ ቦላ፥ ሎኦ ጊዲን ኢታ ጊዲንካ ፒርዳና።
SOL 1:1 ማዛሙሬ ኡባፌ ኣꬊዛ ሶሎሞኔ ማዛሙሬ።
SOL 1:2 «ኔ ሲቆይ ዎይኔ ኡሻፌ ኣꬊ ኡፋይሴስ፤ ኔ ሜቴርሻን ዛራ ዛራዳካ ታና ዬራ።
SOL 1:3 ኔ ቲዬቲዛ ሺቶይ ኣይ ማላ ሳዊዜ! ኔ ሱንꬃይ ጼይጌቲዛ ዎዴካ ኣይ ማላ ኡፋይሲዜ! ጌላኦቲ ኔና ሄሳ ጊሻስ ሲቄቴስ።
SOL 1:4 ታና ኔናራ ኤካዳ ባ፤ ሃ ያ፥ ኣኔ ናምኣይ ኢሲፌ ዎጾስ! ታ ካዎ፥ ታና ኔ ቁሩጾ ጊዶ ጌልꬃ» ጋዱስ። ላጌቲ «ኢዛን ኑኒ ኣይ ኬና ኡፋዬቲዶኒ! ኑኒ ኢዛ ሲቆ ዎይኔ ኡሻፌካ ኣꬂዲ ናሾስ። ቱሙካ ማጫሳይ ኡባይ ኔና ሲቃናስ ቤሴስ» ጊዳ።
SOL 1:5 «ኢንቴኖ ዬሩሳላሜ ማጫሳቶ፥ ሲዪቴ! ታኒ ካሬꬅ ጊዲኮካ ማላ ሎኦ። ታ ካሬꬃቴꬃይ ቄዳሬ ዱንካኔ ማላ፤ ጊዶ ኣቲን ታ ሜꬋይ ካዎ ሶሎሞኔ ኬꬃ ማጋላሻታ ማላ።
SOL 1:6 ታ ሜꬋ ካሬꬂዳይ ኣዋ ሴላ፤ ታኒ ካሬꬅ ጊዲዳ ጊሻስ ታና ካꬎፒቴ። ታ ኣዪ ና ኢሻቲ ታናራ ኦዬቲዲ ታና ዎይኔ ኣታኪልቴ ናጋናስ ዎꬂዳ፤ ሄሳ ጊሻስ ታኒ ታይሳ ናጋቤኬ።
SOL 1:7 ታ ሲቆዞ! ኣኔ ታስ ዮታ፤ ኔ ዶርሳ ዉዴ ሄሚዛይ ኣዋኔ? ጋላስ ኣዋፔ ኔ ኢስታ ጉሪሲዛይ ኣዋኔ? ኔና ዴማናስ ኔ ላጌታ ዉዴ ካላሼ ኣይስ ጮ ቶይላቲዛ ማጫሳ ማላ ጊዶ?» ጋዱስ።
SOL 1:8 «ሃ ማጫ ኡባፌ ኣꬋ ሎኢዛ ማላንቻዬ! ታ ዲዛሶ ኤሮንታ ኣጊኮ ዶርሳቲ ቢዳ ጌዶ ካላዳ ያ፤ ኔ ዴይሻ ላቃታካ ሄንꬃንቻታ ዱንካኔ ማታን ሄማ።»
SOL 1:9 «ታ ጎዴ! ጊብጼ ካዎስ ፓራ-ጋሬ ጎቺዛ ፓራታ ጊዶን ዲዛ ማጫ ፓራይ ማላ ሎኣሳ።
SOL 1:10 ኔ ሻጋላሶይ ሎዡ ጊዴስ፤ ኔ ቆꬌይ ኢንቁ ጌቴቲዛ ሴሎን ኣሌቄቲዴስ።
SOL 1:11 ኑኒ ኔስ ቢራን ኣሌቄቲዳ ዎርቃ ጌጼ ኦሲሳና» ጊዴስ።
SOL 1:12 «ካዎይ ማዳን ኡቲ ዲሺን ታ ሺቶ ሳዎይ ኬꬃ ጊዶ ኡባን ቱኑ ጊዴስ።
SOL 1:13 ታ ሲቆዚ ታ ꬋንꬃታ ጊዶን ዲዛ ሳዊዛ ካርቤ ጹንቴ ማላ።
SOL 1:14 ታ ሲቆዚ ኤን-ጋዴ ጌቴቲዛ ዎይኔ ቶኪዛ ጋዴን ሞኪዳ ባዞ ጪሻ ማላ» ጋዱስ።
SOL 1:15 «ታ ጎዴ! ኔኒ ኣይ ማላ ሎኣይ! ኔኒ ኣይ ማላ ሎኣይ! ኔ ኣይፌቲ ሃራጴ ማላ ሎኤቴስ» ጊዴስ።
SOL 1:16 «ታ ሲቆዞ፥ ኔኒካ ኣይ ማላ ሎኣይ! ኔ ኬሃ ሎኣሳ፤ ኑ ሂꬃይ ጪሊላ ማታ ማላ ኡፋይሴስ» ጋዱስ።
SOL 1:17 «ኑ ኬꬃ ቱሲ ሊባኖሴ ዚጋ፤ ካራይካ ጺዳን ኦሴቲዴስ» ጊዴስ።
SOL 2:1 «ታኒ ላሻሮኔን ሞኪዛ ጪሻ ማላኔ ጋꬋን ሞኪዛ ሱፌ ጪሻ ማላ» ጋዱስ።
SOL 2:2 «ታ ሲቆያ ማጫሳታ ጋርሳን ኣጉንꬃ ጊዶን ዲዛ ሎኦ ጪሽ ሚሳታዉስ» ጊዴስ።
SOL 2:3 «ታ ሲቆዛ ታኒ ናቴꬃታራ ጋꬃ ጼሊዛ ዎዴ፥ ዎራ ጊዶን ዲዛ ኣፒሌ ሚሳቴስ፤ ታኒካ ኬሃ ኡፋዬታዲስ፤ ታኒ ኢዛ ኩዋ ጋርሳን ሼምፓዲስ፤ ማልኢዛ ኢዛ ኣይፌዛፔካ ማ ካላዲስ።
SOL 2:4 ኢዚ ታና ጊቢራስ ኣሆ ኬꬃን ጌልꬂዴስ፤ ባ ሲቆ ታ ቦላ ባንዲራ ማላ ꬎቁ ꬎቁ ኦꬂዴስ።
SOL 2:5 ታኒ ኢዛ ሲቆን ኦይኬታዳ ሃርጋዲስ፤ ሄሳ ጊሻስ ታና ዛቢቤ ኣይፌ ሚዚዲ ጋዚዲሲቴ፤ ኣፒሌ ሚዚዲ ታና ቤጎꬂቴ።
SOL 2:6 ባ ሃዲርሳ ኩሼ ቦላ ታና ቦርኮቲሲዴስ፤ ባ ኡሻቻ ኩሼን ታና ኢዲሚዴስ።
SOL 2:7 ኢንቴኖ ዬሩሳላሜ ዬላጋ ማጫሳቶ! ሲቆይ ባስ ዶሲዲ ዴንዳና ጋካናስ ኢዛ ኢንቴ ቤጎꬆንታ ማላ፥ ታኒ ኢንቴና ጌኔሳታኒኔ ባዞ ዉሻን ኣማታይስ።
SOL 2:8 ቤኢቴ! ታ ሲቆዛ ጬንጉርሲ ዙማታ ቦላራ ፒሪሼ፥ ዙምቡላታ ቦላራ ጾንጌቲሼ ዪዛይሲ ሲዬቴስ።
SOL 2:9 ታ ሲቆዚ ዉሻ ላቃ ዎይኮ ጌኔሳ ላቃ ሚሳቴስ። ቤኢቴ! ኢዚ ኑ ኬꬃ ዳራንቻን ኤቂዴስ፤ ማስኮቴራ ሶ ጼሌስ፤ ማጋላሻ ጾኤራ ጹሉንጊ ጼሌስ።
SOL 2:10 ታ ሲቆዚ ታና፥ ‹ታ ጎዴ፥ ዴንዳ! ታ ሎኦዬ! ሃ ያ! ኣኔ ኢሲፌ ቦስ።
SOL 2:11 ቤያ፥ ባልጎይ ኣꬊዴስ፤ ኢራይካ ኣጊዴስ።
SOL 2:12 ኡባሶን ጪሺ ጪዪዴስ፤ ማዛሙሬ ዬጺዛ ኣጊናይካ ጋኪዴስ፤ ሃራጴ ዬꬂካ ኑ ቢታን ሲዬቴስ።
SOL 2:13 ባላሴይ ኣይፌ ኢሞ ዶሚዴስ፤ ዎይኔይ ጪዪዴስ፤ ኢዛ ጪሻ ሳዎይ ኡባሶን ቱኑ ጌስ። ሄሳ ጊሻስ ታ ጎዴ፥ ዴንዳ፤ ታ ሎኦዬ! ሃያ፤ ኣኔ ኢሲፌ ቦስ› ጌስ» ጋዱስ።
SOL 2:14 «ኔኒ ኣፎ ዶናን ዛላ ዛኣ ጊዶን ዲዛ ሃራጴይ ማላ፤ ኣኔ ኢሲቶ ኔ ኣይፌሶ ታና ቤሳ፤ ኔ ቃላ ጬንጉርሲካ ታና ሲሳ። ኣይስ ጊኮ ኔ ጬንጉርሳይ ታና ኡፋይሴስ፤ ኔ ኣይፌሶይካ ታና ሎኤስ» ጊዴስ።
SOL 2:15 ኑ ዎይኔ ኣታኪልቴይ ጪዪዴስ፤ ሄሳ ጊሻስ ኑ ዎይኔ ኣታኪልቴ ጊዶ ሞሮንታ ማላ ዎራካናታኔ ኢስታ ቡቱላታ ዎጺማዴን ኦይኪቴ።
SOL 2:16 «ታ ሲቆዚ ታሳ፤ ታኒካ ኢዛሳ፤ ጪሊላ ማታ ጊዶን ኢዚ ባ ሜሄ ሄሜስ።
SOL 2:17 ኦማርሳ ꬉማይ ቃሬታናሺን፥ ማላዶ ጫርኮይ ጫርካናሺን፥ ታ ሲቆዞ! ጌኔሳ ማላ ዎይኮ ዉሻ ላቃ ማላ ኣፎቲዛ ዙማ ቦላራ ዎጻዳ ሃ ሲማ» ጋዱስ።
SOL 3:1 «ኦማርስ ኩሜꬅ ታ ሂጻን ኢቻዳ፥ ታ ሲቆዛ ዴማናስ ኣሞታዲስ፤ ሚንꬃዳካ ኮያዲስ፤ ጊዶ ኣቲን ዴማናስ ዳንዳያቤኬ።
SOL 3:2 ካታማ ጊዶን ዲዛ ኦጌታኒኔ ዱቡሻታ ኡባን ዩያዲስ፤ ታ ሲቆዛ ዴማናስ ኣሞታዲስ፤ ሚንꬃዳካ ኮያዲስ፤ ጊዶ ኣቲን ዴማናስ ዳንዳያቤኬ።
SOL 3:3 ካታማ ዩዪ ናጊዛይቲ ታና ዴሚዳ፤ ታኒ ኢስታስ፥ ‹ታ ሲቆዛ ቤዪዴቲ?› ጋዳ ኦይቻዲስ።
SOL 3:4 ኢስታፌ ጉꬅ ኣꬋ ባዳ ታ ሲቆዛ ዴማዲስ፤ ኢዚ ታፔ ኬሲ ኤኮንታ ማላ ሚንꬃዳ ኦይካዲስ፤ ታ ኣዬይ ኬꬅ ኤካ ኤፋዲስ፤ ታ ዬሌቲዳ ኪፊሌ ጌልꬃዲስ።
SOL 3:5 ኢንቴኖ ዬሩሳላሜ ጌላኦቶ! ሲቆዚ ባስ ዶሲዲ ዴንዳና ጋካናስ፥ ኢዛ ኢንቴ ቤጎꬆንታ ማላ፥ ታኒ ኢንቴና ጌኔሳታኒኔ ባዞ ዉሻታን ኣማታይስ» ጋዱስ።
SOL 3:6 «ካርቤፌ፥ ኤጻኔፔኔ ዛልኣንቻታ ሳዎፔ ጊጌቲዳ ሺቶ ማላ ሳዎ ቱኑ ጋሼኔ ጩዋ ማላ ቱሉ ጋሼ ባዞራ ዪዛራ ሃና ኢዛ ኦኔ?
SOL 3:7 ሄኮ ቤኢቴ፥ ሶሎሞኔ ፓራ-ጋሬያ ዩሳን ዳዉስ፤ ኢስራኤሌፔ ዶሬቲዳ ኡሱፑን ታሙ ኦላ ኣሳቲ ኢዞ ኣዣቢዳ።
SOL 3:8 ኢስቲ ኡባይካ ማሻ ኦይꬅ ሜዜቲዳ፥ ኦላ ኤሪዛይታኔ ኦማርስ ዪዛ ሜቶ ኤቄታናስ ኢሶይ ኢሶይ ማሻ ጊጺዳ ማላ ኣቄቴስ።
SOL 3:9 ካዎ ሶሎሞኔይ ፓራ-ጋሬ ጊዶን ኡቲዛ ኣራታይ ሊባኖሴ ሚꬃፌ ኦሴቲዴስ።
SOL 3:10 ኢዛ ኣራታ ቱሳቲ ቢራን ቲዬቲዳ፤ ዜምፖዚ ዎርቃን ኣሌቄቲዴስ፤ ኡቲዛሶዚ ኦቻ ቴራ ሚሳቲዛ ቃጪናፔ ኦሴቲዴስ፤ ጊዶዛ ዬሩሳላሜ ጌላኦቲ ሲቆስ ዳዲዳ ኣፋላን ኣሌቂሲዳ» ጊዳ።
SOL 3:11 «ኢንቴኖ ጺዮኔ ጌላኦቶ! ኢዚ ኬሂ ኡፋዬቲዳ ኢዛ ቡላቻ ጋላስ ኢዛ ኣያ ኢዛ ሁኤን ዎꬂዳ ካላቻ ጎጺ ኡቲዳይሳ ቤኣናስ ካዎ ሶሎሞኔኮ ሃ ዪቴ» ጋዱስ።
SOL 4:1 «ታ ጎዴ! ኔ ኣይ ማላ ሎኦ! ኔኒ ኣይ ማላ ጊጋ! ኔ ኣይፌቲ ኔ ኣይፌሶ ካሚዛ ቁራጬ ጊዶራ ጼሊዛ ዎዴ ሃራጴ ማላ ሎኤቴስ፤ ኔ ቢናናይ ጋላኣዴ ዙማራ ዱጌ ዎꬊዛ ዴይሻ ዉዴ ሚሳቴስ።
SOL 4:2 ኢስታ ጊዶን ማይኔይ ባይንዳ ሜንቴ ሜንቴ ዬሊዛ ኢስኬይ ዲሬቲን ሜጬቲ ኬዚዛ ቦꬃ ዶርሳ ዉዴታ ማላ ኔ ኣቻቲ ታና ኡፋይሴቴስ።
SOL 4:3 ኔ ሜቴርሻቲ ዞኦ ቃጪና ማላ ሎኤቴስ፤ ኔ ሃሳይዛ ዎዴ ኬሂ ኡፋይሴቴስ፤ ኔ ሻጋላቲ ኣይፌሶ ካሚዛ ቁራጬ ጊዶራ ጼሊዛ ዎዴ ኦሮማኔ ናምኡ ኬሲ ጳልቂዳ ሚሳቴቴስ።
SOL 4:4 ኔ ቆꬌይ ሺያን ቆዴቲዛ ጎንዳሌቲ፥ ኦላ ማሳራቲ ኢዛ ቦላ ካቄቲ ቤቲዛኔ ኦላ ሚጻ ጊዳናስ ኦሴቲዳ ዳዊቴ ጊምቤ ሚሳቴስ፤
SOL 4:5 ኔ ꬋንꬃቲ ሜንቴ ዬሌቲዲ፥ ሱፌ ጪሻታ ጊዶን ሚዛ ጌኔሳ ላቃታ ሚሳቴቴስ።
SOL 4:6 ቃማይ ዎንታና ጋካናስ፥ ꬉማይ ኣꬋና ጋካናስ ካርቤይ ዲዛ ዙማ ቦላኔ ኤጻኔይ ኢዛ ዙምቡላ ቦላ ባዳ ሼምፓና።
SOL 4:7 ታ ጎዴ! ኔ ኣሳቴꬃይ ኩሜꬅ ሎኦ፤ ኔ ቦላ ኣይኮ ዎሶይካ ባዋ።
SOL 4:8 ታ ሚሺራዬ! ሊባኖሴፔ ሃ ዱጌ ዎꬋ፤ ጋሞይኔ ማሄይ ዲዛሶ ኣማና ዙማፔ፥ ሳኒሬ ዙማፔኔ ሄርሞኔ ዙማፔ ዎꬋዳ ሃ ያ።
SOL 4:9 ታስ ሲቆ ሚቾ ጊዲዳ ታ ሚሺራዬ! ኔ ጼሊዛ ጼሎይኔ ኔ ቆꬌን ዲዛ ኣሌቆይ ታ ዎዚና ኤኪዴስ።
SOL 4:10 ታስ ሲቆ ሚቾ ጊዲዳ ታ ሚሺራዬ! ኔ ሲቆይ ታና ኣይ ማላ ኡፋይሲዜ! ኔ ሲቆይ ዎይኔ ኡሻፌ ኣꬊ ኡፋይሴስ፤ ኔ ሺቶይ ኡባፌካ ኣꬊዲ ሳዌስ።
SOL 4:11 ታ ሚሺራዬ! ኔ ሜቴርሻራ ኤሳ ኢሊሎይ ጾኬስ። ኔ ዶናፔ ኤሲኔ ማꬂ ፑልቴስ፤ ኔ ማይኦ ሳዎይ ሊባኖሴ ሺቶ ማላ ሳዌስ።
SOL 4:12 ታስ ሲቆ ሚቾ ጊዲዳ ታ ሚሺራዬ! ኔ ታስ ዲርሳ ጊዶን ናጌቲዛ ኣታኪልቴ ማላ፥ ኢዛስ ዩሾይ ሹሬቲዳ ፑልቶ ሃꬃ ማላኔ ኣሲ ጋኮንታ ፒሳ ሃꬃ ማላ።
SOL 4:13 ኔ ኣꬋ ቢዛሶን ማልኢዛ ሚꬃ ኣይፌቲ ኩሚዳ፤ ሄይቲካ ኦሮማኔ ኣታኪልቴሶሆታ ማላ።
SOL 4:14 ናርዶሴይ፥ ላዴይ፥ ሳዎ ማታይኔ ቃራፋይ፥ ቃሴካ ኤጻኔ ማላ ሳዊዛ ዱማ ዱማ ኣታኪልቴቲ ዴቴስ፤ ሃራይ ቃሴ ካርቤይ፥ ጎዳሬ ኡꬃ ጪሻይኔ ዱማ ዱማ ሳዎ ኣታኪልቴቲ ሞኬቴስ።
SOL 4:15 ኔኒ ኣታኪልቴ ኡሺዛ ፑልቶ ሃꬃ ማላ፤ ዴኦ ሃꬂ ኬዚዛ ኦላ ማላ፤ ሊባኖሴ ዙማ ጋርሳፌ ጎጊዛ ሻፋ ሃꬃ ማላ» ጊዴስ።
SOL 4:16 «ፑዴሃ ባጋ ጫርኮዞ! ዴንዳ! ዱጌሃ ባጋ ጫርኮዞ! ሃ ያ! ታ ኣታኪልቴ ቦላ ጫርካ! ሄራዚ ኡባይ ሳዎ ቱኑ ጎ። ታ ሲቆዚ ባ ኣታኪልቴ ጊዶ ዮ፤ ዶሬቲዳ ሚꬃ ኣይፌታካ ሞ» ጋዱስ።
SOL 5:1 «ታስ ሲቆ ሚቾ ጊዲዳ ታ ሚሺራዬ! ታኒ ታ ኣታኪልቴ ጊዶ ጌላዲስ። ታ ካርቤኔ ታ ሺቶ ጪሽ ማጻዲስ፤ ኤሳ ኡኬꬃ ኢሊሎዛራ ጋꬃ ማዲስ፤ ታ ዎይኔ ኡሻ፥ ታ ማꬃ ኡያዲስ» ጊዴስ። ላጌቲ «ኢንቴኖ ሲቄቲዛይቶ! ካላና ጋካናስ ሚቴ፤ ኣላና ጋካናስካ ኡዪቴ» ጊዳ።
SOL 5:2 «ታኒ ኦማርስ ꬊስካዲስ፤ ጊዶ ኣቲን ታ ዎዚናይ ቤጊዴስ፤ ታ ሲቆዚ ካሬ ቆጺሼ፥ ‹ታስ ሲቆ ሚቾ ጊዲዳ ሚሺራዬ! ኔናን ዎሶይ ባይንዳ ታ ሃራጴዬ! ኔና ሾባይስ ታስ ካሬዛ ዶያ፤ ታ ሁኤይ ኬንቾን ዎቂዴስ። ታ ቢናናይካ ኦማርሳ ፑሴን ሙሲዴስ› ጊሺን ሲያዲስ።
SOL 5:3 ታኒ ታ ማይኦ ኬሳዲስ፤ ሂስቲን ዛራ ማይኦ? ታ ቶሆካ ሜጬታዲስ፤ ቃሴ ዛራዳ ኡርቃሶ?
SOL 5:4 ታ ሲቆዚ ፔንጌ ጾኤራ ኩሼ ዬዲዴስ፤ ሂስቲን ታስ ማራጬን ፖልኡ ጊዴስ።
SOL 5:5 ሄሳፌ ጉዬ ታ ሲቆዛስ ካሬ ዶያናስ ዴንዳዲስ፤ ካሬዛ ዶያና ታ ኦይኪሺን ታ ኩሼፔ ካርቤይ ጾኬቲዴስ፤ ታ ቢራꬌታፔካ ሺቶይ ጎጊዴስ።
SOL 5:6 ታ ካሬዛ ዶይሺን ታ ሲቆዚ ሲሚዲ ቢቺዴስ፤ ኢዛ ቃላ ጬንጉርሳ ሲያናስ ኬሃ ኣሞታዲስ። ሚንꬃዳካ ኮያዲስ፤ ጊዶ ኣቲን ዴማናስ ዳንዳያቤኬ፤ ጼይጋዲስ ሺን ኢዚ ታስ ኮዪቤና።
SOL 5:7 ካታማ ናጊዛይቲ ታና ዴሚ ዋꬊዲ ማዱንꬂዳ፤ ካታማ ጊምቤ ናጊዛይቲ ታ ማይኢዳ ሴሎ ማይኦዛ ቃሪ ኤኪዳ።
SOL 5:8 ኢንቴኖ ዬሩሳላሜ ጌላኦቶ! ኢንቴ ታ ሲቆዛ ዴሚዳ ጊዲኮ ታኒ ኢዛ ሲቆፔ ዴንዲዳይሳን ሃርጊዳይሳ ሃዳራ ኢዛስ ዮቲቴ» ጋዱስ።
SOL 5:9 «ሃኔ ማጫሳ ኡባፌ ኣꬎ ሎኦዬ! ቱሙ ኔ ሲቆ ላጌዚ ሃራታፔ ዱማቲዜ? ኔኒ ሃይሳ ማላ ኑና ሃዳራ ጊዛይ ኢዚ ሃራታፔ ዋኒኔ?» ጊዳ።
SOL 5:10 «ታ ሲቆይ ዳሮ ሎኦኔ ሚኖ፤ 10,000 ኣቱማሳ ጋርሳን ኢዛ ማላይ ዴና።
SOL 5:11 ኢዛ ሁኤይ ጌሻ ዎርቃ ሚሳቴስ፤ ኢዛ ቢናናይካ ኦሎሲኔ ዱምኣ ካሬꬅ ሚሳቴስ።
SOL 5:12 ኢዛ ኣይፌቲ ሻፋ ላንቄን ዲዛ ሃራጴታ ማላኔ ማꬃን ሜጬቲዳ ኢንቁታ ማላ።
SOL 5:13 ኢዛ ሻጋላቲ ማልኢዛ ሳዎ ማታታ ማላ፤ ዱማ ዱማ ቂማሜቲ ቶኬቲዳ ኣታኪልቴሶ ሚሳቴቴስ፤ ኢዛ ሜቴርሻቲ ካርቤ ሺቶይ ጾኪዛ ሱፌ ጪሻ ማላ ሎኤቴስ።
SOL 5:14 ኢዛ ኩሼቲ ኢንቁን ኣሌቄቲዳ ዎርቃ ጉፌ ማላ ሎኤቴስ፤ ኢዛ ቦላይ ሲምፔሬ ጌቴቲዛ ኢንቁን ኣሌቄቲዳ ዳንጋርሳ ዛሌ ማላ ሎኤስ።
SOL 5:15 ኢዛ ቶሆቲ ዎርቃን ቶኬቲዳ፥ ዳልዳቻ ቱሳታ ሚሳቴቴስ፤ ኢዛ ሜꬋይ ሊባኖሴ ዚጋን ኣሌቄቲዳ ሊባኖሴ ዙማ ሚሳቴስ።
SOL 5:16 ኢዛ ቃላይ ኤሳ ማላ ማልኤስ፤ ኢዛ ቦላይ ሙሌራ ካይሼስ፤ ኢንቴኖ ዬሩሳላሜ ጌላኦቶ፥ ታ ሲቆዚኔ ታ ላጌዚ ሃይሳ ሚሳቴስ» ጋዱስ።
SOL 6:1 «ማጫሳ ኡባፌ ሎኦዬ! ኔ ሲቆ ላጌዚ ኣዋ ቢዴ? ኑኒካ ኔናራ ኢሲፌ ኮያናስ፥ ኢዚ ኣዋ ባጋራ ቢዳኮ ኑስ ዮታ» ጊዳ።
SOL 6:2 «ታ ሲቆዚ ዶርሳ ዉዴ ሄማናስ ሎኦ ጪሻታ ማጻናስ ሺቶስ ጎኢዛ ሳዎ ማታይ ዲዛሶ ዱጌ ኣታኪልቴ ጊዶ ዎꬊዴስ።
SOL 6:3 ታኒ ታ ሲቆዛሳ፤ ኢዚካ ታሳ፤ ኢዚ ዉዴዛ ጪሊላ ማታን ሄሜስ» ጋዱስ።
SOL 6:4 «ታ ጎዴ! ኔኒ ቲርጻ ካታማይ ሎኢዛ ማላ ሎኣሳ፤ ዬሩሳላሜ ማላ ኬሃ ካይሻሳ፤ ባንዲራ ቶኪዲ ቢዛ ኦላንቻ ማላ ያሺሲዛ ቴማራ ዳሳ።
SOL 6:5 ዎዜ ኔና ኔ ኣይፌ ታፔ ዴንꬃርኪ! ኢስቲ ታና ዲኢዲ ቃሾ ኣስ ኬሲዳ፤ ኔ ቢናናይ ጋላኣዴ ዙማፔ ዱጌ ዎꬊዛ ዴይሻ ዉዴ ሚሳቴስ።
SOL 6:6 ኢስታ ጊዶን ማይኔይ ባይንዳ ሜንቴ ሜንቴ ዬሊዛ ኢስኬይ ዲሬቲን ሜጬቲ ኬዚዛ ቦꬃ ዶርሳ ዉዴታ ማላ ኔ ኣቻቲ ታና ኡፋይሴቴስ።
SOL 6:7 ኔ ሻጋላቲ ኣይፌሶ ካሚዛ ቁራጬ ጊዶራ ጼሊዛ ዎዴ ኦሮማኔ ናምኡ ኬሲ ጳልቂዳ ሚሳቴቴስ።
SOL 6:8 ኡሱፑን ታሙ ማጫ ካዎቲ፥ ኦስፑን ታሙ ላጌꬆ ማጫሳቲ፥ ቃሴ ቆዳይ ባይንዳ ጌላኦቲ ዴቴስ።
SOL 6:9 ታኒ ጊዲኮ ኢሲኒዮ ጻላ ዶሳይስ፤ ኢዚ ቦላ ኣይ ዎሶይ ዴና፤ ኢዛ ሃራጴ ማላ ካይሻ ኡታዱስ፤ ኢዛ ባ ኣዬይስካ ሜጺ ኢሲኖ፤ ኢዞ ዬሊዳ ኣያ ኢዞ ኡባፌ ኣꬃ ሲቃዉስ። ጌላኦቲካ ኢዞ ጼሊዲ ጼሊዲ ሳቤቴስ፤ ካዎ ማቼቲኔ ኢዛ ላጌꬆቲ ኢዞ ናሼቴስ።
SOL 6:10 ሃና ማላዶ ጻልቄ ማላ ሞኪዛራ፥ ኣጊና ማላ ጶሊዛራ፥ ኣዋ ማላ ፖኢዛራ፥ ባንዲራ ቶኪዲ ቢዛ ኦላንቻ ማላ ያሺሲዛራ ኢዛ ኦኔ?» ጌቴስ።
SOL 6:11 «ታኒ ሾባን ቶኬቲዳ ኣታኪልቴታ ቤኣናስ፥ ዎይኔይ ኣጪዳኮ፥ ኦሮማኔይካ ጪዪዳኮ ጼላናስ ዱጌ ኦቾሎኔይ ቶኬቲዛሶ ዎꬋዲስ።
SOL 6:12 ታኒ ቆፖንታ ዲሺን፥ ታ ኣሞይ ታና ኤፊዲ ካዎ ፓራ-ጋሬታ ቦላ ኡቲሲዴስ» ጊዴስ።
SOL 6:13 «ሃኔ ሹላሜ ማጫሳዬ! ሃ ሲማ፤ ኔና ኑ ሎኤꬂ ጼላና ማላ ሃ ሲማ» ጊዳ። ጌላኦያ «ዳሮ ኣሳ ሲንꬃን ዬጺዛ ኣሳ ማላ፥ ታና ሹላሜ ማጫሳዮ ኣይስ ጼሌቲ?» ጋዱስ።
SOL 7:1 «ካዎ ናዳ ሎኢዛሬ! ኔ ቶሆቲ ኔኒ ናጻላ ጫማ ኣꬃ ዲሺን ቤኢዛ ዎዴ ኣይ ማላ ሎኢዞ! ኔ ሼቻቲ ሂላንቻ ዎጋጬይ ቆጺዲ ሎኤꬂ ኣሌቂሲዳ ኢንቁ ሚሳቴስ።
SOL 7:2 ኔ ጉልኣይ ዎይኔ ኡሺ ኩሚዳ ቢሪሌ ሚሳቴስ፤ ኔ ጼሳይ ሎኦ ጪሻን ቃሼቲዳ ጊስቴ ሚርቄ ሚሳቴስ።
SOL 7:3 ኔ ꬋንꬃቲ ሜንቴ ዬሌቲዳ ዉሻ ላቃ ሚሳቴቴስ።
SOL 7:4 ኔ ቆꬌይ ዳንጋርሳ ዛሌን ኣሌቄቲዳ ኣዱሳ ጊምቤ ሚሳቴስ፤ ኔ ኣይፌይ ጊታ ሃሴቦኔ ካታማ ፔንጌ ማታን ዲዛ ኤሌ ሃꬅ ሚሳቴስ፤ ኔ ሲꬌይ ዳማስቆ ጼሊሲዲ ጊምቢዳ ሊባኖሴ ጊምቤዛ ሚሳቴስ።
SOL 7:5 ኔ ሁኤይ ቃርሜሎሴ ዙማ ሚሳቴስ፤ ኔ ሁኤ ቢናናይ ጻጼቲ ኡቲዳ ጺላታ ሚሳቴስ፤ ኔ ሁኤ ዳꬃይካ ካዎዛ ዎዚና ኤኪዴስ።
SOL 7:6 ታ ጎዴ! ኔ ኣይ ማላ ሎኣይ! ኔ ኣይ ማላ ካይሻይ! ኔ ሲቆይ ታና ኣይ ማላ ኡፋይሲዜ!
SOL 7:7 ኔ ጌሳይ ዛምባ ጌሳ ሚሳቴስ፤ ኔ ꬋንꬃይ ዛምባ ዉርጮ ሚሳቴስ።
SOL 7:8 ታኒ ሃ ዛምባ ቦላ ኬዛና፤ ኬዛዳ ኢዛ ኣይፌታ ማጻና፤ ኔ ꬋንꬃቲ ዎይኔ ኣይፌ ማላ ዉርጮቲ ኡቲዳ፤ ቃሴ ኔ ፔኖይ ኣፒሌ ኣይፌ ማላ ሳዌስ።
SOL 7:9 ኔ ሜቴርሻቲ ኤሳ ኢሊሎ ማላ ማልኤቴስ» ጊዴስ። ጌላኦያ «ሂስቲኮ ሄ ሎኦ ኢሊሎይ ታ ሲቆዛ ሜቴርሻታ ጊዶራኔ ኣቻታ ጊዶራ ዱጌ ዎሎሉ ጊ ጎጎ።
SOL 7:10 ታኒ ታ ሲቆዛሳ፤ ኢዚካ ታና ኣሞቴስ።
SOL 7:11 ታ ሲቆዞ! ሃ ያ፤ ናምኣይ ካታማፔ ኬዚዲ ኣኔ ጌዴ ጋጻሬ ቦስ፤ ሄን ኦማርስ ኣኔ ኢሲፌ ኣꬆስ።
SOL 7:12 ማላዶ ዎንታራ ኣኔ ዎይኔ ኣታኪልቴ ጊዶ ቦስ፤ ዎይኔይ ጪዪዳኮ፥ ኦሮማኔይካ ኣይፊዳኮ ኣኔ ቤዮስ፤ ሄን ታኒ ታ ሲቆ ኔስ ቆንጪሳና።
SOL 7:13 ኢንኮ ኣይፌ ሳዎይኔ ዱማ ዱማ ኣይፌ ኢሚዛ ኣታኪልቴቲ ኑ ካሬን ኩሚዳ፤ ታ ሲቆዞ! ሃ ኣይፌታፔ ቴሪዳይታኔ ኦራꬅ ማጼቲዳይታ ኔስ ዎꬃዲስ።
SOL 8:1 ኔ ታ ኣዬይ ꬋንꬅ ꬋሚ ዲጪዳ ታ ኢሻ ማላ ጊዲዳኮ ታ ኔና ኦጌን ዴማዳ ዬራ ኤኪዳኮ ታና ኦኒካ ካꬌናኮሺን!
SOL 8:2 ታና ታማርሲዳ ታ ኣዬይሶ ታ ኔ ኩሼ ኦይካዳ ኤፋናኮሺን፤ ኔ ኡያናስ ኦሮማኔፔኔ ዎይኔፔ ጉምኤቲዳ ሎኦ ኡሹ ታ ኔስ ኢማናኮሺን።
SOL 8:3 ባ ሃዲርሳ ኩሼ ቦላ ታና ቦርኮቲሴስ፤ ኡሻቻ ኩሼንካ ታና ቆሜስ።
SOL 8:4 ኢንቴኖ ዬሩሳላሜ ጌላኦቶ! ሲቆዚ ባስ ዶሲዲ ዴንዳና ጋካናስ ኢዛ ኢንቴ ቤጎꬆንታ ማላ ታኒ ኢንቴና ሃዳራ ጋይስ» ጋዱስ።
SOL 8:5 «ባ ሲቆ ላጌዛ ቦላ ዜምፓዳ፥ ባዞፌ ዪዛራ ሃና ኦኔ?» ጊዳ። ጌላኦያ «ቤኒ ኔ ኣያ ኔና ሚጻታ ዬሊዳ ኣፒሌ ሚꬃ ጋርሳፌ ታ ኔና ቤጎꬃ ዴንꬃዲስ።
SOL 8:6 ሜርና ሲቆን ኔ ዎዚናን ታና ዎꬃ፤ ታና ጻላ ኔ ቄሴ ቦላ ማታሜ ማላ ሾጫ፤ ኣይስ ጊኮ ሲቆይ ሃይቆ ማላ ሚኖ፤ ቃናቴይ ዱፎ ማላ ሜንጼ ኢታ፤ ኢዚ ላጮይካ ታማ ላጮ ማላ ፖፖልኡ ጌስ።
SOL 8:7 ሃꬃ ዳሮይ ሲቆ ታማ ቶይሳናስ ዳንዳዬና፤ ዲኦይካ ሜጪዲ ኤፌና፤ ኣሲ ባስ ዲዛ ሚሽ ኡባን ሲቆ ሻማናስ ኮይኮ ሲቆይ ሚሻን ቤቶንታ ጊሻስ ኣሳይ ቂልጪ ካኤስ» ጋዱስ።
SOL 8:8 «ꬋንꬂ ኡቶንታ ቄሪ ሚቻ ኑስ ዳዉስ፤ ኣዚናይ ኢዞ ኦይቺኮ ኑ ኢዚስ ኣይ ኦꬃኔ?
SOL 8:9 ኢዛ ጊምቤ ጊዲዳኮ ኑኒ ኢዚ ቦላ ቢራፔ ሻኮ ኦꬃና፤ ኢዛ ጌሊዛ ፔንጌ ጊዲዳኮ ኑኒ ኢዚ ቦላ ሊባኖሴ ዚጋፔ ሳንቃ ኬሳና» ጊዳ።
SOL 8:10 «ቤኢቴ ታኒ ጊምቤ፤ ታ ꬋንꬃቲካ ሻኮ ማላ፤ ታኒ ታ ሲቆዛራ ዲዛ ዎዴ ኢዚ ኡፋይሲኔ ሳሮቴꬅ ዴሜስ።
SOL 8:11 ሶሎሞኔስ ባኣሊ-ሃሞኔን ዎይኔ ቶኪዛሶሆይ ዴስ፤ ሄ ዎይኔ ቶኪዛሶሆዛ ኦሳንቻታስ ኪራ ኢሚዴስ፤ ኢስቲካ ሁኤን ሁኤን ሺ ቢራ ኢዛስ ኤሄቴስ።
SOL 8:12 ጊዶ ኣቲን ታስ ቡዞ ጊዲዳ ዎይኔ ቶኪዛሶሆይ ዴስ፤ ሶሎሞኔ ኔኒ ሺ ቢራ ኤካ፤ ኦሳንቻቲ 200 ቢራ ኤኬቶ» ጋዱስ።
SOL 8:13 «ሃኔ ታ ሚሺራዬ! ኔ ኣታኪልቴ ጊዶን ዳሼ ሃሳይዛ ቃላ ታ ላጌቲ ሲያና ኮዬቴስ፤ ኣኔ ታናካ ኔ ቃላ ጬንጉርሳ ሲሳ» ጊዴስ።
SOL 8:14 «ታ ሲቆዞ! ታኮ ኤሶን ሃ ያ! ሳዎ ኣታኪልቴቲ ሞኪዛ ዙማታ ቦላራ ጉፒዛ ጌኔሳ ዎይኮ ዉሻ ላቃ ሚሳታ» ጋዱስ።
ISA 1:1 ዩሁዳ ካዎታ ኦዚያ፥ ኢዮኣታሜ፥ ኣካዜኔ ሂዝቂያሳ ካዎቴꬃ ዎዴ ኣሞጼ ና ኢሳያሲ ዩሁዳ ጊሻሲኔ ዬሩሳላሜ ጊሻስ ቤኢዳ ኣጁታ።
ISA 1:2 ጎዳይ፥ «ሳሎቶ ሲዪቴ! ቢታዬ ኔካ ኤዝጋ ሲያ! ታኒ ናይታ ዬላዳ ዲቻ ጋꬂን ኢስቲ ታ ቦላ ማካሊዳ።
ISA 1:3 ቦራይ ባ ጎዳ ኤሬስ፤ ሃሬይ ኢዛ ጎዳይ ኢዛስ ጊግሲዳ ዜꬌካ ኤሬስ፤ ኢስራኤሌይ ጊዲኮ ታና ኤሬና፤ ታ ዴሬይካ ኣኬኬና» ጊዴስ።
ISA 1:4 ኢንቴኖ ናጋራንቻ ካዎቴꬃቶ! ቆሆን ኩሚዳይቶ! ኢታ ኦꬂዛ ዜሬꬃቶ! ኢንቴ ኣዋታ ቱናቴꬃ ካሊዛ ናይቶ! ኢንቴና ኣዬ ኣና! ጎዳ ኣጋጊዴታ፤ ኢስራኤሌ ጌሻዛ ዬጊ ኣጊዴታ፤ ዞኮካ ኢዛስ ዛሪዴታ።
ISA 1:5 ማካላ ቦላ ማካላ ጉጂዲ ኢንቴ ኣይስ ዛሪ ዛሪ ቃጻዬቴቲ? ኢንቴ ሁኤይ ሙሌ ሳኬቲዴስ፤ ኢንቴ ዎዚናይካ ዳቡርዴስ።
ISA 1:6 ሄሳ ጋሶን ሂርኪ ቶሆ ጹጉንꬃፌ ቢዲ ሁኤ ኢስኬ ጋካናስ ፓጻቴꬂ ኢንቴስ ባዋ። ማዱንꬅ፥ ኪጻኔ ኡዛስ ጻላ ጊዲዴስ። ሄ ማዱንꬃይ ሜጬቲቤና፤ ቃሼቲቤና፤ ዛይቴንካ ሹጊቤና።
ISA 1:7 ኢንቴ ዴሬይ ኣይኮይ ባይንዳ ባዞ ጊዳና፤ ኢንቴ ካታማቲ ታማን ጹጌታና፤ ኢንቴ ኣይፌይ ጼሊሺን ኢንቴ ቢታ ኣላጋይ ቦንቂ ኤካና፤ ኢስቲ ኢንቴ ቢታ ቡላ ኬሳና።
ISA 1:8 ጺዮኔ ናያ ዎይኔ ሚꬃ ጊዶን ዲዛ ጋባ ማላ፥ ሌሌሄ ጊዶን ዲዛ ቄሪ ኬꬃ ማላኔ ሞርኬይ ጊዶꬂዳ ካታማ ማላ ጊዳዱስ።
ISA 1:9 ኡባፌ ዎልቃማ ጎዳይ ኑስ ዜሬꬅ ኣሾንታኮ፥ ኑኒ ሶዶሜ ማላኔ ጋሞራ ማላ ጊዳናኮሺን።
ISA 1:10 ኢንቴኖ ሶዶሜ ኣይሲዛይቶ! ጎዳ ቃላ ሲዪቴ፤ ኢንቴኖ ጋሞራ ዴሬቶ! ኑ ጾሳ ቲሚርቴ ኤዝጊ ሲዪቴ።
ISA 1:11 «ኢንቴ ያርሾ ዳሮይ ታስ ኣይ ኦꬃኔ? ሃኖ ጋካናስ ኢንቴ ታስ ሺሺዳ ጹጌቲ ሺቂዛ ꬋርሾ ኣሾኔ ሞꬎ ሜሄታ ኣሾ ካላዲስ፤ ታኒ ቦራ ሱꬃን፥ ዶርሳ ሱꬃኒኔ ዴይሻ ሱꬃን ኡፋዬቲኬ።
ISA 1:12 ኢንቴ ታስ ጎይናናስ ዪዛ ዎዴ ሄሳ ኡባ ኢንቴ ኤኪ ያና ማላኔ ታ ኬꬃ ዛጎ ኢንቴ ዬꬋና ማላ ኦኒ ኦይቺዴ?
ISA 1:13 ሃይሳፌ ጉዬ ሃይሳ ሚሳቲዛ ሃዳ ያርሾ ናምኣንꬆ ሺሾፍቴ፤ ኢንቴ ጩዋሲዛ ኤጻኔይ ታና ሻቴስ፤ ኣጊና ጼሮን፥ ሳምባታ ጋላሳታኒኔ ኢንቴ ጎይኖስ ሺቂዛ ጋላሳታን ኢንቴ ቦንቺዛ ባኣሌቲ ኢታቴꬃን ኩሚዳ ጊሻስ ታኒ ሄይታ ጌንጫ ኣꬋናስ ዳንዳይኬ።
ISA 1:14 ኣጊና ጼሮን ኢንቴ ቦንቺዛ ጋላሳታኔ ካሴ ኢንቴ ዎꬂዳ ባኣሌ ጋላሳታ ታ ሼምፖያ ሃራሴታዱስ፤ ሄይቲ ታስ ዳሮ ዴጾ ቶሆ ጊዲዳ ጊሻስ ታ ኢስታ ቶካናስ ዳንዳይኬ።
ISA 1:15 ኢንቴ ኢንቴ ኩሼ ዎሳስ ታኮ ሚጪኮ ታኒ ታ ኣይፌ ኢንቴፌ ሃራሶ ዛራና፤ ኢንቴ ኩሼን ሱꬂ ኩሚዳ ጊሻስ ኢንቴ ኬሂ ዎሲኮካ ታ ኢንቴ ዎሳ ሲዪኬ።
ISA 1:16 ሜጬቲቴ፤ ኢንቴና ጌሺቴ፤ ኢንቴ ኢታ ኦሶዛ ታ ሲንꬃፌ ዲጊቴ፤ ኢታ ኦሶካ ኣጊቴ።
ISA 1:17 ሎኦ ኦሶ ታማርቴ፤ ሱሬ ፒርዳ ኮዪቴ፤ ቆሄቲዳይታ ሚንꬄꬂቴ፤ ዪኦታስ ኤቂቴ፤ ኣምኤታስ ሞቴቲቴ» ጊዴስ።
ISA 1:18 ቃሴካ ጎዳይ፥ «ሃ ዪቴ ኢሶይ ኢሳራ ኣኔ ቡጼቶስ፤ ኢንቴ ናጋራይ ጼቃ ዞኦ ጊዲኮካ ሻቻ ማላ ቦታና፤ ሱꬃ ማላ ዞኢኮካ ፑቶ ማላ ፑቃ ቦꬅ ጊዳና።
ISA 1:19 ኢንቴ ታስ ኤኖ ጊ ኣዛዜቲኮ ቢታ ኣንጆ ማና።
ISA 1:20 ኢንቴ ታስ ኣካይ ጊ ማካሊኮ ማሻይ ኢንቴና ማና፤ ሃይሳ ዮቲዳይ ታና ጎዳ» ጊዴስ።
ISA 1:21 ካሴ ኣማኔቲዳ ካታማያ ዋናዳ ላይማ ጊዳዴ? ካሴ ኢዚን ሱሬ ፒርዳይ ኩሚዳራኔ ጺሎቴꬂ ኢዚን ኩሚዳራ ሃኢ ጊዲኮ ሼምፖ ዎꬊዛይታስ ዱሳሶ ጊዳዱስ።
ISA 1:22 ሃኔ ኔ ቢራይ ሺይዴስ፤ ኔ ዎይኔ ኡሻይ ሃꬃን ዬሌቲዴስ።
ISA 1:23 ኔና ካሌꬂዛይቲ ማካላንቻታራኔ ካይሶታራ ላጌቲዳ፤ ኢስቲ ኡባይካ ማጋንጾ ዶሴቴስ። ማታኤካ ኬሂ ኮዬቴስ፤ ዪኦታስ ኣꬊ ኤቄቴና፤ ኣምኤታ ማጋና ሲዬቴና።
ISA 1:24 ሄሳ ጊሻስ ጎዳይ፥ ኡባፌ ዎልቃማ ጎዳ ኢስራኤሌ ጾሳይ፥ «ታኒ ታ ሞርኬታ ቦላ ታ ሃንቆ ጉሳና፤ ታና ኮሚዛይታ ቦላካ ታኒ ሃሎ ኬሳና።
ISA 1:25 ታኒ ታ ኩሼ ኔ ቦላ ዴንꬃና፤ ኔ ቦላ ዲዛ ኪንꬃካ ታ ጌሻና፤ ኔ ቂታካ ኔ ቦላፌ ዲጋና።
ISA 1:26 ካሴ ኔና ኣይሲዛይታ ማላ ሃራ ኔና ኣይሳናይታኔ ዞራናይታ ታኒ ኔስ ዴንꬃና፤ ሄሳፌ ጉዬ ኔኒ፥ ‹ጺሎቴꬂ ዲዛ ኣማኔቲዳ ካታማዮ› ጌቴታና።
ISA 1:27 ጺዮና ሱሬ ፒርዳን፥ ማሮቴꬃን ሲሚዛይቲ ጺሎቴꬃን ዎዜታና።
ISA 1:28 ጊዶ ኣቲን ማካላንቻቲኔ ናጋራንቻቲ ኢሲ ቦላ ሊቃና፤ ጾሳ ኣጊዛይቲ ዉሪካ ꬋያና።
ISA 1:29 ካሴ ኢንቴ ዶሲዛ ካሻታን ኢንቴ ዬላታና፤ ካሴ ኢንቴ ዶሪዳ ኣታኪልቴሶሆታን ኢንቴ ካዉያና።
ISA 1:30 ዉርሴꬃን ኢንቴ ቦንጮይ ቆኪዳ ዎላ ማላ፥ ሃꬂ ባይንዳ ኣታኪልቴሶሆታ ማላ ጊዳና።
ISA 1:31 ሚኖ ኣሲ ሃፓ ማላ፤ ኢዛ ኦሶይካ ፒልኢ ጊዛ ላጮ ማላ ጊዳና፤ ናምኣይካ ኢሲ ቦላ ጹጌታና፤ ሄ ታማ ቶይሳና ኣሲካ ዴና» ጊዴስ።
ISA 2:1 ኣሞጼ ና ኢሳያሲ ዩሁዳ ዴሬ ጊሻሲኔ ዬሩሳላሜ ካታማ ጊሻስ ቤኢዳ ኣጁታይ ሃይሳ።
ISA 2:2 ዎዴ ዉርሴꬃን ጾሳ ኬꬂ ኢዛ ቦላ ኬጼቲዳ ዙማይ ሃራ ዙማ ኡባፌ ꬎቂ ቤታና። ዙምቡላታ ኡባፌ ꬎቁ ꬎቁ ጋና፤ ኡባ ካዎቴꬃቲ ሄ ጎቻና።
ISA 2:3 ዳሮ ኣሳይ ዪዲ፥ «ዎጋይ ጺዮኔፔ፥ ጎዳ ቃላይ ዬሩሳላሜፔ ኬዚዛ ጊሻስ ሃ ዪቴ! ጎዳ ዙማ፥ ያቆቤ ጾሳ ኬꬅ ኣኔ ፑዴ ኬዞስ። ኢዚ ኮይዛይሳꬆ ኑኒ ባና ማላ ኢዚ ኑና ባ ኦጌ ታማርሳና» ጋና።
ISA 2:4 ኢዚ ካዎቴꬃታ ጊዶን ፒርዳና፤ ዳሮ ኣሳታ ጋርሳን ዲዛ ፓላማ ኢዚ ዲጋና። ኢስቲ ባንታ ጊꬃ ማሻ ማራሻ፥ ባንታ ቶራካ ባጫ ቆጺ ኬሳና። ዴሬይ ዴሬ ቦላ ማሻ ዴንꬄና፤ ሄሳፌ ጉዬ ኢስቲ ኦላ ታማሬቴና።
ISA 2:5 ኢንቴኖ ያቆቤ ዛሬቶ! ሃ ዪቴ! ኣኔ ጎዳ ፖኦን ሲሜሬቶስ።
ISA 2:6 ጎዳዉ! ኔኒ ኔ ኣሳ ያቆቤ ዛሬታ ኣጋዳሳ። ኢስቲ ኣርሼይ ሞኪዛ ባጋራ ዲዛ ኣሳታ ማላ ቢታን ኩሚዳ፤ ፊሊስጼሜ ኣሳ ማላ ሙሬኔቴስ። ኢስቲ ኣላጋራ ኢሲፌ ዙፔቴቴስ።
ISA 2:7 ኢስታ ቢታን ቢራይኔ ዎርቃይ ኩሚዴስ፤ ኢስታ ዱሬቴꬃስ ዛዋይ ባዋ፤ ኢስታ ቢታን ፓራይ ኩሚዴስ፤ ኢስታ ፓራ-ጋሬታስ ዛዋይ ዴና።
ISA 2:8 ኢስታ ቢታን ኤቃ ጾሳቲ ኩሚዳ፤ ባንታ ኩሼን ኦꬂ ኬሲዳ ሚሻስ ጎይኔቴስ።
ISA 2:9 ሄሳ ጊሻስ ኣሲ ኡባይ ዚቂ ጋናኔ ካዉያና። ኢስታ ቆሆ ኣቶ ጎፓ።
ISA 2:10 ያሺሲዛ ጎዳ ሃንቆፌኔ ኢዛ ቴማፔ ኣታናስ ዛላታኮ ቢዲ ቢታ ጊዶን ቆቴቲቴ!
ISA 2:11 ኦቶራንቻ ኣይፌይ ጉካና፤ ሞꬌቲዛይቲ ካዉያና፤ ሄ ዎዴ ጎዳይ ጻላ ꬎቁ ꬎቁ ጋና።
ISA 2:12 ኡባፌ ዎልቃማ ጎዳይ ኦቶራንቻታ፥ ሞꬌቲዛይታኔ ጬቄቲዛይታ ካዉሻናስ ጋላስ ባሪ ዎꬂዴስ።
ISA 2:13 ኣዱሲኔ ꬎቃ ጊዲዳ ሊባኖሴ ዚጋታኔ ባሳኔ ዎላታ ኡባ፥
ISA 2:14 ጊታ ዙማታኔ ꬎቃ ዙምቡላታ ኡባ፥
ISA 2:15 ካታማ ናጊዛ ኣዱሳ ሚጻታኔ ካታማ ዩሾን ዲዛ ሚኖ ጊምቤታ ኡባ፥
ISA 2:16 ታርሴሴ ማርካቤታኔ ቦንቾ ዎጎሎታ ኡባ ኢዚ ካዉሻና ዎዴይ ዴስ።
ISA 2:17 ሞꬌቲዛዴይ ካዉያና፤ ኦቶራንቻይ ኩንዳና፤ ሄ ጋላስ ጎዳይ ጻላ ꬎቁ ꬎቁ ጋና፤
ISA 2:18 ኤቃ ጾሳቲ ኡባይ ሙሌራ ꬋያና።
ISA 2:19 ጎዳይ ሃይሳ ቢታ ቃꬃናስ ዴንዲዛ ዎዴ ያሺሲዛ ጎዳ ሃንቆፌኔ ኢዛ ቴማፔ ኣታናስ ኣሳይ ቆቴታናስ ሹቻ ጋርሲኔ ኦላይ ዲዛሶ ባቃታና።
ISA 2:20 ሄ ጋላስ ኣሳይ ጎይናናስ ሜꬊዳ ባንታ ቢራ፥ ዎርቃ ሚስሌታ ጊሮሲኔ ካፎታስ ኦላና።
ISA 2:21 ጎዳይ ሃ ቢታ ቃꬃናስ ዴንዲዛ ዎዴ ኢዛ ያሺሴꬃፌኔ ኢዛ ቴማፔ ዴንዲዳይሳን ሹቻ ጎንጎሎይኔ ዛላ ዛኣይ ዲዛሶ ባቃታና።
ISA 2:22 ሼምፖይ ሲꬌራ ኬዚን ኣሃ ጊዲዛ ኣሳን ኣማኔቶፍቴ፤ ኣሲ ኣይ ማዳኔ?
ISA 3:1 ቤኢቴ፥ ጎዳይ ኡባፌ ዎልቃማ ጎዳይ ኣሳስ ኮሺዛ ካꬅ፥ ሃꬂኔ ማዶ ኡባ ዬሩሳላሜፔኔ ዩሁዳፔ ዲጋና።
ISA 3:2 ቃራታኔ ኦላንቻታ፥ ፒርዲዛይታኔ ናቤታ፥ ሙሬኒዛይታኔ ጪማታ፥
ISA 3:3 ሃምሳ ሃላቃታኔ ኦላ ጋዳዋታ፥ ዞራንቻታኔ ሂላንቻታ፥ ጪንጫቴꬃን ቢቲዛይታ ኡባ ꬋይሳና።
ISA 3:4 ታኒ ዬላጋ ናይታ ኢስታ ቦላ ሹማና፤ ቄሪ ናይቲ ኢስታ ሃራና።
ISA 3:5 ዴሬይ ዴሬ ቦላ፥ ኣሲ ኢሶይ ኢሳ ቦላ፥ ሾሮይ ሾሮ ቦላ፥ ዬላጋ ናይቲ ጪማታ ቦላ፥ ሹፉሮይ ቦንቼቲዳይታ ቦላ ዴንዳና።
ISA 3:6 ኣሲ ባ ኣዋ ኬꬃን ባ ኢሻንታፌ ኦይኪዲ፥ «ኔስ ማይኦይ ዲዛ ጊሻስ ኑና ካሌꬂዛይሳ ጊዳ፤ ሃ ላሌቲዳ ሶሆዛ ኣዋቴꬅ ኔ ኤካ» ጋና።
ISA 3:7 ሂስቲን ኢዚ ሄ ዎዴ ባ ቃላ ꬎቁ ሂስቲዲ፥ «ታኒ ኣይኮካ ማዲኬ፤ ታሶን ማይኦይኔ ሚዛ ካꬂ ባይንዳ ጊሻስ ታና ዴሬ ካሌꬂዛዴ ሂስቶፍቴ» ጋና።
ISA 3:8 ዬሩሳላሜይ ጋንዲጋራዉስ፤ ዩሁዳይካ ኩንዳና ማታዱስ፤ ጋሶይካ ኢስቲ ባንታ ሃሳያኒኔ ኦሶን ጎዳራ ኤቄቲሼ ኢዛ ቦንቾዛ ቶቼቴስ።
ISA 3:9 ኢስታ ኣይፌሶይ ኢስታ ቦላ ማርካቴስ፤ ኢስቲ ሶዶሜ ኣሳ ማላ ባንታ ናጋራ ቆቶንታ ቆንጬን ሃሳዬቴስ፤ ኢስቲ ባንታ ቦላ ኢታ ሚሽ ኤሂዛ ጊሻስ ኢስታስ ኣዬ ኣና!
ISA 3:10 ጺሎታስ፥ «ጺሎቲ ባ ሎኦ ኦሶ ኣይፌ ማና፤ ሄሳ ጊሻስ ኢስታስ ሎኦ ጊዳና» ጋ ዮታ።
ISA 3:11 ኢታታስ ኣዬ ኣና! ኢስታ ቦላ ኢታ ሚሺ ያና፤ ኣይስ ጊኮ ኢስቲ ባንታ ኦሶ ማላ ኤካና።
ISA 3:12 ዬላጋቲ ታ ዴራ ኡንኤꬄቴስ፤ ማጫሳቲካ ኢስታ ሃሬቴስ፤ ታ ዴሬዞ! ኢንቴና ካሌꬂዛይቲ ኢንቴና ባሌꬂዳ፤ ኢንቴ ቢዛ ኦጌፔካ ኢንቴና ካሬ ኬሲዳ።
ISA 3:13 ጎዳይ ፒርዳናስ ሺሎታን ኡቲዴስ፤ ዴራ ቦላ ፒርዳናስ ዴንዲዴስ።
ISA 3:14 ጎዳይ ዴሬ ጪማታኔ ካሌꬂዛይታ ፒርዳናስ ኢሲ ቦላ ሺሺዲ፥ «ታኒ ዎይኔ ቶኪዛሶሆዛ ኢሲዴታ፤ ማንቆታፔ ኢንቴ ቦንቂዳይሲ ኢንቴ ቆልኣን ዴስ።
ISA 3:15 ታ ዴራ ኣይስ ሜቶን ሊቂሲዴቲ? ማንቆታ ኣይስ ዬሴቲ? ሃይሳ ዮቲዳይ ታና ጎዳ፥ ኡባፌ ዎልቃማ ጎዳ ጾሳ» ጌስ።
ISA 3:16 ጎዳይ፥ «ጺዮኔ ማጫሳቲ ኦቶሬቲዳ፤ ባንታ ቆꬌ ዋርጺ ሂስቲሼ፥ ባንታ ኣይፌን ሶምኢ ቤሲሼ፥ ባንታ ዱጫ ቃꬂሼ፥ ባንታ ቶሆን ዲዛ ሳጋዮ ጊሪሲሼ ሄሜቴቴስ።
ISA 3:17 ሄሳ ጊሻስ ታኒ ጎዳይ ጺዮኔ ማጫሳታ ሁኤ ጪቶን ጎኢሳና፤ ታኒ ጎዳይ ኢስታ ሁኤ ቦኣሳና» ጌስ።
ISA 3:18 ሄ ጋላስ ጎዳይ ጺዮኔ ማጫሳታ ኣሌቆ ሚሻታ፥ ሄይቲካ ቶሆ ሳጋዮታ፥ ሁኤ ኣሌቆታ፥ ቆꬌ ጎዝዳታ፥
ISA 3:19 ሃይꬃ ጉቲቻታ፥ ኩሼ ሳጋዮታ፥ ኣይፌሶ ካሚዛ ቁራጬታ፥
ISA 3:20 ሁኤ ጎሴታ፥ ሳጋዮታ፥ ሁኤ ኣሌቆታ፥ ጼሳን ዳንጪዛ ዳንጮታ፥ ሺቶ ቢልቃጼታ፥ ኣሼንኪታቤታ፥
ISA 3:21 ሲꬌ ሚዲጋታ፥ ቢራꬌ ሚዲጋታ፥
ISA 3:22 ሴሎ ማይኦታ፥ ጋርሳራ ማይኢዛ ማይኦታ፥ ካባታ፥ ኩሼ ካራጺቴታ፥
ISA 3:23 ሄሬጋታ፥ ላይኖታ፥ ጊዶራ ማይኢዛ ማይኦታ፥ ቢናና ቃቺዛ ኣሌቆታኔ ኣይፌሶ ካሚዛ ቆሌታ ኡባ ዳፊ ኤካና።
ISA 3:24 ሺቶ ጺንቆን፥ ዳንጮ ዎዶሮን፥ ጎፋሬ ቦኣን፥ ሴሎ ማይኦ ማቃን፥ ፑላቴꬅ ፒጌን ላማና።
ISA 3:25 ኢንቴስ ኣቱማ ኣሳቲ ጊꬃ ማሻን፥ ኦላንቻቲ ኦላን ሃይቃና።
ISA 3:26 ጺዮኔ ፔንጌቲ ካሎ ጋዴን ዎꬋ ኡታዳ ዬኪዛ ማጫሳ ማላ ዬካናኔ ዚላላና።
ISA 4:1 ሄ ዎዴ ላፑን ማጫሳቲ ኢሲ ኣዴ ኦይኪዲ፥ «ማና ካꬅ ጊዲን ማይኣና ማይኦ ኑኒ ኑርካ ኑና ዳንዳያና፤ ኔ ሱንꬃን ጻላ ጼይጌታና ማላ ሂስታዳ ኑ ካዉሻቴꬃ ኑፔ ዲጋርኪ!» ጊ ዎሳና።
ISA 4:2 ሄ ዎዴ ጎዳ ሚꬃ ሃጋይ ሎኣናኔ ቦንቼታና፤ ኢስራኤሌ ኣሳፔ ꬋይሼ ኣቲዳይታስ ሄ ቢታ ካꬃይ ጬቆሲኔ ቦንቾስ ጊዳና።
ISA 4:3 ጺዮኔን ኣቲዳይቲ፥ ዬሩሳላሜን ꬋዮንታ ኣቲዳይቲ፥ ዬሩሳላሜን ሼምፖራ ፓጻ ዲሼ ጻፌቲዳ ኡባታራ፥ «ኢስቲ ጌሻታ» ጌቴታና።
ISA 4:4 ጎዳይ ጺዮኔ ማጫሳታ ቂታ ሜጫና፤ ማꬌቲ ኡቲዳ ሱꬃፌ ዬሩሳላሜ ፒርዳ ኣያናኒኔ ጹጊዛ ኣያናን ጌሻና።
ISA 4:5 ጎዳይ ጺዮኔ ዙማ ቦላኔ ሄን ሺቂዛ ኡባታ ቦላ ጋላስ ሻራኔ ጩዋ፥ ኦማርስ ኤጺዛ ታማ ፖኦ ኪታና፤ ጾሳ ቦንቾይ ካታማዮ ዱንካኔ ማላ ካሚ ናጋና።
ISA 4:6 ኢዚ ጋላሳ ኣዋ ሱሌፔ ኣሺዛ ኩዋ፥ ኡሾፔኔ ኢራፔ ባቃቲ ኣቲዛሶሆ ጊዳና።
ISA 5:1 ታኒ ታ ሲቆ ላጌዛ ጊሻሲኔ ኢዛ ዎይኔ ቱራ ቶኪዛሶሆ ጊሻስ ሲቆ ማዛሙሬ ዬጻና። ታኒ ሲቂዛ ላጌዛስ ኣራዳ ዙምቡላን ዎይኔ ቱራ ቶኪዛሶሆይ ዴስ።
ISA 5:2 ቢታ ቦኪዲ፥ ሹቻ ቆሪ ኬሲዲ፥ ኡባፌ ሎኢዛ ዎይኔ ቱራ ቶኪዴስ፤ ሂስቲዲ ኢዛ ናጋናስ ሻኮ ጊግሲዴስ፤ ዎይኔ ኡሹ ጉምኢዛሶሆ ኦላ ቦኪ ጊግሲዴስ። ሄሳፌ ጉዬ ሎኦ ኣይፌ ኣይፋና ጊዲ ናጊዴስ፤ ጊዶ ኣቲን ጫላ ጳንቂዳ ኣይፌ ኣይፊዴስ።
ISA 5:3 ሂስቲን ታ ሲቆይ፥ «ኢንቴኖ ዬሩሳላሜን ዴኢዛይቶ! ኢንቴኖ ዩሁዳ ኣሳቶ! ታፔኔ ታ ዎይኔ ቱራ ቶኪዛ ሶሆዛፔ ጊዶን ዴኢዛ ዮኦዛ ኣኔ ሃኢ ኢንቴ ፒርዲቴ።
ISA 5:4 ታኒ ታ ዎይኔ ቱራ ሶሆዛሲ ኦꬂዳይሳፌ ሃራ ኣይ ኦꬃናይሲ ኣቲዴ? ኢዚ ሎኦ ኣይፌ ኣይፋና ጋዳ ታ ናጊሺን ኣይስ ጫላ ጳንቂዳ ኣይፌ ኣይፊዴ?
ISA 5:5 ሃኢ ታኒ ታ ዎይኔ ቶኪዛ ጋዴዛ ቦላ ኦꬃናዝ ኢንቴስ ዮታይስ። ዲርሳ ሾዳና፤ ኢዚካ ꬋያና ማላ ኦꬃና፤ ታኒ ጊምቤዛ ላላና፤ ሄ ሶሆይካ ዱሬታና።
ISA 5:6 ታኒ ሄ ሶሆዛ ማጎ ቢታ ኦꬃና። ሄ ቱራይ ጹንቄቴናኔ ቡልኤቴና፤ ሂስቲን ኪንዲቾይኔ ኣጉንꬂ ኢዛን ሞካና። ኢራይ ኢዛን ቡኮንታ ማላ፥ ታኒ ሻራታ ኣዛዛና» ጊዴስ።
ISA 5:7 ኡባፌ ዎልቃማ ጎዳ ዎይኔ ቶኪዛ ጋዴይ ኢስራኤሌ ኣሳ። ዩሁዳ ኣሳይ ኢዚ ኡፋዬቲዛ ኣታኪልቴ። ኢስቲ ሱሬ ፒርዳ ፒርዳና ጊዲ ናጊዴስ፤ ጊዶ ኣቲን ሱꬅ ጉሲሺን ቤዪዴስ። ኢዚ ጺሎቴꬅ ኮዪዴስ፤ ጊዶ ኣቲን ሜቶ ዋሶ ሲዪዴስ።
ISA 5:8 ሃራታስ ሶሆይ ꬋያናሼ ጋካናስ፥ ኬꬅ ኬꬃ ቦላ ጉጂዛይቶ! ጋዴ ጋዴራ ጋꬂ ኦይꬂዲ፥ ኢንቴርካ ጻላ ቢታ ቦላ ኣኪ ዴኢዛይቶ! ኢንቴስ ኣዬ ኣና!
ISA 5:9 ኡባፌ ዎልቃማ ጎዳይ ታኒ ታ ሃይꬃራ ሲዪሺን፥ «ጊታ ኬꬃቲ ካይዚ ኣታና፤ ሄ ሎኦ ኬꬃታን ዴኣናስ ኣሲ ꬋያና።
ISA 5:10 ታሙ ዋጻ ቦራታን ቶኪዳ ዎይኔ ኣይፌፔ ኢሲ ኦቶ ጊዲዛ ዎይኔ ኡሺ ጻላ ኬኣና፤ ታሙ ቁንኣ ካꬅ ዜሪን ኢሲ ቁንኣ ካꬂ ጻላ ኣይፋና» ጊዴስ።
ISA 5:11 ማꬆሲዛ ኡሹ ኮያናስ ማላዶ ጉራራ ዴንዲዲ ዎይኔ ኡሻን ጹጌታና ጋካናስ፥ ሳኣ ቃሚሲዛይታስ ኣዬ ኣና!
ISA 5:12 ኢስታ ጊቢራሶሆን ማሲንቆይ፥ ዲꬂ፥ ካራቤይ፥ ሱሱልኤይኔ ዎይኔ ኡሺ ዴስ፤ ጊዶ ኣቲን ኢስቲ ጎዳ ኦሶዛስ ዉዴቲቤቴና፤ ኢዚ ባ ኩሼን ኦꬂዳ ኦሶካ ቦንቺቤቴና።
ISA 5:13 ሂስቲን ታ ዴሬይ ኣኬካ ꬋይዳ ጊሻስ ዲኤቲ ባና፤ ኢስታ ሹሜቲ ኮሻን ሃይቃና፤ ኢስታ ዴሬ ኣሳይካ ሃꬃ ሳሞን ጹጌቲ ሃይቃና።
ISA 5:14 ዱፎይ ባ ጎምፓ ኣሳዱስ፤ ባ ዶናካ ዛዋፔ ቦላራ ዶያዱስ፤ ዬሩሳላሜን ዴኢዛ ጊታ ኣሳቲኔ ሃንኮ ዴሬይ፥ ዎጫሚዛይታኔ ጉፒዛይታ ኢሲ ቦላ ሚታና።
ISA 5:15 ኣሲ ኡባይ ቶሼታናኔ ካዉያና፤ ኦቶራንቻቲ ኡባይ ዬላታና።
ISA 5:16 ጊዶ ኣቲን ኡባፌ ዎልቃማ ጎዳይ፥ ሱሬ ፒርዳን ꬎቁ ꬎቁ ጋና፤ ጌሻ ጾሳይ ባ ጌሻቴꬃ ባ ጺሎቴꬃን ቤሳና።
ISA 5:17 ሄ ዎዴ ዶርሳቲ ባንታ ቆሮን ሄሜቲዛ ማላ ሄሜታና፤ ዶርሳ ላቃቲ ላሌቲዳ ዱሬታ ኬꬃታ ሶሆን ማታ ማና።
ISA 5:18 ጪሞ ዎዶሮን ናጋራ ጎቺዛይታስ፥ ፓራ-ጋሬ ዎዶሮን ኢታቴꬅ ጎቺዛይታስ ኣዬ ኣና!
ISA 5:19 «ኑኒ ኑ ኣይፌራ ቤኣና ማላ ኣኔ ጾሲ ኤሌሎ! ባ ኦሶካ ኤሶሶ! ኑኒ ኤራና ማላ ኢስራኤሌ ጌሻይ ቆፒዳ ቆፋይ ማታን ፖሌቶ» ጊዛይታስ ኣዬ ኣና!
ISA 5:20 ኢታ ሎኦ፥ ሎኦዛ ኢታ ጊዛይታስ፥ ꬉማ ፖኦ ፖኦዛ ꬉማ ኦꬂዛይታሲኔ ጫሚዛይሳ ማልኦ፥ ማልኢዛይሳ ጫሞ ኦꬂዛይታስ ኣዬ ኣና!
ISA 5:21 ባንታና ባርካ፥ «ታኒ ኣꬎ ኤራንቻ! ታኒ ቃራ ጊዲኪና!» ጊ ቆፒዛይታስ ኣዬ ኣና!
ISA 5:22 ዎይኔ ኡሻን ኤሬቲዳይታሲኔ ማꬆሲዛ ኡሹ ዋላካናስ ጎቢዛይታስ ኣዬ ኣና!
ISA 5:23 ማታኤ ኤኪዲ፥ ሞራንቻታ ጺሊሲዛይታሲኔ ጺሎ ኣሳታሲ ሱሬ ፒርዳ ዲጊዛይታስ ኣዬ ኣና!
ISA 5:24 ኢስቲ ኡባፌ ዎልቃማ ጎዳ ዎጋ ኢጺዳ ጊሻስ፥ ኢስራኤሌ ጌሻ ቃላካ ካꬊዳ ጊሻስ፥ ታማ ላጮይ ቡጻ ኦይኪዛ ማላኔ ሜላ ማታይ ኤጺ ꬋይዛ ማላ ኢስታ ጻጶይ ዎቃና፤ ኢስታ ጪሻይካ ቡሄ ማላ ላሌቲ ꬋያና፤
ISA 5:25 ጎዳ ሃንቆይ ኢዛ ዴራ ቦላ ኤጺ ኬኢዴስ፤ ኢዚ ባ ኩሼ ዴንꬂዲ ኢስታ ሾጪዴስ። ዙማቲ ቃጺዳ፤ ሃይቂዳ ኣሳ ኣሃይ ኦጌ ቦላ ፒቲ ዬጊዳ ቡራ ማላ ጊዲዴስ፤ ሂስቲ ፔኢንካ ኢዛ ሃንቆይ ሲሚቤና፤ ኢዛ ኩሼይ ሃኢካ ዴንዲዳ ማላ ዴስ።
ISA 5:26 ጎዳይ ሃኮን ዴኢዛ ካዎቴꬃታስ ማላታ ꬎቃን ኤሴስ፤ ሳኣ ጋጻን ዴኢዛ ሞርኬታስካ ዋይቄስ፤ ኢስቲካ ኤሶን ቢቻሪሼ ፑቱ ጋና።
ISA 5:27 ኢስታ ጊዶን ዳቡራንቻይኔ ዎቤይ ዴና፤ ኢስታፌ ኢሶይኔ ꬊስኬናኔ ኢቼና። ጼሳን ጊጺዳ ቃባቶይካ ቢርሼቴና፤ ኢስታ ጫማ ዳፎይካ ዱጼና።
ISA 5:28 ኢስታ ዪሻይ ሆጼ፤ ኢስታ ዎንዳፌይካ ዋጼቲ ኡቲዴስ። ኢስታ ፓራታ ቂንጫፊሌይ ዛላ ሹቻ ማላ፤ ኢስታ ፓራ-ጋሬታ ኤርዞይካ ጎቴ ማላ።
ISA 5:29 ኢስታ ጻጎይካ ጋሞ ጻጎ ማላ፤ ዎዳላ ጋሞታ ማላ ጻጌቴስ፤ ባንታስ ሚዛ ሚሽ ሻንካቲ ኦይኪዲ ጻጌቴስ፤ ኢስቲ ኦይኪዳይሳ ቶኪ ኤኪ ቤቴስ፤ ኢስታፌ ዎꬂ ኤካናይ ኦኒካ ዴና።
ISA 5:30 ሄ ጋላስ ኢስቲ ጊታ ኣባ ዳምባላ ማላ፥ ኢስራኤሌ ቦላ ጉማና፤ ኦኒካ ዱጌ ዛሪ ቢታ ጼሊኮ ꬉማኔ ሜቶ ቤኣና፤ ፖኦይካ ሻራን ካሜታና።
ISA 6:1 ካዎ ኦዚያይ ሃይቂዳ ላይꬅ ጎዳይ ꬎቃ ኣራታ ቦላ ኡቲዳይሳ ቤያዲስ፤ ኢዚ ማይኢዳ ኣፋላ ማጫራይ ጾሳ ኬꬅ ኩሚ ኡቲዴስ።
ISA 6:2 ሱራፌሌ ጌቴቲዛ ኪታንቻቲ ኢዛፔ ቦላራ ዴቴስ፤ ኢሲ ኢሲ ሱራፌሌስ ኡሱፑን ቄፌቲ ዴቴስ፤ ናምኡ ቄፌታን ባ ኣይፌሶ ኣይፌሶ ካሜቴስ፤ ናምኡ ቄፌታን ባ ቶሆ ቶሆ ካሜቴስ፤ ናምኡ ቄፌታን ፒራꬌቴስ።
ISA 6:3 ኢሶይ ኢሳራ፥ «ጌሻዉ፥ ጌሻዉ፥ ጌሻዉ ኡባፌ ዎልቃማ ጎዳ ጾሳዉ! ሳኣ ኡባይ ኢዛ ቦንቾን ኩሚዴስ» ጊዳ።
ISA 6:4 ኢስታ ቃላ ጬንጉርሳፌ ዴንዲዳይሳን ጾሳ ኬꬃስ ዮቻይ ቃጺዴስ፤ ቃሴካ ጾሳ ኬꬃ ጩዋይ ꬊፒ ጊ ኩሚዴስ።
ISA 6:5 ሂስቲን ታኒ፥ «ታኒ ዶናይ ቱኒዳ ኣሳ፤ ቃሴ ዶናይ ቱኒዳ ኣሳታ ጊዶን ዴኣይስ፤ ታኒ ካዎዛ፥ ኡባፌ ዎልቃማ ጎዳ ጾሳ ታ ኣይፌን ቤኢዳ ጊሻስ ታስ ኣዬ ኣና! ታ ꬋያዲስ» ጋዲስ።
ISA 6:6 ሂስቲን ሱራፌሌታፔ ኢሶይ ያርሺዛሶዛፔ ቃጴን ታማ ቦንቆ ኤኪዲ ፒራꬊሼ ታኮ ዪዴስ።
ISA 6:7 ታማ ቦንቆዛን ታ ዶና ቦቺዲ፥ «ቤኣ፤ ሃይሲ ታማ ቦንቆዚ ኔ ዶና ቦቺዴስ፤ ኔ ሞሮይ ኔፔ ኪቺዴስ፤ ኔ ናጋራይካ ቁጬቲ ኪቺዴስ» ጊዴስ።
ISA 6:8 ሄሳፌ ጉዬ ጎዳይ፥ «ኦና ኪቶ? ኑስ ኦኔ ኪቴታናይ?» ጊሺን ሲያዲስ። ታኒካ ዛራዳ፥ «ሄኮ፥ ታና ኪታ» ጋዲስ።
ISA 6:9 ሂስቲን ጎዳይ፤ «ባ፤ ባዳ ሃ ኣሳስ፥ ‹ኢንቴ ሲሲ ሲዬታ፤ ጊዶ ኣቲን ዩሺ ቆፔኬታ፤ ኣይፌን ጼሌታ ሺን ኣኬኬኬታ› ጋዳ ኢስታስ ዮታ።
ISA 6:10 ሃይሳ ዴራ ዎዚና ዳሚሳ፤ ኢስታ ሃይꬃካ ቱሊሳ፤ ኢስታ ኣይፌዛካ ቆቂሳ፤ ሂስቶንታ ኣጊኮ ኢስቲ ባንታ ኣይፌን ቤኣና፤ ባንታ ሃይꬃን ሲያና፤ ባንታ ዎዚናንካ ኣኬካና፤ ሂስቲዲ ኢስቲ ታኮ ሲሚዲ ፓጻና» ጊዴስ።
ISA 6:11 ታኒካ፥ «ኣቤት ጎዳዉ! ሃይሲ ኣይዴ ጋካናስ ሃናኔ?» ጋዲስ። ኢዚካ ዛሪዲ ታስ፥ «ካታማቲ ኢስታን ዴኢዛ ኣሲ ꬋዪን ኢስቲ ላሌታና ጋካናስ፥ ኬꬃቲካ ኡባይ ካይዛና ጋካናሲኔ ቢታይካ ሙሌራ ኣይኮይ ባይንዳ ቡላ ጊዳና ጋካናሳ።
ISA 6:12 ታኒ ጎዳይ ኣሳ ሃሳና ጋካናሳ፤ ቢታካ ኣይኮይ ባይንዳ ባዞ ኬሳና ጋካናሳ።
ISA 6:13 ታሙ ኣሳፔ ኢሲ ኣሲ ቢታ ቦላ ኣቲኮ፥ ኢዚካ ꬋያና፤ ቃንጺ ዬጊን ኣቲዳ ዎላ ዱሩማ ማላ ጊዳና፤ ጌሻ ዛሬይ ሄሳꬆ ሄ ዱሩማ ማላ ጊዳና» ጊዴስ።
ISA 7:1 ኦዚያ ና ኢዮኣታሜይ ዬሊዳ ኣካዜይ ዩሁዳ ቢታን ካዎቲዳ ዎዴ ኣራሜ ቢታ ካዎ ኤራሶኒኔ ኢስራኤሌ ቢታ ካዎ ኤሮሜሊዮ ና ፋቁሄይ ዬሩሳላሜ ኦላናስ ኬዚዳ፤ ጊዶ ኣቲን ጾናናስ ዳንዳይቤቴና።
ISA 7:2 ኣራሜ ዴሬይኔ ኤፍሬሜ ዴሬይ ኢሲ ቦላ ጊዲዲ ኦላስ ኬኢዳይሳ ዳዊቴ ዛሬፔ ካዎቲዳ ካዎይ ሲዪዳ ዎዴ ዎራ ሚꬅ ጫርኮይ ቃꬂዛ ማላ ኣካዜ ዎዚናይኔ ዴራ ዎዚናይ ቃጺዴስ።
ISA 7:3 ሂስቲን ጎዳይ ኢሳያሳስ፥ «ኔኒ ኔ ና ሻኣሪ-ያሹቤ ኤካዳ ኣካዜራ ጋይታናስ ባዳ ማይኦ ሜጪዛይታ ጎሻኮ ኤፊዛ ኦጌ ማታን ጋና ባጋራ ዴኢዛ ኤሌ ሃꬃ ዛራ ጼራን ኔኒ ኢዛ ዴማና።
ISA 7:4 ሂስታዳ ኢዛስ፥ ‹ናጌታ፤ ዎፑ ጋ፤ ባቦፋ፤ ሃይታ ታማይ ሚሺን ኣቲዲ ጩዋቲዛ ዱሩማ ናምኣታፔ ኣራሜስ፥ ኤራሶኔሲኔ፥ ኤሮሜሊዮ ና ሃንቆስ ሻባሬቶፋ› ጋ ዮታ።
ISA 7:5 ኣራሜ ቢታ ኣሳይ ኤፍሬሜ ኣሳራኔ ኤሮሜሊዮ ናራ ኔ ቦላ ኢታ ሚሽ ኦꬃናስ፥
ISA 7:6 ‹ኣኔ ዩሁዳ ቢታን ዎራጆስ፤ ኣኔ ላሎስ፤ ኣኔ ኑስ ኑስ ሻኬቲ ኤኪዲ ጻቢኤሌ ና ካዎꬆስ› ጊ ማቄቲዳ» ጊዴስ።
ISA 7:7 ጊዶ ኣቲን ኡባ ሃሪዛ ጎዳይ፥ «ሃይሲ ሃ ኢስታ ማቆዚ ሚኔና፤ ሙሌካ ፖሌቴና።
ISA 7:8 ጋሶይካ ዳማስቆይ ኣራሜ ቢታስ ሁኤ፤ ካዎ ኤራሶኔይ ዳማስቆስ ሁኤ። ኡሱፑን ታማን ኢቻሽ ላይꬃ ጋርሳን ኤፍሬሜ ዴሬይ ላሌታና፤ ሲሚዲ ዴሬ ጊዳና ዳንዳዬና።
ISA 7:9 ቃሴ ሳማሪያይ ኤፍሬሜ ቢታስ ሁኤ፤ ኤሮሜሊዮ ናይ ሳማሪያስ ሁኤ፤ ኢንቴ ኢንቴ ኣማኖን ሚኒዲ ኤቆንታ ኢጺኮ ሙሌካ ኤቃናስ ዳንዳዬኬታ» ጌስ።
ISA 7:10 ቃሴካ ጎዳይ ኣካዜስ፥
ISA 7:11 «ጎዳይ ኔ ጾሳ ኔስ ቦላ ሳሎፔ፥ ዎይኮ ሳኣፔ፥ ጋርስ ጪማፌ ኢሲ ማላታ ኢማና ማላ ኦይቻ» ጊዴስ።
ISA 7:12 ኣካዜይ ጊዲኮ፥ «ኦይቺኬ፤ ጎዳካ ፓጪኬ» ጊዴስ።
ISA 7:13 ኢሳያሲ፥ «ኢንቴኖ ዳዊቴ ዛሬቶ፥ ሲዪቴ! ኢንቴ ኣሳ ሳሌꬂዛይሲ ጉጺን ጾስ ሳሌꬃናስ ዴንዲዴቲ?
ISA 7:14 ሂስቲኮ ጎዳይ ባርካ ኢንቴስ ማላታ ቤሳና፤ ጌላኦይ ሻራና፤ ኣቱማ ና ዬላና፤ ኢዛ ሱንꬃካ፥ ‹ኣማኑኤሌ› ጋዳ ሱንꬃና።
ISA 7:15 ኢዚ ኢታኔ ሎኦ ሻኪ ኤሪዛ ዎዴ ሃንጋራ ማꬂኔ ኤስ ማና።
ISA 7:16 ጊዶ ኣቲን ናዚ ኢታኔ ሎኦ ሻኪ ኤራናፔ ሲንꬃን ኔኒ ኬሂ ያዪዳ ናምኡ ካዎታ ቢታቲ ኣይኮይ ባይንዳ ቡላ ጊዳና።
ISA 7:17 «ኤፍሬሜ ቢታይ ዩሁዳ ቢታፌ ሻኬቶሶፌ ዶሚን ሃይሳፌ ሲንꬃን ሃኒ ኤሮንታ ዎዴ ጎዳይ ኔ ቦላ፥ ኔ ዴራ ቦላኔ ኔ ኣዋ ኬꬃ ቦላ ኤሃና፤ ኢዚ ኔ ቦላ ኤሃናይሲካ ኣሶሬ ካዎ» ጊዴስ።
ISA 7:18 ሄ ዎዴ ጎዳይ ሃኮ ቢታን ዲዛ ጊብጼ ሻፋፔ ኡዱንጼታ፥ ኣሶሬ ቢታፌ ማꬃታ ዋይቄꬃን ጼይጋና።
ISA 7:19 ኢስቲ ኡባይካ ዪዲ ባዞ ሾባን፥ ሹቻ ጎንጎሎን፥ ኣጉንꬃ ቱሻኒኔ ሃꬃ ኦላታን ጋዉኣና።
ISA 7:20 ሄ ዎዴ ጎዳይ ኤፊራጺሴ ሻፋ ፒንꬃፌ ጋርጺ ኤሂዳ ማጋላን፥ ሄሲካ ኣሶሬ ካዎይ ዪዲ ኢንቴስ ሁኤ ቢናና፥ ኢንቴ ቡቺኔ ኢንቴ ቦላ ዲዛ ኢስኬ ኡባ ሜዳና።
ISA 7:21 ሄ ዎዴ ኢሲ ኣሳስ ኢሲ ኡሳ ሚዚኔ ናምኡ ዴይሻቲ ጻላ ኣታና።
ISA 7:22 ጊዲኮካ ኢስቲ ማጺዛ ማꬂ ኬሂ ዳሮ ጊዲዳ ጊሻስ ኢዚ ኦይስ ማና፤ ሄ ቢታን ኣቲዳ ኣሳይ ኡባይካ ሃንጋራኔ ኤስ ማና።
ISA 7:23 ሄ ዎዴ ኢሲ ሺ ቢራን ዋሼቲዛ ኢሲ ሺ ዎይኔ ቱራቲ ቶኬቲዳሶሆቲ ኡባይ ኣጉንꬂኔ ኪንዲቾ ጻላ ጊዳና።
ISA 7:24 ቢታ ኡባን ኪንዲቾይኔ ኣጉንꬂ ኩሚዳ ጊሻስ ኣሳይ ሄ ቢዛ ዎዴ ዎንዳፌኔ ዪሽ ኦይኪ ባና።
ISA 7:25 ካሴ ጾይሌን ጎዬቲዲ ካꬅ ኢሚዛ ዙምቡላቲ ኪንዲቾኒኔ ኣጉንꬃን ኩሚዳ ጊሻስ ያዪዲ ኢሲ ኣሲካ ሄ ቤና፤ ሜሄይኔ ዶርሲ ላኤቲዛሶ ጊዳና።
ISA 8:1 ጎዳይ ታና፥ «ጊታ ጻꬃ ዋራቃታ ኤካዳ፥ ‹ማሄር-ሻላል ሃሽ-ባዝ› ጋዳ ናባቤቲዛ ፒዳሌን ጻፋ።
ISA 8:2 ቄሴ ኦሪያኔ ባራኪዮ ና ዛካራሳ ታስ ኣማኔቲዳ ማርካታ ጊዳና ማላ ታ ኢስታ ጼይጋና» ጊዴስ።
ISA 8:3 ሄሳፌ ጉዬ ባ ማቾ ናቤይራ ኣቂዴስ፤ ኢዛካ ሻራዳ ኣቱማ ና ዬላዱስ፤ ሂስቲን ጎዳይ ታና፥ «ኢዛ ሱንꬃ፥ ‹ማሄር-ሻላል ሃሽ-ባዝ› ጋዳ ሱንꬃ።
ISA 8:4 ናዚ፥ ‹ኣቦ! ኣዬ!› ጊ ጼይስ ኤራናፔ ካሴ ኣሶሬ ቢታ ካዎይ ሳማሪያኔ ዳማስቆ ኣቆታ ዲኢ ኤፋና» ጊዴስ።
ISA 8:5 ቃሴካ ጎዳይ ታስ፥
ISA 8:6 «ሃ ዴሬይ ጮኡ ጊ ጎጊዛ ሴሊሆሜ ሃꬃታ ኣጊዲ ኤራሶኔኒኔ ኤሮሜሊዮ ናዛን ኡፋዬቲዴስ።
ISA 8:7 ሄሳ ጊሻስ ታኒ ጎዳይ ሚኖኔ ዎልቃማ ጊዲዳ ኤፊራጺሴ ሃꬃ ሃሮ፥ ኣሶሬ ካዎ ኢዛ ቴማራኔ ቦንቾዛራ ኢስታ ቦላ ኤሃና፤ ሃꬃዚ ሻፋዛ ኩሚ ፖሊችዲ ሻፋ ዶናን ዲዛ ቢታ ኡባ ሚታና።
ISA 8:8 ቡሪ ኤኪዲ ዱጌ ዩሁዳ ዎꬋና፤ ቢታ ኩሚዲ ኣꬋና፤ ቆꬌ ጋካናስ ሚታና» ጊዴስ። ጊዶ ኣቲን ኣማኑኤሌ! ሚጬቲዳ ኢዛ ቄፌይ ኔ ቢታ ጋጻፔ ጋጻ ጋካናስ ካሚ ኦይኪዴስ።
ISA 8:9 ኢንቴኖ ካዎቴꬃቶ! ኦላስ ዴንዲዲ ዋሲቴ፤ ኢንቴ ዲፒ ጋና፤ ሃሆ ዴሬን ዲዛይቲ ኤዝጊቴ! ኦላስካ ጊጌቲቴ! ኢንቴ ዲፒ ጋና፤ ኦላስካ ጊጌቲቴ! ኢንቴ ሜቄሬታና፤
ISA 8:10 ኦላስ ዞሬቲቴ፤ ጊዶ ኣቲን ኢንቴስ ሱሬና፤ ሃልቾ ኬሲቴ፤ ጊዶ ኣቲን ኢንቴስ ሚኔና። ጋሶይካ ጾሳይ ኑናራ ዴስ።
ISA 8:11 ጎዳይ ባ ሚኖ ኩሼ ታ ቦላ ዎꬂዲ ታኒ ሃ ኣሳ ኦጌ ካሎንታ ማላ ሴሪዴስ፤
ISA 8:12 «ሃይሲ ኣሳይ፥ ‹ኢታ ማቆ› ጊ ጼይጊዛ ሚሽ ኢንቴ ኣይኮካ፥ ‹ኢታ ማቆ› ጎፒቴ፤ ኢስቲ ባቢዛይሳስ ኢንቴ ባቦፍቴ፤ ኢዛስ ያርኪያርኮፍቴ።
ISA 8:13 ኢንቴ ዱማሳና ቤሲዛይ ኡባፌ ዎልቃማ ጎዳ ጻላ፤ ኢንቴ ያያናሲኔ ኮኮራናስ ቤሲዛይ ኢዛ።
ISA 8:14 ኢዚ ጌሻሶሆ ጊዳና፤ ጊዶ ኣቲን ኢዚ ዩሁዳ ቢታ ኣሳሲኔ ኢስራኤሌ ኬꬃ ኣሳስ ꬉጲዛ ሹቺኔ ኩንዲሲዛ ዛላ ጊዳና፤ ዬሩሳላሜን ዲዛ ኣሳስ ኢዚ ጊቴኔ ዎጺማዴ ጊዳና።
ISA 8:15 ኢስታፌ ዳሮቲ ꬉጴታና፤ ኩንዲዲካ ሜቃና፤ ዎጺማዴን ጌሊ ኦይኬታና» ጊዴስ።
ISA 8:16 ማርካቴꬃ ሎኤꬃ ኦይካ፤ ታ ታማሬታ ጊዶን ዎጋ ማታሜን ሾጫ።
ISA 8:17 ታኒ ባ ሲንꬅ ያቆቤ ዛሬታፔ ጌንꬂዳ ጎዳ ናጋና፤ ኢዛካ ሂዶታ ኦꬃና።
ISA 8:18 ታናኔ ታስ ጎዳይ ኢሚዳ ናይታ ቤኢቴ። ኑኒ ጺዮኔ ዙማን ዲዛ ኡባፌ ዎልቃማ ጎዳፔ ኢስራኤሌስ ማላታኔ ማርካ።
ISA 8:19 ኣሳይ ኢንቴና፥ «ቤሶንታዝ ታታፌቲሼኔ ሳሱኬቲሼ ሃሳዬቲዛ ቢቲዛይታኔ ሞይቲሌ ጼይጊዛይታ ኦይቺቴ» ጊኮ ዴሬይ ባ ጎዳ ኦይቻናስ ቤሴኔ? ዴኦ ጾሳ ኣጊዲ ሃይቂዳይታ ኦይሾ ኣይስ ኮሺዜ?
ISA 8:20 ዎጋኮኔ ማርካቴꬃ ቃላኮ ቢቴ! ኢስቲ ሃይሳ ማላ ቃላ ኢንቴስ ዮቶንታ ኣጊኮ ዎንታ ፖኦይ ኢስታስ ፖኤና።
ISA 8:21 ኢስቲ ጬጪሼኔ ጋፊሼ ቢታ ቦላ ቶይላታና፤ ኢስቲ ኬሂ ጋፊዳ ዎዴ ሃንቄታና፤ ፑዴ ጼሊዲ ባንታ ካዋኔ ባንታ ጾሳ ቃንጋና።
ISA 8:22 ሄሳፌ ጉዬ ኢስቲ ዱጌ ቢታ ጼላና፤ ኢስቲ ጼላናይሲካ ዋዬ፥ ꬉማኔ ꬊፒ ጊዳ ባቢሲዛ ሚሽ ጻላ፤ ኢስቲ ጊርዲ ጊዳ ꬉማን ዬጌታና።
ISA 9:1 ጬጪሼ ዲዛይታስ ሃይሳፌ ጉዬን ሂዶታይ ꬋዬና፤ ቤኒ ዎዴ ዛቢሎኔ ቢታኔ ኒፍታሌሜ ቢታ ካዉሺዴስ፤ ሲንꬃፌ ያና ዎዴን ጊዲኮ ሜዲቴራኔ ኣባ ኦጌን ዴኢዛ ቢታኔ ዮርዳኖሴ ሻፋፔ ሄ ፒንꬃን ዴኢዛ፥ «ኣይዛቤቲ ዴኢዛ ጋሊላ ቢታ» ኢዚ ቦንቻና።
ISA 9:2 ꬉማን ዴኢዛ ዴሬይ ዎልቃማ ፖኦ ቤኢዴስ፤ ሃይቆ ኩዋ ጋርሳን ዲዛ ዴሬታስ ፖኦይ ፖኢዴስ።
ISA 9:3 ኔኒ ካዎቴꬃ ዳርሳዳሳ፤ ኢስታስ ኡፋይሳ ቦላ ኡፋይስ ጉጃዳሳ፤ ኣሳይ ካꬅ ሺሺሼኔ ዲኢ ኤኪዳ ሚሽ ጊሼቲሼ ኡፋዬቲዛ ማላ ኢስቲካ ኔ ሲንꬃን ኡፋዬታና።
ISA 9:4 ካሴ ኔኒ ሚዲያሜ ቢታ ጾኒዳ ማላ ኢስታ ዴጺዛ ቃምባራ፥ ኢስታ ሃሼ ቦላ ዎꬊዳ ዱርቃኔ ኢስታ ዋዪሲ ሃሪዳ ጉፌ ሜንꬃዳሳ።
ISA 9:5 ኦላንቻታ ጫማይ ኡባይ፥ ሱꬃን ሞሬቲዳ ማይኦ ኡባይካ ታማን ዱኔ ጊዲ ኤጻና።
ISA 9:6 ሄኮ ኑስ ናይ ዬሌቲዴስ! ኣቱማ ናይካ ኑስ ኢሜቲዴስ! ሃላቃቴꬂ ኢዛ ሃሼ ቦላ ጊዳና፤ ኢዛ ሱንꬂ፥ «ማላሊሲዛ ዞራንቻ፥ ዎልቃማ ጾሳ፥ ሜርና ኣዋ፥ ሳሮቴꬃ ሃላቃ» ጌቴታና።
ISA 9:7 ኢዛ ካዎቴꬃ ኣኮቴꬃሲኔ ኢዛ ሳሮቴꬃስ ዛዋይ ዴና፤ ሃቺፌ ዶሚዲ ሜርና ጋካናስ ባ ካዎቴꬃ፥ ሱሬ ፒርዳኒኔ ጺሎቴꬃን ኤሳና፤ ሎኤꬂ ኦይኪዲ ሚንꬃና፤ ዳዊቴ ካዎቴꬃ ኣራታን ኢዚ ኡታና፤ ዴራ ኡባ ሃራና፤ ኡባፌ ዎልቃማ ጎዳ ቃናቴይ ሄሳ ፖላና።
ISA 9:8 ጎዳይ ያቆቤ ዛሬታ ቦላ ፒርዳ ቃላ ኪቲዴስ፤ ኢዚካ ኢስራኤሌ ቦላ ፖሌታና።
ISA 9:9 ኤፍሬሜኒኔ ሳማሪያን ዴኢዛ ዴሬ ኡባይ ሄሳ ጾሲ ኦꬂዳይሳ ኤራና፤ ኦቶሮኒኔ ሞꬌቴꬃን ዴንዲዲ፥
ISA 9:10 «ጹቤፔ ኦሴቲዳ ጊምቤቲ ላሌቲዳ፤ ኑኒ ጊዲኮ ማሴቲዳ ሹቻን ዛሪ ጊምባና፤ ኤꬃቲ ቃንጼቲዳ፤ ኑኒ ጊዲኮ ኢስታሶሆን ዚጋ ላማና» ጊዳ።
ISA 9:11 ሄሳ ጊሻስ ጎዳይ ኤራሶኔ ሞርኬታ ሚንꬃና፤ ኢስታ ሞርኬታ ኢስታ ቦላ ዴንꬄꬂዲ ኤሃና።
ISA 9:12 ኣርሼይ ሞኪዛ ባጋፌ ኣራሜ ቢታ ኣሳቲኔ ኣርሼይ ዉሊዛ ባጋፌ ፊሊስጼሜ ቢታ ኣሳቲ ባንታ ዶና ሃንጊዲ ኢስራኤሌ ሚታና። ሄሲ ኡባይ ሃኒንካ ጎዳ ሃንቆይ ኢርጺቤና፤ ኢዛ ኩሼይካ ዴንዲዳሶፔ ሲሚቤና።
ISA 9:13 ዴሬዚ ጊዲኮ ባና ሾጪዳ ጎዳኮ ሲሚቤና፤ ኡባፌ ዎልቃማ ጎዳካ ኮዪቤና።
ISA 9:14 ሄሳ ጊሻስ ጎዳይ ሁኤኔ ጎይና፥ ዛምባ ሃጋኔ ማቃ ኢስራኤሌፔ ኢሲ ጋላስ ቄጻና።
ISA 9:15 ጪማቲኔ ቦንቼቲዳይቲ ሁኤ፤ ዎርዶ ታማርሲዛ ናቤቲ ጎይና።
ISA 9:16 ሃይሳ ዴራ ካሌꬂዛይቲ ባሌꬄቴስ፤ ካሊዛ ዴሬይካ ኦጌፔ ካሬ ኬዚዲ ቶይላቴስ።
ISA 9:17 ሄሳ ጊሻስ ጎዳይ ናቴꬃ ናይታን ኡፋዬቴና፤ ዪኦታሲኔ ኣምኤታስ ቃꬌቴና፤ ኡባይካ ኢታ ኦꬂዛይታኔ ጾሳ ያሻቴꬅ ባይንዳይታ፤ ኡባ ኣሳ ዶናፔ ሃራሲዛ ቃላይ ኬዜስ፤ ሄሲ ኡባይ ሃኒንካ ጎዳ ሃንቆይ ኢርጺቤና፤ ኢዛ ኩሼይካ ዴንዲዳሶፔ ሲሚቤና።
ISA 9:18 ዴራ ኢታቴꬂ ኪንዲቾኔ ኣጉንꬅ ጹጊዛ ታማ ማላ፤ ꬊፒ ጊዳ ዎራይ ጹጌቲሺን ኬዚዛ ጩዋ ቱሳ ማላ ሲቲ ጊዲ ፑዴ ኬዜስ።
ISA 9:19 ኡባፌ ዎልቃማ ጎዳ ሃንቆን ቢታይ ጹጌታና፤ ዴሬይካ ታማን ጌሊዛ ሚꬃ ማላ ጊዳና፤ ኢሻይ ኢሻስ ቃꬌቴና።
ISA 9:20 ኡሻቻ ባጋራ ቱጻና፤ ጊዶ ኣቲን ጋፋ ቴቄና። ሃዲርሳ ባጋራ ማና፤ ጊዶ ኣቲን ካሌቴና። ኢሶይ ኢሶይ ባ ዬሊዳ ናይታ ማና።
ISA 9:21 ሚናሴይ ኤፍሬሜ ማና፤ ኤፍሬሜይካ ሚናሴ ማና፤ ኢስቲ ኢሲፌ ጊዲዲ ዩሁዳ ቦላ ዴንዳና። ሄሲ ኡባይ ሃኒንካ ጎዳ ሃንቆይ ኢርጺቤና፤ ኢዛ ኩሼይካ ዴንዲዳሶፔ ሲሚቤና።
ISA 10:1 ጌላ ዎጋኔ ኣስ ኡንኤꬂዛ ኣዋጃ ኬሲዛይታስ ኣዬ ኣና!
ISA 10:2 ማንቆታ ፒርዳ ጌላሲዛይታስ፥ ኡንኤቲዳ ታ ዴሬዛ ፒርዳ ቦካሲዛይታስ፥ ኣምኤታ ኣቆታ ቦንቂዛይታስ፥ ዪኦታ ኣቆታ ꬌቺ ሚዛይታስ ኣዬ ኣና!
ISA 10:3 ኢንቴና ጾሞሲዛ ዎዴ ኢንቴ ኣዋ ጌላንዴቲ? ሃኮፔ ባሺ ዪዛ ዎዴ ኣይ ሃናንዴቲ? ማዶ ዴማናስ ኦናኮ ባቃታንዴቲ? ኢንቴ ኣቆታ ኣዋን ቆታንዴቲ?
ISA 10:4 ቃሼቲዳ ኣሳራ ኢሲፌ ቃሼቴꬃፌ ሹኬቲዛ ኣሳራ ኢሲፌ ሹኬቴꬃፌ ኣቲን ሃራይ ኢንቴስ ኣታናሶይ ዴና። ሄሲ ኡባይ ሃኒንካ ጎዳ ሃንቆይ ዶቺቤና፤ ቃጻያናስ ኢዚ ባ ኩሼ ዴንꬂ ዎꬂዴስ።
ISA 10:5 ጎዳይ፥ «ታ ሃንቆስ ጉፌ፥ ታ ኤሂዛ ባሻስ ጻምኣ ጊዲዳ ኣሶሬ ቢታ ኣሳስ ኣዬ ኣና!
ISA 10:6 ኢስታ ኣቆታ ቦንቃና ማላ፥ ባንታስ ዲኦ ቡሪ ሺሻና ማላ፥ ኢስቲ ኦጌ ኡርቃꬆ ዬꬌታና ማላ፥ ጾስ ኤሮንታ ካዎቴꬃ ቦላ ኪታና። ታና ሃንቄꬂዳ ኣሳ ቦላ ታኒ ኣሶሬታ ዬዳና።
ISA 10:7 ጊዶ ኣቲን ኣሶሬ ካዎይ ሃይሳ ሃልቺቤና፤ ኢዛ ዎዚናን ሃይሳ ማላ ቆፋይ ዴና፤ ኢዛ ሃልቾይ ዳሮ ካዎቴꬃታ ባሻናሲኔ ሙሌራ ꬋይሳናሳ።
ISA 10:8 ኢዚ፥ ‹ታ ኦላ ጋዳዋቲ ኡባቲ ካዎ ጊዴቴኔ?› ጊ ጬቄቴስ።
ISA 10:9 ‹ካልኖይ ካርካሚሼ ማላ፥ ሃማቴይ ኣርፋዴ ማላ፥ ሳማሪያይካ ዳማስቆ ማላ ጊዴቴኔ?
ISA 10:10 ዬሩሳላሜኒኔ ሳማሪያን ዴኢዛ ኤቃ ሚስሌታፔ ዳሪዛ ሚስሌታ ጎይኒዛ ካዎቴꬃታ ሴራናስ ታኒ ታ ኩሼ ዬዳዲስ።
ISA 10:11 ሳማሪያ ቦላኒኔ ኢዚ ሚስሌታ ቦላ ታ ኦꬆይሳꬆ ዬሩሳላሜ ቦላኔ ኢዚ ሚስሌታ ቦላ ታ ኦꬂኪና?› ጌስ» ጊዴስ።
ISA 10:12 ጎዳይ ጺዮኔ ዙማ ቦላኔ ዬሩሳላሜ ቦላ ባ ኦꬃና ኦሶ ኡባ ፖሊዳፔ ጉዬ፥ «ኣሶሬ ካዎ ኢዛ ዎዚና ኦቶሬቴꬃ ጊሻሲኔ ኢዚ ካꬌ ኣይፌን ጼሊዛ ጊሻስ ታ ኢዛ ቃጻያና» ጌስ።
ISA 10:13 ኣሶሬ ካዎይ፥ «ሃይሳ ኡባ ታኒ ታ ሚኖ ቄሴን ኦꬃዲስ፤ ቃሴካ ታኒ ኣꬎ ኤራንቻኔ ኣኬካንቻ፤ ታኒ ካዎቴꬃታ ዛዋ ላላዲስ፤ ታኒ ኢስታ ኣቆታ ቦንቃ ኤካዲስ፤ ታ ቃራቴꬃን ኢስታ ካዎታ ካዉሻዲስ።
ISA 10:14 ኣሲ ባ ኩሼ ካፎ ኬꬃን ዬዲዛ ማላ ታኒካ ታ ኩሼ ካዎቴꬃታ ኣቆታን ዬዳዲስ። ቃሴ ኣሲ ዶጌቲ ኣቲዳ ጱጱሌታ ሺሺዛ ማላ ታኒካ ዴሬ ኡባ ሺሻዲስ። ፓላናስ ባ ቄፌ ሚጪዳይ ዴና፤ ዋሳናስ ባ ዶና ዶይዳይ ዴና» ጊዴስ።
ISA 10:15 ካልታይ ባናን ቃንጺዛዴ ቦላ ጬቄቲዜ? ማጋዜይ ባና ጎቺዛዴ ቦላ ኦቶሬቲዜ? ጻምኣይ ባና ኦይኪዳ ኣሳ ቦላ ባ ሁኤ ቃꬃና ዳንዳይዜ? ጉፌይ ኣሲ ባይንዳ ባርካ ሄሜቲ ኤሪዜ?
ISA 10:16 ሄሳ ጊሻስ ጎዳይ፥ ኡባፌ ዎልቃማ ጎዳይ፥ ሞꬊዳ ኢዛ ኦላንቻታ ቦላ ጊልቂሲዛ ሃርጌ ዬዳና፤ ኢዛ ቦንቾዛፔ ጋርሳራ ላጪዛ ታማ ዬዳና።
ISA 10:17 ኢስራኤሌ ፖኦይ ታማ ጊዳና፤ ጌሻዚካ ታማ ላጮ ጊዳና፤ ኢሲ ጋላሳን ኢዛ ኣጉንꬃኔ ኪንዲቾዛ ታማይ ማና።
ISA 10:18 ሃርጋንቻይ ጊልቂዲ ሃይቂዛ ማላ ባ ዎራ ቦንቾኔ ኣራዳ ቢታ፥ ኣሾኔ ሼምፖ ሙሌራ ꬋይሳና።
ISA 10:19 ኢዛ ዎራን ጉꬃ ሚꬃቲ ጫሻ ኣታና፤ ሄይታካ ቄሪ ናይ ቆዲ ዉርሳና ዳዳዬስ።
ISA 10:20 ሄ ዎዴ ኢስራኤሌ ዛሬፔ ጫሻ ኣቲዳይቲ፥ ያቆቤ ኬꬃፌ ኣቲዳይቲ ሃይሳፌ ጉዬ ባንታና ሾጪዳይታ ቦላ ዜምፔቴና፤ ጊዶ ኣቲን ጎዳን ኢስራኤሌ ጌሻን ቱማፔ ኣማኔታና።
ISA 10:21 ጫሻ ኣቲዳይቲ ሲማና፤ ያቆቤ ኬꬃፌ ጫሻ ኣቲዳይቲ ኡባፌ ዎልቃማ ጾሳኮ ሲማና።
ISA 10:22 ኔኖ ኢስራኤሌ! ኔ ኣሳይ ኣባ ሻሚንታ ማላ ጊዲኮካ ጫሻ ኣቲዳይቲ ጻላ ሲማና። ጺሎቴꬃን ኩሚዳ ጊታ ባሺ ኣዋጄቲዴስ።
ISA 10:23 ጎዳይ፥ ኡባፌ ዎልቃማ ጎዳይ ሳኣ ኡባ ቦላን ኤሃና ቃቺዳ ባሽ ኤሃና።
ISA 10:24 ሄሳ ጊሻስ ጎዳይ፥ ኡባፌ ዎልቃማ ጎዳይ፥ «ጺዮኔን ዲዛ ታ ዴሬዞ! ጊብጼቲ ኔ ቦላ ኦꬂዳይሳꬆ ጉፌ ኔ ቦላ ዴንꬂዳይታ ዱርቃን ኔና ቆጺዳ ኣሶሬ ኣሳስ ባቦፋ።
ISA 10:25 ታ ኔ ቦላ ኤሂዳ ቂጻቴዛ ጉꬃ ዎዴ ጋርሳን ታ ኤሳና፤ ታ ኢስታ ቦላካ ቦሻ ኤሃና» ጌስ።
ISA 10:26 ኡባፌ ዎልቃማ ጎዳይ፥ «ሚዲያሜ ኣሳ ሄሬቤ ዛላ ኣቻን ሾጮይሳꬆ ኢዚ ኢስታ ጹርቃፌራ ዋꬋና፤ ኢዚ ጊብጼታ ቦላ ኦꬂዳይሳꬆ ባ ጉፌዛ ኣባ ቦላ ዴንꬃና።
ISA 10:27 ሄ ጋላስ ኢስታ ቶሆይ ኔ ሃሼፔ፥ ኢስታ ቃምባራይ ኔ ሞርጌፌ ኪቻና፤ ኔ ኦርዴቴꬃፌ ዴንዲዳይሳን ኢዛ ቃምባራይ ሜቃና» ጌስ።
ISA 10:28 ኢስቲ ኣያቴራ ቢዲ ሚጌሮኔ ካንꬂ ቤቴስ፤ ባስ ዲዛ ሚሻ ማኪማሴን ሺሼቴስ።
ISA 10:29 ኢስቲ ፒኒዛሶራ ኣꬊ ቢዲ፥ ኑኒ ጌባን ዱንካኒ ኣቃና፤ ኤራማይ ዳጋማዱስ፤ ሳኦሌ ካታማ ጊቢኣይ ባቃታዱስ።
ISA 10:30 ጋሊሜ ናዬ ኔ ዋሳ! ላይሻ ኤዝጋ ሲያ! ማንቆ ጊዲዳ ኣናቶቴ፥ ኔ ኢዚስ ዛሮ ኢማ።
ISA 10:31 ማዲሜናሃ ባቃታ ቦላ ዳዉስ፤ ጌባ ዴሬይ ቆቴታና ዎꬃን ዴስ።
ISA 10:32 ኢስቲ ሃች ኖቤ ጋካና፤ ኢስቲ ባንታ ኩሼ ዬሩሳላሜ ዙምቡላ ቦላ፥ ጺዮኔ ማጫ ናይ ዙማ ቦላ ጬቄቴꬃን ማንዳና።
ISA 10:33 ቤኢቴ ጎዳይ፥ ኡባፌ ዎልቃማ ጎዳይ ባ ጊታ ዎልቃን ሃጋታ ቃንጼሬꬃና፤ ኣዱሳ ሚꬃቲካ ሺሬቲ ዎꬋና፤ ꬎቁ ꬎቁ ጊዳይቲካ ኩንዳና።
ISA 10:34 ጊርዲ ጊዳ ዎራካ ካልታራ ቄጻና፤ ሊባኖሴ ዚጋቲካ ዎልቃማዛ ሲንꬃን ኩንዳና።
ISA 11:1 ኢሴዬ ዱሩማፔ ኣጫይ ፑርጫና፤ ኢዛ ጻጶታፔ ኢሲ ሃጋይ ኣይፌ ኢማና።
ISA 11:2 ጎዳ ኣያናይ፥ ኣꬎ ኤራቴꬂኔ ኣኬካ ኣያናይ፥ ዞሬ ኣያናይኔ ዎልቃ ኣያናይ፥ ኤራቴꬃ ኣያናይኔ ጎዳስ ያሺሲዛ ኣያናይ ኢዛ ቦላ ሼምፓና።
ISA 11:3 ጎዳስ ያሻን ኢዚ ኡፋዬታና፤ ባ ኣይፌን ቤኢዳ ማላኔ ባ ሃይꬃን ሲዪዳ ማላ ፒርዴና።
ISA 11:4 ጊዶ ኣቲን ሂዬሳታስ ጺሎ ፒርዳና፤ ሳኣ ቦላ ማንቆታስ ሱሬ ፒርዳና፤ ባ ኢንጻርሳ ጻምኣን ሳኣ ሾጫና፤ ባ ዶና ፔኖን ኢታታ ዎꬋና።
ISA 11:5 ጺሎቴꬂ ኢዛስ ጼሳ ዳንጮ ጊዳና፤ ኣማኔቴꬃይ ኢዛስ ዳባላ ዳንጮ ጊዳና።
ISA 11:6 ካና ሱይቴይ ዶርሳ ላቃራ ኢሲፌ ዳና፤ ማሄይካ ዴይሻ ላቃራ ኢሲፌ ኢቻና፤ ሚዛ ማሪ፥ ጋሞ ማሪኔ ሞꬎ ሜሄይ ኢሲፌ ሄሜታና፤ ጉꬃ ናይ ኢስታ ሄማና።
ISA 11:7 ሚዚኔ ዛርዶይ ኢሲፌ ሄሜታና፤ ኢስታ ማራቲካ ኢሲፌ ኢቻና፤ ጋሞይ ቦራ ማላ ሃፓ ማና።
ISA 11:8 ꬋሚዛ ናይ ኢታ ሾሻ ኦላን ካኣና፤ ꬋንꬅ ዱꬆንታ ናይ ባ ኩሼ ጎፔ ሾሻ ኦላን ዬዳና።
ISA 11:9 ጌሺ ጊዲዳ ታ ዙማ ቦላ ቆሄቴና ዎይኮ ኦኒካ ꬋዬና፤ ሃꬂ ኣባ ኩሚዛ ማላ ሳኣ ኡባይ ጎዳ ኤሮን ኩማና።
ISA 11:10 ሄ ዎዴ ኢሴዬ ዜሬꬂ ካዎቴꬃታስ ማላታ ጊዲ ኤቃና፤ ካዎቴꬃቲ ኢዛኮ ያና፤ ኢዛ ሼምፖሶይ ቦንቼታና።
ISA 11:11 ሄ ዎዴ ጎዳይ ናምኣንꬆ ባ ኩሼ ሚጪዲ ኣቲዳ ኣሳ ኣሶሬፔ፥ ፑዴሃ ጊብጼፔ፥ ዱጌሃ ጊብጼፔ፥ ቶጵያፔ፥ ኤላሜፔ፥ ሳናኦሬፔ፥ ሃማቴፔኔ ኣባ ጋጻን ዲዛ ዴሬታፔ ሺሻና።
ISA 11:12 ካዎቴꬃታስ ማላታ ኤሳና፤ ꬎቁ ኦꬂዲ ዴንꬃና፤ ኢስራኤሌፔ ጎዴቲ ቢዳይታ ዛሪ ኤሃና፤ ላሌቲዳ ዩሁዳ ኣሳ ኦይዱ ባጋ ቢታ ጋጻፔ ኢዚ ሺሻና።
ISA 11:13 ኤፍሬሜ ቃናቴቴꬂ ኤቃና፤ ዩሁዳ ሞርኬቲካ ቃንጼታና፤ ኤፍሬሜይ ዩሁዳ ቦላ ቃናቴና፤ ዩሁዳይካ ኤፍሬሜ ኢጼና።
ISA 11:14 ኢስቲ ኣርሼይ ዉሊዛ ባጋራ ፊሊስጼሜታ ዱጉንꬃ ዎꬋና፤ ናምኣይካ ኢሲፌ ጊዲዲ ኣርሼይ ሞኪዛ ዴሬዛ ቦንቃና፤ ኢስቲ ኤዶሜ ቦላኔ ሞኣቤ ቦላ ባንታ ኩሼ ዴንꬃና፤ ኣሞኔ ኣሳይ ኢስታስ ሃሬታና።
ISA 11:15 ጎዳይ ኢታ ጫርኮን ጊብጼ ኣባ ሜሊሳና፤ ኢዚ ባ ኩሼ ኤፊራጺሴ ሻፋ ቦላ ዬዳና፤ ላፑን ኬሲ ሻኬሬꬂ ዬጋና፤ ሄሳ ጊሻስ ኣሳይ ቶሆፔ ጫማ ኬሶንታ ፒናና።
ISA 11:16 ካሴ ኢስራኤሌይ ጊብጼፔ ኬዚሺን ሃኒዳይሳꬆ ኣሶሬን ኣቲዳ ኣሳይ ኬዛና ኦጌ ኢስታስ ጊጊሳና።
ISA 12:1 ሄ ዎዴ ኔኒ፥ «ኣቤት ጎዳዉ፥ ካሴ ኔ ታ ቦላ ሃንቄታዳሳ፤ ሃኢ ጊዲኮ ኔኒ ኔ ሃንቆዛፔ ሲማዳ ታና ሚንꬄꬂዳ ጊሻስ ታ ኔና ሳባይስ።
ISA 12:2 ‹ቤኢቴ፥ ጾሳይ ታ ኣቶቴꬃ፤ ታኒ ኢዛን ኣማኔቲዛ ጊሻስ ባቢኬ፤ ጎዳይ፥ ጾሳይ ታስ ሚኖቴꬂኔ ዬꬃ፤ ታ ኣቶቴꬃይ ኢዛ› ጋንዳሳ።
ISA 12:3 ፓꬂዛ ታ ፑልቶታፔ ሃꬅ ኡፋይሳን ዱቃንዴታ።
ISA 12:4 ሄ ዎዴ ኢንቴ ጎዳ ጋላቲቴ! ኢዛ ሱንꬃካ ጼይጊቴ። ኢዚ ኦꬂዳይሳ ካዎቴꬃታ ጊዶን ኤሪሲቴ። ኢዛ ሱንꬃይ ꬎቁ ꬎቁ ጊዳይሳ ኣዋጂቴ።
ISA 12:5 ጎዳይ ጊታ ኦሶ ኦꬂዳ ጊሻስ ኢዛስ ዬጺቴ። ሄሲ ኩሜꬃ ኣላሜስ ኤሬቶ።
ISA 12:6 ኢንቴ ጊዶን ዲዛ ኢስራኤሌ ጌሻይ ጊታ ጊዲዳ ጊሻስ ጺዮኔ ኣሳዉ ኢሊሊ ጊቴ፤ ኡፋይሳንካ ዬጺቴ» ጋንዴታ።
ISA 13:1 ኣሞጼ ና ኢሳያሳስ ጎዳይ ባቢሎኔ ጊሻስ ቆንጪሲን ኢዚ ቤኢዳይሲ ሃይሳፌ ካሊዛይሳ፤
ISA 13:2 ኣይኮይ ባይንዳ ሜላ ዲዛ ዙምቡላ ቦላ ማላታ ኤሲቴ፤ ኢንቴ ቃላ ꬎቁ ሂስቲ ዋሲቴ፤ ኢስታ ሹሜታ ፔንጌራ ጌላና ማላ ማላታ ቤሲቴ።
ISA 13:3 ታ ጾኖን ኡፋዬቲዛይታ ታ ጌሻታ ኣዛዛዲስ፤ ታ ሃንቆ ኢስቲ ፖላና ማላ ታ ኦላንቻታ ጼይጋዲስ።
ISA 13:4 ዳሮ ዴሬይ ዎጫሚዛ ማላ ዙማታ ቦላ ዎጫሚዛ ዎጫማ ሲዪቴ! ካዎቴꬃታ ጊዶን ሜቶቲዳ ዴሬይ ጉጉሚዛ ጉጉንꬃ ሲዪቴ! ኡባፌ ዎልቃማ ጎዳይ ኦላንቻታ ኦላስ ሳልፊሲዴስ።
ISA 13:5 ጎዳይኔ ኢዚ ባ ሃንቆ ፖሊሳናስ ጎኤቲዛ ሚሻቲ ቢታ ኡባ ꬋይሳናስ ሃሆ ቢታፌ ሳሎታ ጋጻፔ ዪዳ።
ISA 13:6 ጎዳ ጋላሲ ማቲዳ ጊሻስ ዬኪቴ! ሄ ጋላስ ኡባ ዳንዳይዛ ጾሳ ማታፔ ባሺ ያና።
ISA 13:7 ሄሳ ጊሻስ ኩሼ ኡባይ ሲላና፤ ኣሳ ኡባ ዎዚናይካ ሴራና።
ISA 13:8 ኢስቲ ሺሮታና፤ ኢስታ ዋዬይኔ ሜቶይ ጋካና፤ ሚጻይ ኦይኪዳ ማጫሳ ማላ ኢስቲ ሚጻታና፤ ኢሶይ ኢሳራ ዳጋማን ጼሌታና፤ ኢስታ ኣይፌሶይ ዳጋማን ሻላ ማይኢዴስ።
ISA 13:9 ቤኢቴ ጎዳ ጋላሳይ ሜንጼ ኢታ፤ ቢታ ሜላ ኣሻናስ ኢዚን ዲዛ ናጋራንቻታ ꬋይሳናስ ባሻራኔ ጊታ ሃንቆራ ያና።
ISA 13:10 ሳሎ ጾሊንቴቲኔ ኢስታ ቡቴቲ ፖኦ ኢሜቴና፤ ኣርሼይ ቡሮ ሞኪዳ ማላ ꬉማና፤ ኣጊናይካ ባ ፖኦ ኢሙኩ።
ISA 13:11 ጎዳይ፥ «ታኒ ኣላሜ ኢዚ ኢታቴꬃ ጊሻስ ቃጻያና፤ ኢታታካ ኢስታ ናጋራ ጊሻስ ቃጻያና። ታኒ ኦቶራንቻታ ኦቶሬቴꬅ ሻራና፤ ሜንጼ ኢታታ ኦቶሬቴꬅ ታ ካዉሻና።
ISA 13:12 ኣቲዳ ኣሳቲ ሙሩታ ዎርቃፌ ቦላራ ኣልኦ ጊዳና፤ ኦፊሬ ዎርቃፌካ ኣልኦ ጊዳና።
ISA 13:13 ሄሳ ጊሻስ ታኒ ኡባፌ ዎልቃማ ጎዳይ፥ ‹ታኒ ታ ሃንቆ ቆንጪሲዛ ዎዴ ሳሎ ቃꬃና፤ ሳኣካ ኢዚ ዴኢዛሶን ኮኮርሳና› ጌስ።
ISA 13:14 ሻንካቲዛዴፌ ባቃቲዛ ጌኔሳ ማላ፥ ሄሚዛዴይ ባይንዳ ዶርሳ ዉዴ ማላ፥ ኣሲ ኡባይ ባ ኣሳኮ ኣሳኮ ሲማና፤ ኢሶይ ኢሶይ ባ ዴሬ ባቃታና።
ISA 13:15 ዲኤቲዳ ኡባይ ጫዴታና፤ ኦይኬቲዳ ኡባይ ማሻን ሃይቃና።
ISA 13:16 ኢስታ ኣይፌይ ቤኢሺን ኢስታ ናይታ ቡሳካና፤ ኢስታ ኬꬃቲካ ቦንቄታና፤ ኢስታ ማቼታካ ሃራይ ጋይታና» ጌስ።
ISA 13:17 ቤኢቴ፥ ቢራስ ዉዱ ጎንታይታ፥ ዎርቃንካ ኡፋዬቶንታይታ ሜዶኔ ዴሬ ኣሳ ታ ኢስታ ቦላ ዴንꬃና።
ISA 13:18 ኢስታ ዎንዳፌቲ ዎዳላታ ዉርሳና፤ ቄሪ ናይታካ ማሬቴና፤ ኢስታ ዎዚናይካ ናይታስ ሚሼቴና።
ISA 13:19 ካዎቴꬃታስ ቦንቾ፥ ካላዳዌታስ ጬቆ ጊዲዳ ባቢሎኔ ጎዳይ ሶዶሜ ማላኔ ጋሞራ ማላ ኢዞ ሺሪ ዬጋና።
ISA 13:20 ሄ ቢታን ሙሌካ ኣሲ ዴኤና፤ ኢዚን ኡቲዛ ኣሲካ ዴና፤ ኣራቤ ኣሲካ ሄን ባ ዱንካኔ ቶኬና፤ ሜሄ ሄሚዛይቲካ ባንታ ዉዴ ሄን ሼምፒሴቴና።
ISA 13:21 ጊዶ ኣቲን ባዞ ዶኣቲ ሄን ኢቻና፤ ኢዚ ኬꬃን ዎራካናቲ ኩማና፤ ሄን ጉቶቲ ዴኣና፤ ባዞን ዴይሽ ሚሳቲዛ ዳይዳንꬃቲ ኢዚ ቦላ ጉፓና።
ISA 13:22 ኢዚ ሚጻን ጎዳሬቲ ዋሳና፤ ሎኢዛ ኢዚ ካዎቴꬃ ኬꬃንካ ዎራካናቲ ዋሳና፤ ኢዚ ዎዴይ ማቲዴስ፤ ኢዚ ጋላሳይካ ኣዱቄና።
ISA 14:1 ጎዳይ ያቆቤስ ናምኣንꬆ ቃꬌታና፤ ኢስራኤሌካ ዛሬꬂዲ ዶራና። ኢስታ ኢስታ ቢታን ዎꬃና፤ ኢማꬃቲ ዪዲ ያቆቤሶ ኣሳራ ዋላኬታና።
ISA 14:2 ካዎቴꬃቲ ኤፊዲ ኢስታ ኢስታ ቢታ ዛራና። ኢስራኤሌ ኣሳይ ካዎቴꬃታ ባስ ኦይኪዲ ማጫሳኔ ኣቱማሳ ኣይሌ ሂስቲዲ ጎዳ ቢታን ሃራና። ባና ዲኢዳይታ ዛሪ ዲኣና፤ ባና ኡንኤꬂዳይታ ዛሪዲ ሃራና።
ISA 14:3 ጎዳይ ኢንቴና ኢንቴ ዋዬፔ፥ ሜቶፔኔ ኡንኤቴꬃፌኔ ኢታ ኣይሌቴꬃፌ ኔና ሼምፒሲዳ ጋላሲ፥
ISA 14:4 ኢንቴ ባቢሎኔ ካዎ ቦላ ቂልጪሼ፥ «ኡንኤꬂዛይሳስ ዎዴይ ዋኒ ዉሪዴ? ኢዛስ ጊሪሲዛይሲ ዋኒ ኤቂዴ!
ISA 14:5 ጎዳይ ኢታ ጻምኣኔ ሃሪዛይታ ካዎቴꬃ ጉፌ ሜንꬂዴስ።
ISA 14:6 ካዎቴꬃታ ፓጬይ ባይንዳ ሾጪዳይሳ ቃꬌታይ ባይንዳ ጎዲ ጎዲ ቆጺዳይሳ ሜንꬂዴስ።
ISA 14:7 ቢታያ ሳሮኔ ሼምፖ ዴማዱስ፤ ኡፋይሳ ማዛሙሬ ዬጻዉስ።
ISA 14:8 ሃራይ ኣቲን ዚጋቲካ፥ ሊባኖሴ ጺዳቲካ ኡፋዬቲዳ፤ ኔካ ኩንዳዳሳ፤ ሚꬅ ቃንጺዛዴይካ ሃይሳፌ ጉዬ ካልታ ኑ ቦላ ዴንꬄና።
ISA 14:9 «ኔኒ ዪዛ ዎዴ ሲኦሌይ ኔና ሞካናስ ጊጌታዱስ፤ ኔና ሞኪ ኤካና ማላ ሞይቲሌታ፥ ኣላሜ ቦላ ዴሬ ሃሪዛይታ ኡባታ ዴንꬄꬃዱስ፤ ቃሴ ካዎቴꬃታ ቦላ ካዎቲዳ ካዎታ ኢስታ ኣራታፔ ዴንꬃ ኤሳዱስ።
ISA 14:10 ኢስቲ ኔስ፥ ‹ኔካ ኑ ማላ ዳቡራዳሳ፤ ኑ ማላካ ጊዳዳሳ።
ISA 14:11 ኔ ቦንቾይ ዲꬃ ጊሪሳራ ዱጌ ሲኦሌ ዎꬊዴስ፤ ባዳቲ ኔስ ጋርሳራ ሂጼቲዳ፤ ጉጹኔቲ ኔስ ቦላራ ማይኦ ጊዳና› ጋና» ጌታ።
ISA 14:12 ኔኖ ዎንታ ናዞ፥ ቶሮጄ ጾሊንቴዞ፥ ኔ ዋናዳ ሳሎፔ ዱጌ ኩንዳዲ? ካዎቴꬃታ ካዉሺዳ ኔኒ ዋናዳ ዱጌ ዬጌታዲ!
ISA 14:13 ኔኒ ኔ ዎዚናን፥ «ታኒ ፑዴ ሳሎ ኬዛና፤ ታ ካዎቴꬃ ኣራታካ ጾሳ ጾሊንቴታፔ ቦላራ ꬎቃን ዎꬃና፤ ዙማ ቦላ ሺቂዛሶን ኣንጄቲዳ ዙማ ቦላ ꬎቃሶሆን ታ ካዎቴꬃ ኣራታ ቦላ ኡታና።
ISA 14:14 ታኒ ሻራቲ ዲዛ ꬎቃሶሆፔካ ፑዴ ኣꬋና፤ ታኒ ታና ኡባፌ ꬎቃ ጾሳ ማላ ኦꬃና» ጋዳሳ።
ISA 14:15 ጊዶ ኣቲን ኔኒ ሲኦሌን ዱጌ ጪማ ኦላን ዬጌታዳሳ።
ISA 14:16 ኔና ቤኢዛይቲ ኡባይ ቲሺ ሂስቲ ጼሊዲ ኔና፥ «ቢታ ቃꬂዳይሲኔ ካዎቴꬃታ ኮኮሪሲዳይሲ ሃይሴ?
ISA 14:17 ሳኣ ባዞ ኬሲዳይሲ፥ ካታማታካ ላሊዳይ፥ ዲኤቲዳይቲ ባ ዴሬ ሲሚ ቦንታ ማላ ዲጊዳይ ሃይሴ?» ጋና።
ISA 14:18 ካዎቴꬃታ ካዎቲ ኡባይ ቦንቾን ꬊስኪዳ፤ ባ ዱፎን ዱፎን ሼምፒዳ።
ISA 14:19 ኔ ጊዲኮ ኮዬቶንታ ሃጋ ማላ ዱፎፔ ዎራ ኦሌታዳሳ፤ ማሻን ጫዴቲዳይታን፥ ዱጌ ጪማ ሹቻ ኦላን ዎꬊዳይታን፥ ኣሳ ኩሼን ሃይቂዳይታን ካሜታዳሳ፤ ኔኒ ቶሆን ዬꬌቲዳ ኣሃ ማላ ጊዳዳሳ።
ISA 14:20 ኔኒ ኢስታራ ዱፎን ዳካ፤ ጋሶይካ ኔ ቢታ ባሻዳሳ፤ ኔ ዴሬዛ ኔ ꬋይሳዳሳ፤ ኢታ ኦꬂዛይታ ዜሬꬂ ሙሌካ ኣኬኬቴና።
ISA 14:21 ኢስቲ ዴንዲዲ ቢታ ላቶንታ ማላ፥ ኣላሜን ባ ካታማ ኢስቲ ኩንꬆንታ ማላ ካሴ ኢስታ ኣዋታ ናጋራ ጋሶን ኣቱማ ናይቲ ሲፌታናሶሆ ጊግሲቴ።
ISA 14:22 ኡባፌ ዎልቃማ ጎዳይ፥ «ታኒ ኢስታ ቦላ ዴንዳና፤ ሂስታዳ ኢስታ ሱንꬃ፥ ኢስታፌ ኣቲዳይታ፥ ኢስታ ዜሬꬃኔ ዬሌታ ባቢሎኔፔ ꬋይሳና።
ISA 14:23 ታኒ ባቢሎኔ ቁጻርሳ ኣቆሶኔ ጫሬ ኬሳና፤ ባሻ ፔይጻን ታኒ ኢዞ ፒታ ꬋይሳና» ጌስ።
ISA 14:24 ኡባፌ ዎልቃማ ጎዳይ፥ «ታኒ ሃልቺዳ ማላ ፖሌታና፤ ታ ቆፒዳ ማላካ ሃናና።
ISA 14:25 ታኒ ኣሶሬ ታ ቢታ ቦላ ሊቂሳና፤ ታኒ ኢዛ ታ ዙማ ቦላ ዬꬋና፤ ኢዛ ቃምባራይ ታ ዴሬዛ ቦላፌ ዴንዳና፤ ኢዛ ቶሆይካ ኢስታ ሃሼፔ ኪቻና» ጊ ጫቂዴስ።
ISA 14:26 ሳኣ ኡባስ ቆፌቲዳ ቆፋይ ሃይሳ፤ ካዎቴꬃታ ኡባ ቦላን ሚጬቲዳ ኩሼይ ሃይሳ።
ISA 14:27 ኡባፌ ዎልቃማ ጎዳይ ሃይሳ ቆፒዴስ፤ ሄሳ ኢዛ ኦኔ ዲጋናይ? ኢዚ ባ ኩሼ ዴንꬂዴስ፤ ሄሳ ዛራናይ ኦኔ?
ISA 14:28 ካዎ ኣካዜይ ሃይቂዳ ላይꬅ ሂዝጊዛ ቃላይ ዪዴስ፤
ISA 14:29 ኢንቴኖ ፊሊስጼሜ ኣሳቶ፥ ኢንቴና ሾጪዳ ጉፌይ ሜቂዳ ጊሻስ ኡባቲ ኡፋዬቶፍቴ፤ ሾሻ ጋርሳፌ ሃሶ ሾሺ ኬዛና፤ ኢዛ ዜሬꬂካ ጾንጌቲዛ ማርዜራ ዲዛ ሃሶ ሾሽ ጊዳና።
ISA 14:30 ፑቴሳ ማንቆቲ ዱሳሶ ዴማና፤ ሜቶታንቻቲ ዎፑ ጊዲ ኢቻና። ጊዶ ኣቲን ታኒ ኔ ዛሬ ኮሻን ዉርሳና፤ ቃሴ ኔፔ ኣቲዳይታካ ዲፒ ሂስታና።
ISA 14:31 «ኔኖ ፔንጌዞ! ዉ! ዉይ ጋ፤ ኔኖ ካታማዞ! ዋሳ፤ ኢንቴኖ ፊሊስጼሜ ኣሳቶ! ኢንቴ ኡባይካ ሂርጋን ሴሪቴ! ጋሶይካ ፑዴሃ ባጋፌ ጩዋይ ኢንቴ ቦላ ዪዴስ፤ ሄ ጪፍራፔ ዱጺ ኣታናይ ዴና።
ISA 14:32 ሄ ካዎቴꬃታፔ ኪቴቲ ዪዛ ቃስታኔታስ ኣይ ጊ ዛራኔ? ‹ጎዳይ ጺዮኔ ሚንꬂ ኤሲዴስ፤ ዋዬ ኤኪዳ ዴሬይ ኢዚ ጋርሳን ሼምፖሶ ዴሚዴስ› ጊ ዛሮ።»
ISA 15:1 ሞኣቤ ቢታ ጊሻስ ጎዳይ ዮቲዳ ቃላይ ሃይሳ፤ ቂሬ-ሞኣቤን ዲዛ ኤሬያ ላሌታዱስ፤ ኢሲ ጋላሳ ኦማርሳን ዲፒ ጋዱስ፤ ቃሴ ቂሬ-ሞኣቤን ዲዛ ቂሬያ ላሌታዱስ፤ ኢሲ ጋላሳ ኦማርስ ዲፒ ጋዱስ።
ISA 15:2 ዲቦኔ ኣሳይ ጾሳ ኬꬅ ኬዚዴስ፤ ዬካናስ ፑዴ ዙምቡላታ ቦላ ኬዚዴስ፤ ሞኣቤ ኣሳይ ኔቦ ጊሻሲኔ ሜዴባ ጊሻስ ዋሴስ፤ ሁኤይኔ ቡቻይ ሚልጺ ጊ ሜዴቲዴስ።
ISA 15:3 ኦጌይ ዲዛሶ ኡባን ማቃ ማይኤቴስ፤ ፖቄታ ቦላኒኔ ዳባባይ ዲዛሶን ዬኬቴስ፤ ኣፉንꬅ ጉሴቴስ።
ISA 15:4 ሃሴቦኔይኔ ኤልኤሌይ ዋሲዳ፤ ኢስታ ዋሶይካ ያሃጼ ጋካናስ ሴቴቲዴስ። ሄሳ ጊሻስ ሞኣቤ ኦላንቻቲ ዋሲዳ፤ ኢስታ ዎዚናይካ ኮኮሪዴስ።
ISA 15:5 ታ ዎዚናይ ሞኣቤ ጊሻስ ዬኪዴስ፤ ኢዚፔ ጎዴቲዳ ኣሳቲ ዞኣሬ ጋካናስ፥ ኤጊላቴ-ሻሊሺያ ጋካናስ ባቃቲዳ፤ ኢስቲ ኣፉንꬅ ጉሲሼ ፑዴ ሉሂቴ ኬዚዳ፤ ቃሴ ሆሮናይሜ ኤፊዛ ኦጌራ ቢሼ ባንቲ ꬋያናይሳስ ዋሲዳ።
ISA 15:6 ኒሚሪሜ ሃꬃቲ ሚጪዳ፤ ማታይ ሹሊዴስ፤ ጫሬቻይካ ꬋይዴስ፤ ጪሊላ ሚሺካ ቤቴና።
ISA 15:7 ሄሳ ጊሻስ ኢስቲ ሃሪዳ ኣቆታኔ ኢስቲ ሺሺዳ ሃሮ ኣሃያ ሻፋ ቶኪ ፒንꬄቴስ።
ISA 15:8 ኢስታ ዋሶይ ሞኣቤ ዛዋ ጋካናስ ሴቴቴስ፤ ኢስታ ዋሶይ ኤጊላይሜ ጋካናስ ኢስታ ዚላሳይካ ቢኤሪ-ኤሊሜ ጋኬስ።
ISA 15:9 ዲሞና ሻፋቲ ሱꬃን ኩሚዳ፤ ጊዲኮካ ታኒ ዲሞና ቦላ ሄሳፌ ኣꬊዛዝ ኤሃና። ሞኣቤፔ ባቃቲዛይታ ቦላ ቢታይን ጫሻ ኣቲዳይታ ቦላ ጋሞ ዬዳና።
ISA 16:1 ባዞ ቢታፌ ሄ ፒንꬃን ዲዛ ሴላፔ ጺዮኔ ማጫ ናይ ዙማን ዴራ ሃሪዛይሳስ ዶርሳ ላቃ ዬዲቴ።
ISA 16:2 ባንታ ኬꬃፌ ጎዴቲዲ ዋዬቲዛ ካፎታ ማላ ሞኣቤ ማጫሳቲ ኣርኖኔ ሻፋ ፑርዴን ሄሳꬆ ሃናና።
ISA 16:3 ሞኣቤ ኣሳይ ዩሁዳ ኣሳስ፥ «ኑስ ዞሬ ኢሚቴ፤ ኑስ ፒርዲቴ፤ ሴታ ጋላስ ኢንቴ ኤሾን ኦማርሳ ꬉማ ማላ ኑና ካሚቴ። ባቃቲዳይታ ቆቲቴ፤ ጎዴቲዳይታካ ኣꬂ ኢሞፍቴ።
ISA 16:4 ሞኣቤፔ ጎዴቲዳይቲ ኢንቴኮን ታኬቶ፤ ኢስታ ꬋይሲዛይታፔ ኢስቲ ቆቴቲ ኣቲዛሶሆ ጊዲቴ» ጌስ። ኡንኤꬂዛይሳስ ዉርሴꬂ ያና፤ ባሺ ኣታና፤ ኦቶራንቻይ ቢታ ቦላፌ ꬋያና።
ISA 16:5 ኣራታይ ሲቆን ሚኔስ፤ ሄ ኣራታን ዳዊቴ ኬꬃፌ ጊዲዳይ፥ ሱሬ ፒርዳ ኣሞቲዛይ፥ ጺሎቴꬅ ኤሶሲዛይ ኢሲ ኣሲ ኣማኔቴꬃን ኢዛ ቦላ ኡታና።
ISA 16:6 ዩሁዳ ኣሳይ፥ «ሞኣቤታ ሃላጫ፥ ኦቶሬቴꬃኔ ሞꬌቴꬃ፥ ጬቄቴꬃኔ ካꬌዛ ሲዪዶስ፤ ጊዶ ኣቲን ኢስታ ኦቶሬቴꬂ ሃዳ» ጋና።
ISA 16:7 ሄሳ ጊሻስ ሞኣቤቲ ዋሳና፤ ኢሲ ቦላ ሞኣቤስ ዬካና፤ ቂሬ-ሄሬሴቴ ካታማ ኣሳ ጊሻስ ዩሺ ቆፒዲ ካዮቲሼ ዬካና።
ISA 16:8 ሃሴቦኔ ጎሻ ጋዴቲ ሴባማ ዎይኔ ሚꬃቲ ሹሊዳ፤ ካዎቴꬃታ ሃሪዛይቲ ኢያዜሬ ኣꬊ ቢዲ ባዞ ቢታ ካንꬂዲ ባንታ ጻጶ ኣባ ጋካናስ ዬዲዳይታ ዶሬቲዳ ዎይኔ ሚꬃታ ዬꬌቲዳ።
ISA 16:9 ሴባማ ዎይኔ ሚꬃ ጊሻስ ኢያዜራ ዬኪዛ ማላ ታኒካ ዬካይስ፤ ሃሴቦኔ! ኤልኤሌ! ታኒ ታ ኣፉንꬃን ኢንቴና ሎጺኪሳይስ። ጋሶይካ ኢንቴስ ሚꬃ ኣይፌቲ ጋኪዳ ዎዴ ዲዛ ሆምቦጫይኔ ካꬅ ሺሺዛ ዎዴ ዲዛ ኡፋይሲ ኣቲዴስ።
ISA 16:10 ኡፋይሳይኔ ኢሊሊሳይ ኔ ኣታኪልቴይ ዲዛሶፔ ኪቺዴስ፤ ዎይኔ ቶኪዛሶሆን ዬጺዛ ዬꬃይ ዴና፤ ኢሊሲካ ኣቲዴስ። ዎይኔ ቴራ ጉምኢዛሶሆይ ዴና፤ ጉምኢዛይታ ሆምቦጫካ ታ ꬋይሳዲስ።
ISA 16:11 ሄሳ ጊሻስ ታ ዎዚናይ ሞኣቤ ጊሻስ ቃꬌታ ሚላስ ሲሳዉስ፤ ቂሬ-ሄሬሴታ ጊሻስ ታ ማራጬያ ዬካዉስ።
ISA 16:12 ሞኣቤይ ፑዴ ባ ዙምቡላ ቦላ ኬዚኮካ ዳቡራ ጻላ፤ ኢዛ ዎሳስ ባ ኤቃ ኬꬅ ጌሊኮካ ጎኣይ ዴና።
ISA 16:13 ጎዳይ ሞኣቤ ጊሻስ ካሴቲ ዮቲዳ ቃላይ ሃይሳ።
ISA 16:14 ሃኢ ጊዲኮ ጎዳይ፥ ቃጻሬቲ ኦꬂዛ ኦሳንቻይ ጋላስ ቆዲዛ ማላ ሞኣቤ ቦንቾይኔ ኣሳ ጮራቴꬃይ ሄꬑ ላይꬃ ጊዶን ካዉያና፤ ሄን ኣቲዳ ኣሳቲ ጉꬃታኔ ዎልቃይ ባይንዳይታ ጊዳና።
ISA 17:1 ዳማስቆ ጊሻስ፥ «ቤኢቴ፥ ሃይሳፌ ሲንꬃን ዳማስቆ ካታማቴꬂ ኣታና፤ ላሌꬃ ዶሬ ጊዳና።
ISA 17:2 ኣሮኤሬ ካታማቲ ካይስ ጊዳና፤ ሜሄ ሄንꬃሶሆ ጊዳና፤ ኢስታ ባቢሲዛ ሚሺካ ዴና።
ISA 17:3 ጊምቤቲዳ ካታማይ ኤፍሬሜፔ፥ ካዎቴꬃ ማታይ ዳማስቆፌ ꬋያና፤ ኣራሜፔ ጫሻ ኣቲዳይታ ቦንቾይ ኢስራኤሌታይሳ ማላ ካዉያና» ጌስ ኡባፌ ዎልቃማ ጎዳይ።
ISA 17:4 «ሄ ዎዴ ያቆቤ ቦንቾይ ሻሩማታና፤ ኢዛ ሞꬎቴꬃይካ ሹማና።
ISA 17:5 ካꬅ ማጺዛዴይ ኤቂዳ ካꬃ ሺሺዲ ሞꬌ ባ ኩሼን ማጺዛ ማላ ኤራፋይሜ ሾባፌ ማጼቲዛ ፑሹሎ ማላ ጊዳና።
ISA 17:6 ዎጋራ ሚꬅ ሾጪን ናምኡ ዎይኮ ሄꬑ ኣይፌቲ ሃጋ ጼራ ቦላ ኣቲዛ ማላ ኦይዱ ዎይኮ ኢቻሽ ኣይፌቲ ꬊፒ ጊዳ ሃጋታ ቦላ ኣቲዛ ማላ ጉꬃ ሃጋቲ ኣታና» ጊ ጎዳ ኢስራኤሌ ጾሳይ ሃሳይዴስ።
ISA 17:7 ሄ ዎዴ ኣሳይ ባና ሜꬊዳይሳኮ ጼላና፤ ኢስታ ኣይፌይ ኢስራኤሌ ጌሻኮ ጼላና።
ISA 17:8 ኢስቲ ባንታ ኩሼን ኦꬂዳ ያርሾሶሆታ ጼሌቴና፤ ኢስቲ ባንታ ኤቃታስ ኤጻኔ ጩኣሲዛሶሆታሲኔ ኣሼሪስ ጎይናና ኤሲዳ ቱሳታስ ቦንቾ ኢሜቴና።
ISA 17:9 ሄ ዎዴ ኢስራኤሌ ኣሳ ጋሶን ቦሼቶንታ ኣቲዳ ሚኖ ካታማቲ ዎራኔ ኣይኮይ ባይንዳሶ ጊዳና።
ISA 17:10 ኔና ኣሺዛ ጾሳ ባላዳሳ፤ ኔ ኢዛን ቆቴታ ኣቲዛ ኔ ዛላካ ኣኬካቤካ፤ ሄሳ ኔኒ ዶሬቲዳ ኣታኪልቴ ቶኪኮካ፥ ኦራꬃ ዜሬꬅ ኔ ዜሪኮካ፥
ISA 17:11 ኔ ቶኪዳ ጋላስ ኢዚ ሞካና ማላ ኔ ኦꬂኮካ፥ ኔ ዜሪዳ ዎንቴꬃ ጋላስ ኢዚ ጪያና ማላ ኔ ኦꬂኮካ ሄ ካꬃይ ሃርጌኒኔ ፓጾንታ ሳኮን ሙሌራ ꬋያና።
ISA 17:12 ቤኣ፥ ዳሮ ኣሳ ሃንቆ ጊሪሲ ኣባ ዳምባላ ማላ ጊሬስ፤ ቤኣ፥ ኣሳ ዋሶ ዳሮይ ዎልቃማ ሃꬃ ማላ ጉሜስ።
ISA 17:13 ኣሳይ ዎልቃማ ሃꬃ ማላ ጉሚኮካ፥ ኢዚ ኢስታ ሴሪኮ ዙምቡላ ቦላራ ጫርኮን ቢዛ ጉዱላ ማላ ጎቴ ጫርኮይ ላሊዛ ሃፓ ማላ ላሌታና።
ISA 17:14 ሄኮ ሳኣይ ቃሚሺን ቆፋይ ባይንዳ ሺሮ ጊዲዴስ፤ ሳኣይ ዎንታናፔ ካሴቲዲ ኦኒካ ቤቲቤና። ኑ ኣቆታ ቦንቂዳይታ፥ ኡባ ዎልቃን ኤኪዛይታ ቃዳይ ሄሳ።
ISA 18:1 ቶጵያ ሻፋታ ማታን ዲዛ ጊሬቲዛ ቄፌይ ዲዛ ቢታይስ ኣዬ ኣና!
ISA 18:2 ሄ ቢታያ ቃስታኔታ ሻጫፌ ኦሴቲዳ ዎጎሎን ኣባ ቦላራ ሻፋፔ ሄ ፒንꬅ ኪታ ዬዲዛሮ። ኢንቴኖ ፒላታ ቃስታኔቶ! ኣዱሳኔ ቦላ ሹጎ ኣሳታኮ፥ ሃኮኒኔ ማታን ዲዛይ ኢስታስ ያዪዛ ዴሬታኮ፥ ዎልቃማኔ ቃላይ ኤሬቶንታ ዴሬታኮ፥ ሻፋ ሃꬃቲ ኢዛ ዴሬ ሻኪ ቢዛ ካዎቴꬃኮ ቢቴ።
ISA 18:3 ኢንቴኖ ሳኣ ቦላ ዲዛ ኣስ ኡባቶ! ዙማታ ቦላ ማላታይ ካቄቲሺን ኢንቴ ቤኣና፤ ዛዬይ ፑኔቲሺን ኢንቴ ሲያና።
ISA 18:4 ጎዳይ ታስ፥ «ታ ጮኡ ጋ ኡታና፤ ሴታ ጋላስ ኣዋ ሴላን ጾልቄቲዛ ሚሻ ማላ ቦኔ ሆምቤ ማላ፥ ሻራፔ ቡኪዛ ኢራ ማላ ጊዳዳ ታ ጼላና» ጊዴስ።
ISA 18:5 ካꬅ ማጺዛ ዎዴፔ ካሴ ጪሻ ዎዴይ ኣꬊሺን፥ ጪሻይ ጋኪዲ ዎይኔይ ኣይፌ ኣይፋና ጊሺን፥ ዎይኔ ቦላ ዲዛ ኮሾንታይሳ ጹንቃና፤ ዳዪዳ ሃጋታካ ቃንጼሬꬂ ዲጋና።
ISA 18:6 ኢስቲ ኡባይካ ዙማ ቦላ ዲዲ ባቂ ሚዛ ካፎታሲኔ ባዞ ዶኣታስ ኣታና፤ ካፎቲ ቦኔ ኩሜꬅ ሚሼ ሻጫና፤ ባዞ ዶኣቲ ባልጎ ኡባን ሚሼ ሻጫና።
ISA 18:7 ሄ ዎዴ ጎዳስ ኡባፌ ዎልቃማ ጾሳስ ኣዱሳኔ ሊቆ ኣሳፔ፥ ማታፔ ሃሆፔ ያዪዛ ዴሬፔ፥ ዎልቃማኔ ኢዛ ቃላይ ኤሬቶንታ ዴሬፔ፥ ሻፋቲ ሻኪ ቢዛ ካዎቴꬃፌ ኢሞታይ ያና፤ ሜꬌቴꬃ ጎዳይ ዲዛሶ ፑዴ ጺዮኔ ዙማ ቦላ ያና።
ISA 19:1 ጊብጼ ጊሻስ ዮቴቲዳ ቃላይ፥ «ቤኢቴ፥ ጎዳይ ኤሶቲዛ ሻራ ቶጊዲ ጊብጼ ዬስ። ጊብጼ ኤቃ ጾሳቲ ኢዛ ሲንꬃን ኮኮሬቴስ፤ ጊብጼ ዎዚናይ ኢስታ ጊዶን ሴሬስ» ጌስ።
ISA 19:2 «ታኒ ጊብጼታ ኢሳ ኢሳ ቦላ ዴንꬃና፤ ኢሻይ ኢሻራ፥ ሾሮይ ሾሮራ፥ ካታማይ ካታማራ፥ ካዎይ ካዎራ ኦሌታና።
ISA 19:3 ጊብጼታ ዎዚናይ ላቤታና፤ ታኒ ኢስታ ሃልቾ ሃዳ ኦꬃና። ኢስታ ኤቃ ጾሳታኔ ሞይቲሌታ፥ ቱና ኣያና ጼይጊዛይታኔ ማሮታ ዞሬ ኦይቻና።
ISA 19:4 ቃሴ ሜንጼ ኢታ ኣሳ ኩሼን ታ ጊብጼታ ኣꬃ ኢማና፤ ባቢሲዛ ካዎይ ኢስታ ሃራና» ጌስ ጎዳይ፥ ኡባፌ ዎልቃማ ጾሳይ።
ISA 19:5 ኣባዬ ሻፋ ሃꬂ ፓጫና፤ ሃꬂ ጉጺ ጉጺ ሜላና።
ISA 19:6 ዛራ ሃꬃቲ ጺንቃና፤ ጊብጼ ካንቼቲ ሚጪ ꬋያና፤ ሻጫቲኔ ጫሬ ማታቲ ሹላና።
ISA 19:7 ኣባዬ ሻፋ ላንቄን ሃꬃ ማታን ዲዛ ሚꬃቲ ሹላና፤ ሻፋ ማታን ዜሬቲዳ ካꬅ ኡባይ ጫርኮን ፒቴቲ ꬋያና፤ ኣይኮይካ ኣቴና።
ISA 19:8 ሞሌ ኦይኪዛይቲ ጬጫና፤ ኣባዬ ሻፋን ጋቲሌ ዬጊዛይቲ ኡባይ ዬካና፤ ሃꬃ ቦላ ባንታ ጊቴ ዬጊዛይታ ኡባ ዎልቃይ ኢጻና።
ISA 19:9 ፓቴቲዳ ታልባ ሱቂዛይቲ ꬋያና፤ ቃሴ ቦꬃ ፑቶፌ ማይኦ ዳዲዛይቲ ሂዶታ ቃንጻና።
ISA 19:10 ማይኦ ዳዲዛይቲ ጬጫና፤ ዳሞዛን ኣቂዛይታ ዎዚናይ ሜቃና።
ISA 19:11 ጻኖሴ ቢታ ሃላቃቲ ኬሂ ኤያ፤ ኣꬎ ኤራንቻ ጊዲዳ ካዎ ፓሮኔ ኣꬎ ኤራንቻታ ዞሬይ ሃዳ። ፓሮኔስ፥ «ታኒ ኣꬎ ኤራንቻታፔ ኢሳ፤ ታኒ ካሴ ካዎታ ካሊዛዴ» ዋኒዲ ጌቲ?
ISA 19:12 ኢንቴ ኣꬎ ኤራንቻቲ ሃኢ ኣዋን ዲዞ? ኡባፌ ዎልቃማ ጎዳይ ጊብጼ ቦላ ኦꬃና ቆፒዳይሳ ኣኔ ኢንቴና ቤሴቶኔ ኤሪሴቶ።
ISA 19:13 ጻኖሴ ሃላቃቲ ኤይዳ፤ ሜምፒሳ ሹሜቲ ባሌቲዳ፤ ኢዚ ዴሬ ካሌꬂዛ ኤሬቲዳይቲ ጊብጼ ኣሳ ባሌꬂዳ።
ISA 19:14 ጎዳይ ኢስታ ቦላ ዶቺዛ ኣያና ጉሲዴስ፤ ማꬆቲዳ ኣሲ ባ ጮሻን ጋንዲጋርዛ ማላ ጊብጼይ ባ ኦሶ ኡባን ጋንዲጋራና ማላ ኦꬂዳ።
ISA 19:15 ካጬ ዎይኮ ጎይና፥ ዛምባ ዎይኮ ሻጫ ሄይቲ ኡባይ ጊብጼስ ኣይኮካ ማዴቴና።
ISA 19:16 ሄ ዎዴ ጊብጼ ኣሳይ ማጫሳ ማላ ጊዳና። ቃሴ ኡባፌ ዎልቃማ ጎዳይ ኢስታ ቦላ ባ ቄሴ ዴንꬂዛ ዎዴ ኢስቲ ያሻን ኮኮራና።
ISA 19:17 ዩሁዳ ኣሳይ ጊብጼ ኣሳ ቦላ ሺሮ ዴንꬄꬃና፤ ኡባፌ ዎልቃማ ጎዳይ ኢስታ ቦላን ኦꬃና ሃልቺዳ ሃልቾፌ ዴንዲዳይሳን ዩሁዳ ጊሻስ ሲዪዳ ኡባይ ሺሮታና።
ISA 19:18 ሄ ዎዴ ጊብጼ ቢታን ዲዛ ኢቻሽ ካታማቲ ካናኔ ቃላን ሃሳያና፤ ኡባፌ ዎልቃማ ጎዳ ባጋ ጊዳናስ ጫቃና። ሄ ካታማታፔ ኢሲኒያ ባሻ ካታማ ጌቴታ ጼይጌታና።
ISA 19:19 ሄ ዎዴ ጊብጼ ቢታን ጎዳስ ያርሾሶይ ኦሴታና፤ ቃሴ ጊብጼ ቢታ ዛዋን ጎዳስ ቱሲ ኤቃና።
ISA 19:20 ሄሲ ኡባፌ ዎልቃማ ጎዳስ ጊብጼ ቢታን ማላታኔ ማርካ ጊዳና፤ ኢስቲ ባንታና ኡንኤꬂዛይታፔ ዴንዲዳይሳን ጎዳኮ ዋሲዛ ዎዴ ኢዚ ኢስታ ኣሺዛዴኔ ማዲዛዴ ኪቲዲ ኢስታ ኣሻና።
ISA 19:21 ጎዳይ ባና ጊብጼታስ ቆንጪሳና፤ ኢስቲካ ሄ ጋላስ ጎዳ ኤራና፤ ያርሾኒኔ ካꬃ ያርሾን ኢዛ ጎይናና። ኢስቲ ጎዳስ ኣዲኔታና፤ ባ ኣዲኔቲዳይሳካ ጋꬃና።
ISA 19:22 ጎዳይ ጊብጼ ቦሻን ሾጫና፤ ዛሪዲካ ኢስታ ፓꬃና፤ ኢስቲካ ጎዳኮ ሲማና፤ ኢዚካ ኢስታ ዎሳ ሲዪዲ ኢስታ ፓꬃና።
ISA 19:23 ሄ ዎዴ ጊብጼፔ ኣሶሬ ጋካናስ ዎጋ ኦጌይ ኦሴታና፤ ኣሶሬቲ ጊብጼ፥ ጊብጼ ኣሳይ ኣሶሬ ባና፤ ቃሴ ጊብጼቲኔ ኣሶሬቲ ኢሲ ቦላ ጎይናና።
ISA 19:24 ሄ ዎዴ ኢስራኤሌይ ቢታስ ኣንጆ ጊዳናስ ሄꬓንꬆ ማራን ጊብጼራኔ ኣሶሬራ ኢሲፌ ቆዴታና።
ISA 19:25 ኡባፌ ዎልቃማ ጎዳይ ኢስታስ፥ «ታ ዴሬ ጊብጼይ፥ ታ ኩሼይ ሜꬊዳ ኣሶሬይ፥ ታ ጺንጾ ኢስራኤሌይ ኣንጄቲዳይታ ጊዴቶ» ጊ ኣንጃና።
ISA 20:1 ኣሶሬ ካዎ ሳርጎኔይ ኦላ ጋዳዋ ኪቲን ኣሽዶዴ ጌቴቲዛ ፊሊስጼሜ ካታማ ኦሊ ኦይኪዳ ላይꬅ፥
ISA 20:2 ሄ ዎዴ ጎዳይ ኣሞጼ ና ኢሳያሳ፥ «ማቃ ኔ ቦላፌ ቃራ፤ ኔ ጫማ ቶሆፔ ኬሳ» ጊ ዮቲዴስ፤ ኢዚካ ሄሳꬆ ኦꬂዴስ፤ ካሎኔ ጫማይ ባይንዳ ሲሜሬቲዴስ።
ISA 20:3 ሄሳፌ ጎዳይ፥ «ታ ኣይሌ ኢሳያሲ ጊብጼ ቦላኔ ቶጵያ ቦላ ጋካናይሳስ ማላታ ጊዳና ማላ ሄꬑ ላይꬅ ማይኦ ማይኦንታኔ ጫማ ኣꬆንታ ዴኢዳ ማላ፥
ISA 20:4 ኣሶሬ ካዎይ ጊብጼፔ ዲኤቲዳ ጪማታኔ ዬላጋታ፥ ቶጵያፔ ቤቲ ዪዳይታ ካሎኔ ጫማ ኣꬆንታ ኤኪ ባና፤ ኢስቲ ዱጫ ካሎ ቃሪ ዬጊዲ ዬዴሬꬂሼ ጊብጼታ ካዉሻና።
ISA 20:5 ቶጵያ ሂዶታ ኦꬂዳይቲኔ ጊብጼን ጬቄቲዛይቲ ባባናኔ ካዉያና።
ISA 20:6 ሄ ዎዴ ኣባ ማታን ዴኢዛ ዴሬይ፥ ‹ካሴ ኢስቲ ጬቄቲዳይቲ፥ ኣሶሬ ካዎፔ ኣታናሲኔ ላኣ ኬዛናስ ኑ ኢስታ ጊዶን ቆቴቲዳይታ ኣዚ ጋኪዳኮ ኣኔ ጼሊቴ፤ ሂስቲን ኑኒ ዋኒ ኬሲ ኤኪ ኣታኔ? ጋና› » ጊዴስ።
ISA 21:1 ኣባ ላንቄን ዲዛ ባዞ ቢታስ ዮቴቲዳ ጎዳ ቃላይ ሃይሳፌ ካሊዛይሳ። ዱጌሃ ባጋፌ ጎቴ ጫርኮይ ፒቲ ኤኪ ዪዛ ማላ ዎራጂዛይ ሺሮ ዴንꬄꬂዛ ባዞ ቢታፌ ዬስ።
ISA 21:2 ያሺዛ ኣጁታ ታ ቤኣዲስ፤ ኣꬂ ኢሚዛይሲ ኣꬂ ኢሜስ፤ ዲኢዛይሲ ዲኤስ። ኤላሜ ዴንዳ! ሜዶኔ ጊዶꬃ! ኢዛ ጋꬂዳ ዋዬ ኡባ ታ ኤሳና።
ISA 21:3 ሄሳ ጊሻስ ታ ጼሳይ ሳኮ ጻላላ ጊዲዴስ፤ ሚጻይ ኦይኪዳ ማጫሳ ማላ ታና ሌሶይ ኦይኪዴስ፤ ታኒ ሲዪዳ ዮኦይ ታና ጋዲጋዲሲዴስ፤ ታ ቤኢዳ ዮኦን ሺሮታዲስ።
ISA 21:4 ታ ዎዚናይ ፖዱ ጊዴስ፤ ታና ያሺ ኮኮሪሲዴስ፤ ታ ኡፋይሳን ናጊዳ ኦማርሳይ ታ ቦላ ሂርጋ ዬጊዴስ።
ISA 21:5 ኢስቲ ማዳ ጊግሲዳ፤ ኡቲዛሶ ጊግሲዳ፤ ሚዳኔ ኡዪዳ። ኢንቴኖ ሹሜቶ ዴንዲቴ! ጎንዳሌዛ ዛይቴን ቁጪቴ!
ISA 21:6 ጎዳይ ታና፥ «ባ፤ ዎቺዛ ኣስ ዎꬃ፤ ኢዚ ባ ቤኢዳይሳ ዮቶ።
ISA 21:7 ፓራን ጎሼቲዛ ፓራ-ጋሬታ ቤኢዛ ዎዴ ሃሬ ቶጊዛይታ ጋሜላ ቶጊዛይታ ቤኢዛ ዎዴ ኢዚ ዩሺ ቆፖ፤ ሎኤꬂ ዎቾ» ጊዴስ።
ISA 21:8 ናጊዛይሲካ ዋሲሼ፥ «ጎዳዉ፥ ታኒ ጋላስ ጋላስ ፓጬይ ባይንዳ ሻኮ ቦላ ኤቃዲስ፤ ኦማርስ ኡባን ታ ናጊዛሶሆን ኤቃዲስ።
ISA 21:9 ቤኢቴ፥ ኢሲ ኣሲ ፓራታን ጎሼቲዛ ፓራ-ጋሬታን ዪዴስ፤ ሂስቲዲ፥ ‹ባቢሎኔይ ኩንዳዱስ! ኩንዳዱስ! ኢዚ ኤቃ ጾሳ ሚስሌቲካ ሜቄሬቲ ጋዴን ኩንዲዳ› ጊ ዛሪዴስ» ጊ ዋሲዴስ።
ISA 21:10 ባሌን ቡኬቲዳ ታ ዴሬዞ! ኡባፌ ዎልቃማ ጎዳ ኢስራኤሌ ጾሳፌ ታ ሲዪዳ ቃላ ኔስ ዮታይስ።
ISA 21:11 ኤዶሜ ጊሻስ ዮቴቲዳ ሚኖ ዮኦ፤ ኢሲ ኣሲ ሴይሬፔ ታና ጼይጊዲ «ናጊዛይሶ! ጋዴይ ዎንታናስ ኣይ ኬና ሳቴይ ኣቲዴ? ናጊዛይሶ! ጋዴይ ዎንታናስ ኣይ ኬና ሳቴይ ኣቲዴ?» ጊዴስ።
ISA 21:12 ናጊዛይሲ ዛሪዲ፥ «ዎንታና፤ ጊዶ ኣቲን ሲሚዲ ቃማና፤ ኦይቻና ኮይኮ ኦይቺቴ፤ ጊዶ ኣቲን ሲሚዲ ሃ ዪቴ» ጊዴስ።
ISA 21:13 ኣራቤ ጊሻስ ዮቴቲዳ ሚኖ ዮኦ፤ ኢንቴኖ ዳዳኔ ዛልኣንቻቶ! ኢንቴ ኢንቴ ጫና ጋሜላታራ ኣራቤ ባዞን ኣቃና።
ISA 21:14 ሳሜቲዳይታስ ሃꬅ ኤሂቴ፤ ኢንቴኖ ቴማኔን ዲዛይቶ! ቤቴ ኣሳታስ ካꬅ ኤሂቴ።
ISA 21:15 ኢስቲ ጊꬃ ማሻፌኔ ኮሆፔ ሾዴቲዳ ጊꬃ ማሻፌ፥ ዋጼቲዳ ዎንዳፌፔኔ ሱሊዳ ኦላፔ ባቃቲዳ።
ISA 21:16 ጎዳይ ታና፥ «ኮንቲራቴ ኦሳንቻ ኦሶ ጋላሲ ዉሪዛ ማላ ኢሲ ላይꬃ ጊዶን ቄዳሬ ቦንቾይ ኡባይ ዉራና።
ISA 21:17 ቄዳሬ ቢታን ዎንዳፌን ዱኪዛ ዎልቃማ ኦላንቻታፔ ጉꬃቲ ኣታና፤ ሄሳ ጎዳ ኢስራኤሌ ጾሳይ ዮቲዴስ» ጊዴስ።
ISA 22:1 ኣጁታ ዙሌ ቦላ ዮቴቲዳ ሚኖ ዮኦ፤ ኢንቴና ኣዚ ሜቲን ኡባይ ፖቄ ቦላ ኬዚዴቲ?
ISA 22:2 ሃኔ ዎጫማይ ኩሚዳ ካታማዬ! ሺሮይኔ ዲርባይ ኩሚዳ ካታማዬ! ኔፔ ሃይቂዳይቲ ማሻን ሃይቂቤቴና፤ ዎይኮ ኦላን ሃይቂቤቴና።
ISA 22:3 ኔና ኣይሲዛይቲ ኡባይ ኢሲፌ ባቃቲዳ፤ ዎንዳፌ ዴንꬆንታ ዲሼ ዲኤቲዳ፤ ሞርኬይ ሃሆን ዲሺን ባቃቲዳ ኡባቶ! ኢንቴ ኦይኬቲዲ ኢሲ ቦላ ቃሼቲዴታ።
ISA 22:4 ሄሳ ጊሻስ ታኒ፥ «ታፔ ሃኪቴ፤ ኣኔ ጫሞ ዬሆ ታ ዬካይስ፤ ꬋይዳ ታ ኣሳ ጊሻስ ታና ሚንꬄꬃና ቆፖፍቴ» ጋዲስ።
ISA 22:5 ጎዳይ ኡባፌ ዎልቃማ ጾሳይ ኣጁታ ዙሌን ዎጫማ፥ ዲርባኔ ሺሮ፥ ዲርሳታ ላሌꬂኔ ዙማታኮ ዋሶ ጋላሲ ዴስ።
ISA 22:6 ኤላሜይ ዎንዳፌ ዪሻ ኮሆ፥ ባ ፓራታኔ ፓራ-ጋሬታ ጊግሲዴስ፤ ቂሬይካ ባ ጎንዳሌ ኦይኪዴስ።
ISA 22:7 ሎኦ ዙሌቲ ፓራ-ጋሬታን ኩሚዳ፤ ቶጋ ኣሳቲ ካታማይ ፔንጌን ኤቂዳ።
ISA 22:8 ዩሁዳ ሚጻታ ላሊዳ፤ ሄ ዎዴ ዎራ ጊዶን ሚንጃ ኬꬃን ዲዛ ኦላ ማሳራ ኔ ጼላዳሳ።
ISA 22:9 ዳዊቴ ካታማይ ዳሮ ላሌቲዳይሳ ቤኢዴታ፤ ዱጌ ባጋራ ሃꬅ ኤሊሲዴታ።
ISA 22:10 ዬሩሳላሜን ዲዛ ኬꬃታ ቆዲዴታ፤ ዲርሳ ኦራꬃናስ ኬꬃታ ላሊዴታ።
ISA 22:11 ካሴ ጋልኣ ኤሌ ሃꬃ ዛሪዲ፥ ኢዛ ሚንጂዛሶ ናምኡ ጊምቤታፔ ጊዶን ጊግሲዴታ። ጊዶ ኣቲን ኢንቴ ሄሳ ኦꬂዳይ ኦናኮ ኤሪቤኬታ፤ ኮይሮ ሃልቺ ኦꬂዳይሳ ኣኬኪቤኬታ።
ISA 22:12 ሄ ጋላስ ጎዳይ ኡባፌ ዎልቃማ ጾሳይ ኢንቴ ዬካና ማላኔ ዋሳና ማላ፥ ኢንቴ ሁኤ ቢናና ቡጫና ማላኔ ማቃ ማይኣና ማላ ጼይጊዴስ።
ISA 22:13 ጊዶ ኣቲን ኢንጄኔ ኡፋይስ፥ ቦራኔ ꬋርሾ ሹካይ፥ ኣሾ ሙሲኔ ዎይኔ ኡሺ ዴስ፤ «ኑኒ ዎንቶ ሃይቃና ጊሻስ ኣኔ ሞሲኔ ኡዮስ» ጊዴታ።
ISA 22:14 ጎዳይ ኡባፌ ዎልቃማ ጾሳይ ሃይሳፌ ካሊዛይሳ ታስ ቆንጪሲዴስ፤ ኢዛካ ታ ሃይꬃን ሲያዲስ፤ «ሃይሲ ሃ ናጋራዚ ኢንቴ ሃይቃና ጋካናስ ዉርሲን ዉሬና።»
ISA 22:15 ጎዳይ፥ ጎዳይ ኡባፌ ዎልቃማ ጾሳይ፥ «ባዳ ካዎ ኬꬃ ኣላፌ ሼቢና፥
ISA 22:16 ሃይሳን ኣይ ኦꬃይ? ሃይሳ ኔስ ዱፎ ጊጊሳናስ፥ ꬎቃሶሆን ኔ ሞጌታናሶ ዎጫናስ፥ ኔ ኣሃይ ኡታናሶ ዛላ ዎጫናስ ኦኒ ኔና ኣዛዚዴ?
ISA 22:17 ሃይሶ ሚኖ ኣዴዞ! ናጌታ፤ ጎዳይ ኔና ሚንꬂ ኦይኪዲ ባ ኩሼን ጩጩሚ ኦይኪዲ ኦላና ሃኔስ።
ISA 22:18 ኔና ያንባርሻ ማላ ዩሺዲ ኣኮ ቢታን ኦላና፤ ኔ ጎዳ ኬꬃስ ኔ ዬላ ጊዳዳሳ፤ ኔ ሄን ሃይቃና፤ ኔ ቦንቾ ፓራ-ጋሬቲካ ሄን ኣታና።
ISA 22:19 ኔ ቦንቼቲዳሶፔ ታ ኔና ካዉሻና፤ ኣላፌቴꬃፌካ ኔ ጎዴታና» ጋ።
ISA 22:20 «ሄ ጋላስ ታኒ ኪልቂያሳ ና ታ ኣሽካራ ኤልያቄሜ ጼይጋና።
ISA 22:21 ኔ ሴሎዛ ታ ኢዛ ማይዛና፤ ኔ ጊꬃ ኢዛ ጊጺሳና፤ ኔ ዳናቴꬃካ ታ ኢዛስ ኣꬃ ኢማና። ኢዚ ዬሩሳላሜን ዲዛ ኣሳሲኔ ዩሁዳ ኣሳስ ኣዋ ጊዳና።
ISA 22:22 ታኒ ዳዊቴ ኬꬃ ቁልፔ ኢዛ ሃሼን ዎꬃና፤ ኢዚ ዶዪን ኦኒካ ጎርዴና፤ ኢዚ ጎርዲን ኦኒካ ዶዬና።
ISA 22:23 ታኒ ኢዛ ኣማኔቲዛሶሆን ꬊሽኬ ማላ ኤሳና፤ ኢዚ ባ ኣዋ ኬꬃስ ቦንቾ ኣራታ ጊዳና።
ISA 22:24 ቄሪ ጻሮፔ ቢዲ ባꬅ ጋካናስ ሶን ዲዛ ሚሽ ኡባ ኮጫን ካቂዛ ማላ ኢዛ ኣዋ ኬꬃ ቦንቾ ኡባይ ናይታፔ ቢዲ ና ና ጋካናስ ኢዛ ቦላ ቃጴታና» ጊዴስ።
ISA 22:25 ጎዳይ ኡባፌ ዎልቃማ ጾሳይ፥ «ሄ ጋላስ ኣማንꬂዛሶን ኤቂዳ ꬊሽኬይ ሾዴታና፤ ሜቂ ዎꬋና፤ ኢዛ ቦላ ካቄቲዳ ኡባይ ኩንዲዲ ሜቄሬታና» ጊዴስ፤ ሃይሳ ጎዳይ ዮቲዴስ።
ISA 23:1 ጺሮሴ ቦላ ዮቴቲዳ ሚኖ ዮኦ፤ ጺሮሴይ ዲፒ ጊ ꬋይዳ ጊሻስ ታርሴሴ ማርካቤቶ ዋሲቴ፤ ኬꬂኔ ዎዴቤይ ባይንዳሶ ጊዳዱስ። ቆጲሮሴ ቢታፌ ዎሬይ ኬዚዴስ።
ISA 23:2 ኢንቴኖ ሃሩሮቶ! ኢንቴኖ ዱሬቲዳ ሲዶና ዛልኣንቻቶ! ጮኡ ጊቴ!
ISA 23:3 ጊታ ኣባራ ሺሆሬፔ ጺሮሴስ ካꬂ ዬስ፤ ጺሮሴ ኣቆታይ ኣባዬፔ ቤቴስ፤ ኢዛ ካዎቴꬃታስ ዛልኤ ባች ጊዳዱስ።
ISA 23:4 ሃኔ ሲዶና ካታማዬ! ሃኔ ኣባ ሚጻዬ ኔኒ ዬላታ፤ ኣባይ፥ «ታኒ ሚጻታቤኬ፤ ናካ ዬላቤኬ፤ ኣቱማ ናይታኔ ማጫ ናይታ ዲቻቤኬ» ጊዴስ።
ISA 23:5 ጺሮሴፔ ኬዚዛ ፓፑንꬃይ ጊብጼ ቢታን ሲዬቲዛ ዎዴ ኢስቲ ጬጫና።
ISA 23:6 ኢንቴኖ ሃሩሮቶ! ዚላሊቴ፤ ታርሴሴ ፒኒቴ።
ISA 23:7 ኢዚ ቶሆይ ኢዞ ሃኮ ዴሬ ኤፊዳራ ሄን ኢዛ ኡታና ማላ ኦꬂዳራ፥ ካሴ ቤኒ ካታማያ ኢንጄኔ ኡፋይሳ ካታማያ ሃኒ?
ISA 23:8 ካላቻ ጎጺሲዳሪ ቦላ፥ ባ ዛልኣንቻታ ዳናሲዳሪ ቦላ፥ ቢታ ቦላ ቦንቼቲዲ ባይዚዛይቲኔ ላሚዛይቲ ኢዚን ዲዛ ጺሮሲ ቦላ ሃይሳ ቆፒዳይ ኦኔ?
ISA 23:9 ኦቶሬቲዛይታ ኡባ ቦንቾ ካዉሻናስ ቃሴ ቢታ ቦላ ꬎቁ ꬎቁ ጊዳይታ ዚቂ ሂስታናስ ጎዳይ ኡባፌ ዎልቃማ ጾሳይ ሃልቺዴስ።
ISA 23:10 ኢንቴኖ ታርሴሴ ቢታ ኣሳቶ! ኢንቴና ቴቂዛይ ባይንዳ ጊሻስ ኣባዬ ሻፋ ማላ ኢንቴ ቢታ ቦላን ኩሚዲ ጎጊቴ።
ISA 23:11 ጎዳይ ባ ኩሼዛ ኣባ ቦላ ሚጪዴስ፤ ኢዚ ካዎቴꬃታካ ዳጋንꬂዴስ፤ ካናኔ ሚጻቲ ላሌታና ማላ ኣዛዚዴስ።
ISA 23:12 ቃሴካ፥ «ሃኔ ቆጼቲዳ ሲዶና ጌላኦዬ! ሃይሳፌ ጉዬ ኡፋዬቶፋ፤ ዴንዳ ቆጲሮሴ ፒና፤ ሄንካ ኔ ሳሮ ዴማካ» ጊዴስ።
ISA 23:13 ኣኔ ባቢሎኔ ቢታ ቤኢቴ፤ ሄ ቢታ ኣሳይ ፓꬆንታ ኣስ ጊዲዴስ፤ ኣሶሬ ኣሳይ ኢዞ ባዞ ዶኣስ ጉፋሶ ኬሲዴስ፤ ኢስቲ ባንታ ሻኮታ ኢዚ ቦላ ጊምቢዳ፤ ኢዚ ሚጻታ ላሊዳ፤ ቡꬌቶይሲ ዶሬ ጊዲዴስ።
ISA 23:14 ኢንቴኖ ታርሴሴ ማርካቤቶ፥ ዋሲቴ! ኢንቴ ሚጻይ ላሌቲዴስ።
ISA 23:15 ሄ ዎዴ ጺሮሴ ካታማይ ኢሲ ካዎስ ዴኦ ላይꬃ ኬና ላፑን ታሙ ላይꬅ ዶጌታና፤ ሄሳፌ ጉዬ ላይማ ማጫሳይ ጊሻስ ዬጼቲዳ ዬꬂ ጺሮሴ ቦላ ዬጼታና።
ISA 23:16 ኢስቲ፥ «ሃኔ ዶጌቲዳ ላይማ ማጫሳዬ! ባጋና ዴንꬃ፤ ካታማይ ጊዶን ዩያ፤ ኔ ሃሳኤታና ማላ ባጋና ሎኤꬃ ሾጫ፤ ዳሮ ማዛሙሬ ዬጻ» ጋና።
ISA 23:17 ላፑን ታሙ ላይꬂ ፖሌቲዳፔ ጉዬ ጎዳይ ጺሮሴ ቆፓና፤ ጊዶ ኣቲን ኢዛ ካሴ ባ ላይማ ኦሶን ሲማና፤ ሳኣ ቦላ ካዎቴꬃታ ኡባራ ባ ላይማቴꬃ ዛልኤ ዛልኣና።
ISA 23:18 ጊዲኮካ ኢዛ ዴሚዳ ኡባይኔ ዎꬌይ ጎዳስ ዱማታና፤ ዳጋቴናኔ ሱዴና፤ ኢዚ ዎꬌይ ጎዳ ሲንꬃን ዴኢዛይታስ ፓላሂዳ ካꬂኔ ሎኦ ማይኦ ጊዳና።
ISA 24:1 ቤኢቴ! ጎዳይ ቢታ ቡላ ኬሳና፤ ሙሌራ ꬋይሳና፤ ቡꬌꬃ ዶሬ ሂስታና፤ ኢዚን ዲዛ ኣሳ ላላና።
ISA 24:2 ኡባ ሚሺካ ኢሲ ማላ ጊዳና፤ ዴሬዛ ቦላ ሃንዛይሲ ቄሴዛ ቦላ ሃናና፤ ኣይሌ ቦላ ሃንዛይሲ ጎዳ ቦላ ሃናና፤ ኣሽካራይ ቦላ ሃንዛይሲ ጎዳቴይ ቦላ ሃናና፤ ሻሚዛይሳ ቦላ ሃንዛይሲ ባይዚዛይሳ ቦላ ሃናና፤ ታልኤ ኤኪዛይሳ ቦላ ሃንዛይሲ ታልኤ ኢሚዛይሳ ቦላ ሃናና፤ ኣጮ ጪጊዛይሳ ቦላ ሃንዛይሲ ኣጮ ጪጊሲዛይሳ ቦላ ሃናና።
ISA 24:3 ቢታይ ሙሌራ ቡላ ጊዳና፤ ሙሌራ ቦንቄታና፤ ሃ ቃላ ጎዳይ ሃሳይዴስ።
ISA 24:4 ቢታያ ሜላና፤ ኢዚን ዲዛ ኡባይ ቆካና፤ ኣላሜይ ዳቡራና፤ ቢታ ቦላ ኤሬቲዳ ጊታ ኣሳቲ ዳቡራና።
ISA 24:5 ቢታይ ባ ኣሳን ቱናዱስ፤ ኢስቲ ዎጋ ሜንꬂዳ፤ ማራ ሞሪዳ፤ ሜርና ጫቆ ቃላ ሜንꬂዳ።
ISA 24:6 ሄሳ ጊሻስ ቃንጌꬂ ቢታ ሜስ፤ ኢዚን ዴኢዛ ዴሬቲ ባንታ ሞሮን ቃጻዬታና ቤሴስ፤ ሄሳ ጊሻስ ሳኣ ቦላ ዲዛ ኣሳቲ ጹጌቲዳ፤ ኢስታፌ ቆዳን ጉꬃ ኣሳቲ ኣቲዳ።
ISA 24:7 ዎይኔ ቱራይ ሜሊን ዎይኔ ኡሺ ዉሪዴስ፤ ካሴ ኡፋዬቲዛ ኡባይ ጬጪዴስ።
ISA 24:8 ኡፋይሳን ካራቤ ባቃይ ጮኡ ጊዴስ፤ ካኢዛይታ ሆምቦጫይካ ኤቂዴስ፤ ኡፋይሲዛ ዲꬃ ጊሪሲ ጮኡ ጊዴስ።
ISA 24:9 ሃይሳፌ ጉዬ ኢስቲ ዬጺሼ ዎይኔ ኡሹ ኡዬቴና፤ ኡሻይካ ኡዪዛይታ ጫማና።
ISA 24:10 ላሌቲዳ ካታማያ ካይዛዱስ፤ ኬꬃ ፔንጌቲካ ጎርዴቲዳ።
ISA 24:11 ዎይኔ ኡሻ ጊሻስ ዱቡሻን ዋሴቴስ፤ ኡፋይሲ ኡባይ ጬጬን ላሜታና፤ ሆምቦጫ ካሲ ቢታ ቦላፌ ꬋይዴስ።
ISA 24:12 ካታማያ ሙሌራ ላሌታዱስ፤ ፔንጌቲካ ሜቄሬቲ ኩንዲዳ።
ISA 24:13 ዎጋራ ሚꬃ ኣይፌ ሾጪ ቆቆፊን ዎይኔ ሚꬃ ቃንጺ ኤኪን ኣቲዛ ኣቲዳ ፑሹሎ ማላ ቢታ ቦላ፥ ካዎቴꬃታ ቦላ ሄሳꬆ ሃናና።
ISA 24:14 ኢስቲ ባንታ ቃላ ꬎቁ ሂስቲዲ ኡፋይሳን ዬጻና፤ ኣርሼይ ዉሊዛ ባጋፌ ጎዳ ጊታቴꬃ ዮታና።
ISA 24:15 ሄሳ ጊሻስ ኣርሼይ ሞኪዛ ባጋራ ዲዛይቶ፥ ኣባን ዲዛ ሃሩሮቲ ጎዳ ኢስራኤሌ ጾሳ፥ ሱንꬃ ꬎቁ ꬎቁ ሂስቲቴ።
ISA 24:16 ቢታ ጋጻፔ፥ «ጺሎዛስ ቦንቾይ ጊዶ» ጊዛ ማዛሙሬ ኑ ሲዪዶስ፤ «ታኒ ጊዲኮ ጊልቃዳ ሜቄꬅ ኣታዲስ፤ ታና ኣዬ ኣና! ካዲዛይቲ ካዴቴስ፤ ኣꬂ ኢሚዛይቲ ኣꬂ ኢሜቴስ» ጋዲስ።
ISA 24:17 ኢንቴኖ ሳኣ ቦላን ዲዛ ኣሳቶ፥ ዳጋማይ፥ ኦላይኔ ዎጺማዴይ ኢንቴና ናጌስ።
ISA 24:18 ሳሎ ማስኮቴቲ ዶዬቲዳ ጊሻስ፥ ቢታ ዮቻቲካ ቃጺዳ፤ ሺሮፔ ባቃቲዛይ ኦላን ኩንዳና፤ ኦላፌ ኬሲ ኤኪዳይካ ዎጺማዴን ኦይኬታና።
ISA 24:19 ቢታይ ቃጺዴስ፤ ዛኢዴሲኔ ጳልቄቲ ዎꬊዴስ።
ISA 24:20 ቢታይ ማꬆቲዳ ኣሳ ማላ ዪጮቲዴስ፤ ጫርኮይ ሱጊዳ ጋባ ማላ ጊዳዱስ። ቢታ ማካላቴꬃይ ዴጾ ጊዲዳ ጊሻስ ኩንዳና፤ ናምኣንꬆካ ሲሚ ዴንዴና።
ISA 24:21 ሄ ጋላስ ጎዳይ ቦላ ሳሎን ዲዛ ዎልቃማታ ጋርስ ቢታ ቦላ ዲዛ ካዎታካ ቃጻያና።
ISA 24:22 ኢስቲ ኦላን ዲዛ ቃሾ ኣሳ ማላ ኢሲ ቦላ ኡጬታና፤ ኢስቲ ቃሾ ኬꬃን ጎርዴቲ ኡታና፤ ዳሮ ዎዴፔ ጉዬ ኢስቲ ፒርዳ ኤካና ሺቃና።
ISA 24:23 ኡባፌ ዎልቃማ ጎዳይ ጺዮኔ ዙማኒኔ ዬሩሳላሜን ጪማታ ሲንꬃን ቦንቾን ካዎታና፤ ሄ ዎዴ ኣጊናይ ሻጴታና፤ ኣዋ ኣይፌይካ ዬላታና።
ISA 25:1 ኣቤት ጎዳዉ! ኔኒ ታ ጾሳ። ታኒ ኔና ꬎቁ ꬎቁ ሂስታና፤ ኔ ሱንꬃካ ሳባና። ጋሶይካ ቤኒፔ ቆፌቲዳይሳ ማላሊሲዛ ሃኖ ኩሜꬃ ኣማኔቴꬃን ኦꬃዳሳ።
ISA 25:2 ኔኒ ካታማዮ ሹቻ ዶሬ ኦꬃዳሳ፤ ጊምቤቲዳ ካታማዮካ ላላዳሳ፤ ሃይሳፌ ሲንꬃን ጊምቤቲዳ ኣላጋታ ካታማቲ ዴቴና፤ ሲሚዲ ሙሌካ ኦሴቴቴና።
ISA 25:3 ሄሳ ጊሻስ ሚኖ ዴሬቲ ኔና ቦንቻና፤ ሜንጼ ኢታ ካዎቴꬃቲ ኔስ ያያና።
ISA 25:4 ኔኒ ሂዬሳታስ ዜምፖ፤ ሜቶታንቻታስ ሜቶ ዎዴ ኔኒ ዜምፖ፤ ጎቴ ጫርኮፌ ጌሚ ኣቲዛሶ፤ ኣዋ ሴላፔ ኩዋቲዛሶ ጊዳዳሳ። ጋሶይካ ሜንጼ ኢታታ ፔኖይ ኬꬃ ጎዳራ ኢጬቲዛ ጎቴ ጫርኮ ማላ።
ISA 25:5 ባዞ ቢታ ሴላ ማላ። ኣላጋ ኦቶሬቴꬃ ዋሶ ጮኡ ኦꬃሳ። ኣዋ ሴላይ ሻራ ኩዋን ኢርጺዛ ማላ ሜንጼ ኢታታ ማዛሙሬ ሲርጲ ጋና።
ISA 25:6 ጎዳይ ኡባፌ ዎልቃማ ጾሳይ ሃይሳ ዙማ ቦላ ዴሬ ኡባስ ጊዲዛ ጊታ ጊቢራ፥ ሎኢ ካጺዳ ዎይኔ ኡሹ፥ ሎኦ ኣሾኔ ዶሬቲዳ ዎይኔ ኡሹ ጊጊሳና።
ISA 25:7 ሃይሳ ሃ ዙማን ዴሬ ኡባ ቦላን ዎꬊዳ ማጋላሻ፥ ካዎቴꬃታ ኡባ ጎዚ ኦይኪዳ ጎሳ ኢዚ ꬋይሳና።
ISA 25:8 ሃይቆ ኢዚ ሜርናስ ሚታና፤ ኡባ ሃሪዛ ጎዳይ ኣሳ ኡባ ኣይፌፔ ኣፉንꬁ ቁጫና፤ ባ ዴራ ካዉሻቴꬅ ቢታ ኡባፌ ዲጋና። ሃይሳ ጎዳይ ሃሳይዴስ።
ISA 25:9 ሄ ጋላስ ኢስታስ፥ «ቤኢቴ ኑ ጾሳይ ሃይሳ፤ ኑኒ ኢዛን ኣማኔቲዶስ፤ ኢዚካ ኑና ኣሺዴስ፤ ሃይሲ ጎዳ፤ ኑኒ ኢዛን ኣማኔቲዶስ፤ ኢዚ ኣሺዳይሳን ኡፋዬቶስ፤ ኡፋይሳን ሆምቦጮስ» ጋና።
ISA 25:10 ጎዳ ኩሼይ ሃ ዙማ ቦላ ሼምፓና። ጊዶ ኣቲን ኡቱላይ ኡርቃን ዬꬌቲዛ ማላ ሞኣቤይካ ዬꬌታና።
ISA 25:11 ሃꬃ ዋꬊዛይ ባ ኩሼ ሚጪዛ ማላ ኢዛ ጊዶን ዲዛይቲ ባንታ ኩሼ ሚጫና፤ ጾሲ ኢስታ ጌኔ ኦሶ ባሌቶንታ ኢስታ ኦቶሬቴꬃ ካዉሻና።
ISA 25:12 ኢስቲ ꬎቁ ሂስቲ ጊምቢዳ ጊምቤዛ ኢዚ ዱጌ ዚቂ ሂስታና፤ ዱጌ ዎꬃና፤ ካዉሺዲ ዱጌ ሳኣን ዎꬂዲ ጉዱላ ቦላ ዬጋና።
ISA 26:1 ሄ ጋላስ ሃ ዬꬃይ ዩሁዳ ቢታን ዬጼታና። ኑስ ሚኖ ካታማይ ዴስ፤ ጾሲ ኢዛ ጊምቤታኔ ሚጻታ ኣቶቴꬃስ ኦꬂዴስ።
ISA 26:2 ባ ኣማኖ ናጊዳ፥ ጺሎ ካዎቴꬃቲ ጌላና ማላ ፔንጌታ ዶይቴ።
ISA 26:3 ኔናን ኣማኔቲዳ ጊሻስ ኔናን ዜምፒዳ ሼምፖዮ ኔኒ ኩሜꬃ ሳሮቴꬃን ናጋሳ።
ISA 26:4 ሜርናስ ጎዳን ኣማኔቲቴ፤ ጎዳይ ኑስ ሜርና ዛላ።
ISA 26:5 ꬎቃሶሆን ዲዛይታ ዚቂ ኦꬃና፤ ꬎቁ ጊዳ ካታማ ካዉሻና፤ ዱጌ ቢታን ኦላና፤ ጉዱላራ ዋላካና።
ISA 26:6 ቶሆን ዬꬌታና፤ ኡንኤቲዳይታ ቶሆይኔ ማንቆታ ቶሆይ ኢዛ ዬꬋና።
ISA 26:7 ጺሎታ ኦጌይ ሞሌ። ኔኖ ሱሬዞ፥ ኔኒ ጺሎታ ኦጌ ሞሊሳሳ።
ISA 26:8 ኣቤት ጎዳዉ! ኔ ዎጋ ኦጌራ ሄሜቲሼ ኑኒ ኔና ሂዶታ ኦꬂዶስ፤ ኔ ሱንꬂኔ ኔ ጊታቴꬂ ኑ ዎዚናስ ኣሞ።
ISA 26:9 ታ ሼምፖያ ኦማርሲ ኔና ላሞታዉስ፤ ታ ኣያናይ ማላዶ ኔና ኮያዉስ፤ ኔ ፒርዳይ ቢታ ቦላ ዪዳ ዎዴ ሳኣን ዴኢዛ ኣሳይ ጺሎቴꬅ ታማሬስ።
ISA 26:10 ኢታ ኣሳታስ ኪያ ኦꬂኮካ፥ ኢስቲ ጺሎቴꬅ ታማሬቴና። ሱሬ ቢታን ኢታ ኦꬄቴስ፤ ጎዳ ጊታቴꬃካ ኣኬኬቴና።
ISA 26:11 ኣቤት ጎዳዉ! ኔ ቄሴይ ꬎቁ ꬎቁ ጊዴስ። ኢስቲ ጊዲኮ ቤኤቴና፤ ኔ ኣሳስ ኔ ሚሼቲዛይሳ ቤኤቶኔ ዬላቴቶ፤ ኔ ሞርኬታስ ጊጊዳ ታማይ ኢስታ ሞ።
ISA 26:12 ኣቤት ጎዳዉ! ኔኒ ኑስ ሳሮቴꬅ ዮች ኦꬃዳሳ፤ ኑ ኦሶ ኡባ ኔኒ ኦꬃዳሳ።
ISA 26:13 ኣቤት ጎዳዉ ኑ ጾሳዉ! ኔፔ ሃራ ኣላጋ ጾሳቲ ኑና ሃሪዳ፤ ኑኒ ጊዲኮ ኔ ሱንꬃ ጻላ ቦንቾስ።
ISA 26:14 ኢስቲ ሃይቂዳ፤ ሲሚዲ ሼምፖራ ፓጻ ዴኤቴና፤ ኢስታ ሼምፖይ ሲሚ ዬና፤ ኔኒ ኢስታ ቃጻያዳሳኔ ꬋይሳዳሳ፤ ኢስታ ሃሳኢሲዛ ሚሽ ኡባ ፒታ ꬋይሳዳሳ።
ISA 26:15 ኣቤት ጎዳዉ! ኔኒ ካዎቴꬃ ዳርሳዳሳ፤ ኔኒ ዴራ ዳርሳዳሳ። ኔኒ ቦንቼታዳሳ፤ ቢታ ዛዋ ኡባካ ኣሳዳሳ።
ISA 26:16 ኣቤት ጎዳዉ! ኢስቲ ሜቶቲዳ ዎዴ ኔኮ ዪዳ፤ ኔኒ ኢስታ ሴሪዳ ዎዴ፥ ሳሱኪ ኔና ዎሴቴስ።
ISA 26:17 ኣቤት ጎዳዉ! ሻራ ማጫሲ ሚጻን ሜቶቲዛ ማላኔ ዋሲዛ ማላ ኑኒካ ኔ ሲንꬃን ሜቶቲዲ ዋሶስ።
ISA 26:18 ኑኒ ሻሪዶስ፤ ሚጻንካ ኡንኤቲዶስ፤ ጊዶ ኣቲን ጫርኮ ዬሊዶስ። ኑኒ ሳኣስ ኣቶቴꬅ ኤሂቦኮ፤ ሳኣን ዲዛ ዴራካ ዬሊቦኮ።
ISA 26:19 ጊዶ ኣቲን ሃይቂዳ ኔ ኣሳይ ፓጻና፤ ኢስታ ኣሃይካ ዴንዳና። ኢንቴኖ ቢታ ጋርሳን ዲዛይቶ! ዴንዲቴ ኡፋይሳን ዬጺቴ፤ ኔ ጻዛይ ቢታ ያኪሲዛ ማላዶ ጻዛ ማላ ሳኣይ ሚቲዳይታ ዛራ ጩታና።
ISA 26:20 ታ ዴሬዞ! ባ ኔ ኬꬅ ጌላ፤ ኔ ፔንጌ ኔ ቦላ ጎርዳ፤ ኢዛ ሃንቆይ ኣꬋና ጋካናስ ጉꬃ ዎዴስ ቆቴታሻ።
ISA 26:21 ቢታ ቦላን ዲዛ ኣሳ ኢስታ ናጋራ ጊሻስ ቃጻያናስ፥ ጎዳይ ባ ዴኢዛሶፔ ኬዚዲ ዬስ። ቢታይካ ባ ቦላን ጉኪዳ ሱꬃ ቆንጪሳና፤ ሃይቂዳይታካ ሃይሳፌ ጉዬ ቆቱኩ።
ISA 27:1 ሄ ጋላስ ጎዳይ ሌዋታኔ ጌቴቲዛ ጾንጌቲዛ ሾሻኔ ጻጼቲዛ ሾሻ ባ ሚኖ፥ ጊታኔ ዎልቃማ ጊꬃ ማሻን ቃጻያና፤ ኣባን ዲዛ ዎጋ ዶኣ ቃንጼሬꬂ ዬጋና።
ISA 27:2 ሄ ጋላስ፥ «ዎይኔ ሚꬅ ቶኪዛ ሎኦሶዛስ ዬጺቴ!
ISA 27:3 ታኒ ጎዳይ ኢዛ ናጋይስ፤ ታኒ ኡባ ጋላስ ሃꬅ ኡሻይስ፤ ኦማርሲኔ ጋላስ ኢዛ ናጋይስ፤ ሄሳ ጊሻስ ኦኒኔ ኢዛ ቆሄና።
ISA 27:4 ታኒ ሃንቄቲኬ፤ ታናራ ኦሌታናስ ኣጉንꬂኔ ኪንዲቾይ ኬዚዳኮ ታ ኢስታ ኢሲ ቦላ ጹጋና!
ISA 27:5 ዎይኮ ታኮ ዪዲ ታና ባንታስ ቆቴቲዛሶ ኬሴቶ፤ ታናራ ጊጌቶ፤ ኤ ታናራ ጊጌቶ» ጌቴታና።
ISA 27:6 ያና ጋላሳታን ያቆቤይ ጻጶ ዬዳና፤ ኢስራኤሌይ ኣጫናኔ ጪያና፤ ሂስቲን ኢስታ ኣይፌይ ሳኣ ኩማና።
ISA 27:7 ኢዞ ሾጪዳይታ ሾጪዳ ማላ ጎዳይ ኢዞ ሾጪዴ? ኢዞ ዎꬊዳይታ ኢዚ ዎꬊዳ ማላ ኢዞ ዎꬊዴ?
ISA 27:8 ኦላኒኔ ዲኦን ኔ ኢዞ ቃጻያዳሳ፤ ኣርሼይ ሞኪዛ ባጋ ጫርኮይ ጫርኪዛ ማላ ዎልቃማ ጎቴ ጫርኮን ኔ ኢዞ ጎዳዳሳ።
ISA 27:9 ያቆቤይ ያርሾ ያርሺዛሶ ሹቻታ ቦቂንታ ሹቻ ማላ ጋጪ ሊቂሲሺን ኣሼሮ ጌቴቲዛ ኤቃ ጾሳይ ሚስሌኔ ኤጻኔ ጩዋሲዛ ሶሆታ ኢስቲ ዲዛሶሆታፔ ሾዲ ኦሊሺን ሄ ጋላስ ሞሮይ ኣቶ ጌቴታና፤ ሄሲ ኢዚ ባ ናጋራ ዲጎይሳስ ኩሜꬃ ኣይፌ ጊዳና።
ISA 27:10 ጊምቤቲዳ ካታማያ ካይዛዱስ፤ ባዞ ቢታ ማላ ኦሌቲዳሶ ጊዳዱስ፤ ማራቲ ሄን ሄሜቲዲ ሄን ኢቻና፤ ኢዚ ሃጋታካ ፖቂ ማና።
ISA 27:11 ኢዚ ጼራይ ሜሊዲ ሜቃና፤ ማጫሳቲካ ሚጺ ኤꬃና፤ ኣኬካይ ባይንዳ ዴሬ ጊዲዳ ጊሻስ ኢዛ ሜꬊዳይ ኢዛስ ቃꬌቴና፤ ኦꬂዳይሲካ ኢዛ ማሬና።
ISA 27:12 ሄ ጋላስ ኤፊራጺሴ ሻፋፔ ሃꬂ ባይንዳ ጊብጼ ሻፋ ጋካናስ ጎዳይ ባ ካꬃ ቡካና፤ ኢንቴኖ ኢስራኤሌ ኣሳቶ፥ ኢንቴ ኢሶይ ኢሶይ ሺቃና።
ISA 27:13 ሄ ጋላስ ጊታ ዛዬይ ፑኔታና፤ ኣሶሬን ዲኤቲዳይቲኔ ጊብጼን ኡንኤቲዳይቲ ጉዬ ዬሩሳላሜ ሲሚ ዪዲ ጌሻ ዙማ ቦላ ጎዳስ ጎይናና።
ISA 28:1 ኤፍሬሜን ዲዛ ማꬆቲዛይታስ፥ ኦቶሬቴꬃስ፥ ካላቻ ጊዲዳሪስ፥ ጪሊላ ሾባ ሁኤን ኪፒ ጋ ኡቲዳ፥ ኢዛስ ቦንቾ ሴሎ ጊዲዳ ሹላ ጪሻይስ፥ ዎይኔ ኡሻይ ኢስታ ዜሬꬃስ ኦቶሬቴꬃስ ጊዲዳ ካታማይስ ኣዬ ኣና!
ISA 28:2 ቤኢቴ፥ ጎዳስ ዎልቃማኔ ሚኖ ጊዲዳ ኢሶይ ዴስ፤ ሄሲካ ሻቻ ኡሾ ማላ፥ ꬋይሲዛ ጎቴ ጫርኮ ማላ፥ ዎልቃማ ዳምባላ ማላኔ ዎልቃማ ኢራ ማላ ዎልቃን ኢዚ ኢዞ ዱጌ ቢታን ዬጋና።
ISA 28:3 ማꬆቲዛ ኤፍሬሜ ኣሳታ ኦቶሮ ካላቻይ ቶሆን ዬꬌታና።
ISA 28:4 ጪሊላ ሾባ ሁኤን ኪፒ ጋ ኡቲዳ ኢዛስ ቦንቾ ሴሎ ጊዲዳ ሹላ ጪሻያ፥ ካꬃ ሺሾፔ ሲንꬃን ጋኪን ኣሲ ቤኢዳ ማላ ጹጲ ኤኪዲ ሄራካ ሚቲዛ ባላሴ ማላ ጊዳና።
ISA 28:5 ሄ ጋላስ ኡባፌ ዎልቃማ ጎዳይ ባ ኣሳፔ ጫሻ ኣቲዳይታስ ቦንቾ ካላቻኔ ፑላ ኣኪሊሌ ጊዳና።
ISA 28:6 ኢዚ ፒርዲዛይታስ ሱሬ ፒርዳ ፒርዲዛ ኣያና ኦላ ካታማ ፔንጌፌ ዛሪዛይታስ ዎልቃ ጊዳና።
ISA 28:7 ሃይቲ ዎይኔ ኡሹ ኡዪዲ ዪጮቴቴስ፤ ማꬆሲዛ ኡሻን ጋንዲጋሬቴስ። ቄሴቲኔ ናቤቲ ማꬆሲዛ ኡሻን ጋንዲጋርዳ፤ ዎይኔ ኡሻ ጋሶን ዮኦይ ኢስታፌ ባሌቲዴስ፤ ማꬆሲዛ ኡሻን ጋንዲጋርዳ፤ ኣጁታ ሊኬራ ቤኤቴና፤ ፒርዳ ፒርዲሼ ꬉጴቴቴስ።
ISA 28:8 ኢስታ ማዳ ኡባይ ጮሽ ጻላ፤ ጮሻን ሞሬቶንታሶይ ዴና።
ISA 28:9 ኢስቲ፥ «ኢዚ ኦና ታማርሲዜ? ኪታካ ኦስ ቆንጪሲዜ? ማꬅ ኣጊዳ ናይታሴዬ ꬋንꬃ ዱሶ ናይታሴ?
ISA 28:10 ኣዛዞ ቦላ ኣዛዞ፥ ኣዛዞ ቦላ ኣዛዞ ዎጋ ቦላ ዎጋ፥ ዎጋ ቦላ ዎጋ፥ ሃንካ ጉꬃራ፥ ሄንካ ጉꬃራ ኦꬄስ» ጋና።
ISA 28:11 ሂስቲኮ ሲንꬃፌ ጾሳይ ኣላጋታ ቃላኒኔ ኢማꬃታ ዶናን ሃ ኣሳስ ሃሳያና።
ISA 28:12 ኢዚ ኢስታስ፥ «ሃና ሼምፖሶ፤ ዳቡርዳይ ሼምፖ፤ ሃና ሼምፖሶ» ጊዳይ ኦናሴ? ኢስቲ ጊዲኮ ሲያና ኮዪቤቴና።
ISA 28:13 ሄሳ ጊሻስ ጎዳ ቃላይ ኢስቲ ቢዲ ጉዬ ኩንዳና ማላ፥ ማዱንጻና ማላኔ ዎጺማዴን ኦይኬታና ማላ፥ ዲኤታና ማላ ኣዛዞ ቦላ ኣዛዞ፥ ኣዛዞ ቦላ ኣዛዞ፥ ዎጋ ቦላ ዎጋ፥ ዎጋ ቦላ ዎጋ ጊዲዲ፥ ሃን ጉꬃራ፥ ሄን ጉꬃራ ሃናና።
ISA 28:14 ሄሳ ጊሻስ ኢንቴኖ ዬሩሳላሜን ዲዛ ኣሳ ሃሪዛ ቂልጪዛይቶ! ጎዳ ቃላ ሲዪቴ።
ISA 28:15 ኢንቴ፥ «ኑኒ ሃይቆራ ጫቄቲዶስ፤ ዱፎራካ ሲጌቲዶስ፤ ዎርዶ ኑስ ዜምፖሶኔ ቆቴቲዛሶ ኦꬂዶስ፤ ዎልቃማ ቦሻይ ፒቲ ኤኪ ቢሼ ኑና ቦቻናስ ዳንዳዬና» ጊ ኦቶሬቲዴታ።
ISA 28:16 ሄሳ ጊሻስ ኡባ ሃሪዛ ጎዳይ፥ «ቤኢቴ! ታኒ ጺዮኔን ፓጬቲዳ ሹች፥ ዮቻ ሹች፥ ሚኖ ዮቻስ ጊዲዛ ቦንቼቲዳ ጉላ ሹች ዎꬃና፤ ኢዛን ኣማኒዛይ ዬላቴና።
ISA 28:17 ታኒ ሱሬ ፒርዳ ዋꬋ ዎዶሮ፥ ጺሎቴꬂካ ቱምቤ ማላ ኦꬃና፤ ኢንቴ ዎርዶ ዜምፖሶ ኦꬂዳይሳ ሻቻ ኢራይ ሜጫና፤ ኢንቴ ቆቴቲ ኣቲዛሶዛካ ሃꬂ ሚታና» ጌስ።
ISA 28:18 ኢንቴ ሃይቆራ ጫቄቲዳ ጫቆይ ኣታና፤ ኢንቴ ዱፎራ ሲጌቲዳ ሲጋይ ላሌታና፤ ዎልቃማ ቦሻይ ፒቲ ኤኪ ቢሼ ኢንቴናካ ፒቲ ኤኪ ባና።
ISA 28:19 ኢዚ ዪዳ ዎዴ ዎዴ ኢንቴና ኤኪ ባና፤ ማላዶ ማላዶ፥ ቃማኔ ጋላስ ኢንቴና ፒቲ ኤፋና፤ ሃ ቃላ ኢንቴ ኣኬኪዛ ጊዲኮ ሺሮ ቦላ ሺሮ ኤሃና።
ISA 28:20 ቶሆ ጮጎቲ ኢቾንታ ማላ ሂጻይ ቃንꬃ፤ ጋꬂ ማይኣናስ ኣፋላይካ ጉꬃ።
ISA 28:21 ጎዳይ ፓራጺሜ ዙማን ኦꬂዳ ማላ፥ ባ ኦሶ፥ ባ ኢማꬃ ኦሶ፥ ሄሲካ ባ ኦራꬃ ኦሶ ኦꬃናስ ዴንዳና። ቃሴ ጌባኦኔ ዙሌን ኦꬂዳ ማላካ ኦꬃና።
ISA 28:22 ጎዳይ፥ ኡባፌ ዎልቃማ ጎዳይ ኢዚ ቦሻ ቢታ ኡባ ቦላ ኤሃናስ ኣዋጂዳይሳ ታኒ ሲዪዳ ጊሻስ ሃኢ ኢንቴ ቂልጪዛይሳ ኣጊቴ፤ ኣካይ ጊኮ ኢንቴ ቦላ ቃሾይ ሚናና።
ISA 28:23 ኤዝጊዲ ታ ዮቲዛይሳ ሲዪቴ፤ ኣኬኪዲ ታ ቃላ ሲዪቴ።
ISA 28:24 ጎሻንቻይ ካꬅ ዜራናስ ኡባ ዎዴ ሄ ሶሆ ጎዪሼ ዴኢዜ? ቃሴ ኢዚ ሄምኤ ሊቂሲሼኔ ኡባቶ ፒጺሼ ዴኢዜ?
ISA 28:25 ጎሻ ሊቂሲዲ ኣሱታኔ ኣኑጋ ዜሬኔ? ጊስቴዛ ኢዛስ ጊጊዳሶሆን፥ ባንጋ ኢዛስ ጊጊዳሶሆን ኣርዳ ኢዛስ ጊጊዳሶሆን ዜሬኔ?
ISA 28:26 ኢዛ ጾሳይ ኢዛ ታማርሴስ፤ ሱሬ ኦጌካ ኢዛ ቤሴስ።
ISA 28:27 ኣሱታይ ሎዳን ቡኬቴና፤ ኣኑጋይ ፓራ-ጋሬን ቡኬቴና፤ ኣሱታይ ጉፌን፥ ኣኑጋይ ቄሪ ሎዳን ቡኬቴስ።
ISA 28:28 ሶሎ ኡካናስ ካꬂ ጋጬቴስ፤ ሄሳ ጊሻስ ኢሲ ኣሲ ሜርናስ ካꬅ ቡኬና፤ ካꬅ ቡኪዛ ፓራ-ጋሬታ ኢዛ ቦላራ ላጊኮካ ካꬃ ጋጬቴና።
ISA 28:29 ሃይሲ ኡባይ ባ ዞሬን ማላሊሲዛዝ፥ ባ ኣꬎ ኤራቴꬃን ማላሊሲዛዝ ጊዲዳ ኡባፌ ዎልቃማ ጎዳፔ ሃኔስ።
ISA 29:1 ሃኔ ዳዊቲ ኔናን ዴኢዳ ኣርኤሌ ካታማዬ! ኔና ኣዬ ኣና! ላይꬃ ቦላ ላይꬅ ጉጃ፤ ባኣሌታካ ዛራ ዛራዳ ቦንቻ።
ISA 29:2 ጊዶ ኣቲን ታኒ ኣርኤሌ ካታማዮ ጊዶꬃና፤ ኢዛ ዬካናኔ ዋሳና፤ ኢዛ ታስ ያርሾ ያርሺዛሶ ጊዳና።
ISA 29:3 ታኒ ኔ ዩሾን ዱንካናና፤ ታ ኔ ዩሾን ጊምቤ ዩሻ ኣꬃና፤ ኔ ዩሾን ሻኮ ኦꬃዳ ታ ኔና ኡንኤꬃና።
ISA 29:4 ኔኒ ዱጌ ዎꬋና፤ ቢታ ጋርሳፌ ፑዴ ሃሳያና፤ ኔ ሃሳያይ ጉዱላ ጊዶፌ ኬዛና፤ ኔ ጬንጉርሲ ሞይቲሌ ጬንጉርሳ ማላ ቢታ ጋርሳፌ ፑዴ ኬዛና፤ ኔ ሃሳያይካ ጉዱላ ጊዶፌ ሳሱኬታና።
ISA 29:5 ጊዶ ኣቲን ዳሮ ኔ ሞርኬቲ ጉዱላ ሱላ ማላ፥ ሜንጼ ኢታቲ ጫርኮን ቢዛ ሃፓ ማላ ጊዳና፤ ቆፋይ ባይንዳ ዲሺን፥
ISA 29:6 ኡባፌ ዎልቃማ ጎዳይ ዳዳን፥ ቢታ ቃꬃን፥ ጊታ ጬንጉርሳን፥ ጎቴ ጫርኮኒኔ ዎልቃማ ኣባ ዳምባላን ኡባ ሚዛ ታማ ላጮን ያና።
ISA 29:7 ኣርኤሌ ኦሊዛ ካዎቴꬃታ ኡባ ዉዴይ ኢዚ ቦላኔ ኢዚ ሻኮ ቦላ ዳፋ ዬጊዛይቲኔ ዶዲዛይቲ፥ ኣጉሞ ማላኔ ኦማርስ ቤቲዛ ኣጁታ ማላ ጊዳና።
ISA 29:8 ጋፊዳ ኣሲ ኣጉሞራ ሚሼ ኣቄስ፤ ጊዶ ኣቲን ኢዚ ꬊስኮፌ ዴንዲሺን ጋፋይ ኣጎንታይሳ ማላ፥ ሳሜቲዳ ኣሲ ኣጉሞራ ኡዪሼ ኣቄስ፤ ጊዶ ኣቲን ቤጊሺን ዳቡራይኔ ሳሞይ ኢዛ ኣጎንታይሳ ማላ ጺዮኔ ዙማ ኦሊዛ ካዎቴꬃታ ኡባ ዉዴይ ሄሳꬆ ሃናና።
ISA 29:9 ዳማቲዲ ማላሌቲቴ፤ ኢንቴና ኢንቴርካ ቆቂሲዲ ቆቄ ጊዲቴ። ጊዶ ኣቲን ዎይኔ ኡሹ ኡዮንታ ጮ ማꬆቲቴ፤ ማꬆሲዛ ኡሹ ኡዮንታ ዲሼ ጋንዲጋርቴ።
ISA 29:10 ጎዳይ ኢንቴ ቦላ ዎልቃማ ꬊስኮ ዬጊዴስ፤ ኢንቴ ናቤታ ኣይፌ ጎዚዴስ፤ ኣጁታ ቤኢዛይታ ሁኤ ጉሉንቲሲዴስ።
ISA 29:11 ሃ ኣጁታይ ኢስታስ ጻꬃ ማጻፋ ጊዶን ጎርዴቲ ዲዛ ቃላ ማላ ጊዲዴስ። ሃ ጻꬃ ማጻፋ ናባባናስ ዳንዳይዛ ኣሲ፥ «ሾቤ ኑስ ናባባ» ጊዲ ኢንቴ ኢሚኮ፥ ኢዚ ኢንቴስ፥ «ጎርዴቲዳ ጊሻስ ታኒ ናባባናስ ዳንዳይኬ» ጋና።
ISA 29:12 ቃሴ ጻꬃ ማጻፋ ናባቦ ዳንዳዮንታ ኣሳስ፥ «ሾቤ ኑስ ናባባ» ጊዲ ኢንቴ ኢዛስ ኢሚኮ ኢዚ ኢንቴስ፥ «ታ ናባቦ ዳንዳይኬ» ጋና።
ISA 29:13 ጎዳይ፥ «ሃይሲ ዴሬይ ዶናን ጻላ ታኮ ሺቄስ፤ ባ ሜቴርሻን ጻላ ታና ቦንቼስ፤ ጊዶ ኣቲን ኢዛ ዎዚናይ ታፔ ሃኮን ዴስ። ኢስቲ ኣሲ ታማርሲዳኔ ኣሲ ዎꬂዳ ዎጋን ታስ ጎይኔቴስ።
ISA 29:14 ሄሳ ጊሻስ ታኒ ሃ ኣሳ ቦላ ማላሊሲዛ ሚሻ ቦላ ማላሊሲዛ ሚሽ ኦꬃሼ ዛራ ዛራ ኢስታ ማላሊሳና፤ ኣꬎ ኤራንቻታ ኤራቴꬂ ꬋያና፤ ኣኬካንቻታ ኣኬካይካ ፔንቲ ባና» ጊዴስ።
ISA 29:15 ባንታ ሃልቾ ጎዳፔ ጌንꬃናስ ዱጌ ጪማ ኦላን ዎꬊዛይታስ ባንታ ኦሶ ꬉማን ኦꬂዛይታስ «ኑና ኦኒ ቤኣኔ? ኑና ኦኒ ኤራኔ?» ጊዛይታስ ኣዬ ኣና!
ISA 29:16 ኢንቴ ዮኦታ ላሚ ዬጌታ፤ ማናታ ኡርቃ ማላ ጼሌታ! ሜꬌቲዳይሲ ሜꬊዳይሳ፥ «ኢዚ ታና ሜꬊቤና» ጊዜ? ማና ሚሺ ባና ሜꬊዳይሳ፥ «ኢዚ ኣይኮካ ኤሬና» ጊዜ?
ISA 29:17 ሊባኖሴይ ላሜቲዲ ኣራዳ ጋዴ ጊዳናስ፥ ኣራዳ ቢታይ ላሜቲዲ ዎራ ጊዳናስ ጉꬃ ዎዴይ ኣቲዴስ ጊዴኔ?
ISA 29:18 ሄ ጋላስ ቱሌይ ጻꬃ ማጻፋ ቃላ ሲያና፤ ቆቄ ኣይፌቲካ ሻሩማፔኔ ꬉማፔ ሻኬቲዲ ጼላና።
ISA 29:19 ኣሽኬቲ ጎዳን፥ ሂዬሳቲ ኢስራኤሌ ጌሻን ዛሪ ዛሪ ኡፋዬታና።
ISA 29:20 ሜንጼ ኢታቲ ኡባይ ዉራና፤ ቂልጪዛይቲ ቲምኢ ጋና፤ ኢታ ኦꬃናስ ዛማዲ ኡቲዳይቲ ꬋያና።
ISA 29:21 ኣስ ዮኦን ሞራንቻ ኬሲዛይቲ፥ ሺሎታን ሞቴቲዛይሳ ቦላ ዎጺማዴ ዋጺዛይቲ፥ ዎርዶ ማርካን ቱማቴꬃ ጺሎታፔ ቦንቂዛይቲ ꬋያና።
ISA 29:22 ሄሳ ጊሻስ ኣብራሃሜ ዎዚዳ ጎዳይ ያቆቤሶስ፥ «ያቆቤይ ሃይሳፌ ጉዬ ዬላቴና፤ ኢዛ ሲንꬂካ ላሜቴና።
ISA 29:23 ባንታ ጊዶን ታ ኩሼ ኦሶ ጊዲዳ ባንታ ናይታ ቤኢሼ ታ ሱንꬃ ጌሻቴꬃን ናጋና፤ ኢስቲ ያቆቤ ጌሻዛ ጌሻቴꬅ ኤራና፤ ኢስራኤሌ ጾሳ ሲንꬃን ያሻቴꬃን ኤቃና።
ISA 29:24 ኣያናን ባሊዳይቲ ሲሚዲ ኣኬካና፤ ዙዙሚዛይቲካ ቲሚርቴ ኤካና» ጌስ።
ISA 30:1 ጎዳይ፥ «ማካላንቻ ጊዲዳ ናይታስ ኣዬ ኣና! ታፔ ጊዶንታ ቆፋ ካሌቴስ፤ ታ ኣያናፔ ጊዶንታ ጫቆ ጫቄቴስ፤ ናጋራ ቦላ ናጋራ ጉጄቴስ።
ISA 30:2 ታና ዞሬ ኦይቾንታ ጊብጼ ዎꬌቴስ፤ ካዎ ፓሮኔይ ኢስታስ ጎንዳሌ ጊዳና ማላ ጊብጼ ኩዋን ኣታና ኮዬቴስ።
ISA 30:3 ጊዶ ኣቲን ፓሮኔ ጎንዳሌቴꬂ ኢስታስ ካዉሻቴꬅ ጊዳና፤ ጊብጼ ካዎን ኣቴꬂ ኢስታ ቦላ ዬላ ኤሃና።
ISA 30:4 ኢስታ ሹሜቲ ጻኖሴን ዲኮካ፥ ኢስታ ኪቲዳይቲ ሃኔሴን ዲኮካ፥
ISA 30:5 ኢስታስ ዬላቴꬂኔ ካዉሻቴꬅ ጻላ ጊዳና ኣቲን ማዶ ዎይኮ ዎꬌ ኢስታስ ኤሆንታ ኣይኮ ጎኣካ ኢስታስ ኢሞንታ ኣሳታ ጋሶን ኡባይካ ዬላታና» ጌስ።
ISA 30:6 ኔጌቤን ዲዛ ሜዶሳታ ጊሻስ ጎዳይ ዮቲዳ ቃላይ ዎዳላ ጋሞቲኔ ማጫ ጋሞቲ ዲዛሶን፥ ማርዜራ ዲዛ ሾሻቲኔ ጾንጌቲዛ ሾሻቲ ዲዛሶን፥ ሜቶይኔ ጬጬይ ኩሚዳ ቢታራ ኣꬊ ቢዲ፥ ኢስቲ ጎኦንታ ዴሬታኮ፥
ISA 30:7 ኢዚ ማዶስ ሙሌካ ጎኣይ ባይንዳ ዴሬ ኢስቲ ጊብጼ ባና፤ ሄሳ ጊሻስ ታኒ ኢዚ ሱንꬃ «ኣይኮካ ጎኦንታሮ ኤራኣቤ» ጋ ጼይጋና።
ISA 30:8 ሃኢ ባ፤ ሳሌዳን ኢስታስ ጻፋ፤ ጻꬃ ማጻፋ ቦላካ ጫዳ፤ ሄሲ ቡሮፔ ያና ዎዴታን ሜርናስ ማርካ ጊዳና።
ISA 30:9 ሃይቲ ጎዳ ኣዛዞ ሲያና ኮዮንታይቲ፥ ማካላንቻ ዴሬኔ ባሌꬂዛ ናይታ።
ISA 30:10 ኣጁታ ቤኢዛይታ፥ «ሃይሳፌ ጉዬ ኣጁታ ቤኦፒቴ» ጋና፤ ናቤታ፥ «ሃይሳፌ ጉዬ ኑስ ቱማ ቲንቢቴ ዮቶፒቴ፤ ኑና ኡፋይሲዛዚኔ ሚቺዛዝ ዮቲቴ።
ISA 30:11 ሃይሳ ኦጋፔ ኪቺቴ፤ ሃ ዎጋ ኦጋፔ ሃኪቴ፤ ኢስራኤሌ ጌሻራ ኑና ቲራን ጋꬆፍቴ» ጋና።
ISA 30:12 ሄሳ ጊሻስ ኢስራኤሌ ጌሻይ፥ «ኢንቴ ሃ ቃላ ካꬊዳ ጊሻስ፥ ጌኔን ኢንቴ ኣማኔቲዳ ጊሻሲኔ ባሌꬆን ዜምፒዳ ጊሻስ፥
ISA 30:13 ሃይሲ ሃ ናጋራዚ ጳልቄቲ ኩንዳናኔ ቆፖንታ ዲሺን ኩንዲዛ ጊታ ጊምቤ ማላ ኢስታስ ጊዳና።
ISA 30:14 ሜቄሬቶይሳ ጊዶፌ ታማ ቦንቆ ካሺዛ ኮንኣይ፥ ሃꬄ ዱቂዛ ኮንኣይ ꬋያናሼ ጋካናስ፥ ኣይኮይካ ኣቶንታ ቲፌቲዛ ማና ሚሻ ማላ ቲፌታና» ጌስ።
ISA 30:15 ኡባ ሃሪዛ ጎዳይ፥ ኢስራኤሌ ጌሻይ፥ «ኢንቴ ታኮ ሲሞኒኔ ታናን ሼምፖን ኣታና፤ ዎፓኒኔ ኣማኖን ኢንቴ ሚናና፤ ኢንቴ ጊዲኮ ሄሳꬆ ኦꬂቤኬታ።
ISA 30:16 ቃሴካ፥ ‹ቺ! ኑኒ ፓራን ኡቲ ባቃታና› ጊዴታ፤ ሄሳ ጊሻስ ኢንቴ ባቃታና። ዛሪዲካ ኢንቴ፥ ‹ኑኒ ፒላታ ፓራን ኬሲ ኤኪ ባና› ጊዴታ፤ ሄሳ ጊሻስ ኢንቴና ዬዴꬂዛይቲ ፒላታታ ጊዳና።
ISA 30:17 ኢንቴ ዙማ ሁኤን ኤቂዳ ባንዲራ ማላ ዙምቡላታ ጼራን ኤቂዳ ማላታ ማላ ጊዲ ኢንቴ ኣታናሼ ጋካናስ ኢሲ ኣሳ ማንዴꬃን 1,000 ኣሲ ባቃታና፤ ኢቻሽ ኣሳ ማንዴꬃን ኢንቴ ኡባይ ባቃታና» ጌስ።
ISA 30:18 ጊዶ ኣቲን ጎዳይ ኢንቴስ ኪያ ኦꬃናስ ናጌስ፤ ኢንቴና ባ ቃꬌቴꬃ ቤሳናስ ዴንዴስ፤ ጎዳይ ቱሙ ፒርዲዛ ጾሳ ጊዲዳ ጊሻስ ኣማኔቲዲ ኢዛ ናጊዛይቲ ኣንጄቲዳይታ።
ISA 30:19 ኢንቴኖ ዬሩሳላሜን ዴኢዛ ጺዮኔ ዴሬዞ! ሃይሳፌ ሲንꬃን ኢንቴ ዬኬኬታ፤ ኢንቴ ኢዛኮ ዋሲሺን ኢዚ ኢንቴና ዋኒ ማሬኔ? ኢንቴ ዋሶ ኢዚ ሲዪዲ ኢንቴስ ኤሶን ዛሮ ኢማና።
ISA 30:20 ጎዳይ ኢንቴስ ዋዬ ካꬂኔ ሜቶ ሃꬅ ኢሚኮካ ሃይሳፌ ጉዬ ኢንቴ ኣስታማሬይ ኢንቴፌ ቆቴቴና፤ ኢንቴ ኣይፌቲካ ኢንቴ ኣስታማሬዛ ቤኣና።
ISA 30:21 ኢንቴ ሃዲርስ ዎይኮ ኡሻች ጊኮ ኢንቴ ጉዬራ፥ «ኦጌዚ ሃይሳ፤ ኢዛራ ቢቴ» ጊዛይሳ ኢንቴ ሃይꬂ ሲያና።
ISA 30:22 ሄሳፌ ቢራን ሜሼቲዳ ኢንቴ ኤቃ ጾሳታኔ ዎርቃን ሜሼቲዳ ሚስሌታ ኢንቴ ሞራና፤ «ኑፔ ሃኪቴ» ጊዲ ቱና ጫርቃ ማላ ኢንቴ ዎራ ዬጋና።
ISA 30:23 ኔ ዜሪዳ ካꬃስ ኢዚ ኢራ ኢማና፤ ቢታፌ ሞኪዳ ካꬃይ ሙሩታኔ ዳሮ ጊዳና። ሄ ዎዴ ኢንቴ ሜሄይ ኣሆ ዴምባን ሄሜታና።
ISA 30:24 ጎሻ ቦራቲኔ ሃሬቲ ባካን ቡኪ ሱራጌቲዳ ሃርቆኔ ባሶ ማና።
ISA 30:25 ኣሳይ ዉሪዛ ዎልቃማ ጋላሳን ሚጻቲ ላሌቲሺን ጊታ ዙማታ ኡባታ ቦላፌኔ ዙምቡላታ ኡባታ ቦላፌ ዱጌ ሃꬂ ጎጋና።
ISA 30:26 ጎዳይ ሜቂዳ ባ ዴራ ኮሊሺን፥ ማዱንꬂዳይሳ ፓꬂሺን፥ ኣጊናይ ኣርሼ ማላ ፖኣና። ኣርሼስ ኢሲ ጋላሳ ፖኦይካ ላፑን ጋላሳ ፖኦ ማላ ጊዳና።
ISA 30:27 ቤኢቴ፥ ጎዳ ሱንꬃይ ኤጺዛ ሃንቆራ፥ ሻራ ማላ ꬊፒ ጊዳ ጩዋራ ሃኮፔ ያና፤ ኢዛ ሜቴርሻቲ ሃንቆን ኩሚዳ፤ ኢዛ ኢንጻርሳይካ ጹጊዛ ታማ ማላ።
ISA 30:28 ኢዛ ፔኖይካ ቆꬌ ጋኪዲ ሜጪ ኤፊዛ ኪጻ ሃꬃ ማላ፤ ካዎቴꬃታካ ꬋይሶ ዛይዛሬን ዛይዛሬስ፤ ኣሳ ዶናን ኦጌ ባሌꬂዛ ቢጻላ ባርሴስ።
ISA 30:29 ኦማርስ ጌሻ ባኣሌ ኢንቴ ቦንቺሼ ዬጺዛይሳꬆ ኢንቴ ዬጻና፤ ጎዳ ዙማኮ ኢስራኤሌ ዛላኮ ኣሳይ ሱሱልኤ ሱሱልኢሼ ኡፋይሳን ኬዚዛይሳꬆ ኢንቴ ዎዚናይ ኡፋዬታና።
ISA 30:30 ጎዳይ ኤጺዛ ሃንቆኒኔ ሚዛ ታማን፥ ጎቴ ጫርኮኒኔ ዳዳን፥ ሻቻ ሹቻን፥ ቴማይ ኩሚዳ ባ ጬንጉርሳ ኣሳ ሲሳና፤ ዎꬊሼ ባ ቄሳ ኢዚ ቤሳና።
ISA 30:31 ጎዳ ጬንጉርሲ ኣሶሬ ዳጋንꬃና፤ ኢዛ ጉፌይካ ኢስታ ሾጫና።
ISA 30:32 ጎዳይ ኢስታ ቦላ ዬዲዛ ቂጻቴ ጉፌ ኡባይ ካራቤ ጊሪሳኒኔ ዲꬃ ጊሪሳን ኣዣቤቲዳይሳ፤ ኢዚ ባ ዎልቃ ኦላን ቤሲዲ ኢስታ ሾጪዴስ።
ISA 30:33 ቤኒ ዎዴፔ ዶሚዲ ቶፌቴ ጌቴቲዛ ጹጊዛሶይ ጊጌቲ ኡቲዴስ፤ ካዎዛሲካ ጊጌቲ ኡቲዴስ፤ ጹጋና ጎንጎሎዚካ ኣሆኔ ጪማ፤ ኢዛ ጊዶን ዳሮ ታማይኔ ኤጻና ሚꬂ ዴስ፤ ጎዳ ፔኖይ ዲኔ ታማ ማላ ኤꬂ ኬሳና።
ISA 31:1 ፑዴ ኢስራኤሌ ጌሻኮ ጼሎንታይታስ፥ ጎዳፔ ማዶ ኮዮንታይታስ፥ ማዶ ዴማናስ ዱጌ ጊብጼ ዎꬊዛይታስ፥ ፓራ-ጋሬታ ዳሮቴꬃኒኔ ባ ፓራ ሚኖቴꬃን ጬቄቲዛይታስ ኣዬ ኣና።
ISA 31:2 ኢዚ ጊዲኮ ኣꬎ ኤራንቻ፤ ኢዚ ባሽ ኤሃና፤ ባ ቃላካ ላሜና፤ ኢታ ኦꬂዛይታ ቦላኔ ቆሆ ኦꬂዛይታ ማዲዛይታ ቦላ ኢዚ ዴንዳና።
ISA 31:3 ጊብጼ ኣሳይ ኣሳፔ ኣቲን ጾስ ዴቴና፤ ኢስታ ፓራቲካ ኣሾፔ ኣቲን ኣያና ጊዴቴና። ጎዳይ ባ ኩሼ ሚጪዛ ዎዴ ኢዛ ማዲዛዴይ ꬉጴታና፤ ማዴቲዛዴይካ ኩንዳና፤ ናምኣይካ ኢሲፌ ꬋያና።
ISA 31:4 ጎዳይ ታስ፥ «ጋሞይ ዎይኮ ዎዳላ ጋሞይ ሜሄ ኦይኪዲ ዳሮ ሄንꬃንቻቲ ጼይጌቲ ሺቂዲ ኢዛ ቦላ ዪኮ ኢስታ ዋሶይ ኢዛ ያሺሶንታይሳ ኢስታ ዋሶይ ኢዛ ዳጋንꬆንታይሳ ማላ ኡባፌ ዎልቃማ ጎዳይ ዙማ ቦላኔ ዙምቡላታ ቦላ ኦላስ ዎꬋና።
ISA 31:5 ካፎይ ቦላራ ኣላንꬂዛ ማላ ኡባፌ ዎልቃማ ጎዳይ ዬሩሳላሜ ካማና፥ ናጋናኔ ኣሻና፤ ኢዚ ቦላራ ኣꬊዲ ኢዞ ኣሻና» ጌስ።
ISA 31:6 ኢንቴኖ ኢስራኤሌ ኣሳዞ! ኢንቴ ኬሂፔ ማካሊዳይሳኮ ሲሚቴ።
ISA 31:7 ሄ ዎዴ ናጋራይ ኩሚዳ ኢንቴ ኩሼቲ ቢራፔኔ ዎርቃፌ ኦꬂዳ ኤቃ ጾሳታ ኢንቴ ኡባይካ ዎራ ዬጋና።
ISA 31:8 «ኣሶሬይ ኣሳ ማሻ ጊዶንታ ማሻን ሃይቃና፤ ኣሾ ማይኢዳዴ ማሻ ጊዶንታ ሃራ ማሻይ ኢዛ ማና፤ ኢዚ ጊꬃ ማሻ ሲንꬃፌ ባቃታና፤ ናቴꬃቲ ዶሳይ ባይንዳ ዎልቃꬆን ኦꬃና።
ISA 31:9 ሚኖ ሚጻይ ሺሮ ጋሶን ኩንዳና፤ ኦላ ጋዳዋቲካ ኦላ ባንዲራ ቤኢዲ ዳጋማን ኩማና» ጌስ ታማይ ጺዮኔን፥ ታማ ጮጬይ ዬሩሳላሜን ዲዛ ጎዳይ።
ISA 32:1 ቤኢቴ፥ ካዎይ ጺሎቴꬃን ካዎታና፤ ሃሪዛይቲካ ሱሬ ፒርዳን ሃራና።
ISA 32:2 ኣሲ ሁኤን ሁኤን ጫርኮፌ ጌሚዛሶሆ፥ ጎቴፔካ ባቃቲ ኣቲዛሶሆ ጊዳና፤ ባዞ ቢታን ሃꬃ ፑልቶ ማላ፥ ሳሜቲዳ ቢታን ዎጋ ዛላ ኩዋ ማላ ጊዳና።
ISA 32:3 ጼሊዛ ኣሳታ ኣይፌይ ሃይሳፌ ጉዬ ቂሊምኤና፤ ሲዪዛይታ ሃይꬂ ቤጊዲ ኤዝጋና።
ISA 32:4 ታፒታፒዛይታ ዎዚናይ ኤራናኔ ኣኬካና፤ ዴዶቲዛይታ ኢንጻርሲካ ቢርሼታና፤ ጌሺዲካ ሃሳያና።
ISA 32:5 ሃይሳፌ ጉዬን ኤያይ ጊታ ኣስ ጌቴቴና፤ ዎጋይ ባይንዳ ኣሲ ቦንቼቴና።
ISA 32:6 ኤያይ ኤያቴꬅ ሃሳዬስ፤ ኢዛ ዎዚናይ ኢታቴꬅ ዩሺ ቆፔስ፤ ጾሳስ ያሻቴꬂ ባይንዳ ሚሽ ኦꬄስ፤ ጎዳ ቦላ ባላ ቃላ ሃሳዬስ፤ ጋፊዳይሳስ ካꬅ ኢሜና፤ ሳሜቲዳይሳስ ሃꬅ ኢሜና።
ISA 32:7 ዎጋይ ባይንዳ ኣሳታ ሂላቴꬂ ኢታ፤ ሜቶታንቻታ ማጋናይ ሱሬ ጊዲኮካ ሂዬሳታ ዎርዶራ ꬋይሳናስ ኢታቴꬃን ዩሺ ቆፔስ።
ISA 32:8 ጊታ ኣሳስ ቆፋይካ ጊታ፤ ባ ጊታቴꬃ ኦሶን ሚኒ ዴኤስ።
ISA 32:9 ኢንቴኖ ኦቶሮይ ቱጪዳ ማጫሳቶ! ዴንዲቴ፤ ታ ጊዛዝ ሲዪቴ፤ ኢንቴኖ ባꬊ ጊ ኡቲዳ ማጫ ናይቶ! ታኒ ኢንቴስ ዮቲዛይሳ ኤዝጊቴ።
ISA 32:10 ላይꬃይ ቡሮ ኣꬊዳ ማላ፥ ኢንቴ ባꬊ ጊ ኡቲዳይቲ ኮኮራና፤ ዎይኔ ቱራይ ኣይፌ ኢሜና ዱማ ዱማ ኣይፌ ኢንቴ ሺሺዛ ዎዴይ ዬና።
ISA 32:11 ኢንቴኖ ኦቶሮይ ቱጪዳ ማጫሳቶ! ኮኮሪቴ። ኢንቴኖ ባꬊ ጊዳ ማጫ ናይቶ! ሂርጋን ጋጂጋጂቴ። ኢንቴ ማይኢዳ ማይኦ ቃሪ ዬጊቴ፤ ኢንቴ ጼሳን ማቃ ዳንጪቴ።
ISA 32:12 ኣራዳ ቢታ ጊሻስ ኢንቴ ቲራ ኢጪቴ፤ ኣይፊዛ ዎይኔ ሚꬃ ጊሻስ ጬጪቴ፤
ISA 32:13 ታ ዴራ ቢታ ጊሻስ፥ ኣጉንꬂኔ ኪንዲቾይ ሞኪዳ ቢታ ጊሻስ፥ ሆምቦጬꬃን ኢስታን ጉፒዛ ኬꬃታ ኡባ ጊሻስ፥ ሆምቦጬꬃን ኢዚን ጉፒዛ ካታማይስ ዬኪቴ።
ISA 32:14 ሚጻቲ ካይዛና፤ ዳሮ ሺሮቲዛ ካታማያ ዲሚ ጋና፤ ሚጻቲኔ ቃቶቲ ሜርናስ ጎንጎሎ፥ ሃርዲዳቲ ጉፒዛሶሆኔ ዉዴይ ሄሜቲዛሶ ጊዳና።
ISA 32:15 ሄሲካ ሃናናይ ኣያናይ ኑስ ቦላፌ ጉካናሼ፥ ባዞ ቢታይ ኣራዳ ጊዳናሼ፥ ኣራዳ ቢታይ ዎራ ሚሳታናሼ ጋካናሳ።
ISA 32:16 ሄሳፌ ጉዬ ባዞ ቢታን ሱሬ ፒርዳይ ዴኣና፤ ኣራዳ ቢታንካ ጺሎቴꬂ ዳና።
ISA 32:17 ጺሎቴꬃ ኣይፌይ ሳሮቴꬅ፤ ጺሎቴꬃ ኦሶይ ዎፓኔ ሜርናስ ኣማኔቴꬅ ጊዳና።
ISA 32:18 ታ ዴሬይ ሳሮይ ዲዛሶን፥ ኣማንꬂዛሶን፥ ዎፓይ ዲዛሶን ዎፑ ጊ ዳና።
ISA 32:19 ሻቺ ዎራ ኩራኪኮ፥ ካታማይካ ሙሌራ ኩንዲኮ፥
ISA 32:20 ሻፋይ ዲዛሶን ዲዛሶን ካꬅ ዜሪዛይቶ፥ ኢንቴ ቦራታኔ ሃሬታ ሂርጋይ ባይንዳ ሄሚዛይቶ፥ ኢንቴ ኣይ ማላ ኣንጄቲዳይታ ጊዳንዴቲ!
ISA 33:1 ኔስ ꬋዮንታ ዳሼ ሃራ ꬋይሲዛይሶ! ኔስ ኣዬ ኣና! ኔና ኣꬂ ኢሞንታ ዲሺን ሃራ ኣꬃ ኢሚዛይሶ! ኔስ ኣዬ ኣና! ኔኒ ꬋይሶ ኣጊዳ ዎዴ ኔ ꬋያና፤ ኔኒ ኣꬃ ኢሞ ኣጊዳ ዎዴ ኔና ኣꬂ ኢማና።
ISA 33:2 ኣቤት ጎዳዉ! ኑና ማራ፤ ኑኒ ኔና ሂዶታ ኦꬂዶስ፤ ማላዶ ማላዶ ኑስ ዎልቃ ጊዳ፤ ሜቶ ዎዴካ ኑና ኣሺዛዴ ጊዳ።
ISA 33:3 ኔ ጬንጉርሳይ ዳዳ ማላ ጉሚዛ ዎዴ ዴሬይ ባቃቴስ፤ ኔኒ ዴንዳ ኤቂዛ ዎዴ ካዎቴꬃቲ ላሌቴቴስ።
ISA 33:4 ካዎቴꬃቶ! ቦሌይ ሺቂዛ ማላ ኢንቴፌ ዲኤቲዳይሲ ሺቃና፤ ጉምባሮይ ጉፒዛ ማላ ኣሳይ ኢዛ ቦላ ዲርባታና።
ISA 33:5 ጎዳይ ቦላ ሳሎን ዴኢዛ ጊሻስ፥ ꬎቁ ꬎቁ ጊዴስ፤ ኢዚ ጺዮኖ ሱሬ ፒርዳኒኔ ጺሎቴꬃን ኩንꬃና።
ISA 33:6 ኢዚ ኔ ዲዛ ላይꬅ ኡባን ኣማንꬂዛ ዮች፥ ኣቶቴꬅ፥ ኣꬎ ኤራቴꬂኔ ኤራቴꬅ ጊዳና፤ ጎዳስ ያሻቴꬂ ሃይሳ ሃ ኣቆታታስ ቁልፔ ጊዳና።
ISA 33:7 ቤኢቴ፥ ኢስታ ጎባ ኣሳቲ ኦጌታን ዋሴቴስ፤ ሲጋቴꬃስ ኪቴቲዳይቲካ ጫሞ ዬሆ ዬኬቴስ።
ISA 33:8 ዎጋ ኦጌቲ ሳሚዳ፤ ኦጌራ ካንꬂዛይ ዴና። ቃቺዳ ቃላይ ላሌቲዴስ፤ ዞሪዛይቲ ካꬌቲዳ፤ ቦንቼቲዛይካ ዴና።
ISA 33:9 ቢታያ ዬካዱሲኔ ጊልቃዱስ፤ ሊባኖሴይ ዬላቲዲ ሹሊዴስ፤ ላሻሮኔይ ኣራቤ ማላ ባዞ ጊዳዱስ፤ ባሳኔይኔ ቃርሜሎሴይ ባንታ ሃይꬅ ቆቆፊዳ።
ISA 33:10 ጎዳይ ካዎቴꬃታሲ፥ «ሃኢ ታኒ ዴንዳና፤ ሃኢ ታኒ ቦንቼታና፤ ሃኢ ታኒ ꬎቁ ꬎቁ ጋና።
ISA 33:11 ኢንቴ ኡቱላ ሻሪዲ ሱላ ዬሊዴታ። ኢንቴ ሼምፒዛ ሼምፖይ ኢንቴና ሚዛ ታማ።
ISA 33:12 ዴሬይ ቦቂንታ ኬዚዛ ሹቻ ማላ ታማን ጹጌታና፤ ቃሴካ ኣጉንꬃ ቱሻ ማላ ታማን ኤጻና።
ISA 33:13 ኢንቴኖ ሃኮን ዴኢዛይቶ! ታኒ ኦꬂዳይሳ ሲዪቴ፤ ማታን ዲዛይቶ! ታ ዎልቃ ኤሪቴ» ጌስ።
ISA 33:14 ጺዮኔን ዲዛ ናጋራንቻቲ ዳጋሚዳ፤ ጾሲ ኢስታስ ባይንዳይቲ ባቢዲ፥ «ኑ ጋርሳፌ ጹጊዛ ታማራ ዳና ዳንዳይዛይ ኦኔ? ሜርና ታማራ ዳና ዳንዳይዛይ ኦኔ?» ጊዳ።
ISA 33:15 ጺሎቴꬃን ሄሜቲዛይ፥ ሱሬ ሃሳይዛይ፥ ባሌꬆን ቤቲዛ ዎꬌ ካꬊዛይ፥ ጉቦ ኤኬናፔ ባ ኩሼ ሺሺ ኤኪዛይ፥ ኣስ ዎꬋና ዙፔቲዛይታ ዞሬ ሲያናፔ ባ ሃይꬅ ቱጪዛይ፥ ኢታ ቤያናፔ ባ ኣይፌ ቂሊምኢዛይ፥
ISA 33:16 ሄሳዴይ ꬎቃሶሆን ዳና፤ ዙማ ሚጻይ ኢዛስ ሺቂ ኣቲዛሶ ጊዳና፤ ኢዛስ ቁማይ ኢሜታና፤ ሃꬂካ ኢዛስ ፓጬና።
ISA 33:17 ኔ ኣይፌቲ ካዎዛ ፑላቴꬅ ቤኣና፤ ሃኮን ሚጬቲ ዲዛ ቢታካ ቤኣና።
ISA 33:18 ቤኒ ዋዬይ ኔስ ቆፌቲሺን ኔኒ፥ «ዋና ሃላቃዚ ኣዋ ቢዴ? ጊራ ኤኪዛይሲ ኣዋ ቢዴ? ሻኮዛ ኣላፌዚ ኣዋን ዲዜ» ጋና።
ISA 33:19 ሄይታንቲ ቃꬌታይ ባይንዳ ኣሳ፤ ኢስታ ሃሳያይ ኣሳስ ጌሎንታይታኔ ኢስታ ኢንጻርሲ ዴዶቲዛይታ፤ ሃይሳፌ ጉዬ ኢንቴ ኢስታ ቤዬኬታ።
ISA 33:20 ኑ ባኣሌታ ኢዚን ቦንቺዛ ጺዮኔ ካታማዮ ቤኢቴ! ሳሮን ዲዛሶሆዮ፥ ቃጾንታ ዱንካኔ ጊዲዳሮ፥ ኢዚ ቶሌይ ሾዴቶንታሮ፥ ኢዚ ዎዶሮታፔ ኢሲናካ ዱጾንታሮ ዬሩሳላሜ ካታማዮ ኔ ኣይፌይ ቤኣና።
ISA 33:21 ሄን ጎዳይ ኑስ ዎልቃ ጊዳና፤ ሄ ሶሆይ ዳልጋ ሻፋኔ ካንቼ ጊዳና፤ ዎጎሎይ ኢዛ ቦላራ ባናስ ዳንዳዬና፤ ጊታ ማርካቤቲካ ኢዛ ቦላራ ቤቴና።
ISA 33:22 ጎዳይ ኑስ ፒርዲዛ ዳና፤ ጎዳይ ኑስ ዎጋ ኢሚዛዴ፤ ጎዳይ ኑስ ካዎ፤ ኑና ኣሻናይካ ኢዛ።
ISA 33:23 ኔ ቶሌ ዎዶሮይ ሌፒዴስ፤ ቱሳይ ሚኒ ኤቂቤና፤ ሻራዚ ቶሌቲቤና፤ ሄ ዎዴ ዲኤቲዳ ጊታ ሚሺ ጊሼታና፤ ዎቤይካ ኣቶንታ ዲኦ ኤካና።
ISA 33:24 ጺዮኔን ዲሼ፥ «ታ ሳኬታዲስ» ጋና ኣሲ ዴና፤ ሄን ዴኢዛ ኣሳታ ናጋራይ ኣቶ ጌቴታና።
ISA 34:1 ኢንቴኖ ካዎቴꬃቶ ሺቂዲ ሲዪቴ! ኔኒ ዴሬዚ ኣኬካ! ቢታይኔ ቢታን ዲዛ ኡባይ፥ ኣላሜይኔ ኣላሜፔ ዪዳ ኡባይ ሲዮ!
ISA 34:2 ጎዳይ ካዎቴꬅ ኡባ ሃንቄቲዴስ፤ ኢዛ ሃንቆይካ ኢዛ ኦላንቻታ ኡባ ቦላና። ኢዚ ኢስታ ሙሌራ ꬋይሳና፤ ሹካስካ ኣꬂ ኢማና።
ISA 34:3 ኢስታፌ ሃይቂዳይቲ ካሬ ኦሌታና፤ ኢስታ ኣሃይ ጺንቃና። ዙማቲ ሱꬅ ጻላ ጊዳና።
ISA 34:4 ሳሎ ጾሊንቴቲ ኡባይ ሴራና፤ ሳሎይ ጋልባ ማላ ጻጼታና፤ ጮራ ጾሊንቴቲ ኡባይ ሹሊዲ ቆቆፌቲዛ ዎይኔ ሃይꬃ ማላኔ ሜሊዲ ሳኣን ዎꬊዛ ባላሴ ሃይꬃ ማላ ጊዳና።
ISA 34:5 ታ ጊꬃ ማሻይ ሳሎታ ጊዶን ባስ ጊዳና ጋካናስ ኡያዱስ፤ ቤኢቴ፤ ኤዶሜ ቦላ፥ ታኒ ቃንጊዳ ኣሳ ቦላ ፒርዳናስ ዎꬋዱስ።
ISA 34:6 ጎዳ ጊꬃ ማሻይ ሱꬅ ማይኣዱስ፤ ሞꬎካ ካላዱስ፤ ዶርሳ ላቃ ሱꬃኒኔ ዴይሻ ሱꬃን ጎዜታዱስ፤ ꬋርሾ ኪላሆ ሞꬌን ጎዜታዱስ፤ ጎዳይ ቦጺራ ካታማን ያርሾ፥ ኤዶሜን ዎልቃማ ሹካ ጊግሲዳ ጊሻሳ።
ISA 34:7 ቃሴ ኢስታራ ሜንꬂ፥ ኮርማይ ዎፋኖራ ኢሲፌ ኩንዳና፤ ቢታያ ሱꬃን ጫጳና፤ ኢስታ ቢታይ ሞꬎን ኣራዳና።
ISA 34:8 ሄሲካ ጎዳይ ሃሎ ኬሲዛ ጋላሲኔ ጺዮኔ ጊሻስ ሞርኬታ ኦሊዛ ላይꬅ ጊዳና።
ISA 34:9 ኤዶሜ ካንቼቲ ሺዳ ጊዳና፤ ኢዚ ቢታይ ጹጌቲዛ ዲኔ ጊዳና፤ ኢዚ ቢታይ ሺዳ ማላ ኤጻና።
ISA 34:10 ኢዞ ሚዛ ታማይ ቃማኔ ጋላስ ቶኤና፤ ጩዋይካ ሜርናስ ቱሉ ጋና፤ ዬሌታፔ ዬሌታ ጋካናስ ካይስ ጊዳና። ኦኒካ ናምኣንꬆ ሄራ ኣꬌና።
ISA 34:11 ጺሎይኔ ቁጻርሲ ኢዞ ላታና፤ ጉቶይኔ ቁሮይ ኢዚን ኬꬅ ኬጻና፤ ጾሲ ኤዶሜ ቦላ ኢዞ ላላና ዎዶሮኔ ኢዞ ꬋይሳና ቱምቤ ዬዳና።
ISA 34:12 ኢዚ ዳናቲ ካዎ ጌቴቲ ጼይጌታናስ ዳንዳይዛ ሚሺ ዴና፤ ኢዚ ሃላቃቲ ሙሌራ ፒቴቲ ꬋያና።
ISA 34:13 ጊምቤቲ ዩዪዳ ካታማታ፥ ኢዚ ሚጻታ ዶዮይኔ ኦካይ ላታና፤ ዎራካናታ ኦላኔ ጉቶታ ዱሳሶ ጊዳና።
ISA 34:14 ባዞ ዶኣቲ ጎዳሬታራ ኢሲፌ ዳና፤ ባዞ ዴይሽ ሚሳቲዛ ዳይዳንꬃቲ ባንታ ጊዶን ጼይጌታና፤ ኦማርሳ ሜꬌታቲ ሄን ሼምፓና፤ ባንታስ ዱሳሶ ሄን ዴማና።
ISA 34:15 ጉቶይ ሄ ኬꬃን ጱጱሌታ ዬጋና፤ ዛራዳካ ጱቂሳና፤ ባ ጪዬታካ ሃጳና፤ ዎሌቲ ዋꬃን ዋꬃን ሄን ሺቃና።
ISA 34:16 ጎዳ ማጻፋን ጼሊቴ፤ ናባቢቴ። ሃይታፔ ኢሶይካ ፓጬና፤ ኢሶይ ኢሶይ ባስ ዋꬃ ላጌ ꬋዬና፤ ሃይሲ ሃ ኣዛዞዚ ኢዛ ዶናፔ ኬዚዴስ፤ ኢዛ ኣያናይ ኢስታ ኢሲ ቦላ ሺሻና።
ISA 34:17 ኢስታ ጊሻ ጊሻ ኢስታስ ዎꬃና፤ ኢዛ ኩሼይ ሜዛኔን ሜዛኔን ጊሻና፤ ኢዛ ሜርናስ ኢስታስ ጊዳና፤ ዬሌታፔ ዬሌታ ጋካናስ ኢስቲ ኢዚን ዴኣና።
ISA 35:1 ባዞይኔ ሜላ ቢታይ ኡፋዬታና፤ ኣይኮይ ባይንዳ ባዞይ ኡፋዬታና፤ ጪሻ ማላካ ጪያና።
ISA 35:2 ኢዚ ዳሮ ኡፋዬታናኔ ሚጫና፤ ሊባኖሴ ቦንቾይ ኢዛስ ኢሜታና፤ ቃርሜሎሴኔ ላሻሮኔ ቴማ ኢዚ ማይኣና፤ ኑ ጎዳ ቦንቾኔ ጾሳ ጊታቴꬃ ኢስቲ ቤኣና።
ISA 35:3 ዳቡርዳ ቄሴታ ሚንꬂቴ፤ ኣርጋጪዳ ጉልባታታ ሚንꬂቴ።
ISA 35:4 ዎዚናን ያሻይ ዲዛይታ «ሚኒቴ! ያዮፍቴ! ኢንቴ ጾሲ ዪዲ ሃሎ ኬሳና፤ ኢዚ ኢንቴና ኣሻናሲኔ ሃሎ ኬሳናስ ያና» ጊቴ።
ISA 35:5 ሄ ዎዴ ቆቄታ ኣይፌይ ጼላና፤ ቱሌታ ሃይꬂ ሲያና።
ISA 35:6 ዎቤይ ጌኔሳ ማላ ጉፓና፤ ዱዴ ዶናይ ኡፋይሳን ዬጻና፤ ባዞፌ ሃꬂ ኬዛና፤ ፑልቶይ ባዞ ቢታፌ ፑልታና።
ISA 35:7 ጹጊዛ ቢታን ኤሌ ሃꬂ ኩማና፤ ሜላ ቢታቲ ሃꬅ ፑልታና፤ ዎራካናቲ ኣቂዛ ኦላን ማታይ፥ ማቃይኔ ሻጫይ ሞካና።
ISA 35:8 ሄን ዎጋ ኦጌይ ኦሴታና፤ ኢዚካ፥ «ጌሻቴꬃ ኦጌ» ጌቴታና። ቱናቲ ሄ ኦጌራ ቤቴና፤ ኦጌዚ ሄ ኦጌራ ቢዛይታስ ጻላ ጊዳና፤ ጌላቲ ሄ ኦጋራ ባና ዳንዳዬቴና።
ISA 35:9 ሄን ጋሞይ ዴኤና፤ ዳፊ ሚዛ ዶኣይካ ኢዛን ኬዜና፤ ሄይታንቲ ሄን ቤቴቴና፤ ዎዜቲዳይቲ ጻላ ሄራ ባና።
ISA 35:10 ጎዳይ ማዲዳይቲ ሲማና፤ ኢስቲ ዬጺሼ ጺዮኔ ጌላና፤ ሜርና ኡፋይሳ ካላቻ ማላ ጎጻና፤ ኢንጄኔ ኡፋይስ ዴማና፤ ጬጬይኔ ካዮይ ሄፔ ባቃታና።
ISA 36:1 ካዎ ሂዝቂያሲ ካዎቲዳ ታማኔ ኦይዳንꬆ ላይꬃን፥ ኣሶሬ ካዎ ሴናኪሬሜይ ጊምቤቲዳ ዩሁዳ ካታማታ ኡባ ኦሊ ኦይኪዴስ።
ISA 36:2 ኣሶሬ ካዎይ ላኪሼ ጌቴቲዛ ካታማፔ ኦላ ጋዳዋ ጮራ ኦላንቻታራ ካዎ ሂዝቂያሳኮ ዬሩሳላሜ ዬዲዴስ። ኦላ ጋዳዋዚ ማይኦ ሜጪዛዴዛ ጋዴኮ ኤፊዛ ኦጌፔ ቆሞ ባጋራ ዲዛ ኤሌ ሃꬃኮ ኢዛ ዛራ ላንቄን ኤቂዴስ።
ISA 36:3 ካዎ ኬꬅ ኣይሲዛ ኪልቂያሳ ና ኤልያቄሜይ፥ ጻፌዚ ሼቢናይኔ ታሪኬ ጻፌዚ ኣሳፌ ና ዮኣሂ ኢዛኮ ካሬ ኬዚዳ።
ISA 36:4 ኦላ ጋዳዋዚ ኢስታስ፥ «ሂዝቂያሳሲ፥ ‹ዎልቃማ ኣሶሬ ካዎ፥ ኔኒ ሃይሳ ማላ ኔ ኣማኔቲዳይ ኣዛኔ?
ISA 36:5 ኔኒ ኦላ ኤራቴꬂኔ ሚኖ ኦላንቻቲ ታስ ዴቴስ ጋሳ፤ ጊዶ ኣቲን ኔኒ ጎኣይ ባይንዳ ቃላ ጻላ ሃሳያሳ፤ ሂስቲን ኔ ኦናን ኣማኔታዳ ታ ቦላ ማካላይ?
ISA 36:6 ሄኮ ኔኒ ኣሲ ኢዛ ኦይኪ ዳርቲን ሜቂዲ ማዱንꬂዛ ማቃ ሚሳቲዛ ጊብጼን ኣማኔታዳሳ፤ ጊብጼ ካዎ ፓሮኔይካ ኢዛን ኣማኔቲዛ ኡባስ ሄሳ ማላ።›
ISA 36:7 «ኔኒ ታስ፥ ‹ኑኒ ጎዳን፥ ኑ ጾሳን ኣማኔቶስ› ጊኮ፥ ኢዛስ ጎይኒዛ ꬎቃሶሆታኔ ያርሾሶሆታ ሂዝቂያሲ ላሊዲ ዩሁዳ ኣሳኔ ዬሩሳላሜ ኣሳ፥ ‹ኢንቴ ጎይናናስ ቤሲዛይ ሃይሳ ማላ ኢሲ ያርሾሶን ጻላ ጊዳናስ ቤሴስ› ጊቤኔ?
ISA 36:8 «ኣኔ ሃኢ ሃ ያዳ ታ ጎዳ ኣሶሬ ካዎራ ጊጋና ማላ ሃሳያ፤ ኔስ ቶጋ ዳንዳይዛ ኣሳቲ ዲኮ 2,000 ፓራታ ታኒ ኔስ ኢማና።
ISA 36:9 ኔኒ ጊብጼ ፓራ-ጋሬታኒኔ ቶጋንቻታን ኣማኔቲዛ ጊዲኮ ታ ጎዳ ኦላንቻታፔ ኢሲ ላፋ ቡቴዛ ኔ ዎስታ ዛራኔ?
ISA 36:10 ቃሴ ሃይሳ ቢታ ꬋይሳናስ ጎዳ ኣዛዞይ ባይንዳ ታ ዪዳ ኔስ ሚሳቲዜ? ጎዳይ ባ ሁኤራ ሃይሳ ዴራ ታኒ ኦላ ꬋይሳና ማላ ታስ ዮቲዴስ» ጊዴስ።
ISA 36:11 ኤልያቄሜይ፥ ሼቢናይኔ ዮኣሂ ኦላ ጋዳዋዛ፥ «ኑ ኤሪዛ ኣራሜ ቃላራ ኑስ ኔ ኣይሌታስ ዮታ፤ ጊምቤዛ ቦላ ዲዛ ዴሬዚ ኤሪዛ፥ ኢብራዌታ ቃላን ኑስ ዮቶፓ» ጊዳ።
ISA 36:12 ጊዶ ኣቲን ኦላ ጋዳዋዚ ዛሪዲ፥ «ታ ጎዳይ ታና ኪቲ ዬዲዳይ ሃይታ ሃ ዮኦታ ኔ ጎዳሲኔ ኔስ ጻላ ዮታናሴ? ኢንቴ ማላ ባንታ ሺያ ማናሲኔ ባንታ ሼሽ ኡያናስ ጊምቤ ቦላ ኡቲዳ ኣሳሳራ ዮታና ማላ ጊዴኔ?» ጊዴስ።
ISA 36:13 ሄሳፌ ጉዬ ኦላ ጋዳዋዚ ኢብራዌታ ቃላራ ባ ቃላ ꬎቁ ሂስቲዲ፥ «ዎጋ ዎልቃማ ኣሶሬ ካዎ ቃላ ሲዪቴ!
ISA 36:14 ካዎዚ፥ ‹ሂዝቂያሲ ኢንቴና ጪሞፎ፤ ኢዚ ኢንቴና ኣሻና ዳንዳዬና።
ISA 36:15 ጎዳይ ቱማ ኑና ኣሻና፤ ሃ ካታማያካ ኣሶሬ ካዎስ ኢሜቱኩ› ጊዲ ኢንቴ ጎዳን ኣማኔታና ማላ ኦꬆፎ» ጊዴስ።
ISA 36:16 «ሂዝቂያሲ ጊዛይሳ ሲዮፒቴ። ኣሶሬ ካዎይ ኢንቴና፥ ‹ታናራ ሲጌቲቴ፤ ሃ ታኮ ኬዚቴ። ሄሳፌ ጉዬ ኢንቴ ኡባይካ ኢንቴ ዎይኔፔኔ ኢንቴ ባላሴፔ ማንዴታ፤ ኢንቴ ቦኪዳ ኦላፌ ሃꬅ ኡያንዴታ።
ISA 36:17 ሄሳ ኢንቴ ሃናናይ ታኒ ያዳ ኢንቴና ኢንቴ ቢታ ሚሳቲዛ ዴሬ ዴንꬃ ኤፋና ጋካናሳ። ሄ ቢታይ ካꬂኔ ዎይኔ ኡሺ፥ ካꬃ ቢታኔ ዎይኔ ኣታኪልቴይ ኩሚዳ ቢታ› ጌስ።
ISA 36:18 «ሂዝቂያሲ፥ ‹ጎዳይ ኑና ኣሻና› ጊዲ ኢንቴና ጪሞፎ። ሃኖ ጋካናስ ካዎቴꬃታ ጾሳታፔ ባ ዴራ ኣሶሬ ካዎ ኩሼፔ ኣሺዳ ጾሲ ዲዜ?
ISA 36:19 ሃማቴ ጾሳቲኔ ኣርፋዴ ጾሳቲ ኣዋን ዲዞ? ሴፋርዋይሜ ጾሳቲ ኣዋን ዲዞ? ሃይቲ ሳማሪያ ታ ኩሼፔ ኣሺዶ?
ISA 36:20 ሃይታ ሃ ዴሬታ ጾሳታ ኡባፌ ባ ዴራ ታ ኩሼፔ ኣሻና ዳንዳይዳይ ኣዋይሴ? ሂስቲን ጎዳይ ዬሩሳላሜ ታ ኩሼፔ ዎስቲ ኣሻና ዳንዳይዜ?» ጊዴስ።
ISA 36:21 ጊዶ ኣቲን ካዎዚ ኢስታስ፥ «ኢዛስ ኣይኮካ ዛሮፒቴ» ጊ ኣዛዚዳ ጊሻስ ኣሳይ ኢሲ ቃላካ ቃቶንታ ጮኡ ጊዴስ።
ISA 36:22 ሄሳፌ ጉዬ ካዎ ኬꬅ ኣይሲዛ ኪልቂያሳ ና ኤልያቄሜይ፥ ጻፌ ሼቢናይኔ ታሪኬ ጻፌዚ ኣሳፌ ና ዮኣሂ ባንታ ማይኦ ዳኪዲ ሂዝቂያሳኮ ቢዳ፤ ሂስቲዲ ኣሶሬታ ኦላ ጋዳዋይ ጊዳይሳ ኡባ ኢዛስ ዮቲዳ።
ISA 37:1 ካዎ ሂዝቂያሲ ሄሳ ሲዪዳ ማላ ባ ማይኦ ዳኪዴስ፤ ሄሳፌ ጉዬ ማቃ ማይኢዲ ጎዳ ኬꬅ ጌሊዴስ።
ISA 37:2 ካዎ ኬꬅ ኣይሲዛ ኤልያቄሜይ፥ ጻፌ ሼቢናይኔ ቄሴታፔ ኤሬቲዳይቲ ኡባይ ማቃ ማይኢዲ ኣሞጼ ና ናቤ ኢሳያሳኮ ባና ማላ ኪቲዴስ።
ISA 37:3 ኢስቲካ ኢሳያሳስ ቢዲ፥ «ሂዝቂያሲ፥ ‹ሃ ጋላሳይ ጬጬ፥ ቂጻቴኔ ካዉሻቴꬃ ጋላሳ፤ ሄሲካ ናይ ዬሌታና ሃኒሺን ኣቤይ ኢጺዛ ጋላሳ ማላ ጊዲዴስ።
ISA 37:4 ዴኦ ጾሳ ጫያና ማላ ኢዛ ጎዳ ኣሶሬ ካዎይ ኪቲዳ ኦላ ጋዳዋ ቃላ ጎዳ ኔ ጾሳይ ሲዮንታ ኣጌና። ቃሴ ጎዳ ኔ ጾሳይ ሄ ሲዪዳ ቃላ ጋሶን ኢዛ ቃጻዮንታ ኣጌና። ሄሳ ጊሻስ ኔኒ ሼምፖራ ፓጻ ኣቲዳ ጫሻታ ጊሻስ ዎሳ› ጌስ» ጊዳ።
ISA 37:5 ካዎ ሂዝቂያሲ ኪቲዳይቲ ኢሳያሳኮ ዪዳ ዎዴ፥
ISA 37:6 ኢሳያሲ ኢስታስ ዛሪዲ፥ «ኢንቴ ጎዳሲ ቢዲ፥ ‹ጎዳይ ኔና፥ ኣሶሬ ካዎ ኣሽካራቲ ታና ጫዪሺን ኔኒ ሲዪዳ ጫሻ ቃላስ ሂርጎፋ።
ISA 37:7 ቤያ፥ ታ ኢዛ ቦላ ኣያና ኪታና፤ ኢዚ ዎሬ ሲዪዲ ባ ዴሬ ሲሚ ባና፤ ሄን ባ ዴሬን ማሻን ሃይቃና ማላ ታ ኦꬃና› ጊቴ» ጊዴስ።
ISA 37:8 ኣሶሬ ካዎይ ላኪሼ ካታማፔ ዴንዲ ቢዳይሳ ኦላ ጋዳዋዚ ሲዪዲ ጉዬ ሲሚዴስ። ሂስቲዲ ካዎዚ ሊቢና ካታማ ኦሊሺን ዴሚዴስ።
ISA 37:9 ካዎ ሴናኪሬሜይ፥ ቶጵያ ካዎ ቲራቄይ ኢዛ ኦላና ዪዛይሳ ሲዪዴስ፤ ሄሳ ሲዪዳ ማላ ሂዝቂያሳስ ኪታ ዬዲዲ፥
ISA 37:10 «ዩሁዳ ካዎ ሂዝቂያሳስ፥ ‹ዬሩሳላሜይ ኣሶሬ ካዎ ኩሼን ጌሌና› ጊን ኔ ኣማኔቲዳ ጾሲ ኔና ጪሞፎ።
ISA 37:11 ሄኮ ኣሶሬ ካዎቲ ቢታ ኡባ ቦላ ኢስቲ ኦꬂዳይሳኔ ሙሌራ ኢስታ ꬋይሲዳይሳ ኔ ሲያዳሳ። ሂስቲን ኔ ኬሳ ኤካ ኣታና ሚሳቲዜ?
ISA 37:12 ካሴ ታ ኣዋቲ ꬋይሲዳ ጎዛኔን፥ ካራኔኒኔ ኤራፌሴን ሄሳꬆካ ታላሳሬን ዴኢዛ ኤዴኔ ኣሳ ኢስታ ጾሳቲ ሄ ቢታታ ኣሺዶ?
ISA 37:13 ሃማቴ ካዎይ፥ ኣርፋዴ ካዎይ፥ ሴፋርዋይሜ ካዎይ፥ ሄና ካዎይኔ ኢዋ ካዎይ ኣዋን ዲዞ?» ጊዴስ።
ISA 37:14 ሂዝቂያሲ ዳብዳቤዛ ኪቴቲዳ ኣሳታፔ ኤኪዲ ናባቢዴስ። ጎዳ ኬꬅ ኤኪ ኤፊዲ ጎዳ ሲንꬃን ሚጪዴስ።
ISA 37:15 ሂስቲዲ ጎዳ ዎሲሼ፥
ISA 37:16 «ኣቤት ጎዳዉ፥ ኡባፌ ዎልቃማ ጾሳዉ፥ ኪሩቤታፔ ጊዶን ኡቲዛ ኢስራኤሌ ጾሳዉ፥ ሳኣ ካዎቴꬃታ ኡባ ቦላ ኔ ጻላ ጾሳ። ሳሎኔ ሳኣ ኔኒ ሜꬋዳሳ።
ISA 37:17 ኣቤት ጎዳዉ፥ ኔ ሃይꬅ ሃ ዬጋዳ ኤዝጋ። ኣቤት ጎዳዉ፥ ኔ ኣይፌ ፖጋዳ ሃ ጼላ። ኔና ዴኦ ጾሳ ጫያናስ ሴናኪሬሜይ ኪቲዳ ቃላ ሲያ።
ISA 37:18 «ኣቤት ጎዳዉ ቱማካ፥ ኣሶሬ ካዎቲ ሃ ካዎቴꬃታኔ ኢስታ ቢታ ኡባ ባዞ ኬሲዳ።
ISA 37:19 ኢስታ ጾሳታ ታማን ጹጊዳ፤ ኢስታ ጾሳቲ ዎኒካ ሚꬃፌኔ ሹቻፌ ኣሳ ኩሼን ማሴቲ ኬዚዳ ሚስሌፔ ኣቲን ጾሳታ ጊዴቴና።
ISA 37:20 ሃኢካ ኣቤት ጎዳዉ፥ ኑ ጾሳዉ ኔኒ ጎዳይ ጻላ ጾሳ ጊዲዳይሳ ሳኣ ካዎቴꬃቲ ኡባይ ኤራና ማላ ኑና ኢዛ ኩሼፔ ኣሻ!» ጊ ዎሲዴስ።
ISA 37:21 ሄሳፌ ጉዬ ኣሞጼ ና ኢሳያሲ ካዎ ሂዝቂያሳሲ፥ «ጎዳይ ኢስራኤሌ ጾሳይ፥ ‹ኔኒ ኣሶሬ ካዎ ሴናኪሬሜይ ማንዲዳ ማንዴꬃ ጊሻስ ዎሲዳ ዎሳ ታ ሲያዲስ› ጌስ።
ISA 37:22 «ጎዳይ ሴናኪሬሜ ጊሻስ ዮቲዳ ቃላይ፥ «ጌላኦያ ጺዮኔ ናያ ኔና ካꬋዱሲኔ ሌቃዱስ። ዬሩሳላሜ ናያ ኔ ባቃቲሺን ቤኣዳ ባ ቆꬌ ቃꬃዱስ።
ISA 37:23 ኔ ኦና ጫያይኔ ካዉሻይ? ኦና ቦላ ኔ ቃላ ꬎቁ ሂስታ ሃሳያይ? ኦቶሮ ኣይፌን ኦና ጼላይ? ኢስራኤሌ ጌሻ ቦላ ጊዴኔ!
ISA 37:24 ኔኒ ኪቲዳ ኣሳታ ባጋራ ጎዳ ቦላ ዳሮ ጫሻ ቃላ ሃሳያዳሳ። ቃሴካ፥ ‹ታኒ ጮራ ፓራ-ጋሬታን ዙማታ ካራ፥ ሊባኖሴ ሁኤ ኬዛዲስ። ሂስታዳ ኣዱሳ ዚጋታኔ ኡባፌ ሎኢዛ ጺዳታ ቃንጻዲስ። ታኒ ኬሂ ꬎቃሶሆታኒኔ ኬሂ ካይሺዛ ዎራን ጋካዲስ።
ISA 37:25 ታኒ ኣላጋ ቢታታን ሃꬃ ኦላታ ቦካዲስ፥ ኢስታፌካ ሃꬅ ኡያዲስ። ጊብጼ ቢታን ዲዛ ፑልቶ ሃꬃታ ኡባ ታ ቶሆን ዬꬋ ሜሊሳዲስ› ጋዳሳ።
ISA 37:26 «ታኒ ዳሮ ዎዴፔ ካሴ ቃቺዳይሳ፥ ታ ቤኒ ሃልቺዳይሳ ኔ ሲያቤኪ? ሃኢ ጊዲኮ ፖሌታና ማላ ኦꬃዲስ፤ ኔኒካ ጊምቤቲዳ ካታማታ ላላዳ ሹቻ ዶሬ ኬሳና።
ISA 37:27 ኢስታ ዴራስ ዎልቃይ ኢጺዴስ፤ ኢስቲካ ዳጋሚዳኔ ካዉዪዳ። ኢስቲ ጋዴን ዲዛ ዶዛታ ማላ፥ ሙልኦ ጫሬቻታ ማላ፥ ኬꬃ ካራን ሞኪዳ ማታ ማላኔ ኬሶንታ ቆይዳ ካꬃ ማላ ጊዲዳ።
ISA 37:28 «ጊዶ ኣቲን ኔኒ ኡቲዛሶ፥ ኔ ኣይዴ ያዳ ኣይዴ ባናኮ፥ ኔ ታ ቦላ ዋና ሃንቆን ዴንዳናኮ ታ ኤራይስ።
ISA 37:29 ኔኒ ታ ቦላ ሃንቆን ዴንዴቲዳ ጊሻሲኔ፥ ኔ ሃላጪዛይሲ ታ ሃይꬃን ዎꬊዳ ጊሻስ፥ ታኒ ኔ ሲꬌን ዳፎ ኣꬃና፤ ኔ ዶናንካ ቢጻላ ባርሳና፤ ኔ ዪዳ ኦጌራካ ታ ኔና ጉዬ ዛራ ዬዳና» ጊዴስ።
ISA 37:30 «ሄሳፌ ጉዬ ኢሳያሲ ካዎ ሂዝቂያሳስ፥ ሃይሲ ኔስ ማላታ ጊዶ፤ ሃ ላይꬅ ኢንቴ ኣዛባ ሞኪዳ ካꬅ ማና፤ ዪዛ ላይꬂካ ኣዛባፌ ዎꬊ ሞኪዳዝ ማና። ጊዶ ኣቲን ሄꬓንꬆ ላይꬅ ኢንቴ ዜራናኔ ማጻና፤ ዎይኔ ቶካናኔ ኢዛ ኣይፌካ ሺሻና።
ISA 37:31 ዩሁዳፔ ኣቲዳ ጫሻቲ ጻጶ ዱጌ ዬዲዲ ቦላን ኣይፌ ኣይፋና።
ISA 37:32 ኣቲዳ ጫሻቲ ዬሩሳላሜፔ፥ ሼምፖራ ፓጻ ኣቲዳይቲ ጺዮኔፔ ኬዛና። ኡባፌ ዎልቃማ ጎዳ ዚልኤቴꬂ ሄሳ ኦꬃና።
ISA 37:33 «ኣሶሬ ካዎ ጊሻስ ጎዳይ፥ ‹ኣሶሬ ካዎይ ሃ ካታማ ጌሌና፤ ኢዚ ቦላ ባ ዎንዳፌ ዱኬና፤ ኢዚ ቦላ ባ ጎንዳሌ ኦይኪዲ ዬና፤ ቃሴ ካታማ ዩሾን ቢታ ዶሬን ጎርዴና።
ISA 37:34 ባ ዪዳ ኦጌራ ጉዬ ሲማና፤ ኢዚ ሃ ካታማዮ ጌሌና› ጌስ።
ISA 37:35 ታኒ ታ ቦንቾ ጊሻሲኔ ታ ኣሽካራ ዳዊቴ ጊሻስ፥ ሃ ካታማዮ ካማ ኣሻና» ጊዴስ።
ISA 37:36 ሄ ጋላሳ ኦማርሲ ጎዳ ኪታንቻይ ኬኢዲ፥ ኣሶሬ ኣሳይ ዱንካኒ ዲዛሶን፥ 185,000 ኣቱማሳታ ዎꬊዴስ። ሂስቲን ኣሳይ ማላዶ ሱሪዲ ቤኢዛ ዎዴ ሃይቂዳ ኣሳ ኣሃይ ሄን ኩሚዴስ።
ISA 37:37 ሄሳ ጊሻስ ኣሶሬ ካዎ ሴናኪሬሜይ ኬሲ ኤኪዴስ፤ ጉዬ ሲሚ ቢዲካ ናናዌ ካታማን ኡቲዴስ።
ISA 37:38 ሳናኪሬሚ ባ ጾሳ ኒስራኬ ኬꬃን ጎይኒሼ ዴኢሺን፥ ኢዛ ናይቲ ኣዲራሜሌኬይኔ ሳርሳሬይ ማሻን ኢዛ ዎꬊዳ። ሂስቲዲ ኣራራቴ ቢታ ባቃቲዳ። ኢዛ ና ኣሴራዶኔይ ኢዛሶሆን ካዎቲዴስ።
ISA 38:1 ሄ ዎዴ ካዎ ሂዝቂያሲ ሃርጊዲ፥ ሃይቃና ማቲዴስ። ሂስቲን ኣሞጼ ና ናቤ ኢሳያሲ ኢዛኮ ቢዲ፥ «ጎዳይ ኔና፥ ‹ኔኒ ሃይቃናፔ ኣቲን ሃርጌዛፔ ፓጻካ፤ ሄሳ ጊሻስ ኔ ኬꬃ ጊጊሳ› ጌስ» ጊዴስ።
ISA 38:2 ሂስቲን ሂዝቂያሲ ኬꬃ ጎዳኮ ሲሚዲ ጎዳ ዎሲዴስ።
ISA 38:3 ዎሲሼ፥ «ኣቤት ጎዳዉ፥ ታኒ ኔ ሲንꬃን ኣማኔቴꬃኒኔ ኩሜꬃ ዎዚናፔ ኔና ኡፋይሲዛ ሚሽ ኦꬃሼ ታ ዋና ዴኢዳኮ ኔኒ ኣኬካና ማላ ታኒ ኔና ዎሳይስ» ጊ ዎሲዴስ፤ ሂዝቂያሲካ ኬሂ ጫሞ ዬሆ ዬኪዴስ።
ISA 38:4 ሄሳፌ ጉዬ ጎዳ ቃላይ ኢሳያሳኮ ዪዴስ።
ISA 38:5 ሂስቲዲ፥ «ኔኒ ባዳ ሂዝቂያሳ፥ ‹ጎዳይ ኔ ኣዋ ዳዊቴ ጾሳይ፥ ታኒ ኔ ዎሳ ሲያዲስ፤ ኔ ኣፉንꬃካ ቤኣዲስ። ኔ ላይꬃ ቦላ ታኒ ኔስ ታማኔ ኢቻሹ ላይꬅ ጉጃና።
ISA 38:6 ኔናኔ ሃ ካታማዮ ኣሶሬ ቢታ ካዎዛ ኩሼፔ ኣሻና፤ ታኒ ሃ ካታማይ ቦላ ዪዛይሳ ቴቃና› ጌስ» ጊዴስ።
ISA 38:7 ኢሳያሲ ጉጂዲካ፥ «ጎዳይ ኔስ ጊዳ ቃላ ፖላናይሳስ ማላታይ ሃይሳፌ ካሊዛይሳ፤
ISA 38:8 ቤያ፥ ኣካዜይ ፑዴ ኬኣናስ ጊግሲዳ ኬቻታ ቦላ ዎꬊዛ ኣዋ ኩዋይ ታሙ ኬች ጉዬ ሲሚ ባና ማላ ታኒ ኦꬃና» ጊዴስ። ሂስቲን ኩዋይ ታሙ ኬች ጉዬ ሲሚዲ ቢዴስ።
ISA 38:9 ዩሁዳ ካዎ ሂዝቂያሲ ሃርጊ ፓጺዳፔ ጉዬን ጻፊዳ ቃላይ ሃይሳፌ ካሊዛይሳ፤
ISA 38:10 ታኒ፥ «ታ ዴኦ ላይꬃስ ቡሮን ባጋ ጋኪዛ ዎዴ፥ ሃይቆ ፔንጌራ ጌላና ቤሲዜ? ታስ ኣቲዳ ላይꬃይ ታፔ ቦንቄታናስ ቤሲዜ?» ጋዲስ።
ISA 38:11 ቃሴካ፥ «ታኒ ሼምፖራ ፓጻ ዴኢዛይታ ቢታን ኔና ጎዳ ዛራ ቤኢኬ፤ ሃይሳፌ ጉዬን ታ ኣሳ ዜሬꬅ ቤኢኬ፤ ሃ ሳኣን ዴኢዛይታ ጊዶንካ ዴኢኬ።
ISA 38:12 ታ ኬꬂ ሄንꬃንቻታ ዱንካኔ ማላ ሾዴቲዴስ፤ ታፔካ ኤኬቲዴስ፤ ሼማኔይ ኣፋላ ዎንዲራሼን ጻጺዛ ማላ፥ ታኒ ታ ዴኦ ጻጻዲስ፤ ኢዚካ ታና ዎንዲራሼፔ ዱꬂዴስ። ማላዶፔ ኦማርስ ጋካናስ፥ ኔኒ ታና ꬋይሳናስ ኤሶታዳሳ።
ISA 38:13 ሳኣይ ዎንታና ጋካናስ ታኒ ኔና ዳንዳያን ናጋዲስ፤ ጊዶ ኣቲን ጋሞ ማላ ኢዚ ታ ሜቄꬃ ኡባ ሜንꬄሬꬂዴስ። ቃሴ ማላዶፔ ኦማርሲ ጋካናስ ኔኒ ታና ꬋይሳናስ ኤሶታዳሳ።
ISA 38:14 ታኒ ጪራሻኔ ሃꬃ ካፎ ማላ ዋሳዲስ፤ ሃራጴ ማላካ ጉጉማዲስ። ታ ኣይፌቲ ፑዴ ሳሎ ጼሊዲ ዳቡርዳ። ኣቤት ጎዳዉ፥ ታኒ ኡንኤታዲስ፤ ኔኒ ታና ሃኒፌ ኬሳ!» ጋዲስ።
ISA 38:15 ሂስቲን ታ ኣይ ጋኔ? ኢዚ ባ ሁኤራ ታስ ዮቲዴስ፤ ቃሴካ ባ ሁኤራ ሃይሳ ኦꬂዴስ፤ ታ ሼምፖያ ኬሂፔ ጬጪዳ ጊሻስ፥ ታ ዴኦ ላይꬅ ኡባን ኣሽኬቴꬃን ባና።
ISA 38:16 ኣቤት ጎዳዉ ሄይታንታ ማላ ዮኦታን ኣሳይ ፓጻ ዴስ። ታ ኣያናይካ ሄይታንታን ዴኦ ዴማና። ኔ ታና ፓꬃዳሳ፥ ታና ሼምፖራ ፓጻ ዎꬃዳሳ!
ISA 38:17 ሄኮ ታ ሜቶን ጬጪዳይሲ ታስ ጎኣስ ጊዲዴስ። ኔኒ ታ ሼምፖ ባሻ ኦላፌ ኔ ሲቆን ናጋዳሳ፤ ኔኒ ታ ናጋራ ኡባ ኔፔ ጉዬ ዛራዳ ኦላዳሳ።
ISA 38:18 ዱፎይ ኔና ጋላቴና፤ ሃይቆይካ ኔና ሳቤና። ዱጌ ኦላን ዎꬊዛይቲ ኔ ኣማኔቴꬅ ሂዶታ ኦሴቴና።
ISA 38:19 ታኒ ሃች ኔና ጋላቲዛይሳ ማላ ሼምፖራ ፓጻ ዴኢዛይቲ ጻላ ኔና ጋላታና፤ ኔ ኣማኔቴꬃ ጊሻስ ኣዋቲ ባ ናይታስ ዮቴቴስ።
ISA 38:20 ጎዳይ ታና ኣሻና፤ ሄሳ ጊሻስ ኑኒ ኑ ዴኢዛ ላይꬃታ ኡባን፥ ጎዳ ኬꬃን ዋጼቲዳ ዲꬃን ዬጻና።
ISA 38:21 ኢሳያሲ ካሴ፥ «ባላሴ ሚꬃ ኣይፌ ዳጺዲ፥ ኢዛ ኪጻ ቦላ ዎꬂቴ። ሂስቲኮ ኢዚ ፓጻና» ጊ ዎꬂዴስ።
ISA 38:22 ሂዝቂያሲካ፥ «ታኒ ፓጻዳ ጎዳ ኬꬅ ፑዴ ኬዛናይሳስ ማላታይ ኣዜ?» ጊዲ ኢሳያሳ ኦይቺ ዎꬂዴስ።
ISA 39:1 ሄ ዎዴ ባቢሎኔ ካዎይ ባሊዳኔ ና፥ ማሮዶኬ-ባልዳኔይ ሂዝቂያሲ ሃርጊ ፓጺዳ ጊሻስ ዳብዳቤኔ ኢሞታ ኢዛስ ዬዲዴስ።
ISA 39:2 ሂዝቂያሲ ኪቴቲዳይታ ኡፋይሳን ሞኪ ኤኪዴስ፤ ሂስቲዲ ካዎ ሚንጃ ኬꬃን ዲዛ ቢራ፥ ዎርቃ፥ ዱማ ዱማ ሳዎታ፥ ዶሬቲዳ ዛይቴ፥ ቃሴ ኦላ ሚሻ፥ ኢዛስ ዲዛ ሚሽ ኡባ ኢሲኖካ ኣሾንታ ዲሼ ቤሲዴስ። ኢዛ ሚንጃ ኬꬃን ዲዛ ሚሽ ጊዲን ኢዛ ካዎቴꬃ ጋርሳን ዲዛ ሚሽ ኡባ ቤሶንታ ኣሺዳ ሚሺ ዴና።
ISA 39:3 ሄሳፌ ጉዬ ናቤ ኢሳያሲ ካዎ ሂዝቂያሳኮ ዪዲ፥ «ሃ ኣሳቲ ኔና ኣይ ጊዶ? ኢስቲ ኔኮ ኣዋፔ ዪዶ?» ጊ ኦይቺዴስ። ሂዝቂያሲካ ዛሪዲ ኢዛስ፥ «ሃ ኣሳቲ ታኮ ሃኮ ቢታፌ ባቢሎኔፔ ዪዳ» ጊዴስ።
ISA 39:4 ኢሳያሲ ቃሴካ፥ «ኔ ካዎቴꬃ ኬꬃፌ ኣይ ቤኢዶ?» ጊዴስ። ሂዝቂያሲ፥ «ታ ካዎቴꬃ ኬꬃን ዲዛ ኡባ ቤኢዳ፤ ታ ቤሶንታ ኣሺዳ ኢሲ ሚሺካ ዴና» ጊዴስ።
ISA 39:5 ሄሳፌ ጉዬ ኢሳያሲ ሂዝቂያሳስ፥ «ኡባፌ ዎልቃማ ጎዳይ ጊዛይሳ ሲያ፤
ISA 39:6 ‹ኔ ካዎቴꬃ ኬꬃን ዲዛ ኡባይ፥ ካሴ ኔ ኣዋቲ ሃች ጋካናስ ሺሺዳ ኡባይ ዲኤቲዲ ባቢሎኔ ባና ዎዴይ ያና፤ ኢሲኖካ ኣሾንታ ማጺ ኤፊዛ ዎዴይ ያና› ጌስ ጎዳይ።
ISA 39:7 ኔፔ ዬሌቲዳይቲኔ ኔ ዜሬꬃፌ ዬሌቲዳይቲ ዲኤቲ ቢዲ ባቢሎኔ ካዎ ኬꬃን ጉንዱላ ጊዲዲ ኦꬃና» ጊዴስ።
ISA 39:8 ሂዝቂያሲ ዛሪዲ፥ «ኔኒ ዮቲዳ ጎዳ ቃላይ ሎኦ» ጊዴስ። ሂዝቂያሲ፥ «ታኒ ዴኢዳ ላይꬃን ታስ ሳሮኔ ዎፓ ጊዶ» ጊ ቆፒዳ ጊሻሳ።
ISA 40:1 ኢንቴ ጾሳይ፥ «ሚንꬄꬂቴ! ታ ዴሬዛ ሚንꬄꬂቴ!
ISA 40:2 ዬሩሳላሜስካ ሹጎ ቃላራ ዮቲቴ፤ ኢዚስ ኣዋጂቴ፤ ኢዛ ኣይሌቴꬃን ኦꬂዛ ዎዴይ ዉሪዴስ፤ ኢዚ ናጋራ ዋጋይ ጪጌቲዴስ፤ ኢዛ ባ ናጋራ ኡባ ጊሻስ ጎዳፔ ናምኡ ኩሼ ቂጻቴ ኤካዱስ» ጌስ።
ISA 40:3 ኣዋጃ ዮቲዛዴ ጬንጉርሲ፥ «ባዞን ጎዳ ኦጌ ጊግሲቴ፤ ኑ ጾሳስ ኣራባ ባዞን ኣኮ ኦጌ ጊግሲቴ።
ISA 40:4 ሾባይ ኡባይ ፑዴ ꬎቁ ጋና፤ ዙማይኔ ዙምቡላይ ዚቂ ጋና፤ ኩንዱኩርጮ ቢታይ ኢሲ ጊና ጊዳና፤ ኩርፖቲ ዴምባ ጊዳና።
ISA 40:5 ሄ ዎዴ ጎዳ ቦንቾይ ቆንጫና፤ ኣሾ ማይኢዳ ኡባይ ሄሳ ሃሳይዴስ» ጌስ።
ISA 40:6 ጬንጉርሲ ታና፥ «ዋሳ!» ጊዴስ። ታኒካ፥ «ኣይ ጋ ዋሶ?» ጋዲስ። ኢዚካ፥ «ኣሲ ኡባይ ማታ ማላ፤ ኢዛ ቦንቾ ኡባይካ ዴምባ ጪሻ ማላ።
ISA 40:7 ጎዳይ ባ ሼምፖ ኢዛ ቦላን ሼምፒሺን ማታይ ሜሌስ፤ ጪሺካ ቆኬስ፤ ቱማፔ ዴሬይ ማታ ማላ።
ISA 40:8 ማታይ ሜሌስ፤ ጪሻይካ ቆኬስ፤ ጊዶ ኣቲን ኑ ጾሳ ቃላይ ሜርናስ ሚኒ ዴስ» ጋዳ ዋሳ ጊዴስ።
ISA 40:9 ኔኖ ሚሺራቾ ጺዮኔስ ዮቲዛይሶ፥ ꬎቃ ዙማ ቦላ ኬዛ፤ ኔኖ ሚሺራቾ ዬሩሳላሜስ ዮቲዛይሶ፥ ኔ ጬንጉርሳ ꬎቁ ሂስታ ዋሳ፤ ꬎቁ ሂስታ፥ ባቦፋ፤ ዩሁዳ ካታማታስ፥ «ሄኮ ኢንቴ ጾሳ» ጋዳ ዮታ።
ISA 40:10 ሄኮ ኡባ ሃሪዛ ጎዳይ ዎልቃራ ዬስ፤ ኢዛ ቄሴይ ኢዛ ጊሻስ ሃራና። ቤኢቴ ኢዛ ዎይቶይ ኢዛራ ዴስ፤ ኢዚ ጪጋና ኦሶ ዋጋይካ ኢዛራ ዴስ።
ISA 40:11 ኢዚ ባ ዉዴ ሄንꬃንቻ ማላ ሄሜስ፤ ባ ላቃታካ ባ ቄሴን ቶኬስ፤ ባ ኪኦንካ ኢዲሜስ፤ ꬋንꬂዛይታካ ሎዳራ ካሌꬄስ።
ISA 40:12 ሃꬃታ ባ ኩሼ ኩጴን ማኪዳይ፥ ሳሎታ ታꬋኪዳይ፥ ባና ዳቾን ማኪ ኦይኪዳይ፥ ዙማታ ባ ሜዛኔን፥ ዙምቡላታካ ሜዛኔን ዎꬂዳይ ኦኔ?
ISA 40:13 ጎዳ ኣያና ሻኪ ኤሪዳይ፥ ኢዛ ዞሪዛዴ ጊዲ ታማርሲዳይ ኦኔ?
ISA 40:14 ኤራቴꬅ ዴማናስ ጎዳይ ኦና ዞሬ ኦይቺዴ? ሱሬ ኦጌ ኢዛ ታማርሲዳይ ኦኔ? ኤራቴꬅ ኢዛ ታማርሲዳይ፥ ኣኬካ ኦጌካ ኢዛ ቤሲዳይ ኦኔ?
ISA 40:15 ቤኢቴ ካዎቴꬃቲ ጎምቦ ጊዶን ጾኪዳ ሃꬃ ማላ፤ ኢስቲ ሜዛኔ ቦላ ዲዛ ጉዱላ ማላ ቆዴቴቴስ፤ ሃሩሮታ ሊቆ ቢታ ማላ ጌዳሬስ።
ISA 40:16 ሊባኖሴይ ያርሾሶሆ ታማስ ጊዱኩ፤ ኢዚ ሜዶሳታ ቆዳይካ ጹጌቲዛ ያርሾስ ጉꬃ።
ISA 40:17 ካዎቴꬃቲ ኡባይ ኢዛ ሲንꬃን ኣይኮካ ጊዴቴና፤ ኢስቲ ኣይኮራካ ጋኪ ቆዴቶንታ ሃዳ ሚሻ ማላ።
ISA 40:18 ሂስቲን ኢንቴ ጾሳ ኦናራ ጊኒሴቲ? ኣይ ሚስሌራ ጋꬂ ጊኒሴቲ?
ISA 40:19 ኤቃ ሚስሌይ ጊዲኮ ሂላ ኩሼን ማሴቲዴስ፤ ሄሳ ዎርቃ ኦꬂዛዴይ ቦላራ ዎርቃን ሜሼስ፤ ቢራ ሳንሳላታካ ኢዛስ ጊጊሴስ።
ISA 40:20 ሄሳ ማላ ያርሾ ሺሻናስ ዳንዳዮንታ ማንቆ ኣሲ ሙሶንታ ሚꬅ ዶሬስ፤ ኩንዶንታ ሚስሌ ኤሳናስ ኤሬቲዳ ሂላ ኮዬስ።
ISA 40:21 ኢንቴ ሄሳ ኤሬኬቲ? ዎይኮ ሲዪቤኬቲ? ቤኒ ቤኒ ኢንቴስ ዮቴቲቤኔ? ሳኣይ ሜꬌቶሶፌ ዶሚን ኢንቴ ኣኬኪቤኬቲ?
ISA 40:22 ኢዚ ቢታ ዩሾፔ ቦላራ ባ ኣራታን ኡቴስ፤ ቢታ ቦላ ዲዛ ዴሬይ ቦሌ ማላ፤ ሳሎታ ማጋላሻ ማላ ሚጬስ፤ ዱሳሶ ዱንካኔ ማላ ቶኬስ።
ISA 40:23 ሃላቃታ ሃዳ ሂስታና፤ ሃ ቢታ ኣይሲዛይታካ ፒቲ ꬋይሴስ።
ISA 40:24 ኢስቲ ቶኬቲዲ ጋምኦንታ ዲሺን፥ ዜሬቲዲ ታኮንታ ዲሺን፥ ቡሮ ጻጶ ዬዶንታ ዲሺን ኢስታ ቦላ ጫርኮ ዬዲን ሜሊዳ፤ ጎቴይ ኢስታ ሱላ ማላ ፒቲ ኤፊዴስ።
ISA 40:25 ጌሻዚ ኢስታስ፥ «ታና ኦናራ ጊኒሴቲ? ታናራ ጊናቲዛይ ኦኔ?» ጌስ።
ISA 40:26 ኢንቴ ኣይፌ ꬎቁ ሂስቲዲ ፑዴ ሳሎ ጼሊቴ፤ ሃይታንታ ኡባ ሜꬊዳይ ኦኔ? ሳሎ ጾሊንቴታ ኢሳ ኢሳ ኬሲዛይ፥ ኢስታ ሱንꬃን ሱንꬃን ጼይጊዛይ ኢዛ። ኢዚ ባ ጊታቴꬃኒኔ ባ ኤራቴꬃ ሚኖቴꬃፌ ዴንዲዳይሳን ኢስታፌ ኢሶይካ ꬋዬና።
ISA 40:27 ያቆቤ ኔ ኣይስ ሄሳꬆ ጋይ? ኢስራኤሌ ኔ ኣይስ ሄሳꬆ ሃሳያይ? «ታ ኦጌይ ጎዳፔ ጌሚዴስ፤ ታ ፒርዳይ ጾሳ ኣቻን ዉዱ ጌቴቲቤና» ኣይስ ጋይ?
ISA 40:28 ኔ ኤራቤኪ? ኔ ሲያቤኪ? ጎዳይ ሜርና ጾሳ፤ ኢዚ ቢታ ኡባካ ሜꬊዳይሳ። ኢዚ ዳቡሬና፤ ኣዛሌና፤ ኢዛ ኣኬካይካ ኦናንካ ፒልጌቴና።
ISA 40:29 ሚኖቴꬂ ባይንዳዴስ ሚኖቴꬅ ኢሜስ፤ ዳቡርዳይሳስ ዎልቃ ጉጄስ።
ISA 40:30 ዬላጋቲካ ዳቡሬቴሲኔ ኣዛሌቴስ፤ ናቴꬃቲካ ꬉጴቲዲ ኩንዴቴስ፤
ISA 40:31 ጊዶ ኣቲን ጎዳ ሂዶታ ኦꬂዛይቲ ባንታ ዎልቃ ኦራጺሴቴስ፤ ኢስቲ ጎሌ ማላ ፒራꬋና፤ ኢስቲ ዳቡሮንታ ዎጻና፤ ኢስቲ ባና፤ ኣርጋጬቴና።
ISA 41:1 ጎዳይ፥ «ኢንቴኖ ሃሩሮቶ፥ ጮኡ ጊቴ፤ ካዎቴꬃቲ ባ ዎልቃ ኦራꬄቶ፤ ሺቂዲ ሃሳዬቶ፤ ኣኔ ፒርዳ ሺሎታ ሲንꬃን ጋይቶስ።
ISA 41:2 ኣርሼይ ሞኪዛ ባጋፌ ኢሳ ዴንꬂዳይ፥ ጺሎቴꬃን ባስ ሃጋዚሳና ጼይጊዳይ ኦኔ? ኢዚ ካዎቴꬃታ ኢዛስ ኣꬂ ኢሜስ፤ ኢዚ ኢስታ ጊꬃ ማሻን ቢታ ኬሲዴስ፤ ባ ዎንዳፌን ጫርኮይ ላሊዳ ሱላ ማላ ኬሲዴስ።
ISA 41:3 ኢስታ ጎዲ ዬዲዲ ሜቶይ ባይንዳ ኣꬊ ቢዴስ፤ ኢዛ ቶሆይ ካሴ ዬꬎንታ ኦጌራ ሄሜቲዴስ፤
ISA 41:4 ሃይሳ ኦꬂዳይኔ ፖሊዳይ ዬሌታ ቤኒሶፌ ጼይጊዳይ ኦኔ? ጎዳይ ኮይሮይታራካ ዉርሴꬃይታራካ ዲዛይ ታና» ጌስ።
ISA 41:5 ሃሩሮቲ ቤኢዲ ያዪዳ፤ ሳኣ ጋጻቲካ ኮኮሪዳ፤ ኢሲ ቦላ ሺቂዲ ሲንꬅ ዪዳ።
ISA 41:6 ኢሶይ ኢሳራ ማዴቴስ፤ ባ ኢሻካ፥ «ኣይኮይ ባ ሚና» ጌስ።
ISA 41:7 ሂላንቻይ ዎርቃ ኦꬂዛይሳ ሚንꬄꬄስ፤ ናሪቃን ቆጺ ሌኢሲዛዴይ ቢራታ ማርጮን ሴሪሲዛይሳ ሚንꬄꬄስ፤ ቢራታ ሴሪሲ ኦይሴꬆይ፥ «ሎኦ» ጌስ፤ ኤቃ ጾሳ ሚስሌይ ኩንዶንታ ማላ ሚሲማሬን ቶርጌስ።
ISA 41:8 ጎዳይ፥ «ጊዶ ኣቲን ኔኖ ታ ኣሽካራ ኢስራኤሌ፥ ታ ዶሪዳ ያቆቤ፥ ታ ላጌዛ ኣብራሃሜ ዜሬꬃዞ፥
ISA 41:9 ታኒ ኔና ቢታ ጋጻፔ ኤሂዳይሶ፥ ሳሎይ ዳንጾሶፔ ጼይጊዳይሶ፥ ‹ታ ኔና ታ ኣይሌዞ› ጊዳይሶ ታ ኔና ዶራዲስ ኣቲን ኦላጋቤኬ።
ISA 41:10 ታኒ ኔናራ ዲዛ ጊሻስ ያዮፋ፤ ታኒ ኔ ጾሳ ጊዲዳ ጊሻስ ዳጋሞፋ። ታኒ ኔና ሚንꬃናኔ ማዳና። ታ ጺሎቴꬃ ኡሻቻ ኩሼን ዜምፒሳ ኦይካና።
ISA 41:11 «ቤኣ ኔ ቦላ ሃንቄቲዳ ኡባይ ኬሂ ዬላታናኔ ካዉያና፤ ኔናራ ኤቄቲዛይቲ ቲምኢ ጊ ꬋያና።
ISA 41:12 ኔኒ ኔ ሞርኬታካ ኮያዳካ ዴማካ፤ ኔና ኦሊዛይቲ ፒቴቲ ꬋያና።
ISA 41:13 ጋሶይካ ታኒ ጎዳ ኔ ጾሳይ፥ ታ ኔና ማዳና፤ ያዮፋ ታ ኔ ኡሻቻ ኩሼዛ ኦይካና።
ISA 41:14 ኔኖ ጉጹኔዞ ያቆቤ፥ ኔኖ ቄሪ ኢስራኤሌ፥ ‹ያዮፋ ታኒ ኔና ማዳና› ጌስ። ኔና ዎዚዛይ ኢስራኤሌ ጌሻዛ።
ISA 41:15 ቤኣ ታኒ ኔና ኦራꬅ፥ ቃራኔ ኣቻራ ዲዛ ካꬅ ቡኪዛ ሎዳ ኦꬃና፤ ኔኒ ዙማታ ጎያ ሊቂሳና፤ ዙምቡላታካ ዬꬋ ሃፓ ኬሳና።
ISA 41:16 ኔኒ ኢስታ ሱራጋና፤ ጫርኮይ ኢስታ ፒቲ ኤፋና፤ ጎቴይካ ኢስታ ላላና። ጊዶ ኣቲን ኔኒ ጎዳን ኡፋዬታና፤ ቃሴ ኢስራኤሌ ጌሻን ቦንቼታና።
ISA 41:17 ሂዬሳቲኔ ሜቶታንቻቲ ሃꬅ ኮያና፤ ጊዶ ኣቲን ኣይኮካ ዴሜቴና፤ ሃꬃ ሳሞን ኢስታስ ፖራንዴይ ሜሊዴስ፤ ጊዶ ኣቲን ታኒ ጎዳይ ኢስታስ ዛሮ ኢማና፤ ታኒ ኢስራኤሌ ጾሳይ ኢስታ ዬጋ ኣጊኬ።
ISA 41:18 ታኒ ቡላቲዳ ዙምቡላታ ቦላ ሻፋታ፥ ሾባታን ፑልቶታ ꬉሳና፤ ባዞ ቢታ ኤሌ ሃꬅ፥ ሳሜቲዳ ቢታን ሃꬃ ፑልቶ ኬሳና።
ISA 41:19 ባዞ ቢታን ዚጋ፥ ኦዶሮ፥ ባርሴኔቴኔ፥ ዎጋራ ሚꬅ ሞይዛና፤ ኣይኮይ ባይንዳ ባዞን ጺዳ፥ ጉንꬃኔ ኦንꬅ ቶካና።
ISA 41:20 ሄሳ ጊሻስ ኣሳይ ሄሳ ቤኣናኔ ኤራና፤ ጎዳ ኩሼይ ሃይሳ ኦꬂዳይሳ፥ ኢስራኤሌ ጌሻይ ሜꬊዳይሳ ኢስቲ ኢሲፌ ዩሺ ቆፓናኔ ኣኬካና» ጌስ።
ISA 41:21 ጎዳይ፥ «ኣኔ ኢንቴ ሞቶ ኤኪዲ ሃ ሺቂቴ» ጌስ። ያቆቤ ካዎይ፥ «ኣኔ ኢንቴ ሞቶ ዳፋ ሃ ኤሂቴ» ጌስ።
ISA 41:22 ቡሮፔ ሃናናይሳ ዮታና ማላ ኢንቴ ኤቃ ጾሳታ ሃ ኤሂቴ፤ ኑ ኣኬካና ማላኔ ኢስታ ዉርሴꬃካ ኤራና ማላ ካሴ ዮኦቲ ኣዛኮ ኑስ ዮቲቴ፤ ቡሮፔ ሃናና ሚሻታ ኤሪቴ።
ISA 41:23 ኢንቴ ጾሳታ ጊዲዳይሳ ኑ ኤራና ማላ፥ ሲንꬃፌ ሃናና ሚሻታ ኑስ ዮቲቴ፤ ኑኒ ዳጋማና ማላኔ ያያና ማላ፥ ሎኦ ጊዲን ዎይኮ ኢታ ሚሽ ኦꬂቴ።
ISA 41:24 ሄኮ ኢንቴ ኣይኮ ቆዳን ጌሎንታይታ፤ ኢንቴ ኦሶይ ሙሌካ ሃዳ፤ ኢንቴና ዶሪዳይቲ ሃራሲዛይታ።
ISA 41:25 «ታኒ ፑዴሃ ባጋፌ ኢሳ ዴንꬃዲስ፤ ኢዚካ ዬስ። ኣርሼይ ሞኪዛ ባጋራ ዪዛይሲ ታ ሱንꬃ ጼይጊዛይሳ፤ ማናይ ኡርቃ ዬꬊዛ ማላ ኢዚ ካሌꬂዛይታካ ዬꬌስ።
ISA 41:26 ኑኒ ኤራና ማላ ኮይሮቲ ኑስ ኣዋጂዳይ፥ ‹ኢዚ ሊኬ› ኑ ጋና ማላ ኑስ ካሴቲ ዮቲዳይ ኦኔ? ኦኒካ ዮቲቤና፤ ሲንꬃቲዲ ዮቲዳይ ዴና፤ ኢንቴፌ ኣይ ቃላ ሲዪዳይካ ዴና።
ISA 41:27 ኮይሮታዳ፥ ‹ሄኮ ታኒ ቤኣዲስ› ጋዳ ጺዮኔስ ኣዋጂዳይ ታና፤ ዬሩሳላሜስ ሚሺራቾ ዮቲዛዴ ኢማዲስ።
ISA 41:28 ታኒ ጼሊዛ ዎዴ ኦኒካ ዴና፤ ኢስታ ጊዶን ዞራንቻይ ባዋ፤ ታ ኦይቺዳ ዎዴ ዛሮ ኢሚዛይካ ዴና።
ISA 41:29 ቤኢቴ ኢስቲ ኡባይካ ሃዳ፤ ኢስታ ኦሶስካ ጎኣይ ዴና፤ ኢስታ ሚስሌቲካ ኣይኮይ ባይንዳ ጫርኮ ማላ» ጌስ።
ISA 42:1 ጎዳይ፥ «ታኒ ካ ኦይኪዳ ታ ኣሽካራይ፥ ታ ኢዛን ኡፋዬቲዛ ሙሩታይ ሃይሳ፤ ታኒ ታ ኣያና ኢዛ ቦላ ዎꬃዲስ፤ ኢዚ ካዎቴꬃታስ ሱሬ ፒርዳ ኤሃና።
ISA 42:2 ዋሴና፤ ባ ቃላ ꬎቂሴና፤ ባ ጬንጉርሳካ ኦጌ ቦላ ኬሂ ሲሴና።
ISA 42:3 ዲንጬቲዳ ማቃ ኢዚ ሜንꬄና፤ ጩዋቲዛ ሙቃዳ ኢዚ ቶይሴና፤ ኣማኔቴꬃን ኢዚ ሱሬ ፒርዳ ኤሃና።
ISA 42:4 ኢዚ ቢታ ቦላ ሱሬ ፒርዳ ኤሃና ጋካናስ ዳቡሬና፤ ሂዶታካ ቃንጼና፤ ሃሩሮቲ ኢዛ ዎጋን ኣማኔታና» ጌስ።
ISA 42:5 ሳሎታ ሜꬊዳይ፥ ኢስታ ሚጪዳይካ፥ ሳኣኔ ኢዚን ዲዛ ኡባ ጊግሲዳይ፥ ባ ዴሬስ ፔኖ ኢዚን ዴኢዛ ኣሳታስ ሼምፖ ኢሚዛ ጎዳ ጾሳይ፥
ISA 42:6 «ታኒ ጎዳይ ኔና ጺሎቴꬃን ጼይጋዲስ፤ ታ ኔ ኩሼ ኦይካና፤ ታ ኔና ናጋና። ታኒ ኔና ካዎቴꬃስ ጫቆ ቃላ፥ ኣይዛቤታስካ ፖኦ ሂስታና
ISA 42:7 ኔ ቆቄታ ኣይፌ ዶይኣና፤ ዲኤቲዳይታ ቃሾ ኬꬃፌ ቢርሻና፤ ꬉማን ኡቲዳይታካ ካርቻሌፌ ኬሳና።
ISA 42:8 «ታኒ ጎዳ፤ ሃይሲ ታ ሱንꬃ፤ ታ ቦንቾ ሃራስ ኣꬃ ኢሚኬ፤ ታ ጋላታካ ኤቃ ጾሳታስ ሼꬊኬ።
ISA 42:9 ቤኢቴ ቤኒ ዮኦቲ ፖሌቲዳ፤ ሃኢ ታኒ ኦራꬃ ሚሽ ኣዋጃይስ፤ ኢዚ ሞካናፔ ሲንꬅ ታ ኢንቴስ ዮታይስ» ጌስ።
ISA 42:10 ኢንቴኖ ዱጌ ኣባን ዎꬊዛይቶ፥ ሄን ዲዛ ኡባቶ! ኢንቴኖ ሃሩሮቶ! ሄንካ ዲዛ ኡባቶ! ጎዳሲ ኦራꬃ ማዛሙሬ ዬጺቴ፤ ቢታ ጋጻፔ ዶሚዲ ኢዛስ ጋላታ ማዛሙሬ ሺሺቴ።
ISA 42:11 ባዞይኔ ካታማቲ ባንታ ጬንጉርሳ ꬎቁ ሂስቴቶ፤ ቄዳሬይ ዴኢዛ ጉታይ ኡፋዬቶ፤ ሴላ ዴሬ ኣሳቲ ኡፋይሳን ዬጼቶ፤ ዙማ ጼራንካ ኢሊሌቶ።
ISA 42:12 ኢስቲ ቦንቾ ጎዳስ ኢሜቶ፤ ኢዛ ጋላታይካ ሃሩሮታን ኣዋጄቶ።
ISA 42:13 ጎዳይ ኦላ ቃራ ማላ ኬዛና፤ ኦላንቻ ማላ ሆኤቲ ዴንዳና። ጬቄቴꬃ ጋይሮ ሲሳና፤ ባ ሞርኬታካ ኦሊ ጾናና።
ISA 42:14 ጎዳይ፥ «ታኒ ኣዱሳ ዎዴሶፌ ጮኡ ጋዲስ፤ ሲርጲ ጋዲስ፤ ታና ቁምኣ ኦይካዲስ፤ ሃኢ ጊዲኮ ሚጻ ኦይኬቲዳ ማጫሳ ማላ ዋሳይስ፤ ሼኖታይሲኔ ባናካይስ።
ISA 42:15 ታኒ ዙማታኔ ዙምቡላታ ዎዲሳና፤ ዶዛታ ኡባ ሜሊሳና። ሻፋታ ሃሩሮ ቢታ ኬሳና፤ ኤሌ ሃꬃታካ ሚጪንቻና።
ISA 42:16 ታኒ ቆቄታ ኢስቲ ኤሮንታ ኦጌ ካሌꬃና፤ ኢስቲ ሜዜቶንታ ኦጌራካ ታ ኢስታ ኤፋና፤ ꬉማዛ ታ ኢስታ ሲንꬃን ፖኢሳና፤ ኩንዱኩርጮ ሶሆታ ታ ጊጊሳና፤ ሃይታንታ ኡባ ታ ኦꬆንታ ኣጊኬ።
ISA 42:17 ኤቃ ጾሳታን ኣማኔቲዛይቲ ጊዲኮ ሚስሌታካ፥ ‹ኢንቴ ኑ ጾሳታ› ጊዛይቲ ጉዬ ሲማና፤ ኢስቲ ሙሌራ ካዉያና» ጌስ።
ISA 42:18 ጎዳይ፥ «ኢንቴኖ ቱሌቶ ሲዪቴ! ኢንቴኖ ቆቄቶ ቤኢቴኔ ጼሊቴ!
ISA 42:19 ታ ኣሽካረራ ታኒ ኪቲዳዴፌ ኣቲን ሃራ ቱሌይ ኦኔ? ታስ ኣማኔቲዳዴ ማላ ቆቄይ፥ ጎዳ ኣሽካራ ማላ ቆቄይ ኦኔ?
ISA 42:20 ዳሮ ሚሽ ቤኢዴታ ሺን ኣኬኪቤኬታ፤ ኢንቴ ሃይꬃይ ዶያ ዴስ ሺን ሲዬኬታ» ጌስ።
ISA 42:21 ጎዳይ ባ ጺሎቴꬃ ጊሻስ ጊዲ፥ ባ ዎጋ ጊታኔ ቦንቾ ኬሲዳ ጊሻስ ኡፋዬቲዴስ።
ISA 42:22 ሃ ዴሬይ ቦጌቲዳኔ ቦንቄቲዳ፥ ኦላ ጊዶን ዎꬊዳ፥ ዎይኔ ኬꬃይ ኢዛ ቦላ ጎርዴቲዳ ዴሬ፤ ኢስቲ ቦጌቲዳ፤ ኢስታ ኣሺዛዴይ ዴና፤ ኢስቲ ዲኤቲዳ፤ «ኢስታ ዛሪቴ» ጊዛይካ ባዋ።
ISA 42:23 ኢንቴ ጊዶፌ ሃይሳ ሲዪዛይ፥ ሲንꬃፌ ያና ዎዴስ ኣኬኪ ሲዪዛይ ኦኔ?
ISA 42:24 ያቆቤይ ቦጌታና ማላ፥ ኢስራኤሌይ ዲኤታና ማላ ኦꬂዳይ ኦኔ? ናጋራ ኦꬂዲ ኑ ቆሂዳ ጎዳ ጊዴኔ? ኢስቲ ኢዛ ኦጌ ካላናሲኔ ኢዛ ዎጋስ ኣዛዜታና ኮዮንታ ኣጊዳ ጊሻሳ።
ISA 42:25 ሄሳ ጊሻስ ኤጺዛ ባ ሃንቆዛ፥ ኢታ ኦላ ኢስታ ቦላ ዬዲዴስ፤ ታማ ላጮን ኢስታ ጊዶꬂዴስ፤ ኢስቲ ጊዲኮ ሄሳ ኣኬኪቤቴና፤ ኢስታ ጹጊዴስ ሺን ኢስቲ ዎዚናን ዎꬂቤቴና።
ISA 43:1 ሃኢ ጊዲኮ ያቆቤ፥ ኔና ሜꬊዳይ፥ ኢስራኤሌ! ኔና ጊግሲዳ ጎዳይ፥ «ታኒ ኔና ዎዚዳ ጊሻስ ያዮፋ። ታኒ ኔና ኔ ሱንꬃን ጼይጋዲስ፤ ኔኒ ታሳ።
ISA 43:2 ኔኒ ሃꬃ ጊዶራ ፒኒዛ ዎዴ፥ ታኒ ኔናራ ጊዳና። ኔኒ ፒኒሺን ሻፋይ ኔና ሚቴና፤ ኔኒ ታማ ጊዶራ ቢሺን ኔና ጹጌና፤ ታማ ላጮይካ ኔና ሜና።
ISA 43:3 ጋሶይካ ታኒ ጎዳ ኔ ጾሳይ፥ ኢስራኤሌ ጌሻይ ኔስ ꬋሌ፤ ታ ኔ ጊሻስ ጊብጼ ዎዞ ኢማና፤ ቶጵያኔ ሴባ ኔ ጊሻስ ኣꬃ ኢማና።
ISA 43:4 ኔኒ ታ ሲንꬃን ኣልኦኔ ቦንቾ ጊዲዳ ጊሻስ፥ ታኒ ኔና ሲቂዛ ጊሻስ፥ ኣሳ ኔ ጊሻስ፥ ካዎቴꬃታ ኔ ሼምፖ ጊሻስ ላሜ ኢማና።
ISA 43:5 «ታኒ ኔናራ ዲዛ ጊሻስ ያዮፋ፤ ታኒ ኔ ናይታ ኣርሼይ ሞኪዛ ባጋፌ ኤሃና፤ ኔና ኣርሼይ ዉሊዛ ባጋፌ ሺሻና።
ISA 43:6 ታኒ ፑዴሃ ባጋ፥ ‹ሃማ› ዱጌሃ ባጋካ፥ ‹ዬዳ› ጋና፤ ታ ኣቱማ ናይታ ሃሆፔ፥ ታ ማጫ ናይታካ ቢታ ጋጻፔ፥
ISA 43:7 ታ ሱንꬃን ጼይጌቲዳ ኡባ፥ ታ ቦንቾስ ታ ሜꬊዳይታ፥ ታኒ ጊግሲዳይሳኔ ታ ኦꬂዳይሳ ሃሚቴ» ጋና።
ISA 43:8 ኣይፌይ ዲሺን ቆቂዳይታ፥ ሃይꬂካ ዲሺን ቱሊዳይታ ኬሳ።
ISA 43:9 ካዎቴꬃቲ ኡባይ ኢሲፌ ሺቄቶ፤ ኣሳይካ ኢሲ ቦላ ሺቆ፤ ኢስታፌ ካሴቲዲ ሃይሳ ኑስ ዮቲዳይ ኦኔ? ቤኒ ሚሽ ኑስ ኣዋጂዳይ ኦኔ? ሃራቲ ሲዪዲ፥ «ሃይሲ ቱማ» ጋና ማላ፥ ኢስታ ቱማቴꬃይካ ቆንጫና ማላ ባንታ ማርካታ ኤሄቶ።
ISA 43:10 «ኢንቴ ታና ኤራና ማላኔ ኣማናና ማላ፥ ኢዚ ታና ጊዲዳይሳ ኢንቴ ኣኬካና ማላ፥ ታ ማርካቲኔ ታ ዶሪዳ ታ ኣይሌቲ ኢንቴና። ታፔ ካሴ ሃራ ጾሲ ኦሴቲቤና፤ ታፔ ጉዬንካ ሃራ ጾሲ ዴና።
ISA 43:11 ታና፤ ታኒ ጎዳ፤ ታፔ ኣቲን ሃራ ኣሺዛይ ዴና።
ISA 43:12 ታኒ ቆንጪሳዲስ፤ ኣሻዲሲኔ ዮታዲስ፤ ኢንቴ ጊዶን ሃራ ኣላጋ ጾሲ ዴኢቤና። ታኒ ጾሳ ጊዲዳይሳስ ኢንቴ ታ ማርካታ።
ISA 43:13 ቤኒሶፌ ዶማዳ ታኒ ታና፤ ታ ኩሼፔ ኬሲ ኤካናይ ዴና፤ ታ ኦꬂዛይሳ ላማናዉ ዳንዳይዛይ ኦኔ?» ጌስ ጎዳይ።
ISA 43:14 ጎዳይ ኢንቴና ዎዚዛ ኢስራኤሌ ጌሻይ፥ «ኢንቴ ጊሻስ ባቢሎኔ ቦላ ኦላንቻታ ኪታና፤ ኢስቲ ጬቄቲዛ ማርካቤታን፥ ባቢሎኔታ ኡባ ቤታና ማላ ኦꬃና።
ISA 43:15 ታኒ ጎዳይ ኢንቴ ጌሻይ፥ ኢስራኤሌ ሜꬊዳ ኢንቴ ካዎ» ጌስ።
ISA 43:16 ኣባ ጊዶራ ኦጌ፥ ዎልቃማ ሃꬃ ጊዶራ ኣꬊዛሶ ኬሲዳ ጎዳይ፥
ISA 43:17 ፓራ-ጋሬታኔ ፓራታ፥ ኦላንቻታኔ ሚኖ ኣሳታ ኡባ ኤሂዲ፥ ኢስቲ ዛሪ ዴንዶንታ ማላ ዛቁሊሲዳ ጎዳይ፥ ሙቃዳ ቢድንꬃ ማላ ኢስታ ꬋይሲዳ ጎዳይ፥
ISA 43:18 «ቤኒ ዮኦታ ሃሳኦፒቴ፤ ካሴ ኣꬊዳይሳ ባሊቴ።
ISA 43:19 ሄኮ ታ ኦራꬃ ሚሽ ኦꬃና፤ ኢዚካ ሃኢ ሃናና፤ ኢንቴ ዩሺ ቆፔኬቲ? ታኒ ባዞን ኦጌ ጊጊሳና፤ ታኒ ኣይኮይ ባይንዳ ባዞንካ ሻፋታ ኬሳና።
ISA 43:20 ባዞ ዶኣቲ፥ ዎራካናቲኔ ጉቶቲ ታና ቦንቻና። ታኒ ባዞ ቢታን ሃꬅ፥ ኣይኮይ ባይንዳ ባዞንካ ፑልቶ ኢማና፤ ታ ዶሪዳ ታ ዴራስ ሃꬅ ኢማና።
ISA 43:21 ታኒ ታስ ጊግሲዳ ዴሬይ ታ ጋላታ ኣዋጃና ማላ ታ ሃይሳ ኦꬃና።
ISA 43:22 «ያቆቤ፥ ኔ ታና ጼይጋቤካ፤ ኢስራኤሌ፥ ኔ ታና ሳሌታዳሳ።
ISA 43:23 ኔኒ ታስ ጹጌቲዛ ያርሾስ ዶርስ ኤሃቤካ፤ ኔ ያርሾንካ ታና ቦንቻቤካ። ታኒ ኔና ካꬃ ያርሾን ዋዪሳቤኬ፤ ኤጻኔ ያርሾንካ ሳሌꬃቤኬ።
ISA 43:24 ኔኒ ታስ ሎኦ ሳዊዛ ኤጻኔ ሻማቤካ፤ ሞꬎ ያርሾን ታና ካልሳቤካ። ጊዶ ኣቲን ኔ ናጋራ ቶሆ ታና ቶሳዳሳ፤ ቆሆን ታና ዳቡርሳዳሳ።
ISA 43:25 «ታ ጊሻስ ጋዳ ኔ ቆሆዛ ꬋይሲዛይ ታኒ ታና፤ ኔ ናጋራ ታ ቆፒኬ።
ISA 43:26 ኣኔ ካሴ ኣꬊዳይሳ ታና ቆፍሳ፤ ኣኔ ኢሲፌ ሺቂዲ ቆꬌቶስ፤ ኔ ቱማቴꬃ ኣኔ ኤሪሳ።
ISA 43:27 ኔ ኣዋ ኮይሮይሲ ናጋራ ኦꬂዴስ፤ ኔ ኣስታማሬቲካ ታ ቦላ ማካሊዳ።
ISA 43:28 ሄሳ ጊሻስ ታኒ ኔ ጾሳ ኬꬃ ሃላቃታ ካዉሻና፤ ያቆቤ ባሻስ፥ ኢስራኤሌካ ጫሻስ ኣꬃ ኢማና» ጌስ።
ISA 44:1 ጎዳይ፥ «ጊዶ ኣቲን ታ ኣሽካራ ያቆቤ፥ ታ ዶሪዳ ኢስራኤሌ፥ ሲያ።
ISA 44:2 ኔና ሜꬊዳይ፥ ኔ ኣዬይ ኡሎን ኦꬂዳይ፥ ኔና ማዲዛ ጎዳይ፥ ‹ታ ኣሽካራ ያቆቤ! ታኒ ዶሪዳ ዪሹሩኔ! ያዮፋ።
ISA 44:3 ታኒ ሳሜቲዳ ቢታን ሃꬅ ጉሳና፤ ሜላ ቢታንካ ሻፋ ጎጊሳና። ታኒ ታ ኣያና ኔ ዜሬꬃ ቦላ፥ ታ ኣንጆ ኔስ ና ና ቦላ ጉሳና።
ISA 44:4 ኢስቲ ዴምባን ጪሊላ ማታ ማላ፥ ሻፋ ዶናን ዲዛ ሚꬃ ማላ ሞካና› ጌስ።
ISA 44:5 ኢሶይ፥ ‹ታኒ ጎዳሳ› ጋና፤ ሃራይ ባና ያቆቤ ሱንꬃን ጼይጋና፤ ሃራይ ቃሴ ባ ኩሼ ቦላ፥ ‹ታኒ ጎዳሳ› ጊ ጻፋና፤ ኢዚ ባና ኢስራኤሌ ሱንꬃን ጼይጋና» ጌስ።
ISA 44:6 ኢስራኤሌ ካዎይኔ ኢስታ ዎዚዛይ፥ ጎዳይ ኡባፌ ዎልቃማ ጾሳይ፥ «ኮይሮይ ታና፤ ዉርሴꬂካ ታና። ታፔ ሃራ ጾሲ ባዋ።
ISA 44:7 ታ ማላይ ኦኒ ዲዜ? ኣኔ ዮቶ፤ ኮይሮ ታ ዴራስ ታ ዮች ዬጊሺን ኣዚ ሃኒዳኮ፥ ሲንꬃፌካ ኣዚ ሃናናኮ ዮቶ፤ ኣኔ ታስ ቆንጪሶ፤ ቡሮ ሃናና ሚሻ ጊሻስ ሲንꬃቲ ዮቶ፤ ቡሮ ያናይሳ ካሴቲ ዮቶ።
ISA 44:8 ያዮፍቴ፤ ዳጋሞፍቴ። ሃይሳ ታኒ ኢንቴስ ዮታቤኪና? ቤኒሶፌ ታ ኢንቴና ኤሪሳቤኪና? ሄሳስ ኢንቴ ታ ማርካታ። ታፔ ኣቲን ሃራ ጾሲ ዲዜ? ሙሌካ ዴና፤ ዎይኮ ሃራ ዛላይ ዲዜ? ዴና፤ ታ ኦናካ ኤሪኬ» ጌስ።
ISA 44:9 ኤቃ ሚስሌታ ሜꬊዛይቲ ኡባቲ ሃዳ፤ ሚስሌታ ኢስታፌ ኦꬂዛ ሚሻቲካ ሃዳ፤ ኢስታስ ዮቲዛይቲካ ቆቄ፤ ኢስታስ ኤራቴꬂ ዴና፤ ኢስቲ ዬላታና።
ISA 44:10 ኣይኮካ ጎኦንታ ኤቃ ጾሳ ማሲ ጊግሲዛይ ኦኔ?
ISA 44:11 ኤቃ ጾስ ሜꬊዛይ ኣስ ኣቲን ሃራ ጊዴና፤ ኢዚኔ ኢዛ ሚሳቲዛይቲ ዬላታና፤ ኡባይካ ሺቂዲ ኢሲ ቦላ ኤቄቶ፤ ኢስቲ ዳጋማናኔ ዬላታና።
ISA 44:12 ቢራታ ቆጺዛይ ናሪቃ ኦይኬስ፤ ጺፋ ቦንቆ ቦላ ዎꬂ ኦꬄስ፤ ኤቃ ጾስ ናሪቃን ቆጺዲ ሚስሌ ጊጊሴስ፤ ባ ሚኖ ቄሴን ጊጊሴስ። ሄሳፌ ጉዬ ጋፌስ፤ ዎልቃ ꬋዬስ፤ ሃꬅ ሳሜቴስ፤ ዳቡሬስ።
ISA 44:13 ማሲዛይ ዎዶሮን ዋꬌስ፤ ቾኬን ማላታ ዎꬄስ፤ ማርሳራ ዎጬስ፤ ኢርሳሴን ኢዛ ቦላ ማላታ ዎꬄስ፤ ኣሳ ሚሳቲሲ ጊጊሴስ፤ ኣሳ ማላ ፑላሴስ፤ ጎይኖሶን ኤፊ ዎꬄስ።
ISA 44:14 ዚጋ ሚꬅ ቃንጼስ፤ ዎላ ዎይኮ ሞቆꬃ ዶሬስ፤ ዎራን ዲዛ ሚꬃታራ ኢሲፌ ዲጫና ማላ ኣጌስ፤ ዎይኮ ጺዳ ቶኬስ፤ ኢዛካ ኢራይ ዲቼስ።
ISA 44:15 ኣሲ ኤሶስ ጎኤቴስ፤ ኢዛፔ ጉꬅ ኤኪዲ ታማን ኤꬂ ሆኤስ፤ ኡኬꬂካ ኢዛን ኡኬስ፤ ኢዛፔ ማሲዲ ኤቃ ጾስ ጊጊሴስ፤ ኢዛስካ ጎይኔስ። ኤቃ ጾስ ኦꬄስ፤ ኩንዲዲካ ኢዛስ ዚጌስ።
ISA 44:16 ባጋ ሚꬃ ኤꬄስ፤ ኢዛ ቦላካ ቁማ ካꬄስ፤ ኣሾ ኢዛን ጺጺዲ ካሊ ሜስ፤ ታማዛ ሆኢሼ፥ «ኤሮሾ ታና ሆኢዴስ፤ ታማዚካ ታስ ቤቴስ» ጌስ።
ISA 44:17 ቃሴ ኣቲዳ ሚꬃዛ ባስ ኤቃ ጾስ ጊጊሴስ፤ ሆኪዲ ኢዛስ ዚጌስ፤ ኢዛካ ጎይኔስ፤ ኢዛ ዎሲሼ፥ «ኔኒ ታ ጾሳ ጊዲዳ ጊሻስ ታና ኣሻ» ጌስ።
ISA 44:18 ኢስቲ ኣይኮካ ኤሬቴናኔ ኣኬኬቴና፤ ኢስቲ ጼሎንታ ማላ ኢስታ ኣይፌይ ጎዜቲዴስ፤ ኢስቲ ዩሺ ቆፖንታ ማላ ኢስታ ዎዚናይ ጎርዴቲዴስ።
ISA 44:19 ኦኒካ ታኪ ጊ ቆፒቤና፤ ኤራቴꬂ ዎይኮ ኣኬካይ ባይንዳ ጊሻስ፥ «ባጋ ታማን ኤꬃዲስ፤ ኢዛ ቦንቆን ካꬅ ካꬃዲስ፤ ኢዛን ኣሾ ጺጻዳ ማዲስ፤ ሂስቲን ኣቲዳይሳን ዎስታዳ ታኒ ሃራሲዛ ሚሽ ኦꬃኔ? ሚꬃ ኣኖስ ታኒ ጎይናና ቤሲዜ?» ጋናስ ዳንዳይቤና።
ISA 44:20 ኤያ ዎዚናይ ኢዛ ባሌꬂን ኢዚ ቢዲንꬅ ቃምኤስ፤ ባና ኣሻና ዳንዳዬና፤ «ሃይሲ ታስ ኡሻቻ ኩሼን ዲዛይ ዎርዶ ጊዴኔ? ጋናስ ዳንዳይቤና።»
ISA 44:21 ጎዳይ፥ «ኢስራኤሌ ኔኒ ታ ኣሽካራ ጊዲዳ ጊሻስ፥ ‹ያቆቤ ሃይሳ ቆፓ፤ ታኒ ኔና ኦꬃዲስ፤ ኔኒ ታ ኣሽካራ። ኢስራኤሌ ታኒ ኔና ዶጊኬ።
ISA 44:22 ታኒ ኔ ሞሮ ሻራ ማላ፥ ኔ ናጋራካ ማላዶ ቱላላ ማላ ቁጫ ꬋይሳዲስ፤ ታኒ ኔና ዎዚዳ ጊሻስ ሃ ታኮ ሲማ› » ጌስ።
ISA 44:23 ጎዳይ ሃይሳ ኦꬂዳ ጊሻስ ሳሎቶ ዬጺቴ፤ ጪማ ቢታቶ ኡፋይሳን ኢሊሊቴ። ኢንቴኖ ዙማቶ፥ ኢንቴኖ ዎራቶ፥ ሚꬃቶ ኡባይ ኢሊሊቴ፤ ጋሶይካ ጎዳይ ያቆቤ ዎዚዴስ፤ ባ ቦንቾ ኢስራኤሌ ቦላ ቆንጪሲዴስ።
ISA 44:24 ኔና ኣዪ ኡሎን ሜꬊዲ ዎዚዳ ጎዳይ፥ «ኡባ ሜꬋዳ ሳሎታ ታርካ ፒዲሲዳይ፥ ሳኣካ ሚጪዳይ ታና ጎዳ።
ISA 44:25 ታኒ ዎርዶ ናቤታ ማላታ ሃዳ ኦꬃና፤ ቢቲዛይታካ ኤያ ኬሳና። ታኒ ኣꬎ ኤራንቻታ ሺራ ዬጋና፤ ኢስታ ኤራቴꬃካ ሃዳ ኦꬃና።
ISA 44:26 ታ ኣሽካራዛ ቃላ ታ ፖላና፤ ታ ኪቲዳይታ ዞሬ ታ ሚንꬃና፤ ታኒ ዬሩሳላሜ፥ ‹ኔኒ ኣሲ ዲዛሶ ጊዳና›፥ ዩሁዳ ካታማታካ፥ ‹ኢስቲ ኬጼታና›፥ ኢስታ ላሌꬃካ፥ ‹ታኒ ኦራጺሳና› ጋና።
ISA 44:27 ታኒ ጪማ ሃꬃካ፥ ‹ኔ ሜላ ጊዳ! ኔ ሻፋታካ ታ ሜሊሳና› ጋና።
ISA 44:28 ቂሮሴካ፥ ‹ኢዚ ታ ሄንꬃንቻ፤ ኢዚ ታ ሼኔ ፖላና› ጋና፤ ዬሩሳላሜይካ፥ ‹ሲማ ኤቁ› ጋና፤ ጾሳ ኬꬃስ፥ ‹ኢዛ ዮቺ ዬጌቶ› ጋና» ጌስ።
ISA 45:1 «ታ ቲይዳይሳስ፥ ኡሻቻ ታ ኦይኪዳይሳስ፥ ካዎታ ጊꬅ ቢርሻና ማላኔ ካዎቴꬃቲ ኢዛ ሲንꬃን ሃሬታና ማላ፥ ፔንጌቲ ጎርዴቶንታ ማላ ኢዛ ሲንꬃን ፔንጌታ ዶያናስ ቂሮሴስ ጎዳይ፥
ISA 45:2 ታኒ ኔ ሲንꬃራ ባና፤ ዙማታ ባሳ ጊናሳና፤ ጻርቂማላ ፔንጌታ ሜንꬃና፤ ቢራታ ኮላታታካ ቃንጻና።
ISA 45:3 ኔና ኔ ሱንꬃን ጼይጊዳ ጎዳይ፥ ኢስራኤሌ ጾሳይ ታና ጊዲዳይሳ ኔ ኤራና ማላ፥ ጌማሶን ዳጋቲዳ ኣቆታ፥ ꬉማሶን ዲዛ ሃሮ ታ ኔስ ኢማና።
ISA 45:4 ታ ኣሽካራ ያቆቤ ጊሻሲኔ ታኒ ዶሪዳ ኢስራኤሌ ጊሻስ፥ ኔ ታና ኤሮንታ ኣጊኮካ ታኒ ኔና ኔ ሱንꬃን ጼይጋዲስ፤ ቦንቾ ሱንꬂካ ኔስ ኢማዲስ።
ISA 45:5 ታኒ ጎዳ፤ ታፔ ሃራይ ኦኒካ ዴና፤ ታፔ ሃራ ጾሲ ዴና፤ ኔ ታና ኤሮንታ ኣጊኮካ ታ ኔና ሚንꬃና።
ISA 45:6 ሄሲካ ኣሳይ ኣርሼይ ሞኪዛሶፔ ቢዲ ኣርሼይ ዉሊዛሶ ጋካናስ ታፔ ሃራይ ባይንዳይሳ ኤራና ማላሳ። ታኒ ጎዳ፤ ታፔ ሃራይ ኦኒካ ዴና።
ISA 45:7 ታኒ ፖኦ ኦꬃዲስ፤ ꬉማካ ሜꬋዲስ፤ ታ ዱሬሳይሲኔ ማንቂሳይስ፤ ሃይሳ ኡባ ኦꬂዛ ጎዳይ ታና።
ISA 45:8 ኢንቴኖ ሳሎቶ፥ ቦላፌ ጺሎቴꬅ ቡኪሲቴ፤ ሻራቲካ ዱጌ ጾኪሲቴ፤ ቢታይ ዶዬቶ፤ ኣቶቴꬂ ሞኮ። ጺሎቴꬂካ ኢዛራ ኢሲፌ ዲጮ። ታኒ ጎዳይ ሄሳ ሜꬋዲስ።
ISA 45:9 «ማና ሚሻታ ጊዶፌ ባና ሜꬊዳይሳራ ማ ርሼቲዛይሳስ ኣዬ ኣና! ኡርቃይ ባና ሜꬊዳይሳ፥ ‹ኔ ኣይ ኦꬃይ?› ጊ ኤሪዜ? ኔ ኦꬂዛ ኦሶይ፥ ‹ኔስ ኩሼይ ባ› ጊ ኤሪዜ?
ISA 45:10 ባ ኣዋ፥ ‹ኣይስ ታና ሃይሳꬆ ዬላዲ?› ባ ኣዮ፥ ‹ኣይስ ኔ ሃይሳꬆ ሚጻታዲ?› ጊዛዴስ ኣዬ ኣና!
ISA 45:11 «ኢስራኤሌ ጌሻይ፥ ኢዛ ሜꬊዳ ጎዳይ ሲንꬃፌ ሃናና ሃኖታ ጊሻስ፥ ‹ታ ናይታ ጊሻስ ታና ኦይቼቲ? ታ ኩሼ ኦሶታ ጊሻስ ኣዛዜቲ?
ISA 45:12 ሳኣ ኦꬂዳይ ታና፤ ኣሲካ ኢዚ ቦላ ሜꬋዲስ። ሳሎታ ታኒ ታ ኩሼን ቶላዲስ፤ ኢስታ ቦላ ሳሎ ሜꬌታታ ዎꬃዲስ።
ISA 45:13 ታኒ ቂሮሴ ጺሎቴꬃን ዴንꬃና፤ ኢዛ ኦጌ ኡባ ጊጊሳና፤ ታ ካታማዮ ኢዚ ዛሪ ኤሳና፤ ዲኤቲዳ ታ ኣሳ ሚሽ ቃንጺሶንታ ጮ ኢዚ ሜላ ዬዳና› » ጌስ ጎዳይ ኡባፌ ዎልቃማ ጾሳይ።
ISA 45:14 ጎዳይ፥ «ጊብጼ ዱሬቴꬂኔ ቶጵያ ዛልኤይ፥ ቃሴ ጌሳን ኣዱስ ጊዲዳ ሳባ ኣሳቲካ ኔኮ ያና፤ ኔይታ ጊዳና። ኢስቲ ኔና ካላና፤ ሳንሳላታን ቃሼቲ ኔኮ ዪዲ ኔስ ጎይናና፤ ኢስታስ፥ ‹ቱማፔ ጎዳይ ኔናራ ዴስ፤ ኢዛፔ ኣቲን ሃራ ጾሲ ዴና› ጊዲ ዎሳና» ጌስ።
ISA 45:15 ኣሺዛ ኢስራኤሌ ጾሳዉ፥ ቱማፔ ኔኒ ኔና ጌንꬂዛ ጾሳ።
ISA 45:16 ኤቃ ጾሳታ ሜꬊዛይቲ ኡባይ ዬላታና፥ ጉጻና ኢሲ ቦላ ካዉያና።
ISA 45:17 ኢስራኤሌይ ጊዲኮ ጎዳን ሜርና ኣቶቴꬅ ኣታና፤ ኢንቴካ ሜርናስ ዬላቴኬታኔ ካዉዬኬታ።
ISA 45:18 ሳሎታ ሜꬊዳይ ኢዚ ጎዳ፤ ቢታ ጊግሲዲ ሜꬊዳይ፥ ሳኣስ ዮች ዬጊዳይ፥ ኢዛ ኣሳ ዱሳሶ ጊዳና ማላ ኣቲን ጮ ሜላ ዎꬃናስ ሜꬎንታ ጎዳይ፥ ታኒ ጎዳ፤ ታፔ ሃራይ ዴና።
ISA 45:19 ታ ꬉማ ቢታን ጌማን ዮታቤኬ፤ ያቆቤ ዜሬꬃታስ፥ «ታና ጮ ሃዳ ኮዪቴ» ጋቤኬ። ታኒ ጎዳይ ቱማ ሃሳያይስ፤ ሱሬ ዮኦ ኣዋጃይስ።
ISA 45:20 «ኢንቴኖ ካዎቴꬃታፔ ቤቲዳይቶ! ኢሲፌ ሺቂዲ ሃዪቴ፤ ማታ ሺቂቴ። ሚꬃፌ ኦሴቲዳ ኤቃ ጾሳ ቶኪዛይታሲኔ፥ ኣሻናዉ ዳንዳዮንታ ጾሳ ዎሲዛይታስ ኤራቴꬂ ዴና።
ISA 45:21 ኣኔ ኢንቴ ሞቶ ዮቲቴ፤ ሺሺቴ፤ ኢስቲ ኣኔ ኢሲፌ ሺቂዲ ዞሬቴቶ። ሃይሳ ኮይሮቲዲ ኣዋጂዳይ ኦኔ? ቤኒ ዮቲዳይ ኦኔ? ታና ጎዳ ጊዲኪና? ጺሎይኔ ኣሺዛ ጾሲ ታፔ ኣቲን ሃራይ ዴና።
ISA 45:22 «ኢንቴኖ ቢታ ጋጻን ዴኢዛ ኡባቶ! ታኮ ሲሚዲ ኣቲቴ። ታኒ ጾሳ፤ ታፔ ኣቲን ሃራይ ዴና።
ISA 45:23 ጉልባቴይ ኡባይ ታ ሲንꬃን ጉልባታና፤ ኢንጻርስ ኡባይካ ታናን ጫቃና፤ ታኒ ታርካ ታ ሁኤን ጫቃዲስ፤ ጉዬ ሲሞንታ ቃላይ ታ ዶናፔ ጺሎቴꬃን ኬዚዴስ።
ISA 45:24 «ኢስቲ ታ ጊሻስ ሃሳይሼ፥ ‹ጺሎቴꬂኔ ዎልቃይ ጎዳን ጻላ ዴስ› ጋና» ጌስ። ኢዛ ቦላ ሃንቆን ዴንዲዳይቲ ኡባይ ኢዛኮ ዪዲ ዬላታና።
ISA 45:25 ጊዶ ኣቲን ኢስራኤሌ ዜሬꬅ ኡባይ ጎዳን ጺላና፤ ቦንቾካ ዴማና።
ISA 46:1 ቤሌይ ካዉዪዴስ፤ ኔቦይ ኬሂ ጉጺዴስ፤ ኢስታ ኤቃ ጾሳቲ ጫና ሜሄታን ጫኔቲዳ፤ ኢስቲ ኦይኪ ዩዪዛ ሚስሌቲ ቶሆ፤ ዳቡርዳ ሜዶሳታስ ዴጾ ባኦ።
ISA 46:2 ኢስቲካ ኢሲ ቦላ ዱጌ ጉፋናና፤ ጫናካ ኣሻና ዳንዳዬቴና፤ ኢስቲካ ዲኤቲዲ ባና።
ISA 46:3 ጎዳይ፥ «ኢንቴኖ ያቆቤ ሶ ኣሳቶ! ኢስራኤሌፔ ኣቲዳ ኡባቶ! ኢንቴ ኢንቴ ኣዪ ኡሎን ሻራ ኣቶሳፌ ሃ ሲሚን ኢንቴና ታ ኦይኪዳይቶ! ኢንቴ ዬሌቶሶፌ ዶማዳ ታ ቶኪዳይቶ! ታ ጊዛ ሲዪቴ።
ISA 46:4 ኢንቴ ጪሚዲ ፑሉማና ጋካናስካ ኢንቴና ቶኪዛይ ታና፤ ታኒ ታና፤ ታኒ ኢንቴና ሜꬋዲስ፤ ታኒ ኢንቴና ቶካና፤ ታኒ ኢንቴና ካፋና፤ ታ ኢንቴና ኣሻና።
ISA 46:5 «ታና ኦናራ ጊኒሴቲ? ታና ኦናራ ሊኪሴቲ? ኑኒ ኢሲኖ ሚሳታና ማላ ታና ኦናራ ጌዳሬቲ?
ISA 46:6 ኣማርዳ ኣሳቲ ዎርቃ ባንታ ካራጺቴፔ ቆሌቴስ፤ ቢራካ ሜዛኔን ጌዳሬቴስ፤ ኢስቲ ሴሪሲ ቲጊዛ ሂላንቻ ቃጻሬቴስ፤ ኢዚካ ኢስታስ ጾሳ ሂስቲ ሜꬌስ። ኢስቲካ ኢዛስ ጎይኔቴሲኔ ያይኔቴስ።
ISA 46:7 ዴንꬂዲ ባንታ ሃሼን ቶኬቴስ፤ ዛሪዲ ሄ ዴንꬂዳ ሶሆን ዎꬄቴስ፤ ኢዚካ ሄን ኤቃ ጌስ፤ ሄፔ ኣዋካ ቃጼና፤ ኦኒካ ኢዛኮ ዋሲኮ ዛሮ ኢሜና፤ ሜቶፔካ ኢዛ ኣሼና።
ISA 46:8 «ኢንቴኖ ሞራንቻቶ! ሃይሳ ኣኬኪቴ፤ ዩሺካ ቆፒቴ፤ ኢንቴ ዎዚናን ቁምኢ ኦይኪቴ።
ISA 46:9 ካሴ ቤኒ ዎዴ ሃኒዳ ዮኦታ ኣኬኪቴ፤ ታኒ ጾሳ፤ ታፔ ሃራይ ዴና፤ ታኒ ጾሳ፤ ታ ማላይ ኦኒካ ዴና።
ISA 46:10 ዉርሴꬃን ሃናናይሳ ኮይሮታ፥ ቡሮፔ ያናይሳ ቤኒ ዮታዲስ፤ ‹ታ ሃልቾይ ሚኖ፤ ታና ኡፋይሲዛዝ ኡባ ታ ኦꬃና› ጋዲስ።
ISA 46:11 ኣርሼይ ሞኪዛ ባጋፌ ቦንቂዛ ኣርጋንꬅ፥ ሃሆ ቢታፌ ታ ቆፋ ፖሊዛ ኣስ ታኒ ጼይጋና። ታ ዮቲዳይሳ ታ ኦꬃና፤ ታ ሃልቺዳይሳ ታ ፖላና።
ISA 46:12 «ኢንቴኖ ዎዚና ሹቻቶ፥ ጺሎቴꬃፌካ ሃኪዳይቶ፥ ታና ሲዪቴ።
ISA 46:13 ታኒ ታ ጺሎቴꬃ ኤሆን ዳይስ፤ ሃሆ ጊዴና። ታ ኣቶቴꬃይ ጋምኤና፤ ታኒ ጺዮኔ ኣቶቴꬅ። ኢስራኤሌ ቦንቾ ማይዛና» ጌስ።
ISA 47:1 ጎዳይ፥ «ሃኔ ባቢሎኔ ጌላኦዬ፥ ጉዱላ ቦላ ዎꬋ ኡታ፤ ሃኔ ባቢሎኔታ ናዬ፥ ኔ ኣራታፔ ዎꬋ፤ ቢታን ኡታ፤ ሃይሳፌ ጉዬ ኔኒ ማላ ሎኦኔ ዳልቂዳልቃ ጌቴታ ጼይጌታካ።
ISA 47:2 ዎጻ ኤካዳ ካꬅ ጋጫ፤ ኔ ጎሳ ቃራ፤ ኔ ቃሚሳዛ ቃራ፤ ኔ ጺፋ ቤሳ፤ ጋዲጋዳሼ ሻፋ ፒና።
ISA 47:3 ኔ ካሎቴꬂ ቆንጮ፤ ዬላቺዛ ኔ ካሎይ ቤቶ፤ ታኒ ሃሎ ማካና፤ ታ ኦናካ ኣጊኬ» ጌስ።
ISA 47:4 ኑና ዎዚዛ ኢስራኤሌ ጌሻስ፥ ሱንꬃይ ጎዳ ኡባፌ ዎልቃማ ጾሳ።
ISA 47:5 «ሃኔ ባቢሎኔታ ናዬ፥ ꬉማሶ ጌላዳ ጮኡ ጋ ኡታ፤ ሃይሳፌ ጉዬ ኔ ካዎቴꬃታ ጎዳቴዮ ጌቴታ ጼይጌታካ።
ISA 47:6 ታኒ ታ ዴራ ሃንቄታዲስ፤ ታኒ ጺንጾዛካ ቱኒሳዲስ፤ ታኒ ኢስታ ኔ ኩሼን ኣꬃ ኢማዲስ። ኔኒ ጊዲኮ ኢስታስ ቃꬌታቤካ፤ ጪሚዳይታ ቦላካ ኬሂ ዴጾ ቃምባራ ዎꬃዳሳ።
ISA 47:7 ኔኒ፥ ‹ታኒ ሜርናስ ጎዳቶ ጊዳና› ጋዳሳ። ጊዶ ኣቲን ሃይታንታ ኣኬካቤካ፤ ኢስታ ዉርሴꬂ ኣይ ጊዳናኮ ቆፓቤካ።
ISA 47:8 «ሃኔ ኢሻሎ ዱስ ዲዛሬ! ኔርካ ኔናን ኣማኔታ ኡቲዳሬ! ኔ ዎዚናን፥ ‹ታና፤ ታፔ ኣቲን ሃራይ ባ። ሃኒፌ ጉዬ ታኒ ኣምኦ ጊዲኬ፤ ዬላዳ ꬎሚዳሮ ጊዲኬ› ጊዛሬ ሲያ!
ISA 47:9 ሃ ናምኡ ዮኦቲ፥ ኣምኤቴꬂኔ ዬሊ ꬎንꬂ ቆፋይ ባይንዳ ኢሲ ጋላስ ኔ ቦላ ጋኪ ዎꬋና፤ ኔ ኣይ ኬና ቢቲኮካ፥ ኔ ኣይ ኬና ሙሬኒኮካ ኢስቲ ኔ ቦላ ኩሜꬃ ዎልቃራ ያና።
ISA 47:10 ኔኒ ኔ ኢታቴꬃን ኣማኔታዳ፥ ‹ታና ኦኒኔ ቤኤና› ጋዳሳ። ቃሴ፥ ‹ታና፤ ታፔ ኣቲን ሃራይ ዴና ኔ ጊዳ ዎዴ ኔ ኣꬎ ኤራቴꬃይኔ ጪንጫቴꬂ ኔና ባሌꬂዳ› ጋዳሳ።
ISA 47:11 ባሺ ኔ ቦላ ያና፤ ኔኒ ዎስታ ሙሬና ዛራናኮ ኤራካ፤ ኔ ቃንጾ ኢማዳ ኔ ዳንዳዮንታ ቆሆይ ኔ ቦላ ጋካና። ኔ ቆፖንታ ሜቶይ ኔ ቦላ ዲንጋቴ ያና።
ISA 47:12 ሄኮ ቤኣ፤ ኔኒ ናቴꬃፌ ዶማዳ ኦꬃሼ ዳቡርዳ ቢታታኔ ዳሮ ሙሬኖታ ጉጃ ጉጃ ኦꬃ፤ ኦኔ ኤሪዛይ ኔስ ሃናናኮ፥ ኦኔ ኤሪዛይ ኔኒ ኔ ሞርኬታ ሺሮሳናኮ?
ISA 47:13 ኔ ኤኪዳ ዞሬ ኡባይ ኔና ዳቡራራ ኣሺዴስ፤ ኣጊናፔ ኣጊና ጋካናስ ጾሊንቴ ጼሊ ካዪዛይቲ፥ ጾሊንቴ ታይቢዛይቲ ኣኔ ሃ ዬቶ፤ ኔና ጋኪዛ ሜቶፔ ኣኔ ኢስቲ ኔና ኣሼቶ።
ISA 47:14 ሄኮ ኢስቲ ሃፓ ማላ፤ ታማይ ኢስታ ማና። ታማ ላጮፔ ዴንዲዳይሳን ባና ኣሻናስ ዳንዳዬቴና። ኣሲ ሆኣና ቦንቆይ ዴና፤ ኡቲዲ ሆኣና ታማይካ ዴና።
ISA 47:15 ናቴꬃፌ ዶማዳ ኔ ኢስታራ ዳቡርዳይቲ፥ ኔ ኢስታራ ዛልኢዳይቲ፥ ኢስቲ ኦꬃና ዳንዳይዛይ ሃይሳ ጻላ፤ ኢሶይ ኢሶይ ባ ሞሮ ጉጂ ጉጂ ባና፤ ጊዶ ኣቲን ኔና ኣሻናይ ዴና» ጌስ።
ISA 48:1 ጎዳይ፥ «ኢንቴኖ ኢስራኤሌ ሱንꬃን ጼይጌቲዳ፥ ያቆቤሶ ኣሳቶ! ዩሁዳ ዛሬፔ ቤቲዳይቶ! ኢንቴኖ ጎዳ ሱንꬃን ጫቂዛይቶ! ቱማቴꬃኒኔ ጺሎቴꬃን ጊዶንታ፥ ኢስራኤሌ ጾሳ ጼይጊዛይቶ! ሃይሳ ሲዪቴ።
ISA 48:2 ‹ኑኒ ጌሻ ካታማይን ዲዛይታ› ጊዲ ኢንቴርካ ኢንቴና ጼይጊዛይቶ! ኢስራኤሌ ጾሳን ኣማኔቲዛይቶ! ጎዳይ ኡባፌ ዎልቃማ ጾሳይ ጊዛይሳ ሲዪቴ።
ISA 48:3 «ካሴ ሃኒዳ ሚሻታ ታኒ ዳሮ ዎዴፔ ሲንꬃን ዮታ ዎꬃዲስ፤ ታ ዶናፔ ኬዚዴስ። ኢስቲ ኤሬታና ማላካ ታኒ ኦꬃዲስ፤ ታ ዲንጋቴ ኦꬂን ኢስቲካ ፖሌቲዳ።
ISA 48:4 ኔ ኣይ ማላ ሲሞንታ ኣስ ጊዲዳኮ ታ ኤራይስ፤ ኔ ሞርጌ ሻያይ ቢራታ ማላ፥ ኔ ኮንኬይ ጻርቂማላ ሚሳቴስ።
ISA 48:5 ሄሳ ጊሻስ ሃይታ ሃ ዮኦታ ቤኒ ታ ኔስ ዮታዲስ፤ ኢስቲ ፖሌታናፔ ሲንꬃን ታ ኔና ኤሪሳ ዎꬃዲስ፤ ሄሲካ፥ ‹ታ ኤቃ ጾሳቲ ሃይሳ ኦꬂዳ፤ ሚꬃፌ ማሴቲዳ ሚስሌቲኔ ቢራታፔ ኦሴቲዳ ታ ጾሳቲ ሃይሳ ታስ ኣዛዚዳ› ጎንታ ማላሳ።
ISA 48:6 «ሃይታ ሃ ዮኦታ ኔ ሲያዳሳ፤ ኣኔ ኡባካ ጼላ፤ ኢስቲ ሊኬ ጊዲዳይሳ ኔኒ ኔ ሁኤራ ማርካቲኪ? ሃኢፔ ዶማዳ ኦራꬃ ሚሻታ፥ ኔፔ ጌሚዳይታኔ ኔ ኤሮንታ ዮኦታ ታ ኔስ ዮታና።
ISA 48:7 ሄይቲ ሃኢ ሜꬌቲዳ ኣቲን ካሴ ጊዴና፤ ኢስታ ጊሻስ ኔ ሃቺፌ ኣቲን ካሴ ሲያቤካ፤ ሄሳ ጊሻስ፥ ‹ኤ፥ ታ ኢስታ ጊሻስ ኤራይስ› ጋና ዳንዳያካ።
ISA 48:8 ኔኒ ሲያቤካ ዎይኮ ኤራቤካ፤ ኔ ሃይꬂ ቤኒፔካ ዶዬቲቤና። ጋሶይካ ኔኒ ካሴካ ጪሚዛዴኔ ናቴꬃፌ ዶማዳ ኔ ማካላንቻ ጌቴቲዳይሳ ታ ኤራዲስ።
ISA 48:9 «ታ ሱንꬃ ጊሻስ ጋዳ ታኒ ታ ሃንቆ ጋምኢሳና፤ ታ ጋላታ ጊሻስ ጋዳ ታ ኔፔ ቴቃና፤ ታ ኔና ቃንጾንታ ኣጋና ማላሳ።
ISA 48:10 ቤኣ ቢራ ማላ ጊዶንታ ኣጊኮካ ኔና ጋጫዲስ፤ ታማ ማላ ሜቶን ፓጫዲስ፤
ISA 48:11 ታ ጊሻስ ጋዳ፥ ታኒ ታ ጊሻስ ጋዳ ኦꬃይስ። ታርካ ታና ዎስታ ካዉሻቴꬃስ ኣꬃ ኢሞ? ታ ቦንቾ ኦናስካ ኢሚኬ።
ISA 48:12 «ኔኖ ያቆቤ፥ ታኒ ጼይጊዳ ኢስራኤሌ ታኒ ጊዛ ሲያ። ታኒ ኢዛ፤ ኮይሮይካ ታና፤ ዉርሴꬃይካ ታና።
ISA 48:13 ቢታስ ዮች ዬጊዳይ ታ ኩሼ፤ ሳሎታ ሚጪዳይ ታ ኡሻቻ ኩሼ። ታ ኢስታ ጼይጊዛ ዎዴ ኢስቲ ኡባይካ ኢሲ ቦላ ኤቄቴስ።
ISA 48:14 «ኢንቴ ኡባይካ ኢሲ ቦላ ሺቂዲ ሲዪቴ፤ ኤቃ ጾሳታፔ ካሴ ሃይታንታ ዮቲዳይ ኦኔ? ጎዳስ ዶሬቲዳ ላጌይ ኢዚ ባቢሎኔ ቦላ ሃልቺዳይሳ ፖላና፤ ኢዛ ቄሴይካ ባቢሎኔታ ቦላ ጊዳና።
ISA 48:15 ታኒ ታርካ ዮታዲስ፤ ቱሙካ ታ ጼይጋዲስ፤ ታ ኢዛ ኤሃና፤ ኢዛ ኦሶይካ ኢዛስ ፖሌታና።
ISA 48:16 «ታኮ ሃ ሺቂዲ ሃይሳ ሲዪቴ፤ ታኒ ኮይሮፔ ዶማዳካ ጌማን ሃሳያቤኬ፤ ኢዚ ፖሌቲሺን ታ ሄን ዳይስ» ጌስ። ሃኢካ ኡባ ሃሪዛ ጎዳይኔ ኢዛ ኣያናይ ታና ኪቲዳ።
ISA 48:17 ጎዳይ ኔና ዎዚዳ ኢስራኤሌ ጌሻይ፥ «ታኒ ጎዳ ኔ ጾሳይ፥ ኔና ጎኢዛዝ ታማርሲዛይሳ፥ ባናስ ቤሲዛ ኦጌራ ኔና ካሌꬂዛይ ታና።
ISA 48:18 ኔኒ ታ ኣዛዞ ሲዪዳ ጊዲዳኮ፥ ኔስ ሳሮቴꬂ ሻፋ ማላ፥ ኔስ ጺሎቴꬂካ ኣባ ዳምባላ ማላ ጊዳናሺን።
ISA 48:19 ኔ ዜሬꬂ ኣባ ሻሚንታ ማላ፥ ኔ ናይቲካ ቆዳይ ባይንዳ ጉዱላ ማላ ጊዳናሺን፤ ኢስታ ሱንꬂ ቁጬቴና፤ ታ ሲንꬃፌ ꬋዬቴናሺን» ጌስ።
ISA 48:20 ባቢሎኔ ቢታፌ ኬዚቴ፤ ባቢሎኔ ኣሳፔ ባቃቲቴ! ሃይሳ ኢሊሊሳን ኤሪሲቴ፤ ኣዋጂቴ፤ ቢታ ጋጻ ጋካናስ ዮቲቴ፤ «ጎዳይ ባ ኣሽካራ ያቆቤ ዎዚዴስ» ጊቴ።
ISA 48:21 ኢዚ ኢስታ ባዞ ቢታራ ካሌꬂሺን ኢስቲ ሳሜቲቤቴና። ኢዚ ኢስታስ ዛላፌ ሃꬅ ፑልቲሲዴስ፤ ኢዚ ዛላ ጳልቂዴስ፤ ሃꬂካ ꬉቂ ኬዚዴስ።
ISA 48:22 «ኢታታስ ሳሮይ ባ» ጌስ ጎዳይ።
ISA 49:1 ኢንቴኖ ሃሩሮቶ፥ ታ ጊዛይሳ ሲዪቴ። ኢንቴኖ ሃሆን ዲዛ ካዎቴꬃቶ፥ ሃይሳ ኤዝጊቴ። ታኒ ታ ኣዪ ኡሎን ዲሺን ጎዳይ ታና ጼይጊዴስ፤ ታ ዬሌቶንታ ዲሺን ታና ታ ሱንꬃን ጼይጊዴስ።
ISA 49:2 ታ ኢንጻርሳ ጊꬃ ማሻ ማላ ቃራሲዴስ፤ ባ ኩሼ ኩዋን ታና ጌንꬂዴስ፤ ኢዚ ታና ሆጼ ዪሻ ማላ ኦꬂዴስ፤ ሂስቲዲ ባ ኮሆ ጊዶን ታና ቆቲዴስ።
ISA 49:3 ኢዚ ታና፥ «ኢስራኤሌ ኔ ታ ኣይሌ፥ ታኒ ታ ቦንቾ ኔናን ቆንጪሳና» ጊዴስ።
ISA 49:4 ጊዶ ኣቲን ታኒ፥ «ታኒ ሜላ ጮ ዳቡራዲስ፤ ጎኣይ ባይንዳ ጮ ሃዳ ሚሻን ታ ዎልቃ ዉርሳዲስ፤ ጊዲኮካ ታ ኦሶዛስ ኩሼ ዛራናይ ጎዳ፤ ታ ዋጋይካ ታ ጾሳ ማታና» ጋዲስ።
ISA 49:5 ሃኢ ታኒ ጎዳ ኣይፌ ሲንꬃን ቦንቼታዲስ፤ ጾሳይ ታስ ዎልቃ ጊዲዴስ፤ ታኒ ያቆቤ ኢዛኮ ዛራና ማላ፥ ኢስራኤሌ ኢዛኮ ሺሻና ማላ ኦꬂዳ ጎዳይ ሃኢካ ዛሪዲ፥
ISA 49:6 «ኔኒ ታስ ኦሳንቻ ጊዴꬂ፥ ያቆቤ ቆሞታ ኔ ዛራናይሲኔ ታ ናጊዳ ኢስራኤሌ ዛራዳ ኔ ኤሃናይሲ ሄሲ ኔና ዴጼና፤ ቃሴካ ታ ኣቶቴꬃ ቢታ ጋጻ ኔ ጋꬃና ማላ፥ ታኒ ኔና ካዎቴꬃታስ ፖኦ ሂስታና» ጌስ።
ISA 49:7 ካꬌቲዳይሳሲኔ ካዎቴꬃን ኢጼቲዳይሳስ፥ ዴሬ ሃሪዛይታ ኣሽካራ ጊዲዳ ኔስ፥ ጎዳይ፥ ኢስራኤሌ ኣሺዛ ጌሻይ፥ «ካዎቲ ኔና ቤኢዲ ዴንዲ ኤቃና፤ ካዎ ናይቲ ኔና ቤኢዲ ኔስ ዚጋና፤ ጋሶይካ ኔና ዶሪዳ ጎዳይ፥ ኢስራኤሌ ጌሻይ ኣማኔቲዳዴ» ጌስ።
ISA 49:8 ጎዳይ፥ «ታኒ ዶሪዳ ዎዴ ኔ ኦይሻ ዛራና፤ ኣቶቴꬃ ጋላስ ታኒ ኔና ማዳና፤ ዴራስ ጫቆ ቃላ ጊዳና ማላ፥ ቢታዮካ ኔ ዛራ ኤሳና ማላ፥ ካሴ ቢታ ዬጊ ꬋይዳይታስ ኢስታ ጺንጾ ኔ ዛራ ኢማና ማላ፥ ታ ኔና ማዳና፤ ታ ኔስ ኦꬃና።
ISA 49:9 ኔኒ ዲኤቲዳይታ፥ ‹ሃ ኬዚቴ!› ꬉማን ዲዛይታ፥ ‹ፖኦን ኬዚቴ› ጋና ማላ ታ ኦꬃዲስ። ኢስቲ ኦጌይ ዲዛሶን ዲዛሶን ካꬅ ማና፤ ኣይኮይ ባይንዳ ዙምቡላ ቦላ ሄሜቲዛሶ ዴማና።
ISA 49:10 ኢስቲ ጋፌቴቴና ዎይኮ ሳሜቴቴና፤ ኢስታ ባዞ ቢታ ሴላይ ዎይኮ ኣዋ ሴላይ ቆሄና። ኢስታስ ቃꬌቲዛይ ኢስታ ካሌꬃና፤ ሃꬃ ፑልቶይ ዲዛሶን ኢስታ ሄማና።
ISA 49:11 «ታ ዙማታ ኡባ ኦጌ ኬሳና፤ ታ ዎጋ ኦጌቲካ ꬎቁ ጋና።
ISA 49:12 ሄኮ ኢስቲ ሃሆ ዴሬፔ ያና፤ ኢሲ ኢሲኔቲ ፑዴሃፔ፥ ባጋይቲ ኣርሼይ ዉሊዛ ባጋፌ፥ ሃንኮ ኣቲዳይቲ ሲኒሜፔ ያና» ጌስ።
ISA 49:13 ሳሎቶ ኢንቴ፥ ኢሊሊ ጊቴ፤ ቢታዬ ኔኒ ኡፋዬታ። ኢንቴኖ ዙማቶ ኡፋይሳን ዬጺቴ፤ ጋሶይካ ጎዳይ ባ ዴራ ሚንꬄꬄስ፤ ሜቶታንቻታስ ቃꬌቴስ።
ISA 49:14 ጺዮና ጊዲኮ፥ «ጎዳይ ታና ኣጊዴስ፤ ጎዳይ ታና ባሊዴስ» ጋዱስ።
ISA 49:15 ጎዳይ፥ «ኣያ ባ ꬋንꬂዛ ና ባላናስ ዳንዳያዜ? ባ ዬሊዳ ናስ ቃꬌቴኬ? ኦኔ ኤሪዛይ ኢዛ ባላና ዳንዳያዉስ፤ ታኒ ጊዲኮ ኔና ባሊኬ።
ISA 49:16 ሄኮ ታኒ ኔና ታ ኩሼ ቃኣን ጻፋዲስ፤ ኔ ዲርሳ ጊምቤቲካ ኡባቶ ታ ሲንꬃን ዴቴስ።
ISA 49:17 «ኔ ኣቱማ ናይቲካ ኤሶን ሲማና፤ ኔና ላሊዳይቲ ኔፔ ባቃታና።
ISA 49:18 ኣኔ ꬎቁ ጋዳ ኔ ዩሾ ጼላ፤ ኔ ናይቲ ኡባይ ኢሲፌ ሺቂዲ ኔኮ ያና። ታኒ ጎዳይ ታ ዴኦን ጫቃይስ፤ ኔኒ ኢስታ ኡባ ኣሌቆ ማላ ማይኣና፤ ኔ ኢስታ ሚሺራ ማይኦ ማላ ማይኣና» ጌስ።
ISA 49:19 «ኔ ላሌታዳ ቡላ ጊዲኮካ፥ ኔ ቢታይ ሙሌራ ꬋይኮካ፥ ሃች ኔኒ ኔ ዴሬዛስ ጹንꬅ ጊዲኮካ፥ ኔና ሚቲዳይቲ ኔፔ ሃካና።
ISA 49:20 ጬጬ ዎዴ ኔ ዬሊዳ ናይቲ፥ ኔ ሃይꬂ ሲዪሺን፥ ‹ሃይሲ ጋዴይ ኑስ ኬሂ ጹሚዴስ፤ ኑ ዳናስ ኑስ ጊዲዛሶ ኢማ› ጋና።
ISA 49:21 ኔኒ ኔ ዎዚናን፥ ‹ሃይታ ታስ ዬሊዳይ ኦኔ? ታኒ ጬጪዛዴኔ ማይኔ፤ ታኒ ጎዴቲዳዴኔ ኢጼቲዳዴ ጊዳ ዲሺን ሃይታንታ ዲቺዳይ ኦኔ? ታኒ ታርካ ኣታዲስ ሺን ሂስቲን ሃይታንቲ ኣዋፔ ዪዶ?› ጋሳ» ጌስ።
ISA 49:22 ኡባ ሃሪዛ ጎዳይ፥ «ቤኣ፥ ታኒ ካዎቴꬃታ ማላታን ጼይጋና፤ ታኒ ታ ባንዲራ ኣሳስ ꬎቁ ሂስታ ኤሳና፤ ኔ ኣቱማ ናይታ ኢስቲ ኢዲሚ ኤሃና፤ ኔ ማጫ ናይታካ ባንታ ሃሼን ቶኪዲ ኤሃና።
ISA 49:23 ካዎቲ ኔና ዲቺዛ ኣዋታ ጊዳና፤ ኢስታ ማቼቲ ኔና ዲቺዛ ኣዬታ ጊዳና፤ ኢስቲ ጉፋኒዲ ኔስ ጎይናና፤ ኔ ቶሆ ቦላፌ ባናካ ላጫና፤ ኔካ ታኒ ጎዳ ጊዲዳይሳ ኤራና፤ ታናን ሂዶታ ኦꬂዛይቲ ዬላቴቴና» ጌስ።
ISA 49:24 ዲኢ ኤኪዳ ሚሽ ኦላንቻታፔ ጉዬ ዛራናስ፥ ዲኤቲ ቢዳይታ ሜንጼ ኢታታ ኩሼፔ ኣሻናስ ዳንዳዬቲዜ?
ISA 49:25 ጊዶ ኣቲን ጎዳይ፥ «ቱሙካ ኦላንቻቲ ዲኢ ኤፊዳ ሚሽ ኬሲ ኤካናስ፥ ሜንጼ ኢታታ ኩሼፔ ዲኤቲዳይታ ኣሻናስ ዳንዳዬቴስ፤ ኔናራ ኦሌቲዛይታራ ታ ኦሌታና፤ ኔ ናይታካ ታኒ ኣሻና።
ISA 49:26 ኔና ኡንኤꬂዛይቲ ባንታርካ ባ ኣሾ ማና፤ ዎይኔ ኡሻን ማꬆቲዛ ማላ ባንታርካ ባ ሱꬃን ማꬆታና፤ ሄሳፌ ጉዬ ኣሳ ዜሬꬅ ኡባይ፥ ታኒ ጎዳ፥ ኔና ኣሺዛይሳ፥ ኔና ዎዚዛይሳኔ ያቆቤ ዎልቃማ ጊዲዳይሳ ሄሳን ኤራና» ጌስ።
ISA 50:1 ጎዳይ፥ «ታኒ ኢንቴ ኣዮ ኣንጃ ዬዲዳ ዋራቃታይ ኣዋን ዲዜ? ዎይኮ ታ ኢንቴና ኣይ ታልኣ ኤኪዳዴስ ባይዛዲና? ቤኢቴ ኢንቴ ኢንቴ ናጋራ ጊሻስ ባይዜቲዴታ፤ ኢንቴ ሞሮ ጊሻስ ኢንቴ ኣያ ኣንጄታ ባዱስ።
ISA 50:2 ታኒ ዪዛ ዎዴ ሄን ኣሲ ኣይስ ꬋይዴ? ታ ጼይጊዛ ዎዴ ዛሮ ኢሚዛ ኣሲ ሄን ዋኒ ꬋይዴ? ኢንቴና ዎዛና ሚሽ ጪጋናስ ታ ኩሼይ ቃማዴ? ዎይኮ ኢንቴና ኣሻናስ ታስ ዎልቃይ ጉꬄ? ቤኢቴ ታ ሃንቆን ኣባ ሜሊሳይስ፤ ሻፋታካ ባዞ ኬሳይስ ኢስታን ዲዛ ሞሌቲ ሳሞን ሃይቂዲ ዜቄቴስ።
ISA 50:3 ታኒ ሳሎ ꬉሚሳና፤ ታኒ ኢዛ ማቃ ማይዛና» ጌስ።
ISA 50:4 ኡባ ሃሪዛ ጎዳይ ታስ ኢንጻርሳ ኤራቴꬅ ኢሚዴስ፤ ሄሳ ጊሻስ ዳቡራንቻታስ ታ ኣይ ጋና ቤሲዛኮ ታ ኤራይስ፤ ማላዶ ማላዶ ታና ቤጎꬄስ፤ ታማርሼ ዲዛ ታማሬ ማላ ሲያናስ ታ ሃይꬅ ዶዬስ።
ISA 50:5 ኡባ ሃሪዛ ጎዳይ ታ ሃይꬅ ዶይዴስ፤ ታኒ ማካላንቻ ዲኬ፤ ጉዬካ ባቃታቤኬ።
ISA 50:6 ታ ዞኮ ሾጪዛይታስ፥ ታ ቡቻ ሾዲዛይታስ ኣꬃ ኢማዲስ፤ ታ ኣይፌሶ ጩቻፌ ጌንꬃቤኬ።
ISA 50:7 ኡባ ሃሪዛ ጎዳይ ታና ማዲዛ ጊሻስ ታኒ ካዉይኬ፤ ሄሳ ጊሻስ ታ ኣይፌሶ ዳልዳቻ ሹቻ ማላ ኦꬃዲስ፤ ታኒ ዬላቶንታይሳ ኤራይስ።
ISA 50:8 ታ ጺሎቴꬃ ቆንጪሲዛዴይ ታ ማታን ዴስ፤ ሂስቲን ታና ሞታና ዳንዳይዛይ ኢዚ ኦኔ? ኣኔ ኢሲፌ ቲራን ጋይቶስ! ታ ባልጋራይ ኦኔ? ኣኔ ሃዮ!
ISA 50:9 ቤኢቴ፥ ኡባ ሃሪዛ ጎዳይ ታና ማዴስ፤ ሂስቲን ታ ቦላ ፒርዳናይ ኦኔ? ቤኢቴ፥ ኢስቲ ኡባይካ ማይኦ ማላ ጬጋና፤ ቢላይ ኢስታ ማና።
ISA 50:10 ኢንቴ ጊዶፌ ጎዳስ ያዪዛይ፥ ኢዛ ኣይላ ቃላስ ኣዛዜቲዛይ ኦኔ? ሄሳዴይ ꬉማን ቢዛ ጊዲኮኔ ፖኦይ ኢዛስ ባይንዳ ኣጊኮ ኢዚ ጎዳ ሱንꬃን ኣማኔቶ፤ ባ ጾሳንካ ዜምፖ።
ISA 50:11 ሃኢ ጊዲኮ ኢንቴ ታማ ኤꬂዲ፥ ላጪዛ ኢንቴ ጾምፔ ጾምፔ ኦይኪዳ ኡባቲ ኢንቴ ፖኦን ቢቴ፤ ኢንቴ ኦይꬂዳ ጾምፔ ፖኦን ሲሜሬቲቴ፤ ኢንቴ ታ ኩሼፔ ኤካናይሲ ሃይሳ፤ ኢንቴ ኢታ ሜቶን ኩንዳና።
ISA 51:1 «ኢንቴኖ ጺሎቴꬅ ካሊዛይቶ፥ ጎዳ ኮይዛይቶ ሲዪቴ። ኢንቴ ኢዛፔ ጳልቄቲ ኬዚዳ ዛላዛኔ ኢንቴ ቦኬቲ ኬዚዳ ኦላ ጼሊቴ።
ISA 51:2 ኢንቴ ኣዋ ኣብራሃሜኮ፥ ኢንቴና ዬሊዳ ሳራኮ ጼሊቴ። ኢዚ ባርካ ዲሺን ታኒ ኢዛ ጼይጋዲስ፤ ታኒ ኢዛ ኣንጃዲሲኔ ዳርሳዲስ።
ISA 51:3 «ጎዳይ ጺዮኖ ቱሙ ሚንꬄꬃና፤ ኢዚ ላሌቴꬃ ቃꬌታን ጼላና፤ ኢዚ ባዞ ቢታዛ ኤዴኔ ማላ፥ ኢዚ ባዞ ቢታዛ ጎዳ ኣታኪልቴሶሆ ማላ ኦꬃና፤ ኢሻሎይኔ ኡፋይሲ፥ ጋላታይኔ ዬꬃ ጬንጉርሲ ኢዚን ሴቴታና።
ISA 51:4 «ታ ባጋቶ ታ ጊዛይሳ ሲዪቴ፤ ታ ዴሬዞ ታ ጊዛ ኤዝጋ፤ ዎጋይ ታፔ ኬዛና፤ ታ ፒርዳይ ካዎቴꬃታስ ፖኦ ጊዳና።
ISA 51:5 ታ ጺሎቴꬃይ ኤሶቲ ዬꬃ ቦላ፥ ታ ኣቶቴꬃይ ማቲሼ ዴስ፤ ታ ቄሴይ ካዎቴꬃታስ ቱማ ፒርዳ ኤሃና፤ ሃሩሮቲ ታኮ ጼላና፤ ታ ቄሴካ ሂዶታ ኦꬃና።
ISA 51:6 ፑዴ ꬎቁ ጊዲ ሳሎታ ጼሊቴ፤ ዚቂ ጊዲ ዱጌ ሳኣካ ጼሊቴ። ሳሎቲ ጩዋ ማላ ቲምኢ ጊ ꬋያና፤ ሳኣይካ ኣፋላዳን ጬጋና፤ ኢዚን ዴኢዛ ኣሳይ ኡዱንጼ ማላ ኤሶን ꬋያና፤ ታ ኣቶቴꬃይ ሜርናስ ዳና፤ ታ ጺሎቴꬃስካ ዉርሴꬂ ዴና።»
ISA 51:7 ጎዳይ፥ «ኢንቴኖ ጺሎቴꬅ ኤሪዛይቶ፥ ታ ዎጋ ኢንቴ ዎዚናን ዎꬂዳ ኣሳቶ ታ ጊዛ ሲዪቴ። ኣሳይ ኢንቴና ካꬊሺን ባቦፍቴ፤ ኢስቲ ኢንቴና ጫዪሺን ዳጋሞፍቴ።
ISA 51:8 ቢላይ ማይኦ ሚዛ ማላ ኢስታ ማና፤ ኢስቲ ጉጹኔይ ሚዳ ሱፌ ማላ ጊዳና፤ ታ ጺሎቴꬂ ጊዲኮ ሜርናስ፥ ታ ኣቶቴꬂ ዬሌታፔ ዬሌታ ጋካናስ ዳና» ጌስ።
ISA 51:9 ኣቤት ጎዳ ቄሴይ ዴንዳ፤ ዎልቃ ማይኣ፤ ካሴ ኣꬊዳ ዎዴታን፥ ሚሚንቴ ቃንጼሬꬂዳይ፥ ጊታ ዳዌዛ ጫዲዳይ ኔና ጊዲኪ?
ISA 51:10 ዎዜቲ ኣቲዳይቲ ፒናና ማላ፥ ኣባኔ ጪማ ሃꬃ ሜሊሲዳይ፥ ጪማ ጊዶራ ኦጌ ጊግሲዳይ ኔና ጊዲኪ?
ISA 51:11 ጎዳይ ዎዚዳይቲ ሲማና፤ ዬጺሼካ ጺዮኔ ጌላና፤ ሜርና ኡፋይሳ ካላቻ ሁኤን ጎጻና፤ ኢስቲ ኢንጄኔ ኡፋይሳ ዱስ ዴማና፤ ጬጬይኔ ዬሆይ ኢስታፌ ባቃታና።
ISA 51:12 ጎዳይ፥ «ኢንቴና ሚንꬂዛይ ታኒ ጻላ ኢዛ፤ ሃይቂዛ ኣሳ ዜሬꬅ፥ ማታ ማላ ሹሊዛ ኣሳ ናስ ኣይስ ባባይ?
ISA 51:13 ኔና ሜꬊዳይሳ፥ ሳሎታ ቶሊዳይሳ፥ ሳኣስ ዮች ዬጊዳይሳ ኔ ባላዳሳ፤ ኔና ꬋይሳናስ ጊጌቲዳ ሜንጼ ኢታዛ ጋሶፔ ዴንዲዳይሳን ኡባ ጋላስ ሺሮን ዳሳ፤ ሂስቲን ሄ ሜንጼ ኢታዛ ሃንቆይ ሃኢ ኣዋን ዲዜ?
ISA 51:14 ቃሼቲዳይቲ ኤሶን ቢርሼታና፤ ኢስቲ ባ ቃሼቲዳ ኦላ ጊዶን ሃይቄቴና፤ ካꬂ ኢስታስ ፓጬና።
ISA 51:15 ጋሶይካ ዳምባላይ ዴንዳና ማላ ኣባ ቃꬂዛ ታኒ ጎዳይ ኔ ጾሳ፤ ታ ሱንꬂ ጎዳ ኡባፌ ዎልቃማ ጾሳ።
ISA 51:16 ታኒ ታ ቃላ ኔ ዶናን ዎꬃዲስ፤ ታ ኩሼ ኩዋን ካማዲስ፤ ሳሎታ ኢስቲ ዲዛሶን ዎꬂዳይ፥ ቢታስ ዮች ዬጊዳይ፥ ጺዮኖ፥ ‹ኔ ታ ዴሬ› ጊዳይ ታና» ጌስ።
ISA 51:17 ጎዳ ኩሼፔ ሃንቆ ኡሹ ኡዪዳሬ፥ ኦርጮካ ኣሾንታ፥ ኣስ ጋንዲጋርሲዛ ኡሹ ጺጺ ሂስታ ኡዪዳሬ፥ ሃኔ ዬሩሳላሜ ዴንዳ! ዴንዳ፥ ዴንዳ ኤቃ!
ISA 51:18 ኢዛ ዬሊዳ ናይታ ኡባፌ ካሌꬂዛይ ኢሶይካ ባዋ፤ ቃሴ ኢዛ ዲቺዳ ናይታ ኡባፌካ ኢዚ ኩሼ ኦይኪዛይ ኢሶይካ ባዋ።
ISA 51:19 ቤኣ ባሻ ቦላ ባሺ ኔ ቦላ ዪዴስ፤ ሂስቲን ኔና ኦኔ ሚንꬄꬃናይ? ኢስቲካ ላሌቴꬂኔ ꬋይስ፥ ኮሻኔ ማሻ።
ISA 51:20 ኔ ኣቱማ ናይቲ ዳቡርዳ፤ ዎጺማዴን ኦይኬቲዳ ጌኔሳ ማላ ኦጌ ጋጻን ኡባን ኢቺዳ። ጎዳ ሃንቆይኔ ኔ ጾሳ ሴራይ ኢስታ ቦላ ኩሚዴስ።
ISA 51:21 ሄሳ ጊሻስ ዎይኔ ኡሻን ጊዶንታ ጮ ማꬆቲዛሬ ሃይሳ ሲያ
ISA 51:22 ባ ዴራ ኣሺዛ ኔ ጎዳይ ኡባፌ ዎልቃማ ጾሳይ፥ «ቤኣ፤ ኔና ጋንዲጋርሲዛ ኡሻ ኔ ኩሼፔ ታ ኤካዲስ፥ ታ ሃንቆ ጹኣፔ ናምኣንꬆ ኡያካ።
ISA 51:23 ታኒ ሄሳ ኔና ኡንኤꬂዛይታ ኩሼን ዎꬃና። ኢስቲ ኔና፥ ‹ኑኒ ኔ ቦላራ ሄሜቲዲ ኣꬋና ማላ ዛቁላ› ጊዳ። ሂስቲን ኢስቲ ኣꬋና ጋካናስ ኔ ዞኮ ኢስታስ ቢታ ማላኔ ኦጌ ማላ ኦꬃዳሳ» ጌስ።
ISA 52:1 ሃኔ ጺዮኔ ዴንዳ፤ ዴንዳ፤ ዎልቃ ማይኣ፤ ጌሻ ካታማዬ ዬሩሳላሜ! ኔ ቦንቾ ማይኦ ማይኣ፤ ሃይሳፌ ጉዬ ቃጻሬቶንታይኔ ቱናይ ኔ ጊዶ ጌሌና።
ISA 52:2 ሃኔ ዬሩሳላሜ፥ ዴንዳ፤ ጉዱላ ፒታ፤ ኔ ኣራታን ኡታ። ዲኤቲዳ ጺዮኔ ናዬ፥ ኔ ቆꬌን ቃሼቲዳ ሳንሳላታ ኬሳ ዬጋ።
ISA 52:3 ጎዳይ፥ «ኢንቴ ጮ ሃዳ ባይዜቲዴታ፤ ሃኢካ ሚሺ ባይንዳ ጮ ኢንቴ ዎዜታና» ጌስ።
ISA 52:4 ኡባ ሃሪዛ ጎዳይ፥ «ኮይሮ ታ ዴሬይ ዴኣናስ ዱጌ ጊብጼ ዎꬊዴስ፤ ጉዬፔ ኣሶሬይ ጋሶይካ ባይንዳ ኡንኤꬂ ሃሪዴስ።
ISA 52:5 ‹ሂስቲን ታ ዴሬይ ጋሶይካ ባይንዳ ዲኤቲ ቢቺን ታስ ሃን ኣዚ ዲዜ?› ኢስታ ሃሪዳይቲ ኢስታ ቦላ ቂልጪዳ፤ ጋላስ ኩሜꬅ ታ ሱንꬃ ፓጬይ ባይንዳ ጫዬቴስ።
ISA 52:6 ሄሳ ጊሻስ ታ ዴሬይ ታ ሱንꬃ ኤራና፤ ሄ ጋላስ ካሴካ ዮቲዳይ ታና ጊዲዳይሳ ኢስቲ ኤራና። ኤ ሄሲ ታና» ጌስ።
ISA 52:7 ዙማ ቦላ ኤቂዳ ቶሆቲ፥ ሚሺራቾ ኤኪ ዪዛ ቶሆቲ፥ ሳሮቴꬅ ዮቲዛይቲ፥ ሎኦ ሚሺራቾ ዮቲዛይቲ፥ ኣቶቴꬅ ኣዋጂዛይቲ፥ ጺዮኖካ፥ «ኔ ጾሳይ ካዎቲዴስ» ጊዛ ቶሆቲ ኣይ ማላ ሎኦ!
ISA 52:8 ሃኔ ሲያ! ኔና ናጊይዛይቲ ባንታ ቃላ ꬎቁ ሂስቲዳ። ኢሲ ቦላ ኢሊሊሼ ዬጼቴስ፤ ጎዳይ ጺዮኔ ሲሚዛ ዎዴ፥ ኢስቲ ኢዛ ባንታ ኣይፌራ ቤኣና።
ISA 52:9 ኢንቴኖ ዬሩሳላሜን ቆሌቲዳ ሶሆቶ! ኢንቴ ኢሲ ቦላ ኢሊሊሳን ዬጺቴ፤ ጎዳይ ባ ዴራ ሚንꬄꬂዴስ፤ ዬሩሳላሜ ካታማካ ዎዚዴስ።
ISA 52:10 ጎዳይ ባ ጌሻ ቄሳ ካዎቴꬃታ ኡባ ሲንꬃን ቆንጪሳና፤ ቃሴ ቢታ ጋጻን ዲዛ ኡባይካ ኑ ጾሳ ኣቶቴꬃ ቤኣና።
ISA 52:11 ኢንቴኖ ጎዳ ኬꬃ ሚሻታ ቶኪዛይቶ! ሻኬቲቴ፥ ሻኬቲቴ፤ ሄፔ ኬዚቴ። ቱና ሚሽ ቦቾፍቴ፤ ሄፔ ኬዚቴ፤ ኢንቴ ሁኤሲካ ጌይቴ።
ISA 52:12 ጊዲኮካ ኤሶን ኬዜኬታ፤ ዎይኮ ቤቲ ቤኬታ፤ ጎዳይ ኢንቴፌ ሲንꬅ ኣꬊዲ ኢንቴና ካሌꬃና፤ ኢስራኤሌ ጾሳይካ ጉዬራ ኢንቴና ናጋና።
ISA 52:13 ጎዳይ፥ «ቤኢቴ፥ ታ ኣሽካራይ ኣኬካን ኦꬃና፤ ኢዚ ኤሬቲዳዴ ጊዳና፥ ኢዚ ꬎቁ ꬎቁ ጋና፤ ኢዚ ኬሂ ቦንቼታና።
ISA 52:14 ዳሮ ኣሳይ ኢዛን ዳጋማናሼ ጋካናስ ኣስ ኡባፌ ቆሄቲዳ ጊሻስ ኢዛ ሜꬋይ ኣሳ ሜꬋፔ ላሜቲዴስ።
ISA 52:15 ሄሳ ጊሻስ ኢዚ ዳሮ ካዎቴꬃታ ማላሊሳና፤ ኢዛ ጋሶን ካዎቴꬃቲ ባንታ ዶና ኦይካና፤ ኢስታስ ዮቴቶንታይሳ ኢስቲ ቤኣና፤ ኢስቲ ሲዪ ኤሮንታ ሚሽ ኣኬካና» ጌስ።
ISA 53:1 ዴሬዚ፥ «ኑኒ ዮቲዳይሳ ኦኔ ኣማኒዳይ? ጎዳ ቄሴይ ኦናስ ቆንጪዴ?
ISA 53:2 ኢዚ ኢዛ ሲንꬃን ጫሬቻ ማላ፥ ሜላ ቢታፌ ሞኪዛ ጻጶ ማላ ሞኪዴስ፤ ኑ ኢዛ ጼላናስ ሺጫቴꬂ ዎይኮ ቴማይ ዴና፤ ኑ ኢዛ ዶሳናስ ኢዛ ማላይ ሎኤና።
ISA 53:3 ኢዚ ኣሳን ካꬌቲዳዴኔ ኢጼቲዳዴ፤ ኢዚ ሃርጌፌኔ ሜቶፔ ሻኬቲ ኤሮንታ ኣሳ፤ ኢዚ ኣሲ ኢዛ ቤኣናፔ ባ ኣይፌሶ ሃራሶ ዛሪዛ ኣሳ ማላ ካꬌቲዳዴ ጊዲዴስ፤ ኑኒካ ኢዛ ቦንቺቤኮ።
ISA 53:4 «ቱሙካ ኢዚ ኑ ሃርጌ ባስ ኤኪዴስ፤ ቃሴ ኑ ሳኮካ ኢዚ ቶኪዴስ። ኑኒ ጊዲኮ ኢዛ ጋኪዳ ሜቶይ፥ ዴሼቴꬃይኔ ዋዬይ ጾሳፌ ኢዛስ ኢሜቲዳዛ ጊዲ ቆፒዶስ።
ISA 53:5 ጊዶ ኣቲን ኢዚ ኑ ሞሮ ጊሻስ ጫዴቲዴስ፤ ኑ ቆሆ ጊሻስ ሊቂዴስ፤ ኢዛ ቦላ ዎꬊዳ ቂጻቴይ ኑስ ሳሮ ኤሂዴስ፤ ኢዛ ማዱንꬃን ኑ ፓጺዶስ።
ISA 53:6 ኑኒ ኡባይ ዶርሳ ማላ ቶይላቲ ꬋይዶስ፤ ኑኒ ኢሶይ ኢሶይ ኑ ኦጌ ቢዶስ፤ ጎዳይ ኑ ኡባ ቆሆ ኢዛ ቦላ ዎꬂዴስ።
ISA 53:7 «ኢዚ ኡንኤቲዴሲኔ ዋዬቲዴስ፤ ጊዶ ኣቲን ዶናካ ፖጊቤና። ዶርሳ ላቃ ማላ ሹኬታናስ ላጌቲዴስ፤ ባ ኢስኬ ቃንጺዛይታ ሲንꬃን ጮኡ ጊዛ ዶርሳ ማላ ኢዚ ዶናካ ጶቂቤና።
ISA 53:8 ኢዛ ሜቶꬆኒኔ ፒርዳን ኤፊዳ፤ ኢዚ ታ ዴራ ሞሮ ጊሻስ ዴሼቲዲ፥ ፓጻይ ዲዛ ቢታፌ ዲጌቲዳይሳ ኢዛ ዜሬꬃፌ ኣኬኪዳይ ኦኔ?
ISA 53:9 ኢዚ ኣይኮ ጌኔ ሃሳዮንታ፥ ኣይ ሞሮካ ኦꬆንታ፥ ኢዛ ሃይቆይ ኢታታራ ኢሲፌ ቆዴቲዴስ፤ ጊዶ ኣቲን ኢዚ ዱሬታ ዱፎን ሞጌቲዴስ።
ISA 53:10 «ኢዛ ሊቄꬂኔ ዋዬዚ ጎዳ ሼኔ ጊዲዴስ፤ ጎዳይ ኢዛ ሼምፖ ናጋራ ያርሾ ኦꬂኮካ ኢዚ ባ ዜሬꬃ ቤኣና፤ ጎዳ ሼኔይ ኢዛ ኩሼን ፖሌታና።
ISA 53:11 ኢዛ ሼምፖይ ዋዬቲዳፔ ጉዬ ኢዚ ዴኦ ፖኦ ቤኣናኔ ኡፋዬታና። ታ ጺሎ ኣይሌዚ ባ ኤራቴꬃን ዳሮታ ጺሊሳና፤ ኢስታ ሞሮካ ቶካና።
ISA 53:12 ሄሳ ጊሻስ ኢዛ ጋኪዛ ጊሻ ጊታ ኣሳታ ጊሻራ ኢሲፌ ሂስታና፤ ዲኢ ኤሂዳይሳ ዎልቃማታራ ኢዚ ኢሲፌ ጊሼታና፤ ኢዚ ባ ሼምፖ ሃይቆስ ኣꬂ ኢሚዲ፥ ኢታ ኦꬂዛይታራ ኢሲፌ ቆዴቲዳ ጊሻስ፥ ዳሮታ ናጋራ ቶኪዴስ፤ ቆሂዳይታ ጊሻስ ጋናቲዴስ» ጋና።
ISA 54:1 ጎዳይ፥ «ሃኔ ማይኔ ማጫሳዬ፥ ና ዬላ ኤሮንታሬ ዬጻ፤ ኢሊሊ ጋዳ ኡፋይሳን ዋሳ፤ ሃኔ ሚጻታ ኤሮንታሬ፥ ባ ኣዚናራ ዲዛሪ ናይታፔ ኣዚናይ ኣጊዳሪ ናይቲ ዳራና» ጌስ።
ISA 54:2 ኔ ዱንካኔ ኤሳናሶ ኣሳ፤ ኔ ዱንካኔ ማጋላሻታካ ኣሳ ቶላ፤ ጹንꬆፋ፤ ኔ ዎዶሮታ ኣዱሳ፤ ꬊሽኬታካ ሚንꬃ ኤሳ።
ISA 54:3 ኔኒ ኡሻቻ ባጋራኔ ሃዲርሳ ባጋራ ኣካና፤ ኔ ዛሬቲ ካዎቴꬃታ ላታና፤ ሂስቲዲ ኣይኮይ ባይንዳ ኢስታ ካታማታን ኢስቲ ዳና።
ISA 54:4 «ኣይኮይ ባ ባቦፋ፤ ኔ ዬላታካ፤ ሂርጎፋ፤ ኔ ካዉያካ፤ ኔ ዬላጋቴꬃ ዬላ ኔኒ ዶጋና፤ ኔ ኣምኤቴꬃ ቦሮካ ሃይሳፌ ሲንꬃን ሃሳኣካ።
ISA 54:5 ኔና ሜꬊዳይሲ ኔስ ኣዚና፤ ኢዛ ሱንꬃይካ ኡባፌ ዎልቃማ ጎዳ። ኔና ዎዚዳይ ኢስራኤሌ ጌሻ፤ ኢዚ ቢታ ኡባ ጾሳ ጌቴቴስ።
ISA 54:6 ናቴꬃን ኤኪዲ ካꬊዳ ማቺ ማላ፤ ኔኒ ዎዚና ሜቂዳኔ ካꬌቲዳ ማቺ ማላ፤ ጊዶ ኣቲን ጎዳይ ኔና ጉዬ ዛሪ ጼይጋና» ጌስ ጾሳይ።
ISA 54:7 «ጉꬃ ዎዴ ታኒ ኔና ኣጋዲስ፤ ጊዶ ኣቲን ጊታ ቃꬌታን ታ ኔና ዛራ ሺሻና።
ISA 54:8 ታ ጉꬃ ዎዴስ ኬሃ ሃንቄቲዳ ጊሻስ፥ ታ ኣይፌሶ ኔፔ ጌንꬃዲስ፤ ጊዶ ኣቲን ታ ሜርና ኪያቴꬃን ኔስ ቃꬌታና» ጌስ ኔና ዎዚዛ ጎዳይ።
ISA 54:9 «ሃይሲ ታስ ኖሄ ዎዴ ሃꬂ ቢታ ዛሪ ꬋይሶንታ ማላ ታ ጫቆይሳꬆ ሃኢካ ኔ ቦላ ዛራዳ ሃንቄቶንታ ማላኔ ሴሮንታ ማላ ታ ጫቃዲስ።
ISA 54:10 ዙማቲ ቃጺኮ፥ ዙምቡላቲ ባ ዲዛሶፔ ኪቺኮካ፥ ኔስ ዲዛ ታ ሲቆይ ቃጼና፤ ኔናራ ታ ጫቂዳ ሳሮቴꬃ ቃላይ ላሌቴና» ጌስ ኔና ማሪዛ ጎዳይ።
ISA 54:11 ጎዳይ፥ «ሃኔ ኡንኤቲዳ ካታማዬ! ጎቴ ጫርኮን ሾጬቲዳሬ! ሚኔቶንታሬ! ቤኣ፥ ታኒ ኔና ቦንቼቲዳ ሹቻታን ኣሌቂሳ ኬጻና፤ ሴምፔሬ ሹች ኔስ ዮች ዬጋና።
ISA 54:12 ታኒ ኔ ቁስቴ ዞኦ ኢንቁን፥ ኔ ፔንጌታ ጾልቂዛ ኢንቁታን፥ ኔ ዲርሳታ ቦንቼቲዳ ሹቻታን ኦꬃና።
ISA 54:13 ኔ ኣቱማ ናይቲ ኡባይ ጎዳፔ ታማርዳይታ ጊዳና፤ ኔ ናይታ ሳሮቴꬂካ ዳራና።
ISA 54:14 ኔኒ ጺሎቴꬃን ሚና ኤቃና፤ ጌኔ ኦጌራ ኣይሶይ ኔፔ ሃካና። ኔና ባቢሲዛ ሚሺ ዴና፤ ሺሮቴꬂ ኔፔ ሃካና፤ ኔ ማታካ ሺቄና።
ISA 54:15 ኦኒካ ኔና ቆሂኮ፥ ሄሲ ታፔ ጊዴና፤ ኔና ቆሂዳይ ዲኮ ኔ ሲንꬃን ኩንዳና፤
ISA 54:16 «ቤኣ፥ ጺፋይ ታማን ቦንቃና ማላ ዎምፒና ፑኒዛይሳ፥ ኦላ ሚሽ ቆጺዛ ዎጋጬ ሜꬊዳይ ታና። ቃሴ ባሽ ጋꬃና ማላ ሜꬊዳይካ ታና፤ ባሺዛይሳ ሜꬊዳይካ ታና።
ISA 54:17 ኔና ቆሃናስ ኦሴቲዳ ሚሺ ኦꬄና። ኔና ሞቲዛ ኢንጻርስ ኡባ ኔ ላꬃና፤ ሄሳ ጊሻስ ጎዳ ኣይሌታ ጺንጾይ ሃይሳ፤ ኢስቲ ታፔ ዴማና ኣንጆይ ሄሳ» ጌስ።
ISA 55:1 ጎዳይ፥ «ኢንቴኖ ሳሜቲዳይቶ ኡባይካ ሃ ዪቴ! ሃꬃኮ ሃ ዪቴ፤ ኢንቴኖ ሚሺ ባይንዳይቶ ሻሚቴ፤ ሚቴ። ሃ ዪቴ፤ ሚሺ ባይንዳኔ ቃንጾንታ ዎይኔ ኡሺኔ ማꬅ ሻሚቴ።
ISA 55:2 ጎኦንታ ካꬃስ ኣይስ ኢንቴ ሚሽ ꬋይሴቲ? ኢንቴና ካልሶንታ ሚሻስ ኣይ ኤካናስ ኢንቴ ዎልቃ ዉርሴቲ? ሲዪቴ፤ ታ ጊዳዝ ሲዪቴ፤ ሎኦ ጊዲዳዝ ሚቴ፤ ሎኦ ቁማን ኢንቴና ኡፋይሲቴ።
ISA 55:3 ኢንቴ ሃይꬅ ዶይዲ ሃ ታኮ ሺቂቴ፤ ኢንቴ ሼምፖራ ፓጻ ዳና ማላ ታ ጊዛ ኤዝጊ ሲዪቴ፤ ካሴ ታ ዳዊቴራ ጫቂዳ ሚኖ ሲቆን ኢንቴናራካ ሜርና ጫቆ ጫቄታና።
ISA 55:4 ቤኢቴ፥ ታኒ ኢዛ ዴራስ ማርካ፥ ካሌꬂዛዴኔ ኦላ ጋዳዋ ኦꬃዲስ።
ISA 55:5 ቤኣ፥ ኔኒ ኤሮንታ ካዎቴꬃታ ጼይጋና፤ ኔና ኤሮንታ ካዎቴꬃቲ ኔኮ ኤሶን ያና። ጋሶይካ ጎዳ ኔ ጾሳይ ኢስራኤሌ ጌሻይ ባ ቦንቾን ኔና ꬎቁ ꬎቁ ሂስቲዴስ» ጌስ።
ISA 55:6 ጎዳይ ቤቲዛ ዎዴ ኢዛ ኮዪቴ፤ ማታን ዲዛ ዎዴ ኢዛ ጼይጊቴ።
ISA 55:7 ኢታ ኣሲ ባ ኦጌ፥ ቆሂዛይካ ባ ቆፋ ኣጎ፤ ጎዳኮ ሲሞ። ኢዚካ ኢዛ ማራና፤ ኢዛ ማሮቴꬃይ ዳሮ ጊዲዳ ጊሻስ ኢዚ ኑ ጾሳኮ ሲሞ።
ISA 55:8 ጎዳይ፥ «ታ ቆፋይ ኢንቴ ቆፋ ማላ፥ ኢንቴ ኦጌይካ ታ ኦጌ ማላ ጊዴና።
ISA 55:9 ሳሎቲ ሳኣፔ ꬎቂዳ ማላ፥ ታ ኦጌይ ኢንቴ ኦጌፔ፥ ታ ቆፋይካ ኢንቴ ቆፋፔ ꬎቄስ።
ISA 55:10 ኢራይኔ ሻቺ ሳሎፔ ዎꬊዲ ቢታ ካልሲዲ፥ ቢታይ ሞኪሳና ማላኔ ኣይፌ ኢማና ማላ፥ ዜሪዛዴስ ዜሬꬅ፥ ሚዛዴስ ካꬅ ኢሞንታ ዲሼ ጉዬ ሲሞንታይሳ ማላ፥
ISA 55:11 ታ ዶናፔ ኬዚዛ ቃላይካ ጮ ሃዳ ሃ ታኮ ሲሜና፤ ጊዶ ኣቲን ኢዚ ታኒ ኮዪዳይሳ ኦꬄስ፤ ባ ኪቴቲዳ ዋና ቆፋካ ፖሌስ።
ISA 55:12 ኢንቴ ኡፋይሳን ኬዛና፤ ሳሮን ሞይዜታና። ዙማቲኔ ዙምቡላቲ ኢንቴ ሲንꬃን ኢሊሊሳራ ዬጻና፤ ዴምባን ዲዛ ሚꬃቲ ኡባይካ ባንታ ኩሼ ባቃና።
ISA 55:13 ኣጉንꬃ ጊሻስ ጺዳይ፥ ኪንዲቾ ጊሻስ ባርሲኔቴ ጌቴቲዛ ሚꬂ ሞካና፤ ሄሲካ ጎዳ ሃሳኢሲዛ ሚሺ ꬋዮንታ ማላ ሜርናስ ማላታ ጊዳና» ጌስ።
ISA 56:1 ጎዳይ፥ «ቱሙ ፒርዳ ናጊቴ፤ ሎኦ ኦꬂቴ፤ ጋሶይካ ታ ኣቶቴꬃይ ማታን ዴስ፤ ታ ጺሎቴꬃይካ ኤሶን ቆንጫና።
ISA 56:2 ሳምባታ ቱኒሶንታ ቦንቺዛይ፥ ኢታ ኦሶፔ ባ ኩሼ ሺሺዛይኔ ናጊዛይ፥ ሃይታንታ ፖሊዛይ ኣንጄቲዳዴ» ጌስ።
ISA 56:3 ጎዳኮ ሺቂዳ ቤቴይ፥ «ጎዳይ ታና ባ ኣሳፔ ቱሙ ሻካና» ጎፖ። ጉንዱላይካ፥ «ታኒ ሜሊዳ ሚꬃ» ጎፖ።
ISA 56:4 ጎዳይ፥ «ታ ሳምባታታ ቦንቺዛ ጉንዱላታስ፥ ታና ኡፋይሲዛ ሚሽ ዶሪዛይታስ፥ ታ ጫቆ ቃላ ናጊዛይታስ፥
ISA 56:5 ታ ኬꬃኒኔ ታ ጊምቤታ ጊዶን ኣቱማ ናይታፔኔ ማጫ ናይታፔ ኣꬊዛ ሃሳኢሲዛ ሚሺኔ ሱንꬅ ኢስታስ ኢማና፤ ሜርናስ ꬋዮንታ ሱንꬅ ታ ኢስታስ ኢማና።
ISA 56:6 ጎዳስ ሃጋዛናስ፥ ባና ጎዳራ ጋꬂ ዋጺዳ ቤቴ ኣሳታ ጎዳ ሱንꬅ ሲቂዛይታኔ ኢዛስ ጎይኒዛይታ፥ ሳምባታ ቱኒሶንታ ቦንቺዛ ኡባታኔ ጫቆ ቃላ ናጊዛይታ፥
ISA 56:7 ታኒ ታ ጌሻ ዙማ ቦላ ኢስታ ኤሃና፤ ታ ዎሳ ኬꬃ ጊዶን ታ ኢስታ ኡፋይሳና። ታስ ያርሾ ያርሺዛሶዛ ቦላን ኢስቲ ሺሺዛ ጹጌቲዛ ያርሾኔ ሃራ ያርሾታ ታ ኤካና፤ ጋሶይካ ታ ኬꬃይ ኡባ ኣሳ ዎሳ ኬꬅ ጌቴታና» ጌስ።
ISA 56:8 ላሌቲዳ ኢስራኤሌ ሺሺዛ፥ ኡባ ሃሪዛ ጎዳይ፥ «ሺቂዳይታ ቦላ ጉጃ፥ ታኒ ሃራታካ ዛራ ሺሻና» ጌስ።
ISA 56:9 ኢንቴኖ ዶኣቶ፥ ኢንቴኖ ዎራ ዶኣቶ ኡባይካ ሃ ዪቴ፤ ኢንቴ ኣቻራካ ፑዜሬꬂቴ።
ISA 56:10 ኢስራኤሌ ኣሳ ናጊዛይቲ ቆቄ፤ ኢስታስ ኤራቴꬂ ዴና ኢስቲ ኡባይ ቦጮንታ ካና ማላ፤ ቦጫናስ ዳንዳዬቴና፤ ኢስቲ ኢቺዲ ኣጉሜቴቴስ፤ ኢስቲ ꬊስካንቻ።
ISA 56:11 ኢስቲ ጋንጃማ ካና ማላ፤ ሚዲ ካሊ ኤሬቴና። ኢስቲ ኣኬካይ ባይንዳ ሄንꬃንቻታ፤ ኢስቲ ኡባይ ባንታ ኦጌ ኦጌ ቤቴስ፤ ኢሶይ ኢሶይ ባ ጎኣ ጻላ ጼሌስ።
ISA 56:12 ኢስቲ ኢሶይ ኢሳራ፥ «ሃ ዪቴ፤ ዎይኔ ኡሹ ኣኔ ኡዮስ። ኣኔ ማꬆታና ጋካናስ ኡዮስ! ዎንቶይካ ሃቻ ማላ ጊዳና፤ ዎይኮ ሃቺፌካ ኣꬊ ሎኦ ጊዳና» ጌቴታና።
ISA 57:1 ጺሎ ኣሲ ሃይቄስ፤ ሄሳ ኦኒካ ዎዚናን ዎꬄና፤ ጾሳስ ኣቂዛ ኣሳታ ሼምፖይ ኤኬቴስ፤ ጺሎቲ ኢታፔ ኣታና ማላ ኤኬቲዳይሳ ኦኒካ ኣኬኬና።
ISA 57:2 ሱሬቴꬃን ቢዛይቲ ሳሮን ጌላና፤ ሃይቂዲካ ባ ሂꬃን ሳሮን ሼምፓና።
ISA 57:3 ጎዳይ፥ «ኢንቴኖ ማሮ ናይቶ፥ ኢንቴኖ ላጌꬂዛይሳኔ ላይማቲዛሪ ዜሬꬃቶ፥ ኢንቴ ሃ ዪቴ።
ISA 57:4 ኢንቴ ኦና ቦላ ቂልጬቲ? ኢንቴ ኢንጻርሲ ኦና ቦላ ኬሴቲ? ኢንቴ ማካላንቻታ ናይታኔ ዎርዳንቻታ ዛሬ ጊዴኬቲ?
ISA 57:5 ኢንቴ ዎላ ጋርሳኒኔ ዳሻ ሚꬃታ ጋርሳን ዚታን ጹጌቲዛይታ ጊዴኬቲ? ዙሌታኒኔ ዛላ ዛኣታ ጋርሳን ኢንቴ ናይታ ያርሺዛይታ ጊዴኬቲ?
ISA 57:6 ሃኔ ዙሌን ዲዛ ሊቆ ሹቻቲ ኔስ ኤቃ ጾሳታ፤ ኢስቲካ ኔ ቃዳታ፤ ቱሙካ ኔ ኢስታ ቦላ ኡሻ ያርሾ ጉሳዳሳ፤ ካꬃ ያርሾካ ሺሻዳሳ፤ ሂስቲን ሃ ዮኦታ ጊሻስ ታ ጮኡ ጋኔ?
ISA 57:7 ኔ ሂጻ ꬎቁ ጊዳ ኣዱሳ ዙምቡላ ሁኤን ሂጻዳሳ፤ ሄን ኔ ያርሾ ሺሻና ኬዛዳሳ።
ISA 57:8 ኔ ፔንጌፌኔ ቆሲላꬃፌ ሶ ባጋራ ኤቃ ሚስሌታ ኤሳዳሳ። ታና ኣጋዳ ኔ ሂጻ ቃራዳሳ፤ ኢዛ ቦላ ኬዛዳ ኬሃ ቃራዳሳ፤ ኔ ዶሲዳይታራ ቃላ ጊጋዳሳ፤ ኢስታ ካሎካ ቤኣዳሳ።
ISA 57:9 ዎጋራ ዛይቴ ኤካዳ፥ ሺቶ ኢዛ ቦላ ጉጃዳ ሞሎኬ ጌቴቲዛ ኤቃ ጾሳኮ ባዳሳ፤ ኔስ ኪቴቲዛይታ ሃኮ ዴሬ ኪታዳሳ፤ ዱጌ ሲኦሌ ጋካናስ ካንꬃዳሳ።
ISA 57:10 ኔ ኦጌ ዳሮፔ ዴንዲዳይሳን ዳቡራዳሳ፤ ጊዶ ኣቲን፥ ‹ሂዶታይ ባዋ› ጋቤካ። ኔ ዎልቃይ ሃ ኦራጺዴስ፤ ሄሳ ጊሻስ ኣርጋጫቤካ።
ISA 57:11 «ኔኒ ታስ ዎርዶቲዳይ፥ ኦናስ ያያዳ? ኦናስ ሂርጋዳ? ኔ ታና ቆፖንታ ኣጊዳይ፥ ሃይሳካ ኔ ዎዚናን ቁምኦንታ ኣጊዳይ፥ ታስ ኔ ያዮንታ ኢጺዳይ፥ ታኒ ጮኡ ጊዳ ጊሻስ ጊዴኔ?
ISA 57:12 ታኒ ኔ ጺሎቴꬂኔ ኔ ኦሶ ቆንጪሳና፤ ኢስቲካ ኔና ጎኤቴና።
ISA 57:13 ኔኒ ማዶ ዴማናስ ዋሲዛ ዎዴ፥ ኣኔ ኔ ሺሺዳ ኤቃ ጾሳቲ ኔና ኣሼቶ! ኢስታ ኡባካ ጫርኮይ ኤኪ ኤፋና፤ ጉꬃ ፔኖይ ኢስታ ላሊ ꬋይሳና፤ ጊዶ ኣቲን ታና ባስ ባቃታሶ ኦꬂዳ ኣሲ ቢታዮ ላታና፤ ታ ጌሻ ዙማዮ ባስ ሚሽ ኦꬃና» ጌስ።
ISA 57:14 ጎዳይ፥ «ባሲቴ፥ ባሲቴ! ኦጌ ጊግሲቴ፤ ታ ዴራ ኦጋፔ ꬉጲዛ ሚሽ ኡባ ዲጊቴ» ጌስ።
ISA 57:15 ꬎቁ ጊዳይሲ፥ ኡባ ሃሪዛይሲ፥ ኢዛስ ሱንꬃይካ ጌሽ ጌቴቲዳይሲ፥ ሜርናስ ዴኢዛይሲ፥ «ካዉዪዳይታ ኣያና ዴንꬄꬃናስ፥ ዎዚናይ ሜቂዳይታ ሚንꬄꬃናስ፥ ꬎቁ ጊዳ ጌሻሶሆን ታ ዴኣይስ፤ ቃሴካ ዎዚናይ ሜቂዳይታራኔ ኣያናን ኣሽኬ ጊዲዳይታራ ታኒ ዴኣና።
ISA 57:16 ኣሳ ኣያናይ ታ ሲንꬃን ዳቡሮንታ ማላ ታ ሜꬊዳ ኣሳስ ፔኖይ ኤቆንታ ማላ ታ ሜርናስ ዋላሲኬ፤ ታ ኡባቶ ሃንቄቲኬ።
ISA 57:17 ኢዛ ናጋራ ጊሻሲኔ ኢዛ ዪቄቴꬃ ጊሻስ ታ ሃንቄታዲስ፤ ታ ኢዛ ቃጻያዲስ፤ ታ ሲንꬃካ ሃንቆን ኢዛፔ ጌንꬃዲስ፤ ጊዶ ኣቲን ሃኢካ ሲሚዲ ኢዚ ባ ኦጌን ቢዴስ።
ISA 57:18 ታኒ ኢዛ ኦጌታ ቤኣዲስ፤ ጊዲኮካ ታ ኢዛ ፓꬃናኔ ካሌꬃና፤ ኢዛሲኔ ኢዛ ጊሻስ ዬኪዛ ጌሻታ ታ ሚንꬄꬃና።
ISA 57:19 ኢስራኤሌ ቢታን ዬኪዛይታ ዶናን ታ ጋላታ ዎꬃና። ማታኒኔ ሃሆን ዲዛይታስ ሳሮይኔ ዎፓይ ጊዶ። ታኒ ኢስታ ፓꬃና» ጌስ።
ISA 57:20 ጊዶ ኣቲን ኢታቲ ዳምባላይ ኡርቃኔ ቡራ ኬሲዛ ማላ ጮኡ ጋናስ ዳንዳዮንታይሳ ማላ ቡላኬቲዛ ኣባ ማላ።
ISA 57:21 ታ ጾሳይ፥ «ኢታታስ ሳሮይ ባዋ» ጌስ።
ISA 58:1 ጎዳይ፥ «ኔ ቃላ ꬎቁ ሂስታ ዋሳ፤ ኣይኮካ ኣሾፋ። ኔ ጬንጉርሳ ዛዬ ማላ ሲሳ። ታ ዴራስ ኢስታ ማካላቴꬃ፥ ያቆቤ ኬꬃ ኣሳሲካ ኢስታ ናጋራ ዮታ።
ISA 58:2 ኢስቲ ታና ሃች ሃች ኮዬቴስ፤ ታ ኦጌዛ ኤራናስ ላሞቲዛ ሚሳቴቴስ። ሱሬ ሚሽ ኦꬂዳ ካዎቴꬃ ማላኔ ባ ጾሳ ኣዛዞ ዬጊ ኣጎንታ ዴሬ ማላ፥ ኢስቲ ታና ሱሬ ፒርዳ ኦይቼቴስ፤ ጾሲ ኢስታኮ ሺቃናይሳ ኢስቲ ዶሲዛ ሚሳቴስ» ጌስ።
ISA 58:3 ኢስቲ ሺቂዲ፥ «ኔ ኤኮንታሺን ኑ ኣዛስ ጾሚዶኒ? ኔ ዉዱ ጎንታሺን ኣይስ ኑና ካዉሺዶኒ?» ጋና። ጎዳይ ዛሪዲ ኢስታስ፥ «ጊዲኮካ ኢንቴ ጾሚዛ ጋላስ ኢንቴ ዎዚና ቆፋ ማላ ኦꬄታ፤ ኢንቴስ ኦꬂዛይታፔ ቦንቄታ።
ISA 58:4 ኢንቴ ጾማይ ኦሻኒኔ ፓላማን፥ ጌኔ ኦሶኒኔ ዋꬌታን ፖሌቴስ፤ ሃይሳፌ ሲንꬃን ኢንቴ ጾሚዛይሳ ማላ ሃቺፌ ጉዬ ኢንቴ ዎሳይ ሳሎን ሲዬታና ጊዲ ሂዶታ ኦꬆፍቴ።
ISA 58:5 ታኒ ዶሪዳይ ሃይሳ ማላ ጾማ? ኣሲ ባና ካዉሻናይ ሃይሳ ማላ ጋላስ ጻላ? ሻጫ ማላ ባና ዚቂ ሂስቴꬄ? ዎይኮ ማቃ ማይኢዲ ቢዲንꬃ ቦላ ቡሉሌቴꬄ? ሂስቲን ኔ ጾማ ጋ ጼይጊዛይሲ ሃይሴ? ጎዳይ ሄሳ ማላን ኡፋዬቲዜ?
ISA 58:6 «ቤኢቴ ታኒ ዶሪዳ ጾማይ፥ ኡንኤቲዳይታ ሳንሳላታ ኢንቴ ዱꬃና ማላ፥ ቃምባራ ዎዶሮ ኢንቴ ቢርሻና ማላ፥ ኡንኤቲዳይታ ኢንቴ ላኣ ዬዳና ማላ፥ ቶሆ ጊዲዳ ቃምባራ ኢንቴ ሜንꬃና ማላ ጊዴኔ?
ISA 58:7 ቃሴካ ኔ ቁማፔ ጋፊዳዴስ ሻካናስ፥ ቶይላቲዳ ማንቆዛ ኔሶ ጌልꬃናስ፥ ካሎቲዳ ቤኣዳ ማይዛናስ፥ ኔስ ኣሾ ዳቦዛስ ኔ ሲንꬂ ኔ ቱኮንታ ማላ ጊዴኔ?
ISA 58:8 ኔ ሄሳꬆ ኦꬂኮ ኔ ፖኦይ ዎንታ ጻልቄ ማላ ጫራና፤ ፓጻቴꬂ ኔስ ኤሶን ጋካና፤ ጺሎቴꬂ ኔፔ ሲንꬃራ ባና፤ ጾሳ ቦንቾይ ኔና ጋራዳና።
ISA 58:9 ሄ ዎዴ ኔኒ ጼይጋና፤ ጎዳይካ ኔስ ኮያና። ኔኒ ማዶ ዴማናስ ዋሳና፤ ኢዚካ፥ ‹ታ ኔስ ዳይስ› ጋና። «ኔ ኔፔ ሜቶꬂዛ ቃምባራ፥ ኢታ ሃሳያኔ ቢራꬌን ማላታ ቤሲዛይሳ ኣጊኮ፥
ISA 58:10 ጋፊዳዴስ ኔ ቃꬌቲኮ፥ ቆሄቲዳይቲ ካላና ማላ ኔ ሂስቲኮ ኔስ ፖኦይ ꬉማ ጊዶን ፖኣና፤ ኔስ ꬉሚዳይሲካ ሴታ ጋላሳ ማላ ጊዳና።
ISA 58:11 ጎዳይ ኔና ኡባቶ ካሌꬃና፤ ኣዋይ ጹጊዳ ቢታን ኔ ኣሞ ኢዚ ኩንꬃና፤ ኔ ሜቄꬃታካ ኢዚ ሚንꬃና። ኔኒ ሃꬅ ኣላዳ ኣታኪልቴሶሆኔ ሙሌካ ቶኦንታ ፑልቶ ማላ ጊዳና።
ISA 58:12 ኔ ዳቦቲ ቤኒ ዮቻታ ዬጋና፤ ካሴ ላሌቲዳይታ ዛሪ ኬጻና፤ ኔኒ ላሌቲዳ ጊምቤ ዛሪ ኦራጺሲዛዴ፥ ዎጋ ኦጌቲ ዲዛ ካታማታ ዛሪ ጊግሲዛዴ ጌቴታና» ጌስ።
ISA 58:13 ቃሴካ፥ «ኔ ቶሆቲ ሳምባታ ሻሮንታ ማላ ኔ ሼምፒሲኮ ዱማቲዳ ታ ጋላሳን ኔ ዎዚና ቆፋ ኦꬆንታ ኣጊኮ፥ ሳምባታ ጋላሳ ኡፋይስ፥ ጎዳስ ዱማቲዳ ጋላሳ ኔኒ ቦንቾ ጋላስ ጋ ጼይጊኮ፥ ኔ ሼኔ ማላ ኔ ኦꬂዛይሳፌኔ ሃዳ ዮኦፔ ኔ ናጌቲኮ፥
ISA 58:14 ሄ ዎዴ ኔ ጎዳን ኡፋዬታና። ቢታ ቦላን ꬎቃሶሆታን ታ ኔና ቶጊሳና፤ ኔ ኣዋ ያቆቤ ጺንጾ ኔ ካላ ማና ማላ ኦꬃና» ጊዲ ጎዳይ ሃይሳ ባ ዶናን ሃሳይዴስ።
ISA 59:1 ሄኮ ጎዳ ኩሼይ ኢንቴና ኣሻናስ ቃሚቤና፤ ኢዛ ሃይꬂ ሲያናፔ ቱሊቤና።
ISA 59:2 ጊዶ ኣቲን ኢንቴ ቆሆይ ኢንቴና ኢንቴ ጾሳፌ ሻኪዴስ፤ ኢንቴ ናጋራይ ኢዛ ኣይፌሶ ኢንቴፌ ጌንꬂዴስ። ሄሳ ጊሻስ ኢዚ ሲዬና።
ISA 59:3 ኢንቴ ኩሼይ ሱꬃን፥ ኢንቴ ቢራꬌይካ ቆሆን ሙሌቲዴስ፤ ኢንቴ ዶናይ ዎርዶ ሃሳይዴስ፤ ኢንጻርሳቲ ኢታ ዮኦ ሲሲዳ።
ISA 59:4 ጺሎቴꬃን ሞቲዛይ ባዋ፤ ቱማቴꬃን ፒርዲዛይ ኦኒካ ዴና። ሃዳ ዮኦን ኣማኔቴቴስ፤ ዎርዶ ሃሳዬቴስ፤ ሺሮ ቃንꬃቲዲ ኢታቴꬅ ዬሊዳ።
ISA 59:5 ኢስቲ ሾሻ ጱጱሌ ሃጵዳ፤ ኣቻሮ ኬꬅ ኬጺዳ፤ ኢስታ ጱጱሌታ ሚዛ ኣሲ ሃይቄስ፤ ኢስታፌ ኢሶይ ሜቂኮ ፑኪዛ ሾሺ ኬዜስ።
ISA 59:6 ኢስታ ቃጪናይ ማይኦ ጊዴና፤ ኢስቲ ኦꬂዳይሳን ባንታ ቦላ ካማና ዳንዳዬቴና፤ ኢስታ ኦሶይ ኢታ፤ ኢስታ ኩሼታን ማካላ ኦሶይ ኩሚዴስ።
ISA 59:7 ኢስታ ቶሆቲ ናጋራኮ ዎጼቴስ፤ ጺሎ ሱꬅ ጉሳናስ ኤሶቴቴስ፤ ኢስቲ ኢታ ቆፋ ቆፔቴስ። ባሺኔ ቆሆይ ኢስቲ ኣꬊዳ ኦጌ ኡባስ ማላታ።
ISA 59:8 ኢስቲ ሳሮቴꬃ ኦጌ ኤሬቴና፤ ኢስቲ ቢዛ ኦጌን ሱሬ ፒርዳይ ባዋ፤ ኢስቲ ባንታ ኦጌ ጌላሲዳ፤ ሄ ኦጌራ ቢዛይ ሳሮ ዴሜና።
ISA 59:9 ሄሳ ጊሻስ ሱሬ ፒርዳይ ኑፔ ሃኪዴስ፤ ጺሎቴꬂካ ኑኮ ጋኬና። ኑኒ ፖኦ ኮዪዶስ፤ ጊዶ ኣቲን ኡባይ ꬉማ ጊዲዴስ፤ ዋጋጋ ፖኦ ኮዪዶስ፤ ጊዶ ኣቲን ሳካና ꬉማ ጊዲዴስ።
ISA 59:10 ቆቄ ማላ ጊምቤዛ ቦላ ጋንዲጋርዶስ። ኑ ሄሜታይ ኣይፌይ ባይንዳ ኣሳ ማላ ታታፌቴꬅ ጊዲዴስ፤ ኣርሼይ ዉሊሺን ሃኒዛ ሴታ ጋላስ ꬉጴቲዶስ። ቃሴ ሚኖ ኣሳታ ጊዶን ኑኒ ሃይቂዳ ኣሳ ማላ ጊዲዶስ።
ISA 59:11 ኑኒ ኡባይ ዛርዶ ማላ ላዎስ፤ ሃራጴታ ማላካ ጬጪሼ ጉጉሞስ፤ ኑኒ ሱሬ ፒርዳ ኮዪዶስ፤ ጊዶ ኣቲን ዴሚቤኮ፤ ኣታና ኮዪዶስ፤ ጊዶ ኣቲን ኢዚ ኑፔ ሃኪዴስ።
ISA 59:12 ጋሶይካ ኑ ቆሆይ ኔ ሲንꬃን ዳሪዴስ፤ ኑ ናጋራይካ ኑ ቦላ ማርካቲዴስ። ኑ ሞሮይ ኑፔ ሻኬቲቤና፤ ኑ ማካላቴꬃካ ኑኒ ኤሮስ።
ISA 59:13 ኑኒ ጎዳ ቦላ ማካሊዲ ዎርዶ ሃሳይዶስ፤ ኑ ጾሳ ካሎ ኣጊዲ ሼርኢ ጊዶስ፤ ማካላቴꬂኔ ጌኔ ዮኦ ሃሳይዶስ። ኑ ዎዚናይ ሻሪ ኡቲዳ ዎርዶ ሃሳይዶስ።
ISA 59:14 ሄሳ ጊሻስ ሱሬ ፒርዳይ ጉዬ ሱጌቲዴስ፤ ጺሎቴꬂካ ኑፔ ሃኪዴስ፤ ቱማቴꬂ ኦጌ ቦላ ꬉጴቲዴስ፤ ሱሬቴꬂካ ጌላናስ ዳንዳይቤና።
ISA 59:15 ቱማቴꬂ ኣዋንካ ቤቴና፤ ኢታቴꬃፌ ሃኪዛይ ቆሄቴስ፤ ጎዳይ ቤኢዲ ሱሬ ፒርዳይ ꬋይዳ ጊሻስ ጬጪዴስ።
ISA 59:16 ኦኒካ ባይንዳይሳ ቤኢዴስ፤ ኢዛኮ ጋናቲዛይ ባይንዳይሳ ቤኢዲ ማላሌቲዴስ፤ ሄሳ ጊሻስ ኢዛ ቄሴይ ኢዛስ ኣቶቴꬅ ኤሂዴስ፤ ኢዛ ጺሎቴꬂ ኢዛ ካፊ ኦይኪዴስ።
ISA 59:17 ኢዚ ጺሎቴꬃ ጹሩሬ ማላ ቲራን ማይኢዴስ፤ ኣቶቴꬃ ቢራታ ቆቤ ማላ ባ ሁኤ ቦላ ዎꬂዴስ። ማይኦ ጋርሳራ ማይኢዛ ማላ ሃሎ ኬሶ ማይኢዴስ፤ ማይኦ ጎጲ ማይኢዛ ማላ ቃናቴ ቦላራ ጎጲዴስ።
ISA 59:18 ኢስታ ኦሶ ማላ ሃንቆ ባ ባልጋራታስ፥ ፒርዳ ባ ሞርኬታስ ኢዚ ቃንጻና። ሃሩሮ ቢታታስ ኢስታ ኦሶ ኦሶ ማላ ኢማና።
ISA 59:19 ጎዳ ፔኖይ ሱጊ ኤኪ ቢዛ ዎልቃማ ዲኦ ማላ ያና። ሄሳ ጊሻስ ኣርሼይ ዉሊዛ ባጋራ ዲዛይቲ ጎዳ ሱንꬃስ ያያና፤ ኣርሼይ ሞኪዛ ባጋራ ዲዛይቲ ኢዛ ቦንቾስ ሃሬታና።
ISA 59:20 ጎዳይ፥ «ዎዚዛዴይ ጺዮኔሲኔ ያቆቤ ዛሬታን ባንታ ናጋራ ፓጺዳይታኮ ያና» ጌስ።
ISA 59:21 ቃሴካ ጎዳይ፥ «ታ ባጋራ ታሲኔ ኢስታስ ዲዛ ጫቆ ቃላይ ሃይሳ፤ ኢንቴ ቦላ ዲዛ ታ ኣያናይኔ ታኒ ኢንቴ ዶናን ዎꬂዳ ታ ቃላይ ሃቺፌ ዶሚዲ ሜርና ጋካናስ፥ ኢንቴ ዶናፔ፥ ኢንቴ ናይታ ዶናፔኔ ኢንቴ ዜሬꬃ ዶናፔ ሻኬቴና» ጌስ።
ISA 60:1 ጎዳይ፥ «ኔ ፖኦይ ዪዳ ጊሻስ ዴንዳዳ ፖኢሳ፤ ጎዳ ቦንቾይ ኔ ቦላ ፖኢዴስ።
ISA 60:2 ቤኣ፥ ꬉማይ ሳኣ ካማና፤ ሳካና ꬉማይ ዴራ ጎዚ ኦይካና፤ ጊዶ ኣቲን ጎዳይ ኔስ ጋካና፤ ባ ቦንቾካ ኔ ቦላ ፖኢሳና።
ISA 60:3 ካዎቴꬃቲ ኔ ፖኦኮ፥ ካዎቲካ ኔ ዎንታ ጻልቄኮ ያና።
ISA 60:4 «ꬎቁ ጋዳ ኔ ዩሾ ጼላ፤ ኢስቲ ኡባይ ኢሲፌ ሺቂዲ ኔኮ ያና፤ ኔ ኣቱማ ናይቲ ሃሆፔ፥ ኔ ማጫ ናይቲካ ኢዲሞን ኔኮ ያና።
ISA 60:5 ሄ ዎዴ ኔ ቤኣናኔ ጶላና፤ ኔ ዎዚናይ ኡፋይሳን ኩማና፤ ኣባን ዲዛ ኣቆታይ ኔኮ ያና፤ ካዎቴꬃታ ዱሬቴꬂ ኔስ ጊዳና።
ISA 60:6 ጋሜላ ማራቲ፥ ሚዲያሜፔኔ ኤፋፔ ዪዳ ጋሜላ ማራቲ ኔ ቢታ ካማና። ዎርቃኔ ኤጻኔ ኤኪዲ ሳባፔ ዪዛይቲ ጎዳ ጋላታ ኣዋጃና።
ISA 60:7 ቄዳሬፔ ዶርሳታ ዉዴይ ኡባይ ኔኮ ሺቃና፤ ኔባዮቴ ዴሬ ꬋርሾቲ ኔና ጎኣና፤ ሃይታንቲ ታስ ያርሾ ያርሺዛሶዛ ቦላ ኤኬቲዳ ያርሾታ ጊዳና፤ ታኒካ ታ ቦንቾ ኬꬃ ፑላሳና።
ISA 60:8 «ሃራጴይ ባ ኣቂዛሶ ቢዛ ማላኔ ሻራ ማላ ቢዛይቲ ሃይታንቲ ኦኔ?
ISA 60:9 ቱሙካ ሃሩሮቲ ታናን ሂዶታ ኦꬄቴስ፤ ኢዚ ኔና ባ ቦንቾ ማይዚዳ ጊሻስ፥ ጎዳ ኔ ጾሳ ቦንቾስ፥ ኢስራኤሌ ጌሻስ ሃኮፔ ኔ ኣቱማ ናይታ፥ ኢስታ ቢራራኔ ዎርቃራ ጋꬂ ኤሃናስ ታርሴሴ ማርካቤቲ ሲንꬃቲ ኬዛና።
ISA 60:10 «ኣላጋቲ ኔ ጊምቤ ጊምባና፤ ኢስታ ካዎቲ ኔስ ሃጋዛና፤ ታ ሃንቆን ታ ኔና ሾጪዳ ጊዲኮካ፥ ታ ቃꬌታ ሲቆ ኔና ቤሳና።
ISA 60:11 ኔ ፔንጌቲ ኡባቶ ዶያ ዴኣና፤ ጋላስ ጊዲን ኦማርስ ሙሌካ ጎርዴቴቴና፤ ሄሲካ ኣሳይ ካዎቴꬃታ ዱሬቴꬃ ኔኮ ኤሃናሳ፤ ኢስታ ካዎቲካ ጾኖን ኔኮ ጌላና ማላሳ።
ISA 60:12 ኔስ ሃሬቶንታ ካዎቴꬂኔ ዴሬይ ሙሌካ ዲፒ ጋና።
ISA 60:13 ታ ኬꬃይ ዲዛሶ ኣሌቂሳናስ፥ ሊባኖሴ ቦንቾይ ጉጋንꬂ፥ ጺዳይኔ ባርሴኔቴይ ኔኮ ያና፤ ታ ቶሆይ ኤቂዛሶዛ ታ ቦንቻና።
ISA 60:14 ኔና ኡንኤꬂዳይታ ኣቱማ ናይቲ ዚጊሼ ኔኮ ያና፤ ኔና ካꬊዳ ኡባቲ ኔ ቶሆ ቦላ ኩንዳና፤ ‹ሃኔ ጎዳ ካታማዬ! ኢስራኤሌስ ጌሻ ሚሽ ጊዲዳ ጺዮኔ› ጊ ጼይጋና።
ISA 60:15 «ሃኔ ኢጼታዳ ዬጌቲዳሬ፥ ኦኒካ ኔ ጊዶራ ካንꬂ ቢዛሮ ጊዶንታ ኣጊኮካ ታኒ ኔና ሜርና ጬቆሲኔ ዬሌታ ኡባስ ኡፋይስ ሂስታና።
ISA 60:16 ኔኒ ካዎቴꬃታ ማꬅ ኡያና፤ ካዎታ ꬋንꬂካ ꬋማና። ሄሳፌ ጉዬ ታኒ ጎዳይ ኔና ኣሺዛይሳ፥ ኔና ዎዚዛይሳኔ ያቆቤ ዎልቃማ ጊዲዳይሳ ኔኒ ኤራና።
ISA 60:17 ጻርቂማላ ሶሆን ዎርቃ፥ ቢራታ ሶሆን ቢራ ኤሃና፤ ሚꬃ ሶሆን ጻርቂማላ፥ ሹቻ ሶሆን ቢራታ ኤሃና፤ ሳሮቴꬅ ኔና ኣይሲዛዴ፥ ጺሎቴꬂካ ኔስ ሃላቃ ሂስታና።
ISA 60:18 ሃይሳፌ ጉዬ ኔ ቢታን ሺሮይ፥ ኔ ዛዋንካ ላሌቴꬂኔ ባሺ ሲዬቴና። ጊዶ ኣቲን ኔ ዲርሳ ጊምቤ ኣቶቴꬂ፥ ኔ ፔንጌታካ ጋላታ ጋዳ ኔ ጼይጋና።
ISA 60:19 «ሄሳፌ ጉዬ ጋላስ ኣዋ ፖኦይ ኔስ ኮሼና፤ ኦማርሲካ ኣጊናይ ፖኤና፤ ጋሶይካ ጎዳይ ኔስ ሜርና ፖኦ ጊዳና፤ ኔ ጾሳይ ኔስ ቦንቾ ጊዳና።
ISA 60:20 ኔ ኣርሼይ ሃይሳፌ ጉዬ ጌሌና፤ ኔ ኣጊናይካ ፖኦ ኢሞ ኣጌና። ጎዳይ ኔስ ሜርና ፖኦ ጊዳና፤ ኔ ጬጪዳ ጋላሳቲ ጊዳና።
ISA 60:21 ኔ ኣሳይ ኡባይ ጺሎ ጊዳና፤ ቢታዮካ ሜርናስ ላታና፤ ኢስቲ ታ ቦንቾ ቆንጪሳናስ ታኒ ቶኪዳ ፑቴታኔ ታ ኩሼ ኦሶታ።
ISA 60:22 ኔፔ ካሎዚ ሺ፥ ኡባፌ ዉርሴꬃ ካሎዚ ዎልቃማ ካዎቴꬅ ጊዳና፤ ታኒ ጎዳ፤ ዎዴይ ጋኪዛ ዎዴ ታኒ ሄሳ ኤሶን ፖላና» ጌስ።
ISA 61:1 ኡባ ሃሪዛ ጎዳ ኣያናይ ታ ቦላ ዴስ፤ ሂዬሳታስ ሚሺራቾ ዮታና ማላ፥ ጎዳይ ታና ቲይዴስ። ኢዚ ታና ዎዚናይ ሜቂዳይታ ኮላና ማላ፥ ዲኤቲዳይታ ላኣ ኬሳና ማላ፥ ቃሼቲዳይታስ ቢርሼꬅ ኣዋጃና ማላ ኪቲዴስ።
ISA 61:2 ዶሴቲዳ ጎዳ ላይꬅ፥ ኑ ጾሳይ ሃሎ ኬሲዛ ጋላሳ ኣዋጃና ማላኔ ዬኪዛይታ ኡባ ሚንꬄꬃና ማላ ታና ኪቲዴስ።
ISA 61:3 ቃሴካ ጺዮኔን ካዮቲዛይታ ዶሺሳና ማላ፥ ቢዲንꬃ ጊሻስ ፑላቴꬃ ካላቻ፤ ዬሆ ጊሻስ ኡፋይሳ ዛይቴ ኢስታ ሁኤን ታ ጉሳና ማላ፥ ጬጬ ኣያና ጊሻስ ጋላታ ሴሎ ታ ኢስታ ቦላ ጎጳና ማላ ታና ኪቲዴስ፤ ኢስቲካ ኢዛ ቦንቾ ቆንጪሳና ማላ ጎዳይ ቶኪዳ ጺሎ ሚꬅ ጌቴቲ ጼይጌታና።
ISA 61:4 ኢስቲ ቤኒ ላሌቲዳይታ ዛሪ ኬጻና፤ ካሴ ዎዴ ኩንዲዳይታካ ዛሪ ኤሳና፤ ዳሮ ዬሌታታፔ ካሴ ኩንዲዳይታኔ ላሌቲዳ ካታማታ ዛሪ ኬጻና።
ISA 61:5 ኢማꬃቲ ኢንቴ ዶርሳ ዉዴታ ሄማና፤ ኣላጋ ቢታ ኣሳቲ ኢንቴ ጋዴኒኔ ኢንቴ ዎይኔ ኣታኪልቴ ጊዶን ኦꬃና።
ISA 61:6 ኢንቴ ቃሴ፥ «ጎዳ ቄሴታ» ጌቴቲ ጼይጌታና፤ ኣሳይካ ኢንቴና፥ «ኑ ጾሳ ኦሳንቻታ» ጊዲ ጼይጋና፤ ኢንቴ ካዎቴꬃታ ኣቆታ ማና፤ ኢስታ ዱሬቴꬃንካ ኢንቴ ጬቄታና።
ISA 61:7 ታ ዴሬይ ዬላቲዳይሳ ቆꬌ ናምኡ ኩሼ ኤካና፤ ካዉዪዳይሳ ቆꬌ ባንታ ጺንጾን ኡፋዬታና፤ ባንታ ቢታስ ናምኡ ኩሼ ላታና፤ ሜርና ኡፋይሲ ኢስታስ ጊዳና።
ISA 61:8 ታኒ ጎዳይ ሱሬ ፒርዳ ዶሳይስ፤ ቦንቃኔ ቆሆ ኢጻይስ። ታ ኣማኔቴꬃን ኢስታስ ቤሲዛይሳ ኢማና፤ ኢስታራ ሜርና ጫቆ ቃላ ጌላና።
ISA 61:9 ኢስታ ዛሬቲ ካዎቴꬃታ ጊዶን፥ ኢስታ ናይቲ ዴሬ ጊዶን ኤሬቲዳይታ ጊዳና፤ ኢስቲ ቤኢዛ ኡባይ ጎዳይ ኣንጂዳ ዴሬ ጊዲዳይሳ ኤራና፤
ISA 61:10 ታኒ ጎዳን ኬሂፔ ኡፋዬታይስ፤ ታ ሼምፖያካ ታ ጾሳን ሆምቦጫዉስ፤ ሚሺራይ ባ ሁኤን ካላቻ ጎጺዛ ማላ፥ ሚሺራያካ ባና ኢንቁን ሴሌꬂዛ ማላ ኣቶቴꬃ ማይኦ ታና ማይዚዴስ፤ ጺሎቴꬃ ሴሎካ ታ ቦላ ጎጲዴስ።
ISA 61:11 ቢታይ ጫሬች ጫሪሲዛ ማላ፥ ኣታኪልቴሶሆይ ፑቴ ፑቲሲዛ ማላ፥ ኡባ ሃሪዛ ጎዳይ ካዎቴꬃታ ኡባ ሲንꬃን ጺሎቴꬂኔ ጋላታ ጫሪሳና።
ISA 62:1 ኢዚ ጺሎቴꬂ ማላዶ ፖኦ ማላ ጶላናሼ ጋካናስ፥ ኢዚ ኣቶቴꬂ ጾምፔ ማላ ፖኣናሼ ጋካናስ ታ ጺዮኒ ጊሻስ ጮኡ ጊኬ፤ ዬሩሳላሜ ጊሻሲካ ሲርጲ ጊኬ።
ISA 62:2 ካዎቴꬃቲ ኔ ጺሎቴꬅ፥ ካዎቲካ ኔ ቦንቾ ቤኣና፤ ጎዳይ ባ ዶናን ሱንꬂዳ ኦራꬃ ሱንꬃን ኔ ጼይጌታና።
ISA 62:3 ኔኒ ጎዳ ኩሼ ቦንቾ ኣኪሊሌ፥ ኔ ጾሳ ኩሼን ካዎታ ካላቻ ጊዳና።
ISA 62:4 ሃይሳፌ ጉዬ ኔኒ፥ «ኣዚናይ ዬጊ ኣጊዳሮ» ጌቴታካ። ቃሴ ኔ ቢታያካ፥ «ዬጌታ ኣቲዳሮ» ጌቴቱኩ። ጊዶ ኣቲን፥ «ታ ኡፋይሲ ኢዚና» ጌቴታና፤ ኔ ቢታያካ፥ «ኣዚናይ ዲዛሮ» ጌቴታና፤ ጎዳይ ኔናን ኡፋዬታና፤ ኔ ቢታያካ ኣዚናራ ዲዛሮ ጊዳና።
ISA 62:5 ፓንꬂ ጌላኦ ኤኪዛ ማላ፥ ኔ ናይቲ ኔና ኤካና፤ ሚሺራዚ ሚሺራይን ኡፋዬቲዛ ማላ፥ ኔ ጾሲ ኔናን ኡፋዬታና።
ISA 62:6 ሃኔ ዬሩሳላሜ! ናጊዛይታ ኔ ዲርሳታ ቦላ ኤሳዲስ፤ ኢስቲ ጋላሲካ ኦማርስ ጉዬ ጌቴና፤ ኢንቴኖ ጎዳኮ ዋሲዛይቶ፥ ሙሌካ ሼምፖፍቴ፤
ISA 62:7 ኢዚ ዬሩሳላሜ ሚንꬃና ጋካናሲኔ ቢታ ኡባ ቦላ ኤሬቲዳ ካታማ ኦꬃና ጋካናስ ኢዛስ ሼምፖ ኢሞፍቴ።
ISA 62:8 ጎዳይ ባ ኡሻቻ ኩሼኒኔ ባ ዎልቃማ ቄሴን፥ «ሃይሳፌ ጉዬ ታ ኢንቴ ካꬅ ኢንቴ ሞርኬታስ ቁማ ጊዳና ማላ ኢሚኬ፤ ቃሴ ኢንቴ ዳቡሪ ኬሲዳ ኦራꬃ ኡሻ ኣላጋቲ ኡዬቴና።
ISA 62:9 ጊዶ ኣቲን ካꬃ ሺሺዳይቲ ማና፤ ጎዳካ ጋላታና፤ ዎይኔ ቴራ ማጺ ሺሺዳይቲ ታ ኬꬃ ፔንጌን ኡያና» ጊ ጫቂዴስ።
ISA 62:10 ኣꬊቴ! ኢዛ ፔንጌታ ባጋራ ካንꬂ ቢቴ፤ ዴራስ ኦጌ ባሲቴ፤ ጊግሲቴ፤ ሹቻታ ዲጊቴ፤ ካዎቴꬃታስ ማላታ ኤሲቴ።
ISA 62:11 ቤኢቴ፥ ጎዳይ ሳኣ ጋጻ ጋካናስ፥ «ጺዮኔ ማጫ ናይስ፥ ‹ሄኮ ኔና ኣሺዛዴይ ዬስ፤ ኔ ዋጋይ ኢዛ ኩሼን ዴስ፤ ኔ ቃዳይ ኢዛኮን ዴስ› ጊቴ» ጊዲ ኣዋጂዴስ።
ISA 62:12 ኢስቲ፥ «ጎዳይ ዎዚዳ ጌሻ ዴሬታ፤ ኔካ ዬጌታ ኣቶንታሮ ኮዬቲዛ ካታማዮ» ጌቴታና።
ISA 63:1 ኤዶሜ ቢታን ዲዛ ቦጺራ ካታማፔ ዞኦ ሴሎ ማይኦ ማይኢዲ ዪዛይ ሄሲ ኢዚ ኦኔ? ሃይሲ ቦንቾ ማይኢዲ ባ ዎልቃ ጊታቴꬃን ሄሜቲሼ ዪዛይ ኢዚ ኦኔ? «ጺሎ ሃሳይዛይኔ ኣሻናስ ዎልቃይ ዲዛይ ታና ጊዲኪና!» ጌስ ጎዳይ።
ISA 63:2 ኔ ሴሎ ማይኦይ ዎይኔ ጉምኢዛ ኣሳታ ማይኦ ማላ ኣይስ ዞኢዴ?
ISA 63:3 «ጉምኢዛሶሆዛን ዎይኔ ታኒ ታርካ ዬꬋዲስ፤ ካዎቴꬃታፔ ኦኒካ ታናራ ዴና፤ ታኒ ኢስታ ታ ሃንቆን ዬꬋዲስ፤ ታ ባሻንካ ኢስታ ዲርጼሬꬃዲስ፤ ኢስታ ሱꬂ ታ ሴሎ ማይኦ ቦላ ꬋጬቲዴስ፤ ታ ማይኦይ ኡባይ ሞሬቲዴስ።
ISA 63:4 ታኒ ሃሎ ኬሳና ጋላሳይ ታ ዎዚናን ዴስ፤ ታ ዎዛና ጋላሳይካ ጋኪዴስ።
ISA 63:5 ታኒ ጼላዲስ ሺን ማዲዛይ ቤቲቤና፤ ማዲዛዴይ ባይንዳ ጊሻስ ታኒ ማላሌታዲስ ታስ ኣቶቴꬅ ኤሂዴስ፤ ታ ሃንቆይካ ታና ሚንꬂዴስ።
ISA 63:6 ታ ሃንቆን ካዎቴꬃታ ዬꬋዲስ፤ ታ ባሻን ኢስታ ማꬆሳዲስ፤ ኢስታ ሱꬃካ ቢታን ጉሳዲስ» ጋና።
ISA 63:7 ጎዳ ኪያቴꬂ፥ ጎዳይ ኑስ ኦꬂዳ ኦሶ ኡባ ጊሻስ፥ ኢዚ ጋላቴቲዛ ኦሶዛ ጊሻስ፥ ኢዛ ሲቆዛኔ ኢዛ ኪያቴꬃ ኬና፥ ኢስራኤሌ ኬꬃስ ኢዚ ኦꬂዳይሳ፥ ኤ ኢዚ ኦꬂዳ ሎኦ ኦሶታ ጊሻስ ታ ዮታና።
ISA 63:8 ጎዳይካ፥ «ቱሙካ፤ ኢስቲ ታ ዴሬታ፤ ኢስቲ ታስ ዎርዶቶንታ ኣቱማ ናይታ» ጊዴስ። ሄሳ ጊሻስ ኢዚ ኢስታ ኣሺዛዴ ጊዲዴስ።
ISA 63:9 ኢስታ ሜቶ ኡባን ጬጪዴስ፤ ኢዛ ዱሳ ኤሪሲዛ ኪታንቻይ ኢስታ ኣሺዴስ፤ ኢዚ ባ ሲቆኒኔ ባ ማሮቴꬃን ኢስታ ዎዚዴስ። ካሴ ኣꬊዳ ዎዴ ኡባን ኢስታ ዴንꬂዴሲኔ ቶኪዴስ።
ISA 63:10 ኢስቲ ጊዲኮ ማካሊዳ፤ ኢዛ ጌሻ ኣያናካ ሚሺሲዳ ሄሳ ጊሻስ ኢዚ ሲሚዲ ኢስታስ ሞርኬ ጊዲዴስ፤ ኢስታ ኦሊዴስ።
ISA 63:11 ሄሳፌ ጉዬ ኣሳይ ቤኒ ዎዴዛኔ ሙሴ ዎዴ ዩሺ ቆፒዴስ፤ ባ ዶርሳታ ሄንꬃንቻታራ ኡባፌ ኬሲዳይሲ ኢዚ ኣዋን ዲዜ? ባ ጌሻ ኣያና ኢስታ ጊዶን ዎꬂዳይሲ ሃኢ ኣዋን ዲዜ?
ISA 63:12 ቦንቼቲዳ ዎልቃማ ቄሴ፥ ሙሴስ ኡሻቻ ኩሼ ቦላ ዎꬂዴስ፤ ባስ ሜርናስ ሱንꬅ ኬሳናስ፥ ሃꬃታ ኢስታ ሲንꬃን ሻኪዴስ።
ISA 63:13 ፓራይ ኣይኮይ ባይንዳ ባዞ ቢታራ ካንꬂ ቢዛ ማላ፥ ኢስታካ ጪማ ጊዶራ ካሌꬂ ፒንꬂዴስ፤ ሄሳ ጊሻስ ኢስቲ ꬉጴቲቤቴና።
ISA 63:14 ዱጌ ዙሌ ዎꬊዛ ሜሄ ዉዴ ማላ፥ ጎዳ ኣያናይ ኢስታስ ሼምፖ ኢሚዴስ፤ ኢዚ ዴራ ሄሳꬆ ካሌꬂዳይ፥ ኔ ሱንꬃ ቦንቺሳናሳ።
ISA 63:15 ኣቤት ጎዳዉ፥ ዱማቲዳ፥ ቦንቼቲዳኔ ꬎቁ ጊዳ ኔ ኣራታፔ ሳሎፔ ዱጌ ጼላ፤ ኔ ዎልቃይኔ ኔ ሚሼቲዛ ሚሾይ ኣዋኔ? ኔ ኣሽኬቴꬃይኔ ኔ ቃꬌቴꬂ ኑፔ ሃኪዴስ።
ISA 63:16 ኣብራሃሜይ ኑና ኤሮንታ ኣጊኮ፥ ኢስራኤሌይካ ኑና ኣኬኮንታ ኣጊኮካ ኔኒ ኑስ ኣዋ። ኣቤት ጎዳዉ፥ ኔኒ ኑስ ኣዋ፤ ቤኒሶፌካ ዶሚዲ ኔ ሱንꬃይ ኑና ዎዚዛይሳ።
ISA 63:17 ኣቤት ጎዳዉ፥ ኑኒ ኔ ኦጌፔ ኬዛና ማላ፥ ኑ ዎዚና ቱሊሳዳ ኔስ ያዮንታ ማላ ኣይስ ኦꬃይ? ኔ ኣይሌታ ጊሻስ ጋዳ፥ ኔስ ጺንጾ ጊዲዳ ቆሞታ ጊሻስ ጋዳ ኑኮ ሲማ።
ISA 63:18 ጉꬃ ዎዴስ ኔ ዴሬይ ጌሻሶሆዛ ላቲዴስ፤ ሃኢ ጊዲኮ ኑ ሞርኬቲ ኔ ኬꬃ ዬꬊዳ።
ISA 63:19 ሄኮ ቤኒሶፌ ኑኒ ኔይታ፤ ጊዶ ኣቲን ኢስታ ኔኒ ሃራቤካ፤ ኢስቲ ኔ ሱንꬃንካ ጼይጌቲቤቴና።
ISA 64:1 ኣቤት ጎዳዉ፥ ኔኒ ሳሎታ ዳካዳ ዱጌ ዎꬋርኪ! ዙማቲ ኔ ሲንꬃን ኮኮሬቶ።
ISA 64:2 ቃይጻሬ ታማይ ሃꬅ ፔንቲሲዛ ማላ፥ ኔ ሞርኬታ ማታን ኔ ሱንꬂ ኤሬታና ማላ ዎꬋ፤ ካዎቴꬃታካ ኔ ሲንꬃን ኮኮርሳ።
ISA 64:3 ካሴካ ኔኒ ኑ ቆፖንታ ያሺሲዛ ሚሽ ኔ ኦꬂዳ ዎዴ ኔ ዎꬊን ዙማቲ ኮኮሪዳ።
ISA 64:4 ቤኒሶፌ ዶሚዲ ሂዶታ ኦꬂ ናጊዛይታስ ጋኪዛ ማላታ ኦꬂዳይ ኔፔ ኣቲን ሃራ ጾስ ቤኢዳ ኣይፌይኔ ሲዪዳ ሃይꬂ ሙሌካ ዴና።
ISA 64:5 ሱሬ ሚሽ ኡፋይሳን ኦꬂዛይታኔ ኔ ኦጌ ቆፒዛይታ ኔኒ ማዳሳ፤ ጊዶ ኣቲን ኑኒ ኢስታ ቦላ ፓጬይ ባይንዳ ናጋራ ኦꬂዳ ጊሻስ ሄኮ ኔኒ ኑ ቦላ ሃንቄታዳሳ፤ ሂስቲን ኑኒ ዋኒ ኣታና ዳንዳይዞኒ?
ISA 64:6 ኑኒ ኡባይካ ቱና ኣሳ ማላ ጊዲዶስ፤ ኑ ጺሎቴꬃ ኦሶ ኡባይ ቱኒዳ ጫርቃ ማላ። ኑኒ ኡባይካ ቦንጮ ማላ ቆኪዶስ፤ ኑ ናጋራይ ኑና ጫርኮ ማላ ፒቲ ኤፊዴስ።
ISA 64:7 ኦኒካ ዎሳን ኔ ሱንꬅ ጼይጌና፤ ኔና ኦይካና ፓጪዛይካ ዴና፤ ኔኒ ኔ ኣይፌሶ ኑፔ ጌንꬃዳሳ፤ ኑ ናጋራይ ኑና ꬋይሳና ማላ ኣጋዳሳ።
ISA 64:8 ጊዲኮካ ኣቤት ጎዳዉ፥ ኔኒ ኑስ ኣዋ፤ ኑኒ ኡርቃታ፤ ኔኒ ኑና ሜꬊዳይሳ፤ ኑኒ ኡባይካ ኔ ኩሼን ሜꬌቲዳይታ።
ISA 64:9 ኣቤት ጎዳዉ፥ ኬሃ ሃንቄቶፋ፤ ኑ ናጋራካ ሜርናስ ቆፖፋ፤ ኑስ ዎሴታ፤ ኑ ኡባይ ኔ ዴሬ ጊዲዳ ጊሻስ ኔ ኣይፌሶ ኑኮ ሃ ዛራ።
ISA 64:10 ኔ ጌሻ ካታማቲ ኣይኮይ ባይንዳ ባዞ ጊዲዳ፤ ጺዮናካ ኣይኮይ ባይንዳ ባዞ ቢታ ጊዳዱስ፤ ዬሩሳላሜይካ ዬጌታ ኣታዱስ።
ISA 64:11 ኑ ኣዋቲ ካሴ ኔና ኢዛን ጋላቲዛ ጾሳ ኬꬃይ ታማን ጹጌቲዴስ፤ ካሴ ሎኦሶቲ ኡባቲካ ꬋይዳ።
ISA 64:12 ኣቤት ጎዳዉ፥ ሃይሲ ኡባይ ሃኒንካ ኔ ሲሚኪ? ኔኒ ጮኡ ጋዳ ኑና ዛዋይ ባይንዳ ቂጻቴ ቃጻያይ?
ISA 65:1 ጎዳይ፥ «ታና ዎሶንታይታስ ታ ቆንጫዲስ፤ ታና ኮዮንታይታስ ቤታዲስ። ታ ሱንꬃ ጼይጎንታ ካዎቴꬃስ፥ ‹ዬ! ዬ!› ጋ ኮያዲስ።
ISA 65:2 ማካላንቻ ዴሬታስ፥ ኢታ ኦጌራ ቢዛይታስ፥ ባንታ ዎዚና ኣሞ ካሊዛይታስ፥ ታ ኩሼ ጋላስ ኩሜꬅ ሚጫዲስ።
ISA 65:3 ኣታኪልቴሶሆን ያርሾ ያርሺዛይቲ፥ ኡርቃፌ ሜꬌቲዳ ያርሾሶሆታ ቦላ ኤጻኔ ጩዋሲዛይቲ፥ ኡባ ዎዴ ታና ሃንቄꬂዛ ዴሬታ።
ISA 65:4 ዱፎ ጊዶን ኡቲዛይቲ፥ ጌማሶሆን ኣቂዛይቲ፥ ጉዱንꬃ ኣሾ ሚዛይቲ፥ ኢስቲ ባንታ ኦቶታ ቱኒዳ ኣሾ ጫምባ ኩንꬂዛይታ።
ISA 65:5 ኢስቲ፥ ‹ታ ጌሽ ጊዲዳ ጊሻስ ኪቻ፤ ታ ማታ ዮፓ፤ ታኮ ሺቆፓ› ጊዛይታ። ሃይሳ ማላ ዴሬይ ታ ሲꬌን ጩዋ ማላኔ ጋላስ ኩሜꬅ ኤጺዛ ታማ ማላ።
ISA 65:6 «ቤኢቴ፥ ታ ሲንꬃን ጻፌቲ ኡቲዴስ፤ ታ ጮኡ ጊኬ፤ ጊዶ ኣቲን ኢዛ ኦሶ ኦሶ ማላ ታ ኢዛስ ኢማና፤ ኢስታ ሃኖ ማላ ታ ኢስታስ ጪጋና።
ISA 65:7 ኢንቴ ናጋራ ሃሎኔ ኢንቴ ኣዋታ ናጋራ ሃሎ ታ ኬሳና። ኢስቲ ዙማታ ቦላ ጹጌቲዛ ያርሾ ሺሺዳ ጊሻስ፥ ዙምቡላታ ቦላ ታና ጫዪዳ ጊሻስ፥ ኢስቲ ማኪዳ ሚሻን ኢስታስ ዛሪ ማኬታና፤ ኢስቲ ካሴ ኦꬂዳ ኦሶ ኩሼ ዛሪ ኤካና» ጌስ።
ISA 65:8 ጎዳይ፥ «ዎይኔ ዉርጮ ጊዶን ኢሊሎይ ዲዛ ማላ ኣሳይካ፥ ‹ኢዛ ጊዶን ሎኦ ሚሺ ዲዛ ጊሻስ ኢዛ ቃንጾፍቴ› ጊዛ ማላ፥ ታኒካ ታ ኣይሌታ ጊሻስ ጋዳ ሄሳꬆ ኦꬃና፤ ሙሌራ ታኒ ኢስታ ꬋይሲኬ።
ISA 65:9 ታኒ ያቆቤ ዜሬꬃታፔኔ ዩሁዳ ዜሬꬃፌ ታ ዙማታ ላታናይታ ታ ኤሃና፤ ዶሬቲዳ ታ ዴሬይ ኢስታ ላታና፤ ታ ኣሽካራቲካ ሄን ዳና።
ISA 65:10 ታና ሚንꬂ ኮይዛ ታ ዴሬዛስ፥ ላሻሮኔይ ዶርሳ ዉዴይ ሄሜቲዛሶ፥ ኣኮሬ ዙሌይ ዉዴ ሜሄይ ፔኢዛሶ ጊዳና።
ISA 65:11 ጊዶ ኣቲን ጎዳ ኣጊዳ ኢንቴስ፥ ታ ጌሻ ዙማ ዶጊዳ ኢንቴስ፥ ‹ታ ባሶ› ጌቴቲዛ ኤቃ ጾሳስ ሶሆ ጊጊሲዳ ኢንቴስ፥ ‹ጋዴ› ጌቴቲዛ ኤቃ ጾሳስ ዋላኬቲዳ ዎይኔ ኡሹ ዋንጫን ኩንꬂዳ ኢንቴስ፥
ISA 65:12 ታ ጼይጊን ዛሮንታ ኢጺዳ ጊሻስ፥ ታ ዮቲን ሲዮንታ ኢጺዳ ጊሻስ፥ ታ ሲንꬃንካ ኢታ ኦꬂዳ ጊሻስ፥ ታና ሃንቄꬂዛ ሚሽ ኢንቴ ዶሪዳ ጊሻስ፥ ታ ኢንቴና ማሻስ ኣꬃ ኢማና፤ ኢንቴ ኡባይካ ሹኬታናስ ቆꬌ ኢማና» ጌስ።
ISA 65:13 ሄሳ ጊሻስ፥ ኡባ ሃሪዛ ጎዳይ፥ «ቤኢቴ፥ ታ ኣሽካራቲ ማና፤ ኢንቴ ጊዲኮ ጋፋና፤ ታ ኣሽካራቲ ኡያና፤ ኢንቴ ጊዲኮ ሳሜታና፤ ታ ኣሽካራቲ ኡፋዬታና፤ ኢንቴ ጊዲኮ ዬላታና።
ISA 65:14 ታ ኣሽካራቲ ዎዚናፔ ኡፋይሳን ዬጻና፤ ኢንቴ ጊዲኮ ዎዚናይ ሜቂን ኢንቴ ዋሳና፤ ኢንቴ ኣያናይ ሜቂዳ ጊሻስ ኢንቴ ዎ ዎ ጊዲ ዋሳና።
ISA 65:15 ኢንቴ ኢንቴ ሱንꬃ ዶሬቲዳ ታ ዴሬይ ቃንጋና ማላ ኣꬂ ኢማና፤ ኡባ ሃሪዛ ጎዳይ ኢንቴና ዎꬋና፤ ባስ ሃጋዚዛይታስ ጊዲኮ ኢዚ ሃራ ሱንꬅ ኢማና።
ISA 65:16 ሄሳ ጊሻስ ቢታይ ቦላ ኣንጆ ኮይዛዴይ ቱማ ጾሳ ሱንꬃን ኣንጄታና፤ ቢታይን ጫቂዛ ኣሲ ቱማ ጾሳ ሱንꬃን ጫቃና፤ ካሴ ኣꬊዳ ሜቶቲ ዶጌቲዳ፤ ታ ኣይፌፔካ ጌሚዳ» ጌስ።
ISA 65:17 ጎዳይ፥ «ሄኮ፥ ታኒ ኦራꬃ ሳሎታኔ ኦራꬃ ሳኣ ሜꬋና፤ ካሴ ኣꬊዳ ሚሻቲ ቆፌቴቴናኔ ሃሳኤቴቴና።
ISA 65:18 ጊዶ ኣቲን ታኒ ሜꬊዛይሳን ኡፋዬቲቴ፤ ሜርናስ ሆምቦጪቴ፤ ታኒ ዬሩሳላሜ ኡፋይሳስ፥ ኢዚ ዴራካ ሆምቦጬꬃስ ሜꬋና።
ISA 65:19 ታኒ ዬሩሳላሜን ኡፋዬታና፤ ታኒ ታ ዴሬዛን ሆምቦጫና፤ ሃይሳፌ ጉዬን ዬሆይኔ ዋሶይ ሄን ሴቴቴና።
ISA 65:20 ሃይሳፌ ጉዬን ሄን ጉꬃ ዎዴስ ሼምፖራ ፓጻ ዳና ዪꬋይ ዎይኮ ዎዴ ካሎንታ ጪማይ ዴና፤ ጼቱ ላይꬅ ኩሚዳ ኣሲ ሃይቂኮ ዎዴይ ጋኮንታ ሙልቄቲ ሃይቂዳ ኣሳ ማላ ቆዴታና፤ ኣሲ ጼቱ ላይꬅ ኩሞንታ ሃይቂኮ ቦሻን ሃይቂዳ ማላ ቆዴቴስ።
ISA 65:21 ሄ ዎዴ ኣሳይ ኬꬅ ኬጻና፤ ኢዛንካ ዳና፤ ዎይኔ ሚꬅ ቶኪዲ ኢዛ ኣይፌ ማና።
ISA 65:22 ሃይሳፌ ጉዬ ሃራ ኣሲ ኢዛን ዳና ኬꬅ ኬጼቴና፤ ዎይኮ ሃራይ ማና ሚሺ ቶኬቴና፤ ታ ዴራ ላይꬂ ሚꬃ ላይꬃ ማላ ኣዱቃና፤ ታኒ ዶሪዳይቲ ባንታ ኩሼ ኦሶን ኣዱሳ ላይꬅ ኡፋዬታና።
ISA 65:23 ኢስታ ዳቡራይ ሃዳ ኣቴና፤ ቃዳ ኢታ ናካ ዬሌቴና፤ ኢስቲኔ ኢስታ ዜሬꬂ ጎዳይ ኣንጂዳ ዴሬ ጊዳና።
ISA 65:24 ኢስቲ ቡሮ ታና ጼይጋናፔ ካሴታ ታኒ ኮያና፤ ኢስቲ ታስ ዮቲ ዉርሶንታ ታ ሲያና።
ISA 65:25 ካና ሱይቴይኔ ዶርሳ ላቃይ ኢሲፌ ማና፤ ጋሞይ ቦራ ማላ ማታ ማና፤ ሾሺ ጉዱላ ላጫና፤ ታ ጌሻ ዙማ ቦላ ኢስቲ ቆሄቴቴና፤ ባሺካ ኢስታ ቦላ ዬና» ጌስ።
ISA 66:1 ጎዳይ፥ «ሳሎይ ታስ ኣራታ፤ ሳኣይካ ታስ ዬꬊዛሶ፤ ሂስቲን ኢንቴ ታስ ኬጻና ኬꬂኔ ታ ሼምፓና ሶይ ኣዋይሴ?
ISA 66:2 ሃይታ ኡባ ታ ኩሼይ ኦꬂቤኔ? ሃይቲ ቤታና ማላ ኦꬂዳይ ታና ጊዲኪና? ታኒ ኣሽኬ፤ ዎዚናይ ሜቂዳዴኔ ታ ቃላስካ ኮኮሪዛዴኮ ታ ጼላይስ።
ISA 66:3 «ጊዶ ኣቲን ታስ ቦራ ያርሺዛዴይ ኣስ ዎꬊዛዴ ማላ፥ ዶርሳ ላቃ ያርሺዛዴይ ካና ጩሊ ዎꬊዛ ኣሳ ማላ፤ ካꬃ ያርሾ ሺሺዛዴይ፥ ጉዱንꬃ ሱꬅ ሺሺዛዴ ማላ፤ ቆፊሶስ ኤጻኔ ታስ ጩኣሲዛዴይ፥ ኤቃ ጾስ ጎይኒዛ ኣሳ ማላ፤ ኢስቲ ባንታ ኦጌ ዶሪዳ፤ ኢስታ ሼምፖያካ ኢስታ ቱናቴꬃን ኡፋዬታዉስ።
ISA 66:4 ሄሳ ጊሻስ ሜቶ ታ ኢስታ ቦላ ጋꬃና፤ ኢስቲ ያዪዳ ሚሺካ ታ ኢስታ ቦላ ኤሃና፤ ጋሶይካ ታ ጼይጊዛ ዎዴ ኢስቲ ኮዪቤቴና፤ ታ ዮቲሺን ኢስቲ ኤዝጊቤቴና፤ ታ ሲንꬃን ኢታ ሚሽ ኦꬂዳ፤ ታና ኢቲዛ ሚሽ ዶሪዳ» ጌስ።
ISA 66:5 ኢንቴኖ ቃላስ ኮኮሪዛይቶ፥ ሃይሳ ጎዳ ቃላ ሲዪቴ፤ «ኢንቴ ኢሻንቲ ኢንቴና ኢጺዳይቶ፥ ታ ሱንꬃ ጊሻስ ኢንቴና ኬሲ ዬጊዳይቶ! ኢንቴና፥ ‹ኣኔ ጎዳይ ቦንቼቶ! ኣኔ ኢንቴ ኡፋይሳካ ቤኦስ› ጊዳ፤ ጊዲኮካ ኢስቲ ዬላታናይሲ ኣቴና።
ISA 66:6 ሄሳ ካታማን ዲዛ ዋሶዛ ሲዪቴ፤ ጾሳ ኬꬃን ዲዛ ጫባ ሲዪቴ፤ ሄሲካ ጎዳ ጬንጉርሳ፤ ኢዚ ባ ሞርኬታስ ቤሲዛ ዋጋ ቃንጻና።
ISA 66:7 ሚጻታናፔ ካሴታ ዬላዉስ፤ ሚጻ ዋዬ ቤኦንታ ዳሼ ኣቱማ ና ዬላዉስ።
ISA 66:8 ሄሳ ማላ ዮኦ ሲዪ ኤሪዛይ ኦኔ? ሄሳ ማላ ዮኦ ቤኢ ኤሪዛይ ኦኔ? ዴሬይ ኢሲ ጋላስ ሜꬌቲ ኤሪዜ? ዎይኮ ካዎቴꬃቲ ቂጲዳ ኣይፌይ ጼላናሼ ጋካናስ ቤቲ ኤሪዞ? ጺዮኖ ቡሮ ሚጻይ ኦይኪሺን ሄራካ ባ ናይታ ዬላዉስ።
ISA 66:9 ዬሌታና ማቲዳይሳ ዬሌቶንታ ማላ ታኒ ዲጋዚና?» ጌስ ጎዳይ። «ዬሊሺን ዬሊዛ ኡሎ ታ ጎርዳ ኤራዚና?» ጌስ ኔ ጎዳይ።
ISA 66:10 «ኢንቴኖ ዬሩሳላሞ ሲቂዛ ኡባቶ፥ ኢዚራ ኡፋዬቲቴ፤ ኢንቴ ኢዚራ ሆምቦጪቴ፤ ኢዚስ ዬኪዳ ኡባቲ ኢዚራ ኬሂ ኡፋዬቲቴ።
ISA 66:11 ሚንꬄꬂዛ ኢዚ ꬋንꬃ ኢንቴ ꬋሚዲ ካላና፤ ኢንቴስ ጊዳናሼ ጋካናስ ኢንቴ ኡያና፤ ኬሂፔ ዳሮ ጊዲዳ ኢዚ ዱሬቴꬃን ኢንቴ ኡፋዬታና» ጌስ ጎዳይ።
ISA 66:12 ጎዳይ፥ «ቤኢቴ፥ ታኒ ኢዚስ ሳሮቴꬅ ጊታ ሻፋ ማላ ጎጊሳና፤ ካዎቴꬃታ ኣቆታ ሻፋ ሃꬃ ማላ ጎጊሳና ኢንቴ ኢዚ ኪኦን ኢዲሜቲ ꬋማና፤ ኢዚ ኪኦን ኡቲዲ ኢንቴ ጉፓና።
ISA 66:13 ኣያ ባ ና ኣልኢሲዛ ማላ ታካ ኢንቴና ኣልኢሳና፤ ኢንቴ ዬሩሳላሜን ሚኔታና» ጌስ።
ISA 66:14 ኢንቴ ሄሳ ቤኢዛ ዎዴ ኢንቴ ዎዚናይ ኡፋዬታና፤ ኢንቴ ሜቄꬃይካ ማታ ማላ ጪሊላና፤ ቃሴ ጎዳ ኩሼይ ኢዛ ኣይሌታ ቦላ ዲዛይሲ ኤሬታና፤ ኢዛ ሃንቆይ ጊዲኮ ኢዛ ሞርኬታ ቦላ ቆንጫና።
ISA 66:15 ሄኮ ጎዳይ ታማ ላጮን ያና፤ ኢዛ ፓራ-ጋሬቲ ጎቴ ጫርኮ ማላ፤ ኢዚ ባ ዪሎ ሃንቆን፥ ባ ሴራ ታማ ላጮን ቆንጪሳና።
ISA 66:16 ታማኒኔ ማሻን ጎዳይ ባ ፒርዳ ኣሳ ኡባ ቦላ ኤሃና፤ ዳሮቲ ጎዳ ማሻን ሹኬታና።
ISA 66:17 ጎዳይ፥ «ኣታኪልቴይ ዲዛሶሆ ቢዲ ኢስታፌ ኢሳስ ጎይናናስ ባና ጌሺዛይቲኔ ዱማሲዛይቲ፥ ጉዱንꬃ ኣሾኔ ኤጬሬ ኣሾ፥ ቱኒዳ ሚሻታ ሚዛ ኡባቲ ባ ፒርዳ ዉርሴꬃን ኢሲፌ ኤካና» ጌስ።
ISA 66:18 «ታኒ ኢስታ ኦሶኔ ኢስታ ቆፋ ኤሪዛ ጊሻስ፥ ካዎቴꬃታ ኡባኔ ዱማ ዱማ ቃላን ሃሳይዛ ኡባታ ኢሲፌ ሺሻናስ ያና፤ ኢስቲካ ዪዲ ታ ቦንቾ ቤኣና።
ISA 66:19 ታኒ ኢስታ ጊዶን ማላታ ኦꬃና፤ ኢስታፌ ኣቲዳ ኢሲ ኢሲኔታ ጌዴ ካዎቴꬃታኮ፥ ታርሴሴ፥ ፑጼ፥ ዎንዳፌን ኦሌቲዛ ኤሬቲዳ ሉዴታኮ፥ ቱባሌኔ ያዋኔ ሄሳꬆካ ታ ጎባቴꬃ ሲዮንታይታኮኔ ታ ቦንቾ ቤዮንታይታኮ ሃኮን ዲዛ ኣባ ጊዶን ዲዛ ሃሩሮታኮ ታ ዬዳና፤ ታ ቦንቾ ካዎቴꬃታ ጊዶን ዮታና።
ISA 66:20 ጎዳስ ያርሾ ጊዳና ማላ ኢንቴ ኢሻታ ኡባታ ካዎቴꬃታፔ ቦንቼቲዳ ታ ዙማ ዬሩሳላሜ ፓራን፥ ፓራ-ጋሬኒኔ ጋሬን፥ ባቁሎኒኔ ጋሜላን ኢስታ ኤሃና። ኢስራኤሌ ኣሳይ ካꬃ ያርሾ ዎጋን ዲዛ ማላ ጌሻ ሚሻን ዎꬂዲ ጎዳ ኬꬅ ሺሺዛ ማላ ሃይታካ ሺሻና።
ISA 66:21 ታኒካ ኢስታፌ ባጋይታ ቄሴታኔ ሌዌታ ጊዳና ማላ ታ ዶራና» ጌስ።
ISA 66:22 ጎዳይ፥ «ታኒ ሜꬋና ኦራꬃ ሳሎቲኔ ኦራꬃ ሳኣይ ታ ሲንꬃን ሚኒ ዳናይሳꬆ ኢንቴ ሱንꬂኔ ኢንቴ ዜሬꬃ ሱንꬂ ሄሳꬆ ሚኒ ዳና።
ISA 66:23 ኣጊና ጼሮፔ ቢዲ ሃራ ኣጊናይ ጼራና ጋካናስ፥ ኢሲ ሳምባታፔ ቢዲ ሃራ ሳምባታ ጋካናስ፥ ኣስ ጊዲዳ ኡባይ ታስ ጎይናና ያና።
ISA 66:24 ኢስቲ ኬዚዲ ታ ቦላ ማካሊዳ ኣሳታ ኣሃ ቤኣና። ኢስታ ሚዛ ጉጹኔይካ ሃይቄና፤ ኢስታ ሚዛ ታማይካ ቶኤና። ኢስቲ ኣሳ ዜሬꬅ ኡባስ ሃራሲዛዝ ጊዳና» ጌስ።
JER 1:1 ቢኒያሜ ቢታን ኣናቶቴ ካታማን ዲዛ ቄሴታፔ ኢሳ ኪልቂያሳ ና ኤርማሲ ዮቲዳ ቃላይ ሃይሳፌ ካሊዛይሳ።
JER 1:2 ኣሞኔ ና ዩሁዳ ካዎ ኢዮሲያሲ ካዎቲዳ ታማኔ ሄꬓንꬆ ላይꬃን ጎዳ ቃላይ ኤርማሳኮ ዪዴስ።
JER 1:3 ቃሴ ኢዮሲያሳ ና ዩሁዳ ካዎ ኢዮኣቄሜይ ካዎቲዳ ላይꬃታን ጎዳ ቃላይ ኤርማሳኮ ዪዴስ። ሄሳፌ ጉዬ ኢዮሲያሳ ና ሴዴቂያሲ ካዎቲን ታማኔ ኢሲንꬃ ላይꬃን ሄ ዎዴ ኢቻሻንꬃ ኣጊናን ዬሩሳላሜ ኣሳይ ዲኤቲዲ ባና ጋካናስ ጎዳ ቃላይ ኤርማሳ ባጋራ ኢዛስ ዮቴቲዴስ።
JER 1:4 ጎዳ ቃላይ ታኮ ሂዝጊሼ ዪዴስ።
JER 1:5 «ኤርማሳ! ታኒ ኔና ኔ ኣዬይ ኡሎን ሜꬋናፔ ካሴ ኤራይስ። ኔኒ ዬሌታናፔ ሲንꬃን ታ ኔና ዱማሳ ዎꬃዲስ። ቃሴካ ካዎቴꬃታስ ናቤ ጊዳና ማላ ሹማዲስ።»
JER 1:6 ሂስቲን ታኒ፥ «ኡባ ሃሪዛ ጎዳዉ! ታኒ ቡሮ ና ጊዲዳ ጊሻስ ኣይ ጋ ሃሳያናኮ ታ ኤሪኬ» ጋዲስ።
JER 1:7 ጊዶ ኣቲን ጎዳይ ታና፥ « ‹ታኒ ና› ጎፓ። ታኒ ኔና ኪቲዛ ኣሳ ኡባኮ ባ። ታኒ ኣዛዚይሳ ኡባካ ዮታ።
JER 1:8 ታኒ ኔና ኣሻናስ ኔናራ ዲዛ ጊሻስ ኔ ኢስታስ ያዮፋ፤ ታኒ ጎዳይ ሃይሳ ኔስ ዮታይስ» ጊዴስ።
JER 1:9 ጎዳይ ባ ኩሼ ዬዲዲ ታ ሜቴርሻታ ቦቺዲ፥ «ሄኮ ኔ ዮታና ታ ቃላ ኔ ዶናን ዎꬃዲስ።
JER 1:10 ኔኒ ሾዳናሲኔ ላላናስ፥ ꬋይሳናሲኔ ሺራ ዬጋናስ፥ ኬጻናሲኔ ቶካናስ ዴሬታ ቦላኔ ካዎቴꬃታ ቦላ ታኒ ሃች ኔና ሹማዲስ» ጊዴስ።
JER 1:11 ጎዳ ቃላይ ታኮ ዪዲ፥ «ኤርማሳ! ኔ ኣይ ቤኣይ?» ጊ ኦይቺዴስ። ታኒካ፥ «ኦቾሎኔ ሃጋ ቤኣይስ» ጋዲስ።
JER 1:12 ጎዳይ ታና፥ «ኔኒ ሊኬ ቤኣዳሳ። ታኒካ ታ ቃላይ ፖሌታናይሳ ቲሺ ሂስታ ቤኣይስ» ጊዴስ።
JER 1:13 ጎዳ ቃላይ ቃሴካ ታኮ ዪዲ፥ «ሃራይ ኣዚ ኔስ ቤቲዜ?» ጊ ኦይቺዴስ። ታኒካ ዛራዳ፥ «ኢሲ ፔንቲዛ ኦቶይ ፑዴሃ ባጋፌ ሃ ጌዲ ጊ ኡቲዳይሲ ቤቴስ» ጋዲስ።
JER 1:14 ጎዳይ ታስ፥ «ፑዴሃ ባጋፌ ባሺ ꬉቂዲ ሃ ቢታን ዲዛ ኣሳ ኡባ ቦላ ጉካና።
JER 1:15 ታኒ ፑዴሃ ባጋን ዲዛ ካዎቴꬃታ ሃ ያና ማላ ጼይጋና፤ ዬሩሳላሜኒኔ ኢዚ ዩሾን ዲዛ ዩሁዳ ካታማታ ቦላ ሜቶ ጋꬂዲ ኢስታ ኦይካና፤ ሄሳፌ ጉዬ ዬሩሳላሜ ጌሊዛ ፔንጌታ ቦላ ባንታ ኣራታ ሚጫና።
JER 1:16 «ዩሁዳ ኣሳይ ታና ኣጊዲ፥ ሃራ ኤቃ ጾሳታስ ኤጻኔ ጩዋሲዳ ጊሻስ፥ ባ ኩሼን ኦꬂ ኬሲዳይታ ጎይኒዳ ጊሻስ ታ ዴራ ቦላ ፒርዳ ኣዋጃዲስ።
JER 1:17 «ኔኒ ጊዲኮ ጊጌታ! ዴንዳ ኤቃዳ ታኒ ኔና ኣዛዚዛይሳ ኡባ ኢስታስ ዮታ፤ ኢስታስ ያዮፋ። ኔኒ ኢስታስ ያዪኮ ታኒ ኔና ኢስታ ሲንꬃን ጉጃ ያሺሳና።
JER 1:18 «ሃች ታኒ ኔና ሃ ቢታ ኡባ ቦላ፥ ዩሁዳ ካዎታ ቦላ፥ ሃላቃታ ቦላ፥ ቄሴታ ቦላኔ ሃ ቢታ ኣሳ ቦላ ኔ ኤቄታ ዳንዳያና ማላ ጊምቤቲዳ ካታማ፥ ቢራታ ቱሲኔ ጻርቂማላፔ ኦሴቲዳ ቢራታ ዲርሳ ማላ ኦꬃዲስ።
JER 1:19 ኢስቲ ኔናራ ኦሌታና፤ ጊዶ ኣቲን ታኒ ኣሻናስ ኔናራ ኢሲፌ ዲዛ ጊሻስ ኔና ጾኔቴና። ታኒ ጎዳይ ሃይሳ ኔስ ዮታይስ» ጊዴስ።
JER 2:1 ጎዳ ቃላይ ዪዲ ታስ፥
JER 2:2 «ባ! ባዳ ዋሳ፤ ዬሩሳላሜ ኣሳ ሃይꬃን ሲሳ፤ ጎዳይ፥ ‹ኔኒ ናቴቴꬃን ኣይ ኬና ኣማኔቲዳኮ፥ ቃሴ ኔኒ ቡሮ ሚሺራን ዳሼ ታና ኣይ ኬና ሲቂዳኮ፥ ዜሬꬂ ዜሬቶንታ ባዞ ቢታን ኔ ዎስታ ካሊዳኮ ታ ኣኬካይስ።
JER 2:3 ሄ ዎዴ ኢስራኤሌይ ጎዳስ ጌሻ፥ ኮይሮ ሺሺዛ ጼራ ካꬃ ማላ፤ ኢዞ ሚቲዳይቲ ሞራንቻ ጊዲዳ፤ ኢስታ ቦላ ባሺ ዪዴስ› » ጌስ።
JER 2:4 ኢንቴኖ ያቆቤ ኬꬃ ኣሳቶ! ኢስራኤሌ ዛሬ ኡባቶ! ጎዳ ቃላ ሲዪቴ!
JER 2:5 ጎዳይ፥ «ካሴ ኢንቴ ኣዋቲ ታፔ ሃኪዳይ፥ ሃዳ ዮኦ ካሊዳይ፥ ባ ሁኤሲካ ጎኣይ ባይንዳይታ ጊዲዳይ ታፔ ኣይ ሞሮ ዴሚዲ?
JER 2:6 ኢስቲካ፥ ‹ኑና ጊብጼፔ ኬሲዳይ፥ ባዞን ሳሚዳ ኦጌራ፥ ኩንዱኩርጮ ቢታራ፥ ሜላኔ ꬉማ ቢታራ፥ ኣሲ ኣꬎንታሶራ ኑና ካሌꬂ ኤሂዳ ጎዳይ ኣዋን ዲዜ?› ጊ ኦይቺቤቴና።
JER 2:7 ኢንቴ ኢዚ ኣይፌኔ ኢዚ ኣንጆ ማና ማላ ታኒ ኢንቴና ኣራዳ ቢታ ኤሃዲስ፤ ጊዶ ኣቲን ኢንቴ ዪዲ ታ ቢታ ቱኒሲዴታ፤ ታ ጺንጾዮ ሃራሴታና ማላ ኦꬂዴታ።
JER 2:8 ቄሴቲካ፥ ‹ጎዳይ ኣዋን ዲዜ?› ጊ ኦይቺቤቴና፤ ታ ዎጋይ ኢስታ ኩሼን ዲዛ ኣሳቲካ ታና ኤሪቤቴና። ዴሬ ካሌꬂዛይቲካ ታ ቦላ ማካሊዳ። ናቤቲ ባኣሌ ሱንꬃን ቲንቢቴ ዮቲዳ፤ ጎኦንታ ሚሻታካ ካሊዳ» ጊዴስ።
JER 2:9 ቃሴካ ጎዳይ፥ «ሄሳ ጊሻስ ታኒ ኢንቴናራ ቡሮ ፒርዴታና፤ ኢንቴ ናይታ ናይታራካ ሞቴታና።
JER 2:10 ኪቲሜ ፒኒ ጼሊቴ፤ ቄዳሬ ኪቲዲ ሎኤꬂ ጾሞሲቴ፤ ሂስቲዲ ኣኔ ሃይሳ ማላ ሃኖይ ካሴ ሃኒ ኤሪዛኮ ቤኢቴ።
JER 2:11 ኢስቲ ቱሙ ጾሳታ ጊዶንታ ኣጊኮካ ባ ኤቃ ጾሳታ ላሚዳ ካዎቴꬂ ዲዜ? ታ ዴሬይ ጊዲኮ ኢስታስ ቦንቾ ጊዲዳይሳ ላሚዴስ» ጌስ።
JER 2:12 ቃሴካ ኡባፌ ዎልቃማ ጎዳይ፥ «ሳሎቶ፥ ‹ሃኖ ፖራ!› ጊቴ፤ ኬሂ ዳጋሚዲ ኮኮሪቴ!
JER 2:13 ታ ዴሬይ ናምኡ ኢታ ሚሻታ ኦꬂዴስ፤ ዴኦ ሃꬃ ፑልቶ ጊዲዳ ታና ኣጊዴስ፤ ሃꬃ ኦይካናስ ዳንዳዮንታ ሉኬቲዳ ኦላታ ባስ ቦኪዳ።
JER 2:14 ኢስራኤሌይ ካሬፔ ዪዳ ኣይሌ? ዎይኮ ሶን ዬሌቲዳ ኣይሌ? ሂስቲን ኣይስ ቦንቃስ ኣꬊ ኢሜቲዴ?
JER 2:15 ጋሞቲ ኢዛ ቦላን ጻጊዳ፤ ኢስቲ ባንታ ቃላ ꬎቁ ሂስቲዲ ኢዛ ቦላ ጋርማሚዳ፤ ኢስቲ ኢዛ ቢታ ቡላ ኬሲዳ፤ ኢዛ ካታማቲካ ጹጌቲዳኔ ካይዚዳ።
JER 2:16 ቃሴካ ሜምፒሳኔ ጻፊናሴ ኣሳቲ ኔ ሁኤ ቡሉሲዳ።
JER 2:17 ኦጌ ኔና ካሌꬂዛይሳ ጎዳ ኔ ጾሳ ኣጋዳ ሃይሳ ኔ ቦላ ኤሂዳይ ኔና ጊዲኪ?
JER 2:18 ሺሆሬ ሻፋፔ ሃꬅ ኡያናስ፥ ኣይ ኤካናስ ዱጌ ጊብጼ ዎꬋዲ? ዎይኮ ኤፊራጺሴ ሻፋፔ ሃꬅ ኡያናስ ዱጌ ኣሶሬ ቤꬅ ኣይስ ኮሺዴ?
JER 2:19 ኔ ኢታቴꬂ ኔ ቦላ ቂጻቴ ጋꬃና፤ ኔ ታና ካዶይሲ ኔ ቦላ ሃንቆ ኤሃና። ጎዳ ኔ ጾሳ ኔ ኣጊሺን፥ ታስ ያሻቴꬅ ኔ ዉዱ ጎንታ ኢጺሺን ኣይ ማላ ኢታይኔ ጫሞ ሚሺ ኔ ቦላ ጋካናኮ ቆፓ፤ ኣኔ ኣኬካ» ጌስ።
JER 2:20 ኡባ ሃሪዛ ጎዳይ፥ «ቤኒፔ ዶማዳ ታኒ ኔ ቃምባራ ሜንꬃዲስ፤ ኔና ቃቺዳ ሚሺካ ዱꬃዲስ። ሂስቲንካ፥ ‹ታኒ ኔስ ኦꬂኬ› ጋዳሳ። ሂስታዳ ꬎቃ ዙምቡላታ ኣቻን ሚꬃ ጋርሳን ላይማታናስ ኢቻዳሳ።
JER 2:21 ታኒ ኔና ሙሩታ ዜሬꬃፌ ኤካዳ፥ ሎኦ ዎይኔ ቱራ ማላ ቶካዲስ። ሂስቲን ኔኒ ዋና ጉዬ ሲማዳ ዎራን ሞኪዲ ሞሬቲዳ ዎይኔ ቱራ ማላ ጊዳዲ?
JER 2:22 ኔኒ ሃዲንጬን ሜጬቲኮካ፥ ዎይኮ ዳሮ ሳሙናን ሜጬቲኮካ ኔ ሞሮ ቂታይ ሃኢካ ታ ሲንꬃን ዴስ» ጌስ ኡባ ሃሪዛ ጎዳይ።
JER 2:23 ኔኒ ዋናዳ፥ «ታኒ ቱናቤኬ፤ ታኒ ባኣሌ ኤቃታስ ጎይናናስ ዎጻቤኬ» ጋናስ ዳንዳያይ? ኔኒ ሾባን ኦꬂዳይሳ ኣኔ ቆፓ፤ ኔኒ ኦꬂዳይሳ ኣኔ ኣኬካ፤ ኔኒ ያኔ ሃ ዎጼሬቲዛ ጋሜላ ማላ ጊዳዳሳ።
JER 2:24 ኔኒ ባዞ ቢታን ባስ ዶሴ ሂስታዳ ዚታ ኬዛ ሲንጌꬃሼ ዎጺዛ ሃርዲዳ ማላ ጊዳዳሳ፤ ኢዛ ቢራሳስ ኬዛይቺኮ ኦኔ ኢዞ ቴቃናስ ዳንዳይዛይ? ኢዛ ቢራስ ኬዚን ኢዞ ኮይዛይቲ ኡባቲ ዋዮንታ ዴሜቴስ።
JER 2:25 ኔ ቶሆይ ኣርጋጫና ጋካናስ ዎጾፋ፤ ኔ ዶናይ ሳሞን ሜላና ጋካናስ ቶይላቶፋ፤ ኔ ጊዲኮ፥ «ጮ ዳቡሮፓ፤ ታኒ ኤቃ ጾሳታ ዶሳዲስ፤ ታኒ ኢስታ ካላና» ጋዳሳ።
JER 2:26 «ካይሶይ ኦይኬቲዲ ዬላቲዛ ማላ ኢስራኤሌ ኣሳይ ዬላቲዴስ፤ ኢስቲካ፥ ኢስታ ካዎቲ፥ ኢስታ ሹሜቲ፥ ኢስታ ቄሴቲኔ ኢስታ ናቤቲ ኡባይ ሄሳꬆ ዬላታና።
JER 2:27 ኢስቲ ሚꬅ፥ ‹ኔኒ ታ ኣዋ› ጌቴስ፤ ቃሴ ሹች፥ ‹ኔኒ ታና ዬላዳሳ› ጌቴስ። ኢስቲ ታስ ባ ሲንꬅ ዛራናይሳ ኣጊዲ ዞኮ ዛሪዳ፤ ጊዶ ኣቲን ኢስታ ሜቶይ ጋኪዳ ዎዴ፥ ‹ያዳ ኑና ኣሻ› ጌቴስ።
JER 2:28 ሂስቲን ኣኔ ኢንቴ ኢንቴስ ሜꬊዳ ጾሳቲ ኣዋን ዲዞ? ዩሁዳ፥ ኢንቴ ሜቶቲዛ ዎዴ ኢስቲ ኢንቴና ኣሻናስ ዳንዳይኮ ኣኔ ኢንቴና ዪዲ ኣሼቶ! ኢንቴኖ ዩሁዳ ኣሳቶ! ኢንቴ ጾሳቲ ኢንቴ ካታማታ ማላ ጮራ» ጊዴስ።
JER 2:29 ጎዳይ፥ «ኢንቴ ታናራ ኣይስ ሞቴቴቲ? ኢንቴ ኡባይካ ታ ቦላ ማካሊዴታ።
JER 2:30 ታኒ ኢንቴ ናይታ ጮ ሜላ ቃጻያዲስ፤ ኢስቲ ጊዲኮ ባይቤቴና፤ ጋፊዳ ጋሞ ማላ ኢንቴ ማሻይ ኢንቴ ናቤታ ሚዴስ» ጌስ።
JER 2:31 ኢንቴኖ ሃ ዎዴ ዬሌታቶ! ጎዳ ቃላ ዩሺ ቆፒቴ፤ «ታኒ ኢንቴስ ኢስራኤሌ ኣሳስ ባዞ ማላ ዎይኮ ሳካና ꬉማይ ዲዛ ቢታ ማላ ጊዳዲና? ሂስቲን ኣይስ ታ ኣሳይ፥ ‹ኑኒ ኑ ሼኔ ማላ ሃናና፤ ሲሚዲካ ኔኮ ዮኮ› ጊዜ?
JER 2:32 ጌላኦይ ባ ኣሌቆ ዎይኮ ሚሺራያ ባ ሚሺራቴꬃ ማይኦ ባላ ኤራዜ? ታ ዴሬይ ጊዲኮ ታና ዳሮ ዎዴ ጋካናስ ባሊዴስ።
JER 2:33 ዚታን ኣስ ኦይካናስ ኔ ኣይ ማላ ኤራንቻ? ሁስኩ ሁስኪዛ ኢታ ማጫሳቲካ ኔ ሃኖቴꬃፌ ዳሮ ኢታ ሚሽ ታማሬቴስ።
JER 2:34 ኔ ኢስታ ካይሶቴꬃን ኦይኮንታ ጺሎ ማንቆታ ሱꬂ ኔ ማይኦ ቦላ ቤቲዴስ። ኔኒ ሃይሳ ኡባ ኦꬃ ዎꬃዳካ፥
JER 2:35 ‹ታኒ ጺሎ፤ ቱማፔ ኢዛ ሃንቆይ ታና ጋኬና› ጋሳ። ኔኒ፥ ‹ታኒ ናጋራ ኦꬃቤኬ› ጊዛ ጊሻስ ታኒ ኔ ቦላ ፒርዳና።
JER 2:36 ሂስቲን ኔ ኦጌ ላማ ላማ ኣይስ ዎጻይ? ካሴ ኔና ኣሶሬ ቢታይ ካዉሺዳ ማላ ጊብጼ ቢታይ ኔና ካዉሻና።
JER 2:37 ኔኒ ኣማኔቲዛይታ ጎዳይ ካዉሺዳ ጊሻሲኔ ኢስታፌካ ማዶ ዴሞንታ ጊሻስ ሃይሳፌካ ኔ ሁኤ ኩሼን ባቃ ኦይካዳ ኬዛና።
JER 3:1 «ኢሲ ኣሲ ባ ኬꬃዮ ኣንጂ ዬዲን ኢዛ ባዳ ሃራ ኣዚና ጌሊኮ፥ ካሴ ኣንጂ ዬዲዳዴይ ሲሚ ኢዚኮ ቢዜ? ኢዚ ቢኮ ሄ ቢታያ ሙሌ ቱኔኬ? ኔኒ ጊዲኮ ኔ ሲቂዛ ጮራ ላጌታራ ላይማታዳሳ፤ ሂስታዳካ ሃኢ ኔኒ ታኮ ሲማና ኮያይ?» ጌስ።
JER 3:2 «ኣኔ ꬎቁ ጋዳ ኣይኮይ ባይንዳ ዙምቡላታ ጼላ፤ ኔኒ ላይማስ ኢቾንታሶይ ሄሳን ዲዜ? ቦንቃና ባዞን ኡቲዳ ፓንጋ ማላ ኦጌ ዶናን ኡታዳ ኔ ላጌꬆታ ናጋዳሳ፤ ሂስታዳ ኔኒ ላይማቴꬃኒኔ ኢታቴꬃን ቢታዮ ቱኒሳዳሳ።
JER 3:3 ሄሳ ጊሻስ ፑሴይካ ፑሶንታ ማላ ዲጌቲዴስ፤ ባልጎ ኢራይካ ቡኮንታ ኣጊዴስ፤ ኔ ጊዲኮ ሃኖ ጋካናስ ላይማቴꬅ ኣጋቤካ፤ ኔኒ ዬላቶንታካ ኢጻዳሳ።
JER 3:4 ሃኢ ኔኒ ታና፥ ‹ታ ኣዋዉ፥ ታስ ናቴቴꬃ ላጌዞ!
JER 3:5 ኔኒ ኡባቶ ታ ቦላ ሃንቄታኔ? ኔ ሃንቆይ ሜርናሴ?› ጋዳሳ። ኤ ኔኒ ሂዝጋሳ፤ ጊዶ ኣቲን ኔኒ ዳንዳይዳ ኬና ኢታ ሚሽ ኡባ ኦꬃሳ» ጌስ።
JER 3:6 ካዎ ኢዮሲያሲ ካዎቲዳ ላይꬅ ጎዳይ ታስ፥ «ሃና ኣማኖይ ባይንዳ ኢስራኤሌይ ኦꬂዳይሳ ኔኒ ቤኣዲ? ኢዛ ꬎቃ ዙምቡላታ ቦላ ኬዛዳ ዳሻ ሚꬃታ ጋርሳን ላይማታዱስ።
JER 3:7 ኢዛ ሃይሳ ኡባ ኦꬃዳካ ታኮ ሲማና ጋዳ ቆፓዲስ ሺን ሲማቤኩ። ቃሴ ኣማኔቶንታ ኢዚ ሚቾ ዩሁዳይካ ሄሳ ቤያዱስ።
JER 3:8 ኣማኖይ ባይንዳ ኢስራኤሌ ዴሬቲ ላይማቲዳ ጊሻስ ኣንጆ ዋራቃታ ኢማ ዬዳዲስ፤ ኢስራኤሌ ሚቾ ኣማኔቶንታ ዩሁዳይካ ሃይሳ ቤኣሼ ያዮንታ ኬዛዳ ላይማቲሺን ቤኣዲስ።
JER 3:9 ባ ካዉሻቴꬃን ቢታ ቱኒሳዱስ፤ ሚꬃራካ ሹቻራካ ላይማታዱስ።
JER 3:10 ሄሳን ኡባንካ ኢዚ ሚቺያ፥ ኣማኔቶንታ ዩሁዳይ ጮ ሲሚዳ ሚሳታዉሲፌ ኣቲን ኩሜꬃ ዎዚናፔ ታኮ ሲማቤኩ» ጊዴስ።
JER 3:11 ጎዳይ ታስ፥ «ኣማኔቶንታ ዩሁዳፔ ኣማኖይ ባይንዳ ኢስራኤሌይ ጺላ ቤታዱስ።
JER 3:12 «ባ፤ ባዳ ፑዴሃ ባጋስ፥ ‹ሃኔ ኣማኖይ ባይንዳ ኢስራኤሌ ሲማ! ታኒ ማሮታይ ኩሚዳዴ ጊዲዳ ጊሻስ ኔና ኢታ ኣይፌን ጼሊኬ፤ ሜርናስካ ሃንቄቲኬ› ጌስ ጎዳይ።
JER 3:13 ጊዲኮኔ ኔኒ፥ ‹ጎዳ ኔ ጾሳ ቦላ ማካላቴꬃን፥ ኔ ቦንቾካ ኣላጋ ጾሳታስ ዳሻ ሚꬃታ ጋርሳን ኣꬃ ኢሞኒኔ ታስ ኣዛዜቶንታ ኢጾን ኔኒ ሞራንቻ ጊዲዳይሳ ጻላ ኣማና› ጌስ ጎዳይ» ጊዴስ።
JER 3:14 ቃሴካ ጎዳይ፥ «ኢንቴኖ ኣማኔቶንታ ኣሳቶ፥ ሲሚቴ፤ ታኒ ኢንቴስ ኣዚና፤ ታኒ ኢንቴ ጊዶፌ ኢሲ ካታማፔ ኢሳ፥ ኢሲ ቆሞፌ ናምኣታ ዶራዳ ጺዮኔ ኤሃና።
JER 3:15 «ሄሳፌ ጉዬ ታኒ ታ ዎዚና ማላ ኢንቴና ኤራቴꬃኒኔ ኣኬካን ሄሚዛ ሄንꬃንቻታ ኢንቴስ ኢማና።
JER 3:16 ቃሴካ ጎዳይ ኢንቴ ቆዳይ ቢታ ቦላ ጮራቲዛ ዎዴ፥ ‹ጎዳ ጫቆ ቃላ ታቦታ› ጊ ጼይጌኬታ። ኢዚ ኢስታስ ቆፌቴናኔ ኣኬኬቴና፥ ꬋዬናኔ ሃራይ ኦሴቴና።
JER 3:17 ሄ ዎዴን ኢስቲ ዬሩሳላሜ፥ ‹ጎዳ ኣራታ› ጊ ጼይጋና። ካዎቴꬃ ኡባፌ ኣሳይ ጎዳ ሱንꬅ ቦንቻናስ ዬሩሳላሜ ሺቃና። ሄሳፌ ኢስቲ ባንታ ኢታ ዎዚና ሃኖቴꬃ ካሌቴና።
JER 3:18 ሄ ጋላሳታን ዩሁዳ ኣሳቲ ኢስራኤሌ ኣሳታራ ጋይቲዲ ፑዴሃ ባጋ ቢታፌ ታኒ ካሴ ኢንቴ ኣዋታስ ጺንጾ ሂስታ ኢሚዳ ቢታ ኢሲፌ ያና» ጌስ።
JER 3:19 ጎዳይ፥ «ታኒ ኔና ኣቱማ ናይታ ማላ ዎስታ ዎꬃናኮ፥ ዶሬቲዳ ቢታዮኔ ኣይ ካዎቴꬂካ ዴሞንታ ሎኦ ቢታዮ ኔና ላቲሳና ቆፓዲስ። ቃሴ ታና፥ ‹ታ ኣዋዉ!› ጋዳ ጼይጋና ሚሳቲዴስ፤ ታና ካሊዛሶፔ ጉዬ ሲሞንታ ሚሳታዳሳ፤
JER 3:20 ጊዶ ኣቲን ኢስራኤሌ ኣሳዉ! ኢንቴ ባ ኣዚናስ ኣማኔቶንታ ማጫሳ ማላ ታስ ኣማኔቲቤኬታ» ጌስ።
JER 3:21 ኢስቲ ጎዳ ባንታ ጾሳ ባሊዲ ባንታ ኦጌ ጌላሲዳ ጊሻስ ኢስራኤሌ ዴራ ዋሶይ፥ ሚሻ ዬሆይ ኣይኮይ ባይንዳ ዙምቡላታ ቦላ ሲዬቴስ፤
JER 3:22 ኢስቲ፥ «ኢንቴኖ ኣማኖይ ባይንዳ ኣሳቶ! ታኮ ሲሚቴ። ኢንቴ ኣማኔታና ማላ፥ ታኒ ኢንቴና ፓꬃና» ጊዴስ። ሂስቲን ኢስታስ፥ «ኤሮ፥ ኑኒ ኔኮ ሲማና። ኣይስ ጊኮ ኔኒ ጎዳ ኑ ጾሳ።
JER 3:23 ኑኒ ዙምቡላታ ቦላኔ ዙማታ ቦላ ኤቃ ጾሳታስ ጎይኖይ ቱማፔ ኑስ ባላ፤ ቱማፔ ኑስ ኢስራኤሌታስ ኣቶቴꬂ ጎዳ ኑ ጾሳፌ።
JER 3:24 ኑኒ ዬላጋቴꬃፌ ዶሚን ኑ ኣዋቲ ዳቡሪ ዴሚዳ ኣይፌታ፥ ኢስታ ዶርሳታኔ ሜሄታ፥ ኢስታ ማጫ ናይታኔ ኣቱማ ናይታ ቱና ጾሳቲ ሚ ꬋይሲዳ።
JER 3:25 ኑኒ ዬላጋቴꬃፌ ዶሚዲ ሃች ጋካናስ፥ ኑኒካ ኑ ኣዋቲካ ጎዳ ኑ ጾሳ ቦላ ናጋራ ኦꬂዶስ፤ ጎዳስ ኑ ጾሳስ ኣዛዜቲቤኮ፤ ሄሳ ጊሻስ ኣኔ ኑኒ ዬላቴꬅ ጉሉንቲዲ ኢቾስ፤ ቃሴ ካዉሻቴꬂ ኑና ኣፋላ ማላ ካሞ» ጌቴስ።
JER 4:1 ጎዳይ፥ «ኢስራኤሌ ኣሳዉ! ሲሚኮ ሃ ታኮ ሲሚቴ። ኢንቴ ሃራሲዛ ሚሻታ ታ ሲንꬃፌ ዲጊኮ፥ ያዮንታ ሚኒ ኤቂኮ፥
JER 4:2 ኢንቴ ቱማን፥ ሱሬቴꬃኒኔ ጺሎቴꬃን፥ ‹ዴኦ ጎዳይ ቤዪን!› ጊዲ ጫቂኮ፥ ሄ ዎዴ ካዎቴꬃቲ ኢዛን ኣንጄታናኔ ቦንቼታና» ጌስ።
JER 4:3 ጎዳይ ዩሁዳ ኣሳሲኔ ዬሩሳላሜን ዲዛይታስ፥ «ኦꬃ ጋዴ ጎዪቴ፤ ኣጉንꬃ ጊዶን ዜሮፒቴ።
JER 4:4 ኢንቴኖ ዩሁዳ ኣሳቶ፥ ዬሩሳላሜን ዲዛይቶ! ጎዳስ ኢንቴ ቃጻሬቲቴ፤ ኢንቴ ዎዚና ኢታቴꬃ ዲጊቴ፤ ሂስቶንታ ኣጊኮ ኢንቴ ኦꬂዳ ኢታቴꬃ ጊሻስ ታ ሃንቆይ ታማ ማላ ኤጺ ኬዛና፤ ኦኒካ ኢዛ ቶይሳናስ ዳንዳዬና» ጌስ።
JER 4:5 ጎዳይ፥ « ‹ቢታ ኡባን ዛዬ ፑኒቴ!› ጊዲ ዩሁዳን ዮቲቴ። ዬሩሳላሜንካ ኣዋጂቴ፤ ‹ኢሲፌ ሺቂቴ! ኣኔ ጊምቤቲዳ ካታማታኮ ባቃቶስ!› ጊ ዋሲቴ።
JER 4:6 ጺዮኔ ጌላናስ ባንዲራ ኦይኪቴ! ኤሶን ባቃቲ ኣቲቴ፤ ኣይስ ጊኮ ታኒ ፑዴሃ ባጋፌ ሃንቆኔ ባሽ ኤሃና።
JER 4:7 ጋሞይ ባ ዲዛሶፔ ኬዚዴስ፤ ካዎቴꬃታ ꬋይሲዛይ ኪቴቲዴስ፤ ኔ ቢታዮካ ቡላሳናስ ባ ዲዛሶፔ ኬዚዴስ፤ ኔ ካታማቲ ላሌታና፤ ኩንዲዲካ ካይዚ ኣታና።
JER 4:8 ሄሳ ጊሻስ ማቃ ማይኢቴ፤ ካዮቲሼ፥ ‹ዉ! ዉይ› ጊ ዬኪቴ። ኣይስ ጊኮ ጎዳ ሃንቆ ሴላይ ኑ ቦላፌ ሲሚቤና» ጌስ።
JER 4:9 ቃሴካ ጎዳይ፥ «ሄ ጋላስ ካዎ ዎዚናይኔ ሹሜታ ዎዚናይ ታሃና፤ ቄሴቲ ዳጋማና፤ ናቤቲካ ኮኮራና» ጌስ።
JER 4:10 ሂስቲን ታኒ፥ «ኣቤት ኡባ ሃሪዛ ጎዳዉ! ማሻይ ኢስታ ቆꬌን ዎꬊን፥ ‹ኢንቴስ ሳኣይ ሳሮ ጊዳና› ጋዳ ሃ ኣሳኔ ዬሩሳላሜ ኣይስ ኬሃ ባሌꬃዲ?» ጋዲስ።
JER 4:11 ሄ ዎዴን ሃ ኣሳሲኔ ዬሩሳላሜስ፥ «ባዞን ዲዛ ኣይኮይ ባይንዳ ዙምቡላታፔ ጹጊዛ ጫርኮይ ታ ዴራ ቦላ ጫርካና፤ ጊዶ ኣቲን ሄሲ ካꬅ ሱራጋናሲኔ ጌሻናስ ጊዴና።
JER 4:12 ሄሳፌካ ኬሂ ዎልቃሚዛ ጫርኮይ ታ ኣዛዞን ጫርካና፤ ሃኢ ታኒ ኢስታ ቦላ ፒርዳና» ጌቴቲ ዮቴታና።
JER 4:13 ቤኢቴ! ሞርኬይ ሻራ ማላ ቢታ ኩሚዴስ፤ ኢዛ ፓራ-ጋሬቲካ ጎቴ ጫርኮ ማላ ዬቴስ፤ ኢዛ ፓራቲካ ጎሌ ካፎታ ማላ ኤሶቴቴስ፤ ኣዬ ኣና ኑ ꬋያና ጎስ!
JER 4:14 ኔኖ ዬሩሳላሜ! ኔ ኣታና ኮይኮ ኔ ዎዚና ኢታቴꬃ ሜጬታ፤ ኢታ ቆፋይ ኔ ዎዚናን ኣይዴ ጋካናስ ጋምኣኔ?
JER 4:15 ጬንጉርሲ ዳኔፔ ሴቴቴስ፤ ኤፍሬሜ ዙማታ ቦላ ባሺ ኣዋጄቴስ።
JER 4:16 «ካዎቴꬃታስ ዮቲቴ፤ ዬሩሳላሜስካ፥ ‹ዶዲ ኡንኤꬂዛይቲ ሃሆ ቢታፌ ያና፤ ዩሁዳ ካታማታ ቦላካ ጬቄታና፤
JER 4:17 ኢዛ ታ ቦላ ማካሊዳ ጊሻስ ካꬅ ናጊዛ ኣሳ ማላ ኢስቲ ዩሁዳ ጊዶꬃና› ጊቴ።
JER 4:18 ኔ ሃኖይኔ ኔ ኦሶይ ሄሳ ኔ ቦላ ኤሂዴስ፤ ሄሲ ኔስ ቂጻቴ፤ ሄሲካ ኣይ ማላ ጫሚዛዜ! ኣይ ማላ ዎዚና ሜንꬂዛዜ!» ጌስ ጎዳይ።
JER 4:19 ዋኖ ታኒ! ታኒ ሃይሳ ዎስታ ዳንዳያኔ! ታና ሜቲዴስ! ታ ዎዚናይ ሂርጌስ፤ ታኒ ጮኡ ጋናስ ዳንዳይኬ። ኣይስ ጊኮ ታኒ ዛዬ ጬንጉርሲኔ ኦላ ጬንጉርስ ሲያዲስ።
JER 4:20 ኢታ ሚሺ ኢታ ሚሽ ካሌስ፤ ሙሌ ቢታይ ሞሬቲዴስ፤ ታ ዱንካኔቲኔ ማጋላሻቲ ኤሶን ꬋይዳ።
JER 4:21 ታኒ ኣይዴ ጋካናስ ኦላ ማላታ ጼላኔ? ታ ኣይዴ ጋካናስ ዛዬ ጊሪስ ሲያኔ?
JER 4:22 ጎዳይ፥ «ታ ኣሳይ ኤያ፤ ኢስቲ ታና ኤሬቴና። ኢስቲ ዩሺ ቆፖንታይታ፤ ኢስቲ ኣኬካይ ባይንዳይታ፤ ኢስቲ ኢታ ሚሽ ኦꬃናስ ኤራንቻታ፤ ሎኦ ኦꬃናስ ኤራይ ፓጪዳይታ» ጌስ።
JER 4:23 ታኒ ሳኣ ጼላዳ ሳኣይ ሎኢ ጊጎንታይሳኔ ጮ ሜላ ዲዛይሳ ቤኣዲስ። ቃሴ ሳሎታ ጼላዳ ኢስታን ፖኦይ ባይንዳይሳ ቤኣዲስ።
JER 4:24 ታኒ ዙማታ ጼላዳ ኢስቲ ኮኮሪሺኒኔ ዙምቡላቲ ኡባይ ዮንኢዮንኢሺን ቤኣዲስ።
JER 4:25 ታኒ ጼላዲስ ሺን ኣይ ኣሲካ ቤኣቤኬ፤ ሳሎ ካፎቲካ ኡባይ ፒራꬊዲ ꬋይዳ።
JER 4:26 ኣራዳ ቢታይ ባዞ ጊዲዳይሳ ቤኣዲስ፤ ጎዳ ሲንꬃን፥ ኢዛ ሱሌ ሃንቆ ሲንꬃን ሄ ካታማቲካ ላሌቲዳ።
JER 4:27 ጎዳይ፥ «ሙሌ ቢታይ ቡላታና፤ ጊዶ ኣቲን ታኒ ኢዞ ሙሌራ ꬋይሲኬ።
JER 4:28 ሄሳ ጊሻስ ሳኣይ ዬካና፤ ሳሎይካ ꬉማና። ኣይስ ጊኮ ታኒ ጋዲስ፤ ሄ ቆፋ ታ ላሞንታ ማላ ቃቻዲስ» ጌስ።
JER 4:29 ፓራ ኣሳታኔ ዎንዳፌ ኣሳታ ካቻ ጋሶን ኣሳይ ካታማ ኡባፌ ባቃታና። ባጋይ ዎጺዲ ዎራ ጋርስ ጌላና፤ ባጋይ ቃሴ ዛላ ቦላ ኬዛና፤ ካታማይ ኡባይ ኣሲ ባይንዳ ካይዚ ኣታና።
JER 4:30 ሃኔ ባሻስ ኡቲዳሬ! ኔኒ ኣይ ኦꬃይ? ኔ ዞኦ ማይኦ ኣይስ ማይኣይ? ዎርቃ ኣሌቆካ ኣይስ ኣꬃይ? ኔ ኣይፌ ጪሮ ኣይስ ቲያይ? ኔኒ ጮ ሜላ ኔና ሎኤꬃሳ፤ ኔ ላጌꬆቲ ኔና ካꬊዳ፤ ኢስቲ ኔና ዎꬋናስ ኮዬቴስ።
JER 4:31 ታኒ ኮይሮ ባይራ ና ዬላናስ ሚጻቲዛ ማጫሳ ማላ ኔ ዋሲሺን ታ ሲያዲስ፤ ዬሩሳላሜ ማጫ ናያ ፔኖይ ቱጬታናሼ ጋካናስ ዋሲሺኒኔ ባ ኩሼ ሚጫዳ፥ «ታ ዋኖ! ሄኮ ታና ዎꬋና ጌቴስ!» ጊሺን ሲያዲስ።
JER 5:1 ጎዳይ፥ «ኣኔ ዬሩሳላሜ ኦጌታ ቦላ ኬዚዲ ፑዴኔ ዱጌ ዩሺ ጼሊቴኔ ኣኬኪቴ፤ ዴሬይ ዱላቲዛሶታን ጺሎቴꬅ ኮይዛይኔ ሱሬ ፒርዲዛ ኬዚዲ ኢንቴ ኢሳዴካ ዴሚኮ ታኒ ዬሩሳላሜ ማራና።
JER 5:2 ጊዶ ኣቲን ኢስታስ፥ ‹ጎዳይ ቤዪን› ጊ ጫቂኮካ ኢስቲ ቱማፔ ዎርዶ ጫቄቴስ» ጌስ።
JER 5:3 ኣቤት ጎዳዉ! ኔ ኣይፌቲ ቱማ ጼሌቴኔ? ኔኒ ኢስታ ሾጫዳሳ ሺን ኢስታ ሳኪቤና። ኔኒ ኢስታ ኪንቼሬꬃዳሳ፤ ጊዶ ኣቲን ኢስቲ ሲሚቤቴና፤ ኢስቲ ባንታ ዎዚና ሹቻፌ ኣꬂ ሚንꬂዳ፤ ባንታ ናጋራፔካ ሲሞንታ ኢጺዳ።
JER 5:4 ሄሳፌ ጉዬ ታኒ ታ ዎዚናን፥ «ሃይቲ ማንቆታኔ ኤያታ፤ ሄይቲ ጎዳ ኦጌኔ ባንታ ጾሳ ዎጋ ኤሮንታይታ።
JER 5:5 ሄሳ ጊሻስ ታኒ ጊታ ኣሳታኮ ባና፤ ኢስታስካ ዮታና፤ ጋሶይካ ጎዳ ኦጌኔ ባንታ ጾሳ ዎጋ ኤሬቴስ» ጋዳ ቆፓዲስ። ጊዶ ኣቲን ኢስቲ ኡባይካ ኢሲፌ ኢዛ ቃምባራ ሜንꬂዳ፤ ቃሾዛካ ዱꬂዳ።
JER 5:6 ሄሳ ጊሻስ ጋሞይ ዎራፔ ኬዚዲ ኢስታ ሜንꬄሬꬃና፤ ኢስታ ፑዜሬꬃና፤ ማሄይ ኢስታ ካታማታ ዩሾ ዛማዲ ናጋና። ሄ ካታማታፔ ኬዚዛ ኡባ ኢዚ ፑዛና። ጋሶይካ ኢስታ ማካላቴꬂኔ ካዶይ ዳሪዴስ።
JER 5:7 ጎዳይ፥ «ታኒ ኢንቴ ናጋራ ኣይስ ኣቶ ጎ? ኢንቴ ናይቲ ታና ኣጊዳ፤ ኤቃ ጾሳታንካ ጫቂዳ፤ ታኒ ኢስታ ካልሳ ሚዛዲስ፤ ኢስቲ ጊዲኮ ላይማቲዳኔ ላይማ ኬꬅ ቢዳ።
JER 5:8 ኢስቲ ꬊኬቲዳ ኮርማ ፓራ ማላ ጊዲዳ፤ ኢስቲ ኢሶይ ኢሶይ ኣሳ ማቾ ላጌꬃናስ ካሊዳ።
JER 5:9 ቱሙፔ ታኒ ሃ ዮኦታ ጊሻስ ኢስታ ቃጻያናስ ቤሴኔ? ታኒ ታ ሁኤራ ሄሳ ማላ ካዎቴꬃ ቦላ ሃሎ ኬሳና ቤሴኔ?» ጌስ።
JER 5:10 ቃሴካ ጎዳይ፥ «ዎይኔ ቱራ ጊዶ ቢዲ ኢዛ ሞሪቴ፤ ጊዶ ኣቲን ሙሌራ ꬋይሶፍቴ። ኢስቲ ጎዳስ ጊዶንታ ጊሻስ ኢዚ ሃጋታ ታርሺ ታርሺ ዬጊቴ፤ ኢስራኤሌ ኣሳይኔ ዩሁዳ ኣሳይ ሙሌራ ታና ካዲዳ» ጌስ።
JER 5:12 ኢስቲ ጎዳ ቦላ ዎርዶ ሃሳይዳ፤ «ኢዚ ኑና ኣይኮካ ኦꬄና፤ ኢታ ሚሺካ ኑ ቦላ ጋኬና፤ ኦላኔ ኮሻ ኑኒ ሙሌካ ቤኦኮ።
JER 5:13 ናቤቲ ጫርኮ ማላ ኣቲን ኢስታ ጊዶን ቃላይ ዴና፤ ኢስቲ ጊዛዚ ኡባይ ኢስታ ቦላ ጋኮ» ጌቴስ።
JER 5:14 ሄሳ ጊሻስ ጎዳይ ኡባፌ ዎልቃማ ጾሳይ፥ «ኢስቲ ሃ ቃላ ሃሳይዳ ጊሻስ ታኒ ታ ቃላ ኔ ዶናን ታማ ኬሳና። ሃ ኣሳካ ሚꬅ ኬሳና፤ ታማይካ ኢስታ ሚ ꬋይሳና» ጌስ።
JER 5:15 ጎዳይ ኢንቴና፥ «ኢንቴኖ ኢስራኤሌ ኣሳቶ! ታኒ ኢንቴ ቦላ ሃሆ ቢታፌ ኢሲ ካዎቴꬅ ኤሃና። ኢዚ ዎልቃማኔ ቤኒሶፌ ዲዛ ካዎቴꬃ። ኢዛ ቃላይ ኢንቴስ ኤሬቴና፤ ኢዛ ሃሳያይ ኢንቴስ ጌሌና።
JER 5:16 ኢስታ ማሻ ኮሆይ ዶያ ዲዛ ዱፎ ማላ፤ ኢስቲ ኡባይካ ዎልቃማ ኦላንቻታ።
JER 5:17 ኢስቲ ኢንቴ ካꬃኔ ቁማ ፒቲ ማና። ኢንቴ ኣቱማ ናይታኔ ማጫ ናይታ ዎꬋና። ኢንቴ ዶርሳኔ ሚዛ ቦንቂዲ ማና። ኢንቴ ዎይኔ ቴራኔ ባላሴ ቴራ ቦንቂዲ ማና። ኢንቴ ኣማኔቲዛ ጊምቤቲዳ ካታማታካ ኢስቲ ባንታ ማሻን ꬋይሳና» ጌስ።
JER 5:18 ጎዳይ ኤርማሳ፥ «ጊዶ ኣቲን ሄ ጋላሳታን ታኒ ኢንቴና ሙሌራ ꬋይሲኬ።
JER 5:19 ኣሳይ ኔና፥ ‹ኑ ጎዳ ኑ ጾሳይ ኑ ቦላ ሃይሳ ኡባ ኣይስ ኦꬂዴ?› ጊዲ ኦይቺዛ ዎዴ ኔኒ ኢስታስ፥ ‹ኢንቴ ታና ጎዳ ኣጊዲ ኢንቴ ቢታን ኣላጋ ጾሳታስ ኦꬂዳ ማላ፥ ኢንቴካ ኣሳ ቢታን ኣላጋታስ ሄሳꬆ ኦꬃና› ጋ» ጊዴስ።
JER 5:20 ቃሴካ ጎዳይ፥ «ሃይሳ ያቆቤሶ ኣሳታስ ዮታ፤ ዩሁዳ ቢታንካ ሂዝጋ ኣዋጃ፤
JER 5:21 ኢንቴኖ ኣይፌይ ዲሺን ዴሞንታይቶ! ሃይꬂ ዲሺን ሲዮንታይቶ! ኤያኔ ዩሺ ቆፖንታይቶ! ሃይሳ ሲዪቴ!
JER 5:22 ኢንቴ ታስ ያያናስ ቤሴኔ? ኢንቴ ታ ሲንꬃን ኮኮራናስ ቤሴኔ? ኣይስ ጊኮ ኢዚ ሜርናስ ካንꬂ ቦንታ ማላ፥ ታኒ ኣንጮ ኣባስ ዛዋ ኦꬃዲስ። ዳምባላይ ቡላኬቲኮካ ዛዋፔ ኣꬌና፤ ኢዚ ጉሚኮካ ፒናናስ ዳንዳዬና።
JER 5:23 ጊዶ ኣቲን ሃ ዴራስ ሙሜኔ ማካላ ዎዚናይ ዴስ፤ ኢስቲ ኦጌ ኣጊ ዎራ ቢዳ።
JER 5:24 ኢስቲ ባንታ ዎዚናን፥ ‹ኑስ ሲላ ኢራኔ ጋባ ኢራ ዎዴን ዎዴን ቡኪሲዛ፥ ካꬃ ሺሾ ዎዴ ኑስ ዎዴራ ኤሂዛ ጎዳ ኑ ጾሳስ ኣኔ ያዮስ› ጊቤቴና።
JER 5:25 ‹ኢንቴ ኢታ ኦሶይ ሃይታ ኢንቴና ዲጊዴስ። ኢንቴ ናጋራይ ኢንቴና ሎኦ ሚሻፌ ኣሺዴስ› ጋ» ጌስ።
JER 5:26 ጎዳይ፥ «ታ ኣሳ ጊዶን ኢታ ኣሳቲ ዴቴስ። ካፎታ ኦይካናስ ናጊዛ ኣሳ ማላ ኢስቲ ዎጺማዴ ዎꬂዲ ኣሳ ኦይካናስ ናጌቴስ።
JER 5:27 ካፎ ኬꬃን ካፎይ ኩሚዳ ማላ ኢስታ ኬꬃን ባሌꬆይ ኩሚዴስ። ሄሳ ጊሻስ ኢስቲ ዱሬኔ ዎልቃማ ጊዲዳ።
JER 5:28 ኢስቲ ኦርዲዳኔ ሞꬊዳ፤ ኢስታ ኢታቴꬃስ ዛዋይ ዴና። ዪኦቲ ሱሬ ፒርዳ ዴማና ማላ ኢስታስ ኤቂቤቴና፤ ማንቆታ ማታ ጊሻሲካ ሞቴቴቴና።
JER 5:29 ሂስቲን ታኒ ሃይታ ሃ ዮታ ጊሻስ፥ ኢስታ ቃጻያናስ ቤሴኔ? ሄሳ ማላ ካዎቴꬃ ቦላ ታ ሃሎ ኬሳናስ ቤሴኔ?» ጌስ።
JER 5:30 ቃሴካ ጎዳይ፥ «ዳሮ ባቢሲዛ ሚሺኔ ዳጋንꬂዛ ሚሺ ቢታ ቦላን ሃኒዴስ።
JER 5:31 ናቤቲ ዎርዶ ቲንቢቴ ዮቴቴስ፤ ቄሴቲካ ኢስታ ዞሬን ኣይሴቴስ። ታ ኣሳይካ ሄሳ ማላ ሚሽ ዶሴስ! ሂስቲን ዉርሴꬃን ኢንቴ ኣይ ኦꬃኔ?» ጌስ።
JER 6:1 ጎዳይ፥ «ኢንቴኖ ቢኒያሜ ዛሬቶ! ፑዴሃ ባጋፌ ኢታ ሚሺኔ ባሺ ያና ጊዛ ጊሻስ ኢንቴ ሼምፖ ኣሻናስ ባቃቲቴ! ዬሩሳላሜፔ ኬዚቴ! ቴቁሄ ካታማን ዛዬ ፑኒቴ! ቤቲ-ሃካሪሜን ማላታ ቤሲቴ!
JER 6:2 ታኒ ማላ ሎኦኔ ኡፋይሲዛ ጺዮኔ ናዮ ꬋይሳና።
JER 6:3 ሄንꬃንቻቲ ባንታ ዉዴ ኤኪዲ ኢዚ ቦላ ያና፤ ሂስቲዲ ኢዚ ዩሾን ባንታ ዱንካኔ ቶካና፤ ባንታ ዉዴ ባንታ ሶሆን ሶሆን ሄማና።
JER 6:4 ኢስቲ ኢሶይ ኢሳ፥ ‹ዬሩሳላሜራ ኦሌታናስ ጊጌቲቴ! ዴንዲቴ! ኣኔ ኑኒ ኢዞ ሴታ ጋላስ ኦሎስ። ጊዶ ኣቲን ኣዬ ኣና! ሳኣይ ቃሜስ፤ ኦማርሳ ኩዋይ ኣዱቂ ኣዱቂ ቤስ።
JER 6:5 ሄሳ ጊሻስ ዴንዲቴ! ኣኔ ኦማርስ ኦሎስ፤ ሂስቲዲ ኢዚ ሚጻካ ኣኔ ላሎስ› ጊዲ ማቄቲዳ» ጌስ።
JER 6:6 ኡባፌ ዎልቃማ ጎዳይ፥ «ሚꬃታ ቃንጺቴ። ዬሩሳላሜ ጊምቤ ላንቄን ቢታ ዶሪቴ፤ ሃ ካታማይን ቆሆይ ኩሚዳ ጊሻስ ኢዚስ ቂጻቴይ ቤሴስ።
JER 6:7 ኦላፌ ሃꬂ ፑልቲዛ ማላ ኢዛካ ባ ኢታቴꬃ ፑልቲሳዉስ፤ ማካላ ሚሺኔ ባሻ ሚሺ ኢዚ ጊዶን ሴቴቴስ፤ ኡባ ዎዴ ኢዚ ሳኮይኔ ማዱንꬂ ታስ ቤቴስ።
JER 6:8 ሃኔ ዬሩሳላሜ ናጌታ፤ ኔ ኣካይ ጊኮ ታ ኔፔ ሻኬታና፤ ቃሴ ኔ ቢታካ ቡላሳና» ጌስ።
JER 6:9 ኡባፌ ዎልቃማ ጎዳይ፥ «ዎይኔ ቴራ ኢሲኖካ ኣሾንታ ማጺዛ ማላ ኢስራኤሌ ኣሳፔ ኣቲዳይታ ሄሳꬆካ ማጺ ሺሺቴ። ዎይኔ ቴራ ማጺዛ ኣሳ ማላ ኢንቴ ኩሼ ሃጋታ ጊዶ ናምኣንꬆካ ዬዲቴ» ጌስ።
JER 6:10 ታኒ ኦናስ ዮቶ? ኦና ሴሮ? ኦኒ ታ ጊዛዝ ሲያኔ? ሄኮ ኢስታ ሃይꬂ ቱሌ ጊዲዳ ጊሻስ ኢስቲ ሲዬቴና፤ ጎዳ ቃላይ ኢስታስ ቂꬌስ ኬዚዴስ፤ ኢስቲ ኢዛን ኡፋዬቴቴና።
JER 6:11 ሄሳ ጊሻስ ጎዳ ሃንቆይ ታናን ኩሚ ኡቲዴስ፤ ታኒ ሃ ሃንቆዛ ታ ኡሎን ኦይካና ዳንዳይኬ። ሂስቲን ጎዳይ ታና፥ «ታ ሃንቆዛ ኦጌን ዲዛ ጉꬃ ናይታ ቦላኔ ሺቂዳ ዬላጋ ናይታ ቦላ ጉሳ፤ ማቻኔ ኣዚናይ፥ ጪሚዳ ኣሳቲካ ኬሲ ኤኪ ኣቴቴና።
JER 6:12 ታኒ ሄ ቢታን ዲዛይታ ቦላ ታ ኩሼ ዬዲዛ ዎዴ ኢስታ ኬꬃቲ፥ ኢስታ ጋዴቲኔ ኢስታ ማቼቲካ ኣቶንታ ኡባይ ሃራታስ ጊዳና» ጌስ።
JER 6:13 ቃሴካ ጎዳይ፥ «ጉꬃይካ ጊታይካ ኡባይ ባ ጎኣስ ዪቄቴስ። ናቤቲኔ ቄሴቲ ኡባይ ኣስ ባሌꬄቴስ።
JER 6:14 ኢስቲ ታ ዴራ ማዱንꬃ ቄሪ ሚሻ ማላ ጼሊዳ፤ ፓጻና ማላ ኮሺዛ ኦሶ ኦꬂቤቴና፤ ሳሮይ ባይንዳ፥ ‹ሳሮ፤ ሳሮ› ጌቴስ።
JER 6:15 ሃ ሃራሲዛ ኦሶዛ ጊሻስ ኢስቲ ዬላቲዶ? ኣካይ ሙሌካ ዬላቲቤቴና፤ ኢስቲ ዬላይ ኣዛኮ ኤሬቴና። ሄሳ ጊሻስ ኢስቲ ኩንዲዛይታራ ኢሲፌ ኩንዳና፤ ታኒ ኢስታ ቃጻዪዛ ዎዴ ኢስቲ ካዉያና» ጌስ።
JER 6:16 ጎዳይ፥ «ዳጋላ ኦጌ ቦላ ኤቂ ጼሊቴ፤ ቤኒ ኦጌዮ ኦይቺቴ፤ ሎኦ ኦጌይ ኣዋሪ? ኢዚራ ቢቴ፤ ኢንቴ ኢንቴ ሼምፖስ ሼምፖ ዴማና፤ ኢንቴ ጊዲኮ፥ ‹ኑ ኢዚራ ቦኮ!› ጊዴታ።
JER 6:17 ታ ኢንቴና ናጊዛይታ ዎꬃዲስ፤ ‹ዛዬይ ፑኔቲሺን ሲዪቴ› ጋዲስ፤ ኢንቴ ጊዲኮ፥ ‹ኑኒ ሲዮኮ› ጊዴታ።
JER 6:18 ሄሳ ጊሻስ ካዎቴꬃቶ፥ ሲዪቴ! ኢንቴኖ ማርካቶ! ኢስታ ቦላ ኣዚ ጋካናኮ ኣኬኪቴ።
JER 6:19 ቢታዬ ሲያ! ኢስቲ ታ ቃላ ሲዮንታ ኢጺዳ ጊሻሲኔ ታ ዎጋካ ካꬊዳ ጊሻስ ታኒ ዴራ ቦላ ኢስታ ኢታ ቆፋ ማላ ባሽ ኤሃና።
JER 6:20 ኤጻኔይ ሳባ ቢታፌ ሳዊዛ ቂማሜይ ሃኮ ቢታፌ ዪኮ ታና ኣይ ጋኔ? ጹጌቲዛ ኢንቴ ያርሾዛካ ታ ኤኪኬ፤ ኢንቴ ሺሺዛ ሃራ ያርሾይካ ታና ኡፋይሴና» ጌስ።
JER 6:21 ሄሳ ጊሻስ ጎዳይ፥ «ታኒ ሃ ዴራ ሲንꬃን ꬉጲዛ ሚሽ ዎꬃና፤ ኣዋቲኔ ኣቱማ ናይቲ ኢዛን ꬉጴታና፤ ሾሮቲኔ ላጌቲ ꬋያና» ጌስ።
JER 6:22 ቃሴካ ጎዳይ፥ «ሄኮ ፑዴሃ ባጋፌ ኦላንቻቲ ዬቴስ፤ ጊታ ካዎቴꬂ ሳኣ ጋጻፔ ዴንꬃ ቦላ ዴስ።
JER 6:23 ኢስቲ ዎንዳፌኔ ቶራ ኦይኪዳ። ኢስቲ ሜንጼ ኢታታኔ ቃꬌታይ ባይንዳይታ፤ ኢስቲ ባንታ ፓራታ ቶጊዛ ዎዴ ኣባይ ጉሚዛ ማላ ጉሜቴስ። ኢንቴኖ ጺዮኔ ማጫ ናይቶ! ኢስቲ ጊጌቲዲ ኢንቴና ኦላናስ ዬቴስ» ጌስ።
JER 6:24 ኑኒ ሄ ዮኦ ሲዪን ኑ ቄሴይ ኪምኢሊሽ ጊዴስ። ማጫስ ሚጻይ ኦይኪዳ ማላ ኑና ጬጬይ ኦይኪዴስ።
JER 6:25 ሞርኬይ ማሻ ጊጺዴስ፤ ኡባሶን ሺሮይ ኩሚዴስ፤ ሄሳ ጊሻስ ካሬ ኬዞፒቴ፤ ኦጌንካ ሄሜቶፍቴ።
JER 6:26 ታ ዴሬቶ ማቃ ማይኢቴ፤ ቢዲንꬃ ቦላ ቡሉሌቲቴ፤ ሜጺ ኢሲ ናይ ሃይቂዳ ኣሳ ማላ ጫሞ ዬሆ ዬኪቴ፤ ጋሶይካ ኑ ቆፖንታ ዲሺን ꬋይሲዛይ ኑ ቦላ ያና።
JER 6:27 ጎዳይ ኤርማሳ፥ «ኤርማሳ! ቢራታ ፓጪዛዴ ማላ ኔኒ ታ ዴሬዛ ኦጌኔ ኢስታ ሄሜታ ፓጫና ማላ ታ ኔና ዎꬃዲስ፤
JER 6:28 ኢስቲ ኡባይ ዚጊርሼ ዩዪዛይታኔ ዮቲን ኤኮንታ ማካላንቻታ፤ ኢስቲ ጻርቂማላ ማላኔ ቢራታ ማላ፤ ኢስቲ ኡባይካ ሞሮ ኦꬂዛይታ።
JER 6:29 ቢራታ ሴሪሳናስ ዎምፒና ሎኤꬃ ፑና፤ ጊዶ ኣቲን ኢታቲ ሙሌራ ፒቴቲ ኬዞንታ ጊሻስ ሄሲ ጮ ሃዳ ዳቡራ።
JER 6:30 ጎዳይ ኢስታ ካꬊዳ ጊሻስ ኢስቲ ካꬌቲዳ ቢራ ጌቴቲ ጼይጌታና» ጌስ።
JER 7:1 ጎዳፔ ኤርማሳስ ዪዳ ቃላይ ሃይሳፌ ካሊ ዲዛይሳ፤
JER 7:2 «ኔኒ ጎዳ ጾሳ ኬꬃ ፔንጌን ኤቃ፤ ሂስታዳ ሃ ቃላ፥ ‹ኢንቴኖ ጎዳስ ጎይናናስ ሃ ፔንጌታራ ጌሊዛ ዩሁዳ ኣሳቶ፥ ኡባይካ ጎዳ ቃላ ሲዪቴ!› ጋ ኣዋጃ።
JER 7:3 ኡባፌ ዎልቃማ ጎዳ ኢስራኤሌ ጾሳይ፥ ‹ኢንቴ ኦጌኔ ኢንቴ ኦሶ ሎኤꬂቴ፤ ኢንቴ ሂስቲኮ ታ ኢንቴና ሃይሳን ዳና ማላ ኦꬃና› ጌስ።
JER 7:4 ጪሞ ቃላን፥ ‹ሃይሲ ጎዳ ጾሳ ኬꬃ! ሃይሲ ጎዳ ጾሳ ኬꬃ! ሃይሲ ጎዳ ጾሳ ኬꬃ!› ጊዲ ኣማኔቶፍቴ።
JER 7:5 ኢንቴ ኢንቴ ኦጌኔ ኢንቴ ኦሶ ሎኤꬂኮ፥ ኢንቴ ጊዶን ሱሬቴꬂ ዲኮ፥
JER 7:6 ቤቴ ዪዳ ኣሳታኔ ዪኦታ፥ ኣምኤታ ኢንቴ ቆሆንታ ኣጊኮ፥ ሃይሳ ሃ ቢታ ቦላ ጺሎ ሱꬅ ጉሶንታ ኣጊኮ፥ ኢንቴና ቆሂዛ ኤቃ ጾሳታ ኢንቴ ካሎንታ ኣጊኮ፥
JER 7:7 ታኒ ኢንቴ ኣዋታስ ሜርናስ ጺንጾ ሂስታ ኢሚዳ ሃ ቢታይን ታ ኢንቴና ዎꬃና።
JER 7:8 ሄኮ ኢንቴ ሃዳ ጊዲዳ ዎርዶ ቃላን ኣማኔቲዴታ።»
JER 7:9 ጎዳይ፥ «ኢንቴ ካይሶቴታ፥ ኣስ ዎꬌታ፥ ላይማቴታ፥ ዎርዶ ጫቂ ማርካቴታ፥ ባኣሌ ኤቃ ጾሳስ ያርሾ ያርሼታ፥ ሃይሳፌ ካሴ ኢንቴ ኤሮንታ ኤቃ ጾሳታስ ጎይኔታ።
JER 7:10 ሂስቲዲ ታ ሱንꬃን ጼይጌቲዳ ጾሳ ኬꬃ ዪ ታ ሲንꬃን ኤቂዲ፥ ‹ኑኒ ሎኦ ዶስ!› ጊሼ ሃይታ ሃራሲዛ ሚሻታ ኦሶን ዴታ።
JER 7:11 ታ ሱንꬃን ጼይጌቲዳ ሃ ጾሳ ኬꬃይ ኢንቴስ ፓንጋቲ ቆቴቲዛ ጎንጎሎ ጊዲዴ? ኢንቴ ኦꬂዛይሳ ኡባ ታኒ ታ ኣይፌራ ቤኣዲስ» ጌስ።
JER 7:12 ጎዳይ፥ «ታኒ ታ ሱንꬃይ ኢዛን ዳና ማላ ታ ዶሪዳሶ ሴሎ ቢቴ፤ ታ ኣሳ ኢስራኤሌ ኢታቴꬃ ጋሶን ታኒ ሄን ኦꬂዳይሳ ቢዲ ቤኢቴ።
JER 7:13 ኢንቴ ሄሳ ኡባ ኦꬂሺን ታኒ ኢንቴስ ዛራ ዛራዳ ዮታዲስ፤ ጊዶ ኣቲን ኢንቴ ሲዮንታ ኢጺዴታ፤ ታኒ ኢንቴና ጼይጋዲስ ሺን ኢንቴ ታስ ኮዪቤኬታ።
JER 7:14 ሄሳ ጊሻስ ታኒ ሴሎን ኦꬂዳይሳ ማላ ሃኢካ ሃይሳን ኢንቴ ኣማኔቲዛ፥ ታ ሱንꬃይ ኢዛን ጼይጌቲዛ ሃ ጾሳ ኬꬃ ቦላካ ኦꬃና፤ ኢንቴሲኔ ካሴ ኢንቴ ኣዋታስ ኢሚዳ ሶሆን ሃይሳን ታኒ ሴሎ ቦላ ኦꬂዳይሳ ማላ ዛራዳ ኦꬃና።
JER 7:15 ኢንቴ ኢሻታ ኤፍሬሜ ዛሬታ ታኒ ዲጊዳ ማላ ታ ሲንꬃፌ ኢንቴናካ ዲጋና» ጌስ።
JER 7:16 ጎዳይ፥ «ኤርማሳ፥ ኔ ዎሲንካ ታ ሲዮንታ ጊሻስ ኔ ሃይሳ ዴራስ ዎሶፋ፤ ኢስታስ ሾቦፋ ዎይኮ ኢስታስ ጋናቶፓ።
JER 7:17 ኢስቲ ዩሁዳ ካታማታኒኔ ዬሩሳላሜ ኦጌታን ኣይ ኦꬂዛኮ ኔ ቤኢኪ?
JER 7:18 ‹ሳሎ ጎዳቴዮ› ጌቴቲዛ ጾሳይሲ ኡኬꬅ ኡካናስ ማጫሳቲ ꬊሌ ሙኑቄቴስ፤ ናይቲ ሚꬅ ሚጼቴስ፤ ኣዋቲ ታማ ኤꬄቴስ። ኢስቲ ታና ቆሃና ጊዲ ኡሻ ያርሾ ሃራ ጾሳታስ ያርሼቴስ።
JER 7:19 ኢስቲ ሃይሳ ኡባ ኦꬂዛይ ታና ቆሃናሴ? ሃይሳን ቆሄቲዲ ዬላታናይ ባንታ ሁኤስ ኢስታ ጊዴቴኔ?» ጊዴስ።
JER 7:20 ሄሳ ጊሻስ ኡባፌ ዎልቃማ ጎዳይ፥ «ታ ዪሎይኔ ታ ሃንቆይ ሃ ሶሆ ቦላ፥ ሜዶሳታ ቦላ፥ ጋዴን ዲዛ ሚꬃ ቦላኔ ካꬃ ቦላ ጉካና፤ ሂስቲዲ ኤጻና፤ ቶኣናስካ ዳንዳዬና» ጌስ።
JER 7:21 ኡባፌ ዎልቃማ ጎዳ ኢስራኤሌ ጾሳይ፥ «ኢንቴ ጹጊ ሺሺዛ ያርሾዛ ጊዲን ሃራ ያርሾታራ ጉጂዲ ኣሾዛራ ኢንቴስ ሚቴ።
JER 7:22 ታኒ ኢንቴ ኣዋታ ጊብጼ ቢታፌ ኬሲዳ ዎዴ ጹጌቲዛ ያርሾ ጊሻስ ጊዲን፥ ሃራ ያርሾ ጊሻስ ጊዲን፥ ታ ኢስታስ ዮታቤኬ ዎይኮ ኢስታ ኣዛዛቤኬ።
JER 7:23 ጊዶ ኣቲን ታኒ ኢስታስ፥ ‹ታስ ኣዛዜቲቴ፤ ሂስቲኮ ታኒ ኢንቴ ጾሳ ጊዳና፤ ኢንቴካ ታ ዴሬ ጊዳና፤ ኢንቴስ ሎኣና ማላ ታኒ ኢንቴና ኣዛዚዛ ኦጌ ኡባራ ቢቴ› ጋዳ ኣዛዛዲስ።
JER 7:24 ኢስቲ ጊዲኮ ታ ጊዛዝ ሲዪቤቴና፤ ዎዚናን ዎꬂ ሲያናስካ ኮዪቤቴና፤ ኢስቲ ባንታ ኢታ ዎዚና ቆፋ ሚንꬂ ካሊዳ፤ ኢስቲ ሲንꬄ ቡስ ኣጊዲ ጉዬ ጉዬ ቢዳ።
JER 7:25 ኢንቴ ኣዋቲ ጊብጼ ቢታፌ ኬዚዳ ጋላሳፌ ዶሚዲ ሃኖ ጋካናስ ታኒ ታ ኣይሌ ጊዲዳ ናቤታ ኢስታስ ኪታሼ ዳይስ።
JER 7:26 ዴሬዚ ጊዲኮ ታ ጊዛዝ ሲዪቤና፤ ዎዚናን ዎꬂ ሲያናስካ ኮዪቤና፤ ኢስቲ ባንታ ሞርጌ ሚንꬂዳኔ ኢስታ ኣዋቲ ኦꬂዳ ኢታ ሚሻፌ ኣꬊዛ ኢታ ሚሽ ኦꬂዳ።
JER 7:27 «ሃይሳ ኡባ ኔኒ ኢስታስ ዮታና፤ ጊዶ ኣቲን ኢስቲ ኔ ጊዛይሳ ሲዬቴና፤ ኔኒ ኢስታ ጼይጋና ሺን ኢስቲ ኔስ ኮዬቴና።
JER 7:28 ሄሳ ጊሻስ ኔኒ ኢስታስ፥ ‹ሃይሲ ዴሬዚ ጎዳ ባ ጾሳስ ኣዛዜቶንታኔ ኢዛ ዞሬ ኤኮንታ ዴሬ፤ ቱማይ ዴና፤ ኢስታ ኢንጻርሳፌ ꬋይዴስ።
JER 7:29 ሃንቆይ ኢዛ ቦላ ጋኪዳ ሃ ዬሌታ ጎዳይ ካꬊዳ ጊሻሲኔ ኣጊዳ ጊሻስ ኢንቴ ሁኤ ሜዲዲ ዎራ ዬጊቴ፤ ኣይኮይካ ባይንዳ ዙምቡላታ ቦላ ኬዚዲ ዚላሊቴ› ጋ» ጌስ።
JER 7:30 ቃሴካ ጎዳይ፥ «ዩሁዳ ኣሳቲ ታ ሲንꬃን ኢታ ሚሽ ኦꬂዳ፤ ሃራሲዛ ኤቃ ጾሳታ ኤሂዲ ታ ሱንꬃን ጼይጌቲዳ ጾሳ ኬꬃን ዎꬂዲ ቱኒሲዳ።
JER 7:31 ኢስቲ ባንታ ኣቱማ ናይታኔ ማጫ ናይታ ታማን ጹጊዲ ያርሻናስ፥ ሄኖሜ ና ሾባን ቶፌቴ ጌቴቲዛ ያርሾሶሆ ጊምቢዳ። ጊዶ ኣቲን ሄሲ ታኒ ኢስታ ኣዛዞንታይሳኔ ታ ቆፋን ባይንዳይሳ።
JER 7:32 ሄሳ ጊሻስ ሄ ሶሆይ ሄኖሜ ና ሾባ ዎይኮ ቶፌቴ ጌቴቲዛይሲ ኣቲዲ ሹካ ዙሌ ጌቴቲ ጼይጌታና ጋላሳቲ ዬቴስ። ጋሶይካ ሞጎሶይ ꬋያና ጋካናስ ሃይቂዳ ኣሳቲ ቶፌቴን ሞጌታና።
JER 7:33 ሄ ዎዴ ሄ ኣሳታ ኣሃይ ሳሎ ካፎታሲኔ ሳኣ ዶኣታስ ቁማ ጊዳና፤ ኢስታ ባቢሲዲ ጎዲዛ ሚሺ ዴና።
JER 7:34 ታኒ ኢሊሲ፥ ኡፋይሳ ጬንጉርሲኔ ሚሺራታ ጬንጉርስ ዩሁዳ ካታማታፔኔ ዬሩሳላሜ ኦጌታፔ ꬋይሳና፤ ቢታያካ ቡላ ጊዳ ኣታና» ጌስ።
JER 8:1 ኡባፌ ዎልቃማ ጎዳይ፥ «ሄ ዎዴን ዩሁዳ ካዎታ ሜቄꬂ፥ ሹሜታ ሜቄꬂ፥ ቄሴታ ሜቄꬂ፥ ናቤታ ሜቄꬂኔ ዬሩሳላሜን ዲዛ ኣሳታ ሜቄꬂ ኡባይ ዱፎፔ ማጼቲዲ ኬዛና።
JER 8:2 ሂስቲዲ ኢስቲ ሲቂዳ፥ ኪቴቲዳ፥ ካሊዳ፥ ዞሬ ኦይቺዳኔ ጎይኒዳ ኣርሼ ሲንꬃን፥ ኣጊና ሲንꬃኒኔ ሳሎ ጾሊንቴታ ኡባ ሲንꬃን ሚጬታና። ኢስታ ሜቄꬃይ ሺቄና ዎይኮ ሞጌቴና፤ ጊዶ ኣቲን ቢታ ቦላ ኦሌቲዳ ቡራ ማላ ጊዳና።
JER 8:3 ሃ ኢታ ኣሳ ኩሼፔ ኣቲዳይቲ ኡባይ ታ ኢስታ ጎዳ ዬዲዳሶ ኡባን ዴኦፔ ሃይቆ ዶራና» ጌስ።
JER 8:4 ጎዳይ ታና፥ «ኣሳስ፥ ‹ኣሲ ኩንዲኮ ኩንዲዳሶሆፔ ሲሚዲ ዴንዴኔ? ዎይኮ ኣሲ ባሊዳ ጊዲኮ ጉዬፔ ባ ባላፔ ሲሜኔ?
JER 8:5 ሂስቲን ሃይሲ ዴሬዚ ኣይስ ጉዬ ሲሚ ቢዜ? ዬሩሳላሜይ ኣይስ ኡባቶ ጉዬ ሲማዜ? ኢስቲ ጌኔ ኦሶ ሚንꬂ ኦይኪዳ፤ ሲማናስካ ኮዬቴና።
JER 8:6 ታኒ ኢስታ ሎኤꬃ ኤዝጋዲስ፤ ኢስቲ ሱሬ ሃሳዬቴና፤ ታ ኣይ ኦꬃዲና?› ጌስ። ጊዶ ኣቲን ባ ኢታ ኦሶ ፓጺዛይ ኢሶይካ ዴና፤ ኦላስ ዲርጊዛ ፓራ ማላ ኡባይካ ባስ ባስ ዎጼስ።
JER 8:7 ሺሜላ ጌቴቲዛ ካፎቲ ባንቲ ሲሚዛ ዎዴ ኤሬቴስ፤ ሃራጴቲ፥ ዳጊጬቲኔ ዋላ ጌቴቲዛ ካፎቲ ባ ዴንዲ ቢዛ ዎዴ ኤሬቴስ፤ ጊዶ ኣቲን ታ ዴሬይ ጎዳ ዎጋ ኤሪቤና።
JER 8:8 ዎርዳንቻ ጻፌቲ ባንታ ቢኢሬን ታ ዎጋ ዎርዶራ ጻፊዳ፤ ሂስቲን ዋኒዲ፥ ‹ኑኒ ኣꬎ ኤራንቻ፤ ጎዳ ዎጋይ ኑናራ ዴስ› ጌቲ?
JER 8:9 ኣꬎ ኤራንቻቲ ዬላታና፤ ኢስቲ ካዉያናኔ ዎጺማዴን ኦይኬታና። ጎዳ ቃላራ ኢስቲ ኤቄቲቺን ኢስታስ ኣዛ ኤራቴꬂ ዲዜ?
JER 8:10 ሄሳ ጊሻስ ታኒ ኢስታ ማቼታ ሃራ ኣዚናታስ፥ ኢስታ ቢታታካ ኣላጋታስ ኢማና፤ ጉꬃይካ ጊታይካ ኡባይ ባንታ ጎኣስ ዪቄቴቴስ። ናቤቲኔ ቄሴቲካ ኡባይ ኣስ ባሌꬄቴስ።
JER 8:11 ኢስቲ ታ ዴሬዛ ማዱንꬃ ቄሪ ሚሻን ቆዲዲ ማዶንታ ꬋሌ ኢሜቴስ፤ ሳሮይ ባይንዳ፥ ‹ሳሮ፥ ሳሮ› ጌቴስ።
JER 8:12 ቱና ኦሶ ኦꬂዲ ዬላቲዶ? ቺ! ሙሌካ ዬላቲቤቴና። ኢስቲ ዬላይ ኣዛኮካ ኤሬቴና። ሄሳ ጊሻስ ኢስቲካ ኩንዲዳይታራ ኢሲፌ ኩንዳና፤ ታ ኢስታ ቃጻዪዛ ዎዴ ኢስቲ ካዉያና» ጌስ።
JER 8:13 ጎዳይ፥ «ኢስቲ ጎዪ ኬሲዳ ካꬅ ኡባ ታ ኢስታፌ ኤካይቻና፤ ኢስታ ዎይኔ ቱራን ኣይፌይ ꬋያና፤ ባላሴ ሚꬂካ ኣይፌ ኢሜና፤ ኢስታ ቦንጮቲካ ቆካና፤ ታኒ ኢስታስ ኢሚዳይሲ ኢስታፌ ኤኬቲቻና» ጌስ።
JER 8:14 ሂስቲን ኣሳቲ፥ «ኑኒ ሃይሳን ኣይስ ኡቲኖ? ኣኔ ኢሲ ቦላ ሺቂቴ፤ ጊምቤቲ ኡቲዳ ካታማታን ባቃቲ ቢዲ ሄን ሃይቆስ፤ ጎዳ ኑ ጾሳይ ኑና ሃይቃና ማላ ፒርዲዴስ፤ ኑኒ ኢዛ ቦላ ናጋራ ኦꬂዳ ጊሻስ ኑ ኡያና ማላ ማርዜራ ዲዛ ሃꬅ ኢሚዴስ።
JER 8:15 ‹ሳሮይ ያና› ጊዲ ሂዶታ ኦꬂዶስ፤ ጊዶ ኣቲን ሎኦ ሚሺ ዪቤና። ‹ኑኒ ፓጻና› ጊዲ ኣሞቲዶስ፤ ጊዶ ኣቲን ዳጋማ ጻላ ጊዲዴስ።
JER 8:16 ሞርኬታ ፓራ ፔኖይ ዳኔ ካታማፔ ሲዬቴስ፤ ኢስታ ዎዳላ ፓራታ ጫሻን ቢታይ ኡባይ ቃጼስ፤ ቢታዮኔ ቢታይ ቦላ ዲዛ ኡባ፥ ካታማዮኔ ኢዚን ዲዛ ኡባ ሚታናስ ዪዳ» ጌቴስ።
JER 8:17 ጎዳይ፥ «ቤኢቴ፥ ታኒ ማርዜራ ዲዛ ሾሻታ፥ ሙሬኒዛይታ ሂላቴꬂ ቴቃናስ ዳንዳዮንታ ሃሶ ሾሻታ ኢንቴ ጊዶ ዬዳና፤ ኢስቲ ኢንቴና ዱካና» ጌስ።
JER 8:18 ታ ጬጪዛ ዎዴ ታና ሚንꬄꬂዛይሶ! ታ ዎዚናይ ኬሂ ሜቂዴስ።
JER 8:19 ታ ኣሳይ ሃሆ ቢታን ዲሼ ዋሲዛ ዋሶ ሲያ። ኢስቲ፥ «ጎዳይ ጺዮኔን ዴኔ? ኢዚ ካዎይካ ሄን ዴኔ?» ጊዲ ዋሴቴስ። ሂስቲን ጎዳይ ኢዛስ፥ «ኢስቲ ባስ ማሲዳ ሚስሌታን፥ ሃዳ ጊዲዳ ኤቃ ጾሳታን ታና ኣይስ ሃንቄꬂዶ?» ጌስ።
JER 8:20 ሂስቲን ኣሳይ፥ «ሄኮ ካꬃ ሺሾ ዎዴይ ኣꬊዴስ፤ ቦኔይካ ዉሪዴስ፤ ኑኒካ ኣቲቤኮ» ጊዲ ዋሴቴስ።
JER 8:21 ታ ዴሬይ ማዱንጺሺን ታኒካ ማዱንጻዲስ፤ ዬካዲሲኔ ዳጋማዲስ።
JER 8:22 ጋላኣዴን ቲዪዛ ꬋሌይ ዴኔ? ዎይኮ ሄን ኣኪሜይ ዴኔ? ሂስቲን ታ ዴራ ማዱንꬂ ኣይስ ፓጺቤኔ?
JER 9:1 ሹኬቲዳ ታ ዴራ ጊሻስ ኦማርሲኔ ጋላስ ታ ዬካና ማላ ታ ሁኤይ ሃꬃ ኦላ፥ ታ ኣይፌቲካ ፑልቶ ማላ ኣፉንꬅ ጎጊሲዳኮ ታ ኣይ ማላ ዶሳንዲና!
JER 9:2 ታኒ ታ ዴራፔ ሻኬታዳ ሃካ ባና ማላ ባዞን ማንዳራይ ኣቂዛሶሆ ታስ ኦኔ ኢማናይ! ኢስቲ ኡባይካ ላይማቲዛይታኔ ባሌꬂዛይታ ጊዲዳ።
JER 9:3 ጎዳይ፥ «ኢስቲ ባንታ ኢንጻርስ ዎርዶ ሃሳያናስ ዎንዳፌ ማላ ጊግሲዳ፤ ቱማን ጊዶንታ ዎርዶራ ቢታይ ቦላ ሚኒዳ፤ ኢስቲ ኢታ ቦላ ኢታ ጉጂ ጉጂ ቢዳ፤ ታናካ ኤሬቴና» ጌስ።
JER 9:4 ቃሴካ ጎዳይ፥ «ኢሻይ ኢሻ ባሌꬄስ፤ ላጌይ ባ ላጌ ዚጊሬስ፤ ሄሳ ጊሻስ ኢሻይ ኢሻፔ ናጌቶ፤ ላጌይ ባ ላጋን ኣማኔቶፎ።
JER 9:5 ላጌይ ባ ላጌ ጪሜስ፤ ቱማ ሃሳይዛይ ዴና፤ ኢስቲ ባንታ ኢንጻርስ ዎርዶ ሃሳያ ታማርሲዳ። ናጋራ ኦሶን ባንታና ዳቡርሴቴስ።
JER 9:6 ኔኒ ባሌꬆይ ኩሚዳሶን ዳሳ፤ ኢስቲ ባንታ ጪሞ ጋሶን ታና ኤራና ኮዪቤቴና» ጌስ።
JER 9:7 ሄሳ ጊሻስ ኡባፌ ዎልቃማ ጎዳይ፥ «ታኒ ኢስታ ቢራታ ማላ ፓጫዳ ሴሪሳ ጌሻና። ታ ዴራ ናጋራ ጊሻስ ታ ሃይሳፌ ሃራ ኣይ ኦꬃና ዳንዳያዚና?
JER 9:8 ኢስታ ኢንጻርሳይ ዎꬊዛ ዪሻ ማላ፤ ኢስቲ ጪሞ ሃሳያ ሃሳዬቴስ። ኡባይካ ባንታ ላጌታራ ሲቆ ቃላን ሃሳዬቴስ፤ ጊዶ ኣቲን ባንታ ዎዚናራ ዎጺማዴ ጊጊሴቴስ።
JER 9:9 ሂስቲን ሃይታ ሃ ዮኦታ ጊሻስ ታ ኢስታ ቃጻያና ቤሴኔ? ታኒ ታ ሁኤስ ሃይሳ ማላ ካዎቴꬃ ቦላ ሃሎ ኬሲኪና?» ጌስ።
JER 9:10 ታኒ ꬎቃ ዴሬታስ ዬካናኔ ዋሳና፤ ባዞን ሄንꬃሶሆታስ ካዮታና። ጋሶይካ ኢስቲ ꬋይዳ፤ ሄራ ኢሲ ኣሲኔ ካንꬄና። ሜሄ ዋሶይ ሲዬቴና፤ ሳሎ ካፎቲኔ ዶኣቲ ባቃቲዲ ቢቺዳ።
JER 9:11 ጎዳይ፥ «ዬሩሳላሜ ካታማ ታኒ ቡꬌቲ ካይዚዳሶኔ ዎራካናቲ ካኢዛሶ ኦꬃና። ዩሁዳ ካታማታካ ኣሲ ባይንዳሶ ቡላ ኬሳና» ጌስ።
JER 9:12 ሄሳ ኣኬካናስ ዳንዳይዛ ኣꬎ ኤራንቻይ ኦኔ? ጎዳይ ኢዛስ ቆንጪሲን ሃይሳ ኢዛስ ዮታና ዳንዳይዛይ ኦኔ? ቢታያ ኣሲ ባይንዳ ካይስ ኣይስ ጊዳዴ?
JER 9:13 ጎዳይ፥ «ሃይሲ ሃኒዳይ ኢስታስ ታኒ ኢሚዳ ዎጋ ኢስቲ ኣጊዲ ኣዛዜቶንታ ጊሻሲኔ ታ ማራ ካሎንታ ኣጊዳ ጊሻሳ።
JER 9:14 ሂስቲዲ ኢስቲ ባንታ ዎዚና ሙሜቴꬃን ቢዲ ባንታ ኣዋቲ ታማርሲዳ ማላካ ባኣሌ ጌቴቲዛ ኤቃ ጾሳ ካሊዳ» ጊዴስ።
JER 9:15 ሄሳ ጊሻስ ኡባፌ ዎልቃማ ጎዳ ኢስራኤሌ ጾሳይ፥ «ቤኢቴ፥ ታኒ ሃ ኣሳ ጫሚዛ ቁማ ሚዛናኔ ማርዜራ ዲዛ ሃꬅ ኡሻና።
JER 9:16 ኢስታ ዎይኮ ኢስታ ኣዋቲ ኤሮንታ ካዎቴꬃታ ጊዶን ታኒ ኢስታ ላላና። ታኒ ኢስታ ꬋይሳና ጋካናስ ማሻን ዬዴꬃና» ጌስ።
JER 9:17 ቃሴካ ኡባፌ ዎልቃማ ጎዳይ፥ «ኣኔ ዬሆ ዬኪዛ ማጫሳታ ጼይጊቴ፤ ዚላስ ሎኤꬂ ኤሪዛ ማጫሳታ ኤሂቴ።
JER 9:18 ኢስቲ ኤሶን ዬቶ፤ ኑ ኣይፌራ ኣፉንꬂ ጎጋናሼ ጋካናሲኔ ኑ ሲጲንꬃራ ኣፉንꬂ ፑልታና ጋካናስ ኑ ጊሻስ ዚላሌቶ።
JER 9:19 ጺዮኔን ዚላሳ ጬንጉርሲ ሲዬቴስ፤ ‹ኑኒ ꬋይዶስ! ኑኒ ኬሂ ካዉዪዶስ! ኑ ኬꬂ ላሌቲቺዳ ጊሻስ ኑ ቢታ ኣጊዲ ዴንዲ ቦስ› ጊ ዚላሌቴስ» ጌስ።
JER 9:20 ኢንቴኖ ማጫሳቶ! ጎዳ ቃላ ሲዪቴ! ኢንቴ ሃይꬃይ ኢዛ ዶናፔ ኬዚዛ ቃላ ኤዝጎ። ኢንቴ ማጫ ናይታ ዚላስ ታማርሲቴ፤ ኢሲኒያ ሃንኮሮ ዬሆ ታማርሱ።
JER 9:21 ሃይቆይ ናይታ ኦጌፔ፥ ናቴꬃ ናይታ ዱቡሻፔ ፒቲ ꬋይሲዴስ፤ ኑ ማስኮቴታራ ጌሊዴስ፤ ኑ ቆልኣ ጊዶ ካንꬂዴስ።
JER 9:22 ሄሳ ጊሻስ ጎዳይ ታና፥ « ‹ኣሳ ኣሃይ ቡራ ማላ ዴምባን ላሌታና፤ ካꬅ ሺሺዛይቲ ጉዬን ኣጊዳ ፑሹሎ ማላ ኣታና፤ ኢስታ ኦኒካ ሺሼና› ጋ» ጊዲ ኣዛዚዴስ።
JER 9:23 ጎዳይ፥ «ኣꬎ ኤራንቻይ ባ ኣꬎ ኤራቴꬃን ጬቄቶፎ፤ ዎልቃማይ ባ ዎልቃን ጬቄቶፎ፤ ዎይኮ ዱሬይ ባ ዱሬቴꬃን ጬቄቶፎ።
JER 9:24 ጊዶ ኣቲን ጬቄቲዛ ኦኒካ ታኒ ጎዳ ጊዲዳይሳ ኤሮኒኔ ቢታ ቦላ ሲቆ፥ ሱሬ ፒርዳኔ ጺሎቴꬅ ኦꬂዛይ ታና ጊዶይሳ ኣኬኮን ጬቄቶ። ታኒ ሃይታን ኡፋዬታይስ» ጌስ።
JER 9:25 ቃሴካ ጎዳይ፥ «ቤኢቴ፥ ባንታ ኣሾ ጻላ ቃጻሬቲዳ ኣሳ ታኒ ቃጻያና ዎዴይ ዬስ።
JER 9:26 ሄይቲካ ጊብጼ፥ ዩሁዳ፥ ኤዶሜ፥ ኣሞኔ፥ ሞኣቤኔ ባንታ ሁኤ ጪሪ ሜዲዲ ባዞን ዲዛ ኣሳ ኡባታ። ሃ ካዎቴꬃታን ዲዛ ኣሳይ ኡባይ ቱሙካ ቃጻሬቲቤና፤ ኢስራኤሌ ኣሳ ኡባ ዎዚናይካ ቃጻሬቲቤና» ጌስ።
JER 10:1 ኢንቴኖ ኢስራኤሌ ኣሳቶ! ጎዳይ ኢንቴስ ዮቲዛ ቃላ ሲዪቴ!
JER 10:2 ጎዳይ፥ «ካዎቴꬃታ ኦጌ ኢንቴ ታማሮፒቴ። ኢስቲ ሳሎ ቦላ ማላታ ቤኢዲ ሺሮቲኮካ፥ ኢንቴ ሺሮቶፒቴ።
JER 10:3 ጋሶይካ ዴሬታ ዎጋይ ሃዳ። ኢስቲ ሚꬅ ዎራፔ ቃንጼቴስ፤ ሂላይ ማሲ ጊጊሴስ።
JER 10:4 ኢስቲ ቢራኒኔ ዎርቃን ኣሌቂሴቴስ፤ ቃጾንታ ማላ ናሪቃራ ሚሲማሬን ꬊሺኪዲ ኦይꬄቴስ።
JER 10:5 ኢስታ ኤቃ ጾሳቲ ኢስታ ካꬃ ጊዶን ዶኣ ዳጋንꬃናስ ኤሲዛ ሚስሌ ማላ። ሃሳያናስ ዳንዳዬቴና። ሄሜታናስ ኢስቲ ዳንዳዮንታ ጊሻስ ኣሳይ ኢስታ ቶኬስ። ኢስቲ ኢታ ጊዲን ዎይኮ ሎኦ ሚሽ ኢንቴ ቦላ ኦꬃናስ ዳንዳዮንታ ጊሻስ ኢስታስ ሙሌካ ያዮፍቴ» ጌስ።
JER 10:6 ኣቤት ጎዳዉ! ኔ ማላይ ኦኒካ ዴና። ኔኒ ጊታ፤ ኔ ሱንꬃይካ ጊታኔ ዎልቃማ።
JER 10:7 ኣቤት ካዎቴꬃታስ ካዎ! ኔስ ያዮንታይ ኦኔ? ኔስ ቦንቾይ ቤሴስ፤ ጋሶይካ ኣꬎ ኤራንቻታ ጋርሳኒኔ ኢስታ ካዎቴꬃታ ኡባ ጋርሳን ኔ ማላይ ዴና።
JER 10:8 ሃዳ ጊዲዳ ሚꬃፌ ማሴቲዳ ኤቃ ጾሳታፔ ቲሚርቴ ታማርዛ ኡባይ ኤያኔ ዳማ።
JER 10:9 ሄ ኤቃ ጾሳቲ ታርሴሴፔ ዪዳ ቢራኒኔ ኡፋዜፔ ዪዳ ዎርቃን ኣሌቄቲዳ። ኢስቲ ዎይኔ ኡሻኒኔ ኦቻ ቴራ ሚሳቲዛ ሜꬋራ ዲዛ ማይኦን ካሜቲዳ። ኢስቲ ኡባይ ኩሼ ኦሶ ሂላታን ኦሴቲዳ።
JER 10:10 ጊዶ ኣቲን ጎዳይ ቱሙ ጾሳ፤ ኢዚ ዴኦ ጾሳኔ ሜርና ካዎ። ኢዚ ሃንቄቲዛ ዎዴ ቢታይ ቃጼስ፤ ካዎቴꬃቲካ ኢዛ ዪሎ ዳንዳዬቴና።
JER 10:11 ጎዳይ፥ «ኢንቴካ፥ ‹ሄይቲ ሳሎኔ ሳኣ ሜꬎንታ ጾሳቲ ሳኣፔኔ ሳሎ ጋርሳፌ ꬋያና› ጌታ» ጌስ።
JER 10:12 ባ ዎልቃን ሳኣ ሜꬊዳይ፥ ባ ኣꬎ ኤራቴꬃን ኣላሜ ኤሲዳይ፥ ባ ኣኬካን ሳሎ ሚጪዳይ ጎዳ።
JER 10:13 ኢዚ ጉሚዛ ዎዴ፥ ሳሎን ዲዛ ኡባይ ቃጼስ። ኢዚ ሻራ ሳኣ ጋጻፔ ፑዴ ዴንꬄስ። ኢዚ ኢራራ ዳዳ ዬዴስ፤ ጫርኮካ ባ ሚንጃሶፔ ኬሴስ።
JER 10:14 ኣሲ ኡባይ ኤራ ꬋይዲ ዳሚዴስ፤ ዎርቃ ሴሪሲዛ ኣሲ ኡባይ ባ ኦꬂዳ ኤቃ ጾሳታን ዬላቲዴስ። ጋሶይካ ኤቃ ጾሳቲ ዎርዶ፤ ኢስታስ ሼምፖይ ዴና።
JER 10:15 ኢስቲ ጮ ቂꬌስ ሜꬌቲዳ ሚሻ። ፒርዳይ ኢስታ ቦላ ጋኪዛ ዎዴ ኢስቲ ꬋያና።
JER 10:16 ጊዶ ኣቲን ያቆቤ ቃዳይ ሄይታ ማላ ጊዴና። ጋሶይካ ኢዚ ኡባ ሜꬊዳይሳ፤ ኢስራኤሌይ ዶሬቲዳ ዴሬ። ኢዛ ዶሪዳይሳ ሱንꬃይ ኡባፌ ዎልቃማ ጎዳ ጾሳ።
JER 10:17 ኢንቴኖ ሞርኬይ ጊዶꬂዳይቶ! ዲዛ ሚሽ ዲዛሶፔ ሺሺቴ።
JER 10:18 ጋሶይካ ጎዳይ፥ «ታኒ ሃ ሳኣ ቦላ ዲዛ ኣሳ ሃኢ ጌዴ ካሬ ኬሳዳ ጎዳና። ኢስታስ ኤሬታና ማላ ታ ኢስታ ቦላ ሜቶ ኤሃና» ጌስ።
JER 10:19 ዋኖ ኣይ ሃኖ! ታ ማዱንꬃይ ፓጾንታ ማዱንꬃ። ጊዶ ኣቲን ታ ታና፥ «ሃይሲ ታ ሃርጌ፤ ታኒ ዳንዳያናስ ቤሴስ» ጋዲስ።
JER 10:20 ታ ዱንካኔይ ላሌቲዴስ፤ ኢዛ ዎዶሮይ ኡባይ ዱጼሬቲዴስ። ታ ናይቲ ኡባይ ታፔ ሻኬቲዲ ቢቺዳ፤ ሃይሳፌ ጉዬ ሲሜቴና፤ ታ ዱንካና ዛሪዲ ቶላናስ ዎይኮ ታ ማጋላሻ ካቃናስ ሃኢ ኢሲ ኣሲኔ ኣቲቤና።
JER 10:21 ሄንꬃንቻቲ ዳሚዳ፤ ኢስቲ ጎዳ ኦይቺቤቴና። ሄሳ ጊሻስ ኢስታስ ኢንጄቲቤና፤ ኢስታ ዉዴ ኡባይ ላሌቲዴስ።
JER 10:22 ሲዪቴ! ኢታ ዮኦይ ዩሳ ቦላ ዴስ፤ ሄሲ፥ «ፑዴሃ ባጋራ ዲዛ ካዎቴꬃን ጊታ ቡልኣኬቴꬂ ዩሳን ዴስ» ጊዛይሳ። ኢዛ ኦላንቻቲ ዪዲ ዩሁዳ ካታማታ ባዞኔ ዎራካናታ ዱሳሶ ኬሳና።
JER 10:23 ኣቤት ጎዳዉ! ኣሳ ዴኦይ ኢዛዴ ኩሼን ዶንታይሳኔ ባ ሄሜታካ ባርካ ባ ሼኔ ማላ ሎኤꬃና ዳንዳዮንታይሳ ታ ኤራይስ።
JER 10:24 ኣቤት ጎዳዉ! ታና ሴራ፤ ጊዶ ኣቲን ጊናራ ጊዶ። ታኒ ሙሌራ ꬋዮንታ ማላ ኔኒ ሃንቆራ ታ ቦላ ዮፓ፤
JER 10:25 ያቆቤ ሙሌራ ሚ ሚቲዳይታ ቦላኔ ኔ ሱንꬃ ጼይጎንታ ኣሳታ ቦላ ጉሳ። ኢዛ ዱሳሶካ ካይዚሲዳ ጊሻስ ኔኒ ኔ ሃንቆዛ ኔና ኤሮንታ ዴሬታ ቦላኔ ኔ ሱንꬅ ጼይጎንታ ካዎቴꬃታ ቦላ ጉሳ።
JER 11:1 ጎዳፔ ኤርማሳስ ዪዳ ቃላይ ሃይሳፌ ካሊዛይሳ፤
JER 11:2 «ሃ ጫቆ ቃላታ ሲያ፤ ሂስታዳ ዩሁዳ ኣሳሲኔ ዬሩሳላሜ ካታማን ዲዛይታስ ዮታ።
JER 11:3 ጎዳ ኢስራኤሌ ጾሳይ፥ ‹ሃይሳ ጫቆ ቃላስ ኣዛዜቶንታ ኣሲ ቃንጌቲዳዴ ጊዶ።
JER 11:4 « ‹ሃይሲ ኣዛዞዚ ቤኒ ኢንቴ ኣዋታ ጊብጼ ቢታፌ፥ ቢራታ ሴሪሲዛ ጮጬፔ ኬሲዛ ዎዴ ታ ቃላ ሲዪዳኮ፥ ታ ኣዛዞ ናጊዳኮ ኢስቲ ታ ናይታ፤ ታኒ ኢስታ ጎዳ ጊዳና ማላ ታኒ ኢስታስ ኢሚዳ ቃላ።
JER 11:5 ሄሳን ማꬂኔ ኤሲ ጎጊዛ ቢታ ካሴ ኢንቴ ኣዋታስ ኢማናስ ታኒ ጫቂዳ ጫቆ ፖላና› ጋዲስ» ጌስ። ታኒካ፥ «ኤሮ፥ ጎዳዉ፥ ኣሚን» ጋዲስ።
JER 11:6 ሄሳፌ ጉዬ ጎዳይ ታስ፥ «ሃይሳ ታ ቃላ ኡባ ዩሁዳ ካታማታኒኔ ዬሩሳላሜ ኦጌታን፥ ‹ሃ ጫቆ ቃላ ሲዪቴ፤ ሲዪዲ ኢዛ ካሊቴ።
JER 11:7 ካሴ ኢንቴ ኣዋታ ታኒ ጊብጼ ቢታፌ ኬሶሳፔ ሃች ጋካናስ፥ ዛራ ዛራዳ፥ ታስ ኣዛዜቲቴ!› ጋዳ ሴራዲስ።
JER 11:8 ኢስቲ ጊዲኮ ባ ዎዚና ኢታቴꬃ ካሊዳ ኣቲን ታስ ኣዛዜቲቤቴና፤ ባ ሃይꬂካ ሃ ታኮ ዬጊቤቴና፤ ሄሳ ጊሻስ ኢስቲ ካላና ማላ ታ ኣዛዚዳ ጫቆ ቃላ ፖሎንታ ኣጊዳ ጊሻስ ታ ኢስታ ቦላ ቃንጌꬅ ኤሃዲስ» ጊዴስ።
JER 11:9 ዛሪዲካ ጎዳይ ታስ፥ «ዩሁዳ ኣሳ ጊዶኒኔ ዬሩሳላሜን ዲዛይታ ጊዶን ኢታ ማቆይ ዴስ።
JER 11:10 ኢስቲ ካሴ ታ ቃላ ሲዮንታ ኢጺዲ ናጋራ ኦꬂዳ ባንታ ኣዋታ ማላካ ናጋራ ኦꬂዳ፤ ኢስቲ ሃራ ጾሳታስ ጎይኒዳኔ ኢስታ ካሊዳ፤ ኢስራኤሌ ኣሳይኔ ዩሁዳ ኣሳይ ታኒ ካሴ ኢስታ ኣዋታራ ጫቄቲዳ ጫቆ ቃላ ላሊዳ።
JER 11:11 ሄሳ ጊሻስ ጎዳይ ኢስታስ፥ ‹ኢስቲ ባቃቲዲ ኣታናስ ዳንዳዮንታ ሜቶ ታ ኢስታ ቦላ ኤሃና። ኢስቲ ታኮ ዋሲኮካ ታ ሲዪኬ።
JER 11:12 ሄ ዎዴ ዩሁዳ ካታማታ ኣሳቲኔ ዬሩሳላሜ ኣሳቲ ቢዲ ባንቲ ኤጻኔ ጩዋሲዛ ኤቃ ጾሳታስ ዋሳና፤ ጊዶ ኣቲን ሜቶ ዎዴ ሄ ጾሳቲ ሙሌካ ኢስታ ማዴቴና።
JER 11:13 ኢንቴኖ ዩሁዳ ኣሳቶ! ኢንቴ ጾሳቲ ኢንቴ ካታማታ ኬና ጮራ። ቃሴ ባኣሌ ጌቴቲዛ ሄ ዬላቺዛ ጾሳስ ኤጻኔ ጩዋሳናስ ኢንቴ ኤሲዳ ያርሺዛሶሆቲ ዬሩሳላሜ ኦጌታ ኬና ጮራ› ጌስ።
JER 11:14 «ኤርማሳ፥ ኢስቲ ሜቶቲዲ ታና ዎሲኮ ታ ሲዮንታ ጊሻስ ኔ ኢስታ ጊሻስ ታና ዎሶፋ፤ ኢስታ ጊሻስ ጋናቶፓ ዎይኮ ኦይቾፋ።
JER 11:15 ታ ሲቆያ ባ ኢታቴꬃ ዳሮታራ ቃጼሬꬃሼ ታሳራ ኢዚስ ኣዛ ጋይቶቴꬄ ዲዛይ? ኣዲኔቴꬂ ዎይኮ ኣሾ ያርሾይ ኔና ቂጻቴፔ ኣሻና ዳንዳይዜ? ኔ ሄይታንታ ፖላዳ ኡፋዬታና ዳንዳያይ?
JER 11:16 ጎዳይ ኔና፥ ‹ዲጪዛ፥ ሎኦ ኣይፌ ኣይፊዛ ዎጋራ ሚꬅ› ጊዲ ሱንꬂዴስ። ጊዶ ኣቲን ኢዚ ዎልቃማ ጎቴ ጫርኮ ጊሪሳን ጹጋና፤ ኢዚ ሃጋቲካ ሜቄሬቲ ዎꬋና።
JER 11:17 «ኢስራኤሌ ኣሳቲኔ ዩሁዳ ኣሳቲ ባኣሌስ ኤጻኔ ጩዋሲዲ ታና ዪሎሲዳ ጊሻስ ኢንቴና ቶኪዳ ኡባፌ ዎልቃማ ጎዳይ ኢንቴ ቦላ ኢታ ሚሽ ኤሃናስ ኣዋጃዲስ» ጊዴስ።
JER 11:18 ጎዳይ ኢስታ ማቆ ታስ ቆንጪሲዳ ጊሻስ ታኒ ኤራዲስ፤ ሄ ዎዴ ኢስቲ ኢታ ኦꬂዛይሳ ኢዚ ታና ቤሲዴስ።
JER 11:19 ታኒ ሹካስ ካሌꬂዲ ኤፊዛ ዶርሳ ላቃ ማላ ጊዳዲስ። ኢስቲ ታ ቦላ፥ «ኣኔ ኑኒ ሚꬃ ቃንጺዲ ኢዛ ኣይፌዛራ ጋꬂ ꬋይሶስ። ኢዛ ሱንꬃይ ሙሌካ ሃሳኤቶንታ ማላ፥ ኣኔ ኑኒ ኢዛ ፓጻ ዲዛይታ ጊዶፌ ꬎቃሊዲ ꬋይሶስ» ጊዲ ኢስቲ ማቄቲዳይሳ ታኒ ኤራቤኬ።
JER 11:20 ዎዚናኔ ኪላሆ ፓጫ ጼሊዛ ኡባፌ ዎልቃማ ጎዳዉ! ታ ዮኦታ ኔስ ኢማዲስ፤ ኔኒ ኢስታ ቦላ ሃሎ ኬሲሺን ታ ቤያና።
JER 11:21 ሄሳ ጊሻስ፥ «ጎዳ ሱንꬃን ቲንቢቴ ዮቶፓ፤ ኔ ዮቲኮ ኑ ኩሼን ሃይቃና» ጊዲ ኔና ዎꬋናስ ኮይዛ ኣናቶቴ ኣሳ ጊሻስ ጎዳይ ጊዛይሲ ሃይሳ።
JER 11:22 ኡባፌ ዎልቃማ ጎዳይ፥ «ታኒ ኢስታ ቃጻያና፤ ኢስታ ናቴꬃ ናይቲ ማሻን ሃይቃና፤ ኢስታ ማጫ ናይቲኔ ኣቱማ ናይቲ ኮሻን ሃይቃና፤
JER 11:23 ኢስታፌ ኢሶይኔ ኣቴና፤ ጋሶይካ ታኒ ኢስታ ቃጻዪዛ ላይꬅ ኣናቶቴ ኣሳ ቦላ ኢታ ሚሽ ኤሃና» ጌስ።
JER 12:1 ኣቤት ጎዳዉ! ታኒ ኔናራ ፓላሜቲዛ ዎዴ ኡባንካ ኔ ጺሎ። ኢታ ኣሳቲ ኦꬂዛይሲ ኢስታስ ኣይስ ኢንጄቲዜ? ኣማኔቶንታይቲ ኣይስ ኢሻሎ ዱስ ዲዞ?
JER 12:2 ኔኒ ኢስታ ቶካዳሳ፤ ሂስቲን ጻጶ ዬዲዳ፤ ዲጪዲ ኣይፌ ኣይፊዳ። ኢስቲ ኔና ዶናፔ ዬጌቴና፤ ኔኒ ጊዲኮ ኢስታ ዎዚናፔ ሃኮን ዳሳ።
JER 12:3 ጊዶ ኣቲን ኣቤት ጎዳዉ! ኔኒ ታና ኤራሳ። ታና ቤኣሳ፤ ታኒ ኔስ ኣይ ቆፒዛኮ ፓጫሳ። ሹኬታና ቢዛ ዶርሳታ ማላ ኔኒ ኢስታ ላጋ! ሹካ ጋላሳስ ኢስታ ዱማ ሻካ ዎꬃ!
JER 12:4 ኢራይ ꬋዪን ቢታይ ኣይዴ ጋካናስ ሜላኔ? ማታይካ ኣይዴ ጋካናስ ሜላኔ? ኣሳ ኢታቴꬃፌ ዴንዲዳይሳን ሜዶሳቲኔ ካፎቲ ꬋይዳ። ሄሳ ቦላካ ኣሳይ፥ «ጎዳይ ኑኒ ኦꬂዛይሳ ዴሜና» ጌስ።
JER 12:5 ጎዳይ ኤርማሳስ፥ «ኔኒ ቶሆን ዎጺዛ ኣሳታራ ዎጻዳ ዳቡርኮ ፓራራ ዋና ጋዴ ዎጻኔ? ኔኒ ሳሮ ቢታን ꬉጴቲኮ፥ ዮርዳኖሴ ዎራ ጋርሳን ዋና ሄሜታኔ?
JER 12:6 ኔ ኢሻቲኔ ኔ ሶሆ ኣሳቲ ኔና ሂሊዳ፤ ኔ ቦላ ዋሲዳ፤ ሄሳ ጊሻስ ኢስቲ ኔስ ሎኦ ሃሳይኮካ ኔ ኢስታ ኣማኖፓ።
JER 12:7 ታኒ ታ ኬꬃ ኣጋና፤ ታ ጺንጾዮካ ዬጋ ኣጋና፤ ታኒ ታ ሲቂዛ ኣሳ ኢስታ ሞርኬታ ኩሼን ኣꬃ ኢማና።
JER 12:8 ታ ጺንጾያ ዎራ ጊዶን ዲዛ ጋሞ ማላ ታ ቦላ ዴንዳዱስ፤ ታ ቦላካ ጻጋዱስ፤ ሄሳ ጊሻስ ታኒ ኢዞ ኢጻዲስ።
JER 12:9 ታ ጺንጾያ ጲርጮቲ ማና ጊዶꬂዳ ካፎ ማላ ጊዳቤኬ? ቢዲ ዎራ ዶኣታ ኡባ ሺሺቴ፤ ኢስቲ ኢዞ ዱꬄꬂ ማና ማላ ጼይጊቴ።
JER 12:10 ዳሮ ሄንꬃንቻቲ ታ ዎይኔ ቱራ ሶሆ ሞሪዳ፤ ታኒ ኢዛን ኡፋዬቲዛ ታ ጋዴዛ ቡላሲዳ።
JER 12:11 ሄ ቢታይ ታ ሲንꬃን ባዞ፥ ቡላኔ ሜላ ቢታ ጊዳና፤ ኢዚስ ቆፒዛይ ባይንዳ ጊሻስ ቢታያ ባዞ ጊዳና።
JER 12:12 ባዞን ዲዛ ዙምቡላታ ቦላፌ ꬋይሲዛይቲ ያና፤ ጋሶይካ ጎዳ ማሻይ ቢታ ሃ ጋጻፔ ሄ ጋጻ ጋካናስ ማና። ሄሳ ጊሻስ ኦኒካ ኣታናስ ዳንዳዬና።
JER 12:13 ኢስቲ ጊስቴ ዜሪዲ ኣጉንꬅ ጫካና፤ ኢስቲ ዳሮ ዳቡራናሺን ኣይኮካ ዴሜቴና፤ ዳሮ ዜሪዲ ጎዳ ሃንቆ ጋሶን ኢንቴ ጉꬅ ዴሚዲ ዬላታና» ጊዴስ።
JER 12:14 ጎዳይ፥ «ታኒ ታ ዴሬ ኢስራኤሌስ ኢሚዳ ጺንጾ ቢታ ኦይኪዛ ኢታ ሾሮታ ታኒ ኢስታ ኢስታ ቢታፌ ꬎቃላና። ቃሴ ዩሁዳ ኣሳታካ ኢስታ ጊዶፌ ꬎቃላና።
JER 12:15 ጊዶ ኣቲን ታኒ ኢስታ ኢስታ ቢታፌ ꬎቃሊዳፔ ጉዬ ዛራዳ ማራና፤ ታኒ ኢስታ ዴሬኒኔ ኢስታ ጺንጾን ጺንጾን ዛራ ኤሃና።
JER 12:16 ካሴ ታ ኣሳ ባኣሌ ሱንꬃን ጫቃና ማላ ታማርሶይሳꬆካ፥ ‹ጎዳይ ቤኢን!› ጊዲ ታ ሱንꬃን ጫቂኮ ኢስቲ ታ ኣሳ ጊዶን ጻጵዲ ዳና።
JER 12:17 ታ ጊዛዝ ኤኮንታ ካዎቴꬂ ዲኮ ታ ኢዛ ሙሌራ ꬎቃላ ꬋይሳና» ጌስ።
JER 13:1 ጎዳይ ታና፥ «ባዳ ላይኖፔ ኦሴቲዳ ዳንጮ ሻማዳ ኔ ጼሳን ዳንጫ፤ ጊዶ ኣቲን ሃꬃን ቦሺሶፓ» ጊዴስ።
JER 13:2 ሄሳ ጊሻስ ታኒ ጎዳይ ኣዛዚዳ ማላ ዳንጮ ሻማዳ ታ ጼሳን ዳንጫዲስ።
JER 13:3 ጎዳ ቃላይ ናምኣንꬆ ታኮ ዪዲ፥
JER 13:4 «ኔኒ ሻማ ዳንጪዳ ዳንጮዛ ኤካዳ ኤፊራጺሴ ሻፋ ባ፤ ሂስታዳ ዛላ ዛኣ ጊዶን ቆታ» ጊዴስ።
JER 13:5 ሂስቲን ታኒ ጎዳይ ታስ ዮቲዳ ማላ ኤፋዳ ኤፊራጺሴ ሻፋ ላንቄን ቆታዲስ።
JER 13:6 ዳሮ ጋላሳፌ ጉዬ ጎዳይ፥ «ዴንዳ ኤፊራጺሴ ሻፋ ባዳ ታኒ ኔና፥ ‹ሄን ቆታ› ጊዳ ዳንጮዛ ኬሳ» ጊዴስ።
JER 13:7 ሂስቲን ታኒ ኤፊራጺሴ ሻፋ ባ ቦካዳ ዳንጮዛ ታ ቆቲዳሶፔ ኬሳዲስ፤ ጊዶ ኣቲን ሄ ዳንጮዚ ሞሬቲዲ ሙሌራ ጎኦንታዝ ጊዲዴስ።
JER 13:8 ሄሳፌ ጉዬ ጎዳ ቃላይ ታኮ ዪዲ፥
JER 13:9 «ጎዳይ ታኒ ዩሁዳ ኣሳ ኦቶሬቴꬂኔ ዬሩሳላሜ ኣሳ ጬቄቴꬅ ሄሳ ማላ ꬋይሳና።
JER 13:10 ታ ቃላ ሲዮንታ ኢጺዲ፥ ባንታ ዎዚና ሙሜቴꬃ ካሊዲ፥ ኤቃ ጾሳታስ ኦꬃናሲኔ ጎይናናስ ቢዛ ሃ ኢታ ኣሳይ ሃይሳ ዳንጮዛ ማላ ሙሌካ ጎኦንታይሳ ጊዳና።
JER 13:11 ዳንጮይ ኣሳ ጼሳ ባቂ ኦይኪዛ ማላ ዩሁዳ ኣሳይ ኡባይኔ ኢስራኤሌ ኣሳይ ኡባይ ታኮ ሺጵ ጋና ማላኔ ታ ሱንꬃስ ጋላታኔ ቦንቾ ኢማና ማላ ታ ኦꬂን ኢስቲ ታ ጊዛዝ ሲዪቤቴና» ጌስ።
JER 13:12 ቃሴካ ጎዳ ኢስራኤሌ ጾሳይ፥ «ኤርማሳ! ኣሳስ፥ ‹ኦቶ ኡባን ዎይኔ ኡሻይ ኩማና› ጌስ። ኢስቲ ኔስ ዛሪዲ፥ ‹ኦቶ ኡባን ዎይኔ ኡሺ ኩማናይሳ ዋኒ ኑ ኤሮኮኒ?› ጊኮ፥
JER 13:13 ኔኒ ኢስታስ፥ ‹ጎዳይ ታኒ ሃ ቢታን ዲዛ ኣሳ ኡባ፥ ዳዊቴ ካዎቴꬃ ኣራታን ኡቲዛ ካዎታ፥ ቄሴታ፥ ናቤታኔ ዬሩሳላሜን ዲዛ ኣሳ ኡባካ ታ ዎይኔ ኡሻን ማꬆሳና።
JER 13:14 ታኒ ኢሲ ኣስ ሃራ ኣሳራ፥ ኣዋ ናራ ኦሻና፤ ታኒ ኢስታ ꬋይሳና ኣቲን ኢስታስ ሚሼቲኬ፤ ቃꬌቲኬኔ ማሪኬ› ጌስ ጋ» ጊዴስ።
JER 13:15 ጎዳይ ዮቲዴስ፤ ዎዚናን ዎꬂ ሲዪቴ፤ ኣጊቴ ኦቶራንቻ ጊዶፒቴ።
JER 13:16 ኢዚ ꬉማ ኤሆንታ ዲሺን ꬉሚዳ ዙማታ ቦላ ኢንቴ ቶሆይ ꬉጴቶንታ ዲሺን ጎዳስ ኢንቴ ጾሳስ ቦንቾ ኢሚቴ፤ ኢንቴ፥ «ፖኦይ ያና» ጊዲ ናጌታ፤ ጊዶ ኣቲን ኢዚ ꬉማን ላማና፤ ሳካና ꬉማ ኦꬃና።
JER 13:17 ኢንቴ ሲዮንታ ኢጺኮ፥ ኢንቴ ኦቶሬቴꬃ ጊሻስ ታ ሼምፖያ ጌማን ዬካና፤ ጎዳ ዉዴይ ዲኤቲ ቢቺዳ ጊሻስ ታኒ ጫሞ ዬሆ ዬካይስ፤ ታ ኣይፌፔ ኣፉንꬂ ሃꬃ ማላ ጎጌስ።
JER 13:18 ጎዳይ ታና፥ «ካዎዛሲኔ ኢዛ ኣዮ ጎዳቴይስ፥ ‹ኢንቴ ቦንቾ ካላቻይ ኢንቴ ሁኤፔ ዎꬋና ጊሻስ፥ ኢንቴ ካዎቴꬃ ኣራታፔ ዱጌ ዎꬊቴ።
JER 13:19 ኔጌቤ ቢታን ዲዛ ካታማቲ ኡባይ ጎርዴታና። ኢስታ ዶያናዴይካ ዴና፤ ዩሁዳ ኣሳይ ኡባይ ዲኤቲዲ ባና፤ ኢስታ ኦጌይካ ጎርዴታና› ጋ» ጊዴስ።
JER 13:20 ቃሴካ ጎዳይ፥ «ኣኔ ꬎቁ ጊዲ ፑዴሃ ባጋፌ ዪዛይታ ጼሊቴ፤ ኢንቴስ ኢሜቲዳ ዉዴይ፥ ኢንቴ ጬቄቲዛ ዶርሳቲ ኣዋን ዲዞ?
JER 13:21 ኔኒ ኔስ ዳቦ ጊዳና ማላ ኮዪዳይቲ ኔና ጾኒዲ ሃሪዛ ዎዴ ኔ ኣይ ጋኔ? ዬሎ ሚጻይ ኦይኪዳ ማጫሳ ማላ ኔና ሚጻይ ኦይኬኔ?
JER 13:22 ኔኒ ኔ ዎዚናን፥ ‹ሃይሲ ኡባይ ታ ቦላ ኣይስ ጋኪዴ?› ጊኮ፥ ኔ ማይኦይ ቃሬቲን ኔ ሱጌቲዳይ፥ ኔ ኣሳ ኩሼን ዋዬ ቤኢዳይ ኔ ናጋራይ ዳሪዳ ጊሻሳ።
JER 13:23 ቱሙ ቶጵያ ኣሲ ባ ሜꬋ፥ ዎይኮ ማሄይ ባ ማሳራቴꬃ ላማናስ ዳንዳይዜ? ኢንቴ ኢታ ኦꬂ ሜዜቲዳይቲ ሎኦ ኦꬃናስ ዳንዳዬኬታ» ጊዴስ።
JER 13:24 ጎዳይ፥ «ባዞ ጫርኮይ ሱላ ላሊዛ ማላ ታኒካ ኢንቴና ላላና።
JER 13:25 ኢንቴ ታና ዶጊዳ ጊሻሲኔ ዎርዶ ጾሳታን ኣማኔቲዳ ጊሻስ ኢንቴ ሳማይኔ ኢንቴ ቃዳይ ሃይሳ።
JER 13:26 ኢንቴ ካሎቴꬂ ቤታናሼ ጋካናስ ታኒ ኢንቴ ማይኦ ቃራዳ ኢንቴ ሲንꬅ ካማና።
JER 13:27 ኢንቴ ዙምቡላታ ቦላኔ ዴምባን ኦꬂዳ ሃራሲዛ ኦሶ ታኒ ቤኣዲስ፤ ኢንቴ ላይማቴꬃኔ ኢንቴ ዚታ ሃኖታ ታ ቤኣዲስ፤ ዬሩሳላሜ ኔስ ኣዬ ኣና! ኔኒ ኣይዴ ጋካናስ ኔ ቱናቴꬃፌ ጌዮንታ ዳኔ?» ጌስ።
JER 14:1 ጎዳይ ኮሻ ጊሻስ ኤርማሳስ ዮቲዳ ቃላይ ሃይሳፌ ካሊዛይሳ፤
JER 14:2 «ዩሁዳ ቢታይ ዬኬስ፤ ካታማቲካ ፖርቁ ጌቴስ፤ ኣሳይ ቢታ ቦላ ኡቲዲ ጬጬስ፤ ዬሩሳላሜፔካ ዋሶይ ሴቴቴስ።
JER 14:3 ዱሬቲ ባንታ ኣይሌታ ሃꬅ ዱቃናስ ኪቴቴስ። ኢስቲካ ሃꬃ ኦላይ ዲዛሶ ቤቴስ፤ ጊዶ ኣቲን ሃꬅ ዴሜቴና፤ ባንታ ኦቶ ሜላ ቶኪ ኤኪዲ ሲሜቴስ። ዬላቲዲኔ ሂዶታ ቃንጺዲ ባንታ ሁኤ ጉሉንቴቴስ።
JER 14:4 ኢራይ ቡኮንታ ጊሻስ ቢታይ ሜሊዲ ዛኤስ። ጎሻንቻቲ ዬላቲዲ ባንታ ሁኤ ጉሉንቴቴስ።
JER 14:5 ማታይ ባይንዳ ጊሻስ ቆርኬይ ባ ዬሊዳ ማራ ዴምባን ዬጋዳ ባዉስ።
JER 14:6 ሃርዲዳቲ ኣይኮይ ባይንዳ ዙምቡላታ ቦላ ኤቂዳ፤ ዎራካናታ ማላ ሃꬅ ኮዪዲ ሌሶቴቴስ። ኢስታስ ሚዛ ሚሺ ꬋይዳ ጋሶን ኢስታ ኣይፌይ ጼላናስ ዳቡርዴስ» ጊዴስ።
JER 14:7 ኣሳይ፥ «ኣቤት ጎዳዉ! ኔ ሲንꬃፌ ባቃታ ዳርሲዶስ፤ ኔ ሱንꬃ ጊሻስ ኑስ ኢሲ ሚሽ ኦꬃ፤ ኑኒ ኔፔ ዳሮቲ ጉዬ ሲሚዶስ፤ ኔ ቦላን ናጋራ ኦꬂዶስ።
JER 14:8 ኣቤት ኢስራኤሌ ሂዶታዉ! ሜቶ ዎዴ ኣሺዛይሶ! ኔኒ ቢታን ኢማꬃ ማላ፥ ኢሲ ኦማርስ ኣቂዲ ቢዛ ኦጌ ኣሳ ማላ ኣይስ ሃናይ?
JER 14:9 ኔኒ ሃኒዛዚ ꬋይዳ ኣሳ ማላ፥ ኣሻናስ ዎልቃይ ꬋይዳ ኦላንቻ ማላ ኣይስ ጊዳይ? ኣቤት ጎዳዉ! ኔኒ ኑ ጊዶን ዳሳ፤ ኑኒካ ኔ ሱንꬃን ጼይጌቲዶስ፤ ኑና ኔኒ ኣጎፋርኪ!» ጊዴስ።
JER 14:10 ሃ ኣሳታ ጊሻስ ጎዳይ፥ «ኢስቲ ቶይላቴቴꬅ ኬሂ ዶሴቴስ፤ ባንታ ቶሆ ናጌቴና። ሄሳ ጊሻስ ጎዳይ ኢስታን ኡፋዬቴና፤ ሃኢ ኢዚ ኢስታ ቆሆ ቆፔስ፤ ኢስታ ናጋራ ጋሶን ኢስታ ቃጻዬስ» ጌስ።
JER 14:11 ሄሳፌ ጉዬ ጎዳይ ታና፥ «ሃ ዴራ ሎኦቴꬃስ ዎሶፋ።
JER 14:12 ኢስቲ ጾሚ ዎሲኮካ ታኒ ኢስታ ዋሶ ሲዪኬ፤ ጹጌቲዛ ያርሾኔ ካꬃ ያርሾዛ ኢስቲ ያርሺኮካ ታኒ ኢስታ ያርሾዛ ኤኪኬ። ታኒ ኢስታ ማሻን፥ ኮሻኒኔ ኢታ ሃርጌን ꬋይሳና» ጊዴስ።
JER 14:13 ሂስቲን ታኒ፥ «ኣቤት ኡባፌ ዎልቃማ ጎዳዉ! ኣዬ ኣና! ናቤቲ ኢስታስ፥ ‹ኢንቴ ኦላ ቤኤኬታ ዎይኮ ኮሻይ ኢንቴና ዴሜና፤ ታኒ ኢንቴስ ዉርሴꬅ ጋካናስ ሳሮቴꬅ ኢማና› ጌቴስ» ጋዲስ።
JER 14:14 ሂስቲን ጎዳይ ታስ፥ «ናቤቲ ታ ሱንꬃን ዎርዶ ዮቴቴስ። ታኒ ኢስታ ኪታቤኬ፥ ኣዛዛቤኬ፥ ኢስታስካ ዮታቤኬ። ኢስቲ ኢንቴስ ዎርዶ ኣጁታ፥ ሙሬኖ ዮኦ፥ ሃዳ ዮኦኔ ባንታ ዎዚናን ዲዛ ባሌꬆ ዮኦ ዮቴቴስ።
JER 14:15 ሄሳ ጊሻስ ታ ኪቶንታ ዲሺን፥ ‹ኦላይኔ ኮሻይ ሃ ቢታይ ቦላ ዬና› ጊዲ ታ ሱንꬃን ዎርዶ ቲንቢቴ ዮቲዛ ናቤታ ታኒ ኦላኒኔ ኮሻን ꬋይሳና።
JER 14:16 ቃሴ ኢስቲ ቲንቢቴ ዮቲዳ ዴሬይካ ኮሻኒኔ ኦላ ጋሶን ዬሩሳላሜ ዱቡሻታን ኩንዳና፤ ኢስታስ፥ ኢስታ ማቼታ፥ ኢስታ ኣቱማ ናይታኔ ማጫ ናይታ ኣሃ ሞጊዛይ ꬋያና፤ ታኒ ኢስታ ሞሮ ማላ ኢስታ ቦላ ቂጻቴ ኤሃና» ጊዴስ።
JER 14:17 ሃ ቃላ ኢስታስ፥ « ‹ታ ዴሬይ ኬሂ ዴሼቲዲ ማዱንጺዳ ጊሻስ፥ ታ ኣይፌቲ ኦማርሲኔ ጋላስ ሼምፖንታ ኣፉንጼቴስ።
JER 14:18 ታኒ ጋጻሬ ቢኮ፥ ማሻን ሃይቂዳይታ ቤኣይስ፤ ካታማ ጌሊኮ ኮሻይ ዉርሲዳይታ ቤኣይስ። ናቤቲኔ ቄሴቲ ባ ኤሮንታ ዴሬ ባቃቲዳ› ጌስ ጎዳይ» ጊዴስ።
JER 14:19 ኣቤት ጎዳዉ! ኔኒ ዩሁዳ ሙሌካ ኣጋዲ? ጺዮኔ ኣሳ ሃራሴታዲ? ኔኒ ኑና ፓጾንታ ማላ ኦꬃዳ ኣይስ ዴቻዲ? ኑኒ ሳሮቴꬅ ናጊዶስ፤ ጊዶ ኣቲን ሳሮቴꬅ ዴሚቤኮ፤ «ፓጻና ዎዴይ ያና» ጊዲ ናጊዶስ፤ ጊዶ ኣቲን ዳጋማ ጻላ ጊዲዴስ።
JER 14:20 ኣቤት ጎዳዉ! ኑኒ ኑ ኢታቴꬃ ኤሪዶስ፤ ኑ ኣዋታ ቆሆካ ኣኬኪዶስ፤ ቱማፔካ ኔ ቦላ ናጋራ ኦꬂዶስ።
JER 14:21 ኑና ኔ ሱንꬃ ጊሻስ ጋዳ ካꬎፓርኪ! ኔ ቦንቾ ኣራታ ካዉሾፋ። ኔኒ ኑናራ ጫቄቲዳ ጫቆዛ ቆፓ፤ ኔ ጫቂዳ ቃላ ሞፓ።
JER 14:22 ካዎቴꬃታ ኤቃ ጾሳቲ ኢራ ቡኪሳና ዳንዳይዞ? ሳሎቲ ባ ሼኔን ፑሴ ዱጌ ዬዳናስ ዳንዳይዞ? ዳንዳዬቴና፤ ኣቤት ኑ ጎዳዉ! ሄሳ ኡባ ኦꬃና ዳንዳይዛይ ኔና፤ ሄሳ ጊሻስ ኑኒ ኔናን ሂዶታ ኦꬆስ።
JER 15:1 ሄሳፌ ጉዬ ጎዳይ ታስ፥ «ሙሴይኔ ሳሜሊ ታ ሲንꬃን ኤቂዳኮካ ታ ዎዚናይ ሃ ዴራስ ሚሼቴና፤ ኢስታ ታ ሲንꬃፌ ዲጋ፤ ኢስቲ ቤቶ።
JER 15:2 ቃሴ ኢስቲ ኔና፥ ‹ኑኒ ኣዋ ቢኖ?› ጊ ኦይቺኮ፥ ኔ ኢስታስ፥ ‹ሃይቆስ ፒርዴቲዳይቲ ሃይቃና፤ ማሻስ ፒርዴቲዳይቲ ማሻን ሹኬታና፤ ኮሻስ ፒርዴቲዳይቲ ኮሻን ዉራና፤ ዲኤታናስ ፒርዴቲዳይቲ ዲኤቲ ባና።›
JER 15:3 «ጎዳይ፥ ‹ታኒ ኦይዱ ቆሞ ባሽ ኢስታ ቦላ ኤሃና፤ ሄይቲካ ኢስታ ዎꬋናስ ማሻ፥ ኢስታ ኣሃ ጎቻናስ ካናታ፥ ኢስታ ኣሾዛ ሚዲ ꬋይሳናስ ሳሎ ካፎታኔ ሳኣ ዶኣታ።
JER 15:4 ሂዝቂያሳ ና፥ ዩሁዳ ካዎ ሚናሴይ ዬሩሳላሜን ኦꬂዳ ፓላ ጊሻስ ታኒ ኢስታ ቦላ ሳኣ ካዎቴꬃታ ኡባስ ዳጋንꬂዛዝ ኦꬃና› ጌስ ጋዳ ዮታ» ጊዴስ።
JER 15:5 «ሃኔ ዬሩሳላሜ! ኔስ ኦኔ ቃꬌታናይ? ኔስ ሚሼታናይ ኦኔ? ኔ ሎኤቴꬃ ጌሊ ኦይቻናይ ኦኔ?» ጌስ።
JER 15:6 «ኔ ታና ኣጋዳሳ፤ ጉዬ ጉዬ ባሳ፤ ሄሳ ጊሻስ ታኒ ኔ ቦላ ታ ኩሼ ዴንꬃዳ ኔና ꬋይሳና፤ ሃይሳፌ ጉዬ ኔስ ቃꬌቲኬ።
JER 15:7 ታኒ ኢስታ ካꬅ ሱራጊዛ ማላ ሱራጋዳ ካታማታ ፔንጌን ላላና፤ ኢስቲ ባ ኦጌፔ ሲሞንታ ኣጊዳ ጊሻስ ታኒ ታ ዴሬዛ ካዮን ኩንꬃና፤ ኢስታ ቦላካ ባሽ ኤሃና።
JER 15:8 ታኒ ኢስታ ኣምኤታ ቆዳ ኣባን ዲዛ ኣጬፔካ ዳርሳና፤ ሚኖ ኣዬታ ꬋይሲዛዝ ሴታ ጋላስ ታ ኢስታ ቦላ ኤሃና፤ ኢስቲ ቆፖንታ ዲሺን ዳጋማኔ ሺሮ ታ ኢስታ ቦላ ዬጋና።
JER 15:9 ላፑን ናይቲ ሃይቂዳ ኣያ ዳጋማን ዳቡራና፤ ፔኖራ ꬋያና ኢዚስ ጋላሳይ ቃማና፤ ኢዛ ዬላታናኔ ካዉያና፤ ኣቲዳይታካ ሞርኬታ ማሻስ ኣꬃ ኢማና» ጌስ ጎዳይ።
JER 15:10 ታ ኣዬ! ሃኖ ፖራ! ታኒ ኣስ ኡባስ ኦሻሲኔ ፓላማስ ጊዳና ማላ ኣይስ ታና ዬላዲ? ታኒ ኦናስካ ታልኤ ኢማቤኬ፤ ኦናፔካ ታልኤ ኤካቤኬ፤ ጊዶ ኣቲን ኣሲ ኡባይ ታና ቃንጌስ።
JER 15:11 ጎዳይ፥ «ቱማፔ ታኒ ኔና ሎኦ ሚሻስ ኣሻ ኤካና፤ ቱማፔ ኔ ሞርኬቲ ሜቶ ዎዴኔ ዋዬ ዎዴ ኔና ሾባና ማላ ታኒ ኦꬃና።
JER 15:12 ኣሲ ቢራታ፥ ፑዴሃ ባጋፌ ዪዳ ቢራታ ዎይኮ ጻርቂማላ ሜንꬃና ዳንዳይዜ?
JER 15:13 ኔ ዴሬ ኡባን ኦሴቲዳ ናጋራ ጊሻስ ኔ ኣቆታ ኡባ ዲኢዛይታስ ጮ ኣꬃ ኢማና።
JER 15:14 ታ ሃንቆይ ኢንቴ ቦላ ታማ ማላ ኤጻና፤ ሄሳ ጊሻስ ኔኒ ኔ ኤሮንታ ቢታን ኔ ሞርኬታስ ታኒ ኔና ኣይሌሳና» ጊዴስ።
JER 15:15 ኣቤት ጎዳዉ! ኔ ኤራሳ። ታና ቆፓ፤ ሞካካ ጼላ፤ ታና ዬዴꬂዛይታ ቦላ ሃሎ ኬሳ፤ ኔ ዳንዳያንቻ ጊዲዳ ጊሻስ ታና ꬋይሶፋ፤ ኔ ጋሶን ታና ጋኪዛ ካꬌዛ ኔ ቆፓ።
JER 15:16 ኣቤት ኡባፌ ዎልቃማ ጎዳዉ! ታኒ ኔ ሱንꬃን ጼይጌቲዳ ጊሻስ ኔ ቃላይ ታኮ ዪን ማዲስ፤ ሂስቲን ኔ ቃላይ ታስ ፓሽካኔ ዎዚና ኡፋይስ ኢሚዴስ።
JER 15:17 ጉፒዛይታራ ኡታቤኬ፤ ኢስታራካ ጉፓቤኬ። ኔኒ ኔ ኩሼ ታ ቦላ ዴንꬂዳ ጊሻሲኔ ኔ ሃንቆ ታ ቦላ ዬዲዳ ጊሻስ ታኒ ታርካ ኡታዲስ።
JER 15:18 ታ ቦላ ሃርጌይ ኣይስ ሚኒዴ? ታ ማዱንꬃይ ኣይስ ዳሪ ዳሪ ቢዴ? ኣይስ ፓጾንታ ኢጺዴ? ኔኒ ታስ ባሌꬂዛ ሻፋ ማላኔ ጪሚዛ ፑልቶ ማላ ኣይስ ጊዳዲ?
JER 15:19 ሄሳ ጊሻስ ጎዳይ፥ «ኔኒ ሲሚኮ ታ ኔና ዛራ ኤሳና፤ ኔካ ታስ ኦꬃና። ሃዳ ዮኦ ኣጋዳ ቦንቾ ቃላ ጻላ ሃሳይኮ ኔኒ ታ ዶና ጊዳና። ኢስቲ ኔኮ ሲማና ኣቲን ኔ ኢስታኮ ሲማካ።
JER 15:20 ታ ኔና ሃ ዴራስ ጊምቤ ኦꬃና፤ ጻርቂማላፔ ኦሴቲዳ ጊምቤ ማላ ሂስታና፤ ታኒ ኔና ኣሻናሲኔ ዎꬃ ኤካናስ ኔናራ ዲዛ ጊሻስ ኢስቲ ኔናራ ኦሌታና ሺን ኔና ጾኔቴና።
JER 15:21 ኢታታ ኩሼፔ ታኒ ኔና ዎዛና፤ ሜንጼ ኢታታ ቆሆፔካ ታ ኔና ኣሻና» ጌስ።
JER 16:1 ጎዳ ቃላይ ታኮ ዪዲ፥
JER 16:2 «ኔኒ ሃይሳን ማቾ ኤኮፋ፤ ኣቱማ ናካ፥ ማጫ ናካ ዬሎፓ» ጊዴስ።
JER 16:3 ሃ ቢታ ቦላ ዬሌቲዛ ኣቱማ ናይታኔ ማጫ ናይታ ጊሻስ፥ ኢስታ ዬሊዳ ኣዬታኔ ኣዋታ ጊሻስ ጎዳይ፥
JER 16:4 «ኢስቲ ኢታ ሃርጌን ሃይቃና፤ ኢስታስ ዬሆይ ዴና፤ ሞጎካ ሞጌቴቴና፤ ኢስታ ኣሃይ ቢታ ቦላን ቡራ ማላ ዬጌቲ ኣታና፤ ኢስቲ ማሻኒኔ ኮሻን ዉራና፤ ኢስታ ኣሃይ ሳሎ ካፎታሲኔ ዎራ ዶኣታስ ቁማ ጊዳና» ጊዴስ።
JER 16:5 ጎዳይ ታስ፥ «ታኒ ታ ኣንጆዛ፥ ታ ሲቆዛኔ ታ ማሮቴꬃ ሃ ዴራ ቦላፌ ዴንꬃዲስ፤ ሄሳ ጊሻስ ዬሆ ኬꬅ ጌሎፓ፤ ዬካናሲኔ ካዮታናስ ሄ ቦፓ።
JER 16:6 ዱሬቲኔ ማንቆቲ ሃ ቢታይ ቦላ ሃይቃና፤ ኢስቲ ሞጌቴቴና። ኢስታ ዬሆይካ ዬኬቴና፤ ኢስታስ ባ ቦላ ቃጫናይ ዴና፤ ባ ሁኤካ ቡጫናይ ዴና።
JER 16:7 ካዮቲዛይታ ሚንꬄꬃናስ ሾች ኤሃናይ ዴና፤ ቃሴካ ኣዋይ ሃይቂዳ ዎይኮ ኣያ ሃይቂዳ ኣስ ሚንꬄꬃናስ ሾቻ ኡሹ ኤሃናይ ዴና።
JER 16:8 «ጊቢራይ ዲዛ ኬꬂካ ጌሎፓ፤ ማናሲኔ ኡያናስ ኢስታራ ኢሲፌ ኡቶፋ።
JER 16:9 ታኒ ኢስራኤሌ ጾሳይ ኡባፌ ዎልቃማ ጎዳይ፥ ‹ሄኮ፥ ታኒ ኡፋይሲኔ ኢሊሊሳ ጬንጉርስ፥ ሚሺራዛ ጬንጉርሲኔ ሚሺራይ ጬንጉርሲ ሃይሳፌ ታ ዲጋና፤ ሄሳ ኢንቴ ዎዴን ኢንቴ ኢንቴ ኣይፌራ ቤኣና› ጌስ።
JER 16:10 «ኔኒ ሃ ቃላ ኡባ ሃ ኣሳስ ዮቲዛ ዎዴ ኢስቲ ኔና፥ ‹ጎዳይ ኣይስ ሃይሳ ማላ ጊታ ባሽ ኑ ቦላ ኣዋጂዴ? ኑኒ ኣይ ሞሪዶኒ? ጎዳ ኑ ጾሳስ ኣይ ናጋራ ኦꬂዶኒ?› ጊ ኦይቻና።
JER 16:11 ሄ ዎዴ ኔኒ ኢስታስ፥ ‹ካሴ ኢንቴ ኣዋቲ ታና ኣጊዳ ጊሻሳ፥ ኢስቲ ኤቃ ጾሳታ ካሊዲ ኢስታስ ኦꬂዳ ጊሻሲኔ ጎይኒዳ ጊሻሳ፤ ታና ኣጊ ባቃቲዲ ታ ዎጋ ናጎንታ ኢጺዳ ጊሻሳ፤
JER 16:12 ኢንቴ ካሴ ኢንቴ ኣዋታፔካ ኣꬊዳ ኢታ ኦꬂዳ ጊሻሳ፤ ቤኢቴ፤ ኢንቴ ኢሶይ ኢሶይ ኢንቴ ዎዚና ኢታቴꬃ ካሊዴታ፤ ታስካ ኣዛዜቶንታ ኢጺዴታ።
JER 16:13 ሄሳ ጊሻስ ታኒ ኢንቴና ሃ ቢታይፌ ዴንꬃዳ ኢንቴ ዎይኮ ኢንቴ ኣዋቲ ኤሮንታ ቢታ ኤፋ ኦላና፤ ሄን ኢንቴ ኤቃ ጾሳታስ ጋላሲኔ ኦማርስ ጎይናና። ታኒ ሙሌካ ኢንቴስ ቃꬌቲኬ› ጋና» ጊዴስ።
JER 16:14 ጎዳይ፥ «ሄሳ ጊሻስ ኣሳይ፥ ‹ኢስራኤሌ ኣሳ ጊብጼ ቢታፌ ኬሲዳ ጎዳይ ቤዪን› ጊዲ ጫቆንታ ዎዴይ ያና።
JER 16:15 ‹ጊዶ ኣቲን ኢስራኤሌ ኣሳ ፑዴሃ ባጋ ቢታፌኔ ኢስታ ኢዚ ላሊዳ ቢታታ ኡባፌ ዛሪዲ ኤሂዳ ጎዳይ ቤዪን› ጊዲ ጫቃና ዎዴይ ያና፤ ጋሶይካ ታኒ ካሴ ኢስታ ኣዋታስ ኢሚዳ ጺንጾ ቢታን ዛራዳ ኢስታ ኤሃና» ጌስ።
JER 16:16 ጎዳይ፥ «ሃኢ ጊዲኮ ታኒ ሞሌ ኦይኪዛ ዳሮ ኣሳታ ኪታና፤ ኢስቲካ ኦይካና። ሄሳፌ ጉዬ ታኒ ዳሮ ሻንካቲዛ ኣሳታ ዬዳና፤ ኢስቲካ ዙማቲ ዲዛሶፔ፥ ዙምቡላቲ ዲዛሶፔኔ፥ ዛላታ ጎንጎሎፔ ሻንካቲዲ ኦይካና።
JER 16:17 ታ ኣይፌይ ኢስታ ኦጌ ኡባ ቤኤስ፤ ኢስቲ ታፔ ጌሜቴና፤ ኢስታ ናጋራይካ ታ ኣይፌፔ ጌሚቤና።
JER 16:18 ኢስቲ ታ ቢታ ኣሃ ማላ ጊዲዳ ሃራሲዛ ኤቃ ጾሳታን ቱኒሲዳ ጊሻሲኔ ታ ጺንጾካ ዬላቺዛ ሚሻታን ኩንꬂዳ ጊሻስ ታኒ ኢስቲ ኦꬂዳ ቆሆዛ ጊሻሲኔ ናጋራ ጊሻስ ናምኡ ኩሼ ቃጻያና» ጌስ።
JER 16:19 ታስ ሚኖቴꬂኔ ሚጻ ጊዳዳ ሜቶ ጋላስ ታ ሺቃ ኣቲዛሶ ጊዲዳ ጎዳዉ! ካዎቴꬃቲ ሳኣ ጋጻፔ ኔኮ ዪዲ፥ «ካሴ ኑ ኣዋቲ ባና ኣይኮካ ማዶንታ ኤቃ ጾሳታስ ጎይኒዳ።
JER 16:20 ኣሲ ባስ ጾስ ሜꬋናስ ዳንዳይዜ? ኤ ዳንዳያናሺን ኢስቲ ሜꬊዛይቲ ቱሙ ጾስ ጊዴቴና!» ጋና።
JER 16:21 ጎዳይ፥ «ሄሳ ጊሻስ ሃኢ ታ ኢስታ ታ ዎልቃኔ ታ ጊታቴꬅ ታማርሳና፤ ኢስቲካ ታ ሱንꬃይ ጎዳ ጊዲዳይሳ ኤራና» ጌስ።
JER 17:1 ጎዳይ፥ «ዩሁዳ ናጋራይ ቢራታ ቢኢሬኒኔ ሆጼ ኣልማዜ ጼራን ጻፌቲዴስ፤ ኢስታ ዎዚና ቦላኔ ኢስቲ ያርሺዛሶን ዲዛ ካጬታ ቦላ ጻፌቲዴስ።
JER 17:2 ኢስታስ ናይቲካ ኣቶንታ ጪሊላ ሚꬃታ ጋርሳኒኔ ꬎቃ ዙምቡላታ ቦላ ዲዛ ያርሾሶታኔ ኣሼሮ ጌቴቲዛ ኤቃ ሚስሌዮ ቆፔቴስ።
JER 17:3 ኔ ቢታን ኦሴቲዳ ናጋራ ጋሶን ዙማታ ቦላኔ ዙምቡላታ ቦላ ዲዛ ኔ ኣቆታ፥ ኔ ዱሬቴꬂኔ ኔ ጎይኖሶታ ታኒ ዲኦስ ኣꬃ ኢማና።
JER 17:4 ኔ ሞሮ ጋሶን ታ ኔስ ኢሚዳ ጺንጾዛፔ ኔ ሜላ ኣታና፤ ኔና ታኒ ኔ ኤሮንታ ቢታን ኔ ሞርኬታስ ኣይሌሳና። ጋሶይካ ሜርናስ ታማ ማላ ኤጺዛ ታ ሃንቆዛ ኔ ዴንꬄꬃዳሳ» ጌስ።
JER 17:5 ጎዳይ፥ «ኣሳን ኣማኔቲዛይ፥ ኣሾ ማይኢዳ ኣሳን ጬቄቲዛይ፥ ባ ዎዚና ጎዳፔ ሃሲዛይ ቃንጌቲዳዴ።
JER 17:6 ኢዚ ባዞን ዲዛ ቄሪ ዎራ ማላ ጊዳና፤ ኢዚ ሎኦ ሚሽ ቤኤና፤ ኢዚ ኣሲ ባይንዳ ማጺኔ ቢታን ባዞን ሜላ ሶሆን ኡታና።
JER 17:7 ጊዶ ኣቲን ጎዳን ኣማኔቲዛ ኣሲ፥ ኢዚ ኣማኔቲዛይ ጎዳ ጊዲዳዴይ ኣንጄቲዳዴ።
JER 17:8 ኢዚ ሃꬃ ላንቄን ቶኬቲዲ፥ ባ ጻጶ ዱጌ ሃꬃን ዬዲዳ ሚꬃ ማላ። ኣዋ ሴላስካ ያዬና፤ ኢዛ ሃይꬃይ ጪሊሊዳ ማላ ዳና፤ ኣዋይ ዳሪዳ ላይꬂካ ባቤና፤ ኣይፌ ኢሞፔካ ፓጬና።
JER 17:9 ኣሳ ዎዚናይ ኡባ ሚሻፌካ ጌኔ፤ ኢዛስ ፓጻቴꬂካ ዴና፤ ኢዛ ኤራናስ ኦኒ ዳንዳያኔ?
JER 17:10 ታኒ ጎዳይ ኣስ ኡባስ ኢዛ ኦጌ ማላኔ ኢዛ ኦሶ ማላ ኢማናስ ኣሳ ዎዚና ፒልጋይሲኔ ኢዛ ካሃ ፓጫይስ» ጌስ።
JER 17:11 ቤሶንታ ኦጌራ ኣቆታ ዳጋሲዛ ኣሲ ባ ጱቂሶንታ ጪዬ ሃጵዛ ኩራቾ ማላ። ኢዛ ላይꬃይ ቡሮ ባጋቲሺን ኢዚ ኣቆታ ኣጊ ባና፤ ዉርሴꬃን ኢዛ ኤያቴꬂ ቆንጬ ኬዛና።
JER 17:12 ኑ ጾሳ ኬꬂ ዲዛሶይ ቤኒፔ ዶሚዲ ꬎቁ ጊዳ ቦንቾ ኣራታ።
JER 17:13 ኢስራኤሌስ ሂዶታ ጊዲዳ ጎዳዉ! ኔና ኣጊ ቢዳ ኡባይ ዬላታና፤ ኔና ዴኦ ሃꬃ ፑልቶ ጊዲዳ ጎዳ ኣጊዳ ጊሻስ ባ ኣይፌሶ ኔፔ ሃራሶ ዛሪዛይቲ ጉዱላ ቦላ ጻፌቲዳይሳ ማላ ጊዳና።
JER 17:14 ኣቤት ጎዳዉ! ታና ፓꬃ፤ ታኒካ ፓጻና፤ ታና ኣሻ፤ ታኒካ ኣታና፤ ጋሶይካ ታ ጋላታይ ኔና።
JER 17:15 ኣሳይ ታና ዛሪ ዛሪዲ፥ «ጎዳ ቃላይ ኣዋን ዲዜ? ኣኔ ሃኢ ፖሌቶ!» ጌቴስ።
JER 17:16 ሄንꬃንቻ ጊዳዳ ኔስ ኦꬃናፔ ጉዬ ጋቤኬ፤ ታ ኢስታስ ኢታ ጋላስ ኣሞቶንታይሳ ኔ ኤራሳ፤ ታ ዶናፔ ኬዚዛይሲ ኔ ሲንꬃን ቆንጬ።
JER 17:17 ታና ዳጋንꬂዛዴ ጊዶፓ፤ ኔኒ ታስ ሜቶ ጋላስ ታ ባቃታ ኣቲዛሶሆ።
JER 17:18 ታና ዬዴꬂዛይቲ ዬላቴቶ፤ ታና ዬላሶፓ፤ ኢስቲ ዳጋሜቶ፤ ጊዶ ኣቲን ታና ዳጋማፔ ቆታ፤ ኢስታ ቦላ ኢታ ጋላስ ኤሃ፤ ኢስታ ቦላ ዳኮ ባሽ ኤሃ።
JER 17:19 ጎዳይ ታና፥ «ዩሁዳ ካዎቲ ካታማ ጌሊዛሶኒኔ ኬዚዛሶ ዴራ ፔንጌኒኔ ሃራ ዬሩሳላሜ ፔንጌታ ኡባን ባዳ ኤቃ።
JER 17:20 ሂስታዳ ኢስታስ፥ ‹ሃ ፔንጌታራ ጌሊዛ ዩሁዳ ካዎቶ! ዩሁዳ ኣሳቶ! ዬሩሳላሜን ዲዛ ኣስ ኡባቶ ጎዳ ቃላ ሲዪቴ!› ጋ» ጌስ።
JER 17:21 ጎዳይ ታስ፥ «ሳምባታ ጋላስ ቶሆ ቶኪዲ ዬሩሳላሜ ፔንጌታራ ጌሎንታ ማላ ኢንቴስ ናጌቲቴ!
JER 17:22 ሳምባታ ጋላሳን ኢንቴ ኬꬃፌ ቶሆ ቶኪዲ ኬሶፍቴ፤ ዎይኮ ኣይኮ ኦሶኔ ኦꬆፍቴ። ካሴ ኢንቴ ኣዋታ ታኒ ኣዛዚዳ ማላ፥ ሳምባታ ጋላስ ዱማሲዲ ቦንቺቴ።
JER 17:23 ኢስቲ ጊዲኮ ሲዪቤቴና፤ ዎዚናንካ ዎꬂቤቴና፤ ኢስቲ ሲዮንታ ማላኔ ሲሞንታ ማላ ባ ዎዚና ሙሚሲዳ።
JER 17:24 ጊዶ ኣቲን ኢንቴ ታኒ ጎዳይ ዮቲዛይሳ ናጌቲ ኣዛዜቲኮ፥ ሳምባታ ጋላሳን ኣይ ሚሺካ ቶኪዲ ሃኖ ሃ ካታማይ ፔንጌታራ ጌሎንታ ኣጊኮ፥ ሳምባታ ጋላስ ዱማሲዲ ኢዛን ኣይ ኦሶኔ ኦꬆንታ ቦንቺኮ፥
JER 17:25 ዳዊቴ ካዎቴꬃ ኣራታን ኡቲዛ ካዎቲኔ ኢስታ ሹሜቲ ሃ ካታማይ ፔንጌራ ጌላና፤ ኢስቲ ባ ፓራታኒኔ ባ ፓራ-ጋሬታ ቦላ ኡቲዲ ዩሁዳ ኣሳይኔ ዬሩሳላሜ ኣሳይ ኣዣቢን ያና፤ ሃ ካታማያ ሜርናስ ኣሲ ዲዛ ካታማ ጊዳና።
JER 17:26 ኣሳይ ጹጌቲዛ ያርሾኔ ሃራ ያርሾ፥ ካꬃ ያርሾ፥ ኤጻኔኔ ጋላታ ያርሾ ኤኪዲ፥ ዩሁዳ ካታማታፔ፥ ዬሩሳላሜ ዩሾን ዲዛ ሞꬃታፔ፥ ቢኒያሜ ቢታፌ፥ ጋꬋፔኔ ጌዜፌ ቃሴካ ኔጌቤ ቢታፌ ጎዳ ኬꬅ ያና።
JER 17:27 ጊዶ ኣቲን ኢንቴ ሳምባታ ጋላሳታ ዱማሶንታ ኢጺዲ ሳምባታ ጋላስ ቶሆ ቶኪዲ ዬሩሳላሜ ፔንጌታራ ጌሊዲ ታ ኣዛዞ ሜንꬂኮ ታኒ ዬሩሳላሜ ፔንጌታ ቦላ ኢዚ ሚጻታ ሚዛ ቶኦንታ ታማ ታ ኤꬃና» ጊዴስ።
JER 18:1 ጎዳ ማታፔ ኤርማሳኮ፥
JER 18:2 «ዴንዳዳ ማናሶ ባ፤ ሄን ታ ኔስ ታ ኪታ ዮታና» ጊዛ ቃላይ ዪዴስ።
JER 18:3 ታኒካ ዱጌ ማናዛሶ ባዲስ፤ ኢዚ ባ ሜꬊዛ ኢርዞ ቦላ ኦቶ ሜꬊሺን ቤኣዲስ።
JER 18:4 ኢዚ ሜꬊሺን ኦቶዚ ኢዛ ኩሼን ሞሬቲዴስ፤ ሂስቲን ኢዚ ሄ ኡርቃ ዛሪዲ ባ ኮዪዳ ማላ ሜꬊዴስ።
JER 18:5 ሄ ዎዴ ጎዳ ቃላይ፥
JER 18:6 «ኢስራኤሌ ኣሳዉ! ማናዚ ኦꬂዛይሳꬆ ታ ኢንቴና ኦꬃናስ ዳንዳይኪና? ኢስራኤሌ ኣሳዉ! ኡርቃይ ማና ኩሼን ዲዛይሳꬆ ኢንቴካ ታ ኩሼን ዴታ።
JER 18:7 ታኒ ኢሲ ዴሬይ ዎይኮ ኢሲ ካዎቴꬂ ሾዴታና ማላ፥ ላሌታና ማላኔ ꬋያና ማላ ዮቲኮ፥
JER 18:8 ሄ ታኒ ዮቲዳ ካዎቴꬃይ ባ ኢታቴꬃፌ ኣጊዲ ሲሚኮ፥ ታኒ ኢስታ ቦላ ኤሃና ጊዳ ኢታ ሚሽ ኤሆንታ ኣጋጋና።
JER 18:9 ቃሴ ሃራ ዎዴካ ታኒ ኢሲ ዴሬ ዎይኮ ኢሲ ካዎቴꬅ ሚንꬃ ኤሳናስ ዮቲኮ፥
JER 18:10 ታ ሲንꬃን ኢታ ሚሽ ኦꬂኮኔ ታስ ኣዛዜቶንታ ኢጺኮ፥ ‹ታ ኢዛስ ኦꬃና› ጊዳ ሎኦ ሚሻ ኡባ ኦꬆንታ ኣጋጋና» ጌስ።
JER 18:11 ጎዳይ፥ «ሄሳ ጊሻስ፥ ኤርማሳ ሃኢ ዩሁዳ ኣሳታሲኔ ዬሩሳላሜን ዲዛይታስ ባዳ፥ ‹ሄኮ ታኒ ኢንቴ ቦላ ባሽ ጊጊሶ ቦላ ዳይስ፤ ኢንቴ ቦላ ኢታ ሚሽ ሜꬋሼ ዳይስ፤ ሄሳ ጊሻስ ኢንቴ ኡባይካ ኢንቴ ቢዛ ኢታ ኦጌፔ ሲሚቴ፤ ኢንቴ ኦጌኔ ኢንቴ ኦሶ ሱሪሲቴ› ጋ ዮታ።
JER 18:12 ጊዶ ኣቲን ኢስታስ፥ ‹ዳቡሮፓ፤ ኑ ሃልቺዳ ኦጌራ ባና፤ ኑኒ ኢሶይ ኢሶይ ኑ ኢታ ዎዚና ቆፋ ካላና› ጌቴስ» ጊዴስ።
JER 18:13 ሄሳ ጊሻስ ጎዳይ፥ «ኣኔ ካዎቴꬃታ፥ ‹ሃይሳ ማላ ሚሺ ኢንቴ ጊዶን ሴቴቲ ኤሪዜ?› ጊ ኦይቺቴ። ጌላኦያ ኢስራኤሌይ ሃራሲዛ ኢታ ሚሽ ኦꬃዱስ።
JER 18:14 ሹች ጻላ ጊዲዳ ሊባኖሴ ዙማታ ቦላፌ ሻቺ ꬋዪ ኤሪዜ? ላዴ ቦላፌ ዱጌ ጎጊዛ ኢርጻ ሃꬂ ጎጌꬅ ኣጊ ኤሪዜ?
JER 18:15 ታ ዴሬይ ጊዲኮ ታና ባሊዴስ፤ ኢስቲ ጎኦንታ ጾሳታስ ኤጻኔ ጩዋሴቴስ፤ ባንታ ኦጌራ ቢዲ ꬉጴቲዳ፤ ቤኒ ኦጌፔ ካሬ ኬዚዳ፤ ባሴቶንታ ዲዛ ኩንዱኩርጮ ኦጌራ ቢዳ።
JER 18:16 ኢስታ ቢታይ ቡላኔ ሜርናስ ካꬌቲዳዝ ጊዳና፤ ሄራ ኣꬊዛ ኡባይ ማላሌታና፤ ባ ሁኤካ ቂꬊሼ ቃꬃና።
JER 18:17 ኣርሼይ ሞኪዛ ባጋ ጫርኮ ማላ ታኒ ኢስታ ኢስታ ሞርኬታ ሲንꬃን ላላና። ኢስቲ ꬋይዛ ጋላስ ታ ኢስታስ ዞኮ ዛራና ኣቲን ታ ኣይፌሶ ቤሲኬ» ጌስ።
JER 18:18 ኢስቲካ፥ «ኣኔ ሃ ዪቴ፤ ኤርማሳ ቦላ ማቄቶስ፤ ዎጋይ ቄሴታ ኣቻን፥ ዞሬይ ኣꬎ ኤራንቻታ ኣቻን፥ ቃላይካ ናቤታ ኣቻን ꬋዬና፤ ኣኔ ሃ ዪቴ፤ ኑ ኢንጻርሳን ኢዛ ቶቾስ፤ ኢዚ ጊዛይሳካ ኡባ ሲዮኮ» ጊዳ።
JER 18:19 ኣቤት ጎዳዉ! ታ ጊዛዝ ሲያ፤ ታ ሞርኬቲ ታ ቦላ ሃሳይዛይሳ ኤዝጋ።
JER 18:20 ሎኦ ኦꬂዳዴስ ኢታ ዛሪዞ? ኢስቲ ጊዲኮ ታስ ኦላ ቦኪዳ፤ ኔ ሃንቆይ ኢስታፌ ሲማና ማላ ኔ ሲንꬃን ኤቃዳ ኢስታ ጊሻስ ታ ዮቲዳይሳ ቆፓ።
JER 18:21 ሄሳ ጊሻስ ኢስታ ናይታ ኮሻሲኔ ማሻስ ኣꬃ ኢማ፤ ኢስታ ማጫሳቲ ማይኔኔ ኣምኤታ ጊዴቶ፤ ኢስታ ኣቱማሳቲካ ፓራ ሃይቆን ዉሬቶ፤ ኢስታ ናቴꬃ ናይቲ ኦላሶን ማሻስ ጊዴቶ
JER 18:22 ኢስቲ ታና ኩንዲሳናስ ኦላ ቦኪዛ ጊሻሲኔ ታ ቶሆስካ ዎጺማዴ ዎꬂዳ ጊሻስ ኢስቲ ቆፖንታ ኔኒ ኢስታ ቦላ ቦንቂዛይታ ዬዲን ኢስታ ኬꬃን ዋሶይ ኬዞ።
JER 18:23 ጊዶ ኣቲን ኣቤት ጎዳዉ! ኢስቲ ታና ዎꬋናስ ማቄቲዳይሳ ኡባ ኔኒ ኤራሳ፤ ኔኒ ኢስታ ኢታቴꬃ ኣቶ ጎፓ፥ ዎይኮ ኢስታ ናጋራ ኔ ሲንꬃፌ ቁጮፋ፤ ኢስቲ ኔ ሲንꬃን ጾኔቲዲ ኩንዴቶ፤ ኔ ሃንቆ ጋላስ ኔ ኢስታ ማሮፓ።
JER 19:1 ጎዳይ ኤርማሳስ፥ «ባዳ ማናፔ ጎምቦ ሻማ፤ ሂስታዳ ኔናራ ዴሬ ጪማታፔኔ ቄሴታፔ ጉꬃታ ኤካዳ፥
JER 19:2 ኮንኣ ሜቆ ፔንጌ ኣቻራ ኣꬋዳ ሄኖሜ ና ሾባ ባ፤ ሄን ታኒ ኔስ ዮቲዛ ቃላ ኣዋጃ።
JER 19:3 ‹ኢንቴኖ ዩሁዳ ካዎቶ! ዬሩሳላሜን ዲዛ ዴሬዞ! ጎዳ ቃላ ሲዪቴ! ኡባፌ ዎልቃማ ጎዳ ኢስራኤሌ ጾሳይ፡ ሲያናስ ሃይꬃስ ኢቲዛ ሚሽ ሃ ቢታ ቦላ ታኒ ኤሃና።
JER 19:4 ጋሶይካ ኣሳይ ታና ኣጊዲ ሃይሳ ሃ ሶሆዛ ኤቃ ጎይኒዛሶሆ ኬሲዴስ፤ ኢስቲ ጊዲን ዎይኮ ካሴ ኢስታ ኣዋቲ፥ ዎይኮ ዩሁዳ ካዎቲ ኤሮንታ ኤቃ ጾሳታስ ያርሺዳ፤ ሃይሳ ሃ ሶሆዛን ጺሎ ሱꬅ ጉሲዳ።
JER 19:5 ቃሴ ታኒ ኢስታ ኣዛዞንታይሳ፥ ዎይኮ ኢስታስ ዮቶንታይሳ፥ ዎይኮ ታ ዎዚናን ቆፖንታይሳ ባንታ ኣቱማ ናይታ ባኣሌስ ታማን ጹጊ ያርሻናስ ጎይኒዛሶሆ ዙምቡላታ ኦꬂዳ።
JER 19:6 ሄሳ ጊሻስ ኣሳይ ሃ ሶሆዛ ሹካ ሾባ ጋናፔ ኣቲን ቶፌቴ ዎይኮ ሄኖሜ ና ሾባ ጊ ጼይጎንታ ዎዴይ ያና።
JER 19:7 « ‹ሃ ሶሆን ዩሁዳ ሃልቾኔ ዬሩሳላሜ ሃልቾ ታ ላላና፤ ኢስቲ ባንታ ሞርኬታ ማሻኒኔ ባንታና ዎꬋናስ ኮይዛይታ ኩሼን ሃይቃና ማላ ታኒ ኦꬃና፤ ኢስታ ኣሃ ሳሎ ካፎታሲኔ ዎራ ዶኣታስ ቁማ ሂስታ ኢማና።
JER 19:8 ታኒ ሃ ካታማዮ ሙሌራ ꬋይሳና፤ ሚቻስካ ኬሳና፤ ኢዚ ማታራ ኣꬊዛ ኣሳይ ኡባይ ሃኖ ፓላ! ጊ ቂꬊ ካኣና።
JER 19:9 ኢስቲ ባንታ ማጫ ናይታ ኣሾኔ ባንታ ኣቱማ ናይታ ኣሾ ማና ማላ ታኒ ኦꬃና፤ ኢስታ ዎꬋናስ ኮይዛ ኢስታ ሞርኬቲ ኢስታ ጊዶꬂን ኢስቲ ኡባይ ኢሶይ ኢሳ ኣሾ ማና› ጌስ።
JER 19:10 «ሄሳፌ ጉዬ ኔናራ ኢሲፌ ቢዳ ኣሳታ ሲንꬃን ሄ ጎምቦዛ ሜንꬃ።
JER 19:11 ሂስቲዲ ኢስታስ ኡባፌ ዎልቃማ ጎዳ ጾሳይ፥ ‹ማናዛ ጎምቦይ ሜቂዳይሳꬆኔ ሲሚ ኮሌታና ዳንዳዮንታይሳꬆ ታኒ ሃ ካዎቴꬃኔ ሃ ካታማ ሄሳꬆ ኦꬃና፤ ኣሳይ ኣሃ ሞጊዛሶይ ባይንዳ ጊሻስ ቶፌቴን ሞጋና።
JER 19:12 ታኒ ሃ ሶሆዛኒኔ ኢዛን ዲዛ ኣሳ ቦላ ሄሳꬆ ኦꬃና፤ ታኒ ሃ ካታማዮ ቶፌቴ ማላ ኦꬃና።
JER 19:13 ባንታ ኬꬃ ካራ ቦላ ሳሎ ሜꬌቴꬃታስ ኤጻኔ ጩዋሲዲኔ ኤቃ ጾሳታስ ኡሹ ሺሺዳይቲ ዬሩሳላሜ ኣሳ ኬꬃቲኔ ዩሁዳ ካዎታ ኬꬃቲ ቶፌቴ ማላ ቱናና› ጌስ።
JER 19:14 «ሄሳፌ ጉዬ ኤርማሲ ጎዳይ ቲንቢቴ ዮታናስ ኪቲዳ ቶፌቴፔ ሲሚ ዪዲ ጎዳ ኬꬃ ዱቡሻን ኤቂዲ፥
JER 19:15 ኡባፌ ዎልቃማ ጎዳ ኢስራኤሌ ጾሳይ፥ ‹ሲዪቴ! ኢስቲ ባንታ ዎዚና ሹቻሲዲ ታ ቃላ ሲዮንታ ኢጺዳ ጊሻስ ታኒ ሃ ካታማ ቦላኔ ኢዛ ማታን ዲዛ ሞꬃታ ኡባ ቦላ ኤሃና ጊዳ ኢታ ሚሽ ኡባ ኢስታ ቦላ ኤሃና ጋይስ› ጌስ» ጊዴስ።
JER 20:1 ሄ ዎዴ ጎዳ ኬꬃን ኢሜሬ ና ቄሴ ፓሽኩሬይ ኤርማሲ ቲንቢቴ ዮቲሺን ሲዪዲ፥
JER 20:2 ናቤ ኤርማሳ ሾጪዴስ፤ ጾሳ ኬꬃፌ ፑዴ ባጋራ ዲዛ ቢኒያሜ ጊምቤ ፔንጌ ቦላ ኣግሪሞቄን ቃቺዴስ።
JER 20:3 ዎንቴꬃ ጋላስ ፓሽኩሬይ ኤርማሳ ቃሾፔ ቢርሺን ኤርማሲ ኢዛስ፥ «ሃቺፌ ዶሚን ጎዳይ ኔ ሱንꬅ ማጎርሚሳቢቤ ጋና ኣቲን ፓሽኩሬ ጌና።
JER 20:4 ጋሶይካ ጎዳይ፥ ‹ታኒ ኔናኔ ኔ ላጌታ ኡባ ዳጋማስ ኣꬃ ኢማና፤ ኢስቲ ኔኒ ጼሊሺን ባንታ ሞርኬታ ማሻን ዉራና፤ ታኒ ዩሁዳ ኣሳ ኡባ ባቢሎኔ ካዎ ኩሼን ኣꬃ ኢማና፤ ኢዚ ኢስታ ዲኢዲ ባቢሎኔ ኤፋና፤ ሂስቲዲ ሄን ኢስታ ማሻን ሲፋና።
JER 20:5 ሃ ካታማይ ኣቆታ፥ ኢዛ ኦꬃ ዴሚዳ ኡባ፥ ዩሁዳ ካዎታ ኣቆታኔ ኢስታስ ዲዛ ኣልኦ ሚሽ ኡባ ታኒ ኢስታ ሞርኬታስ ኣꬃ ኢማና፤ ኢስቲካ ዲኢ ኤኪዲ ባቢሎኔ ኤፋና።
JER 20:6 ፓሽኩሬ! ኔኒኔ ኔ ሶሆን ዲዛ ኡባይካ ዲኤቲዲ ባቢሎኔ ባና። ኔኒኔ ኔ ኢስታስ ዎርዶ ቲንቢቴ ዮቲዳ ኔ ላጌቲ ኡባይ ሄን ሃይቃናኔ ሞጌታና› ጌስ» ጊዴስ።
JER 20:7 ኣቤት ጎዳዉ! ኔኒ ታና ጪማዳሳ፤ ታኒካ ጪሜታዲስ። ኔኒ ታፔ ኬሃ ሚናዳ ታና ጾናዳሳ። ጋላስ ኩሜꬅ ታኒ ኣሳስ ሚቻስ ኣታዲስ፤ ኡባይካ ታና ቂꬌስ።
JER 20:8 ታኒ ሃሳይዛ ዎዴ ኡባን ዋሳይስ፤ «ሺሮኔ ባሽ» ጋ ኣዋጃይስ፤ ሄሳ ጊሻስ ጎዳ ቃላይ ታስ ኩሜꬃ ጋላስ ታ ቦላ ጫሼኔ ቂꬌ ኤሂዴስ።
JER 20:9 ታኒ፥ «ሃይሳፌ ጉዬ ጎዳ ሱንꬃ ዴንꬂኬ፤ ኢዛ ሱንꬃንካ ሃሳይኬ» ጊኮ ኢዛ ቃላይ ታ ዎዚና ጊዶን ታማ ማላ፥ ታ ሜቄꬃ ጊዶንካ ሱርቁንቶ ማላ ጊዲዴስ፤ ሄሳ ጊሻስ ታ ካማ ኦይካናስ ጾኒዴስ፤ ሙሌራካ ኤቄታናዉ ዳንዳያቤኬ።
JER 20:10 «ኡባሶን ሺሮይ ዴስ፤ ሂሊቴ ኣኔ ኑኒካ ሂሎስ» ጊዲ ዳሮቲ ሳሱኬቲሺን ታ ሲያዲስ፤ ታ ኩንዴꬅ ናጌቲሼ ዲዛ ታ ላጌቲ ኡባይ፥ «ኦኔ ኤሪዛይ ባሌታና ዳንዳይዛኮ ሂስቲኮ ኑኒ ኢዛ ጾናናኮኔ ኑ ሃሎ ኬሳናኮ» ጌቴስ።
JER 20:11 ጊዶ ኣቲን ጎዳይ ያሺሲዛ ቶራ ቃራ ማላ ታናራ ዴስ፤ ሄሳ ጊሻስ ታና ዬዴꬂዛይቲ ꬉጴታና ኣቲን ታና ጾኔቴና፤ ኢስቲ ኢታ ካዉሽ ካዉያና ኣቲን ኢስታስ ጊጌና፤ ኢስታ ካዉሻቴꬃይ ሙሌካ ዶጌቴና።
JER 20:12 ኣቤት ኡባፌ ዎልቃማ ጎዳዉ! ጺሎዛ ፓጪዛይሶ! ዎዚናኔ ካሃ ፒልጋ ጼሊዛይሶ! ታኒ ታ ሞቶ ኔስ ኣꬃ ኢሚዳ ጊሻስ ኔኒ ኢስታ ቦላ ሃሎ ኬሲሺን ታ ኣይፌን ቤኣናስ ታና ጋꬃ።
JER 20:13 ጎዳስ ዬጺቴ! ኢዛስ ጋላታ ሺሺቴ፤ ኢዚ ሜቶታንቻታ ሼምፖ ኢታታ ኩሼፔ ኣሼስ።
JER 20:14 ታኒ ዬሌቲዳ ጋላሳያ ቃንጌቲዳሮ ጊዱ! ታ ኣዬያ ታና ዬሊዳ ጋላሳያ ኣንጄቱፉ!
JER 20:15 ታ ኣዋስ፥ «ኔስ ሚሺራቾ፤ ኔስ ኣቱማ ናይ ዬሌቲዴስ!» ጊ ዮቲዳይ ቃንጌቲዳዴ ጊዶ!
JER 20:16 ሄሳዴይ ጎዳይ ቃꬌታይ ባይንዳ ሺሬቺ ዬጊዳ ካታማታ ማላ ጊዶ፤ ማላዶ ዋሶ፥ ጋላሳ ሴታን ኦላ ሺሮ ሲዮ።
JER 20:17 ታ ኣያ ታስ ዱፎ ጊዳና ማላ፥ ኢዚ ኡሎይ ታስ ሜርና ዱሳሶ ጊዳና ማላ ታና ሄን ኣይስ ዎꬊቤኔ?
JER 20:18 ታኒ ሜቶኔ ጬጬ ቤኣናሲኔ ታ ዴኦ ላይꬃ ኡባ ካዉሻቴꬃን ዉርሳናስ ታ ኣዪ ኡሎፔ ኣይስ ኬዛዲና?
JER 21:1 ዩሁዳ ካዎ ሴዴቂያሲ ማልኪያ ና ፓሽኩሬኔ ማኢሳያ ና ቄሴ ሶፎናሳ ኤርማሳኮ ኪቲዳ ዎዴ ጎዳ ቃላይ ኤርማሳኮ ዪዴስ።
JER 21:2 ኪቴቲዳይቲካ፥ «ባቢሎኔ ካዎ ናቡካዳናጾሬይ ባ ኦላንቻታራ ሃ ካታማ ጊዶꬂዳ ጊሻስ ኣኔ ኑስ ጎዳ ኦይቻ። ጎዳይ ቤኒይሳ ማላ ማላሊሲዛ ኦሶ ኑ ጊሻስ ኦꬂዲ ኢዛ ጉዬ ዛራናኮ ኦኒ ኤሪዜ» ጊ ኦይቺዳ።
JER 21:3 ኤርማሲ ጊዲኮ ኢስታስ፥ «ቢዲ ሴዴቂያሳስ፥
JER 21:4 ‹ጎዳ ኢስራኤሌ ጾሳይ ኔና ጊምቤዛፔ ካሬ ባጋራ ዶዲ ኡቲዳ ባቢሎኔ ካዎኔ ኢዛ ኦላንቻታ ኦላናስ ኢንቴ ኩሼን ኢንቴ ኦይኪዳ ኦላ ሚሻ ታኒ ኢንቴ ቦላ ጉዬ ዛራና። ኢስታ ሃ ካታማዮ ዛራ ጌልꬃና።
JER 21:5 ታኒ ታ ሁኤራ ቂጻቴስ ዴንꬂዳ ኩሼኒኔ ሚኖ ቄሴን፥ ሃንቆኒኔ ባሻን፥ ጊታ ቦሻን ታ ኢንቴና ጫዳና።
JER 21:6 ታኒ ሃ ካታማይን ዲዛ ኣሳኔ ሜሃ ሾጫና፤ ኢስቲካ ኢታ ሃርጌን ዉራና።
JER 21:7 ሄሳፌ ጉዬ ዩሁዳ ካዎ ሴዴቂያሳኔ ኢዛ ሹሜታ፥ ኢታ ሃርጌፌ፥ ማሻፌኔ ኮሻፔ ኣቲዳ ዴራ ባቢሎኔ ካዎ ናቡካዳናጾሬሲኔ ኢስታ ዎꬋናስ ኮይዛ ሞርኬታስ ታኒ ጎዳይ ኣꬃ ኢማና። ኢዚ ኢስታ ቃራ ማሻን ዎꬋና፤ ኢስታ ማሬና፤ ኢስታስ ሚሼቴናኔ ቃꬌቴና› ጌስ» ጊቴ።
JER 21:8 ጎዳይ ኤርማሳ፥ «ጉጃዳካ ሃይሳ ዴራስ፥ ‹ጎዳይ ሄኮ ታኒ ኢንቴ ሲንꬃን ዴኦ ኦጌኔ ሃይቆ ኦጌ ዎꬃዲስ።
JER 21:9 ሃኖ ሃ ካታማይን ታኪዛ ኡባይ ማሻን፥ ኮሻኒኔ ኢታ ሃርጌን ሃይቃና፤ ጊዶ ኣቲን ካታማይፔ ኬዚ ቢዲ ካታማ ዶዲ ኦይኪዳ ባቢሎኔ ኣሳታስ ባ ኩሼ ኢሚዳ ኣሲ ባ ሼምፖ ኣሻናኔ ዴኦን ዳና።
JER 21:10 ታኒ ሃ ካታማስ ሎኦ ኦꬃናስ ጊዶንታ ኢታ ኦꬃናስ ቃቻዲስ፤ ኢዛ ባቢሎኔ ካዎስ ኣꬋ ኢሜታና፤ ኢዚካ ኢዞ ታማን ጹጋና› ጌስ።
JER 21:11 «ቃሴካ ዩሁዳ ካዎ ኬꬃ ኣሳስ፥ ‹ጎዳ ቃላ ሲዪቴ!
JER 21:12 ኢንቴኖ ዳዊቴ ሶ ኣሳዉ! ኢንቴ ኦꬂዳ ኢታ ኦሶ ጋሶን ኤጺን ኦኒካ ቶይሳና ዳንዳዮንታ ታማ ማላ ታ ሃንቆይ ኢንቴ ቦላ ኤጾንታ ማላ ዎንታን ዎንታን ሱሬ ፒርዲቴ፤ ቦንቄቲዳይታ ኡንኤꬂዛይታ ኩሼፔ ኣሺቴ› ጌስ ጋ።
JER 21:13 ‹ሃኔ ሾባፌ ፑዴ ባጋራ ሹቺ ዳሪ ዲዛሶን ዲዛ ዬሩሳላሜ! ታኒ ኔ ቦላ ዴንዳዲስ፤ ኑ ቦላ ኦኔ ዴንዳናይ? ኑ ኬꬅ ኦኔ ጻሊ ጌላናይ?› ጊዛሬ!
JER 21:14 ታኒ ኔና ኔ ኦሶ ማላ ቃጻያና፤ ታኒ ኔ ዎራን ታማ ዬዳና፤ ኢዛ ዩሾን ዲዛይሳካ ኡባ ጹጋና» ጌስ።
JER 22:1 ጎዳይ፥ «ዱጌ ዩሁዳ ካዎ ሶ ባዳ፥
JER 22:2 ‹ኔኖ ዳዊቴ ካዎቴꬃ ኣራታ ቦላ ኡቲዳ ዩሁዳ ካዎ! ኔኒኔ ኔ ሹሜቲ፥ ሃ ፔንጌታራ ጌሊዛ ኣስ ኡባይ ጎዳ ቃላ ሲዪቴ› ጋ» ጌስ።
JER 22:3 ጎዳይ፥ «ሱሬ ፒርዳኔ ጺሎ ኦꬂቴ፤ ቦንቄቲዳይታ ኡንኤꬂዛይታ ኩሼፔ ኣሺቴ፤ ቤቴታ፥ ዪኦታኔ ኣምኤታ ቆሆፒቴ፤ ሃ ሶሆንካ ጺሎ ሱꬅ ጉሶፍቴ።
JER 22:4 ሃይታ ኣዛዞታ ኢንቴ ሎኤꬂ ናጊኮ ዳዊቴ ካዎቴꬃ ኣራታ ቦላ ኡቲዛ ካዎቲ ባ ሹሜታራኔ ባ ዴሬ ኣሳራ ፓራ-ጋሬኔ ፓራ ቶጊዲ ሃይሳ ካዎቴꬃ ኬꬃ ፔንጌራ ጌላናኔ ኬዛና።
JER 22:5 ጊዶ ኣቲን ኢንቴ ታ ኣዛዞታ ናጎንታ ኢጺኮ፥ ‹ሃ ካዎቴꬃ ኬꬃይ ሙሌራ ꬋያና› ጋዳ ታኒ ታርካ ታናን ጫቃይስ» ጊዴስ።
JER 22:6 ጎዳይ ዩሁዳ ካዎ ኬꬃስ፥ «ኔኒ ታስ ጋላኣዴ ቢታኔ ሊባኖሴ ዙማ ጼራ ማላ ሎኢኮካ ታኒ ኔና ኣዳፌ ባዞኔ ኣሲ ኢዛን ባይንዳ ካታማ ኦꬃና።
JER 22:7 ታኒ ኔና ኦሊዛይታ ሁኤን ሁኤን ኦላ ሚሽ ኦይꬃዳ ኔ ቦላ ዬዳና፤ ኢስቲ ዚጋፔ ማሴቲዳ ቱቄታ ቃንጼሬꬂዲ ታማን ዬጋና።
JER 22:8 «ዱማ ዱማ ካዎቴꬃፌ ዪዳ ኣሳይ ሃ ካታማይራ ኣꬊ ቢሼ፥ ‹ጎዳይ ሃኖ ጊታ ካታማዮ ኣይስ ሃይሳꬆ ኦꬂዴ?› ጊዲ ባ ጋርሳን ሃሳዬታና።
JER 22:9 «ኢስቲ፥ ‹ጎዳ ባንታ ጾሳራ ጫቄቲዳ ጫቆ ኣጊዲ ኤቃ ጾሳታስ ጎይኒዳ ጊሻሲኔ ኢስታስ ኦꬂዳ ጊሻሳ› ጋና» ጌስ።
JER 22:10 ሃይቂዳ ካዎ ኢዮሲያሳስ ዬኮፍቴ ዎይኮ ካዮቶፍቴ፤ ሄሳ ኣጊዲ ዲኤቲ ቢዳ ሻሉሜስ ሚሼቲዲ ዬኪቴ። ጋሶይካ ኢዚ ሙሌካ ጉዬ ሲሜና፤ ባ ዬሌቲዳ ቢታ ናምኣንꬆ ቤኤና።
JER 22:11 ባ ኣዋ ሶሆን ዩሁዳን ካዎቲዲ ዲሼ ሃ ሶሆፔ ቢዳ ኢዮሲያሳ ና ሻሉሜ ጊሻስ ጎዳይ፥ «ኢዚ ሙሌካ ጉዬ ሲሜና።
JER 22:12 ኢዚ ዲኤቲ ቢዳ ቢታን ሄን ሃይቃና፤ ሲሚ ዪዲ ሃ ቢታዮ ቤኤና።
JER 22:13 «ባ ካዎቴꬃ ኬꬃ ጌኔን ኬጺዛይሳስ፥ ፒርዳ ጌላሲዲ ፖቄ ኬጺዛይሳስ፥ ኣስ ጮ ሜላ ኦሲሲዛይሳስ፥ ኢዛ ዎልቃ ዋጋ ጪጎንታዴስ፥
JER 22:14 ኢዚ፥ ‹ጊታ ፖቄኔ ኣሆ ካዎቴꬃ ኬꬅ ታስ ኬጻና› ጊዛዴስ ኣዬ ኣና! ኢዚ ባ ኬꬃስ ጊታ ማስኮቴታ ኬሴስ፤ ዚጋ ሚꬃን ኣሌቂሴስ፤ ዞኦ ቃላሜካ ቲዬስ።
JER 22:15 «ኔ ካዎቴꬃ ኬꬃ ዳሮ ዚጋ ሚꬃን ኬጺዳይሲ ኔስ ካዎቲዳ ሚሳቲዜ? ኔ ኣዋይ ሱሬ ፒርዳኔ ጺሎ ኦꬂዳ ጊሻስ ሚዛዚኔ ኡዪዛዚ ፓጪዴ? ኢዛስ ኡባ ሚሺካ ኢንጄቲዴስ።
JER 22:16 ኢዚ ማንቆታሲኔ ሜቶታንቻታስ ፒርዳ ጌላሲቤና፤ ሄሳ ጊሻስ ኡባ ሚሺካ ኢዛስ ኤኖ ጊዴስ፤ ታስ ኤሮ ጉሲ ሄሳ ጊዴኔ?
JER 22:17 ጊዶ ኣቲን ኔ ኣይፌይኔ ኔ ዎዚናይ ሼምፒዳይ ሃ ሄ ሾጬቾን ዴሚዛ ጎኣን፥ ጺሎታ ሱꬅ ጉሶን፥ ኣሳ ኡንኤꬆኒኔ ጌኔ ኦሶና» ጌስ።
JER 22:18 ሄሳ ጊሻስ ጎዳይ ዩሁዳ ካዎ ኢዮሲያሳ ና ኢዮኣቄሜ ጊሻስ፥ «ዎ ታ ኢሻዉ! ዋይ ዋይ ታ ሚቼ! ቃሴ፥ ‹ታ ጎዳዉ ዎ ዎ! ኔ ጊታቴꬃ ዎ ዎ!› ጊዲ ዚላሌቴና።
JER 22:19 ሃሬይ ሞጌቲዛ ማላ ኢዚ ሞጌታና፤ ኢዛ ኣሃይ ዬሩሳላሜ ፔንጌታፔ ጎሼቲዲ ካሬ ኦሌታና» ጌስ።
JER 22:20 ጎዳይ ዬሩሳላሜ፥ «ፑዴ ሊባኖሴ ባዳ ዋሳ፤ ኔ ቃላካ ባሳኔን ሲሳ፤ ኣባሪሜን ኤቃዳ ዋሳ፤ ጋሶይካ ኔስ ኦላ ላጌቲ ኡባይ ዉሪዳ።
JER 22:21 ኔኒ ሳሮ ዲሺን ታ ኔስ ሚንꬃ ዮታዲስ፤ ጊዶ ኣቲን ኔኒ፥ ‹ሲዪኬ› ጋዳሳ። ዬላጋቴꬃፌ ዶሚን ኔ ኦጌይ ሃይሳ፤ ኔኒ ታስ ኣዛዜቶንታ ኢጻዳሳ።
JER 22:22 ኔ ሄንꬃንቻታ ኡባ ጫርኮይ ኤፋና፤ ኔ ላጌቲ ኡባይ ዲኤቲ ባና፤ ኔ ኢታቴꬃ ኡባ ጋሶን ዬላታናኔ ካዉያና።
JER 22:23 ሃኔ ሊባኖሴን ዲዛሬ! ኔ ኬꬃ ዚጋ ሚꬃፌ ኬጺዳሬ! ሚጻይ ኦይኪዳ ማጫሳ ማላ ሜቶይ ኔ ቦላ ዪሺን ዋና ዋሳንዲ!» ጌስ።
JER 22:24 ጎዳይ፥ « ‹ታኒ ታ ዴኦን ጫቃይስ› ዩሁዳ ካዎ ኢዮኣቄሜ ና ኢኮኒያኔ ኔኒ ታስ ኡሻቻ ኩሼ ቃላባቴ ማታሜ ጊዲዳኮካ ታ ኔና ኬሳ ኦላና።
JER 22:25 ኔና ዎꬋናስ ኮይዛይታስ፥ ኔኒ ያዪዛ ባቢሎኔ ካዎ ናቡካዳናጾሬሲኔ ኢዛ ኦላንቻታስ ታኒ ኔና ኣꬃ ኢማና።
JER 22:26 ታኒ ኔናካ ኔና ዬሊዳ ኔ ኣዬዮካ ኢንቴ ዬሌቶንታ ኣላጋ ቢታን ኦላ ኣጋና፤ ኢንቴካ ሄን ሃይቃና።
JER 22:27 ኢንቴ ሲማናስ ላሞቲዛ ቢታዮ ሙሌካ ሲሜኬታ» ጌስ።
JER 22:28 ሃይሲ ኢኮኒያኔይ ካꬌቲዲ ሜቂዳ ኦቶ ማላ ኦኒካ ኮዮንታ ሚሼ? ኢዚኔ ኢዛ ናይቲ ኣይስ ካሬ ኦሌቲ ኣቲዶ? ኢስቲ ባ ኤሮንታ ኣላጋ ቢታን ኣይስ ዬጌቲ ኣቲዶ?
JER 22:29 ሃኔ ቢታዬ፥ ሃኔ ቢታዬ! ጎዳ ቃላ ሲያ!
JER 22:30 ጎዳይ፥ «ዩሁዳ ኣይሳናስ ኣሲ ባይንዳ ጊሻስ፥ ዳዊቴ ኣራታን ኡታና ኢሳዴይካ ኬኦንታ ጊሻስ፥ ኢሲ ፓጻ ኣሲ ኬዞንታ ጊሻስ ኢዛስ ዴኦ ላይꬃ ኡባን ኢንጄቶንታ ꬎንꬃ ኣስ ጊዲ ጻፍቴ» ጌስ።
JER 23:1 ጎዳይ፥ «ታ ሄንꬃሶሆን ዲዛ ታ ዶርሳታ ꬋይሲዛይታሲኔ ላሊዛ ሄንꬃንቻታስ ኣዬ ኣና!» ጌስ።
JER 23:2 ጎዳ ኢስራኤሌ ጾሳይ ባ ኣሳ ሄሚዛ ሄንꬃንቻታስ፥ «ኢንቴ ታ ዶርሳታ ላሊዲ ዎራ ዬዲዳ ጊሻሲኔ ኢንቴ ኢስታ ሎኤꬂ ጼሎንታ ኣጊዳ ጊሻስ ኢንቴ ኢታቴꬃስ ቤሲዛ ቂጻቴ ታ ኢማና።
JER 23:3 ሄሳፌ ጉዬ ታ ዉዴፔ ኣቲዳይታ ካሴ ታ ጎዳ ዬዲዳ ዴሬ ኡባፌ ታኒ ታርካ ሺሻዳ ካሴ ታ ሄሚዛሶሆ ዛራ ኤሃና፤ ኢስቲካ ሄሳን ዬሌቲዲ ጮራታና።
JER 23:4 ታኒ ሎኤꬂ ሄሚዛ ሄንꬃንቻታ ኢስታስ ዴንꬃና፤ ኢስቲ ናምኣንꬆ ባቤቴናኔ ዳጋሜቴና፤ ኢስታፌ ኢሳዴይካ ꬋዬና» ጌስ።
JER 23:5 ጎዳይ፥ «ታኒ ዳዊቴስ ጺሎ ዛሬ ዴንꬃና ዎዴይ ያና፤ ኢዚ ቱሙ ፒርዳኔ ጺሎቴꬅ ኦꬂዛዴ፥ ኣꬎ ኤራቴꬃን ሃሪዛ ካዎ ጊዳና።
JER 23:6 ኢዛ ካዎቴꬃ ላይꬃን ዩሁዳይ ኣታና፤ ኢስራኤሌይካ ሳሮን ዳና፤ ኢዛ ሱንꬂ፥ ‹ጎዳይ ኑስ ጺሎቴꬃ› ጌቴታና።
JER 23:7 ሄሳ ጊሻስ ኣሳይ ሃይሳፌ ጉዬ ኢዛ፥ ‹ኢስራኤሌ ኣሳ ጊብጼ ቢታፌ ኬሲዲ ኤሂዳ ጎዳይ ቤኢን› ጊ ጫቆንታ ዎዴይ ያና ጌስ ጎዳይ።
JER 23:8 ጊዶ ኣቲን፥ ‹ኢስራኤሌ ዛሬታ ፑዴሃ ባጋ ቢታፌኔ ኢዚ ኢስታ ላሊዳ ሃራ ዴሬታፔ ኬሲዳ ዴኦ ጎዳይ ቤኢን› ጊ ጫቃና ዎዴይ ያና፤ ሄሳፌ ጉዬ ኢስቲ ባንታ ዴሬን ዳና» ጌስ።
JER 23:9 ናቤታ ጊሻስ ታ ዎዚናይ ሜቂዴስ፤ ታ ሜቄꬃቲ ኡባይካ ኮኮሪዳ። ጎዳ ጋሶኒኔ ኢዛ ጌሻ ቃላ ጋሶን ዎይኔ ኡሹ ኡዪዲ ማꬆቲዛ ኣሳ ማላ ጊዳዲስ።
JER 23:10 ቢታያ ላይማን ጻላ ኩማዱስ፤ ቃንጌቲዳ ጊሻስ ዬካዉስ፤ ባዞን ዲዛ ሜሄ ሄንꬃሶሆቲ ሜሊዳ፤ ናቤቲካ ጌላ ኦጌ ካሊዳ፤ ባስ ኢሜቲዳ ማታ ዎጋይ ባይንዳ ጎኤቲዳ።
JER 23:11 ጎዳይ፥ «ናቤቲ፥ ቄሴቲ ጺሎቴꬃ ኦጌራ ቤቴና፤ ታ ኬꬃ ጋርሳንካ ኢስቲ ኦꬂዛ ኢታቴꬃ ታ ቤኣዲስ።
JER 23:12 ሄሳ ጊሻስ ኢስታ ኦጌይ ሃሊጻና፤ ኢስቲካ ꬉማን ኩንዳና፤ ኢስቲ ጋንዲጋርዲ ኩንዳና፤ ኢስቲ ቃጻዬቲዛ ዎዴ ታ ኢስታ ቦላ ፓላ ሚሽ ኤሃና።
JER 23:13 ታኒ ሳማሪያን ዲዛ ናቤታ ቦላ ኡፋይሶንታ ሚሽ ቤኣዲስ፤ ኢስቲ ባኣሌ ሱንꬃን ቲንቢቴ ዮቲዳ፤ ታ ዴራ ኢስራኤሌካ ባሌꬂዳ።
JER 23:14 ዬሩሳላሜን ዲዛ ናቤታ ቦላ ዴጺዛ ኢታ ሚሽ ቤኣዲስ፤ ኢስቲ ላይማቴቴስ፤ ዎርዶቴꬃን ዴኤቴስ፤ ኦኒካ ባ ኢታ ኦሶፔ ሲሞንታ ማላ ኢታታ ሚንꬄቴስ፤ ታ ማታን ኢስቲ ኡባይካ ሶዶሜ ማላ፥ ኢዚን ዲዛ ኣሳይካ ጋሞራ ማላ» ጌስ።
JER 23:15 ሄሳ ጊሻስ ኡባፌ ዎልቃማ ጎዳይ ሃይታ ናቤታ ጊሻስ፥ «ዬሩሳላሜን ዲዛ ናቤታፔ ቱና ሚሺ ኬዚዲ ቢታ ኡባን ላሌቲዳ ጊሻስ ታ ኢስታ ጫሞ ካꬅ ሚዛና፤ ቃሴ ማርዜቲዳ ሃꬅ ኡሻና» ጌስ።
JER 23:16 ኡባፌ ዎልቃማ ጎዳይ፥ «ሃይቲ ናቤቲ ቲንቢቴ ኢንቴስ ዮቲዛይሳ ሲዮፒቴ፤ ኢስቲ ኢንቴና ዎርዶ ሂዶታን ኩንꬄቴስ፤ ኢስቲ ጎዳፔ ጊዶንታ ባፔ ሜꬊ ኤኪ ዮቴቴስ።
JER 23:17 ታና ካꬊዛይታ ኢስታስ፥ ‹ጎዳይ ኢንቴስ ሳሮ ጊዳና ጊዴስ› ጌቴስ፤ ባንታ ዎዚና ሙሜቴꬃ ካሊዛይታ ኡባ ኢስታስ፥ ‹ኢታ ሚሺ ኢንቴና ጋኬና› ጌቴስ።
JER 23:18 ኢዛ ቃላ ሲያናሲኔ ኣዛዜታናስ ጎዳይ ዴኢዛ ሺቆን ኢስታፌ ኦኔ ኤቃናይ? ኢዛ ቃላ ኤዝጊ ሲዪዳይ ኦኔ?
JER 23:19 ጎዳ ሃንቆይ ጎቴ ጫርኮ ማላ ዴንዳና፤ ሚኖ ዳምባላይ ኢታ ኣሳታ ሁኤ ሾጫና።
JER 23:20 ኢዛ ዎዚና ቆፋ ሙሌራ ፖሎንታ ዲሼ ኢዛ ሃንቆይ ጮ ሃዳ ሲሜና፤ ጉዬፔ ዪዛ ላይꬃታን ሃይሳ ቆንጬን ኢንቴ ኤራና።
JER 23:21 ሃይታ ሃ ናቤታ ታ ኪታቤኬ፤ ጊዶ ኣቲን ኢስቲ ባንታ ኪታ ኤኪ ዎጼቴስ፤ ታ ኢስታስ ዮቶንታ ቲንቢቴ ዮቴቴስ።
JER 23:22 ኢስቲ ታ ዞሬን ኤቂዳኮ ታ ቃላ ታ ዴራ ሲሳና፤ ኢታ ኦጌፔኔ ኢታ ኦሶፔ ኢስታ ዛራና።
JER 23:23 ታኒ ማታስ ጻላ ጾሴ? ሃሆስካ ጾስ ጊዲኪና?
JER 23:24 ታኒ ቤኦንታ ማላ ጌማሶን ቆቴቲ ኣታና ኣሲ ዲዜ? ሳሎኔ ሳኣ ኩሚዳይ ታና ጊዲኪና!» ጌስ ጎዳይ።
JER 23:25 ጎዳይ፥ «ታኒ ኣጉሜታዲስ፤ ታኒ ኣጉሜታዲስ» ጊሼ ታ ሱንꬃን ዎርዶ ቲንቢቴ ሃሳይዛ ናቤታ ቃላ ሲያዲስ።
JER 23:26 ሃ ዮኦይ ባንታ ዎዚና ባሌꬆን ዎርዶ ቲንቢቴ ሃሳይዛ ናቤታ ዎዚናን ኣይዴ ጋካናስ ጋምኣኔ?
JER 23:27 ኢስታ ኣዋቲ ባኣሌ ጌቴቲዛ ኤቃዛ ጋሶን ታ ሱንꬃ ዶጊዳ ማላ፥ ኢስቲ ኢሶይ ኢሳስ ዮቲዛ ኣጉሞን ታ ኣሳይ ታ ሱንꬃ ዶጋና ማላ ኦꬂዳ ኢስታስ ሚሳቴስ።
JER 23:28 ኣጉሜቲዛ ናቤይ ባ ኣጉማ ዮቶ፤ ታ ቃላይ ኢዛን ዲዛዴይ ጊዲኮ ሄ ቃላ ኣማኔቴꬃን ዮቶ፤ ሃፓሲኔ ካꬃ ኣይፌስ ኣይ ጋይቶቴꬂ ዲዜ?
JER 23:29 «ታ ቃላይ ታማ ማላኔ ሹች ቄሪዛ ናሪቃ ማላ ጊዴኔ?» ጌስ።
JER 23:30 ጎዳይ፥ «ሄሳ ጊሻስ ቃላ ኢሶይ ኢሳፌ ካይሲ ካይሲ ኤኪዲ ታፔ ኤኪዳ ማላ ዮቲዛ ናቤታራ ታ ኤቄታይስ።
JER 23:31 ባንታ ዶና ጪንጫቴꬃን፥ ‹ጎዳይ ሂዝጌስ› ጊዛ ናቤታራ ታ ኤቄታይስ» ጌስ።
JER 23:32 ጎዳይ፥ «ታኒ ዎርዶ ኣጉሞ ካሊዲ ቲንቢቴ ዮቲዛ ናቤታራ ኤቄታይስ፤ ታ ኪቶንታ ዲሺን ዎይኮ ታ ሹሞንታ ዲሺን ጻላቴꬃን ዎርዶ ዮኦ ዮቴቴስ፤ ታ ዴሬዛካ ባሌꬄቴስ፤ ሃይሳ ሃ ዴሬዛ ኣይኮካ ጎኤቴና» ጌስ።
JER 23:33 ጎዳይ ታስ፥ «ሃ ዴሬይ፥ ዎይኮ ናቤይ፥ ዎይኮ ቄሴይ፥ ‹ጎዳስ ቶሆ ጊዲዳይ ኣዜ?› ጊዲ ኦይቺኮ፥ ‹ጎዳስ ቶሆይ ኢንቴና፤ ሄሳ ጊሻስ ታኒ ኢንቴና ዎራ ኦላና› ጌስ ጋ ዮታ።
JER 23:34 ናቤይ፥ ዎይኮ ቄሴይ፥ ዎይኮ ኣይ ኣሲካ፥ ‹ሃይሲ ጎዳ ቶሆ› ጊዲ ሃሳይኮ ታኒ ሄሳዴኔ ኢዛ ሶሆ ኣሳ ቃጻያና።
JER 23:35 ኢሶይ ኢሶይ ባ ላጌ ዎይኮ ባ ዳቦ፥ ‹ጎዳይ ኣይ ዛሮ ኢሚዴ?› ዎይኮ፥ ‹ጎዳይ ዮቲዳይ ኣዜ?› ጊዲ ኦይቻናስ ቤሴስ።
JER 23:36 ሃይሳፌ ጉዬን ጊዲኮ፥ ‹ጎዳ ቶሆ› ጊዲ ኢንቴ ሃሳያናስ ቤሴና። ጋሶይካ ኣስ ኡባስ ኢዚ ሃሳይዳ ቃላይ ኢዛስ ቶሆ ጊዲዛ ጊሻስ ዴኦ ጾሳ፥ ኡባፌ ዎልቃማ ጎዳ ኑ ጾሳ ቃላ ኢንቴ ቦኪሴታ።
JER 23:37 ሄሳ ጊሻስ ናቤዛስ፥ ‹ጎዳይ ኢንቴስ ኣይ ዛሮ ኢሚዴ?› ዎይኮ፥ ‹ጎዳይ ዮቲዳይ ኣዜ?› ጋዳ ኦይቻናስ ቤሴስ።
JER 23:38 ጊዶ ኣቲን ኢንቴ፥ ‹ሃይሲ ጎዳ ቶሆ› ጊኮ፥ ጎዳይ ታኒ ኢንቴና፥ ‹ሃይሲ ጎዳ ቶሆ› ጎፒቴ ጊንካ ኢንቴ፥ ‹ሃይሲ ጎዳ ቶሆ› ጊዴታ።
JER 23:39 ሄሳ ጊሻስ ኢንቴና፥ ቃሴካ ኢንቴሲኔ ኢንቴ ኣዋታስ ታ ኢሚዳ ካታማይራ ጋꬃዳ ዬጋ ኣጋና፤ ታ ሲንꬃፌካ ዎራ ኦላና።
JER 23:40 ሜርናስ ዶጌቶንታ ሜርና ዬላቴꬂኔ ካዉሻቴꬅ ታ ኢንቴ ቦላ ኤሃና» ጊዴስ።
JER 24:1 ባቢሎኔ ካዎ ናቡካዳናጾሬይ ኢዮኣቄሜ ና፥ ዩሁዳ ካዎ ኢኮኒያኔኔ ኢዛ ሹሜታ፥ ኣናጼታኔ ዎጋጬታ ዬሩሳላሜፔ ዲኢዲ ባቢሎኔ ኤፊዳፔ ጉዬ ጾሳ ኬꬃፌ ሲንꬃ ባጋራ ባላሴ ቴራይ ኢዛን ኩሚ ኡቲዳ ናምኡ ኬሼታ ጎዳይ ኣጁታን ታና ቤሲዴስ።
JER 24:2 ኢሲ ኬሼዛን ሻቼ ጋኪዳ ኬሂ ሎኢዛ ባላሴ ቴራ ሚሳቲዛይ ዴስ። ናምኣንꬆ ኬሼዛን ሜቴቶንታ ማላ ሞሬቲዳ ኬሂ ኢታ ባላሴ ቴራይ ዴስ።
JER 24:3 ጎዳይ ታና፥ «ኤርማሳ፥ ሄሲ ኔኒ ቤኢዛይ ኣዜ?» ጊዲ ኦይቺዴስ። ታኒካ፥ «ባላሴ ቴራ ቤኣይስ፤ ሎኦ ቴራይ ኬሂፔ ሎኦ፤ ጊዶ ኣቲን ኢታ ቴራይ ሜቴቶንታ ማላ ሞሬቲዳ ኬሂ ኢታ» ጋዲስ።
JER 24:4 ቃሴካ ጎዳ ቃላይ ታኮ ዪዲ፥
JER 24:5 «ጎዳ ኢስራኤሌ ጾሳይ፥ ‹ሃይሳ ሎኦ ባላሴዛ ማላ ታኒ ሃይሳፌ ባቢሎኔ ቢታ ዬዲዳ ዩሁዳፔ ዲኤቲዳይሳ ሎኦን ቆፓና።
JER 24:6 ታኒ ሎኦ ኣይፌን ኢስታ ጼላና፤ ቃሴ ታኒ ኢስታ ዛራዳ ሃ ቢታ ኤሃና። ታ ኢስታ ጊጊሳና ኣቲን ላሊኬ፤ ታ ኢስታ ቶካና ኣቲን ሾዲኬ።
JER 24:7 ታኒ ጎዳ ጊዲዳይሳ ኤሪዛ ዎዚና ኢስታስ ኢማና፤ ኢስቲ ባንታ ኩሜꬃ ዎዚናፔ ታኮ ሲማና ጊሻስ ኢስቲ ታ ዴሬ ጊዳና፤ ታኒካ ኢስታ ጾስ ጊዳና።
JER 24:8 « ‹ጊዶ ኣቲን ጎዳይ፥ ሜቴቶንታ ኬሂ ኢታ ባላሴዛ ማላ ዩሁዳ ካዎ ሴዴቂያሳኔ ኢዛ ሹሜታ፥ ቃሴካ ዬሩሳላሜን ጫሻ ኣቲዳይታኔ ጊብጼን ዲዛይታ ታ ሄሳꬆ ኦꬃና።
JER 24:9 ቢታ ቦላ ካዎቴꬃታ ኡባ ሲንꬃን ሃራሴቲዛይታኔ ጫዬቲዳይታ ጊዳና፤ ኢስታ ላላ ዬዲዛሶ ኡባን ኢስቲ ቂꬌስ፥ ሌሚሶስ፥ ካꬌሲኔ ቃንጌꬃስ ታ ኢስታ ኦꬃና።
JER 24:10 ታኒ ኢስታሲኔ ኢስታ ኣዋታስ ኢሚዳ ቢታፌ ኢስቲ ሙሌራ ꬋያና ጋካናስ፥ ማሻ፥ ኮሻኔ ኢታ ሃርጌ ኢስታ ቦላ ዬዳና› ጌስ» ጊዴስ።
JER 25:1 ዩሁዳ ካዎ ኢዮሲያሳ ና ኢዮኣቄሜይ ካዎቲዳ ኦይዳንꬆ ላይꬃን፥ ባቢሎኔ ካዎ ናቡካዳናጾሬይ ካዎቲዳ ኮይሮ ላይꬃን ዩሁዳ ኣሳ ኡባ ጊሻስ ኤርማሳኮ ዪዳ ቃላይ ሃይሳ።
JER 25:2 ናቤ ኤርማሲ ዩሁዳ ኣሳ ኡባሲኔ ዬሩሳላሜን ዲዛ ኡባታስ፥
JER 25:3 «ዩሁዳ ካዎ ኣሞኔ ና ኢዮሲያሲ ካዎቲዳ ታማኔ ሄꬓንꬆ ላይꬃፌ ዶሚዲ ሃች ጋካናስ ናምኡ ታማኔ ሄꬑ ላይꬅ ኩሜꬅ ጎዳ ቃላይ ታኮ ዪዴስ። ሂስቲን ታኒካ ዛራ ዛራዳ ኢንቴስ ዮታዲስ፤ ጊዶ ኣቲን ኢንቴ ሲዮንታ ኢጺዴታ።
JER 25:4 «ጎዳይ ባ ኣይሌ ጊዲዳ ናቤታ ኡባ ዛሪ ዛሪዲካ ኢንቴኮ ኪቲዴስ፤ ጊዶ ኣቲን ኢንቴ ኢስታ ሲዮንታ ኢጺዴታ፤ ኢስታስካ ዉዱ ጎንታ ኢጺዴታ» ጊዴስ።
JER 25:5 ኢስቲ፥ «ኢንቴ ኡባይካ ኢንቴ ኢታ ኦጌፔኔ ኢንቴ ኢታ ኦሶፔ ሃኢ ሲሚቴ። ሂስቲኮ ጎዳይ ኢንቴሲኔ ኢንቴ ኣዋታስ ሜሪ ሜርናስ ኢሚዳ ቢታን ኢንቴ ዳና።
JER 25:6 ኤቃ ጾሳታስ ኦꬃናሲኔ ጎይናናስ ካሎፍቴ፤ ቃሴ ኢንቴ ኩሼይ ኦꬂዳ ሚሻን ታና ዪሎሶፒቴ። ሂስቲኮ ታ ኢንቴ ቦላ ኢታ ኦꬂኬ» ጊዳ።
JER 25:7 ጎዳይ፥ «ኢንቴ ታና ሲዮንታ ኣጊዳ ጊሻስ ኢንቴ ኩሼይ ኦꬂዳ ሚሽ ኡባን ታና ሃንቄꬂዴታ፤ ሂስቲዲ ኢንቴ ቦላ ኢታ ሚሽ ኤሂዴታ» ጌስ።
JER 25:8 ሄሳ ጊሻስ ኡባፌ ዎልቃማ ጎዳይ፥ «ኢንቴ ታ ቃላስ ኣዛዜቶንታ ኢጺዳ ጊሻስ፥
JER 25:9 ታኒ ፑዴሃ ባጋ ዴራ ኡባኔ ታ ኣይሌ ጊዲዳ ባቢሎኔ ካዎ ናቡካዳናጾሬ ጼይጋና። ሂስታዳ ኢስታ ሃ ቢታ ቦላ፥ ሃ ቢታን ዲዛ ኣሳ ቦላኔ ሄራን ዲዛ ካዎቴꬃታ ኡባ ቦላ ኤሃና፤ ታኒ ኢንቴና ሙሌራ ꬋይሳና፤ ቃሴ ሜርናስ ኣሲ ካꬊዛኔ ቂꬊዛ ቡላ ኬሳና።
JER 25:10 ታኒ ኢስታፌ ኡፋይሲኔ ኢሊሊሳ ጬንጉርሳ፥ ሚሺራዛኔ ሚሺራይ ጬንጉርሳ፥ ዎጻ ጊሪሲኔ ጾምፔ ፖኦ ꬋይሳና።
JER 25:11 ሃ ቢታይ ሙሌራ ቡላኔ ካይስ ጊዳና፤ ሃ ካዎቴꬃቲካ ባቢሎኔ ካዎስ ላፑን ታሙ ላይꬅ ሃሬታና።
JER 25:12 «ላፑን ታሙ ላይꬃይ ፖሌቲዳፔ ጉዬ ባቢሎኔ ካዎ፥ ኢዛ ዴራኔ ኢዛ ቢታ ሞሮ ጊሻስ ታኒ ቃጻያና፤ ኢስታ ቢታካ ሜርናስ ቡላ ኦꬃና።
JER 25:13 ታኒ ሄ ቢታ ቦላ ሃሳይዳይሳ ኡባ፥ ሃ ማጻፋዛን ጻፌቲዳይሳ፥ ኤርማሲ ካዎቴꬃታ ኡባ ቦላ ዮቲዳ ቲንቢቴታ ኤሃና።
JER 25:14 ባቢሎኔ ዴሬይ ዳሮ ካዎቴꬃታሲኔ ጊታ ካዎታስ ኣይሌ ጊዳና፤ ኢስታ ኩሼ ኦሶ ማላ ታ ኢስታስ ቃንጻና» ጌስ።
JER 25:15 ጎዳ ኢስራኤሌ ጾሳይ ታስ፥ «ሃይሳ ታ ሃንቆ ዎይኔ ኡሻዚ ኩሚዳ ዋንጫ ሄይ፤ ኤፋዳ ታኒ ኔና ኪቲዛ ካዎቴꬃታ ኡባ ኡሻ።
JER 25:16 ኢስቲ ኡዪዳ ዎዴ ጋንዲጋራና፤ ኢስታ ቦላ ታ ዬዲዳ ኦላ ጋሶን ኢስቲ ጎያና» ጊዴስ።
JER 25:17 ሂስቲን ታኒ ጎዳ ኩሼፔ ዋንጫ ኤካዳ ኢዚ ታና ኪቲዳ ካዎቴꬃታኮ ባዳ ኢስታ ኡሻዲስ።
JER 25:18 ሃች ሃኒዳይሳ ማላ ኢስቲ ቡላ፥ ኣሲ ሃራሴቲዛይታ፥ ካꬊዛይታኔ ቃንጌቲዳይታ ጊዳና ማላ ዬሩሳላሜኔ ዩሁዳ ካታማ ኣሳታ፥ ኢስታ ካዎታኔ ኢስታ ሹሜታ ኡባ፥
JER 25:19 ጊብጼ ቢታ ካዎ፥ ኢዛ ኣይሌታ፥ ኢዛ ሹሜታ፥ ኢዛ ዴራ ኡባ፥
JER 25:20 ሄን ዲዛ ዋላካ ዴራ ኡባ፥ ኡጼ ቢታ ካዎታ ኡባ፥ ፊሊስጼሜ ካዎታ፥ ኣስቄሎናን፥ ጋዛን፥ ኣቃሮኔኒኔ ኣዛጾኔን ኣቲ ዲዛ ዴራ ኡባ፥
JER 25:21 ኤዶሜ፥ ሞኣቤኔ ኣሞኔ፥
JER 25:22 ጺሮሴኔ ሲዶና ኣባፌ ሄ ፒንꬃ ጋጻን ዲዛ ካዎታ፥
JER 25:23 ዳዳኔ፥ ቴማ፥ ቡዜኔ ባንታ ሁኤ ጋሜ ሜዲዛ ኣሳ ኡባታ፥
JER 25:24 ኣራቢያ ቢታ ካዎታ ኡባኔ ባዞ ቢታን ዲዛ ዋላካ ዴሬ ካዎታ ኡባ፥
JER 25:25 ዚሚሬ፥ ኤላሜኔ ሜዶኔ ካዎታ ኡባ ኡሻዲስ።
JER 25:26 ሃሆኒኔ ማታን ዲዛ ፑዴሃ ባጋ ካዎታ ኡባ፥ ታራን ታራን ቢታ ቦላ ዲዛ ካዎቴꬃታ ኡባ ኡሻዲስ። ኢስታ ኡባፌ ጉዬ ባቢሎኔ ካዎይካ ኡያና።
JER 25:27 ሄሳ ጊሻስ ጎዳይ ታና፥ «ኡባፌ ዎልቃማ ጎዳ ኢስራኤሌ ጾሳይ ኢንቴና፥ ‹ኡዪቴ፤ ማꬆቲቴ፤ ጮዪቴ ናምኣንꬆ ኢንቴ ዴንዶንታ ማላ ታ ኢንቴ ጊዶ ዬዲዛ ኦላ ሲንꬃን ኩንዲቴ› ጌስ።
JER 25:28 ጊዶ ኣቲን ኢስቲ ኔ ኩሼፔ ዋንጫ ኤኮንታኔ ኡዮንታ ኢጺኮ ኢስታስ፥ ‹ኡባፌ ዎልቃማ ጎዳይ ኢንቴ ዶሶንታ ኡያና።
JER 25:29 ቤኢቴ፤ ታ ሱንꬃይ ጼይጌቲዳ ካታማዮ ታ ꬋይሶ ዶማና፤ ሂስቲን ኢንቴ ቃጻዬቶንታ ኣቲ ባኔ? ታኒ ሳኣን ዲዛ ኡባ ቦላ ኦላ ጼይጊዳ ጊሻስ ኢንቴ ቃጻዬቶንታ ኣቴኬታ› ጌስ» ጊዴስ።
JER 25:30 ሄሳ ጊሻስ ጎዳይ ኤርማሳስ፥ «ሃ ቃላ ኡባ ኢስታ ቦላ ቲንቢቴ ዮታ፤ ‹ጎዳይ ቦላፌ ዋሳና፤ ባ ዲዛ ጌሻ ሶሆፔ ዳዳቲዛ ባ ጉንꬃ ሲሳና፤ ኢዚ ባ ቢታ ቦላ ኬሂ ዋሳና፤ ዎይኔ ማጺሼ ዬጺዛ ማላ ሳኣን ዲዛ ኡባ ቦላ ኢዚ ጉማና።
JER 25:31 ጎዳይ ካዎቴꬃታ ቦላ ፒርዲዛ ዎዴ ኢዛ ጬንጉርሳይ ቢታ ጋጻ ጋካናስ ሲዬታና፤ ኢዚ ኣስ ኡባ ቦላ ፒርዳና፤ ኢታታካ ማሻስ ኣꬂ ኢማና› » ጊዴስ።
JER 25:32 ጎዳይ ኡባፌ ዎልቃማ ጾሳይ፥ «ቤኣ፥ ኢታ ሚሺ ካዎቴꬃፌ ካዎቴꬅ ኣኪ ኣኪ ቢዴስ፤ ሳኣ ጋጻፔ ዎልቃማ ጎቴ ጫርኮይ ዴንዲዴስ» ጌስ።
JER 25:33 ሄ ዎዴን ጎዳይ ዎꬊዳይታ ኣሃይ ቢታ ጋጻፔ ቢታ ጋጻ ጋካናስ ፖርጩ ጊ ኩንዳና፤ ኢስታስ ዬኬቴና፤ ኢስታ ኣሃይ ሺቄናኔ ሞጌቴና፤ ቢታ ቦላ ቡራ ማላ ኦሌታና።
JER 25:34 ኢንቴኖ ሄንꬃንቻቶ! ዬኪቴኔ ዋሲቴ። ኢንቴኖ ዉዳ ሄሚዛይቶ! ቢዲንꬃን ጌንዴሬቲቴ። ኢንቴ ሹኬታና ዎዴይ ጋኪዳ ጊሻስ ሎኢ ሜꬌቲዳ ማና ሚሺ ቲንቼቲዛ ማላ ኢንቴ ኩንዲ ቲንቼታና።
JER 25:35 ሄንꬃንቻቲ ባቃቲዛሶይ ዴና፤ ዉዴ ሄሚዛይቲ ኬሲ ኤኪ ኣቲዛሶይ ባ።
JER 25:36 ጎዳይ ኢስቲ ሄሚዛሶሆ ꬋይሲዳ ጊሻስ ሄንꬃንቻታ ዋሶኔ ዉዴ ሄሚዛይታ ዬሆ ሲዪቴ።
JER 25:37 ጎዳ ሃንቆ ሴላ ጋሶን ሳሮ ቢታይ ቡላ ጊዳና።
JER 25:38 ጋሞይ ባ ኣቂዛሶፔ ዬጊ ቢዛ ማላ ኡንኤꬂዛይሳ ማሻፌኔ ጎዳ ሃንቆፌ ዴንዲዳይሳን ኢስታ ቢታያ ቡላ ጊዳና።
JER 26:1 ዩሁዳ ካዎ ኢዮሲያሳ ና ኢዮኣቄሜይ ካዎቲዳ ኮይሮ ላይꬃን ሃይሳፌ ካሊ ዲዛ ቃላይ ጎዳ ኣቻፌ ዪዴስ።
JER 26:2 ጎዳይ ታና፥ «ጎዳ ኬꬃ ዛጎን ኤቃዳ ጎዳ ኬꬃን ጎይናናስ ዩሁዳ ካታማታፔ ዪዛ ዴሬ ኡባስ ዮታ፤ ታኒ ኔና፥ ‹ዮታ› ጋዳ ኣዛዚዳ ቃላ ኡባፌ ኢሲኖካ ኣሾንታ ዉርሳ ዮታ።
JER 26:3 ኢስቲ ሲዪዲ ባ ቢዛ ኢታ ኦጌፔ ሲማናኮ ኦኔ ኤሪዛይ? ታኒካ ኢስቲ ኦꬂዳ ኢታቴꬃ ጊሻስ ኢስታ ቦላ ኤሃና ጊዳ ቂጻቴዛ ኣጋና።
JER 26:4 ኔ ኢስታስ፥ ‹ጎዳይ ኢንቴና ኢንቴ ታ ጊዛዝ ሲዮንታ ኢጺኮ፥ ታ ኢንቴስ ኢሚዳ ታ ዎጋ ናጎንታ ኢጺኮ፥
JER 26:5 ኢንቴ ሲያና ማላ ታ ኦሳንቻታ ዛራ ዛራ ታ ኢንቴኮ ዬዲዳ ናቤታ ቃላ ኢንቴ ሲዮንታ ኢጺኮ፥
JER 26:6 ታኒ ሃ ኬꬃ ሴሎ ማላ ኦꬃና፤ ሃ ካታማዮካ ሳኣ ቦላ ዲዛ ካዎቴꬃ ኡባ ሲንꬃን ቃንጌቲዳሮ ሂስታና› ጌስ ጋ» ጊዴስ።
JER 26:7 ኤርማሲ ጎዳ ኬꬃን ሃ ቃላ ዮቲሺን ቄሴቲ፥ ናቤቲኔ ዴሬይ ዉሪ ሲዪዳ።
JER 26:8 ጊዶ ኣቲን ኤርማሲ ዴሬዛስ ዮታና ማላ ጎዳይ ኢዛስ ዮቲዳይሳ ዴሬዛስ ዮቲ ዉርሲዳ ማላ ቄሴቲ፥ ናቤቲኔ ዴሬዚ ዉሪ ኢዛ ኦይኪዲ፥ «ኔና ዎꬋናስ ቤሴስ!
JER 26:9 ኔኒ፥ ‹ሃይሲ ኬꬃዚ ሴሎ ማላ ጊዳና፤ ቃሴ ሃና ካታማያ ቡላኔ ካይስ ጊዳና› ጋዳ ጎዳ ሱንꬃን ኣይስ ቲንቢቴ ዮታይ?» ጊዳ። ሂስቲዲ ጎዳ ኬꬃን ሺቂዳ ኣሳይ ኡባይ ኤርማሳ ጊዶꬂዴስ።
JER 26:10 ዩሁዳ ሹሜቲ ሄሳ ኡባ ሲዪዳ ማላ ካዎቴꬃ ኬꬃፌ ኬዚዲ ጎዳ ኬꬅ ቢዳ። ሂስቲዲ ጎዳ ኬꬃስ፥ «ኦራꬃ ፔንጌ» ጌቴቲዛሶ ፔንጌዛን ቢ ኡቲዳ።
JER 26:11 ቄሴቲኔ ናቤቲ ሹሜታሲኔ ዴሬ ኡባስ፥ «ኢንቴ ኢንቴ ሃይꬃን ሲዪዳ ማላ ሃ ኣዴዚ ሃኖ ካታማይ ቦላ ቲንቢቴ ዮቲዳ ጊሻስ ኢዛስ ሃይቆይ ቤሴስ!» ጊዳ።
JER 26:12 ኤርማሲካ ሹሜታሲኔ ዴሬ ኡባስ፥ «ሃ ኢንቴ ሲዪዳ ቃላ ኡባ ሃ ኬꬃ ቦላኔ ሃኖ ካታማይ ቦላ ታ ዮታና ማላ ጎዳይ ታና ኪቲዴስ።
JER 26:13 ሃኢካ ኢንቴ ኦጌኔ ኢንቴ ኦሶ ሎኤꬂቴ፤ ጎዳ ኢንቴ ጾሳስ ኣዛዜቲቴ፤ ኢንቴ ሂስቲኮ ጎዳይ ኢንቴ ቦላ ኤሃና ጊ ዮቲዳ ኢታ ሚሻ ኢዚ ኣጋጋና።
JER 26:14 «ታኒ ጊዲኮ ሄኮ ኢንቴ ኩሼን ዳይስ፤ ኢንቴስ ሎኦኔ ሱሬ ሚሳቲዛይሳ ታ ቦላ ኦꬂቴ።
JER 26:15 ጊዶ ኣቲን ሃይሳ ኢንቴ ሲዪዳ ቃላ ኡባ ታኒ ኢንቴስ ዮታና ማላ ጎዳይ ታስ ኣዳፌ ዮቲዳ ጊሻስ ኢንቴ ታና ዎꬊኮካ ኢንቴ ጺሎ ሱꬅ ጉሲዲ ኢንቴ ኢንቴ ሁኤሲኔ ሃኖ ካታማይን ዲዛ ኣስ ኡባ ሞራንቻ ሂስቶንታ ማላ ናጌቲቴ» ጊዴስ።
JER 26:16 ሂስቲን ሹሜቲኔ ዴሬዚ ኡባይ ቄሴታሲኔ ናቤታስ፥ «ሃይሲ ኣዴዚ ጎዳ ኑ ጾሳ ሱንꬃን ሃሳይዳ ጊሻስ ሃይቃናስ ቤሴና!» ጊዳ።
JER 26:17 ዴሬ ጪማታፔካ ኢሲ ኢሲ ኣሳቲ ዴንዲ ኤቂዲ ሺቂዳ ዴራስ፥
JER 26:18 «ሂዝቂያሲ ዩሁዳን ካዎቲዲ ዲዛ ዎዴ ሞሬሼቴፔ ዪዳ ሚኪያሲ ዩሁዳ ዴሬ ኡባስ፥ «ኡባፌ ዎልቃማ ጎዳ ጾሳይ፥ ‹ጺዮኔይ ጎሻ ጋዴ ማላ ጎዬታና፤ ዬሩሳላሜይ ላሊ ኮሪዳ ኬꬃ ማላ ጊዳና፤ ጾሳ ኬꬃይ ኢዛ ቦላ ኬጼቲዳ ዙማይ ዎራ ማይኣና› ጊዴስ።
JER 26:19 «ሂስቲን፥ ዩሁዳ ካዎ ሂዝቂያሲኔ ዩሁዳ ኣሳይ ኡባይ ኢዛ ዎꬊዶ? ሂዝቂያሲ ጎዳስ ያዪዲ ኢዛፔ ማሮ ዎሲቤኔ? ጎዳይካ ባ ኤሃና ጊ ቆፒዳ ቂጻቴዛ ኣጋጊቤኔ? ጊዶ ኣቲን ኑኒ ኑርካ ኑ ቦላ ፓላ ኢታ ሚሽ ኤሃና ሃኖስ» ጊዴስ።
JER 26:20 ቃሴካ ቤኒ ዎዴ ቂሪያቴ-ዪኣሪሜ ጊዛሶን ዲዛ ሻማኤ ና ኦሪዮይ ዴስ፤ ኢዚካ ኤርማሲ ዮቲዳ ማላ ሃ ካታማ ቦላኔ ሃ ቢታ ቦላ ጎዳ ሱንꬃን ቲንቢቴ ዮቲዴስ።
JER 26:21 ካዎ ኢዮኣቄሜይ፥ ኢዛ ኦላንቻቲ፥ ኢዛ ኦሳንቻቲ ኦሪዮይ ዮቲዳይሳ ሲዪዳ ዎዴ ካዎዚ ኢዛ ዎꬋናስ ኮዪዴስ። ኦሪዮይ ሄሳ ሲዪዲ ባቢዳ ጊሻስ ጊብጼ ቢታ ባቃቲዴስ።
JER 26:22 ጊዶ ኣቲን ካዎ ኢዮኣቄሜይ ኣኪቦሬ ና ኤልናታኔኔ ሃራ ኣሳታካ ኢዛ ቦላ ጉጂዲ ጊብጼ ቢታ ኪቲዴስ።
JER 26:23 ኢስቲ ኦሪዮ ጊብጼፔ ኦይኪ ኤሂዲ ካዎ ኢዮኣቄሜኮ ኤፊዳ። ካዎዚ ኢዛ ማሻን ዎꬊዲ ኢዛ ኣሃ ቤቲዳይ ሞጌቲዛሶን ኤፊ ዬጊዴስ።
JER 26:24 ጊዶ ኣቲን ሳፋኔ ና ኣኪቃሜይ ኤርማሳ ባጋ ጊዲዳ ጊሻስ ኣሳይ ኤርማሳ ዎꬋና ማላ ኣꬂ ኢሚቤና።
JER 27:1 ዩሁዳ ካዎ ኢዮሲያሳ ና ሴዴቂያሲ ካዎቲዳ ኮይሮ ላይꬃን ጎዳ ቃላይ ኤርማሳኮ ዪዴስ።
JER 27:2 ጎዳይ ታስ፥ «ሚꬃፌ ቃምባራ ጊጊሳዳ ዳፎ ኢዛን ጌልꬃዳ ኔ ሞርጌን ዎꬃ።
JER 27:3 ዩሁዳ ካዎ ሴዴቂያሳኮ ዬሩሳላሜ ዪዳ ኣሳታ ቦላ ኤዶሜ ካዎስ፥ ሞኣቤ ካዎስ፥ ኣሞኔ ካዎስ፥ ጺሮሴ ካዎሲኔ ሲዶና ካዎስ ኪታ ዬዳ።
JER 27:4 ኢስቲ ባንታ ጎዳታ ኤሪሳና ማላ ኢስታስ ኡባፌ ዎልቃማ ጎዳ ኢስራኤሌ ጾሳይ ኢንቴ ጎዳታስ ሃይሳ ዮቲቴ።
JER 27:5 ታ ጊታ ዎልቃኒኔ ሚጬቲዳ ታ ኩሼን ሳኣኔ ሳኣ ቦላ ዲዛ ኣሲኔ ሜሄ ሜꬋዲስ። ኢስታ ታ ዶሲዳዴስ ኢማና።
JER 27:6 ሃኢካ ሃይታ ሃ ዴሬታ ኡባ ታ ኣይሌዛ ባቢሎኔ ካዎ ናቡካዳናጾሬስ ኣꬃ ኢማና፤ ዎራ ዶኣታካ ታ ኢዛስ ሃሪሳና።
JER 27:7 ኢዛ ዴሬይ ሃራስ ሃሬታና ጋካናስ ካዎቴꬃቲ ኡባይ ኢዛስ፥ ኢዛ ናሲኔ ኢዛስ ና ናስ ሃሬታና። ሄሳፌ ጉዬ ዳሮ ካዎቴꬃቲኔ ጊታ ካዎቲ ኢዛ ሃራና።
JER 27:8 «ጊዶ ኣቲን ኣይ ዴሬይ ዎይኮ ኣይ ካዎቴꬂኔ ሃ ባቢሎኔ ካዎ ናቡካዳናጾሬስ ኣዛዜቶንታ ኢጺኮኔ ኢዛ ቃምባራን ጌሎንታ ኢጺኮ፥ ታኒ ጎዳይ ሄ ካዎቴꬃ ኢዛ ኩሼን ꬋይሳና ጋካናስ፥ ኦላን፥ ኮሻኒኔ ኢታ ሃርጌን ቃጻያና።
JER 27:9 ሄሳ ጊሻስ ኢንቴና፥ ‹ባቢሎኔ ካዎስ ሃሬቴኬታ› ጊዛ ኢንቴ ናቤታ፥ ሙሬኒዛይታ፥ ኣጉሞ ኣጉሜቲዛይታ፥ ሞይቲሌ ጼይጊዛይታ ሲዮፒቴ።
JER 27:10 ጋሶይካ ኢንቴ ኢንቴ ቢታፌ ሾዴታና ማላ፥ ታ ኢንቴና ጎዳና ማላኔ ꬋይሳና ማላ ኢስቲ ኢንቴስ ዎርዶ ቲንቢቴ ዮቴቴስ።
JER 27:11 ጊዶ ኣቲን ኣይ ካዎቴꬂካ ባቢሎኔ ካዎ ቃምባራን ጌሊዲ ባ ሁኤ ዚቂ ሂስቲዲ ኢዛስ ኦꬂዛ ጊዲኮ ታኒ ጎዳይ ሄ ዴራ ሄን ባ ዴሬን ኣቲዲ ጎዪሼ ዳና ማላ ኦꬃና» ጊዴስ።
JER 27:12 ታኒ ዩሁዳ ካዎ ሴዴቂያሳሲካ ሃይሳ ሃ ኪታ ዮታዲስ፤ «ኢንቴ ሞርጌ ባቢሎኔ ካዎ ቃምባራ ጋርሳን ዚቂ ሂስቲቴ፤ ኢዛሲኔ ኢዛ ዴራስ ሃጋዚቴ፤ ሂስቲኮ ኢንቴ ሼምፖራ ፓጻ ዳና።
JER 27:13 ጎዳይ ባቢሎኔ ካዎስ ሃሬቶንታ ኢጺዛ ካዎቴꬃታ ቦላ ኤሃና ጊዳ ኦላን፥ ኮሻኒኔ ኢታ ሃርጌን ኔኒኔ ኔ ዴሬይ ኣይስ ዉሬቲ?
JER 27:14 ዎርዶ ናቤቲ ኢንቴስ፥ ‹ኢንቴ ባቢሎኔ ካዎስ ሃሬቴኬታ› ጊዛ ዎርዶ ቲንቢቴ ሲዮፒቴ።
JER 27:15 ‹ታኒ ኢስታ ኪታቤኬ፤ ኢስቲ ታ ሱንꬃን ዎርዶ ቲንቢቴ ዮቴቴስ፤ ሄሳ ጊሻስ ታኒ ኢንቴናኔ ኢንቴስ ናቤታ ጎዳ ኬሳና፤ ኢንቴካ ꬋያና› ጌስ ጎዳይ።»
JER 27:16 ሄሳፌ ጉዬ ታኒ ቄሴታሲኔ ሃ ዴሬ ኡባስ፥ «ጎዳይ፥ ‹ጎዳ ኬꬃ ሚሻይ ባቢሎኔፔ ኤሌ ሲማና› ጊዛ ናቤታ ቃላ ሲዮፒቴ። ጋሶይካ ኢስቲ ኢንቴስ ዎርዶ ቲንቢቴ ዮቴቴስ።
JER 27:17 ሄሳ ጊሻስ ኢስቲ ዮቲዛይሳ ሲሲ ኣጊዲ ባቢሎኔ ካዎስ ሃሬቲቴ፤ ኢንቴ ሼምፖራ ፓጻ ዳና፤ ሃ ካታማያ ኣይስ ላሌታ ኣታኔ?
JER 27:18 ኢስቲ ቱሙ ናቤታ ጊዲኮ፥ ቱሙካ ጎዳ ቃላይ ዲዛ ጊዲኮ ጎዳ ኬꬃን፥ ዩሁዳ ካዎ ኬꬃኒኔ ዬሩሳላሜን ኣቲዳ ሚሻቲ ባቢሎኔ ዲኤቲ ቦንታ ማላ ኣኔ ጎዳ ኡባፌ ዎልቃማ ጾሳኮ ሾቢ ዎሴቶ።
JER 27:19 ጎዳይ ኡባፌ ዎልቃማ ጾሳይ ሃ ካታማን ኣቲዳ ቱሳታ ጊሻስ፥ ጻርቂማላፔ ኦሴቲዳ ጊታ ሳኔዛ ጊሻስ፥ ጋሬታ ጊሻሲኔ ሃራ ኣቲዳ ኡባ ሚሻታ ጊሻስ፥
JER 27:20 ሃይቲ ሃ ሚሻቲ ባቢሎኔ ካዎ ናቡካዳናጾሬይ ዩሁዳ ካዎ ኢዮኣቄሜ ና ኢኮኒያኔ፥ ዩሁዳኒኔ ዬሩሳላሜን ዲዛ ሹሜታ ዲኢዲ ኤፊዛ ዎዴ ኣቲዳ ጊሻስ፥
JER 27:21 ጎዳ ኬꬃን፥ ዩሁዳ ካዎ ኬꬃኒኔ ዬሩሳላሜን ኣቲዳ ሚሻታ ጊሻስ ኡባፌ ዎልቃማ ጎዳ ኢስራኤሌ ጾሳይ፥
JER 27:22 ‹ኢስቲ ባቢሎኔ ቢታ ዲኤቲ ባና፤ ታኒ ኢስታ ጾሞሳና ጋላሲ ጋካናስ ሄን ዳና፤ ሄ ዎዴ ታ ኢስታ ዛራ ኤሃዳ ካሴ ኢስታሶሆን ዎꬃና› ጌስ» ጋዲስ።
JER 28:1 ሄ ዎዴ ዩሁዳ ካዎ ሴዴቂያሲ ካዎቲዳ ኦይዳንꬆ ላይꬃን ኢቻሻንꬆ ኣጊናን ጌባኦኔ ኣስ ኣዙሬ ና ናቤ ሃናኒያይ ጎዳ ኬꬃን ቄሴታ ሲንꬃኒኔ ዴሬ ኡባ ሲንꬃን ታስ፥
JER 28:2 «ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎይ ኢንቴና ቶሲዳ ቃምባራ ታ ሜንꬃና።
JER 28:3 ባቢሎኔ ካዎ ናቡካዳናጾሬይ ጎዳ ኬꬃፌ ዲኢ ኤኪዲ ኤፊዳ ሚሻታ ኡባ ታኒ ናምኡ ላይꬃ ጊዶን ዛራዳ ሃ ሶሆ ኤሃና።
JER 28:4 ቃሴ ታኒ ዩሁዳ ካዎ ኢዮኣቄሜ ና ኢኮኒያኔኔ ዩሁዳፔ ዲኤቲዲ ባቢሎኔ ቢዳ ኣሳ ኡባ ዛራዳ ሃ ሶሆ ኤሃና። ጋሶይካ ባቢሎኔ ካዎይ ኢንቴና ቶሲዳ ቃምባራ ታ ሜንꬃና› ጌስ» ጊዴስ።
JER 28:5 ሂስቲን ጎዳ ኬꬃ ጊዶን ኤቂዳ ቄሴታ ሲንꬃኒኔ ዴራ ሲንꬃን ናቤ ኤርማሲ ናቤ ሃናኒያስ፥
JER 28:6 «ኣሚን! ጎዳይ ኦꬆ! ጎዳ ኬꬃ ሚሻታኔ ዲኤቲዲ ቢዳ ኣሳ ኡባ ባቢሎኔፔ ዛሪ ኤሂዲ ጎዳይ ባ ዮቲዳ ቃላ ፖሎ!
JER 28:7 ጊዲኮካ ኣኔ ታ ኔሲኔ ሃ ኣሳስ ዮቲዛ ቃላ ሲያ።
JER 28:8 ኔፔኔ ታፔ ካሴ ሲንꬃን ዴኢዳ ናቤቲ ዳሮ ዴሬታ ቦላኔ ጊታ ካዎቴꬃታ ቦላ ኦላ ጊሻስ፥ ባሻ ጊሻሲኔ ኢታ ሃርጌ ጊሻስ ቲንቢቴ ዮቲዳ።
JER 28:9 ጊዶ ኣቲን ሳሮቴꬃ ጊሻስ ቲንቢቴ ዮቲዳ ናቤይ ኢዚ ዮቲዳ ቃላይ ፖሌቲዛ ዎዴ ቱማፔ ጎዳይ ኢዛ ኪቲዳይሲ ሄሳን ኤሬቴስ» ጊዴስ።
JER 28:10 ሄሳፌ ጉዬ ናቤ ሃናኒያይ ናቤ ኤርማሳ ሞርጌፌ ቃምባራ ኤኪዲ ሜንꬂዴስ።
JER 28:11 ሂስቲዲ ሃናኒያይ ኣሳ ኡባ ሲንꬃን፥ «ጎዳይ፥ ‹ታኒ ናምኡ ላይꬃታ ጊዶን ባቢሎኔ ካዎ ናቡካዳናጾሬ ቃምባራ ካዎቴꬃታ ኡባ ሞርጌፌ ዴንꬃዳ ሃይሳꬆ ሜንꬃና› ጌስ» ጊዴስ። ሄ ዎዴ ናቤ ኤርማሲ ኣጋጊዲ ባ ኦጌ ቢዴስ።
JER 28:12 ናቤ ሃናኒያይ ናቤ ኤርማሳ ሞርጌፌ ቃምባራ ሜንꬂዳ ጉꬃ ዎዴፔ ጉዬ ጎዳ ቃላይ ናቤ ኤርማሳኮ ዪዲ፥
JER 28:13 «ባዳ ሃናኒያስ፥ ‹ኔኒ ሚꬃ ቃምባራ ሜንꬃዳሳ፤ ታኒ ጊዲኮ ኢዛ ጊሻስ ቢራታ ቃምባራ ጊጊሳና› ጌስ ጎዳይ ጋዳ ዮታ።
JER 28:14 ቃሴካ ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎ ናቡካዳናጾሬስ ሃጋዛና ማላ ታኒ ሃ ካዎቴꬃታ ኡባ ሞርጌን ቢራታ ቃምባራ ዎꬃና፤ ኢስቲካ ኢዛስ ሃሬታና። ሃራይ ኣቶሺን ዎራ ዶኣታ ቦላካ ጎዳቴꬅ ኢዛስ ኢማና› ጌስ» ጊዴስ።
JER 28:15 ሄሳፌ ጉዬ ናቤ ኤርማሲ ናቤ ሃናኒያስ፥ «ሃናኒያ ሲያ! ጎዳይ ኔና ኪቲቤና፤ ጊዶ ኣቲን ኔኒ ሃ ኣሳይ ዎርዶ ሚሻን ኣማኔታና ማላ ኦꬃዳሳ።
JER 28:16 ሄሳ ጊሻስ ጎዳይ፥ ‹ታኒ ኔና ሃ ሳኣ ቦላፌ ዲጋና፤ ኔኒ ጎዳ ቦላ ማካላ ሃሳይዳ ጊሻስ ኔ ሃ ላይꬅ ሃይቃና› ጌስ» ጊዴስ።
JER 28:17 ናቤ ሃናኒያይ ሄ ላይꬅ ላፑንꬃ ኣጊናን ሃይቂዴስ።
JER 29:1 ናቤ ኤርማሲ ዲኤቲ ቢዲ ሃይቆንታ ሼምፖራ ፓጻ ዲዛ ጪማታስ፥ ቄሴታስ፥ ናቤታሲኔ ናቡካዳናጾሬይ ዬሩሳላሜፔ ዲኢዲ ባቢሎኔ ኤፊዳ ሃራ ኣስ ኡባስ ዬሩሳላሜፔ ዬዲዳ ዳብዳቤይ ሃይሳፌ ካሊዲ ጻፌቲዳይሳ።
JER 29:2 ሃይሲ ሃኒዳይ ካዎ ኢኮኒያኔይ፥ ጎዳቴያ ኢዛ ኣያ፥ ካዎ ኬꬃ ኦሳንቻቲ፥ ዩሁዳኔ ዬሩሳላሜ ካሌꬂዛይቲ፥ ሂላንቻቲኔ ዎጋጬቲ ዬሩሳላሜፔ ዲኤቲ ቢዳፔ ጉዬና።
JER 29:3 ኤርማሲ ዩሁዳ ካዎ ሴዴቂያሲ ባቢሎኔ ካዎ ናቡካዳናጾሬስ ኪቲዛ ሳፋኔ ና ኤልኣሳ ቦላኔ ኪልቂያሳ ና ጋማሪያ ቦላን ሄ ዳብዳቤዛ ዬዲዴስ።
JER 29:4 ዳብዳቤዚካ፥ «ኡባፌ ዎልቃማ ጎዳ ኢስራኤሌ ጾሳይ ታኒ ዬሩሳላሜፔ ባቢሎኔ ዲኢሳ ዬዲዳ ኣሳስ፥
JER 29:5 ‹ኬꬅ ኬጺዲ ኡቲቴ፤ ዶዛታ ቶኪዲ ኢስታ ኣይፌ ሚቴ፤
JER 29:6 ኤኬቲዲ ማጫ ናይታኔ ኣቱማ ናይታ ዬሊቴ፤ ኢንቴ ኣቱማ ናይቲኔ ማጫ ናይቲ ኤኬታና ማላኔ ጌሌታና ማላ ኦꬂቴ፤ ኢስቲካ ኣቱማ ናይታኔ ማጫ ናይታ ዬሌቶ፤ ኢንቴ ሄን ቆዳን ጮራቲቴ ኣቲን ጉጾፍቴ።
JER 29:7 ኢንቴ ዲኤቲ ቢዳ ካታማይስ ሳሮቴꬂኔ ዱሬቴꬅ ኮዪቴ፤ ሄ ካታማይስ ጎዳ ዎሲቴ፤ ኢዛ ዱሬቲኮ ኢንቴካ ዱሬታና› ጌስ።
JER 29:8 ቱሙካ ኡባፌ ዎልቃማ ጎዳ ኢስራኤሌ ጾሳይ፥ ‹ኢንቴ ጊዶን ዲዛ ናቤቲኔ ማሮቲ ኢንቴና ባሌꬆፌቶ፤ ኢስቲ ኢንቴ ጊሻስ ኣጉሜቲዛ ኣጉሞ ሲዮፒቴ።
JER 29:9 ኢስቲ ታ ሱንꬃን ዎርዶ ቲንቢቴ ዮቴቴስ ታ ኢስታ ኪታቤኬ› ጌስ።
JER 29:10 «ጎዳይ፥ ‹ኢንቴ ባቢሎኔን ዳና ላፑን ታሙ ላይꬂ ፖሌቲዳፔ ጉዬ ታ ኢንቴና ሞካ ጼላና፤ ታኒ ኢንቴና ሃ ቢታ ዛራ ኤሃና ጊዳ ሎኦ ቃላዮካ ኢንቴስ ፖላና።
JER 29:11 ታ ኢንቴስ ሃልቺዳ ሃልቾ ኤራይስ፤ ሄ ሃልቾዛስ ፖሎይ ሎኦኔ ሂዶታ ኢሚዛዛ፥ ኢንቴና ጎኢዛዛ ኣቲን ቆሂዛዝ ጊዴና።
JER 29:12 ኢንቴካ ታና ጼይጋና፤ ሺቂዲ ታና ዎሳና፤ ታኒካ ሲያና።
JER 29:13 ኢንቴ ታና ኮያና፤ ኢንቴ ታና ኩሜꬃ ዎዚናፔ ኮይኮ ዴማና።
JER 29:14 ታኒካ ኢንቴስ ቤታና። ታ ኢንቴ ዲኤቲ ቢዳ ቢታፌ ዛራና፤ ታኒ ኢንቴና ላላ ዬዲዳ ካዎቴꬃፌኔ ሶሆ ኡባፌ ሺሻና፤ ሂስታዳ ታኒ ኢንቴና ዲኦስ ዬዳናፔ ካሴ ኢንቴ ዴኢዳ ሶሆ ጉዬ ዛራዳ ኤሃና› ጌስ።
JER 29:15 «ኢንቴካ፥ ‹ጎዳይ ናቤ ኑስ ባቢሎኔን ዴንꬂዴስ› ጋና።
JER 29:16 ጊዶ ኣቲን ጎዳይ ዳዊቴ ካዎቴꬃ ኣልጋን ኡታና ካዎ ጊሻስ፥ ኢንቴናራ ዲኤቲ ቦንታ ሃን ኣቲዳ ዳቦታ ጊሻሲኔ ሃ ካታማን ኣቲዳ ዴራ ኡባ ጊሻስ፥
JER 29:17 ቱሙካ ጎዳይ ኡባፌ ዎልቃማ ጾሳይ፥ ‹ታኒ ኢስታ ቦላ ኦላ፥ ኮሻኔ ኢታ ሃርጌ ዬዳና፤ ቃሴ ታኒ ኢስታ ማናስ ጊጎንታ ሞሬቲዳ ባላሴ ቴራ ማላ ኦꬃና።
JER 29:18 ታኒ ኢስታ ማሻን፥ ኮሻኒኔ ኢታ ሃርጌን ዬዴꬃና፤ ሂስታዳ ታኒ ኢስታ ሳኣ ካዎቴꬃታ ኡባ ሲንꬃን ካꬌሲኔ ቂꬌስ ኬሳና፤ ቃሴ ታኒ ኢስታ ዬዴꬃ ዬዲዳ ዴራ ጊዶን ቃንጌꬃሲኔ ዳጋማስ፥ ቦሬሲኔ ካꬌስ ማላታ ጊዳና።
JER 29:19 ጋሶይካ ታ ኦሳንቻ ናቤታ ቦላ ታኒ ኢስታስ ዛራ ዛራዳ ኪቲዳ ታ ቃላ ኢስቲ ሲዮንታ ኢጺዳ። ኢንቴካ ዲኤቲ ቢዳይቲ ሲዮንታ ኢጺዴታ› ጌስ።
JER 29:20 « ‹ታኒ ዬሩሳላሜፔ ባቢሎኔ ዲኢሳ ዬዲዳ ኣሳቶ! ኢንቴ ኡባይካ ጎዳ ቃላ ሲዪቴ› ጌስ።
JER 29:21 ኡባፌ ዎልቃማ ጎዳ ኢስራኤሌ ጾሳይ ታ ሱንꬃን ዎርዶ ቲንቢቴ ኢንቴስ ዮቲዛ ቆላያ ና ኣካቤ ጊሻሲኔ ማኢሳያ ና ሴዴቂያሳ ጊሻስ ታኒ ኢስታ ባቢሎኔ ካዎ ናቡካዳናጾሬስ ኣꬃ ኢማና፤ ኢንቴ ጼሊሺን ኢዚ ኢስታ ዎꬋና።
JER 29:22 ሄሳፌ ጉዬ ዩሁዳፔ ዲኤቲ ቢዲ ባቢሎኔን ዲዛ ኣሳይ ኡባይ፥ ‹ጎዳይ ኔና ባቢሎኔ ካዎይ ታማን ጹጊዳ ሴዴቂያሳ ማላኔ ኣካቤ ማላ ኦꬆ› ጊዲ ቃንጋና።
JER 29:23 ኢስቲ ባ ላጌታ ማቼታራ ላይማቴꬃን ታ ኢስታስ ዮቶንታ ቃላ ታ ሱንꬃን ዎርዶ ዮቶን ኢስራኤሌ ቦላ ቆሆ ጋꬂዳ፤ ሄሳ ታኒ ኤራይስ፤ ታኒ ሄሳስ ማርካ» ጌስ ጎዳይ።
JER 29:24 ኔሄላሜ ዴሬ ኣስ ሻማኤስ፥
JER 29:25 «ኡባፌ ዎልቃማ ጎዳ ኢስራኤሌ ጾሳይ፥ ‹ዬሩሳላሜን ዲዛ ኣስ ኡባስ፥ ማኢሳያ ና ቄሴ ሶፎናሳሲኔ ሃራ ቄሴታ ኡባስ ኔኒ ኔ ሱንꬃን ዳብዳቤታ ዬዳዳሳ› ጌስ። ኔ ሶፎናሳስ፥
JER 29:26 ጎዳ ኬꬃን ሃላቃ ጊዳና ማላ ኔና ጎዳይ ዮዳሄ ሶሆን ቄሴ ኦꬂዲ ሹሚዴስ፤ ‹ታኒ ናቤ› ጊሼ ጎዪዲ ቲንቢቴ ዮቲዛ ኣይ ኣሳ ቶሆ ኣግሪሞቄን፥ ኢዛ ቆꬌካ ሳንሳላታን ዜጻ ቃቻናስ ቤሴስ።
JER 29:27 ሂስቲን፥ ‹ታኒ ናቤ› ኣናቶቴ ዴሬ ኣስ ኤርማሳ ኣይስ ሴራቤኪ?
JER 29:28 ሃ ኣዴዚ፥ ‹ኢንቴ ዲኤቴꬃን ጋምኣና ዎዴይ ኣዱሳ ጊዲዳ ጊሻስ ኢንቴስ ኬꬅ ኬጺዲ ኢዛን ዲቴ፤ ዶዛታካ ቶኪዲ ኢስታ ኣይፌ ሚቴ› ጊዲ ኑስ ባቢሎኔ ኪታ ዬዲዴስ» ጊዴስ።
JER 29:29 ቄሴ ሶፎናሲ ናቤ ኤርማሳስ ሃ ዳብዳቤዛ ናባቢዴስ።
JER 29:30 ሂስቲን ጎዳ ቃላይ ኤርማሳኮ፥
JER 29:31 «ሃይሳ ሃ ኪታ ዲኤቴꬃን ዲዛይታስ ኡባስ፥ ‹ኔሄላሜ ዴሬ ኣስ ሻማኤይ ታኒ ኪቶንታ ቲንቢቴ ዮቲዴስ፤ ኢንቴ ዎርዶን ኣማኔታና ማላ ኦꬂዴስ› ጋ ኪታ።
JER 29:32 ጎዳይ፥ ‹ታኒ ኔሄላሜ ዴሬ ኣስ ሻማኤኔ ኢዛ ሶ ኣሳ ቃጻያና። ታ ቦላ ኢዚ ማካላ ሚሽ ሃሳይዳ ጊሻስ ሃ ዴራ ጊዶን ኢዛስ ዛሬይ ኣቴና፤ ቃሴ ታኒ ታ ዴራስ ኦꬃና ሎኦ ሚሻካ ጋኪ ቤዬና› ጊዴስ» ጊሼ ዪዴስ።
JER 30:1 ጎዳፔ ኤርማሳኮ ዪዳ ቃላይ ሃይሳፌ ካሊዛይሳ።
JER 30:2 ጎዳ ኢስራኤሌ ጾሳይ ኤርማሳ፥ «ታኒ ኔስ ዮቲዳ ቃላ ኡባ ማጻፋን ጻፋ።
JER 30:3 ታኒ ታ ዴሬ ኢስራኤሌኔ ዩሁዳ ካሴ ኢስታ ኣዋታስ ታ ኢሚዳ ቢታ ኢስታስ ዛራ ኤሃና ዎዴይ ጋኪዴስ፤ ኢስቲካ ላታና» ጌስ።
JER 30:4 ጎዳይ ኢስራኤሌሲኔ ዩሁዳስ ዮቲዳ ቃላይ ሃይሳፌ ካሊዛይሳ።
JER 30:5 ጎዳይ፥ «ታኒ ባቦኔ ሺሮ ዋሶ ሲያይስ፤ ሳሮይካ ዴና።
JER 30:6 ኣኔ ኦይቺቴኔ ኣኬኪቴ! ኣዴይ ዬላናስ ዳንዳይዜ? ሂስቲን ኣዴይ ኡባ ሚጻይ ኦይኪዳ ማጫሳ ማላ ባ ኩሼ ባ ኡሎ ቦላ ዎꬂን ኣሳ ኡባ ሲንꬅ ካሬቲን ታ ቤኢዛይ ኣዛሴ?
JER 30:7 ሄ ጋላሳይ ኣይ ማላ ዳጋንꬂዛ ጋላስ ጊዳኔ! ሄሳ ማላ ጋላሲ ዴና፤ ሄ ጋላሳይ ያቆቤ ዜሬꬃታስ ሜቶ ጋላስ ጊዳና፤ ጊዶ ኣቲን ኢስቲ ሄ ሜቶዛፔ ኣታና» ጌስ።
JER 30:8 ጎዳይ ኡባፌ ዎልቃማ ጾሳይ፥ «ሄ ጋላስ ታኒ ኢስታ ሞርጌፌ ቃምባራ ሜንꬃና፤ ኢስቲ ቃሼቲዳ ሳንሳላታካ ዱꬃና፤ ሃይሳፌ ጉዬን ኣላጋይ ኢስታ ሃሬና።
JER 30:9 ጊዶ ኣቲን ጎዳስ ባንታ ጾሳሲኔ ታኒ ኢስታስ ካዎꬂዳ ካዎ ዳዊቴ ዛሬስ ኢስቲ ሃሬታና» ጌስ።
JER 30:10 «ሄሳ ጊሻስ ታ ኣይሌ ያቆቤ ዛሬቶ ያዮፍቴ! ኢንቴኖ ኢስራኤሌቶ ዳጋሞፍቴ! ኢንቴ ሃሆሶን ዲሺን ታኒ ኢንቴና ኣሻና፤ ኢንቴ ዛሬታካ ኢስቲ ዲኤቲዳ ቢታፌ ኬሳ ኤካና፤ ያቆቤ ዛሬቲ ሲሚዲ ሳሮኒኔ ዎፓን ኡታና፤ ኢስታ ያሺሳና ኣይ ሚሺካ ዴና።
JER 30:11 ታኒ ኢንቴና ኣሻናስ ኢንቴናራ ዳይስ፤ ታኒ ኢንቴና ካዎቴꬃታ ጊዶን ላላዲስ፤ ሄ ካዎቴꬃታ ሙሌራ ꬋይሳና፤ ጊዶ ኣቲን ኢንቴና ሙሌራ ꬋይሲኬ፤ ታኒ ቂጻቴይ ባይንዳ ጮ ኣጊኬ፤ ጊዲኮካ ታኒ ኢንቴና ጊናራ ቃጻያና» ጌስ ጎዳይ።
JER 30:12 ጎዳይ፥ «ኢንቴ ሜቆይ ኮሌቴና፤ ኢንቴ ማዱንꬃይ ፓጼና።
JER 30:13 ኢንቴ ጊሻስ ሞቴቲዛይ ዴና፤ ኢንቴ ማዱንꬃስካ ꬋሌይ ቤቴና፤ ኢንቴስ ፓጾይ ዴና።
JER 30:14 ኢንቴ ላጌቲ ኡባይ ኢንቴና ዶጊዳ፤ ኢስቲ ኢንቴ ጊሻስ ዉዴቴቴና፤ ታኒ ኢንቴና ሞርኬ ሾጪዛ ማላ ሾጫዲስ፤ ሜንጼ ኢታ ኣሳ ማላ ታ ኢንቴና ቃጻያዲስ። ጋሶይካ ኢንቴ ቆሆይ ጊታ፤ ኢንቴ ናጋራይካ ዳሮ።
JER 30:15 ꬋሌይ ባይንዳ ኢንቴ ሃርጌሲኔ ኢንቴ ማዱንꬃ ጊሻስ ኣይስ ዋሴቲ? ኢንቴ ሞሮይ ጊታኔ ኢንቴ ናጋራይ ዳሮ ጊዲዳ ጊሻስ ሃይታ ኡባ ታ ኢንቴ ቦላ ኦꬃዲስ» ጌስ።
JER 30:16 «ጊዶ ኣቲን ኢንቴና ዲፒ ሂስቲ ሚዳ ኡባቲ ሄሳꬆ ሜቴታና፤ ኢንቴ ሞርኬ ኡባቲካ ዲኤቲ ባና፤ ኢንቴና ቦንቂዳይቲ ቦንቄታና፤ ኢንቴና ቦጊዛይቲ ቦጌታና።
JER 30:17 ኢንቴና ጊዲኮ ታኒ ዛራዳ ፓዪሳና፤ ኢንቴ ማዱንꬃካ ፓꬃና። ጋሶይካ ኢስታስ፥ ‹ካꬌቲዳሮ፤ ኦኒካ ኮዮንታ ጺዮኖ› ጊዳ ጊሻሳ» ጌስ ጎዳይ።
JER 30:18 ጎዳይ፥ «ታኒ ያቆቤ ኬꬅ ዛራ ኬጻና፤ ኢዚ ዲዛሶስካ ቃꬌታና፤ ካታማያካ ካሴ ባ ላሌቲዳሶን ሲማ ኬጼታና፤ ካዎቴꬃ ኬꬃይካ ካሴ ባ ዲዛሶን ሲሚ ኬጼታና።
JER 30:19 ኢስታፌ ጋላታ ዬꬃይኔ ኢሊሊሳ ጬንጉርሲ ሲዬታና፤ ታኒ ኢስታ ዳርሳና፤ ኢስታ ቆዳይካ ፓጬና፤ ታኒ ኢስታ ቦንቼቲዳ ዴሬ ኦꬃና፤ ኢስቲ ካꬌቲዳይታ ጊዴቴና።
JER 30:20 ኢስታ ዜሬꬃይ ቤኒ ዎዴ ዲዛ ማላ ዳና፤ ኢስታ ማባራይካ ታ ሲንꬃን ሚኒ ኤቃና፤ ኢስታ ኡንኤꬂዛ ኡባካ ታኒ ቃጻያና።
JER 30:21 ኢስታ ካሌꬂዛይ ኢስታ ባጋፌ ጊዳና፤ ኢስታ ኣይሲዛይ ኢስታ ጊዶፌ ዴንዳና፤ ታኒ ኢዛ ታኮ ሺሻና፤ ኢዚካ ታኮ ሺቃና። ታ ሺሾንታ ዲሺን ጻሊዲ ታኮ ሺቃናይ ኦኔ?
JER 30:22 ሄሳ ጊሻስ ኢንቴ ታ ዴሬ ጊዳና፤ ታኒካ ኢንቴ ጾስ ጊዳና» ጌስ።
JER 30:23 ቤኢቴ ጎዳ ሃንቆይ ዳምባላ ማላ ዴንዴስ፤ ቡልኣኬቲዛ ጎቴ ጫርኮይ ኢታታ ዎꬋና።
JER 30:24 ኢዛ ዎዚና ቆፋ ፖሎንታ ጎዳ ሃንቆይ ጮ ሃዳ ጉዬ ሲሜና፤ ሄሳ ዪዛ ዎዴታን ኢንቴ ኣኬካና።
JER 31:1 ጎዳይ፥ «ሄ ዎዴ ታኒ ኢስራኤሌ ቆሞ ኡባታስ ጾስ ጊዳና፤ ኢስቲካ ታ ዴሬ ጊዳና» ጌስ።
JER 31:2 ጎዳይ፥ «ማሻፌ ኣቲዳ ዴሬይ ባዞ ቢታን ታፔ ኪያቴꬅ ዴማና፤ ታኒካ ኢስራኤሌስ ሼምፖ ኢማናስ ያና» ጌስ።
JER 31:3 ጎዳይ ኑስ ሃሆሶፔ ቆንጪዲ፥ «ታኒ ኢንቴና ሜርና ሲቆን ዶሳዲስ፤ ሄሳ ጊሻስ ታ ቃꬌቴꬃን ኢንቴና ታኮ ሺሻዲስ።
JER 31:4 ኢስራኤሌ ዴሬዞ! ታኒ ኢንቴና ዛራ ኬጻና፤ ኢንቴካ ኬጼታና። ኢንቴ ካራቤ ዛሪ ዴንꬂዲ ኡፋይሳን ሆምቦጪዛይታራ ኢንቴ ሆምቦጫና።
JER 31:5 ኢንቴ ዛሪዲ ሳማሪያ ዙምቡላታ ቦላ ዎይኔ ቶካና፤ ጎሻንቻቲ ቶካና፤ ኢስቲ ኣይፊዛ ኣይፌዛንካ ኡፋዬታና።
JER 31:6 ኤፍሬሜ ዙምቡላታ ቦላ ናጊዛይቲ፥ ‹ሃ ዪቴ፤ ጎዳ ኑ ጾሳኮ ፑዴ ጺዮኔ ኣኔ ኬዞስ› ጊ ጼይጋና ዎዴይ ያና» ጌስ።
JER 31:7 ጎዳይ፥ «ያቆቤ ዴራስ ኡፋይሳን ዬጺቴ፤ ካዎቴꬃታ ሃላቃስ ኢሊሊ ጊቴ፤ ኢንቴ ጋላታካ ሲሲቴ፤ ‹ጎዳዉ ኢስራኤሌፔ ጫሻ ኣቲዳ ኔ ዴራ ኣሻ› ጊቴ።
JER 31:8 ቤኢቴ ታኒ ኢስታ ፑዴሃ ባጋፌ ኤሃና፤ ቢታ ጋጻፔካ ታኒ ሺሻና፤ ኢስታ ጊዶን ቆቄቲኔ ዎቤቲ፥ ኣቤይ ባይንዳ ማጫሳቲኔ ሚጻቲዛይቲ ዳና፤ ኬሂ ዳሪዲ ባንታ ዴሬ ሲማና።
JER 31:9 ታኒ ኢስታ ዛራዳ ኤሂዛ ዎዴ ኢስቲ ዬኪሼኔ ዎሲሼ ያና። ታኒ ኢስታ ፑልቶ ሃꬃ ኣቻራ ሱሬ ኦጌራ ካሌꬃና። ጋሶይካ ታኒ ኢስራኤሌስ ኣዋ፤ ኤፍሬሜይካ ታስ ባይራ ና።
JER 31:10 «ኢንቴኖ ካዎቴꬃቶ ጎዳ ቃላ ሲዪቴ! ሃሆን ዲዛ ኣባ ጋጻታንካ፥ ‹ኢስራኤሌ ላሊዳይ ኢዚ ኢስታ ዛሪ ሺሻና፤ ባ ዉዴዛካ ሄንꬃንቻ ማላ ኢዚ ሄማና› ጊዲ ኣዋጂቴ።
JER 31:11 ጋሶይካ ጎዳይ ያቆቤ ዎዛና፤ ኢዛፔ ሚኒዛይታ ኩሼፔ ኢዛ ኬሲ ኤካና።
JER 31:12 ኢስቲ ዪዲ ጺዮኔ ዙማ ቦላ ኡፋይሳ ማዛሙሬ ዬጻና፤ ኢስቲ ጎዳ ኪያቴꬅ ጊዲዳ ካꬃን፥ ዎይኔ ኡሻን፥ ዛይቴን፥ ዴይሻኒኔ ዶርሳ ላቃታን፥ ዎፋኖታኒኔ ኡሳታን ኡፋዬታና፤ ኢስቲ ሃꬂ ፓጮንታ ኣታኪልቴ ሶሆ ማላ ጊዳና፤ ሃይሳፌ ጉዬ ኢስቲ ሙዞቴቴና።
JER 31:13 ሄ ዎዴ ጌላኦቲ ኡፋዬቲዲ ዬጻና፤ ዎዳላቲኔ ጪማቲ ጉፓና፤ ታ ኢስታ ዬሆዛ ኡፋይሳን ላማና፤ ታ ኢስታ ሙዞቴꬃፌ ሚንꬄꬃና፤ ታ ኢስታስ ኡፋይስ ኢማና።
JER 31:14 ታኒ ቄሴታ ኬሃ ኣንጃና፤ ታ ዴሬዛካ ኪያቴꬂ ካላና» ጌስ።
JER 31:15 ጎዳይ፥ «ዋሶይኔ ጫሞ ዬሆይ ኤራማ ካታማፔ ሴቴቲዴስ፤ ኢዚ ናይቲ ዉሪዳ ጊሻስ ኤራሄላ ዬካዱስ፤ ሚኔቶንታካ ኢጻዱስ» ጌስ።
JER 31:16 ጎዳይ፥ «ዬኮፋኔ ኣፉንጾፋ፤ ኔ ዳቡራይ ጮ ሃዳ ኣቴና፤ ሞርኬታ ቢታፌ ኢስቲ ሲማና።
JER 31:17 ሲንꬃፌ ኔስ ሂዶታይ ዲዛ ጊሻስ ኔ ናይቲ ባንታ ቢታ ሲማና» ጌስ።
JER 31:18 «ኤፍሬሜይ ጫሞ ሚላስ ሚላሊሺን ኣዳፌ ታ ሲያዲስ፤ ‹ሎሆንታ ዎፋኖ ማላ ታና ቃጻያዳሳ፤ ታኒካ ቃጻዬታዲስ፤ ኔኒ ጎዳ ታ ጾሳ፤ ኔኒ ታና ዛራ፤ ታኒካ ሲማና።
JER 31:19 ታ ኔፔ ሃካ ቢዳፔ ጉዬ ሲማዳ ሞꬌታዲስ፤ ታ ኣኬኪዳ ዎዴ ታ ሁኤ ባቃዲስ፤ ታ ዬላጋቴꬃ ካዉሻቴꬅ ቶካዲስ፤ ዬላታዳ ጉጻዲስ› ጊዴስ።
JER 31:20 ኤፍሬሜይ ታ ዶሳዳ ኡፋዬቲዛ ታ ናዛ ጊዴኔ? ዳሮ ዎዴ ታ ኢዛራ ኤቄታ ሃሳይኮካ ዛራዳ ኢዛ ጊሻስ ታ ቆፓይስ፤ ታ ማራጬይ ኮኮሬስ፤ ታ ኢዛስ ኬሃ ቃꬌታይስ» ጌስ ጎዳይ።
JER 31:21 ጎዳይ፥ «ኦጌን ማላታ ኤሳ፤ ቢዛሶ ቤሲዛ ማላታ ቶካ፤ ኔ ባና ዎጋ ኦጌዛ ኣኬካ፤ ጌላኦዬ ኢስራኤሌ ሲማ፤ ሂስታዳ ኔ ካታማታ ጌላ።
JER 31:22 ሃኔ ካዲዳ ናዬ! ኔ ኣይዴ ጋካናስ ቶይላታኔ? ጎዳይ ሳኣ ቦላ ኦራꬃ ሚሽ ሜꬋና፤ ሄሲካ ማጫይ ኣዴ ዶዳና» ጌስ።
JER 31:23 ኡባፌ ዎልቃማ ጎዳ ኢስራኤሌ ጾሳይ፥ «ታኒ ኢስታፌ ዲኤቲዳ ሚሻ ታ ኢስታስ ዛሪዛ ዎዴ ኢስቲ ዩሁዳ ቢታኒኔ ኢዚ ካታማታን፥ ‹ኔኖ ጺሎቴꬂ ኣቂዛ ጌሻ ዙማዞ! ጎዳይ ኔና ኣንጆ!› ጊዛ ቃላ ዛሪ ጎኤታና።
JER 31:24 ጎሻንቻቲኔ ሜሄ ሃሮን ኣቂዛይቲ ዩሁዳኒኔ ዩሁዳ ካታማታን ኢሲፌ ዳና፤
JER 31:25 ታኒ ላባኒዳ ሼምፖዮ ኦራጺሳና፤ ዳቡርዳሮካ ሚንꬃና» ጌስ።
JER 31:26 ሄ ዎዴ ታኒ ꬊስኮፌ ቤጋዳ ዩሻ ጼላዲስ፤ ታኒ ማልኦ ꬊስኮ ꬊስካዲስ።
JER 31:27 ጎዳይ፥ «ታኒ ኢስራኤሌ ቢታኒኔ ዩሁዳ ቢታን ኣሲኔ ሜሄ ኩንꬂዛ ዎዴይ ያና።
JER 31:28 ኢስታ ꬎቃላናስ፥ ላላናስ፥ ሺራ ዬጋናስ፥ ꬋይሳናሲኔ ባሽ ኢስታ ቦላ ኤሃናስ ኬሃ ታኒ ሚኒዳ ማላ ኢስታ ዛራ ኬጻናሲኔ ቶካናስ ኬሃ ሚናና» ጌስ።
JER 31:29 «ሄ ዎዴ ኣሳይ፥ ‹ኣዋቲ ዎይኔ ሚꬃ ቴራ ጫሊዳይሳ ሚን ኢስታ ናይታ ኣቺ ዚልኢዴስ› ጌቴቲዛ ሌሚሶ ናምኣንꬆ ሃሳዬቴና።
JER 31:30 ጊዶ ኣቲን ኣሳይ ኢሶይ ኢሶይ ባ ናጋራን ናጋራን ሃይቃና፤ ዎይኔ ቴራ ቃዉኤ ሚዳ ኣሳ ኣቺ ኡባይ ዚልኣና» ጌስ ጎዳይ።
JER 31:31 ጎዳይ፥ «ታኒ ኢስራኤሌ ዴራራኔ ዩሁዳ ዴራራ ኦራꬃ ጫቆ ጫቄታና ዎዴይ ያና።
JER 31:32 ሄ ጫቆዚ ታኒ ኢስታ ጊብጼፔ ኬሳናስ ኢስታ ኩሼ ኦይካዳ ኢስታ ኣዋታራ ጫቄቲዳ ጫቆዛ ማላ ጊዴና፤ ታኒ ኢስታስ ኣዚና ማላ ጊዳ ዲሺን ኢስቲ ታናራ ዲዛ ጫቆ ቃላዛ ላሊዳ» ጌስ።
JER 31:33 «ጊዶ ኣቲን ታኒ ጎዳይ ሄ ዎዴፔ ጉዬ ኢስራኤሌ ዴራራ ታ ጫቄታና ጫቆይ ሃይሳ፤ ታኒ ታ ዎጋ ኢስታ ዎዚናን ጻፋ ዎꬃና፤ ታኒካ ኢስታስ ጾሳ ጊዳና፤ ኢስቲካ ታ ዴሬ ጊዳና።
JER 31:34 ሃይሳፌ ጉዬ ኦኒካ ባ ላጌ ዎይኮ ባ ኢሻ፥ ‹ጎዳ ኤራ› ጊዲ ታማርሴና፤ ጋሶይካ ጉꬃፌ ዶሚዲ ጊታ ጋካናስ ኢስቲ ኡባይ ታና ኤራና፤ ታኒካ ኢስታ ቆሆ ኣቶ ጋና፤ ኢስታ ናጋራካ ናምኣንꬆ ዛራ ቆፒኬ» ጌስ ጎዳይ።
JER 31:35 ጋላሳን ፖኢሳና ማላ ኣርሼ ዎꬂዳይ፥ ኦማርሳን ፖኢሳና ማላ ኣጊናኔ ጾሊንቴታ ኣዛዚዳይ፥ ዳምባላይ ጉማና ማላ ኣባ ቃꬂዛይ ኢዛ ሱንꬃይ ጎዳ ኡባፌ ዎልቃማ ጾሳ ጌቴቲዛይሲ፥
JER 31:36 «ሃ ኤቂዲ ዲዛ ሜꬌታ ዎጋይ ታ ሲንꬃፌ ኪቺኮ ሄ ዎዴ ኢስራኤሌ ዜሬꬃቲ ታ ሲንꬃን ሜርናስ ካዎቴꬅ ጊዲዲ ዱሳይ ኣታና» ጌስ።
JER 31:37 ጎዳይ፥ «ቦላን ዲዛ ሳሎታ ጋኪ ዋꬋናስ ዳንዳዬቲኮ፥ ዎይኮ ጋርሳን ዲዛ ቢታ ጻጶ ጋኪ ፒልጊ ኤራናስ ዳንዳዬቲኮ ሄ ዎዴ ታኒ ኢስራኤሌይ ኦꬂዳ ኦሶ ኡባ ጊሻስ ታ ኢስታ ዬጋ ኣጋና» ጌስ።
JER 31:38 ጎዳይ፥ «ሃናኒኤሌ ጊምቤፌ ዶሚዲ ጉላ ፔንጌ ጋካናስ ካታማያ ታስ ጎዳስ ኦሴታና ዎዴይ ያና።
JER 31:39 ዋꬋ ዎዶሮዚ ሄፔ ዶሚ ሲቲ ጊዲ ጋሬቤ ዙምቡላታራ ኣꬊዲ ጎኣሃ ጋካናስ ሚጬታና።
JER 31:40 ኣሃይኔ ቢዲንꬂ ዬጌቲዛ ሾባ ኡባይ ኣርሼይ ሞኪዛ ቄዲሮኔ ሾባራ ቢዲ ፓራ ፔንጌ ጋካናስ ዲዛ ቲꬊ ጊዳ ዴምባይ ኡባይ ጎዳስ ዱማቲዳዝ ጊዳና፤ ሄሳፌ ጉዬ ሄ ካታማያ ሾዴቱኩኔ ላሌቱኩ» ጌስ።
JER 32:1 ዩሁዳ ካዎ ሴዴቂያሲ ካዎቲዳ ታማንꬃ ላይꬃን፥ ባቢሎኔ ካዎ ናቡካዳናጾሬይ ካዎቲዳ ታማኔ ኦስፑንꬃ ላይꬃን ጎዳ ቃላይ ኤርማሳኮ ዪዴስ።
JER 32:2 ሄ ዎዴ ባቢሎኔ ካዎ ኦላንቻቲ ዬሩሳላሜ ጊዶꬂዳ፤ ናቤ ኤርማሲ ዩሁዳን ካዎቴꬃ ኬꬃ ዛጎን ዲዛ ዛቤታ ኬꬃን ጎርዴቲ ኡቲዴስ።
JER 32:3 ካሴ ዩሁዳ ካዎ ሴዴቂያሲ ኢዛ፥ «ኔ ሃይሳ ማላ ቲንቢቴ ዋና ዮታይ? ጎዳይ፥ ‹ታኒ ሃኖ ሃ ካታማዮ ባቢሎኔ ካዎ ኩሼን ኣꬃ ኢማና፤ ኢዚካ ሃራና።
JER 32:4 ዩሁዳ ካዎ ሴዴቂያሲ ባቢሎኔ ካዎስ ኣꬊ ኢሜታና፤ ካዎዛ ሲንꬃን ኤቂዲ ኢዛ ሃሳይሳና፤ ኢዚካ ባ ኣይፌራ ቤኣና ኣቲን ባቢሎኔታ ኩሼፔ ኬሲ ኤኪ ኣቴና።
JER 32:5 ሄሳፌ ጉዬ ኢስቲ ሴዴቂያሳ ባቢሎኔ ኤፋና፤ ሂስቲን ታኒ ኢዛ ቦላ ፒርዳና ጋካናስ ኢዚ ሄን ዳና፤ ኢንቴ ባቢሎኔ ኣሳታራ ኦሌቲኮ ኢንቴስ ጊጌና› ጌስ ጋሳ» ጊዲ ሄሳ ጊሻስ ቃሺሲዴስ።
JER 32:6 ኤርማሲካ ጎዳ ቃላይ ታኮ፥
JER 32:7 «ኔ ኣዋ ኢሻ ሻሎሜ ና ሃናምኤሌይ ኔኮ ዪዲ፥ ‹ኣናቶቴ ካታማን ዲዛ ታ ጋዴዛ ሻማ፤ ጋሶይካ ሻማናስ ዳቦቴꬂ ጋꬂዛይ ኔና› ጌስ» ጊሼ ዪዴስ።
JER 32:8 ጎዳይ ጊዳ ማላ፥ ታ ኣዋ ኢሻ ና ሃናምኤሌይ ታኮ ዛቤቲ ናጊዛሶ ዛጎ ዪዲ፥ «ቢኒያሜ ቢታን ኣናቶቴን ዲዛ ታ ጋዴዛ ዎዛናስ ቤሲዛይ ኔና ጊዲዳ ጊሻስ ኔስ ቡዞꬃ ሻማ» ጊዴስ፤ ሃይሲካ ጎዳ ቃላ ጊዲዳይሳ ኤራዲስ።
JER 32:9 ሂስቲን ኣናቶቴ ካታማን ዲዛ ጋዴዛ ታ ኣዋ ኢሻ ና ሃናምኤሌፔ ታማኔ ላፑን ሳቂሌ ቢራ ኢማዳ ሻማዲስ።
JER 32:10 ሂስታዳ ማርካታ ሲንꬃን ዉሌ ዋራቃታ ፓራማዳ ጎርዳዲስ፤ ሚሻካ ሜዛኔን ዎꬃዳ ቆዳ ኢማዲስ።
JER 32:11 ሄሳፌ ጉዬ ኑ ሃሳዬቲዳ ፓቴꬃ ዮኦታ ኦይኪዲ ጎርዴቲዳኔ ጎርዴቶንታ ዉሌ ዋራቃታ ታ ኩሼን ኤካዲስ።
JER 32:12 ሂስታዳ ፓራሜቲዳ ዉሌ ዋራቃታ ታ ኣዋ ኢሻ ና ሃናምኤሌ ሲንꬃን፥ ፓራሚዳ ማርካታ ሲንꬃኒኔ ዛቤ ናጊዛ ኬꬃ ዛጎን ኡቲዳ ኡባ ኣይሁዳታ ሲንꬃን ማኢሴያ ና፥ ኔሪያ ና ባሮኬስ ኢማዲስ።
JER 32:13 ሄሳፌ ጉዬ ኢስታ ሲንꬃን ታኒ ባሮኬስ ኣዛዞ ኢማዲስ፤
JER 32:14 ኡባፌ ዎልቃማ ጎዳ ኢስራኤሌ ጾሳይ፥ «ጎርዴቲዳይሳኔ ጎርዴቶንታ ዲዛ ናምኡ ዉሌ ዋራቃታቲ ሞሬቶንታ ዲሼ ዳሮ ዎዴ ጋምኣና ማላ ኤፋዳ ኦቶ ጊዶን ዎꬃ» ጌስ።
JER 32:15 ኡባፌ ዎልቃማ ጎዳ ኢስራኤሌ ጾሳይ፥ «ሃ ቢታን ኣሳይ ኬꬅ፥ ጎሻ ጋዴኔ ዎይኔ ቶኪዛሶሆ ዛሪ ሻማና» ጌስ።
JER 32:16 ታኒ ኔሪያ ና ባሮኬስ ጋዴዛ ሻሚዳ ዉሌ ዋራቃታ ኢሚዳፔ ጉዬ ጎዳ፥
JER 32:17 «ኣቤት ኡባፌ ዎልቃማ ጎዳዉ! ኔኒ ሳሎታኔ ሳኣ ኔ ጊታ ዎልቃኒኔ ሚጬቲዳ ኔ ኩሼን ሜꬋዳሳ፤ ኔና ጾኒዛ ኢሲ ሚሺካ ዴና።
JER 32:18 ኔኒ ኔ ሲቆኔ ኪያቴꬅ ሺ ዬሌታ ጋካናስ ቤሳሳ፤ ጊዶ ኣቲን ኣዋታ ሞሮ ኢስታ ናይታ ቦላ ዛራሳ። ኣቤት ጊታኔ ዎልቃማ ጾሳዉ! ኔ ሱንꬃይ ጎዳ ኡባፌ ዎልቃማ ጾሳ።
JER 32:19 ኔ ሃልቾይ ጊታ፤ ኔኒ ኔ ኦሶን ሚኖ፤ ኔ ኣይፌቲ ኣሳ ኦጌ ኡባ ጼሌቴስ፤ ኢሳስ ኢሳስ ኢዛ ኦጌ ማላኔ ኢዛ ኦሶ ማላ ኔ ኢማና።
JER 32:20 ኔኒ ጊብጼን ማላታታኔ ኦራꬃ ሚሽ ኦꬃዳሳ፤ ሃች ጋካናስካ ሃ ኦራꬃ ኦሶታ ኢስራኤሌ ኣሳ ጊዶኒኔ ሃራ ካዎቴꬃታ ኡባ ጊዶን ኦꬂዛይሳ ኣጋቤካ። ሄሳፌ ዴንዲዳይሳን ኔ ሱንꬃይ ኡባሶን ኤሬቲዴስ።
JER 32:21 ኔኒ ማላታኒኔ ኦራꬃ ሚሻን፥ ኔ ሚኖ ቄሴኒኔ ሚጬቲዳ ኩሼን ኬሂ ያሺሲዛ ፑላቴꬃን ኔ ዴሬ ኢስራኤሌ ጊብጼፔ ኬሳዳሳ።
JER 32:22 ኢስታ ኣዋታስ ኔኒ ኢማና ጋዳ ጫቂዳ ማꬂኔ ኤሲ ኢዚፔ ጎጊዛ ሃኖ ሃ ቢታዮ ኔ ኢስታስ ኢማዳሳ።
JER 32:23 ሂስቲን ኢስቲ ሄ ቢታ ጌሊዲ ላቲዳ፤ ጊዶ ኣቲን ኔስ ኣዛዜቲቤቴና፤ ኔ ዎጋካ ናጊቤቴና፤ ኢስቲ ኦꬃና ማላ ኔኒ ኣዛዚዳይሳ ኡባካ ኦꬂቤቴና፤ ሄሳ ጊሻስ ኔኒ ኢስታ ቦላ ሃ ቦሻ ኡባ ኤሃዳሳ።
JER 32:24 «ሄኮ ባቢሎኔቲ ካታማዮ ኦይካናስ ጊምቤ ዩሾን ቢታ ዶሪዲ ጊዶꬂዳ፤ ኦላፔ፥ ኮሻፔኔ ኢታ ሃርጌፌ ዴንዲዳይሳን ካታማያ ኢስታራ ኦሌቲዛ ባቢሎኔታ ኩሼን ኣꬋ ኢሜታና ሃናዉስ፤ ኔኒ ሃኢ ቤኢዛይሳ ማላ ኔ ዮቲዳ ኡባይ ፖሌቲሼ ዴስ።
JER 32:25 ኣቤት ኡባፌ ዎልቃማ ጎዳዉ! ካታማያ ባቢሎኔታስ ኣꬋ ኢሜቴꬃ ቦላ ዲሺን፥ ‹ጋዳ ቢራን ሻማ፤ ሻማሼ ማርካ ሲንꬃን ሻማ› ጋሳ» ጋ ዎሳዲስ።
JER 32:26 ሄሳፌ ጉዬ ጎዳ ቃላይ ኤርማሳኮ ዪዲ፥
JER 32:27 «ታኒ ጎዳይ ኣስ ኡባስ ጾሳ፤ ቱማፔ ታና ጾኒዛ ሚሺ ዲዜ?» ጊዴስ።
JER 32:28 ሄሳ ጊሻስ ጎዳይ፥ «ታኒ ሃ ካታማዮ ባቢሎኔታሲኔ ባቢሎኔ ካዎ ናቡካዳናጾሬስ ኣꬃ ኢማና፤ ኢስቲካ ኢዞ ኦይካና።
JER 32:29 ካታማዮ ኦሊዛ ባቢሎኔቲ ዪዲ ካታማይ ጊዶ ጌላና፤ ኢዞካ ታማን ጹጋና፤ ታና ሃንቄꬃናስ ኣሳይ ባንታ ኬꬃ ፖቄ ፖቄ ቦላ ባኣሌስ ኤጻኔ ጩኣሲዳሶሆታኔ ኤቃ ጾሳታስ ኡሻ ያርሾ ሺሺዳ ኬꬃታ ኡባ ኢስቲ ጹጋና» ጌስ።
JER 32:30 ጎዳይ፥ «ኢስራኤሌ ኣሳይኔ ዩሁዳ ኣሳይ ባንታ ዬላጋቴꬃፌ ዶሚዲ ታ ሲንꬃን ኢታ ሚሽ ኦꬂዳፔ ኣቲን ሃራ ኢሲ ሎኦ ሚሽ ኦꬂቤቴና፤ ኢስቲ ባንታ ኩሼን ኦꬂዳ ኦሶን ታና ሃንቄꬂዳ።
JER 32:31 ሃና ካታማያ ኤቂዳሶፔ ሃች ጋካናስ ታኒ ኢዞ ታ ሲንꬃፌ ꬋይሳና ማላ ታ ሃንቆኔ ባሽ ዴንꬄꬃዱስ።
JER 32:32 ኢስራኤሌ ኣሳይኔ ዩሁዳ ኣሳይ፥ ኢስታ ካዎቲኔ ሹሜቲ፥ ኢስታ ቄሴቲኔ ናቤቲ ኦꬂዳ ኢታ ኦሶ ኡባን ታና ሃንቄꬂዳ።
JER 32:33 ኢስቲ ታስ ባንታ ሲንꬅ ኣጊዲ ዞኮ ዛሪዳ፤ ታኒ ኢስታ ዛራ ዛራዳ ታማርሲኮካ ኢስቲ ሲዬቴናኔ ሴራካ ኤኬቴና።
JER 32:34 ታ ሱንꬂ ጼይጌቲዛ ኬꬃ ሃራሲዛ ባንታ ኤቃ ጾሳታ ኤሲዲ ቱኒሲዳ።
JER 32:35 ኢስቲ ባንታ ኣቱማ ናይታኔ ማጫ ናይታ ሞሎኬስ ያርሻናስ ሄኖሜ ና ሾባን ባኣሌስ ጎይኒዛ ꬎቃሶሆታ ጊግሲዳ፤ ጊዶ ኣቲን ኢስቲ ዩሁዳ ናጋራ ኦሲሳናስ ሃይሳ ማላ ሃራሲዛ ኦሶ ኦꬃና ማላ ታ ኢስታ ኣዛዛቤኬ፤ ታ ሄሳ ሙሌካ ቆፓቤኬ» ጊዴስ።
JER 32:36 ኢንቴ፥ «ኦላን፥ ኮሻኒኔ ኢታ ሃርጌን ባቢሎኔ ካዎ ኩሼን ኣꬋ ኢሜታና» ጊዳ ሃ ካታማይስ ጎዳ ኢስራኤሌ ጾሳይ፥
JER 32:37 «ታ ሚኖ ሃንቆኒኔ ጊታ ቦሻን ታ ኢስታ ጎዳ ዬዲዳ ቢታ ኡባፌ ሺሻና፤ ሂስታዳ ሃሶሆ ዛራ ኤሃዳ ሳሮቴꬃን ታ ኢስታ ዎꬃና።
JER 32:38 ኢስቲ ታ ዴሬ ጊዳና፤ ታኒካ ኢስታ ጾስ ጊዳና።
JER 32:39 ኢስታሲኔ ኢስታፌ ጉዬ ኢስታ ናይታስ ሎኦ ጊዳና ማላኔ ኢስቲ ታስ ኡባ ዎዴ ያያና ማላ ታኒ ኢስታስ ኢሲ ዎዚናኔ ኢሲ ቆፋ ኢማና።
JER 32:40 ታኒ ኢስታራ ሜርናስ ጊዲዛ ጫቆ ጫቄታና፤ ታኒ ኢስታስ ሎኦ ሚሽ ኦሶ ኣጊኬ፤ ኢስቲ ታፔ ዎራ ሲሞንታ ማላኔ ኢስቲ ታስ ያያና ማላ ታ ኦꬃና።
JER 32:41 ታ ኢስታስ ሎኦ ኦꬃዳ ኡፋዬታና፤ ቃሴ ታኒ ታ ኩሜꬃ ዎዚናፔኔ ታ ኩሜꬃ ሼምፖፌ ቱማፔ ሃ ቢታይ ቦላ ኢስታ ቶካና» ጌስ።
JER 32:42 ቃሴካ ጎዳይ፥ «ታኒ ሃ ዴራ ቦላ ሃይሳ ዎልቃማ ባሽ ኡባ ኤሂዳ ማላ ታኒ ኢስታስ ሎኦ ኦꬃና ጋዳ ጫቂዳ ቃላ ኡባ ፖላና።
JER 32:43 ኢንቴካ፥ ‹ሃ ቢታያ ባቢሎኔታስ ኣꬋ ኢሜቲዳ ጊሻስ ኢዚን ኣሲኔ ሜሄይ ባይንዳ ዲዛ ሜላ ቢታ› ኢንቴ ጊዳ ሃ ቢታይን ጋዴይ ዛልኤታና።
JER 32:44 ታኒ ኢስታፌ ዲኤቲዳ ሚሽ ዛሪዛ ጊሻስ ቢኒያሜ ዴሬን፥ ዬሩሳላሜ ዩሾን ዲዛ ጉታታን፥ ዩሁዳ ካታማታኒኔ ጌዜ ቢታን ዲዛ ካታማታን፥ ኣርሼይ ዉሊዛ ባጋን ዲዛ ዙማታስ ዱጌ ባጋኒኔ ኔጌቤን ዲዛ ቢታይ ሳቂሌ ቢራን ሻሜታና፤ ዉሌዚ ፓራሜቲዲ ማርካታ ሲንꬃን ጎርዴታና» ጌስ።
JER 33:1 ኤርማሲ ዛቤ ናጊዛይታ ኪፊሌን ቃሾን ዲሺን ጎዳ ቃላይ ኢዛኮ ናምኣንꬆ ዪዴስ።
JER 33:2 ሳኣ ሜꬊዳይ፥ ጊግሲዳይኔ ዮች ዬጊዳ ጎዳይ፥ ኢዛስ ሱንꬃይካ ጎዳ ጊዲዳይ፥
JER 33:3 «ኔ ሃ ታኮ ዋሳ፤ ታኒካ ኔስ ዛራና፤ ኔ ኤሮንታ ሚሽ ሄሲካ ዎልቃማኔ ፒልጊን ኤሬቶንታ ሚሽ ታ ኔስ ቆንጪሳና።
JER 33:4 ጎዳ ኢስራኤሌ ጾሳይ ባቢሎኔታራ ዲዛ ኦላን ቢታ ዶሪዲ ማሻን ቆሂዛ ኦላ ቴቃናስ ላሌቲዳ ሃ ካታማይ ኬꬃታሲኔ ዩሁዳ ካዎቴꬃ ኬꬃታ ጊሻስ፥
JER 33:5 ‹ሃይታንቲ ታ ሃንቆኒኔ ባሻን ዎꬊዛ ኣሳታ ኣሃን ኩማና፤ ኢስታ ኢታቴꬃ ጊሻስ ታኒ ታ ኣይፌሶ ሃ ካታማይፔ ሃራሶ ዛራና› ጌስ።
JER 33:6 «ጊዶ ኣቲን ታኒ ኢዚስ ፓጻቴꬂኔ ፓያቴꬅ ዛራ ኢማና፤ ታ ዴሬዛካ ፓꬃና፤ ታ ኢስታ ዳሮ ሳሮቴꬃኒኔ ዎፓቴꬃን ዎꬃና።
JER 33:7 ታኒ ዩሁዳ ኣሳኔ ኢስራኤሌ ኣሳ ዲኤቲ ኢስቲ ቢዳሶፔ ዛራና፤ ኢስቲ ካሴ ዲዛ ማላ ታ ኢስታ ሎኤꬃ ዎꬃና።
JER 33:8 ኢስቲ ታ ቦላ ኦꬂዳ ናጋራ ኡባፌ ታ ኢስታ ጌሻና፤ ኢስቲ ማካላቴꬃን ታና ቆሂዳ ናጋራ ኡባ ታ ኢስታስ ኣቶ ጋና።
JER 33:9 ሄሳፌ ጉዬ ሃና ሃ ካታማያ ታ ኢዚስ ኦꬂዳ ሎኦ ሚሽ ኡባ ሲዪዛ ካዎቴꬃታ ኡባ ሲንꬃን ሳባስ፥ ኡፋይሳስ፥ ጋላታሲኔ ቦንቾስ ጊዳና፤ ታ ኢዚስ ኢሚዛ ዳሮ ዱሬቴꬃፌኔ ሳሮቴꬃፌ ዴንዲዳይሳን ኣሳይ ኢዚስ ያሻን ኮኮራና» ጌስ።
JER 33:10 ጎዳይ፥ «ኢንቴ፥ ‹ሃና ሃ ሶሆያ ኣሲኔ ሜዶሳቲ ባይንዳሶ› ጌታ፤ ጊዶ ኣቲን ኣሲኔ ሜዶሳቲ ባይንዳ ቡላ ጊዲዳ ዩሁዳ ካታማታኒኔ ዬሩሳላሜ ኦጌታን ቃሴ ጬንጉርሲ ሴቴታና።
JER 33:11 ኡፋይሳ ጬንጉርሲ፥ ሚሺራታ ጬንጉርሲ ሄሳꬆካ ቡላቺዛይሳኔ ቡላቼቲዛሪ ቃላይ፥ « ‹ጎዳይ ኪያ፤ ኢዛ ማሮቴꬃይካ ሜርናሳ፤ ጎዳ ኡባፌ ዎልቃማ ጾሳ ጋላቲቴ› ጊዛ ጋላታ ያርሾ ኤኪዲ ጾሳ ኬꬅ ዪዛ ኣሳታ ጬንጉርሲ ሴቴታና፤ ሄ ቢታይፌ ዲኤቲዳ ሚሽ ካሴ ዲዛሶታ ዛራና» ጌስ።
JER 33:12 ጎዳይ ኡባፌ ዎልቃማ ጾሳይ፥ «ኣስ ጊዲን ዎይኮ ሜዶሳቲ ባይንዳ ቡላ ሶሆን ካታማታ ኡባን ሄንꬃንቻቲ ባንታ ዉዴታ ሄሚዛሶሆ ዴማና።
JER 33:13 ጌዜ ቢታን፥ ኣርሼይ ዉሊዛሶ ባጋን ዲዛ ዙማታ ጋርሳን፥ ኔጌቤን ዲዛ ካታማታን፥ ቢኒያሜ ቢታን፥ ዬሩሳላሜ ዩሾን ዲዛ ሄራታኒኔ ዩሁዳ ካታማታን ሄንꬃንቻቲ ባንታ ዉዴ ሜሄታ ቆዳና።
JER 33:14 «ታኒ ኢስራኤሌ ኣሳሲኔ ዩሁዳ ኣሳስ ኦꬃና ጊዳ ሂዶታ ቃላ ፖላና ጋላሳቲ ያና።
JER 33:15 «ሄ ጋላሳታኒኔ ሄ ዎዴታን ታኒ ዳዊቴ ዛሬፔ ኢሲ ጺሎ ሃጋ ኣጪሳና፤ ኢዚ ሄ ቢታን ሱሬ ፒርዳኔ ጺሎቴꬅ ኦꬃና።
JER 33:16 ሄ ዎዴ ዩሁዳ ኣሳይ ኣታና፤ ዬሩሳላሜ ኣሳይካ ሳሮን ዳና፤ ኢዛካ፥ ‹ጎዳይ ኑስ ጺሎቴꬃ› ጋና።
JER 33:17 «ጎዳይ፥ ‹ዳዊቴ ዜሬꬃፌ ኢስራኤሌ ካዎቴꬃ ኣራታን ኡቲዛ ኣሲ ሙሌካ ꬋዬና።
JER 33:18 ሌዌ ዛሬፔ ጊዲዳ ቄሴታፔ ጹጌቲዛ ያርሾ፥ ካꬃ ያርሾኔ ሃራ ያርሾ ሺሻናስ ኡባ ዎዴ ታ ሲንꬃን ኤቂዛ ኣሲ ኢስታ ጋርሳፌ ꬋዬና› » ጌስ።
JER 33:19 ጎዳ ቃላይ ኤርማሳኮ ዪዴስ።
JER 33:20 ጎዳይ፥ «ታኒ ጋላሳሲኔ ኦማርሳስ ዎꬂዳ ዎጋ ኢንቴ ላሊዲ ጋላሲኔ ኦማርሲ ባንታስ ዎꬊዳ ዎጋን ኦꬆንታ ማላ ታ ጫቆዛ ኢንቴ ላላና ዳንዳይኮ፥
JER 33:21 ሄ ዎዴ ታኒ ዳዊቴሲኔ ታስ ቄሴቴꬃን ኦꬃና ማላ ሌዌታስ ጌሊዳ ጫቆ ቃላ ላላና ዳንዳዬቴስ፤ ሄሳፌ ጉዬ ዳዊቴ ዛሬፔ ካዎቴꬃ ኣራታን ኡታና ኣሲ ዴና።
JER 33:22 ታኒ ታ ኦሳንቻ ዳዊቴ ዛሬታኔ ታ ሲንꬃን ሃጋዚዛ ሌዌ ቆሞታ ቆዳይ ባይንዳ ሳሎ ጾሊንቴታ ማላኔ ማኪን ዉሮንታ ኣባ ሻሚንታ ማላ ዳርሳና» ጌስ።
JER 33:23 ጎዳ ቃላይ ቃሴካ ኤርማሳኮ ዪዲ፥
JER 33:24 «ሃ ኣሳይ፥ ‹ጎዳይ ባ ዶሪዳ ናምኡ ካዎቴꬃታ ዬጊ ኣጊዴስ› ጊ ሃሳይዛይሳ ኔ ኣኬካቤኪ? ኢስቲ ታ ዴራ ካꬊዲ ካዎቴꬃን ቆዲቤቴና» ጌስ።
JER 33:25 ጎዳይ፥ «ጋላሳሲኔ ኦማርሳስ፥ ሳሎሲኔ ሳኣስ ዎጋ ኤሲዳይ ታና ጊዶንታ ኣጊኮ፥
JER 33:26 ታኒ ያቆቤ ዜሬꬃታኔ ታ ኣይሌ ዳዊቴ ዜሬꬃታ ኣጋጋና፤ ዳዊቴ ዛሬፔ ኣብራሃሜ፥ ዪሳቃኔ ያቆቤ ዛሬታ ቦላ ካዎታና ማላ ዶሪኬ፤ ታኒ ኢስታስ ቃꬌታና፤ ኢስታፌ ዲኤቲዳይሳካ ኢስታስ ዛራና» ጌስ።
JER 34:1 ባቢሎኔ ካዎ ናቡካዳናጾሬይ፥ ኢዛ ኦላንቻቲ ኡባይኔ ኢዚ ሃሪዛ ካዎቴꬃ ጋርሳን ዲዛ ካዎቲኔ ዴሬ ኡባይ፥ ዬሩሳላሜኔ ኢዚ ዩሾን ዲዛ ካታማታ ኡባ ኦሊዛ ዎዴ ሃ ቃላይ ጎዳፔ ኤርማሳኮ ዪዴስ።
JER 34:2 ጎዳ ኢስራኤሌ ጾሳይ፥ «ዩሁዳ ካዎ ሴዴቂያሳኮ ባዳ፥ ‹ታኒ ሃ ካታማዮ ባቢሎኔ ካዎ ኩሼን ኣꬃ ኢማና፤ ኢዚካ ሃ ካታማዮ ታማን ጹጋና።
JER 34:3 ኔኒ ኢዛ ኩሼፔ ኬሳ ኤካካ፤ ኔኒ ዲኤታናኔ ኢዛስ ኣꬋ ኢሜታና፤ ኔኒ ኔ ኣይፌን ባቢሎኔ ካዎ ቤኣና፤ ኔናራ ኢዚ ቲራን ጋይቲ ሃሳያና፤ ሄሳፌ ጉዬ ኔኒ ባቢሎኔ ቢታ ባና።
JER 34:4 « ‹ጊዶ ኣቲን ዩሁዳ ካዎ ሴዴቂያሳ! ጎዳ ቃላ ሲያ! ኔኒ ኦላን ሃይቃካ፤
JER 34:5 ኔኒ ሳሮ ሃይቆ ሃይቃና፤ ኔፔ ሲንꬃን ካዎቲዳ ኔ ኣዋቲ ሃይቂን ኢስቲ ቦንቾስ ታማ ኤꬂዳ ማላ ኔኒ ሞጌቲዛ ጋላሲካ ኢስቲ ኔ ቦንቾስ ታማ ኤꬃና፤ ሂስቲዲ «ዎ! ዎ! ኑ ካዎዞ!» ጊዲ ኔስ ዬካና፤ ሃይሳ ሃ ቃላ ዮቲዳይ ታና ጎዳ› ጌስ ጋዳ ዮታ» ጊዴስ።
JER 34:6 ሄሳፌ ጉዬ ናቤ ኤርማሲ ሃ ቲንቢቴ ኡባ ዩሁዳ ካዎ ሴዴቂያሳስ ዬሩሳላሜን ዮቲዴስ።
JER 34:7 ሄ ዎዴ ባቢሎኔ ካዎ ኦላንቻቲ ዬሩሳላሜ ካታማኔ ዩሁዳን ኢስታ ዩሾይ ጊምቤቲ ኡቲን ኣቲዳ ላኪሼኔ ኣዜቄ ጌቴቲዛ ካታማታ ኦሊሼ ዴቴስ። ጊምቤቲ ኡቲዳ ካታማታፔ ኣቲዳይቲ ሃይታ ጻላ።
JER 34:8 ካዎ ሴዴቂያሲ ኣይሌቴꬃ ጋርሳን ዲዛይታ ላኣ ኬሳናስ ዬሩሳላሜን ዲዛ ኣሳ ኡባራ ጫቄቲዳፔ ጉዬ ጎዳ ቃላይ ኤርማሳኮ ዪዴስ።
JER 34:9 ኢሶይ ኢሶይ ኢብራዌ ጊዲ ኡቲዲ ኣቱማ ኣስ ጊዲን ዎይኮ ማጫ ኣስ ጊዲን ኣይሌቴꬃን ዲዛዴ ላኣ ዬዳና ቤሴስ፤ ኣይሁዳታፔ ኦኒካ ባ ኢሻ ኣይሌ ሂስቲ ሃራናስ ቤሴና።
JER 34:10 ሃይሳ ሃ ጫቆ ቃላን ኩዪዳ ሹሜቲኔ ዴሬይ ኡባይ ባንታ ኣቱማኔ ማጫ ኣይሌታ ኣይሌቴꬃፌ ኬሳናሲኔ ናምኣንꬆ ዛሪዲ ኣይሌቴꬃን ሃሮንታ ኣጋናስ ቃላ ቃቺዳ።
JER 34:11 ጊዶ ኣቲን ባንታ ቆፋ ላሚዲ ኣይሌቴꬃፌ ላኣ ዬዲዳ ባንታ ኣቱማኔ ማጫ ኣይሌታ ዛሪዲ ኣይሌቴꬃን ሃሪዳ።
JER 34:12 ሄሳ ጊሻስ ጎዳ ቃላይ ኤርማሳኮ ዪዴስ።
JER 34:13 ጎዳ ኢስራኤሌ ጾሳይ፥ «ታኒ ኢንቴ ኣዋታ ጊብጼፔ ኣይሌቴꬃ ቢታፌ ኬሲዳ ዎዴ ኢስታራ፥
JER 34:14 ‹ባና ኣይሌቴꬃስ ኣꬂ ኢሚዳ ኢንቴ ዳቦ ኢብራዌታ ኡሱፑን ላይꬅ ሃሪዳፔ ጉዬ ላፑንꬃ ላይꬃን ላኣ ዬዶ› ጋዳ ጫቄꬃዲስ፤ ጊዶ ኣቲን ኢንቴ ኣዋቲ ታ ጊዛዝ ሲዮንታ ኢጺዲ ባ ሃይꬅ ሃራሶ ዬጊዳ።
JER 34:15 ሃኢ ኢንቴ ማሮቴꬃን ጌሊዲ ታ ሲንꬃን ሎኦ ኦሶ ኦꬂዴታ፤ ኢንቴ ኢሶይ ኢሶይ ኢብራዌ ጊዲዳ ኢንቴ ዳቦቲ ኣይሌቴꬃፌ ላኣ ኬዛና ማላ ኣዋጂዴታ፤ ታ ሱንꬃይ ኢዛን ጼይጌቲዛ ኬꬃን ታ ሲንꬃን ጫቆ ቃላ ጌሊዴታ።
JER 34:16 ጊዶ ኣቲን ሃኢካ ኢንቴ ኢንቴ ቆፋ ላሚዲ ታ ሱንꬃ ቱኒሲዴታ። ኢንቴ ላኣ ዬዲዳ ኣቱማኔ ማጫ ኣይሌታ ዛሪዲ ኣይሌቴꬃን ሃሪዴታ» ጌስ።
JER 34:17 ሄሳ ጊሻስ ታኒ ጎዳይ፥ «ኢንቴ ታስ ኣዛዜቶንታ ኢጺዲ ኢንቴ ኢሻታኔ ኢንቴ ዳቦታ ኣይሌቴꬃፌ ላኣ ዬዲዛ ኣዋጃ ኣዋጂቤኬታ፤ ቤኢቴ ታኒ ኢንቴ ቦላ፥ ‹ላኣ› ኣዋጃ ኣዋጃና፤ ሄሲካ ኦላን፥ ኢታ ሃርጌኒኔ ኮሻን ኢንቴ ኩንዳና ኣዋጃ፤ ታኒ ኢንቴና ሳኣ ቦላ ዲዛ ካዎቴꬃቲ ሻጴቲዛ ሚሽ ኦꬃና።
JER 34:18 ታናራ ጫቄቲዳ ቃላ ሜንꬂዳይታኔ ታ ሲንꬃን ጫቄቲዳ ቃላ ፖሎንታ ኣሳታ ኢስቲ ማሪ ሹኪ ኢዛ ኣሾ ናምኡ ኬሲ ሻኪ ዎꬂዲ ኢዛ ጊዶራ ኣꬊዳይሳꬆ ታኒካ ኢስታ ኦꬃና።
JER 34:19 ዩሁዳኔ ዬሩሳላሜ ካሌꬂዛይታ፥ ካዎ ኬꬃ ሹሜታ፥ ቄሴታኔ ማራ ኣሻ ጊዶራ ኣꬊዳ ዴራ ኡባ፥
JER 34:20 ታኒ ኢስታ ሼምፖ ዎꬋናስ ኮይዛ ኢስታ ሞርኬታ ኩሼን ኣꬃ ኢማና፤ ኢስታ ኣሃይ ሳሎ ካፎታሲኔ ዶኣታስ ቁማ ጊዳና» ጌስ።
JER 34:21 ጎዳይ፥ «ታኒ ዩሁዳ ካዎ ሴዴቂያሳኔ ኢዛ ሹሜታ ኢስቲ ዎꬋና ኮይዛ ኢስታ ሞርኬታ ኩሼን ሄይቲካ ጉꬃ ዎዴስ ኢንቴና ኦሎ ኣጊዳ ባቢሎኔ ካዎ ኦላንቻታ ኩሼን ኣꬃ ኢማና።
JER 34:22 ታኒ ኢስታ ኣዛዛና፤ ኢስቲ ሃ ካታማዮ ኦላና ማላ ታኒ ዛራ ኤሃና፤ ኢስቲካ ካታማዮ ኦሊ ኦይካናኔ ታማን ጹጋና፤ ታኒ ዩሁዳ ካታማታ ኣሲ ባይንዳሶ ቡላ ኬሳና» ጌስ።
JER 35:1 ዩሁዳ ካዎ ኢዮሲያሳ ና ኢዮኣቄሜ ካዎቴꬃ ላይꬃን ጎዳ ቃላይ ኤርማሳኮ ዪዲ፥
JER 35:2 «ኤሬካቤታኮ ባዳ ኢስታ ሃ ጾሳ ኬꬅ ኤካ ያ፤ ኢስታ ኪፊሌ ጌልꬃዳ ኢስታስ ኡያናስ ዎይኔ ኡሹ ኢማ» ጊዴስ።
JER 35:3 ሂስቲን ታኒ ባዳ ኤሬካቤ ና፥ ኤርማሳ ናዛ ያኢዛኔ፥ ኢዛ ኢሻታኔ ኢዛ ኣቱማ ናይታ ኡባኔ ኤሬካቤ ዛሬታ ኡባ ጼይጋዲስ።
JER 35:4 ኢስታ ጾሳ ኬꬅ ኤሃዳ ሃናኔ ናይታ ኪፊሌ ጌልꬃዲስ፤ ሃናኔ ኣዋ ጌዴሊያይ ጾሳ ኣሳ፤ ሄ ኪፊሌዚ ፔንጌ ናጊዛ ሻሎሜ ና ማኢሳያ ኪፊሌፔ ቦላ ባጋራ ሹሜታ ኪፊሌ ማታን ዴስ።
JER 35:5 ሄሳፌ ጉዬ ታኒ ኤሬካቤታ ሲንꬃን ዎይኔ ኡሺ ኩሚዳ ኦቶታኔ ዋንጫታ ዎꬃዳ፥ «ሃይሳ ዎይኔ ኡሻ ኡዪቴ» ጋዲስ።
JER 35:6 ጊዶ ኣቲን ኢስቲ ዛሪዲ፥ «ኑኒ ዎይኔ ኡሹ ኡዮኮ፤ ኑ ኣዋ ኤሬካቤ ና ኢዮናዳቤይ ኑና፥ ‹ኢንቴካ ኢንቴ ናይቲካ ዎይኔ ኡሹ ሜርናስ ኡዮፒቴ፤
JER 35:7 ኬꬅ ኬጾፍቴ፤ ካꬅ ዜሮፒቴ፤ ዎይኔ ቶኮፍቴ፤ ኡባቶ ዱንካኔን ዲቴ፤ ሃይታፔ ኢሲናካ ኢንቴስ ዱፑ። ሄሳꬆ ኢንቴ ኦꬂኮ ኢንቴ ኢማꬃቴꬅ ዲዛ ቢታን ዳሮ ላይꬅ ዳና› ጊዴስ።
JER 35:8 ኑ ኣዋ ኤሬካቤ ና ኢዮናዳቤይ ኑና ኣዛዚዳ ኡባ ኑኒ ፖሊዶስ፤ ኑኒኔ ኑ ማቼቲ፥ ኑ ኣቱማ ናይቲኔ ኑ ማጫ ናይቲ ዎይኔ ኡሹ ኡዪ ኤሮኮ።
JER 35:9 ኑ ኢዛን ዳና ኬꬂካ ኬጺቤኮ፤ ዎይኔ ቶኪዛ ጋዴይ፥ ጎሻ ጋዴይ፥ ዜሬꬃ ካꬂካ ኑስ ዴና።
JER 35:10 ኑኒ ዱንካኔ ጊዶን ዴኢዶስ፤ ኑ ኣዋ ኢዮናዳቤይ ኑና ኣዛዚዳ ኡባ ኑ ናጊዶስ።
JER 35:11 ጊዶ ኣቲን ባቢሎኔ ካዎ ናቡካዳናጾሬይ ሃ ቢታዮ ዎራጂዳ ዎዴ፥ ‹ሃ ዪቴ ባቢሎኔ ኦላንቻታፔኔ ኣራሜ ኦላንቻታፔ ባቃቲ ኣታናስ ዬሩሳላሜ ቦስ› ጊዶስ፤ ሄሳ ጊሻስ ኑ ዬሩሳላሜን ኡቲዶስ» ጊዳ።
JER 35:12 ሄሳፌ ጉዬ ጎዳ ቃላይ ኤርማሳኮ ዪዴስ።
JER 35:13 ኡባፌ ዎልቃማ ጎዳ ኢስራኤሌ ጾሳይ፥ «ባዳ ዩሁዳ ኣሳሲኔ ዬሩሳላሜ ኣሳስ፥ ‹ታ ቃላ ናጋና ማላ ሃይሳፌ ታማሬኬቲ?› ጋ ዮታ።
JER 35:14 ኤሬካቤ ና ኢዮናዳቤይ ባ ናይታ ዎይኔ ኡሹ ኡዮንታ ማላ ኣዛዚዴስ፤ ሄ ኣዛዞይካ ናጌቲዴስ፤ ኢስቲ ባንታ ኣዋ ኣዛዞ ናጊዳ ጊሻስ ሃች ጋካናስ ዎይኔ ኡሹ ኡዬቴና፤ ኢንቴ ጊዲኮ ታ ኢንቴስ ዛራ ዛራዳ ዮቲንካ ኣዛዜቲቤኬታ።
JER 35:15 ታስ ኦሳንቻ ጊዲዳ ናቤታ ዛራ ዛራ ኢንቴኮ ኪታዲስ፤ ሂስታዳ፥ ‹ኢንቴ ኡባይካ ኢንቴ ኢታ ኦጌፔ ሃኢ ሲሚቴ፤ ኢንቴ ኦሶካ ሎኤꬂቴ፤ ኤቃ ጾሳታስ ጎይኖፍቴኔ ኦꬆፍቴ። ሂስቲኮ፥ ታኒ ጎዳይ ኢንቴሲኔ ኢንቴ ኣዋታስ ኢሚዳ ቢታን ኢንቴ ዳና› ጋዲስ። ኢንቴ ጊዲኮ ኢንቴ ሃይꬅ ታኮ ዬጊዲ ሲዪቤኬታ።
JER 35:16 ኤሬካቤ ና ኢዮናዳቤ ዜሬꬃቲ ኢስታ ኣዋይ ኢስታ ኣዛዚዳ ኣዛዞ ፖሊዳ፤ ጊዶ ኣቲን ሃ ኣሳይ ታስ ኣዛዜቲቤና» ጌስ።
JER 35:17 ሄሳ ጊሻስ ኡባፌ ዎልቃማ ጎዳ ኢስራኤሌ ጾሳይ፥ «ቤኢቴ፤ ታኒ ዩሁዳ ኣሳ ቦላኔ ዬሩሳላሜን ዲዛይታ ኡባ ቦላ ኤሃና ጊዳ ኢታ ሚሽ ታ ኤሃና፤ ጋሶይካ ታ ኢስታስ ዮቲን ሲዪቤቴና፤ ታ ኢስታ ጼይጊን ኢስቲ ታስ ኮዪቤቴና» ጌስ።
JER 35:18 ሄሳፌ ጉዬ ኤርማሲ ኤሬካቤ ዜሬꬃታስ፥ «ኡባፌ ዎልቃማ ጎዳ ኢስራኤሌ ጾሳይ ኢንቴና፥ ‹ኢንቴ ኢንቴ ኣዋ ኢዮናዳቤስ ኣዛዜቲዳ ጊሻስ፥ ኢዛ ዎጋ ካሊዳ ጊሻሲኔ ኢዚ ኣዛዚዳ ሚሽ ኡባካ ፖሊዳ ጊሻስ፥
JER 35:19 ኤሬካቤ ና ኢዮናዳቤይ ታስ ጎዳስ ኦꬂዛ ኣቱማ ኣሲ ኣይዴካ ꬋዬና› ጌስ» ጊዴስ።
JER 36:1 ዩሁዳ ካዎ ኢዮሲያሳ ና ኢዮኣቄሜይ ካዎቲዳ ኦይዳንꬆ ላይꬃን፥ ጎዳ ቃላይ ኤርማሳኮ ዪዲ፥
JER 36:2 «ጻꬃ ማጻፋ ኤካዳ ታኒ ኢዮሲያሳ ካዎቴꬃ ዎዴፔ ዶማዳ ታ ኔስ ዮቶ ኦይኮሶፌ ሃች ጋካናስ ኢስራኤሌ ቦላ፥ ዩሁዳ ቦላኔ ሃራ ካዎቴꬃታ ኡባ ቦላ ሃሳይዳ ቃላ ኡባ ጻፋ።
JER 36:3 ታኒ ዩሁዳ ኣሳ ቦላ ኤሃና ጋዳ ሃልቺዳ ቦሻ ኡባ ኣሳይ ሲዪዲ ኢሶይ ኢሶይ ባ ቢዛ ኢታ ኦጌፔ ሲማናኮ ኦኔ ኤሪዛይ? ታኒካ ኢስታ ቆሆኔ ኢስታ ናጋራ ኣቶ ጋና» ጊዴስ።
JER 36:4 ሄሳ ጊሻስ ኤርማሲ ኔሪያ ና ባሮኬ ጼይጊዴስ፤ ሂስቲዲ ጎዳይ ኢዛስ ዮቲዳይሳ ኡባ ባሮኬስ ዮቲን ኢዚ ጻꬃ ማጻፋን ጻፊዴስ።
JER 36:5 ሄሳፌ ጉዬ ኤርማሲ ባሮኬስ፥ «ታኒ ጎዳ ኬꬅ ጌሎንታ ማላ ዲጌቲዳ ጊሻስ ጌላና ዳንዳይኬ።
JER 36:6 ሄሳ ጊሻስ ኔኒ ኣሳይ ጾሚዛ ጋላስ ጎዳ ኬꬃ ባዳ፥ ታኒ ዮቲን፥ ኔኒ ጻꬃ ማጻፋን ጻፊዳ ጎዳ ቃላ ኢስታስ ናባባ፤ ባንታ ካታማታፔ ዪዳ ዩሁዳ ኣስ ኡባሲካ ናባባ።
JER 36:7 ሃይሳ ዴራ ቦላ ጎዳይ ዮቲዳ ሃንቆይኔ ቦሻይ ዴጾ ጊዲዳ ጊሻስ ኢስታፌ ኢሶይ ኢሶይ ባ ናጋራ ጎዳ ሲንꬃን ፓጺዲ ባንታ ኢታ ኦጌፔ ኢስቲ ሲማናኮ ኦኔ ኤሪዛይ?» ጊዴስ።
JER 36:8 ኔሪያ ና ባሮኬይ ናቤ ኤርማሲ ኢዛስ ዮቲዳይሳ ኡባ ፖሊዴስ፤ ጎዳ ኬꬃን ጎዳ ቃላ ጻꬃ ማጻፋፔ ናባቢዴስ።
JER 36:9 ዩሁዳ ካዎ ኢዮሲያሳ ና ኢዮኣቄሜይ ካዎቲዳ ኢቻሻንꬆ ላይꬃን፥ ኡዱፉንꬃ ኣጊናን፥ ዬሩሳላሜን ዲዛ ኣስ ኡባሲኔ ዩሁዳ ካታማታፔ ዪዳ ኣሳስ ጎዳ ሲንꬃን ጾማና ማላ ኣዋጂዳ።
JER 36:10 ባሮኬይ ጻꬃ ማጻፋን ጻፌቲዳ ኤርማሳ ቃላ ጎዳ ኬꬃፌ ፑዴ ባጋን ዲዛ ዛጎን፥ «ኦራꬃ ፔንጌ» ጌቴቲዛ ጾሳ ኬꬃ ፔንጌ ኣቻን ዲዛ ሳፋኔ ና ጻፌ ጋማሪያ ኪፊሌን ኤቂዲ ዴሬ ኡባስ ናባቢዴስ።
JER 36:11 ሳፋኔ ናዛ ጋማሪያ ና ሚኪያሲ ጻꬃ ማጻፋፔ ናባቤቲዳ ጎዳ ቃላ ኡባ ሲዪዲ፥
JER 36:12 ካዎቴꬃ ኬꬃን ጻፌዛ ኪፊሌ ቢዴስ፤ ሹሜቲ ኡባይ ጻፌ ኤልሻማይ፥ ሻማኤ ና ዳላያይ፥ ኣኪቦሬ ና ኤልናታኔይ፥ ሳፋኔ ና ጋማሪያይ፥ ሃናኒያ ና ሴዴቂያሲኔ ሃራ ሹሜቲ ኡባይ ሄን ኡቲዳ።
JER 36:13 ባሮኬይ ዴራስ ጻꬃ ማጻፋፔ ናባቢሺን ሲዪዳ ቃላ ኡባ ሚኪያሲ ኢስታስ ዮቲዳፔ ጉዬ፥
JER 36:14 ሹሜቲ ኡባይ ኩሼ ና፥ ሼሌሚያ ና፥ ናታኒያ ና ዩሁዳ፥ «ዴራስ ኔ ናባቢዳ ጻꬃ ማጻፋ ኤካዳ ያ» ጊዲ ባሮኬስ ኪታ ዬዲዳ፤ ኔሪያ ና ባሮኬይ ጻꬃ ማጻፋ ኤኪዲ ኢስታኮ ዪዴስ፤
JER 36:15 ኢስቲካ ኢዛ፥ «ኣኔ ኡታዳ ኑስ ማጻፋ ናባባ» ጊዳ። ባሮኬይካ ኢስታስ ናባቢዴስ።
JER 36:16 ኢስቲካ ቃላ ኡባ ሲዪዲ ባ ጋርሳን ኢሶይ ኢሳ ያሻቴꬃን ጼሊዲ ባሮኬስ ሃይሳ ሃ ቃላ ኡባ፥ «ኑኒ ካዎዛስ ዮታናስ ቤሴስ» ጊዳ።
JER 36:17 ቃሴካ ዛሪዲ፥ «ኔኒ ሃ ቃላ ኡባ ዎስታ ጻፊዳኮ ኑስ ዮታ፤ ኤርማሲ ባ ዶናን ዮቲን ጻፋዲ?» ጊዲ ባሮኬ ኦይቺዳ።
JER 36:18 ባሮኬይካ፥ «ኤ፥ ሃ ቃላ ኡባ ኤርማሲ ባ ዶናፔ ታስ ዮቲዴስ፤ ታኒካ ቃላሜን ጻꬃ ማጻፋን ጻፋዲስ» ጊ ዛሪዴስ።
JER 36:19 ሹሜቲ ባሮኬ፥ «ኔኒኔ ኤርማሲ ቢዲ ቆቴቲቴ፤ ኢንቴ ኣዋን ዲዛኮ ኦኒካ ኢንቴና ኤሮፖ» ጊዳ።
JER 36:20 ሹሜቲ ጻꬃ ማጻፋዛ ጻፌ ኤልሻማ ኪፊሌን ዎꬂዳፔ ጉዬ ካዎዚ ዲዛ ዛጎ ቢዲ ኢዛስ ሃኒዳ ኡባ ዮቲዳ።
JER 36:21 ሂስቲን ሄ ማጻፋ ኤሃና ማላ ካዎዚ ዩሁዳ ኪቲዴስ፤ ዩሁዳይካ ጻꬃ ማጻፋ ኤልሻማ ኪፊሌፔ ኤሂዲ ካዎዛሲኔ ኢዛ ዩሾን ኤቂዳ ሹሜታስ ናባቢዴስ።
JER 36:22 ኡዱፉንꬃ ኣጊናን ሳኣይ ባልጎ ጊዲዳ ጊሻስ ካዎዚ ባልጎ ኢዛን ጋምኢዛ ኬꬃን ዴስ፤ ሄ ዎዴ ኢዛ ሲንꬃን ጮጬ ታማይ ኤጺሼ ዴስ።
JER 36:23 ዩሁዳይ ሄꬑ ዎይኮ ኦይዱ ሶሆታ ናባቢዳፔ ጉዬ ካዎዚ ሄ ሶሆታ ጻꬃ ማጻፋፔ ጻፌዛ ማጋላን ቃንጺ ቃንጺዲ ኩሜꬃ ማጻፋይ ጹጌቲ ዉራና ጋካናስ ታማዛን ዬጊዴስ።
JER 36:24 ካዎዛ ጊዲን ዎይኮ ሄ ቃላ ሲዪዳ ሹሜቲ ኡባይ ኣይኮካ ያዪቤቴና፤ ባንታ ማይኦካ ዳኪቤቴና።
JER 36:25 ኤልናታኔይ፥ ዳላያይኔ ጋማሪያይ ካዎዚ ጻꬃ ማጻፋ ታማን ጹጎንታ ማላ ዎሲንካ ኢዚ ኢስታ ዎሳ ሲዪቤና።
JER 36:26 ሄሳፌካ ቦላራ ጻፌ ባሮኬኔ ናቤ ኤርማሳ ኦይኪ ቃቻና ማላ ካዎዛ ና ዬራሂምኤሌ፥ ኣዛሪኤሌ ና ሳራያኔ ኣብዲኤሌ ና ሼሌሚያ ኣዛዚዴስ፤ ጊዶ ኣቲን ጎዳይ ኢስታ ቆቲዴስ።
JER 36:27 ኤርማሲ ዮቲሺን ባሮኬይ ጻፊዳ ጻꬃ ማጻፋ ካዎዚ ጹጊዳፔ ጉዬ ጎዳ ቃላይ ኤርማሳኮ ዪዲ፥
JER 36:28 «ሃኢካ ሃራ ጻꬃ ማጻፋ ኤካዳ ዩሁዳ ካዎ ኢዮኣቄሜይ ካሴ ጹጊዳ ጻꬃ ማጻፋ ጊዶን ዲዛ ቃላ ኡባ ጻፋ።
JER 36:29 ቃሴ ዩሁዳ ካዎ ኢዮኣቄሜስ፥ ‹ባቢሎኔ ካዎይ ቱማፔ ዪዲ ሃ ቢታ ꬋይሳና፤ ኢዚን ዲዛ ኣሳኔ ሜሄ ዉርሳና ጋዳ ኣይስ ጻፋዲ?› ጋዳ ጻꬃ ማጻፋ ጹጋዳሳ» ጌስ ጎዳይ ጋዳ ዮታ።
JER 36:30 ሄሳ ጊሻስ ጎዳይ ዩሁዳ ካዎ ኢዮኣቄሜ ጊሻስ፥ «ዳዊቴ ካዎቴꬃ ኣራታን ኡታናይ ኢዛ ዛሬፔ ቤቴና፤ ኢዛ ኣሃይካ ጋላሳ ኣዋ ሴላሲኔ ኦማርሳ ኬንቾስ ዬጌቲ ኣታና።
JER 36:31 ኢዛኔ ኢዛ ናይታ፥ ኢዛ ሹሜታ ኢስታ ኢታቴꬃ ጊሻስ ታ ኢስታ ቃጻያና፤ ታ ጊዛዝ ኢስቲ ሲዮንታ ኢጺዳ ጊሻስ ታ ኢስታ ቦላ ኤሃና ጊዳ ባሽ ኡባ ኢስታ ቦላ፥ ዬሩሳላሜኒኔ ዩሁዳን ዲዛ ኣሳ ቦላ ኤሃና» ጌስ።
JER 36:32 ሄሳፌ ጉዬ ኤርማሲ ሃራ ጻꬃ ማጻፋ ኤኪዲ ኔሪያ ና ጻፌ ባሮኬስ ኢሚዴስ፤ ሂስቲን ባሮኬይ ዩሁዳ ካዎ ኢዮኣቄሜይ ታማን ጹጊዳ ጻꬃ ማጻፋ ቃላ ኡባ ኤርማሲ ኢዛስ ዶናን ዮቲን ጻፊዴስ። ቃሴ ኤርማሲ ሄሳ ሚሳቲዛ ሃራ ቃላካ ጉጂን ኡባካ ባሮኬይ ጻፊዴስ።
JER 37:1 ባቢሎኔ ካዎ ናቡካዳናጾሬይ ኢዮኣቄሜ ና ኢዮኣኪኔ ሶሆን ኢዮሲያሳ ና ሴዴቂያሳ ዩሁዳ ቢታን ካዎꬂዴስ።
JER 37:2 ጊዶ ኣቲን ሴዴቂያሲ፥ ኢዛ ሹሜቲኔ ዴሬ ኣሳይ ኡባይ ጎዳይ ናቤ ኤርማሳ ባጋራ ዮቲዳ ቃላስ ኣዛዜቲቤቴና።
JER 37:3 ካዎ ሴዴቂያሲ፥ ሼሌሚያ ና ዬካሌኔ ማኢሳያ ና ቄሴ ሶፎናሳ ናቤ ኤርማሳኮ፥ «ጎዳ ኑ ጾሳ ኑስ ዎሳ» ጊዲ ኪቲዴስ።
JER 37:4 ሄ ዎዴ ኤርማሲ ቡሮ ቃሾ ኬꬅ ጌሎንታ ዲዛ ጊሻስ ባ ሼኔ ማላ ሲሜሬቲሼ ዴስ።
JER 37:5 ጊብጼ ካዎ ኦላንቻቲ ጊብጼፔ ኬዚዲ ዪዛይሳ ዬሩሳላሜ ጊዶꬂዳ ባቢሎኔ ኦላንቻቲ ሲዪዳ ዎዴ ኢስቲ ዬሩሳላሜፔ ኣጊዲ ጉዬ ሲሚዳ።
JER 37:6 ሄሳፌ ጉዬ ጎዳ ቃላይ ናቤ ኤርማሳኮ ዪዲ፥
JER 37:7 ጎዳ ኢስራኤሌ ጾሳይ፥ «ታና ኢንቴ ኦይቻና ማላ ኢንቴና ኪቲዳ ዩሁዳ ካዎስ፥ ‹ቤኢቴ፥ ኢንቴና ማዳናስ ኬዚዳ ጊብጼ ካዎ ኦላንቻቲ ባንታ ቢታ ጉዬ ሲሚ ባና።
JER 37:8 ባቢሎኔ ኦላንቻቲካ ሲሚ ዪዲ ሃኖ ሃ ካታማዮ ኦሊ ኦይካናኔ ኢዞ ጹጋና› ጊቴ» ጌስ።
JER 37:9 ጎዳይ፥ « ‹ባቢሎኔ ኦላንቻቲ ኑና ቱማፔ ኣጊ ቢዳ› ጊዲ ቆፖፍቴ፤ ኢስቲ ኣጊ ቦንታ ጊሻስ ኢንቴና ኢንቴርካ ባሌꬆፍቴ።
JER 37:10 ኢንቴናራ ኦሌቲዛ ባቢሎኔ ኦላንቻታ ኢንቴ ጾኒን ኢስታ ዱንካኔ ጊዶን ማዱንጺዳ ኣሲ ጻላ ኣቲኮካ ሄይቲ ዪዲ ሃኖ ሃ ካታማዮ ጹጋና» ጌስ።
JER 37:11 ባቢሎኔ ኦላንቻቲ ጊብጼ ካዎ ኦላንቻታ ጋሶን ዬሩሳላሜ ዬጊ ኬዚዳፔ ጉዬ፥
JER 37:12 ሄ ዎዴ ኤርማሲ ዴራ ጊዶን ባና ጋኪዛ ጺንጾ ኤካናስ ቢኒያሜ ቢታ ባናስ ዬሩሳላሜፔ ዴንዲዴስ።
JER 37:13 ጊዶ ኣቲን ኢዚ ቢዲ ቢኒያሜ ፔንጌ ጋኪሺን ዛቤታ ሃላቃ ሃናኒያ ናዛ ሼሌሚያ ና ዪሪያይ ኢዛ፥ «ኔኒ ዴራ ካዳዳ ባቢሎኔ ኣሳኮ ባና ጋሳ!» ጊዲ ኦይኪዴስ።
JER 37:14 ኤርማሲካ፥ «ኔኒ ጊዛይሲ ዎርዶ፤ ታኒ ካዳዳ ባቢሎኔ ቢዛ ኣስ ጊዲኬ» ጊዴስ፤ ጊዶ ኣቲን ዪሪያይ ኢዚ ጊዛይሳ ሲዮንታ ኢጺዲ ኤርማሳ ኦይኪ ኤኪዲ ሹሜታኮ ኤፊዴስ።
JER 37:15 ሹሜቲካ ኬሂ ሃንቄቲዲ ኤርማሳ ዋꬊዳ፤ ሄሳፌ ጉዬ ኢስቲ ቃሾ ኬꬅ ሂስቲዳ ጻፌ ዮናታኔ ኬꬃን ኤፊ ቃቺዳ።
JER 37:16 ኤርማሲ ሄን ቢታ ጋርሳን ዲዛ ቃሾ ኬꬃን ዳሮ ዎዴ ጋምኢዴስ።
JER 37:17 ሄሳፌ ጉዬ ካዎ ሴዴቂያሲ ኣስ ኪቲዲ ኤርማሳ ባ ዲዛሶ ካዎ ኬꬅ ጼይጊ ኤሂሲዴስ፤ ኢዛ ጻላ ኤፊዲ፥ «ጎዳፔ ዪዳ ቃላይ ኔኮን ዲዜ?» ጊ ኦይቺዴስ። ኤርማሲ ዛሪዲ፥ «ኤ ዴስ፤ ኔኒ ባቢሎኔ ካዎ ኩሼን ኣꬋ ኢሜታና» ጊዴስ።
JER 37:18 ቃሴካ ኤርማሲ ካዎ ሴዴቂያሳስ፥ «ኢንቴ ታና ቃሾ ኬꬃን ዬጋናስ ታኒ ኢንቴ ቦላ፥ ኢንቴስ ኦꬂዛ ሹሜታ ቦላ ዎይኮ ሃ ኣሳ ቦላ ኣይ ሞሮ ኦꬃዲና?
JER 37:19 ‹ኣኔ ባቢሎኔ ካዎይ ኢንቴናኔ ሃ ቢታዮ ዪዲ ኦሌና› ጊዲ ኢንቴስ ቲንቢቴ ዮቲዳ ናቤቲ ሃኢ ኣዋን ዲዞ?
JER 37:20 ሄሳ ጊሻስ ታ ጎዳዉ ካዎ! ታ ጊዛዝ ኤዝጋ! ታ ኔና ዎሳይስ። ታኒ ሄን ሃይቆንታ ማላ ጻፌ ዮናታኔ ሶ ዛራ ዬዶፋ» ጊዴስ።
JER 37:21 ካዎ ሴዴቂያሲ ዛቤ ናጊዛይታ ዛጎን ዳና ማላኔ ሄ ካታማይን ዲዛ ካꬂ ዉራናሼ ጋካናስ ካꬅ ካꬂዛይታ ሄራፔ ጋላስ ጋላስ ኢሲ ኢሲ ቡዴናይ ኢዛስ ኢሜታና ማላ ኣዛዚዴስ፤ ሄሳ ጊሻስ ኤርማሲ ዛቤ ናጊዛይታ ዛጎን ዴኢዴስ።
JER 38:1 ማታኔ ና ሻፋጺያይ፥ ፓሽኩሬ ና ጎዶሊያሳይ፥ ሼሌሚያ ና ዬካሌይኔ ማልኪያ ና ፓሽኩሬይ ኤርማሲ ኣስ ኡባስ ዮቲዳ ቃላታ ሲዪዳ።
JER 38:2 ጎዳይ፥ «ሃኖ ካታማይን ኣቲዛ ኦኒካ ኦላን፥ ኮሻኒኔ ኢታ ሃርጌን ሃይቃና፤ ጊዶ ኣቲን ባቢሎኔታኮ ቢዛ ኦኒካ ሃይቄና፤ ባ ሁኤ ኣሻና፤ ፓጻካ ዳና» ጌስ።
JER 38:3 ቃሴካ ጎዳይ፥ «ሃና ካታማያ ቱማፔ ባቢሎኔ ካዎ ኦላንቻታ ኩሼን ኣꬋ ኢሜታና፤ ኢስቲካ ኢዞ ሃራና» ጊዴስ።
JER 38:4 ሄሳፌ ጉዬ ሹሜቲ ካዎዛኮ ቢዲ፥ «ሃይሲ ኣዴዚ ሃ ካታማይን ኣቲዳ ኦላንቻታኔ ዴራ ሂዶታ ቃንጺሲዛዴ ጊዲዳ ጊሻስ ኢዚ ሃይቃናስ ቤሴስ፤ ሃይሲ ኣዴዚ ዴሬይ ꬋያና ማላ ኮዬስ ኣቲን ዴራስ ሎኦ ሚሽ ኮዬና» ጊዳ።
JER 38:5 ካዎ ሴዴቂያሲ ዛሪዲ፥ «ኢዚ ኢንቴ ኩሼን ዴስ፤ ካዎዚ ኢንቴናራ ኤቄቲዲ ኣይኮካ ኦꬃና ዳንዳዬና» ጊዴስ።
JER 38:6 ሂስቲን ኢስቲ ኤርማሳ ካዎ ኬꬃ ናጊዛ ዛቤታ ዱቡሻን ዲዛ ካዎ ና ማልኪያ ሃꬃ ኦላን ዬጊዳ፤ ኢስቲ ኢዛ ዎዶሮራ ዱጌ ኦላን ዎꬂዳ፤ ሄ ዎዴ ሄ ኦላዛን ኡርቃፌ ኣቲን ሃꬂ ዴና፤ ኤርማሲ ሄ ኡርቃን ሚቴቲዴስ።
JER 38:7 ጊዶ ኣቲን ቶጵያ ኣስ ጊዲዳ ካዎ ኬꬃን ኦꬂዛ ኣቢሜሌኬ ጌቴቲዛ ኢሲ ጉንዱላይ ኤርማሲ ኦላን ዬጌቲዳይሳ ሲዪዴስ፤ ሄ ዎዴ ካዎይ ቢኒያሜ ፔንጌን ኡቲ ዲሺን፥
JER 38:8 ኣቢሜሌኬይ ካዎ ኬꬃፌ ኬዚዲ፥
JER 38:9 «ታ ጎዳዉ ካዎ! ሃይቲ ኣሳቲ ናቤ ኤርማሳ ቦላ ኬሂ ኢታ ሚሽ ኦꬂዳ፤ ሃኖ ካታማይን ካꬂ ꬋይዳ ዎዴን ኢዚ ኮሻን ሃይቃና ማላ ኦላን ዬጊዳ» ጊዴስ።
JER 38:10 ካዎዚካ ቶጵያ ኣስ ኣቢሜሌኬስ፥ «ሄꬑ ታሙ ኣስ ኔናራ ኤካ ባዳ ኤርማሲ ሃይቆንታ ዲሺን ኦላፌ ኬሳ» ጊ ኣዛዚዴስ።
JER 38:11 ሂስቲን ኣቢሜሌኬይ ኣሳ ባናራ ኤኪዲ ካዎቴꬃ ሚንጃ ኬꬃን ጋርሳ ባጋራ ዲዛ ኪፊላኮ ቢዴስ፤ ሄፔ ጬጋ ጫርቃኔ ጬጋ ማይኦ ኤኪ ዎዶሮን ቃቺዲ ዱጌ ኤርማሳስ ዬጊዴስ።
JER 38:12 ቶጵያ ኣስ ኣቢሜሌኬይ ኤርማሳ ኦላ ጊዶ ዱጌ ጼይጊዲ፥ «ኔና ቁምኦንታ ማላ ሃይሳ ጬጋ ጫርቃይኔ ጬጋ ማይኦይ ኢዛ ቦላ ጻጼቲዳ ዎዶሮዛ ኔ ሾጳ ጊዶ ጌልꬃ» ጊዴስ። ኤርማሲካ ኢዚ ጎይሳꬆ ኦꬂዴስ።
JER 38:13 ሂስቲን ሄ ዎዶሮዛን ኢዛ ኦላፌ ኬሲዳ፤ ኤርማሲካ ዛቤታ ዛጎን ጋምኢዴስ።
JER 38:14 ሄሳፌ ጉዬ ካዎ ሴዴቂያሲ ኤርማሳ ኪቲ ኤሂሲዲ ጎዳ ኬꬅ ጌሊዛ ሄꬓንꬆ ፔንጌ ማታን ኢዛስ፥ «ታኒ ኢሲ ሚሽ ኔና ኦይቻይስ፤ ኔኒ ታፔ ኣይኮካ ቆቶፋ» ጊዴስ።
JER 38:15 ኤርማሲ ዛሪዲ ሴዴቂያሳስ፥ «ታ ኔስ ዛሮ ኢሚኮ ኔ ታና ዎꬊኪ? ታ ዞሪን ኔ ኤካካ» ጊዴስ።
JER 38:16 ካዎ ሴዴቂያሲ ኤርማሳስ፥ «ሼምፖ ኑስ ኢሚዳ ዴኦ ጾሲ ቤኢን ታ ኔና ዎꬊኬ፤ ኔና ዎꬋናስ ኮይዛይታስካ ታ ኣꬃ ኢሚኬ» ጊዲ ቆታን ጫቂዴስ።
JER 38:17 ኤርማሲ ሴዴቂያሳስ ዛሪዲ፥ «ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎ ኦላ ሃላቃታስ ኔ ኩሼ ኔኒ ኢሚኮ ኔ ሼምፖይ ኣታና፤ ሃና ካታማያካ ጹጌቱኩ፤ ኔኒኔ ኔሶ ኣሳይ ሼምፖራ ፓጻ ዳና።
JER 38:18 ጊዶ ኣቲን ባቢሎኔ ካዎ ኦላ ሃላቃታስ ኔኒ ኔ ኩሼ ኢሞንታ ኢጺኮ ሃና ካታማያ ባቢሎኔታስ ኣꬋ ኢሜታና፤ ኢስቲካ ኢዞ ጹጋና፤ ኔኒካ ኢስታ ኩሼፔ ኬሳ ኤካካ› ጌስ» ጊዴስ።
JER 38:19 ቃሴካ ካዎ ሴዴቂያሲ ኤርማሳስ፥ «ባቢሎኔ ባቃቲ ቢዳ ኣይሁዳቲ ታ ቦላ ቂꬊ ካኦንታ ማላ ታና ኢስታ ኩሼን ኣꬂ ኢማናኮ ጋዳ ባባይስ» ጊዴስ።
JER 38:20 ኤርማሲካ ዛሪዲ፥ «ኣይኮይ ባዋ! ኢስቲ ኔና ኣꬂ ኢሜቴና፤ ታ ኔስ ዮቲዛ ጎዳ ቃላስ ኣዛዜታ፤ ሄሲካ ኔስ ሎኦ ጊዳና፤ ኔ ሼምፖይካ ኣታና።
JER 38:21 ጊዶ ኣቲን ኔኒ ኩሼ ኢሞንታ ኢጺኮ ጎዳይ ታና ቤሲዳ ሚሺ ዴስ።
JER 38:22 ዩሁዳ ካዎቴꬃ ኬꬃን ኣቲዳ ማጫሳቲ ኡባይ ዲኤቲዲ ባቢሎኔ ሹሜታስ ኣꬊ ኢሜታና፤ ሄ ማጫሳቲ፥ « ‹ኔኒ ኢስታን ኣማኔቲዳ ኔ ሲቆቲ ኔና ባሌꬂዳኔ ጾኒዳ፤ ኔ ቶሆይ ኡርቃን ሚቴቲዴስ፤ ኔ ሲቆቲካ ኔና ዬጊ ቢዳ› ጋና።
JER 38:23 «ኔ ማቼቲኔ ኔ ናይቲ ኡባይ ባቢሎኔ ኣሳስ ኣꬊ ኢሜታና፤ ኔኒካ ባቢሎኔ ካዎ ኩሼን ኦይኬታና ኣቲን ኢስታ ኩሼፔ ኬሳ ኤካካ፤ ሃና ካታማያካ ታማን ጹጌታና» ጊዴስ።
JER 38:24 ሴዴቂያሲ ኤርማሳስ ዛሪዲ፥ «ሃይሳ ኑ ሃሳይዳይሳ ኦኒካ ኤሮፖ፤ ኣካይ ጊኮ ኔ ሃይቃና።
JER 38:25 ሹሜቲ ታ ኔናራ ሃሳይዳይሳ ሲዪ ኔኮ ዪዲ፥ ‹ኔኒ ካዎዛ ኣይ ጊን ኢዚ ኔና ኣይ ጊዳኮ ኑስ ዮታ፤ ቆቶንታ ኑስ ዮታ፤ ኔ ሂስቶንታ ኣጊኮ ኑ ኔና ዎꬋና› ኢስቲ ጊኮ፥
JER 38:26 ኔኒ ኢስታስ፥ ‹ታኒ ሄን ሃይቆንታ ማላ ታና ዛራዳ ዮናታኔ ሶ ዬዶፋ ጋዳ ዎሳዲስ› ጋዳ ዮታ» ጊዴስ።
JER 38:27 ሄሳፌ ጉዬ ሹሜቲ ኡባይ ኤርማሳኮ ዪዲ ኢዛ ኦይቺዳ፤ ኢዚካ ካዎዚ ኢዛ ኣዛዚዳ ቃላ ኡባ ኢስታስ ዮቲዴስ። ኢዚ ካዎዛራ ሃሳይዳይሳ ሲዪዳ ኢሲ ኣሲካ ባይንዳ ጊሻስ ሄሳፌ ቦላራ ኢዛ ሃሳይሲቤቴና።
JER 38:28 ዬሩሳላሜይ ኦይኬታና ጋካናስ ኤርማሲ ዛቤታ ዛጎን ጋምኢዴስ።
JER 39:1 ሴዴቂያሲ ዩሁዳን ካዎቲዳ ኡዱፉንꬆ ላይꬃን፥ ታማንꬃ ኣጊናን፥ ባቢሎኔ ካዎ ናቡካዳናጾሬይኔ ኢዛ ኦላንቻቲ ኡባይ ዪዲ ዬሩሳላሜ ዎራጂ ጊዶꬂ ኦይኪዳ።
JER 39:2 ሴዴቂያሲ ካዎቲዳ ታማኔ ኢሲንꬃ ላይꬃን፥ ኦይዳንꬆ ኣጊናን፥ ኡዱፉንꬃ ጋላሳን ባቢሎኔ ኦላንቻቲ ካታማይ ጊምቤ ሜንꬂዳ።
JER 39:3 ሄ ዎዴ ባቢሎኔ ካዎ ሹሜቲ፥ ኔቦ ዴሬ ኣስ ኔሪጋሌ-ሳርሳሬይ፥ ዋና ሹሜ ኔቦ ሳርሲኪኔይ፥ ꬎቃ ሹሜ ኔሪጋሌ-ሳርሳሬይ፥ ሄሳꬆካ ሃራ ባቢሎኔ ሹሜቲ ጌሊዲ ጊዶ ፔንጌን ኡቲዳ።
JER 39:4 ዩሁዳ ካዎ ሴዴቂያሲኔ ኢዛ ኦላንቻቲ ኡባይ ባቢሎኔ ኦላንቻታ ቤኢዳ ዎዴ ባቃቲዳ፤ ኦማርሳራ ካዎይ ዶዛ ቶኪዛሶሆ ባጋራ ናምኡ ጊምቤታፔ ጊዶራ ካታማፔ ኬዚዲ ዮርዳኖሴ ዙሌ ቢዳ።
JER 39:5 ጊዶ ኣቲን ባቢሎኔ ኦላንቻቲ ኢስታ ጉዬራ ዬዴꬂ ኤኪዲ ኢያርኮ ዴምባን ጋኪ ኦይኪዳ፤ ሴዴቂያሲ ዲኢዲ ሃማቴ ቢታን ኤሬቢላ ካታማን ዲዛ ካዎ ናቡካዳናጾሬኮ ኤፊዳ፤ ሂስቲን ካዎ ናቡካዳናጾሬይ ሄን ሴዴቂያሳ ቦላ ፒርዲዴስ።
JER 39:6 ባቢሎኔ ካዎይ ኤሬቢላ ካታማን ሴዴቂያሳ ኣቱማ ናይታ ኢዚ ቤዪሺን ሲፊዴስ፤ ዩሁዳን ዲዛ ሹሜታ ኡባካ ዎꬊዴስ።
JER 39:7 ሴዴቂያሳ ኣይፌታ ዎጪ ኬሲዲ ኢዛ ባቢሎኔ ቢታ ኤፋናስ ጻርቂማላ ሳንሳላታን ቃቺዴስ።
JER 39:8 ሄ ዎዴ ባቢሎኔ ኦላንቻቲ ካዎ ኬꬃኔ ኣሳይ ዲዛ ኬꬃታ ኡባ ታማን ጹጊዳ፤ ዬሩሳላሜ ጊምቤካ ላሊዳ።
JER 39:9 ባቢሎኔ ካዎ ቦንቾ ናጊዛ ዛቤታ ኣዛዚዛ ናቡዛራዳኔይ ካታማን ኣቲዳ ኣሳታኔ ካዲዲ ባናን ጋጊዳ ኣሳታ ኡባ ኢሲፌ ዲኢዲ ባቢሎኔ ቢታ ኤፊዴስ።
JER 39:10 ጊዶ ኣቲን ካዎ ቦንቾ ናጊዛ ዛቤታ ኣዛዚዛ ናቡዛራዳኔይ ኣይኮይካ ኢስታስ ባይንዳ ማንቆታፔ ጉꬃታ ዩሁዳን ኣጊዲ፥ ኢስታስ ዎይኔ ቱራ ሶሆታኔ ጎዪዛ ጋዴታ ኢሚዴስ።
JER 39:11 ባቢሎኔ ካዎ ናቡካዳናጾሬይ ካዎ ቦንቾ ናጊዛ ዛቤታ ኣዛዚዛ ናቡዛራዳኔ ባጋራ ኤርማሳ ጊሻስ፥
JER 39:12 «ኢዛ ኤካዳ ቃላያ፤ ኢዚ ኮይዛይሳ ኡባ ፖላ ኣቲን ቆሆፓ» ጊዲ ኣዛዞ ኢሚዴስ።
JER 39:13 ሄሳ ጊሻስ ናቡዛራዳኔይ፥ ዋና ሹሜ ኔቡሻዚባኔ፥ ꬎቃ ሹሜ ኔሪጋሌ-ሳርሳሬ ሄሳꬆካ ሃራ ባቢሎኔ ካዎ ሹሜታ ኡባ፥
JER 39:14 ኪቲዲ ኤርማሳ ዛቤታ ዛጎፔ ኬሲዳ፤ ሂስቲዲ ሳፋኔ ና፥ ኣኪቃሜ ና ጎዶሊያሳይ ባ ሶ ኤፋና ማላ ሃዳሪዳ፤ ሄሳፌ ዴንዲዳይሳን ኤርማሲካ ባ ዴሬ ኣሳራ ኢሲፌ ዴኢዴስ።
JER 39:15 ኤርማሲ ዛቤታ ዛጎን ቃሼቲ ዲዛ ዎዴ ጎዳ ቃላይ ኢዛኮ ዪዴስ፤
JER 39:16 ኡባፌ ዎልቃማ ጎዳ ኢስራኤሌ ጾሳይ ኤርማሲ ቢዲ ቶጵያ ዴሬ ኣስ ጊዲዳ ኣቢሜሌኬስ፥ «ሃይሳፌ ካሴ ታኒ ዮቲዳ ማላ ሃ ካታማይ ቦላ ዲች ጊዶንታ ባሽ ኤሃዳ ታ ቃላ ታ ፖላና፤ ሄሲ ኡባይ ሃኒዛ ዎዴ ኔኒካ ሃ ካታማን ኡታዳ ኔ ኣይፌን ቤኣና።
JER 39:17 ጊዶ ኣቲን ሄ ጋላሳን ታኒ ኔና ኣሻና፤ ኔኒ ያዪዛ ኣሳታ ኩሼን ኣꬋ ኢሜታካ።
JER 39:18 ታኒ ኔና ኣሻና፤ ኔኒ ታናን ኣማኔቲዳ ጊሻስ ሼምፖራ ፓጻ ኣታና ኣቲን ማሻን ሲፌታካ» ጊዲ ዮታና ማላ ኣዛዚዴስ።
JER 40:1 ካዎ ቦንቾ ናጊዛ ዛቤታ ኣዛዚዛ ናቡዛራዳኔይ ኤርማሲ ዬሩሳላሜፔኔ ዩሁዳፔ ዲኤቲዲ ባቢሎኔ ቢታ ቢዛ ኣሳታ ጊዶን ኤራማን ሳንሳላታን ቃሼቲ ዲዛይሳ ቤኢዲ ኢዛ ቃሾፔ ቢርሺሲዴስ፤ ሄሳፌ ጉዬ ጎዳ ቃላይ ኤርማሳኮ ዪዴስ።
JER 40:2 ካዎ ቦንቾ ናጊዛ ዛቤታ ኣዛዚዛይሲ ኤርማሳ ጻላ ኤኪዲ ኢዛስ፥ «ጎዳ ኔ ጾሳይ ሃይሲ ባሻይ ሃ ቢታይ ቦላ ያናይሳ ዮቲዴስ።
JER 40:3 ሃኢካ ጎዳይ ባ ጊዳ ማላ ኤሂዲ ባ ቃላ ፖሊዴስ፤ ሃይሲ ኡባይ ሃኒዳይ ኢንቴ ጎዳ ቦላ ናጋራ ኦꬂዳ ጊሻሲኔ ኢዛስ ኣዛዜቶንታ ኢጺዳ ጊሻሳ።
JER 40:4 ቤያ፥ ሃኢ ኔ ቃሼታ ኡቲዳ ሳንሳላታ ኔ ኩሼፔ ቢርሻዲስ፤ ታናራ ባቢሎኔ ቢታ ባና ጊኮ ኣꬋ፤ ኔ ዶሲዛ ጊዲኮ ታናራ ባቢሎኔ ዬꬋ፤ ታኒ ኔና ቃላያና፤ ኔ ዶሶንታ ኣጊኮ ቦፓ፤ ቤኣ ዴሬ ኡባይ ኔ ሲንꬃን ዴስ፤ ኔ ዶሲዳሶ ባ» ጊዴስ።
JER 40:5 ኤርማሲ ቡሮ ዛሮ ኢሞንታ ዲሺን ናቡዛራዳኔይ ጉጂዲ፥ «ባቢሎኔ ካዎ ናቡካዳናጾሬይ ኢዛ ዩሁዳ ካታማታ ቦላ ሹሚ ዎꬂዳ ሳፋኔ ና፥ ኣኪቃሜ ና ጎዶሊያሳኮ ባ፤ ኢዛራ ኢሲፌ ዴራ ጊዶን ኡታ፤ ዎይኮ ኔና ሎኢዛሶ ባ» ጊዴስ። ዛቤታ ኣዛዚዛይሲ ኢሞታኔ ሺንቄ ኢሚዲ ኢዛ ሞይዚዴስ።
JER 40:6 ኤርማሲ ሚጺጳን ዲዛ ኣኪቃሜ ና ጎዶሊያሳኮ ቢዴስ፤ ኢዛራ ኢሲፌ ሄን ኣቲዳ ዴራ ጊዶን ዴኢዴስ።
JER 40:7 ዩሁዳፔ ኢሲ ኢሲ ኣማርዳ ኦላ ቃራቲኔ ኦላንቻቲ ባንታ ኩሼ ባቢሎኔ ካዎስ ኢሞንታ ጊሻስ ዴምባን ላሌቲ ኡቲዳ፤ ባቢሎኔ ካዎይ ኣኪቃሜ ና ጎዶሊያሳይ ሄ ቢታዮ ሃራና ማላ ሹሚዳይሳኔ ዲኤቲዲ ባቢሎኔ ቦንታ ኣቲዳ ማንቆ ኣቱማሳታ፥ ማጫሳታኔ ናይታ ቦላ ማታ ኢሚ ዎꬂዳይሳ ሲዪዴስ።
JER 40:8 ሂስቲዲ ናታኒያ ና ኢስማኤሌይ፥ ቃሬሃ ናይቲ ዮሃናኔይኔ ዮናታኔይ፥ ታኒሁሜታ ና ሳራያ፥ ናጾፌ ካታማፔ ዪዳ ኤፋያ ናይቲኔ ማኢካቴ ካታማ ኣስ ያኢዛኔይ ባንታ ኦላንቻታ ኡባራ ጎዶሊያሳኮ ሚጺጳ ዪዳ።
JER 40:9 ሳፋኔ ና ኣኪቃሜ ና ጎዶሊያሳይ ኢስታሲኔ ኢስታ ኦላንቻታስ፥ «ባቢሎኔታስ ሃሬታናስ ያዮፍቴ፤ ሃኖ ቢታይን ኡቲዲ ባቢሎኔ ካዎስ ሃጋዚቴ፤ ሂስቲኮ ኡባ ሚሺ ኢንቴስ ሎኦ ጊዳና።
JER 40:10 ታኒ ሚጺጳን ኡታዳ ባቢሎኔ ቢታፌ ኑኮ ዪዛ ኣሳታራ ኢንቴ ጊሻስ ሃሳያና፤ ኢንቴ ጊዲኮ ኢንቴ ዲዛ ሄራን ሄራን ዎይኔ፥ ዎጋራ ዛይቴኔ ቦኔ ካꬃ ኣይፌ ኡባ ሺሺቴ» ጊዲ ቃላ ጌሊዴስ።
JER 40:11 ሄ ዎዴ ሞኣቤን፥ ኣሞኔን፥ ኤዶሜኒኔ ሃራ ቢታታን ዲዛ ኣይሁዳ ኡባይ ባቢሎኔ ካዎይ ኣማርዳ ኣሳታ ዩሁዳን ኣሺዳይሳኔ ኢስታ ቦላ ሳፋኔ ና ኣኪቃሜ ና ጎዶሊያሳ ሹሚዳይሳ ሲዪዳ።
JER 40:12 ኡባቲካ ባ ላሌቲ ዲዛ ዴሬፔ ዩሁዳ ቢታ ሲሚዳ። ሂስቲዲ ጎዶሊያሳይ ዲዛሶ ሚጺጳ ዪዳ፤ ሄን ዳሮ ዎይኔኔ ቦኔ ካꬃ ኣይፌ ዳጋሲዳ።
JER 40:13 ሄሳፌ ጉዬ ቃሬሃ ና ዮሃናኔይኔ ቡሮ ኩሼ ኢሞንታ ዲዛ ኦላ ቃራቲ ኡባይ ጎዶሊያሳኮ ሚጺጳ ዪዲ፥
JER 40:14 «ኣሞኔ ካዎ ባኣሊሲ ናታኒያ ና ኢስማኤሌ ኔና ዎꬋና ማላ ዬዲዳይሳ ኤርኪ?» ጊዳ። ጊዶ ኣቲን ኣኪቃሜ ና ጎዶሊያሳይ ኢስቲ ጊዛይሳ ኣማኒቤና።
JER 40:15 ሄሳፌ ጉዬ ቃሬሃ ና ዮሃናኔይ ሚጺጳን ዲዛ ጎዶሊያሳኮ ዪዲ፥ «ኦኒካ ኤሮንታ ዲሺን ባዳ ናታኒያ ና ኢስማኤሌ ታኒ ዎꬋና፤ ጋሶይካ ባቃቲዲ ኔኮ ዪዳ ኣሳይ ላሌታና ማላኔ ዩሁዳን ኣቲዳ ኣሳይካ ꬋያና ማላ ኣይስ ኔና ዎꬋና ጊዜ?» ጊዲ ጹራን ዮቲዴስ።
JER 40:16 ጊዶ ኣቲን ኣኪቃሜ ና ጎዶሊያሳይ ቃሬሃ ና ዮሃናኔ፥ «ኔኒ ኢስማኤሌ ጊሻስ ታስ ዮቲዛይሲ ኡባይ ዎርዶ ጊዲዳ ጊሻስ ሄሳ ማላ ሚሽ ኦꬆፋ» ጊዴስ።
JER 41:1 ዩሁዳን ካዎ ኬꬃ ኣሳፔ ኦላንቻታ ሹሜታፔ ኢሶይ ኤልሻማ ና፥ ናታኒያ ና ኢስማኤሌይ ላፑንꬃ ኣጊናን ታሙ ኣሳታራ ኢሲፌ ሚጺጳን ዲዛ ኣኪቃሜ ና ጎዶሊያሳኮ ቢዴስ። ኢስቲ ኡባይ ካꬃ ማዳን ዲሺን፥
JER 41:2 ናታኒያ ና ኢስማኤሌይኔ ኢዛራ ዲዛ ታሙ ኣሳቲ ባንታ ማሻ ማሻ ኬሲዲ ባቢሎኔ ካዎይ ዩሁዳ ሃራና ማላ ሹሚዳ ሳፋኔ ና ኣኪቃሜ ና ጎዶሊያሳ ዎꬊዳ።
JER 41:3 ሄሳ ቦላካ ቃሴ ኢስማኤሌይ ሚጺጳን ጎዶሊያሳራ ዲዛ ኣይሁዳታኔ ባቢሎኔ ኦላንቻታ ኡባ ዎꬊዴስ።
JER 41:4 ጎዶሊያሳይ ሃይቂን ዎንቴꬃ ጋላስ ኦኒካ ኢዛ ሃይቆ ኤሮንታ ዲሺን፥
JER 41:5 ሴኬሜፔ፥ ሴሎፔኔ ሳማሪያፔ ኦስፑን ታሙ ኣሳቲ ካዮቲሼ፥ ባንታ ቡች ሜዲዲ፥ ባንታ ማይኦ ዳኪዲኔ ባንታ ቦላካ ፑዚዲ ካꬃ ያርሾኔ ኤጻኔ ጎዳ ኬꬅ ኤኪ ዪዳ።
JER 41:6 ናታኒያ ና ኢስማኤሌይ ሚጺጳፌ ኬዚዲ ዬኪሼ ኢስታራ ጋጋናስ ቢዴስ፤ ኢስታራ ጋጊዲ፥ «ኣኪቃሜ ና ጎዶሊያሳኮ ሃ ዪቴ» ጊዴስ።
JER 41:7 ኢስቲ ካታማይ ጊዶ ጌሊዳ ማላ ናታኒያ ና ኢስማኤሌይኔ ኢዛራ ዲዛ ኣሳቲ ሄ ኣሳታ ዎꬊዲ ሃꬃ ኦላን ዬጊዳ።
JER 41:8 ጊዶ ኣቲን ሄ ሃይቂዳ ኣሳታራ ዲዛ ታሙ ኣሳቲ ኢስማኤሌ፥ «ኑና ዎꬎፓርኪ! ኑኒ ኑ ሾቃን ቆቲዳ ዳሮ ጊስቴይ፥ ባንጋይ፥ ዎጋራ ዛይቴይኔ ኤሲ ዴስ» ጊዳ። ኢዚካ ኢስታ ሃንኮይታራ ዎꬎንታ ኣጋጊዴስ።
JER 41:9 ኢስማኤሌይ ጎዶሊያሳራ ኢሲ ቦላ ዎꬊዳ ኣሳ ኡባ ኦሊዳ ኦላይ ኢስራኤሌ ካዎ ባሼይ ኦላናስ ዪዳ ዎዴ ካዎ ኣሳይ ኢዛስ ባቢዲ ባና ኣሻናስ ቦኪሲዳ ጊታ ኦላ። ናታኒያ ና ኢስማኤሌይ ሄ ኦላ ኣሃን ኩንꬂዴስ።
JER 41:10 ኢስማኤሌይ ካዎ ማጫ ናይታኔ ሚጺጳን ኣቲዳ ኣሳ ኡባ ዲኢዴስ። ሄይቲ ካዎ ቦንቾ ናጊዛ ዛቤታ ኣዛዚዛ ናቡዛራዳኔይ ኣኪቃሜ ና ጎዶሊያሳራ ኢሲፌ ሚጺጳን ዎꬂዳይታ። ኢዚ ኢስታ ዲኢ ባናራ ኤኪዲ ኣሞኔ ቢታ ባናስ ዴንዲዴስ።
JER 41:11 ቃሬሃ ና ዮሃናኔይኔ ኢዛራ ኢሲፌ ዲዛ ኦላ ኣሳ ሹሜቲ ኢስማኤሌይ ኦꬂዳ ኢታ ሚሽ ኡባ ሲዪዲ፥
JER 41:12 ናታኒያ ና ኢስማኤሌ ኦላናስ ባ ኣሳ ኡባ ኤኪዲ ቢዳ፤ ኢስማኤሌካ ጌባኦኔን ዲዛ ጊታ ኤሌ ሃꬃ ማታን ጋኪ ኦይኪዳ።
JER 41:13 ኢስማኤሌይ ዲኢዲ ባናራ ኤፊዳ ኣሳይ ኡባይ ቃሬሃ ና ዮሃናኔኔ ኢዛራ ዲዛ ኦላ ኣሳ ሹሜታ ቤኢዳ ዎዴ ኬሂ ኡፋዬቲዳ።
JER 41:14 ኢስማኤሌይ ሚጺጳፌ ዲኢ ኤፊዳ ኣሳይ ኡባይ ኬሲ ኤኪ ቢዲ ቃሬሃ ና ዮሃናኔን ጋይቲዴስ።
JER 41:15 ጊዶ ኣቲን ናታኒያ ና ኢስማኤሌይኔ ሃራ ኦስፑን ኣሳቲ ኢሲፌ ዮሃናኔፔ ኬሲ ኤኪዲ ኣሞኔ ቢታ ባቃቲዳ።
JER 41:16 ሄሳፌ ጉዬ ቃሬሃ ና ዮሃናኔይኔ ኢዛራ ዲዛ ኦላ ቃራቲ ኡባይ ናታኒያ ና ኢስማኤሌይ ኣኪቃሜ ና ጎዶሊያሳ ዎꬊ ሲሚዲ ሚጺጳፌ ዲኢዲ ኤሂዳ ኦላንቻታ፥ ማጫሳታ፥ ናይታኔ ካዎ ኬꬃን ኦꬂዛ ሹሜታ ኡባ ጌባኦኔፔ ዛሪዲ ኤኪ ቢዳ።
JER 41:17 ሄፔ ዴንዲዲ ጊብጼ ቢሼ ቤቴሊሄሜ ማታን ዲዛ ጌሮት-ኬሜኣሜ ጋኪ ሼምፒዳ፤
JER 41:18 ኢስቲ ጊብጼ ቢዳይ ባቢሎኔ ኣሳፔ ኬሲ ኤኪ ኣታናሳ፤ ናታኒያ ና ኢስማኤሌይ ባቢሎኔ ካዎይ ቢታዮ ሃራና ማላ ሹሚ ዎꬂዳ ኣኪቃሜ ና ጎዶሊያሳ ዎꬊዳ ጊሻስ ኢስቲ ባቢሎኔታስ ባቢዳ።
JER 42:1 ኦላ ቃራቲ፥ ቃሬሃ ና ዮሃናኔይ፥ ሆሻኢያ ና ኣዛሪያሲኔ ኣሳይ ኡባይ ጉꬃፌ ጊታ ጋካናስ ዪዲ፥
JER 42:2 ናቤ ኤርማሳስ፥ «ኑኒ ካሴ ዳሮ፥ ሃኢ ኔ ቤኢዛ ማላ ጉꬅ ኣቲዶስ፤ ሄሳ ጊሻስ ኑ ኔና ዎሲዛ ዎሳ ሲያ፤ ሃይሳ ኣቲዳ ዴራ ጊሻስ ጎዳ ኔ ጾሳ ዎሳ።
JER 42:3 ኑኒ ቢዛ ኦጌኔ ኑ ኦꬃና ሚሽ ኢዚ ኑና ቤሳና ማላ ጎዳ ኔ ጾሳ ዎሳ» ጊዳ።
JER 42:4 ናቤ ኤርማሲ ዛሪዲ፥ «ሎኦ፤ ኢንቴ ጊዳ ማላካ ጎዳ ኢንቴ ጾሳ ታኒ ዎሳና፤ ቃሴ ኢንቴፌ ኣይኮካ ቆቶንታ ኢዚ ዮቲዳይሳ ኡባ ዛራዳ ታ ኢንቴስ ዮታና» ጊዴስ።
JER 42:5 ኢስቲ ዛሪዲ ኤርማሳስ፥ «ጎዳ ኔ ጾሳይ ኔ ባጋራ ኑስ ኪቲዛይሳ ኡባ ኑኒ ፖሎንታ ኣጊኮ ጎዳይ ኑ ቦላ ቱሙኔ ኣማኔቲዳ ማርካ ጊዶ።
JER 42:6 ጎዳ ኑ ጾሳስ ኣዛዜቲን ኑስ ሎኦ ጊዳና ማላ ኑስ ጊጊን ጊጎንታ ኣጊን ኔና ኑ ኢዛኮ ኪቲዛ ጎዳስ ኑ ጾሳስ ኑ ኣዛዜታና» ጊዳ።
JER 42:7 ታሙ ጋላሳፌ ጉዬ ጎዳ ቃላይ ኤርማሳኮ ዪዴስ።
JER 42:8 ሂስቲን ኢዚ ቃሬሃ ና ዮሃናኔ፥ ኢዛራ ዲዛ ኦላ ቃራታኔ ኣስ ኡባ ጉꬃፌ ጊታ ጋካናስ ጼይጊዲ፥
JER 42:9 «ኢንቴ ዎሳ ታኒ ኢዛኮ ሺሻና ማላ ኢንቴ ታና ኪቲዳ ጎዳ ኢስራኤሌ ጾሳይ፥
JER 42:10 ‹ታ ኢንቴ ቦላ ኤሂዳ ባሻ ጋሶን ጬጪዳ ጊሻስ ኢንቴ ሃ ቢታን ኡቲኮ ታኒ ኢንቴና ኬጻናፔ ኣቲን ላሊኬ፤ ቶካናፔ ኣቲን ሾዲኬ።
JER 42:11 ኢንቴ ሃኢ ባቢሲዳ ባቢሎኔ ካዎስ ባቦፍቴ! ታ ኢንቴና ኢዛ ኩሼፔ ዎꬃ ኤካናሲኔ ኣሻናስ ኢንቴናራ ዲዛ ጊሻስ ያዮፍቴ!
JER 42:12 ኢዚ ኢንቴና ማራና ማላኔ ኢንቴ ቢታ ዛራና ማላ ታኒካ ኢንቴና ማራና› ጌስ።
JER 42:13 «ጊዶ ኣቲን ኢንቴ፥ ‹ሃ ቢታይን ኡቶኮ› ጊዲ ጎዳስ ኢንቴ ጾሳስ ኣዛዜቶንታ ኢጺኮ፥
JER 42:14 ቃሴ ኢንቴ፥ ‹ኦላ ቤዮንታሶ፥ ኦላ ዛዬይ ፑኔቶንታሶኔ ኮሻይ ባይንዳሶ ጊብጼ ቢዲ ሄን ዳና› ጊኮ፥
JER 42:15 ኢንቴኖ ዩሁዳን ጫሻ ኣቲዳይቶ! ጎዳ ቃላ ሲዪቴ። ኡባፌ ዎልቃማ ጎዳ ኢስራኤሌ ጾሳይ፥ ‹ኢንቴ ጊብጼን ዳና ጊዲ ቆፋ ቃቺዲ ቢዛ ጊዲኮ፥
JER 42:16 ኢንቴ ባቢዳ ማሻይ ኢንቴና ሄን ዴማና፤ ኢንቴ ሂርጊዳ ኮሻይካ ኢንቴና ካሊዲ ጊብጼ ጋካናስ ባና፤ ኢንቴካ ሄን ሃይቃና።
JER 42:17 ጊብጼን ዳና ጊዲ ቆፋ ቃቺዲ ቢዳ ኣሳይ ኡባይ ኦላን፥ ኮሻኒኔ ኢታ ሃርጌን ሃይቃና፤ ታኒ ኢስታ ቦላ ኤሂዛ ኢታ ሚሻፌ ኢሳዴይካ ኬሲ ኤኪ ኣቴና› ጌስ።
JER 42:18 «ኡባፌ ዎልቃማ ጎዳ ኢስራኤሌ ጾሳይ፥ ‹ታ ሃንቆይኔ ቦሻይ ዬሩሳላሜን ዲዛይታ ቦላ ጉኪዳ ማላ ኢንቴ ጊብጼ ጌሊዛ ዎዴ ኢንቴ ቦላካ ጉካና፤ ኢንቴ ዳጋማስ፥ ቂꬌስ፥ ቃንጌꬃሲኔ ፓልቄስ ማላታ ጊዳንዴታ፤ ሃ ቢታ ዛሪ ቤኤኬታ› ጌስ።
JER 42:19 «ዩሁዳን ጫሻ ኣቲዳይቶ! ጎዳይ ኢንቴና፥ ‹ጊብጼ ቦፒቴ!› ጊዴስ። ታኒካ ሃች ኢንቴስ ሚንꬃ ዮቲዳይሳ ኤሪቴ።
JER 42:20 ኢንቴ ታና፥ ‹ኔኒ ኑ ጊሻስ ጎዳ ኑ ጾሳ ዎሳ፤ ኢዚ ኔስ ዮቲዛይሳ ኡባካ ኑስ ዮታ፤ ኑኒካ ኢዛስ ኣዛዜታና› ጊዲ ታና ጎዳ ኢንቴ ጾሳኮ ኪቲዳ ዎዴ ኢንቴ ሼምፖ ꬋይሲዛ ባላ ሚሽ ኦꬂዴታ።
JER 42:21 ታኒ ኢዚ ጊዳ ሚሽ ኡባ ሃች ኢንቴስ ቆንጬን ዮታዲስ፤ ጊዶ ኣቲን ኢንቴ ጎዳይ ታ ባጋራ ኢንቴስ ኪቲዳ ቃላስ ኢንቴ ሃኢካ ኣዛዜቲቤኬታ።
JER 42:22 ሄሳ ጊሻስ ኢንቴ ቢዲ ዳናስ ኮይዛ ቢታን ኢንቴ ኦላን፥ ኮሻኒኔ ኢታ ሃርጌን ሃይቂዲ ዉራና» ጊዴስ።
JER 43:1 ጎዳይ ኪቲዳ ቃላ ኡባ ኤርማሲ ኢስታስ ዮቲዲ ዉርሲዳፔ ጉዬ፥
JER 43:2 ሆሻኢያ ና ኣዛሪያሲ፥ ቃሬሃ ና ዮሃናኔይኔ ኦቶራንቻቲ ኡባይ ኤርማሳ፥ «ኔኒ ዎርዶ ዮታሳ! ጎዳ ኑ ጾሳይ፥ ‹ሄን ዳናስ ጊብጼ ቦፒቴ› ጋዳ ኔ ዮታና ማላ ኔና ኪቲቤና።
JER 43:3 ጊዶ ኣቲን ባቢሎኔ ቢታ ኣሳይ ኑና ዎꬋና ማላ ዎይኮ ዲኢዲ ባንታ ቢታ ኤፋና ማላ ኔኒ ኑና ኢስታ ኩሼን ኣꬃዳ ኢማና ማላ ኔሪያ ና ባሮኬይ ኔና ኑ ቦላ ዴንꬄꬂዴስ» ጊዳ።
JER 43:4 ሄሳ ጊሻስ ቃሬሃ ና ዮሃናኔይ ኦላ ቃራቲ ኡባይኔ ኩሜꬃ ዴሬዚ ዩሁዳ ቢታን ዳና ማላ ጎዳይ ኢስታ ኣዛዚዳ ኣዛዞ ፖሎንታ ኢጺዳ።
JER 43:5 ሂስቲዲ ቃሬሃ ና ዮሃናኔይኔ ኦላ ቃራቲ ኡባይ ዩሁዳ ቢታን ዳናስ ካዎቴꬃታ ኡባፌ ሲሚዳይታኔ ዩሁዳኔ ጫሻ ኣቲዳይታ ኡባ ኤኪ ቢዳ።
JER 43:6 ቃሴ ካዎ ቦንቾ ናጊዛ ዛቤታ ኣዛዚዛ ናቡዛራዳኔይ ሳፋኔ ና፥ ኣኪቃሜ ና ጎዶሊያሳ ኩሼን ዎꬂዳ ካዎ ማጫ ናይታ፥ ናቤ ኤርማሳኔ ኔሪያ ና ባሮኬ፥ ቃሴካ ኣቱማሳታ፥ ማጫሳታኔ ቄሪ ናይታ ኤኪ ቢዳ።
JER 43:7 ጎዳ ቃላስ ኣዛዜቶንታ ኢጺዲ ጊብጼ ቢታ ጌሊዳ፤ ጌዴ ጻፊናሴ ጋካናስ ካንꬂ ቢዳ።
JER 43:8 ጻፊናሴን ጎዳ ቃላይ ኤርማሳኮ ዪዲ፥
JER 43:9 «ጊታ ሹቻታ ኤካዳ ዩሁዳ ኣሳይ ቤኢሺን ጻፊናሴን ዲዛ ጊብጼ ካዎቴꬃ ኬꬃ ፔንጌን ጹቤፔ ኦሴቲዳ ዉይጌዛን ሞጋ።
JER 43:10 ኡባፌ ዎልቃማ ጎዳ ኢስራኤሌ ጾሳይ ታስ፥ ‹ታኒ ኪታዳ፥ ታ ኣይሌዛ ባቢሎኔ ካዎ ናቡካዳናጾሬ ኤሂሳና፤ ሂስታዳ ሃ ሞጌቲዳ ሹቻታ ቦላን ኢዛ ካዎቴꬃ ኣራታ ዎꬃና። ሂስቲዳፔ ጉዬ ኢዚ ባ ካዎቴꬃ ዱንካና ኢዛ ቦላን ኤሳና።
JER 43:11 ኢዚ ዪዲ ጊብጼ ኦላና፤ ሃይቆስ ቤሲዛይታ ሃይቆስ፥ ዲኦስ ቤሲዛይታ ዲኦስ፥ ማሻስ ቤሲዛይታ ማሻስ ኣꬂ ኢማና።
JER 43:12 ጊብጼን ኤቃ ጾሳታ ኬꬃን ታማ ዬዳናኔ ኢስታ ሙሌራ ጹጋና፤ ኢስታ ኤቃ ጾሳታካ ዲኢ ኤፋና። ሄንꬃንቻይ ባ ሄንꬃ ማይኦ ማይኢዛ ማላ ኢዚ ጊብጼ ቢታፌ ቡሪ ኤኪዲ ሳሮን ባና።
JER 43:13 ጊብጼ ቢታን ሄሊዮፖሊሳ ጌቴቲዛ ካታማን ኣዋ ኣርሼ ጾስ ጌቴቲዛ ኤቃ ጾሳታ ሃዉልቴታ ኢዚ ሜንꬄሬꬃና፤ ጊብጼን ኤቃ ጾሳታ ኬꬃታካ ታማን ጹጋና› ጌስ ጋዳ ኢስታስ ዮታ» ጊዴስ።
JER 44:1 ጊብጼን ፑዴሃ ባጋራ ዲዛ ሚጊዶሌን፥ ጻፊናሴኒኔ ሜምፒሳን ሄሳꬆካ ጊብጼፔ ዱጌሃ ባጋን ዲዛ ኣይሁዳ ኣሳስ ጎዳ ቃላይ ኤርማሳኮ ዪዲ፥
JER 44:2 ኡባፌ ዎልቃማ ጎዳ ኢስራኤሌ ጾሳይ፥ «ዬሩሳላሜ ቦላኒኔ ዩሁዳ ካታማታ ኡባ ቦላን ታኒ ኤሂዳ ባሽ ኡባ ኢንቴ ኢንቴ ኣይፌራ ቤኢዴታ፤ ኢስቲ ሃች ጋካናስ ኦኒካ ዶንታ ባዞ ቢታ ጊዲ ኣቲዳ።
JER 44:3 ሄሲ ሃኒዳይ ኢስቲ ኦꬂዳ ኢታ ኦሶ ጊሻሳ፤ ኢስታ ጊዲን፥ ኢንቴና ዎይኮ ኢንቴ ኣዋታ ጊዲን፥ ባ ኤሮንታ ሃራ ኤቃ ጾሳታስ ኤጻኔ ጩዋሴꬃኒኔ ኢስታስ ጎይኖን ታና ሃንቄꬂዳ።
JER 44:4 ታኒካ ኢስታስ፥ ‹ሃይሳ ታና ሃራሲዛ ሚሽ ኦꬆፍቴ!› ጋዳ ታስ ኦꬂዛ ናቤታ ኢስታኮ ዛራ ዛራ ዬዳዲስ።
JER 44:5 ኢስቲ ጊዲኮ ኤሮ ጊ ኤኪቤቴና፤ ኢስቲ ባ ኦꬂዛ ኢታ ኦሶፔ ሲሚቤቴና፤ ሃራ ኤቃ ጾሳታስ ኤጻኔ ጩዋሴꬅ ኣጊቤቴና።
JER 44:6 ሄሳ ጊሻስ ዩሁዳ ካታማታ ቦላኔ ዬሩሳላሜ ኦጌታ ቦላ ታ ሃንቆይኔ ባሺ ዎꬊዲ ታማ ማላ ኤጺዴስ፤ ሃች ኢንቴ ቤኢዛ ማላ ኦኒካ ዶንታ ማላ ላሌቲዳሶ ጊዲዴስ።
JER 44:7 «ሃኢካ ኡባፌ ዎልቃማ ጎዳ ኢስራኤሌ ጾሳይ፥ ‹ኢንቴስ ዜሬꬂ ዩሁዳን ኣቶንታ ማላ፥ ማጫሳታ ቦላኔ ኣቱማታ ቦላ፥ ጊታ ናይታ ቦላኔ ቄሪ ናይታ ቦላ ባሺ ያና ማላ ኣይስ ኮዬቲ?
JER 44:8 ኢንቴ ዳናስ ጌሊዳ ሃ ጊብጼ ቢታን ሃራ ኤቃ ጾሳታስ ኤጻኔ ጩዋሴꬃን ኢንቴ ኢንቴ ኩሼን ሜꬊዳ ሚሻታን ታና ኣይስ ሃንቄꬄቲ? ቢታ ቦላ ዲዛ ካዎቴꬃታ ኡባ ጊዶን ቃንጌꬃሲኔ ቂꬌስ ማላታ ጊዳና ማላ ኢንቴርካ ኢንቴና ꬋይሳና ኮዬቲ?
JER 44:9 ካሴ ኢንቴ ኣዋቲ፥ ዩሁዳ ካዎቲኔ ኢስታ ማቼቲ፥ ቃሴ ኢንቴኒኔ ኢንቴ ማቼቲ ዩሁዳ ካታማታኒኔ ዬሩሳላሜ ኦጌታን ኦꬂዳ ኢታቴꬃ ኡባ ዶጊዴቲ?
JER 44:10 ኢንቴ ሃች ጋካናስ ኢንቴናቴꬃ ዚቂሲዲ ታስ ቦንቾ ኢሚቤኬታ፤ ቃሴ ታኒ ኢንቴሲኔ ኢንቴ ኣዋታስ ዎꬂዳ ዎጋኔ ማራ ካሊቤኬታ› ጌስ።
JER 44:11 «ሄሳ ጊሻስ ኡባፌ ዎልቃማ ጎዳ ኢስራኤሌ ጾሳይ፥ ‹ታኒ ኢንቴ ቦላ ሜቶ ኤሃናሲኔ ዩሁዳ ኡባ ꬋይሳናስ ቃቻ ዴንዳዲስ።
JER 44:12 ዩሁዳን ጫሻ ኣቲዳይቲ ጊብጼ ቢዲ ሄን ዳና ቃቺዳ ኡባታ ታኒ ዴንꬃ ꬋይሳና፤ ኢስቲ ኡባይ ꬋያና፤ ጊብጼ ቢታን ማሻኒኔ ኮሻን ዉራና፤ ጊታፔ ጋሼ ጋካናስ ዲዛ ኡባይ ማሻኒኔ ኮሻን ሃይቃና፤ ፓልቄስ፥ ዳጋማስ፥ ቃንጌꬃሲኔ ቂꬌስ ኬዛና።
JER 44:13 ታኒ ዬሩሳላሜ ኦላን፥ ኮሻኒኔ ኢታ ሃርጌን ቃጻይዳ ማላ ጊብጼ ቢታን ዲዛይታካ ቃጻያና።
JER 44:14 ጊብጼ ቢዲ ዲዛ ጫሻ ኣቲዳ ዩሁዳ ኣሳቲ ሲሚዲ ዩሁዳ ቢታ ባና ኣሞቲኮካ ቤቲ ዪዳ ጉꬃታፔ ኣቲን ኬሲ ኤኪዲ ዩሁዳ ቢታ ሲማና ኣሲ ኢሳዴይካ ዴና› ጌስ» ጊዴስ።
JER 44:15 ኢስታ ማቼቲ ሃራ ኤቃ ጾሳታስ ኤጻኔ ጩዋሲዛይሳ ኤሪዛ ኣቱማሳቲ ኡባይኔ ሄን ዲዛ ማጫሳቲ ኡባይ ሄሲካ ፑዴሃ ባጋ ጊብጼኒኔ ዱጌሃ ባጋ ጊብጼን ዲዛ ዴሬ ኡባይ ኢሲፌ ሺቂዲ ኤርማሳስ፥
JER 44:16 «ኔኒ ጎዳ ሱንꬃን ኑስ ዮቲዛይሳ ኡባ ኑኒ ሲዮኮ።
JER 44:17 ኑኒ ኦꬃና ጊዳ ሚሽ ኡባ ኦꬆስ፤ ኑኒ፥ ኑ ኣዋቲ፥ ኑ ካዎቲኔ ኑ ሃላቃቲ ዩሁዳ ካታማታኒኔ ዬሩሳላሜ ኦጌታን ካሴ ኦꬂዳ ማላ፥ ኑኒካ ሳሎ ካዎዮ ጌቴቲዛ ኤቃ ጾሳይስ ኤጻኔ ጩዋሶስ፤ ኡሻ ያርሾካ ኢዚስ ያርሾስ፤ ኑኒ ካሴ ሄሳ ኦꬂዛ ዎዴ ኑስ ቲርፓ ካꬂ ዴስ፤ ኑኒ ሎኦ ዱስ ዴኢዶስ ኣቲን ኣይኮ ኢታካ ቤኢቤኮ።
JER 44:18 ጊዶ ኣቲን ሳሎ ካዎይስ ኤጻኔ ጩዋሴꬂኔ ኡሻ ያርሾ ሺሾ ኑ ኣጎሶፔ ሃ ሲሚን ኡባ ሚሺ ኑስ ፓጪዴስ፤ ኑኒ ማሻኒኔ ኮሻን ዉሮን ዶስ» ጊዳ።
JER 44:19 ማጫሳቲካ፥ «ኑኒ ሳሎ ካዎይስ ኤጻኔ ጩዋሲሺን፥ ኡሻ ያርሾ ሺሺን፥ ኢዚ ሚስሌ ሚሳቲሲዲ ቄሪ ኡኬꬅ ኑ ሺሺን ሄሳ ኡባ ኑ ኣዚናቲ ኤሮንታ ዲሺን ኑ ኦꬂዶኒ?» ጊዳ።
JER 44:20 ኤርማሲ ባስ ዛሮ ኢሚዳ ኣቱማሳስ፥ ማጫሲኔ ኡባ ኣሳስ፥
JER 44:21 «ኢንቴኒኔ ኢንቴ ኣዋቲ፥ ኢንቴ ካዎቲኔ ኢንቴ ሹሜቲ፥ ቃሴ ቢታይን ዲዛ ኣሳይ ኡባይ ዩሁዳ ካታማታኒኔ ዬሩሳላሜ ኦጌታን ኢንቴ ኤጻኔ ጩዋሲዳይሳ ጎዳይ ኤሮንታኔ ዶጊዳ ኢንቴስ ሚሳቲዜ?
JER 44:22 ኢንቴ ኦꬂዳ ኢታኔ ሃራሲዛ ኦሶ ጎዳይ ጮኡ ጋናስ ዳንዳዮንታ ጊሻስ ሃች ኢንቴ ቤኢዛ ማላ ኢንቴ ቢታይ ቃንጌꬃስ ማላታ፥ ኣሲ ባይንዳ ባዞ ቢታ ጊዲዴስ።
JER 44:23 ቤኢቴ፥ ሃች ሃ ባሻይ ኡባይ ኢንቴና ጋኪዳይ ኢንቴ ሃራ ኤቃ ጾሳታስ ኤጻኔ ጩዋሲዳ ጊሻስ፥ ጎዳ ቆሂዳ ጊሻስ፥ ጎዳ ቃላ ናጎንታ ኢጺዳ ጊሻስ፥ ኢዛ ዎጋ፥ ማራኔ ኣዛዞ ቦንቾንታ ኣጊዳ ጊሻሳ» ጊዴስ።
JER 44:24 ሄሳፌ ጉዬ ኤርማሲ ዴራስ፥ ኣቱማሲኔ ማጫስ ኡባስ፥ «ኢንቴኖ ዩሁዳፔ ዪዲ ጊብጼ ቢታን ዲዛ ኣሳቶ! ኡባይካ ጎዳ ቃላ ሲዪቴ!
JER 44:25 ኡባፌ ዎልቃማ ጎዳ ኢስራኤሌ ጾሳይ ኢንቴኒኔ ኢንቴ ማቼቲ፥ ‹ኑኒ ሳሎ ካዎይስ ኤጻኔ ጩዋሳናሲኔ ኡሻ ያርሾ ሺሻናስ ኑ ኣዲኒዳ ኣዲና ኣዳፌ ኑ ፖላና› ኢንቴ ጊዳ ቃላ ፖሊዴታ፤ ሂስቲኮ ጉዬ ጎፒቴ፤ ኢንቴ ኣዲኒዳ ቃላ ፖሊቴ።
JER 44:26 ኢንቴኖ ጊብጼ ቢታን ዲዛ ዩሁዳ ኣሳቶ! ጎዳ ቃላ ሲዪቴ! ጎዳይ፥ ‹ሃይሳፌ ጉዬ ጊብጼ ቢታን ኣዋ ባጋንካ ዲዛ ዩሁዳ ኣሲ ኦኒካ ዴኦ ጎዳይ ቤኢን!› ጊዲ ታ ሱንꬅ ጼይጊ ጫቆንታ ማላ ታኒ ታ ጊታ ሱንꬃን ጫቃዲስ።
JER 44:27 ታኒ ኢስታ ቦላ ሎኦ ሚሽ ኤሃናስ ጊዶንታ ኢታ ሚሽ ኤሃናስ ባጼታና፤ ጊብጼን ዲዛ ዩሁዳ ኣሳይ ሙሌራ ዉራና ጋካናስ፥ ኦላኒኔ ኮሻን ሃይቃና።
JER 44:28 ጊዶ ኣቲን ኦላፔ ኣቲዳ ጉꬃቲ ጊብጼፔ ሲሚዲ ዩሁዳ ጌላና፤ ሄ ዎዴ ጊብጼን ዳና ቢዲ ሄን ኣቲዳ ዩሁዳ ጫሻቲ ኡባይ ታ ቃላፔኔ ኢስታ ቃላፔ ኣዋይሲ ቱሙ ጊዳናኮ ኢስቲ ኤራና።
JER 44:29 «ታኒ ኢንቴና ሃ ሶሆን ቃጻያናሲኔ ታኒ ኢንቴ ቦላ ኤሃና ጊዳ ኢታ ሚሺ ፖሌታናይሳ ኢንቴ ኤራና ማላ ታ ሃይሳን ኢንቴና ቃጻያናይሳስ ሃይሳፌ ካሊዛይሲ ኢንቴስ ማላታ ጊዶ።
JER 44:30 ሄሲካ፥ ‹ታኒ ዩሁዳ ካዎ ሴዴቂያሲ ኢዛስ ሞርኬ ጊዲዲ ኢዛ ዎꬋናስ ኮይዛ ባቢሎኔ ካዎ ናቡካዳናጾሬ ዎꬋናስ ኮይዛ ኢዛ ሞርኬታስ ታ ኣꬃ ኢማና› ጌስ ጎዳይ» ጊዴስ።
JER 45:1 ኢዮሲያሳ ና ኢዮኣቄሜይ ዩሁዳን ካዎቲዳ ኦይዳንꬆ ላይꬃን፥ ኔሪያ ና ባሮኬይ ሃ ቃላታ ኤርማሲ ዮቲን ሲዪዲ ማጻፋን ጻፊዴስ። ሄ ዎዴ ኤርማሲ ኢዛስ ዮቲዳ ቃላይ፥
JER 45:2 «ባሮኬ! ኔና ጎዳ ኢስራኤሌ ጾሳይ፥
JER 45:3 ኔኒ፥ ‹ጎዳይ ታ ሳኮ ቦላ ጬጬ ጉጂዳ ጊሻስ ታስ ኣዬ ኣና! ታኒ ዳሮ ዬኪዳ ጊሻስ ዳቡራዲስ፤ ሼምፖይካ ታስ ባዋ› ጋዳሳ» ጌስ።
JER 45:4 ጎዳይ፥ «ታኒ ቢታ ቦላ ኬጺዳይሳ ላላና፤ ታ ቶኪዳይሳካ ሾዳና።
JER 45:5 ሂስቲን ኔኒ ኔስ ጊታ ሚሽ ኮያይ? ኣሳ ናይታ ኡባ ቦላ ታኒ ባሽ ኤሃና ጊሻስ ኔ ሄሳ ኮዮፓ፤ ጊዶ ኣቲን ኔኒ ቢዳሶ ኡባን ታ ኔ ሼምፖ ኣሻና» ጌስ።
JER 46:1 ካዎቴꬃታ ጊሻስ ናቤ ኤርማሳኮ ዪዳ ጎዳ ቃላይ ሃይሳፌ ካሊ ዲዛይሳ፤
JER 46:2 ጊብጼ ጊሻስ ዩሁዳ ካዎ ኢዮሲያሳ ና ኢዮኣቄሜይ ካዎቲዳ ኦይዳንꬆ ላይꬃን፥ ኤፊራጺሴ ሻፋ ማታን ዲዛ ካርካሚሼን፥ ባቢሎኔ ካዎ ናቡካዳናጾሬይ ጾኒዳ ጊብጼ ካዎ ኒካ ኦላ ኣሳ ቦላ ዮቴቲዳ ኪታይ ሃይሳፌ ካሊ ዲዛይሳ፤
JER 46:3 «ኢንቴ ዎጋ ጎንዳሌኔ ቄሪ ጎንዳሌ ጊግሲቴ፤ ሂስቲዲ ኦላስ ኬዚቴ!
JER 46:4 ኢንቴ ፓራታ ኮሪዲ ቶጊቴ፤ ኢንቴ ሁኤን ቢራታ ቆቤ ዎꬂዲ፥ ኢንቴ ሶሆ ሶሆ ኦይኪቴ! ኢንቴ ቶራ ሌፍቴ፤ ኢንቴ ኦላ ማይኦካ ማይኢቴ!
JER 46:5 ጊዶ ኣቲን ሃይሲ ታኒ ቤኢዛይ ኣዜ? ኬሂ ያዪዲ ጉዬ ኡንዱዴቴስ፤ ዎልቃማ ኢስታ ኦላንቻቲ ጾኔቲዳ፤ ጉዬ ሲሚ ጼሎንታ ኤሶን ባቃቴቴስ፤ ኡባሶን ሺሮይ ዴስ።
JER 46:6 ፒላታይ ባቃቲ ኣቴና፤ ሚኖይካ ኬሲ ኤኪ ኣቴና፤ ፑዴሃ ባጋን ኤፊራጺሴ ሻፋ ማታን ꬉጴቲ ኩንዲዳ።
JER 46:7 ሃይሲ ኣባዬ ሻፋ ማላ ኪጺዲ ጉፒዛይ ቃሴ ዲኦ ሃꬃ ማላ ጎጊዛይ ኦኔ?
JER 46:8 ጊብጼይ ኣባዬ ሻፋይ ኪጺዲ ጉፒዛ ማላ ጉፔስ፤ ዲኦ ሃꬃ ማላ ጾንጌቴስ፤ ጊብጼይ፥ ‹ታኒ ኬዛዳ ቢታ ካማና፤ ካታማታኔ ኢስታን ዲዛ ኣሳ ꬋይሳና› ጌስ።
JER 46:9 ፓራቶ ጉፒ ኬዚቴ፤ ፓራ-ጋሬቶ ኣዳራሲቴ፤ ጎንዳሌ ኦይኪዳ ቶጵያ ኣሳይኔ ፑጼ ኣሳይ፥ ዎንዳፌ ዋጺ ኦይኪዳ ሚኖ ጊዲዳ ሉዲሜ ኣሳቲ፥ ኢንቴ ሚኖ ኦላንቻቲ ኦላስ ዴንዲቴ።
JER 46:10 ሄ ጋላሳይ ጎዳ ኡባፌ ዎልቃማ ጾሳ ጋላሳ፤ ኢዚ ባ ሞርኬታ ቦላ ሃሎ ኬሲዛ ጋላሳ፤ ማሻይ ካላና ጋካናስ ማና፤ ሳሞ ኣላና ጋካናስካ ሱꬅ ኡያና፤ ጎዳይ ኡባፌ ዎልቃማ ጾሳይ ፑዴሃ ባጋን ኤፊራጺሴ ሻፋ ማታን ኢስታስ ያርሾ ጊግሲ ዎꬂዴስ።
JER 46:11 ሃኔ ጊብጼ ጌላኦዬ! ፑዴ ጋላኣዴ ኬዛ፤ ቲዬቲዛ ꬋሌ ኤካ ያ፤ ጊዶ ኣቲን ኔኒ ꬋሌ ጮ ሜላ ዳርሳሳ፤ ኔ ፓጻካ።
JER 46:12 ካዎቴꬃቲ ኔ ዬላቴꬃ ሲያና፤ ኔ ዬሆይ ቢታ ኩማና፤ ኦላንቻይ ኦላንቻራ ኦይኬቲ ኩንዳና» ጌስ ጎዳይ።
JER 46:13 ባቢሎኔ ካዎ ናቡካዳናጾሬይ ጊብጼ ቢታ ዪዲ ኦላናይሳ ጎዳይ ናቤ ኤርማሳስ ዮቲዳ ቃላይ ሃይሳፌ ካሊ ዲዛይሳ፤
JER 46:14 «ሃይሳ ጊብጼን ዮታ፤ ቃሴ ጊብጼ ካታማታን ሚጊዶሌን፥ ሜምፒሳኒኔ ጻፊናሴን ኣዋጃ። ኢንቴ ዩሾን ዲዛይታ ማሻይ ማና ጊጌቲዳ ጊሻስ ኢንቴ ዲዛሶን ዲዛሶን ጊጌቲ ኡቲቴ።
JER 46:15 ዎልቃማ ጊዲዳ ኣጵሴ ጌቴቲዛ ኤቃ ጾሳይ ኣይስ ኩንዲዴ? ጎዳይ ኢዛ ሱጊ ዬጊዳ ጊሻስ ኤቃና ዳንዳይቤና።
JER 46:16 ኢዛ ካሊዛ ኣሳቲ ዛሪ ዛሪ ꬉጴታና፤ ኢሶይ ኢሳ ቦላ ኩንዳና፤ ‹ኣኔ ዴንዲቴ! ጌዴ ኑ ዴሬኔ ኑ ኣሳኮ ኣኔ ሲሞስ፤ ሞርኬ ማሻፌካ ኣኔ ኬሲ ኤኮስ› ጋና።
JER 46:17 ኢስቲ ሄን፥ ‹ጊብጼ ካዎ ፓሮኔይ ባስ ኢሜቲዳ ቃዳን ጎኤቶንታ ዲሼ ጮ ታ ዳይስ ታ ዳይስ ጊ ጬቄቲዛዴ ጊ ጼይጋና› ጊዴስ።
JER 46:18 ኢዛ ሱንꬃይ ጎዳ ኡባፌ ዎልቃማ ጾሳ ጌቴቲዛ ካዎይ፥ ታኒ ታ ዴኦን ጫቃይስ፤ ዙማታ ጊዶን ዲዛ ታቦሬ ዙማ ሚሳቲዛይ፥ ኣባ ኣቻን ዲዛ ቃርሜሎሴ ዙማ ሚሳቲዛ ኢሳዴይ ያናስ ዴስ።
JER 46:19 ኢንቴኖ ጊብጼ ቢታን ዲዛይቶ! ዲኤቲ ባናስ ኢንቴስ ዲዛዝ ጊግሲቴ፤ ሜምፒሳ ላሌታዳ ኢዚን ኣሲ ባይንዳ ቡላ ጊዳና።
JER 46:20 ጊብጼ ቢታይ ሎኦ ኡሳ ማላ፤ ጊዶ ኣቲን ሳጺዛ ቦጼይ ፑዴሃ ባጋፌ ያና።
JER 46:21 ሚሻን ሻሜቲ ዪዳ ኢዚ ኦላንቻቲ ሞꬊዳ ዎፋኖ ማላ። ኢስቲ ቃጻዬታና ዎዴይ ጋኪዳ ጊሻሲኔ ኢስቲ ꬋያናስ ዎዴይ ማቲዳ ጊሻስ ኢስቲ ኢሲፌ ጉዬ ሲሚ ባቃታና፤ ባ ዲዛሶን ሚኒ ኤቂዲ ኤቄታናስ ዳንዳዬቴና።
JER 46:22 ሞርኬይ ጾኒ ጾኒ ዪሺን ጊብጼ ኣሳይ ባቃቲሼ ሾሺ ሱይቂዛ ማላ ሱይቃና፤ ሚꬅ ቃንጻና ቢዛ ኣሳ ማላ ኢዚ ሞርኬቲ ኢዞ ቃንጻና ካልታ ኤኪ ያና።
JER 46:23 ꬊፒ ጊዳ ዎራ ጊዲኮካ ዎራይ ቄጼቴስ፤ ኢስታ ዳሮቴꬃይ ቦሌ ማላ፤ ኢስቲ ቆዴታናስ ዳንዳዬቴና።
JER 46:24 ጊብጼ ማጫ ናያ ዬላታና፤ ፑዴሃ ባጋ ዴሬስ ኣꬋ ኢሜታና።»
JER 46:25 ኡባፌ ዎልቃማ ጎዳ ኢስራኤሌ ጾሳይ፥ «ቴቤሴ ጾሳ ኣሞኔ ቦላ፥ ፓሮኔ ቦላ፥ ጊብጼ ቦላኔ ኢዚ ኤቃ ጾሳታ ቦላ፥ ኢዚ ካዎታ ቦላኔ ፓሮኔን ኣማኔቲዛይታ ቦላ ታኒ ቂጻቴ ኤሃና።
JER 46:26 ኢስታ ዎꬋናስ ኮይዛ ባቢሎኔ ካዎ ናቡካዳናጾሬ ኩሼኒኔ ኢዛ ኦላንቻታ ኩሼን ታ ኣꬃ ኢማና። ጉꬃ ዎዴፔ ጉዬ ጊብጼይ ካሴይሳꬆ ኣሲ ዲዛሶ ጊዳና» ጌስ።
JER 46:27 «ታ ኦሳንቻ ያቆቤ ያዮፋ፤ ኢስራኤሌ ሺሮቶፓ፤ ታ ኔና ሃሆ ቢታፌ ኔ ዛሬካ ዲኤቲ ቢዳሶፔ ኣሻና። ያቆቤይካ ሲሚዲ ሳሮቴꬃን ዎፑ ጊ ዳና፤ ኢዛ ባቢሳና ሚሺካ ዴና።
JER 46:28 ታ ኔናራ ዲዛ ጊሻስ ታ ኦሳንቻ ያቆቤ ባቦፋ። ታ ኔና ኢዛን ላሊዳ ካዎቴꬅ ኡባ ሙሌራ ꬋይሲኮካ ኔና ጊዲኮ ሙሌራ ꬋይሲኬ። ታ ኔስ ቤሲዛ ቂጻቴ ቃጻያና ኣቲን ሜላ ኣጊኬ» ጌስ ጎዳይ።
JER 47:1 ፓሮኔይ ጋዛ ኦሊ ኦይካናፔ ካሴ ፊሊስጼሜታ ጊሻስ ጎዳፔ ኤርማሳኮ ዪዳ ቃላይ ሃይሳፌ ካሊ ዲዛይሳ።
JER 47:2 ጎዳይ፥ «ቤኢቴ፥ ፑዴሃ ባጋን ሃꬂ ኩሚ ኩሚ ቤስ፤ ዎልቃማ ዲኦ ጊዳና፤ ዴሬዮኔ ኢዚ ጊዶን ዲዛይታ ኡባ ኢዚ ካታማታኔ ካታማታን ዲዛ ኣሳ ኡባ ሚታና። ዴሬዚካ ባ ቃላ ꬎቁ ሂስቲ ዋሳና፤ ሄ ቢታን ዲዛ ኣሳይ ኡባይ ጫሞ ዬሆ ዬካና።
JER 47:3 ፓራ ቶሆ ጊሪሲ ሞርኬ ፓራ-ጋሬታ ዋሶ፥ ፓራ-ጋሬታ ቶሆይ ጌንዴሪሼ ጊሪዛ ጊሪሳ ጋሶን ኣዋቲ ባንታ ናይታ ኣሻናስ ጉዬ ሲሚ ጼሌቴና፤ ኢስታ ኩሼይካ ሲላ ጊዳና።
JER 47:4 ፊሊስጼሜ ኣሳ ኡባ ꬋይሳናስ፥ ባስ ኣቲዲ ሃራታ ማዲዛይታ ኡባ ጺሮሴፔኔ ሲዶናፔ ዱꬃ ኣሻናስ ዎዴይ ጋኪዴስ። ጎዳይ ካፍቶሬ ጋጻን ኣቲዳ ፊሊስጼሜ ኣሳ ꬋይሳና ዴንዲዴስ።
JER 47:5 ጋዛይ ካዮስ ባ ቢናና ሜዴታና፤ ኣስቄሎናይ ባ ዶና ቦላ ኩሼ ዎꬃና፤ ኢንቴኖ ዴምባ ቦላ ጫሻ ኣቲዳይቶ! ኢንቴ ኣይዴ ጋካናስ ኢንቴ ቦላ ቃጪሼ ዳኔ?
JER 47:6 «ኢንቴ፥ ‹ኔኖ ጎዳ ማሻዉ! ኔ ኣይዴ ሼምፓኔ? ኔ ኮሆን ሲማ ጌላ፤ ኔኒ ጮኡ ጋዳ ኡታ› ጋና።
JER 47:7 ጊዶ ኣቲን ጎዳይ ኣስቄሎናኔ ኣባ ጋጻ ኦላና ማላ ኣዛዚሺን ዋኒ ሼምፓናስ ዳንዳዬቲዜ?» ጌስ።
JER 48:1 ሞኣቤ ጊሻስ ኡባፌ ዎልቃማ ጎዳ ኢስራኤሌ ጾሳይ፥ «ኔቦይ ꬋያና ጊሻስ ኢዚስ ኣዬ ኣና! ቂሪያታይሜይ ካዉያናኔ ኦይኬታና፤ ሚጻቲካ ኦይኬታናኔ ላሌታና።
JER 48:2 ሃይሳፌ ጉዬ ሞኣቤይ ቦንቼቱኩ፤ ኣሳይ ሃሴቦኔን ኡቲዲ፥ ‹ሃ ዪቴ! ሃኖ ካታማዮ ኣኔ ꬋይሶስ› ጊዲ ኢዚ ቦላ ዱላታና። ሃኔ ማዲሜኔ! ኔና ቡሮ ጮኡ ሂስታና፤ ማሻይ ኔና ጎዳና።
JER 48:3 ሆሮናይሜፔ ኬዚዛ ꬋይሳ ዋሶኔ ጊታ ባሻ ዋሶ ጊሪስ ሲዪቴ፤
JER 48:4 ሞኣቤይ ሜቃና፤ ኢዚ ናይቲካ ዋሶ ሲሳና።
JER 48:5 ጫሞ ዬሆ ዬካና፤ ሉሂቴ ፑዱንꬅ ኬዛና፤ ባና ጋኪዳ ኢታ ሜቶፔ ዴንዲዳይሳን ጫሞ ዬሆ ዬኪሼ ሆሮናይሜ ዱጉንꬃ ዎꬋና።
JER 48:6 ባቃቲዲ ኢንቴ ሼምፖ ኣሺቴ፤ ባዞን ቱሻ ዎራ ጊዲቴ።
JER 48:7 ኢንቴ ኦꬂዳ ኦሶኒኔ ኢንቴ ኣቆታን ኢንቴ ኣማኔቲዛ ጊሻስ ኢንቴካ ዲኤታና፤ ካሞሼይካ ባ ቄሴታራኔ ባ ሹሜታራ ዲኤቲ ባና።
JER 48:8 ካታማ ኡባ ቦላ ꬋይሲዛይ ያና፤ ኢሲ ካታማይካ ኬሲ ኤኪ ኣቴና፤ ጎዳይ ዮቲዳ ጊሻስ ሾባይ ꬋያና፤ ዴምባቲካ ꬋያና።
JER 48:9 ሞኣቤይ ፒራꬋ ኣታና ማላ ኢዚስ ቄፌ ኢሚቴ፤ ኢዚ ካታማቲ ኣይኮይ ባይንዳ ቡላ ጊዳና።
JER 48:10 «ጎዳ ኦሶስ ዉዱ ጎንታዴይ ቃንጌቲዳዴ ጊዶ! ኢዛ ማሻይ ሱꬅ ጉሶንታ ማላ ዲጊዛዴይ ቃንጌቲዳዴ ጊዶ።
JER 48:11 «ሞኣቤይ ዬላጋቴꬃፌ ዶሚዲ ጋጬቶንታ ቶጬራ ዲዛ ዎይኔ ኡሻ ማላ ዎፓን ዴስ፤ ኦቶፔ ኦቶን ላሜቲቤና፤ ኢዚ ዲኤቲ ቢ ኤሬና፤ ኢዛ ማልኦይ ካሴ ዲዛ ማላ ዴስ፤ ኢዛ ሳዎይካ ላሜቲቤና።
JER 48:12 ጊዶ ኣቲን ኦቶዛ ላሚዛ ኣሳታ ታ ኪታና ዎዴይ ያና፤ ኢስታካ ዎራ ጉሲዲ ኦታ ጻላ ኣሻና፤ ዱቂዛ ሚሻታካ ሜንꬄሬꬂ ዬጋና።
JER 48:13 ኢስራኤሌ ኣሳይ ቤቴሌን ኣማኔቲ ዲሼ ዬላቲዳይሳꬆ ሞኣቤ ኣሳይካ ባ ጾሳን ካሞሼን ዬላታና።
JER 48:14 «ኢንቴ፥ ‹ኑኒ ሚኖ ኦላንቻታ› ጋናስ ዋኒ ዳንዳይዴቲ?
JER 48:15 ቤኢቴ ሞኣቤ ቢታይ ꬋያና፤ ኢዚ ካታማቲካ ዎራጄታና፤ ዶሬቲዳ ኢዚ ዬላጋ ናይቲካ ሹኬታናስ ዱጌ ዎꬋና፤ ኢዛ ሱንꬃይ ጎዳይ ኡባፌ ዎልቃማ ጾሳይ፥
JER 48:16 «ሞኣቤስ ኩንዴꬃ ዎዴይ ጋኪዴስ፤ ባሺ ኢዛ ቦላ ኤሶን ያና።
JER 48:17 ኢዛ ዩሾን ዲዛ ኡባይ ኢዛ ጊታቴꬅ ኤሪዛይቲ ኡባይ ኢዛስ ዬኪቴ፤ ኢንቴ፥ ‹ሚኖ ኢዛ ጪካይ፥ ቦንቼቲዳ ጻንባሮይ ዋኒ ሜቂዴ?› ጊቴ።
JER 48:18 «ሞኣቤ ꬋይሳናይ ኔ ቦላ ያና፤ ጊምቤቲዳ ኔ ካታማታ ኢዚ ꬋይሳና፤ ሃኔ ዲቦኔ ናዬ! ኔ ቦንቾዛፔ ዱጌ ዎꬋ፤ ሜላ ቢታ ቦላ ዎꬋ ኡታ።
JER 48:19 ሃኔ ኣሮኤሬን ዲዛሬ! ኔኒ ኦጌ ዶናን ኤቃዳ ጼላ፤ ባቃቲዛ ኣቱማስ፥ ኬሳ ኤካ ቢዛ ማጫስ፥ ‹ኣዜ ሜꬌቲዳይ?› ጋዳ ኦይቻ።
JER 48:20 ሞኣቤይ ላሌቲዲ ካዉዪዴስ፤ ‹ዉ! ዉይ› ጊዲ ዋሲቴ፤ ሞኣቤይ ሙሌራ ꬋይዳይሳ ኣርኖኔ ሻፋ ኣቻን ኣዋጂቴ!
JER 48:21 ፒርዳይ ቦላ ጌዜ ቢታን ሆሎኔ ቦላ፥ ያሃጼ ቦላኔ ሜፋኣቴ ቦላ፥
JER 48:22 ዲቦኔ ቦላ፥ ኔቦ ቦላኔ ቤቲ-ዲቢላታይሜ ቦላ፥
JER 48:23 ቂሪያታይሜ ቦላ፥ ቤቲ-ጋሙሌ ቦላኔ ቤቲ-ማኦኔ ቦላ፥
JER 48:24 ቂሪያቴ ቦላኔ ቦጺራ ቦላ፥ ሃሆኒኔ ማታን ዲዛ ሞኣቤ ካታማታ ኡባ ቦላ ዪዴስ።
JER 48:25 ሞኣቤ ካጬይ ቃንጼቲዴስ፤ ኢዛ ቄሴይካ ሜቄሬቲዴስ።
JER 48:26 «ኢዚ ጎዳ ካꬊዳ ጊሻስ ሞኣቤ ኡሻን ማꬆሲቴ፤ ሞኣቤይ ባ ጮሻ ቦላ ጌንዴሬቶ፤ ቂꬌስ ኣቶ።
JER 48:27 ኔኒ ካሴ ኢስራኤሌ ቂꬋቤኪ? ኢዚ ጊሻስ ኔ ሃሳይዛ ዎዴ ኔኒ ኔ ሁኤ ቃꬃቤኪ? ኢዛ ካይሶታራ ካይሶታሼ ኦይኬታዴ?
JER 48:28 ኢንቴኖ ሞኣቤን ዲዛይቶ! ካታማፔ ኬዚ ቢዲ ዛላ ጊዶን ዲቴ፤ ኣፎ ዶናን ባ ኬꬅ ኬጺዛ ሃራጴይ ማላ ጊዲቴ።
JER 48:29 ሞኣቤ ኦቶሬቴꬅ፥ ባና ꬎቁ ሂስቴꬅ፥ ጬቄቴꬂኔ ዎዚና ሙሜቴꬅ ኑ ሲዪዶስ።
JER 48:30 ታኒ ኢዛ ዎልቃ ኤራይስ፤ ጊዶ ኣቲን ሄሲ ሃዳ፤ ኢዛ ጬቄቴꬃስ ጎኣይ ዴና።
JER 48:31 ሄሳ ጊሻስ ታኒ ሞኣቤስ ዬካይስ፤ ሞኣቤ ዴሬ ኡባስ፥ ‹ዉ! ዉይ› ጋይስ፤ ቂሬ-ሄሬሴ ኣሳሲካ ዬሆ ጬንጉርስ ሲሳይስ።
JER 48:32 ኔኖ ሴባማ ዎይኔ ሚꬃዞ! ኢያዜሬስ ዬኮይሳፌ ኣꬃዳ ታኒ ኔስ ዬካይስ። ኔ ሃጋቲ ዳዪዲ ኣባ ፒኒዲ ኢያዜሬ ጋኪዳ፤ ጊዶ ኣቲን ኔስ ማጻ ጋኪዳ ካꬃ ኣይፌኔ ዎይኔ ꬋይሳናይ ዪዴስ።
JER 48:33 ሞኣቤን ኣታኪልቴሶፔኔ ጎሻ ጋዴፔ ሃሹ ሂስቲዛዚኔ ኡፋይሲ ꬋይዴስ፤ ዎይኔ ኡሺ ጉምኢን ዎꬎንታ ማላ ሜሊሳዲስ፤ ኦኒካ ኢዛ ኢሊሊሼ ጉምኤና፤ ሄን ኣሳ ቃላይ ሲዬቲኮካ ኢሊሊሳ ጬንጉርስ ጊዴና።
JER 48:34 «ሃሴቦኔፔ ቢዲ ኤልኤሌኔ ያሃጼ ጋካናስ፥ ዞኣሬፔ ቢዲ ሆሮናይሜ፥ ኤጊላቴ-ሻሊሺያ ጋካናስ ኢስታ ዋሶይ ኬሂ ሴቴቴስ፤ ኒሚሪሜ ሃꬂ ሜሊዴስ።
JER 48:35 ꬎቃሶሆታ ቦላ ያርሺዛይታኔ ባንታ ኤቃ ጾሳታስ ኤጻኔ ጩዋሲዛይታ ታኒ ሞኣቤ ቢታፌ ꬋይሳና።
JER 48:36 «ታ ዎዚናይ ሞኣቤሲኔ ቂሬ-ሄሬሴ ኣሳስ ዛዬን ዬኪዛ ኣሳ ማላ ዬኬስ፤ ጋሶይካ ኢስታ ዱሬቴꬂ ꬋይዴስ።
JER 48:37 ኣስ ኡባ ሁኤይኔ ቡቺ ሜዴቲዴስ፤ ባንታ ኩሼካ ጫዴሬꬂዳ፤ ቃሴ ማቃ ማይኢዳ።
JER 48:38 ሞኣቤን ዲዛ ኬꬃ ኡባኒኔ ዳባባን ዬሆፔ ኣቲን ሃራይ ዴና፤ ጋሶይካ ታኒ ሞኣቤ ዴሬ ሞሆ ኦቶ ማላ ሜንꬄሬꬃ ዬጋዲስ።
JER 48:39 «ሞኣቤይ ኣይ ሜቆ ሜቂዴ! ኣሳይ ኣይ ዬሆ ዬኪዜ! ሞኣቤይ ኣይ ማላ ዬላቲዲ ዞኮ ዛሪዴ! ሞኣቤይ ባ ሄራን ዲዛ ኣሳ ኡባስ ጫሻሲኔ ሻባርሳስ ማላታ ጊዲዴስ» ጌስ።
JER 48:40 ጎዳይ፥ «ጎሌይ ባ ቄፌ ፒዲ ሂስቲ ፒራꬊ ዎꬊዛ ማላ፥ ሞኣቤ ቦላ ዎꬋና።
JER 48:41 ኢዛ ካታማቲኔ ኢዛ ሚጻቲ ኦይኬታና፤ ሄ ጋላስ ሞኣቤ ኦላንቻታ ዎዚናይካ ሚጻ ኦይኬቲዳ ማጫሳ ዎዚና ማላ ጊዳና።
JER 48:42 ሞኣቤይ ጎዳ ካዉሺዳ ጊሻስ ꬋያና፤ ኢዛ ካዎቴꬃይካ ኣታና።
JER 48:43 ኔኖ ሞኣቤ ዴሬዞ! ኔና ሻባርሲ፥ ኦላይኔ ዎጺማዴይ ናጌስ።
JER 48:44 «ሻባርሳፌ ባቃቲ ኣቲዳ ኡባይ ኦላን ጌላና፤ ኦላፌ ኬዚዳይ ዎጺማዴን ኦይኬታና፤ ታኒ ሞኣቤይ ቃጻዬቲዛ ላይꬅ ኤሃና ጊሻሳ።
JER 48:45 «ሃሴቦኔፔ ሞኣቤ ሊጴ፥ ጬቄቲዛይታ ፒꬌ ጹጊዛ ታማይ፥ ታማ ላጮይ ሲሆኔ ኬꬃፌ ኬዚዴስ፤ ባቃቲ ቢዳይቲ ሃሴቦኔ ኩዋ ጋርሳን ባናሶ ꬋይዲ ኤቂዳ።
JER 48:46 ሞኣቤ ኔስ ኣዬ ኣና! ካሞሼስ ጎይኒዛ ዴሬይ ዉሪ ዉሪዴስ። ኔ ኣቱማ ናይቲ ኡባይ ዲኤቲዳ፤ ማጫ ናይቲ ኡባይካ ዲኤቲ ቢዳ።
JER 48:47 «ጊዶ ኣቲን ዉርሴꬃን ሞኣቤፔ ዲኤቲ ቢዳይታ ታ ዛራና» ጌስ። ሞኣቤ ቦላ ፒርዴቲዳ ፒርዳይ ሄሳ።
JER 49:1 ኣሞኔ ኣሳ ጎዳይ፥ «ኢስራኤሌይ ኣቱማ ናይታ ዬሊቤኔ? ዎይኮ ኢዛ ላታናይቲ ባዌ? ሂስቲን ሚልኮሜይ ጋዴ ኣይስ ላቲዴ? ኢዛ ኣሳቲ ኣይስ ካታማይን ዲዞ?
JER 49:2 ኣሞኔ ካታማ ኤራባ ቦላ ኦላ ዋሶ ጬንጉርሲ ሴቴታና ዎዴይ ያና። ኢዛ ቡꬌታዳ ዶሬቲዳ ዶሬ ጊዳና፤ ኢዚ ጉታቲ ኡባይ ጹጌታና፤ ኢስራኤሌይ ባና ኬሲ ጎዲዳይታ ባ ዴሬፔ ኬሳ ጎዳና።
JER 49:3 ሃኔ ሃሴቦኔ! ኣዬ ካታማይ ꬋይዳ ጊሻስ ዬካ፤ ኤራባ ማጫ ናይቶ ዋሲቴ፤ ማቃ ማይኢዲ ዬኪቴ፤ ጋሶይካ ሚልኮሜይ ባ ቄሴታራኔ ባ ሹሜታራ ዲኤቲዲ ባና፤ ዲርሳ ጊዶን ያኔ ሃ ዎጼሬቲቴ።
JER 49:4 ሃኔ ካዲዳሬ! ኔኒ ኔ ሾባታን ኣይስ ኣማኔታይ? ኔኒ ሎኦ ካꬅ ኢሚዛ ኔ ሾባን ኣይስ ጬቄታይ? ኔኒ ኔ ዱሬቴꬃን ጬቄታዳ፥ ‹ታና ኦኔ ቦቻናይ?› ጋሳ።
JER 49:5 ታኒ ኔ ዩሾን ዲዛይታፔ ኔ ቦላ ሺሮ ኤሃና፤ ኢንቴ ኡባይካ ጎዴታና፤ ባቃታ ቦላ ዲዛይታ ሺሻና ኣሲ ቤቴና።
JER 49:6 «ሄሳፌ ጉዬ ታኒ ኣሞኔ ኣሳፔ ዲኤቲዳ ሚሻ ዛራና» ጌስ።
JER 49:7 ኤዶሜ ጊሻስ ጎዳይ ኡባፌ ዎልቃማ ጾሳይ፥ «ኣꬎ ኤራቴꬂ ቴማኔ ኣሳፔ ꬋይዴ? ዞሬይ ኣኬካንቻታፔ ሃኪዴ? ኢስታ ኣꬎ ኤራቴꬃይ ጪንጊዴ?
JER 49:8 ታኒ ኤሳዌ ቃጻዪዛ ዎዴ ታ ኢዛ ቦላ ባሻ ኤሂዛ ጊሻስ ኢንቴ ዲዳኔን ዲዛይቲ ጉዬ ሲሚ ባቃቲቴ፤ ጪማ ኦላ ጊዶን ቆቴቲቴ።
JER 49:9 ዎይኔ ማጺዛይቲ ኢንቴኮ ዪዲ ማጺሼ ፑሹሎ ኣሺ ኤሬቴኔ? ካይሶቲ ካይሶታና ጌሊኮ ባ ኮዪዳይሳ ጻላ ኤኬቴስ ዴቴኔ?
JER 49:10 ጊዶ ኣቲን ታኒ ኤሳዌ ፓጻ ካሎ ኣሻና፤ ኢዚ ቆቴቲ ኣቶንታ ማላ ኢዚ ቆቴታናሶሆታ ታኒ ቆንጬ ኬሳና፤ ኢዛ ናይቲ፥ ኢዛ ዳቦቲኔ ኢዛ ሾሮቲ ꬋያና፤ ኢዚካ ባ ሁኤስ ዴና።
JER 49:11 «ዬሊዳ ኣያኔ ኣዋይ ባይንዳ ኔ ጋርሳን ዲዛ ናይታ ኔ ኣጋጋ፤ ታ ኢስታ ዲቻና፤ ኣምኤቲካ ታናን ኣማኔቴቶ» ጌስ።
JER 49:12 ጎዳይ፥ «ጻዋ ኡያና ቤሶንታይታስ ጻዋ ኡሺ ኣቶንታይሳ ጊዲኮ ኔኒ ዋና ቂጻቴፔ ኣታኔ? ኔስ ቃጻዬቴꬂ ኣቴና፤ ኔ ኡያናስ ቤሴስ።
JER 49:13 ቦጺራይ ላሌታዳ ዳጋማስ፥ ቂꬌሲኔ ቃንጌꬃስ ማላታ ጊዳና ማላ ታኒ ታናን ጫቃዲስ፤ ኢዚ ካታማቲ ኡባይ ሜርናስ ኣይኮይ ባይንዳ ቡላ ጊዳና» ጌስ።
JER 49:14 ጎዳፔ ዪዳ ኢሲ ኪታ ሲያዲስ፤ «ኤዶሜ ቦላ ዎራጃናስ ሺቂቴ፤ ኦሌታናስ ዴንዲቴ!» ጊ ዮቲዛ ቃስታኔይ ካዎቴꬃታኮ ኪቴቲዴስ።
JER 49:15 ጎዳይ፥ «ሃኢ ታኒ ኔና ካዎቴꬃታ ጊዶን ላፋ፤ ኣሳ ጊዶንካ ካꬌቲዳዴ ኦꬃና።
JER 49:16 ኔኖ ዛላ ጎንጎሎ ጊዶን ዲዛይሶ! ኔኖ ꬎቃ ዙምቡላ ሁኤን ኡቲዳይሶ! ኔ ዮምቢዛ ዮምባይኔ ኔ ዎዚና ኦቶሮይ ኔና ባሌꬂዴስ፤ ኔኒ ኔ ኬꬅ ጎሌ ማላ ꬎቃሶሆን ኬጺኮካ ታኒ ኔና ሄፔ ዱጌ ኦላና» ጌስ።
JER 49:17 ጎዳይ፥ «ኤዶሜይ ዳጋማስ ማላታ ጊዳና፤ ሄራ ኣꬊዛ ኣስ ኡባይ ኢዚ ቦላ ጋኪዳ ባሽ ቤኢዲ ማላሌቲሼ ቂꬋና።
JER 49:18 ሶዶሜይኔ ጋሞራይ ባንታ ዩሾን ዲዛ ካታማታራ ኢሲፌ ꬋይዳ ማላ ኤዶሜይ ꬋያና፤ ኦኒካ ሄ ቢታን ዴኤና፤ ኢሳዴይካ ኢዚን ኡቴና» ጌስ።
JER 49:19 ጎዳይ፥ «ጋሞይ ዮርዳኖሴ ዎራታፔ ሜሄ ሄሚዛ ዴምባን ኬዚ ዎꬊዛ ማላ ታኒካ ኤዶሜይ ቆፖንታ ዲሺን ኬዛ ዎꬋና፤ ኢዛ ቢታፌ ታ ኢዛ ጎዳና፤ ታ ዶሪዳይሳ ኢዛ ቦላ ሹማና፤ ታ ማላይ ኦኔ? ታናራ ኤቄታና ዳንዳይዛይ ኦኔ? ታናራ ኤቄታና ዳንዳይዛ ሄንꬃንቻይ ኦኔ?» ጌስ።
JER 49:20 ሄሳ ጊሻስ ታኒ ጎዳይ ኤዶሜ ቦላ ፖላናስ ሃልቺዳ ሃልቾኔ ቴማኔን ዲዛይታ ቦላ ታ ቆፒዳ ቆፋ ሲዪቴ! ጉꬃ ዉዴቲ ጎሼቲ ባና፤ ሄሳ ጋሶን ዉዴይ ሄሜቲዛሶ ሙሌራ ꬋይሳና።
JER 49:21 ኤዶሜ ኩንዴꬃ ጊሪሲ ቢታ ቃꬃና፤ ኢስታ ዋሶይካ ዞኦ ኣባ ጋካናስ ኮሹሜስ።
JER 49:22 ጎሌ ማላ ዱጌ ሲቲ ጊ ኢዚ ቦላ ዎꬋና፤ ባ ቄፌታካ ቦጺራ ቦላ ሚጫና፤ ሄ ዎዴ ኤዶሜ ኦላንቻቲ ሚጻይ ኦይኪዳ ማጫሳ ማላ ሂርጋና።
JER 49:23 ጎዳይ ዳማስቆ ጊሻስ፥ «ሃማቴ ኣሳይኔ ኣርፋዴ ኣሳይ ዳማስቆ ካታማ ꬋዮ ሲዪዲ ዳጋሚዴስ፤ ኣባ ዳምባላ ማላ ሺሮቲዴስ፤ ኢስታ ዎዚናይካ ሴሪዴስ።
JER 49:24 ዳማስቆይ ዳቡራዱስ፤ ባቃታናስ ጉዬ ሲማዱስ፤ ኮኮራዱስ፤ ሚጻይ ኦይኪዳ ማጫሳ ማላ ጬጬይኔ ቱጋይ ኢዞ ኦይኪዴስ።
JER 49:25 ታ ኢዚን ኡፋዬቲዛ ኤሬቲዳ ካታማያ ዋና ዬጌታ ኣታዴ?
JER 49:26 ሄ ዎዴ ኢዚስ ናቴꬃ ኣቱማ ናይቲ ኡባይ ኬኢዳሶን ኬኢዳሶን ኦጌ ቦላ ኩንዳና፤ ኦላንቻቲ ኡባይካ ሃይቂ ዉራና።
JER 49:27 ታኒ ዳማስቆ ካታማ ዩሾን ዲዛ ጊምቤ ቦላ ታማ ዬዳና፤ ሄ ታማይ ቤኒ-ሃዳዴ ሻኮ ማና» ጌስ።
JER 49:28 ባቢሎኔ ካዎ ናቡካዳናጾሬይ ኦሊ ጾኒዳ ቄዳሬ ካዎቴꬃ ጊሻሲኔ ሃጾሬ ካዎቴꬃ ጊሻስ ጎዳይ፥ «ዴንዲዲ ቄዳሬ ኦሊቴ! ኣርሼይ ሞኪዛ ባጋራ ዲዛ ዴራ ዲፒ ሂስቲቴ።
JER 49:29 ኢስታ ዱንካኔታኔ ኢስታ ዉዴታ ኤኪቴ! ኢስታ ኣቆሶይኔ ኢስታ ጋሜላቲ ኡባይ ኣቶንታ ኤኬታና፤ ሂስቲዲ ኢስታስ፥ ‹ኢስታ ቦላ ሺሮ ቦላ ሺሮይ ዪዴስ› ጊዲ ዋሳና።
JER 49:30 «ኢንቴኖ ሃጾሬን ዲዛይቶ! ባቢሎኔ ካዎ ናቡካዳናጾሬይ ኢንቴ ቦላ ኢታ ሚሽ ኦꬃና ማቄቲ ኡቲዳ ጊሻስ ባቃቲቴ፤ ቢዲ ጪማ ጎንጎሎን ቆቴቲቴ።
JER 49:31 «ዴንዲቴ! ሂርጋይ ባይንዳ ባꬊ ጊ ኡቲዳ ባናን ኣማኔቲ ኡቲዳ ካዎቴꬃ ኦሊቴ! ኢቢꬂ ዎይኮ ኮላታይ ባይንዳ ዲሺን ባርካ ዲዛ ዴራ ቦላ ዎራጂቴ» ጌስ።
JER 49:32 ጎዳይ፥ «ኢስታ ጋሜላቲ ቦንቄታና፤ ኢስታ ዉዴታካ ቡሪ ኤኪ ባና፤ ባንታ ሁኤ ጋሜ ሂስቲ ሜዴቲዳይታ ታኒ ጫርኮን ላላና፤ ታኒ ኡባሶራ ኢስታ ቦላ ቦሻ ኤሃና።
JER 49:33 «ሃጾሬይ ዎራካናታ ዱሳሶ ጊዳና፤ ሜርናስ ቡላ ጊዳና፤ ኦኒካ ሄን ዴኤና፤ ኣይ ኣሲካ ኢዚን ኡቴና» ጌስ።
JER 49:34 ዩሁዳ ካዎ ሴዴቂያሲ ካዎቲዳ ኮይሮ ላይꬅ ጎዳፔ ኤላሜ ጊሻስ ታኮ ዪዳ ቃላይ፥
JER 49:35 ኡባፌ ዎልቃማ ጎዳይ፥ «ሄኮ ኢዚ ዎልቃቴꬃስ ዮች ጊዲዳ ኤላሜ ዎንዳፌታ ታ ሜንꬃና።
JER 49:36 ኦይዱ ባጋ ጉላታፔ ታኒ ኤላሜ ቦላ ኦይዱ ጫርኮታ ኤሃና፤ ኢስታ ሄ ኦይዱ ባጋ ጫርኮታን ታ ላላና፤ ኤላሜፔ ዲኤቲ ቢዳይቲ ጋኮንታ ካዎቴꬃይ ዴና።
JER 49:37 ኢስታ ሼምፖ ዎꬋና ኮይዛ ኢስታ ሞርኬታ ሲንꬃን ታኒ ኤላሜ ያርኪያርኪሳና፤ ኢስታ ቦላ ባሽ ኤሃና፤ ሄሲካ ታ ኢስታ ቦላ ኤሃና ሃንቆ፤ ታኒ ኢስታ ሙሌራ ꬋይሳና ጋካናስ ማሻን ዬዴꬃና።
JER 49:38 ታኒ ኣራታ ኤላሜን ቶካና፤ ታኒ ኢዚ ካዎታኔ ሹሜታ ꬋይሳና።
JER 49:39 «ጊዶ ኣቲን ዉርሴꬃ ዎዴታን ታኒ ኤላሜ ዛራ ኢሻልሳና» ጌስ።
JER 50:1 ባቢሎኔ ቢታኔ ባቢሎኔ ኣሳ ጊሻስ ጾሲ ናቤ ኤርማሳ ባጋራ ዮቲዳ ቃላይ ሃይሳፌ ካሊዛይሳ፤
JER 50:2 «ካዎቴꬃታ ኡባ ጊዶን ኣዋጂቴ! ባንዲራ ꬎቁ ሂስቲ ኦይኪዲ ኣዋጂቴ! ኣይኮካ ኣሾንታ ዲሼ፥ ‹ሄኮ ባቢሎኔይ ኦይኬታና፤ ቤሌይ ካዉያና፤ ማርዱኬይ ሺሮን ኩማና፤ ኢዚ ኤቃ ጾሳቲ ካዉያና፤ ኢዚ ኤቃ ሚስሌቲ ሜቄሬታና› ጊቴ።
JER 50:3 ፑዴሃ ባጋፌ ኢሲ ካዎቴꬃይ ዪዲ ባቢሎኔ ቢታ ኦላና፤ ሄሳፌ ዴንዲዳይሳን ኣሲኔ ሜሄይ ባቃታና፤ ቢታዮካ ቡላ ኬሳና፤ ኦኒካ ኢዚን ዴና።»
JER 50:4 ጎዳይ፥ «ሄ ዎዴኒኔ ሄ ጋላሳታን ኢስራኤሌ ኣሳይኔ ዩሁዳ ኣሳይ ኢሲፌ ያና፤ ጎዳ ባንታ ጾሳ ኮዪሼኔ ዬኪሼ ያና።
JER 50:5 ኢስቲ ጺዮኔ ኤፊዛ ኦጌ ኦይቻና፤ ባንታ ሲንꬅ ሄ ዛራና፤ ዪዲ ሙሌራ ዶጌቶንታ ሜርና ጫቆ ቃላን ጎዳራ ኦይኬታና።
JER 50:6 «ታ ዴሬይ ꬋይዳ ዶርሳ ማላ ጊዲዴስ፤ ኢስታ ሄንꬃንቻቲ ኢስታ ባሌꬂዲ ዎራ ካሌꬂዳ፤ ዙማታ ቦላኔ ዙምቡላታ ቦላ ቶይላቲዳ፤ ባ ኣቂዛሶካ ዶጊዳ።
JER 50:7 ዴሚዳ ኡባይ ኢስታ ቆሄስ፤ ኢስታ ሞርኬቲ፥ ‹ኑ ቦላ ሞሮይ ባ፤ ሃይሲ ሜቶይ ኢስታ ጋኪዳይ ባንታ ኣዋታስ ሂዶታ ጊዲዳ ጎዳ፥ ቱማፔ ኢስታስ ዱሳሶ ጊዲዳ ጎዳ ቆሂዳ ጊሻሳ› ጊዳ።
JER 50:8 «ባቢሎኔፔ ባቃቲቴ! ኢስታ ቢታካ ዬዲቴ! ዉዴ ካሌꬂዛ ዴይሻ ኦርጌ ማላ ጊዲቴ።
JER 50:9 ታኒ ፑዴሃ ባጋፌ ዎልቃማ ካዎቴꬃታ ባቢሎኔ ቦላ ዴንꬄꬃና፤ ኢስቲካ ኢዚ ቦላ ሳልፋና፤ ሂስቲዲ ኢዞ ሄፔ ኦይካና፤ ኢስታ ዎንዳፌይ ዬዶንታ ሎሂዳ ኦላንቻታ ማላ።
JER 50:10 ባቢሎኔ ቢታይ ቦንቄታና፤ ኢዞ ቦንቂዛይቲ ባስ ጊዳናሼ ጋካናስ ቦንቃና» ጌስ።
JER 50:11 «ኢንቴኖ ታ ጺንጾ ቦንቂ ኤኪዳይቶ! ኢንቴ ኡፋዬቲዳ ጊሻሲኔ ኡፋይሳን ማጉሊዳ ጊሻስ፥ ዴምባን ጺኬቲዛ ኡሳ ማላ ኢንቴ ሊፍጼቲዳ ጊሻስ፥ ዎዳላ ፓራ ማላ ኢንቴ ጫጊዳ ጊሻስ፥
JER 50:12 ኢንቴ ኣያ ኬሃ ዬላታና፤ ኢንቴና ዬሊዳራካ ካዉያና፤ ካዎቴꬃታ ኡባ ጊዶን ኢዛ ጉꬅ ጊዳና፤ ኢዛ ኣሲ ባይንዳሶ፥ ሃꬂ ባይንዳ ቢታኔ ባዞ ጊዳና።
JER 50:13 ጎዳ ሃንቆ ጋሶን ኢዛ ባዞ ጊዳና ኣቲን ኣሲ ኢዚን ዴና፤ ኢዚ ቦላ ጋኪዳ ባሻ ጋሶን ባቢሎኔራ ኣꬊ ቢዛ ኡባይ ማላሌቲሼ ኢዛ ቂꬋና።
JER 50:14 «ኢንቴኖ ዪሻን ዱኪዛይቶ! ባቢሎኔ ኦላናስ ኢዚ ዩሾን ሳልፍቴ፤ ናጋራ ኦꬂዳ ጊሻስ ኢንቴ ዪሽ ኢሲኖካ ኣሾንታ ኢዚ ቦላ ዬዲቴ።
JER 50:15 ኡባ ባጋራካ ኢዚ ቦላ ማጉሊቴ! ኢዛ ኢንቴስ ኩሼ ኢማና፤ ኢዚ ሚጻቲኔ ጊምቤቲ ላሌታና፤ ሃይሲ ጎዳይ ሃሎ ኬሲዛ ኦጌ ጊዲዳ ጊሻስ ኢንቴ ኢዚ ቦላ ሃሎ ኬሲቴ፤ ኢዛ ሃራታ ቦላ ኦꬂዳ ማላ ኢንቴ ኢዚ ቦላ ኦꬂቴ።
JER 50:16 ባቢሎኔፔ ዜሬꬂ ዜሪዛይሳ፥ ካꬃ ሺሾ ዎዴ ጫካናስ ባጫ ኦይኪዳይሳ ꬋይሲቴ፤ ኡንኤꬂዛይታ ማሻፌ ዴንዲዳይሳን ኢሶይ ኢሶይ ባ ኣሳኮ ሲሞ፤ ባ ዴሬካ ባቃቶ።
JER 50:17 «ኢስራኤሌይ ጋሞይ ጎዲዲ ላሊዳ ዉዴ ማላ ጊዲዴስ፤ ኮይሮ ኣሶሬ ካዎይ ፑዜሬꬂ ሚዴስ፤ ጉዬፔ ባቢሎኔ ካዎ ናቡካዳናጾሬይ ሜቄꬃ ꬎጊዴስ» ጌስ ጎዳይ።
JER 50:18 ሄሳ ጊሻስ ኡባፌ ዎልቃማ ጎዳ ኢስራኤሌ ጾሳይ፥ «ኣሶሬ ካዎ ታኒ ቃጻይዳ ማላ ባቢሎኔ ካዎኔ ኢዛ ቢታ ቃጻያና።
JER 50:19 ጊዶ ኣቲን ታኒ ኢስራኤሌ ካሴ ኢዚ ሄሜቲዛሶ ኢዛ ዛራና፤ ቃርሜሎሴኒኔ ባሳኔ ዴሬን ኢዚ ሄሜታና፤ ቃሴ ኢዚ ኤፍሬሜ ዙምቡላታ ቦላኔ ጋላኣዴ ዙምቡላታ ቦላ ካላናሼ ጋካናስ ማና» ጌስ።
JER 50:20 ሄ ዎዴታኒኔ ሄ ጋላሳታን ጎዳይ፥ «ኢስራኤሌ ሞሮይ ኮዬታና፤ ጊዶ ኣቲን ኢሲናካ ቤቱኩ፤ ዩሁዳ ናጋራይካ ኮዬታና፤ ጊዶ ኣቲን ሙሌካ ቤቴና፤ ሃይቆፔ ታ ኣሺዳ ሾጌታ ታ ማራና» ጌስ።
JER 50:21 «ሚራታይሜኒኔ ፓቆዴን ዲዛ ኣሳ ጎዲቴ፤ ዎꬊቴኔ ሙሌራ ꬋይሲቴ፤ ታኒ ኢንቴና ኣዛዚዳይሳ ኡባ ኦꬂቴ።
JER 50:22 ሄ ቢታን ኦላ ሺሮይኔ ጊታ ባሻ ዋሶይ ሴቴቲዴስ።
JER 50:23 ኣላሜ ኡባ ሊቂሲዛ ማዶሻይ ዋኒ ሜቂዴ? ዋኒ ሊቂዴ? ካዎቴꬃታ ጊዶን ዋና ባቢሎኔይ ቡላ ጊዳዴ?
JER 50:24 ሃኔ ባቢሎኔ! ታ ኔስ ዎጺማዴ ዎꬃዲስ፤ ኔካ ኤሮንታ ዳሼ ኦይኬታዳሳ፤ ኔኒ ጎዳራ ኤቄቲዳ ጊሻስ ቤታዳ ኦይኬታዳሳ።
JER 50:25 ጎዳይ ባ ኦላ ማሳራ ዎꬂዛ ሚንጃ ኬꬃ ዶይዴስ፤ ባ ሃንቆ ኦላ ማሳራ ኬሲዴስ፤ ጎዳይ ኡባፌ ዎልቃማ ጾሳይ ባቢሎኔ ቢታን ኦꬂዛ ኦሶይ ዴስ።
JER 50:26 ያራ ሃራ ኢዚ ቦላ ዎራጂቴ፤ ኢዚ ጎታራታ ላሊቴ፤ ዲኤቲዳ ሚሻ ካꬃ ማላ ዶሪቴ፤ ሙሌራ ኢዞ ꬋይሲቴ፤ ኢዚን ኣይኮይካ ኣቶፎ።
JER 50:27 ኢዚ ዎፋኖታ ኡባ ሹኪቴ፤ ዱጌ ሹኬቲዛሶ ዎꬌቶ! ኢስቲ ቃጻዬታና ዎዴይኔ ጋላሳይ ጋኪዳ ጊሻስ ኣዬ ኣና!
JER 50:28 «ጎዳ ኑ ጾሳይ ሃሎ ኬሲዳይሳ፥ ጾሳ ኬꬃ ጊሻስ ሃሎ ኬሲዳይሳ ባቢሎኔፔ ቤቲዳይቲኔ ጎዴቲዳይቲ ጺዮኔን ሃሳይዛይሳ ሲዪቴ።
JER 50:29 «ዎንዳፌን ኦሊዛይታ ባቢሎኔ ቦላ ጼይጊቴ፤ ኢሳዴይካ ኬሲ ኤኪ ቦንታ ማላ ኢስታ ጊዶꬂዲ ዱንካኒቴ፤ ጎዳ ኢስራኤሌ ጌሻ ካዉሺዳ ጊሻስ ኢዚ ኦሶ ማላ ኢዚስ ዛሪቴ፤ ኢዛ ሃራታ ቦላ ኦꬂዳይሳꬆ ኢዚ ቦላ ኦꬂቴ።
JER 50:30 ሄሳ ጊሻስ ኢዚ ናቴꬃ ኣቱማ ናይቲ ኣꬎሶን ኣꬎሶን ሃይቃና፤ ኢዚ ኦላንቻቲ ኡባይ ሄ ጋላስ ኩንዳና» ጌስ ጎዳይ።
JER 50:31 ጎዳይ ኡባፌ ዎልቃማ ጾሳይ፥ «ኔኖ ኦቶራንቻዞ! ታኒ ኔ ቦላ ዴንዳዲስ፤ ኔኒ ቃጻዬታና ዎዴይኔ ጋላሳይ ጋኪዴስ።
JER 50:32 ኦቶራንቻይ ꬉጴቲዲ ኩንዳና፤ ዴንꬃናይካ ዴና፤ ኢዛ ዩሾን ዲዛይታ ኡባ ሚዛ ታማ ኢዛ ካታማታ ቦላ ዬዳና» ጌስ።
JER 50:33 ጎዳይ ኡባፌ ዎልቃማ ጾሳይ፥ «ኢስራኤሌ ኣሳይኔ ዩሁዳ ኣሳይ ኢሲ ቦላ ቆሄቲዴስ፤ ዲኢዳይቲ ኡባይ ኢስታ ሚንꬂ ኦይኪዳ፤ ኢስታ ዬዳናስ ኢጺዳ።
JER 50:34 ጊዶ ኣቲን ኢስታ ዎዚዛይ ሚኖ፤ ኢዛ ሱንꬃይካ ጎዳ ኡባፌ ዎልቃማ ጾሳ፤ ኢስቲ ቢታስ ሼምፖ ኢማናስ ኬሂ ባጼቴስ፤ ጊዶ ኣቲን ባቢሎኔን ዲዛይታስ ሼምፖ ꬋይሴስ» ጌስ።
JER 50:35 ጎዳይ፥ «ማሻይ ባቢሎኔ ኣሳ ቦላ ዪዴስ፤ ኢዚን ዲዛ ኣሳታ ቦላ፥ ማታይ ዲዛ ኣሳታ ቦላኔ ኣꬎ ኤራንቻታ ቦላ ሲፋናስ ሾዴቲዴስ።
JER 50:36 ማሻይ ዎርዶ ጊዲዳ ኢዚ ናቤታ ቦላ ዪዴስ፤ ኢስቲ ኤያታ ጊዳና፤ ማሻይ ኢስታ ኦላንቻታ ቦላ ሾዴታና፤ ኢስቲካ ሺሮታና።
JER 50:37 ኢስታ ፓራታ ቦላኔ ኢስታ ፓራ-ጋሬታ ቦላ ቃሴ ኢዚ ጊዶን ዲዛ ሃራ ዴሬ ዎታዳራታ ቦላ ማሻይ ያና፤ ኢስቲካ ማጫሳታ ማላ ጊዳና፤ ማሻይ ኢዚ ኣቆታ ኡባ ቦላ ያና፤ ኢስቲካ ቦንቄታና።
JER 50:38 ቢታያ ባቢሲዛኔ ኣስ ጎሺዛ ኤቃ ጾሳታን ኩሚዳ ጊሻስ ኢዚ ሃꬃታ ቦላ ኣርሼይ ኬዛና፤ ኢስቲካ ሜላና።
JER 50:39 «ሄሳ ጊሻስ ባዞ ዶኣታሲኔ ጎዳሬስ ዱሳሶ ጊዳና፤ ጉቶስ ኣቆሶ ጊዳና፤ ሃይሳፌ ጉዬ ኦኒካ ኢዚን ዴና፤ ዬሌታፔ ዬሌታ ጋካናስ ኢዚን ኡታናይ ቤቴና።
JER 50:40 ሶዶሜኔ ጋሞራ ካታማ ኢስታ ዩሾን ዲዛ ዴሬታ ኣሲ ዶንታ ማላ ኦꬂዴስ፤ ሄሳꬆካ ኦኒካ ሄን ዴና፤ ኢዚን ኡታናይካ ቤቴና» ጌስ።
JER 50:41 «ቤኢቴ! ፑዴሃ ባጋፌ ኣሳይ ዬꬃ ቦላ ዴስ፤ ኢሲ ዎልቃማ ካዎቴꬂኔ ዳሮ ካዎቲ ሳኣ ጋጻፔ ዴንዲዳ።
JER 50:42 ኢስቲ ዎንዳፌታኔ ማሻታ ኦይኪዳ፤ ኢስቲ ማሮንታ ሜንጼ ኢታታ፥ ማሮካ ኦꬄቴና፤ ኢስቲ ፓራታ ቶጊሺን ኢስታ ጊሪሳይ ኣባ ዳምባላ ማላ ጉሜስ፤ ሃኔ ባቢሎኔ ማጫ ናዬ! ኦላስ ጊጌቲዳ ኦላንቻታ ማላ ኔ ቦላ ያና።
JER 50:43 ባቢሎኔ ካዎይ ኢስታ ጊሻስ ሲዪዴስ፤ ኢዛ ኩሼቲካ ዶጪዳ፤ ኢዛ ጬጬይ ኦይኪዴስ፤ ሚጻይ ኦይኪዳ ማጫሳ ማላ ሳኬቲዴስ።
JER 50:44 ጋሞይ ዮርዳኖሴ ዎራታፔ ሜሄ ሄሚዛ ዴምባን ኬዚ ዎꬊዛ ማላ ታኒካ ባቢሎኔይ ቆፖንታ ዲሺን ኬዛ ዎꬋና፤ ኢዚ ቢታፌ ታ ኢዞ ጎዳና፤ ታ ዶሪዳይሳ ኢዚ ቦላ ሹማና፤ ታ ማላይ ኦኔ? ታናራ ኤቄታና ዳንዳይዛይ ኦኔ? ታናራ ኤቄታና ዳንዳይዛ ሄንꬃንቻይ ኦኔ?
JER 50:45 ሄሳ ጊሻስ ጎዳይ ባቢሎኔ ቦላ ሃልቺዳ ሃልቾ፥ ባቢሎኔ ቢታ ቦላ ቆፒዳ ቆፋ ሲዪቴ! ጉꬃ ዉዴይ ጎሼቲ ባና፤ ኢስታ ጋሶን ሄሚዛሶሆዛ ሙሌራ ꬋይሳና።
JER 50:46 ባቢሎኔ ኩንዴꬃ ጊሪሲ ቢታ ቃꬃና፤ ኢዚ ዋሶይ ካዎቴꬃ ኡባ ጋርሳን ኮሹማና» ጌስ።
JER 51:1 ጎዳይ፥ «ቤኢቴ! ባቢሎኔኔ ኢዚን ዲዛይታ ቦላ ꬋይሲዛ ጫርኮ ታኒ ዬዳና።
JER 51:2 ኢዞ ሱራጋናሲኔ ኢዞ ꬋይሳናስ ኣላጋታ ታ ባቢሎኔ ቦላ ኪታና፤ ኢዛ ሜቶቲዳ ጋላስ ኢዞ ዶዲ ኦይኪዲ ኡንኤꬃና።
JER 51:3 ዎንዳፌ ዱኪዛይቲ ባ ዎንዳፌ ዱካናስ፥ ባ ኦላ ማይኦ ማይኣና ጋካናስ ሼምፖ ኢሞፍቴ፤ ናቴꬃ ኢዚ ናይታስ ቃꬌቶፍቴ፤ ኢዚ ኦላንቻታ ሙሌራ ꬋይሲቴ።
JER 51:4 ኢስቲ ባቢሎኔ ቢታን ሲፌቲዲ፥ ኢዚ ኦጌታን ሃይቃና ጋካናስ ማዱንጺዲ ኩንዳና።
JER 51:5 ኢስታ ቢታያ ኢስራኤሌ ጌሻ ሲንꬃን ሞሮን ኩሚዳ ጊዲኮካ ኢስራኤሌኔ ዩሁዳ ኡባፌ ዎልቃማ ጎዳይ ኢስታ ጾሳይ ኢስታ ዬጊ ኣጊቤና።
JER 51:6 «ባቢሎኔፔ ባቃቲ ኬዚቴ! ኤሌሊዲ ኢንቴ ሼምፖ ኣሺቴ፤ ኢዚ ናጋራ ጋሶን ꬋዮፒቴ፤ ሃይሲ ጎዳይ ሃሎ ኬሲዛ ዎዴ ኢዚ ኦሶ ማላ ኢዚስ ኢማና።
JER 51:7 ባቢሎኔይ ጎዳ ኩሼን ዎርቃ ጹኣ፤ ቢታ ኡባ ማꬆሳዱስ፤ ካዎቴꬃቲ ኡባይ ኢዚ ዎይኔ ኡሻ ኡዪዳ፤ ሄሳ ጊሻስ ሃኢ ጎዪዳ።
JER 51:8 ባቢሎኔይ ቆፖንታ ዳሼ ኩንዳ ሜቃና፤ ሄሳ ጊሻስ ኢዚስ ዋሲቴ! ኦኔ ኤሪዛይ ኢዛ ፓጻናኮ ኢዚ ማዱንꬃስካ ꬋሌ ኮዪቴ።
JER 51:9 «ኣሳይ፥ ‹ኑኒ ባቢሎኔ ፓꬃናስ ባጼቲዶስ፤ ኢዛ ጊዲኮ ፓጻና ዳንዳዩኩ፤ ኢዚ ፒርዳይ ፑዴ ሳሎ ጋኪዳ ጊሻስ ሻራን ጋካናስካ ꬎቁ ጊዳ ጊሻስ ኢዞ ኣጋጊዲ ኣኔ ኑ ዴሬ ዴሬ ሲሞስ።
JER 51:10 ጎዳይ ኑ ሱሬቴꬃ ጊሻስ ማርካቲዴስ፤ ኣኔ ሃ ዪቴ፤ ጎዳ ኑ ጾሳይ ኦꬂዳይሳ ጺዮኔን ኣዋጆስ› ጊዴስ።
JER 51:11 «ቶራታ ሌፍቴ፤ ጎንዳሌታካ ጊግሲቴ፤ ጎዳይ ባቢሎኔ ꬋይሳና ቆፒዳ ጊሻስ ሜዶኔ ካዎታ ዴንꬄꬂዴስ፤ ጎዳይ ሃሎ ኬሳና፤ ባ ኬꬃ ጊሻስ ሃሎ ኬሳና።
JER 51:12 ባቢሎኔ ጊምቤታ ቦላ ማላታ ኤሲቴ፤ ሚንꬂ ናጊቴ፤ ዛቤ ናጊዛይታ ኤሲቴ፤ ዛማዲ ኡቲዲ ኦሊዛይታ ጊግሲቴ። ጎዳይ ባቢሎኔ ኣሳ ቦላ ቆፒዳ ቆፋኔ ባ ሃልቾ ፖላና።
JER 51:13 ሃኔ ዳሮ ሻፋታ ማታን ዲዛሬ! ኣቆታን ኬሃ ዱሬቲዳሬ! ኔ ꬋያና ዎዴይ ጋኪዴስ፤ ኔስ ዉርሴꬂ ጋኪዴስ» ጌስ።
JER 51:14 ጎዳይ ኡባፌ ዎልቃማ ጾሳይ፥ «ቦሌይ ቢታ ኩሚዛ ማላ ዳሮ ኣስ ታ ኔ ቦላ ዬዳና፤ ሄይቲ ኔና ጾኒዳ ኡፋይሳፌ ዴንዲዳይሳን ኔ ቦላ ጬቄታና» ጊዲ ባ ሱንꬃን ጫቂዴስ።
JER 51:15 «ጾሲ ባ ዎልቃን ሳኣ ሜꬊዴስ፤ ባ ኣꬎ ኤራቴꬃን ኣላሜ ጊግሲዴስ፤ ሳሎታካ ባ ኣኬካን ሚጪዴስ።
JER 51:16 ኢዚ ባ ጬንጉርሳ ሲሲዛ ዎዴ ሳሎን ዲዛ ሃꬃቲ ጉሜቴስ፤ ሻራታ ኢዚ ሳኣ ጋጻፔ ኤሄስ፤ ኢራራ ዎልቃንꬅ ኪቴስ፤ ባ ሚንጃሶሆፔካ ጫርኮ ኪቴስ።
JER 51:17 «ኣስ ኡባይ ዳማኔ ኤራቴꬂ ባይንዳይሳ ጊዲዴስ፤ ዎርቃ ሴሪሲዛይቲ ኡባይ ባ ኦꬂዳ ኤቃ ሚስሌታን ዬላቲዳ፤ ኢስቲ ጊግሲዳ ሚስሌቲ ዎርዶኔ ሼምፖይ ባይንዳይታ።
JER 51:18 ኢስቲ ሃዳኔ ካꬌቲዳይታ፤ ኢስታ ቦላ ፒርዳይ ዪዛ ዎዴ ኢስቲ ꬋያና።
JER 51:19 ያቆቤ ቃዳይ ጊዲኮ ሄይታንታ ማላ ጊዴና፤ ኢዚ ኡባ ሜꬊዳይሳ፤ ኢስራኤሌ ኣሳይ ኢዚ ባስ ዶሪዳ ዴሬ፤ ኢዛ ሱንꬂ ጎዳ ኡባፌ ዎልቃማ ጾሳ» ጌስ።
JER 51:20 ጎዳይ፥ «ባቢሎኔ ኔኒ ታ ጻምኣኔ ኦላ ማሳራ፤ ኔናን ጎኤታዳ ታኒ ዴሬ ኡባ ሜንꬄሬꬃዲስ፤ ቃሴ ካዎቴꬃታካ ꬋይሳዲስ።
JER 51:21 ኔናን ፓራታኔ ፓራ ቶጊዛይታ ꬋይሳዲስ፤ ፓራ-ጋሬታኔ ኢስታ ላጊዛይታ ሜንꬄሬꬃዲስ።
JER 51:22 ኔናን ማጫሳታኔ ኣቱማሳታ ሜንꬄሬꬃዲስ፤ ጪማታኔ ናቴꬃታ ሜንꬄሬꬃዲስ፤ ፓንꬃታኔ ጌላኦታ ሜንꬄሬꬃዲስ።
JER 51:23 ኔናን ሄንꬃንቻታኔ ዉዴታ ሜንꬄሬꬃዲስ፤ ጎሻንቻታኔ ቦራታ ሜንꬄሬꬃዲስ፤ ዴሬ ሃሪዛይታኔ ሹሜታ ሜንꬄሬꬃዲስ» ጌስ።
JER 51:24 ጎዳይ፥ «ጺዮኔ ቦላ ኢስቲ ኦꬂዳ ኢታ ኦሶ ጊሻስ ባቢሎኔሲኔ ኢዚን ዲዛ ኡባስ ኢንቴ ኢንቴ ኣይፌን ቤኢሺን ኢስታ ኦሶ ማላ ታ ኢስታስ ኢማና» ጌስ።
JER 51:25 ጎዳይ፥ «ሃኔ ꬋይሲዛ ዙማዬ! ቢታ ኡባ ꬋይሲዛሬ! ታ ኔ ሁኤ ቦላ ዳይስ፤ ታኒ ታ ኩሼ ኔ ቦላ ዴንꬃና፤ ታ ኔና ኣፎ ሁኤፔ ዱጌ ቡሉላና፤ ታ ኔና ጹጌቲዳ ዙማ ሂስታና።
JER 51:26 ኔፔ ዮቻ ሹቺ ቤቴና፤ ጉላስ ጊዲዛ ሹቺ ኤኬቴና፤ ኔኒ ሜርናስ ቡላ ጊዳና» ጌስ።
JER 51:27 «ቢታ ኡባ ቦላ ባንዲራ ዴንꬂቴ፤ ካዎቴꬃታ ጊዶን ዛዬ ፑኒቴ፤ ካዎቴꬃታ ኢዚ ቦላ ኦላስ ጊግሲቴ፤ ኣራራቴ፥ ሚናኔኔ ኣሽኬናዜ ካዎታ ኦላስ ኢዚ ቦላ ጼይጊ ሺሺቴ፤ ኦላ ጋዳዋ ኢዚ ቦላ ሹሚቴ፤ ቦሌ ዉዴ ማላ ፓራታ ኢዚ ቦላ ዬዲቴ።
JER 51:28 ሜዶኔ ካዎታ፥ ኢዞ ኣይሲዛይታኔ ኢዚ ሹሜታ ኡባ፥ ኢስቲ ሃሪዛሶን ዲዛ ካዎቴꬃታ ኡባ ኢዚ ቦላ ኦላስ ጊግሲቴ።
JER 51:29 ባቢሎኔ ኦኒካ ዶንታ ባዞ ቢታ ሂስታናስ ጎዳይ ቆፒዳ ቆፋይ ፖሌታና ዎዴይ ጋኪዳ ጊሻስ ቢታይ ኮኮሬስ፤ ሜቶንካ ፖፖርቁ ጌስ።
JER 51:30 ባቢሎኔ ኦላንቻቲ ኦላ ኣጊዳ፤ ባንታ ሚጻን ኡቲዳ፤ ኢስታስ ዎልቃይ ዉሪዴስ፤ ኢስቲ ማጫሳ ማላ ጊዲዳ፤ ኢስታ ኬꬃቲካ ጹጌቲዳ፤ ኢዚ ፔንጌ ኮላታቲ ሜቄሬቲዳ።
JER 51:31 ካታማያ ሙሌራ ኦይኬቲዳይሳ ባቢሎኔ ካዎስ ዮታናስ ኢሲ ዮምባይ ሃራ ዮምባስ፥ ኢሲ ቃስታኔይ ሃራ ቃስታኔስ ሄራካ ቶሆ ቦላ ካሌስ።
JER 51:32 ሻፋ ፒኒዛ ፑርዴቲ ኦይኬቲዳይሳ፥ ሻፋ ማታን ዲዛ ሚጻቲ ጹጌቲዳይሳ፥ ኢስታ ዎታዳራቲ ባቦን ቡልኣኬቲዳይሳ፥ ዳጋሚዳይሳ ዮታናስ ዎጼሬቴቴስ» ጌስ።
JER 51:33 ኡባፌ ዎልቃማ ጎዳ ኢስራኤሌ ጾሳይ፥ «ባቢሎኔ ማጫ ናይቲ ካꬅ ቡካናስ ጊጊዛ ባሌ ማላ፤ ካꬃ ሺሾ ዎዴይ ኢዚ ቦላ ኤሶን ጋካና» ጌስ።
JER 51:34 ባቢሎኔ ካዎ ናቡካዳናጾሬይ ዬሩሳላሜ ኣቆታ ቦንቂዴስ፤ ጋጪ ሊቂሲዴስ፤ ኣይኮይ ባይንዳ ካይሳ ኦቶ ኬሲዴስ፤ ዳዌይ ሚቲዛ ማላ ዴራ ሚቲዴስ፤ ማልኦ ሚዛ ማላ ሚዲ ጉዬፔ ኑና ኬሲ ጩቲዴስ።
JER 51:35 ሄሳ ጊሻስ ጺዮኔ ኣሳይ፥ «ኑ ቦላ ጋኪዳ ጌኔይ ባቢሎኔ ቦላ ጋኮ» ጌስ፤ ዬሩሳላሜይ፥ «ኑ ሱꬂ ባቢሎኔን ዲዛ ኣሳታ ቦላ ጊዶ» ጋዉስ።
JER 51:36 ሄሳ ጊሻስ ጎዳይ፥ «ኔ ጊሻስ ታ ሞቴታና፤ ኔ ሃሎካ ኬሳና፤ ኢዚ ኣባኔ ፑልቶ ሃꬃታ ታ ሜሊሳና።
JER 51:37 ባቢሎኔይ ላሌꬂ ዶሬቲዛሶ ጊዳና፤ ዎራካናቲ ካኢዛሶ ጊዳና፤ ዳጋማሲኔ ቂꬌስ ማላታ ጊዳና፤ ኦኒካ ኢዚን ዴና።
JER 51:38 ኢዚን ዲዛ ኣሳይ ዎዳላ ጋሞ ማላ ጻጌስ፤ ጋሞ ማራ ማላ ዳሬስ፤ ኢስቲ ሆኤቲ ዴንዴቲሺን ታ ኢስታስ ጊቢራ ጊጊሳና፤ ኢስቲ ማꬆታና ማላ ኦꬃና።
JER 51:39 ሚጪሼ ሜርናስ ቤጎንታ ꬊስኮ ꬊስካና።
JER 51:40 ላቃ ማላ፥ ꬋርሾ ማላኔ ኮርቤ ማላ ታ ኢስታ ሹካስ ኤፋና።
JER 51:41 «ሼሻካ ዋና ዲኤታዴ! ሳኣ ኡባይ ኢዚን ጬቄቲዛራ ዋና ኦይኬታዴ! ባቢሎኔይ ካዎቴꬃታ ኡባ ሲንꬃን ኣይ ማላ ዳጋንꬂዛዝ ጊዳዴ!
JER 51:42 ኣባይ ባቢሎኔ ቦላ ኬዛና፤ ዳምባላይካ ጉሚሼ ኢዞ ሚታና
JER 51:43 ኢዚ ካታማቲ ኣሲ ባይንዳሶ፥ ኣሲ ሞኪ ጼሎንታሶ፥ ሜላኔ ባዞ ቢታ፥ ኣይኮይ ባይንዳ ቡላ ቢታ ጊዳና።
JER 51:44 ቤሌ ታኒ ባቢሎኔን ቃጻያና፤ ኢዚ ሚቲዳይሳካ ታ ጮሻና፤ ሃይሳፌ ካዎቴꬃይ ኢዛኮ ጎጌና፤ ባቢሎኔ ጊምቤይ ኩንዳና።
JER 51:45 ታ ዴሬቶ! ኢዚፔ ኬዚቴ፤ ኢንቴ ሼምፖ ኣሺቴ፤ ያሺዛ ጎዳ ሃንቆፌ ኬሲ ኤኪ ኣቲቴ።
JER 51:46 ዎሬይ ቢታይን ሴቴቲሺን ሂዶታ ቃንጾፍቴኔ ባቦፍቴ፤ ካዎይ ካዎ ቦላ ዴንዲዛይሳ፥ ማካላቴꬂ ቢታይ ቦላ ዲዛይሳ ኢሲ ዎሬይ ሃ ላይꬃን፥ ሃራይ ላይꬅ ካሊዲ ያና።
JER 51:47 ቱማፔ ታኒ ባቢሎኔ ኤቃ ጾሳታ ቃጻያና ዎዴይ ያና፤ ቢታያ ኩሜꬅ ካዉያና፤ ሲፌቲዳይቲ ኡባይ ኢዚን ፖርጩ ጊ ኩንዳና።
JER 51:48 ꬋይሲዛይቲ ፑዴሃ ባጋፌ ዪዲ ኢዞ ኦሊዛ ጊሻስ ሳሎይኔ ሳኣይ ቃሴ ኢስታ ጊዶን ዲዛ ኡባይ ባቢሎኔ ቦላ ኢሊሊ ጋና» ጌስ።
JER 51:49 ጎዳይ፥ «ቢታ ኡባን ሲፌቲዳይቲ፥ ባቢሎኔ ጋሶን ኩንዲዳ ማላ ኢስራኤሌን ሲፌቲዳይታ ጋሶን ባቢሎኔይ ኩንዳና ቤሳዉስ» ጌስ።
JER 51:50 ኢንቴኖ ማሻፌ ኬሲ ኤኪ ኣቲዳይቶ! ቢቴ፤ ሃይሳን ታኮፍቴ፤ ሃኮ ቢታን ዲዛይቶ ጎዳ ኣኬኪቴ፤ ዬሩሳላሜካ ቆፒቴ።
JER 51:51 «ኣላጋቲ ጌሻሶሆ ጎዳ ኬꬅ ጌሊዳ ጊሻስ፥ ‹ኑኒ ጫዬቲዶስ፤ ዬላይ ኑ ሲንꬅ ካሚዴስ፤ ካዉሻቴꬂካ ጉሉንቲዶስ› ጊቴ» ጌስ።
JER 51:52 ጊዶ ኣቲን ጎዳይ፥ «ባቢሎኔ ኤቃ ጾሳታ ቃጻያና ዎዴይ ያና፤ ኢዚ ቢታ ኡባን ማዱንጺዳይቲ ጎታራና።
JER 51:53 ባቢሎኔይ ፑዴ ሳሎ ኬዚኮካ፥ ꬎቁ ጊዳ ሚኖ ሚጻ ኦꬂኮካ ታኒ ꬋይሲዛይታ ኢዚ ቦላ ዬዳና» ጌስ።
JER 51:54 «ባቢሎኔፔ ዋሶይ ሲዬታና፤ ኢስታ ቢታፌ ጊታ ባሻ ጬንጉርሲ ሲዬታና።
JER 51:55 ጎዳይ ባቢሎኔ ꬋይሳና፤ ኬሃ ዋሲዛ ኢዚ ዋሶዛ ጮኡ ሂስታና፤ ኢስታ ሞርኬቲ ጊታ ሃꬃ ማላ ጉማና፤ ኢስታ ዋሶይካ ኮሹማና።
JER 51:56 ባቢሎኔ ꬋይሲዛ ሚሺ ያና፤ ኢዚ ኦላንቻቲ ዲኤታና፤ ኢስታ ዎንዳፌይካ ሜቃና፤ ጎዳይ ጌኔ ኦሶ ጊሻስ ሃሎ ኬሲዛዴኔ ኢዚ ሃኒዛ ሚሽ ኡባስ ቤሲዛ ዋጋ ቃንጺዛ ጾሳ።
JER 51:57 ኢዚ ሹሜታኔ ኣꬎ ኤራንቻታ ኢዞ ሃሪዛይታኔ ጊታ ኣሳታ፥ ኢዚ ኦላንቻታ ታኒ ማꬆሳና፤ ኢስቲ ሜርናስ ኢቻና፤ ሲሚዲካ ቤጌቴና» ጌስ ኢዛ ሱንꬂ ጎዳ ኡባፌ ዎልቃማ ጾሳ ጌቴቲዛ ካዎይ።
JER 51:58 ጎዳይ ኡባፌ ዎልቃማ ጾሳይ፥ «ጉባይ ዳልጋ ጊዲዳ ባቢሎኔ ጊምቤቲ ላሌታና፤ ꬎቁ ጊዳ ኢዚ ፔንጌቲካ ታማን ጹጌታና፤ ኣሳይ ሃዳ ዳቡሬስ፤ ካዎቴꬃታ ዳቡራይ ታማስ ጻላ ጊዳና» ጌስ።
JER 51:59 ዩሁዳ ካዎ ሴዴቂያሲ ካዎቲዳ ኦይዳንꬆ ላይꬃን ካዎዛ ጊቤ ዛቤዚ ማኢሴያ ናዛ ኔሪያ ና ሳራያይ ካዎዛራ ባቢሎኔ ቢዳ ዎዴ ናቤ ኤርማሲ ኢዛስ ዮቲዳ ኪታይ ሃይሳ።
JER 51:60 ኤርማሲ ባቢሎኔ ጊሻስ ካሴ ጻፊ ዎꬂዳይሳ ኡባ ባቢሎኔ ቦላ ያና ባሽ ኡባ ጻꬃ ማጻፋን ጻፊዴስ።
JER 51:61 ሳራያስካ፥ «ኔኒ ባቢሎኔ ጋኪዳ ማላ ሃይሳ ቃላ ኡባካ ኔ ቃላ ꬎቁ ሂስታዳ ናባባናይሳ ባሎፓ።
JER 51:62 ኔኒ፥ ‹ኣቤት ጎዳዉ! ኔኒ ሃኖ ሃ ሶሆዪን ኣስ ጊዲን ሜሄይ ሙሌራ ꬋያና ጋካናስ ሜርናስ ቡላ ኬሳና ጋዳሳ› ጋ።
JER 51:63 ኔኒ ሃይሳ ጻꬃ ማጻፋዛ ናባባ ዉርሲዳፔ ጉዬ ኢዛ ጊዶን ሹች ቃቻዳ ኤፊራጺሴ ሻፋን ኤፋ ዬጋ።
JER 51:64 ሂስታዳ፥ ‹ባቢሎኔይካ ታ ኢዚ ቦላ ኤሂዛ ባሻፌ ዴንዲዳይሳን ሃይሳꬆ ሚቴታና፤ ናምኣንꬆ ሲማ ዴንዱኩ፤ ኢዚ ኣሳይካ ኩንዳና› ጋ» ጌስ። ኤርማሲ ሃሳይዳ ቃላይ ሃይሳን ፖሌቲዴስ።
JER 52:1 ሴዴቂያሲ ካዎቲዛ ዎዴ ኢዛስ ላይꬃይ ናምኡ ታማኔ ኢሲኖ፤ ኢዚ ዬሩሳላሜን ታማኔ ኢሲ ላይꬅ ካዎቲዴስ፤ ኢዛ ኣዬይ ሱንꬂ ኣምጻሎ ጊዲሺን ኢዛ ሊቢና ዴሬ ኣስ ኤርማሳ ና።
JER 52:2 ሴዴቂያሲካ ኢዮኣቄሜይ ኦꬆይሳꬆ ጎዳ ሲንꬃን ኢታ ሚሽ ኦꬂዴስ።
JER 52:3 ጎዳይ ዬሩሳላሜ ቦላኔ ዩሁዳ ቦላ ሄሳ ኡባካ ጋꬂዳይኔ ዉርሴꬃን ኢዚ ባ ሲንꬃፌ ዲጊዳይ ሃንቄቲዳ ጊሻሳ። ሴዴቂያሲካ ባቢሎኔ ካዎ ቦላ ማካሊዴስ።
JER 52:4 ሄሳ ጊሻስ ሴዴቂያሲ ካዎቲዳ ኡዱፉንꬃ ላይꬃን ታማንꬃ ኣጊናን ታማንꬃ ጋላስ ባቢሎኔ ካዎ ናቡካዳናጾሬይ ባ ኦላ ዎታዳራታ ኡባ ሺሺ ኤኪዲ ዬሩሳላሜ ቦላ ዎራጂዴስ። ካታማዮካ ጊዶꬂዴስ፤ ዩዪ ኣꬋናስ ኬላ ኬሊዴስ።
JER 52:5 ካታማያካ ካዎ ሴዴቂያሲ ካዎቲን ኢዛስ ላይꬃይ ቢዲ ታማኔ ኢሲ ላይꬅ ጊዳና ጋካናስ ጊዶꬂዳ ማላ ጋምኣዱስ።
JER 52:6 ኦይዳንꬃ ኣጊናን ኡዱፉንꬃ ጋላስ ሄ ካታማይን ኮሻይ ሚኒዳ ጊሻስ ዴሬዛስ ማና ካꬂ ꬋይዴስ።
JER 52:7 ሄ ካታማይ ጊምቤይ ላሌቲዴስ፤ ኦላ ኣሳይ ኡባይካ ኬዚ ባቃቲዴስ። ባቢሎኔ ዴሬ ኣሳይ ሄ ካታማይ ዩሾን ዲኮካ ካዎዛ ኣታኪልቴ ኣቻን ናምኡ ጊምቤታ ጊዶን ዲዛ ፔንጌዛራ ጊዶꬅ ካታማይፔ ኬሲ ኤኪ ባቃቲዲ ኣራቤ ጌቴቲዛሶ ቢዳ።
JER 52:8 ባቢሎኔ ዴሬ ኦላንቻቲ ካዎ ሴዴቂያሳ ዬዴꬂዲ ኢያርኮ ዴምባን ኢዛ ጋኪዳ፤ ዎታዳራቲ ኡባይካ ኢዛፔ ሻኬቲዲ ላሌቴꬃን ዲሺን ካዎዛ ኦይኪዳ።
JER 52:9 ኢዛ ሃማቴ ዴሬን ኤሬቢላ ጌቴቲዛሶን ዲዛ ባቢሎኔ ካዎኮ ኤፊዳ፤ ባቢሎኔ ካዎይ ሄን ኢዛ ቦላ ፒርዲዴስ።
JER 52:10 ኤሬቢላን ባቢሎኔ ካዎይ ሴዴቂያሳ ኣቱማ ናይታ ኢዛ ሲንꬃን ሹኪዴስ፤ ዩሁዳ ዴሬ ሹሜታ ኡባካ ዎꬊዴስ።
JER 52:11 ሴዴቂያሳ ኣይፌታካ ዎጪ ኬሲዴስ፤ ጻርቂማላ ሳንሳላታን ኢዛ ቃቺዲ ባቢሎኔ ኤፊዴስ፤ ሂስቲዲ ኢዚ ሃይቃና ጋካናስ ሄን ቃሾ ኬꬃን ጋምኢሲዴስ።
JER 52:12 ባቢሎኔ ካዎ ናቡካዳናጾሬይ ካዎቲዳ ታማኔ ኡዱፉንꬃ ላይꬃን ኢቻሻንꬆ ኣጊናን ታማንꬃ ጋላስ ባቢሎኔ ካዎዛ ቦንቾ ናጊዛ ዎታዳራታ ሃላቃይ ካዎ ሹሜ ናቡዛራዳኔይ ዬሩሳላሜ ዪዴስ።
JER 52:13 ጎዳ ኬꬃዛኔ ካዎቴꬃ ኬꬃ ሄሳꬆካ ዬሩሳላሜን ዲዛ ኬꬅ ኡባካ ታማን ጹጊዴስ፤ ሃራ ዎልቃማ ኬꬃታካ ዲፒ ሂስቲ ጹጊዴስ።
JER 52:14 ካዎዛ ቦንቾ ናጊዛ ዎታዳራታ ሃላቃፔ ጋርሳራ ዲዛ ባቢሎኔ ኦላንቻቲ ኡባይ ዬሩሳላሜ ዩሾን ዲዛ ጊምቤዛ ኡባ ላሊዳ።
JER 52:15 ናቡዛራዳኔይ ኢሲ ኢሲ ማንቆታ፥ ካታማይ ጊዶን ኣቲዳ ኣሳታ፥ ሂላንቻታኔ ባቃቲዲ ባቢሎኔ ካዎስ ኩሼ ኢሚዳይታ ዴንꬂ ኤፊዴስ።
JER 52:16 ጊዶ ኣቲን ናቡዛራዳኔይ ሃንኮ ሄ ቢታን ዲዛ ማንቆታ ዎይኔ ቶካናሲኔ ጎሻንቻታ ጊዳና ማላ ሄን ኣጊዴስ።
JER 52:17 ባቢሎኔ ዴሬ ኣሳይ ጎዳ ኬꬃን ዲዛ ጻርቂማላ ቱሳታ፤ ሚሻታ ኢስታ ቦላ ዎꬂዲ ኢሲ ሶሆፔ ሃራሶ ኤፊዛ ጋሬታኔ ጻርቂማላፔ ኦሴቲዳ ሃꬃ ጎንጌታ ሜንꬄሬꬂ ዬጊዳ፤ ጻርቂማላ ኡባካ ባቢሎኔ ኤኪ ቢዳ።
JER 52:18 ሄይታፔ ሃራካ ጻሮታ፥ ታማ ካሺዛ ኮንኣታ፥ ቃጴታ፥ ኬሬታ፥ ጪልፋታኔ ጎዳ ኬꬃ ጊዶን ኦሶስ ጎኢዛ ጻርቂማላፔ ኦሴቲዳ ሚሻታ ኡባካ ኤኪ ቢዳ።
JER 52:19 ካዎ ቦንቾ ናጊዛ ዎታዳራታ ሃላቃይ ሙሩታ ዎርቃፌኔ ሙሩታ ቢራፔ ኦሴቲዳ ሚሻታ ኡባ፥ ጉቃ ሳኔታ፥ ኤጻኔ ጩዋሲዛ ጺናታ፥ ኬሬታ፥ ቄሪ ጻሮታ፥ ጾምፔ ኢስታ ቦላ ዎꬂዛ ሚሻታ፥ ጪልፋታኔ ኡሻ ያርሾ ኢስታን ሺሺዛ ጹኣታ ኤኪ ቢዴስ።
JER 52:20 ካዎ ሶሎሞኔይ ጎዳ ኬꬄስ ጻርቂማላፔ ኦሲሲዳ ናምኡ ቱሳቲ፥ ሃꬃ ጎንጌ፥ ኢዛፔ ጋርሳ ባጋራ ዲዛ 12 ዎፋኖቲኔ ሚሻታ ኢስታ ቦላ ዎꬂዲ ኢሲ ሶሆፔ ሃራሶ ኤፊዛ ጋሬቲ ኬሂ ዴጼቴስ።
JER 52:21 ኢሲ ኢሲ ቱሳ ጌሳይ 18 ዋꬋ፥ ጎምፓይ ዩዪ ኣꬋናስ 12 ዋꬋ፤ ኢዛስ ጊዶይ ዶያ ጊዲዳ ጊሻስ ኢሳ ኢሳ ዶና ኦርዴቴꬃይ ኦይዱ ቢራꬌይ ዎꬊዛ ኬና።
JER 52:22 ኢሲ ቱሳ ሁኤ ቦላ ዋꬊዛ ጻርቂማላፔ ኦሴቲዳ ቁስቴይ ዴስ፤ ኢሲ ኢሲ ጻርቂማላፔ ኦሴቲዳ ቁስቴ ኣዱሳቴꬃይ 5 ዋꬋ ጊዲሺን ዩዪ ኣꬋናስ ኦሮማኔ ሚꬃ ኣይፌ ሚሳቲዛ ጌጼን ጌጼቲዴስ፤ ሃንኮ ቱሳይካ ሄ ኦሮማኔ ኣይፌ ሚሳቲዛ ጌጼን ጌጼቲ ካሴይሳራ ኢሲኖ ሚሳቲዴስ።
JER 52:23 ኡዱፉን ታማኔ ኡሱፑን ኦሮማኔ ሚꬃ ኣይፌቲ ሚሌ ባጋራ ዋዬይ ባይንዳ ቤቲዛይታ ጊዲሺን ዩሾዛን ዲዛ ኦሮማኔ ሚꬃ ኣይፌታ ቆዳይ ጼታ።
JER 52:24 ካዎዛ ቦንቾ ናጊዛ ዎታዳራታ ሃላቃይ ካሴ ቄሴታ ሃላቃ ሳራያ፥ ኢዛፔ ጋርሳራ ዲዛ ቄሴ ሶፎናሳኔ ፔንጌ ናጊዛ ሄꬑ ዛቤታ ቃቺ ኤፊዴስ።
JER 52:25 ካታማ ጊዶን ኣቲዳ ኣሳፔ ኦላንቻታስ ኣላፌ ጊዲዳ ኦላ ጋዳዋ፥ ካዎ ዞሪዛ ላፑናታ፥ ዴሬዛ ጊዶፌ ኦላንቻታ ዶሪዛ ኦላ ጋዳዋ፥ ጻፌዛኔ ካታማ ጊዶን ቤቲዳ ሃራ 60 ኣሳታ ኤኪ ቢዴስ።
JER 52:26 ካዎዛ ቦንቾ ናጊዛ ዎታዳራታ ሃላቃ ናቡዛራዳኔይ ሄይታንታ ኡባ ኤኪዲ ባቢሎኔ ካዎይ ዲዛሶ ኤሬቢላ ጋꬂዴስ።
JER 52:27 ካዎዚካ ኢስታ ሄን ኤሬቢላን ዲፒ ሂስቲ ዎꬊዴስ፤ ዩሁዳይካ ሄሳ ማላን ባ ቢታፌ ዲኤታ ባዱስ።
JER 52:28 ናቡካዳናጾሬይ ዲኢ ኤፊዳ ዴሬዛ ቆዳይ ሃይሳፌ ካሊ ዲዛይሳ፤ ኢዚ ባ ካዎቲዳ ላፑንꬃ ላይꬃን 3,023 ኣይሁዳታ፥
JER 52:29 ባ ካዎቲዳ ታማኔ ኦስፑንꬃ ላይꬃን ናቡካዳናጾሬይ 832 ኣስ፥
JER 52:30 ባ ካዎቲዳ ናምኡ ታማኔ ሄꬓንꬆ ላይꬃን ናቡዛራዳኔይ 745 ኣይሁዳታ ዲኢ ኤፊዴስ፤ ኢዚ ዲኢ ኤፊዳ ኣሳ ቆዳይ ኢሲ ቦላ 4,600።
JER 52:31 ዩሁዳ ካዎ ኢዮኣኪኔይ ዲኤቲዳ ሄꬑ ታማኔ ላፑንꬃ ላይꬃን ዮሪ-ማሮዴቄይ ባቢሎኔን ካዎቲዴስ፤ ሄ ላይꬃንካ ታማኔ ናምኣንꬃ ኣጊናን ናምኡ ታማኔ ኢቻሻንꬆ ጋላሳን ዩሁዳ ካዎ ኢዮኣኪኔ ቆፒዴስ፤ ቃሾ ኬꬃፌካ ኢዛ ኬሲዴስ።
JER 52:32 ኢዛ ሎኦ ቃላን ሃሳይሲዴስ፤ ባቢሎኔን ኢዛራ ቃሾሶን ዲዛ ካዎታ ኡባታፔ ቦላራ ኣꬂዲ ኢዛ ቦንቾሶን ዎꬂዴስ።
JER 52:33 ኢዮኣኪኔይ ቃሾሶን ዲሼ ማይኢዳ ማይኦዛ ኢዛፔ ቃሪ ዬጊዴስ፤ ሄሳፌ ቢዲ ሃይቃና ጋካናስ ባ ዲዛ ዎዴ ኡባን ካዎዛ ማዳፌ ሚሼ ጋምኢዴስ።
JER 52:34 ባቢሎኔ ካዎ ኢዮኣኪኔይ ቢዲ ሃይቃና ጋካናስ ፓጬይ ባይንዳ ኡባ ዎዴ ኢዛስ ማና ቃላባ ኢሚዴስ።
LAM 1:1 ካሴ ኢዚን ዳሮ ካዎቴꬃይ ዲዛ ካታማያ ዋናዳ ኦሌታ ኣታዴ! ዴሬታ ጊዶን ካሴ ጊታ ጊዲዳራ ዋናዳ ኣምኢ ማላ ጊዳዴ! ኣዉራጃታ ጋርሳን ጎዳቶ ጊዲዳራ ሃኢ ዋናዳ ኣይሌ ጊዳዴ!
LAM 1:2 ኢዛ ጊዶꬂ ጫሞ ዬሆ ዬካዉስ፤ ኢዚስ ኣፉንꬃይካ ሻጋላራ ጎጌስ፤ ኢዚ ላጌታፔ ኢዞ ሚንꬄꬂዛይ ኦኒካ ዴና፤ ኡባቲካ ኢዞ ካዲዳ፤ ዛሪዲካ ኢዚስ ሞርኬ ጊዲዳ።
LAM 1:3 ዩሁዳይ ዳሮ ዋዬቲዳፔኔ ቶሼቲዳፔ ጉዬ ዲኤታዱስ፤ ኢዛ ካዎቴꬃታ ጊዶን ኡታዱስ፤ ኢዚስ ሼምፒዛሶይካ ꬋይዴስ፤ ኢዛ ሜቶ ጋርሳን ዲሺን ጎዲዛይቲ ኡባይ ኢዞ ዴሚዳ።
LAM 1:4 ኦኒካ ኢዚ ባኣሌታ ቦንቻናስ ዮንታ ጊሻስ ጺዮኔ ኦጌቲ ዬኬቴስ፤ ኢዚ ፔንጌታራ ጌሊዛይኔ ኬዚዛይ ዴና፤ ኢዚ ቄሴቲ ጬጬቴስ፤ ጌላኦቲካ ሙዞቴቴስ፤ ኢዛካ ጊታ ሜቶ ጋርሳን ቱጋታዉስ።
LAM 1:5 ኢዚ ናጋራይ ዳሮ ጊዲዳ ጋሶን ጎዳይ ኢዚ ቦላ ሜቶ ዬጊዴስ፤ ኢዚ ሞርኬቲ ኢዞ ሃሪዳ፤ ኢዚ ናይቲካ ሞርኬታን ዲኤቲዳ፤ ኢዚ ሞርኬታስ ዱሲ ሎኢዴስ።
LAM 1:6 ጺዮኔ ማጫ ናይፔ ኢዚ ፑላቴꬂኔ ቴማይ ሻኬቲ ኪቺዴስ፤ ኢዚ ዳናቲ ማታ ሚዛሶይ ꬋይዳ ጌኔሳ ማላ ጊዲዳ፤ ኢስቲ ባና ጎዲዛይታፔ ዎልቃይ ዉሪን ባቃቲዳ።
LAM 1:7 ዬሩሳላሜይ ሜቶቲዳ ዎዴኒኔ ዋዬቲዳ ጋላሳታን ካሴ ኢዚስ ዲዛ ኣቆታ ዩሻ ቆፓዉስ፤ ኢዛ ሞርኬ ኩሼን ኩንዲዳ ዎዴ ኢዞ ማዲዛይ ኦኒካ ባይንዳ ዎዴ፥ ኢዚ ሞርኬቲ ኢዚ ኩንዴꬃ ቤኢዲ ኢዚ ቦላ ሚጪዳ።
LAM 1:8 ዬሩሳላሜይ ዳሮ ዴጾ ናጋራ ኦꬃዱስ፤ ካꬌስካ ኣታዱስ፤ ኢዛ ካሎ ዲሺን ቤኢዳ ጊሻስ ካሴ ኢዞ ቦንቺዳይቲ ኡባይ ኢዞ ካꬊዳ፤ ኢዛካ ባ ባጋራ ዬላታዳ ቢታ ጼላሼ ጉዬ ሲማዱስ።
LAM 1:9 ኢዚ ቱናቴꬂ ኢዚ ማይኦ ቦላ ቤቲዴስ፤ ሲንꬃፌ ኢዚ ቦላ ሃናናይሳ ኢዛ ቆፓቤኩ፤ ኢዚ ኩንዴꬂ ዳጋንꬂዛዝ ጊዲዴስ፤ ኢዛ፥ «ታ ጎዳ ጾሶ! ታ ሜቶቲዛ ሜቶዛ ቤኣ፤ ታ ሞርኬቲ ታና ጾኒዳ» ጋ ዎሲንካ ኢዞ ሚንꬄꬂዛይ ኦኒካ ቤቲቤና።
LAM 1:10 ኢዚ ኣቆታ ኡባ ቦላ ሞርኬይ ባ ኩሼ ዬዲዴስ፤ ጾሳ ኣሳ ሺቆን ጌሎንታ ማላ ኔኒ ዲጊዳይቲ ኤቃ ጾሳታስ ጎይኒዛ ኣይዛቤቲ ጌዴ ኢዚ ጾሳ ኬꬃን ጌሊሺን ቤኣዱስ።
LAM 1:11 ኢዚ ኣሳይ ሚዛ ካꬅ ዴማናስ ኮሻን ዳቡሬስ፤ ሼምፖራ ፓጻ ዳናስ ባስ ዲዛ ኣቆታ ማና ካꬃራ ላሜቴስ፤ ዬሩሳላሜ ኣሳይ፥ «ኣቤት ጎዳዉ! ኑኒ ካዉዪዶስ፤ ኑና ጼላዳ ኑስ ቆፓ።
LAM 1:12 «ጎዳ ጾሲ ባ ዎልቃማ ሃንቆዛ ኑ ቦላ ዬዲዳ ዎዴ ኑ ቦላ ጋኪዳ ሜቶ ማላ ሜቶይ ጋኪዳ ኣሲ ዲዛ ጊዲኮ ኢንቴኖ ኦጌራ ኣꬊ ቢዛ ኡባቶ ኣኔ ቤኢቴ! ሃ ሜቶይ ኢንቴስ ካዉሻ ሚሳቲዜ?
LAM 1:13 «ኢዚ ቦላ ꬎቃሶሆፔ ታማ ዬዲዴስ፤ ሄ ታማዚካ ኑስ ሜቄꬃን ጌሊዴስ፤ ኑ ቶሆታ ቃቻናስ ጊቴ ዬጊዴስ፤ ሂስቲዲ ኑና ጉዬ ዛሪ ኩንዲሲዴስ፤ ኩሜꬃ ጋላስ ኑና ዳቡርሲዴስ፤ ጮ ሜላካ ቶይላሲዴስ።
LAM 1:14 «ታ ናጋራ ሺሺ ቃቺዲ ታ ሞርጌን ዎꬂዴስ፤ ታ ዎልቃካ ዉርሲዴስ፤ ታኒ ኤቄታናስ ዳንዳዮንታ ሞርኬታስ ጎዳይ ታና ኣꬂ ኢሚዴስ።
LAM 1:15 «ኑ ጋርሳን ዲዛ ኦላንቻታ ኡባታራ ጾሲ ኤቄቲዴስ፤ ኑ ጊዶፌ ዬላጋታ ꬋይሳናስ ኦላንቻታ ኑ ቦላ ዬዲዴስ። ዎይኔ ሚꬃ ኣይፌ ኡሹ ኬሳናስ ዬꬊዛ ማላ ጎዳይ ቦሼቶንታ ጌላኦ ሚሳቲዛ ዩሁዳ ኣሳ ዬꬊዴስ።
LAM 1:16 «ሞርኬይ ኑ ቦላ ጎቢዴስ፤ ኑ ናይቲካ ባርካ ኣቲዳ፤ ኑና ዞሪ ሚንꬄꬂዛይቲ ኑፔ ሃኪዳ፤ ሄሳ ጊሻስ ታ ዬካይሲኔ ኣፉንꬃ ጉሳይስ።
LAM 1:17 ጺዮና ባ ኩሼ ሚጫዱስ፤ ኢዞ ሚንꬄꬂዛዴይ ዴና፤ ያቆቤ ዛሬታስ ሾሮቲ ኢዛስ ሞርኬ ጊዳና ማላ ጾሲ ኣዛዞ ኬሲዴስ፤ ዬሩሳላሜይካ ኢስታ ጊዶን ቱና ሚሻ ማላ ቆዴታዱስ።
LAM 1:18 «ጾሲ ጺሎ፤ ታኒ ጊዲኮ ኢዛ ኣዛዞ ቦላ ማካላዲስ፤ ኢንቴ ዉሪካ ሲዪቴ፤ ታ ሜቶዛካ ጼሊቴ፤ ማጫ ናይቲኔ ናቴꬃ ኣቱማ ናይቲ ታፔ ዲኤቲ ቢዳ።
LAM 1:19 ታኒ ታ ዶሲዛይታ ጼይጋዲስ፤ ኢስቲ ጊዲኮ ታና ካዲዳ፤ ታ ቄሴቲኔ ጪማቲ ባ ሼምፖ ኣሻናስ ካꬅ ኮዪሼ ካታማይ ጊዶን ዉሪዳ።
LAM 1:20 «ኣቤት ጎዳዉ! ታ ዋዬዛ ቤኣ! ታ ጊዶ ኣሳቴꬃይ ሜቶቲዴስ፤ ታ ኬሃ ማካላዲስ፤ ታ ዎዚናይካ ሜቂዴስ፤ ካሬን ጊዲን ሶን ዴራ ሃይቆይ ዉርሴስ።
LAM 1:21 «ዴሬይ ታ ዚላሊዛይሳ ሲዪዴስ፤ ጊዶ ኣቲን ኦኒካ ታና ሚንꬄꬂዛዴይ ቤቲቤና፤ ታ ሞርኬቲ ኡባይካ ታ ሜቶቶይሳ ሲዪዳ፤ ኔኒ ኦꬆይሳካ ኤሪዲ ኢስቲ ኡፋዬቲዳ፤ ኔ ኢስታ ቦላ ኤሃና ጋ ቃቺዳ ጋላሳያ ዩ፤ ኢስቲካ ታ ማላ ዚላሌቶ።
LAM 1:22 «ኢስታ ኢታቴꬂ ኔ ሲንꬃን ቤቶ፤ ታ ናጋራ ጋሶን ኔ ታ ቦላ ኦꬆይሳꬆ ኢስታ ቦላካ ኦꬃ፤ ታ ጬጫዳ ዚላሊዛ ዚላሳይ ዳሪዴስ፤ ታ ዎዚናይካ ዳቡርዴስ» ጊሼ ዋሴቴስ።
LAM 2:1 ጎዳይ ጺዮኔ ማጫ ናዮ ባ ሃንቆን ዎስቲ ካዉሺዴ! ኢስራኤሌ ቦንቾ ሳሎፔ ዱጌ ሳኣን ዬጊዴስ፤ ኢዚ ባ ሃንቆ ጋላስ ባ ቶሆ ሼምፒሲዛሶ ጊዲዳሮ ዛሪ ቆፓናስ ኮዪቤና።
LAM 2:2 ያቆቤ ዱሳሶ ኡባ ጾሲ ቃꬌታይ ባይንዳ ꬋይሲዴስ፤ ዩሁዳ ዴሬ ሚጻታ ኢዚ ባ ሃንቆን ላሊዴስ፤ ኢዚ ካዎቴꬃኔ ዴሬ ኣይሲዛይታ ካዉሺዲ ዱጌ ቢታን ዬጊዴስ።
LAM 2:3 ኢዚ ባ ጊታ ሃንቆን ኢስራኤሌ ዎልቃ ሊቂሲዴስ፤ ሞርኬይ ኢዛ ኦላናስ ዪዛ ዎዴ ባ ማዶ ኩሼ ኢስታፌ ዴንꬂዴስ፤ ባ ዩሾን ዲዛ ኡባ ሚዛ ታማ ላጮ ማላ ኢዛ ሃንቆይ ያቆቤ ቦላ ኤጺ ኬዚዴስ።
LAM 2:4 ኢዚ ሞርኬ ማላ ዎንዳፌ ዳፊ ኦይኪዴስ፤ ኢዛ ኡሻቻ ኩሼይ ዪሻ ዬዳናስ ጊግሲዴስ፤ ባና ሎኢዛይታ ኡባ ሞርኬ ማላ ሹኪዴስ፤ ጺዮኔ ዱንካኔታ ቦላካ ባ ሃንቆ ታማ ማላ ቆሊዴስ።
LAM 2:5 ጾሲ ሞርኬ ማላ ጊዲዲ ኢስራኤሌ ዲፒ ሂስቲዴስ፤ ካዎቴꬃ ኬꬃካ ꬋይሲዴስ፤ ኢዚ ሚጻካ ላሊዴስ፤ ዩሁዳ ኣሳ ቦላ ካዮኔ ዚላስ ዳርሲዴስ።
LAM 2:6 ኢዚ ባ ኬꬃ ካꬃ ጊዶን ዲዛ ጋባ ሾዲዛ ማላ ሾዲ ኦሊዴስ፤ ጾሲ ጺዮኖ ኢዛ ላይꬃን ላይꬃን ቦንቺዛ ባኣሌታኔ ሳምባታታ ዲጊዴስ፤ ኢዚ ባ ሚኖ ሃንቆን ካዎዛኔ ቄሴዛ ካዉሺዴስ።
LAM 2:7 ጎዳይ ያርሾ ያርሺዛሶሆዛ ካꬊዴስ፤ ባ ኬꬃካ ኣጊዴስ፤ ባ ካዎቴꬃ ኬꬃ ጊምቤታ ሞርኬስ ኣꬂ ኢሚዴስ፤ ባኣሌ ጋላሳታን ኦꬂዛይሳꬆ ኢስቲ ጎዳ ኬꬃን ኬሂ ዋሲዳ።
LAM 2:8 ጎዳይ ጺዮኔ ካታማ ጊምቤ ላላናስ ቃንጺ ዴንዲዴስ፤ ሚጼ ዎዶሮዛ ፒዲሲዴስ፤ ኢዚ ኢስታ ꬋይሶንታ ኣጌና፤ ሚጻቲኔ ጊምቤቲ ላሌቲዳ፤ ኢስቲካ ኢሲፌ ꬋይዳ።
LAM 2:9 ኢዚ ፔንጌቲ ዱጌ ቢታን ጌሊዳ፤ ካሬ ጎርዲዛ ቢራታ ኮላታቲ ሜቄሬቲ ዎꬊዳ፤ ኢዚ ካዎዚኔ ዳናቲ ኣይዛቤታን ዲኤቲ ቢዳ፤ ሃይሳፌ ጉዬ ካሴ ኢስታስ ዲዛ ዎጋይ ኦꬄና፤ ኢዚ ናቤታስካ ሃይሳፌ ጉዬ ጎዳፔ ኣጁታይ ቆንጬና።
LAM 2:10 ጺዮኔ ዴሬ ጪማቲ ቢታ ቦላ ጮኡ ጊ ኡቲዳ፤ ኢስቲ ባ ሁኤን ጉዱላ ላሊዳ፤ ማቃካ ማይኢዳ፤ ዬሩሳላሜ ጌላኦቲ ዱጌ ቢታ ጼሊዳ።
LAM 2:11 ታ ዴሬይ ዉሪዴስ፤ ናቴꬃ ናይቲኔ ቄሪ ናይቲ ካታማ ጊዶን ላባኒ ኩንዲዳ። ሄሳ ጊሻስ ታ ኣይፌይ ኣፉንꬃን ባልጁሚዴስ፤ ታስ ማራጬይ ኮኮሪዴስ፤ ታ ዎዚናይካ ሴሪዴስ፤
LAM 2:12 ኦላሶን ማዱንጺ ኩንዲዳ ኣሳታ ማላ ካታማይ ጊዶን ኢስቲ ዳቡርዳ፤ ኢስቲ ባንታ ኣዬታ፥ «ካꬂኔ ሃꬂ ኑስ ኣዋን ዲዜ?» ጊ ኦይቺሼ ኢስቲ ቄሴ ቦላ ቦርኮቲዲ ሼምፖ ኬዚዳ።
LAM 2:13 «ሃኔ ዬሩሳላሜ! ታ ኔ ጊሻስ ኣይ ጋናስ ዳንዳያዚና? ታ ኔና ኣዛራ ጊናሳ ጼሎ? ሃኔ ዶሴቲዳ ጺዮኔ ጌላኦዬ! ታ ኔና ዎስታ ሚንꬄꬃናስ ዳንዳያዚና? ኔ ማዱንꬃይ ኣባፌካ ጪማቴስ፤ ኔና ፓꬃናስ ዳንዳይዛይ ኦኔ?
LAM 2:14 ኔ ናቤታ ኣጁታይ ዎርዶኔ ጮ ሃዳ፤ ኔ ናጋራ ቆንጪሲዲ ኔና ዲኤቴꬃፌ ኣሼቴና፤ ኢስቲ ኔስ ዮቲዛ ቲንቢቴይ ባሌꬂዛዚኔ ኦጌፔ ካሬ ኬሲዛዛ።
LAM 2:15 ኔ ኣቻራ ኣꬊ ቢዛ ኡባይ ኔ ቦላ ባ ኩሼ ባቂ ካኣና፤ ቢታ ኡባን ኣꬎ ሎኦ ጌቴቲዛ ካታማያኔ ዴሬ ኡባይ ኡፋዬቲዛ ካታማያ ሃኒ?» ጋና፤ ቂꬊሼካ ባ ሁኤ ቃꬃና።
LAM 2:16 ኔ ሞርኬቲ ኡባይ ኢሲፌ ባንታ ዶና ኬሂ ዶይዳ፤ ባንታ ኣች ሳጺሼ ቂꬊዳ፤ «ኑኒ ኢዞ ሚቲዶስ! ኑኒ ኣሞቲዳራ ሃኖ፤ ሼምፖራ ፓጻ ዲዲ ጋኪ ኣይፌን ቤኢዶስ» ጊዳ።
LAM 2:17 ጾሲ ባ ቆፒዳይሳ ኦꬂዴስ፤ ዳሮ ዎዴፔ ካሴ ዮቲዳ ቃላ ፖሊዴስ፤ ኢዚ ኔና ቃꬌታይ ባይንዳ ላሊዴስ፤ ኔ ዋዬቲሺን ሞርኬይ ኡፋዬታና ማላ ኔ ሞርኬታ ꬎቁ ꬎቁ ሂስቲዴስ።
LAM 2:18 ዬሩሳላሜ ጊምቤ ጊዶን ዲዛ ኣሳዉ! ጾሳኮ ዋሲቴ፤ ኢንቴ ኣፉንꬂ ኦማርሲኔ ጋላስ ዲኦ ማላ ጎጎ፤ ኢንቴካ ሼምፖፍቴ፤ ኢንቴ ኣይፌሲካ ሼምፖ ኢሞፍቴ።
LAM 2:19 ቃማ ኩሜꬅ ዴንዲዲ ዋሲቴ፤ ጎዳ ሲንꬃን ኢንቴ ዎዚና ሃꬃ ማላ ጉሲቴ፤ ኦጌ ዶናን ኮሻቲ ኩንዲዳ ኔ ናይታ ሼምፖ ጊሻስ ኔ ኩሼ ፑዴ ኢዛኮ ዴንꬃዳ ዎሳ።
LAM 2:20 ኣቤት ጎዳዉ! ሃይሳ ኔ ቤኣ! ኔኒ ሃይሳꬆ ካሴ ኦና ቦላ ኦꬃ ኤሪዛኮ ኣኔ ኣኬካ፤ ኣያ ዬላ ዲቺዳ ና ዛራ ማናስ ቤሲዜ? ቄሴይኔ ናቤይ ጾሳ ኬꬃን ሃይቃናስ ቤሲዜ?
LAM 2:21 ዬላጋቲኔ ጪማቲ ሃይቂዲ ኦጌን ኩንዲ ኣቲዳ፤ ዬላጋ ማጫሳቲኔ ኣቱማቲ ማሻን ሃይቂዳ፤ ኔ ሃንቄቲዳ ጋላስ ኢስታ ዎꬋዳሳ፤ ቃꬌታይ ባይንዳካ ሹካዳሳ።
LAM 2:22 ባኣሌ ጋላስ ዲጊሳስ ጼይጊዛ ማላ ታ ሞርኬታ ታ ቦላ ጼይጋዳሳ፤ ኔ ሃንቆ ጋላስ ኦኒካ ኬሲ ኤኪቤና፤ ዎይኮ ሼምፖራ ፓጻ ኣቲዳይ ዴና፤ ታ ዬላ ዲቺዳይታ ሞርኬይ ታፔ ꬋይሲዴስ።
LAM 3:1 ጎዳ ሃንቆ ጉፌን ዋዬ ቤኢዳ ኣሲ ታና።
LAM 3:2 ኢዚ ታና ባ ሲንꬃፌ ኬሲ ዬዲዴስ፤ ፖኦይ ባይንዳ ጌዴ ꬉማን ታና ጌልꬂዴስ።
LAM 3:3 ኢዚ ኩሜꬃ ጋላስ ዛሪ ዛሪዲ ታና ሾጪዴስ።
LAM 3:4 ኢዚ ታ ኣሳቴꬃካ ጬጊሲዴስ፤ ታ ሜቄꬃታካ ሜንꬄሬꬂዴስ።
LAM 3:5 ኢዚ ታና ሜቶኒኔ ኢታ ቱጋ ጊዶ ዬጊዴስ።
LAM 3:6 ሃይቂዲ ጋምኢዳ ኣሳ ማላ ታኒ ꬉማን ዳና ማላ ኦꬂዴስ።
LAM 3:7 ታ ኬዞንታ ማላ ታ ዩሾዛ ዲርዴስ፤ ሚኖ ሳንሳላታን ታና ቃቺዴስ።
LAM 3:8 ታኒ ማዶ ኮያዳ ዋሳ ጼይጊንካ ኢዚ ታ ዋሳ ሲያናስ ኮዪቤና።
LAM 3:9 ታ ኦጌዛ ማሴቲዳ ሹቻን ጎርዲዴስ፤ ታ ኣꬋ ቢዛ ኦጌዛካ ጌላሲዴስ።
LAM 3:10 ኢዚ ታስ ዛማዲ ኡቲዳ ዛርዶ ማላ ጊዲዴስ፤ ቃሴካ ቆቴቲ ናጊዛ ጋሞ ማላ ጊዲዴስ።
LAM 3:11 ታና ታ ቢዛ ኦጌፔ ጎቺ ኬሲዲ ዱሴሬꬂ ዬጊዴስ፤ ታና ኣሲ ባይንዳሶን ኦላጊዴስ።
LAM 3:12 ኢዚ ባ ዎንዳፌ ዳፊ ኦይኪዴስ፤ ታና ጫዳናስ ባ ዪሽ ጊግሲ ዎꬂዴስ።
LAM 3:13 ኢዚ ዪሻ ዬዲዲ ታስ ዎዚና ኣይፌን ጫዲዴስ።
LAM 3:14 ታኒ ታ ዴሬ ኣሳስ ቂꬌ ሚሽ ጊዳዲስ፤ ጋላስ ኩሜꬅ ታ ቦላ ቂꬌ ማዛሙሬ ዬጼቴስ።
LAM 3:15 ኢዚ ታ ዴኦዛ ጫሞን ኩንꬂዴስ፤ ኢዚ ታና ጪዬ ኡሹ ካልሲዴስ።
LAM 3:16 ኢዚ ታ ኣች ሹቻን ሜንꬂዴስ፤ ኢዚ ታና ጉዱላን ዬꬌቲዴስ።
LAM 3:17 ታ ሼምፖይስ ሳሮቴꬂ ꬋይዴስ፤ ኡፋይሲ ኢዚ ኣዛኮኔ ታ ባላዲስ።
LAM 3:18 ሄሳ ጊሻስ፥ «ታ ቦንቾይ ታፔ ሻኬቲዴስ፤ ታኒ ጾሳፌ ናጊዛ ሂዶታ ኡባይ ꬋይዴስ» ጋዲስ።
LAM 3:19 ታ ዋዬኔ ታ ቶይላቴꬃ ታ ቆፒሺን ታ ዴኦይ ታና ጫሚዴስ።
LAM 3:20 ኡባ ዎዴካ ታ ሃይሳ ቆፒሺን ታ ዎዚናይ ጬጬስ።
LAM 3:21 ጊዲኮካ ታኒ ሃይሳ ቆፒዛ ዎዴ ታስ ሲንꬃፌ ሂዶታይ ዴስ።
LAM 3:22 ሄሲካ ኑኒ ꬋዮንታ ኣጊዳይ ጎዳ ሲቆይ ዳሮ ጊዲዳ ጋሶና፤ ኢዛ ቃꬌታይካ ሜርናስ ዉሮንታ ጊሻሳ።
LAM 3:23 ኢስቲ ማላዶ ማላዶ ኦራꬃ፤ ኔ ኣማኔቴꬃይካ ዳሮ።
LAM 3:24 ታስ ቃዳይ ጎዳ፤ ሄሳ ጊሻስ ታ ኢዛን ጻላ ሂዶታ ኦꬃይስ።
LAM 3:25 ጎዳይ ባና ሂዶታ ኦꬂዛይታሲኔ ኢዛ ኮይዛይታስ ሎኦ።
LAM 3:26 ጎዳይ ኣስ ኣሺዛ ኣሾዛ ኢዛዴይ ጮኡ ጊ ናጊኮ ሎኦ።
LAM 3:27 ኣሲ ዬላጋቴꬃ ዎዴን ቃምባራ ቶኪኮ ሎኦ።
LAM 3:28 ጎዳይ ኢዛ ቶሲዳ ጊሻስ ኢዚ ባርካ ጮኡ ጊ ኡቶ።
LAM 3:29 ሲንꬃፌ ኢዛስ ሂዶታይ ዳና ዳንዳይዛ ጊሻስ ባና ዚቂ ሂስቲ ሃሪሶ።
LAM 3:30 ባቃና ኮዪዳዴስ ኢዚ ባ ሻጋላ ቤሶ፤ ካዉሻቴꬂካ ኤኮ።
LAM 3:31 ጎዳይ ኣሴ ሜርናስካ ዬጊ ኣጌና።
LAM 3:32 ኢዚ ኣሳ ቦላ ሜቶ ኤሂኮካ ባ ሜርና ሲቆን ሲሚ ቃꬌቴስ፤
LAM 3:33 ኢዚ ኦዲዲ ኣሳ ቦላ ሜቶ ዎይኮ ዋዬ ኤሂ ኤሬና።
LAM 3:34 ዴራን ዲዛ ቃሾ ኣሳይ ኡባይ ጌኔን ዬꬌቲሺን፥
LAM 3:35 ኡባፌ ꬎቃ ጾሳይ ቤዪሺን ኣሳስ ኣሳቴꬃ ማታይ ዲጌቲዛ ዎዴ፥
LAM 3:36 ቃሴካ ቱማ ፒርዳይ ጌላቲዛ ዎዴ ጎዳይ ሄሳ ማላ ሃኖታ ዴሜኔ?
LAM 3:37 ጾሲ ኣዛዞንታ ዲሺን ባ ጊዳዝ ፖላናስ ዳንዳይዛይ ኦኔ?
LAM 3:38 ኢታ ጊዲን ዎይኮ ሎኦ ጊዲን ባ ጊዳዝ ፖሊዛይ ኡባፌ ꬎቃ ጾሳ ጊዴኔ?
LAM 3:39 ሂስቲን ሼምፖራ ፓጻ ዲዛ ኣሲ ባ ናጋራን ቃጻዬቲሼ ኣዛስ ዙዙሚዜ?
LAM 3:40 ሄሳ ኣጊዲ ኑኒ ኑ ኦጌ ኣኔ ፒልጊ ጼሎስ፤ ጎዳኮካ ሲሞስ።
LAM 3:41 ኣኔ ኑኒ ኑ ዎዚናኔ ኑ ኩሼ ሳሎን ዲዛ ጾሳኮ ፑዴ ዴንꬂዲ፥
LAM 3:42 «ኑ ጎዳዉ! ኑኒ ማካሊዶስ፤ ናጋራካ ኦꬂዶስ፤ ሄሳ ጊሻስ ኔኒ ኑና ማራቤካ።
LAM 3:43 ኔኒ ሃንቆን ኩማዳ ኑና ጎዳዳሳ፤ ኔ ኑና ቃꬌታይ ባይንዳ ዎꬋዳሳ።
LAM 3:44 ዎሳይ ኔኮ ኣꬊ ቦንታ ማላ ኔና ሻራን ካማዳሳ።
LAM 3:45 ኔ ኑና ኣይዛቤታ ጊዶን ኦርጮኔ ቡራ ኬሳዳሳ።
LAM 3:46 ኑ ሞርኬቲ ኡባይ ባ ዶና ኑ ቦላ ዶይዳ።
LAM 3:47 ኑኒ ባሻኒኔ ላሌቴꬃን ሜቶኒኔ ሺሮን ኩምዶስ» ጎስ።
LAM 3:48 ታ ዴሬይ ዉሪዳ ጊሻስ ታ ኣይፌፔ ኣፉንꬂ ዲኦ ማላ ጎጊዴስ።
LAM 3:49 ሼምፖንታ ኡባ ዎዴ ታ ኣይፌፔ ኣፉንꬂ ጉኬስ።
LAM 3:50 ሄሲ ሃናናይ ጾሲ ሳሎፔ ዱጌ ጼላና ጋካናሳ።
LAM 3:51 ታኒ ዲዛ ካታማን ዲዛ ኡባ ማጫሳታ ቦላ ጋኪዳ ሜቶዛ ታኒ ታ ኣይፌን ቤኢዳ ጊሻስ ታ ዎዚናይ ጬጪዴስ።
LAM 3:52 ጋሶይካ ባይንዳ ታስ ሞርኬ ጊዲዳይቲ ካፎ ማላ ታና ሻንካቲዳ።
LAM 3:53 ኢስቲ ታኒ ሼምፖራ ፓጻ ዲሺን ዱጌ ኦላን ዬጊዳ፤ ሹቺካ ታ ቦላ ኦሊዳ።
LAM 3:54 ሃꬂ ኩሚዲ ታስ ሁኤ ቦላራ ጎጊዴስ፤ ታኒ ꬋያዲስ ጋዳ ቆፓዲስ።
LAM 3:55 ታ ጎዳዉ! ታኒ ጪማ ኦላ ጊዶን ዳሼ ኔ ሱንꬃ ጼይጋዲስ።
LAM 3:56 ታ ዋሶ ኔ ሲያና ማላ ታ ኔና ዎሲን ሲያዳሳ።
LAM 3:57 ታ ኔና ጼይጊዳ ዎዴ ኔ ታኮ ሺቃዳ፥ «ያዮፋ» ጋዳሳ።
LAM 3:58 ጎዶ! ኔ ታስ ሞቴታዳ ታና ኣሻዳሳ።
LAM 3:59 ጎዳዉ! ኔ ታ ቦላ ጋኪዳ ቆሆዛ ቤያዳሳ፤ ኔ ታስ ፒርዳ።
LAM 3:60 ታ ሞርኬቲ ታ ቦላ ሃሎ ኬሳናስ ቆፒዳይሳኔ ኢስቲ ታ ቦላ ዙፔቲዳይሳ ኔ ቤያዳሳ።
LAM 3:61 ታ ጎዳዉ! ኢስቲ ታና ጫዪዳ ጫሻኔ ታ ቦላ ማቄቲዳ ማቆዛ ኔ ሲያዳሳ።
LAM 3:62 ጋላስ ኩሜꬅ ታ ሞርኬቲ ታ ቦላ ሳሱኬቴቴሲኔ ዙዙሜቴስ።
LAM 3:63 ኔ ኢስታ ጼላ! ኢስቲ ኤቂዲ ጊዲን ኡቲዲ ባ ዬꬃን ታና ጫዴቴስ።
LAM 3:64 ታ ጎዳዉ! ኔ ኢስታስ ኢስታ ኦሶ ማላ ኢማ።
LAM 3:65 ኢስታ ዎዚና ዳሚሳ፤ ኔ ቃንጌꬂ ኢስታ ጋኮ።
LAM 3:66 ኣቤት ጎዳዉ! ኔ ኢስታ ኔ ሃንቆን ጎዳ፤ ሳሎ ጋርሳፌ ꬋይሳ።
LAM 4:1 ዎርቃይ ዋኒ ታሲዴስ፤ ዋላካይ ባይንዳ ሙሩታ ዎርቃይ ዋኒ ላሜቲዴ! ጾሳ ኬꬂ ኬጼቲዳ ቦንቾ ሹቻቲ ኦጌ ዶናን ላሌቲዳ።
LAM 4:2 ካሴ ቦንቼቲዳ ዎርቃ ሚሳቲዛ ጺዮኔ ናይቲ ሃኢ ዋኒዲ ኩሼን ኡርቃፌ ቲሊዲ ሜꬊዳ ማና ሚሻ ማላ ጊዲዶ!
LAM 4:3 ዎራካናቲ ባ ማራታ ዲቻናስ ባ ꬋንꬅ ꬋንꬄቴስ፤ ታ ዴሬይ ጊዲኮ ባዞን ዲዛ ያንቻ ካፎታ ማላ ሜንጼ ኢቲዴስ።
LAM 4:4 ዳሮ ሳሜቲዳ ጊሻስ ጉꬃ ናይታ ኢንጻርሲ ፑዴ ጎንጊራꬃራ ኦይኬቲዴስ፤ ናይቲ ካꬅ ዎሲዳ ሺን ኦኒካ ኢስታስ ኢሚቤና።
LAM 4:5 ካሴ ሎኦ ካꬅ ሚዛይቲ ሃኢ ሜቶቲዲ ኦጌ ቦላ ቶይላቲዳ፤ ካሴ ሎኦ ማይኦ ማይኢዲ ኢሻሎን ዲጪዳይቲ ሃኢ ቢዲንꬃን ኢቺዳ።
LAM 4:6 ታ ዴሬዛ ቦላ ጋኪዳ ቂጻቴይ ኦና ኩሼይካ ቦቾንታ ዲሺን ኤሶን ኣꬋ ዎꬊዳ ሶዶሜ ካታማ ኣሳ ጋኪዳ ቂጻቴዛፔካ ኬሂ ኢታ።
LAM 4:7 ኢስታ ካሌꬂዛይቲ ሻቻፌ ኣꬊዳ ጌሻ፤ ማꬃፌ ኣꬊ ቦꬃ፤ ኢስታ ቦላይ ዞኦ ኢንቁፌ ኣꬊዳ ኣሪሳ፤ ቃሴ ኢስታስ ሜꬋይካ ሲምፔሬ ጌቴቲዛ ሹቻ ማላ።
LAM 4:8 ሃኢ ጊዲኮ ኢስታ ሜꬋይ ሻላፔካ ኣꬊ ካሬቲዴስ፤ ኦኒካ ኢስታ ኦጌን ቤኢዲ ኤሬና፤ ኢስቲ ሜቄꬅ ጻላ ኣቲዳ፤ ሜላ ሚꬃ ማላ ጊዲዳ።
LAM 4:9 ኮሻን ሃይቂዳይታፔ ማሻን ሃይቂዳይቲ ሎኦ፤
LAM 4:10 ታ ኣሳ ቦላ ጋኪዳ ሃንቆ ጋሶን ናይታስ ሚሼቲዛ ኣዬቲ ባ ዬሊዳ ናይታ ባ ኩሼራ ዶይሲ ሚዳ።
LAM 4:11 ጾሲ ባ ዎልቃማ ሃንቆዛ ቆንጪሲዴስ፤ ጺዮኖ ዲፒ ሂስቲ ꬋይሲዛ ታማ ኦይሴꬂዴስ።
LAM 4:12 ቢታ ቦላ ዲዛ ካዎታፔ ዎይኮ ኣላሜ ቦላ ዲዛ ኣሳፔ ኦኒካ ኢስታ ሞርኬቲ ዎይኮ ዎራጂዛይቲ ዬሩሳላሜ ፔንጌታ ሜንꬂ ጌላና ጊዲ ኦኒካ ቆፒቤና።
LAM 4:13 ሃይሲ ሃኒዳይ ናቤቲኔ ቄሴቲ ኦꬂዳ ናጋራ ጋሶና፤ ቃሴ ኢስቲ ጺሎታ ሱꬅ ጉሲዳ ጊሻሳ።
LAM 4:14 ቆቄ ኣሳ ማላ ኢስቲ ኦጌ ቦላ ጋዲጋዳና፤ ኢስቲ ሱꬃን ቱኒዳ ጊሻስ ኢስታ ማይኦ ቦቻናስ ጻሊዛዴይ ዴና።
LAM 4:15 ሄሳ ጊሻስ ኣሳይ ኢስታ ቦላ፥ «ኪቺቴ! ኢንቴ ቱና! ሃኪቴ! ኑና ቦቾፍቴ!» ጊ ዋሳና። ሄሳ ጋሶን ኢስቲ ባቃቲዲ ካዎቴꬃ ጊዶን ቶይላቲሼ ኣሳይ ኢስታስ፥ «ኢንቴ ኑናራ ሃይሳን ዳናስ ዳንዳዬኬታ» ጊዳ።
LAM 4:16 ኢስታ ላሊዳይ ጾሳ፤ ሃይሳፌ ጉዬ ኢዚ ኢስታስ ቆፔና፤ ኢስታ ቄሴታስ ቦንቾይ ኢሜቴና፤ ጪማታስካ ፑላይ ዴና።
LAM 4:17 ኑ ኣይፌይ ማዶ ዴማናስ ጼሊሼ ጮ ሜላ ዳቡርዴስ፤ ኑና ኣሻናስ ዳንዳዮንታ ዴሬታፔ ማዶ ዴማናስ ላሞታን ናጊዶስ።
LAM 4:18 ኣሳይ ኑ ጌዶን ኤቂዛ ጊሻስ ኑ ኦጌራ ሄሜታናስ ዳንዳይቤኮ፤ ኑስ ዉርሴꬂ ማቲዴስ፤ ኑ ላይꬂ ዉሪዴስ፤ ኑ ꬋይዛ ዎዴይ ጋኪዴስ።
LAM 4:19 ኑና ጎዲዛይቲ ሳሎራ ፓሊዛ ጎሌፌ ኣꬊ ኤሶቴቴስ፤ ኢስቲ ኑና ዙማ ቦላራ ጎዲዳ፤ ባዞን ኑና ዙጊ ናጊዳ።
LAM 4:20 ኑኒ ኢዛ ኩዋ ጋርሳን ኡቲ ዴኣና ጊ ቆፒዳይሳ፥ ጾሲ ቲይዳይሳ፥ ኑስ ዴኦ ሼምፖካ ጊዲዳይሳ ባንታ ዎጺማዴን ኦይኪዳ።
LAM 4:21 ኢንቴኖ ኡጼ ቢታን ዲዛ ኤዶሜ ኣሳቶ! ኡፋይስ ኖጮጩ ጊቴ! ጊዶ ኣቲን ቃዳይ ኢንቴናካ ጋካና፤ ኢንቴ ማꬆታናኔ ካሎ ኣታና።
LAM 4:22 ኢንቴኖ ጺዮኔ ኣሳቶ! ኢንቴ ሞሮ ጋሶን ቃጻዬቶይሲ ኢንቴስ ጊዳና፤ ሃይሳፌ ጉዬ ኢንቴና ዲኤቲዳ ቢታን ጋምኢሴና፤ ጊዶ ኣቲን ኤዶሜ ኣሳቶ! ኢዚ ኢንቴና ኢንቴ ናጋራ ጊሻስ ቃጻያና፤ ኢዚ ኢንቴ ሞሮዛካ ቆንጬ ኬሳና።
LAM 5:1 ኣቤት ጎዳዉ! ኑ ቦላ ጋኪዳይሳ ኔ ቆፓ፤ ኑ ካዉሻቴꬃካ ጼላ።
LAM 5:2 ኑ ቢታ ኣላጋቲ ላቲዳ፤ ኑ ኬꬃካ ባስ ዱሳሶ ኦꬂዳ።
LAM 5:3 ኑኒ ዪኦ ጊዲዶስ፤ ኑ ኣዬቲ ኣምኤታ ጊዲዳ።
LAM 5:4 ኑኒ ኑ ሃꬃ ሚሻን ሻሚ ኡዪዶስ፤ ኑኒ ኑ ሚꬃካ ሻሚ ኤኪዶስ።
LAM 5:5 ኑና ጎዲዛይቲ ኑስ ጌዶን ኤቂዳ፤ ኬሂ ዳቡርዶስ፤ ሼምፖካ ዲጌቲዶስ።
LAM 5:6 ኑኒ ካꬅ ካላናስ ጊዲ ኣሶሬ ኣሳታሲኔ ጊብጼስ ኩሼ ኢሚዶስ።
LAM 5:7 ኑ ኣዋቲ ናጋራ ኦꬂዳ፤ ኑኒ ኢስታ ቂጻቴ ኤኪዶስ።
LAM 5:8 ኣይሌቲ ኑና ሃሪዳ፤ ኢስታ ኩሼፔ ኑና ኬሲ ኤካናይ ኦኒካ ዴና።
LAM 5:9 ባዞን ዲዛ ኦላ ጋሶን ኑኒ ኑ ሼምፖ ኣꬂ ኢሚዲ ካꬅ ዴሚዶስ።
LAM 5:10 ኮሻ ዳሮፔ ዴንዲዳይሳን ሃርጊዶስ፤ ኑ ሜꬋይካ ሻላ ማላ ጊዲዴስ።
LAM 5:11 ማጫሳታ ጺዮኔን ቱኒሲዳ፤ ጌላኦታካ ዩሁዳ ካታማታን ዎልቃን ኦይኪ ካዉሺዳ።
LAM 5:12 ዳናታ ካቂዳ፤ ጪማታካ ቦንቺቤቴና።
LAM 5:13 ዬላጋ ኣቱማ ናይቲ ዎጻን ጋጫና ማላ ዎልቃꬂዳ፤ ፓንꬃቲ ዴጾ ሚꬅ ቶኪዲ ጋዲጋዲዳ።
LAM 5:14 ጪማቲ ፒርዳናስ ኡቲዛ ዱቡሻ ኣጊዳ፤ ፓንꬃቲካ ባንታ ማዛሙሬ ኣጊዳ።
LAM 5:15 ኡፋይሲ ኑ ዎዚናፔ ꬋይዴስ፤ ኑ ዱሪሲካ ዬሆን ላሜቲዴስ።
LAM 5:16 ካላቻይ ኑ ሁኤፔ ኩንዲዴስ፤ ኑ ናጋራ ኦꬂዳ ጊሻስ ኣዬ ኣና!
LAM 5:17 ሄሳ ጋሶን ኑ ዎዚናይ ዳቡርዴስ፤ ኑ ኣይፌይካ ባልጁሚዴስ።
LAM 5:18 ጺዮኔ ቢታይ ቡላ ጊዲዳ ጊሻስ ዎራካናቲ ጉፒዛሶሆ ጊዲዴስ።
LAM 5:19 ኣቤት ጎዳዉ! ኔኒ ሜርናስ ሃራሳ፤ ኔ ካዎቴꬃይ ዬሌታፔ ዬሌታ ጋካናስ ዳና።
LAM 5:20 ኔ ኑና ኣይስ ኡባ ዎዴ ጮኡ ጋይ? ቃሴ ኣይስ ሃይሳ ጋካናስ ኣጋጋዲ?
LAM 5:21 ጎዳዉ! ኔኒ ኑና ኔኮ ዛራ፤ ኑኒካ ኔኮ ሲማና! ቤኒ ኑ ቦንቾዛ ዛራዳ ኑና ኦራꬃ!
LAM 5:22 ኔ ሄሳꬆ ኦꬆንታ ኣጊኮ ኑና ሙሌራ ኣጋዲ? ኔ ሃንቆዛስካ ዛዋይ ባዌ?
EZE 1:1 ሄꬑ ታማንꬃ ላይꬃን፥ ኦይዳንꬆ ኣጊናን፥ ኢቻሻንꬆ ጋላሳን፥ ታኒ ኮቦሬ ሻፋን ዲኤቲዲ ቢዳይታ ጊዶን ዳሼ ሳሎቲ ዶዬቲን ጾሳ ኣጁታ ቤኣዲስ።
EZE 1:2 ካዎ ኢዮኣኪኔይ ዲኤቲዳ ኢቻሻንꬃ ላይꬃን፥ ሄ ኣጊናን ኢቻሻንꬆ ጋላሳን፥
EZE 1:3 ባቢሎኔን ኮቦሬ ሻፋ ማታን ዲዛ ቡዜ ና ቄሴ ሂዚቄላኮ ጎዳ ቃላይ ዪዴስ፤ ጎዳ ዎልቃይ ታና ኦይኪዴስ።
EZE 1:4 ታኒ ꬎቁ ጋ ጼሊሺን ፑዴሃ ባጋፌ ጎቴ ጫርኮይ ዪዛይሳ ቤኣዲስ፤ ኢዛፔ ዎልቃንꬂ ዋዋጪ ጊዛ ꬊፒ ጊዳ ሻራ ጊታ ፖኦይ ጊዶꬂ ዎꬂዴስ፤ ታማዛስ ጊዶ ኣዳይ ቢራታ ቦንቆ ሚሳቴስ።
EZE 1:5 ታማዛ ጊዶን ሼምፖራ ፓጻ ዲዛ ኦይዱ ሜꬌቴꬃታ ሚስሌይ ዴስ፤ ኢስታ ሜꬋይካ ኣሳ ሜꬋ ሚሳቴስ።
EZE 1:6 ኢስታስ ኢሳስ ኢሳስ ኦይዱ ኣይፌሶይኔ ኦይዱ ቄፌይ ዴስ።
EZE 1:7 ኢስታስ ሲቲ ጊዳ ሉሌ ቶሆይ ዴስ፤ ኢስታ ቶሆይ ማራ ቂንጪፊሌ ማላኔ ቁጬቲዲ ጾልቂዛ ጻርቂማላ ሚሳቴስ።
EZE 1:8 ኢስታስ ኦይዱ ባጋራ ቄፌታ ጋርሳን ኣሳ ኩሼይ ዴስ፤ ሄ ኦይዳታሲካ ኣይፌሶቲኔ ቄፌቲ ዴቴስ።
EZE 1:9 ኢስታ ቄፌቲ ኢሶይ ኢሳራ ዲሼቴቴስ፤ ኢስቲ ኡባይካ ጉዬ ሲሚ ጼሎንታ ሲቲ ጊዲ ሲንꬅ ቤቴስ።
EZE 1:10 ኢስታ ኣይፌሶይ ሃይሳፌ ካሊ ዲዛይሳ ማላ፤ ኢስታ ኦይዳታሲካ ኢሳስ ኢሳስ ሲንꬃ ባጋራ ኣሳ ኣይፌሶ ማላይ ዴስ፤ ኡሻቻ ባጋራ ጋሞ ኣይፌሶ ማላይ፥ ሃዲርሳ ባጋራ ቦራ ኣይፌሶ ማላይ፥ ቃሴካ ኢስታ ኢሳስ ኢሳስ ጉዬ ባጋራ ጎሌ ኣይፌሶ ማላይ ዴስ።
EZE 1:11 ኢስታ ኣይፌሶይ ሄሳ ሚሳቴስ፤ ኢስታ ቄፌይ ፑዴ ያንጌቲ ኡቲዴስ፤ ኢስታስ ኢሳስ ኢሳስ ናምኡ ናምኡ ቄፌይ ዴስ፤ ኢሳ ኢሳ ቄፌይ ሃንኮይሳ ቄፌራ ዲሼቲ ኡቲዴስ።
EZE 1:12 ኢስቲ ኡባይካ ሲቲ ጊዲ ሲንꬅ ቤቴስ፤ ጉዬ ሲሞንታ ጾሳ ኣያናይ ቢዛሶ ኣዋካ ቤቴስ።
EZE 1:13 ሃ ሼምፖራ ፓጻ ዲዛ ሜꬌቴꬃታ ሜꬋይ ኤጺዛ ታማ ቦንቆኔ ጾምፔ ሚሳቴስ፤ ሄ ሼምፖራ ፓጻ ዲዛ ሜꬌቴꬃታ ጊዶን ታማይ ያኔ ሃ ቃጼስ፤ ታማዚ ጶሌስ፤ ኢዛ ጊዶፌካ ዎልቃንꬂ ኬዜስ።
EZE 1:14 ሃ ሼምፖራ ፓጻ ዲዛ ሜꬌቴꬃቲ ዎልቃንꬂ ኤሶን ዋዋጪ ጊዛ ማላ ያኔ ሃ ሲሜሬቴቴስ።
EZE 1:15 ታ ሃ ኦይዱ ሼምፖራ ፓጻ ዲዛ ሜꬌቴꬃታ ጼላሼ፥ ኦይዱ ኣይፌሶቲ ሼምፖራ ፓጻ ዲዛ ሜꬌቴꬃታ ማታን ኢሲ ኢሲ ኢርዞ ቢታ ቦላ ቤያዲስ።
EZE 1:16 ሄ ኢርዞታ ሜꬋይኔ ሃኖታይ ሃይሳፌ ካሊዛይሳ ማላ፤ ኣልኦ ሹቻ ማላ ጾልቄቴስ፤ ኦይዳታ ሜꬋይካ ኢሲ ማላ፤ ኢሲ ኢሲ ኢርዞይ ሃራ ኢርዞራ ቃጼቲ ኡቲዳ ሚሳቴስ።
EZE 1:17 ኢስቲ ቢዛ ዎዴ ሜꬌቴꬃቲ ኦይዱ ባጋ ዩያና ዳንዳዬቴስ፤ ሜꬌቴꬃቲ ቢዛ ዎዴ ኢርዞቲ ያኔ ሃ ጌቴና።
EZE 1:18 ሄ ኦይዱ ኢርዞታስ ኦꬖꬖይ ዴስ፤ ሃ ኦይዱ ኢርዞቲ ጊታኔ ባቢሲዛዛ፤ ዩዪ ኣꬋናስካ ኢስታን ኣይፌቲ ኩሚዳ።
EZE 1:19 ሃ ሼምፖራ ፓጻ ዲዛ ሜꬌቴꬃቲ ቢዛ ዎዴ ኢስታ ሚሌን ዲዛ ኢርዞቲካ ቤቴስ፤ ሄ ሼምፖራ ፓጻ ዲዛ ሜꬌቴꬃቲ ቢታፌ ፑዴ ዴንዲዛ ዎዴ ኢርዞቲካ ኢስታራ ኢሲፌ ዴንዴቴስ።
EZE 1:20 ጾሳ ኣያናይ ቢዛሶ ኣዋካ ኢስቲ ቤቴስ፤ ኣያናይ ኢስታ ጊዶን ዲዛ ጊሻስ ኢርዞቲ ኢስታራ ኢሲፌ ፑዴ ዴንዴቴስ።
EZE 1:21 ዴኦይ ዲዛ ሜꬌቴꬃቲ ቢዛ ዎዴ ኢርዞቲካ ቤቴስ፤ ኢስቲ ኤቂዛ ዎዴ ኢርዞቲካ ኤቄቴስ፤ ቃሴ ኢርዞቲ ኢስታራ ኢሲፌ ፑዴ ዴንዴቴስ።
EZE 1:22 ሃ ሼምፖራ ፓጻ ዲዛ ሜꬌቴꬃታ ሁኤፔ ቦላራ ባቢሲዛኔ ማስቶቴ ማላ ጾልቂዲ ኣይፌ ጫዲዛ ሳሎ ጉፋንꬆ ሚሳቲዛይ ሚጬቲ ዴስ።
EZE 1:23 ሄ ሳሎ ጉፋንꬆዛፔ ጋርሳ ባጋራ ኢስታ ቄፌይ ሲቲ ጊዲ፥ ኢሶይ ኢሳኮ ሚጬቲ ኡቲዴስ፤ ቃሴ ኢስታ ኡባሲካ ኢስታ ቦላ ካሚዛ ናምኡ ናምኡ ቄፌይ ዴስ።
EZE 1:24 ሃ ሼምፖራ ፓጻ ዲዛ ሜꬌቴꬃቲ ፒራꬊዛ ዎዴ ኢስታ ቄፌታ ጊሪሳ ሲያዲስ፤ ሄ ጊሪሳይ ዲኦ ሃꬃ ጉንꬃ ማላ፥ ኡባ ዳንዳይዛ ጾሳ ጬንጉርሳ ማላኔ ጮራ ኦላንቻታ ዎጫማ ማላ ሃኒዛይሳ ሲያዲስ። ኢስቲ ፒራꬎ ኣጊዛ ዎዴ ባንታ ቄፌዛ ሺጵ ሂስቴቴስ።
EZE 1:25 ኢስቲ ፒራꬊዛይሳ ኣጊዲ ባንታ ቄፌዛ ሺሺዳ ማላ ኢስታ ሁኤፔ ቦላራ ዲዛ ሳሎ ጉፋንꬆፌ ቦላራ ጊሪሲ ሴቴቲዴስ።
EZE 1:26 ኢስታፌ ቦላራ ዲዛ ሳሎ ጉፋንꬆፌ ꬎቁ ጊዲ ሲምፔሬ ኣራታ ሚሳቲዛይ ዴስ፤ ሄ ኣራታ ቦላ ኣስ ሚሳቲዛዚ ኡቲዴስ።
EZE 1:27 ኢዛስ ጼስ ሚሳቲዛሶፔ ፑዴ ባጋይ ታማን ቦንቂዳ ቢራታ ሚሳቲዛይሳ፤ ጼስ ሚሳቲዛሶፔ ዱጌ ባጋይ ታማ ሚሳቲዛይሳ ቤኣዲስ፤ ኢዛ ዩሾን ጶሊዛ ፖኦይ ዴስ።
EZE 1:28 ኢዛ ዩሾን ዲዛ ጶሊዛ ፖኦይ ኢራ ጋላስ ሻራ ቦላ ኤቂዳ ዙላ ሚሳቴስ። ሄሲካ ጎዳ ቦንቾ ቆንጬꬅ ሚሳቴስ። ታኒ ሄሳ ቤኢዳ ዎዴ፥ ቢታን ዱጌ ጉፋናዳ ኢሳዴ ሃሳያ ጬንጉርስ ሲያዲስ።
EZE 2:1 ኢዚ ታና፥ «ሃይሶ ኣሳ ናዉ! ዴንዳ ኔ ቶሆን ኤቃ፤ ታኒ ኔስ ዮታና» ጊዴስ።
EZE 2:2 ኢዚ ታስ ዮቲሺን ጾሳ ኣያናይ ታ ጊዶ ጌሊዲ ታና ታ ቶሆን ኤሲዴስ። ኢዚ ታስ ዮቲዛይሳካ ሲያዲስ።
EZE 2:3 ኢዚካ ታስ፥ «ሃይሶ ኣሳ ናዉ! ታ ቦላ ማካሊዳ ማካላንቻ ዴሬ ኢስራኤሌ ኣሳኮ ታ ኔና ኪታይስ፤ ኢስቲኔ ኢስታ ኣዋቲ ሃች ጋካናስካ ታ ቦላ ማካሊዳ።
EZE 2:4 ኢስቲ ዬላይ ባይንዳይታኔ ዎዚና ሙሜታ ጊዲዳ ጊሻስ ታኒ ኔና ኢስታኮ ኪታይስ። ኔ ባዳ ኢስታስ፥ ‹ኡባ ሃሪዛ ጎዳይ ዮቲዴስ› ጋ ዮታ፤
EZE 2:5 ኢስቲ ማካላንቻ ኬꬅ ጊዲዳ ጊሻስ ኢስቲ ሲዪኮካ ሲዮንታ ኢጺኮካ ኢስታ ጊዶን ናቤይ ዲዛይሳ ኢስቲ ኤራና።
EZE 2:6 ሃይሶ ኣሳ ናዉ! ኢስታስ ዎይኮ ኢስታ ቃላስ ባቦፋ! ኣጉንꬂኔ ኪንዲቾይ ኔ ዩሾን ዲኮካ ቃሴ ማሲማሶታ ጊዶን ኔ ኡቲኮካ ባቦፋ። ኢስቲ ማካላንቻ ዛሬ ጊዲኮካ ኢስቲ ኔና ጊዛይሳስ ባቦፋ፤ ኢስታስ ዳጋሞፋ።
EZE 2:7 ኢስቲ ማካላንቻ ዛሬ ጊዲዳ ጊሻስ ኢስቲ ሲዪኮካ ሲዮንታ ኢጺኮካ ታ ቃላ ኢስታስ ዮታ።
EZE 2:8 ኔኒ ጊዲኮ ሃይሶ ኣሳ ናዉ! ታ ኔስ ዮቲዛይሳ ሲያ! ሄ ማካላንቻ ዛሬታ ማላ ማካሎፋ፤ ኔ ዶና ዶያዳ ታኒ ኔስ ኢሚዛይሳ ማ» ጊዴስ።
EZE 2:9 ሄሳፌ ጉዬ ታኒ ጼሊሺን ኢሲ ኩሼይ ታኮ ሚጬቲዳይሳ ሄራካ ቤኣዲስ፤ ሄ ኩሼዛን ጻꬃ ማጻፋይ ዴስ።
EZE 2:10 ኢዚ ታ ሲንꬃን ሄ ጻꬃ ማጻፋ ቢርሺዴስ፤ ሄ ጻꬃ ማጻፋን ጊዶ ባጋራኔ ካሬ ባጋራ ዚላሲ፥ ዬሆይኔ ዋሶ ቃላይ ጻፌቲ ኡቲዴስ።
EZE 3:1 ቃሴ ኢዚ ታስ፥ «ሃይሶ ኣሳ ናዉ! ሃይሳ ኔ ሲንꬃን ዲዛይሳ ማ፤ ሃይሳ ጻꬃ ማጻፋ ማዳኔ ባዳ ኢስራኤሌ ኣሳስ ዮታ» ጊዴስ።
EZE 3:2 ሂስቲን ታ ሃንጊን ኢዚ ታና ጻꬃ ማጻፋ ባርሲዴስ።
EZE 3:3 ሂስቲዲ ኢዚ ታና፥ «ሃይሶ ኣሳ ናዉ! ሃ ታኒ ኔና ባርሲዛ ጻꬃ ማጻፋዛ ማ፤ ኔ ኡሎ ኢዛን ኩንꬃ» ጊዴስ። ታ ሚን ታ ዶናን ኤሳ ማላ ማልኢዴስ።
EZE 3:4 ሄሳፌ ጉዬ ኢዚ ታና፥ «ሃይሶ ኣሳ ናዉ! ዴንዳዳ ኢስራኤሌ ኣሳኮ ባ፤ ታ ቃላካ ኢስታስ ዮታ።
EZE 3:5 ኔኒ ኪቴቲዳይ ኢስራኤሌ ኣሳሳፌ ኣቲን ኢስታ ሃሳያይ ኣሳስ ጌሎንታ ዴሬኮኔ ቃላይ ኤሬቶንታ ዴሬታኮ ጊዴና።
EZE 3:6 ቃሴ ታኒ ኔና ኢስታ ሃሳያይ ኣሳስ ጌሎንታ ዴሬታኮ፥ ቃላይ ኤሬቶንታ ዴሬታኮ፥ ኢስታ ቃላ ኤራናስ ዳንዳዬቶንታ ዳሮ ዴሬታኮ ኪታቤኬ፤ ቱማ ጋይስ ታኒ ኔና ኢስታኮ ኪቲዳኮ ኢስቲ ኔኒ ዮቲዛይሳ ሲያና።
EZE 3:7 ጊዶ ኣቲን ኢስራኤሌ ኣሳይ ዞባኔ ዎዚና ሙሜ ጊዲዳ ጊሻስ ታ ዮቲዛይሳ ሲያና ኮዪቤቴና፤ ሄሳ ጊሻስ ኢስቲ ኔ ዮቲዛይሳካ ሲዬቴና።
EZE 3:8 ቤኣ ታኒ ኔና ኢስታስ ሲንꬅ ኢሞንታ ሚኖ ኣስ ሂስታና።
EZE 3:9 ታኒ ኔና ዬላይ ባይንዳዴኔ ዛላፌካ ኣꬊዳ ሚኖ ሂስታና፤ ኢስቲ ማካላንቻ ዛሬ ጊዲኮካ ኢስታስ ባቦፋኔ ኮኮሮፓ» ጊዴስ።
EZE 3:10 ቃሴ ኢዚ ታና፥ «ሃይሶ ኣሳ ናዉ! ታኒ ኔስ ዮቲዛ ቃላ ኡባ ሚንꬃዳ ኤዝጋኔ ኔ ዎዚናን ዎꬃ።
EZE 3:11 ሃኢ ባዳ ዲኤቲ ዲዛ ኔ ኣሳስ ዮታ። ኢስቲ ሲዪን ሲዮንታ ኢጺን ኢስታስ፥ ‹ኡባ ሃሪዛ ጎዳይ ሃይሳ ማላ ጌስ› ጋዳ ዮታ» ጊዴስ።
EZE 3:12 ሄሳፌ ጉዬ ታና ኣያናይ ፑዴ ꬎቁ ሂስቲ ዴንꬂዴስ፤ ጎዳ ቦንቾይ ባ ዲዛሶፔ ዴንዲሺን ታፔ ጉዬ ባጋራ ዎልቃማ ጉጉንꬃ ጬንጉርስ ሲያዲስ።
EZE 3:13 ቃሴ ሼምፖራ ፓጻ ዲዛ ሜꬌቴꬃታ ቄፌይ ኢሶይ ኢሳራ ቦሼቲሼኔ ኢስታ ሚሌን ዲዛ ኢርዞቲ ሲሲዛ ዎልቃማ ጉጉንꬃ ጬንጉርሲ ዴስ።
EZE 3:14 ሄሳፌ ጉዬ ታና ኣያናይ ፑዴ ꬎቁ ሂስቲ ሃራሶ ኤፊዴስ፤ ታኒ ጫሞኒኔ ሃንቆ ኣያናን ኩማዳ ባዲስ፤ ጎዳ ጊታ ዎልቃይ ታና ኦይኪዴስ።
EZE 3:15 ኮቦሬ ሻፋ ማታን ቴሊ-ኣቢቤን ዲኤቲ ዲዛይታኮ ያዲስ፤ ታኒ ዳጋማዳ ኢስታ ጊዶን ላፑን ጋላስ ኡታዲስ።
EZE 3:16 ላፑንꬃ ጋላስ ዉርሴꬃን ጎዳ ቃላይ ታኮ ዪዴስ፤
EZE 3:17 ኢዚካ፥ «ሃይሶ ኣሳ ናዉ! ታኒ ኔና ኢስራኤሌ ኣሳ ቦላ ናጌ ሂስታ ሹማዲስ፤ ሄሳ ጊሻስ ታ ዶናፔ ኬኢዛ ቃላ ሲያ፤ ታ ኔስ ዮቲዛ ሴራካ ኢስታስ ኣꬃ።
EZE 3:18 ታኒ ናጋራንቻዛ፥ ‹ኣዳ ኔኒ ሃይቃና› ጊዛ ዎዴ ኔኒ ኢዛ ሴሮንታ ኣጊኮ ዎይኮ ኢዚ ባ ኢታ ሃኖፔ ሲማና ማላኔ ባ ሼምፖ ኣሻና ማላ ኔ ዮቶንታ ኣጊኮ ሄ ናጋራንቻይ ባ ናጋራን ሃይቃና፤ ኔናካ ኢዛ ሱꬃ ጊሻስ ታ ኦይቻና።
EZE 3:19 ጊዶ ኣቲን ኔኒ ናጋራንቻ ሴሪን ኢዚ ባ ናጋራፔኔ ባ ኢታ ሃኖፔ ሲሞንታ ኢጺኮ ኢዚ ባ ናጋራን ሃይቃና፤ ኔኒ ጊዲኮ ኔ ሼምፖ ኣሻና» ጊዴስ።
EZE 3:20 «ቃሴ ጺሎ ኣሲ ባ ጺሎቴꬃፌ ጉዬ ሲሚዲ ናጋራ ኦꬂኮ ታኒካ ꬉጲዛ ሚሽ ኢዛ ሲንꬃን ዎꬂኮ ኢዚ ሃይቃና፤ ኔኒ ኢዛ ሴሮንታ ጊሻስ ኢዚ ባ ናጋራን ሃይቃና፤ ኢዚ ካሴ ኦꬂዳ ጺሎ ኦሶይ ዛሪ ቆፌቴና፤ ታኒ ኔና ኢዛ ሱꬃ ኦይቻና።
EZE 3:21 ጊዶ ኣቲን ጺሎ ኣሲ ናጋራ ኦꬆንታ ማላ ኔኒ ሴሪኮ፥ ኢዚ ኔ ሴራ ሲዪዲ ናጋራ ኦꬆንታ ኣጊኮ፥ ቱሙካ ሼምፖራ ፓጻ ዳና፤ ኔካ ኔ ሼምፖ ኣሻና» ጊዴስ።
EZE 3:22 ሄን ጎዳ ዎልቃይ ታና ኦይኪዴስ፤ ኢዚካ ታና፥ «ዴንዳዳ ቆልታቲዛ ዴምባ ባ፤ ሄን ታኒ ኔስ ዮታና» ጊዴስ።
EZE 3:23 ታኒካ ዴንዳዳ ቆልታቲዛ ዴምባ ባዲስ፤ ካሴ ኮቦሬ ሻፋ ማታን ታኒ ቤኢዳ ቦንቾዛ ማላ ጎዳ ቦንቾይ ኤቂዳይሳ ሄን ቤኣዲስ፤ ታኒካ ሲንꬃ ጉꬅ ጉፋናዲስ።
EZE 3:24 ኣያናይ ታ ጊዶ ጌሊዲ ታና ታ ቶሆን ኤሲዴስ፤ ሂስቲዲ ታና፥ «ባ፤ ኔ ሶሆ ጌላዳ ኔ ቦላ ፔንጌ ጎርዳ።
EZE 3:25 ሃይሶ ኣሳ ናዉ! ዎዶሮን ዋጺዲ ኣሳ ጊዶን ሲሜሬቶንታ ማላ ኢስቲ ኔና ቃቻና።
EZE 3:26 ኢስቲ ማካላንቻ ዴሬ ጊዲዳ ጊሻስ ኔ ኢስታ ሙሮንታ ማላ ኔ ኢንጻርሳ ታ ጎንጊራꬃራ ኦይꬃና፤ ኔኒካ ዶና ዱዴ ጊዳና።
EZE 3:27 ጊዶ ኣቲን ታኒ ኔስ ዮቲዛ ዎዴ ታኒ ኔ ዶና ዶያና፤ ኔኒካ ኢስታስ፥ ‹ኡባ ሃሪዛ ጎዳይ ሃይሳ ማላ ጌስ› ጋና። ኢስቲ ማካላንቻ ዴሬ ጊዲዳ ጊሻስ ሲያና ኮይዛይ ሲዮ፤ ሲዮንታ ኢጺዛይ ሲዮፖ» ጊዴስ።
EZE 4:1 «ሃይሶ ኣሳ ናዉ! ኡርቃፌ ሜꬌቲዳ ኢሲ ጹቤ ኤካዳ ኔ ሲንꬃን ዎꬃ፤ ሂስታዳ ዬሩሳላሜ ሚስሌ ኢዛ ቦላ ኦꬃ።
EZE 4:2 ሂስታዳ ዎታዳራይ ጊዶꬂዛ ማላ ኢዞ ጊዶꬃ፤ ሚጻ ኢዚን ጊጊሳ፤ ቢታ ሺሻ ዶራ፤ ኦላ ዎሳናታ ኢዚ ዩሾን ጊጊሳ፤ ጊምቤዛ ላሊዛ ዱሩማ ኢዚ ዩሾን ዋጻ።
EZE 4:3 ቃሴ ቢራታ ባሼ ኤካዳ ኔፔኔ ካታማፔ ጊዶን ቢራታ ጊምቤ ማላ ኤሳ። ኔ ሲንꬃ ኢዚኮ ዛራዳ ዴሬቃ፤ ኢዛ ዶዴቲዳሮ ጊዳና፤ ኔካ ኢዞ ዶዳና። ሄሲካ ኢስራኤሌ ኣሳስ ማላታ ጊዳና።
EZE 4:4 «ታኒ ኢስራኤሌ ኬꬃ ሙሪዛይሳስ ማላታ ጊዳና ማላ ኔኒ ሃዲርሳ ሚሌን ኢቻ፤ ኔኒ ሃዲርሳ ሚሌን ኢቺዳ ዎዴታ ኡባን ኢስራኤሌ ኬꬃ ባላ ማላ ጊዳና ማላ ቤሳና።
EZE 4:5 ኢስራኤሌ ኬꬃይ ባ ባላን ዋኒ ቃጻዬታናኮ ኔ ቤሳና ማላ ታ ኔስ 390 ጋላሳታ ኢማዲስ፤ ኢሲ ኢሲ ጋላሳይ ኢስቲ ቃጻዬታና ኢሲ ኢሲ ላይꬅ ቤሴስ።
EZE 4:6 «ሄሳፌ ጉዬ ኔኒ ኡሻቻ ሚሌን 40 ጋላስ ኢቻ፤ ሄሲ ዩሁዳ ኣሳይ ባ ባላን ዋኒ ቃጻዬታናኮ ቤሲዛ ማላታ ጊዳና፤ ኢሲ ኢሲ ጋላሳይ ኢስቲ ቃጻዬታና ኢሲ ኢሲ ላይꬅ ቤሴስ።
EZE 4:7 ኔ ሲንꬅ ዬሩሳላሜ ዶዴቴꬃኮ ዛራዳ ዴሬቃ፤ ኔ ኩሼ ዴንꬃዳ ማንዳሼ ቲንቢቴ ኢዚ ቦላ ዮታ።
EZE 4:8 ሄ ዶዴቴꬃ ኣጊናይ ዉራና ጋካናስ ኔ ሚሌ ሺሮንታ ማላ ታ ኔና ዎዶሮን ቃቻና።
EZE 4:9 «ሃኢ ኔኒ ጊስቴኔ ባንጋ፥ ባኤላኔ ሚሲራ፥ ማሊዶኔ ሙርቃ ኤካዳ ኦቶን ዎꬃ፤ ኢዛፔ ካꬃ ማ፤ ሂስታዳ ኔኒ ሃዲርሳ ሚሌን ኢቻ ዲዛ 390 ጋላሳታን ማና።
EZE 4:10 ሃች ሃች ኔ ማና ካꬃ ጌዳራ ዎꬃ፤ ኢዛ ዎዴን ዎዴን ኢሲ ዞላ ማ።
EZE 4:11 ኔ ኡያና ሃꬃካ ማካ ዎꬃ፤ ሄሳ ኢዛ ዎዴን ዎዴን ናምኡ ኩባያ ኡያ።
EZE 4:12 ሄ ዋላኬቲዳ ካꬃ ኤካዳ ዴራ ሲንꬃን ባንጋ ኡኬꬃ ማላ ሺኣ ኬፌን ኡካዳ ማ።»
EZE 4:13 ጎዳይካ፥ «ሄሳ ማላ ሃኖታን ኢስራኤሌ ኣሳይ ታኒ ኢስታ ላላና ካዎቴꬃታ ጊዶን ኢስቲ ቱና ካꬅ ማናይሳስ ማላታ» ጊዴስ።
EZE 4:14 ሂስቲን ታኒ ዛራዳ፥ «ሃይ! ኡባ ሃሪዛ ጎዳዉ! ሙሌካ ታ ሄሳ ማላን ቱና ኤሪኬ፤ ታኒ ዬላጋቴꬃፌ ዶማዳ ባዉታ ዎይኮ ዶኣይ ዎꬊዳይሳ ማ ኤሪኬ፤ ቱኒዳ ኣሾይካ ታ ዶናኮ ሺቂ ኤሬና» ጋዲስ።
EZE 4:15 ኢዚካ ታና፥ «ኤሮ ሎኦ፥ ሺኣ ኬፌን ኡኪዛይሳ ኣጋዳ ኦሻ ኬፌን ኡካ» ጊዴስ።
EZE 4:16 ቃሴካ ጎዳይ ታና፥ «ሃይሶ ኣሳ ናዉ! ኣኬካ፤ ታኒ ዬሩሳላሜስ ካꬂ ዪዛሶታ ዱꬃና ሃናይስ፤ ኣሳይ ካꬃ ሂርጊሼ ማካን ማና፤ ሃꬃካ ያዪሼ ጉꬃራ ኡያና።
EZE 4:17 ሄሳን ኢስታስ ዲዛ ካꬂኔ ሃꬂ ፓጫና፤ ኢሶይ ኢሳ ቤኢሼ ጮልኡ ጋና፤ ኢስቲ ባንታ ናጋራ ጋሶን ጊልቂ ꬋያና።
EZE 5:1 «ሃይሶ ኣሳ ናዉ! ቃራ ማሻ ኤካዳ ማጋላን ሜዲዛ ማላ ኔ ሁኤኔ ኔ ቡቼ ኢዛን ሜዳ። ሂስታዳ ኔ ቢናና ሜዛኔን ጌዳራዳ ሄꬑ ኬሳ ሻካ።
EZE 5:2 ኔ ዶዲዛ ዎዴይ ዉርሺን ኔኒ ሻኪዳ ቢናናስ ኢሲ ኩሼዛ ዬሩሳላሜ ካታማ ሚስሌ ጊዶን ጹጋ፤ ናምኣንꬆ ኩሼዛ ካታማይ ዩሾን ጊꬃ ማሻን ቃንጼሬꬃ ዬጋ፤ ኣቲዳ ሄꬓንꬆ ኩሼዛ ጫርኮ ቦላ ላላ፤ ታኒ ኢስታ ማሻን ዬዴሬꬃና።
EZE 5:3 ቢናናፔ ጉꬅ ኤካዳ ኔ ሴሎ ማይኦ ጼራን ቃቻ።
EZE 5:4 ቃሴ ሄ ቢናናፌ ጉꬃራ ኤካዳ ታማን ጹጋ፤ ታማይ ሄፔ ኬዚዲ ኢስራኤሌ ኣሳ ማና» ጊዴስ።
EZE 5:5 ኡባ ሃሪዛ ጎዳይ፥ «ዴሬታ ኡባ ኢዚ ዩሾን ዎꬃዳ ካዎቴꬃታ ጊዶን ዎꬂዳ ዬሩሳላሜ ካታማያ ሃኖ።
EZE 5:6 ጊዶ ኣቲን ኢዛ ባ ኢታ ኦሶን፥ ባ ዩሾን ዲዛ ቢታታፔኔ ካዎቴꬃታፔ ጌዴ ኢታዳ ታ ዎጋ ቦላኔ ማራ ቦላ ማካላዱስ፤ ኣዳካ ኢዛ ታ ዎጋ ካꬋዱስ፤ ታ ማራካ ካላቤኩ» ጌስ።
EZE 5:7 ሄሳ ጊሻስ ኡባ ሃሪዛ ጎዳይ፥ «ኢንቴ ኢንቴ ዩሾን ዲዛ ካዎቴꬃታፔ ኣꬊ ጩቦቲዛይታ ጊዲዴታ፤ ታ ማራ ካሊቤኬታ፤ ታ ዎጋስካ ኣዛዜቲቤኬታ፤ ሃራይ ኣቶሺን ኢንቴ ዩሾን ዲዛ ካዎቴꬃቲ ናጊዛ ዎጋዮካ ናጊቤኬታ» ጌስ።
EZE 5:8 ሄሳ ጊሻስ ኡባ ሃሪዛ ጎዳይ፥ «ሄኮ፥ ታኒ ታ ባጋራ ኔ ቦላ ዴንዳዲስ፤ ካዎቴꬃታ ሲንꬃን ታኒ ኔ ቦላ ፒርዳ ኤሃና።
EZE 5:9 ኔ ሃራሲዛ ኤቃ ጾሳታ ጎይኒዳ ጋሶን ታኒ ሃይሳፌ ካሴ ኦꬃ ኤሮንታ ሚሺኔ ሃይሳፌ ጉዬካ ኦꬆንታ ሚሽ ታ ኔ ቦላ ኦꬃና።
EZE 5:10 ሄሳፌ ዴንዲዳይሳን ኔ ጊዶን ኣዋቲ ባንታ ናይታ፥ ናይቲ ባንታ ኣዋታ ማና፤ ታ ኔ ቦላ ፒርዳ ኤሃና፤ ኔፔ ኣቲዳይታ ታኒ ጫርኮን ላላና።
EZE 5:11 ሄሳ ጊሻስ ኡባ ሃሪዛ ጎዳይ፥ ታኒ ዴኦ ጾሳ ጊዲዳይሳን ጫቃይስ፡ ኔኒ ታ ኬꬃ ቱና ሚስሌታኒኔ ሃራሲዛ ኔ ኦሶ ኡባን ቱኒሲዳ ጊሻስ ታ ኔና ቡጫ ꬋይሳና፤ ታ ኔና ቃꬌታ ኣይፌን ጼሊኬኔ ማሪኬ።
EZE 5:12 ኔ ኣሳፔ ኢሲ ኩሼይ ካታማ ጊዶን ኢታ ሃርጌኒኔ ኮሻን ሃይቃና፤ ናምኣንꬆ ኩሼይ ካታማ ጊምቤፌ ካሬራ ማሻን ዉራና፤ ኣቲዳ ሄꬓንꬆ ኩሼዛ ታኒ ጫርኮስ ላላናኔ ማሻ ሾዳ ዬዴꬃና።
EZE 5:13 «ሄሳፌ ጉዬ ታ ሃንቆይ ዶቻና፤ ኢስታ ቦላ ቦሻይካ ሲማና፤ ታ ኢስታ ቦላ ሃሎ ኬሲኮ ታስ ዎፑ ጋና፤ ታ ኢስታ ቦላ ባሻ ጋꬂዳፔ ጉዬ ታኒ ጎዳይ ዚልኤታ ሃሳይዳይሳ ኢስቲ ኤራና።
EZE 5:14 «ኔ ዩሾን ዲዛ ካዎቴꬃታ ጊዶን ኔ ማታራ ኣꬊዛ ኡባ ሲንꬃን ታኒ ኔና ቡላሳናኔ ቂꬌስ ኣꬃ ኢማና።
EZE 5:15 ሃንቆኒኔ ቦሻን ቃሴካ ዪሎኒኔ ሃንቆን ታ ኔ ቦላ ፒርዳ ኤሂዛ ዎዴ ኔ ዩሾን ዲዛ ካዎቴꬃታስ ኔኒ ቂꬌሲኔ ሚቻስ፥ ሴራሲኔ ዳጋማስ ማላታ ጊዳና። ታኒ ጎዳይ ሃይሳ ዮታዲስ።
EZE 5:16 ዱኪዛ ዎንዳፌ ማላ ዎꬊዛኔ ꬋይሲዛ ኮሻ ታ ኢንቴ ቦላ ዬዲዛ ዎዴ ቱማፔ ታ ኢንቴና ꬋይሳናስ ዬዳይስ፤ ታ ኢንቴስ ኮሻ ቦላ ኮሻ ኤሃና፤ ታኒ ካꬂ ዪዛሶ ሜሊሳና።
EZE 5:17 ታኒ ኮሻኔ ዎራ ዶኣታ ኢንቴ ቦላ ዬዳና፤ ኢስቲካ ኢንቴና ናይ ባይንዳይታ ኦꬃና፤ ታ ኢንቴ ቦላ ኢታ ሃርጌ፥ ሱꬂኔ ማሻ ኤሃና፤ ታኒ ጎዳይ ሃይሳ ዮታይስ» ጌስ።
EZE 6:1 ጎዳ ቃላይ ታኮ ዪዲ፥
EZE 6:2 «ሃይሶ ኣሳ ናዉ! ኔ ኣይፌሶ ፑዴ ኢስራኤሌ ዙምቡላታኮ ዛራዳ ሃንቄታሼ ኢስታ ቦላ ቲንቢቴ ዮታ።
EZE 6:3 ‹ኢስራኤሌ ዙምቡላቶ! ኡባ ሃሪዛ ጎዳ ቃላ ሲዪቴ! ኡባ ሃሪዛ ጎዳይ ዙምቡላታስ፥ ፖጎኖታስ፥ ካካታሲኔ ዙሌታስ፡ ታ ኢንቴ ቦላ ማሻ ኤሃና፤ ኢንቴ ኢስታ ቦላ ጎይኒዛሶሆታካ ꬋይሳና።
EZE 6:4 ኢንቴ ኢስታ ቦላ ያርሾ ያርሺዛሶሆቲካ ላሌታና፤ ቃሴ ኢንቴ ኢስታ ቦላ ኤጻኔ ጩዋሲዛሶሆቲካ ሜቄሬታና፤ ሹኬቲዳ ኢንቴ ኣሳታ ኢስታስ ጎይኒዛ ኤቃ ጾሳታ ሲንꬃን ታ ዬጋና።
EZE 6:5 ታኒ ኢስራኤሌ ኣሳ ኣሃ ኢስታ ኤቃታ ሲንꬃን ኢቺሳና፤ ኢንቴ ሜቄꬃታካ ኢንቴ ያርሺዛሶሆታ ዩሾን ላላና።
EZE 6:6 ኢንቴ ኢስታን ዲዛ ካታማቲ ኡባይ ካይስ ጊዳና፤ ኢንቴ ጎይኒዛሶቲ ኡባይ ላሌታና፤ ሄሳꬆካ ኢንቴ ያርሺዛሶሆቲ ቱናናኔ ላሌቲ ꬋያና፤ ኢንቴ ኤቃ ጾሳቲ ኒፒ ጊ ሜቄሬታና፤ ኢንቴ ኤጻኔ ያርሺዛሶሆቲ ኒፒ ጊ ሜቄሬታና፤ ኢንቴ ኩሼ ኦሶቲ ዲፒ ጊ ꬋያና።
EZE 6:7 ኢንቴ ኣሳይ ሹኬቲዲ ኢንቴ ጊዶን ኩንዳና፤ ታኒ ጎዳ ጊዲዳይሳ ኢንቴ ሄሳን ኤራና።
EZE 6:8 « ‹ታኒ ኢንቴፌ ማሻፌ ኬሲ ኤኪ ኣቲዳ ጉꬃታ ኣሻና፤ ሄሳፌ ጉዬ ካዎቴꬃታ ጊዶኒኔ ዴሬታ ጊዶን ኢንቴና ታ ላላና።
EZE 6:9 ሃይቲ ሃይቆፔ ኣቲዳይቲ ዲኤቲ ቢዳሶን ዲሼ ኢስቲ ታና ቆፓና፤ ኢስቲ ታፔ ሃኪዲ ላይማቴꬃን ኩሚዳ ዎዚናኒኔ ዚታይ ኩሚዳ ኤቃ ጾሳታ ካሊዛ ኢንቴ ኣይፌታን ታና ሚሺሲዴታ፤ ባ ኦꬂዳ ኢታቴꬃፌኔ ሃራሲዛ ኤቃ ጾሳታፔ ዴንዲዳይሳን ኢስቲ ባርካ ባና ሃራሴታና።
EZE 6:10 ቃሴካ ታኒ ጎዳ ጊዲዳይሳ ኢስቲ ኤራና፤ ታኒ ኢስታ ቦላ ኢታ ሚሽ ኤሃና ጊዳይሲ ጮ ሃዳ ጊዴና።
EZE 6:11 « ‹ኡባ ሃሪዛ ጎዳይ፡ ዪሎን ኔ ኩሼ ባቃ፤ ኔ ቶሆንካ ቢታ ቃካሼ፥ ዉ! ዉይ› ጋ ዋሳ፤ ኢስራኤሌ ኣሳይ ኦꬂዳ ኢታቴꬃፌኔ ሃራሲዛ ሃኖፔ ዴንዲዳይሳን ማሻን፥ ኮሻኒኔ ኢታ ሃርጌን ዉራና።
EZE 6:12 ሃሆን ዲዛይቲ ኢታ ሃርጌን ሃይቃና፤ ማታን ዲዛይቲ ማሻን ኩንዳና፤ ቃሴ ሼምፖራ ፓጻ ኣቲዳይቲ ኮሻን ዉራና፤ ታ ሃንቆዛ ሃይሳ ማላን ኢስታ ቦላ ፖላና።
EZE 6:13 ኢስታ ኣሳፔ ሹኬቲዳይቲ ያርሾ ያርሺዛሶሆታ ዩሾ ኡባን፥ ኢስታ ኤቃ ጾሳታ ጊዶ ኡባን፥ ዙምቡላታ ቦላ ኡባን፥ ዙማታ ጼራ ቦላ ኡባን፥ ጪሊላ ሚꬃ ጋርሳታን ኡባኒኔ ዎጋ ዎላታ ጋርሳታ ኡባን፥ ባንታ ኤቃ ጾሳታስ ሳዊዛ ያርሾ ያርሺዛሶሆታ ኡባን ዬጌቲ ኣቲዳይታ ኢንቴ ቤኢዲ ሄ ዎዴ ታኒ ጎዳ ጊዲዳይሳ ኢንቴ ኤራና።
EZE 6:14 ታኒ ታ ኩሼዛ ኢስታ ቦላ ዴንꬃና፤ ኢስቲ ዲዛሶሆታ ዱጌሃን ባዞ ቢታፌ ቢዲ ፑዴሃን ዲቢላ ጋካናስ ቡላ ሂስታና፤ ታኒ ጎዳ ጊዲዳይሳ ኢስቲ ሄ ዎዴ ኤራና» ጊዴስ።
EZE 7:1 ጎዳ ቃላይ ታኮ ዪዲ፥
EZE 7:2 ታና «ሃይሶ ኣሳ ናዉ! ኡባ ሃሪዛ ጎዳይ ኢስራኤሌ ቢታስ፥ ‹ሃይሲ ዉርሴꬃ! ቢታይ ቦላ ኦይዱ ባጋራካ ዉርሴꬂ ዬስ።
EZE 7:3 ሃኢካ ኔ ዉርሴꬂ ጋኪዴስ! ታኒ ታ ሃንቆዛ ኢንቴ ቦላ ጉሳና፤ ኢንቴ ሃኖ ማላ ታ ኢንቴ ቦላ ፒርዳና፤ ሃራሲዛ ኤቃ ጾሳታስ ኢንቴ ጎይኒዛ ጊሻስ ታ ኔስ ቤሲዛ ቂጻቴ ኢማና።
EZE 7:4 ታ ኢንቴና ቃꬌታ ኣይፌን ጼሊኬ፤ ታ ኢንቴና ማሪኬ፤ ኢንቴ ሃኖታ ማላ ታ ኢንቴ ቦላ ፒርዳና፤ ኢንቴ ጊዶን ዲዛ ሃራሲዛ ኤቃ ጾሳታ ታ ቆንጪሳና፤ ታኒ ጎዳ ጊዲዳይሳ ኢንቴ ሄ ዎዴ ኤራና› ጌስ።
EZE 7:5 «ኡባ ሃሪዛ ጎዳይ፥ ‹ሄኮ ቦሻይ! ሴቴቲ ኤሮንታ ቦሻይ› ዬስ።
EZE 7:6 ዉርሴꬂ ጋኪዴስ! ዉርሴꬂ ጋኪዴስ! ኢንቴ ቦላ ዴንዲዴስ፤ ሄኮ ጋኪዴስ!
EZE 7:7 ኢንቴኖ ሃኖ ቢታይ ቦላ ዲዛይቶ! ኢንቴና ꬋይሳና ፒርዳይ ኢንቴ ቦላ ጋኪዴስ፤ ዎዴዚ ጋኪዴስ፤ ዙምቡላታ ቦላ ኡፋይሳ ኢሊስ ጊዶንታ ሺሮይ ጋኪዴስ።
EZE 7:8 ሃኢ ማታን ታኒ ታ ሃንቆዛ ኢንቴ ቦላ ጉሳና፤ ታኒ ታ ሃንቆ ኢንቴ ቦላ ፖላና፤ ኢንቴ ሃኖታ ማላ ታ ኢንቴ ቦላ ፒርዳና፤ ሃራሲዛ ኤቃ ጾሳታስ ኢንቴ ጎይኒዛ ጊሻስ ታ ኢንቴስ ቤሲዛ ቂጻቴ ኢማና።
EZE 7:9 ታ ኢንቴና ቃꬌታ ኣይፌን ጼሊኬ፤ ታ ኢንቴና ማሪኬ፤ ኢንቴ ሃኖታ ማላ ታ ኢንቴ ቦላ ፒርዳና፤ ኢንቴ ጊዶን ዲዛ ሃራሲዛ ኤቃ ጾሳታ ታ ቆንጪሳና፤ ታኒ ጎዳ ጊዲዳይሳ ኢንቴ ሄ ዎዴ ኤራና።
EZE 7:10 « ‹ሄኮ ጋላሳ! ሄ ጋላሳይ ጋኪዴስ! ኢንቴ ባሻይ ኢንቴ ፔንጌን ዴስ! ኢታቴꬃ ጉፌይ ጉምቢዴስ፤ ኦቶሬቴꬂ ጪዪዴስ።
EZE 7:11 ማካላይ ዲጫዳ ኢታቴꬅ ሾጪዛ ጉፌ ጊዳዱስ፤ ኣሳፔ ኣይኮይካ ኣቴና፤ ኢስታ ጮራቴꬃፌ፥ ኢስታ ኣቆታፔኔ ኢስታ ቦንቾፌ ኣይኮይካ ኣቴና።
EZE 7:12 ዎዴዚ ጋኪዴስ፤ ጋላሳይካ ማቲዴስ! ሃንቆይ ዴሬ ኡባ ቦላ ጋኪዳ ጊሻስ ባይዚዛይ ጬጮፖ፤ ሻሚዛይካ ኡፋዬቶፎ።
EZE 7:13 ኢስቲ ናምኣይ ሼምፖራ ፓጻ ዲሺን ባይዚዳይሲ ባ ባይዚዳይሳ ዛሮፖ፤ ሄሳꬆካ ኩሜꬃ ኢስራኤሌ ቦላ ዮቴቲዳ ኣጁታይ ላሜቴና። ባ ናጋራ ጋሶን ኦኒካ ባ ሼምፖ ኣሻና ዳንዳዬና።
EZE 7:14 ታ ሃንቆይ ኣሳ ኡባ ቦላ ዪዳ ጊሻስ ኢስቲ ዛዬ ዛይኮኔ ኡባ ሚሽ ጊግሲኮ ኦላሶ ባናይ ኦኒካ ዴና።
EZE 7:15 « ‹ካሬራ ኦላይ ዴስ፤ ሶራ ኢታ ሃርጌይኔ ኮሻይ ዴስ፤ ካታማፔ ካሬን ዲዛይቲ ኦላን ዉራና፤ ካታማን ዲዛይቲ ኮሻኒኔ ኢታ ሃርጌን ዉራና።
EZE 7:16 ኢስታፌ ኬሲ ኤኪ ኣቲዛይቲ ሾባ ጊዶፌ ጎዲን ሂርጊሼ ፒራꬊ ቢዲ ዙምቡላ ቦላ ጉጉሚዛ ሃራጴታ ማላ ባንታ ናጋራ ጋሶን ዚላሊሼ ዙማ ቦላ ዳና።
EZE 7:17 ኩሼ ኡባይ ዶጫና፤ ያሻን ጉልባቴ ኡባይካ ሃጻና።
EZE 7:18 ኢስቲ ማቃ ማይኣና፤ ኢስቲ ዳጋማን ሺሮታና፤ ኢስታ ኡባ ኣይፌሶይ ዬላ ማይኣና፤ ኢስታ ኡባ ሁኤይካ ቡሊሴታና።
EZE 7:19 ኢስቲ ባንታ ቢራ ኦጌን ኦላና፤ ኢስታ ዎርቃይካ ቱና ማላ ቆዴታና፤ ጎዳ ዎልቃማ ሃንቆ ጋላስ ኢስታ ቢራይኔ ዎርቃይ ኢስታ ኣሼና፤ ኢስታ ቢራይኔ ዎርቃይ ኢስቲ ናጋራን ኩንዳና ማላ ኢስታስ ꬉጴ ጊዲዴስ፤ ቢራይኔ ዎርቃይ ኢስታ ካልሴና፤ ኢስታ ኡሎካ ኩሜና።
EZE 7:20 ኢስቲ ባንታ ሎኦ ኣሌቆን ኦቶሬቲዳ፤ ሄይታ ባንታ ሃራሲዛ ኤቃ ጾሳታኔ ማሲ ጊግሲዳ ዬላቺዛ ሚስሌታ ኦꬃናስ ጎኤቲዳ። ሄሳ ጊሻስ ታኒ ሄ ሎኦ ኣሌቆዛ ኢስታስ ቱና ኬሳና።
EZE 7:21 ታኒ ኢስታ ኣሌቆታ ኣላጋታስ ዲኦስ፥ ቢታ ቦላ ዲዛ ኢታታስ ቦንቃስ ኣꬃ ኢማና፤ ሄይቲካ ኢስታ ቱኒሳና።
EZE 7:22 ታኒ ታ ኣይፌሶ ሃራሶ ዛራና፤ ቦንቼቲዳ ታ ኬꬃ ፓንጋቲ ጌላናኔ ቱኒሳና።
EZE 7:23 « ‹ሱሬ ፒርዳይ ꬋዪን ቢታይ ሱꬃ ጉኮን ኩሚዳ ጊሻስ፥ ካታማያካ ማካላ ኦሶን ኩሚዳ ጊሻስ ኔኒ ሳንሳላታ ጊጊሳ።
EZE 7:24 ካዎቴꬃታ ጋርሳፌ ዳሮ ኢታታ ኤሃዳ ኢስታ ኬꬃን ዲዛ ኣቆታ ታ ቦንቂሳና፤ ዎልቃማታ ኦቶሬቴꬅ ታኒ ꬋይሳና፤ ኢስቲ ጎይኒዛሶሆታ ቱኒሳና።
EZE 7:25 ሺሮይ ዪዛ ዎዴ ኢስቲ ሳሮቴꬅ ኮያና ሺን ዴሜቴና።
EZE 7:26 ሜቶይ ሜቶ ቦላ ቃሴ ኢታ ዮኦይ ኢታ ዮኦ ቦላ ያና፤ ኢስቲ ናቤፔ ኣጁታ ዴማናስ ባጼታና፤ ዎጋ ቲሚርቴይ ቄሴፔ፥ ዞሬይካ ጪማፔ ꬋያና።
EZE 7:27 ካዎይ ዬካና፤ ሃላቃይ ሂዶታ ቃንጻና፤ ሄ ቢታ ኣሳ ኩሼይ ባቦን ኮኮራና። ታኒ ኢስታ ኦሶ ማላ ኢስታስ ኢማና፤ ኢስቲ ሃራታ ቦላ ፒርዲዳ ማላ ታኒ ኢስታ ቦላ ፒርዳና። ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ» ጊሼ ዪዴስ።
EZE 8:1 ኡሱፑንꬃ ላይꬃን፥ ኡሱፑንꬃ ኣጊናን፥ ኢቻሻንꬃ ጋላሳን ታኒ ታሶን ኡታ ዲሺን፥ ዩሁዳ ጪማቲካ ታ ሲንꬃን ኡቲ ዲሺን፥ ኡባ ሃሪዛ ጎዳ ዎልቃይ ታና ኦይኪዴስ።
EZE 8:2 ታኒ ሄራካ ቲሺ ሂስታ ጼላሼ ኣሳ ና ሚሳቲዛ ሚስሌ ቤኣዲስ፤ ኢዛስ ጼስ ሚሳቲዛሶፔ ፑዴ ባጋይ ታማን ቦንቂዳ ቢራታ ሚሳቲዛይሳ፤ ጼስ ሚሳቲዛሶፔ ዱጌ ባጋይ ታማ ሚሳቲዛይሳ ቤኣዲስ፤ ኢዛ ዩሾን ጶሊዛ ፖኦይ ዴስ።
EZE 8:3 ኢዚካ ኩሼ ሚሳቲዛ ሚሽ ዬዲዲ ታ ሁኤ ቢናና ኦይኪዴስ፤ ኣያናይ ታና ሳኣፔኔ ሳሎፔ ጊዶን ዴንꬂዲ ጾሳ ኣጁታን ዬሩሳላሜ ኤፊዴስ፤ ፑዴሃ ባጋራ ዲዛ ጾሳ ኬꬃ ጊዶ ዳባባ ጌሊዛ ፔንጌራ ጌልꬂዲ፥ ጎዳ ቃናቴ ዴንꬄꬂዛ ኤቃ ጾሳይ ዲዛሶ ታና ኤፊ ጋꬂዴስ።
EZE 8:4 ሄኮ ካሴ ታኒ ቆልታቲዛ ዴምባን ኣጁታን ቤኢዳ ኢስራኤሌ ጾሳ ቦንቾይ ሄን ዴስ።
EZE 8:5 ኢዚካ ታስ፥ «ሃይሶ ኣሳ ናዉ! ፑዴሃ ባጋ ጼላ» ጊዴስ። ታኒካ ጼላዲስ፤ ሄኮ ያርሾ ያርሺዛሶ ፔንጌፌ ፑዴሃ ባጋራ ጌሊዛሶ ቦላ ጎዳ ቃናቴ ዴንꬄꬂዛ ኤቃ ጾሳይ ዴስ።
EZE 8:6 ቃሴካ ኢዚ ታስ፥ «ሃይሶ ኣሳ ናዉ! ኢስራኤሌ ኣሳይ ታና ታ ጌሻ ኬꬃፌ ሃሳናስ ሃይሳን ኦꬂዛ ሃራሲዛ ኤቃ ጾሳታስ ጎይኒዛይሳ ኔ ቤኣይ? ኔ ቡሮ ሃይሳፌካ ሃራሲዛ ኤቃ ጾሳታስ ጎይኖ ኔ ቤኣና» ጊዴስ።
EZE 8:7 ሄሳፌ ጉዬ ኢዚ ታና ዛጎ ፔንጌ ኤሂዴስ፤ ሄኮ ታኒ ጊምቤዛ ጼሊሺን ጾኤይ ቤቲዴስ።
EZE 8:8 ኢዚ ታና፥ «ሃይሶ ኣሳ ናዉ! ጎዳ ሉካ» ጊዴስ፤ ታኒካ ጊምቤዛ ኣሳ ሉካዳ ኢሲ ፔንጌ ዴማዲስ።
EZE 8:9 ቃሴካ ኢዚ ታና፥ «ኣኔ ጌላዳ ኢስታ ሃይሳን ኦꬂዛ ሃራሲዛ ኤቃ ጾሳታስ ጎይኖኔ ኢታ ቱናቴꬃ ጼላ» ጊዴስ።
EZE 8:10 ታኒካ ጌላዳ ጼሊሺን ቲራን ጎሼቲዛ ሼምፖራ ፓጻ ዲዛ ሜꬌቴꬃቲኔ ዱማ ዱማ ቱና ዶኣቲ ኡባይ፥ ኢስራኤሌ ኬꬃ ኤቃ ጾሳታ ሚስሌ ኡባይ ጊምቤዛ ቦላ ዩዪ ኣꬋናስ ዎጬቲዴስ።
EZE 8:11 ኢስታፌ ሲንꬃ ባጋራ ኢስራኤሌ ኬꬃፌ ላፑን ታሙ ጪማቲ ኤቂ ዴቴስ፤ ቃሴ ሳፋኔ ና ያኢዛኔያይካ ኢስታ ጊዶን ኤቂዴስ። ኡባይካ ኤጻኔ ጩዋሲዛ ሚሽ ባንታ ኩሼን ኦይኪ ዴቴስ፤ ሎኦ ሳዎ ሳዊዛ ኤጻኔ ጩዋይ ቱሉ ጊ ኬዜስ።
EZE 8:12 ቃሴ ጾሲ ታና፥ «ሃይሶ ኣሳ ናዉ! ኢስራኤሌ ኬꬃ ጪማቲ ኢሶይ ኢሶይ ቆልኣ ጊዶን ꬉማሶን ባንታ ኤቃ ሚስሌ ኬꬃን ኢስቲ ኦꬂዛይሳ ቤያይ? ጋሶይካ ኢስታ፥ ‹ጎዳይ ኑና ቤዬና፤ ጎዳይ ቢታ ኣጊዴስ› ጌቴስ» ጊዴስ።
EZE 8:13 ቃሴካ ኢዚ ታና፥ «ሄሳፌካ ኣꬊዛ ሃራሲዛ ኤቃ ጾሳታስ ኢስቲ ጎይኒዛይሳ ኔኒ ቡሮ ቤያና» ጊዴስ።
EZE 8:14 ሄሳፌ ጉዬ ኢዚ ታና ጾሳ ኬꬃስ ፑዴሃ ባጋራ ዲዛ ፔንጌዛኮ ኤሂዴስ፤ ሄን ቴሙዜ ጌቴቲዛ ባንታ ኤቃ ጾሳስ ዬኪዛ ማጫሳቲ ኡቲዳይሳ ቤያዲስ።
EZE 8:15 ኢዚካ ታና፥ «ሃይሶ ኣሳ ናዉ! ሃይሳ ቤያይ? ሄሳፌካ ኣꬊዛ ሃራሲዛ ኤቃ ጾሳታስ ኢስቲ ጎይኒዛይሳ ኔኒ ቡሮ ቤያና» ጊዴስ።
EZE 8:16 ሄሳፌ ጉዬ ኢዚ ታና ጎዳ ኬꬃስ ሶ ባጋ ዛጎ ኤፊዴስ፤ ሄሳን ጾሳ ኬꬃ ፔንጌን ዳራንቻፌኔ ያርሺዛሶሆፔ ጊዶን ናምኡ ታማኔ ኢቻሽ ጊዲዛ ኣቱማሳቲ ዴቴስ፤ ኢስቲ ባንታ ዞኮ ጎዳ ኬꬃኮ፥ ባንታ ኣይፌሶ ኣርሼይ ሞኪዛ ባጋ ዛሪዲ ኣርሼስ ጉፋኒ ጎይኔቴስ።
EZE 8:17 ጎዳይ ታና፥ «ሃይሶ ኣሳ ናዉ! ሃይሳ ቤያይ? ዩሁዳ ኣሳይ ሃይሳን ኦꬂዛ ሃራሲዛ ኤቃ ጾሳታስ ኢስቲ ጎይኒዛይሲ ላፋ ሚሼ? ኢስቲ ቢታ ማካላ ኦሶን ኩንꬂዲ ዛሪ ዛሪዲ ታና ሃንቄꬃናዉ ቤሲዜ? ሄኮ ኢስቲ ታና ኣይ ማላ ጫዪዛኮ ታና ሃንቄꬃናስ ባስ ዳንዳዬቲዳ ኡባ ኢስቲ ኦꬂዛይሳ ቤኣ።
EZE 8:18 ሄሳ ጊሻስ ታኒ ኢስታ ቦላ ሃንቆን ያና፤ ታኒ ኢስታስ ቃꬌቲኬኔ ኢስታ ቦላ ያና ሃኖታፔ ታ ኢስታ ኣሺኬ፤ ኢስቲ ታኮ ዋሲኮካ ታ ሲዪኬ» ጊዴስ።
EZE 9:1 ሄሳፌ ጉዬ ታኒ ሲዪሺን ባ ቃላ ꬎቁ ሂስቲዲ፥ «ካታማዮ ቃጻያና ዶሬቲዳይቲ ባ ኦላ ሚሻ ኦይኪዲ ሃ ዬቶ» ጊ ዋሲሺን ሲያዲስ።
EZE 9:2 ሄኮ ꬋይሲዛ ኦላ ሚሽ ባ ኩሼን ኦይኪዳ ኡሱፑን ኣሳቲ ፑዴሃ ባጋን ዲዛ ጋና ባጋ ፔንጌዛራ ዪዳ፤ ኢስታራ ላይኖ ማይኢዲ፥ ባ ሚሌን ጻፊዛ ሚሽ ኮሮጆን ኦይኪዳ ኢሲ ኣሲ ዴስ። ኢስቲ ጊዶ ጌሊዲ ጻርቂማላፔ ኦሴቲዳ ያርሺዛሶ ላንቄን ኤቂዳ።
EZE 9:3 ሄሳፌ ጉዬ ኢስራኤሌ ጾሳ ቦንቾይ ኪሩቤፔ ቦላራ ካሴ ባ ዲዛሶፔ ዴንዲዲ ጾሳ ኬꬃ ዳርማች ቢዴስ። ጎዳይ ላይኖ ማይኢዲ ባ ሚሌን ጻፊዛ ሚሽ ኮሮጆን ኦይኪዳ ኣዴዛ ጼይጊዴስ።
EZE 9:4 ጎዳይ ጼይጊዲ ኢዛ፥ «ዬሩሳላሜ ካታማ ኡባ ባዳ ኢዚ ጊዶን ኦሴቲዳ ሃራሲዛ ኤቃ ጾሳታ ጊሻስ ሚሼቲዲ ዬኪዛ ኣሳታ ሊጴ ቦላ ማላታ ዎꬃ» ጊዴስ።
EZE 9:5 ታኒ ሲዪሺን ኢዚ ሃራታስ፥ «ኢዛ ጌዶ ካሊዲ ካሊዲ ካታማይን ዲዛ ዎꬊቴ! ኦናካ ሚሼቲ ኣሾፍቴ።
EZE 9:6 ጪማታ፥ ናቴꬃታኔ ጌላኦታ፥ ማጫሳታኔ ጉꬃ ናይታ ኡባካ ሹኪቴ፤ ጊዶ ኣቲን ማላታራ ዲዛ ኣስ ኦናካ ቦቾፍቴ። ዎꬎ ታ ኬꬃን ዶሚቴ» ጊዴስ። ሄሳ ጊሻስ ኢስቲ ጾሳ ኬꬃ ሲንꬃን ኤቂዲ ዎꬎ ጪማታን ዶሚዳ።
EZE 9:7 ሄሳፌ ጉዬ ጎዳይ ኢስታስ፥ «ታ ኬꬃ ቱኒሲቴ፤ ዛጎታካ ኣሃን ኩንꬂቴ፤ ቢቴ» ጊዴስ፤ ኢስቲካ ኬዚዲ ካታማ ጊዶን ኡባን ዩዪዲ ዎꬎ ዶሚዳ።
EZE 9:8 ኢስቲ ዎꬎን ዲሺን ታኒ ታርካ ሊጴ ቦላ ዱጌ ቢታን ጉፋናዳ ኣዬ ኣና! «ኣቤት ኡባ ሃሪዛ ጎዳዉ! ኔኒ ዬሩሳላሜ ቦላ ባሽ ዬዳዳ ኢስራኤሌ ኣሳፔ ኣቲዳ ጫሻታ ኡባ ꬋይሳና ሃናይ?» ጋ ዋሳዲስ።
EZE 9:9 ኢዚ ዛሪዲ ታስ፥ «ኢስራኤሌ ኬꬃ ናጋራይኔ ዩሁዳ ኬꬃ ናጋራይ ኬሂ ዳሪዴስ፤ ቢታያ ሱꬅ ጻላ ጊዳዱስ፤ ቃሴ ካታማያ ጌላቴꬃን ኩማዱስ፤ ጋሶይካ ኣሳይ፥ ‹ጎዳይ ቢታ ኣጊዴስ፤ ጎዳይ ቤኤና› ጌቴስ።
EZE 9:10 ሄሳ ጊሻስ ታኒ ኢስታስ ኢስታ ሃኖ ማላ ኢማና ኣቲን ታ ኢስታስ ቃꬌቲኬ፤ ኢስታ ቦላ ዪዛ ሜቶፔ ታ ኢስታ ኣሺኬ» ጊዴስ።
EZE 9:11 ሄሳፌ ጉዬ ላይኖ ማይኢዲ፥ ባ ሚሌን ጻፊዛ ሚሽ ኮሮጆን ኦይኪዳ ኢሳዴይ ሲሚዲ፥ «ኔኒ ታና ኣዛዚዳ ማላ ኦꬃዲስ» ጊዴስ።
EZE 10:1 ታኒ ጼሊዛ ዎዴ ሲምፔሬ ጌቴቲዛ ኢንቁፌ ኦሴቲዳ ኣራታ ሚሳቲዛይ ኪሩቤታ ሁኤ ቦላ ሳሎ ማላ ሚጬቲ ዲዛ ሚሽ ቤኣዲስ።
EZE 10:2 ጎዳይ ላይኖ ማይኢዳ ኣዴዛ፥ «ኪሩቤታፔ ጋርሳ ባጋራ ኢርዞታ ጊዶራ ካንꬃዳ ባ፤ ሂስታዳ ታማ ቦንቆ ኔ ኩሼን ኩጳታ ኤካዳ፥ ካታማይ ቦላ ላላ» ጊዴስ። ታ ጼሊሺን ኣዴዚ ታማ ኤካናስ ጌሊዴስ።
EZE 10:3 ኣዴዚ ጊዶ ጌሊዛ ዎዴ ኪሩቤቲ ጾሳ ኬꬃፌ ዱጌሃ ባጋራ ኤቂዳ፤ ጊዶ ዛጎዛካ ሻራይ ኩሚዴስ።
EZE 10:4 ጎዳ ቦንቾይ ኪሩቤታ ቦላፌ ዴንዲዲ ጾሳ ኬꬃ ዳርማች ቢዲ ኤቂዴስ። ጎዳ ኬꬃ ሻራይ ኩሚዴስ፤ ዛጎዚ ጶሊዛ ጎዳ ቦንቾን ኩሚዴስ።
EZE 10:5 ኪሩቤታ ቄፌታ ጊሪሳይ ኡባ ዳንዳይዛ ጾሳይ ሃሳይሺን ሲዬቲዛ ጬንጉርሳ ማላ ካሬ ዛጎን ሲዬቴስ።
EZE 10:6 ጎዳይ ላይኖ ማይኢዳ ኣዴዛ፥ «ኪሩቤታ ማታፔ ኢርዞታ ጊዶፌ ታማ ኤካ» ጊዲ ኣዛዚን፥ ኢዚ ጌሊዲ ኢርዞታፔ ኢሳ ኣቻን ኤቂዴስ።
EZE 10:7 ኪሩቤታፔ ኢሶይ ባንታ ጊዶን ዲዛ ታማኮ ባ ኩሼዛ ዬዲዲ፥ ኢዛፔ ጉꬅ ኤኪዲ፥ ላይኖ ማይኢዳ ኣዴዛ ኩሼን ዎꬂን ኢዚካ ኤኪዲ ኬዚዴስ።
EZE 10:8 ኪሩቤታ ቄፌፔ ጋርሳ ባጋራ ኣሳ ኩሼ ሚሳቲዛዚ ቤቴስ።
EZE 10:9 ታኒ ጼሊዛ ዎዴ ኪሩቤታ ሚሌሶን ኦይዱ ኢርዞቲ ዴቴስ፤ ኢሲ ኢሲ ኪሩቤ ሚሌን ኢሲ ኢሲ ኢርዞይ ዲዛይሳ ቤኣዲስ፤ ሄ ኢርዞቲ ኢንቁ ማላ ጶሌቴስ።
EZE 10:10 ኢስቲ ኦይዳይካ ኢሶይ ኢሳ ሚሳቴቴስ፤ ኢሲ ኢሲ ኢርዞይ ሃራ ኢርዞራ ኢሲፌ ኦይኬቲ ኦሴቲዳ ሚሳቴስ።
EZE 10:11 ኢርዞቲ ባና ዴንዲዛ ዎዴ ኪሩቤቲ ባናስ ሲሚዲ ኦይዱ ባጋ ባናስ ዳንዳዬቴስ፤ ኪሩቤቲ ቢዛ ዎዴ ኢርዞቲ ያኔ ሃ ጎንታ ሲቲ ጊ ቤቴስ። ኪሩቤቲ ቢዛ ዎዴ ኢርዞቲ ያኔ ሃ ጎንታ ሁኤይ ሲሚዳ ኣዋ ባጋካ ቤቴስ።
EZE 10:12 ኢስታ ኩሜꬃ ቦላን፥ ኢስታ ዞኮን፥ ኢስታ ኩሼን፥ ኢስታ ቄፌታኒኔ ኦይዱ ኢርዞታ ኡባን ኣይፌይ ኩሚዴስ።
EZE 10:13 ኢርዞቲ፥ «ኤꬖቲዛ ኢርዞታ» ጌቴቲ ጼይጌቲሺን ታ ሲያዲስ።
EZE 10:14 ኢሲ ኢሲ ኪሩቤስ ኦይዱ ኣይፌሶይ ዴስ። ኮይሮይሲ ኪሩቤ ኣይፌሶ፥ ናምኣንꬆዚ ኣሳ ኣይፌሶ፥ ሄꬓንꬆዚ ጋሞ ኣይፌሶኔ ኦይዳንꬆዚ ጎሌ ኣይፌሶ ሚሳቴስ።
EZE 10:15 ሄሳፌ ጉዬ ኪሩቤቲ ፑዴ ዴንዲዳ። ሄይቲካ ታኒ ኮቦሬ ሻፋ ማታን ቤኢዳ ሼምፖራ ፓጻ ዲዛ ሜꬌቴꬃታ።
EZE 10:16 ቃሴ ኪሩቤቲ ባና ቃጺዛ ዎዴ ኢስታ ሚሌን ዲዛ ኢርዞቲካ ቃጼቴስ፤ ኪሩቤቲ ቢታፌ ፑዴ ዴንዳናዉ ባንታ ቄፌታ ያንጊዛ ዎዴካ ኢስታ ሚሌን ዲዛ ኢርዞቲካ ኢስታፌ ሻኬቴቴና።
EZE 10:17 ኪሩቤቲ ሲቲ ጊ ኤቂዛ ዎዴ ኢርዞቲካ ኤቃ ጌቴስ፤ ኪሩቤቲ ቢታፌ ፑዴ ꬎቁ ጊ ዴንዲዛ ዎዴ ኢርዞታ ጊዶን ሼምፖራ ፓጻ ዲዛ ሜꬌቴꬃታ ኣያናይ ዲዛ ጊሻስ ኢርዞቲካ ኢስታራ ኢሲፌ ዴንዴቴስ።
EZE 10:18 ሄሳፌ ጉዬ ጎዳ ቦንቾይ ጾሳ ኬꬃ ዳርማቻፌ ዴንዲዲ ኪሩቤታ ቦላ ኤቂዴስ።
EZE 10:19 ታኒ ጼሊሺን ኪሩቤቲ ባንታ ቄፌታ ያንጊዲ ኢርዞታራካ ኢሲፌ ቢታፌ ፑዴ ዴንዲ ቢዳ። ኢስቲ ኣርሼይ ሞኪዛ ባጋራ ዲዛ ጎዳ ኬꬃ ዩሾን ዲዛ ጊምቤ ፔንጌን ኤቂዳ፤ ኢስራኤሌ ጾሳ ቦንቾይካ ኢስታፌ ቦላራ ዴስ።
EZE 10:20 ሃይቲ ኮቦሬ ሻፋን ኢስራኤሌ ጾሳ ጋርሳን ታ ቤኢዳ ሼምፖራ ፓጻ ዲዛ ሜꬌቴꬃታ፤ ኢስቲካ ኪሩቤታ ጊዲዳይሳ ታ ኣኬካዲስ።
EZE 10:21 ኢስታስ ኢሳስ ኢሳስካ ኦይዱ ኣይፌሶይኔ ኦይዱ ቄፌይ ዴስ፤ ኢስታ ቄፌታፔ ጋርሳ ባጋራ ኣሳ ኩሼ ሚሳቲዛዚ ዴስ።
EZE 10:22 ኢስታ ኣይፌሶይካ ኮቦሬ ሻፋ ማታን ታ ቤኢዳይታ ሚሳቴስ። ኢስቲ ኢሶይ ኢሶይ ሲቲ ጊዲ ሲንꬅ ቤቴስ።
EZE 11:1 ሄሳፌ ጉዬ ኣያናይ ታና ፑዴ ዴንꬂዲ ኣርሼይ ሞኪዛ ባጋራ ዲዛ ጎዳ ኬꬃ ጊምቤ ፔንጌ ኤሂዴስ። ጌሊዛሶ ፔንጌ ቦላ 25 ኣቱማሳቲ ዴቴስ፤ ኢስታ ጊዶን ዴራ ካሌꬂዛ ኣዙሬ ና ያኢዛኔያኔ ባናያ ና ፓላጺያ ቤኣዲስ።
EZE 11:2 ጎዳይ ታና፥ «ሃይሶ ኣሳ ናዉ! ሃ ኣቱማሳቲ ሃ ካታማን ኢታ ሃልቾ ሃልቺዛይታኔ ጌኔ ዞሬ ዞሪዛይታ።
EZE 11:3 ኢስቲካ፥ ‹ኬꬃቲ ኬጼታና ዎዴይ ሃኢ ጊዴና። ሃና ካታማያ ኣሾ ዶይሲዛ ዲስቴ፤ ኑኒካ ኣሾ› ጌቴስ።
EZE 11:4 ሄሳ ጊሻስ ኔኒ ኢስታ ቦላ ቲንቢቴ ዮታ! ኣሳ ናዉ! ቲንቢቴ ዮታ» ጊዴስ።
EZE 11:5 ሄሳፌ ጉዬ ጎዳ ኣያናይ ታ ቦላ ዎꬊዲ ታስ፥ «ጎዳይ፡ ኢስራኤሌ ኣሳዉ! ኢንቴ ሄሳ ማላ ጌታ፤ ታኒ ኢንቴ ኣይ ቆፒዛኮ ኤራይስ።
EZE 11:6 ሃ ካታማይን ኢንቴ ዳሮ ኣሳ ዎꬊዲ ኦጌ ኡባን ኣሃ ኩንꬂዴታ።
EZE 11:7 «ሄሳ ጊሻስ ኡባ ሃሪዛ ጎዳይ፥ ‹ኢንቴ ዎꬊዲ ሄን ኦሊዳ ኣሃቲ ኢስታ ኣሾ፤ ቃሴ ሃ ካታማያካ ኣሾ ዶይሲዛ ዲስቴ፤ ጊዶ ኣቲን ሃ ካታማይፔ ታኒ ኢንቴና ኬሳና።
EZE 11:8 ኢንቴ ማሻስ ያዪዴታ፤ ታኒ ሄ ኢንቴ ያዪዳ ማሻ ኢንቴ ቦላ ኤሃና› ጌስ።
EZE 11:9 ታኒ ኢንቴና ሃ ካታማይፔ ኬሳዳ ኣላጋታ ኩሼን ኣꬃ ኢማና፤ ታ ኢንቴና ቃጻያና።
EZE 11:10 ኢንቴ ማሻን ዉራና፤ ታኒ ኢንቴና ኢንቴ ቢታን ፒርዳና። ታኒ ጎዳ ጊዲዳይሳ ኢንቴ ሄ ዎዴ ኤራና።
EZE 11:11 ሃ ካታማያ ኢንቴስ ኣሾ ዶይሲዛ ዲስቴ ጊዱኩ፤ ኢንቴካ ኢዚ ጊዶን ኣሾ ጊዴኬታ። ታኒ ኢንቴና ኢንቴ ቢታን ፒርዳና።
EZE 11:12 ታኒ ጎዳ ጊዲዳይሳ ኢንቴ ሄ ዎዴ ኤራና። ኢንቴ ኢንቴ ዩሾን ዲዛ ካዎቴꬃታ ዎጋ ካሊዳ ጊሻስ ታ ኣዛዞ ፖሊቤኬታ፤ ታ ዎጋካ ናጊቤኬታ» ጊዴስ።
EZE 11:13 ታኒ ቲንቢቴ ዮቶ ቦላ ዲሺን ባናያ ና ፓላጺያይ ሃይቂዴስ፤ ታኒካ ሲንꬃ ጉꬅ ጉፋናዳ፥ «ኣቤት ኡባ ሃሪዛ ጎዳዉ! ኢስራኤሌፔ ጫሻ ኣቲዳይታ ሙሌራ ꬋይሳኔ?» ጋዳ ታ ቃላ ꬎቁ ሂስታ ዋሳዲስ።
EZE 11:14 ሄሳፌ ጉዬ ጎዳ ቃላይ ታኮ ዪዲ፥
EZE 11:15 «ሃይሶ ኣሳ ናዉ! ኔ ኢሻቲ ኔ ዳቦቲኔ ኢስራኤሌ ኣሳይ ኡባይ ዲኤቲዲ ጎዳፔ ሃኪዳ፤ ሃና ቢታያ ኑስ ጺንጾ ጊዳ ኢሜታዱስ» ጊዲ ዲኤቶንታ ዬሩሳላሜን ኣቲዳይቲ ሃሳይዳ።
EZE 11:16 «ሄሳ ጊሻስ ኔኒ፥ ‹ኡባ ሃሪዛ ጎዳይ፡ ታኒ ኢስታ ሃሆን ዲዛ ካዎቴꬃታ ጊዶን ዬዲኮካ፥ ዴሬታ ጊዶን ላሊኮካ፥ ኢስቲ ቢዳ ዴሬ ኡባን ጉꬃ ዎዴ ታኒ ኢስታራ ጊዳና› ጊዴስ።
EZE 11:17 «ሄሳ ጊሻስ ኔኒ፥ ‹ኡባ ሃሪዛ ጎዳይ፡ ካዎቴꬃታ ጊዶፌኔ ኢንቴ ላሌቲዳ ቢታታፔ ታኒ ኢንቴና ሺሻ ዛራና፤ ኢስራኤሌ ቢታካ ታኒ ዛራዳ ኢንቴስ ኢማና› ጌስ።
EZE 11:18 «ኢስቲ ጉዬ ሲሚ ዪዲ ቱኒዳ ኢዚ ሚስሌታኔ ሃራሲዛ ኢዚ ኦሶታ ታ ꬋይሳና።
EZE 11:19 ታኒ ኢስታስ ኢሲ ዎዚና ኢማና፤ ቃሴ ኦራꬃ ኣያናካ ኢስታ ጊዶን ታ ዎꬃና። ታኒ ኢስታፌ ሹች ሚሳቲዛ ዎዚና ዲጋዳ ኣሾ ማላ ሹጎ ዎዚና ኢማና።
EZE 11:20 ሄሳ ጊሻስ ኢስቲ ታ ኣዛዞ ፖላና፤ ታ ዎጋካ ናጋና። ኢስቲ ታ ዴሬ ጊዳና፤ ታኒካ ኢስታ ጾስ ጊዳና።
EZE 11:21 ጊዶ ኣቲን ባንታ ዎዚና ቱኒዳ ሚስሌታኮኔ ሃራሲዛ ኦሶታኮ ዛሪዳይታስ ኢስታ ኦሶ ማላ ታ ኢስታስ ኢማና» ጊዴስ።
EZE 11:22 ሄሳፌ ጉዬ ኪሩቤቲ ባንታ ቄፌታ ያንጊዳ፤ ኢርዞቲ ኢስታ ሚሌን ዴቴስ፤ ኢስራኤሌ ጾሳ ቦንቾይካ ኢስታፌ ቦላራ ዴስ።
EZE 11:23 ጎዳ ቦንቾይ ካታማይ ጊዶፌ ዴንዲ ቢዲ ኣርሼይ ሞኪዛ ባጋራ ዲዛ ዙማ ቦላ ኤቂዴስ።
EZE 11:24 ኣያናይ ታና ፑዴ ዴንꬂዴስ፤ ጾሳ ኣያናይ ታስ ኢሚዳ ኣጁታን ባቢሎኔን ዲዛ ዲኤቲዳይታኮ ታና ኤፊዴስ። ሄሳፌ ጉዬ ታኒ ቤኢዳ ኣጁታይ ታፔ ሻኬቲ ቢዴስ።
EZE 11:25 ሂስቲን ጎዳይ ታና ቤሲዳ ሚሻታ ኡባ ዲኤቴꬃን ዲዛይታስ ዮታዲስ።
EZE 12:1 ጎዳ ቃላይ ታኮ ዪዲ፥
EZE 12:2 «ሃይሶ ኣሳ ናዉ! ኔኒ ማካላንቻ ዴራ ጊዶን ዳሳ። ኢስቲ ማካላንቻ ጊዲዳ ጊሻስ ኢስታስ ኣይፌይ ዴስ ሺን ዴሜቴና፤ ኢስታስ ሃይꬂ ዴስ ሺን ሲዬቴና።
EZE 12:3 ሄሳ ጊሻስ ኣሳ ናዉ! ኢስቲ ቤኢሺን ጋላስ ኔስ ዲዛ ሚሽ ሺሻ ኤካዳ ጎዴታናስ ጊጌታ፤ ኔ ዲዛሶፔ ዴንዳዳ ሃራሶ ባ። ኢስቲ ማካላንቻ ጊዲኮካ ኣኬካናስ ዳንዳዬቴስ።
EZE 12:4 ጋላስ ኢስቲ ጼሊሺን ኔስ ዲዛ ሚሽ ጎዴቲ ቢዛ ኣሳ ማላ ኬሳ፤ ኦማርሲካ ኢስቲ ጼሊሺን ዲኤቲ ቢዛ ኣሳ ማላ ኬዛ።
EZE 12:5 ኢስቲ ጼሊሺን ኔ ኬꬃ ጎዳ ሉካዳ ኔስ ዲዛ ሚሽ ኬሳ።
EZE 12:6 ኔኒ ኬሲዳ ሚሻ ኢስቲ ጼሊሺን ጋዴይ ꬉሚሺን ኔ ሃሼን ቶካዳ ኬዛ። ታ ኔና ኢስራኤሌ ኬꬃስ ማላታ ኦꬂዳ ጊሻስ ጋዴ ቤኦንታ ማላ ኔ ሲንꬃ ካማ» ጊዴስ።
EZE 12:7 ታኒካ ኢዚ ታና ኣዛዚዳ ማላ ኦꬃዲስ። ዲኤቲ ቢዛ ኣሳ ማላ ጋላስ ታስ ዲዛ ሚሽ ሺሻ ቃቻዳ ጎዴቲ ቢዛ ኣሳ ማላ ኬሳዲስ፤ ኦማርስ ታ ኬꬃ ጎዳ ታ ኩሼን ሉካዲስ፤ ኢስቲ ጼሊሺን ቃቻ ዎꬂዳ ሚሻ ሃሼን ቶካዳ ꬉሚሺን ባዲስ።
EZE 12:8 ዎንቴꬃ ጋላስ ማላዶራ ጎዳ ቃላይ ታኮ ዪዲ፥
EZE 12:9 «ሃይሶ ኣሳ ናዉ! ማካላንቻ ኢስራኤሌ ኣሳይ ኔና፥ ‹ኔኒ ኦꬂዛይ ኣዜ?› ጊዲ ኔና ኦይቺዴስ ጊዴኔ?
EZE 12:10 ኔኒ ኢስታስ፥ ‹ኡባ ሃሪዛ ጎዳይ ሃ ቲንቢቴይ፡ ዬሩሳላሜን ዲዛ ሃላቃሲኔ ኢስራኤሌ ኣሳ ኩሜꬃሳ›
EZE 12:11 ኔኒ ኢስታስ፥ « ‹ታኒ ኢንቴስ ማላታ፤ ታኒ ኦꬂዳ ማላ ሄሳꬆ ኢስታ ቦላካ ሃናና፤ ኢስቲ ዲኤቲዲ ሃራ ቢታ ባና› ጋ።
EZE 12:12 «ኢስታ ጊዶን ዲዛ ሃላቃይ ኦማርሳራ ባስ ዲዛ ሚሽ ሺሺ ቶኪዲ ኬዛና፤ ኢዚ ባቃቲ ባና ማላ ጊምቤይ ሉኬታና፤ ቢታ ቤኦንታ ማላ ባ ኣይፌሶ ካማና።
EZE 12:13 ታኒ ታ ጊቴ ኢዛ ሲንꬃን ዬጋና፤ ኢዚ ዎጺማዴንካ ኦይኬታና፤ ታኒ ኢዛ ካላዳዌታ ቢታ ባቢሎኔ ኤሃና፤ ጊዶ ኣቲን ኢዚ ሄ ቢታ ቤኦንታ ሃይቃና።
EZE 12:14 ኢዛ ዩሾን ዲዛ ኢዛ ማዲዛይታኔ ኢዛ ኦላንቻታ ኡባ ታኒ ኡባሶ ፒስኪ ሂስታና፤ ታኒ ኢስታ ማሻን ዬዴꬃና።
EZE 12:15 «ኢስታ ታኒ ዴሬታ ጊዶኒኔ ካዎቴꬃ ጊዶን ላሊዛ ዎዴ ታኒ ጎዳ ጊዲዳይሳ ኢስቲ ኤራና።
EZE 12:16 ኢስቲ ባንቲ ቢዳ ካዎቴꬃታ ጊዶን ባንታ ቱና ኦሶ ፓጻና ማላ፥ ታኒ ኢስታፌ ጉꬃታ ኦላፔ፥ ኮሻፔኔ ኢታ ሃርጌፌ ኬሲ ኤካና ማላ ኦꬃና። ታኒ ጎዳ ጊዲዳይሳ ኢስቲ ሄ ዎዴ ኤራና» ጊዴስ።
EZE 12:17 ጎዳ ቃላይ ታኮ ዪዲ፥
EZE 12:18 «ሃይሶ ኣሳ ናዉ! ኔ ካꬅ ኮኮራሼ ማ፤ ቃሴ ኔ ሃꬃካ ጋዢጋዣሼኔ ባባሼ ኡያ።
EZE 12:19 ቢታን ዲዛ ኣሳስ፥ ‹ኡባ ሃሪዛ ጎዳይ ኢስራኤሌ ቢታን ዲዛ ዬሩሳላሜ ኣሳስ፡ ኢስቲ ባንታ ካꬅ ሂርጊሼ ማና፤ ባንታ ሃꬃካ ጋዢጋዢሼኔ ባቢሼ ኡያና። ሄን ዲዛ ኣሳይ ኡባይ ጌናንቻ ጊዲዳ ጊሻስ ኢስታ ቢታይ ካይዛና።
EZE 12:20 ካሴ ኢስታን ኣሲ ኩሚዳ ካታማቲ ካይዛና፤ ቢታያካ ቡላታና። ታኒ ጎዳ ጊዲዳይሳ ኢንቴ ሄ ዎዴ ኤራና› ጌስ» ጋ ጊዴስ።
EZE 12:21 ጎዳ ቃላይ ታኮ ዪዲ፥
EZE 12:22 «ሃይሶ ኣሳ ናዉ! ኢስራኤሌ ቢታን፥ ‹ዎዴይ ኣዱቂዴስ፤ ኣጁታይ ኡባይካ ሃዳ ጊዲዴስ› ጊዲ ኢንቴ ቶሴ ዮቲዛይ ኣዜ?
EZE 12:23 ሄሳ ጊሻስ ኢስታስ ኔኒ፥ ‹ኡባ ሃሪዛ ጎዳይ፡ ታኒ ሃይሳ ሃ ቶሴዛ ዲጋና፤ ኢስቲ ዛሬꬂዲ ሃይሳ ሃ ቶሴዛ ኢስራኤሌ ቢታን ጎኤቴቴና› ጌስ ጋ። ቃሴካ ኔኒ ኢስታስ፥ ‹ኣጁታይ ኡባይካ ፖሌታና ዎዴይ ማቲዴስ።
EZE 12:24 ሃይሳፌ ጉዬ ኢስራኤሌ ዴራ ጊዶን ዎርዶ ኣጁታይኔ ኣስ ሙሬኖ ኦሶይ ዴና።
EZE 12:25 ታኒ ጎዳይ ሃሳያና ኮዪዳይሳ ሃሳያና፤ ታ ሃሳይዳ ቃላይካ ጋምኦንታ ፖሌታና፤ ኢንቴኖ ማካላንቻ ኣሳቶ! ታኒ ዮቲዳይሳ ኡባ ኢንቴ ላይꬃን ታኒ ፖላና› ጌስ ኡባ ሃሪዛ ጎዳይ» ጊዴስ።
EZE 12:26 ቃሴካ ጎዳ ቃላይ ታኮ ዪዲ፥
EZE 12:27 «ሃይሶ ኣሳ ናዉ! ኢስራኤሌ ኣሳይ፥ ‹ሃይሲ ኣዴዚ ቤኢዛ ኣጁታይ ቡሮ ዳሮ ላይꬃፌ ጉዬን ሃናናዛ፤ ኢዚ ዮቲዛ ቲንቢቴይካ ዳሮ ላይꬃፌ ጉዬን ሃናናዛ› ጌስ።
EZE 12:28 ሄሳ ጊሻስ ኔኒ ኢስታስ፥ ‹ኡባ ሃሪዛ ጎዳይ፡ ታኒ ዮቲዳ ቃላፔ ጋምኣናዚ ዴና፤ ታ ጊዳ ኡባይ ፖሌታና› ጌስ» ጊዴስ።
EZE 13:1 ጎዳ ቃላይ ታኮ ዪዲ፥
EZE 13:2 «ሃይሶ ኣሳ ናዉ! ቲንቢቴ ዮቲዛ ኢስራኤሌ ናቤታ ቦላ ኔኒ ቲንቢቴ ዮታ፤ ባፔ ሜꬊ ኤኪዲ ቲንቢቴ ዮቲዛይታ፥ ጎዳ ቃላ ሲዪቴ!
EZE 13:3 ኡባ ሃሪዛ ጎዳይ፥ ‹ኢሲ ሚሺካ ቤኦንታ ባንታ ኣያና ካሊዛ ኤያ ናቤታስ ኣዬ ኣና!
EZE 13:4 ኢስራኤሌ ኣሳዉ! ኢንቴ ናቤቲ ላሌቲዳሶሆታን ዲዛ ሻናታ ማላ።
EZE 13:5 ጎዳ ጋላሳን ዪዛ ኦላን ዲርሳይ ሚኒ ኤቃናስ ዳንዳያና ማላ ጳልቄቲዳ ኢስራኤሌ ጊምቤዛ ሚንꬂ ጊምባናስ ኢንቴ ሄ ኬዚቤኬታ።
EZE 13:6 ኢስታ ኣጁታይኔ ኢስታ ቲንቢቴይ ዎርዶ። ኢስቲ ጎዳይ ኪቶንታ ዲሺን ጎዳይ ሃይሳꬆ ጌስ› ጌቴስ። ኢስቲካ ባ ዮቲዳይሲ ፖሌታና ጊዲ ናጌቴስ።
EZE 13:7 ታኒ ዮቶንታ ዲሺን፥ ‹ጎዳይ ሂዝጌስ› ጊሼ ኢንቴ ዎርዶ ኣጁታኔ ዎርዶ ቲንቢቴ ዮቲዛይሳ ጊዴኔ?» ጌስ።
EZE 13:8 ሄሳ ጊሻስ ኡባ ሃሪዛ ጎዳይ፥ «ኢንቴ ዮቲዳ ቲንቢቴይኔ ኢንቴ ቤኢዳ ኣጁታይ ዎርዶ ጊዲዳ ጊሻስ ታኒ ኢንቴ ቦላ ዴንዳዲስ።
EZE 13:9 ታ ኩሼይ ዎርዶ ኣጁታ ቤኢዛይታ ቦላኔ ሙሬኒዛ ናቤታ ቦላ ዴንዳና። ኢስቲ ታ ዴራ ዱላታን ጌሌቴና፤ ኢስራኤሌ ኣሳ ማዝጋባን ጻፌቴቴና፤ ኢስራኤሌ ቢታካ ጌሌቴና። ታኒ ኡባ ሃሪዛ ጎዳ ጊዲዳይሳ ኢንቴ ሄ ዎዴ ኤራና።
EZE 13:10 «ሳሮይ ባይንዳ ዲሺን፥ ‹ሳሮይ ዴስ› ጊሼ ታ ዴራ ባሌꬄቴስ፤ ቃሴ ዴሬዚ ሹች ኬሊሺን ኢስቲ ኣኖን ሜሼቴስ።
EZE 13:11 ሄሳ ጊሻስ ኣኖን ሜሺዛይታስ፥ ‹ኬላዚ ዎዳናይሳ ዮታ! ሃንꬒꬔ ኢራይ ቡካና፤ ታኒ ዎልቃማ ሹቻ ማላ ሻች ዬዳና፤ ጎቴ ጫርኮይካ ዴንዳና› ጊዲ ዮቲቴ።
EZE 13:12 ኬላዚ ላሌቲዛ ዎዴ ዴሬይ፥ ‹ኢንቴ ሜሺዳ ኣኖይ ኣዋ ቢዴ?› ጊዲ ኢንቴና ኦይቾንታ ኣጌና» ጌስ።
EZE 13:13 ሄሳ ጊሻስ ኡባ ሃሪዛ ጎዳይ፥ «ጊምቤ ዲርሳ ꬋይሳናስ ታኒ ታ ዪሎን ጎቴ ጫርኮ ዬዳና፤ ታ ሃንቆን ሻች ዬዳና፤ ሃንꬒꬔ ኢራ ጊታ ባሻራ ኪታና።
EZE 13:14 ኢንቴ ኣኖን ሜሺዳ ኬላ ታ ላላና፤ ኢዛ ዮቺ ቤታናሼ ጋካናስ ታ ላላና፤ ጊምቤዚ ኩንዲዛ ዎዴ ኢንቴ ኢዛ ጊዶን ዉራና፤ ታኒ ጎዳ ጊዲዳይሳ ኢንቴ ሄ ዎዴ ኤራና።
EZE 13:15 ሄሳ ጊሻስ ታኒ ታ ባሻዛ ጊምቤዛ ቦላኔ ኣኖዛ ሜሺዳ ኣሳታ ቦላ ዬዳና፤ ታኒ ኢንቴና፥ ‹ጊምቤዛ ጊምቤዛራ ጋꬂዲ ኣኖ ሜሺዳይቲ ዴቴና።
EZE 13:16 ዬሩሳላሜስ ቲንቢቴ ዮቲዳይቲኔ ሳሮይ ባይንዳ ዲሺን ሳሮቴꬃ ኣጁታ ኢዚስ ቤኢዳ ኢስራኤሌ ናቤቲ ꬋይዳ› ጋይስ።
EZE 13:17 «ሃይሶ ኣሳ ናዉ! ባፔ ሜꬊ ኤኪዲ ቲንቢቴ ዮቲዛ ኢንቴ ዴራ ማጫ ናይታኮ ኔ ኣይፌሶ ሃንቆን ዛራ፤ ኢስታ ቦላ ቲንቢቴ ዮታ።
EZE 13:18 ኢስታስ ኡባ ሃሪዛ ጎዳይ፥ ‹ዴሬ ሼምፖ ዎጺማዴ ማላ ኦይካናስ ሙሬኖ ሚሽ ሲኪሲዲ ባንታ ቄሴን ኣꬂዛይታሲኔ ዱማ ዱማ ቆሞ ቢታ ጎስ ሁኤስ ጊግሲዛ ማጫሳታስ ኣዬ ኣና! ታ ኣሳ ሼምፖ ዎጺማዴን ጌልꬂዲ ኢንቴ ኢንቴ ሼምፖ ኣሻኔ?
EZE 13:19 ኩቼ ጊዶንታ ባንጋሲኔ ባርስ ጊዶንታ ካꬃስ ጊዲ ዎርዶ ሲዪዛ ታ ዴራስ ኢንቴ ዎርዶቲሼ ሃይቃና ቤሶንታይሳ ዎꬊሼ፥ ዳናስ ቤሶንታይታ ኣሺሼ ታ ሱንꬅ ዴሬ ሲንꬃን ካዉሺዴታ› ጌስ።
EZE 13:20 «ሄሳ ጊሻስ ኡባ ሃሪዛ ጎዳይ፥ ‹ኢንቴ ካፎ ጲሬን ኦይኪዛ ማላ ኣሳ ሼምፖ ኦይኪዛ ሙሬኖ ሚሻ ቦላ ታ ዴንዳዲስ፤ ታኒ ኢዛ ኢንቴ ቄሴፔ ዱꬃ ኦላና፤ ኢንቴ ጲሬን ካፎ ኦይኪዛ ማላ ኦይኪዳ ታ ዴራ ታ ኬሳ ኤካና።
EZE 13:21 ታኒ ኢንቴ ቢታ ጎሳ ዳፋ ዬጋዳ ታ ዴሬዛ ኢንቴ ኩሼፔ ዎꬃ ኤካና፤ ሃይሳፌ ጉዬ ኢስቲ ኢንቴ ሼኔን ኣቄቴና፤ ታኒ ጎዳ ጊዲዳይሳ ኢንቴ ሄ ዎዴ ኤራና።
EZE 13:22 ታኒ ቆሆንታ ጺሎዛ ኢንቴ ዎርዶራ ጬጪሲዳ ጊሻስ፥ ናጋራንቻይ ባ ኢታ ኦጌፔ ሲሚዲ ባ ሼምፖ ኣሾንታ ማላ ኢንቴ ኢዛ ኢዛ ናጋራን ሚንꬄꬂዴታ።
EZE 13:23 ሄሳ ጊሻስ ሃይሳፌ ጉዬ ዎርዶ ኣጁታ ቤኤኬታ፤ ሙሬኖካ ሙሬኔኬታ፤ ታ ዴራ ኢንቴ ኩሼፔ ዎꬃ ኤካና፤ ታኒ ጎዳ ጊዲዳይሳ ኢንቴ ሄ ዎዴ ኤራና› ጌስ» ጊዴስ።
EZE 14:1 ኢስራኤሌ ጪማታፔ ጉꬃቲ ታኮ ዪዲ ታ ሲንꬃን ኡቲዳ።
EZE 14:2 ሂስቲን ጎዳ ቃላይ ታኮ ዪዲ፥
EZE 14:3 «ሃይሶ ኣሳ ናዉ! ሃይቲ ኣሳቲ ኤቃ ጾሳታ ባንታ ዎዚናን ዎꬂዳ፤ ባንታ ኢታቴꬃ ꬉጲዛ ሹቻ ማላ ባንታ ሲንꬃን ዎꬂዳ፤ ሂስቲን ኢስቲ ታፔ ኢሲ ሚሽ ኦይቻና ማላ ቃላ ኢሞዬ?
EZE 14:4 ሄሳ ጊሻስ ኔኒ ኢስታስ፥ ‹ኡባ ሃሪዛ ጎዳይ ኢስራኤሌ ኣሳፔ ኦኒካ ኤቃ ጾስ ባ ዎዚናን ዎꬂዲ፥ ባ ኢታቴꬃ ꬉጲዛ ሹቻꬆ ባ ሲንꬃን ዎꬂዲ ናቤኮ ዪኮ ታኒ ጎዳይ ታ ሁኤራ ኢዛስ ኢዛ ኤቃ ጾሳታ ቆዳ ማላ ኢዛስ ዛራና።
EZE 14:5 ባንታ ኤቃ ጾሳታ ጋሶን ታፔ ሻኬቲዳ ኢስራኤሌ ኣሳ ኡባ ዎዚና ሃ ታኮ ዛራናስ ታ ሄሳ ኦꬃና› ጌስ።
EZE 14:6 «ሄሳ ጊሻስ ኢስራኤሌ ኣሳስ፥ ‹ኡባ ሃሪዛ ጎዳይ፡ ማሬቲቴ! ኢንቴ ኤቃ ጾሳታፔ ሲሚቴ! ሃራሲዛ ኢንቴ ኦሶ ኡባ ኣጊቴ!
EZE 14:7 « ‹ኢስራኤሌ ኣሳፔ ኦናካ ጊዲን ዎይኮ ኢስራኤሌ ቢታን ዲዛ ቤቴ ኣሳፔ ኦናካ ጊዲን፥ ታፔ ሻኬቴꬃን ኤቃ ጾሳታ ባ ዎዚናን ዎꬂዲ፥ ባ ኢታቴꬃ ꬉጲዛ ሹች ሂስቲ ባ ሲንꬃን ዎꬂዲ ታፔ ኦይቻና ናቤኮ ዪኮ ታኒ ጎዳይ ታ ሁኤራ ኢዛስ ዛሮ ኢማና።
EZE 14:8 ኢታቴꬃን ታኒ ታ ኣይፌሶ ሄሳዴኮ ዛራና፤ ቶሴሲኔ ቂꬌስ ታ ኢዛ ኬሳና፤ ታኒ ኢዛ ታ ዴራ ጊዶፌ ዲጋና፤ ታኒ ጎዳ ጊዲዳይሳ ኢንቴ ሄ ዎዴ ኤራና።
EZE 14:9 « ‹ናቤዛ ቲንቢቴ ዮታና ማላ ባሌꬂኮ፥ ሄ ናቤዛ ባሌꬂዳይ ታና ጎዳ፤ ታኒ ታ ቄሴ ኢዛ ቦላ ዴንꬃዳ ታ ዴሬ ኢስራኤሌ ጊዶፌ ኢዛ ꬋይሳና።
EZE 14:10 ኢስታ ቆሆይ ኢስታስ ጊዳና፤ ናቤዚኔ ኢዛ ኦይቻና ዪዳዴይ ናምኣይ ኢሲ ጊና ቂጻቴ ኤካና።
EZE 14:11 ሄሳፌ ጉዬ ኢስራኤሌ ኣሳይ ኦጌ ባሊዲ ታፔ ሻኬቴና፤ ሲሚዲ ባ ናጋራን ኡባን ባና ቱኒሴና። ኢስቲ ታ ዴሬ ጊዳና፤ ታኒካ ኢስታ ጾሳ ጊዳና› ጌስ ኡባ ሃሪዛ ጎዳይ» ጊዴስ።
EZE 14:12 ጎዳ ቃላይ ታኮ ዪዲ፥
EZE 14:13 «ሃይሶ ኣሳ ናዉ! ኢሲ ዴሬይ ታናን ኣማኔቶንታ ኢጺዲ ናጋራ ኦꬂኮ፥ ታኒ ታ ኩሼዛ ዬዳዳ ካꬃ ፑልቶ ሜሊሲኮ፥ ኮሻ ዬዳዳ ሜሄኔ ኣስ ዎꬊኮ፥
EZE 14:14 ኖሄይ፥ ዳኔሊኔ ኢዮቢ ሃ ሄꬓቲ ሄን ዲኮካ ኢስቲ ባንታ ጺሎቴꬃን ባንታ ሼምፖ ጻላላ ኣሻና» ጌስ ኡባ ሃሪዛ ጎዳይ።
EZE 14:15 «ታኒ ዎራ ዶኣታ ዴራ ቦላ ኪቲን ሄ ዶኣቲ ዴራ ꬎንꬅ ሂስቲን፥ ኢስታፌ ዴንዶይሳን ሄራ ኣሲ ኣꬋና ዳንዳዮንታ ዎራ ጊዲኮ፥
EZE 14:16 ኡባ ሃሪዛ ጎዳይ፥ ‹ታኒ ዴኦ ጾሳ ጊዲዳይሳን ጫቃይስ፤ ሃ ሄꬑ ኣሳቲ ሄ ቢታን ዲዛኮካ ኢስቲ ባንታና ኣሻና ኣቲን ባንታ ኣቱማ ናይታ ዎይኮ ማጫ ናይታ ኣሻናስ ዳንዳዬቴና። ቢታያ ጊዲኮ ዎራ ጊዳና› ጌስ።
EZE 14:17 «ዎይኮ ታኒ ሃ ቢታ ቦላን ማሻ ኤሃዳ፥ ‹ሃ ቢታራ ማሻይ ካንꬆ› ጋዳ ሜሄኔ ኣስ ꬋይሲኮ፥
EZE 14:18 ኡባ ሃሪዛ ጎዳይ፥ ‹ታኒ ዴኦ ጾሳ ጊዲዳይሳን ጫቃይስ፡ ሃ ሄꬑ ኣሳቲ ሄ ቢታን ዲዛኮካ ኢስቲ ባንታና ኣሻና ኣቲን ባንታ ኣቱማ ናይታ ዎይኮ ማጫ ናይታ ኣሻናስ ዳንዳዬቴና› ጌስ።
EZE 14:19 «ዎይኮ ታኒ ቢታይ ቦላ ኢታ ሃርጌ ዬዳዳ፥ ታ ሃንቆን ኣሳይ ሱꬅ ጉሳና ማላ ኦꬃዳ ኣሳኔ ሜሃ ዎꬋ ዉርሲኮ፥
EZE 14:20 ታኒ ኡባ ሃሪዛ ጎዳይ ታኒ ዴኦ ጾሳ ጊዲዳይሳን ጫቃይስ፡ ኖሄይ፥ ዳኔሊኔ ኢዮቢ ሄ ቢታን ዲኮካ ኢስቲ ባ ጺሎቴꬃን ባንታና ጻላ ኣሻና ኣቲን ባንታ ኣቱማ ናይታ ዎይኮ ባንታ ማጫ ናይታካ ኣሼቴና።
EZE 14:21 «ኡባ ሃሪዛ ጎዳይ፡ ታኒ ኣሳኔ ሜሄ ዎꬋናስ ዬሩሳላሜ ቦላ ታ ኦይዱ ፒርዳታ፥ ማሻ፥ ኮሻ፥ ዎራ ዶኣታኔ ኢታ ሃርጌ ዬዲዛ ዎዴ ኢዚ ኣይ ኬና ኣꬎ ኢታ ሚሽ ጊዳንዴ!
EZE 14:22 ጊዲኮካ ሄፔ ኣማርዳ ኣሳቲ ኬሲ ኤኪዲ ኣታና፤ ኣቱማ ናይቲኔ ማጫ ናይቲ ኢንቴኮ ያና፤ ኢንቴ ኢስታ ሄሜꬂኔ ኢስታ ኦሶ ቤኢዳ ዎዴ ታኒ ዬሩሳላሜ ቦላ ኤሂዳ ሜቶዚኔ ጋꬂዳ ኢታ ባሻዚ ኡባይ ሊኬ ጊዲዳይሳ ኢንቴ ኤራና።
EZE 14:23 ኢስታ ሄሜታኔ ኢስታ ኦሶ ኢንቴ ቤኢዲ ሚኔታና፤ ታኒ ኢስታ ቦላ ጮ ሃዳን ኦꬆንታይሳ ኢንቴ ኤራና» ጌስ።
EZE 15:1 ጎዳ ቃላይ ታኮ ዪዲ፥
EZE 15:2 «ሃይሶ ኣሳ ናዉ! ዎይኔ ቱራይ ዎራን ዲዛ ሃራ ሚꬃታ ኡባ ሃጋፌ ኣዛን ኣꬊዜ?
EZE 15:3 ጎኢዛ ሚሽ ኦꬃናስ ኢዛ ኣኖፔ ኤኬቲ ኤሪዜ? ኢሲ ሚሽ ካቃናስ ኮጫይ ኢዛፔ ኤኬቲ ኤሪዜ?
EZE 15:4 ኢዚ ኤጻና ማላ ታማን ዬጊዳፔ ጉዬን ናምኡ ባጋ ጼራ ታማይ ሚዲ ጊዶዛ ላቢኮ ሄሲ ጎኣናስ ዳንዳይዜ?
EZE 15:5 ሎኦ ጊዲ ኡቲዲ ኣይ ጎኣካ ኢሞንታ ኣጊኮ ታማይ ጹጊዳፔኔ ላቢዳፔ ጉዬ ኬሂ ጎኣይ ባይንዳዝ ጊዳና።
EZE 15:6 «ሄሳ ጊሻስ ኡባ ሃሪዛ ጎዳይ፥ ‹ታኒ ዎራ ሚꬃ ጊዶን ዲዛ ዎይኔ ኣኖ ታማን ኤጻና ማላ ታ ኣꬃ ኢሚዳይሳꬆ ዬሩሳላሜን ዲዛይታካ ኣꬃ ኢማና።
EZE 15:7 ታኒ ታ ኣይፌሶ ኢታቴꬃን ኢስታ ቦላ ዛራና፤ ኢስቲ ታማፔ ኬሲ ኤኪ ኣቲዳ ጊዲኮካ ቡሮ ኢስታ ታማይ ማና፤ ታኒ ታ ሲንꬅ ኢታቴꬃን ኢስታኮ ዛሪዛ ዎዴ ታኒ ጎዳ ጊዲዳይሳ ኢንቴ ኤራና።
EZE 15:8 ኢስቲ ኣማኔቶንታ ኣጊዳ ጊሻስ ታኒ ቢታዮ ኣሲ ባይንዳ ቡላ ኬሳዲስ› ጌስ» ጊዴስ።
EZE 16:1 ጎዳ ቃላይ ታኮ ዪዲ፥
EZE 16:2 «ሃይሶ ኣሳ ናዉ! ዬሩሳላሜስ ኢዛ ኦꬂዛ ሃራሲዛ ኦሶታ ኢዚስ ቆንጬራ ዮታ።
EZE 16:3 ኡባ ሃሪዛ ጎዳይ ዬሩሳላሜስ፥ ‹ኔ ማይዛይኔ ኔ ዬሌታይ ካናኔ ቢታፌ ዪዴስ፤ ኔ ኣዋይ ኣሞሬ ቢታ ኣሳ፤ ኔ ኣዪያካ ሂቴ ቢታ ኣሳ።
EZE 16:4 ኔ ዬሌቲዳ ጋላስ ኔ ጉልኣይ ቃንጼቲቤና፤ ጌያናስ ሃꬃን ሜጬታቤካ፤ ማጺኔን ሾሼታቤካ፤ ጫርቃንካ ጻጼታቤካ።
EZE 16:5 ቃꬌታ ኣይፌን ኔና ጼሊዲ ዎይኮ ኔስ ሚሼቲዲ ሃይታፔ ኢሲኖካ ኔስ ኦꬂዳዴይ ዴና፤ ኔኒ ዬሌቲዳ ጋላስ ካꬌቲዳ ጊሻስ ዴምባን ዬጌታ ኣታዳሳ።
EZE 16:6 «ታ ሄራ ካንꬃ ባሼ ኔኒ ኔ ሱꬃን ሞሬታዳ ቃኬቲሺን ቤኣዲስ፤ ኔኒ ኔ ሱꬃ ጊዶን ኢቻ ዲሺን ታ ኔና፥ ‹ሼምፖራ ፓጻ ዳ› ጋዲስ።
EZE 16:7 ታኒ ኔና ዴምባ ጋዴን ዲዛ ካꬃ ማላ ዲቻዲስ፤ ኔኒ ዲጫ ጋካዳ ኢንቁ ማላ ኣልኦ ጊዳዳሳ፤ ኔ ꬋንꬃቲ ኡቲዳ፤ ኔ ቢናናይካ ዲጪዴስ፤ ጊዶ ኣቲን ኔኒ ኣዪ ኡሎፔ ዬሌቲዳ ማላ ፒጺኒ ካሎ ዳሳ።
EZE 16:8 «ቃሴካ ታ ሄራ ኣꬋ ባሼ ጼላዲስ፤ ኔ ጌሎ ጋኪዳ ጌላኦ ጊዲዳይሳ ቤኣዳ ታ ማይኦ ማጫራ ኔ ቦላ ዬጋዳ ኔ ካሎቴꬅ ካማዲስ፤ ኔስ ጫቃዲስ፤ ኔናራ ቃላ ጌላዲስ፤ ኔ ታሳ» ጌስ ኡባ ሃሪዛ ጎዳይ።
EZE 16:9 «ታኒ ኔ ቦላይ ሱꬃን ሞሬቲዳይሳ ሃꬃን ሜጫ ጌሻዳ ዛይቴ ቲያዲስ።
EZE 16:10 ታኒ ኔና ጺባቤ ቃሚሳ ማይዛዳ ጋልባፌ ኦሴቲዳ ሎኦ ጫማካ ኣꬂሳዲስ፤ ሎኦ ላይኖፔ ኦሴቲዳ ጎሴ ኔና ጎዚሳዲስ፤ ቃሴ ሴሎ ኩታካ ቁማይሳዲስ።
EZE 16:11 ኔና ታ ኣሌቆን ፖጪሳዲስ፤ ኔ ኩሼን ሳጋዮ፥ ኔ ቆꬌን ማጪፋራ ኣꬃዲስ።
EZE 16:12 ቃሴ ኔ ሲꬌኒኔ ኔ ሃይꬃን ጉቲቻ ኣꬃዲስ፤ ኔ ሁኤንካ ሎኦ ካላቻ ጎጺሳዲስ።
EZE 16:13 ኔኒ ዎርቃኒኔ ቢራን ኣሌቄታዳሳ፤ ኔ ማይኦይ ኡባይ ሎኦ ላይኖ፥ ሲልኮኔኔ ጺባቤ፤ ኔ ቁማይ ሊቆ ꬊሌ፥ ኤሲኔ ዎጋራ ዛይቴ። ኔኒ ኬሃ ፑላታዳ ካዎ ማቾ ጊዳዳሳ።
EZE 16:14 ታ ኔስ ኢሚዳ ቴማፔ ዴንዲዳይሳን ኔ ፑላቴꬂ ኩሜꬅ ጊዲዳ ጊሻስ ኔ ዎሬይ ካዎቴꬃታ ጊዶን ኤሬቲዴስ» ጌስ ኡባ ሃሪዛ ጎዳይ።
EZE 16:15 «ጊዶ ኣቲን ኔኒ ኔ ፑላቴꬃን ጬቄታዳሳ፤ ኬኢዳ ኔ ሱንꬃ ኔኒ ላይማቴꬃስ ጎኤታዳሳ፤ ኣꬊ ቢዛ ኡባራ ኔ ሼኔ ማላ ላይማታዳሳ፤ ኔኒ ኔናቴꬃ ቤታስ ቤታስ ኣꬃ ኢማዳሳ።
EZE 16:16 ኔ ማይኦታፔ ጉꬃታ ኤካዳ ኔ ላይማታሼ ጎይኒዛሶሆታ ኣሌቂሳ ጊጊሳዳሳ፤ ሄሳ ማላ ሃኖታይ ሃይሳፌ ሲንꬃን ሃኒቤና፤ ሃይሳፌ ጉዬንካ ሃኔና።
EZE 16:17 ታኒ ኔስ ኢሚዳ ዎርቃፌኔ ቢራፔ ኦሴቲዳ ሎኦ ኣሌቆታ ኤካዳ ኣቱማሳ ሚስሌታ ኔስ ኦꬃዳሳ፤ ሂስታዳ ኢስታራ ላይማታዳሳ።
EZE 16:18 ኔ ጺባቤታ ኤፋዳ ኢስታ ቦላ ጎጳዳሳ፤ ቃሴ ታ ዛይቴኔ ታ ኤጻኔ ኢስታስ ሺሻዳሳ።
EZE 16:19 ቃሴ ኔ ማና ማላ ታ ኔስ ኢሚዳ ቁማ፥ ሄሲካ ሙሩታ ꬊሌ፥ ኤሲኔ ዎጋራ ዛይቴ ሳዎ ቱኑ ጊዛ ኤጻኔ ማላ ኦꬃዳ ኔ ኢስታስ ያርሾ ሺሻዳሳ፤ ሄሳ ማላ ኦሶይ ፖሌቲዴስ።
EZE 16:20 «ቃሴካ ኔ ታስ ዬሊዳ ኣቱማ ናይታኔ ማጫ ናይታ ኢስቲ ማና ማላ ኤፋዳ ሚስሌታስ ያርሻዳሳ። ሄሳ ኔ ኦꬂዛይ ኔ ላይማቲዛይሲ ጉጺኔ?
EZE 16:21 ኔኒ ታ ናይታ ሹካዳ ኤቃ ጾሳታስ ያርሻዳሳ።
EZE 16:22 ሃ ሃራሲዛ ኔ ኦሶታኒኔ ኔ ላይማቴꬅ ኡባን ኔ ኣዬይ ኡሎፔ ኔ ፒጺኒ ካሎ ዬሌቲዳ ማላ ኔ ሱꬃን ሞሬታዳ ቃኬታሼ ዲዛ ዬላጋቴꬃ ዎዴታ ኔ ቆፓቤካ።
EZE 16:23 « ‹ኣዬ ኣና! ሃኔ ኔስ ኣዬ ኣና!› ጌስ ኡባ ሃሪዛ ጎዳይ፤ ኔ ኦꬂዳ ኢታ ሚሻታ ኡባፌካ ቦላራ ሃራ ጉጃዳ፥
EZE 16:24 ኔስ ፖጎኖ ጊጊሳዳሳ፤ ሄ ኡባን ኔስ ጎይኒዛሶሆታ ኦꬃዳሳ።
EZE 16:25 ኦይዱ ኦጌ ዶናን ኡባን ጎይኒዛሶሆታ ጊጊሳዳሳ፤ ኔናቴꬃ ኣꬊ ቢዛ ኡባስ ላይማቴꬃስ ሺሻዳ ኔ ፑላቴꬃ ቱኒሳዳሳ።
EZE 16:26 ዚታ ኬዚዳ ኔ ሾሮ ጊብጼ ኣሳታራ ላይማታዳሳ፤ ቡቴፔ ዳሮ ኔ ላይማቴꬃን ታና ሃንቄꬃዳሳ።
EZE 16:27 ሄሳ ጊሻስ ታኒ ታ ቄሴ ኔ ቦላ ዴንꬃዳ ኔስ ኢሚዛ ጎኣታፔ ፓጪንቻዲስ፤ ኔ ኢታ ሃኖታፔ ዴንዲዳይሳን፥ ኔ ፖኮ ኦሶን ዬላቲዛ ኔ ሞርኬ ፊሊስጼሜ ማጫ ናይታ ኣሞስ ኣꬃ ኢማዲስ።
EZE 16:28 ኔና ቡሮ ኣሎንታ ጊሻስ ኣሶሬታራካ ላይማታዳሳ፤ ሄሳፌ ጉዬካ ኣላቤካ።
EZE 16:29 ኔ ቱናቴꬃ ዛልኣንቻታ ቢታ ባቢሎኔ ጋካናስ ዳርሳዳሳ፤ ሂስታዳካ ኣላቤካ።
EZE 16:30 « ‹ዬላይ ባይንዳ ላይማ ማጫሳ ማላ ሄሳ ኡባ ኔ ፖሊዳይ ኣይ ማላ ላፋ ዎዚናይ ኔስ ዲኔ?› ጌስ ኡባ ሃሪዛ ጎዳይ።
EZE 16:31 ኦይዱ ኦጌ ዶና ኡባን ኔስ ፖጎኖታ ጎይኒዛሶሆታ ጊጊሳዳሳ፤ ጊዲኮካ ሃራ ላይማን ኣቂዛ ማጫሳታ ማላ ሚሼ ቃንጺሳቤካ።
EZE 16:32 « ‹ሃኔ ላይማ ማጫሳዬ! ኔኒ ኣዚናይ ዴኢሺን ሃራ ኣዴራ ላይማቲዛ ማጫሳ ማላ።
EZE 16:33 ኣይ ላይማ ማጫሳስ ኢሞታይ ኢሜቴስ፤ ኔ ጊዲኮ ኔ ላጌታስ ጌዴ ኢሞታ ኢማሳ፤ ኣዋ ባጋራካ ዪዳይቲ ኔናራ ላይማታና ማላ ባሌꬃናስ ሞጎታ ኢማሳ።
EZE 16:34 ሄሳ ጊሻስ ኔ ላይማቴꬃይ ሃራታፔ ዱማ፤ ላይማታናስ ኮይዛዴይ ኔናራ ጊጋናስ ሜቶቴና፤ ኔኒ ኢዛስ ኢሞታ ኢማሳ ኣቲን ኢዚ ኔስ ኢሞታ ኢሜና፤ ኔ ሃኖታይ ሃንኮይታፔ ዱማቴስ› ጌስ» ጌስ ኡባ ሃሪዛ ጎዳይ።
EZE 16:35 ሃኔ ላይማ ማጫሳዬ፥ ኣኔ ጎዳ ቃላ ሲያ!
EZE 16:36 ኡባ ሃሪዛ ጎዳይ፥ «ኔኒ ኔ ላይማቴꬃ ኣሞን ኔ ማይኦ ቃራዳ ኔ ካሎቴꬅ ኔ ላጌታ ቤሲዳ ጊሻስ፥ ሃራሲዛ ኤቃ ጾሳታ ኔ ጎይኒዳ ጊሻስ ኢስታስ ኔኒ ኔ ናይታ ሱꬅ ያርሺዳ ጊሻስ፥
EZE 16:37 ኔኒ ኢስታን ኡፋዬቲዳ ኔ ላጌታ ኡባ፥ ኔ ሲቂዛይታኔ ኔ ኢጺዛይታ ኡባ ታ ሺሻና፤ ኡባ ባጋፌ ኔ ዩሾን ሺሻዳ ኢስታ ሲንꬃን ኔ ካሎቴꬃ ታ ቃራና፤ ኢስቲካ ኔ ካሎቴꬃ ኡባ ቤኣና።
EZE 16:38 ታኒ ላይማቲዛ ማጫሳታ ቦላኔ ሼምፖ ዎꬊዛ ማጫሳታ ቦላ ፒርዲዛ ማላ ኔ ቦላ ፒርዳና፤ ታ ሃንቆኒኔ ሚሾናን ሼምፖ ዎꬋናሼ ጋካናስ ታ ሃሎ ኬሳና።
EZE 16:39 ታኒ ኔና ኔ ላጌታስ ኣꬃ ኢማና፤ ኢስቲካ ኔ ፖጎኖታኔ ኔ ዙምቡላ ቦላ ጎይኒዛሶሆታ ላላና፤ ኢስቲ ኔ ማይኦ ቃሪ ኤካና፤ ሎኦ ኔ ኣሌቆታ ቦንቂ ኤካና፤ ኔና ፒጺኒ ካሎኔ ኩሼ ሜላ ኣሻና።
EZE 16:40 ኢስቲ ኔ ቦላ ዴሬ ዴንꬃና፤ ሹቻራ ኔና ኩራካና፤ ማሻራ ኢስቲ ኔና ቃንጼሬꬃና።
EZE 16:41 ኔ ኬꬃታ ታማን ጹጋና፤ ዳሮ ማጫሳታ ሲንꬃን ኔ ቦላ ቂጻቴ ኤሃና፤ ኔ ላይማቴꬃ ታ ኔና ዲጋና፤ ሃይሳፌ ጉዬ ኔ ሲቆታስ ኔ ሚሽ ቃንጻካ።
EZE 16:42 ሄሳን ኔ ቦላ ዲዛ ታ ሃንቆይ ኢርጻና፤ ታ ሴላ ሃንቆይ ኔፔ ሃካና፤ ታ ጮኡ ጋና ኣቲን ሃይሳፌ ጉዬ ሃንቄቲኬ።
EZE 16:43 «ኔ ታና ሃይታን ሃንቄꬃዳሳ ኣቲን ኔ ዬላጋቴꬃ ዎዴታ ቆፓቤካ፤ ሄሳ ጊሻስ ኔ ኦሶ ማላ ታ ኔስ ኢማና» ጌስ ኡባ ሃሪዛ ጎዳይ። ኔ ኦꬂዳ ኢታ ኦሶታ ቦላ ሃራ ዚታቴꬅ ጉጃቤኪ?
EZE 16:44 «ዬሩሳላሜ! ኣስ ኡባይ ሌሚሶ ሃሳይሼ፥ ‹ማጫ ናይ ኣዪን ኬዜስ› ጊ ኔ ቦላ ሌሚሶ ሃሳዬስ።
EZE 16:45 ቱሙ ኔኒ ባ ኣዚናኔ ባ ናይታ ሻቴቲዛ ኔ ኣዬይ ና፤ ኔኒ ባንታ ኣዚናታኔ ባንታ ናይታ ሻቴቲዛ ኔ ሚቼታ ማላ። ኢንቴ ኣያ ሂቴ ቢታ ኣሳ፤ ኢንቴ ኣዋይ ቃሴ ኣሞሬ ቢታ ኣሳ።
EZE 16:46 ኔስ ባይራ ሚቺያ ኔፔ ፑዴሃ ባጋራ ባ ማጫ ናይታራ ዲዛ ሳማሪያ፤ ኔስ ካሎ ሚቺያ ኔፔ ዱጌሃ ባጋራ ዲዛ ሶዶሞ።
EZE 16:47 ኔኒ ኢስታ ኦጌ ቡሲኔ ኢስታ ኢታ ኦጌ ካሎ ጻላ ጊዶንታ ጉꬃ ዎዴን ኢስታፌ ቦላራ ኢታ ኦꬂዛሮ ጊዳዳሳ።
EZE 16:48 ታ ኡባ ሃሪዛ ጎዳይ ታኒ ዴኦ ጾሳ ጊዲዳይሳን ጫቃይስ፡ ኔኒኔ ኔ ማጫ ናይቲ ኦꬂዳይሳ ማላ ኔ ሚቾ ሶዶማኔ ኢዚ ማጫ ናይቲካ ኦꬂቤቴና።
EZE 16:49 ኔ ሚቺያ ሶዶማ ኦꬂዳ ናጋራይ ሃይሳ፡ ኢዛኔ ኢዚ ማጫ ናይቲ ኦቶራንቻ፥ ካሊዳይታኔ ኢንጄ ዱስ ዲዛይታ፤ ኢስቲ ማንቆታኔ ሜቶቴቲዳይታ ማዲ ኤሬቴና።
EZE 16:50 ኢስቲ ኦቶራንቻ ጊዲዲ ታ ሲንꬃን ሃራሲዛ ሚሽ ኦꬂዳ፤ ሄሳ ጊሻስ ኢንቴ ቤኢዳ ማላ ታ ሲንꬃፌ ꬋይሳዲስ።
EZE 16:51 ሳማሪያይ ኔ ኦꬂዳ ናጋራስ ባጋ ጊዳናይሳካ ኦꬃቤኩ፤ ኔኒ ጊዲኮ ኢዚፔ ኬሂ ኢታ ጊዲዳ ኦሶ ኦሶን ሄ ኡባን ኔኒ ኔ ሚቼታ ጺሎ ኣሳ ማላ ሚሳቲሳዳሳ።
EZE 16:52 ኔኒ ኔ ሚቼታ ጺሎ ማላ ቆዲዳ ጊሻስ ዬላ ማይኣ፤ ኔ ናጋራይ ኢስታይሳፌ ኬሂ ኢታ ጊዲዳ ጊሻስ ኢስቲ ኔፔ ጺሎ፤ ኔኒ ኔ ሚቼታ ጺሊሲዳ ጊሻስ ዬላ ቁማኣ።
EZE 16:53 «ታኒ ጊዲኮ ሶዶሞኔ ኢዚ ማጫ ናይታ፥ ሄሳꬆካ ሳማሪያፔኔ ኢዚ ማጫ ናይታፔ ኤኬቲዳ ዲኦ ታ ዛራና፤ ኢስታፌ ዲኤቲዳይሳ ታ ዛሪዛ ዎዴ ኔፔ ዲኤቲዳይሳካ ዛራና።
EZE 16:54 ኔ ኦꬂዳ ኡባን ኔ ካዉያናኔ ኬሃ ዬላታና፤ ሄሳን ኔ ሚቼቲ ሚኔታና።
EZE 16:55 ኔ ሚቾ ሶዶማኔ ኢዚ ማጫ ናይቲ፥ ቃሴካ ሳማሪያይኔ ኢዚ ማጫ ናይቲ ካሴ ባ ዲዛ ሃኖታን ሲማና፤ ኔኒኔ ኔ ማጫ ናይቲካ ካሴ ኢንቴ ዲዛ ሃኖታን ሲማና።
EZE 16:56 ካሴ ኔ ኦቶሬቲዛ ዎዴ ኔ ሚቾ ሶዶሚስ ሱንꬅ ጼይጋናስካ ኮያቤካ።
EZE 16:57 ሄሲ ኔ ናጋራይ ቆንጫናፔ ሲንꬃን ሃኒዴስ፤ ሃኢ ጊዲኮ ኔ ዩሾን ዲሼ ኔና ካꬊዛ ኤዶሜ ማጫ ናይታሲኔ ኢዚ ሾሮታ ኡባስ፥ ቃሴ ፊሊስጼሜ ማጫ ናይታስ ቂꬌስ ኣታዳሳ።
EZE 16:58 ኔ ፖኮ ሃኖሲኔ ኔ ኢታ ኦሶስ ቤሲዛ ቂጻቴ ኤካና» ጌስ።
EZE 16:59 ኡባ ሃሪዛ ጎዳይ፥ «ታ ቃላ ካꬊዳ ጊሻስ ታናራ ጌሊዳ ጫቆ ቃላ ላላዳሳ፤ ሄሳስ ኔ ኦꬂዳ ማላ ታ ኔ ቦላ ኦꬃና።
EZE 16:60 ጊዶ ኣቲን ኔ ናቴꬃን ዲሺን ታ ኔናራ ጫቂዳ ቃላ ቆፓና፤ ቃሴ ሜርናስ ኤቂ ዳና ጫቆ ቃላ ታ ኔናራ ጫቄታና።
EZE 16:61 ኔኒ ኔስ ባይራ ሚቼታኔ ካሎ ሚቼታ ሞካ ኤኪዛ ዎዴ ኔ ሄሜꬅ ቆፓ ኤካዳ ዬላታና፤ ኢስቲ ኔስ ማጫ ናይታ ጊዳና ማላ ታ ኔስ ኢማና፤ ጊዶ ኣቲን ታ ኔናራ ጌሊዳ ጫቆ ቃላ ማላ ጊዴና።
EZE 16:62 ሄሳ ጊሻስ ታ ኔናራ ጫቆ ቃላ ኦራጺሳና፤ ታኒ ጎዳ ጊዲዳይሳ ኔ ሄ ዎዴ ኤራና።
EZE 16:63 ታኒ ኔ ኦꬂዳ ሞሮ ኡባ ኣቶ ጊዳ ዎዴ ኔ ቆሆይ ኔ ዎዚናን ካርፒ ጊ ጌሊዛ ዎዴ ኔ ዬላታና፤ ኔ ካዉሻቴꬃፌ ዴንዲዳይሳን ኔ ዶና ሙሌካ ዶያካ» ጊዴስ።
EZE 17:1 ጎዳ ቃላይ ታኮ ዪዲ፥
EZE 17:2 «ሃይሶ ኣሳ ናዉ! ኢስራኤሌ ኣሳ ማሌꬆ ማሌꬃ፤ ኔ ኢስታስ ሌሚሶን ማሌꬆ ዮታ።
EZE 17:3 ኡባ ሃሪዛ ጎዳይ፥ ‹ዎጋ ቄፌይኔ ኣዱሲኔ ጮራ ባሌይ ዲዛ ኢዛስ ሜꬋይ ማሳራ ጊዲዳ ጊታ ጎሌይ ዴስ። ኢዚካ ሊባኖሴ ዪዲ ዚጋ ሚꬃ ጼራን ኡቲዲ ኡንቁሎዛ ጹንቂዴስ።
EZE 17:4 ሄ ሚꬃዛ ጼራፔ ኡንቁሎዛ ጹንቂ ኤኪዲ ዛልኣንቻታ ዴሬ ኤፊዴስ፤ ዛልኣንቻታ ካታማን ቶኪዴስ።
EZE 17:5 « ‹ሄሳፌ ጉዬ ሄ ቢታፌ ዜሬꬅ ኤፊዲ ሎኦ ቢታን ሃꬂ ኩሚዳሶን ሃꬅ ናጌ ሚꬃ ማላ ቶኪዴስ።
EZE 17:6 ኢዚ ሞኪዳ ዎዴ ቃንꬂኔ ዳዪዳ ዎይኔ ቱራ ጊዲዴስ፤ ሃጋቲ ጎሌዛ ባጋ ዲጪዳ፤ ጻጶቲ ጊዲኮ ኢዛ ጋርሳን ኣቲዳ፤ ሄሳ ጊሻስ ኢዚ ዎይኔ ቱራ ጊዲዴስ፤ ሃጋታ ኬሲዴስ፤ ጪሊላ ሃይꬃታካ ኬሲዴስ።
EZE 17:7 « ‹ቃሴ ዎጋ ቄፌቲኔ ጮራ ባሌን ካሜቲዳ ጊታ ጎሌይ ዴስ፤ ሄ ቶኬቲዳ ዎይኔ ሚꬃዚ ሃꬅ ዴማናስ ባ ቶኬቲዳሶፔ ባ ጻጶዛ ጎሌዛኮ ዬዲዴስ፤ ሃጋካ ኢዛኮ ሚጪዴስ።
EZE 17:8 ጊዶ ኣቲን ሃጋ ኬሳና ማላ፥ ኣይፌ ኣይፋና ማላኔ ሎኦ ዎይኔ ሚꬅ ጊዳና ማላ ኢዛ ማታን ዳሮ ሃꬂ ዲዛሶን ኣራዳ ቢታን ካሴ ቶኬቲዴስ› ጌስ።
EZE 17:9 «ኔኒ ኢስታስ፥ ‹ኡባ ሃሪዛ ጎዳይ፡ ሄ ቱራይ ዲጫኔ? ኮይሮ ጎሌዚ ሹላና ማላ ጻጶዛ ሾዲን ኢዛ ኣይፌዚ ቆቆፌቴኔ? ኡንቁሎይካ ኡባይ ሜላና፤ ኢዛ ጻጶፔ ሾዳናስ ሚኖ ቄሴኔ ዳሮ ኣሳ ዎልቃ ኮሼና።
EZE 17:10 ኢዚ ሃራሶን ቶኬቲዲ ኦይካንዴሻ? ኣርሼይ ሞኪዛ ባጋ ጫርኮይ ሾጪኮ ሄን ባ ዲጪዳሶን ኢዚ ሙሌራ ሜሌኔ?› » ጊዴስ።
EZE 17:11 ሄሳፌ ጉዬ ጎዳ ቃላይ ታኮ ዪዲ፥
EZE 17:12 «ሃይሳ ማካላንቻ ኬꬃ ኣሳስ፥ ‹ሃይታ ሌሚሶታ ቢርሼꬂ ኣዛኮኔ ኢንቴ ኤሬኬቲ?› ሄሲካ ባቢሎኔ ካዎይ ዬሩሳላሜ ዪዲ ኢዚ ካዎዛኔ ኢዚ ዳናታ ዲኢ ኤኪ ባቢሎኔ ሲሚ ቢዴስ።
EZE 17:13 ቃሴ ካዎ ኬꬃ ኣሳፔካ ኢሳ ኤኪዲ ኢዛራ ኢሲፌ ቃላ ጌሊዴስ፤ ኢዛካ ጫቄꬂዴስ፤ ቢታይ ቦላ ኤሬቲዛ ኣሳታ ዲኢ ኤኪ ቢዴስ።
EZE 17:14 ኢዚ ሄሳ ኦꬂዳይ ሄ ቢታይን ዲዛ ካዎቴꬃያ ካዉያዳ ኢዛራ ጌሊዳ ቃላ ናጋዳ ዳና ማላ ኣቲን ናምኣንꬆ ዴንዶንታ ማላ ኦꬃናሳ።
EZE 17:15 ጊዶ ኣቲን ዩሁዳ ካዎይ ኢዛ ቦላ ማካሊዲ፥ ፓራታኔ ዳሮ ኦላንቻታ ዴማናስ ቃስታኔታ ጊብጼ ቢታ ኪቲዴስ። ኢዛስ ሄሲ ሃናንዴ? ሃይሳ ማላ ኦꬂዳይ ኬሲ ኤኪ ኣታንዴ? ጌሊዳ ጫቆ ቃላ ላሊዳዴይ ቃጻዬቶንታ ኣታንዴ?
EZE 17:16 «ኡባ ሃሪዛ ጎዳይ፥ ‹ታኒ ዴኦ ጾሳ ጊዲዳይሳን ጫቃይስ፡ ኢዚ ጫቆዛ ካꬊዲ ጌሊዳ ቃላ ላሊዳሶን ኢዛ ኣራታ ቦላ ኡቲሲዳ ካዎዛ ቢታ ባቢሎኔን ኢዚ ሃይቃና።
EZE 17:17 ባቢሎኔ ኦላንቻቲ ኣስ ዎꬋናስ ካታማይ ጊምቤ ዩሾን ቢታ ዶሪዛ ዎዴኔ ሚጻታ ጊግሲዛ ዎዴ ጊብጼ ካዎ ፓሮኔ ኦላንቻታራኔ ዳሮ ቡቴታራ ዪዲ ኦላን ኢዛ ማዳና ዳንዳዬና።
EZE 17:18 ካሴ ኢዚ ጫቂዳ ጫቆዛ ካꬊዲኔ ካሴ ባ ጌሊዳ ቃላ ላሊዲ ባ ኩሼ ኢሚዳፔ ጉዬ ሃይታንታ ኡባ ኦꬂዳ ጊሻስ ቃጻዬቶንታ ኣቴና› ጌስ።
EZE 17:19 «ሄሳ ጊሻስ ኡባ ሃሪዛ ጎዳይ፥ ‹ታኒ ዴኦ ጾሳ ጊዲዳይሳን ጫቃይስ፤ ኢዚ ጫቂዳ ጫቆዛ ካꬊዲ ጌሊዳ ቃላ ላሊዳ ጊሻስ ታኒ ታ ጫቆ ቃላ ኢዛ ሁኤ ቦላ ኤሃና።
EZE 17:20 ታ ጊቴ ኢዛ ቦላ ሚጫና፤ ኢዚ ታ ዎጺማዴን ኦይኬታና፤ ኢዚ ታስ ኣማኔቶንታ ኣጊዳ ጊሻስ ታ ኢዛ ባቢሎኔ ኤፋዳ ሄን ኢዛ ቦላ ፒርዳና።
EZE 17:21 ባቃቲዛ ኢዛ ኦላንቻቲ ኡባይ ማሻን ሃይቃና፤ ጫሻ ኣቲዳይቲ ዱማ ዱማሶ ላሌታና። ሃይሳ ሃሳይዳይ ታና ጎዳ ጊዲዳይሳ ኢንቴ ሄ ዎዴ ኤራና› ጌስ።
EZE 17:22 «ኡባ ሃሪዛ ጎዳይ፥ ‹ታኒ ሁኤራ ኣዱሳ ዚጋ ጼራፔ ኡንቁሎዛ ጹንቃ ኤካዳ ኡባፌ ꬎቃ ዙማ ሁኤን ቶካና።
EZE 17:23 ꬎቁ ጊዳ ኢስራኤሌ ዙማ ሁኤን ቶካና፤ ኢዚ ሃጋታ ኬሳና፤ ኣይፌ ኣይፋና፤ ሎኦ ዚጋ ጊዳና፤ ዱማ ዱማ ቆሞ ካፎቲ ኡባይ ሄን ባስ ዱሳሶ ኬጻና፤ ኢዛ ሃጋታ ኩዋን ሼምፓና።
EZE 17:24 ዎራ ሚꬅ ኡባይ፥ ኣዱሳ ሚꬃታ ዚቂ ሂስቲዛይ፥ ቃንꬃ ሚꬃታ ꬎቁ ሂስቲዛይ ታና ጎዳ ጊዲዳይሳ ኢስቲ ሄ ዎዴ ኤራና፤ ጪሊላ ሚꬃታ ታኒ ሜሊሳይስ፤ ሜላ ሚꬃታ ታኒ ጪሊሊሳይስ› ጌስ። «ታኒ ጎዳይ ሃይሳ ሃሳያዲስ፤ ኢዛካ ኦꬃና» ጊዴስ።
EZE 18:1 ጎዳ ቃላይ ታኮ ዪዲ፥
EZE 18:2 «ኢስራኤሌ ቢታ ጊሻስ፥ ‹ኣዋቲ ቃዉኤ ዎይኔ ሚን ናይታ ኣቺ ዚልኢዴስ› ጊዲ ኢንቴ ቶሴ ዮቲዛይ ኣዜ?
EZE 18:3 «ታኒ ኡባ ሃሪዛ ጎዳይ! ታኒ ዴኦ ጾሳ ጊዲዳይሳን ጫቃይስ፡ ሃይሳፌ ጉዬን ኢንቴ ሃይሳ ማላ ቶሴ ኢስራኤሌ ቢታን ዮቴኬታ።
EZE 18:4 ቤኢቴ ኣሳ ኡባ ሼምፖይ ታሳ፤ ዬሊዳይታ ሼምፖይ ታስ ጊዲዳ ማላ ኢስታ ናይታ ሼምፖይካ ታሳ፤ ናጋራ ኦꬂዳ ሼምፖያ ሃይቃና።
EZE 18:5 ሱሬቴꬃኒኔ ዎጋን ኦꬂዛ ኢሲ ኣሲ ዲኮ፥
EZE 18:6 ዙምቡላታ ቦላ ኤቃ ጾሳታስ ያርሼቲዳይሳ ኢዚ ሜና፤ ኢስራኤሌ ቢታንካ ዲዛ ኤቃ ጾሳታኮ ጼሌና፤ ባ ላጌዛ ማቼይራ ላይማቴና፤ ማጫሳ ዎጋይ ዪሺን ማጫሳራ ኣቄና።
EZE 18:7 ኦናካ ኡንኤꬄና፤ ጊዶ ኣቲን ኦይሶ ኤኪዳ ሚሻካ ታልኤ ኤኪዳዴስ ዛሬስ፤ ጋፊዳዴስ ባ ካꬅ፥ ካሎቲዳዴስ ባ ማይኦ ኢሜስ ኣቲን ዎልቃራ ባስ ቦንቂ ኤኬና።
EZE 18:8 ኢዚ ዲቻስ ታልኤና፤ ቡቴ ዳሮ ዲቺካ ኤኬና፤ ባ ኩሼ ሞሮፔ ናጌስ፤ ኣሳስ ሱሬ ፒርዳ ፒርዴስ።
EZE 18:9 ታ ማራ ካሌስ፤ ታ ዎጋካ ሱሬቴꬃን ፖሌስ። ሄሲ ጺሎ ኣሳ፤ ኢዚ ሼምፖራ ፓጻ ዳና» ጊዴስ።
EZE 18:10 ኡባ ሃሪዛ ጎዳይ፥ «ሃ ቢታኔዛስ ሼምፖ ዎꬊዛ፥ ዎይኮ ሃይሳፌ ካሊ ዲዛይታፔ ኢሳ ኦꬂዛ ኢሲ ማካላንቻ ናይ ዴኢኮ፥
EZE 18:11 ኢዛ ኣዋይ ሄይታፔ ኢሳካ ኦꬆንታ ኣጊኮ፥ ናዚ ዙምቡላታ ቦላ ያርሾስ ሺቂዳይሳ ሚኮ፥ ባ ላጌዛ ማቼይራ ላይማቲኮ፥
EZE 18:12 ሂዬሳኔ ሜቶቴቲዳዴ ኡንኤꬂኮ፥ ዎልቃራ ዳፊ ኤኪኮ፥ ኦይሶ ኤኪዳይሳ ዛሮንታ ኢጺኮ፥ ኤቃ ጾሳታኮ ሲሚኮ፥ ሃራሲዛ ኦሶታ ኦꬂኮ፥
EZE 18:13 ዲቻስ ታልኢኮ፥ ቡቴ ዳሮ ዲች ኤኪኮ፥ ሄሳ ማላ ኣሲ ሼምፖራ ፓጻ ዳኔ? ሙሌካ ዴና! ኢዚ ሃይታ ሃራሲዛ ሚሻታ ኦꬂዳ ጊሻስ ኢዚ ቱሙካ ሃይቃና፤ ባ ሱꬃን ባርካ ኦይሼታና፤ ቱሙካ ሃይቃና።
EZE 18:14 «ሃ ኢታ ኣዴዛ ናዚ ጋኪዲ ና ዬሊኮ ኢዛ ናዚ ካሴ ኣዋይ ኦꬂዳ ናጋራ ኡባ ቤኢዲ ኢዛꬆ ኦꬆንታ ኣጊኮ፥
EZE 18:15 ዙምቡላታ ቦላ ያርሾ ሺሺዳይሳ ኢዚ ሞንታ ኣጊኮ፥ ኢስራኤሌ ቢታን ዲዛ ኤቃ ጾሳታ ጎይኖንታ ኣጊኮ፥ ባ ላጌዛ ማቼይራ ላይማቶንታ ኣጊኮ፥
EZE 18:16 ኣስ ኡንኤꬆንታ ኣጊኮ፥ ታልኤ ኢማናስ ኦይሶ ኦይቾንታ ኣጊኮ፥ ዎልቃራ ቦንቂ ኤኮንታ ኣጊኮ፥ ጊዶ ኣቲን ባ ካꬅ ጋፊዳዴስ፥ ባ ማይኦ ካሎቲዳዴስ ኢሚኮ፥
EZE 18:17 ባ ኩሼ ኢታ ኦሶፔ ሺሺ ኤኪኮ፥ ዲች ዎይኮ ቡቴፔ ዳሮ ዲች ኤኮንታ ኣጊኮ፥ ታ ዎጋ ናጊኮ፥ ታ ማራ ካሊኮ፥ ኢዚ ሼምፖራ ፓጻ ዳና ኣቲን ባ ኣዋ ናጋራን ሃይቄና።
EZE 18:18 ጊዶ ኣቲን ኢዛ ኣዋይ ኣሳ ማታ ናቂዳ ጊሻስ፥ ባ ኢሻፔ ዎልቃራ ቦንቂ ኤኪዳ ጊሻስ፥ ዴራ ጊዶን ቤሶንታ ሚሽ ኦꬂዳ ጊሻስ ኢዚ ባ ናጋራን ሃይቃና።
EZE 18:19 «ኢንቴ ጊዲኮ፥ ‹ናይ ባ ኣዋ ናጋራን ኣይስ ቃጻዬቴኔ?› ጌታ። ናዚ ሱሬኔ ቱማ ኦꬂዳ ጊሻስ፥ ታ ማራካ ሚንꬂ ናጊዳ ጊሻስ ኢዚ ሼምፖራ ፓጻ ዳና።
EZE 18:20 ሃይቃናስ ቤሲዛይ ናጋራ ኦꬂዳ ሼምፖ። ናይ ባና ዬሊዳይታ ናጋራን ቃጻዬቴና፤ ሄሳ ማላንካ ዬሊዳይቲ ባ ናይታ ናጋራን ቃጻዬቴቴና። ጺሎይ ባ ጺሎቴꬃ ኣይፌ ማና፤ ናጋራንቻይካ ባ ናጋራ ጋቴ ኤካና።
EZE 18:21 «ጊዶ ኣቲን ናጋራንቻይ ባ ኦꬂዳ ናጋራ ኡባፌ ሲሚዲ ታ ማራ ኡባ ናጊኮ፥ ሱሬኔ ቱማ ጊዲዳ ኦሶ ኦꬂኮ ኢዚ ሙሌካ ሼምፖራ ፓጻ ዳናፔ ኣቲን ሃይቄና።
EZE 18:22 ኢዛ ቆሆይ ኡባይ ቆዴቴና። ኢዚ ጺሎቴꬃ ኦጌን ቢዳ ጊሻስ ሼምፖራ ፓጻ ዳና።
EZE 18:23 ቱማፔ ናጋራንቻ ሃይቆን ታ ኡፋዬታዚና? ጌስ ኡባ ሃሪዛ ጎዳይ። ሄሳፌ ቦላራ ኢዚ ባ ቢዛ ኢታ ኦጌፔ ሲሚዲ ሼምፖራ ፓጻ ዲኮ ታና ኡፋይሴኔ?
EZE 18:24 «ጊዶ ኣቲን ጺሎ ኣሲ ባ ጺሎቴꬃፌ ሲሚዲ ናጋራ ኦꬂኮ፥ ናጋራንቻይ ኦꬂዛ ቱና ሚሽ ኦꬂኮ ቱማፔ ኢዛዴይ ሼምፖራ ፓጻ ዳኔ? ኣካይ፤ ኢዚ ኦꬂዳ ጺሎቴꬃፌ ኢሶይካ ኢዛስ ቆዴቴና፤ ኢዚ ኣማኔቶንታ ኢጺዳ ጋሶኒኔ ኢዚ ኦꬂዳ ናጋራ ኡባ ጋሶን ኢዚ ሃይቃና።
EZE 18:25 «ኢንቴ ጊዲኮ፥ ‹ጎዳ ኦጌይ ሱሬ ጊዴና› ጌታ። ኢንቴኖ ኢስራኤሌ ኣሳቶ! ሃኢ ሲዪቴ! ታ ኦጌይ ሱሬ ጊዴኔ? ጌላይ ኢንቴ ኦጌ ጊዴኔ?
EZE 18:26 ጺሎ ኣሲ ባ ጺሎቴꬃፌ ሲሚዲ ናጋራ ኦꬂዛ ዎዴ ባ ናጋራ ጋሶን ሃይቃና፤ ባ ኦꬂዳ ቆሆ ጋሶን ኢዚ ሼምፖራ ፓጻ ዴና።
EZE 18:27 ናጋራንቻይ ጊዲኮ ባ ኢታ ኦሶፔ ሲሚዲ ኣማኔቴꬃን ዲኮ ኢዚ ባ ሼምፖ ኣሻና።
EZE 18:28 ኢዚ ባ ኦꬂዳ ቆሆ ኡባ ዩሺ ኣኬኪዲ፥ ባ ኦꬂዳ ኢታቴꬃ ኦሶ ኡባፌ ሲሚዳ ጊሻስ ኢዚ ሼምፖራ ፓጻ ዳና ኣቲን ሃይቄና።
EZE 18:29 ኢስራኤሌ ኣሳይ ጊዲኮ፥ ‹ጎዳ ኦጌይ ሱሬ ጊዴና› ጊዳ። ኢንቴኖ ኢስራኤሌ ኣሳቶ! ታ ኦጌይ ሱሬ ጊዴኔ? ጌላይ ኢንቴ ኦጌ ጊዴኔ?
EZE 18:30 «ሄሳ ጊሻስ ኢንቴኖ ኢስራኤሌ ኣሳቶ! ሄሳ ጊሻስ ኢንቴ ኦሶ ኦሶ ማላ ታ ኢንቴ ቦላ ፒርዳና፤ ሃኢ ማሮቴꬃን ጌሊቴ፤ ኢንቴ ናጋራን ꬋዮንታ ማላ ኢንቴ ናጋራ ኡባፌ ሲሚቴ።
EZE 18:31 ኢንቴ ታ ቦላ ኦꬂዳ ቆሆ ኡባ ዎራ ኦሊቴ፤ ኢንቴስ ኦራꬃ ዎዚናይኔ ኦራꬃ ኣያናይ ዴኦ፤ ኢንቴኖ ኢስራኤሌ ኣሳቶ ኣይስ ሃይቄቲ?
EZE 18:32 ኦኒካ ሃይቃናይሳ ታ ኮይኬ ጌስ ኡባ ሃሪዛ ጎዳይ፤ ታኮ ሃ ሲሚዲ ሼምፖራ ፓጻ ዲቴ» ጊዴስ።
EZE 19:1 ጎዳይ፥ «ኢስራኤሌ ዳናታ ጊሻስ ዚላስ ዚላላና ማላ ታስ ዮቲዴስ፤
EZE 19:2 ኢዚካ ታስ፥ « ‹ኔ ኣያ ካሴ ጋሞታ ጊዶን ኣይ ማላ ጋሞ! ዎዳላ ጋሞታ ጊዶን ኢቻዱስ፤ ባ ማራታካ ሄን ዲቻዱስ።
EZE 19:3 ባ ማራታፔ ኢሳ ኢዛ ዲቺን፥ ኢዚ ሚኖ ጋሞ ጊዲዴስ፤ ኢዚ ሻንካቴꬅ ታማርዲ ኣስ ሚዴስ።
EZE 19:4 ካዎቴꬃቲ ኡባይ ኢዛ ሃኖ ሲዪዳ፤ ኢስቲ ቦኪዳ ኦላን ጌሊዲ ኦይኬቲዴስ፤ ኢስቲካ ኢዛ ሲꬌን ዳፎ ኣꬂ ጎቺዲ ጊብጼ ቢታ ኤፊዳ።
EZE 19:5 « ‹ኢዛ ሂዶታ ኦꬂዳይሲ ጫልቃሚዳይሳ፥ ኢዛ ናጊዳይሲ ፖሌቶንታይሳ ቤኢዳ ዎዴ፥ ባ ማራታ ጊዶፌ ናምኣንꬆዛ ዲቻዳ፥ ሚኖ ጋሞ ኬሳዱስ።
EZE 19:6 ኢዚ ጋሞታ ጊዶን ኖቹ ጊዴስ፤ ሚኒ ሚኒካ ቢዴስ፤ ዎꬊ ሙስ ኤሪዲ ኣሳካ ሚዴስ።
EZE 19:7 ኢዚ ኢስታ ሚጻ ሜንꬄሬꬂዴስ፤ ኢስታ ካታማታካ ካይዚሲዴስ፤ ቢታይኔ ቢታን ዲዛ ኣሳይ ኡባይ ኢዛ ጻጎፔ ዴንዲዳይሳን ኮኮሪዳ።
EZE 19:8 ኢዛ ዩሾን ዲዛ ካዎቴꬃቲ ኡባይ ኢዛ ቦላ ዴንዲዳ፤ ባንታ ዴሬ ኡባፌ ኢዛ ቦላ ሺቂዳ፤ ባንታ ጊቴ ኢዛ ኦይካና ዬጊዳ፤ ኢዚ ኢስታ ኦላን ጌሊዲ ኦይኬቲዴስ።
EZE 19:9 ሲꬌን ዳፎ ዬጊዲ ኮꬃ ጊዶን ጌልꬂዳ፤ ባቢሎኔ ካዎኮ ኤፊዳ፤ ናምኣንꬆ ኢዛ ጬንጉርሲ ኢስራኤሌ ዙማታ ቦላ ሴቴቶንታ ማላ፥ ኢስቲ ኢዛ ቃሾ ኬꬅ ጌልꬂዳ።
EZE 19:10 « ‹ኔ ኣያ ሃꬃ ዶናን ቶኬቲዳ ዎይኔ ቱራ ማላ፤ ጎሻ ጋዴን ዳሮ ሃꬂ ዲዛ ጊሻስ፥ ዳዪዳ ኣይፊዳ ዎይኔ ቱራ ሚሳታዱስ።
EZE 19:11 ኢዚ ሃጋቲ ካዎቴꬃስ ቤሲዛ ሚኖ ጉፌታ። ጪፒ ጊዳ ሃይꬃታ ጊዶን፥ ባ ኣዱሳቴꬃኒኔ ባ ጮራ ሃጋታን ሎኣ ቤታዱስ።
EZE 19:12 ጊዶ ኣቲን ሃንቆን ꬎቃሌታዱስ፤ ዱጌ ቢታን ኦሌታዱስ፤ ኣርሼይ ሞኪዛ ባጋ ጫርኮይ ኢዞ ሜሊሲዴስ፤ ኢዛ ኣይፊዳ ኣይፌዛ ቆቆፊዴስ፤ ሚኖ ኢዚ ሃጋቲ ዳጋሚዳ፤ ታማይካ ኢስታ ሚዴስ።
EZE 19:13 ሃኢ ሃꬅ ሳሜቲዳ ሜላ ቢታን ባዞን ቶኬታዱስ።
EZE 19:14 ኢዚስ ዎጋ ሃጋታ ኢሳፌ ታማይ ኬዚዴስ፤ ኢዛ ኣይፊዳ ኣይፌዛ ሚዴስ፤ ካዎቴꬃስ ጊዲዛ ኢሲ ሚኖ ሃጋይካ ኣቲቤና፤ ሃይሲ ዚላሳ፤ ጬጬ ጋላስ ሚላሳስ ጊዳና› ጋ» ጊዴስ።
EZE 20:1 ኑኒ ዲኤቲዳ ላፑንꬃ ላይꬃን፥ ኢቻሻንꬃ ኣጊናን፥ ታማንꬃ ጋላሳን፥ ኢስራኤሌ ጪማታፔ ጉꬃቲ ጎዳ ኦይቻናስ ዪዲ ታ ሲንꬃን ኡቲዳ።
EZE 20:2 ጎዳ ቃላይ ታኮ ዪዲ፥
EZE 20:3 «ሃይሶ ኣሳ ናዉ! ኢስራኤሌ ጪማታስ ኡባ ሃሪዛ ጎዳይ፥ ‹ኢንቴ ታ ቆፋ ኦይቻና ዪዴቲ? ታኒ ዴኦ ጾስ ጊዲዳይሳን ጫቃይስ፤ ኢንቴ ታና ኦይቺዲ ኤራና ማላ ኮይኬ› ጌስ ጋዳ ዮታ» ጊዴስ።
EZE 20:4 ኡባ ሃሪዛ ጎዳይ፥ «ሃይሶ ኣሳ ናዉ! ሃይታንታ ኔ ፒርዳስ ሺሻኔ? ቱማፔ ኔ ኢስታ ፒርዳስ ሺሻኔ? ሃራሲዛ ካሴ ኢስታ ኣዋታ ኦሶዛ ኢስታስ ቆንጪሳ።
EZE 20:5 ኢስታስ፥ ‹ታኒ ኢስራኤሌ ዶሪዳ ዎዴ፥ ያቆቤ ዛሬታስ ታ ኩሼ ዴንꬃዳ ጫቃዲስ፤ ጊብጼ ቢታን ታናቴꬃ ኢስታስ ቆንጪሳዲስ፤ ታ ኩሼካ ዴንꬃ ጫቃዳ ጎዳይ ታኒ ኢንቴ ጾሳ› ጊዴስ።
EZE 20:6 ‹ታኒ ኢስታ ጊብጼ ቢታፌ ኬሳዳ ኡባፌ ሎኦ ጊዲዳ ማꬂኔ ኤሲ ጎጊዛ ቢታ ታ ኢስታስ ጊጊሳ ዎꬂዳ ቢታ ጌልꬃና› ጋዳ ጫቃዲስ።
EZE 20:7 ቃሴ ታኒ ኢስታስ፥ ‹ኢንቴፌ ኢሶይ ኢሶይ ኢንቴ ኣይፌታ ሼምፒሲዳ ቱና ሚስሌታ ዲጊቴ፤ ጊብጼ ኤቃ ጾሳታን ኢንቴና ቱኒሶፒቴ። ጎዳይ ታኒ ኢንቴ ጾሳ› ጋዲስ።
EZE 20:8 «ኢስቲ ኢሶይ ኢሶይ ጊዲኮ ታ ቦላ ማካሊዳ፤ ታ ዮቲዛይሳካ ሲያና ኮዪቤቴና፤ ኢስቲ ባንታ ኣይፌታ ኢስታ ቦላ ዎꬂዳ ቱና ሚስሌታ ዲጊቤቴና፤ ጊብጼ ኤቃ ጾሳታካ ኣጊቤቴና። ሄሳ ጊሻስ ኢስቲ ጊብጼን ዲሺን ታኒ ታ ሃንቆ ኢስታ ቦላ ጉሳና፤ ፖላና ጋካናሼ ኢስታ ቦላ ዬዳናስ ቃቻዲስ።
EZE 20:9 ጊዶ ኣቲን ኢስቲ ካሴ ዲዛ ካዎቴꬃ ጊዶኒኔ ኢስራኤሌ ኣሳ ጊብጼፔ ዎዛናስ ታኒ ቃላ ጌሊዛ ዎዴ ኢስታ ማታን ታ ቆንጪዳ ካዎቴꬃታ ሲንꬃን ታ ሱንꬂ ቱኖንታ ማላ ታ ሱንꬃ ጊሻስ ጌንጫዲስ።
EZE 20:10 «ሄሳ ጊሻስ ታኒ ኢስታ ጊብጼፔ ኬሳዳ ባዞ ኤሃዲስ።
EZE 20:11 ኣሲ ናጊዛኮ ሼምፖራ ፓጻ ዎꬂዛ ማራ ታ ኢስታስ ኢማዲስ፤ ታ ዎጋካ ታ ኢስታ ኤሪሳዲስ።
EZE 20:12 ቃሴ ኢስታ ጌሺዳይ ታና ጎዳ ጊዲዳይሳ ኢስቲ ሄ ዎዴ ኤራና ማላ ታሲኔ ኢስታስ ጊዶን ማላታ ጊዳና ማላ ታ ሳምባታ ኢስታስ ኢማዲስ።
EZE 20:13 «ጊዶ ኣቲን ኢስራኤሌ ኣሳይ ባዞ ቢታን ታ ቦላ ማካሊዳ። ኣሲ ናጊዳኮ ሼምፖራ ፓጻ ዎꬂዛ ታ ዎጋ ናጊቤቴና፤ ታ ማራ ሜንꬂዳ፤ ታ ሳምባታካ ሙሌራ ቱኒሲዳ። ሂስቲን ታኒ ታ ሃንቆ ኢስታ ቦላ ጉሳዳ ባዞ ቢታን ኢስታ ꬋይሳናስ ቃቻዲስ።
EZE 20:14 ጊዶ ኣቲን ታኒ ኢስታ ጊብጼፔ ኬሲሺን ቤኢዳ ካዎቴꬃታ ሲንꬃን ታ ሱንꬂ ቱኖንታ ማላ ታ ሱንꬃ ጊሻስ ጌንጫዲስ።
EZE 20:15 ቃሴ ታኒ ኢስታ ኡባፌ ሎኦ ጊዲዳ ማꬂኔ ኤሲ ጎጊዛ ቢታ ታ ኢስታስ ኢሚዳ ቢታ ታ ኢስታ ጌልꬂኬ ጋዳ ታ ኩሼ ዴንꬃዳ ባዞ ቢታን ኢስታ ሲንꬃን ጫቃዲስ።
EZE 20:16 ጋሶይካ ኢስቲ ታ ዎጋ ሜንꬂዳ፤ ታ ኢስታስ ኢሚዳ ማራካ ናጊቤቴና፤ ታ ሳምባታካ ቱኒሲዳ፤ ኢስታ ዎዚናይ ኢስታ ኤቃ ጾሳታራ ኦይኬቲዴስ።
EZE 20:17 ታኒ ጊዲኮ ኢስታ ቃꬌታን ጼላዲስ ኣቲን ባዞ ቢታን ኢስታ ሙሌራ ꬋይሳቤኬ።
EZE 20:18 ባዞ ቢታን ኢስታ ናይታስ፥ ‹ካሴ ኢንቴ ኣዋታ ማራ ካሎፍቴ፤ ኢስታ ዎጋካ ናጎፒቴ፤ ኢንቴና ኢስታ ኤቃ ጾሳታን ቱኒሶፒቴ።
EZE 20:19 ጎዳይ ታኒ ኢንቴ ጾሳ። ታ ማራ ካሊቴ፤ ታ ዎጋ ናጋናስ ሚኒቴ።
EZE 20:20 ታሲኔ ኢንቴስ ጊዶን ማላታ ጊዳና ማላ ታ ሳምባታ ኢንቴስ ዱማ ጋላስ ሂስቲቴ፤ ጎዳይ ታኒ ኢንቴ ጾስ ጊዲዳይሳ ኢንቴ ሄ ዎዴ ኤራና› ጋዲስ።
EZE 20:21 «ኢስታ ናይቲ ታ ቦላ ማካሊዳ፤ ኣሲ ናጊዲ ሼምፖራ ፓጻ ዳና ማላ ታ ኢሚዳ ማራ ካሊቤቴና፤ ታ ዎጋ ሚኒ ናጊቤቴና፤ ታ ሳምባታካ ቱኒሲዳ። ሂስቲን ታኒ ታ ሃንቆ ባዞን ኢስታ ቦላ ጉሳዲስ፤ ታ ሃንቆይ ፖሌታና ጋካናስ ኢስታ ቦላ ኤሃናስ ቃቻዲስ።
EZE 20:22 ጊዶ ኣቲን ታኒ ኢስታ ጊብጼፔ ኬሲሺን ቤኢዳ ካዎቴꬃታ ሲንꬃን ታ ሱንꬂ ቱኖንታ ማላ ታ ኩሼ ሺሻዲስ።
EZE 20:23 ቃሴካ ታኒ ኢስታ ካዎቴꬃታ ጊዶን ላላናይሳኔ ዱማ ዱማ ዴሬታ ጊዶ ꬋርጫናይሳ ባዞ ቢታን ታ ኩሼ ዴንꬃዳ ኢስታ ሲንꬃን ጫቃዲስ።
EZE 20:24 ጋሶይካ ኢስቲ ማራ ካꬊዳ፤ ታ ዎጋ ናጊቤቴና፤ ታ ሳምባታ ቱኒሲዳ፤ ኢስታ ኣይፌይ ኢስታ ኣዋታ ኤቃ ጾሳታራ ሺዲዴስ።
EZE 20:25 ሄሳ ጊሻስ ታኒ ኢስታ ሎኦ ጊዶንታ ማራሲኔ ኢስታ ሼምፖራ ፓጻ ዎꬆንታ ዎጋስ ኣꬃ ኢማዲስ።
EZE 20:26 ኢስታ ባይራ ናይታ ታማን ጹጊ ያርሺዲ ቱናና ማላ ኦꬃዲስ፤ ታ ሄሳ ኦꬂዳይ ኢስቲ ዳጋሚዲ ታኒ ጎዳ ጊዲዳይሳ ኤራና ማላሳ።
EZE 20:27 «ሄሳ ጊሻስ ኣሳ ናዉ! ኢስራኤሌ ኣሳስ ኡባ ሃሪዛ ጎዳይ፥ ‹ኢንቴ ኣዋቲ ታናን ኣማኔቶንታ ኣጊዲ ሃይሳን ታና ጫዪዳ።
EZE 20:28 ታኒ ኢስታስ ኢማና ጫቂዳ ቢታ ኢስታ ኤሃ ጌልꬂዳ ዎዴ ꬎቁ ጊዳ ዙምቡላታ ኡባኔ ጪሊሎ ሚꬅ ኡባታ ቤኢዳ፤ ሄን ባንታ ያርሾ ያርሺዳ፤ ባንታ ካꬃ ያርሾ ሺሺዲ፥ ሳዎ ቱኑ ጊዛ ኤጻኔ ጩዋሲዲ፥ ኡሻ ያርሾካ ሺሺዲ ታ ሃንቆ ዴንꬄꬂዳ› ጌስ።
EZE 20:29 ታኒካ፥ ‹ኢንቴ ቢዛ ꬎቃሶሆዚ ኢዚ ኣዜ?› ጋዲስ። ሃች ጋካናስ ኢዛ ሱንꬃይ ባማ ጌቴቲ ጼይጌቴስ፤ ኢዛስ ቢርሼꬃይ ጎይኒዛ ꬎቃሶሆታ ጉሳ» ጌስ።
EZE 20:30 ሄሳ ጊሻስ፥ «ኡባ ሃሪዛ ጎዳይ ኢስራኤሌ ኣሳስ፥ ‹ኢንቴ ኣዋቲ ኦꬂዳ ማላ ኢንቴኒካ ኢንቴናቴꬃ ቱኒሴቲ? ቱኒዳ ኢስታ ኤቃ ሚስሌታ ኣሞቴꬃን ኣይስ ጹጌቴቲ?
EZE 20:31 ኢንቴ ያርሾ ሺሺዛ ዎዴ ኡባን ኢንቴ ናይታ ታማን ጹጊ ያርሺሼ ኤቃ ጾሳታን ሃች ጋካናስ ቱኒሼ ዴታ፤ ኢንቴኖ ኢስራኤሌ ኣሳቶ! ኢንቴ ታ ቆፋ ኦይቻና ማላ ታ ኢንቴስ ኤሮ ጎ? ታኒ ዴኦ ጾስ ጊዲዳይሳን ታናን ጫቃይስ፤ ኢንቴ ታና ኦይቻና ማላ ታ ኢንቴስ ኤኖ ጊኬ› ጌስ» ጋዳ ዮታ።
EZE 20:32 ኡባ ሃሪዛ ጎዳይ፥ «ኢንቴ፥ ‹ኑኒ ሚꬃሲኔ ሹቻስ ጎይኒዛ ካዎቴꬃ ማላኔ ኣላሜ ቦላ ዲዛ ዴራ ማላ ጊዳና ኮዮስ› ጊዲ ቆፔታ። ጊዶ ኣቲን ኢንቴ ቆፋይ ሙሌካ ኢንቴስ ሃኔና።
EZE 20:33 «ኡባ ሃሪዛ ጎዳይ፥ ‹ታኒ ዴኦ ጾስ ጊዲዳይሳን ታናን ጫቃይስ› ታኒ ታ ሚኖ ቄሴኒኔ ሚጬቲዳ ታ ኩሼን ሃንቆ ጉሳሼ ታ ኢንቴ ቦላ ካዎታና።
EZE 20:34 ካዎቴꬃታ ጊዶፌ ታኒ ኢንቴና ኬሳና፤ ኢንቴ ላሌቲዳ ቢታ ኡባፌ ታ ሚኖ ቄሴኒኔ ሚጬቲዳ ታ ኩሼን ሃንቆ ጉሳሼ ኢንቴ ላሌቲ ቢዳ ዴሬ ኡባፌ ታ ኢንቴና ሺሻና።
EZE 20:35 ታኒ ኢንቴና ካዎቴꬃታስ ዲዛ ባዞ ቢታ ኤሃና፤ ሂስታዳ ሄን ታ ኢንቴና ቆንጬን ፒርዳና።
EZE 20:36 ጊብጼ ባዞን ኢንቴ ኣዋታ ካሴ ታ ፒርዲዳ ማላ ኢንቴናካ ታ ፒርዳና ጌስ ኡባ ሃሪዛ ጎዳይ።
EZE 20:37 ታኒ ኢንቴና ታ ካዎቴꬃ ጉፌ ጋርሳራ ኣꬃና፤ ታ ጫቆ ቃላራካ ኢንቴና ጋꬃ ኦይሴꬃና
EZE 20:38 ታ ቦላ ማካሊዳይታኔ ታና ቆሂዳይታ ታኒ ኢንቴ ጊዶፌ ዲጋና፤ ሃኢ ኢስቲ ዲዛ ቢታፌካ ታ ኢስታ ኬሳና፤ ጊዶ ኣቲን ኢስቲ ኢስራኤሌ ቢታ ጌሌቴና። ታኒ ጎዳ ጊዲዳይሳ ኢንቴ ሄ ዎዴ ኤራና» ጌስ።
EZE 20:39 ኢስራኤሌ ኣሳቶ! ኡባ ሃሪዛ ጎዳይ ኢንቴና፥ «ኢንቴ ሃኢ ታኒ ዮቲዛይሳ ሲዮንታ ኢጺኮ ቢዲ ኡባይካ ኢንቴ ኤቃ ጾሳስ ጎይኒቴ! ጊዶ ኣቲን ኢንቴ ሃይሳፌ ጉዬ ዛሪዲ ኢንቴ ያርሾኒኔ ኢንቴ ኤቃ ጾሳታን ታ ጌሻ ሱንꬃ ቱኒሴኬታ።
EZE 20:40 ታ ጌሻ ዙማ ቦላ፥ ꬎቁ ጊዳ ኢስራኤሌ ዙማ ቦላ ሄን ኢስራኤሌ ኣሳይ ኡባይ ታስ ኡባ ሃሪዛ ጎዳስ ጎይናና። ታኒካ ሄን ኢንቴና ሞካ ኤካና፤ ኢንቴ ካꬃ ያርሾ፥ ኢንቴ ባይራ ኢሞታኔ ጌዪዳ ኢንቴ ያርሾታ ኡባ ታኒ ሄን ኮያይስ።
EZE 20:41 ኢንቴ ላሌቲ ዲዛ ካዎቴꬃ ጊዶፌ ታኒ ኢንቴና ኤሂዛ ዎዴኔ ሃራ ቢታታፔ ታኒ ኢንቴና ሺሺዛ ዎዴ፥ ሳዎ ቶንጉ ጊዛ ያርሾ ኤኪዛ ማላ ታኒ ኢንቴና ኤካና። ታኒ ኢንቴ ጊዶን ጌሽ ጊዲዳይሳ ካዎቴꬃታ ሲንꬃን ቆንጪሳና።
EZE 20:42 ታኒ ካሴ ኢንቴ ኣዋታስ ኢማናስ ታ ኩሼ ዴንꬃ ጫቂዳ ኢስራኤሌ ቢታ ኢንቴና ዛራ ጌልꬂዛ ዎዴ ታኒ ጎዳ ጊዲዳይሳ ኢንቴ ሄ ዎዴ ኤራና።
EZE 20:43 ሄን ኢንቴ ኢንቴ ኦጌኔ ኢንቴናቴꬃ ቱኒሲዳ ኦሶታ ኡባ ኢንቴ ኣኬካና፤ ኢንቴ ፖሊዳ ኢታ ኦሶ ኡባን ኢንቴርካ ኢንቴና ሃራሴታና።
EZE 20:44 ኢንቴኖ ኢስራኤሌ ኣሳቶ! ኢንቴ ኢታ ኦጌኔ ኢንቴ ኢታ ኦሶ ማላ ጊዶንታ ታ ሱንꬃ ጊሻስ ጋዳ ታ ኢንቴና ዎቺዛ ዎዴ ኡባ ሃሪዛ ጎዳይ ታኒ ጾስ ጊዲዳይሳ ኢንቴ ኤራና» ጌስ።
EZE 20:45 ጎዳ ቃላይ ታኮ ዪዲ፥
EZE 20:46 «ሃይሶ ኣሳ ናዉ! ዱጌሃ ባጋ ሲማዳ ጼላ፤ ዱጌሃ ባጋ ዴራ ቦላ ዮታ፤ ዱጌሃ ባጋን ዲዛ ዎራ ቦላ ቲንቢቴ ዮታ።
EZE 20:47 ዱጌሃ ባጋ ዎራስ፥ ‹ጎዳ ቃላ ሲያ!› ጋ፤ ኡባ ሃሪዛ ጎዳይ፥ ‹ታኒ ኔ ቦላ ታማ ኦይꬃና፤ ታማዚካ ጪሊላኔ ሜላ ሚꬅ ኡባ ማና፤ ፖፖልኡ ጊዛ ላጮዚ ቶኤና፤ ዱጌሃፔ ቢዲ ፑዴሃ ጋካናስ ዲዛ ኣሳ ኣይፌሶ ኡባ ላባና።
EZE 20:48 ታኒ ጎዳይ ሄሳ ኦይሴꬂዳይሳ ኣሲ ኡባይ ቤኣና፤ ሄ ታማይካ ቶኤና› ጌስ» ጊዴስ።
EZE 20:49 ታኒካ ዛራዳ፥ «ኡባ ሃሪዛ ጎዳዉ! ኣዬ ኣና! ኢስቲ ታ ጊሻስ ኡባ ጋላስ፥ ‹ኢዚ ሌሚሶ ጻላ ዮቴስ› ጌቴስ» ጋዲስ።
EZE 21:1 ጎዳ ቃላይ ታኮ ዪዲ፥
EZE 21:2 «ሃይሶ ኣሳ ናዉ! ኔ ኣይፌሶ ጌዴ ዬሩሳላሜኮ ዛራ፤ ጾሳ ኬꬃ ቦላ ቃላ ዮታ፤ ኢስራኤሌ ቢታ ቦላ ቲንቢቴ ዮታ።
EZE 21:3 ኢስታስ ጎዳይ፥ ‹ታ ኔ ቦላ ዴንዳዲስ፤ ታኒ ታ ማሻ ኮሆፔ ሾዳዳ ጺሎ ኣሳኔ ኢታ ኣሳ ኔ ጊዶፌ ዲጋና።
EZE 21:4 ጺሎኔ ዎርዶ ꬋይሳና ታ ማሻይ ዱጌሃፔ ፑዴሃ ጋካናስ ዲዛ ዴራ ኡባ ቦላ ኮሆፔ ሾዴታና።
EZE 21:5 ታኒ ጎዳይ ታ ማሻ ኮሆዛፔ ሾዲዳይሳኔ ዛራዳ ጉዬ ኮሆን ጉዬ ጌልꬆንታይሳ ኣሲ ኡባይ ኤራና።›
EZE 21:6 «ሄሳ ጊሻስ ሃይሶ ኣሳ ናዉ! ሜቂዳ ዎዚናን ጫሞ ኦሌ ኦላ።
EZE 21:7 ኢስቲ ኔና፥ ‹ኣይስ ኦላይ?› ጊ ኦይቺኮ፥ ኔኒ፥ ‹ሲንꬃራ ዪዛ ኢታ ዎሬ ጊሻስ ኦላይስ፤ ዎዚና ኡባይ ታሃና፤ ኩሼ ኡባይ ዶጫና፤ ሼምፖ ኡባይ ፖꬉ ጋና፤ ጉልባቴ ኡባይ ሃጻና› ጋ ዮታ። ኡባ ሃሪዛ ጎዳይ፥ ‹ቤኢቴ ሄሲ ያናኔ ፖሌታና› ጌስ» ጊዴስ።
EZE 21:8 ጎዳ ቃላይ ታኮ ዪዲ፥
EZE 21:9 «ሃይሶ ኣሳ ናዉ! ቲንቢቴ ዮታ፤ ጎዳይ፥ ‹ማሻ! ማሻ፥ ሌፌቲዳኔ ቁጬቲዳ ማሻ!
EZE 21:10 ሌፌቲዳይ ሲፋናስ፥ ቁጬቲዳይ ዎልቃንꬃ ማላ ጶላናሳ። ሂስቲን ሄሲ ኑና ዋኒ ኡፋይሳና ዳንዳይዜ? ኢዛ ማሻዚ ታ ናዛ ካዎቴꬃ ጉፌ ጮ ጉፌ ማላ ካꬊዴስ።
EZE 21:11 ኩሼን ኦይካና ማላ ማሻይ ቁጬቲዲ ኢሜቲዴስ፤ ዎꬊዛይሲ ኩሼን ኦይካናስ ማሻይ ሌፌቲዲ ኢሜቲዴስ።
EZE 21:12 ሃይሶ ኣሳ ናዉ! ሃይሲ ታ ዴሬ ቦላ ኢስራኤሌ ዳናታ ኡባ ቦላ ዪዴስ፤ ሄሳ ጊሻስ ዬሆኔ ዋሶ ሲሳ፤ ኢስቲ ታ ዴሬዛራ ኢሲፌ ማሻስ ኢሜቲዳ፤ ሄሳስ ኔ ጊሻስ ኔ ቲራ ኢጫ።
EZE 21:13 ቱማፔ ፓጬይ ያና፤ ኢዛ ማሻይ ካꬊዳ ካዎቴꬃ ጉፌዛስ ዉርሴꬂ ባይንዳ ኣጊኮ ዋናኔ?› ጌስ።
EZE 21:14 «ሃኢካ ኣሳ ናዉ! ቲንቢቴ ዮታ፤ ኔ ኩሼካ ባቃ። ማሻይ ናምኡቶ ዎይኮ ሄꬑቶ ሾጮ፤ ሄሲካ ኬሂ ዎꬊዛ፥ ሲፊዛኔ ኡባሶራ ኢስታ ዶዲ ኦይኪዳ ማሻ።
EZE 21:15 ዎዚና ኡባይ ታሃና ማላ፥ ኩንዲዛይቲ ዳራና ማላ፥ ታኒ ኢስታ ፔንጌታ ኡባን ፖፖልኡ ጊዛ ማሻ ዎꬃዲስ። ኣዬ ኣና፥ ፖፖልኡ ጋና ማላ ቁጬቲዴስ፤ ሲፋናስካ ኮሆፔ ሾዴቲዴስ።
EZE 21:16 ሃይሶ ማሻዞ! ኔ ቃራቲዳ ባጋራ ሃዲርሲኔ ኡሻች ቃንጻ።
EZE 21:17 ታኒካ ታ ኩሼ ባቃና፤ ታ ሃንቆይካ ኢርጻና ጋዲስ ታኒ ጎዳይ» ጊዴስ።
EZE 21:18 ጎዳ ቃላይ ታኮ ዪዲ፥
EZE 21:19 «ሃይሶ ኣሳ ናዉ! ባቢሎኔ ካዎዛ ማሻይ ዪዛ ናምኡ ኦጌታን ማላታ ቱስ ኤሳ። ናምኡ ኦጌቲካ ኢሲ ዴሬፔ ዶሜቴስ። ካታማ ኤፊዛ ኦጌቲ ሻኬቲዛሶን ማላታ ቱስ ኤሳ።
EZE 21:20 ኣሞኔታ ካታማ ኤራባ ቢዛ ማሻስ ኢሲ ኦጌዛን ማላታ ቱስ ኤሳ፤ ቃሴ ዩሁዳኔ ጊምቤቲዳ ዬሩሳላሜ ካታማ ቢዛ ማሻስ ናምኣንꬆ ኦጌዛን ማላታ ቱስ ኤሳ።
EZE 21:21 ባቢሎኔ ካዎዚ ባ ባናሶ ማሮꬂ ዴማናስ ዳጋላ ኦጌታን ኤቃና፤ ባ ዎንዳፌታ ቃሴꬂዲ ሳማ ዬጋና፤ ባ ኤቃ ጾሳታካ ዞሬ ኦይቻና፤ ቲሬ ሚጪ ጼላና።
EZE 21:22 ኢዚ ቢዲ ጊምቤ ፔንጌ ላሊዛ ዱሩማታ ኤሃና ማላ፥ ዎꬋናስ ኣዛዛና ማላ፥ ጬቄቴꬅ ሲሳና ማላ፥ ጊምቤ ፔንጌዛ ላሊዛ ዱሩማታ ካታማታ ፔንጌን ኤሳና ማላ፥ ቢታ ሺሺ ዶራና ማላኔ ሚጻታ ጊጊሳና ማላ ዬሩሳላሜ ሳማይ ኢዛስ ኡሻቻ ኩሼን ኬዚዴስ።
EZE 21:23 ሄሲካ ኢዛራ ጫቄቲዳ ኣሳታስ ባላ ካሌꬆ ሚሳቲዴስ። ኢዚ ጊዲኮ ኢስታ ቆሆ ኢስታ ቆፍሳና፤ ኢስቲ ዲኢ ኤኪዲካ ባና።
EZE 21:24 «ሄሳ ጊሻስ ኡባ ሃሪዛ ጎዳይ፥ ‹ኢንቴ ኦꬂዳ ሚሽ ኡባን ኢንቴ ቆንጬራ ናጋራ ኦꬂዲ ኢንቴ ቆሆዛ ኢንቴ ቆፍሲዳ ጊሻሲኔ ሄሳꬆካ ኢንቴ ኦꬂዳ ጊሻስ ኢንቴ ዲኤቲ ባና።
EZE 21:25 « ‹ሃይሶ ጌኔኔ ቱና ጊዲዳ ኢስራኤሌ ዳናዞ! ኔ ቃጻዬቲዛ ዎዴይ ጋኪዴስ› ጌስ፤ ቱናኒኔ ኢታቴꬃን ኩሚዳ ኢስራኤሌ ዳናዞ፥
EZE 21:26 ኡባ ሃሪዛ ጎዳይ፥ ‹ኔ ሁኤን ዲዛ ጎሳ ቢርሻ፤ ኔ ካላቻ ዴንꬃ። ሃይሳፌ ጉዬ ካሴይሳ ማላ ሃኔና፤ ዚቂ ጊዳይ ꬎቁ ጋና፤ ꬎቁ ጊዳይካ ዚቂ ጋና።
EZE 21:27 ቡላሳና! ቡላሳና! ኣዋቴꬂ ቤሲዛዴይ ያና ጋካናስ ኢዛ ቤኒ ማላ ሃኑኩ፤ ታ ኢዛስ ኢዞ ኣꬃ ኢማና› ጌስ።
EZE 21:28 «ሃይሶ ኣሳ ናዉ! ኡባ ሃሪዛ ጎዳይ ኔና ኣሞኔታ ጊሻሲኔ ኢስታ ጫሻ ጊሻስ፥ ‹ማሻ! ማሻ! ዎꬋናስ ሾዴቲዳ ꬋይሳናስ ቁጬቲዳ፥ ዎልቃንꬃ ማላ ፖፖልኡ ጋና ቁጬቲዳ ማሻ።
EZE 21:29 ኔ ጊሻስ ቤኢዳ ዎርዶ ኣጁታይ፥ ኔስ ዮቴቲዳ ሙሬኖይ ዲኮካ፥ ኢስታስ ጌኔ ጹኣይ ኩሚሺን፥ ኢስታ ባሬይ ጋኪሺን ሲፌታና ቤሲዛ ኢታታ ቆꬌ ቦላ ዎꬋና።
EZE 21:30 ማሻ ኮሆዛን ዛራ፤ ኔ ሜꬌቲዳ ቢታን፥ ኔ ዬሌቲዳ ዴሬን ሄን ታ ኔ ቦላ ፒርዳና።
EZE 21:31 ታኒ ታ ሃንቆ ኔ ቦላ ጉሳና፤ ታኒ ታ ሃንቆ ታማ ኔ ቦላ ኤꬃና፤ ኢታቴꬃን ኤሬቲዳ ሜንጼ ኢታ ኣሳታስ ታ ኔና ኣꬃ ኢማና።
EZE 21:32 ኔኒ ኤሶ ሚꬅ ጊዳና፤ ኔ ዴሬን ኔ ሱꬂ ጉካና፤ ሃይሳፌ ጉዬ ኔና ቆፍሲዛ ሚሺ ዴና፤ ታኒ ጎዳይ ሃይሳ ዮታዲስ› ጌስ» ጊዴስ።
EZE 22:1 ጎዳ ቃላይ ታኮ ዪዲ፥
EZE 22:2 «ሃይሶ ኣሳ ናዉ! ኔ ኢዚ ቦላ ፒርዲኪ? ሃኖ ሱꬅ ጉሲዛ ካታማይ ቦላ ፒርዲኪ? ሃራሲዛ ኢዚ ኦሶዛ ኢዚስ ቆንጬን ዮታ።
EZE 22:3 ኡባ ሃሪዛ ጎዳይ ኢዚስ፥ ‹ሃኔ ኔ ጊዶን ሼምፖ ዎꬎኒኔ ኤቃ ጾሳታ ጊጊሶን ኔና ቱኒሲዳሬ! ኔ ቦላ ፒርዳ ኤሶሲዛ ካታማዬ!
EZE 22:4 ኔኒ ጉሲዳ ሱꬃን ቆሃዳሳ፤ ኔ ጊግሲዳ ኤቃ ጾሳን ቱናዳሳ። ሄ ጋሶን ኔ ባሬ ማቲሳዳሳ፤ ኔ ላይꬂካ ቃንꬃዳሳ፤ ታ ኔና ካዎቴꬃታስ ቂꬌስ፥ ዴሬ ኡባስ ናቻስ ኬሳና።
EZE 22:5 ሃኔ ካዉሺኔ ሺሮይ ኔናን ኩሚዳሬ! ማታኒኔ ሃኮን ዲዛይቲ ኔና ቂꬋና።
EZE 22:6 « ‹ቤኣ፥ ኔ ጊዶን ዲዛ ኢስራኤሌ ዳናቲ ኢሶይ ኢሶይ ሱꬅ ጉሳናስ ባ ማታን ጎኤቴቴስ።
EZE 22:7 ኣዋቲኔ ኣዬቲ ኔ ጊዶን ካዉዪዳ፤ ቤቴ ኣሳቲ ኡንኤቲዳ፤ ዪኦቲኔ ኣምኤቲ ቱጋ ቤኢዳ።
EZE 22:8 ጌሻ ሚሻታ ታይታ ካዉሻዳሳ፤ ታ ሳምባታታካ ቱኒሳዳሳ።
EZE 22:9 ሼምፖ ዎꬋናስ ፓፑንꬅ ጋꬂዛይቲ ኔ ጊዶን ዴቴስ፤ ዙምቡላታ ቦላ ዲዛ ኤቃ ጾሳታስ ያርሼቲዳይሳ ሚዛይቲኔ ላይማቲዛይቲ ኔ ጊዶን ዴቴስ።
EZE 22:10 ባ ኣዋ ማቼይራ ዚንኢዛይቲ ኔ ጊዶን ዴቴስ፤ ማጫሳ ዎጋይ ዪዛ ዎዴ ዎጋ ማላ ጌዮንታ ዲዛ ኣጊናታን ማጫሳታ ዎልቃን ኦይኪዛይቲ ኔ ጊዶን ዴቴስ።
EZE 22:11 ኔ ጊዶን ኢሶይ ባ ላጌዛ ማቼይራ ላይማቴስ፤ ሃራይ ባ ናዛ ማቾ ቱኒሴስ፤ ሃራይ ቃሴ ባ ኣዋ ናኤይራ ዎልቃን ዚንኤስ።
EZE 22:12 ኔ ጊዶን ዲዛ ኣሳቲ ሱꬅ ጉሳናስ ማጋንጾ ኤኬቴስ፤ ኔኒካ ዬሎኔ ቡቴ ዳሮ ዲች ኤካዳ ኔ ላጌዛፔ ቤሶንታ ዎꬌ ቦንቃሳ፤ ታናካ ባሌታዳሳ› ጌስ ኡባ ሃሪዛ ጎዳይ።
EZE 22:13 « ‹ኔኒ ኔስ ቤሶንታ ኤኪዳ ጎኣ ቦላኔ ኔኒ ጉሲዳ ሱꬃ ቦላ ታኒ ታ ኩሼ ባቃና።
EZE 22:14 ታኒ ኔና ቃጻዪዛ ጋላስ ኔ ዎዚናን ኔ ሙርታ ኤቃኔ? ዎይኮ ኔ ኩሼይ ሄ ዎዴ ሚናና ዳንዳይዜ? ታኒ ጎዳይ ሃይሳ ዮታዲስ፤ ኢዛካ ታኒ ኦꬃና።
EZE 22:15 ታኒ ኔና ካዎቴꬃታ ጊዶን ላላና፤ ዴሬ ኡባ ጊዶንካ ላላና፤ ኔ ቱናቴꬃካ ታኒ ኔ ቦላፌ ጌሻና።
EZE 22:16 ካዎቴꬃታ ጊዶን ቱናዳ ታኒ ጎዳ ጊዲዳይሳ ሄ ዎዴ ኔኒ ኤራና› » ጊዴስ።
EZE 22:17 ጎዳ ቃላይ ታኮ ዪዲ፥
EZE 22:18 «ሃይሶ ኣሳ ናዉ! ኢስራኤሌ ኬꬃይ ቢራታ ሺኣ ማላ ጊዲዴስ፤ ኢስቲ ኡባይካ ታማ ጊዶን ሴሪ ኣቲዛ ጻርቂማላ፥ ቆርቆሮ፥ ቢራታኔ ኢርሳሴ ሺኣ ማላ።
EZE 22:19 ሄሳ ጊሻስ ኡባ ሃሪዛ ጎዳይ፥ ‹ኢንቴ ኡባይካ ቢራታ ሺኣ ማላ ጊዲዳ ጊሻስ ታኒ ኢንቴና ዬሩሳላሜ ሺሻና።
EZE 22:20 ኣሳይ ቢራ፥ ጻርቂማላ፥ ቢራታ፥ ኢርሳሴኔ ቆርቆሮ ሴሪሳናስ ታማን ዬጊ ዎምፒናን ፑኒዛ ማላ፥ ታኒካ ታ ሃንቆኒኔ ታ ቦሻን ኢንቴና ካታማይ ጊዶ ሺሻዳ ሄን ታ ኢንቴና ሴሪሳና።
EZE 22:21 ታኒ ኢንቴና ሺሻዳ ታ ሃንቆ ታማ ኢንቴ ቦላ ታ ፔኖን ኤꬃና፤ ኢንቴካ ሄን ሴሪ ኣታና።
EZE 22:22 ቢራይ ታማ ጮጬን ሴሪዛ ማላ ኢንቴካ ካታማይ ጊዶን ሴራና። ታኒ ጎዳይ ታ ሃንቆ ኢንቴ ቦላ ጉሲዳይሳ ሄ ዎዴ ኢንቴ ኤራና› ጌስ» ጊዴስ።
EZE 22:23 ጎዳ ቃላይ ታኮ ዪዲ፥
EZE 22:24 «ሃይሶ ኣሳ ናዉ! ‹ሃኔ ኔኒ፤ ሃንቆ ጋላሲካ ኢራ ዴሞንታ ቢታ› ጋ ዮታ።
EZE 22:25 ኢዚ ዳናቲ ባ ዎꬊዳይሳ ፑዚሼ ጻጊዛ ጋሞ ማላ ኢዚ ጊዶን ዱላቴቴስ፤ ዴራ ዎꬌቴስ፤ ኢስታ ኣቆታኔ ኢስታስ ዲዛ ኣልኦ ሚሻታ ቦንቂ ኤኬቴስ፤ ዳሮ ማጫሳታ ኣምኤታ ሂስቴቴስ።
EZE 22:26 ኢዚ ቄሴቲ ታ ዎጋ ቦላ ማካሌቴስ፤ ታ ጌሻ ሚሻታካ ቱኒሴቴስ። ኢስቲ ጌዪዳይሳ ቱናፔ ሻኬቴና፤ ጌሺኔ ጌሽ ጊዶንታይሳ ሻኪ ታማርሴቴና፤ ታ ሳምባታታ ዬጊ ኣጊዳ፤ ሄሳ ጋሶን ታ ኢስታ ጊዶን ካꬌታዲስ።
EZE 22:27 ኢዚ ጊዶን ዲዛ ጊታ ኣሳቲ ሃይቂዳይሳ ፑዚዛ ካና ሱይቴ ማላ፤ ኢስቲ ቤሶንታ ዱሬቴꬅ ሺሻናስ ሱꬅ ጉሴቴስ።
EZE 22:28 ኢዚ ናቤቲ ጎዳ ኣኖን ቲዪዛ ማላ ዎርዶ ኣጁታኒኔ ሙሬኖን ኢስታስ ቡሪ ሺሼቴስ፤ ኢስታስ ጎዳይ ዮቶንታ ዲሺን፥ ‹ኡባ ሃሪዛ ጎዳይ ሃይሳ ማላ ጌስ› ጌቴስ።
EZE 22:29 ሄ ቢታን ዲዛ ኣሳይ ቦንቄቴስ፤ ቦጌቴስ፤ ፒርዳ ጌላሲዲ ሂዬሳኔ ሜቶታንቻታ ኡንኤꬄቴስ፤ ቤቴ ኣሳካ ቆሄቴስ።
EZE 22:30 «ታኒ ቢታዮ ꬋይሶንታ ማላ ዲርሳ ዲሪዛዴ፥ ላሌቲዳ ባጋራ ታ ሲንꬃን ኢዚ ጊሻስ ኤቂዛዴ ኢንቴ ጊዶፌ ታ ኮያዲስ፤ ጊዶ ኣቲን ኢሳዴካ ዴማቤኬ።
EZE 22:31 ሄሳ ጊሻስ ታ ሃንቆ ታ ኢስታ ቦላ ጉሳና፤ ታ ዎልቃማ ሃንቆዛን ታ ኢስታ ጹጋና፤ ኢስቲ ኦꬂዳይሳ ታ ጌዴ ኢስታ ቦላ ዛራና ጌስ ኡባ ሃሪዛ ጎዳይ» ጊዴስ።
EZE 23:1 ጎዳ ቃላይ ታኮ ዪዲ፥
EZE 23:2 «ሃይሶ ኣሳ ናዉ! ኢሲ ኣይፔ ዬሌቲዳ ናምኡ ማጫቲ ዴቴስ።
EZE 23:3 ኢስቲ ቡሮ ናቴꬃን ዲሼ ጊብጼ ቢታን ላይማቴꬅ ዶሚዳ፤ ሄን ኢስቲ ዲሺን ꬋንꬂ ቲራን ኡቲዴስ፤ ኣዴ ናይቲ ኢዛን ካኢዳ፤ ኢስታ ጌላኦቴꬃይካ ኤኬቲዴስ።
EZE 23:4 ኢስታፌ ባይራይ ሱንꬃይ ኦሆሎ፤ ካሎይ ሱንꬂ ኦሆሊቦ። ኢስታ ናምኣካ ታ ኤኪን ታስ ማጫ ናይታኔ ኣቱማ ናይታ ዬሊዳ። ኦሆላ ሳማሪያ፥ ኦሆሊባ ዬሩሳላሜ ቆንጪሴቴስ።
EZE 23:5 «ኦሆላ ታስ ማቾ ጊዳ ኡታዳ ሃራራ ላይማታዱስ፤ ኦላንቻ ጊዲዳ ባ ሲቆ ኣሶሬታራ ላጌꬃናስ ኣሞታዱስ።
EZE 23:6 ኢስቲ ኦቻ ቴራ ሚሳቲዛ ማይኦ ማይኢዳ ዴሬ ኣይሲዛይታኔ ኣዛዚዛይታ፤ ኢስቲ ኡባቲካ ማላ ሎኦ፥ ናቴꬂኔ ፒላታ ቶጋንቻታ።
EZE 23:7 ኢዛ ባናቴꬃ ላይማቴꬃስ ዶሬቲዳ ኣሶሬ ኣሳስ ኣꬃ ኢማዱስ። ኢዚራ ላይማቲዳ ኣሳታ ኤቃ ጾሳታ ኡባን ቱናዱስ።
EZE 23:8 ኢዛ ጊብጼን ዶሚዳ ላይማቴꬃ ኣጋቤኩ፤ ሄን ኢዚ ዬላጋቴꬃ ዎዴ ኣቱማሳቲ ኢዚራ ዚንኢዳ፤ ኢዚ ጌላኦቴꬃ ꬋንꬃ ጎርፔሬꬂዳ፤ ባ ኣሞቲዳ ኣሞቴꬃ ኢዚ ቦላ ፖሊዳ።
EZE 23:9 «ሄሳ ጊሻስ ኢዚራ ኢሲፌ ላይማታና ኣሞቲዳ ኣሶሬ ላጌꬆታስ ታኒ ኢዞ ኣꬃ ኢማዲስ።
EZE 23:10 ኢስቲ ኢዞ ቃሪዲ ካሎ ኣሺዳ፤ ኢዚ ኣቱማ ናይታኔ ማጫ ናይታ ኢዚፔ ቦንቂዳ፤ ኢዞካ ማሻን ሲፊዳ፤ ኢዛካ ማጫሳታ ማታን ሃይሲኤስ ኣታዱስ፤ ፒርዳይ ኢዚ ቦላ ፒርዴቲዴስ።
EZE 23:11 «ኢዚ ሚቺያ ኦሆሊባይ ሄሳ ቤኣሼ ዚታኒኔ ላይማቴꬃን ባ ሚቼይፌ ኣꬋ ሞሬቲዳሮ ጊዳዱስ።
EZE 23:12 ቃሴካ ሃሪዛይታራኔ ኣዛዚዛይታራ፥ ሴሎ ማይኦ ማይኢዳ ኦላንቻታራ፥ ፒላታ ቶጋንቻታራኔ ማላ ሎኦ ጊዲዳ ኣሶሬ ናቴꬃታራ ላይማታናስ ኣሞታ ካላዱስ።
EZE 23:13 ኢዛካ ባና ቱኒሲዳይሳ ቤኣዲስ፤ ኢስቲ ናምኣይካ ኢሲ ኦጌ ቢዳ።
EZE 23:14 «ኢዛ ባ ላይማቴꬃን ጉጃ ጉጃ ባዱስ፤ ኢዛ ጎዳ ቦላ ዎጬቲ ኦሴቲዳ ጼቃ ዞኦ ቃላሜን ቲዬቲዳ ካላዳዌ ዴሬ ኣዴታ ሚስሌ ቤኣዱስ።
EZE 23:15 ኢስቲካ ባንታ ጼሳን ቃባቶ ዳንጪዳይታኔ ባንታ ሁኤ ቦላ ቁራጬ ጻጺዳይታ። ኢስቲ ኡባይካ ካላዳዌፔ ዪዳ ባቢሎኔ ዴሬ ዳናታ ሚሳቴቴስ።
EZE 23:16 ኢዛ ኢስታ ሚስሌታ ቤኢዳ ማላ ዚታ ኣሞን ጹጌታዳ ካላዳዌታኮ ኣስ ኪታዱስ።
EZE 23:17 ባቢሎኔቲካ ኢዚኮ ዪዲ ኢዚ ሂጻኮ ጌሊዳ፤ ባንታ ዚታ ኣሞን ኢዞ ቱኒሲዳ፤ ኢዛ ኢስታን ቱኒዳፔ ጉዬ ኢዛ ኢስታ ኢጻዳ ኢስታፌ ሃራሶ ሼርኢ ጋዱስ።
EZE 23:18 ኢዛ ቆንጬን ላይማቲዳፔኔ ባ ካሎቴꬃ ቃሪዳ ዎዴ፥ ታኒ ኢዚ ሚቼይፌ ሃራሶ ሼርኢ ጊዳ ማላ ኢዞ ኢጻዳ ኢዚፔ ሼርኢ ጋዲስ።
EZE 23:19 ጊዶ ኣቲን ካሴ ጊብጼን ኢዛ ናቴቴꬃን ላይማቲዳይሲ ቆፌቲን ካሴይሳፌ ኣꬋ ላይማታዱስ።
EZE 23:20 ኢስታ ኣቱማቴꬃይ ሃሬይሳ ማላ፥ ኢስታፌ ኬዚዛ ዜሬꬃይ ዎዳላ ፓራይሳ ማላ ጊዲዳ ባ ላጌꬆታራ ላይማታናስ ኣሞታዱስ።
EZE 23:21 ኔኒ ጊብጼ ቢታን ዲዛ ዎዴ ኔ ጌላኦቴꬃ ኢሚዳይሳኒኔ ኔ ናቴቴꬃ ꬋንꬃን ኣቱማሳቲ ካኢዳይሳን ኔ ጌላኦቴꬃ ቱናቴꬃ ኣሞታዳሳ።
EZE 23:22 «ሃኔ ኦሆሊቤ! ኡባ ሃሪዛ ጎዳይ፥ ‹ኔ ኢጻዳ ኢስታፌ ሼርኢ ጊዳ ኔ ላጌꬆታ ታ ኔ ቦላ ዴንꬃና፤ ኢስታካ ኡባ ባጋፌ ታ ኔ ቦላ ኤሃና።
EZE 23:23 ኢስቲካ ባቢሎኔታኔ ካላዳዌታ፤ ኢስታራ ፓቆዴ፥ ሱሄ፥ ቆኣይኔ ኣሶሬቲ ኡባይ ዴቴስ፤ ሄይቲካ ማላ ሎኦኔ ሚኖ ጊዲሺን ኡባቲካ ፓራ ቶጊዲ ዴሬ ኣይሲዛይታኔ ኣዛዚዛይታ፥ ፓራ-ጋሬ ኣዛዚዛይታኔ ꬎቃ ሹሜታ።
EZE 23:24 ኢስቲ ኦላ ማሳራ፥ ፓራ-ጋሬኔ ጋሬ ኤኪዲ ዳሮ ዴሬይ ኔ ቦላ ያና፤ ኢስቲ ዎጋ ጎንዳሌኔ ቄሪ ጎንዳሌ ኦይኪዲ፥ ቢራታ ቆቤ ዎꬂዲ፥ ኔ ዩሾን ሳልፋና፤ ኢስቲ ኔ ቦላ ፒርዳና ማላ ታ ኔና ኢስታስ ኣꬃ ኢማና፤ ኢስቲካ ባ ዎጋን ኔና ቃጻያና።
EZE 23:25 ታ ዚልኤቴꬃ ሃንቆ ኔ ቦላ ኤሃና፤ ኢስቲካ ኔ ቦላ ሃንቆን ኬዛና፤ ኢስቲ ኔ ሲꬌኔ ኔ ሃይꬅ ቃንጻና፤ ኔ ባጋታፔ ኣቲዳይቲ ማሻን ሲፌታና፤ ኔ ማጫ ናይታኔ ኣቱማ ናይታ ኔፔ ቦንቂ ኤካና፤ ኢስታፌ ጫሻ ኣቲዳይታካ ታማይ ማና።
EZE 23:26 ኢስቲ ኔ ማይኦ ቃሪ ኤካና፤ ዶሬቲዳ ኔ ኣሌቆታ ኔፔ ዎꬂ ኤካና።
EZE 23:27 ኔኒ ጊብጼን ዶሚዳ ላይማቴꬃኔ ዚታ ታ ኔፔ ዲጋና፤ ኔካ ኔ ኣይፌታ ሄይታንታኮ ዴንꬃካ፤ ሃይሳፌ ጉዬ ኔ ጊብጼ ቆፓካ› ጌስ።
EZE 23:28 «ኡባ ሃሪዛ ጎዳይ፥ ‹ኔኒ ሃራሴታዳ ኢስታፌ ሼርኢ ጊዳይታሲኔ ኔ ኢጺዛይታስ ታ ኔና ኣꬃዳ ኢማና።
EZE 23:29 ኢስቲካ ኔና ኢጺሼ ኔኮ ሺቃና፤ ኔ ዳቡርዳይሳ ኡባ ኔፔ ኢስቲ ቦንቃና፤ ኔ ኣዬይ ኡሎፔ ኬዚዳ ማላ ካሎ ኣሻና። ዬላቺዛ ኔ ዚታ ኣሞይ ቆንጫና፤ ኔ ላይማቴꬃይኔ ዛዋይ ባይንዳ ቱናቴꬃይ ሃይሳ ኔ ቦላ ኤሂዴስ።
EZE 23:30 ጋሶይካ ኔኒ ካዎቴꬃታራ ላይማታናስ ኣሞታዳ ኢስታ ኤቃ ጾሳታን ቱናዳሳ።
EZE 23:31 ኔኒ ኔ ሚቼይ ኦጌን ቢዳ ጊሻስ ታኒ ኔና ኢዚ ጹኣ ኦይꬃና› ጌስ።
EZE 23:32 «ኡባ ሃሪዛ ጎዳይ፥ « ‹ኣኮኔ ጪማ ጊዲዳ ጹኣ፥ ኔ ሚቼይ ጹኣ ኔ ኡያና፤ ጹኣዚ ዳሮ ኦይኪዛ ጊሻስ ጫሼኔ ናች ኔ ካላና።
EZE 23:33 ኔ ሚቾ ሳማሪያ ጹኣን፥ ሺሮቺዛኔ ላሊዛ ጹኣን፥ ማꬆኒኔ ጬጬን ኔ ኩማና።
EZE 23:34 ኔኒ ጮንጎርሳዳ ኡያና፤ ሂስታዳ ኔኒ ጹኣዛ ሜንꬄሬꬃና፤ ኔ ꬋንꬃካ ጋራና፤ ኡባ ሃሪዛ ጎዳይ ታኒ ሃይሳ ዮታዲስ› ጌስ።
EZE 23:35 «ሄሳ ጊሻስ ኡባ ሃሪዛ ጎዳይ፥ ‹ኔኒ ታና ዶጊዳ ጊሻሲኔ ታስ ዞኮ ዛሪዳ ጊሻስ ኔኒ ኔ ላይማቴꬃኔ ዚታ ጋቴ ቶካና› ጌስ» ጊዴስ።
EZE 23:36 ጎዳይ ታስ፥ «ሃይሶ ኣሳ ናዉ! ኦሆሊ ቦላኔ ኦሆሊቢ ቦላ ኔ ፒርዳኔ? ሂስቲኮ ሃራሲዛ ኢስታ ኦሶዛ ኔ ኢስታስ ዮታ።
EZE 23:37 ኢስቲ ላይማቲዳ፤ ኢስታ ኩሼይካ ሱꬃን ሞሬቲዴስ። ኢስቲ ባንታ ኤቃ ጾሳታራ ላይማቲዳ፤ ባንታ ኤቃ ጾሳታስ ቁማ ጊዳና ማላ ሃራይ ኣቶሺን ኢስቲ ታስ ዬሊዳ ናይታካ ኢስታስ ታማን ጹጊ ያርሺዳ።
EZE 23:38 ሄሳፌካ ሃራ ሚሽ ኢስቲ ታ ቦላ ኦꬂዳ፤ ሄ ጋላሲካ ጾሳ ኬꬃ ታይሳ ቱኒሲዳ፤ ታ ሳምባታካ ካዉሺዳ።
EZE 23:39 ኢስቲ ባንታ ናይታ ኤቃ ጾሳታስ ያርሺዳ ጋላስ ታ ኬꬃ ጌሊዲ ቱኒሲዳ። ኢስቲ ታ ኬꬃን ሄሳ ማላ ኦꬂዳ።
EZE 23:40 «ሄሳፌካ ቦላራ ኣዴቲ ሃኮ ቢታፌ ያና ማላ ኣስ ኪቲዳ፤ ኢስቲካ ዪዳ፤ ኔኒ ኔ ቦላ ሜጬታዳሳ፤ ኔ ኣይፌሶ ፑላሳዳኔ ኣሌቆታን ፑላታዳ ናጋዳሳ።
EZE 23:41 ሎኢ ጊጊዳ ኣርጄታን ኡታዳሳ፤ ታ ኤጻኔዛኔ ዛይቴዛ ኔ ዎꬂዳ ጻራጴዛ ኣርጄታ ሲንꬃን ዎꬃዳሳ።
EZE 23:42 «ካኢዛ ኣሳታ ካቺ ኢዚ ዩሾን ዴስ፤ ሺሮ ሜꬊዛ ኣሳታራ ባዞፌ ዪዳ ማꬆቲዛይቲ ዴቴስ፤ ማጫሳይ ቦላኔ ኢዚ ሚቼይ ቦላ ሳጋዮ፥ ኢስታ ሁኤንካ ካይሺዛ ካላቻ ዎꬂዳ።
EZE 23:43 ታኒካ ታ ዎዚናን፥ ‹ኢዚ ቦላይ ላይማቴꬃን ጊልቂዳሪራ፥ ሃኢካ ኢዚ ዴኦይ ሄሳ ማላ ጊዲዳሪራ ላይማ ማጫሳይራ ዚንኤቶ› ጋዲስ።
EZE 23:44 ኢስቲካ ኢዚራ ዚንኢዳ፤ ኣሲ ላይማ ማጫሳራ ዚንኢዛ ማላ ሃ ዬላይ ባይንዳ ማጫስ ኦሆሊራኔ ኦሆሊባራ ዚንኢዳ።
EZE 23:45 ጌሻቲ ጊዲኮ ላይማ ማጫሳታ ቦላኔ ሼምፖ ዎꬊዛ ማጫሳታ ቦላ ቤሲዛ ፒርዳ ፒርዳና፤ ኢስቲ ላይማ ማጫስ ጊዲዳ ጊሻስ ኢስታ ኩሼይ ሱꬃን ሞሬቲዴስ።
EZE 23:46 «ኡባ ሃሪዛ ጎዳይ ዴራ ኢስታ ቦላ ዴንꬄꬃ ኤሃ፤ ሺሮሲኔ ቦንቃስ ኢስታ ኣꬃ ኢማ።
EZE 23:47 ዴሬይ ኢስታ ሹቻን ኩራካና፤ ኢስቲ ጊꬃ ማሻን ኢስታ ቃንጼሬꬃና፤ ኢስታ ኣቱማ ናይታኔ ማጫ ናይታ ዎꬋና፤ ኢስታ ኬꬃካ ጹጋና።
EZE 23:48 ሄሳ ታኒ ማጫሳቲ ኡባይ ናጌታና ማላኔ ኢንቴ ኢታ ሃኖ ካሎንታ ማላ ዚታቴꬃ ቃቄ ኦꬆንታ ማላ ታ ቢታፌ ቴቃና።
EZE 23:49 ኢንቴ ኢንቴ ዚታ ጋቴ ኤካና፤ ኢንቴ ኤቃ ጾሳታ ጎይኖን ኦꬂዳ ናጋራ ቂጻቴ ኢንቴ ቶካና፤ ታኒ ኡባ ሃሪዛ ጎዳ ጊዲዳይሳ ኢንቴ ሄ ዎዴ ኤራና» ጊዴስ።
EZE 24:1 ኑኒ ዲኤቲዳ ኡዱፉንꬃ ላይꬃን፥ ታማንꬃ ኣጊናን፥ ታማንꬃ ጋላሳን ጎዳ ቃላይ ታኮ ዪዲ፥
EZE 24:2 «ሃይሶ ኣሳ ናዉ! ሃች ሃኖ ጋላሳዮ ዱማ ማዝጋባ፤ ባቢሎኔ ካዎይ ዬሩሳላሜ ሃ ጋላሳይን ዶዲ ኦይኪዴስ።
EZE 24:3 ሃ ማካላንቻ ኬꬃስ ሃይሳፌ ካሊ ዲዛ ሌሚሶዛ ዮታ፤ ኡባ ሃሪዛ ጎዳይ፥ « ‹ቢራታ ዲስቴ ታማ ቦላ ዎꬃ፤ ሄሳፌ ጉዬ ኢዛን ሃꬅ ጉጃ።
EZE 24:4 ጌዳፔኔ ሚሳፌ ቃንጻዳ፥ ሎኦ ሎኦ ኣሾ ሙጻዳ፥ ዶሬቲዳ ሜቄꬃታ ጩኬሬꬃዳ ኢዛን ዬጋ።
EZE 24:5 ዉዴዛፔ ሞꬎ ዶርስ ኤካ ሹካ፤ ኢዛ ሜቄꬃ ዶይሳናስ ኤሶ ሚꬅ ዳርሳ ዎꬃ፤ ሱꬉ ጋናሼ ጋካናስ ዶይሳ፤ ሜቄꬃዚካ ካጾ› ጌስ።
EZE 24:6 «ኡባ ሃሪዛ ጎዳይ፥ ‹ሺኢዳ ቢራታ ዲስቴይስ፥ ኢዚ ሺኢ ዬዶንታሪስ፥ ሱꬅ ጉሲዳ ካታማይስ ኣዬ ኣና! ሻካናስ ሳማ ዬጎንታ ኢሳ ኢሳ ኬሳዳ ካይስ ኣሻ።
EZE 24:7 ኢዚ ጊዶን ኣሳ ሱꬂ ዴስ፤ ዛላ ቦላ ቆንጬሶን ጉሳዱስ ኣቲን ቢታይ ካማናስ ዳንዳይዛ ጋዴን ጉሳቤኩ።
EZE 24:8 ታ ሃንቆይ ኤጻና ማላኔ ሃሎ ኬሳናስ ታስ ኢንጄታና ማላ፥ ኢዚ ካማናስ ዳንዳዮንታ ማላ፥ ኢዚ ሱꬃ ዛላ ቦላ ቆንጬሶን ጉሳዲስ› ጌስ።
EZE 24:9 «ሄሳ ጊሻስ ኡባ ሃሪዛ ጎዳይ፥ ‹ሱꬅ ጉሲዳ ካታማይስ ኣዬ ኣና! ታኒ ኢዛ ጹጌታና ሚꬅ ጉፓና።
EZE 24:10 ኤሶ ሚꬅ ዶራ፤ ታማካ ኤꬃ። ሳዎ ጉጃዳ ኣሾዛ ሎኤꬃ ዶይሳ፤ ሜቄꬃዚካ ሚጮ።
EZE 24:11 ሺኣዚ ሴራና ማላኔ ቢራታ ሺኣዚ ታማን ጹጌታና ማላ፥ ሜላ ዲስቴይ ሴላና ጋካናስ፥ ታማዚ ቦንቃናሼ ጋካናስ ጮጬዛ ቦላ ዎꬃ።
EZE 24:12 ዳሮ ዎልቃይ ዉሪኮካ ዶሬቲዳ ቢራታ ሺኢ ታማንካ ዬዳና ዳንዳዬና።
EZE 24:13 « ‹ኔ ቱኒዳይ ኔ ባላጌ ኦሶና፤ ታ ሃንቆይ ኔ ቦላ ፖሌታናሼ ጋካናስ ሃይሳፌ ጉዬ ኔ ጌሽ ጊዳካ፤ ጋሶይካ ታኒ ኔና ኔ ቱናቴꬃፌ ጌሻና ኮዪንካ ኔ ጌያና ዶሳቤካ።
EZE 24:14 « ‹ታኒ ጎዳይ ሃይሳ ዮታዲስ፤ ታ ኦꬃናስ ዎዴይ ጋኪዴስ፤ ታ ጉዬ ጊኬ፤ ቃꬌቲኬኔ ሲꬊኬ፤ ኔ ኦጌ ማላኔ ኔ ኦሶ ማላ ኔ ቦላ ፒርዴታና› ጌስ» ጊዴስ።
EZE 24:15 ጎዳ ቃላይ ታኮ ዪዲ፥
EZE 24:16 «ሃይሶ ኣሳ ናዉ! ኔኒ ኔ ኣይፌ ሼምፒሲዛ ሚሽ ታኒ ታ ሃንቆን ኔፔ ኤካ ዲጋና፤ ኔኒ ጊዲኮ ዋሶፋ፤ ዬኮፋ፤ ኣፉንꬂካ ጉሶፋ።
EZE 24:17 ኔ ቃላ ዚቂ ሂስታዳ ካዮታሼ ሚላላ ኣቲን ሃይቂዳይሳስ ዬኮፋ፤ ኔ ሁኤፔ ቁራጬ ዲጎፋ፤ ኔ ቶሆፔ ጫማ ኬሶፋ፤ ኔ ዶና ጋꬃ ካሞፋ፤ ሾቺካ ሞፓ» ጊዴስ።
EZE 24:18 ታኒካ ዎንታራ ዴራስ ሄሳ ዮታዲስ፤ ሄ ጋላሳ ኦማርሳ ዎዴ ታ ኬꬃ ኣዬያ ሃይቃዱስ፤ ዎንቴꬃ ጋላስ ማላዶ ጎዳይ ታና ኣዛዚዳ ማላ ኦꬃዲስ።
EZE 24:19 ዴሬዚ ታና፥ «ኑስ ኣይ ኪታ ዮታና ኮያዳ ኔ ሃይሳ ኦꬂዳኮ ኑስ ዮቲኪ?» ጊ ኦይቺዴስ።
EZE 24:20 ታኒካ ዴራስ ዛራዳ፥ «ጎዳ ቃላይ ታኮ ዪዲ፥
EZE 24:21 ኢስራኤሌ ኬꬃስ ኡባ ሃሪዛ ጎዳይ፥ ‹ኢንቴ ጬቄቲዛ ዎልቃ፥ ኢንቴ ኣይፌ ሼምፒሲዛሶዛኔ ኢንቴ ዎዚናስ ኡፋይስ ጊዲዳ ጾሳ ኬꬃ ታይሳ ታ ቱኒሳና። ኢንቴ ዬጊ ቢዳ ኢንቴ ማጫ ናይቲኔ ኣቱማ ናይቲ ማሻን ዉራና።
EZE 24:22 ታ ኦꬂዳ ማላ ሄ ዎዴ ኢንቴካ ኦꬃና፤ ኢንቴ ዶና ጋꬂ ካሜኬታ፤ ሾቺካ ሜኬታ።
EZE 24:23 ኢንቴ ሁኤፔ ቁራጬ ዲጌኬታ፤ ኢንቴ ቶሆፔ ጫማ ኬሴኬታ፤ ኢንቴ ኢንቴ ናጋራን ጊልቃና፤ ኢሶይ ኢሳራ ቶኪ ሼምፓና ኣቲን ካዮስ ኡቴኬታኔ ዬኬኬታ።
EZE 24:24 ሄ ዎዴን ሂዚቄሊ ኢንቴስ ማላታ ጊዳና፤ ኢዚ ኦꬂዳ ማላ ኢንቴካ ኦꬃና› ጊዴስ። ኡባ ሃሪዛ ጎዳይ ታና ጊዲዳይሳ ሃይሲ ሃኒዛ ዎዴ ኢንቴ ኤራና» ጌስ።
EZE 24:25 ጎዳይ ታና፥ «ሃይሶ ኣሳ ናዉ! ባንታ ዎልቃ፥ ባንታ ኡፋይሳ፥ ባንታ ቦንቾ፥ ኢስታ ኣይፌስ ሼምፖሶኔ ኢስታ ዎዚናስ ኡፋይስ ጊዲዳ ኢስታ ማጫ ናይታኔ ኣቱማ ናይታ ጋꬃ ታ ኢስታፌ ኤኪዛ ዎዴ፥
EZE 24:26 ሄ ጋላስ ኬሲ ኤኪ ኣቲዳ ኣሲ ሄ ፓፑንꬃ ዮታናስ ኔኮ ያና።
EZE 24:27 ሄ ጋላስ ኔ ዶናይ ዶዬታና፤ ኔኒካ ኢዛራ ሃሳያና፤ ሄሳፌ ጉዬ ኔ ዶና ዱዴ ጊዳካ፤ ኔ ኢስታስ ማላታ ጊዳና፤ ታኒ ጎዳ ጊዲዳይሳ ኢስቲ ሄ ዎዴ ኤራና» ጊዴስ።
EZE 25:1 ጎዳ ቃላይ ታኮ ዪዲ፥
EZE 25:2 «ሃይሶ ኣሳ ናዉ! ኔ ሲንꬅ ኣሞኔ ቢታኮ ዛራዳ ኢስታ ቦላ ቲንቢቴ ዮታ።
EZE 25:3 ኢስታስ፥ ‹ኡባ ሃሪዛ ጎዳ ቃላ ሲዪቴ፤ ኡባ ሃሪዛ ጎዳይ ታ ኬꬃይ ቱኒዳ ዎዴ፥ ኢስራኤሌ ቢታይ ቡላቲዳ ዎዴ፥ ዩሁዳ ኣሳይ ዲኤቲ ቢዳ ዎዴ፥ ኢንቴ ኢስታስ ሃሹ! ጊዳ ጊሻስ፥
EZE 25:4 ኣርሼይ ሞኪዛ ባጋራ ዲዛ ዴሬዛስ ኢንቴ ሃሬታና ማላ ታ ኢንቴና ኣꬃ ኢማና። ኢስቲካ ኢንቴ ጊዶን ባንታ ዱንካኔ ቶኪዲ ዳና፤ ኢንቴ ሚꬃታ ኣይፌ ማና፤ ኢንቴ ማꬂካ ኢስቲ ኡያና።
EZE 25:5 ታኒ ኤራባ ካታማ ጋሜላቲ ሄሜቲዛሶ፥ ኣሞኔ ዶርሳቲካ ሄሜቲዛሶ ኬሳና፤ ታኒ ጎዳ ጊዲዳይሳ ኢንቴ ሄ ዎዴ ኤራና› ጋ ዮታ።
EZE 25:6 ኡባ ሃሪዛ ጎዳይ፥ ‹ኢንቴ ዎዚና ኢታቴꬃ ጋሶን ኢስራኤሌ ኩንዴꬃን ኢንቴ ኡፋዬቲዲ ኩሼ ባቂዳ ጊሻሲኔ ጉፒ ካኢዳኔ ቂꬊዳ ጊሻስ፥
EZE 25:7 ታኒ ታ ቄሴ ኢንቴ ቦላ ዴንꬃና፤ ታኒ ካዎቴꬃቲ ኢንቴፌ ቦንቃና ማላ ኦꬃና፤ ታ ኢንቴና ካዎቴꬃታ ጊዶፌ ሾዳና፤ ኣሳፔካ ሻካዳ ꬋይሳና፤ ታ ኢንቴና ዲፒ ሂስታና። ታኒ ጎዳ ጊዲዳይሳ ኢንቴ ሄ ዎዴ ኤራና› ጌስ።
EZE 25:8 «ኡባ ሃሪዛ ጎዳይ፥ ‹ሞኣቤይኔ ሴይሬይ፡ ቤኢቴ፥ ዩሁዳ ኣሳይ ሃራ ካዎቴꬃታ ማላ ጊዲዴስ ጊዳ ጊሻስ፥
EZE 25:9 ኢስታ ቢታ ዛዋ ቦላ ዲዛይታኔ ኢዚስ ቦንቾ ጊዲዳ ካታማታ ቤቲ-ያሺሞቴፔ፥ ባኣሊ-ሜኦኔፔኔ ቂሪያታይሜፔ ዶማዳ ሞኣቤ ሚጻ ቃራ ዬጋና።
EZE 25:10 ሞኣቤቲኔ ኣሞኔቲ ኢስታስ ሃሬታና ማላ ታ ኢስታ ኣርሼይ ዉሊዛ ባጋራ ዲዛ ዴራስ ኣꬃ ኢማና፤ ኣሞኔ ኣሳስ ሃይሳፌ ጉዬ ካዎቴꬃታ ማታን ኢስታ ቆፍሲዛ ሚሺ ዴና።
EZE 25:11 ታኒ ሞኣቤ ቃጻያና፤ ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ።
EZE 25:12 «ኡባ ሃሪዛ ጎዳይ፥ ‹ኤዶሜይ ዩሁዳ ቦላ ሃሎ ኬሲዳ ጊሻሲኔ ሄሳን ሞራንቻ ጊዲዳ ጊሻስ፥
EZE 25:13 ኡባ ሃሪዛ ጎዳይ፡ ታኒ ታ ቄሴ ኤዶሜ ቦላ ዴንꬃና። ኢዛ ኣሳኔ ሜሃ ታ ዎꬋና፤ ታ ኢዛ ቡላ ሂስታና፤ ቴማኔፔ ቢዲ ዳዳኔ ጋካናስ ኢስቲ ማሻን ዉራና።
EZE 25:14 ታ ዴሬ ኢስራኤሌ ዴንꬃዳ ኤዶሜ ቦላ ሃሎ ኬሳና፤ ኢስቲካ ታ ሃንቆ ማላኔ ታ ቦሻ ማላ ኤዶሜ ዴራ ቦላ ኦꬃና፤ ታኒ ሃሎ ኬሲዳይሳ ኢስቲ ሄ ዎዴ ኤራና› ጌስ።
EZE 25:15 «ኡባ ሃሪዛ ጎዳይ፥ ‹ፊሊስጼሜቲ ዎዚና ኢታቴꬃን ዴንዲዲ ሃሎ ኬሲዳ ጊሻሲኔ ዩሁዳካ ካሴ ጋምኢዳ ሞርኬቴꬃን ካꬊዲ ꬋይሳናሳ።
EZE 25:16 ኡባ ሃሪዛ ጎዳይ፡ ታኒ ታ ቄሴ ፊሊስጼሜ ኣሳ ቦላ ዴንꬃና፤ ኬሊቴ ኣሳ ቃንጻና፤ ኣባ ጋጻን ኣቲዳይታካ ꬋይሳና።
EZE 25:17 ታኒ ኢስታ ቦላ ዎልቃማ ሃሎ ኬሳና፤ ታ ቦሻንካ ኢስታ ቃጻያና፤ ታ ኢስታ ቃጻዪዛ ዎዴ ኢስቲ ታኒ ጎዳ ጊዲዳይሳ ኤራና› ጌስ» ጊዴስ።
EZE 26:1 ኑኒ ዲኤቲዳ ታማኔ ኢሲንꬃ ላይꬃን፥ ኣጊናስ ኮይሮ ጋላሳን ጎዳ ቃላይ ታኮ ዪዲ፥
EZE 26:2 «ሃይሶ ኣሳ ናዉ! ጺሮሲ ዬሩሳላሜ ጊሻስ፥ ‹ዴሬታ ፔንጌይ ሃሹ ሜቃዱስ፤ ኢዚ ፔንጌቲ ታስ ዋቂ ጊ ዶዬቲዳ፤ ሃኢ ኢዛ ላሌቲዳ ጊሻስ ታ ኢዞ ዱሬታና› ጊዴስ፥
EZE 26:3 ኡባ ሃሪዛ ጎዳይ፡ ሃኔ ጺሮሴ ታ ኔ ቦላ ዴንዳዲስ፤ ኣባ ዳምባላይ ዴንዲዛ ማላ ታ ኔ ቦላ ዳሮ ዴሬ ዴንꬃና።
EZE 26:4 ኢስቲ ጺሮሲ ጊምቤዛ ሙሌራ ꬋይሳና፤ ኢዚ ናጌ ጊምቤታካ ላላና፤ ታኒ ኢዚ ቢታ ፒታ ꬋይሳዳ ካሎ ዲዛ ዛላ ኬሳና።
EZE 26:5 ታኒ ኡባ ሃሪዛ ጎዳይ ሃይሳ ዮቲዳ ጊሻስ ኢዛ ኣባ ጊዶን ጊቴ ሚጪ ሜሊሲዛሶ ጊዳና፤ ካዎቴꬃቲ ኢዚስ ዲዛዝ ቦንቃና።
EZE 26:6 ሄ ቢታን ኣባፌ ሃኪ ዲዛ ጉታቲ ማሻን ዉራና፤ ታኒ ጎዳ ጊዲዳይሳ ኢስቲ ሄ ዎዴ ኤራና።
EZE 26:7 «ኡባ ሃሪዛ ጎዳይ፥ ‹ካዎታስ ካዎ ጊዲዳ ባቢሎኔ ካዎ ናቡካዳናጾሬ ፓራታራኔ ፓራ-ጋሬታራ፥ ቶጋንቻታራኔ ዳሮ ኦላንቻታራ ፑዴሃ ባጋፌ ጺሮሲ ቦላ ታ ኤሃና።
EZE 26:8 ኢዚ ዴራስ ጊዶን ዲዛ ኔ ጉታታ ማሻን ዉርሳና፤ ኢዚ ዩሾን ኬላ ኬላና፤ ኔ ጊምቤስ ጼራ ጋካናስ ቢታ ዶራና፤ ኢዚ ባ ጎንዳሌዛካ ኔ ቦላ ዴንꬃና።
EZE 26:9 ጊምቤዛ ላሊዛ ሚሻን ዲርሳ ላላና፤ ኦላ ማሳራን ናጌ ጊምቤታካ ላላና።
EZE 26:10 ፓራ ዳሮቴꬃፌ ዴንዲዳይሳን ጉዱላይ ኔና ጎዚ ኦይካና፤ ኣሳይ ጊምቤይ ላሌቲዳ ካታማ ማላ ኢዚ ኔ ፔንጌታራ ጌሊዛ ዎዴ፥ ፓራታ፥ ፓራ-ጋሬታኔ ጋሬታ ጬንጉርሳፌ ዴንዲዳይሳን ኔ ጊምቤቲ ቃጻና።
EZE 26:11 ኔ ኦጌቲ ኡባይ ፓራ ቶሆን ዱሬታና፤ ኔ ዴራ ማሻን ዎꬋና፤ ኔ ዎልቃማ ቱሳቲካ ሳኣን ኩንዳና።
EZE 26:12 ኔ ኣቆታ ኢስቲ ቦንቃና፤ ኔ ሻቃጬ ኢስቲ ቦንቂ ኤካና፤ ኔ ዲርሳ ኢስቲ ላላና፤ ኔ ሎኦ ኬꬃታካ ኡባ ꬋይሳና፤ ኔ ሹቻኔ ኔ ሚꬃ፥ ኔ ዲርሳ ላሌꬃ ዱጌ ኣባን ዬጋና።
EZE 26:13 ኔ ዬꬃ ታኒ ሲርጲ ሂስታና፤ ሃይሳፌ ጉዬ ኔ ዲꬃ ጊሪሲ ሴቴቴና።
EZE 26:14 ታ ኔና ካሎ ዲዛ ሎቻ ዛላ ኦꬃና፤ ኔኒ ሞሌ ጊቴ ሚጪዛሶ ጊዳና፤ ናምኣንꬆ ሲማ ኦሴታካ፤ ሃይሲ ሃናናይ ታኒ ጎዳይ ዮቲዳ ጊሻሳ› ጌስ።
EZE 26:15 «ኡባ ሃሪዛ ጎዳይ ጺሮሲስ፥ ‹ማዱንጺዳይቲ ቶቂሺን፥ ኔ ጊዶን ሼምፖ ዎꬊሺን፥ ኔ ኩንዴꬃ ጊሪሳፌ ዴንዲዳይሳን ሃሩሮቲ ቃጼቴኔ?
EZE 26:16 ኣባ ጋጻን ዲዛ ሃላቃቲ ኡባይ ባንታ ካዎቴꬃ ኣራታፔ ዎꬋና። ባንታ ሴሎ ማይኦ ዬጋና፤ ባንታ ጺባቤ ማይኦዛ ቃሪ ዬጋና። ባቦን ኩሚዲ ቢታ ቦላ ኡቲ ኮኮሪሼ ኔ ቦላ ጋኪዳ ሃኖዛ ጋሶን ኢስቲ ሺሮታና› ጌስ።
EZE 26:17 ኔ ጊሻስ ዚላሊሼ፥ « ‹ኔ ኣሳይ ኣባ ጊዶን ዲዛሬ፥ ኤሬቲዳ ካታማዬ ኔ ዋና ꬋያዲ! ኔናን ዲዛ ኣሳራ ኔ ኣባ ጊዶን ዎልቃማኮሺን፥ ሄን ዲዛ ኣሳ ኣቻን ኔ ያሺሲዳሮኮሺን።
EZE 26:18 ሃኢ ኔ ኩንዴꬃ ጋላስ ኣባ ጋጻን ዲዛ ዴሬቲ ሂርጊዳ፤ ኔ ላሌቲዳ ጋሶን ሃሩሮቲካ ቃጺዳ› ጌስ።
EZE 26:19 «ኡባ ሃሪዛ ጎዳይ፥ ‹ኢስታን ኣሲ ባይንዳ ካታማታ ማላ ታኒ ኔና ካይዚሲሺን፥ ዎጋ ጊታ ኣባን ታኒ ኔና ዬጋዳ ካሚሺን፥
EZE 26:20 ቤኒ ዎዴ ኣሳቲ ጌሊዳ ኦላን ዎꬊዛይታራ ታ ኔና ዱጌ ዎꬃና፤ ዱጌ ኦላን ጌሊዛይታራ ታ ኔና ኢሲፌ ቤኒ ላሌቲዲ ዲዛ ቢታ ጋርሳን ታ ኔና ዎꬃና፤ ሄሳፌ ጉዬ ኔኒ ቢታ ቦላ ሼምፖራ ፓጻ ዲዛይታ ጋርሳን ኔስ ዴኦሶ ዴማካ፤
EZE 26:21 ታኒ ኔ ዉርሴꬃ ሚቺዛዝ ኦꬃና፤ ሄሳፌ ጉዬ ኔ ዴኣካ፤ ኔ ኮዬታናሺን ቤታካ፤ ጊዶ ኣቲን ኔኒ ናምኣንꬆ ሙሌካ ቤታካ› ጌስ» ጊዴስ።
EZE 27:1 ጎዳ ቃላይ ታኮ ዪዲ፥
EZE 27:2 «ሃይሶ ኣሳ ናዉ! ጺሮሲ ጊሻስ ዚላላ።
EZE 27:3 ኣባን ጌሊዛሶ ፔንጌን ዲዛሪሲኔ ዳሮ ኣባ ጋጻታን ዲዛ ዴሬታራ ዛልኢዛ ጺሮሲስ፥ ኡባ ሃሪዛ ጎዳይ፥ «ሃኔ ጺሮሴ! ‹ኔኒ ኔና ኬሂፔ ሎኦ› ጋዳሳ፤
EZE 27:4 ኔ ዛዋይ ኣባ ጊዶን ዴስ፤ ኔና ኦꬂዳይቲ ኬሂ ሎኤꬂ ኦꬂዳ።
EZE 27:5 ኔ ሳንቃታ ኡባ፥ ሳኒሬፔ ዪዳ ጺዳን ኦꬂዳ፤ ማርካቤ ቱሳቲ ሊባኖሴፔ ዪዳ ዚጋፔ ጊጊዳ።
EZE 27:6 ባሳኔፔ ዪዳ ዎላፔ ማርካቤ ላጊዛ ሚሽ ኦꬂዳ፤ ቆጲሮሴ ዛዋፔ ዪዳ ዚጋ ሚꬃ፥ ዳንጋርሳ ዛሌን ኣሌቄሲዲ ኔ ዉይጌዛ ኦꬂዳ።
EZE 27:7 ኔ ማርካቤዛ ጺባቤይ ጊብጼ ቢታ ላይኖፔ ኦሴቲዴስ፤ ሄሲ ኔና ባንዲራ ማላ ጎኢዴስ። ሳሎ ሚሳቲዛኔ ኦቻ ቴራ ሚሳቲዛ ኔ ሻራቲ ቆጲሮሴፔ ዪዳ።
EZE 27:8 ማርካቤ ሶሎሊሲዛይቲ ሲዶናፔኔ ኣርዋዴፔ ዪዳይታ፤ ሃኔ ጺሮሴ፥ ኔ ማርካቤ ላጊዛይቲ ሎሂዳ ኔ ኣሳታ።
EZE 27:9 ጌባሌፔ ሎሂዳ ዳናቲኔ ሂላንቻቲ ኔ ማርካቤታ ኮላናስ ኔ ጊዶን ዴቴስ፤ ኣባ ቦላራ ቢዛ ማርካቤቲኔ ማርካቤ ላጊዛይቲ ኡባይ ሄሬጌቲዲ ኔናራ ዛልኤታናስ ኔኮ ዬቴስ።
EZE 27:10 «ፓሪሴ፥ ሉዴኔ ፑጼ ኣሳቲ ዎታዳራ ጊዲዲ ኔ ኦላንቻታ ጊዶን ኔና ሃጋዜቴስ፤ ኔስ ቴማ ጊዳና ማላ ባንታ ጎንዳሌኔ ባንታ ቢራታ ቆቤ ኔ ጎዳ ቦላ ካቂዳ።
EZE 27:11 ኣርዋዴኔ ሄሌኬ ኣሳቲ ኔ ጊምቤታ ኡባሶራ ናጌቴስ፤ ጋማዴፔ ዪዳ ኣሳቲ ኔ ጊምቤ ጊዶን ዴቴስ፤ ኢስቲ ባንታ ጎንዳሌ ኔ ጊምቤዛ ዩሾን ካቂዳ፤ ኔ ፑላቴꬃ ኩሜꬅ ኦꬂዳ።
EZE 27:12 «ኬሂ ዳሮ ጊዲዳ ኔ ዱሬቴꬃ ጋሶን ታርሴሴይ ኔናራ ዛልኤን ጋይታዱስ፤ ኢዛ ቢራኔ ቢራታ፥ ቆርቆሮኔ ኢርሳሴ ኤሃዳ ኔ ሻቃጬታ ላሜ ኤካዉስ።
EZE 27:13 «ያዋኔይ፥ ቱባሌይኔ ሜሼኬይ ኔናራ ኢሲፌ ዛልኤቴስ፤ ኣይሌታኔ ጻርቂማላፔ ኦሴቲዳ ሚሻታ ሻቃጬራ ላሜቴስ።
EZE 27:14 «ቤቲ-ቶጋርማ ኣሳቲ ጫና ፓራታ፥ ኦላ ፓራታኔ ባቁሎታ ሻቃጬን ላሜቴስ።
EZE 27:15 «ኤሮዶሴ ኣሳቲ ዛልኤን ኔናራ ጋይቲዳ፤ ዳሮ ሃሩሮ ዴሬቲ ኔ ሻቃጬታ ዳንጋርሳ ዛሌኒኔ ዞጴ ጌቴቲዛ ሚꬃን ላሜቴስ።
EZE 27:16 «ኬሂ ዳሮ ጊዲዳ ኔ ኣቆታ ጋሶን ኣራሜይ ኔናራ ዛልኤን ጋይታዱስ፤ ኔ ሻቃጬካ ቤሉሬን፥ ኦቻ ቴራ ሚሳቲዛ ጫርቃን፥ ጺባቤን፥ ሎኦ ላይኖን፥ ሄሌሎኒኔ ዞኦ ኢንቁን ላሜቴስ።
EZE 27:17 «ዩሁዳይኔ ኢስራኤሌይካ ኣቶንታ ኔናራ ዛልኤን ጋይቲዳ፤ ኢስቲ ሚኒቴፔ ዪዳ ጊስቴ፥ ማሊዶ፥ ኤስ፥ ዛይቴኔ ባላሳኔ ጌቴቲዛ ꬋሊዛ ዛይቴ ኔ ሻቃጬዛራ ላሜቴስ።
EZE 27:18 «ኔ ዳሮ ዱሬቴꬃኔ ኢሻሎ ዱሳ ጋሶን ዳማስቆ ኣሳቲ ሄልቦኔ ዎይኔ ኡሺኔ ዛሃሬ ዴሬ ዶርሳ ኢስኬ ሺሺዲ ኔናራ ዛልኤቲዳ።
EZE 27:19 «ኦዜሌን ዲዛ ዳኔይኔ ጊርኬ ኣሳይ ኔ ዱማ ዱማ ሚሻ ሻሚዳ፤ ኢስቲ ኔ ሚሻራ ላማናስ ኣሌቄቲዳ ቢራታ፥ ዱማ ዱማ ሳዎታኔ ቃራፋ ኤሂዳ።
EZE 27:20 «ዳዳኔይ ኔ ሻቃጬ ጊላሴራ ላማዉስ።
EZE 27:21 «ኣራቢያ ሃላቃቲኔ ቄዳሬ ሃላቃቲ ኡባይ ኔ ላጌታ፤ ኢስቲ ላቃ፥ ꬋርሾኔ ዴይሼ ኤሂዲ ኔናራ ዛልኤቴስ።
EZE 27:22 «ሳባ ዛልኣንቻቲኔ ኤራኢሜ ዛልኣንቻቲ ኔናራ ዛልኤቴቴስ፤ ዶሬቲዳ ቂማሜ ኡባ፥ ኣልኦ ሹቺኔ ዎርቃ ሺሺዲ ሻቃጬን ኔናራ ዛልኤቴቴስ።
EZE 27:23 «ካራኔ፥ ካኔ፥ ኤዴኔ፥ ሳባ፥ ኣሶሬኔ ኪልማዴ ዛልኣንቻቲ ኔናራ ዛልኤቴቴስ።
EZE 27:24 ሄይቲካ ኔ ጊያ ጊዶን ሎኦ ማይኦ፥ ሳሎ ሚሳቲዛ ካባ፥ ጺባቤ፥ ሄሳꬆካ ቢራታ ቃላሜን ጶሊዛኔ ሚኒ ዳዴቲዳ ሲጋጃ ኤሂዲ ኔናራ ዛልኤቴቴስ።
EZE 27:25 «ታርሴሴ ማርካቤቲ ኔ ሻቃጬ ጫኒ ጫኒ ኤፊዳ፤ ኔኒ ኣባ ጊዶን ዴጾ ጫና ጫኔታዳ ዳሳ።
EZE 27:26 ማርካቤ ሶሎሊሲዛይቲ ጪማ ኣባ ጊዶን ኔና ኤፊዳ፤ ጊዶ ኣቲን ኣርሼይ ሞኪዛ ባጋ ጫርኮይ ኣባ ጊዶን ኔና ሜንꬄሬꬂዴስ።
EZE 27:27 ማርካቤ ዳፋይ ኔ ቦላ ጋኪዛ ጋላስ ኔ ኣቆታይ፥ ኔ ሻቃጬይኔ ኔ ዛልኤ ሚሻይ፥ ኔ ማርካቤዛ ሶሎሊሲዛይቲ፥ ማርካቤዛን ቢዛይቲኔ ማርካቤ ኦሳንቻቲ፥ ኔ ዛልኣንቻቲኔ ኔ ዎታዳራቲ ኡባይ፥ ማርካቤዛን ዲዛይቲ ኡባይ፥ ዱጌ ጪማ ኣባን ሚቴታና።
EZE 27:28 ኔ ማርካቤ ሶሎሊሲዛይቲ ዋሲሺን፥ ኣባ ጋጻን ዲዛይቲ ያርኪያርኬቴስ።
EZE 27:29 ማርካቤ ሶሎሊሲዛይቲ ኡባይ ባንታ ማርካቤታ ኦሊ ባና፤ ማርካቤ ሶሎሊሲዛይቲኔ ማርካቤን ዲዛይቲ ኡባይ ዎꬊዲ ኣባ ጋጻን ኤቃና።
EZE 27:30 ባንታ ቃላ ꬎቁ ሂስቲዲ ጫሞ ዬሆ ኔስ ዬካና፤ ባንታ ሁኤን ጉዱላ ቆሊዲ ቢዲንꬃ ቦላ ቡሉሌታና።
EZE 27:31 ኔ ጊሻስ ካዮቲዲ ባንታ ሁኤ ቡሉሳና፤ ማቃካ ማይኣና፤ ዎዚናፔ ጬጪዲ ጫሞ ዬሆ ኔስ ዬካና።
EZE 27:32 ኔ ጊሻስ ኢስቲ ዋሲሼ ዬካና፤ ኢስቲ ኔስ ዚላሊሼ፥ ‹ኣባን ሚቴቲ ጮኡ ጊዳይ፥ ጺሮሴ ማላይ ኦኔ?› ጋና።
EZE 27:33 ኔ ሻቃጬይ ኣባፌ ፒኒ ኬዚዳ ዎዴ፥ ዳሮ ዴሬታ ካልሳሳ፤ ኔኒ ኔ ጊታ ኣቆታኒኔ ኔ ሻቃጬዛን ቢታን ዲዛ ካዎቴꬃታ ዱሬሳዳሳ።
EZE 27:34 ሃኢ ጊዲኮ ጪማ ሃꬃን ኣባ ጊዶን ሜቄሬታ ኩንዳዳሳ፤ ኔ ጫናይኔ ጫኔቲዳ ኣሳይ ኡባይ ኔናራ ኣባን ሚቴቲዳ።
EZE 27:35 ኣባ ጋጻን ዴኢዛ ኣሳይ ኡባይ ኔ ቦላ ጋኪዳይሳ ቤኢዲ ዳጋሚዳ። ኢስታ ካዎቲካ ሂርጋን ኮኮሪዳ፤ ኢስታ ኣይፌሶይ ላሜቲዴስ።
EZE 27:36 ሃራ ካዎቴꬃታ ጊዶን ዲዛ ዛልኣንቻቲ ኔ ቦላ ኣይ ኬና ዋይቂዶ! ኔ ዉርሴꬃይ ዳጋንꬂዛዝ ጊዲዴስ፤ ኔ ሜርናስ ቤታካ» ጊዴስ።
EZE 28:1 ጎዳ ቃላይ ታኮ ዪዲ፥
EZE 28:2 «ሃይሶ ኣሳ ናዉ! ጺሮሴ ሃላቃስ ኡባ ሃሪዛ ጎዳይ፡ «ኔ ዎዚናይ ኦቶሮን ኩሚዲ፥ ‹ታኒ ጾሳ፤ ጾሳ ኣራታን ኣባስ ጊዶ ኣዳን ኡታዲስ› ጊዴስ። ኣይኮስካ ኔኒ ታኒ ጾሳ ማላ ኣꬎ ኤራንቻ ቆፒኮካ ኔኒ ኣሳ ኣቲን ጾስ ዳካ።
EZE 28:3 ኔኒ ዳኔላፔ ቦላራ ኣꬎ ኤራንቻ? ኔፔ ጌሚዳ ጹራ ዮኦይ ዴኔ?
EZE 28:4 ኔ ኣꬎ ኤራቴꬃኒኔ ኔ ኣኬካን ኔ ኣቆታ ዳጋሳዳሳ፤ ዎርቃኔ ቢራ ኔ ሚንጃ ኬꬃን ሺሻዳሳ።
EZE 28:5 ኔ ዛልኤ ኦሶ ኤራቴꬃን ኬሃ ቢዳ ጊሻስ፥ ኣቆታ ቦላ ኣቆታ ዳጋሳዳሳ፤ ኔ ኣቆታ ዳሮቴꬃፌ ዴንዲዳይሳን ኔ ዎዚናይ ኦቶሮን ኩሚዴስ ጋዳ ዮታ።
EZE 28:6 «ሄሳ ጊሻስ ኡባ ሃሪዛ ጎዳይ፥ ‹ታኒ ጾሳ ማላ ኣꬎ ኤራንቻ› ጋዳ ኔኒ ቆፒዛ ጊሻስ፥
EZE 28:7 ካዎቴꬃታ ጊዶን ኬሂ ሜንጼ ኢታ ጊዲዳ ኣላጋታ ታ ኔ ቦላ ኤሃና። ኢስቲ ኔ ኣꬎ ኤራቴꬃ ፑላቴꬃ ቦላ ባንታ ማሻ ሾዳና፤ ጊታ ኔ ቦንቾዛካ ቱኒሳና።
EZE 28:8 ኔና ዱጌ ኦላን ዬጋና፤ ጪማ ሃꬃን ኣባ ጊዶን ኢታ ሃይቆ ኔ ሃይቃና።
EZE 28:9 ሂስቲን ኔኒ ኔና ዎꬊዛይታ ሲንꬃን፥ ‹ታኒ ጾሳ› ጋንዲ? ኔና ዎꬊዛይታ ኩሼን ኔ ጌላሼ ኔኒ ኣሳ ኣቲን ጾስ ዳካ።
EZE 28:10 ኔኒ ኣላጋታ ኩሼን ኣማኖንታ ኣሳታ ሃይቆ ማላ ሃይቃና፤ ኡባ ሃሪዛ ጎዳይ፥ ‹ታኒ ሃይሳ ዮታዲስ› ጌስ» ጊዴስ።
EZE 28:11 ቃሴካ ጎዳ ቃላይ ታኮ ዪዲ፥
EZE 28:12 «ሃይሶ ኣሳ ናዉ! ጺሮሴ ካዎ ጊሻስ ዚላላሼ ኡባ ሃሪዛ ጎዳይ ኔና፥ « ‹ኣꬎ ኤራቴꬃን ኩማዳ፥ ኩሜꬃ ፑላቴꬅ ማይኣዳ ኔኒ ኣሳስ ቱሙ ሌሚሶ ጊዳዳሳ።
EZE 28:13 ኔኒ ኤዴኔን፥ ጾሳ ኣታኪልቴ ጊዶን ዴኣዳሳ፤ ቦንቾ ሹቻዚ ኢሶይ ኢሶይ ኔና ኣሌቂሲዴስ፤ ኢስቲካ ሳርዲዮኔ፥ ቶጳዚዮኔኔ ኣልማዜ፥ ማርጊዴ፥ ኢያስጲዴኔ ሲምፔሬ፥ ቤሉሬ፥ ቢሪሌኔ ኣልኦ ኢንቁ፤ ኔ ማይኦቲካ ጾልቂዛ ኢንቁኔ ዎርቃ፤ ሃይቲ ኔኒ ሜꬌቲዳ ጋላስ ኦሴቲዳ።
EZE 28:14 ኔኒ ናጊዛ ኪሩቤ ጊዳዳ ቲዬታዳሳ፤ ሄሳስ ታ ኔና ሹማዲስ፤ ኔኒ ካሴ ጌሻ ዙማን ጾሳይሳን ዴኣዳሳ፤ ታማ ማላ ሹቻታ ጊዶን ሲሜሬታዳሳ።
EZE 28:15 ኔኒ ሜꬌቲዳ ጋላሳፌ ዶሚን፥ ኢታቴꬂ ኔ ቦላ ቤቲዳ ጋላስ ጋካናስ፥ ኔኒ ኦጌ ኡባን ቦሬይ ባይንዳ ዴኣዳሳ።
EZE 28:16 ኔ ዛልኤይ ሚኒዳ ጊሻስ፥ ማካላቴꬃን ኩማዳሳ፤ ናጋራካ ኦꬃዳሳ። ሄሳ ጊሻስ ታ ኔና ጾሳ ዙማ ቦላፌ ካዉሻዳ ዬዴꬃዲስ፤ ሃይሶ ናጊዛ ኪሩቤ! ታ ኔና ታማ ሚሳቲዛ ሹቻታ ጊዶፌ ኬሳዲስ።
EZE 28:17 ኔ ፑላቴꬃ ጋሶን፥ ኔ ዎዚናይ ኦቶሬቲዴስ፤ ኔ ቦንቾ ጊታቴꬃፌ ዴንዲዳይሳን፥ ኔ ኣꬎ ኤራቴꬃ ቱኒሳዳሳ፤ ሄሳ ጊሻስ ታኒ ኔና ዱጌ ቢታን ኦላዲስ፤ ሃራ ካዎታ ሴራናስ ማላታ ኦꬃዲስ።
EZE 28:18 ኔ ናጋራኒኔ ኔ ጪሞ ዛልኤ ዳሮፔ ዴንዲዳይሳን፥ ኔ ጎይኒዛ ኬꬃታ ቱኒሳዳሳ። ሄሳ ጊሻስ ታኒ ታማይ ኔ ጊዶፌ ኬዛና ማላ ኦꬃዲስ፤ ኢዚካ ኔና ሚዴስ። ኔና ቤኢዛ ኡባ ሲንꬃን፥ ቢታ ቦላ ኔና ቢዲንꬅ ኬሳዲስ።
EZE 28:19 ኔና ኤሪዛ ካዎቴꬃቲ ኡባይ፥ ኔ ቦላ ጋኪዳይሳን ዳጋሚዳ። ኔ ዉርሴꬂ ጬጪሲዛዝ ጊዲዴስ፤ ሃይሳፌ ጉዬ ኔስ ዴኦይ ዴና› ጌስ» ጊዴስ።
EZE 28:20 ጎዳ ቃላይ ታኮ ዪዲ፥
EZE 28:21 «ሃይሶ ኣሳ ናዉ! ኔ ኣይፌሶ ሲዶና ባጋ ዛራዳ ቲንቢቴ ኢዚ ቦላ ዮታ።
EZE 28:22 ኔኒ ዴራስ ኡባ ሃሪዛ ጎዳይ ኔና፥ ‹ሃኔ ሲዶና ታኒ ኔ ቦላ ዴንዳዲስ፤ ኔ ጊዶን ታኒ ቦንቼታና፤ ቂጻቴ ታኒ ኢዚ ቦላ ኤሂሺን፥ ታ ጌሻቴꬃካ ታ ኢዚ ጊዶን ቆንጪሲሺን፥ ታኒ ጎዳ ጊዲዳይሳ ኢስቲ ኤራና።
EZE 28:23 ታኒ ኢዚ ቦላ ኢታ ሃርጌ ኤሃና፤ ኢዚ ኦጌታን ሱꬂ ጉካና ማላ ታ ኦꬃና፤ ኡባ ባጋራ ዪዛ ማሻን ሲፌቲዳይቲ፥ ኢዚ ጊዶን ኩንዳና፤ ሄሳፌ ጉዬ ታኒ ጎዳ ጊዲዳይሳ ኢስቲ ኤራና።
EZE 28:24 « ‹ሃይሳፌ ጉዬ ኢስራኤሌ ኣሳ ኡንኤꬂዛ ኪንዲቾይኔ ጫዲዛ ኣጉንꬅ ጊዲዳ ሾሮቲ ኢስታ ዩሾን ዴቴና፤ ሄሳን ታኒ ኡባ ሃሪዛ ጎዳ ጊዲዳይሳ ኢስቲ ኤራና› ጌስ» ጊዴስ።
EZE 28:25 ኡባ ሃሪዛ ጎዳይ፥ «ታ ኢስራኤሌ ዴራ ኢስቲ ላሌቲዳ ካዎቴꬃታ ቢታፌ ሺሺዛ ዎዴ፥ ካዎቴꬃቲ ጼሊሺን ታ ጌሻቴꬃ ታኒ ኢስታ ጊዶን ቆንጪሳና፤ ሄሳፌ ጉዬ ኢስቲ ታኒ ታ ኣይሌ ያቆቤስ ኢሚዳ ባንታ ቢታን ዴኣና።
EZE 28:26 ሄን ኢስቲ ሳሮን ዳና፤ ኬꬃታ ኬጻና፤ ዎይኔ ቱራ ቶኪዛሶሆታ ጊጊሳና፤ ኢስቲ ካꬊዳ ሾሮታ ታ ቃጻዪዛ ዎዴ ኢስቲ ሳሮን ዳና፤ ሄሳፌ ጉዬ ታኒ ጎዳይ ኢስታ ጾስ ጊዲዳይሳ ኢስቲ ኤራና» ጌስ።
EZE 29:1 ኑኒ ዲኤቲዳ ታማንꬃ ላይꬃን፥ ታማንꬃ ኣጊናን፥ ታማኔ ናምኣንꬃ ጋላሳን ጎዳ ቃላይ ታኮ ዪዲ፥
EZE 29:2 «ሃይሶ ኣሳ ናዉ! ኔ ኣይፌሶ ጊብጼ ካዎ ፓሮኔኮ ዛራዳ ኢዛ ቦላኔ ጊብጼ ቢታ ኡባ ቦላ ቲንቢቴ ዮታ።
EZE 29:3 ኔኒ ኢዛስ ኡባ ሃሪዛ ጎዳይ፥ «ሻፋ ሃꬃ ጊዶን ኢቺዳ ሃይሶ ጊታ ዶኣዞ! ጊብጼ ካዎ ፓሮኔ! ታ ኔ ቦላ ዴንዳዲስ፤ ‹ኣባዬ ሻፋይ ታይሳ፤ ታኒ ታስ ሜꬋዲስ› ጋሳ።
EZE 29:4 ጊዶ ኣቲን ኔ ሲꬌን ታ ዳፎ ኣꬃና፤ ኔ ሻፋታን ዲዛ ሞሌታ ኔ ጎጋራ ኦይሴꬃና። ኔስ ጎጋን ሻቢዳ ሞሌታ ኡባራ ታ ኔና ኔ ሻፋታፔ ጎቻ ኬሳና።
EZE 29:5 ኔናኔ ኔ ሻፋታን ዲዛ ሞሌታ ኡባ፥ ታ ባዞ ቢታን ዬጋ ኣጋና፤ ኣይኮይ ባይንዳ ዴምባን ኔ ኩንዳና፤ ኔና ሺሻናይኔ ዴንꬃናይ ዴና፤ ዎራ ዶኣታሲኔ ሳሎ ካፎታስ፥ ኔኒ ቁማ ጊዳና ማላ ታ ኣꬃ ኢማና።
EZE 29:6 «ሄሳፌ ጉዬ ጊብጼን ዲዛ ኡባይ ታኒ ጎዳ ጊዲዳይሳ ኤራና። «ኢስራኤሌ ኬꬃን ኔኒ ኣሳስ ማቃ ጉፌ ጊዳዳሳ።
EZE 29:7 ኢስቲ ኔና ኦይኪዳ ዎዴ ሜቃዳ ኢስታ ሾጳዛ ጫዳዳሳ፤ ኢስቲ ኔናን ዜምፒዳ ዎዴ ሜቃዳ ኢስታ ዞኮ ዱꬃዳሳ።
EZE 29:8 ሄሳ ጊሻስ ኡባ ሃሪዛ ጎዳይ ታኒ ማሻ ኔ ቦላ ኤሃና፤ ኔ ኣሳታኔ ኢስታ ሜሄታ ዎꬋና።
EZE 29:9 ጊብጼይ ላሌቲዳ ቡላ ቢታ ጊዳና። ሄሳፌ ጉዬ ታኒ ጎዳ ጊዲዳይሳ ኢስቲ ኤራና። « ‹ኣባዬ ሻፋይ ታይሳ፤ ታኒ ኢዛ ሜꬋዲስ› ጋዳሳ።
EZE 29:10 ሄሳ ጊሻስ ታኒ ኔ ቦላኔ ኔ ሻፋታ ቦላ ዴንዳዲስ፤ ጊብጼ ቢታ ሚጊዶሌፔ ቢዲ ኣሲዋ ጋካናስ፥ ሄፔካ ቢዲ ቶጵያ ዛዋ ጋካናስ ላላዳ ታኒ ቡላሳና።
EZE 29:11 ኣስ ጊዲን ሜሄ ጊዲን ሄራ ኣꬊቤና፤ ኦይዱ ታሙ ላይꬅ ጋካናስ ኦኒካ ኢዚን ዴና።
EZE 29:12 ታኒ ጊብጼ ቢታ ꬋይዳ ቢታታፔ ኢሲኔይ ማላ ቡላሳና፤ ኢዚ ካታማቲካ ላሌቲዳ ካታማታ ጊዶን ኦይዱ ታሙ ላይꬅ ጋካናስ ካይስ ጊዳና፤ ጊብጼታካ ታኒ ካዎቴꬃታ ጊዶን ላላና፤ ዴሬታ ጊዶን ታ ኢስታ ዜራና።
EZE 29:13 «ኡባ ሃሪዛ ጎዳይ፥ ‹ኦይዱ ታሙ ላይꬃፌ ጉዬ ታኒ ጊብጼታ ኢስቲ ላሌቲ ዲዛ ካዎቴꬃታ ጊዶፌ ሺሻና።
EZE 29:14 ታኒ ኢስታስ ዛራ ኢሻሎ ዴኦ ኢማና፤ ካሴ ኢስታ ኣዋታ ቢታ ጳጺሮሴ ታ ኢስታ ዛራና፤ ኢዛካ ካዎቴꬃታ ኡባፌ ላፋ ጊዳና።
EZE 29:15 ሃራ ካዎቴꬃታፔ ቦላራ ኢዛ ባና ꬎቁ ሂስታና ዳንዳዩኩ፤ ታኒ ኢዞ ኬሃ ላፋ ሂስታና፤ ሄሳ ጊሻስ ኢዛ ሃራ ካዎቴꬃታ ዛራ ሃራና ዳንዳዩኩ።
EZE 29:16 ጊብጼይ ሃይሳፌ ጉዬ ኢስራኤሌይ ኢዚን ዜምፒዛ ዴሬ ጊዱኩ፤ ማዶ ዴማናስ ኢዚኮ ኢስቲ ሲሚዳ ዎዴ ኢስቲ ኦꬂዳ ናጋራ ኢስቲ ቆፍሲዛ ዴሬ ጊዳና፤ ሄሳፌ ጉዬ ታኒ ኡባ ሃሪዛ ጎዳ ጊዲዳይሳ ኢስቲ ኤራና› ጌስ» ጊዴስ።
EZE 29:17 ኑኒ ዲኤቲዳ ናምኡ ታማኔ ላፑንꬃ ላይꬃን፥ ኮይሮ ኣጊናን፥ ኮይሮ ጋላሳን ጎዳ ቃላይ ታኮ ዪዲ፥
EZE 29:18 «ሃይሶ ኣሳ ናዉ! ባቢሎኔ ካዎ ናቡካዳናጾሬይ ዎልቃማ ኦላ ጺሮሴ ቦላ ዴንꬄꬂዴስ፤ ኡባ ሁኤይ ቦኣቲዴስ፤ ኡባ ሃሼይካ ጋሬቲዴስ፤ ጊዲኮካ ኢዚኔ ኢዛ ኦላንቻቲ ጺሮሴ ቦላ ኢስቲ ዎራጂዲ ዴሚዳ ዎꬌይ ዴና።
EZE 29:19 ሄሳ ጊሻስ ኡባ ሃሪዛ ጎዳይ፥ ‹ታኒ ጊብጼ ቢታ ባቢሎኔ ካዎ ናቡካዳናጾሬስ ኣꬃ ኢማና፤ ኢዚስ ዲዛ ኣቆታ ኡባ ኢዚ ባስ ሚያና፤ ኢዛ ኦላንቻታስ ዳሞዛ ጊዳና ማላ ቢታይን ዲዛ ሚሽ ኡባ ቦንቃናኔ ፒቲ ኤፋና።
EZE 29:20 ኢዚኔ ኢዛ ኦላንቻቲ ታስ ዳቡርዳ ጊሻስ ኢዛስ ዳቡራ ጋቴ ጊዳና ማላ ጊብጼ ታ ኢዛስ ኢማዲስ› ጌስ።
EZE 29:21 «ሄ ጋላስ ታኒ ኢስራኤሌ ኬꬃስ ካጬ ሞይዛና፤ ኢስታ ጊዶን ታ ኔ ዶና ዶያና፤ ሄሳን ታኒ ጎዳ ጊዲዳይሳ ኢስቲ ኤራና» ጊዴስ።
EZE 30:1 ጎዳ ቃላይ ታኮ ዪዲ፥
EZE 30:2 «ሃይሶ ኣሳ ናዉ! ሃይሳ ማላ ጋዳ ቲንቢቴ ዮታ፡ ኡባ ሃሪዛ ጎዳይ፥ « ‹ዉ! ዉይ› ጋ ዋሳ፤ ‹ሄ ጋላሳይስ ኣዬ ኣና!› ጋ።
EZE 30:3 ጋላሳይ ማቲዴስ! ጎዳ ጋላሳይ ጋኪዴስ! ሄ ጋላሳይ ሻራ ጋላሳ፤ ካዎቴꬃታ ኡባስ ባሻ ጋላሳ።
EZE 30:4 ጊብጼ ቦላ ኦላይ ያና፤ ቶጵያ ቦላካ ቱጋይ ያና። ዳሮቲ ጊብጼን ሹኬቲ ኩንዳና፤ ኢዚ ኣቆታይ ቦንቄታና፤ ኢዚ ዮቻቲካ ላሌታና።
EZE 30:5 «ቶጵያይኔ ፑጼይ፥ ሉዴይኔ ኣራቤይ፥ ሊቢያይኔ ጫቆ ቃላ ቢታ ኣሳይ ጊብጼራ ኢሲፌ ማሻን ዉራና።
EZE 30:6 «ኡባ ሃሪዛ ጎዳይ፥ ‹ጊብጼራ ዙፔቲዛይቲ ኩንዳና፤ ኢዛ ኦቶሬቲዛ ሚኖቴꬃይ ꬋያና፤ ሚጊዶሌፔ ቢዲ ኣሲዋ ጋካናስ፥ ኢስቲ ማሻን ሃይቃና› ጌስ።
EZE 30:7 ቡላ ቢታታ ጊዶን ኢስቲ ኣꬊ ቡላ ጊዳና፤ ኢስታ ካታማቲካ ላሌቲዳ ካታማታ ጊዶፌ ኢሳ ጊዳና።
EZE 30:8 ታኒ ጊብጼን ታማ ኦይꬂዛ ዎዴ፥ ኢዞ ማዲዛይቲ ኡባይ ኩንዲዛ ዎዴ፥ ታኒ ጎዳ ጊዲዳይሳ ኢስቲ ሄ ዎዴ ኤራና።
EZE 30:9 «ሄ ጋላስ ታ ቃስታኔቲ ማርካቤን ቢዲ ባꬊ ጋ ኡቲዳሶሆፔ ኬሳናስ ቶጵያ ዳጋንꬃና፤ ጊብጼይ ꬉማን ሚቴቲዛ ዎዴ ኢስታ ጬጬይ ኦይካና፤ ቱማፔ ሄ ጋላሳይ ያና»።
EZE 30:10 ኡባ ሃሪዛ ጎዳይ፥ «ባቢሎኔ ካዎ ናቡካዳናጾሬ ኩሼን ቆዳይ ባይንዳ ጊብጼ ዴሬ ኣሳ ታ ꬋይሳና።
EZE 30:11 ካዎቴꬃታ ኡባፌ ሜንጼ ኢታ ጊዲዳ ኢዚኔ ኢዛ ኦሳንቻቲ ቢታዮ ꬋይሳናስ ያና ማላ ኦꬃና፤ ባንታ ማሻ ጊብጼ ቦላ ሾዲዲ ቢታዮ ኣሃ ጻላ ሂስታና።
EZE 30:12 ኣባዬ ሻፋ ታኒ ሜሊሳና፤ ቢታዮካ ኢታ ኣሳታስ ባይዛና፤ ኣላጋታ ኩሼን ቢታዮኔ ኢዚን ዲዛ ኡባ ታ ቡላ ሂስታና፤ ታኒ ጎዳይ ሃይሳ ዮታዲስ።
EZE 30:13 «ኤቃ ጾሳታ ታ ꬋይሳና፤ ሜምፒሳን ዲዛ ሚስሌታ ታ ዲፒ ሂስታና፤ ሃይሳፌ ጉዬ ጊብጼን ሃላቃታናይ ዴና፤ ቢታይ ቦላ ታ ያሻቴꬅ ኪታና።
EZE 30:14 ታኒ ጳጺሮሴ ቢታ ቡላ ሂስታና፤ ጻኖሴ ቦላ ታማ ዬዳና፤ ቴቤሴ ቦላ ቂጻቴ ዬጋና።
EZE 30:15 ጊብጼስ ሚጻ ጊዲዳ ሲና ቦላ ታ ባሻ ጉሳና፤ ቆዳይ ባይንዳ ቴቤሴ ኣሳ ታ ꬋይሳና።
EZE 30:16 ታኒ ጊብጼ ቦላ ታማ ኤꬃና፤ ሲኔይ ጬጬን ቡልኣኬታና፤ ቴቤሴይ ዳምባላን ሚቴታና፤ ሜምፒሳይ ዱጾንታ ጬጬ ጊዶ ጌላና።
EZE 30:17 ሄሊዮቴኔ ቡባስቴ ናቴꬃቲ ማሻን ሲፌታና፤ ሄ ካታማቲካ ዲኤታና።
EZE 30:18 ታኒ ጊብጼ ቃምባራ ሜንꬂዛ ዎዴ ጻፊናሴን ጋላሳይ ቃማና፤ ሄሳፌ ጉዬ ኢዛ ኦቶሬቲዳ ኢዚ ሚኖቴꬃይ ኩንዳና፤ ኢዛ ሻራን ካሜታና፤ ኢዚ ጉታቲካ ዲኤታና።
EZE 30:19 ሄሳ ጊሻስ ታ ጊብጼ ቦላ ታ ቂጻቴ ኤሃና፤ ኢስቲካ ታኒ ጎዳ ጊዲዳይሳ ሄ ዎዴ ኤራና» ጊዴስ።
EZE 30:20 ኑኒ ዲኤቲዳ ታማኔ ኢሲንꬃ ላይꬃን፥ ኮይሮ ኣጊናን፥ ላፑንꬃ ጋላሳን ጎዳ ቃላይ ታኮ ዪዲ፥
EZE 30:21 «ሃይሶ ኣሳ ናዉ! ታኒ ጊብጼ ካዎ ቄሴ ሜንꬃዲስ፤ ኢዚ ፓጻና ማላ ኢዛ ቄሴይ ኮሌቲቤና፤ ዎይኮ ኢዚ ማሻ ኦይኪ ዳንዳያና ማላ ኢዛ ኩሼይ ማቃን ኮሌቲቤና።
EZE 30:22 ሄሳ ጊሻስ ኡባ ሃሪዛ ጎዳይ፥ ‹ታኒ ጊብጼ ካዎ ፓሮኔ ቦላ ዴንዳዲስ፤ ኢዛስ ፓጻ ቄሴዛራኔ ሜቆ ቄሴዛራ ናምኣ ጋꬃ ሜንꬃና፤ ኢዛ ማሻይ ኢዛ ኩሼፔ ኬሲ ኤኪ ዎꬋና ማላ ታ ኦꬃና።
EZE 30:23 ታኒ ጊብጼ ኣሳ ካዎቴꬃታ ጊዶን ላላና፤ ሃራ ዴሬታ ጊዶንካ ዜራና።
EZE 30:24 ታኒ ባቢሎኔ ካዎ ቄሴ ሚንꬃዳ ታ ማሻካ ኢዛ ኦይꬃና። ጊዶ ኣቲን ፓሮኔ ቄሴዛ ታ ሜንꬃና፤ ኢዚካ ባ ሞርኬዛ ሲንꬃን ኢታ ማዱንጺዳ ኣሳ ማላ ቶቃና።
EZE 30:25 ባቢሎኔ ካዎ ቄሴ ታ ሚንꬃና፤ ጊዶ ኣቲን ፓሮኔ ቄሴይ ዳቡራና፤ ታኒ ታ ማሻ ባቢሎኔ ካዎ ኩሼን ኦይꬂን ኢዚካ ቃꬂሺን ታኒ ጎዳ ጊዲዳይሳ ኢስቲ ኤራና።
EZE 30:26 ታ ጊብጼታ ካዎቴꬃታ ጊዶን ላላና፤ ዴሬታ ጊዶንካ ዜራና፤ ሄሳፌ ጉዬ ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ» ጊዴስ።
EZE 31:1 ኑኒ ዲኤቲዳ ታማኔ ኢሲንꬃ ላይꬃን፥ ሄꬓንꬃ ኣጊናን፥ ኮይሮ ጋላሳን ጎዳ ቃላይ ታኮ ዪዲ፥
EZE 31:2 «ሃይሶ ኣሳ ናዉ! ጊብጼ ካዎ ፓሮኔሲኔ ቆዳይ ባይንዳ ኢዛ ዴራስ፥ « ‹ጊታቴꬃን ኔናራ ጊናታናይ ኦኔ?
EZE 31:3 ኢዛ ሃጋይ ዎራስ ኩዋ ጊዲዲ ዳሮ ሉሌ ጊዲዲ ኢዛ ጼራይ ሳሎ ጋኪ ዲቺዛ ሊባኖሴ ዚጋ ሚሳቲዛ ኣሶሬ ጼሊቴ።
EZE 31:4 ሃꬃቲ ኢዛ ጫሪሲዳ፤ ጪማ ፑልቶቲካ ኢዛ ዲቺዳ፤ ኢስታ ካንቼ ሃꬃቲ ጎጊዳ፤ ኢስታ ጻጶይ ዲዛሶ ኡባ ኢርጺሲዳ፤ ዴምባን ዲዛ ሚꬃታ ኡባኮ ዛራ ሃꬅ ዬዲዳ።
EZE 31:5 ሃꬅ ካሊዳ ጊሻስ ዎራ ጊዶን ዲዛ ሚꬅ ኡባፌ፥ ኬሂ ኣዱቂዴስ፤ ኢዛ ሃጋቲ ዳዪዳ፤ ኡንቁሎቲ ኣዱቂዳ።
EZE 31:6 ሳሎ ካፎቲ ኡባይ ኢዛ ሃጋታ ቦላ ባንታ ኬꬅ ኬጺዳ፤ ዎራ ዶኣቲ ኡባይ ኢዛ ሃጋታ ጋርሳን ማራታ ዬሊዳ፤ ጊታ ካዎቴꬃቲ ኡባይ ኢዛ ኩዋ ጋርሳን ዴኢዳ።
EZE 31:7 ዳዪዳ ኢዛ ሃጋታራ ኢዛስ ፑላዚ ኬሂ ሎኦ፤ ኢዛ ጻጶቲ ሃꬂ ዳሪ ዲዛሶ ቢዳ።
EZE 31:8 ጾሳ ጋናቴን ዲዛ ዚጋቲካ ኢዛራ ጊናታና ዳንዳይቤቴና፤ ጺዳቲካ ኢዛ ሃጋታራ ጊናቴቴና፤ ዎላቲካ ኢዛ ሃጋራ ጊናቴቴና፤ ጾሳ ጋናቴን ዲዛ ኣይ ሚꬂካ ሎኤቴꬃን ኢዛ ጋኬና።
EZE 31:9 ታኒ ኢዛ ዳሮ ሃጋታራ ጋꬃ ፑላሳ ሜꬋዲስ፤ ጾሳ ጋናቴን ዲዛ ሚꬃቲ ኡባይ ኢዛ ኣሞታና ማላ ኦꬃዲስ› ጌስ ጋ።
EZE 31:10 «ሄሳ ጊሻስ ኡባ ሃሪዛ ጎዳይ፥ ‹ጩፑ ጊዳ ቦንጮታ ቦላ ጼራ ꬎቁ ሂስቲዲ ባና ዛራꬊሲዳ ጊሻስ፥ ባ ኣዱሳቴꬃን ኢዚ ኦቶሬቲዳ ጊሻስ፥
EZE 31:11 ታኒ ኢዛ ኢታቴꬃ ኬና ኢዛ ኦሶ ጋቴ ኢማና ማላ ካዎቴꬃታ ሃሪዛይሳስ ታ ኢዛ ኣꬃ ኢማዲስ። ታ ኢዛ ኬሳ ዎራ ኦላዲስ።
EZE 31:12 ካዎቴꬃታ ጋርሳን ኬሂ ሜንጼ ኢታ ኣላጋቲ ኢዛ ቃንጼሬꬂ ዬጊዳ፤ ኢዛ ኡንቁሎቲ ዙማታኒኔ ዙሌታን ኩንዲዳ፤ ኢዛ ሃጋቲካ ሜቄሬቲ ሃꬃ ዛራታን ዎꬊዳ፤ ቢታን ዲዛ ካዎቴꬃቲ ኡባይ ኢዛ ኩዋ ጋርሳፌ ኬዚዲ ዬጊ ቢዳ።
EZE 31:13 ሳሎ ካፎቲ ዪዲ ኩንዲዳ ሚꬃ ቦላ ኡቲዳ፤ ዎራ ዶኣቲካ ኡባይ ኩንዲዳ ሚꬃ ሃጋታ ቦላ ኡቲዳ።
EZE 31:14 ሄሳ ጊሻስ ሃꬃ ላንቄን ዲዛ ኣይ ሚꬂካ ባ ጼራ ጩፑ ጊዳ ቦንጮታፔ ቦላራ ꬎቁ ሂስቲዲ ሃይሳፌ ጉዬ ባና ኦቶሮን ዛራꬊሴና፤ ቃሴካ ኣይ ሚꬂካ ሎኤꬂዲ ሃይሳꬆ ኣዱቄና፤ ኡባይካ ሃይቂዲ ዱጌ ዱፎን ጌሊዛይታራ ኢሲፌ ሃይቃና ማላ ፒርዴቲዴስ› ጌስ።
EZE 31:15 «ኡባ ሃሪዛ ጎዳይ፥ ኢዚ ዱጌ ዱፎን ጌሊዳ ጋላስ ጪማ ፑልቶታ ኢዛ ጊሻስ ካዮን ካማዲስ፤ ሻፋታ ቴቃዲስ፤ ጎጊዛ ሃꬃቲካ ኤቂዳ፤ ታ ኢዛ ጋሶን ሊባኖሴ ꬉማ ማይዛዲስ፤ ዎራ ሚꬃቲ ኡባይ ሜሊዳ።
EZE 31:16 ዱጌ ዱፎን ጌሊዛይታራ ታ ኢዛ ጌልꬂዛ ዎዴ ኢዚ ኩንዲሺን ሲዬቲዳ ጊሪሳይ ካዎቴꬃታ ዳጋንꬂዴስ፤ ሄሳፌ ጉዬ ኤዴኔ ሚꬃቲ፥ ዱማኔ ዶሬቲዳ ሊባኖሴ ሚꬃቲ፥ ሃꬅ ካሊዳ ሚꬃቲ ኡባይ ቢታ ጋርሳን ዲሼ ሚኔቲዳ።
EZE 31:17 ካዎቴꬃታ ጊዶፌ ኢዛራ ዙፔቲዳይቲ፥ ኢዛ ኩዋ ጋርሳን ዴኢዳይቲ፥ ማሻን ሲፌቲዳይታራ ጋይታናስ ዱጌ ዱፎን ዎꬊዳ።
EZE 31:18 «ኤዴኔን ሚꬃታፔ ፑላቴꬃኒኔ ኣዱሳቴꬃን ኔናራ ጊናታናይ ኦኔ? ጊዶ ኣቲን ኔኒካ ሄሳꬆ ኤዴኔ ሚꬃታራ ኢሲፌ ቢታ ጋርስ ጌላና፤ ማሻን ሃይቂዳይታራኔ ኣማኖንታይታራ ኢሲ ቦላ ኢቻና። «ፓሮኔኔ ቆዳይ ባይንዳ ኢዛ ዴራ ጋካናይሲ ሃይሳ፤ ታኒ ኡባ ሃሪዛ ጎዳይ ሃይሳ ዮታዲስ» ጊዴስ።
EZE 32:1 ኑኒ ዲኤቲዳ ታማኔ ናምኣንꬆ ላይꬃን፥ ታማኔ ናምኣንꬆ ኣጊናን፥ ኮይሮ ጋላሳን ጎዳ ቃላይ ታኮ ዪዲ፥
EZE 32:2 «ሃይሶ ኣሳ ናዉ! ጊብጼ ካዎ ፓሮኔስ ዚላላሼ፥ « ‹ኔኒ ካዎቴꬃ ጊዶን ጋሞ ማላ፤ ኣባ ጊዶንካ ሚሚንቴ ማላ፤ ኔኒ ሻፋታን ቦቦልጩ ጋሳ፤ ሃꬃታ ኔ ቶሆን ዋꬋሳ፤ ፑልቶታ ኡሎሳሳ።
EZE 32:3 « ‹ኡባ ሃሪዛ ጎዳይ፡ ዳሮ ዴሬ ሺሻዳ፥ ታ ጊቴዛ ኔ ቦላ ዬጋና፤ ኢስቲ ኔና ታ ጊቴዛራ ጎቺ ኬሳና።
EZE 32:4 ታ ኔና ቢታ ቦላ ዬጋና፤ ዴምባ ቦላካ ሚጫና፤ ሳሎ ካፎቲ ኡባይ ኔ ቦላ ኡታና ማላ ታ ኦꬃና፤ ዎራ ዶኣቲ ኡባይ ኔና ዪቄቲ ሚ ካላና።
EZE 32:5 ታኒ ኔ ኣሾ ዙማታ ቦላ ላላና፤ ዙሌታካ ኔ ኣሃን ኩንꬃና።
EZE 32:6 ቢታ ኔ ሱꬃን ታ ጫጲሳና፤ ኔፔ ጎጊዛይሲ ዙሌታ ኩሚዲ ዙማታ ጋካናስ ዲዛ ኦጌ ኡባ ካማና።
EZE 32:7 ታ ኔና ꬋይሲዛ ዎዴ ሳሎታ ጎዛና፤ ኢስታ ጾሊንቴታካ ꬉሚሳና፤ ኣዋካ ሻራን ካማና፤ ኣጊናይካ ባ ፖኦ ዲጋና።
EZE 32:8 ሳሎን ፖኢሲዛ ፖኦታ ኡባ፥ ኔ ቦላ ታ ꬉሚሳና፤ ኔ ቢታ ቦላ ታ ꬉማ ኤሃና› ጌስ።
EZE 32:9 «ኔ ቦላ ዪዳ ባሻ ታ ሲሲዛ ዎዴ ኔ ኤሮንታ ቢታን ካዎቴꬃታ ጊዶን፥ ዳሮ ኣሳታ ዎዚና ጬጪሳና።
EZE 32:10 ዳሮ ኣሳይ ኔ ቦላ ጋኪዳ ሜቶን ዳጋማና ማላ ታ ኦꬃና፤ ታኒ ታ ማሻ ኢስታ ሲንꬃን ሾዳ ሴሲሺን ኔ ቦላ ጋኪዳ ሃኖዛ ጋሶን ኢስታ ካዎቲ ዳጋማን ኖዡ ጋና፤ ኔኒ ኩንዲዛ ጋላስ ኢሶይ ኢሶይ ባ ሼምፖስ ያሻን ኣይፌ ቂጶን ኮኮራና።
EZE 32:11 «ኡባ ሃሪዛ ጎዳይ ጊብጼ ካዎስ፥ ‹ባቢሎኔ ካዎ ማሻይ ኔ ቦላ ያና።
EZE 32:12 ካዎቴꬃታ ኡባፌ ኬሂ ሜንጼ ኢታ ጊዲዳ፥ ዎልቃማ ኣሳታ ማሻን ኔ ሺሺዳ ኦላንቻቲ ኩንዳና ማላ ታ ኦꬃና፤ ጊብጼ ኦቶሬቴꬃ ኢስቲ ኩንዲሳና፤ ኢዚስ ጮራ ኦላንቻታካ ꬋይሳና።
EZE 32:13 ዳሮ ሃꬃ ማታን ዲዛ ኢዚ ዉዴታ ታ ꬋይሳና፤ ሄሳፌ ጉዬ ኣሳ ቶሆን ዬꬌቴቴና፤ ሜሄ ቶሆይ ኡሎሴና።
EZE 32:14 ሂስታዳ ታ ኢዚ ሃꬃታ ጺሊሳና፤ ኢዚ ሻፋታ ዛይቴ ማላ ታ ጎጊሳና።
EZE 32:15 ታ ጊብጼ ቡላሲሺን ቢታይን ዲዛይ ኡባይ ꬋይሺን፥ ሄን ዲዛ ኡባ ታኒ ሾጪሺን፥ ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ» ጊዴስ።
EZE 32:16 ኡባ ሃሪዛ ጎዳይ፥ «ሄሲ ኡባይ ኢዚ ጊሻስ ዚላሌቲዛ ዚላሳ፤ ካዎቴꬃታ ማጫ ናይቲ ዚላላና፤ ጊብጼሲኔ ኢዚ ጮራ ኦላንቻታ ጊሻስ ዚላሊሼ ኮይዛና» ጌስ።
EZE 32:17 ኑኒ ዲኤቲዳ ታማኔ ናምኣንꬆ ላይꬃን፥ ሄ ኣጊናን፥ ታማኔ ኢቻሻንꬆ ጋላሳን ጎዳ ቃላይ ታኮ ዪዲ፥
EZE 32:18 «ሃይሶ ኣሳ ናዉ! ጊብጼ ኦላንቻ ጮራታ ጊሻስ ዬካ! ኢዞኔ ዎልቃማ ካዎቴꬃታ ማጫ ናይታ ዱጌ ዱፎን ጌሊዛይታራ ኢሲፌ ዱጌ ቢታ ጋርስ ጌልꬃ።
EZE 32:19 ኔኒ ኢስታስ፥ ‹ኢንቴ ሃራታፔ ኣꬊዲ ሎኤቲ? ዱጌ ዎꬋዳ ኣማኖንታይታራ ኢሲፌ ኢቻ› ጋ ዮታ።
EZE 32:20 ኢስቲ ማሻን ሲፌቲዳይታ ጊዶን ኩንዳና፤ ማሻይ ሾዴቲዴስ፤ ኢዛ ባ ዳሮ ኦሳንቻታራ ኢሲፌ ጎሼቱ።
EZE 32:21 ዱፎ ጊዶን ዎልቃማ ሃላቃቲ ጊብጼ ጊሻሲኔ ኢዚራ ዙፔቲዛይታ ጊሻስ ኢስቲ ዱጌ ዎꬊዲ፥ ‹ማሻን ሃይቂዳይታራኔ ኣማኖንታይታራ ኢሲ ቦላ ኢቺዳ› ጋና።
EZE 32:22 «ኣሶሬይ ባ ኩሜꬃ ኦላንቻታራ ዳዉስ፤ ኢዚፔ ማሻን ኩንዲዳይታኔ ሲፌቲዳይታ ዱፎን ዶዴታ ኡታዱስ።
EZE 32:23 ኢስታ ዱፎይ ጪማ ኦላ ጊዶን ዴስ፤ ኢዚ ኦላንቻቲ ኢዚ ዱፎ ዩሾን ኮሬቲዳ፤ ፓጻ ዲዛይታ ቢታን ሺሮ ዴንꬂዳይቲ ኡባይ ሹኬቲዳ፤ ማሻንካ ዉሪዳ።
EZE 32:24 «ኤላማ ሄን ዳዉስ፤ ኢዚ ኦላንቻቲ ኡባይ ኢዚ ዱፎ ዩዪ ኣꬊ ዴቴስ፤ ኡባቲካ ሹኬቲዳ፤ ማሻንካ ሃይቂዳ፤ ፓጻ ዲዛይታ ቢታን ሺሮ ዴንꬂዳ ኡባቲ ኣማኖንታ ቢታ ጋርስ ጌሊዳ፤ ዱጌ ቢታ ጋርስ ጌሊዳይታራ ኢሲፌ ዬላ ማይኢ ጌሊዳ።
EZE 32:25 ኢዚ ዱፎ ዩሾን ዲዛ ኩሜꬃ ኦላንቻታራ ሹኬቲዳይታ ጊዶን ሂጻይ ኢዚስ ጊጌቲዴስ። ኢስቲ ኡባይ ኣማኖንታይታኔ ማሻን ሲፌቲዳይታ፤ ኢስታ ሺሮይ ሼምፖራ ፓጻ ዲዛይታ ቢታን ዎሬኬቲዳ ጊሻስ ዱጌ ዱፎን ጌሊዛይታራ ኢሲ ቦላ ዬላ ማይኣና፤ ሹኬቲዳይታ ጊዶን ኢስቲ ኢቻና።
EZE 32:26 «ሜሼኬይኔ ቱባሌ ዱፎይ ባንታ ኦላንቻታ ዱፎን ዶዴቲ ኡታና፤ ኢስቲ ኡባይካ ኣማኖንታይታ ጊዲ ኡቲዲ ሼምፖራ ፓጻ ዲዛይታ ቢታን ባ ሺሮ ዴንꬄꬂዳ ጊሻስ ማሻን ሃይቂዳ።
EZE 32:27 ዳሮ ላይꬃፌ ካሴ ሃይቂዳ ኦላ ቃራቲ ባንታ ማሻ ቦርኮቲዲ፥ ባንታ ጎንዳሌ ባንታ ቲራ ቦላ ኦይኪዲ፥ ባንታ ኩሜꬃ ኦላ ሚሽ ኡባራ ዱፎን ጌሊዳይታ ማላ ቦንቾን ሞጌቲቤቴና። ሃ ኦላንቻቲ ሼምፖራ ፓጻ ዲዛይታ ቢታን ዲዛ ዎልቃማ ኣሳታ ቦላ ሺሮ ዴንꬂዳ ጊሻስ ኢስታ ናጋራ ቂጻቴይ ኢስታ ሜቄꬃ ቦላ ሼምፓና።
EZE 32:28 «ፓሮኔ! ኔኒካ ሄሳꬆ ሜቃና፤ ማሻን ሲፌቲዳይታራኔ ኣማኖንታይታራ ኔ ኢሲ ቦላ ኢቻና።
EZE 32:29 «ኤዶማ ሄን ዴኣዉስ፤ ኢዚ ካዎቲኔ ኢዞ ሃሪዛይቲ ኡባይ ሄን ዴቴስ፤ ኢስቲ ዎልቃራ ዲዛይታ ጊዲኮካ ማሻን ሲፌቲዳይታራ፥ ዱጌ ዱፎን ጌሊዳይታራኔ ኣማኖንታይታራ ኢሲ ቦላ ኢቺዳ።
EZE 32:30 «ፑዴሃ ባጋ ሃሪዛይቲኔ ሲዶናቲ ኡባይ ሄን ዴቴስ፤ ሃይሳፌ ካሴ ኢስቲ ባ ዎልቃን ኣማኔቲዲ ሺሮ ዴንꬂዳይታ ጊዲኮካ ሹኬቲዳይታራ ኢሲፌ ዬላን ኩንዲዳ፤ ማሻን ሲፌቲዳይታ ኣማኖንታይታራኔ ዱጌ ዱፎን ዎꬊዳይታራ ኢሲፌ ዬላ ማይኢ ኢቻና።
EZE 32:31 «ፓሮኔይኔ ኢዛ ኦላንቻቲ ኡባይ ኢስታ ቤኣና፤ ማሻን ሲፌቲዳ ባ ኦላንቻታ ኡባ ካዮፔ ኢዚ ሚኔታና።
EZE 32:32 ታኒ ሃይሳፌ ካሴ ካዎቴꬃቲ ኡባይ ጊብጼ ካዎስ ያያና ማላ ሼምፖራ ፓጻ ዲዛይታ ቢታን ሺሮይ ኣካና ማላ ኮይኮካ ፓሮኔይኔ ኢዛ ኦላንቻቲ ኡባይ ማሻን ሲፌቲዳይታራኔ ኣማኖንታይታራ ኢሲፌ ኢቻና፤ ታኒ ኡባ ሃሪዛ ጎዳይ ሃይሳ ዮታዲስ» ጊዴስ።
EZE 33:1 ጎዳ ቃላይ ታኮ ዪዲ፥
EZE 33:2 «ሃይሶ ኣሳ ናዉ! ኔ ዴሬ ኣሳስ ዮታ፤ ኔኒ ኢስታስ፥ ‹ታኒ ቢታ ቦላ ማሻ ኤሂሺን ሄ ዴሬ ኣሳይ ኣሳ ጊዶፌ ዎሼ ኣስ ዶሪዲ ዎꬂኮ፥
EZE 33:3 ኢዚካ ቢታይ ቦላ ማሻይ ዪሺን ቤኢዲ ዴራ ሚንꬂ ኤሪሳናስ ዛዬ ፑኒኮ፥
EZE 33:4 ሄሳፌ ጉዬ ኦኒካ ዛዬዛ ሲዪዲ ናጌቶንታ ኣጊኮ፥ ማሻዚ ዪዲ ኢዛ ሼምፖ ꬋይሲኮ፥ ሱꬃ ኣጮይ ኢዛ ቦላ ዴኤስ።
EZE 33:5 ዛዬዛ ሲዪዲ ናጌቶንታ ኣጊኮ ኢዛ ሱꬃይ ኢዛ ቦላ ጊዳና፤ ኢዚ ናጌቲዳኮ ባና ኣሻና
EZE 33:6 ጊዶ ኣቲን ዎሼ ኣዴዚ ማሻይ ዪዛይሳ ቤኢዲ ዴራ ኤሪሳናስ ዛዬ ፑኖንታ ኣጊኮ ኢስታ ጊዶፌ ኢሲ ኣሳ ሼምፖ ማሻይ ዎꬊኮ ኢዛዴይ ባ ናጋራ ጊሻስ ሃይቃና፤ ጊዶ ኣቲን ኢዛ ሱꬃ ጊሻስ ዎሼ ኣዴዚ ኦይሼታና ማላ ታኒ ኦꬃና› ጋ ዮታ።
EZE 33:7 «ሃይሶ ኣሳ ናዉ! ታኒ ኔና ኢስራኤሌ ኬꬃስ ዎሼ ኣስ ሂስታ ዶራዲስ፤ ሄሳ ጊሻስ ታ ኔስ ዮቲዛ ቃላ ሲያ፤ ታ ሴራካ ኢስታ ኤሪሳ።
EZE 33:8 ታኒ ኢታዛ፥ ‹ሃይሶ ኢታዞ፥ ኔኒ ቱማፔ ሃይቃና› ታኒ ጊዳ ዎዴ፥ ኢዚ ባ ኦጌፔ ሲማና ማላ ኔ ኦꬆንታ ኣጊኮ ሄ ኢታ ኣዴዚ ባ ናጋራን ሃይቃና፤ ኔኒ ጊዲኮ ኢዛ ሱꬃ ጊሻስ ኦይሼታና።
EZE 33:9 ጊዶ ኣቲን ኢታ ኣሲ ባ ኦጌፔ ሲማና ማላ ኔ ዮቲን ኢጺኮ ኢዚ ባ ናጋራን ሃይቃና፤ ኔኒ ጊዲኮ ኔ ሼምፖ ኣሻና።
EZE 33:10 «ሃይሶ ኣሳ ናዉ! ኢስራኤሌ ኣሳስ ኢንቴ፥ ‹ኑ ናጋራይኔ ኑ ቆሆይ ኑና ዴጺዴስ፤ ሄሳፌ ዴንዲዳይሳን ኑኒ ꬋያና ጎስ፤ ሂስቲን ኑኒ ዋኒ ዳና ዳንዳይዞኒ?› ጌታ።
EZE 33:11 ኔኒ ኢስታስ ኡባ ሃሪዛ ጎዳይ፥ ‹ታኒ ታ ዴኦን ጫቃይስ፤ ኢስቲ ባ ኦጌፔ ሲሚዲ ሼምፖራ ፓጻ ዳና ማላ ኣቲን ኢታ ኣሳታ ሃይቆን ታ ኡፋዬቲኬ፤ ሲሚቴ! ኢንቴ ኢታ ኦጌፔ ሲሚቴ! ኢስራኤሌ ኬꬃ ኣሳቶ ኣይስ ሃይቄቲ?› ጋዳ ዮታ።
EZE 33:12 «ሃይሶ ኣሳ ናዉ! ሃኢካ ኔ ዴሬ ኣሳታስ፥ ‹ጺሎ ኣሲ ኣዛዞ ሜንꬂዛ ዎዴ ኢዛስ ካሴ ጺሎቴꬃይ ኢዛ ኣሼና፤ ናጋራንቻይ ባ ናጋራፔ ሲሚኮ ኢዚ ካሴ ናጋራፔ ዴንዲዳይሳን ꬋዬና። ጺሎ ኣሲ ናጋራ ኦꬂኮ ኢዚ ካሴ ጺሎቴꬃፌ ዴንዲዳይሳን ሼምፖራ ፓጻ ዴና› ጋ ዮታ።
EZE 33:13 ጺሎ ኣስ ቱማፔ ኔኒ ሼምፖራ ፓጻ ዳና ጊን ኢዚካ ባ ጺሎቴꬃን ኣማኔቲዲ ኢታ ኦꬂኮ ኢዛ ጺሎ ኦሶታፔ ኢሶይካ ቆፌቴና፤ ኢዚካ ባ ናጋራ ጋሶን ሃይቃና።
EZE 33:14 ቃሴ ኢታ ኣስ ኔ ቱማፔ ሃይቃና ጊኮ፥ ኢዚ ባ ናጋራፔ ሲሚዲ ሱሬኔ ሊኬ ጊዲዳ ሚሽ ኦꬂኮ፥
EZE 33:15 ኢዚ ታልኢዳይሳስ ኦይሶ ኤኪዳይሳ ዛሪኮ፥ ባ ካይሲዳይሳ ዛሪ ኢሚኮ፥ ዴኦ ኢሚዛ ኣዛዞታ ኢዚ ካሊኮ፥ ኢታ ሚሺካ ኢዚ ኦꬆንታ ኣጊኮ ቱማፔ ኢዚ ዴኦን ዳና ኣቲን ሃይቄና።
EZE 33:16 ኢዚ ኦꬂዳ ናጋራፔ ኢሶይካ ቆፌቴና፤ ኢዚ ሱሬኔ ሊኬ ጊዲዳ ሚሽ ኦꬂዳ ጊሻስ ቱማፔ ሼምፖራ ፓጻ ዳና።
EZE 33:17 «ሄሳꬆ ሃንኮካ ኔ ዴሬ ኣሳይ፥ ‹ጎዳ ኦጌይ ሱሬ ዴና› ጌስ፤ ጊዶ ኣቲን ሱሬ ጊዶንታይ ኢስታ ኦጌ።
EZE 33:18 ጺሎ ኣሲ ባ ጺሎቴꬃ ኦሶ ኣጊዲ ኢታ ሚሽ ኦꬂኮ ኢዚ ባ ናጋራን ሃይቃና።
EZE 33:19 ጊዶ ኣቲን ኢታ ኣሲ ባ ኢታቴꬃ ኦሶፔ ሲሚዲ ሱሬኔ ሊኬ ሚሽ ኢዚ ኦꬂኮ፥ ኢዚ ሄሳ ኦꬂዳ ጊሻስ ሼምፖራ ፓጻ ዳና።
EZE 33:20 ኢንቴኖ ኢስራኤሌ ኬꬃ ኣሳቶ ኢንቴ፥ ‹ጎዳ ኦጌይ ሊኬ ዴና› ጌታ፤ ጊዶ ኣቲን ኢሳ ኢሳ ቦላ ኢንቴ ኦጌ ማላ ታ ፒርዳና» ጊዴስ።
EZE 33:21 ኑኒ ዲኤቲዳ ታማኔ ናምኣንꬆ ላይꬃን፥ ታማንꬆ ኣጊናን፥ ኢቻሻንꬆ ጋላሳን፥ ዬሩሳላሜፔ ኬሲ ኤኪ ዪዳ ኢሲ ኣሲ ካታማይ ኩንዲዳይሳ ታስ ዮቲዴስ።
EZE 33:22 ሄ ቢታኔይ ያናፔ ሲንꬃ ጋላሳ ኦማርሳ ዎዴ ጎዳ ኩሼይ ታ ቦላ ሼምፒዲ ታ ዶና ዶይዴስ፤ ዎንቴꬃ ጋላስ ማላዶ ኣዴዚ ታኮ ጋኪዳ ማላ ታ ሃሳያና ዳንዳያዲስ፤ ሄሳፌ ጉዬ ጮኡ ጋቤኬ።
EZE 33:23 ሄሳፌ ጉዬ ጎዳ ቃላይ ታኮ ዪዲ፥
EZE 33:24 «ሃይሶ ኣሳ ናዉ! ኢስራኤሌ ቢታን ላሌቲ ዲዛ ኣሳቲ፥ ‹ኣብራሃሜይ ባርካ ዲዛ ኢሲ ኣስ ጊዲኮካ ቢታዮ ላቲዴስ፤ ኑኒ ጊዲኮ ጮራ፤ ቱማፔ ቢታያ ኑስ ጺንጾ ጊዳ ኢሜታዱስ› ጌቴስ።
EZE 33:25 ሄሳ ጊሻስ ኔኒ ኢስታስ ኡባ ሃሪዛ ጎዳይ፥ ‹ኣሾዛ ሱꬃራ ጋꬂ ሜታ፤ ኢንቴ ኣይፌታካ ኢንቴ ኤቃ ጾሳታኮ ዴንꬄታ፤ ሼምፖ ዎꬌታ። ሂስቲን ሄሳ ማላ ሃኖን ቢታዮ ላታና ቆፔቲ?
EZE 33:26 ኢንቴ ኢንቴ ማሻን ኣማኔቴታ፤ ኢንቴ ሃራሲዛ ሚሻታ ኦꬄታ፤ ኢንቴ ኢሶይ ኢሶይ ኢንቴ ላጌታ ማቼታ ቱኒሴታ። ሂስቲን ኢንቴ ሃይሳ ማላ ሃኖን ቢታዮ ላታና ቤሲዜ? ጌስ።
EZE 33:27 «ኔ ኢስታስ ኡባ ሃሪዛ ጎዳይ፥ ‹ታኒ ዴኦ ጾስ ጊዲዳይሳን ጫቃይስ፤ ላሌቲሼ ኣቲዳይቲ ማሻን ዉራና፤ ጋጻሬን ዲዛይታ ፑዜሬꬂ ማና ማላ ታኒ ዎራ ዶኣታስ ኣꬃ ኢማና፤ ሚኖ ሚጻኒኔ ጎንጎሎ ጊዶን ዲዛይቲ ኢታ ሃርጌን ሃይቃና።
EZE 33:28 ታኒ ቢታዮ ቡላኔ ኣሲ ባይንዳ ካይስ ኬሳና፤ ኢዛ ጬቄቲዛ ዎልቃይ ኢዚፔ ዉራና፤ ኢስራኤሌ ዙማቲ ኦኒካ ኢዛራ ካንꬂ ቦንታ ማላ ቡላ ጊዳና።
EZE 33:29 ኢስቲ ኦꬂዳ ሃራሲዛ ኦሶፔ ዴንዲዳይሳን ታኒ ቢታዮ ቡላኔ ኣሲ ባይንዳ ካይስ ሂስቲሺን ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ።
EZE 33:30 «ሃይሶ ኣሳ ናዉ! ኔ ጊሻስ ኔ ዴሬ ኣሳይ ኬꬃ ፔንጌን ፔንጌኒኔ ጎዳ ጻጶን ኢሶይ ኢሳራ ሃሳዬታና፤ ኢሶይ ኢሳራ ሃሳዬቲሼ፥ ‹ኣኔ ሃ ዪቴ፤ ጎዳፔ ዪዳ ኪታ ሲዮስ› ጌቴስ።
EZE 33:31 ኡባ ጋላስ ኢስቲ ኦꬂዛ ማላ ታ ዴሬይ ኔኮ ያና፤ ኔ ቃላ ሲያናስ ኢስቲ ኔ ሲንꬃን ኡታና፤ ጊዶ ኣቲን ሲዪዳይሳ ፖሌቴና። ባንታ ሜቴርሻን ዳሮ ሲቆ ቆንጪሴቴስ፤ ጊዶ ኣቲን ኢስታ ዎዚናይ ቤሶንታ ጎኣን ሼምፒዴስ።
EZE 33:32 ኢስቲ ኔ ቃላ ሲዪዲ ኦሶን ፔይሾንታይታ ጊዲዳ ጊሻስ፥ ኔኒ ኢስታስ ሎኦ ቃናን ሲቆ ማዛሙሬ ዬጺዛኔ ዬꬃ ማሳራን ሎኤꬂ ካኢዛ ዬꬃንቻ ጊዳዳሳ።
EZE 33:33 «ሃይሲ ኡባይ ቱማፔ ፖሌታና፤ ኢስታ ጊዶን ናቤይ ዲዛይሳ ኢስቲ ሄ ዎዴ ኤራና» ጊዴስ።
EZE 34:1 ጎዳ ቃላይ ታኮ ዪዲ፥
EZE 34:2 «ሃይሶ ኣሳ ናዉ! ኢስራኤሌ ሄንꬃንቻታ ቦላ ቲንቢቴ ዮታ፤ ቲንቢቴ ዮታሼ፥ ‹ኡባ ሃሪዛ ጎዳይ፥ ባና ጻላ ጼሊዛ ኢስራኤሌ ሄንꬃንቻታስ ኣዬ ኣና! ሄንꬃንቻቲ ዉዴዛ ሄማናስ ቤሴኔ?
EZE 34:3 ኢንቴ ማꬃ ኡዬታ፤ ኢዛ ኢስኬፌ ዳዴቲዳ ሱፌዛ ማይኤታ፤ ሞꬊዳይታ ሹኪ ሜታ ሺን ዉዴዛ ጼሌኬታ።
EZE 34:4 ዳቡርዳይታ ሚንꬄꬂቤኬታ፤ ሃርጊዳይታ ꬋሊቤኬታ፤ ሜቂዳይታ ኮሊቤኬታ፤ ቶይላቲዳይታ ዛሪቤኬታ፤ ꬋይዳይታ ኮዪቤኬታ። ኢንቴ ኢስታ ጌኔኒኔ ሜንጼ ኢታቴꬃን ሃሪዴታ።
EZE 34:5 ዉዴቲ ሄንꬃንቻይ ባይንዳ ጊሻስ ላሌቲዳ፤ ላሌቲዳይቲ ዎራ ዶኣታስ ቁማ ጊዲዳ።
EZE 34:6 ታ ዉዴቲ ዙማታ ቦላኔ ዙምቡላታ ኡባ ቦላ ቶይላቲዳ። ቢታ ጋዴ ጋካናስ ላሌቲዳ፤ ጊዶ ኣቲን ኢስታ ጾሞሲዳይ ዎይኮ ኮዪዳይ ዴና› ጋ።
EZE 34:7 «ሄሳ ጊሻስ ኢንቴኖ፥ ሄንꬃንቻቶ፥ ጎዳ ቃላ ሲዪቴ!
EZE 34:8 ኡባ ሃሪዛ ጎዳይ፥ ‹ታኒ ዴኦ ጾስ ጊዲዳይሳን ጫቃይስ!› ጌስ፤ ታ ሄንꬃንቻቲ ታ ዉዴዛ ኮዮንታ ጊሻሲኔ ታ ዉዴዛፔ ኣꬂዲ ባንታና ጼሊዛ ጊሻስ ታ ዉዴይ ሄንꬃንቻይ ꬋዪን ቦንቄቲዴሲኔ ዶኣ ኡባስ ቁማ ጊዲዴስ።
EZE 34:9 ሄሳ ጊሻስ ሄንꬃንቻቶ፥ ጎዳ ቃላ ሲዪቴ!
EZE 34:10 ኡባ ሃሪዛ ጎዳይ፥ ‹ታኒ ታ ሄንꬃንቻታ ቦላ ዴንዳዲስ፤ ታ ዉዴታ ጊሻስ ታ ኢስታ ኦይቻና፤ ሃይሳፌ ጉዬ ሄንꬃንቻቲ ባንታና ጼሎንታ ማላኔ ታ ዉዴዛ ሄሞንታ ማላ ኦꬃና፤ ኢስታ ዶናፔ ታኒ ታ ዉዴዛ ዬጊሳና። ሃይሳፌ ጉዬ ኢስታስ ቁማ ጊዴቴና› ጌስ።
EZE 34:11 «ኡባ ሃሪዛ ጎዳይ፥ ‹ታኒ ታርካ ታ ዉዴታ ኮያና፤ ታ ኢስታ ናጋና።
EZE 34:12 ሄንꬃንቻይ ባ ዉዴታራ ዲሼ ላሌቲዳ ዉዴታ ኮይዛ ማላ ታኒካ ታ ዉዴታ ኮያና፤ ሻራ ጋላሲኔ ꬉማ ጋላስ ኢስቲ ላሌቲዳሶ ኡባፌ ታ ኢስታ ሺሻና።
EZE 34:13 ካዎቴꬃታ ጊዶፌ ታ ኢስታ ኬሳና፤ ዴሬይ ዲዛሶፔ ታ ኢስታ ሺሻና፤ ታ ኢስታ ኢስታ ቢታ ዛራ ኤሃና፤ ኢስራኤሌ ዙማታ ቦላ፥ ሻፋታ ላንቄኒኔ ቢታይ ቦላ ዱሳሶ ኡባን ታ ኢስታ ሄማና።
EZE 34:14 ታኒ ኢስታ ሎኦ ቆሮን ሄማና፤ ꬎቃ ኢስራኤሌ ዙማቲ ኢስቲ ሄሜቲዛሶሆ ጊዳና፤ ሎኦ ቆሮይ ዲዛ ማታን ኢስቲ ኢቻና፤ ሄን ኢስራኤሌ ዙማታ ቦላ ጪሊላሶን ኢስቲ ሄሜታና።
EZE 34:15 ታኒ ታርካ ታ ዉዴታ ሄማናኔ ሼምፒሳና።
EZE 34:16 ታኒ ꬋይዳይሳ ኮያና፤ ቶይላቲዳይሳካ ዛራና፤ ሜቂዳይሳ ኮላና፤ ዳቡርዳይሳካ ሚንꬄꬃና። ጊዶ ኣቲን ታኒ ሞꬊዳይታኔ ሚኒዳይታ ꬋይሳና፤ ዉዴዛ ዎጋራ ሄማና።
EZE 34:17 « ‹ኡባ ሃሪዛ ጎዳይ፡ ኢንቴ ኢዛ ዉዴ ጊዲዳ ጊሻስ፥ ኢዚ ኢንቴ ጊሻስ ኢታ ጊዶኒኔ ሎኦ ጊዶን፥ ꬋርሾ ጊዶኒኔ ኦርጌ ጊዶን ታ ፒርዳና።
EZE 34:18 ጪሊላ ቆሮን ኢንቴ ሄሜቲዛይሲ ኢንቴስ ጊዴኔ? ሚሺን ኣቲዳ ማታ ኢንቴ ዬꬌታና ቤሲዜ? ኢንቴ ጺሎ ሃꬅ ኡዪዛይሲ ኢንቴስ ጊዴኔ? ኣቲዳይሳ ኢንቴ ኢንቴ ቶሆን ቡልቆሳናስ ቤሲዜ?
EZE 34:19 ታ ዉዴቲ ኢንቴ ኢንቴ ቶሆን ዬꬌቲዳ ማታ ማናሲኔ ኢንቴ ኢንቴ ቶሆን ቡልቆሲዳ ሃꬃ ኡያናስ ቤሲዜ?› ጌስ።
EZE 34:20 «ሄሳ ጊሻስ ኡባ ሃሪዛ ጎዳይ ኢስታስ፥ ‹ቤኢቴ፥ ታኒ ታርካ ሞꬎ ሜሄታሲኔ ጊልቃ ሜሄታስ ጊዶን ፒርዳና።
EZE 34:21 ላፋታ ኢንቴ ኢንቴ ሃሼኒኔ ኢንቴ ቡንቃሼን ሱጊዛ ጊሻስ፥ ኢስቲ ጎዴቲ ባና ጋካናስ ኢንቴ ኢንቴ ካጬን ኢጪዛ ጊሻስ፥
EZE 34:22 ታኒ ታ ዉዴዛ ኣሻና፤ ሃይሳፌ ጉዬ ኢስታ ቦንቄቴቴና፤ ሎኦ ሜሄታ ጊዶኒኔ ኢታ ሜሄታ ጊዶን ታ ፒርዳና።
EZE 34:23 ታ ኢስታ ቦላን ኢሲ ሄንꬃንቻ ታ ኣይሌ ዳዊቴ ዎꬃና፤ ኢዚ ኢስታ ሄማናኔ ኢስታስ ሄንꬃንቻ ጊዳና።
EZE 34:24 ታኒ ጎዳይ ኢስታ ጾስ ጊዳና፤ ታ ኣይሌ ዳዊቲ ኢስታ ጊዶን ሃሪዛዴ ጊዳና፤ ታኒ ጎዳይ ሃይሳ ዮታዲስ።
EZE 34:25 « ‹ታኒ ኢስታራ ሳሮቴꬃ ጫቆ ቃላ ጌላና፤ ሄሳፌ ጉዬ ታኒ ኢስታ ዎራ ዶኣታፔ ሼምፒሳና፤ ኢስቲካ ባዞ ቢታን ሳሮን ዴኣና፤ ዎራ ጊዶንካ ዎፓን ኢቻና።
EZE 34:26 ኢስታ ዩሾኒኔ ታ ዙምቡላታ ዩሾን ዲዛሶሆታ ታ ኣንጃና። ዎዴን ዎዴን ታ ኢስታስ ኢራ ኢማና፤ ኢዚካ ኢስታስ ኣንጆ ኢራ ጊዳና።
EZE 34:27 ጋዴን ዲዛ ሚꬃቲ ኣይፌ ኢማና፤ ቢታይካ ካꬅ ሞይዛና፤ ኣስ ኡባይ ባ ቢታ ቦላ ሳሮን ዳና። ታ ኢስታ ቃምባራ ሜንꬃዳ ኢስታ ኣይሌቴꬃን ሃሪዳይታ ኩሼፔ ዎዚዛ ዎዴ ታኒ ጎዳ ጊዲዳይሳ ኢስቲ ኤራና።
EZE 34:28 ሄሳፌ ጉዬ ሃራ ካዎቴꬃቲ ኢስታ ቦንቄቴና፤ ዎራ ዶኣቲካ ኢስታ ፑዜቴና፤ ኢስቲ ሳሮን ዳና፤ ኢስታ ባቢሳና ሚሺ ዴና
EZE 34:29 ሄሳፌ ጉዬ ኢስቲ ኮሻቶንታ ማላ፥ ካዎቴꬃታ ጫሼ ቶኮንታ ማላ ኣይፌ ኢሞን ኤሬቲዳ ኣራዳ ቢታ ታ ኢስታስ ኢማና።
EZE 34:30 ታኒ ጎዳይ ኢስታ ጾሳይ ኢስታራ ዲዛይሳኔ ኢስራኤሌ ኬꬂ ታ ዴሬ ጊዲዳይሳ ሄ ዎዴ ኢስቲ ኤራና።
EZE 34:31 ኢንቴ ታ ዉዴቲ ታ ሄሚዛ ታ ዉዴታ፤ ኢንቴ ታ ኣሳ፤ ታኒካ ኢንቴ ጾሳ፤ ታኒ ኡባ ሃሪዛ ጎዳይ ሃይሳ ዮታዲስ› ጌስ» ጊዴስ።
EZE 35:1 ጎዳ ቃላይ ታኮ ዪዲ፥
EZE 35:2 «ሃይሶ ኣሳ ናዉ! ኔ ሲንꬅ ሃንቄታሼ ሴይሬ ዙማኮ ዛራ፤ ኢዛስ ቲንቢቴ ዮታ።
EZE 35:3 ኔኒ ኢዛስ ኡባ ሃሪዛ ጎዳይ፥ ‹ሃይሶ ሴይሬ ዙማዞ! ታ ኔ ቦላ ዴንዳዲስ፤ ታኒ ታ ኩሼ ኔ ቦላ ዴንꬃና፤ ኔና ቡላኔ ኣሲ ባይንዳሶ ኬሳና።
EZE 35:4 ኔ ካታማታ ታኒ ላላና፤ ኔ ቡላታና። ሄሳፌ ጉዬ ታኒ ጎዳ ጊዲዳይሳ ኔኒ ኤራና።
EZE 35:5 « ‹ኢስራኤሌታ ቦላ ጋኪዛ ቂጻቴይ ኬሂ ጫሚን ኢስቲ ባንታና ጋኪዛ ሜቶዛ ኤኪዛ ዎዴ ኔኒ ቤኒ ላንጬዮ ኦይካ ኡታዳ ኔ ኢስታ ማሻስ ጋꬃዳሳ።
EZE 35:6 ኡባ ሃሪዛ ጎዳይ ታኒ ዴኦ ጾስ ጊዲዳይሳን ጫቃይስ፤ ኔ ሱꬂ ጉካና ማላ ታ ኔና ኢዛስ ኣꬃ ኢማና፤ ኢዚካ ኔና ዬዴꬃና፤ ሱꬅ ጉሲዛይሳ ኔ ኢጾንታ ጊሻስ ሱꬅ ጉሲዛይቲ ኔና ዬዴꬃና።
EZE 35:7 ታኒ ሴይሬ ዙማ ቡላኔ ኣሲ ባይንዳሶ ኬሳና፤ ኢዚ ቦላ ፑዴ ኬዚዛይታኔ ዱጌ ዎꬊዛይታ ታ ዲጋና።
EZE 35:8 ኔ ዙማታ ታ ኣሃን ኩንꬃና፤ ማሻን ሲፌቲዳይቲ ኡባይ ኔ ዙማታን፥ ኔ ዙሌታኒኔ ኔ ሃꬂ ጎጊዛሶ ኡባን ኩንዳና።
EZE 35:9 ታ ኔና ሜርናስ ቡላ ሂስታና፤ ኔ ካታማቲ ዱሳሶ ጊዴቴና፤ ሄሳፌ ጉዬ ታኒ ጎዳ ጊዲዳይሳ ኢንቴ ኤራና› ጌስ ጋ።
EZE 35:10 «ታኒ ጎዳይ ሄን ዲሺን ኢንቴ፥ ‹ሃይቲ ናምኡ ካዎቴꬃቲኔ ናምኡ ዴሬቲ ኑስ ጊዳና፤ ኑኒካ ኢስታ ላታና› ጊዴታ።
EZE 35:11 ሄሳ ጊሻስ ኡባ ሃሪዛ ጎዳይ ታኒ ዴኦ ጾስ ጊዲዳይሳን ጫቃይስ፤ ኢንቴ ኢስታ ኢጺዛ ጋሶን፥ ኢንቴ ኢስታ ቦላ ቆንጪሲዳ ሃንቆኔ ቃናቴ ኬና ታ ኢንቴ ቦላ ፒርዳና፤ ታ ኢንቴ ቦላ ፒርዲዛ ዎዴ ታናቴꬃይ ኢስታ ጊዶን ኤሬታና ማላ ታ ኦꬃና።
EZE 35:12 ሄሳፌ ጉዬ ኢስራኤሌ ዙማታ ጊሻስ ኔኒ፥ ‹ኢስቲ ኣሲ ባይንዳሶ ጊዲዳ፤ ኑ ኢስታ ማና ማላ ኑስ ኢሜቲዳ› ጋዳ ኔ ካꬌን ዮቲዳይሳ ታኒ ጎዳይ ሲዪዳይሳ ኔኒ ሄ ዎዴ ኤራና።
EZE 35:13 ኔኒ ታ ቦላ ኦቶሬታዳሳኔ ጻላቴꬃን ሃሳያዳሳ፤ ታኒካ ሄሳ ሲያዲስ።
EZE 35:14 «ኡባ ሃሪዛ ጎዳይ፥ ‹ኩሜꬃ ቢታይ ኡፋዬቲዛ ዎዴ ታ ኔና ቡላሳና።
EZE 35:15 ኢስራኤሌ ኬꬃ ጺንጾይ ቡላ ጊዲዳ ዎዴ ኔ ኡፋዬቲዳ ጊሻስ ታኒካ ኔ ቦላ ሄሳꬆ ኦꬃና፤ ሃይሶ ሴይሬ ዙማዞ! ኔኒኔ ኩሜꬃ ኤዶሜይ ቡላታና፤ ሄሳፌ ጉዬ ታኒ ጎዳ ጊዲዳይሳ ኢስቲ ኤራና› ጌስ» ጊዴስ።
EZE 36:1 ጎዳይ፥ «ሃይሶ ኣሳ ናዉ! ኢስራኤሌ ዙማታስ ቲንቢቴ ዮታ፤ ኢስታስ ኔኒ፥ ‹ኢስራኤሌ ዙማቶ! ጎዳ ቃላ ሲዪቴ!
EZE 36:2 ኡባ ሃሪዛ ጎዳይ፡ ኔ ጊሻስ ሞርኬቲ ቤኢቴ! ሄይቲ ቤኒ ዙማቲ ኑስ ጺንጾ ጊዲዳ› ጊዳ፤
EZE 36:3 ሄሳ ጊሻስ ኔኒ ቲንቢቴ ዮታ፤ ኡባ ሃሪዛ ጎዳይ፥ ‹ኡባ ባጋራ ዶዲዲ ኦሊሼ ኢንቴና ቆሂዳ ጊሻስ ሃንኮ ኣቲዳ ካዎቴꬃታስ ኢንቴ ጺንጾ ጊዲዴታ፤ ዴሬታሲካ ሚቻሲኔ ቂꬌስ ጊዲዴታ› ጌስ ጋ።
EZE 36:4 ሄሳ ጊሻስ ኢስራኤሌ ዙማቶ! ኡባ ሃሪዛ ጎዳ ቃላ ሲዪቴ! ኡባ ሃሪዛ ጎዳይ ዙማታሲኔ ዙምቡላታስ፥ ዙሌታሲኔ ሃꬃ ዛራታስ፥ ላሌቲዲ ቡላቲዳሶታሲኔ ኢንቴ ዩሾን ዲዛ ሃራ ካዎቴꬃታን ቦንቄቲዲኔ ቂꬌቲዲ ሜላ ኣቲዳ ካታማታስ፥
EZE 36:5 ኡባ ሃሪዛ ጎዳይ፥ ‹ቱማፔ ኤጺዛ ታ ቃናቴቴꬃን ኣቲዳ ዴሬታ ኡባ ቦላኔ ኤዶሜ ኡባ ቦላ ሃሳያዲስ። ኢስቲ ዎዚናፔ ኡፋዬቲሼኔ ካꬌን ኩሚዲ ታ ሄሚዛ ቢታ ኦይኪዲ ቦንቂ ኤካናስ ባስ ጺንጾ ኦꬂዳ› ጌስ።
EZE 36:6 ሄሳ ጊሻስ ኢስራኤሌ ቢታ ጊሻስ ኔኒ ቲንቢቴ ዮታ። ዙማታስ፥ ዙምቡላታስ፥ ዙሌታሲኔ ሃꬃ ዛራታስ ኡባ ሃሪዛ ጎዳይ፥ ‹ኢንቴ ካዎቴꬃታ ቂꬌን ኢንቴ ኩሚዳ ጊሻስ፥ ሃንቆን ኩሚዳ ታ ቃናቴን ዮታይስ› ጌስ።
EZE 36:7 ሄሳ ጊሻስ ኡባ ሃሪዛ ጎዳይ፥ ‹ታኒ ታ ኩሼ ዴንꬃዳ ጫቃይስ፤ ኢንቴ ዩሾን ዲዛ ካዎቴꬃታ ቦላ ናቻ ቃላይ ያና› ጌስ።
EZE 36:8 «ኢስራኤሌ ዙማቶ፥ ኢንቴ ጊዲኮ ታ ዴሬ ኢስራኤሌስ ሃጋ ኬሳና፤ ኢስቲ ማታ ዎዴ ባንታ ዴሬ ሲሚዛ ጊሻስ ኣይፌካ ኢስታስ ኣይፋና።
EZE 36:9 ኢንቴ ጊሻስ ታስ ሲዬቴስ፤ ታ ኢንቴና ሎኦ ኣይፌን ጼላና፤ ኢንቴካ ጎዬታና፤ ዜሬꬂካ ኢንቴ ቦላ ዜሬታና።
EZE 36:10 ኢስራኤሌ ኬꬅ ኩሜꬂ ኣቶንታ ታ ኢንቴ ኣሳ ቆዳ ዳርሳና፤ ካታማቲ ኣሳ ዱሳሶ ጊዳና፤ ላሌቲዳሶቲ ሲሚ ጊምቤታና።
EZE 36:11 ታኒ ኢንቴ ቦላ ኣሳ ቆዳኔ ሜሄታ ቆዳ ጉጃና፤ ኢስቲ ዬሌታናኔ ጮራታና፤ ቤኒሳ ማላካ ኢንቴ ቦላ ኣሳይ ዳና ማላ ታኒ ኦꬃና፤ ታኒ ኢንቴና ካሴፔ ኣꬃ ዱሬሳና፤ ሄሳፌ ጉዬ ታኒ ጎዳ ጊዲዳይሳ ኢንቴ ኤራና።
EZE 36:12 ታ ዴሬ ኢስራኤሌ ኣሳይ ኢንቴናን ሲሜሬታና ማላ ታ ኦꬃና፤ ኢስቲ ኢንቴና ላታና፤ ኢንቴካ ኢስታስ ጺንጾ ጊዳና፤ ሃይሳፌ ጉዬ ኢንቴ ኢስታ ዬሎይ ባይንዳይታ ኦꬄኬታ።
EZE 36:13 «ኡባ ሃሪዛ ጎዳይ፡ ዴሬዚ ኢንቴና፥ ‹ቢታያ ኣስ ፑዜሬꬃ ማና፤ ካዎቴꬃካ ናይ ባይንዳዝ ሂስታና› ጊዳ።
EZE 36:14 ሄሳ ጊሻስ ሃይሳፌ ጉዬ ቢታያ ኣስ ሙኩ፤ ካዎቴꬃካ ናይ ባይንዳዝ ሂስቲኬ።
EZE 36:15 ሃይሳፌ ጉዬ ታ ኔና ካዎቴꬃታ ናች ሲሲኬ፤ ኔ ኣሳ ጫሻን ሜቶታካ፤ ኔኒ ካዎቴꬃታስካ ꬉጴ ጊዳካ ጌስ» ጊዴስ።
EZE 36:16 ቃሴካ ጎዳ ቃላይ ታኮ ዪዲ፥
EZE 36:17 «ሃይሶ ኣሳ ናዉ! ኢስራኤሌ ኣሳይ ባንታ ቢታን ዲዛ ዎዴ ባንታ ኦሶኒኔ ባንታ ዱሳን ቢታዮ ቱኒሲዳ፤ ማጫሳይ ኣጊና ዎጋይ ዪዛ ዎዴ ቱኒዛ ማላ ኢስታ ካንዶይ ታ ሲንꬃን ቱና።
EZE 36:18 ኢስቲ ቢታይ ቦላ ሱꬅ ጉሲዳ ጊሻሲኔ ባንታ ኤቃ ጾሳታን ቢታ ቱኒሲዳ ጊሻስ ታ ሃንቆ ኢስታ ቦላ ጉሳዲስ።
EZE 36:19 ታኒ ኢስታ ካዎቴꬃታ ጊዶን ላላዲስ፤ ኢስቲካ ዴሬ ኡባን ላሌቲዳ፤ ታኒ ኢስታ ቦላ ኢስታ ካንዶ ማላኔ ኢስታ ኦሶ ማላ ፒርዳዲስ።
EZE 36:20 ኢስቲ ባ ቢዳ ካዎቴꬃታ ኡባ ጊዶን ታ ጌሻ ሱንꬃ ቱኒሲዳ፤ ኢስታ ጊሻስ፥ ‹ሃይቲ ጎዳ ዴሬታ፤ ጊዶ ኣቲን ኢስቲ ኢዛ ዴራ ዬጊ ቢዳ› ጌቴቲዴስ።
EZE 36:21 ኢስራኤሌ ኬꬃይ ባ ቢዳ ካዎቴꬃታ ኡባ ጊዶን ቱኒሲዳ ታ ጌሻ ሱንꬃ ጊሻስ ታስ ሴቴቴስ።
EZE 36:22 «ሄሳ ጊሻስ ኢስራኤሌ ኬꬃስ ኡባ ሃሪዛ ጎዳይ፥ ‹ኢንቴኖ ኢስራኤሌ ኬꬃ ኣሳቶ! ታኒ ሃይሳ ኡባ ኦꬂዛይ ኢንቴ ቢዳ ካዎቴꬃታ ኡባ ጊዶን ቱኒሲዳ ታ ጌሻ ሱንꬃ ጊሻሳፌ ኣቲን ኢንቴ ጊሻስ ጊዴና።
EZE 36:23 ኢንቴ ኢስታ ማታን ቱኒሲን ካዎቴꬃታ ጊዶን ቱኒዳ ጊታ ታ ሱንꬃ ጌሻቴꬃ ታኒ ቤሳና። ኢስቲ ጼሊሺን ኢንቴ ባጋራ ታኒ ታ ጌሻቴꬃ ቆንጪሲዛ ዎዴ ካዎቴꬃቲ ታኒ ጎዳ ጊዲዳይሳ ኢስቲ ሄ ዎዴ ኤራና። ታኒ ኡባ ሃሪዛ ጎዳይ ሃይሳ ዮታይስ።
EZE 36:24 « ‹ታኒ ኢንቴና ካዎቴꬃታ ጊዶፌ ኬሳና፤ ዴሬ ኡባፌ ታ ሺሻና። ሂስታዳ ኢንቴና ኢንቴ ቢታ ዛራ ኤሃና።
EZE 36:25 ታኒ ኢንቴና ጺሎ ሃꬃን ኣራጫና፤ ኢንቴካ ጌያና፤ ሂስታዳ ታ ኢንቴና ኢንቴ ኤቃ ጾሳታ ኡባፌኔ ኢንቴ ቱናቴꬅ ኡባፌ ጌሻና።
EZE 36:26 ታኒ ኢንቴስ ኦራꬃ ዎዚና ኢማና፤ ኦራꬃ ኣያናካ ኢንቴ ጊዶን ታ ኣይሳና፤ ቃሴ ሹቻ ዎዚና ኢንቴ ጊዶፌ ኬሳዳ ኣሾ ዎዚና ኢማና።
EZE 36:27 ታኒ ታ ኣያና ኢንቴ ጊዶን ኣይሳና፤ ኢንቴ ታ ማራ ካላና ማላኔ ታ ዎጋ ሚንꬂ ናጋና ማላ ኦꬃና።
EZE 36:28 ታኒ ካሴ ኢንቴ ኣዋታስ ኢሚዳ ቢታን ኢንቴ ዳና፤ ኢንቴ ታ ዴሬ ጊዳና፤ ታኒካ ኢንቴ ጾሳ ጊዳና።
EZE 36:29 ኢንቴ ቱናቴꬃፌ ታ ኢንቴና ጌሻና፤ ካꬃ ታ ሙሩቲሳናኔ ዳርሳና፤ ኮሻካ ኢንቴ ቦላ ኤሂኬ።
EZE 36:30 ኮሻ ጋሶን ኢንቴ ካዎቴꬃታ ጊዶን ኢንቴ ካዉዪዲ ዬላቶንታ ማላ ሚꬃ ኣይፌኔ ካꬅ ታ ኢንቴስ ዳርሳና።
EZE 36:31 ሄ ዎዴ ኢንቴ ኢንቴ ኢታ ኦጌኔ ቱኒዳ ኢንቴ ኦሶታ ኢንቴ ኣኬካና፤ ኢንቴ ናጋራ ጊሻሲኔ ሃራሲዛ ኢንቴ ኦሶታ ጊሻስ ኢንቴርካ ኢንቴ ኢንቴና ባሻሼታና።
EZE 36:32 ታኒ ሃይሳ ኦꬂዛይ ኢንቴ ጊሻስ ጊዶንታይሳ ኤሪቴ፤ ኢንቴኖ ኢስራኤሌ ኣሳቶ! ኢንቴ ኢንቴ ኦሶን ዬላቲቴኔ ባሻሼቲቴ፤ ታኒ ኡባ ሃሪዛ ጎዳይ ሃይሳ ዮታይስ› ጌስ።
EZE 36:33 «ኡባ ሃሪዛ ጎዳይ፥ ‹ታኒ ኢንቴና ኢንቴ ናጋራ ኡባፌ ጌሺዛ ጋላስ ኢንቴ ካታማቲ ሲሚዲ ኣሳ ዱሳሶ ጊዳና፤ ቡꬌቲዳይቲ ሲሚዲ ጊምቤታና።
EZE 36:34 ቢዛኔ ዪዛ ኣሳ ኣይፌን ኣሲ ባይንዳሶ ጊዲ ቤቲዛ ቡላ ቢታይ ጎዬታና።
EZE 36:35 ኢስቲ ሃይሲ ኣሲ ባይንዳሶዚ ኤዴኔ ጋናቴ ሚሳቲዴስ፤ ꬋይዳ፥ ላሌቲዳኔ ቡላቲዳ ካታማቲ ኣሳ ዱሳሶኔ ጊምቤቲዳሶ ጊዲዳ ጋና።
EZE 36:36 ሄሳፌ ጉዬ ካሴ ኢንቴ ዩሾን ኣቲዳ ካዎቴꬃቲ ካሴ ቡꬌቲዳ ካታማታ ዛራ ኬጺዳይ፥ ኣሲ ባይንዳሶታ ጪሊሊሲዳይ ታና ጎዳ ጊዲዳይሳ ኢስቲ ሄ ዎዴ ኤራና። ታኒ ጎዳይ ሃይሳ ዮታዲስ፤ ታኒ ዮቲዳይሳካ ታ ፖላና› ጌስ።
EZE 36:37 «ኡባ ሃሪዛ ጎዳይ፥ ‹ቃሴካ ኢስራኤሌ ኣሳ ዎሳ ታ ኤሮ ጋ ሲያና፤ ኢዛካ ታ ኢስታስ ፖላና፤ ሂስታዳ ኢስታ ቆዳ ዉዴ ማላ ጮራሳና።
EZE 36:38 ዬሩሳላሜን ባኣሌ ጋላስ ያርሼታና ሺቂዛ ሜሄ ማላ ታ ዳርሳና፤ ቤኢቴ ካሴ ላሌቲዳ ካታማቲ ዳሮ ኣሳስ ዱሳሶ ጊዳና፤ ሄሳፌ ጉዬ ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ» ጊዴስ።
EZE 37:1 ጎዳ ኩሼይ ታ ቦላ ዴስ፤ ኢዚካ ታና ጎዳ ኣያናን ኬሲዴስ፤ ሜቄꬃቲ ኩሚ ኡቲዳ ሾባን ታና ዎꬂዴስ።
EZE 37:2 ኢዚ ታና ሄን ዩሺ ቤሲዴስ፤ ታኒካ ኬሂ ሺች ጊ ሜሊዳ ዳሮ ሜቄꬃቲ ኩሚዳይታ ሾባ ጊዶን ቤኣዲስ።
EZE 37:3 ኢዚ ታና፥ «ሃይሶ ኣሳ ናዉ! ሃ ሜቄꬃቲ ሲሚዲ ሼምፖራ ፓጻ ዳናስ ዳንዳይዞ?» ጊዴስ። ታኒካ፥ «ኡባ ሃሪዛ ጎዳዉ፥ ሄሳ ኔ ጻላ ኤራሳ» ጋዲስ።
EZE 37:4 ሂስቲን ኢዚ ታና፥ «ሃይታ ሃ ሜቄꬃታስ ቲንቢቴ ዮታ፤ ‹ኢንቴኖ ሜላ ሜቄꬃቶ፥ ጎዳ ቃላ ሲዪቴ!
EZE 37:5 ኡባ ሃሪዛ ጎዳይ ሃይታ ሃ ሜቄꬃታስ ፔኖ ታ ኢማና፤ ኢንቴኒካ ሼምፖራ ፓጻ ዳና።
EZE 37:6 ታ ኢንቴ ቦላ ሻያታ ዎꬃዳ፥ ኣሾይካ ኢንቴ ቦላ ሲማና ማላ ኦꬃዳ፥ ኢንቴስ ሻያ ኢማና፤ ታ ኢንቴና ኣሾ ማይዛና፤ ቦላራካ ጋልባን ካማና፤ ኢንቴ ጊዶ ፔኖ ጌልꬃና፤ ኢንቴካ ሼምፖራ ፓጻ ዳና፤ ሄሳፌ ጉዬ ታኒ ጎዳ ጊዲዳይሳ ኢንቴ ኤራና› ጋ» ጊዴስ።
EZE 37:7 ሄሳ ጊሻስ ታኒ ኣዛዜቲዳ ማላ ቲንቢቴ ዮታዲስ፤ ታኒ ቲንቢቴ ዮቲሺን ሳሱኬቴꬃ ጊሪሲ ሴቴቲዴስ፤ ሜቄꬃቲ ኢሳይ ኢሳራ ኦይኬቲዳ።
EZE 37:8 ታ ጼሊሺን ኢስታ ቦላን ሻያይ ዴስ፤ ሻያ ቦላ ኣሾይ ዴስ፤ ኣሾዛ ቦላ ጋልባይ ካሚ ኦይኪዴስ፤ ጊዶ ኣቲን ሼምፖይ ኢስታን ባዋ።
EZE 37:9 ሄሳፌ ጉዬ ኢዚ ታና፥ «ሃይሶ ኣሳ ናዉ! ጫርኮስ ቲንቢቴ ዮታ፤ ኡባ ሃሪዛ ጎዳይ፥ ‹ጫርኮዞ፥ ኦይዱ ባጋ ጫርኮታፔ ሃያ፤ ሃይቲ ሃይቂዳይቲ ሼምፖራ ፓጻ ዳና ማላ ኢስታ ቦላ ኡፉ ጋ ፑና› ጌስ» ጊዴስ።
EZE 37:10 ሄሳ ጊሻስ ኢዚ ታና ኣዛዚዳ ማላ ቲንቢቴ ዮታዲስ፤ ፔኖይካ ኢስታ ጊዶ ጌሊዴስ፤ ኢስቲካ ፓጺዳ፤ ኬሂፔ ዳሮ ኦላንቻታ ጊዲዲ ኤቂዳ።
EZE 37:11 ሄሳፌ ጉዬ ኢዚ ታስ፥ «ሃይሶ ኣሳ ናዉ! ሃይቲ ሜቄꬃቲ ኩሜꬃ ኢስራኤሌ ኣሳ ሌሚሶ፤ ኢስቲካ፥ ‹ኑ ሜቄꬃቲ ሜሊዳ፤ ኑስ ሂዶታይ ባዋ፤ ኑ ዱጺ ኣቲዶስ› ጌቴስ።
EZE 37:12 ሄሳ ጊሻስ ኢስታስ ኡባ ሃሪዛ ጎዳይ፥ ‹ታ ዴሬዞ! ታኒ ኢንቴ ዱፎ ዶያና፤ ኢስታ ጊዶፌ ታ ኢንቴና ኬሳና፤ ኢስራኤሌ ቢታካ ታ ኢንቴና ዛራ ኤሃና።
EZE 37:13 ሄሳፌ ጉዬ ታ ዴሬቶ፥ ታኒ ኢንቴ ዱፎ ዶያዳ ኢንቴና ኬሲዛ ዎዴ ኢንቴ ታኒ ጎዳ ጊዲዳይሳ ኤራና።
EZE 37:14 ታኒ ታ ኣያና ኢንቴ ጊዶን ዎꬃና፤ ኢንቴካ ሼምፖራ ፓጻ ዳና፤ ታ ኢንቴና ኢንቴ ቢታን ዎꬃና፤ ሄሳፌ ጉዬ ታኒ ጎዳይ ዮቲዳ ማላ ኦꬂዳይሳ ኢንቴ ኤራና፤ ታኒ ጎዳይ ሃይሳ ዮታይስ› ጌስ» ጊዴስ።
EZE 37:15 ጎዳ ቃላይ ታኮ ዪዲ፥
EZE 37:16 «ሃይሶ ኣሳ ናዉ! ኢሲ ጉፌ ኤካዳ ኢዛ ቦላ፥ ‹ሃይሲ ዩሁዳሲኔ ኢዚራ ዙፔቲዛ ኢስራኤሌሳ› ጋዳ ጻፋ፤ ቃሴ ሃራ ጉፌ ኤካዳ ኢዛ ቦላ፥ ‹ሃይሲ ኤፍሬሜስ፥ ዮሴፌሲኔ ኢዛራ ዙፔቲዛ ኢስራኤሌ ኬꬃ ኣሳ ኡባሳ› ጋዳ ጻፋ።
EZE 37:17 ኢስቲ ኢሲ ጉፌ ሚሳታና ማላ ኢስታ ኔ ኩሼን ጋጋ ኦይካ።
EZE 37:18 «ኔ ዴሬ ናይቲ፥ ‹ሃይሳ ኔ ኣይ ጋና ኮዪዳኮ ኑስ ዮቲኪ?› ጊ ኦይቺዛ ዎዴ፥
EZE 37:19 ኔ ኢስታስ፡ ኡባ ሃሪዛ ጎዳይ፥ ‹ታኒ ኤፍሬሜ ኩሼን ዲዛ ዮሴፌ ጉፌኔ ኢዛራ ዙፔቲዛ ኢስራኤሌ ቆሞታ ጉፌ ኤካና፤ ዩሁዳ ጉፌዛራ ጋጋዳ ታ ኢሲ ጉፌ ሂስታና፤ ኢስቲካ ታ ኩሼን ኢሲ ጉፌ ጊዳና› ጋ።
EZE 37:20 ኔ ኢስታ ቦላ ጻፊዳ ጉፌታ ኢስታ ሲንꬃን ኦይካ።
EZE 37:21 ኔኒ ኢስታስ ኡባ ሃሪዛ ጎዳይ፥ ‹ታኒ ኢስራኤሌ ኣሳ ኢስቲ ቢዳ ካዎቴꬃታ ጊዶፌ ኬሳና፤ ታኒ ኢስታ ኡባሶፔ ሺሻዳ ኢስታ ቢታ ዛራ ኤሃና።
EZE 37:22 ቢታይ ቦላ ኢስራኤሌ ዙማታን ታ ኢስታ ኢሲ ካዎቴꬅ ኦꬃና፤ ኢስታ ኡባ ቦላ ኢሲ ካዎይ ካዎታና። ሃይሳፌ ጉዬ ኢስቲ ናምኡ ዴሬ ጊዴቴና፤ ኢስታ ካዎቴꬃይ ናምኡ ኬዚ ሻኬቴና።
EZE 37:23 ኢስቲ ባንታ ኤቃ ጾሳታን፥ ሃራሲዛ ባንታ ሚስሌታን፥ ዎይኮ ባንታ ናጋራንካ ባንታናቴꬃ ቱኒሴቴና። ጋሶይካ ኢስቲ ታና ኣጊዲ ኦꬂዳ ናጋራ ኡባፌ ታ ኢስታ ኣሻናኔ ጌሻና፤ ኢስቲ ታ ዴሬ ጊዳና፤ ታኒካ ኢስታ ጾስ ጊዳና።
EZE 37:24 « ‹ታ ኣይሌ ዳዊቲ ኢስታ ቦላ ካዎታና፤ ኡባሲካ ኢሲ ሄንꬃንቻይ ዳና፤ ኢስቲ ታ ዎጋ ካላና፤ ታ ማራካ ሚንꬂ ናጋና።
EZE 37:25 ታኒ ታ ኣይሌ ያቆቤስ ኢሚዳኔ ኢንቴ ኣዋቲ ዴኢዳ ቢታን ኢስቲ ዳና። ሄን ኢስታስ፥ ኢስታ ናይቲኔ ኢስታ ናይታ ናይቲ ሜርናስ ዳና፤ ታ ኣይሌ ዳዊቲ ኢስታ ቦላ ሜርናስ ካዎ ጊዳና።
EZE 37:26 ታኒ ኢስታራ ሳሮቴꬃ ጫቆ ቃላ ጌላና፤ ሄ ጫቆ ቃላይካ ሜርናስ ጊዳና። ታኒ ኢስታ ሚንꬃና፤ ጮሪሳና፤ ታ ኬꬃካ ኢስታ ጊዶን ሜርናስ ዎꬃና።
EZE 37:27 ታ ዱሳሶይ ኢስታኮን ጊዳና፤ ታ ኢስታ ጾሳ ጊዳና፤ ኢስቲካ ታ ዴሬ ጊዳና።
EZE 37:28 ታ ኬꬃይ ሜርናስ ኢስታ ጊዶን ዲዛ ዎዴ ኢስራኤሌታ ጌሺዛይ ታና ጎዳ ጊዲዳይሳ ካዎቴꬃቲ ኤራና› ጌስ» ጊዴስ።
EZE 38:1 ጎዳ ቃላይ ታኮ ዪዲ፥
EZE 38:2 «ሃይሶ ኣሳ ናዉ! ኔ ኣይፌሶ ጌዴ ማጎጌ ቢታን ዲዛ ሜሼኬሲኔ ቱባሌስ ዋና ሃላቃ ጎጌ ቦላ ዛራ፤ ኢዛ ቦላ ቲንቢቴ ዮታ።
EZE 38:3 ኔኒ ኢዛስ ኡባ ሃሪዛ ጎዳይ፥ ‹ሜሼኬሲኔ ቱባሌስ ዋና ሃላቃ ጊዲዳ ሃይሶ ጎጌ ታኒ ኔ ቦላ ዴንዳዲስ።
EZE 38:4 ታ ኔና ጉዬ ዛራና፤ ታኒ ኔ ሲꬌን ዳፎ ኣꬃዳ ኩሜꬅ ኔ ኦላንቻታራ፥ ኔ ፓራታራ፥ ኔ ቶጋ ኣሳታ ኢስታ ኩሜꬃ ኦላ ማሳራራ፥ ዎጋ ጎንዳሌኔ ቄሪ ጎንዳሌ ኦይኪዳይታ ኡባ፥ ባንታ ጊꬃ ማሻ ቤሲዛይታ ኡባ ታ ኬሳና።
EZE 38:5 ጎንዳሌ ኦይኪዳይቲኔ ቢራታ ቆቤ ዎꬂዳ ኡባቲ፥ ፓሪሴይ፥ ቶጵያይኔ ፑጼይ ኢስታራ ጊዳና።
EZE 38:6 ቃሴ ጎሜሬ ኢዛ ኦላንቻታራ ፑዴሃ ባጋን ሃኮን ዲዛ ቤቲ-ቶጋርማ ኢዛ ኦላንቻታራኔ ዳሮ ካዎቴꬃታ ታ ኔናራ ኬሳና።
EZE 38:7 « ‹ኔኒኔ ኔ ዩሾን ሺቂዳ ኣሳይ ኡባይ ዴንዲቴ፤ ጊጌቲቴ፤ ኔካ ኢስታ ካሌꬂዛዴ ጊዳ።
EZE 38:8 ዳሮ ዎዴፔ ጉዬ ኔኒ ኦላስ ጼይጌታና፤ ሲንꬃፌ ያና ላይꬃታን ኦላፔ ሼምፒዳሪ፥ ኢዚ ኣሳይ ዳሮ ካዎቴꬃታ ጊዶፌ ኬዚ ሺቂዳሪ፥ ዳሮ ዎዴስ ቡላ ጊዲዳ ኢስራኤሌ ዙማታ ቦላ ኡቲዳ ዴራ ቦላ ኔ ዎራጃና። ኢስታ ካዎቴꬃታ ጊዶፌ ኬዚዲ ሃኢ ሳሮን ዳና።
EZE 38:9 ኔኒ፥ ኔ ኦላንቻቲኔ ኔናራ ዲዛ ዳሮ ካዎቴꬃቲ ጎቴ ጫርኮ ማላ ዴንዳና፤ ሻራ ማላ ኢንቴ ቢታ ካማና።
EZE 38:10 « ‹ኡባ ሃሪዛ ጎዳይ ሄ ዎዴ ኔ ካሃን ቆፋይ ጌሊን ኔኒ ኢታ ሚሽ ሃልቻና።
EZE 38:11 ኔኒ ኢስታስ፥ ዲርሳይ ባይንዳ ዴሬታ ቢታ ታ ዎራጃና፤ ኢስቲ ኡባይካ ዲርሳይ ባይንዳ፥ ፔንጌይኔ ቢራታ ኮላታይ ባይንዳ ዲሺን ሳሮኒኔ ሂርጋይ ባይንዳ ኡቲዳ ዴራ ታ ኦላና።
EZE 38:12 ታኒ ኢስታፌ ቦንቃናኔ ዳፋ ኤካና፤ ሄሳꬆካ ካዎቴꬃታ ጊዶፌ ሺቂዲ ቢታስ ጊዶ ኣዳን ዳና፤ ኢስቲ ሜሄኒኔ ሻቃጬታን ዱሬቲዳ፥ ሄ ቢታይን ዲዛ ዴራ ቦላ ታ ኩሼ ዴንꬃና› ጋና።
EZE 38:13 ሳባ ኣሳይ፥ ዳዳኔ ኣሳይ፥ ታርሴሴ ዴሬ ዛልኣንቻቲኔ ኢዚ ጉታቲ ኡባይ ኔና፥ ‹ኑና ቦንቃናስ ያዲ? ኔኒ ኔ ኦላንቻታ ሺሺዳይ ዳፋ ኤካናስ፥ ዎርቃኔ ቢራ ሺሻ ኤፋናስ፥ ሜሃኔ ሻቃጫ ቡራ ኤፋናስ፥ ዳሮ ሚሽ ዲኣ ኤካዳ ሲማናሴ?› ጋና።
EZE 38:14 «ሄሳ ጊሻስ ኣሳ ናዉ፥ ጎጌ ቦላ ቲንቢቴ ዮታ፤ ኢዛስ ኡባ ሃሪዛ ጎዳይ፥ ‹ሄ ዎዴ ታ ዴሬ ኢስራኤሌይ ሳሮን ኡቲዳይሳ ኔኒ ኤራዳ ኣኬኪኪ?
EZE 38:15 ፑዴሃ ባጋፌ ሃሆ ቢታፌ ኔ ያና፤ ኔኒኔ ኔናራ ዲዛ ጮራ ካዎቴꬃቲ ፓራ ቶጊዲ ኬሂ ሚኖኔ ዎልቃማ ኦላንቻ ጊዲዲ ያና።
EZE 38:16 ቢታ ካሚዛ ሻራ ማላ፥ ኔኒ ታ ኣሳ ኢስራኤሌ ቦላ ዎራጃና። ሃይሶ ጎጌ ታ ጌሻቴꬃ ካዎቴꬃታ ሲንꬃን ታኒ ቆንጪሲሺን ኢስቲ ታና ኤራና ማላ ሲንꬃፌ ያና ዎዴታን ታ ቢታይ ቦላ ታ ኔና ኤሃና› ጌስ።
EZE 38:17 «ኡባ ሃሪዛ ጎዳይ፥ ‹ታ ቤኒ ዎዴ ታ ኣይሌ ኢስራኤሌ ናቤታ ባጋራ ኢዛ ጊሻስ ዮቲዳ ሄ ቢታኔይ ኔና ጊዲኪ? ኢስቲ ሄ ዎዴ ታኒ ኔና ኢስታ ቦላ ኤሃናይሳ ዳሮ ላይꬃታን ቲንቢቴ ዮቲዳ› ጌስ።
EZE 38:18 «ሄ ዎዴ ኡባ ሃሪዛ ጎዳይ፥ ‹ጎጌይ ኢስራኤሌ ቢታ ኦሊዛ ዎዴ ሚኖ ታ ሃንቆይ ሱላና።
EZE 38:19 ሄ ዎዴ ታኒ ታ ቃናቴኒኔ ባቢሲዛ ታ ሃንቆን ኢስራኤሌን ቢታይ ኬሂ ቃጻና ጋ ዮታዲስ።
EZE 38:20 ኣባ ሞሌቲ፥ ሳሎ ካፎቲ፥ ዎራ ዶኣቲ፥ ቢታ ቦላ ቲራን ጎሼቲዛ ኣይ ሜꬌቴꬃቲካ፥ ሄሳꬆ ቢታ ቦላ ዲዛ ኣስ ኡባይ ታ ሲንꬃን ኮኮራና፤ ዙማቲ ሺሬቲ ሺሬቲ ዎꬋና፤ ኣፎቲ ዎዳና፤ ዲርሳ ጊምቤይ ኡባይ ላሌታና።
EZE 38:21 ታኒ ታ ዙማታ ኡባን ጎጌ ቦላ ማሻ ጼይጋና፤ ኢሳ ኢሳ ማሻይ ኢዛዴ ኢሻ ቦላ ሼምፓና፤ ታኒ ኡባ ሃሪዛ ጎዳይ ሃይሳ ዮታይስ።
EZE 38:22 ታኒ ኢታ ሃርጌኒኔ ሼምፖ ዎꬎን ኢዛ ቦላ ፒርዳና፤ ዎልቃማ ኢራ፥ ዎልቃማ ሻች፥ ጹጊዛ ዲኔ ታማ ኢዛ ቦላ፥ ኢዛ ኦላንቻታ ቦላኔ ኢዛራ ዲዛ ጮራ ካዎቴꬃታ ቦላ ታ ቡኪሳና።
EZE 38:23 ታኒ ታ ጊታቴꬃኔ ታ ጌሻቴꬃ ሄሳን ቤሳና። ቃሴ ዳሮ ካዎቴꬃታ ሲንꬃን ታኒ ታናቴꬃ ኤሪሳና። ሄሳፌ ጉዬ ታኒ ጎዳ ጊዲዳይሳ ኢስቲ ኤራና› ጌስ።
EZE 39:1 «ኡባ ሃሪዛ ጎዳይ፥ ‹ሃይሶ ኣሳ ናዉ! ጎጌ ቦላ ቲንቢቴ ዮታ። ሜሼኬሲኔ ቱባሌስ ዋና ሃላቃ ጊዲዳ ሃይሶ ጎጌ ታ ኔ ቦላ ዴንዳዲስ።
EZE 39:2 ታኒ ኔና ጉዬ ዛራናኔ ጎቻና፤ ታ ኔና ፑዴሃ ባጋፌ ሃኮሶፔ ኤሃዳ ኢስራኤሌ ዙማታ ቦላ ዬዳና።
EZE 39:3 ኔስ ሃዲርሳ ኩሼን ዲዛ ኔ ዎንዳፌዛ ታ ሾጫና፤ ኔኒ ኡሻቻ ኩሼን ኦይኪዳ ዪሻዛ ታ ቆቆፍሳና።
EZE 39:4 ኔኒ፥ ኔ ኦላንቻቲኔ ኔናራ ዲዛ ካዎቴꬃቲ ኡባይ ኢስራኤሌ ዙማታ ቦላ ኩንዳና፤ ታኒ ኢንቴ ኣሾዛ ፑዚ ሚዛ ኣንኮታሲኔ ዎራ ዶኣታስ ማና ማላ ኣꬃ ኢማና።
EZE 39:5 ታኒ ኡባ ሃሪዛ ጎዳይ ዮቲዳ ጊሻስ ኢንቴ ሚሊጺ ጊዳ ዴምባን ኩንዳና።
EZE 39:6 ማጎጌ ቢታኒኔ ኣባ ዶናን ሂርጋይ ባይንዳ ባꬊ ጊ ዲዛይታ ቦላ ታኒ ታማ ዬዳና። ታኒ ጎዳ ጊዲዳይሳ ኢስቲ ሄሳን ኤራና።
EZE 39:7 « ‹ታ ጌሻ ሱንꬃይ ታ ዴራ ኢስራኤሌን ኤሬታና ማላ ታ ኦꬃና፤ ሃይሳፌ ጉዬን ታ ጌሻ ሱንꬃይ ካꬌታና ማላኔ ካዉያና ማላ ታ ኮይኬ፤ ሄሳን ካዎቴꬃቲ ታኒ ጎዳይ ኢስራኤሌ ጌሻ ጊዲዳይሳ ኤራና።
EZE 39:8 ኡባ ሃሪዛ ጎዳይ ቤኢቴ፥ ሄ ጋላሳይ ያና ኣቴና ጋዳ ታኒ ዮቲዳ ጋላሳይ ሃይሳ።
EZE 39:9 « ‹ሄሳፌ ጉዬ ኢስራኤሌ ካታማታን ዲዛ ኣሳይ ኡባይ ኬዚዲ፥ ኦላ ሚሻታ፥ ዎጋ ጎንዳሌታኔ ቄሪ ጎንዳሌታ፥ ዎንዳፌታ፥ ዪሻታ፥ ኦላንቻታ ጻምኣታኔ ቶራታ ሺሺዲ ታማን ኤꬃና። ሄሳ ላፑን ላይꬅ ኩሜꬅ ኢስቲ ኤሶስ ጎኤታና።
EZE 39:10 ኢስቲ ሺሺዳ ኦላ ሚሻታ ኤሶስ ጎኤታና ጊሻስ ኢስታስ ካሬፔ ሚꬅ ሚጾኔ ዎራፔ ሚꬅ ቃንጾ ኮሼና። ኢስታፌ ቦንቂ ኤኪዳይታፔ ኢስቲካ ቦንቂ ኤካና፤ ኢስታፌ ዳፊ ኤኪዳይታፔ ኢስቲ ዳፊ ኤካና፤ ታኒ ኡባ ሃሪዛ ጎዳይ ሃይሳ ዮታይስ።
EZE 39:11 « ‹ሄ ዎዴ ኣሳይ ኣርሼይ ሞኪዛ ባጋራ ዱጌ ኣባን ቢዛሶ ዙሌን ኢስራኤሌ ቢታን ታ ጎጌስ ዱፎ ኢማና፤ ጎጌይኔ ኢዛ ኦላንቻቲ ሄን ሞጌታና ጊሻስ ማንዳሪዛ ኣሳታ ኦጌይ ጎርዴታና፤ ሄሳ ጊሻስ ሄ ሶሆይ ሃሞን ጎጌ ሾባ ጌቴታና።
EZE 39:12 « ‹ቢታዮ ጌሻናስ ኢስራኤሌ ኣሳይ ላፑን ኣጊና ኩሜꬅ ኢስታ ሞጊሼ ታካና።
EZE 39:13 ሄ ቢታ ኣሳይ ኡባይ ኢስታ ሞጋና፤ ታኒ ታ ቦንቾ ቤሲዛ ዎዴ ኢስታስ ቦንቾ ጊዳና፤ ታኒ ኡባ ሃሪዛ ጎዳይ ሃይሳ ዮታይስ።
EZE 39:14 « ‹ላፑን ኣጊናፔ ጉዬ ኣቲዳ ኣሃይ ዲኮ፥ ቢታይ ጌያና ማላ፥ ዩዪ ዩዪዲ ኣቲዳ ኣሃ ሞጋና ኣሳቲ ዶሬታና።
EZE 39:15 ኢስቲ ቢታይ ቦላ ዩዪሺን፥ ኢስታፌ ኢሶይ ኣሳ ሜቄꬅ ዴሚዲ ዱፎ ቦኪዛይቲ ሃሞን ጎጌ ዙሌን ሞጋናሼ ጋካናስ ሜቄꬃይ ዲዛሶን ማላታ ዎꬃና።
EZE 39:16 ሄን ኦላንቻታ ካታማያ ዲዛ ጊሻስ ቢታዮ ኢስቲ ጌሻና› ጌስ።
EZE 39:17 «ኡባ ሃሪዛ ጎዳይ፥ ‹ሃይሶ ኣሳ ናዉ! ዱማ ዱማ ቆሞ ካፎታኔ ዎራ ዶኣታ፡ ኢንቴ ዲዛሶ ኡባፌ ሺቄቲዲ ታኒ ኢንቴስ ጊግሲዳ ያርሾኮ ሃ ዪቴ፤ ሄሲካ ኢስራኤሌ ዙማታ ቦላ ሃናና ጊታ ያርሾ፤ ኢንቴ ሄን ኣሾ ማናኔ ሱꬅ ኡያና።
EZE 39:18 ኢንቴ ꬋርሾ ኣሾኔ ላቃ ኣሾ ሚዛ ማላ፥ ዴይሻ ኣሾኔ ዎፋኖ ኣሾ ሚዛ ማላ ዎልቃማ ኣሳታ ኣሾ ማና፤ ቢታ ቦላ ሃላቃታ ሱꬂካ ኢንቴ ኡያና፤ ሃይቲ ኡባይ ሞꬊዳ ባሳኔ ሜሄታ።
EZE 39:19 ታኒ ኢንቴስ ጊግሲዛ ያርሾዛ ኢንቴ ካላናሼ ጋካናዉ ማና፤ ቃሴ ማꬆታናሼ ጋካናስ ኢንቴ ሱꬅ ኡያና።
EZE 39:20 ታ ማዳን ፓራታ፥ ቶጋንቻታ፥ ዎልቃማ ኣሳታኔ ዱማ ዱማ ቆሞፌ ሺቂዳ ሃራ ዎታዳራታ ኣሾ ካላናሼ ጋካናስ ኢንቴ ማና› ጌስ።
EZE 39:21 «ካዎቴꬃታ ጊዶን ታኒ ታ ቦንቾ ቆንጪሳና፤ ካዎቴꬃቲ ኡባይ ታኒ ኢስታ ቦላ ኤሂዳ ቂጻቴኔ ታ ኢስታ ቦላ ዴጼꬂዳ ኩሼ ቤኣና።
EZE 39:22 ሄ ጋላሳፌ ዶሚዲ ኢስራኤሌ ኣሳይ ታኒ ጎዳይ ኢስታ ጾስ ጊዲዳይሳ ኤራና።
EZE 39:23 ኢስራኤሌ ኣሳይ ታስ ኣማኔቶንታ ኢጺዲ ናጋራ ኦꬂዳ ጋሶን ኢስቲ ጎዴቲዳይሳ ካዎቴꬃቲ ኤራና። ሄሳ ጊሻስ ታኒ ታ ኣይፌሶ ኢስታፌ ጌንꬃዲስ፤ ታኒ ኢስታ ኢስታ ሞርኬታስ ኣꬃ ኢማዲስ፤ ኢስቲ ኡባይ ማሻን ዉሪዳ።
EZE 39:24 ኢስታ ቱናቴꬃ ማላኔ ኢስታ ቆሆዛ ማላ ታ ኢስታ ቦላ ፒርዳዲስ፤ ታ ኣይፌሶካ ታ ኢስታፌ ጌንꬃዲስ።
EZE 39:25 «ሄሳ ጊሻስ ኡባ ሃሪዛ ጎዳይ፥ ‹ሃኢ ያቆቤይ ጎዴቲዳሶፔ ታኒ ኢዛ ዛራዳ ኢሻልሳና፤ ኢስራኤሌ ኣሳ ኡባስ ታ ቃꬌታና፤ ታ ጌሻ ሱንꬃ ጊሻስ ታኒ ሚሼታና።
EZE 39:26 ኢስታ ባቢሲዛ ኦኒካ ባይንዳ ዲሺን ኢስቲ ባንታ ቢታን ሳሮን ዲዛ ዎዴ ባንታ ካዉሻቴꬃኔ ካሴ ታስ ኣማኔቶንታ ኢስቲ ዴኢዳ ዎዴታ ዶጋና።
EZE 39:27 ታኒ ካዎቴꬃታ ኡባ ጊዶፌ ኢስታ ዛራ ኤሂዛ ዎዴ፥ ኢስታ ሞርኬታ ቢታፌ ታ ኢስታ ሺሺዛ ዎዴ፥ ታ ጌሻቴꬃ ታኒ ኢስታ ባጋራ ዳሮ ካዎቴꬃታ ሲንꬃን ቤሳና።
EZE 39:28 ታኒ ኢስታ ካዎቴꬃ ጊዶን ላሌታና ማላ ኦꬂዳ ጊዲኮካ ኢሳካ ኣሾንታ ኢስታ ኢስታ ዴሬ ታ ዛራና፤ ሄሳፌ ጉዬ ታኒ ጎዳይ ኢስታ ጾስ ጊዲዳይሳ ኢስቲ ኤራና፤ ታኒ ኢስታፌ ኢሳኔ ካዎቴꬃ ጊዶን ኣጊኬ።
EZE 39:29 ታኒ ኣያና ኢስራኤሌ ኣሳ ቦላ ጉሳና ጊሻስ ሃይሳፌ ጉዬ ታኒ ታ ኣይፌሶ ኢስታፌ ጌንꬂኬ። ታኒ ኡባ ሃሪዛ ጎዳይ ሃይሳ ዮታይስ› ጌስ» ጊዴስ።
EZE 40:1 ኑኒ ዲኤቲዳ ናምኡ ታማኔ ኢቻሻንꬃ ላይꬃን፥ ኮይሮ ኣጊናን ታማንꬃ ጋላሳን፥ ዬሩሳላሜይ ኩንዲዳ ታማኔ ኦይዳንꬃ ላይꬃን ሄ ጋላስ ጎዳ ኩሼይ ታ ቦላ ዴስ፤ ኢዚካ ታና ዬሩሳላሜ ኤፊዴስ።
EZE 40:2 ጾሳ ኣጁታን ኢዚ ታና ኢስራኤሌ ቢታ ኤፊዲ ꬎቃ ዙማ ቦላ ዎꬂዴስ፤ ሄ ዙማፔ ዱጌሃ ባጋራ ካታማ ሚሳቲዛ ጊምቤ ኬꬃታ ቤኣዲስ።
EZE 40:3 ኢዚ ታና ሄ ኤፊዴስ፤ ሂስቲን ታኒ ጻርቂማላ ሚሳቲዛ ኢሲ ኣስ ቤኣዲስ፤ ኢዚ ላይኖፔ ኦሴቲዳ ዎዶሮኔ ዋꬋ ሚꬅ ባ ኩሼን ኦይኪዲ ጌሊዛ ፔንጌ ቦላ ኤቂዴስ።
EZE 40:4 ኣዴዚ ታና፥ «ሃይሶ ኣሳ ናዉ! ኔ ኣይፌን ጼላ፤ ኔ ሃይꬃን ሲያ፤ ታ ኔና ቤሲዛይሳ ኡባ ዎዚናን ዎꬃዳ ኤዝጋ። ኔ ሃ ዪዳይ ሃይሳስ ጊዲዳ ጊሻስ ኔ ቤኢዳ ኡባ ኢስራኤሌ ኬꬃስ ዮታ» ጊዴስ።
EZE 40:5 ታኒ ጾሳ ኬꬃ ሙሌራ ዩዪ ኣꬊዳ ዲርሳ ጊምቤ ቤኣዲስ። ኣዴዛ ኩሼን ኡሱፑን ዋꬋ ጊዲዛ ዛንጌ ቤኣዲስ፤ ኢሲ ኢሲ ዋꬋ ሚሻይ ዋꬋኔ ታꬋኮ ጊዴስ፤ ኢዚ ጊምቤዛ ዋꬊዴስ፤ ኣኮቴꬃይ ኢሲ ዋꬋ፥ ጌሳይካ ኢሲ ዋꬋ ጊዲዴስ።
EZE 40:6 ሄሳፌ ጉዬ ኣርሼ ኬሳ ባጋራ ዲዛ ዲርሳ ፔንጌኮ ቢዴስ። ኬቻታ ኬዚዲ ጌሊዛ ፔንጌዛ ማዲራኬ ዋꬊዴስ፤ ኢዛስ ጌሳይ ኡሱፑን ዋꬋ ጊዲዴስ።
EZE 40:7 ዛቤታ ኬꬃስ ጌሳይኔ ጎምፓይ ኡሱፑን ኡሱፑን ዋꬋ፥ ኬꬃታ ጊዶን ዲዛ ጊምቤ ኦርዴቴꬃይ ኢቻሽ ዋꬋ ጊዲዴስ፤ ጾሳ ኬꬃፌ ሲንꬃ ባጋራ ኣꬊ ቢዛሶን ዲዛ ዳራንቻን ጊዶ ባጋራ ዲዛ ማዲራኬዛስ ዉይጌዛ ዋꬋይ ኡሱፑን ጊዲዴስ።
EZE 40:8 ሄሳፌ ጉዬ ጌሊዛሶራ ካንꬂ ቢዛ ዳራንቻ ዋꬊዴስ።
EZE 40:9 ኢዛስ ኣዱሳቴꬃይ 8 ዋꬋ፥ ቱቄታ ኦርዴቴꬃይ 2 ዋꬋ ጊዴስ፤ ጌሊዛሶ ፔንጌን ዲዛ ዳራንቻይ ጾሳ ኬꬃ ጊናን ዴስ።
EZE 40:10 ኣርሼይ ሞኪዛ ባጋ ፔንጌዛስ ሃዲርሳ ባጋራኔ ኡሻቻ ባጋራ ኢሲ ጊና ጊዲዳ ሄꬑ ሄꬑ ዛቤ ኬꬃቲ ዴቴስ፤ ኢስታ ጊዶን ሻኪዛ ጊምቤታ ኦርዴቴꬃይ ኢሲ ጊናኔ ኢሲ ማላ።
EZE 40:11 ሄሳፌ ጉዬ ፔንጌዛ ጎምፓ ዋꬊዴስ፤ ኢዛ ጎምፓይ ታሙ ዋꬋ፥ ኣዱሳቴꬃይ ታማኔ ሄꬑ ዋꬋ ጊዲዴስ።
EZE 40:12 ዛቤ ኬꬃታስ ኢሳስ ኢሳስ ሲንꬃ ባጋራ ኣዱሳቴꬃይ ኢሲ ዋꬋ ጊምቤ ጊዲዳ ዲርሳይ ዴስ፤ ዛቤታ ኬꬃ ጎምፓይ ኢሲ ጊና ጊዲዳ ኡሱፑን ኡሱፑን ዋꬋ።
EZE 40:13 ዛቤ ኬꬃስ ጉዬ ባጋ ጎዳፔ ዶሚዲ ሃራይሳ ጼራ ጋካናስ ዲዛ ጌሎሶ ፔንጌ ዋꬊዴስ፤ ኢሲ ጎዳፔ ቢዲ ሃንኮ ጎዳ ጋካናስ 25 ዋꬋ ጊዲዴስ።
EZE 40:14 ጌሊዛሶ ፔንጌ ዩሾን ዲዛ ኬኢ ኬኢ ኡቲዳ ጊምቤታ ኡባ ሲንꬃን ዲዛሶዛ ዋꬊን 20 ዋꬋ ጊዲዴስ፤ ዋꬌቲዳይካ ዛጎዛፔ ሲንꬃ ባጋራ ዲዛ ሲሜሬቲዛሶ ዳራንቻ ጋካናሳ።
EZE 40:15 ጌሊዛ ፔንጌፌ ቢዲ ሲሜሬቲዛሶዛ ዳራንቻ ጋካናስ ዲዛ ኣዱሳቴꬃይ 15 ዋꬋ ጊዲዴስ።
EZE 40:16 ኪፊሌቲ ሲሜሬቲዛሶን ዲዛ ዳራንቻታ ማላ ሃዲርሳ ባጋራኔ ኡሻቻ ባጋራ ኢስታስ ጉꬃ ማስኮቴቲ ዴቴስ። ዩዪ ኣꬋናስ ዲዛ ማስኮቴቲ ጌሊዛ ፔንጌዛፔ ሲንꬃ ባጋራ ዲዛይታ ጊዲሺን ኢሲ ኢሲ ኪፊሌስ ሃዲርሳ ባጋራኔ ኡሻቻ ባጋራ ጎዳ ቦላ ዛምባ ሚꬃ ሚስሌይ ጊጌቲ ኡቲዴስ።
EZE 40:17 ሄሳፌ ጉዬ ኣዴዚ ካሬ ባጋ ዛጎ ታና ኤፊዴስ፤ ሄን ዛጎዛ ዩሾን ዮቻ ሹቺ ዬጌቲ ኡቲዳ ሲሜሬቲዛሶሆታ ቤኣዲስ፤ ኢስታ ዩሾንካ 30 ኪፊሌቲ ዴቴስ።
EZE 40:18 ሹቺ ዬጌቲ ኦሴቲዳ ዛጎዚ ጊምባስ ኡባ ዩሾ ጋኬስ፤ ካሬ ዛጎዚ ጊዶ ዛጎፔ ዚቄስ።
EZE 40:19 ሄፔ ዱጌ ባጋራ ጌሊዛ ፔንጌ ሲንꬃፌ ዶሚዲ ጊዶ ዛጎዛ ፔንጌ ጋካናስ ዲዛሶዛ ዋꬊዴስ፤ ኣርሼይ ሞኪዛ ባጋራ ጊዲን ፑዴሃ ባጋራ ዲዛ ኣዱሳቴꬃይ 100 ዋꬋ ጊዲዴስ።
EZE 40:20 ሄሳፌ ጉዬ ፑዴሃ ባጋ ጊናራ ዲዛ ጌዴ ካሬ ዛጎ ኬሲዛ ፔንጌዛ ኣዱሳቴꬂኔ ኣኮቴꬅ ዋꬊዴስ።
EZE 40:21 ኮይሮ ፔንጌዛ ማላ ሃይሲካ ሚሌ ባጋራ ዲዛ ሄꬑ ሄꬑ ዛቤ ኬꬃታስ፥ ኢስታ ጊዶን ኬኢ ኬኢ ቤቲዛ ጊምቤታሲኔ ሲሜሬቲዛሶ ዳራንቻታስ ዋꬋይ ኢሲ ጊና፤ ኣዱሳቴꬃይ 50 ዋꬋ፥ ጎምፓይ 25 ዋꬋ ጊዲዴስ።
EZE 40:22 ማስኮቴቲ፥ ሲሜሬቲዛሶ ዳራንቻቲኔ ዛምባ ሚꬃታ ሚስሌቲ ኣርሼይ ሞኪዛ ባጋራ ዲዛይታራ ኢሲ ማላ፤ ሄ ኤፊዛ ላፑን ኬቻቲ ዴቴስ፤ ሲሜሬቲዛሶን ዲዛ ዳራንቻቲ ኢስታ ጊናን ዴቴስ።
EZE 40:23 ኣርሼይ ሞኪዛ ባጋራ ዲዛይሳꬆ ፑዴሃ ባጋራ ዲዛ ፔንጌ ጊና ጌዴ ጊዶ ዛጎ ጌልꬂዛ ፔንጌይ ዴስ፤ ኢሲ ፔንጌዛፔ ቢዲ ሃራ ፔንጌ ጋካናስ ዲዛይሳ ዋꬊዴስ፤ ሄሲካ 100 ዋꬋ ጊዲዴስ።
EZE 40:24 ሄሳፌ ሲሚዲ ሄ ቢታኔይ ታና ዱጌሃ ባጋ ዲርሳ ፔንጌ ካሌꬂዴስ፤ ካሌꬂን ባዳ፥ ሄሳን ሃራ ዲርሳ ፔንጌ ቤያዲስ። ኢዚ ቱቄታኔ ጊዶ ኪፊሌታ ሊኪዛ ዎዴ ሃራታራ ኢሲ ጊና ጊዲዴስ።
EZE 40:25 ሊኬ ሃራታ ማላ፥ ሃ ዲርሳ ፔንጌ ማታን ዲዛ ኪፊሌታስ ኡባስ ማስኮቴቲ ዴቴስ። ዲርሳ ፔንጌዛ ዞኖይ 50 ዋꬋ፤ ኣሆቴꬃይካ 25 ዋꬋ።
EZE 40:26 ሄ ጋꬂዛ ላፑን ꬌካቲ ዴቴስ። ዳራንቻይ ዳባባ ሲንꬃን ዉርሴꬃ ባጋራ ዴስ። ፔንጌዛ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ።
EZE 40:27 ጊዶ ዳባባስካ ሃራ ፔንጌይ ዴስ። ሄ ቢታኔይ ሃ ናምኡ ዲርሳ ፔንጌታፔ ጊዶን ዲዛሶሆ ሚዛኒን 100 ዋꬋ ጊዲዴስ።
EZE 40:28 ሄ ቢታኔይ ታና ዱጌሃ ዲርሳ ፔንጌ ባጋራ ሄኒ ጊዶ ዳባባኮ ኤፊዴስ። ኢዚ ዲርሳ ፔንጌ ሜዛኒን ሃራ ፔንጌታራ ሊኬ ጊዲዴስ።
EZE 40:29 ሄሳስ ናጊዛይታ ኪፊሌቲ፥ ጎዳቲኔ ዳራንቻቲ ኡባይ ሃራ ዲርሳ ፔንጌታራ ኢሲ ማላ። ሄ ዲርሳ ፔንጌ ዩሾን ዲዛ ኪፊሌታ ኡባስ ማስኮቴቲ ዴቴስ። ሃ ጊዶ ፔንጌ ዞኖይ 50 ዋꬋ፤ ኣሆቴꬃይካ 25 ዋꬋ።
EZE 40:30 ኢዛ ዩሾን ዳራንቻቲ ዴቴስ፤ ኢስታ ዞኖይ 25 ዋꬋ፤ ኣሆቴꬃይካ 5 ዋꬋ።
EZE 40:31 ሄ ዳራንቻቲ ካሬ ባጋ ዳባባ ጼሌቴስ። ፔንጌ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ። ሄ ጋꬂዛ 8 ꬌካቲ ዴቴስ።
EZE 40:32 ሄ ቢታኔይ ታና ኣርሼ ኬሳ ባጋ ዲርሳ ፔንጌራ ሄኒ ጊዶ ዳባባኮ ኤፊዴስ። ኢዚ ሄ ዲርሳ ፔንጌ ሜዛኒን ሃራ ፔንጌታራ ኢሲ ጊና ጊዲዴስ።
EZE 40:33 ናጊዛይታ ኪፊሌቲ፥ ጎዳቲኔ ዳራንቻይ ኡባይ ሃራ ዲርሳ ፔንጌታራ ኢሲ ማላ። ሄ ዲርሳ ፔንጌ ዩሾን ዲዛ ኪፊሌታ ኡባስ ማስኮቴቲ ዴቴስ። ሄ ፔንጌ ዞኖይ 50 ዋꬋ፤ ኣሆቴꬃይካ ናምኡ ታማኔ ኢቻሽ ዋꬋ።
EZE 40:34 ዳራንቻይ ካሬ ባጋ ዳባባ ጼሌስ። ፔንጌ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ። ሄ ጋꬂዛ 8 ꬌካቲ ዴቴስ።
EZE 40:35 ሄ ቢታኔይ ታና ፑዴሃ ባጋ ዲርሳ ፔንጌኮ ኤፊዴስ። ኢዚ ሄ ዲርሳ ፔንጌ ሜዛኒን፥ ኢዚካ ሃራ ፔንጌታራ ኢሲ ጊና ጊዲዴስ።
EZE 40:36 ናጊዛይታ ኪፊሌቲ፥ ጎዳቲኔ ዳራንቻይ ኡባይ ሃራ ዲርሳ ፔንጌታራ ኢሲ ጊና። ሄ ዲርሳ ፔንጌዛ ዩሾን ማስኮቴቲ ዴቴስ። ሄ ፔንጌዛ ዞኖይ 50 ዋꬋ፤ ኣሆቴꬃይካ 25 ዋꬋ።
EZE 40:37 ዳራንቻይ ካሬ ባጋ ዳባባ ጼሌስ። ፔንጌ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ። ሄ ጋꬂዛ ኦስፑን ꬌካቲ ዴቴስ።
EZE 40:38 ካሬ ዳባባስ ፑዴሃ ባጋራ፥ ጊዶ ዲርሳ ፔንጌ ዳራንቻራ ኦይኬቲዳ ሃራ ኪፊሌይካ ዴስ። ጹጌቲዛ ያርሾስ ኤሂዛ ሜሄ ኣሾይ ሜጬቲዛይ ሄ ኪፊሌና።
EZE 40:39 ሄ ዳራንቻን ሃ ባጋራ ናምኡ ጻራጴዛቲ፥ ሄ ባጋራካ ናምኡ ጻራጴዛቲ ዴቴስ፤ ጹጌቲዛ ያርሾስ፥ ናጋራ ያርሾሲኔ ቆሆ ያርሾስ ሹኪዛ ሜሄ ኡባይ ሹኬቲዛይ ሄ ጻራጴዛታ ቦላና።
EZE 40:40 ዳራንቻፌ ካሬ ባጋራ ፑዴሃ ዲርሳ ፔንጌ ማታን ናምኡ ጻራጴዛቲ ሃ ባጋራ፥ ናምኡ ጻራጴዛቲ ሄ ባጋራ ዴቴስ።
EZE 40:41 ሄሳ ጊሻስ ያርሾስ ሺቂዳ ሜሄይ ኢስታ ቦላ ሹኬቲዛ ሙሌራ ኦስፑን ጻራጴዛቲ ዴቴስ፤ ኢስታፌ ኦይዳቲ ዳራንቻን ዴቴስ፤ ኦይዳቲ ቃሴ ካሬ ዳባባን ዴቴስ።
EZE 40:42 ቃሴ ጹጌቲዛ ያርሾ ዎꬃናስ ጊግሲዳ፥ ሹቻፌ ማሴቲዲ ኦሴቲዳ ኦይዱ ጻራጴዛቲ ዴቴስ። ኢስታስ ꬎቃቴꬃይ ኢሲ ዋꬋ፤ ኣዱሳቴꬃይ ኢሲ ዋꬋኔ ታꬋኮ፤ ቃሴ ኣሆቴꬃይካ ኢሲ ዋꬋኔ ታꬋኮ። ጹጌቲዛ ያርሾኔ ሃራ ያርሾታ ኡባ ሹኪዛ ሚሻቲ ሄ ጻራጴዛታ ቦላን ኡቴቴስ።
EZE 40:43 ኦይዱ ቢራꬌ ኣዱቂዛ ካቆ ሆኮቲ ጎዳዛ ቦላ ዩዪ ኣꬊዲ ꬊሽኬቲ ኡቲዳ። ያርሾስ ሺሺዛ ኣሾይ ኡባይ ሄ ጻራጴዛታ ቦላ ዎꬌስ።
EZE 40:44 ሄሳፌ ጉዬ ሄ ቢታኔይ ታና ጊዶ ዳባባ ጌልꬂዴስ። ሄሳን ፔንጌቲ ጊዶ ዳባባኮ ዶዬቲዛ ናምኡ ኪፊሌቲ ዴቴስ። ኢስታፌ ኢሲ ኪፊሌይ ፑዴሃ ዲርሳ ፔንጌ ማታራ ዱጌሃ ባጋ ጼሌስ፤ ናምኣንꬃይ ቃሴ ዱጌሃ ዲርሳ ፔንጌ ማታራ ፑዴሃ ባጋ ጼሌስ።
EZE 40:45 ሄ ቢታኔይ ታና፥ «ዱጌሃ ባጋ ጼሊዛ ኪፊሌይ ጾሳ ኬꬃን ኦꬂዛ ቄሴታይሳ።
EZE 40:46 ፑዴሃ ባጋ ጼሊዛ ኪፊሌይ ቃሴ ያርሺዛሶን ኦꬂዛ ቄሴታይሳ። ቄሴቲ ኡባይ ሳዶቄ ዛሬፔ ዬሌቲዳ ሌዌታ፤ ጎዳኮ ሺቂዲ ኦꬃናስ ቤሴቴስ ጌቴቲዳይ ኢስታ ጻላ» ጊዴስ።
EZE 40:47 ሄ ቢታኔይ ዳባባ ሚዛኒን ኣዱሳቴꬃይ 100 ዋꬋ፥ ኣሆቴꬃይካ 100 ዋꬋ ጊዲዴስ። ዳባባን ጾሳ ኬꬃፌ ሲንꬃ ባጋራ ኢሲ ያርሺዛሶሆይ ዴስ።
EZE 40:48 ሄሳፌ ጉዬ ኢዚ ታና ጾሳ ኬꬃ ዳራንቻ ኤፊዴስ። ዳራንቻ ጌሊዛሶን ዲዛ ቆሲላꬃ ሚዛኒን ꬎቃቴꬃይ 5 ዋꬋ፤ ኣሆቴꬃይካ 14 ዋꬋ። ሃዲርሳራኔ ኡሻቻራ ዲዛ ጎዳታ ኦርዴቴꬃይ ሄꬑ ሄꬑ ዋꬋ ጊዲዴስ።
EZE 40:49 ዳራንቻ ኣዱሳቴꬃይ 20 ዋꬋ፤ ኣሆቴꬃይካ 12 ዋꬋ። ሄ ጋꬂዛ ታሙ ꬌካቲ ዴቴስ። ጌሊዛሶን ኡሻቻራኔ ሃዲርሳራ ኤቂዳ ናምኡ ቱቄቲ ዴቴስ።
EZE 41:1 ሄሳፌ ሲሚዲ ሄ ቢታኔይ ታና ጾሳ ኬꬃን ዲዛ ጌሻሶሆ ጌልꬂዴስ። ሄ ጌሻሶሆ ጎዳ ኦርዴቴꬃ ሚዛኒን ኡሱፑን ዋꬋ ጊዲዴስ።
EZE 41:2 ፔንጌ ኣሆቴꬃዚ ቃሴ ታሙ ዋꬋ ጊዲዴስ። ሃዲርሳራኔ ኡሻቻራ ዲዛ ጎዳታ ኣሆቴꬃይ ኢቻሽ ኢቻሽ ዋꬋ። ቃሴ ኢዚ ጌሻሶሆ ዋꬊን ኣዱሳቴꬃ 40 ዋꬋ፥ ኣሆቴꬃይካ 20 ዋꬋ ጊዲዴስ።
EZE 41:3 ሄሳፌ ጉዬ ቆልኣ ጌሊዴስ። ሄ ጌሊዛ ፔንጌ ጎዳ ኦርዴቴꬃ ዋꬊን ናምኡ ናምኡ ዋꬋ ጊዲዴስ። ፔንጌዛ ኣሆቴꬃይ ኡሱፑን ዋꬋ ጊዲዴስ፤ ሃዲርሳራኔ ኡሻቻራ ዲዛ ጎዳታ ኣሆቴꬃይ ላፑን ላፑን ዋꬋ።
EZE 41:4 ቃሴ ኢዚ ቆልኣ ዋꬊዴስ፤ ኣዱሳቴꬃይ 20 ዋꬋ፥ ኣሆቴꬃይካ 20 ዋꬋ ጊዲዴስ። ሄሳፌ ጉዬ ኢዚ ታና፥ «ሃይሲ ኡባፌ ኣꬊዛ ጌሻሶሆ» ጊዴስ።
EZE 41:5 ሄ ቢታኔይ ጾሳ ኬꬃ ጎዳ ዋꬊዴስ፤ ሂስቲን ኦርዴቴꬃይ ኡሱፑን ዋꬋ ጊዲዴስ። ሄ ጎዳዛራ ኦይኬቲዲ፥ ጾሳ ኬꬃ ጊምቤ ዩሾን ኬጼቲዳ ኦይዱ ኦይዱ ዋꬋ ኣኪዛ ዳሮ ኪፊሌቲ ዴቴስ።
EZE 41:6 ሄ ኪፊሌቲ ኢሶይ ኢሳ ቦላ ኬጼቲዳ ሄꬑ ፖቄ ጊዲሺን ኢሲ ኢሲ ፖቄስ ሄꬑ ታሙ ኪፊሌቲ ዴቴስ። ዞንጋልꬅ ዬጊዛ ሚꬂ ጌሻሶሆዛ ጊዶ ጌሎንታ ማላ፥ ኮይሮ ጎዳራ ኦይሴꬂ ዎꬂዳ።
EZE 41:7 ሄ ኬꬃይ ጋርሳ ዉርሴꬃ ፖቄን ኦርዲዳ ጊሻሲኔ ፑዴ ሺቂሼ ሌኢዛ ጊሻስ፥ ኪፊሌቲካ ፑዴ ሺቂዛ ዎዴ፥ ኣኪ ኣኪዲ ቤቴስ። ኮይሮ ዉይጌፔ ጊዶ ፖቄዛራ ካንꬂዲ፥ ዉርሴꬃ ፖቄዛ ጋካናስ ኤፊዛ ꬌካቲ ዴቴስ።
EZE 41:8 ታኒ ጾሳ ኬꬃ ዩሾን ꬎቁ ጊዳ ባሳይ ዲዛይሳ ቤያዲስ። ኢዛ ዩሾን ዲዛ ኪፊሌቲ ሄ ባሳ ቦላን ኬጼቲዳ፤ ሄ ባሳይ ጊዶ ዳባባፔ ኡሱፑን ዋꬋ ꬎቄስ።
EZE 41:9 ሄ ኪፊሌታስ ካሬ ባጋ ጎዳ ኦርዴቴꬃይ ኢቻሽ ዋꬋ። ኪፊሌታ ጌሊዛ ናምኡ ፔንጌቲ፥ ኢሶይ ፑዴሃ ባጋራ፥ ኢሶይ ቃሴ ዱጌሃ ባጋራ ዴቴስ፤ ቃሴ ሄ ኪፊሌታ ዩሾን ዲዛ ባሳዛ ኣሆቴꬃይ ኢቻሽ ዋꬋ። ጾሳ ኬꬃ ባሳፔኔ ጊዶ ዳባባን ዲዛ ኪፊሌታፔ ጊዶን ዲዛ ሜላ ሶሆይ ናምኡ ታሙ ዋꬋ።
EZE 41:12 ጾሳ ኬꬃፌ ኣርሼ ጌሎሶ ባጋራ ዲዛ ሜላ ሶሆ ጊናራ ኢሲ ኬꬃይ ዴስ። ሄ ኬꬃስ ኣዱሳቴꬃይ ኡዱፉን ታሙ ዋꬋ፤ ኣሆቴꬃይካ ላፑን ታሙ ዋꬋ። ሄ ኬꬃ ጎዳይ ኢቻሽ ዋꬋ ኦርዴ።
EZE 41:13 ሄ ቢታኔይ ጾሳ ኬꬃስ ካሬ ባጋ ዋꬊዴስ፤ ሂስቲን ኣዱሳቴꬃይ ጼቱ ዋꬋ። ጾሳ ኬꬃ ዞኮሶፔ ቢዲ፥ ሄኒ ኣርሼይ ዉሊዛ ባጋ ኬꬃ ዞኮሶ ጋካናስ ዲዛሶሆ ዋꬊን፥ ጼቱ ዋꬋ ጊዲዴስ።
EZE 41:14 ኣርሼ ኬሳ ባጋራ ዲዛ ጾሳ ኬꬃ ኣሆቴꬃይ ናምኡ ሜላ ሶሆታ ጉጂዲ ዋꬊን ጼቱ ዋꬋ ኣኬስ።
EZE 41:15 ናምኡ ባጋራካ ዲዛ ካንꬂዛ ሶሆታ ጉጂዲ ኣርሼይ ዉሊዛ ባጋራ ዲዛ ኬꬃ ኣዱሳቴꬃ ዋꬊዴስ፤ ሂስቲን ጼቱ ዋꬋ ጊዲዴስ። ጾሳ ኬꬃ ጌሻ ሶሆይ፥ ኢዛ ቆልኣይኔ ኢዛ ዳራንቻይ
EZE 41:16 ዉይጌፔ ቢዲ ማስኮቴታ ጋካናስ፥ ሚꬃን ሊጬቲ ኡቲዴስ፤ ማስኮቴቲካ ሚꬃን ሊጬቲ ኡቲዳ።
EZE 41:17 ጾሳ ኬꬃስ ሶ ባጋ ኪፊሌታ ጎዳይ ፔንጌታፔ ቦላ ኣꬋና ጋካናስ፥ ዛምባታኔ ኪሩቤታ ሚስሌታን ኣሌቄቲ ኡቲዴስ፤ ኪፊሌታን ዩዪ ኣꬋናስካ ዛምባ ሚስሌኒኔ ኪሩቤ ሚስሌን ዋላካን ሜꬌቲ ኡቲዴስ። ኪሩቤታስ ኡባስ ናምኡ ናምኡ ኣይፌሶይ ዴስ።
EZE 41:19 ኢሲ ባጋራ ኣሳ ኣይፌሶ ሚሳቲዛይ ዛምባ ሚስሌዛኮ ጼሌስ፤ ቃሴ ሃራ ባጋራ ጋሞ ኣይፌሶ ሚሳቲዛይ ዛምባ ሚስሌዛኮ ጼሌስ።
EZE 41:20 ዉይጌፔ ዴንዲ ቢዲ ፔንጌታፔ ቦላ ባጋን ዲዛሶሆ ጋካናስ፥ ጌሻሶሆ ጎዳ ዩሾ ኡባይ ሄሳ ማላን ኣሌቄቲዴስ።
EZE 41:21 ጾሳ ኬꬃ ፔንጌ ቆሲላꬃቲ ኡባይ ኦይዱ ዞዜ ጊዲዲ ማሴቲዳይታ፤ ኢስቲ ኡባይካ ኢሲ ጊና።
EZE 41:22 ኡባፌ ኣꬊዳ ጌሻሶሆ ጌሊዛሶ ሲንꬃን ሚꬃፌ ኦሴቲዳ ያርሾ ያርሺዛሶ ሚሳቲዛይ ቤቴስ። ኢዚካ ኦይዱ ዞዜ ጊዲዲ ጌሳይ ሄꬑ ዋꬋ፥ ኣሆቴꬃይ ናምኡ ዋꬋ፥ ኣዱሳቴꬃይ ናምኡ ዋꬋ፤ ጉላቲ፥ ዮቻቲኔ ዞዜቲ ሚꬃፌ ኦሴቲዳ፤ ሄ ቢታኔይ ታና፥ «ሃይሲ ጎዳ ሲንꬃን ዲዛ ጻራጴዛ» ጊዴስ።
EZE 41:23 ጌሻ ሶሆዛስ ኢሲ ፔንጌይ ዴስ፤ ቃሴ ኡባፌ ኣꬊዳ ጌሻ ሶሆዛስ ኢሲ ፔንጌይ ዴስ።
EZE 41:24 ኢሲ ኢሲ ፔንጌስ ጊዶን ዳኮቲዲ ዶዬቲዛ ናምኡ ሳንቃቲ ዴቴስ።
EZE 41:25 ጌሻሶሆ ጎዳታ ቦላ ኦሴቲዳ ማላ፥ ፔንጌታ ሳንቃታ ቦላካ ኪሩቤታኔ ዛምባታ ሚስሌይ ኦሴቲ ኡቲዴስ። ዳራንቻፔ ቦላ ባጋራ ሲንꬃራ ዲዛ ሳንቃይ ሚꬃፌ ኦሴቲዳይሳ።
EZE 41:26 ሄ ዳራንቻ ጎዳታ ሚሌን ማስኮቴቲ ዴቴስ። ናምኡ ባጋ ጎዳቲካ ዛምባ ሚስሌን ኣሌቄቲዳ፤ ሃዲርሳ ባጋራኔ ኡሻቻ ባጋራ ዲዛ ኪፊሌታስ ꬌካ ባጋራ ካሚዛ ካራይ ዴስ።
EZE 42:1 ሄሳፌ ጉዬ ሄ ቢታኔይ ታና ፑዴሃ ባጋ ፔንጌራ ካሬ ዳባባ ካሌꬂዴስ፤ ሂስቲዲ ጾሳ ኬꬃ ጊዶ ዳባባ ጊምቤራ ኦይኬቲዳ ኬꬃኮ ታና ኤሂዴስ።
EZE 42:2 ሃ ኬꬃ ፔንጌይ ፑዴሃ ባጋ ሲሚዲ ጼቱ ዋꬋ ኣዱሲኔ ኢቻሽ ታሙ ዋꬋ ኣሆ።
EZE 42:3 ጊዶ ዛጎፔ ናምኡ ታሙ ዋꬋ ሃኪዲ ቃሴ ሲንꬃ ባጋራ ካሬ ዛጎዛን ዲዛ ሂጼቲዳ ሹቻፌ ሲንꬃ ባጋራ ኢሶይ ኢሳኮ ጼሊዛ ሄꬑ ዴꬂ ዲዛ ፖቄይ ዴስ።
EZE 42:4 ሄ ኪፊሌታ ፔንጌቲ ፑዴሃ ባጋ ጼሌቴስ፤ ኢስታፌ ሲንꬃ ባጋራ ታሙ ዋꬋ ኣሆኔ ጼቱ ዋꬋ ኣዱስ ጊዲዳ ጊዶራ ኣꬂዛ ኦጌይ ዴስ።
EZE 42:5 ሄ ኬꬃስ ቦላ ሄꬓንꬆ ፖቄይ ናምኣንꬆዛፔ ጹሜስ፤ ናምኣንꬃይ ቃሴ ኮይሮይሳፌ ጹሜስ። ጋሶይካ ኢስቲ ኢሶይ ኢሳፌ ጉዬ ሺቂ ሺቂዲ ጊምቤቲዳ ጊሻሳ።
EZE 42:6 ቃሴ ኢስቲ ሄꬑ ፖቄ ጊዲዳ ጊሻሳኔ ካሬ ዳባባን ዲዛ ሃራ ኬꬃታ ማላ ኢስታስ ቱሳይ ባይንዳ ጊሻሳ፤ ሄሳ ጊሻስ ቦላራ ዲዛ ፖቄ ኪፊሌቲ ጋርሳ ባጋን ዲዛ ፖቄ ኪፊሌታፔ ጹሜቴስ።
EZE 42:7 ሄ ኪፊሌታፔ ሲንꬃ ባጋራ፥ ካሬ ዳባባ ጊዶን ኢቻሽ ታሙ ዋꬋ ኣዱቂዛ ዲርሳ ጊምቤይ ዴስ።
EZE 42:8 ካሬ ዳባባ ባጋራ ዲዛ ኪፊሌታ ኣዱሳቴꬃይ ኢቻሽ ታሙ ዋꬋ ጊዲሺን ጾሳ ኬꬃ ሲንꬃን ዲዛ ኪፊሌታ ኣዱሳቴꬃይ ጼቱ ዋꬋ ጊዴስ።
EZE 42:9 ካሬ ዳባባፔ ጋꬅ ጌሊዛ ዎዴ ኣርሼ ኬሳ ባጋራ ጋርሳ ኪፊሌታ ጌሊዛ ፔንጌይ ዴስ።
EZE 42:10 ጾሳ ኬꬃፌ ዱጌሃ ባጋራ ካሬ ባጋን ዲዛ ጊምቤራ ኦይኬቲ ኬጼቲዳ ካሬ ዳባባኮ ሲሚዳ ኪፊሌቲ ዴቴስ።
EZE 42:11 ሄ ኬꬃ ኪፊሌታ ሲንꬃን ኣሳይ ሄሜቲዛ ኦጌይ ዴስ። ሄ ኬꬃይ ፑዴሃ ባጋን ዲዛ ኬꬃራ ኢሲ ማላ፤ ኣዱሳቴꬃይ፥ ኣሆቴꬃይ፥ ኪፊሌቲኔ ፔንጌቲ ኡባይ ኢሲ ጊና።
EZE 42:12 ዲርሳ ጊምቤይ ዉሪዛሶን ኣርሼ ኬሳ ባጋን ዲዛ ጊምቤዛስ ዱጌሃ ባጋራ ዲዛ ኪፊሌታ ጌሊዛሶ ፔንጌይ ዴስ።
EZE 42:13 ሄሳፌ ጉዬ ሄ ቢታኔይ ታና፥ «ሃይቲ ኪፊሌቲ፥ ፑዴሃ ባጋራኔ ዱጌሃ ባጋራ ጾሳ ኬꬃ ካሬ ዳባባኮ ጼሊዛይቲ ቄሴታ ኪፊሌታ። ኢስታ ጊዶን ጎዳ ሲንꬃን ኦꬂዛ ቄሴቲ ኡባፌ ኣꬊዳ ጌሻ ቁማ ማና። ሄ ኪፊሌቲ ጌሽ ጊዲዳ ጊሻስ፥ ኡባፌ ኣꬊዳ ጌሻ ኢሞታ፥ ሄይቲካ ካꬃ ያርሾ፥ ናጋራ ያርሾኔ ቆሆ ያርሾ ኡባ ኢስቲ ሄሳን ዎꬃና።
EZE 42:14 ጾሳ ኬꬃ ጌሊዳ ቄሴቲ ካሬ ዳባባ ኬዚዛ ዎዴ፥ ጎዳስ ኦꬂዛ ዎዴ ማይኢዳ ጌሻ ማይኦ ኬሲዲ፥ ሄ ኪፊሌታን ዎꬆንታ ኬዜቴና። ጋሶይካ ማይኦቲ ጌሻ። ኢስቲ ካሬ ኣሳኮ ኬዚሼ ካሴ ማይኢዛ ሃራ ማይኦታ ማይኢዲ ኬሳናስ ኮሼስ» ጊዴስ።
EZE 42:15 ሄ ቢታኔይ ጾሳ ኬꬃ ጊዶ ዳባባን ዲዛ ኬꬃታ ዋꬊ ዉርሲዲ፥ ኣርሼ ኬሳ ባጋ ጼሊዛ ዲርሳ ፔንጌራ ታና ካሬ ኬሲዴስ። ሂስቲዲ ጾሳ ኬꬃ ሄራ ዩሺ ኣꬂዲ ዋꬊዴስ።
EZE 42:16 ዋꬊዛ ጉፌ ኤኪዲ፥ ኣርሼ ኬሳ ባጋ ዋꬊን፥ ኣዱሳቴꬃይ 500 ዋꬋ ጊዲዴስ።
EZE 42:17 ሲሚዲ ፑዴሃ ባጋ ሄ ጉፌዛን ዋꬊዴስ፤ ሂስቲን 500 ዋꬋ ጊዲዴስ።
EZE 42:18 ሲሚዲ ዱጌሃ ባጋ ዋꬊዴስ፤ ሂስቲን 500 ዋꬋ ጊዲዴስ።
EZE 42:19 ሲሚዲካ ኣርሼ ኬሳ ባጋ ዋꬊዴስ፤ ኢዚካ 500 ዋꬋ ጊዲዴስ።
EZE 42:20 ሄሳ ማላ ኦꬂዲ ኢዚ ኦይዱ ባጋታካ ሚዛኒዴስ። ኢዛ ዩሾን 500 ዋꬋ ኣዱቂዲ፥ 500 ዋꬋ ኣኪዛ ዲርሳ ጊምቤይ ዴስ። ሄ ጊምቤይ ጌሻሶሆ ሃንኮ ጮ ሶሆፔ ሻካናሳ።
EZE 43:1 ሄሳፌ ጉዬ ሄ ቢታኔይ ታና ኣርሼ ኬሳ ባጋ ጼሊዛ ፔንጌኮ ኤሂዴስ።
EZE 43:2 ታኒ ኢስራኤሌ ጾሳ ቦንቾይ ኣርሼ ኬሳ ባጋፌ ዪዛይሳ ቤያዲስ። ኢዛ ዩሳ ጬንጉርሳይ ዳሮ ኪጻ ሃꬃ ጉንꬃ ማላ፤ ቃሴ ቢታይካ ኢዛ ቦንቾን ፖኢዴስ።
EZE 43:3 ታኒ ቤኢዳ ኣጁታይ ካሴ ጎዳይ ዬሩሳላሜ ካታማ ꬋይሳናስ ዪዳ ዎዴ ቤኢዳ ኣጁታ ሚሳቴስ፤ ቃሴ ኮቦሬ ሻፋ ማታን ታኒ ቤኢዳ ኣጁታካ ሚሳቴስ። ሄሳ ቤያዳ ታኒ ሲንꬃ ጉꬅ ጉፋናዲስ።
EZE 43:4 ጎዳ ቦንቾይ ኣርሼ ኬሳ ጼሊዛ ፔንጌራ ጾሳ ኬꬃ ጊዶ ጌሊዴስ።
EZE 43:5 ሄ ዎዴ ጎዳ ኣያናይ ታና ፑዴ ዴንꬂዲ ጊዶ ዳባባ ጌልꬂዴስ፤ ሄኮ ጎዳ ቦንቾይ ጾሳ ኬꬃ ኩሚዴስ።
EZE 43:6 ሄሳን ሄ ቢታኔይ ታ ሚሌን ኤቂ ዲሺን ኢሶይ ጾሳ ኬꬃ ጊዶፌ ታስ ሃሳይሺን ታ ሲያዲስ።
EZE 43:7 ኢዚ «ሃይሶ ኣሳ ናዉ፥ ሃይሲ ታ ኣልጋ ሶሆኔ ታ ቶሆይ ዬꬊዛ ሶሆ። ታኒ ኢስራኤሌ ኣሳ ጊዶን ሜርናስ ዳና። ሃይሳፌ ጉዬ ኢስራኤሌ ኣስ ጊዲን፥ ኢስታ ካዎቴꬃ ጊዲን፥ ሃራ ጾሳታስ ጎይኒዲ ዎይኮ ሼምፖይ ባይንዳ ባንታ ካዎታ ሃዉልቴ ጎይኖን ታ ጌሻ ሱንꬃ ቱኒሴቴና።
EZE 43:8 ዋኒዲ ጊኮ፥ ኢሲ ጎዳ ጻላላይ ታናኔ ኢስታኔ ሻኪን፥ ባንታ ፔንጌ ታይሳ ሚሌን፥ ባንታ ፔንጌ ሚꬃካ ታይሳ ሚሌን ዎꬂዳ። ሂስቲዲ ባንታ ሼኔሲዛ ኦሶን ታ ጌሻ ሱንꬃ ቱኒሲዳ። ሄሳ ጊሻስ ታኒ ታ ሃንቆን ኢስታ ꬋይሳዲስ።
EZE 43:9 ሃኢ ሲሚ ሃራ ጾሳታስ ጎይኒዛይሳ ኣጌቶ፤ ባንታ ካዎታ ሃዉልቴካ ታ ኣቻፌ ዲጌቶ። ሂስቲኮ ታኒ ኢስታ ጊዶን ሜርናስ ዳና።»
EZE 43:10 «ሃይሶ ኣሳ ናዉ፥ ታኒ ኔና ቤሲዳ ጾሳ ኬꬃ ኢስራኤሌ ኣሳስ ዮታ፤ ኢስቲ ባንቲ ኦꬂዳ ናጋራን ዬላታና ማላ፥ ኢዛ ሜꬋዛኔ ኢዚ ኬጼቲዳ ማራ ኢስታስ ዮታ።
EZE 43:11 ኢስቲ ባንቲ ኦꬂዳይሳን ዬላቲዛይታ ጊዲኮ፥ ጾሳ ኬꬃ ሜꬋ፥ ኢዚ ኬጼቲዳ ማራ፥ ኬዚዛ ሶሆታ፥ ጌሊዛ ሶሆታኔ ኢዛ ኩሜꬃ ሚስሌ ኢስታስ ቆንጪሳ። ሄሳንካ ቃሴ ኢዛ ዎጋ ኡባኔ ኢዛ ማራ ኡባ ኢስታ ኤሪሳ። ቃሴ ሄ ኬꬃይ ዋኒ ኬጼቲዳኮ፥ ኢስቲ ዎጋ ኡባ ናጋናሲኔ ፖላናስ ዳንዳያና ማላ ኔኒ ኢስቲ ጼሊሺን ጻፋ።
EZE 43:12 ጾሳ ኬꬃ ዎጋይ ሃይሳ፡ ጾሳ ኬꬃይ ኬጼቲዳ ዴሬ ሁኤይኔ ኢዛ ዩሾን ዲዛ ሄራይ ኡባይ ኡባፌ ኣꬊዳ ጌሻ ጊዳና። ኤ፥ ጾሳ ኬꬃ ዎጋይ ሃይሳ።
EZE 43:13 «ያርሺዛሶይ ካሴ ጾሳ ኬꬃ ዋꬊዛይሳንካ፥ ኢሲ ዋꬋ ቦላ ኦይዱ ቢራꬌታ ጉጂዳ፥ ኣዱሳ ዋꬋን ዋꬌቲዴስ። ያርሺዛሶዛ ባሳ ዩሾን ኢሲ ዋꬋ ዚቂዛይሳኔ ኢሲ ዋꬋ ኣኪዛ ኦላይ ዴስ፤ ሄ ኦላስ ካሬ ባጋ ዶና ዩሾይ ኢሲ ታꬋኮ ኣኬስ። ያርሺዛሶዛ ꬎቃቴꬃይ ሃይሳ ማላ፡
EZE 43:14 ባሳፔ ቢዲ ኮይሮ ዩሾ ጋካናስ ናምኡ ዋꬋ፤ ናምኣንꬆ ዩሾይ ኢሲ ዋꬋ ሶኮ ሺቂ ዶሚዲ ኦይዱ ዋꬋ ꬎቄስ፤ ቃሴካ ኢሲ ዋꬋ ጊዶ ሺቂዲ፥
EZE 43:15 ያርሾይ ጹጌቲዛ ጮጬይ ዲዛ ሄꬓንꬆ ዩሾይ ኦይዱ ዋꬋ ꬎቄስ። ኢዚ ኦይዱ ዞዜ ጊዲዲ፥ ኦይዱ ጉላንካ ኢሲ ኢሲ ካጬይ ዴስ።
EZE 43:16 ያርሾ ጹጊዛ ጮጬይ ኦይዱ ዞዜ ጊዲዲ፥ ኣዱሳቴꬃይ ታማኔ ናምኡ ዋꬋ፥ ኣሆቴꬃይካ ታማኔ ናምኡ ዋꬋ።
EZE 43:17 ሄሳꬆካ ናምኣንꬆ ኬቻይ ኦይዱ ባጋራ ጊና ጊዲዲ ኣዱሳቴꬃይ 14 ዋꬋ፥ ኣሆቴꬃይካ 14 ዋꬋ። ኢዛስ ባጋ ዋꬋ ዞዜይኔ ዩዪ ኣꬋናስ ኢሲ ዋꬋ ኦላይ ዴስ፤ ያርሺዛሶዛ ꬌካቲ ኣርሼይ ሞኪዛሶ ባጋ ጊናን ዴቴስ» ጊዴስ።
EZE 43:18 ቃሴካ ኢዚ ታና፥ «ሃይሶ ኣሳ ናዉ፥ ኡባ ሃሪዛ ጎዳይ፥ ‹ያርሺዛሶ ዎጋይ ሃይሳ። ጹጊዛ ያርሾ ያርሻናሲኔ ሱꬃ ኣራጫናስ፥ ያርሺዛሶ ጊምቢዲ ፖሊዛ ጋላስ፥
EZE 43:19 ታኮ ሺቂዲ፥ ታስ ኦꬂዛ ሳዶቄ ዛሬፔ ዬሌቲዳ ሌዌ ዛሬ ቄሴታስ ናጋራ ያርሾ ኦꬃዳ ኢሲ ዎፋኖ ኢማ። ታኒ ኡባ ሃሪዛ ጎዳይ ሃይሳ ዮታይስ።
EZE 43:20 ኔኒ ሄ ሱꬃፌ ኤካዳ፥ ኦይዱ ካጬታ፥ ናምኣንꬆ ዩሾ ኦይዱ ዞዜዛኔ ሄ ዩሾስ ጋጻ ቲያ። ሄሳ ማላ ኦꬃዳ ያርሺዛሶዛ ቱናቴꬃፌ ጌሻ።
EZE 43:21 ቃሴ ናጋራ ያርሾስ ኢሜቲዳ ሄ ዎፋና ኤካዳ፥ ጾሳ ኬꬃ ጊዲዲ፥ ጌሻ ሶሆፔ ካሬ ባጋራ ኢዛስ ኣዛዜቲዳ ሶሆን ጹጋ።
EZE 43:22 « ‹ዎንቴꬃ ጋላስ ቦሬይ ባይንዳ ዲዛ ኢሲ ዴይሻ ኦርጌ ኤካዳ ናጋራ ያርሾስ ያርሻ። ካሴ ዎፋኖዛ ሱꬃን ጌሺዳ ማላ፥ ሄ ዴይሻ ኦርጌዛ ሱꬃን ያርሺዛሶ ጌሻ።
EZE 43:23 ሂስታዳ ቦሬይ ባይንዳ ዲዛ ኢሲ ዎፋኖኔ ቦሬይ ባይንዳ ዲዛ ኢሲ ꬋርሾ ኤካዳ፥
EZE 43:24 ናምኣካ ጎዳ ሲንꬅ ሺሻ። ሂስቲዳፔ ጉዬ ቄሴቲ ኢስታ ቦላ ማጺኔ ዬጊዲ ጎዳስ ጹጌቲዛ ያርሾ ሂስቲ ያርሼቶ።
EZE 43:25 « ‹ላፑን ጋላስ ኩሜꬅ፥ ሃች ሃች ኢሲ ዴይሻ ኦርጌ ናጋራ ያርሾስ፥ ቃሴ ኢዛ ቦላ ቦሬይ ባይንዳ ዎፋኖኔ ኢሲ ꬋርሾ ሺሻ።
EZE 43:26 ቄሴቲ ላፑን ጋላስ ኩሜꬅ ያርሺዛሶዛ ቱናቴꬃፌ ጌሼቶ። ሂስቲዲ ጎዳስ ኢዛ ዱማሴቶ።
EZE 43:27 ሃ ጋላሳቲ ዉሪዛ ዎዴ፥ ኦስፑንꬃ ጋላሳፌ ዶሚዲ፥ ቄሴቲ ኢንቴ ጹጌቲዛ ያርሾኔ ኢንቴ ኢሲፌቴꬃ ያርሾ ያርሺዛሶ ቦላን ያርሼቶ። ሄ ዎዴ ታኒ ኢንቴናን ኡፋዬታና። ታኒ ኡባ ሃሪዛ ጎዳይ ሃይሳ ዮታይስ› ጌስ» ጊዴስ።
EZE 44:1 ሄሳፌ ጉዬ ሄ ቢታኔይ ታና ጉዬ ዛሪዲ ጾሳ ኬꬃስ ኣርሼ ኬሳ ባጋራ ዲዛ ካሬ ባጋ ዲርሳ ፔንጌኮ ኤሂዴስ፤ ኢዚ ኤሂዛ ዎዴ ዲርሳ ፔንጌይ ጎርዴቲ ኡቲዴስ።
EZE 44:2 ጎዳይ፥ «ታና ሃ ፔንጌይ ጎርዳን ዴኣናፔ ኣቲን ናምኣንꬆ ዶዬቴና። ኣሲካ ኢዛራ ጌሌና፤ ኣይስ ጊኮ ጎዳ ኢስራኤሌ ጾሳይ ኢዛራ ጌሊዴስ። ሄሳ ጊሻስ ሄ ፔንጌይ ጎርዳን ዳና።
EZE 44:3 ጊዲኮካ ኢስራኤሌ ሃላቃይ ጎዳ ሲንꬃን ኡኬꬅ ማናስ ሄሳን ኡታና ዳንዳዬስ። ፔንጌ ዳራንቻራ ኢዚ ጌላናሲኔ ኬዛናስ ዳንዳዬስ» ጊዴስ።
EZE 44:4 ሄሳፌ ጉዬ ሄሳዴይ ታና ፑዴሃ ፔንጌኮ ኤፊዛ ኦጌራ ኤፊዲ፥ ጾሳ ኬꬃስ ሲንꬃ ባጋ ጋꬂዴስ። ሄሳን ታኒ ጼሊዛ ዎዴ ሄኮ፥ ጎዳ ቦንቾይ ጾሳ ኬꬃ ኩሚ ኡቲዳይሳ ቤያዲስ፤ ቤያዳ ታ ሲንꬃ ጉꬅ ጉፋናዲስ።
EZE 44:5 ሂስቲን ጎዳይ ታና፥ «ሃይሶ ኣሳ ናዉ፥ ጾሳ ኬꬃ ዎጋታ ኡባኔ ኢዛ ማራታ ኡባ ጼሊዛይሳን ታኒ ኔስ ዮቲዛይሳ ኔ ሃይꬃን ሚንꬃዳ ሲያ፤ ኔ ኣይፌንካ ሚንꬃዳ ጼላ። ጾሳ ኬꬃ ጌላናሲኔ ኬዛናስ ቤሲዛ ኣሳቲኔ ቤሶንታ ኣሳቲ ኣዋይታኮ ሚንꬃዳ ኣኬካ።
EZE 44:6 ማካላንቻ ኢስራኤሌ ኣሳስ ኡባ ሃሪዛ ጎዳይ፥ ‹ኢንቴኖ ኢስራኤሌ ኣሳቶ፥ ኢንቴ ኦꬂዛ ቱና ኦሶይ ኤቆ።
EZE 44:7 ኢንቴ ታስ ታ ቁማ፥ ሞꬎኔ ሱꬃ ያርሾ ኦꬂዲ ሺሺዛ ዎዴ፥ ዎዚናይኔ ኣሾይ ቃጻሬቶንታ ኣላጋ ኣሳታ ጾሳ ኬꬃ ጌልꬂዲ ኢስቲ ኢዛ ቱኒሳና ማላ ኦꬂዴታ። ኢንቴ ቱናቴꬃ ኡባ ቦላካ ጉጂዲ ታ ጫቆዛ ላሊዴታ።
EZE 44:8 ቃሴ ታ ጌሻ ሚሻታ ቦላ ኣዋቶንታ ኢጺዲ፥ ታ ኬꬃን ኣላጋታ ኣዋሲዴታ።
EZE 44:9 ሄሳ ጊሻስ ኡባ ሃሪዛ ጎዳይ፡ ኢስራኤሌ ኣሳ ጊዶን ዲዛ ኣላጋ ኣሲ፥ ባ ዎዚናኒኔ ባ ኣሾን ቃጻሬቶንታይ፥ ኦኒኔ ታ ጾሳ ኬꬃ ጌሎፖ።
EZE 44:10 « ‹ታፔ ሃኪዳ ሌዌቲ፥ ኢስራኤሌ ኣሳይ ታና ኣጊዲ ዎራ ሲሚን፥ ባንታ ኤቃታስ ጎይናናስ ዎራ ሲሚዳይቲ ባንታ ቂጻቴ ኤኬቶ።
EZE 44:11 ጊዲኮካ ኢስቲ ጾሳ ኬꬃን ኦሳንቻ ጊዴቶ፤ ጾሳ ኬꬃ ዲርሳ ፔንጌታ ናጌቶ፤ ጾሳ ኬꬃ ኦሶካ ኦꬄቶ። ኢስቲ ጹጊዛ ያርሾኔ ኣሳይ ኤሂዛ ሃራ ያርሾ ሹኬቶ፤ ቃሴ ኣሳስ ኦꬃናስ ኢስቲ ኣሳኮ ሺቄቶ።
EZE 44:12 ጊዶ ኣቲን ኢስቲ ካሴ ኢስራኤሌ ኣሳ ኤቃታስ ጎይኒሲዳ ጊሻሲኔ ኣሳ ናጋራን ኦንጊዛ ꬉጴ ጊዲዳ ጊሻስ፥ ኢስቲ ባንታ ናጋራ ቂጻቴ ኤካና ማላ ታኒ ኩሼ ዴንꬃዳ ጫቃዲስ። ታኒ ኡባ ሃሪዛ ጎዳይ ሃይሳ ዮታይስ።
EZE 44:13 ኢስቲ ቄሴ ጊዲዲ ኦꬃናስ ታኮ ሺቄቴና፤ ዎይኮ ታስ ዱማቲዳ ጌሻኮኔ ኡባፌ ኣꬊዳ ጌሻኮ ሺቄቴና። ኢስቲ ባንታ ኦꬂዳ ቱና ኦሶ ጊሻስ ዬላ ማይኤቶ።
EZE 44:14 ጊዲኮካ ኢስቲ ጾሳ ኬꬃን ኣዋታና ማላኔ ኢዛ ጊዶን ኦꬃናስ ዲዛ ኦሶ ኡባካ ኦꬃና ማላ፥ ታኒ ኢስታ ሱንꬃና።
EZE 44:15 « ‹ጊዶ ኣቲን ኢስራኤሌ ኣሳይ ታና ኣጊዲ፥ ዎራ ሲሚዳ ዎዴ፥ ጾሳ ኬꬃ ዎጋ ኣማኔቲዲ ፖሊዳ፥ ሌዌ ዛሬ ቄሴቲ ሳዶቄ ዛሬቲ ታስ ኦꬃናስ ታኮ ሺቄቶ። ሞꬎኔ ሱꬃ ሺሺሼ፥ ኢስቲ ታ ሲንꬃን ኦꬄቶ። ታኒ ኡባ ሃሪዛ ጎዳይ ሃይሳ ዮታይስ።
EZE 44:16 ጾሳ ኬꬃ ኢስቲ ጌሌቶ፤ ታስ ኦꬃናስ ታ ያርሺዛሶ ኢስቲ ሺቄቶ፤ ኣዋቴꬃካ ኢስቲ ኦይኬቶ።
EZE 44:17 ኢስቲ ጾሳ ኬꬃስ ጊዶ ዳባባ ጌሊዛ ዎዴ፥ ላይኖፔ ዳዴቲዳ ማይኦ ማይኤቶ፤ ጊዶ ዳባባ ፔንጌን ዎይኮ ጾሳ ኬꬃ ጊዶን ኦꬂዛ ዎዴ፥ ሱፌ ማይኦ ማይኦፌቶ።
EZE 44:18 ኢስቲ ባንታ ሁኤን ላይኖ ሻሼ ጻጼቶ፤ ባንታ ጼሳንካ ላይኖ ሱሬ ጊጼቶ። ባና ጫዋሲዛ ሚሽ ኣይኮካ ማይኦፌቶ።
EZE 44:19 ኣሳይ ዲዛ ካሬ ዳባባ ኢስቲ ኬዚዛ ዎዴ፥ ጾሳ ኬꬃን ኦꬂሼ ማይኢዳ ማይኦ ቃሪዲ ጌሻ ኪፊሌታን ዎꬄቶ። ሂስቶንታ ኣጊኮ ኢስቲ ባንታ ጌሻ ማይኦን ኣሳ ጎዳስ ጌሻና።
EZE 44:20 « ‹ቄሴቲ ባንታ ሁኤ ሜዴቶፌቶ፥ ዎይኮ ባንታ ቢናና ኣዱሶፌቶ፤ ባንታ ሁኤ ሊኬን ቃንጺሴቶ።
EZE 44:21 ኣይ ቄሴይካ ጊዶ ዳባባ ጌሊዛ ዎዴ ዎይኔ ኡሹ ኡዮፖ።
EZE 44:22 ኢስታ ኣዚናይ ሃይቂዳ፥ ዎይኮ ኣንጄታ ቢዳ ማጫስ ማቾ ኤኮፌቶ። ኢስራኤሌ ኣሳፔ ጌላኦ ኤኬቶ፤ ዎይኮ ኣዚናይ ቄሴ ጊዲዲ ዲሼ ሃይቂዳ ማጫሳ ኤኬቶ።
EZE 44:23 « ‹ቄሴቲ ጎዳስ ዱማቲዳይሳፌኔ ዱማቶንታ ጮ ዲዛይሳፌ ጊዶን ዲዛ ዱማቴꬃ ታ ኣሳ ታማርሴቶ። ቃሴ ጌሻፌኔ ቱናፔ ጊዶን ዲዛ ዱማቴꬃ ኢስታ ቤሴቶ።
EZE 44:24 ኣይ ሞቶይ ዴንዲኮካ ቄሴቲ ታ ዎጋይ ዮቲዛይሳ ማላ ፒርዴቶ። ታ ማራኔ ታ ዎጋ ናጊዲ፥ ታ ባኣሌታ ቦንቼቶ፤ ታ ሳምባታካ ዱማሲዲ ቦንቼቶ።
EZE 44:25 « ‹ቄሴይ ሃይቂዳ ኣሃኮ ሺቂዲ ባና ቱኒሶፖ። ጊዲኮካ ሃይቂዳይሲ ኣዋ፥ ዎይኮ ኣዮ፥ ዎይኮ ዬሊዳ ኣቱማ ና፥ ዎይኮ ማጫ ና፥ ዎይኮ ኢሻ፥ ዎይኮ ኣዚና ጌሎንታ ሚቾ ጊዲኮ ቦቻና ዳንዳዬስ።
EZE 44:26 ጌዪዳፔ ጉዬ ላፑን ጋላስ ታኮ። ሄሳፌ ጉዬ ኢዚ ጌሽ ጊዳና።
EZE 44:27 ሄሳፌ ሲሚዲ ጌሻሶሆን ኦꬃናስ ጊዶ ዳባባ ቢዛ ጋላስ፥ ባ ናጋራስ ያርሾ ሺሾ። ታኒ ኡባ ሃሪዛ ጎዳይ ሃይሳ ዮታይስ።
EZE 44:28 « ‹ቄሴታስ ላታይ ባዋ፤ ታኒ ኢስታስ ላታ። ኢስራኤሌ ቢታን ኢስታስ ኣይ ላታ ኢሞፍቴ፤ ኢስታ ላታይ ታና።
EZE 44:29 ኢስቲ ካꬃ ያርሾ፥ ናጋራ ያርሾኔ ቆሆ ያርሾ ሜቶ። ኢስራኤሌ ቢታን ጎዳስ ዱማቲዳይ ኡባይ ኢስታሳ።
EZE 44:30 ኮይሮ ጋኪዛ ዱማ ዱማ ካꬃስ ኮይሮ ኣይፌይኔ ኢንቴ ጎዳስ ኢሚዛ ኢሞታ ኡባይ ቄሴታሳ። ኢንቴ ኬꬃን ኣንጆይ ሼምፓና ማላ፥ ኢንቴ ꬊሌፌ ኮይሮ ኩሼ ኢስታስ ኢሚቴ።
EZE 44:31 ቄሴቲ ባዉቲዳይሳ ዎይኮ ዶኣይ ዎꬊዳይሳ ካፎ ኣሾ ጊዲን፥ ሜሄ ኣሾ ጊዲን ኣይኮካ ሞፔቶ።
EZE 45:1 « ‹ቢታ ኢንቴ ላታናስ ሳማን ሻኪዛ ዎዴ፥ ሄ ቢታፌ ኢሲ ሳማ ጎዳስ ዱማሲዲ ዎꬂቴ። ሄሲካ ታማኔ ናምኡ ኪሎ ሜቲሬኔ ባጋ ኣዱቂዛኔ ታሙ ኪሎ ሜቲሬ ኣኪዛ ሶሆ ጊዶ። ሄ ሶሆይ ሙሌካ ጌሻሶሆ ጊዶ።
EZE 45:2 ሄ ሶሆፔ ኣዱሳቴꬃይ 500 ዋꬋ፥ ኣሆቴꬃይካ 500 ዋꬋ ጊዲዳ ኦይዱ ጉላይ ዲዛይ ጾሳ ኬꬃስ ጊዶ፤ ኢዛ ዩሾን ኢቻሽ ታሙ ዋꬋ ጊዲዳ ዶያ ሶሆይ ዴዮ።
EZE 45:3 ሄ ጎዳስ ዱማቲዳ ሶሆፔ ኣዱሳቴꬃይ ታማኔ ናምኡ ኪሎ ሜቲሬኔ ባጋ፥ ኣሆቴꬃይ ቃሴ ኢቻሽ ኪሎ ሜቲሬ ጊዲዳ ሶሆ ዋꬋዳ ሻካ። ሄ ሶሆይ ኡባፌ ኣꬊዳ ጌሻ ሶሆይ ጾሳ ኬꬃስ ጊዶ።
EZE 45:4 ሄሲ ጾሳ ኬꬃ ጊዶን ጎዳስ ኦꬃናስ፥ ኢዛኮ ሺቂዛ ቄሴታስ ዱማቲዳ ጌሻሶሆ ጊዶ፤ ቃሴ ኢስቲ ባንታ ኬꬃ ኬጺዛ ሶሆኔ ጾሳ ኬꬃስካ ጌሻሶሆ ጊዶ።
EZE 45:5 ቃሴ ኣቲዛ ታማኔ ናምኡ ኪሎ ሜቲሬ ባጋ ኣዱቂዛኔ ኢቻሽ ኪሎ ሜቲሬ ባጋ ኣኪዛ ሶሆይ ጾሳ ኬꬃን ኦꬂዛ ሌዌታስ ላታ ጊዶ፤ ኢስቲ ባስ ዴኢዛ ካታማታ ሄሳን ኬጼቶ።
EZE 45:6 « ‹ሄ ጎዳስ ዱማቲዳ ሶሆዛ ሚሌን ታማኔ ናምኡ ኪሎ ሜቲሬኔ ባጋ ኣዱቂዛኔ ናምኡ ኪሎ ሜቲሬኔ ባጋ ኣኪዛ ሶሆይ ካታማ ኬጻናስ ዴኦ፤ ሄ ሶሆይ ኢስራኤሌ ኣሳስ ኡባስ ጊዶ።
EZE 45:7 « ‹ኢስራኤሌ ሃላቃስ ኢሜቲዳ ጊሻይ ናምኡ ባጋራካ ጎዳስ ዱማቲዳ ሶሆኒኔ ካታማ ሶሆን ዛዋቴስ። ኢዚ ኣርሼ ጌሎሶ ባጋራ ሜዲቴራኔ ኣባ ጋኬስ፤ ኣርሼ ኬሳ ባጋራ ቢዲ ኢስራኤሌ ቢታ ዛዋ ጋኬስ፤ ኢዛስ ኣዱሳቴꬃይካ ኢሲ ቆሞስ ኢሜቲዛ ጺንጾ ጊና ጊዴስ።
EZE 45:8 ሄ ጊሻይ ኢስራኤሌ ቢታ ሃላቃስ ላታ ጋዴ ጊዶ። ሃይሳፌ ሲንꬃን ታ ሃላቃቲ ታ ኣሳ ዋዪሶፔቶ፤ ኢስቲ ኢስራኤሌ ኣሳይ ኡባይ ባ ዛሬን ዛሬን ጋዴ ኤካና ማላ ኦꬄቶ።
EZE 45:9 « ‹ኡባ ሃሪዛ ጎዳይ፡ ኢንቴኖ ኢስራኤሌ ሃላቃቶ፥ ኢንቴስ ሃኢ ጊዳና! ኢንቴ ሻባርሲዛይሳኔ ኣሳ ኡንኤꬂዛይሳ ኣጊቴ፤ ሱሬ ፒርዳኔ ጺሎቴꬅ ኦꬂቴ። ታ ኣሳ ኢስታ ላታ ቢታፌ ꬎቃሊዲ ጎዲዛይሳ ኣጊቴ። ታኒ ኡባ ሃሪዛ ጎዳይ ሃይሳ ዮታይስ።
EZE 45:10 ኢንቴ ኡባሲካ ሊኬ ጌዳራይኔ ማካ ሚሺ ዴኦ።
EZE 45:11 ኢንቴስ ማካ ሚሻስ ጊዶ ጊዲዛ ሆሜሬ ጌቴቲዛ ማካ ሚሽ ዴኦ፤ ኢሲ ባዶሴይ ሆሜሬስ ታማፌ ኢሲ ኩሼ ጊዲሺን፥ ኢሲ ኤፌይ ሆሜሬስ ታማፌ ኢሲ ኩሼ ጊዴስ። ሆሜሬይ ናምኡ ጌዳራታሲካ ኤሬቲዳ ማካ ጌዳራ ሚሽ ጊዶ።
EZE 45:12 ኢሲ ሳቂሌይ ናምኡ ታሙ ጌራ ጊዴስ፤ ናምኡ ታሙ ሳቂሌ ቦላ ናምኡ ታማኔ ኢቻሽ ሳቂሌ ቃሴካ ታማኔ ኢቻሽ ሳቂሌ ጉጂሺን ኢሲ ሚናኔ ጊዴስ።
EZE 45:13 « ‹ኢንቴ ኢሞታ ኢሚሼ ሃይሳ ማላ ሂስቲ ኢሚቴ። ኢንቴ ቡኪ ሺሺዛ ጊስቴፌ ኡሱፑን ታማፌ ኢሲ ኩሼ፥ ባንጋፌ ኡሱፑን ታማፌ ኢሲ ኩሼ፥
EZE 45:14 ቃሴ ዎጋራ ዛይቴፔ ጼታፔ ኢሲ ኩሼ ኢሚቴ። ሃይታ ሜዛኒዛ ዎዴ፥ ኔኒ ማኪዛ ሚሻይ ባቴ ጊዶ። ታሙ ባቴይ ኢሲ ሆሜሬ ዎይኮ ኢሲ ኮሬ ጊዴስ።
EZE 45:15 ኢስራኤሌ ኣሳይ ሄሚዛ ናምኡ ናምኡ ጼቱ ሜሄይ ዲዛ ኢሲ ዉዴፔ ኢሲ ኢሲ ሜሄ ኢሚቴ። ሄይቲ ኣሳ ናጋራ ኣቶ ጊሳናስ ካꬃ ያርሾ፥ ጹጌቲዛ ያርሾኔ ኢሲፌቴꬃ ያርሾ ጊዴቶ። ታኒ ኡባ ሃሪዛ ጎዳይ ሃይሳ ዮታይስ።
EZE 45:16 ቢታን ዲዛ ኣሳይ ኡባይ ሃይሳ ኡባ ኢስራኤሌ ሃላቃስ ኢሞ።
EZE 45:17 ሃላቃዚ ኢስራኤሌ ኣሳይ ቦንቺዛ ባኣሌታን፥ ኣጊናይ ጼሪዛ ጋላሳታኒኔ ሳምባታታን ጹጊዛ ያርሾታ፥ ካꬃ ያርሾታኔ ኡሻ ያርሾታ ሺሺ ኢሞ። ኢስራኤሌ ኣሳ ናጋራ ኣቶ ጊሳናስ፥ ናጋራ ያርሾታ፥ ካꬃ ያርሾታ፥ ጹጌቲዛ ያርሾታኔ ኢሲፌቴꬃ ያርሾታ ኡባ ኢዚ ሺሺ ኢሞ።
EZE 45:18 « ‹ኡባ ሃሪዛ ጎዳይ፡ ኮይሮ ኣጊናን፥ ኮይሮ ጋላስ ቦሬይ ባይንዳ ዲዛ ኢሲ ዎፋኖ ጾሳ ኬꬃ ጌሻናስ ሺሻ።
EZE 45:19 ቄሴይ ሃ ናጋራ ያርሾ ሱꬃፌ ኤኪዲ፥ ጾሳ ኬꬃ ፔንጌ ቆሲላꬃታ፥ ያርሺዛሶ ዩሾን ዲዛ ኦይዱ ዞዜታኔ ጊዶ ዳባባ ኤፊዛ ዲርሳ ፔንጌ ቆሲላꬃታ ቲዮ።
EZE 45:20 ኦኒካ ቆፖንታ ዎይኮ ኤሮንታ ኣጊዲ ኦꬂዳ ናጋራ ኣቶ ጊሳናስ፥ ኣጊናስ ላፑንꬃ ጋላሳን ሄሳ ማላንካ ኦꬃ። ሂስታዳ ጾሳ ኬꬃ ቱናቴꬃፌ ጌሻ።
EZE 45:21 « ‹ኮይሮ ኣጊናን፥ ታማኔ ኦይዳንꬆ ጋላሳን ፓዚጋ ባኣሌ ቦንቺቴ፤ ቃሴ ላፑን ጋላስ ጋካናስ ኢርሾይ ጌሎንታ ኡኬꬅ ሚቴ።
EZE 45:22 ሄ ኮይሮ ጋላሳን ሃላቃይ ባ ጊሻሲኔ ባ ኣሳ ጊሻስ ናጋራ ያርሾ ኦꬂዲ ኢሲ ዎፋኖ ሺሺ ኢሞ።
EZE 45:23 ሄ ባኣሌይ ቦንቼቲዛ ላፑን ጋላሳታን ሃች ሃች ላፑን ዎፋኖታኔ ላፑን ꬋርሾታ ኡባይካ ቦሬይ ባይንዳ ቦላራ ዲዛይታ ጹጌቲዛ ያርሾ ኦꬂዲ፥ ጎዳስ ሺሾ። ሄሳራካ ኢሲፌ ናጋራ ያርሾስ ሃች ሃች ኢሲ ዴይሻ ኦርጌ ሺሺ ኢሞ።
EZE 45:24 ኢሲ ኢሲ ዎፋኖኔ ኢሲ ኢሲ ꬋርሾ ያርሺዛ ዎዴ፥ ካꬃ ያርሾስ ታማኔ ላፑን ኪሎ ጊራሜ ጊስቴኔ ሄꬑ ሄꬑ ሊቲሮ ዛይቴ ሺሺ ኢሞ።
EZE 45:25 « ‹ላፑንꬃ ኣጊናን፥ ታማኔ ኢቻሻንꬃ ጋላሳን ዶሚዛ ላፑን ጋላስ ባኣሌ ዎዴን ኡባን፥ ናጋራ ያርሾ፥ ጹጌቲዛ ያርሾ፥ ካꬃ ያርሾኔ ዛይቴ ካሴይሳፌ ዱማሶንታ ሃላቃይ ሺሺ ኢሞ።
EZE 46:1 « ‹ኡባ ሃሪዛ ጎዳይ፡ ጊዶ ዳባባ ጌልꬂዛ ኣርሼ ኬሳ ባጋ ዲርሳ ፔንጌይ ኦሶ ጋላስ ኡሱፑናታንካ ጎርዴቲ ጋምኦ፤ ጊዶ ኣቲን ሳምባታ ጋላሲኔ ኣጊናይ ጼሪዛ ጋላስ ዶዬቶ።
EZE 46:2 ኢስራኤሌ ኣሳ ሃላቃይ ዲርሳስ ፔንጌ ባጋ ዳባባፔ ጌሊዛ ዳራንቻ ባጋራ ጌሊዲ፥ ዲርሳ ፔንጌ ሚꬃ ማታን ኤቆ። ቄሴቲ ኢዚ ኢሚዳ ጹጌቲዛ ያርሾኔ ኢሲፌቴꬃ ያርሾ ያርሼቶ። ኢዚ ሄሳን ዲርሳ ፔንጌን ጎይኒ ሲሚዲ ካሬ ኬዞ። ጊዶ ኣቲን ዲርሳ ፔንጌይ ኦማርሳና ጋካናስ ጎርዴቶፎ።
EZE 46:3 ሄ ቢታ ኣሳይካ ሳምባታኒኔ ኣጊናይ ጼሪዛ ዎዴን ሄ ጊዶ ዳባባ ዲርሳ ፔንጌ ጌሊዛሶን ጎዳ ሲንꬃን ጎይኔቶ።
EZE 46:4 « ‹ሃላቃይ ሳምባታ ጋላስ ጎዳስ ጹጌቲዛ ያርሾ ኦꬂዲ፥ ኡሱፑን ዶርሳ ላቃኔ ኢሲ ꬋርሾ፥ ኡባይካ ቦሬይ ባይንዳ ዲዛይታ ሺሾ።
EZE 46:5 ኢሲ ꬋርሾራ ታማኔ ላፑን ኪሎ ጊራሜ ካꬃ ያርሾ ሺሾ። ዶርሳ ላቃታራ ሺቂዛ ካꬃ ያርሾይ ሃላቃይ ባስ ሺሻናስ ኮዪዳይሳ ኬና ሺሺ ኢሞ። ቃሴ ታማኔ ላፑን ኪሎ ጊራሜ ካꬃራ ሄꬑ ሄꬑ ሊቲሮ ዛይቴ ሺሺ ኢሞ።
EZE 46:6 ኣጊናይ ጼሪዛ ጋላስ ጋላስ ቃሴ ኢሲ ዎፋኖ፥ ኡሱፑን ዶርሳ ላቃኔ ኢሲ ꬋርሾ፥ ቦሬይ ባይንዳ ቦላራ ዲዛይታ ኡባ ሺሺ ኢሞ።
EZE 46:7 ኢሲ ኢሲ ዎፋኖኔ ኢሲ ኢሲ ꬋርሾ ያርሺዛ ዎዴ፥ ካꬃ ያርሾስ ታማኔ ላፑን ኪሎ ጊራሜ ጊስቴኔ ሄꬑ ሄꬑ ሊቲሮ ዛይቴ ሺሺ ኢሞ። ዶርሳ ላቃታራ ሺቂዛ ካꬃ ያርሾይ ሃላቃይ ባስ ሺሻናስ ኮዪዳይሳ ኬና ጊዶ።
EZE 46:8 ሃላቃይ ጌልꬂሼ፥ ዲርሳ ፔንጌ ዳራንቻራ ኣꬊዲ ጌሎ፤ ኬዚሼካ ሄሳራ ኬዞ።
EZE 46:9 « ‹ጊዶ ኣቲን ሄ ቢታ ኣሳይ ባኣሌ ጋላስ ጎዳ ሲንꬃን ጎይናናስ ዪዛ ዎዴ፥ ጎይኖስ ፑዴሃ ባጋ ፔንጌራ ጌሊዳይቲ ዱጌሃ ባጋ ፔንጌራ ኬዜቶ፤ ቃሴ ዱጌሃ ባጋ ፔንጌራ ጌሊዳይቲ ፑዴሃ ባጋ ፔንጌራ ኬዜቶ። ኣይ ኣሲኔ ባ ሲንꬃን ዲዛ ፔንጌራ ሲቲ ጊዲ ኬዞ ኣቲን ባ ጌሊዳሶራ ኬዞፖ።
EZE 46:10 ኢስቲ ጌሊዛ ዎዴ ሃላቃይ ኢስታራ ጌሎ፤ ኢስቲ ኬዚዛ ዎዴካ ኢስታራ ኬዞ።
EZE 46:11 « ‹ኡፋይሳ ጋላሳታኒኔ ላይꬃ ባኣሌታን ኢሲ ኢሲ ዎፋኖራኔ ኢሲ ኢሲ ꬋርሾራ ሺቂዛ ካꬃ ያርሾይ ታማኔ ላፑን ኪሎ ጊራሜ ጊስቴኔ ሄꬑ ሄꬑ ሊቲሮ ዛይቴ ጊዶ። ቃሴ ዶርሳ ላቃታራ ሺቂዛ ያርሾይ ሃላቃይ ባስ ሺሻናስ ኮዪዳይሳ ኬና ጊዶ።
EZE 46:12 ሃላቃይ ባ ዶሳን ኢሚዛ ያርሾ፥ ጹጌቲዛ ያርሾዛ፥ ዎይኮ ኢሲፌቴꬃ ያርሾዛ ጎዳስ ኤሂዛ ዎዴ፥ ኣርሼይ ሞኪዛሶ ባጋ ጊዶ ዳባባ ፔንጌይ ኢዛስ ዶዬቶ። ባ ጹጊ ሺሺዛ ያርሾዛ ዎይኮ ኢሲፌቴꬃ ያርሾ ሳምባታ ጋላስ ኢዚ ሺሺዛ ማላ ሺሺ ኢሞ። ሂስቲዲ ኢዚ ኬዚዲ ቢን ዲርሳ ፔንጌይ ጎርዴቶ።
EZE 46:13 « ‹ሃላቃይ ሃች ሃች ቦሬይ ባይንዳ ቦላራ ዲዛ ኢሲ ላይꬃ ጊዲዳ ኢሲ ዶርሳ ጹጊዛ ያርሾ ኦꬂዲ ጎዳስ ሺሺ ኢሞ፤ ኢዚ ሄሳ ማላዶ ማላዶ ፓጬይ ባይንዳ ኤሆ።
EZE 46:14 ሄሳራካ ናምኡ ኪሎ ጊራሜ ꬊሌይ ኢሲ ሊቲሮ ዛይቴን ሙኑቄቲዲ፥ ማላዶ ማላዶ ካꬃ ያርሾ ጊዲዲ ሺቆ። ሃይሲ ኢንቴ ጎዳስ ሃች ሃች ሺሺዛ ያርሾ ዎጋ።
EZE 46:15 ሃይሲ ሲሚ ꬋርሾይ፥ ካꬃይኔ ዛይቴይ ፓጬይ ባይንዳ ማላዶ ማላዶ ጹጌቲዛ ያርሾ ጊዲ ሺቃናስ ቤሴስ።
EZE 46:16 « ‹ኡባ ሃሪዛ ጎዳይ፡ ሃላቃይ ባ ጋዴፔ ሻኪዲ፥ ባ ኣቱማ ናይታፔ ኢሳስ ኢሚኮ፥ ሄሲ ሄ ናዛሲኔ ኢዛ ናስ ላታ ጊዴስ።
EZE 46:17 ጊዶ ኣቲን ሃላቃይ ባ ጋዴፔ ሻኪዲ ባ ኣይሌታፔ ኢሳስ ኢሚኮ፥ ኢቻሽ ታማንꬃ ላይꬃ ባኣሌይ ጋካናስ ሄ ጋዴይ ኢዛይሳ። ሄሳፌ ጉዬ ሃላቃስ ሲሞ፤ ሄሲ ሃላቃስ ጊዲዳ ጊሻስ ሜርናስ ኢዛሲኔ ኢዛ ናይታስ ላታ ጊዴስ።
EZE 46:18 ሃላቃይ ኣስ ሱጊዲ ኣሳ ላታ ጋዴ ዎልቃን ኤኮፎ። ታ ኣሳይ ባ ላታ ጋዴፔ ꬎቃሌቶንታ ማላ፥ ኢዚ ባ ኣቱማ ናይታስ ባ ጋዴፔ ኢሞ› ጌስ» ጊዴስ።
EZE 46:19 ሄሳፌ ጉዬ ሄ ቢታኔይ ታና ፑዴሃ ጼሊዛ ጌሽ ጊዲዳ ቄሴታ ኪፊሌታኮ ጌሊዛሶ ኤሂዴስ። ሄይቲካ ጊዶ ዳባባኮ ጋꬂዛ ዱጌሃ ባጋ ዲርሳ ፔንጌ ማታን ዲዛይታ። ኢስታፌ ኣርሼ ጌሎሶ ባጋራ ኢሲ ሶሆ ኢዚ ታና ቤሲዴስ።
EZE 46:20 ሄ ሶሆይ ቄሴቲ ናጋራ ያርሾኔ ቆሆ ያርሾ ዶይሲዛ ሶሆኔ ካꬃ ያርሾ ኡኪዛ ሶሆ፤ ሃ ሶሆን ጎኤቲዛ ጋሶይካ ሄ ጌሻ ያርሾታ ኣሳኮ ካሬ ዳባባ ኬሲን፥ ኣሳይ ጌሻ ሚሽ ቦቺዲ ጌዮንታ ማላ ናጋናሳ።
EZE 46:21 ሄሳፌ ጉዬ ሄ ቢታኔይ ታና ካሬ ባጋ ዛጎ ኤፊዲ ሄ ዛጎዛስ ኦይዱ ጉላ ታና ዩሺዴስ። ሄ ዳባባ ዞዜን ኡባንካ ቄሪ ዳባባቲ ዲዛይታ ቤያዲስ።
EZE 46:22 ኢስታስ ኡባሲካ ዛጎይ 40 ዋꬋ፤ ኣሆቴꬃይካ 30 ዋꬋ፤ ኦይዱ ጉላን ዲዛ ዳባባቲካ ኢሲ ጊና።
EZE 46:23 ሄ ኦይዱ ዳባባታ ዩሾንካ ሹቻ ጊምቤይ ዴስ፤ ቃሴ ጊምቤዛ ላንቄዛን ኢዛኮ ሺቂዲ ኦሴቲዳ፥ ኢስታስ ታማ ኤꬂዛሶሆቲ ዴቴስ።
EZE 46:24 ሄ ቢታኔይ ታና፥ «ሃይቲ ኡባይ ጾሳ ኬꬃን ኦꬂዛይቲ ኤሂዛ ያርሾ ዶይሲዛ ሶሆታ» ጊዴስ።
EZE 47:1 ሄ ቢታኔይ ዛሪዲ ታና ጾሳ ኬꬅ ጌሊዛሶ ኤፊዴስ። ጾሳ ኬꬃ ጌሊዛ ፔንጌፌ ጋርሳራ ሃꬃይ ፑልቲዲ፥ ጾሳ ኬꬃፌ ኣርሼ ኬሳ ባጋ ጎጌስ። ጋሶይካ ጾሳ ኬꬃ ፔንጌይ ኣርሼይ ሞኪዛሶ ሲሚ ዲዛ ጊሻሳ፤ ጾሳ ኬꬃስ ዱጌሃ ባጋራ ዱጌ ጎጊዲ፥ ያርሺዛሶፔ ዱጌሃ ባጋራ ካንꬄስ።
EZE 47:2 ኢዚ ታና ፑዴሃ ፔንጌ ባጋራ ኬሲዲ፥ ኣርሼኮ ጼሊዛ ፔንጌ ዩሾራ ካሌꬂዲ ኤፊዴስ። ሄ ፔንጌፌ ዱጌሃ ባጋራ ሃꬂ ጎጌስ።
EZE 47:3 ሄ ቢታኔይ ሜዛኒዛ ሜቲሬ ባ ኩሼን ኦይኪዲ፥ ኣርሼ ኬሳ ባጋ ቢዲ ጎጊዛ ሃꬅ ካሊዲ 1,000 ዋꬋ ዋꬊዴስ። ታናካ ሃꬃራ ካሌꬂ ፒንꬂዴስ፤ ሃꬃዚ ታስ ቂርጴ ጋኬስ።
EZE 47:4 ናምኣንꬆካ 1,000 ዋꬋ ዋꬊዲ ሃꬃራ ታና ካሌꬂ ፒንꬂዴስ። ሃꬃይ ታስ ጉልባቴ ጋኪዴስ። ቃሴ 1,000 ዋꬋ ዋꬊዲ ታና ሃꬃራ ካሌꬂ ፒንꬂዴስ። ሄ ዎዴ ሃꬃዚ ታስ ጼሳ ጋኪዴስ።
EZE 47:5 ኢዚ ቃሴካ 1,000 ዋꬋ ዋꬊዴስ። ጊዶ ኣቲን ሄ ሃꬃዚ ዳሮ ጪማ ጊዲዳ ጊሻስ ታኒ ፒናናስ ዳንዳያቤኬ፤ ኢዚ ኣሲ ዋꬎንታ ፒናናስ ዳንዳዮንታ ሻፋ ጊዲዴስ።
EZE 47:6 ሄ ቢታኔይ ታና፥ «ሃይሶ ኣሳ ናዉ፥ ሃይሳ ቤያዲ?» ጊዴስ። ሄሳፌ ጉዬ ኢዚ ታና ሻፋ ጋጻኮ ጉዬ ዛሪዴስ።
EZE 47:7 ታኒ ሲማዳ ሄ ጋኪዛ ዎዴ፥ ሻፋዛ ዶናን ሃ ባጋራኔ ሄ ባጋራ ኬሂ ዳሮ ሚꬂ ዲዛይሳ ቤያዲስ።
EZE 47:8 ኢዚ ታና፥ «ሃꬃይ ኣርሼ ኬሳ ባጋ ቢታኮ ጎጊዲ ኣራቤ ዙሌን ጌሌስ። ኢዚ ሄሳን ጎጊዲ ማጺኔ ኣባን ጌሊዛ ዎዴ ሄ ሃꬃዚ ኦራጺዲ ጺሎ ሃꬅ ኬዜስ።
EZE 47:9 ሃ ሻፋይ ጎጊዲ ቢዛ ሶሆን ዲዛ፥ ሾምኡሾምኡ ጊዛ ሜꬌቴꬃቲ ኡባይ ፓጻ ዳና፤ ቃሴ ሄ ሻፋይ ሄ ጎጊዲ ኣባ ሃꬃ ኦራጺሲዲ ጺሊሲዛ ጊሻስ፥ ቆዳን ዳሮ ጮራቲዳ ሞሌቲ ሄን ዳና። ሄሳፌ ዴንዲዳይሳን ሄ ሻፋይ ጎጊዛሶን ዲዛይ ኡባይ ፓጻ ዳና።
EZE 47:10 ሞሌ ኦይኪዛይቲ ኣባ ዶናን ኤቃና፤ ኤን-ጋዴፔ ቢዲ ኤን-ኤጊላይሜ ጋካናስ ዲዛ ሶሆይ ሞሌ ጊቴ ሚጪዛሶሆ ጊዳና። ሜዲቴራኔ ኣባን ዲዛ ሞሌታ ማላ፥ ሄሳንካ ዳሮ ዱማ ዱማ ቆሞ ሞሌቲ ዳና።
EZE 47:11 ጊዶ ኣቲን ኣባ ዶናን ዲዛ ጫሬይኔ ኤሌ ሃꬂ ማጺኔ ጊዲዲ ኣታናፔ ኣቲን ኦራጼና።
EZE 47:12 ሄ ሻፋ ዶናን ሃ ባጋራኔ ሄ ባጋራ ኣይፌ ኣይፊዛ ዳሮ ዱማ ዱማ ቆሞ ሚꬃቲ ሞኬቴስ። ኢስታ ቦንጮይ ቆቆፌቴና፤ ኣይፊዛይሳካ ኣጌቴና። ጾሳ ኬꬃፌ ኬዚዛ ሃꬂ ኢስታኮ ጎጊዛ ጊሻስ ኢስቲ ኣጊናን ኣጊናን ኦራꬃ ኣይፌ ኣይፋና። ኢስቲ ኣይፊዳ ኣይፌይ ቁማ ጊዳና፤ ኢስታ ሃይꬃቲካ ꬋሌ ጊዳና» ጌስ።
EZE 47:13 ኡባ ሃሪዛ ጎዳይ፥ «ኢስራኤሌ ዛሬታስ ታማኔ ናምኣታስ ቢታ ላታ ጋዴ ኦꬃዳ ኔኒ ሻካና ዛዋይ ሃይሳ። ዮሴፌ ዛሬታስ ናምኡ ጊሻይ ኢሜቶ።
EZE 47:14 ታኒ ካሴ ኢንቴ ኣዋታስ ሃ ቢታ ላቲሳናስ ታ ኩሼ ዴንꬃ ጫቃዲስ፤ ሃኢ ኢንቴ ኡባይካ ኢሲ ጊና ሻኬቲ ላቲቴ።
EZE 47:15 ቢታስ ፑዴሃ ባጋ ዛዋይ ሃይሳ፡ «ሜዲቴራኔ ኣባፌ ዴንዲዲ ሄቲሎኔ ካታማኔ ሃማቴ ፒንꬅ ካንꬂዲ ጼዳዴ ካታማ ጋኬስ።
EZE 47:16 ሄሳፌ ቃሴ ዳማስቆፌኔ ሃማቴፔ ጊዶ ዛዋን ዲዛ ቤሮታኔ ሲብራይሜ ካታማታ ካንꬂዲ ሃዉራኔ ዛዋን ዲዛ ቲኮና ካታማ ጋኬስ።
EZE 47:17 ሄሳ ጊሻስ ኢስራኤሌ ዛዋይ ሃማቴ ቢታ ፑዴሃ ባጋን ኣጊዲ፥ ሜዲቴራኔ ኣባፌ ኣርሼ ኬሳ ባጋራ ቢዲ፥ ዳማስቆ ቢታ ዛዋን ዲዛ ሃጻሬ-ኤናኔ ካታማ ጋኬስ።
EZE 47:18 «ኣርሼ ኬሳ ባጋ ዛዋይ ሃጻሬ-ኤናናፔ ዴንዲዲ፥ ዳማስቆፌኔ ሃዉራኔፔ ጊዶራ ካንꬄስ። ሄሳፌ ቃሴ ኢስራኤሌፔኔ ጋላኣዴፔ ጊዶን ዲዛ ዮርዳኖሴ ሻፋን ዛዋቲሼ፥ ማጺኔ ኣባ ካንꬂ ቢዲ ታማሬ ካታማ ጋኬስ።
EZE 47:19 «ዱጌሃ ባጋ ዛዋይ ታማሬፔ ዴንዲ ቢዲ፥ ማሪባ ቃዴሴን ዲዛ ፑልቶዛን ጋኬስ። ሄሳፌ ፑዴሃ ባጋፌ ኣርሼ ጌሎሶ ባጋ ኦይኪዲ ጊብጼ ሻፋ ካሊ ቢዲ ሜዲቴራኔ ኣባ ጋኬስ።
EZE 47:20 «ኣርሼ ጌሎሶ ባጋ ዛዋይ ሜዲቴራኔ ኣባ ጊዲዲ፥ ፑዴሃ ባጋራ ካንꬂዲ ሃማቴ ጋኬስ።
EZE 47:21 «ሄሳ ጊሻስ ሃ ቢታ ኢስራኤሌ ዛሬታ ቆዳ ሊኬን ጊሼቲ ኤኪቴ።
EZE 47:22 ኢንቴሲኔ ኢንቴ ጊዶን ናይታ ዬሊዲ ዲዛ ቤቴታስ ቢታ ላታ ሂስቲ ጊሺቴ። ኢስታ ኢንቴ ኢንቴ ቢታን ዬሌቲዳ ኢስራኤሌ ኣሳ ማላ ጼሊቴ። ኢስቲ ኢንቴናራ ኢሲፌ ኢስራኤሌ ዛሬታራ ጋዴ ሳማን ኤኬቶ።
EZE 47:23 ቤቴይ ኢስራኤሌን ኣይ ዛሬራ ዲኮካ፥ ሄ ኢዚ ዲዛ ዛሬ ጊዶን ኢዛስ ላታ ቢታ ኢሚቴ። ታኒ ኡባ ሃሪዛ ጎዳይ ሃይሳ ዮታይስ» ጌስ።
EZE 48:1 «ቢታ ሻካናስ ማዝጋቤቲዳ ዛሬታ ሱንꬃይ ሃይሳ፤ ፑዴሃ ባጋራ ኢሲ ጊሻይ ዳኔ ዜሬስ ኢሜቶ። ሄሲካ ሄቲሎኔፔ ሃማቴ ኤፊዛ ኦጌ ካሊዲ፥ ሄሳፌካ ዳማስቆ ዛዋን ዲዛ ሃጻሬ-ኤና ካንꬂዲ ሃማቴ ማታን ዛዋቴስ። ሄሲ ኣርሼ ኬሳሶፔ ቢዲ ኣርሼ ጌሎሶ ጋካናስ ዲዛ ሶሆስ ፑዴሃ ባጋ ዛዋ ጊዳና።
EZE 48:2 ዳኔ ዛዋራ ኦይኬቲዲ ኣርሼ ኬሳሶፔ ኣርሼ ጌሎሶ ባጋ ጋካናስ ዲዛ ኢሲ ጊሻይ ኣሴሬ ዛሬስ ኢሜቶ።
EZE 48:3 ኣሴሬ ዛዋራ ኦይኬቲዲ ኣርሼ ኬሳሶፔ ኣርሼ ጌሎሶ ባጋ ጋካናስ ዲዛ ኢሲ ጊሻይ ኒፍታሌሜ ዛሬስ ኢሜቶ።
EZE 48:4 ኒፍታሌሜ ዛዋራ ኦይኬቲዲ ኣርሼ ኬሳሶ ባጋፌ ኣርሼ ጌሎሶ ባጋ ጋካናስ ዲዛ ኢሲ ጊሻይ ሚናሴ ዛሬስ ኢሜቶ።
EZE 48:5 ሚናሴ ዛዋራ ኦይኬቲዲ ኣርሼ ኬሳሶ ባጋፌ ኣርሼ ጌሎሶ ባጋ ጋካናስ ዲዛ ኢሲ ጊሻይ ኤፍሬሜ ዛሬስ ኢሜቶ።
EZE 48:6 ኤፍሬሜ ዛዋራ ኦይኬቲዲ ኣርሼ ኬሳሶ ባጋፌ ኣርሼ ጌሎሶ ባጋ ጋካናስ ዲዛ ኢሲ ጊሻይ ኦሮቤሌ ዛሬስ ኢሜቶ።
EZE 48:7 ኦሮቤሌ ዛዋራ ኦይኬቲዲ ኣርሼ ኬሳሶ ባጋፌ ኣርሼ ጌሎሶ ባጋ ጋካናስ ዲዛ ኢሲ ጊሻይ ዩሁዳ ዛሬስ ኢሜቶ።
EZE 48:8 «ዩሁዳ ዛዋራ ኦይኬቲዲ፥ ኣርሼ ኬሳሶ ባጋፌ ኣርሼ ጌሎሶ ባጋ ጋካናስ ዲዛ ኢሲ ጊሻ ዱማሳ ዎꬃ። ኢዛስ ኣሆቴꬃይ 12 ኪሎ ሜቲሬኔ ባጋ ጊዴስ። ኣርሼ ኬሳሶ ባጋፌ ኣርሼ ጌሎሶ ባጋ ጋካናስ ዲዛ ዛዋይ ኢሲ ዛሬ ሻኪን ጋኪዛ ጊሻ ላጌ። ኢዛስ ጊዶ ጊናን ጾሳ ኬꬃይ ዴስ።
EZE 48:9 «ሄ ጊሻፔ ኔኒ ጎዳስ ዱማሳዳ ዎꬂዛ ሶሆይ 12 ኪሎ ሜቲሬኔ ባጋ ኣዱሲኔ 10 ኪሎ ሜቲሬ ኣሆ ጊዶ።
EZE 48:10 ሄ ሶሆይ ቄሴታስ ዱማቲዳ ሶሆ ጊዶ፤ ኢዚ ፑዴሃ ባጋራ 12 ኪሎ ሜቲሬኔ ባጋ ኣዱሳ፤ ኣርሼ ጌሎሶ ባጋራ ኢቻሽ ኪሎ ሜቲሬ ኣሆኔ ኣርሼ ኬሳሶ ባጋራካ 5 ኪሎ ሜቲሬ ኣሆ፤ ቃሴ ዱጌሃ ባጋራ 12 ኪሎ ሜቲሬኔ ባጋ ኣዱሳ። ጾሳ ኬꬃይ ኢዛስ ጊዶ ጊናን ዴስ።
EZE 48:11 ሃ ዱማሲ ዎꬂዳ ሶሆይ ኢስራኤሌ ኣሳይ ታ ኦጌፔ ዎራ ሲሚዛ ዎዴ ኢስታራ ዎራ ሲሚዳ ሌዌታ ማላ ጊዶንታ ማላ ኣማኔቲዲ ታስ ኦꬂሼ ጋምኢዳ ጌሻ ቄሴታስ ሳዶቄ ዛሬታስ ኢሜቶ።
EZE 48:12 ሄሲ ጎዳስ ዱማቲዳ ቢታፌ ኢስታስ ዱማ ጊሻ፤ ኢዚ ኡባፌ ኣꬊዳ ጌሻ። ኢስታ ጊሻይ ሌዌታ ጊሻን ዛዋቶ።
EZE 48:13 «ቄሴታ ዛዋራ ኦይኬቲዲ፥ ሌዌታስካ ኣዱሳቴꬃይ 12 ኪሎ ሜቲሬ ባጋ፥ ኣሆቴꬃይካ 5 ኪሎ ሜቲሬ ጊዲዳ ኢሲ ጊሻይ ኢሜቶ።
EZE 48:14 ኢስቲ ሄ ጋዴዛፔ ኣይኮካ ባይዞፔቶ ዎይኮ ላሞፌቶ። ሄሲ ቢታ ኡባን ዱማቲዳይሳ ጊዲዳ ጊሻስ ሃራ ኣሳ ኩሼን ጌላናስ ቤሴና፤ ጎዳስ ኢዚ ጌሻሶሆ።
EZE 48:15 «ኣቲዳ ናምኡ ኪሎ ሜቲሬኔ ባጋ ኣሆኔ ታማኔ ናምኡ ኪሎ ሜቲሬኔ ባጋ ኣዱሳ ሶሆይ ካታማ ኣሳይ ኡባይ ኮꬃን ጎኤቲዛ ኬꬃ ኬጺዛሶኔ ሜሄ ሄሚዛሶሆ ጊዶ፤ ካታማይ ሄ ቢታስ ጊዶ ጊናን ዴኦ።
EZE 48:16 ሄ ካታማይ ኦይዱ ዞዜራ ዴስ። ፑዴሃ ባጋይ 2,250 ሜቲሬ፤ ዱጌሃ ባጋይ 2,250 ሜቲሬ፤ ኣርሼ ኬሳሶ ባጋይ 2,250 ሜቲሬ፤ ኣርሼ ጌሎሶ ባጋይካ 2,250 ሜቲሬ።
EZE 48:17 ካታማስ ሄንꬃ ጋዴይ ዴኦ፤ ሄ ጋዴይ ፑዴሃ ባጋራ፥ ዱጌሃ ባጋራ፥ ኣርሼ ኬሳሶ ባጋራኔ ኣርሼ ጌሎሶ ባጋራ 125 ሜቲሬ ኣሆ ጊዶ።
EZE 48:18 ጌሻሶሆ ባጋራ ኣቲዳ ሶሆይ ኣርሼ ኬሳሶ ባጋ ዋꬊዛ ዎዴ ዛዋይ 5 ኪሎ ሜቲሬ ኣዱሳ፤ ኣርሼ ጌሎሶ ባጋ ዋꬊዛ ዎዴ፥ ዛዋይ 5 ኪሎ ሜቲሬ ኣሆ። ሄ ሶሆዛን ሞኪዳይሲ ኡባይ ሄ ካታማን ኦꬂዛይታስ ቁማ ጊዳና።
EZE 48:19 ኢስራኤሌ ዛሬ ኡባፌ ሄ ካታማን ኦꬃናስ ዪዛይቲ ሄ ቢታ ጎዬቶ።
EZE 48:20 ኢንቴ ዱማሲዳ ሶሆይ ሙሌራ ኦይዱ ዞዜራካ ታማኔ ናምኡ ኪሎ ሜቲሬኔ ባጋ ኣዱቄስ። ሄ ሶሆይ ካታማይ ኬጼቲዳ ሶሆኔ ጌሻሶሆ ባናን ጉጄስ።
EZE 48:21 «ጾሳ ኬꬃፌ፥ ቄሴታ ጊሻፔ፥ ሌዌታ ጊሻፔ ካታማ ሶሆፔ ኣርሼ ኬሳሶ ባጋራኔ ኣርሼ ጌሎሶ ባጋራ ዲዛ ኣቲዳ ቢታይ ሃላቃስ ጊዶ። ሄ ቢታስ ኣሆቴꬃይ ታማኔ ናምኡ ኪሎ ሜቲሬኔ ባጋ። ሄ ሃላቃ ቢታይ ፑዴሃ ባጋራ ዩሁዳ ጋኪዳ ጊሻን ዱጌሃ ባጋራ ቢኒያሜ ጋኪዳ ጊሻን ዛዋቴስ።
EZE 48:23 «ኣቲዳ ዛሬታስ ቢታይ ሃይሳ ማላ ሻኬቴስ። ኣርሼ ኬሳሶፔ ኣርሼ ጌሎሶ ጋካናስ፥ ኢሲ ጊሻይ ቢኒያሜ ዛሬስ ኢሜቶ።
EZE 48:24 ቢኒያሜ ዛዋራ ኦይኬቲዲ ኣርሼ ኬሳሶፔ ኣርሼ ጌሎሶ ጋካናስ ዲዛ ኢሲ ጊሻይ ሲሞና ዛሬስ ኢሜቶ።
EZE 48:25 ሲሞና ዛዋራ ኦይኬቲዲ ኣርሼ ኬሳሶፔ ኣርሼ ጌሎሶ ጋካናስ ዲዛ ኢሲ ጊሻይ ዪሳኮሬ ዛሬስ ኢሜቶ።
EZE 48:26 ዪሳኮሬ ዛዋራ ኦይኬቲዲ ኣርሼ ኬሳሶፔ ኣርሼ ጌሎሶ ጋካናስ ዲዛ ኢሲ ጊሻይ ዛቢሎኔ ዛሬስ ኢሜቶ።
EZE 48:27 ዛቢሎኔ ዛዋራ ኦይኬቲዲ ኣርሼ ኬሳሶ ባጋፌ ኣርሼ ጌሎሶ ባጋ ጋካናስ ዲዛ ኢሲ ጊሻይ ጋዴ ዛሬስ ኢሜቶ።
EZE 48:28 ጋዴ ዱጌሃ ዛዋይ ታማሬ ካታማፔ ዴንዲዲ፥ ማሪባ ቃዴሴን ዲዛ ፑልቶዛራ ካንꬂዲ፥ ጊብጼ ሻፋ ካሊ ቢዲ ሜዲቴራኔ ኣባ ጋኬስ።
EZE 48:29 «ኢንቴ ኢስራኤሌ ቆሞታስ ላታ ቢታ ሂስቲዲ ኢንቴ ሻካና ቢታይ ሃይሳ፤ ሃይቲ ኢስታ ጋካና ጊሻ። ታኒ ኡባ ሃሪዛ ጎዳይ ሃይሳ ዮታይስ።
EZE 48:30 «ካታማፔ ኬዚዛ ፔንጌቲ ሃይታ። ኢስቲ ኢስራኤሌ ዛሬታ ሱንꬃን ጼይጌታና። ፑዴሃ ዲርሳ ጊምቤይ 2,250 ሜቲሬ ኣዱቃና፤ ሄ ጊምቤዛን ኦሮቤሌ ፔንጌ፥ ዩሁዳ ፔንጌኔ ሌዌ ፔንጌ ጌቴቲዛ ሄꬑ ፔንጌቲ ዳና።
EZE 48:32 ኣርሼ ኬሳሶ ባጋራ ዲዛ ዲርሳ ጊምቤይ 2,250 ሜቲሬ ኣዱቃና፤ ሄ ጊምቤዛን ዮሴፌ ፔንጌ፥ ቢኒያሜ ፔንጌኔ ዳኔ ፔንጌ ጌቴቲዛ ሄꬑ ፔንጌቲ ዳና።
EZE 48:33 ዱጌሃ ባጋራ ዲዛ ዲርሳ ጊምቤይ 2,250 ሜቲሬ ኣዱቃና፤ ሄ ጊምቤን ሲሞና ፔንጌ፥ ዪሳኮሬ ፔንጌኔ ዛቢሎኔ ፔንጌ ጌቴቲዛ ሄꬑ ፔንጌቲ ዳና።
EZE 48:34 ኣርሼ ጌሎሶ ባጋራ ዲዛ ዲርሳ ጊምቤይ 2,250 ሜቲሬ ኣዱቃና፤ ሄ ጊምቤን ጋዴ ፔንጌ፥ ኣሴሬ ፔንጌኔ ኒፍታሌሜ ፔንጌ ጌቴቲዛ ሄꬑ ፔንጌቲ ዳና።
EZE 48:35 ካታማ ዩሾይ ሙሌራ ዋꬊን 9,000 ሜቲሬ ጊዳና። ሄ ዎዴፔ ዶሚዲ ሄ ካታማይ፥ ‹ጎዳይ ሄን ዴስ› ጌቴቲ ጼይጌታና» ጌስ።
DAN 1:1 ካዎ ኢዮኣቄሜይ ዩሁዳን ካዎቲዳ ሄꬓንꬆ ላይꬃን ባቢሎኔ ካዎ ናቡካዳናጾሬይ ዬሩሳላሜ ዶዲዴስ።
DAN 1:2 ጎዳይ ዩሁዳ ካዎ ኢዮኣቄሜ ኣማርዳ ጾሳ ኬꬃ ሚሻታራ ኢዛ ኩሼን ኣꬂ ኢሚዴስ፤ ኢዚካ ባ ጾሳ ኬꬃን ዎꬃና ሳናኦሬ ኤፊዴስ፤ ኢዚ ዲኢ ኤፊዳ ጾሳ ኬꬃ ሚሻ ኡባካ ባ ኤቃ ጾሳታ ሚሼ ዎꬂዛ ኬꬃን ዎꬂዴስ።
DAN 1:3 ሄሳፌ ጉዬ ካዎ ናቡካዳናጾሬይ ባ ኦሳንቻታ ሃላቃ ኣሺፌናዜይ ካዎሶ ኣሳፔኔ ዳናታ ዜሬꬃፌ ጊዲዳ ኢስራኤሌታ ኤሃና ማላ ኣዛዚዴስ።
DAN 1:4 ሄ ዶሬቲዳይቲ ናቴꬂኔ ካዎ ኬꬃን ኦꬃናስ ዳንዳይዛ ኤራቴꬂ ዲዛይታ ጊዳና ማላ፥ ማላ ሎኦታ፥ ኣꬎ ኤራቴꬂ ዲዛይታ፥ ዩሺ ቆፒዛይታ፥ ኡባ ኤሶን ኤኪዛይታኔ ኢስታ ኣሳቴꬃ ቦላ ቦሬይ ባይንዳይታ ጊዳና ማላ ቆፍሲዴስ፤ ሄይታ ቃሴ ባቢሎኔ ቃላኒኔ ሄ ዴሬ ቃላን ጻፎ ዎጋ ታማርሳና ማላ ኣዛዚዴስ።
DAN 1:5 ኢስቲ ማና ካꬂኔ ኡያና ዎይኔ ኡሺ ካዎዛ ማዳፌ ጊዳና ማላ ኣዛዜቲዴስ፤ ሂስቲዲ ሄꬑ ላይꬅ ታማሪ ኤሪዳፔ ጉዬ ኢስቲ ካዎዛ ሲንꬅ ሺቂዲ ካዎ ኬꬃን ኦꬃና ማላ ዮኦይ ቃሼቲዴስ።
DAN 1:6 ሄ ዶሬቲዳይታ ጊዶፌ ዩሁዳ ቆሞፌ ዳኔሊ፥ ሃናኒያይ፥ ሚሻኤሌይኔ ኣዛሪያሲ ዪዳ።
DAN 1:7 ካዎዛ ሹሜታ ሃላቃይ ኢስታ ሱንꬃ ላሚዲ ዳኔላ ቢልጻሶሬ፥ ሃናኒያ ሲዲራቃ፥ ሚሻኤሌ ሚሳቃ፥ ኣዛሪያሳ ቃሴ ኣብዲናጎ ጊ ሱንꬂዴስ።
DAN 1:8 ዳኔሊ ካዎዛ ማዳፌ ሚዲኔ ዎይኔ ኡሻ ኡዪዲ ባና ቱኒሶንታ ማላ ቆፋ ቃቺዴስ፤ ሂስቲዲ ሄሳ ሄ ቆፋዛ ኤሮ ጊ ኤካና ማላ ኣሺፌናዜ ዎሲዴስ።
DAN 1:9 ጾሲ ዳኔላስ ሹሜዛ ሲንꬃን ቴማ ኢሚዲ ቃꬌታና ማላ ኦꬂዴስ።
DAN 1:10 ጊዶ ኣቲን ኣሺፌናዜይ ካዎዛስ ባቢዳ ጊሻስ ዳኔላስ፥ «ኢንቴ ማና ካꬂኔ ኡያና ኡሹ ኢንቴስ ኣዛዚዳይ ካዎዛኮ፤ ኢንቴ ቃሴ ሃንኮ ናቴꬃታፔ ጊልቂዲኔ ላፊ ቤቲኮ ካዎፔ ኢንቴ ቦላ ሜቶ ጋሲሳና» ጊ ዮቲዴስ።
DAN 1:11 ሄሳፌ ጉዬ ዳኔላ፥ ሃናኒያ፥ ሚሻኤሌኔ ኣዛሪያሳ ናጊ ካꬅ ሚዛና ማላ ሹሜታ ሃላቃ ኣሽፌናዜይ ዎሲዳዴኮ ዳኔሊ ቢዲ፥
DAN 1:12 «ኑኒ ኣታኪልቴ ሚሼኔ ሃꬅ ኡዪሼ ጋምኣና ማላ ኔ ኑና ኔ ኦሳንቻታ ኣኔ ታሙ ጋላስ ጋካናስ ፓጫ ቤያ።
DAN 1:13 ሄሳፌ ጉዬ ኑና ሃንኮ ካዎዛ ማዳፌ ሚዛ ናቴꬃታራ ጋꬃ ፓጫ ጼላዳ ኔ ዶሲዳዝ ኑ ቦላ ኦꬃ» ጊዴስ።
DAN 1:14 ኢስታ ናጊዛይሲካ ሄ ቆፋዛ ኤኪዲ ታሙ ጋላስ ጋካናስ ኢስታ ፓጪዴስ።
DAN 1:15 ሄ ታሙ ጋላሳይ ዉሪዳፔ ጉዬ ካዎዛ ማዳፌ ሚዛ ናቴꬃ ኡባፌ ኣꬊዲ ኢስታ ኣሳቴꬃይ ሎኢዲኔ ኦርዲዲ ቤቲዴስ።
DAN 1:16 ሄ ጋላሳፌ ዶሚዲ ኢስታ ናጊዛይሲ ካዎ ማዳፌ ኢስታስ ዪዛ ሎኦ ቁማኔ ዎይኔ ኡሻ ኣጊዲ ኣታኪልቴ ኢሞ ኦይኪዴስ።
DAN 1:17 ጾሲካ ሄ ኦይዱ ናቴꬃታስ ኣꬎ ኤራቴꬅ፥ ጻፎ ኤራቴꬂኔ ኣኬካ ኢሚዴስ፤ ዳኔላስ ጊዲኮ ሄሳፌካ ቦላራ ኣጁታኔ ኣጉሞ ቢርሺዛ ኤራቴꬅ ዴስ።
DAN 1:18 ካሴ ካዎዚ ዎꬂዳ ሄꬑ ላይꬃይ ጋኪን ኣሽፌናዜይ ሄ ናቴꬃታ ኡባ ኤኪ ኤፊዲ ናቡካዳናጾሬ ሲንꬅ ሺሺዴስ።
DAN 1:19 ካዎዚካ ኢስታ ኡባ ሃሳይሲዳ ዎዴ ኢስታ ጊዶፌ ዳኔላራ፥ ሃናኒያራ፥ ሚሻኤሌራኔ ኣዛሪያሳራ ጊናቲዛ ኣሲ ቤቲቤና፤ ሄሳ ጊሻስ ኢስቲ ካዎዛ ሲንꬃን ኦꬃና ማላ ዶሬቲዳ።
DAN 1:20 ካዎዚ ኦይቺዳ ኣይ ኣꬎ ኤራቴꬃኒኔ ኣኬካን ኢዚ ኣይሲዛ ዴሬን ዲዛ ማሮታፔ፥ ሳጋታፔ፥ ታሙ ኩሼፔ ኣꬊ ቤቲዳ።
DAN 1:21 ዳኔሊካ ፓሪሴ ካዎ ቂሮሲ ካዎቲዳ ኮይሮ ላይꬅ ጋካናስ ካዎቴꬃ ጋርሳን ኦꬂሼ ጋምኢዴስ።
DAN 2:1 ናቡካዳናጾሬይ ካዎቲዳ ናምኣንꬆ ላይꬃን ኣጉሞ ኣጉሜቲዴስ፤ ሄ ኣጉሞዛ ጋሶን ኬሂ ጬጪን ꬊስኮይ ኢዛስ ꬋይዴስ።
DAN 2:2 ሄሳ ጊሻስ ኢዛኮ ዪዲ ሄ ኢዛ ኣጉሞዛ ቢርሼꬅ ኢዛስ ዮታና ማላ ማሮቲ፥ ሳጋቲ፥ ሙሬኒዛይቲኔ ጾሊንቴ ታይቢዛይቲ ጼይጌታና ማላ ኣዛዚዴስ፤ ኢስቲካ ዪዲ ኢዛ ሲንꬃን ኤቂዳ።
DAN 2:3 ካዎዚ ኢስታስ፥ «ታኒ ኣጉሞ ኣጉሜታዲስ ሺን ሄ ኣጉሞዚ ኢዚ ኣዛኮ ኤራናስ ታኒ ኬሃ ጬጫዲስ» ጊዴስ።
DAN 2:4 ጾሊንቴ ታይቢዛ ኤራንቻቲ ካዎዛስ፥ «ካዎይ ሜርናስ ካዎቶ! ኔ ኣይ ኣጉሜቲዳኮ ኣኔ ኑስ ዮታ፤ ኑኒ ኢዛ ቢርሼꬅ ኔና ኤሪሳና» ጊዲ ኢዛስ ኣራማይኬ ቃላን ሃሳይዳ።
DAN 2:5 ካዎዚካ ኢስታስ፥ «ታ ኣጉሜቲዳ ኣጉሞዛኔ ኢዛ ቢርሼꬃ ኢንቴ ታስ ዮቶንታ ኣጊኮ ኢንቴ ኣሳቴꬃ ሙጼሬꬃዳኔ ኢንቴ ኬꬃታ ፒስኪ ሂስታ ላላ ዬጋና።
DAN 2:6 ጊዶ ኣቲን ኢንቴ ታ ኣጉሞዛኔ ኢዛ ቢርሼꬃ ጋꬂ ታስ ዮቲኮ ታ ኢንቴስ ኢሞታ፥ ዎይቶኔ ጊታ ቦንቾ ኢማና፤ ሄሳ ጊሻስ ታ ኣጉሞዛ ኢዛ ቢርሼꬃራ ታስ ዮቲቴ» ጊ ኣዋጂዴስ።
DAN 2:7 ኢስቲካ ዛሪዲ፥ «ካዎ! ኔ ኣጉሞይ ኢዚ ኣዛኮ ኑስ ኔ ኣይሌታስ ዮቲኮ ኑኒ ኔስ ኢዛ ቢርሼꬃ ዮታና» ጊዳ።
DAN 2:8 ካዎዚ ሄሳ ሲዪዳ ማላ፥ «ታ ኦꬃና ቃቺዳይሳ ኢንቴ ኤሪዳ ጊሻስ ኢንቴ ታ ቆፋ ጋምኢሳናስ ሃኒዛይሳ ታ ኤራይስ።
DAN 2:9 ኢንቴ ታስ ኣጉሞዛ ዮታናስ ዳንዳዮንታ ኣጊኮ ኢንቴስ ኡባታሲካ ኢሲ ማላ ቂጻቴይ ጊጌቲ ኡቲዴስ፤ ዮኦቲ ኢንቴስ ላሜታና ሚሳቲን ዎርዶኔ ጌኔ ቃላ ሃሳያን ጮ ሜላ ዎዴ ዉርሳናስ ኮዪዴታ፤ ኮይሮቲዲ ኣጉሞዛ ኢንቴ ታስ ዮቲኮ ኢዛ ቢርሼꬂ ኢንቴና ዋዪሶንታይሳ ታ ኤራይስ» ጊዴስ።
DAN 2:10 ጾሊንቴ ታይቢዛ ኤራንቻቲ ኢዛስ፥ «ካዎ! ኔ ኦይቺዳይሳ ኔስ ዛራና ዳንዳይዛ ኣሲ ኣላሜ ቦላ ቤቴና፤ ኣይ ካዎይካ ጊታኔ ዎልቃማ ጊዲኮካ ሃይሳ ማላ ኦይሾ ማሮታ፥ ሳጋታኔ ጾሊንቴ ታይቢዛ ኤራንቻታ ኦይቺ ኤሬና።
DAN 2:11 ካዎ! ኔኒ ኦይቺዛ ኦይሻይ ኬሂ ዴጾ ጊዲዳ ጊሻስ ኣሳራ ኢሲፌ ዶንታ ጾሳታፔ ኣቲን ኣሲ ኔስ ቆንጪሳናስ ዳንዳዬና» ጊ ዛሪዳ።
DAN 2:12 ሄሲ ካዎዛ ዪሎቺዴሲኔ ሃንቄꬂዴስ፤ ሄሳ ጊሻስ ባቢሎኔን ዲዛ ኣꬎ ኤራንቻቲ ዉሪካ ሃይቃና ማላ ኣዛዚዴስ።
DAN 2:13 ኣꬎ ኤራንቻቲ ሃይቃና ማላ ኣዋጃይ ኬዚዴስ፤ ዳኔላኔ ኢዛ ላጌታ ኮዪዲ ዎꬋና ማላ ኣስ ኪቴቲዴስ።
DAN 2:14 ካዎስ ዛቤታ ሃላቃ ኣርዮኬይ ባቢሎኔን ዲዛ ኣꬎ ኤራንቻታ ዎꬋናስ ዪዳ ዎዴ ዳኔሊ ኢዛኮ ሺቂዲ ሂላኒኔ ማልኦ ቃላን ኢዛ ሃሳይሲዴስ።
DAN 2:15 ዳኔሊ ካዎ ሹሜዛ፥ «ካዎይ ሃይሳ ዴጾ ኣዋጃ ኣይስ ኬሲዴ?» ጊዲ ኦይቺዴስ፤ ኣርዮኬይ ዮኦዛ ዳኔላስ ቆንጪሲ ዮቲዴስ።
DAN 2:16 ዳኔሊ ሄ ዎዴ ካዎዛኮ ጌሊዲ ኣጉሞዛ ቢርሻናስ ጉꬃ ዎዴይ ኢዛስ ኢሜታና ማላ ዎሲዴስ።
DAN 2:17 ሄሳፌ ጉዬ ዳኔሊ ባሶ ሲሚ ቢዲ ሄ ሃኒዳ ዮኦዛ ባ ላጌታስ ሃናኒያስ፥ ሚሻኤሌሲኔ ኣዛሪያሳስ ዮቲዴስ።
DAN 2:18 ኢዚኔ ኢዛ ላጌቲ ሃንኮ ኣቲዳ ባቢሎኔ ኤራንቻታራ ኢሲፌ ሃይቆንታ ማላ፥ ሳሎ ጾሲ ኢስታስ ማሮቴꬅ ዬዳና ማላኔ ሄ ጹራ ዮኦዛ ቆንጪሳና ማላ፥ «ዎሲቴ» ጊዲ ኢስታ ቆፍሲዴስ።
DAN 2:19 ሄ ጹራ ዮኦይ ዳኔላስ ኦማርሲ ኣጁታን ቆንጪዴስ፤ ሄሳ ጊሻስ ኢዚ ሳሎ ጾሳ ጋላቲዴስ።
DAN 2:20 ዳኔሊ፥ «ኣꬎ ኤራቴꬂኔ ዎልቃይ ኢዛሳ፤ ሄሳ ጊሻስ ጾሳ ሱንꬂ ሜርፔ ሜርናስ ኣንጄቶ።
DAN 2:21 ኢዚ ዎዴታኔ ኣጊናታካ ላሜስ፤ ካዎታ ኣራታን ኡቲሴስ፤ ካዎቴꬃ ኣራታፔካ ዱጌ ዎꬄስ፤ ኤራንቻታስ ኣꬎ ኤራቴꬅ ኣኬኪዛይታሲካ ኤራቴꬅ ኢሜስ።
DAN 2:22 ኢዚ ጪማ ጊዲዳ ጹራ ዮኦታኔ ጌሚዳይታ ቆንጪሴስ፤ ኡባ ዎዴ ኢዛ ማታን ፖኦይ ዴስ፤ ሄሳ ጊሻስ ኢዚ ꬉማን ዲዛዝ ኤሬስ።
DAN 2:23 ካሴ ታ ኣዋታ ጎዳዉ! ታ ኔና ጋላታይስ፤ ታ ኔና ቦንቻይስ፤ ኔ ታስ ኣꬎ ኤራቴꬂኔ ዎልቃ ኢማዳሳ፤ ኑ ዎሳካ ሲያዳሳ፤ ካዎዛ ኣጉሞዛካ ኑስ ቆንጪሳዳሳ» ጊ ጋላቲዴስ።
DAN 2:24 ሄሳፌ ጉዬ ዳኔሊ ባቢሎኔ ኤራንቻታ ዎꬋና ማላ ካዎዛፔ ኣዛዞይ ኢዛስ ኢሜቲዳ ኣርዮኬኮ ቢዲ፥ «ባቢሎኔ ኤራንቻታ ኔ ዎꬎፓ፤ ታና ጌዴ ካዎዛኮ ጌልꬃ፤ ሂስቲኮ ታ ኢዛስ ኢዛ ኣጉሞዛ ቢርሻና» ጊዴስ።
DAN 2:25 ኣርዮኬይ ሄራካ ዳኔላ ጌዴ ካዎ ናቡኬዴናጾሬ ሲንꬂ ሺሺዲ፥ «ካዎ! ኔ ኣጉሞዛ ቢርሼꬅ ኔስ ዮታናዴ ዩሁዳ ዴሬፔ ዲኤቲ ዪዳይታ ጊዶፌ ኢሳዴ ዴማዲስ» ጊ ዮቲዴስ።
DAN 2:26 ካዎዚካ ቢልጻሶሬ ጌቴቲዳ ዳኔላ፥ «ታ ኣጉሜቲዳ ኣጉሞዛ ኢዛ ቢርሼꬃራ ኔ ታስ ዮታናስ ዳንዳያይ?» ጊ ኦይቺዴስ።
DAN 2:27 ዳኔሊካ ኢዛስ፥ «ካዎ! ኣይ ኣꬎ ኤራንቻቲ፥ ሳጋቲ፥ ማሮቲኔ ሙሬኒዛይቲ ኔ ኦይቺዳ ጹራ ዮኦዛ ኔስ ዮታናስ ዳንዳዬቴና።
DAN 2:28 ጊዶ ኣቲን ጹራ ዮኦ ኡባ ቆንጪሲዛ ጾሲ ሳሎን ዴስ፤ ኢዚ ቡሮ ሲንꬃፌ ያና ላይꬃታን ሃናናይሳ ኡባ ኔስ ቆንጪሲዴስ፤ ኔኒ ኔ ሂꬃን ኢቻ ዳሼ ቤኢዳ ኣጉሞይኔ ኣጁታይ ሃይሳፌ ካሊዛይሳ።
DAN 2:29 «ካዎ! ኔኒ ኔ ሂꬃን ኢቻ ዳሼ ሲንꬃፌ ሃናና ዮኦታ ቆፓዳሳ፤ ሄ ዎዴ ጹራ ቆንጪሲዛ ጾሳይ ቡሮ ሲንꬃፌ ሃናና ዮኦታ ኔና ቤሲዴስ።
DAN 2:30 ሃይሲ ሃ ጹራ ዮኦዚ ታስ ቆንጪዳይ ታኒ ሃንኮ ኣሳፔ ኣꬎ ኤራንቻ ጊዲዳ ጊሻስ ጊዴና፤ ጊዶ ኣቲን ኔኒ ሄ ኣጉሞዛ ቢርሼꬅ ኤራና ማላኔ ኔ ዎዚና ጊዶን ሲሜሬቲዛ ቆፋ ሻካ ኤራናሳ።
DAN 2:31 «ካዎ! ኔ ሲንꬃን ኬሂ ጊታ ጾልቂዛኔ ባቢሲዛ ሚስሌይ ኤቂዳይሳ ቤኣዳሳ።
DAN 2:32 ሄ ሚስሌዛ ሁኤይ ጌሻ ዎርቃፌ፥ ኢዛ ቲራይኔ ኢዛ ኩሼቲ ቢራፔ፥ ኢዛ ኡሎይኔ ዎዲራይ ጻርቂማላፔ ኦሴቲዳ፤
DAN 2:33 ኢዛ ሱሌቲካ ቢራታፔ፥ ቶሆ ያቻታፔ ባጋይ ቢራታፔኔ ባጋይ ማና ኡርቃፌ ሜꬌቲዴስ።
DAN 2:34 ኔኒ ሚስሌዛ ጼሊሺን ጊታ ሹቺ ኣሲ ቦቾንታ ባ ዲዛሶፔ ꬎቃሌቲዲ ቢራፔኔ ማና ኡርቃፌ ኦሴቲዳ ሚስሌዛ ቶሆታ ሜንꬄሬꬂ ሊቂሲዴስ።
DAN 2:35 ሄራካ ቢራታዚ፥ ማና ኡርቃዚ፥ ጻርቂማላዚ፥ ቢራዚኔ ዎርቃዚ ዉሪ ሜቄሬቲ ዎꬊዳ፤ ቦኔ ካꬃ ባሌን ዲዛ ሱላ ማላ ጊዲዳ፤ ጫርኮይ ኢስታ ኢሲኖካ ኣሾንታ ፒቲ ኤፊዴስ፤ ሚስሌዛ ቦላ ኩንዲዳ ሹቻዚ ጊዲኮ ኢዚ ቢታ ኩማናሼ ጋካናስ ጊታ ዙማ ጊዲዴስ።
DAN 2:36 «ሄኮ ኣጉሞዚ ሃይሳ፤ ኢዛ ቢርሼꬃይካ ሃይሳፌ ካሊዛይሳ።
DAN 2:37 ካዎ! ኔኒ ካዎታስ ካዎ፤ ሳሎ ጾሲ ኔስ ካዎቴꬂ፥ ማታ፥ ዎልቃኔ ቦንቾ ኢሚዴስ።
DAN 2:38 ኢዚ ኔኒ ቢታ ኡባ ሃራና ማላ ኦꬂዴስ፤ ኢዚ ኔስ ኣሳ፥ ሜሃ፥ ዶኣታኔ ካፎታ ቦላ ጎዳቴꬅ ኢሚዴስ፤ ሄሳ ጊሻስ ዎርቃ ሁኤዚ ኔና።
DAN 2:39 «ኔፔ ጉዬ ኔፔ ሲሚዛ ካዎይ ዴንዳና፤ ኢዛፔካ ካሊዲ ጻርቂማላን ሌሚሴቲዳ ሄꬓንꬆ ካዎይ ዴንዳና፤ ኢዚካ ኩሜꬃ ኣላሜ ሃራና።
DAN 2:40 ቃሴካ ቤቲዳ ሚሽ ኡባ ሜንꬄሬꬂ ዬጊዛ ቢራታ ማላ ሚኖ ጊዲዳ ኦይዳንꬆ ካዎይ ካዎታና፤ ቢራታይ ኡባ ሜንꬄሬꬂ ሊቂሲዛ ማላ ኢዚ ባፔ ካሴ ካዎቲዳ ካዎታ ሜንꬄሬꬂ ዬጋና።
DAN 2:41 ኢዛ ቶሆቲኔ ኢዛ ቶሆ ቢራꬌቲ ባጋይ ቢራታፔ ባጋይ ማና ኡርቃፌ ጊዲዳይሳ ኔ ቤኢዳ ማላ ሄ ካዎቴꬃይ ናምኡ ኬዚ ሻኬቲዳ ካዎቴꬅ ጊዳና፤ ቢራታይኔ ኡርቃይ ዋላኬቲዳይሳ ኔ ቤኢዳ ማላ ሄ ካዎቴꬃፌ ባጋይ ቢራታ ማላ ሚኖ ጊዳና።
DAN 2:42 ኢዛ ቶሆታ ቢራꬌታፔ ባጋይ ቢራታ፥ ባጋይ ማና ኡርቃ ጊዲዳ ማላ ሄ ካዎቴꬃፌ ባጋይ ሚኖ፥ ባጋይ ቃሴ ላፋ ጊዳና።
DAN 2:43 ቢራታይኔ ማና ኡርቃይ ዋላኬቲዳይሳ ማላ ኣሳይ ኡባይ ዋላካ ጊዳና፤ ጊዶ ኣቲን ቢራታይ ማና ኡርቃራ ኦይኬቶንታይሳꬆ ኢስቲካ ባ ጊዶን ኢሲኖ ጊዲ ኦይኬቴቴና።
DAN 2:44 «ሄይታ ሄ ካዎታ ዎዴን ሳሎ ጾሳይ ሙሌራካ ላሌቶንታኔ ሃራ ዴሬስ ኣꬊ ኢሜቶንታ ካዎቴꬅ ኤሳና፤ ሄ ካዎቴꬃዚ ሃራ ካዎቴꬃታ ሙሌራ ሊቂሳና፤ ኢስታ ዉርሴꬅ ጋካናዉካ ꬋይሳና፤ ሄ ካዎቴꬃዚ ባ ሁኤስ ሜርናስ ሚኒ ዳና።
DAN 2:45 ኣሲ ቦቾንታ ዲሺን ዙማ ቦላፌ ꬎቃሌቲዲ ቢራታፔ፥ ጻርቂማላፔ፥ ማና ኡርቃፌ፥ ቢራፔኔ ዎርቃፌ ኦሴቲዳ ሚስሌዛ ሊቂሲዳ ሹቻ ኣጁታ ቢርሼꬃይ ሃይሳ፤ ጊታ ጾሳይ ቡሮ ሲንꬃፌ ሃናናይሳ ካዎ ኔና ቤሲዴስ፤ ኣጉሞዚካ ቱማ፤ ኢዛ ቢርሼꬃዚካ ኣማንꬂዛዛ» ጊ ዮቲዴስ።
DAN 2:46 ሄሳፌ ጉዬ ካዎ ናቡካዳናጾሬይ ባ ሁኤ ዱጌ ቢታ ጋꬂዲ ዳኔላስ ዚጊዴስ፤ ኢዛካ ቦንቺዴስ፤ ኢዛስ ያርሾኔ ኤጻኔ ሺሻና ማላ ኣዛዚዴስ።
DAN 2:47 ካዎዚ ዳኔላ፥ «ሃይሳ ጹራ ዮኦዛ ኔ ቢርሻና ዳንዳይዳ ጊሻስ ቱማፔ ኢንቴ ጾሳይ ጾሳታስ ጾሳ፤ ኢዚ ካዎታስ ጎዳ፤ ኢዚ ጹራ ቆንጪሲዛ ጾሳ» ጊዴስ።
DAN 2:48 ሄሳፌ ጉዬ ካዎዚ ዳኔላ ጊታ ቦንቾሶን ዎꬂዴስ፤ ኬሂ ዳሮ ኢሞታታ ኢዛስ ኢሚዴስ፤ ባቢሎኔ ካዎቴꬃ ኡባ ኣይሲዛዴ ሂስቲዴስ፤ ባቢሎኔ ኤራንቻታ ኡባ ቦላ ሃላቃ ሂስቲ ሹሚዴስ።
DAN 2:49 ሄሳፌካ ቦላራ ዳኔሊ ካዎዛ ቆፍሲን ካዎዚ ሲዲራቃ፥ ሚሳቃኔ ኣብዲናጎ ባቢሎኔ ኣዉራጃታ ኡባ ቦላ ኣይሲዛይታ ሂስቲ ሹሚዴስ፤ ዳኔሊ ጊዲኮ ካዎ ኬꬃን ኡቲዴስ።
DAN 3:1 ካዎ ናቡካዳናጾሬይ ጌሳይ 60 ዋꬋ፥ ጎምፓይ 6 ዋꬋ ጊዲዳ ዎርቃ ሚስሌ ኦሲሲዲ ባቢሎኔ ዴሬን ዱራ ዴምባን ኤሲዴስ።
DAN 3:2 ሄ ኢዚ ኤሲዳ ሚስሌዛ ኣንጂሳናስ ጊታ ኣሳታ፥ ሹሜታ፥ ዴሬ ኣይሲዛይታ፥ ካዎዛ ዞሪዛ ኣሳታ፥ ሚንጃ ኬꬃ ኣላፌታ፥ ዳናታ፥ ዎጋ ኤሪዛይታኔ ሃራ ዱማ ዱማ ኣዉራጃን ዲዛ ሹሜታ ጼይጊሲዴስ።
DAN 3:3 ሄይቲ ዴሬ ኣይሲዛይቲ ዉሪካ ሄ ሚስሌዛ ኣንጂሳናስ ኢሲፌ ሺቂዲ ሄ ሚስሌዛ ሲንꬃን ኤቂዳ።
DAN 3:4 ሄ ዎዴ ኣዋጃ ኣዋጂዛ ኢሳዴይ ባ ቃላ ꬎቁ ሂስቲዲ፥ «ኢንቴኖ ዱማ ዱማ ዴሬፔ፥ ዱማ ዱማ ካዎቴꬃፌኔ ዱማ ዱማ ቃላን ሃሳይዛሶፔ ዪዳይቶ!
DAN 3:5 ዛዬኔ ዲንኬ ጊሪስ፥ ማሲንቆኔ ዲꬃ ጊሪስ፥ ሱሱልኤኔ ባጋና ጊሪስ፥ ቃሴካ ዬꬃ ጊሪስ ኡባ ሲዪዳ ማላ ዱጌ ቢታን ጉፋኒዲ ካዎ ናቡካዳናጾሬይ ኤሲዳ ዎርቃ ሚስሌዛስ ጎይናና ቤሴስ።
DAN 3:6 ቢታን ጉፋኒዲ ጎይኖንታይ ኦኒካ ዲኮ ላጪዛ ኢቶኔ ታማን ዬጌታና» ጊ ኣዋጂዴስ።
DAN 3:7 ሄሳ ጊሻስ ዱማ ዱማ ዴሬፔ፥ ዱማ ዱማ ካዎቴꬃፌኔ ዱማ ዱማ ቃላን ሃሳይዛሶፔ ዪዳ ኣሳቲ ኡባይ ዲንኬ ጊሪስ፥ ማሲንቆኔ ዲꬃ ጊሪስ፥ ባጋናኔ ሱሱልኤ ጊሪሲኔ ዬꬃ ጊሪስ ሲዪዳ ማላ ቢታን ጉፋኒዲ ካዎ ናቡካዳናጾሬይ ኤሲዳ ዎርቃ ሚስሌዛስ ጎይኒዳ።
DAN 3:8 ሄ ዎዴ ጾሊንቴ ፒልጊዛ ኢሲ ኢሲ ባቢሎኔ ኤራንቻቲ ሺቂዲ ኣይሁዳታ ሞቲዳ።
DAN 3:9 ካዎ ናቡካዳናጾሬስካ፥ «ካዎ! ኔኒ ሜርናስ ካዎታ!
DAN 3:10 ካዎ! ኔኒ፥ ‹ዛዬ፥ ዲንኬ፥ ማሲንቆ፥ ዲꬃ፥ ባጋና፥ ሱሱልኤኔ ዬꬃ ጊሪስ ሲዪዛዴይ ኦኒካ ቢታ ቦላ ጉፋኒዲ ዎርቃ ሚስሌዛስ ጎይናናስ ቤሴስ።
DAN 3:11 ቢታን ጉፋኒዲ ሚስሌዛስ ጎይኖንታዴይ ዲኮ ላጪዛ ኢቶኔ ታማን ዬጌቶ› ጋ ኣዋጃዳሳ።
DAN 3:12 ሄኮ ኔኒ ባቢሎኔ ኣዉራጃታ ኣይሳና ማላ ሹሚዳ ሲዲራቂ፥ ሚሳቂኔ ኣብዲናጎ ጌቴቲዛ ኣይሁዳ ኣሳቲ ኔ ኣዛዞ ፖሌቴና፤ ኔ ኤቃ ጾሳታስ ሃጋዜቴና፤ ኔ ኤሲዳ ዎርቃ ሚስሌዛስ ጎይኔቴና» ጊ ዮቲዳ።
DAN 3:13 ካዎዚ ሄሳ ሲዪዲ ኬሂ ሃንቄቲዲ ሲዲራቃ፥ ሚሳቃኔ ኣብዲናጎ ጼይጋና ማላ ኣዛዚዴስ፤ ኢስቲካ ኤሂዲ ካዎዛ ሲንꬅ ሺሺዳ።
DAN 3:14 ካዎ ናቡካዳናጾሬይ፥ «ሃይቶ ሲዲራቃ፥ ሚሳቃ፥ ኣብዲናጎ! ኢንቴ ታ ኤሲዳ ዎርቃ ሚስሌዛስ ጎይኖንታ ኢጺዳይሲኔ ታ ኤቃ ጾሳታስ ሃጋዞንታ ኢጺዳይሲ ቱሜ?
DAN 3:15 ሃኢካ ዛዬ፥ ዲንኬ፥ ማሲንቆኔ ዲꬃ፥ ባጋናኔ ሱሱልኤ፥ ዬꬃ ጊሪስ ኡባ ኢንቴ ሲዪዲ ታ ኤሲዳ ሚስሌዛ ሲንꬃን ቢታ ቦላ ጉፋኒዲ ኢንቴ ጎይኒኮ ኢንቴስ ኪያ ጊዳና፤ ኢንቴ ጎይኖንታ ኢጺኮ ሄ ላጪዛ ኢቶኔ ታማን ሄራካ ዬጌታና፤ ኢንቴና ታ ኩሼፔ ኣሻና ጾሲ ኢንቴስ ባይንዳይሳ ኢንቴ ኤሪቴ!» ጊዴስ።
DAN 3:16 ሲዲራቂ፥ ሚሳቂኔ ኣብዲናጎይ ካዎዛስ፥ «ካዎ! ሃይሳ ሃ ዮኦዛስ ጊዲ ኑ ጊሻስ ኔስ ዛሮ ኢማና ቤሴና።
DAN 3:17 ካዎ! ኑኒ ሃይሳ ላጪዛ ኢቶኔ ታማን ዬጌቲዛ ጊዲኮካ ኑኒ ኢዛስ ጎይኒዛ ጾሳይ ሃይሳ ላጪዛ ኢቶኔ ታማፔኔ ኔ ኩሼፔ ኢዚ ኑና ኣሻና ዳንዳዬስ።
DAN 3:18 ጊዶ ኣቲን ካዎ! ኢዚ ኑና ኣሾንታ ኣጊኮካ ኑኒ ኔ ኤቃ ጾሳታስ ሃጋዞንታይሳኔ ኔ ኤሲዳ ዎርቃ ሚስሌዛስ ኑ ጎይኖንታይሳ ኔ ኤራ» ጊ ዛሪዳ።
DAN 3:19 ሄ ዎዴ ናቡካዳናጾሬይ ሲዲራቃ ቦላ፥ ሚሳቃ ቦላኔ ኣብዲናጎ ቦላ ኬሂ ሃንቄቲን ኢዛ ሜꬋይካ ላሜቲ ዎꬊዴስ፤ ላጪዛ ኢቶኔ ታማዚ ካሴፔ ላፑን ኩሼ ዳሪ ኤጻና ማላ ኣዛዚዴስ።
DAN 3:20 ሄ ሄꬑ ኣሳታ ቃቺዲ ላጪዛ ኢቶኔ ታማን ዬጋና ማላ ባ ኦላ ኣሳ ጊዶፌ ኣማርዳ ሚኖ ኣሳታ ኣዛዚዴስ።
DAN 3:21 ሄሳ ጊሻስ ኢስቲ ሴሎ ማይኦዛ፥ ሱሬዛ፥ ሁኤን ጻጺዛይሳኔ ሃራ ማይኦታካ ማይኢዳ ማላ ቃሼቲዲ ላጪዛ ኢቶኔ ታማን ዬጌቲዳ።
DAN 3:22 ካዎዚ ኢሚዳ ሚኖ ኣዛዞዛ ኢቶኔ ታማዚ ኬሂ ኤጺዛ ጊሻስ ሲዲራቃ፥ ሚሳቃኔ ኣብዲናጎ ታማን ዬጊዳ ኦላ ኣሳታ ሄ ታማ ሴላይ ዎꬊዴስ።
DAN 3:23 ሄ ሄꬑ ኣሳቲ ጊዲኮ ኢስቲ ሚንꬂ ቃቺን ላጪዛ ኢቶኔ ታማን ዬጌቲዳ።
DAN 3:24 ሄሳፌ ጉዬ ካዎ ናቡካዳናጾሬይ ባ ኡቲዳሶሆፔ ማላሌቲሼ ዴንዲ ኤቂዲ፥ «ኑኒ ቃቺዲ ኤጺዛ ኢቶኔ ታማን ዬጊዳ ኣሳቲ ሄꬓታ ጻላ ጊዴቴኔ?» ጊዲ ባና ዞሪዛይታ ኦይቺዴስ፤ ኢስቲካ፥ «ካዎ! ኤ ሄꬓታ!» ጊዳ።
DAN 3:25 ካዎዚካ፥ «ሄኮ ሃኢ ታኒ ኢስታ ታማዚ ኣይኮካ ቦቾንታ ቃሾፔ ቢርሼቲዲ ላጪዛ ኢቶኔ ታማ ጊዶን ሄ ሃ ሲሜሬቲዛ ኦይዱ ኣሳታ ቤኣይስ፤ ኦይዳንꬆዚካ ጾሳታ ና ሚሳቴስ» ጊዴስ።
DAN 3:26 ሄሳ ጊሻስ ናቡካዳናጾሬይ ሄ ኤጺዛ ኢቶኔ ታማኮ ሺቂ ባ ቃላ ꬎቁ ሂስቲዲ፥ «ኢንቴኖ ኡባፌ ꬎቃ ጾሳ ኦሳንቻቶ! ሲዲራቃ፥ ሚሳቃ፥ ኣብዲናጎ! ኬዚዲ ሃ ዪቴ!» ጊዲ ጼይጊዴስ፤ ኢስቲካ ታማዛ ጊዶፌ ኬዚዳ።
DAN 3:27 ሄሳፌ ጉዬ ጊታ ኣሳቲ፥ ሹሜቲ፥ ዴሬ ኣይሲዛይቲ፥ ካዎዛ ዞሪዛይቲ ዉሪ ሄ ኢስታ ዩሾን ሺቂዳ፤ ታማይ ኢስታ ኣሳቴꬃ ቆሆንታይሳ፥ ሁኤ ቢናናፔ ኢሲኔያካ ቦሼቶንታይሳ፥ ኢስታ ሴሎ ማይኦዚ ሜꬋ ላሞንታይሳኔ ጩዋ ጩዋ ጎንታይሳ ቤኢዳ።
DAN 3:28 ሄሳፌ ጉዬ ታኒ ካዎ ናቡካዳናጾሬይ፥ «ኢዚ ባ ኪታንቻ ኪቲዲ ባ ኦሳንቻታ ኣሺዳ ሲዲራቃ፥ ሚሳቃኔ ኣብዲናጎ ጾሳይ ጋላቴቶ! ኢስቲካ ባ ጎዳን ኣማኔቲዲ ባ ጾሳስ ኣቲን ሃራ ኤቃ ጾሳታስ ኦꬆኮኔ ጎይኖኮ ጊዲ ካዎዛ ኣዛዞ ኢጺዲ ባ ሼምፖ ኣꬂ ኢሚዳ።
DAN 3:29 «ሃይሳ ማላ ኣሺዛ ሃራ ጾሲ ዴና፤ ሄሳ ጊሻስ ዱማ ዱማ ዴሬይ፥ ዱማ ዱማ ካዎቴꬂ ዎይኮ ዱማ ዱማ ቃላን ሃሳይዛ ኣይ ኣሲካ ሲዲራቃ፥ ሚሳቃኔ ኣብዲናጎ ጾሳ ቦላ ጫሻ ቃላን ሃሳይኮ ሄሳዴይ ሹኬቶ፤ ኢዛዴ ኬꬃይ ላሌቲ ዶሬቶ» ጋ ኣዛዛዲስ።
DAN 3:30 ሄሳፌ ጉዬ ካዎዚ ሲዲራቃ፥ ሚሳቃኔ ኣብዲናጎ ባቢሎኔ ኣዉራጃታን ሹሚዴስ።
DAN 4:1 ካዎ ናቡካዳናጾሬይ ኣላሜ ቦላ ዱማ ዱማ ዴሬታስ፥ ዱማ ዱማ ካዎቴꬃታሲኔ ዱማ ዱማ ቃላን ሃሳይዛ ኣሳታስ ኡባስ፥ ሳሮይ ኢንቴስ ጊዶ!
DAN 4:2 ኡባፌ ꬎቃ ጾሳይ ታስ ኦꬂዳ ጊታኔ ማላሊሲዛ ኦሶታ ታ ኢንቴስ ዮታናስ ኮያይስ።
DAN 4:3 ጾሲ ቤሲዛ ማላታይ ኣይ ማላ ጊታ! ማላሊሲዛ ኢዛ ኦሶቲ ኣይ ማላ ሚኖ! ጾሲ ሜርናስ ካዎ፤ ኢዛ ካዎቴꬃይ ዬሌታፔ ዬሌታ ጋካናስ ዴኤስ።
DAN 4:4 ታኒ ናቡካዳናጾሬይ ታ ኬꬃን ታስ ኢንጄን ታ ካዎቴꬃንካ ኢሻሎን ዳይስ።
DAN 4:5 ጊዶ ኣቲን ጋላሳታፔ ኢሲ ጋላስ ታኒ ታ ሂꬃን ኢቻ ዳሼ ዳሮ ዳጋንꬂዛ ኣጉሞኔ ኣጁታ ቤያዲስ።
DAN 4:6 ሄሳ ጊሻስ ሄ ኣጉሞዛ ቢርሼꬅ ታስ ዮታና ማላ ባቢሎኔን ዲዛ ኤራንቻቲ ዉሪ ታኮ ያና ማላ ኣዛዛዲስ።
DAN 4:7 ቢቲዛይቲ፥ ማሮቲ፥ ሳጋቲ፥ ጾሊንቴ ታይቢዛ ኤራንቻቲኔ ሙሬኒዛይቲ ኡባይ ታኮ ዪን ታ ኢስታስ ታ ኣጉሞዛ ዮታዲስ ሺን ኢስቲ ኣጉሞዛ ቢርሻና ዳንዳይቤቴና።
DAN 4:8 ሄሳፌ ጉዬ ታ ጾሳ ሱንꬃን ቢልጻሶሬ ጌቴቲ ጼይጌቲዛይሲኔ ጌሻ ጾሳታ ኣያናይ ኢዛን ዲዛ ዳኔሊ ጌሊዲ ታ ሲንꬃን ኤቂን ታ ኣጉሞዛ ኢዛስ ዮታዲስ።
DAN 4:9 ታኒካ፥ «ኤራንቻታስ ሃላቃ ጊዲዳ ቢልጻሶሬ! ጌሻ ጾሳታ ኣያናይ ኔናን ዲዛይሳኔ ጹራ ዮኦይ ዉሪካ ኔፔ ጌሞንታይሳ ታ ኤራይስ፤ ሄሳ ጊሻስ ታኒ ቤኢዳ ኣጉሞዛ ኔ ታስ ቢርሻ።
DAN 4:10 «ታኒ ታ ሂꬃን ኢቻ ዳሼ ኢሲ ዎጋ ጊታ ሚꬂ ዳይሲ ቢታ ቦላ ኤቂዳይሳ ኣጁታን ቤያዲስ።
DAN 4:11 ሄሲ ሄ ሚꬃዚ ኬሂ ዲጪዴስ፤ ሚኒዴስ፤ ኢዛ ጼራይካ ሳሎ ጋኪዴስ፤ ሳኣ ጋጻ ጋካናስ ቤቲዴስ።
DAN 4:12 ኢዛ ሃይꬃይ ጪሊላ፤ ኢዛ ኣይፌይ ዴሬ ኡባስ ጊዳና ጋካናስ ዳሪዴስ፤ ኢዛ ኩዋይ ዶኣታስ ሼምፒዛሶ ጊዲዴስ፤ ሳሎ ካፎቲካ ኢዛ ሃጋታ ቦላ ባ ኬꬃ ኬጺዲ ኢዛን ዴቴስ፤ ሼምፖራ ዲዛ ሜꬌቴꬃቲ ዉሪካ ሄ ሚꬃዛ ኣይፌ ሜቴስ።
DAN 4:13 «ታኒ ታ ሂꬃን ኢቻ ዳሼ ኣጁታን ኢሲ ጌሻ ኪታንቻይ ሳሎፔ ዱጌ ዎꬊሺን ቤኣዲስ።
DAN 4:14 ኢዚካ ባ ቃላ ꬎቁ ሂስቲዲ፥ ‹ሃይሳ ሚꬃዛ ቃንጺቴ፤ ኢዛ ሃጋታ ኡባ ጉሪቴ፤ ኢዛ ሃይꬃ ኡባ ዩዲቴ፤ ኢዛ ኣይፌዛ ላሊቴ፤ ኢዛ ኩዋ ጋርሳን ዲዛ ዶኣቲኔ ኢዛ ሃጋታ ቦላ ዲዛ ካፎቲ ባቃቴቶ።
DAN 4:15 ጊዶ ኣቲን ኢዛ ዱሩማዛኔ ጻጶዛ ቢራታፔኔ ጻርቂማላፔ ኦሴቲዳ ሳንሳላታን ዩሺ ቃቺዲ ሄን ዴምባን ማታ ጊዶን ቢታ ጋርሳን ኣጋጊቴ፤ ኢዚ ሳሎፔ ዎꬊዛ ኬንቾን ሙሶ! ኢዚ ዶኣታራ ቱሻ ጊዶን ዴኦ።
DAN 4:16 ኢዛ ካሃይ ኣሳይሳፌ ላሜቶ፤ ላፑን ላይꬂ ጋካናስ ኢዛስ ሜሄ ካሃይ ኢሜቶ።
DAN 4:17 « ‹ሃ ፒርዳ ቃሾይ ጌሻ ኪታንቻታ ባጋራ ቆንጪ ዮቴቲዴስ፤ ሄሲካ ኡባፌ ꬎቃ ጾሳስ ሳኣ ካዎታ ቦላ ኢዛስ ጎዳቴꬂ ዲዛይሳኔ ካዎቴꬃታካ ባ ዶሲዳዴስ ኢሚዛይሳ፥ ኣሳፔ ካꬌቲዳይታ ኢስታ ቦላ ኢዚ ሹሚዛይሳ፥ ሜꬌታ ኡባይ ኤራና ማላሳ› ጊዴስ።
DAN 4:18 «ታኒ ካዎ ናቡካዳናጾሬይ ቤኢዳ ኣጉሞይ ሃይሳ፤ ቢልጻሶሬ! ኔኒ ታስ ኣጉሞዛ ቢርሻ፤ ታ ካዎቴꬃን ዲዛ ኤራንቻቲ ቢርሼꬃ ታስ ዮታናስ ዳንዳይቤቴና፤ ኔ ጊዲኮ ጌሻ ጾሳታ ኣያናይ ኔናን ዲዛ ጊሻስ ታስ ቢርሼꬃ ዮታና ዳንዳያሳ» ጊዴስ።
DAN 4:19 ሄ ዎዴ ቢልጻሶሬ ጌቴቲዛ ዳኔሊ ኬሂ ዳጋሚዲ ሃኒዛዝ ꬋይዴስ፤ ባ ቆፋን ጉꬃ ዎዴስ ጬጪዴስ፤ ካዎዚካ ኢዛ፥ «ቢልጻሶሬ! ኣጉሞዛ ጊዲን ዎይኮ ኢዛ ቢርሼꬃይ ኔና ዳጋንꬆፎ» ጊዴስ። ቢልጻሶሬይካ ኢዛስ፥ «ካዎ! ኔ ኣጉሞዚ ኔና ኢጺዛይታስ፥ ቢርሼꬃይካ ኔ ሞርኬታስ ጊዶ።
DAN 4:20 ኬሂ ዲጪ ሚኒን ኔ ቤኢዳ ሚꬃዚ ጼራይካ ኢዛስ ሳሎ ጋኪን ቢታ ኡባን ቤቲዛ ሚꬃዚ፥
DAN 4:21 ኢዛ ሃይꬃቲ ጪሊሊዳይ፥ ኢዛ ኣይፌይ ዴሬ ኡባስ ጊዳና ጋካናስ ዳሪዳይ፥ ዶኣቲካ ኢዛ ኩዋ ጋርሳን ሼምፒዳይ፥ ካፎቲካ ኢዛ ሃጋታ ቦላ ባስ ኬꬅ ኬጺ ዴኢዳይ፥
DAN 4:22 «ካዎ! ሄ ሚꬃይ ኔና፤ ኔ ጊታቴꬃይ ዲጪዲ ሳሎ ጋኪዴስ፤ ኔ ካዎቴꬃይካ ቢታ ጋጻ ጋኪዴስ።
DAN 4:23 «ካዎዞ! ኔ ቤኢዳ ጌሻ ኪታንቻይ ሳሎፔ ዎꬊዲ፥ ‹ኢንቴ ሚꬃዛ ቃንጺ ꬋይሲቴ፤ ኣቲዳ ዱሩማዛኔ ጻጶዛ ቢራታፔኔ ጻርቂማላፔ ኦሴቲዳ ሳንሳላታን ዩሺ ቃቺዲ ዴምባን ማታ ጊዶን ቢታ ጋርሳን ኣጋጊቴ፤ ሄን ሳሎ ኬንቾን ሙሶ፤ ላፑን ላይꬂ ኢዚ ዶኣታራ ዴኦ› ጊዛይሳ ሲያዳሳ።
DAN 4:24 «ካዎ! ሄኮ ቢርሼꬃይ ሃይሳ፤ ኡባፌ ꬎቃ ጾሳይ ታ ጎዳ ካዎዛ ቦላ ፖሌታና ማላ ኬሲዳ ኣዋጃይ ሃይሳፌ ካሊዛይሳ።
DAN 4:25 ኔኒ ኔ ዴሬዛፔ ሻኬታዳ ጎዴታና፤ ኔስ ዱሳሶይካ ዎራ ዶኣታራ ጊዳና፤ ላፑን ላይꬂ ፖሌታና ጋካናስ ኔኒ ሜሄ ማላ ማታ ማና፤ ኔኒ ኬንቾን ሙሳና፤ ሄሲ ዉሪ ኔና ጋካናይ ኡባፌ ꬎቃ ጾሳይ ካዎታ ኡባ ቦላ ኢዛስ ጎዳቴꬂ ዲዛይሳኔ ኢዚ ካዎቴꬃ ዉርሲካ ባ ዶሲዳዴስ ኢሚዛይሳ ኔ ሻካ ኤራና ጋካናሳ።
DAN 4:26 ዱሩማዚ ጻጶዛራ ሄን ጋዴ ጊዶን ኣታና ማላ ኢዚ ኣዛዚዳይ ጾሳስ ኣላሜ ቦላ ኩሜꬃ ማታይ ዲዛይሳ ኔ ኤራዳ ኔኒ ሲማ ኔ ካዎቴꬃን ኡታናይሳ ቤሴስ።
DAN 4:27 ሄሳ ጊሻስ ካዎ! ታኒ ታ ባጋራ ኔና ዞሪዛይሳ ሲያ፤ ኔኒ ናጋራ ኦሶ ኣጋ፤ ሱሬ ኦሶ ኡባ ዎዴ ኦꬃ፤ ኔ ኢታ ኦሶ ኣጋዳ ቆሄቲዛይታስ ቃꬌታ፤ ሄሳꬆ ኔ ኦꬂኮ ኔ ሳሮን ዱሳ ላይꬃይ ኣዱቆንታ ኣጌና» ጊዴስ።
DAN 4:28 ሄሲ ዉሪካ ካዎ ናቡካዳናጾሬ ቦላ ጋኪዴስ።
DAN 4:29 ታማኔ ናምኡ ኣጊናፔ ጉዬ ኢዚ ባቢሎኔን ካዎቴꬃ ኬꬃ ፖቄ ቦላ ሲሜሬቲሼ፥
DAN 4:30 «ታ ሚኖ ዎልቃን ታ ቦንቾስ ካዎስ ዱሳሶ ጊዳና ማላ ታ ኦሲሲዳ ጊታ ባቢሎኔ ካታማያ ሃኖ ጊዴኬ?» ጊዴስ።
DAN 4:31 ኢዚ ቡሮ ሃሳያ ባ ዶናፔ ኬሲ ዉርሶንታ ዲሺን ሳሎፔ፥ «ካዎ ናቡካዳናጾሬ! ኔ ቦላ ፒርዴቲዳ ፒርዳይ ሃይሳፌ ካሊዛይሳ። ሄኮ ኔ ካዎቴꬃይ ኔፔ ኤኬቲዴስ።
DAN 4:32 ኔኒ ዴሬዛ ጋርሳፌ ጎዴታና፤ ኔስ ዱሳሶይ ዎራ ዶኣታራ ጊዳና፤ ላፑን ላይꬂ ኩማና ጋካናስ ኔኒ ሜሄ ማላ ማታ ማና፤ ሄሲካ ሃናናይ ኡባፌ ꬎቃ ጾሳይ ካዎታ ኡባ ቦላ ኢዛስ ጎዳቴꬂ ዲዛይሳኔ ካዎቴꬂ ዉርሲካ ኢዚ ባ ዶሲዳዴስ ኢሚዛይሳ ኔ ሻካ ኤራና ጋካናሳ» ጊዛ ቃላይ ዪዴስ።
DAN 4:33 ሄ ቃላይ ሄራካ ካዎ ናቡካዳናጾሬ ቦላ ፖሌቲዴስ፤ ሄሳ ጊሻስ ኢዚ ዴሬዛ ጋርሳፌ ጎዴቲዴስ፤ ሜሄ ማላ ማታ ሚዴስ፤ ሳሎፔ ዎꬊዛ ኬንቾን ኢዚ ሙሲዴስ፤ ኢዛ ቢናናይካ ጎሌ ካፎ ባሌ ማላ ዲጪዴስ፤ ኢዛ ጹጉንꬂካ ካፎ ጹጉንꬃ ማላ ጊዲዴስ።
DAN 4:34 ካዎ ናቡካዳናጾሬይ፥ «ላፑን ላይꬃቲ ኣꬊዳፔ ጉዬ ታኒ ታ ኣይፌታ ፑዴ ሳሎ ዴንꬃዲስ፤ ታስ ዎዚና ካሃይ ሲሚዴስ፤ ኡባፌ ꬎቃ ጾሳ ጋላታዲስ፤ ሜርናስ ዲዛ ጾሳ ሳባዲስ፤ ቦንቾካ ኢዛስ ኢማዲስ፤ ኢዛ ካዎቴꬃይ ሜርናሳ፤ ኢዛ ካዎቴꬃይ ዬሌታፔ ዬሌታ ጋካናስ ዳና።
DAN 4:35 ቢታ ቦላ ዲዛ ዴሬቲ ዉሪካ ኢዛ ኣቻን ቄሪ ኡኤ ማላ፤ ሳሎን ዲዛ ኦሳንቻታ ቦላኔ ቢታ ቦላ ዲዛ ዴራ ቦላ ኢዚ ባ ዶሲዳዝ ኦꬄስ፤ ኢዛ ሼኔ ዲጋናስ ዳንዳይዛይኔ ‹ኔ ሃይሳ ኣዛስ ኦꬃይ?› ጋናይ ኦኒካ ዴና።
DAN 4:36 «ታ ዎዚና ካሃይ ታኮ ሲሚን ሄራካ ታ ካዎቴꬃስ ቦንቾይ፥ ኣዮቴꬂኔ ቴማይ ሲሚዴስ፤ ካሴ ታና ዞሪዛይቲኔ ታ ሹሜቲ ታና ኡፋይሳን ሞኪ ኤኪዳ፤ ካሴ ታኒ ካዎቴꬃ ኣራታን ሲማ ኡታዲስ፤ ካሴይሳፌ ቦላራ ኣꬎ ቦንቼታዲስ።
DAN 4:37 «ሄኮ ቤኢቴ! ታኒ ናቡካዳናጾሬይ ሳሎ ካዎስ ጋላታ፥ ቦንቾኔ ሳባ ሺሻይስ፤ ኢዛ ኦሶ ኡባይ ሊኬ፤ ኢዛ ኦጌይካ ሱሬ፤ ኦቶራንቻታ ኢዚ ካዉሻናስ ዳንዳዬስ» ጊዴስ።
DAN 5:1 ጋላሳታፔ ኢሲ ጋላስ ካዎ ቤሊሻጾሬይ ሺያን ቆዴቲዛ ጊታ ሹሜታስ ኬሂ ጊታ ጊቢራ ጊግሲዴስ፤ ኢዚ ኣሳራ ዎይኔ ኡሹ ኡዪሼ ቃሚሲዴስ።
DAN 5:2 ኣሳይ ዎይኔ ኡሻ ኡዪሺን ቤሊሻጾሬይ ካሴ ኢዛ ኣዋ ናቡካዳናጾሬይ ዬሩሳላሜን ዲዛ ጾሳ ኬꬃፌ ቦንቂ ኤኪዳ ዎርቃፌኔ ቢራፔ ኦሴቲዳ ጹኣታ ኤሃና ማላ ባ ኦሳንቻታ ኣዛዚዴስ፤ ካዎዚ ሄሳ ኦꬂዳይ ኢዚኔ ኢዛ ሹሜቲ፥ ኢዛ ማቼቲኔ ኢዛ ላጌꬆቲ ሄ ጹኣታን ዎይኔ ኡሹ ኡያና ኮዪዳ ጊሻሳ።
DAN 5:3 ኢዛ ኦሳንቻቲካ ሄ ዬሩሳላሜፔ ጾሳ ኬꬃፌ ቢዳ ዎርቃፌኔ ቢራፔ ኦሴቲዳ ጹኣታ ሄራካ ኤሂዳ፤ ካዎዚኔ ኢዛ ሹሜቲ፥ ኢዛ ማቼቲኔ ኢዛ ላጌꬆቲ ሃይታ ሃ ጹኣታን ኡዪዳ።
DAN 5:4 ኡሻ ኡዪሼ ዎርቃፌ፥ ቢራፔ፥ ጻርቂማላፔ፥ ቢራታፔ፥ ሚꬃፌኔ ሹቻፌ ኦሴቲዳ ኤቃ ጾሳታ ጋላቲዳ።
DAN 5:5 ቆፖንታ ዲሺን ኣሳ ኩሼ ቢራꬌቲ ቤቲዲ ጾሳ ኬꬃን ጾምፔ ዎꬂዛሶፔ ሲንꬃ ባጋራ ሜሼቲ ዲዛ ካዎ ኬꬃን ጎዳ ቦላ ጻፎ ኦይኪዳ፤ ሄ ቢራꬌቲ ጻፊሺን ካዎዚ ቤዪዴስ።
DAN 5:6 ሄ ዎዴ ካዎዚ ኬሂ ዳጋሚዴስ፤ ኢዛ ኣይፌሶይ ላሜቲዴስ፤ ኢዛ ኩሼቲኔ ቶሆቲ ዶጪዳ፤ ኢዛ ጋዴይ ኮኮሪዴስ።
DAN 5:7 ካዎዚ ሳጋታ፥ ማሮታኔ ጾሊንቴ ቆዲዛይታ ባኮ ጌልꬃና ማላ ኣዛዚዴስ። ኢስቲካ ጼይጌቲ ዪን ካዎዚ ባቢሎኔ ኤራንቻታስ፥ «ሃይሳ ጻፌቲዳ ቃላ ናባቢዲ ኢዛ ቢርሼꬃ ታስ ዮታና ዳንዳይዛዴይ ኦኒካ፥ ኦቻ ቴራ ሚሳቲዛ ሴሎ ማይኦ ማይኣና፤ ዎርቃፌ ኦሴቲዳ ጌጼ ቆꬌን ኣꬃና፤ ኢዛዴይ ታ ካዎቴꬃንካ ሄꬓንꬆ ማራን ሹሜታና» ጊዴስ።
DAN 5:8 ኣꬎ ኤራንቻቲ ካዎዛኮ ሺቂዳ ሺን ሄ ጻፌቲዳይሳ ናባባናሲኔ ኢዛ ቢርሼꬃ ካዎዛ ኤሪሳናስ ዳንዳይዳይ ኦኒካ ኢስታ ጊዶፌ ቤቲቤና።
DAN 5:9 ካዎ ቤሊሻጾሬይ ካሴፔ ኬሂ ባቢዳ ጊሻስ ኢዛ ኣይፌሶይ ላሜቲ ላሜቲ ቢዴስ፤ ኢዛ ሹሜታስ ሃኒዛዚ ꬋዪን ዳጋሚዳ።
DAN 5:10 ጎዳቴያ ካዎዛ ጬንጉርሲኔ ሹሜታ ቃላ ሲያዳ ጊቢራይ ኢዛን ዲዛ ኬꬅ ጌላዳ፥ «ካዎ! ኔኒ ሜርናስ ካዎታ! ዳጋሞፋ፤ ኔ ኣይፌሶይ ላሜቶፎ።
DAN 5:11 ጌሻ ጾሳታ ኣያናራ ዲዛ ኢሳዴይ ኔ ካዎቴꬃ ጊዶን ዴስ፤ ሄሳዴይካ ካሴ ኔ ኣዋይ ካዎቴꬃን ዲሺን ኢዛስ ጾሳታ ማላ ኣꬎ ኤራቴꬂ፥ ኤራቴꬂኔ ኣኬካይ ኢዛን ኩሚዳዴ ጊዲ ቤቲዴስ፤ ሄሳ ጊሻስ ካሴ ኔ ኣዋይ ካዎ ናቡካዳናጾሬይ ኢዛ ማሮታስ፥ ሳጋታስ፥ ሙሬኒዛይታሲኔ ጾሊንቴ ታይቢዛይታስ ኡባታስ ሃላቃ ኦꬂ ሹሚዴስ።
DAN 5:12 ኢዚ ኣጉሞኔ ማሌꬆ ቢርሻናሲ፥ ቆቴቲዳ ጹራ ዮኦታካ ቆንጪሳናስ ሎኦ ኣያናይ፥ ኤራይኔ ኣኬካይ ዴስ፤ ሄሳ ጊሻስ ካሴ ኔ ኣዋ ናቡካዳናጾሬይ ኢዛ፥ ‹ቢልጻሶሬ› ጊ ሱንꬂዳ ዳኔላ ኔ ጼይጊሳ ኤሂሲኮ ኢዚ ሃይሳ ጻፌቶይሳ ቢርሺዲ ኔስ ዮታና» ጋዱስ።
DAN 5:13 ሄ ዎዴ ሄራካ ዳኔላ ካዎዛ ሲንꬅ ሺሺዳ፤ ካዎዚካ ኢዛ፥ «ታ ኣዋይ ካዎ ናቡካዳናጾሬይ ዩሁዳ ዴሬፔ ዲኢ ኤሂዳይታፔ ዳኔላ ጌቴቲዛይሲ ኔኔ?
DAN 5:14 ኔ ቦላ ጌሻ ጾሳታ ኣያናይ ዲዛይሳኔ ኔስ ኤራቴꬂ፥ ኣኬካይኔ ኣꬎ ኤራቴꬂ ዲዛይሳ ታኒ ሲያዲስ።
DAN 5:15 ኣꬎ ኤራንቻቲኔ ሳጋቲ ኡባይ ሃይሳ ጻፌቲዳይሳ ናባቢዲ ቢርሻና ማላ ታ ሲንꬂ ሺቂዳ፤ ኢስቲ ጊዲኮ ኢዛ ቢርሼꬃ ታና ኤሪሳናስ ዳንዳይቤቴና።
DAN 5:16 ኔኒ ጊዲኮ ጹራ ዮኦታ ቢርሻናሲኔ ዋዪሲዛ ሚሻታ ዉርሳ ቆንጪሳናስ ዳንዳይዛይሳ ታ ሲያዲስ፤ ሄሳ ጊሻስ ኔኒ ሃይሳ ጻፌቲዳይሳ ናባባዳ ታስ ቢርሻ ዮቲኮ ኢስቲ ኔና ኦቻ ቴራ ሚሳቲዛ ሴሎ ማይኦ ማይዛና፤ ዎርቃፌ ኦሴቲዳ ሞጋ ኔ ቆꬌን ኣꬃና፤ ታ ካዎቴꬃንካ ሄꬓንꬆ ማራን ታ ኔና ሹማና» ጊዴስ።
DAN 5:17 ዳኔሊካ ኢዛስ፥ «ካዎ! ኔ ታስ ኢማና ኢሞታይ ኔስ ጊዶ፤ ኔ ታስ ኢማናይሳካ ሃራስ ኢማ፤ ታኒ ጊዲኮ ሄ ጻፌቲዳይሳ ናባባዳ ቢርሼꬃ ኔስ ዮታና።
DAN 5:18 «ካዎ! ኡባፌ ꬎቃ ጾሳይ ካሴ ኔ ኣዋ ናቡካዳናጾሬስ ካዎቴꬂኔ ጊታቴꬅ፥ ቦንቾኔ ቴማቴꬅ ኢሚዴስ።
DAN 5:19 ኢዚ ኢሚዳ ጊታቴꬃፌኔ ማታፔ ዴንዲዳይሳን ዱማ ዱማ ዴሬቲ፥ ዱማ ዱማ ካዎቴꬃቲ፥ ዱማ ዱማ ቃላን ሃሳይዛይቲ ኡባይ ኢዛስ ኮኮሪዳኔ ያዪዳ። ኢዚካ ባ ዎꬋና ኮዪዳይሳ ዎꬌስ፤ ኣሻና ኮዪዳዴ ኣሼስ፤ ባ ꬎቂሳና ኮዪዳይሳ ꬎቂሴስ፤ ካዉሻና ኮዪዳዴ ካዉሼስ።
DAN 5:20 ጊዶ ኣቲን ኢዚ ኦቶሬቲዳ ዎዴኔ ኢዛ ዎዚናይ ሙሚዳ ዎዴ፥ ባ ካዎቴꬃ ኣራታፔ ዎꬊዴስ፤ ቦንቾይካ ኢዛፔ ቃሬቲዴስ።
DAN 5:21 ኢዚካ ዴሬ ጊዶፌ ጎዴቲዴስ፤ ኢዛ ካሃይካ ላሜቲዲ ኢዛስ ሜሄ ካሃይ ኢሜቲዴስ፤ ኢዚ ሜሄ ማላ ማታ ሚሼ ሃርዲዳታራ ዴኢዴስ፤ ኣቂዛሶይ ꬋዪን ኢዛ ቦላይ ጻዛን ሙሲዴስ፤ ሄሲ ሄሳꬆ ሃኒዳይ ኡባፌ ꬎቃ ጾሳይ ካዎቴꬃ ኡባ ቦላ ጎዳ ጊዲዳይሳኔ ካዎቴꬅ ኡባ ባ ኮዪዳ ኣሳስ ኢማናስ ዳንዳይዛይሳ ኢዚ ኤራና ጋካናሳ።
DAN 5:22 «ቤሊሻጾሬ! ኔኒ ኢዛ ና ጊዳ ኡታዳ ሄሳ ኡባ ኤራሼ ኔኒ ኔና ዚቂ ሂስታቤካ።
DAN 5:23 ሄሳፌ ቦላራካ ሳሎ ጎዳ ቦላ ኔ ኦቶሬታዳ ኔርካ ኔና ꬎቁ ꬎቁ ሂስታዳሳ፤ ጾሳ ኬꬃፌ ዲኤቲ ዪዳ ዎርቃፌኔ ቢራፔ ኦሴቲዳ ሚሻታ ኔኒ ኤሂሳዳ፥ ኔኒ ኔ ሹሜቲ፥ ኔ ማቼቲኔ ኔ ላጌꬆቲ ኢሲፌ ኢስታን ዎይኔ ኡሹ ኡዪዴታ፤ ሂስቲዲ ጼላናስ፥ ሲያናስ፥ ኣኬካናስ ዳንዳዮንታይታ ዎርቃፌ፥ ቢራፔ፥ ጻርቂማላፔ፥ ቢራታፔ፥ ሚꬃፌኔ ሹቻፌ ኦሴቲዳ ኤቃ ጾሳታ ጋላቲዴታ፤ ኔ ሼምፖኔ ኔ ኦጌ ባ ኩሼን ኦይኪዳ ጾሳ ቦንቻቤካ።
DAN 5:24 ሄሳ ጊሻስ ኢዚ ጻፌዛ ጻፊዳ ኩሼዛ ዬዲዴስ።
DAN 5:25 «ጻፌቲዳይሲካ፥ ‹ማኔ! ማኔ! ቴቄሌ! ፋሪስ› ጌስ።
DAN 5:26 ሄሳ ቢርሼꬂ ሃይሳፌ ካሊዛይሳ፤ ማኔ! ጉሲ፥ ‹ጾሲ ኔ ካዎቴꬃ ላይꬃ ቆዲዴስ፤ ዉርሴꬂካ ጋꬂዴስ› ጉሳ።
DAN 5:27 ቴቄሌ! ጉሲ፥ ‹ኔኒ ሜዛኔን ጌዳሬታዳሳ፤ ካዉያ ቤታዳሳ› ጉሳ።
DAN 5:28 ፋሪስ! ጉሲ፥ ‹ኔ ካዎቴꬂ ሻኬቲ ዎꬊዴስ፤ ሜዶኔታሲኔ ፓሪሴታስ ኢሜቲዴስ› ጉሳ» ጊ ዛሪዴስ።
DAN 5:29 ሄሳፌ ጉዬ ቤሊሻጾሬ ኣዛዞን ሄራካ ዳኔላ ኦቻ ቴራ ሚሳቲዛ ሴሎ ማይኦ ማይዚዳ፤ ዎርቃፌ ኦሴቲዳ ሞጋ ኢዛ ቆꬌን ኣꬂዳ፤ ኢዛ ካዎቴꬃን ሄꬓንꬆ ማራን ሹሚዳ።
DAN 5:30 ሄ ጋላሳ ኦማርስ ባቢሎኔ ካዎ ቤሊሻጾሬይ ኣሳ ኩሼን ሃይቂዴስ።
DAN 5:31 ሄ ዎዴ ኢዛስ ላይꬃይ 62 ጊዲዳ ሜዶኔ ዴሬ ኣስ ዳሪዮሲ ካዎቴꬃ ኦይኪዴስ።
DAN 6:1 ካዎ ዳሪዮሲ ባ ካዎቴꬃ ኡባ ጊዶን ባፔ ጋርሳራ ቢታ ሃሪዛ 120 ዳናታ ሹማናስ ኮዪዴስ።
DAN 6:2 ቃሴ ካዎዛስ ኣይኮይካ ፓጮንታ ማላ፥ ሄ ቢታ ሃሪዛይታ ጼላና ማላ ሄꬑ ኣሳታ ሃላቃ ኦꬂዲ ዶሪዴስ፤ ዶሬቲዳይታፔ ኢሶይ ዳኔላ።
DAN 6:3 ዳኔሊ ሃንኮ ዴሬ ኣይሲዛይታፔኔ ዳናታፔ ኣꬎ ኤራቴꬃን ኩሚዳዴ ጊዲ ቤቲዳ ጊሻስ ካዎዚ ኢዛ ባ ካዎቴꬃ ቦላ ሹማናስ ቆፒዴስ።
DAN 6:4 ሄሳፌ ጉዬ ሃንኮ ዴሬዛ ኣይሲዛይቲኔ ዳናቲ ዳኔሊ ኦꬂዛ ካዎ ኦሶዛ ቦላ ካሳሴ ዴሚዲ ሞታና ኮዪዳ፤ ጊዶ ኣቲን ዳኔሊ ኬሂ ባና ናጊዛዴ፥ ኣማኔቲዳዴኔ ኢዛ ኦሶዛ ቦላ ዎሶይ ባይንዳ ጊሻስ ኢዛፔ ሞሮ ዴማናስ ዳንዳይቤቴና።
DAN 6:5 ሄሳ ጊሻስ ኢስቲ ባ ጋርሳን፥ «ኑ ዳኔላ ሞታናስ ኮይኮ ኢዛ ጾሳ ዎጋ ጋሶንፔ ኣቲን ሃራ ኦጌራ ኑ ኢዛ ሞታናስ ኣይ ሞሮካ ዴማናስ ዳንዳዮኮ» ጊዳ።
DAN 6:6 ሄሳፌ ጉዬ ዴሬ ኣይሲዛይቲኔ ዳናቲ ኢሲ ቦላ ካዎዛኮ ቢዲ፥ «ካዎ ዳሪዮሳ! ኔኒ ሜርናስ ካዎታ!
DAN 6:7 ኑኒ ኔ ካዎቴꬃ ጋርሳን ዴራ ኣይሳናስ ኡቲዳይቲ ካዎቴꬃን ꬎቃ ሹሜቲ፥ ሞኮኔቲ፥ ዳናቲ፥ ዴሬዛ ኣይሲዛይቲኔ ዞሪዛይቲ፥ ኑኒ ኢሲፌ ዞሬ ቃቺዳ ኢሲ ሚሺ ዴስ፤ ሄሲካ ሃቺፌ ቢዲ ሄꬑ ታሙ ጋላስ ጋካናስ ኣይ ኣሲካ ኔናፔ ኣቲን ሃራ ኣይ ጾሲካ ዎይኮ ሃራ ኣስ ዎሶንታ ማላ ኔ ኣዋጃ፤ ሄሳ ሄ ኣዋጃ ኦꬆንታዴይ ጋሞታ ኦላን ዬጌታና ማላ ኔ ኣዛዛ።
DAN 6:8 ሄሳ ጊሻስ ካዎ! ሃይሲ ኣዋጃዚ ሜዶኔኔ ፓሪሴ ዎጋ ማላ ላሜቶንታ ሚኖ ጊዳና ማላ ኔኒ ኢዛ ቦላ ኔ ፒሪማ ዎꬃ» ጊዳ።
DAN 6:9 ሄሳ ጊሻስ ካዎ ዳሪዮሲ ኣዋጆዛ ጻፊ ፓራሚዲ ኬሲዴስ።
DAN 6:10 ዳኔሊ ኣዋጃዚ ፓራሜቲዲ ኬዚዳይሳ ኤሪዳ ማላ ባሶ ቢዴስ፤ ፖቄ ቦላ ማስኮቴይ ዬሩሳላሜ ባጋ ሲሚዲ ዶዬቲ ዲዛ ኪፊሌዛን ካሴ ዎሲዛይሳꬆ ጋላስ ጋላስ ሄꬑቶ ጉልባቲዲ ዎሲዴስ፤ ባ ጾሳካ ጋላቲዴስ።
DAN 6:11 ሄይቲ ዙፔቲዳ ኣሳቲ ኢሲፌ ቢዲ ዳኔሊ ባ ጾሳ ዎሲሺን ዴሚዳ።
DAN 6:12 ኡባይካ ኢሲፌ ካዎዛኮ ቢዲ፥ «ካዎ! ኔኒ ሃይሳፌ ካሴ ቢዲ ሄꬑ ታሙ ጋላስ ጋካናስ ኔፔ ኣቲን ኣሲ ሃራ ኣይ ጾሳሲካ ዎይኮ ኣሳስ ሆኪ ጎይኒዛ ኣሲ ጋሞታ ኦላን ዬጌታና ማላ ኣዋጃ ፓራማ ኬሳቤኪ?» ጊ ኦይቺዳ። ካዎዚካ «ኤ፥ ሜዶኔኔ ፓሪሴ ዎጋ ማላ ላሜቶንታ ሚኖ ኣዋጃይ ኣዋጄቲዴስ» ጊዴስ።
DAN 6:13 ኢስቲካ፥ «ካዎ! ሂስቲን ሄኮ ዩሁዳፔ ዲኤቲ ዪዳይታፔ ኢሶይ ዳኔሊ ኔናኔ ኔ ጻፋ ኬሲዳ ኣዋጃዛ ቦንቼና፤ ኢዚ ሃኢካ ጋላስ ጋላስ ሄꬑቶ ባ ጾሳ ዎሴስ» ጊዳ።
DAN 6:14 ካዎዚካ ሄሳ ሲዪዲ ኬሂ ጬጪዴስ፤ ዳኔላ ኣሻናስ ቆፋ ቃቺዴስ፤ ኣርሼይ ዉላና ጋካናስ ኢዛ ኣሻና ኦጌ ሜꬋናስ ዳፌቲዴስ።
DAN 6:15 ኣሳቲካ ኢሲፌ ካዎዛኮ ቢዲ «ካዎ! ሜዶኔኔ ፓሪሴ ዎጋን ኢሲ ካዎይ ባ ኣዋጂዳ ኣዋጃ ዎይኮ ባ ኣዛዚዳ ኣዛዞ ላማናስ ዳንዳዮንታይሳ ኔ ኤራ!» ጊዳ።
DAN 6:16 ሄሳ ጊሻስ ዳኔሊ ኦይኬቲ ዪዲ ጋሞታ ኦላን ዬጌታና ማላ ካዎዚ ኣዛዚዴስ። ካዎዚካ ዳኔላ፥ «ኔኒ ኡባ ዎዴ ኣማኔቴꬃን ኢዛስ ጎይኒዛ ኔ ጎዳይ ኔና ኣሾ» ጊዴስ።
DAN 6:17 ኦላዛ ዶና ሹቻራ ጎርዲዲ ዳኔላ ቦላ ኦሴቶይሲ ላሜቶንታ ማላ ካዎዚ ባ ሚዲጋ ማታሜኒኔ ሹሜታ ሚዲጋ ማታሜን ሾጪዴስ።
DAN 6:18 ሄሳፌ ጉዬ ካዎዚ ጌዴ ባሶ ካዎ ኬꬅ ሲሚዴስ፤ ካዎካ ሚቤና፤ ኢዛ ኡፋይሲዛ ሚሺ ኢዛኮ ሺቆንታ ማላ ኢጺዲ ꬊስኮይ ባይንዳ ኣቂዴስ።
DAN 6:19 ማላዶ ዎንታራ ቡሮ ባዞይ ዞኢሺን ካዎዚ ዴንዲዲ ኤሶን ጋሞታ ኦላኮ ቢዴስ።
DAN 6:20 ኢዚ ሄ ጋኪዳ ማላ ጬጪሼ፥ «ዴኦ ጾሳ ኦሳንቻ ዳኔላ! ኔኒ ኢዛስ ኣማኔቴꬃን ኦꬂዛ ኔ ጾሳይ ኔና ጋሞታፔ ኣሻናስ ዳንዳይዴ?» ጊዲ ጼይጊዴስ።
DAN 6:21 ዳኔሊካ ኢዛስ፥ «ካዎ! ኔኒ ሜርናስ ካዎታ!
DAN 6:22 ጋሞቲ ታና ቆሆንታ ማላ ጾሲ ባ ኪታንቻ ታኮ ኪቲዲ ኢስታ ዶና ጎርዲዴስ፤ ኢዚ ሄሳꬆ ኦꬂዳይ ታኒ ኢዛ ኣቻን ጺሎኔ ኔናካ ታኒ ቆሆንታይሳ ኢዚ ኤሪዛ ጊሻሳ» ጊ ዛሪዴስ።
DAN 6:23 ካዎዚ ኬሂ ኡፋዬቲዴስ፤ ዳኔላካ ጋሞ ኦላ ጊዶፌ ኬሳና ማላ ኣዛዚዴስ። ዳኔሊ ባ ጾሳን ኣማኔቲዳ ጊሻስ ኢዚ ኦላፌ ኬዚዳ ዎዴ ኢዛ ቦላ ኢሲ ቆሆይካ ጋኪቤና።
DAN 6:24 ሄሳፌ ጉዬ ካሴ ዳኔላ ዎርዶራ ሞቲዳ ኣሳቲ ባ ማቼታራ፥ ባ ናይታራ ኦይኬቲ ዪዲ ጋሞታ ኦላን ዬጌታና ማላ ካዎዚ ኣዛዚን ጋሞታ ኦላን ኢስታ ዬጊዳ፤ ኢስቲ ኦላን ዱጌ ጋኮንታ ዲሺን ጋሞቲ ፑዚ ዬጊዲ ኢስታ ሜቄꬃታ ኒፊፊ ሂስቲ ሜንꬄሬꬂዳ።
DAN 6:25 ሄሳፌ ጉዬ ካዎ ዳሪዮሲ ኣላሜ ቦላ ዲዛ ዴራስ፥ ካዎቴꬃታሲኔ ዱማ ዱማ ቃላን ሃሳይዛ ኣስ ኡባስ ሃይሳፌ ካሊዛ ኪታ ጻፊ ኪቲዴስ፤ «ሳሮይ ኢንቴስ ጊዶ!
DAN 6:26 ታ ካዎቴꬃን ዲዛ ዴሬይ ዉሪካ ዳኔላ ጾሳስ ያያና ማላኔ ኢዛ ቦንቻና ማላ ታኒ ኣዋጃ ኬሳዲስ፤ ኢዚ ሜርናስ ዴኢዛ ዴኦ ጾሳ፤ ኢዛ ካዎቴꬂ ꬋዮንታ ካዎቴꬃ፤ ኢዛ ካዎቴꬃስካ ዉርሴꬂ ዴና።
DAN 6:27 ኢዚ ኣሼሲኔ ማዴስ፤ ኢዚ ሳሎኒኔ ሳኣን ማላታታኔ ማላሊሲዛ ሚሻታ ኦꬄስ፤ ኢዚ ዳኔላ ጋሞታ ዶናፔ ኣሺዴስ» ጊዴስ።
DAN 6:28 ሄሳ ጊሻስ ዳኔሊ ካዎ ዳሪዮሳ ካዎቴꬃ ዎዴኒኔ ፓሪሴ ዴሬ ኣስ ቂሮሳ ካዎቴꬃ ላይꬅ ኡባን ኢዛስ ዴኦይ ኢንጄቲዴስ።
DAN 7:1 ባቢሎኔ ካዎ ቤሊሻጾሬይ ካዎቲዳ ኮይሮ ላይꬅ ዳኔሊ ባ ኣልጋን ኢቺ ዲሼ ኣጉሞኔ ኣጁታ ቤዪዴስ፤ ሄሳፌ ጉዬ ባ ቤኢዳ ኣጉሞዛ ጻፊዴስ።
DAN 7:2 ዳኔሊ፥ «ሳሎ ጫርኮ ኦይዳቲ ዎጋ ኣባ ቃꬂሺን ኦማርስ ኣጁታን ቤያዲስ።
DAN 7:3 ዱማ ዱማ ቆሞ ዎጋ ጊታ ኦይዱ ዶኣቲ ኣባፌ ኬዚዳ።
DAN 7:4 «ኮይሮ ዶኣዚ ጋሞ ሚሳቴስ፤ ኢዛስ ጎሌ ቄፌ ማላ ቄፌቲ ዴቴስ፤ ታኒካ ጼሎን ዲሺን ሄ ቄፌቲ ሾዴቲ ሾዴቲ ዎꬊዳ፤ ሄ ዶኣዚ ꬎቁ ጊዲ ኣሳ ማላ ናምኡ ቶሆታን ኤቂዴስ፤ ኢዛስ ኣሳ ዎዚናይ ኢሜቲዴስ።
DAN 7:5 «ናምኣንꬆ ዶኣዚ ዛርዶ ዶኣ ሚሳቴስ፤ ኢዚ ኢሲ ሚሌን ꬎቁ ጊ ኤቂዴስ፤ ኢዚ ባ ኣቻን ሄꬑ ሚሌ ሜቄꬃታ ሳጺ ኦይኪዴስ፤ ‹ኔ ኮዪዳ ኬና ኣሾ ማ› ጊዛ ቃላይ ኢዛስ ዮቴቲዴስ።
DAN 7:6 «ታኒ ሄሳ ጼሎን ዲሺን ማሄ ሚሳቲዛ ሃራ ዶኣይ ኬዚዴስ፤ ኢዛስ ካፎ ቄፌ ሚሳቲዛ ኦይዱ ቄፌቲ ዞኮ ቦላ ዴቴስ። ኦይዱ ሁኤቲ ኢዛስ ዴቴስ፤ ጎዳቴꬂካ ኢዛስ ኢሜቲዴስ።
DAN 7:7 «ሄሳፌ ጉዬ ኦይዳንꬆ ዶኣዛ ታ ቤያዲስ፤ ኢዚካ ኬሂ ባቢሲዛ፥ ዳጋንꬂዛዚኔ ዎልቃማ ዶኣ፤ ሄ ዶኣዛስ ፑዜሬꬂዛኔ ሜንꬄሬꬂዛ ቢራታ ሚሳቲዛ ጊታ ኣቻቲ ዴቴስ። ኢዚ ሚሺን ኣቲዳይሳ ባ ቶሆታን ዬꬌቴስ፤ ካሴ ኣꬊዳ ዶኣታ ኡባፌ ኢዚ ዱማ፤ ኢዛስ ታሙ ካጬቲ ዴቴስ።
DAN 7:8 «ታኒ ካጬታ ጊሻስ ቆፋን ዲሺን ካጬታ ጊዶራ ሃራ ኢሲ ጉꬃ ካጬይ ኬዚዴስ። ኮይሮ ካጬታፔ ሄꬓቲ ሾዴቲ ዎꬊዳ፤ ሄ ጉꬃ ካጬዛስ ኣሳ ኣይፌይኔ ኦቶሬቴꬃን ሃሳይዛ ዶናይ ዴስ።
DAN 7:9 «ታ ጼሎን ዲሺን ኣራታቲ ሚጬቲዳ፤ ቤኒ ቤኒሶፌ ዲዛይሲ ኢዛ ቦላ ኡቲዴስ፤ ኢዛ ማይኦይ ሻቻ ማላ ቦꬃ፤ ኢዛ ቢናናይካ ፑቶ ማላ ቦꬃ፤ ኢዛ ኣራታይ ታማ ላጮ፥ ኢዛ ፓራ-ጋሬቲ ኤጺዛ ታማ ማላ።
DAN 7:10 ኢዛ ሲንꬃራ ታማ ሃꬂ ፑልቲ ጎጌስ፤ ኢዛስ ዳሮ ሺያን ቆዴቲዛ ኦሳንቻቲ ዴቴስ፤ ቆዳይ ባይንዳ ዴሬይ ኢዛ ሲንꬃን ኤቂዴስ፤ ፒርዳ ሺሎታይካ ኡቲዴስ፤ ማጻፋቲካ ዶዬቲዳ።
DAN 7:11 «ታኒ ሄ ካጬዚ ሃሳይዛ ኦቶሮ ቃላፔ ዴንዲዳይሳን ታ ኢዛኮ ጉጃ ጉጃ ጼላዲስ፤ ሄ ዶኣዚ ኦይኬቲዲ ሹኬታና ጋካናሲኔ ኢዛ ኣሾይ ሲፋሌቲዲ ጌዴ ላጪዛ ታማን ኦሌታና ጋካናስ ታኒ ጼሎ ኣጋቤኬ።
DAN 7:12 ሃንኮ ኣቲዳ ዶኣታ ጎዳቴꬂ ኢስታፌ ኤኬቲዴስ፤ ጊዶ ኣቲን ጉꬃ ዎዴስ ኢስቲ ሼምፖራ ፓጻ ዴኣና ማላ ፒቃዴይ ኢሜቲዴስ።
DAN 7:13 «ኣሳ ና ሚሳቲዛዴይ ሳሎ ሻራይ ኢዛ ጊዶꬂ ኦይኪን ዪዛይሳ ኦማርስ ኣጁታን ቤያዲስ፤ ኢዛ ጌዴ ቤኒ ቤኒሶፌ ዲዛይሳኮ ሺሺዳ።
DAN 7:14 ኣላሜ ቦላ ዲዛ ኣስ ኡባይ፥ ካዎቴꬃቲ ኡባይኔ ዱማ ዱማ ቃላን ሃሳይዛ ዛሬቲ ኡባይ ኢዛስ ሃጋዛና ማላ ጎዳቴꬂ፥ ቦንቾይኔ ካዎቴꬂ ኢዛስ ኢሜቲዴስ፤ ኢዚ ሜርናስ ሃራና፤ ኢዛ ካዎቴꬃስካ ዉርሴꬂ ዴና።
DAN 7:15 «ታኒ ዳኔሊ ሃይሳ ታ ቤኢዳ ኣጁታን ኬሃ ሜቶታዲስ፤ ታ ሼምፖያካ ጬጫዱስ።
DAN 7:16 ታስ ሄን ጋዳን ኤቂዳይታፔ ኢሳኮ ሺቃዳ ሃይሳ ኡባ ቱሙ ቢርሼꬂ ኣዛኮ ኦይቻዲስ፤ ኢዚካ ታስ ሄሳ ኡባ ቢርሼꬅ ዮቲዴስ።
DAN 7:17 ኢዚካ ታስ፥ ‹ሃይቲ ዎጋ ጊታ ኦይዱ ዶኣቲ ቢታፌ ዴንዳና ኦይዱ ካዎታ።
DAN 7:18 ጊዶ ኣቲን ኡባፌ ꬎቃ ጾሳ ጌሻቲ ኢዛ ካዎቴꬃ ባስ ኤካና፤ ሜርናስ ኦይካና፤ ኤ ሜርናስ ኢስቲ ኦይካና› ጊዴስ።
DAN 7:19 «ሄሳፌ ጉዬ ታኒ ሃንኮ ዶኣታ ኡባፌ ዱማቲዲ ያሺሲዛ ኦይዳንꬆ ዶኣሲ ዲዛ ቱሙ ቢርሼꬃ ኤራናስ ኮያዲስ። ሄ ዶኣስ ቢራታ ኣቺኔ ጻርቂማላ ጹጉንꬂ ዴስ፤ ኢዚ ባናራ ጋይቲዳ ኡባ ሜንꬄሬꬂ ሜስ፤ ሚሺን ኣቶይሳ ባ ቶሆን ዬꬌሬቴስ።
DAN 7:20 ቃሴካ ሄ ዶኣዛ ሁኤን ዲዛ ታሙ ካጬታ ጊሻስ፥ ኢስታ ጊዶን ሞኪዳ ካጬ ጊሻሲኔ ሄ ካጬታ ጊዶፌ ሾዴቲዳ ሄꬑ ካጬታ ጊሻስ ሄሳꬆካ ሃራታፔ ኣꬊዛ ኣሳ ኣይፌ ሚሳቲዛ ኣይፌታ ጊሻስ፥ ኦቶሮቴꬃን ሃሳይዛ ዶናይ ኢዛስ ዲዛ ሃ ካጬዛ ጊሻስ ታ ኤራናስ ኮያዲስ።
DAN 7:21 ቤኢቴ ታ ጼሊሺን ሃይሲ ሃ ካጬዚ ጌሻታ ቦላ ኦላ ኣዋጂዲ ኢስታ ጾኒዴስ።
DAN 7:22 ሄሲካ ሃኒዳይ ቤኒ ቤኒሶፌ ዲዛይሲ ያና ጋካናሲኔ ኡባፌ ꬎቃ ጾሳይ ጌሻታስ ቱማ ፒርዳ ፒርዳና ጋካናሳ። ጌሻቲ ኢዛ ካዎቴꬃ ላቲዛ ዎዴይ ጋኪዴስ።
DAN 7:23 «ኢዚካ ታስ ሄሳ ቢርሼꬃ፥ ‹ሄ ኦይዳንꬆ ዶኣዚ ቡሮፔ ቢታ ቦላ ዴንዳና ኦይዳንꬃ ካዎቴꬃ፤ ሄሲ ሄ ካዎቴꬃይ ኡባፌ ዱማ ጊዲዳ ጊሻስ ኢዚ ቢታ ኡባ ዎራጂዲ ባ ቶሆን ዬꬋና፥ ሊቂሳናኔ ማና።
DAN 7:24 ታሙ ካጬቲ ሄ ካዎቴꬃ ጊዶፌ ኬዛና ታሙ ካዎታ፤ ሄሳፌ ጉዬ ካሴ ካዎታፔ ሃራ ዱማ ካዎይ ዴንዲዲ ሄ ታሙ ካዎታፔ ሄꬓታ ሺሪ ዬጋና።
DAN 7:25 ኢዚ ኡባፌ ꬎቃ ጾሳ ቦላ ማካላ ቃላ ሃሳያና፤ ኢዛ ጌሻታ ኢዚ ዋዪሳና፤ ኢዛ ቦንቾ ባኣሌታኔ ኢዛ ዎጋ ላማናስ ኢዚ ዳፌታና፤ ጌሻቲ ሄꬑ ላይꬂኔ ባጋ ጋካናስ ኢዛ ጎዳቴꬃ ጋርሳን ዴኣና።
DAN 7:26 « ‹ሄሳፌ ጉዬ ፒርዳ ኣራታይ ሚጬታና፤ ኢዛ ካዎቴꬃይ ኢዛፔ ቃሬቲ ኤኬቲን ኢዚ ሜርናስ ሙሌራ ꬋያና።
DAN 7:27 ሳሎፔ ጋርሳራ ዴኢዛ ካዎቴꬃ ኡባ ማታይ፥ ዎልቃይኔ ጊታቴꬃይ ኡባፌ ꬎቃ ጾሳ ዴሬ ጌሻታስ ኢሜታና። ኢዛ ካዎቴꬃይካ ሜርና ካዎቴꬅ ጊዳና፤ ዴሬዛ ሃሪዛይቲ ኡባቲ ኢዛስ ኣዛዜታናኔ ኢዛስ ጎይናና› ጊዴስ።
DAN 7:28 «ታ ኣጁታ ቢርሼꬂ ሃይሳን ፖሌቴስ፤ ታኒ ዳኔሊ ታ ቆፋን ኬሃ ጬጫዲስ፤ ታ ኣይፌሶይ ላሜቲዴስ፤ ጊዶ ኣቲን ታኒ ሃይሳ ዉርሳካ ታ ዎዚናን ቁምኣ ኦይካዲስ» ጊዴስ።
DAN 8:1 ቤሊሻጾሬይ ካዎቲዳ ሄꬓንꬆ ላይꬃን ታኒ ዳኔሊ ሃይሳፌ ካሴ ቤኢዳይሳፌ ሃራ ኣጁታ ቤያዲስ።
DAN 8:2 ኤላማ ኣዉራጃን ሱሳ ጊምቤ ማታን ኣጁታን ታና ቤያዲስ፤ ኣጁታዛን ታኒ ኡላዬ ሻፋ ኣቻን ዳይስ።
DAN 8:3 ታኒ ꬎቁ ሂስታ ጼላሼ ሄ ሻፋዛ ኣቻን ናምኡ ጊታ ካጬቲ ዲዛ ኢሲ ꬋርሾይ ኤቂዳይሳ ቤያዲስ፤ ካጬቲ ኣዱሳ፤ ሄ ካጬታፔ ኢሶይ ኣዱቂ ኤኬስ፤ ጊዶ ኣቲን ኢዚ ሞኪዳይ ጉዬፔ።
DAN 8:4 ሄ ꬋርሾዚ ባ ካጬን ኣርሼይ ዉሊዛ ባጋ፥ ፑዴሃ ባጋኔ ዱጌሃ ባጋ ቃይጬስ፤ ኣይ ሜዶሳይካ ኢዛራ ኤቄታና ዳንዳይቤና፤ ኢዛ ኩሼፔካ ኣሻና ዳንዳይዛይ ዴና፤ ኢዚ ባ ኮዪዳ ማላ ኦꬂዴስ፤ ሂስቲዲ ካሴፔካ ሚኒ ሚኒ ቢዴስ።
DAN 8:5 ታኒ ሄሳ ሄ ኣጁታዛ ጊሻስ ዩሻ ቆፒሺን ኢዛ ኣይፌታፔ ጊዶን ጊታ ካጬይ ዲዛ ዴይሻ ኦርጌይ ቶሆን ጋዴ ዬꬎንታ ዲሼ ቢታ ካንꬂዲ ቆፖንታ ኣርሼይ ዉሊዛ ባጋፌ ዪዴስ።
DAN 8:6 ካሴ ሻፋ ኣቻን ኤቂ ዲሺን ታ ቤኢዳ ናምኡ ካጬራ ዲዛ ꬋርሾዛኮ ሃንቆራ ዲዲሚ ዪዲ ኢጪዴስ።
DAN 8:7 ኢዚ ꬋርሾዛኮ ሺቂሺን ታ ቤያዲስ፤ ኢዚ ꬋርሾዛ ሃንቆን ኢጪዲ ꬋርሾዛ ካጬታ ናምኣታ ሜንꬄሬꬂ ዬጊዴስ፤ ꬋርሾዚካ ኢዛራ ኤቄታናስ ዎልቃ ꬋይዴስ፤ ሄሳ ጊሻስ ኦርጌዚ ꬋርሾዛ ዱጌ ቢታ ቦላ ዬጊዲ ኢዛ ባ ቶሆን ዬꬊ ኤቂዴስ፤ ꬋርሾዛ ዴይሻፌ ኣሻና ዳንዳይዛይ ቤቲቤና።
DAN 8:8 ዴይሻ ኦርጌዚ ኬሂ ሚኒ ሚኒ ዎልቃቲ ቢዴስ፤ ጊዶ ኣቲን ኢዚ ባ ዎልቃን ሚኒ ሚኒ ቢዳ ዎዴ ኢዛስ ጊታ ካጬዚ ሜቂ ዎꬊዴስ፤ ሄ ካጬዛሶሆዛን ሃራ ኦይዱ ጊታ ካጬቲ ሞኪዳ፤ ኢስቲ ኡባይካ ሳሎ ጫርኮ ኦይዳታ ባጋ ሲሚ ዲጪዳ።
DAN 8:9 ሃይታ ኦይዱ ካጬታፔ ኢሳ ቦላ ሃራ ጉꬃ ካጬይ ሞኪዴስ፤ ሄ ጉꬃ ካጬዛ ዎልቃይ ዱጌሃ ባጋኔ ኣርሼይ ሞኪዛ ባጋ ጌዴ ሎኦ ዴሬይኮ ኬሂ ዲጪ ዲጪ ቢዴስ።
DAN 8:10 ፑዴ ሳሎ ሜꬌቴꬃታኮ ጋካናስ ꬎቁ ጊዴስ፤ ሳሎ ጾሊንቴታፔ ኣማርዳይታ ዱጌ ቢታ ቦላ ዬጊዲ ኢስታ ቦላ ዱሬቲዴስ።
DAN 8:11 ሳሎን ዲዛ ሜꬌቴꬃታ ሃላቃራ ጊናታና ኮዪዲ ባና ꬎቁ ዶቁ ሂስቲዴስ፤ ጋላስ ጋላስ ሺቂዛ ያርሾዚ ኢዛስ ሺቆንታ ማላ ዲጊዴስ፤ ጾሳ ኬꬃካ ቱኒሲዴስ።
DAN 8:12 ማካላቴꬃ ጋሶን ጌሻታ ኦላንቻቲኔ ጋላስ ጋላስ ሺቂዛ ያርሾዚ ኢዛስ ኢሜቲዴስ፤ ኢዚ ኦꬂዛ ሚሺ ዉሪካ ኢዛስ ጊጊ ጊጊ ቢዴስ፤ ቱማይካ ዱጌ ሳኣን ኦሌቲዴስ።
DAN 8:13 ሄሳፌ ጉዬ ጌሻታፔ ኢሶይ ሃሳይሺን ታ ሲያዲስ፤ ቃሴ ጌሻታፔ ሃራይ ኢሶይ ኢዛስ፥ «ሃች ሃች ያርሺዛ ያርሾ ኣጁታይ ፖሌታና ዎዴይ ኣይዴ? ሃ ማካላቴꬃ ጋሶን ዪዛ ባሻይ ኣዉዴ ጋካናስ ጋምኣኔ? ቃሴካ ሳሎ ኦላንቻቲኔ ጾሳ ኬꬃይ ኣዉዴ ጋካናስ ዬꬌቲሼ ዳኔ?» ጊ ኦይቺዴስ።
DAN 8:14 ሄ ኦይሼቲዳ ጌሻይካ፥ «2,300 ማላዶኔ ኦማርስ ጋካናስ ጋምኣና፤ ሄሳፌ ጉዬ ጾሳ ኬꬃይ ጌያና» ጊሺን ታ ሲያዲስ።
DAN 8:15 ታኒ ዳኔሊ ሃይሳ ኣጁታዛ ጼሊሺኒኔ ዩሻ ቆፒሺን ኣሴ ሚሳቲዛይ ታ ሲንꬃን ኤቂዴስ።
DAN 8:16 ኡላዬ ሻፋፔ ሄ ፒንꬃን፥ «ጋብሬሌ! ሃይሳ ኣዴዛስ ኣጁታዛ ቢርሼꬅ ዮታ!» ጊ ዋሲዛ ኣሳ ጬንጉርስ ሲያዲስ።
DAN 8:17 ጋብሬሌይ ታ ኤቃ ዲዛሶ ማቲ ማቲ ዪሺን ታ ዳጋማዳ ሲንꬃ ጉꬅ ጉፋናዲስ፤ ኢዚካ፥ «ኣሳ ናዉ! ሃይሲ ኣጁታዚ ቤሲዛይ ኣላሜ ዉርሴꬃ ጊሻስ ጊዲዳይሳ ኔ ኣኬካ» ጊዴስ።
DAN 8:18 ኢዚ ሄሳ ዮቲሺን ታኒ ቢታ ቦላ ሲንꬃ ጉꬅ ጉፋናዲስ፤ ኬሃ ꬊስኮ ሴራዲስ፤ ኢዚ ጊዲኮ ታና ካፊዲ ፑዴ ዴንꬂ ታ ቶሆን ኤሲዴስ።
DAN 8:19 ኢዚ ታና፥ «ሃይሲ ኣጁታዚ ኣላሜ ዉርሴꬃን ሃናና ዮኦታ ቤሴስ፤ ጉዬፔ ሃንቆ ዎዴ ኣዚ ሃናናኮ ታ ኔስ ዮታና።
DAN 8:20 ኔ ቤኢዳ ናምኡ ካጬራ ዲዛ ꬋርሾዚ ሜዶኔኔ ፓሪሴ ካዎቴꬃታ ቤሴስ።
DAN 8:21 ዴይሻ ኦርጌዚ ጊሪኬ ካዎቴꬃ ቤሴስ፤ ኢዛ ኣይፌታ ጊዶን ዲዛ ጊታ ካጬዚ ኮይሮ ካዎዛ ቤሴስ።
DAN 8:22 ሜቂዳሶዛን ሞኪዳ ኦይዱ ካጬቲ ሄ ካዎቴꬃይ ኦይዱ ኬዛናይሳ ቤሴቴስ፤ ጊዶ ኣቲን ኮይሮ ካዎቴꬃ ማላ ሚኖ ጊዶንታይሳ ቤሴስ።
DAN 8:23 «ኢስታ ካዎቴꬃ ዉርሴꬃ ዎዴይ ጋኪሺን ማካላንቻቲ ኢታቴꬃን ጉጂ ጉጂ ቢዛ ዎዴ ባቢሲዛ ሲንꬂ ዲዛ ባሌꬂዛ ካዎይ ካዎታና።
DAN 8:24 ሄ ካዎዚ ኬሂፔ ሚናና፤ ጊዶ ኣቲን ባ ዎልቃን ሚኔና፤ ሻጲዛ ኢታ ሚሽ ኦꬃና፤ ኢዚ ኦꬂዛ ኡባይ ኢዛስ ጊጋ ጊዳና፤ ጊታ ኣሳታኔ ጌሻታ ꬋይሳና።
DAN 8:25 ኢዚ ማካላንቻ ጊዲዳ ጊሻስ ሾጬቺ ሾጬቺ ዱሬታና፤ ኢዚ ባና ባርካ ጊታ ማላ ቆዳና፤ ሳሮን ዶስ ጊሺን ኢዚ ዳሮታ ꬋይሳና፤ ካዎታ ካዎ ቦላ ኢዚ ዴንዳና፤ ሂስቲኮካ ዛሪዲ ኢዚ ꬋያና፤ ጊዲኮካ ኣሳ ዎልቃን ጊዴና።
DAN 8:26 «ማላዶኔ ኦማርሳ ዎዴ ሺቂዛ ያርሾ ጊሻስ ኔ ቤኢዳ ኣጁታይ ቱማ፤ ጊዶ ኣቲን ሃ ኣጁታይ ፖሌታናይ ቡሮ ዳሮ ላይꬃፌ ጉዬን ጊዲዳ ጊሻስ ኔ ዎዚናን ቁምኣ ኦይካ» ጊዴስ።
DAN 8:27 ታስ ዳኔላስ ዎልቃይ ኢጺዴስ፤ ዳሮ ዎዴካ ሳኬታ ኢቻዲስ፤ ሄሳፌ ጉዬ ዴንዳዳ ካዎ ኦሶሶ ባዲስ፤ ታ ቤኢዳ ኣጁታን ኬሃ ዳጋማዲስ፤ ታ ኤራፔ ቦላ ጊዲዴስ።
DAN 9:1 ሜዶኔ ዴሬ ኣስ ኣርጼኪሲሴ ና ዳሪዮሲ ባቢሎኔን ካዎቲዴስ።
DAN 9:2 ኢዚ ካዎቲዳ ኮይሮ ላይꬂ ታኒ ዳኔሊ ካሴ ናቤ ኤርማሳስ ኢሜቲዳ ጎዳ ቃላ ማላ ዬሩሳላሜይ ላሌታዳ ላፑን ታሙ ላይꬅ ጋምኣናይሳ ጌሻ ማጻፋታፔ ኣኬካዲስ።
DAN 9:3 ሄሳ ጊሻስ ታኒ ማቃ ማይኣዳኔ ቢዲንꬃ ቦላ ኡታዳ ጾማናስ፥ ዎሳናሲኔ ጋናታናስ ታ ኣይፌ ፑዴ ጎዳ ጾሳኮ ዴንꬃዲስ።
DAN 9:4 ታኒ ጎዳ ታ ጾሳ ዎሳሼኔ ፓጻሼ፥ «ኣቤት ጎዳ ጾሳዉ፥ ኔና ሲቂዛይታሲኔ ኔ ኣዛዞታ ናጊዛይታስ ኔኒ ኔ ጫቂዳ ቃላኔ ሜርና ሲቆዛ ናጊዛ ጊታኔ ያሺሲዛ ጾሳ።
DAN 9:5 ኑኒ ጊዲኮ ናጋራ ኦꬂዶስ፤ ኔና ቆሂዶስ፤ ኢታ ሚሽ ኦꬂዶስ፤ ማካሊዶስ፤ ኔ ኣዛዞታፔኔ ኔ ዎጋፔ ካሬ ኬዚዶስ።
DAN 9:6 ኑኒ ኑ ካዎታስ፥ ኑና ኣይሲዛይታስ፥ ቤኒ ኑ ኣዋታሲኔ ሄ ቢታይ ቦላ ዲዛ ዴሬ ኡባስ ኔ ሱንꬃን ዮቲዳ ናቤ ጊዲዳ ኔ ኦሳንቻታ ሲዪቤኮ።
DAN 9:7 «ኣቤት ጎዳዉ! ኔኒ ጺሎ፤ ኑኒ ጊዲኮ ኔስ ኣማኔቶንታ ጊሻስ ኑና ቢታ ኡባ ቦላን ኔ ላሊዳ ዩሁዳ ኣሳይ፥ ዬሩሳላሜ ኣሳይኔ ኩሜꬃ ኢስራኤሌ ኣሳይ ማታን ጊዲን ሃሆን ዲዛ ኡባይ ሃኢ ዬላቲዶስ።
DAN 9:8 ኣቤት ጎዳዉ! ኑኒ ዉሪካ ኔና ቆሂዳ ጊሻስ ኑ ካዎታ፥ ኑና ኣይሲዛይታኔ ካሴ ኑ ኣዋታኔ ኑና ዬላይ ጋኪዴስ።
DAN 9:9 ኣቤት ጎዳ ኑ ጾሳዉ! ኑኒ ኔ ቦላ ማካሊኮካ ኔኒ ማሪዛኔ ኣቶ ጊዛ ጾሳ።
DAN 9:10 ኣቤት ጎዳ ኑ ጾሳዉ! ኑኒ ኔስ ኣዛዜቲቤኮ፤ ኔ ኦሳንቻ ጊዲዳ ናቤታ ባጋራ ኔ ኢሚዳ ዎጋታ ናጊቤኮ።
DAN 9:11 ኢስራኤሌ ኣሳይ ኡባይ ኔስ ኣዛዜቲቤና፤ ኔ ዎጋካ ኡባ ሜንꬂዲ ካሬ ኬዚዴስ። «ኑኒ ኔና ቆሂዳ ጊሻስ ኔ ኦሳንቻዛ ሙሴ ዎጋን ጻፌቲዳ ጫቆዚኔ ቃንጌꬃዚ ኑ ቦላ ጋኪዴስ።
DAN 9:12 ‹ኢንቴ ቦላኔ ኢንቴና ካሌꬂዛይታ ቦላ ታ ጊታ ሜቶ ኤሃና› ጋዳ ካሴ ኔ ዮቲዳይሳ ኡባ ኑ ቦላ ፖላዳሳ፤ ሄ ዎዴ ዬሩሳላሜ ቦላ ጋኪዳ ቂጻቴ ማላይ ሃራሶ ኣዋንካ ጋኪቤና።
DAN 9:13 ካሴ ሙሴ ዎጋን ጻፌቲዳ ማላ ኔኒ ሃይሳ ሃ ሜቶዛ ዉርሳካ ኑ ቦላ ኤሃዳሳ፤ ጎዳ ኑ ጾሳዉ! ሄሲ ዉሪ ሃኒንካ ኑኒ ኑ ናጋራፔ ሲሚዲኔ ቱማ ካሊዲ ኔፔ ማሮቴꬅ ዴማናስ ኮዪቤኮ።
DAN 9:14 ጎዳ ኑ ጾሳይ ባ ኦꬂዛ ኦሶ ኡባን ጺሎ፤ ጎዳይ ኑ ቦላ ባሽ ኤሃናስ ሞꬌቲቤና።
DAN 9:15 «ኣቤት ጎዳ ኑ ጾሳዉ! ሃይሳፌ ካሴ ኔኒ ኔ ዴሬዛ ኔ ሚኖቴꬃን ጊብጼፔ ኬሳዳ ሃች ጋካናስ ኔ ሱንꬃይ ኤሬታና ማላ ኦꬃዳሳ፤ ኑኒ ጊዲኮ ናጋራ ኦꬂዶስ፤ ኔናካ ቆሂዶስ።
DAN 9:16 ኣቤት ጎዳዉ! ኔኒ ካሴ ኦꬂዳ ጺሎ ኦሶዛ ጊሻስ ጋዳ ኔ ካታማ ዬሩሳላሜፔ፥ ኔ ጌሻ ዙማፔ ኔ ሃንቆዛ ዛራ፤ ኑ ናጋራኔ ኑ ኣዋታ ቆሆ ጋሶን ዬሩሳላሜይኔ ኔ ዴሬይ ኑ ዩሾን ዲዛ ዴራ ጊዶን ቂꬌስ ኣቲዶስ።
DAN 9:17 «ኣቤት ኑ ጾሳዉ! ሃኢ ኔ ኦሳንቻ ዎሳኔ ጋናቴꬃ ሲያ፤ ኣቤት ጎዳዉ፥ ኔ ሱንꬃ ጊሻስ ጋዳ ላሌቲዳ ኔ ኬꬃኮ ኔ ሲንꬃ ዛራ።
DAN 9:18 ኣቤት ጾሳዉ! ኔ ሃይꬃ ታኮ ዛራዳ ታ ዎሳ ሲያ፤ ኔ ኣይፌ ዶይኣዳ ኑ ꬋይዛይሳኔ ኔ ሱንꬂ ጼይጌቲዳ ካታማዮ ቤኣ፤ ኑኒ ኔና ዎሲዛይ ኔ ጊታ ማሮቴꬃን ኣማኔቲዲ ኣቲን ኑ ጺሎቴꬃን ጬቄቲዲ ጊዴና።
DAN 9:19 ኣቤት ጎዳዉ! ኑ ዎሳ ኤዝጋ! ኑና ማራ! ኔኒ ሲያዳ ኦꬃ! ሃኖ ካታማይኒኔ ዴራ ቦላ ኔ ሱንꬂ ጼይጌቲዴስ፤ ጎዶ ኔ ሱንꬃ ጊሻስ ጋዳ ጋምኦፋ» ጋ ዎሳዲስ።
DAN 9:20 ታኒ ታ ናጋራኔ ታ ዴሬ ኢስራኤሌ ኣሳ ናጋራ ፓጻሼ ጌሻ ዙማ ጊሻስ ጎዳ ታ ጾሳ ሲንꬃን ኣጎንታ ዎሳዲስ።
DAN 9:21 ታኒ ዎሳ ቦላ ዳሼ ኮይሮ ኣጁታን ቤኢዳ ጋብሬሌይ ኦማርሳ ዎዴ ያርሾይ ሺቂዛ ዎዴን ታኮ ኤሶን ፒራꬊሼ ዪዴስ።
DAN 9:22 ኢዚ ታና ታማርሲሼ፥ «ዳኔላ! ሃኢ ታ ኔስ ኣꬎ ኤራቴꬂኔ ኣኬካ ኢማና ያዲስ።
DAN 9:23 ኔ ኬሃ ዶሴቲዳዴ ጊዲዳ ጊሻስ ኔ ቡሮ ዎሳ ዶሚሺን ጾሲ ኔ ዎሳ ሲዪዴስ፤ ታኒካ ሄሳ ኔስ ዮታና ያዲስ፤ ሄሳ ጊሻስ ሃኢ ታ ኔስ ዮቲዛይሳ ዎዚናን ዎꬃ፤ ኣጁታዛካ ኣኬካ።
DAN 9:24 «ማካላቴꬃ ኤሳናስ፥ ናጋራ ዲጋናስ፥ ቆሆ ዉርሳናስ፥ ሜርና ጺሎቴꬅ ኤሃናስ፥ ኣጁታኔ ቲንቢቴ ማታሜን ሾጫናስ፥ ጌሽ ጊዲዳ ጊዶ ቆልኣ ቲስታናስ ኔ ዴራ ጊሻሲኔ ኔ ጌሻ ካታማይ ጊሻስ ላፑን ታሙ ሳሚንታይ ኣዋጄቲዴስ።
DAN 9:25 «ኔ ሃይሳ ኤራ፥ ኣኬካ፤ ዬሩሳላሜ ዛሪ ኦꬃናሲኔ ኦራꬃናስ ኣዋጃይ ኬዚዳ ጋላሳፌ ዶሚዲ ሃሪዛ ቲዬቲዳዴይ ያና ጋካናስ ላፑን ሳሚንታኔ ኡሱፑን ታማኔ ናምኡ ሳሚንታ ጊዳና፤ ዬሩሳላሜ ኦጌቲኔ ኢዚስ ዲርሳቲ ዛሪ ኦራጻና፤ ሄሲ ፖሌታናይ ሜቶ ዎዴና።
DAN 9:26 ኡሱፑን ታማኔ ናምኡ ሳሚንታታፔ ጉዬን ቲዬቲዳዴይ ኣይኮ ሞሮይ ባይንዳ ኣሳ ኩሼን ሃይቃና፤ ቡሮ ያና ሃላቃዛ ኣሳቲ ዬሩሳላሜኔ ጾሳ ኬꬃ ዲፒ ሂስቲ ꬋይሳና፤ ኢዛ ዉርሴꬂካ ሃꬃ ዲኦ ማላ ያና፤ ዉርሴꬅ ጋካናስ ኦላይ ጉጂ ጉጂ ባና፤ ባሺ ኣዋጄቲዴስ።
DAN 9:27 ሃላቃዚ ዳሮ ኣሳራ ኢሲ ሳሚንታስ ጫቄታና፤ ሳሚንታስ ባጋ ቦላ ያርሾዛኔ ካꬃ ኢሞታ ዲጋና፤ ኢስታሶሆን ባሽ ኤሂዛ ቱናቴꬅ ጾሳ ኬꬅ ጌልꬃና፤ ሄሲካ ሃናናይ ሄ ባሻ ካሌꬂዛይሳ ቦላ ኣዋጄቲዳ ቂጻቴይ ፖሌታና ጋካናሳ» ጊዴስ።
DAN 10:1 ፓሪሴ ካዎ ቂሮሲ ካዎቲዳ ሄꬓንꬆ ላይꬃን ቢልጻሶሬ ጌቴቲዛ ዳኔሊ ኣጁታ ቤኢዴስ፤ ኣጁታን ኢዛስ ዮቴቲዳ ቃላይ ቱማ፤ ሄሲካ ዎልቃማ ኦላ ጊሻስ ቆንጪሲዛዛ፤ ኢዚ ሄ ኪታ ኤራና ማላ ኢዛስ ኣኬካይ ኣጁታን ኢሜቲዴስ።
DAN 10:2 ሄ ዎዴ ታኒ ዳኔሊ ሄꬑ ሳሚንታ ኩሜꬂ ዬካዲስ።
DAN 10:3 ሄꬑ ሳሚንታቲ ኣꬋና ጋካናስ ኣሾ ጊዲን ሃራ ሎኦ ካꬅ ማቤኬ፥ ዎይኔ ኡሹ ጋንጻ ኤካቤኬ፤ ሺጪሲዛ ሚሺካ ቲዬታቤኬ።
DAN 10:4 ላይꬃስ ኮይሮ ኣጊናይ ጌሊዳ ናምኡ ታማኔ ኦይዳንꬆ ጋላስ ታኒ ዎጋ ሻፋ ጼግሮሴ ኣቻን ኤቃዲስ።
DAN 10:5 ታኒ ꬎቁ ጋ ጼሊሺን ሌኤ ሃሬ ማይኢዲ ዎርቃ ቃባቶ ዳንጪዳ ኢሲ ኣስ ቤያዲስ።
DAN 10:6 ኢዛ ቦላይ ኢንቁ ማላ ጾልቄስ፤ ኢዛ ኣይፌሶይ ዎልቃንꬃ ማላ ፖፖልኡ ጌስ፤ ኢዛ ኣይፌቲካ ታማ ላጮ ሚሳቴቴስ፤ ኢዛ ቶሆቲኔ ኢዛ ኩሼቲ ታማን ቦንቂዳ ጻርቂማላꬆ ጾልቄቴስ፤ ኢዛ ቃላ ጊሪሳይ ዳሮ ዴሬ ቃላ ማላ ኮሹሜስ።
DAN 10:7 ሄ ኣጁታዛ ታኒ ዳኔሊ ጻላ ቤያዲስ፤ ሃንኮ ታናራ ዲዛይቲ ጊዲኮ ኣይኮካ ቤዪቤቴና፤ ኬሂ ዳጋሚዳ ጊሻስ ባቃቲ ቢዲ ቆቴቲዳ።
DAN 10:8 ታኒካ ሄሳ ኬሂ ማላሊሲዛ ኣጁታ ጼላሼ ታርካ ኣታዲስ፤ ታስ ዲዛ ዎልቃይ ዉሪን ዳቡራዲስ፤ ታ ኣይፌሶይካ ኬሂ ጊልቂዴስ።
DAN 10:9 ሄሳፌ ጉዬ ቃላ ጬንጉርስ ሲያዲስ፤ ታ ሄ ጬንጉርሳ ሲዪዛ ዎዴ ሲንꬃ ጉꬅ ቢታን ጉፋናዲስ፤ ዎልቃማ ꬊስኮ ሴራዲስ።
DAN 10:10 ሄኮ ታና ኢሲ ኩሼይ ቦቺዴስ፤ ታ ኮኮሪሺን ኢዚ ታና ካፊዲ ታ ኩሼኒኔ ታ ቶሆ ጉልባቴን ኤሲዴስ።
DAN 10:11 ኢዚካ፥ «ኬሃ ዶሴቲዳ ዳኔላ! ሄኮ ታኒ ኔኮ ኪቴታ ያዲስ፤ ኔኒ ኔ ዲዛሶን ሲቲ ጋ ኤቃ፤ ታ ኔስ ዮቲዛይሳ ኣኬካ!» ጊዴስ። ኢዚ ታስ ሄሳ ዮቲን ታኒ ኮኮራሼ ዴንዳ ኤቃዲስ።
DAN 10:12 ቃሴካ ኢዚ ታስ፥ «ዳኔላ ኔኒ ባቦፋ፤ ኔኒ ኣኬካ ዴማናሲኔ ኔና ኔ ጾሳ ሲንꬃን ኔ ሁኤ ካዉሾ ዶሚዳ ኮይሮ ጋላሳፌ ሃ ሲሚን ኔ ቃላይ ሲዬቲዴስ፤ ታኒ ኔ ቃላስ ዛሮ ኤካዳ ሃ ኔኮ ኪቴታ ያዲስ።
DAN 10:13 ጊዶ ኣቲን ፓሪሴ ካዎቴꬃ ሃላቃይ ታናራ ናምኡ ታማኔ ኢሲ ጋላስ ኤቄቲዴስ፤ ፋሪሴ ካዎቴꬂ ታኒ ታኪሲዳይሳ ቤኢዲ ዋና ሃላቃታፔ ሚካኤሌይ ታና ማዳናስ ዪዴስ፤ ታኒካ ኢዛ ፋሪሴ ሃላቃራ ሄን ኣጋዳ ያዲስ።
DAN 10:14 ኣጁታዚ ፖሌታናስ ቡሮ ሲንꬃፌ ዳሮ ላይꬂ ዲዛ ጊሻስ ሲንꬃፌ ኔ ዴሬዛ ቦላ ሃናና ዮኦታ ኔስ ቆንጪሳናስ ታ ያዲስ» ጊዴስ።
DAN 10:15 ኢዚ ሃይሳ ታስ ዮቲዛ ዎዴ ታ ጋናዚ ꬋዪን ዱጌ ቢታ ጼላዲስ።
DAN 10:16 ሄሳፌ ጉዬ ኣስ ሚሳቲዛዴይ ባ ኩሼ ዬዲዲ ታ ሜቴርሻታ ቦቺዴስ፤ ታኒካ ኢዛስ፥ ታ ዶና ዶያዳ ሃሳያ ዶማዲስ፤ ታ ሲንꬃን ዲዛይሳ፥ «ታ ጎዳዉ! ሃይሳ ኣጁታ ጋሶን ታ ሳኬታዲስ፤ ዎልቃይካ ታስ ዉሪዴስ።
DAN 10:17 ታኒ ኔ ኦሳንቻዚ ኔናራ ዋና ሃሳያና ዳንዳያዚና? ታ ጎዳዉ! ታስ ኣቤይ ኢጺዴስ፤ ታኒ ፔኖ ኬሳ ሼምፓናስካ ጾኔታዲስ» ጋዲስ።
DAN 10:18 ኣስ ሚሳቲዛ ኪታንቻዚ ቃሴካ ታና ቦቺን ታኒ ሚናዲስ።
DAN 10:19 ኢዚካ ታና፥ «ኬሃ ዶሴቲዳይሶ! ኔስ ሳሮ ጊዳና፤ ባቦፋ ኣይኮይ ባ ሚና!» ጊዴስ። ኢዚ ታስ ዮቲን ታኒ ሚናዳ፥ «ታ ጎዶ! ኔኒ ታስ ሚኖቴꬅ ኢሚዳ ጊሻስ ኣኔ ኔ ዮታናይሳ ታስ ዮታ!» ጋዲስ።
DAN 10:20 ኢዚ ቃሴካ ታስ፥ «ታኒ ኔኮ ኣዛስ ዪዳኮ ኔኒ ኤራይ? ፓሪሴ ሃላቃ ኦላናስ ታ ኤሶን ሲማና፤ ታ ሲሚኮ ጊርኬ ሃላቃይ ያና።
DAN 10:21 ኮይሮታዳ ቱማ ማጻፋን ጻፌቲዳይሳ ታ ኔስ ቆንጪሳና፤ ሃ ሃላቃታራ ታ ኦሌቲሺን ኢንቴ ሃላቃ ሚካኤሌፔ ኣቲን ሃራይ ታና ማዲዳይ ባዋ።
DAN 11:1 «ሜዶኔ ኣስ ዳሪዮሲ ካዎቲዳ ኮይሮ ላይꬅ ታኒ ኢዛ ማዳናሲኔ ኢዛ ሚንꬄꬃናስ ኢዛ ኣቻን ኤቃ ዳይስ።
DAN 11:2 «ሃኢካ ታኒ ኔስ ቱማ ዮታና፤ ሃራ ሄꬑ ካዎቲ ቡሮ ፓሪሴ ቦላ ካዎታና፤ ሄይታ ሄꬓታ ካሊዲ ኦይዳንꬆ ካዎታና ካዎዚ ሃንኮ ካሴይታፔ ዱሬቴꬃን ኣꬋና፤ ኢዛስ ዱሬቴꬂ ኬሂ ዳሪሺን ኢዚ ባ ቦላ ሃራ ካዎታ ጉጂ ኤኪዲ ጊሪኬ ካዎቴꬃ ቦላ ዴንዳና።
DAN 11:3 ሄሳፌ ጉዬ ዎልቃማ ካዎይ ዴንዳና፤ ኢዛ ካዎቴꬃይካ ጊታ ጊዳና፤ ኢዚ ባ ኮዪዳዚ ኡባ ኦꬃና።
DAN 11:4 ጊዶ ኣቲን ኢዚ ዳሮ ሚኒዳ ዎዴ ኢዛ ካዎቴꬃይ ላሌታና፤ ኣላሜ ቦላ ኦይዱ ኬዚ ሻኬቲ ዎꬊዲ ኦይዱ ባጋ ባና፤ ኢዛ ዜሬꬂ ጊዶንታይቲ ኢዛ ካዎቴꬃን ካዎታና፤ ጊዲኮካ ኢስታፌ ኢሶይካ ኢዛ ማላ ሚኔና፤ ጋሶይካ ካዎቴꬃይ ላሌቲን ሃራቲ ጊሼቲ ኤኪዳ ጊሻሳ።
DAN 11:5 «ዱጌሃ ባጋ ካዎይ ሚናና፤ ጊዶ ኣቲን ኢዛ ኦላንቻታ ኣዛዚዛይታፔ ኢሶይ ካዎዛፔ ኬሂ ሚናና፤ ኢዛ ካዎቴꬃይ ኬሂ ጊታ ጊዳና።
DAN 11:6 ጉꬃ ላይꬃታፔ ጉዬ ዱጌሃ ባጋ ካዎይ ፑዴሃ ባጋ ካዎራ ላጌቴꬃ ጫቆ ጫቄታና፤ ዱጌሃ ባጋ ካዎይ ባ ናዮ ፑዴሃ ባጋ ካዎዛስ ማቾ ሂስቲ ኢማና፤ ጊዶ ኣቲን ኢዛ ባ ዎልቃ ሚንꬃናስ ዳንዳዮንታ ጊሻሲኔ ካዎዛ ዎልቃይ ሚኖንታ ጊሻስ ካሴ ጌሊዳ ጫቆ ቃላዚ ሚኔና፤ ሄሳ ጊሻስ ኢዛ ባና ማዲዛይታራ፥ ባ ኣዋራኔ ባስ ኣዛዜቲዛይታራ ኣሳ ኩሼን ኣꬋ ኢሜታና።
DAN 11:7 «ሄራካ ኢዚ ዳቦ ጊዲዳ ኢሳዴይ ኢዚ ሶሆ ኦይካናስ ዴንዳና፤ ፑዴሃ ባጋ ካዎዛ ኦላንቻታራ ኦላ ኦይኬታና፤ ኢስታስ ኦላ ሚጻካ ሜንꬂ ጌሊዲ ኢዚ ኢስታ ጾናና።
DAN 11:8 ኢስታ ኤቃ ጾሳታ ሚስሌታ፥ ቢራፔኔ ዎርቃፌ ኦሴቲዳ ሚሻታ ዲኢ ኤኪዲ ዱጌ ጊብጼ ኤፋና፤ ጉꬃ ላይꬃታስ ዱጌሃ ባጋ ካዎይ ፑዴሃ ባጋ ካዎራ ኦሌቴꬅ ኤሳና።
DAN 11:9 ሄሳፌ ጉዬ ፑዴሃ ባጋ ካዎይ ዱጌሃ ካዎይ ሃሪዛ ዴራ ኦላናስ ዎራጃና፤ ጊዶ ኣቲን ኢዚ ባ ዪዳ ኦጌራ ጉዬ ሲሚ ባቃቲዲ ባ ዴሬ ባና።
DAN 11:10 ፑዴሃ ባጋ ካዎ ኣቱማ ናይቲ ኦላስ ጊጌቲሼ ኬሂ ዎልቃማ ኦላንቻታ ሺሻና፤ ሄ ኦላ ኣሳይካ ባ ሲንꬃን ዲዛ ቢታ ሜጪ ኤፊዛ ዎልቃማ ዲኦ ሃꬃ ማላ ባ ሞርኬ ሚጻ ቦላ ሜቶ ጋꬃና።
DAN 11:11 «ሄ ዎዴ ዱጌሃ ካዎይ ኬሂ ሃንቄቲዲ ፑዴሃ ባጋ ካዎራ ኦሌታናስ ዴንዲዴስ፤ ፑዴሃ ባጋ ካዎይ ሺሺዳ ዎልቃማ ኦላንቻቲ ጾኔታና።
DAN 11:12 ዱጌሃ ባጋ ካዎይ ዳሮ ኦላንቻታ ዲኢዳ ዎዴ ባ ዎዚናን ኦቶሬታና፤ ዳሮ ሺያን ቆዴቲዛ ኦላንቻታካ ኢዚ ዉርሳና፤ ጊዲኮካ ኢዚ ጾኒዳ ማላ ሚኒ ዴና።
DAN 11:13 ፑዴሃ ባጋ ካዎይ ጌዴ ባ ዴሬ ሲሚዲ ካሴይሳፌ ሚንꬂዲ ኦላንቻታ ጊጊሳና፤ ጉꬃ ላይꬃታፔ ጉዬ ኢዚ ባ ኦላንቻታ ኩሜꬃ ኦላ ሚሽ ጊጺሲ ኤኪዲ ያና።
DAN 11:14 «ሄሳፌ ጉዬ ዳሮ ኣሳይ ዱጌሃ ባጋ ካዎ ቦላ ማካላና፤ ዳኔላ ኔኒ ሃይሳ ኣጁታዛን ቤኢዳይሲ ዉሪካ ፖሌታና ማላ ኔ ባጋ ኣሳፔ ማካላንቻቲ ቢታ ቦላ ሺሮ ዴንꬃና ሺን ኢስታ ቆፋይ ፖሌቴና።
DAN 11:15 ሄሳ ጊሻስ ፑዴሃ ባጋ ካዎይ ኢሲ ጊምቤይ ዩዪ ኣꬊዳ ካታማዮ ጊዶꬂዲ ኢዞ ኦይካና፤ ዱጌሃ ባጋ ዎታዳራቲ ኢስታራ ኤቄታናስ ዳንዳዬቴና፤ ኢስታ ጋርሳፌ ዶሬቲዳ ሚኖ ኦላንቻቲካ ኢዛራ ኤቄቲ ዳንዳያና ዎልቃይ ኢስታስ ዴና።
DAN 11:16 ፑዴ ባጋፌ ዎራጃናይሲ ባ ኮዪዳ ማላ ኦꬃና፤ ኢዛራ ኤቄቲ ዳንዳያናይ ዴና፤ ኢዚ ሎኦ ቢታዮ ሃራና፤ ኢዞ ꬋይሳናስካ ዎልቃ ዴማና።
DAN 11:17 «ፑዴሃ ባጋ ካዎይ ባ ኦላንቻታ ኩሜꬅ ሺሺ ኦላስ ዎራጃናስ ቆፓና፤ ሃንኮ ባስ ሞርኬ ጊዲዳ ዱጌሃ ባጋ ካዎራ ሲጌቲዲ ጫቄታና፤ ሄ ካዎዛ ኩንዲሳናስ ባ ናዮ ኢዛስ ማቾ ሂስቲ ኢማና፤ ጊዶ ኣቲን ኢዛ ቆፋይ ፖሌቴና።
DAN 11:18 ሄሳፌ ጉዬ ኣባ ኣቻን ዲዛ ዴሬታ ቦላ ሜቶ ጋꬂዲ ኢስታ ሃራና፤ ጊዶ ኣቲን ኦላንቻታ ሃላቃይ ኢዛ ኦቶሬቴꬃ ፑርሺሳና፤ ኢዚ ኦꬂዳ ኡባ ኢዛ ቦላ ዛራና።
DAN 11:19 ሂስቲዲ ሄ ካዎዚ ካሴ ባ ዴሬ ሚጻታን ሲማና፤ ጊዶ ኣቲን ꬉጴቲዲ ኢዚ ኩንዳና፤ ናምኣንꬆ ቤቴና።
DAN 11:20 «ኢዛሶሆን ሃራ ካዎይ ካዎታና፤ ሄ ካዎቲዳ ካዎዚ ባ ካዎቴꬃ ቦንቾ ናጋናስ ጊራ ጊሪሲዛ ኣስ ሹማና፤ ጊዶ ኣቲን ሄ ካዎዚ ጉꬃ ዎዴፔ ጉዬ ዴሬይ ዴንዲን ዎይኮ ኦላን ጊዶንታ ኢዚ ጮ ሃይቂ ꬋያና።»
DAN 11:21 ታስ ኣጁታ ቢርሺዛ ኪታንቻዚ፥ «ኢዛፔ ጉዬ ኢሲ ካꬌቲዳ ኣሲ ዴንዳና፤ ኢዛስ ካዎቴꬃ ቦንቾይ ኢሜቲቤና፤ ጊዶ ኣቲን ዴሬዚ ቆፖንታ ሳሮን ዲሺን ዪዲ ጌኔራ ካዎቴꬃ ኦይካና።
DAN 11:22 ሄሳፌ ጉዬ ኢዛራ ኤቄቲዛ ዳሮ ኦላንቻቲ ኢዛ ሲንꬃፌ ፒቴቲ ꬋያና፤ ጫቄꬂዛ ሃላቃዚካ ሃይቃና።
DAN 11:23 ኢዚ ኢዛራ ሲጌቴꬃስ ጫቄቲዳፔ ጉዬ ጪሞን ጌኔ ኦሶ ኦꬃና፤ ኣማርዳ ኣሳታ ኦይኪዲ ሚኒ ሚኒ ባና።
DAN 11:24 ኢዚ ኬሂ ዱሬቲዳ ዴሬ ቆፖንታ ዲሺን ዎራጂ ኦይካና፤ ካሴ ኢዛ ኣዋቲ ኦꬂ ኤሮንታ ሚሽ ኢዚ ኦꬃና፤ ኢዚ ዲኢ ኤኪዳይሳ ኡባ ባ ኦላንቻታስ ጊሼቺ ኢማና፤ ኦላ ሚጻታ ቦላካ ሜቶ ጋꬃናስ ቆፋ ቃቻና፤ ጊዶ ኣቲን ሄሲ ጉꬃ ዎዴሳ።
DAN 11:25 «ዎልቃማ ኦላንቻታ ጊግሲዲ ኦሌታናስ ዱጌሃ ባጋ ካዎ ቦላ ዎራጃና፤ ዱጌሃ ባጋ ካዎይካ ባ ባጋራ ዳሮ ዎልቃማኔ ሚኖ ኦላንቻታ ጊግሲዲ ባ ቦላ ዪዛ ኦላ ቴቃናስ ዴንዳና፤ ጊዶ ኣቲን ኢዛ ቦላ ካሴቲዲ ማቄቲዳ ማቄቴꬃፌ ዴንዶይሳን ኢዚ ኢስታራ ኤቄታናስ ዳንዳዬና።
DAN 11:26 ኢዛራ ኢሲፌ ሚዛ ኢዛ ላጌቲ ኢዛ ꬋይሳናስ ማቄታና፤ ኢዛ ኦላንቻቲ ኡባይ ዉራና፤ ዳሮቲካ ኦላን ሃይቃና።
DAN 11:27 ሄሳፌ ጉዬ ሄ ናምኡ ካዎቲ ባንታ ዎዚናን ጌኔ ቆፋ ኦይኪ ኢሲ ማዳፌ ማናስ ኢሲፌ ኡታና፤ ኢሶይ ኢሳስ ባሌꬆ ዮኦ ሃሳይና፤ ጊዲኮካ ባሬዚ ጋኮንታ ጊሻስ ኢስታ ቆፋይ ፖሌቴና።
DAN 11:28 ፑዴሃ ባጋ ካዎይ ባስ ሺሺዳ ኣቆታ ኤኪዲ ባ ዴሬ ሲማና፤ ጊዶ ኣቲን ኢዛ ዎዚናይ ጌሻ ጫቆ ቃላ ꬋይሳናስ ዴንዳና፤ ጫቆ ቃላ ቦላ ኢታ ሚሽ ኦꬃና፤ ሄሳፌ ጉዬ ባ ዴሬ ሲሚ ባና።
DAN 11:29 «ባሬቲዳ ጋላሳን ዱጌሃ ባጋ ዛሪ ዎራጃና፤ ጊዶ ኣቲን ኢዛስ ካሴይሳ ማላ ሃኔና።
DAN 11:30 ኣርሼይ ዉሊዛ ባጋራ ዲዛ ዴሬይ ማርካቤን ዪዲ ኦሊዛ ጊሻስ ኢዚ ኬሂ ዳጋማና፤ ጉዬ ሲሚ ባና፤ ጌሻ ጫቆ ቃላ ቦላ ሃንቄታና፤ ሲሚዲካ ጌሻ ጫቆ ቃላ ካዲዳይታራ ላጌታና።
DAN 11:31 «ኢዛ ኦላንቻቲ ጾሳ ኬꬃኔ ዲርሳ ቱኒሳና፤ ሃች ሃች ሺቂዛ ያርሾዛ ዲጋና፤ ባሽ ኤሂዛ ቱናቴꬅ ቶካና።
DAN 11:32 ካዎዚ ጫቆ ቃላዛ ካዲዳይታ ባሌꬂዲ ኦጌፔ ኢስታ ካሬ ኬሳና፤ ባ ጾሳ ኤሪዛ ዴሬይ ጊዲኮ ጎባና፤ ሚኒካ ካዎዛራ ኤቄታና።
DAN 11:33 «ዴሬ ጊዶን ዲዛ ኣꬎ ኤራንቻቲ ዳሮታ ታማርሳና፤ ጊዶ ኣቲን ኢስቲ ጉꬃ ዎዴስ ታማን ጹጌታና፤ ማሻን ሲፌታና፤ ዲኤታናኔ ኢስቲ ሃሪዳይሲካ ቦንቄቲ ኤኬታና።
DAN 11:34 ሃ ዴጾ ሜቶዚ ኢስታ ቦላ ጋኪዳ ዎዴ ኢስቲ ኣማርዳ ማዶ ዴማና፤ ዳሮ ኣሳቲ ኢስታ ባጋ ሚሳቲዲ ኢስታኮ ሺቃና ሺን ዎዚናፔ ጊዴና።
DAN 11:35 ኣꬎ ኤራንቻታፔ ኢሶቲ ኢሶቲ ꬉጴታና፤ ሄሳꬆ ሃኒዲ ዉርሴꬃ ዎዴይ ጋካናስ ኢስቲ ጋጬቲዲ፥ ጌዪዲኔ ኢስታ ቦላ ዎሶይ ባይንዳይታ ጊዲዲ ኬዛና፤ ሄሲ ኡባይ ሃናናይ ጾሲ ባሪዳ ዎዴይ ጋካናሳ።
DAN 11:36 «ፑዴሃ ባጋ ካዎይ ባ ቆፒዳይሳ ኡባ ፖላና፤ ኢዚ ባና ኤቃ ጾሳታፔካ ቦላራ ꬎቁ ꬎቁ ሂስታና፤ ጾሳታፔ ኣꬎ ጾሳ ቦላ ሃይሳፌ ካሴ ሴቴቲ ኤሮንታ ጫሻ ቃላ ሃሳያና፤ ጾሳ ሃንቆይ ፖሌታና ጋካናስ ኢዚ ኦꬂዛ ኡባይ ኢዛስ ኢንጄታና፤ ካሴ ባሬቲዳይሲ ፖሌታና ቤሴስ።
DAN 11:37 ሃ ካዎዚ ካሴ ባ ኣዋታ ኤቃ ጾሳታ ካዉሻና፤ ማጫሳቲ ዶሲዛ ኤቃ ጾሳታ ኢዚ ሌቃና፤ ኢዚ ባና ኡባፌካ ቦላራ ጼሊዛ ጊሻስ ኤቃ ጾሳታ ኡባ ቄሊ ጋና።
DAN 11:38 ኢስታሶሆን ሚጻታ ጾሳ ቦንቻና፥ ካሴ ኢዛ ኣዋቲ ኤሮንታ ጾሳስ ዎርቃ፥ ቢራ፥ ኣሌቆ ሚሻታ፥ ኣልኦ ሹቻታኔ ሃራ ዳሮ ኢሞታታ ሺሺዲ ቦንቻና።
DAN 11:39 ኣላጋ ጾሳታ ማዶን ኢዚ ሚኖ ሚጻታ ዎራጂ ኦይካና፤ ኢዛስ ሃሬቲዛይታ ኬሂ ቦንቻና፤ ዳሮ ዴሬ ሃራና ማላ ኢስታ ሹማና፤ ቃሴ ቢታዮካ ኢስታስ ሻኪ ሻኪ ኢማና።
DAN 11:40 «ዉርሴꬃ ዎዴይ ጋኪሺን ዱጌሃ ባጋ ካዎይ ፑዴሃ ባጋ ካዎዛ ቦላ ኦላስ ዎራጃና፤ ፑዴሃ ባጋ ካዎይ ፓራ-ጋሬን፥ ቶጋኒኔ ማርካቤታን ጎኤቲዲ ኦላ ኤቄታና፤ ዲኦ ሃꬃ ማላ ዳሮ ዴሬታ ዎራጂ ኦይካና።
DAN 11:41 ሎኦ ቢታዮካ ዎራጂ ኦይካና፤ ዳሮ ዴሬቲ ኢዛ ኩሼን ኩንዳና፤ ጊዲኮካ ኤዶሜይ፥ ሞኣቤይኔ ኣሞኔ ዴሬቲ ኢዛ ኩሼፔ ኣታና።
DAN 11:42 ኢዚ ባ ጎዳቴꬃ ዳሮ ዴሬታ ቦላ ኣሳና፤ ሄ ዎዴ ጊብጼይካ ኢዛፔ ኬሳ ኤካ ኣቱኩ።
DAN 11:43 ዎርቃ፥ ቢራኔ ጊብጼ ኣቆታ ኡባ ቦንቂ ኤካና፤ ሊቢያ ኣሳይኔ ቶጵያ ኣሳይ ኢዛስ ሃሬታና።
DAN 11:44 ሄሳፌ ጉዬ ኣርሼይ ሞኪዛ ባጋራኔ ፑዴሃ ባጋራ ዪዛ ዎሬይ ኢዛ ዳጋንꬃና፤ ኢዚ ኬሂ ሃንቄቲዲ ዳሮ ኣሳታ ዎꬋናሲኔ ꬋይሳናስ ዴንዳና።
DAN 11:45 ኢዚ ባ ካዎቴꬃ ዱንካኔዛ ኣባፌኔ ጌሻ ዙማፔ ጊዶን ቶካና፤ ጊዶ ኣቲን ሄሲ ዉሪ ሃኒንካ ኢዛስ ዉርሴꬅ ጊዳና፤ ኢዛ ማዳናይካ ቤቴና» ጊዴስ።
DAN 12:1 ካሴ ታስ ኣጁታዛ ቢርሺዛ ኪታንቻዚ ታስ፥ «ኔ ዴሬዛ ናጊዛ ጊታ ኪታንቻስ ሃላቃ ሚካኤሌይ ኢዚ ሄ ዎዴ ቆንጫና፤ ኣሳ ዜሬꬂ ሜꬌቶሶፌ ሄ ዎዴ ጋካናስ ሃኒ ኤሮንታ ዎልቃማ ሜቶይ ሃናና፤ ኢስታ ሱንꬃይ ማጻፋን ጻፌቲዳ ኡባ ኣሳይ ኣታና።
DAN 12:2 ኢስቲ ሃይቂን ቢታይ ሚዳይቲ ዉሪካ ዴንዳና፤ ኢስታ ጋርሳፌ ባጋይቲ ሜርና ዴኦስ፥ ባጋይቲ ሜርና ካዉሻሲኔ ዋዬስ ዴንዳና።
DAN 12:3 ሄ ዎዴ ኣꬎ ኤራንቻቲ ሳሎ ፖኦ ማላ ጶላና፤ ዳሮታ ጺሎቴꬃ ኦጌ ካሌꬂዳይቲ ዉሪ ሜሪፔ ሜርና ጋካናስ ሳሎ ጾሊንቴታ ማላ ጾልቃና።
DAN 12:4 «ዳኔላ! ኔኒ ኣላሜ ዉርሴꬂ ጋካናስ ሃይሳ ማጻፋዛ ጎርዳዳ ማታሜን ሾጫ፤ ሄ ዎዴ ኣሳይ ኤራቴꬅ ዳርሳናስ ያኔ ሃ ዎጼሬታና» ጊዴስ።
DAN 12:5 ሄሳፌ ጉዬ ታ ሲንꬃን ሃꬃ ሻፋ ዶናን ሃራ ናምኣታ ሄ ፒንꬃኒኔ ሃ ፒንꬃን ኤቂዳይታ ቤኣዲስ።
DAN 12:6 ኢስታ ጊዶፌ ኢሳይ ሌኤ ሃሬ ማይኢዲ ሄ ሻፋዛፔ ፑዴ ባጋራ ኤቂዳ ኪታንቻዛ፥ «ሃይቲ ማላሊሲዛ ሃኖቲ ፖሌታናስ ኣይ ኬና ዎዴይ ኣቲዴ?» ጊዲ ኦይቺዴስ።
DAN 12:7 ሌኤ ሃሬ ማይኢዲ ሻፋፔ ጋና ባጋራ ኤቂዳ ኪታንቻዚ ባ ኩሼታ ፑዴ ሳሎ ዴንꬂዲ፥ «ሄሲ ሄꬑ ላይꬂኔ ባጋ ጋምኣና፤ ጌሻ ኣሳታ ዎልቃይ ዉርሺን ሃይቲ ዉሪካ ፖሌታና» ጊዲ ሜርናስ ዴኢዛይሳን ጫቂሺን ሲያዲስ።
DAN 12:8 ኢዚ ጊዛይሳ ሲያዲስ ሺን ታስ ጌሊቤና፤ ሂስቲን ታኒ፥ «ታ ጎዶ! ሃይሳ ኡባ ዉርሴꬂ ኣይ ጊዳኔ?» ጋ ኦይቻዲስ።
DAN 12:9 ኢዚካ ታስ፥ «ዳኔላ! ሃይሳ ኣላሜዛ ዉርሴꬂ ጋካናስ ሃይሲ ቲንቢቴ ቃላዚ ጎርዴቲዲ ማታሜን ሾጬቲዳ ጊሻስ ኔኒ ባ።
DAN 12:10 ዳሮቲ ቆሬታና፥ ጋጬቲ ጌያናኔ ኢስታ ቦላ ዎሶይ ባይንዳይታ ጊዳና፤ ኢታቲ ጊዲኮ ባንታ ኢታቴꬅ ጉጂ ጉጂ ባና፤ ኢታታፔ ኢሶይካ ኣኬኬና፤ ጊዶ ኣቲን ኣꬎ ኤራንቻቲ ኣኬካና።
DAN 12:11 «ጋላስ ጋላስ ሺቂዛ ያርሾይ ዲጌቶሳፌኔ ባሻ ቱናቴꬂ ዶሜቶሳፌ ሃ ሲሚን 1,290 ጋላስ ጊዳና።
DAN 12:12 ጌንጪዲ 1,335 ጋላሳቲ ኣꬋና ጋካናስ ባ ኣማኖ ናጊዛይ ኣንጄቲዳ ኣሳ።
DAN 12:13 «ዳኔላ! ኔኒ ዉርሴꬅ ጋካናስ ባ፤ ሄሳፌ ጉዬ ኔ ሼምፓና፤ ዉርሴꬃ ጋላስ ኔስ ጊጊዳ ጺንጾ ኔ ላታና» ጊዴስ።
HOS 1:1 ኦዚያይ፥ ኢዮኣታሜይ፥ ኣካዜይኔ ሂዝቂያሲ ኢሶይ ኢሳፌ ካሊ ካሊዲ ዩሁዳን ካዎቲዳ ዎዴ ሄሳꬆካ ኢዮኣሳ ና ኢዮርባኣሜይ ኢስራኤሌን ካዎቲዳ ዎዴ ቢኤሬ ና ሆሴኤኮ ዪዳ ጎዳ ቃላይ ሃይሳፌ ካሊዛይሳ።
HOS 1:2 ጎዳይ ሆሴኤ ባጋራ ኢስራኤሌ ናይታስ ቃላ ቡሮ ዮቲሼ ሆሴኤስ፥ «ታ ዴሬይ ታፔ ሻኬቲዲ ኢታ ላይማ ላይማቲዛ ጊሻስ ኔኒ ባዳ ኢሲ ላይማቲዛ ማጫስ ኔስ ማቾ ኤካ፤ ኢዚፔ ኔስ ናይታ ዬላ» ጊዴስ።
HOS 1:3 ሄሳ ጊሻስ ሆሴኤይ ቢዲ ዲቢላዬሜ ናዮ ጎሜሮ ማቾ ኤኪዴስ፤ ኢዛካ ቃንꬃታዳ ኢዛስ ኣቱማ ና ዬላዱስ።
HOS 1:4 ሄሳፌ ጉዬ ጎዳይ ሆሴኤስ፥ «ኢዩኔ ኢዛ ዜሬꬃቲ ኢዝራኤሌን ዎꬊዳ ኣሳታ ጌዶን ኢዩ ዜሬꬃታ ታ ቃጻያና ዎዴይ ሃሆ ጊዴና፤ ኢስራኤሌ ካዎቴꬂ ሃይሳፌ ጉዬ ኩንዳና ማላ ታ ኦꬃና።
HOS 1:5 ሄ ዎዴ ኢዝራኤሌ ሾባን ኢስራኤሌ ኦላ ኣሳ ኡባ ታ ሜንꬄሬꬃና፤ ሄሳ ጊሻስ ኔ ናዛ ሱንꬃ፥ ‹ኢዝራኤሌ› ጋዳ ሱንꬃ» ጊዴስ።
HOS 1:6 ጎሜራ ቃሴካ ቃንꬃታዳ ማጫ ና ዬላዱስ። ጎዳይካ ሆሴኤስ፥ «ታኒ ሃይሳፌ ጉዬ ኢስራኤሌ ኣሳስ ቃꬌቲኬ፤ ታ ኢስታ ማሪኬ፤ ሄሳ ጊሻስ ኔኒ ኢዚ ሱንꬃ፥ ‹ሎሩሃማ› ጋ ሱንꬃ።
HOS 1:7 ዩሁዳ ኣሳስ ጊዲኮ ታኒ ታ ሲቆ ቤሳና። ታኒ ጎዳይ ኢስታ ጾሳይ ኣሻና፤ ታ ኢስታ ኣሻናይሲ ኦላ ዎልቃን ጊዴና፤ ማሻን፥ ቶራን ዎይኮ ፓራኒኔ ፓራን ኦሊዛይታን ጊዴና» ጊዴስ።
HOS 1:8 ጎሜራ ባ ናዮ ꬋንꬂ ዱꬂዳፔ ጉዬ ቃሴካ ቃንꬃታዳ ኣቱማ ና ዬላዱስ።
HOS 1:9 ጎዳይካ ሆሴኤ፥ «ሃይሳፌ ጉዬ ኢስራኤሌ ኣሳይ ታ ዴሬ ጊዴና፤ ታኒካ ኢስታ ጾስ ጊዲኬ። ሄሳ ጊሻስ ኔኒ ኔ ናዛ ሱንꬃ፥ ‹ሎኣሚ› ጋ ጼይጋ» ጊዴስ።
HOS 1:10 ጊዲኮካ ኢስራኤሌ ኣሳይ ቆዳይ ባይንዳ ኣባን ሻሚንታ ማላ ዳራና። ሃኢ ጾሲ፥ «ኢንቴ ታ ዴሬ ዴኬታ» ጌቴቲዳሶሆን፥ «ኢንቴ ዴኦ ጾሳ ናይታ» ጌቴቲ ጼይጌታና ዎዴይ ያና።
HOS 1:11 ሄ ዎዴ ዩሁዳ ኣሳይኔ ኢስራኤሌ ኣሳይ ሲሚዲ ኢሲኖ ጊዳና። ናምኣቲ ባንታና ኣይሳናዴ ኢሲ ኣስ ዶራና። ቃሴካ ኢስቲ ባንታ ዴሬን ዲቻኒኔ ዱሬቴꬃን ዴኣና። ኢዝራኤሌ ጋላሳይ ጊታ ጊዳና።
HOS 2:1 ሄሳ ጊሻስ ኢንቴ ኢንቴ ኢሻታ ኢስራኤሌ ናይታ፥ «ኣሚ» ኢንቴ ሚቼታካ «ኡሩሃማ» ጊ ሱንꬂቴ።
HOS 2:2 «ታ ናይቶ! ኢንቴ ኣዮ ዞሪቴ፤ ሃይሳፌ ጉዬ ኢዛ ታስ ማቾ ጊዱኩ፤ ታኒካ ኢዚስ ኣዚና ጊዲኬ፤ ባ ሲንꬃፌ ላይማ ሱኬ ሃኖ፥ ባ ዎዲራ ጊዶፌ ላይማቴꬅ ዲጉ።
HOS 2:3 ኢዛ ሲሞንታ ኢጺኮ ኢዛ ባ ኣዬይ ኡሎፔ ካሎ ዬሌቲዳ ማላ ታ ኢዞ ጺሬ ካሎ ኣሻና። ባዞ ማላኔ ሜላ ቢታ ማላ ታ ኢዞ ኦꬃና። ታ ኢዞ ሃꬃ ሳሞን ዎꬋና።
HOS 2:4 ላይማ ማጫሳፌ ዬሌቲዳ ጊሻስ ኢዚ ናይታስ ታ ሚሼቲኬ።
HOS 2:5 ኢስታ ኣያ ላይማ፤ ካዉሻ ሃኖን ሻራዱስ። ኢዛ ባ ዶናራ፥ ‹ታኒ ታ ላጌꬆታኮ ባይስ፤ ኢስቲ ታስ ካꬂኔ ሃꬄ፥ ሱፌፔኔ ሌኤ ሃሬፔ ዳዴቲዳ ማይኦ፥ ዎጋራ ዛይቴኔ ዎይኔ ኡሹ ኢማና› ጋዱስ።
HOS 2:6 ሄሳ ጊሻስ ታኒ ኢዚ ኦጌ ኣጉንꬃራ ጎርዳና፤ ኢዛ ኬዛና ፔንጌ ዴሞንታ ማላ ታኒ ጊምቤ ዩሻ ኣꬃ ጎርዳና።
HOS 2:7 ኢዛ ባ ላጌꬆታ ዴማናስ ዎጻና ሺን ኢስታኮ ጋካናስ ዳንዳዩኩ። ኢዛ ኢስታ ዳሮ ኮያና ሺን ዴሙኩ፤ ሃይሳፌ ጉዬ፥ ‹ሃይሳ ሃ ዱሳፌ ታስ ካሴ ዱሳይ ሎኦ፤ ሄሳ ጊሻስ ቤኒ ታ ኣዚናኮ ታ ሲማ ባና› ጋና።
HOS 2:8 ታኒ ኢዚስ ካሴ ካꬅ፥ ዎይኔ ኡሺኔ ዎጋራ ዛይቴ ኢሚዳይሳኔ ቃሴካ ኢዛ ባኣሌ ጌቴቲዛ ኤቃ ጾሳስ ያርሾ ቢራኔ ዎርቃ ኢዚስ ዳርሲዳይ ታና ጊዲዳይሳ ኢዛ ሻካ ኤራቤኩ።
HOS 2:9 ሄሳ ጊሻስ ካꬂ ካጺዛ ዎዴ ሃ ካጺዛ ካꬃ፥ ዎይኔ ኣይፌይ ቴሪዛ ዎዴ ዎይኔ ኡሻ፥ ታኒ ኢዚፔ ዎꬃ ኤካና። ሄሳꬆካ ኢዛ ባ ካሎቴꬃ ካሞንታ ማላ ሱፌፔኔ ሌኤ ሃሬፔ ዳዴቲዳ ማይኦዛ ታ ኢዚፔ ቃራ ኤካና።
HOS 2:10 ኢዚ ላጌꬆታ ሲንꬃን ታ ኢዞ ካሎ ኣሻና፤ ኢዞ ታ ኩሼፔ ኣሻናይ ዴና።
HOS 2:11 ኢዛ ባ ኡፋይሳ ባኣሌታ ኡባ፥ ላይꬃን ላይꬃን ቦንቺዛ ባኣሌታ፥ ኣጊና ጼሮን ጼሮን ቦንቺዛ ባኣሌታ፥ ሳምባታታኔ ሃራ ኢዛ ዱማ ዱማ ዶራ ቦንቺዛ ባኣሌታ ናምኣንꬆ ኦꬆንታ ማላ ታ ዲጋና።
HOS 2:12 ኢዛ ባ ላጌꬆታፔ ባስ ዋጋ ጋዳ ኤኪዳ ዎይኔ ሚꬃታኔ ባላሴ ሚꬃታ ታ ꬎቃላና። ኢስታካ ዎራ ዶኣቲ ማና።
HOS 2:13 ባኣሌ ጌቴቲዛ ኤቃ ጾሳስ ኤጻኔ ጩዋሳናሲኔ ሎኦ ጌጼ ዎꬃዳ ኢዛ ባ ላጌꬆታ ካላዳ ታና ኣጊዳ ጊሻስ ታ ኢዞ ቃጻያና።
HOS 2:14 «ሄሳ ጊሻስ ታ ኢዞ ማቃዳ ባዞ ኤፋና፤ ሄን ታ ኢዚራ ሲቆ ቃላን ሃሳይሳና።
HOS 2:15 ካሴ ኢዚ ዎይኔ ኣታኪልቴዛ ታ ኢዚስ ዛራና፤ ሜቶ ሾባ ታ ኢዚስ ሂዶታ ፔንጌ ሂስታና፤ ሄን ኢዛ ጊብጼፔ ኬዚዳ ጋላስ ናቴꬃን ዳሼ ዬጺዳ ማላ ዬጻና።
HOS 2:16 ኢዛ ሄ ጋላሲ ታና፥ ‹ታ ኣዚናዞ› ጋ ጼይጋና ኣቲን ሃይሳፌ ጉዬ፥ ‹ባኣሌ› ጌቴቲዛ ኤቃ ጾሳ ሱንꬃን ታና ጼይጉኩ።
HOS 2:17 ባኣሌ ጌቴቲዛ ኤቃ ጾሳታ ሱንꬃ ታ ኢዚ ዶናፔ ዲጋና፤ ሃይሳፌ ጉዬ ኢስታ ሱንꬂ ዴንዴና።
HOS 2:18 ሄ ዎዴ ዶኣታራ፥ ካፎታራኔ ቢታ ቦላ ጎሼቲዛ ሜꬌቴꬅ ኡባታራ ታ ኢንቴ ጊሻስ ጫቄታና። ኡባይካ ሳሮን ዳና ማላ ኦላ፥ ቶራኔ፥ ማሻ ቢታ ቦላፌ ታ ዲጋና።
HOS 2:19 ሃኔ ኢስራኤሌ! ታ ኔና ሜርናስ ታስ ጊጊሳና፤ ታ ኔስ ጺሎቴꬃኒኔ ሱሬቴꬃን ፒርዳና፤ ኣጎንታ ሲቆኒኔ ቃꬌታን ታ ኔና ታስ ኦይቻ ጊጊሳና።
HOS 2:20 ታኒ ኣማኔታዳ ኔና ታስ ማቾ ጊጊሳና። ኔኒካ ታኒ ጎዳ ጊዲዳይሳ ኤራና።
HOS 2:21 «ሄ ጋላስ ታኒ ዛሮ ኢማና፤ ታኒ ሳሎ ኣዛዛና፤ ሳሎይካ ሳኣስ ዛሮ ኢማና።
HOS 2:22 ቢታይ ካꬅ፥ ዎይኔ ኡሹኔ ዛይቴ ኢማና፤ ኢስቲካ ኢዝራኤሌስ ዛሮ ጊዳና።
HOS 2:23 ታኒ ታ ዴሬዮ ቢታ ቦላ ቶካና። ‹ማሮቴꬂ ባይንዳሮ› ጌቴቲዳሮ ታ ዛራዳ ማራና፤ ‹ታ ማሪኬ› ጊዳይሳካ ዛራ ማራና፤ ‹ኢንቴ ታ ዴሬ ዴኬታ› ጌቴቲዴታ። ‹ታ ዴሬታ› ጋዳ ታ ጼይጋና ጋና፤ ኢስቲካ ታና፥ ‹ኔኒ ኑ ጾሳ› ጋና» ጌስ።
HOS 3:1 ጎዳይ ታና፥ «ኢስራኤሌ ኣሳይ ሃራ ጾሳታኮ ሲሚዲ ዛቢቤ ኡኬꬂ ሺሻና ኮዪዴስ፤ ሄሳራካ ጎዳይ ኢስታ ሲቂዛይሳ ማላ ኔካ ባዳ ባ ላጌꬆታ ሲቃዳ ላይማታሼ ዲዛ ካሴ ኔ ማቼዮ ዛራዳ ሲቃ» ጊዴስ።
HOS 3:2 ሄሳ ጊሻስ ታ ኢዞ ታማኔ ኢቻሹ ሳቂሌ ቢራኒኔ 150 ኪሎ ባንጋን ሻማዲስ።
HOS 3:3 ታ ኢዞ፥ «ኔ ላይማቲዛይሳኔ ሃራ ኣስ ካሊዛይሳ ኣጋዳ ታናራ ዳሮ ዎዴ ጺሎቴꬃን ዴኣ፤ ታኒካ ኔናራ ኣማኔቴꬃን ዳና» ጋ ዞራዲስ።
HOS 3:4 ሄሳꬆካ ኢስራኤሌ ኣሳይ ካዎይ ባይንዳ ዎይኮ ካሌꬂዛዴይ ባይንዳ፥ ያርሾይ ባይንዳ ዎይኮ ኤቃ ጾሳታ ሃዉልቴይ ባይንዳ፥ ቄሴቴꬃ ማይኦይ ባይንዳ ዎይኮ ኤቃ ጾሳታ ሚስሌይ ባይንዳ ዳሮ ዎዴ ዴኣና።
HOS 3:5 ሄሳፌ ጉዬ ኢስራኤሌ ዴሬይ ጎዳ ባ ጾሳኮኔ ባ ካዎ ዳዊቴኮ ሲማና። ዉርሴꬃ ዎዴ ኢስቲ ያሻን ኮኮሪሼ ጎዳኮኔ ኢዛ ኣንጆኮ ያና።
HOS 4:1 ሃኖ ቢታይ ቦላ ዲዛ ኣሳ ኡባ ቦላ ጎዳይ ሺሺዛ ሞቶይ ዴስ። ሄሳ ጊሻስ ኢስራኤሌ ኣሳዉ! ኢዚ ኢንቴና ጊዛይሳ ሲዪቴ፤ «ሃኖ ቢታይ ቦላፌ ኣማኔቴꬃይ፥ ሲቆይኔ ጾስ ኤሮይ ꬋይዴስ።
HOS 4:2 ሃን ዲዛይ ቃንጌꬅ፥ ዎርዶ፥ ሼምፖ ዎꬎ፥ ላይማቴꬂኔ ጫቂዳ ቃላ ሙሲ ጻላ ዴስ። ጌኔይኔ ሼምፖ ዎꬎይ ዳሪ ዳሪ ቤስ።
HOS 4:3 ሄሳ ጋሶን ቢታይ ቦላ ኮሻይ ዬስ፤ ኢዚ ቦላ ዲዛይ ዉሪ ጊልቄስ፤ ሜሄቲ፥ ዶኣቲ፥ ካፎቲኔ ኣባ ጊዶን ዲዛ ሞሌቲ ኡባይ ዉሬቴስ።»
HOS 4:4 ጎዳይ፥ «ኢንቴኖ ቄሴቶ ታ ኢንቴና ሞቲዛ ሚሺ ዴስ፤ ሄሳ ጊሻስ ኦኒካ ሃራ ኣሳራ ፓላሜቶፎ፤ ቃሴ ኦኒካ ሃራ ኣስ ሞቶፖ።
HOS 4:5 ኢንቴ ኦማርሲኔ ጋላስ ꬉጴቴታ፤ ናቤቲካ ኢንቴናራ ꬉጴቴቴስ። ሄሳ ጊሻስ ታኒ ኢንቴ ኣዮ ኢስራኤሌ ꬋይሳና።
HOS 4:6 ታ ዴሬዛስ ኤራቴꬂ ፓጪዳ ጊሻስ ꬋይዴስ። ኢንቴ ታና ኤራናስ ኮዮንታ ጊሻስ ታኒካ ኢንቴ ታስ ቄሴታ ጊዲ ኦꬃና ማላ ኮይኬ። ኢንቴ ታ ዎጋ ባሌቲዳ ጊሻስ ታኒካ ኢንቴ ናይታ ባላና።
HOS 4:7 ቄሴታ ቆዳይ ዳሪ ዳሪ ቢሺን ኢስቲ ታ ቦላ ኦꬂዳ ናጋራይ ዳሪ ዳሪ ቢዴስ፤ ባንታ ቦንቾካ ካዉሻን ላሚዳ።
HOS 4:8 ታ ዴሬዛ ናጋራይ ኢስታስ ሙሳስ ኪዪዴስ፤ ሄሳ ጊሻስ ዴሬይ ናጋራ ኦꬂዛይሳ ኬሂ ዶሲዳ።
HOS 4:9 ኢንቴ ቄሴቲካ ዴራፔ ዱማቴኬታ፤ ሄሳ ጊሻስ ታ ኡባካ ኢዛዴ ሃኖ ማላ ኢዛ ቃጻያና፤ ኢዛ ኦሶ ማላካ ኢዛስ ኢማና።
HOS 4:10 ታ ዴሬይ ታና ጎዳ ኣጊዳ ጊሻስ ኢስቲ ማናሺን ካሌቴና፤ ላይማታናሺን ጮራቴቴና» ጌስ።
HOS 4:11 «ላይማቴꬃስ፥ ጫሊዳ ዎይኔ ኡሻስ፥ ማልኦ ዎይኔ ኡሻ ሱኬስ ባንታና ኣꬂ ኢሚዳ፤ ሄሳንቲ ታ ዴሬዛ ዎዚና ኤኪዳ።
HOS 4:12 ሄሳ ጊሻስ ሚꬃፌ ኦሴቲዳ ኤቃ ጾሳ ዞሬ ኦይቼቴስ፤ ኢስቲ ኢዛን ማሮꬂዛ ጉፌዚካ ኢስታስ ዛሮ ኢሚዛ ሚሳቴስ፤ ላይማቴꬃ ቆፋይ ባሌꬂዴስ፤ ባንታ ጾሳስ ኣማኔቲቤቴና።
HOS 4:13 ዙማይ ዲዛሶን ዲዛሶን ያርሾ ያርሼቴስ፤ ዙምቡላታ ቦላ፥ ጊታ ዳሻ ሚꬃታ ኩዋ ጋርሳን ጹጌቲዛ ያርሾ ያርሼቴስ። ሄሳ ጋሶን ኢንቴ ማጫ ናይቲ ላይማን ዳና፤ ኢንቴ ናይታ ማቼቲ ላይማታና።
HOS 4:14 ኢንቴ ማጫ ናይቲኔ ኢንቴ ናይታ ማቼቲ ላይማቲሺን ታኒ ኢስታ ቃጻይኬ፤ ጋሶይካ ኢንቴ ኣቱማሳቲ ላይማ ማጫሳታራ ሱኬቴቴስ፤ ኤቃ ጾሳታስ ላይማቴꬃ ያርሾ ሺሺዛይታራ ኢንቴካ ኢዛꬆ ያርሼታ። ሄሳ ጊሻስ ኣኬካይ ባይንዳ ዴሬይ ꬋያና።
HOS 4:15 «ኢንቴኖ ኢስራኤሌ ኣሳቶ! ኢንቴ ላይማቲኮካ ዩሁዳ ኣሳይ ላይማታና ማላ ኦꬆፍቴ፤ ሄሳ ጊሻስ ታስ ጎይናናስ ጌልጌላ ዎይኮ ቤቲ-ኣዌኔ ጌቴቲዛሶ ቦፒቴ፤ ‹ዴኦ ጎዳይ ቤዪን› ጊዲ ታ ሱንꬃን ጫቆፍቴ።
HOS 4:16 ኢስራኤሌ ዴሬይ ማካላንቻ ኡሳ ማላ ማካሊዴስ፤ ሂስቲን ጎዳይ ኢስታ ዶርሳ ላቃታ ማላ ሎኦሶን ዎስቲ ሄማኔ?
HOS 4:17 ኤፍሬሜይ ኤቃ ጾሳታ ጎይኖን ኦይኬቲዳ ጊሻስ ኢስታ ጌዴ ኣጋጊቴ።
HOS 4:18 ዎይኔ ኡሹ ኡዪዳፔ ጉዬ ላይማቴቴስ። ኢስታ ኣይሲዛይቲካ ዬላቺዛ ሚሽ ዶሴቴስ።
HOS 4:19 ኢስታ ጎቴ ጫርኮይ ፒቲ ኤፋና፤ ኢስታ ያርሾይ ኢስታ ቦላ ዬላ ኤሃና።
HOS 5:1 ኢንቴኖ ቄሴቶ ሃይሳ ሲዪቴ! ኢስራኤሌ ኣሳቶ ኣኬኪቴ! ካዎ ኬꬃ ኣሳቶ ሃይሳ ኤዝጊቴ! ሄኮ ፒርዳይ ኢንቴ ቦላ ዪዴስ፤ ጋሶይካ ኢንቴ ሚጺጳን ናርጻ፥ ታቦሬ ዙማን ጊቴ ጊዲዴታ።
HOS 5:2 ማካላንቻቲ ሼምፖ ዎꬎ ካሴፔ ሃ ዳርሲዳ፤ ሄሳ ጊሻስ ታኒ ኢስታ ኡባካ ቃጻያና።
HOS 5:3 ታኒ ኢስራኤሌ ኣሳ ኡባ ኤራይስ። ኢስራኤሌይ ታ ኣይፌፔ ጌማቤኩ፤ ኤፍሬሜ፥ ኔኒ ላይማቴꬃ ጎይኖን ቱናዳሳ።
HOS 5:4 ኢስራኤሌ ኣሳይ ኦꬂዳ ሞሮይ ኢስቲ ባ ጾሳኮ ሲሞንታ ማላ ዲጊዴስ። ላይማቴꬃ ኣያናይ ኢስታ ዎዚና ኩሚዴስ። ሄሳ ጊሻስ ኢስቲ ጎዳ ኤሬቴና።
HOS 5:5 ኢስራኤሌ ኣሳ ኦቶሮይ ኢስታ ቦላ ሲሚ ማርካቴስ። ኢስቲ ባንታ ናጋራን ꬉጴታና። ዩሁዳይካ ኢስታራ ኢሲፌ ꬉጴቲ ኩንዳና።
HOS 5:6 ኢስቲ ጎዳ ኮያናስ ባንታ ዉዴ ሜሄታኔ ሚዛታካ ላጊ ኤፋና፤ ጊዶ ኣቲን ኢዚ ኢስታፌ ሻኬቲዳ ጊሻስ ኢስቲ ኢዛ ዴሜቴና።
HOS 5:7 ኢስቲ ኤቃ ጾሳታስ ጎይኒዛ ጊሻስ ጎዳስ ኣማኔቲቤቴና፤ ኢስቲ ላይማን ናይታ ዬሊዳ። ሄሳ ጊሻስ ኢስቲ ኣጊና ጼሮን ቦንቺዛ ባኣሌይ ኢስታኔ ኢስታ ናይታ ኢሲፌ ꬋይሳና።
HOS 5:8 ኣሳይ ኦላስ ኬዛና ማላ ጊቢኣን ዛዬ ዛዪቴ፤ ኤራማን ጹሩምባ ፑኒቴ። ቤቲ-ኣዌኔን፥ ‹ቢኒያሜ ባጋቶ! ኑ ኢንቴናራ ዶስ› ጊሼ ዋሲቴ።
HOS 5:9 ቂጻቴይ ዪዛ ዎዴ ኤፍሬሜይ ቡላ ጊዳና፤ ሃይሲ ኢስራኤሌ ቦላ ጋካናይሳ ታ ሎኤꬃ ኤሪሳይስ» ጌስ።
HOS 5:10 ጎዳይ፥ «ዩሁዳ ካሌꬂዛይቲ ꬋስ ሾዲዛ ኣሳ ማላ ጊዲዳ ጊሻስ ታኒ ታ ሃንቆ ሃꬃ ዲኦ ማላ ኢስታ ቦላ ዬዳና።
HOS 5:11 ኢስራኤሌ ኣሳይ ሃዳ ጾስ ካሎን ሚኒዴስ። ሄሳ ጋሶን ናቄቲዴታኔ ፒርዳን ቆሄቲዴታ።
HOS 5:12 ሄሳ ጊሻስ ታኒ ኢስራኤሌ ኣሳ ፒኖ ማላ፥ ዩሁዳ ኣሳስ ቃሴ ቁኖ ማላ ጊዳና።
HOS 5:13 ኢስራኤሌይ ባ ሳኮዛ፤ ዩሁዳይካ ባ ማዱንꬃ ቤኢዲ ኢስራኤሌይ ኣሶሬኮ ባ ኣይፍሶ ዛራዱስ፤ ኢስራኤሌይ ማዶ ዴማናስ ጊታ ኣሶሬ ካዎኮ ቃስታኔ ኪታዱስ። ጊዶ ኣቲን ኢዚ ኢንቴና ኣሻናስ ዎይኮ ኢንቴ ማዱንꬃ ፓꬃናስ ዳንዳይቤና።
HOS 5:14 ሄሳፌ ዴንዲዳይሳን ታኒ ኢስራኤሌስ ጋሞ ማላ ዩሁዳስካ ዎዳላ ጋሞ ማላ ጊዳና፤ ታ ኢስታ ኒፊፊ ሂስታ ሜንꬄሬꬃ ዬጋና፤ ቦንቃ ኤካዳ ባና፤ ኦኒካ ኢስታ ታ ኩሼፔ ኣሻናስ ዳንዳዬና።
HOS 5:15 ኢስቲ ባ ባላ ኤሪዲ ታኮ ሲማና ጋካናስ ታኒ ኢስታፌ ሃካና። ኢስታ ቦላ ሜቶይ ዳሪዛ ዎዴ ኢስቲ ታና ሚንꬂ ኮያና» ጌስ።
HOS 6:1 ዴሬዚ፥ «ሃ ዪቴ፥ ኣኔ ጎዳኮ ሲሞስ! ኢዚ ኑና ሜንꬂዳ ማላ ኢዚካ ኑና ዛሪዲ ኮላና፤ ኢዚ ኑና ማዱንꬂዳ ማላ ዛሪዲካ ኢዚ ኑ ማዱንꬃ ፓꬃና።
HOS 6:2 ናምኡ ጋላሳታፔ ጉዬ ኢዚ ኑና ቤጎꬃና፤ ሄꬓንꬆ ጋላስ ኢዚ ኑና ዴንꬃና፤ ኑኒካ ኢዛ ሲንꬃን ፓጻ ዳና።
HOS 6:3 ኣኔ ኑኒ ጎዳ ኤሮስ! ኑ ኢዛ ሎኤꬂ ኤራናስ ኣኔ ሚኔቶስ! ኢዚ ዎንታ ፖኦ ማላ ኑስ ቆንጫና፤ ቢታ ካልሲዛ ኣሱራ ኢራ ማላኔ ባልጎ ኢራ ማላ ኢዚ ኑኮ ያና» ጌስ።
HOS 6:4 ጎዳይ፥ «ኤፍሬሜ ኣሳቶ! ዩሁዳ ኣሳቶ! ታ ኢንቴና ዎስቲኮ ሎኦ? ኢንቴ ታና ሲቂዛ ሲቆይ ማላዶ ሻራ ማላኔ ማላዶ ጻዛ ማላ ጮ ቲምኢ ጊ ኤሶን ꬋዬስ።
HOS 6:5 ሄሳ ጊሻስ ታኒ ታ ናቤታ ባጋራ ኢንቴና ቃንጼሬꬃዲስ፤ ታ ዶናፔ ኬኢዛ ቃላን ታ ኢንቴና ዎꬋዲስ። ታ ፒርዳይካ ኢንቴ ቦላ ዎልቃንꬃ ማላ ፖኢዴስ።
HOS 6:6 ታኒ ያርሾፌ ኣꬃዳ ማሮቴꬅ ዶሳይስ። ጹጌቲዛ ያርሾፌ ኣꬃዳ ጾስ ኤሮ ዶሳይስ።
HOS 6:7 ኢስቲ ቃሴ ካሴ ኣዳሜ ጌቴቲዛሶን ታናራ ጌሊዳ ጫቆ ቃላ ላሊዳ፤ ሄንካ ኢስቲ ታናን ኣማኔቲቤቴና።
HOS 6:8 ጋላኣዴይ ሱꬃን ሞሬታዱስ፤ ኢታ ኣሳታ ዱሳሶ ጊዳዱስ።
HOS 6:9 ፓንጋቲ ኣሴ ዎꬋናስ ዛማዲዛ ማላ ቄሴቲካ ዙፔቲዲ ሄሳꬆ ኦꬄቴስ። ጌዴ ሴኬሜ ኤፊዛ ኦጌ ቦላካ ናጊ ናጊ ኣስ ዎꬌቴስ፤ ዬላቺዛ ኢታ ሚሽ ኦꬄቴስ።
HOS 6:10 ዲዢጊንꬂዛ ኢታ ሚሽ ኢስራኤሌን ቤያዲስ፤ ኤፍሬሜይ ኤቃስ ጎይኖኒኔ ላይማቴꬃን ቱኒዴስ።
HOS 6:11 «ኢንቴኖ ዩሁዳ ኣሳቶ! ታ ኢንቴና ቃጻያና ጋላስ ባራ ዎꬃዲስ።
HOS 7:1 «ታኒ ታ ዴሬ ኢስራኤሌ ኣሳ ፓꬃናሲኔ ዛራዳ ዱሬሳናስ ኮይዛ ዎዴ፤ ኤፍሬሜ ናጋራይኔ ሳማሪያ ኣሳ ኢታቴꬂ ኬሂ ዳሪ ቤቲዴስ። ኢስቲ ኢሶይ ኢሳስ ዎርዶቴቴስ፥ ካይሶቲ ኬꬄ ቦኪ ጌሊዲ ካይሶቴቴስ፥ ፓንጋቲ ኦጌ ቦላ ኣꬎሶን ኣꬎሶን ቦንቄቴስ።
HOS 7:2 ጊዶ ኣቲን ታኒ ሃይሳ ኢስታ ኢታቴꬃ ዉርሳ ኤሪዛይሳ ኢስቲ ኣኬኪቤቴና። ሄሳ ጊሻስ ኢስታ ኢስታ ናጋራይ ጊዶꬂ ዎꬂዴስ፤ ኢስታ ኢታ ኦሶይ ታፔ ጌሚቤና» ጌስ።
HOS 7:3 ጎዳይ፥ «ኢስቲ ካዎዛ ባ ኢታቴꬃን ሃላቃታካ ባንታ ዎርዶን ባሌꬄቴስ።
HOS 7:4 ኢስቲ ዉሪካ ላይማቲዛይታ፥ ቡኬሶይ ዴንዳና ጋካናስ ዳቦ ኡኪዛዴይ ታማ ኤꬃናስ ኮሾንታ ሴሊሲዳ ጮጬ ማላ።
HOS 7:5 ኑ ካዎዛ ባኣሌ ጋላስ ሃላቃቲ ዎይኔ ኡሻን ማꬆ ሌላ ጊዳ። ኢዚካ ቂꬊዛይታራ ዙፔቲዴስ።
HOS 7:6 ኢስታ ዎዚናይ ጮጬ ታማ ማላ ሴሊዴስ፤ ጌኔን ኢዛኮ ሺቄቴስ። ኢስቲ ኦማርሲ ኩሜꬂ ሃንቆ ጩዋቲሼ ኣቄቴስ ዎንቴꬃ ጋላስ ኤጺዛ ታማ ማላ ፖፖልኡ ጌቴስ።
HOS 7:7 ዉሪካ ታማ ጮጬ ማላ ሴሊዳይታ፤ ባንታና ኣይሲዛይታ ዲፒ ሂስቲ ዉርሲዳ። ኢስታ ካዎቲካ ኩንዲዳ፤ ኢስታፌ ኦኒካ ታኮ ሺቂቤና።
HOS 7:8 «ኤፍሬሜይ ሃራ ካዎቴꬃታራ ዋላኬቲዴስ፤ ኢዚ ሺሬቶንታ ኣቲዳ ኡኬꬃ ማላ።
HOS 7:9 ኣላጋቲ ኢስታ ዎልቃ ሚዳ፤ ጊዶ ኣቲን ኢስቲ ሄሳ ኤሪቤቴና። ኢዛ ሁኤይ ፑሉንꬅ ጫዲዴስ፤ ጊዶ ኣቲን ኢዚ ሄሳ ኤሪቤና።
HOS 7:10 ኢስራኤሌ ኣሳ ኦቶሬቴꬂ ኢስታ ቦላ ማርካቴስ፤ ሄሲ ዉሪ ሃኒንካ ኢስቲ ጎዳ ባንታ ጾሳኮ ሲሚቤቴና፤ ኢዛካ ኮዪቤቴና።
HOS 7:11 «ኢስራኤሌ ኣሳይ ኤሌ ባሌቲዛኔ ቆፋይ ባይንዳ ሃራጴ ካፎ ማላ። ኢሲቶ ጊብጼ ጼይጌስ፤ ሃራ ዎዴ ቃሴ ኣሶሬኮ ሲሜስ፤
HOS 7:12 ኢስቲ ፒራꬊሺን ታ ጊቴ ኢስታ ቦላ ዬጋና፤ ሳሎ ካፎታ ማላ ዱጌ ጎቻ ዎꬃና፤ ኢስቲ ኦꬂዳ ኢታ ኦሶ ጊሻስ ታ ኢስታ ዴሬ ሲንꬃን ቃጻያና።
HOS 7:13 ኢስቲ ታፔ ሃኪ ቢዳ ጊሻስ ኢስታስ ኣዬ ኣና! ታ ቦላ ኢስቲ ማካሊዳ ጊሻስ ኢስታ ቦላ ꬋይሲዛዚ ዮ፤ ታኒ ኢስታ ዎዛና ኮያዲስ፤ ኢስቲ ጊዲኮ ታ ቦላ ዎርዶ ሃሳዬቴስ።
HOS 7:14 ኢስቲ ባ ሂጻ ቦላ ኢቺዲ ዬኬቴስ፤ ጊዶ ኣቲን ዎዚናፔ ታኮ ዎሴቴና፤ ካꬃሲኔ ኡሻስ ሺቄቴስ፤ ጊዶ ኣቲን ታፔ ሼርኢ ጊዳ።
HOS 7:15 ታኒ ኢስታ ታማርሳዲሲኔ ኢስታ ሚንꬃዲስ፤ ኢስቲ ጊዲኮ ታ ቦላ ዴንዲዳ።
HOS 7:16 ታፔ ሃኪዲ ሃዳ ሚሻኮ ሲሚዳ፤ ኢስቲ ጫዳና ጾንጊን ዎራ ቢዛ ቶራ ማላ። ኢስታ ካሌꬂዛይቲካ ባንቲ ሃሳይዛ ኢታ ቃላ ጋሶን ማሻን ዉራና፤ ሄሳፌ ዴንዶይሳን ኢስቲ ጊብጼ ቢታን ቂꬌስ ኣታና።
HOS 8:1 «ኣሳይ ታናራ ዲዛ ጫቆ ቃላ ላሊዴስ፤ ታ ዎጋ ቦላካ ማካሊዴስ። ሄሳ ጋሶን ሞርኬይ ኣርጋንꬃ ማላ ጎዳ ኬꬃ ቦላ ኣላንꬄስ። ሄሳ ጊሻስ ኢስቲ ናጌታና ማላ ዛዬ ፑና!
HOS 8:2 ኢስቲካ፥ ‹ጾሳዉ! ኑ ኔና ኤሮስ› ጊሼ ታኮ ዋሴቴስ።
HOS 8:3 ጊዶ ኣቲን ኢስራኤሌ ኣሳይ ሎኦ ሚሽ ኢጺዳ ጊሻስ ሞርኬይ ኢስታ ጎዳና።
HOS 8:4 «ታ ሼኔ ጊዶንታ ኢስቲ ባስ ካዎታ ካዎꬂዳ፤ ታና ኦይቾንታ ዲሼ ዳናታ ዶሪዳ፤ ባ ቢራፔኔ ባ ዎርቃፌ ባና ꬋይሳና ኤቃ ጾሳታ ባስ ኦꬂዳ።
HOS 8:5 ሳማሪያ ዴሬ ኣሳቶ! ማሪ ሚሳቲሲ ኢንቴ ሜꬊዳ ኤቃ ጾሳቲ ታና ሻቴቴስ። ታ ሃንቆይ ኢንቴ ቦላ ታማ ማላ ኤጼስ፤ ኢንቴ ሞሮ ኦሶን ኣይዴ ጋካናስ ኢንቴ ጋምኣኔ?
HOS 8:6 ሂላንቻይ ማራ ሚስሌ ሜꬊዳ ኤቃ ጾሳቲ ጾስ ጊዳናስ ዳንዳዬቴና። ሄሳ ጊሻስ ማር ሚሳቲ ኦሴቲዳ ሳማሪያ ኤቃ ጾሳቲ ሜቄሬቲ ዎꬋና።
HOS 8:7 ኢስቲ ጫርኮ ዜሪዲ ጎቴ ሺሻና፤ ቡጻ ቦላ ኣይፌይ ዴና፤ ꬊሌይካ ቤቴና፤ ኣይፊኮካ ኣላጋቲ ማና።
HOS 8:8 ኢስራኤሌይ ሃራ ካዎቴꬃታ ጊዶን ሂራይሶ ሚሻ ማላ ጊዲዳ።
HOS 8:9 ባርካ ባዞ ቢታን ቶይላቲዛ ሃርዲዳ ማላ ጌዴ ኣሶሬ ዴሬ ቢዳ። ባና ማዳና ማላ ካዎታስ ሚሼ ኢሚዲ ባስ ዳቦ ሻሚዳ።
HOS 8:10 ኢስቲ ባና ካዎታስ ኣꬂ ባይዚኮካ ሃኢ ታ ኢስታ ሺሻና፤ ካዎቲኔ ዳናቲ ኢስታ ቦላ ጋꬂዛ ሜቶፔ ዴንዲዳይሳን ኢስቲ ጉጺ ጉጺ ባና።
HOS 8:11 «ኤፍሬሜይ ናጋራ ዉርሳናስ ዳሮ ያርሾሶሆ ኦꬂዴስ፤ ጊዶ ኣቲን ሄ ያርሾሶሆቲ ናጋራ ኦꬂዛሶ ጊዲዳ።
HOS 8:12 ታ ኢስታስ ታ ዎጋ ጋርሳን ዲዛ ዳሮ ሚሻታ ጻፋዲስ። ኢስቲ ጊዲኮ ሃዳ ሚሻ ማላ ቆዲዳ።
HOS 8:13 ኢስቲ ሎኦ ያርሾ ሺሼቴስ ሄ ያርሾ ኣሾዛካ ሜቴስ፤ ጊዶ ኣቲን ጎዳይ ኢስታን ኡፋዬቲቤና። ሄሳ ጊሻስ ኢዚ ኢስታ ኢታቴꬃ ዛሪ ቆፓና፤ ኢስታ ናጋራ ጊሻስ ቃጻያና። ኢስቲካ ጊብጼ ሲማና።
HOS 8:14 «ኢስራኤሌ ዴሬይ ባስ ጊታ ካዎቴꬃ ኬꬃታ ኬጺዴስ፤ ጊዶ ኣቲን ባና ሜꬊዳይሳ ባሊዴስ። ዩሁዳ ዴሬይካ ዳሮ ሚኖ ካታማታ ኦꬂዴስ፤ ጊዶ ኣቲን ታኒ ሄ ካታማታ ቦላ ታማ ዬዳና፤ ኢስታ ሚጻታካ ታማይ ማና» ጊዴስ።
HOS 9:1 ኢስራኤሌ ኣሳዉ! ኡፋዬቶፍቴ! ሃራ ካዎቴꬃታ ማላ ኡፋይስ ኖጮጩ ጎፒቴ! ኣይስ ጊኮ ኢንቴ ኢንቴ ጾሳስ ኣማኔቲቤኬታ ካꬃ ባሌ ኡባን ላይማቴꬃስ ኢሚዛ ዋጋ ዶሲዴታ።
HOS 9:2 ሄሳ ጊሻስ ሃይሳፌ ጉዬ ኢንቴ ካꬃ ባሌፔ ካꬅ፥ ዎይኔ ጉምኢዛሶሆፔ ዎይኔ ኡሹ ዴሜኬታ። ኦራꬃ ዎይኔ ኡሺካ ኢንቴስ ፓጫና።
HOS 9:3 ኢስራኤሌ ዴሬይ ጎዳይ ኢስታስ ኢሚዳ ቢታን ኡቴና። ኤፍሬሜይ ዱጌ ጊብጼ ሲማና፤ ኣሶሬካ ቢዲ ቱኒዳ ካꬅ ማና።
HOS 9:4 ሄን ጎዳስ ዎይኔ ኡሹ ያርሻናስ ዳንዳዬቴና፤ ኢስታ ያርሾይካ ጎዳ ኡፋይሴና። ሄሳ ጊሻስ ኢስታስ ያርሾዚ ሾቻ ካꬅ ጊዳና፤ ኢዛ ሚዛ ኡባይ ቱናና። ሄ ካꬃዚ ጮ ጋፋስ ሚዛ ካꬅ ጊዳና ኣቲን ጎዳ ኬꬅ ያርሾስ ሺቄና።
HOS 9:5 ሂስቲን ኢንቴ ዱማ ዱማ ባኣሌ ጋላሳታኒኔ ጎዳ ባኣሌ ጋላሳታን ኣይ ኦꬄቲ?
HOS 9:6 ኢስቲ ባሻፌ ኣታናስ ቤቲኮካ ጊብጼይ ኢስታ ሺሻና፤ ሜምፒሳ ጌቴቲዛሶን ኢስታ ሞጋና፤ ኢስቲ ሃሪዳ ቢራይ ዉሪካ ሻራፋ ማይኢ ኣታና፤ ኢስታ ዱሳሶ ኡባ ኣጉንꬂ ላታና።
HOS 9:7 ቃጻያና ዎዴይ ጋኪዴስ፤ ፒርዳ ጋላሲካ ጋኪዴስ፤ ሄሳ ኢስራኤሌ ኣሳይ ኤሮ። ኢንቴ ኦꬂዳ ናጋራይ ዳሮ ጊዲዳ ጊሻሲኔ ኢንቴ ሞርኬቴꬂ ጊታ ጊዲዳ ጊሻስ ናቤይ ኤያ ማላ፥ ጾሳ ኣያናይ ኢዛ ቦላ ሼምፒዳዴይ ጎሻ ማላ ቆዴቲዴስ።
HOS 9:8 ናቤይ ጾሳራ ጊዲዲ ኤፍሬሜ ናጊዛዴ፤ ጊዶ ኣቲን ኢዛ ኦጌ ኡባን ዎጺማዴይ፥ ኢዛ ጾሳ ኬꬃን ኢጾይ ኢዛ ናጌስ።
HOS 9:9 ኢስራኤሌ ኣሳይ ካሴ ጊቢኣ ዎዴ ዲዛ ኣሳ ማላ ኬሂ ቱኒዴስ፤ ጾሲ ኢስታ ቆሆዛ ቆፒዲ ኢስታ ናጋራ ጊሻስ ኢስታ ቃጻያና።
HOS 9:10 ጎዳይ፥ «ታኒ ኢስራኤሌ ኣሳ ዴሚዳ ዎዴ ታስ ባዞ ቢታን ዎይኔ ሚꬃ ኣይፌ ዴሚዳ ሚሳቲዴስ። ታኒ ካሴ ኢንቴ ኣዋታ ቤኢዳ ዎዴ ታስ ኮይሮ ካጺዳ ባላሴ ሚꬃ ኣይፌ ቤኢዳ ሚሳቲዴስ። ኢስቲ ባኣሊ-ፔኦሬ ጋኪዳ ዎዴ ባንታናቴꬃ ዬላቺዛ ኤቃ ጾሳስ ዱማሲዳ። ኢስቲካ ሄ ባ ሲቂዛ ኤቃ ጾሳ ማላ ቱኒዳ።
HOS 9:11 ኤፍሬሜ ቦንቾይ ካፎይ ፒራꬊዛ ማላ ፒራꬊ ꬋያና፤ ሃይሳፌ ጉዬ ና ቃንꬃቴꬂ፥ ሻራይኔ ና ዬሎይካ ዴና።
HOS 9:12 ና ዬሊዲ ዲቺኮካ ኢስቲ ꬎማና ጋካናስ ታ ኢስታ ዎꬋና። ታ ኢስታፌ ታ ኣይፌሶ ዛሪዳ ዎዴ ኢስታስ ኣዬ ኣና!
HOS 9:13 ኤፍሬሜይ ጺሮሴ ማላ ሎኦ ጋዴን ቶኬቲን ቤኣዲስ፤ ሃኢ ጊዲኮ ኤፍሬሜይ ባ ናይታ ሼምፖ ዎꬊዛይታስ ኣꬂ ኢማና።
HOS 9:14 ጎዳዉ! ኔ ሃ ዴራስ ኣይ ኢማኔ? ኣዉጫዪዛ ኡሎኔ ሹላ ꬋንꬅ ኢማ!
HOS 9:15 «ኢስቲ ጌልጌላን ኦꬂዳ ኢታቴꬃ ጋሶን ታ ኢስታ ኢጻዲስ፤ ኢስቲ ኦꬂዳ ኢታ ኦሶ ጊሻስ ታ ኬꬃፌ ታ ኢስታ ጎዳና፤ ሃይሳፌ ጉዬካ ታ ኢስታ ዶሲኬ፤ ኢስታ ካሌꬂዛይቲ ኡባይ ማካላንቻታ።
HOS 9:16 ኤፍሬሜይ ሾጬቲዴስ፤ ኢስታስ ጻጶይካ ሜሊዴስ፤ ኢስቲ ኢሻሎን ዲቺዳ ናይታ ታ ዎꬋና» ጌስ።
HOS 9:17 ኢስቲ ኣዛዜቶንታ ኢጺዳ ጊሻስ ታ ጾሲ ኢስታ ዬጊ ኣጋና፤ ኢስቲካ ካዎቴꬃታ ጊዶን ጮ ቶይላታና።
HOS 10:1 ኢስራኤሌ ኣሳይ ዳዪዳ ዎይኔ ሚꬃ ማላ። ኢስቲ ዳሮ ኣይፌ ኣይፊዳ፤ ኣይፌዚ ዳሪዳ ኬና ዳሮ ያርሾሶሆ ሜꬊዳ። ኢስታ ቢታያ ሎኦ ኣይፌ ኢማዳ ኢስታ ዱሬሲዳ ማላ ኢስቲ ጎይኒዛ ቱሳታ ኣሌቄሲዳ።
HOS 10:2 ኢስታ ዎዚናን ጌኔይ ኩሚዴስ፤ ኢስቲ ባ ኦꬂዳ ጌኔዛ ዋጋ ኤካና። ጎዳይ ኢስቲ ያርሾ ያርሺዛሶሆታ ኡባ ላላና። ኢስቲ ጎይኒዛ ኤቃ ጾሳ ቱሳታካ ሾዳና።
HOS 10:3 ኢስቲካ፥ «ኑስ ካዎይ ዴና፤ ኑኒ ጎዳ ቦንቾንታ ጊሻስ ካዎይ ዲዛኮካ ኢዚ ኑስ ኣይ ኦꬃኔ?» ጋና።
HOS 10:4 ኢስቲ ዎርዶራ ጫቂዲ ቃላ ጌሌቴስ፤ ሃዳ ሂዶታ ኦꬄቴስ፤ ሄሳ ጊሻስ ካꬃ ጊዶን ማርዜራ ዲዛ ሃሩማ ማታይ ሞኪዛ ማላ ኢስታ ጊዶን ጌኔ ፒርዳይ ዳራና።
HOS 10:5 ሳማሪያ ካታማን ዲዛ ዴሬይ ቤቲ-ኣዌኔን ዲዛ ማራ ሚስሌን ኦሴቲዳ ኤቃ ጾሳስ ያዬስ። ኢዛፔ ቦንቾይ ቃሬቲ ኪቺዳ ጊሻስ ኣሳይ ዬኬስ። ሄ ኤቃ ሚስሌዛ ቄሴቲካ ዋሴቴስ።
HOS 10:6 ሄ ኤቃ ሚስሌዚ ጊታ ጊዲዳ ኣሶሬ ካዎስ ኪያቴꬅ ኢሜታና። ኤፍሬሜይ ካዉያና፤ ኢስራኤሌይካ ባንታ ኤቃ ጾሳ ጊሻስ ዬላታና።
HOS 10:7 ሳማሪያ ካዎይ ሃꬃ ጎፖንቶ ማላ ጮ ꬋያና።
HOS 10:8 ኢስራኤሌስ ናጋራ ጊዲዳ ቤት-ኣዌኔን ጎይኒዛሶሆ ዙምቡላዚ ꬋያና፤ ኦካይኔ ኦሃይ ሞካና፤ ሄ ዎዴ ዴሬይ ዙማታ፥ «ኑና ቆቲቴ!» ዙምቡላታካ «ኑና ካሚቴ!» ጋና።
HOS 10:9 ጎዳይ፥ «ኢስራኤሌ ኣሳዉ! ጊቢኣን ናጋራ ኦꬆሶፔ ሃች ጋካናስ ጌባኦኔን ናጋራ ኦꬂዛይታ ኦላይ ዉርሲቤኔ?
HOS 10:10 ታኒ ኮይዛ ዎዴ ኢስታ ቃጻያና፤ ኢስቲ ኦꬂዳ ዳኮ ናጋራ ጊሻስ ቂጻቴይ ኢስታ ቦላ ጋካና፤ ካዎቴꬃቲ ኢስታ ቦላ ዴንዳና።
HOS 10:11 ኢስራኤሌይ ካꬅ ቡካናስ ዶሲዛ ሜሄ ማላ፤ ጊዶ ኣቲን ሎኢዛ ኢዚ ሞርጌ ቦላ ቃምባራ ዎꬃና፤ ኤፍሬሜ ዋጻና፤ ዩሁዳይ ጎያና፤ ያቆቤ ናይቲ ዋጼቲዲ ቢታ ፒጻና።
HOS 10:12 ጎዳይ ዪዲ ጺሎቴꬅ ኢንቴ ቦላ ኢራ ማላ ቡኪሳና ጋካናስ ሃና ኢንቴ ኢዛ ኮይዛ ዎዴ ጊዲዳ ጊሻስ ኦꬃ ጎዪቴ፤ ኢንቴስ ጺሎቴꬅ ዜሪቴ፤ ሚኖ ሲቆ ኣይፌ ማጺቴ።
HOS 10:13 «ኢንቴ ጊዲኮ ኢንቴ ዎልቃኒኔ ኢንቴ ኦላ ቃራታ ዳሮቴꬃን ኣማኔቲዲ ኢታቴꬂ ዜሪዴታ፤ ናጋራ ሺሺዴታ፤ ዎርዶቴꬃ ኣይፌ ሚዴታ።
HOS 10:14 ሺሊማኔይ ቤቲ-ኣርቤሌ ጌቴቲዛ ካታማ ኦላን ካሴ ላሊዳይሳꬆኔ ኣዬታ ናይታራ ጋꬂ ቢታ ቦላ ዲንጬሬꬂ ዉርሲዳ ማላ ሺሮይ ዴራ ቦላ ያና። ኢንቴ ዴሬ ኣሳ ቦላ ዎልቃማ ኦላይ ያና፤ ኢንቴ ሚጻይ ላሌታና።
HOS 10:15 ቤቴሌ! ኔ ኢታቴꬂ ጊታ ጊዲዳ ጊሻስ ኔ ቦላካ ሄሳꬆ ሃናና፤ ሄ ጋላሳያ ጋኪዛ ዎዴ ኢስራኤሌ ካዎይ ሙሌራ ꬋያና» ጌስ።
HOS 11:1 ጎዳይ፥ «ኢስራኤሌይ ቡሮ ዪꬋን ዲሺን ዶሳዲስ። ሂስታዳ ታ ናዛ ታ ጊብጼ ቢታፌ ጼይጋዲስ።
HOS 11:2 ጊዶ ኣቲን ታ ኢስታ ጼይጊዳ ኬና ኢስቲ ታፔ ጌዴ ሃኪ ሃኪ ቢዳ። ባኣሌስ ያርሾ ሺሺዳ፤ ኢዛ ሚስሌታሲካ ኤጻኔ ጩዋሲዳ።
HOS 11:3 ኤፍሬሜስ ኩሼዛ ኦይካዳ ሄሜꬅ ታማርሲዳይ ታና፤ ጊዶ ኣቲን ኢስታ ፓꬂዳይ ታና ጊዲዳይሳ ኢስቲ ኤሪቤቴና።
HOS 11:4 ታ ኢስታ ቃꬌታ ዎዶሮኒኔ ሲቆ ሳንሳላታን ታኮ ሺሻዲስ፤ ኢስታ ሞርጌፌ ቃምባራ ዴንꬃዲስ፤ ዚቂ ጋ ሆካዳ ኢስታ ሚዛዲስ።
HOS 11:5 «ሂስቲን ኢስቲ ማሮቴꬃን ጌሎንታ ጊሻስ ዱጌ ጊብጼ ሲሜቴኔ? ኣሶሬይ ኢስታ ሃሬኔ?
HOS 11:6 ኢስታ ኢታ ሃልቾ ጊሻስ ሞርኬ ቶራይ ኢስታ ካታማታ ኦላና፤ ኢስታ ካታማታ ፔንጌታካ ሜንꬄሬꬂ ዬጋና። ኢስቲካ ሙሌራ ꬋያና።
HOS 11:7 ታ ዴሬይ ታፔ ሃካናስ ኮዪዴስ፤ ጊዲኮካ ኢስቲ ታኮ ኡባፌ ዎልቃማ ጾሳኮ ዋሲኮ ታ ኢስታ ኣሺኬ።
HOS 11:8 «ኤፍሬሜ! ታ ኔና ዎስታ ኣጋጋኔ? ኢስራኤሌ ታ ኔና ዎስታ ኣꬃ ኢማኔ? ታ ካሴ ኣዳማኒኔ ጻቦይሜን ኦꬂዳይሳꬆ ዎስታ ኔ ቦላ ኦꬆ? ታ ዎዚናይ ጊዶን ቃጺዴስ፤ ታ ማሮቴꬃይ ኔና ኣሻና ዴንዲዴስ።
HOS 11:9 ታኒ ኢንቴ ጊዶን ዲዛ ጌሻ ጾሳ ኣቲን ኣስ ጊዲኬ። ታ ሃንቆራ ኢንቴኮ ዪኬ፤ ታ ቦሻ ሃንቆ ኢንቴ ቦላ ዬዲኬ፤ ኤፍሬሜ ዛራዳ ꬋይሲኬ።
HOS 11:10 «ታኒ ጎዳይ ኢስታ ኣሻናስ ጻጊዛ ጋሞ ማላ ታኒ ታ ቃላ ሲሲሺን ኢስቲ ታና ካላና፤ ታ ናይቲ ኮኮሪሼ ኣርሼይ ሞኪዛ ባጋፌ ያና።
HOS 11:11 ጊብጼፔ ካፎ ማላ ኣሶሬፔ ሃራጴ ማላ ፒራꬊ ያና። ታኒ ኢስታ ኢስታሶሆን ዎꬃና» ጌስ።
HOS 11:12 ጎዳይ፥ «ኤፍሬሜ ዎርዶን ኢስራኤሌይካ ጌኔን ታና ጊዶꬂዴስ፤ ዩሁዳይ ጾሳስ ሃሬቶንታዴ፤ ኣማኔቲዳ ጌሻዛራ ኤቄቲዛዴ» ጌስ።
HOS 12:1 ኤፍሬሜይ ጫርኮ ሄንꬃንቻ፤ ጋላስ ኩሜꬅ ኣርሼይ ሞኪዛ ባጋ ጫርኮ ካሌስ፤ ዎርዶኔ ማካላ ዳሪሴስ። ኣሶሬ ዴራራ ጫቆ ቃላ ጌሌስ፤ ዎጋራ ዛይቴ ጊብጼ ቢታ ዬዴስ።
HOS 12:2 ጎዳይ ዩሁዳ ዴራ ቦላ ሺሺዛ ሞቶይ ዴስ፤ ኢዚ ያቆቤ ኢዛ ሃኖታ ማላ ቃጻያና። ኢዛ ኦሶ ማላ ኢዛስ ኢማና።
HOS 12:3 ያቆቤይ ቡሮ ባ ኣዬይ ኡሎን ዲሼ ባ ኢሻ ቶሆ ቂርጴ ኦይኪዴስ፤ ኣሳ ዛዋ ጋኪዳፔ ጉዬ ጾሳራ ባጼቲዴስ።
HOS 12:4 ኪታንቻራ ባጼቲዲ ኢዛ ጾኒዴስ፤ ኢዛ ሲንꬃን ቴማ ዴማናስ ዬኪ ዎሲዴስ፤ ኢዛካ ቤቴሌን ዴሚዴስ፤ ሄን ኢዛራ ሃሳዬቲዴስ።
HOS 12:5 ጎዳይ ኡባፌ ዎልቃማ ጾሳይ ኢዛስ ኤሬቲዳ ሱንꬃይ ጎዳ።
HOS 12:6 ሄሳ ጊሻስ ኔ ጾሳኮ ሲማ፤ ሲቆኔ ቱሙ ፒርዳ ሎኤꬃ ኦይካ፤ ኡባ ዎዴ ኔ ጾሳን ኣማኔታ።
HOS 12:7 «ዛልኣንቻቲ ዎርዶ ጌዳራን ባይዜቴስ፤ ሾጬቾካ ዶሴቴስ።
HOS 12:8 ኤፍሬሜይ፥ ‹ታኒ ዱሬ፤ ታ ዱሬታዲስ፤ ታስ ሃይሲ ኡባይ ዲሺን ኣይ ቆሆይካ ዎይኮ ናጋራይ ታ ቦላ ጋኬና› ጊ ጬቄቴስ።
HOS 12:9 «ኢንቴና ጊብጼ ቢታፌ ኬሲዳ ጎዳ ኢንቴ ጾሳይ ታና፤ ላይꬃ ባኣሌ ጋላስ ካሴ ኢንቴ ኦꬂዛ ማላ ኢንቴ ኢንቴ ዱንካኔን ዳና ማላ ታ ኦꬃና።
HOS 12:10 «ታኒ ካሴታዳ ናቤታስ ዮታዲስ፤ ዳሮ ኣጁታ ታ ኢስታ ቤሳዲስ፤ ኢስታ ባጋራ ሌሚሶን ዮታዲስ።
HOS 12:11 ጋላኣዴን ኢታቴꬂ ኩሚዴስ፤ ኣሳይካ ሹፉሮ ጻላ። ጌልጌላን ሚርጎታ ያርሾስ ሺሺዞ? ኢስታ ያርሺዛሶይ ሜቄሬቲዲ ጎሻ ጊዶን ኮሬቲዳ ሹቻ ማላ ጊዳና» ጌስ።
HOS 12:12 ያቆቤይ ሜስጴጾሚያ ባቃቲዴስ፤ ኢስራኤሌይ ማቾ ኤካናስ ሄን ሃጋዚዴስ፤ ኢዚስ ኢማና ጪሎሻ ጊሻስ ዶርስ ሄሚዴስ።
HOS 12:13 ጎዳይ ናቤ ባጋራ ኢስራኤሌ ጊብጼፔ ኬሲዴስ፥ ናቤዛ ባጋራ ኢስታ ኢሻልሲ ኦይኪዴስ።
HOS 12:14 ጊዶ ኣቲን ኤፍሬሜይ ኢዛ ኬሂ ሃንቄꬂዴስ፤ ኢዛ ጎዳይ ኢዚ ሱꬅ ጉሲዳ ማላ ቆሆዛ ኢዛ ቦላ ጋꬃና፤ ኢዚ ሌቂዛ ሌቆዛ ጊሻስ ኢዛስ ቤሲዛዝ ቃንጻና።
HOS 13:1 ኤፍሬሜይ ኢስራኤሌ ዴሬዛ ጊዶን ቦንቼቲ ዲዛ ጊሻስ ኢዚ ሃሳይሺን ኣሳይ ኡባይ ኮኮሬስ። ጊዶ ኣቲን ባኣሌስ ጎይኒዳ ጊሻስ ቆሂዴስ፤ ሃይቂዴስ።
HOS 13:2 ሃኢካ ናጋራ ቦላ ናጋራ ጉጂዳ፤ ባንታ ጪንጫቴꬃን ሚስሌታ ባስ ጊግሲዳ፤ ቢራፔ ኤቃ ጾሳታ ባንታስ ሜꬊዳ፤ ሄይቲ ዉሪካ ኣሳ ኩሼን ኦሴቲዳይታ፤ ሃይታ ሃ ኣሳታ ጊሻስ፥ «ኣስ ያርሾ ሂስቲ ሺሼቴስ፤ ማራ ሚስሌን ኦሴቲዳ ኤቃ ጾሳታ ዬሬቴስ» ጌቴቲዴስ።
HOS 13:3 ሄሳ ጋሶን ኢስቲ ዎንታ ማላዶ ሻራ ማላ ጮ ቲምኢ ጋና፤ ማላዶ ጻዛ ማላካ ጮ ዎꬊ ꬋያና፤ ዎይኮ ባንጋ ቡኪዛ ባሌፔ ጎቴ ጫርኮይ ኤፊዛ ሱላ ማላ ጊዳና፤ ዎይኮ ኬꬃፌ ኬዚዲ ቤቲሼ ጮ ꬋይዛ ጩዋ ማላ ጊዳና።
HOS 13:4 ጎዳይ፥ «ኔና ጊብጼፔ ኬሲዳይ ታና ጎዳ ኔ ጾሳ፤ ኔስ ታፔ ኣቲን ሃራ ጾሲ ዴና፤ ኔና ኣሺዳይ ታፔ ኣቲን ሃራ ጾስ ጊዴና።
HOS 13:5 ባዞ ቢታን ካꬂኔ ሃꬂ ባይንዳሶን ኔና ኢሻልሳ ዎꬃዲስ።
HOS 13:6 ጊዶ ኣቲን ታ ሚዚን ኢስቲ ካሊዳ፤ ካሊዲ ኦቶሬቲዳ፤ ሄሳፌ ጉዬ ታና ባሊዳ።
HOS 13:7 ሄሳ ጊሻስ ታኒ ኢስታ ቦላ ጋሞ ማላ ያና፤ ማሄ ማላ ኦጌ ቦላ ዛማዳ ኡታና።
HOS 13:8 ኢዚ ማራቲ ቦንቄቲዳ ዛርዶ ማላ ታ ኢስታ ሾጫናኔ ፑዜሬꬃና፤ ታ ኢስታ ጋሞ ማላ ፑዜሬꬃ ሚታና፤ ዎራ ዶኣ ማላ ዱሴሬꬃና።
HOS 13:9 «ኢስራኤሌ ዴሬዞ! ኔ ታ ቦላ ዴንዲዳ ጊሻሲኔ ኔና ማዲዛ ታናራ ኔ ኤቄቲዳ ጊሻስ ኔ ꬋያና፤
HOS 13:10 ኔ ታና፥ ‹ታስ ካዎኔ ሃላቃታ ኢማ› ጋዳሳ፤ ሂስቲን ሃኢ ኔና ኣሻና ካዎይ ኣዋን ዲዜ? ኔ ካታማታን ዲዛ ሃላቃቲ ኡባይ ሃኢ ኣዋን ዲዞ?
HOS 13:11 ታ ሃንቄታሼ ኢንቴስ ካዎ ኢማዲስ፤ ጊዶ ኣቲን ታኒ ቦሻንካ ኢዛ ሻራዲስ።
HOS 13:12 «ኤፍሬሜ ቆሆይ ዶሬቲዴስ፤ ኢዛ ናጋራይካ ማዝጋቤን ጻፌቲዴስ።
HOS 13:13 ሚጻይ ኦይኪዳ ማጫሳ ማላ ኢዛ ቦላ ሜቶይ ያና፤ ኢዚ ጊዲኮ ኣꬎ ኤራቴꬂ ባይንዳ ኤያ ና፤ ዬሌቲዛ ዎዴይ ጋኪን ባ ኣዬይ ኡሎፔ ዬሌታናስ ኮዮንታ ና ማላ።
HOS 13:14 ታኒ ኔና ዱፎ ዎልቃፌ ኣሻና፤ ሃይቆፔካ ዎዛና። ሃይቆ! ኔ ዎꬊዛ ዎልቃይ ኣዋን ዲዜ? ዱፎዞ! ኔኒ ኣስ ꬋይሲዛ ዎልቃይ ኣዋን ዲዜ? ታኒ ኢዛስ ቃꬌቲኬ።
HOS 13:15 ኢዚ ባ ኢሻታ ጊዶን ዱሬ ጊዲኮካ ጎዳፔ ኪቴቲዳ ጫርኮይ ኣርሼይ ሞኪዛ ባጋራ ባዞ ቢታፌ ዴንዲዲ ያና። ፑልቶይ ቶኣና፤ ሃꬃ ኦላይካ ሜላና፤ ኢዛስ ዲዛ ኣልኦ ኣቆታይ ሚንጃ ኬꬃፌ ቦንቄታና።
HOS 13:16 ሳማሪያ ኣሳይ ባንታ ጾሳ ቦላ ማካሊዳ ጊሻስ ባንታ ቆሆ ቶካና፤ ማሻንካ ሲፌታና፤ ቄሪ ናይቲ ቢታ ቦላ ዲንጬታና፤ ቃንꬃራ ዲዛ ማጫሳታ ኡሎይ ዳኬታና» ጌስ።
HOS 14:1 ኢስራኤሌ ዴሬዞ! ኢንቴ ኢንቴ ናጋራ ጋሶን ኩንዲዳ ጊሻስ ጎዳ ኢንቴ ጾሳኮ ሲሚቴ።
HOS 14:2 ፓጼꬃ ቃላ ኤኪ ጎዳኮ ሲሚዲ፥ «ኑ ናጋራ ኡባ ኣቶ ጋ፤ ኑኒ ኑ ዶናፔ ጋላታ ሺሻና ማላ ኔ ማሮቴꬃን ኑና ኤካ።
HOS 14:3 ኣሶሬይ ኑና ኣሼና፤ ኑኒ ኦላ ፓራታንካ ኣማኔቶኮ፤ ሃይሳፌ ጉዬ ኑኒ ኑ ኩሼን ሜꬊዳ ኤቃ ጾሳታ፥ ‹ሃይቲ ኑ ጾሳታ› ጎኮ። ማንቆቲ ኔፔ ቃꬌቴꬅ ዴሜቴስ» ጊቴ።
HOS 14:4 ጎዳይ፥ «ታ ሃንቆይ ኢስታ ቦላፌ ሲሚዳ ጊሻስ ታስ ኣማኔቶንታ ኢጺዳ ታ ዴራ ታ ፓꬃና፤ ታ ኢስታ ጮ ሜላ ሲቃና።
HOS 14:5 ታኒ ኢስራኤሌ ኣሳስ ፑሴ ኢራ ማላ ጊዳና፤ ኢስቲካ ሎኦ ጪሻ ማላ ጪያና፤ ሊባኖሴ ዚጋ ማላ ጻጶ ዬዳና።
HOS 14:6 ኢስታ ሃጋይ ዲጫና፤ ዎጋራ ሚꬃ ማላ ኢስቲ ሎኣና፤ ሊባኖሴ ዚጋ ማላ ሎኦ ሳዎ ሳዋና።
HOS 14:7 ኢስቲ ሲሚዲ ታ ኩዋ ጋርሳን ኡታና፤ ጫሬቻ ካꬃ ማላ ኢስቲ ጪሊላና፤ ዎይኔ ሚꬃ ማላ ኢስቲ ጪያና። ኢስታ ሱንꬂ ሊባኖሴ ዴሬ ዎይኔ ኡሻ ማላ ኡባሶን ኤሬታና።
HOS 14:8 ኤፍሬሜ! ታሲኔ ኤቃ ጾሳታስ ኣይ ጋይቶቴꬂ ዲዜ? ኔ ዎሳ ሲዪዛይኔ ኔና ናጊዛይ ታና፤ ታኒ ኡባ ዎዴ ጪሊሊ ኡቲዳ ሚꬃ ማላ፤ ኔ ኣይፊዛይ ታፔ ዴንዲዳይሳና» ጌስ።
HOS 14:9 ኣꬎ ኤራንቻይ ሃ ዮኦታ ኣኬካና። ኣኬኪዛዴይ ሃ ዮኦታ ኤራና፤ ጎዳ ኦጌይ ሱሬ፤ ጺሎቲ ኢዛን ሄሜቴቴስ። ናጋራንቻቲ ጊዲኮ ኢዛን ꬉጴቴቴስ።
JOE 1:1 ሲንꬃፌ ሃናናይሳ ጾሲ ኢዩኤሌስ ዮቲዳ ቃላይ ሃይሳ፤
JOE 1:2 ኢንቴ ጪማቲ ሃይሳ ሲዪቴ፤ ዩሁዳ ዴሬን ዲዛይቲ ዉሪካ ሃይሳ ኤዝጊ ሲዪቴ። ሃይሳ ማላ ሃኖይ ካሴ ኢንቴ ዎዴ ጊዲን ዎይኮ ካሴ ኢንቴ ኣዋታ ዎዴ ሃኒ ኤሪዜ?
JOE 1:3 ኢንቴ ሃይሳ ኢንቴ ናይታስ ዮቲቴ፤ ኢንቴ ናይቲ ቃሴ ባንታ ናይታስ ዮቴቶ፤ ናይታ ናይቲካ ካሊዛ ዬሌታስ ዮቴቶ።
JOE 1:4 ጎንዶይ ሚሺን ኣቲዳ ካꬃ ቢታ ማቴ ቦሌይ ሚዴስ፤ ኢዛፔ ኣቲዳይሳ ኡሾ ጫርኮꬆ ሾጪዛ ዲኦ ማላ ቦሌይ ꬋይሲዴስ፤ ኢዛፔ ኣቲዳይሳ ቃሴ ጉምባሮይ ሚዴስ።
JOE 1:5 ሄሳፌ ጉዬ ዎይኔ ኡሹ ኢንቴ ዴሞንታ ጊሻስ ዬኪቴ፤ ኢንቴኖ ማꬆቲዛይቶ! ኢንቴ ꬊስኪዛሶፔ ቤጊዲ ዋሲቴ፤ ኢንቴኖ ዎንታን ዎንታን ዎይኔ ኡሹ ኡዪዛይቶ! ጫሞ ዬሆ ዬኪቴ።
JOE 1:6 ቆዳይ ባይንዳ ቦሌይ ኦላ ኣሳ ማላ ታ ዴሬዛ ቦላ ዪዴስ፤ ኢዛ ኣቻይ ጋሞ ኣቻ ማላ፤ ኢዛ ጋጊና ኣቻይ ማጫ ጋሞ ጋጊና ኣቻ ማላ።
JOE 1:7 ታ ዎይኔ ሚꬃ ኣይፌዛ ሙሌራ ꬋይሲዴስ፤ ባላሴ ጌቴቲዛ ሚꬃ ኡባ ሜንꬄሬꬂዴስ፤ ሚꬃ ሃጋቲ ሙሌራ ቦጻና ጋካናስ ፖቆዛ ሙሌራ ፖቂ ዴንꬂቺዴስ።
JOE 1:8 ሄሳ ጊሻስ ኢዞ ኤካና ጊግሲዳይሲ ሃይቂን ማቃ ማይኣዳ ዬኪዛ ጌላኦይ ማላ ኢንቴካ ዬኪቴ።
JOE 1:9 ጎዳ ኬꬃን ያርሾስ ሺቃና ካꬅ ጊዲን ዎይኮ ዎይኔ ኡሻይ ባይንዳ ጊሻስ ጎዳስ ኦꬂዛ ቄሴቲ ዬኬቴስ።
JOE 1:10 ጎዪዲ ዜሪዳ ካꬃይ ሜሊ ꬋዪን ዎይኔ ሚꬃይ ቶኬቲዲ ሜሊዳ ጊሻስ ዛይቴይ ꬋይዴስ፤ ሄሳ ጊሻስ ቢታያ ዬካዉስ።
JOE 1:11 ጊስቴይኔ ባንጋይ ሃራይካ ቦኔ ካꬂ ዉሪካ ꬋይዳ ጊሻስ ኢንቴኖ ጎሻንቻቶ ጬጪቴ፤ ኢንቴኖ፥ ዎይኔ ሚꬃታ ጎዳቲካ ዬኪቴ።
JOE 1:12 ዎይኔ ሚꬃቲኔ ባላሴ ሚꬃቲ ሹሊዳ፤ ኦሮማኔኔ ቴሚሬ ሚꬃቲ፥ ላዴይኔ ሃራ ኣይፌ ኣይፊዛ ሚꬃቲ ዉሪካ ሜሊዳ፤ ሄሳ ጋሶን ኣዳፌ ኡፋይሲ ኣሳፔ ሃኪዴስ።
JOE 1:13 ኢንቴ ኢንቴ ጾሳ ያርሾ ሺሺዛ ካꬅ ጊዲን ዎይኮ ዎይኔ ኡሺ ባይንዳ ጊሻስ ኢንቴኖ ታ ጎዳ ኦሳንቻታ ጊዲዳ ቄሴቶ! ኣኔ ሃ ዪዲ ማቃ ማይኢዲ ኩሜꬃ ኦማርስ ዬኪቴ። ኢንቴኖ ያርሾ ያርሺዛሶን ኦꬂዛይቶ! ኢንቴ፥ «ዉ! ዉይ!» ጊ ዋሲቴ።
JOE 1:14 ዱማ ጾማ ጋላስ ኣዋጂቴ፤ ኣያና ሺቆስ ኣሳ ጼይጊቴ፤ ዴሬን ዲዛ ጪማታኔ ኣሳ ኡባ ኑ ጎዳ ኬꬃን ሺሺዲ ፑዴ ጎዳኮ ዋሲቴ።
JOE 1:15 ኣዬ ኣና! ጎዳ ጋላሲ ማቲዴስ። ኡባ ዳንዳይዛ ጾሳይ ꬋይሲዛዝ ኤሂዛ ጋላሲ ጋኪዴስ። ሄ ጋላሳይስ ኣዬ ኣና!
JOE 1:16 ካꬂ ኑ ሲንꬃፌ ꬋይዴስ፤ ኡፋይሲኔ ኢሊሲ ኑ ጾሳ ኬꬃፌ ሙሌ ꬋይዴስ።
JOE 1:17 ዜሬቲዳ ካꬃይ ዉሪ ቢታ ጋርሳን ዎቂ ꬋይዴስ፤ ካꬂ ቢታፌ ꬋይዳ ጊሻስ ካሴ ካꬅ ዎꬂዛ ሚሻቲ ዉሪካ ሜላ ዴቴስ። ጎታራቲካ ላሌቲዳ።
JOE 1:18 ሜሄይ ሚዛ ማታይ ጋዴን ባይንዳ ጊሻስ ሜሄቲ ኮሻቲዲ ዋሴቴስ፤ ዶርሳ ዉዴቲካ ማታይ ꬋዪን ዳሮ ዋዬ ቦላ ዴቴስ።
JOE 1:19 ጎዳዉ! ዴምባ ማታ ኡባ ታማይ ሚዳ ጊሻስ ዎራ ሚꬃካ ታማይ ሚዳ ጊሻስ ታ ኔኮ ዋሳይስ።
JOE 1:20 ሻፋቲ ሜሊዳ ጊሻስ ዴምባን ዲዛ ማታይ ዉሪካ ጹጌቲዳ ጊሻስ ዎራ ዶኣቲካ ኔኮ ዋሴቴስ።
JOE 2:1 ጺዮኔን ዛዬ ዛዪቴ፤ ጌሻ ዙማ ቦላ ዋሲቴ! ጎዳ ዩሳ ጋላሲ ጋኪዳ ጊሻስ ቢታ ቦላ ዲዛይ ዉሪካ ኮኮሮ።
JOE 2:2 ሄ ጋላሳይ ꬉማኔ ቱላላ ጋላሳ፤ ሻራኔ ሳካና ꬉማ ጋላሳ፤ ዎንታ ፖኦይ ኤሶን ዙማታ ጋኪዛ ማላ ዎልቃማ ቦሌይ ቢታ ኡባን ማይኣና፤ ሄሳ ማላይ ሃይሳፌ ካሴ ሃኒቤና፤ ሃይሳፌ ጉዬንካ ሃኔና።
JOE 2:3 ሄ ቦሌቲ ባ ሲንꬃን ቤቲዳዚ ኡባ ታማ ማላ ማና፤ ታማ ላጮ ማላ ጹጋና፤ ቡሮ ኢስታ ጋኮንታ ቢታይ ኤዴኔ ጋናቴ ማላ ጪሊላ ቢታ ሺን ኢስቲ ጋኪ ኣꬊዳ ቢታይ ኣይኮይ ባይንዳ ባዞ ቢታ ጊዳና፤ ቦሌቲ ሚሺን ኣቲዳ ሚሺካ ቤቴና።
JOE 2:4 ኢስታስ ሜꬋይ ፓራ ማላ፤ ኢስታ ቡሳይ ኦላ ፓራ ቡሳ ማላ።
JOE 2:5 ፓራ-ጋሬ ጊሪሳ ማላ ጊሪስ ሲሲሼ ዙማታ ቦላራ ጉፔቴስ፤ ታማይ ቡራ ሚዛ ማላ ቤቲዳ ሚሻ ኡባ ጹጋና፤ ጊጌቲዳ ሚኖ ኦላንቻታ ሳልፌ ማላ ጊሬቴስ።
JOE 2:6 ኢስታ ቤኢዲ ዴሬይ ኮኮራና፤ ኣሳ ኣይፌሶይ ዉሪካ ባቦን ቦታና።
JOE 2:7 ኦላ ቃራታ ማላ ጌዴ ሲንꬄ ቤቴስ፤ ኦላንቻታ ማላ ዲርሳ ቦላራ ጉፒ ኣꬋና፤ ዉሪካ ሲቲ ጊዲ ጌዴ ሲንꬄ ባና፤ ባ ቢዛ ኦጌፔ ሃራ ኦጌ ቤቴና።
JOE 2:8 ኢሶይ ኢሳራ ሱጌቴቴና፤ ኢሶይ ኢሶይ ባ ኦጌ ዬዴና፤ ባ ሞርኬ ኦላ ሚሽ ኡባ ꬋይሲዲ ኣꬊ ባና፤ ኣይኮይካ ኢስታ ቴቄና።
JOE 2:9 ኢስቲ ካታማዛ ዎራጃና፤ ካታማ ጊምቤዛ ቦላ ኢስቲ ዎጻና፤ ጉፒ ጉፒዲ ኬꬃታ ቦላ ኬዛና፤ ካይሶ ማላ ማስኮቴራ ሶ ጌላና።
JOE 2:10 ቢታይ ኢስታ ሲንꬃን ኮኮራና ሳሎይካ ቃጻና፤ ኣዋ ኣይፌይኔ ኣጊናይ ꬉማና፤ ጾሊንቴይካ ፖኦ ኢሜና።
JOE 2:11 ጎዳይ ባ ኦላንቻታ ሲንꬃን ዳዳ ማላ ጉማና፤ ኢዛ ኦላንቻቲ ኣይ ማላ ዳሮ! ኢዛ ኣዛዞ ኦꬂዛይቲ ኣይ ማላ ዎልቃማ! ቱማፔካ ጎዳ ጋላሳይ ኬሂ ዎልቃማ፤ ኬሂ ባቢሲዛ ሄ ጋላሳ ዳንዳይ ኤቃናይ ኦኔ?
JOE 2:12 ጎዳይ፥ «ሃኢካ ጊዲኮ ጾማን ዬሆኒኔ ጬጬን ኢንቴ ኩሜꬃ ዎዚናፔ ሃ ታኮ ሲሚቴ።
JOE 2:13 ኢንቴ ኢንቴ ካዮ ቤሳናስ ማይኦ ዳኬꬅ ጻላ ጊዴና፤ ሄሳፌ ቦላራ ኢንቴ ዎዚናይ ሜቂን ማሬቲቴ፤ ጎዳ ኢንቴ ጾሳይ ኪያኔ ማሪዛ ጾሳ፥ ሃንቆስካ ኤሶቴና፤ ሜርና ሲቆን ኢዚ ዱሬኔ ቃጻያናስ ኤሶቶንታ ጾሳ፤ ሄሳ ጊሻስ ኢንቴ ኢዛኮ ሲሚቴ።
JOE 2:14 ኦኔ ኤሪዛይ ጎዳ ኢንቴ ጾሳይ ባ ሃንቆዛ ዛሪዲ ኢንቴና ኣንጃናኮ፥ ኢንቴካ ሄ ዎዴ ጎዳ ኢንቴ ጾሳስ ካꬃ ያርሾኔ ኡሻ ያርሾ ሺሻንዴታ።
JOE 2:15 ጺዮኔ ዙማ ቦላ ዛዬ ፑኒቴ፤ ዴሬዛ ኣያና ሺቆስ ጼይጊቴ፤ ጾማካ ኣዋጂቴ።
JOE 2:16 ዴሬዛ ኡባ ኢሲ ሶ ሺሺቴ፤ ጌሻ ዱላታስ ጊግሲቴ፤ ጪማታ ጼይጊቴ፤ ናይታኔ ቡሮ ꬋሚዛ ናይታካ ኡባ ሺሺቴ፤ ሚሺራቲካ ሚሺራ ኬꬃፌ ኣቶንታ ኬዜቶ።
JOE 2:17 ጎዳስ ኦꬂዛ ቄሴቲካ ያርሾ ያርሺዛሶዛሲኔ ኣሲ ሲሜሬቲዛሶ ጊዶን ኤቂዲ ዬኬቶ፤ ጎዳዉ! ኔኒ ኔ ዴሬዛስ ቃꬌታ፤ ካዎቴꬃቲ ኢስታ ጾሳይ ኣዋን ዲዜ? ጊዲ ኑና ካꬋናሲኔ ኢስቲ ኑ ቦላ ሚጪ ካኣና ማላ ኔ ኢስታ ኦꬆፋ» ጌቶ።
JOE 2:18 ጎዳይ ቢታይስ ዲዛ ሚሼቴꬃፌ ዴንዲዳይሳን ባ ዴሬዛስ ቃꬌቲዴስ።
JOE 2:19 ሄሳ ጊሻስ ጎዳይ፥ «ኢንቴ ካꬅ፥ ዎይኔ ኡሺኔ ዎጋራ ዛይቴ ካላና ጋካናስ ታ ኢንቴስ ኢማናስ ሃይሳፌ ጉዬ ካዎቴꬃቲ ኢንቴና ባስ ካሳ ሚሽ ሂስታና ማላ ታ ኢስታስ ኣꬃ ኢሚኬ።
JOE 2:20 ፑዴሃፔ ያና ኦላንቻታ ታ ኢንቴፌ ሃሳና፤ ዱጌ ባዞ ዛራ ጎዳና፤ ሲንꬃቲ ዪዛይታ ዱጌ ሃይቆ ኣባን ዬዳና፤ ጉዬራ ዪዛይታ ሜዲቴራኔ ኣባን ዬዳና፤ ሄን ኢስታ ኣሃይ ዜቃና፤ ቱማፔ ታኒ ጎዳይ ጊታ ሚሽ ኦꬃዲስ።
JOE 2:21 ቢታዬ ባቦፋ፤ ጎዳይ ኔስ ኦꬂዳ ጊታ ሚሻ ጊሻስ ኡፋዬታ!
JOE 2:22 ኢንቴኖ ቢታ ቦላ ዲዛ ዶኣቶ ባቦፍቴ፤ ካሴ ኢንቴ ኢዛን ሄሜቲዛ ጋዴይ ጪሊሊዴስ፤ ሚꬃቲካ ኣይፊዳ፤ ባላሴይኔ ዎይኔ ሚꬃይ ኬሂ ዳሮ ኣይፊዴስ።
JOE 2:23 ኢንቴኖ ጺዮኔ ዴሬቶ፥ ጎዳን ኢንቴ ጾሳን ኡፋይሲ ኦꬂቴ፤ ኢዚ ቱሙ ፒርዲዲ ባꬌሳ ኢራኔ ኦፊንꬃ ኢራ ዎጋራ ኢሚዴስ።
JOE 2:24 ኢንቴ ካሴ ካꬅ ቡኪዛ ባሌን ካꬂ ኩማና፤ ዎይኔ ኡሺኔ ዎጋራ ሚꬃ ዛይቴይ ካሴ ኢስታን ጉምኤቲዛ ኦላታ ኩሚ ፓላሃና።
JOE 2:25 ሃይሳፌ ካሴ ዎልቃማ ኦላንቻ ሚሳቲዛ ታ ዬዲዳ ኡሾ ጫርኮꬆ ሾጪዛ ቦሌቲ፥ ጉምባሮቲኔ ጎንዶቲ፥ ካሴ ሚዳ ካꬃ ጊሻስ ታ ኢንቴስ ዛራ ኢማና።
JOE 2:26 ኢንቴ ቡሮ ዳሮ ሚዲ ካላና፤ ኢንቴስ ማላሊሲዛ ሚሻታ ታ ኦꬂዳ ጊሻስ ኢንቴ ታና ጎዳ ኢንቴ ጾሳ ጋላታና፤ ሃይሳፌ ጉዬ ታ ዴራ ዬላይ ጋኬና።
JOE 2:27 ኢስራኤሌ ኣሳቶ ታኒ ኢንቴ ጊዶን ዲዛይሳኔ ጎዳ ኢንቴ ጾሲ ታና ጻላ ጊዲዳይሳኔ ታፔ ሃራይ ባይንዳይሳ ኢንቴ ኤራና፤ ሄሳፌ ጉዬ ታ ዴሬዛ ዬላይ ጋኬና» ጊዴስ።
JOE 2:28 ጎዳይ፥ «ሃይሳፌ ጉዬ ታኒ ኣሳ ኡባ ቦላ ታ ኣያና ጉሳና፤ ኢንቴ ማጫ ናይቲኔ ኣቱማ ናይቲ ቲንቢቴ ሃሳያና፤ ጪማ ኣሳይካ ኣጉሞ ኣጉሜታና፤ ዬላጋ ናቴꬃቲ ኣጁታ ቤያና።
JOE 2:29 ሄሳꬆካ ሄ ጋላሳታን ታስ ኦꬂዛ ማጫሳ ቦላኔ ኣቱማሳ ቦላ ታኒ ታ ኣያና ጉሳና።
JOE 2:30 ሳሎኒኔ ሳኣን ማላሊሲዛ ሚሻታ ታ ቤሳና፤ ሱꬂ፥ ታማይኔ ጩዋ ቱሲ ቤታና።
JOE 2:31 ጊታ ባቢሲዛ ጎዳ ጋላሳይ ያናፔ ካሴቲዲ ኣርሼይ ꬉማና፤ ኣጊናይካ ሱꬅ ኣꬃና።
JOE 2:32 ጎዳ ሱንꬅ ጼይጊዛይ ዉሪካ ኣታና፤ ጎዳይ ካሴ ዮቲዳ ማላ ጺዮኔ ዙማ ቦላፌኔ ዬሩሳላሜፔ ኣቶቴꬂ ቤታና፤ ኣታናይታ ጋርሳን ጎዳይ ጼይጊዳይቲ ዳና» ጊዴስ።
JOE 3:1 ጾሲ፥ «ሄ ዎዴ ታኒ ዬሩሳላሜፔኔ ዩሁዳፔ ዲኤቲ ኤኬቲዳ ሚሽ ኡባ ዛራና።
JOE 3:2 ታኒ ካዎቴꬃታ ኡባ ሺሻዳ ዱጌ ኢዮሳፊጼ ዙሌ ዎꬃና፤ ሄንካ ታ ኢስታ ቦላ ፒርዳና፤ ጋሶይካ ታ ዴሬ ኢስራኤሌ ኣሳ ካዎቴꬃታ ጊዶን ላሊዲ ኢስቲ ቢታ ጊሼቲ ኤኪዳ ጊሻሳ።
JOE 3:3 ኢስቲ ባ ዲኢ ኤሂዳ ታ ዴሬታ ጊሼቲ ኤካናስ ኢስታ ቦላ ሳማ ዬጊዳ፤ ላይማ ማጫሳታ ዴማናስ ኣቱማ ናይታ ኣꬂ ኢሚዳ፤ ዎይኔ ኡሹ ኡያናስ ማጫ ናይታ ኣይሌቴꬃስ ባይዚዳ።
JOE 3:4 ኢንቴኖ ጺሮሴ፥ ሲዶናኔ ፊሊስጼሜ ኣሳቶ! ኢንቴ ኣይ ኦꬂሼ ዴቲ? ኢንቴ ታ ቦላ ሃሎ ኬሳና ቆፔቲ? ኢንቴ ሄሳ ማላ ቆፒኮ ታኒካ ካሴታዳ ኢንቴ ቦላ ሃሎ ኬሳና።
JOE 3:5 ታ ቢራ፥ ዎርቃኔ ታስ ዲዛ ኣልኦ ሚሽ ኡባ ኢንቴ ቦንቂ ኤኪዲ ኢንቴ ኤቃ ኬꬅ ጌልꬂዴታ።
JOE 3:6 ዩሁዳኔ ዬሩሳላሜ ዬሌታታ ኢስታ ዴሬ ꬋሳፌ ሃሲ ኤፊዲ ጊሪኬ ኣሳስ ባይዚዴታ።
JOE 3:7 «ሄኮ ታኒ ሃኢ ኢስቲ ባይዜቲ ዲዛሶፔ ኢስታ ዴንꬄꬃዳ ዛራና፤ ኢንቴ ኢስታ ቦላ ጋꬂዳ ቆሆዛ ታ ኢንቴ ቦላ ዛራ ኤሃና።
JOE 3:8 ኢንቴ ማጫ ናይቲኔ ኣቱማ ናይቲ ዩሁዳ ኣሳስ ባይዜታና ማላ ታ ኦꬃና፤ ኢስቲካ ሃሆ ዴሬን ዲዛ ሳባኔ ኣሳስ ኣꬂ ባይዛና፤ ሃይሳ ዉርሳ ዮቲዳይ ታና ጎዳ።
JOE 3:9 «ሃይሳ ኡባ ካዎቴꬃታስ ኣዋጂቴ! ኦላስ ጊጌቲቴ! ኦላ ቃራታ ዴንꬄꬂቴ! ኢንቴ ኦላንቻቲ ኡባይ ኬዚዲ ሞርኬታ ኦሌቶ!
JOE 3:10 ማራሻ ጊꬃ ማሻ ቆጺቴ፤ ባጫ ቃሴ ቶራ ቆጺቴ፤ ላፋይካ ባና፥ ‹ታኒ ሚኖ ኣሳ› ጎ።
JOE 3:11 ኢንቴኖ ዩዪ ኣꬋናስ ዲዛ ካዎቴꬃቶ! ኢንቴ ዉሪካ ኤሶን ኬዚቴ! ሂርኪ ሾባን ኢሲ ቦላ ሺቂቴ። ጎዳዉ፥ ኔኒ
JOE 3:12 «ካዎቴꬃቲ ኡባይ ዴንዲዲ ዱጌ ኢዮሳፊጼ ሾባ ቤቶ፤ ታኒ ጾሳይ ኢንቴ ዩሾን ዲዛ ካዎቴꬃታ ቦላ ፒርዳናስ ታ ሄን ኡታና።
JOE 3:13 ኢስታ ኢታቴꬂ ኬሂ ዳሪዴስ፤ ሄሳ ጊሻስ ካጺዳ ካꬂ ባጫን ጫኬቲዛ ማላ ኢስታ ጫኪቴ፤ ዎይኔ ሚꬃ ኣይፌይ ጉምኤቲዛሶን ኩሚዲ ዬꬌቲዛ ማላ ኢንቴ ኢስታ ዬꬌቲቴ» ጊዴስ።
JOE 3:14 ዮኦ ፒርዲዛ ዙሌን ጎዳይ ፒርዲዛ ጋላሲ ጋኪዴስ፤ ሄሳ ጊሻስ ዳሮ ዴሬይ ሄን ሺቂ ኡቲዴስ።
JOE 3:15 ሄ ጋላስ ኣርሼይኔ ኣጊናይ ꬉማና፤ ጾሊንቴይካ ፖኤና።
JOE 3:16 ጎዳይ ጺዮኔ ዙማ ቦላ ዬሩሳላሜን ዲሼ ባቢሲዛ ባ ቃላ ጊሪስ ሲሳና፤ ሳሎይኔ ሳኣይ ቃጻና፤ ጎዳይ ጊዲኮ ባ ዴሬ ኢስራኤሌስ ሺቂ ኣቲዛሶ ጊዳና።
JOE 3:17 «ኢስራኤሌ ኣሳዉ! ሄ ዎዴ ታኒ ጎዳ ኢንቴ ጾሳ ጊዲዳይሳ ኢንቴ ኤራና፤ ታኒ ጌሽ ጊዲዳ ታ ዙማ ጺዮኔ ቦላ ዴኣና፤ ዬሩሳላሜይ ኣንጄቲዳ ካታማ ጊዳና፤ ሄሳፌ ጉዬ ሃራ ኣላጋ ዎታዳራይ ኢዞ ዎራጄና።
JOE 3:18 «ሄ ዎዴ ዙማቲ ዉሪካ ዎይኔ ሚꬃን ኩማና፤ ዙምቡላን ዳሮ ማꬃ ሚዛቲ ሄሜታና፤ ጎዳ ኬꬃፌ ፑልቶይ ፑልታና፤ ዩሁዳ ዴሬን ዲዛ ሻፋታ ኡባ ሃꬂ ኩማና፤ ሺጺሜ ሾባይ ሃꬅ ካላና።
JOE 3:19 ጊብጼ ኣሳይኔ ኤዶሜ ኣሳይ ዩሁዳ ኣሳ ቦላ ጌኔ ኦꬂዳ ጊሻስ ቃሴካ ጺሎ ኣሳ ዎꬊዳ ጊሻስ ጊብጼይ ባዞ ጊዳና፤ ኤዶሜይ ኣሲ ባይንዳሶ ጊዳና።
JOE 3:20 ሄሳ ጋካናዉ ታኒ ሃሎ ኬሶንታ ኣጊዳ ጺሎታ ሱꬃ ጊሻስ ሃሎ ኬሳና፤ ዩሁዳይኔ ዬሩሳላሜይ ቃሴ ሜርናስ ታ ዴሬይ ዴኢዛሶ ጊዳና፤ ታኒካ ጾሳይ ጺዮኔ ዙማ ቦላ ዴኣና» ጊዴስ።
AMO 1:1 ኦዚያይ ዩሁዳ ካዎ፤ ሄሳꬆካ ኢዮኣሳ ና ኢዮርባኣሜይ ኢስራኤሌ ካዎ ጊዲ ዲሺን ሄሲካ ቢታይ ቃጻናፔ ናምኡ ላይꬃፌ ሲንꬃን ኢስራኤሌ ጊሻስ ቴቁሄን ሜሄ ሄሚዛይታ ጊዶፌ ኣሞጼይ ቤኢዲ ዮቲዳ ቃላይ ሃይሳፌ ካሊ ዲዛይሳ፤
AMO 1:2 ኣሞጼይ፥ «ጎዳይ ጺዮኔፔ ባ ቃላ ꬎቁ ሂስቲ ሲሴስ፤ ዬሩሳላሜፔ ጊሬስ፤ ሜሄይ ሄሜቲዛሶቲ ሜላና፤ ቃርሜሎሴ ዙማን ዲዛ ጪሊላቲ ሹላና» ጊዴስ።
AMO 1:3 ጎዳይ ኣራሜስ፥ «ዳማስቆ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ጋላኣዴ ኣሳ ቢራታ ኣቻራ ዲዛ ካꬅ ቡኪዛ ሎዳን ቡኪዳ።
AMO 1:4 ካዎ ኣዛሄሌ ኬꬃን ታማ ዬዳና፤ ሄ ታማይ ካዎ ቤኒ-ሃዳዴ ሚጻታ ማና።
AMO 1:5 ዳማስቆ ካታማ ፔንጌታ ታ ሜንꬄሬꬃና፤ ቤቲ-ኤዴኔ ዴሬ ካዎዛኔ ኣዌ ዙላን ዲዛ ኣሳ ታ ꬋይሳና፤ ኣራሜ ዴሬ ኣሳይካ ዲኤቲዲ ጌዴ ቂሬ ዴሬ ባና» ጌስ።
AMO 1:6 ጎዳይ ፊሊስጼሜስ፥ «ጋዛ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስታ ዴሬዛ ኡባ ዲኢ ኤፊዲ ኤዶሜስ ባይዚዳ።
AMO 1:7 ኢዚ ጊምቤታ ማና ማላ ጋዛ ሚጻን ታኒ ታማ ዬዳና።
AMO 1:8 ኣስቄሎና ዴሬ ካዎዛኔ ኣሽዶዴ ዴሬ ኣሳ ታ ፒታ ꬋይሳና፤ ፊሊስጼሜን ዲዛይቲ ዉሪ ዉራና ጋካናስ ታኒ ታ ኩሼ ኣቃሮኔ ቦላ ዴንꬃና» ጌስ።
AMO 1:9 ጎዳይ ጺሮሴስ፥ «ጺሮሴ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ባ ኢሻቴꬃ ጫቆ ቃላ ላሊዲ ባ ዲኢዳ ዴሬዛ ኡባ ኤዶሜስ ባይዚዳ።
AMO 1:10 ሄሳ ጊሻስ ታኒ ጺሮሴ ካታማ ጊምቤታ ቦላ ታማ ዬዳና፤ ሄ ታማይ ኢዚ ሚጻታካ ማና» ጌስ።
AMO 1:11 ጎዳይ ኤዶሜስ፥ «ኤዶሜ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ባ ኢሻታ ኢስራኤሌ ናይታስ ቃꬌቶንታ ማሻን ጎዲዳ፤ ባ ሃንቆ ዶሺሶንታ ኤጺዲ ኢስታስ ሚሼቶንታ ኡባ ዲፒ ሂስቲዳ።
AMO 1:12 ሄሳ ጊሻስ ታኒ ቴማኔ ጊምቤታ ቦላ ታማ ዬዳና፤ ሄ ታማይ ቦጺራ ሚጻታካ ማና» ጌስ።
AMO 1:13 ጎዳይ ኣሞኔስ፥ «ኣሞኔ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ዴሬ ዛዋ ኣሳናስ ጋላኣዴ ዴሬ ሻራ ማጫሳታ ኡሎ ዳኪዳ።
AMO 1:14 ሄሳ ጊሻስ ኤራባ ካታማ ጊምቤታ ቦላ ታኒ ታማ ዬዳና፤ ሄ ታማይ ኢስታ ሚጻታ ማና። ሄሳፌ ጉዬ ኦላ ጋላሳን ዋሶይ ዳራና፤ ኦላዚካ ጎቴ ጫርኮ ማላ ኤሶታና።
AMO 1:15 ኢስታ ካዎይኔ ዳናቲ ዲኤታና» ጌስ።
AMO 2:1 ጎዳይ ሞኣቤስ፥ «ሞኣቤ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ኤዶሜ ካዎ ሜቄꬂ ቢዲንꬅ ጊዳና ጋካናስ ጹጊዳ።
AMO 2:2 ሄሳ ጊሻስ ታኒ ሞኣቤ ቦላ ታማ ዬዳና፤ ሄ ታማይ ቂሪያቴ ሚጻታ ማና። ኦላንቻቲ ማጉልꬅ፥ ዋሶኔ ዛዬ ጊሪስ ሲሲሼ ሞኣቤ ኣሳ ዎꬊ ዉርሳና።
AMO 2:3 ታኒ ኢስታ ሃሪዛ ካዎዛኔ ዳናታ ኡባ ꬋይሳና» ጌስ።
AMO 2:4 ጎዳይ ዩሁዳ፥ «ዩሁዳ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ታ ዎጋ ካꬊዳ፤ ታ ኣዛዞታካ ናጎንታ ኢጺዳ፤ ካሴ ኢስታ ኣዋቲ ጎይኒዳ ኤቃ ጾሳታ ካሊዲ ኢስቲ ባሌቲዳ።
AMO 2:5 ሄሳ ጊሻስ ታኒ ዩሁዳ ቦላ ታማ ዬዳና፤ ሄ ታማይ ዬሩሳላሜ ሚጻታ ማና» ጌስ።
AMO 2:6 ጎዳይ ኢስራኤሌስ፥ «ኢስራኤሌ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ። ጺሎ ኣሳታ ቢራስ፥ ሜቶቲዳይሳ ቶሆ ጫማስ ባይዚዳ።
AMO 2:7 ኢስቲ ማንቆታ ጉዱላ ቦላ ጌንዴሪሲዲ ኢስታ ሁኤ ዬꬌቴቴስ፤ ቆሄቲዳይታስ ጌላ ፒርዴቴስ፤ ኣዋይኔ ናይ ኢሲ ማጫሳይራ ላይማቴቴስ፤ ኢስቲ ሄሳꬆ ኦꬂ ኦꬂዲ ታ ሱንꬅ ቱኒሴቴስ።
AMO 2:8 ኣሳፔ ኦይሶ ኤኬቲዳ ማይኦ ሂጺዲ ያርሾ ያርሺዛሶዛ ጋርሳን ኣቄቴስ፤ ኢስቲ ባንታ ጾሳ ኬꬃን ኤዳሲ ኤኪዲ ዎይኔ ኡሹ ኢዛን ኡዬቴስ።
AMO 2:9 «ኢስታስ ኣዱሳቴꬃይ ዚጋ ሚꬃ ማላ፤ ሚኖቴꬃይካ ጺዳ ማላ ጊዲዳ ኣሞሬ ኣሳ ታኒ ኢንቴ ሲንꬃፌ ꬋይሳዲስ፤ ኣይፎንታ ማላ ጻጶፔ ሾዳ ዲጋዲስ።
AMO 2:10 ታኒ ኢንቴስ ኣሞሬ ዴሬ ቢታ ኢማናስ ኢንቴና ጊብጼፔ ኬሳዲስ፤ ኦይዱ ታሙ ላይꬅ ኩሜꬅ ባዞራ ካሌꬃ ኤሃዳ ላቲሳዲስ።
AMO 2:11 ቃሴካ ታኒ ኢንቴ ኣቱማ ናይታ ጋርሳፌ ናቤታ፥ ናቴꬃታ ጊዶፌ ናዚራዌታ ዴንꬃዲስ። ኢስራኤሌ ዴሬዞ! ሄሲ ቱሙ ጊዴኔ?» ጌስ።
AMO 2:12 ጾሳይ፥ «ኢንቴ ጊዲኮ ናዚራዌታ ዎይኔ ኡሹ ኡሺዴታ፤ ናቤታካ ቲንቢቴ ዮቶንታ ማላ ኣዛዚዴታ።
AMO 2:13 ቤኢቴ ዳሮ ካꬅ ዴጼቲ ጫኔቲዳ ጋሬይ ጋርሳራ ዲዛ ሚሽ ሊቂሲዛ ማላ ታኒካ ኢንቴና ሊቂሳና።
AMO 2:14 ፒላታ ኣሲ ኬሲ ኤኪ ኣቴና፤ ሚኖይካ ባ ሚኖቴꬃን ማዴቴና፤ ዎልቃማይካ ባ ሼምፖ ኣሼና።
AMO 2:15 ዎንዳፌ ኦይኪዳዴይ ባ ዲዛሶን ሚኒ ኤቂዲ ኦላ ዛሬና፤ ፒላታ ኦላንቻይካ ዎጺ ኣቴና፤ ቶጋንቻይካ ባ ሼምፖ ኣሼና።
AMO 2:16 ኦላ ቃራቲካ ሄ ጋላስ ጎሮ ካሎ ባቃታና» ጌስ።
AMO 3:1 ኢስራኤሌ ኣሳዉ! ጊብጼፔ ኬዚዳ ኢስራኤሌ ኣሳስ ኢንቴስ ጎዳይ ዮቲዳ ቃላ ሃይሳ ሲዪቴ።
AMO 3:2 ጾሳይ፥ «ኩሜꬃ ኣላሜን ዲዛ ዴሬ ኡባፌ ታ ኢንቴና ጻላ ዶራዲስ፤ ኢንቴ ኦꬂዛ ናጋራ ኡባ ጊሻስ ታ ኢንቴና ቃጻያይስ» ጌስ።
AMO 3:3 ናምኡ ኣሳቲ ኦጌ ኢሲፌ ባና ጊዲ ቃቾንታ ኣጊኮ ኢሲፌ ባናስ ዳንዳይዞ?
AMO 3:4 ጋሞይ ዎራ ጊዶን ኣይኮ ሚዛ ሚሽ ሻንካቲ ዴሞንታ ዲሼ ጮ ሜላ ጻጊ ኤሪዜ? ዎዳላ ጋሞይ ኣይኮ ሚዛ ሚሽ ዴሞንታ ዲሼ ባ ዲዛሶን ጮ ሜላ ባ ቃላ ሲሲ ኤሪዜ?
AMO 3:5 ያርዴይ ዎይኮ ጊቴይ ባይንዳሶን ጮ ሜላ ጋዴን ካፎይ ኦይኬቲ ኤሪዜ? ዎይኮ ዲዛይ ኢሲ ሚሺ ባና ቦቾንታ ዲሺን ጮ ሜላ ፒሪ ኤሪዜ?
AMO 3:6 ካታማ ጊዶን ኦላስ ዛዬይ ፑኔቲሺን ባቦን ኮኮሮንታ ኣሲ ዲ ኤሪዜ? ጎዳ ሼኔይ ባይንዳ ዲሺን ካታማ ቦላ ኢታ ሚሺ ጋኪ ኤሪዜ?
AMO 3:7 ጎዳይ ባ ጹራ ባ ኦሳንቻ ናቤታስ ኮይሮቲ ዮቶንታ ዲሼ ኣይኮካ ኦꬄና።
AMO 3:8 ጋሞይ ጻጊን ሲዪዲ ዳጋሞንታይ ኦኔ? ጎዳይ ባ ጹራ ኢዛስ ዮቲን ቲንቢቴ ሃሳዮንታይ ኦኔ?
AMO 3:9 ኣሽዶዴኒኔ ጊብጼን ዲዛ ሚጻታን ዲዛ ኡባስ፥ «ሳማሪያ ዙማታ ቦላ ሺቂቴ፤ ሄን ኢስታን ኦሴቲዛ ጌኔ ኦሶኔ ቡልኣኬቲዛይሳ ጼሊቴ» ጊ ኣዋጂቴ።
AMO 3:10 ጎዳይ፥ «ሃይቲ ዴሬቲ ሎኦ ኦሶ ኤሬቴና። ማካላኒኔ ጌኔን ኤኪዳ ሚሻን ባ ሚጻ ኩንꬄቴስ።
AMO 3:11 ሄሳ ጊሻስ ኢንቴ ዴሬ ሞርኬይ ዎራጃና፤ ኢንቴ ሚጻታ ላሊዲ ኢንቴ ኬꬃካ ቦንቃና» ጌስ።
AMO 3:12 ጎዳይ፥ «ሄንꬃንቻይ ጋሞ ዶናፔ ዶርስ ዎꬂ ኤኪዛ ዎዴ ዶርሳስ ናምኡ ጌዳታ ዎይኮ ዱጻ ሃይꬃታ ዎꬂ ኤኪዛ ማላ ሳማሪያ ቢታን ኢሻሎን ኡቲዳ ኢስራኤሌ ኣሳፔ ጉꬃቲ ጻላ ኣታና» ጌስ።
AMO 3:13 ሳሎ ጎዳይ፥ «ሄኮ ኣኔ ሃይሳ ሲዪቴ! ያቆቤ ዜሬꬃ ቦላ ማርካቲቴ።
AMO 3:14 ኢስቲ ኦꬂዳ ናጋራ ጊሻስ ታኒ ኢስራኤሌ ኣሳ ቃጻዪዛ ዎዴ ቤቴሌን ዲዛ ያርሾ ያርሺዛሶሆታ ታኒ ላላና፤ ያርሺዛሶሆታ ቦላ ዲዛ ካጬቲ ሜቄሬቲ ኩንዳና።
AMO 3:15 ኢስቲ ኢዛን ቦኔኔ ባልጎ ዲዛ ኬꬃታ ኡባ ታ ላላ ꬋይሳና፤ ዳንጋርሳ ዛሌን ሎኤꬂ ኣሌቂሲዳ ኬꬃቲ ዉሪካ ላሌታና፤ ጊታ ኬꬃቲ ዉሪካ ꬋያና» ጌስ።
AMO 4:1 ꬊኬቲዳ ባሳኔ ሚዛታ ማላ ኢንቴ ኣሳቴꬃ ኦርዲሲዳ ሳማሪያ ማጫሳቶ! ሃይሳ ቃላ ሲዪቴ! ኢንቴ ዳቡራንቻታ ካዉሼታ፤ ማንቆታ ቦላካ ጎዳቴታ፤ ኢንቴ ኣዚናታ፥ «ኑስ ማꬆሲዛ ኡሹ ኤሂቴ» ጌታ።
AMO 4:2 ሄሳ ጊሻስ ጎዳይ ባ ጌሻቴꬃን፥ «ኢንቴስ ሲꬌን ዳፎይ ኣꬊን ኢንቴ ባና ዎዴይ ያና፤ ኢንቴፌ ሄን ቢታ ቦላ ኣቲዳይቲ ቃሴ ማንጻኮን ኦይኬቲ ቢዛ ሞሌ ማላ ኦይኬቲ ባና።
AMO 4:3 «ኢንቴፌ ኢሶይ ኢሶይ ኢንቴ ማታን ዲዛ ሉኮራ ጎሼቲ ጎሼቲ ኬዚዲ ጌዴ ሄሪሞኔን ዬጌታና» ጊ ጫቂዴስ።
AMO 4:4 ጎዳይ፥ «ኢስራኤሌ ዴሬዞ! ቤቴሌ ቢዲ ናጋራ ኦꬂቴ! ጌልጌላካ ቢዲ ናጋራ ጉጂ ኦꬂቴ! ጋላስ ጋላስ ኢንቴ ያርሾ ያርሺቴ! ሄꬓንꬆ ጋላስ ጋላስ ኢንቴ ኣስራታ ኢሚቴ።
AMO 4:5 ኢንቴ ኦꬃናስ ኮይዛይ ሄሳ ጊዲዳ ጊሻስ ኢርሾይ ኢዛን ዲዛ ኡኬꬅ ጋላታ ያርሾ ሺሺቴ፤ ኢንቴ ሄሳ ኢንቴ ሼኔ ማላ ሺሺዛ ጊሻስ ኢዛን ጬቄቲቴ» ጌስ።
AMO 4:6 «ኢንቴስ ዶናን ባꬋና ካꬃራ ታ ꬋይሳዳ ኢንቴ ካታማታን ኡባን ኮሻ ዬዳዲስ። ኢንቴ ጊዲኮ ሃ ታኮ ሲሚቤኬታ።
AMO 4:7 ኢንቴ ካꬃይ ጋካናፔ ቡሮ ሄꬑ ኣጊናይ ዲሺን ሲንꬃታ ታ ኢንቴስ ኢራይ ቡኮንታ ማላ ዲጋዲስ፤ ኢሲ ካታማን ቡኪሺን ሃራ ካታማን ቡኮንታ ማላ ዲጋዲስ፤ ኢሲ ጋዴን ቡኪሺን ሃንኮ ኢሳ ጋዴን ኢራይ ꬋዪን ሜሊዴስ።
AMO 4:8 ኣሳይ ሃꬅ ኡያናስ ኮዪሼ ሃ ካታማፔ ሄ ካታማ ቢዴስ፤ ጊዶ ኣቲን ባስ ጊዲዛ ሃꬄ ዴሞንታ ኣጊዳ ጊሻስ ኡዪዲ ኣላናስ ዳንዳይቤቴና፤ ኢንቴካ ታኮ ሲሚቤኬታ።
AMO 4:9 «ኢንቴ ካꬃ ሜሊሲዛ ሃርጌ ታ ኪታዲስ፤ ኢንቴ ኢንቴ ኣታኪልቴኔ ዎይኔ ሚꬃታ፥ ባላሴኔ ዎጋራ ሚꬃታ ኡባ ቦሌይ ሚዴስ፤ ጊዶ ኣቲን ኢንቴ ሃ ታኮ ሲሚቤኬታ» ጌስ።
AMO 4:10 «ታ ካሴ ጊብጼ ቢታ ቦላ ዬዲዳ ኢታ ሃርጌዛ ማላ ሃርጌ ኢንቴ ቦላ ዬዳዲስ፤ ኢንቴ ናቴꬃ ናይታ ማሻን ሃይቃና ማላ ኦꬃዲስ፤ ኢንቴ ፓራታካ ዲኤታና ማላ ታ ኦꬃዲስ፤ ኢንቴ ዲዛሶን ሃይቂዳ ኣሳ ኣሃ ጺንቆይ ኢንቴ ሲꬌ ቱጪዴስ፤ ኢንቴ ጊዲኮ ሃ ታኮ ሲሚቤኬታ።
AMO 4:11 ሶዶሜኔ ጋሞራ ካሴ ታ ꬋይሲዳ ማላ ኢንቴፌ ዳሮታካ ታ ꬋይሳዲስ፤ ኢንቴ ኣቲዳይቲካ ታማይ ሚሺን ኣቲዳ ሚꬃ ዱርጫ ማላ ጊዲዴታ ሺን ኢንቴ ሃ ታኮ ሲሚቤኬታ።
AMO 4:12 «ኢንቴኖ ኢስራኤሌ ኣሳቶ ታኒካ ኢንቴ ቦላ ሄሳꬆ ኦꬃና፤ ሄሳ ጊሻስ ኢንቴ ታናራ ኢንቴ ጎዳራ ጋይታናስ ኣኔ ጊጌቲቴ!» ጌስ።
AMO 4:13 ዙማታ ኦꬂዳዴይ ጫርኮታ ሜꬊዳዴይ ባ ቆፒዳይሳ ኣሳስ ቆንጪሲዛይ ጋላሳ ፖኦ ጌዴ ꬉማን ላሚዛይ ቢታ ቦላ ꬎቃሶሆን ሄሜቲዛይሳ ሱንꬃይ ጎዳ ሳሎ ጾሳ።
AMO 5:1 ኢስራኤሌ ኣሳዉ! ኢንቴ ጊሻስ ታ ዚላሊዛ ዚላስ ሲዪቴ።
AMO 5:2 «ጌላኦያ ኢስራኤሌይ ኩንዳዱስ፤ ናምኣንꬆ ዴንዳናስ ዳንዳዩኩ፤ ኢዞ ማዲ ዴንꬃናይ ባይንዳ ጊሻስ ኢዛ ባርካ ባ ዴሬን ኩንዳ ኣታና።»
AMO 5:3 ኡባ ሃሪዛ ጎዳይ፥ «ኢስራኤሌ ካታማ ኢሲኔይፔ 1,000 ኦላንቻቲ ኦላስ ባናሺን ኢስታፌ ሃይቆንታ ፓጻ ኣታናይ 100 ኣሳታ ጻላ ጊዳና፤ ሃራ ካታማፔካ 100 ኦላ ኣሳቲ ኦላስ ባናሺን ኢስታፌ 10 ኣሲ ጻላ ሲሚ ያና» ጊዴስ።
AMO 5:4 ጎዳይ ኢስራኤሌ ኣሳስ፥ «ኢስራኤሌ ኣሳዉ! ሃ ታኮ ሲሚቴ፤ ኢንቴ ሃይቆንታ ዴኣና።
AMO 5:5 ኢንቴ ቤርሳቤሄ ቦፒቴ፤ ቤቴሌይ ላሌታዳ ሙሌራ ꬋያና፤ ጌልጌላን ዲዛ ኣሳይ ዲኤታና፤ ሄሳ ጊሻስ ቤቴሌ ጊዲን ዎይኮ ጌልጌላ ቦፒቴ» ጊዴስ።
AMO 5:6 ሃ ጾሳኮ ሲሚቴ፤ ሂስቲኮ ኢንቴ ሼምፖራ ፓጻ ዴኣና፤ ኣካይ ጊኮ ጾሲ ታማ ማላ ኢስራኤሌ ዴራ ማና፤ ቤቴሌን ዲዛይታካ ታማይ ማና፤ ሄ ታማ ቶይሳናይ ኢስታስ ቤቴና።
AMO 5:7 ኢንቴኖ ፒርዳ ጌላሲዛይቶ! ቱማካ ጌዴ ዎርዶን ላሚዛይቶ ኢንቴስ ኣዬ ኣና!
AMO 5:8 ፒሊያዲሴ ጌቴቲዛ ላፑን ጾሊንቴታኔ ኦርዮኔ ጌቴቲዛ ኢሲ ቦላ ዲዛ ጾሊንቴታ ሜꬊዳይ ጋላሳ ኦማርሳን፥ ኦማርሳ ጋላሳን ላሚዛይ፥ ኣባ ሃꬅ ኣዛዚዲ ቢታ ቦላ ጎጊሲዛይ፥
AMO 5:9 ዎልቃማታኔ ኢስታ ሚጻታ ላሊ ꬋይሲዛይ ኢዛ፤ ኢዛስ ሱንꬃይካ ጾሳ።
AMO 5:10 ኢንቴ ቃሴ ኢንቴና ፒርዳሶን ሃንቂዛዴ ኢጼታ፤ ቱሙ ሃሳይዛዴካ ካꬌታ።
AMO 5:11 ማንቆታ ኡንኤꬄታ፤ ኢስታ ዎልቃራ ካꬅ ጊሪሴታ፤ ኢንቴስ ማሴቲዳ ሹቻፌ ኬꬅ ኬጺዴታ ሺን ሄ ኬꬃን ዴኬታ። ኣራዳ ቢታን ዎይኔ ሚꬃ ቶኪዴታ ሺን ኢዛፔ ኣጌቲዳ ዎይኔ ኡሹ ኡዬኬታ።
AMO 5:12 ኢንቴ ቆሆይ ኣይ ማላ ዳሮኮኔ ኢንቴ ናጋራይ ኣይ ማላ ዴጾኮ ታ ኤራይስ፤ ኢንቴ ጺሎ ኣሳታ ኡንኤꬄታ፤ ማታኤ ኤኪዲ ፒርዳሶን ማንቆታስ ጌላ ፒርዴታ።
AMO 5:13 ሄሳ ጊሻስ ሄ ዎዴ ዎዴይ ኢታ ጊዲዳ ጊሻስ ኣኬካይ ዲዛ ኣሲ ጮኡ ጌስ።
AMO 5:14 ኢንቴ ሼምፖራ ፓጻ ዴኣና ማላ ሎኦፔ ኣቲን ኢታ ኦꬆፍቴ፤ ኢንቴ ሄሳꬆ ኦꬂኮ ኢንቴ ጊዳ ማላ ጎዳይ ሳሎ ጾሳይ ኢንቴናራ ጊዳና።
AMO 5:15 ኢታ ሚሽ ኢጺቴ፤ ሎኦ ጊዲዳዝ ዶሲቴ፤ ፒርዳ ፒርዲዛሶን ቱሙ ፒርዳ ጌላሶፒቴ። ጎዳይ ሳሎ ጾሳይ ኣቲዳ ኢስራኤሌ ኣሳ ማራናኮ ኦኔ ኤሪዛይ?
AMO 5:16 ሄሳ ጊሻስ ጎዳይ ሳሎ ጾሳይ፥ «ኦጌ ቦላኔ ዱቡሻይ ዲዛሶን ኡባን ዋሶይኔ ዬሆይ ሲዬታና፤ ጎሻንቻቲ ኮይሳስ ዚላሊዛይቲ ዬሆስ ጼይጌታና።
AMO 5:17 ዎይኔ ሚꬂ ቶኬቲዛሶን ኡባን ዬሆ ጻላ ጊዳና፤ ሄሲካ ዉሪ ሃናናይ ታ ኢንቴ ጊዶራ ኣꬊዛ ጊሻሳ» ጌስ።
AMO 5:18 ኢንቴኖ ጎዳ ጋላስ ናጊዛይቶ! ኢንቴስ ኣዬ ኣና! ሄ ጋላሳይ ꬉማፔ ኣቲን ፖኦ ጋላስ ጊዶንታ ጊሻስ ኢንቴ ኣይስ ሄ ጋላሳ ኮዬቲ?
AMO 5:19 ሄ ጋላሳይ ኣሲ ጋሞፌ ኣታናስ ቆቴቲሼ ዛርዶራ ጋጊዛ ማላ ዎይኮ ኬሲ ኤኪ ባሶ ጌሊዲ ባ ኩሼን ኬꬃ ጎዳ ኦይኪን ሾሺ ዱኪዳ ማላ ሃናና።
AMO 5:20 ጎዳይ ፒርዲዛ ጋላሳይ ኢንቴስ ꬉማፔ ኣቲን ፖኦ ጊዴና፤ ሄ ጋላሳይ ኢዛን ኣይኮ ፖኦይካ ባይንዳ ጊርዲ ጊዳ ꬉማ ጊዳና።
AMO 5:21 «ታኒ ኢንቴ ላይꬃን ላይꬃን ቦንቺዛ ባኣሌዛ ካꬋይሲኔ ኢጻይስ፤ ኢንቴ ጎይኖስ ሺቂዛ ሺቆይካ ታና ኡፋይሴና።
AMO 5:22 ታማን ጹጌቲዛ ያርሾኔ ካꬃ ያርሾ ኢንቴ ታስ ሺሺኮካ ታ ሄሳ ኢንቴፌ ኤኪኬ፤ ꬊኬቲዳ ኢንቴ ሜሄታፔ ኢንቴ ታስ ኢሲፌቴꬃ ያርሾስ ሺሺኮ ታ ኢዛ ኣይፌንካ ጼሊኬ።
AMO 5:23 ኢንቴ ዬጺሼ ታ ሃይꬃን ካጮፍቴ፤ ኢንቴ ዲꬃ ጊሪስ ታ ሲያናስ ኮይኬ።
AMO 5:24 ጊዶ ኣቲን ቱሙ ፒርዳይ ጎጊዛ ሃꬃ ማላ፤ ጺሎቴꬂካ ሚጮንታ ፑልቶ ማላ ጎጎ።
AMO 5:25 «ኢስራኤሌ ኣሳዉ! ቱማፔ ኢንቴ ኦይዱ ታሙ ላይꬅ ባዞ ቢታን ዲዛ ዎዴ ቱሙ ያርሾኔ ካꬃ ጼራ ታስ ሺሺዴቲ?
AMO 5:26 ኢንቴ ኢንቴስ ኦꬂዳ፥ ‹ካዎ ዛኩቴ› ጌቴቲዛ ኤቃ ጾሳዛ፤ ቃሴካ፥ ‹ኬዌኔ› ጌቴቲዛ ኢንቴ ሜꬊ ኬሲዳ ጾሊንቴ ሚሳቲዛ ኤቃ ጾሳታ ቶኪዴታ።
AMO 5:27 ታኒ ኢንቴና ዳማስቆፌ ጌዴ ሃሳ ጎዳና» ጌስ ጎዳይ ሳሎ ጾሳይ።
AMO 6:1 ጺዮኔን ባꬊ ጊ ኡቲዳይቶ! ሳማሪያ ዙማ ቦላ ሂርጋይ ባይንዳ ዲዛይቶ! ኢስራኤሌ ኣሳይ ማዶ ኮዪዲ ኢንቴኮ ዪዛይቶ! ኢንቴኖ ዴሬ ሃላቃቶ! ኢንቴስ ኣዬ ኣና!
AMO 6:2 ኣኔ ኢንቴ ጌዴ ካላናሄ ካታማ ቢዲ ጼሊቴ፤ ሄፔካ ኣꬊዲ ሃማቴ ጌቴቲ ጼይጌቲዛ ጊታ ካታማዮኔ ዱጌ ፊሊስጼሜ ካታማ ጌቴ ዎꬊቴ፤ ኢስቲ ኢንቴ ናምኡ ካዎቴꬃታፔ ሎኢዞ? ኢስታ ቢታይ ኢንቴ ቢታፌ ኣኪዜ?
AMO 6:3 ኢንቴ ቃሴ፥ «ኢታ ጋላሲ ኤሌ ጋኬና» ጊዛ ቆፋን ኢንቴ ዳናቴꬃን ጌኔ ኦሶ ኤሶሴታ።
AMO 6:4 ኢንቴ ዳንጋርሳ ዛሌፔ ኦሴቲዳ ኣልጋን ኢቼታ፤ ኦሃላ ላቃ ኣሾኔ ማራ ኣሾ ሚሼ ሶፋ ቦላ ኡቲ ሼምፔታ።
AMO 6:5 ዳዊቴ ማላ ዬꬃ ሚሽ ኢንቴስ ጊግሲዲ ባጋናኒኔ ዱማ ዱማ ማዛሙሬ ዬጺዛይቶ!
AMO 6:6 ዎይኔ ኡሹ ቢሪሌራ ጊዶንታ ኦቶራ ኡዪዛይቶ! ኬሂ ኣልኦ ጊዲዳ ሺቶ ቲዬቲዛይቶ! ኢስራኤሌ ዴራ ቦላ ጋኪዳ ሜቶ ጊሻስ ቃꬌቶንታይቶ ኢንቴና ኣዬ ኣና!
AMO 6:7 ሄሳ ጊሻስ ሄራ ኣሳፔ ኮይሮ ኢንቴ ዲኤታና፤ ሄ ዎዴ ኢንቴ ካሴ ኡፋይሳን ጉፒዛ ጉፋይኔ ባꬊ ጊ ዲዛ ዱሲ ኣታና።
AMO 6:8 ጎዳይ ሳሎ ጾሳይ፥ «ኢስራኤሌ ኣሳ ኦቶሬቴꬃ ታኒ ሃራሴታዲስ፤ ኢስታ ሚጻቲካ ታና ሹኔቴስ፤ ሄሳ ጊሻስ ታኒ ካታማዮኔ ኢዚን ዲዛይታ ኡባ ሞርኬስ ኣꬃ ኢማና» ጊዲ ባርካ ባናን ጫቂዴስ።
AMO 6:9 ኢሲ ኬꬃን ታማቲ ኣቲኮ ሄ ኣቲዳይቲካ ሃይቃና።
AMO 6:10 ሃይቂዳይታፔ ኢሳዴስ ማታ ዳቦ ጊዲዳዴይኔ ሞጎ ዎጋ ፖሊዛዴይ ኣሃዛ ኬꬃፌ ኬሲ ኤፋና፤ ሄ ዎዴ ኢዛዴይ ሶን ዲዛ ኢሲ ኣስ ጼይጊዲ፥ «ኔናራ ኣቲዳ ሃራ ኣሲ ዲዜ?» ጊዲ ኢዛ ኦይቻና ሺን ኢዛዴይ ቃሴ፥ «ኣቲዳ ኣሲ ኦኒካ ዴና» ጋና። ኦይቺዛይሲካ ዛሪዲ፥ «ጎዳ ኑ ጾሳ ሱንꬅ ጼይጋናስ ቤሶንታ ጊሻስ ጮኡ ጋ!» ጋና።
AMO 6:11 ጎዳ ኣዛዞን ዎጋ ኬꬃቲ ላሌታና፤ ጉꬃ ኬꬃቲካ ላሌቲ ኣታና።
AMO 6:12 ፓራይ ሹቻ ቦላ ቶጌቲዜ? ጎሻንቻይ ኣባ ጊዶን ቦራ ዋጺ ጎያናስ ዳንዳይዜ? ኢንቴ ጊዲኮ ፒርዳ ማርዜን ላሚዴታ፤ ቱማካ ጌዴ ጫሞን ሺርዴታ።
AMO 6:13 ኢንቴ ሎዲባሬ ካታማ ጾኒዳ ጊሻስ ኡፋዬቲዴታ፤ «ቃርናይሜ ካታማዮ ኑኒ ኑ ዎልቃን ኦይኪዶስ» ጊዲ ጬቄቴታ።
AMO 6:14 ጎዳይ ሳሎ ጾሳይ፥ «ኢስራኤሌ ኣሳዉ! ታኒ ኢንቴ ቦላ ሃራ ዎልቃማ ዴሬ ዴንꬃና፤ ሄሲካ ፑዴሃ ባጋፌ ሃማቴ ፔንጌፌ ዶሚዲ ዱጌሃ ባጋራ ኣራቤ ሾባ ጋካናስ ኢንቴና ኡንኤꬃና» ጌስ።
AMO 7:1 ጎዳይ ኣጁታን ቦሌይ ያናይሳ ታና ቤሲዴስ፤ ሄኮ ካዎ ካꬂ ማጼቲ ዉሪዳፔ ጉዬ ጌዶራ ጫሪዳ ኣዛባ ካꬃ ቦላ ጾሲ ማቴ ቦሌይ ኬዛና ማላ ኦꬂዴስ።
AMO 7:2 ቦሌዚካ ቢታ ቦላ ዲዛ ጪሊላ ኡባ ፒቲ ሚዳይሳ ታኒ ቤያዳ፥ «ኡባፌ ዎልቃማ ጎዳዉ! ኔ ዴሬ ቆሆዛ ማራርኪ! ኔ ዴሬ ኢስራኤሌስ ዎልቃይ ባይንዳ ጊሻስ ኢዚ ሃይሳ ዎስቲ ኤቄቲ ዳንዳያኔ?» ጋ ዎሳዲስ።
AMO 7:3 ጎዳይካ ኢስታስ ሚሼቲዲ፥ «ሃይሲ ኔ ቤኢዛይሲ ፖሌቴና» ጊዲ ታስ ዮቲዴስ።
AMO 7:4 ኡባፌ ዎልቃማ ጎዳይ ታና ኣጁታ ቤሲዴስ፤ ጎዳይ ቃጻያናስ ታማ ፒርዳ ዬዲዴስ፤ ታማዚካ ዎጋ ጊታ ኣባ ሚቺዲ ቢታ ሙስ ኦይኪዴስ።
AMO 7:5 ሄ ዎዴ ታኒ፥ «ኡባፌ ዎልቃማ ጎዳዉ! ሃይሳ ታማ ቶይሳርኪ! ኔ ዴሬ ኢስራኤሌስ ዎልቃይ ባይንዳ ጊሻስ ኢዚ ሃይሳ ዎስቲ ኤቄቲ ዳንዳያኔ?» ጋ ዎሳዲስ።
AMO 7:6 ጎዳይካ ኢስታስ ሚሼቲዲ፥ «ሃይሲ ኔ ቤኢዛይሲ ፖሌቴና» ጊዲ ታስ ዮቲዴስ።
AMO 7:7 ጎዳይ ታና ሃራ ኣጁታ ቤሲዴስ፤ ቱምቤን ሲቲ ጊ ኦሴቲዳ ጊምቤ ኣቻን ጾሲ ባ ኩሼን ቱምቤ ኦይኪ ኤቂዳይሳ ቤያዲስ።
AMO 7:8 ኢዚካ፥ «ኣሞጼ! ሄሲ ኔ ቤኢዛይሲ ኢዚ ኣዜ?» ጊ ኦይቺዴስ። ታኒካ፥ «ቱምቤኮ!» ጋዲስ። ጎዳይ ዛሪዲ ታስ፥ «ቱምቤን ሲቲ ጊ ኦሴቶንታ ጊምቤ ማላ ታ ዴሬ ኢስራኤሌይ ጌላቲዴስ፤ ሄሳ ጊሻስ ሃይሲ ቱምቤዚ ኢስራኤሌ ናይታ ጌላቴꬃ ቤሲዛ ሌሚሶ፤ ታኒካ ኢስታ ቃጻዮንታ ኣጊኬ።
AMO 7:9 ዪሳቂኔ ኢዛስ ናዛ ናይቲ ጎይኒዛ ꬎቃሶሆቲ ላሌታና፤ ኢስራኤሌ ናይቲ ጎይኒዛሶሆቲ ላሌታና፤ ኢዮርባኣሜ ካዎቴꬅ ታኒ ሙሌራ ꬋይሳና» ጊዴስ።
AMO 7:10 ቤቴሌ ቄሴ ጊዲዳ ኣማሲያሲ ኢስራኤሌ ካዎ ኢዮርባኣሜኮ፥ «ሄኮ ኣሞጼይ ኢስራኤሌ ኣሳ ጊዶን ኡቲዲ ኔ ቦላ ኣሳ ዴንꬄꬄስ፤ ሄሳ ማላ ኦሶን ቢታ ሺሪ ዬጌስ።
AMO 7:11 ኢዚካ፥ ‹ኢዮርባኣሜይካ ኦላን ሃይቃና፤ ኢስራኤሌ ዴሬይ ባ ዴሬፔ ዲኤቲ ባና› ጌስ» ጊ ኪቲዴስ።
AMO 7:12 ኣማሲያሲ ኣሞጼስ፥ «ኔኖ ኣጁታ ቤኢዛይሶ! ሃይሳፌ ዴንዳ ኪቻ፤ ዱጌ ዩሁዳ ቢታ ባዳ ሄን ቲንቢቴ ዮታሼ ኔስ ሚዛ ሚሽ ዴማ።
AMO 7:13 ቤቴሌይ ጊዲኮ ካዎይ ጎይኒዛሶኔ ካዎ ዱሳሶ ጊዲዳ ጊሻስ ቲንቢቴ ዮቶፓ» ጊዴስ።
AMO 7:14 ኣሞጼይ ኣማሲያሳስ፥ «ታኒ ዉዴ ሜሄ ሄሚዛዴኔ ኤꬃ ኣይፌ ማጺዛዴ ኣቲን ታ ሁኤስ ናቤ ዎይኮ ናቤ ና ጊዲኬ።
AMO 7:15 ጊዶ ኣቲን ጎዳይ ሜሄ ሄሚዛሶሆፔ ታና ጼይጊዲ፥ ‹ባ! ታ ዴሬ ኢስራኤሌስ ቲንቢቴ ዮታ› ጊዲ ኣዛዚዳይ ጎዳ።
AMO 7:16 «ሃኢካ ጎዳይ ኔና ጊዛይሳ ሲያ፤ ኔኒ ታና፥ ‹ኢስራኤሌ ኣሳ ቦላ ቲንቢቴ ዮቶፓ፤ ዪሳቃ ዜሬꬅ ጊዲዳ ኢስራኤሌ ዴሬዛካ ሳባኮፓ› ጋ ዲጋዳሳ።
AMO 7:17 ሄሳ ጊሻስ ኣማሲያሳ! ኔ ጊሻስ ጎዳይ፥ ‹ኔ ማቼያ ካታማ ጊዶን ላይማ ማጫስ ጊዳና፤ ኔስ ማጫ ናይቲኔ ኣቱማ ናይቲካ ኦላን ሃይቃና፤ ኣላጋቲ ኔ ቢታ ዎዶሮን ዋꬊ ጊሼቲ ኤካና፤ ኔኒካ ኣላጋ ቢታን ሃይቃና፤ ኢስራኤሌ ኣሳይ ባ ቢታፌ ዲኤቲዲ ኣላጋ ዴሬ ባና› ጌስ» ጊ ዮቲዴስ።
AMO 8:1 ኡባፌ ዎልቃማ ጎዳይ ታና ሃራ ኣጁታ ቤሲዴስ፤ ሄሲካ ቴራይ ኢዛን ኩሚ ዲዛ ኬሼ።
AMO 8:2 ጎዳይ ታና፥ «ሄሲ ኔ ቤኢዛይሲ ኣዜ?» ጊ ኦይቺዴስ፤ ታኒካ ኢዛስ፥ «ቴራራ ዲዛ ዳቾ ቤያይስ» ጋዲስ፤ ቃሴካ ጾሲ ታስ፥ «ታ ዴሬ ኢስራኤሌስ ዉርሴꬂ ጋኪዴስ፤ ሃይሳፌ ጉዬን ታኒ ኢስታ ቃጻዮንታ ኣጊኬ።
AMO 8:3 «ኢስቲ ጾሳ ኬꬃን ሲሲዛ ዬꬃይ ሄ ዎዴ ዬሆን ላሜታና፤ ዳሮ ኣሳ ኣሃይ ኣዋን ኣዋንካ ኩንዲ ኣታና፤ ኣዋንካ ጮ ዬጌቲ ኣታና» ጌስ።
AMO 8:4 ኢንቴኖ ሜቶቲዳ ኣሳ ቆሂዛይቶ! ቃሴ ማንቆታ ቢታፌ ꬋይሳና ኮይዛይቶ! ሃይሳ ሲዪቴ!
AMO 8:5 ኢንቴ፥ «ኑኒ ኑ ካꬃ ባይዛና ማላ ኣጊና ጼሮን ቦንቺዛ ባኣሌይ ኣይዴ ኣꬋኔሻ! ኑኒ ካꬅ ጊያ ጌልꬃናስ ሳምባታይካ ኑስ ኣይዴ ኣꬋኔሻ! ሄ ባኣሌይ ኣꬊኮ ኑኒ ማካ ሚሻ ጉꬂዲ ኣልኦ ዋጋን ባይዛና፤ ቃሴካ ዎርዶ ሜዛኔን ኣሳ ባሌꬃና።
AMO 8:6 ጊስቴ ሃርቆካ ሙሩታ ጊስቴ ዋጋን ባይዛና፤ ማንቆታ ቢራን፥ ሜቶቲዳይታካ ቶሆ ጫማን ሻማና» ጌታ።
AMO 8:7 ያቆቤይኔ ኢዛ ዜሬꬃቲ ኢዛን ጬቄቲዛ ጎዳይ፥ «ኢስቲ ኦꬂዳ ኦሶ ኡባ ታኒ ባሊኬ፤
AMO 8:8 ሃይሳ ጌዶን ቢታይ ቡሮ ቃጻና፤ ቢታይ ቦላ ዲዛይ ዉሪካ ዬካና፤ ኣባዬ ሻፋይ ኪጺዲ ጉሚዛይሳꬆ ቢታ ኡባይ ቃꬂ ዮሺኩዮሺካና» ጊዲ ባርካ ባናን ጫቂዴስ።
AMO 8:9 ኡባፌ ዎልቃማ ጎዳይ፥ «ሄ ዎዴ ታኒ ጋላሳ ሴታን ኣዋ ኣርሼ ዉልሳና፤ ጋላሳ ሴታን ጋዴ ꬉሚሳና።
AMO 8:10 ኢንቴ ላይꬃን ላይꬃን ቦንቺዛ ባኣሌዛ ዬሆን ላማና፤ ኢንቴ ዬጺዛ ዬꬃካ ዋሶን ላማና፤ ዲዛ ፔጺ ኢሲ ናይ ሃይቂን ጫሞ ዬሆ ዬኪዛ ኣሳ ማላ ኢንቴ ኢንቴ ሁኤ ቢናና ቡጪዲ ማቃ ማይኣና ማላ ታኒ ኢንቴና ኦꬃና፤ ሄ ዉርሴꬃ ጋላሳይ ጫሞ ጋላስ ጊዳና።
AMO 8:11 ሄኮ ታኒ ቢታ ቦላ ኮሻ ኤሃና ዎዴይ ያና፤ ሄሲካ ኣሳይ ጾሳ ቃላ ሲያና ጋፋኔ ሳሞ ኣቲን ካꬃ ጋፋኔ ሃꬃ ሳሞ ጊዴና።
AMO 8:12 ዴሬይ ዉሪ ፑዴሃፔ ዱጌሃ ጋካናስ ኣርሼይ ሞኪዛሶፔ ዉሊዛሶ ጋካናስ ጎዳ ቃላ ኮሽ ያኔ ሃ ዬሞታናሺን ዴሜና።
AMO 8:13 ሄ ዎዴ ሎኦ ጌላኦቲኔ ሚኖ ፓንꬃቲ ሳሞፔ ዴንዳናይሳን ዳቡራና።
AMO 8:14 ሳማሪያ ዴሬን፥ ‹ኣሻሞ› ጌቴታ ጼይጌቲዛ ኤቃ ጾሳይን ጫቂዛይቲ፥ ‹ዳኔ ጾሳይ ቤዪን› ዎይኮ፥ ‹ቤርሳቤሄ ጾሳይ ቤዪን› ጊ ጫቂዛይቲ ዉሪካ ኩንዳና፤ ባ ኩንዲዳሶሆፔ ሙሌካ ዴንዳናስ ዳንዳዬቴና» ጌስ።
AMO 9:1 ጎዳይ ያርሾ ያርሺዛሶዛ ሚሌን ኤቂ ዲሺን ታ ቤያዲስ፤ ኢዚካ ታና፥ «ጾሳ ኬꬃ ዮቻይ ቃጻና ጋካናስ ኬꬃ ቁስቴ ሾጫ ላላዳኔ ኣሳ ቦላ ኩንዳና ማላ ኦꬃ፤ ሄሳፌካ ኣቲዳይታ ታኒ ኢስታ ማሻራ ዎꬋ ꬋይሳና፤ ኢስታፌ ኦኒካ ባቃቴና፤ ባቃቲኮካ ታፔ ኬሲ ኤኪ ኣቴና።
AMO 9:2 ኢስቲ ዱፎ ቦኪ ጌሊዳኮካ ታ ኩሼይ ኢስታ ሄፔ ሾዲ ሃ ኬሳና፤ ኢስቲ ፑዴ ሳሎ ኬዚዳኮካ ታኒ ኢስታ ሄፔ ሃ ዱጌ ጎቻ ዎꬃና።
AMO 9:3 ኢስቲ ፑዴ ቃርሜሎሴ ዙማ ቦላ ኬዚ ቆቴቲዳኮካ ታ ካሌታ ባዳ ኢስታ ሄፔ ዎꬃና፤ ኢስቲ ዱጌ ጪማ ኣባ ጊዶ ጌሊዲ ታፔ ቆቴቲዛኮካ ሄን ኢስታ ሾሺ ዱካና ማላ ታ ኣዛዛና።
AMO 9:4 ኢስቲ ባ ሞርኬታ ኩሼን ዲኤቲ ቢኮካ ሄን ኢስቲ ማሻን ሃይቃና ማላ ታ ኣዛዛና፤ ታኒ ኢስታ ቦላ ታ ኣይፌ ሎኦስ ጊዶንታ ኢታስ ዛራና» ጊ ኣዛዚዴስ።
AMO 9:5 ኡባ ሃሪዛ ጎዳይ ኢዚ ቢታዮ ቦቼስ፤ ኢዛካ ሴራዉስ፤ ኢዚን ዲዛ ኡባይ ዬኬስ፤ ናይሌ ሻፋይ ኪጺ ጉሚዛ ማላ ቢታ ኡባይ ቃጼስ፤ ቃሴ ዛሪዲ ኪጻ ሃꬂ ዎꬊዛ ማላ ዎꬋና።
AMO 9:6 ባ ዱሳሶ ሳሎ ኦꬂዳይ፥ ሳሎካ ሳኣፔ ቦላን ሚንꬂዳይ፥ ኣባ ሃꬃ ኣዛዚዲ ቢታ ቦላ ጎጊሲዛይ ኢዛስ ሱንꬃይ ጎዳ።
AMO 9:7 ጎዳይ፥ «ኢስራኤሌ ኣሳዉ! ኢንቴ ታስ ቶጵያ ኣሳ ማላ ጊዴኬቲ? ታኒ ኢንቴና ጊብጼፔ ኬሶይሳꬆ ፊሊስጼሜ ኣሳ ቃርጼሴፔ ቃሴ ሶሪያ ኣስ ቂሬፔ ኬሳቤኪና?
AMO 9:8 ታኒ ኡባ ሃሪዛ ጎዳይ ጌዴ ናጋራንቻ ኢስራኤሌ ኣሳ ካዎቴꬃኮ ጼላይስ፤ ታ ኢዛ ቢታፌ ሙሌራ ꬋይሳና፤ ጊዶ ኣቲን ያቆቤ ዜሬꬅ ኡባ ꬋይሲኬ» ጌስ።
AMO 9:9 «ቤኢቴ ካꬅ ዛይዛሬን ዛይዛሪዛ ማላ ኢስራኤሌ ኣሳ ኣይዛቤ ካዎቴꬃ ጊዶን ዛይዛራና ማላ ታ ኣዛዛና፤ ጊዶ ኣቲን ኢስታፌ ኢሳዴይካ ዎራ ዎꬊ ꬋዬና።
AMO 9:10 ‹ኑ ቦላ ኣይኮ ኢታይካ ጋኬና ዎይኮ ኑና ቦቼና› ጊዛ ታ ዴሬ ኣሳ ጋርሳን ዲዛ ናጋራንቻቲ ኡባይ ኦላን ሃይቃና» ጌስ ጎዳይ።
AMO 9:11 «ጮ ኩንዲ ላሌቲዳ ኬꬃ ማላ ጊዲዳ ዳዊቴ ዜሬꬃታ ካዎቴꬃስ ታኒ ዛራ ኤሳና ዎዴይ ያና፤ ታኒ ጊምቤዛ ዛራ ጊምባና፤ ላሌቲዳይሳካ ኦራጺሳና፤ ካሴይሳꬆ ዛራ ኦꬃና።
AMO 9:12 ሄሳꬆካ ኤዶሜ ዴሬን ኣቲዳይታኔ ታ ሱንꬃን ጼይጌቲዳ ዴሬታ ኡባ ኢስቲ ላታና» ጌስ ጎዳይ።
AMO 9:13 «ካꬅ ማጺዛይቲ ማጺ ዉርሶንታ ዲሺን ጎሻ ዎዴይ ጋኬስ፤ ዎይኔ ኣይፌ ጉምኢዛዴይ ጉምኢ ጊጎንታ ዲሺን ዎይኔ ፑቴ ቶኪዛ ዎዴይ ጋኬስ፤ ሄ ዎዴ ማልኢዛ ሎኦ ዎይኔ ኡሺ ዙማፔ ፑልታና፤ ዙምቡላታፔካ ጎጋና።
AMO 9:14 ዲኤቲ ቢዳ ኢስራኤሌ ኣሳ ሃ ኢስታ ዴሬ ዛራ ኤሃና፤ ላሌቲዳ ካታማታ ዛሪ ኬጺዲ ኢዛን ዴኣና፤ ኢስቲ ዎይኔ ቶኪዲ ኢዛፔ ኣጌቲዳ ኡሹ ኡያና፤ ዱማ ዱማ ኣይፊዛ ሚꬅ ቶኪዲ ኢዛ ኣይፌ ማና።
AMO 9:15 ታ ዴሬ ኢስራኤሌ ኣሳ ታኒ ካሴ ኢስታ ቢታን ዛራዳ ቶካና፤ ታኒ ኢስታስ ኢሚዳ ቢታፌ ኢስቲ ናምኣንꬆ ꬎቃሌቲ ꬋዬቴና» ጌስ ጎዳይ ሳሎ ጾሳይ።
OBA 1:1 ኣብዲዩይ ቤኢዳ ኣጁታ፤ ጎዳይ ኤዶሜ ጊሻስ ኣብዲዩ ኪቲዴስ፤ ኑ ሲዪዳ ጾሳ ኪታይ፥ «ታኒ ጾሳይ ኤዶሜ ቦላ ሜቶ ጋꬃና ማላ ኣዛዛዳ ዴራ ጊዶ ኣስ ኪታዲስ» ጌስ።
OBA 1:2 ጎዳይ ኤዶሜስ፥ «ታ ኔና ዴሬ ኣሳፔ ላፊሳና፤ ኔኒ ኣስ ኡባን ሌቄቲዳዝ ጊዳና።
OBA 1:3 ኔኖ ዛላ ጎምፓን ዲዛይሶ! ኔ ዱሳሶ ꬎቃሶሆን ኬጺዳይሶ! ‹ታ ዲዛሶፔ ታና ዚቃሶ ዎꬃና ዳንዳይዛይ ኦኔ?› ጊዛይሶ! ኔ ዎዚና ኦቶሮቴꬂ ኔና ባሌꬂዴስ።
OBA 1:4 ኔ ጎሌ ካፎ ማላ ኬሃ ፑዴ ፒራꬊኮካ፥ ኔ ኬꬅ ጾሊንቴ ጊዶን ኬጺኮካ ታ ኔና ሄፔ ሃ ዱጌ ዎꬃና።
OBA 1:5 «ካይሶቲ ዎይኮ ቦንቂዛይቲ ኦማርስ ዪኮ ባስ ጊዲዛይሳ ኤኬቴስ፤ ካꬅ ማጺዛይቲ ፒጼ ኣሼቴስ፤ ጊዶ ኣቲን ኔ ሞርኬቲ ኢሲኖካ ኣሼቴና።
OBA 1:6 ኢንቴኖ ኤሳዌ ዜሬꬃቶ! ኢንቴ ኬꬅ ቦንቄቲዴስ፤ ሄኮ ኢንቴ ሃሮይ ዉሪ ቦጌቲዴስ።
OBA 1:7 ኔናራ ጫቄቲዳ ላጌቲ ኔና ባሌꬂዳ፤ ኔና ዶሲዛ ላጌቲ ኔ ቦላ ሞርኬቴꬃን ዴንዲዳ፤ ኔ ካꬅ ሚዳይቲ ኔስ ያርዴ ዎꬂዲ ኔና ኔ ዴሬፔ ጎዲዳ፤ ጊዶ ኣቲን ኢስቲ ሄሳ ኔ ቦላ ኦꬂሺን ኔኒ ኤራቤካ።
OBA 1:8 «ሄ ዎዴ ኤዶሜፔ ኣꬎ ኤራንቻታ፥ ኤሳዌ ዙማፔ ኤራቴꬅ ꬋይሳና።
OBA 1:9 ኤዶሜ ዴሬን ዴኢዛ ኣሳቲ ዉሪካ ሃይቃና፤ ቴማኔ ኦሊዛ ዎልቃማ ኦላንቻቲ ባባና።
OBA 1:10 «ኔ ኢሻ ያቆቤ ዜሬꬃታ ኔኒ ጌኔ ዎꬊዳ ጊሻስ ኔ ካዉያዳ ሜርናስ ꬋያና።
OBA 1:11 ዬሩሳላሜ ሞርኬቲ ፔንጌ ሜንꬂዲ ሃሪዳ ሚሽ ኡባ ቦንቂዛ ዎዴ ኔኒ ላንቄራ ኤቃ ጼላዳሳ፤ ሄሳ ጊሻስ ዬሩሳላሜ ቦላ ሳማ ዬጊ ጊሼቲ ኤኪዳይታፔ ኔኒ ዱማታካ።
OBA 1:12 ዩሁዳ ዴሬን ዴኢዛ ኢሻታ ቦላ ጋኪዳ ሜቶን ኔኒ ኡፋዬታና ኮሼናሺን ኡፋዬታዳሳ፤ ቃሴ ኢስታ ꬋዮኒኔ ሜቶን ኡፋዬታናኔ ኦቶሬታና ኔስ ቤሴናሺን ኦቶሬታዳሳ።
OBA 1:13 ታ ዴሬይ ꬋይዛ ጋላስ ኢስታ ፔንጌራ ኔኒ ጌላና ቤሴናሺን፤ ኢስቲ ꬋይዛ ጋላስ ሜቶቲሺን ኔኒ ኡፋዬታና ቤሴናሺን፤ ቃሴካ ኢስቲ ꬋይዛ ጋላስ ኔ ኢስታ ሃሮ ቦጋና ኔስ ቤሴናሺን።
OBA 1:14 ጎዴቲዲ ቆቴቲዳይታ ዎꬋና ኔ ኦይዱ ኦጌ ቦላ ናጋና ቤሴናሺን ናጋዳሳ፤ ቃሴ ኣቲዳ ኣሳታ ሜቶ ጋላስ ኔ ኣꬃ ኢማናስ ቤሴናሺን ኢማዳሳ።
OBA 1:15 «ታ ጾሳይ ኣሳ ኡባ ቦላ ፒርዲዛ ዎዴይ ጋኪዳ ጊሻስ ኤዶሜ! ኔ ኦꬂዳ ኢታ ኦሶይ ኔ ቦላ ሲማና፤ ሄሳ ጊሻስ ኔ ኦሶ ማላ ኔ ኤካና።
OBA 1:16 ኣንጄቲዳ ታ ዙማ ቦላ ኢንቴ ዋዬ ኡሹ ኡዪዳ ማላ ኢንቴ ዩሾን ዲዛ ሃንኮ ዴሬይ ዋዬ ኡሹ ኡያና፤ ኡዪዳይቲ ዉሪካ ꬋያና።
OBA 1:17 «ጺዮኔ ዙማን ሜቶፔ ኣታናይ ዳና፤ ሄ ዙማያካ ጌሽ ጊዳና፤ ያቆቤ ዴሬይ ቦንቄቲዳ ባ ሃሮ ዛሪ ኤካና።
OBA 1:18 ያቆቤ ዜሬꬃቲ ታማ ማላ፥ ዮሴፌ ዜሬꬃቲ ታማ ላጮ ማላ ጊዲን ኤሳዌ ዜሬꬃቲ ኡቱላ ማላ ጊዳና፤ ታማይ ኡቱላ ሚዛ ማላ ያቆቤ ዜሬꬃቲኔ ዮሴፌ ዜሬꬃቲ ኤሳዌ ዜሬꬃታ ꬋይሳና።
OBA 1:19 «ዩሁዳ ዴሬፔ ዱጌሃ ባጋራ ዲዛ ኔጌቤ ኣሳይ ኤዶሜ ቢታ ላታና፤ ኣርሼይ ዉሊዛ ባጋራ ጋꬋን ዲዛ ኣሳቲ ፊሊስጼሜ፥ ኤፍሬሜኔ ሳማሪያ ቢታ ላታና፤ ቃሴ ቢኒያሜ ዜሬꬃቲ ጋላኣዴ ቢታ ላታና።
OBA 1:20 ቤቲ ቢዳ ኢስራኤሌ ኣሳይ ኣላሄ ጌቴቲዛ ዴሬፔ ሲሚዲ ካናኔ ቢታፌ ሲራፍታ ጋካናስ ዲዛ ቢታ ላታና፤ ቤቴ ቢዲ ሲራፍታ ዴሬን ዲዛ ኢስራኤሌ ኣሳይ ኔጌቤን ዲዛ ካታማታ ላታና።
OBA 1:21 ኣቲዳ ኢስራኤሌ ኣሳቲ ጺዮኔ ዙማ ቦላ ኡቲዲ ኤዶሜ ዴሬ ኣይሳና፤ ቃሴ ካዎቴꬃይካ ጾሳስ ጊዳና» ጊ ዮቲዴስ።
JON 1:1 ኣማቴ ና ዮናሳኮ ጎዳ ቃላይ፥
JON 1:2 «ዴንዳዳ ሄ ጊታ ካታማ ናናዌ ባ፤ ሄ ካታማ ኣሳ ኢታቴꬅ ታ ቤኢዳይሳ ኢስታስ ዮታ» ጊሼ ዪዴስ።
JON 1:3 ጊዶ ኣቲን ዮናሲ ጎዳ ሲንꬃፌ ባቃቲዲ ታርሴሴ ቢታ ባናስ ዴንዲዴስ፤ ኢዚ ዮጴ ካታማ ዎꬊዲ ታርሴሴ ቢዛ ማርካቤ ዴሚዴስ፤ ጎዳ ሲንꬃፌ ባቃቲዲ ኢስታራ ታርሴሴ ባናስ ሚሽ ቃንጺዲ ማርካቤዛን ጌሊዴስ።
JON 1:4 ማርካቤዚ ቢሺን ጎዳይ ኣባ ቦላ ጎቴ ጫርኮ ዴንꬂን ኣባ ዳምባላይ ኬሂ ዳሪዳ ጊሻስ ማርካቤዚ ሜቃና ጋኪዴስ።
JON 1:5 ሂስቲን ማርካቤዛን ዲዛ ኣሳይ ባቢዳ ጊሻስ ዉሪካ ባ ጾሳኮ ዋሲዴስ፤ ቃሴ ማርካቤዚ ካዉያና ማላ ኢዛ ጊዶን ዲዛ ጫና ዴንꬂዲ ኣባን ኦሊዳ፤ ጊዲኮካ ዮናሲ ማርካቤዛስ ጋርሳ ኪፊሌ ዎꬊዲ ሄን ዴጾ ꬊስኮ ዎꬊዴስ።
JON 1:6 ማርካቤዛ ሃላቃይ ኢዛኮ ቢዲ፥ «ኣይስ ꬊስካዲ? ዴንዳዳ ኔ ጾሳ ዎሳ! ኢዚ ባ ሎኦ ኣይፌን ጼሊዲ ኑና ኣሻናኮ ኦኒ ኤሪዜ!» ጊዴስ።
JON 1:7 ማርካቤዛን ዲዛ ኣሳይ ኢሶይ ኢሳ፥ «ሃ ዪቴ! ሃይሲ ኢታ ሚሺ ኦና ጋሶን ኑና ጋኪዳኮ ኤራናስ ኣኔ ሳማ ዬጎስ» ጊዳ፤ ሂስቲን ኢስቲ ሳማ ዬጊን ሳማይ ዮናሳ ቦላ ዎꬊዴስ።
JON 1:8 ሄሳፌ ጉዬ ኢስቲ ዮናሳ፥ «ሃይሲ ኢታ ሚሺ ኦና ጋሶን ኑ ቦላ ጋኪዳኮ ኣኔ ኑስ ዮታ! ኔ ኦሶይ ኣዜ? ኣዋፔ ያዲ? ኔ ዴሬይ ኣዋ? ኔኒ ኦና ዜሬꬄ?» ጊ ኦይቺዳ።
JON 1:9 ሂስቲን ዮናሲ ዛሪዲ፥ «ታኒ ኢብራዌ ኣሳ፤ ኣባኔ ቢታ ሜꬊዳ ሳሎ ጎዳ ጎይናይስ» ጊዴስ።
JON 1:10 ሄሳ ጊሻስ ጾሳ ሲንꬃፌ ኢዚ ባቃቲዛይሳ ኢዚ ኢስታስ ዮቲዳይሳፌ ኣሳይ ኤሪዳ ጊሻስ ኬሂ ባቢዲ፥ «ሃይሶ ኣይ ፓላ ሚሽ ኦꬃዲ?» ጊዳ።
JON 1:11 ቃሴ ኣባ ዳምባላይ ካሴይሳፌ ሃ ዳሪዳ ጊሻስ ኣሳይ ዮናሳ፥ «ኑስ ኣባይ ጮኡ ጋና ማላ ኔና ኑኒ ዎስቲኖ?» ጊዲ ኦይቺዳ።
JON 1:12 ኢዚካ ኢስታስ፥ «ሃይሲ ዎልቃማ ዳምባላይ ኢንቴ ቦላን ዴንዲዳይ ታ ጋሶን ጊዲዳይሳ ታ ኤራይስ፤ ሄሳ ጊሻስ ታና ዴንꬂዲ ኣባን ኦሊቴ፤ ሂስቲኮ ኣባይ ኢንቴስ ጮኡ ጋና» ጊዴስ።
JON 1:13 ጊዶ ኣቲን ማርካቤዛን ዲዛ ኣሳይ ማርካቤዛ ጉዬ ኣባ ላንቄ ኬሳናስ ሚንꬂ ላጊዳ ሺን ኣባ ዳምባላይ ኬሂ ዳሪዳ ጊሻስ ኬሳናስ ዳንዳይቤቴና።
JON 1:14 ሄሳ ጊሻስ ኢስታስ፥ «ኣቤት ጎዳዉ! ሃይሳ ኣዴዛ ሼምፖ ጊሻስ ኔኒ ኑና ꬋይሶንታ ማላኔ ሃይሳ ጌሻ ሱꬃ ኣጮዛካ ኔኒ ኑፔ ኦይቾንታ ማላ ኑኒ ኔና ኬሂ ዎሶስ። ኣይስ ጊኮ ጎዳዉ ኔኒ ኔ ኮዪዳ ማላ ኦꬃዳሳ» ጊዲ ጎዳኮ ዋሲዳ።
JON 1:15 ሄሳፌ ጉዬ ዮናሳ ዴንꬂዲ ኣባን ኦሊን ኣባ ዳምባላይ ጮኡ ጊዴስ።
JON 1:16 ሂስቲን ኣሳይ ጎዳስ ኬሂ ባቢዴስ፤ ጎዳስ ያርሾ ያርሺዳ፤ ኣዲናካ ኣዲኔቲዳ።
JON 1:17 ዮናሳ ሚታና ማላ ኢሲ ጊታ ሞሌ ጎዳይ ጊግሲን ሄ ሞሌዛ ኡሎን ዮናሲ ሄꬑ ጋላሲኔ ሄꬑ ኦማርስ ኣቂዴስ።
JON 2:1 ዮናሲ ሞሌዛ ኡሎን ዲሼ ባ ጎዳኮ፥
JON 2:2 «ታኒ ቱጋ ጊዶን ዳሼ ጎዳ ጼይጊን ኢዚ ታስ ኮዪዴስ፤ ታኒ ሃይቂዳይቲ ዲዛ ጪማ ጊዶን ዳሼ ኔኮ ዋሳዲስ፤ ኔካ ታ ዋሶ ሲያዳሳ።
JON 2:3 ኔ ታና ጪማ ኣባ ጊዶ ዱጌ ዬጋዳሳ፤ ሃꬂ ታና ዶዲዴስ፤ ኔ ዳምባላይ ታ ቦላራ ኣꬊዴስ።
JON 2:4 ሄሳ ጊሻስ ታኒ፥ ‹ታ ኔ ሲንꬃፌ ዎራ ኦሌታዲስ፤ ጊዲኮካ ታ ኔ ጌሻ ኬꬃ ቃሴካ ዛራ ቤኣና› ጋዲስ።
JON 2:5 «ሃꬃይ ታስ ቆꬌ ጋካናስ ሚቲዴስ፤ ጪማ ኣባይ ታና ሚቲዴስ፤ ኣባ ጊዶን ዲዛ ማታይካ ታ ሁኤ ቦላ ጻጼቲዴስ።
JON 2:6 ታኒ ዙማታ ጋርስ ዱጌ ዎꬋዲስ፤ ሄን ቢታ ጋርሳን ሜርናስ ጎርዳን ኡታዲስ፤ ጊዲኮካ ኣቤት ታ ጎዳዉ! ኔኒ ታ ሼምፖ ጪማ ኦላፌ ኬሳዳሳ።
JON 2:7 «ታኒ ሃይቃና ማቲዳ ዎዴ ኔና ጎዳ ቆፓዲስ። ታ ዎሳይካ ኔኮ ፑዴ ጌሻ ኬꬅ ጋኪዴስ።
JON 2:8 ሃዳ ኤቃታ ካሊዛይቲ ዉሪ ኔናን ጎዳን ኣማኔታናይሳ ኣጊዳ።
JON 2:9 ጊዶ ኣቲን ታ ጋላታ ኔስ ያርሻና፤ ታ ኣዲኔቲዳይሳ ኡባካ ጋꬃና፤ ኣይስ ጊኮ ኣቶቴꬂ ጎዳፔ ዬስ» ጊ ዎሲዴስ።
JON 2:10 ሄሳፌ ጉዬ ጎዳይ ሞሌዛ ኣዛዚን ሞሌዚ ዮናሳ ቢታ ቦላ ጮዪዴስ።
JON 3:1 ጎዳ ቃላይ ናምኣንꬆ ዮናሳኮ፥
JON 3:2 «ዴንዳዳ ሄ ጊታ ካታማ ናናዌ ባዳ ታኒ ኔስ ዮቲዛ ቃላ ኢስታስ ኣዋጃ» ጊሼ ዪዴስ።
JON 3:3 ሂስቲን ዮናሲ ዴንዲዲ ጎዳ ቃላꬆ ናናዌ ቢዴስ። ናናዌይ ኬሂ ጊታ ካታማ፤ ሃ ጋጻፔ ሄ ጋጻ ጋካናስ ሄꬑ ጋላስ ሄሜꬄስ።
JON 3:4 ዮናሲ ናናዌ ካታማ ቢ ጋኪዲ ኢሲ ጋላሳ ኦጌ ማላ ካታማስ ጊዶ ቢዲ፥ «ኦይዱ ታሙ ጋላሳፌ ጉዬ ናናዌይ ꬋያና» ጊዲ ኣዋጂዴስ።
JON 3:5 ሂስቲን ናናዌ ኣሳይ ጾሳ ኣማኒዲ ጾማ ኣዋጂዴስ፤ ጊታታፔ ጉꬃታ ጋካናስ ዉሪካ ማቃ ማይኢዳ።
JON 3:6 ዮኦዚ ናናዌ ካዎኮ ጋኪን ኢዚ ባ ካዎቴꬃ ኣራታፔ ዎꬊዲ ካዎቴꬃ ማይኦ ማይኢዳይሳ ቃሪዲ ማቃ ማይኢዲ ቢዲንꬃን ኡቲዴስ።
JON 3:7 ሂስቲዲ ናናዌ ኣሳስ፥ «ካዎዛፔኔ ካዎ ኦሳንቻታፔ ኢሜቲዳ ኣዛዞ ማላ ሃቺፌ ዶሚዲ ኣሲኔ ሜሄይ ኡባይ ኣይኮካ ሞፖ፤ ሃꬂካ ኡዮፖ።
JON 3:8 ኣሳይካ ሜሄይካ ዉሪ ማቃ ማይኦ፤ ኣሲ ዉሪ ሚንꬂዲ ጾሳኮ ዋሶ፤ ባ ኢታ ኦጌፔኔ ቆሆ ኦሶፔካ ሲሞ።
JON 3:9 ሂስቲኮ ጾሳይ ኑስ ቃꬌቲዲ ኑ ꬋዮንታ ማላ ባ ዎልቃማ ሃንቆፌ ሲማናኮ ኦኔ ኤሪዛይ» ጊዴስ።
JON 3:10 ኢስቲ ባ ኢታ ኦጌፔ ሲሚዳይሳ ጾሳይ ቤኢዲ ኢስታስ ቃꬌቲዲ ኢስታ ቦላ ኤሃና ጊዳ ፒርዳ ኣጊዴስ።
JON 4:1 ዮናሲ ጊዲኮ ሄ ሃኖዛ ኡባን ኡፋዬቲቤና፤ ሄሳ ጊሻስ ኬሂ ሃንቄቲዴስ፤
JON 4:2 ሄሳፌ ጉዬ ጎዳ፥ «ኣቤት ጎዳዉ! ታኒ ቡሮ ታ ዴሬን ዳሼ ጊዳይሲ ሃይሳ ጊዴኔ? ታ ኔ ሲንꬃፌ ቤታዳ ታርሴሴ ባናስ ኤሶቲዳይሲ ሄሳሳ፤ ቃꬌታይኔ ማሮታይ ኔናን ኩሚዳ ጾሳ ኔ ጊዲዳይሳ፥ ሃንቆስ ኤሶቶንታይሳኔ ኣጎንታ ሲቆን ኩሚዳይሳ፥ ቃሴ ኤሃና ጊዳ ኢታ ሚሺካ ኣጊዛ ጾሳ ኔ ጊዲዳይሳ ታኒ ካሴካ ኤራይስ።
JON 4:3 ኣቤት ጎዳዉ! ሃኢ ታ ሼምፖ ኤካ፤ ፓጻ ዱሳፌ ታስ ሃይቆይ ሎኦ» ጊ ዎሲዴስ።
JON 4:4 ሂስቲን ጎዳይ ኢዛስ፥ «ቱሙ ኔ ሃይሳስ ሃንቄታናስ ቤሲዜ?» ጊዴስ።
JON 4:5 ዮናሲ ካታማፔ ኬዚ ቢዲ ኣርሼይ ሞኪዛ ባጋን ኡቲዴስ፤ ካታማ ቦላ ጋኪዛዝ ቤያናስ ሄን ባስ ዳሴ ዳሲዲ ኢዛ ኩዋን ኡቲዴስ።
JON 4:6 ኣርሼ ሴላፔ ዮናሳ ኣሻናስ ጎዳይ ኢሲ ጎሴ ዶሊሲዴስ፤ ሄ ጎሴይ ዲጪዲ ዮናሳ ኩዋሲዴስ፤ ዮናሲ ሄ ጎሴይ ጊሻስ ኬሂ ኡፋዬቲዴስ።
JON 4:7 ጊዶ ኣቲን ዎንቴꬃ ጋላስ ማላዶ ጾሳይ ጉጹኔ ኪቲዴስ፤ ሄ ጉጹኔያ ጎሴይ ጻጶ ዱꬂን ጎሴያ ሜላዱስ።
JON 4:8 ኣርሼይ ሞኪዛ ዎዴ ጾሳይ ጹጊዛ ጫርኮ ኣርሼይ ሞኪዛ ባጋፌ ዬዲዴስ፤ ሄሳፌ ዴንዲዳይሳን ዮናሲ ዳቡራና ጋካናስ ኣዋይ ዮናሳ ሁኤ ጹጊዴስ፤ ሂስቲን ኢዚ፥ «ፓጻ ዳናፔ ታስ ሃይቆይ ሎኦ» ጊዴስ።
JON 4:9 ሂስቲን ጾሳይ ዮናሳስ፥ «ቱሙ ኔኒ ሃ ጎሴይ ጊሻስ ሃንቄታናስ ታስ ቤሲዜ?» ጊዴስ። ዮናሲካ፥ «ኤ! ሃይቃና ጋካናስ ሃንቄታናስ ቤሴስ» ጊዴስ።
JON 4:10 ሂስቲን ጎዳይ ዮናሳስ፥ «ኢሲ ጋላስ ሞካዳ፥ ናምኣንꬆ ጋላስ ሜሊዳ ጎሴይስ ኔኒ ኢዚን ዳቡሮንታሪሲኔ ኢዞ ዲቾንታሪስ ሃይሳ ማላ ሚሼታሳሺን፥
JON 4:11 ኡሻቺኔ ሃዲርስ ሻኪ ኤሮንታ ጼታኔ ናምኡ ታሙ ሺያፔ ቦላራ ዲዛ ዴሬይኔ ዳሮ ሜሄይ ዲዛ ሃ ጊታ ናናዌ ካታማይስ ታ ሚሼታናስ ቤሴኔ?» ጊዴስ።
MIC 1:1 ዩሁዳ ካዎ ኢዮኣታሜ፥ ኣካዜኔ ሂዝቂያሳ ዎዴ ሞሬሼቴ ኣስ ጊዲዳ ሚኪያሳኮ ሳማሪያ ጊሻሲኔ ዬሩሳላሜ ጊሻስ ዪዳ ጾሳ ቃላይ ሃይሳ፥
MIC 1:2 ኢንቴኖ ዴሬቶ፤ ኢንቴ ዉሪካ ሲዪቴ! ሃ ቢታ ቦላ ዲዛይቲ ዉሪካ ሃ ኤዝጊ ሲዪቴ፤ ሳሎ ጎዳይ ባ ጌሻ ኬꬃን ኡቲዲ ኢንቴ ኢታ ኦሶዛ ኢንቴ ቦላ ማርካቴስ።
MIC 1:3 ሄኮ ጾሲ ባ ዲዛሶፔ ያና፤ ዪዲካ ቢታ ቦላን ꬎቃሶሆን ꬎቃሶሆን ሄሜታና።
MIC 1:4 ሙቃዳይ ታማ ቤኢዲ ሴሪዛ ማላኔ ሃꬂ ኣፎራ ዱጌ ጎጊዛ ማላ ሄ ዎዴ ዙማቲ ኢዛ ቶሆ ጋርሳን ሴራና፤ ሾባቲካ ጳልቄቲ ዎꬋና።
MIC 1:5 ሄሲ ዉሪ ሃናናይ ያቆቤይ ኦꬂዳ ሞሮ ጊሻሲኔ ኢስራኤሌ ናይታ ናጋራ ጊሻሳ፤ ኢስራኤሌ ኣሳይ ኢታ ኦꬃናስ ጋሶ ጊዲዳይ ኦኔ? ኢዚስ ዋና ካታማዮ ሳማሪያ ጊዴኬ? ዩሁዳ ኣሳይ ኤቃ ጎይኒዲ ናጋራ ኦꬃና ማላ ጋꬂዳይ ኦኔ? ዬሩሳላሜ ጊዴኬ?
MIC 1:6 ሄሳ ጊሻስ ታኒ ሳማሪያ ኬꬅ ላሌቲዳሶኔ ዎይኔ ሚꬂ ቶኬቲዛሶ ኬሳና፤ ኢዛ ኬጼቲዳ ዮቻ ሹቻ ታ ዱጌ ሾባን ኦላናኔ ኢዚ ጻጶ ሾዳ ꬋይሳና።
MIC 1:7 ኢዚ ኤቃቲ ዉሪካ ሜቄሬታና፤ ኢዚ ኤቃ ኬꬃን ዲዛ ላይማቲዛይታስ ኢሜቲዳዚ ዉሪ ታማን ጹጌታና፤ ኢዚ ሚስሌታካ ኡባ ታ ꬋይሳና፤ ኢዛ ባስ ኢሜቲዳይሳ ላይማን ሺሺዳ ማላ ሃኢካ ኢዚስ ዲዛዚ ላይማን ኤኪዛዝ ጊዳና።
MIC 1:8 ሄሳ ጌዶን ታኒ ዬካይስ፥ ዉ! ዉይ ጋይስ፤ ታ ጫማይ ባይንዳ ሜላ ቶሆኒኔ ሜላ ካሎ ባይስ፤ ዎራካና ማላ ዋሳይስ፤ ጉቶ ማላ ዋሳይስ።
MIC 1:9 ኢዚ ማዱንꬃይ ፓጾንታዝ ጊዳና፤ ኢዚፔ ኣꬊ ዩሁዳሳራ ጊዳና፤ ታ ዴሬይ ጌሊዛ ፔንጌ ዬሩሳላሜ ጋኪዴስ።
MIC 1:10 ጌቴ ዴሬን ሃሳዮፒቴ፤ ዬሆ ሙሌካ ዬኮፍቴ፤ ቤቲ-ሊኦፋራን ጉዱላ ቦላ ጌንዴሬቲቴ።
MIC 1:11 ኢንቴኖ ሻፊሬን ዲዛይቶ ማይኦይ ባይንዳ ካሎ ዬላቲሼ ኣꬊቴ፤ ጻኢናን ዲዛይቲ ሄፔ ኬዜቴና፤ ቤቲ-ኤዜሌይ ጬጬ ቦላ ዳዉስ፤ ኢንቴስካ ጋኪ ሼምፓናሶ ጊዳናስ ዳንዳዩኩ።
MIC 1:12 ሜቶፔ ሼምፓናስ ኮሻን ማሮቴን ዲዛይቲ ሜቶን ዋዬቴቴስ፤ ሄሲካ ዬሩሳላሜ ፔንጌ ጋካናስ ኢታ ሜቶይ ጾሳ ኣቻፌ ዪዳ ጊሻሳ።
MIC 1:13 ኢንቴኖ ላኪሼን ዲዛይቶ ፓራታ ጋሬራ ጋꬂ ኦይሴꬂቴ። ጺዮኔ ማጫ ናይታስ ኮይሮ ናጋራይ ኢንቴናኮ። ኢስራኤሌስ ቆሆይ ኢንቴ ኣቻፌ ቤቲዴስ።
MIC 1:14 ሄሳ ጊሻስ ኢንቴ ሞሬሼት-ጋቴስ ኢሞታ ኢማና፤ ኣኪዚቤ ካታማይ ኢስራኤሌ ካዎታ ባሌꬂዛ ካታማ ጊዳና።
MIC 1:15 ኢንቴኖ ማሬሻን ዲዛይቶ! ታ ኢንቴና ጾኒዛዴ ኢንቴ ቦላ ኤሃና፤ ኢስራኤሌስ ቦንቾ ጊዲዳዚ ኣዱላሜ ሃ ያና።
MIC 1:16 ኢንቴ ኢስታን ኡፋዬቲዛ ኢንቴ ናይቲ ኢንቴፌ ዲኤቲ ባና ጊሻስ ኢንቴ ሁኤ ቡሉሲቴ።
MIC 2:1 ኢታ ኦꬃናስ ቆፒዛይታሲኔ ሂጻን ዲሼ ጌኔ ኦꬃናስ ዮኦ ቱኪዛይታስ ኣዬ ኣና! ኦማርስ ቆፖይሳ ማላዶ ዎንታራ ፖሌቴሲኔ ሄሳ ኦꬃናስካ ዎልቃራ ዴቴስ።
MIC 2:2 ኣሳ ጋዴ ኣሞቲዳ ማላ ኦይኬቴስ፤ ኣሳ ኬꬂካ ኣሞቲዲ ኤኬቴስ፤ ባ ላጌ ኬꬂኔ ቢታ ባሌꬆን ኤኬቴስ።
MIC 2:3 ሄሳ ጊሻስ ጾሲ፥ «ሄኮ ታ ሄሳ ማላ ዴሬ ቦላ ꬋይሲዛዝ ኤካ ያና ቆፓዲስ፤ ኢንቴ ቃሴ ሄሳፌ ኬሲ ኤካና ዳንዳዬኬታ፤ ኢንቴ ቦላ ሜቶይ ዪዛ ጊሻስ ሄሳፌ ጉዬ ኢንቴ ኦቶሬቴꬃን ሲሜሬቴኬታ።
MIC 2:4 ሄ ዎዴ ዴሬይ ኢንቴ ቦላ ሚጪ ካኣና፤ ኢንቴና ቂꬊሼ፥ « ‹ኑ ሙሌራ ꬋይዶስ፤ ታ ዳቦ ጋዴይ ሃራስ ጊሼቲዴስ፤ ታፔ ቦንቂ ኤኪዲ ኑ ቢታ ኑና ጾኒዳይታስ ጊሺዴስ› ጊ ዚላላና» ጊዴስ።
MIC 2:5 ሄሳ ጊሻስ ጾሳ ዱላታ ጊዶን ጋዴ ሳማ ዬጊ ጊሻናዴይ ኦኒካ ዴና።
MIC 2:6 ኢስታ ናቤቲ፥ «ቲንቢቴ ኑ ቦላ ዮቶፓ፤ ሄይታንታ ጊሻስ ቲንቢቴ ኑስ ዮቶፓ፤ ኑ ቦላ ካዉሻቴꬂ ጋኬና» ጋና።
MIC 2:7 «ያቆቤ ሶ ኣሳቶ ሄሳꬆ ጌቴታናስ ቤሲዜ? ጾሳ ኣያናይ ኣጊ ኣꬌሬኔ? ሄይታንታ ማላካ ኦꬂዜ?» ጊ ኦይቻና፤ «ሱሬ ኦጌ ሄሜቲዛይታስ ታ ቃላይ ሎኦ ኦꬂ ኤሬኔ?
MIC 2:8 ዉርሴꬃን ኢንቴ ታ ዴሬታ ቦላ ሞርኬ ጊዲ ዴንዲዴታ፤ ኢስታስ ኦላ ቆፋይ ባይንዳ ዲሺን ሳሮቴꬃራ ኣꬊዛይታ ቦላፌ ሴሎ ማይኦ ኢንቴ ቃሪ ኤኪዴታ።
MIC 2:9 ኢስቲ ዶሲዛ ኢስታ ኬꬃፌ ታ ኣሳ ማጫ ናይታ ኬሲ ኤፊዴታ፤ ታ ቦንቾካ ኢስታ ናይታፔ ሜርናስ ኤኪዴታ።
MIC 2:10 ዴንዲዲ ሄሳፌ ኪቺቴ፤ ሄሲ ኢንቴስ ሼምፖሶ ጊዴና፤ ጋሶይካ ቱኒዴሲኔ ዳሮ ሞሬቲዴስ።
MIC 2:11 ባሌꬂዛ ዎርዶ ኣሲ ዪዲ፥ ‹ዳሮ ዎይኔ ኡሹ ጊሻሲኔ ማꬆሲዛ ኡሻ ጊሻስ ጊዲ ቲንቢቴ ኢንቴስ ዮታና› ጊኮ ሃይሳ ዴሬዛስ ዶሴቲዳ ናቤ ጊዳና።
MIC 2:12 «ያቆቤ! ቱማፔ ታ ኢንቴና ኢሲሶ ሺሻና፤ ኢስራኤሌታፔ ኣቲዳይታ ታ ኢሲ ቦላ ኤሃና፤ ዪሬ ጊዶን ዲዛ ሜሄ ማላኔ ዴምባን ሄሜቲዛ ሜሄ ማላ ታኒ ኢንቴና ኢሲ ቦላ ሺሻና፤ ኢንቴ ዴሬይ ዉሪ ኣስ ጻላ ጊዳና።
MIC 2:13 ሜንꬂዛይ ኢስታፌ ካሴቲ ኬዚ ባና፤ ኢስቲካ ፔንጌዛ ሜንꬂዲ ኬዚ ባና፤ ኢስታ ካዎይ ጾሳይ ኢስታፌ ሲንꬄ ኣꬊ ካሌꬃና» ጊዳ።
MIC 3:1 ቃሴካ፥ «ኢንቴኖ ያቆቤ ካሌꬂዛይታኔ ኢስራኤሌ ኬꬃ ኣሳ ሃሪዛይቶ ሲዪቴ፤ ኢንቴ ቱሙ ፒርዳ ኤራናስ ኢንቴስ ቤሴኔ?
MIC 3:2 ኢንቴ ሎኦ ኢጺዴታ፤ ኢታ ቃሴ ዶሲዴታ፤ ታ ኣሳ ጋልባ ሾቂዴታ፤ ኢስታ ኣሾካ ሜቄꬃፌ ሻኪዴታ።
MIC 3:3 ታ ኣሳ ኣሾ ሚዴታ፤ ጋልባካ ሾቂዴታ፤ ኢስታ ሜቄꬂካ ሜንꬄሬꬂዴታ፤ ኣሾ ጫጪዛ ባሼን ጫጪዛ ማላኔ ዲስቴን ዶይሲዛ ኣሾ ማላ ቃንጼሬꬂዴታ» ታ ጋዲስ።
MIC 3:4 ኢስቲካ ፑዴ ጾሳኮ ዋሳና ሺን ጾሲ ኢስታ ዋሶ ሲዬና፤ ኢታቴꬃ ጊሻስ ሄ ዎዴ ጾሳይ ባ ኣይፌሶ ኢስታፌ ሃራሶ ዛራና።
MIC 3:5 ጾሲ፥ «ታ ዴሬ ባሌꬂዛ ናቤቲ ኣሲ ኢስታ ሚዚኮ፥ ‹ሳሮቴꬂ ዴስ› ጌቴስ። ሙዞንታ ኣጊኮ ቃሴ፥ ‹ኦላይ ዬስ› ጊ ኣዋጃናስ ዴንዴቴቴስ።
MIC 3:6 ሄሳ ጊሻስ ኢስታ ቦላ ቃማይ ቤቶንታ፥ ꬉማይ ኤሮንታ ጋኪ ዎꬋና፤ ናቤታ ቦላ ኣርሼይ ጌላናኔ ጋላሳይ ኢስታስ ቃማና።
MIC 3:7 ቡሮ ማሮቲዛይቲ ካዉያና፤ ቲንቢቴ ዮቲዛይቲ ዬላታና፤ ዉሪካ ባ ኣይፌሶ ካማና፤ ጋሶይካ ኢስታስ ዛሮይ ጾሳ ኣቻፌ ባይንዳ ጊሻሳ» ጊዴስ።
MIC 3:8 ታ ቃሴ ያቆቤስ ኢዛ ቆሆዛ፥ ኢስራኤሌሲካ ኢዛ ናጋራ ዮታናስ ዎልቃን፥ ጾሳ ኣያናን፥ ቱማ ፒርዳኒኔ ሚኖቴꬃን ኩማዲስ።
MIC 3:9 ኢንቴኖ ያቆቤ ሶ ኣሳ ካሌꬂዛይቶ! ኢንቴኖ ኢስራኤሌ ዴሬ ሃሪዛይቶ! ቱሙ ፒርዳ ካꬊዛይቶ! ቱሙ ጊዲዳዝ ኡባ ሚርቂዛይቶ! ኣኔ ሲዪቴ።
MIC 3:10 ጺዮኔ፥ ኣሳ ሱꬅ ጉሶኒኔ ዬሩሳላሜ ኢታቴꬃን ኩንꬂዛይቶ! ኣኔ ሲዪቴ።
MIC 3:11 ካሌꬂዛይቲ ማታኤስ ፒርዴቴስ፤ ቄሴቲ ሚሻ ጊሻስ ታማርሴቴስ፤ ናቤቲካ ሚሼ ሚዳ ጊሻስ ዮቴቴስ። ሄሳ ኡባ ኦꬂዲካ፥ «ጾሲ ኑ ጊዶን ዴስ ጊዴኔ? ኣይ ኢታይካ ኑ ቦላ ጋኬና» ጊሼ ጾሳን ጬቄቴቴስ።
MIC 3:12 ሄሳ ጊሻስ ኢንቴ ጌዶን ጺዮኔይ ጎሻ ቢታ ማላ ጎዬታና፤ ዬሩሳላሜይካ ቆሌቲዳ ኬꬃ ዶሬ ጊዳና፤ ጾሳ ኬꬃይ ዲዛ ዙማይካ ሻራፋ ማታይ ኢዛ ቦላ ዲጪዳ ዙማ ጊዳና።
MIC 4:1 ዉርሴꬃ ዎዴ ጾሳ ኬꬂ ኢዛ ቦላ ዲዛ ዙማይ ሃራ ዙማ ኡባፌ ኣꬊ ቤታና፤ ሃራ ዙማታፔ ቦላራ ꬎቁ ጋና፤ ዴሬይካ ኢዛኮ ጎቻና።
MIC 4:2 ዳሮ ካዎቴꬃቲ ኢዛኮ ዪዲ፥ «ጾሳ ዙማኮ ሃ ዪቴ፤ ያቆቤ ጎዳኮ ኣኔ ቦስ፤ ኑ ኢዛ ኦጌራ ባና ማላ ኑና ኢዚ ባ ኦጌ ታማርሳና» ጊዳ፤ ዎጋይ ጺዮኔፔ፥ ጾሳ ቃላይ ቃሴ ዬሩሳላሜፔ ያና።
MIC 4:3 ኢዚ ዳሮ ኣሳ ጊዶን ፒርዳና፤ ሃሆኒኔ ማታን ዲዛ ዎልቃማ ካታማ ጊዶን ዲዛ ኦሽ ኤሳና፤ ኢስቲ ባ ጊꬃ ማሻ ማራሻ፥ ባ ቶራካ ባጫ ሂስቲ ቆጻና፤ ኢሲ ካዎይ ሃራ ካዎ ቦላ ማሻ ዴንꬄና፤ ሄሳፌ ጉዬ ኢስቲ ኦላ ቲሚርቴ ታማሬቴና።
MIC 4:4 ኢሲ ኣሲ ባ ዎይኔ ሚꬃ ጋርሳንካ ባ ባላሴ ሚꬃ ጋርሳን ኡታና፤ ኢስታ ባቢሲዛ ሚሺ ዴና፤ ኡባፌ ዎልቃማ ጎዳ ዶናይ ሃይሳ ዮቲዴስ።
MIC 4:5 ሃንኮ ዴሬይ ባ ኤቃ ሱንꬃን ቤስ፤ ኑኒ ቃሴ ሜርናፔ ሜርና ጋካናስ ኑ ጎዳ ሱንꬃን ባና።
MIC 4:6 ጎዳይ፥ «ታኒ ሄ ጋላስ ጉንዲዳይታ ሺሻና፤ ቤቴ ቢዳይታኔ ሙዞታና ማላ ታ ኣꬃ ኢሚዳይታ ኡባ ኢሲሶ ሺሻና።
MIC 4:7 ጉንዳታፔ ኣቲዳይታኔ ቆሄቲዳይታ ታ ኢስታ ሚኖ ዴሬ ኬሳና፤ ሄ ጋላሳይፌ ዶሚዲ ሜርና ጋካናስ ጎዳይ ጺዮኔ ዙማን ኢስታ ቦላ ካዎታና።
MIC 4:8 ሃይሶ ኔናን ኡቲዲ ሜሄ ሄሚዛ ꬎቃ ዙማዞ! ጺዮኔ ማጫ ናይታ ናጋና ጊጋ ኡቲዳ ዙማዞ! ቤኒ ኔ ሃሪዛ ዴሬይ ኔስ ሲማና፤ ኔ ካዎቴꬃይ ዬሩሳላሜ ማጫ ናይስ ጊዳና።
MIC 4:9 ሂስቲን ኔ ሃኢ ኣዛስ ዋሳይ? ኔስ ካዎይ ባዬ? ኔኒ ሚጻይ ኦይኪዳ ማጫሳይ ማላ ኡንኤቲዳይ ኔና ዞሪዛይ ꬋይኔ?
MIC 4:10 ሃኔ ጺዮኔ ማጫ ናዬ! ሚጻቲዛ ማጫሳይ ማላ ኔ ሜቶታና፤ ሃኢ ቃሴ ኔ ካታማፔ ጌዴ ኬዛዳ ጮ ዴምባን ዴኣና ቤሲዛ ጊሻስ ባቢሎኔ ባና፤ ኔ ሄ ባዳ ሄን ኔ ሞርኬታ ኩሼፔ ኣታና፤ ጎዳይ ኔና ሄን ኔ ሞርኬታፔ ኣሻና።
MIC 4:11 ሃኢ ቃሴ ዳሮ ሃንኮ ዴሬ ኣሳይ ኔ ቦላ ሺቂዴስ፤ ኢስቲካ፥ ‹ሃና ቱኒዳዝ ጊዱ! ኑ ኣይፌይ ጺዮኖ ቂꬌን ጼሎ› ጋና።
MIC 4:12 ጊዶ ኣቲን ኢስቲ ጾሳ ቆፋ ኤሬቴና፤ ቡኬታናስ ባሌን ሺቂዛ ሚርቄ ካꬃ ማላ ባና ሺሺዛዴ ቆፋ ኢስቲ ኤሬቴና።
MIC 4:13 ሃኔ ጺዮኔ ናዬ ዴንዳዳ ካꬃ ቡካ፤ ታ ኔስ ቢራታ ካጬኔ ጻርቂማላ ጹጉንꬅ ኢማና፤ ኔካ ሃንኮ ዴሬዛ ኢዛን ሊቂሳና» ጊዴስ። ኢስቲ ጌኔን ሺሺዳይሳ ጾሳስ፥ ኢስታ ሃሮካ ኡባ ቢታ ኡባ ሃሪዛ ጎዳስ ኔ ሺሻንዳሳ።
MIC 5:1 ሃኔ ኔኒ ኦላ ኣሳታ ካታማዬ፥ ኔ ኦላ ኣሳ ዚርሳ። ኑና ኦይካናስ ዩዪ ኣꬊዳ፤ ኢስራኤሌ ሃሪዛይሳስ ሻጋላን ጉፌራ ሾጫና።
MIC 5:2 ሃኔ ኔ ቃሴ ቤቴሊሄሜ ኤፍራታ፥ ዩሁዳ ዛርኬታፔ ኔኒ ጉꬅ ጊዲኮካ ኢዛስ ኬሳይ ካሴ ቤኒ ዎዴፔ ጊዲዳ ኢስራኤሌ ሃሪዛዴይ ኔ ጊዶፌ ታስ ኬዛና።
MIC 5:3 ሄሳ ጊሻስ ዬሊዛራ ሚጻታዳ ዬላና ጋካናስ ኢስራኤሌይ ዬጌታ ኣታና፤ ሃንኮ ኣቲዳ ኢሻቲካ ሲሚዲ ኢስራኤሌ ኣሳራ ዋላኬታና።
MIC 5:4 ጎዳ ዎልቃን ጎዳ ባ ጾሳ ሱንꬃ ጊታቴꬃን ሚኒ ኤቃናኔ ባ ሜሄ ኢዚ ሄማና፤ ሄ ዎዴ ኢዛ ዎልቃቴꬃይ ቢታ ጋጻ ጋካና ጊሻስ ኣሳይ ጊጋ ዱስ ዳና።
MIC 5:5 ኢስታስ ሳሮቴꬂ ኢዛ ጊዳና። ጎዳይ ኢስራኤሌ ኣሳ ኣሻናኔ ኢስታ ሞርኬታ ꬋይሳና ኣሶሬ ኣሳይ ኑ ቢታ ዎራጂሺን ኑ ሚጻታካ ሜንꬂ ጌሊሺን ላፑን ሄሚዛይታ ሄሳፌካ ኦስፑን ሃላቃታ ኑ ኢዛ ቦላ ዴንꬃና።
MIC 5:6 ኣሶሬ ዴሬይ ማሻን ናሙሩዴ ዴሬይ ኮሆፔ ሾዴቲዳ ጊꬃ ማሻን ሃሬታና፤ ኣሶሬ ኣሳይ ኑ ቢታ ዎራጂሺኒኔ ኑ ꬋስ ቦቺሺን ኢዚ ኑና ኣሻና።
MIC 5:7 ያቆቤ ዜሬꬃፌ ኣቲዳይቲ ዳሮ ዴሬ ጊዶን ጾሳ ኣቻፌ ዎꬊዛ ኢራ ማላ ማታ ቦላ ሎዳራ ፑሲሼ ቢታ ካሌꬂዛ ፑሴ ኢራ ማላ ኣሳፔ ኣይኮካ ኮዮንታ ኣሳ ጊዳና።
MIC 5:8 ዎራ ዶኣታ ጊዶን ዲዛ ጋሞይ፥ ባ ቶሆራ ኢጪ ሜንꬄሬꬂሼ ቢዛ ማላ፥ ሜንꬄሬꬆይሳካ ኢዛፔ ኦኒካ ዎꬂ ኤካናስ ዳንዳዮንታይሳ ማላ፤ ዳሮ ዶርሳ ጊዶን ዲዛ ዎዳላ ጋሞ ማላ፤ ያቆቤ ዜሬꬃፌ ኣቲዳይቲ ሃንኮ ዴሬታ ጊዶኒኔ ዳሮ ኣሳ ጊዶን ሄሳ ማላ ጊዳና።
MIC 5:9 ኔ ኩሼይ ኔ ሞርኬታ ጾኒዲ ꬎቁ ꬎቁ ጋና፤ ኔ ሞርኬቲ ዉሪካ ꬋያና።
MIC 5:10 ሄ ዎዴ ጾሲ፥ «ታ ኢንቴ ጊዶፌ ኢንቴ ፓራታ ꬋይሳና፤ ፓራ-ጋሬታካ ሙሌራ ꬋይሳና።
MIC 5:11 ኢንቴ ቢታን ዲዛ ካታማታካ ꬋይሳና፤ ኢንቴ ሚጻታካ ኡባ ላላና።
MIC 5:12 ኢንቴ ማሮቲዛይሳካ ꬋይሳና፤ ሄሳፌ ጉዬ ማሮቴኬታ።
MIC 5:13 ማሴቲ ኬዚዳ ኢንቴ ኤቃ ሚስሌታኔ ኢንቴ ኤቃሶሆታካ ታ ኢንቴ ጊዶፌ ꬋይሳና፤ ሃይሳፌ ጉዬ ኢንቴ ኢንቴ ኩሼን ኦꬂዳይታስ ጎይኔኬታ።
MIC 5:14 ኣሼሮ ጌቴቲዛ ኤቂዛ ሚስሌዮ ታ ኢንቴ ጊዶፌ ሾዳና፤ ታ ኢንቴ ካታማካ ꬋይሳና።
MIC 5:15 ታስ ኣዛዜቶንታ ዴሬታ ዎልቃማ ሃንቆን ታ ሃሎ ኬሳና» ጌስ።
MIC 6:1 ጾሲ ጊዛይሳ ሲዪቴ፤ «ዴንዲቴ! ኢንቴ ሜቶ ዙማታስ ዮቲቴ፤ ዙማቲካ ኢንቴ ጊዛይሳ ሲዬቶ።
MIC 6:2 ዙማቶ! ጾሳ ሞቶ ሲዪቴ፤ ኢንቴኖ ቢታ ሚኖ ጻጶቶ ሲዪቴ፤ ጾሳስ ኣሳራ ፓላማይ ዴስ፤ ኢዚ ኢስራኤሌ ናይታራ ፒርዴቴስ።
MIC 6:3 ታ ዴሬዞ! ታ ኔና ዎስታዲና? ታ ኔስ ኣዛን ቶሆ ጊዳዲና? ኣኔ ታስ ዛሮ ኢማ።
MIC 6:4 ታ ኔና ጊብጼፔ ኬሳዲስ፤ ኣይሌቴꬃ ቢታፌካ ዎዛዲስ፤ ኔና ካሌꬃና ማላ ሙሴ፥ ኣሮኔኔ ማራሞ ኔስ ዬዳዲስ።
MIC 6:5 ታ ዴሬዞ! ሞኣቤ ካዎይ ባላቄይ ኢዛ ዞሪን ቢኦሬ ና ባላሜይ ኢዛስ ዛሮይሳ ኣኔ ዩሺ ቆፒቴ፤ ጾሳ ጺሎቴꬃ ኦሶ ኢንቴ ሻኪ ኤራና ማላ፥ ሺጺሜፔ ጌልጌላ ጋካናስ ኢንቴ ሄሜቶይሳ ኣኔ ቆፒቴ» ጊዴስ።
MIC 6:6 ታ ኣይ ኤካዳ ጾሳ ሲንꬄ ሺቆ? ዴኦ ጾሳስ ዎስታ ጎይኖ? ጹጌቲዛ ያርሾ ኢሲ ላይꬃ ማራራ ጋꬃ ኤካ ባዳ ኢዛ ሲንꬅ ሺቆሻ?
MIC 6:7 ኢሲ ሺ ꬋርሾታኔ 10,000 ጎጊዛ ዛይቴይ ጾሳ ኡፋይሳንዴሻ? ታ ኢዛ ቆሆይሳ ጊሻስ ታ ባይራ ናዛ ኢሚዛኮ ታ ሼምፖ ናጋራ ጊሻስ ታ ኡሎፔ ዎꬊዳ ዬሎ ኢዛስ ኢሞሻ?
MIC 6:8 ኣሳ ናዉ! ኢዚ ኔና ሎኦ ሚሽ ቤሲዴስ ጾሲ ኔፔ ኮይዛይ ኣዜ? ሎኦ ኦꬃና ማላ ማሮቴꬅ ኔ ዶሳና ማላኔ ጾሳ ሲንꬃን ኔኒ ኣሽኬቴꬃራ ባና ማላ ጊዴኔ?
MIC 6:9 ጾሳስ ባቦይ ኣꬊዳ ኤራቴꬃ፤ ሲዪቴ! ጾሲ ካታማዮ ሂዝጊ ጼይጌስ፥ «ኢዛ ሃንቆ ጉፌዛ ቆፒቴ፤ ሄሳካ ጊግሲዳይ ኦናኮ ዎዚናን ዎꬂቴ።»
MIC 6:10 ኢታቴꬃ ኬꬃቶ! ኢንቴ ጌኔን ሺሺዳ ኢንቴ ሚሽ ዎርዶ ማካ ሚሻን ማኪ ኢንቴ ሺሺዳ ሹኒዛ ሚሻ ታ ዶጋኔ?
MIC 6:11 ባሌꬂዛ ማካ ሚሽ ኦይኪዳዴ፥ ዎርዶ ማካ ሚሻ ካራጺቴን ጹንቲዳዴ ጺሊሳናስ ታስ ቤሲዜ?
MIC 6:12 ኢዚ ዴሬን ዱሬ ኣሳቲ ኣስ ቆሂዛዴንታ፤ ኢዚን ዲዛ ኣሳይ ዎርዳንቻ ጻላ፤ ኢስታ ኢንጻርሳይ ባሌꬂዛ ኢንጻርሳ።
MIC 6:13 ሄሳ ጊሻስ ታ ኔና ꬋይሳና ዴንዳዲስ፤ ኔ ናጋራ ጌዶን ታ ኔና ላላና።
MIC 6:14 ኔ ማናሺን ካላካ፤ ኔ ቃንꬃይ ጮ ሜላ ዳና፤ ኔ ሺሻናሺን ኣይኮካ ኔስ ሺቄና፤ ኔ ሺሺዳይሳ ታኒ ማሻሲኔ ቶራስ ኣꬃ ኢማና።
MIC 6:15 ኔ ዜራና ሺን ማጻካ፤ ዎጋራ ሚꬃ ዛይቴ ኔ ጉምኣና ሺን ሄ ዛይቴዛ ቲዬታ፤ ዎይኔ ሚꬃ ኣይፌ ጹንቃ ሺሻናሺን ዎይኔ ኡሹ ኔ ኡያካ።
MIC 6:16 ካዎ ኦሚሬ ዎጋኔ ካዎ ኣካቤ ኬꬃ ዎጋ ኔ ኡባ ሺሻ ኦይካዳሳ፤ ኔካ ኢስታ ሃይሲኤ ካላዳሳ። ሄሳ ጊሻስ ኔና ꬋይሳስ፥ ኔ ዴሬዛካ ታኒ ቂꬌስ ኣꬃ ኢማና፤ ዴሬይ ኔ ቦላ ቂꬊ ካኣና።
MIC 7:1 ታና ኣዬ ኣና! ዎይኔ ሚꬃ ጊዶፌ ማጺሺን ኣቲዳ ሚꬃ ኣይፌ ቦኔ ቆሪዛ ኣሳ ማላ ጊዳዲስ፤ ሜቴቲዛ ዎይኔ ሚꬃ ኣይፌይ ዴና፤ ኑ ኢዛስ ኣሞቲዛ ኤሌሊ ጋኪዛ ባላሴ ሚꬃ ኣይፌይካ ቤቲቤና።
MIC 7:2 ጾሳስ ባቢዛ ኣሲ ቢታ ቦላፌ ꬋይዴስ፤ ሱሬ ኣሲ ኢሳዴይካ ባዋ፤ ኣሲ ዉሪካ ሱꬅ ጉሳናስ ዙጌስ፤ ኢሲ ኢሲ ኣሲ ባ ኢሻ ያርዴን ኦይኬስ።
MIC 7:3 ኢዛ ኩሼይ ኢታ ኦꬃናስ ታማርዴስ፤ ዴሬ ሄሚዛዴይ ኩሼ ጌንꬆ ኮዬስ፤ ፒርዲዛ ዳናይካ ማታኤ ኤኬስ፤ ዎልቃማቲ ባና ኮሺዳዚ ኦꬄቴስ፤ ዉሪካ ኢሲ ቦላ ዱላቴቴስ።
MIC 7:4 ኢስታ ጋርሳፌ ሎኦ ጌቴቲዳዴይ ኣጉንꬃ ማላ ኬሂ ሎኦ ጌቴቲዛዴይ ቃሴ ኪንዲቾ ማላ ኢንቴና ናጊዛይታስ ዎዴይ ጋኪዴስ፤ ጾሳ ፒርዳ ጋላሳይ ጋኪዴስ፤ ኣሳይ ሺሮታና ዎዴይ ጋኪዴስ፤
MIC 7:5 ኔ ላጌ ኣማኖፓ፤ ኔ ላጌንካ ኣማኔቶፋ፤ ኔ ኪኦን ኔናራ ኣቂዛሪስካ ኔ ዮቲዛዝ ኣኬካዳ ዮታ።
MIC 7:6 ኣቱማ ናይ ባ ኣዋ ካꬋና፤ ማጫ ናይካ ባ ኣዪ ቦላ፥ ና ማቻካ ባ ቦሎቴይ ቦላ ዴንዳና፤ ኣሳስ ሞርኬይ ሶ ኣሳ ጊዳና።
MIC 7:7 ታኒ ጊዲኮ ጾሳ ሂዶታ ኦꬃይስ፤ ታና ኣሺዳ ታ ጾሳ ናጋይስ፤ ታ ጎዳይካ ታስ ሲያና።
MIC 7:8 ታ ሞርኬዞ! ታ ቦላ ጋኪዳዚ ኔና ኡፋይሶፎ፤ ኩንዲኮካ ታ ዴንዳና፤ ታ ꬉማን ኡቲኮካ ጾሳይ ታስ ፖኦ ጊዳና።
MIC 7:9 ታ ኢዛ ቆሂዳ ጊሻስ ኢዚ ታ ጊሻስ ኤቃና ጋካናሲኔ ታስ ፒርዳና ጋካናስ ጾሳይ ሃንቄቲኮካ ታ ዳንዳያና፤ ኢዚ ታና ፖኦን ኬሳና፤ ታኒካ ኢዛ ጺሎቴꬅ ቤያና።
MIC 7:10 ታ ሞርኬዛካ ሄሳ ቤያንዱስ፤ ኢዛ ዬላታና። ታና፥ «ጎዳ ኔ ጾሳይ ኣዋን ዲዜ?» ጊዳሪ ኩንዴꬅ ታ ኣይፌቲ ቤያና፤ ኦጌ ኡርቃ ማላ ኢዛ ዬꬌታና።
MIC 7:11 ኢንቴ ኢንቴ ካታማ ጊምቤ ጊምቢዛ ዎዴይኔ ኢንቴ ꬋሲካ ኣሲዛ ጋላሲ ያና።
MIC 7:12 ሄ ጋላስ ኣሳይ ኣሶሬፔ ጊብጼ ካታማታ፥ ጊብጼፔ ኤፊራጺሴ ሻፋ ጋካናስ፥ ኣባፌ ኣባኮ፥ ዙማፔ ዙማኮ ጋካናስ ኢንቴኮ ያና።
MIC 7:13 ኢስታ ኦሶ ጌዶኔ ኢዚን ዲዛ ኣሳ ጋሶን ቢታያ ኣይኮይ ባይንዳዝ ጊዳና።
MIC 7:14 ዎራ ጊዶኒኔ ጪሊላ ማታ ጊዶን ባርካ ዲዛይቲ ኔ ሜሄ ጊዲዳ ኔ ዴሬታ ኔኒ ኔ ጉፌራ ሄማ፤ ቤኒ ዎዴ ማላ ኢስቲ ባሳኔኒኔ ጋላኣዴን ሄሜቴቶ።
MIC 7:15 ኔ ካሴ ጊብጼፔ ኬዚዳ ዎዴዛ ማላ ታኒ ታ ማላታ ኢስታ ቤሳና።
MIC 7:16 ኣይዛቤቲ ሄሳ ቤያናኔ ዬላታና፤ ኢስታስካ ዎልቃይ ꬋያና፤ ኢስቲ ባ ዶና ባ ኩሼን ቱጫና፤ ኢስታ ሃይꬂካ ቱላና።
MIC 7:17 ቢታ ቦላራ ቲራን ጎሼቲዛ ሜꬌቴꬃታ ማላ፥ ሾሻ ማላ ኢስቲ ቢታ ላጫና፤ ባ ዲዛ ጎንጎሎ ጊዶፌ ኮኮሪሼ ኬዛና፤ ባቢሼ ጎዳ ኑ ጾሳኮ ሲማና፤ ኢስቲካ ኢንቴስ ባባና።
MIC 7:18 ꬋይሼ ኣቲዳ ዜሬꬃ ናጋራ ኣቶ ጊ ማሪዛ ኔ ማላ ጾሲ ኦኔ? ኔኒ ሜርናስ ሃንቄታካ፤ ማሮ ጌሊዛይሳን ኔ ኡፋዬታሳ።
MIC 7:19 ሲማዳካ ኑስ ኔ ቃꬌታሳ፤ ኑ ናጋራካ ኔ ቶሆ ጋርሳን ዬꬋሳ፤ ኑ ቆሆዛካ ኡባ ጌዴ ጪማ ኣባ ጊዶ ዬጋሳ።
MIC 7:20 ቤኒ ዎዴፔ ኦይካዳ ካሴ ኑ ኣዋታስ ጫቆ ቃላ ኔ ጌሊዳ ማላ ያቆቤስ ኣማኔቴꬅ ኣብራሃሜስ ማሮቴꬅ ኦꬃሳ።
NAH 1:1 ኤልቆሼ ዴሬ ኣስ ናሆሜይ ናናዌ ꬋዮ ጊሻስ ዮቲዳ ኣጁታ ማጻፋይ ሃይሳፌ ካሊዛይሳ።
NAH 1:2 ጎዳይ ዚልኤቲዛኔ ሃሎ ኬሲዛ ጾሳ፤ ጎዳይ ሃሎ ኬሲዛኔ ሃንቆን ኩሚዳ ጾሳ። ጎዳይ ሃሎ ኬሲዛዴኔ ፓላ ሚሺ ኢዛን ኩሚዳዴ። ጎዳይ ባ ባልጋራታ ቦላ ሃሎ ኬሴስ፤ ባ ሞርኬታ ቦላ ባ ሃንቆ ኤሄስ።
NAH 1:3 ጎዳይ ሃንቄታናስ ኤሶቴና፤ ኢዛ ዎልቃይካ ጊታ። ጎዳይ ሞራንቻ ቃጻዮንታ ኣጌና፤ ጎቴ ጫርኮይኔ ኣባ ዳምባላይ ኢዛስ ኦጌ፤ ሻራይ ኢዛ ቶሆ ጉዱላ።
NAH 1:4 ኣባ ሴሪዲ ሜሊሴስ፤ ሻፋታ ኡባ ሚጪንቼስ። ባሳኔይኔ ቃርሜሎሴይ ሹሊዳ። ሊባኖሴ ጪሻቲካ ቆቆፌቲዳ።
NAH 1:5 ዙማቲ ኢዛ ሲንꬃን ኮኮሪዳ፤ ዙምቡላቲካ ሴሪዳ። ኢዛ ሲንꬃን ቢታይ፥ ኣላሜይኔ ኢዚን ዲዛ ኡባቲ ቃጺዳ።
NAH 1:6 ኢዛ ሃንቆራ ኤቄታና ዳንዳይዛይ ኦኔ? ኢዛ ሃንቆ ሚኖዛ ቶካና ዳንዳይዛይ ኦኔ? ኢዛ ሃንቆይ ታማ ማላ ኤጺዴስ፤ ዛላቲካ ኢዛ ሲንꬃፌ ዛኢዳ።
NAH 1:7 ጎዳይ ሎኦ፤ ሜቶ ጋላሲካ ቆቴቲ ኣቲዛሶ። ኢዛን ኣማኔቲዛይታ ናጌስ።
NAH 1:8 ጊዶ ኣቲን ኢዚ ናናዌ ዎልቃማ ዲኦ ሃꬃን ꬋይሳና፤ ባ ሞርኬታ ꬉማይ ዲዛሶ ዬዴꬃና።
NAH 1:9 ኢስቲ ጾሳ ቦላ ኣይ ዱላቲኮካ ኢዚ ኢስታ ꬋይሳና። ሜቶይ ናምኣንꬆ ዴንዴና።
NAH 1:10 ኢስቲ ኣጉንꬃን ቃጼታና፤ ባ ዎይኔ ኡሻን ኢስቲ ማꬆታና፤ ታማይ ኢስታ ቡጻ ማላ ማና።
NAH 1:11 ሃኔ ናናዌ! ጎዳ ቦላ ኢታ ዱላቲዛይቲኔ ኢታ ዞሬ ዞሬቲዛይቲ ኔ ጋርሳፌ ቤቲዳ፤
NAH 1:12 ጎዳይ፥ «ኢስቲ ኣይ ዎልቃማታኔ ዳሮታ ጊዲኮካ ኢስቲ ቃንጼቲ ꬋያና። ሃይሶ ዩሁዳ ኔኒ ሃይሳፌ ካሴ ታ ኔና ኡንኤꬂዳ ጊዲኮ ሃይሳፌ ጉዬ ታ ኔና ኡንኤꬂኬ።
NAH 1:13 ሃኢካ ታ ኢስታ ቃምባራ ኔ ሞርጌፌ ሜንꬃ ዲጋና፤ ኔ ኢዛን ቃሼቲዳ ሳንሳላታካ ዱꬃ ዬጋና» ጌስ።
NAH 1:14 ሃኔ ናናዌ ጎዳይ ኔና፥ «ሃይሳፌ ሲንꬃን ኔ ሱንꬅ ጼይጊዛ ዬሌታይ ዴና። ኔ ኤቃ ጾሳታ ኬꬃን ዲዛ ማሴቲ ጊጊዳ ሚስሌታኔ ሴሪሲ ጊግሲዳ ኤቃ ጾሳታ ꬋይሳና፤ ኔ ኢታ ጊዲዳ ጊሻስ ኔ ሞጌታናሶ ታ ቦካና» ጌስ።
NAH 1:15 ሄኮ ሚሺራቾ ዮቲዛይሲ፥ ሳሮቴꬅ ኣዋጂዛይሲ ዙማ ቦላራ ዩሳን ዴስ። ዩሁዳ ኔ ባኣሌታ ቦንቻ፤ ኔ ኣዲኔቲዳይሳ ጋꬃ፤ ሃይሳፌ ጉዬ ኢታቲ ኔ ዴሬ ዎራጄቴና፤ ኢስቲ ሙሌራ ꬋያና።
NAH 2:1 ሃኔ ናናዌ! ኔና ቆሃናይ ኔ ቦላ ዪዴስ፤ ኔ ሚጻ ናጋ፤ ኔ ኦጌ ጾሞሳ፤ ሚንꬃ ጊጻ፤ ኔ ዎልቃ ኡባ ሚንꬃ።
NAH 2:2 ꬋይሲዛይቲ ኢስታ ሜላ ኣሺኮካ፥ ኢስቲ ዎይኔ ኣታኪልቴ ቶኪዛሶሆ ሙሌራ ꬋይሲኮካ ኢስራኤሌ ቦንቾ ኡባ ማላ ጎዳይ ያቆቤ ቦንቾካ ዛራና።
NAH 2:3 ኢዛ ዎታዳራታ ጎንዳሌይ ዞኦ፤ ኢዛ ኦላንቻቲካ ዞኦ ማይኦ ማይኢዳ፤ ኢስቲ ኦሌታናስ ጊጌቲዳ ጋላስ ኢስታ ፓራ-ጋሬታ ቢራታይ ጾልቄስ፤ ኢስታ ቶራ ቶማይ ሉጼስ።
NAH 2:4 ፓራ-ጋሬቲ ዴምባን ያኔ ሃ ቡራቄቴስ፤ ኦጌታ ቦላካ ሾምኡሾምኡ ጌቴስ፤ ላጪዛ ጾምፔ ሚሳቴቴስ፤ ዎልቃንꬃ ማላ ዋዋጪ ጌቴስ።
NAH 2:5 ዶሬቲዳ ኦላንቻታ ጼይጌስ፤ ጊዶ ኣቲን ኢስቲ ዪሼ ኦጌን ꬉጴቴቴስ፤ ካታማ ጊምቤኮ ዎጼቴስ፤ ኦላ ቴቂዛ ጎንዳሌይካ ሄን ዴስ።
NAH 2:6 ሻፋ ፔንጌይ ዋጊ ጊ ዶዬቲዴስ፤ ካዎቴꬃ ኬꬂ ኩንዲዴስ።
NAH 2:7 ናናዌይ ካዉዪን ኢዚ ካዎያ ዲኤታዳ ቡሲ ኣቶንታይሲ ካሴቲ ዮቴቲዴስ። ኢዚ ማጫ ኣይሌቲ ሃራጴ ማላ ዬካና፤ ባንታ ቲራካ ኢጫና።
NAH 2:8 ናናዌይ ኤሌ ሃꬃ ማላ፤ ኢዚ ሃꬂካ ሚጫና። «ኤቃ! ኤቃ!» ጊ ኢስቲ ዋሳና፤ ጊዶ ኣቲን ጉዬ ሲሚዛይ ዴና።
NAH 2:9 ኢዛ ሚንጃ ኬꬃን ዳጋቲዳ ኣቆታስ ቆዳይ ዴና፤ ቢዲ ቢራካ፥ ዎርቃካ ቦንቂ ኤኪቴ።
NAH 2:10 ቆጪሬታዱስ፤ ቦንቄታዱስ፤ ካሎታዱስ፤ ዎዚናይ ታሂዴስ፤ ጉልባቴይ ኮኮሪዴስ፤ ኣሾይ ቃጺዴስ፤ ኣይፌሶይካ ጊልቂዴስ።
NAH 2:11 ጋሞቲ ካሴ ዴኢዛ ጎንጎሎይ፥ ኢስታ ማራቲ ሚዛሶይ፥ ማጫ ጋሞይኔ ኣዴ ጋሞይ ቢዛሶሆይ፥ ኢስታ ማራቲ ሂርጋይ ባይንዳ ሚዛሶይ ሃኢ ኣዋን ዲዜ?
NAH 2:12 ጋሞይ ባ ማራታስ ጊዳናይሳ ኬና ዎꬊዴስ፤ ማጫሳታስካ ጩሊ ዎꬊዴስ፤ ባ ዎꬊዳይሳ ባ ሼምፒዛሶን፥ ባ ቦንቂ ሺሺዳይሳ ባ ጎንጎሎ ኩንꬂዴስ።
NAH 2:13 ኡባፌ ዎልቃማ ጎዳይ፥ «ታ ኢንቴ ቦላ ዴንዳዲስ፤ ኢንቴ ፓራ-ጋሬታካ ጹጋና፤ ኢንቴ ጋሞ ማራታ ማሻይ ማና፤ ኢንቴስ ማና ሚሺካ ቢታ ቦላ ኣሽኬ፤ ኢንቴ ኪቲዛይታ ጬንጉርሲ ሃይሳፌ ጉዬ ሴቴቴና» ጊ ኣዋጄስ።
NAH 3:1 ሱꬃ ካታማይስ ኣዬ ኣና፤ ዎርዶይኔ ቦንቃይ ኢዚን ኩሚዴስ፤ ኢዚፔ ቆጪሬቲ ሺቂዳይሲ ኤፊንካ ዉሬና።
NAH 3:2 ጹርቃፌ ጊሪሲ፥ ኢሪዞ ጬንጉርሲ፥ ፒላታ ፓራ ኣዳራሶይ፥ ፓራ-ጋሬታ ጊሪሲ ሲዬቲዴስ።
NAH 3:3 ቶጋንቻይ ቶጌስ፤ ማሻይ ፖፖልኡ ጌስ፤ ቶራይ ጾልቄቴስ፤ ዳሮይ ሃይቂዴስ፤ ኣሃይ ኣሃ ቦላ ኮሬቲዴስ፤ ኢዛስ ቆዳይካ ዴና፤ ኣꬊ ቢዛሶይካ ቤቲቤና።
NAH 3:4 ሃይሲ ኡባይ ሃኒዳይ ቡቴ ኣꬃዳ ኣስ ባሌꬂዛኔ ሙሬኒዛ ላይማይ ጋሶና። ኢዛ ባ ላይማቴꬃን ካዎቴꬃ፥ ማሮቴꬃን ዴሬዛ ኣይሌሲዳሮ።
NAH 3:5 ኡባፌ ዎልቃማ ጎዳይ፥ «ሃኔ ታኒ ኔ ቦላ ሞርኬቴꬃን ዴንዳዲስ፤ ታኒ ኔ ቃሚሳ ቃራ ኔ ኣይፌሶ ካማና፤ ኔ ካሎቴꬃ ዴራስ፥ ዬላቴꬃ ካዎቴꬃታስ ታ ቤሳና።
NAH 3:6 ታኒ ኔ ቦላ ቡራ ኦላና፤ ታ ኔና ካꬋና፤ ቂꬌስካ ኣꬃ ኢማና።
NAH 3:7 ኔና ቤኢዛይቲ ኔፔ ባቃቲሼ፥ ‹ናናዌይ ላሌታዱስ፤ ኢዚስ ዬካናይ ኦኔ?› ጋና። ኔና ሚንꬄꬃናዴ ታ ኣዋፔ ዴማኔ?» ጊዴስ።
NAH 3:8 ኔኒ ኣባዬ ሻፋ ኣቻን ዲዛ፥ ሃꬃን ዶዴታ ዲዛ ኖኤ ኣሞኔፔ ጎባይ? ሻፋዚ ኢዚስ ቴቄ ሃꬃዚካ ኢዚስ ጊምቤ።
NAH 3:9 ቶጵያይኔ ጊብጼይ ኢዚስ ዛዋይ ባይንዳ ዎልቃ፤ ፑጼይኔ ሊቢያይ ኢዞ ማዲዛይታ፤
NAH 3:10 ጊዶ ኣቲን ኢዛ ዲኤታዱስ፤ ጎዴታ ባዱስ፤ ኢዚ ናይቲ ኦጌታ ቲጻ ቦላ ዲንጬቲዳ፤ ኢዚ ዳናታ ቦላ ሳማይ ዎꬊዴስ፤ ኢዚ ጊታ ኣሳቲ ኡባይ ሳንሳላታን ቃሼቲዳ።
NAH 3:11 ኔኒካ ቃሴ ማꬆታናኔ ቆቴታና፤ ሞርኬታፔ ኣቲዛሶ ኔ ኮያና።
NAH 3:12 ኔ ሚጻቲ ኡባይ ሙሳስ ጋኪዳ ባላሴ ሚꬃስ ኮይሮ ኣይፌ ማላ፤ ኢስቲ ቃጺዛ ዎዴ ኢስታ ኣይፌቲ ሚዛዴ ዶናን ዎꬌቴስ።
NAH 3:13 ሄኮ ኔ ኦላ ኣሳይ ዉሪካ ማጫ ጻላ! ኔ ዛዋቲ ኔ ሞርኬታስ ዋጊ ጊ ዶዬቲዳ፤ ኢስታ ኮላታታካ ታማይ ሚዴስ።
NAH 3:14 ኔና ጊዶꬂዛ ዎዴስ ሃꬅ ዱቃ፤ ኔስ ቴቄ ሚንꬃ ጊጊሳ፤ ማና ኡርቃ ኮያ፤ ኡርቃ ዬꬋዳ ጹቤ ኦꬃ።
NAH 3:15 ኔና ሄን ታማይ ማና፤ ማሻይካ ኔና ቃንጻና፤ ጉምባሮይ ሚዛ ማላ ኔና ጋርጫና፤ ጉምባሮ ማላ ዬሌታ፤ ቦሌ ማላ ዳራ።
NAH 3:16 ኔ ዛልኣንቻታ ሳሎ ጾሊንቴፔካ ዳርሳዳሳ። ኢስቲ ጊዲኮ ቢታዮ ቦሌ ማላ ፒቲ ሚዲ ፒራꬊ ቢዳ።
NAH 3:17 ኔና ናጊዛይቲ ቦሌ ማላ፤ ኔ ጊታ ኣሳቲ ሜጎ ጋላስ ጊምቤ ጋርሳን ኡቲዛ ጉምባሮ ማላ። ኢስቲ ኣርሼይ ኬዚሺን ፒራꬌቴስ፤ ኢስቲ ፒራꬊ ቢዛሶይ ኣዋኮ ኤሬቴና።
NAH 3:18 ኣሶሬ ካዎ፥ ኔ ሄንꬃንቻቲ ꬊስኪዳ፤ ኔ ጊታ ኣሳቲ ዎፑ ጊ ኢቺዳ፤ ኔ ዴሬይ ሺሺዛይ ꬋዪን ዙማ ቦላ ላሌቲዴስ።
NAH 3:19 ኔ ማዱንꬅ ፓꬃና ዳንዳይዛይ ዴና፤ ኔኒ ሃይቆስ ጋꬂዛ ሜቆ ሜቃዳሳ፤ ኔ ጊሻስ ሲዪዳ ኡባይ ኔ ኩንዴꬃን ኡፋዬቲ ኩሼ ባቃና፤ ዛዋይ ባይንዳ ኔ ሜንጼ ኢታቴꬂ ቦቾንታይ ኦኔ?
HAB 1:1 ናቤ ኢምባቆስ ኣጁታን ቆንጪዳ ኪታይ ሃይሳፌ ካሊዛይሳ።
HAB 1:2 ጎዳዉ! ኔ ታና ማዳና ማላ ታ ኔና ጼይጊሺን ኔ ኣይዴ ጋካናስ ሲዪኪ? «ቆሆይ ዳሪዴስ» ጋዳ ታ ዋሲሺን ኔ ኣይዴ ጋካናስ ኣሺኪ?
HAB 1:3 ኔ ታና ኣዛስ ቆሆይ ዳሪሺን ቤሳይ? ሃይሳ ማላ ጌኔ ኦሶይ ኦሴቲሺን ኔ ዋና ጮኡ ጋዳ ጼላይ? ሞሮይኔ ማካላይ ታ ሲንꬃን ዴስ። ኦሺኔ ፓላማይ ቢታ ቦላ ዳሪዴስ።
HAB 1:4 ሄሳ ጊሻስ ዎጋይ ሌፒዴስ፤ ቱማ ፒርዳይ ዴና፤ ቱማ ፒርዳይ ጌላታና ማላ ኢታቲ ጺሎታ ኡንኤꬄቴስ።
HAB 1:5 «ኢንቴስ ዮቴቲንካ ኣማኖንታ ኢንቴና ታ ኢንቴ ፓጻ ዲሺን ኢሲ ሚሽ ኦꬃና ጊሻስ ኣኔ ሃኢ ኣሳ ጼሊቴ፤ ቤኢዲኔ ዳሮ ማላሌቲቴ።
HAB 1:6 ባስ ጊዶንታ ኬꬃኔ ዲዛሶ ኦይካናስ ቢታ ኡባ ዎራጂዛ ሼምፖ ኢታታኔ ፒላታታ ባቢሎኔ ዴሬ ኣሳ ታኒ ዴንꬃና።
HAB 1:7 ኢስቲካ ባቢሲዛይታኔ ዳጋንꬂዛይታ፤ ኢስታ ፒርዳይኔ ቦንቾይ ኢስታፌ ኬዛና።
HAB 1:8 ኢስታ ፓራይ ማሄፔካ ፒላታ፤ ኦማርሳ ካና ሱይቴታፔካ ሜንጼ ኢታ፤ ኢስታ ቶጋ ኣሳይካ ቶ ፒላታኔ ሃሆፔ ዪዛይታ። ባቂ ኤኪዲ ኤሌሊዛ ጎሌ ካፎ ማላ ፒራꬌቴስ።
HAB 1:9 ዉሪካ ጌኔስ ጊጺ ኬዚዳ፤ ኢስታ ኦላ ኣሳይ ባዞ ቢታ ጫርኮ ማላ ጌዴ ሲንꬄ ሆርዶፌስ። ዲኤቲዳይታ ኣጬ ማላ ሺሼስ።
HAB 1:10 ካዎታ ሌቄስ፤ ዴሬ ሃሪዛይታ ቂꬊ ካኤስ፤ ኦላ ሚጻ ኡባ ሌቄስ፤ ቢታ ኢሲሶ ሺሺ ጉፒዲ ካታማታ ባስ ኦይኬስ።
HAB 1:11 ሄሳፌ ጉዬ ጎቴ ጫርኮ ማላ ፒቲ ኤኪ ቤስ፤ ሄይቲ ባ ዎልቃ ባስ ጾሳ ኬሲዳ ናጋራንቻታ» ጌስ።
HAB 1:12 ኣቤት ጎዳዉ! ኔ ሜርናሶፌ ዳሳ ጊዲኪ? ታ ጌሻዉ፥ ታ ጾሳዉ፥ ኔኒ ናጊዛ ጊሻስ ኑኒ ሃይቆኮ፤ ጎዳዉ ኢስታ ፒርዳና ማላ ኔ ኢስታ ሹማዳሳ። ዛላዞ! ኢስቲ ኑና ቃጻያና ማላ ኔ ኢስታስ ማታ ኢማዳሳ።
HAB 1:13 ኔ ኣይፌቲ ኢታ ጼሎንታ ማላ ኬሂ ጌሻ፤ ኔኒ ቆሆ ጮኡ ጋ ጼላናስ ዳንዳያካ፤ ሂስቲን ኣስ ባሌꬂዛይታ ኣዛስ ጮኡ ጋዲ? ሄ ኣሳቲ ባፔ ኬሂ ጺሊዛ ኣሳታ ꬋይሲሺን ኔ ኣዛስ ጮኡ ጋይ?
HAB 1:14 ኔኒ ኣሳ ኣባ ጊዶን ዲዛ ሞሌ ማላኔ ጎዳይ ኢስታስ ባይንዳ ኣባ ጊዶን ዲዛ ሜꬌቴꬃ ማላ ኦꬃዳሳ።
HAB 1:15 ኢታ ሞርኬይ ኢስታ ዉርሲካ ማንጻኮራ ኦይኪ ኬሳና፤ ኢዚ ኢስታ ጊቴንካ ኦይኪ ጎቻና፤ ባ ዎꬂዛሶን ኢስታ ሺሺ ዎꬃና፤ ሄሳንካ ኡፋዬቲዲ ሃሹ ጋና።
HAB 1:16 ሄሳንካ ሼምፒዲ ዲዛ ጊሻሲኔ ኢዚ ሚዛ ቁማይ ሞꬎ ጊዲዳ ጊሻስ ባ ኦይኪዳ ጊቴዛስ ያርሾ ያርሼስ፤ ቃሴካ ባ ሺሺዛሶዛስ ኤጻኔ ጩዋሴስ።
HAB 1:17 ሂስቲን ኢዚ ዎንቲን ዎንቲን ፓጬይ ባይንዳ ባ ጊቴ ዬጊ ዬጊ ሞሌ ኦይኪዛ ማላ ዴሬዛካ ሚሻይ ባይንዳ ዎꬋናስ ቤሲዜ?
HAB 2:1 ታኒ ናጌ ናጊዛሶን ኤቃና፤ ሚጻ ጊምቤ ቦላ ኬዛዳ ሄን ታካና። ታ ኦይሻስ ጎዳይ ኣይ ዛሮ ኢማናኮ ታ ዲዛሶን ዳዳ ኢዛ ናጋና።
HAB 2:2 ጾሲ ኢምባቆስ፥ «ዋዪሶንታ ናባቤታና ማላ ኔስ ኣጁታን ቆንጪዳይሳ ሳሌዳ ቦላ ሎኤꬃ ዎጫ ጻፋ።
HAB 2:3 ኔ ኣጁታዚ ባስ ኢሜቲዳ ዎዴ ናጌስ፤ ኢዚካ ዉርሴꬃ ጊሻስ ዮቴስ፥ ዎርዶቴና። ጋምኣና ሚሳቲኮካ ናጋ፤ ኢዚ ቱማፔ ያና፤ ሙሌካ ጋምኤና።
HAB 2:4 «ሄኮ ኢዚ ኦቶሬቲዴስ፤ ኢዛ ኣሞይ ሱሬ ጊዴና፤ ጺሎ ኣሲ ጊዲኮ ኣማኖን ዴስ።
HAB 2:5 ዱሬቴꬂ ኣስ ባሌꬄስ፤ ኦቶራንቻስ ሙሌካ ሼምፖይ ዴና፤ ኢዚ ዱፎ ማላ ዮራ፤ ዎꬊዛ ሃይቆ ማላካ ካሎ ኤሬና፤ ዴሬ ኡባ ሺሼሲኔ ዲኢ ኤኪ ቤስ።
HAB 2:6 ሂስቲን ሄሳ ማላ ኣሳ ቦላ ቂꬌኒኔ ካꬌን ኣሳይ፥ ‹ባ ካይሲ ኤኪዳ ሻቃጬዛ ባስ ሺሺዛዴስ፥ ጌኔን ዱሬቲዛዴስ ኣዬ ኣና! ሄሳꬆ ኣይዴ ጋካናስ ሺሻኔ?› ጊ ኢዛ ቦላ ሚጬኔ?
HAB 2:7 ኔ ኣጮን ዬጊዳ ኣሳቲ ኔ ቆፖንታ ኔ ቦላ ዴንዴቴኔ? ኢስቲ ቤጊዲ ኔና ዳጋንꬄቴኔ? ሄሳፌ ጉዬ ኔ ኢስታ ኩሼን ኩንዳና።
HAB 2:8 ኔ ዳሮ ዴሬ ሚሽ ቦንቂዳ ጊሻስ ሃንኮ ቦንቄቶንታይቲ ኔና ቦንቃና፤ ኔ ኣሳ ሱꬅ ጉሳዳሳ፤ ዴራ፥ ካታማኔ ኢዛን ዲዛይታ ዉርሳ ꬋይሳዳሳ።
HAB 2:9 «ዎርዶራ ባሌꬂ ኤኪዳ ሚሻን ባስ ዳና ኬꬅ ኬጺዛዴሲኔ ባ ሞርኬ ኩሼፔ ኣታናስ ባ ኬꬅ ꬎቃሶሆን ኬጺዛዴስ ኣዬ ኣና!
HAB 2:10 ዳሮ ኣሳ ሼምፖይ ꬋያና ማላ ቃቻዳሳ፤ ኔ ኬꬃ ቦላኔ ኔ ቦላ ꬋይሲዛዝ ኤሃዳሳ።
HAB 2:11 ጊምቤ ጊዶን ሹቺ ዋሴስ፤ ጊዶን ጎዳ ኤቂዳ ሚꬃቲካ ኢዛስ ዛሮ ኢሜቴስ።
HAB 2:12 «ሱꬅ ጉሲዲኔ ኢታ ኦꬂዲ ካታማ ኤሲዛይታስ ኣዬ ኣና!
HAB 2:13 ኣሳ ኦሶይ ኡባይ ታማን ጹጌታና ማላ ዴሬይካ ሜላ ዳቡራና ማላ ጎዳይ ኡባፌ ዎልቃማ ጾሳይ ኡባ ዎꬂቤኔ?
HAB 2:14 ኣባይ ኩሚዛ ማላ ቢታይ ጎዳ ጊታቴꬅ ኤሮን ኩማና።
HAB 2:15 «ኣሳ ካሎቴꬅ ቤያናስ ባ ላጌታ ኡሹ ኡሺዛዴሲኔ ኢስቲ ኡዪዲ ማꬆታና ጋካናስ ዎይኔ ኡሹ ዱቂዛዴስ ኣዬ ኣና!
HAB 2:16 ኔኒ ቦንቾ ጊሻስ ዬላታና፤ ሄሲካ ሃኢ ታራይ ኔስ ጊዲዳ ጊሻስ ኡያዳ ጋንዲጋራ፤ ኔ ካሎታ። ጎዳ ኡሻቻ ኩሼን ዲዛ ሃንቆ ጹኣይ ኔ ቦላ ሲማና፤ ካሴ ኔስ ዲዛ ቦንቾዛ ካዉሻቴꬃን ላማና።
HAB 2:17 ኔ ሊባኖሴ ቦላ ኦꬂዳ ጌኔይ ኔና ሚታና፤ ኔኒ ሜዶሳታ ꬋይሲዳይሲ ዛሪ ኔና ዳጋንꬃና፤ ሄሲካ ኔ ኣሳ ሱꬅ ጉሲዳ ጊሻሲኔ ዴሬታ፥ ካታማታኔ ኢስታን ዲዛይታ ኔ ኡባ ꬋይሲዳ ጊሻሳ።
HAB 2:18 «ኣሳ ኩሼይ ማሲ ጊግሲዳ ኤቃኔ ዎርዶ ሃሳይዛ ሚስሌስ ኣይ ጎኣይ ዲዜ? ሂስቲን ኢዛ ኦꬂዳዴይ ባርካ ባ ኦሶን ኣማኔቲዛ ጊሻሲኔ ኢስቲካ ሃሳያናስ ዳንዳዮንታ ኤቃ ኦꬂዛ ጊሻሳ።
HAB 2:19 ሚꬃ፥ ‹ኔ ቤጋ!› ሼምፖይ ባይንዳ ሹቻካ፥ ‹ኔ ዴንዳ!› ጊዛዴስ ኣዬ ኣና! ቱሙካ ኢዚ ታማርሳና ዳንዳይዜ? ሄኮ ኢዚ ቦላራ ዎርቃኒኔ ቢራን ቲዬቲዴስ፤ ኢዛስ ሼምፖይካ ዴና።
HAB 2:20 ጎዳይ ጊዲኮ ባ ጌሻ ኬꬃን ዴስ። ቢታ ቦላ ዲዛ ዴሬይ ዉሪካ ኢዛ ሲንꬃን ጮኡ ጎ» ጊዴስ።
HAB 3:1 ናቤ ኢምባቆይ ዬꬃን ሺሺዳ ዎሳ።
HAB 3:2 ኣቤት ጎዳዉ! ታ ኔ ጎባቴꬃ ጊሻስ ሲያዲስ። ጎዳዉ ኔ ኦሶይካ ታና ያሺሲዴስ፤ ኔኒ ኔ ኦሶ ኑ ዎዴን ኦራꬃ፤ ኔ ኦሶቲ ኑ ዎዴንካ ኤሬታና ማላ ኦꬃርኪ! ሃንቆ ዎዴካ ማሮቴꬅ ቆፓርኪ!
HAB 3:3 ጾሲ ቴማኔፔ ጌሻይካ ፓራኔ ዙማ ቦላፌ ዪዴስ፤ ኢዛ ቦንቾይ ሳሎ ካሚ ኦይኪዴስ፤ ኢዛ ጋላታይካ ቢታ ቦላ ኩሚዴስ።
HAB 3:4 ኢዛ ፖኦይ ኣዋ ኣርሼ ፖኦ ማላ፤ ኣዋ ጻልቄይ ኢዛ ኩሼፔ ኬዚዴስ፤ ኢዛ ዎልቃይካ ሄን ቆቴቲዴስ።
HAB 3:5 ኢታ ሃርጌይ ኢዛፔ ሲንꬃራ ቢዴስ፤ ሃዳ ሃይቆይካ ኢዛ ጌዶ ካሊዴስ።
HAB 3:6 ኢዚ ኤቂን ቢታይ ቃጺዴስ፤ ኢዚ ጼሊዲ ኣሳ ኮኮሪሲዴስ፤ ሜርናስ ዲዛ ዙማቲ ላሌቴꬅ ፒስኪ ጊዳ፤ ቤኒሶፌ ዲዛ ዙማቲካ ዎዲዳ፤ ኢዛ ኦጌይ ሜርናሳ።
HAB 3:7 ቶጵያ ዱንካኔቲ ሜቶቴቲሺን፥ ሚዲያሜታ ዱሳሶይ ቡልኣኬቲሺን ታ ቤያዲስ።
HAB 3:8 ጎዳዉ! ኔ ሃꬃታ ቦላ ሃንቄታዲ? ኔ ሃንቆይ ሃꬃ ፑልቶታ ቦላ ዲዜ? ኔኒ ኔ ፓራታኔ ጾኒዛ ፓራ-ጋሬታ ቶጋዳ ካሌꬂዳ ዎዴ ኣባ ቦላ ሃንቄታዲ?
HAB 3:9 ኔኒ ኔ ዎንዳፌ ጊጊሳዳሳ፤ ዪሻይ ኔስ ያና ማላ ኣዛዛዳሳ፤ ቢታ ጳልቃዳ ሃꬅ ኬሳዳሳ።
HAB 3:10 ዙማቲ ኔና ቤኢዲ ማኒዳ፤ ሃꬃ ዳምባላይ ኣꬊ ቢዴስ፤ ኣባይ ጬቄቲዴስ፤ ኣባ ዳምባላካ ፑዴ ዴንꬂዴስ።
HAB 3:11 ኔ ፒሪሳ ዬዲዳ ኔ ዪሻታፔኔ ጾልቄቲዛ ኔ ቶራ ፖኦፔ ዴንዲዳይሳን ኣርሼይኔ ኣጊናይ ባ ዲዛሶን ኤቂ ኣቲዳ።
HAB 3:12 ኔኒ ቢታ ቦላ ሃንቆን ሲሜሬታዳሳ፤ ዴሬታካ ሃንቆን ዬꬋዳሳ።
HAB 3:13 ኔኒ ኔ ዴሬ ኣሻናሲኔ ኔ ቲይዳዴ ኣሻናስ ኬዛዳሳ፥ ኢታ ዴሬ ካሌꬂዛዴ ሊቂሳዳሳ፥ ሁኤፔ ቶሆ ጹጉንꬅ ጋካናስ ካሎ ኣሻዳሳ።
HAB 3:14 ጎቴ ጫርኮ ማላ ኑና ላላናስ ዪዳይሳ፥ ኣይኮይ ባይንዳ ማንቆዛ ጌማራ ሚታናስ ኣሞቲዛይሳ፥ ኦላንቻታ ሃላቃ ጊዲዳይሳ ኢዛ ዛራ ጫዳዳሳ።
HAB 3:15 ኔኒ ኣባ ኔ ፓራታን ዬꬊሲዛ ዎዴን ጪማ ኣባይ ቃጼስ።
HAB 3:16 ታኒ ሲያዲስ፤ ታ ዎዚናይካ ዳጋሚዴስ፤ ኢዛ ጊርሳፌ ዴንዲዳይሳን ታ ሜቴርሻይ ኮኮሪዴስ። ባቦን ታስ ማራጬይ ቃጺዴስ። ታስ ጉልባቴይ ኮኮሪዴስ፤ ጊዲኮካ ኑ ቦላ ዎራጂዛ ዴሬዛ ቦላ ሜቶይ ያና ጋላስ ታ ጌንጫ ናጋይስ።
HAB 3:17 ባላሴ ጌቴቲዛ ሚꬃይ ኣይፎንታ ኣጊኮካ ዎይኔ ሚꬃፌ ኣይፌይ ቤቶንታ ኣጊኮ ዎጋራ ሚꬂካ ኣይፎንታ ኣጊኮ ጎሻ ጋዴይ ካꬅ ኢሞንታ ኣጊኮ ዶርሲ ዪሬን ዶንታ ኣጊኮካ ሚዚ ዜꬌን ዶንታ ኣጊኮካ
HAB 3:18 ታኒ ታ ጎዳን ኡፋዬታና፤ ታ ኢዛን ኣቲዳ ጾሳን ኡፋዬታና።
HAB 3:19 ጎዳ ታ ጾሳይ ታስ ዎልቃ፤ ታ ቶሆታ ኢዚ ጌኔሳ ቶሆ ማላ ሚንꬆ፤ ኢዚ ታና ꬎቃሶሆራ ሄሜꬃና። ዬጺዛይታ ካሌꬂዛዴስ ዬꬃ ሚሻን ዬጼቲዳ ማዛሙሬ።
ZEP 1:1 ኣሞጼ ና ኢዮሲያሲ ዩሁዳን ካዎቲዳ ዎዴ ሂዝቂያሳ ና፥ ኣማሪያ ና፥ ጎዶሊያሳ ና፥ ኩሼ ና ሶፎናሳኮ ዪዳ ጎዳ ቃላይ ሃይሳፌ ካሊዛይሳ።
ZEP 1:2 ጎዳይ፥ «ታኒ ቢታ ቦላ ዲዛዝ ኡባ ꬋይሳና» ጌስ።
ZEP 1:3 ጎዳይ፥ «ኣሴኔ ሜዶሳታ ꬋይሳና፤ ሳሎ ካፎታኔ ኣባ ጊዶን ዲዛ ሞሌታ ታ ꬋይሳና፤ ታ ኣሳ ዜሬꬅ ቢታ ቦላፌ ꬋይሲዛ ዎዴ ኢታቲ ላሌቲዳ ቡራ ዶሬ ማላ ጊዳና» ጌስ።
ZEP 1:4 ጎዳይ፥ «ታኒ ዩሁዳኒኔ ዬሩሳላሜን ዲዛ ኣስ ኡባ ቃጻያና፤ ቃሴካ ባኣሌ፥ ኢስታ ኤቃ ጾሳታኔ ላይማቲዛ ቄሴታ ሃይሳፌ ታ ሚልጺ ሂስታ ꬋይሳና።
ZEP 1:5 ፎቄ ቦላ ኬዚዲ ሳሎ ሜꬌቴꬃታስ ጎይኒዛይታ፥ ጎዳስ ጎይኒሼኔ ኢዛ ሱንꬃን ጫቂሼ ሲሚ ዎꬊዲ ቃሴ ሚልኮሜ ሱንꬃን ጫቂዛይታ፥
ZEP 1:6 ጎዳ ካላናፔ ጉዬ ሲሚዛይታ፥ ጎዳ ኮዮንታይታ፥ ኢዚ ኢስታ ማዳና ማላ ኦይቾንታይታ ታ ꬋይሳና» ጌስ።
ZEP 1:7 ጎዳ ጋላሳይ ማቲዳ ጊሻስ ኡባ ሃሪዛ ጎዳ ሲንꬃን ጮኡ ጊቴ፤ ጎዳይ ያርሾ ጊግሲዴስ፤ ባ ጼይጊዳይታ ባስ ዱማሲዴስ።
ZEP 1:8 «ጎዳ ያርሾ ጋላስ ዳናታኔ ካዎዛ ናይታ፥ ኢማꬃ ማይኦ ማይኢዛይታ ኡባ ታ ቃጻያና።
ZEP 1:9 ሄ ዎዴ ኣላጋ ጾሳታ ፔንጌን ጉፒዛይታ፥ ባንታ ጎዳታ ኬꬃ ማካላቴꬃኒኔ ባሌꬆን ኩንꬂዛይታ ታ ቃጻያና» ጌስ ጎዳይ።
ZEP 1:10 ጎዳይ፥ «ሄ ዎዴ ሞሌ ፔንጌ ባጋራ ዋሶይ፥ ካታማስ ናምኣንꬆ ዱቡሻን ዬሆይ፥ ዙምቡላታ ቦላ ጊታ ሺሮይ ሲዬታና።
ZEP 1:11 ኢንቴኖ ማኪቴሻ ጊያን ዲዛይቶ! ዋሲቴ፤ ጋሶይካ ኢዛን ዛልኢዛ ዛልኣንቻቲ ኡባይ ዉራና፤ ቢራን ዛልኢዛይቲካ ኡባይ ሃይቃና።
ZEP 1:12 ሄ ዎዴ ታ ዬሩሳላሜ ጊዶዛ ጾምፔራ ኮያና፤ ኣይኮ ሂርጋይ ባይንዳ ባꬊ ጊ ኡቲዳይታ፥ ዎይኔ ኡሹ ጋጪ ኤኪቺን ኦርጮ ቦላ ኣቲዳ ዎይኔ ኡሻ ማላ ጊዲዳይታ፥ ‹ኢታ ጊዲን ዎይኮ ሎኦ ጊዲን ጎዳይ ኣይኮካ ኦꬄና› ጊዛይታ ታ ቃጻያና።
ZEP 1:13 ኢስቲ ሃሪዳ ሃሮይ ቦንቄታና፤ ኢስታ ኬꬃይ ላሌታና፤ ኢስቲ ኬꬅ ኬጻናሺን ባ ኬጺዳ ኬꬃን ዴቴና፤ ዎይኔ ሚꬅ ቶካናሺን ባ ቶኪዳ ዎይኔዛፔ ኦሴቲዳ ኡሻ ኡዬቴና» ጌስ።
ZEP 1:14 «ጎዳፔ ያና ጊታ ጋላሳይ ማቲዴስ፤ ሄሲካ ኤሶን ያና፤ ጎዳ ጋላሳን ሲዬታና ዬሆይ ጫሞ፤ ሄን ኦላንቻቲ ጫሞ ዋሶ ዋሳና።
ZEP 1:15 ሄ ጋላሳይ ባሻ ጋላስ፥ ሜቶኔ ጬጬ ጋላስ፥ ሺሮኔ ꬋይሳ ጋላስ፥ ꬉማ ጋላሲኔ ቱላላ ጋላስ፥ ሻራኔ ጊርዲ ጊዳ ꬉማ ጋላስ ጊዳና።
ZEP 1:16 ሄ ጋላሳይ ጊምቤቲዳ ካታማታ ቦላኔ ኣዱሳ ጊምቤታ ቦላ ኦላ ዛዬይኔ ኦላ ዋሶይ ሲዬቲዛ ጋላስ ጊዳና።
ZEP 1:17 ኣሳይ ቆቄꬆ ሄሜታና ማላ ኣሳ ቦላ ታኒ ጬጬ ዬዳና፤ ኣሳይ ጎዳ ቦላ ናጋራ ኦꬂዳ ጊሻስ ኢስታ ሱꬂ ዲኦ ማላ ጉካና፤ ኢስታ ኣሃይካ ቡራ ማላ ኦሌታና።
ZEP 1:18 ጎዳ ባሻ ጋላስ ኢስታ ቢራይኔ ዎርቃይ ኢስታ ኣሻናስ ዳንዳዬና። ቢታይ ኩሜꬅ ኢዛ ሃንቆን ꬋያና፤ ኢዛ ዚልኤቴꬃ ሱሌን ቢታ ኡባይ ጹጌታና፤ ቢታ ቦላ ዲዛ ኡባ ቦላ ቆፖንታ ዲሺን ዉርሴꬅ ኤሃና» ጌስ ጎዳይ።
ZEP 2:1 ኢንቴኖ ዬላይ ባይንዳ ዴሬቶ! ኣኔ ኢሲ ቦላ ሺቂቴ!
ZEP 2:2 ባሻ ጋላሳይ ጋካናፔ ካሴቲዲ፥ ሄ ጋላሳይ ሱላ ማላ ዴንꬂ ꬋይሶንታ ዲሺን፥ ጎዳፔ ሚኖ ሃንቆይ ኢንቴ ቦላ ዮንታ ዲሺን ጎዳፔ ባሻ ጋላሲ ኢንቴ ቦላ ጋኮንታ ዲሺን ሺቂቴ።
ZEP 2:3 ኢንቴኖ ቢታ ቦላ ዲዛ ኣሽኬቶ፤ ኢዛ ኣዛዞካ ፖሊዛይቶ! ጎዳ ኮዪቴ፤ ጺሎቴꬂኔ ኣሽኬቴꬅ ኮዪቴ፤ ጎዳ ሃንቆ ጋላሳፌ ኢንቴ ኣታናኮ ኦኔ ኤሪዛይ!
ZEP 2:4 ጋዛይ ቡላ ቢታ ጊዳና፤ ኣስቄሎናይካ ላሌታ ኣታና። ኣዛጾኔይ ሴታ ጋላስ ካይዛና። ኣቃሮኔይ ሾዴታና።
ZEP 2:5 ኢንቴኖ ኣባ ኣቻን ዲዛይቶ! ኬሊቴ ዴሬ ኣሳቶ፥ ኢንቴስ ኣዬ ኣና! ፊሊስጼሜ ዴሬ ኣሳይ ዲዛ ካናኔ ቢታዬ! ኔ ቦላ ዮቴቲዳ ጎዳ ቃላይ ሃይሳፌ ካሊዛይሳ፤ «ታ ኔና ሙሌራ ꬋይሳና፤ ኔናን ዲዛ ኣሳፔ ኣታና ኣሲ ዴና።
ZEP 2:6 ካሊቴ ኣሳይ ዲዛ ኣባ ኣቻ ቢታይ ሄንꬃንቻታ ዱሳሶኔ ዶርሳ ዪሬ ጊዳና።
ZEP 2:7 ሄሲካ ዩሁዳፔ ጫሻ ኣቲዳይታስ ጊዳና፤ ኢስቲካ ሄን ባስ ኣቆታ ዴማና፤ ጋዴይ ቃሚሺን ኣስቄሎና ካታማን ዲዛ ኬꬃታን ኣቃና፤ ጎዳይ ኢስታ ጾሳይ ኢስታ ናጋና፤ ኢስታፌ ዲኤቲዳይሳካ ኢስታስ ዛራና።»
ZEP 2:8 ጎዳይ፥ «ሞኣቤ ኣሳይ ጫዪዛይሳኔ ኣሞኔ ኣሳይ ቂꬊዛይሳ ታ ሲያዲስ። ታ ዴራ ጫዪዳ፤ ኢስቲ ታ ዴራ ቦላካ ማንዲዳ» ጌስ።
ZEP 2:9 ሄሳ ጊሻስ ጎዳይ ኡባፌ ዎልቃማ ኢስራኤሌ ጾሳይ፥ «ታኒ ታ ዴኦ ጾሳቴꬃን ጫቃይስ፤ ሞኣቤይ ሶዶሜ ማላ ኣሞኔይ ጋሞራ ማላ፥ ሻራፋይ ማይኢዳሶ ማላኔ ማጺኔ ቦኪ ኤኪዳ ኦላ ማላ ሜርናስ ቡላ ጊዳና። ታ ኣሳፔ ጫሻ ኣቲዳይቲ ኢስታ ሃሮ ቦንቃናኔ ኢስታ ቢታ ላታና» ጌስ።
ZEP 2:10 ባንታ ኦቶሮቴꬃፌ ዴንዲዳይሳን ኢስቲ ኡባፌ ዎልቃማ ጾሳ ዴራ ጫዪዳ ጊሻሲኔ ቂꬊዳ ጊሻስ ሄሲ ኢስታ ቦላ ጋካና።
ZEP 2:11 ጎዳይ ሄ ቢታ ኤቃ ጾሳታ ኡባ ꬋይሲዛ ዎዴ ኢዚ ኢስታ ያሺሲዛይሳ ጊዳና፤ ኣባ ኣቻን ዲዛ ዴሬቲ ኡባይ ኢሶይ ኢሶይ ባ ዲዛሶን ዲሼ ኢዛስ ጎይናና።
ZEP 2:12 «ኢንቴኖ ቶጵያ ኣሳቶ! ኢንቴ ታ ማሻን ሲፌታና።»
ZEP 2:13 ኢዚ ባ ኩሼ ፑዴሃ ባጋን ዲዛ ዴሬታ ቦላ ዴንꬃና፤ ኣሶሬ ꬋይሳና። ናናዌካ ቡላሳና፤ ባዞ ቢታ ማላ ሜሊሳና።
ZEP 2:14 ዶርሳ ዉዴይኔ ሜሄ ዉዴይ፥ ሜꬌቴꬃፌ ኡባ ቆሞይ ሄን ሼምፓና። ጉቶይኔ ቁጻርሲ ኢዚ ጊምቤታን ኣቃና። ኢስታ ዋሶይ ማስኮቴታራ ሴቴታና። ጊምቤዛ ላሌꬂ ኢሳ ኢሳ ፔንጌን ዶሬታና፤ ኬꬃታ ቶኪ ኤቂዳ ዚጋ ጎዳቲ ካሎታና።
ZEP 2:15 ካሴ ኡፋይሳን ዲዛ ካታማያ ሃኖ፤ ኢዛካ ባ ዎዚናን፥ «ታ ጻላ ዳይስ፤ ታፔ ሃራይ ኦኒካ ዴና» ጊዳራ ሂስቲን ሃኢ ዋናዳ ዎራ ዶኣቲ ጉሪዛሶ ባዞ ቢታ ጊዳ ኣታዴ? ኢዚ ኣቻራ ኣꬊ ቢዛ ኡባይ ኢዞ ቂꬊሼ ባ ኩሼ ዉጼስ።
ZEP 3:1 ማካላንቻይሲኔ ቱኒዳሪስ፥ ኣስ ኡንኤꬂዛይታ ካታማይስ ኣዬ ኣና!
ZEP 3:2 ኢዛ ኦናስካ ኣዛዜቱኩ፤ ኦኒ ዞሪንካ ኤኩኩ፤ ጎዳንካ ኣማኔቱኩ፤ ባ ጾሳኮካ ሺቁኩ።
ZEP 3:3 ኢዞ ካሌꬂዛይቲ ጻጊዛ ጋሞ ማላ። ኢዞ ኣይሲዛይቲካ ዎንቶስ ኣሾንታ ሚዛ ካና ሱይቴ ማላ።
ZEP 3:4 ኢዚን ዲዛ ናቤቲ ኦቶራንቻታኔ ኣስ ባሌꬂዛይታ። ቄሴቲ ጾሳ ኬꬃ ቱኒሴቴስ፤ ዎጋ ቦላካ ማካሌቴስ።
ZEP 3:5 ኢዚን ዲዛ ጎዳይ ኢዚ ጺሎ። ሙሌካ ባሌቲ ኤሬና፤ ማላዶ ማላዶ ሱሬ ፒርዴስ፤ ኡባ ጋላሲካ ዳቡሪ ኤሬና፤ ጊዶ ኣቲን ማካላንቻታስ ዬላይ ዴና።
ZEP 3:6 ጎዳይ፥ «ታኒ ዴሬታ ꬋይሳዲስ፤ ኢስታ ሚጻይ ሙሌራ ꬋይዴስ፤ ኦኒካ ኢዛራ ኣꬎንታ ማላ ኢስታ ኦጌ ካይዚሳዲስ፤ ኢስታ ካታማቲ ሙሌራ ꬋይዳ፤ ኢሲ ኣሲካ ዴና፤ ኢስታን ዴኣናይካ ዴና።
ZEP 3:7 ታ ሄ ካታማዮ፥ ቱማፔ ኔኒ ታስ ያያና፤ ታ ሴሪሺን ኔ ኤካና ጋዲስ ሺን፤ ሄሳ ጊሻስ ኢዚ ዱሳሶይ ꬋዬና፤ ኢዚ ቦላ ቂጻቴይ ጋኬና። ጊዶ ኣቲን ታ ዴሬይ ኢታ ኦሶን፥ ካሴፔ ጌዴ ሚኒ ሚኒ ቢዴስ» ጌስ።
ZEP 3:8 ጎዳይ፥ «ሄሳ ጊሻስ ታ ፒርዳና ጋላሳይ ጋካናስ ዲሺቴ፤ ታኒ ዴሬ ኣሳኔ ካዎታ ሺሻናስ ቃቻዲስ። ታኒ ታ ሚኖ ሃንቆዛ ኢስታ ቦላ ጉሳናስ ቃቻዲስ። ታ ሃንቆ ታማን ኩሜꬃ ቢታይ ኤጻና።
ZEP 3:9 ሄ ዎዴ ኣሳይ ኡባይ ጎዳ ሱንꬅ ጼይጋና ማላኔ ሲጋን ኢዛስ ሃጋዛና ማላ ታ ኢስታ ዶና ጌሻና።
ZEP 3:10 ቶጵያ ሻፋታፔ ሄ ፒንꬃን ላሌቲ ዲሼ ታስ ጎይኒዛ ታ ዴሬይ ታስ ያርሾ ኤሃና።
ZEP 3:11 ኢንቴ ታ ቦላ ፖሊዳ ቆሆ ኡባፌ ዴንዲዳይሳን፤ ሄ ጋላስ ዬላቴኬታ፤ ባ ኦቶሬቴꬃን ኡፋዬቲዛይታ፥ ሃኖ ሃ ካታማይፔ ታ ዲጋና። ሄሳፌ ጉዬ ታ ጌሻ ዙማን፥ ኢንቴ ታ ቦላ ኦቶሬቴኬታ።
ZEP 3:12 ጎዳ ሱንꬃን ኣማኔቲዛ፤ ኣሽኬታኔ ባንታና ካዉሺዛይታ፤ ታ ኢንቴ ጊዶን ኣሻና።
ZEP 3:13 ኢስራኤሌፔ ጫሻ ኣቲዳይቲ ናጋራ ኦሴቴና። ዎርዶ ሃሳዬቴና፤ ኢስታ ዶናንካ ጌኔ ሃሳያይ ዴና። ሄሳ ጊሻስ ኢስቲ ሚዲ ሳሮን ዴኣና፤ ኢስታ ባቢሳና ሚሺካ ዴና።
ZEP 3:14 ሃኔ ጺዮኔ ናዬ ኣኔ ዬጻ! ኢስራኤሌ ኣሳዉ ኣኔ ኢሊሊቴ! ሃኔ ዬሩሳላሜ ናዬ! ኩሜꬃ ዎዚናፔ ኡፋዬታ! ኡፋዬታሼ ሃሹ ጋ!
ZEP 3:15 ጎዳይ ኔ ቦላ ዪዛ ቂጻቴዛ ዲጊዴስ፤ ኔ ሞርኬታካ ኔፔ ዛሪዴስ። ጎዳይ ኢስራኤሌ ካዎይ ኔናራ ዴስ፤ ሃይሳፌ ጉዬ ኣይ ኢታሲካ ባባካ።
ZEP 3:16 ሄ ዎዴ ኣሳይ ዬሩሳላሜስ፥ ‹ጺዮኔ ኔ ባቦፋ፤ ኔ ቄሴይ ዳቡሮፖ።
ZEP 3:17 ጎዳ ኔ ጾሳይ ኔናራ ዴስ፤ ኢዚ ኣሺዛ ሚኖ ኦላንቻ። ኢዚ ኔናን ዳሮ ኡፋዬቴስ፤ ኢዚ ባ ሲቆን ኔና ዎፒሳና፤ ኔ ዬꬃን ኢዚ ቦንቼቲዲ ኡፋዬታና› ጋና።
ZEP 3:18 «ቦንቾ ባኣሌ ጋላሳቲ ኣቲዳ ጊሻስ ኔኒ ሙዞቲዳይሳኔ፥ ኔስ ቶሆ ጊዲዳ ዬላ ታ ኔፔ ዲጋና።
ZEP 3:19 ሄ ዎዴ ኔና ኡንኤꬂዳይታ ታ ቃጻያና። ዎቤታ ታ ኣሻና፤ ላሌቲዳይታካ ታ ሺሻና። ኢስቲ ካዉዪዳ ዴሬ ኡባን ታ ኢስታ ቦንቾሲኔ ሳባስ ጋꬃና።
ZEP 3:20 ሄ ዎዴ ታ ኢንቴና ሺሻና፤ ኢንቴ ዴሬ ታ ኢንቴና ዛራና። ኢንቴ ኢንቴ ኣይፌራ ቤዪሺን፥ ኢንቴፌ ዲኤቲዳ ሚሻ ታ ኢንቴስ ዛሪዛ ዎዴ ቢታ ቦላ ዲዛ ዴሬ ኡባ ሲንꬃን ታ ኢንቴስ ሳባኔ ቦንቾ ኢማና» ጌስ።
HAG 1:1 ዳሪዮሲ ካዎቲዳ ናምኣንꬆ ላይꬃን ኡሱፑንꬃ ኣጊናይ ጌሊዳ ኮይሮ ጋላስ፥ ጎዳ ቃላይ ናቤ ሃጌ ባጋራ ዩሁዳ ዴሬ ሃሪዛ ሳላቲያሌ ና ዜሩባቤሌኮኔ ቄሴታ ሃላቃ ኢዮሳዶቄ ና ኢያሶኮ ሂዝጊሼ ዪዴስ።
HAG 1:2 ጎዳይ ኡባፌ ዎልቃማ ጾሳይ፥ «ሃይሲ ዴሬይ፥ ‹ጾሳ ኬꬂ ኬጼቲዛ ዎዴይ ቡሮ ጋኪቤና› ጌስ።»
HAG 1:3 ጎዳ ቃላይ ናቤ ሃጌ ባጋራ ሂዝጊሼ ዪዴስ።
HAG 1:4 «ታ ኬꬃይ ላሌቲ ዲሺን ኢንቴ ሎኦ ኬꬃን ዳናስ ሃይሲ ኢንቴስ ቤሲዛ ዎዴዬ?»
HAG 1:5 ሄሳ ጊሻስ ጎዳይ ኡባፌ ዎልቃማ ጾሳይ ኢንቴና፥ «ኣኔ ኢንቴ ኦꬆይሳ ቆፒቴ።
HAG 1:6 ዳሮ ዜሪዴታ ሺን ጉꬅ ማጺ ሺሺዴታ። ሚዴታ ሺን ካሊቤኬታ፤ ኡዪዴታ ሺን ኣሊቤኬታ፤ ማይኢዴታ ሺን ማይኦይ ኢንቴና ሆኢቤና፤ ዳሞዛ ኤኪዴታ ሺን ኢንቴ ኤኪዳ ዳሞዛይ ዳኬꬃ ካራጺቴን ዎꬂዳይሳ ማላ» ጌስ።
HAG 1:7 ጎዳይ ኡባፌ ዎልቃማ ጾሳይ፥ «ኣኔ ኢንቴ ኦꬂዳይሳ ቆፒቴ።
HAG 1:8 ፑዴ ዙማ ቦላ ኬዚዲ ሚꬅ ኤኪ ዪቴ፤ ኬꬃካ ኬጺቴ፤ ታኒካ ኢዛን ኡፋዬታናኔ ቦንቼታና» ጌስ።
HAG 1:9 ጎዳይ ኡባፌ ዎልቃማ ጾሳይ፥ «ኢንቴ ዳሮ ዴማና ጊዴታሺን ጉꬅ ዴሚዴታ፤ ሂኖካ ኢንቴሶ ጌልꬂዳ ዎዴ ታ ፑና ꬋይሳዲስ። ሄሳ ታ ኦꬂዳይ ኢንቴስ ኣይ ሚሳቲዜ? ታ ኬꬃይ ላሌቲ ኡቲን ኢንቴ ዉሪካ ኢንቴ ኬꬅ ኬጻናስ ዎጺዛ ጊሻሳ።
HAG 1:10 ሄሳ ጊሻስ ኢንቴ ጌዶን ሳሎፔ ፑሴይካ ዲጌቲዴስ፤ ቢታይካ ካꬅ ዲጊዴስ።
HAG 1:11 ታኒካ ጎሻታ ቦላኔ ዙማታ ቦላ፥ ካꬃ ቦላኔ ኦራꬃ ዎይኔ ኡሻ ቦላ፥ ዛይቴ ቦላ፥ ቢታይ ኢሚዛ ኣይፌ ኡባ ቦላ፥ ኣሳ ቦላ፥ ሜሄ ቦላኔ ኢንቴ ኩሼ ኦሶ ኡባ ቦላ ኮሻ ኤሃና» ጌስ።
HAG 1:12 ሄሳፌ ጉዬ ሳላቲያሌ ና ዜሩባቤሌይ ቄሴታ ሃላቃ ኢዮሳዶቄ ና ኢያሶይኔ ዲኤቴꬃፌ ሼምፖራ ፓጻ ሲሚዳ ኣሳይ ጎዳ ባንታ ጾሳ ቃላኔ ናቤ ሃጌ ባጋራ ጾሲ ኪቲዳ ቃላስ ኣዛዜቲዳ። ኣሳይካ ጎዳስ ያዪዴስ።
HAG 1:13 ቃሴካ ጎዳይ ኪቲዳ ሃጌይ ሄሳ ጎዳ ኪታ ዴሬዛስ፥ «ጎዳይ ታ ኢንቴናራ ዳይስ» ጌስ ጊዲ ዮቲዴስ።
HAG 1:14 ሄሳ ጊሻስ ጎዳይ ዩሁዳ ኣይሲዛ ሳላቲያሌ ና ዜሩባቤሌ፥ ቄሴታ ሃላቃ ኢዮሳዶቄ ና ኢያሶኔ ዲኤቴꬃፌ ሼምፖራ ፓጻ ሲሚዳ ዴሬዛ ኡባ ዎዚና ዴንꬄꬂዴስ። ኣሳይካ ዪዲ ባ ጎዳ ኡባፌ ዎልቃማ ጾሳ ኬꬅ ኬጾ ዶሚዴስ።
HAG 1:15 ሄሲካ ዳሪዮሲ ካዎቲዳ ናምኣንꬆ ላይꬃን ኡሱፑንꬃ ኣጊናይ ጌሊዳ ናምኡ ታማኔ ኦይዳንꬆ ጋላስ ሃኒዴስ።
HAG 2:1 ላፑንꬃ ኣጊናይ ጌሊዳ ናምኡ ታማኔ ኢሲንꬃ ጋላስ ጎዳ ቃላይ ናቤ ሃጌ ባጋራ ሂዝጊሼ ዪዴስ።
HAG 2:2 ጎዳይ ኡባፌ ዎልቃማ ጾሳይ ሃጌስ፥ «ዩሁዳ ኣይሲዛ ሳላቲያሌ ና ዜሩባቤሌስ፥ ቄሴታ ሃላቃ ኢዮሳዶቄ ና ኢያሶሲኔ ዲኦፔ ሼምፖራ ፓጻ ኣቲ ሲሚዳ ኣሳስ፥
HAG 2:3 ‹ኢንቴ ጋርሳን ሃይሳ ኬꬃ ካሴ ኢዚ ቦንቾራ ዲሺን ቤኢዳዴይ ኦኔ? ሃኢ ቃሴ ኢንቴስ ኣይ ሚሳቲ ቤቲዜ? ሃይሲ ኢንቴ ኣቻን ቆዳን ጌሎንታዝ ጊዴኔ?
HAG 2:4 ሃኢ ቃሴ ዜሩባቤሌ ሚና! ቄሴታ ሃላቃ ኢዮሳዶቄ ና ኢያሶ ሚና! ኢንቴኖ ሃ ዴሬ ኣሳቶ ዉሪካ ሚኒቴ! ታ ኢንቴናራ ዲዛ ጊሻስ ኦꬂቴ› ጋ ዮታኔ ኦይቻ።
HAG 2:5 ኢንቴ ጊብጼፔ ኬዚዛ ዎዴ ታ ኢንቴስ፥ ‹ታ ኣያናይ ኢንቴናራ ዲዛ ጊሻስ ባቦፍቴ› ጊዳ ቃላይ ሃይሳ።
HAG 2:6 «ጎዳይ ኡባፌ ዎልቃማ ጾሳይ፥ ‹ማታ ዎዴ ታ ናምኣንꬆ ሳሎኔ ሳኣ፥ ኣባኔ ቢታ ኢሲቶ ቃꬃና።
HAG 2:7 ካዎቴꬃታ ኡባ ታ ቃሴꬃና። ካዎቴꬃታ ኡባ ሃሮይ ሃ ያና ማላ ታ ኦꬃና። ሃይሳ ሃ ኬꬃን ታ ኣንጆ ኩንꬃና።
HAG 2:8 ኩሜꬃ ኣላሜን ዲዛ ቢራይኔ ዎርቃ ኡባይ ታሳ።
HAG 2:9 ሃይሳ ሃ ኬꬃ ቦንቾይ ካሴ ኬꬃ ቦንቾፌ ኣꬋና። ታኒ ሃይሳን ኢንቴስ ኩሜꬃ ሳሮቴꬅ ኢማና› » ጌስ።
HAG 2:10 ዳሪዮሲ ካዎቲዳ ናምኣንꬆ ላይꬃን ኡዱፉንꬆ ኣጊናይ ጌሊዳ ናምኡ ታማኔ ኦይዳንꬆ ጋላስ ጎዳ ቃላይ ናቤ ሃጌ ባጋራ ሂዝጊሼ ዪዴስ።
HAG 2:11 ጎዳይ ኡባፌ ዎልቃማ ጾሳይ፥ «ሙሴ ዎጋይ ኣይ ጊዛኮ ቄሴታ ሃላቃታ ሂዝጋ ኦይቻ።
HAG 2:12 ኢሲ ኣሲ ጾሳስ ያርሼቲዛ ኣሾ ባ ኣፋላ ቃላምኦ ጊዶን ኤኪኮ ሄ ማይኦዛራ ዲዛ ኣሾይ፥ ዎይኮ ኡኬꬂ ዎይኮ ዎጼይ ዎይኮ ዎይኔፔ ኣጌቲዳ ጫጄይ ዎይኮ ዛይቴይ ዎይኮ ሃራ ኣይ ቆሞ ካꬅ ኢዚ ቦቺኮ ሄ ቦሼቲዳይሲ ጌሽ ጊዳንዴ?» ጊዲ ኦይቺን ቄሴቲካ፥ «ጌሽ ጊዴና» ጊዲ ዛሪዳ።
HAG 2:13 ሃጌይ ቃሴካ፥ «ኣሃ ቦቺዲ ቱኒዳ ኣሲ ሄይታፔ ኢሳ ቦቺኮ ሄ ቦሼቲዳ ካꬃይ ቱናንዴ?» ጊ ኦይቺን ቄሴቲካ፥ «ኤ ቱናና» ጊዲ ዛሪዳ።
HAG 2:14 ሄሳፌ ጉዬ ሃጌይ፥ « ‹ሃይሲ ዴሬይኔ ሃይሳ ባጋ ኣሳይካ ሄሳ ማላ፤ ኢስታ ኦሶይኔ ኢስቲ ታስ ሺሺዛ ኢሞታይ ዉሪካ ሄሳ ማላ ታ ሲንꬃን ቱና› ጌስ ጎዳይ።
HAG 2:15 «ጎዳይ፥ ‹ሃቺፌ ዶሚዲ ጾሳ ኬꬃ ጊምቤታ ዶማናፔ ካሴ ኢንቴ ቦላን ጋኪዳይሳ ኣኬኪቴ።
HAG 2:16 ኢንቴ ናምኡ ኮንታሌ ካꬅ ኤካና ጊዲ ካꬃ ዶሬኮ ቢዴታ ሺን ኢሲ ኮንታሌ ጻላ ዴሚዴታ። ኢሲ ጼቱ ሊቲሮ ጊዲዛ ዎይኔ ኡሹ ኤካናስ ጊዲ ዎይኔ ኡሹ ጉምኢዛሶሆ ቢዴታ ሺን ፔጺ ኦይዱ ታሙ ሊቲሮ ጻላ ዴሚዴታ።
HAG 2:17 ታኒ ኢንቴ ኩሼይ ኦꬂዳዝ ዉርሳ ኩቱልኤን፥ ቆሻኒኔ ሻቻን ꬋይሳዲስ፤ ጊዲኮካ ኢንቴ ቃሴ ሃ ታኮ ሲሚቤኬታ።
HAG 2:18 ሃኖ ሃ ኡዱፉንꬃ ኣጊናይፔ ሃች ሃ ናምኡ ታማኔ ኦይዳንꬆ ጋላሳፌ ሃ ሲሚን ጾሳ ኬꬃስ ዮቺ ዬጌቲዳ ጋላስ ጋካናስ ዲዛ ዎዴዛ ዎዚናን ዎꬂቴኔ ዩሺ ቆፒቴ።
HAG 2:19 ሃኢ ዜሬꬃስ ጊዲዛ ካꬅ ጎታራን ꬋይኮ፥ ቃሴካ ዎይኔይኔ ባላሴ ሚꬂ፥ ኦሮማኔይኔ ዎጋራ ሚꬂ ኡባይ ሃች ጋካናስ ኣይፌ ኣይፎንታ ኣጊኮካ፥ ሃቺፌ ዶማዳ ታኒ ኢንቴና ኣንጃና› ጌስ» ጊዴስ።
HAG 2:20 ሄ ኣጊናን ናምኡ ታማኔ ኦይዳንꬆ ጋላስ ጎዳ ቃላይ ቃሴካ ሂዝጊሼ ሃጌኮ ዪዴስ።
HAG 2:21 ጎዳይ ሃጌስ፥ «ዩሁዳ ሃሪዛ ዜሩባቤሌስ፥ ‹ታኒ ሳሎኔ ሳኣ ቃꬃና› ጊዴስ ጋዳ ዮታ።
HAG 2:22 ካዎታ ታ ኢስታ ኣራታፔ ዲጋና፤ ኣላጋ ካዎታስ ዲዛ ዎልቃ ታ ꬋይሳና፤ ፓራ-ጋሬታኔ ኢስታ ቶጋንቻታ ታ ሺራ ዬጋና፤ ፓራቲኔ ፓራ ቶጊዛይቲ ኢሶይ ኢሳራ ባንታ ጊዶን ሃይቄታና።
HAG 2:23 ሄ ጋላስ ታኒ ታ ኣይሌ ሳላቲያሌ ና ዜሩባቤሌ ታ ኔና ኤካና፤ ታ ኔና ታስ ማታሜ ሾጪዛ ቃላባቴ ሂስታና፤ ታ ኔና ዶራዲስ» ጊዴስ።
ZEC 1:1 ዳሪዮሲ ካዎቲዳ ናምኣንꬆ ላይꬃን ኦስፑንꬃ ኣጊናን ጎዳ ቃላይ ኢዶ ና ባራካዬ ና ናቤ ዛካራሳኮ ዪዴስ፤
ZEC 1:2 «ጎዳይ ካሴ ኢንቴ ኣዋታ ቦላ ኬሂ ሃንቄቲዴስ።
ZEC 1:3 ሃኢ ጊዲኮ ኣሳስ፥ ‹ታኮ ሃ ሲሚቴ፤ ታኒካ ኢንቴኮ ሲማና› ጌስ ኡባፌ ዎልቃማ ጎዳይ።
ZEC 1:4 ካሴ ናቤቲ ኢንቴ ኣዋታስ፥ ‹ኢንቴ ኢንቴ ኢታ ኦጌፔኔ ኢንቴ ኦሶፔ ሲሚቴ› ጊዲ ሚንꬂ ዮቲዳ፤ ጊዶ ኣቲን ኢስቲ ቃሴ ሲዪቤቴናኔ ታ ኣዛዞካ ናጊቤቴና፤ ሄሳ ማላ ኢንቴ ኢንቴ ኣዋታ ማላ ሃኖፒቴ።
ZEC 1:5 ካሴ ኢንቴ ኣዋቲ ሃኢ ኣዋን ዲዞ? ናቤቲካ ሜርናስ ዴኣንዴቶ?
ZEC 1:6 ጊዶ ኣቲን ታኒ ታ ናቤታ ባጋራ ዮቲዳ ቃላቲኔ ዎጋቲ ኢንቴ ኣዋታ ቦላ ጋኪቤቴኔ? ‹ኢስቲካ ማሮቴꬃን ጌልꬂሼ ኡባፌ ዎልቃማ ጎዳይ ባ ኮዪዳ ማላ ኑ ኦሶ ማላኔ ኑ ኦጌ ማላ ኑስ ቤሲዛዝ ኑ ቦላ ኦꬂዴስ› » ጊዳ።
ZEC 1:7 ዳሪዮሲ ካዎቲዳ ናምኣንꬆ ላይꬃን ሼባጼ ጌቴቲዛ ታማኔ ኢሲንꬆ ኣጊናን ናምኡ ታማኔ ኦይዳንꬆ ጋላሳን ጎዳ ቃላይ ኢዶ ና ባራካዬ ና ናቤ ዛካራሳኮ ዪዴስ።
ZEC 1:8 ኦማርሳ ዎዴ ኣጁታን ዞኦ ፓራ ቶጊዳ ኢሳዴ ቤኣዲስ፤ ሄ ኢዚካ ሾባ ጊዶን ባርሲኔቴ ሚꬃታ ጋርሳን ኤቂዴስ፤ ቃሴ ኢዛ ጉዬራ ዳማ፥ ዞኦኔ ቦꬃ ፓራቲ ዴቴስ።
ZEC 1:9 ታኒካ፥ «ታ ጎዶ ሃይታንቲ ኣዜ?» ጋዳ ኦይቻዲስ፤ ታናራ ሃሳይዛ ኪታንቻዚ ቃሴ፥ «ሃይታንቲ ኢስቲ ኣዛኮ ታኒ ኔና ቤሳና» ጊዴስ።
ZEC 1:10 ሄ ባርሲኔቴ ሚꬃ ጋርሳን ኤቂዳይሲ፥ «ሃይቲ ቢታ ኡባ ቦላ ሲሜሬቲ ጾሞሳና ማላ ጎዳይ ኪቲዳይታ» ጊዴስ።
ZEC 1:11 ኢስቲካ ባርሲኔቴ ሚꬃ ጋርሳን ኤቂዳ ጎዳ ኪታንቻስ፥ «ኑ ቢታ ኡባ ቦላ ሲሜሬቲ ጾሞሲዶስ፤ ቢታ ኡባይ ዎፑ ጊዲ ዴስ» ጊዳ።
ZEC 1:12 ሄሳፌ ጉዬ ጎዳ ኪታንቻይ፥ «ኡባፌ ዎልቃማ ጎዳዉ! ላፑን ታሙ ላይꬃታን ኔ ኢስታ ቦላ ሃንቄቲዳ ዬሩሳላሜኔ ዩሁዳ ካታማታ ኔ ኣዪዴ ጋካናስ ማርኪ?» ጊዴስ።
ZEC 1:13 ጎዳይካ ታናራ ሃሳይዛ ኪታንቻስ ኡፋይሲዛ ቃላኒኔ ሚንꬄꬂዛ ቃላን ማልꬄ ዛሪዴስ።
ZEC 1:14 ቃሴካ ታናራ ሃሳይዛ ኪታንቻዚ፥ «ሃይሳ ቃላ ዮታ፤ ኡባፌ ዎልቃማ ጎዳይ፥ ‹ታኒ ጺዮኔሲኔ ዬሩሳላሜስ ኬሃ ቃꬌታይስ።
ZEC 1:15 ጊዶ ኣቲን ሳሮቴꬅ ዴሚዲ ዎፓን ዲዛ ካዎቴꬃታ ኬሃ ሃንቄታዲስ፤ ሄሳስ ጋሶይካ ታኒ ታ ዴሬዛ ቦላ ጉꬃራ ሃንቄቲን ካዎቴꬃቲ ታ ቆፋፔ ቦላራ ታ ዴራ ቆሂዳ› ጊዴስ።
ZEC 1:16 «ሄሳ ጊሻስ ኡባፌ ዎልቃማ ጎዳይ፥ ‹ታኒ ታ ማሮቴꬅ ዬሩሳላሜስ ኢማና፤ ሄንካ ታ ኬꬃይ ሲሚ ኦራጺዲ ኬጼታና፤ ዬሩሳላሜ ካታማያካ ዎዶሮን ዋꬌታና› ጌስ።
ZEC 1:17 «ካሌꬂዲካ ኪታንቻዚ፥ ‹ኡባፌ ዎልቃማ ጎዳይ ታ ካታማቲ ኬሂ ዱሬታና፤ ጎዳይ ዬሩሳላሜ ካሴ ማላ ማዳናኔ ባ ካታማ ሂስቲ ዶራና› » ጊ ኣዋጂቴ።
ZEC 1:18 ሄሳፌ ጉዬ ኣጁታን ኦይዱ ካጬታ ቤኣዲስ።
ZEC 1:19 ታናራ ሃሳይዛ ኪታንቻዛ፥ «ሃይቲ ኣዜ?» ጋ ኦይቻዲስ፤ ኢዚካ፥ «ሃይቲ ዩሁዳ ኣሳ፥ ኢስራኤሌ ኣሳኔ ዬሩሳላሜ ኣሳ ላሊዳ ካጬታ» ጊዴስ።
ZEC 1:20 ሄሳፌ ካሌꬂዲ ጎዳይ ናሪቃ ኦይኪዳ ኦይዱ ዎጋጬታ ታና ቤሲዴስ።
ZEC 1:21 ታኒካ፥ «ሃይታንቲ ኣይ ኦꬃና ዪዶ?» ጋ ኦይቻዲስ። ኢዚካ፥ «ሃይቲ ኦኒካ ꬎቁ ጊ ጼሎንታ ማላ ዩሁዳ ቢታ ላሊዳ ካጬታ፤ ሃ ዎጋጬቲ ዪዳይ ኢስታ ዳጋንꬃናሲኔ ዴራ ላላናስ ዩሁዳ ቦላ ባንታ ካጬ ዴንꬂዳ ካዎቴꬃታ ካጬ ሜንꬂ ኦላናሳ» ጊዴስ።
ZEC 2:1 ቃሴካ ታ ኣጁታን ዋꬋ ዎዶሮ ባ ኩሼን ኦይኪዳይሳ ቤኣዲስ።
ZEC 2:2 ታኒካ ኢዛ፥ «ኔ ኣዋ ባይ?» ጋ ኦይቻዲስ። ኢዚ ቃሴ፥ «ዬሩሳላሜ ኣዱሳቴꬃይኔ ኣኮቴꬃይ ኣፑን ዋꬋኮ ዋꬋ ቤያና ባይስ» ጊዴስ።
ZEC 2:3 ሄ ታናራ ሃሳይዛ ኪታንቻይ ቢዴስ። ሃራ ኪታንቻይካ ኢዛራ ጋጋናስ ዪዴስ።
ZEC 2:4 ሂስቲዲ ኢዛስ፥ «ዎጻ ባዳ ሄሳ ናቴꬃ ኣዴዛስ፥ ‹ዬሩሳላሜይ ኢዚን ዲዛ ኣሳ ዳሮቴꬃፌኔ ሜሄ ዳሮቴꬃፌ ዴንዶይሳን ካታማ ዩሾን ጊምቤ ዲርሳ ኮሼና።
ZEC 2:5 ታኒ ታርካ ኢዚስ ታማ ዲርሳ ጊዳና፤ ኢዚ ጊዶን ታኒ ኢዚስ ቦንቾ ጊዳና› ጌስ ጋዳ ዮታ» ጊዴስ።
ZEC 2:6 ጎዳይ ባ ዴራ፥ «ታ ካሴ ኢንቴና ኦይዱ ባጋ ላላዲስ፤ ሃኢ ጊዲኮ ፑዴሃ ባጋፌ ባቃቲ ኬዚቴ፤ ሃ ዪቴ።
ZEC 2:7 ሃኔ ጺዮኔ ሃ ያ፤ ባቢሎኔ ማጫ ናይታራ ዴኢዛሬ ኢስታ ጊዶፌ ባቃታ።
ZEC 2:8 ኡባፌ ዎልቃማ ጎዳይ፡ ባ ቦንቾ ቆንጪሳና ማላ ባ ኣሳ ቦንቂዳይታ ካዎቴꬃኮ ታና ኪቲዴስ፤ ኢንቴና ቦቺዛይ ታስ ኣይፌ ጪሮ ቦቺዛ ማላ።
ZEC 2:9 ሄኮ ታኒ ታ ኩሼ ኢስታ ቦላ ዴንꬃና፤ ኢስታ ኣይሌቲ ኢስታ ቦንቃና፤ ሄሳፌ ጉዬ ኡባፌ ዎልቃማ ጎዳይ ታና ኪቲዳይሳ ኢንቴ ኤራና።
ZEC 2:10 «ሃኔ ጺዮኔ ናዬ ኣኔ ኢሊላ፤ ኡፋዬታ፤ ታኒ ያዳ ኔ ጊዶን ዳና» ጌስ ጎዳይ።
ZEC 2:11 ሄ ጋላስ ዳሮ ካዎቴꬃቲ ጎዳኮ ሺቂዲ ኢዛ ዴሬ ጊዳና፤ ኢዚካ ኔ ጊዶን ዴኣና፤ ኡባፌ ዎልቃማ ጎዳይ ታና ኔኮ ኪቲዳይሳ ኔካ ኤራና።
ZEC 2:12 ጎዳይ ጌሻ ቢታይን ዩሁዳ ባስ ቡዞ ሂስቲ ላታና፤ ዬሩሳላሜካ ዛሪ ዶራና።
ZEC 2:13 ጎዳይ ጌሽ ጊዲዳ ባሶዛፔ ዴንዲዳ ጊሻስ ኣሾ ማይኢዳ ኡባይ ኢዛ ሲንꬃን ጮኡ ጎ።
ZEC 3:1 ሄሳፌ ጉዬ ቄሴታ ሃላቃ ኢያሶይ ጎዳ ኪታንቻ ሲንꬃን ኤቂዳይሳኔ ጻላኤይካ ኢዛ ሞታናስ ኢዛፔ ኡሻቻ ባጋራ ኤቂዳይሳ ታና ኣጁታን ቤሲዴስ።
ZEC 3:2 ጎዳይ ቃሴ ጻላኤ፥ «ሃይሶ ጻላኤ ጎዳይ ኔና ሴሮ፤ ዬሩሳላሜ ዶሪዳ ጎዳይ ኔና ሃንቆ፤ ሃይሲ ኣዴዚ ታማፔ ኣቲዳ ዱርጫ ጊዴኔ?» ጊዴስ።
ZEC 3:3 ኢያሶይካ ቂታ ማይኦ ማይኢዲ ኪታንቻዛ ሲንꬃን ኤቂዴስ።
ZEC 3:4 ኪታንቻዚ ባ ሲንꬃን ኤቂዳይታ፥ «ሄሳ ቂታ ማይኦዛ ኢዛ ቦላፌ ቃሪ ዲጊቴ» ጊዴስ፤ ኢያሶስካ፥ «ሄኮ ታ ኔ ናጋራ ኔፔ ዲጋዲስ፤ ታ ኔና ሎኦ ማይኦ ማይዛና» ጊዴስ።
ZEC 3:5 ቃሴ ታኒካ፥ «ጌሻ ጎሴ ኢዛ ሁኤን ጎዚሲቴ» ጋ ኣዛዛዲስ፤ ጎዳ ኪታንቻይ ኢዛ ኣቻን ኤቂ ዲሺን ጌሻ ጎሴ ኢዛ ሁኤን ጎዚሲዳኔ ማይኦካ ማይዚዳ።
ZEC 3:6 ጎዳ ኪታንቻይካ ኢያሶይ ናጌታና ማላ ኢዛስ ዞሬ ኢሚዴስ።
ZEC 3:7 ኡባፌ ዎልቃማ ጎዳይ፥ «ኔ ታ ኦጌን ቢኮ፥ ኔ ታ ኣዛዞ ናጊኮ ታ ኬꬃ ኔ ኣይሳና፤ ጊቤዛሲካ ኔ ኣዋታና። ቃሴካ ሃይሳን ኤቂዳይታራ ኢሲፌ ኔ ጌላና ማላኔ ኬዛና ማላ ታ ኔስ ማታ ኢማና።
ZEC 3:8 «ሃይሶ ቄሴታ ሃላቃ ኢያሶ ሲያ! ኔ ማታን ኔና ኦꬂ ማዲዛይቲ ቡሮ ሲንꬃፌ ሃናና ሎኦ ማላታ ጊዲዳ ጊሻስ ኢስቲካ ሲዬቶ፤ ሄኮ ታኒ ቡሮ ፑርጪዛ ታ ኣይሌዛ ኤሃና።
ZEC 3:9 ቤያ! ታኒ ኢያሶ ሲንꬃን ላፑን ኣይፌይ ዲዛ ሹች ዎꬃና፤ ታ ሄ ሹቻ ቦላን ጻፌቲዛዝ ዎጫ ዎጫ ጻፋና፤ ሄ ቢታይ ናጋራካ ታ ኢሲ ጋላስ ዲጋና» ጌስ።
ZEC 3:10 ኡባፌ ዎልቃማ ጎዳይ፥ «ሄ ዎዴ ኢሶይ ኢሶይ ባ ዎይኔ ሚꬃ ጋርሳኒኔ ባ ባላሴ ሚꬃ ጋርሳን ባ ላጌ ዲጊሳስ ጼይጋና» ጌስ።
ZEC 4:1 ታና ሃሳይሲዳ ኪታንቻዚ ሲሚ ዪዲ ኢሲ ኢሲ ኣሲ ꬊስኮፌ ቤጊዛ ማላ ታና ቤጎꬂዴስ።
ZEC 4:2 ኢዚካ፥ «ሃይሶ ሄሲ ኔ ቤኢዛይሲ ኣዜ?» ጊዴስ። ታኒካ «ሄኮ ኢዛ ቦላ ዛይቴ ኦቶይ ዲዛ ኩሜꬃራ ዎርቃ ጊዲዳ ጾምፔ ዎꬂዛ ባላ ቤኣዲስ፤ ሄ ባላታ ቦላ ላፑን ቦምባይ ዲዛ ላፑን ጾምፔታ ቤኣዲስ።
ZEC 4:3 ቃሴካ ናምኡ ዎጋራ ሚꬃታ ቤኣዲስ፤ ኢስታፌ ኢሶይ ዛይቴራ ዲዛ ኦቶዛፔ ኡሻቻ ባጋራ ዲዛይሳ ቃሴ ኢሶይ ሃዲርሳ ባጋራ ዲዛይሳ ቤኣዲስ» ጋዲስ።
ZEC 4:4 ታናራ ሃሳይዛ ኪታንቻዛ፥ «ታ ጎዶ! ሃይታንቲ ኣዜ?» ጋ ኦይቻዲስ።
ZEC 4:5 ኢዚካ ታስ፥ «ሃይቲ ኣዛኮ ኔ ኤርኪ?» ጊ ዛሪዴስ። ታኒካ ኢዛስ፥ «ታ ጎዳዉ! ታ ኤሪኬ» ጋዲስ።
ZEC 4:6 ቃሴካ፥ «ጎዳይ ዜሩባቤሌስ ዮቲዳ ቃላይ ሃይሳ፥ ‹ታ ኣያናንፔ ኣቲን ዎልቃኒኔ ሚኖቴꬃን ጊዴና› ጌስ ኡባፌ ዎልቃማ ጎዳይ።
ZEC 4:7 «ሃይሶ ጊታ ዙማዞ ኔ ኣዜ? ኔ ዜሩባቤሌ ሲንꬃን ቲꬊ ጊዳ ዴምባ ጊዳና፤ ቃሴ ዜሩባቤሌይ ጾሳ ኬꬃ ኬጺ ጊጊዲ ቁስቴ ሹቻ ፑዴ ኬሲዛ ዎዴ ኣሳይ፥ ‹ሃሹ ሃሹ ሎኦን ፖሌቲዴስ› ጊ ሳባና» ጌስ።
ZEC 4:8 ቃሴ ጎዳ ቃላይ ታኮ ዪዴስ፤
ZEC 4:9 «ዜሩባቤሌ ኩሼይ ሃይሳ ጎዳ ኬꬃስ ዮቻ ሹች ዎꬂዴስ፤ ኢዛ ኩሼይ ኬጺ ፖላና፤ ሄሳፌ ጉዬ ኡባፌ ዎልቃማ ጎዳይ ታና ኢንቴኮ ኪቲዳይሳ ኢንቴ ኤራና።
ZEC 4:10 «ጉꬃ ሚሻቲ ሃኒዛ ጋላሲ ካꬊዳይ ኦኔ? ኣሳይ ዜሩባቤሌ ኩሼን ቱምቤ ቤኢዲ ኡፋዬታና፤ ሄይቲ ላፑን ጾምፔታ ኢስታ ቦላ ዎꬂዛ ላፑን ባላቲ ኣላሜ ቦላ ዩዪ ጼሊዛ ጎዳ ኣይፌታ።»
ZEC 4:11 ሄሳፌ ጉዬ ታኒ ኪታንቻዛ፥ «ጾምፔዛፔ ኢስታ ቦላ ዎꬂዛ ባላታፔ ኡሻቻ ባጋራኔ ሃዲርሳ ባጋራ ዲዛይቲ ሃይቲ ዎጋራ ሚꬃቲ ኢስቲ ኣዜ?» ጋ ኦይቻዲስ።
ZEC 4:12 ቃሴካ፥ «ናምኡ ዎርቃ ቦምባታ ኣቻን ዎጋራ ዛይቴይ ኢስታፌ ጉኪዛ ናምኡ ቦምባታ ማታን ዲዛ ናምኡ ዎጋራ ሃጋቲ ኣዜ?» ጋ ኦይቻዲስ።
ZEC 4:13 ኢዚካ ታና፥ «ሄይቲ ኣዛኮ ኔ ኤርኪ?» ጊዴስ፤ ታኒካ ኢዛስ፥ «ታ ጎዶ! ታ ኤሪኬ» ጋዲስ።
ZEC 4:14 ኢዚ ቃሴካ፥ «ሃይቲ ናምኣቲ ሜꬌቴꬃ ኡባ ጎዳ ሲንꬃን ኦꬃና ቲዬቲዳ ኣሳታ» ጊዴስ።
ZEC 5:1 ታ ዛራዳ ጼሊሺን ሄን ታ ሲንꬃን ኢሲ ፒራꬊዛ ጻꬃ ማጻፋ ቤኣዲስ።
ZEC 5:2 ኢዚካ ታና፥ «ኣይ ጼላይ?» ጊ ኦይቺዴስ። ታኒካ ኢዛስ፥ «ኣዱሳቴꬃይ ናምኡ ታሙ ዋꬋ፥ ጎምፓይ ታሙ ዋꬋ ጊዲዳ ኢሲ ፒራꬊዛ ጻꬃ ማጻፋ ቤኣዲስ» ጋዲስ።
ZEC 5:3 ኢዚካ ታስ፥ «ሃ ጻꬃ ማጻፋ ጊዶን ቢታ ኡባ ቦላ ያና ቃንጌꬂ ጻፌቲ ኡቲዴስ፤ ሄ ማጻፋን ኢሲ ባጋራ፥ ‹ካይሶ ኡባይ ቢታ ቦላፌ ꬋያና› ጌቴቲ ጻፌቲዴስ፤ ቃሴካ ሃንኮ ባጋራ፥ ‹ዎርዶ ጫቂዛ ኡባይ ꬋያና› ጌቴቲ ጻፌቲዴስ።
ZEC 5:4 ኡባፌ ዎልቃማ ጎዳይ፥ ‹ታኒ ቃንጌꬅ ኤሃና፤ ኢዚካ ካይሶታ ኬꬂኔ ታ ሱንꬃን ዎርዶ ጫቂዛይታ ኬꬅ ጌላና፤ ኢስታስ ሄን ዲዛ ኬꬃ፥ ሚꬃኔ ሹቻ ኡባ ꬋይሳና› ጌስ» ጊዴስ።
ZEC 5:5 ሄሳፌ ካሊዲ ታናራ ሃሳዬቲዛ ኪታንቻይ ታኮ ዪዲ፥ «ሃይሲ ዪዛይ ኣዛኮ ꬎቁ ሂስታ ጼላ» ጊዴስ።
ZEC 5:6 ታኒካ ኢዛ፥ «ሃይሲ ኣዜ?» ጋ ኦይቻዲስ። ኢዚካ «ሃይሲ ማካ ዳቾ» ጊዴስ፤ ቃሴካ ጉጂዲ፥ «ሃይሲ ቢታ ቦላ ዲዛ ኣሳይ ኦꬂዳ ቆሆዛ ቤሲዛ ማላታ» ጊዴስ።
ZEC 5:7 ሄሳፌ ጉዬ ኢርሳሴ ጌቴቲዛ ቢራታፔ ኦሴቲዳ ካማይ ቃሬቲዛ ዎዴ ዳቾዛ ጊዶን ኡቲዳ ኢሲ ማጫሳዮ ቤኣዲስ።
ZEC 5:8 ኪታንቻዚካ ታስ፥ «ሃና ቱና» ጊ ዮቲዲ ኢዞ ጉዬ ዛሪ ዳቾዛ ጊዶ ናቂ ጌልꬂዴስ፤ ሄ ዳቾ ካማዛካ ዛሪ ካሚዴስ።
ZEC 5:9 ሄሳፌ ጉዬ ታኒ ፑዴ ꬎቁ ጋ ጼሊሺን ኢስታስ ቄፌታን ጫርኮይ ዲዛ ናምኡ ማጫሳታ ቤኣዲስ፤ ኢስታስ ቄፌይካ ካፎ ዎሌ ቄፌ ማላ፤ ኢስቲ ሄ ዳቾዛ ዴንꬂ ኤኪዲ ፑዴ ሳሎ ፒራꬊዳ።
ZEC 5:10 ታኒካ ታናራ ሃሳይዛ ኪታንቻዛ፥ «ሃይቲ ዳቻ ኣዋ ኤፊዞ?» ጋ ኦይቻዲስ።
ZEC 5:11 ኢዚካ፥ «ኢዛስ ኬꬅ ኬጻናስ ሳናኦሬ ዴሬ ኤፌቴስ፤ ኬጼቲ ጊጊዛ ዎዴ ዳቾዛ ሄን ዎꬃና» ጊዴስ።
ZEC 6:1 ቃሴካ ሃራ ኣጁታን ኦይዱ ፓራ-ጋሬቲ ናምኡ ጻርቂማላ ዙማታ ጊዶራ ዪዛይታ ቤኣዲስ።
ZEC 6:2 ኮይሮ ጋሬዛ ጎቺዛ ፓራዚ ዞኦ፥ ናምኣንꬆዚ ካሬꬃ፥
ZEC 6:3 ሄꬓንꬆዚ ቦꬃ፥ ኦይዳንꬆዚ ቃሴ ማሳራ ጊዲሺን ፓራቲ ኡባይካ ዎልቃማ።
ZEC 6:4 ታኒካ ታናራ ሃሳይዛ ኪታንቻዛ፥ «ታ ጎዳዉ! ሃይታንቲ ኣዜ?» ጋ ኦይቻዲስ።
ZEC 6:5 ኪታንቻዚካ፥ «ሃይቲ ሳኣ ኡባ ጎዳ ሲንꬃን ኦꬂዛሶፔ ኬዚዳ ሳሎ ኣያና ኦይዳታ።
ZEC 6:6 ካሬꬃ ፓራቲ ጎቺዛ ጋሬይ ፑዴሃ ባጋ፥ ቦꬃ ፓራቲ ጎቺዛ ጋሬይ ኣርሼ ጌሎሶ ባጋ፥ ማሳራ ፓራቲ ጎቺዛ ፓራይ ዱጌሃ ባጋራ ዲዛ ዴሬ ቤቴስ» ጊዴስ።
ZEC 6:7 ሚኖ ፓራቲ ቡሮ ኬዚሼ ቢታ ኡባ ቦላ ሲሜሬታናስ ሌሶቴቴስ፤ ኢዚካ ኢስታ፥ «ኢንቴ ሳኣ ኡባ ጋርስ ቢዲ ጾሞሲቴ» ጊዴስ፤ ኢስቲካ ቢዲ ጾሞሲዳ።
ZEC 6:8 ቃሴካ ኪታንቻዚ ታስ፥ «ፑዴሃ ባጋ ዴሬታ ቢዳ ፓራቲ ታ ኣያና ሼምፒሲዳ» ጊዲ ባ ቃላ ꬎቁ ሂስቲ ዮቲዴስ።
ZEC 6:9 ጎዳ ቃላይ ታኮ ዪዴስ።
ZEC 6:10 ባቢሎኔ ዴሬፔ ዲኦፔ ሲሚዳ ሄልዳዬፔኔ ያዳያፔ ዎርቃኔ ቢራ ኤካዳ ሄ ጋላሲካ ሶፎናሳ ና ኢዮሲያሳ ሶ ባ።
ZEC 6:11 ኢስቲ ኢሚዳ ቢራፔኔ ዎርቃፌ ካላቻ ሜꬋዳ ኢዮሳዶቄ ና ቄሴታ ሃላቃ ኢያሶ ሁኤን ጎጻ።
ZEC 6:12 ኔኒ ኢዛስ፥ «ኡባፌ ዎልቃማ ጎዳይ፥ ‹ኢዛ ሱንꬃይ ሃጋ› ጌቴቲዳይሲ ሃይሳ፤ ኢዚካ ባ ዲዛሶን ዳያና፤ ኢዚ ጎዳ ኬꬅ ዛሪዲ ኬጻና።
ZEC 6:13 ኢዚ ጎዳ ኬꬃ ኬጻና፤ ኢዚ ካዎ ማላ ቦንቾ ማይኣና፤ ባ ካዎቴꬃ ኣራታን ኡቲዲ ሃራና፤ ቃሴካ ኢዚ ባ ኣራታን ኡቲዲ ቄሴቴꬃን ኦꬃና፤ ሄ ናምኣቲካ ሳሮቴꬃኒኔ ሲጋን ኦꬃና» ጌስ ጋ ዮታ።
ZEC 6:14 ሄ ካላቻዚካ ሄሌሜስ፥ ጾቢያስ፥ ያዳያሲኔ ሶፎናሳ ና ሄኔስ ጎዳ ኬꬃ ጊዶን ኢስቲ ሃሳኢሲዛዝ ጊዳና።
ZEC 6:15 ሄይቲ ሃሆን ዲዛይቲ ዪዲ ጎዳ ኬꬃይ ኬጼቲሺን ኢስታ ኦሶን ማዳና፤ ኢንቴካ ታና ኡባፌ ዎልቃማ ጎዳይ ኪቲዳይሳ ኤራና። ጎዳ ኢንቴ ጾሳስ ኢንቴ ዎዚናፔ ኣዛዜቲኮ ሄሲ ዉሪ ኢንቴስ ሃናና።
ZEC 7:1 ዳሪዮሲ ካዎቲዳ ኦይዳንꬆ ላይꬃን ካሴሎ ጌቴቲዛ ኡዱፉንꬃ ኣጊናን ኦይዳንꬆ ጋላስ ጎዳ ቃላይ ዛካራሳኮ ዪዴስ።
ZEC 7:2 ቤቴሌ ኣሳይ ጎዳይ ዎሳናስ ሳርሳሬኔ ኤርጌሜ-ሜሌኬ ኢስታራ ዲዛይታራ ኢሲፌ ኪቲዳ።
ZEC 7:3 ኢስቲካ ኡባፌ ዎልቃማ ጎዳ ኬꬃ ቄሴታኔ ናቤታ፥ «ኑ ካሴ ዳሮ ዎዴ ኦꬂዳይሳ ማላ ኢቻሻንꬃ ኣጊናን ጬጫናሲኔ ጾማናስ ኑስ ቤሲዜ?» ጊዲ ኦይቺዳ።
ZEC 7:4 ቃሴካ ጎዳ ቃላይ ታኮ ዪዴስ፤
ZEC 7:5 «ሃ ዴሬ ኣሳኔ ቄሴታ፥ ‹ካሴ ኣꬊዳ ላፑን ታሙ ላይꬃታን ኢቻሻንꬃ ኣጊናኒኔ ላፑንꬃ ኣጊናን ኢንቴ ጾሚዳ ጾማይኔ ኢንቴ ጬጪዳ ጬጬይ ታ ቦንቾሴ?
ZEC 7:6 ካሴ ኢንቴ ሚዳይሲኔ ኡዪዳይሲ ኢንቴስ ጻላ ጊዴኔ?
ZEC 7:7 ዬሩሳላሜይኔ ኢዚ ኣቻን ዩዪ ኣꬊ ዲዛ ካታማቲ ሳሮቴꬃኒኔ ዱሬቴꬃን ዲዛ ዎዴ ዱጌሃ ባጋ ዙማታ ጋርሳኒኔ ኣርሼይ ጌሊዛ ባጋን ዲዛ ዙማታ ጋርሳን ካሴ ኣሲ ሄን ዲዛ ዎዴ ጎዳይ ባ ናቤታ ባጋራ ዮቲዳ ቃላይ ሃይሳ ጊዴኔ?› ጋ ኦይቻ።»
ZEC 7:8 ጎዳ ቃላይ ቃሴካ ዛካራሳኮ ዪዴስ፤
ZEC 7:9 «ኡባፌ ዎልቃማ ጎዳይ፥ ‹ቱሙ ፒርዳ ፒርዲቴ፤ ኢንቴ ጋርሳን ኢሶይ ኢሳራ ማሬቲቴኔ ኢሶይ ኢሳስ ቃꬌቲቴ።
ZEC 7:10 ኣምኤታ፥ ዪኦታ፥ ቤቴ ኣሳታኔ ማንቆታ ሜቶꬆፍቴ፤ ኢሶይ ኢሳስ ኢንቴ ዎዚናን ኢታ ቆፖፍቴ› ጌስ።
ZEC 7:11 «ኢስቲ ቃሴ ሲያና ኮዪቤቴና፤ ዞኮ ዛሪዲ ባ ሃይꬅ ቱጪዳ።
ZEC 7:12 ባ ዎዚና ዛላ ሹቻ ማላ ሚንꬂዳ፤ ኡባፌ ዎልቃማ ጎዳይ ካሴ ናቤታ ባጋራ ባ ኣያናን ኪቲዳ ቃላ ዎይኮ ዎጋ ሲዮንታ ኢጺዳ፤ ሄሳ ጊሻስ ኡባፌ ዎልቃማ ጎዳይ ኢስታ ቦላ ኬሂ ሃንቄቲዴስ።
ZEC 7:13 ‹ታ ኢስታ ጼይጊሺን ኢስታ ሲዪቤቴና፤ ሄሳ ጊሻስ ኢስቲ ታና ጼይጊሺን ታኒካ ሲዪኬ› ጌስ ኡባፌ ዎልቃማ ጎዳይ።
ZEC 7:14 ኢስቲ ኤሮንታ ኣላጋ ዴሬ ጊዶ ጎቴ ጫርኮን ኢስታ ላላዲስ፤ ኢስታፌ ጉዬራ ሃራይ ኦኒካ ሄ ቦንታ ማላኔ ሃ ዮንታ ማላ ቢታያ ኣሲ ባይንዳ ቡላ ቢታ ጊዳዱስ፤ ኢስቲ ሎኦ ቢታዮ ቡላ ኦꬂዳይ ሄሳ ማላና።»
ZEC 8:1 ቃሴካ ኡባፌ ዎልቃማ ጎዳይ ታኮ ዪዴስ፤
ZEC 8:2 ኡባፌ ዎልቃማ ጎዳይ፥ «ታ ጺዮኒስ ዳሮ ሚሼታይስ፤ ኢዚ ሚሻይ ታና ጹጌስ» ጌስ።
ZEC 8:3 ጎዳይ፥ «ታ ጌዴ ጺዮኒኮ ሲማና፤ ዬሩሳላሜንካ ዴኣና። ዬሩሳላሜይካ ቱሙ ካታማ ጌቴታዉስ፤ ኢዛካ ኡባፌ ዎልቃማ ጎዳስ ጌሻ ዙማ ጌቴታና» ጌስ።
ZEC 8:4 ኡባፌ ዎልቃማ ጎዳይ፥ «ኣዴ ጪማቲኔ ማጫ ጪማቲ ካሴ ማላ ዬሩሳላሜ ዱቡሻን ኡታና፤ ኢስታፌ ኢሶይ ኢሶይ ጪማቴꬃ ጋሶን ጉፌ ኦይኪዲ ሄሜታና።
ZEC 8:5 ካታማይን ዲዛ ኦጌታን ካኢዛ ማጫ ናይቲኔ ኣቱማ ናይቲ ኩማና» ጌስ።
ZEC 8:6 ኡባፌ ዎልቃማ ጎዳይ፥ «ሃይሲ ካሴ ዲኤቶንታ ኣቲዳ ኢስራኤሌ ናይታስ ማላሊሲዛዝ ሚሳታና ሺን ታና ኡባፌ ዎልቃማ ጎዳ ማላሊሳናስ ዳንዳይዜ?» ጌስ።
ZEC 8:7 ኡባፌ ዎልቃማ ጎዳይ፥ «ታኒ ታ ዴሬታ ኣርሼይ ሞኪዛ ባጋ ዴሬታፔኔ ዉሊዛ ባጋ ዴሬታፔ ኣሻና።
ZEC 8:8 ኢስቲ ዬሩሳላሜን ዴኣና ማላ ታ ኢስታ ዛራ ሃ ኤሃና፤ ኢስቲካ ታ ዴሬታ ጊዳና፤ ታኒካ ጺሎቴꬃኒኔ ኣማኔቴꬃን ኢስታ ጾሳ ጊዳና» ጌስ።
ZEC 8:9 ኡባፌ ዎልቃማ ጎዳይ፥ «ኡባፌ ዎልቃማ ጎዳ ኬꬃስ ዮቺ ዬጌቲሺን ሄን ዲዛ ናቤቲ ዮቲዳ ቃላ ሃኢ ሲዪዛይቲ ኡባይ ኡባፌ ዎልቃማ ጎዳ ኬꬅ ኬጻናስ ኢንቴ ኩሼ ሚንꬂቴ።
ZEC 8:10 ሃይሳፌ ካሴ ኣሳስ ዳሞዛይ ኢሜቲ ኤሬና፤ ሜሄስካ ኪራይ ኢሜቲ ኤሬና። ሞርኬይ ዲዛ ጊሻስ ኦኒካ ባ ኦሶ ዎጋራ ኦꬂ ኤሬና፤ ካሴ ታኒ ኣሳይ ላጌይ ላጌ ቦላ ዴንዳና ማላ ኦꬂዳ ጊሻስ ሄሲ ሃኒዴስ።
ZEC 8:11 ሃኢ ቃሴ ታ ካሴ ኦꬂዳ ማላ ሃይሳ ሃን ኣቲዳ ዴሬዛ ቦላ ኦꬂኬ» ጊ ኣዋጄስ።
ZEC 8:12 ዜሬꬃይ ሎኦ ሞካና፤ ዎይኔ ሚꬃይ ኣይፋና፤ ቢታይካ ካꬅ ኢማና፤ ሳሎይካ ኢራ ኢማና፤ ሄይታ ዉርሳካ ሃን ሃይሳን ኣቲዛ ዴሬዛስ ጺንጾ ሂስቲ ኢማና።
ZEC 8:13 ዩሁዳ ዴሬኔ ኢስራኤሌ ዴሬ ኣሳቶ! ኢንቴ ካሴ ካዎቴꬃታ ጊዶን ቃንጌቲዳ ዴሬ ማላ ቆዴቲዴታ፤ ሃኢ ጊዲኮ ታ ኢንቴና ኣሻና፤ ኢንቴካ ኣንጆስ ጊዳና፤ ሄሳ ጊሻስ ባቦፍቴ፤ ሚኒቴ።
ZEC 8:14 ኡባፌ ዎልቃማ ጎዳይ፥ «ካሴ ኢንቴ ኣዋቲ ታና ሃንቄꬂዳ ጊሻስ ታኒካ ሚሻይ ባይንዳ ኢንቴና ቃጻያና ቃቻዲስ» ጌስ።
ZEC 8:15 «ሃኢ ቃሴ ዬሩሳላሜሲኔ ዩሁዳ ዴራስ ሎኦ ኦꬃናስ ታ ቃቺዳ ጊሻስ ባቦፍቴ።
ZEC 8:16 ኢንቴ ኦꬃናስ ቤሲዛ ሚሻቲ ሃይታንታ፤ ኢንቴ ኢንቴ ጋርሳን ኢሶይ ኢሳራ ቱሙ ሃሳዬቲቴ፤ ኢንቴ ዱቡሻንካ ቱማኔ ሱሬ ፒርዳ ፒርዲቴ።
ZEC 8:17 ኢሶይ ኢሳ ቆሃናስ ጌኔ ቆፖፍቴ፤ ዎርዶ ማርካቶፍቴ፤ ታ ሃይታንታ ኡባ ኢጻይስ» ጌስ ጎዳይ።
ZEC 8:18 ቃሴካ ኡባፌ ዎልቃማ ጎዳ ቃላይ ታኮ ዪዴስ፤
ZEC 8:19 «ኦይዳንꬆ ኣጊናን፥ ኢቻሻንꬆ ኣጊናን፥ ላፑንꬃ ኣጊናኒኔ ታማንꬃ ኣጊናን ኢንቴ ጾሚዛ ጾማይ ዩሁዳ ዴራስ ኡፋይሳ ጋላሲኔ ባኣሌ ጋላስ ጊዳና፤ ሄሳ ጊሻስ ኢንቴ ቱማቴꬂኔ ሳሮቴꬅ ኮዪቴ።»
ZEC 8:20 ኡባፌ ዎልቃማ ጎዳይ፥ «ዳሮ ካታማታን ዲዛ ዴሬይ ዬሩሳላሜ ጎጋና ዎዴይ ያና።
ZEC 8:21 ኢሲ ካታማይን ዲዛ ኣሳይካ፥ ‹ጎዳ ኣንጆ ዎሳናሲኔ ኡባፌ ዎልቃማ ጎዳ ኮያናስ ኣኔ ሃ ዪቴ፤ ኣኔ ኤሶን ቦስ፤ ኑኒካ ቦስ› ጊሼ ሃራ ካታማ ባና።
ZEC 8:22 ዳሮ ዴሬይኔ ዎልቃማ ካዎቲካ ኡባፌ ዎልቃማ ጎዳ ኮያናሲኔ ኢዛ ዎሳናስ ዬሩሳላሜ ያና።
ZEC 8:23 «ሄ ጋላሳታን ዱማ ዱማ ዴሬፔ ዱማ ዱማ ቃላን ሃሳይዛ ታሙ ኣሳቲ ኢሲ ኣይሁዳ ኣሳ ማይኦ ማጫራ ኦይኪዲ፥ ‹ኢንቴናራ ጾሲ ዲዛይሳ ኑ ሲዪዳ ጊሻስ ኑ ኢንቴናራ ኢሲፌ ባና› ጋና» ጊዴስ።
ZEC 9:1 ኢስራኤሌ ኣሳ ኡባ ኣይፌይ ፑዴ ጎዳኮ ጼሌስ፤ ሄሳ ጊሻስ ጎዳይ ካሴ ዮቲ ዎꬂዳ ማላ ሴዲሬኬ ቦላኔ ዳማስቆ ቦላ ፒርዳና።
ZEC 9:2 ሃ ፒርዳዚካ ዳማስቆ ዛዋን ዲዛ ሃማቴ ቦላ፥ ኣꬎ ኤራቴꬂ ዲዛ ጺሮሴ ካታማታ ቦላኔ ሲዶና ካታማታ ቦላ ጋካና።
ZEC 9:3 ጺሮሴ ካታማያ ባስ ሚኖ ሚጻ ጊጊሳዱስ፤ ቢራ ቢታ ማላ፥ ዎርቃካ ጉዱላ ማላ ሺሻ ጉፓዱስ።
ZEC 9:4 ጊዶ ኣቲን ጎዳይ ኢዛ ጉፒዳይሳ ዎꬂ ኤካና፤ ኢዚስ ኣባ ጊዶን ዲዛ ዎልቃ ኡባ ꬋይሳና፤ ኢዛካ ታማን ጹጌታ ꬋያና።
ZEC 9:5 ኣስቄሎናይ ሄሳ ቤኢዲ ያያና፤ ጋዛይ ሜቶን ኡንኤታና፤ ሄሳꬆካ ኣቃሮኔይ ሂዶታካ ቃንጻና፤ ጋዛይ ቃሴ ካዎይ ባይንዳሮ ጊዳና፤ ኣስቄሎናይ ቡላ ጊዳና።
ZEC 9:6 ዋላካ ዴሬይ ኣዛጾኔ ኦይካና፤ ጬቄቲዛ ፊሊስጼሜ ኣሳ ታ ꬋይሳና።
ZEC 9:7 ታኒ ኢስታ ዶናፔ ሱꬅ፥ ኢስታ ጋጮፔ ሞንታ ማላ ዲጌቲዳ ካꬅ ዲጋና፤ ሃንኮ ኣቲዳይቲ ታ ዴሬ ጊዳና፤ ዩሁዳ ቢታን ሃላቃታና፤ ኣቃሮኔ ኣሳይካ ያቡሴ ኣሳ ማላ ጊዳና።
ZEC 9:8 ታኒ ጊዲኮ ታ ኬꬃ ቦንቂዛ ዎልቃማታፔ ናጋና፤ ሃይሳፌ ጉዬ ኡንኤꬂዛይ ታ ዴራ ላቴና። ታኒ ሃኢ ሚና ናጋይስ።
ZEC 9:9 ሃኔ ጺዮኔ ናዬ ኬሃ ኡፋዬታ። ሃኔ ዬሩሳላሜ ናዬ ኡፋይሳን ኢሊላ፤ ጺሎኔ ኣሺዛ ኔ ካዎይ ኣሽኬ ጊዲዲ ሃሬዮኔ ሃሬይ ጉቴ ቶጊዲ ኔኮ ዬስ።
ZEC 9:10 ፓራ-ጋሬታ ኤፍሬሜፔ ኦላ ፓራታ ዬሩሳላሜፔ ታ ኤካ ꬋይሳና። ታኒ ኦላ ቶራታ ሜንꬄሬꬃና። ሳሮቴꬅ ካዎቴꬃታስ ኣዋጃና። ኢዚ ኣባፌ ኣባን ጋካናስ ሃራና፤ ኤፊራጺሴ ሻፋፔ ሳኣ ጋጻ ጋካናስ ኢዚ ኣይሳና።
ZEC 9:11 ታ ኔናራ ሱꬃን ጫቄቲዳ ጫቆዛ ጊሻስ ሃꬂ ባይንዳ ኦላን ቃሼቲዳ ኣሳታ ታ ቢርሻዳ ዬዳና።
ZEC 9:12 ኢንቴኖ ሂዶታይ ዲዛ ቃሾ ኣሳቶ! ኢንቴ ካሴ ዲዛ ሚጻን ሲሚቴ፤ ካሴ ኢንቴስ ዲዛ ኣቆታ ዳኮ ሂስታ ታ ኢንቴስ ዛራና።
ZEC 9:13 ዩሁዳ ዎንዳፌ ማላ ኤፍሬሜካ ዪሻ ማላ ታ ጎኤታና፤ ሃኔ ጺዮኔ ታኒ ኔ ናይታ ጊሪኬ ዴሬ ቦላ ዴንꬄꬃና፤ ኔናካ ታኒ ዎልቃማ ማሻ ማላ ሂስታ ጎኤታና።
ZEC 9:14 ጎዳይ ኢስታ ቦላ ቆንጫና፤ ኢዛ ዪሻይ ዎልቃንꬃ ማላ ፖፖልኡ ጋና፤ ኡባፌ ዎልቃማ ጎዳይ ጹሩምባ ፑናና። ዱጌሃፔ ኬዚዛ ጎቴ ጫርኮ ማላ ኢዚ ባና።
ZEC 9:15 ኡባፌ ዎልቃማ ጎዳይ ኢስታስ ጎንዳሌ ጊዳና፤ ኢስቲ ባ ሞርኬታ ኡባ ꬋይሳና፤ ኢስቲ ያንባርሻን ኦሊዛይታ ዬꬋና፤ ኢስቲ ዎይኔ ኡሹ ኡዪዳ ኣሳ ማላ ዋሳና፤ ያርሾ ሱꬂ ኬሬ ኩሚ ያርሾሶሆ ቦላ ጉኪዛ ማላ ኢስታ ሞርኬታ ሱꬂካ ጉካና።
ZEC 9:16 ሄ ዎዴ ጎዳይ ኢስታ ጾሳይ ባ ዴራ ባስ ዉዴ ሜሄ ሂስቲ ኣሻና፤ ካላቻ ቦላ ዲዛ ሴሎይ ጾልቂዛ ማላ ኢስቲካ ጾሳ ዴሬን ጶላና።
ZEC 9:17 ኢስቲ ኣይ ማላ ሎኦኔ ፑላ ኣስ ጊዳኔሻ! ካꬂ ናቴꬃታ ዎይኔ ኡሺ ጌላኦታ ኣንቃርሳና።
ZEC 10:1 ጎዳይ ኢንቴስ ኣሱራ ኢራ ኢማና ማላ ዎሲቴ። ኢራ ሻራ ኪቲዛይ ጎዳ፤ ኢዚ ኡባ ኣሳስ ጊዲዛ ኢራ ኢሜስ፤ ኢሳስ ኢሳስ ቶካናስ ዶዛ ኢሜስ።
ZEC 10:2 ኤቃ ጾሳቲ ባሌꬆ ዮኦ ዮቴቴስ፤ ማሮቲ ዎርዶ ኣጁታ ቤዬቴስ፤ ካዪዛይቲ ዎርዶ ኣጉሞ ኣጉሜቴቴስ፤ ኣሳካ ጮ ሃዳ ዮኦን ሚንꬄꬄቴስ፤ ሄሳ ጊሻስ ዴሬይ ሄሚዛዴይ ባይንዳ ዶርሳ ማላ ጮ ሜላ ቶይላቲሼ ቆሄቲዴስ።
ZEC 10:3 ጎዳይ፥ «ታ ሃንቆይ ሄንꬃንቻታ ቦላ ታማ ማላ ኤጺ ኬዚዴስ። ዴራ ካሌꬂዛይታ ታ ቃጻያና። ታኒ ኡባፌ ዎልቃማ ጎዳይ ባ ዉዴ ጊዲዳ ዩሁዳ ኣሳ ኦላስ ጊጊዳ ፓራ ማላ ኦꬃና።
ZEC 10:4 ዩሁዳፔ ጉላን ዎꬂዛ ሹቺ፥ ዱንካኔ ቶሊዛ ꬊሽኬይ፥ ኦላ ቶራይኔ ዴሬ ኡባ ሃሪዛይ ኬዛና።
ZEC 10:5 ኢስቲ ኡባይካ ኢሲ ቦላ ኦጌን ዲዛ ኡርቃ ዬꬊዛ ሚኖ ኦላንቻታ ማላ ጊዳና፤ ጎዳይ ኢስታራ ዲዛ ጊሻስ ፓራን ኦሌቲዛይታ ኢስቲ ጾናና።
ZEC 10:6 «ታኒ ዩሁዳ ኬꬅ ሚንꬃና፤ ታ ኢስታስ ቃꬌቲዛ ጊሻስ ኢስቲ ካሴ ዲዛሶታ ኢስታ ዛራና፤ ታኒ ጎዳ ኢስታ ጾሳ ጊዲዳ ጊሻስ ታ ኢስታ ዎሳ ሲያና፤ ኢስቲካ ሃይሳፌ ካሴ ታ ዬጋ ኤሮንታ ኣሳ ማላ ጊዳና።
ZEC 10:7 ኤፍሬሜ ኣሳይ ዎልቃማ ኣሳ ማላ ጊዳና፤ ኢስታ ዎዚናይ ዎይኔ ኡሹ ኡዪዳ ኣሳ ማላ ኡፋዬታና፤ ኢስታ ናይቲ ኢስታ ቤያናኔ ኡፋዬታና፤ ኢስቲካ ጎዳን ኡፋዬታና።
ZEC 10:8 ታኒ ኢስታ ዋይቄꬃን ጼይጋዳ ኢሲ ቦላ ሺሻና፤ ቱማፔ ታ ኢስታ ዎዛና፤ ካሴ ማላ ታ ኢስታ ዳርሳና።
ZEC 10:9 ታኒ ኢስታ ዴሬታ ጊዶን ላሊኮካ ኢስቲ ሄን ሃሆ ዴሬን ዲሼ ታና ቆፓና፤ ኢስታኔ ኢስታ ናይቲ ሼምፖራ ፓጻ ኣቲዲ ጉዬ ሲማና።
ZEC 10:10 ታኒ ኢስታ ጊብጼፔ ኬሳና፤ ኣሶሬፔካ ሺሻና፤ ኢስታስ ኡቲዛሶይ ኡንኣናሼ ጋካናስ ታኒ ኢስታ ጋላኣዴኒኔ ሊባኖሴን ሺሻና።
ZEC 10:11 ኢስቲ ኣባ ጊዶራ ዋዬቲ ኣꬋና፤ ኣባ ዳምባላይ ጮኡ ጋና፤ ጪማ ኣባይካ ዉሪ ሚጫና፤ ኦቶራንቻ ኣሶሬ ዴሬ ኣሳይ ካዉያና፤ ጊብጼ ካዎቴꬃ ጻምኣይ ሜቃና።
ZEC 10:12 ታኒ ኢስታ ጎዳን ሚንꬃና፤ ኢስቲካ ኢዛ ሱንꬃን ሲሜሬታና» ጌስ።
ZEC 11:1 ሊባኖሴ ኔናን ዲዛ ዚጋ ሚꬃ ታማይ ማና ማላ ኔ ፔንጌታ ዶያ።
ZEC 11:2 ጺዳቶ! ዚጋ ሚꬃይ ኩንዲዳ ጊሻስ ዬኪቴ፤ ቦንቼቲዳ ሚꬃቲ ꬋይዳ፤ ባሳኔ ዎላቲ «ዉ! ዉይ» ጊ ዋሲቴ፤ ꬊፒ ጊዳ ዎራይ ቄጼቲዴስ።
ZEC 11:3 ሄንꬃ ናይታ ዋሶ ሲዪቴ፤ ኢስታ ቦንቾይ ቃሬቲዴስ፤ ዮርዳኖሴ ሻፋ ዶናን ዲዛ ꬊፒ ጊዳ ዎራይ ዉሪዳ ጊሻስ ጋሞታ ጻጎ ሲዪቴ።
ZEC 11:4 ጎዳ ታ ጾሳይ ኔና፥ «ሹኬታናስ ዶሬቲዳ ዶርሳታ ꬊካ።
ZEC 11:5 ኢስታ ሻሚ ሹኪዳይቲ ቃጻዬቴቴና፤ ኢስታ ባይዚዳይቲ፥ ‹ጎዳይ ጋላቴቶ፤ ኑ ዱሬቲዶስ› ጌቴስ። ኢስታ ሄሚዛይቲካ ኢስታስ ቃꬌቴቴና።
ZEC 11:6 «ሃይሳፌ ጉዬ ሃ ቢታይ ቦላ ዲዛ ኣሳስ ታ ቃꬌቲኬ፤ ታኒ ታ ባጋራ ኢሳ ኢሳ ኢዛ ላጌሲኔ ኢዛ ካዎስ ኣꬃ ኢማና፤ ኢስቲካ ቢታ ኡንኤꬃና፤ ታኒካ ኢስታ ኢስታ ኩሼፔ ኣሺኬ» ጌስ።
ZEC 11:7 ሄሳ ጊሻስ ታኒ ባይዚዛይታሲኔ ሻሚዛይታስ ቃጻሬታ ሹኬታናስ ዶሬቲዳ ዶርሳታ ሄሚዛዴ ጊዳዲስ፤ ዶርሳታካ ሄማሼ ናምኡ ጉፌታ ኤካዳ ኢሳ፥ «ኪያቴꬅ» ናምኣንꬆዛ፥ «ኢሲፌቴꬅ» ጋ ሱንꬃዲስ።
ZEC 11:8 ኢሲ ኣጊና ጊዶን ሜሄ ሄሚዛ ሄꬓታ ዲጋዲስ፤ ኢስቲካ ታና ኢጺዳ ጊሻስ ታኒካ ኢስታ ሳሌታዲስ።
ZEC 11:9 ታኒ ኢስታስ፥ «ሃይሳፌ ጉዬ ታኒ ኢንቴና ሄሚኬ፤ ሃይቃናይቲ ሃይቄቶ፤ ꬋያናይቲካ ꬋዬቶ፤ ኣቲዳይቲካ ኢሶይ ኢሳ ኣሾ ሞ» ጋዲስ።
ZEC 11:10 ቃሴካ ዴሬ ኡባራ ታ ጫቄቲዳ ቃላ ላላናስ፥ «ኪያቴꬅ» ጋዳ ሱንꬂዳ ታ ጉፌዛ ሜንꬃዲስ።
ZEC 11:11 ሄ ጋላስ ካሴ ጫቆዚ ላሌቲዴስ፤ ኡንኤቲ ኡቲዲ ታና ጼሊዛ ዶርሳቲ ሄሲ ጎዳ ቃላ ጊዲዳይሳ ኤሪዳ።
ZEC 11:12 ታኒካ ኢስታስ፥ «ኢንቴስ ሎኦ ሚሳቲኮ ታ ዋጋ ታስ ቃንጺቴ፤ ኣካይ ጊኮ ኣጋጊቴ» ጋዲስ፤ ሄሳ ጊሻስ ኢስቲ ታስ ሄꬑ ታሙ ሳቂሌ ቢራ ቃንጺዳ።
ZEC 11:13 ጎዳይካ ኢስቲ ታስ ኢማና ጊጊዳ ካꬌቲዳ ቢራ ኤካዳ፥ «ሚንጃ ኬꬃን ዎꬃ!» ጊዴስ። ታኒካ ሄ ሄꬑ ታሙ ሳቂሌ ቢራ ኤካዳ ጎዳ ኬꬃ ጊዶን ሚንጃሶን ዎꬃዲስ።
ZEC 11:14 ሄሳፌ ቃሴ ኢስራኤሌኔ ዩሁዳ ኢሻቴꬅ ላላዳ፥ «ኢሲፌቴꬅ» ጋዳ ታ ሱንꬂዳ ናምኣንꬆ ጉፌዛካ ሜንꬃዲስ።
ZEC 11:15 ቃሴካ ጎዳይ ታና፥ «ኣዛላ ሄንꬃንቻቲ ኦይኪዛ ሚሽ ኢስታፌ ዎꬃ ኤካ።
ZEC 11:16 ሄኮ ታኒ ቢታ ቦላ ኦራꬃ ሄንꬃንቻ ዴንꬃና፤ ሄ ሄንꬃንቻይ ካሴ ꬋይዳይሳ ዛሪ ቆፔና፤ ላሌቲዳይሳካ ኮዬና፤ ሜቂዳይሳካ ኮሌና፤ ፓጺዳይሳካ ꬊኬና፤ ጊዶ ኣቲን ሞꬊዳይሳ ኣሾ ማና፤ ቂንጪፊሌካ ኣሾንታ ዲፒ ሂስታና።
ZEC 11:17 ዉዴዛ ዬጊ ኣጊዛ ጎኣይ ባይንዳ ሄንꬃንቻስ ኣዬ ኣና! «ኢዛ ኡሻቻ ኣይፌኔ ኢዛ ቄሴ ማሻይ ጫዶ፤ ኢዛ ቄሴይ ሲሎ፤ ኢዛ ኡሻቻ ኣይፌይካ ቂልች ጊ ቆቆ» ጊዴስ።
ZEC 12:1 ሳሎ ሚጪዳ ጎዳይ፥ ሳኣ ሜꬊዳ ጎዳይ ኣሳ ናይታስ ዴኦ ሼምፖ ኢሚዳ ጎዳይ ኢስራኤሌ ናይታስ ዮቲዳ ቃላይ ሃይሳፌ ካሊዛይሳ፤
ZEC 12:2 «ታኒ ዬሩሳላሜ ኢዞ ዩዪ ኣꬊ ዲዛ ዴሬታስ ማꬆሲዛ ዎይኔ ኡሹ ኢዛን ቲጊዛ ቢሪሌ ማላ ኦꬃና፤ ዬሩሳላሜ ዶዳና ማላ ዩሁዳ ካታማዮካ ዶዳና።
ZEC 12:3 ቢታ ቦላ ዲዛ ዴሬይ ኢዚ ቦላ ዴንዲዛ ጋላስ ታኒ ዬሩሳላሜ ዴሬ ኡባስ ሱጊን ቃጾንታ ዛላ ኬሳና፤ ኢዞ ቃꬃና ፓጪ ጼሊዛይ ባስ ቆሄታና።
ZEC 12:4 ሄ ጋላስ ታኒ ቶጋ ፓራታ ዳጋማን፥ ፓራታ ቶጊዳ ኣሳ ጎሻና፤ ኢስታ ሞርኬታ ፓራታ ቆቂሳና፤ ጊዶ ኣቲን ዩሁዳ ኣሳ ታኒ ታ ኪያ ኣይፌን ናጋና።
ZEC 12:5 ዩሁዳ ኣሳ ካሌꬂዛይቲ ባንታ ዎዚናን፥ ‹ኡባፌ ዎልቃማ ጎዳይ ኢስታ ጾሲ ጊዲዳ ጊሻስ ዬሩሳላሜን ዲዛ ኣሳይ ሚኖ› ጋና።
ZEC 12:6 «ታ ሄ ጋላስ ዩሁዳ ካሌꬂዛይታ ዶሬ ሚꬃ ጊዶን ዲዛ ታማ ጮጬ ኬሳና፤ ካꬃ ሚርቄ ጊዶን ዲዛ ጾምፔ ላጮ ኬሳና፤ ኢስቲ ባፔ ሃዲርሳራኔ ኡሻቻራ ዩዪ ኣꬊ ዲዛ ዴሬታ ጹጋና፤ ዬሩሳላሜይ ጊዲኮ ባ ዲዛሶፔ ሙሌካ ቃጹኩ።
ZEC 12:7 «ዳዊቴሶ ኣሳኔ ዬሩሳላሜን ዲዛይታ ቦንቾይ ዩሁዳ ቦንቾፌ ኣꬎንታ ማላ ታኒ ጎዳይ ካሴታዳ ዩሁዳ ኣሳስ ጾኖ ኢማና።
ZEC 12:8 ሄ ጋላስ ኢስታ ጊዶን ዳሮ ላፋ ጊዲዳይ ዳዊቴ ማላ ሚኖ ጊዳና፤ ዳዊቴሶ ኣሳይ ቃሴ ኢስታፌ ሲንꬄ ሲንꬄ ቢዛ ጾሳ ማላኔ ጎዳ ኪታንቻ ማላ ጊዳና፤ ዬሩሳላሜን ዲዛይታስ ጎዳይ ጎንዳሌ ጊዳና።
ZEC 12:9 ሄ ጋላስ ዬሩሳላሜ ኦላና ዴንዲዛ ካዎቴꬃታ ኡባ ꬋይሳናስ ታ ዴንዳና።
ZEC 12:10 «ሄ ዎዴ ዳዊቴ ኬꬃ ኣሳ ቦላኔ ዬሩሳላሜን ዲዛ ኣሳ ቦላ ኪያቴꬃ ኣያናኔ ዎሳ ኣያና ታ ጉሳና፤ ታና ጫዲዳይቲ ታኮ ጼላና፤ ኢስቲካ ኣሲ ባስ ዲዛ ኢሲ ናይ ሃይቂን ዬኪዛ ኣሳ ማላ ኢዛስ ዬካና፤ ባይራ ናስ ኣሲ ዬኪዛ ማላ ጫሞ ዬሆ ዬካና።
ZEC 12:11 ሄ ዎዴ ማጊዶ ጌቴቲዛ ሃዳዴይ ኤርሞናስ ዬኮይሳꬆ ዬሩሳላሜንካ ሄሳ ማላ ጊታ ዬሆ ጊዳና።
ZEC 12:12 ቢታ ቦላ ዲዛ ቆሞይ ኡባይ ባስ ባስ ዬካና፤ ኢስታ ማቼቲካ ባስ ባስ ዬካና፤ ሄሳ ማላን ዳዊቴ ባጋፌ ኣቱማሳይ ባ ማቼታራ፥ ናታኔሶ ኣሳይ ባንታ ማቼታራ ዬካና።
ZEC 12:13 ሌዌ ባጋቲ ባንታ ማቼታራ፥ ሺምኤ ባጋቲ ባንታ ማቼታራ፥
ZEC 12:14 ሃንኮ ኣቲዳ ቆሞታፔ ኣቱማሳይ ኡባይ ባንታ ማቼታራ ዬካና» ጌስ።
ZEC 13:1 ኡባፌ ዎልቃማ ጎዳይ፥ «ሄ ጋላስ ዳዊቴ ኬꬃ ኣሳኔ ዬሩሳላሜን ዲዛ ኣሳ ናጋራፔኔ ቱናቴꬃፌ ጌሻናስ ፑልቶይ ፑልታና።
ZEC 13:2 «ታኒ ሄ ዎዴ ቢታፌ ኤቃ ጾሳታ ሱንꬅ ꬋይሳና፤ ሄሳፌ ናምኣንꬆ ኢስቲ ቆፌቴቴና፤ ኢስታ ናቤታኔ ቱና ኣያናታ ቢታይ ቦላፌ ታ ዲጋና።
ZEC 13:3 ኦኒካ ታኒ ናቤ ጊኮ ኢዛዴ ዬሊዳ ኣዋይኔ ኣዬያ ኢዛ ኔ ጎዳ ሱንꬃን ዎርዶ ሃሳይዳ ጊሻስ ኔስ ሃይቆይ ቤሴስ ጌቶ፤ ኢዚ ቲንቢቴ ሃሳይሺን ኢዛ ዬሊዳይቲ ኢዛ ጫዴቶ።
ZEC 13:4 ሄ ዎዴ ዎርዶ ሃሳይዳዴይ ኦኒካ ባ ሃሳይዳ ዎርዶ ቲንቢቴን ዬላታና፤ ባሌꬃናስ ኢስኬራ ዲዛ ናቤታ ማይኦ ማይኤና።
ZEC 13:5 ኢዚካ፥ ‹ታ ጎሻ ኣሳ ኣቲን ናቤ ጊዲኬ፤ ታ ናቴቴꬃፌ ዶማዳ ሃኖ ጋካናስ ጎሻንቻ› ጋና።
ZEC 13:6 ኢሲ ኣሲ፥ ‹ሄሲ ኔ ቦላ ኣይ ማዱንꬄ?› ጊ ኦይቺኮ ኢዚ፥ ‹ታ ሃይሳ ታ ላጌታሶን ዳሼ ማዱንጻዲስ› ጊዴስ።
ZEC 13:7 «ኡባፌ ዎልቃማ ጎዳይ፥ ‹ማሻ! ታ ሄንꬃንቻ ታ ዳሮ ዶሲዛይሳ ቦላ ቤጋ! ሄሚዛይሳ ሾጫ፤ ዶርሳቲካ ላሌታና፤ ታኒካ ታ ቄሴ ጉꬃታ ቦላ ዴንꬃና› » ጌስ።
ZEC 13:8 ጎዳይ፥ «ቢታ ኡባን ዲዛ ሄꬑ ኩሼ ኣሳፔ ናምኡ ኩሼይ ꬋያና፤ ኢሲ ኩሼ ኣሲ ኣታና።
ZEC 13:9 ሄ ኣቲዳ ኢሲ ኩሼ ኣሳ ታ ጌዴ ታማን ዬጋና፤ ቢራ ታማን ጌሺዛ ማላ ታ ጌሻና፤ ዎርቃ ማላካ ፓጫና፤ ኢስቲ ታ ሱንꬅ ጼይጋና፤ ታኒካ ኢስታስ ኮያና፤ ታ ኢስታስ፥ ‹ታ ዴሬታ› ጋና፤ ኢስቲካ፥ ‹ኑ ጎዳ› ጋና» ጊዴስ።
ZEC 14:1 ሄኮ ጎዳይ ፒርዲዛ ጋላሲ ጋኪዴስ፤ ኔፔ ቦንቂዳ ሚሻ ኔ ኣይፌይ ቤኢሺን ኢስቲ ጊሼቲ ኤካና።
ZEC 14:2 ዬሩሳላሜ ኦላና ማላ ካዎቴꬃታ ኡባ ታ ሺሻና፤ ካታማያካ ኦይኬታና፤ ኬꬃ ጊዶን ዲዛ ሚሺ ቦንቄታና፤ ማጫሳታራካ ዎልቃን ኢቻና፤ ካታማ ኣሳፔ ባጋይ ዲኤታና፤ ኣቲዳ ዴሬይ ቃሴ ካታማይፔ ኬዜና።
ZEC 14:3 ሄሳፌ ጉዬ ጎዳይ ካሴ ኦላ ጋላስ ኦሌቲዛ ማላ ሄ ካዎቴꬃታ ኦላናስ ዴንዳና።
ZEC 14:4 ሄ ዎዴ ኢዛ ቶሆይ ዬሩሳላሜፔ ኣርሼይ ሞኪዛ ባጋራ ዳብራዛይቴ ዙማ ቦላ ኤቃና። ዳብራዛይቴ ዙማይካ ኣርሼይ ሞኪዛሶፔ ዉሊዛሶ ጋካናስ ናምኡ ኬዚ ሻኬቲ ዎꬋና፤ ባጋ ዙማይ ፑዴሃ ባጋ፥ ባጋይ ዱጌሃ ባጋ ሻኬቲዲ ጊዶን ዎልቃማ ሾባይ ሜꬌታና።
ZEC 14:5 ኢንቴኒካ ኣዜሌ ጋካናስ ዙማ ታኒ ናምኡ ኬሲ ሻኪዳ ሾባራ ባቃታና፤ ካሴ ዩሁዳ ካዎ ኦዚያ ዎዴ ቢታይ ቃጺን ቤኒ ኢንቴ ኣዋቲ ጋንጊዳ ማላ ኢንቴ ጋንጋና፤ ሄሳፌ ጉዬ ጎዳ ታ ጾሳይ ጌሻታራ ኢሲፌ ያና።
ZEC 14:6 ሄ ዎዴ ታ ኬንቾይ፥ ሻቺኔ ፖኦይ ሙሌካ ዴና።
ZEC 14:7 ሄ ጋላሳይ ጋላሲኔ ቃማይ ባይንዳ ጎዳይ ኤሪዛ ዱማ ጋላስ ጊዳና፤ ሄ ጋላሲ ፖኦይ ፖኦሺን ዴኣና።
ZEC 14:8 ሄ ዎዴ ዬሩሳላሜፔ ዴኦ ሃꬂ ፑልታና፤ ኢዛፔ ባጋይ ኣርሼይ ሞኪዛ ባጋን ዲዛ ሃይቆ ኣባን ጌላና፤ ባጋይ ቃሴ ኣርሼይ ዉሊዛ ባጋራ ዲዛ ሜዲቴራኔ ኣባን ጌላና፤ ቦኔ ጊዲን ባልጎ ጊዲን ላይꬅ ኩሜꬅ ፓጬይ ባይንዳ ጎጊሼ ዴኣና።
ZEC 14:9 ሄ ዎዴ ጎዳይ ቢታ ኡባ ቦላ ካዎታና፤ ሄ ዎዴ ጎዳይ ኢሳ ጻላ፤ ኢዛ ሱንꬃይካ ኢሳ ጊዳና።
ZEC 14:10 ፑዴሃ ባጋራ ጌባፔ ዶሚዲ ዬሩሳላሜ ዱጌሃ ባጋራ ዲዛ ኣርሞኔ ካታማ ጋካናስ ዲዛ ኣዉራጃይ ቲꬋ ዴምባ ጊዳና፤ ዬሩሳላሜ ካታማያ ቢኒያሜ ፔንጌፌ ቤኒ ፔንጌ ጊናራኔ ጉላ ፔንጌ ጋካናስ ሄሳꬆካ ሃናኒኤሌ ጊምቤፌ ጌዴ ካዎ ኬꬃሶ ዎይኔ ኡሹ ጉምኢዛሶሆ ጋካናስ ꬎቁ ጋዳ ኢዛ ሚና ዴኣና።
ZEC 14:11 ዬሩሳላሜይ ዳሮ ኣሲ ዳናሶ ጊዳና፤ ሄሳፌ ጉዬ ኢዛ ꬋዩኩ፤ ኢዚን ዲዛ ዴሬይ ሂርጋይ ባይንዳ ዎፓን ዳና።
ZEC 14:12 ዬሩሳላሜ ኦላና ዴንዲዛ ዴሬ ቦላ ጎዳይ ቦሻ ሃርጌ ኤሃና፤ ኢስታ ሼምፖራ ፓጻ ዲሺን ኢስታ ኣሾይ ዎቃና፤ ኢስታ ኣይፌይኔ ኢንጻርሳይ ሄን ባ ዲዛሶን ዎቃና።
ZEC 14:13 ሄ ዎዴ ጎዳይ ኢስታ ቦላ ሂርጋኔ ባቦ ዬዳና፤ ኢስቲካ ኢሶይ ኢሶይ ባ ላጌዛ ቦላ ቆሆ ጋꬃና።
ZEC 14:14 ዩሁዳ ኣሳይ ዬሩሳላሜ ባጋ ጊዲዲ ኦሌታና፤ ባና ዩዪ ኣꬊዳ ካዎቴꬃቲ ሃሪዳ ኣቆታ ኡባ ዎርቃ፥ ቢራ፥ ማይኦኔ ቆዳይ ባይንዳ ሚሽ ዲኢ ኤካና።
ZEC 14:15 ሄሳ ሚሳቲዛ ቦሻይ ሞርኬቲ ዲዛሶን ዲዛሶን፥ ፓራታ፥ ባቁሎታ፥ ጋሜላታኔ ሃሬታ ቦላኔ ሃራ ሜሄ ኡባ ቦላ ያና።
ZEC 14:16 ሄሳፌ ጉዬ ዬሩሳላሜ ኦላና ኬዚዳ ካዎቴꬃታፔ ሃይቆንታ ኣቲዳ ኡባይ ኡባፌ ዎልቃማ ጎዳስ ጎይናናሲኔ ዳሴ ባኣሌ ቦንቻናስ ላይꬃን ላይꬃን ዬሩሳላሜን ሺቃና።
ZEC 14:17 ኡባፌ ዎልቃማ ጎዳስ ጎይናናስ ዬሩሳላሜ ሺቆንታ ቢታ ካዎቴꬃታ ኡባስ ኢራይ ቡኬና።
ZEC 14:18 ጊብጼ ኣሳይካ ሄ ቦንታ ኢራይ ኢስታስ ቡኬና፤ ዬሩሳላሜ ኬዚዲ ዳሴ ባኣሌ ቦንቾንታ ኢጺዳ ካዎቴꬃታ ቦላ ጎዳይ ኤሃና ቦሻ ኢስታ ቦላ ኤሃና።
ZEC 14:19 ጊብጼ ኣሳካ ጊዲን ሃራ ዴሬ ኣሳ ካዎታ ጊዲን፥ «ዳሴ ባኣሌ ኑ ቦንቾኮ» ጊኮ ኢስታ ቦላ ያና ቂጻቴይ ሃይሳፌ ቦላን ዲዛይታ፤
ZEC 14:20 ሄ ዎዴ ፓራታ ቆꬌን ቃሼቲዛ ዳላ ኡባ ቦላ፥ «ሃይሲ ጾሳስ ዱማቲዳይሳ» ጊዛ ቃላይ ጻፌታና፤ ጎዳ ኬꬃ ጊዶን ካꬅ ካꬂዛ ኦቶቲካ ያርሾ ያርሺዛሶ ሲንꬃን ዲዛ ሳኔታ ማላ ዱማታና።
ZEC 14:21 ዬሩሳላሜኒኔ ዩሁዳን ዲዛ ኦቶይ ዉሪካ ሜꬌቴꬃ ኡባፌ ዎልቃማ ጎዳስ ዱማቲዳዝ ጊዳና፤ ያርሾ ሺሺዛ ኣሳይ ዉሪካ ኦቶታ ኤኪዲ ያርሾ ኣሾ ኢስታን ዶይሳና፤ ሄ ዎዴ ኡባፌ ዎልቃማ ጎዳ ኬꬃ ጊዶን ኣይ ዛልኣንቻይካ ዴና።
MAL 1:1 ሚልካሳ ባጋራ ኢስራኤሌ ናይታስ ዪዳ ጎዳ ቃላ፥
MAL 1:2 ጎዳይ፥ «ታ ኢንቴና ዶሳዲስ» ጌስ፤ ኢንቴ ጊዲኮ፥ «ኔ ኑና ኣዛን ዶሳዲ?» ጌታ። ጎዳ ጾሲ፥ «ኤሳዌይ ያቆቤ ኢሻ ጊዴኔ? ታ ያቆቤ ዶሳዲስ።
MAL 1:3 ጊዶ ኣቲን ኤሳዌ ኢጻዲስ፤ ኢዛ ዴሬን ዲዛ ዙማታ ባዞ ኬሳዲስ፤ ኢዛ ጋዴዛካ ባዞን ዲዛ ዎራካናታስ ኣꬃ ኢማዲስ» ጊዴስ።
MAL 1:4 ኤዶሜይ፥ «ኑ ካታማቲ ላሌቲን ኢስታ ዛሪ ኤሳና» ኢስቲ ጊን ኡባፌ ዎልቃማ ጎዳ ጾሳ ቃሴ፥ «ኢስቲ ዛሪዲ ኦꬃና ሺን ታ ኢስቲ ኦꬆይሳ ዛራ ላላና፤ ኢስቲካ፥ ‹ኢታ ዴሬኔ ጎዳይ ሜርናስ ሃንቄቲዳ ዴሬ ጌቴታና።›
MAL 1:5 ሄሳካ ኢንቴ ኢንቴ ኣይፌራ ቤያና፤ ኢንቴካ፥ ‹ኢስራኤሌ ናይታ ዴሬ ꬋሳፌ ሃራሶንካ ጎዳይ ጊታ ጋና።
MAL 1:6 «ናይ ባ ኣዋ፥ ኣይሌይካ ባ ጎዳ ቦንቼስ ሺን ታ ኢንቴስ ኣዋ ጊዲኮ ኣዛስ ታና ቦንቼኬቲ? ታኒ ጎዳ ጊዲኮ ኣዛስ ታስ ያዬኬቲ? ጌስ ሜꬌቴꬃ ጎዳይ፤ ቄሴቶ! ታ ሱንꬅ ካዉሺዛይ ኢንቴና። ‹ኢንቴ ቃሴ፡ ኑኒ ኔ ሱንꬅ ዎስቲ ካዉሺዶኒ?› ጌታ።
MAL 1:7 ኢንቴ ታስ ያርሾ ሺሺዛሶን ቱኒዳ ካꬅ ዎꬄታ» ሂስቲ ዎꬂዲ፥ «ኑ ኔና ዎስቲ ቱኒሲዶኒ?» ጌታ። ኢንቴ፥ «ጎዳ ማዳይ ቶሼቲዳዛ» ጉሳና፤ ኢንቴ፥ «ጎዳ ማዳይ ካꬌቲዳዛ ጉሳና።
MAL 1:8 ኢንቴ ቆቄ ሜሄ ያርሾስ ኤሂዛይሲ ሄሲ ቆሆ ጊዴኔ? ዎቤ ዎይኮ ሳኬቲዛ ሜሄ ኢንቴ ያርሾስ ሺሺዛይሲ ሄሲ ቆሆ ጊዴኔ? ሄይታንታ ማላ ኢንቴና ኣይሲዛ ዳናታስ ኢንቴ ኢሚዛኮ ኢስቲ ኢንቴፌ ኡፋይሳን ኤካኔ?» ጌስ ኡባፌ ዎልቃማ ጎዳይ።
MAL 1:9 «ሃኢ ቃሴ ኢዚ ኑስ ሚሼታና ማላ ጾሳ ዎሲቴ፤ ሄሳ ማላ ያርሾ ኢንቴ ሺሺን ጾሲ ኢንቴፌ ኤካንዴ?» ጌስ ኡባፌ ዎልቃማ ጎዳ ጾሳይ።
MAL 1:10 «ታስ ያርሾ ያርሺዛሶን ጎኣይ ባይንዳ ታማ ኢንቴ ኤꬆንታ ማላ ኢንቴፌ ኢሳዴይካ ጾሳ ኬꬃ ፔንጌ ጎርዲዛኮ ኣዜ ዲዛይ! ታ ኢንቴናን ኡፋዬቲኬኔ ኢንቴ ኩሼፔ ኣይ ያርሾካ ኤኪኬ» ጌስ ኡባፌ ዎልቃማ ጎዳ ጾሳይ።
MAL 1:11 ኣዋ ኣርሼይ ኬዚዛሶፔ ዶሚዲ ኣርሼይ ዉሊዛሶ ጋካናስ ታ ሱንꬃይ ዴሬ ኡባ ጊዶን ቦንቼታና፤ ቤቶሶን ኡባን ታ ሱንꬃስ ኤጻኔይኔ ጌሻ ያርሾ ኣሳይ ሺሻና፤ ታ ሱንꬂ ኣሳ ኡባ ኣቻን ቦንቼታና።
MAL 1:12 «ኢንቴ ቃሴ፥ ‹ጎዳ ማዳይ ቱና ያርሾ፤ ካꬃይካ ካꬌቲዳይሳ› ጊዲ ካዉሼታ።
MAL 1:13 ቃሴካ፥ ‹ሃይሲ ዳቡራ› ጉሳን ሌቆ ሚጺልꬅ ኢዛ ቦላ ሚጺሌታ» ጌስ ኡባፌ ዎልቃማ ጎዳ ጾሳይ። «ቦንቂ ኤኪዳ ሜሄ ዎቤኔ ሃርጊዛ ሜሄ ኢንቴ ያርሾ ሺሺን ኢንቴ ኩሼፔ ታ ሄሳ ኤካናስ ቤሲዜ?» ጌስ ኡባፌ ዎልቃማ ጎዳ ጾሳይ።
MAL 1:14 «ዶርሳታ ጋርሳን ሎኦ ꬋርሾይ ዲዛይሳ ኢማናስ ኣዲኔቲዲ ቃሴ ባሌꬆን ኢዛ ቦላ ዎሶይ ዲዛ ሜሄ ጎዳስ ያርሾ ሺሺዛዴይ ቃንጌቶ፤ ታ ጊታ ካዎ፤ ታ ሱንꬂካ ዴሬ ኩሜꬂ ባባናስ ቤሲዛ ሱንꬃ» ጌስ ኡባፌ ዎልቃማ ጎዳ ጾሳይ።
MAL 2:1 «ሃኢካ ቄሴቶ ሃይሲ ሃ ኣዛዞይ ኢንቴስ ኢሜቲዴስ።
MAL 2:2 ኢንቴ ታ ጊዛዝ ሲዮንታ ኢጺኮኔ ኢንቴ ኢንቴ ዎዚና ታ ሱንꬃ ቦንቻናስ ጊጊሶንታ ኣጊኮ ታ ኢንቴ ቦላ ቃንጌꬅ ዬዳና፤ ታ ኢንቴና ኣንጃና ኣንጆዛ ቃንጌꬃን ላማና፤ ኢንቴ ታና ቦንቻናስ ኢንቴ ዎዚና ጊጊሶንታ ኣጊዳ ጊሻስ ኣዳፌ ታ ሃይሳ ኡባ ኢንቴ ቦላ ኦꬃና» ጌስ ኡባፌ ዎልቃማ ጎዳይ።
MAL 2:3 «ኢንቴ ጋሶን ኢንቴ ናይታ ታ ሃንቃና፤ ኢንቴ ያርሾስ ሺሺዛ ሜሄ ቶጬ ታ ጌዴ ኢንቴ ኣይፌ ቦላ ላላና፤ ኢንቴካ ኢዛራ ኢሲፌ ꬋያና።
MAL 2:4 ታ ሌዌራ ጫቂዳ ጫቆ ቃላይ ሚናና ማላ ሃይሳ ኢንቴና ቆፍሳናስ ታ ዬዶይሳ ኢንቴ ኤራና» ጌስ ኡባፌ ዎልቃማ ጎዳይ።
MAL 2:5 «ታ ኢዛራ ጫቂዳ ጫቆይ ዴኦኔ ሳሮቴꬃ ጫቆ፤ ሄይታካ ታ ኢዛስ ኢማዲስ፤ ሄሲካ ቦንቾ ኤሂዴስ፤ ኢዚካ ታስ ያዪዴስ፤ ታ ሱንꬃካ ቦንቺዴስ።
MAL 2:6 ኢዛ ዶናን ቱሙ ቲሚርቴይ ዴስ፤ ኢሲ ባላ ሚሺካ ኢዛ ዶናን ቤቲቤና፤ ሳሮቴꬃኒኔ ሱሬቴꬃን ታናራ ሄሜቲዴስ፤ ዳሮ ኣሳካ ናጋራፔ ዛሪዴስ።
MAL 2:7 ቄሴይ ኡባ ዳንዳይዛ ኡባፌ ዎልቃማ ጎዳስ ኪቴቲዛዴ ጊዲዳ ጊሻስ ኢዛ ዶናይ ኤራቴꬅ ናጋናስ ኣሳይ ኢዛ ዶናፔ ቲሚርቴ ኮያናስ ቤሴስ» ጌስ ኡባፌ ዎልቃማ ጎዳይ።
MAL 2:8 ጊዶ ኣቲን ኢንቴ ኢዛ ኦጌፔ ካሬ ኬዚዴታ፤ ዳሮ ኣሳይካ ኢንቴ ቲሚርቴን ꬉጴታና ማላ ኦꬂዴታ፤ ሌዌ ጫቆዛካ ላሊዴታ።
MAL 2:9 ሂስቲን ኢንቴ ታ ኦጌን ቦንታ ጊሻሲኔ ኢንቴ ኢንቴ ቲሚርቴዛ ዱማ ማዶ ኦꬂዳ ጊሻስ ኢንቴ ኣሳ ኡባ ሲንꬃን ካꬌታና ማላኔ ኢንቴ ጉጻና ማላታ ኦꬃዲስ።
MAL 2:10 ኑ ዉሪካ ኢሳዴ ና ጊዶኮኒ? ኑና ሜꬊዳይ ኢሲ ጾሳ ጊዴኔ? ሂስቲን ኑ ኢሶይ ኢሳስ ኣማኔቶንታ ኣጊዲ ካሴ ኑ ኣዋታ ጫቆ ኣዛስ ቱኒሲዞኒ?
MAL 2:11 ዩሁዳይ ኣማኔቲቤና፤ ኢስራኤሌኒኔ ዬሩሳላሜን ሃራሲዛ ሚሺ ሃኒዴስ፤ ዩሁዳይ ኣላጋኔ ኣላጋ ጾሳስ ጎይኒዛ ማጫ ናይታ ማቾ ኤኪዲ ጎዳ ጾሲ ዶሲዛ ኢዛ ኬꬃ ቱኒሲዴስ።
MAL 2:12 ሄሳ ማላ ኦꬂዛ ኣይ ኣሲካ ሳሎ ጎዳስ ያርሾ ኤሂዛ ጊዲኮካ ጎዳይ ያቆቤ ዱንካናፔ ኢዛ ዲጎ።
MAL 2:13 ቃሴ ኢንቴ ኦꬃና ሃራ ሚሽ ጎዳስ ያርሾ ሺሺዛሶዛ ኢንቴ ኣይፉንꬃን ሜሻና፤ ሄሳፌ ጉዬ ኢንቴ ያርሾኮ ጼሎንታ ጊሻሲኔ ኡፋይሳን ኤኮንታ ጊሻስ ኢንቴ ዬካናኔ ዋሳና።
MAL 2:14 ኢንቴካ፥ «ኢዚ ኣዛስ ኑ ያርሾዛ ኤኮንታ ኢጺዴ?» ጊዲ ኦይቻና፤ ሄሲካ ሃኒዳይ ኢንቴ ጫቆን ኤኬቲዳ ናቴቴꬃ ማቼታራ ጫቄቲዳ ቃላ ኢንቴ ኣማኔቶንታ ላሊዳ ጊሻሳ፤ ጎዳ ጾሲ ኢንቴ ጊዶን ማርካ።
MAL 2:15 ጎዳ ጾሲ ኢንቴሲኔ ማቼታስ ኢሲ ኣሳቴꬂኔ ኢሲ ኣያናይ ዳና ማላ ኦꬂቤኔ? ጾሲ ኢንቴና ኣዛስ ኢሲኖ ኦꬂዴ? ኢዛስ ዋና ቆፋይ ጾሳስ ጌሻ ዜሬꬅ ኢንቴ ዬላና ማላ ጊዴኔ? ሄሳ ጊሻስ ኢንቴፌ ኢሳይ ኢሳይ ባ ማቼይስ ጫቂዳ ቃላ ፓጪንቾንታ ኣማኔቴꬃን ናጎ።
MAL 2:16 «ኣይስ ጊኮ ታኒ ጎዳ ኢስራኤሌ ጾሳይ ኣዚናይ ባ ማቾ ኣንጂ ዬዲዛይሳ ኢጻይስ፤ ኢንቴፌ ኢሳዴይካ ሄሳ ማላ ጌኔ ኦሶ ኦꬂኮ ታ ሄሳ ኢጻይስ፤ ሄሳ ጊሻስ ኢንቴ ኢንቴ ማቼታራ ጫቄቲዳ ቃላ ላሞንታ ማላ ናጌቲቴ» ጌስ ጎዳ ኢስራኤሌ ጾሳይ።
MAL 2:17 ኢንቴ ጮ ሃዳ ሃሳያን ጎዳ ሳሌꬂዴታ፤ «ኑ ኢዛ ኣዛን ሳሌꬂዶኒ?» ጌታ፤ ኢንቴ ኢዛ ሳሌꬂዳይ፥ «ኢታ ኦꬂዛይቲ ኡባይ ጾሳ ሲንꬃን ሎኦ፤ ኢዚካ ኢስታን ኡፋዬቴስ» ጉሳን ዎይኮ «ቱማ ፒርዲዛ ጾሲ ኣዋን ዲዜ?» ጉሳና።
MAL 3:1 «ሄኮ ታኒ ባና ኦጌ ባሳና ኣስ ታፔ ሲንꬃራ ዬዳና፤ ኢንቴ ኮይዛ ጎዳይ ኢንቴ ቆፖንታ ጾሳ ኬꬅ ጋኪ ዎꬋና፤ ኢንቴ ኡፋይሳን ናጊዛ ጫቆ ቃላ ኪታ ኤኪ ዪዛ ታ ኪቲዳዴይ ያና።
MAL 3:2 ኢዚ ያና ጋላሳ ቴቃና ዳንዳይዛይ ኦኔ? ኢዚ ቆንጪዛ ጋላስ ኢዛ ሲንꬃን ኤቃናስ ዳንዳያናይ ኦኔ? ኢዚ ጮጬ ታማ ማላ ዎይኮ ማይኦ ሜጪዛ ሳሙና ማላ፤
MAL 3:3 ቢራ ታማን ሴሪሲዲ ሎኤꬂ ጌሺዛ ኣሳ ማላ ኡታና፤ ሌዌ ናይታ ዎርቃ ማላኔ ቢራ ማላ ጌሻና፤ ሄሳፌ ጉዬ ጎዳስ ያርሾ ሺሺዛ ጺሎ ኣሳቲ ዳና።
MAL 3:4 ሄ ዎዴ ዩሁዳኒኔ ዬሩሳላሜን ሺቂዛ ያርሾይ ካሴ ኣꬊዳ ዎዴ ማላ ጎዳ ኡፋይሲዛ ያርሾ ጊዳና።
MAL 3:5 «ሄሳ ጊሻስ ታ ኢንቴኮ ፒርዳና ያና፤ ሙሬኒዛይታ፥ ላይማቲዛይታ፥ ዎርዶ ማርካ ማርካቲዛይታ፥ ዎርዶ ጫቆ ጫቂዛይታ፥ ኦሶ ኦሲሲዲ ሚሻ ዲጊዛይታ፥ ኣምኤታኔ ዪኦ ናይታ ዴቺዛይታ፥ ቤቴ ኣሳታስ ፒርዳ ቱጪዛይታ፥ ታስ ባቦንታይታ ቦላ ማርካታናስ ታ ኤሌሳይስ» ጌስ ኡባፌ ዎልቃማ ጎዳ ጾሳይ።
MAL 3:6 «ታኒ ላሜቶንታ ጾሳ፤ ሄሳ ጊሻስ ኢንቴኖ ያቆቤ ናይቶ! ኢንቴ ꬋይቤኬታ» ጌስ ጎዳይ።
MAL 3:7 «ኢንቴ ካሴ ኢንቴ ኣዋታ ዎዴፔ ዶሚዲ ታ ኣዛዞታፔ ሃኪዴታ፤ ኢስታካ ናጊቤኬታ፤ ሃ ታኮ ሲሚቴ ታኒካ ኢንቴኮ ሲማና፤ ኢንቴ ጊዲኮ፥ ‹ኑኒ ኔኮ ዋኒ ሲሚኖ?› ጌታ» ጌስ ኡባፌ ዎልቃማ ጎዳ ጾሳይ።
MAL 3:8 «ኣሲ ጾሳ ሚሽ ካይሶቲ ኤሪዜ? ኢንቴ ጊዲኮ ካይሶቴታ፤ ኢንቴ ቃሴ፥ ‹ኑ ኣይ ካይሶቲዶኒ?› ጊዲ ኦይቺቴ፤ ኢንቴ ኣስራታኔ ማባ ታፔ ካይሶቲዴታ።
MAL 3:9 ኢንቴ ኢስራኤሌ ኣሳይ ኡባይ ታ ሚሽ ካይሶቲዳ ጊሻስ ኢንቴ ቃንጌቲዳይታ።
MAL 3:10 ታ ኬꬃን ሚዛ ካꬂ ዳና ማላ ኢንቴካ ታና ሃይሳን ፓጫናስ ኣኔ ታማፌ ኢሲኖ ኡባ ሃ ታ ጎታራን ጌልꬂቴ፤ ታ ኢንቴስ ሳሎ ማስኮቴ ዶዮንታ ኣጊኮኔ ኢንቴስ ዎꬂዛሶይ ꬋያና ጋካናስ ታ ኢንቴስ ኣንጃ ፓላሂሶንታ ኣጊኮ ቤያንዴታ» ጌስ ኡባፌ ዎልቃማ ጎዳ ጾሳይ።
MAL 3:11 ታ ኢንቴ ጊሻስ ኢንቴ ቢታን ሞኪዛ ካꬃ ቆሂዛ ሚሻቲ ኢንቴ ካꬅ ሞንታ ማላ ታ ሃንቃና፤ ኢንቴ ካꬃይካ ሜቴቴና፤ ኢንቴ ጋዴ ጊዶን ኢንቴ ቶኪዳ ዎይኔ ሚꬃይ ኣይፌይ ባይንዳ ጮ ሜላ ዴና፤
MAL 3:12 «ሄሳፌ ካሊዲ ኢንቴ ዴሬይ ካሎ ቢታ ጊዲዳ ጊሻስ ሃራ ዴሬይ ዉሪካ ኢንቴና ኢንቴ ኣንጄቲዳ ዴሬታ ጊ ጼይጋና» ጌስ ኡባፌ ዎልቃማ ጎዳ ጾሳይ።
MAL 3:13 «ኢንቴ ታ ቦላ ጻላቴꬃ ቃላ ሃሳይዴታ» ጌስ ኡባፌ ዎልቃማ ጎዳ ጾሳይ። «ኢንቴ ጊዲኮ፥ ‹ኔ ቦላ ኑ ኣይ ሃሳይዶኒ?› ጌታ።
MAL 3:14 ቃሴካ ኢንቴ፥ ‹ጾሳስ ኦሶይ ሃዳ፤ ኢዛ ኣዛዞታ ናጎይኔ ሜꬌቴꬃ ጎዳ ሲንꬃን ሙዞቲዛ ኣሳ ማላ ዴኦይ ኑና ኣይ ማዲዴ?
MAL 3:15 ሃኢ ኑ ኦቶራንቻቲ ኣንጄቲ ዲሺን ኢታ ኦꬂዛይቲ ዱሬቲሺን ጾሳ ፓጪዛይቲ ኬሲ ኤኪ ኣቲሺን ቤዮስ› ጌታ» ጌስ ኡባፌ ዎልቃማ ጎዳ ጾሳይ።
MAL 3:16 ሄ ዎዴ ጎዳስ ባቢዛ ኣሳቲ ባ ጋርሳን ኢሶይ ኢሳራ ሃሳዬቲዳ ጎዳ ጾሲካ ኢስቲ ጊዛይሳ ሎኤꬂ ሲዪዴስ፤ ጎዳስ ባቢዛይታስ ቃሴካ ኢዛ ሱንꬃ ቦንቺዛይታስ ኢስቲ ኦሶይ ባሌቶንታ ማላ ቆፍሲዛ ማጻፋይ ኢዛ ሲንꬃን ጻፌቲዴስ።
MAL 3:17 «ታኒ ኦꬂዛ ጋላስ ኢስቲ ታስ ቡዞ ሚሽ ጊዳና» ጌስ ኡባፌ ዎልቃማ ጎዳ ጾሳይ፤ «ኣዋይ ባስ ኦꬂዛ ና ኣሺዛ ማላ ታኒካ ኢስታ ኣሻና።
MAL 3:18 ሄ ዎዴ ቃሴካ ጺሎኔ ናጋራንቻ ጊዶን ጾሳስ ኦꬂዛይታ ጊዶኒኔ ኦꬆንታይታ ጊዶን ዲዛ ዱማቴꬃ ኢንቴ ቤያንዴታ።
MAL 4:1 «ሄኮ ጮጬ ታማ ማላ ኤጺዛ ጋላሲ ያና፤ ኦቶራንቻቲኔ ኢታ ኦꬂዛይቲ ዉሪካ ሜላ ሃፓ ማላ ጊዳና፤ ሄ ያና ጋላሳይካ ኢስታ ጹጋና፤ ጼራካ ጻጶካ ኣሼና» ጌስ ኡባፌ ዎልቃማ ጎዳ ጾሳይ።
MAL 4:2 «ታ ሱንꬃስ ባቢዛ ኢንቴስ ቃሴ ጺሎቴꬃ ኣርሼይ ባ ቄፌ ጋርሳን ፓꬂዛዝ ኤካ ያና፤ ኢንቴካ ቢርሺ ዬዲዳ ጋሎ ማራ ማላ ጺኬቲሼ ኬዛና።
MAL 4:3 ታኒ ኦꬂዛ ጋላስ ኢንቴ ኢታታ ኢንቴ ቶሆ ጋርሳን ዬꬋና፤ ኢስቲ ኢንቴ ቶሆ ጫማ ጋርሳን ቢዲንꬅ ጊዳና» ጌስ ኡባፌ ዎልቃማ ጎዳ ጾሳይ።
MAL 4:4 «ኢስራኤሌ ናይቲ ኡባይ ኣዛዜታና ማላ ታኒ ታ ኦሳንቻ ሙሴ ባጋራ ኮሬቤ ዙማ ቦላ ታ ኢሚዳ ዎጋኔ ኣዛዞታ ቆፒቴ» ጌስ ኡባፌ ዎልቃማ ጎዳ ጾሳይ።
MAL 4:5 «ሄኮ ኬሂ ጊታኔ ያሺሲዛ ኡባፌ ዎልቃማ ጎዳ ጋላሳይ ጋካናፔ ካሴ ታ ኢንቴስ ናቤ ኤላሳ ዬዳና» ጌስ ኡባፌ ዎልቃማ ጎዳይ።
MAL 4:6 «ታ ያዳ ቢታ ቃንጌꬃን ꬋይሶንታ ማላ ኢዚ ኣዋታ ዎዚና ናይታኮ፥ ቃሴ ናይታ ዎዚና ኣዋታኮ ዛራና» ጌስ ኡባፌ ዎልቃማ ጎዳይ።
MAT 1:1 ዳዊቴ ና፥ ኣብራሃሜ ና ጊዲዳ ዬሱስ ኪርስቶሳ ዬሌታ ዛርኬይ ሃይሳፌ ካሊዛይሳ፤
MAT 1:2 ኣብራሃሜይ ዪሳቃ ዬሊዴስ፤ ዪሳቂ ያቆቤ ዬሊዴስ፤ ያቆቤይ ዩሁዳኔ ኢዛ ኢሻታ ዬሊዴስ፤
MAT 1:3 ዩሁዳይ ቲማሪፔ ፋሬሴኔ ዛራ ዬሊዴስ፤ ፋሬሴይ ኤስሮሜ ዬሊዴስ፤ ኤስሮሜይ ኣራሜ ዬሊዴስ፤
MAT 1:4 ኣራሜይ ኣሚናዳቤ ዬሊዴስ፤ ኣሚናዳቤይ ኔኣሶኔ ዬሊዴስ፤ ኔኣሶኔይ ሶሎሞኔ ዬሊዴስ፤
MAT 1:5 ሶሎሞኔይካ ቦኤዜ ኤራቢፔ ዬሊዴስ፤ ቦኤዜይ ኡሩቲፔ ኢዮቤዴ ዬሊዴስ፤ ኢዮቤዴይ ኢሴዬ ዬሊዴስ፤
MAT 1:6 ኢሴዬይ ካዎ ዳዊቴ ዬሊዴስ፤ ዳዊቲ ኦሪዮ ማቼይፌ ሶሎሞኔ ዬሊዴስ።
MAT 1:7 ሶሎሞኔይ ኤሮቢኣሜ ዬሊዴስ፤ ኤሮቢኣሜይ ኣቢያ ዬሊዴስ፤ ኣቢያይካ ኣሳፌ ዬሊዴስ፤
MAT 1:8 ኣሳፌይ ኢዮሳፊጼ ዬሊዴስ፤ ኢዮሳፊጼይ ኢዮራሜ ዬሊዴስ፤ ኢዮራሜይ ኦዚያ ዬሊዴስ፤
MAT 1:9 ኦዚያይ ኢዮኣታሜ ዬሊዴስ፤ ኢዮኣታሜይ ኣካዜ ዬሊዴስ፤ ኣካዜይ ሂዝቂያሳ ዬሊዴስ፤
MAT 1:10 ሂዝቂያሲ ሚናሴ ዬሊዴስ፤ ሚናሴይ ኣሞጼ ዬሊዴስ፤ ኣሞጼይ ኢዮሲያሳ ዬሊዴስ፤
MAT 1:11 ኢዮሲያሲ ባቢሎኔ ዲኦ ላይꬅ ኢኮኒያኔኔ ኢዛ ኢሻታ ዬሊዴስ።
MAT 1:12 ባቢሎኔ ዲኦፔ ጉዬ ኢኮኒያኔይ ሳላቲያሌ ዬሊዴስ፤ ሳላቲያሌይ ዜሩባቤሌ ዬሊዴስ፤
MAT 1:13 ዜሩባቤሌይ ኣቢዮዴ ዬሊዴስ፤ ኣቢዮዴይ ኤልያቄሜ ዬሊዴስ፤ ኤልያቄሜይ ኣዛሬ ዬሊዴስ፤
MAT 1:14 ኣዛሬይ ሳዶቄ ዬሊዴስ፤ ሳዶቄይ ኣኪሜ ዬሊዴስ፤ ኣኪሜይ ኤሊዮዴ ዬሊዴስ፤
MAT 1:15 ኤሊዮዴይ ኣላዛሬ ዬሊዴስ፤ ኣላዛሬይ ማታኔ ዬሊዴስ፤ ማታኔይ ያቆቤ ዬሊዴስ፤
MAT 1:16 ያቆቤይካ ኪርስቶሳ ጌቴቲዳይሳ ዬሱሳ ዬሊዳ ማራሞ ኤካና ጊግሲዳ ዮሴፌ ዬሊዴስ።
MAT 1:17 ሄሳ ጊሻስ ኣብራሃሜፔ ዪዲ ዳዊቴ ጋካናስ ታማኔ ኦይዱ ዬሌቴꬅ፤ ቃሴ ዳዊቴፔ ባቢሎኔ ዲኦ ዎዴ ጋካናስ ታማኔ ኦይዱ ዬሌቴꬅ፤ ባቢሎኔ ዲኦፔ ኪርስቶሳ ዬሌታ ጋካናስ ታማኔ ኦይዱ ዬሌታ ጊዴስ።
MAT 1:18 ዬሱስ ኪርስቶሳ ዬሌታ ታሪኬይ ሃይሳፌ ካሊ ዲዛይሳ፤ ኢዛ ኣዮ ማራማ ዮሴፌስ ጊጌታ ዲሺን ኢዚ ኢዚራ ጋይቶንታ ጺሎ ኣያናን ቃንꬃታዳ ቤታዱስ።
MAT 1:19 ኢዞ ጊግሲዳ ዮሴፌይ ጺሎ ኣስ ጊዲዳ ጊሻስ ማራሞ ኣሳ ሲንꬃን ቆንጬ ኬሶንታ ቆታራ ኣጋናስ ባ ዎዚናራ ቃቺዴስ።
MAT 1:20 ሃይሳ ኢዚ ቆፒሺን ጾሳ ኪታንቻይ ኣጉሞራ ኢዛስ ቆንጪዲ፥ «ዳዊቴ ና ዮሴፌ! ኔ ጊግሲዳ ማራማ ቃንꬃቲዳይ ጺሎ ኣያናን ጊዲዳ ጊሻስ ኢዞ ኔሶ ኤፋናስ ባቦፋ።
MAT 1:21 ኢዛ ኣቱማ ና ዬላና፤ ኢዚ ኣስ ናጋራፔ ኣሻናዴ ጊዲዳ ጊሻስ ኢዛ ሱንꬅ ኔ፥ ‹ዬሱሳ› ጋ ሱንꬃና» ጊዴስ።
MAT 1:22 ጎዳይ ናቤ ኢሳያሳ ዶናን፥ «ሄኮ! ጌላኦይ ቃንꬃታና፤ ኣቱማ ናካ ዬላና፤ ናዛ ሱንꬃይካ ኣማኑኤሌ ጌቴታና፤ ሄሳ ቢርሼꬂካ፥ ‹ጾሲ ኑናራ ዴስ› ጌቴቲዲ ጻፌቲዳይሲ ፖሌታና ማላ ሃይሲ ዉሪካ ሃኒዴስ» ጊዴስ።
MAT 1:24 ዮሴፌይካ ꬊስኮፌ ቤጊዲ ጎዳ ኪታንቻይ ኢዛ ኣዛዚዳ ማላ ማራሞ ባሶ ኤፊዴስ።
MAT 1:25 ጊዶ ኣቲን ባዳ ኢዛ ኮይሮ ናዛ ዬላና ጋካናስ ኢዞ ኤኪቤና። ዬሌቲዳ ጉꬃ ናዛ ሱንꬃ፥ «ዬሱሳ» ጊዴስ።
MAT 2:1 ካዎ ሄርዶሳ ዎዴ ዬሱሲ ቤቴሊሄሜ ዩሁዳን ዬሌቲዳፔ ጉዬ ኣርሼይ ሞኪዛ ባጋፌ ኤራንቻቲ ዬሩሳላሜ ዪዲ፥
MAT 2:2 «ዬሌቲዳ ኣይሁዳ ካዎይ ኣዋን ዲዜ? ኣዋ ኣርሼይ ሞኪዛ ባጋራ ዲዛ ጾሊንቴዛ ቤኢዲ ኢዛስ ጎይናና ዪዶስ» ጊዲ ኦይቺዳ።
MAT 2:3 ካዎ ሄርዶሲ ሄሳ ሲዪዲ ዳጋሚዴስ፤ ዬሩሳላሜን ዲዛ ኣሳይ ዉሪ ኢዛራ ዳጋሚዴስ።
MAT 2:4 ኢዚካ ቄሴታ ሃላቃታኔ ዎጋ ታማርሲዛይታ ኡባ ሺሺዲ፥ «ኪርስቶሲ ኣዋን ዬሌታኔ?» ጊዲ ኦይቺዴስ።
MAT 2:5 ኢስቲካ ኢዛስ፥ «ናቤይ፥ ‹ዩሁዳ ቢታን ዲዛሬ ሃኔ ቤቴሊሄሜ! ታ ዴሬ ኢስራኤሌ ናጊዛዴይ ኔፔ ኬዛና ጊሻስ ሃንኮ ዩሁዳ ሃሪዛይታፔ ኣዛንካ ጉጻካ› ጊዲ ጻፊዳ ጊሻስ ኢዚ ቤቴሊሄሜ ዩሁዳን ዬሌታና» ጊዲ ዮቲዳ።
MAT 2:7 ሄሳፌ ጉዬ ሄርዶሲ ሄ ኤራንቻታ ጌማራ ጼይጊሲዲኔ ኢስታ ሃሳይሲዲ ጾሊንቴዚ ኢስታስ ቤቲዳ ዎዴዮ ሻኪ ኤሪዴስ።
MAT 2:8 ኤራንቻታ ቤቴሊሄሜ ዬዲዲ፥ «ቢዲ ጉꬃ ናዛ ኮዪቴ፥ ታኒካ ባዳ ኢዛስ ጎይናና ማላ ዴሚዳ ማላ ሃ ታኮ ሲሚዲ ኢዚ ኣዋን ዲዛኮን ታስ ዮቲቴ» ጊዴስ።
MAT 2:9 ኤራንቻቲካ ካዎይ ኢስታስ ጊዳይሳ ሲዪዳፔ ጉዬ ሲሚ ቢዳ፤ ኣርሼይ ሞኪዛ ባጋራ ኢስታስ ቤቲዳ ጾሊንቴይ ኢስታ ካሌꬂዲ ጉꬃ ናዚ ዲዛሶ ጋꬂዴስ።
MAT 2:10 ኢስቲ ጾሊንቴዛ ቤኢዲ ዳሮ ኡፋዬቲዳ።
MAT 2:11 ኬꬄ ጌሊዲ ጉꬃ ናዛ ኢዛ ኣዮ ማራሚራ ዴሚዲኔ ጉልባቲዲ ኢዛስ ጎይኒዳ፤ ባ ሳጺኔ ሳጺኔ ዶይዲ ዎርቃ፥ ኤጻኔኔ ካርቤ ጌቴቲዛ ሚሽ ኢዛስ ኢሚዳ።
MAT 2:12 ኢስቲ ሄርዶሳኮ ሲሞንታ ማላ ኣጉሞን ኬሂ ናጌታና ማላ ጌቴቲዳ ጊሻስ ሃራ ኦጌራ ባ ዴሬ ሲሚዳ።
MAT 2:13 ኤራንቻቲ ቢዳፔ ጉዬ ጎዳ ኪታንቻይ ዮሴፌስ ኣጉሞራ ቤቲዲ፥ «ሄርዶሲ ጉꬃ ናዛ ዎꬋና ኮይዛ ጊሻስ ኔ ሲማና ዎዴ ታ ኔና ኤሪሳና ጋካናስ ዴንዳዳ ጉꬃ ናዛ ኣዬይራ ኤካዳ ዱጌ ጊብጼ ቢታ ባቃታዳ ሄን ዳሻ» ጊዴስ።
MAT 2:14 ሄሳ ጊሻስ ዮሴፌይ ዴንዲዲ ኣዪዮ ናዛራ ኤኪዲ ጊዶꬃራ ዱጌ ጊብጼ ቢታ ቢዴስ።
MAT 2:15 ሄርዶሲ ሃይቃና ጋካናስ ሄን ዴኢዴስ። ሄሳንካ፥ «ታ ናዛ ታ ጊብጼ ቢታፌ ጼይጋዲስ» ጊዲ ጎዳይ ካሴ ናቤ ዶናን ሃሳይዳይሲ ፖሌቲዴስ።
MAT 2:16 ኤራንቻቲ ኢዛ ባሌꬂዳይሳ ኤሪዳ ዎዴ ሄርዶሲ ኬሂ ሃንቄቲዴስ። ኤራንቻቲ ኢዛስ ካሴ ዮቲዳ ማላ ባ ኣስ ኪቲዲ ናምኡ ላይꬂኔ ናምኡ ላይꬅ ኩሞንታይታ ቤቴሊሄሜኒኔ ቤቴሊሄሜ ዩሾን ዲዛ ጉꬃ ኣቱማ ናይታ ኡባ ዎꬊሲዴስ።
MAT 2:17 ሄሳን፥ «ዬሆይኔ ጊታ ዋሶ ጊሪሳይ ኤራማን ሲዬቲዴስ፤ ኢራኤላ ባ ናይታስ ዬካዱስ፤ ናይቲ ዉሪ ዉሪዳ ጊሻስ ሚናናስ ዳንዳዮንታ ኢጻዱስ» ጌቴቲዲ ናቤ ኤርማሳን ዮቴቲዳይሲ ፖሌቲዴስ።
MAT 2:19 ሄርዶሲ ሃይቂዳፔ ጉዬ ጎዳ ኪታንቻይ ኣጉሞራ ዮሴፌስ ጊብጼ ቢታን ቤቲዲ፥
MAT 2:20 «ዴንዳዳ ጉꬃ ናዛኔ ኢዛ ኣዪዮ ኤካዳ ኢስራኤሌ ቢታ ሲማ፤ ናዛ ዎꬋና ኮይዛይቲ ሃይቂዳ» ጊዴስ።
MAT 2:21 ዮሴፌይ ዴንዲዲ ናዛ ኣዬይራ ኤኪዲ ኢስራኤሌ ቢታ ሲሚዴስ።
MAT 2:22 ጊዶ ኣቲን ኣርካላዎሴይ ባ ኣዋ ሄርዶሳ ሶሆን ዩሁዳን ካዎቲዳይሳ ሲዪዲኔ ሄ ባናስ ባቢዴስ፤ ጎዳይ ኣጉሞራ ኢዚ ሄ ቦንታ ማላ ዮቲዳ ጊሻስ ጋሊላ ኣዉራጃ ቢዴስ።
MAT 2:23 ናዚሬቴ ጌቴቲዛ ካታማዮ ቢዲ ሄን ዱስ ኦይኪዴስ። ሄሳንካ ካሴ ናቤታን «ናዚሬቴ ኣስ ጌቴታና» ጌቴቲዲ ሲንꬃፌ ሃናናይሳ ካሴቲ ዮቴቲዳይሲ ፖሌቲዴስ።
MAT 3:1 ሄ ዎዴ ጻማቂዛ ዮሃኒሲ ኣሳስ፥ «ሳሎ ካዎቴꬂ ማቲዳ ጊሻስ ኢንቴ ናጋራፔ ሲሚቴ» ጊ ሳባኪሼ ዩሁዳ ባዞራ ዪዴስ።
MAT 3:3 «ጎዳ ኦጌ ኦꬂቴ፤ ዎጋ ኦጌዛካ ሎኤꬂቴ ጊሼ ባዞ ቢታን ዋሲዛ ቃላ» ጌቴቲዲ ካሴ ናቤ ኢሳያሳን ዮቴቲዳይሲ ዮሃኒሳ ጊሻሳ።
MAT 3:4 ዮሃኒሲ ጋሜላ ኢስኬፌ ኦሴቲዳ ማይኦ ማይኤስ። ባ ጼሳን ዳፎ ጊጼስ፤ ኢዚ ሚዛ ቁማይ ዴጌራ ኤሲኔ ቦሌ።
MAT 3:5 ዬሩሳላሜፔ፥ ኩሜꬃ ዩሁዳፔኔ ዮርዳኖሴ ሻፋ ማታን ዲዛ ዴሬ ኣሳይ ዉሪ ዮሃኒሳኮ ዎꬊዲ፥
MAT 3:6 ባ ናጋራካ ኢዛስ ፓጺሼ ዮርዳኖሴ ሻፋን ኢዛ ኩሼን ጻማቄቲዴስ።
MAT 3:7 ዳሮ ፋርሳዌቲኔ ሳዱቃዌቲ ኢዚ ጻማቂዛሶ ዪሺን ቤኢዲ ዮሃኒሲ፥ «ኢንቴኖ ሾሻቶ! ኢንቴ ሲንꬃራ ዲዛ ሃንቆፌ ኣታና ማላ ኢንቴና ኦኒ ቤሲዴ?
MAT 3:8 ኢንቴ ኢንቴ ናጋራፔ ሲሚዳይሳ ቤሲዛ ኦሶ ኦꬂቴ።
MAT 3:9 ‹ኑ ኣዋይ ኣብራሃሜይ ኑስ ዴስ› ጊዛይሳን ኢንቴርካ ኢንቴና ባሌꬆፍቴ፤ ታ ኢንቴስ ጾሲ ሃይታ ሹቻታፔ ኣብራሃሜስ ና ሂስቲ ዴንꬃናስ ዳንዳዬስ ጋይስ።
MAT 3:10 ሄኮ ካልታይ ቃንጻናስ ሚꬃታ ጋርሳን ጊጌቲ ኡቲዴስ፤ ሄሳ ጊሻስ ሎኦ ኣይፌ ኣይፎንታ ሚꬂ ዉሪ ቃንጼታናኔ ታማን ዬጌታና።
MAT 3:11 ታኒ ማሮቴꬃስ ሃꬃን ጻማቃይስ፤ ሃራይ ኣቶሺን ታ ኢዛ ጫማ ቶካናስ ቤሶንታዴይ ታፔ ኣꬊዛ ሚኖይ ጉዬራ ያና፤ ኢዚካ ጺሎ ኣያናኒኔ ታማን ኢንቴና ጻማቃና።
MAT 3:12 ካꬅ ሱራጊዛ ላይዳይ ኢዛ ኩሼን ዴስ፤ ኢዚካ ባ ካꬃ ባሌዛ ፒቲ ጌሻና፤ ባ ጊስቴዛካ ዲኤን ቆላና፤ ሃፓ ጊዲኮ ቶኦንታ ታማን ጹጋና» ጊዴስ።
MAT 3:13 ሄ ዎዴ ዬሱሲ ዮሃኒሳን ጻማቄታናስ ጋሊላፔ ዮርዳኖሴ ሻፋ ቢዴስ።
MAT 3:14 ጊዶ ኣቲን ዮሃኒሲ፥ «ሃይሲ ሃኔና፤ ታኒ ኔናን ጻማቄታና ቤሲሺን ኔኒ ዋናዳ ታኮ ያይ?» ጊዲ ኢዛራ ማርሼቲዴስ።
MAT 3:15 ዬሱሲካ፥ «ኣይኮይ ባ፥ ኤሮ ጋርኪ? ሃይሳ ኦꬂዲ ኑኒ ጺሎቴꬅ ኡባ ፖላናስ ኑስ ቤሴስ» ጊዴስ። ዮሃኒሲካ ኢዛ ቆፋ ኤሮ ጊ ኤኪዴስ።
MAT 3:16 ዬሱሲ ጻማቄቲዲ ሃꬃፌ ኬዚዳ ማላ ሄራካ ሳሎይ ዶዬቲን ጾሳ ኣያናይ ሃራጴ ሚሳቲዲ ኢዛ ቦላ ዎꬊሺን ቤዪዴስ።
MAT 3:17 ሳሎፔካ፥ «ታኒ ኢዛን ኡፋዬቲዛ ናዚኔ ታ ሲቂዛ ታ ናዚ ሃይሳ» ጊዛ ቃላይ ሲዬቲዴስ።
MAT 4:1 ሄሳፌ ጉዬ ጺሎ ኣያናይ ጻላኤን ፓጬታና ማላ ዬሱሳ ዱጌ ባዞ ቢታ ኤፊዴስ።
MAT 4:2 ኦይዱ ታሙ ጋላሲኔ ኦይዱ ታሙ ቃማ ጾሚዳፔ ጉዬ ዬሱሲ ጋፊዴስ።
MAT 4:3 ፓጪዛይሲ ዬሱሳኮ ሺቂዲ፥ «ኔ ጾሳ ና ጊዲኮ ኣኔ ሃይታ ሹቻታ ኡኬꬅ ጊዳና ማላ ኣዛዛ» ጊዴስ።
MAT 4:4 ዬሱሲካ፥ « ‹ኣሲ ጾሳ ዶናፔ ኬዚዛ ቃላንፔ ኣቲን ካꬃን ጻላ ዴና› ጌቴቲ ጻፌቲዴስ» ጊዲ ኢዛስ ዛሪዴስ።
MAT 4:5 ቃሴካ ጻላኤይ ዬሱሳ ጌሻ ካታማዮ ኤፊ ጾሳ ኬꬃ ቁስቴ ቦላ ኬሲዲ፥
MAT 4:6 «ኔ ጾሳ ና ጊዲኮ ኣኔ ሃይሳፌ ዱጌ ጉፓ፤ ኣይስ ጊኮ « ‹ኔ ቶሆይ ሹቻን ꬉጴቶንታ ማላ ኪታንቻቲ ባ ኩሼራ ኔና ኦይኪ ዴንꬃና ማላ ኔ ጊሻስ ጾሲ ባ ኪታንቻ ኪታና› ጌቴቲ ጻፌቲዴስ» ጊዴስ።
MAT 4:7 ዬሱሲካ፥ «ጌሻ ማጻፋን፥ ‹ጎዳ ኔ ጾሳ ፓጮፋ› ጌቴቲ ጻፌቲዴስ» ጊዲ ዛሪዴስ።
MAT 4:8 ቃሴካ ጻላኤይ ዬሱሳ ኬሂ ꬎቃ ዙማ ቦላ ኬሲዲ ሳሎ ጉፋንꬆን ዲዛ ካዎቴꬃ ቦንቾዛራ ኡባ ኤሂ ቤሲዲ፥
MAT 4:9 «ኔ ኩንዳዳ ታስ ጎይኒኮ ሃይሳ ኡባ ታ ኔስ ኢማና» ጊዴስ።
MAT 4:10 ዬሱሲ፥ «ሃይሶ ጻላኤ! ታ ሲንꬃፌ ኔ ሃካ! ‹ኔኒ ጎዳ ኔ ጾሳስ ጎይና፤ ኢዛስ ጻላላ ኣዛዜታ› ጌቴቲ ጌሻ ማጻፋን ጻፌቲዴስ» ጊዴስ።
MAT 4:11 ሄሳፌ ጻላኤይ ኢዛ ኣጊዲ ቢዴስ፤ ኪታንቻቲካ ዪዲ ኢዛ ማዲዳ።
MAT 4:12 ዬሱሲ፥ ዮሃኒሲ ቃሼቲዳይሳ ሲዪዲ ጌዴ ጋሊላ ሲሚዴስ።
MAT 4:13 ናዚሬቴ ካታማ ኣጊዲ ዛቢሎኔ ኒፍታሌሜ ሄራን ኣባ ማታን ዲዛ ቂፊርናሆሜ ካታማን ዱስ ኦይኪዴስ።
MAT 4:14 «ሄሳን ዛቢሎኔኒኔ ኒፍታሌሜ ቢታን፥ «ዮርዳኖሴፔ ሄ ፒንꬃን ኣባ ላንቄራ ኤፊዛ ኦጌ ማታን ዲዛ ኣይዛቤ ጊዲዳ ጋሊላ ዴሬ ኣሳይ፥ ꬉማን ዲዛ ዴሬይ ዎልቃማ ፖኦ ቤዪዴስ። ሃይቆ ኩዋ ጊዶን ዲዛ ዴሬስ ፖኦይ ፖኢዴስ» ጌቴቲዲ ናቤ ኢሳያሳ ዶናን ካሴቲዲ ሃሳዬቲዳይሲ ፖሌቲዴስ።
MAT 4:17 ዬሱሲ ሄ ዎዴፔ ሃ ሲሚን፥ «ሳሎ ካዎቴꬂ ማቲዴስ፤ ማሮታን ጌሊቴ» ጊዲ ሳባኮ ኦይኪዴስ።
MAT 4:18 ዬሱሲ ጋሊላ ኣባ ላንቄራ ኣꬊሼ ናምኡ ኢሻንታ፥ ሄይቲካ ጴጽሮሳ ጌቴቲዛ ሲሞናኔ ኢዛ ኢሻ ኢንዲራሳ ቤዪዴስ። ኢስቲካ ሞሌ ኦይኪዛይታ ጊዲዳ ጊሻስ ሞሌ ኦይኪዛ ጊቴ ኣባን ዬጊሼ ዴቴስ።
MAT 4:19 ዬሱሲ ኢስታ፥ «ሃ ዪቴ! ታና ካሊቴ! ታ ኢንቴና ኣስ ኦይኪዛ ኣስ ኬሳና» ጊዴስ።
MAT 4:20 ኢስቲ ሄራካ ሞሌ ኦይኪዛ ጊቴዛ ዬጊ ኣጊዲ ዬሱሳ ካሊዳ።
MAT 4:21 ጉꬅ ሲንꬄ ቢሼ ሃራ ናምኡ ኢሻንታ ዛብዶሳ ና ናምኣታ ያቆቤኔ ዮሃኒሳ ቤዪዴስ፤ ኢስቲካ ባ ኣዋ ዛብዶሳራ ዎጎሎ ጊዶን ሞሌ ጊቴ ሎኤꬄቴስ። ዬሱሲካ ኢስታ ጼይጊን
MAT 4:22 ኢስቲ ሄራካ ዎጎሎዛኔ ባ ኣዋ ኣጊዲ ኢዛ ካሊዳ።
MAT 4:23 ዬሱሲ ኣይሁዳታ ኢስታ ዎሳ ኬꬃን ታማርሲሼኔ ካዎቴꬃ ሚሺራቾ ቃላ ሳባኪሼ ቃሴ ዴሬ ጊዶን ኣይ ሃርጌይካ ሳኪዛይታ ፓꬂሼ ኩሜꬃ ጋሊላን ዩዪዴስ።
MAT 4:24 ሄሳ ጋሶን ሎኦ ናሾይ ኩሜꬃ ሶሪያ ቢታን ሲዬቲዴስ፤ ዴሬይካ ዱማ ዱማ ሳኮን ዳሮ ዋዬቲዛይታ፥ ዳይዳንꬂ ኢስታን ጌሊዳይታ፥ ቢጮ ሃርጌይ ዲዛይታኔ ሲሊዳይታ ኢዛኮ ኤሂን ኡባካ ፓꬂዴስ።
MAT 4:25 ሄሳፌ ዴንዲዳይሳን ጋሊላፔ፥ ታሙ ካታማታፔ፥ ዬሩሳላሜፔኔ ዩሁዳፔ፥ ዮርዳኖሴ ሻፋ ፒንꬃፌ ዪዳ ዳሮ ኣሳይ ኢዛ ካሊዴስ።
MAT 5:1 ዳሮ ዴሬይ ሺቂዳይሳ ቤኢዲ ዬሱሲ ፑዴ ዙማ ቦላ ኬዚ ኡቲዴስ፤ ኢዛ ካሊዛይቲካ ኢዛኮ ዪዳ።
MAT 5:2 ኢዚካ ኢስታ ሂዝጊ ታማርሶ ኦይኪዴስ፤
MAT 5:3 «ኣያናን ባና ካዉሺዛይቲ ኣንጄቲዳይታ፤ ኣይስ ጊኮ ሳሎ ካዎቴꬂ ኢስታሳ።
MAT 5:4 ቃꬌቲዛይቲ ኣንጄቲዳይታ፥ ኣይስ ጊኮ ኢስቲ ሚኔታና።
MAT 5:5 ኣሽኬቲ ኣንጄቲዳይታ፤ ኣይስ ጊኮ ኢስቲ ቢታ ላታና።
MAT 5:6 ጺሎቴꬅ ጋፊዛይቲኔ ሳሜቲዛይቲ ኣንጄቲዳይታ፤ ኣይስ ጊኮ ኢስቲ ካላና።
MAT 5:7 ኣሳስ ሎኦ ኦꬂዛይቲ ኣንጄቲዳይታ፤ ኣይስ ጊኮ ኢስታስካ ሎኦይ ኦሴታና።
MAT 5:8 ዎዚና ጺሎቲ ኣንጄቲዳይታ፤ ኣይስ ጊኮ ኢስቲ ጾሳ ቤያና።
MAT 5:9 ሳሮቴꬅ ኦꬂዛይቲ ኣንጄቲዳይታ፤ ኣይስ ጊኮ ኢስቲ ጾሳ ናይታ ጌቴቲ ጼይጌታና።
MAT 5:10 ጺሎቴꬃ ጊሻስ ጎዴቲዛይቲ ኣንጄቲዳይታ፤ ኣይስ ጊኮ ሳሎ ካዎቴꬂ ኢስታሳ።
MAT 5:11 «ታ ጋሶን ኣሳይ ኢንቴና ጫዪኮ፥ ጎዲኮኔ ኢታ ዮኦ ዎርዶራ ኢንቴ ቦላ ሃሳይኮ ኢንቴ ኣንጄቲዳይታ።
MAT 5:12 ኢንቴ ሳሎን ዴማና ዋጋይ ኬሂ ጊታ ጊዲዳ ጊሻስ ኡፋይሳን ጉፒቴ። ኢንቴፌ ሲንꬃን ዲዛ ናቤታካ ሄሳꬆ ጎዲዳ።
MAT 5:13 «ኢንቴ ሃ ቢታ ኣሳስ ማጺኔ ማላ። ማጺኔይ ባ ማልኦቴꬃ ዬዲዛ ጊዲኮ ጌዴ ካሬ ዬጌቲዲ ዬꬌቴꬃፌ ኣቲን ዛሪዲ ዴማናስ ዳንዳይዜ?
MAT 5:14 ኢንቴ ኣላሜስ ፖኦ። ዙማ ቦላ ዲዛ ካታማያ ቆቴታናስ ዳንዳያኩ።
MAT 5:15 ኣሲ ጾምፔ ኦይꬂዲ ኬꬃን ዲዛ ኣሳ ኩሜꬃስ ፖኣና ማላ ꬎቃሶሆን ዎꬄስ ኣቲን ጌማሶሆን ዎꬂ ኤሬና።
MAT 5:16 ሄሳꬆካ ኣሳይ ኢንቴ ሎኦ ኦሶ ቤኢዲ ሳሎን ዲዛ ኢንቴ ኣዋ ቦንቻና ማላ ኢንቴ ፖኦይ ኣሳ ሲንꬃን ፖኦ።
MAT 5:17 «ታኒ ሙሴ ዎጋኔ ናቤታ ቃላ ሻራና ዪዳ ኢንቴስ ሚሳቶፖ፤ ፖላናስ ያዲስ ኣቲን ሻራናስ ያቤኬ።
MAT 5:18 ታ ኢንቴስ ቱሙ ጋይስ፥ ሳሎይኔ ሳኣይ ኣꬋና ጋካናስ ሙሴ ዎጋይ ዉሪ ፖሌታና ኣቲን ዎጋፔ ኢሲ ፒዳሌይካ ዎይኮ ቄሪናካ ሻሬቱኩ።
MAT 5:19 ሄሳ ጊሻስ ኦኒካ ሃ ኣዛዞታፔ ጉጺዛሮ ጊዲኮካ ኦꬆንታ ዬጊ ኣꬊኮ፥ ሃንኮይታካ ዬꬊ ኣꬋና ማላ ታማርሲኮ ሳሎ ካዎቴꬃን ሄሳዴይ ጉꬅ ጌቴቲ ጼይጌታና፤ ጊዶ ኣቲን ሃይታ ኣዛዞታ ኦꬂ ፖሊሼ ሃንኮይታ ፖላና ማላ ታማርሲኮ ሄሳዴይ ሳሎ ካዎቴꬃን ጊታ ጌቴታና።
MAT 5:20 ታ ኢንቴስ ጋይስ፥ ኢንቴ ጺሎቴꬂ ፋርሳዌታፔኔ ሙሴ ዎጋ ታማርሲዛይታ ጺሎቴꬃፌ ኣꬎንታ ኣጊኮ ሳሎ ካዎቴꬅ ጌላና ዳንዳዬኬታ።
MAT 5:21 «ካሴ ኣሳታስ፥ ‹ዎꬎፓ፤ ዎꬊዳዴ ቦላ ፒርዴታና› ጌቴቲዳይሳ ኢንቴ ሲዪዴታ።
MAT 5:22 ታ ቃሴ ኢንቴስ ጊዛይ ባ ኢሻ ቦላ ኦጌይ ባይንዳ ሃንቄቲዛዴ ቦላ ፒርዴታና፤ ኦኒካ ባ ኢሻ፥ ‹ናፓይ› ጊዛዴይ ዱላታ ሲንꬃን ኦይሼታና። ‹ኤያይ› ጊዛዴ ጋናሜ ታማ ፒርዳይ ናጌስ።
MAT 5:23 ሄሳ ጊሻስ ኔኒ ያርሾ ሺሺዛሶን ጾሳስ ያርሻና ጊሺን ኔ ኢሻይ ኔ ቦላ ሚሼቲዳዚ ኔስ ቆፌቲኮ፥
MAT 5:24 ኔ ያርሺዛይሳ ሄን ያርሺዛሶን ኣጋዳ ኮይሮ ባዳ ኔ ኢሻራ ጊጋ፤ ሄሳፌ ጉዬ ሲማዳ ኔ ያርሾዛ ጾሳስ ሺሻ።
MAT 5:25 «ኔና ሞቲዳ ኔ ሞርኬይ ኔ ቦላ ፒርዲሶንታ ማላ፥ ፒርዲዛ ዳናይ ቃቺዛይሳስ ኔና ኣꬂ ኢሞንታ ማላ፥ ቃሾ ኬꬃን ኔ ዎꬎንታ ማላ ቡሮ ኦጌ ቦላ ዳሼ ኔ ሞርኬራ ኤሌላ ጊጋይቻ።
MAT 5:26 ታ ኔስ ቱሙ ጋይስ፤ ኢዚ ፒርዲሲ ዉርሲዳ ጊዲኮ ዉርሴꬃ ሳንቲዮ ቃንጻና ጋካናስ ቃሾፔ ኔኒ ቢርሼታካ።
MAT 5:27 « ‹ላይማቶፓ› ጊዛይሳ ኢንቴ ሲዪዴታ።
MAT 5:28 ታኒ ጊዲኮ ኢንቴና ሂዝጋይስ፤ ማጫስ ኣሞ ኣይፌራ ጼሊዳዴይ ዉሪ ባ ዎዚናን ኢዚራ ላይማቲዴስ።
MAT 5:29 ናጋራ ኦꬃናስ ኔ ኡሻቻ ኣይፌይ ኔስ ጋሶ ጊዲኮ ኔፔ ኬሳ ዎራ ዬጋ፤ ኔ ኣሳቴꬃይ ኩሜꬅ ጌዴ ጋናሜ ታማን ዬጌታናፔ ኔ ኣሳቴꬃፌ ኢሲና ፓጪኮ ሎኦ።
MAT 5:30 ኔ ኡሻቻ ኩሼይ ናጋራ ኦሶስ ጋሶ ጊዲኮ ኔፔ ቃንጻ ዲጋ፤ ኔ ኣሳቴꬃይ ኩሜꬅ ጋናሜን ዬጌታናይሳፌ ኔ ኣሳቴꬃፌ ኢሲ ቢሊቴይ ኔስ ፓጬ ጊዲኮ ሎኦ።
MAT 5:31 « ‹ማቾ ኣንጂ ዬዲዛዴይ ፒርማ ዋራቃታ ኢዚስ ኢማና ቤሴስ› ጌቴቲዴስ።
MAT 5:32 ታኒ ቃሴ ኢንቴና ሂዝጋይስ፥ ሃራ ኣሳራ ላይማቲሺን ቤኦንታ ዲሼ ባ ማቾ ኣንጂዛዴይ ዉሪ ኢዛ ላይማታና ማላ ኦꬄስ። ሄሳꬆካ ኣንጄቲዳሮ ኤኪዛዴይካ ላይማቲዳ ማላ ቆዴቴስ።
MAT 5:33 «ካሴ ኣሳታስ፥ ‹ዎርዶ ጫቆፋ፤ ጾሳ ሲንꬃን ኔ ጫቂዳይሳ ናጋ› ጌቴቲዳይሳ ኢንቴ ሲዪዴታ።
MAT 5:34 ታ ቃሴ ኢንቴና ኣይኮካ ጫቆፍቴ ጋይስ፤ ሳሎይ ጾሳስ ኡቲዛ ኣራታ ጊዲዳ ጊሻስ ሳሎን ጫቆፍቴ።
MAT 5:35 ቢታይ ጾሳ ቶሆይ ዬꬊዛሶ ጊዲዳ ጊሻስ ቢታንካ ጫቆፍቴ። ዎጋ ካዎ ካታማ ጊዲዳ ጊሻስ ዬሩሳላሜንካ ጫቆፍቴ።
MAT 5:36 ኢንቴ ሁኤንካ ጫቆፍቴ፤ ኢንቴ ሁኤ ቢናናፔ ኢሲኔዮካ ቦꬅ ዎይኮ ካሬꬅ ሂስታናስ ዳንዳዬኬታ።
MAT 5:37 ሄሳ ጊሻስ ኢንቴ ኢንቴ ጊዶን ሃሳዬቲሺን ኢንቴ ሃሳያይ፥ ‹ኤ› ጋናዝ ጊዲኮ፥ ‹ኤ› ጊቴ፤ ‹ኣካይ› ጋናዝ ጊዲኮ፥ ‹ኣካይ› ጊቴ፤ ሄሳፌ ሃራይ ዉሪ ኢታ ኣሳፔ ዪዛዛ።
MAT 5:38 « ‹ኣይፌ ጊሻስ ኣይፌ፥ ኣች ጊሻስ ኣች› ጌቴቲዳይሳ ኢንቴ ሲዪዴታ።
MAT 5:39 ታ ቃሴ ኢንቴስ ጊዛይ ኢታ ኦꬂዳዴራ ኤቄቶፍቴ፤ ጊዶ ኣቲን ኔስ ኡሻቻ ሻጋላ ባቂዛዴስ ሃንኮይሳካ ዩሻ ቤሳ።
MAT 5:40 ኢሲ ኣሲ ኔኒ ጋርሳራ ማይኢዳይሳ ኔፔ ኤካናስ ኔና ሞቲኮ ቦላራ ማይኢዳይሳካ ጉጃዳ ኢዛስ ኢማ።
MAT 5:41 ኢሲ ኣሲ ኔና ኢሲ ሳቴ ኦጌ ኔ ባና ማላ ዎልቃꬂኮ ኢሲፌ ናምኡ ዳኮ ጊዳና ኦጌ ኢዛራ ባ።
MAT 5:42 ኔና ዎሲዛዴስ ኢማ፤ ኔፔ ታልኤ ኤካናስ ኮይዛዴስ ዞኮ ዛሮፓ።
MAT 5:43 « ‹ኔ ላጌ ሲቃ፤ ኔ ሞርኬ ኢጻ› ጌቴቲዳይሳ ሲዪዴታ።
MAT 5:44 ታ ቃሴ ኢንቴና ኢንቴ ሞርኬታ ዶሲቴ፤ ኢንቴና ጎዲዛይታስ ዎሲቴ ጋይስ።
MAT 5:45 ኢንቴ ሄሳꬆ ኦꬂኮ ኢንቴ ሳሎ ኣዋስ ናይታ ጊዳና። ኢዚ ኣርሼ ኢታታሲኔ ሎኦታስ ኢሲ ቦላ ጋꬂ ኢሜስ። ኢራካ ጺሎታሲኔ ናጋራንቻታስ ኢሲ ቦላ ቡኪሴስ።
MAT 5:46 ኢንቴና ዶሲዛይታ ጻላ ኢንቴ ዶሲኮ ኢንቴስ ኣዛ ጎኣይ ዲዜ? ቃራጻ ቃንጺሲዛይቲ ሄሳꬆ ኦꬄቴኔ?
MAT 5:47 ኢንቴ ኢሻታ ጻላ ኢንቴ ሳሮቲኮ ሃንኮይታፔ ኣዛን ሎኤቲ? ኣማኖንታይቲካ ሄሳꬆ ኦꬄቴስ።
MAT 5:48 ሄሳ ጊሻስ ኢንቴ ሳሎ ኣዋይ ዎሶይ ባይንዳይታስ ጊዲዳ ማላ ኢንቴካ ዎሶይ ባይንዳዴ ጊዲቴ።
MAT 6:1 «ኣሲ ኢንቴና ቤያና ማላ ኣሳ ሲንꬃን ሎኦ ኦꬆንታ ማላ ናጌቲቴ፤ ሄሳꬆ ኦꬂኮ ኢንቴ ሳሎ ኣዋፔ ጎኣ ዴሜኬታ።
MAT 6:2 ኢንቴ ማንቆታስ ማዶ ኢሚዛ ዎዴ ኣሲ ታና ቤዮ ጊዲ ኣሳ ሲንꬃን ቦንቼታናስ ኦጌኒኔ ኣይሁዳ ዎሳ ኬꬃን ጹሩምባ ፑኒሲዛ ቆꬌፔ ቆሞን ሃኒዛይታꬆ ኦꬆፍቴ። ታ ኢንቴስ ቱሙ ጋይስ፤ ኢስቲ ባ ዋጋ ኡባ ሃን ኤኪዳ።
MAT 6:3 ኢንቴ ማንቆታስ ኢሚሺን ኡሻቻ ኩሼይ ኦꬂዛ ሃዲርሳ ኩሼይ ኤሮፖ።
MAT 6:4 ኢንቴ ኢሞይ ጌማን ጊዶ፤ ቆታን ኦሴቲዳይሳ ቤኢዛ ኢንቴ ኣዋይካ ኢንቴ ዋጋ ኢንቴስ ኢማና።
MAT 6:5 «ኢንቴ ዎሲሼ ቆꬌፔ ቆሞን ሃኒዛይታ ማላ ሃኖፒቴ፤ ኢስቲ ኣሲ ቤያና ማላ ኣይሁዳ ዎሳ ኬꬃታኒኔ ኦይዱ ኦጌ ቦላ ኤቂዲ ዎሳናስ ዶሴቴስ። ታ ኢንቴስ ቱሙ ጋይስ፤ ኢስቲ ኩሜꬃ ዋጋ ኤኪቺዳ።
MAT 6:6 ኔኒ ዎሳና ጌሊዛ ኔ ኪፊሌ ጌላ፤ ካሬካ ኔ ቦላ ጎርዳዳ ጌማን ዲዛ ኔ ኣዋኮ ዎሳ። ጌማን ኦሴቲዳይሳ ቤኢዛ ኔ ኣዋይ ኔ ኦሶ ማላ ኔስ ኢማና።
MAT 6:7 «ኣማኖንታ ኣሳይ ኢሲ ቃላ ዛሪ ዛሪ ዎሲኮ ኢስታስ ሲዬቲዛ ሚሳቲን ኢስቲ ዛሪ ዛሪ ጊዛይሳꬆ ኢንቴካ ዎሲሼ ኢሲ ቃላ ዛሪ ዛሪ ጎፒቴ።
MAT 6:8 ጊዶ ኣቲን ኢንቴ ኣዋይ ኢንቴ ዎሳናፔ ካሴቲዲ ኢንቴስ ኣዚ ኮሺዛኮ ኤሪዛ ጊሻስ ኢንቴ ኢስታ ሚሳቶፒቴ።
MAT 6:9 ኢንቴ ዎሲሼ፥ « ‹ሳሎን ዲዛ ኑ ኣዋዉ! ኔ ሱንꬂ ኣንጄቶ።
MAT 6:10 ኔ ካዎቴꬂ ሃ ዮ፤ ኔ ሼኔይ ሳሎን ጊዲዳ ማላ ሳኣንካ ሃኖ።
MAT 6:11 ሃቺስ ጊዲዛ ካꬅ ኑስ ሃች ኢማ።
MAT 6:12 ኑ ኑና ቆሂዳይታስ ኣቶ ጊዛ ማላ ኔካ ኑ ቆሆ ኑስ ኣቶ ጋ።
MAT 6:13 ኢታፔ ኑና ኣሻ ኣቲን ኑና ፓጬን ጌልꬆፋ፤ ቦንቾይ ሜሪፔ ሜርና ጋካናስ ኔይሳ። ኣሚን› ጊ ዎሲቴ።
MAT 6:14 «ኢንቴ ኢንቴና ቆሂዳይታስ ኣቶ ጊኮ ኢንቴ ሳሎ ኣዋይካ ኢንቴስ ኣቶ ጋና።
MAT 6:15 ቃሴ ኢንቴ ኣሳ ናጋራ ኣቶ ጎንታ ኢጺኮ ኢንቴ ኣዋይካ ኢንቴ ናጋራ ኣቶ ጌና።
MAT 6:16 «ኢንቴ ጾማ ጾሚሼ ቆꬌፔ ቆሞን ጾሚዛይታꬆ ሹሎፍቴ። ኢስቲ ባ ጾሚዛይሳ ኣሲ ኤራና ማላ ባ ኣይፌሶ ኢሴቴስ። ታ ቱሙ ጋይስ፤ ሄሳꬆ ኦꬂዛይቲ ባ ዋጋ ኩሜꬅ ኤኪቺዳ።
MAT 6:17 ኔኒ ጾማ ጾማሼ ኔ ኣይፌሶ ሜጬታ፥ ኔ ሁኤ ቲዬታ።
MAT 6:18 ሄሳꬆ ኔ ጾሚኮ ጌማን ዲዛ ኔ ኣዋይ ጻላላ ኤሪዛዚኔ ኣሲ ኦኒካ ኤሮንታ ቆታን ጊዳና። ቆታን ኦሴቲዳይሳ ቤኢዛ ኔ ኣዋይካ ኔ ዋጋ ኔስ ኢማና።
MAT 6:19 «ቢላይ ሚዛሶን ቡቂዲኔ ሺይዲ ሞሬቲዛሶን፥ ካይሶይ ቦኪዲ ካይሳናስ ዳንዳይዛሶን፥ ሃ ቢታ ቦላ ኢንቴስ ሚሽ ሺሾፍቴ።
MAT 6:20 ጊዶ ኣቲን ቢላይ ማናስ፥ ቡቂዲ ዎይኮ ሺይዲ ሞሬቶንታሶን፥ ካይሶይ ቦኪ ኤካና ዳንዳዮንታሶን ሄን ሳሎን ኢንቴስ ሚሽ ሺሺቴ።
MAT 6:21 ኔ ሚሻይ ዲዛሶን ኔ ዎዚናይ ሄን ዴስ።
MAT 6:22 «ኣይፌይ ኣሳቴꬃስ ፖኦ፤ ሄሳ ጊሻስ ኔ ኣይፌይ ፓጻ ጊዲኮ፥ ኔ ኩሜꬃ ኣሳቴꬃይካ ፖኦ ጊዳና።
MAT 6:23 ኔ ኣይፌይ ሃርጋንቻ ጊዲኮ፥ ኔ ኩሜꬃ ኣሳቴꬃይካ ꬉማ ጻላ ጊዳና። ሂስቲኮ ኔናን ዲዛ ፖኦይ ꬉማ ጊዲኮ፥ ቃሴ ꬉማይ ዋኒዳ ጊርዲ ጊዳ ꬉማ ጊዳንዴ?
MAT 6:24 «ኢሲ ኣሲ ናምኡ ጎዳስ ኦꬃና ዳንዳዬና። ኢሳ ኢጺዲ ናምኣንꬆዛ ዶሳና፤ ዎይኮ ኢሳ ቦንቺዲ ናምኣንꬆዛ ሌቃና፤ ጾሳሲኔ ሚሻስ ናምኣታስ ጋꬂ ኦꬃናስ ዳንዳዬቴና።
MAT 6:25 «ሄሳ ጊሻስ ታ ኢንቴና ኢንቴ ዱሳ ጊሻስ፥ ‹ኣይ ሚኖ? ኣይ ኡዪኖ? ኣይ ማይኢኖ?› ጊዲ ሂርጎፍቴ ጋይስ። ሼምፖይ ቁማፔ፥ ኣሾይ ማይኦፌ ኣꬌኔ?
MAT 6:26 ኣኔ ሳሎ ካፎታ ጼሊቴ! ዜሬቴና፤ ማጼቴና፤ ዲኤን ቆሌቴና፤ ጊዶ ኣቲን ኢንቴ ሳሎ ኣዋይ ኢስታ ሚዜስ። ኢንቴ ኢስታፌ ኬሂ ኣꬌኬቲ?
MAT 6:27 ኣኔ ኢንቴፌ ዳሮ ዋዬቲዲ ባስ ኢሜቲዳ ላይꬃ ቦላ ሃራ ኢሲ ጋላስ ጉጃና ዳንዳይዛ ኣሲ ዲዜ?
MAT 6:28 «ቃሴ ማይኦ ጊሻስ ኣዛስ ሂርጌቲ? ኣኔ ጮ ዴምባን ዲዛ ጪሻታ ጼሊቴ፤ ዳቡሬቴና ዎይኮ ሱቄቴና።
MAT 6:29 ሄሳ ጊሻስ ታ ኢንቴና ጊዛይ ሃራይ ኣቶሺን ካዎ ሶሎሞኔይካ ባ ቦንቾራ ሃ ጪሻታፔ ኢሲኔይ ማላ ሎኦ ማይኢቤና።
MAT 6:30 ኢንቴኖ ፓጬ ኣማኖይ ዲዛይቶ! ሃች ኣሳ ኣይፌን ቤቲዲ ዎንቶ ታማን ዎꬋና ማታ ሃይሳꬆ ማይዚዛ ጾሲ ኢንቴና ሄሳፌ ሎኤꬂ ኣꬂ ማይዛናስ ዳንዳዬኔ?
MAT 6:31 ሄሳ ጊሻስ ኑ ኣይ ማኔ? ኣይ ኡያኔ? ኣይ ማይኣኔ? ጊዲ ሂርጎፍቴ።
MAT 6:32 ሃንኮ ኣማኖንታ ኣሳይ ሃይሳ ዴማናስ ዳሮ ቆፔስ። ሃይሲ ዉሪ ኢንቴስ ኮሺዛይሳ ኢንቴ ሳሎ ኣዋይ ኤሬስ።
MAT 6:33 ሃራፔ ሲንꬃቲዲ ጾሳ ካዎቴꬃ ጺሎቴꬅ ኮዪቴ፤ ሃይቲ ዉሪ ኢንቴስ ጉጄታና።
MAT 6:34 ሄሳ ጊሻስ ዎንቶስ ኬሂ ቆፖፍቴ፤ ዎንቶ ሜቶይ ዎንቶስ ኣቆ፤ ኢሲ ኢሲ ጋላሳይ ባስ ባስ ጊዲዛ ሜቶራ ዴስ።
MAT 7:1 «ኢንቴ ቦላ ፒርዴቶንታ ማላ ሃራ ኣሳ ቦላ ፒርዶፍቴ።
MAT 7:2 ኢንቴ ፒርዲዳ ማላ ኢንቴ ቦላካ ፒርዴታና። ኢንቴ ማኪዳ ሚሻራ ኢንቴስ ማኬታና።
MAT 7:3 ኔ ኣይፌን ዲዛ ጊታ ሚꬃ ቤኦንታ ዳሼ ኔ ኢሻ ኣይፌን ዲዛ ቄሪ ቡራ ኣዛስ ጼላይ?
MAT 7:4 ኔ ኣይፌን ጊታ ሚꬂ ዲሺን ኔ ኢሻ፥ ‹ኣኔ ታ ኔ ኣይፌፔ ቄሪ ቡራዮ ኬሳይስ› ጋናስ ዋና ዳንዳያይ?
MAT 7:5 ኔኖ ቆꬌፔ ቆሞን ሃኒዛይሶ ካሴታዳ ኔ ኣይፌን ዲዛ ጊታ ሚꬃ ኬሳይቻ። ሄሳፌ ጉዬ ኔ ኢሻ ኣይፌን ዲዛ ቡራ ኬሳናስ ሎኤꬃ ጼላንዳሳ።
MAT 7:6 ባ ቶሆን ዬꬎንታ ማላኔ ሲሚዲ ኢንቴና ሳጺ ዳኬሬꬆንታ ማላ ኣንጄቲዳይሳ ካናታ ሲንꬃን ዬጎፍቴ፤ ቃሴ ኢንቴ ዎርቃካ ጉዱንꬃታ ሲንꬃን ዬጎፍቴ።
MAT 7:7 «ዎሲቴ ኢንቴስ ኢሜታና፤ ኮዪቴ ኢንቴ ዴማና፤ ካሬ ቆጺቴ ኢንቴስ ዶዬታና።
MAT 7:8 ዎሲዳ ኡባስ ኢሜታና፤ ኮይዛ ኣሲ ዴማና፤ ቆጺዛዴስ ካሬይ ዶዬታና።
MAT 7:9 ኢንቴ ጊዶፌ ኢሳዴስ ናይ ኡኬꬅ ዎሲኮ ሹች ኢሚዛ ኣዋይ ዳንዴ?
MAT 7:10 ዎይኮ ሞሌ ዎሲኮ ሾሽ ኢሚዛዴይ ዳንዴ?
MAT 7:11 ሂስቲን ኢንቴ ኢታታ ጊዲ ኡቲዲ ኢንቴ ናይታስ ሎኦ ሚሽ ኢሞ ኤሪዛይታ ጊዲኮ ኢንቴ ሳሎ ኣዋይ ኢዛ ዎሲዛይታስ ዋኒዲ ኣꬊዛ ሎኦ ሚሽ ኢሜኔ?
MAT 7:12 ሄሳ ጊሻስ ሃራ ኣሲ ኢንቴስ ኦꬃና ማላ ኢንቴ ኮይዛይሳ፥ ኢንቴካ ሃራታስ ኦꬂቴ። ሙሴ ዎጋይኔ ናቤቲ ጊዛይሲ ሃይሳ።
MAT 7:13 «ጹንꬃ ፔንጌራ ጌሊቴ፤ ꬋዮሶ ኤፊዛ ኦጌይ ጊታ፤ ፔንጌይካ ኣሆ፤ ዳሮ ኣሳይ ሄ ፔንጌዛራ ጌሌስ።
MAT 7:14 ዴኦስ ጋꬂዛ ኦጌይ ጊዲኮ ጹንꬃ፤ ፔንጌይካ ጹንꬃ፤ ጌላናይቲካ ጉꬃታ ጻላ።
MAT 7:15 «ኢስታስ ጊዶ ባጋይ ካና ሱይቴ ማላ ጊዲ ኡቲዲኔ ዶርሳ ኢቴ ማይኢ ጌሊዲ ኢንቴ ጊዶን ኦꬂዛ ዎርዶ ናቤታፔ ናጌቲቴ።
MAT 7:16 ኢንቴ ኢስታ፥ ኢስታ ኦሶን ኤራንዴታ። ኣጉንꬃ ዎራፔ ዎይኔይ፥ ኪንዲቾ ኣጉንꬃፌ ባላሴ ኣይፌይ ማጼቲዜ?
MAT 7:17 ሄሳꬆካ ሎኦ ሚꬂ ዉሪ ሎኦ ኣይፌስ፤ ኢታ ሚꬂካ ኢታ ኣይፌ ኣይፌስ።
MAT 7:18 ሎኦ ሚꬂ ኢታ ኣይፌ ኣይፋናስ ዳንዳዮንታይሳ ማላ ኢታ ሚꬂ ሎኦ ኣይፌ ኣይፋናስ ዳንዳዬና።
MAT 7:19 ሎኦ ኣይፌ ኣይፎንታ ሚꬂ ዉሪካ ቃንጼታናኔ ታማን ዬጌታና።
MAT 7:20 ሄሳ ጊሻስ ኢንቴ ኢስታ ኢስቲ ኣይፊዛ ኣይፌን ሻኪ ኤራና።
MAT 7:21 «ሳሎን ዲዛ ታ ኣዋ ሼኔ ፖሎንታ ዲሼ ታና፥ ‹ጎዶ! ጎዶ!› ጊዛይ ዉሪ ሳሎ ካዎቴꬅ ጌሌና።
MAT 7:22 ሄ ጋላስ ዳሮቲ፥ ‹ጎዶ! ጎዶ! ኑኒ ኔ ሱንꬃን ቲንቢቴ ዮቲቤኮኒ? ኔ ሱንꬃን ዳይዳንꬅ ኬሲቤኮኒ? ኔ ሱንꬃን ዳሮ ማላታ ኦꬂቤኮኒ?› ጋና።
MAT 7:23 ሄ ዎዴ ታ ኢስታስ፥ ‹ታ ኢንቴና ሙሌካ ኤሪኬ! ኢንቴ ኢታቲ ታፔ ሃኪቴ› ጋዳ ቆንጬራ ታ ኢስታስ ዮታና።
MAT 7:24 «ሂስቲኮ ሃይሳ ታ ቃላ ሲዪዲ ኦሶን ፔይሺዛዴይ ባ ኬꬄ ዛላ ቦላ ኬጺዛዴ ሚሳቴስ።
MAT 7:25 ዴጾ ኢራይ ቡኪን ሃሮይካ ሃሮቲዴስ፤ ጫርኮይካ ጫርኪዴስ፤ ኬꬃካ ሱጊዴስ ሺን ዛላ ቦላ ኬጼቲዳ ጊሻስ ኩንዲቤና።
MAT 7:26 «ሃይሳ ታ ቃላ ሲዪዲ ኦꬆንታዴይ ጊዲኮ ባ ኬꬄ ኣጬ ቦላ ኬጺዳ ኤያ ኣሳ ማላ።
MAT 7:27 ዴጾ ኢራይ ቡኪን ሃሮይካ ሃሮቲዴስ፤ ጫርኮይካ ጫርኪዴስ፤ ሄ ኬꬃካ ሱጊዴስ፤ ኬꬃይካ ኢታ ኩንዴꬅ ኩንዲዴስ» ጊዴስ።
MAT 7:28 ዬሱሲ ታማርሲ ዉርሲን ኣሳይ ኢዛ ቲሚርቴዛን ማላሌቲዴስ።
MAT 7:29 ጋሶይካ ሙሴ ዎጋ ታማርሲዛይታ ማላ ጊዶንታ ኢዚ ጎዳቴꬂ ዲዛ ኣሳ ማላ ታማርሲዴስ።
MAT 8:1 ዬሱሲ ዙማ ቦላፌ ዎꬊን ዳሮ ዴሬይ ኢዛ ካሊዴስ።
MAT 8:2 ኢሲ ኢንቺራቻ ሃርጌይ ዲዛዴይ ዬሱሳኮ ሺቂዲ ኢዛ ሲንꬃን ጉልባቲዲ፥ «ጎዶ! ኔ ኮይኮ ታና ፓꬃናስ ዳንዳያሳ» ጊዴስ።
MAT 8:3 ዬሱሲ ባ ኩሼ ዬዲዲ፥ «ታ ዶሳዲስ፤ ፓጻ!» ጊን ኣዴዚ ሄ ሃርጌዛፔ ሄራካ ፓጺዴስ።
MAT 8:4 ቃሴካ ዬሱሲ ኣዴዛ፥ «ኔ ፓጺዳይሳ ኦናስካ ዮቶፓ፤ ጊዶ ኣቲን ባዳ ኔና ቄሴስ ቤሳ። ኢስቲ ኣዛዚዳ ያርሾዛ ጋꬃ፤ ሄሲካ ኢስታስ ማርካ ጊዳና» ጊዴስ።
MAT 8:5 ዬሱሲ ቂፊርናሆሜ ጋኪዳ ማላ ማቶ ሃላቃይ ኢዛኮ ሺቂዲ ኢዛ ሂዝጊ ዎሲዴስ።
MAT 8:6 «ጎዶ! ታ ኣሽካራይ ኬሂ ሳኬቲዲ ኬꬃን ኢቺ ዴስ» ጊዴስ።
MAT 8:7 ዬሱሲካ ኢዛስ፥ «ታ ባዳ ፓꬃና» ጊዴስ።
MAT 8:8 ማቶ ሃላቃዚ ኢዛስ ዛሪዲ፥ «ታ ኔና ታ ኬꬄ ጌልꬃናስ ቤሲዛዴ ጊዲኬ፤ ጊዶ ኣቲን ኔ ሃን ዳዳ ኢሲ ቃላ ጻላ ጊኮ ታ ኣሽካራይ ፓጻና።
MAT 8:9 ታስካ ታና ኣዛዚዛ ሃላቃቲ ታፔ ቦላራ ዴቴስ፤ ቃሴካ ታስ ኣዛዜቲዛ ዎታዳራቲ ታፔ ጋርሳራ ዴቴስ፤ ኢስታፌ ኢሳ፥ ‹ባ!› ጊኮ ቤስ፤ ቃሴ ኢሳ፥ ‹ሃ ያ!› ጊኮ ዬስ፤ ታኒ ታ ኣሽካራዛ፥ ‹ሄሳ ኦꬃ!› ጊኮ ኦꬄስ» ጊዴስ።
MAT 8:10 ዬሱሲ ኢዛ ዛሮዛን ማላሌቲዲ ባና ካሊዛይታስ፥ «ታ ኢንቴስ ቱሙ ጋይስ፤ ሃራይ ኣቶሺን ኢስራኤሌ ኣሳ ጋርሳን ሃይሳ ማላ ኣማኖይ ዲዛዴ ኢሳዴካ ዴማቤኬ።
MAT 8:11 ታ ኢንቴስ ዮታይስ፤ ዳሮቲ ኣርሼይ ሞኪዛ ባጋፌኔ ዉሊዛ ባጋፌ ያና። ሳሎ ካዎቴꬃ ማዳን ኣብራሃሜንታራ ዪሳቃንታራኔ ያቆቤንታራ ኢሲፌ ኡታና።
MAT 8:12 ሳሎ ካዎቴꬂ ኢስታስ ጊዳና ቤሲዛ ኣሳቲ ሄን ካሬ ꬉማን ዬጌታና። ሄንካ ዬሆኔ ኣቻ ጋርጬች ጊዳና» ጊዴስ።
MAT 8:13 ዬሱሲካ ማቶ ሃላቃዛስ፥ «ባ! ኔ ኣማኖ ማላ ኔስ ሃኖ» ጊዴስ፤ ኣሽካራዚ ሄራካ ፓጺዴስ።
MAT 8:14 ዬሱሲካ ቡሮ ጴጽሮሳ ኬꬄ ጌሊሺን ጴጽሮሳ ቦሎቴያ ሚሾ ሃርጌ ሳኬታዳ ኢቺዳሮ ቤዪዴስ።
MAT 8:15 ኢዚ ኩሼ ዬሱሲ ቦቺን ሚሾ ሃርጌዚ ኣጊዴስ። ኢዛካ ዴንዳዳ ዬሱሳ ሞካዱስ።
MAT 8:16 ሄ ጋላሳ ኦማርስ ዳይዳንꬂ ኦይኪዳ ዳሮ ኣሳታ ዬሱሳኮ ኤሂዳ። ኢዚካ ቱና ኣያናታ ባ ቃላራ ኢስታፌ ኬሲዴስ፤ ሃርጋንቻታ ኡባካ ፓꬂዴስ።
MAT 8:17 ኢሳያሲ፥ «ኢዚ ኑ ሃርጌ ኤኪዴስ፤ ኑ ሳኮካ ቶኪዴስ» ጊዳ ቃላይ ሃይሳን ፖሌቲዴስ።
MAT 8:18 ዳሮ ኣሳይ ኢዛ ጊዶꬂዳይሳ ቢዪዲ ዬሱሲ ኣሳ ኣባፌ ሄ ፒንꬅ ፒናና ማላ ኣዛዚዴስ።
MAT 8:19 ሄ ዎዴ ኢሲ ኣይሁዳ ኣማኖ ታማርሲዛዴይ ኢዛኮ ሺቂዲ፥ «ኣስታማሬ! ኔ ቢዛሶ ኣዋካ ታ ኔና ካላና» ጊዴስ።
MAT 8:20 ዬሱሲካ ኢዛስ ዛሪዲ፥ «ዎራካናታስ ኦላይ ዴስ፤ ሳሎ ካፎታስ ኬꬂ ዴስ፤ ታስ ኣሳ ናስ ጊዲኮ ሁኤ ጌልꬂዛሶይካ ዴና» ጊዴስ።
MAT 8:21 ኢዛ ካሊዛ ኢሲ ሃራ ኣሲ ቃሴ፥ «ጎዶ! ኮይሮ ባዳ ታ ኣዋ ሞጎ?» ጊዴስ።
MAT 8:22 ኢዚ ቃሴ፥ «ሃይቂዳይቲ ባ ሃይቄꬅ ሞጌቶ፤ ኔኒ ጊዲኮ ታና ካላ» ጊዴስ።
MAT 8:23 ሄሳፌ ጉዬ ዬሱሲካ ዎጎሎን ጌሊን ኢዛ ካሊዛይቲካ ኢዛራ ኢሲፌ ቢዳ።
MAT 8:24 ቆፖንታ ኣባ ጊዶን ዳምባላይ ዴንዲዲ ዎጎሎዮ ሚታና ጋካናስ ኢስታ ዋዪሲዴስ። ሄሲ ዉሪ ሃኒሺን ዬሱሲ ꬊስኪዴስ።
MAT 8:25 ኢዛ ካሊዛይቲ ኢዛ ቤጎꬂዲ፥ «ጎዶ! ኑ ꬋዮስ፤ ኑና ኣሻ!» ጊዳ።
MAT 8:26 ዬሱሲካ ኢስታስ፥ «ኢንቴኖ ኣማኖይ ፓጪዳይቶ! ኣዛስ ሃይሳ ማላ ባቤቲ?» ጊዴስ። ሄሳፌ ዴንዲዲ ጫርኮዛኔ ኣባ ዳምባላ ኢዚ ሃንቂን ሄራካ ሲርጲ ጊዴስ።
MAT 8:27 ኢስቲካ፥ «ሃይሲ ኣባይኔ ጫርኮይካ ኢዛስ ኣዛዜቲዛዴይ ኢዚ ዋኒዳዴ?» ጊዲ ማላሌቲዳ።
MAT 8:28 ኢዚ ኣባ ፒኒዲ ጌርጌሴኖኔ ጌቴቲዛ ዴሬ ጋኪዳ ማላ ዳይዳንꬂ ኦይኪዳ ናምኡ ኣስ ዳይቲ ባ ዲዛ ዱፎፔ ኬዚዲ ኢዛራ ጋጊዳ። ኣሲ ሄ ኦጌዛራ ኣꬋናስ ዳንዳዬቶንታ ማላ ኣሳስ ዳሮ ኬሂ ሜቶ ጊዲ ዴቴስ።
MAT 8:29 ኢስቲካ፥ «ጾሳ ናዉ! ኔስ ኑናራ ኣዛ ኢሲፌቴꬂ ዲዜ? ዎዴይ ጋኮንታ ዲሺን ኑና ጹጋና ያዲ?» ጊ ዋሲዳ።
MAT 8:30 ሄን ኢስታፌ ጉꬅ ሃኪዲ ዳሮ ጉዱንꬃ ዉዴይ ኢሲ ቦላ ሄሜቴስ።
MAT 8:31 ዳይዳንꬃቲ ዬሱሳ፥ «ኔ ኑና ኬሳና ጊዲኮ ሃይታን ዳሮ ጉዱንꬃታን ኑ ጌላና ማላ ኑስ ፒቃዴ ኢማ» ጊዲ ዎሲዳ።
MAT 8:32 ዬሱሲካ ኢስታ፥ «ቢቴ!» ጊዴስ። ዳይዳንꬃቲካ ኢስታፌ ኬዚዲ ጉዱንꬃታን ጌሊዳ። ጉዱንꬃቲ ዉሪካ ባ ዲዛሶ ኣፎራ ቢቻሪሼ ኣባን ጌሊዲ ሃꬃን ሚቴቲ ሃይቂዳ።
MAT 8:33 ጉዱንꬃ ሄሚዛይቲ ኤሌሊዲ ካታማይ ዲዛሶ ቢዲ ጉዱንꬃይ ሃኖይሳኔ ዳይዳንꬂ ኢስታ ኦይኪዳ ኣሳታ ቦላ ሃኒዳይሳ ኡባ ኣሳስ ዮቲዳ።
MAT 8:34 ካታማ ኣሳይ ዉሪ ዬሱሳራ ጋጋናስ ኬዚዴስ። ዬሱሳ ቤኢዲኔ ኢስታ ዴሬ ዬዲ ባና ማላ ኢዛ ዎሲዳ።
MAT 9:1 ሄሳፌ ጉዬ ዬሱሲ ኣባ ቦላ ዎጎሎራ ፒኒዲ ካሴ ባ ዲዛ ካታማ ዪዴስ።
MAT 9:2 ሄን ኢሲ ጉንዳ ኣዴዛ፥ ኣሳይ ሃላራ ቶኪዲ ዬሱሳኮ ኤሂዴስ። ዬሱሲካ ኢስታ ኣማኖ ቤኢዲ ጉንዳ ኣዴዛ፥ «ኣይኮይ ባ፤ ሃይሶ ናዞ! ኔ ናጋራይ ኣቶ ጌቴቲዴስ» ጊዴስ።
MAT 9:3 ሄ ዎዴ ሙሴ ዎጋ ታማርሲዛይቲ፥ «ሃይሲ ጾሳ ጫሻ» ጊዲ ባ ዎዚናን ቆፒዳ።
MAT 9:4 ዬሱሲ ኢስታ ቆፋ ኤሪዲ፥ «ኢንቴ ዎዚናን ኢታ ዮኦ ኣዛስ ቆፔቲ?
MAT 9:5 ‹ኔ ናጋራይ ኣቶ ጌቴቲዴስ› ጉሳፌኔ ‹ዴንዳዳ ባ!› ጉሳፌ ኣዋይሲ ካዉሼ?
MAT 9:6 ጊዶ ኣቲን ኣሳ ናስ ቢታ ቦላ ኣሴ ናጋራፔ ማራናስ ሼኔይ ዲዛይሳ ኤራና ማላሳ» ጊዲ ጉንዳ ኣዴዛ «ዴንዳ! ኔ ሃላ ኤካዳ ኔሶ ባ» ጊዴስ።
MAT 9:7 ጉንዳ ኣዴዚካ ዴንዲዲ ባሶ ቢዴስ።
MAT 9:8 ዴሬይካ ሄሳ ቤኢዲ ማላሌቴꬃኒኔ ባቦን ኩሚዲ ሃይሳ ማላ ጎዳቴꬅ ኣሳስ ኢሚዳ ጾሳ ጋላቲዴስ።
MAT 9:9 ዬሱሲ ሄፔ ዴንዲዲ ቢሼ ኢሲ ማቶሳ ጌቴቲዛዴይ ቃራጻ ቃንጺሲዛሶን ኡቲዳይሳ ቤኢዲ፥ «ታና ካላ!» ጊን ዴንዲዲ ኢዛ ካሊዴስ።
MAT 9:10 ዬሱሲ ማቶሳሶን ማዳ ቦላ ዲሺን ዳሮ ቃራጻ ቃራጺዛይቲኔ ናጋራንቻቲ ኢዛኮ ዪዲ ኢዛራኔ ኢዛ ካሊዛይታራ ኢሲፌ ማናስ ኡቲዳ።
MAT 9:11 ፋርሳዌቲ ሄሳ ቢዪዲ ዬሱሳ ካሊዛይታ፥ «ኢንቴና ታማርሲዛይሲ ቃራጻ ቃንጺሲዛይታራኔ ናጋራንቻታራ ዋኒ ኢስታራ ኢሲፌ ካꬅ ሚዜ?» ጊ ኦይቺዳ።
MAT 9:12 ዬሱሲካ ኢስቲ ጊዛይሳ ሲዪዲ ኢስታስ፥ «ኣኪሜይ ኮሺዛይ ሳኬቲዳይታስ ኣቲን ሳኬቶንታ ፓጻታስ ጊዴና።
MAT 9:13 ሄሳ ጊሻስ፥ ‹ኢንቴ ቢዲ ያርሾ ጊዶንታ ማሮቴꬅ ዶሳይስ› ጊዛ ቃላ ቢርሼꬅ ታማርቴ። ናጋራንቻታ ጼይጋና ያዲስ ኣቲን ጺሎታ ጼይጋናስ ያቤኬ» ጊዴስ።
MAT 9:14 ጻማቂዛ ዮሃኒሳ ካሊዛይቲ ዬሱሳኮ ዪዲ፥ «ኑኒኔ ፋርሳዌቲ ጾሚሺን ኔና ካሊዛይቲ ኣዛስ ጾሜቴኔ?» ጊ ኦይቺዳ።
MAT 9:15 ዬሱሲ ኢስታስ፥ «ሚሺራ ላጌቲ ሚሺራዚ ኢስታራ ዲሺን ሙዞታና ቤሲዜ? ሚሺራይ ኢስታፌ ኤኬታና ዎዴይ ያና፤ ኢስቲ ሄ ዎዴ ጾማና።
MAT 9:16 «ጋልኣ ማይኦ ቦላ ኦራꬃ ዎሶ ዎꬂ ሲኪዛ ኣሲ ዴና። ጋልኣ ቦላ ኦራꬅ ዎꬂ ሲኪኮ ኦራꬃዚ ጋልኣዛ ፔꬌሬꬂዲ ዳኬꬅ ሃ ዳርሳና።
MAT 9:17 ኦኒካ ኦራꬃ ዎይኔ ኡሹ ጋልኣ ሉካሞን ጉጄና። ጉጂዛ ጊዲኮ ሉካሞዚ ꬉቃና፤ ዎይኔ ጫጄዚካ ጉካና፤ ሉካሞዚካ ጎኣይ ባይንዳዝ ጊዳና። ጊዶ ኣቲን ኦራꬃ ዎይኔ ጫጄይ ኦራꬃ ሉካሞዛን ጉጄቴስ። ሄሳ ማላራ ዎይኔ ጫጄዚኔ ሉካሞዚ ሎኦን ናጌቲዲ ጋምኤስ» ጊዴስ።
MAT 9:18 ዬሱሲ ኣሳ ሃሳይሶን ዲሺን ኢሲ ሹሜይ ኢዛ ሲንꬃን ኩንዲዲ፥ «ታስ ና ዳራ ሃይቃና ጋዉስ። ኢዛ ፓጻ ዳና ማላ ያዳ ኔ ኩሼ ኢዚ ቦላ ዎꬃርኪ?» ጊን፥
MAT 9:19 ዬሱሲ ዴንዲዲ ኢዛራ ቢዴስ፤ ዬሱሳ ካሊዛይቲካ ኢዛራ ቢዳ።
MAT 9:20 ታማኔ ናምኡ ላይꬅ ኩሜꬅ ኢዚፔ ሱꬂ ጉኪዛ ኢሲ ማጫሳያ ዬሱሳፔ ጉዬራ ያዳ ኢዛ ኣፋላ ማጫራ ቦቻዱስ።
MAT 9:21 ኢዛ ሄሳ ኦꬂዳይ፥ «ኢዛ ኣፋላ ማጫራ ታ ቦቺዳኮ ፓጻና» ጊዛ ኣማኖይ ኢዚ ዎዚናን ዲዛ ጊሻስ ቦቻዱስ።
MAT 9:22 ዬሱሲካ ጉዬ ሲሚ ጼሊዲ ማጫሳዮ፥ «ኣይኮይ ባ፥ ታ ናዬ! ኔና ኔ ኣማኖይ ፓꬂዴስ» ጊን ማጫሳያ ሄራካ ፓጻ ጋዱስ።
MAT 9:23 ዬሱሲካ ሹሜዛ ሶ ማታ ጋኪሺን ዴሬይ ዛዬራኔ ዲንኬራ ዋሲሼ ዬኪዛይሳ ቤኢዲ፥
MAT 9:24 «ኪቺቴ! ናያ ꬊስካዱስ ኣቲን ሃይቃቤኩ» ጊን ኢስቲ ኢዛ ቦላ ሚጪዳ።
MAT 9:25 ዴሬይ ዉሪ ኬꬃፌ ኬዚን ኢዚ ኬꬃ ጌሊዲ ናይ ኩሼ ኦይኪዴስ፤ ናያካ ዴንዳ ኤቃዱስ።
MAT 9:26 ኢዛ ጎባቴꬂ ሄ ዴሬ ኡባን ሴቴቲዴስ።
MAT 9:27 ዬሱሲካ ሄፔ ቢሺን ናምኡ ቆቄቲ፥ «ዳዊቴ ናዉ! ኑና ማራርኪ!» ጊዲ ዋሲሼ ኢዛ ጌዶ ካሊዳ።
MAT 9:28 ቆቄቲካ ዬሱሲ ጌሊዳ ኬꬃ ኢዛ ካሊዲ ጌሊዳ። ዬሱሲካ ኢስታስ፥ «ታ ኢንቴ ኣይፌ ፓꬃና ዳንዳይዛይሳ ኣማኔቲ?» ጊዲ ኦይቺዴስ። ኢስቲካ፥ «ኤ፥ ጎዶ!» ጊዳ።
MAT 9:29 ሄሳፌ ጉዬ ዬሱሲ ኢስታ ኣይፌ ቦቺዲ፥ «ኢንቴ ኣማኖ ማላ ኢንቴስ ሃኖ!» ጊዴስ።
MAT 9:30 ኢስታ ኣይፌይካ ጼሊዴስ። ዬሱሲካ፥ «ሃይሳ ኦኒካ ኤሮንታ ማላ» ጊዲ ሚንꬂ ዮቲዴስ።
MAT 9:31 ጊዶ ኣቲን ኢስቲ ቢዲ ሄራ ኡባሶን ዬሱሳ ጊሻስ ዎሬሲዳ።
MAT 9:32 ኢስቲ ሄፔ ኬዚሺን ዳይዳንꬂ ኦይኪዳ ኢሲ ዶና ዱዴ ኣስ ዬሱሳኮ ኤሂዳ።
MAT 9:33 ዳይዳንꬃዚ ኬዚዳፔ ጉዬ ሄ ዶና ዱዴ ኣዴዚ ሃሳያ ኦይኪዴስ፤ ዴሬዚካ ማላሌቲዲ፥ «ሃይሳ ማላ ሃኖይ ኢስራኤሌ ቢታን ሃኒን ኑ ቤዪ ኤሮኮ» ጊዳ።
MAT 9:34 ጊዶ ኣቲን ፋርሳዌቲ ዛሪዲ ኢዛ፥ «ዳይዳንꬅ ኬሲዛይ ዳይዳንꬃታ ሃላቃና» ጊዳ።
MAT 9:35 ዬሱሲ ኣይሁዳታ ዎሳ ኬꬃን ኣይሁዳታ ታማርሲሼኔ ጾሳ ካዎቴꬃ ሚሺራቾ ቃላ ዮቲሼ ቃሴካ ሃርጌ ኡባፌ ኣሳ ፓꬂሼ ጉታታን ጉታታን ዩዪዴስ።
MAT 9:36 ኣሳይ ዉሪ ሄሚዛዴይ ባይንዳ ዶርሳ ማላ ኬሂ ሜቶቴቲዲ ጼሊዛይ ባይንዳዴ ጊዲዳይሳ ቤኢዳ ዎዴ ኢስታስ ዳሮ ሚሼቲዴስ።
MAT 9:37 ባና ካሊዛይታስካ፥ «ማጻ ጋኪዳ ካꬃይ ዳሮ ሺን ማጺ ሺሺዛይቲ ጉꬃታ።
MAT 9:38 ሄሳ ጊሻስ ካꬃ ጎዳይ ካꬃኮ ኦሳንቻታ ዬዳና ማላ ዎሲቴ!» ጊዴስ።
MAT 10:1 ዬሱሲ ባና ካሊዛ ታማኔ ናምኣታ ባኮ ጼይጊዲ፥ ኢስቲ ቱና ኣያናታ ኬሳና ማላ ቃሴካ ሳኮፔኔ ሃርጌፌ ፓꬃና ማላ ኢስታስ ጎዳቴꬅ ኢሚዴስ።
MAT 10:2 ታማኔ ናምኡ ሃዋሬታ ሱንꬃይ ሃይሳፌ ካሊዛይሳ፤ ኮይሮይ ጴጽሮሳ ጌቴቲዛ ሲሞና፥ ኢዛ ኢሻ ኢንዲራሳ፥ ዛብዶሳ ና ያቆቤኔ ኢዛ ኢሻ ዮሃኒሳ፥
MAT 10:3 ፒሊጶሳኔ ባርቴሌሞሳ፥ ቶማሳኔ ቃራጻ ሺሺዛ ማቶሳ፥ ኢልፊዮሳ ና ያቆቤኔ ታዶሳ፥
MAT 10:4 ባ ባጋስ ሚሼቲዛ ሲሞናኔ ጉዬፔ ዬሱሳ ሃይቆስ ኣꬂ ኢሚዳ ኣስቆሮንቶ ዩሁዳ።
MAT 10:5 ሃይታ ታማኔ ናምኣታ ኡባ፥ «ኣይዛቤታ ጊዶ ቦፒቴ፤ ሳማሪያ ኣሳ ካታማ ጌሎፒቴ።
MAT 10:6 ጊዶ ኣቲን ኢስራኤሌ ዴራ ጋርሳፌ ꬋይዳ ዶርሳታኮ ቢቴ።
MAT 10:7 ቢዲኔ፥ ‹ሳሎ ካዎቴꬂ ማቲዴስ!› ጊዲ ሳባኪቴ።
MAT 10:8 ሃርጋንቻታ ፓꬂቴ፥ ሃይቂዳይታ ሃይቆፔ ዴንꬂቴ፥ ኢንቺራቻ ሃርጊዛይታ ጌሺቴ፤ ዳይዳንꬃታ ኬሲቴ፤ ኢንቴ ሜላ ኤኪዳይሳ ሜላ ኢሚቴ፤
MAT 10:9 ዎርቃ፥ ቢራ ዎይኮ ጻርቂማላ ጊዲን ኢንቴ ኪሴን ኦይኮፍቴ።
MAT 10:10 ኦሳንቻስ ሃቺስ ሃቺስ ጊዲዛዝ ኮሺዛ ጊሻስ ኢንቴ ኦጌስ ጊዲ ሺንቄ፥ ኮሾንታ ማይኦ፥ ጫማ ዎይኮ ጉፌ ኤኪ ቦፒቴ።
MAT 10:11 «ኢሲ ካታማ ዎይኮ ኢሲ ጉታ ኢንቴ ጌሊዛ ዎዴ ኢንቴና ሞካናዴ ኮዪ ዴሚዲ ኢዛ ኬꬃን ሼምፒቴ፤ ሄፔ ኬዛና ጋካናስ ሄን ዲሺቴ።
MAT 10:12 ኢንቴ ኦና ኬꬂካ ጌልሼ፥ ‹ሳሮ› ጊቴ።
MAT 10:13 ሄ ኬꬃይ ሳሮታይ ቤሲዛ ኬꬄ ጊዲኮ ኢንቴ ሳሮታይ ሄ ኬꬃስ ጊዶ፤ ሳሮታይ ቤሶንታ ኬꬄ ጊዲኮ ኢንቴ ሳሮታይ ኣጊ ኢንቴስ ሲሞ።
MAT 10:14 ኣይ ኣሲካ ኢንቴና ሞኪ ኤካናሲኔ ኢንቴ ጊዛ ሲያናስ ኮዮንታዴ ጊዲኮ ሄሳዴ ኬꬃፌ ዎይኮ ሄ ካታማፔ ኬዚሼ ኢስታ ቦላ ዪዛ ጎሜፔ ኢንቴ ኣቲዳይሳስ ማርካ ጊዳና ማላ ኢንቴ ቶሆ ቦላ ዲዛ ጉዱላ ፒቲዲ ኬዚቴ።
MAT 10:15 ታ ኢንቴስ ቱሙ ጋይስ፤ ፒርዳ ጋላስ ሄ ካታማይ ቦላ ጋካና ፒርዳይ ሶዶሜ ቦላኔ ጋሞራ ቦላ ጋኪዳ ፒርዳፌ ዴጾ ጊዳና።
MAT 10:16 «ታ ኢንቴና ዶርሳ ማላ ካና ሱይቴታ ጊዶራ ኪታይስ። ሄሳ ጊሻስ ሾሻ ማላ ጪንጫታኔ ሃራጴ ማላ ኣሽኬታ ጊዲቴ።
MAT 10:17 ኣሳይ ኢንቴና ኦይኪዲ ፒርዲዛ ዱላታስ ሺሻና፤ ኣይሁዳቲ ባ ዎሳ ኬꬃን ኢንቴና ጋራፋና፤ ሄሳ ጊሻስ ኢስታፌ ናጌቲቴ።
MAT 10:18 ታ ጋሶን ዴሬ ሃሪዛይታኮኔ ካዎታኮ ኢንቴና ኤፋና፤ ኢስታ ሲንꬃኒኔ ኣማኖንታ ኣሳታ ሲንꬃን ኢንቴ ማርካ ጊዳና።
MAT 10:19 ኢንቴና ኢስቲ ኦይኪዛ ዎዴ፥ ‹ኑ ኣይ ጊ ሃሳይኖ? ዎዝጊ ዛሮ ኢሚኖ?› ጊ ሂርጎፍቴ። ሄ ዎዴ ኢንቴ ጋናዚ ኢንቴስ ኢሜታና።
MAT 10:20 ኢንቴናን ሃሳያናይ ኢንቴ ኣዋ ኣያናፔ ኣቲን ኢንቴና ጊዴኬታ።
MAT 10:21 «ኢሻይ ባ ኢሻ ሃይቆስ ኣꬂ ኢማና፤ ኣዋይ ባ ና ቦላ፥ ናይቲ ባና ዬሊዳይታ ቦላ ማካላቴꬃን ዴንዲዲ ሃራ ኣሳን ዎꬊሳና።
MAT 10:22 ታ ጊሻስ ኣሲ ዉሪካ ኢንቴና ኢጻና። ጊዶ ኣቲን ዉርሴꬅ ጋካናስ ሚኒ ኤቂዳይ ኢዚ ኣታና።
MAT 10:23 ኣሳይ ኢንቴና ኢንቴ ዲዛ ሄራፔ ጎዲኮ ሃራሶ ኪቺቴ! ታ ኢንቴስ ቱሙ ጋይስ፤ ኢንቴ ኢስራኤሌ ካታማ ኡባ ጋኮንታ ዲሺን ታ ኣሳ ናይ ያና።
MAT 10:24 «ኣሽካራይ ጎዳፔ ዎይኮ ካሊዛዴይ ካሌꬂዛዴፌ ኣꬌና።
MAT 10:25 ታማሬይ ባና ታማርሲዛይሳ ማላ ዎይኮ ኣሽካራይ ባ ጎዳ ማላ ጊዲኮ ሄሲ ኢዛስ ጊዳና። ኬꬃ ኣዋ፥ ‹ቢኤሊዜቡላ› ጊኮ ኢዛ ሶ ኣሳ ኣይስ ሄሳፌ ኢታ ጌቴኔ!
MAT 10:26 «ሄሳ ጊሻስ ኢስታስ ባቦፍቴ፤ ጌሜቲዳይ ቆንጮንታ ቆቴቲዳይ ጌሽ ኬዞንታ ኣቴና።
MAT 10:27 ታ ኢንቴስ ꬉማራ ዮቲዳይሳ ፖኦን ሃሳይቴ፤ ሃይꬃን ሲዪዳይሳ ቆንጬን ሃሳይቴ።
MAT 10:28 ኣሾ ዎꬊኮፌ ኣቲን ሼምፖ ዎꬋናስ ዳንዳዮንታይታስ ባቦፍቴ፤ ሄሳፌ ኣሾኔ ሼምፖ ጋꬂ ጋናሜ ታማን ꬋይሳናስ ዳንዳይዛይሳስ ባቢቴ።
MAT 10:29 ኢሲ ሳንቴን ባይዜቲዛ ናምኡ ሲኔ ካፎታፔ ኢሲኒያካ ኢንቴ ሳሎ ኣዋ ሼኔይ ባይንዳ ጮ ኩንዳ ኣቱኩ።
MAT 10:30 ሃራይ ኣቶሺን ኢንቴ ሁኤ ቢናናይካ ታይቦን ዴስ።
MAT 10:31 ሄሳ ጊሻስ ባቦፍቴ። ዳሮ ሲኔ ካፎታፔ ኢንቴ ዋጋይ ኣꬊ ቦንቼቲዳዛ።
MAT 10:32 «ኣሳ ሲንꬃን ታስ ማርካቲዛዴስ ታኒካ ሳሎን ዲዛ ታ ኣዋ ሲንꬃን ኢዛዴስ ማርካታና።
MAT 10:33 ቃሴ ኣሳ ሲንꬃን ታና ካዲዳዴ ታኒካ ሳሎን ዲዛ ታ ኣዋ ሲንꬃን ኢዛ ካዳና።
MAT 10:34 «ታኒ ቢታ ቦላ ሳሮቴꬅ ኤሃናስ ዪዳ ኢንቴስ ሚሳቶፖ፤ ማሻ ኤሃናስ ኣቲን ሳሮቴꬅ ኤሃናስ ያቤኬ።
MAT 10:35 ታኒ ዪዳይ ና ኣዋፔ፥ ማጫ ና ኣይፔ፥ ና ማቾ ቦሎቲፔ ሻካናሳ።
MAT 10:36 ኣሳስ ሞርኬይ ሶ ኣሳ ጊዳና።
MAT 10:37 «ታፔ ኣꬂዲ ባ ኣዋ ዎይኮ ባ ኣዮ ሲቂዛዴይ ታስ ጊዳናስ ቤሴና። ታፔ ኣꬂዲ ባ ኣቱማ ና ዎይኮ፥ ማጫ ና ሲቂዛዴይ ታስ ጊዳናስ ቤሴና።
MAT 10:38 ባ ማስቃሌ ቶኪዲ ታና ካሎንታ ኣሲ ታስ ጊዳናስ ቤሴና።
MAT 10:39 ባ ሼምፖ ኣሻናስ ኮይዛዴይ ꬋይሴስ፤ ባ ሼምፖ ታ ጊሻስ ኣꬂ ኢሚዛዴይ ኣሼስ።
MAT 10:40 «ኢንቴና ሞኪ ኤኪዛዴይ ታናካ ሞኪ ኤኬስ። ታና ሞኪ ኤኪዛዴይ ታና ኪቲዳዴካ ሞኪ ኤኬስ።
MAT 10:41 ኢሲ ናቤ ናቤቴꬃን ሞኪ ኤኪዛዴይ ሄ ናቤዛ ዋጋ ዴማና። ጺሎ ኣስ ኢዛ ጺሎቴꬃ ጊሻስ ሞኪ ኤኪኮ ሄ ጺሎዛ ዋጋ ኤካና።
MAT 10:42 ሄሳ ጊሻስ ታ ኢንቴስ ቱሙ ጋይስ፤ ኦኒካ ሃይታ ጉꬃታፔ ታና ካሊዛዴ ጊዲዳ ጊሻስ ኢሲ ጹኣ ኢርጻ ሃꬅ ኡሺኮ ሂኒስካ ዋጋይ ꬋዬና» ጊዴስ።
MAT 11:1 ዬሱሲካ ባና ካሊዛ ታማኔ ናምኡ ኣሳታስ ኣዛዞ ኢሚ ዉርሲዳፔ ጉዬ ታማርሳናሲኔ ሳባካናስ ጋሊላን ዲዛ ካታማታ ቢዴስ።
MAT 11:2 ዮሃኒሲ ቃሾ ኬꬃን ዲሼ ኪርስቶሲ ኦꬂዛ ሃኖታ ሲዪዲ ባና ካሊዛይታ ኢዛኮ ዬዲዲ፥ «ኣስ ኣሺዛዴይ ያና ጌቴቲዳይ ኔኔዬ? ሃራ ናጊኖ?» ጊዲ ኦይቺዴስ።
MAT 11:4 ዬሱሲካ ዛሪዲ፥ «ቢዲ ኢንቴ ሲዪዳይሳኔ ኢንቴ ቤኢዳይሳ ዮሃኒሳስ ዮቲቴ።
MAT 11:5 ቆቄቲ ጼሌቴስ፤ ዎቤቲ ሄሜቴቴስ፤ ኢንቺራቻ ሃርጊዛይቲ ፓጼቴስ፤ ቱሌቲ ሲዬቴስ፤ ሃይቂዳይቲ ሃይቆፔ ፓጺ ዴንዴቴስ፤ ማንቆታስ ሚሺራቾ ቃላይ ዮቴቴስ።
MAT 11:6 ታናን ꬉጴቶንታዴይ ኣንጄቲዳዴ» ጊዴስ።
MAT 11:7 ዮሃኒሳ ካሊዛይቲ ቢዳፔ ጉዬ ዬሱሲካ ኣሳስ ዮሃኒሳ ጊሻስ፥ «ኣይ ቤያናስ ዱጌ ባዞ ቢዴቲ? ጫርኮይ ቃꬂዛ ሾምቦቆ ቤያናስ ዪዴቲ?
MAT 11:8 ዎይኮ ኣይ ቤያናስ ኬዚዴቲ? ሎኦ ማይኦ ማይኢ ዲዛይታ ቤያና ዪዴቲ? ሎኦ ማይኦ ማይኢዲ ሎኢዛይቲ ካዎታ ኬꬃን ዴቴስ።
MAT 11:9 ሂስቲን ኣይ ቤያና ኬዚዴቲ? ናቤ ቤያና ኬዚዴቲ? ኤ፥ ታ ኢንቴስ ጋይስ፥ ናቤፔ ኣꬊዛይሳ ቤያናሳ።
MAT 11:10 « ‹ኔ ባና ኦጌ ኔስ ጊጊሳናዴ ኔፔ ካሴታ ታ ኔስ ኪታና ጌቴቲዲ ኢዛ ጊሻስ ካሴ ጻፌቲዳዴይ ኢዛኮ!› ጊዴስ።
MAT 11:11 «ታ ኢንቴስ ቱሙ ጋይስ፤ ማጫሳፌ ዬሌቲዳ ኣሳፔ ጻማቂዛ ዮሃኒሳ ሚሳቲዛ ኣሲ ቢታ ቦላ ዴንዲቤና። ጊዲኮካ ጾሳ ካዎቴꬃን ኣስ ኡባፌ ላፋ ኣሲ ዮሃኒሳፔ ኣꬋና።
MAT 11:12 «ጻማቂዛ ዮሃኒሳ ዎዴፔ ሃ ሲሚን ሃኢ ጋካናስ ሳሎ ካዎቴꬃያ ዳሮ ባጼ ቦላ ዳዉስ። ሚኖ ኣሳቲ ጻላ ኢዞ ዴማና።
MAT 11:13 ናቤቲካ ሙሴ ዎጋይካ ዉሪ ዮሃኒሳ ዎዴ ጋካናስ ቡሮፔ ሃናናይሳ ዮቲዳ።
MAT 11:14 ሂስቲኮ ኢንቴ ኤካና ኮይኮ ኢዚ ያና ጌቴቲዳ ኤላሲ ኢዛኮ!
MAT 11:15 ሲዪዛ ሃይꬂ ዲዛ ኣሲ ሲዮ!
MAT 11:16 «ሃይሳ ሃ ዎዴ ኣሳ ኣዛን ሌሚሶ? ጊያን ኡቲዲ ባ ላጌታ፥ ‹ኑ ኢንቴስ ዲꬅ ዲጺን ኢንቴ ዱሪቤኬታ! ዬሆ ዚላስ ዚላሊን ዬኪቤኬታ!› ጊዛ ናይታ ሚሳቴቴስ።
MAT 11:18 ዮሃኒሲ ሙሳፌኔ ኡሻፌ ናጌቲዲ ዪዳ ጊሻስ፥ ‹ኢዚ ዳይዳንꬃራ ዴስ› ጊዳ።
MAT 11:19 ታ ኣሳ ናይ ማሼኔ ኡያሼ ዪን፥ ‹ሃይሲ ሚዲ ካሎንታ ኣሳ፥ ኡሻንቻ፥ ቃራጻ ሺሺዛይታሲኔ ናጋራንቻታስ ላጌኮ!› ጊዳ። ጊዶ ኣቲን ጾሳ ኤራቴꬂ ባ ኦሶን ጺላዱስ» ጊዴስ።
MAT 11:20 ሄሳፌ ጉዬ ዬሱሲ ኢዚ ማላታታ ኦꬂዳ ካታማ ኣሳይ ማሮቴꬃን ጌሎንታ ኣጊዳ ጊሻስ፥ «ኩራዚኔኔ ቤቴሳይዳ! ኢንቴና ኣዬ ኣና! ኢንቴ ቦላ ኦሴቲዳ ማላታይ ጺሮሴ ቦላኔ ሲዶና ቦላ ኦሴቲዳኮ ኢስቲ ማቃ ማይኢዲኔ ቢዲንꬃን ኡቲዲ ቤኒ ማሮቴꬃን ጌላናኮሺን።
MAT 11:22 ሄሳ ጊሻስ ታኒ ኢንቴስ ጊዛይ ፒርዳ ጋላስ ኢንቴፌ ኣꬊ ጺሮሴሲኔ ሲዶናስ ቂጻቴይ ካዉያና።
MAT 11:23 «ሃኔ ቂፊርናሆሜ ፑዴ ሳሎ ꬎቁ ꬎቁ ጋናስ ኮያዲ? ጊዶ ኣቲን ኔኒ ዱጌ ሲኦሌ ዎꬋንዳሳ፤ ኔ ቦላ ኦሴቲዳ ማላታይ ሶዶሜን ኦሴቲዳኮ ሶዶሜይ ሃች ጋካናስ ዳናኮሺን።
MAT 11:24 ሄሳ ጊሻስ ታ ኔና ጊዛይ ፒርዳ ጋላስ ቂጻቴይ ኔፔ ሶዶሜስ ካዉያና» ጊዴስ።
MAT 11:25 ሄ ዎዴ ዬሱሲ፥ «ሳሎኔ ሳኣ ጎዶ! ታ ኣዋዉ! ሃይሳ ዳሮ ኤራንቻታፔኔ ጪንጫታፔ ቆታዳ ቄሪ ናይታስ ኔ ቆንጪሲዳ ጊሻስ ታ ኔና ጋላታይስ።
MAT 11:26 ታ ኣዋዉ! ኤ ሃይሲ ኔ ሲንꬃን ሎኦ ኔ ሼኔ ጊዲ ቤቲዴስ።
MAT 11:27 «ዉሪካ ታ ኣዋፔ ታስ ኢሜቲዴስ፤ ኣዋፔ ኣቲን ናዛ ጊሻስ ኤሪዛ ኣሲ ባ፤ ቃሴ ናዛፔኔ ናዚ ባ ሼኔን ቆንጪሲዳ ኣሳፔ ሃራይ ኣዋ ኤሪዛ ኣሲ ባ።
MAT 11:28 «ቶሆይ ዴጺዳይቶ፥ ዳቡርዳይቶ፥ ኢንቴ ዉሪካ ታኮ ሃ ዪቴ፤ ታኒካ ኢንቴስ ሼምፖ ኢማና።
MAT 11:29 ታ ቃምባራ ቶኪቴ፤ ታፔካ ታማርቴ፤ ታኒ ታ ዎዚናን ኣዳኔ ኣሽኬ፤ ኢንቴ ሼምፖስ ኢንቴ ሼምፖ ዴማና።
MAT 11:30 ታ ቃምባራይ ሻይኮኔ ታ ቶሆይ ካዉሻ» ጊዴስ።
MAT 12:1 ሄሳፌ ጉዬ ዬሱሲ ሳምባታ ጋላስ ካꬃ ጊዶራ ኣꬊ ቢዴስ። ኢዛ ካሊዛይቲካ ጋፊዳ ጊሻስ ቲያ ዱꬂዲ ሺጌቺ ሙስ ኦይኪዳ።
MAT 12:2 ፋርሳዌቲ ሄሳ ቤኢዲ ዬሱሳ፥ «ሄኮ ኔና ካሊዛይቲ ሳምባታ ጋላስ ኦሴታናስ ቤሶንታይሳ ኦꬄቴስ» ጊዳ።
MAT 12:3 ኢዚካ ኢስታስ ዛሪዲ፥ «ዳዊቲኔ ኢዛራ ዲዛ ኣሳቲ ጋፊዳ ዎዴ ኢዚ ኣይ ኦꬂዳኮን ናባቢቤኬቲ?
MAT 12:4 ጾሳ ኬꬄ ጌሊዲ ቄሴታፔ ኣቲን ዳዊቲኔ ኢዛራ ዲዛይቲ ቦቻናስ ቤሶንታ ዱማቲዳ ኡኬꬅ ሚዴስ።
MAT 12:5 ቃሴ ቄሴቲ ሳምባታ ሻሪዲ ጾሳ ኬꬃ ጊዶን ኦሶ ኦꬂኮ ሞሮ ጊዶንታይሳ ሙሴ ዎጋፔ ናባቢቤኬቲ?
MAT 12:6 ጊዲኮካ ታ ኢንቴስ ጊዛይ ጾሳ ኬꬃፌ ኣꬊዛዴይ ሃን ዴስ።
MAT 12:7 ‹ታኒ ያርሾ ጊዶንታ ማሮቴꬅ ዶሳይስ› ጊዛ ቃላይ ኣይ ጉሳኮ ኢንቴ ኤሪዛኮ ጺሎታ ቦላ ፒርዴኬታኮሺን።
MAT 12:8 ኣሳ ናይ ሳምባታስ ጎዳ» ጊዴስ።
MAT 12:9 ሄፔ ኢዚ ኣꬊ ቢሼ ኣይሁዳታ ዎሳ ኬꬅ ጌሊዴስ።
MAT 12:10 ሄንካ ኢሲ ኩሼ ሲሊዳዴይ ዴስ። ዬሱሳ ሞታናስ ጋሶ ኮዪዲ፥ «ሳምባታ ጋላስ ፓꬃናስ ቤሲዜ?» ጊዲ ኢዛ ኦይቺዴስ።
MAT 12:11 ኢዚካ ኢስታ፥ «ኢንቴፌ ኢሳዴ ዶርሲ ሳምባታ ጋላስ ኦላን ጌሊኮ ባ ዶርሳ ኢዚ ጌሊዲ ኦላፌ ጎቺ ኬሲ ኤሬኔ?
MAT 12:12 ሂስቲኮ ኣሲ ዶርሳፌ ኬሂ ኣꬌኔ? ሄሳ ጊሻስ ሳምባታ ጋላስ ሎኦ ኦሶይ ዲጌቴና» ጊዴስ።
MAT 12:13 ቃሴካ ኣዴዛ፥ «ኔ ኩሼ ፒዲሳ!» ጊዴስ፤ ኣዴዚካ ባ ኩሼ ፒዲሲን ሂንኮ ኩሼዛ ማላ ፓጻ ጊዲዴስ።
MAT 12:14 ጊዶ ኣቲን ፋርሳዌቲ ሄፔ ኬዚዲ፥ ዬሱሳ ዎስቲ ኦይኪ ዎꬋናኮ ባ ጊዶን ዞሬቲዳ።
MAT 12:15 ዬሱሲ ኢስታ ቆፋ ኤሪዲ ሄፔ ሃራሶ ሼርኢ ጊዴስ። ዳሮ ዴሬይ ኢዛ ካሊዴስ፤ ሃርጋንቻታካ ኡባ ፓꬂዴስ።
MAT 12:16 ኢዚ ኦናኮኔ ኣሳስ ዮቶንታ ማላ ኢስታ ኣዛዚዴስ።
MAT 12:17 ሄሲካ ሃኒዳይ ናቤ ኢሳያሳን፥ «ታ ዶሪዳይኔ ታ ኢዛን ኡፋዬቲዛ ታ ናይ ሃይሳኮ! ታ ኣያና ታ ኢዛ ቦላ ዎꬃና፤ ኢዚካ ኣማኖንታ ዴሬታስ ቱሙ ፒርዳ ኣዋጃና፤ ማርሼቴና፤ ዎይኮ ዋሴና። ኢዛስ ቃላይካ ካሬን ሲዬቴና፤ ሱሬ ፒርዳ ጾኖስ ጋꬃና ጋካናስ ዲንጬቲ ኡቲዳ ሾምቦቆካ ሜንꬄናኔ ጩዋቲዛ ሙቃዳካ ቶይሴና፤ ኣይዛቤቲ ኢዛ ኡፋይሳን ናጋና» ጌቴቲ ዮቴቲዳ ቲንቢቴ ቃላይ ፖሌታና።
MAT 12:22 ሄሳፌ ጉዬ ዳይዳንꬂ ኦይኪን ጼላናሲኔ ሃሳያናስ ዳንዳዮንታ ኢሲ ኣስ ዬሱሳኮ ኤኪ ዪዳ። ዬሱሲካ ኢዛ ፓꬂን ኣዴዚ ጼላናሲኔ ሃሳያናስ ዳንዳይዴስ።
MAT 12:23 ኣሳይ ዉሪካ ማላሌቲዲ፥ «ሃይሲ ኣዴዚ ዳዊቴ ናሻ?» ጊዴስ።
MAT 12:24 ጊዶ ኣቲን ፋርሳዌቲ ሄሳ ሲዪዲ፥ «ሃይሲ ኣዴዚ ዳይዳንꬅ ኬሲዛይ ዳይዳንꬃ ሃላቃ ቢኤሊዜቡላ ዎልቃን ጻላ ጊዳናስ ቤሴስ» ጊዳ።
MAT 12:25 ዬሱሲካ ኢስታ ቆፋ ኤሪዲ፥ «ባ ጊዶን ኢሶይ ኢሳፌ ሻኬቲዛ ካዎቴꬂ ዉሪካ ኩንዳና፤ ባ ጊዶን ሻኬቲዛ ካታማይ ዎይኮ ኬꬃ ኣሲ ሚኔና።
MAT 12:26 ጻላኤይ ጻላኤ ኬሲዛ ጊዲኮ ጻላኤይ ባ ጊዶን ሻኬቲዴስ ጉሳ። ሄሳꬆ ሃንኮ ኢዛ ካዎቴꬂ ዋኒ ሚናና ዳንዳይዜ?
MAT 12:27 ታኒ ቢኤሊዜቡላ ዎልቃን ኬሲዛ ጊዲኮ ኢንቴ ናይቲ ኣዛ ዎልቃን ኬሳኔ? ሄሳ ጊሻስ ኢንቴ ናይቲ ኢንቴ ቦላ ፒርዳና።
MAT 12:28 ጊዶ ኣቲን ታኒ ዳይዳንꬅ ኬሲዛይ ጾሳ ኣያናን ጊዲኮ ጾሳ ካዎቴꬂ ኢንቴኮ ዪዴስ ጉሳ።
MAT 12:29 «ዎይኮ ኢሲ ኣሲ ዎልቃራ ዲዛዴ ኬꬄ ጌሊዲ ሚሼ ቦንቃና ኮይኮ ካሴቲዲ ሄ ዎልቃራ ዲዛ ኣዴዛ ኦይኪ ቃቾንታ ዎስቲ ቦንቃኔ? ቃቺዳፔ ጉዬ ቦንቃና ዳንዳዬስ።
MAT 12:30 «ታናራ ጊዶንታዴይ ታናራ ኤቄቴስ፤ ታናራ ኢሲፌ ሺሾንታ ኣሲ ዉሪካ ላሌስ።
MAT 12:31 ሄሳ ጊሻስ ታ ኢንቴስ ቱሙ ጋይስ፤ ናጋራ ኦሶይኔ ጫሺ ዉሪ ኣሳስ ኣቶ ጌቴታና ሺን ጺሎ ኣያና ጫዪዳዴይ ማሬቴና።
MAT 12:32 ኣይ ኣሲካ ኣሳ ና ቦላ ሃሳይዛ ኢታ ቃላ ጊሻስ ማሬታናሺን፥ ጺሎ ኣያና ቦላ ሃሳይዛ ኢታ ቃላይ ጊዲኮ ሃይሳ ሃ ዎዴን ጊዲን ዎይኮ ቡሮ ያና ዎዴን ጊዲን ማሮይ ዴና።
MAT 12:33 «ሚꬂ ዉሪ ኣይፌን ኤሬቲዛይሳ ማላ ኢንቴ ሎኦ ኣይፌ ዴማናስ ኢንቴስ ሎኦ ሚꬂ ዶ፤ ኢንቴስ ኢታ ሚꬂ ዲዛ ጊዲኮ ኢንቴ ኢታ ኣይፌ ኤካና።
MAT 12:34 ኢንቴኖ ማርዜራ ዲዛ ሾሻቶ! ኢንቴ ኢታታ ጊዲ ኡቲዲ ዋኒ ሎኦ ሃሳያናስ ዳንዳዬቲ? ኡሎ ጊዶን ኩሚዳዚ ዶናራ ሃሳዬቴስ።
MAT 12:35 «ሎኦ ኣሲ ባ ዎዚናን ኩንꬂ ዎꬂዳ ሎኦ ቆፋፔ ሎኦ ሃሳዬስ፤ ኢታ ኣሲካ ባ ዎዚናን ኩንꬂ ዎꬂዳ ኢታቴꬃፌ ኢታ ዮኦ ኬሴስ።
MAT 12:36 ጊዶ ኣቲን ታ ኢንቴስ ጊዛይ ኣሳይ ባ ሃሳይዳ ሃዳ ቃላ ኡባ ጊሻስ ፒርዳ ጋላስ ዉሪካ ኦይሼታና።
MAT 12:37 ጋሶይካ ኔ ቃላፔ ዴንዲዳይሳን ኔ ጺላዳ ኣታናኔ ኔ ቃላፔ ዴንዲዳይሳን ኔ ቦላ ፒርዴታና» ጊዴስ።
MAT 12:38 ሄሳፌ ጉዬ ኢሲ ኢሲ ሙሴ ዎጋ ታማርሲዛይቲኔ ፋርሳዌቲ ዬሱሳ፥ «ኣስታማሬ! ኑ ኔፔ ማላሊሲዛ ማላታ ቤያና ኮዮስ» ጊዳ።
MAT 12:39 ኢዚ ኢስታስ ዛሪዲ፥ «ሃ ኢታኔ ላይማ ዬሌታይ ማላታ ኦይቼስ፤ ጊዶ ኣቲን ናቤ ዮናሳ ማላታፔ ኣቲን ሃራ ማላታይ ኢሜቴና።
MAT 12:40 ዮናሲ ጊታ ሞሌ ኡሎ ጊዶን ሄꬑ ቃማኔ ሄꬑ ጋላስ ጋምኢዳ ማላ ኣሳ ናይካ ሄꬑ ጋላሲኔ ሄꬑ ቃማ ቢታ ጋርሳን ጋምኣና።
MAT 12:41 ናናዌ ኣሳይ ፒርዳ ጋላስ ሃይሳ ሃ ዬሌታራ ዴንዲዲ ሃ ዬሌታ ቦላ ፒርዳና፤ ጋሶይካ ናናዌ ኣሳይ ዮናሳ ማርካቴꬃን ማሮቴꬅ ጌሊዳ ጊሻሳ። ሄኮ ዮናሳፔ ኣꬊዛዴይ ሃን ዴስ።
MAT 12:42 ዱጌሃ ዴሬ ካዎያ ሶሎሞኔ ኤራቴꬅ ሲያናስ ቢታ ጋጻፔ ዴንዳዳ ዪዳ ጊሻስ ፒርዳ ጋላስ ኢዛ ሃይሳ ሃ ዬሌታራ ዴንዳዳ ሃ ዬሌታ ቦላ ፒርዳና። ሄኮ ሶሎሞኔፔ ኣꬊዛዴይ ሃይሳን ዴስ።
MAT 12:43 «ቱና ኣያናይ ኣሳፔ ኬዚዲ ሼምፖ ዴማናስ ሃꬂ ባይንዳ ሜላ ቢታን ዳቡሬስ። ጊዶ ኣቲን ባ ኮይዛ ሼምፖዛ ዴሜና።
MAT 12:44 ሄሳፌ ቃሴ ካሴ ታ ዲዛሶ ሲማ ባና ጊዲ ቤኒሶ ኢዚ ሲሚሺን ካሴ ኢዚ ዲዛሶይ ኣይኮይካ ባይንዳ ሜላ ኬꬄ ጊዲዲ ጌዪዳይሳኔ ጊጌቲ ዲዛይሳ ዴሜስ።
MAT 12:45 ሄሳፌ ቢዲ ሃራ ባፔ ኢቲዛ ላፑን ኢታ ኣያናታ ባናራ ኤኪዲ ዬስ። ኢስቲካ ሄ ኣዴዛን ጌሊዲ ዴኣና። ሄ ኣዴዛስ ካሴ ዱሳፌ ጉዬ ዱሳይ ኢታ ጊዳና። ሃይሳ ኢታ ዬሌታስካ ሄሳ ማላ ሃናና» ጊዴስ።
MAT 12:46 ዬሱሲ ኣሳስ ዮቲሺን ኢዛ ኣዬያኔ ኢሻቲ ኢዛ ዮቻና ኮዪዲ ካሬን ኤቂዳ።
MAT 12:47 ኢሲ ኣሲ፥ «ሄኮ ኔ ኣያኔ ኔ ኢሻቲ ኔና ሃሳይሳናስ ካሬን ኤቂዲ ኔና ኮዬቴስ» ጊዴስ።
MAT 12:48 ዬሱሲካ፥ «ታ ኣያ ኦኔ? ታ ኢሻቲች! ኢስቲ ኦናንቴ?» ጊዴስ።
MAT 12:49 ባ ኩሼራ ባና ካሊዛይታኮ ማላቲዲ፥ «ታ ኣያኔ ታ ኢሻቲ ሃይታንታ።
MAT 12:50 ሳሎን ዲዛ ታ ኣዋ ሼኔ ኦꬂዛይቲ ዉሪካ ታስ ኢሻ፥ ሚቾኔ ኣዮ» ጊዴስ።
MAT 13:1 ሄ ጋላስ ዬሱሲ ኬꬃፌ ካሬ ኬዚዲ ኣባ ላንቄን ኡቲዴስ።
MAT 13:2 ዳሮ ዴሬይ ኢዛ ዩዪ ኣꬊ ጊዶꬂዳ ጊሻስ ኣሳ ኣባ ጋጻን ኣጊዲ ዎጎሎ ጊዶ ጌሊ ኡቲዲ፥
MAT 13:3 ዳሮ ዮኦ ሌሚሶራ፥ «ኢሲ ጎሻንቻይ ዜሬꬅ ዜራናስ ኬዚዴስ።
MAT 13:4 ኢዚ ዜሪሺን ኢሲ ኢሲ ዜሬꬂ ኦጌ ዶናን ዎꬊን ካፎቲ ዪዲ ማጺ ሚዳ።
MAT 13:5 ኢሲ ኢሲ ዜሬꬂ ሜላኔ ሹቻቲዛ ቢታ ቦላ ዎꬊን ቢታይ ሜላ ቢታ ጊዲዳ ጊሻስ ኤሌ ጫሪዴስ።
MAT 13:6 ጊዶ ኣቲን ኣዋይ ኣዋቲን ሹሊዲኔ ጻጶ ዬዶንታ ኣጊዳ ጊሻስ ሜሊዴስ።
MAT 13:7 ኢሲ ኢሲ ዜሬꬃይ ኣጉንꬃ ጊዶን ዎꬊዴስ፤ ኣጉንꬃይካ ዲጪዲ ጫሬቻ ጩሊዴስ።
MAT 13:8 ሃራ ዜሬꬂካ ኣራዳ ቢታን ዎꬊዲ ኣይፌካ ኣይፊዴስ፤ ኢሶይ ጼቱ፥ ኢሶይ ኡሱፑን ታሙ፥ ኢሶይ ሄꬑ ታሙ ኣይፌ ኢሚዴስ።
MAT 13:9 ሲዪዛ ሃይꬂ ዲዛዴይ ሲዮ!» ጊ ዮቲዴስ።
MAT 13:10 ሄሳፌ ጉዬ ኢዛ ካሊዛይቲ ኢዛኮ ሺቂዲ፥ «ኔ ኣዛስ ሌሚሶራ ዮታይ?» ጊዳ።
MAT 13:11 ኢዚካ ኢስታስ፥ «ሳሎ ካዎቴꬃ ጹራ ኤሮይ ኢንቴስ ኢሜቲዴስ፤ ኢስታስ ጊዲኮ ኢሜቲቤና።
MAT 13:12 ዲዛዴስ ዲዛይሳ ቦላ ጉጄታናኔ ዳራና ሺን ባይንዳዴፌ ሂና ዲዛራካ ኤኬታይቻና።
MAT 13:13 ታ ሃይሳꬆ ሌሚሶራ ዮቲዛይ ኢስቲ ሲዪሼ ኤዝጎንታ ጊሻሲኔ ጼሊሼ ዴሞንታ ጊሻሳ።
MAT 13:14 «ኢሳያሲ፥ ‹ኢንቴ ሲስ ሲያና ሺን ዩሺ ቆፔኬታ፤ ጼሎ ጼላና ሺን ዎዚናን ዎꬄኬታ፤ ዴሬዛ ዎዚናይ ሙሚዴስ፤ ኢስታ ሃይꬃይካ ሲዬና፤ ጼሎንታ ማላ ባ ኣይፌ ቂሊምኢዳ፤ ሄሳ ማላ ጊዶንታኮ ኢስቲ ባ ኣይፌራ ቤኢዲኔ ባ ሃይꬃራ ሲዪዲ ባ ዎዚናን ዩሺ ቆፒዲ ታኮ ሃ ሲሚን ታ ኢስታ ፓꬃናሺን› ጊዳ ቲንቢቴ ቃላይ ኢስታን ፖሌቲዴስ።
MAT 13:16 «ኢንቴ ኣይፌይ ጼሊዛ ጊሻሲኔ ኢንቴ ሃይꬃቲ ሲዪዛ ጊሻስ ኢንቴ ኣንጄቲዳይታ።
MAT 13:17 ታ ኢንቴስ ቱሙ ጋይስ፤ ዳሮ ናቤቲኔ ዳሮ ጺሎ ኣሳቲ ሃኢ ኢንቴ ቤኢዛይሳ ቤያናሲኔ ሃኢ ኢንቴ ሲዪዛይሳ ሲያናስ ኣሞቲዳ ሺን ኢስታስ ሃኒቤና።
MAT 13:18 «ሂስቲኮ ሃኢ ዜሬꬃ ሌሚሶዛ ቢርሼꬅ ሲዪቴ።
MAT 13:19 ካዎቴꬃ ቃላ ሲዪዲ ዩሺ ቆፖንታ ኣይ ኣሳ ዎዚናፔካ ጻላኤይ ዪዲ ዜሬቲዳ ዜሬꬃ ኤሶን ማጺቻና። ሄሲካ ኦጌ ቦላ ዎꬊዳ ዜሬꬃ።
MAT 13:20 ሹቻ ቦላ ዜሬቲዳይሲ ቃላ ኡፋይሳን ሲዪዲ ሄራካ ኡፋይሳን ኤኪዛዴ ሚሳቴስ።
MAT 13:21 ጊዶ ኣቲን ጻጶ ዬዳናስ ዳንዳዮንታ ኣጊዳ ጊሻስ ዳሮ ጋምኦንታ ቃላ ጋሶን ሜቶይኔ ጎዴቴꬂ ዪዛ ዎዴ ኤሌሊ ꬉጴቴስ።
MAT 13:22 ኣጉንꬃ ጊዶን ዜሬቲዳ ዜሬꬃይ ቃላ ሲዪዲ ሃይሳ ሃ ኣላሜዛስ ዳሮ ሜቶቴꬃኒኔ ዱሬቴꬃ ቆፋን ባሌቲዲኔ ጩሌቲዲ ኣይፌ ኢሞንታ ኣሳ ማላ።
MAT 13:23 ሎኦ ቢታን ዜሬቲዳ ዜሬꬃይ ቃሴ ቃላ ሲዪዲ ዩሺ ቆፒዛዴ ሚሳቴስ፤ ሎኦ ኣይፌ ኣይፌስ፤ ኢሶይ ጼቱ፥ ኢሶይ ኡሱፑን ታሙ፥ ኢሶይ ሄꬑ ታሙ ኣይፌ ኢሚዴስ» ጊዴስ።
MAT 13:24 ዬሱሲ ቃሴካ ሃራ ሌሚሶ ኢስታስ፥ «ሳሎ ካዎቴꬂ ባ ጎሻ ጋዴን ሎኦ ዜሬꬅ ዜሪዳዴ ሚሳቴስ።
MAT 13:25 ጊዶ ኣቲን ኣሲ ዉሪ ኢቺዳ ዎዴ ሞርኬይ ዪዲ ጊስቴዛ ጊዶን ሌሾ ዜሪዲ ቢዴስ።
MAT 13:26 ጊስቴዚ ዲጪዲ ኣይፌ ኣይፊዛ ዎዴ ሌሾይካ ኢዛራ ኢሲፌ ቤቲዴስ።
MAT 13:27 «ካꬃ ጎዳዛ ኣሽካራቲ ጎዳዛኮ ሺቂዲ፥ ‹ጎዶ! ኔኒ ኔ ጎሻን ሎኦ ዜሬꬅ ዜራቤኪ? ሃይሲ ሌሾይ ኣዋፔ ዪዴ?› ጊዳ።
MAT 13:28 «ኢዚካ ኢስታስ፥ ‹ሄሳ ሞርኬይ ኦꬂዴስ› ጊዴስ። ኣሽካራቲካ፥ ‹ኑ ቢዲ ሌሾዛ ሾዳና ማላ ኮያይ?› ጊ ኦይቺዳ።
MAT 13:29 «ኢዚካ ኢስታስ፥ ‹ኣካይ ሃኔና፤ ጋሶይካ ኢንቴ ሌሾዛ ሾዲሼ ጊስቴዛራ ጋꬂ ሾዳና፤
MAT 13:30 ኣጊቴ! ማጻ ዎዴይ ጋካናስ ኢሲፌ ዲጮ፤ ሄ ዎዴ ማጺዛይቲ ሌሾዛ ካሴቲዲ ቆሪ ማጺዲ ታማን ጹጋናስ ሚርቄን ሚርቄን ቃቺቴ፤ ጊስቴዛ ቃሴ ሺሺዲ ጎታራን ጌልꬂቴ› ጋዳ ታ ኢንቴስ ዮታና» ጊ ዮቲዴስ።
MAT 13:31 ሃራ ሌሚሶ ኢስታስ፥ «ሳሎ ካዎቴꬂ ኢሲ ኣሲ ባ ጋዴ ጊዶን ዜሪዳ ባርዛፌ ሚꬃ ኣይፌ ማላ።
MAT 13:32 ባርዛፌ ሚꬃ ኣይፌይ ሃራ ሚꬃ ኣይፌ ኡባፌ ዳሮ ላፋ ጊዲኮካ ዲጫዳ ሚꬃ ኡባፌ ጊታ ጊዳዉስ። ሳሎ ካፎቲካ ኢዚ ሃጋ ቦላ ኬጺዲ ዳና ጋካናስ ጊታ ሚꬅ ጊዳዉስ» ጊዴስ።
MAT 13:33 ሃኢካ ሃራ ሌሚሶ ኢስታስ፥ «ሳሎ ካዎቴꬂ ማጫሲ ቡኬሶይ ዴንዳና ማላ ቡኬሶ ጊዶን ጉጂዳ ጉꬃ ኢርሾ ሚሳታዉስ» ጊዴስ።
MAT 13:34 ዬሱሲ ሃይሳ ኡባ ኣሳስ ሌሚሶራ ዮቲዴስ። ሌሚሶይ ባይንዳ ኢሲኖካ ዮቲቤና።
MAT 13:35 ሄሲካ ካሴ ናቤ ዶናን፥ «ታ ዶና ሌሚሶን ታ ዶያና፤ ኣላሜይ ሜꬌቶሶፔ ሃ ሲሚን ቆቴቲዳይሳ ታ ሃሳያና» ጌቴቲ ዮቴቲዳይሲ ፖሌቲዴስ።
MAT 13:36 ሄሳፌ ዬሱሲ ኣሳ ኣጊዲ ሶ ጌሊዴስ። ኢዛ ካሊዛይቲ ኢዛኮ ሺቂዲ፥ «ካꬃ ጊዶን ዲዛ ሌሾዛ ጊሻስ ኔ ዮቲዳ ሌሚሶዛ ቢርሼꬅ ኑስ ዮታ» ጊዳ።
MAT 13:37 ኢዚካ ኢስታስ ዛሪዲ፥ «ሎኦ ዜሬꬅ ዜሪዳይ ኣሳ ና።
MAT 13:38 ጎሻይ ሃይሳ ኣላሜዛ፤ ሎኦ ዜሬꬃይ ካዎቴꬃ ናይታ ጊዲዳይሳ ቤሴስ፤ ሌሾይ ቃሴ ጻላኤ ናይታ።
MAT 13:39 ሌሾዛ ዜሪዲ ቢዳ ሞርኬይ ዳቡሎሳ። ማጻ ዎዴይ ኣላሜ ዉርሴꬅ ጊዲሺን ማጺዛይቲ ጾሳ ኪታንቻታ።
MAT 13:40 «ሌሾይ ቆሬቲዲ ታማን ጹጌቲዛ ማላ ኣላሜ ዉርሴꬃን ሄሳꬆ ሃናና።
MAT 13:41 ኣሳ ናይ ባ ኪታንቻታ ኪታና፤ ኢስቲካ ናጋራስ ጋሶ ጊዲዳይታኔ ኢታ ኦꬂዛይታ ኢዛ ካዎቴꬃ ጊዶፌ ኡባ ቆሪ ኬሳና።
MAT 13:42 ዬሆይ ዲዛሶኒኔ ኣች ጋርጪዛሶን ዳሮ ዎልቃማ ታማን ኢስታ ዬጋና።
MAT 13:43 ሄ ዎዴ ጺሎቲ ባ ኣዋ ካዎቴꬃን ኣርሼ ማላ ፖኣና። ሲዪዛ ሃይꬂ ዲዛዴይ ሲዮ!
MAT 13:44 «ሳሎ ካዎቴꬂ ጋዴ ጊዶን ቆቴቲዳ ሚሼ ሚሳቴስ። ኢሲ ኣሲ ሄ ሚሻዮ ዴሚዲ ዛሪ ቆቲዴስ። ኡፋይሳፌ ዴንዲዳይሳን ቢዲ ባስ ዲዛዝ ኡባ ባይዚዲ ሄ ሚሺያ ዲዛ ቢታ ሻሚዴስ።
MAT 13:45 «ሄሳꬆካ ሳሎ ካዎቴꬂ ኣልኦ ዎርቃ ኮይዛ ዛልኣንቻ ሚሳቴስ።
MAT 13:46 ዳሮ ኣልኦ ጊዲዳ ኢንቁ ጌቴቲዛ ሹች ዴሚዳ ማላ ቢዲ ባስ ዲዛ ኡባ ባይዚዲ ሻሚዴስ።
MAT 13:47 «ቃሴካ ሳሎ ካዎቴꬂ ኣባ ጊዶን ዬጌቲዲ ዱማ ዱማ ሞሌ ኦይኪዳ ሞሌ ጊቴ ሚሳቴስ።
MAT 13:48 ሞሌ ኦይኪዛይቲ ጊቴይ ኩሚን ጎቺዲ ኣባ ላንቄ ኬሲዳ። ሄን ኡቲዲ ሎኦ ሎኦ ሞሌ ቆሪዲ ኬሼን ጉጂዳ። ኢታ ሞሌታ ዎራ ዬጊዳ።
MAT 13:49 ኣላሜ ዉርሴꬃን ሄሳꬆ ሃናና። ኪታንቻቲ ዪዲ ናጋራንቻታ ጺሎታፔ ሻኪዲ ዬኪዛሶኔ ኣች ጋርጪዛሶ ጌዴ ቶኦንታ ታማን ዬጋና።
MAT 13:51 «ዬሱሲ ኢስታ ሃይሲ ዉሪ ኢንቴስ ጌሊዴ?» ጊዴስ። ኢስቲካ «ኤ» ጊዳ።
MAT 13:52 ኢዚካ ዛሪዲ፥ «ሄሳ ጊሻስ ሳሎ ካዎቴꬃ ጹራይ ጌሊዳ ሙሴ ዎጋ ታማርሲዛዴይ ኦኒካ ኢዛስ ሚንጂ ዎꬂዳ ኣልኦ ሚሻፌ ኦራꬂኔ ጋልኣ ሚሽ ኬሲዛዴ ሚሳቴስ» ጊዴስ።
MAT 13:53 ዬሱሲካ ሃይታ ሌሚሶታ ዮቲ ዉርሲዲ ሄፔ ሃራሶ ቢዴስ።
MAT 13:54 ባ ዴሬ ቢዲ ኣይሁዳታ ዎሳ ኬꬃን ኣሳ ታማርሶ ኦይኪዴስ። ኢስቲካ ማላሌቲዲ፥ «ሃይሲ ኣዴዚ ሃይሳ ኤራቴꬃኔ ሃይታ ማላታታ ኦꬃና ዎልቃ ኣዋፔ ዴሚዴ?
MAT 13:55 ሃይሲ ኣናጼዛ ና ዴኔ? ኢዛ ኣዬይ ሱንꬂ ማራሞ ጊዴኔ? ኢዛ ኢሻቲ ያቆቤ፥ ዮሴፌ፥ ሲሞናኔ ዩሁዳ ጊዴቴኔ?
MAT 13:56 ሚቼቲ ኑናራ ዲዛይታ ጊዴቴኔ? ሂስቲን ሃይሲ ኣዴዚ ሃይሳ ኡባ ኣዋፔ ኤኪዴ?» ጊዳ።
MAT 13:57 ሄሳ ጊሻስ ኢስቲ ኢዚ ጊዛይሳ ኤኪቤቴና። ዬሱሲካ ኢስታስ፥ «ናቤይ ባ ዴሬኒኔ ባ ኬꬃን ቦንቼቴና ኣቲን ሃራሶን ቦንቼቴስ» ጊዴስ።
MAT 13:58 ኢስቲ ኣማኖንታ ኣጊዳ ጊሻስ ዳሮ ማላታታ ሄን ኦꬂቤና።
MAT 14:1 ሄ ዎዴ ጋሊላ ዴሬ ሃሪዛ ሄርዶሲ ኣሳይ ዬሱሳ ናሺዛይሳ ሲዪዴስ።
MAT 14:2 ሄርዶሲ ባ ኣሽካራታስ፥ «ሄሳ ጊዲኮ ጻማቂዛ ዮሃኒሲ ሃይቆፔ ዴንዲዲ ዪዴስ ጉሳካ! ሃይሲ ዉሪ ጊታ ማላታይ ኢዛ ኩሼን ኦሴቲዛይ ሄሳሳ» ጊዴስ።
MAT 14:3 ሄርዶሲ ባ ኢሻ ፒሊጶሳ ማቾ ሄሮዲያዲ ጋሶን ዮሃኒሳ ኦይꬂዲ ቃሾ ኬꬃን ዬጊዴስ።
MAT 14:4 ጋሶይካ ዮሃኒሲ ሄርዶሳ፥ «ኔ ኢዞ ኤካና ማላ ዎጋ ጊዴና ጊዳ ጊሻሳ» ጊዴስ።
MAT 14:5 ሄርዶሲካ ዮሃኒሳ ዎꬋናስ ኮዪሺን ኣሳይ ዮሃኒሳ ናቤ ማላ ጼሊዛ ጊሻስ ባቢዴስ።
MAT 14:6 ሄርዶሲ ባ ዬሌታ ጋላስ ሄሮዲያዲ ናያ ዬꬃን ኢዛ ኡፋይሲዳ ጊሻስ ናያ ኢዛ ኦይቺዳዝ ኡባ ኢማናስ ኢዚስ ጫቂዴስ።
MAT 14:8 ናያካ ኣዬይ ዞሬን፥ «ጻማቂዛ ዮሃኒሳ ሁኤ ኬሬን ዎꬃዳ ሃኢ ሃኒን ታስ ኢማ» ጋዱስ።
MAT 14:9 ሄ ዎዴ ካዎዚ ኢዛስ ሚሼቲዴስ። ጊዶ ኣቲን ጫቂዳ ጊሻሲኔ ኢዛራ ዲዛ ኢማꬃታ ጊሻስ ጊዲ ናዪ ኦይሻይ ፖሌታና ማላ ኣዛዚዴስ።
MAT 14:10 ኪቲዲኔ ዮሃኒሳ ዎይኔ ኬꬃን ዲሺን ቆꬌ ቃንጺሲዴስ።
MAT 14:11 ቃንጼቲዳ ሁኤዛ ኬሬን ዎꬂዲ ናይስ ኢሚዳ። ናያካ ኤካዳ ባ ኣዬይስ ኢማዱስ።
MAT 14:12 ዮሃኒሳ ካሊዛይቲ ኢዛ ኣሃ ኤኪዲ ሞጊዲኔ ሃኒዳይሳ ኡባ ዬሱሳስ ዮቲዳ።
MAT 14:13 ሄሳ ሲዪዳ ማላ ዬሱሲ ካሴ ባ ዲዛሶ ኣጊዲኔ ዎጎሎን ጌሊዲ ባርካ ሃራ ኣሲ ባይንዳሶ ቢዴስ። ዴሬይካ ሄሳ ሲዪዲ ካታማይ ዲዛሶፔ ቶሆራ ኢዛ ካሊዴስ።
MAT 14:14 ዬሱሲካ ዎጎሎዛፔ ዎꬊሼ ዳሮ ኣሳ ቤኢዲ ኣሳስ ሚሼቲዴስ። ሳኬቲዛይታካ ፓꬂዴስ።
MAT 14:15 ጋዴይ ቃሚ ቃሚ ቢዛይሳ ቤኢዲ ኢዛ ካሊዛይቲ ኢዛኮ ሺቂዲ፥ «ሃይሲ ኑ ዲዛሶይ ባዞ፤ ጋዴይካ ቃሚ ቃሚ ቢዛ ጊሻስ ጌዴ ጉታታን ጉታታን ቢዲ ባስ ማናዝ ሻማና ማላ ኣሳ ዬዳ» ጊዳ።
MAT 14:16 ጊዶ ኣቲን ዬሱሲካ ኢስታ፥ «ኢንቴ ኣሳስ ማናዝ ኢሚቴ ኣቲን ኣሳይ ባናስ ኮሼና» ጊዴስ።
MAT 14:17 ኢስቲካ ኢዛስ ዛሪዲ፥ «ሃይሳን ኑስ ኢቻሹ ኡኬꬃፌኔ ናምኡ ሞሌፔ ኣቲን ሃራይ ባ» ጊዳ።
MAT 14:18 ኢዚካ ኢስታ፥ «ኣኔ ሄይታ ዲዛይታ ሃ ታስ ኤኪ ዪቴ» ጊዴስ።
MAT 14:19 ቃሴካ ኣሳይ ማታ ቦላ ኡታና ማላ ኣዛዚዴስ። ኢቻሹ ኡኬꬂኔ ናምኡ ሞሌታ ባ ኩሼን ኦይኪዲ ባ ኣይፌ ፑዴ ሳሎ ꬎቁ ሂስቲ ጋላቲዲ፥ ኡኬꬃ ሜንꬂ ባና ካሊዛይታስ ኢሚዴስ። ኢስቲካ ኣሳስ ኢሚዳ።
MAT 14:20 ኣሳይ ዉሪካ ሚዲ ካሊዴስ። ሄሳፌ ጉዬ ኢዛ ካሊዛይቲ ኣሳፔ ሚሺን ኣቲዳይሳ ታማኔ ናምኡ ሌማቴ ኩሜꬅ ሺሺዳ።
MAT 14:21 ሚዳ ኣሳይ ማጫሳቲኔ ጉꬃ ናይቲ ጉጄቶንታ ኣቱማሳይ ጻላ ኢቻሹ ሺ ጊዳናዛ።
MAT 14:22 ሄራካ ኢዛ ካሊዛይቲ ዎጎሎን ጌሊዲ ጌዴ ፒንꬅ ኢዛፔ ካሴቲዲ ፒናና ማላ ኣዛዚዲ ኣሳ ሞይዛናስ ባስ ጉዬ ኣቲዴስ።
MAT 14:23 ዴሬዛ ሞይዚዳፔ ጉዬ ዎሳ ዎሳናስ ባርካ ዙማ ቦላ ኬዚዴስ። ጋዴይ ꬉሚንካ ሄን ዙማ ቦላ ባርካ ዴስ።
MAT 14:24 ሄ ዎዴ ዎጎሎያ ኣባ ካንꬃ ቢሺን ዳምባላይ ዴንዲዲ ዳሮ ሜቶꬆ ኦይኪዴስ።
MAT 14:25 ኦማርስ ኮይሮ ኩቶይ ባቂሺን ዬሱሲ ኣባ ቦላራ ሄሜቲዲ ኢዛ ካሊዛይቲ ዲዛሶ ዪዴስ።
MAT 14:26 ዬሱሳ ካሊዛይቲካ ኢዚ ኣባ ቦላራ ሄሜቲ ዪሺን ቤኢዲ ባቢዳ ጊሻስ ኢዛ ሞይቲሌ ጊዲኔ ዋሲዳ።
MAT 14:27 ዬሱሲ ሄራካ፥ «ኣይኮይ ባ! ታናኮ፤ ባቦፍቴ!» ጊዴስ።
MAT 14:28 ጴጽሮሲ፥ «ጎዶ! ኔና ጊዲኮ ታ ኣባ ቦላራ ሄሜታዳ ኔኮ ባና ማላ ታና ኣዛዛ» ጊዴስ።
MAT 14:29 ዬሱሲ ኢዛ፥ «ሃ ያ!» ጊዴስ። ጴጽሮሲካ ዎጎሎዛፔ ዎꬊዲ ሃꬃ ቦላራ ሄሜቲዲ ዬሱሳኮ ዪዴስ።
MAT 14:30 ጊዶ ኣቲን ጫርኮዛ ዎልቃ ቢዪዲ ባቢዳ ጊሻስ ሃꬃን ሚቴቴꬅ ኦይኪዲ፥ «ጎዶ! ታና ኣሻ!» ጊ ዋሲዴስ።
MAT 14:31 ዬሱሲ ሄራካ ባ ኩሼ ዬዲ ኦይኪዲ፥ «ኔኖ፥ ኣማኖይ ፓጪዳይሶ! ኣዛስ ሲꬋዲ?» ጊዴስ።
MAT 14:32 ዬሱሲኔ ጴጽሮሲ ዎጎሎዛን ጌሊዳ ማላ ጫርኮይ ሲርጲ ጊዴስ።
MAT 14:33 ሄሳፌ ጉዬ ዎጎሎን ዲዛይቲ፥ «ቱሙ ኔኒ ጾሳ ና!» ጊዲ ኢዛስ ጎይኒዳ።
MAT 14:34 ዬሱሲኔ ኢዛ ካሊዛይቲ ኣባ ፒኒዲ ጌንሴሬጼ ጌቴቲዛሶ ጋኪዳ።
MAT 14:35 ሄን ዲዛይቲ ዬሱሳ ጊዲዳይሳ ኤሪዲ፥ ሄ ሄራን ዩዪ ኣꬋናስ ዲዛ ኣሳስ ኪታ ዬዲዳ። ኣሳይካ ሃርጋንቻታ ኡባ ዬሱሳኮ ኤሂዴስ።
MAT 14:36 ሃርጋንቻቲ ኢዛ ኣፋላ ጼራ ጻላ ቦቻና ማላ ዬሱሳ ዎሲዳ። ቦቺዳይቲ ዉሪካ ፓጺዳ።
MAT 15:1 ቃሴካ ዬሩሳላሜፔ ዪዳ ፋርሳዌቲኔ ሙሴ ዎጋ ታማርሲዛይቲ ዬሱሳኮ ሺቂዲ፥
MAT 15:2 «ኔና ካሊዛይቲ ካሴ ኑ ኣዋታ ዎጋ ኣዛስ ꬋይሲዞ? ቁማ ማናስ ኩሼ ሜጬቴቴና» ጊዳ።
MAT 15:3 ዬሱሲካ ኢስታስ፥ «ኢንቴ ኢንቴ ዎጋስ ጊዲ ጾሳ ኣዛዞ ኣይስ ሻሬቲ?
MAT 15:4 ጾሲ፥ ‹ኔ ኣዮኔ ኔ ኣዋ ቦንቻ፤ ባ ኣዋ ቦላ ዎይኮ ባ ኣዪ ቦላ ኢታ ቃላ ሃሳይዳዴይ ሃይቆ!› ጊ ኣዛዚዴስ።
MAT 15:5 ኢንቴ ጊዲኮ ኣይ ኣሲካ ባ ኣዋ ዎይኮ ባ ኣዮ፥ ‹ታ ኢንቴስ ኦꬃናስ ቤሲዛዝ ኣይ ሚሺካ ጾሳስ ያርሾ ኦꬃ ሺሻዲስ› ጊኮ፥
MAT 15:6 ‹ሄ ኣዴዚ ባ ኣዋ ዎይኮ ባ ኣዮ ቦንቺዴስ› ጌታ፤ ሄሳ ጊሻስ ኢንቴ ዎጋ ጊሻስ ጾሳ ቃላ ሻሬታ።
MAT 15:7 ኢንቴኖ ቆꬌፔ ቆሞን ሃኒዛይቶ! ኢሳያሲ ኢንቴ ጊሻስ ዮቲሼ፥ « ‹ሃይሲ ዴሬይ ታና ዶናን ጻላ ቦንቼስ፤ ዎዚናይ ጊዲኮ ታፔ ሃኪዴስ፤ ሜላ ሃዳ ታና ጎይኔስ፤ ኢስታ ቲሚርቴይካ ኣሲ ዎꬂዳ ዎጋ› ጊዲዲ ሲንꬃፌ ሃናናይሳ ዮቲዳይሲ ቱማ» ጊዴስ።
MAT 15:10 ዬሱሲ ኣሳ ባኮ ጼይጊዲ፥ «ሲዪቴ ዎዚናን ዎꬂቴ።
MAT 15:11 ኣስ ቱኒሲዛይ ኢዛዴ ዶናራ ሃ ኬዚዛይሳፌ ኣቲን ዶናራ ዱጌ ጌሊዛይ ቱኒሴና» ጊዴስ።
MAT 15:12 ቃሴ ኢዛ ካሊዛይቲ ኢዛኮ ሺቂዲ፥ «ፋርሳዌቲ ኔ ጊዳይሳ ሲዪዲ ሃንቄቲዳይሳ ኤራዲ?» ጊዳ።
MAT 15:13 ኢዚ ኢስታስ፥ «ታ ኣዋ ሳሎይሲ ቶኮንታ ሚꬂ ዉሪካ ꬎቃሌታና።
MAT 15:14 ኢስታ ኣጋጊቴ፤ ኢስቲ ቆቄቲ ካሌꬂዛ ቆቄታ ጊዲዳ ጊሻስ፥ ቆቄቲ ቆቄ ካሌꬂኮ ናምኣይ ኢሶይ ኢሳራ ኦይኬቲዲ ኣፎን ዉላና» ጊዴስ።
MAT 15:15 ጴጽሮሲ ዬሱሳ፥ «ኔ ዮቲዳ ሌሚሶዛ ኑስ ቢርሻ» ጊዴስ።
MAT 15:16 ኢዚካ፥ «ኢንቴ ሃኢ ጋካናስካ ኤሪቤኬታ ጉሴ?
MAT 15:17 ዶናራ ጌሊዛይ ዉሪ ዱጌ ቃንꬅ ካንꬂዲ ጌዴ ካሬ ኬዚዛይሳ ኤሬኬቲ?
MAT 15:18 ዶናራ ኬዚዛይ ጊዲኮ ዎዚናፔ ፑልቴስ። ኣስ ቱኒሲዛይ ሄሳ።
MAT 15:19 ኢታ ቆፋይ፥ ሼምፖ ዎꬎይ፥ ላይማይ፥ ላይማታናስ ቃቃቶይ፥ ካይሶይ፥ ዎርዶ ማርካቴꬂኔ ኣሳ ሱንꬅ ሞሮይ ዉሪ ዎዚናፔ ፑልቴስ።
MAT 15:20 ኣስ ቱኒሲዛይ ሃይታንታፌ ኣቲን ኩሼ ሜጬቶንታ ሙሲ ኣስ ቱኒሴና» ጊዴስ።
MAT 15:21 ዬሱሲ ሄፔ ኬዚዲ ጺሮሴኔ ሲዶና ጌቴቲዛ ዴሬ ቢዴስ።
MAT 15:22 ኢሲ ካናኔ ማጫስ ዲዛራ ሄ ሄራፔ ኬዛዳ ዬሱሳኮ ያዳ፥ «ጎዶ፥ ዳዊቴ ናዉ! ታስ ሚሼታ! ታ ናያ ቱና ኣያናይ ኦይኪን ኬሃ ዋያዉስ» ጋዳ ዋሳዱስ።
MAT 15:23 ጊዶ ኣቲን ኢዚ ኢሲ ቃላካ ኢዚስ ዛሪቤና። ሂስቲን ሄ ዎዴ ኢዛ ካሊዛይቲ ኢዛኮ ሺቂዲ፥ «ኑና ካላ ካላ ዋዪሲዛ ጊሻስ ኔ ኢዞ ሞይዛ» ጊዲ ኢዛ ኦይቺዳ።
MAT 15:24 ኢዚካ ኢስታስ፥ «ታኒ ኢስራኤሌ ኬꬃፌ ꬋይዳ ዶርሳታኮ ጻላ ኪቴታዲስ» ጊዴስ።
MAT 15:25 ማጫሳያካ ዬሱሳ ቶሆ ቦላ ኩንዳዳ፥ «ጎዶ! ታና ማዳርኪ!» ጋዱስ።
MAT 15:26 ኢዚካ ኢዚስ ዛሪዲ፥ «ናይታ ካꬅ ኤኪዲ ካና ቡቱላታስ ዬጋናስ ቤሴና» ጊዴስ።
MAT 15:27 ኢዛካ፥ «ኤ ጎዶ፤ ቡቱላቲካ ባ ጎዳ ማዳፌ ጋዴን ዎꬊዳ ካꬅ ማጺ ሜቴስ» ጋዱስ።
MAT 15:28 ዬሱሲካ ማጫሳዮ፥ «ሃኔ ማጫሳዬ፥ ኔ ኣማኖይ ጊታ! ኔ ኮዪዳ ማላ ኔስ ሃኖ» ጊዴስ። ማጫሳይ ናያ ሄራካ ፓጻዱስ።
MAT 15:29 ዬሱሲ ሄፔ ዴንዲዲ ጋሊላ ኣባ ላንቄ ቢዲ ሄን ዲዛ ኢሲ ዙማ ቦላ ኬዚ ኡቲዴስ።
MAT 15:30 ቆዳን ዳሮ ዴሬይ ዎቤታ፥ ቆቄታ፥ ሲላታ፥ ሃሳዮንታ ዱዴታ ሃራታካ ዳሮ ሃርጋንቻታ ኤሂዲ ኢዛ ሲንꬃን ዎꬂዴስ፤ ኢዚካ ኢስታ ፓꬂዴስ።
MAT 15:31 ዱዴይ ሃሳይሺን፥ ቶሆ ሲላይ ፓጺሺን፥ ዎቤይ ሲቲ ጊ ሄሜቲሺን፥ ቆቄይ ጼሊሺን ቤኢዲ ኣሳይ ማላሌቲዴስ፤ ኢስራኤሌ ጎዳካ ጋላቲዴስ።
MAT 15:32 ዬሱሲ ባና ካሊዛይታ ጼይጊዲ፥ «ኣሳይ ታናራ ሄꬑ ጋላስ ጋምኢዳ ጊሻሲኔ ማና ካꬂ ባይንዳ ጊሻስ ኣሳይ ታና ሚቼስ። ኦጌ ቦላን ጋፋን ዳቡርዲ ኩንዶንታ ማላ ሜላ ኡሎራ ዬዳና ኮይኬ» ጊዴስ።
MAT 15:33 ኢዛ ካሊዛይቲ፥ «ሃይሳን ኣይኮይካ ባይንዳ ባዞ ቢታን ሃይሳ ኬና ዴሬ ሚዛናስ ጊዲዛ ቁማ ኑ ኣዋፔ ዴማኔ?» ጊዳ።
MAT 15:34 ዬሱሲ ኢስታ፥ «ኢንቴስ ኣፑን ኡኬꬂ ዲዜ?» ጊ ኦይቺን ኢስቲካ፥ «ላፑን ኡኬꬂኔ ቂ ጉꬃ ሞሌቲ ዴቴስ» ጊዳ።
MAT 15:35 ኢዚካ ዴሬዚ ጋዴን ኡታና ማላ ኣዛዚዴስ።
MAT 15:36 ላፑን ኡኬꬃኔ ሞሌዛ ባ ኩሼን ኦይኪዲ ጋላቲዳፔ ጉዬ ሜንꬂዲ ባና ካሊዛይታስ ኢሚዴስ፤ ኢስቲካ ዴራስ ጊሺዳ።
MAT 15:37 ኣሳይ ዉሪካ ሚዲ ካሊዴስ፤ ዬሱሳ ካሊዛይቲ ኣሳፔ ኣቲዳይሳ ላፑን ሌማቴ ኩሜꬅ ሺሺዳ።
MAT 15:38 ሚዳይቲካ ናይቲኔ ማጫሳይ ባይንዳ ኣዴቲ ጻላ ኦይዱ ሺ ጊዲዳ።
MAT 15:39 ዬሱሲ ዴሬዛ ሞይዚዳፔ ጉዬ ዎጎሎን ጌሊዲ ሜጊዶኔ ጌቴቲዛሶ ቢዴስ።
MAT 16:1 ፋርሳዌቲኔ ሳዱቃዌ ጌቴቲዛይቲ ዬሱሳኮ ሺቂዲ ኢዛ ፓጫናስ «ሳሎፔ ኑና ማላታ ቤሳ» ጊዲ ኦይቺዳ።
MAT 16:2 ኢዚካ ኢስታስ፥ «ኦማርሳ ዎዴ ሳሎይ ዞኢኮ፥ ‹ጋዴይ ኣዋታና› ጌታ።
MAT 16:3 ዎንታ ቦላ፥ ‹ሳሎይ ዴጺኮ ሃች ኢራይ ቡካና› ጌታ፤ ሳሎ ሜꬋ ጼሊዲ ሻኪ ኤሬታ ሺን ታ ያና ዎዴ ማላታ ሻኪ ኤራናስ ዳንዳዬኬታ።
MAT 16:4 ሃይሲ ኢታኔ ላይማ ዬሌታይ ማላታ ኮዬስ፤ ጊዶ ኣቲን ዮናሳ ማላታፔ ኣቲን ሃራ ማላታይ ኢዛስ ኢሜቴና» ጊዴስ። ዬሱሲ ኢስታ ሄን ኣጊዲ ሃራሶ ቢዴስ።
MAT 16:5 ኣባ ፒኒዳ ማላ ዬሱሳ ካሊዛይቲ ቁማ ኤኪ ባናይሳ ባሌቲዳ።
MAT 16:6 ዬሱሲካ፥ «ቆፒቴ፤ ፋርሳዌታ ኢርሾፌኔ ሳዱቃዌታ ኢርሾፌ ናጌቲቴ» ጊዴስ።
MAT 16:7 ኢስቲ ቃሴ ባ ጊዶን፥ «ኑኒ ካꬅ ኦይኮንታ ጊሻስ ሄሳ ጊዴስ» ጊዲ ኢሶይ ኢሳራ ሃሳዬቲዳ።
MAT 16:8 ዬሱሲካ ኢስታ ቆፋ ኤሪዲ፥ «ኢንቴኖ ኣማኖይ ፓጪዳይቶ! ካꬅ ኦይኮንታ ጊሻስ ኣዛስ ኢሶይ ኢሳራ ሃሳዬቴቲ?
MAT 16:9 ኢቻሹ ኡኬꬂ ኢቻሹ ሺ ኣሳስ ጊዲዲ ኣፑን ሌማቴይ ቲርፒን ኢንቴ ዴንꬂዳኮ ዩሺ ቆፔኬቲ?
MAT 16:10 ሄሳꬆካ ላፑን ኡኬꬂ ኦይዱ ሺ ኣሳስ ጊዲዲ ኣፑን ሌማቴይ ቲርፒን ኢንቴ ዴንꬂዳኮ ዎዚናን ዎꬂቤኬታ ጉሴ?
MAT 16:11 ሂስቲን ታ ኢንቴስ ዮቲዳይ ካꬃ ጊሻስ ጊዶንታይሳ ኣይስ ዩሺ ቆፔኬቲ? ሃኢካ ፋርሳዌታ ኢርሾፌኔ ሳዱቃዌታ ኢርሾፌ ናጌቲቴ» ጊዴስ።
MAT 16:12 ሃኢ ኢዚ ኢስታ ቆፍሲዛይ ቡኬሶ ዴንꬃናስ ጉጂዛ ኢርሾ ጊሻስ ጊዶንታ ፋርሳዌታኔ ሳዱቃዌታ ቲሚርቴፌ ናጌታና ማላ ጊዲዳይሲ ኢስታስ ጌሊዴስ።
MAT 16:13 ዬሱሲ ቂሳሪያ ፒሊጲሲዮሴ ጌቴቲዛ ቢታ ጋኪዳ ዎዴ ባና ካሊዛይታ፥ «ኣሳይ ታና ኣሳ ና ኦና ጊዜ?» ጊዲ ኦይቺዴስ።
MAT 16:14 ኢስቲካ፥ «ኢሲ ኢሲ ኣሳይ፥ ‹ጻማቂዛ ዮሃኒሳ› ጌስ፤ ባጋ ኣሳይ፥ ‹ኤላሳ› ጌስ፤ ባጋይ፥ ‹ኤርማሳ ዎይኮ ናቤታፔ ኢሳ ጊዶንታ ኣጌና› ጌስ» ጊዳ።
MAT 16:15 ኢዚካ ኢስታ፥ «ኢንቴ ታና ኦና ጌቲ?» ጊዴስ።
MAT 16:16 ሲሞና ጌቴቲዛ ጴጽሮሲ፥ «ኔኒ ኪርስቶሳ ዴኦ ጾሳ ና ጊዲኪ?» ጊዲ ዛሪዴስ።
MAT 16:17 ዬሱሲ፥ «ዮና ና ሲሞና! ኔኒ ኣንጄቲዳዴ! ኔስ ሃይሳ ቆንጪሲዳይ ሳሎን ዲዛ ታ ኣዋፔ ኣቲን ኣሾኔ ሱꬅ ጊዴና።
MAT 16:18 ኔኒ ዛላ፤ ሃይሳ ዛላ ቦላ ታኒ ታ ዎሳ ኬꬄ ኬጻና፤ ጋናሜ ፔንጌቲካ ኢዞ ጾኔቴና።
MAT 16:19 ሳሎ ካዎቴꬃ ቁልፔታ ታ ኔስ ኢማና፤ ኔኒ ቢታ ቦላ ሃኖ ጊዛይ ዉሪ ሳሎንካ ሃናና። ቢታ ቦላ ኔ ሃኖፖ ጊዳይሲ ዉሪካ ሳሎንካ ሃኔና» ጊዴስ።
MAT 16:20 ቃሴካ ኢዚ ኪርስቶሳ ጊዲዳይሳ ኢስቲ ኦናስካ ዮቶንታ ማላ ባና ካሊዛይታስ ሎኤꬂ ዮቲዴስ።
MAT 16:21 ሄሳፌ ሃ ሲሚን ዬሱሲ ዬሩሳላሜ ባናይሳ፥ ሄን ዴሬ ጪማታን፥ ቄሴታ ሃላቃታኒኔ ሙሴ ዎጋ ታማርሲዛይታ ኩሼን ዋዬ ኤካናይሳ፥ ሃይቃናይሳኔ ሄꬓንꬆ ጋላስ ሃይቆፔ ዴንዳናይሳ ባና ካሊዛይታስ ቆንጪሲ ዮቲዴስ።
MAT 16:22 ጴጽሮሲ ዬሱሳ ጌዴ ኢሲ ባጋ ዛሪዲ፥ «ጎዶ! ሃይሲ ኔ ቦላ ጋኮፎ!» ጊዲ ሃንቂዴስ።
MAT 16:23 ዬሱሲ ጴጽሮሳኮ ሺቂዲ፥ «ሃይሶ ጻላኤ! ሃይሳፌ ኪቻ! ኔኒ ኣሳዛፔ ኣቲን ጾሳ ዮኦይ ኔ ዎዚና ጊዶን ባይንዳ ጊሻስ ኔ ታስ ꬉጴ ጊዳዳሳ» ጊዴስ።
MAT 16:24 ቃሴካ ዬሱሲ ባና ካሊዛይታስ፥ «ታና ካላናስ ዶሲዛ ኣሲ ባና ካዶ፤ ባ ማስቃሌ ቶኪዲ ታና ካሎ።
MAT 16:25 ባ ሼምፖ ኣሻና ኮይዛ ኣሲ ዉሪ ꬋይሳና፤ ጊዶ ኣቲን ባ ሼምፖ ታ ጊሻስ ꬋይሲዛዴይ ኣሻና።
MAT 16:26 ኣሲ ኣላሜን ዲዛዝ ኩሜꬅ ሃሪዲ ባ ሼምፖ ꬋይሲኮ ኢዛ ኣይ ማዳኔ? ዎይኮ ኣሲ ባ ሼምፖ ጊሻስ ቃንጻና ዳንዳይዛዚ ኣዜ?
MAT 16:27 ኣሳ ናይ ባ ኣዋ ቦንቾራኔ ሳሎ ኪታንቻታራ ያና፤ ኢሳስ ኢሳስ ኢዛ ኦሶ ማላ ኢዛዴ ዋጋ ኢማና።
MAT 16:28 ታ ኢንቴስ ቱሙ ጋይስ፤ ሃይሳን ኤቂዳ ኣሳታ ጊዶፌ ኣሳ ናይ ባ ካዎቴꬃራ ዪሺን ቤያና ጋካናስ ሃይቆይ ኢስታ ቦቾንታ ኣሳቲ ዴቴስ» ጊዴስ።
MAT 17:1 ኡሱፑን ጋላሳፌ ጉዬ ዬሱሲ ጴጽሮሳኔ ያቆቤ ቃሴካ ያቆቤ ኢሻ ዮሃኒሳ ባናራ ኤኪዲ ኢስታራ ጻላ ꬎቃ ዙማ ቦላ ኬዚዴስ።
MAT 17:2 ኢስቲ ሄን ዲሺን ዬሱሳ ሜꬋይ ላሜቲዴስ፤ ኢዛ ኣይፌሶይ ኣዋ ኣርሼ ማላ ፖኢዴስ፤ ኢዛ ማይኦይካ ፖኦ ማላ ጾልቂዴስ።
MAT 17:3 ሄራካ ሙሴይኔ ኤላሲ ዬሱሳራ ሃሳይሼ ኢስታስ ቤቲዴስ።
MAT 17:4 ጴጽሮሲ ዬሱሳ፥ «ጎዶ! ኑ ሃኒን ዲዛኮ ኑስ ሎኦኮ! ኔ ሼኔ ጊዲኮ ኢሲ ዳሴ ኔስ፥ ኢሲ ዳሴ ሙሴስ፥ ኢሲ ዳሴ ኤላሳስ ሄꬑ ዳሴ ኦꬆኒ?» ጊዴስ።
MAT 17:5 ኢዚ ቡሮ ሃሳያን ዲሺን ፖኢዛ ሻራይ ኢስታ ካሚዴስ፤ ሻራ ጋꬃራ፥ «ታኒ ኢዛን ኡፋዬቲዛ ታ ዶሲዛ ታ ናይ ሃይሳ፤ ኢዚ ጊዛይሳ ሲዪቴ» ጊዛ ቃላ ጊሪስ ሲዪቴ።
MAT 17:6 ኢዛ ካሊዛይቲካ ሄሳ ሲዪዳ ማላ ዳጋሚዲ ቢታ ቦላ ጉፋኒዳ።
MAT 17:7 ዬሱሲ ኢስታኮ ሺቂዲ ኢስታ ባ ኩሼን ቦቺዲ፥ «ዴንዲቴ፤ ባቦፍቴ!» ጊዴስ።
MAT 17:8 ኢስቲ ꬎቁ ጊ ጼሊሺን ዬሱሳፔ ኣቲን ኢዛራ ሃራ ኣስ ኦናካ ቤኢቤቴና።
MAT 17:9 ኢስቲ ዙማዛ ቦላፌ ዎꬊሺን ዬሱሲ፥ «ኣሳ ናይ ሃይቆፔ ዴንዳና ጋካናስ ኢንቴ ቤዮይሳ ኦናስካ ዮቶንታ ማላ» ጊ ኣዛዚዴስ።
MAT 17:10 ዬሱሳ ካሊዛይቲ፥ «ሂስቲን ሙሴ ዎጋ ታማርሲዛይቲ፥ ኤላሲ ካሴቲዲ ያና ቤሴስ ኣዛስ ጊዞ?» ጊ ኦይቺዳ።
MAT 17:11 ኢዚካ ኢስታስ፥ «ቱማኮ፤ ኤላሲ ዪዲ ዉርሲካ ጊጊሳና።
MAT 17:12 ታ ኢንቴስ ጊዛይ ኤላሲ ዪዴስ፤ ጊዶ ኣቲን ኣሳይ ባ ኮዪዳ ማላ ኢዛ ቦላ ኦꬂዴስ ኣቲን ኢዛ ኤሪቤና፤ ሄሳꬆካ ኣሳ ናይ ኢስታ ኩሼን ዋዬ ቤያና» ጊዴስ።
MAT 17:13 ሄ ዎዴ ዬሱሳ ካሊዛይቲ ዬሱሲ ኢስታስ ዮቲዛይሲ ጻማቂዛ ዮሃኒሳ ጊሻስ ጊዲዳይሳ ኤሪዳ።
MAT 17:14 ዬሱሲኔ ኢዛ ካሊዛይቲ ኣሳኮ ሲሚዳ ማላ ኢሲ ኣሲ ዬሱሳኮ ሺቂዲ ኢዛ ሲንꬃን ጉልባቲዲ፥ «ጎዶ! ታ ና ዳይሳ ቦላፌ ዬጊዛ ሃርጌይ ዳሮ ዋዪሲዛ ጊሻስ ታስ ማራርኪ! ዳሮ ዎዴ ታማን ኩንዴስ፤ ሃꬃንካ ጌሌስ።
MAT 17:16 ታኒ ናዛ ኔና ካሊዛይታኮ ኤሃዲስ ሺን ኢስቲ ኢዛ ፓꬃና ዳንዳይቤቴና» ጊዴስ።
MAT 17:17 ዬሱሲ፥ «ኢንቴኖ ኣማኖንታ ጌላ ዬሌታቶ! ኣይዴ ጋካናስ ታ ኢንቴናራ ዳኔ? ቃሴ ኣይዴ ጋካናስ ታ ኢንቴና ዳንዳያኔ? ኣኔ ናዛ ሃ ታኮ ኤሂቴ» ጊዴስ።
MAT 17:18 ሄሳፌ ጉዬ ዬሱሲ ዳይዳንꬃዛ ሴሪዲ ናዛፔ ኬሲዴስ፤ ናዚካ ሄ ሳቴፔ ሲሚዲ ፓጺዴስ።
MAT 17:19 ዬሱሳ ካሊዛይቲ ጻላላ ኢዛኮ ሺቂዲ፥ «ኑኒ ዳይዳንꬅ ኬሳናስ ኣዛስ ዳንዳይቤኮኒ?» ጊዲ ኦይቺዳ።
MAT 17:20 ኢዚካ ኢስታስ፥ «ኢንቴስ ኣማኖይ ፓጬ ጊዲዳ ጊሻስ ዳንዳይቤኬታ፤ ታ ኢንቴስ ቱሙ ጋይስ፤ ቄሪ ጋሼ ኣይፌ ማላ ኣማኖይ ኢንቴ ቦላ ዲዛኮ ሃይሳ ዙማ፥ ‹ሃይሳፌ ዴንዳዳ ጌዴ ባ!› ኢንቴ ጊዳኮ ኢዚ ኢንቴስ ባና። ኢንቴና ጾናናይ ዴና።
MAT 17:21 ሃይሳ ማላይ ጊዲኮ ጾማኒኔ ዎሳን ኣቲን ሃራን ኬዜና» ጊዴስ።
MAT 17:22 ኢስቲ ጋሊላን ኢሲፌ ዲሺን ዬሱሲ ኢስታስ፥ «ታና ኣሳ ና ኣሳስ ኣꬂ ኢማና።
MAT 17:23 ኢስቲካ ኢዛ ዎꬋና፤ ኢዚካ ሄꬓንꬆ ጋላስ ዴንዳና» ጊን ኢዛ ካሊዛይቲ ኬሂ ሚሼቲዳ።
MAT 17:24 ዬሱሲኔ ኢዛ ካሊዛይቲ ቂፊርናሆሜ ጌቴቲዛሶ ጋኪዳፔ ጉዬ ጾሳ ኬꬃ ጊራ ኤኪዛይቲ ጴጽሮሳኮ ሺቂዲ፥ «ኢንቴ ኣስታማሬይ ጾሳ ኬꬃ ጊራ ናምኡ ዲናሬዛ ኣይስ ቃንጼኔ?» ጊዳ።
MAT 17:25 ኢዚካ ኢስታስ፥ «ቃንጼስ» ጊዴስ። ጴጽሮሲ ሶ ጌሊዳ ማላ ዬሱሲ ካሴቲዲ፥ «ሲሞና ዴሬ ካዎቲ ጊራ ጊዲን ዎይኮ ቃራጻ ጊዲን ባ ናይታፔ ኤኪዞዬ? ሃራታፔ ኤኪዛ ሚሳቲዜ?» ጊዴስ።
MAT 17:26 ጴጽሮሲካ፥ «ሃራታፔ ኤኬቴስ» ጊዴስ። ዬሱሲ፥ «ሂስቲኮ ናይታ ቦላ ኣጮይ ባ ጉሳካ!
MAT 17:27 ሂስቲኮካ ኢስታ ኑ ꬉጴꬆንታ ማላ ኔ ሞሌ ኦይኪዛ ጊቴ ኤካ ባዳ ኣባን ዬጋ፤ ኮይሮ ኦይኪዳ ሞሌዛ ዶና ፖቃዳ ኔ ዴሚዳ ሚሻ ኤካዳ ታ ሱንꬃራኔ ኔ ሱንꬃራ ጊራ ቃንጻ» ጊዴስ።
MAT 18:1 ሄ ዎዴ ዬሱሳ ካሊዛይቲ ኢዛኮ ሺቂዲ፥ «ሳሎ ካዎቴꬃን ኑ ጋርሳን ኡባፌ ኣꬋናዴይ ኦኔ?» ጊ ኦይቺዳ።
MAT 18:2 ዬሱሲ ኢሲ ና ጼይጊ ኤሂዲ ኢስታ ጊዶን ኤሲዲ፥ «ታ ኢንቴስ ቱሙ ጋይስ፤ ኢንቴ ሲሞንታ ኢጺኮኔ ጉꬃ ናይታ ማላ ሃኖንታ ኢጺኮ ሙሌካ ሳሎ ካዎቴꬅ ጌሌኬታ።
MAT 18:4 ሄሳ ጊሻስ ሃ ናዛ ማላ ባና ዚቂሲዛዴይ ሳሎ ካዎቴꬃን ኡባፌ ኣꬋና።
MAT 18:5 ሃይሳ ማላ ጉꬃ ና ታ ሱንꬃን ኤኪዛዴይ ታና ኤኬስ።
MAT 18:6 «ጊዶ ኣቲን ታና ኣማኒዛ ጉꬃታፔ ኢሳዴ ꬉጴꬂዛይ ዴጾ ዎጻ ሹቺ ኢዛ ቆꬌን ቃሼቲን ኣባ ጪማን ዬጌቲዲ ሚቴቲኮ ኢዛስ ሎኦ ጊዳና።
MAT 18:7 ሃና ኣላሜያ ኣስ ꬉጳና ጋሶ ጊዲዳ ጊሻስ ኢዚስ ኣዬ ኣና! ꬉጴይ ዩስ ኣጌና ሺን ꬉጴዛስ ጋሶ ጊዲዛዴስ ኣዬ ኣና!
MAT 18:8 ኔ ኩሼይ ዎይኮ ኔ ቶሆይ ኔና ꬉጳናስ ጋሶ ጊዲኮ ኔፔ ቃንጻ ዲጋ! ኔኒ ናምኡ ኩሼራ ዎይኮ ናምኡ ቶሆራ ጌዴ ሜርና ታማን ዬጌታናፔ ዎቤ ዎይኮ ቶሆ ሲላ ጊዳዳ ሄ ጌዴ ዴኦይ ዲዛሶ ጌሎይ ኔስ ሎኣና።
MAT 18:9 ሄሳꬆካ ኔ ኣይፌይ ኔስ ꬉጴ ጊዲኮ ኔፔ ኬሳ ዬጋ! ናምኡ ኣይፌራ ጌዴ ጋናሜ ታማን ኔ ዬጌታናፔ ኢሲ ኣይፌራ ዴኦይ ዲዛሶ ኔ ጌሊዛይሲ ኔስ ሎኦ።
MAT 18:10 «ሃይታ ጉꬃታ ጊዶፌ ኢሲኔዮካ ኢንቴ ካꬎንታ ማላ ናጌቲቴ! ታ ኢንቴስ ቱሙ ጋይስ፤ ሳሎን ዲዛ ኢስታ ኪታንቻቲ ሳሎን ታ ኣዋ ኣይፌሶ ኡባ ጋላስ ጼሌቴስ።
MAT 18:11 ኣሳ ናይ ꬋይዳይታ ኣሻናስ ዪዴስ።
MAT 18:12 «ኣኔ ታስ ዮቲቴ፥ ኢሳዴስ ጼቱ ዶርሲ ዲኮ ቃሴ ኢስታፌ ኢሲና ꬋይኮ፥ ሃንኮ ኡዱፉን ታማኔ ኡዱፉናታ ዙማ ቦላ ዬጊዲ ꬋይዳሮ ኮያና ቢ ኤሬኔ?
MAT 18:13 ታ ኢንቴስ ቱሙ ጋይስ፤ ሃንኮ ꬋዮንታ ኣቲዳ ኡዱፉን ታማኔ ኡዱፉን ዶርሳታፔ ኣꬂዲ ቤቲዳ ዶርሳይን ኡፋዬቴስ።
MAT 18:14 ሄሳꬆካ ሃ ጉꬃታ ጊዶፌ ኢሶይ ꬋያና ማላ ሳሎን ዲዛ ኢንቴ ኣዋ ሼኔ ጊዴና።
MAT 18:15 «ኔ ኢሻይ ኔና ቆሂኮ ኢዛኮ ባዳ ኢዛ ጻላላ ኔናራ ኤካዳ ኢዛ ሞሮ ኢዛስ ዮታ፤ ኢዚ ኔ ጊዛ ሲዪኮ ኔ ኢሻ ኔ ኣስ ሂስታሳ።
MAT 18:16 ኢዚ ኔ ጊዛይሳ ሲዮንታ ኢጺኮ ዮኦይ ዉሪ ናምኡ ማርካን ዎይኮ ሄꬑ ማርካን ላꬊዛ ጊሻስ ኢሳዴ ዎይኮ ናምኡ ኣስ ኔናራ ኤካ ባዳ ኢዛ ሃሳይሳ።
MAT 18:17 ኢዚ ኢስታካ ሲዮንታ ኢጺኮ ዎሳ ኬꬃስ ዮታ፤ ዎሳ ኬꬃዮካ ሲዮንታ ኢጺኮ ኢዛዴ ኔ ኣማኖንታዴ ማላኔ ዮቲን ሲሞንታ ኢታ ኣሳ ማላ ቆዳ።
MAT 18:18 «ታ ኢንቴስ ቱሙ ጋይስ፤ ቢታ ቦላ ኢንቴ ቃቺዳይ ዉሪ ሳሎንካ ቃሼቲዳ ጊዳና፤ ቢታ ቦላ ኢንቴ ቢርሺዳዚ ሳሎንካ ቢርሼቲዳይሳ ጊዳና።
MAT 18:19 ቃሴካ ታ ኢንቴስ ቱሙ ጋይስ፤ ቢታ ቦላ ኢንቴ ናምኡ ጊዲዲ ኣይ ሚሺካ ኢሲፌ ዶሳን ኢንቴ ኦይቺኮ ሳሎን ዲዛ ታ ኣዋይ ኢንቴስ ኢማና።
MAT 18:20 ናምኡ ዎይኮ ሄꬑ ጊዲዲ ታ ሱንꬃን ኢንቴ ሺቂዛሶን ሄን ኢንቴ ጊዶን ታ ዳና» ጊዴስ።
MAT 18:21 ሄ ዎዴ ጴጽሮሲ ዬሱሳኮ ሺቂዲ፥ «ጎዶ! ታ ኢሻይ ታና ቆሂኮ ታ ኢዛስ ኣፑንቶ ኣቶ ጎ? ላፑንቶ ኣቶ ጎ?» ጊዴስ።
MAT 18:22 ዬሱሲካ ኢዛስ ዛሪዲ፥ «ላፑን ታሙቶ ላፑን ኣቲን ላፑንቶ ጻላ ጋ ጊኬ፤
MAT 18:23 «ሄሳ ጊሻስ ሳሎ ካዎቴꬂ ባ ኣሽካራታ ቦላ ዲዛ ሚሼ ሺሻና ኮዪዳ ካዎ ሚሳታዉስ።
MAT 18:24 ሚሻ ቆዳ ኦይኪዳ ማላ ኢዛ ኣሽካራታፔ ዳሮ ሚሎኔ ቢራ ኣጮይ ኢዛ ቦላ ዲዛዴ ኤኪ ዪዳ።
MAT 18:25 ኣሽካራዚካ ባ ቦላ ዲዛ ኣጮዛ ቃንጾይ ጾኒዳ ጊሻስ ኢዚካ ኢዛ ማቺያካ ኢዛ ናይቲኔ ኢዛስ ዲዛዚ ዉሪ ባይዜቲዲ ሚሻይ ቃንጼታና ማላ ኢዛ ጎዳይ ኢዛ ኣዛዚዴስ።
MAT 18:26 ሄ ዎዴ ኣሽካራዚ ጎዳዛ ቶሆ ቦላ ኩንዲዲ፥ ‹ታኒ ታ ቦላ ዲዛ ኣጮዛ ዉርሳ ኔስ ቃንጻና ጋካናስ ታስ ጉꬃ ዎዴ ኢማርኪ!› ጊዲ ዎሲዴስ።
MAT 18:27 ኢዛ ጎዳይካ ኢዛስ ሚሼቲዲ ኢዛ ኣጮዛ ኡባ ማሪዲ ዬዲዴስ።
MAT 18:28 «ሄ ኣሽካራዚካ ባ ጎዳ ኣቻፌ ኬዚዳ ማላ ጉꬃ ኣጮይ ኢዛ ቦላ ዲዛ ባ ላጌ ዴሚዲኔ፥ ‹ኔ ቦላ ዲዛ ታ ሚሻዮ ሃኢ ሃኒን ቃንጻ› ጊዲ ጩሊ ኦይኪዴስ።
MAT 18:29 ሄ ኢዛ ላጌ ኣሽካራይ፥ ‹ታስ ጉꬃ ዎዴ ኢማርኪ! ታ ኔስ ቃንጻና› ጊዲ ኢዛ ቶሆ ቦላ ኩንዲዲ ዎሲዴስ።
MAT 18:30 «ጊዶ ኣቲን ኢዛስ ጉꬃ ዎዴ ኢማናስ ኮዮንታ ኢጺዲ ኢዛ ላጌዚ ባ ቦላ ዲዛ ኣጮዛ ቃንጻና ጋካናስ ቃሾ ኬꬃን ዬጊዴስ።
MAT 18:31 ኢዚ ሄሳ ኦꬂሺን ቤኢዳ ኣሳይኔ ሃንኮ ኢዛ ላጌ ኣሽካራቲ ዳሮ ሚሼቲዳ። ቢዲካ ሃኒዳይሳ ኡባ ባ ጎዳስ ዮቲዳ።
MAT 18:32 «ሄ ዎዴ ጎዳዚ ሄ ኣሽካራ ጼይጊሲ ኤሂዲ፥ ሃይሶ ኔኖ! ኢታዞ፥ ኔ ታና ዎሲን ኔ ቦላ ዲዛ ኣጮዛ ታ ኔስ ኣጋዲሲ ሺን ታ ኔና ማሪዳ ማላ ኔኒካ ኔ ላጌዛ ማራናስ ቤሴኔ?
MAT 18:34 ጊዲ ኢዛ ቦላ ዲዛ ኣጮዛ ኢዚ ኡባ ቃንጻና ጋካናስ ቃቻና ማላ ቃቺዛይታስ ኣꬂ ኢሚዴስ።
MAT 18:35 ሄሳ ጊሻስ ኢንቴ ኢሶይ ኢሳ ዎዚናፔ ማሮንታ ኣጊኮ ሳሎን ዲዛ ታ ኣዋይካ ኢንቴና ማሬና» ጊዴስ።
MAT 19:1 ዬሱሲ ዮቲ ዉርሲዳፔ ጉዬ ጋሊላ ኣጊዲ ዮርዳኖሴ ፒንꬃን ዲዛ ዩሁዳ ኣዉራጃ ቢዴስ።
MAT 19:2 ዳሮ ዴሬይ ኢዛ ሄን ካሊን ኢዚካ ሃርጋንቻታ ፓꬂዴስ።
MAT 19:3 ፋርሳዌቲ ኢዛ ፓጫናስ ኢዛኮ ሺቂዲ ኣይ ጋሶንካ፥ «ኣሲ ባ ማቾ ኣንጂ ዬዳና ቤሲዜ?» ጊ ኦይቺዳ።
MAT 19:4 ኢዚካ ኢስታስ፥ «ጾሲ ኮይሮፔ ማጫኔ ኣዴ ሜꬊዳይሳ ናባቢቤኬቲ? ጊዴስ።
MAT 19:5 ቃሴካ፥ ‹ኣሲ ባ ኣዋኔ ባ ኣዮ ኣጊዲ ባ ማቺራ ኢሲፌ ጊዴስ። ናምኣይካ ኢሲ ኣሾ ጊዴቴስ› ጌቴቲዳይሲ ሃይሳ ጋሶን ጊዴኔ? ጊዴስ።
MAT 19:6 ናምኣይ ኢሲ ኣሾ ኣቲን ሲንꬃፌ ናምኡ ጊዴቴና። ሄሳ ጊሻስ ጾሲ ጋꬂ ዋጺዳይሳ ኣሲ ሻኮፎ» ጊዴስ።
MAT 19:7 ኢስቲካ ኢዛስ፥ «ሂስቲን ሙሴይ፥ ‹ኣሲ ባ ማቾ ኣንጂ ዬዲዳ ኣንጆ ዋራቃታ ኢዚስ ኢሚ ዬዶ› ጊዲ ኣዛስ ኣዛዚዴ?» ጊዳ።
MAT 19:8 ዬሱሲካ ኢስታስ፥ «ሙሴይ ኢንቴ ዎዚና ሙሜቴꬅ ቤኢዲ ማቼታ ኢንቴ ኣንጃና ማላ ፒቃዴ ኢንቴስ ኢሚዴስ ኣቲን ኮይሮፔ ሄሳ ማላ ጊዴና።
MAT 19:9 «ታ ኢንቴስ ቱሙ ጋይስ፤ ባ ኣዚናፔ ሃራራ ላይማቶንታ ዲሺን ባ ማቾ ኣንጂ ዬዲዳ ሃራ ማቾ ኤኪዛዴይ ዉሪ ላይማቴስ። ኣንጄቲዳሮካ ኤኪዛዴይ ኢዚራ ላይማቴስ» ጊዴስ።
MAT 19:10 ዬሱሳ ካሊዛይቲ ኢዛስ፥ «ማቺ ዎጋይኔ ኣዚና ዎጋይ ሃይሳ ማላ ጊዲኮ ማቾ ኤኮንታ ኣጎይ ሎኦ» ጊዳ።
MAT 19:11 ጊዶ ኣቲን ዬሱሲ ኢስታስ፥ «ኢሲ ኢሲ ዱማ ኢሞታይ ዲዛ ኣሳታፔ ኣቲን ሃይሳ ቲሚርቴዛ ኦኒካ ኤካናስ ዳንዳዬና።
MAT 19:12 ጋሶይካ ኢሲ ኢሲ ኣሳይ ባ ኣዪ ኡሎፔ ዬሌቲሼ ሹፋ ጊዲ ዬሌቴስ፤ ኢሲ ኢሲ ኣሳይ ኣሳ ኩሼን ቃራቴቲዲ ጉንዱሌስ፤ ኢሲ ኢሲ ኣሳይ ሳሎ ካዎቴꬃስ ጊዲ ባና ባርካ ጉንዱላ ኦꬂዛ ኣሲካ ዴስ። ሃይሳ ኤካናስ ዳንዳይዛዴይ ኤኮ» ጊዴስ።
MAT 19:13 ሄ ዎዴ ዬሱሲ ኢስታ ቦላ ባ ኩሼ ዎꬂዲ ዎሳና ማላ ጉꬃ ናይታ ኢዛኮ ኤኪ ኤሂዳ፤ ጊዶ ኣቲን ኢዛ ካሊዛይቲ ናይታ ኤሂዳ ኣሳታ ቦላ ሃንቄቲዳ።
MAT 19:14 ዬሱሲ፥ «ናይቲ ሃ ታኮ ዬቶ፤ ዲጎፍቴ፤ ሳሎ ካዎቴꬂ ሃይታንታ ማላሳ!» ጊዴስ።
MAT 19:15 ባ ኩሼ ናይታ ቦላ ዎꬂዲ ኣንጂዳፔ ጉዬ ሄፔ ዴንዲ ቢዴስ።
MAT 19:16 ሄሳፌ ጉዬ ኢሳዴይ ዬሱሳኮ ሺቂዲ፥ «ኣስታማሬ! ሜርና ዴኦ ዴማናስ ታኒ ሎኦ ኦሶ ኣይ ኦꬆ?» ጊ ኦይቺዴስ።
MAT 19:17 ዬሱሲካ፥ «ታና ኣዛስ ሎኦ ጊሻስ ኦይቻይ? ሎኦይ ኢሲ ጾሳ ጻላ፤ ዴኦይ ዲዛሶ ኔ ጌላና ኮይኮ ኣዛዞታ ናጋ» ጊዴስ።
MAT 19:18 ኣዴዚ፥ «ኣዛዞቲ ኣዋይቴ?» ጊዲ ኦይቺዴስ። ዬሱሲካ ዛሪዲ፥ «ኣስ ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ ኔ ኣዋኔ ኔ ኣዮ ቦንቻ፤ ኔ ሾሮ ኔ ማላ ሲቃ» ጊዴስ።
MAT 19:20 ናቴꬃዚ ዛሪዲ፥ «ሃይሳ ዉርሳ ታ ናጋዲስ፤ ሃራይ ኣዚ ታስ ፓጪዴ?» ጊዴስ።
MAT 19:21 ዬሱሲካ ዛሪዲ፥ «ኔ ሙሌ ጺላና ኮይኮ ባዳ ኔ ሃሪዳዝ ኡባ ባይዛዳ ሚሻ ዉርሳ ማንቆታስ ኢማ፤ ኔኒ ሳሎን ሚሽ ዴማንዳሳ፤ ሄሳፌ ጉዬ ሲማ ያዳ ታና ካላ» ጊዴስ።
MAT 19:22 ኣዴዚ ሄሳ ሲዪዲ ኢዛስ ዳሮ ሚሺ ዲዛ ጊሻስ ኬሂፔ ሚሼቲሼ ቢዴስ።
MAT 19:23 ዬሱሲ ባና ካሊዛይታ፥ «ታ ኢንቴስ ቱሙ ጋይስ፤ ዱሬቲ ሳሎ ካዎቴꬅ ጌላናይሲ ዳሮ ሜቶ።
MAT 19:24 ቃሴካ ታኒ ኢንቴስ ጊዛይ ዱሬይ ሳሎ ካዎቴꬅ ጌላናይሳፌ ጋሜላይ ናርፔ ሉኮራ ኣꬌꬂ ካዉያና» ጊዴስ።
MAT 19:25 ሄሳ ሲዪዲ ኢዛ ካሊዛይቲ ዳሮ ቆፒዲ፥ «ሂስቲን ኦኒ ኣታናስ ዳንዳይዜ?» ጊዲ ዬሱሳ ኦይቺዳ።
MAT 19:26 ዬሱሲካ ኢስታ ጼሊዲ፥ «ሃይሲ ኣሳ ኣቻን ዳንዳዬቴና፤ ጾሳ ኣቻን ጊዲኮ ዉሪካ ዳንዳዬቴስ» ጊዴስ።
MAT 19:27 ጴጽሮሲ ኢዛስ ዛሪዲ፥ «ኑ ኡባካ ኣጊዲ ኔና ካሊዶስ፤ ሂስቲን ሃኢ ኑ ኣይ ዴማኔ?» ጊዴስ።
MAT 19:28 ዬሱሲካ ኢስታስ፥ «ታ ኢንቴስ ቱሙ ጋይስ፤ ኣሳ ናይ ቡሮ ያና ኦራꬃ ኣላሜን ባ ቦንቾ ኣራታ ቦላ ኡቲዛ ዎዴ ኢንቴ ታና ካሊዳይቲ ታማኔ ናምኡ ኣራታታ ቦላ ኡቲዲ ታማኔ ናምኡ ኢስራኤሌ ናይታ ቦላ ፒርዳና።
MAT 19:29 ታ ሱንꬃ ጊሻስ ጊዲ ባ ኬꬄ፥ ባ ኢሻታ፥ ባ ሚቼታ፥ ባ ኣዋ፥ ባ ኣዮኔ ባ ናይታ፥ ዎይኮ ባ ቢታ ኣጊዛ ኣሲ ዉሪ ጼቱ ኩሼ ዳኮ ኤካና፤ ሜርና ዴኦካ ላታና።
MAT 19:30 ጊዶ ኣቲን ዳሮ ሲንꬄ ጊዲዳ ኣሳቲ ጉዬ ጊዳና፤ ዳሮ ጉዬን ዲዛ ኣሳቲ ሲንꬃታና።
MAT 20:1 «ሳሎ ካዎቴꬂ ባ ዎይኔ ኣታኪልቴ ጊዶን ኦꬂዛ ኦሳንቻታ ቃጻራናስ ማላዶራ ኬዚዳ ኢሲ ኣታኪልቴይ ዲዛ ጋዳዴ ሚሳታዉስ።
MAT 20:2 ኢሲ ጋላሳ ዳሞዛ ጊዲዛዝ ሃሳዬቲዲ ጊጊዳፔ ጉዬ ኦሳንቻታ ዎይኔ ኣታኪልቴ ኦሶ ኦይꬂዴስ።
MAT 20:3 «ማላዶ ሄꬑ ሳቴን ኬዚዲ ኦሶይ ባይንዳ ሜላ ጊያይ ኤቂዛሶን ኤቂዳ ሃራ ኣሳታ ዴሚዴስ።
MAT 20:4 ‹ኢንቴ ቢዲ ታ ዎይኔ ጊዶን ኦꬂቴ፤ ታ ኢንቴስ ቤሲዛ ሚሼ ኢማና› ጊዴስ።
MAT 20:5 ኢስቲካ ቢዳ። ቃሴካ ጋላሳፌ ኡሱፑን ሳቴኒኔ ኡዱፉን ሳቴ ቦላ ኬዚዲ ሃራ ኦሳንቻታ ኦሶን ጌልꬂዴስ።
MAT 20:6 ኦማርሳ ዎዴ ታማኔ ኢሲ ሳቴ ጊዲሺን ኬዚዲ ጮ ኤቂዳይታ ሃራታ ዴሚዲ፥ ‹ኢንቴ ኩሜꬃ ጋላስ ኦሶይ ባይንዳ ኣዛስ ሃይሳን ኤቂዴቲ?› ጊ ኦይቺዴስ።
MAT 20:7 «ኢስቲካ፥ ‹ኑና ኦሲሲዛ ኣሲ ꬋይዳ ጊሻስ ኤቂዶስ› ጊዳ። ኢዚካ ኢስታ፥ ‹ኢንቴካ ቢዲ ታ ዎይኔ ኣታኪልቴ ጊዶን ኦꬂቴ› ጊዴስ።
MAT 20:8 «ጋዴይ ቃሚሺን ዎይኔ ኣታኪልቴዛ ጎዳይ ኦሳንቻታ ኣላፌዛስ፥ ‹ጉዬፔ ዪዳይታፔ ዶማዳ ኮይሮ ዪዳይታ ጋካናስ ዲዛ ኦሳንቻታ ኡባ ጼይጋዳ ኢስታ ኦሶ ጋቴ ቃንጻ› ጊዴስ።
MAT 20:9 ታማኔ ኢሲንꬃ ሳቴ ቦላ ኦሶን ጌሊዳይቲ ዪዲ ኢሶይ ኢሶይ ኩሜꬃ ጋላሳ ጋቴ ኤኪዳ።
MAT 20:10 «ኮይሮ ኦሶን ጌሊዳይቲ ዪሼ ባ ዎዚናራ ሂንኮይታፔ ቦላራ ዳሮ ዴማና ጊ ቆፒሺን ኢስታስካ ሂንኮይታራ ጊና ኢሚዴስ።
MAT 20:11 ሚሻ ኤኪሼ ቃንጺዛዴ ቦላ፥ ‹ሃይቲ ዉርሴꬃን ኦሶን ጌሊዲ ኢሲ ሳቴ ጻላ ኦꬂዳይቲ ኩሜꬃ ጋላስ ኦሶን ዳቡርዲኔ ኣዋን ጹጌቲዲ ፔኢዳ ኑሲኔ ኢስታስ ዎስታ ኢሲ ጊና ቃንጻይ?› ጊዳ።
MAT 20:13 «ኢዚካ ኢስታፌ ኢሳዴስ፥ ‹ታ ጃላዞ! ኔና ቆሃቤኬ፤ ኢሲ ጋላሳስ ጊዲዛ ዳሞዛን ኦꬃናስ ታናራ ጊጋቤኪ? ሃኢ ሄይ ኔ ጊሻ ኤካዳ ባ፤ ኔስ ኢሚዳይሳ ማላ ዉርሴꬃን ዪዳይሳስካ ታ ኢማና ኮያይስ።
MAT 20:15 ሂስቲን ታ ሚሻን ታ ዶሲዳዝ ኦꬃናስ ዳንዳይኪና? ዎይኮ ታ ኪያ ጊዲዳይሲ ኔና ቃናቲሲዜ?›
MAT 20:16 «ጉዬን ዲዛይቲ ሲንꬄ፥ ሲንꬄን ዲዛይቲ ጉዬ ኣꬋና» ጊዴስ።
MAT 20:17 ዬሱሲ ዬሩሳላሜ ቢሼ ባና ካሊዛ ታማኔ ናምኣታ ዱማ ሻኪ ኤኪዲ፥
MAT 20:18 «ሂያ ኑኒ ዬሩሳላሜ ባና ጎስ፤ ኣሳ ናይ ቄሴታ ሃላቃሲኔ ሙሴ ዎጋ ታማርሲዛይታስ ኣꬊ ኢሜታና፤ ኢስቲካ ኢዚ ሃይቃና ማላ ኢዛ ቦላ ፒርዳና።
MAT 20:19 ኢዛ ቦላ ቂꬊ ካኣናሲኔ ጋራፋና ማላ፥ ዎꬋና ማላካ ዴሬታስ ኣꬂ ኢማና፤ ሄꬓንꬆ ጋላስ ኢዚካ ሃይቆፔ ዴንዳና» ጊዴስ።
MAT 20:20 ሄሳፌካ ዛብዶሳ ናይታ ኣያ ባ ናይታራ ዬሱሳኮ ሺቃዳ ኢዛ ሲንꬃን ጉልባታዳ ዬሱሲ ኢዚስ ኢሲ ሚሽ ኦꬃና ማላ ዎሳዱስ።
MAT 20:21 ኢዚካ ኢዞ፥ «ኣይ ኮያይ?» ጊዴስ፤ ኢዛካ፥ «ሃይቲ ታ ና ናምኣቲ ኔ ካዎቴꬃን ኢሶይ ኔ ኡሻቻራ፥ ኢሶይ ኔ ሃዲርሳራ ኡታና ማላ ኦꬃርኪ!» ጋዱስ።
MAT 20:22 ዬሱሲካ ዛሪዲ፥ «ኢንቴ ዎሲዛዝ ኤሬኬታ፤ ታኒ ኡዪዛ ጹኣ ኢንቴ ኡያና ዳንዳያኔ?» ጊዴስ። ኢስቲካ፥ «ኤ ዳንዳዮስ» ጊዳ።
MAT 20:23 ኢዚካ፥ «ታ ጹኣፔ ቱሙ ኢንቴ ኡያናሺን ታ ኡሻቻኒኔ ታ ሃዲርሳን ኡቴꬂ ታ ኣዋይ ጊግሲዳዴንታስ ኣቲን ታኒ ኢሚዛዝ ጊዴና» ጊዴስ።
MAT 20:24 ታማቲ ሄሳ ሲዪዲ ናምኡ ኢሻታ ቦላ ሃንቄቲዳ።
MAT 20:25 ዬሱሲ ኢስታ ኢሲ ቦላ ጼይጊዲ፥ «ኣይዛቤ ሃላቃቲ ባ ሃሪዛ ዴሬ ቦላ ጎዳቲዛይሳ ማላ ጎዳቴꬂ ዲዛይቲ ዎልቃራ ሃሪዛይሳ ኢንቴ ኤሬታ።
MAT 20:26 ኢንቴ ጊዶን ሄሳ ማላ ሃናናስ ቤሴና፤ ኢንቴፌ ጊታ ጊዳና ኮይዛዴይ ኢንቴስ ኦꬂዛዴ ጊዶ።
MAT 20:27 ኢንቴፌ ቦላ ጊዳናስ ኮይዛዴይ ኢንቴፌ ጋርስ ጊዶ።
MAT 20:28 ኣሳ ናይ ኣሳይ ኢዛስ ኦꬃና ማላ ጊዶንታ ኢዚ ኣሳስ ኦꬃናሲኔ ባ ሼምፖ ዳሮታ ጊሻስ ኣꬂ ኢማናስ ዪዴስ» ጊዴስ።
MAT 20:29 ዬሱሲ ባና ካሊዛይታራ ኢያርኮፌ ኬዚ ቢሺን ዳሮ ዴሬይ ኢዛ ካሊዴስ።
MAT 20:30 ሄን ኣይፌይ ቆቂዳ ናምኡ ኣሳቲ ኦጌ ዶናን ኡቲ ዴቴስ። ዬሱሲ ኣꬊ ቢዛይሳ ሲዪዲ፥ «ጎዶ! ዳዊቴ ናዉ፥ ኑና ማራ!» ጊዲ ዋሲዳ።
MAT 20:31 ዴሬዚ፥ «ሃይዚቴ!» ጊዲ ሃንቂዴስ፤ ጊዶ ኣቲን ኢስቲ ዳርሲ ዋሲሼ፥ «ጎዶ! ዳዊቴ ናዉ፥ ኑና ማራ!» ጊዳ።
MAT 20:32 ዬሱሲካ ኤቂ ኢስታ ጼይጊዲ፥ «ታ ኢንቴስ ኣይ ኦꬃና ማላ ኮዬቲ?» ጊዴስ።
MAT 20:33 ኢስቲካ፥ «ኑ ኣይፌይ ጼላና ማላ ኮዮስ» ጊዳ።
MAT 20:34 ዬሱሲ ኢስታስ ሚሼቲዲ ኢስታ ኣይፌታካ ባ ኩሼራ ቦሼቺን ሄራካ ጼሊዲ ኢዛ ካሊዳ።
MAT 21:1 ኢስቲ ዬሩሳላሜ ማታን ዳብራዛይቴ ዙማ ቦላ ዲዛ ቤቴፋጌ ጌቴቲዛሶ ጋኪዳ ማላ ዬሱሲ ባና ካሊዛይታፔ ናምኣታ ኪቲዴስ።
MAT 21:2 «ሃኖ ኢንቴ ማታን ዲዛ ጉታዮ ቢዲ ኢንቴ ሄ ጋኪዳ ማላ ኢሲ ሃሬ ዲዛራ ባ ጉቴይራ ቃሼታ ዲሺን ኢንቴ ዴማና። ቢርሺዲ ሃ ታኮ ኤኪ ዪቴ።
MAT 21:3 ኦኒካ ኢንቴና፥ ‹ኣይስ ሃይሳꬆ ኦꬄቲ?› ጊኮ፥ ‹ጎዳይ ኢስታ ኮዬስ› ጊቴ፤ ኢንቴና ኦይቺዛዴይ ሄራካ ዬዳና።
MAT 21:4 «ሃይሲካ ሃኒዛይ ካሴ ናቤን ጺዮኒስ ሂዝጊቴ፥ ‹ሄኮ! ኔ ካዎይ ኣሽኬ ጊዲዲ ሃሬዮኔ ሃሬይ ጉቴዮ ቶጊዲ ኔኮ ያና› ጌቴቲዳይሲ ፖሌታናሳ» ጊዴስ።
MAT 21:6 ኢዛ ካሊዛይቲ ዬሱሲ ኢስታስ ዮቲዳ ማላ ኦꬂዳ።
MAT 21:7 ሃሬዮ ኢዚ ጉቴይራ ኤሂዲ ባ ማይኦ ኢስታ ቦላ ዎꬂን ኢዚካ ሃሬታ ቶጊዴስ።
MAT 21:8 ዴራፔ ዳሪዛ ባጋይ ባ ማይኦ ኦጌ ቦላ ሚጪዴስ፤ ባጋ ኣሳይ ሚꬃ ቦንጮ ዱꬂ ዱꬂ ኦጌ ቦላ ኣꬂ ኣꬂ ዬጊዴስ።
MAT 21:9 ኢዛፔ ሲንꬃራ ቢዛ ዴሬይኔ ጉዬራ ካሊዛ ዴሬይካ ባ ቃላ ꬎቁ ሂስቲዲ፥ «ሆሳኢና! ዳዊቴ ናይ ጋላቴቶ! ጎዳ ሱንꬃን ዪዳይ ኣንጄቲዳዴ! ጾሲ ጋላቴቶ!» ጊዳ።
MAT 21:10 ኢዚ ዬሩሳላሜ ጌሊዳ ማላ ካታማ ኣሳይ ዉሪ፥ «ሃይሲ ኦኔ?» ጊዲ ያርክ ያርኪዴስ።
MAT 21:11 ኢዛ ካሊዲ ዪዳ ዴሬዚካ፥ «ሃይሲ ጋሊላ ጊዶን ዲዛ ናዚሬቴፔ ዪዳ ናቤ ዬሱሳ ጊዴኔ?» ጊዴስ።
MAT 21:12 ሄሳፌ ጉዬ ዬሱሲ ጾሳ ኬꬅ ጌሊዲ ጾሳ ኬꬃ ካሬ ጊዶን ጋꬃን ባይዚዛይታኔ ሻሚዛይታ ጎዲዴስ። ሚሽ ላሚዛይታ ጻራጴዛታኔ ሃራጴ ባይዚዛይታ ኦይዴ ሺሪ ሺሪ ዬጊዲ፥ « ‹ታ ኬꬃይ ዎሳ ኬꬄ ጌቴቴስ› ጌቴቲዲ ጻፌቲዴስ፤ ኢንቴ ቃሴ ቦንቂዛይታ ጎንጎሎ ሂስቲዴታ» ጊዴስ።
MAT 21:14 ኣይፌ ቆቄታኔ ቶሆይ ሲሊዳ ኣሳታ ዬሱሳኮ ጾሳ ኬꬄ ኤሂዳ። ኢዚካ ኢስታ ፓꬂዴስ።
MAT 21:15 ጊዶ ኣቲን ቄሴታ ሃላቃቲኔ ሙሴ ዎጋ ታማርሲዛይቲ ኢዚ ኦꬂዳ ማላታታ ቤኢዳይሳኒኔ ጉꬃ ናይቲ፥ «ዎዜ ካዎ፥ ጋላታይ ዳዊቴ ናስ ጊዶ!» ጊዲ ዋሲዛይሳ ሲዪዳ ጊሻስ ዳሮ ሃንቄቲዳ።
MAT 21:16 ኢስቲካ ዬሱሳ፥ «ሃይቲ ናይቲ ጊዛይሳ ሲያይ?» ጊዳ፤ ዬሱሲካ ኢስታስ፥ «ኤ ሲያዲስ፤ ናይታ ዶናኒኔ ꬋሚዛ ቄሪ ናይታ ዶናን ታኒ ጋላታ ጊጊሳዲስ ጊዛሶ ሙሌራካ ናባቢ ኤሬኬቲ?» ጊዴስ።
MAT 21:17 ኢስታ ዬጊ ኣጊዲ ሄ ካታማፔ ኬዚዲ ቢታኒያ ጌቴቲዛሶ ቢዲ ሄን ኣቂዴስ።
MAT 21:18 ዬሱሲ ዎንቴꬃ ጋላስ ማላዶ ጉዬ ካታማ ሲሚሺን ኢዛ ጋፊሲዴስ።
MAT 21:19 ኦጌ ማታን ኢሲ ባላሴ ጌቴቲዛ ሚꬅ ቤኢዲ ጌዴ ኢዚኮ ሺቂሺን ሃይꬅ ጻላላፔ ኣቲን ኣይፌይ ባይንዳይሳ ቤኢዲ፥ «ሂያፔ ጉዬ ኔ ቦላ ኣይፌይ ዶፖ!» ጊን ባላሴ ሚꬃያ ሄራካ ሜላዱስ።
MAT 21:20 ዬሱሳ ካሊዛይቲ ሄሳ ቤኢዲኔ ማላሌቲዲ፥ «ሃና ባላሴያ ዋናዳ ሄራካ ሜላዴ?» ጊዳ።
MAT 21:21 ዬሱሲካ ኢስታ፥ «ታ ኢንቴስ ቱሙ ጋይስ፤ ኢንቴስ ኣማኖይ ዲኮኔ ኢንቴ ሲꬎንታ ኣጊኮ ባላሴ ሚꬃይ ቦላ ሃኒዳይሳ ማላ ጻላላ ጊዶንታ ሃይሳ ዙማ፥ ‹ሃይሳፌ ꬎቃሌታዳ ዱጌ ኣባን ጌላ› ኢንቴ ጊዳኮካ ኢዚ ጌላና» ጊዴስ።
MAT 21:22 ኢንቴስ ኣማኖይ ዲኮ ኢንቴ ዎሳን ኦይቺዳ ሚሽ ኡባካ ኤካና።
MAT 21:23 ዬሱሲ ጾሳ ኬꬄ ጌሊዲ ታማርሲሺን ቄሴታ ሃላቃቲኔ ዴሬ ጪማቲ ኢዛኮ ሺቂዲ፥ «ሃይሳ ዉርሳ ኦና ሼኔን ኦꬃይ? ሃይሳ ኦꬃናስ ሼኔ ኔስ ኦኒ ኢሚዴ?» ጊዲ ኢዛ ኦይቺዳ።
MAT 21:24 ዬሱሲካ ኢስታስ ዛሪዲ፥ «ታኒካ ኢንቴና ኢሲ ሚሽ ኦይቻይስ፤ ኢንቴ ታስ ዛሪኮ ታኒካ ሃይታ ኦና ሼኔን ኦꬂዛኮ ኢንቴስ ዮታና።
MAT 21:25 ዮሃኒሳ ጺንቃታይ ኣዋፔ ዪዴ? ሳሎፔ ዪዴዬ? ኣሳፔ?» ጊዴስ። ኢስቲካ፥ «ኑ፥ ‹ሳሎፔ ዪዴስ› ጊኮ፥ ‹ሂስቲን ኣዛስ ኣማኒቤኬቲ?› ጋና ጊዲ ባ ጊዶን ኢሶይ ኢሶይ ኢሳራ ዞሬቲዳ።
MAT 21:26 ቃሴ ኑ፥ ‹ኣሳፔ› ጊኮ፥ ኣሳይ ዉሪካ ዮሃኒሳ ናቤ ጊዲ ኣማኒዛ ጊሻስ ኑ ባቦስ» ጊዳ።
MAT 21:27 ሄሳ ጊሻስ ዬሱሳስ፥ «ኑ ኤሮኮ» ጊዲ ዛሪዳ። ኢዚካ ኢስታስ፥ «ሃይታ ታ ኦና ሼኔን ኦꬂዛኮ ታኒካ ኢንቴስ ዮቲኬ» ጊዴስ።
MAT 21:28 ዬሱሲ ኢስታ፥ «ኢንቴስ ኣይ ሚሳቲዜ? ናምኡ ኣቱማ ናይ ዲዛ ኢሳዴይ ዴስ፤ ኢዚካ ኮይሮ ናዛኮ ቢዲ፥ ‹ታ ናዞ! ሃች ጌዴ ዎይኔ ሚꬃሶ ባዳ ኦꬃ› ጊዴስ።
MAT 21:29 ናዚ ቃሴ፥ ‹ቢኬ!› ጊዲኔ ጉዬፔ ሙዞቲዲ ቢዴስ።
MAT 21:30 «ናምኣንꬆ ናዛካ ካሴይሳꬆካ፥ ‹ባ!› ጊን ናዚ፥ ‹ኤሮ!› ጊዲ ቦንታ ኣጋጊዴስ።
MAT 21:31 ሃይታ ናምኣታፔ ኣዋ ሼኔ ፖሊዳይ ኣዋይሴ?» ጊዲ ኦይቺዴስ። ኢስቲካ፥ «ኮይሮ ናዛ!» ጊዳ። ዬሱሲካ ኢስታስ፥ «ታ ኢንቴስ ቱሙ ጋይስ፤ ቃራጻ ቃንጺሲዛይቲኔ ላይማቲዛይቲ ሳሎ ካዎቴꬅ ኢንቴፌ ሲንꬃን ጌላና።
MAT 21:32 «ጻማቂዛ ዮሃኒሲ ኢንቴና ጺሎቴꬃ ኦጌ ቤሳናስ ኢንቴኮ ዪዴስ ሺን ኢንቴ ኢዚ ጊዛይሳ ኣማኒቤኬታ፤ ጊዶ ኣቲን ቃራጻ ቃንጺሲዛይቲኔ ላይማቲዛይቲ ጊዲኮ ኣማኒዳ፤ ኢዚ ሃኒዳይሳ ኢንቴ ቤዪ ሲሚዲካ ማሮቴꬃን ጌሊዲ ኣማኒቤኬታ» ጊዴስ።
MAT 21:33 «ሃራ ሌሚሶካ ሲዪቴ፤ ዎይኔ ሚꬂ ቶኪዛሶሆይ ዲዛዴይ ሄ ዎይኔዛስ ቢርዳ ዩሺ ኣꬂዲ ዎይኔዛ ኣይፌ ጉምኣናስ ኦላ ቦኪዴስ። ዎይኔዛ ናጋናስ ሚꬃ ቦላ ሻኮ ጊግሲዴስ። ሄሳፌ ጉዬ ጋዴዛ ዎይኔ ሚꬃራ ጎዪዛይታስ ኪራ ኢሚዲ ሃራ ዴሬ ቢዴስ።
MAT 21:34 ቦኔይ ጋኪሺን ዎይኔ ሚꬃዛ ኣይፌ ኤካናስ ባ ኣሽካራታ ጋዴዛ ጎዪዛይታኮ ዬዲዴስ።
MAT 21:35 ጋዴዛ ጎዪዛይቲ ኣሽካራታ ኦይኪዲ ኢሳ ዎꬊዳ፤ ኢሳ ቃሴ ሹቻን ጫዲዳ።
MAT 21:36 ጋዳ ጎዳይ ካሴይታፔ ኣꬊዛ ሃራ ኣሽካራታ ዬዲዴስ። ጎዪዛይቲ ሃኢካ ካሴይታ ቦላ ኦꬂዳይሳ ማላካ ኢስታ ቦላካ ፖሊዳ።
MAT 21:37 ዉርሴꬃን ኦኔ ኤሪዛይ፥ ‹ኢስቲ ኢዛ ቦንቻናኮ› ጊዲ ባ ና ኣꬂ ዬዲዴስ።
MAT 21:38 ጊዶ ኣቲን ጋዳ ጎዪዛይቲ ናዛ ቤኢዳ ማላ፥ ‹ሃይሲ ኢዛ ላታናይሳኮ! ኣኔ ሃ ዪቴ፤ ኢዛ ዎꬊዲ ጋዳ ላቶስ› ጊዳ።
MAT 21:39 ናዛ ኦይኪዲ ዎይኔይ ቶኬቲዳሶዛፔ ካሬ ኬሲዲ ዎꬊዳ።
MAT 21:40 «ኤሮ! ዎይኔዛ ጎዳይ ዪዛ ዎዴ ሄ ጋዳ ጎዪዛ ኣሳታ ዎስታና ኢንቴስ ሚሳቲዜ?» ጊዴስ።
MAT 21:41 ኢስቲካ፥ «ሄይታ ኢታታ ዳሮ ዋዪሲ ዎꬊዲ ዎይኔይ ቶኬቲዛ ጋዳፔ ቤሲዛ ዎይኔ ኣይፌ ዎዴራ ኢዛስ ኢሚዛ ሃራ ጎሻንቻታስ ጋዳ ኪራሳና» ጊ ኢዛስ ዛሪዳ።
MAT 21:42 ዬሱሲካ ኢስታስ፥ «ጌሻ ማጻፋን፥ ‹ጊምቤ ኬጺዛይቲ ኢታ ጊዲ ዎራ ዬጊዳ ሹቻይ ኬꬃስ ጉላ ቦላ ዎꬊዛ ሹች ጊዲዴስ፤ ጾሲ ሃይሳ ኦꬂዴስ፤ ኢዛ ኦሶይካ ኑ ኣይፌስ ማላሊሲዛዝ› ጌቴቲ ጻፌቲዳይሳ ናባቢቤኬቲ?
MAT 21:43 «ሄሳ ጊሻስ ታ ኢንቴስ ጾሳ ካዎቴꬂ ኢንቴፌ ኤኬታዳ ኣይፌ ኣይፊዛ ዴሬታስ ኢሜታና።
MAT 21:44 ሃይሳ ሹቻ ቦላ ኩንዲዛይ ሜቃና፤ ሹቻይ ኢዛ ቦላ ዎꬊዛዴይካ ሊቃና» ጊዴስ።
MAT 21:45 ቄሴታ ሃላቃቲኔ ፋርሳዌቲ ኢዛ ሌሚሶይ ኢስታ ጊሻስ ጊዲዳይሳ ኤሪዳ።
MAT 21:46 ጊዶ ኣቲን ኢስቲ ኢዛ ኦይኪ ቃቾንታ ማላ ኣሳይ ዬሱሳ ናቤ ማላ ጼሊዛ ጊሻስ ባቢዳ።
MAT 22:1 ቃሴካ ዬሱሲ ሃራ ሌሚሶ፥
MAT 22:2 «ሳሎ ካዎቴꬂ ባ ናስ ሳርጌ ጊግሲዳ ኢሲ ካዎ ሚሳታዉስ።
MAT 22:3 ካዎይካ ዲጊሳስ ዮቲዳይታ ጼይጋናስ ባ ኣሽካራታ ዬዲዴስ፤ ጼይጌቲዳይቲካ፥ ‹ኑ ቦኮ› ጊዳ።
MAT 22:4 «ቃሴካ ሃራ ኣሽካራታ፥ ‹ካሴ ኢስታስ ዮቲዳይታ ሄኮ ታ ሳንጋ ቦራታኔ ሞꬊዳ ሜሄታ ሹካዳ ዲጊሳ ጊጊሳዲስ፤ ዉሪካ ጊጌቲዳ ጊሻስ ሳርጌሶ ሃ ዪቴ!› ጊዲ ዮቲቴ።
MAT 22:5 ጼይጌቲዳይቲ ጊዲኮ ኢዛ ጼይሳ ዉዳን ዬጎንታ ኣጊዲ ኢሶይ ባ ጎሻሶሆ፥ ኢሶይ ባ ዛልኤሶ ቢዴስ።
MAT 22:6 ሃንኮ ኣቲዳይታ ኣሽካራቲ ኦይኪዲ ዳሮ ዋዪሲዲ ዎꬊዳ።
MAT 22:7 «ካዎይካ ሃንቄቲዲ ዎታዳራታ ዬዲዲ ኣሽካራዛ ዎꬊዳይታ ꬋይሲዴስ፤ ኢስታ ካታማ ጹጊዴስ።
MAT 22:8 ባ ኣሽካራታካ፥ ‹ሳርጌዛ ዲጊሳይ ጊጊዴስ፤ ጊዶ ኣቲን ሳርጌዛሶ ጼይጌቲዳይቲ ሳርጌስ ቤሲዛይታ ጊዲቤቴና።
MAT 22:9 ጌዴ ኦጌ ቦላ ኬዚዲ ኢንቴ ዴሚዳ ኣስ ኡባ ሃ ዲጊሳሶ ጼይጊቴ› ጊዴስ።
MAT 22:10 ኣሽካራቲካ ኦጌ ቦላ ኬዚዲ ባ ዴሚዳይታ ሎኦታካ ኢታታካ ኡባ ሺሺዲ ሳርጌዛሶ ኢማꬅ ኩንꬂዳ።
MAT 22:11 «ካዎይካ ጼይጌቲዳ ኢማꬃ ቤያናስ ሶ ጌሊዛ ዎዴ ሳርጌ ማይኦ ማይኦንታ ኣስ ዴሚዴስ።
MAT 22:12 ‹ሃይሶ! ሳርጌ ማይኦ ማይኦንታ ዋናዳ ሃ ጌላናስ ዳንዳያዲ?› ጊ ኦይቺን ኣዴዛስ ዛራና ቃላይ ꬋይዴስ።
MAT 22:13 ካዎይካ ባ ኣሽካራታ፥ ‹ሃይሳ ኣዴዛ ቶሆኔ ኩሼ ሺሺ ቃቺዲ ሄን ካሬን ዲዛ ꬉማን ኬሲ ኦሊቴ፤ ሄን ዬሆኔ ኣቻ ጋርጬች ጊዳና።›
MAT 22:14 «ጼይጌቲዳይቲ ዳሮታ፤ ዶሬቲዳይቲ ጊዲኮ ጉꬃታ» ጊ ዮቲዴስ።
MAT 22:15 ሄሳፌ ጉዬ ፋርሳዌቲ ኬዚ ቢሼ፥ «ኢዛ ዶናፔ ባላ ቃላ ዎስቲ ዴሚ ኦይኪኖ?» ጊዲ ዞሬቲዳ።
MAT 22:16 ባና ካሊዛይታ ሄርዶሳ ኣሳታራ ኢዛኮ ኪቲዲ፥ «ኣስታማሬ! ኔኒ ቱማንቻኔ ጾሳ ኦጌ ቱማፔ ታማርሲዛዴ ጊዲዳይሳኔ ኦናስካ ዱማ ማዶ ኦꬆንታ ኡባካ ኢሲ ማላ ኔ ጼሊዛይሳ ኑ ኤሮስ።
MAT 22:17 ኔስ ኣይ ሚሳቲዛኮ ኣኔ ኑስ ዮታ፤ ቄሳሬስ ጊራ ቃንጻናስ ቤሲዜ? ቤሴኔ?» ጊዳ።
MAT 22:18 ዬሱሲካ ኢስታ ጌኔ ቆፋ ኤሪዲ፥ «ኢንቴኖ ቆꬌፔ ቆሞን ሃኒዛይቶ! ታና ዮኦን ባሌꬂ ኦይካናስ ኣዛስ ኮዬቲ?
MAT 22:19 ኢንቴ ጊራ ቃንጺዛ ሚሻ ኣኔ ታና ቤሲቴ» ጊን ኢስቲካ ኢሲ ዲናሬ ጌቴቲዛ ሚሽ ኢዛስ ኤሂዳ።
MAT 22:20 ኢዚካ፥ «ሃይሳ ሚሻ ቦላ ዲዛ ሚስሌይኔ ጻፌቲዳ ሱንꬃይ ኦናይሴ?» ጊዴስ።
MAT 22:21 ኢስቲካ ኢዛስ፥ «ቄሳሬይሳ» ጊዳ። ኢዚካ ኢስታስ ዛሪዲ፥ «ቄሳሬይሳ ቄሳሬስ፥ ጾሳይሳ ጾሳስ ኢሚቴ» ጊዴስ።
MAT 22:22 ሄሳ ሲዪዲ ኢስቲ ማላሌቲዲ ኢዛ ኣጊ ቢዳ።
MAT 22:23 «ሃይቂዳይታስ ዴንዶይ ባ» ጊዲ ኣማኒዛ ሳዱቃዌቲ ሄ ጋላስ ዬሱሳኮ ሺቂዲ፥
MAT 22:24 «ኣስታማሬ! ሙሴይ፥ ‹ኢሳዴይ ማቾ ኤኪዲ ና ዬሎንታ ሃይቂኮ ኢዛ ኢሻይ ሃይቂዳይሳ ማቾ ኤኪዲ ባ ኢሻ ላቲዛ ና ኢዛስ ዬሎ› ጊዴስ።
MAT 22:25 ኑ ኣቻን ላፑን ኢሻቲ ዴቴስ ሺን ኮይሮ ኢሻይ ማቾ ኤኪዲ ና ዬሎንታ ሃይቂዳ ጊሻስ ካሎ ኢሻይ ኢዛ ማቼዮ ኤኪዴስ።
MAT 22:26 ናምኣንꬆ ኢሻይካ ሃይቂዳ ኢሻꬆ ና ዬሎንታ ሃይቂዴስ፤ ሄሳꬆካ ሃኒሺን ማጫሳያ ላፑንꬃ ኢሻ ጌላዱስ።
MAT 22:27 ዉርሴꬃን ማጫሳያ ሃይቃዱስ።
MAT 22:28 ሄሳ ጊሻስ ላፑናቲ ዉሪካ ኢዞ ኤኪዳሺን ሃይቆፔ ዴንꬃ ጋላስ ማጫሳያ ላፑናታፔ ኣዋይሳ ማቾ ጊዳኔ?» ጊዳ።
MAT 22:29 ዬሱሲካ ኢስታስ ዛሪዲ፥ «ጌሻ ማጻፋታኔ ጾሳ ዎልቃ ኢንቴ ኤሮንታ ጊሻስ ባሌቴታ።
MAT 22:30 ሃይቆፔ ዴንዲዳፔ ጉዬ ኣሳይ ሳሎ ኪታንቻታ ማላ ጊዳና ኣቲን ኤኬቴቴናኔ ጌሌቴና።
MAT 22:31 ሃይቂዳይታ ዴንꬃ ጊሻስ ጊዲኮ ጾሲ፥ ‹ታኒ ኣብራሃሜ ጾሳ፥ ዪሳቃ ጾሳ፥ ያቆቤ ጾሳ› ጊዲ ኢንቴስ ዮቶይሳ ናባቢቤኬቲ? ጾሲ ፓጻታ ጾሳ ኣቲን ሃይቄꬃታ ጾስ ጊዴና» ጊዴስ።
MAT 22:33 ዴሬዚካ ሄሳ ሲዪዲ ኢዛ ቲሚርቴዛን ማላሌቲዴስ።
MAT 22:34 ዬሱሲ ሳዱቃዌታ ጮኡ ሂስቲዳይሳ ሲዪዲ ፋርሳዌቲ ኢሲ ቦላ ሺቄቲዳ።
MAT 22:35 ኢስታ ጊዶፌ ኢሲ ሙሴ ዎጋ ሎኤꬂ ኤሪዛዴይ ዬሱሳ ፓጫናስ ኮዪዲ፥ «ኣስታማሬ! ሙሴ ዎጋታ ጊዶን ኡባፌ ኣꬊዛይ ኣዋይሴ?» ጊዲ ኦይቺዴስ።
MAT 22:37 ኢዚካ ዛሪዲ፥ « ‹ኔ ጎዳ ጾሳ ኔ ኩሜꬃ ዎዚናፔ፥ ኔ ኩሜꬃ ሼምፖፌ፥ ኔ ኩሜꬃ ቆፋፔ ዶሳ።›
MAT 22:38 ሃይሲ ኮይሮኔ ኡባፌ ኣꬊዛ ኣዛዞ።
MAT 22:39 ናምኣንꬆይካ ኢዛ ሚሳቴስ፥ ሄሲካ፥ ‹ኔ ሾሮ ኔ ሁኤ ማላ ዶሳ› ጊዛይሳ።
MAT 22:40 ሙሴ ዎጋይኔ ናቤታ ቲሚርቴይ ዉሪካ ሃይታ ናምኡ ኣዛዞታን ቃሼቴስ» ጊዴስ።
MAT 22:41 ፋርሳዌቲ ኢሲ ቦላ ሺቄቲ ዲሺን ዬሱሲ ኢስታ፥
MAT 22:42 «ኪርስቶሳ ጊሻስ ኢንቴ ኣይ ጌቲ? ኢዚ ኦና ና?» ጊ ኦይቺዴስ፤ ኢስቲካ ኢዛስ ዛሪዲ፥ «ኢዚ ዳዊቴ ና» ጊዳ።
MAT 22:43 ኢዚካ ኢስታስ፥ «ሂስቲን ዳዊቲ ጺሎ ኣያና ዎልቃን፥ ‹ጾሳይ ታ ጎዳ› ጊዲ ዋኒ ጼይጊዴ? ‹ታ ኔ ሞርኬታ ኔ ቶሆ ጋርሳን ጉልባቲሳና ጋካናስ ኔ ታ ኡሻቻን ኡታ!› ጊዴስ።
MAT 22:45 ሄሳ ጊሻስ ዳዊቲ ኢዛ፥ ‹ታ ጎዳ› ጊዲ ጼይጊኮ ዋኒዲ ኢዛስ ና ጊዳና ዳንዳይዜ?» ጊዴስ።
MAT 22:46 ኢዛስ ኢሲ ቃላ ዛራና ዳንዳይዳ ኣሲ ዎይኮ ሄ ጋላሳፌ ሲሚን ኢዛ ኦይሾ ኦይቻና ጻሊዳ ኣሲ ኦኒካ ቤቲቤና።
MAT 23:1 ቃሴካ ዬሱሲ ዴሬዛሲኔ ባና ካሊዛይታስ፥
MAT 23:2 «ሙሴ ዎጋ ታማርሲዛይቲኔ ፋርሳዌቲ ሙሴ ዎምቦራ ቦላ ኡቲዳ።
MAT 23:3 ሄሳ ጊሻስ ኢስቲ ኢንቴስ ዮቲዛይሳ ኡባ ኦꬂቴኔ ናጊቴ፤ ጊዶ ኣቲን ኢስቲ ዶናን ሃሳይዛይሳ ማላ ኦሶን ቤሶንታ ጊሻስ ኢንቴ ኢስታ ኦሶ ካሎፍቴ።
MAT 23:4 «ሄሳꬆካ ኣሲ ቶካናስ ዳንዳዮንታ ዴጾ ቶሆ ቃቺዲ ኣሳ ሃሼ ቦላ ዎꬄቴስ፤ ባስ ጊዲኮ ቢራꬌ ጼራንካ ቦቼቴና።
MAT 23:5 ኢስታ ኦሶ ኡባ ኣሲ ቤያና ማላ ኦꬄቴስ፤ ባ ኣሼንኪታቤ ጌሻ ማጻፋ ጊዶፌ ጻፊ ኤኪዳ ኢሲ ኢሲ ጺቂሴታ ኪታቤ ሲኪዲ ሊጴ ቦላ ዎይኮ ኩሼን ቃቺዛዝ ኦꬄቴስ። ባ ማይኦ ማጫራ ኣዱሴቴስ።
MAT 23:6 ዲጊሳይ ዲዛሶን ቦንቾሶ ኣይሁዳ ዎሳ ኬꬃንካ ሲንꬃራ ኡታና ዶሴቴስ።
MAT 23:7 ሄሳꬆካ ጊያ ጊዶን ሳሮ ጌቴታናሲኔ ኣሳይ ኢስታ፥ ‹ኣስታማሬ!› ጋና ማላ ኮዬቴስ።
MAT 23:8 «ኢንቴ ጊዲኮ፥ ‹ኣስታማሬ› ጌቴቲ ጼይጌቶፍቴ፤ ኢንቴ ኣስታማሬይ ኢሳ ጻላላ ጊዲሺን ኢንቴ ዉሪካ ኢሶይ ኢሳስ ኢሻንታ።
MAT 23:9 ሳሎን ኢንቴስ ኢሲ ኣዋይ ጻላላ ዲዛ ጊሻስ ቢታ ቦላ ኦናካ፥ ‹ኣዋዉ!› ጊ ጼይጎፒቴ።
MAT 23:10 ኢንቴ ኣስታማሬይ ኢሲ ኪርስቶሳ ጻላ ጊዲዳ ጊሻስ ኢንቴ፥ ‹ኣስታማሬንቶ!› ጌቴቶፍቴ።
MAT 23:11 ኢንቴ ጊዶን ኡባፌ ኣꬊዛዴይ ኢንቴስ ኦꬂዛዴ ጊዳና።
MAT 23:12 ባና ꬎቂሲዛዴይ ካዉያና፤ ባና ካዉሺዛዴይ ቦንቼታና።
MAT 23:13 «ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ! ኢንቴኖ ፋርሳዌቶ! ኣሳይ ጾሳ ካዎቴꬅ ጌሎንታ ማላ ኣሳ ቦላ ኢንቴ ፔንጌ ጎርዲዛ ጊሻስ ኢንቴና ኣዬ ኣና! ኢንቴ ኢንቴስ ጌሌኬታኔ ጌላናስ ኮይዛይታካ ጌልꬄኬታ።
MAT 23:14 ኢንቴኖ ቆꬌፔ ቆሞን ሃኒዛይቶ! ሙሴ ዎጋ ታማርሲዛይቶ፥ ቃሴካ ፋርሳዌቶ! ኢንቴስ ኣዬ ኣና! ኣዚናይ ባይንዳ ማጫሳታ ኬꬅ ካሎሲሼ ኣሳ ኣይፌ ሲንꬃን ኣዱሳ ዎሳ ኢንቴ ዎሲዛ ጊሻስ ኢንቴ ኢታ ፒርዳ ፒርዴታና።
MAT 23:15 «ኢንቴኖ ቆꬌፔ ቆሞን ሃኒዛይቶ! ሙሴ ዎጋ ታማርሲዛይቶ! ቃሴካ ፋርሳዌቶ! ኢሲ ኣስ ኣይሁዳ ኣማኖን ጌልꬃናስ ኣባ ቦላራኔ ቢታ ቦላራ ዩዪ ዳቡርዲኔ ኣማንꬂዳ ኣሳ ኢንቴፌ ናምኡ ኩሼ ኣꬂዲ ጋናሜ ና ኢንቴ ኬሲዛ ጊሻስ ኢንቴስ ኣዬ ኣና!
MAT 23:16 «ኢንቴኖ ኢንቴስ ቆቂ ኡቲዲ ሃራታ ካሌꬂዛይቶ! ኢንቴስ ኣዬ ኣና! ‹ኦኒካ ጾሳ ኬꬃን ጫቂኮ ኣይኮይ ባ› ጊዶ ኣቲን፥ ‹ጾሳ ኬꬃ ጊዶን ዲዛ ዎርቃን ጫቂኮ ጫቆ ጎሜይ ጋካና› ጌታ።
MAT 23:17 ኢንቴኖ ቆቂዳይቶ! ባሌቲዳይቶ! ዎርቃፌኔ ዎርቃ ዱማሲዳ ጾሳ ኬꬃፌ ኣዋይሲ ኣꬊዜ?
MAT 23:18 ሄሳꬆካ፥ ‹ኦኒካ ያርሾ ያርሺዛሶ ቦላ ጫቂኮ ኣይኮይ ባ፤ ጊዶ ኣቲን ያርሺዛሶን ዲዛ ያርሾዛ ቦላ ጫቂኮ ጫቆይ ጎሜስ› ጌታ።
MAT 23:19 ኢንቴኖ ቆቄቶ! ያርሾፌኔ ያርሾ ሺሺዛሶፔ ኣዋይሴ ኣꬊዛይ?
MAT 23:20 ሄሳ ጊሻስ ያርሾ ሺሺዛሶ ቦላ ጫቂዛዴይ ያርሾሶዛ ቦላኔ ያርሺዛሶ ቦላ ዲዛ ኡባ ሚሻን ጫቄስ።
MAT 23:21 ሄሳꬆካ ጾሳ ኬꬃዛ ቦላ ጫቂዳይ ጾሳ ኬꬃኒኔ ኢዛ ጊዶን ኣቂዛይሳን ጫቄስ።
MAT 23:22 ሳሎን ጫቂዛዴይካ ጾሳ ኣልጋኒኔ ኣልጋ ቦላ ኡቲዳይሳን ጫቄስ።
MAT 23:23 «ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ፋርሳዌቶ! ኢንቴስ ኣዬ ኣና! ኣሱታፔ፥ ኣኑጋፔኔ ካትካልኣፌ ታማፌ ኢሲኖ ኢሜታ፤ ጊዶ ኣቲን ዎጋታፔ ዋናቲዛይታ ሄይቲካ ቱማ ፒርዳ፥ ማሮቴꬂኔ ኣማኔቴꬅ ጊዲኮ ካꬊዴታ። ሄይታ ኣጎንታ ዲሼ ሃይታንታ ኢንቴ ኦꬃናስ ኢንቴስ ቤሴስ ሺን ኣጊዴታ።
MAT 23:24 ኢንቴኖ ቆቂ ኡቲዲ ካሌꬂዛይቶ! ኡኤ ጋጪዲ ኡዬታ ሺን ጋሜላ ሙሜ ሚቴታ!
MAT 23:25 «ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶኔ ፋርሳዌቶ! ኢንቴስ ኣዬ ኣና! ጹኣሲኔ ኬሬስ ቦላ ባጋ ቁጬታ ሺን ኢዛ ጊዶን ዲዛይሳ ኢንቴ ቦንቃኒኔ ኡዜቴꬃን ሺሺዴታ።
MAT 23:26 ኔኖ ቆቄ ፋርሳዌዞ! ኮይሮታዳ ጹኣሲኔ ኬሬስ ጊዶ ባጋ ጌሻ! ሄሳፌ ጉዬ ካሬ ባጋይ ጌሽ ጊዳና።
MAT 23:27 «ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ቃሴ ፋርሳዌቶ! ቦላ ባጋይ ኖራን ሜሼቲዲ ሎኢዛይቲ ጊዶይ ጊዲኮ ሃይቂዳይታ ሜቄꬂኔ ዳሮ ቱናቴꬃን ኩሚዳ ዱፎታ ሚሳቲዛ ጊሻስ ኢንቴስ ኣዬ ኣና!
MAT 23:28 ኢንቴካ ቦላ ባጋራ ኣሳስ ጺሎ ኣሳታ ሚሳቴታ፤ ኢንቴ ጊዶይ ጊዲኮ ጪሞኒኔ ኢታቴꬃን ኩሚዴስ።
MAT 23:29 «ኢንቴኖ ዶናን ጪሚዛይቶ! ሙሴ ዎጋ ኣስታማሬቶ፥ ቃሴካ ፋርሳዌቶ! ኢንቴስ ኣዬ ኣና! ናቤታ ዱፎ ሎኤꬂዛይቶ! ጺሎ ኣሳታ ዱፎ ሃዉልቴራ ጊግሲዛይቶ!
MAT 23:30 ኑ ኣዋቲ ናቤታ ዎꬊዛ ዎዴ ኑ ዲዛኮ ኢስታራ ዙፔቶኮ ሺን፥
MAT 23:31 ኢንቴ ናቤታ ዎꬊዳ ኣሳታ ናይታ ጊዲዳይሳ ኢንቴ ዶናራ ኢንቴርካ ኢንቴ ኢንቴ ቦላ ማርካቴታ።
MAT 23:32 ሂስቲኮ ኦሴቲዲ ፖሌቶንታ ኦጌ ቦላ ዲዛ ኢንቴ ኣዋታ ኦሶ ፖሊቴ።
MAT 23:33 «ኢንቴኖ ዱኪዛ ኢታ ሾሻ ናይቶ! ጋናሜ ታማ ፒርዳፌ ኢንቴ ዋኒ ኣታኔ?
MAT 23:34 ሄሳ ጊሻስ ናቤታኔ ኤራንቻታ ኣስታማሬታካ ታ ኢንቴስ ዬዳና። ኢንቴ ኢስታ ጊዶፌ ኢሲ ኢሲ ኣሳታ ዎꬋና። ባጋይታ ኢንቴ ካቃና፤ ባጋይታ ኢንቴ ኣይሁዳ ዎሳ ኬꬃን ጋራፋናኔ ሄ ካታማፔ ሃራ ካታማ ኢንቴ ጎዳና።
MAT 23:35 ሄሳ ጊሻስ ጺሎ ኣቤሌ ሱꬃፌ ሃ ሲሚን ጾሳ ኬꬃኒኔ ያርሾ ያርሺዛሶ ጊዶን ኢንቴ ዎꬊዳ ባራኪዮ ና ዛካራሳ ሱꬃ ጋካናስ ቢታ ቦላ ጉኪዳ ጺሎታ ሱꬃ ኡባስ ኢንቴ ኦይሼታና።
MAT 23:36 ታ ኢንቴስ ቱሙ ጋይስ፤ ካሴ ኣꬊዳ ዮኦ ኡባስ ሃይሲ ሃ ዬሌታይ ኦይሼታና።
MAT 23:37 «ሃኔ ዬሩሳላሜ! ናቤታ ዎꬊዛሬ! ኔኮ ኪቴቲዳይታ ሹቻራ ጫዲዛሬ! ሃኔ ዬሩሳላሜ፥ ኩቶ ኣያ ባ ጪዬታ ባ ቄፌ ጊዶ ሺሺዛ ማላ ታ ኔ ናይታ ሺሻናስ ኣፑን ዎዴ ኮያዲናሺን ኔ ጊዲኮ ኮያቤካ።
MAT 23:38 ሄኮ ኢንቴ ኬꬂ ካይስ ጊዲ ኣታና።
MAT 23:39 ታ ኢንቴስ ቱሙ ጋይስ፤ ኢንቴ ጎዳ ሱንꬃን ዪዛዴይ ኣንጄቲዳዴ ጋና ዎዴይ ጋካናስ ናምኣንꬆ ታና ቤዬኬታ» ጊዴስ።
MAT 24:1 ዬሱሲ ጾሳ ኬꬃፌ ኬዚ ቢሺን ኢዛ ካሊዛይቲ ጾሳ ኬꬃዚ ሹቻን ኬጼቲዳይሳ ቤሳና ኮዪዲ ዬሱሳኮ ሺቂዳ።
MAT 24:2 ኢዚካ ኢስታስ፥ «ሃይሳ ኡባ ጼሌቲ? ታ ኢንቴስ ቱሙ ጋይስ፤ ሃይሲ ኢንቴ ቤኢዛ ኢሶይ ኢሳ ቦላ ዲዛ ሹቻይ ላሌቶንታ ኢሲ ሹቺካ ሃይሳꬆ ዴና» ጊዴስ።
MAT 24:3 ኢዚ ዳብራዛይቴ ጌቴቲዛ ዙማ ቦላ ኡቲ ዲሺን ኢዛ ካሊዛይቲ ጻላላ ኢዛኮ ሺቂዲ፥ «ኣኔ ኑስ ዮታ፤ ሃይሲ ኔ ጊዛይሲ ኣይዴ ሃናኔ? ኔ ዩሳሲኔ ዎዴ ዉርሴꬃስ ማላታይ ኣዜ?» ጊ ኦይቺዳ።
MAT 24:4 ዬሱሲካ ዛሪዲ፥ «ኦኒካ ኢንቴና ባሌꬆንታ ማላ ናጌቲቴ።
MAT 24:5 ቡሮ ዳሮቲ፥ ‹ታ ኪርስቶሳ› ጊሼ ታ ሱንꬃን ያና፤ ዳሮታካ ባሌꬃና።
MAT 24:6 ኦላኔ ኦላ ጊሻስ ሃሳዬቲዛ ዎሬ ኢንቴ ሲያና። ሃ ዮኦቲ ዉሪካ ዎልቃራ ፖሌታና ሺን ዉርሴꬂ ቡሮ ጊዲዳ ጊሻስ ኢንቴ ሃይሳን ዳጋሞንታ ማላ ናጌቲቴ።
MAT 24:7 ዴሬይ ዴሬ ቦላ፥ ካዎይ ካዎ ቦላ ዴንዳና፤ ዱማ ዱማ ዴሬን ኮሻይኔ ቢታ ቃꬂ ሃናና።
MAT 24:8 ሄሲ ዉሪካ ሚጻስ ሌሶ ማላ።
MAT 24:9 ሄ ዎዴ ኢንቴና ዋዬስ ኣꬂ ኢማና፤ ኢንቴና ዎꬋና፤ ታ ሱንꬃ ጋሶን ዴሬ ኡባን ኢንቴ ኢጼቲዳይታ ጊዳና።
MAT 24:10 «ሄ ዎዴ ዳሮ ኣሳይ ꬉጴታና፤ ኢሶይ ኢሳ ኣꬂ ኢማናኔ ባ ጊዶን ኢጼታና።
MAT 24:11 ዳሮ ዎርዶ ናቤቲ ዴንዳናኔ ዳሮታ ባሌꬃና።
MAT 24:12 ኢታቴꬂ ዳሪዛ ጊሻስ ዳሮታፔ ሲቆይ ኢርጻና።
MAT 24:13 ዉርሴꬅ ጋካናስ ሚኒዳዴይ ኣታና።
MAT 24:14 ዴሬ ኡባስ ማርካ ጊዳና ማላ ሃይሲ ካዎቴꬃ ሚሺራቾ ቃላይ ኩሜꬃ ኣላሜን ዮቴታና፤ ሄሳፌ ጉዬ ዉርሴꬂ ያና።
MAT 24:15 «ሄሳ ጊሻስ ናቤ ዳኔላን ዮቴቲዳይሳ ማላ፥ ‹ሃራሲዛ ቱናቴꬂ› ኣንጄቲዳሶን ኤቂዳይሳ ኢንቴ ቤኢዛ ዎዴ ናባቢዛዴይ ዎዚናን ዎꬆ፤
MAT 24:16 ሄ ዎዴ ዩሁዳን ዲዛይቲ ፑዴ ዙማ ቦላ ጋንጌቶ።
MAT 24:17 ኬꬃ ካራ ቦላ ዲዛዴይ ኦኒካ ባ ሚሽ ኬꬃፌ ኬሳና ጊዲ ዱጌ ዎꬎፎ።
MAT 24:18 ጋዴ ጊዶን ዲዛዴይ ኦኒካ ባ ማይኦ ኤካና ጊዲ ሶ ሲሞፎ።
MAT 24:19 ሄ ጋላሳታን ቃንꬃራ ዲዛ ማጫሳታሲኔ ና ꬋንꬂዛ ኣዬታስ ኣዬ ኣና!
MAT 24:20 ሄሳ ጊሻስ ኢንቴ ጋንጎይ ባልጎ ዎይኮ ሳምባታ ጋላስ ጊዶንታ ማላ ዎሲቴ።
MAT 24:21 ሄ ዎዴ ኣላሜይ ሜꬌቶሶፔ ሃች ጋካናስ ሃኒ ኤሮንታ ሚሺ ሲንꬃፌካ ኢዛ ሚሳቲዛይ ባይንዳ ዎልቃማ ሜቶይ ሃናና።
MAT 24:22 ሄ ጋላሳቲ ቃሞንታኮ ኣሾ ማይኢዳ ኣሲ ዉሪ ኣቴና ሺን ዶሬቲዳይታ ጊሻስ ሄ ጋላሳቲ ቃማና።
MAT 24:23 «ሄ ዎዴ ኦኒካ፥ ‹ሄኮ ኪርስቶሲ ሃይሳን ዴስ!› ዎይኮ፥ ‹ሄሳን ዴስ› ጊዛዴ ኣማኖፒቴ።
MAT 24:24 ዎርዶ ኪርስቶሲኔ ዎርዶ ናቤቲ ቡሮ ዴንዲዲ ኢስታስ ዳንዳዬቲኮ ዶሬቲዳይታ ባሌꬃናስ ጊዲ ዎልቃማ ማላታታኔ ካሴ ኦሴቲ ኤሮንታ ሚሽ ኦꬃና።
MAT 24:25 «ሄኮ ሃይሳ ታ ኢንቴስ ካሴታ ዮታይስ።
MAT 24:26 ሄሳ ጊሻስ፥ ‹ሄኮ ሂርኪ ባዞን ዴስ› ጊዲ ኢንቴስ ዮቲኮ ሄ ኬዞፒቴ፤ ‹ሄኮ ኢልፒኔን ዴስ› ጊኮ ኣማኖፒቴ።
MAT 24:27 ዎልቃንꬂ ኣርሼይ ሞኪዛሶራ ዎልቃሚዲ ኣርሼይ ዉሊዛሶ ጋካናስ ፖኢዛይሳ ማላ ኣሳ ና ዩሳይካ ሄሳꬆ ሃናና።
MAT 24:28 ኣሃይ ዲዛሶ ኣንኮይ ሺቄስ።
MAT 24:29 «ሄራካ ሄ ኢታ ሜቶ ጋላሳታፔ ጉዬ ኣርሼይ ꬉማና፤ ኣጊናይ ባ ፖኦ ዲጋና፤ ጾሊንቴቲ ሳሎፔ ቆቆፌታና፤ ሳሎ ዎልቃማቲካ ቃጻና።
MAT 24:30 «ሄ ዎዴ ኣሳ ና ማላታይ ሳሎ ቦላ ቤታና። ቢታ ቦላ ዲዛ ዴሬይ ዉሪ ዬካና፤ ኣሳ ናይካ ሳሎ ሻራ ቦላ ዳሮ ዎልቃራኔ ጊታ ቦንቾራ ዪሺን ኣሳይ ቤያና።
MAT 24:31 ኪታንቻታካ ዳሮ ዎልቃማ ጹሩምባ ጊሪሳራ ዬዳና። ኢስቲካ ዶሬቲዳይታ ኦይዱ ጉላፔ ሳሎስ ሃ ጋጻፔ ሄ ጋጻ ጋካናስ ኡባ ኢሲሶ ሺሻና።
MAT 24:32 «ባላሴ ጌቴቲዛ ሚꬃፌ ሃይሳ ታማርቴ፤ ባላሴ ሚꬃይስ ኡንቁሎይ ጪሊሊዛ ዎዴ ኢዛ ሃይꬅ ኬሲሺን ቦኔይ ማቲዳይሳ ኢንቴ ኤሬታ።
MAT 24:33 ሄሳꬆካ ሃይታ ኢንቴ ቤኢዛ ዎዴ ኢዚ ፔንጌ ማቲዳይሳ ኢንቴ ኤራና።
MAT 24:34 ታ ቱሙ ጋይስ፤ ሃይሲ ዉሪ ፖሌታና ጋካናስ ሃ ዬሌታይ ኣꬌና።
MAT 24:35 ሳሎይኔ ሳኣይ ኣꬋና ሺን ታ ቃላይ ጊዲኮ ሙሌካ ኣꬌና።
MAT 24:36 «ሄ ጋላሳዮኔ ሄ ሳቴዮ ኣዋፔ ኣቲን ሳሎ ኪታንቻታ ጊዲንካ ናዛ ጊዲንካ ኦኒካ ኤሬና።
MAT 24:37 ኖሄ ዎዴ ሃኒዳይሳ ማላ ኣሳ ና ዩሲ ሄሳ ማላ ጊዳና።
MAT 24:38 ꬋይሲዛ ሃꬃፌ ካሴ ኖሄይ ማርካቤን ጌሊዛ ጋላስ ጋካናስ ኣሳይ ሚሼኔ ኡዪሼ፥ ኤኪሼኔ ጌልሼ ጋምኢዴስ።
MAT 24:39 ሄ ዎዴይ ጋካናስ ኣዚ ሃናናኮ ኣሳይ ኤሮንታኔ ቆፖንታ ባሻ ሃꬂ ዪዲ ሚቲዳይሳ ማላ ታ ኣሳ ናይ ዪዛ ዎዴይካ ሄሳꬆ ሃናና።
MAT 24:40 «ሄ ዎዴ ናምኡ ኣሳቲ ኢሲፌ ጎሻን ፔኣና ሺን ኢስታፌ ኢሳዴይ ኤኬታና፤ ኢሳዴይ ኣታና።
MAT 24:41 ናምኡ ማጫሳቲ ዎጻን ኢሲፌ ጋጫና ሺን ኢስታፌ ኢሲኔያ ኤኬታና፤ ኢሲኔያ ኣታና።
MAT 24:42 «ሂስቲኮ ኢንቴ ጎዳይ ያና ጋላሳ ኢንቴ ኤሮንታ ጊሻስ ቤጊዲ ናጊቴ።
MAT 24:43 ሃይሳ ዎዚናን ዎꬂቴ፤ ካይሶይ ቃማፌ ኣፉንꬃ ሳቴ ቦላ ያናኮን ኤሪዛኮ ኢዛ ሚሽ ካይሶይ ኤኮንታ ማላ ኬꬃ ኣዋይ ቤጊዲ ናጋና።
MAT 24:44 ኣሳ ናይካ ኢንቴ ቆፖንታ ሳቴ ቦላ ያና፤ ኢንቴካ ሄሳꬆ ጊጌቲዳይታ ጊዲቴ።
MAT 24:45 «ዎዴራ ሶ ኣሳ ቁማ ሚዛና ማላ ጎዳይ ባ ኬꬃ ኣሳ ቦላ ሹሚዳ ኣማኔቲዛ ጪንጫ ኦሳንቻይ ኦኔ?
MAT 24:46 ኬꬃ ኣዋይ ሲሚዲ ዪዛ ዎዴ ኢዛስ ኢሚዳ ሃዳራ ኦꬂ ፖሊሼ ቤቲዳ ኦሳንቻይ ኣንጄቲዳይሳ።
MAT 24:47 ታ ኢንቴስ ቱሙ ጋይስ፤ ጎዳይ ኢዛ ባ ሃሪዳ ኡባ ቦላ ሹማና።
MAT 24:48 ጊዶ ኣቲን ሄ ኦሳንቻይ ኢታ ጊዲዲ፥ ‹ታ ጎዳይ ጋምኢዲ ያና› ጊ ቆፒዲ፥
MAT 24:49 ዴንዲ ሃንኮ ኦሳንቻታ ዋꬋ ኦይኪኮ ማꬆቲዛይታራ ሚኮኔ ኡዪኮ፥
MAT 24:50 ኢዚ ቆፖንታ ጋላሳኒኔ ኤሮንታ ሳቴን ኢዛ ጎዳይ ዪዲ፥
MAT 24:51 ኢዛ ቃንጼꬂ ካኣና፤ ኢዛ ኤጻ ቆꬌፔ ቆሞን ሃኒዛይታራ ኦꬃና። ሄንካ ዬሆይኔ ኣቻ ጋርጬቺ ሃናና።
MAT 25:1 «ሄ ዎዴ ሳሎ ካዎቴꬂያ ሚሺራ ሞካናስ ጾምፔ ኦይኪዲ ኬዚዳ ታሙ ጌላኦታ ሚሳታዉስ።
MAT 25:2 ሄ ታማታፔ ኢቻሹ ጌላኦቲ ኤያታ፤ ሃንኮ ኢቻሻቲ ጪንጫታ።
MAT 25:3 ኤያቲ ኩራዜ፥ ጾምፔ ኦይኪዳ ሺን ዉሪኮ ጉጃና ሃራ ናጌ ላምባ ኦይኪቤቴና።
MAT 25:4 ጪንጫቲ ጊዲኮ ባ ኩራዜዛራ ዉሪኮ ጉጃና ላምባ ሃራ ጻርሙሴን ኦይኪዳ።
MAT 25:5 ማቺዮ ኤካና ሚሺራይ ዮንታ ጋምኢን ꬊስኮይ ዴጺን ኣሳይ ዉሪካ ꬊስኪዴስ።
MAT 25:6 «ሌላ ጊዶꬅ ጊዲሺን፥ ‹ሚሺራዚ ዬስ! ኬዚዲ ሞኪ ኤኪቴ!› ጊዛ ጼይሳ ቃላይ ሲዬቲዴስ።
MAT 25:7 ሄ ዎዴ ጌላኦቲ ዉሪካ ዴንዲዲ ባ ጾምፔ ጾምፔ ኦይሴꬆኔ ጊጌቴꬅ ኦይኪዳ።
MAT 25:8 ኤያቲ ጪንጫታ፥ ‹ኑ ጾምፔይ ቶኣና ጊዛ ጊሻስ ኢንቴ ላምባፌ ኑስ ኢሚቴ› ጊዳ።
MAT 25:9 «ጪንጫ ጌላኦቲ ኢስታስ ዛሪዲ፥ ‹ኑስ ዲዛ ላምባይ ኑሳራኔ ኢንቴሳራ ጊዶንታ ጊሻስ ቢዲ ላምባ ባይዚዛይታፔ ኢንቴስ ሻሚቴ› ጊዳ።
MAT 25:10 ኢስቲ ላምባ ሻማና ቢ ኪቺን ሚሺራዚ ጋኪ ዎꬊዴስ። ካሴ ጊጌቲ ኡቲዳ ጌላኦቲ ቡላቻሶ ኢዛራ ጌሊዳ፤ ካሬይካ ጎርዴቲዴስ።
MAT 25:11 «ጉꬅ ጋምኢሼ ሃንኮ ጌላኦቲ ዪዲ፥ ‹ጎዶ! ጎዶ! ካሬ ኑስ ዶያ!› ጊዳ።
MAT 25:12 ኢዚካ ዛሪዲ፥ ‹ታ ኢንቴስ ቱሙ ጋይስ፤ ታ ኢንቴና ኤሪኬ!› ጊዴስ።
MAT 25:13 ሄሳ ጊሻስ ያና ጋላሳ ዎይኮ ሳቴዛ ኢንቴ ኤሮንታ ጊሻስ ጊጌቲዲ ናጊቴ።
MAT 25:14 «ጾሳ ካዎቴꬂ ባስ ዲዛዝ ኡባ ባ ኣሽካራታስ ሃዳራ ኢሚዲ ሃራ ዴሬ ባና ዴንዲዳ ኢሲ ኣስ ሚሳቴስ።
MAT 25:15 ኣሽካራታስ ኢሳስ ኢሳስ ኢስታ ዎልቃ ማላ ጊግሲዲ ኢሳስ ኢቻሹ ሺ ቢራ፥ ኢሳስ ናምኡ ሺ ቢራ፥ ሃንኮይሳስ ቃሴ ኢሲ ሺ ቢራ ኢሚዲ ቢዴስ።
MAT 25:16 ኢቻሹ ሺ ቢራ ኤኪዳ ኣዴዚ ሄራካ ሚሻን ዛልኤ ኦይኪዲ ሃራ ኢቻሹ ሺ ቢራ ዎꬊሲዴስ።
MAT 25:17 ቃሴካ ናምኡ ሺ ቢራ ኤኪዳይሲ ሃራ ናምኡ ሺ ቢራ ዎꬊሲዴስ።
MAT 25:18 ኢሲ ሺ ቢራ ኤኪዳይሲ ባ ጎዳ ቢራ ቢታን ሞጊዲ ቆቲዴስ።
MAT 25:19 «ኣሽካራታ ጎዳይ ባ ቢዳሶን ዳሮ ዎዴ ጋምኢ ሲሚዲ ሚሻ ኢስታራ ሳላኤቲዴስ።
MAT 25:20 ኢቻሹ ሺ ቢራ ኤኪዳ ኣሽካራይ ሃራ ኢቻሹ ሺ ቢራ ዎꬊሲዳይሳ ኤኪ ዪዲ፥ ‹ጎዶ! ኔ ታስ ኢቻሹ ሺ ቢራ ኢማዳሳ ሺን ሄኮ ሃይሳ ታ ሃራ ኢቻሹ ሺ ቢራ ዎꬊሳዲስ› ጊዴስ።
MAT 25:21 ኢዛ ጎዳይካ፥ ‹ሎኦ ኦꬃዳሳ፤ ኔኖ ሎኦ ኣማኔቲዳ ኣሽካራዞ! ኔኒ ጉꬃ ሚሻን ኣማኔቲዳ ኣስ ጊዲዳ ጊሻስ ታ ኔና ዳሮ ሚሻ ቦላ ሹማና፤ ጌዴ ኔ ጎዳ ኡፋይሳሶ ጌላ› ጊዴስ።
MAT 25:22 «ሄሳꬆካ ናምኡ ሺ ቢራ ኤኪዳይሲ ጎዳዛኮ ሺቂዲ፥ ‹ጎዶ! ኔ ታስ ናምኡ ሺ ቢራ ኢማዳሳ ሺን ሄኮ ሃራ ናምኡ ሺ ቢራ ዎꬊሳዲስ› ጊዴስ።
MAT 25:23 ጎዳዚካ፥ ‹ሎኤꬃዳሳ፤ ሃይሶ ሎኦኔ ታስ ኣማኔቲዳ ኣሽካራዞ! ኔኒ ጉꬃን ኣማኔቲዳዴ ጊዲዳ ጊሻስ ታ ኔና ዳሮ ሚሻ ቦላ ሹማይስ፤ ጌዴ ኔ ጎዳ ኡፋይሳሶ ጌላ› ጊዴስ።
MAT 25:24 «ኢሲ ሺ ቢራ ኤኪዳ ኣሽካራዚ ሺቂዲ፥ ‹ጎዶ! ኔኒ ዜሮንታሶፔ ማጺዛዴኔ ላሎንታሶፔ ሺሺዛ ሜንጼ ኢታ ኣስ ጊዲዳይሳ ታ ኤራይስ።
MAT 25:25 ሄሳ ጊሻስ ታ ባባዳ ቢታ ቦካዳ ኔ ቢራ ቦኪዳ ኦላን ሞጋዳ ቆታዲስ፤ ኔ ሚሽ ሄሳ ቤያ!› ጊዴስ።
MAT 25:26 «ኢዛ ጎዳይ ዛሪዲ፥ ‹ሃይሶ ኢታ ኣዛላ ኣሽካራዞ! ታኒ ዜሮንታሶፔ ማጺዛዴ ላሎንታሶፔ ሺሺዛዴ ጊዲዳይሳ ኔ ኤራይ?
MAT 25:27 ሂስቲን ታ ሲማ ዪዛ ዎዴ ታ ሚሻ ዬሎራ ታ ኤካና ማላ ቲርፒሲ ዛልኢዛ ኣሳስ ኔ ኢማናስ ቤሴሲሺን› ጊዴስ።
MAT 25:28 « ‹ኣኔ ሃኢ ኢዛፔ ሺ ቢራ ኤኪዲ ታሙ ሺ ቢራይ ዲዛዴስ ኢሚቴ።
MAT 25:29 ዲዛዴስ ጉጄታናኔ ዳሪ ዳሪ ባና፤ ባይንዳዴፌ ሄ ዲዛ ጉꬃያካ ኢዛፔ ኤኬታይቻና።
MAT 25:30 ሃይሳ ጎኣይ ባይንዳ ኣሽካራ ጌዴ ዬኪዛሶኔ ኣቼይ ጋርጬቲዛሶ ሄን ካሬን ዲዛ ꬉማን ኬሲ ዬጊቴ› ጊዴስ።
MAT 25:31 «ኣሳ ናይ ባ ኪታንቻታ ኡባራ ቦንቾን ዪዛ ዎዴ ባ ቦንቾ ኣልጋ ቦላ ኡታና።
MAT 25:32 ዴሬይ ዉሪ ኢዛ ሲንꬂ ሺቃና፤ ኢዚካ ሜሄ ሄሚዛዴይ ዴይሽ ዶርሳፌ ቆሪ ሻኪዛ ማላ ኣሳ ኢሳ ኢሳፌ ቆሪ ሻካና።
MAT 25:33 ዶርሳታ ባ ኡሻቻ ባጋራ፥ ዴይሻታ ሃዲርሳ ባጋራ ኤሳና።
MAT 25:34 ሄ ዎዴ ካዎይ ኡሻቻ ባጋራ ዲዛይታ፥ ‹ኢንቴኖ! ታ ኣዋይ ኢንቴና ኣንጂዳይቲ ሃ ዪቴ! ኣላሜይ ሜꬌቶሶፔ ኢንቴስ ጊጌቲዳ ካዎቴꬃ ላቲቴ! ጋና።
MAT 25:35 ጋሶይካ ታኒ ጋፊን ታና ሚዚዴታ፤ ታ ሳሜቲን ታና ኡሺዴታ፤ ታ ኢማꬅ ጊዳዳ ዪን ታና ሞኪ ኤኪዴታ።
MAT 25:36 ታ ካሎቲን ታና ማይዚዴታ፤ ታ ሳኬቲን ታና ሃርጊሲዴታ፤ ታ ቃሼቲን ታና ኦይቺዴታ› ጋና።
MAT 25:37 «ጺሎቲካ ዛሪዲ፥ ‹ጎዶ! ኔ ጋፊን ኑ ኔና ኣይዴ ሚዚዶኒ? ዎይኮ ኔ ሳሜቲን ኣይዴ ቤኢዲ ኑ ኔና ኡሺዶኒ?
MAT 25:38 ኑ ኣይዴ ኔና ቤኢዲ ኢማꬃቴꬅ ሞኪዶኒ? ዎይኮ ኣይዴ ኔ ካሎቲን ቤኢዲ ኔና ማይዚዶኒ?
MAT 25:39 ሄሳꬆካ ኔ ሳኬቲን ዎይኮ ቃሼቲን ኣይዴ ቤኢዲ ኔና ኦይቺዶኒ?› ጋና።
MAT 25:40 ካዎይካ ዛሪዲ፥ ‹ታ ኢንቴስ ቱሙ ጋይስ፤ ሃይታ ላፋ ጊዲዳ ታ ኢሻታፔ ኢሳዴስ ኦꬂዳይሲ ኢንቴ ታስ ኦꬂዳ ማላ› ጋና።
MAT 25:41 «ቃሴካ ሃዲርሳ ባጋራ ዲዛይታስ፥ ‹ኢንቴኖ ቃንጌቲዳይቶ! ታፔ ሻኬቲዲ ዳቡሎሳሲኔ ኢዛ ኪታንቻታስ ጊጌቲዳ ሜርና ታማን ቢቴ ጋና።
MAT 25:42 ጋሶይካ ታ ጋፊን ታና ሚዚቤኬታ፤ ታ ሳሜቲን ታና ኡሺቤኬታ፤
MAT 25:43 ታና ኢማꬃቴꬅ ሞኪቤኬታ፤ ታ ካሎቲን ታና ማይዚቤኬታ፤ ታ ሳኬቲኒኔ ቃሼቲን ታና ኦይቺቤኬታ› ጋና።
MAT 25:44 «ኢስቲካ ዛሪዲ፥ ‹ጎዶ! ኔ ጋፊን ዎይኮ ኔ ሳሜቲን ዎይኮ ኔ ኢማꬅ ጊዲን ዎይኮ ኔ ካሎቲኒኔ ኔ ሳኬቲን ዎይኮ ኔ ቃሼቲን ኑ ኔና ቤኢዲ ኣይዴ ኔኮ ጋኪቤኮኒ?› ጋና።
MAT 25:45 «ሄ ዎዴ ኢዚካ ኢስታስ ዛሪዲ፥ ‹ታ ኢንቴስ ቱሙ ጋይስ፤ ሃይታ ላፋ ታ ኢሻታፔ ኢሳዴስ ኢንቴ ኦꬆንታ ኣጊዳይሲ ታስ ኢንቴ ኦꬆንታ ኣጊዳ ማላ› ጋና።
MAT 25:46 ሄይቲ ጌዴ ሜርና ፒርዳን ባና፤ ጺሎቲ ጊዲኮ ሜርና ዴኦኮ ባና» ጊዴስ።
MAT 26:1 ዬሱሲ ሄሳ ሃሳዪ ዉርሲዳፔ ጉዬ ባና ካሊዛይታስ፥ «ናምኡ ጋላሳፌ ጉዬ ፓዚጋ ጊዲዳይሳ ኤሬቲ? ኣሳ ናይ ካቄታናስ ኣꬊ ኢሜታና» ጊዴስ።
MAT 26:3 ሄሳፌ ጉዬ ቄሴታ ሃላቃቲኔ ዴሬ ጪማቲ ቃያፋ ጌቴቲዛ ቄሴታ ሃላቃ ጊቤን ሺቂዲ ሂላራ ዬሱሳ ኦይꬂዲ ዎꬊሳናስ ማቄቲዳ።
MAT 26:5 ጊዶ ኣቲን፥ «ኣሳ ጊዶን ኦሺ ዴንዶንታ ማላ ባኣሌ ጋላስ ጊዶፖ» ጊዲ ቃቺዳ።
MAT 26:6 ዬሱሲ ቢታኒያን ኢንቺራቻ ሃርጌራ ዲዛ ሲሞና ጌቴቲዛዴ ሶን ዲሺን፥
MAT 26:7 ኢሲ ማጫስ ዲዛራ ጋቴይ ኬሂ ኣልኦ ጊዲዳ ኣልባስጺሮሴ ሺቶ ቢልቃጼ ኩሜꬅ ኦይካዳ ዬሱሳኮ ሺቃዳ ኢዚ ማዳን ኡቲ ዲሺን ኢዛ ሁኤ ቦላ ሺቶዛ ጉሳዱስ።
MAT 26:8 ኢዛ ካሊዛይቲ፥ «ሄሳ ቤኢዲ ሃይሲ ኣዛስ ሜላ ሞሬቲዜ?
MAT 26:9 ሺቶዚ ዳሮ ጋቴስ ባይዜቲዲ ሚሻይ ማንቆታስ ኢሜቲዛኮቺ?» ጊዳ።
MAT 26:10 ዬሱሲ ሄሳ ኤሪዲ፥ «ሃኖ ማጫሳዮ ኣዛስ ዋዪሴቲ? ኢዛ ታስ ሎኦ ኦꬃዱስ።
MAT 26:11 ማንቆቲ ኡባ ዎዴ ኢንቴናራ ዴቴስ፤ ታ ጊዲኮ ኡባ ዎዴ ኢንቴናራ ዲኬ።
MAT 26:12 ኢዛ ሺቶዛ ታ ቦላ ጉሲዳይሲ ታና ሞጎስ ጊጊሳናሳ።
MAT 26:13 ታ ኢንቴስ ቱሙ ጋይስ፤ ሃይሲ ሚሺራቾ ቃላይ ሳባኬቲዛ ኣላሜ ዩሾን ኣዋንካ ኢዛ ኦꬂዳይሲ ኢዞ ቆፍሲዛዝ ጊዲዲ ሃሳዬታና» ጊዴስ።
MAT 26:14 ሄሳፌ ጉዬ ታማኔ ናምኣታፔ ኢሶይ ኣስቆሮንቶ ዩሁዳ ጌቴቲዛይሲ ቄሴታ ሃላቃታኮ ቢዲ፥
MAT 26:15 «ታ ኢንቴስ ኢዛ ኣꬃ ኢሚኮ ኢንቴ ታስ ኣይ ኢማኔ?» ጊዴስ። ኢስቲካ ኢዛስ ሄꬑ ታሙ ቢራ ኢዛ ኩሼን ታይቢ ኢሚዳ።
MAT 26:16 ሄ ጋላሳፌ ሲሚዲ ዩሁዳይ ዬሱሳ ኢስታስ ኣꬂ ኢማናስ ኢንጄ ዎዴ ናጊሼ ጋምኢዴስ።
MAT 26:17 ኡኬꬃ ባኣሌ ጌቴቲዛ ባኣሌ ጋላስ ኢዛ ካሊዛይቲ ዬሱሳኮ ሺቂዲ፥ «ኔ ፓዚጋ ማናሶ ኣዋን ጊጊሳና ማላ ኮያይ?» ጊዳ።
MAT 26:18 ኢዚካ ኢስታስ ዛሪዲ ጌዴ ካታማ ቢዲ ኤቤሎ ጌቴቲዛ ኣስ፥ «ኣስታማሬይ፥ ‹ታ ዎዴይ ማቲዳ ጊሻስ ታና ካሊዛይታራ ፓዚጋ ታ ኔ ኬꬃን ቦንቻና ጊዴስ› ጊ ዮቲቴ» ጊዴስ።
MAT 26:19 ኢዛ ካሊዛይቲካ ዬሱሲ ኢስታ ኣዛዚዳ ማላ ፓዚጋ ካዎ ጊግሲዳ።
MAT 26:20 ጋዴይ ኦማርሲሺን ዬሱሲ ታማኔ ናምኣታራ ማዳን ኡቲዴስ።
MAT 26:21 ኢስቲ ሙሳን ዲሺን ኢዚ ኢስታስ፥ «ታ ቱሙ ጋይስ፤ ኢንቴፌ ኢሶይ ታና ኣꬂ ኢማና» ጊዴስ።
MAT 26:22 ኢስቲካ ኬሂ ሙዞቲዲ ታራን ታራን፥ «ጎዶ ታኔሻ?» ጊዳ።
MAT 26:23 ኢዚካ ዛሪዲ፥ «ታና ኣꬂ ኢማናዴይ ኬሬን ታናራ ኩሼ ዬዲዛዴ።
MAT 26:24 ኢዛ ጊሻስ ካሴ ጻፌቲዳይሳ ማላ ኣሳ ናይ ባና፤ ጊዶ ኣቲን ኣሳ ና ኣꬂ ኢሚዛዴስ ኣዬ ኣና! ሄሳዴይ ዬሌቶንታ ኣቲዳኮ ኢዛስ ሎኦኮሺን» ጊዴስ።
MAT 26:25 ኢዛ ኣꬂ ኢማና ዩሁዳይ፥ «ኣስታማሬ! ታኔሻ?» ጊዴስ። ኢዚካ፥ «ኤ፥ ኔ ጊዳ ማላ» ጊዴስ።
MAT 26:26 ኢስቲ ሙሳን ዲሺን ዬሱሲ ሚዛ ቁማፔ ኤኪዲ ኣንጂዴስ። ሜንꬂዲኔ ባና ካሊዛይታስ ኢሚዲ፥ «ሄኢቴ ሚቴ፤ ሃይሲ ታ ኣሾኮ» ጊዴስ።
MAT 26:27 ቃሴካ ኡሻ ዴንꬂዲ ጋላቲዲኔ ባና ካሊዛይታስ ኢሚዲ፥ «ዉሪካ ሃይሳፌ ኡዪቴ፤
MAT 26:28 ዳሮ ኣሳ ናጋራፔ ማራና ጉኪዛ ታ ኦራꬃ ጫቆ ሱꬃይ ሃይሳ።
MAT 26:29 ታ ኢንቴስ ጊዛይ ታ ኣዋ ካዎቴꬃን ታ ኢንቴናራ ኦራꬃ ዎይኔ ኡሻ ኡያና ጋካናስ ሃይሳፌ ጉዬ ሃይሳ ዎይኔ ኡሻ ኢንቴናራ ኡዪኬ» ጊዴስ።
MAT 26:30 ዬꬃ ዬጺዳፔ ጉዬ ፑዴ ዳብራዛይቴ ጌቴቲዛ ዙማ ቦላ ኬዚዳ።
MAT 26:31 ዬሱሲ ኢስታስ፥ «ኢንቴ ዉሪ ሃች ኦማርሲ ታናን ꬉጴቲዲ ታና ዬጊ ባና፤ ‹ሄሚዛይሳ ታ ሾጫና፤ ሜሄቲ ላሌታና› ጌቴቲዲ ካሴ ጻፌቲዴስ።
MAT 26:32 ጊዶ ኣቲን ታኒ ዴንዲዳፔ ጉዬ ኢንቴፌ ሲንꬃታዳ ጋሊላ ባና» ጊዴስ።
MAT 26:33 ጴጽሮሲ ዛሪዲ፥ «ሃንኮይቲ ዉሪ ኔ ጋሶን ꬉጴቲኮካ ታኒ ሙሌካ ꬉጴቲኬ!» ጊዴስ።
MAT 26:34 ዬሱሲካ ኢዛስ ዛሪዲ፥ «ቱሙ ጋይስ፤ ሃች ኦማርስ ኩቶይ ዋሶንታ ካሴታዳ ሄꬑቶ ኔ ታና ካዳና» ጊዴስ።
MAT 26:35 ጴጽሮሲ ቃሴ፥ «ኔናራ ታ ሃይቃና ኮሺኮካ ሙሌካ ታ ኔና ካዲኬ!» ጊዴስ። ዬሱሳ ካሊዛ ሃንኮይቲካ ኩሜꬅ ኢዛይሳꬆካ ጊዳ።
MAT 26:36 ሄሳፌ ጉዬ ዬሱሲ ባና ካሊዛይታራ ጌቴሴማኔ ጌቴቲዛሶ ቢዴስ። ኢስታካ፥ «ሄ ባዳ ታ ዎሲሺን ኢንቴ ሃይሳን ኡቲሺቴ» ጊዴስ።
MAT 26:37 ጴጽሮሳራ ዛብዶሳ ናይታ ናምኣታ ባናራ ኤኪ ቢዲ ሙዞቴꬂኔ ዳሮ ቆፌቴꬅ ኦይኪዴስ።
MAT 26:38 ሄሳፌካ፥ «ታ ሼምፖያ ሃይቃና ጋካናስ ዳሮ ሙዞታዱስ፤ ታናራ ሚኒዲ ሃኒን ታኪቴ» ጊዴስ።
MAT 26:39 ኢስታፌ ጉꬅ ጌዴ ሃኪ ቢ ጉፋኒዲ፥ «ታ ኣዋዉ! ኔስ ዳንዳዬቲኮ ሃይሲ ሜቶይ ታፔ ኣꬎ፤ ጊዶ ኣቲን ታኒ ኮዪዳ ማላ ጊዶንታ ኔኒ ኮዪዳ ማላ ሃኖ» ጊ ዎሲዴስ።
MAT 26:40 ሄሳፌ ሲሚዲ ባና ካሊዛይታኮ ዪዲ ኢስቲ ꬊስኪሺን ዴሚዴስ። ጴጽሮሳካ፥ «ሃይቶ ኣሳቶ! ኢንቴ ታናራ ኢሲ ሳቴካ ሚናናስ ጾኒዴ?
MAT 26:41 ፓጬን ኢንቴ ጌሎንታ ማላ ሚኒዲ ዎሲቴ፤ ኣያናይ ጊጌቲዴስ ሺን ኣሾይ ጊዲኮ ዳቡራንቻ» ጊዴስ።
MAT 26:42 ቃሴካ ናምኣንꬆ ቢዲ፥ «ታ ኣዋዉ! ታ ሃይሳ ኡያናይሲ ታስ ኣቶንታ ሚሽ ጊዲኮ ኔ ሼኔይ ፖሌቶ» ጊዲ ዎሲዴስ።
MAT 26:43 ቃሴካ ኢዚ ዪሺን ኢስታ ኣይፌን ꬊስኮይ ዴጺዳ ጊሻስ ኢቺዳይታ ቤዪዴስ።
MAT 26:44 ኢስታ ኣጊዲ ቃሴካ ቢዲ ሄꬓንꬆ ካሴ ዎሲዳ ቃላ ዛሪ ዎሲዴስ።
MAT 26:45 ሄሳፌ ባና ካሊዛይታኮ ሲሚዲ፥ «ሃኢካ ሼምፒ ꬊስኪዴቲ? ሄኮ ሃኢ ሳቴይ ማቲዴስ፤ ኣሳ ናይ ናጋራንቻታ ኩሼን ኣꬊ ኢሜታና።
MAT 26:46 ዴንዲቴ ኣኔ ቦስ! ታና ኣꬂ ኢሚዛዴይ ዩሳ ቦላ ዴስ» ጊዴስ።
MAT 26:47 ኢዚ ሃሳይሺን ታማኔ ናምኣታፔ ኢሶይ ዩሁዳይ ዪዴስ። ቄሴታ ሃላቃቲኔ ዴሬ ጪማቲ ዬዲዳ ዳሮ ኣሳይ ቶራኔ ዱርቃ ኦይኪዲ ዩሁዳራ ኢሲፌ ዴስ።
MAT 26:48 ዩሁዳይካ፥ «ታ ዬሪዛዴይ ኢዛ ጊዲዳ ጊሻስ ኦይኪቴ» ጊዲ ካሴ ዮቲ ዎꬂዴስ።
MAT 26:49 ሲቲ ጊ ዬሱሳኮ ቢዲ፥ «ኣስታማሬ! ሳሮ» ጊሼ ዬሱሳ ዬሪዴስ።
MAT 26:50 ዬሱሲካ፥ «ታ ላጌ! ኔ ዪዳ ቆፋ ፖላ» ጊዴስ። ሄራካ ኣሳይ ሺቂዲ ዬሱሳ ኦይኪ ቃቺዴስ።
MAT 26:51 ዬሱሳራ ዲዛይታፔ ኢሶይ ጊꬃ ማሻ ሾዲዲ ቄሴታ ሃላቃዛ ኣሽካራ ሃይꬅ ቃንጺዴስ።
MAT 26:52 ዬሱሲካ፥ «ኣኔ ኔ ማሻ ኮሆን ዛራ ጌልꬃ፤ ማሻ ሾዲዛይቲ ማሻን ꬋያና።
MAT 26:53 ኮሺኮ ታኒ ታ ኣዋ ኦይቺዛኮ ዳሮ ሺያን ቆዴቲዛ ኦሊዛ ኪታንቻ ታስ ዬዶንታ ኣጋና ኔስ ሚሳቲዜ?
MAT 26:54 ሄሳꬆ ኦꬂኮ ቃሴ ጌሻ ማጻፋታን ሃናና ጌቴቲዳይሲ ዋኒ ፖሌታኔ?» ጊዴስ።
MAT 26:55 ሄ ዎዴ ዬሱሲ ኣሳ፥ «ፓንጋ ኦይኪዛ ኣሳꬆ ማሻኔ ዱርቃ ኤኪዲ ታና ኦይካና ዪዴቲ? ዎንቲን ዎንቲን ጾሳ ኬꬃን ኡታዳ ታ ታማርሲሺን ካሴ ኦይኪቤኬታ ሺን።
MAT 26:56 ጊዶ ኣቲን ሃይሲ ዉሪካ ሃኒዳይሲ ካሴ ናቤቲ ጌሻ ማጻፋታን ዮቲዳይሲ ፖሌታናሳ» ጊዴስ። ሄ ዎዴ ዬሱሳ ካሊዛይቲ ኢዛ ዬጊዲ ꬋይዳ።
MAT 26:57 ሄ ዎዴ ዬሱሳ ኦይኪዲ ኣሳቲ ሙሴ ዎጋ ኣስታማሬቲኔ ዴሬ ጪማቲ ኢሲፌ ሺቂዳሶን ቄሴታ ሃላቃ ቃያፋኮ ኤፊዳ።
MAT 26:58 ጊዶ ኣቲን ጴጽሮሲ ቄሴታ ሃላቃ ጊቤ ጋካናስ ሃሆራ ዬሱሳ ካሊዴስ። ጊቤ ጊዶ ጌሊዲ ሃኒዛይሳ ዉርሴꬅ ቤያናስ፥ ጊቤ ናጊዛይታራ ኡቲዴስ።
MAT 26:59 ሄ ዎዴ ቄሴታ ሃላቃቲኔ ኣይሁዳታ ዱላታይ ኩሜꬅ ዬሱሳ ዎꬊሳናስ ዎርዶ ማርካ ኮዪዴስ።
MAT 26:60 ዳሮ ዎርዶ ማርካቲ ሺቂኮካ ቤሲዛ ማርካቴꬅ ዴሚቤቴና፤ ጊዶ ኣቲን ጉዬፔ ናምኡ ኣስ ዳይቲ ሺቂዲ፥ «ሃይሲ ኣዴዚ፥ ‹ታኒ ጾሳ ኬꬃ ላላዳ ሄꬑ ጋላሳራ ዛራዳ ኬጻና ዳንዳያይስ› ጊዴስ» ጊዲ ማርካቲዳ።
MAT 26:62 ሄሳ ሲዪዳ ቄሴታ ሃላቃይ ኡቴꬃፌ ዴንዲ ኤቂዲ፥ «ሃይቲ ኣሳቲ ኔ ቦላ ማርካቲዛይሳስ ኣይኮካ ዛሪኪ?» ጊዴስ።
MAT 26:63 ዬሱሲካ ጮኡ ጊዴስ። ቄሴታ ሃላቃይ፥ «ታ ኔና ዴኦ ጾሳ ሱንꬃን ኦይቻይስ! ኔኒ ጾሳ ና ኪርስቶሳ ጊዲኮ ታስ ዮታ!» ጊዴስ።
MAT 26:64 ዬሱሲካ፥ «ኔ ጎይሳካ ማላ፤ ጊዶ ኣቲን ኢንቴስ ኡባስ ታ ዮቲዛይ ሲንꬃፌ ኣሳ ናይ ዎልቃማዛ ኡሻቻን ኡቲዲ ሳሎ ሻራራ ዪዛ ዎዴ ኢንቴ ቤያና» ጊዴስ።
MAT 26:65 ሄ ዎዴ ቄሴታ ሃላቃይ ባ ማይኦ ዳኪዲ፥ «ጾሳ ቦላ ጫሻ ቃላ ሃሳይዴስ፤ ኑስ ሃይሳፌ ኣꬊዛ ሃራ ኣዛ ማርካ ኮሺዜ! ጾሳ ቦላ ጫሻ ቃላ ኢዚ ሃሳይሺን ኢንቴ ኢንቴ ሃይꬃራ ሲዪዴታ።
MAT 26:66 ኢንቴስ ኣይ ሚሳቲዜ?» ጊዴስ። ኢስቲካ ዛሪዲ ኢዛስ፥ «ሃይቆይ ኢዛስ ቤሴስ» ጊዳ።
MAT 26:67 ሄ ዎዴ ዬሱሳ ኣይፌሶን ጩቲሼ ኢዛ ኢጪዳ፤ ባጋይቲ ኢዛ ባቂሼ፥
MAT 26:68 «ኪርስቶሳ! ኔ ኔና ናቤ ጋሳ ሺን ኔና ባቂዳይ ኦናኮን ኣኔ ኑስ ዮታ» ጊዳ።
MAT 26:69 ሄሳፌ ጉዬ ጴጽሮሲ ቄሴታ ሃላቃዛ ጊቤን ኡቲ ዲሺን ኬꬃ ጊዶን ኦꬂዛ ኢሲ ማጫስ ዲዛራ ኢዛኮ ሺቃዳ፥ «ኔኒካ ጋሊላ ዬሱሳራ ዲዛዴ!» ጋዱስ።
MAT 26:70 ኢዚ ቃሴ፥ «ኔ ኣይ ጊዛኮ ታ ኤሪኬ!» ጊዲ ኡባ ኣሳ ሲንꬃን ካዲዴስ።
MAT 26:71 ጊቤዛ ፔንጌ ኢዚ ቢሺን ኢሲ ሃራ ኦሳንቻያ ኢዛ ጼላዳ ሄን ዲዛይታስ፥ «ሃይሲ ኣዴዚ ናዚሬቴ ዬሱሳራ ዲዛዴኮ!» ጋዱስ።
MAT 26:72 ኢዚካ፥ «ታ ኢዛ ኤሪኬ!» ጊዲ ናምኣንꬆ ካዲዴስ።
MAT 26:73 ጉꬅ ጋምኢሺን ሄን ኤቂዳ ኣሳቲ ሺቂዲ ጴጽሮሳ፥ «ኔ ሃሳያይ ኔ ሃይታራ ዲዛይሳ ቆንጪሴስ፤ ቱማፔ ኔ ኢስታ ባጋ ኣሳ» ጊዳ።
MAT 26:74 ኢዚካ ጫቂሼኔ ኣማቲሼ፥ «ሄሳ ኣዴዛ ታ ኤሪኬ!» ጊዴስ። ሄራካ ኩቶይ ዋሲዴስ።
MAT 26:75 ሄ ዎዴ ዬሱሲ ካሴ ጴጽሮሳስ፥ «ኩቶይ ዋሳናስ ኔ ታና ሄꬑቶ ካዳና» ጊዲ ዮቲዳ ቃላይ ቆፌቲን፥ ጴጽሮሲ ካሬ ኬዚዲ ጫሞ ዬሆ ዬኪዴስ።
MAT 27:1 ማላዶ ዎንታራ ቄሴታ ሃላቃቲኔ ዴሬ ጪማቲ ዉሪካ ዬሱሳ ዎꬋና ኦጌ ዞሬቲዳ።
MAT 27:2 ዬሱሳ ቃቺ ኤፊዲ ዴሬ ሃሪዛ ጲላጾሳስ ኣꬂ ኢሚዳ።
MAT 27:3 ኢዛ ኣꬂ ኢሚዳ ዩሁዳይካ ዬሱሳ ቦላ ፒርዴቲዳይሳ ቤኢዲ፥ «ታ ኢዛ ኣꬃ ኢሞንታ ኣጋርኪና» ጊዲ ባ ኤኪዳ ሄꬑ ታሙ ቢራ ቄሴታ ሃላቃታሲኔ ዴሬ ጪማታስ ዛሪ ኢሚዲ፥ «ጺሎ ኣስ ኣꬃ ኢሚዳ ጊሻስ ታ ሞራዲስ» ጊዴስ። ኢስቲካ፥ «ሂስቲን ኑስ ኣይ ሜቶ! ኔ ኤራ ኤካ!» ጊዳ።
MAT 27:5 ሄሳ ጊሻስ ዩሁዳይ ቢራ ኤፊዲ ጾሳ ኬꬃ ጊዶን ዬጊዲ ኬዚ ቢዲ ጩሌቲ ሃይቂዴስ።
MAT 27:6 ቄሴታ ሃላቃቲ ቢራ ዴንꬂዲ፥ «ሱꬃ ዋጋ ጊዲዳ ጊሻስ ጾሳ ኬꬃ ሚሻን ጉጃናስ ቤሴና» ጊዳ።
MAT 27:7 ባ ጊዶን ዞሬቲዲ ኢማꬅ ጊዲዳ ኣሳታስ ዱፎ ጊዳና ማላ ኢሲ ኡርቃ ሚሽ ሜꬊዛ ሂላዛ ጋዴ ሻሚዳ።
MAT 27:8 ሄሳ ጊሻስ ሄ ጋዴይ ሃች ጋካናስ ሱꬃ ጋዴ ጌቴቴስ።
MAT 27:9 ኢዛስ ዋጋ ጊዳና ማላ፥ «ኢስራኤሌ ናይቲ ሄሬጊዳ ሄꬑ ታሙ ቢራ ቆዲ ኤኪዳ። ጾሲ ታና ኣዛዚዳ ማላ ኡርቃ ሜꬊዛ ሂላዛ ጋዴስ ኢሚዳ» ጌቴቲዲ ናቤ ኤርማሳ ዶናን ዮቴቲዳይሲ ፖሌቲዴስ።
MAT 27:11 ሄ ዎዴ ዬሱሲ ዴሬ ሃሪዛይሳ ሲንꬅ ሺቂዴስ። ዴሬ ሃሪዛይሲካ፥ «ኔኒ ኣይሁዳ ካዎ?» ጊዲ ኢዛ ኦይቺዴስ። ዬሱሲካ፥ «ኔ ጊዳ ማላ ጊዶ» ጊዴስ።
MAT 27:12 ቄሴታ ሃላቃቲኔ ዴሬ ጪማቲ ኢዛ ሞቲሺን ዬሱሲ ኢስታስ ኣይኔ ዛሪቤና።
MAT 27:13 ሄ ዎዴ ጲላጾሲ ዬሱሳ፥ «ኣፑን ዮኦን ኔና ሞቲዛኮ ሲዪኪ?» ጊዴስ።
MAT 27:14 ዴሬ ሃሪዛይሲ ኬሂ ማላሌታና ጋካናስ ዬሱሲ ኢሲ ቃላካ ዛሪቤና።
MAT 27:15 ዴሬ ሃሪዛይሳስ ባኣሌ ጋላስ ዴሬይ ቃሾ ኣሳፔ፥ «ኤቤሎይ ኑስ ቢርሼቶ!» ጊ ኦይቺኮ ኢሳዴ ቢርሺዛ ዎጋይ ዴስ።
MAT 27:16 ሄ ዎዴ ጌኔ ኦሶን ኤሬቲዳ ባርባኔ ጌቴቲዛ ኢሳዴይ ቃሾሶን ዴስ።
MAT 27:17 ዴሬይ ሺቂዳ ማላ ጲላጾሲ፥ «ባርባኔፔኔ ኪርስቶሳ ጌቴቲዛ ዬሱሳፔ ታ ኢንቴስ ኦና ቢርሻና ማላ ኮዬቲ?» ጊዴስ።
MAT 27:18 ጲላጾሲ ኢስታ ጮ ቃናቴስ ኣꬂ ኢሚዳይሳ ኤሪሼ ኦይቺዴስ።
MAT 27:19 ኢዚ ፒርዳ ኣልጋ ቦላ ኡቲ ዲሺን ኢዛ ማቼያ፥ «ኢዛ ጋሶን ሃች ታኒ ኣጉሞራ ዳሮ ሜቶታዲስ፤ ሄሳ ጺሎ ኣዴዛ ቦላ ኔ ኣይኮካ ኦꬆንታ ማላ» ጊዛ ኪታ ጲላጾሳስ ዬዳዱስ።
MAT 27:20 ጊዶ ኣቲን ቄሴታ ሃላቃቲኔ ጪማቲ ኢስታስ ባርባኔይ ቢርሼታና ማላኔ ቃሴ ዬሱሳ ዎꬋና ማላ ዎሳናስ ዴሬዛ ቃላይ ጋጋና ማላ ኦꬂዳ።
MAT 27:21 ዴሬ ሃሪዛይሲ፥ «ናምኣታፔ ኦና ቢርሻና ማላ ኮዬቲ?» ጊ ኦይቺን ኢስቲ፥ «ባርባኔ ቢርሻ!» ጊዳ።
MAT 27:22 ጲላጾሲካ፥ «ሂስቲኮ ኪርስቶሳ ጌቴቲዛ ዬሱሳ ዎስቶ?» ጊዴስ። ኢንቴ ዉሪካ፥ «ካቄቶ!» ጊዳ።
MAT 27:23 ጲላጾሲካ ኣዛስ? «ኢዚ ኣይ ኢታ ኦꬂዴ?» ጊዲ ኢስታ ኦይቺዴስ። ኢስቲካ ቃሴ ኬሂ ዋሲዲ፥ «ካቄቶ!» ጊዳ።
MAT 27:24 ጲላጾሲ ሃኒዛይሲ ዉሪካ ኣሳይ ባ ጊዶን ቡልኣኬቴꬃፌ ኣቲን ሃራ ኣይ ጎኣይ ባይንዳይሳ ዩሺ ጼሊዲ፥ «ሃይሳ ኣዴዛ ሱꬃ ጎሜፔ ታ ጌሻ፤ ሃይሳፌ ጉዬ ኢንቴ ሼኔ» ጊዲ ሃꬅ ኤሂሲዲ ዴሬዛ ሲንꬃን ባ ኩሼ ሜጬቲዴስ።
MAT 27:25 ዴሬይ ዉሪ፥ «ኢዛ ሱꬂ ኑ ቦላኔ ኑ ናይታ ቦላ ጋኮ» ጊዲ ዛሪዴስ።
MAT 27:26 ሄ ዎዴ ባርባኔ ኢስታስ ቢርሺዲ ዬሱሳ ጋራፊሲዳፔ ጉዬ ካቃና ማላ ኣꬂ ኢሚዴስ።
MAT 27:27 ሄሳፌ ዎታዳራቲ ዬሱሳ ጌዴ ዴሬ ሃሪዛይሳ ጊቤ ኤኪ ቢዲ ዉሪ ሺቂዲ ዬሱሳ ጊዶ ኣꬂዳ።
MAT 27:28 ኢዛ ማይኦ ቃሪዲ ሃራ ዞኦ ማይኦ ማይዚዳ።
MAT 27:29 ኣጉንꬃ ኣኪሊሌ ጻጺዲ ጊግሲዳ፤ ኢዛ ሁኤ ቦላ ዎꬂዳ፤ ሾምቦቆ ጉፌ ኡሻቻ ኩሼን ኦይꬂዲኔ ኢዛ ሲንꬃን ጉልባቲዲ፥ «ኣይሁዳ ካዎ! ኢንቴስ ቶ!» ጊዲ ኢዛ ቂꬊዳ።
MAT 27:30 ኢዛ ቦላ ጩቲዳ፤ ሾምቦቆ ጉፌዛ ኢዛ ኩሼፔ ኤኪዲ ዬሱሳ ሁኤን ዛሪ ዛሪዲ ሾጪዳ።
MAT 27:31 ኢዛ ቦላ ቂꬊ ካኢዳፔ ጉዬ ቃሴካ ዞኦ ማይኦዛ ቃሪ ኤኪዲኔ ካሴ ኢዛ ማይኦዛ ዛሪ ማይዚዲ ካቃናሶ ኤኪ ቢዳ።
MAT 27:32 ኢስቲ ኤኪ ቢሺን ቃሬና ጌቴቲዛሶፔ ዪዳ ሲሞና ጌቴቲዛይሳ ዴሚዲ ማስቃሌዛ ኢዛ ዎልቃራ ቶሲዳ።
MAT 27:33 ቢርሼꬃይ፥ «ሁኤ ጉጌ» ጌቴቲዛ ጎልጎታ ጋኪሺን ጪዬራ ዋላኬቲዳ ዎይኔ ጫጄ፥ «ኡያ» ጊዲ ኢሚዳ፤ ጊዶ ኣቲን ኢዚ ጋንጺ ኤኪዲ ኡያና ኮዪቤና።
MAT 27:35 ኢዛ ካቂዳፔ ጉዬ ኢዛ ማይኦዛ ቦላ ሳማ ዬጊዲ ጊሼቲዳ።
MAT 27:36 ሄን ኡቲዲ ኢዛ ናጊዳ።
MAT 27:37 «ሃይሲ ኣይሁዳ ካዎ ዬሱሳ» ጊዛ ሞቶ ቃላ ኢዛ ሁኤፔ ቦላራ ዎꬂዳ።
MAT 27:38 ናምኡ ፓንጋታፔ ኢሶይ ዬሱሳፔ ኡሻቻ ባጋራ፥ ኢሶይ ሃዲርሳ ባጋራ ኢዛራ ኢሲፌ ካቄቲዳ።
MAT 27:39 ኦጌራ ኣꬊ ቢዛ ኣሳይ ጫዪሼኔ ሁኤ ቃꬂሼ፥ «ጾሳ ኬꬃ ላላዳ ሄꬑ ጋላሳን ዛራ ኬጻና ጊዛይሶ! ኣኔ ኔና ኣሻ፤ ኔ ጾሳ ና ጊዲኮ ኣኔ ማስቃሌዛ ቦላፌ ዎꬋ» ጊዳ።
MAT 27:41 ቄሴታ ሃላቃቲ ዴሬ ጪማታራ ጊዲዲ ኢዛ ቦላ ቂꬊሼ፤
MAT 27:42 «ሃራ ኣሳ ኣሺዴስ ሺን ባና ኣሻናስ ዳንዳይቤና፤ ኢዚ ኢስራኤሌ ካዎ ጊዲኮ ኣኔ ሃኢ ማስቃሌ ቦላፌ ዎꬎ፤ ኑኒካ ኢዛ ኣማናና።
MAT 27:43 ጾሳን ኣማኔቲዴስ፤ ባና ጾሳ ና ጊዳ ማላ ጾሲ ኢዛ ዶሲዛ ጊዲኮ ኣኔ ሃኢ ኢዛ ኣሾ» ጊዳ።
MAT 27:44 ኢዛራ ኢሲፌ ካቄቲዳ ፓንጋቲካ ሄሳꬆ ጫሻ ቃላ ኢዛ ቦላ ቆቆፊዳ።
MAT 27:45 ጋላስ ኡሱፑን ሳቴፔ ቢዲ ኡዱፉን ሳቴ ጋካናስ ኩሜꬃ ቢታይ ꬉሚዴስ።
MAT 27:46 ኡዱፉን ሳቴ ጊዲሺን ዬሱሲ ቃላ ꬎቁ ሂስቲዲ፥ «ኤሎሄ! ኤሎሄ! ላማ ሳባቂታኔ» ጊዲ ዋሲዴስ። ሄሳ ጉሳስ ቢርሼꬃይ፥ «ታ ጾሶ! ታ ጾሶ! ታና ኣይስ ኣጋዲ?» ጉሳ።
MAT 27:47 ሄን ኤቂዳ ኣሳፔ ኢሲ ኢሲ ኣሳቲ ኢዛ ዋሶዛ ሲዪዲ፥ «ኤላሳ ጼይጌስ» ጊዳ።
MAT 27:48 ኢስታፌ ኢሳዴይ ዎጺ ቢዲ ዛንꬓ ሚሳቲዛ ሳፊኔጌ ጌቴቲዛ ሚሽ ኤኪዲ ጫሊዳ ዎይኔ ጫጄን ዬጊ ጫጲሲዲኔ ሾምቦቆ ጌቴቲዛ ሚꬃ ጼራን ቃጲዲ ኡያና ማላ ዬሱሳ ዶናኮ ሺሺዴስ።
MAT 27:49 ሃንኮ ኣሳይ ቃሴ፥ «ኣጋጊቴ ኣኔ፥ ኤላሲ ዪዲ ኢዛ ኣሺሺን ቤያና» ጊዳ።
MAT 27:50 ዬሱሲ ቃሴካ ꬎቃ ቃላን ዋሲዲ ሼምፖ ኬዚዴስ።
MAT 27:51 ሄ ዎዴ ጾሳ ኬꬃ ማጋላሻይ ቦላ ሁኤራ ዱጌ ሲሚ ዳኬቲዲ ናምኡ ኬዚዴስ፤ ቢታይ ቃጺዴስ፤ ዛላቲ ዛኢዳ።
MAT 27:52 ዱፎቲ ዶዬቲዳ፤ ካሴ ሃይቂዳ ጾሳ ኣሳፔ ዳሪዛ ባጋይ ዴንዲዴስ።
MAT 27:53 ዱፎፔ ኬዚዲ ዬሱሳ ዴንꬃፌ ጉዬ ጌሻ ካታማ ጌሊዲ ዳሮታ ኣይፌን ቤቲዳ።
MAT 27:54 ማቶ ሃላቃይኔ ኢዛራ ኢሲፌ ዬሱሳ ናጊዛይቲ ቢታ ቃꬃኔ ሃኒዳይሳ ኡባ ቤኢዲ ዳሮ ባቢዳ። ቃሴ፥ «ሃይሲ ቱማፔ ጾሳ ናኮ!» ጊዳ።
MAT 27:55 ጋሊላፔ ዪዲ ዬሱሳ ኮሺዛዛን ኦꬂ ማዳናስ ካሊዛ ዳሮ ማጫሳቲ ሃኒዛይሳ ዉርሲካ ሃሆራ ጼሊሼ ሄን ዴቴስ።
MAT 27:56 ኢስታ ጊዶን ማግዳሌፔ ዪዳ ማራሚራኔ፥ ያቆቤኔ ዮሴፌ ኣዮ ማራሚራ፥ ቃሴካ ዛብዶሳ ናይታ ኣዬይራ ኢሲፌ ዴቴስ።
MAT 27:57 ጋዴይ ኦማርሲሺን ዮሴፌ ጌቴቲዛ ኢሲ ዱሬ ኣዴ ዳይሲ ኣርማቲያሴ ጌቴቲዛሶፔ ዪዴስ። ኢዚካ ባ ባጋራ ዬሱሳ ካሊዛዴ።
MAT 27:58 ኢዚ ጲላጾሳ ሲንꬂ ሺቂዲ ዬሱሳ ኣሃ ኢዛስ ኢማና ማላ ዎሲን ጲላጾሲካ ኢዛስ ኢማና ማላ ኣዛዚዴስ።
MAT 27:59 ዮሴፌይ ኣሃ ኤኪዲ ጌሽ ጊዲዳ ሞጎ ኣፋላን ጻጺዴስ።
MAT 27:60 ሹች ዎጪዲ ባስ ጊግሲዳ ዱፎን ኤፊ ዎꬂዲ ጊታ ሹች ጌንዴሪሲ ዱፎዛ ጎርዲዴስ።
MAT 27:61 ሄ ዎዴ ማግዳሌ ማራሚራኔ ሃንኮ ማራሚራ ዱፎዛ ጊናን ኡቲዳ።
MAT 27:62 ሳምባታስ ጊጌቲዛ ዎንቴꬃ ጋላስ ቄሴታ ሃላቃቲኔ ፋርሳዌቲ ጲላጾሳ ሲንꬅ ሺቂዲ፥
MAT 27:63 «ጎዶ! ሄ ዎርዶይ ካሴ ፓጻ ዲሼ፥ ‹ሄꬑ ጋላሳፌ ጉዬ ታ ዴንዳና› ጊዳ ቃላይ ኑ ዎዚናን ቱርቹ ጊዴስ።
MAT 27:64 ሄሳ ጊሻስ ኢዛ ካሊዛይቲ ኢዛ ኣሃ ካይሶቲ ኤኪዲ ዴራስ፥ ‹ኢዚ ሃይቆፔ ዴንዲዴስ› ጊዲ ዎሬሶንታ ማላ ሄꬓንꬆ ጋላስ ጋካናስ ዱፎይ ናጌታና ማላ ኣዛዛ፤ ኣካይ ጊኮ ካሴይሳፌ ጉዬ ባላይ ኣꬌꬅ ጊዳና» ጊዳ።
MAT 27:65 ጲላጾሲ፥ «ኢንቴስ ናጊዛይቲ ዴቴስ፤ ቢዲኔ ኢንቴስ ኤሬቲዳ ማላ ናጊሲቴ» ጊዴስ።
MAT 27:66 ኢስቲካ ቢዲ ዱፎዛ ዶና ማታሜን ጎርዲዲ ናጋና ዛቤ ኤሲዳ።
MAT 28:1 ሳምባታይ ኣꬊዳፔ ጉዬ ሳሚንታፌ ኮይሮ ጋላስ ቡሮ ሳሎይ ዞኢሺን ማግዳሌ ማራማኔ ሃንኮ ማራማ ዱፎዛ ቤያና ቢዳ።
MAT 28:2 ቆፖንታ ዲሺን ጊታ ቢታ ቃꬂ ሃኒዴስ፤ ጎዳ ኪታንቻይካ ሳሎፔ ዎꬊ ዱፋኮ ቢዲ ሹቻ ጌንዴሪሲዲ ኢዛ ቦላ ኡቲዴስ።
MAT 28:3 ኪታንቻዛስ ሜꬋይ ዎልቃንꬃ ፖኦ ማላ፤ ኢዛ ማይኦይካ ሻቻ ማላ ቦꬃ።
MAT 28:4 ዱፎ ናጊዛይቲ ኪታንቻዛስ ባቢ ኮኮሪዲኔ ሃይቄꬅ ሚሳቲዳ።
MAT 28:5 ኪታንቻዚ ማጫሳታ፥ «ባቦፍቴ፤ ኢንቴ ካቄቲዳ ዬሱሳ ኮይዛይሳ ታ ኤራይስ፤ ኢዚ ሃኢ ሃን ባ፤ ኢዚ ካሴ ዮቲዳ ማላ ሃይቆፔ ዴንዲዴስ፤ ሃ ዪዲ ኢዚ ኢቺዳሶ ቤኢቴ።
MAT 28:7 ሃኢካ ኤሌሊ ቢዲ ኢዛ ካሊዛይታስ፥ ‹ሃይቆፔ ዴንዲዴስ። ኢንቴፌ ካሴቲዲ ጋሊላ ቤስ፤ ኢንቴ ኢዛ ሄን ዴማና› ጊዲ ዮቲቴ። ሂኣ ታ ኢንቴስ ዮታዲስ» ጊዴስ።
MAT 28:8 ማጫሳቲካ ባቦኒኔ ኡፋይሳን ኩሚዲ ኢዛ ካሊዛይታስ ዮታናስ ኤሌሊዲ ዎꬃን ዱፎዚ ዲዛሶ ዬጊ ኣጊዲ ቢዳ።
MAT 28:9 ሄራካ ዬሱሲ ኢስታ ዴሚዲ፥ «ሃይቶ ሳሮ» ጊዴስ። ኢስቲካ ዬሱሳኮ ሺቂዲኔ ኢዛ ቶሆ ኦይኪዲ ኢዛስ ጎይኒዳ።
MAT 28:10 ዬሱሲ ኢስታ፥ «ባቦፍቴ! ቢዲኔ ኢስቲ ጋሊላ ባና ማላ ታ ኢሻታስ ዮቲቴ። ኢስቲ ታና ሄን ቤያና» ጊዴስ።
MAT 28:11 ማጫሳቲ ቡሮ ኦጌ ቦላ ዲሺን ናጊዛይታፔ ባጋቲ ካታማ ቢዲ ሃኒዳይሳ ኡባ ቄሴታ ሃላቃታስ ዮቲዳ።
MAT 28:12 ቄሴታ ሃላቃቲካ ዴሬ ጪማታራ ሺቄቲዲ ዞሬቲዳ፤ ዎታዳራታስ ጊዲዛ ሚሽ ኢሚዲ፥ « ‹ኑኒ ꬊስኮን ዲሺን ኢዛ ካሊዛይቲ ቃማራ ዪዲ ካይሶቲ ኤፊዳ› ጊቴ ጊዳ።
MAT 28:14 ሃይሲ ዎሬይ ዴሬ ሃሪዛይሳ ማታን ሲዬቲኮካ ኑኒ ኢዛስ ሎኤꬂ ዮታና፤ ኣይኮ ኢታይካ ኢንቴ ቦላ ጋኮንታ ማላ ኑ ኦꬃና» ጊዳ።
MAT 28:15 ዎታዳራቲካ ሚሻ ኤኪዲ ኢስቲ ጊዳ ማላ ኦꬂዳ፤ ሃይሲ ዮኦዚ ሃች ጋካናስ ኣይሁዳታ ኣቻን ዳሮሶን ዮቴቲሼ ዴስ።
MAT 28:16 ሄሳፌ ጉዬ ዬሱሳ ካሊዛ ታማኔ ኢሲኔቲ ዬሱሲ ኢስታ ቤሲዳ ጋሊላን ዲዛ ዙማ ቦላ ኬዚዳ።
MAT 28:17 ዬሱሳ ቤኢዳ ማላ ኢዛስ ጎይኒዳ፤ ኢስታ ጋርሳፌ ጉጺዛ ባጋቲ ሲꬊዳ።
MAT 28:18 ዬሱሲካ ባና ካሊዛይታኮ ሺቂዲ፥ «ሳሎኒኔ ሳኣን ጎዳቴꬂ ታስ ኢሜቲዴስ። ሄሳ ጊሻስ ቢዲ ዴሬ ኡባ ኣዋ፥ ናዛኔ ጺሎ ኣያና ሱንꬃን ጻማቂሼ፥ ታና ካሊዛይታ ኦꬂቴ፤ ታ ኢንቴና ኣዛዚዳይሳ ኡባ ናጋና ማላ ታማርሲቴ። ታኒካ ኣላሜ ዉርሴꬅ ጋካናስ ኢንቴናራ ዳይስ» ጊዴስ።
MAR 1:1 ጾሳ ና ዬሱስ ኪርስቶሳ ኮይሮ ሚሺራቾይ ሃይሳ፤
MAR 1:2 ናቤ ኢሳያሳ ባጋራ፥ «ሄኮ ኔስ ኦጌ ሎኤꬃናስ ታ ኪታናዴ ኔፔ ሲንꬃራ ዬዳና።
MAR 1:3 ‹ጎዳስ ኦጌ ጊግሲቴ፤ ኢዚ ባና ኦጌ ሱሪሲዲ ኦꬂቴ› ጊሼ ባዞ ቢታን ዋሲዛ ጊሪስ» ጌቴቲ ጻፌቲዴስ።
MAR 1:4 ሄሳꬆካ ጻማቂዛ ዮሃኒሲ ኣሳ ጻማቂሼ፥ «ኢንቴ ናጋራፔ ሲሚዲ ጻማቄቲቴ፥ ጾሲ ኢንቴ ናጋራ ኣቶ ጋና» ጊ ኣዋጂሼ ባዞራ ኬዚ ዎꬊዴስ።
MAR 1:5 ዩሁዳ ዴሬይ ኩሜꬅ ዬሩሳላሜ ኣሳይ ዉሪ ዮሃኒሳኮ ቢ ቢዲ ባ ናጋራ ናጋራ ፓጺ ፓጺ ዮርዳኖሴ ሻፋን ዮሃኒሳ ኩሼን ጻማቄቲዴስ።
MAR 1:6 ሄ ዎዴ ዮሃኒሲ ማይኢዛይ ጋሜላ ኢስኬፌ ኦሴቲዳ ማይኦ፤ ቃሴ ባ ጼሳን ዳፎ ጊጼስ፤ ኢዚ ሚዛ ቁማይ ቦሌኔ ዴጌራ ኤሳ።
MAR 1:7 ኢዚ፥ «ታኒ ሆካዳ ኢዛ ጫማ ቃሾ ቢርሻናስ ቤሶንታዴይ፥ ታፔ ኣꬊዛዴይ ታፔ ጉዬራ ያና።
MAR 1:8 ታኒ ኢንቴና ሃꬃን ጻማቃይስ፤ ኢዚ ጊዲኮ ኢንቴና ጺሎ ኣያናን ጻማቃና» ጊ ሳባኪዴስ።
MAR 1:9 ሄ ዎዴ ዬሱሲ ጋሊላ ጊዶን ዲዛ ናዚሬቴ ጌቴቲዛ ካታማይፔ ዮርዳኖሴ ሻፋ ዪዲ ዮሃኒሳ ኩሼን ጻማቄቲዴስ።
MAR 1:10 ዬሱሲ ጻማቄቲዲ ሃꬃፌ ኬዚዳ ማላ ሳሎይ ዶዬቲን ጺሎ ኣያናይ ኢዛ ቦላ ሃራጴ ሚሳቲዲ ዎꬊሺን ቤዪዴስ።
MAR 1:11 ቃሴካ፥ «ታ ዶሲዛ ናይ ኔና፥ ኔናን ታ ኡፋዬታይስ» ጊዛ ቃላ ጊሪሲ ፑዴ ሳሎፔ ሴቴቲዴስ።
MAR 1:12 ሄራካ ጺሎ ኣያናይ ኢዛ ዱጌ ባዞ ካሌꬂ ኤፊዴስ።
MAR 1:13 ሄን ባዞንካ ኦይዱ ታሙ ጋላስ ጋካናስ ጻላኤራ ፓጬቲሼ ጋምኢዴስ፤ ዶኣታራ ኢሲፌ ዴኢዴስ፤ ኪታንቻቲካ ኢዛ ማዲዳ።
MAR 1:14 ዮሃኒሲ ቃሾ ኬꬅ ጌሊዳፔ ጉዬ ዬሱሲ ጾሳ ሚሺራቾ ቃላ ሳባኪሼ ጋሊላ ቢዲ፥ «ዎዴይ ጋኪዴስ፤ ጾሳ ካዎቴꬂ ማቲዴስ፤ ናጋራፔ ሲሚቴ፤ ሚሺራቾ ቃላን ኣማኒቴ» ጊዲ ሳባኪዴስ።
MAR 1:16 ዬሱሲ ጋሊላ ኣባ ኣቻራ ኣꬊን ሲሞኒኔ ኢዛ ኢሻ ኢንዲራሲ ሞሌ ኦይኪዛይታ ጊዲዳ ጊሻስ ኢስቲ ሞሌ ኦይኪዛ ጊቴ ኣባን ዬጊሺን ቤዪዴስ።
MAR 1:17 ዬሱሲ ኢስታ፥ «ሃ ዪቴ! ታና ካሊቴ፤ ኢንቴ ሞሌ ኦይኪ ሺሺዛ ማላ ታ ኢንቴና ኣስ ኦይኪዛይታ ኦꬃና» ጊዴስ።
MAR 1:18 ኢስቲ ሄራካ ሞሌ ጊቴዛ ዬጊ ኣጊዲ ዬሱሳ ካሊዳ።
MAR 1:19 ጉꬅ ጌዴ ሲንꬄ ኣꬊዲ ዛብዶሳ ና ያቆቤይኔ ኢዛ ኢሻ ዮሃኒሲ ዎጎሎን ኡቲዲ ሞሌ ጊቴ ጊግሲሺን ቤኢዲ ሄራካ ኢስታ ጼይጊዴስ።
MAR 1:20 ኢስቲካ ባ ኣዋ ዛብዶሳኔ ኢዛስ ቃጻሬቲ ኦꬂዛ ኣሳታራ ኢሲፌ ዎጎሎዛ ጊዶን ኣጊዲ ዬሱሳ ካሊ ቢዳ።
MAR 1:21 ሄፔካ ቂፊርናሆሜ ቢዳ። ሄራካ ዬሱሲ ኣይሁዳታ ሳምባታ ጋላስ ኣይሁዳታ ዎሳ ኬꬅ ጌሊዲ ታማርሶ ኦይኪዴስ።
MAR 1:22 ጻፌታ ማላ ጊዶንታ ጎዳቴꬃራ ዲዛ ኣሳ ማላ ኢዚ ታማርሲን ኣሳይ ዉሪ ኢዛ ቲሚርቴዛን ማላሌቲዴስ።
MAR 1:23 ሄ ዎዴ ኣይሁዳታ ዎሳ ኬꬃን ቱና ኣያናይ ኢዛ ቦላ ዲዛ ኢሳዴይ፥
MAR 1:24 «ናዚሬቴ ዬሱሳ ኔ ኑፔ ኣይ ኮያይ? ኑና ꬋይሳና ያዲ? ኔ ኦናኮ ታ ኔና ኤራይስ፤ ኔኒ ጾሳ ጌሻዛ» ጊዲ ዋሲዴስ።
MAR 1:25 ዬሱስካ ቱና ኣያናዛ፥ «ጮኡ ጋዳ ኢዛፔ ኬዛ!» ጊ ሃንቂዴስ።
MAR 1:26 ቱና ኣያናይ ኣዴዛ ጌንዴሪሲዲ ኢዚ ቃኬቲሺን ኢዛፔ ዋሲሼ ኬዚዴስ።
MAR 1:27 ዴሬይ ዉሪ፥ «ኣሶ ሃይሲ ኣዛ ፓላ? ሃይሲ ጎዳቴꬃራ ዲዛ ኦራꬃ ቲሚርቴ፤ ቱና ኣያናታካ ኣዛዜስ፤ ኢስቲካ ኢዛስ ኣዛዜቴቴስ» ጊ ማላሌቲሼ ኣሳይ ባ ጊዶን ኢሶይ ኢሳ ኦይሼቾ ኦይኪዴስ።
MAR 1:28 ሄራካ ኢዛ ኦሶ ዎሬይ ጋሊላ ዩሾን ዲዛ ዴሬ ኡባን ሲዬቲዴስ።
MAR 1:29 ኣይሁዳታ ዎሳ ኬꬃፌ ኬዚዳ ማላ ያቆቤራኔ ዮሃኒሳራ ኢሲፌ ጌዴ ሲሞናሶኔ ኢንዲራሳሶ ጌሊዳ።
MAR 1:30 ሄ ጌሊዳ ማላ ሲሞና ቦሎቴያ ሚሻ ሃርጌ ሳኬታዳ ኢቺዳይሳ ኢዛስ ዮቲዳ።
MAR 1:31 ሄሳ ጊሻስ ዬሱሲ ኢዚኮ ሺቂዲ ኢዚ ኩሼ ኦይኪ ዴንꬂዴስ። ሚሻይ ኣጊን ኢዛ ዴንዳዳ ኢስታ ሞካዱስ።
MAR 1:32 ኣርሼይ ዉሊዳፔ ጉዬ ጋዴይ ꬉሚሺን ኣሳይ ሃርጋንቻታኔ ዳይዳንꬂ ኦይኪዳ ኣሳ ዉርሲ ዬሱሳኮ ኤኪ ዪዴስ።
MAR 1:33 ሄ ካታማዪን ዲዛ ኣሳይ ዉሪ ኬꬃ ካሬን ሺቂዴስ።
MAR 1:34 ኢዚካ ዱማ ዱማ ሃርጌን ሳኬቲዳይታ ዳሮታ ፓꬂዴስ፤ ዳሮ ዳይዳንꬃታካ ኬሲዴስ፤ ጊዶ ኣቲን ዳይዳንꬃቲ ዬሱሲ ኦናኮ ኤሪዛ ጊሻስ ኢስቲ ሃሳያና ማላ ዬሱሲ ኮዪቤና።
MAR 1:35 ባዞይ ዞኦንታ ዬሱሲ ማላዶ ዎንታራ ዴንዲዲ ኣሲ ባይንዳሶ ቢዲ ሄን ዎሳ ኦይኪዴስ።
MAR 1:36 ሲሞኒኔ ኢዛራ ዲዛይቲ ዬሱሳ ኮያና ኬዚ ቢዳ።
MAR 1:37 ኢስቲ ኢዛ ዴሚዲ፥ «ኣሲ ዉሪ ኔና ኮሻን ዴስ» ጊዳ።
MAR 1:38 ዬሱሲካ፥ «ታ ዪዳይ ታማርሳናስ ጊዲዳ ጊሻስ ሚሺራቾ ቃላ ዮታናስ ማታን ዲዛ ጉታታ ኣኔ ቦስ» ጊዴስ።
MAR 1:39 ሄሳ ጊሻስ ኣይሁዳታ ዎሳ ኬꬃን ጌሊ ጌሊ ሳባኪሼኔ ዳይዳንꬅ ኬሲሼ ጋሊላ ካታማ ኩሜꬃን ዩዪዴስ።
MAR 1:40 ኢሲ ኢንቺራቻ ሃርጊዛዴይ ዬሱሳኮ ሺቂዲኔ ኢዛ ሲንꬃን ጉልባቲዲ፥ «ኔ ሼኔ ጊዲኮ ኔ ታና ፓꬃና ዳንዳያሳ» ጊ ዎሲዴስ።
MAR 1:41 ዬሱሲካ ኣዴዛስ ሚሼቲዲ ባ ኩሼ ዬዲ ኢዛ ቦቺዲ፥ «ኔ ፓጻና ማላ ታ ኮያይስ፤ ፓጻ!» ጊዴስ።
MAR 1:42 ሄራካ ኣዴዛ ኢንቺራቻ ሃርጌይ ኣጊን ኣዴዚ ፓጺዴስ።
MAR 1:43 ዬሱሲካ ኣዴዛስ፥ «ኦናስካ ሃይሳ ኔ ዮቶንታ ማላ ናጌታ፤ ጊዶ ኣቲን ባዳ ቄሴስ ኔና ቤሳ። ዴሬዛስ ማርካ ጊዳና ማላ ኔ ፓጺዳይሳስ ሙሴይ ኣዛዚዳ ያርሾ ሺሻ» ጊዲ ኬሂ ሚንꬂ ዮቲዴስ።
MAR 1:45 ጊዶ ኣቲን ኣዴዚ ኬዚ ቢዲ ባ ቢዳ ኡባሶን ዎሬ ዳርሲ ꬋርጪዴስ። ሄሳ ጋሶን ዬሱሲ ኣይ ካታማንካ ቆንጬራ ጌላናስ ዳንዳይቤና። ሄሳፌ ዴንዲዳይሳን ካታማፔ ካሬራ ኣሲ ባይንዳሶን ዱስ ኦይኪዴስ። ኣሳይ ጊዲኮ ዱማ ዱማሶፔካ ኢዛኮ ዪዴስ።
MAR 2:1 ጉꬃ ጋላሳፌ ጉዬ፥ «ዬሱሲ ቂፊርናሆሜ ሲሚዲ ሶን ዴስ» ጊዛ ዎሬ ኣሳይ ሲዪዴስ።
MAR 2:2 ሄሳ ጊሻስ ኬꬃራ፥ ካሬራ ኡቲዛሶይ ꬋያና ጋካናስ ዳሮ ዴሬይ ሺቂዴስ። ኢዚካ ጾሳ ቃላ ኣሳስ ሳባኪዴስ።
MAR 2:3 ኦይዱ ኣስ ዳይቲ ቶሆይ ሲሊዳ ኢሲ ኣስ ቶኪዲ ኢዛኮ ኤሂዳ።
MAR 2:4 ኣሳ ዳሮቴꬃፌ ዴንዲዳይሳን ዬሱሲ ዲዛሶ ጋꬃናስ ዳንዳዮንታ ጊሻስ ዬሱሲ ዲዛ ጊናራ ካራ ቃሪዲ ሃርጋንቻዛ ኢዚ ኢቺዳ ሃላራ ዬሱሳ ሲንꬅ ዱጌ ዎꬂዳ።
MAR 2:5 ዬሱሲ ኣሳታ ኣማኖ ቤኢዲ ቶሆይ ሲሊዳ ኣዴዛ፥ «ታ ናዞ! ኔ ናጋራይ ኣቶ ጌቴቲዴስ» ጊዴስ።
MAR 2:6 ሄን ጋዳን ኡቲዳ ኢሲ ኢሲ ሙሴ ዎጋ ጻፌቲ ባ ዎዚናራ ሃይሲ ኣዴዚ ዎስቲ ሃይሳꬆ ጊዜ? «ጾሳ ቦላ ጫሻ ቃላ ሃሳዬስ። ኢሲ ጾሳፌ ኣቲን ናጋራ ማራና ዳንዳይዛይ ኦኔ?» ጊዲ ቆፒዳ።
MAR 2:8 ዬሱሲ ሄራካ ኢስቲ ባ ዎዚናን ቆፒዳይሳ ባ ኣያናን ኤሪዲ፥ «ኢንቴ ዎስቲ ሃይሳꬆ ቆፔቲ?
MAR 2:9 ቶሆይ ሲሊዳ ኣዴዛ፥ ‹ኔ ናጋራይ ኣቶ ጌቴቲዴስ› ጉሳፌኔ ‹ዴንዳዳ ኔ ሃላ ቶካዳ ባ› ጉሳፌ ኣዋይሲ ማቲዜ?
MAR 2:10 ጊዶ ኣቲን ኣሳ ናስ ቢታ ቦላን ናጋራ ማራና ጎዳቴꬂ ዲዛይሳ ኢንቴ ኤራና ማላ» ጊዲ ቶሆ ሲላ ኣዴዛ፥
MAR 2:11 «ዴንዳዳ ኔ ቶኬታ ዪዳ ሃላ ቶካዳ ኔሶ ባ» ጊዴስ።
MAR 2:12 ኢዚካ ዴንዲዲ ኣሳይ ዉሪ ቤዪሺን ሃላ ቶኪዲ ቢዴስ። ሄን ጋዳን ዲዛ ኣሳይ ዉሪ ሃኖዛን ማላሌቲዲ፥ «ካሴ ሃይሳ ማላይ ሃኒን ቤዪቤኮ» ጊዲ ጾስ ጋላቲዴስ።
MAR 2:13 ቃሴካ ዬሱሲ ጋሊላ ኣባ ላንቄ ቢዴስ። ዳሮ ዴሬይ ኢዛኮ ዪን ኢዚካ ዪዳ ኣሳ ታማርሲዴስ።
MAR 2:14 ኢዚ ኦጌራ ኣꬊ ቢሺን ኢልፊዮሳ ና ሌዌይ ቃራጻ ሺሺዛሶን ኡቲዳይሳ ቤኢዲ፥ «ሃ ያ ታና ካላ» ጊዴስ። ኢዚካ ዴንዲዲ ዬሱሳ ካሊዴስ።
MAR 2:15 ሄሳፌ ጉዬ ሌዌ ሶን ካꬃ ማዳን ኡቲ ዲሺን ቃራጻ ሺሺዛ ዳሮ ኣሳቲኔ ናጋራንቻቲ ኢዛራ ካሊ ዪዳ ጊሻስ ኢስቲ ዬሱሳራኔ ኢዛ ካሊዛይታራ ኢሲፌ ማዳን ኡቲዳ።
MAR 2:16 ፋርሳዌታ ባጋፌ ጊዲዳ ሙሴ ዎጋ ታማርሲዛይቲ ዬሱሲ ናጋራንቻታራኔ ቃራጻ ሺሺዛይታራ ሚሺን ቤኢዲ ኢዛ ካሊዛይታ፥ «ቃራጻ ቃንጺሲዛይታራኔ ናጋራንቻታራ ኣዛስ ሚዜ?» ጊዲ ኦይቺዳ።
MAR 2:17 ዬሱሲካ ኢስቲ ጊዛይሳ ሲዪዲ፥ «ኣኪሜይ ሃርጋንቻታስ ኮሼስ ኣቲን ሃርጎንታይታስ ጊዴና። ታኒካ ናጋራንቻታ ጼይጋናስ ያዲስ ኣቲን ጺሎታ ጼይጋናስ ያቤኬ» ጊዴስ።
MAR 2:18 ዮሃኒሳ ካሊዛይቲኔ ፋርሳዌቲ ጾማ ጾሜቴስ። ኢሲ ኢሲ ኣሳቲ ዬሱሳኮ ዪዲ፥ «ዮሃኒሳ ካሊዛይቲኔ ፋርሳዌታ ካሊዛይቲ ጾሜቴስ ሺን ኔና ካሊዛይቲ ኣዛስ ጾሜቴኔ?» ጊ ኦይቺዳ።
MAR 2:19 ዬሱሲካ ኢስታስ፥ «ሚሺራይ ኢስታራ ዲሺን ሚሺራ ላጌቲ ጾሚ ኤሪዞ? ሚሺራይ ኢስታራ ዲሺን ጾሚ ኤሬቴና።
MAR 2:20 ሚሺራይ ኢስታፌ ኤኬታና ዎዴይ ያና። ሄ ዎዴ ኢስቲ ጾማና።
MAR 2:21 «ጋልኣ ማይኦ ቦላ ኦራꬃ ዎሶ ዎꬂ ሲኪዛዴይ ኦኒካ ዴና፤ ሄሳꬆ ኦꬂኮ ኦራꬃዚ ጋልኣ ዳኪ ዳኪ ዬጌስ፤ ዳኬꬃይካ ካሴፔ ጌዴ ኣꬊ ኢቴስ።
MAR 2:22 ሄሳꬆካ ኦራꬃ ዎይኔ ጫጄ ጋልኣ ሉካሞን ዎꬂዛዴይ ዴና። ዎꬂዛ ጊዲኮ ዎይኔ ጫጄዚ ጋልኣ ሉካሞዛ ꬉሴስ፤ ዎይኔ ጫጄዚኔ ሉካሞዚ ናምኣይ ሞሬቴቴስ። ሄሳ ጊሻስ ኦራꬃ ዎይኔ ጫጄይ ዳናስ ቤሲዛይ ኦራꬃ ሉካሞና» ጊዴስ።
MAR 2:23 ዬሱሲ ኣይሁዳታ ሳምባታ ጋላስ ጊስቴ ቲያ ጊዶራ ኣꬊሺን ኢዛ ካሊዛይቲ ኢዛራ ኢሲፌ ቢሼ ቲያ ጹጶ ኦይኪዳ።
MAR 2:24 ፋርሳዌቲ፥ «ኔና ካሊዛይቲ ሳምባታ ጋላስ ዲጌቲዳ ሚሽ ኣዛስ ኦꬂዞ?» ጊዲ ዬሱሳ ኦይቺዳ።
MAR 2:25 ኢዚካ ኢስታስ፥ «ዳዊቲ ጋፊዲ ሚዛ ሚሽ ኮዪዳ ዎዴ ኢዛራ ኢሲፌ ዲዛይታራ ኢዚ ኦꬂዳይሳ ናባቢቤኬቲ?
MAR 2:26 ኣቢያታሬይ ቄሴታ ሃላቃቴꬃን ዲሺን ኢዚ ጾሳ ኬꬄ ጌሊዲ ቄሴቲ ጻላላ ማና ቤሲዛ ዱማ ካꬃ ባስ ሚዲኔ ባናራ ዲዛይታስ ኢሚዴስ» ጊዴስ።
MAR 2:27 ቃሴካ ዬሱሲ ኢስታስ፥ «ሳምባታይ ኣሳስ ሜꬌቲዴስ ኣቲን ኣሲ ሳምባታስ ሜꬌቲቤና።
MAR 2:28 ሄሳ ጊሻስ ታ ኣሳ ናይ ሳምባታ ጎዳ» ጊዴስ።
MAR 3:1 ሃራ ጋላስ ዬሱሲ ኣይሁዳ ዎሳ ኬꬄ ጌሊዴስ። ሄንካ ኩሼይ ሲሊዳዴይ ዴስ።
MAR 3:2 ዬሱሳ ሞታናስ ጋሶ ኮይዛ ኣሳቲ ኢዚ ኣይሁዳታ ሳምባታ ጋላስ ፓꬃናኮን ጊዲ ፓꬂሺን ቤያና ኮዪዳ።
MAR 3:3 ኢዚካ ኩሼይ ሲሊዳ ኣዴዛ፥ «ሄን ሺቂ ኡቲዳ ኣሳ ሲንꬃን ዴንዳ ኤቃ» ጊዴስ።
MAR 3:4 ሄሳፌ ጉዬ ዬሱሲ ኣሳ፥ «ሳምባታ ጋላስ ቤሲዛይ ሎኦ ኦሶዬ? ኢታ ኦሶ? ኣሳ ሼምፖ ኣሾዬ? ዎይኮ ሼምፖ ዎꬎ?» ጊዲ ኦይቺዴስ። ኢስቲካ ጮኡ ጊዳ።
MAR 3:5 ኢስታ ዎዚና ሹቻቴꬃን ሚሼቲዲ ኢዛ ጊዶꬂዲ ዩዪ ኣꬊ ኤቂዳ ኣሳ ሃንቆራ ጼሊዲ ኣዴዛ፥ «ኔ ኩሼዛ ፒዲሳ!» ጊዴስ። ኣዴዚካ ባ ኩሼ ፒዲሲን ኩሼዚ ሙሌራ ፓጺዴስ።
MAR 3:6 ፋርሳዌቲ ኬዚ ቢዲ ኢዛ ዎስቲ ꬋይሳናኮ ሄርዶሳ ባጋ ጊዲዳ ኣሳታራ ዞሬቲዳ።
MAR 3:7 ዬሱሲ ባና ካሊዛይታራ ኣባኮ ቢዴስ። ጋሊላፔኔ ዩሁዳፔ ዪዳ ዳሮ ዴሬይ ኢዛ ካሊዴስ።
MAR 3:8 ኢዚ ኦꬂዛይሳ ሲዪዲ ኣሳይ ዩሁዳፔ፥ ዬሩሳላሜፔ፥ ኤዶሜፔ፥ ዮርዳኖሴ ፒንꬃን ዲዛ ዴሬታፔ ቃሴ ጺሮሴፔኔ ሲዶና ሄራፔ ኢዛኮ ዪዴስ።
MAR 3:9 ኣሳይ ዳሪዳ ጊሻስ ኢዛ ኡንኤꬆንታ ማላ ጉꬃ ዎጎሎ ኢስቲ ጊጊሳና ማላ ባና ካሊዛይታ ኣዛዚዴስ።
MAR 3:10 ኢዚ ዳሮ ሃርጋንቻታ ፓꬂዳ ጊሻስ ሳኮይ ዋዪሲዛይቲ ዉሪ ኢዛ ባ ኩሼራ ቦቻናስ ዳፌቲዳ።
MAR 3:11 ቱና ኣያናቲካ ዬሱሳ ቤኢዳ ማላ ኢዛ ሲንꬃን ኩንዲዲ፥ «ኔኒ ጾሳ ና» ጊዲ ዋሲዳ።
MAR 3:12 ጊዶ ኣቲን ኢዚ ኦናኮ ቱና ኣያናቲ ቆንጪሶንታ ማላ ኬሂፔ ሃንቂዴስ።
MAR 3:13 ዬሱሲ ፑዴ ዙማ ቦላ ኬዚዲ ባ ኮይዛይታ ባኮ ያና ማላ ጼይጊዴስ፤ ኢስቲካ ኢዛኮ ዪዳ።
MAR 3:14 ኢዛራ ኢሲፌ ጊዳና ማላኔ ሳባካናስ ዬዳና ማላ ታማኔ ናምኣታ፥ «ሃዋሬታ» ጊ ሱንꬂዴስ።
MAR 3:15 ኣሳፔ ዳይዳንꬃታ ኬሳና ማላ ኢስታስ ጎዳቴꬅ ኢሚዴስ።
MAR 3:16 ኢዚ ሱንꬂዳ ታማኔ ናምኣታ ሱንꬂ ሃይሳፌ ካሊዛይሳ፤ ጴጽሮሳ ጌቴቲዳ ሲሞና፥
MAR 3:17 ቢኦሪኔጌሴ ዎይኮ ዳዳ ናይታ ጌቴቲዳ ዛብዶሳ ናይታ ያቆቤኔ ዮሃኒሳ፥
MAR 3:18 ኢንዲራሳ፥ ፒሊጶሳ፥ ባርቴሌሞሳ፥ ማቶሳ፥ ቶማሳ፥ ኢልፊዮሳ ና ያቆቤ፥ ታዶሳ፥ ባ ባጋስ ሚሼቲዛ ሲሞና፥
MAR 3:19 ዬሱሳ ኣꬂ ኢሚዳ ኣስቆሮንቶ ዩሁዳ።
MAR 3:20 ሄሳፌ ጉዬ ዬሱሲ ኢሲ ሶ ጌሊዴስ። ኢዚኔ ኢዛ ካሊዛይቲ ካꬅ ማና ዎዴይ ኢስታስ ꬋያና ጋካናስ ዴሬይ ቃሴካ ዳሪ ሺቂዴስ።
MAR 3:21 ኢዛ ሃኖታ ሲዪዳ ኢዛ ዳቦቲ፥ «ጎዮንታ ኣጌና» ጊዲ ባናራ ኤኪ ባናስ ኢዚ ዲዛሶ ጋኪዳ።
MAR 3:22 ዬሩሳላሜፔ ዪዳ ጻፌቲካ፥ «ቢኤሊዜቡላ ጌቴቲዛ ዳይዳንꬃታ ሃላቃይ ኢዛ ቦላ ዴስ። ኢዚ ዳይዳንꬃታ ኬሲዛይ ዳይዳንꬃታ ሃላቃ ዎልቃንኮ!» ጊዳ።
MAR 3:23 ኢዚካ ኢስታ ጼይጊዲ ሌሚሶራ፥ «ጻላኤይ ኣሳፔ ጻላኤ ዎስቲ ኬሳኔ?
MAR 3:24 ባ ጊዶን ሻኮይ ዲዛ ካዎቴꬂ ሚናናስ ዳንዳዬና።
MAR 3:25 ኢሲ ኬꬃ ኣሲካ ባ ጊዶን ሻኬቲኮ ኤቃናስ ዳንዳዬና።
MAR 3:26 ሄሳꬆካ ጻላኤይ ባ ጋርሳን ኢሶይ ኢሳራ ሻኬቲኮኔ ኢጼቲኮ ሚኒ ኤቃናስ ዳንዳዬና። ሄሲካ ኢዛስ ዉርሴꬅ ጊዳና።
MAR 3:27 «ሄሳ ጋሶን ኢሳዴይ ኮይሮቲዲ ዎልቃማ ኣስ ቃቾንታ ዲሼ ዎልቃማዛ ሶ ጌላናሲኔ ኢዛ ሚሼ ቦንቃናስ ዳንዳዬና፤ ኢዛ ኣቆ ቦንቃናስ ዳንዳዬቲዛይ ዎልቃማዛ ቃቺኮ ጻላላ።
MAR 3:28 «ታ ኢንቴስ ቱሙ ጋይስ፤ ኣሳ ናይታስ ናጋራይኔ ጫሺ ዉሪ ማሬታና።
MAR 3:29 ጊዶ ኣቲን ጺሎ ኣያና ቦላ ጫሻ ቃላ ሃሳይዛ ኣሳ ኡባስ ሜርናስ ናጋራ ኣጮ ጊዳና ኣቲን ማሬቴና» ጊዴስ።
MAR 3:30 ሄሳ ኢዚ ጊዳይ ኢስቲ ኢዛ፥ «ኔ ቦላ ቱና ኣያናይ ዴስ» ጊዳ ጊሻሳ።
MAR 3:31 ሄሳፌ ጉዬ ኢዛ ኣዬያኔ ኢዛ ኢሻቲ ካሬ ዪ ኤቂዲኔ ኣሴ ኢዛኮ ኪቲ ጼይጊሲዳ።
MAR 3:32 ኢዛ ጊዶꬂ ኡቲዳ ዳሮ ኣሳይ፥ «ሄኮ ኔ ኣዬያኔ ኔ ኢሻቲ ካሬን ኤቂዲ ኔና ኮዬቴስ» ጊዳ።
MAR 3:33 ኢዚካ ዛሪዲ፥ «ታ ኣያ ኦኔ? ታ ኢሻቲ ኦናንቴ?» ጊዴስ።
MAR 3:34 ኢዛ ዩዪ ኡቲዳ ኣሳኮ ጼሊዲ፥ «ታ ኣዬያኔ ታ ኢሻቲ ሃይታንታኮ!
MAR 3:35 ጾሳ ሼኔ ኦꬂዛይ ዉሪ ኢዚ ታ ኢሻ፥ ታ ሚቾኔ ታ ኣዮ» ጊዴስ።
MAR 4:1 ቃሴ ዬሱሲ ሃራ ዎዴ ኣባ ኣቻን ታማርሶ ኦይኪዴስ። ኢዛኮ ኬሂ ዳሮ ዴሬይ ሺቂዳ ጊሻስ ኣባ ጊዶን ዲዛ ዎጎሎ ዲዛሪን ጌሊዲ ኡቲዴስ፤ ኣሳይካ ዉሪ ኣባ ኣቻን ሺቂዴስ።
MAR 4:2 ኢዚካ ዳሮ ዮኦታ ሌሚሶን ሂዝጊ ታማርሲዴስ።
MAR 4:3 «ሲዪቴ! ኢሳዴይ ዜሬꬅ ዜራናስ ኬዚዴስ።
MAR 4:4 ኢዚ ዜሪሺን ኢሲ ኢሲ ዜሬꬂ ኦጌ ቦላ ዎꬊዴስ። ኦጌ ቦላ ዎꬊዳ ዜሬꬃ ካፎቲ ማጺ ሚዳ።
MAR 4:5 ባጋይ ሜላ ቢታን ዎꬊዴስ። ሄ ቢታይ ሜላ ጊዲዳ ጊሻስ ሄራካ ጫሪዴስ።
MAR 4:6 ጊዶ ኣቲን ኣርሼይ ኬዚዳ ማላ ሹሊዲ ጻጶ ዬዶንታ ጊሻስ ሜሊዴስ።
MAR 4:7 ቃሴ ኢሲ ዜሬꬂ ኣጉንꬃ ጊዶን ዎꬊዴስ፤ ኣጉንꬃይካ ዲጪዲ ጩሊዳ ጊሻስ ኣይፊቤና።
MAR 4:8 ሃራ ዜሬꬂ ቃሴ ሎኦ ኦርዴ ቢታ ቦላ ዎꬊዳ ጊሻስ ጫሪዲ ዲጪዴስ፤ ኣይፌካ ኣይፊዴስ፤ ኢሶይ ሄꬑ ታሙ፥ ኢሶይ ቃሴ ኡሱፑን ታሙ፥ ኢሶይ ቃሴ ጼቱ ኣይፊዴስ።»
MAR 4:9 ዬሱሲ ቃሴካ፥ «ሲዪዛ ሃይꬂ ዲዛዴይ ሲዮ!» ጊዴስ።
MAR 4:10 ዬሱሲ ባርካ ዲሺን ታማኔ ናምኣቲኔ ካሴ ኢዛራ ዲዛ ኣሳይ ኢዚ ዮቲዳ ሌሚሶዛ ጊሻስ ኢዛ ዛሪ ኦይቺዳ።
MAR 4:11 ኢዚካ ኢስታስ፥ «ኢንቴስ ጾሳ ካዎቴꬃ ጹራ ኤሮይ ጌሊዴስ ሺን ካሬን ዲዛይታስ ጊዲኮ ዮኦይ ዉሪ ሌሚሶራ ዮቴቴስ።
MAR 4:12 ሄሲካ ካሴ፥ ‹ኢስቲ ቤኢዲ ቤኢዳይሳ ኣኬኮንታ ማላኔ ሲሞንታ ማላ፥ ቃሴካ ኢስታ ናጋራይ ማሬቶንታ ማላኮ› » ጊዴስ።
MAR 4:13 ቃሴካ ዬሱሲ፥ «ሃይሲ ሌሚሶይ ኢንቴስ ጌሊቤኔ? ሂስቲን ሃራ ሌሚሶ ኢንቴ ዎስቲ ኤራኔ?
MAR 4:14 ዜሪዛዴይ ቃላ ዜሬስ።
MAR 4:15 ኢሲ ኢሲ ኣሳቲ ኦጌ ቦላ ዎꬊዳ ዜሬꬃ ሚሳቴቴስ፤ ኢስቲ ቃላ ሲዪዛ ዎዴ ጻላኤይ ዪዲ ሄራካ ኢስቲ ሲዪዳ ቃላ ኢስታ ዎዚናፔ ኤኪቼስ።
MAR 4:16 ሄሳꬆካ ሃራቲ ሜላ ቢታ ቦላ ዎꬊዳ ዜሬꬃ ሚሳቴቴስ። ኢስቲ ቃላ ሲዪዲ ኡፋይሳን ኤኬቴስ።
MAR 4:17 ጊዶ ኣቲን ኢስቲ ጻጶ ዬዶንታ ጊሻስ ጉꬃ ዎዴ ጋምኢሺን ቃላ ጋሶን ሜቶይ ዎይኮ ጎዴታይ ኣሳታ ቦላ ዪዛ ዎዴ ሄራካ ꬉጴቴቴስ።
MAR 4:18 ሃራቲ ቃሴ ኣጉንꬃ ጊዶን ዎꬊዳ ዜሬꬃ ሚሳቴቴስ፤ ኢስቲ ቃላ ሲስ ሲዬቴስ።
MAR 4:19 ጊዶ ኣቲን ሃ ቢታ ሜቶይ፥ ሚሻ ሲቆይኔ ሃራ ኣሞይ ኢስቲ ሲዪዳ ቃላ ጩሊዲ ኣይፌ ኣይፎንታ ማላ ዲጌስ።
MAR 4:20 ሃንኮይቲ ሎኦ ቢታን ዜሬቲዳ ዜሬꬃ ሚሳቴቴስ፤ ሄይቲካ ቃላ ሲዪዲ ኤኪዛዴኔ ሄꬑ ታሙ ኣይፌ፥ ኡሱፑን ታሙ ኣይፌኔ ጼቱ ኣይፌ ኣይፊዛይታ» ጊዴስ።
MAR 4:21 ቃሴካ ዬሱሲ፥ «ጾምፔ ኦይꬂዲ ጌማሶን ዎይኮ ኣርሳ ጋርሳን ዎꬂ ኤሬቲ? ፖኣና ማላ ቆንጬሶን ዎꬄታ ጊዴኔ?
MAR 4:22 ሄሳ ጊሻስ ቆቴቲዲ ቆንጬ ኬዞንታይ፥ ፖኦን ኬዞንታ ጌማን ኣታናይ ባ።
MAR 4:23 ሄሳ ጊሻስ ሲዪዛ ሃይꬂ ዲዛዴይ ሲዮ!» ጊዴስ።
MAR 4:24 ጉጂዲካ፥ «ኢንቴ ሲዪዛይሳ ዎዚናን ዎꬂቴ፤ ኢንቴ ማኪዛ ሚሻራ ኢንቴስ ማኬታና፤ ሄሳፌካ ዳሮይ ጉጄታና።
MAR 4:25 ዲዛዴስ ጉጄታና ሺን ባይንዳዴፌ ኢዛስ ዲዛራካ ኤኬታይቻና» ጊዴስ።
MAR 4:26 ቃሴካ ዬሱሲ፥ «ጾሳ ካዎቴꬂያ ዜሬꬅ ዜሪዛ ኢሲ ኣስ ሚሳታዉስ።
MAR 4:27 ዜሪዳዴይ ኦማርስ ꬊስኬስ። ዎንቲሺን ዴንዴስ፤ ጊዶ ኣቲን ኢዚ ኤሮንታ ዲሺን ዜሬቲዳ ካꬃይ ሞኪዲ ዲጬስ።
MAR 4:28 ጋዴያካ ኮይሮ ጫሬች፥ ካሌꬃዳ ፑꬌ፥ ቃሴካ ፑꬌዛ ቦላ ሎኦ ኣይፌ ኢማዉስ።
MAR 4:29 ካꬃይ ካጺዳፔ ጉዬ ቦኔይ ጋኪን ኬꬃ ኣዋይ ሄራካ ማጻ ኦይኬስ» ጊዴስ።
MAR 4:30 ዬሱሲ፥ «ጾሳ ካዎቴꬅ ኑ ኣዛራ ጊኒሳኔ? ኣዛራ ሌሚሳኔ?
MAR 4:31 ቢታ ቦላ ኡባፌ ላፋ ጊዲዳ ሳናፊጬ ኣይፌ ሚሳታዉስ።
MAR 4:32 ዜሬታዳ ዲጪዳፔ ጉዬ ቃሴ ኣታኪልቴታ ኡባፌ ኣꬊዛ ጊሻስ ካፎቲ ዪዲ ሄ ኣታኪልቴይ ሃጋታ ኩዋ ጊዶን ሼምፔቴስ» ጊዴስ።
MAR 4:33 ዬሱሲካ ኣሳይ ኤካናስ ዳንዳይዛይሳ ኬና ሃይታ ሚሳቲዛ ሃራ ዳሮ ሌሚሶራ ኢስታስ ዮቲዴስ።
MAR 4:34 ኣይ ሚሽ ጊዲኮካ ኣሳስ ሌሚሶይ ባይንዳ ዮቲ ኤሬና። ኢዚኔ ኢዛ ካሊዛይቲ ጻላ ዲዛ ዎዴ ጊዲኮ ዉርሲ ቢርሺ ዮቴስ።
MAR 4:35 ሄ ጋላስ ጋዴይ ቃሚሺን ባና ካሊዛይታ፥ «ኣኔ ጌዴ ሄ ፒንꬅ ፒኖስ» ጊዴስ።
MAR 4:36 ኢስቲ ኣሳ ሄን ኣጋጊዲ ኢዚ ኡቲ ዲዛ ዎጎሎዛራ ዬሱሳ ኤኪ ቢዳ። ሃራ ዎጎሎቲካ ኢስታራ ኢሲፌ ዴቴስ።
MAR 4:37 ሄ ዎዴ ዎልቃማ ዳምባላይ ኣባ ቦላ ዴንዲዲ ዎጎሎዛ ሃꬂ ኩማና ጋካናስ ሾጬቺዴስ።
MAR 4:38 ጊዶ ኣቲን ዬሱሲ ቦርኮꬅ ቦርኮቲዲ ዎጎሎዛስ ጉዬ ባጋን ኢቺዴስ። ኢስቲካ ኢዛ ዴንꬂዲ፥ «ኣስታማሬ! ኑኒ ꬋይሺን ኔና ሜቴኔ?» ጊዳ።
MAR 4:39 ኢዚካ ዴንዲዲ ጫርኮዛ፥ «ጮኡ ጋ!» ኣባካ፥ «ዎፑ ጋ!» ጊዴስ፤ ጫርኮይካ ጮኡ ጊዴስ፤ ሙሌካ ጮኡ ጊዴስ።
MAR 4:40 ባና ካሊዛይታካ፥ «ሃይሳꬆ ኣዛስ ባቢዴቲ? ሃይሳ ጋካናስ ኢንቴስ ኣማኖይ ባዌ?» ጊዴስ።
MAR 4:41 ኢስቲካ ኬሂ ባቢዲ ባ ጊዶን ኢሶይ ኢሳራ፥ «ጫርኮይኔ ኣባይ ኢዛስ ኣዛዜቲዛይ ሃይሲ ኦኔ?» ጌቴቲዳ።
MAR 5:1 ኣባ ፒኒዲ ጌዴ ጌርጌሴኖኔ ጌቴቲዛሶ ቢዳ።
MAR 5:2 ዬሱሲ ዎጎሎይፔ ዎꬊዳ ማላ ቱና ኣያናይ ኢዛ ቦላ ዲዛዴይ ዱፎፔ ኬዚዲ ዬሱሳራ ጋጋና ኢዛኮ ዪዴስ።
MAR 5:3 ሃይሲ ኣዴዚ ዱፎሶን ዲዛዴኔ ሃራይ ኣቶሺን ኦኒካ ኢዛ ሳንሳላታንካ ቃቻናስ ዳንዳይቤና።
MAR 5:4 ዳሮ ዎዴ ቶሆ ቢራታራኔ ሳንሳላታራ ቃሼቴስ። ጊዶ ኣቲን ኩሼ ሳንሳላታ ዱሴꬂ ዬጌስ፤ ቶሆ ቢራታካ ሜንꬄሬꬂ ዬጌስ፤ ኦኒካ ኢዛ ኦይኪዲ ቴቃናስ ዳንዳይቤና።
MAR 5:5 ጋላሲኔ ቃማ ዱፎታ ጊዶኒኔ ዙማታ ቦላ ዩዪ ዩዪ ዋሲሼ ባ ቦላ ሹቻራ ቃንጼሬꬂዲ ማዱንꬄስ።
MAR 5:6 ኢዚካ ዬሱሳ ሃሆን ቤኢዳ ማላ ዎꬃን ኢዛኮ ዪዲ ኢዛ ሲንꬃን ጉልባቲዲ ጎይኒዴስ።
MAR 5:7 ኬሂ ዋሲዲ፥ «ሃይሶ ዎጋ ጾሳ ና ዬሱሳ፥ ኔስ ታናራ ኣዚ ዲዜ? ጾሳ ሱንꬃን ታ ኔና ዎሳይስ ታና ዋዪሶፓ» ጊዴስ።
MAR 5:8 ኢዚ ሄሳ ጊዳይ ዬሱሲ ካሴ፥ «ኔኒ ቱና ኣያናይ ሃይሳፌ ኬዛ» ጊዳ ጊሻሳ።
MAR 5:9 ሄሳፌ ቃሴ ዬሱሲ ኢዛ፥ «ኔ ሱንꬂ ኦኔ?» ጊዲ ኦይቺዴስ። ኢዚካ፥ «ኑኒ ዳሮታ ጊዲዳ ጊሻስ ታ ሱንꬂ ሌጎኔ ጌቴቴስ» ጊዴስ።
MAR 5:10 ሄ ዴሬፔ ኬሲ ዬዶንታ ማላ ዬሱሳ ኬሂ ዎሲዴስ።
MAR 5:11 ሄን ማታን ዙማ ቦላ ዳሮ ጉዱንꬂ ሄሜቴስ።
MAR 5:12 ቱና ኣያናቲ፥ «ኑ ጉዱንꬃታን ጌላና ማላ ኑስ ኤሮ ጋርኪ?» ጊዲ ዬሱሳ ዎሲዳ።
MAR 5:13 ኢዚካ ኢስታስ፥ «ኤሮ» ጊዴስ። ቱና ኣያናቲካ ኣዴዛፔ ኬዚዲ ጉዱንꬃታን ጌሊዳ። ናምኡ ሺ ጊዲዛ ጉዱንꬃቲ ዉሪ ኣፎዛራ ዱጉꬃ ጌንዴሬቲ ዎꬊዲ ኣባን ሚቴቲዳ።
MAR 5:14 ጉዱንꬃ ሄሚዛይቲ ባቃቲዲ ሃኒዳይሳ ካታማኒኔ ዴሬ ጊዶን ዮቲዳ። ዴሬይካ ሃኒዳይሳ ቤያናስ ባ ዲዛሶፔ ዲዛሶፔ ኬዚዴስ።
MAR 5:15 ዬሱሳኮ ዪዲ ዳሮ ዳይዳንꬂ ኢዛ ቦላ ዲዛ ኣዴዛ ዎዚናይ ኢዛስ ሲሚን ማይኦ ማይኢዲኔ ዎጋራ ኡቲዳይሳ ዪዳ ኣሳይ ቤኢዲ ባቢዴስ።
MAR 5:16 ሃይሳ ቤኢዳ ኣሳይ ዳይዳንꬂ ኢዛ ቦላ ዲዛ ኣዴዛ ጊሻሲኔ ጉዱንꬃቲ ሃኖይሳ ዴሬዛስ ዮቲዴስ።
MAR 5:17 ሄሳፌ ጉዬ ሄ ዴሬ ኣሳይ ዬሱሲ ኢስታ ዴሬ ዬዲዲ ባና ማላ ዎሲዴስ።
MAR 5:18 ዬሱሲ ዎጎሎን ጌሊሺን ዳይዳንꬃቲ ኢዛፔ ኬዚዳ ኣዴዚ ዬሱሳራ ዳናስ ዎሲዴስ።
MAR 5:19 ዬሱሲ ቃሴ ኢዚ ኦይቺዳይሳ ኣካይ ጊዲ፥ «ኔኒ ጌዴ ኔሶ ባ፤ ጎዳይ ኔስ ኣይ ማላ ጊታ ሚሽ ኦꬂዳኮኔ ኢዚ ኔስ ኦꬂዳ ማሮቴꬃ ኔሶ ኣሳስ ዮታ» ጊዴስ።
MAR 5:20 ኣዴዚካ ባሶ ቢዲ ዬሱሲ ኢዛስ ኦꬂዳ ጊታ ሚሽ ዉርሲ ታሙ ካታማ ጌቴቲዛ ዴሬን ዮቲን ሲዪዳይ ዉሪካ ማላሌቲዴስ።
MAR 5:21 ቃሴካ ዬሱሲ ዎጎሎን ጌሊዲ ጌዴ ፒንꬅ ፒኒዲ ኣባ ኣቻን ዲሺን ዳሮ ኣሳይ ኢዛ ኣች ሺቂዲኔ ኢዛ ጊዶꬂዴስ።
MAR 5:22 ኣይሁዳታ ዎሳ ኬꬃ ሃላቃታፔ ኢሶይ ኢያኢሮሳ ጌቴቲዛይሲ ኢዚ ዲዛሶ ቢዲ ዬሱሳ ዴሚዳ ማላ ኢዛ ቶሆ ቦላ ኩንዲዲ
MAR 5:23 «ታስ ጉꬃ ና ዲዛራ ሃይቃና ጋዉስ። ኢዛ ሃይቆንታ ፓጻ ዳና ማላ ኔ ሃ ያዳ ኔ ኩሼ ኢዚ ቦላ ዎꬃርኪ?» ጊዲ ኬሂ ዎሲዴስ።
MAR 5:24 ዬሱሲካ ኢዛራ ኢሲፌ ቢዴስ። ዳሮ ኣሳይ ኢዛ ኡንኤꬃና ጋካናስ ካሊዴስ።
MAR 5:25 ታማኔ ናምኡ ላይꬅ ኩሜꬅ ሱꬂ ኢዚ ቦላፌ ጉኪዛ ማጫስ ዲዛራ ሄን ኣሳራ ዳዉስ።
MAR 5:26 ኢዛ ባስ ዲዛ ሚሽ ዉርሳና ጋካናስ ኣኪሜፔ ኣኪሜ ላሞን ዳሮ ዳቡራዱስ። ጊዶ ኣቲን ሳኮይ ኢዚስ ጌዴ ዳሪዴስ ኣቲን ኣይኮካ ሎኢቤና።
MAR 5:27 ኢዛ ዬሱሳ ጊሻስ ሲዪዳ ማላ ኣሳ ጊዶራ ዬሱሳ ጉዬራ ካላዳ ኢዛ ማይኦ ቦቻዱስ።
MAR 5:28 ጋሶይካ፥ «ታ ኣይ ሃናዳካ ኢዛ ማይኦ ኩሼራ ቦቾ ቦቺዳኮካ ፓጻና» ጋዳ ቆፒዳ ጊሻሳ።
MAR 5:29 ጉኪዛ ሱꬃይ ሄራካ ኤቂ ኣጊዴስ፤ ኢዛካ ፓጺዳይሳ ባ ኣሳቴꬃን ኤራዱስ።
MAR 5:30 ባፔ ዎልቃይ ኬዚዳይሳ ዬሱሲ ኤሪዲ ጌዴ ኣሳኮ ሲሚዲ፥ «ታ ማይኦ ኦኔ ቦቺዳይ?» ጊዴስ።
MAR 5:31 ኢዛ ካሊዛይቲ ቃሴ፥ «ሃይሲ ዴሬይ ኡንኤቲዲ ሱጌቲሺን ቤያሼ ዋናዳ፥ ‹ታና ቦቺዳይ ኦኔ?› ጋይ» ጊዳ።
MAR 5:32 ዬሱሲ ሄሳ ኦꬂዳይ ኦናኮኔ ቤያናስ ዩሺ ጼሊዴስ።
MAR 5:33 ማጫሳያካ ባስ ኣዚ ዋኒዳኮ ኤራዳ ባባሼኔ ኮኮራሼ ያዳ ዬሱሳ ሲንꬃን ጉፋናዳ ቱማ ዉርሳ ኢዛስ ዮታዱስ።
MAR 5:34 ኢዚካ፥ «ታ ናዬ! ኔ ኣማኖይ ኔና ኣሺዴስ። ሳሮን ባ! ኔ ዋዬፔ ፓጻ!» ጊዴስ።
MAR 5:35 ዬሱሲ ቡሮ ሃሳያን ዲሺን ኣይሁዳታ ዎሳ ኬꬃ ሃላቃ ኢያኢሮሳ ሶፔ ዪዲ ኢያኢሮሳስ፥ «ኔ ናያ ሃይቃዱስ፤ ጎዳ ሜላ ኣዛስ ዳቡርሳይ?» ጊዳ።
MAR 5:36 ጊዶ ኣቲን ዬሱሲ ኢስታ ሃሳያ ሌፒ ሂስቲዲ ኣይሁዳታ ዎሳ ኬꬃ ሃላቃዛ፥ «ኔ ኣማኖ ጻላ ኣማና ኣቲን ባቦፋ!» ጊዴስ።
MAR 5:37 ጴጽሮሳ፥ ያቆቤራኔ ያቆቤ ኢሻ ዮሃኒሳፔ ኣቲን ሃራይ ኦኒካ ኢዛ ካላና ማላ ኮዪቤና።
MAR 5:38 ጌዴ ኣይሁዳታ ዎሳ ኬꬃ ሃላቃዛሶ ጋኪዳ ማላ ኣሳይ ዋሲሼ ጫሞ ዬሆ ዬኪዛይሳ ቤዪዴስ።
MAR 5:39 ሶ ጌሊዲ፥ «ሃይሲ ዉሪ ኣዛ ዋሶኔ ኣዛ ዬሆ? ናያ ꬊስካዱስ ኣቲን ሃይቃቤኩ» ጊዴስ።
MAR 5:40 ቃሴ ኣሳይ ዉሪ ኢዛ ቦላ ሚጪዴስ፤ ኣሳ ዉርሲካ ኬꬃፌ ኬሲዲ ናዪ ኣዋኔ ናዪ ኣዪዮ ቃሴካ ኢዛራ ኢሲፌ ዪዳይታ ኢዛ ካሊዛይታ ጻላ ካሌꬂዲ ናያ ዲዛሶ ጌሊዴስ።
MAR 5:41 ናይ ኩሼካ ኦይኪዲ፥ «ጻቢታ ኩም!» ጊዴስ። «ጻቢታ ኩም!» ጉሳስ ቢርሼꬂ፥ «ሃኔ ናዬ ዴንዳ» ጉሳ።
MAR 5:42 ናያካ ሄራካ ዴንዳ ኤቃዱስ፤ ያኔ ሃ ሄሜታዱስ። ኢዚስካ ላይꬃይ ታማኔ ናምኣ፤ ኣሳይካ ሄ ሃኖዛን ዳሮ ማላሌቲዴስ።
MAR 5:43 ዬሱሲ ሃይሳ ኦኒካ ኤሮንታ ማላ ኬሂ ሚንꬂ ዮቲዴስ፤ «ናይስ ማና ቁማ ኢሚቴ» ጊዴስ።
MAR 6:1 ሄሳፌ ጉዬ ዬሱሲ ሄፔ ዴንዲዲ ጌዴ ባ ዴሬ ቢዴስ። ኢዛ ካሊዛይቲካ ኢዛራ ቢዳ።
MAR 6:2 ኣይሁዳታ ሳምባታይ ጋኪን ኣይሁዳታ ዎሳ ኬꬄ ጌሊዲ ታማርሲሺን ሲዪዳ ኣሳይ፥ «ሃይሲ ኣዴዚ ሃይሳ ዉርሲ ኣዋፔ ኤኪዴ? ሃይሲ ኢዛስ ኢሜቲዳ ኤራቴꬃይ ኣዜ? ቃሴ ሃይቲ ኢዚ ኦꬂዛ ማላታቲ ዋኒ ኢዛ ኩሼን ሃኒዞ?» ጊሼ ማላሌቲዳ።
MAR 6:3 «ሃይሲ ኣናጼዛ ጊዴኔ? ማራሚ ና ያቆቤንታ ዮሳንታ፥ ዩሁዳንታኔ ሲሞናንታ ኢሻ ጊዴኔ? ኢዛ ሚቼቲ ኑናራ ሃን ኑ ማታን ዲዛይታ ዴቴኔ?» ጊዲ ሄሳፌ ዴንዲዳይሳን ኢዛን ኡፋዬቲቤቴና።
MAR 6:4 ዬሱሲካ ኢስታስ፥ «ናቤይ ቦንቼቶንታይ ባ ዴሬን ባ ዳቦታ ጊዶኒኔ ባሶ ኣሳ ኣቻን ጻላ» ጊዴስ።
MAR 6:5 ሄን ጉꬃ ሃርጋንቻታ ቦላ ኩሼ ዎꬂ ፓꬆሪፔ ኣቲን ሃራ ኣይኮ ማላታካ ኦꬃናስ ዳንዳይቤና።
MAR 6:6 ኢስታስ ኣማኖይ ባይንዳይሳ ቤኢዲ ማላሌቲዴስ። ሄሳፌካ ዬሱሲ ጉታን ጉታን ዩዪ ዩዪ ታማርሲዴስ።
MAR 6:7 ታማኔ ናምኣታ ባኮ ጼይጊዲ ናምኡ ናምኡ ሂስቲ ኪቲሼ ቱና ኣያናታ ቦላ ኢስታስ ጎዳቴꬅ ኢሚዴስ።
MAR 6:8 ኢዚ፥ «ኦጌስ ጊዲዛ ጉፌ ኣቲን ኦጌ ሺንቄ ዎይኮ ኮሮጆ ዎይኮ ሚሼ ኦይኮፍቴ።
MAR 6:9 ጫማ ኣꬂቴ ጊዶ ኣቲን ላማና ማይኦ ኦይኮፍቴ።
MAR 6:10 ኢሲ ኬꬄ ኢንቴ ጌሊኮ ሄ ካታማፔ ኢንቴ ኬዛና ጋካናስ ሄ ኬꬃን ዲቴ።
MAR 6:11 ኣዋንካ ኦኒካ ኢንቴና ሞኪ ኤኮንታ ኢጺኮ ሄፔ ኬዚሼ ሄ ዴሬታ ቦላ ማርካ ጊዳና ማላ ኢንቴ ቶሆ ቦላ ዲዛ ጉዱላ ቆቆፍቴ» ጊዲ ኣዛዚዴስ።
MAR 6:12 ኢስቲካ ሄፔ ኬዚዲ ዴሬይ ማሮቴꬃን ጌላና ማላ ሳባኪዳ።
MAR 6:13 ዳሮ ዳይዳንꬃታ ኬሲዳ፤ ዳሮ ሃርጋንቻታ ዛይቴ ቲዪ ቲይዲ ፓꬂዳ።
MAR 6:14 ዬሱሳ ሱንꬂ ካሴፔ ኤሬቲ ኤሬቲ ቢሺን ካዎ ሄርዶሲ ሄሳ ሲዪዴስ። ኢሲ ኢሲ ኣሳቲ፥ «ሃይሳ ማላ ማላታታ ኦꬂዛይ ጻማቂዛ ዮሃኒሲ ሃይቆፔ ዴንዲና» ጊዳ።
MAR 6:15 ባጋይቲ፥ «ኤላሳ» ጌቴስ፤ ባጋ ኣሳይ ቃሴ፥ «ካሴ ናቤታፔ ኢሳ ሚሳቴስ» ጌቴስ።
MAR 6:16 ሄርዶሲ ዮኦዛ ሲዪዲ፥ «ታ ኢዛ ቆꬌ ቃንጺሲዳ ዮሃኒሲ ሃይቆፔ ፓጺ ዴንዲዴስ» ጊዴስ።
MAR 6:17 ሄርዶሲ ባ ኢሻ ፒሊጶሳ ማቾ ሄሮዲያዶ ኤኪዳ ጋሶን ኦይኬቲዲ ቃሼታና ማላ ኣዛዚዲ ዮሃኒሳ ቃሾ ኬꬄ ጌልꬂዴስ።
MAR 6:18 ዮሃኒሲ ሄርዶሳ፥ «ኔ ኢሻ ማቾ ኔ ኤኮንታ ማላ ዎጋይ ኔና ዲጌስ» ጊዳ ጊሻስ ቃቺዴስ።
MAR 6:19 ሄሮዲያዳ ሄሳ ጊሻስ ሆሎታዳ ኢዛ ዎꬊሳናስ ኮያዱስ ሺን ዳንዳያቤኩ።
MAR 6:20 ጋሶይካ ዮሃኒሲ ጺሎኔ ጌሻ ኣስ ጊዲዳይሳ ሄርዶሲ ኤሪዛ ጊሻስ ዮሃኒሳስ ባቤሲኔ ኢዛ ናጌስ። ዮሃኒሲ ዮቲዛይሳ ሄርዶሲ ሲዪዲ ሂርጊዛ ጊዲኮካ ኢዚ ዮቲዛይሳ ዎዚናፔ ሲዬስ።
MAR 6:21 ሄርዶሳ ዬሌታ ጋላስ ቦንቻናስ ꬎቃ ሹሜታስ፥ ኦላ ዎታዳራታ ኣዛዚዛ ዋናታሲኔ ጋሊላ ቢታን ኬሂ ኤሬቲዛ ጊታ ኣሳታስ ጊቢራ ኬሲዴስ፤ ሄሲካ ሄሮዲያዲስ ጊጋ ጋላስ ጊዲዴስ።
MAR 6:22 ሄሮዲያዲ ማጫ ናያ ጌላዳ ኣሳ ሲንꬃን ማዛሙሬ ዬጺን ሄርዶሳኔ ኢዚ ጼይጊዳ ኣሳ ኢዚ ዬꬃይ ኡፋይሲዴስ። ካዎዚካ ናዮ፥ «ኔ ኮይዛ ሚሽ ኡባ ታና ኦይቻ፤ ታ ኔስ ኢማና» ጊዴስ።
MAR 6:23 ቃሴካ ታ ካዎቴꬃ ባጋ ጊዲዳኮካ ኔ ኦይቺኮ ኡባ ታ ኔስ ኢማና ጊዲ ኢዚስ ጫቂዴስ።
MAR 6:24 ናያ ኤሌላ ኬዛዳ ባ ኣዬዮ፥ «ካዎዛ ኣይ ኦይቾ?» ጋዱስ። ኣዪያካ፥ «ጻማቂዛ ዮሃኒሳ ሁኤ ቃንጻዳ ኢማ ጋ» ጋዱስ።
MAR 6:25 ናያካ ኤሌላ ኬዛዳ ካዎዛኮ ጌላዳ፥ «ጻማቂዛ ዮሃኒሳ ሁኤ ኬሬን ዎꬃዳ ኔ ታስ ኢማና ማላ ኮያይስ» ጋ ኦይቻዱስ።
MAR 6:26 ካዎይ ሄ ዮኦዛን ዳሮ ሞꬌቲዴስ፤ ጊዶ ኣቲን ጼይጌቲዳ ኢማꬃ ጊሻሲኔ ጫቂዳ ቃላ ጊሻስ ኢዚስ ኣካይ ጋናስ ኮዪቤና።
MAR 6:27 ሄሳ ጊሻስ ዎታዳራታፔ ኢሳ ኤሶን ኪቲዲ ዮሃኒሳ ቆꬌ ቃንጺዲ ኢዛ ሁኤ ኤኪ ያና ማላ ኣዛዚዴስ፤ ኢዚካ ቢዲ ቃሾ ኬꬃ ጊዶን ዮሃኒሳ ቆꬌ ቃንጺዴስ።
MAR 6:28 ሁኤዛ ኬሬራ ኤሂዲ ናይስ ኢሚዴስ፤ ናያካ ባ ኣዬይስ ኢማዱስ።
MAR 6:29 ዮሃኒሳ ካሊዛይቲካ ሄሳ ሲዪዳ ማላ ዪዲ ዮሃኒሳ ኣሃ ኤኪ ኤፊዲ ሞጊዳ።
MAR 6:30 ሄሳፌ ጉዬ ሃዋሬቲ ሲሚዲ ዬሱሳ ኣቻን ዩዪ ኣꬊ ባ ኦꬂዳይሳኔ ባ ታማርሲዳይሳ ኡባ ኢዛስ ዮቲዳ።
MAR 6:31 ዳሮ ኣሳይ ዪሼኔ ቢሼ ጊዛ ጊሻስ ቁማ ሚዛ ዎዴይካ ቤቲቤና፤ «ኣኔ ኢንቴ ጻላ ታናራ ኣሲ ባይንዳሶ ቢዲ ጉꬅ ሼምፒ ኤኪቴ» ጊዴስ።
MAR 6:32 ሄሳ ጊሻስ ኢስቲ ባርካ ዎጎሎን ጌሊዲ ኢሲ ኣሲካ ባይንዳሶ ቢዳ።
MAR 6:33 ኢስቲ ቢሺን ዳሮቲ ቤኢዲ ቶሆራ ዎꬃን ኢስታፌ ሲንꬄ ኣꬊዳ።
MAR 6:34 ዬሱሲ ዎጎሎዛፔ ዎꬊዛ ዎዴ ዳሮ ዴሬይ ሺቂ ኡቲዳይሳ ቤዪዴስ። ሄሚዛዴይ ባይንዳ ሜሄ ማላ ጊዲዳ ጊሻስ ኣሳስ ቃꬌቲዴስ፤ ዳሮ ዮኦካ ታማርሶ ኦይኪዴስ።
MAR 6:35 ሄ ዎዴ ጋዴይ ቃሚ ቃሚ ቢዛ ጊሻስ ኢዛ ካሊዛይቲ ኢዛኮ ሺቂዲ፥ «ሃይሲ ኑ ዲዛሶይ ባዞኮ፤ ጋዴይካ ቃሚዴስ።
MAR 6:36 ሃይሳ ሄራን ኣሲ ዲዛሶ ቢዲ ኣሳይ ባስ ሚዛ ካꬅ ሻሚ ማና ማላ ኣሳ ዬዳ» ጊዳ።
MAR 6:37 ኢዚ ኢስታስ ዛሪዲ፥ «ኣሳስ ሚዛ ሚሽ ኢንቴ ኢሚቴ» ጊዴስ። ኢስቲካ ማላሌቲዲ፥ «ኑኒ ቢዲ ናምኡ ጼቱ ዲናሬራ ካꬅ ሻሚዲ ሃይሳ ኣሳስ ኢሚዛኮ ጊዳንዴ?» ጊዳ።
MAR 6:38 ኢዚካ ኢስታስ፥ «ኢንቴስ ኣይ ኬና ኡኬꬂ ዲዛኮ ኣኔ ቢዲ ጼሊቴ» ጊን ኢስቲ ቢ ጼሊዲ፥ «ኢቻሹ ኡኬꬂኔ ናምኡ ሞሌይ ዴስ» ጊዳ።
MAR 6:39 ሄሳፌ ካሊዲ ኣሳ ጪሊላ ማታ ቦላ ቡቴን ቡቴን ኡቲሳና ማላ ኣዛዚዴስ።
MAR 6:40 ኣሳይካ ጼቱ ጼቱኔ ኢቻሹ ታሙ ኢቻሹ ታሙ ጊዲዲ ቡቴን ኡቲዴስ።
MAR 6:41 ኢዚካ ኢቻሹ ኡኬꬃታኔ ናምኡ ሞሌታ ባ ኩሼን ኦይኪዲ ፑዴ ሳሎ ጼሊዲ ኣንጂዲኔ ኡኬꬃ ሜንꬂ ሜንꬂ ኣሳስ ጊሻና ማላ ባና ካሊዛይታስ ኢሚዴስ፤ ናምኡ ሞሌታካ ኡባ ኣሳስ ሻኬሬꬂዴስ።
MAR 6:42 ኣሳይ ዉሪካ ሚዲ ካሊዴስ።
MAR 6:43 ዬሱሳ ካሊዛይቲ ኣሳይ ካሊ ሚን ኣቲዳይሳ ታማኔ ናምኡ ሌማቴ ኩሜꬅ ሺሺዴስ።
MAR 6:44 ካꬃ ሚዳ ኣሳፔ ኣቱማሳይ ጻላ ኢቻሹ ሺ።
MAR 6:45 ሄራካ ኢዚ ኣሳ ሞይዚሼ ኢዛ ካሊዛይቲ ሲንꬃቲዲ ጌዴ ፒንꬅ ቤቴሳይዳ ጌቴቲዛሶ ፒናና ማላ ኣዛዚዴስ።
MAR 6:46 ሄፔካ ኢስታ ኣጋጊዲ ዎሳናስ ፑዴ ዙማ ቦላ ኬዚዴስ።
MAR 6:47 ጋዴይ ቃሚን ዎጎሎይ ኣባ ጊዶን ዲሺን ኢዚ ባርካ ቢታ ቦላ ዴስ።
MAR 6:48 ኣባ ቦላ ጫርኮይ ኬሂ ሜቲዳ ጊሻስ ኢዛ ካሊዛይቲ ኣባ ሺሪ ሺሪ ዎጎሎ ላጊዛ ሚሻራ ባጼቲሺን ዬሱሲ ቤዪዴስ። ዎንታ ቦላ ኢስታኮ ዪዴስ፤ ዪዲኔ ኢስታ ኣቻራ ኣꬊ ባናꬆ ሃኒዴስ።
MAR 6:49 ጊዶ ኣቲን ኣꬊ ባና ሃኒሺን ኢዛ ቤኢዳ ማላ ሞይቲሌ ቤይዳ ሚሳቲን ዉሪካ ዋሲዳ።
MAR 6:50 ዉሪካ ኢዛ ቤኢዲ ዳጋሚዳ፤ ኢዚካ ሄራካ ኢስታ ዮቺዲ፥ «ኣይኮይ ባ፤ ታናኮ ዳጋሞፍቴ!» ጊዴስ።
MAR 6:51 ኢዚካ ዎጎሎን ኢስታኮ ጌሊን ጫርኮይ ጮኡ ጊዴስ፥ ኢስቲካ ዳሮ ማላሌቲዳ።
MAR 6:52 ካሴ ኢዚ ኡኬꬃን ኦꬂዳ ማላታ ቢርሼꬅ ኢስቲ ኤሮንታ ጊሻስ ኢስታ ዎዚናይ ዶጪዴስ።
MAR 6:53 ኣባ ፒኒዲ ጌንሴሬጼ ጌቴቲዛሶ ጋኪዳ፤ ዎጎላፔ ዎꬊዲ ዎጎሎዛ ሄን ቃቺዲ ኣጊ ቢዳ።
MAR 6:54 ኢስቲ ዎጎሎፔ ዎꬊዳ ማላ ኣሳይ ዬሱሳ ኤሪዴስ።
MAR 6:55 ዉሪካ ባ ዲዛሶ ዲዛሶ ዎጼሬቲዲ ሃርጋንቻታ ሃላን ቶኪ ቶኪ ኤኪዲ ዬሱሲ ዲዛሶ ኤሂዳ።
MAR 6:56 ኢዚ ጋኪዳ ጉታን ዎይኮ ካታማ ጊዶን ዎይኮ ዴሬ ጊዶን ጊዲን ሃርጋንቻቲ ኢዚ ኣꬊሺን ኢዛ ዎሲዲኔ ኢዛ ማይኦ ቦቺዲ ፓጻና ማላ ሺሺ ሺሺ ዱቡሻይ ዲዛሶን ዎꬂዳ። ኢዚ ኣꬊ ቢሺን ኢዛ ማይኦ ቦቺዳይቲ ዉሪ ፓጺዳ።
MAR 7:1 ሄሳፌ ጉዬ ፋርሳዌቲኔ ዬሩሳላሜፔ ዪዳ ኢሲ ኢሲ ጻፌቲ ዬሱሳ ላንቄን ዩዪ ኣꬊዳ።
MAR 7:2 ዬሱሳ ካሊዛይታፔ ባጋይቲ ሜጬቶንታ ቂታ ኩሼራ ካꬅ ሚሺን ቤኢዳ።
MAR 7:3 ፋርሳዌቲኔ ካሴ ጪማ ኣይሁዳ ኣሳቲ ካሴ ዴሬ ዎጋ ናጋናስ ኩሼ ሎኤꬂ ሜጬቶንታ ካꬅ ሚ ኤሬቴና።
MAR 7:4 ጊያ ቢ ሲሚኮካ ቦላ ሜጬቲ ጌዮንታ ዲሼ ካꬅ ሚ ኤሬቴና። ሄሳꬆካ ዋንጫካ፥ ኦቶካ፥ ኬሬካ፥ ኢቺዛ ሂꬄካ ሜቻ ማላ ሃራ ዎጋታካ ናጌቴስ።
MAR 7:5 ፋርሳዌቲኔ ጻፌቲ ዬሱሳ፥ «ኔና ካሊዛይቲ ካሴ ኣዋታ ዎጋ ማላ ዱስ ኣጊዲ ኣዛስ ኩሼ ሜጬቶንታ ካꬅ ሚዞ?» ጊዲ ኦይቺዳ።
MAR 7:6 ኢዚካ ኢስታስ፥ «ኢሳያሲ ቆꬌፔ ቆሞን ሃኒዛ ኢንቴ ጊሻስ፥ ‹ሃይሲ ዴሬይ ባ ሜቴርሻን ጻላላ ታና ቦንቼስ፤ ዎዚናይ ጊዲኮ ታፔ ሃኪዴስ።
MAR 7:7 ታስ ሜላ ሃዳ ጎይኔስ፤ ኢስታ ቲሚርቴይካ ኣሲ ዎꬂዳ ዎጋ ጻላ› ጊዲ ዮቲዳይሲ ቱማ» ጊዴስ።
MAR 7:8 ጾሳ ዎጋ ኣጊዲ ኣሲ ዎꬂዳ ዎጋ ናጌቴስ።
MAR 7:9 ቃሴካ፥ «ኢንቴ ዎጋስ ጊዲ ጾሳ ዎጋ ኢንቴ ኣጋጊዛ ጪንጫቴꬃ ኦጌይ ኢንቴስ ዴስ።
MAR 7:10 ኣይስ ጊኮ ሙሴይ፥ ‹ኔ ኣዮኔ ኔ ኣዋ ቦንቻ፤ ባ ኣዮኔ ባ ኣዋ ጫዪዛዴይ ሙሌካ ሃይቆ› ጊዴስ።
MAR 7:11 ጊዶ ኣቲን ኢንቴ ቃሴ፥ ‹ኢሲ ኣሲ ባ ኣዋ ዎይኮ ባ ኣዮ ኢንቴ ታፔ ዴማናስ ኮሺዛ ማዶ ታ ጾሳስ ኢማዲስ› ጊኮ፥
MAR 7:12 ኢንቴ ቃሴ ሃይሳዴይ ባ ኣዋስካ ባ ኣዬይሲ ሃራ ኣይኮካ ኦꬃና ማላ ኮዬኬታ።
MAR 7:13 ሄሳ ጊሻስ ኢንቴ ዎጋ ናጋና ጊዲ ጾሳ ቃላ ላሜታ። ሄይታንታ ሚሳቲዛ ዳሮታ ኦꬄታ» ጊዴስ።
MAR 7:14 ቃሴካ ዬሱሲ ኣሳ ባኮ ጼይጊዲ፥ «ዉሪካ ታ ጊዛ ሲዪቴኔ ዎዚናን ዎꬂቴ።
MAR 7:15 ካሬፔ ኡሎ ጊዶ ጌሊዲ ኣስ ቱኒሲዛ ኢሲ ሚሺካ ዴና፤ ሃራፔካ ኣሴ ቱኒሲዛይ ኬꬃ ኣዋፔ ጌዴ ካሬ ኬዚዛ ሚሻ።
MAR 7:16 ሲዪዛ ሃይꬂ ዲዛይ ሲዮ!» ጊዴስ።
MAR 7:17 ኢዚ ኣሳ ካሬን ኣጊዲ ኬꬄ ጌሊን ኢዛ ካሊዛይቲ ኢዚ ዮቲዳ ሌሚሶዛ ቢርሼꬅ ዬሱሳ ኦይቺዳ።
MAR 7:18 ኢዚካ ኢስታ፥ «ኢንቴስካ ዮኦይ ጌሌኔ? ካሬፔ ጌሊዲ ኣሴ ቱኒሲዛ ሚሺ ኣዚካ ዴና።
MAR 7:19 ካሬፔ ጌሊዛይ ጌዴ ዎዚናን ጊዶንታ ዱጌ ቃንꬃ ጊዶ ጌሌስ፤ ቃሴ ሄፔ ኢዛዴ ኣሳቴꬃፌ ጌዴ ካሬ ኬዜስ» ጊዴስ፤ ዬሱሲ ሄሳ ጊዳይ ኣሲ ሚዛ ካꬂ ዉሪካ ጌሽ ጊዲዳይሳ ቆንጪሳናሳ።
MAR 7:20 ካሌꬂዲካ፥ «ኣሳፔ ኬዚዛዚ ኣሴ ቱኒሴስ።
MAR 7:21 ኣሳ ዎዚና ጊዶፌ ኬዚዛይ ኢታ ቆፋታ፥ ላይማ ኣሞኔ ካይሶቴꬅ፥ ኣሴ ዎꬎ፥ ላይማቴꬅ፥
MAR 7:22 ዪቄቴꬅ፥ ኢታቴꬅ፥ ባሌꬆ፥ ላይማ ካስ፥ ቃናቴቴꬅ፥ ኣሳ ሱንꬅ ሞሮ፥ ኦቶሬቴꬂኔ ኣዛላ።
MAR 7:23 ሃይቲ ኢታ ሃኖቲ ዉሪ ኣሳፔ ኬዜቴሲኔ ኣሴ ቱኒሴቴስ» ጊዴስ።
MAR 7:24 ዬሱሲ ሄፔ ኬዚዲ ጺሮሴ ጌቴቲዛ ዴሬ ቢዴስ፤ ሄን ኢሳዴ ኬꬄ ጌሊዲ ኢዚ ሄን ዲዛይሳ ኣሲ ኤሮንታ ማላ ኮዪዴስ። ጊዶ ኣቲን ኢዚ ሄን ኢዛ ዱሳይ ቆቴታናስ ዳንዳዬቲቤና።
MAR 7:25 ሄራካ ኢሲ ቱና ኣያናይ ኦይኪዳ ጉꬃ ና ዲዛሪ ኣያ ዬሱሲ ሄን ዲዛይሳ ሲያዳ ኢዛኮ ያዳ ኢዛ ቶሆ ቦላ ኩንዳዱስ።
MAR 7:26 ማጫሳያ ጊሪኬ ቃላ ሃሳይዛ ማጫስ ሺን ኢዛ ዬሌቲዳሶይ ሲሮፊንቄ ጌቴቴስ። ኢዛካ ዬሱሲ ናይፔ ቱና ኣያና ኬሳና ማላ ዎሳዱስ።
MAR 7:27 ዬሱሲ ዛሪዲ ኢዚስ፥ «ናይታ ቁማ ኤኪ ካናስ ዬጋናስ ቤሶንታ ጊሻስ ኮይሮ ናይቲ ሚ ካሌቶ» ጊዴስ።
MAR 7:28 ኢዛካ ዛራዳ፥ «ኤ ጎዶ! ካናቲካ ማዳ ማታን ዴኢዲ ናይታ ኩሼፔ ጋዴን ዎꬊዳይሳ ሜቴስ» ጋዱስ።
MAR 7:29 ኢዚካ፥ «ሂስቲኮ ኔኒ ሄሳ ጊዳ ጊሻስ ባ! ዳይዳንꬃይ ኔ ናይፔ ኬዚዴስ» ጊዴስ።
MAR 7:30 ኢዛ ሲማዳ ሶ ቢሺን ናያ ዳይዳንꬃይ ዬዲን ፓጻዳ ሂጻን ኢቺዳሮ ዴማዱስ።
MAR 7:31 ሄሳፌ ዬሱሲ ጺሮሴ ቢታፌ ዴንዲዲ ሲዶና ጌቴቲዛሶራ ኣꬊ ታሙ ካታማ ጌቴቲዛሶራ ካንꬂዲ ጌዴ ጋሊላ ኣባኮ ጋኪዴስ።
MAR 7:32 ኣሳይ ኢሲ ሃይꬃ ቱሌኔ ዶና ዱዴ ኣስ ኢዛኮ ሄ ኤኪ ዪዲ ዬሱሲ ኢዛ ቦላ ባ ኩሼ ዎꬃና ማላ ዎሲዳ።
MAR 7:33 ዬሱሲካ ኢዛ ኣሳፔ ሻኪ ኤኪ ቢዲ ባ ኩሼ ቢራꬌታ ኣዴዛ ሃይꬃን ጌልꬂዴስ፤ ቃሴካ ጩች ጩቲዲ ኣዴዛ ኢንጻርስ ቦቺዴስ።
MAR 7:34 ፑዴ ሳሎ ጼሊዲኔ ቶኪ ሼምፒዲ፥ «ኤፍታ» ጊዴስ። ሄሲካ፥ «ፖጌታ» ጉሳ።
MAR 7:35 ሄራካ ኣዴዛ ሃይꬃቲ ፖጌቲዳ፤ ኢንጻርሳይካ ቢርሼቲን ጌሺ ሃሳይዴስ።
MAR 7:36 ዬሱሲ ሃይሳ ቤኢዳይቲ ኦናስካ ዮቶንታ ማላ ኣዛዚዴስ፤ ጊዶ ኣቲን ኣሳይ ኢዚ ኣዛዚዛዳይሳፌ ቦላራ ኬሂ ጉጂዲ ዮቲዴስ።
MAR 7:37 ዴሬዚካ ኬሂ ማላሌቲዲ፥ «ኢዚ ኦꬂዳይሲ ዉሪ ሎኦ፤ ቱሌቲ ሲያና ማላ፥ ዶና ዱዴቲ ሃሳያና ማላ ኦꬂዴስ» ጊዳ።
MAR 8:1 ሄ ዎዴ ቃሴ ዳሮ ኣሲ ሺቂዴስ። ሺቂዳ ኣሳስ ሚዛ ካꬂ ባይንዳ ጊሻስ ዬሱሲ ባና ካሊዛይታ ጼይጊዲ፥
MAR 8:2 «ሃይቲ ኣሳቲ ታናራ ሄꬑ ጋላስ ጋካናስ ጋምኢዳ ጊሻሲኔ ቃሴካ ኢስታስ ሚዛ ካꬂ ባይንዳ ጊሻስ ታና ሚቼቴስ።
MAR 8:3 ኢስታፌ ኢሲ ኢሲ ኣሳቲ ሃሆፔ ዪዳ ጊሻስ ሃይሳ ጋፋራ ታ ኢስታ ሶ ዬዲኮ ዳቡርዲ ኦጌ ቦላ ኩንዳና» ጊዴስ።
MAR 8:4 ኢዛ ካሊዛይቲካ ዛሪዲ፥ «ሃይሳ ባዞን ሃይሳ ማላ ዴሬ ሚዛና ቁማ ኣዋፔ ዴማኔ?» ጊዳ።
MAR 8:5 ኢዚካ ኢስታ፥ «ኢንቴኮን ኣፑን ኡኬꬂ ዲዜ?» ጊ ኦይቺዴስ። ኢስቲካ፥ «ላፑን ኡኬꬂ ዴስ» ጊዳ።
MAR 8:6 ኢዚካ ኣሳይ ጋዴን ኡታና ማላ ኣዛዚዴስ፤ ላፑን ኡኬꬃ ባ ኩሼን ኦይኪ ጋላቲዲኔ ሜንꬂዲ ኣሳስ ጊሼቻና ማላ ባና ካሊዛይታስ ኢሚን ኢስቲካ ዴሬዛስ ጊሺዳ።
MAR 8:7 ቃሴካ ሄን ዲዛ ቄሪ ጉꬃ ሞሌታ ጊሻስ ጾሳ ጋላቲዲ ጉꬃ ሞሌታ ኣሳስ ጊሼቻና ማላ ባና ካሊዛይታ ኣዛዚዴስ።
MAR 8:8 ዴሬይካ ሚዲ ካሊዴስ። ሄሳፌካ ኢዛ ካሊዛይቲ ማዳፌ ፓላሂዳ ካꬅ ላፑን ሌማቴ ኩሜꬅ ዴንꬂዳ።
MAR 8:9 ሄሳ ሚዳ ኣሳይ ኦይዱ ሺ ጊዳና። ሄ ኣሳ ሞይዚዲ ባና ካሊዛይታራ ዎጎሎን ጌሊዲ ጌዴ ዳልማኑታ ጌቴቲዛሶ ቢዴስ።
MAR 8:11 ፋርሳዌቲ ዪዲ ዬሱሳራ ፓላሜቴꬅ ኦይኪዳ፤ ኢዛ ፓጫናስ ኮዪዲ ባንታና ሳሎፔ ማላታ ቤሳና ማላ ኦይቺዳ።
MAR 8:12 ኢዚካ ቶኪ ሼምፒዲ፥ «ሃይሲ ዬሌታዚ ኣዛስ ማላታ ኮይዜ? ታ ኢንቴስ ቱማ ጋይስ፤ ሃይሳ ዬሌታስ ኢሲ ማላታይካ ኢሜቴና» ጊዴስ።
MAR 8:13 ኢስታ ሄን ኣጊዲኔ ዎጎሎን ጌሊዲ ሄ ፒንꬅ ፒኒዴስ።
MAR 8:14 ኢዛ ካሊዛይቲ ካꬅ ኦይኮንታ ባሌቲዳ ጊሻስ ኢሲ ኡኬꬂ ኣቲን ዎጎሎ ጊዶን ሃራ ኣይ ካꬂካ ዴና።
MAR 8:15 ዬሱሲ ኢስታ፥ «ፋርሳዌታ ኢርሾፌኔ ሄርዶሳ ኢርሾፌ ናጌቲቴ» ጊዲ ኣዛዚዴስ።
MAR 8:16 ኢስቲ ቃሴ ባ ጊዶን ኢሶይ ኢሳራ፥ «ኢዚ ኑና ሃይሳ ጊዛይ ኑስ ካꬂ ባይንዳ ጊሻሳ» ጊ ሃሳዬቲዳ።
MAR 8:17 ቃሴ ዬሱሲ ኢስታ ቆፋ ኤሪዲ፥ «ኑስ ካꬂ ባይንዳ ጊሻስ ጋሳ ጊዲ ኢንቴ ጊዶን ኣዛስ ሃሳዬቴቲ? ሃኢካ ዩሺ ቆፔኬቲ? ዎዚናንካ ዎꬄኬቲ? ዎይኮ ኢንቴ ዎዚናይ ሹቻቲዴ?
MAR 8:18 ኢንቴስ ኣይፌይ ዴስ ሺን ጼሌኬቲ? ሃይꬂ ዴስ ሺን ሲዬኬቲ? ኣኬኬኬቲ?
MAR 8:19 ኢቻሹ ኡኬꬃ ኢቻሹ ሺ ኣሳስ ታ ሜንꬃ ኢሚን ኣፑን ሌማቴ ኩሜꬃ ካꬅ ዴንꬂዴቲ?» ጊዴስ። ኢስቲካ ዛሪዲ፥ «ታማኔ ናምኡ» ጊዳ።
MAR 8:20 ኢዚካ፥ «ላፑን ኡኬꬃ ኦይዱ ሺ ኣሳስ ታ ሜንꬃ ኢሚን ኣፑን ሌማቴ ኩሜꬃ ካꬅ ዴንꬂዴቲ?» ጊ ኦይቺን ኢስቲካ፥ «ላፑን» ጊዳ።
MAR 8:21 ኢዚካ ኢስታስ፥ «ሂስቲን ሃኢ ጋካናስ ዩሺ ቆፒቤኬታካ!» ጊዴስ።
MAR 8:22 ሄሳፌ ጌዴ ቤቴሳይዳ ጌቴቲዛሶ ቢዳ፤ ጉꬃ ኣሳቲካ ኣይፌ ቆቄ ኣስ ዬሱሳኮ ኤሂዲ ዬሱሲ ኢዛ ቦቻና ማላ ዎሲዳ።
MAR 8:23 ኢዚካ ሄ ቆቄዛ ኩሼ ኦይኪ ጎቺዲ ኣሲ ዲዛሶፔ ጌዴ ካሬ ኬሲዲ ኣዴዛ ኣይፌን ጩቲዲኔ ባ ኩሼ ኢዛ ቦላ ዎꬂዲ፥ «ሃኢ ኔስ ኣዚ ቤቲዜ?» ጊ ኦይቺዴስ።
MAR 8:24 ኢዚካ ꬎቁ ጊ ጼሊዲ፥ «ኣሳይ ሚꬅ ሚሳቲዲ ቃጼቲሼ ቤቴስ» ጊዴስ።
MAR 8:25 ቃሴካ ዬሱሲ ባ ኩሼታ ኢዛ ኣይፌታ ቦላ ዎꬂዴስ፤ ሄራካ ኢዛ ኣይፌቲ ጼሊዳ፤ ፖኦይካ ኢዛስ ሲሚን ዉርሲካ ጌሺ ጼሊዴስ።
MAR 8:26 ቃሴ፥ «ሃ ጉታታ ጊዶ ጌሎፓኔ ኦናስካ ዮቶፓ» ጊዲ ኢዛ ጌዴ ኢዛሶ ዬዲዴስ።
MAR 8:27 ዬሱሲ ባና ካሊዛይታራ ቂሳሪያ ፒሊጲሲዮሴ ጌቴቲዛ ዴሬ ኣቻን ዲዛ ጉታታ ቢዴስ፤ ኢስቲ ኦጌ ቦላ ዲሺን ባና ካሊዛይታ፥ «ታና ኣሳይ ኦና ጊዜ?» ጊዲ ኦይቺዴስ።
MAR 8:28 ኢስቲካ ዛሪዲ ኔና፥ «ጻማቂዛ ዮሃኒሳ ጊዛይቲካ ዴቴስ፥ ባጋይቲ ቃሴ ኤላሳ ጌቴስ፤ ሃራቲ ቃሴ ናቤታፔ ኢሳዴ ጌቴስ» ጊዲ ዮቲዳ።
MAR 8:29 ካሌꬂዲካ፥ «ኢንቴች ታና ኦና ጌቲ?» ጊዲ ኦይቺዴስ። ጴጽሮሲ፥ «ኔኒ ኪርስቶሳ» ጊዴስ።
MAR 8:30 ዬሱሲካ ባ ጊሻስ ኦናስካ ኢስቲ ዮቶንታ ማላ ሚንꬂ ዮቲዴስ።
MAR 8:31 ሄሳፌ ዬሱሲ ባና ካሊዛይታ፥ «ኣሳ ናይ ዳሮ ዋዬ ቤያናይሳኔ ዴሬ ጪማታን፥ ቄሴታ ሃላቃኒኔ ጻፌታን ካꬌታና፤ ኣሳ ኩሼን ሃይቃና፥ ሃይቆፔ ሄꬓንꬆ ጋላስ ዴንዳና ቤሴስ» ጊዲ ታማርሶ ኦይኪዴስ።
MAR 8:32 ኢዚካ ሄሳ ኢስታስ ቆንጪሲ ዮቲዴስ፥ ጴጽሮሲካ ኢዛ ዱማ ሻኪ ኤፊዲ፥ «ሄሳꬆ ጎፓ!» ጊዲ ሃንቂዴስ።
MAR 8:33 ዬሱሲ ቃሴ ባና ካሊዛይታ ዩሺ ጼሊሼ ጴጽሮሳ፥ «ሃይሶ ጻላኤ ኔ ታፔ ጌዴ ጉዬ ባ! ኔኒ ኣሳዛፔ ኣቲን ጾሳዝ ቆፓካ!» ጊዲ ሃንቂዴስ።
MAR 8:34 ሄሳፌ ጉዬ ኣሳ ባና ካሊዛይታራ ኢሲፌ ባኮ ጼይጊዲ፥ «ታና ካላናስ ዶሲዛዴይ ዲኮ ባና ካዶ፤ ባ ማስቃሌ ቶኪዲ ታና ካሎ።
MAR 8:35 ባ ሼምፖ ኣሻና ዶሲዛዴይ ꬋይሳና ሺን ታ ጊሻሲኔ ታ ሚሺራቾ ቃላ ጊሻስ ባ ሼምፖ ꬋይሲዛዴይ ዉሪካ ኣሻና።
MAR 8:36 ኣሲ ኣላሜ ኩሜꬅ ሃሪኮኔ ባ ሼምፖ ꬋይሲኮ ኢዛ ኣይ ጎኣኔ?
MAR 8:37 ዎይኮ ኣሲ ባ ሼምፖ ጊሻስ ላሜ ኤካናይ ኣዚ ዲዜ?
MAR 8:38 «ሃይሳ ላይማኔ ናጋራንቻ ዬሌታ ጊዶን ዲሼ ታናኒኔ ታ ቃላን ዬላቲዛ ኣሲ ዉሪ ታ ኣሳ ናይ ታ ኣዋ ቦንቾራኔ ጌሻ ኪታንቻታራ ዪዛ ዎዴ ኢዛን ዬላታና» ጊዴስ።
MAR 9:1 ካሌꬂዲካ ዬሱሲ «ታ ኢንቴስ ቱማ ጋይስ፤ ሃይሳን ኤቂዳ ኣሳፔ ጾሳ ካዎቴꬂ ዎልቃራ ዪሺን ቤያና ጋካናስ ሃይቆንታ ጋምኣና ኢሲ ኢሲ ኣሳቲ ዴቴስ» ጊዴስ።
MAR 9:2 ኡሱፑን ጋላሳፌ ጉዬ ዬሱሲ ጴጽሮሳ፥ ያቆቤኔ ዮሃኒሳ ባናራ ካሌꬂ ኤኪዲ ኢሲ ጊታ ዙማ ቦላ ኬዚዴስ። ኢስቲ ባርካ ዲሺን ኢስታ ሲንꬃን ኢዛ ሜꬋይ ላሜቲ ዎꬊዴስ።
MAR 9:3 ኢዚ ማይኢዳ ማይኦይ ቢታ ቦላ ኦኒካ ማይኦ ሜጪዲ ሄሳ ማላ ቦꬃናስ ዳንዳዮንታ ቦꬅ ቦቲዴስ።
MAR 9:4 ሄ ዎዴ ኤላሲኔ ሙሴይ ዬሱሳራ ሃሳዬቲሼ ኢስታስ ቤቲዳ።
MAR 9:5 ጴጽሮሲ ዬሱሳ፥ «ኣስታማሬ! ኑኒ ሃን ሃይሳን ዲዛኮ ኑስ ሎኦ፤ ኔስ ኢሲ ዳሴ፥ ሙሴስ ኢሲ ዳሴ፥ ቃሴ ኤላሳስ ኢሲ ዳሴ፥ ሄꬑ ዳሴታ ኑ ኦꬂኮቺ?» ጊዴስ።
MAR 9:6 ዳሮ ባቢዳ ጊሻስ ጴጽሮሲ ባ ጊዛይሳ ኤሪዲ ጊቤና።
MAR 9:7 ሄራካ ሻራይ ኢስታ ካሚን ሻራ ጊዶራ፥ «ሃይሲ ታ ዶሲዛ ታ ናዛኮ! ኢዚ ጊዛ ሲዪቴ» ጊዛ ቃላ ጊሪሲ ዪዴስ።
MAR 9:8 ሄራካ ኢስቲ ዩሺ ጼሊን ዬሱሳፔ ኣቲን ኦኒካ ሃራ ኣሲ ኢስታራ ዴና።
MAR 9:9 ኢስቲ ዙማ ቦላፌ ዱጌ ዎꬊሺን ኣሳ ናይ ሃይቆፔ ዴንዳና ጋካናስ ሃይሳ ኢስቲ ቤኢዳይሳ ኦናስካ ዮቶንታ ማላ ኣዛዚዴስ።
MAR 9:10 ኢስቲካ ባስ ዮቲዳ ቃላ ባ ዎዚናን ኦይኪዳ ሺን፥ «ሃይቆፔ ዴንዶ ጉሲ ኣይ ጉሴ?» ጊዲ ባ ጊዶን ሃሳዬቲዳ።
MAR 9:11 ቃሴ ኢስቲ ሙሴ ዎጋ ታማርሲዛይቲ፥ «ካሴቲዲ ኤላሲ ያና ኮሼስ ኣዛስ ጊዞ?» ጊዲ ኢዛ ኦይቺዳ።
MAR 9:12 ዬሱሲ ኢስታስ፥ «ቱሙካ ኤላሲ ካሴቲ ዪዲ ዉርሲካ ጊጊሳና። ሂስቲንካ ኣሳ ናይ ዳሮ ዋዬ ኤካናሲኔ ካꬌታናስ ቤሴስ ጌቴቲ ጻፌቲዳይሲ ኢንቴስ ኣይ ሚሳቲዜ?
MAR 9:13 ጊዶ ኣቲን ታ ኢንቴስ ጊዛይ ኤላሲ ጊዲኮ ዪዴስ ሺን ኣሳይካ ኢዛ ጊሻስ ጻፌቲዳ ማላ ባና ኮሺዳ ማላ ኢዛ ቦላ ኦꬂዴስ» ጊዴስ።
MAR 9:14 ጌዶን ኣቲዳ ዬሱሳ ካሊዛይታኮ ኢስቲ ሲሚ ዪሺን ዳሮ ኣሳይ ኢስታ ጊዶꬂን ሙሴ ዎጋ ታማርሲዛይቲ ኢስታራ ፓላሜቲዛይሳ ቤኢዳ።
MAR 9:15 ዴሬይ ኢዛ ዴሚዳ ማላ ማላሌቲዲ ሳሮካናስ ኢዛኮ ዎጺዴስ።
MAR 9:16 ኢዚካ ኢስታ፥ «ኢንቴ ኢስታራ ኣዛ ጊሻስ ፓላሜቴቲ?» ጊዲ ኦይቺዴስ።
MAR 9:17 ኣሳ ጊዶፌ ኢሳዴይ፥ «ኣስታማሬ! ቱና ኣያናይ ኢዛን ጌሊን ዶና ዱዲዳ ታ ና ዳይሳ ታ ኔኮ ኤካ ያዲስ።
MAR 9:18 ኣያናዚ ዴንዲዛ ዎዴ ቦላፌ ዬጌስ፤ ዶናራ ጎፖንቶ ኬሲ ኬሲ ዬጌስ፤ ኣቻካ ጋርጬስ፤ ኣሳቴꬃካ ዞዲሴስ፤ ቱና ኣያና ኬሴቶ ጋዳ ኔና ካሊዛይታ ታ ዮቲን ኢስቲካ ዳንዳይቤቴና» ጊዴስ።
MAR 9:19 ዬሱሲካ ኢስታስ ዛሪዲ፥ «ኢንቴኖ ኣማኖንታ ዬሌታቶ፥ ኣይዴ ጋካናስ ታ ኢንቴናራ ዳኔ? ቃሴ ኣይዴ ጋካናስ ታ ኢንቴና ዳንዳያኔ? ኣኔ ናዛ ሃ ኤሂቴ» ጊዴስ።
MAR 9:20 ኣሳይካ ናዛ ኢዛኮ ኤሂዴስ፥ ቱና ኣያናይ ዬሱሳ ቤኢዳ ማላ ናዛ ሄራካ ጋዴን ጌንዴሪሲዲ ኮኮሪሲዲኔ ዶናራ ጎፖንቶ ጮፑ ሂስቲዴስ።
MAR 9:21 ዬሱሲ ናዛ ኣዋ፥ «ሃይሲ ሃርጌይ ኢዛ ኣዪዴሳፔ ኦይኪዴ?» ጊዴስ። ናዛ ኣዋይካ፥ «ናቴꬃፌ ዶሚዲ» ጊዴስ።
MAR 9:22 «ኢዛ ዎꬋናስ ኮዪዲ ዳሮ ዎዴ ታማንካ ሃꬃንካ ዬጌስ። ኔስ ዳንዳዬቲኮ ኑስ ሚሼታኔ ኑና ማዳ» ጊዴስ።
MAR 9:23 ዬሱሲ ቃሴ፥ « ‹ኔስ ዳንዳዬቲኮ› ጋይ? ኣማኒዛዴስ ዉሪካ ዳንዳዬቴስ» ጊዴስ።
MAR 9:24 ናዛ ኣዋይ ሄራካ፥ «ታ ኣማናይስ ሺን ታ ኣማኖይ ላፋ፥ ታና ማዳርኪ!» ጊዲ ዋሲዴስ።
MAR 9:25 ኣሳይ ዎጫሚሼ ቡሬቲ ኤኪዲ ኢዛኮ ዪዛይሳ ዬሱሲ ቤኢዲ፥ «ሃይሶ ቱሌኔ ዱዴ ኣያናዞ! ሃይሳ ናዛፔ ኬዛ፥ ኔ ቃሴ ሲማዳ ጌሎንታ ማላ ታ ኔና ኣዛዛይስ» ጊዲ ቱና ኣያና ሴሪዴስ።
MAR 9:26 ቱና ኣያናዚካ ኬሂ ዋሲዴስ፤ ናዚካ ኬሂ ቃኬቲዳፔ ጉዬ ናዛፔ ኬዚዴስ። ዳሮቲ ሃይቂዴስ ጋና ጋካናስ ናዚ ኣሃ ሚሳቲዴስ።
MAR 9:27 ጊዶ ኣቲን ዬሱሲ ናዛ ኩሼ ኦይኪ ዴንꬂዴስ፤ ናዚካ ዴንዲ ኤቂዴስ።
MAR 9:28 ዬሱሲ ሶ ጌሊዳፔ ጉዬ ኢዛ ካሊዛይቲ፥ «ኑ ኢዛፔ ቱና ኣያና ኬሳናስ ኣዛስ ዳንዳይቤኮኒ?» ጊዲ ኢዛ ኦይቺዳ።
MAR 9:29 ኢዚካ ኢስታስ፥ «ሃይሳ ማላይ ኬዛና ዳንዳይዛይ ዎሳኒኔ ጾማን ጻላ» ጊዴስ።
MAR 9:30 ሄፔ ዴንዲዲ ጋሊላ ባጋራ ኣꬊ ቢዳ፤ ዬሱሲ ባ ዲዛሶ ኦኒካ ኤራና ማላ ኮዪቤና።
MAR 9:31 ጋሶይካ ዬሱሲ ባና ካሊዛይታስ፥ «ኣሳ ናይ ኣሳ ኩሼን ኣꬊ ኢሜታና፤ ኢስቲካ ኢዛ ዎꬋና፥ ሄꬓንꬆ ጋላሳፌ ጉዬ ኢዚ ዴንዳና» ጊዲ ኢስታ ታማርሲዛ ጊሻሳ።
MAR 9:32 ጊዶ ኣቲን ኢዚ ጊዛይሲ ኢስታስ ጌሊቤና፤ ኢዛ ኦይቻናስካ ባቢዳ።
MAR 9:33 ሄሳፌ ጉዬ ቂፊርናሆሜ ቢዳ፤ ኢዚ ኬꬄ ጌሊዲ፥ «ኢንቴ ዪሼ ኦጌ ቦላ ኣዛ ጊሻስ ፓላሜቲዴቲ?» ጊ ኦይቺዴስ።
MAR 9:34 ኢስቲ ቃሴ ኦጌ ቦላ፥ «ኑ ጊዶን ኑፔ ኡባፌ ኣꬊዛይ ኦኔ?» ጊዲ ፓላሜቲዳ ጊሻስ ዉሪካ ጮኡ ጊዳ።
MAR 9:35 ኢዚ ኡቲዳፔ ጉዬ ታማኔ ናምኣታ ጼይጊዲ፥ «ኮይሮ ጊዳና ኮይዛዴይ ኡባፌ ዉርሴꬂኔ ኡባታስ ኣሽካራ ጊዶ» ጊዴስ።
MAR 9:36 ቂ ጉꬃ ና ኤሂዲ ኢስታ ጊዶን ኤሲዴስ። ኢዲሚዲ፥
MAR 9:37 «ሃይታ ጉꬃ ናይታፔ ኢሳዴ ታ ሱንꬃን ሞኪ ኤኪዛዴይ ታናካ ሞኪ ኤኬስ፤ ታና ሞኪ ኤኪዛዴይ ዉሪ ታና ጻላላ ጊዶንታ ታና ኪቲዳይሳካ ሞኪ ኤኬስ» ጊዴስ።
MAR 9:38 ዮሃኒሲካ፥ «ኣስታማሬ! ኢሳዴይ ኔ ሱንꬃን ዳይዳንꬅ ኬሲሺን ኑ ቤይዶስ። ኢዚ ኑና ካሎንታ ጊሻስ ኬሶንታ ማላ ዲጊዶስ» ጊዴስ።
MAR 9:39 ዬሱሲ ቃሴ፥ «ዲጎፍቴ፤ ኦኒካ ታ ሱንꬃን ማላታ ኦꬂዲ ኤሶቲዲ ታ ቦላ ኢታ ሃሳያናስ ዳንዳዬና።
MAR 9:40 ኑናራ ኤቄቶንታይ ዉሪ ኑናራ ዴስ።
MAR 9:41 ታ ኢንቴስ ቱሙ ጋይስ፤ ኢንቴ ቲዬቲዳ ኪርስቶሳስ ጊዲዳ ጊሻስ ታ ሱንꬃን ኢሲ ዋንጫ ሃꬅ ኢንቴና ኡሺዳዴይ ዉሪ ባ ኦሶይስ ዋጋ ꬋዬና።
MAR 9:42 «ሃይታ ታና ኣማኒዛ ሃ ጉꬃታፔ ኢሳዴስ ꬉጴ ጊዲዛይ ዉሪ ዴጾ ዎጻ ሹቺ ኢዛ ቆꬌን ቃሼቲን ዱጌ ኣባ ጊዶ ኦሌቲዳኮ ኢዛስ ሎኦ ጊዳና።
MAR 9:43 ሄሳ ጊሻስ ኔ ኩሼይ ኔና ባሌꬂኮ ኔፔ ቃንጻ ዬጋ፤ ናምኡ ኩሼራ ዳዳ ጌዴ ጋናሜ ታማን ኔ ባናይሳፌ ኩሼ ዱጻ ጊዳዳ ጌዴ ዴኦን ጌሎይ ኔስ ሎኦ ጊዳና።
MAR 9:44 ጋናሜን ጉጹኔይ ሃይቄና፥ ታማይኔ ቶኤና።
MAR 9:45 ኔና ኔ ቶሆይ ባሌꬂኮ ኔፔ ቃንጻ ዲጋ፤ ናምኡ ቶሆራ ዳዳ ጌዴ ጋናሜ ታማን ዬጌታናፔ ኔ ዎቤ ጊዳዳ ጌዴ ዴኦሶ ጌሎይ ኔስ ሎኦ።
MAR 9:46 ጋናሜን ጉጹኔይ ሃይቄና፥ ታማይኔ ቶኤና።
MAR 9:47 ኔና ኔ ኣይፌይ ባሌꬂኮ ዎጫ ኬሳዳ ኔፔ ዲጋ፤ ናምኡ ኣይፌራ ዳዳ ጌዴ ጋናሜን ዬጌታናፔ ኢሲ ኣይፌራ ጾሳ ካዎቴꬅ ጌሎይ ኔስ ሎኦ።
MAR 9:48 ጋናሜን ጉጹኔይ ሃይቄና ታማይኔ ቶኤና።
MAR 9:49 «ቡሮ ኣሲ ዉሪ ታማን ፓጬታና።
MAR 9:50 «ማጺኔይ ሎኦ፤ ጊዶ ኣቲን ማጺኔይ ባ ማጺኔቴꬃ ዬዲኮ ኢንቴ ዎስቲ ኢዛ ማልኦ ኤራኔ? ኢንቴ ኣሳቴꬃን ማጺኔይ ዴኦ። ኢንቴ ኢንቴ ጊዶን ዶሴቲቴ» ጊዴስ።
MAR 10:1 ዬሱሲ ሄፔ ዴንዲዲ ጌዴ ዩሁዳ ጌቴቲዛ ዴሬኔ ዮርዳኖሴ ሻፋፔ ፒንꬃን ዲዛ ዴሬ ቢዴስ። ዴሬይካ ቃሴ ኢዛ ዩዪ ኣꬊን ኢዚ ካሴ ባ ኦꬂዛ ማላ ኣሳ ታማርሲዴስ።
MAR 10:2 ኢሲ ኢሲ ፋርሳዌቲ ኢዛኮ ዪዲ፥ «ኣሲ ባ ማቾ ኣንጂ ዬዳናስ ቤሲዜ?» ጊዲ ኢዛ ፓጬ ኦይሾ ኦይቺዳ።
MAR 10:3 ኢዚካ ኢስታስ፥ «ሙሴይ ኢንቴና ኣይ ጊ ኣዛዚዴ?» ጊዲ ዛሪ ኦይቺዴስ።
MAR 10:4 ኢስቲካ ኢዛስ፥ «ሙሴይ ታ ኢዞ ኣንጃ ዬዳዲስ ጊዛ ዋራቃታ ጻፊ ኢሚዲ ኣንጆ ጊዴስ» ጊዳ።
MAR 10:5 ዬሱሲካ ዛሪዲ ኢስታ፥ «ሙሴይ ሃይሳ ማላ ዎጋ ጻፊዳይሲ ኢንቴ ዎዚናይ ሚኒዳ ጊሻሳ።
MAR 10:6 ጊዶ ኣቲን ኮይሮ ጾሲ ሜꬊሼ ማጫኔ ኣዴ ኦꬂ ሜꬊዴስ።
MAR 10:7 ሄሳ ጊሻስ ኣሲ ባ ኣዋኔ ባ ኣዮ ኣጊዲ ባ ማቺራ ዋጼቴስ።
MAR 10:8 ናምኣይ ኢሲ ኣሾ ጊዴቴስ፤ ሄሳ ጊሻስ ኢስቲ ናምኣይ ኢሲኖፔ ኣቲን ናምኡ ዴቴና።
MAR 10:9 ሄሳ ጊሻስ ጾሲ ጋꬂ ዋጺዳይታ ኣሲ ሻኮፎ» ጊዴስ።
MAR 10:10 ቃሴካ ኢስቲ ሶ ጌሊን ኢዛ ካሊዛይቲ ሄ ዮኦዛ ጊሻስ ዛሪ ኢዛ ኦይቺዳ።
MAR 10:11 ኢዚ ኢስታስ፥ «ኦኒካ ባ ማቾ ኣንጂ ዬዲዲ ሃራ ማጫስ ኤኪኮ ሄ ማጫሳይ ቦላ ላይማ ኦꬄስ።
MAR 10:12 ማጫሳያካ ባ ኣዚና ኣጋዳ ሃራ ኣዴ ጌሊኮ ኢዛካ ላይማታዉስ» ጊዴስ።
MAR 10:13 ዬሱሲ ባ ኩሼ ዎꬃና ማላ ኣሳይ ናይታ ኢዛኮ ኤሂዴስ። ኢዛ ካሊዛይቲ ቃሴ ኤሂዳ ኣሳ ቦላ ሃንቄቲዳ።
MAR 10:14 ዬሱሲ ሄሳ ቤዪ ሃንቄቲዲ፥ «ናይቲ ታኮ ዬቶ፤ ዲጎፍቴ፤ ጾሳ ካዎቴꬂ ሃይታንታ ማላሳ።
MAR 10:15 ታ ኢንቴስ ቱሙ ጋይስ፤ ጾሳ ካዎቴꬅ ሃይሳ ጉꬃ ናይታ ማላ ኤኮንታዴይ ኢዚን ሙሌካ ጌሌና» ጊዴስ።
MAR 10:16 ናይታ ኢዲሚዲ ኢስታ ቦላ ባ ኩሼ ዎꬂዲ ኣንጂዴስ።
MAR 10:17 ሄፔ ቡሮ ኦጌ ኬዚሺን ኢሳዴይ ዎጺሼ ኢዛኮ ጋኪዲኔ ኢዛ ሲንꬃን ጉልባቲዲ፥ «ኪያ ኣስታማሬንቶ! ታኒ ሜርና ዴኦ ዴማና ማላ ኣይ ኦꬃና ታስ ቤሲዜ?» ጊ ኦይቺዴስ።
MAR 10:18 ዬሱሲካ፥ «ኣዛስ ታና ኪያ ጋይ? ኢሲ ጾሳፌ ኣቲን ኪያይ ባ» ጊዴስ።
MAR 10:19 «ኔኒ ኣዛዞታ ኤራይ? ‹ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ ኣስ ባሌꬆፋ፤ ኔ ኣዋኔ ኔ ኣዮ ቦንቻ› ጊዛይታ» ጊዴስ።
MAR 10:20 ኣዴዚካ ዛሪዲ፥ «ኣስታማሬ! ታ ሃይታ ዉርሳ ናቴꬃፌ ኦይካዳ ናጋዲስ» ጊዴስ።
MAR 10:21 ዬሱሲ ኢዛ ጼሊዲኔ ዶሲዲ፥ «ሂስቲኮ ሃኢ ኔስ ኢሲ ሚሺ ፓጬስ። ባዳኔ ኔስ ዲዛ ዉርሳ ባይዛ፤ ሚሻ ማንቆታስ ኢማ፤ ኔኒ ሳሎን ሺቂዳ ሚሽ ዴማንዳሳ፤ ሂስታዳኔ ሃ ያዳ ታና ካላ» ጊዴስ።
MAR 10:22 ኣዴዚካ ሄሳ ሲዪዲ ዳሮ ዪሎቲዴስ፤ ኢዛስ ዳሮ ኣቆታይ ዲዛ ጊሻስ ሙዞቲሼ ቢዴስ።
MAR 10:23 ዬሱሲ ዩሺ ኣꬂ ጼሊዲ ባና ካሊዛይታ፥ «ዱሬታስ ጾሳ ካዎቴꬅ ጌሎይ ኣይ ማላ ዴጾ!» ጊዴስ።
MAR 10:24 ኢዛ ካሊዛይቲካ ኢዛ ሃሳያን ማላሌቲዳ፤ ዬሱሲ ቃሴ ዛሪዲ፥ «ናይቶ! ጾሳ ካዎቴꬅ ጌሎይ ኣይ ማላ ዴጾ ሚሼ!
MAR 10:25 ዱሬይ ጾሳ ካዎቴꬅ ጌላናይሳፌ ጋሜላይ ናርፔ ሉኮራ ኣꬋናይሲ ካዉያና!» ጊዴስ።
MAR 10:26 ኢዛ ካሊዛይቲካ ዳርሲ ማላሌቲዲ ባ ጊዶን ኢሶይ ኢሳ፥ «ሂስቲን ኦኒ ኣታና ዳንዳይዜ?» ጊዳ።
MAR 10:27 ዬሱሲ ኢስታ ጼሊዲ፥ «ሃይሲ ኣሳስ ዳንዳዬቴና፤ ጾሳ ማታን ጊዲኮ ሄሳ ማላ ጊዴና። ጾሳስ ዉሪካ ዳንዳዬቴስ» ጊዴስ።
MAR 10:28 ጴጽሮሲ ቃሴ፥ «ሄኮ፤ ኑኒ ዉርሲካ ኣጊዲ ኔና ካሊዶስ» ጊዴስ።
MAR 10:29 ዬሱሲካ ዛሪዲ፥ «ታ ኢንቴስ ቱሙ ጋይስ፤ ታ ጊሻሲኔ ሚሺራቾ ቃላ ጊሻስ ጊዲ ባ ኬꬄ፥ ዎይኮ ባ ኢሻታ፥ ዎይኮ ባ ሚቼታ፥ ዎይኮ ባ ኣዮ፥ ዎይኮ ባ ኣዋ፥ ባ ናይታ፥ ዎይኮ ባ ጋዴ ኣጊዳ ኣሲ ዉሪ፥
MAR 10:30 ሃይሳ ሃ ዎዴዛን ሃኢ ጎዴቴꬃራ ኬꬃታ፥ ኢሻታ፥ ሚቼታ፥ ኣዬታ፥ ናይታኔ ጋዴካ ጼቱ ኩሼ ኣꬂ ኤኮንታይኔ ቡሮ ያና ኣላሜዛንካ ሜርና ዴኦ ላቶንታዴይ ዴና።
MAR 10:31 ጊዶ ኣቲን ሲንꬃቲዳ ዳሮቲ ጉዬታና፤ ጉዬቲዳይቲ ሲንꬃታና» ጊዴስ።
MAR 10:32 ኢስቲ ዬሩሳላሜ ኤፊዛ ኦጌ ቦላ ዲሺን ዬሱሲ ኢስታፌ ሲንꬄ ሲንꬄ ቤስ። ኢዛ ካሊዛይቲ ኢዛ ቡሳን ማላሌቲዳ። ሃንኮ ኢዛ ጋሶን ዲዛ ኣሳይ ቃሴ ኢዛስ ባቢዴስ፤ ቃሴካ ታማኔ ናምኣታ ዴሬዛፔ ዱማ ሻኪዲ ባ ቦላ ኣዚ ጋካናኮን ኢስታስ ሂዝጊ ዮቲዴስ፤
MAR 10:33 «ኑኒ ዬሩሳላሜ ኬዛና፤ ኣሳ ናይ ቄሴታ ሃላቃታሲኔ ሙሴ ዎጋ ታማርሲዛይታስ ኣꬊ ኢሜታና፤ ኢስቲካ ኢዛ ቦላ ሃይቆ ፒርዳ ፒርዳናኔ ዴሬ ኣሳስ ኣꬂ ኢማና።
MAR 10:34 ኢዛ ቦላ ቂꬊ ካኣና፤ ኢዛ ቦላ ጩታና፤ ኢዛካ ጋራፋናኔ ዎꬋናሺን ኢዚ ሄꬑ ጋላሳፌ ጉዬ ሃይቆፔ ዴንዳና።»
MAR 10:35 ቃሴ ዛብዶሳ ናይቲ ያቆቤይኔ ዮሃኒሲ ኢዛኮ ሺቂዲ፥ «ኣስታማሬ! ኑኒ ኔና ዎሲዳይሳ ኔ ኑስ ዉርሳ ኦꬃና ማላ ኑ ኮዮስ» ጊዳ።
MAR 10:36 ኢዚካ ኢስታስ፥ «ታ ኢንቴስ ኣይ ኦꬃና ማላ ኮዬቲ?» ጊዴስ።
MAR 10:37 ኢስቲካ፥ «ኔኒ ኔ ካዎቴꬃ ቦንቾን ዲዛ ዎዴ ኑፔ ኢሳዴይ ኔ ኡሻቻን፥ ኢሳዴይ ኔ ሃዲርሳን ኡታና ማላ ኑስ ኤሮ ጋርኪ?» ጊዳ።
MAR 10:38 ዬሱሲካ፥ «ኢንቴ ኦይቺዛይሳ ኤሬኬታ፤ ታኒ ኡያና ኡሻ ኡያናሲኔ ታኒ ጻማቄቲዛ ጺንቃታ ኢንቴ ጻማቄታናስ ዳንዳያንዴቲ?» ጊዴስ።
MAR 10:39 ኢስቲካ ዛሪዲ፥ «ኤ፥ ዳንዳዮስ» ጊዳ። ዬሱሲካ፥ «ታ ኡዪዛ ኡሻ ኢንቴ ኡያናኔ ታ ጻማቄቲዛ ጺንቃታ ኢንቴ ጻማቄታና።
MAR 10:40 ጊዶ ኣቲን ታ ኡሻቻራ ዎይኮ ታ ሃዲርሳራ ኡቴꬂ ጾሲ ኢስታስ ጊግሲዳይታስ ኣቲን ታ ኢማና ሚሽ ጊዴና» ጊዴስ።
MAR 10:41 ታማቲ ሄሳ ሲዪዲ ያቆቤኔ ዮሃኒሳ ቦላ ሃንቄቲዳ።
MAR 10:42 ዬሱሲካ ኢስታ ኢሲ ቦላ ሺሺዲ፥ «ዴሬ ሃላቃ ጌቴቲዛይቲ ዴሬ ሃሪዛይሳ ማላ ኢስታ ሹሜቲ ኢስታ ቦላ ባ ጎዳቴꬅ ቤሲዛይሳ ኢንቴ ኤሬታ።
MAR 10:43 ጊዶ ኣቲን ኢንቴ ጊዶን ጊታ ጊዳና ኮይዛ ኡባይ ኣሽካራ ጊዶ።
MAR 10:44 ሲንꬄ ኣꬋና ኮይዛይ ዉሪካ ኡባስ ኣይሌ ጊዶ።
MAR 10:45 ኣሳ ናይ ጊዲኮ ኣሳስ ኦꬃናሲኔ ባ ሼምፖ ዳሮታ ጊሻስ ኣꬂ ኢማናስ ዪዴስ ኣቲን ኣሴ ኦሲሳናስ ዪቤና» ጊዴስ።
MAR 10:46 ሄፔ ጌዴ ኢያርኮ ቢዳ፤ ዬሱሲኔ ኢዛ ካሊዛይቲ ሃራ ዳሮ ኣሳታራ ኢያርኮፌ ኬዚሺን ጺሞሳ ና ባርጼሞሳ ጌቴቲዛ ኣይፌ ቆቄይ ኦጌ ቦላ ኡቲዲ ዎሴስ።
MAR 10:47 ኢዚካ ዪዛይ ናዚሬቴ ዬሱሳ ጊዲዳይሳ ሲዪዲ፥ «ዳዊቴ ና ዬሱሳ ታና ማራ» ጊዲ ኬሂ ዋሲዴስ።
MAR 10:48 ዳሮቲ ኢዚ ጮኡ ጋና ማላ ሃንቂዳ፤ ጊዶ ኣቲን ኢዚ፥ «ዳዊቴ ናዉ! ታና ማራ» ጊዲ ኬሂ ዋሲዴስ።
MAR 10:49 ዬሱሲካ ኤቂዲ፥ «ኢዛ ሃ ጼይጊቴ» ጊዴስ። ኢስቲካ ቆቄዛ፥ «ኣይኮይ ባ ዴንዳ ኔና ጼይጌስ» ጊዳ።
MAR 10:50 ኢዚካ ባ ማይኦ ቃሪ ዬጊዲ ፑሱኩ ጊ ዴንዲ ኤቂዲ ዬሱሳኮ ዪዴስ።
MAR 10:51 ዬሱሲካ፥ «ታ ኔስ ኣይ ኦꬃና ማላ ኮያይ?» ጊዴስ። ቆቄዚካ፥ «ኣስታማሬንቶ! ታ ጼላና ኮያይስ» ጊዴስ።
MAR 10:52 ዬሱሲካ ዛሪዲ፥ «ባ ኔና ኔ ኣማኖይ ፓꬂዴስ» ጊዴስ። ሄራካ ኢዛ ኣይፌይ ጼሊዴስ። ኢዚካ ዬሱሳ ካሊ ቢዴስ።
MAR 11:1 ኢስቲ ጌዴ ዬሩሳላሜን ዳብራዛይቴ ጌቴቲዛ ዙማ ኣቻን ዲዛ ቤቴፋጌኔ ቢታኒያ ጌቴቲዛሶ ማቲዳ ዎዴ ዬሱሲ ባና ካሊዛይታፔ ናምኣታ፥
MAR 11:2 «ጌዴ ኢንቴ ሲንꬃን ዲዛ ጉታዮ ቢቴ። ኢንቴ ሄ ጌሊዳ ማላ ሄን ኣሲ ቶጊ ኤሮንታ ቃሾን ዲዛ ሃሬ ጉቴ ኢንቴ ዴማና፤ ቢርሺዲ ኢዛ ሃ ኤኪ ዪቴ።
MAR 11:3 ኦኒካ ኢንቴና፥ ‹ሃይሳ ኣይስ ኦꬄቲ?› ጊኮ ጎዳስ ኮሼስ ጊዲ ዮቲቴ፤ ኢዚካ ኢንቴስ ኤሶን ዛሪ ዬዳና» ጊ ኪቲዴስ።
MAR 11:4 ኢስቲካ ቢዲ ኢሲ ኬꬃ ካሬን ኦጌ ቦላ ቃሼቲ ዲዛ ሃሬ ጉቴ ዴሚዲ ቢርሺዳ።
MAR 11:5 ሄን ኤቂዳ ኢሲ ኢሲ ኣሳቲ፥ «ሃሬ ጉቴዛ ኣዛስ ቢርሼቲ?» ጊ ኦይቺዳ።
MAR 11:6 ዬሱሳ ካሊዛይቲ ዬሱሲ ኢስታስ ጊዳ ማላ ኣሳታስ ዮቲን ኤሮ ኤኪ ቢቴ ጊዳ።
MAR 11:7 ጉቴዛካ ዬሱሳኮ ኤሂዲ ባ ማይኦ ኢዛ ዞኮ ቦላ ዬጊን ዬሱሲ ኢዛ ቶጊዴስ።
MAR 11:8 ዳሮ ኣሳይ ባ ማይኦ ኬሲ ኬሲ ኦጌ ቦላ ሚጪዴስ። ባጋ ኣሳይ ጪሊላ ሚꬃ ሃይꬅ ቃንጺ ቃንጺዲ ኦጌ ቦላ ላሊዴስ።
MAR 11:9 ዬሱሳፔ ሲንꬃራኔ ጉዬራ ዲዛ ኣሳይ ቃላ ꬎቁ ሂስቲዲ፥ «ሆሳኢና፤ ጎዳ ሱንꬃን ዪዛዴይ ኣንጄቲዳዴ።
MAR 11:10 ሃና ዪዛራ ኑ ኣዋ ዳዊቴ ካዎቴꬃያ ኣንጄቲዳሮ፤ ሆሳኢና! ቦላ ሳሎን ጾሲ ቦንቼቶ» ጊሼ ዋሲዴስ።
MAR 11:11 ዬሱሲ ዬሩሳላሜ ጋኪዲ ሄሳፌካ ጾሳ ኬꬄ ጌሊዴስ። ሄ ሄራን ዲዛይሳ ኡባ ጼሊዲ ጋዴይ ቃሚዳ ጊሻስ ታማኔ ናምኣታራ ጌዴ ቢታኒያ ኬዚዴስ።
MAR 11:12 ዎንቴꬃ ጋላስ ኢስቲ ቢታኒያፔ ኬዚ ቢሺን ዬሱሲ ጋፊዴስ።
MAR 11:13 ኢዚ ኢሲ ሃይꬂ ጪሊሊዳ ባላሴ ጌቴቲዛ ሚꬂ ሃሆን ቤኢዲ ኣይፌይ ዳናኮን ጊዲ ኢዚኮ ዪዴስ። ጊዶ ኣቲን ባላሴ ሚꬂ ኣይፎንታ ዎዴ ጊዲዳ ጊሻስ ሃይꬃፌ ኣቲን ኢሲ ኣይፌካ ኢዚፔ ዴሚቤና።
MAR 11:14 ሄሳ ጊሻስ ሚꬃዮ፥ «ሃኒፌ ጉዬ ሜርናስ ኦኒካ ኔፔ ኣይፌ ሞፖ!» ጊዴስ። ኢዛ ካሊዛይቲካ ኢዚ ጊዛይሳ ሲዪዳ።
MAR 11:15 ጌዴ ዬሩሳላሜ ቢዳ፤ ሄፔካ ጾሳ ኬꬄ ጌሊዲ ሄን ባይዚዛይታኔ ሻሚዛይታ ኬሲ ጎዶ ኦይኪዴስ። ሚሼ ላሚዛይታ ጻራጴዛኔ ሃራጴ ባይዚዛይታ ኦይዴ ጉፋንꬂ ጉፋንꬂ ዬጊዴስ።
MAR 11:16 ኦኒካ ኣይ ሚሽ ቶኪዲ ጾሳ ኬꬃ ጊቤ ጊዶራ ኣꬎንታ ማላ ዲጊዴስ።
MAR 11:17 ኢስታካ ታማርሲሼ፥ «ታ ኬꬂ ዴሬ ኡባስ ዎሳ ኬꬄ ጊዳና ጌቴቲ ጻፌቲቤኔ? ጊዶ ኣቲን ኢንቴ ካይሶታ ጎንጎሎ ኬሲዴታ» ጊዴስ።
MAR 11:18 ቄሴታ ሃላቃቲኔ ሙሴ ዎጋ ታማርሲዛይቲ ሄሳ ሲዪዲ ኢዛ ዎስቲ ꬋይሳናኮን ኦጌ ኮሽ ኦይኪዳ። ጊዶ ኣቲን ዴሬይካ ኢዛ ቲሚርቴዛን ማላሌቲዳ ጊሻስ ኢዛስ ባቢዳ።
MAR 11:19 ኢስቲካ ጋዴይ ቃሚን ካታማይፔ ኬዚ ቢዳ።
MAR 11:20 ዎንቴꬃ ጋላስ ማላዶ ኢስቲ ኦጌራ ኣꬊ ቢሺን ባላሴ ሚꬃያ ጻጶፔ ሜሊዳሮ ቤኢዳ።
MAR 11:21 ዮኦዚ ኢዛ ዎዚናን ኣኬኬቲን ጴጽሮሲ ዬሱሳ፥ «ኣስታማሬ! ሄኮ፥ ሃና ኔ ቃንጊዳ ባላሴያ ሜላዱስ» ጊዴስ።
MAR 11:22 ኢዚካ ዛሪዲ፥ «ጾሳ ኣማኒቴ።
MAR 11:23 ታ ኢንቴስ ቱሙ ጋይስ፤ ‹ኦኒካ ሃይሳ ዙማዛ ኔ ꬎቃሌታዳ ኣባን ጌላ› ጊዛኮ ሄሳካ ዎዚናን ሲꬎንታ ኣማኒዳኮ ኢዛዴስ ሃናና።
MAR 11:24 ሄሳ ጊሻስ ኢንቴ ዎሳን ኦይቺዳዝ ኡባ ኤኪዳ ማላ ኣማኒኮ ኢንቴስ ሃናና።
MAR 11:25 ሄሳꬆካ ኢንቴ ዎሳስ ኤቂዛ ዎዴ ኢንቴ ሳሎ ኣዋይ ኢንቴ ናጋራ ኣቶ ጋና ማላ ኢንቴካ ኢንቴና ቆሂዳይታ ናጋራ ኡባ ኣቶ ጊቴ።
MAR 11:26 ኢንቴ ኣቶ ጎንታ ኢጺኮ ኢንቴ ሳሎ ኣዋይካ ኢንቴ ናጋራ ኣቶ ጌና» ጊዴስ።
MAR 11:27 ቃሴካ ዬሩሳላሜ ዪዳ፤ ዬሱሲ ጾሳ ኬꬃ ካሬ ጊዶን ያኔ ሃ ዩዬቲሺን ቄሴታ ሃላቃቲ፥ ሙሴ ዎጋ ታማርሲዛይቲኔ ዴሬ ጪማቲ ኢዛኮ ሺቂዲ፥
MAR 11:28 «ሃይሳ ኔ ኦꬂዛይ ኣይ ጎዳቴꬃራ? ሃይታ ኔ ኦꬃና ማላ ሃይሳ ማላ ጎዳቴꬅ ኔስ ኦኒ ኢሚዴ?» ጊዳ።
MAR 11:29 ዬሱሲካ ኢስታስ ዛሪዲ፥ «ኣኔ ታኒካ ኢንቴና ኢሲ ኦይሾ ኦይቻይስ፤ ኢንቴካ ታስ ዛሪኮ ታኒካ ሃ ዮኦታ ኣይ ጎዳቴꬃራ ኦꬂዛኮ ኢንቴስ ዮታና።
MAR 11:30 ዮሃኒሳ ጺንቃታይ ጾሳፌዬ? ኣሳፔ? ኣኔ ታስ ዛሪቴ» ጊዴስ።
MAR 11:31 ኢስቲካ ባ ጊዶን ኢሶይ ኢሳራ፥ «ኑ ሳሎፔ ጊኮ ኢዚ ኑና፥ ‹ሂስቲን ኣዛስ ኢዛ ኣማኒቤኬቲ?› ጋና፤
MAR 11:32 ‹ኑ ኣሳፔ› ጊኮ» ዮሃኒሲ ቱሙ ናቤ ጊዲዳይሳ ዴሬይ ዉሪ ኣማኒዛ ጊሻስ ሄሳꬆ ጋና ባቢዳ።
MAR 11:33 ሄሳ ጊሻስ፥ «ኑ ኤሮኮ» ጊዲ ዬሱሳስ ዛሪዳ። ዬሱሲካ፥ «ሂስቲኮ ታ ሃይታ ኣዛ ጎዳቴꬃራ ኦꬂዛኮ ታኒካ ኢንቴስ ዮቲኬ» ጊዴስ።
MAR 12:1 ቃሴ ኢስታስ ሌሚሶራ ዮቲሼ፥ «ኢሳዴይ ባ ዎይኔ ሚꬅ ቶኪዴስ። ኬላ ዩሺ ኣꬂ ኬሊዴስ፤ ዎይኔ ሚꬃ ኣይፌ ጉምኣና ኦላ ቦኪዴስ። ናጌ ኬꬄካ ኬጺዴስ። ሄሳፌ ጎሻንቻታስ ኪራ ኢሚዲ ሃራ ዴሬ ቢዴስ።
MAR 12:2 ሚꬃይ ኣይፊዛ ዎዴ ዎይኔ ሚꬃ ኣይፌ ኤካዳ ያ ጊዲ ኣሽካራታፔ ኢሳዴ ጎሻንቻታኮ ዬዲዴስ።
MAR 12:3 ጎሻንቻቲ ኣሽካራዛ ኦይኪ ሾጪዲ ጮ ሜላ ኩሼ ዬዲዳ።
MAR 12:4 ናምኣንꬆካ ሃራ ኣሽካራ ዬዲዴስ። ጎሻንቻቲ ሃኢካ ኣሽካራ ኦይኪዲ ኢዛስ ሁኤታራ ቆኢዲኔ ካዉሺዲ ዛሪ ዬዲዳ።
MAR 12:5 ሃኢካ ዛሪዲ ሃራ ኣሽካራ ዬዲዴስ። ሄ ዬዶይሳካ ዎꬊዳ፤ ሃራ ዳሮታ ጊዶፌ ኢሲ ኢሲ ኣሳታ ቆጺዳ፤ ባጋይታ ዎꬊዳ።
MAR 12:6 «ሃኢካ ኪቴቶንታ ኣቲዳ ሃራይ ዴስ፤ ኢዚካ ኣዋይ ዶሲዛ ባ ናዛ። ‹ታ ናዛ ኢስቲ ቦሳና› ጊ ቆፒዲ ዉርሴꬃን ባ ናዛ ዬዲዴስ።
MAR 12:7 ጎሻንቻቲ ቃሴ ባ ጊዶን፥ ‹ሃይሲ ዋና ኢዛ ላታና ናዛ፤ ሃ ዪቴ ኑ ኢዛ ዎꬊኮ ቢታይ ኑስ ጊዳና› ጊዳ።
MAR 12:8 ሄሳ ጊሻስ ሄን ኦይኪ ዎꬊዲ ዎይኔ ሚꬃይ ዲዛሶፔ ሃራሶ ኬሲ ዬጊዳ።
MAR 12:9 «ሂስቲን ዎይኔ ሚꬃ ጎዳይ ኣይ ኦꬃና ኢንቴስ ሚሳቲዜ? ኢዚ ያና፤ ጎሻንቻታካ ዎꬋና፤ ዎይኔ ሚꬃ ሃራታስ ኢማና።
MAR 12:10 ጌሻ ማጻፋን፥ ‹ሹቻ ኬꬄ ኬጺዛይቲ ሃኔና ጊዲ ዎራ ዬጊዳ ሹቻይ ኬꬃ ጉላስ ቦላ ሁኤ ጊዲዴስ፤ ሄሳካ ጎዳይ ኦꬂዴስ። ሄሲካ ኑ ኣይፌስ ማላሊሲዛዝ ጌቴቲዲ ጻፌቲዳይሳ ናባቢቤኬቲ?› » ጊዴስ።
MAR 12:12 ኢዚ ኢስታስ ሌሚሶዛ ዮቲዳይ ኢስታ ጊሻስ ጊዲዳይሳ ኣይሁዳ ሃላቃቲ ኤሪዳ ጊሻስ ኢዛ ኦይካናስ ኮዪዳ፤ ጊዶ ኣቲን ኣሳስ ባቢዳ ጊሻስ ኣጊ ቢዳ።
MAR 12:13 ዬሱሳ ዮኦን ቃጻና ማላ ፋርሳዌታፔኔ ሄርዶሳ ባጋታፔ ጉꬃ ኣሳታ ዶሪዲ ኢዛኮ ዬዲዳ።
MAR 12:14 ኢስቲካ ኢዛኮ ዪዲ፥ «ኣስታማሬ! ኔኒ ሞሮይ ባይንዳ ኣስ ጊዲዳይሳ ኑ ኤሮስ፤ ኔ ኦናስካ ባባዳ ዎርዶ ማዳካ፤ ጾሳ ኦጌ ጻላላ ቱሙ ታማርሳሳ። ኦሮሜ ካዎ ቄሳሬስ ጊራ ቃንጻናስ ቤሲዜዬ? ቤሴኔ? ኑ ቃንጺኖዬ? ቃንጾፊኖ?»
MAR 12:15 ዬሱሲ ኢስታ ኦይሻይ ቆꬌፔ ቆሞ ጊዲዳይሳ ኤሪዲ፥ «ኣዛስ ታና ቃጻና ኮዬቲ? ኣኔ ኢሲ ዲናሬ ሃሚቴ ታ ቤያይስ» ጊዴስ።
MAR 12:16 ኢስቲካ ሚሻ ኤሂን፥ «ሃይሲ ኢዛ ቦላ ዲዛ ሚስሌዚ ኦና ሚስሌ? ኢዛ ቦላ ጻፌቲዳይሲ ኦና ጊዜ?» ጊዴስ። ኢስቲካ፥ «ቄሳሬይሳ» ጊዳ።
MAR 12:17 ዬሱሲካ፥ «ቄሳሬይሳ ቄሳሬስ፥ ጾሳይሳ ጾሳስ ኢሚቴ» ጊዴስ። ኢስቲካ ኢዛ ዛሮን ማላሌቲዳ።
MAR 12:18 ሄሳፌ ጉዬ ሃይቂዳይታስ ሃይቆፔ ዴንꬂ ባ ጊዛ ሳዱቃዌቲ ኢዛኮ ዪዲ ኢዛ ሂዝጊ ኦይቺዳ።
MAR 12:19 «ኣስታማሬ! ኢሲ ኣሲ ማቾ ኤኪዲ ና ዬሎንታ ሃይቂኮ ሃይቂዳይሳ ኢሻይ ኢዛ ማቼዮ ኤኪዲ ኢዛስ ላታ ና ዬላና ማላ ካሴ ሙሴይ ኑስ ጻፊዴስ።
MAR 12:20 ጊዶ ኣቲን ላፑን ኢሻንቲ ዴቴስ፤ ኢስታፌ ባይራይ ማቾ ኤኪዲ ና ዬሎንታ ሃይቂዴስ።
MAR 12:21 ካሎዚ ሄ ማጫሳዮ ኤኪዲ ሃኢካ ና ዬሎንታ ሃይቂዴስ፤ ሄꬓንꬆይካ ዬሎንታ ሃይቂዴስ።
MAR 12:22 ላፑናቲካ ሄ ማጫሳዮ ኤኪዲ ላታ ዬሊቤቴና፤ ዉርሴꬃን ማጫሳያካ ሃይቃዱስ።
MAR 12:23 ሂስቲን ላፑናቲካ ኢዞ ኤኪዳሺን ሃይቆፔ ዴንዶይ ዲዛ ጊዲኮ ሃ ማጫሳያ ኢስታፌ ኦና ማቾ ጊዳኔ?» ጊዳ።
MAR 12:24 ዬሱሲካ ኢስታስ፥ «ኢንቴ ባሌቲዛይ ጌሻ ማጻፋታኔ ጾሳ ዎልቃ ኤሮንታ ጊሻሳ።
MAR 12:25 ሃይቂዳይቲ ዴንዲዛ ዎዴ ሳሎ ኪታንቻታ ማላ ጊዳና ኣቲን ኤኬቴቴናኔ ጌሌቴና።
MAR 12:26 ሃይቂዳይታ ዴንꬃ ጊሻስ ጊዲኮ ሙሴ ማጻፋን ሄሲካ ቄሪ ዎራ ጊዶን ኤጺዛ ታማ ጊዶፌ ጾሲ፥ ‹ታኒ ኣብራሃሜ ጾሳ፤ ዪሳቃ ጾሳ፤ ያቆቤ ጾሳ› ጊዛይሳ ናባቢቤኬቲ?
MAR 12:27 ጾሲ ፓጻታ ጾሳ ኣቲን ሃይቄꬃታ ጾስ ጊዴና፤ ሄሳ ጊሻስ ኢንቴ ዳሮ ባሌቲዴታ» ጊዴስ።
MAR 12:28 ኢስቲ ፓላማን ዲሺን ጻፌታፔ ኢሳዴይ ኢስታ ፓላማ ሲዪዲኔ ዬሱሲ ኦይሼቲዳይሳስ ሎኤꬂ ዛሪዳይሳ ኣኬኪዲ፥ «ኤሮ! ኣዛዞታ ኡባፌ ኣꬊዛይ ኣዋይሴ?» ጊዲ ኦይቺዴስ።
MAR 12:29 ዬሱሲ ኢዛስ፥ «ኡባፌ ኣꬊዛይ ሃይሳ፥ ‹ኢስራኤሌ ሲያ! ጎዳ ኑ ጾሲ ኢሲ ጎዳ፥
MAR 12:30 ኔካ ጎዳ ኔ ጾሳ ኔ ኩሜꬃ ዎዚናፔ፥ ኔ ኩሜꬃ ሼምፖፌ፥ ኔ ኩሜꬃ ቆፋፔ፥ ኔ ኩሜꬃ ዎልቃፌ ዶሳ።›
MAR 12:31 ናምኣንꬆይካ፥ ‹ኔ ላጌ ኔ ሁኤ ማላ ዶሳ› ሃ ናምኣታፔ ኣꬊዛ ኣዛዞይ ባ።»
MAR 12:32 ጻፌዚካ፥ «ኣስታማሬ! ሎኦ ጋዳሳ፥ ‹ጾሲ ኢሲኖ ጊዲዳይሳኔ ኢዛፔ ሃራይ ባይንዳይሳ› ኔ ዮቲዳይሲ ሊኬ።
MAR 12:33 ኢዛ ኔ ኩሜꬃ ዎዚናፔ ኔ ኩሜꬃ ቆፋፔ ኔ ኩሜꬃ ዎልቃፌ ዶሶይ ቃሴካ ኔ ላጌ ኔ ሁኤ ማላ ዶሶይ ጹጌቲዛ ያርሾፌኔ ሃራ ያርሾ ኡባፌ ኣꬌስ» ጊዴስ።
MAR 12:34 ዬሱሲካ ኣዴዚ ዩሺ ቆፒዲ ዛሪዳይሳ ቤኢዲ፥ «ኔኒ ጾሳ ካዎቴꬃፌ ሃሆን ዳካ» ጊዴስ። ሄሳፌ ጉዬ ኢዛ ኦይቻናስ ጻሊዳዴይ ቤቲቤና።
MAR 12:35 ዬሱሲ ጾሳ ኬꬃ ጋꬃን ታማርሲሼ፥ «ሙሴ ዎጋ ታማርሲዛይቲ ኣዛስ፥ ‹ኪርስቶሳ ዳዊቴ ና› ጊዞ?
MAR 12:36 ዳዊቲ ጺሎ ኣያናን ሃሳይሼ፥ ‹ጎዳይ ታ ጎዳ፥ ኔ ሞርኬታ ታ ኔ ቶሆ ጋርስ ኣꬃና ጋካናስ ታ ኡሻቻን ኡታ› ጊዴስ።
MAR 12:37 ሂስቲን ዳዊቲ ባ ዶናራ ኢዛ፥ ‹ጎዳ› ጊኮ ዋኒዲ ሲሚ ኢዛስ ና ጊዳኔ?» ጊዴስ። ዳሮ ዴሬይካ ኢዚ ጊዛይሳ ኡፋይሳራ ሲዪዴስ።
MAR 12:38 ኢዚ ታማርሲሼ፥ «ሙሴ ዎጋ ታማርሲዛይታፔ ናጌቲቴ፥ ጋዴራ ጎሼቲዛ ኣዱሳ ማይኦ ማይኢዲ ዩሼ ዩያና ዶሴቴስ፤ ኣዋንካ ኣꬊ ኣꬊ ኣሲ ኢስታስ ቦንቾ ሳሮታ ኢማና ማላ ኮዬቴስ።
MAR 12:39 ኣይሁዳታ ዎሳ ኬꬃን ꬎቃሶ፥ ጊቢራሶንካ ቦንቾሶ ኮዬቴስ።
MAR 12:40 ኢስቲ ኣዚናይ ባይንዳ ማጫሳ ኬꬅ ካሎሴቴስ፤ ቃሴካ ባና ቤሳናስ ኣዱሳ ዎሳ ዎሴቴስ። ሃይታንቲ ኢታ ፒርዳ ፒርዴታና» ጊዴስ።
MAR 12:41 ዬሱሲካ ኣሳይ ሙጹዋታ ዬጊዛሶን ኡቲዲ ዳሮ ኣሳቲ ኢሚዛይሳ ጾሳ ኬꬃ ሚሻ ሺሺዛ ሳጺኔን ዬጊዛይሳ ጼሊዴስ። ዳሮ ዱሬቲ ዳሮ ሚሽ ዬጊዳ።
MAR 12:42 ኢሲ ኣዚናይ ባይንዳ ኣምኤ ዲዛራ ኢሲ ሲኪናፌ ዳሮንታ ጻርቂማላ ቢራታፔ ኦሴቲዳ ናምኡ ሚሽ ዬጋዱስ።
MAR 12:43 ዬሱሲ ባና ካሊዛይታ ጼይጊዲ፥ «ታ ኢንቴስ ቱሙ ጋይስ፤ ሳጺኔዛን ዬጊዳ ኡባፌ ሃና ማንቆ ኣምኤያ ኣꬌꬅ ዬጋዱስ።
MAR 12:44 ሃይቲ ዉሪ ባስ ዲዛ ቲርፓ ሚሻፌ ዬጊዳሺን ሃና ቃሴ ባ ማንቆቴꬃፌ ባስ ዲዛይሳ ሲንꬃፌ ኢዞ ኮሺዛይሳራ ዉርሳ ኢማዱስ» ጊዴስ።
MAR 13:1 ኢዚ ጾሳ ኬꬃፌ ኬዚሺን ኢዛ ካሊዛይታፔ ኢሶይ፥ «ኣስታማሬ! ሃይሲ ኬꬃይኔ ኬꬃይ ኬጼቲዳ ሹቻይ ኣይ ማላ ሎኢዛኮ ሃይሳ ቤያይ?» ጊዴስ።
MAR 13:2 ዬሱሲካ ዛሪዲ፥ «ሃይታ ጊታ ኬꬃታ ጼላይ? ሹቻቲ ኢሶይ ኢሳ ቦላ ዲዛ ማላ ዴቴና፤ ዉሪካ ላሌታና» ጊዴስ።
MAR 13:3 ዬሱሲ ጾሳ ኬꬃ ጊናራ ዳብራዛይቴ ዙማ ቦላ ኡቲ ዲሺን ጴጽሮሲ፥ ያቆቤይ፥ ዮሃኒሲኔ ኢንዲራሲ ጻላ ኢዛኮ ሺቂዲ፥
MAR 13:4 «ሃይሲ ኣይዴ ሃናናኮ ኑስ ዮታ። ሃይሲ ዉርሴꬃን ፖሌታናስ ማላታይ ኣዜ?» ጊ ኦይቺዳ።
MAR 13:5 ዬሱሲካ ኢስታስ፥ «ኦኒካ ኢንቴና ባሌꬆንታ ማላ ናጌቲቴ።
MAR 13:6 ቡሮ ዳሮቲ፥ ‹ታ ኪርስቶሳ› ጊሼ ታ ሱንꬃን ያና፤ ዳሮታካ ባሌꬃና።
MAR 13:7 ኢንቴ ኦላኔ ኦላ ዎሬ ሲዪዛ ዎዴ ዳጋሞፍቴ፤ ሄሲ ሃናናይሲ ኣቴና፤ ዉርሴꬂ ጊዲኮ ቡሮና።
MAR 13:8 ዴሬይ ዴሬ ቦላ፥ ካዎይ ካዎ ቦላ ዴንዳና፥ ዳሮሶን ቢታ ቃꬂኔ ኮሻይ ሃናና፤ ሄይቲ ዉሪ ሚጻስ ሌሶ ማላ።
MAR 13:9 «ኢንቴ ኢንቴስ ናጌቲቴ። ቡሮ ኢንቴና ዴሬ ዱላታን ኣꬂ ኢማና። ኢስቲ ኢንቴና ኣይሁዳታ ዎሳ ኬꬃን ጋራፋና። ኢንቴ ታ ማርካታ ጊዳና ማላ ታ ጊሻስ ዴሬ ዳናታ ሲንꬃኒኔ ካዎታ ሲንꬃን ኤቃና።
MAR 13:10 ኮይሮቲዲ ሚሺራቾ ቃላይ ዴሬ ኡባስ ሳባኬታና ቤሴስ።
MAR 13:11 ኢንቴ ኦይኬቲዲ ፒርዳስ ሺቂዛ ዎዴ ሂኖ ሄ ሳቴዪን ኢንቴስ ኢሜቲዛሮ ሃሳይቴ ኣቲን ቢዲ፥ ‹ኑ ኣይ ጊኖ?› ጊዲ ካሴቲ ሂርጎፍቴ፤ ሃሳያናይ ጺሎ ኣያናፔ ኣቲን ኢንቴና ጊዴኬታ።
MAR 13:12 «ኢሻይ ኢሻ፥ ኣዋይ ባ ና ሃይቆስ ኣꬂ ኢማና፤ ናይቲ ባና ዬሊዳይታ ቦላ ማካላናኔ ዎꬋና።
MAR 13:13 ታ ጋሶን ኢንቴ ኣሳ ኡባን ኢጼቲዳይታ ጊዳና፤ ዉርሴꬅ ጋካናስ ሚኒ ኤቂዳዴይ ጊዲኮ ኣታና።
MAR 13:14 «ኢንቴ ሃራሲዛ ቱናቴꬅ ኢዛስ ቤሶንታሶን ኤቂዳሼ ቤይኮ ናባቢዛዴይ ዎዚናን ዎꬆ፤ ዩሁዳን ዲዛይቲ ፑዴ ዙማ ቦላ ባቃቴቶ።
MAR 13:15 ኬꬃ ካሬን ዲዛዴይ ሶ ጌሎፖ፤ ባ ሚሽ ኬሳና ጊዲ ኬꬄ ጌሎፖ።
MAR 13:16 ጎሻሶን ዲዛዴይ ባ ማይኦ ኤካናስ ጉዬ ሲሞፎ።
MAR 13:17 ሄ ጋላሳታን ሻራ ማጫሳታሲኔ ና ꬋንꬂዛይታስ ኣዬ ኣና!
MAR 13:18 ሄሲካ ባልጎን ጊዶንታ ማላ ጾስ ዎሲቴ።
MAR 13:19 ጾሲ ኮይሮ ሜꬌቴꬅ ኡባ ሜꬎሶፌ ሃኢ ጋካናስ ዎይኮ ሃይሳፌ ጉዬ ኢዛ ሚሳቲዛይ ባይንዳ ጊታ ሜቶይ ሃናና።
MAR 13:20 ጎዳይ ሄ ጋላሳታ ቃንꬆንታኮ ኦኒካ ኣቴና ሺን ባስ ዶሬቲዳይታ ጊሻስ ኢዚ ሄ ጋላሳታ ቃንꬂዴስ።
MAR 13:21 «ሄ ዎዴ ኦኒካ፥ ‹ሄኮ ኪርስቶሲ ሃይሳን ዴስ› ጊኮ ዎይኮ፥ ‹ሄኮ ሄን ዴስ› ጊኮ ኣማኖፒቴ።
MAR 13:22 ዎርዶ ኪርስቶሳቲኔ ዎርዶ ናቤቲ ቡሮ ዴንዲዲ ማላታታኔ ካሴ ሃኒ ኤሮንታ ፓላ ሚሽ ኦꬃና፤ ኢስታስ ዳንዳዬቲኮ ሃራይ ኣቶሺን ዶሬቲዳይታካ ባሌꬃና።
MAR 13:23 ሄሳ ጊሻስ ናጌቲቴ፤ ሄ ዎዴይ ጋኮንታ ዲሺን ሃራ ሃይሳ ዉርሳ ታ ኢንቴስ ዮታዲስ።
MAR 13:24 «ሄ ዎዴ ሄ ሜቶዛፔ ካሊዲ ኣርሼይ ꬉማና፤ ኣጊናይካ ፖኢሱኩ።
MAR 13:25 ጾሊንቴቲ ሳሎፔ ቆቆፌታና፥ ሳሎን ዲዛ ዎልቃማቲ ቃጻና።
MAR 13:26 «ሄ ዎዴ ኣሳ ናይ ጊታ ዎልቃራኔ ቦንቾራ ሳሎ ሻራራ ዪሺን ኣሳይ ኢዛ ቤያና።
MAR 13:27 ኢዚካ ኪታንቻታ ዬዲዲ ኦይዱ ባጋፌ ቢታ ጋጻፔ ጋጻ ጋካናስ ዲዛ ባስ ዶሬቲዳይታ ሺሻና።
MAR 13:28 «ሌሚሶዛ ባላሴ ሚꬃፌ ታማርቴ። ኡንቁሎይ ጪሊሊዛ ዎዴ ሃይꬅ ኬሲሺን ቦኔይ ማቲዳይሳ ኢንቴ ኤሬታ።
MAR 13:29 ሄሳꬆካ ሃይቲ ታ ጊዳይቲ ፖሌቲሺን ኢንቴ ቤይኮ ዎዴይ ማቲ ዪዲ ፔንጌ ጋኪዳይሳ ኤሪቴ።
MAR 13:30 ታ ኢንቴስ ቱሙ ጋይስ፤ ሃ ዮኦቲ ፖሌታና ጋካናስ ሃይሲ ሃ ዬሌታይ ኣꬌና።
MAR 13:31 ሳሎይኔ ሳኣይ ኣꬋና ሺን ታ ቃላይ ጊዲኮ ኣꬌና።
MAR 13:32 «ቃሴ ሄ ጋላሳይ ጊሻስ ዎይኮ ሄ ሳቴይ ጊሻስ ታ ኣዋፔ ኣቲን ሳሎ ኪታንቻታ ጊዲንካ ናዛ ጊዲንካ ኦኒካ ኤሬና።
MAR 13:33 ሄሳ ጊሻስ ዎዴይ ኣይዴኮ ኢንቴ ኤሮንታ ጊሻስ ናጌቲቴ፥ ሚኒቴኔ ዎሲቴ።
MAR 13:34 ሄሲካ ባ ኬꬅ ኣሽካራታስ ኣጊዲ ኣሽካራታ ኢሳ ኢሳ ኦሶ ኦይꬂዲ ፔንጌ ናጊዛይሲ ቤጊዲ ናጋና ማላ ኣዛዚዲ ቢዳ ኣሳ ሚሳቴስ።
MAR 13:35 «ሂስቲኮ ኬꬃ ኣዋይ ኣይዴ ያናኮ ዎይኮ ሌላ ጊዶꬅ ያናኮ ዎይኮ ኮይሮ ኩቶይ ባቂሺን ያናኮ ዎይኮ ዎንታ ቦላ ባዞይ ዞኢሺን ያናኮ ኢንቴ ኤሮንታ ጊሻስ ቤጊዲ ናጊቴ።
MAR 13:36 ኢንቴ ቆፖንታ ዲሺን ኢዚ ዪዲ ኢንቴ ꬊስኪዲሺን ኢንቴና ዴሞፎ።
MAR 13:37 «ታ ኢንቴስ ዮቲዛይሳ ኣስ ኡባስ ዮታይስ፤ ሚኒዲ ናጊቴ! ጋይስ» ጊዴስ።
MAR 14:1 ፓዚጋኔ ኡኬꬃ ሙሳ ባኣሌ ጋላሳይ ቦንቼታናስ ናምኡ ጋላሲ ኣቲሺን ቄሴታ ሃላቃቲኔ ሙሴ ዎጋ ታማርሲዛይቲ ዬሱሳ ባሌꬂ ኦይኪዲ ዎꬋና ኦጌ ኮዪዳ።
MAR 14:2 ጊዶ ኣቲን፥ «ኣሳይ ሜቶ ሜꬎንታ ማላ ባኣሌ ጋላሳታን ጊዶፖ» ጊዳ።
MAR 14:3 ኢዚ ቢታኒያ ጌቴቲዛሶን ኢሲ ኢንቺራቻ ሃርጋንቻ ጊዲዳ ሲሞናሶን ቁማ ቦላ ዲሺን ዋጋይ ዳሮ ኣልኦ ጊዲዳ ናርዶሴ ጌቴቲዛ ሺቶይ ኩሚ ኡቲዳ ኣልባስጺሮሴ ቢልቃጼ ኦይኪዳ ኢሲ ማጫሳያ ቢልቃጼዛ ሜንꬃዳ ሺቶዛ ዬሱሳ ሁኤ ቦላ ጉሳዱስ።
MAR 14:4 ሄን ዲዛ ኣሳታፔ ኢሲ ኢሲ ኣሳቲ፥ «ሃይሲ ሺቶዚ ኣዛስ ዎጋይ ባይንዳ ጉኪዜ?» ጊዲ ባ ጊዶን ሃንቄቲዳ።
MAR 14:5 «ሺቶዚ ባይዜቲዳኮ ሄꬑ ጼቱ ዲናሬፔ ቦላራ ባይዜቲዲ ማንቆታስ ኢሜቴኔሺን!» ጊዲ ማጫሳዮካ ካꬊዳ።
MAR 14:6 ጊዶ ኣቲን ዬሱሲ ኢስታስ፥ «ኣጊቴ! ሃኖ ማጫሳዮ ኣዛስ ዋዪሴቲ? ኢዛ ታስ ሎኦ ሚሽ ኦꬃዱስ።
MAR 14:7 ማንቆቲ ኣይ ዎዴካ ኢንቴናራ ዴቴስ። ኢንቴ ኮዪዳ ዎዴ ኣይዴካ ኢስታ ማዳናስ ዳንዳዬታ፤ ታ ጊዲኮ ኡባ ዎዴ ኢንቴናራ ዲኬ።
MAR 14:8 ሃና ባ ኦꬃናስ ዳንዳይዛሪ ኬና ኦꬃዱስ። ታስ ሞጎስ ጊዳና ማላ ታ ኣሾ ካሴታ ቲያዱስ።
MAR 14:9 ታ ኢንቴስ ቱሙ ጋይስ፤ ሃይሲ ሚሺራቾ ቃላይ ኣላሜ ኩሜꬃን ሳባኬቲዛሶን ኣዋንካ ኢዛ ኦꬂዳይሲ ኢዞ ሃሳኢሲዛዝ ጊዲዲ ሃሳዬታና» ጊዴስ።
MAR 14:10 ሄሳፌ ጉዬ ታማኔ ናምኣታፔ ኢሶይ ኣስቆሮንቶ ዩሁዳይ ዬሱሳ ኣꬂ ኢማናስ ቄሴታ ሃላቃታኮ ቢዴስ።
MAR 14:11 ኢስቲካ ሄሳ ሲዪዲ ኡፋዬቲዳ፤ ኢዛስ ሚሼ ኢማናስ ኢዛራ ጊጊዳ፤ ሄሳ ጊሻስ ዬሱሳ ኣꬂ ኢማናስ ኢንጄ ዎዴ ናጊሼ ጋምኢዴስ።
MAR 14:12 ፓዚጋ ዶርሲ ሹኬቲዛ ኡኬꬅ ሙሳ ቦንቺዛ ኮይሮ ጋላስ ዬሱሳ ካሊዛይቲ ዬሱሳኮ ሺቂዲ፥ «ፓዚጋ ካዎ ማናሶ ኣዋን ጊጊሳና ማላ ኮያይ?» ጊ ኦይቺዳ።
MAR 14:13 ኢዚካ ባና ካሊዛይታፔ ናምኣታ፥ «ካታማ ቢቴ፤ ኢንቴ ቢሺን ሃꬄ ኦቶራ ቶኪዳ ኢሳዴይ ኢንቴናራ ጋጋና።
MAR 14:14 ኢዚ ቢዲ ጌሊዛሶ ጋካናስ ኢዛ ካሊቴ። ኬꬃዴዛስ፥ ‹ኣስታማሬይ ኔና፥ ታና ካሊዛይታራ ፓዚጋ ካዎ ማናስ ታስ ጊዲዛ ኢማꬃ ሼምፖሶይ ኣዋይሴ? ጊዴስ› ጊቴ።
MAR 14:15 ኢዚካ ቦላ ፖቄ ቦላ ዲዛ ጊጊ ኡቲዳ ኣሆሶ ኢንቴና ቤሳና፤ ሄን ኢዛን ጊግሲቴ» ጊ ኪቲዴስ።
MAR 14:16 ኢዛ ካሊዛይቲካ ኬዚዲ ካታማ ቢዳ። ዉሪካ ዬሱሲ ጊዳ ማላ ሃኒ ቤቲዴስ፤ ፓዚጋካ ሄን ጊግሲዳ።
MAR 14:17 ጋዴይ ቃሚሺን ዬሱሲ ባና ካሊዛ ታማኔ ናምኣታራ ጋኪዴስ።
MAR 14:18 ኢስቲ ማዳን ዲሺን፥ «ታ ኢንቴስ ቱሙ ጋይስ፤ ኢንቴ ጊዶፌ ኢሶይ ኢዚካ ታናራ ኢሲፌ ሚዛይሲ ታና ኣꬂ ኢማና» ጊዴስ።
MAR 14:19 ኢስቲካ ሙዞቲዲ፥ «ታኔሻ? ታኔሻ?» ጊዲ ኢሶይ ኢሶይ ዬሱሳ ኦይቺዳ።
MAR 14:20 ኢዚካ ኢስታስ፥ «ታማኔ ናምኣታፔ ኢሶይ ታናራ ባ ኩሼ ኬሬን ዬዲዛዴ።
MAR 14:21 ካሴ ጻፌቲዳ ማላ ኣሳ ናይ ኢዛ ጊሻስ ሃይቃና ሺን ኣሳ ና ኣꬂ ኢሚዛዴስ ኣዬ ኣና! ሄሳዴይ ካሴ ዬሌቶንታ ኣቲዳኮ ኢዛስ ሎኦኮሺን!» ጊዴስ።
MAR 14:22 ኢስቲ ሚሺን ኡኬꬃ ኤኪ ኣንጂዲኔ ሜንꬂዲ ባና ካሊዛይታስ፥ «ሃይሳ ታ ኣሾ ሄኢቴ» ጊ ኢሚዴስ።
MAR 14:23 ኡሻካ ዴንꬂ ጋላቲዲ ኢስታስ ኢሚን ኢስቲ ዉሪካ ኡዪዳ።
MAR 14:24 ቃሴ ዬሱሲ፥ «ሃይሲ ዳሮታ ጊሻስ ጉካና ታ ኦራꬃ ጫቆ ሱꬃ።
MAR 14:25 ታ ኢንቴስ ቱሙ ጋይስ፤ ኦራꬃ ዎይኔፔ ጊጊዳ ኡሻ ጾሳ ካዎቴꬃን ታ ኡያና ዎዴ ጋካናስ ናምኣንꬆ ሃይሳ ኡዪኬ» ጊዴስ።
MAR 14:26 ሄሳፌ ጉዬ ዬꬃ ኢሲፌ ዬጺዲ ፑዴ ዳብራዛይቴ ዙማ ቦላ ኬዚዳ።
MAR 14:27 ዬሱሲ፥ « ‹ታ ሄሚዛይሳ ሾጫና፤ ሄ ዎዴ ኢዛ ዶርሳቲ ላሌታና› ጌቴቲ ጻፌቲዳይሳ ማላ ኢንቴ ዉሪካ ታናን ꬉጴታና።
MAR 14:28 ታ ዴንዲዳፔ ጉዬ ጊዲኮ ታ ኢንቴፌ ካሴታዳ ጋሊላ ባና» ጊዴስ።
MAR 14:29 ጴጽሮሲካ፥ «ኣሳይ ዉሪ ꬉጴቲኮካ ታኒ ꬉጴቲኬ!» ጊዴስ።
MAR 14:30 ዬሱሲካ፥ «ታ ኔስ ቱሙ ጋይስ፤ ሃች ኦማርስ ኩቶይ ናምኡቶ ዋሳና ጋካናስ ኔኒ ታና ሄꬑቶ ካዳና» ጊዴስ።
MAR 14:31 ጴጽሮሲ ቃሴ፥ «ታ ኔናራ ሃይቂዛኮካ ሙሌካ ኔና ካዲኬ» ጊዲ ኬሂ ሚንꬂ ዮቲዴስ። ሃንኮይቲካ ዉሪ ኢዛይሳꬆ ጊዳ።
MAR 14:32 ሄሳፌ ጉዬ ጌቴሴማኔ ጌቴቲዛሶ ቢዳ፤ ዬሱሲካ ባና ካሊዛይታ፥ «ታኒ ዎሲሺን ኢንቴ ሃይሳን ጋምኢሺቴ» ጊዴስ።
MAR 14:33 ጴጽሮሳ፥ ያቆቤኔ ዮሃኒሳ ባናራ ኤኪ ቢዴስ። ኬሂ ቆፒዴሲኔ ሜቶቲዴስ።
MAR 14:34 ቃሴካ ኢስታስ፥ «ታ ሼምፖያ ዳሮ ሜቶታዱስ ኢንቴ ሃን ዲሺቴ። ꬊስኮንታ ናጊቴ» ጊዴስ።
MAR 14:35 ኢስታ ኣቻፌ ጉꬅ ሃኪ ቢ ቢታ ቦላ ጉፋኒዲ ሄ ሳቴያ ኢዛፔ ኣꬋና ማላ ዎሲዴስ።
MAR 14:36 «ታ ኣዋዉ! ኔስ ዉሪ ዳንዳዬቴስ፤ ሃይሳ ዋዬ ጹኣ ታፔ ሃሳ። ጊዲኮካ ኔ ሼኔፔ ኣቲን ታ ሼኔይ ሃኖፖ» ጊዴስ።
MAR 14:37 ኢዚ ሄፔ ሲሚ ዪሺን ኢዛ ካሊዛይቲ ꬊስኪዳይታ ቤኢዴስ። ጴጽሮሳካ፥ «ሲሞና ꬊስካዲ? ሃራይ ኣቶሺን ኢሲ ሳቴካ ሚናዳ ናጎይ ኔና ጾኒዴ?
MAR 14:38 ኢንቴ ፓጬን ጌሎንታ ማላ ቤጊዲ ዎሲቴኔ ሚኒቴ። ኣያናይ ጊጌቲ ኡቲዴስ ሺን ኣሾይ ጊዲኮ ዳቡራንቻ» ጊዴስ።
MAR 14:39 ቃሴካ ቢዲ ኮይሮይሳꬆ ዎሲዴስ።
MAR 14:40 ኢዚ ናምኣንꬆ ሲሚ ዪሺን ኢስታ ኣይፌን ꬊስኮይ ዴጺን ꬊስኪዳይታ ዴሚዴስ ሺን ኢስቲ ኢዛስ ኣይ ዛራናኮን ኤሪቤቴና።
MAR 14:41 ሄꬓንꬆ ዪዲ፥ «ሃኢካ ኢንቴ ኢቺዲ ሼምፔቲ? ሃኢ ጊዳና፤ ሳቴያካ ጋካዱስ፤ ሄኮ ኣሳ ናይ ናጋራንቻታ ኩሼን ኣꬊ ኢሜታና።
MAR 14:42 ኣኔ ኤቂቴ ቦስ፤ ታና ኣꬂ ኢማናዴይ ዪዴስ» ጊዴስ።
MAR 14:43 ዬሱሲ ቡሮ ሃሳያን ዲሺን ታማኔ ናምኣታፔ ኢሶይ ዩሁዳይ ዪዴስ። ኢዛራ ኢሲፌ ቄሴ ሃላቃታፔኔ ሙሴ ዎጋ ታማርሲዛይታፔ ኪቴቲዳ ዳሮ ኣሳይ ጊꬃ ማሻኔ ዱርቃ ኦይኪዲ ዪዴስ።
MAR 14:44 ኢዛ ኣꬂ ኢማና ዩሁዳይ ኢስታስ፥ «ኣሳ ጊዶፌ ታ ዬሪዛዴይ ኢዛ ጊዲዳ ጊሻስ ኦይኪዲ ሎኤꬂ ናጊ ኤፍቴ» ጊዲ ካሴቲ ማላታ ኢሚ ዎꬂዴስ።
MAR 14:45 ጋኪዳ ማላ ዩሁዳይ ዬሱሳኮ ሺቂዲ፥ «ኣስታማሬ!» ጊዲ ዬሪዴስ።
MAR 14:46 ኣሳቲካ ዬሱሳ ኦይኪዳ።
MAR 14:47 ኢዛ ኣቻን ኤቂዳ ኢሶይ ማሻ ኮሆፔ ሾዲ ቄሴታ ሃላቃዛ ኣሽካራ ሃይꬅ ቃንጺዴስ።
MAR 14:48 ዬሱሲካ ኢስታስ፥ «ፓንጋ ማላ ታና ኦይካና ማሻኔ ዱርቃ ኦይኪዲ ዬቲ?
MAR 14:49 ዎንቲን ዎንቲን ጾሳ ኬꬃን ታማርሳሼ ታ ኢንቴናራ ዲሺን ኦይኪቤኬታ ሺን ካሴ ጻፌቲዳይሲ ፖሌታና ማላ ሃይሲ ሃኒዴስ» ጊዴስ።
MAR 14:50 ሄ ዎዴ ኢዛ ካሊዛይቲ ዉሪ ኢዛ ዬጊ ኣጊ ቢዳ።
MAR 14:51 ባ ካሎቴꬅ ቄሪ ናጻላን ካሚዳ ኢሲ ናይ ዬሱሳ ካሊሺን ኣሳይ ኢዛ ኦይኪን፥
MAR 14:52 ናዚ ናጻላ ዬጊዲ ካሎ ኪቺዴስ።
MAR 14:53 ዬሱሳካ ጌዴ ቄሴታ ሃላቃኮ ኤፊዳ፤ ቄሴታ ሃላቃቲ፥ ዴሬ ጪማቲኔ ሙሴ ዎጋ ታማርሲዛይቲ ሄን ኢሲፌ ዉሪ ሺቂዳ።
MAR 14:54 ጴጽሮሲካ ዬሱሳ ሃሆራ ካሊሼ ቄሴታ ሃላቃዛ ጊቤ ጋካናስ ቢዴስ። ኢዚ ሄን ኡቲዲ ሃራ ኣሳታራ ታማ ሆኢሺን፥
MAR 14:55 ቄሴታ ሃላቃቲኔ ዴሬ ጪማቲ ዉሪ ዬሱሳ ዎꬋናስ ማርካታና ኣስ ኮዪዳ ሺን ዴማናስ ዳንዳይቤቴና።
MAR 14:56 ዳሮቲ ኢዛ ቦላ ዎርዶራ ማርካቲኮካ ማርካታ ቃላይ ኦይኬቲቤና።
MAR 14:57 ኢሲ ኢሲ ማርካቲ ዴንዲዲ ዎርዶራ፥
MAR 14:58 «ሃይሲ ኣዴዚ፥ ‹ታ ኣሳ ኩሼን ኬጼቲዳ ጾሳ ኬꬃ ላላዳ ኣሳ ኩሼይ ቦቾንታዝ ሃራ ሄꬑ ጋላሳራ ታ ኬጻና› ጊሺን ኑ ሲዪዶስ» ጊ ማርካቲዳ።
MAR 14:59 ጊዶ ኣቲን ኢስታ ማርካቴꬂ ኢሲ ቦላ ዎꬊቤና።
MAR 14:60 ቄሴታ ሃላቃይካ ኢስታ ሲንꬃን ኤቂዲ፥ «ሃይቲ ኔ ቦላ ማርካቲዛይሲ ኣዜ? ኔ ኣዛስ ዶና ዛሪኪ?» ጊዲ ዬሱሳ ኦይቺዴስ።
MAR 14:61 ጊዶ ኣቲን ዬሱሲ ኢስታስ ኣይኮካ ዛሮንታ ጮኡ ጊዴስ፤ ቄሴታ ሃላቃይ ቃሴካ፥ «ኣንጄቲዳ ጾሳ ናይ ኪርስቶሲ ኔኔ?» ጊ ኦይቺዴስ።
MAR 14:62 ዬሱሲካ ዛሪዲ፥ «ኤ፤ ታናኮ! ኣሳ ናይ ዎልቃማ ጾሳ ኡሻቻን ኡቲሺኒኔ ሳሎ ሻራራ ዪሺን ኢንቴ ኢዛ ቤያና» ጊዴስ።
MAR 14:63 ቄሴታ ሃላቃይ ባ ማይኦ ዳኪዲ፥ «ኑስ ሃራ ኣዛ ማርካ ኮሺዜ?
MAR 14:64 ኢዚ ጫሻ ቃላ ጾሳ ቦላ ሃሳይሺን ኢንቴ ሲዪዴታ፤ ሃኢች ኢንቴስ ኣይ ሚሳቲዜ?» ጊዴስ። ኢስቲካ፥ «ኢዛስ ሃይቆይ ቤሴስ» ጊዲ ዉሪካ ኢሲ ቃላን ፒርዲዳ።
MAR 14:65 ሄ ዎዴ ኢሲ ኢሲ ኣሳቲ ኢዛ ቦላ ጩች ጩቲዳ፤ ኢዛ ኣይፌ ጎዚ ኦይኪዲ ኢጪሼ፥ «ኣኔ ቲንቢቴ ዮታ» ጊዳ። ባጋይቲ ቃሴ ሻጋላን ባቂሼ ኤፊዳ።
MAR 14:66 ጴጽሮሲ ዱጌ ባጋራ ሄን ጊቤ ጊዶን ዲሺን ቄሴታ ሃላቃ ጋራዴታፔ ኢሲኒያ ያዱስ።
MAR 14:67 ጴጽሮሲ ታማ ሆኢሺን ቲሺ ሂስታ ጼላዳ፥ «ኔኒ ናዚሬቴ ዬሱሳራ ዳሳ ጊዲኪ?» ጋዱስ።
MAR 14:68 ኢዚ ቃሴ፥ «ኔ ጊዛይሳዴ ታ ኤሪኬ፤ ኔ ጊዛይሲ ታስ ጌሌና» ጊዲ ካዲዴስ። ሄሳፌ ጌዴ ፔንጌ ፖቂ ኤቂ ዲሺን ሄራካ ኩቶይ ዋሲዴስ።
MAR 14:69 ሄ ጋራዴያ ኢዛ ቤኢዳ ማላ ሄን ኤቂዳ ኣሳታስ፥ «ሃይሲ ኣዴዚ ኢዛራ ዲዛ ኣሳታፔ ኢሳዴኮ!» ጋዳ ቃሴካ ሃሳያዱስ።
MAR 14:70 ኢዚ ቃሴካ ካዲዴስ። ጉꬃ ዎዴ ጋምኢሺን ሄን ኤቂዳ ኣሳቲ ጴጽሮሳ፥ «ኔኒ ጋሊላ ኣሳ፥ ሄሳ ጊሻስ ቱማፔ ኔ ኢስታፌ ኢሳዴ» ጊዳ።
MAR 14:71 ጊዶ ኣቲን ኢዚ ቃሴ፥ «ኢንቴ ጊዛዴ ታ ኤሪኬ!» ጊሼ ጫቆኔ ባና ቃንጌꬅ ኦይኪዴስ።
MAR 14:72 ሄራካ ኩቶይ ናምኣንꬆ ዋሲዴስ። ጴጽሮሲካ፥ «ኩቶይ ናምኣ ዋሳናስ ኔ ታና ሄꬓ ካዳና» ጊዳ ዬሱሳ ቃላይ ኢዛስ ቆፌቲን ሂቂሚ ዬኪዴስ።
MAR 15:1 ማላዶ ዎንታራ ቄሴታ ሃላቃቲ፥ ዴሬ ጪማቲኔ ሙሴ ዎጋ ታማርሲዛይቲ ኩሜꬃ ሻንጎ ኣላፌታራ ኢሲፌ ዞሬቲዲ ዬሱሳ ቃቺ ኤኪ ኤፊዲ ጲላጾሳስ ኣꬂ ኢሚዳ።
MAR 15:2 ጲላጾሲካ ዬሱሳ፥ «ኔ ኣይሁዳታ ካዎ?» ጊ ኦይቺዴስ። ዬሱሲካ፥ «ኤ፥ ኔ ጊዳ ማላ» ጊዲ ኢዛስ ዛሪዴስ።
MAR 15:3 ቄሴታ ሃላቃቲካ ዳሮ ዮኦ ኢዛ ቦላ ሺሺ ሞቲዳ።
MAR 15:4 ጲላጾሲ ቃሴ፥ «ኔ ኣዛስ ኦይሻ ዛሪኪ? ሄኮ ኔና ዳሮ ዮኦን ሞቴቴስ» ጊዲ ቃሴካ ኦይቺዴስ።
MAR 15:5 ጊዶ ኣቲን ዬሱሲ ሃኢካ ኢዛስ ኣይኮካ ዛሮ ኢሞንታ ጊሻስ ጲላጾሲካ ማላሌቲዴስ።
MAR 15:6 ፓዚጋ ባኣሌ ጋላስ ጲላጾሲ ዴሬይ ቢርሻና ማላ ኦይቺዳዴ ቢርሺ ዬዲዛ ዎጋይ ካሴ ዴስ።
MAR 15:7 ኢታ ኦሶን ዴሬ ቦላ ዴንዲዲ ሼምፖ ዎꬊዳ ኣሳታራ ኢሲፌ ቃሼቲዳ ባርባኔ ጌቴቲዛ ኢሳዴይ ዴስ።
MAR 15:8 ዴሬይካ ዪዲ ካሴ ሎሴ ጊዲዳይሳ ኢዚ ኦꬃና ማላ ጲላጾሳ ዎሲዴስ።
MAR 15:9 ጲላጾሲካ ኢስታስ፥ «ታ ኢንቴስ ኣይሁዳ ካዎ ቢርሻና ማላ ኮዬቲ?» ጊ ኦይቺዴስ።
MAR 15:10 ጲላጾሲ ሄሳꬆ ኦይቺዳይ ካሴ ቄሴታ ሃላቃቲ ዬሱሳ ቃናቴን ኣꬂ ኢሚዳይሳ ኤሪዛ ጊሻሳ።
MAR 15:11 ቄሴታ ሃላቃቲ ቃሴ፥ «ኢዛ ኤጻ ባርባኔይ ቢርሼቶ!» ጊ ኦይቻና ማላ ዴሬዛ ዴንꬄꬂዳ።
MAR 15:12 ጲላጾሲ፥ «ሂስቲኮ ኢንቴ ኣይሁዳ ካዎ ጊዛ ኣዴዛ ዎስታና ማላ ኮዬቲ?» ጊዴስ።
MAR 15:13 ኢስቲ ቃሴካ፥ «ካቃ! ካቃ!» ጊ ዋሲዳ።
MAR 15:14 ጲላጾሲካ፥ «ኣይ ኢታ ኦꬂዴ?» ጊ ኢስታ ኦይቺዴስ። ኢስቲ ቃሴ፥ «ካቃ! ካቃ!» ጊዲ ካሴፔ ኣꬂ ዋሲዳ።
MAR 15:15 ጲላጾሲካ ዴሬዛ ኡፋይሳና ጊዲ ባርባኔ ኢስታስ ቢርሺዴስ። ዬሱሳ ጋራፊዲ ካቃናስ ኣꬂ ኢሚዴስ።
MAR 15:16 ዎታዳራቲ ዬሱሳ ዴሬ ሃሪዛይሳ ጊቤ ኤኪ ቢዲ ኣቲዳ ዎታዳራታ ኡባ ሺሺዳ።
MAR 15:17 ዬሱሳ ዞኦ ማይኦ ማይዚዳ፤ ኣጉንꬃ ኣኪሊሌ ጻጺዲ ኢዛ ሁኤን ዎꬂዳ።
MAR 15:18 ሄሳፌካ፥ «ኣይሁዳ ካዎ ሳሮይ ኔስ ጊዶ!» ጊሼ ኢዛ ሳሮꬂዳ።
MAR 15:19 ኢዛ ሁኤ ጉፌራ ሾጪዳ፤ ኢዛ ቦላካ ጩቲዳ፤ ጉልባቲዲ ኢዛስ ጎይኒዳ።
MAR 15:20 ኢዛ ቦላ ቂꬊ ካኢዳፔ ጉዬ ካሴ ማይዚዳ ዞኦ ማይኦዛ ቃሪ ኤኪዲ ካሴ ኢዛ ማይኦዛ ዛሪ ማይዚዲ ካቃናሶ ኤኪ ቢዳ።
MAR 15:21 ኣላኪሳንድሮሳኔ ኤሩፎሳ ኣዋ ሲሞና ጌቴቲዛ ኢሲ ቃሬና ዴሬ ኣሲ ዴሬፔ ካታማ ዪዛይሳ ዬሱሳ ማስቃሌ ዎልቃራ ኦይኪ ቶሲዳ።
MAR 15:22 ሄሳፌ ጉዬ ዬሱሳ ጎልጎታ ጌቴቲዛሶ ኤፊዳ፤ ኢዛስ ቢርሼꬃይ፥ «ኣሳ ሁኤ ጉጌ» ጉሳ።
MAR 15:23 ካርቤ ጌቴቲዛ ጫሞራ ዋላኬቲዳ ዎይኔ ጫጄ ኡያና ማላ ኢዛስ ኢሚን ኢዚ ኤኮንታ ኢጺዴስ።
MAR 15:24 ሄሳፌ ጉዬ ኢዛ ካቂዳ፤ ኢዛ ማይኦ ኢሳዴ ኢሳዴ ኣዋይሲ ጋካናኮ ጊዲ ሳማ ዬጊዲ ጊሼቲዳ።
MAR 15:25 ኢስቲ ኢዛ ካቂሺን ዎንታፌ ሄꬑ ሳቴ ጊዲዴስ።
MAR 15:26 ኢስቲ ማስቃሌ ቦላ ጻፊ ሺሺዳ ሞቶ ቃላይ፥ «ኣይሁዳ ካዎ» ጊዛ ቃላ።
MAR 15:27 ኢዛራ ኢሲፌ ናምኡ ፓንጋታ ኢሳ ኢዛፔ ኡሻቻራ ኢሳ ሃዲርሳራ ካቂዳ።
MAR 15:28 ሄሳንካ ካሴ ማጻፋይ፥ «ኢታታራ ኢሲፌ ታይቤቲዴስ» ጊዳ ቲንቢቴ ቃላይ ፖሌቲዴስ።
MAR 15:29 ኦጌራ ኣꬊ ቢዛይቲካ ባ ሁኤ ቃꬂሼ፥ «ኦይ! ኦይ! ጾሳ ኬꬃ ላላዳ ሄꬑ ጋላሳን ኬጻናይ ኔኔ?» ጊዲ ኢታ ጫሼ ጫዪሼ፥
MAR 15:30 «ኣኔ ሃኢ ማስቃሌ ቦላፌ ዎꬋዳ ኔና ኣሻ» ጊዳ።
MAR 15:31 ሄሳꬆካ ቄሴታ ሃላቃቲኔ ሙሴ ዎጋ ታማርሲዛይቲ ባ ጊዶን ኢሶይ ኢሳስ፥ «ሃራታ ኣሺዴስ ሺን ባና ኣሻና ዳንዳይቤና» ጊዲ ኢዛ ቂꬊዳ።
MAR 15:32 «ኑ ኢዛ ቤኢዲ ኣማናና ማላ ኣኔ ሃይሲ ኪርስቶሲ ኢስራኤሌታ ካዎይ ሃኢ ማስቃሌፔ ዎꬎ» ጊዳ። ኢዛራ ካቄቲዳይቲካ ኢዛ ቦላ ጫሼ ኮሪዳ።
MAR 15:33 ኡሱፑን ሳቴፔ ዶሚዲ ኡዱፉን ሳቴ ጋካናስ ቢታይ ዉሪ ꬉሚዴስ።
MAR 15:34 ኡዱፉን ሳቴ ቦላ ዬሱሲ፥ «ኤሎሄ! ኤሎሄ! ላማ ሳባቂታኔ» ጊዲ ቃላ ꬎቁ ሂስቲዲ ዋሲዴስ። ሄሳስ ቢርሼꬃይ፥ «ታ ጾሶ! ታ ጾሶ! ኔ ታና ኣዛስ ኣጋዲ?» ጉሳ።
MAR 15:35 ሄን ኤቂዳ ኣሳፔ ኢሲ ኢሲ ኣሳቲ ሄሳ ሲዪዲ፥ «ኤላሳ ጼይጌስኮ!» ጊዳ።
MAR 15:36 ሄሳፌ ኢሲ ኣሲ ኤሌሊ ቢዲ ጫሊዳ ዎይኔ ጫጄ ኢስፖንጄ ማላ ሚሻን ጌልꬂ ኬሲዲ ሚꬃ ጼራን ኦይꬂዲ ኡያና ማላ ዬሱሳስ ሺሺዴስ። ሄሳፌ ቃሴ፥ «ኣኔ ኣጋጊቴ፤ ኤላሲ ዪዲ ኢዛ ካቆፔ ዎꬂሺን ኑ ቤያና» ጊዴስ።
MAR 15:37 ሄሳፌ ዬሱሲ ቃላ ꬎቁ ሂስቲ ዋሲዲ ሼምፖ ኬዚዴስ።
MAR 15:38 ጾሳ ኬꬄ ማጋላሻይ ሁኤራ ዱጌ ናምኡ ኬዚ ዳኬቲዴስ።
MAR 15:39 ዬሱሳ ጊናራ ኤቂዳ ኢሲ ማቶ ሃላቃይ ዬሱሲ ሄሳꬆ ጊታ ቃላራ ዋሲዲ ሼምፖ ኬዚሺን ቤኢዲ፥ «ሃይሳዴይ ቱሙ ጾሳ ናኮሺን» ጊዴስ።
MAR 15:40 ሄ ዎዴ ማጫሳቲ ሃኒዛይሳ ሃሆን ዲዲ ጼሊዳ። ኢስታ ጊዶፌ ማግዳሌፔ ዪዳ ማራማኔ ካሎቲዛ ያቆቤ ዮሳ ኣዮ ማራሚራ ቃሴካ ሳሎሚራ ኢሲፌ ዴቴስ።
MAR 15:41 ሄይቲ ማጫሳቲ ጋሊላን ዬሱሳ ካሊሼኔ ኢዛስ ኦꬂሼ ጋምኢዳይታ። ኢስታራካ ኢሲፌ ሃራ ዳሮ ማጫሳቲ ዬሩሳላሜ ቢዳ።
MAR 15:42 ጋዴይ ቃሚ ቃሚ ቢሺን ሳምባታስ ጊጌቲዛ ጋላሲ ጋኪዴስ።
MAR 15:43 ዴሬ ጪማታ ጊዶን ቦንቼቲዳ ኢሲ ኣርማቲያሴ ዴሬ ኣስ ዮሴፌ ጌቴቲዛይሲ ጾሳ ካዎቴꬅ ናጊሼ ዲዛዴይ ባቦንታ ጲላጾሳኮ ቢዲ ዬሱሳ ኣሃ ዎሲዴስ።
MAR 15:44 ጲላጾሲካ ኢዚ ሂኒ ዎዴ ኤሌራ ሃይቂዳይሳ ሲዪዲ ማላሌቲዴስ። ማቶ ሃላቃ ጼይጊሲዲ፥ «ኢዚ ሃይቂ ጋምኢዴ?» ጊዲ ኦይቺዴስ።
MAR 15:45 ኢዚ ሃይቂዳይሳ ማቶ ሃላቃይ ጌሺ ኤሪዳፔ ጉዬ ዬሱሳ ኣሃ ዮሴፌስ ኢሚዴስ።
MAR 15:46 ዮሴፌይካ ሞጎ ማይኦ ሻሚዲ ኣሃ ማስቃሌፔ ዎꬂዲ ሞጎ ማይኦን ጻጺዲ ሹቻፌ ዎጬቲዳ ዱፎን ሞጊዴስ። ዱፋ ዶና ሹቻራ ጎርዲዴስ።
MAR 15:47 ማግዳሌፔ ዪዳ ማራሚራኔ ዮሴፌ ኣዮ ማራሚራ ዬሱሳ ኣሃ ኣዋን ሞጊዳኮ ቤኢዳ።
MAR 16:1 ሳምባታይ ኣꬊዳፔ ጉዬ ማግዳሌ ማራማ፥ ያቆቤ ኣዮ ማራሚራኔ ሳሎሚራ ኢሲፌ ቢዲ ዬሱሳ ኣሃ ቲያናስ ሺቶ ሻሚዳ።
MAR 16:2 ሳሚንታፌ ኮይሮ ጋላስ ማላዶ ዎንታራ ቡሮ ኣርሼይ ኬዚዳ ማላ ዬሱሳ ዱፎኮ ቡሮ ቢሺን፥
MAR 16:3 «ዱፎዛ ዶናፔ ሹቻ ኑስ ኦኒ ጌንዴሪሳኔ?» ጊዲ ባ ጊዶን ሃሳዬቲዳ።
MAR 16:4 ኢስቲ ꬎቁ ጊ ጼሊሺን ዳሮ ጊታ ሹቻይ ዱፎዛ ዶናፔ ጌንዴሪዳይሳ ቤኢዳ።
MAR 16:5 ዱፎዛ ጊዶ ጌሊዳ ማላ ኢሲ ቦꬃ ማይኦ ማይኢዳ ፓንꬂ ኡሻቻ ባጋራ ኡቲዳይሳ ቤኢዲ ዳጋሚዳ።
MAR 16:6 ኢዚ ቃሴ ኢስታስ፥ «ዳጋሞፍቴ! ኢንቴ ካቄቲዳ ናዚሬቴ ዬሱሳ ኮዬታ፤ ኢዚ ዴንዲዴስ፤ ሃን ዴና፤ ኢስቲ ኢዛ ዎꬂዳሶ ሃይሳ ቤኢቴ።
MAR 16:7 ጊዶ ኣቲን ኢንቴ ቢዲ ኢዛ ካሊዛይታሲኔ ጴጽሮሳስ ካሴ ኢንቴስ ዮቲዳ ማላ ኢንቴፌ ካሴቲዲ ኢዚ ጋሊላ ባና። ኢንቴ ኢዛ ሄን ዴማና ጊዲ ኢስታስ ዮቲቴ» ጊዴስ።
MAR 16:8 ማጫሳቲካ ማላሌቲሼኔ ኮኮሪሼ ዱፋፔ ኬዚ ባቃቲዳ። ባቢዳ ጊሻስ ኦናስካ ኣይኮካ ቃቲቤቴና።
MAR 16:9 ሳሚንታፌ ኮይሮ ጋላስ ዎጋ ዎንታ ማላዶራ ኢዚ ሃይቆፔ ዴንዲዳፔ ጉዬ ዬሱሲ ኢዚፔ ላፑን ዳይዳንꬅ ኬሲዳ ማግዳሌ ማራሚስ ኮይሮ ቤቲዴስ።
MAR 16:10 ኢዛካ ባዳ ካሴ ኢዛራ ዲዛይቲ ካዮቲሼኔ ዬኪሼ ዲሺን ዴማዳ ዮታዱስ።
MAR 16:11 ኢስቲ ዬሱሲ ፓጻ ዲዛይሳኔ ኢዛ ታ ዬሱሳ ቤያዲስ ጊዳይሳ ሲዪዲ ኣማኒቤቴና።
MAR 16:12 ሄሳፌ ጉዬ ኢዛ ካሊዛይታፔ ናምኣቲ ጌዴ ዴሬ ጋርስ ቢሺን ዬሱሲ ኢስታስ ሃራ ኣስ ሚሳቲ ቤቲዴስ።
MAR 16:13 ኢስቲካ ሲሚዲ ሄሳ ኢዛ ካሊዛይታፔ ኣቲዳይታስ ዮቲዳ፤ ጊዶ ኣቲን ኢዛ ካሊዛይቲ ሲዪዲ ኣማኒቤቴና።
MAR 16:14 ሄሳፌ ጉዬ ታማኔ ኢሲኔቲ ማዳ ቦላ ዲሺን ዬሱሲ ኢስታስ ቆንጪዴስ። ኢዚ ሃይቆፔ ዴንዲን ኢዛ ቤኢዳ ኣሳቲ ኢስታስ ዮቲን ሲዪዲ ኣማኖንታ ኣጊዳ ጊሻስ ኢስታስ ኣማኖይ ባይንዳይሳኔ ኢስታ ዎዚና ሙሜቴꬃ ጊሻስ ኢስታ ቦሪዴስ።
MAR 16:15 ኢስታስካ፥ «ኣላሜ ኡባሶ ቢቴ፥ ሚሺራቾ ቃላ ሜꬌቴꬅ ኡባስ ሳባኪቴ።
MAR 16:16 ኣማኒዳይኔ ጻማቄቲዳይ ኣታና። ኣማኖንታይ ጊዲኮ ፒርዴታና።
MAR 16:17 ታና ኣማኒዛይታ ሃይቲ ማላታቲ ካላና። ኢስቲ ታ ሱንꬃን ዳይዳንꬃታ ኬሳና፤ ኦራꬃ ቃላንካ ሃሳያና።
MAR 16:18 ኢስቲ ሾሻታ ባ ኩሼራ ኦይካና፤ ዎꬊዛ ማርዜ ኡዪኮካ ኢስታ ቆሄና። ባ ኩሼ ሃርጋንቻታ ቦላ ዎꬂ ዎሲኮ ሃርጋንቻቲ ፓጻና» ጊዴስ።
MAR 16:19 ጎዳ ዬሱሲ ሄሳ ዮቲዳፔ ጉዬ ፑዴ ሳሎ ዴንዲ ቢዲ ጾሳ ኡሻቻን ኡቲዴስ።
MAR 16:20 ኢዛ ካሊዛይቲ ሄሳፌ ኬዚዲ ኡባሶን ኣꬊ ኣꬊ ሳባኪዳ። ጎዳይካ ኢስታራ ኦꬂዴስ። ኢስታ ቲሚርቴዛ ኤኪዲ ኦꬂዛይታስ ባ ዮቲዳ ቃላካ ማላታ ኦꬂ ኦꬂ ሚንꬂዴስ።
LUK 1:1 ቦንቾ ቶፊሎሳ! ኑ ኣቻን ሃኒዳ ዮኦታ ጊሻስ ዳሮ ኣሳቲ ባስ ሃኒዳ ማላ ጻፊዳ።
LUK 1:2 ሄ ታሪኬዚካ ኮይሮፔ ዴንꬂዲ ባ ኣይፌራ ቤኢዳ ማርካቲኔ ጾሳ ቃላ ዮቲዳይቲ ኑስ ኣꬂዳይሳ።
LUK 1:3 ታኒካ ታ ባጋራ ጻጶፔ ዴንꬃዳ ኬሃ ናጌታዳኔ ፓጫ ጼላዳ ታሪኬዛ ዉርሳ ሲንꬄ ጻፌታናስ ቤሲዛይሳ ሲንꬃሳዳ ካሊዲ ጻፌታናስ ቤሲዛይሳ ካሌꬃዳ ናጌታዳ ኔስ ጻፋና ማላ ታስ ሎኦ ጊዲ ቤቲዴስ።
LUK 1:4 ሃይሳ ኡባ ታ ኦꬂዛይ ኔ ታማርዳይሲ ቱማ ጊዲዳይሳ ኔና ኤሮ ጉሳሳ።
LUK 1:5 ሄርዶሲ ዩሁዳ ቢታን ካዎቲዳ ዎዴ ኣቢያ ጌቴቲዛ ቄሴታ ሃላቃዛ ባጋፌ ቄሴቴꬃ ኦሶ ታራይ ኢዛ ጋኪዳ ዛካራሳ ጌቴቲዛ ኢሲ ቄሴይ ዴስ። ኢዛ ማቼያካ ኤልሳቤጾ ጌቴታዉስ፤ ኢዛካ ኣሮኔ ባጋ ኣሳ። ናምኣቲካ ጎዳ ኣዛዞኔ ኢዛ ዎጋ ዎሶይ ባይንዳ ናጊዲ ዲዛይታኔ ጾሳ ሲንꬃን ጺሎ ኣሳ።
LUK 1:7 ጊዶ ኣቲን ኤልሳቤጻ ና ዬሎንታ ማይኔ ጊዲዳ ጊሻስ ኢስታስ ናይ ባ፤ ናምኣቲካ ዎዴይ ቢዳ ኣሳ።
LUK 1:8 ዛካራሲ ጾሳ ሲንꬃን ቄሴቴꬃ ኦሶ ታራይ ኢዛ ጋኪን ኢዚ ኦꬂሺን
LUK 1:9 ቄሴታስ ዲዛ ዎጋ ማላ ጾሳ ኬꬃን ጌሊዲ ኤጻኔ ጩዋሳና ማላ ኤጻይ ኢዛ ጋኪዴስ።
LUK 1:10 ኤጻኔይ ጩዋቲሺን ኣሳይ ዉሪካ ካሬን ዲዲ ዎሴስ።
LUK 1:11 ጎዳ ኪታንቻይ ኤጻኔይ ጩዋቲዛ ሶፔ ኡሻቻ ባጋራ ኤቂዲ ዛካራሳስ ቤቲዴስ።
LUK 1:12 ዛካራሲካ ኢዛ ቤኢዲ ኬሂ ዳጋሚዲ ባቢዴስ።
LUK 1:13 ኪታንቻይ ዛካራሳስ፥ «ባቦፋ! ኔ ዎሳይ ሴቴቲዴስ፤ ኔ ማቼያ ኤልሳቤጻ ኔስ ኣቱማ ና ዬላና፤ ኢዛ ሱንꬃካ ኔ ዮሃኒሳ ጋዳ ሱንꬃና።
LUK 1:14 ኢዛ ዬሌታን ኔኒ ዳሮ ኡፋዬታና፤ ዳሮ ኣሳይካ ኡፋዬታና።
LUK 1:15 ጎዳ ሲንꬃን ኢዚ ጊታ ጊዳና። ዎይኔፔ ኦሴቲዳ ጫጄ ጊዲንካ ሃራ ማꬆሲዛ ኡሹ ጊዲንካ ኢዚ ኡዬና፤ ኢዚ ቡሮ ባ ኣዬይ ቃንꬃን ዲሼ ጺሎ ኣያናን ኩማና።
LUK 1:16 ኢስራኤሌ ኣሳፔ ዳሮታ ኢስታ ጾሳኮ ዛራና።
LUK 1:17 ኣዋታ ዎዚና ኢስታ ናይታኮ፥ ኣዛዜቶንታይታካ ጌዴ ጺሎታ ጪንጫቴꬃኮ ዛራና ማላኔ ጎዳስ ቤሲዛ ዴሬ ጊጊሳና ማላ ኤላሳ ኣያናኒኔ ኢዛ ዎልቃን ጎዳፔ ሲንꬃራ ኢዚ ባና» ጊዴስ።
LUK 1:18 ዛካራሲ ኪታንቻዛስ፥ «ታኒ ጪማ፤ ታ ማቼያካ ጪማዱስ፤ ታኒ ሃይሳ ኣዛን ኤራኔ?» ጊዲ ኦይቺዴስ።
LUK 1:19 ኪታንቻዚካ ዛሪዲ፥ «ታኒ ጾሳ ሲንꬃን ኤቂዛ ጋብሬሌ። ታኒካ ሃ ሚሺራቾዛ ኔስ ጋꬃናስ ኪቴታዳ ያዲስ።
LUK 1:20 ሄኮ ኔኒ ባ ዎዴን ፖሌታና ታ ቃላ ኣማኖንታ ኢጺዳ ጊሻስ ኔ ዶናይ ዱዳና፤ ኔኒካ ሃሳያና ዳንዳያካ» ጊዴስ።
LUK 1:21 ሄ ዎዴ ዴሬይ ዛካራሲ፥ «ጾሳ ኬꬃፌ ኬዞንታ ኣዛስ ጋምኢዳኮ» ጊዲ ሞꬌቲሼ ናጊዴስ።
LUK 1:22 ኢዚ ጾሳ ኬꬃፌ ኬዚዲ ኣሳ ሃሳይሳናስ ዳንዳይቤና፤ ማላቲ ማላቲ ቤሶፔ ኣቲን ሃሳያናስ ዳንዳዮንታ ኣጊን ኣሳይ ኢዚ ጾሳ ኬꬃን ጾሳፌ ኦራꬃ ሚሽ ቤኢዳይሳ ኤሪዴስ።
LUK 1:23 ዛካራሲካ ባ ኦሶ ታራይ ፖሌቲዳፔ ጉዬ ባሶ ሲሚዴስ።
LUK 1:24 ሄሳፌ ጉዬ ኢዛ ማቼያ ኤልሳቤጻ ና ቃንꬃታዱስ፥ ኢቻሻንꬆ ኣጊናይ ጋካናስ ኣሲ ባና ቤኦንታ ማላ ቆቴታዱስ።
LUK 1:25 ኢዛካ፥ «ጎዳይ ባ ማሮታን ታ ሌቄቲዳይሳ ኣሳ ጊዶፌ ዲጋናስ ሃ ዎዴዛን ሃይሳ ታስ ኦꬂዴስ» ጋዱስ።
LUK 1:26 ኤልሳቤጻ ቃንꬃቲዳ ኡሱፑንꬃ ኣጊናን፥ ጾሲ ባ ኪታንቻ ጋብሬሌ፥ ጋሊላ ቢታን ዲዛ ናዚሬቴ ጌቴቲዛ ካታማ ዬዲዴስ።
LUK 1:27 ኢዚካ ካዎ ዳዊቴ ዜሬꬅ ጊዲዳ ዮሴፌ ጌቴቲዛ ኣሳስ ጊጋ ኡቲዳ ማራሞ ጌቴቲዛ ጌላኦይኮ ኪቴቲዴስ።
LUK 1:28 ዪዲኔ ኢዛ ዲዛሶ ጌሊዲ፥ «ሃኔ ጾሲ ኔና ኣንጂዳሬ ሳሮ! ጎዳይ ኔናራ ዴስ ኔኒካ ኣንጄቲዳሮ» ጊዴስ።
LUK 1:29 ማራማ ኪታንቻ ሃሳያን ኬሃ ዳጋማዳ፥ «ሃይሲ ኣይ ጊዛ ሳሮካ?» ጋዳ ዮኦዛ ኬሃ ቆፓዱስ።
LUK 1:30 ኪታንቻይካ ማራሞ፥ «ጾሲ ኔናን ኡፋዬቲዛ ጊሻስ ባቦፋ!
LUK 1:31 ኔኒ ቃንꬃታና፤ ኣቱማ ናካ ዬላና፤ ሱንꬃካ ዬሱሳ ጋዳ ሱንꬃና።
LUK 1:32 ኢዚካ ጊታ ጊዳና፤ ኡባፌ ቦላ ጊዲዳ ጾሳ ና ጌቴታና፤ ጎዳ ጾሲ ኢዛ ኣዋ ዳዊቴ ካዎቴꬃ ኢዛስ ኢማና።
LUK 1:33 ኢዚ ኢስራኤሌ ናይታ ቦላን ሜርናስ ካዎታና፤ ኢዛ ካዎቴꬃስካ ዉርሴꬂ ዴና» ጊዴስ።
LUK 1:34 ማራማካ ኪታንቻስ፥ «ታኒ ኣዴ ጌላቤኬ ሺን ሃይሲ ዋኒ ሃናኔ?» ጋዳ ኦይቻዱስ።
LUK 1:35 ኪታንቻይካ ማራሚስ፥ «ጺሎ ኣያናይ ኔ ቦላ ዎꬋና፤ ኡባፌ ቦላ ጾሳ ዎልቃይ ኔ ቦላ ኩዋሳና፤ ሄሳ ጊሻስ ዬሌታና ናዚ ጌሻ ጾሳ ና ጌቴታና።
LUK 1:36 ኣሲ ዬሉኩ፤ ኢዛ ማይኔ ጊዲ ሃሳይዛ ኔ ዳቦያ ኤልሳቤጻ ጪማቴꬃን ኣቱማ ና ቃንꬃታዳ ዬላናስ ኡሱፑንꬆ ኣጊና ኦይካዱስ።
LUK 1:37 ጾሳስ ሃኖንታ ሚሺ ዴና» ጊዴስ።
LUK 1:38 ማራማካ ዛራዳ፥ «ሄኮ ታኒ ጾሳ ኣይሌ ዲኪና፤ ኔ ጊዳ ማላ ታስ ሃኖ» ጊን ኪታንቻይ ኢዚፔ ሻኬቲዲ ቢዴስ። ማራማ ኤልሳቤጾ ቤያና ባዱስ።
LUK 1:39 ማራማካ ሄ ዎዴ ማታራ ኤሶታ ዴንዳዳ ፑዴ ጌዜ ዴሬን ዲዛ ኢሲ ዩሁዳ ካታማ ባዱስ።
LUK 1:40 ዛካራሳ ኬꬄ ጌላዳ ኤልሳቤጾ ሳሮታዱስ።
LUK 1:41 ኤልሳቤጻ ማራሚ ሳሮካ ሲዪዳ ማላ ቃንꬃን ዲዛ ናዚ ኢዚ ቃንꬃን ጉፒዴስ፥ ኤልሳቤጺንካ ጺሎ ኣያናይ ኩሚዴስ።
LUK 1:42 ኢዛካ ባ ቃላ ꬎቁ ሂስታዳ፥ «ማጫሳ ኡባፌ ኔ ኣንጄቲዳሮ፤ ኔ ቃንꬃን ዲዛ ናዚካ ኣንጄቲዳይሳ።
LUK 1:43 ታ ጎዳ ኣያ ታኮ ያዳ ታና ኦይቻናስ ታኒ ኦኔ?
LUK 1:44 ኔ ሳሮካ ቃላ ታ ሲዪዳ ማላ ታ ኡሎ ጊዶን ዲዛ ናይ ኡፋይሳን ጉፒዴስ።
LUK 1:45 ፖሌታና ጊዲ ጎዳይ ኢዚስ ዮቲዳይሳ ኣማኒዳራ ኢዛ ኣንጄቲዳሮ» ጋዱስ።
LUK 1:46 ማራማካ፥ «ኢዚ ባ ኣይሌይ ካዉሻቴꬃ ጼሊዳ ጊሻስ ታ ሼምፒያ ጎዳ ꬎቁ ኦꬃዳ ቦንቻዉስ። ታ ኣያናይካ ታና ኣሺዛ ታ ጾሳን ኡፋዬታዉስ። ዎልቃማ ጎዳይ ታስ ጊታ ሚሼ ኦꬂዳ ጊሻስ ሃቺፌ ሲንꬃን ኣሲ ዉሪ ታና ኣንጄቲዳሮ ጋና። ኢዛ ሱንꬃይካ ጌሻ።
LUK 1:50 ኢዛ ማሮይ ኢዛስ ባቢዛይታስ ና ና ጋካናስ ዳና።
LUK 1:51 ባ ዎልቃን ዳሮ ሚኖ ኦሶ ኦꬂዴስ፤ ባ ዎዚና ቆፋን ኦቶሬቲዛይታ ላሊዴስ።
LUK 1:52 ካዎታ ካዎቴꬃፌ ዎꬂዴስ፥ ኣሽኬታ ቃሴ ꬎቁ ꬎቁ ሂስቲዴስ።
LUK 1:53 ጋፊዳይታ ሎኦ ሚሻን ካልሲዴስ፤ ዱሬታ ጊዲኮ ሜላ ኩሼ ዬዲዴስ።
LUK 1:54 ካሴ ኑ ኣዋታስ ኣብራሃሜሲኔ ኢዛ ቆሞታስ ጊዳ ሂዶታ ቃላ ናጋናስ ባ ማሬቴꬃ ዩሺ ቆፒዲ ባ ኣይሌ ኢስራኤሌ ማዲዴስ» ጋዱስ።
LUK 1:56 ማራማካ ኤልሳቤጺ ኣቻን ሄꬑ ኣጊና ሲሬ ጋምኣዳ ባሶ ሲማዱስ።
LUK 1:57 ኤልሳቤጺስ ዬሎ ጋላሳይ ጋኪን ኣቱማ ና ዬላዱስ።
LUK 1:58 ኢዚ ጉታቲኔ ዳቦቲካ ጎዳይ ኢዚስ ጊታ ማሬቴꬅ ኦꬂዳይሳ ሲዪዲ ኢዚራ ኢሲፌ ኡፋዬቲዳ።
LUK 1:59 ዬሌቲዳ ኦስፑንꬃ ጋላስ ቃጻራስ ዪዳ። ኢዛ ኣዋ ሱንꬃን ዛካራሳ ጊዲ ሱንꬃና ኮዪዳ።
LUK 1:60 ጊዶ ኣቲን ኣዬያ፥ «ሃኔና፤ ኢዛ ሱንꬂ ዮሃኒሳ ጌቴቶ» ጋዱስ።
LUK 1:61 ኢስቲካ ኢዚስ፥ «ኔ ዳቦታፔ ዮሃኒሳ ጌቴቲዲ ጼይጌቲዳ ኣሲ ኦኒካ ባ» ጊዳ።
LUK 1:62 ኣዋይ ዛካራሲ ናዛ ኦና ጊዲ ሱንꬃና ኮዪዳኮ ማላታን ኦይቺዳ።
LUK 1:63 ዛካራሲካ ጻፊዛ ሚሽ ኢዛስ ኢማና ማላ ኦይቺ ኤኪዲ ሱንꬃይ፥ «ዮሃኒሳ» ጊ ጻፊን ኣሳይ ዉሪካ ማላሌቲዴስ።
LUK 1:64 ሄራካ ዛካራሳ ዶናይ ፖጌቲዲ ኢንጻርሲ ቢርሼቲን ጾሳ ጋላታ ኦይኪዴስ።
LUK 1:65 ኢዛ ጉታቲ ዉሪ ዳሮ ባቢዳ። ሃይሲ ዉሪካ ꬎቃ ጌዜ ቢታን ዩሁዳ ዴሬን፥ ኡባሶን ሃሳዬቲዴስ።
LUK 1:66 ሃይሳካ ሲዪዳ ኣሲ ዉሪካ፥ «ሃ ጉꬃ ናይ ኣይ ሃናኔሻ?» ጊዲ ሃኖዛ ዉርሲካ ባ ዎዚናን ኦይኪዴስ፤ ጎዳ ኩሼይ ቱማፔ ኢዛራ ኢሲፌ ዴስ።
LUK 1:67 ናዛ ኣዋይ ዛካራሲ ጺሎ ኣያናን ኩሚዲ ቲንቢቴ ሃሳይሼ፥
LUK 1:68 «ዪዲ ባ ኣሳ ኣሺዳ ጊሻስ ኢስራኤሌ ጾሲ ጋላቴቶ።
LUK 1:69 ቤኒ ዎዴ ባ ጌሻ ናቤታ ዶናን ሃሳዬቲዳይሳ ማላ ባ ኣይሌ ዳዊቴ ኬꬃን ኣሺዛ ዎልቃ ኑስ ዴንꬂዴስ።
LUK 1:71 ኢዚ ኑና ኑ ሞርኬታፔኔ ኑና ኢጺዛይታ ኩሼፔ ኣሼስ።
LUK 1:72 ሃይሳ ኢዚ ኦꬂዳይ ኑ ኣዋታስ ባ ማሮቴꬅ ቤሳናሳ፥ ባ ጌሻ ጫቆዛ ዩሺ ቆፓናሳ።
LUK 1:73 ካሴ ኑ ኣዋ ኣብራሃሜስ ጫቂዳይሳ ቆፓና ማላኔ ኑ ሞርኬታ ኩሼፔ ኢዚ ኑና ኬሲን ኑኒ ኢዛስ ባቦይ ባይንዳ ኦꬃናሲኔ ኑ ዲዛ ዎዴ ኡባን ባ ሲንꬃን ኑና ጌሻቴꬃኒኔ ጺሎቴꬃን ኤሳናሳ።
LUK 1:76 ጎዳ ኦጌ ጊጊሳናስ ኔ ኢዛፔ ሲንꬃራ ቢዛ ጊሻስ ታ ናዞ ኔኒ ዎጋ ጾሳ ናቤ ጌቴታና።
LUK 1:77 ኣሳይ ባ ናጋራፔ ማሬቲዳ ጊሻስ ዴሬስ ኣቶቴꬃ ኤራቴꬅ ኔ ኢማና ማላ፥
LUK 1:78 ኑ ጾሳ ሎኦ ማሮቴꬃፌ ዴንዲዳይሳን ሳሎፔ ኑስ ኣርሼይ ኬዚዴስ።
LUK 1:79 ሄሲካ ꬉማን ዲዛይታሲኔ ሃይቆ ኩዋ ጊዶን ዲዛይታስካ ፖኢሳና ማላኔ ኑ ቶሆታካ ሳሮቴꬃ ኦጌ ካሌꬃናሳ» ጊዴስ።
LUK 1:80 ጉꬃ ናዚካ ዲጪዴስ፤ ኣያናንካ ሚኒዴስ፤ ኢስራኤሌ ኣሳስ ቆንጬን ቤታና ጋካናስ ባዞ ቢታን ዴኢዴስ።
LUK 2:1 ሄ ዎዴ ቢታ ቦላን ዲዛ ኣሲ ዉሪካ ታይቤቲዲ ጻፌታና ማላ ኦሮሜ ካዎ ኣዉጊስጾሳፔ ኣዋጃይ ኬዚዴስ።
LUK 2:2 ሄሲካ ቄሬኔዎሳ ጌቴቲዛይሲ ሶሪያ ዴሬ ሃሪዛ ዎዴ ሃኒዳ ኮይሮ ዴሬ ታይቦ።
LUK 2:3 ሄሳ ጊሻስ ኣሲ ዉሪ ጻፌታናስ ባ ዴሬ ዴሬ ቢዴስ።
LUK 2:4 ዮሴፌይካ ኣሾ ዳቦቴꬃን ዳዊቴ ባጋፌ ጊዲዳ ጊሻስ ጋሊላ ኣዉራጃ ጊዶን ዲዛ ናዚሬቴ ካታማፔ ዩሁዳ ኣዉራጃ ቤቴሊሄሜ ጌቴቲዛ ዳዊቴ ካታማፔ ዪዴስ።
LUK 2:5 ኢዚ ጻፌታና ቢሺን ኢዛስ ጊጌታ ዳሼ ዬላና ማቲዳ ማራሚራ ቢዴስ።
LUK 2:6 ኢስቲካ ሄን ዲሺን ኢዚስ ዬሎ ዎዴይ ጋኪዴስ።
LUK 2:7 ኢዛካ ኮይሮ ኣቱማ ና ዬሊዳይሳፌ ጉዬ ኢማꬂ ኣቂዛ ኬꬃን ኣቂዛሶይ ባይንዳ ጊሻስ ናዛ ጫርቃራ ጻጻዳ ሚዛ ሲንꬃን ኢሺሳዱስ።
LUK 2:8 ቤቴሊሄሜ ኣቻን ዶርስ ሄሚዛ ኣሳቲ ዶርሳ ናጊሼ ኦማርሳራ ካሬን ኣቂዛይቲ ዴቴስ።
LUK 2:9 ጎዳ ኪታንቻይካ ኢስታኮ ዪዴስ፤ ጎዳ ቦንቾ ፖኦይካ ኢስታ ላንቄን ዩዪ ኣꬋናስ ፖኢዴስ። ኢስቲካ ኬሂ ዳጋሚዳ ጊሻስ፥
LUK 2:10 ኪታንቻይ ኢስታ፥ «ባቦፍቴ! ታኒ ኣሳ ኡባስ ጊዲዛ ጊታ ኡፋይሳ ሚሺራቾ ኤካ ያዲስ።
LUK 2:11 ሃች ካዎ ዳዊቴ ካታማ ቤቴሊሄሜን ሼምፖ ꬋሌይ ዬሌቲዴስ። ኢዚካ ጎዳ ኪርስቶሳ ጌቴቴስ።
LUK 2:12 ጫርቃራ ጻጼቲ ኢቺዳ ጋጪኖ ና ዴማንዴታ፤ ሄሲካ ኢንቴስ ማላታ ጊዶ» ጊዴስ።
LUK 2:13 ኢዛራካ ሃራ ዳሮ ሳሎ ኪታንቻቲ ቤቲዳ። ጾሳ ጋላቲሼ፥
LUK 2:14 «ቦላ ሳሎን ጾሳስ ቦንቾይ ጊዶ፤ ሳሮቴꬂካ ቢታ ቦላን ኢዚ ዶሲዛ ኣሳ ኡባስ ጊዶ» ጊዳ።
LUK 2:15 ኪታንቻቲ ኢስታፌ ሻኬቲዲ ሳሎ ሲሚን ዶርሳ ሄሚዛይቲ ባ ጊዶን ኢሶይ ኢሳ፥ «ኣኔ ሃ ዪቴ ጎዳይ ኑስ ቆንጪሲዳይሳኔ ሃኒዳይሳ ቤቴሊሄሜ ካታማ ቢዲ ቤዮስ» ጊዳ።
LUK 2:16 ኢስቲካ ኤሌሊ ቢዲ ማራሚራ፥ ዮሴፌራኔ ሚዛ ሲንꬃን ኢቺዳ ናዛ ዴሚዳ።
LUK 2:17 ቤኢዳፔ ጉዬ ጎዳ ኪታንቻይ ናዛ ጊሻስ ኢስታስ ዮቲዳይሳ ኡባ ዛሪ ዮቲዳ።
LUK 2:18 ሄሚዛይቲ ዮቲዳይሳ ሲዪዳ ኣሳይ ዉሪ ኬሂ ማላሌቲዴስ።
LUK 2:19 ጊዶ ኣቲን ማራማ ዮኦዛ ዉርሳ ባ ዎዚናን ዎꬃ ዴንꬃ ቆፓሼ ጋምኣዱስ።
LUK 2:20 ሄሚዛይቲካ ሃኒዳይሲ ዉሪካ ኪታንቻይ ኢስታስ ዮቲዳ ማላ ጊዲዲ ቤቲዳ ጊሻስ ሲዪዳይሳሲኔ ቤኢዳይሳስ ኡባስ ጾሳ ጋላቲሼኔ ቦንቺሼ ሲሚዳ።
LUK 2:21 ናዚ ዬሌቲን ኦስፑንꬃ ጋላሳን ቃጻሬቲዛ ዎዴይ ጋኪን ኣዬያ ኢዛ ቃንꬃታናፔ ካሴ ኪታንቻይ ጊዳ ማላ ዬሱሳ ጌቴቲዲ ሱሚዴስ።
LUK 2:22 ሙሴ ዎጋ ማላ ኢስቲ ጌይዛ ዎዴይ ዉሪን ዮሴፌይኔ ማራማ ጉꬃ ናዛ ዬሱሳ ጎዳ ጾሳ ሲንꬄ ሺሻናስ ኤኪዲ ዬሩሳላሜ ኬዚዳ። ሄሲካ ጎዳ ዎጋን ኮይሮ ዬሌቲዛ ኣቱማ ናይ ዉሪ ጎዳስ ዱማ ጊዳና ጌቴቲዲ ጻፌቲዳይሳ ፖላናሲኔ
LUK 2:24 ቃሴካ ጎዳ ዎጋን ናምኡ ሃራጴታኔ ዎይኮ ናምኡ ሃራጴ ጪዬታ ጌቴቲዳይሳ ማላ ያርሾ ሺሻናሳ።
LUK 2:25 ሄ ዎዴ ዬሩሳላሜ ካታማን ጺሎኔ ጾሳ ባቢዛ ኢሲ ሲሞና ጌቴቲዛ ኣሲ ዴስ፤ ኢዚካ ኢስራኤሌ ናይታ ኣቶቴꬃ ናጊዛ ኣሳኔ ጺሎ ኣያናይ ኢዛ ቦላ ሼምፒዳ ኣሳ።
LUK 2:26 ቃሴካ ኪርስቶሳ ቤኦንታ ዲሼ ሃይቆንታ ማላ ጺሎ ኣያናይ ኢዛስ ቆንጪዴስ።
LUK 2:27 ኢዚካ ሄ ዎዴ ጺሎ ኣያናይ ካሌꬂን ጾሳ ኬꬄ ላሻ ጋꬅ ጌሊዴስ። ናዛ ኣዬይራኔ ኣዋራ ሙሴ ዎጋን ቤሲዛይሳ ፖላናስ ጉꬃ ናዛ ዬሱሳ ኤኪዲ ጌሊዳ ዎዴ፥
LUK 2:28 ሲሞኒ ናዛ ኤኪ ኢዲሚዲ ጾሳ ጋላቲሼ፥
LUK 2:29 «ጎዶ! ኔ ጫቂዳ ቃላ ማላ ሃኢ ታኒ ኔ ኣይሌይ ኔ ኣሺዛይሳ ታ ኣይፌራ ቤኢዳ ጊሻስ ሂኣ ታና ሳሮን ኤካ፤ ኣሳ ኡባ ሲንꬃን ኔ ጊግሲዳ ኣቶቴꬃ ሃኢ ታኒ ታ ኣይፌራ ቤያዲስ።
LUK 2:32 ሃይሲካ ኡባ ዴሬስ ጌሜቲዳይሳ ቆንጪሲዛ ፖኦ፤ ኔ ዴሬ ኢስራኤሌሲካ ቦንቾ» ጊዴስ።
LUK 2:33 ኢዛ ኣዋይኔ ኣያ ኢዛ ጊሻስ ሃሳዬቲዳ ዮኦዛን ማላሌቲዳ።
LUK 2:34 ሲሞኒካ ኢስታ ኣንጂዴስ፤ ማራሞካ፥ «ዳሮ ኣሳ ዎዚና ቆፋይ ቆንጫና ማላ ሃይሲ ኢስራኤሌን ዲዛ ዳሮታስ ꬋዮሲኔ ኣቶቴꬃሳ፤ ኢዛ ኢጺዛይታስ ቃሴ ማላታ ጊዳና ማላ ዶሬቲዴስ።
LUK 2:35 ቃሴካ ዳሮታ ዎዚና ቆፋይ ቆንጫና ማላ ናዛ ሚሻይ ቃራ ማሻ ማላ ኔ ዎዚና ጳልቃና» ጊዴስ።
LUK 2:36 ቃሴካ ኣሴሬ ባጋፌ ፋኑኤሌ ና ሃና ጌቴቲዛ ጪሚዳ ናቤይ ዳዉስ፤ ኢዛካ ባ ኮይሮ ኣዚናራ ላፑን ላይꬅ ኩሜꬅ ዴኣዱስ።
LUK 2:37 ላይꬃይ ኢዚስ ኦስፑን ታማኔ ኦይዱ ላይꬅ ጊዳና ጋካናስ ኦማርሲኔ ጋላስ ጾማሼኔ ዎሳሼ ጾሳ ኬꬃፌ ሻኬቶንታ ኣምኤቴꬃን ጋምኣዱስ።
LUK 2:38 ሄ ዎዴካ ሺቃዳ ጾሳ ጋላታዱስ፤ ዬሩሳላሜ ዎዜቴꬅ ናጊሼ ዲዛይታስ ኡባስ ጉꬃ ናዛ ጊሻስ ዮታዱስ።
LUK 2:39 ዮሴፌራኔ ማራሚራ ጎዳ ዎጋን ኣዛዜቲዳይሳ ፖሊዲ ጋሊላ ኣዉራጃን ዲዛ ባሶ ናዚሬቴ ካታማ ሲሚዳ።
LUK 2:40 ጉꬃ ናዚካ ዲጪዲ ሚኒ ሚኒ ቢዴስ፤ ኣꬎ ኤራቴꬃን ኩሚዴስ፤ ጾሳ ኣꬎ ኪያቴꬂካ ኢዛ ቦላ ዴስ።
LUK 2:41 ኢዛ ኣዋይኔ ኢዛ ኣያ ላይꬃን ላይꬃን ፓዚጋ ቦንቻናስ ዬሩሳላሜ ቤቴስ።
LUK 2:42 ናዛስ ላይꬃይ ታማኔ ናምኡ ላይꬅ ኩሚዳ ዎዴ ካሴ ሎሴ ጊዲዳይሳ ማላ ፓዚጋ ቦንቻና ኬዚዳ።
LUK 2:43 ፓዚጋ ባኣሌዛ ቦንቺዲ ባሶ ሲሚሺን ዬሱሲ ዬሩሳላሜን ኣቲዴስ። ዬሊዳይቲካ ኢዚ ኣቲዳይሳ ኤሪቤቴና።
LUK 2:44 ባናራ ኢሲፌ ቢዛ ኦጌ ኣሳራ ዴስ ጊሼ ኢሲ ጋላሳ ኦጌ ቢዳ። ጊዶ ኣቲን ኢዚ ኢስታራ ባይንዳይሳ ኤሪዲ ባ ዳቦታ ኣቻኒኔ ላጌታ ኣቻን ዲዛኮ ጊዲ ኮዪዳ።
LUK 2:45 ኮዪ ኮዪዲ ቤቶንታ ኢጺን ዬሩሳላሜ ሲሚዳ።
LUK 2:46 ሄꬑ ጋላሳፌ ጉዬ ጾሳ ኬꬃን ታማርሲዛይታ ጊዶን ኡቲዲ ሲዪሼ፥ ኣሳታ ኦይቺሼኔ ኢስታ ኦይሻ ዛሪሼ ጾሳ ኬꬃን ዲሺን ዴሚዳ።
LUK 2:47 ሲዪዳይቲ ዉሪ ዬሱሳ ኣኬካኒኔ ኢዛ ዛሮዛን ዳሮ ማላሌቲዳ።
LUK 2:48 ዮሴፌይኔ ማራማ ኢዛ ቤኢዳ ዎዴ ማላሌቲዳ። ማራማካ፥ «ታ ናዞ ኣይስ ሃይሳ ማላ ኦꬃዲ? ኔ ኣዋይኔ ታኒ ኔና ኮዪሼ ኬሂ ሜቶቴቲዶስ» ጋዱስ።
LUK 2:49 ኢዚካ ዛሪዲ፥ «ታና ኣይስ ኮዪዴቲ? ታኒ ታ ኣዋ ኬꬃን ዳናስ ቤሲዛይሳ ኤሪቤኬቲ?» ጊዴስ።
LUK 2:50 ጊዶ ኣቲን ኢስታስ ኢዚ ዮቲዳይሲ ጌሊቤና።
LUK 2:51 ሄሳፌ ጉዬ ኢስታራ ኢሲፌ ናዚሬቴ ዎꬊዲ ኢስታስ ኣዛዜቲሼ ዴኢዴስ። ኢዛ ኣያ ማራማካ ሄ ሃኒዳ ሚሻ ኡባ ባ ዎዚናን ናጋሼ ጋምኣዱስ።
LUK 2:52 ዬሱሲ ኣꬎ ኤራቴꬃን፥ ጌሳኒኔ ሳባን ጾሳ ሲንꬃኒኔ ኣሳ ሲንꬃን ዲጪዴስ።
LUK 3:1 ጺቢራዶሴ ጌቴቲዛ ቄሳሬይ ካዎቲዳ ታማኔ ኢቻሻንꬆ ላይꬃን ጳንጾሳ ጲላጾሳ ጌቴቲዛይሲ ዩሁዳ ቢታ ሃሪዛ ዎዴ ሄርዶሲ ጋሊላ ቢታ ሃሪዛ ዎዴ፥ ኢዛ ኢሻይ ፒሊጶሲ፥ ኢጹሪያሳኔ ጺራኮንዶሴ ቢታ ሃሪዛ ዎዴ ሊሳኖሲካ ኣብሎኔ ቢታ ሃሪዛ ዎዴ፥
LUK 3:2 ሃናይኔ ቃያፋይ ቄሴታ ሃላቃ ጊዲዳ ዎዴ ጾሳ ቃላይ ባዞ ቢታን ዲዛ ዛካራሳ ና ዮሃኒሳኮ ዪዴስ።
LUK 3:3 ዮሃኒሲ ዮርዳኖሴ ሻፋ ኣቻን ዲዛ ዴሬታ፥ «ኢንቴ ናጋራ ኣቶ ጋናስ ናጋራፔ ሲሚዲ ጻማቄቲቴ» ጊዲ ዮቲዴስ፤
LUK 3:4 ሄሲካ ቃሴ ናቤ ኢሳያሲ፥ «ባዞን ሂዝጊዲ ዋሲዛ ኣሳ ኮሺንቺ፥ ‹ጎዳስ ኦጌ ጊግሲቴ፤ ባሲዲካ ሎኤꬂቴ።
LUK 3:5 ሾባ ቢታይ ዉሪ ኩማና፤ ዙማቲኔ ዙምቡላቲ ዉሪ ዚቂ ጋና፤ ጌላ ኦጌይ ሲቲ ጋና፤ ሞሬቲዳ ኦጌይ ሎኦ ጊዳና።
LUK 3:6 ኣሳ ዜሬꬅ ኡባ ኣሺዛ ጾሳ ዎልቃ ቤያና› ጊዲ ባዞን ዋሲዛ ኣሳ ቃላ ጊሪስ» ጊዲ ባ ማጻፋን ጻፊዳ ማላ።
LUK 3:7 ዮሃኒሲካ ኢዛ ኩሼን ጻማቄታና ዪዛ ኣሳስ፥ «ኢንቴኖ ሃ ሾሻ ናይቶ! ያና ዲዛ ጾሳ ሃንቆፌ ሃካና ማላ ኦኒ ኢንቴና ዞሪዴ?
LUK 3:8 ኢንቴ ናጋራ ኦሶፔ ሲሚዳይሳ ኤሪሲዛ ኦሶ ኦꬂቴ፤ ‹ኑ ኣዋይ ኣብራሃሜይ ኑስ ዴስ› ጉስ ኣጊቴ ጊዴስ። ‹ጾሲ ባስ ጊኮ ሃ ሹቻታፔ ኣብራሃሜስ ና ኦꬂ ዴንꬃናስ ዳንዳይዛይሳ ኤሪቴ›
LUK 3:9 ካልታይ ሚꬅ ቃንጻናስ ሚꬃ ጻጶን ዴስ። ሎኦ ኣይፌ ኣይፎንታ ኢታ ሚꬂ ዉሪ ቃንጼቲዲ ታማን ዬጌታና» ጊዴስ።
LUK 3:10 ኣሳይካ፥ «ሂስቲን ኣይ ኦꬂኖ?» ጊዲ ኦይቺዴስ።
LUK 3:11 ዮሃኒሲካ ኣሳስ፥ «ናምኡ ማይኦይ ዲዛይ ኢሲ ማይኦይ ባይንዳ ኣሳስ ኢሞ፤ ቃሴካ ቁማይ ዲዛይካ ባይንዳዴስ ሻኪ ኢሞ» ጊዴስ።
LUK 3:12 ቃራጻ ሺሺዛይቲካ ጻማቄታናስ ዪዲ፥ «ኣስታማሬ! ኑ ኣይ ኦꬂኖ?» ጊዳ።
LUK 3:13 «ኢዚካ፥ ‹ኢንቴ ኣዛዜቲዳይሳፌ ቦላራ ቃራጻ ሺሾፍቴ› ጊዴስ።
LUK 3:14 «ዎታዳራቲካ፥ ‹ኑኒ ቃሴ ኣይ ኦꬂኖ?› ጊዲ ኦይቺዳ። ኢዚካ፥ ‹ኦና ሚሼካ ዎልቃን ኤኮፍቴ፤ ቃሴካ ኦናካ ዎርዶን ሞቶፒቴ፤ ኢንቴ ዳሞዛይ ኢንቴስ ጊዳና› » ጊዴስ።
LUK 3:15 ኣሳይ ዮሃኒሳ ቤኢዲ፥ «ሃይሲ ኪርስቶሳ?» ጊዲ ባ ዎዚናን ሲꬊዴስ።
LUK 3:16 ዮሃኒሲካ ኡባስ፥ «ታኒ ኢንቴና ሃꬃን ጻማቃይስ፤ ጊዶ ኣቲን ታ ኢዛ ጫማ ቢርሻናስ ቤሶንታይ ታፔ ኣꬊዛዴይ ያና። ኢዚ ኢንቴና ጺሎ ኣያናኒኔ ታማን ጻማቃና።
LUK 3:17 ባሌዛን ዲዛ ካꬃ ጋፌዛፔ ጌሻናስ ካꬅ ሱራጊዛ ላይዳይ ኢዛ ኩሼን ዴስ። ባሌዛ ኩሜꬅ ጌሻና፤ ጊስቴዛ ቃሴ ዲኤን ቆላና፤ ጋፌዛካ ቶኦንታ ታማን ጹጋና» ጊዴስ።
LUK 3:18 ዮሃኒሲ ኣሳ ሃራ ዱማ ዱማ ዞሬ ቃላራ ሚንꬂ ዞሪሼ ሚሺራቾ ቃላ ዮቲዴስ።
LUK 3:19 ጊዶ ኣቲን ጋሊላ ቢታ ሃሪዛ ሄርዶሲ ባ ኢሻ ማቾ ሄሮዲያዶ ኤኪዳ ጊሻሲኔ ሃራ ዳሮ ኢታ ኦꬂዳ ጊሻስ ዮሃኒሲ ኢዛ ሃንቂዳ ጊሻስ፥
LUK 3:20 ካሴ ሞሮዛ ቦላ ሃራ ጉጂዲ ሄርዶሲ ዮሃኒሳ ቃሾ ኬꬃን ዬጊዴስ።
LUK 3:21 ኣሳይ ጻማቄቲዳፔ ጉዬ ዬሱሲካ ጻማቄቲዴስ፤ ኢዚ ዎሲሺን ሳሎይ ዶዬቲዴስ።
LUK 3:22 ጺሎ ኣያናይካ ሃራጴ ሚሳቲዲ ኢዛ ቦላ ዎꬊዴስ። «ሳሎፔ፥ ‹ታ ዶሲዛ ናይ ኔና፤ ኔናን ታኒ ኡፋዬታይስ› » ጊዛ ቃላይ ዪዴስ።
LUK 3:23 ዬሱሲ ጾሳ ኦሶ ኦይኪሺን ኢዛስ ላይꬃይ ጌዴ ሄꬑ ታሙ ጊዳና። ኣሳይካ ኢዚ ዮሴፌ ና፥ ኤሌ ና፥
LUK 3:24 ማቴ ና፥ ሌዌ ና፥ ሚልካ ና፥ ዩሁዳ ና፥ ዮሴፌ ና፥
LUK 3:25 ማቶቲዮ ና፥ ኣሞጼ ና፥ ናሆሜ ና፥ ኢሲሊሜ ና፥ ናጌ ና፥
LUK 3:26 ማቴ ና፥ ማቶቲዮ ና፥ ሴሜዬ ና፥ ዮሴፌ ና፥ ዩሁዳ ና፥
LUK 3:27 ዮናኔ ና፥ ኤሬሴ ና፥ ዜሩባቤሌ ና፥ ሳላቲያሌ ና፥ ኔሬ ና፥
LUK 3:28 ሚልካ ና፥ ሃዴ ና፥ ዮሳ ና፥ ቆሳሜ ና፥ ኤሊሞዳሜ ና፥ ኤራ ና፥
LUK 3:29 ኢያሶ ና፥ ኤልኤዜሬ ና፥ ኢዮራሜ ና፥ ማቴ ና፥ ኤሌ ና፥
LUK 3:30 ሲሞና ና፥ ዩሁዳ ና፥ ዮሴፌ ና፥ ዮና ና፥ ኤልያቄሜ ና፥
LUK 3:31 ሜሊያ ና፥ ማይናኔ ና፥ ማጻቴ ና፥ ናታኔ ና፥ ዳዊቴ ና፥
LUK 3:32 ኢሴዬ ና፥ ኢዮቤዴ ና፥ ቦኤዜ ና፥ ሶሎሞኔ ና፥ ናሶኔ ና፥
LUK 3:33 ኣሚናዳቤ ና፥ ኣራሜ ና፥ ኣሮኔ ና፥ ኤስሮሜ ና፥ ፋሬሴ ና፥ ዩሁዳ ና፥
LUK 3:34 ያቆቤ ና፥ ዪሳቃ ና፥ ኣብራሃሜ ና፥ ታራ ና፥ ናኮሬ ና፥
LUK 3:35 ሴሮሄ ና፥ ኤራጉዌ ና፥ ፋሌቄ ና፥ ኣቤሬ ና፥ ሳላ ና፥
LUK 3:36 ቃዪናሜ ና፥ ኣርፋኪሲዴ ና፥ ሴሜ ና፥ ኖሄ ና፥ ላሜሄ ና፥
LUK 3:37 ማቱሳላ ና፥ ሄኖኬ ና፥ ያሬዴ ና፥ ማላልኤሌ ና፥ ቃዪናሜ ና፥
LUK 3:38 ሄኖሴ ና፥ ሴቴ ና ኣዳሜ ና፥ ጾሳ ና ጌቴስ።
LUK 4:1 ዬሱሲ ጺሎ ኣያናን ኩሚዲ ዮርዳኖሴ ሻፋፔ ሲሚዳ ማላ ጺሎ ኣያናይ ኢዛ ካሌꬂዲ ባዞ ቢታ ኤፊዴስ።
LUK 4:2 ሄንካ ጻላኤን ኦይዱ ታሙ ጋላስ ፓጬቲዴስ። ሄ ፓጬቲዛ ጋላሳታን ኣይኮካ ሞንታ ጊሻስ ዉርሴꬃን ጋፊዴስ።
LUK 4:3 ጻላኤይካ ዬሱሳ፥ «ኔ ጾሳ ና ጊዲኮ ኣኔ ሃይሳ ሹቻ ካꬅ ጊዳና ማላ ኣዛዛ» ጊዴስ።
LUK 4:4 ዬሱሲካ ዛሪዲ፥ «ኣሲ ካꬃን ጻላ ዴና ጌቴቲዲ ጻፌቲዴስ» ጊዲ ጻላኤስ ዛሪዴስ።
LUK 4:5 ሄሳፌ ካሊዲ ጻላኤይ ዬሱሳ ኢሲ ꬎቃ ዙማ ቦላ ኬሲዲ ሳሎ ጉፋንꬆን ዲዛ ካዎቴꬃታ ቂጲዳ ኣይፌይ ጼላናስ ቤሲዲ፥
LUK 4:6 «ሃይሲ ኔ ቤኢዛ ቢታ ካዎታ ጎዳቴꬂኔ ቦንቾይ ዉሪካ ታስ ኢሜቲዴስ፤ ታኒካ ታ ዶሲዛዴስ ኢማናስ ዳንዳይዛ ጊሻስ ኔስካ ኢማና።
LUK 4:7 «ሄሳ ጊሻስ ኔኒ ኩንዳዳ ታስ ጎይኒኮ ሃይሲ ዉሪካ ኔስ ጊዳና» ጊዴስ።
LUK 4:8 ዬሱሲካ ዛሪዲ፥ «ኔ ጎዳ ጾሳስ ኩንዳዳ ኢዛስ ጻላ ጎይና ጌቴቲዲ ጻፌቲዴስ» ጊዴስ።
LUK 4:9 ሄሳፌካ ዬሱሳ ዬሩሳላሜን ጾሳ ኬꬃ ጼራ ኬሲ ኤሲዲ ጾሳ ማጻፋን፥ «ኔና ናጋና ማላ ጾሲ ኔ ጊሻስ ባ ኪታንቻ ኣዛዛና፤ ‹ኔ ቶሆይ ሹቻን ꬉጴቶንታ ማላ ኪታንቻቲ ባ ኩሼራ ኔና ꬎቁ ሂስቲ ኦይካና› ጌቴቲዲ ጻፌቲዳ ጊሻስ ኣኔ ኔ ጾሳ ና ጊዲኮ ሃይሳፌ ዱጌ ኩንዳ» ጊዴስ።
LUK 4:12 ዬሱሲካ፥ «ኔ ጎዳ ጾሳ ፓጮፋ» ጌቴቲዴስ ጊዲ ዛሪዴስ።
LUK 4:13 ጻላኤይካ ባ ፓጫናይሳ ዉርሲዳፔ ጉዬ ባስ ኢንጄ ዎዴይ ቤታናሼ ዬሱሳፔ ሻኬቲዴስ።
LUK 4:14 ዬሱሲካ ጺሎ ኣያና ዎልቃን ጋሊላ ሲሚዴስ፤ ኢዛ ጎባቴꬂ ጋሊላ ኣቻን ዲዛ ዴሬታን ሲዬቲዴስ።
LUK 4:15 ኢዚካ ኣይሁዳታ ዎሳ ኬꬃን ታማርሲሺን ኢዛ ቲሚርቴይ ሎኢን ኣሳይ ዉሪካ ኢዛ ጋላቲዴስ።
LUK 4:16 ሄፔ ባ ዬሌቲዳ ካታማ ናዚሬቴ ዪዲ ካሴ ሳምባታ ጋላስ ኣይሁዳ ዎሳ ኬꬅ ጌሊዛ ማላ ጌሊዲ ጾሳ ማጻፋ ናባባናስ ዴንዲ ኤቂዴስ።
LUK 4:17 ናቤ ኢሳያሳ ማጻፋይ ኢዛስ ኢሜቲን ማጻፋ ዶይዳ ማላ።
LUK 4:18 «ጎዳ ኣያናይ ታ ቦላ ዴስ፤ ማንቆታስ ሚሺራቾ ቃላ ዮታና ማላ ታና ቲይዴስ፤ ቃሼቲዳይታስ ቢርሼቴꬅ፥ ቆቄቲ ጼላና ኦጌ ታ ኣዋጃና ማላ፥ ሜቶቴቲዳይታ ኣሻና ማላ፥ ዶሴቲዳ ጎዳ ላይꬃ ኣዋጃ ታ ዮታና ማላ ታና ኪቲዴስ» ጊዛሶ ዴሚ ናባቢዴስ።
LUK 4:20 ማጻፋካ ጎርዲዲ ኣይሁዳ ዎሳ ኬꬄ ናጊዛይሳስ ዛሪ ኢሚዲ ኡቲዴስ። ኣይሁዳታ ዎሳ ኬꬃን ዲዛይቲ ዉሪካ ኢዛ ቲሺ ሂስቲ ጼሊዳ።
LUK 4:21 ኢዚካ ኢስታስ፥ «ሃይሲ ኢንቴ ኢንቴ ሃይꬃራ ሲዪዳ ማጻፋ ቃላይ ሃች ፖሌቲዴስ» ጊዴስ።
LUK 4:22 ኣሳይ ዉሪካ ኢዛ ጊሻስ ሎኦ ጻላላ ሃሳዬቴስ፤ ቃሴካ ኢዛ ዶናፔ ኬዚዛ ሎኦ ቃላፔ ዴንዲዳይሳን ማላሌቲዲ፥ «ሃይሲ ዮሴፌ ና ጊዴኔ?» ጊዳ።
LUK 4:23 ኢዚካ፥ «ꬋሌ ጎዶ ኔርካ ኔና ፓꬃ፤ ቂፊርናሆሜን ኔኒ ኦꬂሺን ኑ ሲዪዳይሳ ሃይሳን ኔ ካታማንካ ኦꬃ ጊዛ ሌሚሶ ኢንቴ ታ ቦላ ማላታናይሳስ ሲꬌይ ባ» ጊዲ ኢስታስ ዮቲዴስ።
LUK 4:24 ቃሴካ፥ «ታ ኢንቴስ ቱማ ጋይስ፤ ናቤይ ባ ዬሌቲዳ ዴሬን ቦንቼቲ ኤሬና።
LUK 4:25 «ጊዶ ኣቲን ታ ኢንቴስ ቱማ ጋይስ፤ ሄꬑ ላይꬂኔ ባጋ ጋካናስ ሳሎይ ጎርዴቲን ዎልቃማ ኮሻይ ቢታ ቦላ ሃኒዳ ኤላሳ ዎዴ ሄ ላይꬃታን ኣዚናይ ባይንዳ ዳሮ ማጫሳቲ ኢስራኤሌ ቢታን ዴቴስ ሺን ኤላሲ ኢስታፌ ኢሲኔይኮካ ኪቴቲቤና። ጊዶ ኣቲን ሲዶና ጌቴቲዛ ቢታን ሴራጲታ ጌቴቲዛ ካታማን ዲዛ ኢሲ ኣዚናይ ባይንዳ ማጫሳይኮ ኪቴቲዴስ።
LUK 4:27 ናቤ ኤልሳኤ ዎዴ ኢስራኤሌ ዴሬን ዳሮ ኢንቺራቻ ሃርጊዛይቲ ዴቴስ፤ ጊዶ ኣቲን ሶሪያ ቢታ ኣስ ኒኢማኔፔ ኣቲን ሄ ዳሮታፔ ኦኒካ ኢንቺራቻ ሃርጌፌ ፓጺቤና» ጊዴስ።
LUK 4:28 ኣይሁዳታ ዎሳ ኬꬃን ዲዛይቲ ዉሪካ ሄሳ ሲዪዲ ዳሮ ሃንቄቲዳ።
LUK 4:29 ባ ኡቲዳሶሆፔ ዴንዲ ኤቂዲ ዬሱሳ ካታማፔ ካሬ ኬሲዲ ዱጌ ዛሪ ዬዳናስ ኢስታ ካታማያ ኦሴቲዳ ዙማ ቦላ ኣፎቲዛሶን ኦሴቲዳሶ ኤኪ ኤፊዳ።
LUK 4:30 ጊዶ ኣቲን ኢዚ ኢስታ ጊዶራ ሻኪ ዬጊዲ ኣꬊ ቢዴስ።
LUK 4:31 ሄፔካ ጋሊላ ኣዉራጃን ዲዛ ቂፊርናሆሜ ጌቴቲዛ ካታማ ዎꬊዴስ፤ ሄንካ ሳምባታ ጋላስ ዳሮ ኣሳ ታማርሶ ኦይኪዴስ።
LUK 4:32 ኢዚ ጎዳቴꬃራ ሃሳይዛ ጊሻስ ኢዛ ቲሚርቴዛን ማላሌቲዳ።
LUK 4:33 ኣይሁዳታ ዎሳ ኬꬃን ቱና ኣያናይ ኦይኪዳ ኣዴይ ዴስ። ኢዚካ ባ ቃላ ꬎቁ ሂስቲዲ፥
LUK 4:34 «ናዚሬቴ ዬሱሳ ሃኢ ታ ዋኖ? ኔናራ ታና ኣዚ ጋꬂዴ? ኔ ዪዳይ ኑና ꬋይሳናሴ? ኔ ኦናኮ ታ ኤራይስ፤ ኔ ጾሳ ጺሎዛ ጊዲኪ?» ጊዲ ዋሲዴስ።
LUK 4:35 ዬሱሲካ ቱና ኣያናዛ ሃ ኣዴዛፔ፥ «ጮኡ ጋዳ ኬዛ» ጊዲ ሴሪዴስ፤ ቱና ኣያናዚካ ዳሮ ኣሳ ሲንꬃን ኣዴዛ ቦላፌ ዬጊዲ ኢሲ ቆሆካ ጋꬆንታ ዬዲ ኬዚዴስ።
LUK 4:36 ኣሳይ ዉሪካ ማላሌቲዲ ባ ጊዶን ኢሶይ ኢሳራ፥ «ኣሶ ሃይሲ ኣይ ጊዛ ቲሚርቴ? ጎዳቴꬃራኔ ዎልቃራ ኢታ ኣያና ኣዛዜስ፤ ኢስቲካ ኬዜቴስ» ጊዲ ሃሳዬቲዳ።
LUK 4:37 ዬሱሳ ጎባቴꬂካ ኡባሶ ጋኪዴስ።
LUK 4:38 ሄሳፌ ጉዬ ዬሱሲ ኣይሁዳ ዎሳ ኬꬃፌ ኬዚዲ ሲሞና ኬꬄ ጌሊዴስ። ሲሞና ቦሎቴያ፥ «ዎልቃማ ሚሾ ሃርጌይ ኦይኪን ሳኬታዳ ዲሺን ዬሱሳ ኢዞ ፓꬃርኪ!» ጊዲ ዎሲዳ።
LUK 4:39 ዬሱሲካ ኢዚኮ ሺቂዲ ሚሾ ሃርጌዛ ሴሪዴስ። ሚሻ ሃርጌይካ ዬዲን ሄራካ ዴንዳ ኤቃዳ ኢማꬃታ ሞካዱስ።
LUK 4:40 ኣርሼይ ዉላና ጊሺን ዱማ ዱማ ሃርጌይ ኦይኪዳ ኣሳ ዉርሲ ኢዛኮ ኤኪ ዪዳ። ኢዚካ ሃርጊዛ ኣሳ ኡባ ቦላ ባ ኩሼ ዎꬂዲ ፓꬂዴስ።
LUK 4:41 ቱና ኣያናቲ ቃሴካ ዬሱሳ፥ «ኔኒ ጾሳ ና» ጊሼኔ ዋሲሼ ዳሮ ኣሳታፔ ኬዚዳ፤ ጊዶ ኣቲን ኢዚ ኢስታ ሴሪዴስ፤ ቱና ኣያናቲ ኢዚ ኪርስቶሳ ጊዲዳይሳ ኤሪዛ ጊሻስ ኢስቲ ኢሲኖካ ሃሳያና ማላ ኮዪቤና።
LUK 4:42 ጋዴይ ዎንቲሺን ዬሱሲ ኢሲ ኣሲካ ባይንዳሶ ቢዴስ። ዳሮ ኣሳይካ ኢዛ ኮዪሼ ኢዚ ዲዛሶ ጋኪዴስ። ኢዚ ኢስታፌ ሻኬቲዲ ቦንታ ማላ ዲጋናስ ኮዪዳ።
LUK 4:43 ጊዶ ኣቲን ኢስታስ፥ «ጌዴ ሃራ ካታማ ባዳ ጾሳ ካዎቴꬃ ሚሺራቾ ቃላ ዮታናስ ታስ ቤሴስ፤ ታኒ ኪቴቲዳ ጊታ ቆፋይ ሄሳ» ጊዴስ።
LUK 4:44 ኢዚካ ዩሁዳን ኣይሁዳታ ዎሳ ኬꬃን ቃላ ጉጂ ዮቲዴስ።
LUK 5:1 ዬሱሲ ጌንሴሬጼ ኣባ ላንቄን ኤቂዲ ጾሳ ቃላ ታማርሲሺን ሲዪዛ ኣሳይ ኢዛ ኡንኤꬂዴስ።
LUK 5:2 ሄ ዎዴ ናምኡ ዎጎሎቲ ኣባ ኣቻን ዲሺን ዬሱሲ ቤዪዴስ። ሞሌ ኦይኪዛይቲ ዎጎሎታፔ ዎꬊዲ ሞሌ ጊቴታ ሜጬቴስ።
LUK 5:3 ዬሱሲ ዎጎሎታፔ ሲሞና ዎጎሎን ጌሊዲ ቢታፌ ጌዴ ኣባ ጊዶ ሺሻና ማላ ኦይቺዲኔ ዎጎሎ ጊዶን ኡቲዲ ኣሳ ታማርሲዴስ።
LUK 5:4 ታማርሲ ዉርሲዳፔ ጉዬ ሲሞና፥ «ኣባይ ጪማቲዛሶ ሺቃ ሞሌ ኦይካናስ ኢንቴ ጊቴዛ ኣባ ጊዶ ዬጊቴ» ጊዴስ።
LUK 5:5 ሲሞኒ ዬሱሳስ ዛሪዲ፥ «ጎዶ! ቃማ ኩሜꬅ ዳቡሪ ኣቂዲ ኢሲኖካ ኦይኪቤኮ፤ ጊዶ ኣቲን ኔ ቃላን ጊቴዛ ኑ ዬጋና» ጊዴስ።
LUK 5:6 ጊቴዛ ዬጊዳ ዎዴ ዳሮ ሞሌ ኦይኪዳ። ጊቴይካ ዳኬቲዴስ።
LUK 5:7 ሃራ ዎጎሎን ዲዛይቲ ዪዲ ኢስታ ማዳና ማላ ኩሼራ ዉቲ ጼይጊዳ። ኢስቲካ ዪዲ ናምኡ ዎጎሎታ ሞሌ ኩንꬂዳ። ዎጎሎቲካ ዱጌ ሚቴቴꬅ ኦይኪዳ።
LUK 5:8 ሲሞና ጌቴቲዛ ጴጽሮሲ ሄሳ ቤኢዲ ዬሱሳ ቶሆ ቦላ ኩንዲዲ፥ «ጎዶ! ታ ናጋራንቻ ጊዲዳ ጊሻስ ታ ኣቻፌ ኪቻ» ጊዴስ።
LUK 5:9 ኢዚ ሄሳ ጊዳይ ኢዚኔ ኢዛራ ዲዛይቲ ኦይኪዳ ዳሮ ሞሌዛን ማላሌቲዳ ጊሻሳ።
LUK 5:10 ቃሴካ ሲሞና ላጌቲ ዛብዶሳ ናይቲ ያቆቤይኔ ዮሃኒሲ ዉሪካ ማላሌቲዳ። ዬሱሲካ ሲሞና፥ «ባቦፋ! ሃይሳፌ ጉዬ ኔ ኣስ ኦይኪዛዴ ጊዳና» ጊዴስ።
LUK 5:11 ኢስቲካ ዎጎሎታ ቢታኮ ሺሺዲ ዉርሲካ ዬጊ ኣጊዲ ዬሱሳ ካሊዳ።
LUK 5:12 ዬሱሲ ካታማታፔ ኢሲኔይን ዲሺን ኢንቺራቻ ሃርጌይ ቦላ ዉርሲ ኦይኪዳ ኢሲ ኣሲ ሄ ካታማን ዴስ፤ ሄ ኣዴዚካ ዬሱሳ ቤኢዲ ኢዛ ሲንꬃን ኩንዲዲ፥ «ጎዶ! ኔ ኮይኮ ታና ፓꬃና ዳንዳያሳ» ጊዲ ዎሲዴስ።
LUK 5:13 ዬሱሲ ባ ኩሼ ዬዲ ቦቺዲ፥ «ታ ዶሳዲስ፥ ፓጻ» ጊዴስ። ኢንቺራቻይ ሄራካ ꬋይዴስ።
LUK 5:14 ዬሱሲ ኢዛስ፥ «ሃይሳ ኦናስካ ዮቶፓ፤ ጊዶ ኣቲን ባዳ ኔና ቄሴ ሃላቃስ ቤሳ፤ ኢስታስ ማርካ ጊዳና ማላ ኔ ጌዪዳይሳስ ሙሴይ ኣዛዚዳ ያርሾዛ ሺሻ» ጊዲ ኣዛዚዴስ።
LUK 5:15 ጊዶ ኣቲን ኢዛ ጊሻስ ኣሳይ ሃሳይዛ ዎሬይ ካሴፔ ኣኪ ኣኪ ቢዴስ፤ ኬሂ ዳሮ ኣሳይ ኢዛ ሃሳያ ሲያናሲኔ ባና ሳኪዛ ሃርጌፌ ፓጻናስ ኢዛኮ ሺቂዴስ።
LUK 5:16 ዬሱሲ ዳሮ ዎዴ ኣሲ ባይንዳሶ ቢዲ ዎሲዴስ።
LUK 5:17 ዬሱሲ ታማርሲሺን ኣሳይ ጋሊላፔኔ ዩሁዳፔ ቃሴካ ዬሩሳላሜፔ ዪዳ ፋርሳዌቲኔ ዎጋ ታማርሲዛይቲ ሄን ኡቲዳ። ኢዚ ፓꬃና ማላ ጎዳ ዎልቃይ ኢዛራ ዴስ።
LUK 5:18 ሄ ዎዴ ኣሳይ ኢሲ ኩሜꬃ ቦላይ ሲሊዲ ቃጾንታ ሃርጋንቻ ሃላራ ቶኪ ኤኪ ዪዲ ኬꬄ ጌልꬂዲ ዬሱሳ ሲንꬃን ዎꬃናስ ፓጪዳ።
LUK 5:19 ኣሳ ዳሮቴꬃፌ ዴንዲዳይሳን ኬꬄ ጌልꬃናስ ጾኔቲዳ ጊሻስ ፑዴ ኬꬃ ካራ ቦላ ኬዚዲኔ ካራ ቃሪዲ ሃርጋንቻዛ ሃላራ ቶኪ ኤሂዲ ኣሳ ጊዶራ ዬሱሳ ሲንꬃን ዎꬂዳ።
LUK 5:20 ዬሱሲ ኢስታ ኣማኖ ቤኢዲ፥ «ሃይሶ ኔኒ ኔ ናጋራፔ ማሬታዳሳ» ጊዴስ።
LUK 5:21 ሙሴ ዎጋ ጻፊዛይቲኔ ፋርሳዌቲ፥ «ሃይሲ ጾሳ ቦላ ጻላቴꬃን ሃይሳꬆ ሃሳይዛይ ኢዚ ኦኔ? ኢሲ ጾሳፌ ኣቲን ናጋራ ማራናስ ኦኒ ዳንዳይዜ?» ጊዲ ቆፒዳ።
LUK 5:22 ዬሱሲ ኢስታ ቆፋ ኤሪዳ ጊሻስ፥ «ኢንቴ ኢንቴ ዎዚናን ኣይስ፥ ሄሳꬆ ቆፔቲ?
LUK 5:23 ‹ኔ ናጋራይ ኣቶ ጌቴቲዴስ› ጉሳፌኔ ‹ዴንዳዳ ባ› ጉሳፌ ኣዋይሲ ካዉሼ?
LUK 5:24 ጊዶ ኣቲን ታ ሃይሳ ጊዳይ ኣሳ ናስ ቢታ ቦላ ኣስ ናጋራፔ ማራናስ ጎዳቴꬂ ዲዛይሳ ኢንቴ ኤራና ማላ» ጊዴስ፤ ቃሴካ ሄ ሲላ ኣዴዛ፥ «ኔና ጋይስ! ዴንዳ ኤቃ! ኔ ሃላ ቶካዳ ባ!» ጊዴስ።
LUK 5:25 ኢዚ ሄራካ ኢስታ ሲንꬃን ዴንዲ ኤቂዴስ፤ ካሴ ባ ኢቺዳ ሃላ ቶኪዲ ጾሳ ጋላቲሼ ባሶ ቢዴስ።
LUK 5:26 ሄ ዎዴ ኣሲ ዉሪ ማላሌቲዴስ። ጾሳ ጋላቲሼ፥ «ሃች ማላሊሲዛዝ ቤኢዶስ» ጊዲ ዳሮ ባቢዳ።
LUK 5:27 ሄሳፌ ጉዬ ዬሱሲ ሄፔ ኬዚ ቢዴስ። ሌዌ ጌቴቲዛ ኢሲ ቃራጻ ቃንጺሲዛይሲ ቃራጻ ቃንጺዛሶን ኡቲዳይሳ ቤኢዲ፥ «ታና ካላ» ጊዴስ።
LUK 5:28 ኢዚካ ዉርሲ ኣጊዲ ኢዛ ካሊዴስ።
LUK 5:29 ሌዌይካ ዬሱሳስ ባ ኬꬃን ጊታ ዲጊሳ ዲጊሲዴስ። ቃራጻ ቃንጺሲዛ ዳሮ ኣሳቲኔ ሃራ ኣሳቲካ ኢስታራ ኢሲፌ ማዳን ኡቲዳ።
LUK 5:30 ፋርሳዌቲኔ ኢስታ ጻፌቲ፥ «ቃራጻ ቃንጺሲዛይታራኔ ናጋራንቻታራ ኢሲፌ ኣዛስ ሜቲ?» ጊዲ ዬሱሳ ካሊዛይታ ቦላ ዙዙሜቲዳ።
LUK 5:31 ዬሱሲካ ኢስታስ፥ «ሃርጋንቻታስ ኣቲን ፓጻ ኣሳስ ኣኪሜ ኮሼና።
LUK 5:32 ታኒካ ናጋራንቻታ ማሮቴꬃኮ ዛራናስ ያዲስ ኣቲን ጺሎታ ጼይጋናስ ያቤኬ» ጊዴስ።
LUK 5:33 ኢስቲካ ዛሪዲ፥ «ዮሃኒሳ ካሊዛይቲ ዳሮ ዎዴ ጾሜቴሲኔ ዎሴቴስ። ፋርሳዌታ ካሊዛይቲካ ኢዛꬆ ኦꬄቴስ። ኔና ካሊዛይቲ ጊዲኮ ኡባ ዎዴ ሜቴሲኔ ኡዬቴስ» ጊዳ።
LUK 5:34 ዬሱሲካ ኢስታስ ዛሪዲ፥ «ሚሺራይ ኢሲፌ ዲሺን ዲጊሳስ ጼይጌቲዳይቲ ጾማናስ ቤሲዜ?
LUK 5:35 ጊዶ ኣቲን ሚሺራይ ኢስታፌ ሻኬታና ዎዴይ ያና፤ ኢስቲ ሄ ዎዴ ጾማና» ጊዴስ።
LUK 5:36 ኢስታስ፥ «ኦራꬃ ማይኦፌ ቃንጺ ኤኪዲ ጋልኣ ማይኦ ቦላ ዎꬂ ሲኪዛዴይ ዴና፤ ዎꬂ ሲኪኮ ኦራꬃዚ ጋልኣራ ጋጎንታ ጊሻስ ጋልኣዛ ዳካና።
LUK 5:37 ዎይኔፔ ኦሴቲዳ ኦራꬃ ጫጄ ጋልኣ ሉካሞን ኩንꬂዲ ዎꬂዛ ኣሲ ኦኒካ ዴና፤ ዎꬂዛ ጊዲኮ ዎይኔፔ ኦሴቲዳ ኦራꬃ ጫጄይ ጋልኣዛ ዳካና። ዎይኔ ጫጄዚካ ቢታን ጉካና፤ ጋልኣ ሉካሞይ ሲንꬃፌ ጎኦንታዝ ጊዳና።
LUK 5:38 ሄሳ ጊሻስ ኦራꬃ ዎይኔ ጫጄይ ኦራꬃ ኦጎሮን ጉጄታናስ ቤሴስ።
LUK 5:39 ሂስቲኮ ጫላ ዎይኔ ጫጄ ኡዪዳፔ ጉዬ ጫሎንታዝ ኡያና ኮይዛይ ኦኒካ ዴና ጋሶይካ ጫላይ ሎኦ ጊዲዳ ጊሻሳ» ጊዴስ።
LUK 6:1 ኢሲ ሳምባታ ጋላስ ዬሱሲ ካꬃ ጊዶራ ኣꬊ ቢሺን ኢዛ ካሊዛይቲ ቲያ ጹጲ ኤኪዲ ባ ኩሼን ሺጌቺ ሚሺን፥
LUK 6:2 ፋርሳዌታፔ ኢሲ ኢሲ ኣሳቲ፥ «ሳምባታ ጋላስ ኦꬃናስ ቤሶንታይሳ ኣይስ ኦꬄቲ?» ጊዳ።
LUK 6:3 ዬሱሲካ ኢስታስ፥ «ዳዊቲ ኢዛራ ዲዛ ኣሳቲ ጋፊዳ ዎዴ ኢዚ ኦꬂዳይሳ ናባቢቤኬቲ?
LUK 6:4 ኢዚ ጾሳ ኬꬄ ጌሊዲ ቄሴቲ ጻላ ማና ማላ ኣዛዜቲዳ ዱማ ኡኬꬃ ባስ ሚዲ ባናራ ዲዛይታስ ኢሚዴስ» ጊዲ ዛሪዴስ።
LUK 6:5 ቃሴካ ዬሱሲ፥ «ኣሳ ናይ ሳምባታ ጎዳ» ጊዲ ኢስታስ ዮቲዴስ።
LUK 6:6 ዬሱሲካ ሃራ ሳምባታ ጋላስ ኣይሁዳ ዎሳ ኬꬄ ጌሊዲ ታማርሲሺን ኡሻቻ ኩሼይ ሲሊዳ ኢሲ ኣሲ ሄን ዴስ።
LUK 6:7 ሙሴ ዎጋ ታማርሲዛይቲኔ ፋርሳዌቲ ዬሱሳ ሞታናስ ጋሶ ኮዪዲ ኣኔ ኢዚ ሳምባታ ጋላሳን ኣዴዛ ፓꬂኮ ቤያና ጊዲ ናጊሼ ጋምኢዳ።
LUK 6:8 ዬሱሲካ ኢስታ ዎዚና ቆፋ ኤሪዲ ኩሼይ ሲሊዳ ኣዴዛ ኡባ ሲንꬃን፥ «ዴንዳ ኤቃ» ጊዴስ። ኣዴዚካ ዴንዲ ኤቂዴስ።
LUK 6:9 ዬሱሲካ ኢስታ፥ «ታ ኢንቴና ኢሲ ሚሽ ኣኔ ኦይቻይስ፤ ሳምባታ ጋላስ ኦꬃናስ ቤሲዛይ ሎኦ ኦሶዬ? ኢታ ኦሶ? ሼምፖ ኣሾ ዎይኮ ꬋይሶ?» ጊዲ ኦይቺዴስ።
LUK 6:10 ቃሴካ ዬሱሲ ባ ዩሾን ዲዛ ኡባ ዩሺ ጼሊዳፔ ጉዬ ኣዴዛ፥ «ኔ ኩሼ ፒዲሳ» ጊዴስ፤ ኣዴዚካ ዬሱሲ ጊዳ ማላ ኦꬂዴስ። ኢዛ ኩሼይካ ፓጺዴስ።
LUK 6:11 ጊዶ ኣቲን ኣሳቲ ሃንቄቲዳ፤ ዬሱሳ ቦላ ኣይ ኦꬃናስ ኮሺዛኮ ባ ጊዶን ዞሬቲዳ።
LUK 6:12 ሄ ጋላሳታፔ ኢሲ ጋላስ ዬሱሲ ዎሳናስ ዙማ ቦላ ኬዚዲ ኦማርስ ኩሜꬅ ጾሳ ዎሲሼ ኣቂዴስ።
LUK 6:13 ጋዴይ ዎንቲሺን ባና ካሊዛይታ ጼይጊዲ ኢስታፌ ታማኔ ናምኣታ ዶሪዴስ። ኢስታካ፥ «ሃዋሬታ» ጊዲ ሱንꬂዴስ።
LUK 6:14 ኢስቲካ ጴጽሮሳ ጊዲ ሱንꬂዳ ሲሞናኔ ኢዛ ኢሻ ኢንዲራሳ፥ ያቆቤ፥ ዮሃኒሳ፥ ፒሊጶሳ፥ ባርቴሌሞሳ፥
LUK 6:15 ማቶሳ፥ ቶማሳ፥ ኢልፊዮሳ ና ያቆቤ፥ ባ ባጋስ ሚሼቲዛ ሲሞና፥
LUK 6:16 ያቆቤ ና ዩሁዳኔ ዬሱሳ ኣꬂ ኢሚዳ ኣስቆሮንቶ ዩሁዳ።
LUK 6:17 ዬሱሲካ ኢስታራ ኢሲፌ ዙማ ቦላፌ ዱጌ ዎꬊዲ ዴምባሶን ኤቂዴስ። ኢዛ ካሊዛይታፔ ዳሮ ኣሳይ ሄን ዴስ፥ ዩሁዳፔኔ ዬሩሳላሜፔ፥ ቃሴካ ጺሮሴፔኔ ሲዶና ኣባ ኣቻፌ ዪዳ ኬሂ ዳሮ ኣሳይካ ሄን ዴስ።
LUK 6:18 ኢስቲካ ዪዳይ ዬሱሲ ጊዛይሳ ሲያናሲኔ ሃርጌፌ ፓጻናሳ፤ ቱና ኣያናይካ ዋዪሲዛይቲ ዉሪ ፓጺዳ።
LUK 6:19 ዎልቃይካ ኢዛፔ ኬዚዲ ዳሮታ ፓꬂዛ ጊሻስ ኣሳይ ዉሪ ኢዛ ቦቻናስ ዪዴስ።
LUK 6:20 ዬሱሲካ ባና ካሊዛይታስ፥ «ጾሳ ካዎቴꬃይ ኢንቴስ ጊዲዳ ጊሻስ ኢንቴኖ ማንቆቶ! ኢንቴ ኣንጄቲዳይታ፤
LUK 6:21 «ኢንቴ ጉዬፔ ካላና ጊሻስ ሃኢ ጋፊዛይቶ! ኢንቴ ኣንጄቲዳይታ፤ ኢንቴ ጉዬፔ ሚጫና ጊሻስ ኢንቴኖ ሃኢ ዬኪዛይቶ! ኢንቴ ኣንጄቲዳይታ፤
LUK 6:22 ኣሳይ ታ ጊሻስ ኢንቴና ኢጺሺን ባ ጊዶፌ ሻኪሺን፥ ቦሪሺኒኔ ኢንቴና ኢታ ሱንꬃራ ጼይጊሺን ኢንቴ ኣንጄቲዳይታ፤
LUK 6:23 «ኢንቴስ ሳሎን ጊታ ዎይቶይ ዲዛ ጊሻስ ሄ ዎዴ ኡፋይሳን ጉፒቴ፤ ኣይስ ጊኮ ኢስታ ኣዋቲ ናቤታ ቦላ ሄሳꬆ ኦꬂዳ።
LUK 6:24 «ጊዶ ኣቲን ኢንቴኖ ዱሬቶ! ኢንቴ ሃኢ ኡፋዬቲዳ ጊሻስ ኢንቴስ ኣዬ ኣና!
LUK 6:25 ኢንቴኖ ሃኢ ካሊዳይቶ! ኢንቴና ኣዬ ኣና! ኢንቴ ጉዬፔ ጋፋና፤ ኢንቴኖ ሃኢ ሚጪዛይቶ! ኢንቴስ ኣዬ ኣና! ኢንቴ ጉዬፔ ሚሼታናኔ ዬካና።
LUK 6:26 «ኣሲ ዉሪ ኢንቴ ጊሻስ ሎኦ ሃሳይዛ ዎዴ ኢንቴስ ኣዬ ኣና! ኣይስ ጊኮ ኢስታ ኣዋቲ ዎርዶ ናቤታስ ሄሳ ማላ ኦꬂዳ።
LUK 6:27 «ጊዶ ኣቲን ታ ዮቲዛይሳ ሲዪዛይቶ! ታኒ ኢንቴስ ዮቲዛይ ኢንቴ ሞርኬታ ሲቂቴ፤ ኢንቴና ኢጺዛይታስ ሎኦ ኦꬂቴ፤
LUK 6:28 ኢንቴና ቃንጊዛይታ ኣንጂቴ፤ ኢንቴና ቆሂዛይታስ ዎሲቴ፤
LUK 6:29 ኢሲ ሻጋላን ባቂኮ ናምኣንꬆ ሻጋላ ጉጃ ቤሳ፤ ኦኒካ ኔ ቦላራ ማይኢዳይሳ ቃሪ ኤኪኮ ጋꬃራ ማይኢዳይሳካ ዲጎፋ።
LUK 6:30 «ኔና ዎሲዛ ኡባስ ኢማ፤ ኔ ሚሻ ኤኪዳ ኣሲ ዛሪ ኢማና ማላ ኦይቾፋ።
LUK 6:31 «ኣሲ ኢንቴስ ኦꬃና ማላ ኢንቴ ኮይዛይሳꬆ ኢንቴካ ሃራ ኣሳስ ኦꬂቴ።
LUK 6:32 «ናጋራንቻቲካ ባና ሲቂዛይታ ሲቂዛ ጊሻስ ኢንቴ ኢንቴና ሲቂዛይታ ጻላ ሲቂኮ ኢንቴስ ኣይ ዱማ ኣንጆይ ዲዜ?
LUK 6:33 ኢንቴ ኢንቴስ ሎኦ ኦꬂዛይታስ ጻላላ ሎኦ ኦꬂኮ ኢንቴስ ኣይ ዱማ ኣንጆይ ዲዜ? ኣይስ ጊኮ ናጋራንቻቲካ ሄሳꬆ ኦꬄቴስ።
LUK 6:34 ታልኤ ኤኪዲ ዛራና ዳንዳዬቴስ ጊዛይታስ ጻላ ኢንቴ ታልኢኮ ኢንቴ ሃራ ኣይ ዱማ ኣንጆ ዴማኔ? ኣይስ ጊኮ ናጋራንቻቲካ ኢስቲ ታልኢዳይሳ ሲሬ ዛሪዲ ኤካናስ ናጋራንቻታስ ታልኤቴስ።
LUK 6:35 ጊዶ ኣቲን ጾሲ ባና ጋላቶንታይታሲኔ ኢታታስ ኪያ ጊዲዳ ማላ ኢንቴ ሞርኬታ ሲቂቴ፤ ሎኦ ኦꬂቴ፤ ጉዬፔ ዛሪ ኤካናስ ቆፖንታ ዲሼ ታልኤ ኢሚቴ፤ ሄሳንካ ኢንቴስ ኩሼ ዛሮይ ጊታ ጊዳና፤ ቃሴካ ኢንቴ ዎጋ ጾሳ ና ጊዳና።
LUK 6:36 ኢንቴ ኣዋይ ኪያ ጊዲዳ ማላ ኢንቴካ ኪያታ ጊዲቴ።
LUK 6:37 «ኢንቴ ሃራታ ቦላ ፒርዶፍቴ፤ ኢንቴ ቦላካ ፒርዴቴና፤ ኢንቴ ቦላ ፒርዳይ ዳሮንታ ማላ ሃራታ ቦላ ፒርዳ ዳሪሶፍቴ፤ ኣሳስ ኣቶ ጊቴ፤ ኢንቴስካ ኣቶ ጌቴታና።
LUK 6:38 ኢሚቴ! ኢንቴስካ ኢሜታና፤ ኢንቴስ ኢንቴ ማኪዳ ሚሻን ሲሚዲ ማኬታና፤ ሃራፔካ ናቂ ባቄቲዲ ዪጌቲ ኩሚዲ ዎራ ጉካናሼ ሎኦ ማኪዛ ሚሻን ማኬቲዲ ኢንቴስ ኢሜታና» ጊዴስ።
LUK 6:39 ቃሴካ ዬሱሲ ኢስታስ ሌሚሶን፥ «ቆቄይ ቆቄ ካሌꬃናስ ዳንዳይዜ? ካሌꬂኮካ ናምኣቲ ኢሶይ ኢሳራ ኦይኬቲዲ ኦላን ጌሌቴኔ?
LUK 6:40 ታማሬይ ባና ታማርሲዛዴፌ ኣꬌና፤ ጊዶ ኣቲን ሎኤꬂ ታማርዳ ኣሲ ዉሪ ባ ኣስታማሬ ማላ ጊዴስ።
LUK 6:41 «ኔ ኣይፌ ጊዶን ዲዛ ቱሳ ጼሎንታ ዳሼ ኔ ኢሻ ኣይፌ ጊዶን ዲዛ ቡራ ኣይስ ጼላይ?
LUK 6:42 ኔ ኣይፌን ዲዛ ቱሳ ቤኦንታ ኔ ኢሻ፥ ‹ታኒ ኔ ኣይፌን ዲዛ ቡራ ኣኔ ኬሳይስ› ጋናስ ዎስታ ዳንዳያይ? ኔኖ ቆꬌፔ ቆሞን ሃኒዛይሶ ኮይሮታዳ ኔ ኣይፌን ዲዛ ቱሳ ኬሳ፤ ሄሳፌ ጉዬ ኔ ኢሻ ኣይፌን ዲዛ ቡራ ኬሳናስ ሎኤꬃ ጼላንዳሳ።
LUK 6:43 «ሎኦ ሚꬂ ኢታ ኣይፌ ኣይፌና፤ ቃሴካ ኢታ ሚꬂ ሎኦ ኣይፌ ኣይፌና።
LUK 6:44 ሚꬂ ዉሪካ ባ ኣይፌን ኣይፌን ኤሬቴስ፤ ኣጉንꬃፌ ባላሴ ጌቴቲዛ ሚꬃ ኣይፌይ ማጼቴና፤ ላዴፔ ዎይኔ ኣይፌይ ቃንጼቴና።
LUK 6:45 ሎኦ ኣሲ ባ ዎዚና ኩሚዳ ሎኦ ሚሽ ኬሴስ፤ ኢታ ኣሲካ ባ ዎዚና ኩሚዳ ኢታ ሚሻፌ ኢታ ኬሴስ፤ ኣሲ ዉሪካ ባ ዎዚና ኩሚ ፓላሂዳይሳ ባ ዶናን ሃሳዬስ።
LUK 6:46 «ታኒ ጊዛይሳ ኦꬄኬታ ሺን ኣይስ ታና፥ ‹ጎዶ! ጎዶ!› ጌቲ?
LUK 6:47 ታኮ ዪዲኔ ታ ቃላ ሲዪዲ ፖሊዛይ ዉሪ ኦና ሚሳቲዛኮ ታ ኢንቴና ቤሳና፤ ኬꬄ ኬጻናስ ዚቂ ኦꬂ ቦኪዲ ሹቻ ቦላን ባ ኬꬅ ኬጺዳ ኣሳ ሚሳቴስ። ሃሮ ሃꬂ ዪዲ ሄ ኬꬃ ሱጊዴስ፤ ጊዶ ኣቲን ሚኒ ኬጼቲዳ ጊሻስ ቃꬃናስ ዳንዳይቤና።
LUK 6:49 ጊዶ ኣቲን ታ ቃላ ሲዪዲ ፖሎንታ ኣሲ ባ ኬꬄ ሎኤꬂ ባሶንታኔ ጊዶን ሹች ዬጎንታ ኬጺዳ ኣሳ ሚሳቴስ፤ ሃሮይካ ኬꬃ ሱጊን ኬꬃይ ሄራካ ኩንዲዲ ኢታ ላሌꬅ ላሌቲዴስ» ጊ ዮቲዴስ።
LUK 7:1 ዬሱሲ ሄሳ ዉርሲካ ዴሬ ሲንꬃን ዮቲ ዉርሲዳፔ ጉዬ ቂፊርናሆሜ ጊዛሶ ቢ ጌሊዴስ።
LUK 7:2 ሄን ቂፊርናሆሜን ማቶ ሃላቃይ ዴስ፤ ሄ ኣዴዛስ ኢዚ ሲቂዛ ኣሽካራይ ሃርጊዲ ሃይቆስ ሼምፖ ቦላ ዴስ።
LUK 7:3 ኢዚካ ዬሱሳ ጊሻስ ሲዪዲ፥ «ባ ኣሽካራ ፓꬃና ማላ ዬሱሳ ዎሴሪኬቲ!» ጊዲ ኢሲ ኢሲ ኣይሁዳ ባጋ ኣሳታፔ ጪማታ ዬሱሳኮ ዬዲዴስ።
LUK 7:4 ኪቴቲዲ ቢዳ ኣሳቲ ዬሱሳኮ ዪዲ፥ «ሃይሳ ኣዴዛ ጊሻስ ኔ ኣሽካራዛ ፓꬃና ቤሴስ።
LUK 7:5 ኣይስ ጊኮ ሃይሲ ኣዴዚ ኑ ኣሳ ዳሮ ዶሴስ፤ ኑስካ ኣይሁዳ ዎሳ ኬꬄ ኬጺሲዳይ ኢዛ» ጊዲ ሚንꬂ ዎሲዳ።
LUK 7:6 ዬሱሲካ ኢስታራ ቢዴስ። ዬሱሲ ኣዴዛ ኬꬃኮ ማቲዛ ዎዴ ኣዴዚ ባ ላጌታ ዬሱሳኮ ዬዲዲ፥ «ጎዶ! ኔ ታ ኬꬄ ጌላናስ ቤሴና፤ ታኒካ ኔና ታ ኬꬄ ጌልꬃናስ ቤሲዛ ኣስ ጊዶንታ ጊሻስ ሃ ያሼ ዳቡሮፓ።
LUK 7:7 ታኒ ኔ ሲንꬃን ቤታናስ ቤሶንታ ኣስ ጊዲዳ ጊሻስ ኔኮ ባቤኬ፤ ሄሳ ጊሻስ ኔኒ ሄን ዳዳ ቃላ ጻላ ጊኮ ታ ኣሽካራይ ፓጻና።
LUK 7:8 ታስካ ታና ኣዛዚዛ ኣሲ ታፔ ቦላራ ዴስ። ታፔ ጋርሳራ ታኒ ኣዛዚዛ ዎታዳራቲ ዴቴስ። ኢሳ፥ ‹ሃ ያ!› ጊኮ ዬስ፤ ኢሳ፥ ‹ሄ ባ!› ጊኮ ቤስ፤ ኣሽካራይካ፥ ‹ሄሳ ኦꬃ!› ጊኮ ኣዛዜቲዳይሳ ኦꬄስ» ጊዴስ።
LUK 7:9 ዬሱሲካ ኣዴዚ ጊዳይሳ ሲዪዲ ኣዴዛ ሃኖቴꬃን ማላሌቲዴስ፤ ጉዬ ሲሚዲ ባና ካሊዛ ዴራስ፥ «ታ ኢንቴስ ጊዛይ ሃይሳ ማላ ጊታ ኣማኖ ሃራይ ኣቶሺን ኢስራኤሌ ናይታ ጊዶንካ ዴማቤኬ» ጊዴስ።
LUK 7:10 ዬሱሳኮ ኪቴቲዳ ኣሳቲ ጉዬ ኪቲዳ ሃላቃዛሶ ሲሚዲ ኣሽካራዚ ፓጺዳይሳ ቤኢዳ።
LUK 7:11 ሄሳፌ ጉዬ ዬሱሲ ጋምኦንታ ዲሼ ናይኔ ጌቴቲዛ ካታማ ባና ካሊዛይታራኔ ዳሮ ዴሬራ ኢሲፌ ቢዴስ።
LUK 7:12 ኢዚ ቢዲ ካታማ ጌሊዛ ሚጻ ጋኪሺን ሄ ካታማይፔ ዳሮ ኣሳይ ኣሃ ቶኪ ኤኪዲ ኬዚ ዎꬊዴስ። ሃይቂዳይሲ ባ ኣዬይስ ኢዚ ሜጺ ኢሲኖ። ኣዬይስካ ኣዚናይ ባ፤ ካታማፔ ዳሮ ኣሳይ ኢዚራ ኢሲፌ ዴስ።
LUK 7:13 ጎዳይካ ኢዞ ቤኢዳ ዎዴ ኢዚስ ሚሼቲዲ፥ «ኣይኮይ ባ፤ ዬኮፋ!» ጊዴስ።
LUK 7:14 ሺቂዲ ኣሃ ቶኪዳ ሃላ ቦቺን ኣሃ ቶኪዳይቲ ሲቲ ጊ ኤቂዳ። ዬሱሲካ፥ «ሃይሶ ናዞ ኔና ጋይስ ዴንዳ!» ጊዴስ።
LUK 7:15 ሃይቂዳ ናዚካ ሱሪ ኡቲዲ ሃሳያ ኦይኪዴስ። ዬሱሲካ ናዛ ኣዬይስ ኤፊ ኢሚዴስ።
LUK 7:16 ኣሳይ ዉሪካ ኬሂ ባቢዲ ጾሳ ጋላቲሼ፥ «ጊታ ናቤይ ኑ ጊዶፌ ዴንዲዴስ፤ ጾሲካ ሃይሳ ዴሬዛ ዪዲ ቤዪዴስ» ጊዴስ።
LUK 7:17 ሃይሲ ዬሱሳ ጊሻስ ሃሳዬቲዛ ሎኦ ሃሳያይ ኩሜꬃ ዩሁዳኒኔ ዩሁዳ ዩሾን ዲዛ ዴሬታን ኬዚዴስ።
LUK 7:18 ጻማቂዛ ዮሃኒሳ ካሊዛይቲካ ሃይሳ ኡባ ዮሃኒሳስ ዮቲዳ። ዮሃኒሲካ ኢስታ ጊዶፌ ናምኣታ ጼይጊዲ፥
LUK 7:19 «ኢዚ ያና ጌቴቲዲ ሃሳዬቲዛይሲ ኔኔዬ? ሃራ ኣስ ናጊኖ? ጊ ኦይቺቴ» ጊዲ ጎዳኮ ዬዲዴስ።
LUK 7:20 ቢዳ ኣሳቲ ዬሱሳኮ ጋኪዲ፥ «ጻማቂዛ ዮሃኒሲ፥ ‹ኢዚ ያና ጌቴቲዲ ሃሳዬቲዛይሲ ኔኔዬ? ሃራ ኣስ ናጊኖ?› ጊዲ ኔኮ ኑና ዬዲዴስ» ጊዳ።
LUK 7:21 ሄ ዎዴ ዬሱሲ ዳሮ ኣሳ ዋዬፔ፥ ሃርጌፌኔ ቱና ኣያናታፔ ፓꬂዴስ። ዳሮ ቆቄታ ኣይፌይካ ጼሊዴስ።
LUK 7:22 ዮሃኒሲ ኪቲን ኢዛኮ ዪዳይታ፥ «ቢዲ ኢንቴ ኢንቴ ኣይፌራ ቤኢዳይሳኔ ሲዪዳይሳ ዮሃኒሳስ ዮቲቴ። ኣይፌ ቆቄቲ ጼሌቴስ፤ ቶሆ ዎቤቲ ሱሬ ሄሜቴቴስ፤ ኢንቺራቻ ሃርጊዛይቲ ፓጺዳ፤ ቱሌቲ ሲዪዳ፤ ሃይቂዳይቲ ሃይቆፔ ዴንዲዳ፤ ማንቆታስ ሚሺራቾ ቃላይ ዮቴቴስ።
LUK 7:23 ታናን ꬉጴቶንታ ኣሲ ዉሪካ ኣንጄቲዳይሳ» ጊዴስ።
LUK 7:24 ዮሃኒሲ ኪቲዳ ኣሳቲ ዬሱሳ ኣቻፌ ቢዳፔ ጉዬ ዬሱሲ ዳሮ ኣሳስ ዮሃኒሳ ጊሻስ፥ «ኢንቴ ኣይ ቤያናስ ባዞ ኬዚዴቲ? ጫርኮይ ያኔ ሃ ቃሴꬂዛ ሾምቦቆ ቤያናሴ?
LUK 7:25 ኣይ ቤያናስ ኬዚዴቲ? ሎኢዛ ማይኦ ማይኢዳ ኣስ ቤያና ኬዚዴቲ? ሎኦ ማይኦ ማይኢዲ ዋርጺ ዋርጺ ጊዛይቲ ኢሻሎ ዱስ ዲዛይቲ ካዎ ኬꬃን ዴቴስ።
LUK 7:26 ሂስቲኮ ኣይ ቤያናስ ኬዚዴቲ? ናቤ ቤያናሴ? ኤ ታ ኢንቴስ ቱማ ጋይስ፤ ኢንቴ ኬዚዳይ ናቤፔ ኣꬊዛዴ ቤያናሳ።
LUK 7:27 ጾሳ ቃላን፥ ‹ኔ ባና ኦጌ ኔስ ባሲ ሎኤꬃና ኪቴቲዳ ኣስ ታ ኔፔ ሲንꬃራ ዬዳና› ጌቴቲዲ ኢዛ ጊሻስ ጻፌቲዳይሲ ኢዛኮ።
LUK 7:28 «ታኒ ኢንቴስ ጊዛይ ማጫሳፌ ዬሌቲዳ ኣሳ ጊዶን ዮሃኒሳፔ ኣꬊዛዴይ ኦኒካ ዴና፤ ጾሳ ካዎቴꬃን ጊዲኮ ኣስ ኡባፌ ጉꬅ ጌቴቲዳ ኣሲ ዮሃኒሳፔ ኣꬋና» ጊ ዮቲዴስ።
LUK 7:29 ቃራጻ ቃንጺሲዛይቲካ ኣቶንታ ሃይሳ ዬሱሳ ቃላ ሲዪዳይቲ ዉሪካ ዮሃኒሳ ኩሼን ጻማቄቲዲ ጾሳስ ቤሲዛ ቦንቾ ኢሚዳ።
LUK 7:30 ፋርሳዌቲኔ ሙሴ ዎጋ ኤራንቻቲ ዮሃኒሳ ኩሼን ጻማቄቶንታ ጊሻስ ጾሲ ኢስታስ ዋና ቆፋ ኦꬂዲ ሺሺዳይሳ ሂራይሲዳ።
LUK 7:31 ቃሴካ ዬሱሲ ዛሪዲ፥ «ሂስቲኮ ሃኢ ዬሌታ ኣዛን ሌሚሶ? ኢስቲ ኣይ ሚሳቲዞ?
LUK 7:32 ጊያን ኡቲዲ ባ ጊዶን ኢሶይ ኢሳራ ጼይጌቲዲ፥ ‹ኢንቴስ ኑኒ ዲꬅ ዲጺዶስ ሺን ዱሪቤኬታ፤ ዚላስ ዚላሊዶስ ሺን ዬኪቤኬታ ጊዛ ናይታ ሚሳቴቴስ› ጊዴስ።
LUK 7:33 ኣይስ ጊኮ ጻማቂዛ ዮሃኒሲ ካꬅ ሞንታኔ ዎይኔፔ ኦሴቲዳ ጫጄ ኡዮንታ ዪን፥ ‹ዳይዳንꬂ ኢዛ ቦላ ዴስ› ጊዴታ።
LUK 7:34 ኣሳ ናይ ቃሴ ሚሼኔ ኡዪሼ ዪን፥ ‹ጋንጃማኔ ኡሻንቻ፥ ቃራጻ ሺሺዛይታራኔ ናጋራንቻታራ ላጌቴስ› ጊዴታ።
LUK 7:35 ሄሳ ጊሻስ ኤራቴꬃ ቱማቴꬃይ ኢዚ ናይታ ኡባታ ኣቻን ኣማኔቲዴስ» ጊዴስ።
LUK 7:36 ሄሳፌ ጉዬ ፋርሳዌታፔ ኢሲ ኣሲ ቁማ ማናስ ዬሱሳ ባሶ ጼይጊን ዬሱሲ ጼይጊዳ ፋርሳዌዛሶ ቢ ኡቲዴስ።
LUK 7:37 ሄ ካታማን ዲዛ ኢሲ ናጋራንቻ ማጫስ ዲዛራ ዬሱሲ ፋርሳዌዛ ኬꬃን ቁማ ማዳ ቦላን ዲዛይሳ ሲያዳ ኢሲ ኣልባስጺሮሴ ቢልቃጼ ሺቶ ኤካ ያዱስ።
LUK 7:38 ሂስታዳ ዬሱሳፔ ጉዬራ ኢዛ ቶሆ ኣቻን ኤቃዳ ዬካሼኔ ባ ኣፉንꬃን ኢዛ ቶሆ ጫጲሳዳ ባ ሁኤ ቢናናራ ቁጫሼኔ ዬራሼ ሺቶዛ ቲያዱስ።
LUK 7:39 ዬሱሳ ቁማስ ጼይሲዳ ፋርሳዌይካ ሄሳ ቤኢዲ፥ «ሃይሲ ኣዴዚ ናቤ ጊዲዳኮ ሃና ኢዛ ቦቺዳ ማጫሳያ ኢዛ ኦናኮኔ ኣይ ኦꬂዛ ኣሳኮ ኤራናኮሺን፤ ኢዛ ናጋራንቻኮ ሺን» ጊዲ ባ ዎዚናን ቆፒዴስ።
LUK 7:40 ዬሱሲ፥ «ሲሞና! ኔስ ታ ዮታናዚ ዴስ» ጊዴስ። ሲሞኒካ፥ «ኣስታማሬ! ኤሮ ዮታ» ጊዴስ።
LUK 7:41 ዬሱሲ ዛሪዲ፥ «ኢሲ ሚሼ ታልኤ ኢሚዛዴፌ ታልኤ ኤኪዳ ናምኡ ኣሳቲ ዴቴስ፤ ኢስታፌ ኢሳ ቦላ ኢቻሹ ጼት ዲናሬይ ዴስ፤ ናምኣንꬆዛ ቦላ ኢቻሹ ታሙ ዲናሬይ ዴስ።
LUK 7:42 ኢስታስ ቃንጺዛ ሚሺ ꬋዪን ታልኤ ኢሚዳይሲ ናምኣታ ኣጮዛ ኡባካ ማሪዴስ፤ ሂስቲኮ ሃ ናምኣታፔ ሃ ታልኤ ኢሚዳይሳ ዳርሲ ዶሳናይ ኣዋይሴ?» ጊዴስ።
LUK 7:43 ሲሞኒካ ዛሪዲ፥ «ዳሮ ኣጮይ ማሬቲዳይሳ ጋዳ ቆፓይስ» ጊዴስ። ዬሱሲካ፥ «ቱሙ ፒርዳዳሳ» ጊዴስ።
LUK 7:44 ሄ ማጫሳይኮ ዩዪዲ ሲሞና፥ «ሃኖ ማጫሳዮ ጼላይ? ታ ኔ ኬꬄ ጌሊን ኔ ታ ቶሆስ ሃꬄ ሺሻቤካ፤ ኢዛ ጊዲኮ ታ ቶሆ ባ ኣፉንꬃን ጫጲሳዳ ባ ሁኤ ቢናናራ ቁጫዱስ።
LUK 7:45 ኔኒ ኡባካ ታና ዬራቤካ፤ ኢዛ ጊዲኮ ታ ጌሎሶፔ ዶማዳ ታ ቶሆ ዬሮ ኣጋቤኩ።
LUK 7:46 ኔ ታ ሁኤ ዛይቴ ቲያቤካ ሺን ኢዛ ጊዲኮ ታ ቶሆ ሺቶ ቲያዱስ።
LUK 7:47 «ሄሳ ጊሻስ ታ ኔና ጊዛይ ኢዛ ታና ኬሃ ዶሲዳ ጊሻስ ኢዛ ባ ዳሮ ናጋራፔ ማሬታዱስ፤ ጉꬃራ ማሬቲዛ ኣሳ ሲቆይካ ጉꬃ» ጊዴስ።
LUK 7:48 ዬሱሲ ማጫሳዮ፥ «ኔ ናጋራፔ ማሬታዳሳ» ጊዴስ።
LUK 7:49 ኢዛራ ኢሲፌ ማዳን ኡቲዳ ኢማꬃቲካ፥ «ሃይሲ ናጋራ ማሪዛይ ኢዚ ኦኔ?» ጊዲ ባ ዎዚናራ ቆፒዳ።
LUK 7:50 ዬሱሲካ ማጫሳዮ፥ «ኔና ኔ ኣማኖይ ኣሺዴስ፤ ሳሮን ባ!» ጊዴስ።
LUK 8:1 ሄሳፌ ጉዬ ዬሱሲ ጾሳ ካዎቴꬃ ሚሺራቾ ሳባኪሼ ዱማ ዱማ ካታማታ ጊዶራኔ ጉታታ ጊዶራ ኣꬊዴስ። ኣꬊ ቢዛ ዎዴ ኢዛ ካሊዛ ታማኔ ናምኣቲ ኢዛራ ዴቴስ።
LUK 8:2 ቃሴካ ቱና ኣያናፔኔ ኢታ ሃርጌፌ ፓጺዳ ኢሲ ኢሲ ማጫሳቲ ኢዛራ ዴቴስ። ኢስቲካ ላፑን ቱና ኣያናይ ኢዚፔ ኬዚዳ ማግዳሌ ጌቴቲዛ ዴሬፔ ዪዳ ማራሞ፥
LUK 8:3 ካዎ ሄርዶሳሶን ኦꬂዛ ኩዛ ማቾ ዮሃኖ ቃሴካ ሶሲኖኔ ሃራ ዳሮ ማጫሳቲ ዴቴስ፤ ኢስቲካ ባንታስ ዲዛ ሚሻራ ዬሱሳስ ኦꬂዛይታ።
LUK 8:4 ዳሮ ዴሬይ ኢሲፌ ሺቂ ዲሺን ቃሴካ ኣሳይ ዱማ ዱማ ካታማፔ ኢዛኮ ዎꬊዛ ዎዴ ዬሱሲ ሌሚሶራ ታማርሲሼ፥
LUK 8:5 «ኢሲ ጎሻንቻይ ዜሬꬅ ዜራናስ ኬዚዴስ፤ ኢዚ ዜሪሺን ባጋይ ኦጌን ዎꬊዲ ኣሳ ቶሆን ዬꬌቲዴስ፤ ሳሎ ካፎቲካ ዪዲ ማጺ ሚዳ፤
LUK 8:6 ኢሲ ዜሬꬃይ ሹቻ ጋዴን ዎꬊዲ ሄራካ ጫሪዴስ፤ ጋዴዚካ ሜላ ጋዴ ጊዲዳ ጊሻስ ኤሌ ሜሊዴስ።
LUK 8:7 ቃሴካ ሃራ ዜሬꬂ ኣጉንꬃ ጊዶን ዎꬊዴስ፤ ኣጉንꬃይካ ኢዛራ ኢሲፌ ዲጪዲ ጫሬቻይካ ዲጮንታ ማላ ጩሊዴስ።
LUK 8:8 ቃሴካ ሃራ ዜሬꬃይ ኣራዳ ጋዴን ዎꬊዴስ፤ ጫሪዲ ጼቱ ኩሼ ኣይፊዴስ» ጊዴስ። ዬሱሲ ሃሳያ ዉርሲዳፔ ጉዬ ቃላ ꬎቁ ሂስቲዲ፥ «ሲዪዛ ሃይꬂ ዲዛ ኣሲ ሲዮ!» ጊዴስ።
LUK 8:9 ዬሱሳ ካሊዛይቲ፥ «ዜሬꬃ ሌሚሶዛስ ቢርሼꬅ ኢማ» ጊዲ ኦይቺን፥
LUK 8:10 ኢዚካ ኢስታስ፥ «ጾሳ ካዎቴꬃ ጹራ ኤሮይ ኢንቴስ ኢሜቲዴስ፤ ሃራታስ ጊዲኮ ሌሚሶራ ዮታይስ ቃሴካ ሃራቲ ቤኢዲ ዎዚናን ዎꬆንታ ማላኔ ሲዪዲ ዩሺ ቆፖንታ ማላ ሃኒዴስ።
LUK 8:11 «ዜሬꬃዛ ሌሚሶይካ ሃይሳ፤ ዜሬꬅ ጌቴቲዳይሲ ጾሳ ቃላ።
LUK 8:12 ኦጌ ላንቄን ዎꬊዳይሲ ቃላ ሲዪዛይታ፤ ጊዶ ኣቲን ኢስቲ ኣማኒዲ ኣቶንታ ማላ ጻላኤይ ዪዲ ቃላ ኢስታ ዎዚናፔ ኤኪቺዛይታ።
LUK 8:13 ሹቻ ቦላ ዎꬊዳይቲካ ቃላ ሲዪዲ ኡፋይሳራ ኤኪዛይታ፤ ኢስቲካ ሃኢስ ኣማኔቴስ ኣቲን ሜቶይ ኢስታ ቦላ ጋኪዛ ዎዴ ጻጶ ዬዶንታ ጊሻስ ኤሌራ ኣማኖ ካዲዛይታ።
LUK 8:14 ኣጉንꬃ ጊዶን ዎꬊዳይቲ ቃላ ሲዪዛይታ፤ ሄይቲካ ሃይሳ ሃ ኣላሜ ቆፋኒኔ ኣቆታን፥ ሃ ቢታ ቦላ ዱሳ ሎኤቴꬃን ጩሌቲዲ ሎኤꬂ ኣይፌ ኢሜቴና።
LUK 8:15 ኣራዳ ቢታን ዎꬊዳይሲ ቃላ ሱሬኒኔ ሎኦ ዎዚናን ሲዪዲ ናጊዛይታኔ ዳንዳያን ሚኒዲ ኣይፌ ኣይፊዛይታ።
LUK 8:16 «ፖኦ ፖኢሲዲ ባꬃ ጊዶን ዎይኮ ኣርሳ ጋርሳን ዎꬂዛ ኣሲ ዴና፤ ጊዶ ኣቲን ኬꬄ ጌሊዛ ኣሳስ ፖኣና ማላ ቆንጬሶን ዎꬄቴስ።
LUK 8:17 ቆቴቲዲ ቆንጬ ኬዞንታይ፥ ፖኦን ኬዚዲ ኤሬቶንታ ጌማን ኣታና ሚሺ ዴና።
LUK 8:18 «ሄሳ ጊሻስ ኢንቴ ሲዪዛይሳ ናጌቲ ሲዪቴ፤ ዲዛ ኣሳስ ጉጄታና፤ ባይንዳዴስ ኡባፌ ኢዛስ ዲዛ ሚሳቲዛራካ ኤኬታይቻና» ጊ ዛሪዴስ።
LUK 8:19 ሄሳፌ ጉዬ ዬሱሳ ኣያኔ ኢዛ ኢሻቲ ዬሱሳኮ ዪዳ፤ ጊዶ ኣቲን ኣሳ ዳሮቴꬃፌ ዴንዲዳይሳን ኢዛኮ ሺቃናስ ዳንዳይቤቴና።
LUK 8:20 ሄ ዎዴ ኣሳይ ዬሱሳስ፥ «ኔ ኣዬያኔ ኔ ኢሻቲ ኔና ቤያናስ ኮዪዲ ካሬን ኤቂዳ» ጊዲ ዮቲዳ።
LUK 8:21 ዬሱሲካ ዛሪዲ፥ «ታ ኣያኔ ታ ኢሻቲ ጾሳ ቃላ ሲዪዲ ናጊዛይታ» ጊዴስ።
LUK 8:22 ኢሲ ጋላስ ዬሱሲ ባና ካሊዛይታራ ዎጎሎ ጊዶ ጌሊዲ፥ «ኣባፌ ሄ ፒንꬅ ፒኖስ» ጊዴስ።
LUK 8:23 ኢስቲካ ፒኒሺን ኣባ ቦላ ዳምባላይ ዴንዲዲ ዋዪሲዛ ዎዴ ዬሱሲ ꬊስኪዴስ፤ ሃꬂካ ዎጎሎዛ ጊዶ ጌሊን ኣሳይ ዳሮ ሜቶቴቲዴስ።
LUK 8:24 ዬሱሳ ካሊዛይቲ ኢዛኮ ሺቂዲ፥ «ጎዶ! ጎዶ! ኑ ዉራና ሃኖስ» ጊዲ ዬሱሳ ꬊስኮፌ ዴንꬂዳ። ኢዚካ ቤጊዲ ጫርኮዛኔ ኣባ ዳምባላ ሴሪን ጫርኮይኔ ኣባ ዳምባላይ ጮኡ ጊዴስ።
LUK 8:25 ኢዚካ ባና ካሊዛይታ፥ «ኢንቴ ኣማኖይ ኣዋ ቢዴ?» ጊዴስ፤ ኢስቲካ ባ ጊዶን ባቢሼኔ ማላሌቲሼ፥ «ጫርኮኔ ሃꬄ ኣዛዚዛይ፤ ኢስቲካ ኢዛስ ኣዛዜቲዛይ ኢዚ ኦኔ?» ጊዳ።
LUK 8:26 ኢዛፔ ጉዬ ጋሊላፔ ሄ ፒንꬃን ዲዛ ጌርጌሴኖኔ ጌቴቲዛ ዴሬ ዎጎሎራ ፒኒዳ።
LUK 8:27 ዬሱሲ ዎጎሎዛፔ ጋዴን ዎꬊን ዳይዳንꬂ ኢዛ ቦላ ዲዛ ኢሳዴይ ካታማፔ ኬዚዲ ኢዛ ዴሚዴስ፤ ሄ ኣዴዚ ዳሮ ዎዴ ማይኦ ማይኦንታ ካሎ ዲዛዴኔ ኬꬃን ኣቆንታ ዱፎ ባስ ኣቆሶ ኦꬂዳ ኣሳ።
LUK 8:28 ዬሱሳ ቤኢዳ ዎዴ ዋሲሼ ዬሱሳ ሲንꬃን ኩንዲዴስ፤ ቃላ ꬎቁ ሂስቲዲ፥ «ቦንቾ ጾሳ ና ዬሱሳ! ታሲኔ ኔስ ኣይ ጋይቶቴꬂ ዲዜ? ኔ ታና ዋዪሶንታ ማላ ታ ኔና ዎሳይስ» ጊዴስ።
LUK 8:29 ቱና ኣያናይ ሄሳ ጋናስ ዳንዳይዳይ ኣዴዛፔ ኬዛና ማላ ዬሱሲ ኣዛዚዳ ጊሻሳ። ቱና ኣያናዚካ ዎዴን ዎዴን ዴንዲዛ ጊሻስ ኣዴዚ ሳንሳላታኒኔ ቢራታን ቶሆ ቃቺ ናጊንካ ቃሼቲዳ ሳንሳላታ ዱሴሬꬂዲ ኢዛ ቦላ ዲዛ ዳይዳንꬃይ ኢዛ ዱጌ ባዞ ዛሪ ኤፌስ።
LUK 8:30 ዬሱሲ፥ «ኔ ሱንꬂ ኦኔ?» ጊዲ ኦይቺዴስ፤ ኢዚካ ዳሮ ዳይዳንꬃቲ ኢዛን ጌሊዲ ዲዛ ጊሻስ ታ ሱንꬂ፥ «ሌጎኔ» ጊዴስ።
LUK 8:31 ዳይዳንꬃቲካ ባና ዉርሴꬂ ባይንዳ ጪማ ኦላን ዬጎንታ ማላ ሚንꬂዲ ዎሲዳ።
LUK 8:32 ሄንካ ዙማ ቦላ ዳሮ ጉዱንꬂ ሄሜቴስ፤ ዳይዳንꬃቲ፥ «ጉዱንꬃ ዉዴዛን ጌሊቴ» ጊዲ ኣዛዛና ማላ ዎሲን ዬሱሲ፥ «ኤሮ ጌሊቴ!» ጊዴስ።
LUK 8:33 ዳይዳንꬃቲ ኣዴዛፔ ኬዚዲ ጉዱንꬃታን ጌሊዳ። ጉዱንꬃቲ ኣፎዛ ዱጉንꬃራ ቢቻሪሼ ቢዲ ኣባን ጌሊ ሚቴቲዳ።
LUK 8:34 ሄሚዛይቲ ሃኒዳይሳ ቤኢዳ ዎዴ ቤሮቲ ቢዲ ካታማ ኣሳሲኔ ዴሬ ኣሳስ ዮቲዳ።
LUK 8:35 ሃኒዳይሳ ቤያና ጊዲ ኣሳይ ባ ዲዛሶፔ ዬሱሳኮ ዪዴስ፤ ዳይዳንꬃይ ኢዛፔ ኬዚዳ ኣዴዚካ ካሃይ ሲሚን ኣፋላ ማይኢዲ ዬሱሳ ቶሆ ጊዶን ኡቲዳይሳ ቤኢዲ ባቢዳ።
LUK 8:36 ዳይዳንꬃን ኦይኬቲዳ ኣዴዚ ፓጺሺን ቤኢዳይቲ ኢዚ ዋኒ ፓጺዳኮ ዴሬዛስ ዮቲዳ።
LUK 8:37 ጌርጌሴኖኔ ማታን ዲዛ ኣሳይ ኬሂ ባቢዳ ጊሻስ ዬሱሳ፥ «ሃይሳፌ ኪቻ!» ጊዲ ዎሲዳ፤ ኢዚካ ዎጎሎዛን ጌሊዲ ሲሚ ቢዴስ።
LUK 8:38 ዳይዳንꬃይ ኢዛፔ ኬዚዳ ኣዴዚ ዬሱሳራ ኢሲፌ ዳና ማላ ዎሲዴስ።
LUK 8:39 ጊዶ ኣቲን ዬሱሲ ኢዛ፥ «ኔሶ ሲማዳ ጾሲ ኔስ ኦꬂዳ ጊታ ሚሽ ኡባ ዮታ» ጊዲ ሞይዚዴስ፤ ኣዴዚካ ዬሱሲ ኢዛስ ኦꬂዳ ጊታ ሚሽ ባ ካታማን ዲዛ ኣሳስ ኡባስ ቆንጬን ዮቲሼ ቢዴስ።
LUK 8:40 ኣሳይ ዉሪ ዬሱሳ ዩሳ ናጊሼ ጋምኢዳ ጊሻስ ኢዚ ሲሚሺን ኡፋይሳን ሞኪ ኤኪዴስ።
LUK 8:41 ሄ ዎዴ ኢያኢሮሳ ጌቴቲዛ ኣይሁዳ ዎሳ ኬꬃ ሃላቃይ ዪዲ ዬሱሳ ቶሆ ቦላ ኩንዲዲ ባሶ ባና ማላ ዎሲዴስ።
LUK 8:42 ኢዚ ሄሳꬆ ኦይቺዳይ ኢዛስ ታማኔ ናምኡ ላይꬅ ኩሚዳ ኢሲ ማጫ ናይ ሳኬታዳ ሼምፖ ቦላ ዲዛ ጊሻሳ። ኢዚ ሄ ቡሳን ዲሺን ዴሬይ ዳሪዲ ባ ጊዶን ሱጌቲዲ ኢዛ ኬሂ ኡንኢሲዴስ።
LUK 8:43 ታማኔ ናምኡ ላይꬅ ሱꬂ ኢዚፔ ጉኪሺን ዲዛ ኢሲ ማጫሳያ ባስ ዲዛ ሚሻ ዉርሳ ꬋሌ ኤሪዛ ኣሳታስ ኢማ ዉርሲን ኢዞ ፓꬃናስ ዳንዳይዳ ኣሲ ኢሳዴይካ ዴና።
LUK 8:44 ኢዛካ ጉዬራ ሺቃዳ ዬሱሳ ኣፋላ ማጫራታ ቦቻዱስ፤ ኢዚፔ ጉኪዛ ሱꬃይ ሄራካ ኤቂ ኣጊዴስ።
LUK 8:45 ዬሱሲካ፥ «ታና ቦቺዳይ ኦኔ?» ጊዴስ። ዉሪካ ኑኒ ቦቺቤኮ ጊ ካዲዳ ዎዴ ጴጽሮሲ ዛሪዲ፥ «ጎዶ! ኣሲ ዉሪ ዩዪ ኣꬊዲ ኔና ሱጌሬꬂዲ ኡንኢሴስ» ጊዴስ።
LUK 8:46 ጊዶ ኣቲን ዬሱሲ፥ «ኣሲ ታና ቦቺዴስ፤ ዎልቃይ ታፔ ኬዚዳይሳ ታ ኤራይስ» ጊዴስ።
LUK 8:47 ማጫሳያ ኤሬቶንታ ቆቴታዳ ባናስ ዳንዳዮንታይሳ ኤራዳ ኮኮራሼ ያዳ ዬሱሳ ሲንꬃን ኩንዳዱስ፤ ኢዛካ ዬሱሳ ዋና ቦቺዳኮኔ ቃሴካ ኤሌራ ዋና ፓጺዳኮ ኡባ ኣሳ ሲንꬃን ዮታዱስ።
LUK 8:48 ኢዚካ፥ «ታ ናዬ! ኔ ኣማኖይ ኔና ፓꬂዴስ፤ ሳሮን ባ!» ጊዴስ።
LUK 8:49 ዬሱሲ ቡሮ ማጫሳይስ ሃሳያ ቦላ ዲሺን ኣይሁዳ ዎሳ ኬꬃ ሃላቃ ኢያኢሮሳ ኬꬃፌ ኢሲ ኣሲ ኢያኢሮሳስ፥ «ኔ ናያ ሃይቃዱስ፤ ሄሳ ጊሻስ ሃይሳፌ ጉዬ ኣስታማሬዛ ሜላ ዳቡርሶፋ!» ጊዴስ።
LUK 8:50 ዬሱሲ ሄሳ ሲዪዲ ኢያኢሮሳ፥ «ኣይኮይ ባ፤ ባቦፋ! ኣማና ኣቲን ኔ ናያ ፓጻና» ጊዴስ።
LUK 8:51 ዬሱሲ ኢያኢሮሳ ኬꬄ ጌሊዛ ዎዴ ጴጽሮሳ፥ ዮሃኒሳኔ ያቆቤ ቃሴካ ናዪ ኣዋፔኔ ኣይፔ ኣቲን ሃራይ ኦኒካ ኢዛራ ጌላና ማላ ኮዪቤና።
LUK 8:52 ሄ ዎዴ ኣሳይ ዉሪ ናይስ፥ «ዉ! ዉይ» ጊ ዋሲ ዬኪሺን ዬሱሲ፥ «ዬኮፍቴ፤ ኢዛ ኢቻዱስ ኣቲን ሃይቃቤኩ» ጊዴስ።
LUK 8:53 ኣሳይካ ናያ ሃይቂዳይሳ ኤሪዛ ጊሻስ ዬሱሳ ቦላ ሚጪዴስ።
LUK 8:54 ጊዶ ኣቲን ናዪ ኩሼ ኢዚ ኦይኪዲ፥ «ታ ናዬ! ዴንዳ!» ጊዴስ።
LUK 8:55 ናይስ ሼምፖይካ ሲሚዴስ፤ ሄራካ ዴንዳ ኤቃዱስ፤ ዬሱሲካ ኢዚስ ሚዛ ሚሽ ኢማና ማላ ኣዛዚዴስ።
LUK 8:56 ናዮ ዬሊዳይቲካ ማላሌቲዳ፤ ጊዶ ኣቲን ኢዚ ሃኒዳይሳ ኦናስካ ዮቶንታ ማላ ኣዛዚዴስ።
LUK 9:1 ዬሱሲካ ታማኔ ናምኡ ሃዋሬታ ኢሲፌ ጼይጊዲ ዳይዳንꬃታ ኬሳና ማላኔ ሃርጌፌ ፓꬃና ማላ ኢስታስ ዎልቃኔ ጎዳቴꬅ ኢሚዴስ።
LUK 9:2 ቃሴካ ጾሳ ካዎቴꬅ ዮታናሲኔ ሃርጊዛይታ ፓꬃናስ ኢስታ ኪቲዴስ።
LUK 9:3 ኢስታስ፥ «ኦጌ ቢሼ ጉፌ ዎይኮ፥ ቃራጺቴ ዎይኮ፥ ቁማ ዎይኮ፥ ሚሼ ዎይኮ ናምኡ ማይኦ ኦይኪ ባናስ ኮሼና።
LUK 9:4 ኢንቴካ ሄ ካታማይፔ ኬዛና ጋካናስ ኮይሮ ጌሊዳ ኦና ኬꬃንካ ጊዲን ሄን ጋምኢቴ።
LUK 9:5 ካታማ ኣሳይ ኢንቴና ሞኪ ኤኮንታ ኢጺኮ ሄ ካታማይፔ ኬዚዲ ኢንቴና ሞኮንታይታስ ማርካ ጊዳና ማላ ኢንቴ ቶሆን ዲዛ ጉዱላ ፒቲዲ ኬዚቴ» ጊዴስ።
LUK 9:6 ኢስቲካ ጎዳይ ጊዳ ማላ ኬዚዲ ሚሺራቾ ቃላ ዮቲሼኔ ሃርጋንቻታ ፓꬂሼ ጉታን ጉታን ዩዪዳ።
LUK 9:7 ሄ ዎዴ ኢሲ ኢሲ ኣሳቲ፥ «ዮሃኒሲ ሃይቆፔ ዴንዲዴስ» ባጋይቲ፥ «ኤላሲ ኬዚዲ ቤቲዴስ» ቃሴ ባጋይቲ፥ «ቤኒ ናቤታፔ ኢሶይ ሃይቆፔ ዴንዲዴስ» ጊዲ ሃሳዬቲዛ ጊሻስ ዩሁዳ ቢታ ሃሪዛ ሄርዶሲ ሄሳ ሲዪዲ ሃኒዛ ሚሻን ባ ዎዚናን ሜቶቴቲዴስ።
LUK 9:9 ሄርዶሲካ፥ «ታኒ ኢዛ ቆꬌ ቃንጺዳ ጻማቂዛ ዮሃኒሲ ሃይቂዴስ። ሂስቲን ኢዛ ጊሻስ ሃይሳ ማላ ሃሳዬቲሺን ታ ሲዪዛይሲ ኢዚ ኦኔ?» ጊዲ ኢዛ ባ ኣይፌራ ቤያና ኮዪዴስ።
LUK 9:10 ሃዋሬቲካ ሲሚዲ ኢስቲ ኦꬂዳይሳ ኡባ ዬሱሳስ ዮቲዳ፤ ኢዚካ ኢስታ ጻላ ባናራ ኤኪዲ ቤቴሳይዳ ጌቴቲዛ ፖሳን ዲዛ ካታማ ቢዴስ።
LUK 9:11 ጊዶ ኣቲን ዳሮ ኣሳይ ሄሳ ኤሪዲ ኢስታ ካሊዴስ፤ ኢዚካ ኢስታ ሞኪ ኤኪዲ ጾሳ ካዎቴꬃ ጊሻስ ዮቲዴስ፤ ቃሴካ ሃርጌፌ ፓꬃናስ ቤሲዛይታ ፓꬂዴስ።
LUK 9:12 ጋዴይ ሌምኢሺን ታማኔ ናምኡ ሃዋሬቲ ኢዛኮ ሺቂዲ፥ «ኑኒ ዲዛይ ባዞ ቢታን ጊዲዳ ጊሻስ ኣሳይ ቢዲ ባስ ኣቃናሶኔ ሚዛ ሚሽ ኮያና ማላ ኣሳ ሞይዛ» ጊዳ።
LUK 9:13 ጊዶ ኣቲን ኢዚ ኢስታስ ዛሪዲ፥ «ኢንቴ ኢስታስ ሚዛዝ ኢሚቴ» ጊዴስ። ኢስቲካ፥ «ኑስ ኢቻሹ ኡኬꬃፌኔ ናምኡ ሞሌፔ ሃራይ ባ፤ ሃ ኣሳስ ጊዲዛ ካꬅ ኮሺኮ ሻማናስ ቤሴስ» ጊዳ።
LUK 9:14 ዬሱሲካ ባና ካሊዛይታ፥ «ኣሳ ኢቻሹ ታሙ፥ ኢቻሹ ታሙ ሂስቲ ሻኪ ሻኪ ኡቲሲቴ» ጊዴስ። ሄንካ ኢቻሹ ሺ ጊዲዛ ኣቱማሳይ ዴስ።
LUK 9:15 ዬሱሳ ካሊዛይቲካ ዬሱሲ ኣዛዚዳ ማላ ኣሳ ኡባ ኡቲሲዳ።
LUK 9:16 ዬሱሲካ ኢቻሹ ኡኬꬃኔ ናምኡ ሞሌታ ኦይኪ ፑዴ ሳሎ ጼሊዲ ጾሳ ጋላቲዴስ፤ ኢዚካ ኡኬꬃ ሜንꬂዲ ኣሳ ጋꬃና ማላ ባና ካሊዛይታስ ኢሚዴስ።
LUK 9:17 ኣሳይ ዉሪካ ሚዲ ካሊዴስ። ዬሱሳ ካሊዛይቲካ ኣሳፔ ኣቲዳ ታማኔ ናምኡ ሌማቴ ኩሜꬅ ማዳፌ ዴንꬂዳ።
LUK 9:18 ኢሲ ጋላስ ዬሱሲ ባርካ ዎሲሺን ኢዛ ካሊዛይቲ ኢዛኮ ዪዳ። ኢዚካ ኢስታ፥ «ኣሳይ ታና ኦና ጊዜ?» ጊዲ ኦይቺዴስ።
LUK 9:19 ኢስቲካ ኢዛስ፥ «ኢሲ ኢሲ ኣሳይ ጻማቂዛ ዮሃኒሳ፤ ባጋይቲ ኤላሳ፤ ሃራቲ ቃሴ ቤኒ ናቤታፔ ኢሶይ ሃይቆፔ ዴንዲዴስ ጌቴስ» ጊዳ።
LUK 9:20 ኢዚካ ኢስታ፥ «ኢንቴች ታና ኦና ጌቲ?» ጊዲ ኦይቺዴስ። ጴጽሮሲካ፥ «ኔኒ ጾሳፌ ኪቴቲዳ ኪርስቶሳ» ጊዲ ዛሪዴስ።
LUK 9:21 ዬሱሲካ ኢስታ፥ «ሃይሳ ኦናስካ ዮቶፒቴ» ጊዲ ሚንꬂ ዮቲዲ
LUK 9:22 ቃሴካ፥ «ኣሳ ናይ ዳሮ ዋዬ ኤካናስ ቤሴስ፤ ዴሬ ጪማታን፥ ቄሴ ሃላቃታኒኔ ሙሴ ዎጋ ጻፊዛይታን ኢጼታና፥ ኢስታ ኩሼን ሃይቃናኔ ሄꬓንꬆ ጋላሳን ሃይቆፔ ዴንዳና» ጊዴስ።
LUK 9:23 ቃሴካ ኡባስ፥ «ባ ሼምፖ ኣሻና ጊዛ ኣሲ ዉሪ ꬋይሳና ሺን ባ ሼምፖ ታ ጊሻስ ጊዲ ꬋይሲዛ ኣሲ ኣሻና። ሄሳ ጊሻስ ታና ካላና ኮይዛ ኣሲ ዲኮ ባና ካዶ፤ ኡባ ጋላስ ባ ማስቃሌ ቶኪዲ ታና ካሎ።
LUK 9:25 ኣሲ ኣላሜ ጎኣ ሙሌ ዴሚዲ ባ ሼምፖ ꬋይሲኮ ኣዛ ጎኣይ ዲዜ?
LUK 9:26 ኦኒካ ታናኒኔ ታ ቃላን ዬላቲኮ ኣሳ ናይ ባ ቦንቾራ፥ ኣዋ ቦንቾራኔ ጌሻ ኪታንቻታ ቦንቾራ ዪዛ ዎዴ ታኒ ኢዛን ዬላታና።
LUK 9:27 ታ ኢንቴስ ቱሙ ጋይስ፤ ሃይሳን ኤቂዳ ኣሳፔ ሃይቃናፔ ሲንꬃን ጾሳ ካዎቴꬅ ቤያና ኢሲ ኢሲ ኣሳቲ ዴቴስ» ጊዴስ።
LUK 9:28 ዬሱሲ ሄሳ ጊዳ ኦስፑን ጋላሳ ማላፔ ጉዬ ዎሳናስ ዙማ ቦላ ኬዚዴስ፤ ቢሼ ባናራ ጴጽሮሳ፥ ዮሃኒሳኔ ያቆቤ ኤኪ ቢዴስ።
LUK 9:29 ኢዚ ዎሲሺን ኢዛ ኣይፌሶይ ላሜቲዴስ። ኢዛ ሜꬋይካ ዎልቃንꬃ ማላ ጾልቂዲ ቦቲዴስ።
LUK 9:30 ናምኡ ኣሳቲ ሙሴይኔ ኤላሲ ኢዛራ ሃሳዬቲዳ
LUK 9:31 ኢስቲካ ቦንቾራ ቆንጪዲ ዬሩሳላሜን ፖሌታና ዲዛ ዬሱሳ ሃይቆ ጊሻስ ሃሳዬቲዳ።
LUK 9:32 ጴጽሮሳኔ ኢዛራ ዲዛይታ ዴጾ ꬊስኮይ ኦይኪዴስ፤ ኢስቲካ ꬊስኮፌ ቤጊዲ ዬሱሳ ቦንቾኔ ናምኡ ኣሲ ኢዛራ ኤቂዳይታ ቤኢዳ።
LUK 9:33 ሄ ናምኡ ኣሳቲ ዬሱሳፔ ሻኬቲ ቢሺን ጴጽሮሲ ዬሱሳ፥ «ጎዶ! ኢሲ ዳሴ ኔስ፥ ኢሲ ዳሴ ሙሴስ፥ ኢሲ ዳሴ ኤላሳስ ኦꬂዲ ሃን ዲዛኮ ኑስ ሎኦኮሺን» ጊዴስ፤ ጊዶ ኣቲን ጴጽሮሲ ባ ጊዛይሳ ኤሮንታ ጊዴስ።
LUK 9:34 ኢዚ ሄሳ ሃሳይሺን ሻራይ ዪዲ ኢስታ ጌንꬂዴስ። ሻራ ጊዶ ጌሊዲ ባቢዳ።
LUK 9:35 ሻራ ጊዶፌካ፥ «ታኒ ዶሪዳ ታ ናይ ሃይሳ፤ ኢዛ ሲዪቴ» ጊዛ ቃላይ ሴቴቲዴስ።
LUK 9:36 ቃላይ ሴቴቲዳ ዎዴ ዬሱሲ ጻላ ቤቲዴስ። ዬሱሳ ካሊዛይቲካ ሃኒዳ ሚሽ ኡባ ባ ዎዚናን ኦይኪዳ ኣቲን ኦናስካ ዮቲቤቴና።
LUK 9:37 ዎንቴꬃ ጋላስ ኢስቲ ዙማ ቦላፌ ዎꬊን ዳሮ ኣሳይ ዪዲ ዬሱሳራ ጋጊዴስ።
LUK 9:38 ሄ ዎዴ ኣሳ ጊዶፌ ኢሳዴይ ቃላ ꬎቁ ሂስቲዲ «ታማርሲዛይሶ! ታስ ኢሲ ናይ ጻላ ዲዛ ጊሻስ ኢዛ ኔ ጼላና ማላ ታ ኔና ዎሳይስ።
LUK 9:39 ኢዛ ኢታ ኣያናይ ኦይኪሺን ሃሳኣይ ባይንዳ ዋሴስ፤ ቃኬቲሼ ዶናራ ጎፖንቶ ኬሴስ፤ ቆሆ ጋꬂዳፔ ጉዬ ዳሮ ዋዪሲዲ ኣጌስ።
LUK 9:40 ኔና ካሊዛይቲ ናዛፔ ኬሳና ማላ ኢስታ ታ ዎሳዲስ፤ ጊዶ ኣቲን ኬሳና ዳንዳይቤቴና» ጊዴስ።
LUK 9:41 ዬሱሲካ ኢስታስ ዛሪዲ፥ «ኣማኖንታ ሃ ዎዴ ዎቤ ኣሳቶ! ታኒ ኢንቴናራ ኣይዴ ጋካናስ ዳኔ? ኢንቴናካ ኣይዴ ጋካናስ ዳንዳያኔ? ናዛ ኣኔ ሃ ኤሃ!» ጊዴስ።
LUK 9:42 ናዚ ዪሺን ኢታ ኣያናይ ኢዛ ቦላፌ ዬጊን ቃኬቲዴስ። ዬሱሲካ ኢታ ኣያናዛ ሴሪዲ ናዛ ፓꬂዲ ናዛ ኣዋስ ኢሚዴስ።
LUK 9:43 ኣሳይካ ዉሪ ጾሳ ጊታቴꬃን ማላሌቲዴስ። ኢዚ ኦꬂዳይሳን ኣሳይ ዉሪ ማላሌቲሺን ዬሱሲ ባና ካሊዛይታ፥
LUK 9:44 «ኣሳ ናይ ኣሳ ኩሼን ኣꬊ ኢሜታና፤ ኢንቴካ ሃ ዮኦዛ ባሎፒቴ» ጊዴስ።
LUK 9:45 ጊዶ ኣቲን ኢዚ ጊዛይሲ ኢስታስ ጌሊቤና። ጋሶይካ ኢስቲ ኣኬኮንታ ማላ ዮኦዚ ኢስታፌ ጌሜቲዴስ፤ ዛሪዲካ ኦይቾንታ ማላ ባቢዳ።
LUK 9:46 ኢዛ ካሊዛይቲ፥ «ኦኒ ኦናፔ ኣꬊዜ?» ጊዲ ባ ጊዶን ፓላሜቲዳ።
LUK 9:47 ዬሱሲካ ኢስታ ዎዚና ቆፋ ኤሪዲ ጉꬃ ና ኤኪ ዪዲ ባ ማታን ኤሲዲ፥
LUK 9:48 «ሃ ጉꬃ ናዛ ታ ሱንꬃን ኤኪዛዴይ ኦኒካ ዲኮ ታና ኤኬስ፤ ታና ኤኪዛዴይካ ታና ኪቲዳይሳ ኤኬስ፤ ኢንቴፌ ኡባታፔ ጉጺዛዴይ ኢዚ ኡባፌ ኣꬌስ» ጊዴስ።
LUK 9:49 ዮሃኒሲካ፥ «ጎዶ! ኢሲ ኣሲ ኔ ሱንꬃን ዳይዳንꬅ ኬሲሺን ኑ ቤኢዶስ፤ ጊዶ ኣቲን ኢዚ ኑናራ ካሎንታ ጊሻስ ኑ ኢዛ ዲጋናስ ኮዪዶስ» ጊዴስ።
LUK 9:50 ዬሱሲካ፥ «ኢንቴና ኢጾንታ ኣሲ ዉሪ ኢንቴ ባጋ ጊዲዳ ጊሻስ ዲጎፍቴ» ጊዴስ።
LUK 9:51 ዬሱሲ ሳሎ ቢዛ ዎዴይ ማቲዳ ጊሻስ ዬሩሳላሜ ባናስ ዴንዲዴስ።
LUK 9:52 ኢዚካ ሲንꬃሲዲ ኣሴ ኪቲዴስ፤ ኢስቲካ ኮሺዛ ሚሽ ጊጊሳናፔ ካሴቲዲ ሳማሪያ ቢታን ዲዛ ኢሲ ጉታ ቢዳ።
LUK 9:53 ጊዶ ኣቲን ዴሬይ ኢዚ ዬሩሳላሜ ቢዛይሳ ኤሪዳ ጊሻስ ሞኪ ኤኪቤና።
LUK 9:54 ኢዛ ካሊዛይታፔ ያቆቤይኔ ዮሃኒሲ ሃኒዛይሳ ቤኢዲ፥ «ጎዶ! ኤላሲ ኦꬆይሳꬆ፥ ‹ታማይ ሳሎፔ ዎꬊዲ ኢስታ ዲፒ ሂስቶ!› ጊዲ ኣዛዛና ማላ ኮያይ?» ጊዳ።
LUK 9:55 ጊዶ ኣቲን ዬሱሲ ኢስታኮ ዩዪዲ፥ «ኢንቴስ ኣይ ማላ ኣያናይ ዲዛኮ ኤሬኬቲ? ኣሳ ናይ ዪዳይ ኣሳ ሼምፖ ኣሻናስ ኣቲን ꬋይሳናስ ጊዴና» ጊዲ ኢስታ ሴሪዴስ።
LUK 9:56 ኢስቲ ዉሪካ ሃራ ጉታ ቢዳ።
LUK 9:57 ኢስቲካ ቢሺን ኢሲ ኣሲ ኢስታኮ ሺቂዲ፥ «ኔኒ ቢዛ ኡባሶ ታ ኔና ካላና» ጊዴስ።
LUK 9:58 ዬሱሲ፥ «ዎራካናታስ ኣቂዛ ኦላይ፥ ካፎታስ ቃሴ ኣቂዛ ካፎ ኬꬂ ዴስ፤ ጊዶ ኣቲን ኣሳ ናስ ባ ሁኤ ኣይሲዛሶይካ ባ» ጊዴስ።
LUK 9:59 ዬሱሲካ ሂንኮይሳ፥ «ታና ካላ» ጊዴስ። ሄ ኣዴዚካ «ጎዶ! ታ ካሴታ ባዳ ታ ኣዋ ሞጎ?» ጊዴስ።
LUK 9:60 ዬሱሲካ፥ «ኣጋጋ፥ ሃይቂዳይቲ ሃይቂዳይታ ሞጌቶ። ኔኒ ጊዲኮ ባዳ ጾሳ ካዎቴꬃ ኣሳስ ዮታ» ጊዴስ።
LUK 9:61 ቃሴካ ሃራ ኣሲ፥ «ጎዶ! ታ ኔና ካላና ሺን ኮይሮ ሶ ባዳ ታ ኬꬃ ኣሳ ሳሮ ጋዳ ዮ?» ጊዴስ።
LUK 9:62 ጊዶ ኣቲን ዬሱሲ፥ «ቦራ ካሶ ኦይኪዲ ጎዪሼ ጉዬ ዛሪ ጼሊዛዴይ ኦኒካ ጾሳ ካዎቴꬃስ ቤሴና» ጊዴስ።
LUK 10:1 ሄሳፌ ጉዬ ጎዳይ ሃራ ላፑን ታማኔ ናምኡ ኣስ ዶሪዲ ሱንꬂዴስ፤ ኢስታካ ናምኡ ናምኡ ሂስቲዲ ኢዚ ባና ሶሆታኔ ካታማታ ዉርሲካ ኢስቲ ካሴቲዲ ባና ማላ ኪቲዴስ።
LUK 10:2 «ማጻ ጋኪዳ ካꬃይ ዳሮ፤ ካꬃ ማጺ ሺሺዛይቲ ጉꬃታ፤ ሄሳ ጊሻስ ካꬃ ጎዳይ ካꬃ ማጺዲ ሺሺዛይታ ካꬃይ ዲዛሶ ዬዳና ማላ ዎሲቴ።
LUK 10:3 ሄሳ ጊሻስ ቢቴ፤ ዶርሳቲ ካና ሱይቴ ጊዶራ ቢዛ ማላ ታ ኢንቴና ዬዳይስ።
LUK 10:4 ኮሮጆ ዎይኮ ቃራጺቴ ዎይኮ ጫማ ኤኮፍቴ፤ ኦጌ ቦላ ኦናካ ሳሮ ጎፒቴ።
LUK 10:5 «ኢንቴ ኦና ኬꬂካ ጌሊዛ ጊዲኮ ኮይሮቲዲ፥ ‹ኬꬃ ኣሶ ሳሮ!› ጊቴ።
LUK 10:6 ሄ ኬꬃን ሳሮ ዶሲዛ ኣሲ ዲኮ ኢንቴ ሳሮታይ ሄ ኬꬃን ሼምፓና፤ ሳሮ ዶሲዛ ኣሲ ዶንታ ኣጊኮ ኢንቴ ሳሮታይ ኢንቴስ ሲማና።
LUK 10:7 ኢንቴስ ማና ሺሺዳ ካꬅ ኡባ ሚሼኔ ኡዪሼ ሄ ኢንቴ ጌሊዳ ኬꬃን ኡቲቴ፤ ኦꬂዛዴስ ባ ዎልቃ ዋጋ ኤካናስ ኢዛስ ቤሴስ፤ ሃ ኬꬃፌ ሄ ኬꬄ ዩዮፒቴ።
LUK 10:8 «ኢንቴ ኣይ ካታማካ ጋኪዛ ዎዴ ኣሳይ ኢንቴና ሞኪ ኤኪኮ ኢስቲ ኢንቴስ ኣꬂዳ ቁማ ሚቴ።
LUK 10:9 ሄ ካታማን ዲዛ ሃርጋንቻታ ፓꬂዲ፥ ‹ጾሳ ካዎቴꬂ ኢንቴኮ ማቲዴስ› ጊዲ ዮቲቴ።
LUK 10:10 ጊዶ ኣቲን ኢንቴ ቢዲ ኢሲ ካታማ ጌሊሺን ሄ ካታማ ኣሳይ ኢንቴና ሞኪ ኤኮንታ ኢጺኮ ሄ ካታማ ኣሳይ ሺቂዛ ዱቡሻ ኬዚዲ፥
LUK 10:11 ‹ኑ ቶሆ ቦላ ዲዛ ኢንቴ ካታማ ጉዱላ ኢንቴስ ማርካ ጊዳና ማላ ኑ ቶሆ ቦላፌ ፒቶስ፤ ጊዶ ኣቲን ጾሳ ካዎቴꬃይ ኢንቴኮ ማቲዳይሳ ኤሪቴ› ጊቴ።
LUK 10:12 ታ ኢንቴስ ዮታይስ ፒርዳ ጋላስ ሄ ካታማ ፒርዳፌ ሶዶሜ ካታማ ፒርዳይ ካዉሼ ጊዳና።
LUK 10:13 «ኩራዚኔ ኔስ ኣዬ ኣና! ቤቴሳይዳ ኔስ ኣዬ ኣና! ኢንቴናን ኦሴቲዳ ማላታቲ ጺሮሴኒኔ ሲዶናን ኦሴቲዳኮ ኢስቲካ ማቃ ማይኢዲኔ ቢዲንꬅ ጎርፔቲዲ ሄ ዎዴ ቤኒ ማሬታናሺን።
LUK 10:14 ጊዶ ኣቲን ፒርዳ ዎዴ ኢንቴፌ ጺሮሴሲኔ ሲዶናስ ካዉያና።
LUK 10:15 ሃኔ ቂፊርናሆሜ ፑዴ ሳሎ ꬎቁ ꬎቁ ጋዲ? ኔኒ ዱጌ ሲኦሌ ዎꬋና፥
LUK 10:16 «ኢንቴ ጊዛይሳ ሲዪዛ ኣሲ ታና ሲዬስ፤ ኢንቴና ኤኮንታ ኣሲ ታናካ ኤኬና፤ ታና ኤኮንታይካ ታና ኪቲዳይሳ ኤኬና» ጊዴስ።
LUK 10:17 ላፑን ታማኔ ናምኣቲካ ኡፋዬቲሼ ሲሚዲ፥ «ጎዶ! ሃራይ ኣቶሺን ዳይዳንꬃቲካ ኔ ሱንꬃን ኑስ ሃሬቲዳ» ጊ ዮቲዳ።
LUK 10:18 ኢዚካ ኢስታስ፥ «ጻላኤይ ዎልቃንꬃ ማላ ሳሎፔ ኩንዲሺን ታ ቤያዲስ።
LUK 10:19 «ሂስቲኮ ሾሺኔ ማሲማሶ ኢንቴ ዬꬋና ማላ ሞርኬ ዎልቃ ኡባ ቦላ ኢንቴስ ጎዳቴꬅ ታ ኢማዲስ፤ ኢንቴና ቆሂዛ ኢሲ ሚሺካ ዴና።
LUK 10:20 ኢንቴ ሱንꬃይ ሳሎን ጻፌቲዳ ጊሻስ ኡፋዬቲቴ ኣቲን ቱና ኣያናቲ ኢንቴስ ሃሬቲዳ ጊሻስ ኡፋዬቶፍቴ» ጊዴስ።
LUK 10:21 ሄ ዎዴ ዬሱሲ ጺሎ ኣያናን ኡፋዬቲዲ፥ «ሳሎሲኔ ሳኣስ ጎዳ ጊዲዳ ኣቦ! ሃይሳ ዉርሳካ ኣꬎ ኤራንቻታፔኔ ኤራንቻታፔ ቆታዳ ቄሪ ጉꬃ ናይታስ ኔ ቆንጪሲዳ ጊሻስ ታኒ ኔና ጋላታይስ፤ ኤ፥ ታ ኣዋዉ! ሃይሲ ኔ ሎኦ ሼኔይ ሃኒዴስ።
LUK 10:22 «ዉሪ ታ ኣዋ ማታፔ ታስ ኢሜቲዴስ፤ ቃሴካ ኢዛ ናይ ኦናኮ ኣዋፔ ኣቲን ኤሪዛይ ባ፤ ኣዋይ ኦናኮ ናዛፔ ኣቲን ዎይኮ ናዚ ኢዛስ ቆንጪሳናስ ዶሲዳዴፌ ኣቲን ኤሪዛዴይ ባ» ጊዴስ።
LUK 10:23 ባና ካሊዛይታኮ ሲሚዲ ኢስታስ ዱማ፥ «ኢንቴ ቤኢዛይሳ ቤኢዛ ኣይፌቲ ኣንጄቲዳይታ።
LUK 10:24 ታ ኢንቴስ ቱማ ጋይስ፤ ዳሮ ናቤቲኔ ካዎቲ ኢንቴ ሃኢ ቤኢዛይሳ ቤያናስ ኮዪዲ ቤዪቤቴና፤ ኢንቴ ሃኢ ሲዪዛይሳካ ሲያናስ ኮዪዲ ሲዪቤቴና» ጊዴስ።
LUK 10:25 ኢሲ ጋላስ ሙሴ ዎጋ ታማርሲዛ ኢሲ ኣሲ ዬሱሳ ፓጫናስ ኮዪዲ፥ «ታማርሲዛይሶ! ታኒ ሜርና ዴኦ ላታናስ ኣይ ኦꬆ?» ጊዲ ኦይቺዴስ።
LUK 10:26 ዬሱሲካ ዛሪዲ፥ «ዎጋ ማጻፋን ኣይ ጌቴቲ ጻፌቲዴ? ኢዛፔ ኔስ ጌሊዳይ ኣዜ?» ጊዲ ኦይቺዴስ።
LUK 10:27 ኣዴዚ ዛሪዲ፥ «ኔ ጎዳ ጾሳ ኔ ኩሜꬃ ዎዚናፔ፥ ኔ ኩሜꬃ ሼምፖፌ፥ ኔ ኩሜꬃ ዎልቃፌኔ ኔ ኩሜꬃ ቆፋፔ ሲቃ፤ ኔ ላጌካ ኔ ሁኤ ማላ ሲቃ ጌስ» ጊዲ ዛሪዴስ።
LUK 10:28 ዬሱሲካ፥ «ሎኦ ዛራዳሳ። ኔኒካ ሄሳꬆ ኦꬂኮ ሜርና ዴኦ ዴማና» ጊዴስ።
LUK 10:29 ኣዴዚ ባና ጺሊሳናስ ኮዪዲ፥ «ሂስቲን ታ ላጌይ ኦኔ?» ጊዲ ዬሱሳ ኦይቺዴስ።
LUK 10:30 ዬሱሲካ ዛሪዲ፥ «ኢሲ ኣዴዚ ዬሩሳላሜፔ ኢያርኮ ዎꬊሺን ፓንጋቲ ዴሚዲ ኢዛ ማይኦ ቃሪ ኤኪዳ፤ ኬሂ ቆጼሬꬂዲ ሃይቆፔኔ ፓጻፔ ጊዶን ዬጊ ኣጊዲ ቢዳ።
LUK 10:31 ኢሲ ቄሴይ ሄ ኦጌራ ባስ ዱጌ ዎꬊሼ ኣሙንሶንታ ሄ ቆጼቲዳ ኣዴዛ ዴሚዲ ፖቄꬃራ ዬጊ ኣꬊዴስ።
LUK 10:32 ቃሴካ ኢሲ ሌዌ ባጋ ኣሳፔ ኢሲ ኣዴዚ ሄ ኦጌራ ኣꬊሼ ቆጼቲዳ ኣዴዛ ቤኢዲ ሃኢካ ፖቂዲ ኣꬊዴስ።
LUK 10:33 ኢሲ ሳማሪያ ቢታ ኣሲ ሄ ኦጌራ ኣꬊ ቢሼ ቆጼቲዳ ኣዴዛ ቦላ ጋኪ ዎꬊዴስ፤ ኣዴዛ ቤኢዲ ኬሂ ሚሼቲዴስ።
LUK 10:34 ኣዴዛኮ ሺቂዲ ማዱንꬃ ꬋላና ማላ ዎጋራ ሚꬃ ዛይቴኔ ዎይኔ ጫጄ ማዱንꬃ ቦላ ጉሲዲ ቃቺዴስ፤ ኣዴዛ ባ ሃሬ ቶጊሲዲ ኢማꬂ ሼምፒዛሶ ኤፊዲ ሎኤꬂ ጼሊዴስ።
LUK 10:35 ዎንቴꬃ ጋላስ ኢማꬂ ሼምፒዛ ኬꬃ ጎዳስ ናምኡ ዲናሬ ኢሚዲ፥ ‹ኔና ሃራ ሚሽ ኬሲሲኮ ታ ሲማሼ ኔስ ኢማና፤ ኔፔ ኬሳዳ ሎኤꬃ ናጋ› ጊዴስ።
LUK 10:36 «ሂስቲኮ ሃ ሄꬑ ኣሳታፔ ፓንጋታን ቆጼቲዲ ሃይቆፔኔ ፓጻፔ ጊዶን ዬጌቲዳዴስ ኬሂ ማታ ላጌይ ኔስ ኣዋይሳ ሚሳቲዜ?» ጊዴስ።
LUK 10:37 ሙሴ ዎጋ ታማርሲዛይሲካ፥ «ሄሲ ኢዛስ ኔ ሚሼቲዳይሳኔ ማዲዳይሳ!» ጊዴስ። ዬሱሲካ ኢዛስ፥ «ኔካ ባዳ ኢዛይሳꬆ ኦꬃ» ጊዴስ።
LUK 10:38 ዬሱሲኔ ኢዛ ካሊዛይቲ ኦጌ ቢሺን ዬሱሲ ኢሲ ጉታ ጌሊዴስ፤ ማርታ ጌቴቲዛ ኢሲ ማጫሳያ ባሶን ዬሱሳ ሞካ ኤካዱስ።
LUK 10:39 ኢዚስ ማራሞ ጌቴቲዛ ኢሲ ሚቼያ ዳዉስ። ማራማካ ኢዛፔ ቃላ ሲያሼ ጎዳ ቶሆ ጋርሳን ኡታዱስ።
LUK 10:40 ጊዶ ኣቲን ማርታይ ኦሶ ዳሮፔ ዴንዲዳይሳን ዳቡራዳ ዬሱሳኮ ሺቃዳ፥ «ጎዶ! ታ ሚቺያ ኦሶ ኡባ ታ ቦላ ኣጋዳ ኡቲሺን ኔኒ ጮኡ ጋይ? ኢዛ ታና ማዳና ማላ ኢዚስ ዮታ ኣቲን» ጋዱስ።
LUK 10:41 ጊዶ ኣቲን ጎዳይ ኢዚስ፥ «ሃኔ ማርታ! ኔኒ ዳሮ ሚሻ ጊሻስ ቆፋ ዳራሳ፤ ዲርባታሳ፤ ቱጋታሳ።
LUK 10:42 ኮሺዛይ ጊዲኮ ኢሲ ሚሽ ጻላ፤ ማራማካ ሎኦ ኤጻ ዶራዱስ፤ ሄሲካ ኢዚፔ ኤኬቴና» ጊዴስ።
LUK 11:1 ኢሲ ጋላስ ዬሱሲ ኢሲሶን ዎሲዴስ፤ ኢዚ ዎሳ ዉርሲሺን ኢዛ ካሊዛይታፔ ኢሶይ፥ «ጎዶ! ጻማቂዛ ዮሃኒሲ ባና ካሊዛይታ ዎሳ ታማርሲዳይሳꬆ ኔካ ኑና ዎሳ ታማርሳ!» ጊዴስ።
LUK 11:2 ኢዚካ ኢስታስ፥ «ዎሲሼ፥ ‹ኑ ኣዋዉ! ኔ ሱንꬂ ኣንጄቶ፤ ኔ ካዎቴꬂ ሃ ዮ።
LUK 11:3 ሃቺስ ጊዲዛ ቁማ ኑስ ኢማ።
LUK 11:4 ኑና ቆሂዳይታ ኑ ማሪዛ ማላ ኑና ማራ፤ ፓጬንካ ኑና ጌልꬆፋ› ጊ ዎሲቴ» ጊዴስ።
LUK 11:5 ቃሴካ፥ «ኢንቴፌ ኢሳዴስ ላጌይ ዲኮ ሌላ ጊዶꬅ ሄ ላጌዛሶ ቢዲ፥ ‹ታስ ኢሲ ኢማꬂ ኦጌፔ ዪን ሚዛና ካꬂ ባይንዳ ጊሻስ ሄꬑ ሶሎይ ዲኮ ታስ ታልኣርኪ?›
LUK 11:7 ላጌዚካ ዛሪዲ፥ ‹ታና ዋዪሶፓ፤ ካሬይካ ጎርዴቲዴስ፤ ታኒካ ናይታራ ኢቻዲስ። ሃኢ ዴንዳዳ ኢማናስ ዳንዳይኬ› ጋንዴ?
LUK 11:8 ታኒካ ኢንቴስ ዮታይስ፤ ላጌቴꬃ ጊሻስ ዴንዲዲ ኢሞንታ ኣጊኮካ ኢዚ ኦይሾን ሳሌꬂዳ ጊሻስ ዴንዲዲ ኮይዛይሳ ኡባ ኢሚዴስ።
LUK 11:9 «ሄሳ ጊሻስ ታኒ ኢንቴስ ጊዛይ ዎሲቴ ኢንቴስ ኢሜታና፤ ኮዪቴ ኢንቴ ዴማና፤ ካሬ ቆጺቴ ኢንቴስ ዶዬታና።
LUK 11:10 ኣይስ ጊኮ ዎሲዛይ ዉሪ ኤካና፤ ኮይዛይካ ዴማና፤ ካሬ ቆጺዛዴስካ ዶዬታና።
LUK 11:11 «ኢንቴፌ ኣዋ ጊዲ ኡቲዲ ኢዚ ዬሊዳ ናይ ሞሌ ኦይቺኮ ሾሽ ኢሚዛይ ዳንዴ?
LUK 11:12 ዎይኮ ጱጱሌ ኦይቺኮ ማሲማሶ ኢሚዛይ ዳንዴ?
LUK 11:13 ኢንቴ ኢታታ ጊዲሼ ኢንቴ ናይታስ ሎኦ ኢሞታ ኢሞ ኤሪኮ ሳሎን ዲዛ ኢንቴ ኣዋይ ባና ዎሲዛይታስ ጺሎ ኣያና ዎስቲ ዳርሲ ኢሜኔ?» ጊዴስ።
LUK 11:14 ኢሲ ጋላስ ዬሱሲ ሃሳይሶንታ ዱዴ ዳይዳንꬅ ኬሲዴስ። ዳይዳንꬃዚካ ኬዚዳፔ ጉዬ ዶና ዱዴ ኣዴዚ ሃሳይዴስ፤ ቤኢዳ ኣሳቲካ ዳርሲ ማላሌቲዳ።
LUK 11:15 ጊዶ ኣቲን ኢሲ ኢሲ ኣሳቲ፥ «ቢኤሊዜቡላ ጌቴቲዛ ዳይዳንꬃታ ሃላቃን ዳይዳንꬃታ ኬሴስ» ጊዳ።
LUK 11:16 ኢሲ ኢሲ ኣሳይ ኢዛ ፓጫናስ፥ «ሳሎፔ ማላታ ቤሳ» ጊዲ ኦይቺዴስ።
LUK 11:17 ጊዶ ኣቲን ዬሱሲ ኢስታ ቆፋ ኤሪዲ፥ «ባ ጊዶን ሻኬቲዛ ካዎቴꬂ ዉሪ ꬋያና፤ ባ ጊዶን ሲጋይ ባይንዳ ኬꬂካ ኩንዳና።
LUK 11:18 ኢንቴ ታና፥ ‹ቢኤሊዜቡላን ዳይዳንꬃታ ኬሴስ› ጊዲ ሃሳዬታ ሺን ጻላኤይካ ባ ጊዶን ኢሶይ ኢሳፌ ሻኬቲኮ ኢዛ ካዎቴꬂ ዋኒ ሚናኔ?
LUK 11:19 ሂስቲኮ ታኒ ዳይዳንꬃታ ቢኤሊዜቡላን ኬሲኮ ኢንቴ ናይቲ ኦናን ኬሳንዴቶ? ሄሳ ጊሻስ ኢንቴ ናይቲ ኢንቴ ቦላ ፒርዲዛይታ ጊዳና።
LUK 11:20 ጊዶ ኣቲን ታኒ ዳይዳንꬃታ ኬሲዛይ ጾሳ ዎልቃን ጋኪዴስ፤ ጾሳ ካዎቴꬃይ ኢንቴኮ ማቲዳሮ ኤሪቴ።
LUK 11:21 «ሚኖ ኣሲ ሎኤꬂ ጊጼቲዲ ባ ኬꬄ ናጊኮ ኬꬃን ዲዛ ሚሺ ሎኦን ናጌቴስ።
LUK 11:22 ጊዶ ኣቲን ኢዛፔ ሃራ ሚኖ ኣሲ ዪዲ ጾኒኮ ኢዚ ኣማኔቲዳ ኦላ ሚሻታ ዎꬂ ኤኪዲ ኢዛስ ዲዛ ሃሮዛካ ዉርሲ ሃራስ ጊሻና።
LUK 11:23 «ታናራ ጊዶንታይ ታናራ ኤቄቴስ፤ ታናራካ ሺሾንታዴይ ላሌስ፥
LUK 11:24 «ቱና ኣያናይ ኣሳፔ ኬዚዳ ዎዴ ሼምፖሶ ኮዪሼ ሃꬂ ባይንዳ ሜላሶን ዋዬቴስ፤ ሼምፖሶይ ꬋይኮ፥ ‹ታኒ ካሴ ኬዚዳሶ ጉዬ ሲማና› ጌስ።
LUK 11:25 ኢዛፔ ሲሚዲ ዪሺን ካሴ ኢዚ ኣጊ ቢዳ ኬꬃይ ፒቴቲዲኔ ጊጊ ኡቲዳይሳ ዴሜስ።
LUK 11:26 ሄሳፌ ሲሚ ቢዲ ባፔ ኢቲዛ ሃራ ላፑን ዳይዳንꬃታ ባናራ ኤኪዲ ዬስ፤ ኢስቲካ ጌሊዲ ሄን ዳና፤ ሄሳዴስካ ኮይሮይሳፌ ጉዬይሲ ኬሂ ኢታ ጊዳና» ጊዴስ።
LUK 11:27 ዬሱሲ ሄሳ ሃሳይዛ ዎዴ ኣሳ ጊዶፌ ኢሲ ማጫስ ዲዛራ ባ ቃላ ꬎቁ ኦꬃዳ፥ «ኔና ቶኪዳ ቃንꬂኔ ኔ ꬋሚዳ ꬋንꬃቲ ኣንጄቲዳይታ» ጋዱስ።
LUK 11:28 ጊዶ ኣቲን ኢዚ፥ «ኣንጄቲዳይቲ ጾሳ ቃላ ሲዪዲ ኣዛዜቲዛይታ» ጊዴስ።
LUK 11:29 ዳሮ ዴሬይ ዬሱሳኮ ሺቂዳ ዎዴ ዬሱሲ፥ «ሃይሲ ዬሌታይ ኢታ ዬሌታ፤ ጊታ ማላታ ቤያናስ ኮዬስ፤ ጊዶ ኣቲን ዮናሳ ማላታፔ ሃራ ዱማ ማላታይ ኢሜቴና።
LUK 11:30 ጋሶይካ ዮናሲ ናናዌ ኣሳስ ማላታ ጊዲዳ ማላ ኣሳ ናይ ታኒ ሃ ዬሌታስ ማላታ ጊዳና።
LUK 11:31 ዱጌሃ ዴሬ ማጫ ካዎያ ሶሎሞኔ ኤራቴꬅ ቤያናስ ቢታ ጋጻፔ ዴንዳዳ ዪዳ ጊሻስ ፒርዳ ዎዴ ኢዛ ሃ ዬሌታራ ዴንዳዳ ፒርዳና፤ ሄኮ ሶሎሞኔፔ ኣꬊዛዴይ ሃን ዴስ።
LUK 11:32 ዮናሲ ሳባኪሺን ሲዪዲ ናናዌ ኣሳይ ባ ናጋራፔ ማሬቲዳ ጊሻስ ሃ ዬሌታራ ኢሲፌ ዴንዲዲ ፒርዳና፤ ጊዶ ኣቲን ዮናሳፔ ኣꬊዛይ ሃን ዴስ።
LUK 11:33 «ጾምፔ ኦይꬂዲ ካሬፔ ጌሊዛ ኣሳስ ፖኣና ማላ ቆንጬሶን ዎꬄቴስ ኣቲን ጌማሶን ዎꬂዛ ኣሲ ዴና።
LUK 11:34 ኔ ኣሳቴꬃስ ፖኦይ ኔ ኣይፌ፤ ኔ ኣይፌይ ፓጻ ጊዲኮ ኔ ኩሜꬃ ኣሳቴꬃይካ ፖኦ ጊዳና፤ ኔ ኣይፌይ ሳኬቲኮ ኔ ኩሜꬃ ኣሳቴꬃይ ꬉማ ጊዳና።
LUK 11:35 ሄሳ ጊሻስ ኔናን ዲዛ ፖኦይ ꬉሞንታ ማላ ናጌታ።
LUK 11:36 ሂስቲኮ ኔ ኣሳቴꬃይ ፖኦ ጊዲኮ ꬉሚዳ ኣሳቴꬂ ዴና ኣጊኮ ኔ ኩሜꬃ ኣሳቴꬃይ ጾምፔይ ሎኤꬂ ፖኢዛ ማላ ሎኢ ቤታና» ጊዴስ።
LUK 11:37 ዬሱሲ ሃሳያ ዉርሲዳ ማላ ኢሲ ፋርሳዌይ ባናራ ቁማ ማናስ ዬሱሳ ጼይጊዴስ።
LUK 11:38 ዬሱሲ ቁማ ማና ኩሼ ሜጬቶንታ ኣጊዳይሳ ቤኢዲ ማላሌቲዳ።
LUK 11:39 ጎዳይ ኢዛስ፥ «ሃኢ ኢንቴ ፋርሳዌቲ ጹኣሲኔ ኬሬስ ቦላ ባጋ ሜጪ ጌሼታ፤ ኢንቴስ ጊዶ ባጋዚ ኡዜቴꬃኒኔ ኢታቴꬃን ኩሚዴስ።
LUK 11:40 ኢንቴኖ ኤያቶ! ካሬ ባጋ ሜꬊዳይ ጊዶ ባጋ ሜꬊቤኔ?
LUK 11:41 ዮኦን ጊዲኮ ጊዶን ዲዛይሳ ሙጹዋታ ኢሚቴ፤ ሄ ዎዴ ዉሪካ ኢንቴስ ጌሽ ጊዳና።
LUK 11:42 «ኢንቴኖ ፋርሳዌቶ! ኢንቴስ ኣዬ ኣና! ኣኑጋፔኔ ጻሎታፔ ቃሴካ ዱማ ዱማ ካꬃፌ ታማፌ ኢሲኖ ኬሴታ፤ ጊዶ ኣቲን ቱሙ ፒርዳኔ ጾስ ዶሳናይሳ ኣጊ ኣꬌታ፤ ጊዲኮካ ኢንቴ ኣጊ ኣꬋናስ ቤሴና፤ ሃንኮይሳ ኣጎንታ ኢንቴ ኦꬃና ቤሲዛይቲካ ሃይታ።
LUK 11:43 «ኢንቴኖ ፋርሳዌቶ! ኢንቴስ ኣዬ ኣና! ኣይሁዳ ዎሳ ኬꬃን ኡታናስ ቦንቾ ኦይዴ ኮዬታ፤ ጊያ ጊዶንካ ኣሳይ ኢንቴ ሲንꬃን ሆካና ማላ ዶሴታ።
LUK 11:44 ኣሲ ኤሮንታ ኢዛ ቦላራ ቢዛ ቆቴቲ ዲዛ ዱፎ ኢንቴ ሚሳቲዛ ጊሻስ ኢንቴስ ኣዬ ኣና!» ጊዴስ።
LUK 11:45 ሙሴ ዎጋ ኤሪዛይታፔ ኢሶይ ዛሪዲ፥ «ኣስታማሬ! ኔ ሄሳꬆ ሃሳይዛ ዎዴ ኑናካ ጫያሳ» ጊዴስ።
LUK 11:46 ዬሱሲካ ዛሪዲ፥ «ኢንቴኖ ሙሴ ዎጋ ኤሪዛይቶ ኢንቴስካ ኣዬ ኣና! ኣሲ ቶካናስ ዳንዳዮንታ ዴጾ ቶሆ ኣስ ቶሴታ፤ ኢንቴ ጊዲኮ ቢራꬌ ጼራንካ ቦቼኬታ።
LUK 11:47 «ኢንቴ ኣዋቲ ዎꬊዳ ናቤታ ዱፎ ኢንቴ ሎኤꬂዛ ጊሻስ ኢንቴስ ኣዬ ኣና።
LUK 11:48 ሂስቲኮ ኢንቴ ኢንቴ ኣዋታ ኦሶ ሚንꬂዛ ማርካታ፤ ኢስቲ ናቤታ ዎꬊዳ፤ ኢንቴካ ኢስታ ዱፎ ሎኤꬄታ።
LUK 11:49 «ሄሳ ጊሻስ ጾሳ ኤራቴꬂ፥ ‹ናቤታኔ ሃዋሬታ ታ ኢስታስ ዬዳና፤ ኢስቲካ ኢስታፌ ኢሳ ኢሳ ዎꬋና፤ ሃራታካ ጎዳና።
LUK 11:50 ሄሳ ጊሻስ ሃ ዬሌታይ ቢታይ ሜꬌቶሶፌ ሃኢ ጋካናስ ጉኪዳ ናቤታ ኡባ ሱꬃ ጊሻስ ኦይሼታና።
LUK 11:51 ኣቤሌ ሱꬃፌ ዶሚዲ ያርሺዛሶፔኔ ጾሳ ኬꬃ ጊዶን ጉኪዳ ዛካራሳ ሱꬃ ጋካናስ ኮዬቴስ› ጋዱስ። ኤ ታ ኢንቴስ ጊዛይ ሃ ዬሌታይ ሃይሳስ ኦይሼታና።
LUK 11:52 «ኢንቴኖ ዎጋ ኤሪዛይቶ! ኢንቴስ ኣዬ ኣና! ኤራቴꬃ ፔንጌ ቁልፔ ዎልቃራ ዎꬂ ኤኪዲ ኢንቴስካ ጌሊቤኬታ፤ ጌላናይታካ ዲጌታ» ጊዴስ።
LUK 11:53 ዬሱሲ ሄፔ ኬዚዳፔ ጉዬ ጻፌቲኔ ፋርሳዌቲ ኤቄቲሼ ኦይሻን ሼምፖ ዲጊዳ።
LUK 11:54 ኢዛ ዶናፔ ኬዚዛ ቃላን ኢዛ ቃጻናስ ናጌቲዳ።
LUK 12:1 ሄ ዎዴ ዳሮ ዴሬይ ባ ጊዶን ኢሶይ ኢሳራ ዬꬌታና ጋካናስ ሺቂ ኡቲዳሼ ዬሱሲ ባና ካሊዛይታ፥ «ፋርሳዌታ ኢርሾፌ ናጌቲቴ፤ ሄሲካ ቆꬌፔ ቆሞ ሃኖ።
LUK 12:2 ቆንጮንታ ካሜቲዲ ኣታናይኔ ኤሬቶንታ ቆታን ኣታና ሚሺ ዴና።
LUK 12:3 ሄሳ ጊሻስ ኢንቴ ጌማን ሃሳይዳዚ ዉሪ ቆንጬ ኬዛና፤ ቃሴካ ኢንቴ ቆልኣን ሃይꬃን ሳሱኬቲ ሃሳይዳዚ ዉሪ ዴሬ ሲንꬃን ዮቴታና።
LUK 12:4 «ታ ላጌቶ! ታ ኢንቴስ ጊዛይ ኣሾ ጻላ ዎꬋናፔ ኣቲን ሃራ ኣይኮካ ኦꬃናስ ዳንዳዮንታይታስ ባቦፍቴ።
LUK 12:5 ጊዶ ኣቲን ኢንቴ ባባናስ ቤሲዛይ ኦናኮ ታ ኢንቴና ቤሳና፤ ኣሾ ዎꬊዳፔ ጉዬ ኣሾኔ ሼምፖ ኢሲፌ ጋꬂ ጋናሜ ታማን ዬጋናስ ዳንዳይዛይሳስ ባቢቴ፤ ኤ ኢዛስ ባቢቴ ጋይስ።
LUK 12:6 «ሲኔ ካፎ ኢቻሻቲ ናምኡ ሳንቴስ ባይዜቴቴስ፤ ጊዶ ኣቲን ኢስታፌ ኢሲኔዮካ ጾሲ ዶጌና።
LUK 12:7 ኢንቴ ሁኤ ቢናናይ ኩሜꬅ ታይቦን ዴስ፤ ሄሳ ጊሻስ ባቦፍቴ፤ ዳሮ ሲኔ ካፎታፔ ኢንቴ ኣꬌታ።
LUK 12:8 «ታ ኢንቴስ ዮታይስ፤ ታ ጊሻስ ኣሳ ሲንꬃን ማርካቲዛ ኣሳ ኡባስ ኣሳ ናይ ቃሴካ ጾሳ ኪታንቻ ሲንꬃን ኢዛ ጊሻስ ማርካታና።
LUK 12:9 ጊዶ ኣቲን ኣሳ ሲንꬃን ታና ካዲዳዴይ ጾሳ ኪታንቻ ሲንꬃን ካዴታና።
LUK 12:10 «ኣሳ ና ቦላ ካዉሻ ቃላ ሃሳይዛዴስ ናጋራይ ዉሪ ማሬታናሺን ጺሎ ኣያና ጫዪዛዴይ ማሬቴና።
LUK 12:11 «ኣሳይ ኢንቴና ኦይኪዲ ዴሬ ሃሪዛይታኮኔ ጎዳቲዛይታኮ፤ ኣይሁዳ ዎሳ ኬꬄ ኦይኪ ኤፊኮ፥ ‹ኣይ ጊ ዛሪኖ? ኣይ ጊኖ?› ጊዲ ሂርጎፍቴ።
LUK 12:12 ኣይስ ጊኮ ኢንቴ ሃሳያናስ ቤሲዛይሳ ጺሎ ኣያናይ ሄ ዎዴ ኢንቴና ታማርሳና» ጊዴስ።
LUK 12:13 ዳሮ ኣሳ ጊዶፌ ኢሳዴይ፥ «ኣስታማሬ! ታ ኢሻይ ኑ ኣዋ ላታ ሚሻፌ ታና ጋኪዛይሳ ታስ ኢማና ማላ ኢዛስ ዮታ» ጊዴስ።
LUK 12:14 ዬሱሲካ፥ «ሃይሶ! ታና ኢንቴ ቦላ ፒርዲዛ ዳና ኦꬂዳይ ኦኔ?» ጊዴስ።
LUK 12:15 ቃሴካ ኢስታስ፥ «ኣሳስ ዳሮ ሚሺ ዲኮካ ሼምፖይ ሄ ዱሬቴꬃን ዶንታ ጊሻስ ናጌቲቴ፤ ዪቄቴꬃፌ ኢንቴና ኬሂ ናጊቴ» ጊዴስ።
LUK 12:16 ዛሬꬂዲካ ኢስታስ፥ «ሎኤꬂ ካꬅ ኢሚዛ ጋዴ ጎዳ ጊዲዳ ኢሲ ዱሬ ኣሲ ዴስ።
LUK 12:17 ሄ ኣዴዚካ ባ ዎዚናን፥ ‹ታ ካꬃ ሺሻዳ ዎꬂዛሶይ ባይንዳ ጊሻስ ኣይ ኦꬆ?› ጊ ቆፒዴስ።
LUK 12:18 «ኣዴዚካ፥ ‹ታስ ዲዛ ጎታራታ ላላዳ ሃራ ኣኪዛይሳ ኬጻና፤ ሂስታዳ ታስ ዲዛ ካꬃኔ ታስ ዲዛዝ ኡባ ኢዛን ሺሻና።
LUK 12:19 ታ ሼምፖዬ! ዳሮ ዎዴስ ጊዲዛ ካꬅ ሺሺዳ ጊሻስ ሼምፓ ኡታዳ ማ፤ ኡያ፤ ኡፋዬታ› ጋና ጊዴስ።
LUK 12:20 «ጊዶ ኣቲን፥ ‹ጾሲ ሃይሶ ኤያዞ! ኔ ሼምፖዮ ሃች ኦማርስ ኔፔ ኤካና ኮዬቴስ፤ ሄሳ ጊሻስ ኔ ኔስ ሺሺዳይሲ ኦናስ ጊዳኔ?› ጊዴስ።
LUK 12:21 «ሄሳ ጊሻስ ጾሳ ኣቻን ዱሬ ጊዶንታ ባስ ሚሼ ሺሺዛ ኣሳ ዉርሴꬂካ ሄሳ ማላ» ጊ ሌሚሶን ዮቲዴስ።
LUK 12:22 ሄሳፌ ጉዬ ዬሱሲ ባና ካሊዛይታስ፥ «ኢንቴስ ታ ዮታይስ፤ ኢንቴ ዱሳስ፥ ‹ኣይ ማናኮ ዎይኮ ኢንቴ ቦላስ ኣይ ማይኣናኮ› ጊዲ ጬጮፒቴ።
LUK 12:23 ኣይስ ጊኮ ሼምፖይ ካꬃፌ ኣሳቴꬂ ቃሴ ማይኦፌ ኣꬌስ።
LUK 12:24 ቁሮታ ጼሊቴ ዜሬቴና፤ ማጼቴና፤ ካꬅ ሺሺዛ ጎታራይ ኢስታስ ባ ሺን ጾሲ ኢስታ ሚዜስ። ሂስቲኮ ኢንቴ ኢስታፌ ኬሂ ኣꬌኬቲ?
LUK 12:25 ጊዶ ኣቲን ኢንቴፌ ዳርሲ ቆፒዲ ባ ላይꬃ ቦላ ኢሲ ጋላስ ጉጃና ዳንዳይዛይ ኦኔ?
LUK 12:26 ሂስቲኮ ጉꬃ ሚሽ ኦሶይ ኢንቴስ ዳንዳዬቶንታሼ ኣይስ ሃራ ሚሻስ ኬሂ ቆፔቲ?
LUK 12:27 «ጪሻቲ ዋኒዲ ዲጪዛኮ ኣኔ ጼሊቴ፤ ዋዬቴና፤ ሱቄቴና፤ ጊዶ ኣቲን ታ ኢንቴስ ዮታይስ፤ ሶሎሞኔይካ ጊታ ኣሳ ሺን ኢስታፌ ኢሲኔይꬆ ማይኢቤና።
LUK 12:28 ሂስቲኮ ጾሲ ሃች ቤቲዲ ዎንቶ ታማን ዎꬋና ማታ ሃይሳꬆ ማይዚዛ ጊዲኮ ኢንቴኖ ኣማኖይ ፓጪዳይቶ! ኢንቴና ዎስቲ ኣꬂ ማዪዜኔ?
LUK 12:29 «ሄሳ ጊሻስ፥ ‹ኣይ ሚኖ? ኣይ ማይኢኖ?› ጊዲ ኢንቴ ዎዚናይ ዳርሲ ቆፖፎ።
LUK 12:30 ቢታ ቦላን ዲዛ ኣሲ ዉሪ ሃይሳ ኮዬስ፤ ጊዶ ኣቲን ሃይሲ ዉሪ ኢንቴስ ኮሺዛይሳ ኢንቴ ሳሎ ኣዋይ ኤሬስ።
LUK 12:31 ኡባፌካ ኮይሮꬂዲ ጾሳ ካዎቴꬅ ኮዪቴ፤ ሃይሲ ዉሪ ኢንቴስ ጉጄቲ ኢሜታና።
LUK 12:32 «ኢንቴኖ ጉꬃ ዉዴ ሜሄ ማላ ጊዲዳይቶ! ካዎቴꬅ ኢንቴስ ኢማናስ ኢንቴ ኣዋስ ሎኦ ቆፋ ጊዲዳ ጊሻስ ባቦፍቴ።
LUK 12:33 ኢንቴስ ዲዛይሳ ባይዚዲ ማንቆታስ ኢሚቴ፤ ካይሶይ ኤኮንታሶን፥ ቢላይ ሞንታሶን፥ ጪሞንታ ኮሮጆን ዉሮንታ ሚሽ ሳሎን ሺሺቴ።
LUK 12:34 ኢንቴ ዎዚናይ ኢንቴ ሚሺ ዲዛሶን ዳና» ጊዴስ።
LUK 12:35 «ቃንꬃን ጊጺዲ ጊጌቲቴ፤ ኢንቴ ፖኦይካ ፖኦ፥
LUK 12:36 ኢስታ ጎዳይ ቡላቻ ዲጊሳፔ ሲሚዲ ያናሼ ናጌቲዛይታኔ ኢዚ ዪዲ ፔንጌ ቆጺሺን ኤሌ ዶያናስ ጊጊ ኡቲዳ ኣሳታ ሚሳቲቴ።
LUK 12:37 ኢስታ ጎዳይ ዪዛ ዎዴ ꬊስኮንታ ናጊ ኡቲዳ ኣሽካራቲ ኢስቲ ኣንጄቲዳይታ፤ ታ ኢንቴስ ቱሙ ጋይስ፤ ኢስታ ጎዳይ ባስ ቃንꬃን ጊጺ ኤቂዲ ኢስታ ማዳን ኡቲሲዲ ሚዛና።
LUK 12:38 ኦማርስ ዎይኮ ሌላ ጊዶꬃን ዪዲ ኢስቲ ꬊስኮንታ ዲሺን ዴሚኮ ሄ ኣሽካራቲ ኣንጄቲዳይታ።
LUK 12:39 ካይሶይ ኣይ ዎዴ ያናኮ ኤሪዛ ጊዲዳኮ ኬꬃ ጎዳይ ካይሶይ ቦኪሺን ጮኡ ጊዲ ቤሶንታይሳ ኤሪቴ።
LUK 12:40 ኣሳ ናይ ኢንቴ ቆፖንታ ዎዴን ያናይሳ ኤሪዲ ኢንቴካ ጊጌቲዲ ናጊቴ» ጊዴስ።
LUK 12:41 ጴጽሮሲካ፥ «ጎዶ! ሃይሳ ሌሚሶዛ ኔ ዮቲዛይ ኑስ ጻላዬ? ኡባ ኣሳሳራ?» ጊዴስ።
LUK 12:42 ጎዳይካ፥ «ሂስቲኮ ባሶ ኣሳስ ኮሺዛ ዎዴን ቁማ ኢማና ማላ ኬꬃዴይ ኬꬃ ኣሳ ቦላ ዎꬂዛ ኣማኔቲዳ ዎዚናማ ኣሲ ኦኔ?
LUK 12:43 ጎዳይ ሲሚሺን ሄሳꬆ ኦꬂሼ ቤቲዛዴይ ኢዚ ኣንጄቲዳዴ።
LUK 12:44 ታ ኢንቴስ ቱሙ ጋይስ፤ ባስ ዲዛ ሚሽ ኡባ ቦላ ሄሳዴ ጎዳሳና።
LUK 12:45 ጊዶ ኣቲን፥ ‹ኢዛዴይ ታ ጎዳይ ኤሌ ዬና ጋምኣና› ጊ ቆፒዲ ኣዴ ኣሽካራታኔ ማጫ ኣሽካራታ ቡኪኮ፥ ቃሴካ ኮዪዳ ማላ ሚዲኔ ኡዪዲ ማꬆቲኮ፥
LUK 12:46 ሄሳዴ ጎዳይ ኢዚ ቆፖንታ ጋላሳን ያና ጊዲ ኤዝጎንታ ሳቴን ያና፤ ሂስቲዲ ኢዛ ቃንጼሬꬂ ዬጊዲ ኢዛ ኤጻ ኣማኖንታይታራ ኢሲፌ ኦꬃና።
LUK 12:47 «ባ ጎዳ ቆፋ ኤሪዲ ጊጌቶንታይኔ ጎዳ ሼኔ ኦꬆንታ ኣሽካራይ ኢታ ሾች ሾጬታና።
LUK 12:48 ጊዶ ኣቲን ኤሮንታ ዲሼ ሾቻስ ቤሲዛ ሞሮ ኦꬂዳ ኣሽካራይ ጉꬃራ ሾጬታና፤ ዳሮ ኢሜቲዳ ኣሳ ኡባፌ ዳሮይ ኮዬቴስ፤ ዳሮ ሃዳራ ኤኪዳዴፌ ዳሮይ ኮዬቴስ።
LUK 12:49 «ታኒ ዪዳይ ቢታ ቦላን ታማ ኤꬃናሳ፤ ሄ ታማይ ሃኢ ኤጺ ኬዚዳኮ ታና ዳሮ ኡፋይሳና።
LUK 12:50 ጊዶ ኣቲን ታኒ ጻማቄታና ጺንቃታይ ዴስ፤ ሄ ጺንቃታይ ፖሌታናሼ ታኒ ኬሃ ሜቶቴታዲስ።
LUK 12:51 ኢንቴስ ታኒ ቢታ ቦላ ሳሮ ኤሃና ዪዳ ሚሳቲዜ? ጊዴና፤ ታ ኢንቴስ ዮታይስ፤ ታኒ ዪዳይ ኢሳ ኢሳፌ ሻካናሳ።
LUK 12:52 ሃይሳፌ ሲንꬃን ኢሲ ኬꬃን ባ ጊዶን ሻኬቲዳ ኢቻሹ ኣሳቲ ዳና። ናምኣቲ ሄꬓታ ቦላ ሄꬓቲ ናምኣታ ቦላ ዴንዲዲ ባ ጊዶን ሻኬታና።
LUK 12:53 ኣዋይ ባ ኣቱማ ና ቦላ፥ ኣቱማ ናይካ ባ ኣዋ ቦላ፥ ኣያ ባ ማጫ ናይ ቦላ፥ ማጫ ናያካ ባ ኣዬይ ቦላ፥ ቦሎታ ባ ና ማቺ ቦላ፥ ና ማቻካ ባ ቦሎቲ ቦላ ዴንዲዲ ባ ጊዶን ሻኬታና» ጊዴስ።
LUK 12:54 ቃሴካ ዴሬዛስ፥ «ኢንቴ ኣርሼይ ሞኪዛ ባጋራ ሻራይ ኬዚሺን ቤኢዲ፥ ‹ኤሌራካ ኢራይ ያና ጌስ› ጌታ፤ ኢንቴ ጊዳ ማላካ ሃኔስ።
LUK 12:55 ዱጌሃ ባጋራ ፑዴሃ ጫርኪሺን፥ ‹ጋላሳይ ሆኦ ጊዳና› ጌታ፤ ኢንቴ ጊዳ ማላካ ሃኔስ።
LUK 12:56 ኢንቴኖ ሎኦ ሚሳቲዛ ኢታቶ፤ ሳሎይሳኔ ሳኣ ሜꬋ ቤኢዲ ሃናናይሳ ኤሬታ ሺን ሃ ዎዴዛ ኤሮይ ኢንቴና ዋኒ ጾኒዜ?
LUK 12:57 «ሂስቲኮ ኢንቴ ኣይስ ቱማ ፒርዴኬቲ?
LUK 12:58 «ኔ ሞርኬራ ዳና ሲንꬃን ኤቃና ቢሺን ቡሮ ኦጌ ቦላን ዳሼ ኢዛራ ጊጋና ኦጌ ኮያ፤ ኔ ሂስቶንታ ኣጊኮ ኢዚ ኔና ጎቺዲ ዳና ሲንꬅ ኤፋና፤ ዳናይካ ኔና ኣꬂዲ ሃላቃስ ኢማና፤ ሃላቃይካ ኔና ዎይኔን ዬጋና።
LUK 12:59 ታ ኔስ ዮታይስ፤ ዳናይ ፒርዲዳ ዉርሴꬃ ሳንቲዮ ቃንጻ ዉርሳና ጋካናስ ኔ ሄፔ ኬዛካ» ጊዴስ።
LUK 13:1 ሄ ዎዴ ኢሲ ኢሲ ኣሳቲ ዬሱሳኮ ዪዲ፥ «ጲላጾሲ ኢስታ ሱꬅ ኢስታ ያርሾራ ጋꬂ ዋላኪዳ ጋሊላ ኣሳታ» ጊሼ ዬሱሳስ ዮቲዳ።
LUK 13:2 ኢዚካ ዛሪዲ፥ «ሂስቲን ሄሳ ማላ ሜቶይ ኢስታ ቦላ ጋኪዳ ኣሳቲ ሃንኮ ዋዬይ ጋኮንታ ኣቲዳ ጋሊላ ኣሳ ኡባፌ ኣꬊዳ ናጋራንቻ ጊዲዳ ጊሻስ ጊ ቆፔቲ?
LUK 13:3 ጊዴና! ታ ኢንቴስ ዮታይስ፤ ኢንቴ ማሬቶንታ ኢጺኮ ኢንቴ ዉሪካ ሄ ኣሳታ ማላ ꬋያና።
LUK 13:4 ዎይኮ ሴሊሆሜን ጊምቤይ ኢስታ ቦላ ኩንዲን ሃይቂዳ ታማኔ ኦስፑን ኣሳቲ ዬሩሳላሜን ዲዛ ኣሳ ኡባፌ ናጋራንቻ ጊዲዳ ጊሻስ ጊዲ ቆፔቲ?
LUK 13:5 ጊዴና! ታ ኢንቴስ ዮታይስ፤ ኢንቴ ማሬቶንታ ኢጺኮ ኢንቴ ዉሪካ ሄ ኣሳታ ማላ ꬋያና» ጊዴስ።
LUK 13:6 ቃሴካ ኢስታስ፥ «ኢሲ ኣሲ ዎይኔ ቶኪዛሶሆን ቶኬቲዳ ኢሲ ባላሴ ሚꬂ ዳዉስ፤ ሄ ባላሴ ሚꬃይኮ ኣይፌ ኮያና ዪዲ ኢሲ ኣይፌካ ዴሚቤና።
LUK 13:7 ዎይኔ ኣታኪልቴ ኦꬂዛይሳስ፥ ‹ሄኮ ታኒ ኣይፌ ዴማና ጋዳ ሃቺራ ሄꬑ ላይꬅ ሃ ባላሴይኮ ሲሜሬታ ያዳ ኢሲ ኣይፌካ ዴማቤኬ፤ ሄሳ ጊሻስ ኢዞ ቃንጻ ዲጋ! ኣዛስ ጮ ቢታ ጹንጻዜ?› ጊዲ ሌሚሶ ዮቲዴስ።
LUK 13:8 ኢዚካ ዛሪዲ፥ ‹ጎዶ! ታኒ ኢዚ ጻጶን ኦሻ ዬጋዳ ኦሴꬃ ጼላና ማላ ሃ ላይꬃስ ኣጋጋርኪ?
LUK 13:9 ዪዛ ላይꬃስ ኢዛ ኣይፊኮ ሎኦ፤ ኣይፎንታ ኢጺኮ ቃንጻንዳሳ› » ጊዴስ።
LUK 13:10 ዬሱሲ ሳምባታ ጋላስ ኢሲ ኣይሁዳ ዎሳ ኬꬃን ታማርሲሺን፥
LUK 13:11 ታማኔ ኦስፑን ላይꬅ ኩሜꬅ ኢታ ኣያናይ ኦይኪዲ ኣሳቴꬃ ፓጪሲዳ ኢሲ ማጫሳያ ሄን ዳዉስ፤ ኢዛካ ዞኮይ ቁኒዳ ጊሻስ ሙሌካ ꬎቁ ጋናስ ዳንዳዩኩ።
LUK 13:12 ዬሱሲ ኢዞ ቤኢዳፔ ጉዬ ጼይጊዲ፥ «ሃኔ ማጫሳዬ! ኔኒ ኔና ሳኪዛ ሃርጌዛፔ ፓጻዳሳኮ!» ጊዴስ።
LUK 13:13 ዬሱሲ ባ ኩሼ ኢዚ ቦላ ዎꬂን ኢዛ ሄራካ ሲቲ ጋዳ ኤቃዱስ፤ ጾሳካ ጋላታዱስ።
LUK 13:14 ኣይሁዳታ ዎሳ ኬꬃ ሃላቃዚካ ሳምባታ ጋላስ ፓꬂዳይሳስ ዬሱሳ ቦላ ሃንቄቲዲ ኢዛኮ ዪዛ ዴሬዛ፥ «ኦሶስ ቤሲዛ ኡሱፑን ጋላሳቲ ዲዛ ጊሻስ ሄ ኦሶ ጋላሳታን ዪዲ ፓጺቴ ኣቲን ሳምባታ ጋላስ ዮፒቴ» ጊዴስ።
LUK 13:15 ጎዳይካ ዛሪዲ፥ «ኢንቴኖ ቆꬌፔ ቆሞን ሃሳይዛይቶ! ኢንቴ ጊዶፌ ኢሳዴይ ባ ቦራ ዎይኮ ባ ሃሬ ሳምባታ ጋላስ ባሶን ቃሼቲዳሶፔ ቢርሺዲ ሃꬄ ኡሻናስ ኤፊ ኤሬኔ?
LUK 13:16 ሂስቲን ሃና ማጫሳያ ኣብራሃሜ ና ጊዳዳ ታማኔ ኦስፑን ላይꬅ ኩሜꬅ ጻላኤይ ቃቺን ዲዛሶፔ ሳምባታ ጋላስ ቢርሼታናስ ኢዚስ ቤሴኔ?» ጊዴስ።
LUK 13:17 ዬሱሲ ሂዝጊ ኦይቺዳ ዎዴ ኢዛራ ኤቄቲዛይቲ ዉሪካ ዬላቲዳ፤ ጊዶ ኣቲን ዴሬይ ዉሪካ ኢዚ ኦይቺዳ ማላሊሲዛ ኦይሻን ኡፋዬቲዴስ።
LUK 13:18 ቃሴካ ዬሱሲ ዛሪዲ፥ «ጾሳ ካዎቴꬂ ኣይ ሚሳቲዜ? ታ ኢዞ ኣዛራ ሌሚሶ?
LUK 13:19 ኢሲ ኣሲ ሳናፊጬ ጌቴቲዛ ሚꬃ ኣይፌ ባ ጋዴን ቶኪን ሞካ ዲጫዳ ጊታ ጊዲን ካፎቲ ኢዚ ሃጋ ጊዶን ዱሳሶ ጊጊሳና ጋካናስ ዲጪዳ ሳናፊጬ ሚꬅ ሚሳታዉስ» ጊዴስ።
LUK 13:20 ቃሴካ፥ «ጾሳ ካዎቴꬅ ኣዛራ ሌሚሶ?
LUK 13:21 ኢሲ ማጫሲ ሙኑቃ ጫሊሳናስ ዳሮ ꬊሌራ ዋላኪዳ ጉꬃ ኢርሾ ሚሳታዉስ» ጊዴስ።
LUK 13:22 ሄሳፌ ጉዬ ዬሱሲ ዬሩሳላሜ ቢሼ ካንꬂ ቢዛ ካታማኒኔ ጉታታን ኣሳ ታማርሲሼ ኣꬊሺን፥
LUK 13:23 ኢሳዴይ ኢዛኮ ሺቂዲ፥ «ጎዶ! ፒርዳፌ ጉꬃ ኣሳቲ ጻላ ኣታኔ?» ጊ ኦይቺዴስ። ኢዚካ ዛሪዲ፥ «ጹንꬃ ፔንጌይራ ጌላናስ ባጼቲቴ፤ ዳሮቲ ጌላናስ ኮዬቴስ ሺን ኢስታስ ሃኔና።
LUK 13:25 ኬꬃ ጎዳይ ዴንዲዲ ባ ካሬ ጎርዲ ጊዲን ኢንቴ ካሬን ኤቂዲ፥ ‹ጎዶ! ካሬ ዶያርኪ!› ጊዲ ፔንጌ ቆጻና ሺን ኢዚ ዛሪዲ፥ ‹ኢንቴ ኦናኮኔ ኣዋፔ ዪዳኮ ታ ኢንቴና ኤሪኬ› ጋና ጊዴስ።
LUK 13:26 «ኢንቴካ ኢዛስ ዛሪዲ፥ ‹ኑኒ ኔናራ ኢሲፌ ሚዶሲኔ ኢሲፌ ኡዪዶስ፤ ኑ ዱቡሻን ኔ ኑና ታማርሳዳሳ› ጋና።
LUK 13:27 «ኢዚካ ዛሪዲ፥ ‹ኢንቴና ኢንቴ ኦናኮኔ ኢንቴ ኣዋፔ ዪዳኮ ታ ኢንቴና ኤሪኬ፤ ኢንቴ ማካላቲ ዉሪካ ታፔ ሃኪቴ› ጋና ጊዴስ።
LUK 13:28 «ኢንቴ ኣብራሃሜ፥ ዪሳቃ፥ ያቆቤኔ ናቤታ ኡባታ ጾሳ ካዎቴꬃን ቤኢዛ ዎዴ ኢንቴ ካሬን ዬጌቲ ኣቲኮ ሄ ዎዴ ኢንቴስ ዬሆኔ ኣቻ ጋርጬች ጊዳና።
LUK 13:29 ኣሳይ ኣርሼይ ሞኪዛ ባጋፌኔ ዉሊዛ ባጋፌ ፑዴሃፔኔ ዱጌሃፔ ዪዲ ጾሳ ካዎቴꬃ ማዳን ኡታና።
LUK 13:30 ሄኮ ጉዬን ዲዛይታፔ ባጋይቲ ሲንꬄ ኣꬋና፥ ሲንꬃን ዲዛይታፔ ባጋይቲ ጉዬ ኣꬋናይቲ ዴቴስ» ጊዴስ።
LUK 13:31 ሄ ዎዴ ፋርሳዌታፔ ኢሲ ኢሲ ኣሲ ዪዲ፥ «ሄርዶሲ ኔና ዎꬋናስ ኮይዛ ጊሻስ ሃይሳፌ ዴንዳ ኪቻ» ጊዳ።
LUK 13:32 ዬሱሲ ኢስታስ፥ «ታኒ ቡሮ፥ ‹ሃቺኔ ዎንቶ ዳይዳንꬃታ ኣሳፔ ኬሳና፤ ሃርጊዛይታካ ፓꬃና፤ ሄꬓንꬆ ጋላስ ታ ቆፋሶ ታ ጋꬃና› ጊዴስ ጊዲ ሄ ዎራካናስ ዮቲቴ።
LUK 13:33 ጊዶ ኣቲን ናቤይ ዬሩሳላሜፔ ሃራሶን ሃይቃናስ ቤሶንታ ጊሻስ ሃቺኔ ዎንቶ ዎንቶፔይንካ ታ ሲንꬄ ቡስ ጉጃና።
LUK 13:34 «ሃኔ ዬሩሳላሜ ናቤታ ዎꬊዛሬ! ኔኮ ኪቴቲዳይታ ሹቻራ ጫዲዛሬ! ኩቶይ ባ ጪዬታ ባ ቄፌ ጋርስ ሺሺዛ ማላ ኔ ናይታ ሺሻናስ ኣፑን ዎዴ ኮያዲናሺን ኔ ጊዲኮ ኣካይ ጋዳሳ።
LUK 13:35 ሄኮ ኢንቴ ኬꬃይ ካይዚዴስ፤ ታ ኢንቴስ ዮታይስ፥ ‹ጎዳ ሱንꬃን ዪዛዴይ ኣንጄቲዴስ› ኢንቴ ጋና ዎዴይ ጋካናሼ ናምኣንꬆ ታና ቤዬኬታ» ጊዴስ።
LUK 14:1 ኢሲ ጋላስ ዬሱሲ ቁማ ማናስ ፋርሳዌታ ሃላቃታፔ ኢሳ ሶ ጌሊዳ ዎዴ ኣሳይ ዉሪ ዬሱሲ ኣይ ኦꬃናኮ ጊዲ ኣይፌ ኢዛ ቦላ ቶኪ ጼሊዴስ።
LUK 14:2 ሄንካ ኢዛስ ኣሳቴꬃይ ፑሪን ዋዬቲዛ ኢሲ ኣሲ ኢዛ ሲንꬃን ዴስ።
LUK 14:3 ዬሱሲካ ሙሴ ዎጋ ኤሪዛይታኔ ፋርሳዌታ፥ «ሳኬቲዛዴ ሳምባታ ጋላስ ፓꬃናስ ኮሺዜዬ? ኮሼኔ?» ጊዲ ኦይቺዴስ።
LUK 14:4 ኢስቲካ ጮኡ ጊዳ፤ ኢዚካ ኣዴዛ ቦቺዲ ፓꬂ ዬዲዴስ።
LUK 14:5 ቃሴካ፥ «ኢንቴፌ ኢሲ ኣሳስ ሳምባታ ጋላስ ናይ ዎይኮ ቦራይ ኩንዲዲ ኦላን ጌሊኮ ኤሶን ሄራካ ኬሶንታዴይ ኦኔ?» ጊዴስ።
LUK 14:6 ኢስቲካ ኦይሻስ ኣይኮ ዛሮካ ዴማናስ ዳንዳይቤቴና።
LUK 14:7 ጼይጌቲዳ ኣሳቲ ኡታናስ ቦንቾሶ ኮዪሺን ዬሱሲ ቤኢዲ ሌሚሶራ ኢስታስ፥
LUK 14:8 «ኢሲ ኣሲ ኔና ሳርጌስ ጼይጊኮ ቦንቾሶን ኡቶፋ፤ ኔፔ ቦላራ ቦንቼቲዛዴይ ጼይጌቲኮ፥
LUK 14:9 ኢንቴና ናምኣታካ ጼይጊዳዴይ ዪዲ፥ ‹ኔ ኡቲዳሶሆዛ ሃይሳዴስ ዬዳ› ጋና፤ ኔኒካ ዬላታሼ ዚቃሶ ባንዳሳ።
LUK 14:10 ጊዶ ኣቲን ኔ ጼይጌቲዳ ዎዴ ዚቃሶ ጼላዳ ኡታ፤ ኔና ጼይጊዳዴይ ዪዲ፥ ‹ታ ላጌዞ! ሃ ያ ꬎቃሶሆን ኡታ› ጋንዴስ፤ ኔኒካ ሄ ዎዴ ኔናራ ማዳን ኡቲዳ ኣሳ ኡባ ሲንꬃን ቦንቼታና።
LUK 14:11 ጋሶይካ ባና ꬎቁ ሂስቲዛዴይ ዉሪ ዚቂ ጋና፤ ባና ዚቂ ሂስቲዛዴይ ዉሪ ꬎቁ ጋና» ጊዴስ።
LUK 14:12 ዬሱሲካ ጼይጊዳ ኣዴዛ፥ «ቁማ ዎይኮ ካዎ ሚዛናስ ጼይሲኮ ኔይሳꬆ ኔና ጼይሲዲ ሚዞንታ ማላ ኔ ላጌታ ዎይኮ ኔ ኢሻታ፥ ኔ ዳቦታ ዎይኮ ዱሬታ ዎይኮ ዱሬ ጉታታ ጼይጎፓ።
LUK 14:13 ጊዶ ኣቲን ኣሳ ጼይሳዳ ሚዛና ኮይኮ ማንቆታ፥ ኩሼይ፥ ቶሆይ ባይንዳ ዎቤታኔ ቆቄታ ጼይሳ፤ ኔኒ ኣንጄታና።
LUK 14:14 ጼይጌቲዳይቲ ኩሼ ዛራናስ ዳንዳዮንታ ጊሻስ ጺሎታ ዴንꬃ ዎዴ ኔስ ኩሼይ ዛሬታና» ጊዴስ።
LUK 14:15 ማዳን ዬሱሳራ ኢሲፌ ኡቲዳይታፔ ኢሶይ ሃይሳ ሲዪዲ፥ «ጾሳ ካዎቴꬃን ሺቂዲ ማዳፌ ሚዛ ኣሲ ኣንጄቲዳዴ» ጊዴስ።
LUK 14:16 ዬሱሲካ፥ «ኢሲ ኣሲ ዎልቃማ ጊቢራ ጊግሲዲ ዳሮ ኣስ ጼይጊዴስ።
LUK 14:17 «ጊቢራ ማና ዎዴይካ ጋኪን ጼይጌቲዳ ኢማꬃታ፥ ‹ዉሪካ ጊጊዳ ጊሻስ ሃ ዪቴ!› ጊዲ ጼይጋና ማላ ባ ኣሽካራ ዬዲዴስ።
LUK 14:18 ጊዶ ኣቲን ዉሪካ ባስ ሃራ ጋሶ ሺሺዲ ኢሶይ፥ ‹ሃኢ ጋዴ ሻማዲስ፤ ታ ባዳ ቤያናስ ቤሴስ፤ ሃቺስ ታና ላንጮፋ› ጊዴስ።
LUK 14:19 «ሃንኮይሲካ፥ ‹ታኒ ኢቻሹ ዋጻ ቦራ ሻማዲስ፤ ኢስታ ፓጫ ጼላና ጊሻስ ሃች ታና ላንጮፋ› ጊዴስ።
LUK 14:20 «ቃሴ ሃራ ኢሳዴይካ፥ ‹ታኒ ቡሮ ሚሺራቴꬃን ዳይስ፤ ባናስ ዳንዳይኬ› ጊዴስ።
LUK 14:21 «ኦሳንቻዚ ኪቴቲዳሶፔ ሲሚዲ ሄꬓቲ ጊዳይሳ ባ ጎዳስ ዮቲዴስ፤ ሄ ዎዴካ ጊቢራ ጊግሲዳይሲ ሃንቄቲዲ ኦሳንቻዛ፥ ‹ኤሌ ኦይዱ ኦጌ ኬዛዳ ማንቆታ፥ ኩሼይኔ ቶሆይ ባይንዳ ዎቤታ፥ ቆማጻታኔ ኣይፌይ ባይንዳ ቆቄታ ሃ ጌልꬃ› ጊዴስ።
LUK 14:22 «ኦሳንቻዚካ ዛሪዲ፥ ‹ታ ጎዶ! ኔ ታና ኣዛዚዳይሳ ኡባ ፖላዲስ፤ ሃኢካ ሃራ ኡቴꬃሶይ ዴስ› ጊዴስ።
LUK 14:23 «ጎዳዚካ ኦሳንቻዛ፥ ‹ጌዴ ኦይዱ ኦጌ ኬዛዳ ታ ኬꬄ ኩማና ማላ ፑዴኔ ዱጌ ኣꬊዛይታ ዎልቃራ ሃ ጌልꬃ።
LUK 14:24 ታኒ ቱማ ጋይስ፤ ጊቢራ ማና ጼይጌቲዳይታፔ ኢሳዴይካ ዶናን ጌልꬄና› » ጊዴስ።
LUK 14:25 ዳሮ ዴሬይ ኢዛራ ኢሲፌ ቢዛይሳ ዬሱሲ ቤኢዲ ጉዬ ሲሚ፥
LUK 14:26 «ታኮ ዪዛይ ዉሪ ባ ኣዋ፥ ባ ማቾኔ ናይታ፥ ባ ኢሻታኔ ሚቼታ፥ ባ ሼምፖ ጊዲን ኢጾንታ ኣጊኮ ታና ካሊዛዴ ጊዳናስ ዳንዳዬና።
LUK 14:27 ባ ማስቃሌ ቶኪዲ ታና ካሎንታይ ታና ካሊዛዴ ጊዳናስ ዳንዳዬና።
LUK 14:28 «ኢንቴፌ ኢሲ ኣሲ ኬꬄ ኬጻናስ ኮይኮ ፖላናስ ዳንዳያናኮኔ ዳንዳዮንታኮ ኮይሮቲዲ ባስ ዲዛ ቢራ ቆፖንታይ ኦኔ?
LUK 14:29 ኬꬃ ኬጻና ዶሚዲ ዉርሳናስ ሃኖንታ ኢጺኮ ቤኢዳ ኣሲ ዉሪ ኢዛ ቦላ ሚጫና።
LUK 14:30 ኢስቲካ፥ ‹ሃይሲ ኣዴዚ ኬꬄ ኬጾ ኦይኪዴስ ሺን ፖሊቤና› ጊ ሚጫና።
LUK 14:31 «ዎይኮ ኢሲ ካዎይ ሃራ ካዎራ ኦላስ ጊጌቲዲ ናምኡ ታሙ ሺ ኣስ ኤኪ ዪዛ ካዎ ዛራናስ ታሙ ሺ ኦላ ኣሳራ ዛራናኮ ኡቲዲ ቆፖንታይ ኦኔ?
LUK 14:32 ኦላ ዛራናስ ዳንዳዬቶንታ ሚሳቲዲ ቤቲኮ ቡሮ ሃሆን ዲሺን ማቃይናናስ ጋና ዬዴስ።
LUK 14:33 ሄሳꬆካ ኢንቴፌ ኦናካ ጊዲን ባስ ዲዛይሳ ኣጎንታይ ታና ካሊዛዴ ጊዳናስ ዳንዳዬና።
LUK 14:34 «ማጺኔይ ሎኦሺን ባ ማጺኔቴꬃ ማልኦ ዬዲኮ ዛሪዲ ዋኒ ማልኣና ዳንዳይዜ?
LUK 14:35 ጋዴን ዬጊን ኣራዲሶንታ ጊሻስ ጮ ካሬ ዎራ ዬጌቴስ፤ ሲዪዛ ሃይꬂ ዲዛ ኣሲ ሲዮ!» ጊዴስ።
LUK 15:1 ኢሲ ጋላስ ቃራጻ ሺሺዛይቲኔ ናጋራንቻቲ ዉሪ ዬሱሳፔ ሲያናስ ኢዛ ኣቺ ሺቂዳ።
LUK 15:2 ፋርሳዌቲኔ ጻፌቲ፥ «ሃይሲ ኣዴዚ ናጋራንቻታ ኢጼና፤ ኢስታራካ ሜስ» ጊዲ ባ ጊዶን ዙዙሜቲዳ።
LUK 15:3 ዬሱሲካ ኢስታስ ሌሚሶ ሂዝጊ ዮቲዴስ፤
LUK 15:4 «ኢንቴ ጊዶፌ ኢሳዴስ ጼቱ ዶርሲ ዲኮ ሄ ጼቱ ዶርሳታፔ ኢሲና ꬋይኮ ኣቲዳ ኡዱፉን ታማኔ ኡዱፉናታ ዴምባን ዬጊዲ ꬋይዳይሳ ዴማና ጋካናስ ኮያና ቦንታይ ኦኔ?
LUK 15:5 ዴሚዲ ኡፋይሳራ ሃሼን ቶኪ ኤኪዲ፥
LUK 15:6 ባሶ ሲሜስ፤ ባ ላጌታኔ ጉታ ኣሳታ ኢሲ ቦላ ጼይጊዲ፥ ‹ꬋይዳ ታ ዶርሳዮ ዴማዲስ፤ ታናራ ኢሲፌ ኡፋዬቲቴ› ጋና።
LUK 15:7 ታ ኢንቴስ ዮታይስ፥ ‹ሄሳꬆካ ማሮቴꬅ ኮሾንታ ኡዱፉን ታማኔ ኡዱፉን ጺሎታፔ ማሬቴꬃን ጌሊዛ ኢሲ ናጋራንቻን ሳሎን ኡፋይስ ጊዳና።›
LUK 15:8 «ዎይኮ ኢሲ ታሙ ቢራ ሳንቴይ ዲዛ ማጫሳያ ሄ ታማፌ ኢሲኔያ ꬋይኮ ጾምፔ ኦይꬃዳ ዴማና ጋካናስ ኬꬃ ጋርስ ፒታዳ ሎኤꬃ ኮዮንታ ማጫሲ ኦኔ?
LUK 15:9 ኢዛካ ዴሚዳ ዎዴ ባ ላጌታኔ ባ ጉታታ ኢሲፌ ጼይጋዳ፥ ‹ታፔ ꬋይዳ ቢራ ሳንቲዮ ዴሚዳ ጊሻስ ታናራ ኢሲፌ ኡፋዬቲቴ› ጋንዱስ።
LUK 15:10 ታ ኢንቴስ ዮታይስ፤ ‹ሄሳꬆካ ማሮታን ጌሊዛ ኢሲ ናጋራንቻ ኣሳን ጾሳ ኪታንቻታ ኣቻን ኡፋይስ ጊዳና።›
LUK 15:11 «ኢሳዴስ ናምኡ ናይቲ ዴቴስ።
LUK 15:12 ኢስታፌካ ካሎ ናዚ ባ ኣዋ፥ ‹ኣቦ! ኔስ ዲዛ ሚሻፌ ታ ጊሻ ታስ ኢማ› ጊዴስ። ኣዋይካ ባስ ዲዛ ሚሻ ባ ናይታስ ጊሺዴስ።
LUK 15:13 «ዳሮ ዎዴ ጋምኦንታ ዲሼ ካሎ ናዚ ባ ሚሻ ኡባ ሺሺ ኤኪዲ ሃሆ ቢታ ቢዴስ፤ ሄንካ ባስ ዲዛ ሚሻ ጎኣይ ባይንዳ ጮ ሜላ ꬋይሲዴስ።
LUK 15:14 ኢዚካ ባስ ዲዛይሳ ኡባ ꬋይሲዳፔ ጉዬ ሄ ቢታን ኢታ ኮሻይ ዴንዲን ዳሮ ዋዬቲዴስ።
LUK 15:15 ሄሳ ጊሻስ ሄ ዴሬን ዲዛ ኣሳፔ ኢሳዴኮ ሺቂዴስ፤ ኢዛዴይካ ባ ጉዱንꬅ ሄማና ማላ ጉዱንꬅ ሄሚዛሶሆ ዬዲዴስ።
LUK 15:16 ናዚካ ጉዱንꬃቲ ሚዛ ሃርቆዛፔ ማናስ ኣሞቲዴስ ሺን ሄሳካ ኢሚዛዴይ ቤቲቤና።
LUK 15:17 «ጊዶ ኣቲን ኢዛ ዎዚናይ ሲሚዳ ዎዴ፥ ‹ታ ኣዋ ኣሽካራታ ኣፑናታፔ ካꬂ ፓላሂዜ ሺን ታኒ ሃይሳን ጋፋን ሃይቃና ማታዲና?
LUK 15:18 ዴንዳዳ ታ ኣዋ ሶ ባዳ ኣቦ! ሳሎን ጾሳ፥ ሳኣን ታ ኔና ቆሃዲስ።›
LUK 15:19 ሃይሳፌ ጉዬ፥ ‹ታኒ ኔ ና ጌቴታዳ ጼይጌታናስ ታስ ቤሴና፤ ኔ ኣሽካራታፔ ኢሳ ማላ ታና ቆዳ› ጊዴስ።
LUK 15:20 ሄሳ ጊሻስ ዴንዲዲ ባ ኣዋኮ ቢዴስ፤ ጊዶ ኣቲን ቡሮ ኢዚ ሃሆራ ዪሺን ኣዋይ ቤዪ ሚሼቲዲኔ ኢዛኮ ዎጺ ቢዲ ኢዲሚ ኦይኪዲ ዬሪዴስ።
LUK 15:21 «ናዚካ፥ ‹ኣቦ! ሳሎን ጾሳ፥ ሳኣን ታ ኔና ቆሃዲስ፤ ሃይሳፌ ጉዬ ታ ኔ ና ጌቴታዳ ጼይጌታናስ ታስ ቤሴና› ጊዴስ።
LUK 15:22 «ጊዶ ኣቲን ኣዋይ ኣሽካራታስ፥ ‹ኤሶቲዲ ኡባፌ ዶሬቲዳ ማይኦ ኤሂዲ ማይዚቴ፤ ኢዛ ቢራꬌን ሚጊዶ፥ ኢዛ ቶሆንካ ጫማ ኣꬂቴ።
LUK 15:23 ሞꬎ ሚርጎ ቦራ ኤሂዲ ሹኪቴ፤ ኣኔ ሚዲ ኡፋዬቶስ።
LUK 15:24 ሃይሲ ታ ናዚ ሃይቂዴስ ሺን ፓጺዴስ፤ ꬋይዴስ ሺን ቤቲዴስ› ጊዴስ፤ ሄሳፌ ጉዬ ኡፋዬቴꬅ ኦይኪዳ።
LUK 15:25 «ሄሲ ሃኒዛ ዎዴ ባይራ ናዚ ጎሻሶን ዴስ፤ ሄፔካ ሲሚዲ ሶ ማቲዳ ዎዴ ዲꬃ ዱሪስ ሲዪዴስ።
LUK 15:26 ኢዚካ ኣሽካራታፔ ኢሳ ጼይጊዲ፥ ‹ሄሲ ኣዜ?› ጊ ኦይቺዴስ።
LUK 15:27 ኣሽካራዚካ፥ ‹ኔ ኢሻይ ዪዴስ፤ ኢዚ ሳሮኒኔ ሎኦን ሲሚዳ ጊሻስ ኔ ኣዋይ ሞꬎ ሚርጎ ቦራ ሹኪዴስ› ጊዴስ።
LUK 15:28 «ባይራ ኢሻዚካ ሃንቄቲዲ ሶ ጌላናስካ ኮዪቤና። ኣዋይካ ካሬ ኬዚዲ ኢዚ ሶ ጌላና ማላ ዎሲዴስ።
LUK 15:29 ጊዶ ኣቲን ኢዚካ ዛሪዲ ኣዋስ፥ ‹ሄኮ ታኒ ሃይሳ ጋካናስ ኔስ ኣይሌ ማላ ኦꬃዲስ፤ ኔ ኣዛዞፔ ኢሲኖካ ፓጪሳቤኬ፤ ጊዶ ኣቲን ታኒ ታ ላጌታራ ኡፋዬታና ማላ ኔ ታስ ኢሲ ዴይሻ ላቃካ ኢማቤካ።
LUK 15:30 ጊዶ ኣቲን ሃይሲ ኔ ናዚ ኔስ ዲዛይሳ ኡባ ላይማቲዛይታራ ዉርሲዲ ዪሺን ሞꬎ ሚርጎ ቦራ ኢዛስ ሹካዳሳ› ጊዴስ።
LUK 15:31 «ኣዋይካ፥ ‹ታ ናዞ ኔ ኡባ ዎዴ ታናራ ዳሳ፤ ታስ ጊዲዳይ ዉሪካ ኔሳ።
LUK 15:32 ሃይሲ ኔ ኢሻይ ሃይቂዴስ ሺን ፓጺዴስ፤ ꬋይዴስ ሺን ቤቲዴስ፤ ሄሳ ጊሻስ ኑኒ ኡፋዬታናስ ቤሴስ› ጊዴስ።»
LUK 16:1 ዬሱሲ ባና ካሊዛይታስ፥ «ኢሲ ዱሬ ኣዴ ዳይሳስ ኢዛ ኬꬃ ኣይሲዛ ኢሲ ኣሲ ዴስ፤ ኢዚ ሄ ዱሬ ኣዴዛ ሚሻ ኦጌይ ባይንዳ ላሊዛይሳ ዎሬይ ዱሬ ኣዴዛ ሃይꬃን ዎꬊዴስ።
LUK 16:2 ዱሬ ኣዴዚ ሄ ኣዴዛ ጼይጊዲ፥ ‹ሃይሶ ታ ሲዪዛይሲ ሄሲ ኣዜ? ሃይሳፌ ዶማዳ ኔ ታ ኬꬃ ኣይሲዛዴ ጊዳናስ ዳንዳዮንታ ጊሻስ ኔ ኣላፌቴꬃን ዲዛ ሚሻ ኦይኪዳ ማዝጋባ ታስ ዛራ› ጊዴስ።
LUK 16:3 «ኬꬃ ኣይሲዛ ኣዴዚ ባ ዎዚናራ፥ ‹ታ ጎዳይ ታና ታ ኣላፌቴꬃፌ ጎዳና ጌስ፤ ጎያ ማናስ ታስ ዎልቃይ ባ፤ ዎሳናስ ዬላታይስ፤ ሄሳ ጊሻስ ኣይ ኦꬆ?› ጊዲ፥
LUK 16:4 ታኒ ኣላፌቴꬃፌ ኬዚኮ ኣሳይ ታና ሞኪ ኤካና ማላ ኦꬃና ኦጌ ታ ኤራይስ።
LUK 16:5 «ሄሳ ጊሻስ ኢዛ ጎዳ ኣጮይ ኢስታ ቦላ ዲዛ ኣሳታ ኢሳ ኢሳ ጼይጊዴስ። ኮይሮ ዪዳይሳ፥ ‹ኔ ቦላ ጎዳ ኣጮይ ኣፑኔ?› ጊዴስ።
LUK 16:6 « ‹ኢሲ ጼቱ ጻሮ ኩሜꬃ ዛይቴይ ታ ቦላ ዴስ› ጊዴስ፤ ኣላፌዚ ዛሪዲ ካሴ ኔ ፋራሚዳ ዋራቃታ ሄይ ኤካ ኡታዳ ኤሌ ኢቻሹ ታሙ ጻሮ ጋዳ ጻፋ ጊዴስ።
LUK 16:7 «ካሊዲ ሃንኮይሳ፥ ‹ኔች፥ ኔ ቦላ ኣፑኒ ዲዜ?› ጊዴስ። ‹ጼቱ ኦጎሮ ጊስቴይ ዴስ› ጊዴስ፤ ኣላፌዚ ዛሪዲ፥ ‹ካሴ ኔ ታልኣሼ ፋራሚዳ ዋራቃታ ሄይ ኦስፑን ታሙ ኦጎሮ ጋዳ ጻፋ› ጊዴስ።
LUK 16:8 «ጎዳዚካ ሾጬቺዛ ኣላፌዚ ኦꬂዳ ጪንጫቴꬃ ጊሻስ ኢዛ ናሺዴስ፤ ሃይሳ ሃ ኣላሜዛ ናይቲ ባና ሚሳቲዛይታራ ዲዛ ጋጎቴꬃን ፖኦ ናይታፔ ኣꬊዳ ጪንጫታ።
LUK 16:9 «ሄሳ ጊሻስ ታኒ ኢንቴና ጊዛይ ሃ ቢታ ሚሻይ ዉሪዳ ዎዴ ሜርና ኬꬃን ኢንቴ ኤኬታና ማላ ሃኢ ኢንቴስ ዲዛ ሚሻራ ኢንቴስ ላጌ ሜꬊቴ ጋይስ።
LUK 16:10 ጉꬃ ሚሻን ኣማኔቲዛዴይ ዳሮ ሚሻንካ ኣማኔታና፤ ጉꬃ ሚሻን ኣማኔቶንታዴይ ዳሮ ሚሻንካ ኣማኔቴና።
LUK 16:11 ሂስቲኮ ኢንቴ ሃ ቢታ ሚሻን ኣማኔቶንታ ኢጺኮ ቱማ ሚሻ ሃዳራ ኦይኪቴ ጊዲ ኦኒ ኢንቴስ ኢማኔ?
LUK 16:12 ኣሳ ሚሻን ኢንቴ ኣማኔቶንታ ኢጺኮ ኢንቴስ ቡዞ ጊዳና ሚሽ ኦኒ ኢማኔ?
LUK 16:13 «ናምኡ ጎዳስ ኢሲቶ ኣዛዜታና ዳንዳይዛዴይ ኦኒካ ዴና፤ ዎይኮ ኢሳ ዶሲዲ ኢሳ ኢጼስ ዎይኮ ኢሳኮ ሺቂዲ ሃንኮይሳ ሌቄስ፤ ጾሳሲኔ ሚሻስ ኢሲፌ ጋꬂ ሃሬታናስ ዳንዳዬኬታ» ጊዴስ።
LUK 16:14 ሚሽ ዳርሲ ሲቂዛ ፋርሳዌቲ ሄሳ ኡባ ሲዪዲ ዬሱሳ ቂꬊዳ።
LUK 16:15 ዬሱሲካ ኢስታስ፥ «ኢንቴ ኢንቴና ኣሳ ኣቻን ጺሊሴታ፤ ጊዶ ኣቲን ጾሲ ኢንቴ ዎዚና ኤሬስ፤ ኣሳ ኣቻን ቦንቼቲዳዴይ ጾሳ ሲንꬃን ቱና» ጊዲ ዮቲዴስ።
LUK 16:16 «ሙሴ ዎጋይኔ ናቤቲ ዮሃኒሲ ያና ጋካናስ ዮቲሼ ጋምኢዳ። ሄሳ ካሊዲ ቃሴ ጾሳ ካዎቴꬃ ሚሺራቾ ቃላይ ሳባኬቲዴስ። ኣሲ ዉሪካ ሄ ጌላናስ ዋꬌቴስ።
LUK 16:17 ጊዶ ኣቲን ሙሴ ዎጋፔ ኢሲ ቄሪና ኩንዳ ኣታናይሳፌ ሳሎይኔ ሳኣይ ኣꬋናይሲ ካዉሼ ጊዳና።
LUK 16:18 «ባ ማቾ ኣንጂ ዬዲዲ ሃራ ማጫ ኤኪዛ ኣሲ ዉሪካ ላይማቴስ፤ ባ ኣዚናፔ ኣንጄታ ቢዳሮ ኤኪዳይሲካ ላይማቴስ።
LUK 16:19 «ቃሴካ ዬሱሲ ኢስታስ፥ ‹ሎኦ ማይኦ ማይኢዲ ጋላስ ጋላስ ሎኦ ዱሳ ኡፋይሳን ዲዛ ኢሲ ዱሬ ኣሲ ዴስ› ጊዴስ።
LUK 16:20 ሄ ኣዴዛ ፔንጌን ኩሜꬃ ቦላይ ማዱንꬅ ጻላ ጊዲዳ ኢሲ ኣላዛሬ ጌቴቲዛ ማንቆ ኣዴ ዲዛይሲ ኢቺ ዴስ።
LUK 16:21 ኢዚካ ሄ ዱሬ ኣዴዛ ኬꬃን ኣሳይ ካꬅ ሚሺን ማዳፌ ጋዴን ዎꬊዛ ሱፓ ማጺ ማናስ ኣሞቴስ፤ ካናቲካ ኢዛ ማዱንꬃ ላጬቴስ።
LUK 16:22 «ሄ ማንቆ ኣዴዚ ሃይቂን ሳሎ ኪታንቻቲ ኣብራሃሜ ኪኦ ኤኪ ቢዳ፤ ቃሴ ዱሬ ኣዴዚካ ሃይቂዲ ሞጌቲዴስ።
LUK 16:23 ኢዚ ሲኦሌን ዋዬቲሼ ꬎቁ ጊዲ ሃሆን ኣብራሃሜ ጼሊዴስ፤ ኣላዛሬካ ባ ኪኦን ኦይኪ ዲሺን ቤዪዴስ።
LUK 16:24 «ዱሬ ኣዴዚ፥ ‹ኣዋ ኣብራሃሜ! ሃይሳን ዋዬቲዛ ታስ ሚሼታርኪ! ጊ ኣላዛሬይ ባ ቢራꬌ ጼራ ኢርጻ ሃꬃን ቦቺዲ ታ ኢንጻርስ ኢርጺሳና ማላ ሃ ዬዳርኪ!› ጊ ዋሲዴስ።
LUK 16:25 «ጊዶ ኣቲን ኣብራሃሜይ፥ ‹ታ ናዞ ኔኒ ቢታ ቦላ ዳሼ ሎኦ ዱስ ዴኢዳይሳ ማላ ኣላዛሬይ ካሴ ዋዬ ቤኢዳይሳ ኔ ቆፓ፤ ጊዶ ኣቲን ሃኢ ኢዚ ኡፋዬቲሺን ኔኒ ዋዬታሳ።
LUK 16:26 ሄሲ ዉሪ ሃኒሺን ሃን ዲዛ ኣሲ ሃፔ ሄ ኢንቴኮ ኣꬎንታ ማላ ቃሴካ ኢንቴኮን ዲዛይ ሃ ኑኮ ኣꬋና ኮይዛዴይ ሃ ኣꬎንታ ማላ ኢንቴሲኔ ኑስ ጊዶን ጊታ ኣፎይ ጊጌቲዴስ› ጊዴስ።
LUK 16:27 «ዱሬ ኣዴዚ ቃሴ፥ ‹ኣቦ! ሄሲ ሄሳ ጊዲኮ ኔኒ ኣላዛሬ ዱጌ ታ ኣዋ ሶ ዬዳና ማላ ታ ኔና ዎሳይስ፤ ታስ ኢቻሹ ኢሻቲ ዴቴስ፤ ሃይቲ ሃ ዋዬሶ ዮንታ ማላ ቢዲ ኢስታስ ሎኤꬂ ዮታና ማላ ኣላዛሬ ዬዳርኪ!› ጊዴስ።
LUK 16:29 «ኣብራሃሜይ ኢዛስ ዛሪዲ፥ ‹ሙሴይኔ ናቤቲ ሄን ኢስታ ኣቻን ዲዛ ጊሻስ ኢስታፌ ሲዬቶ› ጊዴስ።
LUK 16:30 «ኢዚካ ዛሪዲ፥ ‹ኣዋ ኣብራሃሜ፥ ሄሳ ማላ ጊዴና፤ ሃይቂዳ ኣሳፔ ኢሳዴይ ሃይቆፔ ዴንዲ ቢኮ ኢስቲ ጾሳ ማሮቴꬃን ጌላና› ጊዴስ።
LUK 16:31 «ኣብራሃሜይካ ዛሪዲ፥ ‹ሙሴይኔ ናቤቲ ጊዛይሳ ሲዮንታ ኢጺኮ ሃይቂዳ ኣሳፔ ኢሳዴይ ዴንዲዳኮካ ኢስቲ ኣማኔቴና› » ጊዴስ።
LUK 17:1 ዬሱሲ ባና ካሊዛይታ፥ «ኣሳ ꬉጲዲ ናጋራን ዬጊዛ ሚሺ ዮንታ ኣጌና፤ ጊዶ ኣቲን ያና ꬉጴዛስ ጋሶ ጊዲዛዴስ ኣዬ ኣና!
LUK 17:2 ሄ ኣዴዚ ሃ ጉꬃታፔ ኢሳስ ꬉጴ ጊዳናፔ ዎጻ ሹቺ ኢዛ ቆꬌን ቃሼቲን ኣባ ጊዶ ኢዚ ዬጌቲዛኮ ኢዛስ ሎኦ ጊዳና።
LUK 17:3 ሄሳ ጊሻስ ኢንቴ ሁኤስ ናጌቲቴ። ‹ኔ ኢሻይ ኔና ቆሂኮ ሃንቄታ፤ ኢዚ ባ ሞሮ ኤሪዲ ሲሚኮ ማራ።›
LUK 17:4 ኢሲ ጋላሳን ላፑንቶ ዛሪ ዛሪ ቆሂዲ ላፑንቶካ ዛሪ ዛሪ፥ ‹ማራ› ጊኮ ማራ» ጊዴስ።
LUK 17:5 ሃዋሬቲካ፥ «ጎዶ! ኑስ ኣማኖ ጉጃ» ጊዳ።
LUK 17:6 ጎዳይካ፥ «ጋሼ ኣይፌ ላጌ ኣማኖይ ኢንቴስ ዲኮ ሃይሳ፥ ‹ኤꬃ ꬎቃሌታ ባዳ ኣባን ጌላ ቶኬታ› ኢንቴ ጊኮ ኢዚ ኢንቴስ ኣዛዜታና» ጊዴስ።
LUK 17:7 ቃሴካ ዬሱሲ፥ «ኢንቴ ጊዶፌ ኢሲ ኣሳስ ጎሻንቻይ ዎይኮ ዶርስ ሄሚዛ ኣሽካራይ ዲኮ ኢዚ ጎሻሶፔ ሲሚሺን፥ ‹ታስ ማና ካዎ ጊጊሳ፤ ታ ማዳ ኡያና ጋካናስ ጊጼታዳ ታስ ኦꬃ፤ ሄሳፌ ጉዬ ማንዳሳኔ ኡያንዳሳ› ጌስ ኣቲን ሃኢ ቁማ ማና ሃ ኣꬋ ጊዜ?
LUK 17:9 ሂስቲኮ ሄ ኣሽካራ ጎዳይ ኢዚ ኢዛ ኣዛዞ ፖሊዳ ጊሻስ ኢዛ ጋላቲ ኤሪዜ?
LUK 17:10 ሄሳ ጊሻስ ኢንቴኒካ ኢንቴ ኣዛዜቲዳይሳ ዉርሲ ፖሊዳ ዎዴ፥ ‹ኑኒ ጎኣይ ባይንዳ ኦሳንቻታ ኑስ ኦꬃናስ ቤሲዛይሳ ፖሊ ኦꬂዶስ› ጊቴ» ጊዴስ።
LUK 17:11 ሄሳፌ ጉዬ ዬሱሲ ዬሩሳላሜ ቢሼ ሳማሪያራኔ ጋሊላ ኣቻራ ኣꬊዴስ።
LUK 17:12 ኢሲ ጉታ ጌሊዳ ዎዴ ኢንቺራቻ ሃርጊዛ ታሙ ኣሳቲ ኢዛ ዴሚዳ። ኢስቲካ ሃሆን ኤቂዲ
LUK 17:13 ባ ቃላ ꬎቁ ሂስቲዲ፥ «ዬሱሳ! ጎዶ! ኑስ ሚሼታርኪ!» ጊዳ።
LUK 17:14 ኢዚካ ኢስታ ቤኢዲ፥ «ቢቴ! ኢንቴና ቄሴታስ ቤሲቴ» ጊዴስ፤ ኢስቲካ ቡሮ ቢሼ ኦጌ ቦላ ፓጺዳ።
LUK 17:15 ኢስታፌ ኢሶይ ባ ፓጺዳይሳ ቤኢዲ ባ ቃላ ꬎቁ ሂስቲዲ ጾሳ ቦንቺሼ ሲሚዴስ።
LUK 17:16 ኢዛዴይካ ዬሱሳ ቶሆ ቦላ ኩንዲዲ ጋላቲዴስ፤ ኢዚካ ሳማሪያ ቢታ ኣሳ።
LUK 17:17 ዬሱሲካ ኣዴዛ፥ «ፓጺዳይቲ ታሙ ኣስ ዴቴኔ? ሂስቲን ኡዱፉናቲ ኣዋ ቢዶ?
LUK 17:18 ሃይሳ ዱማ ዴሬ ኣዴዛፔ ኣቲን ጾሳ ጋላቲዛይ ባ ጉሴ?» ጊዲ ኦይቺዴስ።
LUK 17:19 ኣዴዛካ ዛሪዲ «ዴንዳዳ ባ! ኔና ኔ ኣማኖይ ፓꬂዴስ» ጊዴስ።
LUK 17:20 «ጾሳ ካዎቴꬂ ኣይዴ ያኔ?» ጊዲ ፋርሳዌቲ ዬሱሳ ኦይቺዳ ዎዴ ዬሱሲ፥ «ጾሳ ካዎቴꬂ ቤቲዛ ማላታታን ዩኩ።
LUK 17:21 ኣሳይ ጾሳ ካዎቴꬂ ሃን ዳዉስ ዎይኮ ሄን ዳዉስ ጋናስ ዳንዳዬቴና፤ ጾሳ ካዎቴꬂ ኢንቴ ጊዶን ዳዉስ» ጊዲ ዛሪዴስ።
LUK 17:22 ባና ካሊዛይታስካ፥ «ኣሳ ና ጋላሳታፔ ኢሲ ጋላሳዮ ቤያናስ ኢንቴ ኣሞታና ዎዴይ ያና፤ ጊዶ ኣቲን ኢንቴ ቤዬኬታ።
LUK 17:23 ኣሳይ ኢንቴስ፥ ‹ሃን ዳዉስ› ዎይኮ፥ ‹ሄን ዳዉስ› ጋና ሺን ኢንቴ ኢስታ ካሊዲ ቦፒቴ።
LUK 17:24 ጋሶይካ ዎልቃንꬂ ዎልቃሚዲ ሃ ጋጻፔ ሄ ጋጻ ጋካናስ ፖኢሲዛ ማላ ኣሳ ናይ ዪዛ ጋላስ ኢዛ ማላ ሃናና።
LUK 17:25 ጊዶ ኣቲን ሃይሲ ዉሪ ሃናናፔ ኮይሮ ኣሳ ናይ ዳሮ ሜቶ ኤካናሲኔ ሃይሳ ሃ ዬሌታን ካꬌታናስ ቤሴስ።
LUK 17:26 «ኖሄ ዎዴ ሃኒዳይሳ ማላ ኣሳ ና ዎዴንካ ሄሳꬆ ሃናና።
LUK 17:27 ኖሄይ ማርካቤን ጌላና ጋላስ ጋካናስ ኣሳይ ሚሺኒኔ ኡዪሺን፥ ኤኪሺኒኔ ጌሊሺን ꬋይሲዛ ሃꬂ ዪዲ ዉርሲካ ꬋይሲዴስ።
LUK 17:28 «ሎጼ ዎዴካ ኢዛ ማላ ሃኒዴስ፤ ኣሳይ ሜሲኔ ኡዬስ፤ ባይዜሲኔ ሻሜስ፤ ቶኪዛዝ ቶኬስ፤ ኬꬂካ ኬጼስ።
LUK 17:29 ጊዶ ኣቲን ሎጼይ ሶዶሜፔ ኬዚዳ ጋላስ ሹቺኔ ሚꬅ ቆሮንታ ዲኔ ታማይ ሳሎፔ ቡኪዲ ኡባ ꬋይሲዴስ።
LUK 17:30 «ኣሳ ናይ ቆንጪዛ ጋላስ ሄሳꬆ ሃናና።
LUK 17:31 ሄ ዎዴ ባ ኬꬃ ቦላ ዲዛዴይ ኦኒካ ኬꬃ ጊዶን ዲዛ ሚሽ ኤካና ጊዲ ዱጌ ዎꬎፎ፤ ሄሳꬆካ ጎሻ ሶን ዲዛ ኣሲ ጉዬ ሶ ሲሞፎ።
LUK 17:32 ሎጼ ማቾ ቆፒቴ።
LUK 17:33 ባ ዴኦ ጋምኢሳና ኮይዛይ ዉሪ ꬋይሳና፤ ባ ሼምፖ ኣꬂ ኢሚዛዴይ ጋምኢሳና።
LUK 17:34 ታ ኢንቴስ ጊዛይ ሄ ዎዴ ኦማርስ ናምኡ ኣሲ ኢሲ ሂጻን ኢቻና፤ ኢሶይ ኤኬታና፤ ኢሶይ ኣታና።
LUK 17:35 ናምኡ ማጫሳቲ ኢሲፌ ጋጪሺን ኢሲኔያ ኤኬታና፤ ሃንኮራ ኣታና።
LUK 17:36 ናምኡ ኣሲ ኢሲፌ ጎሻሶን ዳና፤ ኢሶይ ኤኬታና፤ ኢሶይ ኣታና።
LUK 17:37 «ኢስቲካ ዛሪዲ፥ ‹ጎዶ! ኢስቲ ኣዋ ኤኬታኔ?› ጊዳ፤ ኢዚካ ኣሃይ ዲዛሶን ኣንኮቲ ሺቃና» ጊዴስ።
LUK 18:1 ባና ካሊዛይቲ ኣዛሎንታ ኡባ ዎዴ ዎሳናስ ቤሲዛይሳ ኤሪሳናስ ዬሱሲ ሃ ሌሚሶዛ ኢስታስ ዮቲዴስ።
LUK 18:2 «ኢሲ ካታማን ጾሳስ ያዮንታ ኣሲኔ ቦንቾንታ ኢሲ ዳናይ ዴስ።
LUK 18:3 ሄ ካታማንካ ኢሲ ኣምኤያ ዳዉስ። ኢዛካ፥ ‹ታ ባልጋራራ ታስ ሞቶይ ዲዛ ጊሻስ ፒርዳርኪ!› ጋሼ ኢዛኮ ሲሜሬታዱስ።
LUK 18:4 «ዳናዚካ ዳሮ ዎዴ ጋካናስ ኢዚስ ፒርዲቤና፤ ጊዶ ኣቲን ጉዬፔ ባ ዎዚናን፥ ‹ጾሳስ ያዮንታ ኣሴካ ቦንቾንታ ኣጊኮ፥
LUK 18:5 ሃና ኣምኤያ ታና ዋዪሲዛ ጊሻስ ታ ኢዚስ ፒርዳና› ቆፒዴስ፤ ሄሳ ሂስቶንታ ኣጊኮ ኡባ ዎዴ ሲሜሬታዳ ኢዛ ታና ዳቡርሳና» ጊዴስ።
LUK 18:6 ጎዳይካ፥ «ማካላንቻ ዳናይ ጊዳይሳ ሲዪቴ፤
LUK 18:7 ጾሲ ቃማ፥ ጋላሲኔ ኦማርስ ኢዛኮ ዋሲዛ ዶሬቲዳይታስ ፒርዴኔዬ? ታና ኣይ ሜቲዴ! ጊዲ ባ ማዶ ጋምኢሳንዴ?
LUK 18:8 ታ ኢንቴስ ጋይስ፤ ኢዚ ኢስታስ ኤሌ ፒርዳና፤ ጊዶ ኣቲን ኣሳ ናይ ዪዛ ዎዴ ቢታ ቦላ ኣማኖ ዴማንዴሻ?» ጊዴስ።
LUK 18:9 ባና ጺሎ ኣሳ ማላ ቆዲዲ ጬቄቲዛይታሲኔ ሃራታ ሌቆ ኣይፌን ጼሊዛይታስ ሌሚሶራ፥
LUK 18:10 «ናምኡ ኣሳቲ ዎሳናስ ጾሳ ኬꬄ ቢዳ፤ ኢሶይ ፋርሳዌ፥ ሂንኮይሲ ቃራጻ ሺሺዛዴ።
LUK 18:11 ፋርሳዌዚካ ኤቂዲ ባ ጊሻስ፥ ‹ጾሶ! ታኒ ሃራ ኣሳ ማላ ቦንቂዛዴ፥ ማካሊዛዴ፥ ላይማቲዛዴ ሃራፔካ ሃይሳ ቃራጻ ሺሺዛዴ ማላ ጊዶንታ ኣጊዳ ጊሻስ ታ ኔና ጋላታይስ።
LUK 18:12 ሳሚንታን ናምኣ ጾማይስ፤ ታስ ዲዛ ታማፌ ኢሳ ኢማይስ› ጊዲ ዎሲዴስ።
LUK 18:13 «ጊዶ ኣቲን ቃራጻ ሺሺዛ ኣዴዚ ሃሆን ኤቂዲ ፑዴ ሳሎ ꬎቁ ጊ ጼላናስ ኮዪቤና፤ ጊዶ ኣቲን ባ ቲራ ኢጪሼ፥ ‹ጾሶ! ታና ናጋራንቻዛ ማራርኪ!› ጊዴስ።
LUK 18:14 «ታ ኢንቴስ ዮታይስ፤ ጾሳ ሲንꬃን ፋርሳዌዚ ጺሎቴꬅ ዴሚቤና፤ ሃይሲ ቃራጺዛይሲ ጊዲኮ ጺሊዲ ባሶ ሲሚዴስ፤ ባና ꬎቂሲዛይ ዉሪ ዚቂ ጋና፤ ባና ዚቂሲዛይ ጊዲኮ ꬎቁ ጋና» ጊዴስ።
LUK 18:15 ዬሱሲ ቦሼሬꬃና ማላ ኣሳይ ጉꬃ ናይታ ኢዛኮ ኤሂዴስ። ኢዛ ካሊዛይቲካ ሄሳ ቤኢዲ ሃንቄቲዳ።
LUK 18:16 ጊዶ ኣቲን ዬሱሲ ጉꬃ ናይታ ባኮ ጼይጊዲ፥ «ጉꬃ ናይቲ ታኮ ያናይሳ ዲጎፍቴ፤ ጾሳ ካዎቴꬂ ሃይታንታ ማላሳ።
LUK 18:17 ታ ኢንቴስ ቱሙ ጋይስ፤ ጾሳ ካዎቴꬅ ጉꬃ ና ማላ ኤኮንታይ ዉሪ ኢዚን ጌሌና» ጊዴስ።
LUK 18:18 ኣይሁዳታ ሃላቃታፔ ኢሶይ፥ «ኪያ ኣስታማሬ! ሜርና ዴኦ ላታናስ ታ ኣይ ኦꬆ?» ጊ ኦይቺዴስ።
LUK 18:19 ዬሱሲካ፥ «ኣዛስ ታና ኪያ ጋይ? ኢሲ ጾሳፌ ኣቲን ኪያይ ሃራይ ዴና።
LUK 18:20 ‹ላይማቶፓ፤ ዎꬎፓ፤ ካይሶቶፓ፤ ዎርዶ ማርካቶፋ፤ ኔ ኣዋ ቦንቻ› ጊዛ ኣዛዞታ ኔ ኤራሳ» ጊ ዛሪዴስ።
LUK 18:21 ኣዴዚካ፥ «ሃይታ ጊዲኮ ጉꬅ ናቴቴꬃፌ ዶማዳ ናጋዲስ» ጊዴስ።
LUK 18:22 ዬሱሲካ ሄሳ ሲዪዲ፥ «ሂስቲኮ ኔስ ኢሲ ሚሺ ፓጬስ፤ ኔስ ዲዛዝ ዉርሳ ባይዛዳ ማንቆታስ ኢማ፤ ሳሎ ማዝጋባን ዴማንዳሳ፤ ኢዛፔ ጉዬ ያዳ ታና ካላ» ጊዴስ።
LUK 18:23 ጊዶ ኣቲን ኣዴዚ ሄሳ ሲዪዳ ዎዴ ዳሮ ሃሮይ ኢዛስ ዲዛ ጊሻስ ኬሂ ሚሼቲዴስ።
LUK 18:24 ዬሱሲካ ኣዴዛ ጼሊዲ፥ «ዳሮ ሚሺ ዲዛ ኣሳቲ ጾሳ ካዎቴꬅ ጌላናይሲ ኣይ ማላ ሜቶ!
LUK 18:25 ዱሬይ ጾሳ ካዎቴꬅ ጌላናይሳፌ ጋሜላይ ናርፔ ሉኮራ ኣꬋናይሲ ማታና» ጊዴስ።
LUK 18:26 ሄሳ ሲዪዳ ኣሳይ፥ «ሂስቲን ኦኒ ኣታና ዳንዳይዜ?» ጊዴስ።
LUK 18:27 ዬሱሲካ፥ «ኣሳ ኣቻን ዳንዳዬቶንታይ ጾሳ ኣቻን ዳንዳዬቴስ» ጊዴስ።
LUK 18:28 ጴጽሮሲካ፥ «ሄኮ ኑኒ ኑስ ዲዛዝ ኡባ ኣጊዲ ኔና ካሊዶስ» ጊዴስ።
LUK 18:29 ዬሱሲካ ኢስታስ፥ «ታ ኢንቴስ ቱሙ ጋይስ፤ ጾሳ ካዎቴꬃ ጊሻስ ጊዲ ባ ኬꬄ፥ ባ ማቾ፥ ባ ኢሻንታ ዎይኮ ባና ዬሊዳይታ ዎይኮ ባ ናይታ ኣጊዳዴይ፥
LUK 18:30 ሃኢ ዎዴ ዳሮ ዳኮ ኩሼ ኤኮንታይኔ ዪዛ ዎዴ ቃሴ ሜርና ዴኦ ኤኮንታይ ኦኒካ ዴና» ጊዴስ።
LUK 18:31 ዬሱሲካ ባና ካሊዛ ታማኔ ናምኣታ ዱማ ኤፊዲ፥ «ሃኢ ኑኒ ዬሩሳላሜ ኬዛና ጎስ፤ ናቤቲ ኣሳ ና ጊሻስ ጻፊዳይሲ ዉሪ ፖሌታና።
LUK 18:32 ኣይዛቤታስ ኣꬂ ኢማና፤ ኢስቲካ ኢዛ ቂꬊ ካኣናኔ ዋዪሳና፤ ኢዛ ቦላ ጩታና።
LUK 18:33 ጋራፋና፤ ሄሳፌካ ዛሪዲ ዎꬋና፤ ኢዚካ ሄꬓንꬆ ጋላስ ሃይቆፔ ዴንዳና» ጊዴስ።
LUK 18:34 ኢዛ ካሊዛይቲ ጊዲኮ ሄሳ ኡባፌ ኢሲኖካ ኤሪቤቴና፤ ኢዚ ጊዛይሲካ ኢስታስ ጌሊቤና። ኢዚ ኣዛ ጊሻስ ሃሳይዳኮ ኤሪቤቴና።
LUK 18:35 ዬሱሲ ኢያርኮ ጌቴቲዛሶ ማቲዳ ዎዴ ኢሲ ቆቄ ኣዴይ ኦጌ ዶናን ኡቲዲ ዎሴስ።
LUK 18:36 ሄ ቆቄ ኣዴዚካ ዳሮ ኣሳይ ኦጌራ ኣꬊዛይሳ ሲዪዲ፥ «ሄሲ ኣዜ?» ጊ ኦይቺዴስ።
LUK 18:37 ኢስቲካ ኢዛስ፥ «ናዚሬቴ ዬሱሲ ሃይሳራ ኣꬌስ» ጊ ዮቲዳ።
LUK 18:38 ኢዚካ፥ «ዳዊቴ ና ዬሱሳ ታስ ቃꬌታ!» ጊ ዋሲዴስ።
LUK 18:39 ዬሱሳፔ ሲንꬃቲ ቢዛይቲ፥ «ጮኡ ጋ!» ጊዲ ሃንቄቲዳ። ጊዶ ኣቲን ኢዚ፥ «ዳዊቴ ናዉ! ታስ ቃꬌታ!» ጊዲ ዳርሲ ዋሲዴስ።
LUK 18:40 ዬሱሲካ ኤቂዲ ኣዴዛ ኢዛኮ ኤሃና ማላ ኣዛዚዴስ፤ ኢዚካ ኢዛኮ ሺቂዳ ማላ፥
LUK 18:41 «ታ ኔስ ኣይ ኦꬃና ማላ ኮያይ?» ጊዲ ኦይቺዴስ። ቆቄዚካ፥ «ጎዶ ጼላናስ ኮያይስ» ጊዴስ።
LUK 18:42 ዬሱሲካ፥ «ኔና ኔ ኣማኖይ ፓꬂዴስ ጼላ» ጊዴስ።
LUK 18:43 ኣዴዚ ሄራካ ጼሊዴስ፤ ጾሳካ ቦንቺሼ ዬሱሳ ካሊዴስ፤ ሄሳ ቤኢዳ ዴሬይ ዉሪ ጾሳ ጋላቲዴስ።
LUK 19:1 ዬሱሲ ኢያርኮ ጌቴቲዛሶራ ኣꬊ ቢሺን፥
LUK 19:2 ዜኪዮሳ ጌቴቲዛ ኢሲ ኣሲ ሄን ዬሱሲ ቢዛ ኦጌ ቦላ ዴስ። ኢዚካ ቃራጻ ቃንጺሲዛይታስ ሃላቃኔ ኬሂ ዱሬ ኣሳ።
LUK 19:3 ኢዚ ዬሱሳ ጌቴቲዛይሲ ኣዋይሳኮ ቤያናስ ኮዪሺን ቃንꬃ ኣሳ ጊዲዳ ጊሻሲኔ ዳሮ ዴሬይ ዬሱሳ ካሊዛ ጊሻስ ዬሱሳ ቤያናስ ዳንዳይቤና።
LUK 19:4 ዬሱሲ ሄ ኦጌራ ኣꬊሺን ሲንꬄ ኣꬊዲ ኦጌ ቦላ ዲዛ ኢሲ ኤꬃ ሚꬃ ቦላ ኬዚዴስ።
LUK 19:5 ዬሱሲ ኤꬃ ጋርስ ጋኪዲ ꬎቁ ሂስቲ ጼሊዲ፥ «ዜኪዮሳ! ሃች ታ ኔ ኬꬃን ፔኣናስ ቤሴስ፤ ኤሌላ ዎꬋ» ጊዴስ።
LUK 19:6 ኢዚካ ኤሌሊ ዎꬊዲ ኡፋይሳን ሞኪ ኤኪዴስ።
LUK 19:7 ሄ ዎዴ ሄን ኢዛራ ዲዛ ኣሳይ ሄሳ ቤኢዲ፥ «ናጋራንቻ ኬꬃን ኢማቶ ማና ጌስ» ጊዲ ዉሪካ ባ ጊዶን ዙዙሜቲዳ።
LUK 19:8 ጊዶ ኣቲን ዜኪዮሲ ኤቂዲ፥ «ጎዶ! ታኒ ታስ ዲዛ ሚሼ ኡባፌ ባጋ ሻካዳ ማንቆታስ ኢማና፤ ታኒ ኦናፔካ ዎርዶራ ቦንቃ ኤኪዳዚ ዲኮ ኦይዱ ኩሼ ጉጃዳ ኢዛዴስ ኢማና» ጊዴስ።
LUK 19:9 ዬሱሲካ፥ «ሃ ኣዴዚ ኣብራሃሜ ና ጊዲዳ ጊሻስ ሃች ሃ ኬꬃስ ፓጻቴꬂ ዪዴስ» ጊዴስ።
LUK 19:10 ሃይሳስ ጋሶይካ ኣሳ ናይ ሃ ዪዳይ ꬋይዳይሳ ኮያናሲኔ ኣሻናሳ።
LUK 19:11 ኣሳይ ሃይሳ ሲዪሺን ሌሚሶራ ሃሳያ ኦይኪዴስ፤ ጋሶይካ ኢዚ ዬሩሳላሜ ጋካናስ ማቲዳ ጊሻሲኔ ኣሳታስ ጾሳ ካዎቴꬂ ቆንጫና ሃኒዛ ሚሳቲዳ ጊሻሳ።
LUK 19:12 ሄሳ ጊሻስ፥ «ኢሲ ካዎይ ባ ካዎቴꬃ ሹሜቴꬅ ኤኪ ያናስ ሃሆ ቢታ ቢዴስ።
LUK 19:13 ባ ኣሽካራታ ጊዶፌ ታማታ ጼይጊዲ ታሙ ሚናኔ ኢስታስ ኢሚዲ፥ ‹ታ ሲማዳ ያና ጋካናስ ሃይሳ ሚሻን ዛልኢቴ› ጊዴስ።
LUK 19:14 «ሄ ዴሬ ኣሳቲ ቃሴ ኢዛ ኢጺዳ ጊሻስ፥ ‹ሃይሲ ኣዴዚ ኑ ቦላ ካዎታና ማላ ኮዮኮ› ጊዲ ኣስ ኢዛ ጌዶራ ኪታ ኣꬂ ዬዲዳ።
LUK 19:15 «ጊዶ ኣቲን ሃ ካዎ ናዚ ካዎ ጊዲዲ ጉዬ ባ ዴሬ ሲሚዴስ። ካሴ ቢሼ ታሙ ሚናኔ ኢሚዳ ታሙ ኣሽካራቲ ኢዚ ኢሚዳ ቢራን ዛልኢዲ ኣይ ኬና ቲርፊሲዳኮ ኤራናስ ኢስታ ጼይጊዴስ።
LUK 19:16 «ኢስታፌ ኮይሮዚ ሺቂዲ፥ ‹ጎዶ! ኔ ታስ ኢሚዳ ታሙ ሚናኔይ ሃራ ታሙ ዬሊዴስ› ጊዴስ።
LUK 19:17 «ጎዳዚካ ኢዛ፥ ‹ኔ ኣማኔቲዳ ኣሽካራ፤ ሎኦ ኦꬃዳሳ። ጉꬃ ሚሻን ኔ ኣማኔቲዳ ጊሻስ ታሙ ካታማታ ኔ ሃራና ማላ ኔስ ኢማዲስ› ጊዴስ።
LUK 19:18 «ናምኣንꬆዚካ ኢዛኮ ሺቂዲ፥ ‹ጎዶ! ኔ ታስ ኢሚዳ ሚናኔፔ ሃራ ኢቻሹ ሚናኔይ ዎꬊዴስ› ጊዴስ።
LUK 19:19 «ኢዛ ጎዳዚ ኢዛስ ዛሪዲ፥ ‹ኔኒ ኣይሳና ማላ ታሙ ካታማቲ ኔስ ኢሜቲዳ› ጊዴስ።
LUK 19:20 «ቃሴካ ሃንኮ ኦሳንቻይ ሺቂዲ፥ ‹ጎዶ! ኔኒ ዎꬆንታሶፔ ኤኪዛዴ፤ ዜሮንታሶፔ ማጺዛዴኔ ሜንጼ ኢታ ኣስ ጊዲዳ ጊሻስ ታ ኔስ ባባዳ ጫርቃን ጻጻ ዎꬂዳ ኔ ሚናኔዮ ሄይ ኤካ› ጊዴስ።
LUK 19:22 «ኢዛ ጎዳዚ ዛሪዲ ኢዛስ፥ ‹ሃይሶ ኢታ ኦሳንቻዞ! ታ ኔ ቃላን ኔና ዛራ ፒርዳይስ። ታኒ ዎꬆንታሶፔ ኤኪዛዴኔ ዜሮንታሶፔ ማጺዛ ሜንጼ ኢታ ኣስ ጊዲዳይሳ ኤራሳሺን ታኒ ታ ሚሻ ዬሎራ ኤካና ማላ ሄ ሚሻን ኦꬃና ኣሳታስ ኣዛስ ኢማቤኪ?› ጊዴስ።
LUK 19:24 «ኢዛ ጎዳዚካ ሄን ኤቂዳ ኣሳታ፥ ‹ኢዛ ኩሼፔ ሚናኔዛ ኤኪዲኔ ታሙ ሚናኔይ ዲዛይሳስ ኢሚቴ› ጊዴስ።
LUK 19:25 «ኢስቲካ ዛሪዲ፥ ‹ጎዶ! ኢዛስ ታሙ ሚናኔይ ዴስኮ› ጊዳ።
LUK 19:26 «ኢዚካ፥ ‹ዲዛዴስ ኡባስ ሃራይ ጉጄታና፤ ባይንዳዴስ ካሴ ዲዛይሲ ኢዛፔ ኤኬቲቻና። ጊዶ ኣቲን ታኒ ኢስታ ቦላ ካዎቶንታ ማላ ኮዪዳይታ ሃይታ ታ ሞርኬታ ታኮ ሃ ኤሂዲ ታ ሲንꬃን ሹኪቴ› ጊ ዛሪዴስ» ጊዴስ።
LUK 19:28 ሄሳ ሃሳዪ ሲሚዲ ዬሱሲ ዬሩሳላሜ ኬዛናስ ኢስታፌ ሲንꬃቲ ቢዴስ።
LUK 19:29 ዳብራዛይቴ ጌቴቲዛ ዙማ ቦላ ዲዛ ቤቴፋጌኔ ቢታኒያ ጌቴቲዛ ካታማታኮ ማቲዳ ዎዴ ባና ካሊዛይታፔ ናምኣታ፥ «ሄን ኢንቴ ሲንꬃን ዲዛ ቄሪ ካታማዮ ቢቴ፤ ቢዲ ካታማዮ ኢንቴ ጌሊሺን ኦኒካ ቶጊ ኤሮንታ ኢሲ ቃሼቲ ዲዛ ሃሬ ጉቴ ኢንቴ ዴማና፤ ኢዛ ቢርሺዲ ሃ ታስ ኤኪ ዪቴ፤ ኢንቴና ኦኒካ፥ ‹ኣዛስ ቢርሼቲ?› ጊዲ ኦይቺኮ፥ ‹ጎዳስ ኮሼስ ጊቴ› » ጊ ኪቲዴስ።
LUK 19:32 ኪቴቲዳይቲካ ቢዲ ኢዚ ኢስታስ ዮቲዳ ማላ ሃሬ ጉቴዛ ዴሚዳ።
LUK 19:33 ኢስቲ ጉቴዛ ቢርሺን ጉቴዛ ጎዳቲ ቤኢዲ፥ «ኣዛስ ቢርሼቲ?» ጊዲ ኦይቺዳ።
LUK 19:34 ኢስቲካ፥ «ጎዳስ ኮሼስ» ጊዳ።
LUK 19:35 ሃሬ ጉቴዛ ዬሱሳኮ ኤሂዲ ባ ማይኦ ኡባ ጉቴዛ ቦላ ዬጊዲ ሃሬ ጉቴዛ ቦላ ዬሱሳ ቶጊሲዳ።
LUK 19:36 ኣሳይ ዉሪካ ባ ኣፋላ ዬሱሲ ቢዛ ኦጌ ቦላ ሚጪዴስ።
LUK 19:37 ዳብራዛይቴ ዙማ ቦላራ ዱጌ ዎꬂዛ ኦጌዛኮ ማቲዳ ዎዴ ቆዳይ ባይንዳ ዴሬይ ባ ቤኢዳ ማላታ ጊሻስ ዉሪካ ኡፋይሳራ ባ ቃላ ꬎቁ ሂስቲዲ፥ «ጎዳ ሱንꬃን ዪዛ ካዎይ ኣንጄቲዳይሳ፤ ሳሮይ ሳሎን፥ ቦንቾይ ሳሎፔ ቦላ ሳሎን ጊዶ» ጊዴስ።
LUK 19:39 ዴራፔ ኢሲ ኢሲ ፋርሳዌቲ ዬሱሳ፥ «ኣስታማሬ! ሃ ኔና ካሊዛ ኣሳይ ጊዛይሳ ጎንታ ማላ ሃንቃ» ጊዴስ።
LUK 19:40 ኢዚካ ኢስታስ ዛሪዲ፥ «ሃይቲ ጮኡ ጊዳኮ ሹቻቲካ ዋሳና» ጊዴስ።
LUK 19:41 ዬሱሲ ዬሩሳላሜ ማቲሼ ካታማዮ ቤኢዲ ኢዚስ ዬኪዴስ። «ኔስ ሳሮ ጊዲዛዝ ሃች ኔ ኤሪዳኮ ኣዜ ዲዛይ? ሃኢ ኔ ኣይፌፔ ቆቴቲዳ ጊሻስ ኔ ሞርኬቲ ሄራ ሃራ ኔና ጊዶꬂዲ ኡንኤꬃና ዎዴይ ያና።
LUK 19:44 ኔናኔ ኔ ጊቤ ጊዶን ኔናራ ዲዛ ኔ ናይታ ኡባ ቢታ ኬሳና፤ ሹቻካ ሹቻ ቦላፌ ላሎንታ ኣጌቴና። ሄሲ ዉሪካ ጾሲ ኔና ኮዪሺን ኔኒ ኤሮንታ ኣጊዳ ጊሻሳ» ጊዴስ።
LUK 19:45 ሄሳፌ ካሊዲ ዬሱሲ ጾሳ ኬꬄ ጌሊዲ ጾሳ ኬꬃ ጊዶን ዛልኢዛይታ ኬሲዴስ።
LUK 19:46 ቃሴካ፥ «ታ ኬꬃይ ዎሳ ኬꬅ ጊዳና ጌቴቲ ጻፌቲዴስ፤ ኢንቴ ጊዲኮ ፓንጋይ ዲዛ ጎንጎሎ ሂስቲዴታ» ጊዴስ።
LUK 19:47 ዎንቲን ዎንቲን ጾሳ ኬꬃን ኢዚ ታማርሲሺን ጻፌቲኔ ዴሬ ሃላቃቲ ኢዛ ዎꬋናስ ኮዪዳ።
LUK 19:48 ጊዶ ኣቲን ዴሬይ ዉሪካ ኢዛራ ኦይኬቲዲ ኢዚ ታማርሲዛይሳ ካሊዛ ጊሻስ ኦꬃናዚ ኢስታስ ኪርቂ ጊዴስ።
LUK 20:1 ኢሲ ጋላስ ዬሱሲ ኣሳ ጾሳ ኬꬃን ታማርሲሺኒኔ ሚሺራቾ ቃላ ሳባኪሺን ቄሴ ሃላቃቲ፥ ጻፌቲኔ ዴሬ ጪማቲ ሺቄቲዲ ኢዛኮ ዪዳ።
LUK 20:2 «ሃይሳ ኔ ኦꬂዛይ ኦና ሼኔኔ? ኔስ ሼኔ ኢሚዳይ ኦኔ?» ጊዲ ኢዛ ኦይቺዳ።
LUK 20:3 ኢዚካ ኢስታስ፥ «ታኒካ ኢንቴና ኢሲ ኦይሾ ኦይቻይስ፤ ኣኔ ታስ ዛሪቴ።
LUK 20:4 ዮሃኒሳ ጺንቃታይ ሳሎፔዬ? ኣሳፔ?» ጊዴስ።
LUK 20:5 ኢስቲካ ባ ጊዶን ኢሶይ ኢሳራ፥ «ኑ፥ ‹ዮሃኒሳ ጺንቃታይ ሳሎፔ› ጊኮ ኢዚ ኑና፥ ‹ሂስቲን ኣዛስ ኣማኒቤኬቲ?› ጋና።
LUK 20:6 ‹ኣሳፔ› ጊኮ ኣሳይ ዉሪ ዮሃኒሲ ናቤ ጊዲዳይሳ ኣማኒዛ ጊሻስ ኑና ሹቻራ ጫዳና» ጊ ዞሬቲዳ።
LUK 20:7 ሄሳ ጊሻስ፥ «ኢዚ ኣዋፔኮ ኑ ኤሮኮ» ጊዲ ዛሪዳ።
LUK 20:8 ዬሱሲካ ሂስቲኮ፥ «ታኒካ ኣዛ ዎልቃን ኦꬂዛኮ ኢንቴስ ዮቲኬ» ጊዴስ።
LUK 20:9 ቃሴካ ዬሱሲ ኣሳስ ሌሚሶራ፥ «ኢሳዴይ ዎይኔ ሚꬅ ቶኪዴስ፤ ጋዴ ጎዪዛይታስ ኪራ ኢሚዲ ሃራ ዴሬ ቢዲ ሄን ጋምኢዴስ።
LUK 20:10 ካጺዛ ቦኔ ዎዴ ካꬃፌ ኤኪ ያና ማላ ባ ኣሽካራታፔ ኢሳዴ ጋዴዛ ጎዪዳ ኣሳታኮ ዬዲን ጋዳ ጎዪዛይቲ ኪቴቲ ቢዳይሳ ቆጺዲ ሜላ ኩሼ ዬዲዳ።
LUK 20:11 ካሌꬂዲካ ሃራ ኣሽካራ ዬዲን ጎሻንቻቲ ሃኢካ ኦይኪ ቆጺዲኔ ካዉሺዲ ሜላ ዬዲዳ።
LUK 20:12 ሃኢካ ካሌꬂዲ ሄꬓንꬆ ኣሽካራ ዬዲን ጎሻንቻቲ ኢዛካ ቆጼሬꬂ ማዱንꬂዲ ካሬ ኬሲ ዬጊዳ።
LUK 20:13 «ዎይኔ ሚꬃ ጎዳይ፥ ‹ሃኢ ኣይ ኦꬆ? ኦኔ ኤሪዛይ ታ ኬሃ ሲቂዛ ታ ናዛ ዬዲዳኮ ኢዛ ቦንቻንዴቶሻ?› ጊዴስ።
LUK 20:14 «ጊዶ ኣቲን ቢታ ጎዪዛይቲ ናዛ ቤኢዳ ማላ ባ ጊዶን፥ ‹ሃይሲ ኢዛ ላታና ናዛ ጊዴኔ? ሃ ዪቴ፤ ኢዛ ዎꬊዲ ቢታ ላቶስ› ጊዲ ዞሬቲዳ።
LUK 20:15 ዎይኔ ሚꬃ ቶኪዳሶፔ ካሬ ኬሲዲ ናዛ ዎꬊዳ። ሂስቲኮ ሃኢ ዎይኔ ሚꬃ ጎዳይ ሃ ኣሳታ ዎስታኔ?
LUK 20:16 ዪዲኔ ሄ ጎሻንቻታ ꬋይሳና፤ ዎይኔ ሚꬅ ቶኪዛሶሆዛ ሃራታስ ኢማና» ጊዴስ፤ ዴሬይካ ሄሳ ኢዚ ጊዳይሳ ሲዪዲ፥ «ሃይሳ ማላይ ሃኖፖ» ጊዴስ።
LUK 20:17 ዬሱሲካ፥ «ኢስታኮ ጼሊዲ፥ ‹ሂስቲን ሹቻን ኬꬄ ኬጺዛ ኣሳቲ ሌቂ ኣጊዳ ሹቻይ ኬꬃስ ዋና ሁኤ ጊዳና ጌቴቲዲ ጻፌቲዳ ሌሚሶዛስ ቢርሼꬃይ ኣዜ?›
LUK 20:18 ሃ ሹቻ ቦላ ኩንዲዳይ ዉሪ ሹቻን ቆጼታና፤ ሹቻይካ ኢዛ ቦላ ዎꬊዳዴይ ዉሪካ ሊቃና» ጊዴስ።
LUK 20:19 ጻፌቲኔ ቄሴታ ሃላቃቲ ሄሲ ሌሚሶዚ ኢስታ ቦላ ሃሳዬቲዳይሳ ኤሪዲ ሄራካ ኢዛ ኦይካናስ ኮዪዳ ሺን ዴሬዛስ ባቢዳ።
LUK 20:20 ዬሱሳ ዎልቃራ ሃሪዛይታስ ኣꬂ ኢማናስ ኢዛ ዶናፔ ኬዚዛ ባላ ቃላ ዴሚዲ ኦይካናስ ካሊ ካሊ ናጊዳኔ ጺሎ ኣሳ ሚሳቲዲ ኢዛ ካሊ ኢዛ ዶናፔ ዮኦ ናጊዛ ኣሳታ ኢዛኮ ዬዲዳ።
LUK 20:21 ኢዛ ዶናፔ ዮኦ ኮይዛ ኣሳቲ ዬሱሳ፥ «ኣስታማሬ! ኔኒ ቱማ ሃሳይዛይሳኔ ቱማ ታማርሲዛይሳ፤ ቃሴካ ጾሳ ኦጌ ኔ ቱሙ ታማርሲዛይሳኔ ኦናካ ሻካ ማዶንታይሳ ኑ ኤሮስ።
LUK 20:22 ጊዶ ኣቲን ቄሳሬስ ጊራ ጊራናስ ቤሲዜ? ቤሴኔ?» ጊዲ ኦይቺዳ።
LUK 20:23 ኢዚካ ኢስታስ ዲዛ ጌኔ ቆፋ ኤሪዲ፥
LUK 20:24 «ኣኔ ኢሲ ዲናሬ ታና ቤሲቴ፥ ሃይሲ ኢዛ ቦላ ዲዛ ሜꬋዚኔ ጻፌቶይሲ ኦናይሴ?» ጊዴስ። ኢስቲካ፥ «ቄሳሬይሳ» ጊዳ።
LUK 20:25 ኢዚካ ዛሪዲ ኢስታስ፥ «ቄሳሬይሳ ቄሳሬስ፥ ጾሳይሳ ጾሳስ ኢሚቴ» ጊዴስ።
LUK 20:26 ሄሳ ጊሻስ ኢዚ ሃሳይዳ ቃላፔ ኤኪዲ ኣሳ ሲንꬃን ኢዛ ቃጻናስ ዳንዳይቤቴና፤ ኢዚ ኢሚዳ ቃላን ማላሌቲዲ ጮኡ ጊዳ።
LUK 20:27 ሃይቂዳይታ ዴንꬂ ባ ጊዛ ሳዱቃዌታፔ ኢሲ ኢሲ ኣሳቲ ዬሱሳኮ ዪዲ ኦይሻ ሺሺዳ።
LUK 20:28 «ጎዶ! ‹ኢሳዴይ ማቾ ኤኪዲ ና ዬሎንታ ሃይቂኮ ሄ ሃይቂዳይሳ ማቼዮ ኢዛ ኢሻይ ኤኪዲ ባ ኢሻ ላታና ና ኢዛስ ዬሎ› ጊዲ ሙሴይ ኑስ ጻፊዴስ።
LUK 20:29 ሂስቲን ላፑን ኢሻቲ ዴቴስ ሺን ኢስታፌ ባይራዚ ማቺዲ ና ዬሎንታ ሃይቂዴስ።
LUK 20:30 ኢዛ ካሎዚካ ኢዛꬆ ሃይቂዴስ፤
LUK 20:31 ሄꬓንꬆዚካ ኢዞ ኤኪዴስ፤ ላፑናቲ ዉሪካ ሄ ማጫሳዮ ኤኪዲ ዉሪካ ና ዬሎንታ ሃይቂዳ።
LUK 20:32 ዉርሴꬃን ማጫሳያ ሃይቃዱስ።
LUK 20:33 ላፑናቲካ ሃ ማጫሳዮ ኤኪዳሺን ሃ ማጫሳያ ዉርሴꬃን ሃይቂዳይቲ ዴንዲዛ ዎዴ ኢዛ ኣዋይሳ ማቾ ጊዳኔ?»
LUK 20:34 ዬሱሲ ኢስታስ፥ «ሃ ኣላሜ ናይቲ ጌሌቴሲኔ ኤኬቴስ።
LUK 20:35 ቡሮ ያና ኣላሜን ሃይቂዳይታ ዴንꬃ ዴማናስ ቤሲዛይቲ ጊዲኮ ጌሌቴናኔ ኤኬቴና።
LUK 20:36 ኢስቲ ኪታንቻታ ማላ ጊዳና ጊሻስ ሄሳፌ ጉዬ ሃይቄቴናኔ ሃይቆፔ ዴንꬃ ናይታ ጊዲዳ ጊሻስ ኢስቲ ጾሳ ናይታ።
LUK 20:37 ሙሴይ ቄሪ ዎራ ጊሻስ ጻፌቲዳ ታሪኬዛን ጎዳ፥ ‹ኣብራሃሜ ጾሳ፥ ዪሳቃ ጾሳ ያቆቤ ጾሳ› ጉሳን ሃይቂዳይቲ ዴንዳናይሳ ቤሴስ።
LUK 20:38 ዉሪካ ኢዛስ ዴኦይ ዲዛ ጊሻስ ኢዚ ፓጻታ ጾሳፌ ኣቲን ሃይቄꬃታ ጾስ ጊዴና» ጊዴስ።
LUK 20:39 ኢሲ ኢሲ ጻፌቲ፥ «ኣስታማሬ! ሎኦ ጋዳሳ» ጊዳ።
LUK 20:40 ሄሳፌ ጉዬ ኣይ ኣሲካ ኢዛ ኦይቻናስ ጻሊቤና።
LUK 20:41 ሄሳፌ ጉዬ ዬሱሲ፥ «ኣሳይ ማሲሄ ዋኒዲ ኢዚ ዳዊቴ ና ጊዜ?
LUK 20:42 ጋሶይካ ዳዊቲ ባ ጻፊዳ ዬꬃ ማጻፋታን፥ ‹ታ ኔ ሞርኬታ ኔ ቶሆ ጋርስ ኣꬃና ጋካናስ ጎዳይ ታ ጎዳ፥ ኔ ታ ኡሻቻን ኡታ› ዋኒዲ ጊዴ?
LUK 20:44 ሂስቲኮ ዳዊቲ ኢዛ፥ ‹ጎዳ› ጊ ጼይጊሼ ዋኒ ኢዛስ ና ጊዳኔ?» ጊዴስ።
LUK 20:45 ዴሬይ ዉሪ ሲዪሺን ባና ካሊዛይታስ፥
LUK 20:46 «ጎሼቲዛ ኣዱሳ ቃሚሳ ማይኢዲ ዩሼ ዶሲዛይታፔ ጊያይ ዲዛሶን ሳሮኬቴꬅ ኮይዛይታፔኔ ኣይሁዳ ዎሳ ኬꬃን ꬎቃ ኦይዴኔ ዲጊሳሶን ቦንቾሶ ኮይዛ ጻፌታፔ ናጌቲቴ።
LUK 20:47 ሃይታንቲ ኣምኤታ ኬꬅ ካሎሲዛይታ፤ ኣሲ ኢስታ ቤያና ማላ ዎሳ ኣዱሴቴስ፤ ሄይታንታ ኢታ ፒርዳይ ናጌስ» ጊዴስ።
LUK 21:1 ዬሱሲ ꬎቁ ጊ ጼሊሺን ዱሬ ኣሳቲ ጾሳ ኬꬄን ሙጹዋታ ኢዛን ሺሺዛይሳ ጊዶን ሙጹዋታ ዬጊሺን ቤዪዴስ።
LUK 21:2 ቃሴካ ኢሲ ኣምኦ ዲዛራ ናምኡ ሲኪና ጊዲዛ ናምኡ ጻርቂማላ ሄ ሙጹዋታ ኢዛን ሺሺዛይሳን ዬጊሺን ጼሊዲ፥
LUK 21:3 «ታ ኢንቴስ ቱሙ ጋይስ፤ ሃና ኣምኤያ ኡባ ኣሳፔ ቦላራ ኣꬌꬅ ኢማዱስ።
LUK 21:4 ሃይቲ ኣሳቲ ኢሚዳይ ባስ ዲዛ ቲርፓፌ ጊዲሺን ኢዛ ጊዲኮ ባስ ባይንዳ ዎልቃፌ ባስ ዲዛሮኔ ባ ዱሳስ ኮሺዛሮ ዉርሳ ዬጋዱስ» ጊዴስ።
LUK 21:5 ኢዛ ካሊዛይታፔ ኢሲ ኢሲ ኣሳቲ ጾሳ ኬꬃይ ሎኦ ሹቻኒኔ ኣሳይ ኢሚዳ ኢሞታን ኣይ ማላ ሎኢ ኬጼቲዳኮ ጊዲ ባ ጊዶን ሃሳዬቲሺን ዬሱሲ ሲዪዲ፥ «ሃይሲ ኢንቴ ቤኢዛይሲ ዉሪ ላሌቶንታ ሹቺ ሹቻ ቦላ ኬሌቲዳ ማላ ኣቶንታ ዎዴይ ያና» ጊዴስ።
LUK 21:7 ኢስቲካ ኢዛ፥ «ኣስታማሬ! ሃይሲ ዉሪ ኣይዴ ሃናኔ? ቃሴ ሃይሲ ሃናናይሳስ ማላታይ ኣዜ?» ጊዲ ኦይቺዳ።
LUK 21:8 ኢዚካ ኢስታስ፥ «ኢንቴ ባሌቶንታ ማላ ናጌቲቴ፤ ዳሮቲ ባና፥ ‹ታ ኪርስቶሳኮ! ዎዴይካ ማቲዴስ› ጊሼ ታ ሱንꬃራ ያና ሺን ኢንቴ ኢስታ ካሎፍቴ።
LUK 21:9 ኦላ ጊሻሲኔ ዴሬ ማካላቴꬃ ጊሻስ ሲዪዛ ዎዴ ዳጋሞፍቴ። ሄሲ ዉሪ ካሴቲዲ ሃናናስ ቤሴስ፤ ዉርሴꬂ ጋኪዴስ፤ ጊዶ ኣቲን ሄራካ ሃኔና» ጊዴስ።
LUK 21:10 ቃሴ፥ «ዴሬይ ዴሬ ቦላ፥ ካዎይ ካዎ ቦላ ዴንዳና።
LUK 21:11 ቢታይ ዎልቃማ ቃꬅ ቃጻና፤ ኮሻይኔ ቦሻይ ዱማ ዱማሶን ሃናና፤ ዳሮ ባቢሲዛዚኔ ሳሎፔ ጊታ ማላታይ ቤታና።
LUK 21:12 «ሄሲ ዉሪ ሃናናፔ ካሴቲዲ ኣሳይ ኢንቴና ኦይካናኔ ጎዳና፤ ኣይሁዳ ዎሳ ኬꬂኔ ቃሾ ኬꬅ ጌልꬃና፤ ካዎታ ሲንꬂኔ ዳናታ ሲንꬅ ሺሻና። ሄሲ ዉሪ ታ ሱንꬃ ጊሻስ ኢንቴ ቦላ ጋካና።
LUK 21:13 ሄሲ ዉሪካ ማርካታናስ ሎኦ ቃዳ ጊዳና።
LUK 21:14 ሄሳ ጊሻስ ኑና ኦይቺዛይታስ ኑ ኣይ ዛሪኖ? ጊዲ ካሴቲዲ ሂርጎንታ ማላ ሃይሳ ዎዚናን ዎꬂቴ።
LUK 21:15 ኢንቴ ሞርኬታፔ ኦኒካ ኢንቴናራ ኤቄታናሲኔ ባሌꬃናስ ዳንዳዮንታ ቃላኔ ጪንጫቴꬅ ታ ኢንቴስ ኢማና።
LUK 21:16 ኢንቴና ዬሊዳይቲኔ ኢንቴ ኢሻቲ፥ ኢንቴ ዳቦቲኔ ኢንቴ ላጌቲ ዉሪ ኢንቴና ኣꬂ ኢማና፤ ኢንቴፌ ባጋታ ዎꬋና።
LUK 21:17 ታ ሱንꬃ ጊሻስ ኡባ ኣሳ ኣቻን ኢንቴ ኢጼታና።
LUK 21:18 ጊዶ ኣቲን ኢንቴ ሁኤ ቢናናታፔ ኢሲናካ ꬋዩኩ።
LUK 21:19 ኢንቴ ሚኒ ኤቂኮ ኢንቴ ሼምፖ ኣሻና።
LUK 21:20 «ኦላ ኣሳይ ዬሩሳላሜ ጊዶꬂሺን ቤዪኮ ኢዚስ ꬋይዛ ዎዴይ ማቲዳይሳ ኤሪቴ።
LUK 21:21 ሄ ዎዴ ዩሁዳን ዲዛይቲ ፑዴ ዙማ ቦላ ጋንጌቶ፤ ካታማን ዲዛይቲካ ካታማፔ ኬዚቴ፤ ዴሬ ጊዶን ዲዛይቲካ ሄ ካታማዮ ጌሎፔቶ።
LUK 21:22 ጻፌቲዳይሲ ዉሪ ፖሌታናስ ሃና ሃሎ ኬሲዛ ዎዴ።
LUK 21:23 ቢታ ቦላ ጊታ ሜቶይ ሃናና፤ ሃይሳ ዴሬዛ ቦላ ሃንቆይ ያና፤ ሄሳ ጊሻስ ሄ ዎዴ ቃንꬃራ ዲዛ ማጫሳታሲኔ ꬋንꬂዛ ኣዬታስ ኣዬ ኣና!
LUK 21:24 ባጋ ኣሳይ ማሻን ሃይቃና፤ ባ ዴሬፔ ሃራ ዴሬ ዲኤታና፤ ዬሩሳላሜይካ ጾስ ኤሮንታ ዴሬታ ዎዴይ ፖሌታና ጋካናስ፥ ጾስ ኤሮንታ ኣሳታን ዬꬌቲዳሮ ጊዳና።
LUK 21:25 «ኣርሼ ቦላ፥ ኣጊና ቦላኔ ጾሊንቴ ቦላ ማላታይ ቤታና፤ ኣባፌኔ ኣባ ዳምባላ ጊሪሳፌ ዴንዲዳይሳን ቢታ ቦላ ዲዛ ዴሬይ ሂርጋናኔ ሜቶታና።
LUK 21:26 ሳሎ ዎልቃማቲ ቃጺዛ ጊሻስ ኣሳይ ቢታ ቦላ ኣዜ ሃናኔሻ ጉሳኒኔ ናጎን ጻላ ዳቡራና።
LUK 21:27 ሄ ዎዴ ኣሳ ናይ ዎልቃራ፥ ጊታ ቦንቾራኔ ሻራራ ዪሺን ቤያና።
LUK 21:28 ኢንቴካ ሃይቲ ሃ ታ ጊዳይቲ ፖሌቴꬅ ኦይኪሺን ኢንቴስ ኣቴꬃ ዎዴይ ማቲዳ ጊሻስ ሲቲ ጊ ኤቂቴ፤ ኢንቴ ኣይፌ ፑዴ ꬎቁ ሂስቲቴ» ጊዴስ።
LUK 21:29 ካሌꬂዲ፥ «ባላሴ ሚꬂኔ ሃራ ሚꬃታ ኡባ ጼሊቴ፤ ሄ ሚꬃቲ ሃይꬅ ኬሲሺን ኢንቴ ቤኢዛ ዎዴ ቦኔይ ማቲዳይሳ ኢንቴ ኤሬታ።
LUK 21:31 ሄሳꬆካ ሃይታንቲ ጌቴቲዳይቲ ፖሌቲሺን ኢንቴ ቤኢዛ ዎዴ ጾሳ ካዎቴꬂ ኢንቴኮ ማቲዳይሳ ኤሪቴ።
LUK 21:32 «ታ ኢንቴስ ቱሙ ጋይስ፤ ሃይሲ ዉሪ ፖሌታና ጋካናስ ሃ ዬሌታይ ኣꬌና።
LUK 21:33 ሳሎይኔ ሳኣይ ኣꬋና ሺን ታ ቃላይ ኣꬌና።
LUK 21:34 «ሂስቲኮ ዎጋይ ባይንዳ ዱሳን፥ ዳሮ ኡሻኒኔ ዱሳስ ሂርጋን ኢንቴ ዎዚናይ ዳቡሮፖ፤ ሄሳ ኦꬆንታ ኢጺኮ ሄ ጋላሳይ ኢንቴ ቆፖንታ ናርጻ ማላ ኢንቴ ቦላ ጋኮንታ ማላ ናጌቲቴ።
LUK 21:35 ሃይሲ ቢታ ቦላን ዲዛ ኣሳ ኡባ ቦላ ጋካና።
LUK 21:36 ሄሳ ጊሻስ ቡሮ ያናይሳፌ ኢንቴ ኬሲ ኤካና ማላኔ ኣሳ ና ሲንꬃን ኤቃናስ ዳንዳያና ማላ ኡባ ጋላስ ሚኒዲ ዎሲቴ» ጊዴስ።
LUK 21:37 ዬሱሲ ጋላስ ጋላስ ጾሳ ኬꬃን ታማርሲ ታማርሲዲ ኦማርስ ኦማርስ ዳብራዛይቴ ጌቴቲዛ ዙማ ቦላ ኬዚ ኬዚ ኣቄስ።
LUK 21:38 ኣሳይ ዉሪካ ኢዛፔ ሲያናስ ማላዶ ዎንታራ ዬሱሳኮ ጾሳ ኬꬄ ዬስ።
LUK 22:1 ሄ ዎዴ ፓዚጋ ጌቴቲዛ ኡኬꬃራ ቦንቼቲዛ ባኣሌይ ማቲ ኡቲዴስ።
LUK 22:2 ቄሴታ ሃላቃቲኔ ጻፌቲ ሃንኮ ዴሬ ኣሳስ ባቢዛ ጊሻስ ዬሱሳ ꬋይሳና ኦጌ ኮዪዳ።
LUK 22:3 ዬሱሳ ካሊዛ ታማኔ ናምኣታፔ ኣስቆሮንቶ ዴሬ ኣስ ዩሁዳ ጌቴቲዛይሳን ጻላኤይ ጌሊዴስ።
LUK 22:4 ዩሁዳይካ ቄሴታ ሃላቃታኮኔ ጾሳ ኬꬃ ኣላፌታኮ ቢዲ ኢስታስ ዬሱሳ ዎስቲ ኣꬂ ኢማናኮ ኢስታራ ዞሬቲዴስ።
LUK 22:5 ኢስቲካ ሄሳን ኡፋዬቲዲ ሚሼ ኢማናስ ኢዛራ ጊጊዳ።
LUK 22:6 ዩሁዳይካ ኢስታ ቆፋ ዶሲዴስ፤ ዬሱሳ ኢስታስ ኣሲ ቤኦንታ ኣꬂ ኢማናስ ኢንጄ ዎዴ ናጊሺን ፓዚጋ ዶርሳ ሹኪዲ ኡኬꬃራ ቦንቺዛ ባኣሌ ጋላሲ ጋኪዴስ።
LUK 22:8 ዬሱሲካ ባና ካሊዛይታ፥ «ፓዚጋ ካዎ ማናስ ቢዲ ኑስ ጊግሲቴ» ጊዲ ጴጽሮሳኔ ዮሃኒሳ ኪቲዴስ።
LUK 22:9 ኢስቲካ፥ «ኑ ኣዋን ጊጊሳና ማላ ኮያይ?» ጊዳ።
LUK 22:10 ኢዚካ ዛሪዲ፥ «ኢንቴ ጌዴ ዬሩሳላሜ ካታማ ጌሊሺን ሃꬃ ኦቶ ቶኪዳ ኣሲ ኢንቴና ዴማና፤ ኢንቴካ ኢዚ ቢዲ ጌሊዛ ኬꬄ ጋካናስ ኢዛ ካሊቴ።
LUK 22:11 ኬꬃዴስ፥ ‹ኣስታማሬይ ታና ካሊዛይታራ ፓዚጋ ካዎ ማናስ ኢማꬃ ኬꬂ ኣዋን ዲዜ?› ጌስ ጊቴ።
LUK 22:12 ኢዚካ ኢማꬃስ ጊጌቲዳ ኣሆሶ ኢንቴና ቤሳና፤ ኢዚ ቤሲዛሶን ጊግሲቴ» ጊዴስ።
LUK 22:13 ኢስቲካ ቢዲ ዬሱሲ ጊዳ ማላ ኬꬃ ዴሚዲ ፓዚጋ ሄን ጊግሲዳ።
LUK 22:14 ዎዴይ ጋኪዳ ማላ ዬሱሲ ሃዋሬታራ ቁማ ማዳን ኡቲዲ፥ «ታኒ ዋዬ ቤያናፔ ካሴታዳ ሃይሳ ፓዚጋ ኢንቴናራ ኢሲፌ ማናስ ኬሃ ኣሞታዲስ።
LUK 22:16 ታ ኢንቴስ ቱሙ ጋይስ፤ ጾሳ ካዎቴꬃን ሃይሳ ቢርሼꬂ ፖሌታና ጋካናስ ሃይሳ ፓዚጋ ናምኣንꬆ ታ ኢንቴናራ ሚኬ» ጊዴስ።
LUK 22:17 ዎይኔፔ ኦሴቲዳ ኡሻ ጹኣራ ኤኪዲ ጾሳ ጋላቲ ሲሚዲ፥ «ሄኢቴ፤ ዉሪካ ኢዛፔ ኡዪቴ» ጊዲ ኢስታስ ኢሚዴስ።
LUK 22:18 «ታ ኢንቴስ ቱሙ ጋይስ፤ ሃይሳፌ ጉዬ ጾሳ ካዎቴꬂ ያና ጋካናስ ናምኣንꬆ ሃ ዎይኔ ኡሻፌ ኡዪኬ» ጊዴስ።
LUK 22:19 ኡኬꬃ ኤኪዲ ጾሳ ጋላቲዴስ፤ ኢዛፔ ኢስታስ ሜንꬂ ኢሚዲ፥ «ሃይሲ ኢንቴ ጊሻስ ኢሜታና ታ ኣሾ ሌሚሶ ጊዲዛ ጊሻስ ሃይሳ ኡባ ዎዴ ታና ቆፓናስ ኦꬂቴ» ጊዴስ።
LUK 22:20 ኢዛꬆካ ካዎፔ ጉዬ ኡሻ ጹኣ ዴንꬂዲ፥ «ሃይሲ ኡሻይ ኢንቴ ጊሻስ ታ ሱꬃን ሃናና ኦራꬃ ጫቆ ዎጋ።
LUK 22:21 «ጊዶ ኣቲን ታና ኣꬂ ኢማናዴ ኩሼይ ታ ኩሼራ ኢሲፌ ማዳን ዴስ።
LUK 22:22 ኣሳ ናይ ካሴቲዲ ኢዛ ጊሻስ ሃናናይሲ ዉሪ ኡቲዳ ማላ ኢዚ ባና፤ ጊዶ ኣቲን ኢዛ ኣꬂ ኢሚዛዴስ ኣዬ ኣና!» ጊዴስ።
LUK 22:23 ኢስቲካ ሄሳ ኦꬃናይ ኦኔ? ጊዲ ባ ጊዶን ኢሶይ ኢሳ ኦይሼሬꬂዳ።
LUK 22:24 ቃሴካ፥ «ኦኒ ኦናፔ ኣꬊዛኮ» ጊዲ ባ ጊዶን ኢሶይ ኢሳራ ፓላሜቲዳ።
LUK 22:25 ዬሱሲካ ኢስታ፥ «ዴሬ ሃሪዛ ካዎቲ ባ ዴሬ ኣሳ ዎልቃራ ሃሬቴሲኔ ኢስቲካ ሎኦ ካዎታ ጌቴቲዲ ጼይጌቴቴስ።
LUK 22:26 ኢንቴ ጊዲኮ ሄሳꬆ ሃኖፒቴ፤ ኢንቴፌ ጊታ ጊዲዳዴይ ዎይኮ ታ ኦፔካ ኣꬋይስ ጊዛ ኣሲ ኡባፌ ቄሪ ና ማላ ጊዶ፤ ሃሪዛዴይ ሃሬቲዛዴ ማላ ጊዶ።
LUK 22:27 ቁማ ኤቂዲ ሚዚዳዴፌኔ ኡቲዲ ሚዛዴፌ ኦኒ ኣꬊዜ? ኡቲዲ ሚዛዴ ጊዴኔ? ታኒ ቃሴ ኢንቴ ጊዶን ኣሽካራ ማላ ዳይስ።
LUK 22:28 «ኢንቴ ጊዲኮ ታፔ ሻኬቶንታ ታ ዋዪሺን ታ ማታን ኤቂዳይታ።
LUK 22:29 ታ ኣዋይ ታና ካዎꬂዳይሳ ማላ ታኒካ ታ ካዎቴꬃን ኢንቴና ካዎꬃና።
LUK 22:30 ሄሲካ ታ ካዎቴꬃን ታ ማዳፌ ኢንቴ ማና ማላኔ ኡያና ማላ፤ ቃሴካ ታ ካዎቴꬃ ኣልጋን ኡቲዲ ታማኔ ናምኡ ኢስራኤሌ ናይታ ቦላ ፒርዳናሳ» ጊዴስ።
LUK 22:31 ቃሴካ ዬሱሲ ሲሞና ጼይጊዲ፥ «ሲሞና! ጻላኤይ ኢንቴና ጊስቴ ማላ ሱራጋናስ ዎሲዴስ።
LUK 22:32 ጊዶ ኣቲን ታኒ ኔፔ ኣማኖይ ꬋዮንታ ማላ ኔ ጊሻስ ጾሳ ዎሳዲስ፤ ኔካ ሲሚዳ ዎዴ ኔ ኢሻታ ሚንꬄꬃ» ጊዴስ።
LUK 22:33 ሲሞኒካ ዛሪዲ፥ «ጎዶ! ታ ኔናራ ቃሼታናሲኔ ሃይቃናስ ጊጋ ኡታዲስ» ጊዴስ።
LUK 22:34 ዬሱሲካ ዛሪዲ፥ «ጴጽሮሳ! ሃች ኩቶይ ኢሲቶ ዋሳናስ፥ ‹ታ ኢዛ ኤሪኬ› ጋዳ ሄꬑቶ ኔ ታና ካዳና» ጊዴስ።
LUK 22:35 ቃሴካ ዬሱሲ ኢስታ፥ «ታ ኢንቴና ካሴ ጫማይ፥ ኮሮጆይኔ ቃራጺቴይ ባይንዳ ኪቲዳ ዎዴ ኢንቴስ ኣዚ ፓጪዴ?» ጊ ኦይቺዴስ። ኢስቲካ፥ «ኣይኮይካ ፓጪቤና» ጊዳ።
LUK 22:36 ኢዚካ ዛሪዲ፥ «ሃኢ ጊዲኮ ኮሮጆይካ፥ ቃራጺቴይካ ዲዛዴይ ኦይኮ፤ ጊꬃ ማሻይ ባይንዳዴይ ባ ማይኦ ባይዚዲ ሻሞ።
LUK 22:37 ታ ኢንቴስ ቱማ ጋይስ፤ ‹ማካላታራ ኢዚ ኢሲፌ ታይቤቲዴስ› ጌቴቲ ካሴ ጻፌቲዳ ቃላይ ታ ቦላ ፖሌታና ቤሴስ፤ ታ ጊሻስ ጻፌቲዳይሳስ ፖሎይ ቱማፔ ጋኪዴስ» ጊዴስ።
LUK 22:38 ኢዛ ካሊዛይቲ ቃሴ፥ «ጎዶ! ሄኮ ናምኡ ጊꬃ ማሻቲ ሃይሳን ዴቴስ» ጊዳ። ኢዚካ ኢዛ ጊሻስ፥ «ሃይሲ ጊዳና» ጊዴስ።
LUK 22:39 ካሴ ኢዛስ ሎሴ ጊዲዳ ማላ ፑዴ ዳብራዛይቴ ጌቴቲዛ ዙማ ቦላ ኬዚ ቢዴስ። ኢዛ ካሊዛይቲካ ኢዛ ካሊ ቢዳ።
LUK 22:40 ሄ ጋኪዳ ማላ፥ «ኢንቴ ፓጬን ጌሎንታ ማላ ዎሲቴ» ጊዴስ።
LUK 22:41 ዬሱሲ ባና ካሊዛይታፔ ኣሲ ሹች ኦሊዲ ጋꬃናሶ ማላ ሃኪ ቢዲ ጉልባቲ ዎሲዴስ።
LUK 22:42 «ታ ኣዋዉ! ኔ ሼኔ ጊዲኮ ሃኖ ሜቶዮ ታፔ ዲጋ፤ ጊዶ ኣቲን ኔ ሼኔይ ሃኖፔ ኣቲን ታ ሼኔይ ሃኖፖ» ጊዲ ዎሲዴስ።
LUK 22:43 ሳሎፔ ኪታንቻይ ቆንጪዲ ዬሱሳ ሚንꬄꬂዴስ።
LUK 22:44 ኢዚካ ኬሂ ጹጌቲዲ ዎሲሺን ኢዛ ኣሳቴꬃፌ ጫዋይ ሱꬃ ማላ ጉኪዴስ።
LUK 22:45 ዎሳፔ ዴንዲዲ ባና ካሊዛይታኮ ቢዴስ። ኢስቲካ ኢዛስ ሚሼቲዲ ቆፒሺን ꬊስኮይ ኤፊዳሼ ዬሱሲ ኢስታኮ ዪዲ፥
LUK 22:46 «ኣይስ ꬊስኬቲ? ኢንቴ ፓጬን ጌሎንታ ማላ ሃኢ ዴንዲዲ ዎሲቴ» ጊዴስ።
LUK 22:47 ኢዚ ቡሮ ሃሳያን ዲሺን ዬሱሳ ካሊዛይታፔ ኢሶይ ዩሁዳ ጌቴቲዛይሲ ባናራ ዳሮ ኣሳ ካሌꬂ ኤኪ ዪዲ ዬሱሳ ዬራናስ ኢዛኮ ሺቂዴስ።
LUK 22:48 ጊዶ ኣቲን ዬሱሲ ኢዛ፥ «ዩሁዳ! ታና ኣሳ ና ዬሮን ኣꬃ ኢማይ?» ጊዴስ።
LUK 22:49 ዬሱሳ ዩዪ ኣꬊ ዲዛ ኣሳይ ሃኖዛ ሎኤꬂ ጼሊዲ፥ «ጎዶ! ሃይታንታ ማሻራ ቡꬂኖ?» ጊዳ።
LUK 22:50 ኢስታፌ ኢሶይ ቄሴታ ኣላፌ ኣሽካራዛ ኡሻቻ ሃይꬅ ማሻራ ቃንጺዴስ።
LUK 22:51 ዬሱሲ ኢስታ፥ «ኢንቴ ሃኢ ታስ ኣጊቴ!» ጊዲ ኣሽካራዛ ሃይꬅ ቦቺዲ ፓꬂዴስ።
LUK 22:52 ቃሴካ ኢዛ ኦይካና ዪዳ ቄሴታ ሃላቃታ ጾሳ ኬꬃ ኣላፌታኔ ጪማታ፥ «ፓንጋ ኦይኪዛ ኣሳ ማላ ጊꬃ ማሻኔ ዱርቃ ኤኪዲ ዪዴቲ?
LUK 22:53 ጋላስ ጋላስ ታ ኢንቴናራ ጾሳ ኬꬃን ዲሺን ታ ቦላ ኩሼ ዎꬂቤኬታ፤ ሃይሲ ꬉማይ ካዎቲዳ ኢንቴ ዎዴ» ጊዴስ።
LUK 22:54 ሄሳፌ ጉዬ ዬሱሳ ኦይኪ ኤኪዲ ቄሴታ ሃላቃሶ ጌሊዳ፤ ጴጽሮሲካ ዬሱሳ ሃሆራ ካሊዴስ።
LUK 22:55 ኣሳይ ቄሴታ ሃላቃ ጊቤ ጊዶን ታማ ኤꬂዲ ሆኢሼ ኢሲ ቦላ ኡቲዳሼ ጴጽሮሲካ ኢስታራ ኢሲፌ ኡቲዴስ።
LUK 22:56 ኢሲ ጋራዴያ ጴጽሮሲ ታማ ሆኢዛይታራ ኡቲዳይሳ ቤያዳኔ ቲሺ ሂስታ ጼላዳ፥ «ሃይሲ ኣዴዚካ ዬሱሳራ ዴስ!» ጋዱስ።
LUK 22:57 ጴጽሮሲካ፥ «ሃኔ ማጫሳዬ! ታ ኢዛ ኤሪኬ» ጊዲ ካዲዴስ።
LUK 22:58 ጉꬅ ጋምኢሺን ሃራ ኢሳዴይ ኢዛ ቤኢዲ፥ «ኔካ ኢዛራ ዲዛይታፔ ኢሳ ጊዲኪ?» ጊዴስ። ጴጽሮሲካ፥ «ሃይሶ ታኒ ኢስታራ ዲኬ!» ጊዴስ።
LUK 22:59 ኢሲ ሳቴ ማላ ጋምኢሺን ሃራ ኣሲ ቃሴካ፥ «ጋሊላ ኣስ ጊዲዛ ጊሻስ ሲꬌይ ባይንዳ ሃይሲ ኢዛራ ዴስ» ጊዴስ።
LUK 22:60 ጴጽሮሲካ ቃሴ፥ «ሃይሶ ኔ ጊዛዴ ታ ኤሪኬ!» ጊዴስ። ሂኖ ጊ ኬሶንታ ዲሺን ኩቶይ ዋሲዴስ።
LUK 22:61 ጎዳይካ ጴጽሮሳኮ ዪሼ ጼሊን ጴጽሮሲ፥ «ሃች ኩቶይ ዋሳናስ ኔ ታና ሄꬑቶ ካዳና» ጊዲ ጎዳይ ካሴ ዮቶ ቃላይ ኢዛ ዎዚናን ካርፒ ጊዴስ።
LUK 22:62 ጴጽሮሲካ ካሬ ኬዚዲ ሂቂሚ ዬኪዴስ።
LUK 22:63 ዬሱሳ ቃቺዲ ናጊዛ ኣሳቲካ ኢዛ ቦላ ቂꬊ ቂꬊ ካኢሼ ሾጬሬꬂዳ።
LUK 22:64 ኢዛ ኣይፌ ጎዚዲ፥ «ኔ ናቤ ጊዲኮ ኔና ሾጪዳይ ኦናኮ ኣኔ ኤራ!» ጊዲ ኦይቺዳ።
LUK 22:65 ሃራ ዳሮ ጫሻ ቃላራ ካዉሺዳ።
LUK 22:66 ጋዴይ ዎንቲን ዴሬ ጪማቲ፥ ቄሴታ ሃላቃቲኔ ሙሴ ዎጋ ታማርሲዛይቲ ዱላታ ሺቂዲ ዬሱሳ ዱላታኮ ሺሺዳ።
LUK 22:67 ኢስቲካ ዬሱሳ፥ «ኔ ኪርስቶሳ? ኣኔ ኑስ ዮታ» ጊዳ። ዬሱሲካ፥ «ታ ኢንቴስ ዮቲዳኮካ ታና ኣማኔኬታ።
LUK 22:68 ታ ኢንቴና ኦይቺዳኮ ታስ ዛሬኬታ።
LUK 22:69 ጊዶ ኣቲን ሃኢፔ ዶሚዲ ኣሳ ናይ ዎልቃማ ጾሳ ኡሻቻን ኡታና» ጊዴስ።
LUK 22:70 ሄ ዎዴ ዉሪካ፥ «ሂስቲን ኔ ጾሳ ና?» ጊዲ ኦይቺዳ። ኢዚካ፥ «ታ ጾሳ ና ጊዲዳይሳ ኢንቴካ ጌታ» ጊዴስ።
LUK 22:71 ኢስቲካ፥ «ሄኮ ኢዚ ባ ዶናራ ማርካቲሺን ኑ ሃይꬃራ ሲዪዶስ፤ ሃይሳፌ ሃራ ማርካ ኣዛስ ኮሺዜ?» ጊዳ።
LUK 23:1 ሄን ሺቂዳ ኣሳይ ዉሪ ዴንዲዲ ዬሱሳ ጲላጾሳኮ ኤኪ ቢዴስ።
LUK 23:2 «ሃይሲ ኣዴዚ ኑ ኣሳይ ቄሳሬስ ጊራ ጊሮንታ ማላ ባሌꬂሼኔ ባና፥ ‹ታኒ ኪርስቶሲ ካዎ› ጊዲ ባሌꬂሺን ዴሚዶስ» ጊዲ ሞቲዳ።
LUK 23:3 ጲላጾሲካ ዬሱሳ፥ «ኔኒ ኣይሁዳታ ካዎ?» ጊዲ ኦይቺዴስ። ዬሱሲካ ዛሪዲ፥ «ኔ ጊዳ ማላ» ጊዴስ።
LUK 23:4 ጲላጾሲካ ቄሴታ ሃላቃታሲኔ ሺቂዳ ኣሳስ፥ «ሃይሳ ኣዴዛ ቦላ ኢዛ ሞቲሲዛ ኢታ ዮኦ ዴማቤኬ» ጊዴስ።
LUK 23:5 ኢስቲ ዛሪዲ፥ «ሃይሲ ኣዴዚ ጋሊላፔ ሃይሳ ጋካናስ ኩሜꬃ ዩሁዳ ዋዪሶ ቦላ ዴስ» ጊዲ ሚንꬂ ዮቲዳ።
LUK 23:6 ጲላጾሲ ኣሳይ ጊዛይሳ ሲዪዲ፥ «ዬሱሲ ጋሊላ ኣሳኮኔ» ጊዲ ሎኤꬂ ኤራናስ ኦይቺዴስ።
LUK 23:7 ዬሱሲ ሄርዶሳ ካዎቴꬃ ጊዶን ዲዛይሳ ሻኪ ኤሪዲ ሄ ዎዴ ሄርዶሲ ዬሩሳላሜን ዲዛ ጊሻስ ኢዛኮ ዬሱሳ ዬዲዴስ።
LUK 23:8 ሄርዶሲካ ካሴ ዬሱሳ ቤያናስ ዳሮ ኮዪሼ ዲዛ ጊሻስ ዬሱሳ ቤኢዲ ኬሂ ኡፋዪዴስ፤ ኢዛ ጊሻስ ካሴ ሲዪዲ ኢዚ ኦꬂሺን ቤያናስ ኮዪዲ ኡፋዬቲዴስ።
LUK 23:9 ዳሮ ኦይሻታካ ኢዛ ኦይሼሬꬂዴስ፤ ጊዶ ኣቲን ዬሱሲ ኢዛ ኦይሻ ዛሪቤና።
LUK 23:10 ቄሴ ሃላቃቲኔ ጻፌቲ ሄን ኢዛ ማታን ኤቂዲ ኬሂ ዎርዶ ሞቶ ሞቲዳ።
LUK 23:11 ሄርዶሲካ ባ ዎታዳራታራ ኢሲፌ ኢዛ ካꬊዳ፤ ካዎ ማይኦ ማይዚዲ ጲላጾሳኮ ዛሪ ዬዲዴስ።
LUK 23:12 ሄርዶሲኔ ጲላጾሲ ካሴ ባ ጊዶን ኢሶይ ኢሳራ ኦሻ ሺን ሄ ጋላስ ጊጊዳ።
LUK 23:13 ጲላጾሲ ቄሴታ ሃላቃታራ፥ ዴሬ ዳናታራኔ ዴሬ ኣሳ ሺሺዲ፥
LUK 23:14 «ሃይሲ ኣዴዚ ኣሳይ ዉሪ ማካላና ማላ ዴንꬄꬄስ ጊዲ ኢንቴ ታኮ ኤሂን ታ ቆራዳ ኢዛ ኦይꬂዛ ኢሲ ኢታ ሚሺካ ዴማቤኬ።
LUK 23:15 ቃሴካ ሄርዶሲ ኢሲ ኢታ ሚሺካ ኢዛ ቦላ ዴሞንታ ኣጊዳ ጊሻስ ሃ ኑኮ ዛሪ ዬዲዴስ። ሃኢ ኢንቴ ቤኢዛ ማላ ኢዛ ሃይቆስ ጋꬂዛ ኢሲ ኢታ ሚሺካ ኦꬂቤና።
LUK 23:16 ሄሳ ጊሻስ ቃጻያዳ ታ ኢዛ ዬዳና» ጊዴስ።
LUK 23:17 ኢዚ ሄሳ ጊዳይ ኢስታ ባኣሌ ጋላስ ቃሼቲዳ ኣሳፔ ኢሳዴ ቢርሺዛ ዎጋይ ዲዛ ጊሻሳ።
LUK 23:18 ዴሬይ ዉሪካ ኢሲ ቦላ፥ «ባርባኔ ቢርሻዳ ሃይሳ ኣዴዛ ዲጋ!» ጊዲ ዋሲዴስ።
LUK 23:19 ባርባኔይ ካታማ ጊዶን ኣሳ ማካላ ዮኦን ዴንꬄꬂዲ ኣስ ዎꬊ ቃሼቲዳ ኣሳ።
LUK 23:20 ጲላጾሲካ ዬሱሳ ቢርሻናስ ኮዪዳ ጊሻስ ቃሴካ ዛሪዲ ኦይቺዴስ።
LUK 23:21 ኣሳይ ዛሪዲ ኢዛ፥ «ካቃ! ካቃ!» ጊዲ ዋሲዴስ።
LUK 23:22 ጲላጾሲ ሄꬓንꬆካ፥ «ኣዛስ ካቆ? ሃይሲ ኣዴዚ ኣይ ኢታ ኦꬂዴ? ኢዛ ሃይቆስ ጋꬂዛ ኢታ ኦሶ ታኒ ኢዛ ቦላ ቤያቤኬ፤ ሄሳ ጊሻስ ቃጻያዳ ታ ኢዛ ቢርሻ ዬዳና» ጊዴስ።
LUK 23:23 ኣሳይካ ቃላ ꬎቁ ሂስቲዲ ዬሱሲ ካቄታና ማላ ጲላጾሳ ኬሂ ዎሲሼ ዋሲዴስ።
LUK 23:24 ሄሳ ጊሻስ ጲላጾሲ ኢስታ ኦይሾይ ፖሌታና ማላ ኣዛዚዴስ።
LUK 23:25 ኣሳ ማካሊሲዲ ሼምፖ ዎꬊዳ ጊሻስ ቃሼቲዳይሳ ቢርሻና ማላ ኢስቲ ዎሲዳዴ ቢርሺዲ ቃሴካ ዬሱሳ ኢስቲ ዶሲዳ ማላ ኦꬄቶ ጊዲ ዴራስ ኣꬂ ኢሚዴስ።
LUK 23:26 ኢስቲካ ዬሱሳ ኦይኪ ኤኪ ቢሺን ቃሬና ጌቴቲዛ ካታማፔ ኢሲ ሲሞና ጌቴቲዛ ኣዴይ ሃሆፔ ዪዛይሳ ዴሚዳ፤ ዬሱሲ ካቄታና ማስቃሌ ኮጫ ኢዚ ቶኪዲ ዬሱሳ ካላና ማላ ዎልቃꬂዳ።
LUK 23:27 ዳሮ ዴሬይኔ ባ ቲራ ኢጪ ኢጪ ዬኪዛ ማጫሳቲ፥
LUK 23:28 ዬሱሳፔ ጉዬራ ኢዛ ካሊዳ። ዬሱሲ ኢስታኮ ሲሚ ጼሊዲ፥ «ኢንቴ ዬሩሳላሜ ማጫሳይ ኢንቴሲኔ ኢንቴ ናይታስ ዬኪቴ ኣቲን ታስ ዬኮፍቴ።
LUK 23:29 ‹ሲንꬃፌ ኢንቴ ሄኮ ማይኔ ጊዲዳ ማጫሳቲ፥ ዬሎንታ ኡሎቲኔ ናይ ꬋሞንታ ꬋንꬃቲ ኣንጄቲዳይታ!› ጋና ዎዴይ ሲንꬃራ ዬስ።
LUK 23:30 ሄ ዎዴ ኣሳይ፥ ‹ዙማቶ! ኑ ቦላ ዎዲቴ፤ ዙምቡላቲካ ኑና ቆቲቴ!› ጋና።
LUK 23:31 ሂስቲን ቃዬ ሚꬃ ቦላ ሃይሳꬆ ኦꬂዳይቲ ሜላ ሚꬃ ቦላ ዎስታኔሻ?» ጊዴስ።
LUK 23:32 ኢዛራ ኢሲፌ ሃይቃና ማላ ሃራ ናምኡ ኢታ ኦꬂዳ ኣሳታ ኢዛራ ኤፊዳ።
LUK 23:33 ቃራኒዮ ጌቴቲዛሶ ጋꬂዲ ካቂዳ፤ ኢታ ኦꬂዳይታፔ ኢሳ ኡሻቻ ባጋራ፥ ኢሳ ሃዲርሳ ባጋራ ካቂዳ።
LUK 23:34 ዬሱሲካ፥ «ታ ኣዋዉ! ሃይቲ ባ ኦꬂዛይሳ ኤሪዲ ኦꬆንታ ጊሻስ ኢስታስ ኣቶ ጋ!» ጊዴስ፤ ኢስቲካ ኢዛ ማይኦዛ ሳማ ዬጊዲ ባ ጊዶን ጊሼቲ ኤኪዳ።
LUK 23:35 ሄሲ ሃኒሺን ኣሳይ ዉሪ ኤቂ ጼሊዴስ፤ ዳናቲካ፥ «ኢዚ ሃራ ኣሳ ኣሺዴስ ሺን ጾሳፌ ዶሬቲዳ ኪርስቶሲ ኢዛ ጊዲኮ ኣኔ ሃኢ ባና ኣሾ» ጊዲ ቂꬊዳ።
LUK 23:36 ዎታዳራቲካ ሺቂዲ ዎይኔፔ ኣጌቲዳ ጫላ ኡሹ ኡሺዲ ኢዛ ቂꬊዳ።
LUK 23:37 «ኔኒ ኣይሁዳ ካዎ ጊዲኪ? ኣኔ ሃኢ ኔና ኣሻ» ጊዳ።
LUK 23:38 ኢዛ ሁኤፔ ቦላ ባጋራ ማስቃሌ ኮጫ ቦላ፥ «ሃይሲ ኣይሁዳታ ካዎ» ጊዛ ቃላ ጻፊ ቃጲዳ።
LUK 23:39 ኢታ ኦꬂዲ ካቄቲዳ ኣሳታፔ ኢሶይ ጫሻ ቃላ ዬሱሳ ቦላ ቆቆፊዴስ። «ኔ ኪርስቶሳ ጊዲኪ? ኣኔ ኔናካ ኑናካ ኣሻ» ጊዴስ።
LUK 23:40 ኢታ ኦꬂዳይታፔ ኢሶይ፥ «ኔኒ ኔስ ቤሲዛ ፒርዳ ኤካሼ ጾሳስ ባቢኪ?
LUK 23:41 ኑኒ ኑ ኦꬂዳ ኢታ ኦሶስ ቤሲዛይሳ ኤኮስ፤ ሃይሲ ኣዴዚ ጊዲኮ ኢሲ ኢታካ ኦꬂቤና» ጊዴስ።
LUK 23:42 ዬሱሳ፥ «ኔኒ ኔ ካዎቴꬃራ ዪዛ ዎዴ ታና ቆፓ!» ጊዴስ።
LUK 23:43 ዬሱሲካ ዛሪዲ፥ «ታ ኔስ ቱሙ ጋይስ፤ ሃች ኔ ታናራ ጋናቴን ዳና» ጊዴስ።
LUK 23:44 ሄ ዎዴ ጋዴይ ሴታ ጋላስ ጊዲሺን ቢዲ ኡዱፉን ሳቴ ጋካናስ ኩሜꬃ ቢታ ቦላ ꬉማይ ꬉሚዴስ።
LUK 23:45 ኣርሼ ፖኦይ ዲጌቲዴስ። ጾሳ ኬꬃ ማጋላሻይካ ዳኬቲዲ ናምኡ ኬዚዴስ።
LUK 23:46 ዬሱሲካ ኬሂ ዋሲዲ፥ «ታ ኣዋዉ! ታኒ ታ ሼምፖ ኔ ኩሼን ኢማይስ» ጊዳ ማላ ሼምፖ ኬዚዴስ።
LUK 23:47 ማቶ ሃላቃይ ሄሳ ቤኢዲ፥ «ሃይሲ ኣዴዚ ቱማፔ ጺሎ ኣሳኮሺን» ጊዲ ጾሳ ጋላቲዴስ።
LUK 23:48 ሄሳ ቤያናስ ሄን ሺቂዲ ዴሬይ ዉሪ ሄ ሃኒዳይሳ ቤኢዲ ቲራ ኢጪ ኢጪዲ ሲሚዴስ።
LUK 23:49 ጊዶ ኣቲን ዬሱሳ ካሴ ሎኤꬂ ኤሪዛይቲ ዉሪ ቃሴካ ጋሊላፔራ ኢዛ ካሊዛ ማጫሳቲ ሄሳ ጼሊሼ ሃኪ ኤቂዳ።
LUK 23:50 ኣይሁዳታ ዱላታ ኣሳፔ ኢሶይ ኢዚካ ዮሴፌ ጌቴቲዛይሲ ዳሮ ኪያኔ ጺሎ ኣሳ።
LUK 23:51 ኢዚካ ካሴ ኣሳይ ዬሱሳ ቦላ ዱላቲሺን ሄ ዱላታን ዴና፤ ኢዚካ ኣርማቲያሴ ጌቴቲዛ ኣይሁዳታ ካታማ ኣሳ ሺን ጾሳ ካዎቴꬂ ያናይሳ ናጊሼ ጋምኢዴስ።
LUK 23:52 ኢዚካ ጲላጾሳኮ ቢዲ ዬሱሳ ኣሃ ባስ ኢማና ማላ ጲላጾሳ ዎሲዴስ።
LUK 23:53 ጲላጾሲ ኢዛስ ኤሮ ጊን ዮሴፌይ ኣሃ ማስቃሌ ኮጫፔ ዎꬂዳ ማላ ጻጺዲ ሹቻፌ ዎጬቲዳ ካሴ ሃራ ኣሲ ሞጌቶንታ ዱፎን ኤፊዲ ዎꬂዴስ።
LUK 23:54 ሄ ጋላሳይ ኣሳይ ሳምባታስ ጊጌቲዛ ጋላስ ጊዲዳ ጊሻስ ሳምባታይ ጌላና ሃኔስ።
LUK 23:55 ጋሊላፔ ዴንዲዲ ዬሱሳራ ዪዳ ማጫሳቲካ ዮሴፌ ካሊ ቢዲ ዱፎዛ ቤኢዳ። ዬሱሳ ኣሃ ዎስቲ ዎꬂዳኮ ቤኢዳ።
LUK 23:56 ሄፔ ሲሚዲ ሺቶኔ ቲዪዛ ሚሽ ጊግሲዳ። ዎጋይ ጊዛ ማላ ሳምባታ ጋላስ ሼምፒዳ።
LUK 24:1 ዎጋ ዎንታ ማላዶራ ማጫሳቲ ባ ጊግሲዳ ሺቶዛ ኤኪዲ ዬሱሳ ዎꬂዳ ዱፎዛኮ ቢዳ።
LUK 24:2 ሹቻይካ ዱፎዛ ዶናፔ ጌንዴሪዲ ዲዛይሳ ቤኢዳ።
LUK 24:3 ጊዶ ኣቲን ጊዶ ጌሊዲ ዬሱሳ ኣሃ ዴሞንታ ኣጊዳ ጊሻስ፥
LUK 24:4 ኢስታስ ሃንዛዚ ꬋዪን ኢስቲ ቶሉ ጊዳሼ ቆፖንታ ጾልቄቲዛ ማይኦ ማይኢዳ ናምኡ ኣሳቲ ኢስታ ኣቻን ኤቂዳ።
LUK 24:5 ማጫሳቲካ ኬሂ ባቢዲ ዱጌ ቢታ ጼሊሺን፥ «ሄ ኣሳቲ ፓጺዲ ዴንዲዳይሳ ሃይቄꬃታ ጊዶን ኣይስ ኮዬቲ?
LUK 24:6 ኢዚ ዴንዲዴስ! ሃን ባ። ቃሴካ ኢዚ ጋሊላን ዲሼ ኢንቴስ ካሴ ኣይ ጊዳኮ ኣኔ ቆፒቴ።
LUK 24:7 ኣሳ ናይ ናጋራንቻታ ኩሼን ኣꬊ ኢሜታናሲኔ ካቄታናስ፥ ሃይቆፔካ ሄꬓንꬆ ጋላስ ዴንዳናስ ቤሴስ» ጊዲ ዮቲ ዎꬂዴስ።
LUK 24:8 ማጫሳቲካ ሄ ዎዴ ካሴ ኢዚ ጊዳ ቃላ ኣኬኪዳ።
LUK 24:9 ማጫሳቲ ዱፎሶፔ ሲሚዲ ሄሳ ኡባ ዬሱሳ ካሊዛ ታማኔ ኢሲኔታሲኔ ሃራታስ ዮቲዳ።
LUK 24:10 ሄሳካ ሃዋሬታስ ዮቲዳይ ማግዳሌ ጊዛሶፔ ዪዳ ማራሞኔ ዮሃኖ ጌቴቲዛሪራ ያቆቤ ማራሞኔ ኢስታራ ኢሲፌ ዲዛ ሃራ ማጫሳታ።
LUK 24:11 ጊዶ ኣቲን ኢስታስ ማጫሳቲ ዮቲዳይሲ ኣጉሞ ሚሳቲን ኣማኒቤቴና።
LUK 24:12 ጊዶ ኣቲን ጴጽሮሲ ዎꬃን ዬሱሳ ዱፎኮ ጋኪ ሆኪዲ ዱፎዛ ጊዶ ጼሊሺን ኢዛ ኣሃዛ ጻጺዳ ማይኦይ ጻላ ዲዛይሳ ቤኢዲ ኬሂ ማላሌቲሼ ባሶ ሲሚዴስ።
LUK 24:13 ሄ ጋላስ ኢዛ ካሊዛይታፔ ናምኣቲ ዬሩሳላሜፔ ታማኔ ኢሲ ኪሎ ሜቲሬ ሃኪዛ ኤማሆሴ ጌቴቲዛ ካታማ ቤቴስ።
LUK 24:14 ቢሼ ኢስቲ ሄ ዎዴ ሃኒዳ ዬሱሳ ሃይቆ ጊሻስ ባ ጊዶን ሃሳዬቴቴስ።
LUK 24:15 ኢስቲ ሃሳዬቲሺን ዬሱሲ ኢስታኮ ሺቂዲ ኢስታራ ኢሲፌ ቢሺን፥
LUK 24:16 ኢስቲ ኢዛ ኤሮንታ ማላ ኢስታ ኣይፌይ ኦይኬቲዴስ።
LUK 24:17 ዬሱሲ ኢስታ፥ «ሃይሲ ኦጌ ሄሜቲሼ ኢንቴ ኢንቴ ጊዶን ሃሳዬቲዛይሲ ኣዜ?» ጊዴስ። ኢስቲካ ዳጋማራ ሞꬌቲሼ ሲቲ ጊ ኤቃ ጊዳ።
LUK 24:18 ኢስታ ጊዶፌ ኢሶይ ቃሊዮጳ ጌቴቲዛይሲ ዛሪዲ፥ «ሃ ማታ ጋላሳታን ዬሩሳላሜን ሃኒዳይሳ ኤሮንታ ኢማꬃ ኣሲ ኔና ጻላ?» ጊዴስ።
LUK 24:19 ኢዚካ ኢስታስ ዛሪዲ፥ «ኣዚ ሃኒዴ?» ጊን ኢስቲ ቃሴ ዛሪዲ፥ «ጾሳ ሲንꬃኒኔ ኣሳ ኡባ ሲንꬃን ኦሶኒኔ ቃላን ሚኖ ናቤ ጊዲዳ ናዚሬቴ ዬሱሳ ጊሻሳ» ጊዳ።
LUK 24:20 ኢዛካ ቄሴታ ሃላቃቲኔ ዳናቲ ሃይቆ ፒርዳስ ኣꬂ ኢሚዳኔ ካቂዳ።
LUK 24:21 ኑኒ ጊዲኮ፥ « ‹ኢስራኤሌ ዎዛናይ ኢዛ› ጊዲ ኡፋዬቲዶሲሺን ሃራፔካ ሄሲ ሃኒን ቃሴ ሃች ሄꬓንꬆ ጋላሳ።
LUK 24:22 ቃሴ ኑ ጊዶፌ ኢሲ ኢሲ ማጫሳቲ ኑና ኬሂ ማላሊሲዳ፤ ኢስቲካ ማላዶ ዎንታራ ጌዴ ኢዛ ዱፎኮ ቢዲ፥
LUK 24:23 ኢዛ ኣሃይ ቤቶንታ ኢጺን ዪዲ ኢዚ ፓጻ ዲዛይሳ ኢስታስ ዮቲን ኪታንቻታ ቤኢዳይሳ ኑስ ዮቲዳ።
LUK 24:24 ኑፔካ ኢሲ ኢሲ ኣሳቲ ኢዛ ዱፎኮ ቢዲ ማጫሳቲ ጊዳ ማላ ቤኢዳ ኣቲን ዬሱሳ ዴሚቤቴና» ጊዳ።
LUK 24:25 ኢዚካ ኢስታስ፥ «ኢንቴኖ ዎዚናን ዎꬆንታይቶ! ኢንቴ ዎዚናይ ካሴ ናቤቲ ዮቲዳይሳ ኣማናናፔ ታኪዳይቶ!
LUK 24:26 ጾሳፌ ኪቴቲዳይሲ ሃ ሜቶዛ ኤካናሲኔ ጌዴ ባ ቦንቾሶ ጌላናስ ቤሴኔ?» ጊዴስ።
LUK 24:27 ሙሴፔኔ ናቤታፔ ዶሚዲ ጌሻ ማጻፋታን ኢዛ ጊሻስ ጻፌቲዳይሳ ኢስታስ ሎኤꬂ ዮቲዴስ።
LUK 24:28 ኢስቲ ባ ቢዛሶ ማቲዳ ዎዴ ዬሱሲ ኣꬊ ቢዛ ሚሳቲዴስ።
LUK 24:29 ኢስቲካ ቃሴ፥ «ጋዴይ ቃሚዛ ጊሻስ ኑናራ ኣቃ» ጊዲ ኢዛ ኬሂ ዎሲን ኢስታራ ኣቃናስ ጌሊዴስ።
LUK 24:30 ኢስታራ ኢሲፌ ማዳን ኡቲዲ ኡኬꬅ ባ ኩሼን ኦይኪዲ ኢስታስ ሜንꬂ ሜንꬂ ኢሚዴስ።
LUK 24:31 ሄ ዎዴ ኢስታ ኣይፌይ ዶዬቲን ኢዛ ጊዲዳይሳ ኤሪዳ፤ ኢዚካ ኢስታ ኣይፌፔ ጌሚዴስ።
LUK 24:32 ኢስቲካ፥ «ኑ ዪሼ ኦጌ ቦላ ዲሺን ኑና ሃሳይሲዲ ጌሻ ማጻፋታካ ቆንጪሲዲ ኑስ ጌላናሼ ዮቲን ኑ ዎዚናይ ታማ ማላ ጹጌቲቤኔ?» ጊዲ ኢሶይ ኢሳራ ሃሳዬቲዳ።
LUK 24:33 ሄራካ ዴንዲዲ ዬሩሳላሜ ሲሚ ቢዳ፤ ታማኔ ኢሲኔቲኔ ኢስታራ ኢሲፌ ዲዛይቲካ ኢሲ ቦላ ሺቂ ዲዛይታ ዴሚዳ።
LUK 24:34 ኢስቲካ ባ ጊዶን ኢሶይ ኢሳስ፥ «ጎዳይ ቱሙ ዴንዲዴስ! ሲሞናስካ ቤቲዴስ» ጊዳ።
LUK 24:35 ኢዛ ካሊዛይታፔ ናምኣቲ ኦጌ ቦላ ሃኒዳይሳኔ ዬሱሲ ኡኬꬃ ሜንꬂ ሜንꬂ ኢሚዳ ዎዴ ኢስቲ ዎስቲ ኤሪዳኮ ኢስታስ ዮቲዳ።
LUK 24:36 ሄሳ ጊሻስ ኢስቲ ባ ጊዶን ሃሳዬቲሺን ዬሱሲ ኢስታ ጊዶን ኤቂዲ፥ «ሳሮይ ኢንቴስ ጊዶ!» ጊዴስ።
LUK 24:37 ጊዶ ኣቲን ኢስቲ ሞይቲሌ ቤኢዳ ሚሳቲን ኬሂ ዳጋሚዳ።
LUK 24:38 ኢዚካ ኢስታስ፥ «ኣዛስ ዳሮ ቆፔቲ? ኣዛስ ኢንቴ ዎዚናራ ሲꬌቲ?
LUK 24:39 ታ ኩሼታኔ ታ ቶሆታ ሃ ጼሊቴ፤ ታናኮ፤ ቃሴካ ታና ኦይኪ ቤኢቴ፤ ታና ኢንቴ ቤኢዛይሳ ማላ ሞይቲሌስ ኣሾይኔ ሜቄꬂ ዴና» ጊዴስ።
LUK 24:40 ሄሳ ጊ ሲሚዲ ባ ቶሆታኔ ባ ኩሼታ ኢስታ ቤሲዴስ።
LUK 24:41 ኢስቲካ ኡፋይሳ ዳሮፔኔ ማላሌቴꬃፌ ዴንዲዳይሳን ቡሮ ኣማኖንታ ዲሺን ዬሱሲ፥ «ሄሳን ኣይኮ ሚዛዚ ዲዜ?» ጊዲ ኢስታ ኦይቺዴስ።
LUK 24:42 ኢስቲካ ሞሌ ጺጻ ኢሲ ባርስ ኢዛስ ኢሚዳ።
LUK 24:43 ኢዚካ ኤኪዲ ኢስታ ሲንꬃን ሚዴስ።
LUK 24:44 ኢዚካ፥ «ኢንቴናራ ታ ዲዛ ዎዴ፥ ‹ሙሴ ዎጋን ናቤታኒኔ ዬꬃ ማጻፋታን ታ ጊሻስ ጻፌቲዳይሲ ዉሪካ ፖሌታናስ ቤሴስ› ጋዳ ታ ኢንቴስ ዮቲዳ ታ ቃላይ ሃይሳኮ» ጊዴስ።
LUK 24:45 ሄ ዎዴ ጌሻ ማጻፋታ ኢስቲ ኤራና ማላ ዎዚና ኢስታስ ዶይዴስ።
LUK 24:46 ኢስታስካ፥ «ኪርስቶሲ ዋዬ ቤያና፤ ሄꬓንꬆ ጋላስ ሃይቆፔ ዴንዳና ጌቴቲ ጻፌቲዴስ።
LUK 24:47 ዬሩሳላሜፔ ዶሚዲ ኡባ ዴሬስ ናጋራፔ ሲሞይኔ ማሮቴꬂ ኢዛ ሱንꬃን ዮቴታና።
LUK 24:48 ኢንቴካ ሃይሳስ ማርካታ።
LUK 24:49 ታኒካ ታ ኣዋይ ኢሚዳ ኡፋይሳ ኢንቴስ ዬዳና፤ ኢንቴ ቃሴ ዎልቃ ቦላፌ ማይኣና ጋካናስ ዬሩሳላሜ ካታማን ታኪቴ» ጊዴስ።
LUK 24:50 ሄሳፌ ጉዬ ኢስታ ኤኪዲ ቢታኒያ ጌቴቲዛሶ ኬዚዴስ። ባ ኩሼታካ ዴንꬂዲ ኢስታ ኣንጂዴስ።
LUK 24:51 ኢስታ ኣንጂሼ ኢስታፌ ሻኬቲዲ ፑዴ ሳሎ ቢዴስ።
LUK 24:52 ኢስቲካ ኢዛስ ሆኪ ጎይኒዳ፤ ኬሂ ኡፋዬቲሼ ዬሩሳላሜ ሲሚዳ።
LUK 24:53 ኡባ ዎዴ ጾሳ ኬꬃን ጾሳ ጋላቲሼ ጋምኢዳ።
JOH 1:1 ቃላይ ካሴ ኮይሮ ዴስ። ቃላይካ ጾሳ ኣቻን ዴስ። ሄ ቃላይካ ጾሳ።
JOH 1:2 ኢዚ ኮይሮ ጾሳ ኣቻን ዴስ።
JOH 1:3 ሜꬌቴꬂ ዉሪ ኢዛን ሜꬌቲዴስ። ሜꬌቲዳዛን ኢዚ ባይንዳ ሜꬌቲዳይ ኢሲናካ ዱኩ።
JOH 1:4 ዴኦይ ኢዛን ዳዉስ፤ ሃና ዴኦያ ኣሳስ ፖኦ።
JOH 1:5 ፖኦይ ꬉማን ፖኢሴስ፤ ꬉማይ ፖኦ ሙሌካ ጾኔና።
JOH 1:6 ጾሳፌ ኪቴቲዳ ዮሃኒሳ ጌቴቲዛ ኢሳዴይ ዴስ።
JOH 1:7 ኢዛ ማርካቴꬃን ኣሲ ዉሪ ኣማናና ማላ ፖኦስ ማርካ ጊዲ ዪዴስ።
JOH 1:8 ኢዚ ፖኦ ጊሻስ ማርካታና ዪዴስ ኣቲን ኢዚ ባ ሁኤስ ፖኦ ጊዴና።
JOH 1:9 ኣስ ኡባስ ፖኦ ኢሚዛ ቱሙ ፖኦይ ሃይሳ ሃ ኣላሜዛን ዩሳን ዴስ።
JOH 1:10 ቃላይካ ካሴ ኣላሜን ዴስ፤ ኣላሜይካ ሜꬌቲዳይ ኢዛና። ጊዶ ኣቲን ኣላሜይ ኢዛ ኤሪቤና።
JOH 1:11 ኢዚ ባ ባጋታኮ ዪን ኢዛ ባጋቲ ኢዛ ኤኪቤቴና።
JOH 1:12 ጊዶ ኣቲን ኢዛ ኤኪዳይቲ ኢዛ ሱንꬃን ኣማኒዳይቲ ኢስቲ ጾሳ ናይታ ጊዳና ማላ ማታ ኢስታስ ኢሚዴስ።
JOH 1:13 ኢስቲካ ጾሳ ናይታ ጊዲዳይ ጾሳፌ ዬሌቲዳ ጊሻስ ኣቲን ኣሳ ዜሬꬃፌ ሄሲካ ኣሳ ዎጋን ዎይኮ ኣሾ ሼኔን ጊዴና።
JOH 1:14 ቃላይካ ኣስ ጊዲዴስ፤ ጾሳ ኪያቴꬃኒኔ ቱማን ኩሚዲ ኑናን ኣቂዴስ፤ ኢሲ ናስ ኣዋ ማታን ዲዛ ቦንቾ ሚሳቲዛ ኢዛ ቦንቾ ኑ ቤኢዶስ።
JOH 1:15 ዮሃኒሲካ፥ «ታፔ ጉዬራ ዪዛይሲ ታፔ ኣꬌስ። ጋሶይካ ኢዚ ታፔ ካሴካ ዴስ ጋዳ ታ ኢንቴስ ዮቲዳይሲ ሄኮ ሃይሲ ኢዛኮ!» ጊ ማርካቲዴስ።
JOH 1:16 ኢዛ ኩሜꬃ ኪያቴꬃን ኑ ዉሪ ኪያቴꬃ ቦላ ኪያቴꬅ ኤኪዶስ።
JOH 1:17 ዎጋይ ሙሴ ባጋራ ኢሜቲዴስ፤ ኪያቴꬂኔ ቱማይ ጊዲኮ ዬሱስ ኪርስቶሳ ባጋራ ኑስ ዪዴስ።
JOH 1:18 ጾስ ቤኢዳይ ኦኒካ ባ። ጊዶ ኣቲን ጾሳ ኣዋ ማታን ዲዛ ጾሳ ና ኢሶይ ጻላላ ኢዛ ቆንጪሲዴስ።
JOH 1:19 ኣይሁዳታ ዳናቲ ዬሩሳላሜፔ ቄሴታኔ ሌዌ ናይታ ዮሃኒሳኮ ኪቲዲ፥ «ኔ ኦኔ?» ጊ ኦይቺሺን፥
JOH 1:20 ዮሃኒሲ፥ «ታኒ ኪርስቶሳ ጊዲኬ» ጊዲ ጌሺ ማርካቲዴስ ኣቲን ማርካታናስ ኢጺቤና።
JOH 1:21 ኢስቲካ፥ «ሂስቲን ኔ ኦኔ? ኔ ኤላሳ?» ጊ ኦይቺዳ፤ ኢዚካ፥ «ጊዲኬ» ጊዲ ኢስታስ ዛሪዴስ። ኢስቲካ፥ «ኢዚ ያና ጌቴቲዳ ናቤይ ኔኔ?» ጊዳ። ኢዚካ፥ «ኣካይ ታና ጊዲኬ» ጊዴስ።
JOH 1:22 ኢስቲ ቃሴ፥ «ሂስቲን ኔ ኦኔ? ኑና ኪቲዳ ኣሳስ ኑ ዮታና ማላ ኔ ኔና ኦና ጋይ?» ጊዳ።
JOH 1:23 ኢዚካ፥ «ናቤ ኢሳያሲ ዮቲዳ ማላ ታኒ፥ ‹ጾሳ ኦጌ ሱሪሲቴ› ጊሼ ባዞ ቢታን ዋሲዛዴ ቃላ ጊሪሳ» ጊዴስ።
JOH 1:24 ፋርሳዌታፔ ኪቴቲዳ ኢሲ ኢሲ ኣሳቲ፥
JOH 1:25 ሄሳ ጊሻስ፥ «ኔ ጾሲ ኪቲዳዴ ዎይኮ ቡሮ ያና ጌቴቲዳ ናቤይ ኔና ጊዶንታ ጊዲኮ ሂስቲን ኣዛስ ኑና ጻማቃይ?» ጊዲ ኢዛ ኦይቺዳ።
JOH 1:26 ዮሃኒሲካ ኢስታስ፥ «ታ ሃꬃን ጻማቃይስ፤ ጊዶ ኣቲን ኢንቴ ኤሮንታዴይ ኢንቴ ጊዶን ኤቂዴስ።
JOH 1:27 ታፔ ጉዬራ ያናይሲ ኢዛ፤ ታ ኢዛ ጫማ ቃሾ ቢርሻናስ ቤሲዛዴ ጊዲኬ» ጊዴስ።
JOH 1:28 ሃይሲ ዉሪ ሃኒዳይ ዮሃኒሲ ጻማቂዛ ዮርዳኖሴ ሻፋፔ ሄ ፒንꬃን ዲዛ ቢታኒያ ጌቴቲዛ ካታማና።
JOH 1:29 ዎንቴꬃ ጋላስ ዮሃኒሲ ዬሱሲ ባኮ ዪሺን ቤኢዲ፥ «ዴሬ ናጋራ ቢታፌ ዲጋና ጾሳ ዶርሲ ሄኮ ሃይሲች!
JOH 1:30 ‹ታፔ ጉዬራ ያናይሲ ኢዚ ታፔ ካሴካ ዲዛ ጊሻስ ታፔ ኣꬌስ› ጋዳ ታ ኢንቴስ ዮቲዛይ ሃይሲች!
JOH 1:31 ታኒካ ታ ባጋራ ኢዛ ኤራቤኬ፤ ጊዲኮካ ኢዚ ኢስራኤሌ ዴሬስ ቆንጫና ማላ ታ ሃꬃን ጻማቃሼ ያዲስ» ጊዴስ።
JOH 1:32 ካሌꬂዲካ ዮሃኒሲ ሂዝጊ ማርካቲዴስ፤ «ጺሎ ኣያናይ ሃራጴ ካፎ ሚሳቲዲ ሳሎፔ ዎꬊሺኒኔ ኢዛ ቦላ ኡቲሺን ቤያዲስ።
JOH 1:33 ታ ታ ባጋራ ኢዛ ኤሪኬ ሺን ታ ሃꬃን ጻማቃና ማላ ታና ኪቲዳዴይ፥ ‹ጺሎ ኣያናይ ኢዛ ቦላ ዎꬊ ሼምፒሺን ኔ ቤያናዴይ ጺሎ ኣያናን ሜጫናይ ኢዛ› ጊዲ ታስ ዮቲዴስ።
JOH 1:34 ታኒካ ሄሳ ቤያዲስ። ሄሳ ጊሻስ ኢዚ ጾሳ ና ጊዲዳይሳ ታ ማርካታይስ» ጊዴስ።
JOH 1:35 ዎንቴꬃ ጋላስ ዮሃኒሲ ባና ካሊዛ ናምኣታራ ሄን ኤቂዴስ።
JOH 1:36 ዬሱሲ ኢዛ ኣቻራ ኣꬊሺን ዮሃኒሲ ቤኢዲ፥ «ጾሳ ዶርሲ ሄኮ ሃይሲች!» ጊዴስ።
JOH 1:37 ዮሃኒሳ ካሊዛ ናምኣቲ ሄሳ ሲዪዲ ዬሱሳ ካሊዳ።
JOH 1:38 ኢስቲ ኢዛ ካሊሺን ዬሱሲ ጉዬ ዩዪ ጼሊዲ፥ «ኣይ ኮዬቲ?» ጊዴስ። ኢስቲካ፥ «ኣስታማሬ! ኔ ዱሳሶይ ኣዋ?» ጊዳ።
JOH 1:39 ኢዚካ ኢስታ፥ «ሃ ዪዲ ቤኢቴ» ጊዴስ፤ ሄሳ ጊሻስ ቢዲ ኢዚ ኣዋን ዲዛኮ ቤኢዳኔ ሄ ጋላስ ኢዛራ ኢሲፌ ፔኢዳ፤ ዎዴይካ ጌዴ ታሙ ሳቴሶ ቢዴስ።
JOH 1:40 ዮሃኒሲ ዮቲዳ ቃላ ሲዪዲ ዬሱሳ ካሊዳ ናምኣታፔ ኢሶይ ሲሞና ጴጽሮሳ ኢሻ ኢንዲራሳ።
JOH 1:41 ኢንዲራሲ ኮይሮ ባ ኢሻ ሲሞናኮ ቢዲ፥ «ጾሲ ኪቲዳ ኪርስቶሳ ኑ ዴሚዶስ!» ጊዴስ።
JOH 1:42 ሄሳፌ ጉዬ ኢንዲራሲ ሲሞና ዬሱሳኮ ኤኪ ቢዴስ። ዬሱሲካ ኢዛ ቲሺ ሂስቲ ጼሊዲ፥ «ሃይሶ! ኔ ዮና ና ሲሞና፤ ሃይሳፌ ጉዬ ኔ ኬፋ ጌቴታና» ጊዴስ። ኬፋ ጉሲ ጴጽሮሳ ጉሳ ዎይኮ ዛላ ሹች ጉሳ።
JOH 1:43 ዎንቴꬃ ጋላስ ዬሱሲ ጋሊላ ባናስ ኮዪዴስ። ፒሊጶሳካ ዴሚዲ፥ «ታና ካላ» ጊዴስ።
JOH 1:44 ፒሊጶሲካ ኢንዲራሳ ማላኔ ጴጽሮሳ ማላ ቤቴሳይዳ ካታማ ኣሳ።
JOH 1:45 ፒሊጶሲ ናቲናኤሌ ዴሚዲ፥ «ሙሴይ ዎጋ ማጻፋን ቃሴ ናቤቲካ ቡሮፔ ሃናናይሳ ዮቲዛ ባ ማጻፋታን ኢዛ ጊሻስ ጻፊዳ ኣዴዛ ኑ ዴሚዶስ። ኢዚካ ዮሴፌ ና ናዚሬቴ ዬሱሳኮ!» ጊዴስ።
JOH 1:46 ናቲናኤሌይ ቃሴ፥ «ናዚሬቴፔ ሎኦ ሚሺ ቤቲ ኤሪዜ?» ጊ ኦይቺን ፒሊጶሲ ኢዛ፥ «ሃ ያዳ ቤያ» ጊዴስ።
JOH 1:47 ናቲናኤሌይ ዬሱሳ ቤያና ዪሺን ዬሱሲ ቤኢዲ ኢዛ፥ «ሄኮ! ጌኔይ ባይንዳ ቱሙ ኢስራኤሌ ኣሳ!» ጊዲ ኢዛ ጊሻስ ዮቲዴስ።
JOH 1:48 ናቲናኤሌይካ ዛሪዲ፥ «ታና ዎስታ ኤራዲ?» ጊ ኦይቺን ዬሱሲካ፥ «ፒሊጶሲ ኔና ጼይጋናፔ ካሴ ባላሴ ሚꬃ ጋርሳን ኔ ዲሺን ታ ኔና ቤያዲስ» ጊ ዛሪዴስ።
JOH 1:49 ናቲናኤሌይ፥ «ኣስታማሬ! ኔ ጾሳ ና፤ ኔ ኢስራኤሌ ካዎ» ጊዴስ።
JOH 1:50 ዬሱሲካ ኢዛስ፥ «ኔ ኣማኒዳይ፥ ‹ታ ኔና ባላሴ ሚꬃ ጋርሳን ቤያዲስ› ጊዳ ጊሼ? ኔ ቡሮ ሄሳፌ ኣꬊዛ ዳሮ ሚሽ ቤያና።
JOH 1:51 ጉጂዲካ ታ ኢንቴስ ቱሙ ጋይስ፤ ቡሮ ሳሎይ ዶዬቲን ጾሳ ኪታንቻቲ ኣሳ ና ቦላ ዎꬊሺኒኔ ኬዚሺን ኢንቴ ቤያና» ጊዴስ።
JOH 2:1 ሄꬓንꬆ ጋላስ ጋሊላ ጊዶን ዲዛ ቃና ጌቴቲዛ ካታማን ሳርጌይ ዴስ፤ ዬሱሳ ኣዬያካ ሄን ዳዉስ።
JOH 2:2 ዬሱሲኔ ኢዛ ካሊዛይቲካ ሳርጌዛሶ ጼይጌቲዳ።
JOH 2:3 ሳርጌዛሶን ዎይኔፔ ኣጌቲዳ ኡሻይ ዉሪን ዬሱሳ ኣያ ዬሱሳ፥ «ዎይኔ ኡሻይ ዉሪዴስ» ጋዱስ።
JOH 2:4 ዬሱሲካ ኢዞ፥ «ኣዬ! ታስ ኔናራ ኣዚ ዲዜ? ታ ዎዴይ ጋኪቤና» ጊዴስ።
JOH 2:5 ሄ ዎዴ ዬሱሳ ኣዬያ ማራማ ሄን ጋዴዛን ዲዛ ኦሳንቻታ፥ «ኢዚ ኢንቴና ጊዛይሳ ኦꬂቴ» ጋዱስ።
JOH 2:6 ኣይሁዳታስ ጌሾ ዎጋይ ዲዛ ጊሻስ ሹቻፌ ሜꬌቲዳ ኡሱፑን ባꬃቲ ሄን ዴቴስ፤ ኢስቲካ ኢሶይ ኢሶይ ናምኡ ኦቶ ዎይኮ ሄꬑ ኦቶ ሃꬄ ኦይኬቴስ።
JOH 2:7 ዬሱሲ ኦሳንቻታ፥ «ባꬃታ ሃꬄ ኩንꬂቴ» ጊን ኢስቲካ ባꬃታ ዶና ጋካናስ ሲልቲ ሂስቲ ኩንꬂዳ።
JOH 2:8 ሄሳፌ ጉዬ ኦሳንቻታ፥ «ኣኔ ሃኢ ዱቂዲ ሳርጌዛ ኣላፌዛስ ኢዛፔ ኢሚቴ» ጊዴስ። ኢስቲካ ዱቂ ዱቂ ኢሚዳ።
JOH 2:9 ኣላፌዚካ ዎይኔ ኡሻን ላሜቲዳ ሃꬃ ጋንጺ ጼሊዲ ኢዚ ኣዋፔ ዪዳኮ ኤሪቤና። ሃꬃ ዱቂዳይቲ ጊዲኮ ኤሬቴስ፤ ሄሳ ጊሻስ ሳርጌዛ ኣላፌይ ሚሺራዛ ጼይጊዲ፥
JOH 2:10 «ኣሲ ዉሪ ሳርጌሶን ኮይሮ ሎኦ ኡሹ ሺሼስ፤ ኣሳይ ማꬆቲዳፔ ጉዬ ኢታ ኤሄስ፤ ጊዶ ኣቲን ኔ ጊዲኮ ሎኦ ኡሹ ሃኖ ጋካናስ ዎꬃ ጋዳሳ» ጊዴስ።
JOH 2:11 ዬሱሲ ሄሳ ማላሊሲዛ ማላታ ኡባፌ ኮይሮ ጋሊላ ጌቴቲዛ ዴሬን ቃና ካታማን ኦꬂዴስ፤ ባ ቦንቾካ ሄሳ ማላን ቆንጪሲዴስ፤ ኢዛ ካሊዛይቲካ ኢዛን ኣማኒዳ።
JOH 2:12 ሄሳፌ ጉዬ ዬሱሲ ባ ኣዬይራ ባ ኢሻታራኔ ባና ካሊዛይታራ ዱጌ ቂፊርናሆሜ ዎꬊዲ ሄን ጉꬃ ዎዴ ታኪዳ።
JOH 2:13 ኣይሁዳታ ፓዚጋ ባኣሌይ ማቲዳ ጊሻስ ዬሱሲ ዬሩሳላሜ ቢዴስ።
JOH 2:14 ጾሳ ኬꬃ ጊቤ ጊዶን ቦራታ፥ ዶርሳታኔ ሃራጴታ ባይዚዛይታ ቃሴካ ሚሼ ላሚዛይቲ ሚሼ ላሚሺን ዴሚዴስ።
JOH 2:15 ሄሳ ቤኢዲ ዎዶሮ ጹርቃፌ ዶቂ ኤኪዲ ኣሳኔ ቦራታካ ጾሳ ኬꬃ ጊቤፌ ኬሲዴስ፤ ሚሽ ላሚዛይታ ሚሻካ ꬋርጪዲ ኢስታ ጻራጴዛታካ ሺሪ ሺሪ ዬጊዴስ።
JOH 2:16 ሃራጴ ባይዚዛ ኣሳካ፥ «ሃይሳ ኡባ ጌዴ ዲጊቴ! ታ ኣዋ ኬꬃ ዛልኤ ኬꬅ ሂስቶፍቴ» ጊዴስ።
JOH 2:17 ሄ ዎዴ ኢዛ ካሊዛይቲ፥ «ኔ ኬꬃ ሚሻይ ታና ታማ ማላ ጹጌስ» ጌቴቲ ጻፌቲዳ ቃላ ቆፓ።
JOH 2:18 ሄሳፌ ጉዬ ኣይሁዳ ኣሳ ሃላቃቲ ዬሱሳ፥ «ኔ ሃይሳ ዉርሳ ኦꬃናስ ሼኔይ ኔስ ዲዛይሳ ቆንጪሳናስ ኔ ኑና ኣይ ማላሊሲዛ ማላታ ቤሳኔ?» ጊ ኦይቺዳ።
JOH 2:19 ዬሱሲካ ኢስታስ፥ «ኣኔ ሃይሳ ጾሳ ኬꬃ ላሊቴ፤ ታ ኢዛ ሄꬑ ጋላሳራ ዛራ ኬጻና» ጊ ዛሪዴስ።
JOH 2:20 ኢስቲካ ኢዛ፥ «ሃይሳ ጾሳ ኬꬃ ኬጻናስ ካሴ ኦይዱ ታማኔ ኡሱፑን ላይꬅ ኤኪዴስ፤ ሂስቲን ኔኒ ሄꬑ ጋላሳራ ኬጻ ኩንꬃኔ?» ጊ ኦይቺዳ።
JOH 2:21 ጊዶ ኣቲን ዬሱሲ፥ «ጾሳ ኬꬅ» ጊዳይ ባ ኣሳቴꬃ ጊሻሳ።
JOH 2:22 ሄሳ ጊሻስ ዬሱሲ ሃይቂ ዴንዲን ኢዛ ካሊዛይቲ ሄ ዮኦዛ ዩሺ ቆፒዲ ኤሪዳኔ ሃይሳ ካሴ ማጻፋን ጻፌቲዳይሳ ዬሱሲ ኢስታስ ካሴቲ ዮቲዳ ቃላ ኣማኒዳ።
JOH 2:23 ፓዚጋ ባኣሌ ጋላስ ዬሱሲ ዬሩሳላሜን ዲሼ ኦꬂዳ ማላታታ ቤኢዲ ዳሮ ኣሳይ ኢዛ ኣማኒዴስ።
JOH 2:24 ቃሴ ዬሱሲ ኣሳ ኡባ ኤሪዛ ጊሻስ ኦናካ ኣማኒቤና።
JOH 2:25 ኢዚ ኣሳ ዎዚናን ዲዛ ኡባ ኤሪዛ ጊሻስ ኦኒካ ኢዛስ ኣሳ ጊሻስ ዮታናስ ኮሺቤና።
JOH 3:1 ፋርሳዌታ ባጋ ኣስ ኣይሁዳታ ሃላቃታፔ ኢሲ ኒቆዲሞሳ ጌቴቲዛ ኣሲ ዴስ።
JOH 3:2 ኢዚ ቃማራ ዬሱሳኮ ቢዲ፥ «ኣስታማሬ! ጾሲ ኢዛራ ዲዛዴ ጊዲኮፌ ኣቲን ሃይታ ኔ ኦꬂዛ ማላሊሲዛ ማላታታ ኦꬃና ዳንዳይዛዴይ ዴና፤ ሄሳ ጊሻስ ኔኒ ጾሳ ኣቻፌ ዪዳ ኣስታማሬ ጊዲዳይሳ ኑ ኤሮስ» ጊዴስ።
JOH 3:3 ዬሱሲካ ኢዛስ ዛሪዲ፥ «ታ ኔስ ቱሙ ጋይስ፤ ኣሲ ናምኣንꬆ ዬሌቶንታ ኣጊኮ ጾሳ ካዎቴꬅ ቤያናስ ዳንዳዬና» ጊዴስ።
JOH 3:4 ኒቆዲሞሲካ ዛሪዲ፥ «ሂስቲን ኣሲ ጪሚዳፔ ጉዬ ዋኒዲ ናምኣንꬆ ዬሌታና ዳንዳይዜ? ቃሴካ ባ ኣዪ ኡሎን ሲሚ ጌሊዲ ዬሌታኔ?» ጊዲ ኦይቺዴስ።
JOH 3:5 ዬሱሲካ ኢዛስ፥ «ታ ኔስ ቱሙ ጋይስ፤ ኣሲ ሃꬃፌኔ ጺሎ ኣያናፔ ዬሌቶንታ ዲሼ ጾሳ ካዎቴꬅ ጌላናስ ዳንዳዬና።
JOH 3:6 ኣሳፔ ዬሌቲዳይ ኣሳ፤ ኣያናፔ ዬሌቲዳይ ኣያና።
JOH 3:7 ሄሳ ጊሻስ፥ ‹ኢንቴ ናምኣንꬆ ዬሌታናስ ኮሼስ› ታ ኔና ጊዳ ጊሻስ ማላሌቶፋ።
JOH 3:8 ጫርኮይ ባ ኮዪዳ ባጋ ጫርኬስ፤ ኔኒ ጫርኮስ ጊሪስ ሲያሳ ኣቲን ኢዚ ኣዋፔ ዪዛኮኔ ኣዋ ቢዛኮ ኤራካ። ኣያናፔ ዬሌቲዳይካ ሄሳ ማላ» ጊዴስ።
JOH 3:9 ኒቆዲሞሲ፥ «ሃይሲ ዋኒ ሃናና ዳንዳይዜ?» ጊዲ ኦይቺዴስ።
JOH 3:10 ዬሱሲካ ኢዛስ፥ «ኢስራኤሌ ኣስታማሬ ጊዳ ኡታዳ ሄሳ ኔ ኤርኪ?
JOH 3:11 ታ ኔስ ቱሙ ጋይስ፤ ኑኒ ኑ ኤሪዛይሳ ዮቶስ። ኑ ቤኢዳይሳ ማርካቶስ፤ ጊዶ ኣቲን ኢንቴ ኑ ማርካቴꬅ ኤኬኬታ።
JOH 3:12 ታ ኢንቴስ ሃይሳ ሃ ቢታ ዮኦ ዮቲን ኣማኖንታ ኢጺኮ ሳሎ ሚሽ ዮቲኮ ዎስቲ ኢንቴ ኣማናኔ?
JOH 3:13 ሳሎፔ ዱጌ ዎꬊዳ ኣሳ ናፔ ኣቲን ፑዴ ሳሎ ኬዚዳይ ሃራይ ኦኒካ ዴና።
JOH 3:14 «ባዞ ቢታን ሙሴይ ሾሽ ꬎቁ ሂስቲ ካቂዳይሳꬆ ሄሳꬆካ ኣሳ ናይ ꬎቃሶሆን ካቄታናስ ቤሴስ።
JOH 3:15 ሄሲካ ኢዛን ኣማኒዛዴይ ዉሪካ ሜርና ዴኦ ዴማናሳ።
JOH 3:16 ጾሳ ና ኣማኒዛይ ዉሪ ሜርና ዴኦ ዴማናፔ ኣቲን ꬋዮንታ ማላ ጾሲ ሃይሳ ኣላሜዛ ዳሮ ሲቂዳ ጊሻስ ባ ሜጺ ኢሲ ናዛ ኢሚዴስ።
JOH 3:17 ጾሲ ባ ናዛ ዱጌ ኣላሜ ኪቲዳይ ኣላሜ ኣሳይ ኢዛን ኣማኒዲ ኣታና ማላሳ ኣቲን ኢዚ ኣላሜ ኣሳ ቦላ ፒርዳናስ ጊዴና።
JOH 3:18 «ኢዛ ኣማኒዛዴ ቦላ ፒርዴቴና። ኢዛ ኣማኖንታዴይ ጊዲኮ ጾሳ ና ኢሲኔዛን ኣማኖንታ ጊሻስ ካሴካ ፒርዴቲ ኡቲዴስ።
JOH 3:19 ፒርዳይካ ሃይሳ ማላ፥ ፖኦይ ሃ ኣላሜ ዪዴስ ሺን ኣሳስ ኦሶይ ኢታ ጊዲዳ ጊሻስ ኣሳይ ፖኦፔ ኬሂ ꬉማ ዶሲዴስ።
JOH 3:20 ኢታ ኦꬂዛዴይ ዉሪካ ፖኦ ዶሴና። ኢዚ ኦꬂዛ ኢታ ኦሶይ ቆንጬ ኬዞንታ ማላ ኢዚ ባ ሁኤስ ፖኦይ ዲዛሶ ኬዜና።
JOH 3:21 ቱሙ ኦꬂዛዴይ ጊዲኮ ፖኦይ ዲዛሶ ዬስ። ኢዚ ፖኦይ ዲዛሶ ዪዛ ጋሶይካ ጾሳ ኣዛዞ ማላ ኢዚ ኦꬂዳ ኦሶይ ቆንጫና ማላሳ» ጊዴስ።
JOH 3:22 ሄሳፌ ጉዬ ዬሱሲ ባና ካሊዛይታራ ዩሁዳ ዴሬ ቢዴስ፤ ሄንካ ኣሳ ጻማቂሼ ኢስታራ ጉꬃ ዎዴ ጋምኢዴስ።
JOH 3:23 ሄ ዎዴ ሳሊሜ ኣቻን ሄኖኔ ጌቴቲዛሶን ዳሮ ሃꬂ ዲዛ ጊሻስ ዮሃኒሲ ኣሳ ጻማቂሺን ኣሳይካ ኢዛኮ ቢዲ ጻማቄቲዴስ።
JOH 3:24 ሄ ዎዴ ዮሃኒሲ ቡሮ ቃሾ ኬꬄ ጌሊቤና።
JOH 3:25 ሄ ዎዴ ዮሃኒሳ ካሊዛይታ ጊዶኒኔ ኢሲ ኢሲ ኣይሁዳ ኣሳታ ጊዶን ኣይሁዳታ ጌሾ ዎጋ ጊሻስ ጊታ ፓላማይ ዴንዲዴስ።
JOH 3:26 ዮሃኒሳ ካሊዛይቲ ኢዛኮ ሺቂዲ፥ «ኣስታማሬ! ኔናራ ዮርዳኖሴ ሻፋ ፒንꬃን ኢሲፌ ዲሺን ኔ ኢዛ ጊሻስ ማርካቶ ኣዴዚ ሄኮ ጻማቄስ፤ ኣሳይካ ኢዛኮ ቤስ» ጊዳ።
JOH 3:27 ዮሃኒሲካ ኢስታስ፥ «ኦናስካ ጾሳፌ ኢሜቶንታ ዲሺን ኣይኮይካ ዳና ዳንዳዬና።
JOH 3:28 «ታኒ ኢዛፔ ሲንꬃታ ኪቴታዲስ ኣቲን ያና ጊዳ ኪርስቶሲ ታና ጊዲኬ» ጋዳ ታ ኢንቴስ ዮቶይሳስ ኢንቴ ኢንቴ ሁኤራ ታ ማርካታ።
JOH 3:29 ሳርጌ ዎዴ ኤካና ሚሺራይ ዲዛዴይ ኢዚካ ሚሺራ፤ ሚሺራ ላጌይ ጊዲኮ ሚሺራዛ ኣቻን ኤቂዲ ሚሺራዚ ጊዛዝ ሲዬስ፤ ሚሺራዛ ቃላ ሲዪዲ ኡፋዬቴስ፤ ሄሳ ጊሻስ ታ ኡፋይሲ ሃኢ ፖሌቲዴስ።
JOH 3:30 ኢዚ ꬎቁ ꬎቁ ጋና ማላ ታኒካ ዚቂ ዚቂ ጋና ኮሼስ።
JOH 3:31 «ቦላፌ ዪዛዴይ ኡባፌ ቦላ፤ ጋርሳ ቢታፌ ዪዛዴይ ኢዚ ቢታፌኔ ቢታዝ ዮቴስ፤ ሳሎፔ ዪዛዴይ ኢዚ ኡባፌ ቦላ።
JOH 3:32 ኢዚ ባ ቤኢዳዚኔ ባ ሲዪዳዝ ማርካቴስ፤ ጊዶ ኣቲን ኢዛ ማርካቴꬅ ኤኪዛዴይ ዴና።
JOH 3:33 ኢዛ ማርካቴꬅ ኤኪዛዴይ ጊዲኮ ጾሳ ቱማንቻ ጊዲዳይሳ ቆንጪሴስ።
JOH 3:34 ጾሲ ኪቲዳዴይ ጾሳ ቃላ ዮቴስ። ጾሲካ ኢዛዴስ ባ ኣያና ማኪ ኢሜና።
JOH 3:35 «ኣዋይ ባ ና ዶሴስ። ሃኒዛ ዮኦ ኡባ ኢዛ ኩሼን ኣꬂ ኢሜስ።
JOH 3:36 ናዛን ኣማኒዛዴስ ሜርና ዴኦይ ዴስ። ናዛን ኣማኖንታይ ጊዲኮ ጾሳ ሃንቆይ ኢዛ ቦላ ዳና ኣቲን ዴኦ ዴሜና» ጊዴስ።
JOH 4:1 ሄ ዎዴ ዬሱሲ ዮሃኒሳፔ ቦላራ ዳሮ ኣሳ ባና ካሊዛዴ ኦꬂዛይሳኔ ጻማቂዛይሳ ፋርሳዌቲ ሲዪዳ።
JOH 4:2 ጊዶ ኣቲን ጻማቂዛይቲ ኢዛ ካሊዛይታፔ ኣቲን ኢዚ ጻማቂቤና።
JOH 4:3 ኢዛ ጊሻስ ሃሳዬቲዛይሳ ፋርሳዌቲ ሲዪዳይሳ ዬሱሲ ኤሪዲ ዩሁዳ ዴሬ ኣጊዲ ጋሊላ ዴሬ ሲሚ ቢዴስ።
JOH 4:4 ኢዚ ሄ ቢሺን ሳማሪያራ ኣꬊ ባናይሲ ኢዛስ ኣቶንታዝ ጊዲዴስ።
JOH 4:5 ሄሳ ጊሻስ ሲካሮ ጌቴቲዛሶ ሳማሪያ ካታማ ቢዴስ። ሲካራ ያቆቤይ ባ ና ዮሴፌስ ኢሚዳ ቢታ ኣቻን ዳዉስ።
JOH 4:6 ሄንካ ያቆቤ ሃꬃ ኦላይ ዴስ። ዬሱሲ ኦጌ ሄሜቲ ዳቡርዳ ጊሻስ ሄ ኦላይ ኣቻን ኡቲዴስ። ዎዴይካ ጋላሳፌ ኡሱፑን ሳቴ ማላ።
JOH 4:7 ሄ ዎዴ ኢሲ ሳማሪያ ዴሬ ማጫስ ዲዛራ ሃꬄ ዱቃናስ ሄ ሃꬃ ኦላኮ ያዱስ። ዬሱሲካ ኢዞ፥ «ታና ሃꬄ ኡሻ» ጊዴስ።
JOH 4:8 ሄሲ ሃኒሺን ዬሱሳ ካሊዛይቲ ቁማ ሻማና ካታማ ቢዳ።
JOH 4:9 ሂና ሳማሪያ ማጫሳያ ዬሱሳ፥ «ኔ ኣይሁዳ ኣስ ጊዳ ኡታዳ ዋናዳ ታና ሳማሪያ ማጫስ፥ ‹ሃꬄ ኡሻ› ጋ ኦይቻይ?» ጋዱስ፤ ኢዛ ሄሳ ጊዳይ ኣይሁዳ ኣሳሲኔ ሳማሪያ ኣሳስ ጋጎቴꬂ ዶንታ ጊሻሳ።
JOH 4:10 ዬሱሲካ ኢዚስ፥ «ጾሳ ኢሞታይኔ ኔና፥ ‹ታና ሃꬄ ኡሻ› ጊዛዴይ ኢዚ ኦናኮኔ ኔ ኤሪዛኮ ኔ ኢዛ ዎሳናስ ቤሴስ። ኢዚካ ኔስ ዴኦ ሃꬄ ኢማናኮሺን» ጊዴስ።
JOH 4:11 ኢዛካ ኢዛስ፥ «ጎዶ! ኔስ ሃꬄ ዱቂዛ ሚሺ ዴና፤ ሃꬃ ኦላይካ ዳሮ ጪማ፤ ሂስቲን ኔ ዴኦ ሃꬅ ኣዋፔ ዴማኔ?
JOH 4:12 ኔ ሃይሳ ሃꬃ ኦላዛ ኑስ ኢሚዳ ኑ ኣዋ ያቆቤፔ ኣꬋይ? ኢዚኔ ኢዛ ናይቲ ኢዛ ሜሄቲካ ሃይሳ ሃ ኦላፌ ሃꬅ ኡዪዳ» ጋዱስ።
JOH 4:13 ዬሱሲ ኢዚስ፥ «ሃይሳ ሃ ሃꬃፌ ኡዪዛይ ዉሪ ናምኣንꬆ ሳሜቲዲ ዛሪ ሃራ ኡያናሺን።
JOH 4:14 ታ ኢሚዛ ሃꬄ ኡዪዛዴይ ጊዲኮ ሜርናስ ሙሌካ ሳሜቴና፤ ጋሶይካ ታ ኢሚዛ ሃꬅ ኡዪዛዴስ ሜርና ዴኦስ ፑልቲዛ ፑልቶ ሃꬄ ጊዳና» ጊዴስ።
JOH 4:15 ማጫሳያካ፥ «ጎዶ! ሃይሳፌ ጉዬ ታና ሃꬂ ሳሞንታ ማላኔ ቃሴካ ታ ሃꬄ ዱቃና ሃ ዮንታ ማላ ሄሳ ኔ ጊዛ ሃꬃ ማላ ሃꬄ ታስ ኢማርኪ?» ጋዱስ።
JOH 4:16 ዬሱሲካ ኢዞ፥ «ባዳ ኔ ኣዚና ጼይጋ ኤካዳ ያ» ጊዴስ።
JOH 4:17 ማጫሳያካ ዛራዳ፥ «ታስ ኣዚናይ ዴና» ጋዱስ፤ ኢዛ ሂዝጊን ዬሱሲ፥ « ‹ኔ ታስ ኣዚናይ ዴና› ጉሳይ ቱሙኮ።
JOH 4:18 ጋሶይካ ካሴ ኔስ ኢቻሹ ኣዚናቲ ዴቴስ፤ ቃሴ ሃኢ ኔናራ ዲዛይሲ ኔ ኣዚና ጊዴና፤ ሄሳ ጊሻስ ኔ ቱሙ ጋዳሳ» ጊዴስ።
JOH 4:19 ማጫሳያ ኢዛስ፥ «ጎዶ! ኔኒ ናቤ ጊዲዳይሳ ታ ሃኢ ኤራዲስ።
JOH 4:20 ካሴ ኑ ኣዋቲ ሃይሳ ዙማ ቦላ ጎይኒዳ፤ ኢንቴ ቃሴ፥ ‹ኣሳይ ጎይናናስ ቤሲዛሶይ ዬሩሳላሜንኮ!› ጌታ» ጋዱስ።
JOH 4:21 ዬሱሲካ ኢዚስ፥ «ሃኔ ማጫሳዬ፥ ጾሳ ኣዋስ ሃይሳ ዙማ ቦላ ዎይኮ ዬሩሳላሜን ኢንቴ ጎይኖንታ ዎዴይ ያናይሳ ኣማና።
JOH 4:22 ኢንቴ ኢንቴ ኤሮንታ ጾሳስ ጎይኔታ፤ ኑ ጊዲኮ ኣሳስ ኣቶቴꬂ ኣይሁዳፔ ጊዲዳ ጊሻስ ኑኒ ኑ ኤሪዛ ጾሳስ ጎይኖስ።
JOH 4:23 ጊዶ ኣቲን ቱሙ ጎይኒዛይቲ ጾሳ ኣዋስ ኣያናኒኔ ቱማን ጎይኒዛ ዎዴይ ቡሮ ያና፤ ሃራይ ኣቶሺን ሃኢካ ዪዴስ። ጾሳይ ኣዋይካ ኮይዛይ ሄሳ ማላ ጎይኒዛይታ።
JOH 4:24 ጾሲ ባ ሁኤስ ኣያና፤ ኢዛ ጎይኒዛይቲ ኣያናኒኔ ቱማን ጎይናናስ ቤሴስ» ጊዴስ።
JOH 4:25 ማጫሳያካ፥ «ኪርስቶሲ ያናይሳ ታ ኤራይስ፤ ኢዚ ዪዲ ሃኒዛዝ ኡባ ኑስ ዮታና» ጋዱስ።
JOH 4:26 ዬሱሲካ ኢዚስ፥ «ሃኢ ኔናራ ሃሳይዛይ ታ ኢዛ» ጊዴስ።
JOH 4:27 ሄሲ ሃኒሺን ኢዛ ካሊዛይቲ ባ ቢዳሶፔ ሲሚዳ። ዬሱሲ ማጫሳራ ሃሳይዛይሳ ማላሌቲዳ፤ ጊዶ ኣቲን፥ «ሃኔ ኣይ ኮያይ? ዎይኮ ሃኒራ ኣዛስ ሃሳያይ?» ጊዲ ኦኒካ ኦይቺቤና።
JOH 4:28 ሄሳፌ ጉዬ ማጫሳያ ኦቶዛ ሄን ኣጋጋዳ ጌዴ ካታማ ባዳ ኣሳስ፥
JOH 4:29 «ታ ኦꬂዳዝ ዉርሲ ታስ ዮቲዳዴ ሃ ዪዲ ቤኢቴ፤ ኦኔ ኤሪዛይ ጾሲ ቲይዳ ኪርስቶሲ ኢዛኮኔ!» ጋዱስ።
JOH 4:30 ኣሳይካ ካታማፔ ኬዚዲ ዬሱሳኮ ቢዴስ።
JOH 4:31 ሄ ዎዴ ዬሱሳ ካሊዛይቲ ዬሱሳ፥ «ኣስታማሬ! ቁማ ማ» ጊዲ ዎሲዳ።
JOH 4:32 ኢዚ ቃሴ፥ «ኢንቴ ኤሮንታይ ታ ሚዛ ቁማይ ታስ ዴስ» ጊዴስ።
JOH 4:33 ሄሳ ጊሻስ ኢዛ ካሊዛይቲ፥ «ኣይኮ ሚዛ ካꬅ ኣሲ ኢዛስ ኤሂዴሻ?» ጊዲ ባ ጊዶን ሃሳዬቲዳ
JOH 4:34 ዬሱሲካ ኢስታስ ዛሪዲ፥ «ታ ቁማይ ታና ኪቲዳ ታ ኣዋ ሼኔ ኦሶኔ ኢዛ ኦሶ ፖሎ።
JOH 4:35 ኢንቴ ቃሴ፥ ‹ካꬃ ማጻይ ጋካናስ ቡሮ ኦይዱ ኣጊናይ ኣቲዴስ› ጌታ ጊዴኬቲ? ቃሴ ታኒ ጊዲኮ ኢንቴና፥ ‹ꬎቁ ጊዲ ካꬃይ ማጻ ጋኪዳይሳ ጼሊቴ› ጋይስ።
JOH 4:36 ማጺዛዴይ ባ ዳሞዛ ኤካና፤ ሜርናስ ጊዲዛ ኣይፌ ሺሻና፤ ሄሳ ጊሻስ ዜሪዛዴይኔ ማጺዛዴይ ኢሲፌ ኡፋዬታና።
JOH 4:37 ሄሳ ጊሻስ ኢሳዴይ ዜራና፤ ሃራ ኣሲ ማጻና ጌቴቲዛ ሌሚሶይ ቱማ።
JOH 4:38 ታ ኢንቴና ኢንቴ ዳቡሮንታይሳ ማጻና ማላ ዬዳዲስ፤ ሃራቲ ኦሶን ዳቡርዳ፤ ጊዶ ኣቲን ኢንቴ ኢስታ ዳቡርሳን ጎኤቲዴታ» ጊዴስ።
JOH 4:39 ማጫሳያ፥ «ታ ኦꬂዳዝ ኡባ ታስ ኢዚ ዮቲዴስ» ጋዳ ኣሳስ ማርካቲዳ ማላ ካታማፔ ዳሮ ሳማሪያ ኣሳይ ኢዛን ኣማኒዴስ።
JOH 4:40 ሄሳ ጊሻስ ሳማሪያ ኣሳይ ዬሱሳኮ ዪዲ ኢዚ ኢስታኮን ጋምኣና ማላ ዎሲዴስ፤ ኢዚካ ናምኡ ጋላስ ሄን ጋምኢዴስ።
JOH 4:41 ኢዛ ቃላ ሲዪዲ ዳሮ ኣሳይ ኢዛ ኣማኒዴስ።
JOH 4:42 ማጫሳዮካ፥ «ሃኢ ኑ ኢዛ ኣማኒዛይ ኔ ዮቲዳ ቃላ ጊሻስ ጻላ ጊዶንታ ኑኒካ ኑ ባጋራ ኢዛፔ ሲዪዳ ጊሻሲኔ ቱማፔ ኢዚ ዴሬ ኣሺዛዴ ጊዲዳይሳ ኤሪዳ ጊሻሳ» ጊዳ።
JOH 4:43 ዬሱሲ ሳማሪያን ናምኡ ጋላስ ጋምኢዳፔ ጉዬ ጋሊላ ቢዴስ።
JOH 4:44 ኢዚ ባ ባጋራ፥ «ናቤይ ባ ዴሬን ቦንቼቴና» ጊ ዮቲዴስ።
JOH 4:45 ጊዶ ኣቲን ኢዚ ጋሊላ ቢን ጋሊላ ኣሳይ ኢዛ ሎኤꬂ ሞኪ ኤኪዴስ፤ ጋሶይካ ፓዚጋ ባኣሌ ቦንቻና ዬሩሳላሜ ቢዳሶን ሄን ዲሺን ኢዚ ኦꬂዳይሳ ዉርሲ ቤኢዳ ጊሻሳ።
JOH 4:46 ሄሳፌ ጉዬ ዬሱሲ ሃꬄ ዎይኔ ጫጄ ኦꬂዳ ጋሊላ ዴሬ ጊዶን ዲዛ ቃና ጌቴቲዛ ካታማ ናምኣንꬆ ቢዴስ። ሄ ዎዴ ቂፊርናሆሜን ኢዛስ ናይ ሳኬቲዳ ኢሲ ካዎ ሹሜይ ዴስ።
JOH 4:47 ኢዚካ ዬሱሲ ዩሁዳ ዴሬፔ ጌዴ ጋሊላ ዪዳይሳ ሲዪዲ ዬሱሳኮ ቢዴስ። ዬሱሲ ዱጌ ቂፊርናሆሜ ዎꬋና ማላኔ ዳሮ ሳኬቲዲ ሃይቃና ጊዛ ናዛ ፓꬃና ማላ ዬሱሳ ዎሲዴስ።
JOH 4:48 ዬሱሲካ ኢዛስ፥ «ኢንቴ ጊታ ማላታታኔ ማላሊሲዛዝ ቤኦንታ ኣይኮካ ኣማኔኬታ» ጊዴስ።
JOH 4:49 ሹሜዚካ ዛሪዲ፥ «ጎዶ! ታ ናዚ ሃይቆንታ ኤሌላ ዎꬋርኪ!» ጊዴስ።
JOH 4:50 ዬሱሲካ ኢዛ፥ «ኔኒ ኔሶ ባ! ናዚ ፓጺዴስ» ጊዴስ፤ ኣዴዚካ ዬሱሲ ኢዛስ ዮቲዳ ቃላ ኣማኒዲ ሶ ሲሚ ቢዴስ።
JOH 4:51 ኢዚ ሶ ቢሺን ኢዛ ኣሽካራቲ ኢዛራ ኦጌን ጋጊዲ፥ «ኔ ናዚ ፓጺዴስ» ጊዲ ኢዛስ ዮቲዳ።
JOH 4:52 ሹሜዚካ ናዚ ኣይ ሳቴን ፓጺዳኮ ኢስታ ዛሪ ኦይቺዴስ። ኢስቲካ ኢዛስ፥ «ቃማ ጋላሳፌ ላፑን ሳቴን ኢዛ ሚቺዛይሲ ኣጊዴስ» ጊዳ።
JOH 4:53 ናዛ ኣዋይካ ዬሱሲ፥ «ኔ ናዚ ፓጺዴስ» ጊዳይ ሄ ኢስቲ ኢዛስ ዮቲዛ ዎዴ ጊዲዳይሳ ኤሪዴስ። ሄሳ ጊሻስ ሄ ጋላሳፌ ኦይኪዲ ኢዚኔ ኢዛሶ ኣሳይ ዉሪ ዬሱሳ ኣማኒዳ።
JOH 4:54 ሃይሲ ማላታይ ዬሱሲ ዩሁዳፔ ጋሊላ ዪዲ ኦꬂዳ ናምኣንꬆ ማላታ።
JOH 5:1 ሄሳፌ ካሊዲ ኣይሁዳታ ባኣሌይ ዲዛ ጊሻስ ዬሱሲ ዬሩሳላሜ ቢዴስ።
JOH 5:2 ዬሩሳላሜን ዶርሲ ጌሊዛ ፔንጌ ኣቻን ኢብራዌታ ቃላራ፥ «ቤቴሳይዳ» ጌቴቲዛ ኢሲ ፑልቶፌ ሺቂዲ ኤሊዳ ሃꬂ ዴስ፤ ኢዛፔ ቦላራ ካማይ ዲዛ ኢቻሹ ኦጌቲ ዴቴስ።
JOH 5:3 ዳሮ ሃርጋንቻቲ፥ ኣይፌ ቆቄቲ፥ ቶሆ ዎቤቲኔ ቶሆ ሲላቲ ኦጌ ቦላ ኢቺዲ ሃꬂ ቃጼታና ጋካናስ ናጌቴስ።
JOH 5:4 ኢሲ ኢሲ ዎዴ ጎዳ ኪታንቻይ ሃꬃን ዎꬊዲ ሃꬃ ቃꬄስ፤ ሃꬃ ቃꬃፌ ካሊዲ ኮይሮቲዲ ሃꬃን ጌሊዛ ሃርጋንቻይ ባና ሳኪዛ ኣይ ሃርጌፌካ ፓጼስ።
JOH 5:5 ሄን ሄꬑ ታማኔ ኦስፑን ላይꬅ ኩሜꬅ ሳኬቲዳ ኢሳዴይ ዴስ።
JOH 5:6 ዬሱሲ ኣዴዚ ሄን ኢቺዳይሳ ቤኢዲኔ ኢዚ ዳሮ ላይꬅ ሳኬቲዳይሳ ኤሪዲ፥ «ኔ ፓጻና ኮያይ?» ጊዴስ።
JOH 5:7 ሃርጋንቻዚካ ዛሪዲ፥ «ጎዶ! ሃꬃይ ቃጼቲዛ ዎዴ ታና ሃꬃን ጌልꬂዛ ኣሲ ዴና፤ ታ ቡሮ ባና ጊሺን ሃራይ ታፔ ካሴቲ ሃꬃን ጌሌስ» ጊዴስ።
JOH 5:8 ዬሱሲካ ኢዛ፥ «ዴንዳ! ኔ ኢቺዳ ኣልጋ ቶካዳ ባ!» ጊዴስ።
JOH 5:9 ኣዴዚካ ሄራካ ፓጺዴስ፤ ባ ኣልጋ ቶኪ ኤኪዲ ቢዴስ። ሄሲ ሃኒዳይ ኣይሁዳታ ሳምባታ ጋላሳ።
JOH 5:10 ሄሳ ጊሻስ ኣይሁዳታ ሃላቃቲ ፓጺዳ ኣዴዛ፥ «ሃች ሳምባታራ ኔ ኣልጋ ቶካና ማላ ሙሴ ዎጋይ ኣዛዜና» ጊዳ።
JOH 5:11 ኢዚካ ኢስታስ፥ « ‹ኔ ኢቺዳ ኣልጋ ቶካዳ ባ› ጊ ዮቲዴስ» ጊዴስ።
JOH 5:12 ኢስቲካ፥ «ኔና ኣልጋ ቶካዳ ባ ጊዳይ ኦኔ?» ጊ ኦይቺዳ።
JOH 5:13 ዴሬይ ዳሪዳ ጊሻሲኔ ዬሱሲ ሄፔ ሃኪ ቢዳ ጊሻስ ኢዛ ኦኒ ፓꬂዳኮ ኣዴዚ ኤሪቤና።
JOH 5:14 ሄሳፌ ጉዬ ዬሱሲ ኣዴዛ ጾሳ ኬꬃን ዴሚዲ፥ «ሄኮ ሃኢ ኔ ፓጻዳሳ፤ ካሴይሳፌ ኣꬊዛ ኢታ ሚሺ ኔ ቦላ ጋኮንታ ማላ ናጋራ ናምኣንꬆ ኦꬆፋ» ጊዴስ።
JOH 5:15 ኣዴዚካ ቢዲኔ ኢዛ ፓꬂዳይ ዬሱሳ ጊዲዳይሳ ኣይሁዳታ ሃላቃታስ ዮቲዴስ።
JOH 5:16 ኣዴዛ ሳምባታ ጋላስ ፓꬂዳ ጊሻስ ኣይሁዳታ ዳናቲ ዬሱሳ ኦይካና ዬዴꬂዳ።
JOH 5:17 ዬሱሲካ ኢስታስ፥ «ታ ኣዋይ ኡባ ዎዴ ኦꬄስ፤ ታኒካ ኦꬃና» ጊዴስ፤
JOH 5:18 ሄሳ ጋሶን ኣይሁዳታ ዳናቲ ዬሱሳ ዎꬋና ማላ ካሴፔ ኣꬂ ዴንꬄꬂዳ። ቃሴ ኢዚ ሳምባታ ሞሪዳ ጊሻስ ጻላ ጊዶንታ፥ «ጾሲ ታ ኣዋ» ጊዳ ጊሻሲኔ ባና ጾሳራ ጊኒሲዳ ጊሻሳ።
JOH 5:19 ዬሱሲ ኢስታስ፥ «ታ ኢንቴስ ቱሙ ጋይስ፤ ኣዋይ ኦꬂሺን ቤኢዳይሳ ኦሶፔ ኣቲን ናዚ ባ ሼኔን ኣይኮካ ኦꬄና። ኣዋይ ኦꬂዛይሳ ኢዛ ናይ ሄሳꬆካ ኦꬄስ።
JOH 5:20 ጋሶይካ ኣዋይ ናዛ ዶሴስ። ባ ኦꬂዛይሳካ ዉርሲ ኢዛ ቤሴስ፤ ኢንቴ ማላሌታና ማላ ሃይሳፌካ ኣꬊዛ ኦሶ ቡሮ ቤሳና።
JOH 5:21 ኣዋይ ሃይቂዳይታ ዴንꬂዛይሳꬆኔ ዴኦ ኢሚዛይሳꬆ ናዚካ ሄሳꬆ ባ ኮዪዳዴስ ዴኦ ኢማና።
JOH 5:22 ኣዋይ ኦና ቦላካ ፒርዴና፤ ጊዶ ኣቲን ፒርዳ ማታ ኡባ ባ ናዛስ ኢሚዴስ።
JOH 5:23 ኢዚ ሄሳꬆ ኦꬂዳይ ኣሳይ ዉሪ ኣዋ ቦንቻና ማላኔ ቃሴካ ናዛካ ቦንቻና ማላሳ። ናዛ ቦንቾንታይ ናዛ ኪቲዳ ኣዋካ ቦንቼና።
JOH 5:24 «ታ ኢንቴስ ቱማ ጋይስ፤ ታ ቃላ ሲዪዛዴሲኔ ታና ኪቲዳዴን ኣማኒዛዴስ ሜርና ዴኦይ ዴስ። ኢዛዴይ ሃይቆፔ ጌዴ ዴኦን ፒኒዴስ ኣቲን ኢዛ ቦላ ፒርዴቴና።
JOH 5:25 ታ ኢንቴስ ቱማ ጋይስ፤ ካሴ ሃይቂዳ ኣሳቲ ጾሳ ና ቃላ ሲዪዛ ዎዴይ ያና፤ ሄ ዎዴያካ ሃኖ፤ ሲዪዛይቲ ዉሪ ዴኦን ዳና።
JOH 5:26 ጋሶይካ ኣዋይ ባ ባጋራ ዴኦይ ዲዛ ማላ ናዚካ ባ ባጋራ ዴኦይ ዳና ማላ ኦꬂዴስ።
JOH 5:27 ኢዚ ኣሳ ና ጊዲዳ ጊሻስ ፒርዳና ማላ ጎዳቴꬅ ኢዛስ ኢሚዴስ።
JOH 5:28 ሃይሳን ኣይኮካ ማላሌቶፍቴ። ጋሶይካ ካሴ ሃይቂዲ ዱፎን ዲዛይቲ ዉሪ ኢዛ ቃላ ጊሪስ ሲዪዛ ዎዴይ ያና።
JOH 5:29 ሎኦ ኦꬂዳይቲ ሃይቆፔ ዴንዲዲ ፓጻና። ጊዶ ኣቲን ኢታ ኦꬂዳይቲ ሃይቆፔ ዴንዲዲ ፒርዴታና።
JOH 5:30 «ታኒ ታ ሼኔን ኣይኮካ ኦꬃናስ ዳንዳይኬ፤ ጊዶ ኣቲን ታ ኣዋፔ ታ ሲዪዳ ማላ ፒርዳይስ። ታና ኪቲዳይሳ ሼኔ ኦꬃይስ ኣቲን ታ ሼኔን ታ ኦꬆንታ ጊሻስ ታ ፒርዳን ባላይ ባ።
JOH 5:31 ታኒ ታ ጊሻስ ታርካ ማርካቲኮ ታ ማርካይ ቱሙ ጊዴና።
JOH 5:32 ጊዶ ኣቲን ታ ጊሻስ ማርካቲዛዴይ ሃራይ ዴስ፤ ኢዚካ ታ ጊሻስ ማርካቲዛዴ ማርካቴꬃይ ቱሙ ጊዲዳይሳ ታ ኤራይስ።
JOH 5:33 ኢንቴ ዮሃኒሳኮ ኣሴ ኪቲዴታ ሺን ኢዚካ ቱሙ ማርካቲዴስ።
JOH 5:34 ታ ሃይሳ ጊዛይ ኢንቴ ኣታና ማላ ኣቲን ታስ ሃራ ማርካቴꬅ ኮሺዳ ጊሻስ ጊዴና።
JOH 5:35 ዮሃኒሲ ኤጺዲ ፖኢሲዛ ፖኦ ማላ። ኢንቴካ ጉꬃ ዎዴ ኢዛ ፖኦን ኡፋዬታና ኮዪዴታ።
JOH 5:36 ታስ ጊዲኮ ዮሃኒሳ ማርካቴꬃፌ ኣꬊዛ ማርካይ ዴስ። ታ ማርካይካ ታ ኣዋይ ታስ ኢሚዳ ኦሶ። ሄሲካ ታ ኦꬂዛ ኦሶይ ታ ኣዋይ ታና ኪቲዳይሳ ታስ ማርካቴስ።
JOH 5:37 ታና ኪቲዳ ታ ኣዋይካ ባ ሁኤራ ታስ ማርካቲዴስ። ኢንቴ ጊዲኮ ኢዛ ቃላ ጊሪስ ሙሌካ ሲዪቤኬታ፤ ኢዛስ ሜꬋካ ሙሌራ ቤዪቤኬታ።
JOH 5:38 ኢዚ ኪቲዳዴን ኢንቴ ኣማኖንታ ጊሻስ ኢዛ ቃላይ ኢንቴ ኣቻን ዴና።
JOH 5:39 ኢንቴስ ጌሻ ማጻፋታፔ ሜርና ዴኦ ዴማናስ ሚሳቲን ማጻፋታ ፒልጌታ፤ ማጻፋቲካ ታ ጊሻስ ማርካቴቴስ።
JOH 5:40 ጊዶ ኣቲን ኢንቴ ዴኦ ዴማናስ ታኮ ሃ ያና ኮዬኬታ።
JOH 5:41 «ታኒ ኣሳፔ ቦንቾ ኮይኬ።
JOH 5:42 ታ ኢንቴና ኤራይስ፤ ጾሳ ሲቆይ ኢንቴናን ባይንዳይሳካ ኤራይስ።
JOH 5:43 ታኒ ታ ኣዋ ሱንꬃን ያዲስ ሺን ኢንቴ ታና ሞኪ ኤኪቤኬታ። ሃራ ኣሲ ቃሴ ባ ሱንꬃን ዪኮ ኢንቴ ኢዛ ሞኪ ኤኬታ።
JOH 5:44 ኢንቴ ኢንቴ ጊዶን ኢሶይ ኢሳፌ ቦንቾ ኮይዛይቶ! ኢሲ ጾሳፌ ቤቲዛ ቦንቾ ኮዮንታይቶ ኢንቴ ዋኒዲ ታና ኣማናና ዳንዳዬቲ?
JOH 5:45 ታ ኣዋ ሲንꬃን ኢንቴና ሞታናይ ኢንቴስ ታና ሚሳቶፖ፤ ኢንቴና ሞታናይ ኢንቴ ኢዛ ሂዶታ ኦꬂዛ ሙሴ።
JOH 5:46 ሙሴይ ታ ጊሻስ ጻፊዳይሳ ኣማኒዳኮ ኢንቴ ታና ኣማናና።
JOH 5:47 ኢዚ ጻፊዳይሳ ኢንቴ ኣማኖንታ ኣጊኮ ቃሴ ታ ቃላ ኢንቴ ዋኒ ኣማናኔ?» ጊዴስ።
JOH 6:1 ሄሳፌ ጉዬ ዬሱሲ ጺቢራዶሴ ጌቴቲዛሶ ጋሊላ ኣባፌ ሄ ፒንꬅ ፒኒዴስ።
JOH 6:2 ዬሱሲ ሃርጋንቻታ ፓꬂዳ ማላታ ቤኢዳ ጊሻስ ዳሮ ኣሳይ ኢዛ ካሊዴስ።
JOH 6:3 ዬሱሲ ባና ካሊዛይታራ ፑዴ ዙማ ቦላ ኬዚ ኡቲዴስ።
JOH 6:4 ሄ ዎዴ ኣይሁዳታ ፓዚጋ ባኣሌይ ማቲ ኡቲዴስ።
JOH 6:5 ሄ ዎዴ ዳሮ ዴሬይ ኢዛኮ ዪዛይሳ ዬሱሲ ꬎቁ ጊ ጼሊዲ ፒሊጶሳ፥ «ሃይሳ ዴራስ ጊዳና ቁማ ኣዋፔ ሻማና ዳንዳይዞኒ?» ጊዴስ።
JOH 6:6 ዬሱሲ ፒሊጶሳ ሄሳꬆ ኦይቺዳይ ኢዛ ፓጫናስ ጊዲፔ ኣቲን ኢዚ ባ ኦꬃናይሳ ኤሬስ።
JOH 6:7 ፒሊጶሲካ ኢዛስ፥ «ኢሳዴስ ኢሳዴስ ኢሲ ባርስ ጊዲዛ ካꬅ ሻሚዛኮካ ናምኡ ጼቱ ዲናሬን ሻሚዳ ካꬂካ ሃይሳስ ጊዴና» ጊዴስ።
JOH 6:8 ዬሱሳ ካሊዛይታፔ ኢሶይ ሲሞና ጴጽሮሳ ኢሻ ኢንዲራሲ፥
JOH 6:9 «ኢቻሹ ባንጋ ኡኬꬂኔ ናምኡ ሞሌ ኦይኪዳ ኢሲ ናይ ሃይሳን ዴስ። ጊዶ ኣቲን ሃና ሃይሳ ሃ ዴሬዛስ ኣይ ጊዳኔ?» ጊዴስ።
JOH 6:10 ዬሱሲካ ዛሪዲ፥ «ኣሳ ኡባ ኡቲሲቴ» ጊዴስ፤ ሄን ዳሮ ማታይ ዲዛ ጊሻስ ኣሳይ ኡቲዴስ፤ ኣሳ ቆዳይካ ኢቻሹ ሺ ጊዲዛዛ።
JOH 6:11 ሄሳፌ ጉዬ ዬሱሲ ኡኬꬃ ኤኪዲ ጋላታ ዎሳ ዎሲዲ ኡቲዳ ኣሳስ ጊሺዴስ። ሞሌዛካ ሄሳꬆካ ጊሼቺዴስ። ኣሳይ ዉሪካ ባስ ጊዲዛዝ ዴሚዴስ።
JOH 6:12 ኣሳይ ዉሪካ ካሊ ሚን ዬሱሲ ባና ካሊዛይታ፥ «ማዳን ኣቲዳ ካꬃ ኢሲኖካ ኣሾንታ ሺሺቴ» ጊዴስ።
JOH 6:13 ኢስቲካ ኣሳይ ሚሺን ኢቻሹ ኡኬꬃፌ ኣቲዳ ታማኔ ናምኡ ሌማቴ ኩሜꬅ ሺሺዳ።
JOH 6:14 ኣሳቲካ ዬሱሲ ኦꬂዳ ማላታ ቤኢዲ፥ «ሃይሳዴይ ቱማፔ ሃ ኣላሜ ያና ናቤዛኮ!» ጊዳ።
JOH 6:15 ኣሳይ ቃሴ ዎልቃራ ዬሱሳ ካዎꬃና ቆፒዳይሳ ዬሱሲ ኤሪዲ ቃሴካ ኢስታፌ ሃኪ ቢዲ ዙማ ቦላ ኬዚዴስ።
JOH 6:16 ጋዴይ ቃሚሺን ዬሱሳ ካሊዛይቲ ዱጌ ኣባኮ ዎꬊዳ።
JOH 6:17 ዎጎሎን ጌሊዲ ቂፊርናሆሜ ባና ኬዚዳ። ኢስቲ ኬዚሺን ጋዴይ ꬉሚዴስ። ዬሱሲ ሄሳ ጋካናስካ ኢስታኮ ዪቤና።
JOH 6:18 ዎልቃማ ጫርኮይ ጫርኪዛ ጊሻስ ኣባይ ኬሂ ቃጺዴስ።
JOH 6:19 ኢዛ ካሊዛይቲ ባጋ ሳቴ ኦጌ ማላ ዎጎሎዛ ላጊዳፔ ጉዬ ዬሱሲ ኣባ ቦላራ ቶሆራ ሄሜቲ ዎጎሎዛኮ ማቲሺን ዴሚዲ ባቢዳ።
JOH 6:20 ኢዚካ ኢስታስ፥ «ታናኮ! ባቦፍቴ!» ጊዴስ።
JOH 6:21 ኢስቲካ ኢዛ ኡፋይሳራ ጌዴ ዎጎሎዛ ጊዶ ኤካና ኮዪዳ። ሄራካ ዎጎሎዚካ ኢስቲ ባናሶ ጋኪዴስ።
JOH 6:22 ኣባፌ ሄ ፒንꬃን ኣቲዳ ኣሳይ ዎንቴꬃ ጋላስ ኣባ ቦላ ኢሲ ዎጎሎይ ጻላ ዲዛሮ ቤዪዴስ። ዬሱሳ ካሊዛይቲ ካሴ ባርካ ቢዳይሳኔ ዬሱሲ ኢስታራ ዎጎሎን ጌሎንታይሳ ኤሪዳ።
JOH 6:23 ጊዶ ኣቲን ሃንኮ ዎጎሎቲ ጺቢራዶሴፔ ዴንዲዲ ዬሱሲ ጋላታ ዎሳ ዎሲን ኣሳይ ካꬅ ሚዳሶ ዪዳ።
JOH 6:24 ኣሳቲካ ዬሱሲ ዎይኮ ኢዛ ካሊዛይቲ ሄን ባይንዳይሳ ቤኢዲ ሄ ዎጎሎታን ጌሊዲ ዬሱሳ ኮሽ ቂፊርናሆሜ ቢዳ።
JOH 6:25 ኣባፌ ሄ ፒንꬃን ኢዛ ዴሚዲ፥ «ኣስታማሬ! ኔ ኣይዴ ሃይሳ ያዲ?» ጊዳ።
JOH 6:26 ዬሱሲካ ኢስታስ፥ «ታ ኢንቴስ ቱማ ጋይስ፤ ኢንቴ ታና ኮይዛይ ካꬅ ሚ ካሊዳ ጊሻስ ኣቲን ማላታ ቤኢዳ ጊሻስ ጊዴና።
JOH 6:27 ꬋያና ካꬃስ ኦꬆፍቴ። ጊዶ ኣቲን ሄሳፌ ኣꬂዲ ጾሳይ ኣዋይ ኣማንꬂዛ ማታሜ ኢዛ ቦላ ሾጪዳ ጊሻስ ኣሳ ናይ ኢንቴስ ኢሚዛ ሜርና ዴኦስ ጊዲዛ ካꬃስ ኦꬂቴ» ጊዴስ።
JOH 6:28 ኢስቲካ ኢዛስ፥ «ሂስቲን ጾሳ ኦሶ ኦꬃናስ ኑ ኣይ ኦꬂኖ?» ጊዳ።
JOH 6:29 ዬሱሲካ፥ «ጾሳ ኦሶይ ጾሲ ኪቲዳ ኢዛ ናዛን ኣማኖ» ጊዲ ኢስታስ ዛሪዴስ።
JOH 6:30 ኢስቲካ ኢዛስ፥ «ኑ ቤኢዲ ኔና ኣማናና ማላ ኔ ኑና ኣይ ማላታ ቤሳኔ? ቃሴካ ኣይ ኦꬃኔ?
JOH 6:31 ‹ኢስቲ ማና ማላ ኢስታስ ቁማ ሳሎፔ ኢሚዴስ› ጌቴቲ ጻፌቲዳ ማላ ካሴ ኑ ኣዋቲ ባዞ ቢታን ማና ጌቴቲዛ ካꬅ ሚዳ» ጊዳ።
JOH 6:32 ዬሱሲ ኢስታስ፥ «ታ ኢንቴስ ቱሙ ጋይስ፤ ሳሎፔ ዎꬊዳ ቁማ ኢንቴስ ኢሚዳይ ሙሴ ጊዴና። ቱሙ ቁማ ሳሎፔ ኢንቴስ ኢሚዛይ ታ ኣዋ።
JOH 6:33 ጋሶይካ ጾሳ ቁማይ ሳሎፔ ዎꬊዲ ኣላሜስ ዴኦ ኢሚዛይሳ» ጊዴስ።
JOH 6:34 ሄሳ ጊሻስ ኣሳይ፥ «ጎዶ፥ ሄሳ ማላ ቁማ ኑስ ኡባ ዎዴ ኢማርኪ!» ጊዴስ።
JOH 6:35 ዬሱሲካ ኢስታስ፥ «ዴኦ ቁማይ ታና፤ ታኮ ዪዛ ኣሲ ሙሌካ ጋፌቴና፤ ታና ኣማኒዛዴይ ኣይዴካ ሳሜቴና።
JOH 6:36 ካሴ ታ ኢንቴስ ጊዳ ማላ ኢንቴ ታና ቤዪዴታ ሺን ኣማኒቤኬታ።
JOH 6:37 ታ ኣዋይ ታስ ኢሚዛይ ዉሪካ ታኮ ያና፤ ታኮ ዪዛዴ ታ ካሬ ጎዲኬ።
JOH 6:38 ጋሶይካ ታኒ ሳሎፔ ዎꬊዳይ ታና ኪቲዳይሳ ሼኔ ኦꬃናስ ኣቲን ታ ሼኔ ኦꬃናስ ጊዴና።
JOH 6:39 ታና ኪቲዳይሳ ሼኔይ ታስ ኢሚዳይታፔ ኢሳዴካ ꬋይሶንታ ዉርሴꬃ ጋላስ ታ ዴንꬃና።
JOH 6:40 ኤ ታ ሼኔይ ናዛ ቤኢዲ ኢዛ ኣማኒዛዴይ ዉሪ ሜርና ዴኦ ዴማናሳ። ታኒካ ዉርሴꬃ ጋላስ ኢዛ ሃይቆፔ ዴንꬃና» ጊዴስ።
JOH 6:41 ሄሳ ጊሻስ ዬሱሲ፥ «ሳሎፔ ዎꬊዳ ቁማይ ታና» ጊዳ ጊሻስ ኣይሁዳቲ ኢዛ ቦላ ዙዙሜቲዳ።
JOH 6:42 «ሃይሲ ዮሴፌ ና ዬሱሳ ጊዴኔ? ኢዛ ኣዋኔ ኢዛ ኣዮ ኑ ኤሮኮኒ? ሂስቲን ሃኢ ኢዚ፥ ‹ሳሎፔ ዎꬋዲስ› ዋኒ ጊዜ?» ጊዳ።
JOH 6:43 ዬሱሲካ ኢስታስ፥ «ኢንቴ ኢንቴ ጊዶን ዙዙሜታ።
JOH 6:44 ታና ኪቲዳ ታ ኣዋይ ጼይጊዳዴፌ ኣቲን ታኮ ያና ዳንዳይዛዴይ ኦኒካ ዴና። ባርካ ታኮ ያና ዳንዳይዛይ ኦኒካ ዴና፤ ታኮ ዪዛዴካ ዉርሴꬃ ጋላስ ታ ኢዛ ሃይቆፔ ዴንꬃና።
JOH 6:45 ናቤታ ማጻፋታን ኣሳይ ዉሪ ጾሳፌ ታማርዳዴ ጊዳና ጌቴቲ ጻፌቲዴስ። ሄሳ ጊሻስ ኣዋፔ ሲዪዲ ታማርዳ ኣሲ ዉሪ ታኮ ያና።
JOH 6:46 ሄሳ ጉሲ ኣዋ ቤኢዳ ኣሲ ዴስ ጉስ ጊዴና፤ ኣዋ ቤኢዳይ ጾሳ ኣቻፌ ዪዳይሳ ጻላ።
JOH 6:47 ታ ኢንቴስ ቱማ ጋይስ፤ ታናን ኣማኒዳ ኣሳስ ሜርና ዴኦይ ዴስ።
JOH 6:48 ታኒ ዴኦ ቁማ።
JOH 6:49 ካሴ ኢንቴ ኣዋቲ ባዞ ቢታን ማና ሚዳ፤ ጊዶ ኣቲን ዉሪካ ሃይቂዳ።
JOH 6:50 ሳሎፔ ዎꬊዳ ቁማይ ሃይሳ፤ ሃይሳ ሚዛዴይ ሙሌካ ሃይቄና።
JOH 6:51 ሳሎፔ ዎꬊዳ ዴኦ ቁማይ ታና፤ ሃይሳ ሃ ቁማፔ ሚዛዴይ ዉሪካ ሜርናስ ዳና። ኣላሜስ ዴኦ ጊዳና ማላ ታ ኢሚዛ ቁማይ ታ ኣሾዛ» ጊዴስ።
JOH 6:52 ሄ ዎዴ ኣይሁዳቲ፥ «ሃይሲ ኣዴዚ ኑ ኢዛ ኣሾ ማና ማላ ኢዚ ኑስ ዎስቲ ኢማኔ?» ጊዲ ባ ጊዶን ፓላሜቲዳ።
JOH 6:53 ሄሳ ጊሻስ ዬሱሲ ኢስታ፥ «ታ ኢንቴስ ቱሙ ጋይስ፤ ኣሳ ና ኣሾ ኢንቴ ሞንታ ኣጊኮ፥ ኢዛ ሱꬂካ ኡዮንታ ኣጊኮ ኢንቴስ ዴኦይ ዴና።
JOH 6:54 ታ ኣሾ ሚዛዴሲኔ ታ ሱꬅ ኡዪዛዴስ ኡባስ ሜርና ዴኦይ ዴስ፤ ታኒካ ኢዛዴ ዉርሴꬃ ጋላስ ሃይቆፔ ዴንꬃና።
JOH 6:55 ጋሶይካ ታ ኣሾይ ቱሙ ቁማ፤ ታ ሱꬂካ ቱሙ ኡሻ።
JOH 6:56 ታ ኣሾ ሚዛይኔ ታ ሱꬅ ኡዪዛይ ዉሪ ታናን ዳና፤ ታኒካ ኢዛዴን ዳና።
JOH 6:57 ዴኦ ኣዋይ ታና ኪቲዳ ማላኔ ታኒካ ኢዛን ዴኦን ዲዛ ማላ ሄሳꬆካ ታ ኣሾ ሚዛዴይ ዉሪ ታናን ዴኦን ዳና።
JOH 6:58 ሄሳ ጊሻስ ሳሎፔ ዎꬊዳ ቁማይ ሃይሳ፤ ኢዚካ ካሴ ኢንቴ ኣዋቲ ሚዳይሳ ማላ ጊዴና። ጋሶይካ ሄ ቁማ ሚዳይቲ ሃይቂዳ፤ ሃ ቁማ ሚዛይቲ ጊዲኮ ሜርናስ ዳና» ጊዴስ።
JOH 6:59 ዬሱሲ ሃይሳ ቂፊርናሆሜን ኣይሁዳታ ዎሳ ኬꬃን ታማርሲዛ ዎዴ ዮቲዴስ።
JOH 6:60 ኢዛ ካሊዛይታፔ ዳሪዛይቲ ሄሳ ሲዪዲ፥ «ሃይሲ ዮኦዚ ዴጾ፤ ሃይሳ ኦኒ ኤካና ዳንዳይዜ?» ጊዳ።
JOH 6:61 ዬሱሲካ ኢዛ ካሊዛይቲ ሄሳ ዮኦዛ ጊሻስ ዙዙሜቲዳይሳ ባ ዎዚናን ኤሪዲ፥ «ሃይሲ ኢንቴና ዴጺዜ?
JOH 6:62 ኣሳ ናይ ኪርስቶሲ ባ ዲዛሶ ሲሚ ኬዚሺን ቤይኮ ኢንቴ ኣይ ጋኔ?
JOH 6:63 ኣሳስ ዴኦ ኢሚዛይ ጾሳ ኣያናኮ! ኣሳ ዎልቃይ ቃሴ ኣይኮካ ጎኤና፤ ታ ኢንቴስ ዮቲዳ ቃላይ ዴኦ ኢሚዛ ኣያና።
JOH 6:64 ጊዶ ኣቲን ኢንቴ ጊዶን ኢሲ ኢሲ ኣማኖንታ ኣሳቲ ዴቴስ» ጊዴስ። ዬሱሲ ኢስታስ ሄሳ ጊዳይ ኮይሮፔ ዶሚዲ ኢስታ ጊዶን ኣማኖንታይቲ ኦናንታኮ ቃሴ ኢዛ ኣꬂ ኢማናዴይካ ኦናኮ ኤሪዛ ጊሻሳ።
JOH 6:65 ካሌꬂዲካ ዬሱሲ፥ «ኣዋ ሼኔይ ባይንዳ ታኮ ሃ ያና ዳንዳይዛዴይ ዴና ጋዳ ታ ኢንቴስ ዮቲዳይ ሄሳሳ» ጊዴስ።
JOH 6:66 ሄሳፌ ዴንዲዳይሳን ኢዛ ካሊዛይታፔ ዳሮቲ ጉዬ ሲሚዳ። ሄ ጋላሳፌ ዶሚዲ ዬሱሳ ካሎ ኣጊዳ።
JOH 6:67 ሄሳ ጊሻስ ዬሱሲ ባና ካሊዛ ታማኔ ናምኣታ፥ «ኢንቴካ ባና ኮዬቲ?» ጊዴስ።
JOH 6:68 ሄ ዎዴ ሲሞና ጌቴቲዛ ጴጽሮሲ፥ «ጎዶ፥ ኔስ ሜርና ዴኦ ቃላይ ዲሺን ኑ ኦናኮ ባኔ?
JOH 6:69 ኔ ጌሻ ጾሳ ና ጊዲዳይሳ ኤሪዲ ኑኒ ኣማኒዶስ» ጊዴስ።
JOH 6:70 ዬሱሲካ ኢስታስ፥ «ታ ኢንቴና ታማኔ ናምኣታ ዶራቤኪና? ሂስቲን ኢንቴፌ ኢሶይ ጻላኤ» ጊዴስ።
JOH 6:71 ኢዚ ሄሳ ጊዳይ ሲሞና ና ኣስቆሮንቶ ዩሁዳ ጊሻሳ። ኣይስ ጊኮ ዩሁዳይ ታማኔ ናምኣታፔ ኢሳ ጊዲኮካ ዬሱሳ ኣꬂ ኢማናይ ኢዛ ጊዲዳ ጊሻሳ።
JOH 7:1 ሄሳፌ ጉዬ ዬሱሲ ጋሊላ ጊዶን ዩዬቲዴስ፤ ጊዶ ኣቲን ዩሁዳን ዩያናስ ኮዪቤና። ጋሶይካ ኣይሁዳቲ ኢዛ ዎꬋና ኮይዛ ጊሻሳ።
JOH 7:2 ሄ ዎዴ ኣይሁዳታ ዳሴ ባኣሌይ ማቲ ኡቲዴስ።
JOH 7:3 ሄሳ ጊሻስ ዬሱሳ ኢሻቲ ኢዛኮ ሺቂዲ፥ «ኔና ካሊዛይቲ ኔ ኦꬂዛ ኦሶዛ ቤያና ማላ ኔ ሃይሳፌ ዴንዳዳ ዩሁዳ ዴሬ ባ።
JOH 7:4 ጋሶይካ ቆንጬን ኤሬታና ኮይዛዴይ ባ ኦሶ ጌማን ኦꬄና። ኔካ ሃይታንታ ዉርሳ ኦꬃሼ ኔና ኣላሜን ቆንጪሳና ኮሼስ» ጊዳ።
JOH 7:5 ኢስቲ ሄሳ ጊዳ ጋሶይካ ኢዛ ኢሻታካ ጊዲን ኢዛን ኣማኖንታይታ ጊዲዳ ጊሻሳ።
JOH 7:6 ዬሱሲካ ኢስታስ፥ «ታ ዎዴይ ቡሮ ጋኪቤና፤ ኢንቴ ዎዴይ ጊዲኮ ኡባ ዎዴ ኢንቴስ ጊጋኮ።
JOH 7:7 ዴሬይ ኢንቴና ኢጻና ዳንዳዬና፤ ታና ጊዲኮ ኢጼስ፤ ጋሶይካ ታኒ ኣላሜ ኦሶይ ኢታ ጊዲዳይሳ ኢዛስ ማርካቲዛ ጊሻሳ።
JOH 7:8 ሃኢ ኢንቴ ባኣሌዛሶ ቢቴ፤ ታስ ዎዴይ ጋኮንታ ጊሻስ ሃይሳ ሃ ባኣሌዛሶ ታ ቢኬ» ጊዴስ።
JOH 7:9 ሄሳ ጊዲ ዬሱሲ ጋሊላን ኣቲዴስ።
JOH 7:10 ጊዶ ኣቲን ኢዛ ኢሻቲ ባኣሌዛሶ ቢዳፔ ጉዬ ዬሱሲ ቆንጬራ ጊዶንታ ቆታራ ባኣሌዛሶ ቢዴስ።
JOH 7:11 ኣይሁዳቲ፥ «ኢዚ ኣዋን ዲዜ?» ጊሼ ባኣሌዛሶን ኮዪዳ።
JOH 7:12 ዴሬይካ ኢዛ ጊሻስ ጋርሳራ ሳሱኪ ሃሳዬቲዴስ። ኢሲ ኢሲ ኣሳቲ፥ «ኢዚ ሎኦ ኣሳ» ጊሺን ባጋይ ቃሴ፥ «ሎኦ ጊዴና፤ ኢዚ ዴሬ ባሌꬄስ» ጊዳ።
JOH 7:13 ጊዶ ኣቲን ኣይሁዳታ ዳናታስ ባቢዛ ጊሻስ ኦኒካ ኢዛ ጊሻስ ቆንጬን ሃሳይቤና።
JOH 7:14 ባኣሌዚ ዉራና ባጋ ጋኪሺን ዬሱሲ ጾሳ ኬꬄ ቢዲ ታማርሶ ኦይኪዴስ።
JOH 7:15 ኣይሁዳቲ፥ «ሃይሲ ኣዴዚ ታማሮንታ ዲሼ ሃይሳ ዉርሲ ዎስቲ ኤሪዴ?» ጊዲ ማላሌቲዳ።
JOH 7:16 ሄሳ ጊሻስ ዬሱሲ፥ «ታ ታማርሲዛ ቲሚርቴይ ታና ኪቲዳ ታ ኣዋፔ ታስ ኢሜቲዴስ ኣቲን ታፔ ጊዴና።
JOH 7:17 ታና ኪቲዳይሳ ሼኔ ኦꬃና ኮይዛዴይ ዲኮ ሃይሲ ሃ ቲሚርቴይ ጾሳፌ ቤቲዳይሳ ዎይኮ ታ ታፔ ሃሳይዳይሳ ጊዲኮካ ኤራና።
JOH 7:18 ባፔ ሃሳይዛዴይ ባ ቦንቾ ኮዬስ። ኪቲዳዴ ቦንቾ ኮይዛዴይ ጊዲኮ ኢዚ ቱማንቻ፤ ዎርዶይ ኢዛ ቦላ ዴና።
JOH 7:19 ሙሴይ ኢንቴስ ዎጋ ኢሚዴስ ጊዴኔ? ጊዲኮካ ኢንቴ ጊዶን ዎጋ ናጊ ፖሊዳዴይ ኦኒካ ዴና። ኢንቴ ኣዛስ ታና ዎꬋና ኮዬቲ?» ጊዴስ።
JOH 7:20 ዴሬይካ ኢዛ፥ «ኔ ቦላ ዳይዳንꬂ ዴስ! ኔና ዎꬋና ኮይዛይ ኦኔ?» ጊዴስ።
JOH 7:21 ዬሱሲካ ኢስታስ፥ «ታ ኢሲ ኦሶ ኦꬃዲስ፤ ኢንቴ ዉሪካ ሃኖ ሃ ኦሶይን ማላሌቴታ።
JOH 7:22 ሙሴይ ኢንቴስ ቃጻራ ዎጋ ኢሚዴስ፤ ሄ ዎጋይካ ኢሜቲዳይ ካሴ ኣዋታፔ ቤቲዴስ ኣቲን ሙሴፔ ጊዴና። ሂስቲን ሄኮ ኢንቴካ ሳምባታ ጋላሲካ ኣስ ቃጻሬታ።
JOH 7:23 ሂስቲኮ ሙሴ ዎጋይ ሻሬቶንታ ማላ ኣሲ ሳምባታ ጋላስ ቃጻሬቲዛዝ ጊዲኮ ሂስቲን ታ ሳምባታ ጋላስ ኣሳስ ኩሜꬃ ኣሳቴꬅ ፓꬂን ኣዛስ ታ ቦላ ሃንቄቴቲ?
JOH 7:24 ሱሬ ፒርዳ ፒርዲቴ ኣቲን ኣሳ ኣይፌሶ ጼሊዲ ማዶ ፒርዳ ፒርዶፍቴ» ጊ ዛሪዴስ።
JOH 7:25 ዬሩሳላሜ ኣሳፔ ኢሲ ኢሲ ኣሳቲ፥ «ኢስቲ ዎꬋና ኮይዛ ኣዴዚ ሃይሳ ጊዴኔ?
JOH 7:26 ሄኮ ኢዚ ቆንጬን ሃሳዬስ ሺን ኢስቲ ኢዛ ኣይኮካ ጊቤቴና። ሃይሲ ጾሲ ኪቲዳዴ ጊዲዳይሳ ዳናቲ ቱሙ ኤሪዞሻ?
JOH 7:27 ሂስቲን ሃይሲ ኣዴዚ ኣዋ ኣሳኮ ኑ ኤሮስ። ጾሲ ኪቲዳዴይ ዪሺን ቃሴ ኢዚ ኣዋፔኮ ኤሪዛዴይ ኦኒካ ዴና» ጊዳ።
JOH 7:28 ሄሳ ጊሻስ ዬሱሲ ጾሳ ኬꬃን ታማርሲሼ ባ ቃላ ꬎቁ ሂስቲዲ፥ «ኢንቴ ታና ቱሙ ኤሬታ፤ ታ ኣዋፔ ዪዳኮ ኢንቴ ኤሬታ። ቃሴ ታኒ ታ ሼኔን ያቤኬ፤ ታና ኪቲዳይሲ ኢዚ ቱማንቻ፤ ጊዶ ኣቲን ኢንቴ ቃሴ ኢዛ ኤሬኬታ።
JOH 7:29 ታ ጊዲኮ ኢዛ ኣቻፌ ዪዳ ጊሻሲኔ ኢዚ ታና ኪቲዳ ጊሻስ ታ ኢዛ ኤራይስ» ጊዴስ።
JOH 7:30 ሄ ዎዴ ኢዛ ኦይካናስ ኮዪዳ፤ ጊዶ ኣቲን ቡሮ ዎዴይ ጋኪቤና ጊሻስ ኦኒካ ኢዛ ኦይኪቤና።
JOH 7:31 ጊዲኮካ ዴሬዛፔ ዳሮይ ኢዛን ኣማኒዴስ፤ ኣሳይ፥ «ጾሲ ኪቲዳዴይ ዪዛ ዎዴ ሃይሲ ኣዴዚ ኦꬆ ማላታፔ ቦላራ ሃራ ኦꬃኔ?» ጊዴስ።
JOH 7:32 ኣሳይ ዬሱሳ ጊሻስ ጋርሳራ ሳሱኬቲ ሃሳዬቲሺን ፋርሳዌቲ ሲዪዳ። ሄሳ ጊሻስ ቄሴታ ሃላቃቲኔ ፋርሳዌቲ ዬሱሳ ኦይካናስ ጾሳ ኬꬃ ፔንጌ ናጊዛይታ ዬዲዳ።
JOH 7:33 ሄ ዎዴ ዬሱሲ፥ «ታ ኢንቴናራ ጉꬃ ዎዴ ዳሻና፤ ሄሳፌ ጉዬ ታና ኪቲዳይሳኮ ታ ሲማ ባና።
JOH 7:34 ኢንቴ ታና ኮያና ሺን ዴሜኬታ፤ ኢንቴ ታ ዲዛሶ ያናስ ዳንዳዬኬታ» ጊዴስ።
JOH 7:35 ሄሳ ጊሻስ ኣይሁዳታ ዳናቲ ባ ጊዶን ኢሶይ ኢሳራ፥ «ሃይሲ ኣዴዚ ኑ ዴሞንታ ማላ ኣዋ ባኔሻ? ኦኔ ኤሪዛይ ጊሪኬታ ጊዶን ላሌቲ ዲዛ ኣይሁዳታኮ ቢዲ ጊሪኬታ ታማርሳኔሻ?
JOH 7:36 ኢዚ፥ ‹ኢንቴ ታና ኮያና ሺን ዴሜኬታ፤ ታ ዲዛሶ ኢንቴ ያናስ ዳንዳዬኬታ› ጊሺን ሄሲ ኣይ ጉሴ?» ጊዳ።
JOH 7:37 ጊታ ባኣሌዛ ዉርሴꬃ ጋላስ ዬሱሲ ዴንዲ ኤቂዲ ባ ቃላ ꬎቁ ሂስቲዲ፥ «ሃꬅ ሳሜቲዳዴይ ዲኮ ሃ ታኮ ዪዲ ኡዮ።
JOH 7:38 ጌሻ ማጻፋይ ጊዳ ማላ ታና ኣማኒዛዴፌ ዴኦ ሃꬃ ፑልቶይ ፑልታና» ጊዴስ።
JOH 7:39 ኢዚ ሄሳ ጊዳይ ኢዛን ኣማኒዛይቲ ቡሮፔ ኤካና ጺሎ ኣያና ጊሻሳ፤ ጋሶይካ ዬሱሲ ቦንቼቲዛ ዎዴይ ቡሮ ጋኮንታ ጊሻስ ጺሎ ኣያናይ ኢሜቲቤና።
JOH 7:40 ሄሳ ጊሻስ ዴሬዛፔ ኢሲ ኢሲ ኣሳቲ ሄ ቃላ ሲዪዲ፥ «ያና ጊዛ ናቤይ ቱማፔ ሃይሳ» ጊዳ።
JOH 7:41 ሃራቲ፥ «ሃይሲ ጾሲ ኪቲዳዴ» ጊዳ፤ ባጋይቲ ቃሴ፥ «ጾሲ ኪቲዳዴይ ጋሊላፔ ዋኒ ያኔ?
JOH 7:42 ጾሲ ኪቲዳዴይ ዳዊቴ ዜሬꬃፌ ዬሌታናይሳኔ ዳዊቴ ካታማ ቤቴሊሄሜፔ ያናይሲ ካሴ ጌሻ ማጻፋን ጻፌቲቤኔ?» ጊዳ።
JOH 7:43 ሄሳ ጊሻስ ኢዛ ጋሶን ዴሬይ ባ ጊዶን ሻኬቲ ዎꬊዴስ።
JOH 7:44 ኢስታፌ ኢሲ ኢሲ ኣሳቲ ኢዛ ኦይካና ኮዪዳ፤ ጊዶ ኣቲን ኦኒካ ኢዛ ኦይኪቤና።
JOH 7:45 ሄሳፌ ጉዬ ጾሳ ኬꬄ ናጊዛይቲ ቄሴታ ሃላቃታኮኔ ፋርሳዌታኮ ሲሚ ቢዳ። ኢስቲካ፥ «ኣዛስ ኢዛ ኤኮንታ ዪዴቲ?» ጊዳ።
JOH 7:46 ዎታዳራቲካ ዛሪዲ፥ «ሃ ኣዴዚ ሃሳይዛይሳ ማላ ኣይ ኣሲካ ሃሳዪ ኤሬና» ጊዳ።
JOH 7:47 ፋርሳዌቲ ኢስታ፥ «ኢንቴካ ባሌቲዴቲ?
JOH 7:48 ዳናታፔ ዎይኮ ፋርሳዌታፔ ኢዛ ኣማኒዳይቲ ዲዞሻ?
JOH 7:49 ሃይሲ ሙሴ ዎጋ ኤሮንታ ዴሬይ ቱማፔ ቃንጌቲዳይሳ» ጊዳ።
JOH 7:50 ሃይሳፌ ካሴ ዬሱሳኮ ቢዳ ፋርሳዌታፔ ኢሳ ጊዲዳ ኒቆዲሞሲ ኢስታስ፥
JOH 7:51 «ኑ ዎጋን ኢሲ ሞቴቲዛዴይ ባ ሞቶስ ዛሮ ኢሚን ሲዮንታኔ ኢዚ ኣይ ኦꬂዳኮ ኤሬቶንታ ዲሺን ፒርዳይ ፒርዴቲ ኤሪዜ?» ጊዴስ።
JOH 7:52 ኢስቲካ፥ «ኔካ ጋሊላ ኣሴ? ጋሊላፔ ናቤይ ዴንዶንታይሳ ፒልጋዳ ጋካ ኤራ» ጊዳ።
JOH 7:53 ሄሳፌ ጉዬ ኢሶይ ኢሶይ ባሶ ቢዴስ።
JOH 8:1 ሄሳፌ ጉዬ ዬሱሲ ዳብራዛይቴ ቢዴስ።
JOH 8:2 ዎንቴꬃ ጋላስ ማላዶ ዎንታራ ጾሳ ኬꬄ ሲሚ ዪዴስ። ዴሬይካ ዉሪ ኢዛኮ ዪን ኢዚ ኡቲዲ ኢስታ ታማርሶ ኦይኪዴስ።
JOH 8:3 ሙሴ ዎጋ ታማርሲዛይቲኔ ፋርሳዌቲ ኢሲ ላይማታሼ ኦይኬቲዳ ማጫስ ዲዛሮ ኤኪ ዪዲ ዴሬ ሲንꬃን ኤሲዳ።
JOH 8:4 ዬሱሳካ፥ «ኣስታማሬ! ሄኮ ሃና ማጫሳያ ላይማታሼ ኦይኬታዱስ።
JOH 8:5 ሃኒ ማላ ማጫሲ ሹቻን ጫዴታ ሃይቃና ማላ ሙሴይ ኑ ዎጋን ኑና ኣዛዚዴስ፤ ኔኒች ሃኒ ጊሻስ ኣይ ጋይ?» ጊዳ።
JOH 8:6 ኢስቲ ኢዛ ሄሳ ጊዳይ ኢዛ ቦላ ሞቶስ ጊዲዛ ጋሶ ዴማናሲኔ ኢዛ ፓጫና ኮዪዳ ጊሻሳ። ጊዶ ኣቲን ዬሱሲ ሆኪዲ ቢታ ቦላ ባ ቢራꬌራ ጻፎ ኦይኪዴስ።
JOH 8:7 ኢስቲ ኢዛ ዛሪ ዛሪ ኦይቺን ꬎቁ ጊዲ፥ «ኢንቴ ጊዶፌ ናጋራይ ባይንዳ ኣሲ ኮይሮ ሹች ኢዚ ቦላ ኦሎ» ጊዴስ።
JOH 8:8 ሄሳፌ ቃሴካ ሆኪዲ ቢታ ቦላ ጻፊዴስ።
JOH 8:9 ኢስቲካ ሄሳ ሲዪዲ ጪማታፔ ዶሚዲ ዉሪካ ኢሶይ ኢሶይ ቢዳ፤ ሄሳ ጊሻስ ዬሱሲ ሄን ኤቂዳ ማጫሳይራ ጻላ ኣቲዴስ። «ኔና ሞቲዛይቲ ኣዋን ዲዞ? ኔ ቦላ ፒርዲዳይ ኦኒካ ዴኔ?» ጊዴስ።
JOH 8:11 ኢዛካ፥ «ጎዶ ኦኒካ ባ» ጋዱስ። ዬሱሲካ፥ «ታኒካ ኔ ቦላ ፒርዲኬ፤ ባ! ናምኣንꬆ ናጋራ ኦꬆፋ» ጊዴስ።
JOH 8:12 ቃሴ ዬሱሲ፥ «ታኒ ኣላሜስ ፖኦ። ታና ካሊዛዴይ ዉሪ ዴኦ ፖኦ ዴማና። ꬉማን ሲሜሬቴና» ጊዲ ኢስታስ ዮቲዴስ።
JOH 8:13 ፋርሳዌቲ፥ «ኔኒ ኔ ጊሻስ ማርካታሳ፤ ኔ ማርካይ ቱሙ ጊዴና» ጊዳ።
JOH 8:14 ዬሱሲካ ኢስታስ፥ «ታኒ ታ ጊሻስ ኣይ ማርካቲኮካ ታ ኣዋፔ ዪዳኮ ቃሴ ታኒ ኣዋ ባናኮ ታ ኤሪዛ ጊሻስ ታ ማርካቴꬂ ቱማ። ኢንቴ ጊዲኮ ታ ኣዋፔ ዪዳኮኔ ቃሴ ኣዋ ባናኮ ኤሬኬታ።
JOH 8:15 ኢንቴ ኣሾ ቆፋ ማላ ፒርዴታ፤ ታኒ ጊዲኮ ኦና ቦላካ ፒርዲኬ።
JOH 8:16 ታ ፒርዲኮካ ታ ፒርዳይ ቱሙ ፒርዳ። ጋሶይካ ታኒ ታርካ ፒርዲኬ፤ ታና ኪቲዳ ታ ኣዋይካ ታናራ ዴስ።
JOH 8:17 ናምኡ ኣሳታ ማርካይ ቱሙ ጊዲዳይሲ ኢንቴ ዎጋን ጻፌቲዴስ።
JOH 8:18 ሄሳ ጊሻስ ታኒ ታ ጊሻስ ማርካታይስ፤ ታና ኪቲዳ ታ ኣዋይካ ታስ ማርካቴስ» ጊ ዛሪዴስ።
JOH 8:19 ኢስቲካ፥ «ኔ ኣዋይ ኣዋን ዲዜ?» ጊዲ ኢዛ ኦይቺዳ። ዬሱሲካ ኢስታስ፥ «ታና ጊዲን ታ ኣዋካ ጊዲን ኢንቴ ኤሬኬታ፤ ኢንቴ ታና ኤሪዛኮ ታ ኣዋካ ኤራናኮሺን» ጊዲ ኢስታስ ዛሪዴስ።
JOH 8:20 ዬሱሲ ሄሳ ኢስታስ ዮቲዳይ ጾሳ ኬꬃ ጊቤን ሚሼ ዎꬂዛ ሳጺኔ ኣቻን ታማርሲሼ ዮቲዴስ፤ ጊዶ ኣቲን ኢዛስ ኦይኬቲዛ ዎዴይ ጋኮንታ ጊሻስ ኦኒካ ኢዛ ኦይኪቤና።
JOH 8:21 ዬሱሲ ቃሴካ፥ «ታ ባናሺን ኢንቴ ታና ኮያናኔ ኢንቴ ኢንቴ ናጋራን ሃይቃና ኣቲን ታ ቢዛሶ ባና ዳንዳዬኬታ» ጊዴስ።
JOH 8:22 ኣይሁዳቲካ ባ ጊዶን ኢሶይ ኢሳራ ኢዚ፥ « ‹ታ ቢዛሶ ኢንቴ ባና ዳንዳዬኬታ› ጊዛይ ባርካ ባና ዎꬋናሴሻ?» ጌቴቲዳ።
JOH 8:23 ኢዚ ቃሴ ኢስታ፥ «ኢንቴ ጋርሳ ኣሳ፤ ታኒ ቦላ ኣሳ፤ ኢንቴ ሃይሳ ኣላሜ ኣሳ፤ ታኒ ሃ ኣላሜፔ ጊዲኬ።
JOH 8:24 ኢንቴ ታ ኦናኮ ኤሪዲ ኣማኖንታ ኣጊኮ ኢንቴ ኢንቴ ናጋራን ሃይቃና ጊሻስ ታ ኢንቴ ኢንቴ ናጋራን ሃይቃና ጊዳይ ሄሳ ጊሻሳ» ጊዴስ።
JOH 8:25 ኢስቲካ ኢዛ፥ «ኔ ኦኔ?» ጊዳ። ዬሱሲካ ኢስታስ፥ «ሃኢ ጋካናስ ታ ኢንቴስ ኢዛ ጊሻስ ዮቲዛዴይ ታና።
JOH 8:26 ታ ኢንቴ ቦላ ሃሳያናይሲኔ ፒርዲዛ ዮኦይ ዳሮይ ዴስ። ጊዶ ኣቲን ታና ኪቲዳዴይ ኣማኔቲዳዴ፤ ታኒካ ኢዛፔ ሲዪዳይሳ ሃ ኣላሜዛስ ዮታይስ» ጊዴስ።
JOH 8:27 ኢዚ ኢስታስ ኣዋ ጊሻስ ዮቲዛይሳ ኣኬኪቤቴና።
JOH 8:28 ሄሳ ጊሻስ ዬሱሲ፥ «ኢንቴ ኣሳ ና ꬎቁ ሂስቲዲ ካቂዳ ዎዴ ታኒ ኢዛ ጊዲዳይሳ ኢንቴ ኤራና፤ ኣዋይ ታና ታማርሲዳይሳ ዮታዲስ ኣቲን ታኒ ታ ሼኔ ማላ ኣይኮካ ኦꬆንታይሳ ኢንቴ ኣኬካና።
JOH 8:29 ታና ኪቲዳይሲ ኢዚ ታናራ ዴስ። ኣይ ዎዴካ ታ ኡፋይሲዛዝ ኦꬂዛ ጊሻስ ኢዚ ታና ጻላላ ዬጊ ኣጊቤና» ጊዴስ።
JOH 8:30 ኢዚ ሄሳ ዮቲዳ ማላ ዳሮ ኣሳይ ኢዛን ኣማኒዴስ።
JOH 8:31 ዬሱሲ ባና ኣማኒዳ ኣይሁዳታ፥ «ኢንቴ ቱሙ ታ ቃላን ዲኮ ኢንቴ ቱማፔ ታና ካሊዛይታ ጊዳና።
JOH 8:32 ቱማይ ኣዛኮ ኢንቴ ኤራናኔ ቱማይካ ኢንቴና ዎዛና» ጊዴስ።
JOH 8:33 ኢስቲካ ኢዛስ ዛሪዲ፥ «ኑኒ ኣብራሃሜ ናይታኮ! ኑ ኦናስካ ኣይሌቲ ኤሮኮ፤ ሂስቲን ኔ ኑና ዋናዳ ኢንቴ ዎዜታና ጋይ?» ጊዳ።
JOH 8:34 ዬሱሲካ ኢስታስ፥ «ታ ኢንቴስ ቱሙ ጋይስ፤ ናጋራ ኦꬂዛዴይ ዉሪ ናጋራስ ኣይሌ፤
JOH 8:35 ኣይ ዎዴካ ኣይሌይ ሶን ሉጺ ዴኤና። ዬሎይ ጊዲኮ ኣይዴካ ሶን ዴስ።
JOH 8:36 ሂስቲኮ ናዚ ኢንቴና ዎዚኮ ኢንቴ ዎዜቲዳይታ ጊዳና።
JOH 8:37 ኢንቴ ኣብራሃሜ ናይታ ጊዲዳይሳ ታ ኤራይስ፤ ጊዶ ኣቲን ታ ቃላ ኢንቴ ኤሮ ጊ ኤኮንታ ጊሻስ ታና ዎꬋናስ ኮዬታ።
JOH 8:38 ታኒ ታ ኣዋ ኣቻን ቤኢዳይሳ ኢንቴስ ዮታይስ፤ ኢንቴ ቃሴ ኢንቴ ኣዋፔ ሲዪዳይሳ ኦꬄታ» ጊዴስ።
JOH 8:39 ኢስቲካ ኢዛስ፥ «ኑ ኣዋይ ኣብራሃሜ» ጊዲ ዛሪ ዮቲን ዬሱሲ ኢስታስ፥ «ኢንቴ ኣብራሃሜ ና ጊዲዳኮ ኣብራሃሜꬆ ኦꬃና።
JOH 8:40 ኢንቴ ጊዲኮ ታኒ ጾሳፌ ሲዪዳ ቱማ ኢንቴስ ዮቲን ታና ዎꬋናስ ጊጺ ዴንዲዴታ። ጊዶ ኣቲን ኣብራሃሜይ ሄሳꬆ ኦꬂቤና።
JOH 8:41 ኢንቴ ኢንቴ ኣዋꬆ ኦꬄታ» ጊዴስ። ኢስቲካ ዛሪዲ፥ «ኑ ላይማን ዬሌቲዳ ና ጊዶኮ፤ ኑ ኣዋይ ኢሲ ጾሳ ጻላ» ጊዲ ኢዛስ ዛሪዳ።
JOH 8:42 ዬሱሲ ኢስታስ፥ «ኢንቴ ኣዋይ ጾሳ ጊዲዳኮ ታኒካ ጾሳፌ ኬዛ ዪዳ ጊሻስ ኢንቴ ታና ዶሳናኮሺን፤ ታና ኢዚ ኪቲዴስ ኣቲን ታ ታርካ ታ ሼኔን ያቤኬ።
JOH 8:43 ታ ዮቲዛይሳ ኣይስ ዩሺ ቆፔኬቲ? ጋሶይካ ኢንቴ ታ ቃላ ሲያና ኮዮንታ ጊሻሳ።
JOH 8:44 ኢንቴ ኢንቴ ኣዋ ጻላኤ ናይታ፤ ኢንቴ ኣዋ ኣሞ ፖላና ኮዬታ፤ ኢዚ ካሴካ ሼምፖ ዎꬊዳዴ። ኢዛ ኣቻን ቱማይ ዶንታ ጊሻስ ኢዚ ቱማን ኤቂቤና፤ ኢዚ ባ ሁኤስ ዎርዳንቻኔ ዎርዶ ኣዋ ጊዲዳ ጊሻስ ኢዚ ዎርዶ ሃሳያ ባፔ ሜꬊ ኤኪዲ ሃሳዬስ።
JOH 8:45 ታ ቃሴ ቱሙ ሃሳይዛ ጊሻስ ኢንቴ ታና ኣማኔኬታ።
JOH 8:46 ኢንቴ ጊዶፌ ታና፥ ‹ኔ ሃኖ ናጋራ ኦꬃዳሳ› ጊዲ ማርካራ ላꬃናስ ሞታና ዳንዳይዛዴይ ዲዜ? ታ ቱሙ ሃሳይዛዴ ጊዲኮ ሂስቲን ኣዛስ ታና ኣማኔኬቲ?
JOH 8:47 ጾሳፌ ጊዲዳ ኣሲ ጾሲ ጊዛ ሲዬስ፤ ኢንቴ ጊዲኮ ጾሳፌ ጊዶንታ ጊሻስ ጾሳ ቃላ ሲዬኬታ» ጊዴስ።
JOH 8:48 ኣይሁዳቲካ ዛሪዲ፥ «ኑ ኔና ኔ፥ ‹ሳማሪያ ኣሳ፤ ኔ ቦላ ዳይዳንꬂ ዴስ› ጊዳይሲ ቱሙ ዴኔ?» ጊዳ።
JOH 8:49 ዬሱሲ ኢስታስ፥ «ታኒ ታ ኣዋ ቦንቻይስ ኣቲን ዳይዳንꬂ ታ ቦላ ባ። ኢንቴ ጊዲኮ ታና ካዉሼታ።
JOH 8:50 ታኒ ታስ ቦንቾ ኮይኬ። ታ ቦንቼታና ማላ ኮይዛዴይ ቃሴ ዴስ። ኢዚካ ፒርዳ ፒርዳናዴ።
JOH 8:51 ታ ኢንቴስ ቱሙ ጋይስ፤ ኦኒካ ታ ቃላ ናጊኮ ሃይቆ ሙሌካ ሃይቄና» ጊ ዛሪዴስ።
JOH 8:52 ኣይሁዳቲ ኢዛ፥ «ኔ ቦላ ዳይዳንꬂ ዲዛይሳ ሃኢ ኑኒ ኤሪዶስ። ኣብራሃሜይ ሃይቂዴስ፤ ናቤቲካ ኢዛꬆ ሃይቂዳ። ኔ ቃሴ፥ ‹ኦኒካ ሙሌ ሃይቆ ቤዬና› ጋ ዮታሳ።
JOH 8:53 ኔ ኑ ኣዋ ኣብራሃሜፔ ኣꬋይ? ኢዚ ሃይቂዴስ፤ ናቤቲካ ሃይቂዳ፤ ሂስቲን ኔ ኔና ኦና ጋና ኮያዲ?» ጊዳ።
JOH 8:54 ዬሱሲካ ኢስታስ፥ «ታ ታርካ ታና ቦንቺኮ ታ ቦንቾይ ሃዳ። ታና ቦንቺዛዴይ ጊዲኮ ኢንቴ፥ ‹ኢዚ ኑ ጾሳ› ጊዛይሲ ታ ኣዋ።
JOH 8:55 ኢንቴ ኢዛ ኤሮንታ ኣጊኮካ ታ ኢዛ ኤራይስ። ታ ኢዛ ኤሪኬ ጊኮ ታኒካ ኢንቴ ማላ ዎርዳንቻ ጊዳይስ፤ ታ ቃሴ ኢዛ ኤራይስ፤ ኢዛ ቃላካ ናጋይስ።
JOH 8:56 ኢንቴ ኣዋ ኣብራሃሜይ ታ ጋላስ ቤያናስ ኣሞቲዲ ቤዪዴሲኔ ኡፋዬቲዴስ» ጊዴስ።
JOH 8:57 ኣይሁዳቲ ቃሴ፥ «ኔስ ቡሮ ኢቻሹ ታሙ ላይꬅ ኩሞንታ ኔኒ ኣብራሃሜ ቤያዲ?» ጊዳ።
JOH 8:58 ዬሱሲካ፥ «ታ ኢንቴስ ቱሙ ጋይስ፤ ኣብራሃሜይ ዬሌታናፔ ካሴካ ታኒ ዳይስ» ጊዴስ።
JOH 8:59 ኣይሁዳቲ ሄራካ ኢዛ ጫዳናስ ዉሪ ሹች ዴንꬂዳ፤ ጊዶ ኣቲን ዬሱሲ ኢስታ ማታፔ ቆቴቲዲ ጾሳ ኬꬃፌ ኬዚ ቢዴስ።
JOH 9:1 ዬሱሲ ኦጌራ ኣꬊ ቢሼ ባ ኣዬይ ኡሎፔ ዬሌቶሶፌ ኣይፌ ቆቂዳዴ ቤዪዴስ።
JOH 9:2 ኢዛ ካሊዛይቲ ኢዛ፥ «ኣስታማሬ! ሃይሲ ኣዴዚ ቆቄ ጊዲ ዬሌታና ማላ ናጋራ ኦꬂዳይ ኦኔ? ኢዛ ዬሊዳይቲ ኦꬂዶዬ? ኢዚ ኦꬂዴ?» ጊዲ ዬሱሳ ኦይቺዳ።
JOH 9:3 ዬሱሲካ ኢስታስ፥ «ኢዛ ጊዲንካ ኢዛ ዬሊዳይቲካ ናጋራ ኦꬂቤቴና። ኢዚ ሄሳꬆ ሃኒዳይ ጾሳ ኦሶይ ኢዛ ቦላ ቆንጫናሳ።
JOH 9:4 ጋላሳራ ታና ኪቲዳዴ ኦሶ ኦꬃናስ ታስ ቤሴስ። ቡሮ ኦኒካ ኦꬃናስ ዳንዳዮንታ ቃማይ ያና።
JOH 9:5 ሃ ቢታ ቦላ ዲዛ ዎዴ ሃ ቢታስ ፖኦይ ታና» ጊዴስ።
JOH 9:6 ሄሳ ጊ ሲሚዲ ቢታ ቦላ ጩች ጩቲዲ ባ ጩቻን ኡርቃ ሹጊሲዲ ኣዴዛ ኣይፌዛ ሄ ኡርቃ ቲይዲ፥
JOH 9:7 «ባዳ ሴሊሆሜን ኣሳይ ጻማቄቲዛሶን ሜጬታ» ጊዴስ። ሴሊሆሜ ጉሲ ኪቴቲዳይሳ ጉሳ። ኣዴዚካ ቢዲ ሜጬቲዲ ጼሊሼ ሲሚ ዪዴስ።
JOH 9:8 ኢዛ ዶꬃቲኔ ካሴ ኢዚ ሄን ዎሲሺን ቤኢዳ ኣሳይ፥ «ሃይሳዴይ ካሴ ኡቲዲ ዎሲዛ ኣዴዛ ዴኔ?» ጊዳ።
JOH 9:9 ኢስታፌ ኢሲ ኢሲ ኣሳቲ፥ «ኤ ኢዛኮ» ጊዳ። ባጋይቲ፥ «ኢዛ ዴና» ጊዳ። ኢዚ ቃሴ፥ «ታ ኢዛኮ» ጊዴስ።
JOH 9:10 ኢስቲካ፥ «ሂስቲን ኔ ኣይፌይ ዋኒ ጼሊዴ?» ጊ ኦይቺዳ።
JOH 9:11 ኢዚካ ዛሪዲ፥ «ዬሱሳ ጌቴቲዛ ኣሲ ቢታ ሙኑቂዲ ታ ኣይፌዛ ሄ ኡርቃ ቲይዲ ታና፥ ‹ባዳ ሴሊሆሜን ሜጬታ› ጊ ዮቲን ታ ባዳ ሜጬታዳ ጼላናስ ዳንዳያዲስ» ጊዴስ።
JOH 9:12 ኢስቲካ፥ «ሂስቲን ሄሳዴይ ሃኢ ኣዋን ዲዜ?» ጊዳ፤ ኢዚካ፥ «ታ ኤሪኬ» ጊዴስ።
JOH 9:13 ኢስቲካ ሄ ካሴ ኣይፌ ቆቄ ኣዴዛ ፋርሳዌታኮ ኤፊዳ።
JOH 9:14 ዬሱሲ ኡርቃ ሙኑቂዲ ኣዴዛ ኣይፌ ፓꬂዳ ጋላሳይ ኣይሁዳታ ሳምባታ ጋላሳ።
JOH 9:15 ሄሳ ጊሻስ ፋርሳዌቲ ኣዴዛ ኢዚ ዎስቲ ጼሊዳኮ ኢዛ ኦይቺዳ። ኣዴዚካ ዛሪዲ፥ «ኢዚ ታ ኣይፌን ኡርቃ ቲይዴስ፤ ታኒካ ሜጬታዲስ፤ ሄኮ ሃኢ ጼላዲስ» ጊዴስ።
JOH 9:16 ፋርሳዌታፔ ኢሲ ኢሲ ኣሳቲ፥ «ሃይሲ ኣዴዚ ሳምባታ ቦንቾንታዴ ጊዲዳ ጊሻስ ኢዚ ጾሳፌ ጊዴና» ጊዳ። ባጋይቲ ቃሴ፥ «ናጋራንቻይ ሃይሳ ማላ ማላታ ዋኒ ኦꬃና ዳንዳይዜ?» ጊዳ። ሄሳ ጊሻስ ኢስታ ጊዶን ፓላማይ ሜꬌቲዴስ።
JOH 9:17 ሂስቲን ካሴ ኣይፌ ቆቄ ኣዴዛኮ ሲሚዲ፥ «ሃ ኔ ኣይፌ ፓꬂዳ ኣዴዛ ጊሻስ ኔ ኣይ ጋይ?» ጊዳ። ኣዴዚ ዛሪዲ፥ «ኢዚ ናቤኮ!» ጊዴስ።
JOH 9:18 ኣይሁዳቲ ኣዴዛ ዬሊዳ ኣዬይራኔ ኣዋራ ጼይጊሲ ኤሂሳና ጋካናስ ኣዴዚ ካሴ ቆቄ ጊዲዳይሳ ኣማኒቤቴና።
JOH 9:19 ኢስቲካ ዬሊዳይታ፥ «ኢንቴ፥ ‹ኑስ ቆቄ ናይ ዬሌቲዴስ› ጊዛ ናዚ ሃይሴ? ሂስቲን ሃኢ ዋኒዲ ጼላና ዳንዳይዴ?» ጊዳ።
JOH 9:20 ዬሊዳይቲካ ሂዝጊ ዛሪዳ፥ «ኢዚ ኑ ና ጊዲዳይሳኔ ቆቄ ጊዲ ዬሌቲዳይሳ ኤሮስ።
JOH 9:21 ሃኢ ቃሴ ኢዚ ዋኒ ጼላና ዳንዳይዳኮኔ ኢዛ ኣይፌ ኦኒ ፖጊዳኮ ኑ ኤሮኮ። ኢዚ ባና ዳንዳይዳዴ ጊዲዳ ጊሻስ ኢዚ ባ ጊሻስ ዮታናስ ዳንዳዬስ ኢዛ ኦይቺቴ» ጊዳ።
JOH 9:22 ኢዛ ዬሊዳይቲ ሄሳꬆ ጊዳይ ኦኒካ ዬሱሳ ኢዚ ኪርስቶሳ ጊዲ ማርካቲዳይ ዉሪ ኣይሁዳታ ዎሳ ኬꬃፌ ጎዴታና ማላ ኣይሁዳቲ ካሴ ሴራ ኦꬂዳ ጊሻስ ኣይሁዳታስ ባቢዲ ጊዳ።
JOH 9:23 ሄሳ ጊሻስ፥ «ኢዛ ዬሊዳይቲ ኢዚ ባና ዳንዳይዳዴ ጊዲዳ ጊሻስ ኢዛ ኦይቺቴ» ጊዳ።
JOH 9:24 ካሴ ቆቄ ኣዴዛ ቃሴካ ጼይጊዲ፥ «ሃይሶ ኔ ቱማዮ ዮታዳ ጾሳ ቦንቻ። ሃይሲ ኣዴዚ ናጋራንቻ ጊዲዳይሳ ኑ ኤሮስ» ጊዳ።
JOH 9:25 ኢዚካ፥ «ኢዚ ናጋራንቻ ጊዲን ታ ኤሪኬ። ጊዶ ኣቲን ታ ካሴ ቆቄ ጊዲዳሮኔ ቃሴ ሃኢ ታ ጼሊዛሮ ሃኖ ጻላ ኤራይስ» ጊዴስ።
JOH 9:26 ኢስቲ ቃሴ ኢዛ፥ «ኢዚ ኔስ ኣይ ኦꬂዴ? ኔ ኣይፌዛ ዎስቲ ፖጊዴ?» ጊዲ ኦይቺዳ
JOH 9:27 ኢዚካ፥ «ታ ኢንቴስ ካሴ ዮቲን ዎዚናን ዎꬂ ሲዪቤኬታ ሺን ሃኢ ቃሴ ኣዛስ ዛሬꬂ ሲያና ኮዬቲ? ኢንቴካ ኢዛ ካሊዛይታ ጊዳና ኮዬቲ?» ጊዴስ።
JOH 9:28 ሄሳፌ ጉዬ ኢዛስ፥ «ኑ ሙሴ ካሊዛዴንታ፤ ኔ ኢዛ ካሊዛዴ ጊዳ።
JOH 9:29 ካሴ ጾሲ ሙሴራ ሃሳዬቲዳይሳ ኑ ኤሮስ፤ ሃይሲ ኣዴዚ ኣዋፔ ዪዳኮ ኑ ኤሮኮ» ጊዳ።
JOH 9:30 ኣዴዚካ ኢስታስ፥ «ኢዚ ኣዋፔኮን ኢንቴ ኤሮንታይሲ ማላሊሴስ፤ ጊዶ ኣቲን ታ ኣይፌ ጼሊሲዳዴይ ኢዛ።
JOH 9:31 ጾሲ ባስ ያዪዛዴሲኔ ኢዛ ሼኔ ኦꬂዛዴስ ኣቲን ናጋራንቻ ኣስ ሲዮንታይሳ ኑ ኤሮስ።
JOH 9:32 ኣይፌ ቆቂዲ ዬሌቲዳዴ ኣይፌይ ጼሊዴስ ጊዛይሳ ኣላሜይ ሜꬌቶሶፔ ኦኒካ ሲዪ ኤሬና።
JOH 9:33 ሃይሳዴይ ጾሳፌ ጊዶንታኮ ሃይሳ ኦꬃናስ ዳንዳዬና» ጊ ዛሪዴስ።
JOH 9:34 ኢስቲካ ኢዛ፥ «ኔኒ ኔስ ሙሌ ኣሳቴꬃይ ናጋራን ሙኑቄቲን ዬሌቲዳይሲ ኑና ታማርሳና ዋና ጻላዲ?» ጊዲ ኢዛ ጎዲዳ።
JOH 9:35 ኣዴዛ ጎዲዳይሳ ዬሱሲ ሲዪዴስ። ኢዛ ዴሚዲ፥ «ኔ ኣሳ ናን ኣማናይ?» ጊዴስ።
JOH 9:36 ኣዴዚካ፥ «ጎዶ! ታ ኢዛን ኣማናና ማላ ኢዚ ኦኔ?» ጊ ኦይቺዴስ።
JOH 9:37 ዬሱሲካ፥ «ኔ ኢዛ ቤያዳሳ፤ ሃኢ ኔናራ ሃሳይዛይ ኢዛኮ!» ጊዴስ።
JOH 9:38 ኣዴዚካ፥ «ጎዶ! ኢዛ ኣማናዲስ» ጊዲ ኢዛስ ሆኪ ጎይኒዴስ።
JOH 9:39 ዬሱሲካ፥ «ቆቄቲ ጼላና ማላኔ ጼሊዛይቲ ቆቃና ማላ ፒርዳናስ ታ ሃይሳ ሃ ኣላሜ ያዲስ» ጊዴስ።
JOH 9:40 ኢዛራ ዲዛ ፋርሳዌታፔ ኢሲ ኢሲ ኣሳቲ ሄሳ ሲዪዲ፥ «ሄሲ ኣይ ጉሴ? ሂስቲን ኑኒካ ቆቄ?» ጊዳ።
JOH 9:41 ዬሱሲካ ኢስታ፥ «ኢንቴ ቆቄታ ጊዲዳኮ ኢንቴስ ናጋራ ጊዴናሺን ኢንቴ ሃኢ፥ ‹ኑ ጼሎስ› ጊዛ ጊሻስ ኢንቴ ናጋራንቻ ጊዲዳ ማላ ዳና» ጊዴስ።
JOH 10:1 ዬሱሲ፥ «ታ ኢንቴስ ቱሙ ጋይስ፤ ዶርሳታ ዪሬን ፔንጌራፔ ኣቲን ሃራ ባጋራ ጉፒ ጌሊዛይ ካይሶኔ ቦንቂዛዴ።
JOH 10:2 ፔንጌራ ጌሊዛዴይ ኢዚ ዶርሳታ ሄሚዛዴ።
JOH 10:3 ፔንጌ ናጊዛዴይ ኢዛስ ፔንጌዛ ዶዬስ። ዶርሳቲካ ኢዛ ቃላ ሲዬቴስ፤ ባ ዶርሳታ ሱንꬃራ ሱንꬃራ ጼይጊ ኬሴስ።
JOH 10:4 ባይታ ኡባ ኬሲዳፔ ጉዬ ኢስታ ሲንꬅ ኣꬊዲ ካሌꬄስ፤ ዶርሳቲካ ኢዛ ቃላ ኤሪዛ ጊሻስ ኢዛ ካሌቴስ።
JOH 10:5 ኢማꬃ ኣሳ ቃላ ኤሮንታ ጊሻስ ኢዛፔ ባቃቴቴስ ኣቲን ሙሌካ ኢዛ ካሌቴና» ጊዴስ።
JOH 10:6 ዬሱሲ ሄሳ ሌሚሶዛ ኢስታስ ዮቲዴስ ሺን ኢስቲ ቃሴ ኢዚ ኢስታስ ዮቲዳይሳ ኣይኮካ ኤሪቤቴና።
JOH 10:7 ሄሳ ጊሻስ ዬሱሲ ቃሴካ ኢስታስ፥ «ታ ኢንቴስ ቱሙ ጋይስ፤ ዶርሳታ ፔንጌይ ታና።
JOH 10:8 ታፔ ካሴ ዪዳይቲ ዉሪ ካይሶኔ ቦንቂዛይታ። ዶርሳቲ ጊዲኮ ኢስቲ ጊዛ ሲዪቤቴና።
JOH 10:9 ፔንጌይ ታና፤ ታ ባጋራ ጌሊዛዴይ ዉሪ ኣታና፤ ጌላናኔ ኬዛና፤ ሄሜቲዛሶካ ዴማና።
JOH 10:10 ካይሶይ ካይሶታና፥ ዎꬋናሲኔ ꬋይሳናስ ጻላ ዬስ። ታኒ ጊዲኮ ኢንቴስ ዴኦይ ዳና ማላኔ ኢንቴስ ኬሂ ዳራና ማላ ያዲስ።
JOH 10:11 «ታኒ ሎኦ ሄንꬃንቻ፤ ሎኦ ሄንꬃንቻይ ባ ሼምፖ ባ ዶርሳታ ጊሻስ ኣꬂ ኢሜስ።
JOH 10:12 ሚሼራ ቃጻሬቲዲ ሄሚዛዴይ ጊዲኮ ዶርሳቲ ኢዛስ ጊዶንታ ጊሻስ ካና ሱይቴይ ዪዛ ዎዴ ዶርሳታ ዬጊዲ ባስ ባቃቴስ። ካና ሱይቴይካ ዶርሳታ ዳፊ ዳፊ ሜሲኔ ላሌስ።
JOH 10:13 ባቃቲዛዴይ ሚሻን ቃጻሬቲዳዴ ጊዲዳ ጊሻሲኔ ዶርሳታስ ሚሼቶንታ ጊሻሳ።
JOH 10:14 «ሎኦ ሄንꬃንቻይ ታና፤ ታኒ ታ ዶርሳታ ኤራይስ፤ ኢስቲካ ታና ኤሬቴስ።
JOH 10:15 ሄሲካ ኣዋይ ታና ኤሪዛይሳ ማላ ታኒ ታ ሼምፖ ዶርሳታ ጊሻስ ኣꬃ ኢማና።
JOH 10:16 ሃይሳ ሃ ዶርሳ ዪሬን ጌሎንታይቲ ታስ ሃራ ዶርሳቲ ዴቴስ፤ ታ ኢስታካ ሃ ኤሃናስ ታስ ቤሴስ፤ ኢስቲካ ታ ቃላ ሲያናኔ ኢሲ ሜሄ ጊዳና። ሄሚዛይሲካ ኢሳዴ ጊዳና።
JOH 10:17 ታ ዛራዳ ዴንꬃናስ ታ ሼምፖ ኣꬃ ኢሚዛ ጊሻስ ታ ኣዋይ ታና ዶሴስ።
JOH 10:18 ታኒ ታ ሼምፖ ታ ዶሳራ ኣꬃ ኢማዲስ ኣቲን ኦኒካ ታፔ ዎꬂ ኤኬና፤ ታ ኣꬃ ኢማናስ ጊዲን ዎይኮ ዛራ ዴንꬃናስ ጊዲን ሼኔይ ታሳ፤ ሄሳ ሄ ኣዛዞዛ ታኒ ታ ኣዋፔ ኤካዲስ» ጊዴስ።
JOH 10:19 ሄሳ ሄ ቃላፔ ዴንዲዳይሳን ኣይሁዳታ ጊዶን ቃሴካ ሻኬቴꬂ ሜꬌቲዴስ።
JOH 10:20 ዳሮ ኣሳይ፥ «ኢዛ ቦላ ዳይዳንꬂ ዲዛ ጊሻሲኔ ኢዚ ጎሽ ጊዲዳ ጊሻስ ኢንቴ ኢዚ ጊዛይሳ ኣይስ ሲዬቲ?» ጊዳ።
JOH 10:21 ባጋይቲ ቃሴ፥ «ዳይዳንꬂ ዲዛዴይ ሃይሳ ማላ ዴና፤ ዳይዳንꬂ ቆቂዳ ኣይፌ ፓꬂ ኤሪዜ?» ጊዳ።
JOH 10:22 ዬሩሳላሜን ጾሳ ኬꬃ ኦራꬆ ባኣሌ ቦንቾ ዎዴይ ጋኪዴስ፤ ሄ ዎዴይካ ባልጎ።
JOH 10:23 ዬሱሲ ጾሳ ኬꬃ ጊቤ ጊዶን ሶሎሞኔ ሲሜሬቴꬃሶራ ኣꬊሺን፥
JOH 10:24 ኣይሁዳቲ ኢዛ ጊዶ ኣꬂዲ፥ «ኔ ኣይዴ ጋካናስ ኑ ዎዚና ሂርጋን ጋምኢሳኔ? ኔ ጾሲ ኪቲዳዴ ጊዲኮ ኑስ ቆንጪሳ ዮታ» ጊዳ።
JOH 10:25 ዬሱሲካ ኢስታስ፥ «ታ ኢንቴስ ዮታዲስኮሺን ኢንቴ ጊዲኮ ኣማኒቤኬታ። ታ ኣዋ ሱንꬃን ታ ኦꬂዛ ማላታቲ ታ ጊሻስ ዮቴቴስ።
JOH 10:26 ኢንቴ ቃሴ ታ ዶርሳታ ጊዶንታ ጊሻስ ታና ኣማኔኬታ።
JOH 10:27 ታ ዶርሳቲ ታ ቃላ ሲዬቴስ። ታኒካ ኢስታ ኤራይስ፤ ኢስቲካ ታና ካሌቴስ።
JOH 10:28 ታ ኢስታስ ሜርና ዴኦ ኢማና፤ ሙሌካ ኢስቲ ꬋዬቴና፤ ኢስታ ታ ኩሼፔ ዎꬂ ኤካናስ ዳንዳያናዴይ ኦኒካ ዴና።
JOH 10:29 ታስ ኢስታ ኢሚዳ ታ ኣዋይ ኡባፌ ኣꬌስ፤ ታ ኣዋ ኩሼፔ ኢስታ ኦኒካ ቦንቃናስ ዳንዳዬና።
JOH 10:30 ታኒኔ ታ ኣዋይ ኑ ኢሲኖ» ጊዴስ።
JOH 10:31 ኣይሁዳቲ ኢዛ ጫዳናስ ቃሴካ ሹች ዴንꬂዳ።
JOH 10:32 ዬሱሲካ፥ «ኣዋፔ ጊዲዳ ዳሮ ጊታ ማላታታ ታ ኢንቴና ቤሳዲስ። ሂስቲን ሃ ታ ቤሲዳይታፔ ኣዋሪ ጊሻስ ታና ሹቻራ ጫዴቲ?» ጊዴስ።
JOH 10:33 ኣይሁዳቲካ፥ «ኑ ኔና ሹቻራ ጫዲዛይ ኔ ኣስ ጊዳ ኡታዳ ኔና ኔርካ ጾስ ኬሳዳ ጫሻ ቃላ ኔ ሃሳይዳ ጊሻሳፌ ኣቲን ኔ ሎኦ ኦꬂዳይሳ ጊሻስ ዴና» ጊዲ ኢዛስ ዛሪዳ።
JOH 10:34 ዬሱሲካ ኢስታስ፥ «ኢንቴ ዎጋ ጊዶን፥ ‹ታ ኢንቴና ጾሳታ ጋዲስ› ጌቴቲ ጻፌቲቤኔ?
JOH 10:35 ጾሳ ቃላይ ኢስታስ ዪዳ ኣሳታ፥ ‹ጾሲ ጊኮ ማጻፋይ ሻሬታናስ ዳንዳዮንታ ጊዲኮ›
JOH 10:36 ሂስቲን፥ ‹ታ ጾሳ ና› ጊዳ ጊሻስ ኣዋይ ባ ሻኪ ዱማሲዳይሳኔ ሃ ዱጌ ኣላሜ ኪቲዳይሳ ኢንቴ፥ ‹ኔ ጫያዳሳ› ጊዲ ታና ዎርዶራ ኣዛስ ሞቴቲ?
JOH 10:37 ታ ኣዋይ ኦꬂዛይሳ ታ ኦꬆንታ ኣጊኮ ታናን ኣማኖፒቴ።
JOH 10:38 ታ ኢዛꬆ ኦꬂዛ ጊዲኮ ኢንቴ ታና ኣማኖንታ ኣጊኮካ ታ ኣዋይ ታናን ዲዛይሳ ታኒካ ኢዛን ዲዛይሳ ኢንቴ ኤራና ማላኔ ዩሺ ቆፓና ማላ ኢዚ ኦꬂዳ ማላታን ኣማኒቴ» ጊዴስ።
JOH 10:39 ቃሴካ ኢስቲ ኢዛ ኦይካናስ ኮዪዳ ሺን ኢዚ ኢስታ ኩሼፔ ኬሲ ኤኪ ቢዴስ።
JOH 10:40 ሄሳፌ ጉዬ ዬሱሲ፥ ዮሃኒሲ ካሴ ጻማቂዛሶ ዮርዳኖሴፔ ሄ ፒንꬅ ሲሚዲ ሄን ጋምኢዴስ።
JOH 10:41 ዳሮ ኣሳይ ኢዛኮ ዪዴስ፤ ኢስቲ ቃሴ፥ «ዮሃኒሲ ኢሲ ማላታካ ኦꬂቤና፤ ጊዶ ኣቲን ሃይሳ ኣዴዛ ጊሻስ ኢዚ ዮቲዳይሲ ዉሪካ ቱሙኮ» ጊዳ።
JOH 10:42 ሄንካ ዳሮ ኣሳይ ዬሱሳን ኣማኒዴስ።
JOH 11:1 ቢታኒያ ጌቴቲዛሶን ማራማኔ ማርታይ ዲዛ ጉታን ኣላዛሬ ጌቴቲዛዴይ ሳኬቲዴስ።
JOH 11:2 ኢዚ ኢሻ ኣላዛሬይ ሳኬቲዳ ማራማ ካሴ ዬሱሳ ቶሆ ቦላ ሺቶ ጉሳዳ ዬሱሳ ቶሆ ባ ሁኤ ቢናናን ቁጪዳሮኮ።
JOH 11:3 ሚቼቲካ፥ «ጎዶ! ኔ ዶሲዛይሲ ሳኬቲዴስ» ጊዲ ኣስ ዬሱሳኮ ኪቲዳ።
JOH 11:4 ዬሱሲ ሄሳ ሲዪዲ፥ «ሃ ሳኮይ ጾሳ ናይ ኢዛን ቦንቼታና ማላኔ ጾሲ ቦንቼታናሳፌ ኣቲን ኢዛ ሃይቆስ ጋꬂዛዝ ዴና» ጊዴስ።
JOH 11:5 ዬሱሲ ማርታ ኢዚ ሚቼዮ ማራሞኔ ኣላዛሬ ሲቄስ።
JOH 11:6 ጊዶ ኣቲን ኣላዛሬይ ሳኬቲዳይሳ ሲዪዲ ሄን ባ ዲዛሶን ናምኡ ጋላስ ጋምኢዴስ።
JOH 11:7 ሄሳፌ ጉዬ ባና ካሊዛይታ፥ «ኣኔ ዩሁዳ ቢታ ሲሚ ቦስ» ጊዴስ።
JOH 11:8 ኢስቲካ፥ «ኣስታማሬ! ጉꬃ ዎዴፔ ካሴ ኣሳይ ኔና ሹቻራ ጫዳና ኮዬቴስኮሺን፤ ኔ ቃሴ ሃኢ ሄ ሲማ ባኔ?» ጊዳ።
JOH 11:9 ዬሱሲ ኢስታስ፥ «ኢሲ ጋላሳን ታማኔ ናምኡ ሳቴይ ዴስ ዴኔ? ጋላሳራ ሄሜቲዛ ኣሲ ሃ ኣላሜዛ ፖኦን ሲሜሬቲዛ ጊሻስ ꬉጴቴና።
JOH 11:10 ꬉጴቲዛዴይ ጊዲኮ ኢዚ ቃማራ ሄሜቲዛዴ። ጋሶይካ ፖኦይ ባይንዳ ጊሻሳ» ጊዴስ።
JOH 11:11 ሄሳ ኢስታስ ዮቲዳፔ ጉዬ፥ «ኑ ላጌ ኣላዛሬይ ꬊስኪዴስ፤ ታኒካ ኢዛ ꬊስኮፌ ዴንꬃና ባይስ» ጊዴስ።
JOH 11:12 ኢዛ ካሊዛይቲ ኢዛ፥ «ጎዶ! ኢዚ ꬊስኪዳ ጊዲኮ ዴንዳና» ጊዳ።
JOH 11:13 ዬሱሲ ኢስታስ ሄሳ ዮቲዳይ ኣላዛሬ ሃይቆ ጊሻሳ፤ ጊዶ ኣቲን ኢዛ ካሊዛይታስ ቃሴ ꬊስኮ ጊሻስ ዮቲዳ ሚሳቲዴስ።
JOH 11:14 ሄሳ ጊሻስ ቆንጬራ ኢስታስ፥ «ኣላዛሬይ ሃይቂዴስ።
JOH 11:15 ኢንቴ ኣማናና ማላ ታ ሄን ዶንታ ኣጊዳይሲ ኢንቴ ጊሻስ ታና ኡፋይሴስ፤ ሃኢ ጊዲኮ ኣኔ ጌዴ ኢዛኮ ቦስ» ጊዴስ።
JOH 11:16 ቃሴ ዲዲሞሳ ጌቴቲዛ ቶማሲ ሃንኮ ዬሱሳ ካሊዛይታ፥ «ኣኔ ኑኒካ ቢዲ ኢዛራ ኢሲፌ ሃይቆስ» ጊዴስ።
JOH 11:17 ዬሱሲ ቢ ጋኪሺን ኣላዛሬይ ሃይቂ ሞጌቲን ኦይዱ ጋላስ ጊዲዴስ።
JOH 11:18 ቢታኒያይ ዬሩሳላሜፔ ባጋ ሳቴ ኦጌ ሃኬስ።
JOH 11:19 ኢስታ ኢሻይ ሃይቂዳ ጊሻስ ማራሞኔ ማርታ ሚንꬄꬃናስ ዳሮ ኣይሁዳ ኣሳይ ኢስታኮ ሺቂዴስ።
JOH 11:20 ዬሱሳ ዩሳ ማርታይ ሲያዳ ኢዛ ሞካ ኤካና ባዱስ፤ ማራማ ጊዲኮ ሶን ኡታዱስ።
JOH 11:21 ማርታይ ዬሱሳ፥ «ጎዶ! ኔ ሃን ዲዛኮ ታ ኢሻይ ሃይቄናኮሺን።
JOH 11:22 ሃኢካ ጊዲኮ ኔ ዎሲዳ ኡባ ጾሲ ኔስ ኢማናይሳ ታ ኤራይስ» ጋዱስ።
JOH 11:23 ዬሱሲካ ኢዚስ፥ «ኔ ኢሻይ ዴንዳና» ጊዴስ።
JOH 11:24 ማርታይ ቃሴ፥ «ዉርሴꬃን ዴንꬃ ዎዴ ኢዚ ዴንዳናይሳ ታኒካ ኤራይስ» ጋዱስ።
JOH 11:25 ዬሱሲካ ኢዚስ፥ «ዴንዶይኔ ዴኦይ ታና፤ ታና ኣማኒዛዴይ ሃይቂኮካ ፓጻ ዳና።
JOH 11:26 ታናን ዲዛዴይኔ ታና ኣማኒዛዴይ ሙሌካ ሃይቄና፤ ሄሳ ኔ ኣማናይ?» ጊዴስ።
JOH 11:27 ኢዛካ ዛራዳ፥ «ኤ ጎዶ! ኔኒ ዱጌ ሃ ኣላሜዛ ኪቴቲዳ ጾሳ ና ጊዲዳይሳ ታ ኣማናይስ» ጋዱስ።
JOH 11:28 ሄሳ ጋዳኔ ሲማ ባ ሚቼዮ ማራሞ ዱማ ጼይጋ ኬሳዳ፥ «ኣስታማሬይ ኔና ኮዬስ» ጋዱስ።
JOH 11:29 ማራማካ ሄሳ ሲዪዳ ማላ ኤሌላ ዴንዳዳ ኢዛኮ ባዱስ።
JOH 11:30 ሄሳ ጋካናስ ዬሱሲ ማርታራ ጋጊዳሶሆን ዴስ ኣቲን ጌዴ ጉታ ጊዶ ጌሊቤና
JOH 11:31 ማራሞ ሚንꬄꬂሼ ኢዚራ ሶን ዲዛ ኣይሁዳቲካ ማራማ ፑሱኩ ጋ ዴንዳ ኤቃዳ ኬዚዳይሳ ቤኢዲ ኢዛ ኣላዛሬ ዱፎ ኣቻን ዬካና ቢዛ ሚሳቲን ኢዞ ካሊዳ።
JOH 11:32 ማራማ ዬሱሲ ዲዛሶ ጋካ ኢዛ ዴሚዳ ማላ ኢዛ ቶሆ ቦላ ጉፋናዳ፥ «ጎዶ! ኔ ሃን ዲዛኮ ታ ኢሻይ ሃይቄናኮሺን» ጋዱስ።
JOH 11:33 ኢዛኔ ኢዞ ካሊ ዪዳ ኣይሁዳቲ ዬኪዛይሳ ዬሱሲ ቤዪ ዳሮ ሚሼቲዲ፥
JOH 11:34 «ኢዛ ኣዋን ሞጊዴቲ?» ጊ ኦይቺዴስ፤ ኢስቲካ፥ «ጎዶ! ሃ ያዳ ቤያ» ጊዳ።
JOH 11:35 ዬሱሲካ ኣፉንጺዴስ።
JOH 11:36 ኣይሁዳቲካ፥ «ኢዚ ኢዛ ኣይ ማላ ሲቂዛኮ ቤኢቴ» ጊዳ።
JOH 11:37 ኢስታ ጊዶፌ ኢሲ ኢሲ ኣሳቲ፥ «ሃይሲ ቆቄ ኣዴዛ ኣይፌ ፖግዳይሲ ሃይሳዴይ ሃይቆንታ ማላ ኦꬃናስ ዳንዳዬኔ?» ጊዳ።
JOH 11:38 ዬሱሲ ኢዛ ዎዚናይ ሚሼቲን ጌዴ ዱፎዛኮ ቢዴስ፤ ዱፎዚካ ሹቻራ ጎርዴቲዳ ጎንጎሎ።
JOH 11:39 ኢዚካ ኢስታ፥ «ሹቻ ዴንꬂቴ!» ጊዴስ፤ ሃይቂዳይሳ ሚቼያ ማርታይ፥ «ጎዶ! ኢዚ ሃይቂን ሃች ኦይዱ ጋላስ ጊዲዳ ጊሻስ ጺንቃናኮ!» ጋዱስ።
JOH 11:40 ዬሱሲካ፥ «ኔ ኣማኒዛ ጊዲኮ ጾሳ ቦንቾ ቤያንዳሳ ጋዳ ኔስ ታ ዮታቤኪና?» ጊዴስ።
JOH 11:41 ሄሳ ጊሻስ ሹቻ ዴንꬂዳ፤ ዬሱሲካ ፑዴ ሳሎ ጼሊዲ፥ «ታ ኣዋዉ! ኔ ታ ጊዛዝ ሲዪዳ ጊሻስ ታ ኔና ጋላታይስ።
JOH 11:42 ኔ ኡባ ጋላስ ታ ጊዛዝ ሲዪዛይሳ ታ ኤራይስ፤ ጊዶ ኣቲን ታ ሄሳ ጊዳይ ሃይሳን ኤቂዳ ኣሳቲ ኔ ታና ኪቲዳይሳ ኣማናና ማላሳ» ጊዴስ።
JOH 11:43 ዬሱሲ ሄሳ ጊዳፔ ጉዬ ካሌꬂዲ ቃላ ꬎቁ ሂስቲዲ፥ «ኣላዛሬ! ሃ ኬዛ!» ጊዲ ጼይጊዴስ።
JOH 11:44 ሃይቂዳ ኣላዛሬይካ ኩሜꬃ ኣሳቴꬃይ ሞጎ ማይኦን ጻጼቲዳ ማላ ዱፎዛፔ ኬዚዴስ። ዬሱሲካ፥ «ቢርሺ ዬዲቴ ቦ!» ጊዴስ።
JOH 11:45 ሄሳ ጊሻስ ማራሞ ሚንꬄꬃና ዪዳ ኣይሁዳታፔ ዳሮ ኣሳይ ዬሱሲ ኦꬂዳይሳ ቤኢዲ ኢዛን ኣማኒዴስ።
JOH 11:46 ኢስታፌ ባጋይቲ ቢዲ ዬሱሲ ኦꬂዳይሳ ፋርሳዌታስ ዮቲዳ።
JOH 11:47 ሄሳ ቄሴታ ሃላቃቲኔ ፋርሳዌቲ ኣይሁዳታ ዱላታ ሺቃና ማላ ጼይጊዲ፥ «ሃ ኣዴዚ ዳሮ ዱማ ዱማ ማላታታ ኦꬂዳዴ ጊዲዳ ጊሻስ ኑ ኣይ ኦꬂኮ ሎኦ?
JOH 11:48 ኑ ጮኡ ጊኮ ኣሲ ዉሪ ኢዛን ኣማናናኔ ኦሮሜ ኣሲካ ዪዲ ሃይሳ ኑ ቢታኔ ኑ ኣሳ ኑፔ ኤካና» ጊዳ።
JOH 11:49 ኢስታ ጊዶፌ ኢሳዴይ ሄ ላይꬅ ቄሴታስ ዋና ሃላቃ ቃያፋይ፥ «ኢንቴ ኣይኮካ ኤሬኬታ።
JOH 11:50 ዴሬይ ዉሪ ꬋያናፔ ዴሬ ጊሻስ ኢሲ ኣሲ ሃይቂኮ ሎኦ ጊዳና ጊሻስ ዩሺ ቆፔኬቲ?» ጊዴስ።
JOH 11:51 ኢዚ ሄሳ ባፔ ጊዶንታ ሄ ላይꬅ ኢዚ ቄሴታስ ሃላቃ ጊዲዳ ጊሻስ ዬሱሲ ኣይሁዳ ዴሬ ጊሻስ ሲንꬃፌ ሃይቃናይሳ ዮቲዴስ።
JOH 11:52 ኢዚ ሃይቃናይ ሄ ዴሬ ኣሳስ ጻላ ጊዶንታ ካሴ ላሌቲዳ ጾሳ ናይታካ ኢሲ ቦላ ሺሻናሳ።
JOH 11:53 ሄ ጋላሳፌ ሃ ሲሚን ኢዛ ዎꬋናስ ማቄቲዳ።
JOH 11:54 ሄሳ ጊሻስ ዬሱሲ ሄ ጋላሳፌ ሃ ሲሚን ኣይሁዳታ ጊዶን ቆንጬራ ሲሜሬቲቤና። ጊዶ ኣቲን ዱጌ ባዞ ቢታ ማታን ዲዛ ኤፍሬሜ ጌቴቲዛ ካታማይ ዲዛሶ ቢዲ ባና ካሊዛይታራ ሄን ታኪዴስ።
JOH 11:55 ኣይሁዳቲ ፓዚጋ ባኣሌይ ማቲዳ ማላ ባኣሌይ ጋካናፔ ካሴ ጌሾ ዎጋ ኦꬃናስ ዳሮ ኣሳይ ዱማ ዱማ ዴሬፔ ዬሩሳላሜ ዪዴስ።
JOH 11:56 ኣሳይ ዬሱሳ ኮዪሼ ጾሳ ኬꬃን ኤቂዲ ባ ጊዶን ኢሶይ ኢሳራ፥ «ኢንቴስ ኣይ ሚሳቲዜ? ባኣሌዛስ ዬኔሻ?» ጊዴስ።
JOH 11:57 ቄሴታ ሃላቃቲኔ ፋርሳዌቲ ቃሴ ዬሱሳ ኦይካናስ ኢዚ ኣዋን ዲዛኮ ኤሪዛዴይ ኢስታስ ማላታና ማላ ካሴ ኣዛዚ ዎꬂዳ።
JOH 12:1 ፓዚጋ ባኣሌስ ቡሮ ኡሱፑን ጋላሲ ኣቲሺን ዬሱሲ ሃይቆፔ ዴንꬂዳ ኣላዛሬይ ዲዛሶ ቢታኒያ ቢዴስ።
JOH 12:2 ሄን ዬሱሳስ ካዎ ካꬂዲ ማርታይ ኢዛ ካዎ ሚዚሺን ኢዛራ ኢሲፌ ማዳን ኡቲዳይታፔ ኢሶይ ኣላዛሬ።
JOH 12:3 ማራማ ዳሮ ኣልኦ ዋጋራ ሻሜቲዳ ባጋ ሊቲሮ ጊዲዛ ጌሻ ናርዶሴ ሺቶ ኤካ ያዳ ዬሱሳ ቶሆ ቦላ ጉሳዳ ቶሆዛ ባ ሁኤ ቢናናራ ቁጫዱስ። ኬꬃካ ሺቶ ሳዎይ ኩሚዴስ።
JOH 12:4 ዬሱሳ ካሊዛይታፔ ኢሶይ ዬሱሳ ኣꬂ ኢማና ኣስቆሮንቶ ዩሁዳይ፥
JOH 12:5 «ሃይሲ ሺቶዚ ሄꬑ ጼቱ ዲናሬስ ባይዜቲዲ ሚሻይ ኣዛስ ማንቆታስ ኢሜቲቤኔ?» ጊዴስ።
JOH 12:6 ኢዚ ሄሳ ጊዳይ ሚሽ ሺሺዛ ካራጺቴ ኦይኪዛዴይ ኢዛ ጊዲዳ ጊሻስ ሺቂዛ ሚሻፌ ባስ ሺሺዲ ጎኤቲዛዴ ጊዲዳ ጊሻሳ ኣቲን ማንቆታስ ሚሼቲዲ ጊዴና።
JOH 12:7 ዬሱሲ ቃሴ፥ «ሃይሲ ሺቶዚ ታስ ሞጎ ጋላሳስ ቆፌቲዳዝ ጊዲዳ ጊሻስ ሄ ዎዴ ጋካናስ ኢዛ ባ ኣቻን ናጉ፥ ቦቾፍቴ።
JOH 12:8 ማንቆቲ ኣይ ዎዴካ ኢንቴናራ ዴቴስ። ጊዶ ኣቲን ኢንቴ ታና ኡባ ዎዴ ዴሜኬታ» ጊዴስ።
JOH 12:9 ሄ ዎዴ ዳሮ ኣይሁዳ ኣሳቲ ዬሱሲ ሄን ዲዛይሳ ኤሪዲ ኢዛኮ ዪዳ፤ ዪዳይቲካ ዬሱሳ ጻላላ ኮሽ ጊዶንታ ዬሱሲ ሃይቆፔ ዴንꬂዳ ኣላዛሬካ ቤያናሳ።
JOH 12:10 ሄሳ ጊሻስ ቄሴታ ሃላቃቲ ዬሱሳራ ኣላዛሬካ ጋꬂ ዎꬋናስ ባ ጊዶን ዞሬቲዳ።
JOH 12:11 ሄሲካ ኣላዛሬ ጋሶን ዳሮ ኣይሁዳ ኣሳይ ዬሱሳኮ ቢ ቢዲ ኢዛ ኣማኒዛ ጊሻሳ።
JOH 12:12 ዎንቴꬃ ጋላስ ባኣሌዛ ቦንቻና ዪዳ ዴሬይ ዬሱሲ ዬሩሳላሜ ዪዛይሳ ሲዪዴስ።
JOH 12:13 ዛምባ ሃይꬅ ኤኪዲ ዬሱሳ ሞካና ኬዚዴስ፤ ዴሬይ ቃላ ꬎቁ ሂስቲዲ፥ «ሆሳኢና! ጎዳ ሱንꬃን ዪዛ ኢስራኤሌ ካዎይ ኣንጄቲዳይሳ!» ጊዴስ።
JOH 12:14 ቤኒ፥ «ሃኔ! ጺዮኔ ናዬ፥ ባቦፋ! ሄኮ ኔ ካዎይ ሃሬ ጉቴ ቶጊዲ ዬስ» ጌቴቲ ጻፌቲዳ ማላ ዬሱሲ ሃሬ ጉቴ ዴሚዲ ቶጊዴስ።
JOH 12:16 ኢዛ ካሊዛይቲ ሄሳ ኡባ ኮይሮ ዎዚናን ዎꬂቤቴና። ኢዛ ጊሻስ ጻፌቲዳይሳኔ ኢዛስ ኦሴቲዳ ሃኖካ ኡባ ዬሱሲ ሃይቆፔ ዴንዲዳፔ ጉዬ ኤሪዳ።
JOH 12:17 ኣላዛሬ ዱፎፔ ጼይጊዲ ሃይቆፔ ዴንꬂዳ ዎዴ ኢዛራ ኢሲፌ ዲዛ ኣሳይ ኢዛ ዴንꬃ ጊሻስ ማርካቲዳ።
JOH 12:18 ዳሮ ኣሲካ ኢዚ ሄሳ ማላ ጊታ ማላታ ኦꬂዳይሳ ሲዪዲ ኢዛ ሞካና ኬዚዴስ።
JOH 12:19 ሄሳ ጊሻስ ፋርሳዌቲ ባ ጊዶን ኢሶይ ኢሳ፥ «ሂስቲን ኑኒ ኣይ ኦꬃና ዳንዳይዞኒ? ቤኢቴ! ኩሜꬃ ዴሬይ ኣቶንታ ኢዛ ካሌስ» ጊዳ።
JOH 12:20 ጎይናናስ ባኣሌዛስ ሺቂዳ ኣሳ ጊዶን ጊሪኬ ዴሬ ኣሳቲካ ዴቴስ።
JOH 12:21 ኢስቲካ ጋሊላ ጊዶን ዲዛ ቤቴሳይዳ ጌቴቲዛ ዴሬ ኣስ ፒሊጶሳ ጌቴቲዛዴኮ ቢዲ፥ «ጎዶ! ኑ ዬሱሳ ቤያና ኮዮስ» ጊዳ።
JOH 12:22 ፒሊጶሲካ ኢንዲራሳስ ዮቲዴስ። ኢንዲራሲኔ ፒሊጶሲ ቢዲ ዬሱሳስ ዮቲዳ።
JOH 12:23 ዬሱሲካ ኢስታስ፥ «ሄኮ ኣሳ ናይ ቦንቼቲዛ ሳቴይ ጋኪዴስ።
JOH 12:24 ታ ኢንቴስ ቱሙ ጋይስ፤ ጊስቴ ኣይፌይ ቢታን ዎꬋዳ ሃይቆንታ ጮኡ ጋ ኡቲኮ ባርካ ኣታዉስ። ኢዛ ሃይቂዛ ጊዲኮ ሃራ ዳሮ ኣይፋዉስ።
JOH 12:25 ባ ሼምፖ ዶሲዛዴይ ꬋይሴስ። ሃይሳ ቢታ ቦላ ባ ሼምፖ ኢጺዛዴይ ጊዲኮ ሜርና ዴኦ ዴሜስ።
JOH 12:26 ታስ ኦꬃና ኮይዛዴይ ታና ካሎ፤ ታስ ኦꬂዛዴይ ታ ዲዛሶን ዳና፤ ታስ ኦꬂዛዴ ታ ኣዋይ ኢዛ ቦንቻና» ጊዴስ።
JOH 12:27 ቃሴካ ዬሱሲ፥ «ሄኮ ታ ሼምፖያ ሜቶታዱስ፤ ‹ታ ኣዋዉ! ሃ ሳቴይፔ ታና ኣሻ ጎሻ?› ታ ሂዝጎንታ ማላ ታ ዪዳይ ሃኖ ሃ ሜቶ ሳቴይሳ።
JOH 12:28 «ታ ኣዋዉ! ኔ ሱንꬃ ቦንቻ» ጊዴስ። ሄሳፌ ካሊዲ፥ «ታኒ ታ ሱንꬃ ቦንቻዲስ፤ ቃሴካ ጉጃ ቦንቻና» ጊዛ ቃላይ ሳሎፔ ዪዴስ።
JOH 12:29 ሄን ኤቂዳ ኣሳይ ሄሳ ሲዪዲ፥ «ዳዳይ ዳዳቴስ» ጊዳ። ባጋይቲ ቃሴ፥ «ኪታንቻኮ ሃሳይዛይ» ጊዳ።
JOH 12:30 ዬሱሲ፥ «ሃይሲ ጊሪሳይ ዪዳይ ኢንቴ ጊሻሳ ኣቲን ታ ጊሻስ ጊዴና።
JOH 12:31 ሃይሲ ኣላሜይ ፒርዴታና ዎዴይ ሃይሳ፤ ሃይሳ ዴሬዛ ሃሪዛ ጻላኤይ ሃኢ ጌዴ ካሬ ዬጌታና።
JOH 12:32 ታኒ ꬎቁ ጋዳ ካቄቲዛ ዎዴ ኣሳ ዉርሳ ታኮ ዛራና» ጊዴስ።
JOH 12:33 ዬሱሲ ሄሳ ዮቲዳይ ኢዚ ኣይ ማላ ሃይቆ ሃይቃናኮ ኤሪሳናሳ።
JOH 12:34 ኣሳይ ቃሴ፥ «ኑ ዎጋን ጻፌቲዳይ፥ ‹ጾሲ ኪቲዳዴይ ሜርናስ ዳና› ጌስ፤ ሂስቲን ኔ ቃሴ ዋናዳ፥ ‹ኣሳ ናይ ꬎቁ ጊ ካቄታና ቤሴስ› ጋይ? ኔ ጊዛ ኣሳ ናይ ኣዋይሴ?» ጊ ኦይቺዳ።
JOH 12:35 ዬሱሲ ኢስታስ፥ «ሃኢ ጉꬃ ዎዴስ ኢንቴናራ ፖኦይ ዴስ፤ ጋዴይ ꬉሞንታ ፖኦራ ሄሜቲቴ፤ ቃማራ ሄሜቲዛዴይ ኢዚ ኣዋ ቢዛኮ ኤሬና።
JOH 12:36 ኢንቴ ፖኦ ናይታ ጊዳና ማላ ፖኦይ ዲሺን ፖኦን ኣማኒቴ» ጊዴስ። ዬሱሲ ሄሳ ጊዳፔ ጉዬ ቢዲ ኢስታ ኣይፌፔ ጌሚዴስ።
JOH 12:37 ዬሱሲ ኢስታስ ሄሳ ማላ ማላታ ኢስታ ሲንꬃን ኦꬂንካ ኣይሁዳቲ ኢዛን ኣማኒቤቴና።
JOH 12:38 ሄሲ ሃኒዳይ ናቤ ኢሳያሲ፥ «ጎዶ! ኑ ማርካቴꬃ ኣማኒዳይ ኦኔ? ጾሳ ቃላይ ኦናስ ቆንጪዴ?» ጊዳ ማላ።
JOH 12:39 ሄሳ ጊሻስ ኣማናናስ ዳንዳይቤቴና፤ ጋሶይካ ናቤ ኢሳያሲ ካሴ፥
JOH 12:40 «ኢስቲ ባ ኣይፌን ቤኢዲ፥ ባ ዎዚናን ዩሺ ቆፒዲ፥ ሲሞንታ ማላኔ ኢዚ ኢስታ ፓꬆንታ ማላ ጾሲ ኢስታ ኣይፌ ቆቂሲዴስ፤ ኢስታ ዎዚናካ ሙሚሲዴስ» ጊ ጻፊዳ ጊሻሳ።
JOH 12:41 ኢሳያሲ ሄሳ ጊዳይ ጾሲ ኪቲዳዴ ቦንቾ ቤኢዳ ጊሻሳ፤ ሄሳ ጊሻስ ዬሱሲ ዮቲዴስ።
JOH 12:42 ጊዲኮካ ኣይሁዳታ ሃላቃታፔ ዳሮ ኣሳይ ዬሱሳ ኣማኒዴስ። ጊዶ ኣቲን ኢስታ ኣይሁዳታ ዎሳ ኬꬃፌ ጎዶንታ ማላ ፋርሳዌታስ ባቢዲ ባ ኣማኖ ቆንጬን ማርካቲቤቴና።
JOH 12:43 ኢስቲ ሄሳꬆ ሃኒዳይ ኢስታስ ጾሳፌ ኢሜቲዛ ቦንቾፌ ኣꬂዲ ኣሳፔ ኢሜቲዛ ቦንቾ ዶሲዳ ጊሻሳ።
JOH 12:44 ዬሱሲ ባ ቃላ ꬎቁ ሂስቲዲ፥ «ታና ኣማኒዛዴይ ታናን ጻላላ ጊዶንታ ታና ኪቲዳይሳንካ ኣማኔስ።
JOH 12:45 ታና ቤኢዳዴይ ታና ኪቲዳይሳካ ቤያና።
JOH 12:46 ታና ኣማኒዛይ ዉሪ ꬉማን ዶንታ ማላ ታኒ ፖኦ ጊዳዳ ሃይሳ ሃ ኣላሜዛ ያዲስ።
JOH 12:47 ታ ቃላ ሲዪዲ ኦꬆንታዴ ቦላ ፒርዳናይ ታና ጊዲኬ። ጋሶይካ ታ ዪዳይ ኣላሜ ኣሻናስ ኣቲን ኣላሜ ቦላ ፒርዳናስ ጊዴና።
JOH 12:48 ታና ኮዮንታዴኔ ታ ቃላ ኤኮንታዴ ቦላ ፒርዳናዴይ ዴስ፤ ታ ኢዛስ ዮቲዳ ቃላይ ዉርሴꬃ ጋላስ ኢዛ ቦላ ፒርዳና።
JOH 12:49 ጋሶይካ ታኒ ጮ ታ ሼኔን ዮታቤኬ፤ ታ ጊዛይሳኔ ታ ዮቲዛ ኣዛዞ ታስ ኢሚዳይ ታና ኪቲዳ ታ ኣዋ።
JOH 12:50 ኢዛ ኣዛዞይ ሜርና ዴኦ ጊዲዳይሳ ታ ኤራይስ፤ ሄሳ ጊሻስ ታ ዮቲዛይ ዉሪ ኣዋይ ታስ ዮቲዳይሳ» ጊዴስ።
JOH 13:1 ሄ ዎዴይካ ኣይሁዳታ ፓዚጋ ባኣሌፔ ካሴ ዬሱሲ ሃይሳ ኣላሜዛ ዬዲዲ ባ ኣዋኮ ባና ሳቴይ ጋኪዳይሳ ኤሪዴስ፤ ሃይሳ ኣላሜዛን ዲዛ ባ ባጋታ ኡባ ሲቂዴስ። ዉርሴꬂ ጋካናስካ ዶሲዴስ።
JOH 13:2 ዬሱሲኔ ኢዛ ካሊዛይቲ ኢሲፌ ካዎ ሚሺን ሲሞና ናይ ኣስቆሮንቶ ዩሁዳይ ዬሱሳ ኣꬂ ኢማና ማላ ጻላኤይ ኢዛ ዎዚናን ኢታ ቆፋ ጌልꬂዴስ።
JOH 13:3 ዬሱሲ ኣዋይ ኢዛስ ጎዳቴꬅ ዉርሲ ኢሚዳይሳኔ ኢዚ ጾሳ ኣቻፌ ኬዚዲ ዪዳይሳ፥ ቃሴ ሲሚዲ ጾሳኮ ባናይሳ ኤሬስ።
JOH 13:4 ሄሳ ጊሻስ ማዳ ቦላፌ ዴንዲዲኔ ማይኦ ቃሪ ዎꬂዲ ፖጻ ኤኪዲ ጼሳን ጊጺዴስ።
JOH 13:5 ቶሆ ሜጪዛ ጎንጌን ሃꬄ ጉጂዲ ባና ካሊዛይታ ቶሆ ሜቼ ኦይኪዴስ፤ ባ ጊጺዳ ፖጻንካ ሜጪዳ ቶሆዛ ቁጪዴስ።
JOH 13:6 ዬሱሲ ሲሞና ጌቴቲዛ ጴጽሮሳኮ ሺቂን ሲሞና ጌቴቲዛ ጴጽሮሲ ኢዛ፥ «ጎዶ! ኔ ታ ቶሆ ሜጫኔ?» ጊዴስ።
JOH 13:7 ዬሱሲካ፥ «ታኒ ኦꬂዛይሳ ኔ ሃኢ ኤራካ፤ ጉዬፔ ቃሴ ኔ ኤራንዳሳ» ጊዴስ።
JOH 13:8 ጴጽሮሲካ፥ «ኔ ታ ቶሆ ሙሌካ ሜጫካ» ጊዴስ። ዬሱሲ ቃሴ፥ «ታ ኔ ቶሆ ሜጮንታ ኣጊኮ ኔሲኔ ታስ ኢሲፌቴꬂ ዴና» ጊዴስ።
JOH 13:9 ሲሞና ጌቴቲዛ ጴጽሮሲካ ዛሪዲ፥ «ጎዶ፥ ሄሳ ጊዲኮ ታስ ቶሆ ጻላላ ጊዶንታ ኩሼራ ሁኤራ ዉርሳ ሜጫ» ጊዴስ።
JOH 13:10 ዬሱሲ ቃሴ፥ «ባ ኣሳቴꬂ ሜጬቲዳዴስ ኩሜꬃ ቦላይ ጌሽ ጊዲዳ ጊሻስ ኢዛስ ቶሆ ሜቻፌ ኣቲን ሃራ ኮሼና። ኢንቴ ጌሽ ሺን ኡባታ ዴኬታ» ጊዴስ።
JOH 13:11 ዬሱሲ፥ «ኢንቴ ኡባቲካ ጌሽ ዴኬታ» ጊዳይ ኢዛ ኣꬂ ኢማናዴይ ኦናኮ ኤሪዛ ጊሻሳ።
JOH 13:12 ኢስታ ቶሆ ሜጪዳፔ ጉዬ ባ ማይኦ ኤኪ ማይኢዲ ካሴ ባ ኡቲዳሶሆን ሲሚ ኡቲዴስ። ቃሴ ኢስታስ፥ «ታ ኢንቴስ ኣይ ኦꬂዳኮ ዎዚናን ዎꬂዴቲ?
JOH 13:13 ኢንቴ ታና ኣስታማሬኔ ጎዳ ጌታ፤ ታ ቃሴ ኣስታማሬኔ ጎዳ ጊዲዳ ጊሻስ ኢንቴ ጉሳይ ቱሙኮ።
JOH 13:14 ሂስቲኮ ታ ኢንቴስ ጎዳኔ ኣስታማሬ ጊዳሼ ኢንቴ ቶሆ ሜጪዛ ጊዲኮ ኢንቴካ ኢንቴ ጊዶን ኢሶይ ኢሳ ቶሆ ሜጫና ቤሴስ።
JOH 13:15 ታ ኢንቴስ ኦꬂዳይሳ ማላ ኢንቴካ ኦꬃና ማላ ታ ኢንቴስ ሌሚሶ ቤሳዲስ።
JOH 13:16 ታ ኢንቴስ ቱሙ ጋይስ፤ ኣሽካራይ ጎዳፔ ኣꬌና፤ ኪቴቲዳዴይ ኪቲዳዴፌ ኣꬌና።
JOH 13:17 ኢንቴ ሃይሳ ኤሪዲ ኦሶን ፔይሺኮ ኢንቴ ኣንጄቲዳይታ።
JOH 13:18 «ታ ሃይሳ ጊዛይ ኢንቴ ኡባታ ጊሻስ ዴና፤ ታኒ ታ ዶሪዳይታ ዉርሳ ኤራይስ፤ ጊዶ ኣቲን፥ ‹ታ ካꬅ ሚዳዴይ ታ ሞርኬ ጊዲዲ ታ ቦላ ዴንዲዴስ› ጊዛ ማጻፋ ቃላይ ፖሌታናስ ኮሼስ።
JOH 13:19 ታ ሃይሳ ሃኢራ ኢንቴስ ዮቲዛይ ኢዚ ፖሌቲዛ ዎዴ ታ ኦናኮ ኢንቴ ኣማናናሳ።
JOH 13:20 ታ ኢንቴስ ቱሙ ጋይስ፤ ታ ኪቲዳዴ ኤኪዛዴይ ታና ኤኬስ፤ ታና ኤኪዛዴይ ታና ኪቲዳዴ ኤኬስ» ጊዴስ።
JOH 13:21 ዬሱሲ ሄሳ ጊ ሲሚዲ ኬሂ ቆፋን ጌሊዲ፥ «ታ ኢንቴስ ቱሙ ጋይስ፤ ኢንቴ ጊዶፌ ኢሳዴይ ታና ኣꬂ ኢማና» ጊዲ ቆንጬን ዮቲዴስ።
JOH 13:22 ኢዛ ካሊዛይቲ ሄሳ ኢዚ ኦና ጊሻስ ጊዳኮ ኤሮንታ ጊሻስ ባ ጊዶን ኢሶይ ኢሳራ ጼሌቲዳ።
JOH 13:23 ኢዛ ካሊዛይታ ጊዶፌ ዬሱሲ ሲቂዛ ኢሶይ ዬሱሳ ኣቻን ኡቲዴስ።
JOH 13:24 ሲሞና ጌቴቲዛ ጴጽሮሲ ዮሃኒሳ ሶምኢ ቤሲዲ፥ «ኢዚ ኦና ጊሻስ ጊዛኮ ኣኔ ኢዛ ኦይቻ» ጊዴስ።
JOH 13:25 ሄሳ ጊሻስ ኢዚ ባ ቆꬌ ጌዴ ዬሱሳ ሃይꬃኮ ሺሺዲ፥ «ጎዶ! ኢዚ ኦኔ?» ጊ ኦይቺዴስ።
JOH 13:26 ዬሱሲካ ዛሪዲ፥ «ኢዛዴይ ታ ሃኢ ቡዴና ዎጼን ꬊምኣዳ ባርሲዛዴ» ጊዴስ፤ ሄሳ ጊ ሲሚዲ ቡዴና ዎጼን ꬊምኢ ኤኪዲ ኣስቆሮንቶፌ ዪዳ ሲሞና ና ዩሁዳ ባርሲዴስ።
JOH 13:27 ዩሁዳይ ኢዛ ባꬊዳ ማላ ሄራካ ጻላኤይ ኢዛን ጌሊዴስ። ዬሱሲካ ዩሁዳ፥ «ኔ ኦꬃናስ ቆፒዳይሳ ኤሌላ ኦꬃ» ጊዴስ።
JOH 13:28 ዬሱሲ ሄሳ ኣዛስ ጊዳኮ ማዳን ኡቲዳ ኣሳፔ ዮኦይ ጌሊዳዴይ ኦኒካ ዴና።
JOH 13:29 ዩሁዳይ ሚሽ ኦይኪዛዴ ጊዲዳ ጊሻስ ዬሱሳ ካሊዛይታፔ ባጋይቲ ዬሱሲ ዩሁዳ፥ «ባኣሌዛስ ኮሺዛይሳ ሻማ ዎይኮ ማንቆታስ ሙጹዋታ ኢማ» ጊዳ ሚሳቲዴስ።
JOH 13:30 ዩሁዳይካ ቡዴና ባꬊዳ ማላ ሄራካ ኬዚዲ ቢዴስ፤ ኢዚ ቢሺን ጋዴይ ቃማኮ።
JOH 13:31 ዩሁዳይ ኬዚ ቢዳፔ ጉዬ ዬሱሲ፥ «ኣሳ ናይ ሃኢ ቦንቼቲዴስ፤ ኢዛ ጋሶን ጾሲካ ቦንቼቲዴስ።
JOH 13:32 ጾሲ ኢዛ ጋሶን ቦንቼቲዛ ጊዲኮ ጾሲካ ኢዛ ቦንቻና፤ ሄራካ ጋምኦንታ ቦንቻና።
JOH 13:33 ታ ናይቶ! ታ ኢንቴናራ ዳሮ ዎዴ ጋምኢኬ፤ ኢንቴ ታና ኮያና፤ ታ ካሴ ኣይሁዳታ ሃላቃታስካ፥ ‹ታ ቢዛሶ ኢንቴ ያና ዳንዳዬኬታ› ጋዳ ዮቲዳ ማላ ሃኢካ ኢንቴስካ ሄሳꬆ ዮታይስ።
JOH 13:34 ኢንቴ ኢንቴ ጊዶን ኢሶይ ኢሳራ ሲቄታና ማላ ታ ኢንቴስ ኦራꬃ ኣዛዞ ኢማይስ። ታ ኢንቴና ሲቂዳ ማላ ኢንቴ ኢንቴ ጊዶን ኢሶይ ኢሳራ ሲቄቲቴ።
JOH 13:35 ኢንቴ ኢንቴ ጊዶን ሲቄቲኮ ኢንቴ ታና ካሊዛይታ ጊዲዳይሳ ኣሲ ዉሪ ኤራና» ጊዴስ።
JOH 13:36 ሄሳፌ ጉዬ ሲሞና ጌቴቲዛ ጴጽሮሲ ዬሱሳ፥ «ጎዶ! ኔ ኣዋ ባኔ?» ጊ ኦይቺዴስ። ዬሱሲ ቃሴ፥ «ታ ቢዛሶ ኔ ሃኢ ታና ካላና ዳንዳያካ ሺን ጉዬፔ ኔ ታና ካላና» ጊዴስ።
JOH 13:37 ጴጽሮሲ፥ «ጎዶ! ታ ኔና ሃኢ ካላናስ ኣይስ ዳንዳይኪና? ሃራይ ኣቶሺን ታኒ ታ ሼምፖካ ኔ ጊሻስ ኣꬃ ኢማና» ጊዴስ።
JOH 13:38 ዬሱሲካ ዛሪዲ፥ «ኔኒ ኔ ሼምፖ ታ ጊሻስ ኣꬃ ኢማኔ? ታ ኔስ ቱሙ ጋይስ፤ ሃች ኩቶይ ዋሳናፔ ካሴታዳ ኔ ታና ሄꬑቶ ካዳና» ጊዴስ።
JOH 14:1 ካሌꬂዲካ ዬሱሲ፥ «ኢንቴ ዎዚናይ ሜቶቶፖ፤ ጾስ ኣማኒቴ፤ ታናካ ኣማኒቴ።
JOH 14:2 ታ ኣዋ ኣቻን ዳሮ ዱሳሶይ ዴስ፤ ሄሳ ጊዶንታኮ፥ ‹ኢንቴስ ዳናሶ ጊጊሳናስ ታ ባና› ጋና ሺን።
JOH 14:3 ባዳ ታ ኢንቴስ ሶ ጊግሲዳፔ ጉዬ ኢንቴ ታ ዲዛሶን ዳና ማላ ታ ሲማ ያዳ ኢንቴና ኤካና።
JOH 14:4 ታ ቢዛ ኦጌ ኢንቴ ኤሬታ» ጊዴስ።
JOH 14:5 ቶማሲ፥ «ጎዶ! ኔ ኣዋ ቢዛኮ ኑ ኤሮኮን፤ ሂስቲን ኦጌዛ ኑ ዎስቲ ኤራናስ ዳንዳይዞኒ?» ጊዴስ።
JOH 14:6 ዬሱሲካ ኢዛስ፥ «ኦጌይኔ፥ ቱማይ፥ ዴኦይካ ታና፤ ታ ባጋራ ጊዲኮፌ ኣቲን ኦኒካ ኣዋኮ ባና ኣሲ ዴና።
JOH 14:7 ኢንቴ ታና ኤሪዛኮ ታ ኣዋካ ኤራናኮሺን፤ ሃኢ ሃይሳፌ ጉዬ ኢንቴ ኢዛ ኤራና፤ ኢዛ ቤኦካ ቤዪዴታ» ጊ ዛሪዴስ።
JOH 14:8 ፒሊጶሲ፥ «ጎዶ! ኔ ኑና ኣዋ ቤሲኮ ኑስ ጊዳና» ጊዴስ።
JOH 14:9 ዬሱሲካ ኢዛስ፥ «ፒሊጶሳ! ሃይሳ ጋካናስ ታ ኢንቴናራ ዴኢንካ ኔ ታና ኤርኪ? ታና ቤኢዳዴይ ኣዋካ ቤዪዴስ፤ ሂስቲን ኔኒ ዋናዳ፥ ‹ኑና ኣዋ ቤሳ› ጋይ?
JOH 14:10 ታኒ ታ ኣዋን፥ ታ ኣዋይካ ታናን ዲዛይሳ ኣማኒኪ? ታ ኢንቴስ ዮቲዛ ቃላ ዮቲዛይ ታ ሼኔ ማላ ዴና፤ ጊዶ ኣቲን ኦሶዛ ኡባ ኦꬂዛይ ታናን ዲዛ ታ ኣዋ።
JOH 14:11 ታኒ ኣዋን ዲዛ ማላ፥ ኣዋይካ ታናን ዲዛይሳ ኢንቴ ኣማኒቴ፤ ኣካይ ጊኮ ታ ኦꬂዛ ኦሶታ ጊሻሲካ ታና ኣማኒቴ።
JOH 14:12 ታ ኢንቴስ ቱሙ ጋይስ፤ ታና ኣማኒዛዴይ ታ ኦꬂዛ ኦሶ ኦꬃና፤ ሄሳፌካ ኣꬂ ኦꬃና፤ ጋሶይካ ታኒ ኣዋኮ ባና።
JOH 14:13 ኣዋይ ናዛ ጋሶን ቦንቼታና ማላ ኢንቴ ታ ሱንꬃን ዎሲዳይሳ ታ ኢንቴስ ዉርሳ ኦꬃና።
JOH 14:14 ኢንቴ ኣይ ሚሺካ ታ ሱንꬃን ዎሲዳይሳ ታ ኡባ ኦꬃና።
JOH 14:15 «ኢንቴ ታና ዶሲዛ ጊዲኮ ታ ኣዛዞዮ ናጊቴ።
JOH 14:16 ታኒ ኣዋ ዎሳና፤ ኢዚካ ኢንቴናራ ሜርናስ ዳና ማላ ሃራ ኢንቴና ሚንꬄꬃናዴ ኢንቴስ ኢማና።
JOH 14:17 ሃይሲ ሚንꬄꬂዛ ኣያናይ ዴሬ ኣሳይ ኢዛ ቤዪ ኤሮንታ ጊሻስ ኣላሜይ ኤካናስ ዳንዳዮንታ ቱሙ ኣያና፤ ጊዶ ኣቲን ኢንቴ ኢዛ ኤሬታ፤ ጋሶይካ ኢዚ ኢንቴናራ ዲዛ ጊሻሲኔ ኢዚ ኢንቴ ጋꬃን ዲዛ ጊሻሳ።
JOH 14:18 «ኣዋይኔ ኣያ ባይንዳ ናይታ ማላ ታ ኢንቴና ጻላ ኣጊኬ፤ ታ ሲማዳ ሃ ኢንቴኮ ያና።
JOH 14:19 ጉꬃ ዎዴፔ ጉዬ ዴሬ ኣሳይ ታና ቤዬና፤ ኢንቴ ጊዲኮ ቤያንዴታ፤ ታኒ ዴኦን ዲዛ ጊሻስ ኢንቴካ ዴኦን ዳንዴታ።
JOH 14:20 ታኒ ታ ኣዋን ዲዛ ማላ ኢንቴካ ታናን ዲዛይሳኔ ታኒካ ኢንቴናን ዲዛይሳ ኢንቴ ሄ ዎዴ ኤራንዴታ።
JOH 14:21 «ታ ኣዛዞ ኤኪዲ ኦꬂዛዴይ ታና ዶሴስ፤ ታና ዶሲዛዴካ ታ ኣዋይ ዶሴስ፤ ታኒካ ኢዛ ዶሳና፤ ታናካ ኢዛዴስ ቆንጪሳና» ጊዴስ።
JOH 14:22 ኣስቆሮንቶ ዩሁዳ ጊዶንታ ሃንኮ ዩሁዳይ፥ «ጎዶ! ኔኒ ኣላሜ ኣሳስ ጊዶንታ ኑስ ዎስታ ኔና ቆንጪሳኔ?» ጊዴስ።
JOH 14:23 ዬሱሲካ ኢዛስ፥ «ታና ሲቂዛዴይ ታ ቃላ ናጋና፤ ታ ኣዋይካ ኢዛ ዶሳና፤ ኑኒ ኢዛኮ ያና፤ ዪዲካ ኢዛዴራ ኢሲፌ ዳና።
JOH 14:24 ታና ዶሶንታዴይ ታ ቃላ ናጌና፤ ሃይሲ ኢንቴ ሲዪዛ ቃላይ ታና ኪቲዳ ታ ኣዋ ቃላፔ ኣቲን ታ ቃላ ጊዴና።
JOH 14:25 «ታኒ ሃኢ ኢንቴናራ ዳሼ ሃይሳ ኢንቴስ ዮታዲስ።
JOH 14:26 ኣዋይ ታ ሱንꬃን ዬዳና ሚንꬄꬂዛ ጺሎ ኣያናይ ቃሴ ሃኒዛ ኡባ ኢንቴና ታማርሳና፤ ታ ኢንቴስ ዮቶይሳካ ኡባ ኢንቴ ዎዚናን ዎꬃና ማላ ማዳና።
JOH 14:27 «ታ ኢንቴስ ሳሮቴꬅ ኣጋዳ ባይስ፤ ታ ሳሮቴꬂካ ታ ኢንቴስ ኢማና፤ ታ ኢንቴስ ኢሚዛ ሳሮቴꬂ ኣላሜይ ኢሚዛ ሳሮቴꬃ ማላ ዴና፤ ኢንቴ ዎዚናይ ሂርጎፎኔ ባቦፎ።
JOH 14:28 « ‹ታ ባና፤ ባዳካ ኢንቴኮ ሲማ ያና› ጋዳ ታ ኢንቴስ ካሴ ዮቲዳይሳ ሲዪዴታ፤ ኢንቴ ታና ዶሲዛኮ ታኒ ታ ኣዋኮ ቢዛይሲ ኢንቴና ኡፋይሳናኮሺን። ጋሶይካ ኣዋይ ታፔ ኣꬌስ።
JOH 14:29 ሃይሲ ሃኒዛ ዎዴ ኢንቴ ኣማናና ማላ ሃይሳ ታ ኢንቴስ ካሴታ ዮታዲስ።
JOH 14:30 ሃይሳ ኣላሜዛ ሃሪዛ ጻላኤይ ዪዛ ዎዴይ ጋኪዳ ጊሻስ ሃኢ ታ ኢንቴናራ ዳሮ ሃሳይኬ፤ ኢዚ ታ ቦላ ኣይኮካ ኦꬃናስ ኢዛስ ዎልቃይ ዴና።
JOH 14:31 ጊዶ ኣቲን ታኒ ኣዋ ዶሲዛይሳ ኣላሜይ ኤራና ማላ ኣዋይ ታና ኣዛዚዳይሳ ታ ኡባ ፖላና። ኣኔ ሃይሳፌ ቦስ፤ ዴንዲቴ» ጊዴስ።
JOH 15:1 ቃሴካ ዬሱሲ፥ «ቱሙ ዎይኔ ሚꬃ ኣኖይ ታና፤ ኣታኪልቴዛ ኦሳንቻይ ታ ኣዋ።
JOH 15:2 ታ ቦላ ዲሼ ኣይፌ ኢሞንታ ሃጋ ኡባ ታ ኣዋይ ቃንጺ ዲጋና፤ ኣይፊዛ ሃጋ ጉጂ ኣይፋና ማላ ቂርጺ ጌሻና።
JOH 15:3 ታ ኢንቴስ ዮቲዳ ቃላ ጋሶን ኢንቴ ሃኢ ጌሻታ።
JOH 15:4 ታናን ዲቴ፤ ታኒካ ኢንቴናን ዳና፤ ሃጋይ ዎይኔ ኣኖ ቦላ ዶንታ ኣጊኮ ባርካ ኣይፌ ኣይፋና ዳንዳዮንታይሳ ማላ ኢንቴካ ታናን ዶንታ ኣጊኮ ኣይፌ ኣይፋናስ ዳንዳዬኬታ።
JOH 15:5 «ታኒ ዎይኔ ሚꬃስ ኣኖ፤ ኢንቴ ቃሴ ሃጋታ፤ ዳሮ ኣይፌ ኣይፊዛዴይ ታናን ዲዛዴኔ ታኒካ ኢዛን ዲዛዴ፤ ጋሶይካ ታ ባይንዳ ኢንቴ ኣይኮካ ኦꬃናስ ዳንዳዬኬታ።
JOH 15:6 ታናን ባይንዳዴይ ቃንጼቲዲ ዎራ ዬጌቲዳ ሃጋ ማላ ካሬ ዬጌቲዲ ሄን ሜላና፤ ሄይታ ማላ ሃጋቲ ኢሲ ቦላ ሺቂዲ ታማን ዬጌታናኔ ኤጻና።
JOH 15:7 ኢንቴ ታናን ዲኮ ታ ቃላይካ ኢንቴናን ዲኮ ኢንቴ ኮዪዳይሳ ኦይቺኮ ዴማና።
JOH 15:8 ዳሮ ኣይፌ ኢንቴ ኣይፊሺን ታ ኣዋይ ቦንቼቴስ፤ ኢንቴ ታና ካሊዛይታ ጊዲዳይሲ ሄሳን ኤሬታና።
JOH 15:9 «ኣዋይ ታና ዶሲዳይሳꬆ ታኒካ ኢንቴና ዶሳዲስ፤ ሄሳ ጊሻስ ኢንቴ ታ ሲቆን ዲቴ።
JOH 15:10 ታኒ ታ ኣዋ ኣዛዞ ፖላዳ ኢዛ ሲቆን ዲዳ ማላ ኢንቴካ ታ ኣዛዞ ፖሊኮ ታ ሲቆን ዳና።
JOH 15:11 ሃይሳ ታ ኢንቴስ ዮቲዛይ ታ ኡፋይሲ ኢንቴናን ጊዳና ማላኔ ኢንቴ ኡፋይሲካ ኩሜꬅ ጊዳናሳ።
JOH 15:12 ታ ኢንቴስ ኢሚዛ ኣዛዞይ ታ ኢንቴና ሲቂዳ ማላ ኢንቴካ ኢንቴ ጊዶን ኢሶይ ኢሳራ ሲቄታናሳ።
JOH 15:13 ኣሲ ባ ላጌስ ባ ሼምፖ ኣꬂ ኢሞፔ ኣꬊዛ ሲቆይ ዴና።
JOH 15:14 ታ ኢንቴና ኣዛዚዛይሳ ኡባ ኢንቴ ፖሊኮ ኢንቴ ታ ላጌታ።
JOH 15:15 ኣሽካራይ ጎዳይ ኦꬂዛይሳ ኤሮንታ ጊሻስ ሃይሳፌ ጉዬ ታ ኢንቴና ኣሽካራታ ጊኬ። ጊዶ ኣቲን ታኒ ታ ኣዋፔ ሲዪዳይሳ ዉርሳ ኢንቴስ ቆንጪሲዳ ጊሻስ ታ ኢንቴና ታ ላጌታ ጋዲስ።
JOH 15:16 ታ ኢንቴና ዶራዲስ ኣቲን ኢንቴ ታና ዶሪቤኬታ፤ ኢንቴ ቢዲ ዳሮ ኣይፌ ኣይፋና ማላ ኢንቴ ኣይፌይ ኤቂ ዳና ማላ ታ ኢንቴና ዎꬃዲስ፤ ሄሳ ጊሻስ ኢንቴ ታ ሱንꬃን ዎሲዳይሳ ኡባ ታ ኣዋይ ኢንቴስ ኢማና።
JOH 15:17 ሄሳ ጊሻስ ኢንቴ ኢንቴ ጊዶን ኢሶይ ኢሳራ ሲቄታና ማላ ታ ኢንቴና ኣዛዛይስ።
JOH 15:18 «ካሌꬂዲካ ዬሱሲ ኢንቴና ኣላሜይ ኢጺኮ ኢንቴፌ ካሴ ታና ኢጺዳይሳ ኤሪቴ።
JOH 15:19 ኢንቴ ኣማኖንታ ኣላሜ ኣሳ ጊዲኮ ኣላሜ ኣሳይ ባ ባጋ ጊዲዳዴ ዶሴስ። ጊዶ ኣቲን ኢንቴ ኣላሜ ባጋ ጊዶንታ ጊሻስ ታ ኢንቴና ኣላሜፔ ሻካዳ ዶሪዳ ጊሻስ ዴሬይ ኢንቴና ኢጼስ።
JOH 15:20 ‹ኣሽካራይ ጎዳፔ ኣꬌና› ጋዳ ታ ካሴ ኢንቴስ ዮቶይሳ ዩሺ ቆፒቴ፤ ኢስቲ ታና ጎዲዛይቲ ኢንቴናካ ጎዳና፤ ኢስቲ ታ ቃላ ናጊዛኮ ኢንቴ ቃላ ናጋና።
JOH 15:21 ኢስቲ ታና ኪቲዳዴ ኤሮንታ ጊሻስ ታ ጋሶን ኢንቴ ቦላ ሄሳ ዉርሲ ኦꬃና።
JOH 15:22 ታ ያዳ ኢስታስ ዮቶንታኮ ኢስታስ ናጋራ ጊዴና። ሃኢ ቃሴ ኢስታ ናጋራስ ሃኖ ጊዛ ጋሶይካ ባ።
JOH 15:23 ታና ኢጺዛዴይ ታ ኣዋካ ኢጼስ።
JOH 15:24 ሃራ ኣሲ ኦꬆንታ ኦሶ ታ ኢስታ ጊዶን ኦꬆንታኮ ኢስታስ ናጋራ ጊዴናሺን፤ ሃኢ ኢስቲ ሄሳ ኡባ ቤኢዳፔ ጉዬ ታናካ ታ ኣዋካ ኢጺዳ።
JOH 15:25 ሄሲካ ሃኒዳይ ካሴ፥ ‹ታና ጋሶይካ ባይንዳ ዲሺን ኢጺዳ› ጌቴቲዲ ኢስታ ዎጋን ጻፌቲዳ ቃላይ ፖሌታናሳ።
JOH 15:26 «ጊዶ ኣቲን ኣዋፔ ኬዚዲ ያናይሲ፥ ታኒካ ታ ኣዋ ኣቻፌ ኢንቴስ ዬዳናይሲ ሚንꬄꬂዛ ቱማ ኣያናይ ዪዲ ኢዚ ታ ጊሻስ ማርካታና።
JOH 15:27 ኢንቴ ኮይሮፔካ ታናራ ዲዛ ጊሻስ ታስ ኢንቴካ ማርካታንዴታ» ጊዴስ።
JOH 16:1 ቃሴካ ዬሱሲ፥ «ሄኮ ሃይሳ ዉርሳ ታ ኢንቴስ ኢንቴ ኣማኖይ ያርክ ያርኮፎ ጋዳ ዮታዲስ።
JOH 16:2 ኢስቲ ኢንቴና ባ ኬꬃፌ ጎዳና፤ ሃራይ ኣቶሺን ኢንቴና ዎꬊዛዴይ ዉሪ ጾሳስ ኦꬂዛዴ ሚሳቲዛ ዎዴይ ያና።
JOH 16:3 ኢስቲ ሄሳꬆ ኦꬂዛይ ታናካ፥ ታ ኣዋካ ኤሮንታ ጊሻሳ።
JOH 16:4 ታ ሃይሳ ኢንቴስ ዮቲዛ ዎዴ ኢንቴ ታ ኢንቴስ ጊዳይሳ ቆፓናሳ» ጊዴስ። ካሌꬂዲካ ዬሱሳ፥ «ሃይሳ ዉርሳ ታ ኢንቴስ ዮቶንታ ኣጊዳይ ታ ኢንቴናራ ኢሲፌ ዲዛ ጊሻሳ።
JOH 16:5 «ሃኢ ቃሴ ታና ኪቲዳይሳኮ ታ ባና ጋይስ፤ ጊዶ ኣቲን ኢንቴፌ ኦኒካ፥ ‹ኔ ኣዋ ባኔ?› ጊዲ ኦይቻናይ ባ።
JOH 16:6 ጊዶ ኣቲን ሃይሳ ዉርሳ ታ ኢንቴስ ዮቲዳ ጊሻስ ኢንቴ ዎዚናይ ሙዞቴስ።
JOH 16:7 ታ ቃሴ ኢንቴስ ቱሙ ጋይስ፤ ታ ቡሲ ኢንቴስ ጎኣ ጊዳና፤ ጋሶይካ ታ ቦንታ ኣጊኮ ሚንꬄꬂዛ ኣያናይ ኢንቴኮ ዬና፤ ታ ቢዳፔ ጉዬ ኢዛ ኢንቴኮ ዬዳና።
JOH 16:8 ኢዚ ዪዲ ኣሳ ናጋራ ጊሻሲኔ ጺሎቴꬃ ጊሻስ ቃሴካ ፒርዳ ጊሻስ ኤሪሳና።
JOH 16:9 ኣሳ ናጋራ ጊሻስ ኢዚ ኤሪሳናይ ኣሳይ ታና ኣማኖንታ ጊሻሳ።
JOH 16:10 ጺሎቴꬃ ጊሻስ ኢዚ ኣሳ ኤሪሳናይ ታኒ ታ ኣዋኮ ቢዛ ጊሻሲኔ ቃሴ ናምኣንꬆ ኢንቴ ታና ቤኦንታ ጊሻሳ።
JOH 16:11 ፒርዳ ጊሻስ ኢዚ ኤሪሳናይ ሃይሳ ኣላሜዛ ሃሪዛይሳ ቦላ ፒርዴቲዳ ጊሻሳ።
JOH 16:12 «ታ ኢንቴስ ቡሮ ዮታና ዳሮ ዮኦይ ዴስ፤ ጊዶ ኣቲን ሃኢ ኢንቴና ዴጻና።
JOH 16:13 ቱማ ኣያናይ ዪዲ ኢንቴና ቱማይ ዲዛሶ ካሌꬃና፤ ጋሶይካ ኢዚ ሲዪዳይሳ ዮታና ኣቲን ባፔ ጊዶንታ ጊሻስ ኢዚ ሲንꬃፌ ሃናና ዮኦታ ኢንቴስ ዮታና።
JOH 16:14 ታስ ዲዛይሳፌ ኤኪዲ ኢዚ ኢንቴስ ዮቲዛ ጊሻስ ታና ቦንቻና።
JOH 16:15 ኣዋስ ጊዲዳይ ዉሪካ ታይሳ፥ ‹ታስ ጊዲዳይሳፌ ኤኪዲ ኢዚ ኢንቴስ ዮታና› ታ ጊዳይ ሄሳሳ» ጊዴስ።
JOH 16:16 ዬሱሲ ጉጂዲ፥ «ጉꬃ ዎዴፔ ጉዬ ኢንቴ ታና ቤዬኬታ፤ ቃሴካ ጉꬃ ዎዴፔ ጉዬ ኢንቴ ታና ቤያና» ጊዴስ።
JOH 16:17 ኢዛ ካሊዛይታፔ ባጋቲ ባ ጊዶን፥ « ‹ሃይሲ ኑስ ጉꬃ ዎዴፔ ጉዬ ኢንቴ ታና ቤዬኬታ፤ ቃሴካ ጉꬃ ዎዴፔ ጉዬ ኢንቴ ታና ቤያና፤ ቃሴ ታ ኣዋኮ ባና› ጉሲ ኣይ ጉሴ?» ጊዳ።
JOH 16:18 «ሂስቲን ሃይሲ፥ ‹ጉꬃ ዎዴፔ ጉዬ› ጊዛይሲ ኢዚ ኣዜ? ኢዚ ዮቲዛይሲ ኑስ ኤሬቴና» ጊዲ ባ ጊዶን ዛሪ ዛሪ ኦይሼቲዳ።
JOH 16:19 ኢስቲ ኢዛ ኦይቻናይሳ ዬሱሲ ኤሪዲ ኢስታስ፥ «ኢንቴ ኢንቴ ጊዶን ኢሶይ ኢሳራ ኦይሼቲዛይ ታ ኢንቴስ፥ ‹ጉꬃ ዎዴፔ ጉዬ ኢንቴ ታና ቤዬኬታ፤ ቃሴካ ጉꬃ ዎዴፔ ጉዬ ኢንቴ ታና ቤያና› ጊዳ ጊሻሴ?
JOH 16:20 ታ ኢንቴስ ቱማ ጋይስ፤ ኢንቴ ዋሳናኔ ዬካናሺን ኣላሜይ ጊዲኮ ኡፋዬታና። ኢንቴ ሙዞቲሺን ኢንቴ ሙዞይ ኡፋይሳን ላሜታና።
JOH 16:21 ማጫሲ ዬሎ ዎዴይ ጋኪሺን ሚጻስ ሂርጋዉስ፤ ጊዶ ኣቲን ና ዬላ ዬጊዳፔ ጉዬ ቢታ ቦላ ናይ ዬሌቲዳ ጊሻስ ኡፋይሳፌ ዴንዲዳይሳን ካሴ ባ ዋይዳይሳ ዛራ ቆፑኩ።
JOH 16:22 ሄሳꬆ ኢንቴካ ሃኢ ሙዞቴታ፤ ቃሴ ታ ኢንቴና ቤያና ኢንቴ ዎዚናይካ ኡፋዬታና፤ ኢንቴ ኡፋይሳ ዛሪ ኤካናዴይ ዴና።
JOH 16:23 «ኢንቴ ሄ ዎዴ ታፔ ኣይኮካ ዎሴኬታ፤ ታ ኢንቴስ ቱሙ ጋይስ፤ ታ ሱንꬃን ታ ኣዋ ዎሲኮ ኢዚ ኢንቴስ ኡባካ ኢማና።
JOH 16:24 ሃኖ ጋካናስ ኢንቴ ታ ሱንꬃን ኣይኮካ ዎሲ ኤሬኬታ፤ ዎሲቴ ኢንቴ ኤካና፤ ኢንቴ ኡፋይሳይካ ኩሜꬅ ጊዳና።
JOH 16:25 «ሃኢ ጋካናስ ታ ኢንቴስ ሌሚሶራ ዮታዲስ፤ ሃይሳፌ ጉዬ ታ ሌሚሶራ ዮቶንታ ዎዴይ ያና። ጊዶ ኣቲን ኣዋ ጊሻስ ታ ኢንቴስ ኡባ ቆንጪሳ ዮታና።
JOH 16:26 ሄ ዎዴ ኢንቴ ታ ሱንꬃን ዎሳና፤ ታኒካ፥ ‹ኣዋ ኢንቴ ጊሻስ ዎሳና› ጊኬ።
JOH 16:27 ጋሶይካ ኣዋይ ባ ባጋራ ኢንቴና ዶሲዛ ጊሻሳ፤ ኣዋይ ኢንቴና ዶሲዛይ ኢንቴ ታና ዶሲዛ ጊሻሲኔ ታኒ ጾሳ ኣቻፌ ዪዳይሳ ኢንቴ ኣማኒዳ ጊሻሳ።
JOH 16:28 ታኒ ኣዋ ኣቻፌ ኬዛዳ ሃይሳ ሃ ኣላሜ ያዲሲኔ ቃሴካ ሃ ኣላሜዛ ኣጋዳ ኣዋኮ ሲማ ባና» ጊዴስ።
JOH 16:29 ኢዛ ካሊዛይቲ፥ «ሄኮ ኔ ሃኢ ሌሚሶ ጊዶንታ ኑስ ቆንጬራ ዮታዳሳ።
JOH 16:30 ኔ ዉርሳ ኤሪዛ ማላኔ ኦኒካ ኔና ኦይቻናስ ኮሾንታይሳ ሃኢ ኑ ኤሪዶስ፤ ሄሳ ጊሻስ ኔ ጾሳ ኣቻፌ ኬዚዳይሳ ኑ ኣማኖስ» ጊዳ።
JOH 16:31 ዬሱሲ ኢስታስ፥ «ኢንቴ ሃኢ ኣማኒዴታ፤
JOH 16:32 ጊዶ ኣቲን ኢንቴ ኢንቴ ባጋራ ባጋራ ላሌቲዲ ታና ጻላ ኣጋና ዎዴይ ጋኪዴስ፤ ሄ ሳቴያካ ሃኢ ጋካዱስ። ጊዶ ኣቲን ኣዋይ ታናራ ጊዲዳ ጊሻስ ታ ታርካ ዲኬ።
JOH 16:33 ታ ሃይሳ ኢንቴስ ዮቲዛይ ኢንቴ ታናን ዴኢን ኢንቴስ ሳሮቴꬂ ዳና ማላ ጋዳ ዮታይስ። ኢንቴ ሃ ኣላሜን ዲሺን ኢንቴስ ዋዬይ ዴስ፤ ጊዶ ኣቲን ኣይኮይ ባ፤ ታ ኣላሜ ጾናዲስ» ጊዴስ።
JOH 17:1 ዬሱሲ ሄሳ ጊዳፔ ጉዬ ፑዴ ሳሎ ꬎቁ ጊ ጼሊዲ፥ «ታ ኣዋዉ! ሄኮ ሃኢ ሳቴይ ጋኪዴስ፤ ኔ ናይ ኔና ቦንቻና ማላ ኔኒ ኔ ናዛ ቦንቻ።
JOH 17:2 ኔ ቦንቻናይካ ኔ ኢዛስ ኢሚዳይታስ ኢዚ ሜርና ዴኦ ኢማና ማላ ኔ ኢዛስ ኣሳ ኡባ ቦላ ጎዳቴꬅ ኢሚዳ ጊሻሳ።
JOH 17:3 ሜርና ዴኦይካ ኔ ጻላ ቱሙ ጾሳኔ ኔ ኪቲዳ ዬሱስ ኪርስቶሳ ኤሮ ጉሳ።
JOH 17:4 ኔ ታስ ኢሚዳ ኦሶ ታኒ ዉርሳዳ ሃ ቢታ ቦላ ኔና ቦንቻዲስ።
JOH 17:5 ታ ኣዋዉ! ኣላሜይ ሜꬌታናፔ ካሴ ታስ ኔናራ ዲዛ ቦንቾን ሃኢካ ታና ኔ ኣቻን ቦንቻርኪ!
JOH 17:6 «ሃይሳ ኣላሜ ኣሳፔ ኔ ታስ ዶራዳ ኢሚዳ ኣሳታስ ኔ ኦናኮ ታ ኢስታስ ኔና ቆንጪሳዲስ፤ ኢስቲ ካሴካ ኔይታ ሺን ኔ ታስ ኢማዳሳ፤ ኢስቲካ ኔ ቃላ ናጊዳ።
JOH 17:7 ኔ ታስ ኢሚዳይሲ ዉሪካ ኔፔ ጊዲዳይሳ ኢስቲ ሃኢ ኤሪዳ።
JOH 17:8 ኔ ታስ ኢሚዳ ቃላታካ ታ ኢስታስ ኢማዲስ፤ ኢስቲካ ኤኪዳ፤ ታ ኔ ኣቻፌ ዪዳይሳ ኢስቲ ቱማፔ ኤሪዳ፤ ኔ ታና ኪቲዳይሳካ ኢስቲ ኣማኒዳ።
JOH 17:9 «ታ ኢስታስ ዎሳይስ፤ ሄይቲ ኔ ታስ ኢሚዳይቲ ኢስቲ ኔይታ ጊዲዳ ጊሻስ ታ ኢስታስ ዎሳይስ፤ ጊዶ ኣቲን ሃንኮ ኣላሜ ኣሳስ ዎሲኬ።
JOH 17:10 ታስ ጊዲዳይ ዉሪካ ኔይሳ፤ ኔይሲ ዉሪካ ታይሳ፤ ታኒካ ኢስታን ቦንቼታና።
JOH 17:11 ሃይሳፌ ጉዬ ታኒ ሃይሳ ኣላሜ ቦላ ዲኬ፤ ኢስቲ ጊዲኮ ሃ ኣላሜዛ ቦላ ዴቴስ፤ ሃኢ ታ ኔኮ ባይስ፤ ታ ኣዋ ጌሻዞ! ሃይታ ኔ ታስ ኢሚዳይታ ኢስቲ ኑ ማላ ባ ጊዶን ኢሲኖ ጊዳና ማላ ኔ ታስ ኢሚዳ ኔ ሱንꬃን ኢስታ ናጋ።
JOH 17:12 ታ ኢስታራ ኢሲፌ ዳሼ ኔ ታስ ኢሚዳ ኔ ሱንꬃን ታ ኢስታ ናጋዲስ፤ ሄሳ ጊሻስ ካሴ ጻፌቲዳ ጌሻ ማጻፋ ቃላይ ፖሌታና ማላ ኢዚ ካሴካ ꬋዮስ ዲዛ ናዛፔ ኣቲን ኢስታፌ ኦኒካ ꬋይቤና።
JOH 17:13 ታ ቃሴ ሃኢ ኔኮ ባይስ፤ ታ ሃ ኣላሜዛ ቦላ ዳሼ ሃይሳ ዮቲዛይ ታ ኡፋይሲ ኢስታን ፖሌታና ማላ ጋዳ ዮታይስ።
JOH 17:14 ታኒ ኔ ቃላ ኢስታስ ኢማዲስ፤ ታኒ ሃይሳ ኣላሜዛ ኣስ ጊዶንታይሳ ማላ ኢስቲካ ሃ ኣላሜ ኣስ ጊዴቴና፤ ሄሳ ጊሻስ ሃ ኣላሜ ኣሳይ ኢስታ ኢጺዴስ።
JOH 17:15 ኔ ኢስታ ኢታፔ ናጋና ማላ ታ ኔና ዎሳይስ ኣቲን ኔ ኢስታ ሃ ኣላሜፔ ዴንꬃ ኤፋና ማላ ታ ኔና ዎሲኬ።
JOH 17:16 ታኒ ኣላሜ ኣስ ጊዶንታይሳ ማላ ኢስቲካ ሃ ኣላሜ ኣስ ጊዴቴና።
JOH 17:17 ኔ ኢስታ ኔ ቱማን ኔስ ሻካ፤ ኔ ቃላይካ ቱሙ ቃላ።
JOH 17:18 ኔ ታና ሃ ኣላሜ ኪቶይሳꬆ ታኒካ ኢስታ ኣላሜ ቦላ ኪታዲስ።
JOH 17:19 ኢስቲ ቱማፔ ኔስ ዱማ ኣስ ጊዲዳ ማላ ታኒካ ታና ኢስታ ጊሻስ ዱማሳይስ።
JOH 17:20 «ኢስታ ቃላ ማርካቴꬃን ታና ኣማናናይታ ጊሻሳራ ታ ኔና ዎሳይስ ኣቲን ታ ኔና ኢስታ ጊሻስ ጻላ ዎሲኬ።
JOH 17:21 ታ ዎሲዛይ ኢስቲ ዉሪካ ኢሲኖ ጊዳና ማላሳ። ታ ኣዋዉ! ቃሴካ ኔ ታናን ዲዛ ማላ ኢስቲካ ኑናን ጊዳና ማላኔ ኔ ታና ኪቲዳይሳ ሃ ኣላሜይ ኣማናና ማላ ታ ኔና ዎሳይስ።
JOH 17:22 ኑኒ ኑ ጊዶን ኢሲኖ ጊዲዳ ማላ ኢስቲካ ባ ጊዶን ኢሲኖ ጊዳና ማላ ኔ ታስ ኢሚዳ ቦንቾዛ ታኒካ ኢስታስ ኢማዲስ።
JOH 17:23 ታ ኔና ዎሲዛይ ታ ኢስታን፤ ኔካ ታናን ጊዲዳ ማላ ኢስቲካ ኩሜꬅ ኢሲኖ ጊዳና ማላሳ። ቃሴካ ኔኒ ታና ኪቲዳ ማላኔ ታና ኔ ሲቂዳ ማላ ኢስታካ ኔ ሲቂዳይሳ ኣላሜ ኣሳይ ኤራናሳ።
JOH 17:24 «ታ ኣዋዉ! ኔ ታና ሃይሲ ኣላሜይ ሜꬌታናፔ ካሴ ዶሲዳ ጊሻስ ኔ ታስ ኢሚዳ ታ ቦንቾዛ ኢስቲ ቤያና ማላ ሃይቲ ኔ ታስ ኢሚዳይቲካ ታ ዲዛሶን ታናራ ዳና ማላ ዶሳይስ።
JOH 17:25 ጺሎ ጊዲዳ ታ ኣዋዉ! ኔና ኣላሜይ ኤሪቤና፤ ታ ጊዲኮ ኔና ኤራይስ፤ ሃይቲካ ኔ ታና ኪቲዳይሳ ኤሪዳ።
JOH 17:26 ኔ ታና ሲቂዳ ሲቆይ ኢስታን ጊዳና ማላኔ ታኒካ ኢስታን ጊዳና ማላ ኢስቲካ ኔና ኤራና ማላ ኦꬃዲስ። ቃሴካ ኢስቲ ኤራና ማላ ታ ኦꬃና» ጊዴስ።
JOH 18:1 ሄሳ ኡባ ዮቲዳፔ ጉዬ ዬሱሲ ባና ካሊዛይታራ ቄዲሮኔ ጌቴቲዛ ሾባ ፒኒዲ ኣታኪልቴ ጊዶ ጌሊዴስ።
JOH 18:2 ዬሱሲኔ ኢዛ ካሊዛይቲ ካሴካ ሄ ጋዴዪን ዳሮ ዎዴ ኢሲፌ ሺቂዛ ጊሻስ ዬሱሳ ኣꬂ ኢሚዳ ዩሁዳይ ሄ ጋዴዮ ካሴካ ኤሬስ።
JOH 18:3 ሄሳ ጊሻስ ዩሁዳይ ዎታዳራታ፥ ቄሴታ ሃላቃታኔ ፋርሳዌታፔ ኪቴቲ ዪዳ ኣሽካራታ ዉርሲ ካሌꬂ ኤኪዲ ሄ ኢስቲ ሺቂዛሶ ዪዴስ። ኢዛራ ዪዳ ኣሳይ ፓኖሴ፥ ጾምፔ፥ ማሻኔ ቶራ ኦይኪዲ ዪዴስ።
JOH 18:4 ዬሱሲ ባ ቦላ ጋካናይሳ ኡባ ኤሪዲ ዪዳ ኣሳኮ ቢዲ፥ «ኦና ኮዬቲ?» ጊዴስ።
JOH 18:5 ኢስቲ ቃሴ፥ «ናዚሬቴ ዬሱሳ ኮዮስ» ጊዳ። ኢዚካ ኢስታስ፥ «ታኒ ኢዛኮ» ጊዴስ። ኢስታስ ኣꬂ ኢሚዳ ዩሁዳይ ኢስታራ ኢሲፌ ኤቂዴስ።
JOH 18:6 ዬሱሲ፥ «ታኒ ኢዛኮ» ጊዳ ማላ ኣሳቲ ጉዬ ጋንዲጋርዲ ቢታ ቦላ ኩንዲዳ።
JOH 18:7 ዬሱሲ ሃኢካ፥ «ኦና ኮዬቲ?» ጊ ኦይቺን ኢስቲ ዛሪዲ፥ «ናዚሬቴ ዬሱሳ ኮዮስ» ጊዳ።
JOH 18:8 ኢዚካ ዛሪዲ፥ «ታኒ ኢዛኮ፤ ሂስቲን ኢንቴ ኮይዛይ ታና ጊዲኮ ሃይቲ ቤቶ ቦቾፍቴ» ጊዴስ።
JOH 18:9 ሄሲ ሃኒዳይ፥ «ታ ኣዋዉ! ኔ ታስ ኢሚዳይታፔ ኢሳዴካ ታ ꬋይሳቤኬ» ጊዳ ቃላይ ፖሌታና ማላሳ።
JOH 18:10 ሲሞና ጌቴቲዛ ጴጽሮሲ ጊꬃ ማሻ ኦይኪዳ ጊሻስ ማሻ ኮሆፔ ሾዲዲ ኢሲ ቄሴታ ሃላቃ ኣሽካራ ዲዛይሳ ሃይꬅ ማሻራ ቃንጺ ዬጊዴስ፤ ሄ ኣሽካራዛ ሱንꬂ፥ «ማልኮሳ» ጌቴቴስ።
JOH 18:11 ዬሱሲ ቃሴ ጴጽሮሳ፥ «ኔ ማሻዛ ኮሆን ዛራ ጌልꬃ። ኣዋይ ታስ ኢሚዳ ዋዬ ኡሻ ታ ኡዮንታ ኣጋና ሚሳቲዜ?» ጊዴስ።
JOH 18:12 ሄሳፌ ጉዬ ዎታዳራቲ፥ ኢስታ ኣዛዚዛይሲኔ ኣይሁዳታ ኣሽካራቲ ዬሱሳ ኦይኪዲ ቃቺዳ።
JOH 18:13 ኮይሮ ሄ ላይꬃን ቄሴታስ ሃላቃ ቃያፋ ቦሎ ሃናኮ ኤፊዳ።
JOH 18:14 ቃያፋይ፥ «ዴሬ ጊሻስ ኢሳዴይ ሃይቂኮ ሎኦ» ጊዲ ኣይሁዳታ ዳናታ ካሴ ዞሪዳዴ።
JOH 18:15 ሲሞና ጌቴቲዛ ጴጽሮሲኔ ዬሱሳ ካሊዛይታፔ ኢሳዴይ ዬሱሳ ካሊዳ፤ ሄሳዴይ ቄሴታ ሃላቃ ኣቻን ኬሂ ኤሬቲዳዴ። ሄሳ ጊሻስ ዬሱሳራ ኢሲፌ ቄሴታ ሃላቃዛ ጊቤ ጌሊዴስ።
JOH 18:16 ጴጽሮሲ ጊዲኮ ፔንጌፌ ካሬ ባጋራ ኤቂዴስ፤ ቄሴታ ሃላቃ ኣቻን ኬሂ ኤሬቲዲ ዬሱሳ ካሊዛይሲ ዪዲ ፔንጌን ዲዛ ጋራዴያ ጴጽሮሳ ጊቤ ጊዶ ጌልꬃና ማላ ዮቲዲ ጴጽሮሳ ኤኪ ጌሊዴስ።
JOH 18:17 ፔንጌ ናጊዛ ጋራዴያ ጴጽሮሳ፥ «ኔካ ሄሳ ኣዴዛ ካሊዛ ኣሳታፔ ኢሳ ዲኪ?» ጋዱስ፤ ኢዚ ቃሴ፥ «ታኒ ኢዛ ካሊዛዴ ጊዲኬ» ጊዴስ።
JOH 18:18 ዎዴይ ሜጊዛ ዎዴ ጊዲዳ ጊሻስ ኦሳንቻቲኔ ኣሽካራቲ ታማ ኤꬂዲ ኤቂ ሆኤቴስ። ጴጽሮሲካ ኢስታራ ኤቂዲ ሆኤስ።
JOH 18:19 ሄ ዎዴ ቄሴታ ሃላቃይ ዬሱሳ ኢዛ ካሊዛይታ ጊሻሲኔ ኢዚ ታማርሲዳ ቲሚርቴ ጊሻስ ኦይቺዴስ።
JOH 18:20 ዬሱሲካ ኢዛስ፥ «ታ ኣሳ ኡባስ ቆንጬን ዮታዲስ፤ ኣይሁዳቲ ሺቂዛ ኢስታ ዎሳ ኬꬃን ጊዲንካ ጾሳ ኬꬃን ታማርሳዲስ፤ ታ ቆታን ሃሳይዳዚ ኣይኮይካ ዴና።
JOH 18:21 ሂስቲን ኔ ታና ኦይቺዛይ ኣዜ? ታ ዮቲሺን ሲዪዳይታ ኦይቻ፤ ታ ዮቲዳይሳ ኢስቲ ኤሬቴስ» ጊዴስ።
JOH 18:22 ዬሱሲ ሄሳ ጊዳ ማላ ሄን ኤቂዳ ኣሽካራታፔ ኢሶይ፥ «ቄሴታ ሃላቃስ ሃይሳꬆ ዎስታ ዛራይ?» ጊሼ ዬሱሳ ሻጋላን ባቃ ሻዪዴስ።
JOH 18:23 ዬሱሲካ ዛሪዲ፥ «ታ ኢታ ሃሳይዳ ጊዲኮ ኣኔ ታ ጎይሳ ኔ ማርካታ፤ ታ ዮቲዳይ ሊኬ ጊዲኮ ታና ኣዛስ ባቃይ?» ጊዴስ።
JOH 18:24 ሄሳፌ ጉዬ ሃናይ ዬሱሳ ቃቺዳ ማላ ቄሴታ ሃላቃ ቃያፋኮ ዬዲዴስ።
JOH 18:25 ሄ ዎዴ ሲሞና ጌቴቲዛ ጴጽሮሲ ኤቂዲ ታማ ሆኢሺን ሃንኮ ኣሳይ ኢዛ፥ «ሃይሶ! ኔ ዬሱሳ ካሊዛይታፔ ኢሳ ዲኪ?» ጊዳ። ኢዚካ ዛሪዲ፥ «ታ ኢዛ ካሊዛዴ ዲኬ» ጊዲ ካዲዴስ።
JOH 18:26 ካሴ ጴጽሮሲ ኢዛ ሃይꬅ ቃንጺዳይሳ ዳቦይ ቄሴታ ሃላቃ ኣሽካራታፔ ኢሶይ፥ «ዎና ታ ኔና ኣታኪልቴሶን ኢስታራ ዲሺን ቤያቤኪና?» ጊዴስ።
JOH 18:27 ጴጽሮሲ ቃሴካ ካዲዴስ፤ ሄራካ ኩቶይ ዋሲዴስ።
JOH 18:28 ሄሳፌ ጉዬ ዬሱሳ ቃያፋ ኬꬃፌ ዴሬ ኣይሲዛ ካዎዛ ጊቤ ማላዶ ዎንታራ ኤኪ ቢዳ። ኣይሁዳ ኣሳስ ፓዚጋ ባኣሌ ዶርሳ ኣሾ ሚዛ ዎዴ ጊዲዳ ጊሻስ ባና ቱኒሶንታ ማላ ጊዲ ማላዶራ ዴሬ ኣይሲዛይሳ ጊቤ ጊዶ ጌሊቤቴና።
JOH 18:29 ሄሳ ጊሻስ ጲላጾሲ ኢስታኮ ኬዚዲ፥ «ሃይሳ ኣዴዛ ኢንቴ ኣዛስ ሞቴቲ?» ጊዲ ኦይቺዴስ።
JOH 18:30 ኢስቲ ቃሴ፥ «ሃይሲ ኣዴዚ ኢታ ኦꬆንታዴ ጊዲዳኮ ኑ ኢዛ ኔስ ኣꬂ ኢሞኮሺን» ጊዳ።
JOH 18:31 ጲላጾሲካ፥ «ኢንቴ ኢዛ ኤኪ ቢዲ ኢንቴ ዎጋ ማላ ፒርዲቴ» ጊዴስ። ኣይሁዳታ ኣይሲዛይቲ ቃሴ ዛሪዲ፥ «ኑኒ ኣስ ዎꬋና ማላ ኑስ ፒቃዴይ ኢሜቲቤና» ጊዳ።
JOH 18:32 ሄሲካ ሃኒዳይ ዬሱሲ ካሴ ኢስታስ ኢዚ ዋኒ ሃይቃናኮ ዮቲዳ ቃላይ ፖሌታና ጊሻሳ።
JOH 18:33 ጲላጾሲ ቃሴካ ጉዬ ጊቤ ጊዶ ጌሊዲ ዬሱሳ ጼይጊሲዲ፥ «ኔ ኣይሁዳታ ካዎ?» ጊዲ ኦይቺዴስ።
JOH 18:34 ዬሱሲካ ዛሪዲ፥ «ኔ ሄሳ ጊዛይ ኔፔዬ? ዎይኮ ሃራ ኣሳቲ ታ ጊሻስ ኔስ ዮቲዶ?» ጊዴስ።
JOH 18:35 ጲላጾሲካ፥ «ታ ኣይሁዳ ኣሴ? ኔና ታስ ኣꬂ ኢሚዳይቲ ኔ ባጋታኔ ቄሴታ ሃላቃታኮ፤ ኔ ኣይ ኦꬃዲ?» ጊዴስ።
JOH 18:36 ዬሱሲካ፥ «ታ ካዎቴꬂ ሃይሳ ሃ ኣላሜ ቦላ ጊዴና። ታ ካዎቴꬂ ሃይሳ ሃ ኣላሜ ቦላ ጊዲዳኮ ኣይሁዳታ ዳናታ ኩሼን ታ ኩንዶንታ ማላ ታ ኣሽካራቲ ታ ጊሻስ ኦሌታናኮሺን ታ ካዎቴꬂ ጊዲኮ ሃ ኣላሜ ቦላ ጊዴና» ጊዴስ።
JOH 18:37 ጲላጾሲካ፥ «ሂስቲን ኔ ካዎ?» ጊዴስ፤ ዬሱሲ ቃሴ፥ «ታኒ ኔ ጊዳይሳ ማላ ኤ ካዎ፤ ታ ዬሌቲዳይኔ ሃ ቢታ ዪዳይ ቱማ ጊሻስ ማርካታናሳ፤ ቱማፔ ጊዲዳይ ዉሪ ታ ቃላ ሲዬስ» ጊዴስ።
JOH 18:38 ጲላጾሲካ፥ «ቱማይ ኣዜ?» ጊዴስ፤ ሄሳፌ ጉዬ ጲላጾሲ ናምኣንꬆ ኣይሁዳታኮ ኬዚዲ፥ «ታ ኢዛ ቦላ ኣይኮ ባላካ ቤያቤኬ።
JOH 18:39 ጊዶ ኣቲን ካሴካ ታ ኢንቴስ ፓዚጋ ባኣሌ ጋላስ ኢሲ ቃሾ ኣስ ቢርሺዛ ማላ ሃይሳ ኣይሁዳታ ካዎ ኢንቴስ ቢርሻና ማላ ኮዬቲ?» ጊዴስ።
JOH 18:40 ኢስቲ ጊዲኮ፥ «ኑስ ባርባኔ ቢርሻ ኣቲን ሃይሳ ዴና!» ጊዲ ዋሲዳ፤ ባርባኔይ ባ ሁኤስ ፓንጋ።
JOH 19:1 ሄሳፌ ጉዬ ጲላጾሲ ዬሱሳ ኤፊዲ ጋራፊሲዴስ።
JOH 19:2 ዎታዳራቲካ ኣጉንꬃ ዛዉዴ ጻጺዲ ዬሱሳ ሁኤን ዎꬂዳ፤ ዞኦ ካባካ ማይዚዳ።
JOH 19:3 ኢዛኮ ሺቂ ሺቂዲ፥ «ኣይሁዳ ካዎ ሳሮ! ሳሮ!» ጊ ጊዲ ኢዛ ሻጋላን ባቂዳ።
JOH 19:4 ጲላጾሲ ቃሴካ ካሬ ኬሲዲ፥ «ሄኮ ታ ኢዛ ቦላ ኣይኮ ሞሮካ ዴሞንታይሳ ኢንቴ ኤራና ማላ ታ ኢዛ ኢንቴስ ሃ ካሬ ኬሳና» ጊዴስ።
JOH 19:5 ሄሳ ጊሻስ ዬሱሲ ኣጉንꬃ ዛዉዴ ሁኤን ዎꬂ ኤኪዲ ዞኦ ካባ ማይኢዲ ካሬ ኬዚዴስ። ጲላጾሲካ ኢስታስ፥ «ሄኮ ኣዴዚ ሃይሲች!» ጊዴስ።
JOH 19:6 ቄሴታ ሃላቃቲኔ ኢስታ ኣሽካራቲ ዬሱሳ ቤኢዲ፥ «ኔ ኢዛ ካቃ! ካቃ!» ጊሼ ዋሲዳ። ጲላጾሲ ቃሴ፥ «ታኒ ታ ባጋራ ኢዛ ቦላ ኢሲ ሞሮካ ዴማቤኬ፤ ኮይኮ ኢንቴ ኤፊዲ ካቂቴ» ጊዴስ።
JOH 19:7 ኣይሁዳ ኣሳቲ ቃሴ፥ «ኑስ ዎጋይ ዴስ፤ ሃይሲ ኣዴዚ ባና ጾሳ ና ጊዛ ጊሻስ ኑ ዎጋ ማላ ኢዛስ ሃይቆይ ቤሴስ» ጊዳ።
JOH 19:8 ጲላጾሲ ሄሳ ኢስቲ ጊዛይሳ ሲዪዲ ዳሮ ባቢዴስ።
JOH 19:9 ጌዴ ጊቤ ጌሊዲ ዬሱሳ፥ «ኔ ኣዋፔ ያዲ?» ጊ ኦይቺዴስ። ዬሱሲ ቃሴ ኢዛስ ኣይ ዛሮካ ኢሚቤና።
JOH 19:10 ሄሳ ጊሻስ ጲላጾሲ፥ «ኔ ታስ ዮቲኪ? ታ ኔና ካቃናስ ዎይኮ ቢርሻ ዬዳናስ ጎዳቴꬂ ታስ ዲዛይሳ ኤርኪ?» ጊዴስ።
JOH 19:11 ዬሱሲካ ኢዛስ ዛሪዲ፥ «ሼኔይ ኔስ ጾሳፌ ኢሜቶንታኮ ኔስ ታ ቦላ ኣይ ጎዳቴꬂካ ዴናሺን፤ ጊዶ ኣቲን ታና ኔስ ኣꬂ ኢሚዳዴ ቦላ ጊታ ናጋራይ ዴስ» ጊዴስ።
JOH 19:12 ጲላጾሲ ሄሳ ዬሱሳ ሃሳያ ሲዪዳፔ ጉዬ ኢዛ ቢርሺ ዬዳና ኮዪዴስ ሺን ኣይሁዳታስ ባቢዳ ጊሻስ ኢስቲ፥ «ኔ ሃይሳ ኣዴዛ ቢርሺኮ ኦሮሜ ካዎ ቄሳሬ ባጋ ጊዳካ፤ ጋሶይካ ባና ባርካ ካዎꬂዛዴይ ዉሪ ቄሳሬስ ሞርኬ» ጊሼ ዉሪካ ዋሲዳ።
JOH 19:13 ጲላጾሲ ሄሳ ሲዪዳ ማላ ዬሱሳ ካሬ ኬሲዲ፥ «ሎቻ ሹች» ጌቴቲዛሶን ፒርዳ ዎምቦራን ኡቲዴስ። ሄ ፒርዳሶይ ኣይሁዳታ ቃላራ፥ «ጋባታ» ጌቴቴስ።
JOH 19:14 ሄ ዎዴ ጋዴይ ኣሲ ፓዚጋ ባኣሌስ ጊጌቲዛ ጋላሳ። ዎዴይካ ጋላሳፌ ኡሱፑን ሳቴ ማላ ጊዲዴስ፤ ሄ ዎዴ ጲላጾሲ ኣይሁዳታ፥ «ሄኮ ኢንቴ ካዎይ ሃይሲች!» ጊዴስ።
JOH 19:15 ጊዶ ኣቲን ኢስቲ ቃሴ፥ «ጌዴ ዲጋ! ጌዴ ዲጋ! ካቃ!» ጊሼ ዋሲዳ። ጲላጾሲካ፥ «ታ ኢንቴ ካዎ ካቆ?» ጊዴስ። ቄሴታ ሃላቃቲ ዛሪዲ፥ «ኑስ ቄሳሬፔ ሃራ ካዎይ ዴና» ጊዳ።
JOH 19:16 ሄሳፌ ሲሚዲ ጲላጾሲ ዬሱሳ ካቃና ማላ ኢስታስ ኣꬂ ኢሚዴስ። ኢስቲካ ዬሱሳ ኦይኪ ኤኪ ኤፊዳ።
JOH 19:17 ሄሳፌ ጉዬ ዬሱሲ ባ ካቄታና ማስቃሌዛ ቶኪዲ፥ «ኣሳ ሁኤ ጉጌ» ጌቴቲዛሶ ኬዚዴስ። ሄ ሶሆይ ኣይሁዳታ ቃላራ፥ «ጎልጎታ» ጌቴቴስ።
JOH 19:18 ኢዛ ሄን ካቂዳ። ዬሱሳ ጊዶ ጌልꬂዲ ሃራ ናምኡ ኣሳታ ኢዛꬆ ሃዲርሳራኔ ኡሻቻራ ካቂዳ።
JOH 19:19 ጲላጾሲ፥ «ናዚሬቴ ዬሱሲ ኣይሁዳታ ካዎ» ጊዛ ቃላ ጻፊዲ ኢዛ ማስቃሌ ቦላ ኢዛስ ሁኤሶራ ቃጲዴስ።
JOH 19:20 ዬሱሲ ካቄቲዳሶይ ካታማስ ማታ ጊዲዳ ጊሻስ ዳሮ ኣይሁዳ ኣሳይ ጲላጾሲ ጻፊዳይሳ ናባቢዴስ፤ ጻፌቲዳይሲካ ኣይሁዳታ ቃላራ፥ ላቲኔ ቃላራኔ ጊሪኬ ቃላራ።
JOH 19:21 ኣይሁዳታ ቄሴታ ሃላቃቲ ጲላጾሳ፥ «ኔ ኢዛ ኣይሁዳታ ካዎ» ጋዳ ጻፎፓ። ጊዶ ኣቲን፥ « ‹ሃይሲ ኣዴዚ ባና ታ ኣይሁዳታ ካዎ› ጊዴስ ጋዳ ጻፋ» ጊዳ።
JOH 19:22 ጲላጾሲ ቃሴ፥ «ታ ጻፊዳይሳ ጻፋዲስ» ጊዴስ።
JOH 19:23 ዎታዳራቲ ዬሱሳ ካቂዳፔ ጉዬ ኢዛ ማይኦዛ ኤኪዲ ዎታዳራታ ኢሳ ኢሳ ጋካና ማላ ኦይዱ ኬሲ ሻኬሬꬂዳ። ጋርሳራ ማይኢዛ ማይኦዛካ ሄሳꬆ ሻኬሬꬂዳ። ጊዶ ኣቲን ጋርሳራ ማይኢዛ ማይኦዚ ሲኬቶንታ ፑዴፔ ዱጌ ጋካናስ ጮ ዬዳ ዴስ።
JOH 19:24 ሄሳ ጊሻስ ዎታዳራቲ ባ ጊዶን፥ «ጊሻን ኦና ጋካናኮ ኤራና ማላ ኢዛ ቦላ ሳማ ዬጋና ኣቲን ዳኮኮ» ጊዳ፤ ሄሲካ ሃኒዳይ ካሴ፥ «ታ ማይኦ ኢስቲ ጊሼቲ ኤኪዳ፤ ታኒ ቦላራ ማይኢዛ ማይኦዛ ቦላ ሳማ ዬጊዳ» ጌቴቲዳ ጌሻ ማጻፋ ቃላይ ፖሌታና ማላሳ። ዎታዳራቲካ ሄሳ ኦꬂዳ።
JOH 19:25 ዬሱሳ ማስቃሌ ኣቻን ኢዛ ኣዬያኔ ኣዬይ ሚቼያ ቃሊዮጳ ማቻ ማራማኔ ማግዳሌ ጌቴቲዛሶፔ ዪዳ ማራማ ሄን ኤቂዳ።
JOH 19:26 ዬሱሲ ባ ኣዬዮኔ ኢዚ ሲቂዛ ኢዛ ካሊዛይሲ ባ ኣቻን ኤቂዳይታ ቤኢዲ ባ ኣዬዮ፥ «ኣዬ! ኔ ናዛ ሄሳ ቤያ» ጊዴስ።
JOH 19:27 ሄሳፌ ካሌꬂዲ ባና ካሊዛይሳ፥ «ኔ ኣዮ ሂኖ ቤያ» ጊዴስ። ሂኖ ሄ ሳቴይፔ ሲሚን ኢዛ ካሊዛይሲ ኣዬዮ ባሶ ኤፊዴስ።
JOH 19:28 ሄሳፌ ጉዬ ዬሱሲ ሃኢ ዉሪካ ፖሌቲዳይሳ ኤሪዲ ጌሻ ማጻፋን ጻፌቲዳይሲ ፖሌታና ማላ፥ «ታና ሳሜስ» ጊዴስ።
JOH 19:29 ሄን ጫላ ጳንቂዳ ኡሺ ኩሚ ኡቲዳ ኢሲ ጻሮ ማላይ ዴስ። ሄሳ ጊሻስ ሄን ዲዛይቲ ሄ ጫላ ኡሻ ዛንꬓ ሚሳቲዛ ሳፊኔጌ ጌቴቲዛይሳራ ሂሶጴ ጌቴቲዛ ሚꬃ ጼራን ቃጲዲ ኢዛ ዶናኮ ሺሺዳ።
JOH 19:30 ዬሱሲ ሄ ጫላ ኡሻ ጹንጺ ጼሊዲ፥ «ፖሌቲዴስ!» ጊዴስ። ባ ሁኤ ዱጌ ዚቂሲዲ ሼምፖ ኬዚዴስ።
JOH 19:31 ሄሳፌ ጉዬ ኣይሁዳታ ዳናቲ ካቄቲዳ ኣሳታ ሜቄꬅ ዎዲራፔ ሜንꬂዲ ኢስቲ ኢዛ ማስቃሌ ቦላፌ ዎꬃና ማላ ጲላጾሳ ዎሲዳ። ኢስቲ ሄሳ ኦꬂዳይ ኣይሁዳቲ ሳምባታስ ጊጌቲዛ ጋላስ ጊዲዳ ጊሻሲኔ ሄ ሳምባታይካ ዳሮ ጊታ ባኣሌ ጊዲዳ ጊሻስ ሳምባታ ጋላስ ኣሃይ ማስቃሌ ቦላ ጋምኦንታ ማላ ኮዪዳ ጊሻሳ።
JOH 19:32 ሄሳ ጊሻስ ዎታዳራቲ ቢዲ ዬሱሳራ ካቄቲዳ ኣሳታ ሜቄꬅ ዎዲራፔ ዎዲራፔ ሜንꬂዳ።
JOH 19:33 ኢስቲ ዬሱሳኮ ቢን ኢዚ ካሴቲ ሃይቂዳይሳ ቤኢዲ ኢዛ ዎዲራ ሜቄꬅ ሜንꬂቤቴና።
JOH 19:34 ጊዶ ኣቲን ዎታዳራታ ጊዶፌ ኢሳዴይ ቶራራ ኢዛ ሚሌን ጫዲን ሄራካ ሱꬂኔ ሃꬂ ጉኪዴስ።
JOH 19:35 ሄሳ ቤኢዳዴይ ኢንቴ ኢዛን ኣማናና ማላ ማርካቲዴስ፤ ኢዛ ማርካቴꬂካ ቱማ። ኢዚ ዮቲዛይካ ቱሙ ጊዲዳይሳ ኢዚ ኤሬስ።
JOH 19:36 ሄሲካ ሃኒዳይ፥ «ኢዛ ሜቄꬃፌ ኢሲናካ ሜቁኩ» ጌቴቲዳ ጌሻ ማጻፋ ቃላይ ፖሌታናሳ።
JOH 19:37 ቃሴካ ጌሻ ማጻፋን ሃራሶን፥ «ኢስቲ ባና ጫዲዳዴ ቤያና» ጌስ።
JOH 19:38 ኣይሁዳታ ዳናታ ባቢዲ ቆታን ዬሱሳ ካሊዛ ኣርማቲያሴ ጌቴቲዛሶፔ ዪዳ ዮሴፌይ ዬሱሳ ኣሃ ኤካናስ ጲላጾሳ ዎሲን ጲላጾሲካ ኢዛስ ኤሮ ጊዴስ። ሄሳ ጊሻስ ዮሴፌይ ቢዲ ዬሱሳ ኣሃ ኤኪዴስ።
JOH 19:39 ካሴ ዬሱሳኮ ቃማራ ዪዳ ኒቆዲሞሲካ ባጋ ኪሎ ጊዲዛ ካርቤኔ ጎዳሬ ኡꬃራ ዋላኬቲዳ ሺቶ ኤኪ ዪዴስ።
JOH 19:40 ሄ ናምኡ ኣሳቲ ዬሱሳ ኣሃዛ ኤኪዲ ኣይሁዳቲ ኣሃ ጻጺዛ ማላ ሺቶ ፑኪዲ ሌኤ ማይኦራ ጻጺዳ።
JOH 19:41 ዬሱሲ ካቄቲዳሶሆን ኢሲ ኣታኪልቴሶይ ዴስ። ሄ ኣታኪልቴዛሶን ኦኒካ ሞጌቶንታ ኦራꬃ ዱፎይ ዴስ።
JOH 19:42 ኣይሁዳታ ሳምባታስ ጊጌቲዛ ጋላስ ጊዲዳ ጊሻሲኔ ዱፎይካ ማታን ዲዛ ጊሻስ ዬሱሳ ኣሃ ሄን ሞጊዳ።
JOH 20:1 ዎጋ ጋላስ ዎንታ ማላዶ ቡሮ ባዞይ ዞኢሺን ማግዳሌ ማራማ ዬሱሳ ዱፎኮ ባዱስ። ኢዛ ሄ ጋኪሺን ካሴ ዬሱሳ ዱፎ ኢዛራ ጎርዲዳ ሹቻይ ዱፎዛ ዶናፔ ዴንዲዲ ጌንዴሪዳይሳ ቤያዱስ።
JOH 20:2 ሄሳ ጊሻስ ኢዛ ዬሱሳ ካሊዛይታፔ ሲሞና ጌቴቲዛ ጴጽሮሳኮ ዬሱሲ ዶሲዛ ሃንኮ ኢዛ ካሊዛይሳኮ ዎጻ ባዳ፥ «ጎዳ ዱፎፔ ኬሲ ኤኪዲ ኣዋን ዎꬂዳኮ ኑ ኤሮኮ» ጋዱስ።
JOH 20:3 ሄራካ ጴጽሮሲኔ ዬሱሳ ካሊዛይታፔ ኢሶይ ኬዚዲ ዱፎይ ዲዛሶ ቢዳ።
JOH 20:4 ናምኣይካ ኢሲፌ ዎጺዳ፤ ጊዶ ኣቲን ዬሱሳ ካሊዛ ሂንኮይሲ ጴጽሮሳፔ ፒላቲ ዎጺዲ ካሴቲ ዱፎይ ዲዛሶ ጋኪዴስ።
JOH 20:5 ዱፎዛ ሆኪ ጼሊዲ ኣሃይ ኢዛን ጻጼቲዳ ማይኦይ ጻላ ዲዛይሳ ቤዪዴስ፤ ጊዶ ኣቲን ጌዴ ዱፎዛ ጊዶ ጌሊቤና።
JOH 20:6 ሲሞና ጌቴቲዛ ጴጽሮሲካ ኢዛ ካሊ ጋኪዲ ዱፎዛ ጊዶ ጌሊዴስ፤ ኣሃይ ኢዛን ጻጼቲዳ ጫርቃይ ሄን ዲዛይሳ ቤዪዴስ።
JOH 20:7 ዬሱሳ ሁኤይ ጻጼቲዳ ጫርቃይ ሃንኮ ጻꬃ ጫርቃታራ ጊዶንታ ዱማ ሃራሶን ጻጼቲ ዲዛይሳ ቤዪዴስ።
JOH 20:8 ኮይሮቲ ጋኪዳ ዬሱሳ ካሊዛይሲካ ዱፎዛ ጊዶ ጌሊ ቤኢዲ ኣማኒዴስ።
JOH 20:9 ጋሶይካ፥ «ኢዚ ሃይቆፔ ዴንዳና ቤሴስ» ጊዛ ማጻፋ ቃላ ኢስቲ ቡሮ ሃሳኢቤቴና።
JOH 20:10 ሄሳፌ ጉዬ ናምኣቲካ ሲሚዲ ባሶ ባሶ ቢዳ።
JOH 20:11 ማግዳሌ ማራማ ዬካሼ ዬሱሳ ዱፎፔ ካሬራ ኤቃዳ ሆካ ዱፎዛ ጊዶ ጼላዱስ።
JOH 20:12 ዬሱሳ ኣሃይ ዲዛሶን ቦꬃ ማይኦ ማይኢዳ ናምኡ ኪታንቻታፔ ኢሶይ ሁኤሶን ኢሶይ ቶሆሶን ኡቲዳይታ ቤያዱስ።
JOH 20:13 ኢስቲካ ማራሞ፥ «ሃኔ ማጫሳዬ! ኣዛስ ዬካይ?» ጊዳ። ኢዛካ፥ «ኢስቲ ታ ጎዳ ኤፊዲ ኣዋን ዎꬂዳኮ ታ ኤሪኬ» ጋዱስ።
JOH 20:14 ኢዛ ሂኖ ጋዳ ጉዬ ዩዪሺን ዬሱሲ ኤቂዳይሳ ዴማዱስ ሺን ኢዚ ዬሱሳ ጊዲዳይሳ ኤራቤኩ።
JOH 20:15 ዬሱሲ ኢዞ፥ «ሃኔ ማጫሳዬ! ኣዛስ ዬካይ? ቃሴ ኦና ኮያይ?» ጊዴስ፤ ኢዚካ ኢዚስ ኣታኪልቴ ናጊዛዴ ሚሳቲን፥ «ጎዶ! ኔ ኤኪዳ ጊዲኮ ኔ ዎꬂዳሶ ታስ ዮታርኪ! ታ ኢዛ ታስ ኤካና» ጋዱስ።
JOH 20:16 ዬሱሲ ኢዞ፥ «ማራሜ!» ጊዴስ፤ ኢዛካ ጌዴ ኢዛኮ ሲማዳ ኣይሁዳታ ቃላራ፥ «ኤሬቡኔ!» ጋዱስ፤ ሄሳ ቢርሼꬂ፥ «ኣስታማሬ!» ጉሳ።
JOH 20:17 ዬሱሲ ቃሴ፥ «ታ ቡሮ ፑዴ ታ ኣዋኮ ኬዛቤኬ፤ ታና ቦቾፋ፤ ጊዶ ኣቲን ኔ ሃኢ ታ ኢሻታኮ ባዳ፥ ‹ታኒ ታ ኣዋኮኔ ኢንቴ ኣዋኮ፥ ታ ጾሳኮኔ ኢንቴ ጾሳኮ ኬዛና ጊዴስ› ጋዳ ኢስታስ ዮታ» ጊዴስ።
JOH 20:18 ሄሳ ጊሻስ ማግዳሌ ማራማ ዬሱሳ ካሊዛይታኮ ባዳ ኢዛ ዬሱሳ ቤኢዳይሳኔ ኢዚ ኢዚስ ዮቲዳይሳ ኢስታስ ዮታዱስ።
JOH 20:19 ሄ ጋላስ ዎጋ ኦማርስ ዬሱሳ ካሊዛይቲ ኣይሁዳታ ዳናታስ ባቢዲ ካሬ ባ ቦላ ጎርዲዲ ኬꬃ ጊዶን ሺቆን ዲሺን ካሬይ ዶዬቶንታ ዬሱሲ ኢዛ ካሊዛይቲ ሺቂ ዲዛ ኬꬃ ጌሊዴስ፤ ኢስታ ጊዶን ኤቂዲ፥ «ሳሮይ ኢንቴስ ጊዶ!» ጊዴስ።
JOH 20:20 ሄሳ ጊ ሲሚዲ ባ ኩሼታኔ ባ ሚሌ ኢስታ ቤሲዴስ፤ ኢዛ ካሊዛይቲካ ጎዳ ቤኢዲ ኬሂ ኡፋዬቲዳ።
JOH 20:21 ሄሳፌ ጉዬ ቃሴካ ዬሱሲ ኢስታ፥ «ኢንቴስ ሳሮይ ጊዶ! ታ ኣዋይ ታና ኪቲዳ ማላ ታኒካ ኢንቴና ኪታይስ» ጊዴስ።
JOH 20:22 ሄሳ ጊ ሲሚዲ ኢስታ ቦላ ኡፉ ጊዲ፥ «ኢንቴ ጺሎ ኣያና ኤኪቴ።
JOH 20:23 ኢንቴ ኣሳ ናጋራ ኣቶ ጊኮ ኢስታስ ኣቶ ጌቴታና፤ ኢንቴ ኣሳ ናጋራ ኣቶ ጎንታ ኢጺኮ ቃሴ ኢስታስ ኣቶ ጌቴቴና» ጊዴስ።
JOH 20:24 ዬሱሲ ባና ካሊዛይታኮ ዪዳ ዎዴ ታማኔ ናምኣታፔ ኢሶይ ዲዲሞሳ ጌቴቲዛ ቶማሲ ኢስታራ ዴና።
JOH 20:25 ሄሳ ጊሻስ ሃንኮ ዬሱሳ ካሊዛይቲ ቶማሳስ፥ «ኑኒ ጎዳ ቤኢዶስ» ጊዳ። ቶማሲ ቃሴ፥ «ሚሲማሬን ጫዴቲዳ ኢዛ ኩሼታ ታኒ ታ ኣይፌራ ቤኦንታ ዳሼ፥ ቃሴካ ታ ቢራꬌ ሚሲማሬይ ጌሊዳሶን ጌልꬃ ጼሎንታ ዳሼኔ ታ ኩሼ ኢዛ ሚሌ ማዱንꬃን ጌልꬃ ጼሎንታ ዳሼ ኣማኒኬ» ጊዴስ።
JOH 20:26 ኦስፑን ጋላሳፌ ጉዬ ኢዛ ካሊዛይቲ ቃሴካ ኢስቲ ሶን ዲሺን፥ ቶማሲካ ኢስታራ ኢሲፌ ዲሺን፤ ካሬይካ ጎርዳን ዲሺን ዬሱሲ ዪዲ ኢስታ ጊዶን ኤቂዲ፥ «ሳሮይ ኢንቴስ ጊዶ!» ጊዴስ።
JOH 20:27 ሄሳፌ ጉዬ ቶማሳ፥ «ኔ ቢራꬌ ሃ ኤሃዳ ታ ኩሼታ ቤያ። ኔ ኩሼ ሃ ኤሃዳ ታ ሚሌን ጌልꬃ ኣማና ኣቲን ኣማኖንታዴ ጊዶፓ» ጊዴስ።
JOH 20:28 ቶማሲ፥ «ታ ጎዶ! ታ ጾሶ!» ጊዴስ።
JOH 20:29 ዬሱሲካ ቶማሳ፥ «ኔኒ ታና ቤኢዳ ጊሻስ ኣማናዳሳ፤ ታና ቤኦንታ ኣማኒዛይቲ ጊዲኮ ኢስቲ ኣንጄቲዳይታ» ጊዴስ።
JOH 20:30 ሃይሳ ማጻፋን ጻፌቶንታ ዳሮ ማላታታ ባና ካሊዛይታ ሲንꬃን ዬሱሲ ኦꬂዴስ።
JOH 20:31 ጊዶ ኣቲን ዬሱሲ ኢዚ ማሲሄ፥ ጾሳ ና ጊዲዳይሳ ኢንቴ ኤራና ማላኔ ኢንቴ ኢዛ ሱንꬃን ኣማኒዲ ዴኦ ዴማና ማላ ሃይሲ ጻፌቲዴስ።
JOH 21:1 ሄሳፌ ጉዬ ዬሱሲ ጺቢራዶሴ ኣባ ኣቻን ባና ካሊዛይታስ ቃሴካ ቤቲዴስ።
JOH 21:2 ሲሞና ጌቴቲዛ ጴጽሮሲ፥ ዲዲሞሳ ጌቴቲዛ ቶማሲ፥ ጋሊላ ቃና ኣስ ናቲናኤሌይ፥ ዛብዶሳ ናይቲካ ዬሱሳ ካሊዛይታፔ ሃራ ናምኣቲካ ዉሪ ኢሲፌ ዲሺን
JOH 21:3 ሲሞና ጌቴቲዛ ጴጽሮሲ ኢስታስ፥ «ታኒ ሞሌ ኦይካና ባይስ» ጊዴስ፤ ኢስቲካ ኢዛስ፥ «ኑኒካ ኔናራ ባና» ጊዳ። ኢዛራ ኬዚ ቢዲ ዎጎሎን ጌሊዳ ሺን ሄ ጋላሳ ኦማርስ ኢሲ ሞሌካ ኦይኪቤቴና።
JOH 21:4 ጋዴይ ዎንቲሺን ዬሱሲ ኣባ ኣቻን ኤቂዴስ፤ ኢዛ ካሊዛይቲ ቃሴ ኢዚ ዬሱሳ ጊዲዳይሳ ኤሪቤቴና።
JOH 21:5 ዬሱሲ ኢስታ፥ «ናይቶ ሞሌይ ዲዜ?» ጊዴስ፤ ኢስቲካ፥ «ኣይኮይካ ባ» ጊዳ።
JOH 21:6 ኢዚካ፥ «ጊቴዛ ዎጎሎዛፔ ኡሻቻ ባጋራ ኣባን ዬጊቴ፤ ኢንቴ ዴማና» ጊዳ ጊሻስ ጊቴዛ ኣባ ጊዶ ዬጊን ዳሮ ሞሌይ ኦይኬቲዳ ጊሻስ ጊቴዛ ሞሌዛራ ጎቻና ዳንዳይቤቴና።
JOH 21:7 ሄ ዎዴ ዬሱሳ ካሊዛይታፔ ኢዚ ሲቂዛ ኢሶይ ጴጽሮሳስ፥ «ሄሲ ጎዳኮ!» ጊዴስ። ሲሞና ጌቴቲዛ ጴጽሮሲ፥ «ሄሲ ጎዳኮ!» ጊዛ ቃላ ሲዪዳ ማላ ኦሶ ዲጎፎ ጊዲ ማይኦ ቃሪ ዎꬂዲ ካሎ ዲዛ ጊሻስ ሄራካ ማይኦ ኤኪ ማይኢዲ ኣባዛ ጊዶ ጉፒ ጌሊዴስ።
JOH 21:8 ዬሱሳ ካሊዛ ሃንኮይቲ ቃሴ ቢታፌ ጼቱ ሜቲሬ ማላ ሃኪ ዲዛ ጊሻስ ሞሌይ ኩሚ ዲዛ ጊቴዛ ጎቺ ኤኪዲ ዎጎሎራ ጋኪዳ።
JOH 21:9 ኢስቲ ዎጎሎዛፔ ዎꬊሺን ሞሌይ ኢዛ ቦላ ዲዛ ቦንቆ ታማኔ ኡኬꬅ ቤኢዳ።
JOH 21:10 ዬሱሲ ኢስታ፥ «ሃኢ ኢንቴ ኦይኪዳ ሞሌዛፔ ኣኔ ሃ ኤኪ ዪቴ» ጊዴስ።
JOH 21:11 ሄሳ ጊሻስ ሲሞና ጌቴቲዛ ጴጽሮሲ ዎጎሎዛ ጊዶ ጌሊዲ 153 ዎጋ ጊታ ሞሌቲ ኩሚዳ ጊቴዛ ኣባፌ ጌዴ ጋዴ ቦላ ጎቺዴስ፤ ሄሳ ማላ ዳሮ ሞሌራ ዲንካ ጊቴዚ ዳኬቲቤና።
JOH 21:12 ሄሳፌ ጉዬ ዬሱሲ ኢስታ፥ «ሃ ዪዲ ሚቴ» ጊዴስ። ኢዚ ጎዳ ዬሱሳ ጊዲዳይሳ ዉሪ ኤሪዳ ጊሻስ ኢዛ ካሊዛይታፔ ኢሳዴይካ፥ «ኔ ኦኔ?» ጊ ኦይቻናስ ጻሊዳዴይ ባ።
JOH 21:13 ዬሱሲ ዪዲ ኡኬꬃኔ ሞሌዛ ኤኪዲ ኢስታስ ኢሚዴስ።
JOH 21:14 ዬሱሲ ሃይቆፔ ዴንዲን ኢዛ ካሊዛይቲ ኢዛ ቤዪሺን ሃይሲ ሄꬓንꬆ።
JOH 21:15 ኢስቲ ሚ ጊጊሺን ዬሱሲ ሲሞና ጴጽሮሳ፥ «ዮና ና ሲሞና! ሃይታንታፌ ኔ ታና ኣꬃ ዶሳይ?» ጊዴስ። ኢዚካ፥ «ኤ ታ ጎዶ! ታ ኔና ዶሲዛይሳ ኔካ ኤራሳ» ጊዴስ።
JOH 21:16 ዬሱሲ ኢዛ፥ «ꬋሚዛይታ ታይታ ሄማ» ጊዴስ፤ ናምኣንꬆካ፥ «ዮና ና ሲሞና! ኔ ታና ዶሳይ?» ጊዴስ፤ ኢዚካ ዛሪዲ፥ «ኤ ጎዶ! ታ ኔና ዶሲዛይሳ ኔካ ኤራሳ» ጊዴስ፤ ዬሱሲ ቃሴካ፥ «ታ ላቃታ ናጋ» ጊዴስ።
JOH 21:17 ሄꬓንꬆ፥ «ዮና ና ሲሞና! ኔ ታና ዶሳይ?» ጊዴስ። ኢዚ ሄꬓንꬆ፥ «ኔ ታና ዶሳይ?» ጊዳ ጊሻስ ጴጽሮሲ ሚሼቲዲ፥ «ጎዶ! ኔ ኡባ ኤራሳ፤ ታ ኔና ዶሲዛይሳካ ኔ ኤራሳ» ጊዴስ፤ ዬሱሲካ ቃሴካ፥ «ታ ዶርሳታ ሄማ።
JOH 21:18 ታ ኔስ ቱሙ ጋይስ፤ ኔ ናቴꬃን ዳሼ ኔ ጊꬄ ኔርካ ጊጻዳ ኔ ኮዪዳሶ ባሳሺን ኔ ጪሚዛ ዎዴ ጊዲኮ ኔኒ ኔ ኩሼታ ፒዲሲን ሃራ ኣሲ ኔና ጊጺሳናኔ ኔ ዶሶንታሶ ኔና ኤፋና» ጊዴስ።
JOH 21:19 ዬሱሲ ኢዛ ሄሳꬆ ጊዳይ ጴጽሮሲ ኣይ ማላ ሃይቆን ጾስ ቦንቻናኮ ኢዛስ ኤሪሳናሳ፤ ሄሳፌ ጉዬ ጴጽሮሳ፥ «ኔ ታና ካላ» ጊዴስ።
JOH 21:20 ጴጽሮሲ ዩሺ ጼሊዲ ዬሱሲ ዶሲዛይሲ ኢዛ ካሊሺን ቤዪዴስ፤ ሄሳዴይ ካሴ ኢስቲ ካዎ ሚሺን ዬሱሳ ሃይꬃኮ ሺቂዲ፥ «ጎዶ! ኔና ኣꬂ ኢማናዴይ ኢዚ ኦኔ?» ጊ ኦይቺዴስ።
JOH 21:21 ጴጽሮሲ ኢዛ ቤኢዲ፥ «ጎዶ! ሃይሳዴይ ዋናንዴ?» ጊዲ ዬሱሳ ኦይቺዴስ።
JOH 21:22 ዬሱሲካ ኢዛስ፥ «ታ ሃ ሲማ ያና ጋካናዉ ታ ኢዛ ፓጻ ዎꬂኮ ኔና ኣዚ ጋꬂዴ? ኔ ታና ካላ» ጊዴስ።
JOH 21:23 ሄሳ ጋሶን ኢሻታ ጊዶን፥ «ኢዚ ሃይቆ ሃይቄና» ጊዛ ዎሬይ ላሌቲዴስ። ጊዶ ኣቲን ዬሱሲ፥ «ታ ያና ጋካናስ ፓጻ ዳና ማላ ታ ኮይኮ ኔና ኣዜ ጋꬂዳይ?» ጊዴስ ኣቲን፥ «ሃይቃካ» ጊቤና።
JOH 21:24 ሄ ዮኦታ ጊሻስ ማርካቲዳይኔ ጻፊዳይ ሃ ዬሱሳ ካሊዛይሳ፤ ኢዛ ማርካቴꬂካ ቱሙ ጊዲዳይሳ ኑኒ ኤሮስ።
JOH 21:25 ዬሱሲ ኦꬂዳ ሃራ ዳሮቲ ዴቴስ፤ ታስ ሚሳቲዛ ማላ ኢዚ ኦꬂዳ ሚሻታ ኡባ ኢሲ ቦላ ጻፊዛኮ ጻፌቲዳ ማጻፋታ ሃይሲ ኣላሜይ ቶካና ዳንዳዬና።
ACT 1:1 ቶፊሎሳ! ዬሱሲ ኦꬃናሲኔ ታማርሳናስ ኦይኪዳይሳ ዉርሳ ታ ኔስ ኮይሮ ማጻፋን ጻፋዲስ።
ACT 1:2 ሄሲካ ኢዚ ፑዴ ዴንꬃ ጋላስ ጋካናስ ባ ዶሪ ኪቲዳይታስ ጺሎ ኣያና ባጋራ ኢዚ ኢስታስ ኢሚዳ ኣዛዞኮ።
ACT 1:3 ኢዚ ዳሮ ዋዬ ቤኢዳፔ ጉዬ ኢስታኮ ሺቂዲ ሃይቆፔ ዴንዳናይሳ ኢስታስ ዳሮ ማርካራ ቆንጪሲሼ ኦይዱ ታሙ ጋላስ ጋካናስ ኢስታስ ጋላስ ጋላስ ቤቲሼ ጾሳ ካዎቴꬃ ጊሻስ ዮቲዴስ።
ACT 1:4 ኢስታራ ኢሲፌ ማዳን ኡቲ ዲሼ ኢስታ፥ «ዬሩሳላሜፔ ኬዞፒቴ፤ ጊዶ ኣቲን ታ ኢንቴስ ዮቲሺን ኢንቴ ሲዪዳይሳ ታ ኣዋይ ኢሚዳ ኡፋይሳ ናጊቴ።
ACT 1:5 ዮሃኒሲ ሃꬃን ጻማቂዴስ፤ ኢንቴ ጊዲኮ ጉꬃ ዎዴፔ ጉዬ ጺሎ ኣያናን ጻማቄታና» ጊዲ ዮቲዴስ።
ACT 1:6 ኢስቲካ ኢሲ ቦላ ሺቄቲ ዲሼ፥ «ጎዶ! ኔ ኢስራኤሌታ ካዎቴꬅ ዛራዳ ሃኢ ኤሳኔ?» ጊ ኦይቺዳ።
ACT 1:7 ኢዚካ ኢስታስ፥ «ኣዋይ ባ ሼኔን ዎꬂዳ ዎዴ ኤሮይ ኢንቴስ ኢሜቲቤና።
ACT 1:8 ጊዶ ኣቲን ጺሎ ኣያናይ ኢንቴ ቦላ ዎꬊዳ ዎዴ ኢንቴ ዎልቃ ኤካና። ዬሩሳላሜንካ፥ ዩሁዳንካ፥ ሳማሪያንካ ኡባሶን ቢታ ጋጻ ጋካናስ ኢንቴ ታስ ማርካታ ጊዳና» ጊዴስ።
ACT 1:9 ሄሳ ጊ ዮቲዳፔ ጉዬ ኢስቲ ጼሊሺን ፑዴ ሳሎ ዴንዲዴስ፤ ሻራይካ ኢስታ ኣይፌፔ ኢዛ ጌንꬂዴስ።
ACT 1:10 ኢዚ ቢሺን ኢስቲ ኢዛ ቲሺ ሂስቲ ፑዴ ሳሎ ጼሊሺን ቦꬃ ማይኦ ማይኢዳ ናምኡ ኣሳቲ ቆፖንታ ኢስታ ኣቻን ኤቂዲ፥
ACT 1:11 «ኢንቴኖ ጋሊላ ኣሳቶ! ኢንቴ ፑዴ ሳሎ ጼሊሼ ሃይሳን ኣዛስ ኤቂዴቲ? ሃይሲ ኢንቴ ማታፔ ፑዴ ሳሎ ዴንዲሺን ኢንቴ ቤኢዛ ዬሱሲ ሳሎ ኬዚሺን ኢንቴ ቤኢዳ ማላ ሄሳꬆካ ኢዚ ሃ ሲሚ ያና» ጊዳ።
ACT 1:12 ሄሳፌ ጉዬ ዳብራዛይቴ ጌቴቲዛ ዙማ ቦላፌ ዎꬊዲ ዬሩሳላሜ ሲሚዳ። ሄ ዙማይካ ዬሩሳላሜፔ ኢሲ ኪሎ ሜቲሬ ማላ ሃኬስ።
ACT 1:13 ጌዴ ካታማዮ ጌሊዲ ካሴ ባ ዲዛ ኬꬃ ፖቄ ቦላ ኬዚዳ፤ ሄይቲካ ጴጽሮሳ፥ ዮሃኒሳ፥ ያቆቤ፥ ኢንዲራሳ፥ ፒሊጶሳ፥ ቶማሳ፥ ባርቴሌሞሳ፥ ማቶሳ፥ ኢልፊዮሳ ና ያቆቤ፥ ባ ባጋስ ሚሼቲዛ ሲሞናኔ ያቆቤ ና ዩሁዳ።
ACT 1:14 ሄይቲ ዉሪካ ማጫሳታፔ ዬሱሳ ኣዮ ማራሚራ ሄሳꬆካ ኢዛ ኢሻታራ ኢሲ ዎዚናን ኢሲ ቦላ ቃንጾንታ ሚኒ ዎሲዳ።
ACT 1:15 ሄ ጋላሳታን ጴጽሮሲ ጼታኔ ናምኡ ታሙ ኣማኒዛ ኣሳ ጊዶን ኤቂዲ፥
ACT 1:16 «ታ ኢሻቶ! ዬሱሳ ኦይኪዳ ኣሳታ ካሌꬂ ኤሂዳ ዩሁዳ ጊሻስ ጺሎ ኣያናይ ካሴቲዲ ዳዊቴ ዶናን ሃሳይዳ ጌሻ ማጻፋ ቃላይ ፖሌታና ኮሼስ።
ACT 1:17 ኢዚካ ኑፔ ኢሳዴ ማላ ታይቤቲዲ ሃይሳ ሃ ኦሶዛን ጌላናስ ቃዳ ዴሚዴስ» ጊዴስ።
ACT 1:18 ጊዲኮካ ሃይሳዴይ ባ ኢታ ኦሶን ዴሚዳ ሚሻን ጋዴ ሻሚዴስ፤ ሄንካ ባ ሊጴን ጉፋኒ ኩንዲን ኢዛ ኣሳቴꬃይ ጊዶፌ ጳልቄቲ ዎꬊዴስ፤ ኢዛ ማራጬይ ቢታ ቦላ ዛዜቲዴስ።
ACT 1:19 ሄሲካ ዬሩሳላሜን ዲዛ ኣሳ ኡባስ ሲዬቲዴስ፤ ቢታይካ ኢስታ ቃላራ፥ «ኣኬልዳማ» ጌቴቲዴስ፤ ሄሳስ ቢርሼꬃይካ ሱꬃ ቢታ ጉሳ።
ACT 1:20 ጉጂዲካ ጴጽሮሲ፥ «ዬꬃ ማጻፋን፥ ‹ኢዛ ጋዴይ ሜላ ኣቶ፤ ኢዛን ኣይ ኣሲካ ዶፖ፤ ቃሴካ ኢዛ ዳናቴꬅ ሃራ ኣሲ ኤኮ› ጌቴቲ ጻፌቲዴስ።
ACT 1:21 «ሄሳ ጊሻስ ጎዳ ዬሱሲ ኑናራ ዲዛ ዎዴ ኡባን ኑናራ ኢሲፌ ዲዛይታ ጊዶፌ ኑ ኢሳዴ ዶራናስ ኮሼስ።
ACT 1:22 ሄሲካ ዮሃኒሳ ጺንቃታፔ ሃ ሲሚን ዬሱሲ ኑፔ ሻኬቲ ዴንዲ ባና ጋካናስ ኑናራ ዲዛዴ ጊዳናስ ቤሴስ፤ ጋሶይካ ሃ ኣሳታፔ ኢሳዴይ ኑናራ ዬሱሳ ዴንꬃስ ማርካ ጊዳና ኮሼስ» ጊዴስ።
ACT 1:23 ሄሳ ጊሻስ ባርሳባሳ ዎይኮ ዮስጾሳ ጌቴቲዛ ዮሴፌኔ ማቲያሳ ናምኣታ ሺሺዲ፥
ACT 1:24 «ጎዶ! ኔኒ ኣሳ ኡባ ዎዚና ኤራሳ፤ ሃይታ ናምኣታ ጊዶፌ ኔ ኦና ዶሪዳኮ ኢዛዴ ኑና ቤሳ።
ACT 1:25 ዩሁዳይ ዬጊ ቢዳሶን ሃ ኦሳ ኦꬃናዴኔ ሃዋሬ ጊዳናዴ ኔ ዶራ» ጊ ዎሲዳ።
ACT 1:26 ሄሳፌ ሳማ ዬጊን ሳማይ ማቲያሳስ ኬዚዴስ፤ ኢዚካ ታማኔ ኢሲ ሃዋሬታራ ኢሲፌ ታይቤቲዴስ።
ACT 2:1 ጴንጼቆስቴ ጌቴቲዛ ባኣሌ ጋላሲ ጋኪዳ ዎዴ ኣሳይ ዉሪካ ኢሲ ሶን ሺቂ ዲሺን፥
ACT 2:2 ቆፋይ ባይንዳ ዳሮ ሚኖ ጎቴ ጫርኮ ማላ ጊሪሲ ዪዴስ፤ ኣሳይ ዲዛ ኬꬃካ ኩሚዴስ።
ACT 2:3 ታማ ላጮ ሚሳቲዛ ቃላይ ኣሳስ ቤቲዲ ሻኬቲ ሻኬቲ ኢሳ ኢሳ ቦላ ኡቲዴስ።
ACT 2:4 ኣማኒዛይቲ ዉሪ ጺሎ ኣያናን ኩሚዲ ኣያናይ ኢስታስ ሃሳያናስ ኢሚዳይሳ ኬና ሃራ ቃላራ ሃሳያ ኦይኪዳ።
ACT 2:5 ሄ ዎዴ ሳሎ ጉፋንꬆን ዲዛ ዴሬፔ ዪዳ ጾሳስ ባቢዛ ኣይሁዳቲ ዬሩሳላሜን ዴቴስ።
ACT 2:6 ሄ ጊሪሳ ሲዪዲ ዴሬይ ሺቂዴስ፤ ኢሶይ ኢሶይ ባ ቃላራ ሃሳይዛይሳ ሲዪዲ ማላሌቲዳ።
ACT 2:7 ማላሌቲዲ ጋናዚ ꬋዪን፥ «ሃይቲ ሃሳይዛይቲ ዉሪካ ጋሊላ ኣስ ዴቴኔ?
ACT 2:8 ሂስቲን ኑኒ ኑ ዬሌቲዳ ኑ ዴሬ ቃላራ ኢስቲ ሃሳይሺን ዎስቲ ሲዪዞኒ?
ACT 2:9 ኑኒ ጳርታኔ ኣሳይ፥ ሜዴ ኣሳይ፥ ኤላሜ ኣሳይ፥ ሜስጴጾሚያን፥ ዩሁዳን፥ ቆጶዶቂያን፥ ጳንጾሳን፥ ኢሲያን፥
ACT 2:10 ፒርጊያን፥ ጲንፊሊያን፥ ጊብጼን፥ ቃሬና ኣቻን ዲዛ ሊቢያፔኔ ኦሮሜፔ ዪዳይቲ
ACT 2:11 ኣይሁዳቲኔ ጌዴ ኣይሁዳቴꬃን ጌሊዳ ቃርጼሴ ኣሳኔ ኣራቤ ኣሳታ ጊዲሺን ዎልቃማ ኦሶ ጾሳይሳ ሃይቲ ኑ ቃላራ ሃሳይሺን ኑ ሲዮስ» ጊዳ።
ACT 2:12 ዉሪካ ኬሂ ማላሌቲዲኔ ጋናዚ ꬋዪን ባ ጊዶን፥ «ሃይሲ ኣዜሻ?» ጌቴቲዳ።
ACT 2:13 ባጋ ኣሳይ፥ «ሃይቲ ዳሮ ዎይኔ ጫጄ ኡዪዳ» ጊዲ ኢስታ ቂꬊዳ።
ACT 2:14 ሄ ዎዴ ጴጽሮሲ ታማኔ ኢሲኔታራ ኤቂዲ ባ ቃላ ꬎቁ ሂስቲዲ ዴራስ፥ «ኢንቴኖ ዩሁዳ ኣሳቶ! ዬሩሳላሜን ዲዛይቶ! ኢንቴ ዉሪካ ሃይሳ ኢሲ ሚሽ ኤሪቴኔ ታ ጊዛይሳ ሲዪቴ።
ACT 2:15 ሃኢ ጋዴይ ዎንቲን ቡሮ ሄꬑ ሳቴ ጊዲዳ ጊሻስ ኢንቴ ቆፒዛ ማላ ሃይቲ ኣሳቲ ማꬆቲቤቴና።
ACT 2:16 ጊዶ ኣቲን ሃይሲ ካሴ ናቤ ኢዩኤሌን ሂዝጊ ዮቴቲዳ ቃላይ ፖሌታናሳ፥
ACT 2:17 « ‹ጾሲ ዉርሴꬃ ጋላስ ታ ኣያና ኣሾ ማይኢዳ ኡባ ቦላ ታኒ ጉሳና፤ ኢንቴ ማጫ ናይቲኔ ኢንቴ ኣቱማ ናይቲ ቲንቢቴ ሃሳያና፤ ዬላጋ ናይቲ ኣጁታ ቤያና፤ ጪማቲ ኣጉሞ ኣጉሜታና።
ACT 2:18 ሄ ዎዴ ታ ማጫ ኣሽካራታ ቦላኔ ታ ኣቱማ ኣሽካራታ ቦላ ታ ኣያናፔ ታ ጉሳና። ኢስቲካ ቲንቢቴ ሃሳያና።
ACT 2:19 ቦላ ሳሎን ማላሊሲዛ ሃኖታ ታ ቤሳና፥ ጋርሳ ሳኣን ማላታታ ታ ቤሳና፤ ሱꬂ፥ ታማይኔ ቱላላይ ሃናና።
ACT 2:20 ጊታኔ ቦንቾ ጊዲዳ ጎዳ ጋላሲ ያናፔ ካሴቲዲ ኣርሼይ ꬉማና፤ ኣጊናይካ ሱꬅ ሚሳታና።
ACT 2:21 ጎዳ ሱንꬅ ጼይጊዛይ ዉሪ ኣታና› ጊዴስ።
ACT 2:22 «ኢስራኤሌ ናይቶ! ሃይሳ ቃላ ሲዪቴ፤ ኢንቴ ኢንቴ ባጋራ ኤሪዛይሳ ማላ ኢንቴ ጊዶን ማላታኔ ኣሲ ሲዪ ኤሮንታ ሚሻታ ኢዛ ኩሼን ኦꬂዲ ጾሲ ናዚሬቴ ዬሱሳስ ማርካቲዴስ።
ACT 2:23 ጾሲ ካሴ ባ ቃቺዳይሳ ኢዛስ ቤኒ ኤራቴꬃ ማላ ሃይሳዴ ኢንቴ ኩሼን ኣꬂ ኢሚዴስ። ኢንቴካ ኢታ ኣሳታ ኩሼን ካቄቲ ሃይቃና ማላ ኦꬂዴታ።
ACT 2:24 ጊዶ ኣቲን ጾሲ ኢዛ ቦላፌ ሃይቆ ዎልቃ ዲጊዲ ሃይቆፔ ዴንꬂዴስ፤ ሃይቆይካ ኢዛ ኦይኪ ኣሻናስ ዳንዳይቤና።
ACT 2:25 ዳዊቲካ ኢዛ ጊሻስ፥ « ‹ታኒ ጎዳ ኡባ ዎዴ ታ ሲንꬃን ቤያይስ፤ ኢዚ ታ ኡሻቻን ዴስ፤ ሙሌካ ሂርጊኬ።
ACT 2:26 ሄሳ ጊሻስ ታ ዎዚናይ ኡፋዬቴስ፤ ታ ዶናይካ ጋላቴስ፤ ታ ኣሾይ ኡፋይሳን ዳና።
ACT 2:27 ኔ ታ ሼምፖዮ ዱፎን ኣጋካ፤ ኔ ና ጌሻዛ ዎቃና ማላ ኣጋጋካ።
ACT 2:28 ኔ ዴኦ ኦጌ ታ ኤራና ማላ ኦꬃዳሳ። ኔ ታናራ ዲዛ ጊሻስ ታ ኡፋይሳይ ኩሜꬃ።›
ACT 2:29 «ታ ኢሻቶ! ቤኒ ኣዋታፔ ዳዊቲ ሃይቂ ሞጌቲዳይሳኔ ኢዛ ዱፎይ ሃች ጋካናስ ኑ ኣቻን ዲዛይሳ ባቦንታ ታ ኢንቴስ ዮታና ዳንዳያይስ።
ACT 2:30 ኢዚ ናቤ ጊዲዳ ጊሻስ ጾሲ ኢዛ ዜሬꬃፌ ኢሳዴ ኢዛ ካዎቴꬃ ኣልጋ ቦላ ዎꬃናይሳ ካሴ ጫቆ ቃላን ዮቲዳይሳ ኤሪዴስ።
ACT 2:31 ሄሳ ካሴቲዲ ኤሪዳ ጊሻሲኔ ኢዛ ኣሾይ ዎቂ ዱፎን ኣቶንታ ዶሬቲዳ ኪርስቶሳ ዴንꬃ ጊሻስ ሃሳይዴስ።
ACT 2:32 ሄ ዬሱሳ ጾሲ ሃይቆፔ ዴንꬂዴስ፤ ኑኒካ ዉሪ ሃይሳስ ማርካታ።
ACT 2:33 ሄሳ ጊሻስ ኢዚ ጾሳ ኡሻቻን ꬎቁ ꬎቁ ጊዳፔ ጉዬ ጺሎ ኣያና ኡፋይሳ ባ ኣዋፔ ኤኪዲ ሃኢ ኢንቴ ቤኢዛይሳኔ ሲዪዛይሳ ዱጌ ጉሲዴስ።
ACT 2:34 ዳዊቲ ፑዴ ሳሎ ኬዚቤና፤ ኢዚ ባ ዶናን፥ «ጎዳይ ታ ጎዳስ፥ ‹ታ ኔ ሞርኬታ ኔ ቶሆ ጋርሳን ዬꬊሳና ጋካናስ ታ ኡሻቻን ኡታ› ጊዴስ።
ACT 2:36 «ሄሳ ጊሻስ ጾሲ ኢንቴ ካቂዳ ዬሱሳ ጎዳኔ ኪርስቶሳ ሂስቲዳይሳ ኢስራኤሌ ኣሳይ ዉሪ ሎኤꬂ ኤሮ» ጊዴስ።
ACT 2:37 ዴሬይ ሄሳ ሲዪዳ ማላ ዎዚናይ ቦሼቲዴስ፤ ጴጽሮሳኔ ሃንኮ ዬሱሲ ኪቲዳይታ፥ «ሂስቲን ኑ ኢሻቶ! ኑ ኣይ ኦꬂኖ?» ጊዳ።
ACT 2:38 ጴጽሮሲካ፥ «ማሮቴꬃን ጌሊቴ፤ ኢንቴ ናጋራይ ማሬታና ማላ ኢንቴፌ ኢሲ ኢሲ ኣሲ ዬሱስ ኪርስቶሳ ሱንꬃን ጻማቄቲቴ፤ ኢዚ ኢሚዛ ጺሎ ኣያና ኢንቴ ኤካና።
ACT 2:39 ኡፋይሳ ቃላይ ኢንቴሲኔ ኢንቴ ናይታሳ፤ ቃሴካ ጎዳ ጾሲ ባኮ ጼይጊዛ ሃሆን ዲዛይታሳራ ኡባሳ» ጊዴስ።
ACT 2:40 ሃራ ዳሮ ቃላራ ኢስታስ ማርካቲሼ፥ «ሃይሳ ጌላ ዬሌታፔ ኢንቴና ኣሺቴ» ጊዲ ኢስታ ቆፍሲዴስ።
ACT 2:41 ሄ ጋላስ ቃላ ኤኪዳይቲኔ ጻማቄቲዳይቲ ሄꬑ ሺ ማላ ኣሳይ ካሴይታ ቦላ ጉጄቲዴስ።
ACT 2:42 ኢስቲካ ሃዋሬታ ቲሚርቴን፥ ኢሲፌ ቁማ ሙሳኒኔ ዎሳን ሚኒዳ።
ACT 2:43 ሃዋሬታ ኩሼን ዳሮ ማላታቲ ኦሴቲዳ ጊሻስ ኣሲ ኡባይ ኢስታስ ባቢዴስ።
ACT 2:44 ኣማኒዳይቲ ዉሪካ ኢሲፌ ዴኢዳ፤ ባስ ዲዛዚካ ኡባ ኢሲ ቦላ ጎኤቲዳ።
ACT 2:45 ባስ ዲዛ ሚሼኔ ሜሄ ባይዚ ባይዚ ባ ጊዶን ኮሺዳ ማላ ጊሼቺዳ።
ACT 2:46 ጋላስ ጋላስ ጾሳ ኬꬃን ኢሲፌ ሺቄቴስ፤ ባ ኬꬃንካ ቁማ ኢሲፌ ኡፋይሳኒኔ ሱሬ ዎዚናን ኢሲፌቴꬃን ሜቴስ።
ACT 2:47 ኢስቲ ጾሳ ጋላቲሼ ዴሬ ሲንꬃን ቦንቼቲዳ። ጎዳይካ ኢስታ ቦላ ጋላስ ጋላስ ኦራꬅ ኣማኒዛይታ ጉጂዴስ።
ACT 3:1 ኢሲ ዎዴ ጋላሳፌ ኡዱፉን ሳቴ ቦላ ጴጽሮሲኔ ዮሃኒሲ ዎሳ ሳቴን ጾሳ ኬꬄ ባና ኬዚዳ።
ACT 3:2 ኢሲ ዬሌቶሶፔ ዶሚዲ ቶሆይ ሲሊዳዴ ጾሳ ኬꬄ ጌሊዛ ኣሳፔ ሚሼ ዎሳና ማላ ኣሳይ ጋላስ ጋላስ ቶኪ ኤፊዲ ዎꬂን፥ «ሎኦ» ጌቴቲዛ ጾሳ ኬꬃ ፔንጌን ዎሲዛዴይ ዴስ።
ACT 3:3 ኢዚካ ጴጽሮሲኔ ዮሃኒሲ ጾሳ ኬꬄ ጌሊሺን ቤኢዲ ኢስታፌ ሚሼ ዎሲዴስ።
ACT 3:4 ጴጽሮሲኔ ዮሃኒሲ ኢዛ ቲሺ ሂስቲ ጼሊዳ። ጴጽሮሲካ ኢዛ፥ «ኣኔ ሃ ኑና ጼላ» ጊዴስ።
ACT 3:5 ኣዴዚካ ኢስታፌ ኣይኮ ዴማና ጊዲ ኢስታ ቲሺ ሂስቲ ጼሊዴስ።
ACT 3:6 ጊዶ ኣቲን ጴጽሮሲ ኢዛስ ዛሪዲ፥ «ታስ ቢራይኔ ዎርቃይ ዴና፤ ጊዲኮካ ታስ ዲዛዝ ታ ኔስ ኢማይስ፤ ናዚሬቴ ዬሱስ ኪርስቶሳ ሱንꬃን ዴንዳዳ ኔ ቶሆራ ሄሜታ» ጊዴስ።
ACT 3:7 ኢዛስ ኡሻቻ ኩሼ ኦይኪዲ ዴንꬂዴስ። ሄራካ ኣዴዛ ቶሆይኔ ቶሆ ቂርጴይ ሚኒዴስ።
ACT 3:8 ጉፒ ዴንዲ ኤቂዲ ሄሜꬅ ኦይኪዴስ። ያኔ ሃ ሄሜቲሼኔ ጉፒሼ ጾሳካ ጋላቲሼ ኢስታራ ኢሲፌ ጾሳ ኬꬃ ጊቤ ጌሊዴስ።
ACT 3:9 ኢዚ ጾሳ ጋላቲሼ ያኔ ሃ ሲሜሬቲሺን ኣሳይ ቤዪዴስ።
ACT 3:10 ሃይሳዴይ ሃይሳፌ ካሴ፥ «ሎኦ» ጌቴቲዛ ጾሳ ኬꬃ ፔንጌን ኡቲዲ ሚሼ ዎሲዛይ ኢዛ ጊዲዳይሳ ኤሪዴስ። ኢዛ ቦላ ሃኒዳይሳፌ ዴንዲዳይሳን ኣሳይ ኬሂ ማላሌቲዴስ።
ACT 3:11 ሃ ፓጺዳ ዎሳንቻይ ጴጽሮሳኮኔ ዮሃኒሳኮ ሺጵ ጊዲ ኢስታራ ኦይኬቲ ዲሺን ዴሬይ ዉሪ ማላሌቲዲ ኢስታኮ፥ «ሶሎሞኔ ሲሜሬቴꬃሶ» ጌቴቲዛሶ ዎꬃን ዪዴስ።
ACT 3:12 ጴጽሮሲ ሄ ኣሳ ቤኢዲ፥ «ኢንቴኖ ኢስራኤሌ ዴሬቶ! ሃይሳን ኣዛስ ማላሌቴቲ? ቃሴካ ሃይሳ ኣዴዛ ኑኒ ኑ ዎልቃን ዎይኮ ኑኒ ኑ ጺሎቴꬃን ፓꬂዲ ሄሜቲሲዳ ማላ ቆዲዲ ኑና ኣዛስ ቲሺ ሂስቲ ጼሌቲ?
ACT 3:13 ኑ ኣዋንታ ኣብራሃሜንታ፥ ዪሳቃንታ፥ ያቆቤንታ ጾሲ ባ ናዛ ዬሱሳ ቦንቺዴስ። ኢንቴ ቃሴ ኢዛ ሃይቆስ ኣꬂ ኢሚዴታ፤ ጲላጾሲ ኢዛ ቢርሻና ኮዪንካ ኢንቴ፥ ‹ኮዮኮ› ጊዴታ።
ACT 3:14 ጌሻኔ ጺሎዛ ኢንቴ ካዲዲ ሼምፖ ዎꬊዛይሲ ቢርሼታና ማላ ዎሲዴታ።
ACT 3:15 ዴኦ ኢሚዛዴ ኢንቴ ዎꬊዴታ፤ ጊዶ ኣቲን ጾሲ ኢዛ ሃይቆፔ ዴንꬂዴስ፤ ሄሳስ ኑኒ ማርካ።
ACT 3:16 ሃይሲ ኢንቴ ቤኢዛይሲኔ ኢንቴ ኤሪዛይሲ ሚኒ ኤቂዳይ ዬሱሳ ሱንꬃን ኣማኒዳ ጊሻሳ፤ ኢንቴ ዉሪካ ቤኢዛ ማላ ኢዚ ኩሜꬃ ፓጻቴꬅ ዴሚዳይ ዬሱሳ ሱንꬃኒኔ ኢዛ ሱንꬃን ቤቲዛ ኣማኖና።
ACT 3:17 «ሃኢካ ታ ኢሻቶ! ኢንቴ ሄሳ ኦꬂዳይ ኢንቴ ሃላቃታ ማላ ኤሮንታ ጊዲዳይሳ ታ ኤራይስ።
ACT 3:18 ጊዲኮካ ኪርስቶሲ ዋዬ ኤካናይሳ ጾሲ ካሴ ናቤታ ዶናን ሃሳይዳይሳ ፖሊዴስ።
ACT 3:19 ሄሳ ጊሻስ ኢንቴ ናጋራይ ቁጬቲ ꬋያና ማላ ማሮቴꬃን ጌሊቴ፤ ኢንቴ ቢዛ ኦጌፔ ሲሚቴ፤ ጎዳ ማታፔ ኢንቴ ኦራጻና ዎዴይ ኢንቴስ ያና።
ACT 3:20 ቃሴካ ጾሲ ካሴ ኢንቴስ ዶሪ ዎꬂዳ ዬሱስ ኪርስቶሳ ኢዚ ኢንቴስ ዬዳና።
ACT 3:21 ጾሲ ካሴ ጌሻ ናቤታ ዶናን ሃሳይዳይሳ ማላ ሃኒዛይሳ ኡባ ኦራጺሳና ዎዴይ ጋካናስ ኢዚ ሳሎን ጋምኣናስ ኮሼስ።
ACT 3:22 ሙሴይካ፥ ‹ኢንቴ ጎዳ ጾሳይ ኢንቴ ጊዶፌ ታ ማላ ናቤ ኢንቴስ ዴንꬃና። ኢዚ ኢንቴስ ዮቲዛይሳ ሲዪቴ።
ACT 3:23 ሄ ናቤዛ ሲዮንታ ኢጺዳ ሼምፖይ ዉሪ ዴሬ ጊዶፌ ሻኬቲ ꬋዮ።›
ACT 3:24 «ቱማፔ ሳሜላፔ ሃ ሲሚን ዴንዲዳ ናቤቲ ዉሪ ሃይታ ዎዴታ ጊሻስ ሃሳይዳ።
ACT 3:25 ኢንቴካ ናቤታ ናይታ፤ ቃሴካ ጾሲ ኣብራሃሜስ፥ ‹ኔ ዜሬꬃን ቢታ ቦላ ዲዛ ኣሲ ዉሪ ኣንጄታና› ጊዲ ኢዚ ጫቂዳ ጫቆዛ ኢንቴ ላታና።
ACT 3:26 ጾሲ ናዛ ዴንꬂዳ ዎዴ ኢንቴና ኢሳ ኢሳ ኢንቴ ኢታቴꬃፌ ዛሪዲ ኣንጃና ማላ ካሴቲዲ ኢንቴኮ ኪቲዴስ» ጊዴስ።
ACT 4:1 ጴጽሮሲኔ ዮሃኒሲ ኣሳስ ሃሳያን ዲሺን ቄሴታ ሃላቃቲኔ ጾሳ ኬꬃ ናጊዛይታ ሃላቃይ ቃሴካ ሳዱቃዌቲ ኢስታኮ ዪዳ።
ACT 4:2 ሂስቲዲ ሃዋሬቲ ኣሳ ታማርሲዛይሳሲኔ ዬሱሳ ባጋራ ቤቲዳ ሃይቂዳይታ ዴንꬃ ጊሻስ ሳባኪዛይሳስ ኬሂ ሃንቄቲዳ።
ACT 4:3 ጴጽሮሳኔ ዮሃኒሳ ጋዴይ ቃሚሺን ኦይኪዲ ዎንታና ጋካናስ ቃሾ ኬꬃን ኣይሲዳ።
ACT 4:4 ጊዶ ኣቲን ቃላ ሲዪዳ ኣሳፔ ዳሪዛ ባጋይ ኣማኒዴስ፤ ኣማኒዳ ኣቱማ ኣሳ ቆዳይ ጌዴ ኢቻሹ ሺ ጋካናስ ꬎቁ ጊዴስ።
ACT 4:5 ዎንቴꬃ ጋላስ ኢስታ ሃላቃቲኔ ጪማቲ ቃሴካ ሙሴ ዎጋ ታማርሲዛይቲ ዬሩሳላሜን ሺቂዳ።
ACT 4:6 ኢስታ ቄሴታ ሃላቃ ሃናይኔ ቃያፋይ፥ ዮሃኒሲ፥ ኢስኪንዲሮሲኔ ቄሴታ ሃላቃሶ ኣሳይ ዉሪ ሄን ቤቲዳ።
ACT 4:7 ኢስቲካ ጴጽሮሳኔ ዮሃኒሳ ባ ጊዶን ኣꬂ ኤሲዲ፥ «ሃይሳ ኢንቴ ኦꬂዛይ ኣዛ ዎልቃኔ? ዎይኮ ኦና ሱንꬃኔ?» ጊዲ ኦይቺዳ።
ACT 4:8 ሄ ዎዴ ጴጽሮሲ ጺሎ ኣያናን ኩሚዲ፥ «ኢንቴኖ ዴሬ ሃላቃቶ! ዴሬ ጪማቶ!
ACT 4:9 ኢንቴ ሃች ሃ ቶሆ ሲላ ኣዴዛስ ኦሴቲዳ ሎኦ ኦሶይ ዋኒ ኢዚ ፓጺዳኮ ኢንቴ ኑና ኦይቺዛ ጊዲኮ፥
ACT 4:10 ኢንቴ ካቂን ጾሲ ሃይቆፔ ዴንꬂዳ ናዚሬቴ ዬሱስ ኪርስቶሳ ሱንꬃን ኢዚ ፓጺዳይሳኔ ኢንቴ ሲንꬃን ኢዚ ኤቂዳይሳ ኢንቴካ ኢስራኤሌ ዴሬ ኣሳይ ዉሪ ሃይሳ ኤሪቴ።
ACT 4:11 ኢዚካ ኢንቴ ኬꬃ ሂላቲ ሌቂ ኣጊዳ ሹቻይ ጊምቤ ኬꬃስ ጉላ ቦላ ቦላራ ዎꬂዛ ሹች ጊዲዴስ።
ACT 4:12 ኣቶቴꬂ ሃራ ኦናንካ ባ፤ ሳሎፔ ጋርሳ ባጋራ ኑ ኣሳ ናይቲ ኣታና ማላ ኑስ ኢሜቲዳይ ሃይሳፌ ሃራ ሱንꬂ ዴና» ጊዴስ።
ACT 4:13 ኣይሁዳታ ዱላታ ኣሳይካ ጴጽሮሲኔ ዮሃኒሲ ሄሳꬆ ጻሊ ሃሳይዛይሳ ቤኢዲ ኢስቲ ታማሮንታ ኣስ ጊዲዳይሳ ኤሪዲ ማላሌቲዳኔ ኢስቲ ካሴ ዬሱሳራ ዲዛይታ ጊዲዳይሳ ኣኬኪዳ።
ACT 4:14 ሄ ፓጺዳ ኣዴዚ ኢስታራ ኤቂ ዲሺን ቤኢዳ ጊሻስ ኢስታስ ሃራ ኦꬃናስ ጋሶይካ ꬋይዴስ።
ACT 4:15 ሄሳ ጊሻስ ኢስታ ዱላታፔ ኬሳና ማላ ኣዛዚዳ። ሄሳፌ ቃሴካ ሺቄቲዲ ባ ጊዶን ዞሬቲዳ።
ACT 4:16 ባ ጊዶን፥ «ሃይታ ኣሳታ ዎስቲኖ? ዬሩሳላሜን ዲዛ ኣሳይ ዉሪ ኢስታ ኩሼን ሃኒዳ ጊታ ማላታ ኤሪዴስ። ሄሳ ጊሻስ ኑ ሃ ዮኦዛ ኣሳ ባሌꬃናስ ዳንዳዮኮ።
ACT 4:17 ጊዶ ኣቲን ሃይሲ ዮኦዚ ዴሬ ጊዶን ኬሂ ኣኮንታ ማላኔ ሃይቲ ኣሳቲ ናምኣንꬆ ሃይሳ ሃ ሱንꬃን ሃራ ኦናስካ ዮቶንታ ማላ ኢስታስ ሎኤꬂ ዮታና» ጊዳ።
ACT 4:18 ኢስታ ጼይጊዲኔ ሙሌካ ዬሱሳ ሱንꬃን ሃሳዮንታ ማላኔ ታማርሶንታ ማላ ኣዛዚዳ።
ACT 4:19 ጴጽሮሲኔ ዮሃኒሲ ቃሴ ዛሪዲ፥ «ኑኒ ጾሳፌ ቦላራ ኢንቴስ ኣዛዜታናስ ቤሲዛኮ ኣኔ ኢንቴ ጾሳ ሲንꬃን ፒርዲቴ።
ACT 4:20 ኑኒ ኑ ቤኢዳይሳኔ ኑ ሲዪዳይሳ ሃሳያናፔ ጉዬ ጎኮ» ጊዳ።
ACT 4:21 ቃሴካ ኢስታ ቦላ ማንዲዲ ዬዲዳ፤ ጋሶይካ ሃንኮ ዴሬይ ዉሪ ሃኒዳ ዮኦዛ ጋሶን ዉሪካ ጾስ ጋላቲዛ ጊሻስ ኢስታ ቃጻያናስ ዳንዳይቤቴና።
ACT 4:22 ሄ ጊታ ማላታን ፓጺዳ ኣዴዛስ ላይꬃይ ኦይዱ ታማፌ ቦላ።
ACT 4:23 ጴጽሮሲኔ ዮሃኒሲ ቃሾፔ ቢርሼቲዲ ባ ኣሳታኮ ሲሚዲ ቄሴታ ሃላቃቲኔ ዴሬ ጪማቲ ኢስታ ጊዳይሳ ኡባካ ዮቲዳ።
ACT 4:24 ኢስቲካ ሄሳ ሲዪዳ ማላ ባ ቃላ ꬎቁ ሂስቲዲ ኢሲፌ ጾሳኮ፥ «ዎጋ ጎዳዉ! ኔኒ ሳሎኔ ሳኣ፥ ኣባኔ ኣባ ጊዶን ዲዛይታ ዉርሳ ሜꬋዳሳ።
ACT 4:25 ኔ ኣሽካራ ኑ ኣዋ ዳዊቴ ዶናራ ጺሎ ኣያናን፥ « ‹ካዎቴꬃይ ኣዛስ ሃንቄቲ ዴንዲዴ? ዴሬይ ኣዛስ ሜላ ማቄቲዜ?
ACT 4:26 ቢታ ካዎቲ ኢሲፌ ጋጊዲ ቢታ ሃሪዛይቲ ኢሲ ቦላ ሺቄቲዲ ጎዳ ቦላኔ ዶሬቲ ቲዬቲዳይሳ ቦላ ዱላቲዳ› ጊ ዋሲዳ።
ACT 4:27 «ቱማፔ ሄርዶሲኔ ጳንጾሳ ጲላጾሲ ኢስራኤሌታራኔ ሃራ ዴሬ ኣሳራ ሃኖ ካታማይን ኔ ዶራ ቲይዳ ጌሻ ናዛ ዬሱሳ ቦላ ዮኦ ቃቻናስ ሺቄቲዳ።
ACT 4:28 ሃይሳንካ ኔ ዎልቃኒኔ ኔ ሼኔን ካሴ ኔ ቆፒዳይሳ ኢስቲ ፖሊዳ።
ACT 4:29 ጎዶ! ሃኢካ ኢስታ ማንዴዛ ኔ ቤያ፤ ኑኒ ኔ ኣይሌቲ ኔ ቃላ ባቦንታ ኩሜꬃ ጻላቴꬃራ ዮታና ማላ ዳንዳይሳ።
ACT 4:30 ፓꬃናስ ኔ ኩሼ ሚጫ። ኔ ና ጌሻዛ ሱንꬃን ጊታ ማላታ ኦꬃ» ጊዳ።
ACT 4:31 ኢስቲ ዎሲዳፔ ጉዬ ኢስቲ ዲዛሶይ ቃጺዴስ፤ ዉሪካ ጺሎ ኣያናን ኩሚዲ ጾሳ ቃላ ጻላቴꬃን ዮቲዳ።
ACT 4:32 ኣማኒዛይቲ ዉሪካ ኢሲ ዎዚናኒኔ ኢሲ ቆፋን ጋጊ ዴቴስ። ኢስታስ ዲዛይ ዉሪ ኢሲ ቦላ ዴስ ኣቲን ባስ ዲዛዝ፥ «ሃይሲ ታስ ቡዞ ሚሻ» ጊዛዴይ ዴና።
ACT 4:33 ሃዋሬቲካ ጎዳ ዬሱሳ ዴንꬃ ጊታ ዎልቃን ማርካቴꬅ ኦይኪዳ፤ ኡባ ቦላ ጊታ ጾሳ ኪያቴꬂ ዴስ።
ACT 4:34 ኢስታ ጊዶን ሜቶታንቻይ ኢሳዴይካ ዴና፤ ጋሶይካ ጋዴ ጊዲን፥ ኬꬄ ጊዲን ባስ ዲዛ ኡባ ባይዚ ባይዚ ሺሺዳ ሚሽ፥
ACT 4:35 ሃዋሬታ ኩሼን ዎꬂዲ ኢሳዴስ ኢሳዴስ ኢዛስ ኮሺዛ ማላ ጊሼቴስ።
ACT 4:36 ቆጲሮሴ ጌቴቲዛሶን ዲዛ ዮሴፌ ጌቴቲዛዴይ ኢሲ ሌዌ ባጋ ኣሲ ዴስ፤ ኢዚካ ሃዋሬታን፥ «ባርናባሳ» ጌቴቲ ሱሚዴስ። ሄሳስ ቢርሼꬃይ፥ «ሚንꬄꬆ ና» ጉሳ።
ACT 4:37 ኢዚካ ባ ጋዴ ባይዚዳ ሚሻ ኤሂዲ ሃዋሬታ ኩሼን ዎꬂዴስ።
ACT 5:1 ኢሲ ሃናኒያ ጌቴቲዛ ኣሲ ሳጵራ ጌቴቲዛ ባ ማቼይራ ባ ጋዴ ባይዚዴስ።
ACT 5:2 ማቼያ ሳጵራይ ሎኤꬃ ኤሪሺን ጋዴዛ ባይዚዳ ሚሻፌ ባጋ ሻኪ ኣሺዲ ባጋ ኤሂዲ ሃዋሬታ ኩሼን ኢሚዴስ።
ACT 5:3 ቃሴ ጴጽሮሲ፥ «ሃይሶ ሃናኒያ! ኔኒ ጺሎ ኣያና ቦላ ዎርዶታናሲኔ ጋዴዛ ሚሻፌ ኣሻና ማላ ጻላኤይ ኣይስ ኔ ዎዚናን ጌሊዴ? ባይዛናፔ ካሴ ጋዴዚ ኔይሳ ጊዴኔ? ኔ ባይዚዳፔ ጉዬ ቃሴ ሚሻይ ኔ ኩሼን ዴኔ? ሂስቲን ኔ ሃይሳ ማላ ዎስታ ኔ ዎዚናን ቆፓዲ? ኔኒ ጾሳ ቦላ ዎርዶታዳሳ ኣቲን ኣሳ ቦላ ጊዴና» ጊዴስ።
ACT 5:5 ሄሳ ሲዪዳ ማላ ሃናኒያይ ኩንዲ ሃይቂዴስ፤ ሄሳ ሲዪዳ ኣሳይ ዉሪ ዳሮ ባቢዴስ።
ACT 5:6 ኣቱማሳይ ዴንዲዲ ኣሃ ጻጺዲ ሄራካ ኤፊዲ ሞጊዴስ።
ACT 5:7 ሄꬑ ሳቴፔ ጉዬ ማቼያ ኢዚ ዋኒዳኮ ኤሮንታ ዳሼ ያዱስ።
ACT 5:8 ጴጽሮሲካ፥ «ኣኔ ታስ ዮታ፤ ኢንቴ ጋዴዛ ባይዚዳ ዋጋይ ሃኖ ጻላ?» ጊዴስ። ኢዛካ፥ «ኤ ሃኖ ሃ ዋጋይን ባይዚዶስ» ጋዱስ።
ACT 5:9 ጴጽሮሲካ፥ «ኢንቴ ጾሳ ኣያና ፓጫናስ ኣይስ ኢሲ ዶና ጊዲዴቲ? ሄኮ ኔ ኣዚና ሞጊዳ ኣሳቲ ሞጊ ሲሚዲ ካሬን ፔንጌ ቦላ ዴቴስ። ኢስቲ ኔናካ ኬሲ ኤኪ ኤፋና» ጊዴስ።
ACT 5:10 ኢዛ ሲዪዳ ማላ ሄራካ ኢዛ ቶሆ ቦላ ኩንዳዳ ሃይቃዱስ። ኣቱማሳይካ ሶ ጌሊዳ ማላ ሃይቂዳሮ ቤኢዲ ኬሲ ኤፊዲ ኢዚ ኣዚና ኣቻን ኢዞ ሞጊዳ።
ACT 5:11 ኩሜꬃ ዎሳ ኬꬃ ኣሳይኔ ሄሳ ሲዪዳ ኣሳይ ዉሪ ዳሮ ባቢዴስ።
ACT 5:12 ሃዋሬቲካ ዴሬ ጊዶን ዳሮ ማላታታኔ ማላሊሲዛ ሚሽ ኦꬂዳ፤ ኣማኒዛይቲ ዉሪ፥ «ሶሎሞኔ ሲሜሬቴꬃሶ» ጌቴቲዛ ፔንጌን ሺቄቴስ።
ACT 5:13 ኢስታስ ባቢዳ ጊሻስ ኦኒካ ኢስታራ ዋላኬታናስ ኮዪቤና፤ ጊዶ ኣቲን ዴሬይ ኢስታ ኬሂ ቦንቼስ።
ACT 5:14 ዳሮ ማጫሳቲኔ ኣዴቲ ዎዴፔ ዎዴን ጎዳን ኣማኒ ኣማኒ ኢስታ ቦላ ጉጄቲዳ።
ACT 5:15 ሄሳ ጋሶን ጴጽሮሲ ኣꬊሺን ሃራይ ኣቲን ኢዛ ኤሾይ ሃርጋንቻታፔ ባጋ ሃርጋንቻታ ቦላ ዎꬋና ማላ ሃርጊዛይቲ ኢቺዛ ኣልጋ ቦላኔ ሃላ ቦላ ካሬን ኢሺሴቴስ።
ACT 5:16 ዬሩሳላሜ ዩሾን ዲዛ ካታማታፔ ሃርጊዛይታኔ ቱና ኣያናይ ዋዪሲዛይታ ኤሂን ዉሪ ፓጺዳ።
ACT 5:17 ሄ ዎዴ ቄሴታ ሃላቃይኔ ኢዛራ ዲዛ ሳዱቃዌታ ባጋይቲ ዉሪካ ቃናቴ ቃናቲዛይታ ጻላ ጊዲዳ።
ACT 5:18 ሃዋሬታ ኦይኪዲ ቃሾ ኬꬄ ጌልꬂዳ።
ACT 5:19 ጊዶ ኣቲን ጎዳ ኪታንቻይ ቃማራ ቃሾ ኬꬃዛ ካሬ ዶይዲ ኢስታ ኬሲዲ፥
ACT 5:20 «ቢዲ ጾሳ ኬꬃ ጊቤ ጊዶን ኤቂዲ ሃይሳ ዴኦ ቃላ ኡባ ዴራስ ዮቲቴ» ጊዴስ።
ACT 5:21 ጋዴይ ዎንቲዳ ማላ ኢስታስ ዮቲዳይሳ ጾሳ ኬꬃ ጊቤ ጌሊዲ ዴሬዛ ታማርሶ ኦይኪዳ፤ ቄሴታ ሃላቃይኔ ኢዛራ ዲዛይቲ ዪዲ ኣይሁዳታ ዱላታኔ ኢስራኤሌ ዴሬ ጪማታ ኩሜꬅ ኢሲ ቦላ ሺሺዳ፤ ሃዋሬታ ቃሾ ኬꬃፌ ኤኪ ያና ማላ ኣስ ዬዲዳ።
ACT 5:22 ኪቴቲ ቢዳ ኣሳቲ ቢዲ ኢስታ ቃሾ ኬꬃን ዴሚቤቴና፤ ሲሚዲ፥
ACT 5:23 «ቃሾ ኬꬃይ ሎኢ ቁልፔቲ ዴስ፤ ናጊዛይቲካ ፔንጌ ቦላ ኤቂ ዲሺን ኑ ቤኢዶስ፤ ጊዶ ኣቲን ኑ ዶዪ ጌሊሺን ኬꬃን ኦኒካ ባ» ጊዳ።
ACT 5:24 ጾሳ ኬꬅ ናጊዛይታ ሃላቃይኔ ቄሴታ ሃላቃቲካ ሄሳ ሲዪዳ ማላ ሃኖዛን ዳሮ ማላሌቲዳኔ ኢስታስ ሃኖይ ዉሪ ቲኪ ጊዴስ።
ACT 5:25 ሄራካ ኢሲ ኣሲ ዪዲ፥ «ሄኮ ኢንቴ ቃሾ ኬꬄ ጌልꬂዳ ኣሳቲ ጾሳ ኬꬃ ጊቤ ጊዶን ኤቂዲ ዴሬ ታማርሶን ዴቴስ» ጊዴስ።
ACT 5:26 ጾሳ ኬꬄ ናጊዛይታ ሃላቃይ ባ ኦሳንቻታራ ቢዲ ኢስታ ኦይኪ ኤኪ ዪዴስ፤ ኦይኪ ኤሂዳይቲ ኣሳይ ባና ሹቻራ ጫዶንታ ማላ ባቢዲ ዎልቃꬆንታ ሎዳራ ኤሂዳ።
ACT 5:27 ሃዋሬታ ኤሂዲ ኣይሁዳታ ዱላታ ሲንꬃን ኤሲዳ፤ ቄሴታ ሃላቃይካ ኢስታ፥ «ሃይሳ ሃ ሱንꬃን ኢንቴ ታማርሶንታ ማላ ኢንቴስ ሎኤꬂ ዮቲዶስኮሺን ኢንቴ ኢንቴ ቲሚርቴዛ ዬሩሳላሜ ኡባን ኩንꬄታ፤ ቃሴ ኑናካ ሃ ኣዴዛ ሱꬃስ ኦይሼቲዛይታ ሂስታናስ ጊጺ ዴንዲዴታ» ጊዴስ።
ACT 5:29 ጴጽሮሲኔ ሃንኮ ሃዋሬቲካ ዛሪዲ፥ «ኑኒ ኣሳፔ ኣꬂዲ ጾሳስ ኣዛዜታናስ ቤሴስ።
ACT 5:30 «ኢንቴ ኢዛ ሚꬃ ቦላ ካቂ ዎꬊዳ ዬሱሳ ኑ ኣዋንታ ጾሳይ ኢዛ ሃይቆፔ ዴንꬂዴስ።
ACT 5:31 ኢዚካ ኢስራኤሌ ናይታስ ናጋራፔ ሲሚዲ ማሬታና ማላ ጾሲ ኢዛ ኡባፌ ቦላኔ ኣሺዛዴ ሂስቲዲ ባ ኡሻቻን ꬎቁ ꬎቁ ሂስቲዴስ።
ACT 5:32 ኑኒካ ሃይሳስ ማርካታ፤ ቃሴካ ጾሲ ባስ ኣዛዜቲዛ ኦናስካ ኢሚዳ ጺሎ ኣያናይካ ማርካ» ጊዳ።
ACT 5:33 ኣሳቲ ሄሳ ሲዪዲ ኢታ ሃንቆ ሃንቄቲዳ፤ ዎꬋናካ ኮዪዳ።
ACT 5:34 ጊዶ ኣቲን ዴሬ ኣቻን ኬሂ ቦንቼቲዳ ኢሲ ዎጋ ኣስታማሬ፥ ኢዚካ ጋማልያሌ ጌቴቲዛ ፋርሳዌታ ባጋይ ዴሬ ጪማታ ጊዶን ዴንዲ ኤቂዲ ሃዋሬቲ ጉꬃ ዎዴ ካሬን ጋምኣና ማላ ኣዛዚዴስ።
ACT 5:35 ዴሬ ጪማታስ፥ «ኢስራኤሌ ኣሳቶ! ኢንቴ ሃይታ ኣሳታ ቦላ ኦꬃናይሳ ዳሮ ኣኬካራ ኦꬃናስ ቤሴስ።
ACT 5:36 ሃይሳፌ ካሴ ኢሲ ቴዎዳሳ ጌቴቲዛዴይ ባና ጊታ ኣስ ሂስቲ ቆዲ ዴንዲን ኦይዱ ጼቱ ዴሬይ ኢዛ ካሊዴስ፤ ጊዶ ኣቲን ኢዚ ኣሳ ኩሼን ሃይቂዴስ፤ ኢዛ ካሊዛይቲካ ጮ ላሌቲን ኢዛ ሃኖይ ጮ ሜላ ኣቲዴስ።
ACT 5:37 ኢዛፔ ጉዬካ ዴሬይ ታይቤቲዛ ዎዴ ጋሊላ ዩሁዳይ ዴንዲዲ ዳሮ ዴሬ ባናራ ካሌꬂዴስ። ባና ካሊዛይታካ ዴሚዴስ፤ ጊዶ ኣቲን ኢዚካ ꬋይዴስ፤ ኢዛ ካሊዛይቲካ ዉሪ ꬋይዳ።
ACT 5:38 «ሄሳ ጊሻስ ታ ሃኢ ኢንቴና ጊዛይ ሃይታ ኣሳታ ኣጊቴ፥ ቦቾፍቴ፤ ኢስታ ቆፋይ ዎይኮ ኢስታ ኦሶይ ኣሳፔ ጊዲኮ ꬋያና።
ACT 5:39 ጾሳፌ ጊዲኮ ቃሴ ኢንቴ ኢስታ ቴቃናስ ዳንዳዬኬታ፤ ኦኔ ኤሪዛይ ኢንቴ ጾሳራ ኦዬቲሼ ቤታናኮ» ጊዴስ።
ACT 5:40 ኢስቲካ ኢዛ ዞሬዛ ኤኪዲ ሃዋሬታ ጼይጊዲ ጋራፊሲዳ፤ ናምኣንꬆ ዬሱሳ ሱንꬃን ሃሳዮንታ ማላ ኣዛዚዲ ዬዲዳ።
ACT 5:41 ሃዋሬቲካ ኢዛ ሱንꬃ ጊሻስ ካዉያናስ ቤሲዛ ጊሻስ ዳሮ ኡፋዬቲሼ ዴሬ ጪማታ ኣቻፌ ኬዚ ቢዳ።
ACT 5:42 ጋላስ ጋላስ ጾሳ ኬꬃኒኔ ኢሳ ኢሳ ኬꬃን ዬሱሲ ኢዚ ጾሲ ዶሪዳዴ ጊዲዳይሳ ታማርሶፌኔ ሳባኮፔ ሙሌካ ጉዬ ጊቤቴና።
ACT 6:1 ኣማኒዛይታ ቆዳይ ዳሪ ዳሪ ቢዛ ዎዴ ጊሪኬ ቢታፌ ዪዳ ኣይሁዳ ኣሳቲ ዩሁዳን ዲዛ ኣይሁዳ ኣሳ ጉዬራ ዚጊሬቲዳ፤ ጋሶይካ ኡባ ዎዴ ሚዛ ካꬅ ጊሻሼ ኣምኤታ ዉዴቶንታ ኣጊዳ ጊሻሳ።
ACT 6:2 ሄሳ ጊሻስ ኑ ታማኔ ናምኡ ሃዋሬቲ ኣማኒዛ ሃራታ ኢሲ ቦላ ሺሺዲ፥ «ኑኒ ካꬃ ጊሻሶን ጌሊዲ ጾሳ ቃላ ታማርሶ ኣጋናስ ቤሴና።
ACT 6:3 ሄሳ ጊሻስ ኑ ኢሻቶ! ኢንቴ ጊዶፌ ኤራንቻታ፥ ጺሎ ኣያናን ኩሚዳይታኔ ሎኦ ማርካቴꬂ ዲዛ ላፑን ኣሳታ ዶሪቴ፤ ሃይሳ ኣላፌቴꬅ ኑ ኢስታስ ኢማና።
ACT 6:4 ኑኒ ጊዲኮ ዎሳኒኔ ቃላ ዮቶን ሚናና» ጊዳ።
ACT 6:5 ኢስቲ ጊዳ ዮኦይ ሲዪዳይታ ኡፋይሲዴስ፤ ኣማኖኒኔ ጺሎ ኣያናን ኩሚዳይቲ ኢስቲፋኖሴ፥ ፒሊጶሳ፥ ጲሮስቆሮሳ፥ ኒቃሮና፥ ጺሞና፥ ጳርሜናኔ ዩሁዳቴꬃን ጌሊዳ ኣንጾኪያ ዴሬ ኣስ ኒቆሎሳ ዶሪዳ።
ACT 6:6 ሄይታ ኤሂዲ ሃዋሬታ ሲንꬅ ሺሺዳ። ኢስቲካ ባ ኩሼ ኢስታ ቦላ ዎꬂዲ ኢስታስ ዎሲዳ።
ACT 6:7 ጾሳ ቃላይ ኣኪ ኣኪ ቢዴስ፤ ኣማኒዛይታ ቆዳይ ዬሩሳላሜን ዳሪ ዳሪ ቢዴስ፤ ቄሴታፔ ዳሮቲ ኣማኒዳ።
ACT 6:8 ሄ ዎዴ ኢስቲፋኖሲ ጾሳ ኢሞቴꬃኒኔ ዎልቃን ኩሚዲ ዴሬዛ ጊዶን ጊታ ማላሊሲዛ ማላታታ ኦꬂዴስ።
ACT 6:9 «ዎዜቲ ኬዚዳ» ጌቴቲ ጼይጌቲዛሶፔ ኣይሁዳታ ዎሳ ኬꬃፌ ዪዳ ኣስ ጊዲዳ ቃሬናፔኔ ኢስኪንዲሪያፔ፤ ቃሴካ ኪልቂያፔኔ ኢሲያ ኣዉራጃታፔ ዪዳ ኣሳቲካ ዉሪ ኢስቲፋኖሴራ ማርሼቲዳ።
ACT 6:10 ጊዶ ኣቲን ኤራቴꬃን ኢዚ ሃሳይዛ ሃሳያኔ ኢዛን ዲዛ ኣያና ኤቄታናስ ዳንዳይቤቴና።
ACT 6:11 ሄሳ ጊሻስ፥ «ኢስቲፋኖሲ ሙሴኔ ጾስ ጫዪሺን ኑ ሲዪዶስ» ጊዛ ኣሳታ ጉዬራ ጊግሲዳ።
ACT 6:12 ሄ ዎዴ ዴሬዛ፥ ዴሬ ጪማታኔ ዎጋ ታማርሲዛይታ፥ ዴንꬄꬂዲ ኢስቲፋኖሴ ኦይꬂዲ ዴሬ ዱላታኮ ሺሺዳ።
ACT 6:13 ኢዛ ቦላ «ሃይሲ ኣዴዚ ሃይሳ ጾሳ ኬꬃ ቦላኔ ዎጋ ቦላ ጫሻ ቃላ ሃሳያ ሙሌካ ኣጊቤና።
ACT 6:14 ጋሶይካ ሃይሲ ኣዴዚ፥ ‹ናዚሬቴ ዬሱሲ ሃይሳ ጾሳ ኬꬃ ꬋይሳና› ጊሺኒኔ ‹ኑ ሙሴፔ ኤኪዳ ዎጋ ላማና› ጊ ሃሳይሺን ኑ ሲዪዶስ» ጊ ዎርዶራ ማርካቲዛ ኣሳታ ሺሺዲ ማርካሲዳ።
ACT 6:15 ዱላታ ኡቲዳ ኣሳይ ዉሪ ኢስቲፋኖሴ ቲሺ ሂስቲ ጼሊሺን ኢዛ ኣይፌሶይ ኢስታስ ኪታንቻ ኣይፌሶ ሚሳቲ ቤቲዴስ።
ACT 7:1 ቄሴታ ሃላቃይ ኢስቲፋኖሴ፥ «ሃይሲ ኔ ቦላ ሺቂዳ ዮኦዚ ቱሜ?» ጊ ኦይቺዴስ።
ACT 7:2 ኢስቲፋኖሲካ፥ «ታ ኢሻቶ! ታ ኣዋቶ! ታ ጊዛይሳ ሲዪቴ! ኑ ኣዋ ኣብራሃሜይ ካራኔ ጌቴቲዛሶ ያናፔ ካሴ ቡሮ ሜስጴጾሚያን ዲሺን ቦንቾ ጎዳይ ኢዛስ ቆንጪዲ፥
ACT 7:3 ‹ኔ ዴሬፔኔ ኔ ዳቦፌ ሻኬታዳ ታ ኔና ቤሲዛሶ ባ› ጊዴስ።
ACT 7:4 ኢዚካ ካላዳዌታ ቢታፌ ኬዚዲ ካራኔ ጌቴቲዛ ቢታን ኡቲዴስ። ኢዛ ኣዋይ ሃይቂዳፔ ጉዬ ኢንቴ ሃኢ ዲዛሶ ሃ ዴሬ ኢዛ ኤሂዴስ።
ACT 7:5 ሃራይ ኣቶሺን ኢሲ ቶሆይ ኤቂዛ ጋዴይ ኢዛስ ሃይሳፌ ኢሜቲቤና፤ ጊዶ ኣቲን ሄ ዎዴ ኢዛስ ኢሲ ናይካ ባይንዳ ዲሺን ኢዚኔ ኢዛፔ ጉዬን ኢዛ ዜሬꬂ ቢታዮ ላታና ማላ ጾሲ ኢዛስ ጫቂዴስ።
ACT 7:6 ቃሴካ ጾሲ ኢዛስ፥ ‹ኔ ዜሬꬂ ኣላጋ ቢታን ቤቴ ኣስ ጊዳና። ኦይዱ ጼቱ ላይꬅ ኣይሌቴꬃ ቃምባራ ጊዶን ዋዬታና።
ACT 7:7 ጊዶ ኣቲን ኢስታ ኣይሌ ማላ ሃሪዛ ዴሬ ታ ቃጻያና፤ ሄሳፌ ጉዬ ኢስቲ ሄ ቢታፌ ኬዚዲ ሃኖ ሃ ሶሆዪን ታስ ጎይናና› ጊዴስ።
ACT 7:8 ሄሳፌ ጉዬ ቃጻራ ዎጋ ጫቆ ኢዛስ ኢሚዴስ፤ ኣብራሃሜይካ ዪሳቃ ዬሊዲ ኢዛ ኦስፑንꬃ ጋላስ ቃጻሪዴስ፤ ዪሳቃይካ ያቆቤ ዬሊዴስ፤ ያቆቤይካ ታማኔ ናምኡ ቆሞታ ዬሊዴስ።
ACT 7:9 «ሄ ቆሞታ ኣዋቲ ዮሴፌ ቦላ ቃናቲዲ ኢዛ ኣይሌቴꬃስ ዱጌ ጊብጼ ባይዚዳ፤ ጊዶ ኣቲን ጾሲ ኢዛራ ዴስ።
ACT 7:10 ሜቶ ኡባፌ ኢዛ ኣሺዴስ፤ ጊብጼ ካዎ ፓሮኔ ሲንꬃን ቦንቾ ኢሚዴስ፤ ፓሮኔይ ኢዛ ጊብጼ ቢታኒኔ ባ ኬꬃ ኣሳ ኡባ ቦላ ኣላፌቴꬃን ሹሚዴስ።
ACT 7:11 «ሄ ዎዴ ካናኔኒኔ ጊብጼን ዳሮ ሜቶ ኤሂዳ ጊታ ኮሻይ ዴንዲዴስ። ኑ ኣዋታስካ ሚዛ ካꬂ ꬋይዴስ።
ACT 7:12 ያቆቤይ ጊብጼ ዴሬን ካꬂ ዲዛይሳ ሲዪዲ ኑ ኣዋታ ኮይሮ ጊብጼ ዬዲዴስ።
ACT 7:13 ኢስቲ ናምኣንꬆ ቢዛ ዎዴ ዮሴፌይ ኢዚ ኦናኮ ባና ባ ኢሻታስ ቆንጪሲዴስ። ፓሮኔይካ ዮሴፌ ኢሻታ ኤሪዴስ።
ACT 7:14 ሄሳፌ ጉዬ ዮሴፌይ ኪቲዲ ባ ኣዋ ያቆቤኔ ላፑን ታማኔ ኢቻሹ ጊዲዛ ባ ዳቦታ ኩሜꬅ ኤሂሲዴስ።
ACT 7:15 ያቆቤይ ዱጌ ጊብጼ ዎꬊዴስ። ኢዚካ ኑ ኣዋቲካ ዉሪ ሄን ሃይቂዳ።
ACT 7:16 ኢስታ ኣሃይካ ሴኬሜ ጌቴቲዛሶ ኤፊን ኣብራሃሜይ ኤሞሬ ናይታፔ ባ ሚሻን ሻሚዳ ዱፎን ሞጌቲዴስ።
ACT 7:17 «ጾሲ ኣብራሃሜስ ጫቂዳ ቃላይ ፖሌቲዛ ዎዴይ ማቲሺን ጊብጼን ዲዛ ኑ ኣሳ ቆዳይ ዳሪ ዳሪ ቢዴስ።
ACT 7:18 ሄሳፌ ጉዬ ጊብጼ ቢታን ዮሴፌ ኤሮንታ ሃራ ካዎይ ካዎቲዴስ።
ACT 7:19 ኢዚካ ኑ ኣሳ ባ ጌኔ ኦሶን ሜቶꬂዴስ፤ ቡሮ ዬሌቲዳ ጉꬃ ናይቲ ሃይቃና ማላኔ ኣሳይ ዬሊዳ ናይታ ካሬ ኬሲ ዎራ ዬጋና ማላ ዎልቃꬂዴስ።
ACT 7:20 ሄ ዎዴ ሙሴይ ዬሌቲዴስ፤ ኢዚካ ጾሳ ኣቻን ዶሴቲዳ ማላ ሎኦ ና ጊዲዴስ፤ ባ ኣዋ ኬꬃን ሄꬑ ኣጊና ኣልኢሶን ዲጪዴስ።
ACT 7:21 ኢዚ ዎራ ዬጌቲዳ ዎዴ ካዎ ፓሮኔ ማጫ ናያ ዴማዳ ባስ ኤካዱስ፤ ባ ና ማላ ኦꬃዳ ዲቻዱስ።
ACT 7:22 ሙሴይካ ጊብጼታ ኣꬎ ኤራቴꬃ ኡባ ታማርዴስ፤ ዮኦን ኤራ፤ ኦሶንካ ሚኖ ጊዲዴስ።
ACT 7:23 «ሙሴ ላይꬃይ ኦይዱ ታሙ ጊዲዳ ዎዴ ባ ኢሻታ ኢስራኤሌ ናይታ ቤያናስ ባ ዎዚናን ቆፒዴስ።
ACT 7:24 ኢዚካ ኢሲ ጊብጼ ኣሲ ሙሴ ባጋ ኣሳፔ ኢሳዴ ቦላ ቆሆ ጋꬂሺን ቤኢዲ ባ ባጋ ኣዴዛ ማዲዴስ፤ ጊብጼ ኣዴዛ ዎꬊዲ ቆሄቲዳይሳ ሃሎ ኬሲዴስ።
ACT 7:25 ሙሴስ ጾሲ ኢዛ ኩሼን ኢስታ ዎዛናይሳ ኢዛ ኣሳይ ኣኬኪዛ ሚሳቲዴስ፤ ጊዶ ኣቲን ኢስቲ ሄሳ ዩሺ ቆፒቤቴና።
ACT 7:26 ዎንቴꬃ ጋላስ ቃሴካ ኢስራኤሌ ናይታፔ ናምኣቲ ባ ጊዶን ኦዬቲሺን ጋኪዲ ኦዬቲዛይታ ጊጊሳናስ ኮዪዲ፥ ‹ሃይቶ ኣሳቶ! ኢንቴ ኢንቴ ጋርሳን ኢሶይ ኢሳራ ኢሻንታ፤ ኢንቴ ዋኒዲ ኢሶይ ኢሳ ቆሄቲ?› ጊዴስ።
ACT 7:27 «ባ ላጌዛ ቦላ ቆሆ ጋꬂዳይሲ ሙሴ ሱጊ ዬጊዲ፥ ‹ኔና ኑ ቦላ ኑና ሃሪዛዴኔ ኑ ቦላ ፒርዲዛዴ ኦꬂ ሹሚዳይ ኦኔ? ዎይኮ ቃማ ጊብጼ ኣዴዛ ዎꬎይሳꬆ ታናካ ዎꬋና ኮያይ?› ጊዴስ።
ACT 7:29 ሙሴይ ሄሳ ሲዪዳ ማላ ሚዲያሜ ቢታ ቤቲዲ ሄን ቤቴ ኣስ ጊዲ ዴኢዴስ፤ ያንካ ናምኡ ኣቱማ ናይታ ዬሊዴስ።
ACT 7:30 «ሄሳፌ ኦይዱ ታሙ ላይꬃፌ ጉዬ ሲና ዙማ ኣቻን ዲዛ ባዞ ቢታን ቄሪ ዎራ ጊዶን ኤጺዛ ታማ ላጮን ኪታንቻይ ኢዛስ ቤቲዴስ።
ACT 7:31 ሙሴይካ ኢዛ ቤኢዳ ማላ ማላሌቲዴስ፤ ኣዛኮ ሻኪ ኤራናስ ኢዚ ሄ ኢዛኮ ሺቂሺን ጎዳ ቃላይ፥ ‹ታኒ ኔ ኣዋንታ ጾሳ፤ ኣብራሃሜ፥ ዪሳቃኔ ያቆቤ ጾሳ› ጊሺን ሲዪዴስ። ሙሴይካ ዳሮ ዳጋሚዴስ፤ ጼላናስካ ጻሊቤና።
ACT 7:33 «ጎዳይካ ኢዛስ፥ ‹ሃይሲ ኔ ኤቂዳሶይ ጌሻሶሆ ጊዲዳ ጊሻስ ኔ ቶሆፔ ጫማ ሾዳ፤ ጊብጼን ዲዛ ታ ዴሬታ ዋዬ ታ ቱማፔ ቤያዲስ፤ ኢስቲ ዋሲዛ ዋዬ ዋሶዛ ታ ሲያዳ ኢስታ ኣሻናስ ዎꬋዲስ፤ ሃኢካ ኔ ሃ ያ፤ ታ ኔና ዱጌ ጊብጼ ዛራዳ ኪታና› ጊዴስ።
ACT 7:35 «ሂስቲን ሄይቲ፥ ‹ኑ ቦላ ኔና ሃሪዛዴኔ ፒርዲዛዴ ሂስቲ ኦኒ ሹሚዴ?› ጊዲ ኣሳይ ካሴ ካꬊዳ ሙሴ ጾሲ ቄሪ ዎራ ጊዶን ኢዛስ ቤቲዳ ኪታንቻዛ ባጋራ ኢስታ ሃሪዛዴኔ ኣሺዛዴ ሂስቲዲ ኢስታኮ ዛሪ ዬዲዴስ።
ACT 7:36 ኢዚካ ኢስታ ካሌꬂዲ ጊብጼፔ ኬሲዴስ፤ ጊብጼን፥ ዞኦ ኣባኒኔ ባዞ ቢታን ኦይዱ ታሙ ላይꬅ ዳሮ ማላሊሲዛ ሚሻታኔ ጊታ ማላታታ ኢስታስ ኦꬂዴስ።
ACT 7:37 «ኢስራኤሌ ናይታስ፥ ‹ታ ማላ ናቤ ጾሲ ኢንቴ ጊዶፌ ዴንꬃና› ጊዳይሲ ሃይሳ ሙሴኮ!
ACT 7:38 ኢዚካ ሲና ዙማ ቦላ ሃሳይዳ ኪታንቻራኔ ባዞ ቢታን ኑ ኣዋታራ ዴሬ ዱላታ ጊዶን ዴስ፤ ዴኦ ቃላካ ሃ ኑስ ኣꬃናስ ኤኪዴስ።
ACT 7:39 «ኑ ኣዋቲ ጊዲኮ ኢዛራ ኤቄቲዳ ኣቲን ኢዛስ ኣዛዜታናስ ኮዮንታ ጊሻስ ባ ዎዚናራ ጉዬ ጊብጼ ሲሚዳ።
ACT 7:40 ኣሮኔስካ፥ ‹ኑ ሲንꬃራ ቢዛ ኤቃ ኑስ ጊጊሳ! ኑና ጊብጼፔ ካሌꬂ ኬሲዳ ሙሴይ ዋኒዳኮ ኑ ኤሮኮ› ጊዳ።
ACT 7:41 ሄ ዎዴ ማራ ሚስሌ ሜꬊዲ ኤቃስ ያርሾ ሺሺዳ፤ ባርካ ሜꬊዳ ባ ኩሼ ኦሶን ኡፋዬቲዲ ጉፒዳ።
ACT 7:42 «ጊዶ ኣቲን ጾሲ ኢስታስ ዞኮ ዛሪዴስ፤ ኢስቲ ሳሎ ጾሊንቴታስ ጎይናና ማላ ኣꬂ ኢሚዴስ፤ ሄሲካ ናቤታ ማጻፋን፥ « ‹ኢንቴኖ ኢስራኤሌ ናይቶ! ኢንቴ ባዞ ቢታን ኦይዱ ታሙ ላይꬅ ዲዛ ዎዴ ኢንቴፌ ያርሾኔ ሙጹዋታ ታስ ሺሺ ኤሬቲ?
ACT 7:43 ሃራፔካ ኢንቴ ጎይናናሶሆ ኦꬂዳ ኤቃ ሞሎኬ ዱንካናኔ ኢንቴ ኤቃ ኤራፋኔ ጌቴቲዛ ጾሊንቴ ሚስሌዛ ꬎቁ ꬎቁ ሂስቲ ኦይኪዴታ። ሄሳ ጊሻስ ታ ኢንቴና ኢንቴ ዲዛሶፔ ዴንꬃዳ ባቢሎኔራ ኣꬃ ዬዳና› ጌቴቲዲ ጻፌቲዴስ።
ACT 7:44 «ጾሲ ሙሴ ቤሲዳ ሌሚሶዛ ማላኔ ኣዛዚዳይሳ ማላ ኦሴቲዳ ጾሲ ኣሳራ ጋጊዛ ዱንካኔያ ኑ ኣዋታራ ባዞ ቢታን ዴኣዱስ።
ACT 7:45 ኑ ኣዋቲ ዱንካኔዮ ኤኪዳይሳፌ ጉዬ ጾሲ ኢያሶ ካሌꬂን ካሴ ኢስታ ጎዲዳ ዴሬታ ላቲዳ ዎዴ ዱንካኔዮ ኤኪ ጌሊዳ፤ ዳዊቴ ዎዴ ጋካናስ ዱንካኔያ ሄ ቢታን ዴኣዱስ።
ACT 7:46 ዳዊቲካ ጾሳ ሲንꬃን ቦንቾ ዴሚዲ ያቆቤ ጎዳስ ኣቆሶ ጊጊሳናስ ዎሲዴስ።
ACT 7:47 ጊዶ ኣቲን ሶሎሞኔይ ኢዛስ ኣቆሶ ኬጺዴስ።
ACT 7:48 «ጊዶ ኣቲን ዎጋ ጎዳይ ኣሳ ኩሼይ ኬጺዳ ኬꬃን ዴና፤ ሄሲካ ናቤይ ካሴ ጌሻ ማጻፋን ጻፊዳ ማላ፥ « ‹ሳሎይ ታ ኡቲዛ ኣልጋ፤ ቢታይካ ታኒ ቶሆን ዬꬊዛሶ፤ ሂስቲን ኢንቴ ታስ ኣይ ማላ ኬꬄ ኬጼቲ? ዎይኮ ታ ሼምፓናሶይ ኣዋይሴ? ሃይሳ ኡባ ታ ኩሼይ ኦꬂቤኔ?› ጌስ ጎዳ ጾሳይ።
ACT 7:51 «ኢንቴኖ ዎዚና ሙሜቶ! ሃይꬃ ቱሌቶ! ኢንቴካ ኢንቴ ኣዋታ ማላ ኡባ ዎዴ ጺሎ ኣያናራ ኤቄቴታ።
ACT 7:52 ናቤታፔ ኢንቴ ኣዋቲ ጎዶንታ ናቤይ ኦኔ? ጺሎዛ ዮሃኒሳ ካሴቲ ዮቲዳ ናቤታካ ዎꬊዳ፤ ኢንቴካ ሃኢ ኢዛ ኣꬂ ኢሚዴታኔ ዎꬊዴታ።
ACT 7:53 ኪታንቻ ባጋራ ኢንቴስ ኢሜቲዳ ዎጋ ኤኪዴታ ኣቲን ናጊቤኬታ» ጊዴስ።
ACT 7:54 ዱላታን ዲዛ ኣሳይ ሄሳ ሲዪዳ ማላ ዳሮ ሃንቄቲዲ ኢዛ ቦላ ባ ኣቺ ጋርጪዴስ።
ACT 7:55 ጊዶ ኣቲን ኢስቲፋኖሲ ጺሎ ኣያናን ኩሚዲ ፑዴ ሳሎ ቲሺ ሂስቲ ጼሊሺን ጾሳ ቦንቾን ዬሱሲ ጾሳ ኡሻቻን ኤቂዳይሳ ቤኢዲ፥ «ሄኮ ታ ሳሎይ ዶዬቲዳይሳኔ ኣሳ ናይ ጾሳ ኡሻቻን ኤቂዳይሳ ቤያይስ» ጊዴስ።
ACT 7:57 ሄ ዎዴ ኣሳይ ቃላ ꬎቁ ሂስቲ ዋሲሼ ባ ሃይꬅ ቱጪ ኦይኪዲ ኢዛኮ ኢሲፌ ዎጺዴስ።
ACT 7:58 ኢስቲፋኖሴ ኦይኪዲ ካታማፔ ካሬ ኦሊዳ፤ ሹቻን ጫች ኦይኪዳ፤ ሄሲ ዉሪ ሃኒሺን ማርካቲካ ባ ማይኦ ሳኦሌ ጌቴቲዛ ፓንꬃዛ ኣቻን ዎꬂዳ።
ACT 7:59 ኢስቲ ሹቻራ ኢዛ ጫዲሺን ኢስቲፋኖሲ፥ «ታ ጎዳ ዬሱሳ! ታ ሼምፖዮ ኔኮ ኤካ» ጊዲ ዎሲዴስ።
ACT 7:60 ቃሴካ ጉልባቲዲ ꬎቃ ቃላን «ጎዶ! ሃይታንታ ናጋራ ቆዶፓ» ጊዲ ዋሲዴስ፤ ሄሳ ጊዳፔ ጉዬ ሃይቂዴስ።
ACT 8:1 ሳኦሊካ ኢስቲፋኖሴ ሃይቆን ኢስታራ ቆፋን ጋጊዴስ፤ ሄ ዎዴ ዬሩሳላሜን ዲዛ ኣማኒዛይታ ቦላ ዎልቃማ ጎዴቴꬂ ዴንዲዴስ። ሃዋሬቲ ኣታፌ ኣማኒዛይቲ ዉሪ ዩሁዳ ኣዉራጃኒኔ ሳማሪያ ኣዉራጃ ኡባን ላሌቲዳ።
ACT 8:2 ኣያና ኦሶን ሚኒ ኤቂዳ ኣሳቲ ኢስቲፋኖሴ ሞጊዲ ኢዛስ ዳሮ ዬኪዳ።
ACT 8:3 ሳኦሊ ቃሴ ዎሳ ኬꬅ ꬋይሳናስ ጊጺ ዴንዲዴስ፤ ኣማኒዛ ኣሳ ኢሳ ኢሳ ኬꬄ ጌሊዲ ማጫሳታኔ ኣዴታ ጎቺ ጎቺ ኬሲዲ ቃሾ ኬꬅ ጌልꬂዴስ።
ACT 8:4 ላሌቲዳይቲ ዉሪ ባ ቢዳሶን ቢዳሶን ጾሳ ቃላ ዮቲዳ።
ACT 8:5 ፒሊጶሲካ ሳማሪያ ጌቴቲዛ ካታማ ዎꬊዲ ኣሳስ ኪርስቶሳ ሳባኪዴስ።
ACT 8:6 ዳሮ ዴሬይ ፒሊጶሲ ኦꬂዛ ማላታ ቤኢዲ ኢዚ ዮቲዛ ቃላ ዎዚናፔ ሎኤꬂ ሲዪዴስ።
ACT 8:7 ቱና ኣያናቲካ ዳሮ ኣሳፔ ዋሲ ዋሲ ኬዚዳ፤ ዳሮ ቶሆ ሲላቲኔ ዎቤቲካ ፓጺዳ።
ACT 8:8 ሄሳ ጊሻስ ሄ ካታማ ኣሳይ ዳሮ ኡፋዬቲዴስ።
ACT 8:9 ጊዶ ኣቲን ሄሳፌ ካሴ ሄ ካታማዪን ማሮ ማሮቲዲ ሳማሪያ ኣሳ ዳሮ ማላሊሲዛዝ ኦꬂዛ ኢሲ ሲሞና ጌቴቲዛ ማሮይ ዴስ፤ ኢዚካ ባና ጊታ ኣሳ ማላ ቆዲዛዴ።
ACT 8:10 ኣሳይ ዉሪ ጉꬃታፔ ጊታታ ጋካናስ ዉሪካ፥ «ሃይሲ ኣዴዚ ጊታ ዎልቃማ ጌቴቲዛ ጾሳ ዎልቃ» ጊሼ ኢዚ ጊዛይሳ ዉርሲ ዎዚናፔ ሲዬስ።
ACT 8:11 ዳሮ ዎዴ ባ ማሮቴꬃ ኦሶን ኣሳ ማላሊሲዳ ጊሻስ ኣሳይ ኢዛ ዎዚናፔ ካሊሼ ጋምኢዴስ።
ACT 8:12 ጊዶ ኣቲን ፒሊጶሲ ጾሳ ካዎቴꬃ ጊሻሲኔ ዬሱስ ኪርስቶሳ ጊሻስ ሳባኪዳይሳ ሲዪዲ ኣማኒዳ ማጫሳይኔ ኣቱማሳይ ጻማቄቲዴስ።
ACT 8:13 ሲሞኒካ ኣማኒዲ ጻማቄቲዴስ፤ ፒሊጶሳካ ካሊ ቢዲ ሃኒዛ ጊታ ማላታ ቤኢዲ ማላሌቲዴስ።
ACT 8:14 ዬሩሳላሜን ዲዛ ሃዋሬቲ ሳማሪያ ኣሳይ ጾሳ ቃላ ኤኪዲ ኣማኒዳይሳ ሲዪዲ ጴጽሮሳኔ ዮሃኒሳ ኢስታኮ ኪቲዳ።
ACT 8:15 ኢስቲካ ሳማሪያ ጋኪዲ ኣማኒዳ ኣሳይ ጺሎ ኣያና ኤካና ማላ ኣሳስ ዎሲዳ።
ACT 8:16 ጋሶይካ ሄ ዎዴ ኢስቲ ጮ ዬሱሳ ሱንꬃን ጻማቄቲዳ ኣቲን ቡሮ ጺሎ ኣያናይ ኢስታፌ ኢሳዴ ቦላካ ዎꬊቤና።
ACT 8:17 ሄሳ ጊሻስ ጴጽሮሲኔ ዮሃኒሲ ባ ኩሼ ኣሳ ቦላ ዎꬂን ኣሳይ ጺሎ ኣያና ኤኪዴስ።
ACT 8:18 ሲሞኒካ ሃዋሬቲ ኩሼ ዎꬂ ዎሲን ጺሎ ኣያናይ ኢሜቲዛይሳ ቤኢዲ ጴጽሮሳሲኔ ዮሃኒሳስ ሚሼ ኤኪ ዪዲ፥
ACT 8:19 «ታ ኢዛ ቦላ ታ ኩሼ ዎꬂዛዴይ ዉሪ ጺሎ ኣያና ኤካና ማላ ሃይሳ ማላ ጎዳቴꬅ ታስካ ኢሚቴ» ጊን፥
ACT 8:20 ጴጽሮሲ ኢዛስ ዛሪዲ፥ «ጾሳ ኢሞታ ኔ ሚሻን ሻማና ቆፒዳ ጊሻስ ኔኒ ኔ ሚሻራ ኢሲፌ ꬋያ።
ACT 8:21 ኔ ዎዚናይ ጾሳ ሲንꬃን ሱሬ ጊዶንታ ጊሻስ ኔስ ሃይሳ ሃ ኦሶዛን ጊሻይ ዎይኮ ቃዳይ ዴና።
ACT 8:22 ሃይሳ ኔ ኢታቴꬃ ጊሻስ ሃኢ ኤሌ ማሮቴꬃን ጌላ፤ ኔ ዎዚና ቆፋ ኔስ ኣቶ ጋናኮ ኔስ ጎዳ ዎሳ።
ACT 8:23 ጋሶይካ ኔኒ ኢታቴꬃን ኩሚዳይሲኔ ማካላን ቃሼታ ኡቲዳይሲ ታስ ቤቴስ» ጊዴስ።
ACT 8:24 ሲሞኒካ ዛሪዲ፥ «ኢንቴ ጊዳ ዮኦታፔ ኣይኮይካ ታ ቦላ ጋኮንታ ማላ ታስ ጎዳ ዎሲቴ» ጊዴስ።
ACT 8:25 ጴጽሮሲኔ ዮሃኒሲ ጎዳ ቃላ ማርካቲዳይሳፌኔ ቆንጪሲ ዮቲዳይሳፌ ጉዬ ዳሮ ሳማሪያ ጉታታን ሚሺራቾ ቃላ ሳባኪሼ ዬሩሳላሜ ሲሚዳ።
ACT 8:26 ጎዳ ኪታንቻይ ፒሊጶሳ «ዴንዳ! ዬሩሳላሜፔ ዱጌ ባጋራ ጌዴ ጋዛ ኤፊዛ ባዞ ኦጌራ ባ» ጊዴስ።
ACT 8:27 ኢዚካ ዴንዲ ቢዴስ፤ ሂንዴኮ ጌቴቲዛ ቶጵያፔ ጊዲዳ ካዎያ ባ ኬꬃኒኔ ባ ካዎቴꬃን ዲዛ ኡባ ሚሻ ቦላ ኣላፌቴꬃን ዎꬂዳ ኢሲ ቶጵያ ዴሬ ጉንዱላ ኣሲ ኢዛራ ጋጊዴስ፤ ሄ ኣዴዚ ጾሳስ ጎይናና ዬሩሳላሜ ቢዴስ።
ACT 8:28 ኢዚ ሄፔ ሲሚሼ ፓራ-ጋሬን ኡቲዲ ናቤ ኢሳያሳ ማጻፋ ናባቤስ።
ACT 8:29 ኣያናይ ፒሊጶሳ፥ «ባ! ጌዴ ፓራ-ጋሬዛኮ ሺቃ» ጊዴስ።
ACT 8:30 ፒሊጶሲካ ኤሶቲዲ ፓራ-ጋሬዛኮ ቢዲ ኣዴዚ ናቤ ኢሳያሳ ማጻፋ ናባቢሺን ሲዪዲ፥ «ሄሲ ኔ ናባቢዛይሲ ኔስ ጌሊዜ?» ጊዴስ።
ACT 8:31 ጉንዱላ ኣዴዚካ፥ «ታና ኤሪሲዛ ኣሲ ባይንዳ ታ ዎስታ ኤሮ?» ጊዴስ። ኢዚካ ጌዴ ኢዛ ጋሬዛን ጌሊዲ ኢዛ ኣቻን ኡታና ማላ ዎሲዴስ።
ACT 8:32 ኢዚ ናባቢዛ ማጻፋይ፥ «ኢዚ ዶርሳ ማላ ሹኬታና ላጌቲዴስ፤ ዶርሳ ላቃይ ኢስኬ ቃንጺዛይሳ ሲንꬃን ጮኡ ጊዛ ማላ ሄሳꬆካ ኢዚ ባ ዶና ፖጊቤና።
ACT 8:33 ባና ካዉሺዲ ፒርዳይ ባይንዳዴ ጊዲዴስ። ኢዛ ሼምፖይ ቢታ ቦላፌ ዲጌቲዴስ። ኢዛ ዬሌታ ጊሻስ ሃሳያና ዳንዳይዛይ ኦኔ?» ጌስ።
ACT 8:34 ጉንዱላ ኣዴዚካ ዛሪዲ ፒሊጶሳ፥ «ናቤዚ ሃይሳ ኦና ጊሻስ ጊዜ? ባ ጊሻስ ጊዜዬ? ዎይኮ ሃራ ኣሳ ጊሻስ ጊዜ? ሃያና፥ ታስ ዮታርኪ!» ጊዴስ።
ACT 8:35 ፒሊጶሲካ ባ ዶና ዶይዲ ሄ ማጻፋፔ ዶሚዲ ዬሱሳ ሚሺራቾ ቃላ ጊሻስ ማርካቲዴስ።
ACT 8:36 ኢስቲ ኢሲፌ ቢሼ ሃꬂ ዲዛሶ ጋኪዳ፤ ኣዴዚካ፥ «ሄኮ ሃꬂ ሃይሳን ዴስ፤ ሂስቲን ታ ጻማቄቶንታ ማላ ታና ዲጊዛይ ኣዜ?» ጊዴስ።
ACT 8:37 ፒሊጶሲካ፥ «ኔ ኩሜꬃ ዎዚናፔ ኣማኒኮ ጻማቄታና ዳንዳያሳ» ጊዴስ። ኣዴዚካ፥ «ዬሱስ ኪርስቶሲ ጾሳ ና ጊዲዳይሳ ታ ኣማናይስ» ጊዴስ።
ACT 8:38 ኣዴዚ ፓራ-ጋሬዚ ኤቃና ማላ ኣዛዚን ናምኣይ ኢሲፌ ሃꬃን ዎꬊን ፒሊጶሲ ኣዴዛ ጻማቂዴስ።
ACT 8:39 ኢስቲ ሃꬃፌ ኬዚሺን ጾሳ ኣያናይ ፒሊጶሳ ዴንꬂ ኤፊዴስ፤ ኣዴዚ ሄሳፌ ጉዬ ኢዛ ቤዪቤና፤ ጊዶ ኣቲን ኡፋይሳን ባ ኦጌ ቢዴስ።
ACT 8:40 ሄሳፌ ጉዬ ፒሊጶሲ ኣዛጾኔ ጌቴቲዛሶን ቤቲዴስ፤ ቂሳሪያ ጌቴቲዛሶ ጋካናስ ኢዚ ቢዛ ኦጌ ቦላ ካታማ ኡባን ሚሺራቾ ቃላ ሳባኪዴስ።
ACT 9:1 ሳኦሊ ጎዳ ኣማኒዛ ኣሳ ዎꬋናስ ጬቄቲሼ ቄሴታ ሃላቃኮ ቢዴስ።
ACT 9:2 ጎዳ ኦጌ ካሊዛይታ ማጫሳታኔ ኣዴታ ዴሚ ቃቺዲ ዬሩሳላሜ ኤኪ ያናስ ዳማስቆ ጌቴቲዛሶን ዲዛ ኣይሁዳታ ዎሳ ኬꬃስ ዳብዳቤ ጻፋና ማላ ቄሴታ ሃላቃ ዎሲዴስ።
ACT 9:3 ዳማስቆ ጋካና ማቲሺን ቆፖንታ ሳሎፔ ፖኦይ ኢዛ ዩሾን ፖልኡ ጊዴስ።
ACT 9:4 ኢዚካ ሄራካ ቢታ ቦላ ኩንዲዲ ሳሎፔ፥ «ሳኦሌ፥ ሳኦሌ፥ ታና ኣዛስ ጎዳይ?» ጊዛ ቃላ ሲዪዴስ።
ACT 9:5 ሳኦሊካ፥ «ጎዶ! ኔ ኦኔ?» ጊዴስ። ኢዚካ ኢዛስ፥ «ታኒ ኔ ጎዴꬂዛ ዬሱሳኮ!
ACT 9:6 ኔ ሃኢ ዴንዳዳ ጌዴ ካታማ ጌላ፤ ኔ ኦꬃናስ ቤሲዛዝ ኔስ ታ ዮታና» ጊዴስ።
ACT 9:7 ሳኦሌራ ኢሲፌ ቢዛ ኣሳቲ ቃላ ጊሪስ ሲሳፌ ኣቲን ኦናካ ቤኦንታ ጊሻስ ባ ዶና ኦይኪ ኤቂዳ።
ACT 9:8 ሳኦሊ ባ ኩንዲዳሶሆፔ ዴንዲዲ ኣይፌ ዶዪ ጼሊዛ ዎዴ ኣይኮካ ዴማናስ ዳንዳይቤና፤ ሄሳ ጊሻስ ኢዛራ ዲዛ ኣሳቲ ኢዛ ኩሼ ኦይኪዲ ካሌꬂ ኤኪዲ ዳማስቆ ኤፊዳ።
ACT 9:9 ሄꬑ ጋላስ ጋካናስ ቆቂዲ ካꬅ ሃꬅ ቤዪቤና።
ACT 9:10 ዳማስቆን ኢሲ ሃናኒያ ጌቴቲዛ ኣማኒዛዴይ ዴስ፤ ኢዛስ ጎዳይ ኣጁታን፥ «ሃናኒያ» ጊዲ ጼይጊዴስ፤ ኢዚካ፥ «ዬ ጎዶ!» ጊዴስ።
ACT 9:11 ጎዳይካ ኢዛ፥ «ዴንዳ! ሱሬ ጌቴቲዛ ኦጌይራ ዩሁዳ ጌቴቲዛሶ ባ። ሄን ሳኦሌ ጌቴቲዛ ኢሲ ጻርሴሴ ኣሲ ዎሲሼ ዴስ፤ ኔ ኢዛ ኮያ ዴማ።
ACT 9:12 ጋሶይካ ሃናኒያ ጌቴቲዛይሲ ሳኦሊ ዲዛሶ ዪዲ ኢዚ ጼላና ማላ ኢዛ ቦላ ባ ኩሼ ዎꬂሺን ኣጁታን ቤዪዴስ።»
ACT 9:13 ሃናኒያይካ ዛሪዲ፥ «ጎዶ! ሃይሳዴይ ዬሩሳላሜን ዲዛ ጌሻታ ቦላ ኣይ ማላ ኢታ ሜቶ ጋꬂዳኮ ታ ዳሮ ኣሳፔ ሲያዲስ።
ACT 9:14 ኢዚ ሃ ዪዳይ ኔ ሱንꬃ ጼይጊዛይታ ኡባ ቃቻናስ ቄሴታ ሃላቃታፔ ጎዳቴꬅ ኤኪዲኮ» ጊዴስ።
ACT 9:15 ጎዳይካ ኢዛስ፥ «ኔ ባ! ሃይሲ ኣዴዚ ኣይዛቤታ ሲንꬃኒኔ ካዎታ ሲንꬃን ሄሳꬆካ ኢስራኤሌ ዴሬ ሲንꬃን ታ ሱንꬅ ቶካና ማላ ኢዚ ታስ ዶሬቲዳይሳ።
ACT 9:16 ኢዚ ታ ሱንꬃ ጊሻስ ኣይ ማላ ዋዬ ቤያናኮ ታ ኢዛ ቤሳና» ጊዴስ።
ACT 9:17 ሃናኒያይ ቢዲ ኢዛስ ዮቴቲዳሶ ጌሊዴስ። ሳኦሌ ቦላ ባ ኩሼ ዎꬂዲ፥ «ታ ኢሻ ሳኦሌ ኔ ሃ ዪሺን ኔስ ኦጌ ቦላ ቆንጪዳ ጎዳ ዬሱሲ ኔ ኣይፌይ ጼላና ማላኔ ኔኒ ጺሎ ኣያናን ኩማና ማላ ታና ኔኮ ኪቲዴስ» ጊዴስ።
ACT 9:18 ሄራካ ሳኦሌ ኣይፌፔ ፖቆ ማላይ ፖቄቲ ዎꬊን ኢዚ ጼላና ዳንዳይዴሲኔ ዴንዲዲ ጻማቄቲዴስ።
ACT 9:19 ካꬂካ ሚዲ ሚኒዴስ፤ ኡንዴና ዎዴ ኣማኒዛይታራ ዳማስቆን ጋምኢዴስ።
ACT 9:20 ሄራካ ዬሱሲ ጾሳ ና ጊዲዳይሳ ኣይሁዳታ ዎሳ ኬꬃታን ታማርሶ ኦይኪዴስ።
ACT 9:21 ሲዪዳ ኣሳይ ዉሪ፥ «ሃይሲ ዬሩሳላሜን ሃ ሱንꬃ ጼይጊዛይታ ꬋይሲዛ ኣዴዛ ጊዴኔ? ቃሴ ኢዚ ሃ ዪዳይ ሄ ኣሳታ ቃቺ ኤኪ ቄሴታ ሃላቃታኮ ኤፋናስ ዴኔ?» ጊሼ ማላሌቲዳ።
ACT 9:22 ሳኦሊ ካሴፔ ሚኒ ሚኒ ቢዴስ፤ ዳማስቆን ዲዛ ኣይሁዳታስ ዬሱሲ ኢዚ ጾሲ ኪቲዳዴ ጊዲዳይሳ ኣማንꬂሼ ኣሳ ዶና ኦይꬂዴስ።
ACT 9:23 ዳሮ ጋላሳታፔ ጉዬ ኣይሁዳቲ ሳኦሌ ዎꬋናስ ዱላቲዳ።
ACT 9:24 ኢዚካ ኢስታ ቆፋ ኤሪዴስ፤ ኢስቲካ ኢዛ ዎꬋናስ ካታማ ጌልꬂዛ ኦጌን ጋላሲኔ ቃማ ናጊዳ።
ACT 9:25 ኣማኒዛይቲ ጊዲኮ ኢዛ ጊዶꬅ ካታማ ዩሾን ዲዛ ማስኮቴዛራ ኬሼን ዱጌ ዎꬂዳ።
ACT 9:26 ሳኦሊ ዬሩሳላሜ ዪዲ ኣማኒዛይታራ ዋላኬታና ኮዪን ኢዚ ቱሙ ኣማኒዛዴ ጊዲዳይሳ ኢስቲ ኣማኔቶንታ ጊሻስ ኢዛስ ባቢዳ።
ACT 9:27 ጊዶ ኣቲን ባርናባሲ ኢዛ ሃዋሬታኮ ኤፊን ሳኦሊ ኢዚ ዳማስቆ ኦጌ ቦላ ጎዳ ዎስቲ ቤኢዳኮ፥ ጎዳይካ ኢዛስ ኣይ ዮቲዳኮኔ ዳማስቆን ዲሼ ኢዚ ኣይ ማላ ጻላቴꬃራ ዬሱሳ ሱንꬃን ሳባኪዳኮ ኢስታስ ዮቲዴስ።
ACT 9:28 ሄሳ ጊሻስ ሳኦሊ ኢስታራ ዲዴስ፤ ዬሩሳላሜን ዩዪ ዩዪ ኣሳስ ባቦንታ ጎዳ ሱንꬃን ታማርሲዴስ።
ACT 9:29 ጊሪኬ ዴሬፔ ዪዳ ኣይሁዳታራ ሃሳይሼ ፓላሜቲዴስ፤ ጊዶ ኣቲን ኣሳይካ ኢዛ ዎꬋናስ ኮዪዴስ።
ACT 9:30 ኣማኒዛይቲ ሄሳ ኤሪዲ ዱጌ ቂሳሪያ ጌቴቲዛሶ ዎꬂዲ ጻርሴሴ ዬዲዳ።
ACT 9:31 ሄ ዎዴ ዩሁዳኒኔ ጋሊላን፥ ሳማሪያንካ ዲዛ ኣማኒዛይቲ ሳሮን ዲዲ ካሴፔ ሚኒዳ፤ ቃሴካ ጾሳ ያሻቴꬃን ሲሜሬቲሼ ጺሎ ኣያናን ሚኔቲዳኔ ካሴፔ ቆዳን ዳሪ ዳሪ ቢዳ።
ACT 9:32 ጴጽሮሲ ዴሬፔ ዴሬን ዩዪሼ ሊዳ ካታማን ዲዛ ኣማኒዛይታ ቤያናስ ዱጌ ዎꬊዴስ።
ACT 9:33 ሄን ኤኒያ ጌቴቲዛይሳ ኦስፑን ላይꬅ ሂጻን ቃሼቲ ኡቲዳ ኢሲ ጉንዳ ኣስ ዴሚዴስ።
ACT 9:34 ጴጽሮሲካ፥ «ሃይሶ ኤኒያ! ዬሱስ ኪርስቶሲ ኔና ፓꬃና፤ ዴንዳዳ ኔ ሂጻ ዴንꬃ!» ጊዴስ፤ ኤኒያይ ሄራካ ፑሱኩ ጊ ዴንዲዴስ።
ACT 9:35 ሊዳኒኔ ሳሮናን ዲዛ ኣሳይ ዉሪ ኢዛ ቤኢዲ ጎዳን ኣማኒዴስ።
ACT 9:36 ኢዮጴ ጌቴቲዛሶን ጻቢታ ጌቴቲዛ ኢሲ ኣማኒዛራ ዳዉስ፤ ኢዚ ሱንꬃ ቢርሼꬂ ጊሪኬ ቃላራ፥ «ዶርቃ» ጌቴቴስ፤ ኢዛ ኡባ ዎዴ ሎኦ ኦሶ ሚና ኦꬃሼኔ ማንቆታ ማዳሼ ዳዉስ።
ACT 9:37 ሄ ዎዴ ኢዛ ሃርጋዳ ሃይቂን ኣሳይ ኣሃዛ ሜጪ ፑዴ ፖቄን ኬሲ ዎꬂዴስ።
ACT 9:38 ሊዳይ ኢዮጴስ ማታ ጊዲዳ ጊሻስ ኣማኒዛይቲ ጴጽሮሲ ሊዳን ዲዛይሳ ሲዪዲ ናምኡ ኣሳታ ኪቲዲ፥ «ኤሌ ሃ ያርኪ!» ጊ ዎሲዳ።
ACT 9:39 ጴጽሮሲካ ዴንዲዲ ኪቴቲዳ ኣሳታራ ጋኪዳ ዎዴ ኢዛ ፑዴ ፖቄ ቦላ ኬሲዳ፤ ኣምኤቲካ ዉሪ ኢዛ ዩዪ ኣꬊ ኤቂዲ ዶርቃይ ፓጻ ዳሼ ኢስታራ ኦꬂዳ ቃሚሳታኔ ማይኦታ ቤሲሼ ዬኪዳ።
ACT 9:40 ጴጽሮሲካ ኡባ ኣሳ ኪፊሌዛፔ ኬሲዲ ጉልባቲ ዎሲዴስ። ኣሃኮ ሲሚዲ፥ «ሃኔ ጻቢታ ዴንዳ!» ጊዴስ። ኢዛካ ባ ኣይፌ ዶያዳ ጼላዱስ፤ ጴጽሮሳካ ቤያዳ ዴንዳ ኡታዱስ።
ACT 9:41 ኢዚካ ኢዚ ኩሼ ኦይኪ ዴንꬂዴስ። ኣማኒዛይታኔ ኣምኤታ ጼይጊዲ ኢዞ ኢስታስ ፓꬂ ኢሚዴስ።
ACT 9:42 ሄ ሃኖይ ኩሜꬃ ኢዮጴን ኤሬቲዴሲኔ ዳሮ ኣሳይካ ጎዳ ኣማኒዴስ።
ACT 9:43 ጴጽሮሲካ ኢሲ ሲሞና ጌቴቲዛ ጋልባ ቃጪዛዴራ ኢዮጴን ዳሮ ዎዴ ዴኢዴስ።
ACT 10:1 ቂሳሪያ ጌቴቲዛ ዴሬን፥ «ጻላኔ ዎታዳራታ» ጌቴቲዛ ኦላ ኣሳ ጋርሳን ማቶ ሃላቃ ቆርኖሎሳ ጌቴቲዛይሲ ዴስ።
ACT 10:2 ኢዚካ ባ ኬꬃ ኣሳ ኩሜꬃራ ኣያና ሃኖን ሚኖኔ ጾስ ባቢዛዴ፤ ማንቆታስካ ዳሮ ሙጹዋታ ኢሚዛዴኔ ዳሮ ዎዴ ጾስ ዎሲዛ ኣሳ።
ACT 10:3 ኢሲ ጋላስ ጋላሳፌ ኡዱፉን ሳቴ ቦላ ጾሳ ኪታንቻይ ኢዛስ ኣጁታን ቤቲዲ ኢዛኮ ዪዲ፥ «ቆርኖሎሳ!» ጊ ጼይጊሺን ቆንጬን ቤዪዴስ።
ACT 10:4 ቆርኖሎሲካ ዳጋማራ ቲሺ ሂስቲ ጼሊሼ፥ «ጎዶ ሃይሲ ኣዜ?» ጊዴስ። ኪታንቻይካ ዛሪዲ፥ «ኔ ዎሳይኔ ኔ ሙጹዋታይ ቆፌታናስ ፑዴ ጾሳ ሲንꬅ ጋኪዴስ።
ACT 10:5 ኔ ሃኢ ኣስ ኢዮጴ ዬዳዳ ጴጽሮሳ ጌቴቲዛ ሲሞና ጼይጊሳ።
ACT 10:6 ኢዚካ ኣባ ማታን ዲዛ ጋልባ ቃጪዛ ሲሞናሶን ኢማꬃቴꬅ ዴስ» ጊዴስ።
ACT 10:7 ቆርኖሎሳ ሃሳይሲዳ ኪታንቻይ ኢዛፔ ሻኬቲዲ ቢዳፔ ጉዬ ባ ኣሽካራታፔ ናምኣታ ቃሴ ኣያና ዮኦስ ሚኖኔ ኢዛስ ዳሮ ኣማኔቲዛ ዎታዳራታፔ ኢሳ ጼይጊሲዲ፥
ACT 10:8 ኢዚ ቤኢዳይሳ ኡባ ኢስታስ ዮቲዲ ኢዮጴ ኪቲዴስ።
ACT 10:9 ኪቴቲዳ ኣሳቲ ዎንቴꬃ ጋላስ ጌዴ ካታማይኮ ማቲሺን ጴጽሮሲ ኡሱፑን ሳቴ ቦላ ዎሳና ፑዴ ፖቄ ቦላ ኬዚዴስ።
ACT 10:10 ሄ ዎዴ ኢዚ ጋፊዳ ጊሻስ ቁማይ ቡሮ ካጺሺን ꬊስኮ ማላ ሊጲጲ ሂስቲን ኣጁታራ ሳሎይ ዶዬቲን ኢሲ ጊታ ጻጼቲዳ ማይኦ ማላይ ኦይዱ ባጋራ ኦይኬቲዲ ዱጌ ቢታን ዎꬊሺን ቤዪዴስ።
ACT 10:12 ሄ ማይኦዛ ቦላ ኦይዱ ቶሆይ ዲዛ ዱማ ዱማ ዶኣቲ ቢታራ ጎሼቲዛ ሜꬌቴꬃቲኔ ሳሎ ቦላ ፒራꬊዛ ካፎቲ ዴቴስ።
ACT 10:13 ሄ ዎዴ፥ «ጴጽሮሳ ዴንዳ ሃይታ ሹካዳ ማ!» ጊዛ ቃላ ሲዪዴስ።
ACT 10:14 ጴጽሮሲ ቃሴ፥ «ጎዶ ሃይሲ ሃኔና! ጌሽ ጊዶንታይሳ ዎይኮ ቱና ሚሽ ታ ሙሌራካ ማ ኤሪኬ» ጊዴስ።
ACT 10:15 ሄ ካሴ ቃላይ ቃሴካ ናምኣንꬆ ኢዛኮ ዪዲ፥ «ጾሲ ጌሺዳይሳ ኔ ቱና ማላ ቆዶፓ» ጊዴስ።
ACT 10:16 ሄሲካ ሄꬑቶ ሺሬቲ ሺሬቲ ኢዛኮ ዪዳፔ ጉዬ ማይኦ ሚሳቲዛይሲ ሄራካ ፑዴ ሳሎ ቢዴስ።
ACT 10:17 ጴጽሮሲካ ባ ቤኢዳ ኣጁታዛ ቢርሼꬃ ኤራናስ ዳሮ ሜቶቲዲ ኬሂ ቆፋ ቦላ ዲሺን ቆርኖሎሲ ኪቲዳ ኣሳቲ ሲሞና ኬꬄ ኮዪሼ ዴሚዲ ፔንጌን ኤቂዳ።
ACT 10:18 ቃላ ꬎቁ ሂስቲዲ፥ «ጴጽሮሳ ጌቴቲዛ ሲሞኒ ዲዛሶይ ሃይሳን ኣዋኔ?» ጊ ኦይቺዳ።
ACT 10:19 ጴጽሮሲ ባ ቤኢዳይሳ ኬሂ ቆፒሺን ጺሎ ኣያናይ ኢዛ፥ «ሄኮ ሄꬑ ኣሳቲ ኔና ኮዬቴስ፤ ዴንዳ! ዱጌ ዎꬋዳ ኢስታ ዬዲዳይ ታና ጊዲዳ ጊሻስ ሲꬌይ ባይንዳ ኢስታራ ባ» ጊዴስ።
ACT 10:21 ጴጽሮሲካ ዱጌ ዎꬊዲ፥ «ሄኮ ኢንቴ ኮይዛዴይ ታናኮ! ኢንቴ ዪዳይ ኣዛሴ?» ጊዴስ።
ACT 10:22 ኢስቲካ ኢዛስ፥ «ኑኒ ማቶ ሃላቃ ቆርኖሎሳ ማታፔ ዪዶስ፤ ኢዚካ ጾሳስ ባቢዛ ጺሎ ኣሳኔ ኣይሁዳ ኣሳ ኡባ ማታን ዳሮ ቦንቼቲዳ ኣሳ፤ ኔካ ኢዛ ሶ ባና ማላኔ ኔ ጊዛይሳ ኢዚ ሲያና ማላ ጌሻ ኪታንቻይ ኢዛስ ዮቲዴስ» ጊዳ።
ACT 10:23 ጴጽሮሲካ ኣሳታ ባ ዲዛሶን ሞኪ ኤኪዲ ኣይሲዴስ። ጴጽሮሲካ ዎንቴꬃ ጋላስ ዴንዲዲ ኢስታራ ቢዴስ፤ ኢዮጴፌ ዪዳ ኢሲ ኢሲ ኣማኒዛ ኣሳቲ ኢዛራ ኢሲፌ ቢዳ።
ACT 10:24 ቆርኖሎሲካ ባ ዳቦታኔ ማታ ላጌታ ባ ሶን ሺሺዲ ናጎ ቦላ ዲሺን ኢዚ ናምኣንꬆ ጋላስ ቂሳሪያ ጋኪዴስ።
ACT 10:25 ጴጽሮሲካ ቆርኖሎሳ ኬꬄ ጌሊን ቆርኖሎሲ ኢዛ ሞኪ ኤኪዲ ኢዛ ቶሆ ቦላ ሆኪ ጎይኒዴስ።
ACT 10:26 ጊዶ ኣቲን ጴጽሮሲ፥ «ታኒካ ኔ ማላ ኣሳኮ! ዴንዳ» ጊዲ ዴንꬂዴስ።
ACT 10:27 ጴጽሮሲካ ኢዛ ሃሳይሲሼ ኢዛራ ሶ ጌሊሺን ዳሮ ዴሬይ ሺቂ ኡቲዳይሳ ቤዪዴስ።
ACT 10:28 ኢዚካ ኢስታስ፥ «ኣይሁዳ ኣሲ ሃራ ዴሬ ኣሳራ ጋጎንታ ማላ ዎይኮ ሃራ ዴሬ ኣስ ጊዲዳይታ ማታ ሺቆንታ ማላ ኑ ዎጋይ ዲጊዛይሳ ኢንቴ ኤሬታ፤ ጊዶ ኣቲን ታ ኦናካ ቱና ዎይኮ ኢዚ ጌሽ ዴና ጎንታ ማላ ጾሲ ታስ ቆንጪሲዴስ።
ACT 10:29 ሄሳ ጊሻስ ታ ጼይጌቲዳ ዎዴ ሄኮ ሲꬎንታ ያዲስ፤ ሂስቲን ኢንቴ ታና ኣዛስ ጼይጊዳኮ ኤራና ኮያይስ» ጊዴስ።
ACT 10:30 ቆርኖሎሲካ፥ «ኦይዱ ጋላሳፌ ካሴ ሊኬ ሃኒ ዎዴ ጋላሳፌ ኡዱፉን ሳቴን ታኒ ታሶን ዎሲሺን ቆፖንታ ቦꬃ ማይኦ ማይኢዳ ኣሲ ዪዲ ታ ሲንꬃን ኤቂዲ
ACT 10:31 ታና፥ ‹ቆርኖሎሳ! ኔ ዎሳይ ሲዬቲዴስ፤ ኔ ማንቆታስ ኢሚዛ ሙጹዋታይ ጾሳ ሲንꬅ ጋኪዴስ።
ACT 10:32 ሄሳ ጊሻስ ኢዮጴ ካታማ ኣስ ኪታዳ ጴጽሮሳ ጌቴቲዛ ሲሞና ኤሂሳ፤ ኢዚ ኣባ ኣቻን ጋልባ ቃጪዛ ሲሞና ኬꬃን ኢማꬃቴꬅ ዴስ› ጊዴስ።
ACT 10:33 ታኒካ ሄራካ ኔኮ ኣስ ኪታዲስ፤ ኔ ዩሳይካ ሎኦ፤ ሂስቲኮ ጎዳይ ኔና ኣዛዚዳይሳ ኔ ኑስ ዮቲኮ ጾሲ ዮቲዳይሳ ኔፔ ሲያናስ ኑ ዉሪካ ሃይሳን ጾሳ ሲንꬃን ዶስ» ጊዴስ።
ACT 10:34 ጴጽሮሲካ፥ «ጾሲ ኦናካ ሻኪ ማዶንታይሳ ቱማፔ ታ ኤራዲስ።
ACT 10:35 ጊዶ ኣቲን ጾሳስ ባቢዛይታኔ ጺሎ ኦꬂዛይታ ኡባ ኦና ባጋፌ ጊዲንካ ኢዚ ኤኬስ።
ACT 10:36 ጾሲ ኡባስ ጎዳ ጊዲዳ ዬሱስ ኪርስቶሳ ባጋራ ኢስራኤሌ ኣሳስ ኪቲዳ ሳሮቴꬃ ሚሺራቾ ኪታይ ሃይሳ።
ACT 10:37 ዮሃኒሲ ጺንቃታ ጊሻስ ሳባኪዳፔ ጉዬ ጋሊላፔ ዶሚዲ ኩሜꬃ ዩሁዳን ሃኒዳይሳ ኢንቴ ኤሬታ።
ACT 10:38 ጾሲ ናዚሬቴ ዬሱሳ ጺሎ ኣያናኒኔ ዎልቃን ቲይዴስ፤ ኢዚካ ጾሲ ኢዛራ ዲዛ ጊሻስ ባ ጋኪዳሶን ኡባን ሎኦ ኦꬂሼ ጻላኤ ጎዳቴꬃ ጊዶን ዲዛይታ ኡባ ፓꬂዴስ።
ACT 10:39 «ኢዚ ኣይሁዳታ ዴሬኒኔ ዬሩሳላሜ ካታማን ኦꬂዳይሳ ኡባስ ኑ ማርካ፤ ቃሴካ ኣሳይ ኢዛ ሚꬃ ቦላ ካቂ ዎꬊዴስ።
ACT 10:40 ጊዶ ኣቲን ጾሲ ኢዛ ሄꬓንꬆ ጋላስ ሃይቆፔ ዴንꬂዴሲኔ ኣሲ ኢዛ ቤያና ማላ ኦꬂዴስ።
ACT 10:41 ኢዚ ቆንጪዳይ ኣሳ ኡባስ ጊዶንታ ሃይቆፔ ዴንዲን ኢዛራ ሚዳይታሲኔ ኢዛራ ኡዪዳይታስ ጾሲ ኮይሮ ዶሪዳ ኑስ ኢዛ ማርካታሳ።
ACT 10:42 ኢዚ ኑ ዴሬዛስ ሳባካና ማላኔ ሃይቂዳይታ ቦላኔ ፓጻ ዲዛይታ ቦላ ፒርዳናስ ጾሲ ሹሚዳይ ኢዛ ጊዲዳይሳ ኑ ማርካታና ማላ ኑና ኣዛዚዴስ።
ACT 10:43 ኢዛ ኣማኒዳዴይ ዉሪ ኢዛ ሱንꬃን ናጋራ ማሬቲዲ ጌያናይሳ ናቤቲ ኢዛስ ማርካቴቴስ» ጊ ዮቶ ዶሚዴስ።
ACT 10:44 ጴጽሮሲ ሄሳ ሃሳይሺን ቃላ ሲዪዛይታ ኡባ ቦላ ጺሎ ኣያናይ ዎꬊዴስ።
ACT 10:45 ቃጻሬቲዳይታ ባጋፌ ጴጽሮሳራ ዪዳ ኣማኒዛይቲ ጺሎ ኣያና ኢሞቴꬂ ኣይዛቤታ ቦላ ዎꬊሺን ቤኢዲ ማላሌቲዳ።
ACT 10:46 ሄሲካ ኢስቲ ዱማ ቃላን ሃሳይሺኒኔ ጾሳ ጋላቲሺን ሲዪዳ ጊሻሳ። ሄ ዎዴ ጴጽሮሲ፥
ACT 10:47 «ሃይቲ ኣሳቲ ኑ ማላ ጺሎ ኣያና ኤኪዳ ጊሻስ ኢስቲ ሃꬃን ጻማቄቶንታ ማላ ኢስታ ዲጋናይ ኦኔ?» ጊዴስ።
ACT 10:48 ሄሳ ጊሻስ ዬሱስ ኪርስቶሳ ሱንꬃን ጻማቄታና ማላ ኣዛዚዴስ፤ ሄሳፌ ጉዬ ጴጽሮሲ ጉꬃ ዎዴ ኢስታራ ዳና ማላ ዎሲዳ።
ACT 11:1 ሃዋሬቲኔ ዩሁዳን ዲዛ ኣማኒዛይቲ ኣይዛቤቲ ጾሳ ቃላ ኤኪዳይሳ ሲዪዳ።
ACT 11:2 ሄሳ ጊሻስ ጴጽሮሲ ፑዴ ዬሩሳላሜ ኬዚን ቃጻሬቲዳ ኣይሁዳፔ ኣማኒዛይቲ ጴጽሮሳ፥
ACT 11:3 «ኔ ቃጻሬቶንታ ኣሳታ ኬꬅ ጌላዳ ኢስታራ ካꬅ ማዳሳ» ጊዲ ዋላሲዳ።
ACT 11:4 ጴጽሮሲ ቃሴ ኢስታስ ጌላና ማላ ማራራ ሂዝጊ ዮቲዴስ።
ACT 11:5 «ታኒ ኢዮጴ ካታማን ዎሲሺን ꬊስኮ ማላ ታና ሊጲጲ ሂስቲዲ ኣጁታን ጊታ ማይኦ ሚሳቲዛ ሚሺ ኦይዱ ባጋራ ኦይኬቲዲ ሳሎፔ ታ ዲዛሶ ዎꬊሺን ቤያዲስ።
ACT 11:6 ታ ቲሺ ሂስታ ጼሊሺን ኦይዱ ቶሆራ ዲዛ ሜሄታ፥ ዎራ ዶኣታ፥ ቢታ ቦላ ጎሼቲዛ ሜꬌቴꬃታኔ ሳሎ ቦላ ፒራꬊዛ ካፎታ ቤያዲስ።
ACT 11:7 ሄራካ ታና፥ ‹ጴጽሮሳ ዴንዳ! ሃይሳ ሹካዳ ማ› ጊዛ ቃላ ሲያዲስ።
ACT 11:8 «ታኒካ፥ ‹ጎዶ ሄሲ ሃኔና፤ ታኒ ቱና ዎይኮ ጌሽ ጊዶንታይሳ ሙሌካ ታ ዶናኮ ሺሻ ኤሪኬ› ጋዲስ።
ACT 11:9 «ሄ ካሴ ቃላይ ቃሴካ፥ ‹ጾሲ ጌሺዳይሳ ኔ ቱኒሶፓ› ጊዲ ሳሎፔ ታስ ዮቲዴስ።
ACT 11:10 ሄሲካ ሄꬑቶ ሺሬቲ ሺሬቲ ዮቴቲዳፔ ጉዬ ዉሪካ ሲሚዲ ፑዴ ሳሎ ቢዴስ።
ACT 11:11 «ቂሳሪያፔ ታኮ ኪቴቲዳ ሄꬑ ኣሳቲ ሄራካ ሄ ሳቴዪን ዪ ጋኪዲ ታ ዲዛ ኬꬃ ካሬን ኤቂዳ።
ACT 11:12 ታ ኣይኔ ሲꬎንታ ኢስታራ ባና ማላ ጺሎ ኣያናይ ታስ ዮቲዴስ። ሄ ኡሱፑን ኢሻቲ ታናራ ኢሲፌ ቢዲ ኣዴዛ ኬꬄ ጌሊዶስ።
ACT 11:13 ኢዚካ ጾሳ ኪታንቻይ ኢዛ ኬꬃን ኤቂዲ ኢዛስ ቤቲዳይሳ፥ ‹ኢዮጴ ጌቴቲዛሶ ኣስ ዬዳዳ ጴጽሮሳ ጌቴቲዛ ሲሞና ጼይጊሳ።
ACT 11:14 ኢዚ ዪዲ ኔናኔ ኔሶ ኣሳ ኡባ ኣሻና ቃላ ዮታና› ጊዳይሳ ኑስ ዮቲዴስ።
ACT 11:15 «ታኒካ ባዳ ቡሮ ዮቶ ኦይኪሺን ኮይሮ ጺሎ ኣያናይ ካሴ ኑ ቦላ ዎꬎይሳꬆ ኢስታ ቦላካ ዎꬊዴስ።
ACT 11:16 ካሴ ጎዳይ ኑስ ዮቲሼ፥ ‹ዮሃኒሲ ሃꬃን ጻማቂዴስ፤ ኢንቴ ጊዲኮ ጺሎ ኣያናን ጻማቄታና› ጊዳ ቃላይ ሄራካ ታስ ቆፌቲዴስ።
ACT 11:17 ሄሳ ጊሻስ ኑኒ ጎዳ ዬሱስ ኪርስቶሳ ኣማኒሺን ኑስ ኢሚዳ ጺሎ ኣያና ጾሲ ኢስታስ ኢሚኮ ሂስቲን ጾሳራ ኤቄታናስ ታኒ ኦኔ?» ጊዴስ።
ACT 11:18 ኢስቲ ሄሳ ሲዪዳ ዎዴ ኢስታስ ጊዛዚ ꬋዪን ጮኡ ጊ ሲሚዲ፥ «ሃይሳ ማላ ጊዲኮ ኣይዛቤቲካ ሃ ኦራꬃ ዴኦኮ ያና ማላ ጾሲ ኣሳስ ማሮቴꬅ ኢሚዴስ ጉሳ» ጊዲ ጾሳ ጋላቲዳ።
ACT 11:19 ኢስቲፋኖሴ ቦላ ዴንዲዳ ጎዴቴꬃ ጋሶን ላሌቲዳ ኣማኒዛ ኣሳይ ቃላ ኣይሁዳታስ ጻላላ ዮቲሼ ፒንቄ፥ ቆጲሮሴኔ ኣንጾኪያ ጌቴቲዛሶ ጋካናስ ካንꬂ ቢዳ።
ACT 11:20 ቆጲሮሴፔኔ ቃሬናፔ ዪዳ ኢሲ ኢሲ ኣሳቲ ኣንጾኪያ ቢዲ ጊሪኬታስካ ጎዳ ዬሱሳ ሚሺራቾ ቃላ ዮቲዳ።
ACT 11:21 ጎዳ ማዶይካ ኢስታራ ዴስ፤ ቆዳን ኬሂ ዳሮ ኣሳይ ኣማኒዲ ጎዳኮ ሲሚዴስ።
ACT 11:22 ሄሳ ዎሬይካ ዬሩሳላሜን ዲዛ ዎሳ ኬꬃ ኣሳ ሃይꬃን ዎꬊን ዎሳ ኬꬃያ ባርናባሳ ኣንጾኪያ ዬዳዱስ።
ACT 11:23 ኢዚካ ሄ ቢ ጋኪዲ ጾሲ ባ ኣꬎ ኪያቴꬅ ዴራስ ኢሚዳይሳ ቤኢዲ ኡፋዬቲዴሲኔ ኣሳይ ዉሪካ ኩሜꬃ ዎዚናፔ ጎዳ ኣማኖን ሚናና ማላ ዞሪዴስ።
ACT 11:24 ኢዚካ ጺሎ ኣያናኒኔ ኣማኖን ኩሚዳ ሎኦ ኣሳ። ዳሮ ዴሬይ ጎዳ ኣማኒዲ ጉጄቲዴስ።
ACT 11:25 ሄሳፌ ካሊዲ ባርናባሲ ሳኦሌ ኮያና ጻርሴሴ ቢዴስ።
ACT 11:26 ኢዛ ዴሚዲ ኣንጾኪያ ኤኪ ዪዴስ፤ ናምኣይካ ሄን ዲዛ ዎሳ ኬꬃ ኣሳራ ጊዲዲ ላይꬅ ኩሜꬅ ዳሮ ዴሬ ታማርሲዳ። ሄን ኣንጾኪያን ኣማኒዛይቲ ኮይሮ፥ «ኪርሳኔ» ጌቴቲ ጼይጌቲዳ።
ACT 11:27 ሄ ዎዴ ኢሲ ኢሲ ናቤቲ ዬሩሳላሜፔ ዱጌ ኣንጾኪያ ዎꬊዳ።
ACT 11:28 ኢስታ ጊዶፌ ኢሶይ ኣጋቦሳ ጌቴቲዛይሲ ዴንዲ ኤቂዲ ጺሎ ኣያናይ ኢዛ ቤሲን ኣላሜ ኡባን ጊታ ኮሻይ ዴንዳናይሳ ዮቲዴስ። ሄሲካ ኦሮሜ ካዎ ቃላዎዶሳ ቄሳሬ ጌቴቲዛይሳ ካዎቴꬃ ዎዴ ፖሌቲዴስ።
ACT 11:29 ኣማኒዛይቲ ዉሪ ኢሶይ ኢሶይ ባ ዎልቃ ኬና ሚሼ ኬሴቲዲ ዩሁዳን ዲዛ ኣማኒዛ ኢሻታ ማዳናስ ቃቺዳ።
ACT 11:30 ማዶ ሚሽ ኬሴቲዲ ባርናባሳኔ ሳኦሌ ኩሼን ጪማታስ ጋꬃና ማላ ዬዲዳ።
ACT 12:1 ሄ ዎዴ ካዎ ሄርዶሲ ኢሲ ኢሲ ኣማኒዛ ኣሳ ጎዲ ጎዲ ሜቶꬂዴስ።
ACT 12:2 ዮሃኒሳ ኢሻ ያቆቤ ማሻን ዎꬊሲዴስ።
ACT 12:3 ኢዚ ሄሳ ኦꬂዳይ ኣይሁዳታ ኡፋይሲዳይሳ ቤኢዲ ጴጽሮሳካ ኦይꬂዴስ፤ ሄሲካ ሃኒዳይ ኣይሁዳታስ ኡኬꬃ ባኣሌ ጌቴቲዛ ባኣሌ ጋላሳ።
ACT 12:4 ጴጽሮሳካ ቃሾ ኬꬅ ጌልꬂዳፔ ጉዬ ኦይዱ ኦይዱ ዎታዳራቲ ታራን ታራን ናጋና ማላ ጊጌቲዳ ዎታዳራታስ ኢሚዴስ። ኢዚ ሄሳꬆ ኦꬂዳይ ፓዚጋ ባኣሌይ ኣꬊዳ ማላ ኬሲዲ ዴሬይ ፒርዳና ማላ ሺሻናሳ።
ACT 12:5 ሄሳ ጊሻስ ጴጽሮሳ ቃሾ ኬꬄ ጌልꬂዲ ናጌቴስ፤ ጊዶ ኣቲን ዎሳ ኬꬃ ኣሳይ ኢዛስ ኬሂ ሚኖ ዎሳ ዎሲዴስ።
ACT 12:6 ሄርዶሲ ጴጽሮሳ ዴሬዛ ሲንꬅ ሺሻና ቆፒ ኡቲ ዲሺን ሄ ቃማ ጊዶꬅ ናምኡ ሳንሳላታን ቃሼቲዲ ናምኡ ዎታዳራታ ጊዶን ኢቺዴስ፤ ቃሾ ኬꬃ ናጊዛይቲ ኬꬃ ፔንጌ ቦላ ኤቂ ናጊሺን፥
ACT 12:7 ጎዳ ኪታንቻይ ኤዝጎንታ ቤቲዴስ፤ ኢስቲ ዲዛ ኪፊሌን ፖኦይ ፖኢዴስ፤ ኪታንቻዚካ ጴጽሮሳ ሚሌ ቦቺ ቤጎꬂዲ፥ «ኤሌ ዴንዳ!» ጊዴስ፤ ሄራካ ሳንሳላታይ ኢዛ ኩሼፔ ጋዴን ዎꬊዴስ።
ACT 12:8 ኪታንቻዚ ኢዛ፥ «ኔ ማይኦ ማይኣ! ጫማካ ኣꬃ!» ጊን ጴጽሮሲካ ኣዛዜቲዳ ማላ ኦꬂዴስ፤ ቃሴካ ኪታንቻይ፥ «ኔ ጋቤ ማይኣዳ ታና ካላ» ጊዴስ።
ACT 12:9 ጴጽሮሲካ ቃሾ ኬꬃፌ ኢዛ ካሊ ኬዚዴስ፤ ጊዶ ኣቲን ኢዛስ ኣጉሞ ቤኢዛ ሚሳቲዴስ ኣቲን ኪታንቻዚ ኦꬂዛይሲ ቱሙ ጊዲዳይሳ ኤሪቤና።
ACT 12:10 ኮይሮ ዛቤታፔኔ ናምኣንꬆ ዛቤታፔ ኣꬊዲ ጌዴ ካታማ ኬሲዛ ኦጌ ቦላ ዲዛ ቢራታ ፔንጋኮ ጋኪዳ፤ ፔንጌይካ ባርካ ዶዬቲ ዎꬊዴስ፤ ኢስቲ ኬዚ ቢዳ፤ ኢስቲ ቄሪ ኦጌ ዲዛሮ ኣꬊዳ ማላ ኪታንቻዚ ኢዛፔ ሻኬቲዴስ።
ACT 12:11 ጴጽሮሳስ ካሃይ ሲሚሺን፥ «ጎዳይ ባ ኪታንቻ ኪቲዲ ታና ሄርዶሳ ኩሼፔኔ ኣይሁዳቲ ታ ቦላ ቆፒዳ ኡባፌ ኬሲዳይሳ ታ ሃኢ ቱማፔ ኤራዲስ» ጊዴስ።
ACT 12:12 ሄሳ ኣኬኪ ኤሪዳፔ ጉዬ ዳሮ ኣሳይ ኢሲ ቦላ ሺቄቲዲ ዎሲዛ ማርቆሳ ጌቴቲዛ ዮሃኒሳ ኣዮ ማራሚሶ ቢዴስ።
ACT 12:13 ኢዚ ሄ ቢዲ ካሬ ፔንጌ ቆጺን ኢሲ ኤሮዶ ጌቴቲዛ ጋራዴያ ካሬ ኦኒ ቆጺዛኮ ኤራናስ ካሬ ማታ ባዱስ።
ACT 12:14 ቃላይ ጴጽሮሳይሳ ጊዲዳይሳ ኤራዳ ኬሃ ኡፋዬቲዳ ጊሻስ ካሬዛ ዶዮንታ ዎꬃን ጉዬ ሲማዳ፥ «ጴጽሮሲ ካሬን ፔንጌ ቦላ ኤቂዴስ» ጋዱስ።
ACT 12:15 ኣሳይካ ኢዞ፥ «ሃኔ ጎያይ!» ጊዳ፤ ኢዛ ቃሴ ዛራ ዛራ ኢስታስ ዮቲን፥ «ሂስቲኮ ሄሲ ኢዛ ናጊዛ ኪታንቻ ጊዶንታ ኣጌና» ጊዳ።
ACT 12:16 ጴጽሮሲ ቃሴካ ፔንጌ ቆꬅ ጉጂዴስ፤ ኢስቲካ ፔንጋ ዶይዲ ኢዛ ቤኢዳ ማላ ማላሌቲዳ።
ACT 12:17 ኢዚካ ኢስቲ ጮኡ ጋና ማላ ባ ኩሼን ማላቲ ቤሲዲ ጎዳይ ኢዛ ቃሾሶፔ ዎስቲ ኬሲዳኮ ሎኤꬂ ዮቲዴስ። «ሃይሳ ዉርሲ ያቆቤሲኔ ሃንኮ ኣማኒዛይታስ ዮቲቴ» ጊዴስ። ሄሳፌካ ሃራሶ ቢዴስ።
ACT 12:18 ዎንቴꬃ ጋላስ ዎንታራ ዎታዳራቲ፥ «ጴጽሮሲ ዋኒዴ?» ጊሼ ባ ጊዶን ቡልኣኬቲዳ።
ACT 12:19 ሄርዶሲ ኣስ ዬዲ ጴጽሮሳ ኮዪሲዲ ኢዚ ꬋይዳ ጊሻስ ናጊዛይታ ሎኤꬂ ኦይቺዳፔ ጉዬ ኢስታ ዎꬋና ማላ ኣዛዚዴስ። ሄሳፌ ጉዬ ሄርዶሲ ዩሁዳፔ ዱጌ ቂሳሪያ ዎꬊዲ ሄን ኡቲዴስ።
ACT 12:20 ሄርዶሲካ ጺሮሴ ኣሳራኔ ሲዶና ኣሳራ ኦሻ፤ ሄ ዴሬ ኣሳይ ካꬅ ዴሚዛይ ሄርዶሳ ዴሬፔ ጊዲዳ ጊሻስ ሄ ዴሬ ካዎ ጼሊዛዴ ቢላስጾሳፔ ማዶ ቃላ ዴሚዳ ማላ ኢሲ ቦላ ጊዲዲ ሄርዶሳራ ማቃዪንꬃናስ ኦይቺዳ።
ACT 12:21 ጊጋና ባሬቲዳ ጋላስ ሄርዶሲ ካዎቴꬃ ማይኦ ማይኢዲ ካዎቴꬃ ኣልጋን ኡቲዲ ዴራስ ሃሳይዴስ።
ACT 12:22 ዴሬዚካ፥ «ሃይሲ ጾሳ ቃላፔ ኣቲን ኣሳ ቃላ ዴና!» ጊ ዋሲዴስ።
ACT 12:23 ሄርዶሲካ ጾሳስ ቦንቾ ኢሞንታ ኣጊዳ ጊሻስ ጎዳ ኪታንቻይ ሄራካ ሄርዶሳ ሾጪ ዬጊን ጉጹኒ ሃይቂዴስ።
ACT 12:24 ጾሳ ቃላይ ጊዲኮ ዲጪዲ ኣኪ ኣኪ ቢዴስ።
ACT 12:25 ባርናባሲኔ ሳኦሊ ባ ኤኪ ቢዳ ኪታ ፖሊዲ ዬሩሳላሜ ሲሚዲ ማርቆሳ ጌቴቲዛ ዮሃኒሳካ ባናራ ኤኪ ሲሚዳ።
ACT 13:1 ኣንጾኪያን ዲዛ ዎሳ ኬꬃን ናቤቲኔ ኣስታማሬቲ ዴቴስ፤ ሄይቲካ ባርናባሲኔ ኔጌሬ ጌቴቲዛ ሲሞናራ፥ ቃሬና ዴሬ ኣስ ሉቂዮሳራ፥ ሄርዶሳራ ኢሲፌ ዲጪዳ ሚናሄራኔ ሳኦሌራ ዉሪ ኢሲፌ ዴቴስ።
ACT 13:2 ሄይቲ ዉሪ ጎዳስ ጎይኒሼኔ ጾሚሼ ዲሺን ጺሎ ኣያናይ፥ «ባርናባሳኔ ሳኦሌ ታ ኢስታ ጼይጊዳ ኦሶስ ታስ ሻኪ ኬሲቴ» ጊዴስ።
ACT 13:3 ኢስቲካ ጾሚ ዎሲዲ ባ ኩሼ ኢስታ ቦላ ዎꬂዳፔ ጉዬ ሞይዚዳ።
ACT 13:4 ባርናባሲኔ ሳኦሊ ጺሎ ኣያና ኪታን ዱጌ ሴላዉቂያ ዎꬊዳ፤ ሄፔካ ማርካቤን ጌሊዲ ቆጲሮሴ ቢዳ።
ACT 13:5 ሳልሚሴ ጌቴቲዛሶ ጋኪዲ ኣይሁዳታ ዎሳ ኬꬃታን ጾሳ ቃላ ሳባኪዳ፤ ማርቆሳ ጌቴቲዛ ዮሃኒሲካ ኢስታራ ቢዲ ኢስታ ማዲዴስ።
ACT 13:6 ኣባ ጊዶን ዲዛ ቢታ ቆጲሮሴ ጌቴቲዛ ዴሬዮ ሃ ጋጻፔ ሄ ጋጻ ጋካናስ ካንꬂ ኬዚዲ ጳፋ ጌቴቲዛሶ ጋኪሺን ኢሲ ኣይሁዳ ኣሳ ሺን ማሮኔ ዎርዶ ናቤ ባር-ዬሱሳ ጌቴቲዛ ኣስ ዴሚዳ።
ACT 13:7 ኢዚካ ኢሲ ሳርጎሳ ጳዉሎሳ ጌቴቲዛ ዎዚናማ ዴሬ ኣይሲዛይሳራ ኢሲፌ ዴስ፤ ሄሲ ዴሬ ኣይሲዛ ኣዴዚ ጾሳ ቃላ ሲያና ኮዪዲ ባርናባሳኔ ሳኦሌ ጼይጊሲዴስ።
ACT 13:8 ማሮዚ ኤሊማሲ ባ ሱንꬃ ቢርሼꬃ ማላ ዴሬ ኣይሲዛይሲ ኣማኖንታ ማላ ꬉጳናስ ኮዪዲ ኢስታራ ኤቄቲዴስ።
ACT 13:9 ጳዉሎሳ ጌቴቲዳ ሳኦሊ ጺሎ ኣያናይ ኢዛን ኩሚን ማሮዛ ቲሺ ሂስቲ ጼሊዲ፥
ACT 13:10 «ኔኖ ጺሎቴꬅ ኡባስ ሞርኬዞ! ጌኔይኔ ኢታቴꬂ ኔናን ኩሚዳይሶ ሃይሶ ዳቡሎሳ ናዉ! ጎዳ ሱሬ ኦጌ ጌላሴꬃፌ ሼምፒኪ?
ACT 13:11 ሄኮ ሃኢ ጎዳ ኩሼይ ኔ ቦላ ዴስ፤ ኔ ቆቃና፤ ሃኒፌ ጉዬ ኣርሼ ፖኦ ኢሲኖካ ቤያካ» ጊዴስ። ሄራካ ሻሩማይኔ ꬉማይ ኢዛ ቦላ ዎꬊዴስ፤ ኩሼ ኦይኪ ባና ካሌꬃናዴ ኮሺ ያኔ ሃ ጊዴስ።
ACT 13:12 ዴሬ ኣይሲዛይሲ ሃ ሃኒዳ ዮኦዛ ቤኢዲ ጎዳ ጊሻስ ሲዪዳ ቲሚርቴዛን ማላሌቲዲ ኣማኒዴስ።
ACT 13:13 ጳዉሎሲኔ ኢዛራ ዲዛይቲ ጳፋፔ ዴንዲዲ ጲንፊሊያ ጌቴቲዛሶን ዲዛ ጴርጌኔ ጌቴቲዛሶ ማርካቤን ጌሊ ቢዳ፤ ዮሃኒሲ ኢስታፌ ሻኬቲዲ ጉዬ ዬሩሳላሜ ሲሚዴስ።
ACT 13:14 ኢስቲ ጊዲኮ ጴርጌኔፔ ዴንዲዲ ጲሲዲያ ጊዶን ዲዛ ኣንጾኪያ ቢዳ፤ ሳምባታ ጋላስ ኣይሁዳታ ዎሳ ኬꬅ ጌሊ ኡቲዳ።
ACT 13:15 ሙሴ ዎጋ ማጻፋቲኔ ናቤታ ማጻፋቲ ናባቤቲዳፔ ጉዬ ኣይሁዳታ ዎሳ ኬꬃ ሃላቃቲ፥ «ኑ ኢሻቶ! ኢንቴስ ሃይሳ ኣሳ ዞራና ቃላይ ዲኮ ሃሳይቴ» ጊዲ ኢስታኮ ኣሴ ዬዲዳ።
ACT 13:16 ጳዉሎሲካ ዴንዲ ኤቂዲ ባ ኩሼራ ማላቲዲ፥ «ኢንቴኖ ኢስራኤሌ ኣሳቶ! ቃሴካ ኢንቴኖ ጾሳስ ያዪዛ ኣይዛቤቶ! ሲዪቴ።
ACT 13:17 ሃ ኢስራኤሌ ዴሬ ጾሳይ ካሴ ኑ ኣዋታ ዶሪዴስ፤ ኢስቲ ጊብጼ ዴሬን ዲሺን ኢስታ ꬎቁ ꬎቁ ሂስቲዴስ፤ ባ ዎልቃማ ቄሴራ ሄፔ ኢስታ ኬሲዴስ።
ACT 13:18 ኦይዱ ታሙ ላይꬅ ኩሜꬅ ኢስታ ባዞ ቢታን ዳንዳይዴስ።
ACT 13:19 ካናኔ ቢታን ዲዛይታ ላፑን ካዎታ ꬋይሲዲ ኢስታ ቢታ ባ ዴሬታስ ጋዴ ሂስቲ ላቲሲዴስ።
ACT 13:20 ሄሲ ዉሪ ፖሌቲዳይ ኦይዱ ጼታኔ ኢቻሹ ታሙ ላይꬃታ ጊዶና፤ ሄሳፌ ጉዬ ናቤ ሳሜላ ዎዴ ጋካናስ ኢስታ ቦላ ፒርዲዛ ዳናታ ኢሚዴስ።
ACT 13:21 «ሄሳፌ ጉዬ ዴሬይ ባ ቦላ ካዎ ካዎꬃና ማላ ሳሜላ ዎሲዴስ፤ ጾሳይካ ቢኒያሜ ባጋፌ ቂሴ ና ሳኦሌ ኢስታስ ኢሚዴስ፤ ኢዚካ ኢስታ ኦይዱ ታሙ ላይꬅ ሃሪዴስ።
ACT 13:22 ሳኦሌ ሻሪዳፔ ጉዬ ዳዊቴ ካዎꬂዴስ፤ ኢዛ ጊሻስ፥ ‹ታ ዎዚና ማላ ሃኒዛይሳኔ ታ ኮዪዳይሳ ኡባ ኦꬂዛ ኢሴዬ ና ዳዊቴ ታ ዴማዲስ› ጊዲ ዳዊቴ ጊሻስ ጾሲ ማርካቲዴስ።
ACT 13:23 ጾሲካ ባ ጫቆ ቃላꬆ ሃ ኣዴዛ ዜሬꬃፌ ኣስ ኣሺዛይሳ ዬሱሳ ኢስራኤሌስ ኤሂዴስ።
ACT 13:24 ዬሱሲ ያናፔ ካሴ ዮሃኒሲ ኢስራኤሌ ዴሬይ ዉሪ ማሮቴꬃን ጌሊዲ ጻማቄታና ማላ ሳባኪዴስ።
ACT 13:25 ዮሃኒሲ ባ ኪቴቲዳይሳ ፖሎ ቦላ ዲሼ፥ ‹ታ ኢንቴስ ኦና ሚሳታዚና? ታ ኪቴቲዳይሳ ጊዲኬ፤ ሃራይ ኣቶሺን ታ ኢዛስ ቶሆ ጫማ ኪሬ ቢርሻናስ ቤሶንታይሲ ታፔ ጉዬራ ያና› ጊዴስ።
ACT 13:26 «ኢንቴኖ ኣብራሃሜ ዜሬꬃፌ ዬሌቲዳ ኑ ኢሻቶ! ቃሴካ ኢንቴ ጊዶንካ ጾሳስ ያዪዛይቲ ዉሪ ሃይሲ ኣቶቴꬃ ኪታይ ኪቴቲዳይ ኑስ ኡባታሳ!
ACT 13:27 ዬሩሳላሜ ኣሳቲኔ ኢስታ ሃላቃቲ ዬሱሳ ኤሪቤቴና፤ ጊዶ ኣቲን ኢስቲ ኢዛ ቦላ ፒርዲዳ፤ ሄሳንካ ሳምባታን ሳምባታን ናባቤቲዛ ካሴ ናቤታ ቃላይ ኢዛ ቦላ ፖሌቲዴስ።
ACT 13:28 ኢዛ ሃይቆስ ጋꬂዛ ኢሲ ጋሶካ ኢስቲ ዴሞንታ ኣጊኮካ ጲላጾሲ ኢዛ ቦላ ሃይቆ ፒርዳ ፒርዳና ማላ ዎሲዳ።
ACT 13:29 ኢዛ ጊሻስ ጻፌቲዳይሳ ኢስቲ ኡባ ፖሊዳፔ ጉዬ ኢዛ ካቄቲዳ ሚꬃ ቦላፌ ጋዴን ዎꬂዲ ዱፎን ሞጊዳ።
ACT 13:30 ጊዶ ኣቲን ጾሲ ኢዛ ሃይቆፔ ዴንꬂዴስ።
ACT 13:31 ጋሊላፔ ዬሩሳላሜ ጋካናስ ባናራ ዲዛይታስ ዳሮ ዎዴ ቤቲዴስ፤ ሄይቲካ ሃኢ ኢዛ ጊሻስ ዴሬታስ ማርካታ።
ACT 13:32 «ኑኒካ ካሴ ጾሲ ኑ ኣዋታስ ጫቂዳ ሚሺራቾ ቃላ ኢንቴስ ሳባኮስ።
ACT 13:33 ዬሱሳ ኪቲዲ ኢስታስ ጫቂዳ ቃላ ኑስ ኢስታ ናይታስ ፖሊዴስ፤ ሄሲካ ዬꬃ ማጻፋን ናምኣንꬆ ሼምፖን፥ ‹ኔ ታ ናዛ፤ ታ ኔና ሃች ዬላዲስ› ጌቴቲ ጻፌቲዴስ።
ACT 13:34 ቃሴካ ኢዚ ዎቆንታይሳኔ ጾሲ ኢዛ ሃይቆፔ ዴንꬂዳይሳ ሻኪ ኤራና ማላ፥ « ‹ኣንጄቲዳይሳኔ ኣማኔቲዳ ዳዊቴ ኣንጆ ታ ኢንቴስ ኢማና› ጊዴስ።
ACT 13:35 ሄሳ ጊሻስ ሃራሶንካ፥ ‹ኔ ጌሻይ ሃይቂ ዎቃና ማላ ኔ ኮያካ› ጌስ።
ACT 13:36 «ዳዊቲ ባ ዎዴን ጾሳ ሼኔ ማላ ኦꬂዳፔ ጉዬ ሃይቂዴስ፤ ካሴ ባ ኣዋታራ ሞጌቲን ኢዛ ኣሾይ ዎቂዴስ።
ACT 13:37 ጾሲ ኢዛ ሃይቆፔ ዴንꬂዳይሲ ኢዚ ጊዲኮ ዎቂቤና።
ACT 13:38 ሄሳ ጊሻስ ታ ኢሻቶ! ናጋራስ ማሮቴꬂ ቤቲዛይ ዬሱሳ ባጋራ ጊዲዳይሲ ኢንቴስ ሳባኬቲዳይሳ ኤሪቴ።
ACT 13:39 ኢዛ ኣማኒዛዴይ ዉሪ ካሴ ሙሴ ዎጋ ባጋራ ዴሞንታ ጺሎቴꬅ ዴማና።
ACT 13:40 ሄሳ ጊሻስ ካሴ ናቤቲ፥ « ‹ኢንቴኖ ቂꬊዛይቶ ጼሊቴ፥ ማላሌቲቴኔ ꬋይቴ፥ ኢንቴስ ኦኒካ ዮቲን ኣማናናስ ኢንቴና ሜቲዛ ሚሽ ታ ኢንቴ ዎዴን ኦꬃና› ጊዳ ቃላይ ኢንቴ ቦላ ጋኮንታ ማላ ናጌቲቴ» ጊዴስ።
ACT 13:42 ጳዉሎሲኔ ባርናባሲ ኣይሁዳታ ዎሳ ኬꬃፌ ኬዚሺን ኣሳይ ኢስታ ሄሳ ኢስቲ ዮቲዳ ቃላ ካሊዛ ሳምባታ ጋላስ ዛሪ ዮታና ማላ ዎሲዴስ።
ACT 13:43 ሺቆይ ላሌቲዳፔ ጉዬ ዳሮ ኣይሁዳቲኔ ኣይሁዳታ ኣማኖን ጌሊዲ ጾስ ጎይኒዛ ኣሳቲ ጳዉሎሳኔ ባርናባሳ ካሊዳ። ጳዉሎሳንቲካ ኢስታ ቆፍሲሼ ኢስቲ ጾሳ ኪያቴꬃን ሚኒ ዳና ማላ ዞሪዳ።
ACT 13:44 ካሊዛ ሳምባታ ጋላስ ካታማ ኣሳፔ ጉꬃቲ ጻላላ ኣቲን ዳሪዛ ባጋይ ዉሪ ጎዳ ቃላ ሲያና ሺቂዴስ።
ACT 13:45 ኣይሁዳቲካ ዳሮ ዴሬ ቤኢዲ ቃናቴቴꬃን ኩሚዳ፤ ጳዉሎሳ ሃሳያ ኤቄቲሼ ኢዛ ጫዪዳ።
ACT 13:46 ጳዉሎሲኔ ባርናባሲ ባቦንታ ጻላቴꬃን፥ «ጾሳ ቃላይ ኮይሮ ኢንቴስ ዮቴታናስ ቤሴስ፤ ጊዶ ኣቲን ኢንቴ ቃላ ሌቂዴታ። ኢንቴስ ሜርና ዴኦይ ቤሶንታይሳ ኢንቴርካ ኢንቴ ቦላ ፒርዲዳ ጊሻስ ሃኢ ኑኒ ጌዴ ኣይዛቤታኮ ባና ኮዮስ፤ ቃሴካ ጎዳይ ኑና፥ ‹ኣሳስ ኣቶቴꬃ ቃላ ቢታ ጋጻ ጋꬃና ማላ ታ ኔና ኣይዛቤታስ ፖኦ ሂስታ ኪታዲስ› ጊ ኣዛዚዴስ» ጊዳ።
ACT 13:48 ኣይዛቤቲ ሄሳ ሲዪዲ ዳሮ ኡፋዬቲዳ፤ ጎዳ ቃላስካ ቦንቾ ኢሚዳ፤ ሜርና ዴኦስ ጊጌቲዳ ዴሬይ ዉሪ ኣማኒዴስ።
ACT 13:49 ጎዳ ቃላይ ሄራን ዲዛ ዴሬ ኡባሶ ጋኪዴስ።
ACT 13:50 ኣይሁዳቲ ቃሴ ኣያና ሃኖን ካሴፔ ሚኒዛይታኔ ዱሳን ቦንቼቲዳ ማጫሳታ ሄሳꬆካ ካታማን ዲዛ ጊታ ኣሳታ ዴንꬄꬂዲ ጳዉሎሳ ቦላኔ ባርናባሳ ቦላ ጎዴቴꬅ ዴንꬂዲ ባ ዴሬፔ ኬሲ ጎዲዳ።
ACT 13:51 ጳዉሎሲኔ ባርናባሲ ኣሳይ ኢስታ ኢጺዳይሳ ቤሳናስ ባ ቶሆ ቦላ ዲዛ ጉዱላ ፒቲዲ ኢቆኒዮኔ ጌቴቲዛሶ ቢዳ።
ACT 13:52 ኣማኒዛይቲ ኡፋይሳኒኔ ጺሎ ኣያናን ኩሚዳ።
ACT 14:1 ኢቆኒዮኔን ጳዉሎሲኔ ባርናባሲ ኢሲፌ ኣይሁዳታ ዎሳ ኬꬄ ጌሊዳ፤ ሄንካ ኢስቲ ኣሳ ሎኤꬂ ታማርሲዳ ጊሻስ ጊሪኬ ኣሳፔኔ ኣይሁዳ ኣሳፔ ዳሮይ ኣማኒዴስ።
ACT 14:2 ሂንኮ ኣማኖንታ ኣይሁዳ ኣሳይ ኣይዛቤታ ኢስታ ቦላ ዴንꬄꬂዲ ኣሳይ ኣማኒዛይታ ኢጻና ማላ ኦꬂዴስ።
ACT 14:3 ጳዉሎሲኔ ባርናባሲ ጎዳ ጊሻስ ጻላቴꬃራ ኣሳስ ዮቲሼ ሄን ዳሮ ዎዴ ጋምኢዳ፤ ጎዳይካ ኢስቲ ዮቲዛ ቃላ ጊታ ማላታራኔ ዎልቃማ ኦሶን ቆንጪሲ ማርካቲዴስ።
ACT 14:4 ካታማ ኣሳይ ባ ጊዶን ናምኡ ኬዚ ሻኬቲዲ ባጋይ ኣይሁዳታ ባጋ፥ ባጋይ ጳዉሎሳንታ ባጋ ጊዲዴስ።
ACT 14:5 ሄ ዎዴ ኣይሁዳቲኔ ኣይዛቤቲ ባና ካሌꬂዛይታራ ኢሲፌ ጊዲዲ ኢስታ ዋዪሳናሲኔ ሹቻን ጫዳናስ ኮዪዳ።
ACT 14:6 ኢስቲካ ሄሳ ኤሪዳ ማላ ሊስቲራኔ ዳርቤኔ ጌቴቲዛሶ ሊቃኦኒያ ካታማታኔ ሄ ሄራን ዲዛ ዴሬ ባቃቲዳ።
ACT 14:7 ሄንካ ሚሺራቾ ቃላ ሳባኮ ዶሚዳ።
ACT 14:8 ሊስቲራን ዬሌቶሶፔ ባ ቶሆራ ሄሜቲ ኤሮንታ ኢሲ ቶሆ ሲላ ኣዴይ ዴስ።
ACT 14:9 ሄሳዴይ ጳዉሎሲ ሳባኪሺን ኡቲ ሲዬስ፤ ጳዉሎሲካ ኢዛኮ ቲሺ ሂስቲ ጼሊዲ ኣዴዛ ፓꬃና ኣማኖይ ኢዛ ቦላ ዲዛይሳ ቤኢዲኔ ቃላ ꬎቁ ሂስቲዲ፥ «ሲቲ ጋዳ ኔ ቶሆን ኤቃ!» ጊዴስ። ኣዴዚ ሄራካ ጉፒ ዴንዲዲ ሄሜꬅ ኦይኪዴስ።
ACT 14:11 ኣሳይ ጳዉሎሲ ኦꬂዳይሳ ቤኢዲ ሊቃኦኒያ ቃላራ፥ «ኤቃ ጾሳቲ ኣስ ሚሳቲዲ ሃ ኑኮ ዎꬊዳ» ጊዲ ዋሲዴስ።
ACT 14:12 ባርናባሳ፥ «ዲያ» ጊዳ ጳዉሎሳካ ሃሳይዛ ዋናይ ኢዛ ጊዲዳ ጊሻስ፥ «ሄርሜኔ» ጊዳ።
ACT 14:13 ካታማፔ ኣሲ ባይንዳሶን ዲዛ ዲያ ጌቴቲዛ ኤቃ ኬꬃ ቄሴይ ኮርማታኔ ጻጼቲ ጊጊዳ ጪሽ ጌዴ ካታማ ጌሊዛ ኦጌ ቦላ ኤፊዲ ዴሬዛራ ኢሲፌ ጊዲዲ ጳዉሎሳሲኔ ባርናባሳስ ያርሻና ኮዪዴስ።
ACT 14:14 ሃዋሬቲ ባርናባሲኔ ጳዉሎሲ ሄሳ ሲዪዳ ማላ ባ ማይኦ ዳኪዲ ጌዴ ዴሬዛ ጊዶ ዎጺዳ፤ ባ ቃላ ꬎቁ ሂስቲዲ ሂዝጊዳ፤
ACT 14:15 «ሃይቶ ኣሳቶ! ሃይሳ ኣዛስ ኦꬄቲ? ኑኒካ ኢንቴ ማላ ኣሳኮ! ኢንቴካ ቃሴ ሃይሳ ሜላ ሃዳ ዮኦፔ ሃኪዲ ሳሎኔ ሳኣ፥ ኣባካ፥ ኣባታ ጊዶን ዲዛይታ ኡባ ሜꬊዳ ዴኦ ጾሳኮ ኢንቴ ሲማና ማላ ኢንቴስ ሚሺራቾ ቃላ ሳባኮስ።
ACT 14:16 ኢዚ ካሴ ኣꬊዳ ዬሌታይኔ ዴሬይ ዉሪካ ባ ኮዪዳ ማላ ሃናናስ ዬዲ ቤሲዴስ።
ACT 14:17 ጊዶ ኣቲን ጾሲ ሳሎፔ ኢራኔ ሄሳꬆካ ካꬂ ካጺዛ ዎዴታ ኢሚዲ ኢንቴ ዎዚና ካꬃኒኔ ኡፋይሳን ኩንꬂዴስ፤ ኡፋይሳካ ኢንቴና ካልሲዲ ሎኦ ኦሶን ባና ማርካይ ባይንዳ ኣጊቤና» ጊዳ።
ACT 14:18 ሄሳ ኡባ ሃሳይዲ ኣሳይ ኢስታስ ያርሾንታ ማላ ዋይዲ ዲጊዳ።
ACT 14:19 ኣይሁዳቲ ቃሴ ኣንጾኪያፔኔ ኢቆኒዮኔፔ ዪዳ ኣሳይ ኣሳ ዞሪዲ ጳዉሎሳ ሹቻን ጫዳና ማላ ኣማንꬂዳ፤ ጳዉሎሳካ ሹቻን ጫዲዲ ሃይቂዴስ ጊ ጎቺዲ ካታማፔ ጌዴ ካሬ ኬሲዳ።
ACT 14:20 ጊዶ ኣቲን ኣማኒዛይቲ ኢዛ ዩዪ ኣꬊ ናጊሺን ጳዉሎሲ ዴንዲዲ ጌዴ ካታማ ጌሊዴስ፤ ዎንቴꬃ ጋላስ ባርናባሳራ ኢሲፌ ዳርቤኔ ጌቴቲዛሶ ቢዳ።
ACT 14:21 ጳዉሎሲኔ ባርናባሲ ዳርቤኔን ሚሺራቾ ቃላ ሳባኪዲ ዳሮ ኣሳ ኣማንꬂዳፔ ጉዬ ጌዴ ሊስቲራ፥ ኢቆኒዮኔኔ ኣንጾኪያ ሲሚዳ።
ACT 14:22 ኣማኒዛይታ ዎዚና ሚንꬄꬂሼ ኢስቲ ኣማኖን ሚኒ ዳና ማላ ዞሪሼ፥ «ኑ ጾሳ ካዎቴꬅ ጌላናስ ዳሮ ሜቶ ጊዶራ ኣꬋናስ ኮሼስ» ጊዳ።
ACT 14:23 ሄሳፌ ጉዬ ዱማ ዱማ ዎሳ ኬꬃታን ጪማታ ዶሪዳፔ ጉዬ ጾማኒኔ ዎሳን ኣማኔቲዳ ጎዳስ ሃዳራ ኣꬂ ኢሚዳ።
ACT 14:24 ጲሲዲያራ ኣꬊዲ ጲንፊሊያ ሲሚዳ።
ACT 14:25 ጴርጌኔን ቃላ ሳባኪዲ ዱጌ ኣጻሊያ ጌቴቲዛሶ ዎꬊዳ።
ACT 14:26 ኣጻሊያፔካ ሃኢ ጋካናስ ኢስቲ ኦꬂዳ ኦሶዛ ሃዳራ ኢስታስ ኢሜቲዳ ካታማ ሶሪያን ዲዛ ኣንጾኪያ ማርካቤን ጌሊዲ ሲሚዳ።
ACT 14:27 ሄ ጋኪዳ ማላ ዎሳ ኬꬃ ኣሳ ኡባ ሺሺዲ ጾሲ ኢስታራ ኦꬂዳይሳ ቃሴካ ኣይዛቤታስ ኣማኖ ፔንጌይ ዋኒ ዶዬቲዳኮ ዉርሲ ዮቲዳ።
ACT 14:28 ሄን ኣማኒዛይታራ ዳሮ ዎዴ ጋምኢዳ።
ACT 15:1 ኢሲ ኢሲ ኣሳቲ ዩሁዳፔ ዱጌ ኣንጾኪያ ዎꬊዲ፥ «ኢንቴ ሙሴ ዎጋ ማላ ቃጻሬቶንታ ኣጊኮ ኦኒካ ኣታናስ ዳንዳዬኬታ» ጊዲ ኣማኒዛይታ ታማርሶ ዶሚዳ።
ACT 15:2 ሄሲካ ጳዉሎሳኔ ባርናባሳ ጊታ ፓላማኒኔ ኦሻ ጊዶ ጌልꬂዴስ፤ ሄሳ ጊሻስ ጳዉሎሲኔ ባርናባሲ ሃራ ኢሲ ኢሲ ኣማኒዛ ኣሳታራ ዬሩሳላሜ ኬዚዲ ሃ ዮኦዛ ጊሻስ ጪማታኔ ሃዋሬታ ኦይቻና ማላ ጌቴቲዴስ።
ACT 15:3 ሄሳ ጊሻስ ዎሳ ኬꬃያ ኢስታ ዬሩሳላሜ ባና ማላ ኪቲን ኢስቲ ፒንቄራኔ ሳማሪያራ ኣꬊ ቢሼ ሄን ዲዛ ኣይዛቤቲ ኣማኖን ሲሚዳይሳ ዮቲዳ፤ ሄ ዎዴ ኣማኒዛይቲ ሄሳ ሲዪዲ ኬሂ ኡፋዬቲዳ።
ACT 15:4 ኢስቲ ዬሩሳላሜ ጋኪን ዎሳ ኬꬃ ኣሳይ ሃዋሬቲኔ ጪማቲ ኢስታ ሞኪ ኤኪዳ፤ ኪቴቲ ቢዳይቲካ ጾሲ ኢስታራ ጊዲዲ ኦꬂዳይሳ ኡባ ኢስታስ ዮቲዳ።
ACT 15:5 ፋርሳዌታ ባጋ ኣሳታፔ ኣማኒዳ ኢሲ ኢሲ ኣሳቲ ዴንዲዲ፥ «ኣይዛቤቲ ቃጻሬታናሲኔ ሙሴ ዎጋ ናጋና ማላ ኢስታስ ዮታናስ ቤሴስ» ጊዳ።
ACT 15:6 ሃዋሬቲኔ ጪማቲ ሄ ዮኦዛ ጊዶ ሎኤꬂ ጼላናስ ሺቂዳ።
ACT 15:7 ዳሮ ፓላማፔ ጉዬ ጴጽሮሲ ዴንዲ ኤቂዲ፥ «ታ ኢሻቶ! ጉꬃ ዎዴፔ ካሴ ጾሲ ታና ኢንቴ ጊዶፌ ዶሪዲ ኣይዛቤቲ ታ ዶናፔ ሚሺራቾ ቃላ ሲዪዲ ኣማናና ማላ ኦꬂዳይሳ ኢንቴ ኤሬታ።
ACT 15:8 ኣሳ ዎዚና ኤሪዛ ጾሲ ኑስ ኢሚዳይሳ ማላ ኢስታስካ ጺሎ ኣያና ኢሚዲ ኢስታ ባስ ኤኪዳይሳ ማርካቲዴስ።
ACT 15:9 ኢስታ ዎዚናካ ኣማኖን ጌሺዲ ኑ ጊዶኒኔ ኢስታ ጊዶን ኣይኮ ሻኮካ ኦꬂቤና።
ACT 15:10 ሄሳ ጊሻስ ኑ ኣዋቲኔ ኑኒካ ቶካናስ ዳንዳዮንታ ቃምባራ ኣማኒዛይታ ቶሳናስ ኢንቴ ኣዛስ ጾስ ፓጬቲ?
ACT 15:11 ኑ ኣቲዳይ ሊኬ ኢስታꬆካ ጎዳ ዬሱሳ ኣꬎ ኪያቴꬃን ጊዲዳይሳ ኣማኖስ» ጊዴስ።
ACT 15:12 ሺቂዳ ኣሳይ ዉሪካ ጮኡ ጊን ባርናባሲኔ ጳዉሎሲ ጾሲ ኢስታ ባጋራ ኣይዛቤታ ጊዶን ኦꬂዳ ጊታ ማላታታ ጊሻስ ዮቲሺን ማላሌቲዲ ሎኤꬂ ሲዪዳ።
ACT 15:13 ኢስቲ ዮቲ ዉርሲሺን ያቆቤይ ዴንዲ ኤቂዲ፥ «ታ ኢሻቶ! ታ ጊዛይሳ ሲዪቴ፤
ACT 15:14 ጾሲ ኣይዛቤታፔ ባስ ጊዳና ዴሬ ካሴቲዲ ኢዚ ዎስቲ ጼይጊ ዎꬂዳኮ ሲሞኒ ኑስ ሎኤꬂ ዮቲዴስ።
ACT 15:15 ካሴ ናቤታን ሂዝጊ ጻፌቲዳ ቃላይ ሃይሳራ ጋጌስ።
ACT 15:16 « ‹ሃይሳፌ ጉዬ ታ ሲማዳ ላሌቲዳ ዳዊቴ ኬꬄ ኬጻና፤ ላሌቲዳይሳ ዛራ ኤሳና፤ ዛራዳካ ኬጻና።
ACT 15:17 ሄሲካ ኣቲዳ ኣሳይ ጎዳ ኮያና ማላኔ ታ ሱንꬃን ጼይጌቲዳ ኣይዛቤቲ ታና ኮያና ማላ ጌስ ኡባ ኦꬂዳ ጾሳይ።
ACT 15:18 ሃይሳ ኮይሮፔካ ኤሪሲዳ ጾሲ ታና› ጌስ።
ACT 15:19 «ሄሳ ጊሻስ ሃ ጾሳኮ ሲሚዳ ኣይዛቤታ ኑ ሜቶꬆንታ ማላ ሃይሲ ታ ባጋራ ታስ ቃሾ።
ACT 15:20 ጊዶ ኣቲን ኤቃስ ያርሼቲዲ ቱኒዳ ካꬅ ሞፒቴ፤ ላይማፔ ሃኪቴ፤ ባዉቲ ሃይቂዳ ሜሄ ኣሾ ሞፒቴ፤ ሱꬅ ኡዮፒቴ ጊዲ ኑ ኢስታስ ጻፋና ቤሴስ።
ACT 15:21 ሙሴ ዎጋይ ጊዲኮ ቤኒሶፌ ሳምባታ ሳምባታ ጋላስ ኣይሁዳታ ዎሳ ኬꬃን ናባቤቲሼኔ ካታማይ ዲዛሶን ሳባኬቲሼ ዴስ» ጊዴስ።
ACT 15:22 ሄ ዎዴ ሃዋሬቲኔ ጪማቲ ኩሜꬃ ዎሳ ኬꬃ ኣሳራ ጊዲዲ ባ ጊዶፌ ኢሲ ኢሲ ኣሳታ ዶሪዲ ጳዉሎሳራኔ ባርናባሳራ ጋꬂ ኣንጾኪያ ዬዳናስ ቃቺዳ። ኣማኒዛ ኣሳ ጊዶፌ ዋናቲዛይታ ባርሳባሳ ጌቴቲዛ ዩሁዳኔ ሲላሴ ዶሪዳ።
ACT 15:23 ኢስታ ኩሼን ኢሚ ዬዲዳ ዳብዳቤዚ፥ «ኢንቴ ኢሻታፔ፥ ሃዋሬታፔ፥ ጪማታፔ፥ ኣይዛቤታፔ ኣማኒዳ ኣንጾኪያኒኔ ሶሪያን፥ ኪልቂያንካ ዲዛ ኣማኒዛይታስ ኑ ሳሮካይ ኢንቴና ጋኮ።
ACT 15:24 «ኢሲ ኢሲ ኣሳቲ ኑፔ ጊዶንታ ባ ባጋራ ኑ ኣቻፌ ቢዲ ባ ሃሳያን ኢንቴ ዎዚና ያኔ ሃ ቃꬂዳይሳኔ ኢንቴና ቡልኣኪዳይሳ ኑ ሲዪዶስ።
ACT 15:25 ሄሳ ጊሻስ ጉꬃ ኣሳታ ዶሪዲ ዶሴቲዳ ባርናባሳራኔ ጳዉሎሳራ ኢንቴኮ ዬዳናስ ኑ ዉሪካ ቃላ ጋጊዶስ።
ACT 15:26 ኢስቲ ጎዳ ዬሱስ ኪርስቶሳ ጊሻስ ባ ሼምፖ ኣꬂ ኢሚዳይታ።
ACT 15:27 ሄሳ ጊሻስ ኑ ኢንቴስ ጻፊዳይሳ ኢስቲ ኢንቴስ ባ ዶናራ ሎኤꬂ ዮታና ማላ ዩሁዳኔ ሲላሴ ኢንቴኮ ዬዲዶስ።
ACT 15:28 ሃይታ ኢንቴስ ኮሺዛ ዮኦታፔ ሃራ ዴጾ ቶሆ ኑ ኢንቴ ቦላ ዎꬆንታ ማላ ኑሲኔ ጺሎ ኣያናስ ሎኦ ሚሳቲ ቤቲዴስ።
ACT 15:29 ሄሲካ ኤቃስ ሹኬቲዳ ኣሾፔ፥ ሱꬃፌ፥ ባዉቲ ሃይቂዳ ሜሄ ኣሾፔኔ ላይማፔ ኢንቴ ሃካና ማላሳ፤ ኢንቴ ሃይታ ሚሳቲዛይታፔ ሃኪኮ ኢንቴስ ሎኦ፤ ሳሮን ዲቴ» ጌስ።
ACT 15:30 ኪቴቲዳ ኣሳቲ ሞይዜቲዲ ዱጌ ኣንጾኪያ ዎꬊዳ፤ ሄን ኣማኒዛይታ ዉርሲ ሺሺዲ ኤሂዳ ዳብዳቤዛ ኢስታስ ኢሚዳ።
ACT 15:31 ዴሬይካ ናባቢዲ ሚንꬄꬂዛ ቃላን ኡፋዬቲዴስ።
ACT 15:32 ዩሁዳይኔ ሲላሲ ናቤታ ጊዲዳ ጊሻስ ዳሮ ዞሪዲ ኣማኒዛይታ ሚንꬄꬂዳ።
ACT 15:33 ሄን ጉꬃ ዎዴ ጋምኢዲ ኣማኒዛ ኣሳይ ሞይዚን ጉዬ ባና ኪቲዳይታኮ ሲሚዳ።
ACT 15:34 ሲላሲ ቃሴ ሄን ኣታናስ ኮዪዴስ።
ACT 15:35 ጳዉሎሲኔ ባርናባሲ ሃራ ዳሮ ኣሳታራ ጊዲዲ ጎዳ ቃላ ታማርሲሼኔ ሳባኪሼ ኣንጾኪያን ጋምኢዳ።
ACT 15:36 ጳዉሎሲ ጉꬃ ዎዴ ጋምኢዲ ባርናባሳ፥ «ኑ ካሴ ጎዳ ቃላ ዮቲዳ ኡባ ካታማታ ቢዲ ኣማኒዛይቲ ኣይ ማላ ዲዛኮ ኣኔ ዩዪ ቤዮስ፥ ዴንዳ» ጊዴስ።
ACT 15:37 ባርናባሲካ ማርቆሳ ጌቴቲዛ ዮሃኒሲ ኢስታራ ባና ማላ ኮዪዴስ።
ACT 15:38 ጳዉሎሲ ቃሴ ኢዛ ኤኪ ባናስ ኮዪቤና፤ ጋሶይካ ካሴ ማርቆሲ ኢስታፌ ሻኬቲዲ ጲንፊሊያ ጌቴቲዛሶን ጉዬ ኣቲዲ ኢስታራ ኦሶስ ሲንꬅ ኬዞንታ ኣጊዳ ጊሻሳ።
ACT 15:39 ሂስቲን ዳሮ ፓላማይ ኢስታ ጊዶን ሜꬌቲዳ ጊሻስ ባ ጊዶን ሻኬቲ ዎꬊዳ፤ ሄሳ ጊሻስ ባርናባሲ ማርቆሳ ኤኪዲ ማርካቤን ጌሊዲ ቆጲሮሴ ቢዴስ።
ACT 15:40 ጳዉሎሲ ቃሴ ሲላሴ ዶሪዴስ፤ ኣማኒዛይቲካ ጎዳ ኣꬎ ኪያቴꬃስ ጳዉሎሳ ሃዳራ ኢሚዳፔ ጉዬ ኢዚ ኢስታፌ ሻኬቲዲ ቢዴስ።
ACT 15:41 ኣማኒዛይታ ሚንꬄꬂሼ ሶሪያራኔ ኪልቂያራ ኣꬊ ቢዴስ።
ACT 16:1 ጳዉሎሲ ዳርቤኔ ጌቴቲዛሶኔ ሊስቲራ ጋኪዲ ኢዛ ኣዋይ ጊሪኬ ኣስ፥ ኣዬያ ቃሴ ኣይሁዳ ኣስ ጊዲዳ ጺምቶሳ ጌቴቲዛ ኢሲ ኣማኒዛዴ ሄን ዴሚዴስ።
ACT 16:2 ኢዚካ ሊስቲራኒኔ ኢቆኒዮኔን ኣማኒዛ ኣሳ ኣቻን ሎኦ ማርካቴꬂ ዲዛዴ።
ACT 16:3 ጳዉሎሲካ ጺምቶሳ ባናራ ኤኪ ባናስ ኮዪዴስ፤ ሄሳ ጊሻስ ሄ ሄራን ኣይሁዳታ ጊሻስ ጊዲ ጺምቶሳ ቃጻሪዴስ፤ ጋሶይካ ኣይሁዳቲ ጺምቶሳ ኣዋይ ጊሪኬ ኣስ ጊዲዳይሳ ኤሪዛ ጊሻሳ።
ACT 16:4 ኢስቲ ኢሲ ካታማፔ ሃራ ካታማ ኣꬊ ኣꬊ ቢሼ ሃዋሬቲኔ ዬሩሳላሜ ዎሳ ኬꬃ ጪማቲ ዬዲዳ ኪታ ኣሳይ ኤኪዲ ናጋና ማላ ኣማኒዛ ኣሳስ ኢሚ ኢሚ ኣꬊዳ።
ACT 16:5 ዎሳ ኬꬃ ኣሳይ ኣማኖን ሚኒ ሚኒ ቢዴስ፤ ቃሴ ኣሳይካ ቆዳን ጋላስ ጋላስ ጉጄቲ ጉጄቲ ቢዴስ።
ACT 16:6 ጳዉሎሲኔ ኢዛራ ዲዛ ዛታቲ ቃላ ኢሲያን ሳባኮንታ ማላ ጺሎ ኣያናይ ዲጊዳ ጊሻስ ፒርጊያራኔ ጋላቲያ ዴሬራ ኣꬊ ቢዳ።
ACT 16:7 ኢስቲ ሚሲያ ጌቴቲዛሶ ጋካና ማቲሼ ቢቲኒያ ጌቴቲዛሶ ጌላና ቆፒን ዬሱሳ ኣያናይ ኢስታ ዲጊዴስ።
ACT 16:8 ሄሳ ጊሻስ ሚሲያራ ኣꬊዲ ጺሮኣዳ ጌቴቲዛሶ ዎꬊዳ።
ACT 16:9 ኢሲ ማቂዶኒያ ኣሲ ኤቂዲ ጳዉሎሳ ማቂዶኒያ ፒናዳ ኑና ማዳ ጊሺን ጳዉሎሲ ኦማርስ ኣጁታን ቤዪዴስ።
ACT 16:10 ኢዚካ ሄ ኣጁታ ቤዪን ኑኒ ሄራካ ማቂዶኒያ ባና ኮዪዶስ፤ ጾሲ ኑኒ ኢስታስ ሚሺራቾ ቃላ ዮታና ማላ ጼይጊዴስ ጊ ቆፒዳ ጊሻሳ።
ACT 16:11 ማርካቤራ ጺሮኣዳ ጌቴቲዛሶፔ ዴንዲዲ ሲቲ ጊዲ ሳሞቲራቄ ጌቴቲዛሶ ቢዶስ፤ ዎንቴꬃ ጋላስ ናጱሌ ጌቴቲዛሶ ሲንꬅ ሄሜꬅ ጉጂዶስ።
ACT 16:12 ሄፔካ ኦሮሜ ኣሳይ ቶራን ሃሪዳ ዴሬ ጊዲዳ ማቂዶኒያ ዴሬ ዋና ካታማ ጊዲዳ ፒሊጲሲዮሴ ጌቴቲዛሶ ጌሊዶስ፤ ሄንካ ኡንዴና ዎዴ ኡቲዶስ።
ACT 16:13 ሳምባታ ጋላስ ዎሳ ዎሲዛሶ ኮዪሼ ካታማ ጌሊዛሶ ፔንጌ ኬዚዲ ዱጌ ሻፋ ዎꬎስ፤ ኑ ሄን ኡቲዲ ሺቂ ዲዛ ማጫሳታስ ቃላ ዮቲዶስ።
ACT 16:14 ቃላ ሎኤꬂ ሲዪዛ ማጫሳታፔ ኢሲ ሊዲያ ጌቴቲዛራ ኢዛካ ጾስ ጎይኒዛሮኔ ቲያጺሮኔ ካታማፔ ያዳ ዞኦ ሃሬ ማይኦ ዛልኢዛሮ ጳዉሎሲ ዮቲዛ ቃላ ኢዛ ዎዚናን ዎꬃ ሲያና ማላ ጎዳይ ኢዚ ዎዚና ዶይዴስ።
ACT 16:15 ኢዛኔ ኢዚሶ ኣሳይካ ጻማቄቲዳፔ ጉዬ፥ «ታኒ ጾስ ኣማኒዳይሳ ኢንቴ ቱሙ ኤሪዳ ጊዲኮ ሃ ታሶ ዪዲ ጉꬃ ዎዴ ዲሺቴ» ጋዳ ኢስታ ሚንꬃ ዎሳዱስ።
ACT 16:16 ኢሲ ጋላስ ኑ ዎሳሶ ቢሺን ካዮ ካዮታ ማሮቲዛ ኢሲ ጋራዴ ና ዲዛራ ኑና ዴማዱስ፤ ኢዛካ ባ ማሮቴꬃን ባና ኣይሲዛይታስ ዳሮ ሚሽ ጌልꬃዉስ።
ACT 16:17 ሃና ጋራዴ ናያ ጳዉሎሳኔ ኑና ካላ ካላ፥ «ሃይቲ ኣሳቲ ኢንቴስ ኢንቴ ኣታና ኦጌ ዮቲዛይቲ ዎጋ ጾሳ ኦሳንቻታ» ጋ ጋ ዋሳዱስ።
ACT 16:18 ሄሳካ ዳሮ ጋላስ ሺራ ሺራ ጋዱስ፤ ጊዶ ኣቲን ጳዉሎሲ ኢዚ ቃላን ዳሮ ሜቶቲዳ ጊሻስ ኢዚኮ ሲሚዲ ኢዚ ዶናራ ሃሳይዛ ቱና ኣያናዛ፥ «ኔ ኢዚፔ ኬዛና ማላ ታ ኔና ጎዳ ዬሱስ ኪርስቶሳ ሱንꬃን ኣዛዛይስ» ጊዴስ። ሄ ኣያናይ ሄራካ ዬጊ ኢዚፔ ኬዚዴስ።
ACT 16:19 ኢዞ ኣይሲዛ ኣሳቲ ኢስታስ ሚሼ ዴሚዛ ኦጌይ ዱጺን ኢስታ ሂዶታይ ቃንጼቲዳይሲ ኢስታስ ጌሊን ጳዉሎሳኔ ሲላሴ ኦይኪዲ ቢታራ ጎቺዲ ዋናቲ ዲዛሶ ጊያ ጊዶ ኤፊዳ።
ACT 16:20 ዴሬ ኣይሲዛ ዋናታኮ ሺሺዲ፥ «ሃይቲ ኣሳቲ ባስ ኣይሁዳ ኣስ ጊዲ ኡቲዲ ኑ ካታማ ቡልኣኬቴስ፤
ACT 16:21 ቃሴ ኑ ኦሮሜ ኣሳቲ ኤካናስ ዎይኮ ኦꬃናስ ኑስ ቤሶንታ ዎጋ ኑ ኣሳ ጊዶን ላሌቴስ» ጊዳ።
ACT 16:22 ዴሬይካ ኢሲ ቦላ ጊዲዲ ጳዉሎሳ ቦላኔ ሲላሴ ቦላ ዴንዲዴስ፤ ዴራ ኣይሲዛይቲ ጳዉሎሳንታ ማይኦ ቃሪ ኤኪዲ ዱርቃራ ቆጻና ማላ ኣዛዚዳ።
ACT 16:23 ኢታ ቡካ ቡኪዲ ቃሾ ኬꬃን ዬጊዳ፤ ቃሾ ኬꬃ ናጊዛይሲካ ኢስታ ሎኤꬂ ናጋና ማላ ኣዛዚዳ።
ACT 16:24 ኢዚካ ሄሳ ማላ ሚኖ ኣዛዞ ኤኪዲ ቃሾ ኬꬃስ ዋና ጊዶ ኪፊሌ ጌልꬂዲ ኢስታ ቶሆ ጊታ ዱሩማራ ሺሺ ቃቺዴስ።
ACT 16:25 ጊዲ ጊዶꬅ ጊዲሺን ጳዉሎሲኔ ሲላሲ ዎሳኒኔ ዬꬃን ጾሳ ጋላቲሺን ቃሾ ኣሳይ ኢስታ ዬꬃኔ ጋላታ ኤዝጊ ሲዪዴስ።
ACT 16:26 ሃሳኣይ ባይንዳ ዲንጋቴ ቃሾ ኬꬃ ጻጶፔ ቃꬂዛ ሚኖ ቢታ ቃꬂ ሃኒዴስ፤ ሄራካ ቃሾ ኬꬃ ፔንጌቲ ዶዬቲዳ፤ ቃሼቲዳ ኡባ ኣሳ ቃሾይ ቢርሼቲዴስ።
ACT 16:27 ቃሾ ኬꬃ ናጊዛይሲ ꬊስኮፌ ቤጊዲ ቃሾ ኬꬃ ፔንጌቲ ዶያ ዲዛይሳ ቤኢዲ ቃሾ ኣሳይ ዉሪ ኬሲ ኤኪዳ ሚሳቲን ባና ዎꬋና ማሻ ሾዲዴስ።
ACT 16:28 ጳዉሎሲ ቃሴ ባ ቃላ ꬎቁ ሂስቲዲ፥ «ኑ ዉሪ ሃን ዶስ! ኔ ቦላ ኣይኔ ኢታ ኦꬆፋ» ጊ ዋሲዴስ።
ACT 16:29 ቃሾ ኬꬃ ናጊዛይሲ ጾምፔ ዎሲ ኤኪዲ ጊዶ ጉፒ ጌሊዴስ፤ ኮኮሪሼ ጳዉሎሳ ቶሆ ቦላኔ ሲላሴ ቶሆ ቦላ ኩንዲዴስ።
ACT 16:30 ኢስታ ኤኪ ካሬ ኬዚዲ፥ «ሃ ኣሳቶ! ታ ኣታና ማላ ኣይ ኦꬆ?» ጊዴስ።
ACT 16:31 ኢስቲካ ኢዛስ፥ «ጎዳ ዬሱሳ ኣማና፤ ኔካ ኔሶ ኣሳይካ ኢንቴ ዉሪ ኣታና» ጊዳ።
ACT 16:32 ሄሳፌ ጉዬ ኢዛሲኔ ኢዛሶን ዲዛ ኣሳስ ኡባስ ጎዳ ቃላ ዮቲዳ።
ACT 16:33 ቃሾ ኬꬃ ናጊዛይሲ ሄራካ ሄ ጋላስ ቃማራ ኤፊዲ ኢስታ ማዱንꬃ ሜጪዴስ፤ ሄራካ ኢዚኔ ኢዛሶ ኣሳይ ዉሪ ጻማቄቲዳ።
ACT 16:34 ቃሾ ኬꬃ ናጊዛይሲካ ኢስታ ባ ኬꬄ ኤፊዲ ኢስታስ ካꬅ ኣꬂዴስ፤ ባሶ ኣሳ ኡባራ ጾሳ ኣማኒዳ ጊሻስ ኣዴዚ ዳሮ ኡፋዪዴስ።
ACT 16:35 ጋዴይ ዎንቲሺን ዴሬ ኣይሲዛይቲ፥ «ሄይታ ኣሳታ ቢርሻ ዬዳ» ጊዲ ባ ሹሜታ ቃሾ ኬꬃ ናጊዛይሳኮ ዬዲዳ።
ACT 16:36 ቃሾ ኬꬃ ናጊዛይሲካ ኢስታስ፥ «ዴሬ ኣይሲዛይቲ ኢንቴ ቢርሼታና ማላ ኣዛዚዳ፤ ሄሳ ጊሻስ ሃኢ ሳሮን ኬዚ ቢቴ» ጊዲ ጳዉሎሳስ ዮቲዴስ።
ACT 16:37 ጳዉሎሲ ቃሴ፥ «ኑ ኦሮሜ ዬሌቴꬅ ጊዲሺን ፒርዳይ ባይንዳ ዴሬ ሲንꬃን ዱርቃራ ቡኪዲ ቃሾ ኬꬃን ዬጊዳ፤ ሂስቲን ሃኢ ቃሴ ኑና ቆታራ ኣሲ ኤሮንታ ኬሳና ኮዪዞ? ሄሲ ሃኔና፤ ኢስቲ ዪዲ ባርካ ቢርሼቶ!» ጊዴስ።
ACT 16:38 ሹሜቲ ሄ ኢዚ ጊዳ ቃላ ዴሬ ኣይሲዛይታስ ዮቲዳ፤ ኢስቲካ ጳዉሎሲኔ ሲላሲ ኦሮሜ ዬሌታ ጊዲዳይሳ ሲዪዲ ዳጋሚዳ።
ACT 16:39 ዪዲ ኢስታፌ ማሬቴꬅ ኦይቺዲ ዎይኔፔ ኬሲዳ፤ ኢስቲ ሄ ካታማዮ ኣጊዲ ሃራሶ ባና ማላ ኢስታ ዎሲዳ።
ACT 16:40 ጳዉሎሲኔ ሲላሲ ቃሾ ኬꬃፌ ኬዚዲ ሊዲያሶ ቢዳ፤ ሄንካ ዲዛ ኣማኒዛይቲ ኢስታ ኬሂ ሚንꬄꬂዲ ሄፔ ኬዚ ቢዳ።
ACT 17:1 ጳዉሎሲኔ ሲላሲ ኣንፊጶላኔ ኣጶሎኒያ ጌቴቲዛ ዴሬራ ኣꬊዲ ታሶሎንቄ ጌቴቲዛ ዴሬ ቢዳ፤ ሄንካ ኣይሁዳታ ዎሳ ኬꬂ ዴስ።
ACT 17:2 ጳዉሎሲካ ኢዛስ ሎሴ ጊዲዳ ማላ ኣይሁዳታ ዎሳ ኬꬅ ጌሊዴስ፤ ሄꬑ ሳሚንታ ኩሜꬅ ቃላፔ ኤኪ ኤኪ ኢስታራ ሃሳዬቲዴስ።
ACT 17:3 ኪርስቶሲ ዋዬ ኤካናሲኔ ሃይቂ ዴንዳናስ ቤሲዛይሳ ቆንጪሲ ኣማንꬆን፥ «ሃይሲ ታ ሳባኪዛ ዬሱሲ ኢዚ ኪቴቲ ያና ጌቴቲዳይሳኮ!» ጊዴስ።
ACT 17:4 ኣይሁዳታፔ ኢሲ ኢሲ ኣሳይ ባ ሲዪዳይሳ ኣማኒዲ ጳዉሎሳራኔ ሲላሴራ ኢሲፌ ጊዲዴስ፤ ቃሴካ ዳሮ ዴሬይ ጾሳስ ያዪዛ ጊሪኬታፔ ዳሮ ኤሬቲዳ ማጫሳቲ ባ ሲዪዳ ቃላን ኣማኒዲ ኢስታራ ኢሲኖ ጊዲዳ።
ACT 17:5 ኣይሁዳቲ ቃሴ ኢስታ ቃናቲዲ ጊያን ዲዛ ዎርዶ ኣሳታ ሺሺዲ ኩሜꬃ ዴሬዛ ኢስታ ቦላ ዴንꬄꬂዲ ካታማን ሺሮ ሜꬊዳ። ጳዉሎሳኔ ሲላሴ ሺሺዲ ዴራ ሲንꬃን ኤሳናስ ኢሲ ኢያሶኔ ጌቴቲዛይሳሶ ኮያናስ ኤሌሊ ቢዳ።
ACT 17:6 ጊዶ ኣቲን ኢስታ ኢያሶኔ ኬꬃን ዴሞንታ ኣጊዳ ጊሻስ ኢያሶኔኔ ሃራ ኣማኒዛ ኣሳታ ካታማ ዳናታ ሲንꬃራ ጎቺሼ፥ «ሃይቲ ኣሳቲ ዴሬ ዉርሲ ቡልኣኪሼ ጋምኢዲ ቃሴ ሃኢ ሃ ዪዳ።
ACT 17:7 ኢያሶኔይካ ኢስታ ባ ኬꬃን ዎꬂዴስ፤ ሃይቲ ኣሳቲ ዉሪ፥ ‹ዬሱሳ ጌቴቲዛ ሃራ ካዎይ ዴስ› ጊዲ ቄሳሬ ዎጋ ኤኬቴና» ጊሼ ዋሲዳ።
ACT 17:8 ዴሬይኔ ሄ ካታማ ዳናቲ ሄሳ ሲዪዲ ባ ጊዶን ቡቄቲዳ።
ACT 17:9 ኢያሶኔኔ ሃራታካ ዋሴ ጼይጊሲዲ ዬዲዳ።
ACT 17:10 ኣማኒዛይቲ ሄራካ ጳዉሎሳኔ ሲላሴ ቃማራ ቤሪያ ዬዲዳ፤ ኢስቲካ ሄ ጋኪዳ ማላ ኣይሁዳታ ዎሳ ኬꬄ ጌሊዳ።
ACT 17:11 ቤሪያ ኣሳይ ታሶሎንቄ ኣሳፔ ኣꬊዲ ኣኬካራ ዲዛ ኣሳ። ጋሶይካ ሃይሲ ዮኦዚ ቱሜሻ? ጊ ጊዲ ጌሻ ማጻፋታ ቃላ ዎንቲን ዎንቲን ፒልጊ ጼሊዲ ኡፋይሳን ኤኪዴስ።
ACT 17:12 ሄሳ ጊሻስ ኢስታፌ ዳሮ ኣሳይ ኣማኒዴስ፤ ቃሴካ ኢስታራ ቆዳን ዳሮቲ ቦንቼቲዳ ጊሪኬ ዴሬ ማጫሳቲኔ ኣዴቲካ ኣማኒዳ።
ACT 17:13 ታሶሎንቄን ዲዛ ኣይሁዳ ኣሳቲ ጳዉሎሲ ጾሳ ቃላ ቤሪያንካ ሳባኪዛይሳ ኤሪዳ ማላ ዴሬዛ ዴንꬄꬃናስ ቃሴካ ኢስታኮ ቢዳ።
ACT 17:14 ሄ ዎዴ ኣማኒዛይቲ ጳዉሎሳ ኤሌሲዲ ጌዴ ኣባ ኣቺ ዬዲዳ፤ ሲላሲኔ ጺምቶሲ ሄን ኣቲዳ።
ACT 17:15 ጳዉሎሳ ሞይዚዳ ኣሳቲ ኢዛ ኣቴና ጋꬂዳ፤ ቃሴካ ሲላሲኔ ጺምቶሲ ኢዛኮ ኤሌሊ ጋካና ማላ ጊዛ ኪታ ጳዉሎሳፔ ኤኪዲ ሲሚዳ።
ACT 17:16 ጳዉሎሲ ኣቴናን ኢስታ ናጊሺን ኣቴና ካታማን ኤቃቲ ኩሚዳይሳ ቤኢዲ ዳሮ ሼኔቲዴስ።
ACT 17:17 ሄሳ ጊሻስ ኣይሁዳታ ዎሳ ኬꬃን ኣይሁዳታራኔ ጾሳስ ያዪዛ ጊሪኬ ኣሳራ ቃሴካ ጊያይ ዲዛሶን ጋላስ ጋላስ ባናራ ጋጊዛ ኣሳራ ሃሳዬቲዴስ።
ACT 17:18 ኤፊቆሮሴኔ ኢስቶይኮ ጌቴቲዛ ኤራንቻታ ባጋ ጊዲዳይቲ ጳዉሎሳኮ ሺቂዲ ኢዛራ ሃሳዬቲዳ፤ ኢስታፌ ኢሲ ኢሲ ኣሳቲ፥ «ሃይሲ ሎምኡሎምኣይ ኣይ ጋና ኮይዜ?» ጊዳ፤ ባጋይቲ ቃሴ ዬሱሳ ጊሻሲኔ ሃይቆፔ ኢዛ ዴንꬃ ሚሺራቾ ኢዚ ሳባኪሺን ሲዪዲ፥ «ሄሲ ሃራ ኦራꬃ ኤቃታ ጊሻስ ዮቲዛ ሚሳቴስ» ጊዳ።
ACT 17:19 ኢዛ ኦይኪዲ ኣሪዮስፋጎሴ ጌቴቲዛ ዴሬ ዱላታ ሲንꬅ ኤፊዲ፥ «ሃ ኔ ታማርሲዛ ኦራꬃ ቲሚርቴይ ኣዛኮ ኑ ኤራና ማላ ኔ ኮያይ?» ጊዳ።
ACT 17:20 ቃሴ ኔ ኑና ኑ ሃይꬃን ሲሲዛ ዮኦይ ኑ ኤሮንታ ኦራꬅ ጊዲዳ ጊሻስ ኢዚ ኣዛኮ ኑ ኤራና ኮዮስ።
ACT 17:21 ኣቴና ኣሳይ ኩሜꬅ ቃሴካ ሃን ዲዛ ሃራ ዴሬ ኣሳይካ ባስ ዎዴ ኣꬃናስ ኦራꬃ ዮኦ ሃሳያኒኔ ሲሳን ኣቲን ሃራ ሚሻን ዎዴ ኣꬄቴና።
ACT 17:22 ሄሳ ጊሻስ ጳዉሎሲ ኣሪዮስፋጎሴ ጌቴቲዛ ዱላታን ሺቂዳ ዴሬዛ ሲንꬃን ኤቂዲ፥ «ሃይቶ ኣቴና ኣሳቶ! ኢንቴ ቤቶ ሚሽ ኡባ ኣማኒዛይታ ጊዲዳይሳ ታ ቤያይስ።
ACT 17:23 ታ ያኔ ሃ ዩዪሺን ኢንቴ ኢስታስ ጎይኒዛ ሚሻታ ታ ጼሊሺን፥ ‹ኤሬቶንታ ጾስ› ጌቴቲ ጻፌቲዳይሳ ኢሲ ያርሾሶሆ ዴማዲስ፤ ሄሳ ጊሻስ ሄሳ ኢንቴ ኤሮንታ ጎይኒዛይሳ ታ ኢንቴና ኤሪሳና።
ACT 17:24 ሃይሳ ኣላሜዛኔ ኢዛ ጊዶንካ ዲዛይሳ ኡባ ሜꬊዳ ጾሲ ኢዚ ሳሎኔ ሳኣ ጎዳ፤ ሄሳ ጊሻስ ኢዚ ኣሳ ኩሼን ኬጼቲዳ ኬꬃን ዴና።
ACT 17:25 ኢዚ ኣስ ኡባስ ዴኦኔ ሼምፖ፤ ቃሴካ ሃራ ዉርሲ ኢሚዛይሳ ጊዲዳ ጊሻስ ኢዛስ ፓጪዛዚ ባይንዳ ጊሻስ ኢዚ ኣሳ ኩሼፔ ማዶ ኤኬና።
ACT 17:26 ኣሳ ዜሬꬅ ኡባ ኢሳዴፌ ሜꬊዲ ኣሲ ቢታ ቦላ ዳና ማላ ኦꬂዴስ፤ ኣሳይ ዳና ዎዴኔ ዉርሴꬃ ꬋስ ዎꬂዴስ።
ACT 17:27 ሄሲካ ኣሲ ጾስ ኮዪዲኔ ፒልጊዲ ዴማናኮ ጊዲ ዎꬂዴስ፤ ሄሲ ሄሳ ጊዲኮካ ኢዚ ኑፔ ኢሲ ኢሳዴፌ ሃኪ ዲዛ ጊሻስ ጊዴና።
ACT 17:28 ኑ ዴኦ ዴሚዳይ፥ ዲዛይኔ ቃጼቲዛይ ኢዛና፤ ኢንቴ ዴሬን ማዛሙሬ ኬሲዛ ኢሲ ኢሲ ኣሳቲ፥ ‹ኑኒካ ኢዛ ናይታ› ጊዳ ማላ።
ACT 17:29 «ሂስቲኮ ኑ ጾሳ ናይታ ጊዲኮ ጾሲ ኣስ ኤራቴꬃን ሜꬊ ኬሲዳ ዎርቃ ዎይኮ ቢራ ዎይኮ ሹች ሚሳቴስ ጊዲ ኑ ቆፓናስ ቤሴና።
ACT 17:30 ካሴቲዲ ጾሲ ሃይሳ ማላ ሃኖታ ኣሳይ ኤሮንታ ኦꬂዳይሳ ዳንዳያን ኣꬊዴስ፤ ሃኢ ጊዲኮ ኣሲ ዉሪ ባ ዲዛሶን ዲዛሶን ማሮቴꬃን ጌላና ማላ ኣዛዜስ» ጊዴስ።
ACT 17:31 ኢዚ ባ ዶሲዳዴ ባጋራ ቢታ ቦላ ጺሎቴꬃን ፒርዳና ጋላስ ባሬ ዎꬂዴስ። ኢዛካ ሃይቆፔ ዴንꬂዲ ኣስ ኡባስ ሃይሳ ቱማቴꬃ ኤሪሲዴስ።
ACT 17:32 ኢስቲካ ሃይቂዳይታ ዴንꬃ ጊሻስ ሲዪዳ ማላ ኢሲ ኢሲ ኣሳቲ ኢዛ ቂꬊዳ፤ ባጋይቲ ቃሴ፥ «ሃይሳ ቃሴካ ኑ ኔፔ ሃራ ጋላስ ሲያና ኮዮስ» ጊዳ።
ACT 17:33 ሄራካ ጳዉሎሲ ኢስታ ጊዶፌ ኬዚ ቢዴስ።
ACT 17:34 ኢሲ ኢሲ ኣሳቲ ቃሴ ጳዉሎሳ ካሊዳኔ ኣማኒዳ፤ ሄይታፔካ ዲዮናሲዮሳ ጌቴቲዛ ኣሪዮስፋጎሴ ዱላታ ኬꬃ ኣባሌ ጊዲዳ ዴማርሶ ጌቴቲዛ ማጫሳያኔ ሃራቲካ ኢሲፌ ዴቴስ።
ACT 18:1 ሄሳፌ ጉዬ ጳዉሎሲ ኣቴናፔ ዴንዲዲ ቆሮንቶሴ ካታማ ቢዴስ።
ACT 18:2 ሄንካ ጳንጾሳን ዬሌቲዳ ኣቂላ ጌቴቲዛ ኣይሁዳ ኣስ ዴሚዴስ፤ ኢዚካ ኣይሁዳቲ ዉሪ ኦሮሜፔ ኬዛና ማላ ቃላዎዶሳ ጌቴቲዛ ኦሮሜ ካዎይ ኣዛዚዳ ማላ ባ ማቼዮ ጲርሲቂላራ ማታ ዎዴ ኢጻሊያ ዴሬፔ ዪዳይሳ ቤያናስ ጳዉሎሲ ሄ ኢስታኮ ቢዴስ።
ACT 18:3 ኢዚካ ኢስታꬆ ዱንካኔ ሲኪዛዴ ጊዲዳ ጊሻስ ኢስታ ኣቻን ኡቲዲ ዱንካኔ ሲኮን ጌሊዴስ።
ACT 18:4 ሳምባታ ሳምባታ ጋላስ ኣይሁዳታ ዎሳ ኬꬃን ኣይሁዳታራኔ ጊሪኬ ኣሳታራ ሃሳዬቲሼ ኢስታ ኣማንꬃናስ ባጼቲዴስ።
ACT 18:5 ሲላሲኔ ጺምቶሲ ማቂዶኒያፔ ዱጌ ኢዛኮ ዎꬊን ጳዉሎሲ ሳባኮን ሚኒዲ ዬሱሲ ኢዚ ኪርስቶሳ ጊዲዳይሳ ኣይሁዳታስ ማርካቲዴስ።
ACT 18:6 ጊዶ ኣቲን ኢስቲ ኢዛራ ኤቄቲዲ ኢዛ ጫዪዳ ጊሻስ ጳዉሎሲ ባ ማይኦ ቆቆፊዲ፥ «ታ ኢንቴፌ ጺሎ፤ ኢንቴ ፒርዴታናይ ኢንቴ ሞሮን ጊዲዳ ጊሻስ ታ ኢንቴ ሱꬃ ጎሜን ኦይሼቲኬ፤ ሄሳ ጊሻስ ታ ኣይዛቤታኮ ባይስ» ጊዴስ።
ACT 18:7 ሄፔ ኬዚዲ ቲቶሳ ኢዮስጾሳ ጌቴቲዛ ጾስ ዎሲዛይሳሶ ቢዴስ፤ ሄ ኣዴዛ ኬꬃይ ኣይሁዳታ ዎሳ ኬꬃ ኣቻን ዴስ።
ACT 18:8 ኣይሁዳታ ዎሳ ኬꬃ ሃላቃይ ቄሪስጶሲ ባሶ ኣሳ ኡባራ ጎዳ ኣማኒዴስ፤ ጳዉሎሲ ዮቲሺን ሲዪዳ ዳሮ ቆሮንቶሴ ካታማ ኣሳይ ኣማኒዲ ጻማቄቲዴስ።
ACT 18:9 ጎዳይ ቃማራ ኣጁታን ጳዉሎሳ፥ «ባቦፋ፤ ዮታ፤ ጮኡ ጎፓ፤
ACT 18:10 ታ ኔናራ ዳይስ፤ ኦኒካ ኔ ቦላ ዴንዲ ኔና ቆሃናስ ዳንዳዬና፤ ሃኖ ሃ ካታማይን ታስ ዳሮ ኣሲ ዴስ» ጊዴስ።
ACT 18:11 ሄሳ ጊሻስ ጳዉሎሲ ጾሳ ቃላ ኣሳ ታማርሲሼ ኢሲ ላይꬂኔ ባጋ ኢስታራ ኡቲዴስ።
ACT 18:12 ጋልዮሳ ጌቴቲዛ ዴሬ ኣይሲዛይሲ ኣካያን ዲዛ ዎዴ ኣይሁዳቲ ኢሲፌ ጊዲዲ ጳዉሎሳ ቦላ ዴንዲዳ፤ ፒርዳ ዎምቦራ ሲንꬅ ሺሺዲ፥
ACT 18:13 «ሃይሲ ኣዴዚ ዎጋፔ ካሬራ ኣሳይ ጾሳስ ጎይናና ማላ ኣሳ ባሌꬄስ» ጊዳ።
ACT 18:14 ጳዉሎሲ ሃሳያና ቡሮ ዶና ዶይሺን ጋልዮሲ ኣይሁዳታ፥ «ኢንቴኖ ኣይሁዳ ኣሳቶ! ኢንቴ ሺሺዳ ዮኦይ ዴሬ ዴንꬄꬆ ዎይኮ ዴሬ ጊታ ሜቶን ዬጊዛ ዮኦ ጊዲዳኮ ታ ዎዚናፔ ሲያናሺን።
ACT 18:15 ጊዶ ኣቲን ኢንቴ ፓላማይ ኢሲ ኢሲ ቃላታ ጊሻሲኔ ኢሲ ኢሲ ሱንꬃታ ጊሻስ ቃሴካ ኢንቴ ዎጋ ጊሻስ ጊዲዳ ጊሻስ ኢንቴ ሄን ኢንቴ ባጋራ ዉርሲቴ፤ ታ ሄሳ ማላ ዮኦ ፒርዳናስ ኮይኬ» ጊዴስ።
ACT 18:16 ሄሳ ጊሻስ ፒርዳ ዎምቦራ ሲንꬃፌ ኢስታ ኬሲዴስ።
ACT 18:17 ሄ ዎዴ ዉሪካ ኣይሁዳ ዎሳ ኬꬃ ሃላቃ ሶስቲኔሴ ጌቴቲዛይሳ ኦይኪዲ ፒርዳ ኬꬃ ሲንꬃን ቡኪዳ፤ ጋልዮሲ ጊዲኮ ሄሳ ዉዳንካ ዬጊቤና።
ACT 18:18 ሄሳፌ ጉዬ ጳዉሎሲ ቆሮንቶሴ ካታማን ዳሮ ዎዴ ጋምኢዴስ፤ ሄፔካ ኣማኒዛ ኣሳይ ሞይዚን ጲርሲቂላራኔ ኣቂላራ ኢሲፌ ማርካቤን ጌሊዲ ሶሪያ ጌቴቲዛሶ ቢዴስ፤ ኣዲና ጋꬃናስ ኪንኪራኦሴ ጌቴቲዛሶን ባ ሁኤ ሜዴቲዴስ።
ACT 18:19 ኤፌሶኔ ጋኪዳ ማላ ጲርሲቂላኔ ኣቂላ ሄን ኣጊዲ ጳዉሎሲ ኣይሁዳታ ዎሳ ኬꬄ ጌሊዲ ኣይሁዳታራ ሃሳዬቲዴስ።
ACT 18:20 ባናራ ጋምኣና ማላ ኢስቲ ኦይቺን ኢዚ፥ «ኣካይ» ጊዲ ኢጺዴስ።
ACT 18:21 ጊዶ ኣቲን ኢዚ ኢስታፌ ሻኬቲሼ፥ «ጾሳ ሼኔ ጊዲኮ ታ ሲማዳ ያና» ጊዴስ፤ ኤፌሶኔፔ ዴንዲዲ ማርካቤን ጌሊዲ ቢዴስ።
ACT 18:22 ቂሳሪያ ጌቴቲዛሶ ጋኪዳፔ ጉዬ ኬዚዲ ኣማኒዛይታ ሳሮ ጊዲ ሄፔ ኣንጾኪያ ዎꬊዴስ።
ACT 18:23 ኣንጾኪያን ጉꬃ ዎዴ ታኪዳፔ ጉዬ ሄፔ ዴንዲዲ ጋላቲያ ባጋራኔ ፒርጊያ ጌቴቲዛ ዴሬታራ ዩዪ ኣꬊዲ ኣማኒዛይታ ሚንꬄꬂዴስ።
ACT 18:24 ሄ ዎዴ ኢሲ ኢስኪንዲሪያ ካታማን ዬሌቲዳ ኣጲሎሳ ጌቴቲዛ ኢሲ ኣይሁዳ ኣሲ ኤፌሶኔ ዪዴስ፤ ኢዚካ ታማርዳዴኔ ጌሻ ማጻፋታ ሎኤꬂ ኤሪዛዴ።
ACT 18:25 ኢዚ ጎዳ ኦጌ ታማርዳዴኔ ዬሱሳ ጊሻስ ባላይ ባይንዳ ሃሳይዛዴኔ ጺሎ ኣያናን ጹጌቲሼ ታማርሲዛዴ፤ ጊዶ ኣቲን ኢዚ ሎኤꬂ ኤሪዛይ ዮሃኒሳ ጺንቃታ ጻላላ።
ACT 18:26 ኢዚካ ኣይሁዳ ዎሳ ኬꬃን ባቦንታ ዮቶ ኦይኪዴስ፤ ጲርሲቂላይኔ ኣቂላይ ኢዚ ጊዛይሳ ሲዪዲ ኢዛ ባሶ ኤፊዲ ጾሳ ኦጌ ኢዛ ካሴፔ ሎኤꬂ ኤሪሲዳ።
ACT 18:27 ኣጲሎሲ ኣካያ ባናስ ኮዪን ኣማኒዛይቲ ኢዛ ሚንꬄꬂዳ፤ ሄን ዲዛ ኣማኒዛ ኣሳይካ ኢዛ ሞኪ ኤካና ማላ ኢዛስ ዳብዳቤ ጻፊዳ፤ ኢዚ ሄ ጋኪዳ ማላ ኢዛስ ዲዛ ኢሞታፔ ዴንዲዳይሳን ኣማኒዛይታ ዳሮ ማዲዛዴ ጊዲዴስ።
ACT 18:28 ጌሻ ማጻፋታ ያይሳ ሃይሳራ ጋꬂ ማርካሲ ማርካሲ ዬሱሲ ኢዚ ኪርስቶሳ ጊዲዳይሳ ኣይሁዳታራ ዳሮ ፓላሜቲዲ ዴሬ ሲንꬃን ኢስታ ላꬂዴስ።
ACT 19:1 ኣጲሎሲ ቆሮንቶሴን ዲዛ ዎዴ ጳዉሎሲ ፑዴሃ ባጋ ዴሬራ ካንꬂዲ ኤፌሶኔ ዪዲ ሄን ዲዛ ኢሲ ኢሲ ኣማኒዛ ኣሳታ ዴሚዲ፥
ACT 19:2 «ኢንቴ ኣማኒዳ ዎዴ ጺሎ ኣያና ኤኪዴቲ?» ጊዴስ፤ ኢስቲካ «ኤኪቤኮ ሃራይ ኣቶሺን ጺሎ ኣያናይ ዲዛኮ ኑ ሲዪቤኮ» ጊዳ።
ACT 19:3 ጳዉሎሲካ ኢስታ፥ «ሂስቲን ኢንቴ ኣዛን ጻማቄቲዴቲ?» ጊዴስ፤ ኢስቲካ ኢዛስ፥ «ዮሃኒሳ ጺንቃታን ጻማቄቲዶስ» ጊዳ።
ACT 19:4 ጳዉሎሲካ ኢስታስ፥ «ዮሃኒሳ ጺንቃታይ ጊዲኮ ኣሳይ ማሮቴꬃን ሲሚዳይሳ ቤሲዛ ጺንቃታኮ! ዮሃኒሲ ባ ባጋራ ኣሳይ ኢዛፔ ጉዬራ ዪዛ ዬሱሳ ኣማናና ማላ ዮቲዴስ» ጊዴስ።
ACT 19:5 ኢስቲካ ሄሳ ሲዪዳፔ ጉዬ ጎዳ ዬሱሳ ሱንꬃን ጻማቄቲዳ።
ACT 19:6 ጳዉሎሲካ ኢስታ ቦላ ባ ኩሼ ዎꬂዳ ማላ ጺሎ ኣያናይ ኢስታ ቦላ ዎꬊን ኢስቲ ዱማ ዴሬታ ቃላራ ሃሳይዳ፤ ቲንቢቴካ ዮቲዳ።
ACT 19:7 ሄ ኣሳቲ ዉሪካ ታማኔ ናምኡ ጊዲዛይታ።
ACT 19:8 ጳዉሎሲ ኣይሁዳታ ዎሳ ኬꬄ ጌሊዲ ጾሳ ካዎቴꬃ ጊሻስ ሃሳዬቲሼኔ ኢስታ ኣማንꬂሼ ሄꬑ ኣጊና ኩሜꬅ ኦናስካ ባቦንታ ኣሳስ ቆንጪሲ ዮቲዴስ።
ACT 19:9 ኢሲ ኢሲ ኣሳይ ፓላማ ጺንኢ ጊዲ ኣማናናስ ኮዪቤና፤ ጎዳ ኦጌ ቆንጬን ኢጺዳ፤ ሄሳ ጊሻስ ጳዉሎሲ ኢስታ ኣጊዲ ሃራሶ ቢዴስ፤ ኣማኒዛይታካ ዱማ ሻኪ ኬሲዲ ጺራኖሴ ቲሚርቴ ኬꬃን ጋላስ ጋላስ ኢስታራ ሃሳዬቲዴስ።
ACT 19:10 ሄሳ ማላ ኦሶን ናምኡ ላይꬅ ጋምኢዳ ጊሻስ ኢሲያ ኣዉራጃን ዲዛ ኣይሁዳቲኔ ጊሪኬ ኣሳይ ዉሪ ጎዳ ቃላ ሲያና ዳንዳይዴስ።
ACT 19:11 ጾሲ ጳዉሎሳ ባጋራ ዳሮ ማላሊሲዛ ማላታ ኦꬂዴስ።
ACT 19:12 ማራቤ ዎይኮ ኢዛ ኣሳቴꬅ ቦቺዳ ጫርቃ ኤፊዲ ሃርጋንቻታ ቦቺኮ ሃርጌይ ዬዴስ፤ ቱና ኣያናቲካ ባ ኦይኪዳ ኣሳፔ ኬዜቴስ።
ACT 19:13 ዩዪ ዩዪ ኣሳፔ ዳይዳንꬅ ኬሲዛ ኢሲ ኢሲ ኣይሁዳ ኣሳቲ፥ «ጳዉሎሲ ሳባኪዛ ዬሱሳ ሱንꬃን ኢንቴ ኬዛና ማላ ኣዛዛይስ» ጊዲ ጎዳ ሱንꬅ ቱና ኣያናቲ ኦይኪዳ ኣሳታ ቦላ ጼይጋና ፓጪዳ።
ACT 19:14 ኢሲ ኣይሁዳታፔ ጊዲዳ ቄሴታ ሃላቃ ኣስቄዌስ ኣቱማ ና ላፑናቲ ሄሳꬆ ኦꬂዳ።
ACT 19:15 ቱና ኣያናይካ፥ «ታ ዬሱሳካ ኤራይስ፤ ጳዉሎሳካ ኤራይስ ሺን ኢንቴ ቃሴ ኦናንቴ?» ጊዴስ።
ACT 19:16 ቃሴካ ቱና ኣያናይ ኢዛ ኦይኪዳዴይ ጉፒዲ ኣሳታ ኦይኪዴስ፤ ኢስታ ቦላ ዎልቃቲዲ ዳሮ ሚኒን ማዱንጺዲ ኬꬃፌ ሜላ ካሎ ባቃቲዳ።
ACT 19:17 ሄሲካ ኤፌሶኔን ዲዛ ኣይሁዳታ ኣቻኒኔ ጊሪኬ ኣሳ ኡባ ኣቻን ኤሬቲን ዉሪካ ባቢዳ፤ ሄሳንካ ጎዳ ዬሱሳ ሱንꬂ ቦንቼቲዴስ።
ACT 19:18 ኣማኒዳ ኣሳፔ ዳሮይ ሺቂዲ ባ ኢታ ኦሶ ቆንጬን ፓጺዴስ።
ACT 19:19 ማሮ ማሮቲዛይታፔ ዳሮቲ ባ ማሮቲዛ ማጻፋ ሺሺዲ ዴሬ ሲንꬃን ታማን ጹጊዳ፤ ማጻፋ ዋጋይ ሺሺ ቆዲን ኢቻሹ ታሙ ሺ ቢራ ማላ ጊዲዴስ።
ACT 19:20 ሃይሳ ማላን ጎዳ ቃላይ ኬሂ ዲጪሼኔ ጾኒ ጾኒ ቢዴስ።
ACT 19:21 ሃይሲ ዉሪ ሃንዳፔ ጉዬ ጳዉሎሲ ማቂዶኒያራኔ ኣካያ ባጋራ ኣꬊዲ ዬሩሳላሜ ባናስ ቆፋ ቃቺዲ፥ «ታ ሄ ጋኪዳፔ ጉዬ ታ ኦሮሜ ቃሴካ ቤያና ኮሼስ» ጊዴስ።
ACT 19:22 ባና ማዲዛይታፔ ናምኣታ ጺምቶሳኔ ኤሪስጾሳ ጌዴ ማቂዶኒያ ጌቴቲዛሶ ኪቲዲ ባስ ኢሲያ ኣዉራጃን ጉꬃ ዎዴ ሄን ዴኢዴስ።
ACT 19:23 ሄ ዎዴ ጎዳ ኦጌ ጊሻስ ዳሮ ሺሮይ ሜꬌቲዴስ።
ACT 19:24 ዲሜጺሮሳ ጌቴቲዛ ኢሲ ቢራ ቆጺዛይሲ ኣርጼሚሴ ጌቴቲዛ ኤቃ ሚስሌ ቢራፔ ሴሪሲ ሜꬊ ሜꬊ ሂላንቻታስ ዎꬌ ሚሼ ዴሚሴስ።
ACT 19:25 ኢዚካ ሄ ሂላንቻታን ሄሳ ማላ ኦሶን ኣቂዛ ሃራ ኣሳታ ኢሲ ቦላ ሺሺዲ፥ «ኣሶ! ሃይሲ ኦሶዚ ኑስ ሚሽ ኬሲዛይሳ ኢንቴ ኤሬታ።
ACT 19:26 ሃይሲ ጳዉሎሳ ጌቴቲዛይሲ ኤፌሶኔን ጻላ ጊዶንታ ኩሜꬃ ኢሲያ ኣዉራጃን ዲዛ ዳሮ ዴሬዛ ኣማንꬂ ኣማንꬂ ባሌꬂዛይሳ ኢንቴ ዉሪካ ቤኢዛይሳ ማላኔ ሲዪዛይሳ ማላ፥ ‹ኣሳ ኩሼን ኦሴቲዳ ኤቃቲ ሙሌካ ጾስ ጊዴቴና› ጊ ዮቴስ።
ACT 19:27 ሃይሳ ኑ ኦሶዛስ ሎኦ ሱንꬃ ሂራይሲዛይሳፌ ቦላራ ኩሜꬃ ኢሲያይኔ ኩሜꬃ ኣላሜይ ጎይኒዛ ዎጋ ኣርጼሚሴ ኤቃ ኬꬃይካ ጎኣይ ባይንዳይሳ ጊዳና፤ ቃሴካ ኬሂ ꬎቁ ጊዳ ኢዚ ቦንቾይካ ካዉያና» ጊዴስ።
ACT 19:28 ኣሳይ ሄሳ ሲዪዲ ኢታ ሃንቆ ሃንቄቲዲ፥ «ኤፌሶኔ ኣርጼሚሳ ዎጋ ጊታ!» ጊዲ ዋሶ ዶሚዴስ።
ACT 19:29 ሄራካ ኩሜꬃ ካታማይ ሺሮቲዴስ፤ ዴሬይካ ዉሪ ኢሲ ቦላ ጊዲዲ ማቂዶኒያ ኣሳ ጊዲዳይታኔ ጳዉሎሳራ ኢሲፌ ዩዪዛ ኢዛ ላጌታ ጋዪዮሳኔ ኣሪስጺሮኮሳ ኦይኪዲ ዴሬይ ካሴ ካኢዛሶ ዎꬃን ጌሊዳ።
ACT 19:30 ጳዉሎሲካ ካሬ ኬዚዲ ኣሳ ሲንꬅ ሺቃና ኮዪን ኣማኒዛይቲ ዲጊዳ።
ACT 19:31 ሄ ኣዉራጃ ዳናታፔ ኢሲ ኢሲ ጳዉሎሳ ላጌቲ ጳዉሎሲ ኣሳይ ካሴ ካኢዛሶ ጻሊዲ ጌሎንታ ማላ ኣስ ኪቲዲ ዎሲዳ።
ACT 19:32 ሺቂዳ ኣሳይ ኡንኤቲዲ ኢሳዴይ ኢሲ ሚሽ ሃሳይሺን ሃራይ ቃሴ ሃራ ሃሳዬሲኔ ኣሳይ ዉሪ ዋሴስ፤ ዳሪዛ ባጋ ኣሳይ ኣዛስ ሄን ሺቂዳኮ ኤሬና።
ACT 19:33 ኣይሁዳ ኣሳይ ኢስኪንዲሮሳ ጌቴቲዛይሳ ዴራ ጊዶፌ ሱጌሬꬂ ሲንꬅ ኬሲዳ ዎዴ ኢሲ ኢሲ ኣሳቲ ባ ጊሻስ ኢዚ ሃሳያና ማላ ዋሲዳ፤ ኢዚካ ኢስታ ጊሻስ ፓላሜታና ኮዪዲ ኣሳይ ጮኡ ጋና ማላ ማላቲ ቤሲዴስ።
ACT 19:34 ጊዶ ኣቲን ኢዚ ኣይሁዳ ኣስ ጊዲዳይሳ ኤሪዳ ዎዴ ዉሪካ ኢሲ ቦላ፥ «ኤፌሶኔ ኣርጼሚሳ ዎጋ ጊታ!» ጊሼ ናምኡ ሳቴ ማላ ኣሳይ ዋሲዴስ።
ACT 19:35 ሄ ካታማስ ዋና ጻፌይ ኣሳ ጮኡ ሂስቲዲ፥ «ኢንቴኖ ኤፌሶኔ ኣሳቶ! ጊታ ኣርጼሚሲ ኤቃ ኬꬃዮኔ ሳሎፔ ዎꬊዳ ኢዚ ሚስሌ ናጊዛይ ኤፌሶኔ ካታማ ኣስ ጊዲዳይሳ ኤሮንታይ ኦኔ?
ACT 19:36 ሄሳ ጊሻስ ሃይሲ ሃ ቱማይ ካዴታና ዳንዳዬቶንታይሳ ማላ ኢንቴ ጉꬅ ዩሺ ቆፓናሲኔ ሎዱ ጋናስ ቤሴስ።
ACT 19:37 ሃይታ ኣሳታ ጾሳ ኬꬃ ቦንቆንታ ዎይኮ ኑ ጾስ ጊዲዳይሳ ቦላ ጫሻ ቃላ ዴንꬆንታ ዲሺን ኢንቴ ኦይኪዲ ሃ ጋꬃናስ ጮ ኤሂዴታ።
ACT 19:38 «ሄሳ ጊሻስ ዲሞጺሮሲኔ ኢዛራ ዲዛ ቢራ ሴሪሲ ኦꬂዛ ሂላንቻቲ ኦና ቦላካ ሞቲዛ ዮኦይ ዲኮ ፒርዳ ኬꬃይ ኢስታስ ዶያ ዴስ፤ ዳናቲካ ዴቴስ፤ ባ ኮዪዳዴ ሞታናስ ዳንዳዬስ።
ACT 19:39 ሃይሳፌ ሃራ ጋናስ ኢንቴ ኮይኮ ዎጋይ ዲዛ ሺቆሶን ቤዬቶ።
ACT 19:40 ሄሲ ኣቲኮ ሃች ሃኒዳ ሺሮይ ኑና ሞቲሶንታ ማላ ሂርጊሴስ፤ ሞቶስ ጋꬂዛ ጋሶይካ ባይንዳ ጊሻስ ሃ ሃኒዳ ሺሮዛ ጊሻስ ኑ ኦይሼቲኮ ጋናዚ ኑስ ዴና» ጊዴስ።
ACT 19:41 ኢዚ ሄሳ ጊዳፔ ጉዬ ሺቆይ ላሌቲዴስ።
ACT 20:1 ኣሳይ ጮኡ ጊዳፔ ጉዬ ጳዉሎሲ ኣማኒዛይታ ኢሲ ቦላ ጼይጊዲ ኢስታ ሚንꬄꬂዛ ቃላራ ዞሪዳፔ ጉዬ ኢስታ ሳሮኪዲ ማቂዶኒያ ባና ኬዚዴስ።
ACT 20:2 ኢዚ ኣꬊ ቢዛ ዴሬን ዲዛ ኣማኒዛ ኣሳ ሎኤꬂ ዞሬን ሚንꬄꬂሼ ጊሪኬ ዴሬ ቢዴስ።
ACT 20:3 ጊሪኬን ሄꬑ ኣጊና ታኪዳፔ ጉዬ ማርካቤራ ሶሪያ ጌቴቲዛ ዴሬ ባናስ ቆፒዴስ ሺን ኣይሁዳ ኣሳቲ ኢዛ ቦላ ኢታ ሚሽ ኦꬃና ዞሬቲዳይሳ ኤሪዲ ማቂዶኒያ ባጋራ ባና ቆፋ ቃቺዴስ።
ACT 20:4 ቤሪያፔ ጳሪዮሳ ና ሶጳጺሮሲ፥ ታሶሎንቄፌ ኣሪስጺሮኮሲኔ ሲኮንዶሲ፥ ዳርቤኔፔ ጋዪዮሲኔ ጺምቶሲ፥ ኢሲያፔ ጺሮፊሞሲኔ ቲቂቆሲ ጳዉሎሳራ ኢሲፌ ቢዳ።
ACT 20:5 ሄይቲ ዉሪ ኑፔ ካሴቲዲ ጺሮኣዳን ኑና ናጊዳ።
ACT 20:6 ኑ ቃሴ ኡኬꬃ ባኣሌፔ ጉዬ ፒሊጲሲዮሴፔ ማርካቤን ኢስቲ ዲዛሶ ጺሮኣዳ ጌቴቲዛሶ ኢቻሻንꬃ ጋላስ ጋኪዲ ሄን ላፑን ጋላስ ጋምኢዶስ።
ACT 20:7 ሳሚንታፌ ኮይሮ ዎጋ ጋላስ ኢሲፌ ካꬅ ማናስ ኑ ሺቂ ዲሺን ጳዉሎሲ ዎንቶ ባናስ ኮሺዛ ጊሻስ ሺቂዳ ኣሳስ ቃላ ዮቲሺን ኢዚ ዮኦዛ ሌላ ጊዶꬅ ጋካናስ ኣዱሲዴስ።
ACT 20:8 ቦላ ፎቄን ዳሮ ፖኦይ ዲዛሶን ኑ ሺቂዶስ።
ACT 20:9 ኣዉጼኪሴ ጌቴቲዛ ኢሲ ናቴꬃ ናይ ማስኮቴ ቦላ ኡቲ ዲሺን ጳዉሎሲ ዮኦዛ ኣዱሲዳይሳፌ ዴንዲዳይሳን ኢዛ ꬊስኮይ ኤኪ ቢዴስ፤ ዎልቃማ ꬊስኮን ጾኔቲዲ ቦላ ሄꬓንꬆ ፎቄፔ ዱጌ ኩንዲን ኣሳይ ዴንꬂዛ ዎዴ ሃይቂ ቤቲዴስ።
ACT 20:10 ጊዶ ኣቲን ጳዉሎሲ ዱጌ ዎꬊዲ ናዛ ቦላ ሆኪ ኢዲሚዲ፥ «ሃይቂቤና ፓጻ ዴስ፥ ዳጋሞፍቴ!» ጊዴስ።
ACT 20:11 ጳዉሎሲ ሄሳፌ ፑዴ ፎቄ ኬዚዲ ኡኬꬃ ሜንꬂዲ ኣማኒዛይታራ ሚዴስ፤ ጋዴይ ዎንታና ጋካናስ ኣሳታራ ሃሳዬቲሼ ጋምኢ ቢዴስ።
ACT 20:12 ኣሳይካ ሃይቆፔ ፓጺዳ ናዛ ኢዛሶ ኤፊዲ ዉሪካ ኡፋዬቲዴስ።
ACT 20:13 ኑኒ ጳዉሎሳ ማርካቤን ጌልꬃና ኮዪዳ ጊሻስ ካሴቲዲ ማርካቤን ኣሶሳ ጌቴቲዛሶ ቢዶስ፤ ኑ ሄሳ ኦꬂዳይ ጳዉሎሲ ኣሶሳ ጋካናስ ቶሆራ ባና ኮዪዳ ጊሻሲኔ ኑ ሲንꬅ ባና ማላ ኢዚ ኣዛዚዳ ጊሻሳ።
ACT 20:14 ኑ ኢዛራ ኣሶሳን ጋጊዲ ኢዚ ማርካቤን ጌሊን ኢዛራ ኢሲፌ ሚጺሊኔ ቢዶስ።
ACT 20:15 ዎንቴꬃ ጋላስ ሄፔ ዴንዲዲ ሲንꬃራ ዲዛ ኪኦሴ ጌቴቲዛሶ ጋኪዶስ፤ ቃሴ ዎንቴꬃ ጋላስ ሳሞሴ ጌቴቲዛሶ ፒኒዲ ሄፔ ዎንቴꬃ ጋላስ ሚሊጼ ጋኪዶስ።
ACT 20:16 ጴንጼቆስቴ ጌቴቲዛ ኣይሁዳታ ፓዚጋ ባኣሌ ባስ ዳንዳዬቲዳ ማላ ቦንቻና ዬሩሳላሜን ቤታና ኮዪዲ ኢዚ ኢሲያን ዎዴይ ኣꬎንታ ዲሺን ኤፌሶኔ ኣꬊ ባናስ ኮዪዴስ። ኢዚ ሄሳꬆ ኦꬃና ኮዪዳይ ጴንጼቆስቴ ባኣሌስ ዬሩሳላሜን ቤታናስ ኮዪዳ ጊሻሳ።
ACT 20:17 ጳዉሎሲ ሚሊጼፔ ኤፌሶኔ ዎሳ ኬꬃ ጪማታ ኣሴ ኪቲዲ ጼይጊሲዴስ።
ACT 20:18 ኢስቲካ ዪን ጳዉሎሲ ኢስታ፥ «ታ ኢሲያ ጌሊዳ ጋላሳፌ ሃ ሲሚን ኡባ ዎዴ ታ ኢንቴናራ ዋና ዋና ዴኢዳኮ ኢንቴ ኤሬታ።
ACT 20:19 ኣይሁዳቲ ታ ቦላ ኣሳ ዴንꬂዲ ሂሊዳ ጋሶን ዳሮ ሜቶይ ታ ቦላ ጋኪኮካ ታኒ ኩሜꬃ ኣሽኬቴꬃራኔ ኣፉንꬃራ ጎዳስ ኦꬃዲስ።
ACT 20:20 ጮ ዴምባንካ፥ ኢንቴሶን ኢንቴሶን ታኒ ኢንቴና ታማርሳሼ ጎኢዛይሳ ዉርሳ ኢንቴስ ዮታዲስ ኣቲን ኢንቴና ጎኢዛ ሚሻፌ ኣይኮካ ኣሻቤኬ።
ACT 20:21 ኣይሁዳ ኣሳታ ጊዲንካ ጊሪኬ ኣሳ ጊዲንካ ማሮቴꬃን ጌሊዲ ጾሳኮ ሲማና ማላኔ ጎዳ ዬሱሳን ኣማናና ማላ ሎኤꬃ ዮታዲስ።
ACT 20:22 «ሃኢካ ታ ሄ ጋኪሺን ታ ቦላ ኣዚ ጋካናኮ ኤሪኬ ሺን ጺሎ ኣያናይ ታና ኣዛዚዳ ማላ ዬሩሳላሜ ባይስ።
ACT 20:23 ሄን ታና ዱማ ዱማ ቃሾይኔ ሜቶይ ናጊዛይሳ ጺሎ ኣያናይ ታስ ዮቲዴስ።
ACT 20:24 ጊዶ ኣቲን ጎዳ ዬሱሲ ታስ ኢሚዳ ዎꬃ ዎጻ ዉርሳና ጋካናሲኔ ኦሶዛ ታ ፖላና ጋካናስ ታኒ ታ ሼምፖስ ሚሼቲኬ፤ ታስ ኢሜቲዳ ኦሶይካ ጾሳ ሚሺራቾ ቃላ ዮቶኮ።
ACT 20:25 «ሃኢ ጋካናስ ታ ኢንቴ ጊዶን ሲሜሬታሼ ጾሳ ካዎቴꬅ ሳባካዲስ፤ ሃይሳፌ ጉዬ ኢንቴፌ ኦኒካ ሙሌ ታ ኣይፌሶ ቤኦንታይሳ ታ ኤራይስ።
ACT 20:26 ሄሳ ጊሻስ ኢንቴፌ ኢሳዴይካ ꬋይኮ ታ ኦይሼቶንታይሳ ሃች ታ ኢንቴና ኤሪሳይስ።
ACT 20:27 ኣይስ ጊኮ ታ ጾሳ ቆፋ ዉርሳ ኢንቴስ ዮታዲስ ኣቲን ኣይኮካ ታ ዮቶንታ ኣሺዳይ ዴና።
ACT 20:28 ጺሎ ኣያናይ ኢንቴና ጾሳ ዶርሳታ ሄማናስ ሹሚዴስ፤ ሄሳ ጊሻስ ኢንቴ ሁኤሲኔ ጾሳ ዶርሳታስ ናጌቲቴ፤ ጎዳይ ባ ሱꬃን ዎዚዳ ዎሳ ኬꬃዮ ናጊቴ።
ACT 20:29 ታ ቢዳፔ ጉዬ ጾሳ ዶርሳታስ ሚሼቶንታ ኢታ ኣሳቲ ኢንቴ ጋርስ ጌላናይሳ ታ ኤራይስ።
ACT 20:30 ሄሳꬆካ ኢሲ ኢሲ ኣሳቲ ኢንቴ ጊዶፌ ዴንዲዲ ጌላ ዮኦ ኢንቴና ታማርሲዲ ኣማኒዛ ኣሳፔ ዳሮታ ጌዴ ባኮ ዛራና።
ACT 20:31 ሄሳ ጊሻስ ኢንቴና ኢሳ ኢሳ ሄꬑ ላይꬅ ቃማኔ ጋላስ ኣፉንꬃን ዞሪዳይሳ ዩሺ ቆፒቴኔ ናጌቲቴ።
ACT 20:32 «ሃኢካ ኢንቴና ጾሳስ ሚንꬂ ኤሳናሲኔ ኣማኒዛይታ ጊዶን ኢንቴስ ላታሶ ኢማናስ ዳንዳይዛ ኢዛ ኣꬎ ኪያቴꬃ ቃላስ ታ ሃዳራ ኢማዲስ።
ACT 20:33 ታ ኦና ቢራካ ዎርቃካ ዎይኮ ማይኦ ኣሞታቤኬ።
ACT 20:34 ታኒ ታ ኩሼን ኦꬃ ኦꬃዳ ታስ ማዴታዳ ታናራ ዲዛይታካ ማዲዳይሳ ኢንቴካ ኤሬታ።
ACT 20:35 ‹ሃ ኤኪዛዴፌ ጌዴ ኢሚዛዴይ ኣንጄቲዳዴ› ጊዛ ጎዳ ዬሱሳ ቃላ ኑ ዩሺ ቆፒዲ ኑርካ ኑ ኩሼራ ኑ ኦꬂ ዴሚዲ ሃራ ዳቡራንቻታ ጌዴ ማዳናስ ኑስ ቤሲዛይሳ ታ ኢንቴና ዳሮ ዱማ ዱማ ኦጌራ ቤሳዲስ» ጊዴስ።
ACT 20:36 ሄሳፌ ጉዬ ጳዉሎሲ ኡባ ኣሳራ ጉልባቲዲ ዎሲዴስ።
ACT 20:37 ኣሳይ ዉሪ ዬኪሼ ጳዉሎሳ ኢዲሚ ኦይኪዲ ዬሪዴስ።
ACT 20:38 ሃራፔካ ኢስቲ ዳሮ ሚሼቲዳይ ኢዚ፥ «ሃይሳፌ ጉዬ ኢንቴ ናምኣንꬆ ታና ቤዬኬታ» ጊዳ ጊሻሳ፤ ሄፔካ ኢዛ ማርካቤኮ ጋካናስ ሞይዚዳ።
ACT 21:1 ኑ ኢስታፌ ሻኬቲዲኔ ማርካቤን ጌሊዲ ሲቲ ጊዲ ቆሴ ጌቴቲዛ ኣባ ጊዶን ዲዛ ዴሬ ቢዶስ፤ ዎንቴꬃ ጋላስ ሃራ ኤሮዶሴ ጌቴቲዛ ኣባ ጊዶን ዲዛ ዴሬ ጋኪዶስ፤ ሄፔካ ኢሲ ጳጺራ ጌቴቲዛ ካታማ ቢዶስ።
ACT 21:2 ሄን ፒንቄ ጌቴቲዛሶ ቢዛ ማርካቤ ዲዛሮ ዴሚዲ ኢዚን ጌሊዲ ቢዶስ።
ACT 21:3 ኣባ ጊዶን ዲዛ ቆጲሮሴ ጌቴቲዛ ዴሬ ሃዲርሳ ባጋን ዬጊዲ ሶሪያ ጌቴቲዛ ዴሬ ቢዲ ጺሮሴ ጌቴቲዛ ኣባ ኣቻን ዲዛ ዴሬ ቢዶስ፤ ሄሳስ ጋሶይካ ማርካቤያ ባ ጫኔቲዳ ጫና ሄን ዎꬃናስ ኮሺዛ ጊሻሳ።
ACT 21:4 ሄን ኣማኒዛይታ ኮዪ ዴሚዲ ኢስታራ ላፑን ጋላስ ጋምኢዶስ፤ ኢስቲካ ጺሎ ኣያና ካሌꬆን ጳዉሎሳ፥ «ዬሩሳላሜ ቦፓ» ጊዲ ዮቲዳ።
ACT 21:5 ኑ ሄን ጋምኣና ዎዴይ ዉሪን ኢስታፌ ሻኬቲዲ ኑ ኦጌ ቢዶስ፤ ኢስቲ ዉሪ ባ ማቼታራኔ ባ ናይታራ ኢሲፌ ካታማፔ ካሬ ኬዛና ጋካናስ ኑና ሞይዚዳ፤ ኣባ ኣቻን ኑ ዉሪ ጉልባቲዲ ዎሲዳፔ ጉዬ ዴንዲዲ ኢሶይ ኢሳራ ሳሮኬቲዲ ሻኬቲዶስ።
ACT 21:6 ሄሳፌ ጉዬ ኑ ማርካቤን ጌሊን ኢስቲ ባሶ ሲሚዳ።
ACT 21:7 ኑ ጺሮሴፔ ዴንዲዲ ጌዴ ጲጺላማይሴ ጌቴቲዛሶ ጋኪዶስ፤ ሄንካ ኣማኒዛ ኣሳራ ጋጊ ሳሮኬቲዲ ሄን ኢስታ ኣቻን ኢሲ ጋላስ ጋምኢዶስ።
ACT 21:8 ዎንቴꬃ ጋላስ ሄፔ ኬዚዲ ቂሳሪያ ጌቴቲዛሶ ቢዶስ፤ ቂሳሪያን ላፑን ዳቆኔታፔ ኢሳ ዎንጌላዌ ፒሊጶሳሶ ጌሊዲ ኢዛ ኣቻን ሼምፒዶስ።
ACT 21:9 ኢዛስ ናቤ ጊዲዳ ኦይዱ ጌሎንታ ጌላኦቲ ዴቴስ።
ACT 21:10 ዳሮ ጋላስ ኑ ሄን ጋምኢን ኢሲ ኣጋቦሳ ጌቴቲዛ ናቤዚ ዩሁዳ ዴሬፔ ዪዴስ።
ACT 21:11 ሄ ናቤይ ኑኮ ሺቂዲ ጳዉሎሳ ዳንጮ ኤኪዲ ባ ቶሆኔ ባ ኩሼ ቃቺዲ፥ «ጺሎ ኣያናይ ሃይሳ ዳንጫ ጎዳ ዬሩሳላሜን ዲዛ ኣይሁዳ ኣሳቲ ሃይሳꬆ ቃቺዲ ኣይዛቤታስ ኣꬂ ኢማና ጌስ» ጊዴስ።
ACT 21:12 ሄሳ ሲዪዲ ኑኒካ ኑናራ ዲዛ ኣሳይካ ጳዉሎሲ ዬሩሳላሜ ቦንታ ማላ ዎሲዶስ።
ACT 21:13 ቃሴ ጳዉሎሲ፥ «ኢንቴ ኣይስ ዬኪ ዬኪዲ ታ ዎዚና ሜንꬄቲ? ታኒ ጎዳ ዬሱሳ ሱንꬃ ጊሻስ ዬሩሳላሜን ቃሾ ጻላላ ጊዶንታ ሃይቃናስካ ጊጌታዲስ» ጊዴስ።
ACT 21:14 ኢዚ ኑ ዞሬ ኤኮንታ ኢጺን፥ «ሂስቲኮ ጎዳ ሼኔይ ሃኖ» ጊዲ ኣጋጊዶስ።
ACT 21:15 ኑ ሄን ጉꬃ ጋላሳታ ጋምኢዳፔ ጉዬ ኑ ሚሼ ኡባ ጊግሲ ኤኪዲ ዬሩሳላሜ ቢዶስ።
ACT 21:16 ቂሳሪያን ዲዛ ኢሲ ኢሲ ኣማኒዛይቲ ኑናራ ኢሲፌ ዪዳ፤ ኢስቲካ ኑኒ ሚናሶኔ ኬꬃን ዳና ማላ ኑና ኢዛሶ ካሌꬂዳ፤ ሚናሶኒ ካሴቲዲ ኣማኒዳ ቆጲሮሴ ዴሬ ኣሳ።
ACT 21:17 ኑ ዬሩሳላሜ ጋኪዳ ማላ ኣማኒዛይቲ ኑና ኡፋይሳን ሞኪ ኤኪዳ።
ACT 21:18 ዎንቴꬃ ጋላስ ጳዉሎሲ ኑናራ ያቆቤኮ ቢዴስ፤ ሄ ዎዴ ዎሳ ኬꬃ ጪማቲ ሄን ዴቴስ።
ACT 21:19 ጳዉሎሲ ኣሳ ዉርሲ ሳሮኪዳፔ ጉዬ ጾሲ ኢዛ ባጋራ ኣይዛቤታ ጊዶን ኦꬂዳይሳ ኡባ ኢሲኖ ኣሾንታ ዮቲዴስ።
ACT 21:20 ሄሳ ሲዪዲ ኣሳይ ዉሪ ጾስ ጋላቲዴስ፤ ጳዉሎሲካ፥ «ኑ ኢሻዞ ዳሮ ሺያን ቆዴቲዛ ኣማኒዛይቲ ኣይሁዳታ ጊዶን ዲዛይሳኔ ዉሪካ ሙሴ ዎጋ ዎዚናፔ ናጊዛይታ ጊዲዳይሳ ኔካ ኤራሳ።
ACT 21:21 ኔኒ ኣይዛቤታ ጊዶን ዲዛ ኣይሁዳታ፥ ‹ኢንቴ ናይታ ቃጻሮፒቴ ዎይኮ ዎጋታ ኦꬆፍቴ› ጋዳ ኔ ታማርሲዳ ኣሳይ ሙሴ ዎጋ ሻራና ማላ ኦꬄስ ጊዛ ዎሬ ኣሳይ ሲዪዴስ።
ACT 21:22 ሂስቲን ሃኢ ኣዜ ሎኦይ? ሃኢ ኔ ዩሳ ኣሳይ ሲዮንታ ኣጌና።
ACT 21:23 ሄሳ ጊሻስ ኑ ኔና ጊዛይሳ ኦꬃ፤ ኑ ኣቻን ታሳላ ጋꬃና ዪዳ ኦይዱ ኣሳቲ ዴቴስ።
ACT 21:24 ኔ ኢስታ ኔናራ ኤካዳ ኢስታራ ጊዳዳ ኔና ጌሻ፤ ኣሳቲ ባ ሁኤ ሜዴታና ማላኔ ጾሳ ኬꬃን ኢሜቲዛ ሙጹዋታ ሚሻ ኔ ኢስታስ ቃንጻ፤ ኔ ሄሳꬆ ኦꬂኮ ኔ ቦላ ዎሬቲዳይሲ ዉሪ ጮ ሃዳ ጊዲዳይሳኔ ኔካ ሙሴ ዎጋ ፖላ ናጊዛዴ ጊዲዳይሳ ኣሳይ ዉሪ ኤራና።
ACT 21:25 ሂንኮ ኣይዛቤታፔ ኣማኒዳይታ ጊሻስ ጊዲኮ፥ ‹ኤቃስ ሹኬቲዲ ቱኒዳይሳ ሞፒቴ፤ ሱꬂካ ኡዮፒቴ፤ ባዉታ ሃይቂዳ ሜሄ ኣሾ ሞፒቴ፤ ላይማፔ ሃኪቴ› ጊዲ ጪማቲ ቃቺዳ ቃላ ዳብዳቤ ጻፊዲ ኑ ኢስታስ ዬዲዶስ።»
ACT 21:26 ሄሳፌ ጉዬ ጳዉሎሲ ሄ ኦይዱ ኣሳታ ባናራ ኤኪዲ ዎንቴꬃ ጋላስ ኢስታራ ባና ጌሺዴስ፤ ኢስቲ ጌይዛ ጋላሳቲ ኣፑን ጋላሲኮኔ ኢሳዴ ኢሳዴ ጊሻስ ኢሜቲዛ ሚሽ ኢሚዛ ዎዴይ ኣይዴኮ ኤሪሳናስ ጾሳ ኬꬄ ጌሊዴስ።
ACT 21:27 ላፑን ጋላስ ኩማና ማቲሺን ኢሲያ ዴሬፔ ዪዳ ኣይሁዳ ኣሳይ ጳዉሎሳ ጾሳ ኬꬃን ቤኢዲ ዴራ ኢዛ ቦላ ዴንꬄꬂዲ ኢዛ ኦይኪዳ።
ACT 21:28 «ኢስራኤሌ ኣሳቶ! ኑና ማዲቴ! ኑ ኣሳኔ ኑ ዎጋ ሃይሳ ኑ ዲዛሶዛ ጫዪሼኔ ዴሬይ ዲዛሶን ኡባን ኣሳ ታማርሲዛይሲ ሃይሲ ኢዛኮ! ሄሲካ ጊዴና ጊዲ ኣይዛቤታ ጾሳ ኬꬅ ጌልꬂዲ ሃይሳ ጌሻሶሆዛ ቱኒሲዴስ» ጊሼ ዋሲዳ።
ACT 21:29 ኢስቲ ሄሳ ጊዳ ጋሶይካ ሃይሳፌ ካሴ ኤፌሶኔ ዬሌታ ጺሮፊሞሳ ኢዛራ ኢሲፌ ካታማ ጊዶን ቤኢዳ ጊሻስ ኢዛ ጳዉሎሲ ጾሳ ኬꬄ ኤኪ ጌሊዳ ሚሳቲዳ ጊሻሳ።
ACT 21:30 ኩሜꬃ ካታማይ ባ ጊዶን ሺሮቲዴስ፤ ዴሬይ ዉሪ ኢሲፌ ዎጺ ኮዪዲ ጳዉሎሳ ኦይኪ ኤኪ ጾሳ ኬꬃ ጊቤፌ ጎሼቺ ኬሲዴስ፤ ጾሳ ኬꬃ ፔንጌቲ ሄራካ ጎርዴቲዳ።
ACT 21:31 ኣሳይ ጳዉሎሳ ዎꬋና ኮዪሺን፥ «ዬሩሳላሜን ዲዛ ኩሜꬃ ዴሬይ ባ ጊዶን ሺሮቲዴስ» ጊዛ ኪታይ ኦሮሜ ዎታዳራታ ኣዛዚዛይሳኮ ጋኪዴስ።
ACT 21:32 ሄሳ ጊሻስ ኢዚ ዎታዳራታኔ ማቶ ሃላቃታ ካሌꬂዲ ኤሶን ዎጺሼ ኣሳይ ዲዛሶ ቢዴስ፤ ኣሳይ ኦላንቻታ ኣዛዚዛይሳ ቤኢዲ ጳዉሎሳ ቡካ ኣጊዴስ።
ACT 21:33 ማቶ ሃላቃዚ ኢዛኮ ሺቂዲ ጳዉሎሳ ኦይኪዲ ናምኡ ሳንሳላታን ቃሼታና ማላ ኣዛዚዲ ኢዚ ኦናኮኔ ኣይ ኦꬂዳኮ ኤራናስ ኢዛ ኦይቺዴስ።
ACT 21:34 ዴሬይካ ባ ጊዶን ባጋይ ሄሳ፥ ባጋይ ሃይሳ ጊዴስ፤ ማቶ ሃላቃዚ ዴሬዛ ዋሶፔ ዴንዲዳይሳን ቱማይ ኣዋይሳኮኔ ኤራናስ ዳንዳዬቶንታ ኢጺን ጳዉሎሳ ጌዴ ዎታዳራቲ ዲዛሶ ኤፋና ማላ ኣዛዚዴስ።
ACT 21:35 ጳዉሎሲ ፑዴ ꬎቃሶ ጋኪሺን ዴሬይ ዳሮ ሃንቆን ኢዛ ቦላ ሜቶ ጋꬃናስ ኮዪዳ ጊሻስ ዎታዳራቲ ኢዛ ሃሼን ቶኪ ኤፊዳ።
ACT 21:36 ዴሬይካ፥ «ኢዚ ሃይቆ! ሃይቆ» ጊ ዋሲሼ ኢዛ ካሊዴስ።
ACT 21:37 ዎታዳራቲ ጳዉሎሳ ባ ዲዛሶ ጌልꬃና ማቲሺን ጳዉሎሲ ዎታዳራታ ኣዛዚዛይሳ፥ «ታ ኔስ ኢሲ ሚሽ ዮታና ማላ ዶሳይ?» ጊዴስ። ማቶ ሃላቃዚካ፥ «ኔ ጊሪኬ ቃላ ኤራይ?
ACT 21:38 ሂስቲን ሃኢ ማታ ዎዴ ዴሬ ጊዶን ሜቶ ዴንꬄꬃዳ ሼምፖ ዎꬊዳ ኦይዱ ሺ ኣሳ ኤካዳ ባዞ ባቃቲዳ ጊብጼ ኣዴዚ ኔና ዲኪ?» ጊዴስ።
ACT 21:39 ጳዉሎሲካ፥ «ታኒ ኪልቂያ ጊዶን ዳሮ ኤሬቲዳ ጻርሴሴ ካታማን ዬሌቲዳ ኣይሁዳ ኣሳ፤ ሃይሳ ኣሳስ ታና ዮቻርኪ!» ጊዴስ።
ACT 21:40 ኢዚ ሃሳያና ማላ ኤሮ ጊን ጳዉሎሲ ꬎቃሶሆን ኤቂዲ ኣሳይ ጮኡ ጋና ማላ ባ ኩሼራ ማላቲዴስ፤ ኣሳይ ጮኡ ጊን ኢስራኤሌታ ቃላራ፥
ACT 22:1 «ታ ኢሻቶ! ታ ኣዋቶ! ታ ቦላ ዎርዶ ዎꬂዳይሳስ ታ ኢንቴስ ኢሚዛ ዛሮ ሲዪቴ!»
ACT 22:2 ኢዚ ኣይሁዳታ ቃላራ ሃሳይሺን ሲዪዲ ካሴፔ ኣሳይ ጮኡ ጊዴስ፤ ጳዉሎሲካ ሃሳያ ጉጂዲ፥
ACT 22:3 «ታኒ ኪልቂያ ጊዶን ዲዛ ጻርሴሴ ካታማን ዬሌቲዳ ኣይሁዳ ኣሳ፤ ታኒ ዲጪዳይ ጊዲኮ ሃኒን ዬሩሳላሜና፤ ታ ኑ ኣዋታ ዎጋ ዉርሳ ጋማልያሌፔ ሎኤꬃ ታማራዲሴኔ ኢንቴ ሃች ኦꬂዛይሳꬆ ጾሳስ ሱሬ ዎዚናፔ ኦꬃሼ ዴኣዲስ።
ACT 22:4 ሃይሳ ሃ ኦጌዛ ካሊዛ ኣሳታ ኡባ ዎꬋና ጋካናስ ጎዳꬂዛ ኣሳኮሺን፤ ማጫሳታኔ ኣዴታ ቃቻ ቃቻ ቃሾ ኬꬅ ዬዲዛዴኮሺን።
ACT 22:5 ሃይሲ ዉሪ ቱሙ ጊዲዳይሳ ቄሴታ ሃላቃቲኔ ዴሬ ጪማቲካ ዉሪ ታስ ማርካታና፤ ሃራይ ኣቶሺን ዳማስቆን ዲዛ ኣማኒዛ ኣሳ ቃቻ ዬሩሳላሜ ኤሃዳ ቃጻይሳናስ ዳማስቆን ዲዛይታስ ጻፌቲዳ ዳብዳቤ ቄሴታ ሃላቃታፔኔ ዴሬ ጪማታፔ ኤካዲስ።
ACT 22:6 «ታኒ ዳማስቆ ቢሺኒኔ ካታማ ጌላና ማቲሺን ሴታ ጋላስ ታ ቆፖንታ ዲሺን ሳሎፔ ዎልቃማ ፖኦይ ታና ዩዪ ኣꬊ ፖኢዴስ።
ACT 22:7 ሄ ዎዴ ታኒ ቢታ ቦላ ኩንዳዳ፥ ‹ሳኦሌ! ሳኦሌ! ኔ ታና ኣዛስ ጎዳይ?› ጊዛ ቃላ ሲያዲስ።
ACT 22:8 ታኒካ፥ ‹ጎዶ፥ ኔ ኦኔ?› ጋዲስ፤ ኢዚካ፥ ‹ታ ኔኒ ጎዲዛ ናዚሬቴ ዬሱሳ› ጊዴስ።
ACT 22:9 ታናራ ኢሲፌ ዲዛ ኣሳቲ ፖኦዛ ቤኢዳ ኣቲን ኢዚ ታናራ ሃሳይሺን ቃላ ሲዪቤቴና።
ACT 22:10 ታኒካ፥ ‹ጎዶ፥ ታ ኣይ ኦꬆ?› ጋዲስ፤ ጎዳይካ፥ ‹ዴንዳዳ ዳማስቆ ባ፤ ኔ ኦꬃናይሳ ኢስቲ ኔስ ሄን ዮታና› ጊዴስ።
ACT 22:11 ፖኦዛ ጾልቄቴꬃ ዳሮፔ ዴንዲዳይሳን ታ ጼላናስ ዳንዳያቤኬ፤ ታናራ ዲዛ ኣሳቲ ታ ኩሼ ኦይኪ ጎቺዲ ታና ዳማስቆ ጋꬂዳ።
ACT 22:12 «ሃናኒያ ጌቴቲዛ ኢሳዴይ ሄን ዴስ፤ ሃናኒያይ ዳማስቆን ዲዛ ኣይሁዳታ ኣቻን ዳሮ ጋላቴቲዳይሳኔ ዎጋ ቦንቺዛ ኣሳ።
ACT 22:13 ኢዚ ታ ኣች ሺቂ ኤቂዲ፥ ‹ታ ኢሻ ሳኦሌ! ኔ ኣይፌይ ቃሴካ ጼሎ› ጊዴስ፤ ሄራካ ታ ኣይፌይ ኢዛ ጼሊዴስ።
ACT 22:14 ኢዚካ ታና፥ ‹ኑ ኣዋንታ ጾሲ ኔ ኢዛ ሼኔ ኤራና ማላ፥ ኢዛ ጺሎዛ ኔ ቤያና ማላኔ ኢዚ ጊዛይሳ ኔ ሲያና ማላ ኔና ካሴቲ ዶሪዴስ።
ACT 22:15 ኢዚ ሄሳ ኦꬂዳይ ኔ ቤኢዳይሳኔ ሲዪዳይሳ ኣሳ ኡባ ሲንꬃን ኢዛስ ኔ ማርካታናሳ።
ACT 22:16 ሂስቲን ሃኢ ኣዛስ ጋምኣይ? ዴንዳዳ ኢዛ ሱንꬅ ጼይጋዳ ጻማቄታ፤ ኔ ናጋራፔካ ሜጬታ› ጊዴስ።
ACT 22:17 ሄሳፌ ጉዬ ታ ዬሩሳላሜ ሲማዳ ጾሳ ኬꬃን ዎሲሺን ኣጁታይ ታስ ቤቲዴስ።
ACT 22:18 ጎዳይካ ታስ ቆንጪዲ፥ ‹ኔ ታ ጊሻስ ኢማና ማርካቴꬅ ኢስቲ ኤኮንታ ጊሻስ ኔ ጋምኦንታ ዳሼ ዬሩሳላሜፔ ኤሌላ ኬዛ!› ጊዴስ።
ACT 22:19 ታኒካ ኢዛስ፥ ‹ጎዶ! ታ ኣይሁዳታ ዎሳ ኬꬃቲ ዲዛሶ ባዳ ኔና ኣማኒዛይታ ኡባ ቃቻዳ ኢስታ ቡኪዳይሳ ባ ባጋራ ኢስቲካ ኤሬቴስ።
ACT 22:20 ኔ ጊሻስ ማርካቲዛ ኢስቲፋኖሴ ኣሳይ ዎꬊዛ ዎዴ ታኒካ ሄ ዎꬊዛ ኣሳታ ኣቻን ኤቃዳ ኢስቲ ዎꬊዛይሳ ታኒካ ዶሳዲሴኔ ዎꬊዛይታ ማይኦካ ናጋዲስ› ጊዴስ።
ACT 22:21 ጎዳይካ፥ ‹ሃሆን ዲዛ ኣይዛቤታኮ ታ ኔና ኪቲዛ ጊሻስ ዴንዳዳ ባ!› » ጊዴስ።
ACT 22:22 ኣሳይ ሂኖ ጋካናስ ጳዉሎሳ ሃሳያ ዎዚናፔ ሎኤꬂ ሲዪሼ ኣጊዲ ባ ቃላ ꬎቁ ሂስቲዲ፥ «ሃይሳ ማላ ኣሲ ኑ ቢታፌ ꬋዮ፤ ሃይሳ ማላ ኣሲ ኑ ቢታን ሼምፖራ ፓጻ ዳናስ ቤሴና» ጊሼ ዋሲዴስ።
ACT 22:23 ኣሳይ ዋሲሼ ባ ማይኦ ቃሪ ቃሪ ዉጺሼኔ ቢታ ፑዴ ሳሎ ꬋርጪዴስ።
ACT 22:24 ማቶ ሃላቃዚ ሄሳ ቤኢዲ ጳዉሎሳ ዎታዳራቲ ዲዛሶ ጌልꬃና ማላ ኣዛዚዴስ፤ ዴሬይካ ኢዛ ቦላ ኣዛስ ሄሳ ማላ ዋሲዛኮ ኤራና ማላ ኢዛ ጋራፊዲ ፓጺሳና ማላ ኣዛዚዴስ።
ACT 22:25 ጊዶ ኣቲን ዳፎን ዋጺ ቃቺዲ ኢዛ ጋራፋና ጊጌቲሺን ጳዉሎሲ ባ ኣቻን ኤቂዳ ኢሲ ማቶ ሃላቃስ፥ «ኦሮሜ ኣስ ፒርዳይ ባይንዳ ጋራፋናስ ኢንቴስ ፒቃዴይ ዲዜ?» ጊዴስ።
ACT 22:26 ማቶ ሃላቃይ ሄሳ ሲዪዳ ማላ ሃላቃታ ኣዛዚዛይሳኮ ቢዲ፥ «ኣይ ኦꬃና ጋይ? ሃይሲ ኣዴዚ ኦሮሜ ኣሳኮ!» ጊዴስ።
ACT 22:27 ሄሳ ጊሻስ ሃላቃታ ኣዛዚዛይሲ ጳዉሎሳኮ ሺቂዲ፥ «ኣኔ ታስ ዮታ፥ ኔ ኦሮሜ ኣሴ?» ጊዴስ፤ ኢዚካ፥ «ኤ ታ ኦሮሜ ኣሳ» ጊዴስ።
ACT 22:28 ኣዛዚዛይሲካ፥ «ታ ኦሮሜ ኣስ ጊዳናስ ዳሮ ሚሽ ቃንጻዳ ሻማዲስ» ጊን ጳዉሎሲ፥ «ታኒ ጊዲኮ ኦሮሜን ዬሌታዲስ» ጊዴስ።
ACT 22:29 ሄሳ ጊሻስ ኢዛ ፒልጊ ጼላናስ ጊጌቲዳ ኣሳቲ ሄራካ ኢዛ ኣቻፌ ሃኪዳ፤ ኣዛዚዛይሲካ ኢዚ ኦሮሜ ኣስ ሳንሳላታን ቃቺዳይሳ ዩሺ ቆፒዲ ባቢዴስ።
ACT 22:30 ዎንቴꬃ ጋላስ ኣዛዚዛይሲ ኣይሁዳቲ ጳዉሎሳ ሞቲዛ ኣይፌ ዮኦይ ኣዛኮ ኤራና ኮዪዴስ፤ ቄሴታ ሃላቃቲኔ ኣይሁዳታ ሻንጎ ዱላታ ኣሳይ ዉሪ ኢሳዴይካ ኣቶንታ ኩሜꬅ ሺቃና ማላ ኣዛዚዴስ፤ ጳዉሎሳካ ቃሾፔ ቢርሺዲ ሺቂዳ ኣሳ ሲንꬅ ሺሺ ኤሲዴስ።
ACT 23:1 ጳዉሎሲ ዱላታ ኣሳ ቲሺ ሂስቲ ጼሊዲ፥ «ታ ኢሻቶ! ሃች ጋካናስ ታ ጾሳ ሲንꬃን ሎኦ ቆፋራ ዳይስ» ጊዴስ።
ACT 23:2 ቄሴታ ሃላቃ ሃናኒያይ ቃሴ ጳዉሎሳ ዶናን ሾጫና ማላ ኢዛ ኣቻን ኤቂዳይታ ኣዛዚዴስ።
ACT 23:3 ሄራካ ጳዉሎሲ ሃናኒያ፥ «ሃይሶ ኣኖራ ቲዬቲዳ ኬꬃዞ! ኔናካ ጾሲ ሾጫና፤ ዎጋራ ፒርዳና ኡታዳ ዎጋይ ባይንዳ ታና ሾጫና ማላ ኣዛዛይ?» ጊዴስ።
ACT 23:4 ሄ ዎዴ ሄን ዲዛ ኣሳይ ጳዉሎሳ፥ «ጾሳ ቄሴታ ሃላቃ ጫያይ?» ጊዴስ።
ACT 23:5 ጳዉሎሲካ ኢስታስ፥ «ታ ኢሻቶ! ኢዚ ቄሴታ ሃላቃ ጊዲዳይሳ ታ ኤራቤኬ፤ ጋሶይካ፥ ‹ኔ ዴሬ ሃላቃ ቦላ ኢታ ቃላ ጎፓ› ጊዛይሲ ጻፌቲዴስ» ጊዴስ።
ACT 23:6 ጳዉሎሲ ሄን ዲዛ ኣሳፔ ባጋይ ሳዱቃዌታ፥ ባጋይ ፋርሳዌታ ጊዲዳይሳ ኤሪዲ፥ «ታ ኢሻቶ! ታ ፋርሳዌፔ ዬሌታዲስ፤ ታኒካ ፋርሳዌ፤ ሄኮ ሃኢ ታ ፒርዴታና ሺቂዳይ ሃይቂዳይቲ ዴንዳናይሳ ታ ኡፋይስ ኦꬂዛ ጊሻሳ» ጊዲ ባ ቃላ ꬎቁ ሂስቲዲ ዱላታ ኣሳ ሲንꬃን ዮቲዴስ።
ACT 23:7 ጳዉሎሲ ሄሳ ዮቲዳ ማላ ፋርሳዌታ ጊዶኒኔ ሳዱቃዌታ ጊዶንካ ኦሺ ዴንዲን ዱላታይ ናምኡ ኬዚ ሻኬቲ ዎꬊዴስ።
ACT 23:8 ጋሶይካ ሳዱቃዌቲ፥ «ሃይቂዳይታስ ዴንꬂ ዴና፤ ኪታንቻይካ ባ፤ ኣያናይካ ዴና ጊዛይታ፤ ፋርሳዌቲ ጊዲኮ ሄይቲ ዉሪካ ዴቴስ» ጊ ኣማኒዛይታ።
ACT 23:9 ሄ ዎዴ ዳሮ ሺሮይ ኣሳ ጊዶን ሃኒዴስ፤ ፋርሳዌታ ባጋታ ጊዲዳ ኢሲ ኢሲ ሙሴ ዎጋ ታማርዛይቲ ዴንዲዲ፥ «ኑ ሃይሳ ኣዴዛ ቦላ ኣይኮካ ኢታ ሚሽ ዴሚቤኮ፤ ኣያናይ ዎይኮ ኪታንቻይ ኢዛስ ዮቲዳ ጊዳና፤ ኑ ኣይ ኤሪዞኒ?» ጊዲ ፓላሜቲዳ።
ACT 23:10 ፓላማይ ሚኒ ሚኒ ቢዳ ጊሻስ ኣሳይ ጳዉሎሳ ታርሼሬꬆንታ ማላ ባቢዲ ሃላቃታ ኣዛዚዛይሲ፥ «ዱጌ ዎꬊዲ ጳዉሎሳ ኣሳ ጊዶፌ ሃ ኬሲ ኤኪ ዪዲ ዎታዳራቲ ዲዛሶ ኤፍቴ!» ጊዲ ዎታዳራታ ሃላቃታ ኣዛዚዴስ።
ACT 23:11 ዎንቴꬃ ጋላስ ሌላ ጊዶꬅ ጎዳይ ጳዉሎሳ ኣቻን ኤቂዲ፥ «ኣይኮይ ባ፤ ኔ ዬሩሳላሜን ታስ ማርካቲዳይሳꬆ ኦሮሜንካ ኔ ታስ ማርካታናስ ቤሴስ» ጊዴስ።
ACT 23:12 ጋዴይ ዎንቲን ኣይሁዳ ኣሳቲ ሺቄቲዲ፥ «ኑ ጳዉሎሳ ዎꬎንታ ዲሼ ካꬅ ሞኮ፤ ሃꬂካ ኡዮኮ» ጊ ጫቄቲዳ።
ACT 23:13 ሄሳ ሄ ማቆዛን ኢሲፌ ጊዲዳ ኣሳ ቆዳይ ኦይዱ ታማፌ ቦላራ ዴስ።
ACT 23:14 ኢስቲካ ቄሴታ ሃላቃታኮኔ ዴሬ ጪማታኮ ቢዲ ኢስታስ፥ «ኑ ጳዉሎሳ ዎꬎንታ ዲሼ ካꬅ ሞንታ ማላ ሚንꬂ ጫቂዶስ።
ACT 23:15 ሄሳ ጊዲዳ ጊሻስ ኢንቴ ዴሬ ጪማታራ ዞሬቲዲ ኢዛ ኬሂ ፒልጊ ጼሊዛ ሚሳቲዲ ኢስቲ ኢንቴስ ጳዉሎሳ ኤሃና ማላ ኣዛዚዛይሳ ኦይቺቴ፤ ኑኒካ ኢዚ ሃ ሃኖ ጋካናፔ ካሴቲዲ ኢዛ ዎꬋና ጊጌቲዶስ» ጊዳ።
ACT 23:16 ጊዶ ኣቲን ኢሲ ጳዉሎሳስ ሚቺ ናይ ሄሳ ኢስታ ማቆዛ ሲዪዳ ጊሻስ ዎታዳራቲ ዲዛሶ ቢ ጌሊዲ ዮኦዛ ጳዉሎሳስ ዮቲዴስ።
ACT 23:17 ጳዉሎሲካ ማቶ ሃላቃታፔ ኢሳ ባኮ ጼይጊዲ፥ «ሃይሲ ናዚ ዎታዳራታ ኣዛዚዛይሳስ ዮቲዛ ዮኦይ ዲዛ ጊሻስ ኢዛኮ ኤፋ» ጊዴስ።
ACT 23:18 ማቶ ሃላቃይ ናዛ ዋና ኣዛዚዛይሳኮ ኤኪ ጌሊዲ፥ «ቃሼቲዳ ጳዉሎሲ ታና ባኮ ጼይጊዲ ሃይሲ ናዚ ኔስ ዮቲዛ ዮኦይ ዲዛ ጊሻስ ታ ኢዛ ኔኮ ሺሻና ማላ ታና ዎሲዴስ» ጊዴስ።
ACT 23:19 ኣዛዚዛይሲካ ናዛ ኩሼ ኦይኪ ኤኪዲ ሃራሶ ፖቂዲ፥ «ኔ ታስ ዮታናይሲ ኣዜ?» ጊዲ ኢዛ ዱማ ኦይቺዴስ።
ACT 23:20 ናዚካ፥ «ኣይሁዳ ኣሳቲ ጳዉሎሳ ዮኦዛ ሎኤꬂ ማራማሪዛዴ ሚሳቲሲዲ ዎንቶ ኔ ኢዛ ኢስታስ ሺሻና ማላ ኦይቻናስ ቃቺ ዎꬂዳ።
ACT 23:21 ጊዶ ኣቲን ኔ ኢስታስ ኤሮ ጎፓ፤ ጋሶይካ፥ ‹ኑ ኢዛ ዎꬎንታ ዲሼ ካꬅ ሞኮ፤ ሃꬂካ ኡዮኮ› ጊዲ ጫቄቲዳይቲ ኦይዱ ታማፌ ቦላ ጊዲዛ ኣሲ ኢዛ ዎꬋናስ ኦጌ ቦላ ዙጌስ፤ ሃኢ ኢስቲ ናጊዛይ ኔ ዛሮ ጻላላ» ጊዴስ።
ACT 23:22 ኣዛዚዛይሲካ፥ «ኔ ሃይሳ ታስ ዮቲዳይሳ ሃራ ኦናካ ኤሪሶፋ» ጊዲ ናዛ ሞይዚዴስ።
ACT 23:23 ሄሳፌ ጉዬ ዎታዳራታ ኣዛዚዛይሲ ማቶ ሃላቃታፔ ናምኣታ ጼይጊዲ፥ «ቃማፌ ሄꬑ ሳቴ ጊዲሺን ቂሳሪያ ጌቴቲዛሶ ባና ማላ ናምኡ ጼቱ ዎታዳራታ፥ ላፑን ታሙ ቶጋንቻታኔ ናምኡ ጼቱ ቶራንቻታ ጊግሲቴ፤
ACT 23:24 ጳዉሎሳሲካ ፓራ ጊግሲዲ ዴሬ ሃሪዛ ፊልኪሴኮ ሎኦን ጋካና ማላ ኦꬂቴ» ጊዴስ።
ACT 23:25 ዳብዳቤ ሂዝጊ ጻፊዴስ፤
ACT 23:26 «ዴሬ ሃሪዛ ቦንቾ ፊልኪሴስ፥ ቃላዎዶሳ ሉሲዮሳፔ፥ ሳሮይ ኔስ ጊዶ።
ACT 23:27 ሃይሳ ኣዴዛ ኣይሁዳ ኣሳቲ ኦይኪ ዎꬋና ጊሺን ኢዚ ኦሮሜ ኣስ ጊዲዳይሳ ታ ጋካ ኤሪዳ ጊሻስ ዎታዳራታራ ጋካዳ ኣሻዲስ።
ACT 23:28 ኢስቲ ኢዛ ኣዛስ ሞቲዛኮ ታ ኤራና ኮያዳ ዴሬ ዱላታኮ ሺሻዲስ።
ACT 23:29 ኢስቲ ኢዛ ቦላ ሺሺዳ ሞቶይ ባ ዎጋ ጊሻስ ጊዲዳይሳ ኤራዲስ፤ ጊዶ ኣቲን ኢዛ ሃይቆስ ዎይኮ ቃሾስ ጋꬂዛ ሚሺ ዴና።
ACT 23:30 ሃይሳ ኣዴዛ ዎꬋናስ ኣሳይ ማቄቲዳይሳ ታ ሲዪዳ ማላ ሄራካ ኔኮ ዬዳዲስ፤ ሞቲዛይቲካ ሄን ኔ ሲንꬃን ባ ሞቶ ሺሻና ማላ ኢስታስ ዮታዲስ» ጊዴስ።
ACT 23:31 ሄሳ ጊሻስ ዎታዳራቲ ባ ኣዛዜቲዳ ማላ ጳዉሎሳ ቃማራ ኤፊዲ ኣንቲጳጺሮሴ ጌቴቲዛሶ ጋꬂዳ።
ACT 23:32 ዎንቴꬃ ጋላስ ቶጋንቻቲ ጳዉሎሳራ ባና ማላ ኦꬂዲ ኢስቲ ቃሴ ጉዬ ሶ ሲሚዳ።
ACT 23:33 ቶጋንቻቲ ቂሳሪያ ጋኪዲ ዳብዳቤዛ ዴሬ ሃሪዛይሳስ ኢሚዲ ጳዉሎሳ ኢዛ ሲንꬅ ሺሺዳ።
ACT 23:34 ዴሬ ሃሪዛይሲ ዳብዳቤዛ ናባቢዲኔ ጳዉሎሳ፥ «ኔ ኣዋ ዴሬፔ ያዲ?» ጊ ኦይቺዴስ። ኢዚ ኪልቂያ ዴሬ ኣስ ጊዲዳይሳ ኤሪዲ፥
ACT 23:35 «ኔና ሞቲዛይቲ ዪሺን ታ ኔ ዮኦ ሲያና» ጊዴስ፤ ሄርዶሳ ጊቤ ጋꬃን ኢዚ ናጌታና ማላ ኣዛዚዴስ።
ACT 24:1 ኢቻሹ ጋላሳፌ ጉዬ ቄሴታ ሃላቃ ሃናኒያይ ኢሲ ኢሲ ጪማታራኔ ጻርጹሎሳ ጌቴቲዛ ጻባቃራ ቂሳሪያ ቢዴስ፤ ኢስቲካ ዴሬ ኣይሲዛ ፊልኪሴኮ ሺቂዲ ጳዉሎሳ ሞቲዳ።
ACT 24:2 ጳዉሎሲ ጼይጌቲ ሺቂን ጻርጹሎሲ ኢዛ፥ «ቦንቾ ፊልኪሴ! ኑኒ ኔ ባጋራ ዳሮ ሳሮቴꬅ ዴሚዶስ፤ ኔ ሎኦ ኣይሶንካ ኑ ዴሬስ ሎኤቴꬂ ቤቲዴስ።
ACT 24:3 «ሄሳ ኔ ሎኦ ኦሶዛ ኑ ኣዋን ጊዲን ኣይዴካ ꬎቁ ጊዳ ቦንቾራኔ ጋላታራ ኤኮስ።
ACT 24:4 ታ ሃኢ ኔና ጋምኢሶንታኔ ዳቡርሶንታ ቃንꬃራ ኔስ ዮቲዛይሳ ኪያቴꬃን ኑ ጊዛይሳ ኔ ሲያና ማላ ዎሶስ።
ACT 24:5 «ሃይሲ ኣዴዚ ኑስ ኢታ ሃርጌ ጊዲዴስ፤ ኣላሜን ዲዛ ኣይሁዳታ ኡባ ቦላ ሜቶ ሜꬌስ፤ ናዚራዌ ጌቴቲዛ ዎርዶ ኣሳታ ካሌꬂዛ ዋናይ ኢዛ።
ACT 24:6 ኢዚ ጾሳ ኬꬄ ቱኒሳና ጊሺን ኑ ኢዛ ኦይኪዶስ። [ኑ ዎጋ ማላ ኑ ኢዛ ቦላ ፒርዳና ቆፒዶስ፤
ACT 24:7 ጊዶ ኣቲን ዎታዳራታ ሃላቃታ ኣዛዚዛይሲ ሉሲዮሲ ጋኪዲ ኑ ኩሼፔ ኢዛ ዎልቃራ ዎꬂ ኤኪዴስ።
ACT 24:8 ኢዛ ሞቲዛ ኣሳይካ ኔኮ ያና ማላ ኣዛዚዴስ።] ሃይሲ ኑ ኢዛ ቦላ ሺሺዳ ሞቶዚ ዉሪ ቱሙ ጊዲዳይሳ ኔኒ ኔ ባጋራ ኢዛ ኦይቻ ጋካናስ ዳንዳያሳ» ጊ ሞቲዴስ።
ACT 24:9 ሂንኮ ኣይሁዳ ኣሳቲካ፥ «ኤ ሃይሲ ዮኦዚ ዉሪካ ቱሙኮ» ጊዲ ኣማኔቲዳ።
ACT 24:10 ዴሬ ኣይሲዛ ፊልኪሴይ ጳዉሎሲ ሃሳያና ማላ ባ ኩሼራ ማላቲ ቤሲዴስ፤ ጳዉሎሲካ፥ «ኔኒ ዳሮ ላይꬅ ሃይሳ ዴሬዛ ኣይሲዛዴ ጊዲዳይሳ ታ ኤሪዛ ጊሻስ ታ ቦላ ሺቂዳ ሞቶዛስ ታ ኔስ ኡፋይሳን ዛሮ ሺሻይስ።
ACT 24:11 ታ ጾሳስ ጎይናናስ ዬሩሳላሜ ቢን ሃች ታማኔ ናምኡ ጋላሳፌ ዳሮንታይሳ ኔኒ ኔ ባጋራ ኤራናስ ዳንዳያሳ።
ACT 24:12 ጾሳ ኬꬃን ጊዲን ኣይሁዳታ ዎሳ ኬꬃን ዎይኮ ካታማ ጊዶን ታ ኦናራካ ፓላሜቲሺን ዎይኮ ዴሬ ጊዶን ሜቶ ሜꬊሺን ታና ዴሚቤቴና።
ACT 24:13 ሃኢ ታ ቦላ ኢስቲ ሺሺዳ ሞቶዛስ ኣይ ማርካካ ሺሻናስ ዳንዳዬቴና።
ACT 24:14 «ጊዶ ኣቲን ታ ኔስ ቆንጪሳና ኮይዛይ ኢስቲ ዎርዶ ጊዛ ጎዳ ኦጌራ ኑ ኣዋንታ ጾሳስ ጎይናይሲኔ ሙሴ ዎጋኒኔ ናቤታ ማጻፋን ጻፌቲዳይሳካ ኡባ ኣማናይስ።
ACT 24:15 ኢስቲካ ኡፋይስ ኦꬂዛ ማላ ታኒካ ናጋራንቻቲኔ ጺሎቲ ሃይቆፔ ዴንዳናይሳ ጾሳን ኣማኔታይስ።
ACT 24:16 ሄሳ ጊሻስ ጾሳ ሲንꬃኒኔ ኣሳ ሲንꬃን ሲꬌይ ባይንዳ ሃኖይ ታስ ዳና ማላ ኡባ ዎዴ ሚናይስ።
ACT 24:17 «ታ ዬሩሳላሜፔ ኬዚን ታስ ዳሮ ላይꬅ ጊዲዳፔ ጉዬ ታ ዴሬ ኣሳስ ማዶ ሚሼኔ ጾሳስ ኢሜቲዛ ሚሼ ኤካ ያዲስ።
ACT 24:18 ታና ኢስቲ ጾሳ ኬꬃን ዴሚዳይ ታ ሄሳ ጋꬂሺና፤ ሄ ዎዴ ታ ጌይዛ ዎጋ ፖሊሺን ታናራ ዳሮ ኣሲ ዴና፤ ኦሺኔ ሺሮይካ ዴና።
ACT 24:19 ጊዶ ኣቲን ኢሲያፔ ዪዳ ኢሲ ኢሲ ኣይሁዳ ኣሳቲ ዴቴስ፤ ኢስታስካ ታና ሞቶስ ጋꬂዛዚ ዲዛ ጊዲኮ ኔ ሲንꬃን ታና ሞቴቶ።
ACT 24:20 ሄሳፌ ጉዬ ታኒ ዱላታ ሲንꬅ ሺቂኮ ታ ኦꬂዳ ቆሆይ ዲኮ ሄ ኣሳቲ ዮቴቶ።
ACT 24:21 ታና ሃይሳስ ጋꬂዳ ጋሶይካ ታ ኢስታ ጊዶን ኤቃዳ፥ ‹ሃይቂዳይታስ ዴንꬂ ዴስ› ጋ ዮቲዳ ጊሻስ፥ ‹ሃች ፒርዳስ ኢንቴ ሲንꬅ ሺቃዲስ› ጋዳ ታ ቃላ ꬎቁ ሂስታ ዮታዲስ ኣቲን ሃራ ታኒ ኦꬂዳ ሚሺ ዴና» ጊዴስ።
ACT 24:22 ፊልኪሴይ ጎዳ ኦጌ ሎኤꬂ ኤሪዛ ጊሻስ፥ «ዎታዳራታ ሃላቃታ ኣዛዚዛይሲ ሉሲዮሲ ዪዛ ዎዴ ታ ኢንቴ ዮኦዛ ጊሻስ ቃሾ ጊዲዛ ዮኦ ኢማና» ጊዲ ኢስታ ዬዲዴስ።
ACT 24:23 ጳዉሎሳ ናጊዛ ማቶ ሃላቃይ፥ «ኢዛ ዳሮ ዋዪሶንታ ሎኤꬃ ናጋ፤ ኢዛ ላጌቲ ኢዛስ ኮሺዛ ሚሽ ኤኪ ዪኮ ዲጎፋ» ጊዴስ።
ACT 24:24 ጉꬃ ዎዴፔ ካሊዲ ፊልኪሴይ ኣይሁዳ ኣስ ጊዲዳ ባ ማቼዮ ዱሪሲላራ ዪዴስ፤ ጳዉሎሳካ ጼይጊዲ ዬሱስ ኪርስቶሳን ኣማኖ ጊሻስ ኢዚ ዮቲሺን ሲዪዴስ።
ACT 24:25 ጳዉሎሲ ጺሎቴꬃ ጊሻስ፥ ኣሲ ባርካ ባና ሃሮ ጊሻሲኔ ቡሮፔ ያና ፒርዳ ጊሻስ ዮቲን ፊልኪሴይ ባቢዲ፥ «ሃኢ ኔ ባ፤ ሃራ ዎዴ ታስ ጊጊሺን ታ ኔና ጼይጋ ኤካና» ጊዴስ።
ACT 24:26 ፊልኪሴይ ጳዉሎሳፔ ጉቦ ኤካናስ ኡፋይስ ኦꬂ ናጊዳ ጊሻስ ዳሮ ዎዴ ጋካናስ ጼይጊ ጼይጊ ሃሳይሲዴስ።
ACT 24:27 ናምኡ ላይꬃፌ ጉዬ ጶርቂዮሳ ፊስጾሲ ፊልኪሴ ሶሆን ሹሜቲዴስ፤ ፊልኪሴይ ኣይሁዳታ ኡፋይሳናስ ኮዪዲ ጳዉሎሳ ቃሾሶን ኣጋጊዴስ።
ACT 25:1 ፊስጾሲ ባ ኣይሲዛ ዴሬ ቂሳሪያ ጌሊዲ ሄꬑ ጋላስ ኣቄቲዲ ሄፔ ዬሩሳላሜ ቢዴስ።
ACT 25:2 ሄን ዲዛ ቄሴታ ሃላቃቲኔ ኢሲ ኢሲ ኣይሁዳታ ጊዶፌ ጊታ ጊታ ኣሳቲ ጳዉሎሳ ቦላ ባ ሞቶ ሺሺዳ፤ «ጳዉሎሳ ሃ ዬሩሳላሜ ኤሂዲ፥ ‹ኑስ ሎኦ ኦሶ ኦꬃርኪ!› » ጊዲ ዎሲዳ፤ ኢስቲ ሄሳ ጊዳይ ጳዉሎሳ ናጊዲ ኦጌ ቦላ ዎꬋናስ ኮዪዳ ጊሻሳ።
ACT 25:4 ጊዶ ኣቲን ፊስጾሲ፥ «ጳዉሎሲ ቂሳሪያን ቃሾ ኬꬃን ናጌቴስ፤ ታኒካ ሃኢ ኤሌ ሲማዳ ሄ ኢዛኮ ባና።
ACT 25:5 ኢንቴ ጊዶፌ ዳናቴꬂ ዲዛይቲ ታናራ ቂሳሪያ ቤቶ፤ ጳዉሎሲ ኦꬂዳ ቆሆይ ዲዛ ጊዲኮ ሄን ሞቴቶ» ጊዴስ።
ACT 25:6 ፊስጾሲ ኦስፑን ዎይኮ ታሙ ጋላሳፌ ዳሮንታ ዎዴ ኢስታራ ጋምኢዳፔ ጉዬ ቂሳሪያ ቢዴስ፤ ሄ ጋኪዳ ማላ ዎንቴꬃ ጋላስ ፒርዳ ዎምቦራ ቦላ ኡቲዲ ጳዉሎሳ ባኮ ሺሻና ማላ ኣዛዚዴስ።
ACT 25:7 ጳዉሎሲ ኢዛ ሲንꬅ ሺቂን ዬሩሳላሜፔ ዪዳ ኣይሁዳቲ ጳዉሎሳ ጊዶꬂዲ ማርካይ ባይንዳ ዳሮ ዴጾ ሞቶ ኢዛ ቦላ ሺሺዳ።
ACT 25:8 ጳዉሎሲካ፥ «ታኒ ኣይሁዳ ዎጋ ቦላ ጊዲን ጾሳ ኬꬃ ቦላ ዎይኮ ኦሮሜ ካዎ ቄሳሬ ቦላካ ጋꬂዳ ቆሆይ ዴና» ጊዲ ኢስታ ሞቶዛ ሻሪዛ ዛሮ ኢስታስ ኢሚዴስ።
ACT 25:9 ጊዶ ኣቲን ፊስጾሲ ኣይሁዳታ ኡፋይሳናስ ኮዪዲ ጳዉሎሳ፥ «ኔኒ ዬሩሳላሜ ባዳ ሃይሳ ዮኦዛ ሄን ታ ሲንꬃን ፒርዴታና ኮያይ?» ጊዴስ።
ACT 25:10 ጳዉሎሲ ቃሴ ኢዛስ፥ «ሄኮ ታ ፒርዴታናስ ታስ ቤሲዛ ቄሳሬ ፒርዳ ዎምቦራ ሲንꬃን ኤቃዲስ፤ ኔካ ሎኤꬃ ኤሪዛ ማላ ታ ኣይሁዳታ ቦላ ኦꬂዳ ኣይኮ ቆሆይካ ዴና።
ACT 25:11 ታ ቆሂዳ ጊዲኮ ዎይኮ ታና ሃይቆስ ጋꬂዛ ቆሆ ታ ኦꬂዳ ጊዲኮ ታ ሃይቆፔ ኣታና ጊኬ፤ ጊዶ ኣቲን ኢስቲ ሺሺዛ ሞቶይ ሃዳ ጊዲኮ ኦኒካ ታና ኢስታስ ኣꬂ ኢማናስ ዳንዳዬና፤ ታኒካ ታ ዮኦይ ቄሳሬ ሲንꬅ ሺቃና ማላ፥ ‹ዪጊባይኔ› ጋዲስ» ጊ ዛሪዴስ።
ACT 25:12 ሄ ዎዴ ፊስጾሲ ባና ዞሪዛይታራ ሃሳዬቲዲ፥ «ኔ ቄሳሬኮ፥ ‹ዪጊባይኔ› ጊዛ ጊዲኮ ቄሳሬኮ ባንዳሳ» ጊዴስ።
ACT 25:13 ጉꬃ ጋላሳታፔ ጉዬ ካዎ ኣጊርጳይኔ ባርኒቄይ ፊስጾሳ፥ «ሃሹ ሎኦን ያዳሳ» ጊ ሞካናስ ቂሳሪያ ቢዳ።
ACT 25:14 ኢስቲ ሄን ዳሮ ጋላስ ኡቲዳ ጊሻስ ፊስጾሲ ጳዉሎሳ ዮኦዛ ካዎ ኣጊርጳስ፥ «ፊልኪሴይ ቃሾ ኬꬃን ዬጊ ኣጊዳ ኢሳዴይ ሃን ዴስ።
ACT 25:15 ታ ዬሩሳላሜን ዲዛ ዎዴ ቄሴታ ሃላቃቲኔ ኣይሁዳታ ጪማቲ ሃ ኣዴዛ ዮኦ ታኮ ኤሂዲ ታ ኢዛ ቦላ ፒርዳና ማላ ኦይቺዳ።
ACT 25:16 ታ ቃሴ፥ ‹ሞቴቲዳዴይ ሞቲዛይታ ሲንꬃን ኤቂዲ ባና ሞቲዛ ዮኦዛስ ቤሲዛ ዛሮ ኢሞንታ ዲሺን ሞቴቲዳዴ ኣꬂ ኢሞይ ኦሮሜ ካዎቴꬃስ ዎጋ ጊዴና› ጋዳ ዛራዲስ።
ACT 25:17 «ሄሳ ጊሻስ ኢዛ ሞቲዛይቲ ሺቄቲዲ ዪዳ ማላ ሄራካ ዎንቴꬃ ጋላስ ፒርዳ ዎምቦራን ኡታዳ ጳዉሎሳ ታ ሲንꬅ ሺሻና ማላ ኣዛዛዲስ።
ACT 25:18 ኢዛ ሞቲዛይቲ ኢዛ ኣቻን ኤቂዳ ዎዴ ኢስቲ ኢዛ ቦላ ሺሺዳ ሞቶይ ታ ባጋራ ኢዚ ኢታ ኦꬆንታ ኣጌና ጋዳ ቆፒዳ ማላ ጊዲቤና።
ACT 25:19 ጊዶ ኣቲን ኢስቲ ኢዛራ ሞቴቲዛይ ባ ኣማኖ ጊሻሲኔ ጳዉሎሲ ሃይቂዳይሳ፥ ‹ፓጻ ዴስ› ጊዛ ዬሱሳ ጊሻስ ጊዲዴስ።
ACT 25:20 ታኒካ ሄሳ ማላ ዮኦ ቆራ ጼላናስ ታና ሜቲዳ ጊሻስ ጳዉሎሳ፥ ‹ኔ ዬሩሳላሜ ባዳ ሄሳ ዮኦዛ ሄን ፒርዴታና ኮያይ?› ጋዲስ።
ACT 25:21 ሂስቲን ኢዚ ዮኦዚ ኦሮሜ ካዎ ሲንꬃን ቤዬታና ማላ ኮዪዲ፥ ‹ታ ዮኦይ ቄሳሬ ሲንꬅ ሺቃና ማላ ኦይቻይስ› ጊዳ ጊሻስ ኢዛ ዮኦ ቄሳሬኮ ታ ዬዳና ጋካናስ ኢዚ ቃሾ ኬꬃን ጋምኣና ማላ ኣዛዛዲስ» ጊ ዮቲዴስ።
ACT 25:22 ኣጊርጳይ ፊስጾሳ፥ «ታኒካ ኢዚ ጊዛ ሲያና ኮያይስ» ጊዴስ። ፊስጾሲካ፥ «ዎንቶ ሲያንዳሳ» ጊዴስ።
ACT 25:23 ሄሳ ጊሻስ ዎንቴꬃ ጋላስ ኣጊርጳይኔ ባርኒቄይ ካዎቲ ማይኢዛ ማይኦ ማይኢዲኔ ዳሮ ቦንቾራ ዎታዳራታ ሃላቃታራኔ ሄ ካታማን ዲዛ ጊታ ኣሳታን ኣዣቤቲ ዪዲ ፒርዳ ኬꬅ ጌሊዳ፤ ሄሳፌ ጉዬ ፊስጾሲ ጳዉሎሳ ጼይጊሲዴስ።
ACT 25:24 ፊስጾሲ፥ «ካዎ ኣጊርጳ! ኑናራ ዲዛ ኣሳቶ! ኣይሁዳ ኣሳቲ ዉሪ፥ ‹ሃይሲ ኣዴዚ ሃይሳፌ ጉዬ ፓጻ ዳና ቤሴና› ጊዲ ዋሲሼ ዬሩሳላሜንካ ሃንካ ኢዛ ቦላ ፒርዴታና ማላ ኢስቲ ታና ኦይቺዛይ ሃይሳ ኢንቴ ቤኢዛ ኣዴዛ ጊሻሳ።
ACT 25:25 ታኒ ታ ባጋራ ኢዛ ሃይቆስ ጋꬂዛ ኢሲ ባላካ ኢዛ ቦላ ዴማቤኬ፤ ኢዚ፥ ‹ታ ዮኦይ ኦሮሜ ካዎ ሲንꬅ ሺቂ ቤዬቶ› ጊዳ ጊሻስ ታ ኢዛ ሄ ዬዳናስ ቃቻዲስ።
ACT 25:26 «ጊዶ ኣቲን ኢዛ ጊሻስ ታኒ ታ ጎዳስ ጻፋና ጊዛ ኤሬቲዳ ዮኦይ ዴና፤ ሄሳ ጊሻስ ኢዛ ኢሲ ኢሲ ፓጬ ኦይሻታ ኦይቺኮ ታስ ጻፋናይሲ ዳናኮኔ ጋዳ ኢንቴኮ፥ ሃራፔካ ካዎ ኣጊርጳ ኔኮ ሺሻዲስ።
ACT 25:27 ጋሶይካ ቃሾ ኣሲ ፑዴ ቦላቲዛ ꬎቃ ዳናኮ ቢሺን ኢዚ ሞቴቲዛ ዮኦ ቆንጪሶንታ ኣጎይ ኣሳ ኤያ ኬሲዛይሲ ታስ ቤቲዴስ» ጊዴስ።
ACT 26:1 ኣጊርጳይ ጳዉሎሳ፥ «ኔኒ ኔ ጊሻስ ሃሳያናስ ዳንዳያሳ» ጊዴስ፤ ጳዉሎሲካ ባ ኩሼ ዴንꬂዲ ዛሮ ኢሚዴስ።
ACT 26:2 «ካዎ ኣጊርጳ! ታና ኣይሁዳቲ ሞቲዛ ዮኦ ኡባስ ሃች ታ ኔ ሲንꬃን ታና ማዳና ዛሮ ኢሚዛ ጊሻስ ታና ዳሮ ኡፋይሴስ።
ACT 26:3 ጋሶይካ ኔ ኣይሁዳታ ዎጋኔ ኢስታ ፓላማ ኡባ ሎኤꬃ ኤራሳ፤ ሄሳ ጊሻስ ኔ ታ ጊዛ ኡባ ዳንዳያዳ ሲያና ማላ ታ ኔና ዎሳይስ።
ACT 26:4 «ታኒ ጉꬃ ናቴꬃ ዎዴፔ ዶማዳ ዋና ዴኢዳኮ ኣይሁዳ ኣሳቲ ኤሬቴስ፤ ኮይሮፔ ሃኢ ጋካናስ ታኒ ታ ዴሬ ኣሳ ጊዶኒኔ ዬሩሳላሜን ታ ዴኢዳ ዱስ ኣሳይ ኤሬስ።
ACT 26:5 ቃሴካ ኢስቲ ማርካታና ኮይኮ ኑ ኣማኖ ጊሻስ ታ ኬሃ ሚንꬃ ዎጋ ናጊዛ ፋርሳዌ ባጋ ጊዳዳ ጋምኢዳዴ ጊዲዳይሳ ኢስቲ ኮይሮፔ ዴንꬂዲ ኤሬቴስ።
ACT 26:6 ሃኢ ቃሴ ፒርዳስ ታና ሃይሳን ኤሲዳይ ጾሲ ካሴ ኑ ኣዋታስ ኢሚዳ ጫቆ ቃላ ኡፋይሳ ጊሻሳ።
ACT 26:7 ሃ ኡፋይሳኮ ጋካናስ ኑ ዛርኬቲ ታማኔ ናምኣቲ ጋላሲኔ ቃማ ጾስ ጎይኒሼ ናጊዳ፤ ካዎ ኢንቴስ ሆላ! ኣይሁዳቲ ታና ሞቲዛይ ሃ ዮኦዛ ጊሻሳ።
ACT 26:8 ጾሲ ሃይቂዳይታ ዴንꬃናይሲ ዋኒዲ ኣይሁዳ ጊዲዳ ኢንቴ ኣቻን ኣማኔቲቤኔ?
ACT 26:9 «ታኒካ ታ ባጋራ ናዚሬቴ ዬሱሳ ሱንꬃስ ኤቄታናስ ቤሴስ ጋዳ ቆፓዲስ ሺን፤
ACT 26:10 ታኒ ዬሩሳላሜን ኦꬂዳይካ ሄሳኮሺን፤ ቄሴታ ሃላቃታፔ ታ ኤኪዳ ጎዳቴꬃራ ኣማኒዛይታፔ ዳሮታ ቃሾ ኬꬃን ዬጊሳዲስ፤ ኢስታ ዎꬊሺን ዎꬊዛይታራ ኢሲፌ ዳይስ።
ACT 26:11 ዳሮ ዎዴ ኣይሁዳታ ዎሳ ኬꬃቲ ዲዛሶን ኣዋንካ ኢስቲ ቃጻዬታና ማላኔ ባ ኣማኖ ካዳና ማላ ኦꬃዲስ፤ ኢስታ ቦላ ዳሮ ሃንቄታዳካ ኢስራኤሌፔ ካሬን ዲዛ ሃራ ካታማታካ ባዳ ኣማኒዛይታ ጎዳዲስ።
ACT 26:12 «ሃይሳ ሃ ዮኦዛስ ቄሴታ ሃላቃታፔ ኩሜꬃ ጎዳቴꬂኔ ኣዛዞ ኤካዳ ዳማስቆ ጌቴቲዛሶ ታ ቢሺን፥
ACT 26:13 ካዎ ኢንቴስ ሆላ! ቡሮ ታ ኦጌን ዲሺን ጋዴይ ሴታ ጋላስ ጊዲሺን ኣርሼ ፖኦፔ ኣꬊዛ ፖኦ ቤያዲስ፤ ሄ ፖኦይ ታናኔ ታናራ ቢዛ ኣሳታ ዩዪ ኣꬊዲ ሳሎፔ ፖኢዴስ።
ACT 26:14 ኑ ዉሪካ ቢታ ቦላ ኩንዲ ዲሺን ኣይሁዳታ ቃላራ፥ ‹ሳኦሌ! ሳኦሌ! ታና ኣዛስ ጎዳይ? ኔኒ ቃራ ማሻ ቦላ ኤቂኮ ኔርካ ኔና ቆሃሳ› ጊዛ ቃላ ሲያዲስ።
ACT 26:15 «ታኒካ፥ ‹ጎዶ! ኔ ኦኔ?› ጋዲስ፤ ጎዳይካ፥ ‹ታኒ ኔ ጎዲዛ ዬሱሳኮ!
ACT 26:16 ሃኢ ዴንዳዳ ኔ ቶሆን ኤቃ፤ ታ ኔስ ቆንጪዳይ ኔ ታና ሃኢ ቤኢዳይሳኒኔ ሲንꬃፌ ታ ኔና ቤሳናይሳን ኔ ታስ ማርካቲዛዴ ጊዳና ማላ ታ ኔና ሹማና ኮያዲስ።
ACT 26:17 ኢስራኤሌ ኣሳ ኩሼፔኔ ታ ኔና ኢስታኮ ኪቲዛ ኣይዛቤታ ኩሼፔካ ኣሻና።
ACT 26:18 ኔ ኢስታ ኣይፌ ዶያና ማላኔ ꬉማፔ ፖኦን ኬሳና ማላ ቃሴካ ጻላኤስ ሃሬቲዛሶፔ ጾሳኮ ኔ ዛራና ማላ ኦꬃና፤ ኢስቲካ ታና ኣማኒዳ ጊሻስ ባ ናጋራፔ ማሬታና፤ ቃሴ ዶሬቲዳይታ ጊዶን ኢስቲ ጺንጾ ዴማና› ጊዴስ።
ACT 26:19 «ሄሳ ጊሻስ ካዎ ኣጊርጳ! ሳሎፔ ታስ ኢሜቲዳ ኣጁታስ ታ ኣዛዜታዲስ።
ACT 26:20 ጊዶ ኣቲን ታ ካሴታዳ ዳማስቆን ዲዛ ኣሳ ካሌꬃዳ ዬሩሳላሜኒኔ ዩሁዳ ዴሬ ኡባን ዲዛይታ ቃሴካ ኣይዛቤቲካ ናጋራ ኦጌፔ ጾሳኮ ሲሚዲ ማሬታና ማላ ኤሪሳዲስ፤ ኢስቲ ናጋራፔ ሲሚዳይሳ ቤሲዛዝ ኦꬃና ማላ ታ ኢስታስ ዮታዲስ።
ACT 26:21 ሄሳ ጋሶን ኣይሁዳቲ ታኒ ጾሳ ኬꬃን ዲሺን ታና ኦይኪዲ ዎꬋና ኮዪዳ።
ACT 26:22 ሃች ጋካናስካ ታስ ጾሳፌ ማዶይ ፓጪ ኤሬና፤ ሄሳ ጊሻስ ጉꬃስካ ጊታስካ ማርካታሼ ሃይሳን ኤቃዲስ፤ ናቤቲኔ ሙሴይ ካሴቲዲ ሃይሳ ማላይ ሃናና ጊዳይሳ ዮቶፔ ኣቲን ታ ሃራ ኣይኮካ ዮታቤኬ።
ACT 26:23 ኢስቲካ ዮቲዳይሲ፥ ‹ጾሲ ኪቲዳዴይ ሜቶ ቤያና፤ ሃይቆፔ ዴንዶን ኮይሮ ጊዲዲ ኣሲ ኣታና ፖኦይ ኢስራኤሌ ዴሬሲኔ ኣይዛቤታስ ቆንጫና› ጊዛይሳ» ጊዴስ።
ACT 26:24 ጳዉሎሲ ሄሳ ዮቲሺን ፊስጾሲ፥ «ጳዉሎሳ! ሃኢ ኔ ጎዮንታ ኣጋካ፤ ኔ ዳሮ ታማርዳይሲ ኔና ጎሺዴስ» ጊ ዋሲዴስ።
ACT 26:25 ጳዉሎሲ ጊዲኮ ኢዛስ፥ «ቦንቾ ፊስጾሳ! ታ ኔስ ቱማ ኤራዳ ዮታይስ ኣቲን ጎያቤኬ።
ACT 26:26 ታ ኢዛ ሲንꬃን ቆንጬራ ዮቲዳ ካዎይ ሃይሳ ዮኦዛ ኤሬስ፤ ሃይሲካ ቆታራ ኦሴቶንታይሳ ጊዲዳ ጊሻስ ካዎይ ኤራናይሳ ታ ኣማኔታይስ።
ACT 26:27 ካዎ ኣጊርጳ! ናቤታ ኣማናሳ ጊዲኪ? ኔ ኣማኒዛይሳ ታ ኤራይስ» ጊ ዛሪዴስ።
ACT 26:28 ኣጊርጳይካ ጳዉሎሳ፥ «ሄኮ ኔ ታና ሃኖ ጉꬃ ዎዴ ጊዶን ኣማንꬃና ኮያሳ» ጊዴስ።
ACT 26:29 ጳዉሎሲካ ኢዛስ ዛሪዲ፥ «ጉꬃ ዎዴን ጊዲንካ ዎይኮ ዳሮ ዎዴን ኔ ጻላ ጊዶንታ ዲሺን ሃች ታ ዮቲዳይሳ ሲዪዳይ ዉሪ ሃኖ ታ ቃሼቴꬃያ ኣታ ዉሪካ ታ ማላ ጊዳና ማላ ታኒ ጾሳ ዎሳይስ» ጊዴስ።
ACT 26:30 ሄሳፌ ጉዬ ካዎይ፥ ዴሬ ኣይሲዛይሲ፥ ባርኒቄይኔ ኢስታራ ኡቲዳ ኣሳይካ ዉሪ ዴንዲዴስ።
ACT 26:31 ኢስቲ ሄፔ ኬዚ ቢሼ ባ ጊዶን፥ «ሃይሲ ኣዴዚ ሃይቆስ ዎይኮ ቃሾስ ጋꬂዛ ሚሼ ኣይኮካ ኦꬂቤና» ጊዳ።
ACT 26:32 ኣጊርጳይካ ፊስጾሳ፥ «ሃይሲ ኣዴዚ ዮኦዛ ቄሳሬስ ሺቆ ጎንታኮ ኣይኮ ዎሶይ ባይንዳ ሜላ ዬዴታናኮ ሺን» ጊዴስ።
ACT 27:1 ኑኒ ጻላኔ ዴሬ ማርካቤን ባና ማላ ጌቴቲ ቃሼቲዳ ጊሻስ ጳዉሎሳኔ ሃራ ቃሾ ኣሳታካ ካዎ ኣዉጊስጾሳ ዎታዳራታፔ ጊዲዳ ዩሊዮሳ ጌቴቲዛ ማቶ ሃላቃስ ኣꬂ ኢሚዳ።
ACT 27:2 ኢሲያ ኣባ ኣቻን ዲዛ ዴሬታ ቢዛ ማርካቤን ጌሊዲ ቢዶስ። ታሶሎንቄን ዲዛ ኢሲ ማቂዶኒያ ኣስ ኣሪስጺሮኮሳ ጌቴቲዛይሲ ኑናራ ዴስ።
ACT 27:3 ዎንቴꬃ ጋላስ ሲዶና ጌቴቲዛሶ ጋኪዶስ፤ ዩሊዮሲ ጳዉሎሳስ ሎኦ ጊዲዳ ጊሻስ ጳዉሎሲ ባ ላጌታኮ ቢዲ ኣሳይ ኢዛስ ኮሺዛ ማዶ ኦꬃና ማላ ፒቃዴ ኢሚዴስ።
ACT 27:4 ሄፔ ዴንዲ ኑ ቢሺን ሲንꬃ ባጋራ ጫርኮይ ኑ ቦላ ጫርኪዛ ጊሻስ ኣባ ጊዶን ዲዛ ቆጲሮሴ ዴሬን ጌሜቲዲ ሲንꬄ ቢዶስ።
ACT 27:5 ኪልቂያ ጌቴቲዛሶኔ ጲንፊሊያ ጌቴቲዛ ዴሬ ኣቻን ዲዛ ኣባ ፒኒዲ ሎቂያ ዴሬን ዲዛ ሙራ ጌቴቲዛ ካታማ ጋኪዶስ።
ACT 27:6 ሄን ማቶ ሃላቃይ ጻላኔ ዴሬ ቢዛ ኢስኪንዲሪያ ዴሬ ማርካቤ ዴሚዲ ኑና ኢዛን ጌልꬂዴስ።
ACT 27:7 ዳሮ ጋላስ ሎዱ ጊ ቢዲ ዳሮ ዋዬቲዲ ቃንዶሴ ጌቴቲዛ ካታማ ኣች ጋኪዶስ፤ ጫርኮይካ ኑ ሲንꬅ ቦንታ ማላ ዲጊን ሳልሞና ኣቻራ ኣꬊዲ ቃርጼሴ ጌቴቲዛ ኣባ ጊዶን ዲዛ ዴሬን ጌሜቲዲ ቢዶስ።
ACT 27:8 ዳሮ ዋዬቲዲ ላንቄ ላንቄ ኦይኪ ኑ ኣꬊዳፔ ጉዬ ላሲያ ጌቴቲዛ ካታማ ኣቻን ዲዛ፥ «ሎኦ» ጌቴቲዛ ማርካቤይ ኤቂዛሶ ጋኪዶስ።
ACT 27:9 ኑ ቢዛ ኦጌ ቦላ ዳሮ ዳቡራን ጾማ ዎዴይ ኣꬊዳ ጊሻስ ሃኢ ኣባ ቦላራ ባናስ ዳሮ ሜቶ ጊዲዳ ጊሻስ ጳዉሎሲ ባናራ ዲዛ ኣሳይ ናጌታና ማላ ሂዝጊዴስ፤
ACT 27:10 «ኣሶ! ሃይሳፌ ኑ ካሊዲ ባና ቡሳይ ዳሮ ሜቶራ ዲዛይሲ ታስ ቤቴስ፤ ማርካቤዛን ዲዛ ጫናዛ ቦላኔ ማርካቤዛ ቦላ ጻላላ ጊዶንታ ኣሳ ሼምፖ ቦላካ ጊታ ቆሆይ ጋካና።»
ACT 27:11 ማቶ ሃላቃይ ቃሴ ጳዉሎሳ ዞሬፔ ቦላራ ማርካቤዛ ላጊዛ ዋናዚኔ ማርካቤዛ ጎዳይ ጊዛይሳ ሲዪዴስ።
ACT 27:12 ሄ ማርካቤይ ኤቂዛሶይ ባልጎይ ኣꬋና ጋካናስ ማርካቤስ ሎኦ ሼምፖሶ ጊዶንታ ጊሻስ ዳሪዛ ባጋ ኣሳይ፥ «ሄሜꬅ ሲንꬅ ጉጃናስ ዳንዳዬቲኮ ኣርሼይ ዉሊዛሶፔ ዱጌሃ ባጋራኔ ፑዴሃ ባጋራ ዲዛ ፒንቄ ጌቴቲዛሶ ቃርጼሴ ማርካቤ ሼምፖሶ ኑ ጋኪዲ ባልጎ ሄን ኣꬆስ» ጊዲ ባ ቆፋ ሺሺዳ።
ACT 27:13 ዱጌሃ ባጋራ ጉꬃ ጫርኮይ ጫርኪሺን ቤኢዲ ኢስቲ ቆፒዳ ማላ ሃናና ሚሳቲን ባና ኬዚዳ፤ ማርካቤይ ኤቂዛሶፔ ባና ዴንዲዲ ቃርጼሴ ኣቻራ ላንቄ ላንቄ ኦይኪዲ ኣꬊ ቢዳ።
ACT 27:14 ጊዶ ኣቲን ጉꬃ ዎዴፔ ጉዬ፥ «ኣርሼይ ሞኪዛሶፔ ፑዴሃፔ ዪዛ ጎቴ ጫርኮ» ጌቴቲዛ ኢታ ዎልቃማ ጫርኮይ ኣባ ጊዶን ዲዛ ዴሬይፔ ዴንዲዲ ኢስታኮ ኣባ ጊዶ ዪዴስ።
ACT 27:15 ማርካቤዛ ጫርኮይ ሱጊን ጫርካራ ኤቄታናስ ዳንዳዮንታ ኢጺን ኑ ጮኡ ጊዲ ጫርኮይ ኤፊዛሶ ቢዶስ።
ACT 27:16 ቄዳ ጌቴቲዛ ኣባ ጊዶን ዲዛ ዴሬ ዲዛሪን ጌሜቲዲ ኑ ቢሺን ዳሮ ዋዬቲዲ ማርካቤዛ ቄሪ ዎጎሎዪን ኦይኪዲ ኤሳናስ ዳንዳይዶስ።
ACT 27:17 ማርካቤዛ ላጊዛይቲ ቄሪ ዎጎሎዮ ማርካቤዛኮ ጎቺ ኬሲዲ ማርካቤዛ ዎዶሮራ ጻጺዳ፤ ማርካቤዚካ ሲርቲሴ ጌቴቲዛ ኣባ ኣጬይ ዳሪ ዲዛሶን ኩንዶንታ ማላ ባቢዲ ኢዛ ቦላ ዲዛ ሻራ ዎꬂዲ ጫርኮን ላጌቲ ቢዳ።
ACT 27:18 ጎቴ ጫርኮይ ሚኒ ቢዳ ጊሻስ ዎንቴꬃ ጋላስ ማርካቤዛን ጫኔቲዳ ሚሻታ ኢሳ ኢሳ ኣባ ጊዶ ዬጌꬅ ኦይኪዳ።
ACT 27:19 ሄꬓንꬆ ጋላስ ማርካቤዛስ ኮሺዛ ሚሻታካ ባ ኩሼራ ኬሲ ኬሲ ዬጊዳ።
ACT 27:20 ዳሮ ዎዴ ጋካናስ ኣርሼካ፥ ጾሊንቴካ ቤኦንታ ኣጊዳ ጊሻሲኔ ጫርኮይካ ካሴፔ ሚኒ ሚኒ ቢዛ ጊሻስ ሃይሳፌ ጉዬ ኑ ኣታና ዳንዳዮኮ ጊዛ ቆፋን ኡፋይስ ቃንጺዶስ።
ACT 27:21 ኣሳይ ካꬅ ሞንታ ዳሮ ጋላስ ኡቲዴስ፤ ሄሳ ጊሻስ ጳዉሎሲ ኣሳ ጊዶን ኤቂዲ፥ «ሃ ኣሳቶ! ኢንቴ ታ ጊዛይሳ ሲዪዲ ቃርጼሴፔ ዴንዶንታኮ ሃ ቆሆይኔ ꬋዮይ ኢንቴ ቦላ ጋኬናኮሺን።
ACT 27:22 ሃኢካ ማርካቤዚ ጻላ ቆሄታና ኣቲን ኢንቴፌ ኢሳዴ ሼምፖይካ ꬋዬና፤ ሄሳ ጊሻስ ኣይኮይ ባ፤ ባቦፍቴ ጋዳ ታኒ ኢንቴና ዞራይስ።
ACT 27:23 ቃማ ኦማርስ ታ ኢዛስ ጊዲዳ ታ ጎይኒዛ ጾሳይ ኪቲዳ ኪታንቻይ ታ ኣቻን ኤቂዲ፥
ACT 27:24 ‹ጳዉሎሳ! ባቦፋ! ኔ ቄሳሬ ሲንꬃን ኤቃና ቤሴስ፤ ሄኮ ኔናራ ኢሲፌ ቢዛይታ ዉርሲ ጾሲ ኔ ጊሻስ ሃይቆፔ ኣሻና› ጊዲ ታስ ዮቲዴስ።
ACT 27:25 ሄሳ ጊሻስ ኢንቴኖ ሃ ኣሳቶ ኣይኮይ ባ፤ ጾሲ ታስ ሃይሳ ዮቲዳይሳ ፖላናይሳ ታ ኣማናይስ።
ACT 27:26 ጊዲኮካ ሃይሲ ጎቴ ጫርኮዚ ጌዴ ኢሲ ኣባ ጊዶን ዲዛ ዴሬ ኣች ኤፊዲ ኑና ዬጋና» ጊዴስ።
ACT 27:27 ታማኔ ኦይዳንꬆ ቃማ ኣንዲርያ ኣባ ጊዶን ጫርኮይ ኑና ዋዪሲሺን ቢሼ ሌላ ጊዶꬅ ማርካቤዛ ላጊዛይታስ ኣባፌ ቢታ ቦላ ጋኪዳ ሚሳቲዴስ።
ACT 27:28 ሄሳ ጊሻስ ኣባ ጪማቴꬅ ኤራናስ ኣባን ዬጊ ጼሊዛ ዎዶሮ ኢስቲ ዬጊ ጼሊሺን ኣባ ጪማቴꬂ ኦይዱ ታሙ ሜቲሬ ኬና ጊዲ ቤቲዴስ፤ ጋምኢሼ ሃኢካ ዬጊን ሄꬑ ታሙ ሜቲሬ ኬና ጪማ ጊዲዳይሳ ዴሚዳ።
ACT 27:29 ኑ ዲዛ ማርካቤይ ኣባ ጋጻን ዲዛ ዛላ ሹቻራ ኢጬቶንታ ማላ ባቢዲ ማርካቤዛፔ ጉዬ ባጋራ ማርካቤዚ ቃጾንታ ማላ ናጊዛ ꬊሽኬ ዱጌ ኣባ ጊዶ ዬጊዳ፤ ሄሳፌ ጉዬ ኢስታስ ቃማይ ዎንታና ማላ ዎሳ ኦይኪዳ።
ACT 27:30 ማርካቤዛ ላጊዛይቲ ማርካቤዛፔ ኬዚዲ ባቃታና ኮዪዳ ጊሻስ ማርካቤዛፔ ሲንꬃ ባጋራ ማርካቤ ናጊዛ ꬊሽኬ ዬጊዛ ሚሳቲዲ ማርካቤዛ ቦላ ዲዛ ቄሪ ዎጎሎዮ ዱጌ ኣባ ጊዶ ዬጊዳ።
ACT 27:31 ሄ ዎዴ ጳዉሎሲ ማቶ ሃላቃኔ ዎታዳራታ፥ «ሃይቲ ማርካቤዛን ዲዛ ኣሳቲ ማርካቤዛ ቦላ ሼምፒዲ ኡቶንታ ኣጊኮ ኢንቴካ ኣታና ዳንዳዬኬታ» ጊዴስ።
ACT 27:32 ሄሳ ጊሻስ ዎታዳራቲ ዎጎሎዮ ኦይኪዳ ዎዶሮዛ ቃንጺ ዬጊን ኢዛ ኣባ ቦላ ቶኬታና ማላ ዬዲ ኣጊዳ።
ACT 27:33 ጋዴይ ዎንታና ጊሺን ዉሪካ ካꬅ ማና ማላ ጳዉሎሲ ኢስታ፥ «ኢንቴ ኣዚ ሃናኔሻ ጊዲ ሂርጋን ካꬅ ሞንታ ኣጊን ሃች ታማኔ ኦይዳንꬆ ጋላሳ።
ACT 27:34 ሄሳ ጊሻስ ኢንቴ ካꬅ ማና ማላ ታ ኢንቴና ዎሳይስ፤ ኢንቴ ሚኮ ሚናና፤ ሙሌካ ኣይኮ ቆሆይካ ኢንቴ ቦላ ጋኬና» ጊ ዎሲዴስ።
ACT 27:35 ኢዚ ሄሳ ጊዳፔ ጉዬ ካꬅ ኤኪዲ ጾስ ጋላቲዲ ኡባ ኣሳ ሲንꬃን ካꬅ ሙስ ኦይኪዴስ።
ACT 27:36 ሄ ዎዴ ዉሪካ ሚኔቲዲ ካꬅ ሚዳ።
ACT 27:37 ማርካቤዛ ጊዶን ዲዛ ኣሳይ ዉሪ ናምኡ ጼታኔ ላፑን ታማኔ ኡሱፑና።
ACT 27:38 ዉሪካ ሚ ካሊዳፔ ጉዬ ማርካባን ጫኔቲዳ ጊስቴዛ ዱጌ ኣባ ጊዶ ዬጊዲ ማርካቤዛ ዴጾ ካዉሺዳ።
ACT 27:39 ጋዴይ ዎንቲን ባ ዲዛሶ ኤሪቤቴና፤ ጊዶ ኣቲን ኣጬይ ዲዛሶ ኣባ ኩርቁንꬁ ዴሚዳ፤ ኢስታስ ዳንዳዬቲዛኮ ማርካቤዛ ሄ ሱጊ ሺሻና ቆፒዳ።
ACT 27:40 ማርካቤዛ ኦይኪዛ ꬊሽኬ ቃንጺዲ ኣባ ጊዶ ዬጊዳ፤ ሄ ዎዴ ማርካቤ ላጌዛ ሚሻ ኦይኪዳ ዎዶሮታ ቢርሺዳ። ሃ ባጋራ ዲዛ ሻራ ጫርኮ ባጋ ꬎቁ ሂስቲዲ ኬዛና ኣባ ጋጻ ቢዳ።
ACT 27:41 ጊዶ ኣቲን ማርካቤዚ ዳሮ ኣጬይ ኮሬቲ ኡቲዳይሳራ ኢጬቲዲ ዱጌ ጉፋኒዴስ፤ ሲንꬃ ቦላ ዱጌ ጉፋኒ ꬊሽኬቲዲ ቃጾንታይሳ ጊዲዴስ፤ ቃሴ ኣባ ዳምባላይ ዳሮፔ ዴንዲዳይሳን ጉዬ ባጋራ ሜቄሬቴꬅ ኦይኪዴስ።
ACT 27:42 ቃሾ ኣሳፔ ኢሳዴይካ ኣባን ዎꬊዲ ኬሲ ኤኮንታ ማላ ዎታዳራቲ ዎꬋና ቆፒዳ።
ACT 27:43 ማቶ ሃላቃይ ቃሴ ጳዉሎሳ ኣሻናስ ኮዪዳ ጊሻስ ኢስታ ቆፋ ኤካና ኮዪቤና፤ ጊዶ ኣቲን ሃꬄ ዋꬊ ኤሪዛይቲ ማርካቤዛፔ ዱጌ ኣባን ጉፒ ጉፒ ዎꬊዲ ቢታ ቦላ ኬዛና ማላ ኣዛዚዴስ።
ACT 27:44 ሃንኮ ኣቲዳይቲ ሳንቃታኒኔ ማርካቤ ሜቆታን ኣባ ፒናና ማላ ኣዛዚዴስ፤ ሄሳꬆ ሃኒዲ ዉሪካ ሳሮን ኣባ ጊዶፌ ቢታ ቦላ ጋኪዳ።
ACT 28:1 ኑ ቢታይ ዲዛሶ ሳሮቴꬃን ጋኪዳፔ ጉዬ ኑ ጋኪዳ ኣባ ጊዶን ዲዛ ዴሬይ ሜላጺያ ጌቴቲዛ ዴሬ ጊዲዳሮ ኤሪዶስ።
ACT 28:2 ሄ ዴሬዪን ዲዛ ኣሳይ ዳሮ ማላሊሲዛ ኪያቴꬅ ኑስ ኦꬂዴስ፤ ሄ ዎዴ ኢራይ ቡኪዳ ጊሻሲኔ ሜጎ ጊዲዳ ጊሻስ ታማ ኤꬂዲ ኑና ሞኪ ኤኪዳ።
ACT 28:3 ጳዉሎሲ ኣፊራ ጌቴቲዛ ሚꬅ ሺሺዲ ታማን ጉጂን ታማ ሴላፔ ዴንዲዳይሳን ሾሺ ኬዚዲ ኢዛ ኩሼ ቦላ ጻጼቲዴስ።
ACT 28:4 ማልታ ኣሳይ ሾሺ ጳዉሎሳ ኩሼ ቦላ ጻጼቲዳይሳ ቤኢዲ፥ «ሃይሲ ኣዴዚ ሼምፖ ዎꬊዳዴ፤ ጋሶይካ ኣባ ዳምባላፔ ኢዚ ኣቲዲ ዪኮካ ፒርዲዛ ጾሳፌ ኬሲ ኤኪ ፓጻ ዳና ዳንዳይቤና» ጊዲ ባ ጊዶን ሃሳዬቲዳ
ACT 28:5 ጳዉሎሲ ቃሴ ሾሻ ዱጌ ታማን ቆቆፊ ዬጊዲ ኣይኮካ ሃኒቤና።
ACT 28:6 ኣሳይካ፥ «ኣይዴፔ ኣይዴ ኢዛ ኣሳቴꬃይ ኪጻኔሻ፤ ዎይኮ ኢዚ ቆፖንታ ኩንዲዲ ሃይቃና» ጊዲ ናጊዴስ፤ ጊዶ ኣቲን ኢስቲ ዳሮ ዎዴ ናጊሺን ኢዛ ቦላ ኣይኮይካ ሃኖንታይሳ ቤኢዲ ባ ቆፋ ላሚዲ፥ «ሃይሲ ኣዴዚ ጾሳ!» ጊዴስ።
ACT 28:7 ሄ ኑ ዲዛሶ ማታን ኣባ ጊዶን ዲዛ ዴሬዮ ኣይሲዛ ፑፑልዮሳ ጌቴቲዛዴስ ጋዴይ ዴስ፤ ሄ ኣዴዚ ኑና ሞኪ ኤኪዲ ባሶን ሄꬑ ጋላስ ጋካናስ ሎኤꬂ ኢማቲዴስ።
ACT 28:8 ሄን ፑፑልዮሳ ኣዋ ሚሻይኔ ጉሶ ሃርጌይ ሳኪን ኢቺዲ ዴስ፤ ጳዉሎሲ ኢዛኮ ጌሊዲ ኢዛስ ዎሲዴሲኔ ኢዛ ቦላ ባ ኩሼ ዎꬂዲ ፓꬂዴስ።
ACT 28:9 ሄሲ ሄሳꬆ ሃንዳፔ ጉዬ ሄ ዴሬዪን ዲዛ ሃራ ሃርጋንቻቲ ዪዲ ፓጺዳ።
ACT 28:10 ኣሳይካ ኑስ ዳሮ ሚሽ ኤሂዲ ኑና ቦንቺዛይሳ ኑና ቤሲዴስ፤ ኑኒ ማርካቤን ባና ዴንዲን ኑስ ኮሺዛይሳ ማርካቤን ኡባ ጫኒዳ።
ACT 28:11 ኑ ሚሊጺኔን ሄꬑ ኣጊና ጋምኢዳፔ ጉዬ ባልጎይ ኣꬋና ጋካናስ ኣባ ጊዶን ዲዛ ዴሬዪን ጋምኢዲ ኢስኪንዲሪያፔ ዪዛ ማርካቤን ጌሊዲ ባና ዴንዲዶስ፤ ሄ ማርካቤዛ ቦላ ዲዮሲቆሮሳ ጌቴቲዛ ናምኡ ሜንቴ ኤቃታ ሚስሌይ ዴስ።
ACT 28:12 ሲራኩሴ ጌቴቲዛ ካታማ ጋኪዲ ሄን ሄꬑ ጋላስ ጋምኢዶስ።
ACT 28:13 ሄፔ ኣባ ቦላራ ቢዲ ኤሬጊዮሜ ጌቴቲዛ ካታማ ጋኪዶስ፤ ሄን ኢሲ ጋላስ ኣቂዲ ዱጌ ባጋራ ዪዛ ጫርኮይ ጫርኪዳ ጊሻስ ናምኣንꬆ ጋላስ ፑቲዮሎሴ ጌቴቲዛሶ ቢዶስ።
ACT 28:14 ሄን ኣማኒዛይታ ዴሚዲ ኢስታራ ኑ ላፑን ጋላስ ጋካናስ ኡታና ማላ ኑና ዎሲዳ፤ ሄፔ ቃሴ ኦሮሜ ቢዶስ።
ACT 28:15 ኦሮሜን ዲዛ ኣማኒዛ ኣሳይ ኑ ጊሻስ ሲዪዲ ኣፒዮሴ ጌቴቲዛ ጊያኔ «ሄꬑ ኣቆሶታ» ጌቴቲዛሶ ጋካናስ ኑና ሞካና ዪዳ፤ ጳዉሎሳይካ ኢስታ ቤኢዲ ጾስ ጋላቲዴሲኔ ሚኔቲዴስ።
ACT 28:16 ኑኒ ኦሮሜ ጌሊዳ ዎዴ ጳዉሎሳ ናጋናስ ኢሲ ዎታዳራይ ኢዛስ ኢሜቲን ጳዉሎሲ ባርካ ዳና ማላ ኢዛስ ፒቃዴይ ኢሜቲዴስ።
ACT 28:17 ሄꬑ ጋላሳፌ ጉዬ ጳዉሎሲ ኦሮሜን ዲዛ ኣይሁዳታፔ ጊታ ኣሳታ ባኮ ጼይጊሲዴስ፤ ኢስቲካ ኢዛኮ ሺቂን፥ «ታ ኢሻቶ! ታኒ ኢስራኤሌ ዴሬ ቦላኔ ኑ ኣዋታ ዎጋ ቦላ ኦꬂዳ ኢሲ ቆሆይካ ዴና፤ ጊዶ ኣቲን ዬሩሳላሜን ታና ቃቺዲ ኦሮሜ ኣሳታስ ኣꬂ ኢሚዳ።
ACT 28:18 ኦሮሜ ኣሳቲ ታና ቆሪ ኦይቺዳፔ ጉዬ ታና ሃይቆስ ጋꬂዛ ሚሽ ዴሞንታ ኣጊዳ ጊሻስ ቢርሺ ዬዳና ኮዪዳ።
ACT 28:19 ጊዶ ኣቲን ኣይሁዳ ኣሳይ ታ ቦላ ኢሲ ዎሶይ ባይንዳ ዬዴቶንታ ማላ ኤቄቲን ታ ዮኦይ ቄሳሬ ሲንꬅ ሺቂዲ ቤቶ ጋናስ ታስ ጊዴ ጊዲዴስ፤ ጊዶ ኣቲን ታኒ ታ ዴሬታ ሞቲዛ ጋሶይካ ታስ ዴና።
ACT 28:20 ታ ቃሴ ሃኢ ኢንቴና ጼይጊሲዳይ ኢንቴና ቤያናሲኔ ሃኖ ኢንቴስ ዮታናሳ፤ ሃይሳ ሳንሳላታን ታኒ ቃሼቲዳይ ኢስራኤሌ ናይታስ ኢሜቲዳ ኡፋይሳ ጋሶና» ጊዴስ።
ACT 28:21 ኢስቲካ ኢዛስ፥ «ኔ ጊሻስ ዩሁዳ ዴሬፔ ጻፌቲዳ ዳብዳቤይ ኑና ጋኪቤና፤ ሃ ዪዳ ኣሳታፔ ኦኒካ ኔ ጊሻስ ኢታ ሃሳይዳይ ባ።
ACT 28:22 ሃይሳ ኔ ካሊዛ ኣማኖዛ ጊሻስ ኣዋንካ ኣሳይ ኢታ ሃሳይዛይሳ ኑ ኤሮስ፤ ሄሳ ጊሻስ ኔ ቆፋይ ኣዛኮ ኑ ሲያና ኮዮስ» ጊ ዛሪዳ።
ACT 28:23 ባሬ ኢዛስ ኢሚዲ ሃራ ጋላስ ኩሼ ኩሚዲ ኢዚ ዲዛ ኬꬄ ዪዳ፤ ኢዚካ ማላዶፔ ኦማርስ ጋካናስ ጾሳ ካዎቴꬃ ጊሻስ ማርካቴꬃን ባ ቆፋ ኢስታስ ቆንጪሲዴስ። ሙሴ ዎጋፔኔ ናቤታ ማጻፋታፔ ጻቃሲ ጻቃሲ ዬሱሳ ጊሻስ ኢስታስ ቆንጪሲ ዮቲዴስ።
ACT 28:24 ኢስታፌ ኢሲ ኢሲ ኣሳቲ ኢዚ ዮቲዳ ቃላ ኣማኒዳ፤ ባጋይቲ ቃሴ ኣማኒቤቴና።
ACT 28:25 ኢስቲካ ባ ጊዶን ኢሶይ ኢሳራ ቆፋን ጋጎንታ ሻኬቲዳ፤ ጳዉሎሲ ዉርሴꬃን ዮቲሼ፥ «ጺሎ ኣያናይ ናቤ ኢሳያሳ ባጋራ ካሴ ኢንቴ ኣዋታስ ዮቲዳይሲ ቱማኮ!
ACT 28:26 ኢዚ ዮቲዳ ቃላይ፥ « ‹ሃይሳ ዴራኮ ባዳ ኢንቴ ሲስ ሲያናሺን ዩሺ ቆፔኬታ፥ ኣይፌራ ቤያናሺን ዎዚናን ዎꬄኬታ ጋዳ ዮታ።
ACT 28:27 ጋሶይካ ሄ ኣሳታ ዎዚናይ ሙሚዴስ፤ ኢስታ ሃይꬃይካ ቱሊዴስ፤ ኢስታ ኣይፌይ ቆቂዴስ። ሄሳꬆ ሃኖንታኮ ኢስቲ ባ ኣይፌራ ቤኢዲ፥ ባ ሃይꬃራ ሲዪዲ ባ ዎዚናን ዩሺ ቆፒዲ፥ ታኮ ሃ ሲማናኔ ታኒካ ኢስታ ፓꬃናሺን› ጊዴስ።
ACT 28:28 «ሂስቲኮ ጾሲ ኣስ ኣሺዛ ኪታይ ኣይዛቤታስካ ኪቴቲዳይሳ ኢንቴ ኤሪቴ፤ ኢስቲካ ኤሮ ጊዲ ኤኬቴስ» ጊዴስ።
ACT 28:29 ጳዉሎሲ ሄሳ ዮቲዳፔ ጉዬ ኣይሁዳ ኣሳቲ ባ ጊዶን ዳሮ ፓላሜቲሼ ኬዚ ቢዳ።
ACT 28:30 ጳዉሎሲ ኪራቲዳ ኬꬃን ናምኡ ላይꬅ ኩሜꬅ ዴኢዴስ፤ ባኮ ዪዛ ኣስ ኡባ ሞኪ ኤኪዴስ።
ACT 28:31 ጾሳ ካዎቴꬅ ሳባኮን ጎዳ ዬሱስ ኪርስቶሳ ጊሻስ ኦኒካ ኢዛ ዲጎንታ ጻላቴꬃራ ኣሳ ታማርሲዴስ።
ROM 1:1 ዬሱስ ኪርስቶሳ ኣይሌኔ ሃዋሬ ጊዳናስ ጼይጌቲዳ ሚሺራቾ ቃላ ዮታናስ ጳዉሎሳፔ ኪቴቲዳ ኪታ።
ROM 1:2 ሄ ሚሺራቾ ቃላ ጊሻስ ካሴ ናቤታ ባጋራ ጌሻ ማጻፋታን ኡፋይሲ ኢሜቲዴስ።
ROM 1:3 ሚሺራቾ ቃላይካ ባ ናዛ ጊሻስ ኢዚ ኣሾ ባጋራ ዳዊቴ ዜሬꬃፌ ጊዲዳይሳ ዮቲዛ ጊሻሳ።
ROM 1:4 ሄሳꬆካ ኑ ጎዳ ዬሱስ ኪርስቶሲ ባ ጌሻቴꬃ ኣያናን ሃይቆፔ ዴንዲዳይሲ ኢዚ ጾሳ ና ጊዲዳይሲ ጊታ ዎልቃን ቆንጪዴስ።
ROM 1:5 ኪርስቶሳ ሱንꬃ ጊሻስ ኣማኖንታ ዴሬይ ኣማናና ማላኔ ኣዛዜታና ማላ ኢዛ ባጋራ ኑኒ ሃዋራቴꬃስ ጋꬂዛ ኪያቴꬅ ኤኪዶስ።
ROM 1:6 ኢንቴካ ዬሱስ ኪርስቶሳይታ ጊዳና ማላ ጼይጌቲዳይታራ ዴታ።
ROM 1:7 ጾሳን ዶሴቲዳይታኔ ጌሻታ ጊዳናስ ጼይጌቲዳ ኦሮሜ ቢታን ዲዛ ኡባስ ኑ ኣዋ ጾሳፌኔ ኑ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።
ROM 1:8 ኢንቴ ኣማኖይ ኩሜꬃ ኣላሜን ሲዬቲዳ ጊሻሲኔ ኢንቴ ጊሻስ ታ ጎዳ ጾሳ ዬሱስ ኪርስቶሳ ባጋራ ጋላታይስ።
ROM 1:9 ታ ኢንቴ ጊሻስ ኡባ ዎዴ ኣይ ማላ ቆፒዛኮኔ ጾሳ ና ሚሺራቾ ሳባኮን ታ ኩሜꬃ ዎዚናፔ ኢዛስ ኦꬂዛ ጾሳይ ታስ ማርካ።
ROM 1:10 ታኒ ታ ዎሳን ኡባ ዎዴ ኢንቴና ቆፓይስ፤ ሃኢ ቃሴ ዉርሴꬃን ጾሳ ሼኔ ጊዲኮ ታ ኢንቴኮ ባና ማላ ጾሲ ታስ ኦጌ ዶያና ማላ ዎሳይስ።
ROM 1:11 ኢንቴ ሚናና ማላ ማዲዛ ኣያና ኢሞታ ታ ኢንቴ ጊሻሲኔ ኢንቴና ኣይፌራ ቤያናስ ላሞታይስ።
ROM 1:12 ሄሲካ ኢንቴኒኔ ታኒ ኢሶይ ኢሳራ ኣማኖን ሚኔታናሳ።
ROM 1:13 ታ ኢሻቶ! ሃራሶን ኣማኖንታይታ ማታን ታስ ሃኒዳ ማላ ኢንቴ ማታንካ ታስ ኦሶ ኣይፌይ ቤታና ማላ ዳሮ ዎዴ ቆፓዲስ ሺን ሃኖ ጋካናስ ታ ዲጌታዳ ዲዛይሳ ኢንቴ ኤራና ማላ ኮያይስ።
ROM 1:14 ታማርዳይታስ ጊዲን ታማሮንታይታስካ፥ ኤራታሲኔ ኤያታስ ኡባስ ታ ቦላ ታማርሳና ኣጮይ ዴስ።
ROM 1:15 ኢንቴስ ኦሮሜን ዲዛይታስካ ታኒ ሚሺራቾ ቃላ ዮታናስ ታ ኣሞቲዛይ ሄሳሳ።
ROM 1:16 ኣማኒዛይቲ ዉሪ ኣታና ማላ ጾሳ ዎልቃ ጊዲዳ ጊሻስ ታኒ ሚሺራቾ ቃላን ዬላቲኬ፤ ሄሲካ ኮይሮ ኣይሁዳታስ ካሊዲ ኣይዛቤታሳ።
ROM 1:17 «ጺሎይ ጾሳ ኣማኖን ዴስ» ጌቴቲዲ ካሴ ጻፌቲዳ ማላ ጾሳ ጺሎቴꬂ ሚሺራቾ ቃላን ቆንጪና፤ ሄ ጺሎቴꬃይ ኮይሮፔ ዉርሴꬅ ጋካናስ ኣማኖን ሃናና።
ROM 1:18 ቱማ ባ ኢታቴꬃኒኔ ማካላን ቱጪ ኦይኪዛይታ ኢታቴꬃ ቦላኔ ኢስታ ማካላቴꬃ ኡባ ቦላ ጾሳ ሃንቆይ ሳሎፔ ቆንጫና።
ROM 1:19 ኢስቲ ኤራናስ ቤሲዛዝ ጾሲ ኡባ ኢስታስ ቆንጪሲዳ ጊሻስ ኢስቲ ጾስ ኤራናስ ቆንጬ ጊዲዴስ።
ROM 1:20 ኣላሜይ ሜꬌቶሶፌ ሃ ሲሚን ኣሳ ኣይፌን ቤቲ ኤሮንታ ጾሳ ሃኖቴꬂ ሄሲካ ኢዛስ ዲዛ ሜርና ዎልቃይኔ ጾሳቴꬃይ ኢዚ ሜꬊዳ ሜꬌቴꬃን ቆንጬን ቤቴስ፤ ሄሳ ጊሻስ ኣሳይ ሺሻና ጋሶይካ ዴና።
ROM 1:21 ኢስቲ ጾስ ኤሪኮካ ኢዛ ጾሳቴꬃ ማላ ኢዛ ቦንቺቤቴናኔ ጋላቲቤቴና፤ ጊዶ ኣቲን ኢስታ ቆፋይ ሜላ ጎኣይ ባይንዳዝ ጊዲዴሲኔ ዩሺ ቆፖንታ ማላ ኢስታ ዎዚናይ ꬉሚዴስ።
ROM 1:22 ኢስቲ ባና፥ «ኤራ» ጊዛይታ ጊዲኮካ ኤያታ ጊዲዳ።
ROM 1:23 ሜርና ጾሳ ቦንቾ ሃይቂዛ ኣሳኒኔ ካፎታን፤ ሜሄታኒኔ ቢታ ቦላ ጎሼቲዛ ሜꬌቴꬃታን ሚሳቲሲዲ ላሚዳ።
ROM 1:24 ሄሳ ጊሻስ ጾሲ ኢስታ ባ ጊዶን ኢሶይ ኢሳራ ባርካ ባ ኣሳቴꬃን ቱና ኦሶ ኦꬃና ማላ ጌሻቴꬂ ባይንዳ ላይማቴꬃስ ኣꬂ ኢሚዴስ።
ROM 1:25 ኢስቲ ጾሳ ቱማቴꬅ ዎርዶን ላሚዳ፤ ሜꬊዳ ጾሳ ኣጊዲ ሜꬌቴꬃስ ጎይኒዳኔ ኢስታስ ኦꬂዳ፤ ሜꬊዳ ጾሲ ኢዚ ሜርናስ ጋላቴቲዳይሳ። ኣሚን።
ROM 1:26 ሄሳ ጋሶን ጾሲ ኢስታ ዬላቺዛ ኣሞቴꬃስ ኣꬂ ኢሚዴስ፤ ኢስታ ማጫሳቲ ካሴ ሎሴቲዳ ጋይቶቴꬃ ዎጋ ሎሴይ ባይንዳ ዎጋን ላሚዳ።
ROM 1:27 ሄሳꬆካ ኣቱማ ኣሳይ ባስ ቤሲዛ ማጫሳታራ ዚንኣናይሳ ኣጊዲ ኣዴይ ኣዴራ ዚንኣናስ ኣሞን ጹጌቲዲ ማጫሳታራ ዚንኢዛ ማላ ኣዴይ ኣዴራ ዚንኢዲ ፓላ ሚሽ ኦꬂዳ፤ ሄይታንቲ ባርካ ባ ኦꬂዳ ኢታ ኦሶዛስ ቤሲዛ ቂጻቴ ባ ቦላ ኤሂዳ።
ROM 1:28 ቃሴካ ኢስቲ ባ ቆፋራ ጾስ ኤሮይ ኑና ማዴና ጊዳ ጊሻስ ኢስቲ ኦꬃናስ ቤሶንታይሳ ኦꬃና ማላ ጾሲ ኢስታ ጎኦንታ ቆፋስ ኣꬂ ኢሚዴስ።
ROM 1:29 ኡባ ባጋራ ማካላኔ ኢታቴꬅ፥ ዪቄኔ ኢታ ኦሶን ጻላላ ኩሚዳ፤ ቃናቴቴꬃን፥ ሼምፖ ዎꬎን፥ ኦሻን፥ ባሌꬆኒኔ ጌኔን ኩሚዳይታ ቃሴካ ዚጊርዛይታ ጊዲዳ።
ROM 1:30 ኣሳ ሱንꬅ ሞሪዛይታ፥ ጾስ ኢጺዛይታ፥ ኣስ ጫዪዛይታ፥ ኦቶራንቻታኔ ጬቄቲዛይታ ጊዲዳ፥ ኡባ ዎዴ ኢታ ኦꬃናስ ኦጌ ኮይዛይታ፥ ባና ዬሊዳይታስ ኣዛዜቶንታይታ፥
ROM 1:31 ዩሺ ቆፖንታይታ፥ ጊዳ ቃላ ዛሪ ላሊዛይታ፥ ኣሳስ ሚሼቶንታይታ፤ ሜንጼ ኢታታ።
ROM 1:32 «ሄሳ ኦꬂዛይቲ ዉሪካ ሃይቃናስ ቤሴስ» ጊዛ ጾሳ ዎጋ ኢስቲ ኤሪሼ ሄይታንታ ባስ ኦሶ ጻላላ ጊዶንታ ሄሳꬆ ኦꬂዛይታካ ሚንꬄꬄቴስ።
ROM 2:1 ሄሳ ጊሻስ ኔኖ ሃራ ቦላ ፒርዲዛይሶ ኔኒ ታ ሃኒ ጋሶን ኦꬃዲስ ጊዛ ጋሶይካ ኔስ ዴና፤ ኔ ሃራ ኣሳ ቦላ ፒርዲዛይሳን ኔርካ ኔስ ኩናኔ ኤካሳ፤ ጋሶይካ ሃራ ኣሳ ቦላ ኔ ፒርዲዛይሳ ኔካ ዛራዳ ኢዛ ኦꬂዛ ጊሻሳ።
ROM 2:2 ሃይታ ማላታ ኦꬂዛ ኣሳታ ቦላ ጾሳ ፒርዳይ ሊኬ ጊዲዳይሳ ኑ ኤሮስ።
ROM 2:3 ሄሳ ጊሻስ ኔ ኣሳ ቦላ ፒርዳሼ ሄ ኔ ፒርዲዛይሳ ዛራ ኦꬂዛዴ ጊዲኮ ኔ ጾሳ ፒርዳፌ ኬሳ ኤካ ኣታና ኔስ ሚሳቲዜ?
ROM 2:4 ዎይኮ ጾሳ ኪያቴꬂ ኔና ማሮቴꬃኮ ካሌꬂዛይሳ ሻካ ኤሮንታ ዳሼ ኢዛ ጊታ ኪያቴꬃኔ ኢዛ ዳንዳያ ዱሬቴꬃ ኔ ሌቃይ?
ROM 2:5 ጊዶ ኣቲን ኔኒ ኔ ዎዚና ሙሜቴꬃኒኔ ማሮቴꬅ ኮዮንታ ኔ ዎዚና ጋሶን ጾሳ ቱማ ፒርዳይ ቆንጪዛ ዎዴ ጾሳ ሃንቆ ጋላሳስ ኔ ቦላ ዳሮ ሃንቆ ሺሻሳ።
ROM 2:6 ጾሲ ኢሳስ ኢሳስ ኢዛ ኦሶ ማላ ኢማና።
ROM 2:7 ሎኦ ኦሶ ኣጎንታ ኦꬂዲ ቦንቾ ሳባኔ ሜርና ዴኦ ኮይዛይታስ ሜርና ዴኦ ኢማና።
ROM 2:8 ጊዶ ኣቲን ባርካ ባና ዶሲዛይታሲኔ ቱማ ኣጋጊዲ ኢታ ካሊዛይታ ቦላ ፒርዳይኔ ሃንቆይ ጋካና።
ROM 2:9 ኢታ ኦꬂዛ ኣይ ኣሳ ቦላካ ኮይሮ ኣይሁዳ ኣሳ ቦላ፥ ካሊዲ ኣይዛቤታ ቦላ ዋዬይኔ ሜቶይ ጋካና።
ROM 2:10 ጊዲኮካ ሎኦ ኦꬂዛዴስ ኦናስካ ኣይሁዳ ኣሳስ ጊዲን ኣይዛቤታስ ሳባይ፥ ሳሮቴꬂኔ ቦንቾይ ጊዳና።
ROM 2:11 ጾሲ ኦናካ ሻኪ ማዴና።
ROM 2:12 ካሴ ዎጋይ ኤቆንታ ዎዴ ናጋራ ኦꬂዳ ኣሳይ ዉሪካ ዎጋይ ባይንዳ ꬋያና፤ ዎጋይ ኤቂ ሲሚን ናጋራ ኦꬂዳይቲ ዎጋን ኦይኬቲዲ ፒርዴታና።
ROM 2:13 ኣይስ ጊኮ ጾሳ ኣቻን ጺሎ ጌቴቲዛይቲ ኤቂዳ ዎጋስ ኣዛዜቲዛይታፔ ኣቲን ዎጋ ሲስ ሲዪዛይታ ጻላ ጊዴቴና።
ROM 2:14 ዎጋይ ባይንዳ ኣይዛቤቲ ዎጋይ ዮቲዛይሳ ጮ ሜላ ሃኖቴꬃፌ ኤሪዲ ኦꬂሺን ኢስታስ ዎጋይ ባይንዳ ኣጊኮካ ኢስታስ ሜꬌቴꬃ ዎጋይ ዲዛ ጊሻስ ኢስቲ ባ ኦꬃናይሳ ኤሬቴስ።
ROM 2:15 ኢስታ ዎዚናይ ኢስታስ ማርካቲዛ ጊሻሲኔ ኢስታ ቆፋይ ኢስታ ሞቲዛ ጊሻስ ቃሴካ ኢስታ ማዲዛ ጊሻስ ዎጋይ ዮቲዛይ ኢስታ ዎዚናን ጻፌቲዳይሳ ኤሬቴስ።
ROM 2:16 ሄሲካ ታ ሚሺራቾ ቃላን ታማርሲዛ ማላ ጾሲ ኣሳ ዎዚናን ቆቴቲዳይሳ ኪርስቶሳ ባጋራ ፒርዲዛ ጋላሳን ቆንጪሳና።
ROM 2:17 ኔ ኔና ኣይሁዳ ኣስ ጊኮ ዎጋን ኣማኔታሳኔ ኔስ ጾሳራ ዲዛ ኢሲፌቴꬃን ጬቄታሳ።
ROM 2:18 ዎጋ ካሊዛ ጊሻስ ጾሳ ሼኔ ኤራዳ ኩሜꬅ ጊዲዛዝ ሻካ ኤሪዳ ጊዲኮ፥
ROM 2:19 ኔ ቆቄታ ካሌꬂዛዴ፤ ꬉማን ዲዛይታስ ፖኦ ጊዲዳይሳ ኔ ኣማኔቲዳዴ ጊዲኮ
ROM 2:20 ዎጋፔ ኔ ዴሚዳ ኤራቴꬃኒኔ ቱማቴꬃን ሃንኮ ኤሮንታይታ ዞሪዛዴ፥ ጉꬃ ናይታ ታማርሲዛዴ ጊዲኮ፥
ROM 2:21 ኔኒ ሃራታ ታማርሶ ኣጋዳ ኔ ሁኤስ ኣዛስ ታማርኪ? ኔኒ ሃራ ኣስ ካይሶቶፓ ጋ ሳባካሼ ኔስ ካይሶታይ?
ROM 2:22 ኔኒ ሃራ ኣሲ ላይማቶንታ ማላ ዮታሼ ኔስ ላይማታይ? ኔስ ኤቃ ኢጻሳ ሺን ጾሳ ኬꬃ ሚሻ ቦንቃይ?
ROM 2:23 ኔኒ ዎጋን ጬቄታሳ ሺን ዎጋ ኔ ባጋራ ኦꬆንታ ኣጋዳ ጾሳ ካዉሻይ?
ROM 2:24 ሄሲካ፥ «ኢንቴ ጋሶን ጾሳ ሱንꬂ ኣይዛቤታ ኣቻን ጫዬቴስ» ጌቴቲ ጻፌቲዳ ማላ ሃኒዴስ።
ROM 2:25 ኔ ዎጋ ናጋ ፖሊዛዴ ጊዲኮ ቃጻራስ ጎኣይ ዴስ፤ ኔ ዎጋ ኦꬆንታዴ ጊዲኮ ቃሴ ኔ ቃጻራይ ጮ ሃዳ።
ROM 2:26 ቃጻሬቶንታ ዲሼ ዎጋይ ጊዛይሳ ፖሊኮ ቃጻሬቲዳዴራ ጊና ቆዴቴኔ?
ROM 2:27 ኔስ ጻፌቲዳ ዎጋይኔ ቃጻራይ ኔስ ዲኮ ዲዛ ዎጋ ኔ ናጎንታዴ ጊዲኮ ሃንኮ ቃጻሬቶንታ ዲሼ ዎጋስ ኣዛዜቲዳይ ኔ ቦላ ፒርዳና።
ROM 2:28 ኢሳዴይ ጮ ሜላ ሱንꬃስ ኣሳ ኣይፌን ታ ኣይሁዳ ኣስ ጊዳና ጊኮ ኢዚ ኣይሁዳ ኣስ ጊዴና፤ ቱማፔ ቃጼሬቴꬂ ጮ ካሬራ ኣሾ ኣይፌን ቤቲዛ ቃጻራ ጊዴና።
ROM 2:29 ጊዲኮካ ኢሲ ኣሲ ኣይሁዳ ኣስ ጊዳናስ ዳንዳይዛይ ኢዛስ ጋꬃ ባጋይ ኣይሁዳ ኣስ ጊዲሺና። ቃጻራይካ ቃጻራ ጊዲዛይ ጻፌቲዳ ዎጋ ጻላላ ጊዶንታ ኣያናን ዎዚናፔ ጊዲዳ ቃጻራ ጊዲኮኮ! ሄሳ ማላ ኣሲ ጋላታ ኣሳፔ ጊዶንታ ጾሳፌ ዴሜስ።
ROM 3:1 ሂስቲኮ ኣይሁዳ ኣስ ጊዴꬃስ ኣዛ ጎኣይ ዲዜ? ቃጻራይ ኣይ ጎኢዜ?
ROM 3:2 ኣዋራካ ጊዲን ጎኣይ ዳሮ፤ ሃራፔ ኮይሮ ጾሳ ቃላይ ሃዳራ ኣይሁዳታስ ኢሜቲዴስ።
ROM 3:3 ኢስታፌ ኢሶታስ ኢሶታስ ኣማኖይ ባይንዳ ኣጊኮ ጾሳን ኣማኔቴꬅ ዲጊዜ?
ROM 3:4 ሙሌካ ዲጌና! ኣሲ ዉሪካ ዎርዳንቻ፥ «ኔኒ ኔ ቃላፔ ዴንዲዳይሳን ቱማንቻ፤ ኔ ሞርኬ ፒርዳንካ ጾናሳ» ጌቴቲ ጻፌቲዳ ማላ ጾሲ ቃሴ ቱማንቻ።
ROM 3:5 ኑ ማካላ ኦሶይ ጾሳ ጺሎቴꬅ ቆንጬን ቤሲዛይሳ ጊዲኮ ሂስቲን ኑ ኣይ ጋኔ? ጮ ኣሳ ዎጋ ማላ ፓላሜታናስ ጾሲ ባ ሃንቆ ኑ ቦላ ኤሂዛይሲ ኑስ ቤሴና ጋኔዬ? ሄሳካ ታ ጊዛይ ኣሳꬆ ቆፋና።
ROM 3:6 ቱማፔ ሄሳꬆ ሃኔና፤ ሄሳꬆ ሃኒዛ ጊዲኮ ጾሲ ኣላሜ ቦላ ዎስቲ ፒርዳንዴ?
ROM 3:7 «ታ ዎርዶቴꬂ ጾሳ ቱማቴꬅ ቆንጪሲዛይሳን ኢዛ ቦንቾ ጌዴ ጉጂዛ ጊዲኮ ሂስቲን ሃኢ ጋካናስ ዎስቲ ታ ቦላ ናጋራንቻ ማላ ፒርዴቲዜ?» ጊዲ ፓላሜታና ኣሲ ዳና ዳንዳዬስ።
ROM 3:8 ሄሳ ጉሲ፥ «ሎኦይ ያና ማላ ኣኔ ኢታ ኦꬆስ» ጌቴስ ጊዲ ኢሲ ኢሲ ኣሳቲ ኑ ቦላ ዎሬሲዛይሳ ማላ። ሃይታ ኣሳታ ቦላ ጋኪዛ ፒርዳይ ቱሙ ፒርዳ።
ROM 3:9 ሂስቲን ኑ ኣይ ጊኖ? ኑኒ ኢስታፌ ኣꬊዞኒ? ሙሌካ ኣꬎኮ። ኣይሁዳታ ጊዲኮካ፥ ኣይዛቤታ ጊዲኮካ ዉሪካ ናጋራፔ ጋርሳ ባጋራ ዲዛ ጊሻስ ታ ዉርሳካ ካሴታዳ ኢስታስ ዮታዲስ።
ROM 3:10 «ጺሎይ ኦኒካ ዴና፤ ኢሳዴይካ ዴና።
ROM 3:11 ዩሺ ቆፒዛዴይ ባ፤ ጾስ ኮይዛይ ኢሳዴይካ ባ።
ROM 3:12 ዉሪካ ባሌቲዳኔ ኢሲ ቦላ ጎኦንታይታ ጊዲዳ። ሎኦ ኦꬂዛይ ኦኒካ ባ፤ ኢሳዴይካ ዴና።
ROM 3:13 ኢስታ ዶናይ ዶያ ዲዛ ዱፎ ማላ፤ ኢስታ ዶናይ ኡባ ዎዴ ባሌꬆ ሃሳዬስ፤ ኢስታ ሜቴርሻይ ሾሻ ማርዜራ ዴስ።
ROM 3:14 ኢስታ ዶናን ቃንጌꬂኔ ጫሞ ሚሺ ኩሚዴስ።
ROM 3:15 ኢስታ ቶሆይ ሱꬅ ጉሳናስ ኤሶቴስ።
ROM 3:16 ኢስታ ኦጌን ꬋዮይኔ ላፋቴꬂ ዴስ።
ROM 3:17 ኢስቲ ሳሮቴꬃ ኦጌ ኤሬቴና።
ROM 3:18 ኢስታ ኣይፌሶን ጾሳስ ያሻቴꬂ ባ» ጌቴቲ ጻፌቲዳ ማላ።
ROM 3:19 ሄሳ ጊሻስ ዶናይ ዉሪካ ጎርዴታና ማላ ዴሬይ ኩሜꬅ ጾሳስ ዛሮ ኢማና ማላ ዎጋይ ጊዛይ ዉሪካ ዎጋፔ ጊዶራ ዲዛይታስ ጊዲዳይሳ ኑ ኤሮስ።
ROM 3:20 ሄሳ ጊሻስ ዎጋይ ናጋራይ ኣዛኮ ኤሪሴስ ኣቲን ዎጋ ናጎን ኦኒካ ኢዛ ኣቻን ጺሎ ጌቴታናስ ዳንዳዬና።
ROM 3:21 ሃኢ ቃሴ ካሴ ናቤቲ ኢዛስ ማርካቲዳይሲ ዎጋፔ ካሬራ ጊዲዳ ጾሳ ጺሎቴꬂ ቆንጪዴስ።
ROM 3:22 ሄሲ ጾሳ ጺሎቴꬂ ዬሱስ ኪርስቶሳ ኣማኖን ዱማቴꬂ ባይንዳ ቤቲዛ ጺሎቴꬃ።
ROM 3:23 ጋሶይካ ኣሲ ዉሪካ ናጋራ ኦꬂዴስ፤ ጾሳ ቦንቾይካ ኣሳ ናስ ፓጪዴስ።
ROM 3:24 ኣሳይ ዬሱስ ኪርስቶሲ ኣሳ ና ጊሻስ ኦꬂዳ ኪያቴꬃፌ ዴንዲዳይሳን ጮ ሜላ ጺሊዴስ።
ROM 3:25 ኢዛ ሱꬃን ጊዲዳ ኣማኖን ናጋራፔ ማሬታና ያርሾ ሂስቲዲ ጾሲ ዬሱሳ ሺሺዴስ፤ ኢዚ ሄሳ ኦꬂዳይ ካሴቲዲ ፖሌቲዳ ናጋራ ቃጻዮንታ ዳንዳያን ኣꬊዳ ባ ጺሎቴꬅ ቤሳናሳ።
ROM 3:26 ኢዚ ሄሳ ሃ ዎዴዛን ኦꬂዳይ ባ ጺሎቴꬃ፤ ሄሲካ ባ ባጋራ ጺሎ ጊዲዳ ዬሱስ ኪርስቶሳን ኣማኒዛዴ ጺሊሲዛይሳ ቤሳናሳ።
ROM 3:27 ሂስቲን ኑኒ ኢዛን ጬቄቲዛ ሚሺ ኣዚ ዲዜ? ኣይኮ ሚሻንካ ጬቄቶኮ፤ ኑ ጬቄታና ጋሶይካ ኣዜ? ዎጋ ናጊዛ ጊሼ? ጊዴና፤ ኣማኖና።
ROM 3:28 ኣይ ኣሲካ ኣማኖን ኣቲን ዎጋ ናጎን ኣቶንታይሳ ኑ ጌሺ ዮቶስ።
ROM 3:29 ጾሲ ኣይሁዳታስ ጻላ? ኣይዛቤታስካ ጾስ ጊዴኔ? ኤ ኣይዛቤታስካ ኢዚ ጾሳ።
ROM 3:30 ቃጻሬቲዳይሳ ኣማኖን ቃሴ ቃጻሬቶንታይሳካ ሄ ኣማኖንካ ጺሊሲዛይካ ኢዚ ኢሲ ጾሳ ጻላ።
ROM 3:31 ሂስቲን ሄሲ ሄሳ ጊዲኮ ኣማኖ ጋሶን ዎጋ ጎኣይ ባይንዳ ሚሽ ኦꬂኖ? ሙሌካ ሄሳꬆ ሃኔና፤ ዎጋ ኑ ሚንꬃና ኣቲን።
ROM 4:1 ሄሳ ጊሻስ ቃሴ ኑ ኣብራሃሜይ ሃይሳፌ ኣይ ጎኣ ዴሚዴስ ጊኖ?
ROM 4:2 ኣብራሃሜይ ባ ኦሶን ጺሊዳኮ ኢዚ ጬቄታናዚ ኢዛስ ዴሲኮሺን፤ ኢዚ ጾሳ ሲንꬃን ጬቄታናስ ዳንዳዬና።
ROM 4:3 ጌሻ ማጻፋይ፥ «ኣብራሃሜይ ጾስ ኣማኒዴሲኔ ኢዛ ኣማኖይ ኢዛስ ጺሎቴꬃን ቆዴቲዴስ» ጌስ።
ROM 4:4 ኢሳዴይ ኦሶ ኦꬂኮ ኢዚ ኤኪዛ ሚሻይ ኢዛስ ጮ ኪያቴꬅ ኢሜቲዛዝ ጊዶንታ ኢዛዴስ ኦሶ ዋጋ ጊዴስ።
ROM 4:5 ጊዶ ኣቲን ኦሶ ኦꬆንታ ናጋራንቻ ኣሲ ጺሎ ኬሲዛ ጾሳን ኣማኒዛዴስ ኢዛ ኣማኖይ ኢዛስ ጺሎቴꬃን ታይቤቴስ።
ROM 4:6 ዳዊቲካ ጺሎቴꬂ ኢዛዴስ ቆዴቲዛይ ሎኦ ኦሶን ጊዶንታ ኣሳ ጊሻስ፥
ROM 4:7 «ኢስታስ ኢስታ ባላ ኦሶይ ኣቶ ጌቴቲዳይቲኔ ናጋራፔ ማሬቲዳይቲ ኣንጄቲዳይታ!
ROM 4:8 ኢዛ ናጋራ ጎዳይ ሙሌካ ቆዶንታዴይ ኢዚ ኣንጄቲዳይሳ!» ጊዴስ።
ROM 4:9 ሃ ኣንጆዚ ቃጻሬቲዳይታስ ጻላላዬ? ዎይኮ ቃጻሬቶንታይታሳራ? «ካሴ ኮይሮ ኑ ኣዋ ኣብራሃሜ ኣማኖይ ኢዛስ ጺሎቴꬃን ቆዴቲዴስ» ጊዶስ።
ROM 4:10 ሂስቲን ዋኒ ኢዛስ ሄሳꬆ ቆዴቲዴ? ኢዚ ቃጻሬቲዳፔ ጉዬ? ዎይኮ ቃጻሬታናፔ ካሴ? ኢዛስ ጺሎቴꬃን ቆዴቲዳይ ኢዚ ቃጻሬታናፔ ሲንꬃና።
ROM 4:11 ኢዚ ካሴ ቃጻሬታናፔ ካሴ ዴሚዳ ጺሎቴꬃይ ቃጻራስ ማላታ ጊዳና ማላ ጺሎቴꬃስ ማታሜ ኤኪዴስ። ሄሳ ጊሻስ ቃጻሬቶንታ ኣማኒዛይታስ ጺሎቴꬃን ቆዴታና ማላ ኡባታስ ኢዚ ኣዋ።
ROM 4:12 ኢዚ ቃጻሬቲዳይታስካ ኣዋ፤ ቃጻሬቲዳይታስ ጻላላ ጊዶንታ ኑ ኣዋ ኣብራሃሜይ ካሴ ቃጻሬታናፔ ሲንꬄ ኢዛስ ዲዛ ኣማኖ ጌዶ ካሊዛይታስ ኡባሳ።
ROM 4:13 ኢዚ ኣላሜ ላቲዛዴ ጊዳና ማላ ኣብራሃሜይኔ ኢዛ ዜሬꬃቲ ኡፋይሳ ቃላ ኤኪዳይ ዎጋ ባጋራ ጊዶንታ ኣማኖን ጊዲዳ ጺሎቴꬃና።
ROM 4:14 ዎጋ ናጊዛይቲ ላቲዛይታ ጊዲኮ ኣማኖስ ጎኣይ ዴና፤ ሂዶታይካ ጮ ሃዳ ጊዳናሺን፤
ROM 4:15 ዎጋይ ሃንቆ ካሌꬄስ፤ ዎጋይ ባይንዳሶን ዎጋ ሜንꬆይ ዴና።
ROM 4:16 ሄሳ ጊሻስ ሂዶታይ ኣማኖን ዪዴስ፤ ሄሲካ ኢዛ ሂዶታይ ኢዛ ኪያቴꬃን ጊዳና ማላኔ ኣብራሃሜ ዜሬꬅ ኡባስ ኣማኔቲዛይሳ ጊዳና ማላ ሃኒዴስ፤ ሄሲካ ዎጋን ኢዛይታ ጊዲዳይታስ ጻላላ ጊዶንታ ኣማኖን ኣብራሃሜ ናይታ ጊዲዳይታስ ኡባታሳ፤ ኢዚካ ኑስ ኡባሲካ ኣዋ።
ROM 4:17 ሄሲካ፥ «ታ ኔና ዳሮ ዴሬ ኣዋ ኦꬃዲስ» ጌቴቲ ጻፌቲዳ ማላ ሃኒዴስ፤ ኢዚካ ሃይቂዳይታስ ዴኦ ኢሚዛዴን፥ ባይንዳይሳ ቃሴ ዲዛ ማላ ኦꬂዛዴን ኣማኒዳ ጾሳ ሲንꬃን ኢዚ ኑስ ኣዋ።
ROM 4:18 ካሴ ኢዛስ፥ «ኔ ዜሬꬂ ሄሳꬆ ሃናና» ጌቴቲዳ ማላ ሂዶታ ኦꬃናስ ዳንዳዬቶንታ ሚሻን ኣብራሃሜይ ጾሲ ሃናና ጊዳይሳ ኣማኒዲ ዳሮ ዴሬ ኣዋ ጊዲዴስ።
ROM 4:19 ኣብራሃሜስ ዬሌቲን 100 ላይꬅ ጊዲሺን ኣብራሃሜይ ባ ኣሳቴꬃይ ሃይቄꬃ ማላ ጊዲዳይሳኔ ሳራስ ዬሎ ዎዴይ ኣꬊ ቢዳይሳ ኤሪሼካ ኣማኖን ሌፒቤና።
ROM 4:20 ጌዴ ጉጂዲ ኣማኖን ሚኒዲ ጾሳስ ቦንቾ ኢሚዴስ ኣቲን ጾሲ ጊዳ ቃላ ሲꬊቤና።
ROM 4:21 ጾሲ ኢዛስ ኢሚዳ ሂዶታይ ፖሌታናይሳ ኩሜꬃ ዎዚናፔ ኣማኒዴስ።
ROM 4:22 ሄሳ ጊሻስ ኢዛስ ጺሎቴꬃን ቆዴቲዴስ።
ROM 4:23 «ኢዛስ ጺሎቴꬃን ቆዴቲዴስ» ጊዛ ቃላይ ጻፌቲዳይ ኢዛስ ጻላላ ጊዴና።
ROM 4:24 ጊዶ ኣቲን ጾሲ ኑ ጺሎቴꬃ ኢዛ ባጋራ ታይቢዛ ኑ ጎዳ ዬሱሳ ሃይቆፔ ዴንꬂዳይሳን ኣማኒዛ ኑሳራኮ።
ROM 4:25 ኢዚ ኑ ናጋራ ጊሻስ ሃይቃናስ ኣꬊ ኢሜቲዴስ፤ ኢዚ ኑና ጺሊሳናስ ሃይቆፔ ዴንዲዴስ።
ROM 5:1 ሂስቲኮ ኑኒ ኣማኖን ጺሊዳ ጊሻስ ኑ ጎዳ ዬሱስ ኪርስቶሳ ባጋራ ኑስ ጾሳራ ሳሮቴꬂ ዴስ።
ROM 5:2 ሃይሳ ሃ ኣማኖዛን ሚኒ ዲዛ ኪያቴꬃን ኑኒ ጌሊዳይ ኢዛ ባጋራ ጊዲዳ ጊሻስ ኡፋይሳን ጾሳ ቦንቾ ጊሼቲ ኤኪዛይታ ጊዲዳ ጊሻስ ኑ ኡፋዬቶስ።
ROM 5:3 ሃይሳን ጻላላ ጊዶንታ ኑና ጋኪዛ ዋዬንካ ኡፋዬቶስ። ጋሶይካ ዋዬይ ዳንዳያን ጋꬂዛይሳ ኑ ኤሮስ።
ROM 5:4 ዳንዳያይ ፓጬን ሚኖቴꬅ ኢሜስ፤ ፓጬን ሚኖቴꬂ ሂዶታ ኢሜስ።
ROM 5:5 ሄ ሂዶታይ ቃሴ ኑና ዬላቼና። ጾሲ ኑስ ኢሚዳ ጺሎ ኣያናን ባ ሲቆ ኑ ዎዚናን ጉሲዳ ጊሻስ ሄ ሂዶታይ ኑና ዬላን ጋꬄና።
ROM 5:6 ኑ ዳቡራንቻታ ጊዲ ዲሺን ጾሳ ዎዴይ ጋኪዳ ማላ ኪርስቶሲ ኑ ናጋራ ጊሻስ ሃይቂዴስ።
ROM 5:7 ጺሎ ኣሳ ጊሻስ ሃይቃና ኣሲ ቤታናይሲ ዳሮ ሜቴስ። ሎኦ ኣሳ ጊሻስ ሃይቃናስ ጻላና ኣሲ ኦኔ ኤሪዛይ ቤታና ዳንዳዬስ።
ROM 5:8 ጊዶ ኣቲን ኑ ቡሮ ናጋራንቻ ጊዲ ዲሺን ኪርስቶሲ ኑ ጊሻስ ሃይቂዴስ፤ ሄሲካ ጾሲ ኑና ሲቂዛ ባ ሲቆ ሄሳን ቤሴስ።
ROM 5:9 ኑኒ ኢዛ ሱꬃን ጌዪዳይታ ጊዲኮ ሃራፔካ ኢዛ ባጋራ ጾሳ ሃንቆፌ ኣታና።
ROM 5:10 ኑ ጾሳስ ሞርኬታ ጊዲ ዲሺን ኢዛ ናዛ ሃይቆን ኢዛራ ጊጊዳይታ ጊዲኮ ኑ ኢዛራ ጊጊዳፔ ጉዬ ኢዛ ናዛ ዴኦ ባጋራ ኑኒ ፓጺዳይሲ ዋኒ ኬሂ ዳሬኔ!
ROM 5:11 ሄሳ ጻላላ ጊዴና፤ ቃሴካ ኑኒ ሃኢ ኢዛራ ጊጋ ዴሚዳ ኑ ጎዳ ዬሱስ ኪርስቶሳ ባጋራ ጾሳንካ ኡፋይስ ኦꬆስ።
ROM 5:12 ሄሳ ጊሻስ ናጋራይ ኢሳዴ ጋሶን ዱጌ ሃ ኣላሜዛ ዪዳ ማላ ሃይቆይካ ናጋራ ጋሶን ዪዴስ፤ ሃይቆይካ ሄሳ ባጋራ ኣሳ ኡባኮ ዪዴስ፤ ሄሳስ ጋሶይካ ኣሲ ዉሪካ ኢዛ ባጋራ ናጋራ ኦꬂዳ ጊሻሳ።
ROM 5:13 ዎጋይ ኢሜታናፔ ካሴ ናጋራይ ቢታ ቦላ ዴስ ሺን ዎጋይ ባይንዳሶን ናጋራይ ናጋራ ጊዴና።
ROM 5:14 ጊዶ ኣቲን ኣዳሜፔ ሃ ሲሚን ሙሴ ዎዴ ጋካናስ ዲዛ ዎዴን ኣዳሜ ማላ ዎጋ ሜንꬂዲ ናጋራ ኦꬆንታይታ ቦላካ ሃይቆይ ካዎቲዴስ፤ ኣዳሜይ ቡሮ ያና ኪርስቶሳስ ሌሚሶ።
ROM 5:15 ጊዲኮካ ኢዛ ኪያቴꬃ ኢሞታይ ኣሳ ቆሆ ማላ ጊዴና፤ ኢሳዴይ ሞሪዳይሳን ዳሮ ኣሳይ ሃይቂኮካ ጾሳ ኪያቴꬃኒኔ ኢሲ ኣስ ዬሱስ ኪርስቶሳ ኪያቴꬃን ዪዳ ኢሞታይ ዳሮታስ ኬሂ ዳሪ ኢሜቲዴስ።
ROM 5:16 ቃሴካ ጾሳ ኢሞታይ ኢሳዴ ባጋራ ዪዳ ናጋራፔ ቤቲዳ ኣይፌ ማላ ጊዴና፤ ጋሶይካ ኢዛ ፒርዳይ ኢሳዴ ናጋራ ካሊዲ ፒርዳ ኤኪ ዪዴስ፤ ኢዛ ኢሞታይ ቃሴ ዳሮ ቆሆ ጋሶን ጺሎቴꬅ ኤሂዴስ። ሃይቆይ ኢሳዴ ባጋራ ካዎቲዳይሳ ጊዲኮ ዳሮ ቲርፓ ጊዲዳ ጾሳ ኪያቴꬂኔ ጺሎቴꬃ ኢሞታ ኤኪዳይቲ ኢሳዴ ባጋራ ሄሲካ ዬሱስ ኪርስቶሳ ባጋራ ጾኒዲ ዴኦን ዳና።
ROM 5:18 ሂስቲኮ ኢሳዴ ቆሆ ጋሶን ፒርዳይ ኣሳ ኡባ ቦላ ጋኪዳ ማላ ሄሳꬆካ ኢሳዴ ጺሎቴꬃ ኦሶን ኣስ ኡባስ ዴኦ ኢሚዛ ጺሎቴꬂ ቤቲዴስ።
ROM 5:19 ኢሳዴይ ኣዛዜቶንታ ኢጺዳ ጊሻስ ዳሮ ኣሳይ ናጋራንቻ ጊዲዳ ማላ ኢሳዴ ኣዛዜቴꬃን ቃሴ ዳሮቲ ጺላና።
ROM 5:20 ዎጋይ ዪን ሞሮይ ዳሪዴስ፤ ጊዶ ኣቲን ናጋራይ ዳሮይሳፌ ቦላራ ጾሳ ኪያቴꬂ ኬሂ ዳሪዴስ።
ROM 5:21 ሄሲካ ሃኒዳይ ናጋራይ ሃይቆ ቦላ ካዎቲዳይሳ ማላ ዬሱስ ኪርስቶሳ ባጋራ ቃሴ ሜርና ዴኦይ ቤታና ማላ ኢዛ ኪያቴꬂ ጺሎቴꬃን ካዎታናሳ።
ROM 6:1 ሂስቲን ኑ ኣይ ጊኖ? ጾሳ ኪያቴꬂ ዳራና ማላ ናጋራ ጉጂ ኦꬂኖ?
ROM 6:2 ሙሌካ ጊዴና፤ ኑኒ ናጋራስ ሃይቂዶስ፤ ሂስቲን ሃይሳፌ ጉዬ ኑ ዋኒ ናጋራን ዳኔ?
ROM 6:3 ኑኒ ዬሱስ ኪርስቶሳራ ኢሲኖ ጊዳና ማላ ጻማቄቲዳይቲ ኢዛ ሃይቆን ኑ ኢሲፌ ጊዳናስ ጻማቄቲዳይሳ ሃይሳ ኢንቴ ኤሬኬቲ?
ROM 6:4 ሄሳ ጊሻስ ኪርስቶሲ ባ ኣዋ ቦንቾን ሃይቆፔ ዴንዲዳ ማላ ኑኒካ ሄሳꬆ ኦራꬃ ዴኦን ዳናስ ጺንቃታን ሃይቂዲ ኢዛራ ሞጌቲዶስ።
ROM 6:5 ኑኒ ሄሳ ማላ ሃይቆን ኢዛራ ኢሲኖ ጊዲኮ ቃሴ ዴንꬃንካ ኢዛራ ኢሲኖ ጊዶስ።
ROM 6:6 ሃይሳፌ ጉዬ ኑኒ ናጋራስ ኣይሌ ጊዶንታ ማላ ናጋራ ኣሳቴꬃይ ኪቻና ማላ ካሴ ኑ ጬጋ ኣሳቴꬃይ ኢዛራ ኢሲፌ ካቄቲዳይሳ ኑ ኤሮስ።
ROM 6:7 ጋሶይካ ሃይቂዳ ኣሲ ናጋራፔ ሼምፒዴስ።
ROM 6:8 ኑኒ ኪርስቶሳራ ሃይቂዳይታ ጊዲኮ ኑ ኢዛራ ኢሲፌ ዳናይሳ ኣማኖስ።
ROM 6:9 ኪርስቶሲ ሃይቆፔ ዴንዲዳ ጊሻስ ናምኣንꬆ ኢዚ ሃይቆንታይሳኔ ኢዛ ቦላ ሃይቆስ ዎልቃይ ባይንዳይሳ ኑ ኤሮስ።
ROM 6:10 ኢዚ ሃይቂዳ ዎዴ ኢሲቶ ኡባ ናጋራ ጊሻስ ሃይቂዴስ፤ ጊዶ ኣቲን ጾሳስ ፓጻ ዱስ ዴስ።
ROM 6:11 ሄሳꬆካ ኢንቴ ናጋራስ ሃይቂዲ ጾሳስ ዬሱስ ኪርስቶሳ ባጋራ ፓጻ ዲዛይሳ ኤሪቴ።
ROM 6:12 ሄሳ ጊሻስ ኢታ ኦꬃና ኮይዛ ኢታ ኣሾ ቆፋ ኮዪዲ ሃይቂዳ ኢንቴ ኣሳቴꬃ ቦላ ናጋራይ ካዎታና ማላ ኦꬆፍቴ።
ROM 6:13 ኢንቴ ኣሳቴꬃ ኢታ ኦሶ ኦꬂዛ ሚሽ ኦꬂ ናጋራስ ሃሪሶፒቴ፤ ሄሳ ማላ ኦꬃናፔ ሃይቆፔ ጌዴ ዴኦን ፒኒዳ ኣሳታ ማላ ኢንቴና ጾሳስ ሃሪሲቴ፤ ኢንቴ ኣሳቴꬃ ጺሎቴꬃ ሚሻ ማላ ጾሳስ ሃሪሲቴ።
ROM 6:14 ኢንቴ ጾሳ ኪያቴꬃ ጋርሳን ዴታ ኣቲን ዎጋ ጋርሳን ዶንታ ጊሻስ ኢንቴና ናጋራይ ሃሬና።
ROM 6:15 ሂስቲን ኣይ ኦꬂኖ? ዎጋ ጋርሳን ጊዶንታ ኑኒ ጾሳ ኪያቴꬃ ጋርሳን ዲዛ ጊሻስ ናጋራ ኦꬂኖ? ሙሌካ ኦꬃናስ ቤሴና።
ROM 6:16 ኢንቴ ኢንቴና ኣይሌ ማላ ሺሺዛ ዎዴ ኢንቴ ኣዛዜቲዛዴስ ኣይሌ ጊዲዳይሳ ኤሬታ፤ ሄሳꬆካ ጌዴ ሃይቆኮ ኤፊዛ ናጋራስ ዎይኮ ጺሎቴꬃኮ ጋꬂዛ ኣዛዜቴꬃስ ኢንቴ ኣይሌ ጊዲዳይሳ ኤሬኬቲ?
ROM 6:17 ኢንቴ ካሴ ናጋራስ ኣይሌታ ጊዲኮ ኢንቴስ ኢሜቲዳ ቲሚርቴዛስ ኢንቴ ዎዚናፔ ኣዛዜቲዳ ጊሻስ ጾሲ ጋላቴቶ።
ROM 6:18 ኢንቴ ናጋራፔ ዎዜቲዲ ጺሎቴꬃስ ኣይሌ ጊዲዴታ።
ROM 6:19 ሃይሳ ታኒ ኣሳ ቃላን ኢንቴስ ቆንጬን ዮቲዛይ ኢንቴ ዬሌቴꬃን ዳቡራንቻ ጊዲዳ ጊሻሳ። ኢንቴ ካሴ ዎዴ ኢንቴ ኣሳቴꬃ ኣይሌቴꬃሲኔ ካሴፔ ኣꬊ ኢታና ማላ ኦꬂ ኢሚዳ ማላ ሃኢ ቃሴ ጌሻቴꬃኮ ኤፊዛ ጺሎቴꬃስ ኣይሌ ሂስቲ ሃሪሲቴ።
ROM 6:20 ኢንቴ ካሴ ናጋራስ ኣይሌቲዲ ዲዛ ዎዴ ኢንቴ ጺሎቴꬃፌ ሜላ ኣቲዴታ ሺን፤
ROM 6:21 ሃኢ ቃሴ ኢንቴ ዬላቲዛ ሚሻታፔ ሄ ዎዴ ኣይ ጎኣ ዴሚዴቲ? ሄሳ ሄ ሃኖዛስ ጎኣይ ሃይቆ።
ROM 6:22 ሃኢ ቃሴ ኢንቴ ናጋራፔ ዎዜቲዲ ጾሳ ኣይሌታ ጊዲዴታ፤ ሄሲካ ኢንቴና ጌሻቴꬃኮ ካሌꬄስ፤ ዉርሴꬃይካ ሜርና ዴኦ።
ROM 6:23 ናጋራ ዋጋይ ሃይቆ፤ ጊዶ ኣቲን ጾሳ ኢሞታይ ጊዲኮ ጎዳ ዬሱስ ኪርስቶሳ ባጋራ ሜርና ዴኦ።
ROM 7:1 ታ ኢሻቶ! ታኒ ዎጋ ኤሪዛ ኣሳታስ ዮታይስ፤ ዎጋይ ሼምፖራ ፓጻ ዲዛ ኣሳ ጻላላ ሃሪዛይሳ ኢንቴ ኤሬኬቲ?
ROM 7:2 ኢሲ ማጫሲ ኣዚና ጌሊኮ ባ ኣዚናራ ኢዛ ዎጋን ቃሼቲዛይ ኣዚናይ ፓጻ ዲዛ ዎዴ ጋካናሳ፤ ኣዚናይ ሃይቂኮ ኢዛ ማቾ ጊዲዛ ዎጋፔ ኣንጄታዉስ።
ROM 7:3 ጊዶ ኣቲን ኣዚናይ ፓጻ ዲሺን ኢዛ ሃራ ኣዚና ጌሊኮ ላይማ ጌቴታዉስ፤ ኣዚናይ ሃይቂኮ ቃሴ ሃራ ኣስ ጌሊኮ ካሴ ኣዚና ዎጋፔ ኣንጄታዱስ ኣቲን፥ «ላይማ» ጌቴቱኩ።
ROM 7:4 ሄሳ ጊሻስ ታ ኢሻቶ! ኢንቴካ ዬሱስ ኪርስቶሳ ኣሳቴꬃ ባጋራ ዎጋስ ሃይቂዴታ፤ ኢንቴ ሃይቆፔ ዴንዲዳ ኪርስቶሳ ባጋ ጊዲን ኑኒ ጾሳስ ኣይፌ ኣይፋናሳ።
ROM 7:5 ናጋራንቻ ሜꬌቴꬃ ሼኔን ኑ ዲዛ ዎዴ ሃይቆስ ጋꬂዛ ኣይፌ ኑ ኣይፋና ማላ ዎጋይ ዴንꬄꬂዳ ናጋራ ኣሞይ ኑ ቦላ ኦꬂዴስ።
ROM 7:6 ሃኢ ጊዲኮ ካሴ ኑና ዋጺ ቃቺዳ ዎጋስ ሃይቂዳ ጊሻስ ሄ ዎጋፔ ዎዜቲዶስ፤ ሄሲካ ካሴ ጬጋ ዎጋን ጻፌቲዳይሳን ጊዶንታ ዲሼ ኦራꬃ ኣያና ኦጌን ኑኒ ኦꬃናሳ።
ROM 7:7 ሂስቲን ኑ ኣይ ጊኖ? ባ ሁኤስ ዎጋይ ናጋራ? ሙሌካ ጊዴና። ዎጋ ባጋራ ጊዶንታኮ ናጋራይ ኣዛኮ ኑ ኤሮኮ ሺን፤ ዎጋይ «ኣሞቶፋ!» ጎንታኮ ኣሞይ ኣዛኮ ቱማፔ ታ ኤሪኬ።
ROM 7:8 ናጋራይ ቃሴ ዎጋፔ ኬዚዳ ኣዛዞይ ቤሲዳ ኦጌን ጎኤቲዲ ታ ጊዶን ዱማ ዱማ ኢታ ኣሞ ዴንꬄꬂዴስ፤ ዎጋይ ያናፔ ካሴ ናጋራይ ሃይቂዳዛ።
ROM 7:9 ዎጋይ ባይንዳ ካሴ ታኒ ፓጻ ዳይሲሺን ዎጋይ ዪን ቃሴ ናጋራይ ፓጻ ጊዲዴስ፤ ታ ጊዲኮ ሃይቃዲስ።
ROM 7:10 ኣስ ኣሻና ቆፌቲዳ ኣዛዞይካ ሃይቆ ኤኪ ዪዳይሳ ኤራዲስ።
ROM 7:11 ናጋራይ ዎጋ ባጋራ ቤቲዳ ጋሶን ጎኤቲዲ ታና ባሌꬂዴሲኔ ኣዛዞን ዎꬊዴስ።
ROM 7:12 ሄሳ ጊሻስ ዎጋይ ባ ባጋራ ጌሻ፤ ኣዛዞይካ ጌሻ፤ ጺሎኔ ሎኦ።
ROM 7:13 ጊዶ ኣቲን ሎኦስ ሃኒዳይሲ ታስ ሃይቆስ ጊዲዴ? ሙሌካ ጊዴና፤ ጊዶ ኣቲን ናጋራይ ባ ናጋራቴꬃን ኤሬታና ማላ ሎኦ ጊዲዳ ሃኖ ባጋራ ታ ቦላ ሃይቆ ኤሂዴስ፤ ሄሲካ ናጋራይ ኣዛዞ ባጋራ ካሴፔ ኣꬂ ናጋራ ዳርሲዴስ።
ROM 7:14 ዎጋይ ኣያና ዮኦ ጊዲዳይሳ ኑ ኤሮስ፤ ታ ቃሴ ናጋራስ ኣይሌ ማላ ባይዜቲዳ ኣሳ።
ROM 7:15 ታኒ ታ ኦꬂዛይሳ ኤሪኬ፤ ታ ኦꬃና ኮይዛይሳ ኦꬃ ኤሪኬ ሺን ታ ኢጺዛ ሚሽ ኦꬃይስ።
ROM 7:16 ታ ኦꬃና ኮዮንታ ሚሽ ኦꬂዛ ጊዲኮ ዎጋይ ሎኦ ጊዲዳይሳ ታ ማርካታይስ።
ROM 7:17 ሄሳ ኦꬂዛይ ታና ጊዶንታ ታ ጋꬃን ዲዛ ናጋራይ ኦꬄስ።
ROM 7:18 ታናን ሄሲካ ናጋራንቻ ጊዲዳ ታ ሜꬌቴꬃ ጊዶን ኣይኮ ሎኦ ሚሺ ባይንዳይሳ ታ ኤራይስ፤ ሎኦ ኦꬃናስ ታስ ኣሞቴꬂ ዴስ ሺን ፖላ ኦꬃ ኤሪኬ።
ROM 7:19 ታ ኦꬂዛይ ኦꬃና ጋዳ ኮይዛ ሎኦ ኦሶ ጊዴና፤ ጊዶ ኣቲን ታ ኦꬃና ኮዮንታ ኢታ ኦሶ ኦꬃይስ።
ROM 7:20 ታኒ ኦꬃናስ ኮዮንታይሳ ኦꬂዛ ጊዲኮ ሄሳ ኦꬂዛይ ታና ጊዶንታ ታ ጊዶን ዲዛ ናጋራ።
ROM 7:21 ሄሳ ጊሻስ ሃይሲ ዎጋይ ኦሶን ዲዛይሲ ታስ ጌሊዴስ። ሄሲካ ታኒ ሎኦ ኦꬃና ኮያይሲሺን ኢታ ኦꬃይስ።
ROM 7:22 ታኒ ታ ጋꬃራ ጾሳ ዎጋን ኡፋዬታይስ።
ROM 7:23 ጊዶ ኣቲን ታ ኣሳቴꬃ ጊዶን ኦꬂዛ ናጋራ ዎጋይ ታና ቃቺ ኦይኪዲ ታ ቆፋ ዎጋራ ኦሌቲዛ ሃራ ዎጋይ ታ ኣሳቴꬃ ጊዶን ኦꬂሺን ቤያይስ።
ROM 7:24 ታ ኣይ ማላ ላፋ ኣሴ! ሃይሳ ሃይቆስ ኢሜቲዳ ኣሳቴꬃፌ ታና ኣሻናይ ኦኔ?
ROM 7:25 ኑ ጎዳ ዬሱስ ኪርስቶሳ ባጋራ ጋላታይ ጾሳስ ጊዶ። ሂስቲኮ ታኒ ታ ባጋራ ታ ቆፋን ጾሳ ዎጋስ ኣይሌ ጊዳሼ ታኒ ሜꬌቴꬃ ዎጋን ናጋራ ዎጋስ ኣይሌ።
ROM 8:1 ሄሳ ጊሻስ ዬሱስ ኪርስቶሳ ኣማኒዛይታ ቦላ ፒርዳይ ዴና።
ROM 8:2 ጋሶይካ ዴኦ ኣያና ዎጋይ ዬሱስ ኪርስቶሳ ባጋራ ናጋራፔ ኢስታ ጌሺዳ ጊሻሳ።
ROM 8:3 ናጋራንቻ ኣሾፔ ዴንዲዳይሳን ዎጋይ ፖላናስ ዳንዳዮንታይሳ ጾሲ ባ ናዛ ናጋራንቻ ኣሳ ሌሚሶን ናጋራስ ያርሼታና ማላ ዬዲዲ ፖሊዴስ፤ ሂስቲዲ ናጋራ ኢዛ ኣሾን ፒርዲዴስ።
ROM 8:4 ሄሲካ ኑኒ ኣሾን ጊዶንታ ኣያናን ሲሜሬቲዛ ኑፔ ዎጋይ ኮይዛ ጺሎቴꬃ ፖላናሳ።
ROM 8:5 ኣሾ ሼኔ ማላ ዳና ኮይዛ ኣሳታ ዎዚናይ ኣሾይ ኮይዛ ሚሻን ሼምፔስ፤ ኣያና ሼኔ ማላ ዲዛይቲ ቃሴ ባ ዎዚና ኣያናይ ኮይዛ ሚሻ ቦላ ዎꬄቴስ።
ROM 8:6 ኣሾስ ጻላ ቆፋይ ሃይቆ ጊዲሺን ኣያና ዮኦስ ቆፋይ ጊዲኮ ዴኦኔ ሳሮቴꬃ።
ROM 8:7 ናጋራስ ሃሬቲዛ ዎዚናይ ጾሳራ ኦሻ፤ ጋሶይካ ኢዚ ጾሳ ዎጋስ ሃሬቴናኔ ሃሬታናስ ዳንዳዬና።
ROM 8:8 ኣሾ ሼኔ ማላ ዲዛ ኣሳቲካ ጾስ ኡፋይሳናስ ዳንዳዬቴና።
ROM 8:9 ኢንቴ ቃሴ ጾሳ ኣያናይ ኢንቴናን ዲዛ ጊዲኮ ኣሾን ጊዶንታ ኣያናን ዴታ፤ ኪርስቶሳ ኣያናይ ኢዛ ቦላ ባይንዳዴይ ኪርስቶሳስ ጊዴና።
ROM 8:10 ኪርስቶሲ ኢንቴ ጊዶን ዲኮ ቃሴ ኢንቴ ኣሳቴꬃይ ናጋራ ጋሶን ሃይቄꬅ ጊዲኮካ ኢንቴ ኣያናይ ቃሴ ጺሎቴꬃ ጋሶን ዴኦን ዴስ።
ROM 8:11 ዬሱሳ ሃይቆፔ ዴንꬂዳ ኢዛ ኣያናይ ኢንቴ ቦላ ዲዛ ጊዲኮ ኪርስቶሳ ሃይቆፔ ዴንꬂዳይሲ ኢንቴ ጊዶን ዲዛ ኢዛ ኣያናይ ሃይቃናስ ዲዛ ኢንቴ ኣሳቴꬃስ ዴኦ ኢማና።
ROM 8:12 ሄሳ ጊሻስ ታ ኢሻቶ! ሄሲካ ሃናናይ ዶሳን ጊዴናሺን ኑኒ ኣሾ ሼኔ ማላ ዳናስ ኣሾስ ጊዶኮ።
ROM 8:13 ኣሾ ሼኔ ማላ ዲዛ ጊዲኮ ኢንቴ ሃይቃና፤ ኣሾ ኦሶ ኢታዛ ኢንቴ ኣያናን ዎꬊኮ ኢንቴ ዴኦን ዳና።
ROM 8:14 ጾሳ ኣያናን ካሊዛይቲ ኢስቲ ጾሳ ናይታ።
ROM 8:15 ኢንቴ ኤኪዳ ኣያናይ ዛሪዲ ኢንቴና ኣይሌቴꬃን ሃሪዛ ኣያና ጊዶንታ፥ «ኑ ኣዋዉ» ጊ ጼይጊሲዛ ናቴቴꬃ ኣያና ኤኪዴታ።
ROM 8:16 ኑኒ ጾሳ ናይታ ጊዲዳይሳ ሄ ኣያናይ ባ ባጋራ ኑ ኣያናራ ኢሲፌ ኑስ ማርካቴስ።
ROM 8:17 ኑኒ ጾሳ ናይታ ጊዲኮ ኢዛ ላቲዛይታ። ኑ ኪርስቶሳ ቦንቾዛ ላቲዛይታ ጊዳና ማላ ኣዳፌካ ኢዛራ ኢዛ ሜቶዛ ጊሼቲዛይታ ጊዲኮ ኑ ጾስ ላቲዛይታ፤ ኪርስቶሳራካ ኢሲፌ ላቲዛይታ።
ROM 8:18 ሃኢ ኑ ኤኪዛ ዋዬይ ቡሮ ኑስ ሲንꬃን ጊጊ ኡቲዳ ቦንቾዛራ ጋꬂ ጼሊሺን ኣይኮካ ጊዴና ጋይስ።
ROM 8:19 ሜꬌቴꬂ ዉሪካ ጾሳ ናይቲ ቆንጫናይሳ ላሞቴꬃን ናጎን ዴስ።
ROM 8:20 ሜꬌቴꬂ ዉሪካ ሜላ ሃዳ ጊዳና ማላ ፒርዴቲዴስ፤ ሄሲካ ባ ዶሮን ጊዶንታ ሲንꬃፌስ ሃሬታና ማላ ኢዚ ባ ሼኔ ማላ ሃሪሲዳ ጊሻሳ።
ROM 8:21 ሄሲካ ሜꬌቴꬂ ዉሪካ ꬋይሳ ኣይሌቴꬃፌ ዎዜቲዲ ጾሳ ናይታስ ጊዲዳ ቦንቼቲዳ ሼኔ ማላ ዲዛሶ ጋካናሳ።
ROM 8:22 ሃኢ ጋካናስ ሜꬌቴꬂ ዉሪካ ዳሮ ዋዬን ሚጻቲሼ ዲዛይሳ ኑ ኤሮስ።
ROM 8:23 ኢዛ ጻላላ ጊዶንታ ኮይሮ ጺሎ ኣያና ኢሞታ ዴሚዳ ኑኒካ ኑ ኣሳቴꬃይ ኣታና፤ ኑ ኢዛ ና ጊዳናይሳካ ላሞቲሼኔ ዎዚናራ ሚጻቲሼ ዶስ።
ROM 8:24 ሃይሳ ሃ ሂዶታን ጻላ ኣቲዶስ፤ ሂዶታይ ኣይፌን ቤቲዛ ሚሽ ጊዲኮ ቡሮፔ ናጋና ኮሼና፤ ሃኢ ባ ኣይፌን ቤኢዛ ሚሺ ቡሮፔስ ናጊዛይ ኦኔ?
ROM 8:25 ጊዶ ኣቲን ኑኒ ቡሮ ኑ ኣይፌን ቤኦንታ ሚሽ ሂዶታን ናጊዛዝ ጊዲኮ ሳሌታይ ባይንዳ ናጎስ።
ROM 8:26 ሄሳꬆካ ቃሴ ኑ ዳቡርሺን ኣያናይ ኑና ማዴስ፤ ኑኒ ዎሳ ዎስቲ ዎሳናኮ ኤሮንታ ጊሻስ ኣያናይ ኑኒ ቃላን ቆንጪሳናስ ዳንዳዬቶንታ ቃላራ ኑስ ዎሴስ።
ROM 8:27 ኑ ዎዚና ፓጪ ኤሪዛ ኣያናይ ኢዚ ኣያና ቆፋ ኤሬስ፤ ጋሶይካ ኣያናይ ጾሳ ሼኔ ማላ ኣማኒዛ ኣሳስ ኑስ ዎሴስ።
ROM 8:28 ጾሲ ባና ዶሲዛይታሲኔ ኢዛ ሼኔ ማላ ጼይጌቲዳይታስ ኡባስ ኦꬂዛ ሚሽ ኡባካ ሎኦስ ኦꬂዛይሳ ኑ ኤሮስ።
ROM 8:29 ጾሲ ካሴፔ ባ ኤሪዛይታ ኢስቲ ኢዛ ናዛ ሚሳታና ማላ ካሴካ ዶሪ ዎꬂዴስ፤ ሄሲካ ዳሮ ባ ኢሻታ ጊዶፌ ኢዚ ባይራ ጊዳናሳ።
ROM 8:30 ካሴ ኮይሮፔ ባ ዶሪዳይታ ኢስታ ጼይጊዴስ፤ ቃሴካ ጼይጊዳይታ ጺሊሲዴስ፤ ባ ጺሊሲዳይታካ ቦንቺዴስ።
ROM 8:31 ሂስቲን ሄሳ ኑ ኣይ ጊኖ? ጾሲ ኑናራ ጊዲኮ ኑናራ ኤቄታናስ ዳንዳይዛይ ኦኔ?
ROM 8:32 ባ ናዛስ ሚሼቶንታ ኑ ጊሻስ ኣꬂ ኢሚዳይ ኢዛ፤ ሂስቲን ኡባ ሚሽ ኑስ ኢዛራ ኪያቴꬃን ዉርሲ ኣዛስ ኢሜኔ?
ROM 8:33 ጾሲ ዶሪዳይታ ሞቲዛይ ኦኔ? ጺሊሲዛይ ጾሳ።
ROM 8:34 ሂስቲን ፒርዲዛይ ኦኔ? ሃይቂዲ ሃይቆፔ ዴንዲዲ ጾሳ ኡሻቻን ኡቲዳ ዬሱስ ኪርስቶሲ ኑ ጊሻስ ጋናቴስ።
ROM 8:35 ኑና ኪርስቶሳ ሲቆፔ ሻካናይ ኦኔ? ሜቶዬ? ዋዬ? ዎይኮ ጎዴቴꬄ? ዎይኮ ጋፋ? ዎይኮ ካሎቴꬄ? ዎይኮ ቆፖንታ ጋኪዛ ሜቶዬ? ማሻ?
ROM 8:36 ሄሲካ ካሴ፥ «ኔ ጊሻስ ኑ ሹኬቲዛ ዶርሳ ማላ ቆዴቲዶስ፤ ጋላስ ኩሜꬅ ኔ ጊሻስ ኑኒ ሃይቆራ ባጼታና» ጌቴቲ ጻፌቲዳይሳ ማላ።
ROM 8:37 ኑና ኣዚካ ኢዛፔ ሻኬና፤ ሃይሳ ኡባን ኑና ሲቂዳይሳን ጾኒዛይታፔካ ኑ ኣꬎስ።
ROM 8:38 ሄሳ ጊሻስ ሃይቆ ጊዲን፥ ዴኦ ጊዲን፥ ኪታንቻታ ጊዲን፥ ዎይኮ ሃኢ ዲዛ ሚሽ ጊዲን፥ ቡሮ ያና ሚሽ ጊዲን፥ ዎይኮ ኣይ ዎልቃማ ጊዲን፥
ROM 8:39 ꬎቃ ጊዲን ዎይኮ ዚቃ ጊዲን፥ ዎይኮ ኣይ ሜꬌቴꬅ ጊዲን ጎዳ ዬሱስ ኪርስቶሳ ባጋራ ኑስ ዲዛ ጾሳ ሲቆፔ ኑና ሻካና ዳንዳይዛ ሚሺ ባይንዳይሳ ታ ሻካ ኤራዲስ።
ROM 9:1 ታ ዬሱሳ ሱንꬃን ቱሙ ጋይስ፤ ዎርዶቲኬ፤ ታ ዎዚናይካ ጺሎ ኣያና ባጋራ ታስ ማርካቴስ።
ROM 9:2 ታስ ዎዚናፔ ኪቾንታ ጊታ ቆፋይኔ ሚሻይ ዴስ።
ROM 9:3 ታ ዳቦታ ጊሻስ ታ ቃንጌታዳኔ ኪርስቶሳፔ ሻኬታ ዎራ ዎꬊዳኮ ዶሳይስ።
ROM 9:4 ኢስቲካ ኢስራኤሌ ናይታ፤ ኢስቲ ጾሳ ና ጊዳና ማላ ጾሳ ቦንቾይኔ ጫቆ ቃላይ፥ ዎጋይኔ ጾሳ ኬꬃ ዎጋ ሂዶታይ ኢስታስ ኢሜቲዴስ።
ROM 9:5 ካሴ ኣዋቲካ ኢስታ ባጋ፤ ኪርስቶሲ ኢስታ ዜሬꬃ ዛርኬን ቆዴቴስ፤ ኢዚካ ኡባፌ ቦላ ጊዲዳ ሜርናስ ጋላቴቲዳ ጾሳ። ኣሚን።
ROM 9:6 ጊዶ ኣቲን ሄሳ ጉሲ ጾሳ ቃላይ ኣቲዴስ ጉስ ጊዴና፤ ኢስራኤሌፔ ዬሌቲዳይ ዉሪ ኢስራኤሌ ኣስ ጊዴና።
ROM 9:7 ኣብራሃሜፔ ዬሌቲዳይቲ ኢዛፔ ዬሌቲዳ ጊሻስ ዉሪካ ኢዛ ናይታ ጊዴቴናሺን፥ «ኔ ዜሬꬂ ዪሳቃ ባጋራ ጼይጌታና» ጌቴቲዳ ማላ ሃኒዴስ።
ROM 9:8 ሄሳ ጉሲካ ጾሳ ና ጌቴቲዳይቲ ኢስቲ ኣሾን ዬሊዳይታ ጊዴቴና፤ ጊዶ ኣቲን ና ጊዳናይቲ ሂዶታ ቃላን ዮቴቲ ኡቲዳይታ።
ROM 9:9 «ዪዛ ላይꬅ ሃኒ ዎዴ ታ ሃ ሲማና፤ ሳራይካ ኔስ ኣቱማ ና ዬላና» ጌቴቲዲ ኢዛስ ሂዶታ ቃላይ ኢሜቲዴስ።
ROM 9:10 ሄሳ ጻላላካ ጊዴና፤ ኢርቢቃ ናይቲ ኢሳዴ ናኮ! ኢዚካ ኑ ኣዋ ዪሳቃ።
ROM 9:11 ሜንቴቲ ዬሌቲዲ ቡሮ ኢታ ዎይኮ ሎኦ ኦꬆንታ ዲሺን ጾሳ ቆፋይ ሚናና ማላ፥
ROM 9:12 ኦሶን ጊዶንታ ጼይጊዳይሳፌ ጊዲዳ ጊሻስ፥ «ባይራይ ካሎዛስ ሃሬታና» ጌቴቲዲ ኢርቢቃስ ዮቴቲዴስ።
ROM 9:13 ሄሲካ፥ «ታ ያቆቤ ዶሳዲስ፤ ኤሳዌ ኢጻዲስ» ጌቴቲ ካሴ ጻፌቲዳ ማላ ሃኒዴስ።
ROM 9:14 ሂስቲን ኑ ሃኢ ኣይ ጊኖ? ጾሲ ቤሶንታ ኦጌራ ማዲ ኤሪዜ? ሙሌካ ማዲ ኤሬና።
ROM 9:15 ጾሲ ሙሴስ፥ «ታ ማራና ኮዪዳዴ ማራና፤ ታ ሚሼታና ኮዪዳዴስካ ሚሼታና» ጌስ።
ROM 9:16 ሄሳ ጊሻስ ኣሲ ኮዪዳ ማላ ጊዶንታ ዎይኮ ኣሳ ዳቡራን ጊዶንታ ጾሲ ማሪዳ ማላ ሃኔስ።
ROM 9:17 ጌሻ ማጻፋይ ፓሮኔ፥ «ታ ዎልቃይ ኔ ቦላ ቤታና ማላኔ ታ ሱንꬂ ቢታ ኡባ ቦላ ዮቴታና ማላ ታ ኔና ሃይሳስ ዴንꬃዲስ» ጌስ።
ROM 9:18 ሄሳ ጊሻስ ጾሲ ማራና ኮይዛዴ ማሬስ፤ ኢዛ ዎዚና ሙሚሳና ኮይዛዴ ዎዚና ሙሚሴስ።
ROM 9:19 ኢንቴፌ ኢሳዴይ፥ «ሂስቲን ሃኖይ ሄሳ ማላ ጊዲኮ ኑና ሃኖ ጋካናስ ኣዛስ ዋዪሲዜ? ጋሶይካ ኢዛ ሼኔ ዲጋና ዳንዳይዛይ ኦኔ?» ጋዳ ኔ ኦይቾንታ ኣጋካ።
ROM 9:20 ጊዶ ኣቲን ጾሳስ ዛሮ ኢሞስ ኔ ኦኔ? «ኦሴቲዳ ሚሽ ዛሪዲ ኦꬂዳይሳ ኔ ታና ኣዛስ ሃይሳꬆ ኦꬃዲ?» ጊ ኤሪዜ?
ROM 9:21 ኡርቃ ሜꬊዛዴይ ሄ ኡርቃፌ ባጋ ቦንቾስ፥ ባጋ ቃሴ ጮ ሂራይሶ ኦሶስ ሜꬋናስ ኢዛ ሼኔ ጊዴኔ?
ROM 9:22 ጾሲካ ባ ሃንቆ ቤሳናሲኔ ባ ዎልቃ ኤሪሳናስ ኮዪዲ ኢዛ ሃንቆ ቆንጪሲዛይታ፥ ꬋያናስ ጊጌቲዳይታ ꬋይሶንታ ኣጊኮቺ!
ROM 9:23 ኮይሮ ቦንቾስ ጊግሲዳ ኢዛ ማሮቴꬅ ቤሲዛይታስ ኢዛ ቦንቾ ዱሬቴꬂ ኤሬታና ማላ ኢዚ ኦꬃናሳ።
ROM 9:24 ጼይጊዳዴይ ኣይሁዳታ ባጋፌ ጻላላ ጊዶንታ ኣይዛቤታ ባጋፌ ጊዲዳ ኑናካ ኣሾንታ ጼይጊዴስ።
ROM 9:25 ሆሴኤ ማጻፋን፥ «ታ ዴሬ ጊዶንታይታ ታኒ፥ ‹ታ ዴሬታ› ጋ ጼይጋና፤ ታኒ ኢስታ ዶሴቶንታይታ፥ ‹ዶሴቲዳይታ› ጋ ጼይጋና።
ROM 9:26 ቃሴካ፥ ‹ኢንቴ ታ ዴሬ ዴኬታ› ጌቴቲ ዮቴቲዳሶን፥ ‹ኢስቲ ዴኦ ጾሳ ናይታ› ጌቴቲ ጼይጌታና።»
ROM 9:27 ኢሳያሲካ ኢስራኤሌ ናይታ ጊሻስ፥ «ኢስራኤሌ ናይታ ቆዳይ ኣባ ኣጬ ማላ ዳሪኮካ ጉꬃቲ ጻላላ ኣታና።
ROM 9:28 ጎዳይ ባ ፒርዳ ቢታ ቦላ ኤሌ ፒርዳና» ጊ ዮቲዴስ።
ROM 9:29 ሄሲካ፥ «ዎጋ ጎዳይ ኑስ ዜሬꬅ ኣሾንታኮ ኑኒካ ሶዶሜ ካታማ ማላኔ ጋሞራ ካታማ ማላ ꬋያናሺን» ጌቴቲዲ ካሴ ኢሳያሳ ዶናን ዮቲዳይሳ ማላ ሃኒዴስ።
ROM 9:30 ሂስቲን ኑ ኣይ ጊኖ? ኣማኖን ቤቲዳ ጺሎቴꬅ ዴማናስ ኣይዛቤይ ዳቡሮንታ ዴሚዴስ።
ROM 9:31 ጊዶ ኣቲን ጺሎቴꬃ ዎጋ ካሊዛ ኢስራኤሌ ናይቲ ዴሚቤቴና።
ROM 9:32 ሄሲ ኣዛስ ሄሳꬆ ሃኒዴ? ኢስቲ ኣማኖን ጊዶንታ ኦሶን ዴማና ካሊዳ ጊሻሳ፤ ኢስቲካ ꬉጴ ሹቻን ꬉጴቲዳ።
ROM 9:33 ሄሲካ፥ «ሄኮ ኣስ ꬉጲዛ ሹች ኢስታ ኩንዲሲዛ ዛላ ጺዮኔ ቦላ ታ ዎꬃና፤ ኢዛን ኣማኒዛዴይ ዬላቴና» ጌቴቲዲ ካሴ ጌሻ ማጻፋን ጻፌቲዳይሳ ማላ ሃኒዴስ።
ROM 10:1 ታ ኢሻቶ! ኢስራኤሌ ናይታ ጊሻስ ታ ኣሞይኔ ታ ጾስ ዎሲዛይ ኢስቲ ꬋዮንታ ኣታናሳ።
ROM 10:2 ኢስቲ ጾሳ ዮኦስ ሚሼቲዛይታ ጊዲዳይሳ ታ ኢስታ ጊሻስ ማርካታና ዳንዳያይስ፤ ኢስታ ሚሼቴꬂ ጊዲኮ ኤራቴꬃን ጊዴና።
ROM 10:3 ጾሲ ኣስ ጺሊሲዛ ኦጌ ኤሮንታ ኣጊዲ ባ ጺሎቴꬃ ኦጌ ካሊዳ ኣቲን ጾሳ ጺሎቴꬃ ኦጌ ካሊቤቴና።
ROM 10:4 ኣማኒዛ ኣሳ ኡባ ጺሊሳናስ ኪርስቶሲ ዎጋ ኡባ ፖሊዴስ።
ROM 10:5 ሙሴይ ዎጋ ባጋራ ቤቲዛ ጺሎቴꬃ ጊሻስ ኤሪሲሼ፥ «ሃይታ ዎጋታ ፖሊ ኦꬂዛዴይ ሃ ዎጋታን ዳና» ጊዛይሳ።
ROM 10:6 ኣማኖን ቤቲዛ ጺሎቴꬂ ቃሴ፥ «ኔ ዎዚናራ ፑዴ ሳሎ ኦኔ ኬዛናይ? ጎፓ፤» ሄሳꬆ ጉሲ ኪርስቶሳ ሳሎፔ ዱጌ ሃ ዎꬃና ጉሳ።
ROM 10:7 ዎይኮ፥ « ‹ዱጌ ጪማን ኦኔ ዎꬋናይ?› ጎፓ!» ሄሲካ ኪርስቶሳ ሃይቆፔ ቡሮ ዴንꬃና ጉሳ።
ROM 10:8 ጊዶ ኣቲን ቃላይ ኣይ ጊዜ? «ቃላይ ኔ ኣቻን ዴስ።» ኔ ዶናኒኔ ኔ ዎዚናን ዴስ፥ ኑኒ ኣማኖ ጊሻስ ሳባኪዛ ቃላይ ሃይሳ።
ROM 10:9 ኔኒ ኔ ዶናራ፥ «ዬሱሲ ጎዳ» ጋዳ ማርካቲኮ ጾሲ ኢዛ ሃይቆፔ ዴንꬂዳይሳ ኔ ዎዚናን ኔ ኣማኒኮ ኣታና።
ROM 10:10 ኔኒ ጺላናይ ዎዚናን ኣማኒኮ፤ ኔ ኣታናይ ኔ ዶናራ ማርካቲና።
ROM 10:11 ጌሻ ማጻፋይ ጊዛ ማላ፥ «ኢዛን ኣማኒዛይ ዉሪካ ዬላቴና።»
ROM 10:12 ኣይሁዳታ ጊዶኒኔ ኣይዛቤታ ጊዶን ዱማቴꬂ ዴና፤ ኢሲ ጎዳይ ኡባሲካ ጎዳ፤ ኢዛ ዎሲዛይታ ጉጂ ኣንጄስ።
ROM 10:13 «ጎዳ ሱንꬅ ጼይጊዛይቲ ዉሪካ ኣታና» ጌቴቲ ጌሻ ማጻፋን ጻፌቲዴስ።
ROM 10:14 ሂስቲን ኢዛ ኣማኖንታይቲ ኢዛ ዎዝጊ ጼይጋኔ? ቃሴ ኢዛ ጊሻስ ሲዮንታ ዲሼ ዎስቲ ኣማናኔ? ሳባኬይ ባይንዳ ዲሺን ዎስቲ ሲያኔ?
ROM 10:15 ኪቴቶንታ ዎስቲ ሳባካንዴቶ? ሄሲካ፥ «ሚሺራቾ ቃላ ኤኪ ዪዛይታ ዩሲ ኣይ ማላ ሎኦ!» ጌቴቲ ጌሻ ማጻፋን ጻፌቲዳ ማላ ሃኒዴስ።
ROM 10:16 ጊዶ ኣቲን ሲዪዳይቲ ዉሪካ ሚሺራቾ ቃላ ኤኪቤቴና፤ ኢሳያሲ፥ «ጎዶ! ኑ ዮቲዳይሳ ኦኒ ኣማኒዴ?» ጊዳ ማላ ሃኒዴስ።
ROM 10:17 ሄሳ ጊሻስ ኣማኖይ ቤቲዛይ ዮቲዛ ቃላ ሲዬꬃና፤ ዮቴቲዛ ቃላይካ ኪርስቶሳ ጊሻስ ዮቲዛ ቃላፔ።
ROM 10:18 ጊዶ ኣቲን ኣሳይ ሲዪቤኔሻ? ጋዳ ታ ኦይቻይስ፤ ቱማፔ ኣሳይ ሲዪዴስ፤ ጌሻ ማጻፋን ጻፌቲዳ ማላ፥ «ኢስታ ቃላይ ቢታ ኡባኒኔ ኣላሜ ጋጻ ጋካናስ ሲዬቲዴስ።»
ROM 10:19 ታ ቃሴካ ኦይቻይስ፤ ኢስራኤሌ ናይቲ ቃላ ኤሪቤቴኔሻ? ኮይሮ ሙሴይ ኢስታስ፥ «ታ ዴሬ ጊዶንታይታን ታ ኢስታ ኣሞሳና፤ ዩሺ ቆፖንታ ዴሬታን ታ ኢስታ ዪሎቻና» ጊዴስ።
ROM 10:20 ኢሳያሲካ ጻላቴꬃን፥ «ታና ኮዮንታይታስ ታ ቤታዲስ፤ ታና ኦይቾንታይታስ ታና ቆንጪሳዲስ» ጊዴስ።
ROM 10:21 ኢስራኤሌ ጊሻስ ቃሴ፥ «ታስ ኣዛዜቶንታ ዴሬኮኔ ታስ ኤኖ ጎንታ ዴሬኮ ኩሜꬃ ጋላስ ታ ኩሼ ሚጫዲስ» ጌስ።
ROM 11:1 ሂስቲን ጾሲ ባ ዴሬታ ዬጊ ኣጊዴ? ጋዳ ታ ኦይቻይስ፤ ሙሌካ ኣጊቤና፤ ታኒካ ታ ባጋራ ቢኒያሜ ዛርኬ፥ ኣብራሃሜ ዜሬꬅ ጊዲዳ ኢስራኤሌ ኣሳ።
ROM 11:2 ጾሲ ኮይሮፔ ባ ኤሪዳ ዴሬዛ ዬጊቤና፤ ኤላሲ ኢስራኤሌ ናይታ ቦላ ሞቶ ጾሳኮ ዎስቲ ሺሺዳኮ ጌሻ ማጻፋይ ኢዛ ጊሻስ ኣይ ጊዛኮ ኢንቴ ኤሬኬቲ?
ROM 11:3 «ጎዶ! ኢስቲ ኔ ናቤታ ዎꬊዳ፤ ኔስ ያርሺዛሶሆታካ ላሊዳ፤ ቃሴ ታኒ ታርካ ኣታዲስ፤ ታናካ ዎꬋና ጌቴስ» ጊዴስ።
ROM 11:4 ጾሲ ኢዛስ፥ «ባኣሌ ጌቴቲዛ ኤቃስ ጎይኖንታይታ ላፑን ሺ ኣስ ታኒ ታስ ኣሻዲስ» ጊ ዛሪዴስ
ROM 11:5 ሄሳ ማላካ ሃኢ ሃ ዎዴዛንካ ጾሳ ኪያቴꬃን ኢስራኤሌ ኣሳፔ ዶሬቲ ኣቲዳ ጉꬃቲ ዴቴስ።
ROM 11:6 ሂስቲን ሄሲ ጾሳ ኪያቴꬃን ኣቲን ኣሳ ኦሶን ጊዴና፤ ኣሳ ኦሶን ጊዲዳኮ ጾሳ ኪያቴꬂ ኪያቴꬅ ጊዴና።
ROM 11:7 ሂስቲን ኣይ ጋኔ? ኢስራኤሌ ናይቲ ሎኤꬂ ኮዪዳይሳ ዴሚቤቴና፤ ጾሳን ዶሬቲዳይቲ ጊዲኮ ዴሚዳ፤ ሃንኮ ኣቲዳይታ ዎዚናይ ሙሚዴስ።
ROM 11:8 ካሴ፥ «ኢስታ ኣይፌይ ጼሎንታ ማላ፥ ኢስታ ሃይꬃይካ ሲዮንታ ማላ ጾሲ ሃኖ ጋካናስ ኢስታስ ዶጪሲዛ ኣያና ኢሚዴስ» ጌቴቲ ጌሻ ማጻፋን ጻፌቲዳ ማላ።
ROM 11:9 ዳዊቲካ፥ «ኢስታ ማዳይ ኢስታ ኦይኪዛ ናርጻኔ ያርዴ፤ ኢስታስ ꬉጲዛዚኔ ቂጻቴ ጊዶ።
ROM 11:10 ኢስታ ኣይፌይ ጼሎፎ፤ ጎዜቶ፤ ኢስታ ዞኮይ ሜርናስ ኩኖ» ጊዴስ።
ROM 11:11 ኣኔ ቃሴ ታ ዛራ ኦይቻይስ፤ ኢስራኤሌ ኣሳይ ኩንዴꬃፌ ናምኣንꬆ ዴንዴኔ? ዴንዳና። ሃራፔካ ኢስራኤሌ ናይታ ቃናቲሳና ጊሻስ ኢስታ ሞሮ ጋሶን ኣቶቴꬂ ኣይዛቤታስ ጋኪዴስ።
ROM 11:12 ጊዶ ኣቲን ቃሴ ኢስታ ሞሮይ ኣይዛቤታስ ኣንጆ ጊዲዴስ። ኢስታ ኩንዴꬂካ ቃሴ ኣይዛቤታስ ኣንጆ ጊዲኮ ኢስቲ ሲሚ ኣቲዳኮ ኣይ ማላ ጊታ ኣንጆ ጊዳንዴሺን!
ROM 11:13 ኣይዛቤቶ! ታ ኢንቴስ ዮታይስ፤ ታ ኣይዛቤታስ ኪቴቲዳዴ ጊዲዳ ጊሻስ ታ ኦሶዛ ሚና ፖላና።
ROM 11:14 ሄሲካ ታ ባጋ ኣሳቲ ኣሞሳና ማላ ዴንꬄꬃዳ ኢስታፌ ጉꬃ ኣሳታ ኣሻናስ ኡፋይስ ኦꬃይስ።
ROM 11:15 ጾሲ ኢስታ ኣጊዳ ኣይዛቤቲ ጾሳራ ጊጊኮ ጾሲ ኢስራኤሌ ናይታ ዛሪዲ ኤኪዛ ዎዴ ኢንቴስ ኣዚ ሃናና ሚሳቲዜ? ሄሳ ጉሲ፥ «ሃይቆፔ ዴንዲዴስ» ጉሳ ማላ።
ROM 11:16 ኮይሮ ቡኬሶይ ሎኦ ጊዲኮ ሃንኮ ኢዛፔ ኦሴቲዛይሲ ዉሪካ ሎኦ ጊዴስ፤ ሄሳꬆካ ኢሲ ሚꬃ ጻጶይ ሎኦ ጊዲኮ ሃንኮ ኢዛ ቦላ ዲዛ ሃጋቲካ ሎኦ ጊዴቴስ።
ROM 11:17 ኬꬃ ማታን ዲዛ ዎጋራ ሚꬃ ሃጋታ ማላቲ ኢንቴ ሜቂ ዎꬊን ሃንኮ ዎራን ዲዛ ዎጋራ ሚꬃታ ሚሳቲዛ ኣይዛቤቲ ኢንቴ ኪቾሳን ጊዲዲ ኢንቴ ሃሮኔ ኢንቴ ኣንጆ ሻኪ ኤኪዛዴንታ ጊዲኮ፥
ROM 11:18 ሄይታ ሄ ሜቂ ዎꬊዳ ሃጋታ ቦላ ኦቶሬቶፋ፤ ኢንቴ ኢስታ ቦላ ኦቶሬቲኮ ቃሴ ሃኖ ዎዚናን ዎꬂቴ፤ ሄ ሚꬃ ቶኪዳይ ኔና ጊዳካ፤ ሚꬃይ ኔና ቶኪዴስ ኣቲን።
ROM 11:19 ሂስቲኮ፥ «ሄ ሃጋቲ ሜቂ ዎꬊዳይ ኑኒ ኢስቲ ኪቾሳን ጌላና ማላሳ» ጎንታ ኣጌኬታ።
ROM 11:20 ቱሙ ጊዴታሺን ኢስቲ ሜቂዳይ ኣማኖ ፓጬፔ ዴንዲዳይሳና። ኢንቴ ቃሴ ኣማኖን ኤቂዴታ፤ ባቢቴ ኣቲን ኦቶሬቶፍቴ።
ROM 11:21 ጾሲ ኮይሮፔ ዲዛ ሃጋታስ ሚሼቶንታዴ ጊዲኮ ኢንቴስካ ሚሼቴና።
ROM 11:22 ሄሳ ጊሻስ ጾሳ ኪያቴꬂኔ ኢዛ ሜንጼ ኢታቴꬃ ኣኔ ጼላ፤ ኢዛ ሜንጼ ኢታቴꬂ ኩንዲዳይታ ቦላ፤ ኢዛ ኪያቴꬂ ቃሴ ኢንቴ ኢዛ ቃꬌቴꬃ ጋርሳን ዲዛ ዎዴ ጋካናስ ጻላላ፤ ሄሲ ባይንዳ ኣጊኮ ኢንቴካ ቃንጼታና።
ROM 11:23 ኢስቲ ኣማኖንታ ሚኒ ኤቂዳሶፔ ሲሚኮ ካሴ ባ ዲዛሶ ሲሚ ጌላና፤ ጾሲካ ኢስታ ዛርሲ ጌልꬃና ዳንዳዬስ።
ROM 11:24 ኢንቴ ባዞ ዎጋራ ሚꬃፌ ቃንጼቲ ካሴ ኢንቴ ሜꬌቴꬃፌ ጊዶንታ ሎኦ ሚꬃን ኢንቴ ጌላና ዳንዳይኮ ኮይሮፔ ባ ሜꬌቴꬃ ሃጋታ ጊዲዳይቲ ሄይቲ ካሴ ኢዛ ቦላ ዲዛ ዎጋራ ሚꬃን ሲሚ ጌሎይ ኢስታስ ዋኒ ሃኔኔ?
ROM 11:25 ታ ኢሻቶ! ኢንቴ ጪንጫ ኣስ ጊዲዳይሳ ኢንቴስ ሚሳቶንታ ማላ ሃይሳ ጊዶ ጹራ ዮኦዛ ኢንቴ ኤሮንታ ኣታና ማላ ታ ኮይኬ። ሄሲካ ኣይዛቤታፔ ጼይጌቲዳይቲ ዉሪ ኣማናና ጋካናስ ኢስራኤሌ ናይታ ዎዚናይ ሙሚዴስ።
ROM 11:26 ሄሳ ጊሻስ ኢስራኤሌ ናይቲ ዉሪካ ኣታና። «ኣሺዛዴይ ጺዮኔፔ ያና፤ ያቆቤፔካ ኢታቴꬅ ዲጋና።
ROM 11:27 ታኒ ኢስታ ናጋራ ዉርሳ ꬋይሲዳፔ ጉዬ ታ ኢስታራ ጫቆን ጌሊዛ ቃላይ ሄሳ» ጌቴቲዲ ካሴ ጌሻ ማጻፋን ጻፌቲዳ ማላ ሃኒዴስ።
ROM 11:28 ኢንቴስ ኣይዛቤታስ ሚሺራቾ ቃላይ ጋካና ማላ ኢስራኤሌ ናይቲ ጾሳን ኢጼቲዳ ኣስ ጊዲዳ፤ ጊዲኮካ ካሴ ዶሮዛ ማላ ጊዲኮ ባ ኣዋታ ባጋራ ኢስቲ ዶሴቲዳይታ።
ROM 11:29 ጾሲ ዶሪዳፔኔ ባ ኪያቴꬅ ኢሚዳፔ ጉዬ ባ ኦꬂዳ ሚሻን ሲሚዲ ሞꬌቴና።
ROM 11:30 ኢንቴካ ካሴ ኣዛዜቶንታይታኮ! ኢስቲ ኣዛዜቶንታ ኢጺን ሃኢ ኢንቴና ማሪዳይሳꬆ፤
ROM 11:31 ጾሲ ኢንቴና ማሪዳ ጋሶን ኢስቲካ ማሬታና ማላ ሃኢ ኣዛዜቶንታይታ ጊዲዳ።
ROM 11:32 ጾሲ ዉርሲካ ማራናስ ኣሲ ዉሪካ ኣዛዜቶንታ ማላ ጎርዲዴስ።
ROM 11:33 ጾሳ ዱሬቴꬂ፥ ኣꬎ ኤራቴꬃይኔ ኢዛ ኤራቴꬃይ ኣይ ማላ ጪማ! ኢዛ ፒርዳይ ኣይ ማላኮ ፓጬቴና፤ ኢዚ ኣꬊዳ ጌዶይካ ኤሬቴና።
ROM 11:34 «ጎዳ ዎዚና ኤሪዳይ ኦኔ? ኢዛስ ዞሬ ኢሚዳይ ኦኔ?
ROM 11:35 ጾሲ ዛሪ ኢማና ማላ ኢዛስ ታልኤ ኢሚዳይ ኦኔ?» ጌቴቲ ጻፌቲዳ ማላ።
ROM 11:36 ዉሪካ ኢዛፔ፥ ኢዛን፥ ኢዛሳ፤ ኢዛስ ቦንቾይ ሜርናፔ ሜርናስ ጊዶ! ኣሚን።
ROM 12:1 ሄሳ ጊሻስ ታ ኢሻቶ! ኢንቴ ኣሳቴꬃ ጌሺኔ ጾስ ኡፋይሲዛ ዴኦ ያርሾ ኦꬂዲ ኢንቴ ሺሻና ማላ ታ ኢንቴና ጾሳ ቃꬌታን ዎሳይስ፤ ሄሲካ ዎዚናማ ኣሳ ማላ ኢንቴ ጾሳስ ኦꬂዛ ኦሶ።
ROM 12:2 ሎኦ፥ ኡፋይሲዛዚኔ ኩሜꬅ ጊዲዳ ጾሳ ሼኔይ ኣዛኮ ኢንቴ ፓጪ ኤራና ማላ ኢንቴ ቆፋን ኦራጺዲ ላሜቲቴ ኣቲን ሃይሳ ኣላሜ ኣሳ ሚሳቶፒቴ።
ROM 12:3 ኢንቴስ ጾሲ ኢሚዳ ኣማኖ ማላ ኢንቴርካ ኢንቴና ፓጪ ጼሊቴ ኣቲን ሃኢ ዲዛይሳፌ ቦላራ ኢንቴና ꬎቂሲ ጼሎንታ ማላ ታኒ ታስ ኢሜቲዳ ጾሳ ኪያቴꬃን ኢንቴና ኢሳ ኢሳ ዞራይስ።
ROM 12:4 ኑፔ ኢሲ ኢሲ ኣሳስ ኢሲ ኣሳቴꬃ ቦላ ዳሮ ቢሊቴቲ ዲዛ ማላ ሄይቲካ ሄ ቢሊቴቲ ኢሲ ማላ ኦሶ ኦꬆንታይሳꬆ፥
ROM 12:5 ሄሳꬆካ ኑኒ ዳሮታ ጊዲ ኡቲዲ ኪርስቶሳን ኢሲ ኣሾ፤ ኑኒ ኢሶይ ኢሳስ ኣሾ።
ROM 12:6 ኑስ ኢሜቲዳ ኢሞታ ማላ ዱማ ዱማ ኢሞታይ ዴስ፤ ኢሳዴስ ቡሮፔ ሃናናዝ ዮቶ ጊዲኮ ኢዛዴስ ኢሜቲዳ ኣማኖ ማላ ዮቶ።
ROM 12:7 ኦꬂ ማዲዛዴይ ኦꬂ ማዶ፤ ታማርሲዛዴይካ ታማርሶ።
ROM 12:8 ዞሪዛዴይ ጊዲኮ ዞሮ፤ ባይንዳይታስ ኢሚዛዴይ ጉጂ ኢሞ፤ ኣይሲዛዴይ ሚኒ ኣይሶ፤ ማሪዛዴይካ ኡፋይሳን ማሮ።
ROM 12:9 ኢንቴ ሲቆቴꬂ ቆꬌፔ ቆሞን ጊዶፖ፤ ኢታ ጊዲዳይሳ ዉርሲካ ኢጺቴ። ሎኦ ጊዲዳይሳራ ኢሲፌ ኦይኬቲቴ።
ROM 12:10 ኢንቴ ኢንቴ ጋርሳን ኢሶይ ኢሳራ ኢሻታ ማላ ሎኤꬂ ሲቄቲቴ፤ ኢሶይ ኢሳ ባፔ ኣꬂ ቦንቺዛይታ ጊዲቴ።
ROM 12:11 ጎዳስ ኦꬃና ኣያናን ጹጌቲዛይታ ጊዲቴ ኣቲን ሄሳ ሄ ሚኖቴꬃፌ ጉዬ ጎፒቴ።
ROM 12:12 ሂዶታን ኡፋዬቲዛይታ ጊዲቴ፤ ሜቶ ዳንዳይቴ፤ ዎሳን ሚኒቴ።
ROM 12:13 ኣማኒሼ ዋዬቲዛይታስ ኢንቴስ ዲዛይሳፌ ሻኪ ኢሚቴ፤ ኢማꬅ ሞኪቴ።
ROM 12:14 ኢንቴና ቃንጊዛይታ ኣንጂቴ ኣቲን ቃንጎፍቴ።
ROM 12:15 ኡፋዬቲዛይታራ ኡፋዬቲቴ፤ ሙዞቲዛይታራ ሙዞቲቴ።
ROM 12:16 ኢንቴ ኢንቴ ጋርሳን ዶሴቴꬃን ዲቴ፤ ማንቆታራ ኢሲፌቴꬃን ዳናስ ኮዪቴ ኣቲን ኦቶሬቶፍቴኔ ጬቄቶፍቴ።
ROM 12:17 ኦናስካ ኢታ ጊሻስ ኢታ ዛሮፒቴ፤ ኣስ ኡባ ኣቻን ሎኦ ሚሽ ኦꬃናስ ሚኒቴ።
ROM 12:18 ኢንቴስ ዳንዳዬቲኮ ኢንቴ ኢንቴ ባጋራ ኣስ ኡባራ ሳሮን ዲቴ።
ROM 12:19 ታ ሲቆቶ! ኢንቴ ሃሎ ጾሲ ኬሶ ኣቲን ኢንቴርካ ሃሎ ኬሶፍቴ። «ሃሎ ኬሳናይ ታና ጌስ ጎዳይ» ጌቴቲ ጌሻ ማጻፋን ጻፌቲዴስ።
ROM 12:20 ሃሎ ኬሳናፔ፥ «ኔኒ ኔ ሞርኬይ ጋፊኮ ሚዛ፤ ኢዚ ሳሜቲኮ ኡሻ፤ ኔ ሄሳꬆ ኦꬂኮ ታማ ቦንቆ ኢዛ ቦላ ኮራሳ» ጌቴቲዲ ጌሻ ማጻፋን ጻፌቲዴስ።
ROM 12:21 ኢታ ሎኦ ኦሶን ጾና ኣቲን ኢታን ጾኔቶፋ።
ROM 13:1 ኣይ ኣሲካ ባና ኣይሲዛ ዳናታስ ሃሬታናስ ቤሴስ፤ ጾሳፌ ኢሜቶንታ ዲሺን ዳናቴꬂ ዴና፤ ሃኢ ዲዛ ዳናቲ ጾሳፌ ዳናቲዳይታ።
ROM 13:2 ሄሳ ጊሻስ ዳና ቦላ ማካሊዳይ ጾሳ ዎጋ ቦላ ማካሌስ። ሄ ማካሊዛይቲካ ባ ቦላ ፒርዳ ኤሄቴስ።
ROM 13:3 ዴሬ ኣይሲዛይቲ ኢታ ኦꬂዛይታ ባቢሴቴስ ኣቲን ሎኦ ኦꬂዛይታ ባቢሴቴና። ኔኒ ዴሬ ኣይሲዛዴስ ባቦንታ ኣጋና ኮያይ? ሂስቲኮ ሎኦ ኦꬃ፤ ኢዚካ ኔና ጋላታና።
ROM 13:4 ኢዚ ኔስ ሎኦ ኦꬃናስ ጾሳ ኦሳንቻ፤ ጊዶ ኣቲን ኔ ኢታ ኦꬂዳ ጊዲኮ ኢዛስ ባባ፤ ጋሶይካ ኢዚ ማሻ ጮ ሜላ ጊጺቤና፤ ኢዚ ኢታ ኦꬂዛዴ ቃጻያናስ ጾሳ ኦሳንቻ።
ROM 13:5 ሄሳ ጊሻስ ኢዛ ቂጻቴስ ባቦ ጻላላ ጊዶንታ ኔ ቆፋንካ ዳናቲዛዴስ ኣዛዜታናስ ቤሴስ።
ROM 13:6 ኢንቴ ጊራ ኢሚዛይ ሄሳሳ፤ ኣይሲዛይታ ሄ ኦሶዛ ቦላ ጾሲ ዎꬂዴስ።
ROM 13:7 ኢስታፌ ኢሳስ ኢሳስ ቤሲዛይሳ ኢሚቴ፤ ጊራ ኢማና ቤሲዛይታስ ጊራ ኢሚቴ፤ ቃራጻ ቃንጻናስ ቤሲዛይታስ ቃራጻ ቃንጺቴ፤ ባባናስ ቤሲዛይታስ ባቢቴ፤ ቦንቻናስ ቤሲዛይታ ቦንቺቴ።
ROM 13:8 ኢንቴ ጋርሳን ኢሶይ ኢሳራ ሲቄቴꬃፌ ኣቲን ኦና ቦላካ ኣጮይ ዶፖ፤ ኣስ ሲቂዛ ኣሲ ኢዚ ዎጋ ፖሊዴስ።
ROM 13:9 «ላይማቶፓ፤ ዎꬎፓ፤ ኣሞቶፋ» ጊዛይቲኔ ሃራ ኣዛዞቲ ዲኮካ፥ «ኣስ ኡባካ ኔ ማላ ሲቃ» ጊዛ ሃኖ ኢሲ ዎጋይን ዉሪካ ኩዬቲዴስ።
ROM 13:10 ሲቆይ ኣሳ ቦላ ኢታ ኦꬄና፤ ሄሳ ጊሻስ ሲቆይ ዎጋ ኡባስ ኩሻ።
ROM 13:11 ሃይሳ ዎዴዛ ጫዲ ጼሊዲ ሄሳ ኦꬂቴ፤ ሃኢ ሃና ኢንቴ ꬊስኮፌ ዴንዲዛ ዎዴ፤ ኑ ካሴ ኣማኖሶፌ ሃ ሲሚን ሃኢ ኑስ ኣቲዛ ዎዴይ ማቲዴስ።
ROM 13:12 ቃማይ ኣꬊን ዎንታና ጌስ፤ ሄሳ ጊሻስ ኣኔ ኑ ꬉማ ኦሶ ዎራ ዬጊዲ ፖኦ ኦላ ሚሽ ማይኦስ።
ROM 13:13 ጋላሳራ ሄሜቲዛ ማላ ኣኔ ዎጋራ ሄሜቶስ፤ ማጉልሳኒኔ ማꬆን ጊዶፖ፤ ላይማ ኣሞኒኔ ላይማን ጊዶፖ፤ ቃናቴቴꬃኒኔ ፓላማን ጊዶፖ።
ROM 13:14 ሄሳ ኣጊዲ ዬሱስ ኪርስቶሳ ማይኢቴ፤ ኣሾ ኣሞ ፖላናስ ቆፖፍቴ።
ROM 14:1 ኢንቴ ጋርሳን ኣማኖን ቡሮ ሚኖንታዴ ሺሺ ኤኪቴ ኣቲን ኢዛ ቆፋ ቦላ ፒርዶፍቴ።
ROM 14:2 ኢሲ ኢሲ ኣሲ ቤቲዳይሳ ዉርሲ ማናስ ኣማኖይ ዴስ፤ ቃሴ ኣማኖን ሚኖንታዴይ ኣታኪልቴ ጻላላ ሜስ።
ROM 14:3 ቤቲዳይሳ ኡባ ሚዛዴይ ዉርሲ ሞንታዴ ካꬎፓ፤ ሞንታዴይ ቃሴ ሚዛዴ ቦላ ፒርዶፎ፤ ጾሲ ኡባካ ኤኪዴስ።
ROM 14:4 ሃንኮ ኦꬂዛዴ ቦላ ፒርዲዛዴይ ኔ ኦኔ? ኢዛዴይ ኩንዲኮ ዎይኮ ኤቂኮካ ጎዳሳ፤ ጎዳይ ኢዛ ኤሳናስ ዳንዳይዛ ጊሻስ ኢዚ ኤቃንዴስ።
ROM 14:5 ኢሳዴይ፥ «ጋላሳታፔ ኢሲ ጋላስ ሃራ ጋላሳፌ ኣꬂዲ ባስ ዱማ ጋላስ» ጊ ቆፔስ፤ ሃራ ኣሲ ቃሴ፥ «ጋላሳቲ ዉሪካ ኢሲ ጊና» ጊ ቆፔስ። ኢሲ ኢሲ ኣሲ ባ ዎዚናን ኣማኒዳ ማላ ኦꬆ።
ROM 14:6 ኢሲ ጋላስ ሃራ ጋላሳፌ ዱማሲ ቆፒዛዴይ ኢዚ ሄሳ ኦꬂዛይ ጎዳ ቦንቾስ ጊዲኮ ሚዛዴይካ ጎዳ ቦንቾስ ጊዲ ሜስ። ሂስቲዲ ጾስ ጋላቴስ። ሞንታዴይካ ጎዳ ቦንቾስ ጊዲ ሙስ ኣጌሲኔ ጾሳስ ጋላታ ኢሜስ።
ROM 14:7 ኑፔ ኦኒካ ባስ ዲዛዴይኔ ባፔ ባስ ሃይቂዛዴይ ዴና።
ROM 14:8 ኑ ዲኮካ ጎዳስ ዶስ፤ ሃይቂኮካ ጎዳስ ሃይቆስ፤ ሄሳ ጊሻስ ዲኮካ ዎይኮ ሃይቂኮ ኑኒ ጎዳሳ።
ROM 14:9 ሄሳ ጊሻስ ሃይቂዳይታሲኔ ፓጻ ዲዛይታስ ጎዳ ጊዳናስ ኪርስቶሲ ሃይቂዲ ሃይቆፔ ፓጺ ዴንዲዴስ።
ROM 14:10 ሂስቲን ኔ ኣዛስ ኔ ኢሻ ቦላ ፒርዳይ? ኣዛስ ኔ ኢሻ ሌቃይ? ኑ ዉሪካ ጾሳ ፒርዳ ዎምቦራ ሲንꬅ ሺቃና ዶስ።
ROM 14:11 «ታ ፓጻ ዳይስ፤ ጉልባቴይ ዉሪካ ታስ ጉልባታና። ኢንጻርሲ ዉሪ ጾሳስ ማርካታና» ጌቴቲ ካሴ ጌሻ ማጻፋን ጻፌቲዴስ።
ROM 14:12 ሄሳ ጊሻስ ኑኒ ኢሲ ኢሲ ኣሲ ጾሳ ሲንꬅ ሺቂዲ ኑ ኦሶ ጊሻስ ኢዛስ ዛሮ ኢማና።
ROM 14:13 ሄሳ ጊሻስ ኑኒ ኑ ጋርሳን ኢሶይ ኢሳ ቦላ ፒርዳናፔ ኣኔ ናጌቶስ፤ ሄሳ ኣጊዲ ኑ ኢሻስ ꬉጴ ጊዲዛይሳ ዎይኮ ኢዛ ኦይኪዛ ናርጻ ዎꬆንታ ማላ ኣኔ ኑ ናጌቶስ።
ROM 14:14 ታኒ ጎዳ ዬሱሳን ኣማናዳ ሚዛ ካꬃን ቱናይ ባይንዳይሳ ኤራዲስ፤ ጊዶ ኣቲን ኢሳዴይ ኢሲ ሚሽ ቱና ጊ ቆፒኮ ሄ ሚሻይ ኢዛዴስ ቱና።
ROM 14:15 ኔኒ ኔ ኢሻስ ሚዛ ካꬃ ጋሶን ꬉጴ ጊዲኮ ሲቆን ሲሜሬታቤካ፤ ኪርስቶሲ ኢዛ ጊሻስ ሃይቂዳ ኔ ኢሻ ኔ ሚዛ ካꬃ ጋሶን ዎꬎፓ።
ROM 14:16 ኢንቴ ሎኦ ጊዲ ቆፒዛ ሚሺ ኢታ ጌቴታና ማላ ኦꬆፍቴ።
ROM 14:17 ጾሳ ካዎቴꬂ ጺሎ ኣያናን ቤቲዳ ጺሎቴꬅ፥ ሳሮቴꬂኔ ኡፋይሳፌ ኣቲን ሙሳ ዮኦኔ ኡሻ ዮኦ ጊዴና።
ROM 14:18 ሃይሳꬆ ኪርስቶሳስ ኦꬂዛዴይ ጾስ ኡፋይሴሲኔ ኣሳ ኣቻንካ ጋላቴቴስ።
ROM 14:19 ሄሳ ጊሻስ ሳሮቴꬂ ቤቲዛ ኦጌኔ ኑኒ ኑ ጋርሳን ሎኣናስ ቤሲዛ ኦጌ ኣኔ ኮዮስ።
ROM 14:20 ኑኒ ሚዛ ካꬃ ጋሶን ጾሳ ኦሶ ኣኔ ሞሮኮ፤ ካꬂ ዉሪካ ጌሻ፤ ጊዶ ኣቲን ሃራ ኣሳስ ꬉጴ ጊዲዛ ካꬅ ሙሲ ባላ ኦሶ።
ROM 14:21 ኔ ኢሻስ ꬉጴ ጊዲዛዝ ጊዲኮ ኣሾካ ማናፔኔ ዎይኔ ጫጄ ኡያናፔ ዎይኮ ኣይ ሚሺካ ኔ ኦꬆንታ ኣጊኮ ሎኦ።
ROM 14:22 ሄሳ ጊሻስ ሃይታንታ ሚሳቲዛ ሚሻታስ ኔስ ዲዛ ኣማኖይ ኔ ጊዶኒኔ ጾሳ ጊዶን ዴኦ። «ሃይሲ ሊኬኮ» ጊዲ ኣማኖን ኤኪዳ ሚሻን ባርካ ባ ቦላ ፒርዶንታዴይ ኢዛዴይ ኣንጄቲዳዴ።
ROM 14:23 ጊዶ ኣቲን ዎዚናራ ሲꬊሼ ሚኮ ኢዚ ኣማኖን ሞንታ ጊሻስ ኢዛ ቦላ ፒርዴቲዴስ፤ ኣማኖን ኦꬆንታዚ ዉሪካ ናጋራ።
ROM 15:1 ኑኒ ኣማኖን ሚኒዳይቲ ሃንኮ ኣማኖን ሚኖንታይታ ሜቶ ቶካናስ ቤሴስ ኣቲን ኑ ጻላ ኡፋዬቲዛይታ ጊዳናስ ቤሴና።
ROM 15:2 ኑኒ ዉሪካ ሃራ ኣሲ ባ ኣማኖን ሚናና ማላ ኢዛ ጎኢዛዚኔ ኡፋይሲዛ ሚሽ ኣኔ ኦꬆስ።
ROM 15:3 ኪርስቶሲ ባና ኡፋይሲቤና፤ ሃራፔካ፥ «ኣሳይ ኔና ጫዪዳ ጫሻይ ታና ጋኪዴስ» ጌቴቲ ካሴ ጌሻ ማጻፋን ጻፌቲዳይሲ ፖሌቲዴስ።
ROM 15:4 ኑኒ ጌሻ ማጻፋታፔ ዴሚዛ ዳንዳያይኔ ሚኖቴꬂ ኑስ ዳና ማላ ኮይሮፔ ጻፌቲዳይሲ ዉሪካ ኑ ኢዛፔ ኑስ ቲሚርቴ ዴማና ማላ ጻፌቲዴስ።
ROM 15:5 ሚኖቴꬂኔ ዳንዳያ ኢሚዛ ጾሲ ኢንቴ ዬሱስ ኪርስቶሳ ካሊሺን ኢንቴስ ኢንቴ ጊዶን ኣያና ኢሲፌቴꬅ ኢሞ።
ROM 15:6 ሄሲካ ኢንቴ ኢሲ ዎዚናኒኔ ኢሲ ዶና ጊዲዲ ኑ ጎዳ ዬሱስ ኪርስቶሳ ኣዋ ጾሳ ቦንቻናሳ።
ROM 15:7 ሄሳ ጊሻስ ጾሲ ኢንቴና ጾሳ ቦንቾን ሞኪ ኤኪዳ ማላ ኢንቴካ ኢሶይ ኢሳ ኡፋይሳን ሞኪ ኤኪቴ።
ROM 15:8 ካሴ ኣዋታስ ኢሜቲዳ ሂዶታ ቃላ ፖላናስ ጾሳ ቱማቴꬂ ኤሬታና ማላ ኪርስቶሲ ኣይሁዳታስ ኦꬂዛዴ ጊዲዳይሳ ታ ኢንቴስ ዮታይስ።
ROM 15:9 ሄሳꬆካ ኣይዛቤቲ ኢዛ ማሮቴꬃ ጊሻስ ጾስ ጋላታና ማላ፤ ሄሲካ፥ «ታ ኔና ዴሬ ጊዶን ጋላታና፤ ኔ ሱንꬃስካ ጋላታ ማዛሙሬ ዬጻና» ጌቴቲ ጌሻ ማጻፋን ጻፌቲዳ ማላ።
ROM 15:10 ቃሴካ፥ «ኣይዛቤቶ! ኢንቴካ ጾሳ ዴሬታራ ኡፋዬቲቴ» ጌቴቲ ጌሻ ማጻፋን ጻፌቲዴስ።
ROM 15:11 ናምኣንꬆካ፥ «ኣይዛቤቲ ኢንቴ ዉሪካ ጎዳ ጋላቲቴ፤ ዴሬይ ዉሪ ኢዛ ሳቢቴ» ጌቴቲ ጌሻ ማጻፋን ጻፌቲዴስ።
ROM 15:12 ሄሳꬆ ኢሳያሳን፥ «ባ ዴሬ ኣሳ ቦላ ካዎቲዛ ኢሴዬ ናይ ያና። ኣላሜ ኣሳ ኣይሲዛዴይ ዴንዳና፤ ኢስቲካ ኢዛን ኡፋዬታና» ጌስ።
ROM 15:13 ኢንቴ ኢዛን ኣማኒዛ ጊሻስ ሂዶታ ጾሲ ኢንቴናን ኡፋይሲኔ ሳሮቴꬅ ኩንꬆ፤ ሄሲካ ጺሎ ኣያና ዎልቃ ሂዶታይ ኢንቴስ ዳራናሳ።
ROM 15:14 ታ ኢሻቶ! ኢንቴ ሎኤቴꬃን፥ ኤራቴꬅ ኡባን ኩሚዳይታኔ ሃራታ ዞራናስ ኤራይ ዲዛይታ ጊዲዳይሳ ታ ኣዳፌ ሻካ ኤራዲስ።
ROM 15:15 ታ ጾሳፌ ኤኪዳ ኢሞታ ጊና ቃሴካ ኢንቴና ቆፍሳናስ ኢሲ ኢሲ ዮኦታ ጻላቴꬃን ኢንቴስ ጻፋዲስ።
ROM 15:16 ሄሳ ሄ ኪያቴꬂ ኢሜቲዳይ ታኒ ጾሳ ሚሺራቾ ቃላ ሃንኮ ዴሬታስ ዮታና ማላሳ፤ ቃሴካ ቄሴ ማላ ጊዲዳ ዬሱስ ኪርስቶሳስ ኦꬃናሳ፤ ሄሳ ጊሻስ ሃንኮ ዴሬ ኣሳይ ጺሎ ኣያናን ዱማቲዲ ጾስ ኡፋይሲዛ ያርሾ ጊዲዲ ሺቃና ማላ ኦꬃይስ።
ROM 15:17 ሄሳ ታኒ ጾሳስ ኦꬂዛ ጊሻስ ዬሱስ ኪርስቶሳን ጬቄታይስ።
ROM 15:18 ታ ዮቲዳይሳኒኔ ታ ኦꬂዳይሳን ሃንኮ ዴሬ ኣሳይ ጾሳስ ኣዛዜታና ማላ ኪርስቶሲ ታናን ጊዲዲ ኦꬂዳዛፔ ኣቲን ሃራ ሃሳያና ጻሊኬ።
ROM 15:19 ሄሲካ ሃኒዳይ ጺሎ ኣያና ዎልቃን ማላታታ ባጋራ ሃኒዴስ፤ ሄሳ ማላንካ ዬሩሳላሜፔ ኢልዋቆሬ ጋካናስ ታ ኪርስቶሳ ሚሺራቾ ቃላ ሳባካዲስ።
ROM 15:20 ሃራ ኣሲ ካሴ ኦꬂዳሶን ታ ጌሎንታ ማላ ጋዳ ካሴ ኪርስቶሳ ሱንꬂ ጼይጌቲ ኤሮንታሶን ሚሺራቾ ቃላ ሳባካናይሲ ታስ ኣሞ።
ROM 15:21 ሃራፔካ፥ «ኢዛ ጊሻስ ኢስታስ ዮቴቶንታይቲ ኢዛ ቤያና፤ ሲዪ ኤሮንታይቲ ኣኬካና» ጌቴቲ ካሴ ጌሻ ማጻፋን ጻፌቲዳ ማላ ሃኒዴስ።
ROM 15:22 ሄሳ ጋሶን ታ ኢንቴኮ ቦንታ ማላ ዳሮ ዎዴ ዲጌታዲስ።
ROM 15:23 ሃኢ ቃሴ ታስ ሃን ኦሶይ ባይንዳ ጊሻስ ዳሮ ላይꬃታፔ ሃ ሲሚን ኢንቴና ቤያናስ ታ ዳሮ ላሞታዲስ።
ROM 15:24 ሃይሳ ታ ቆፋ ታኒ ኢስፔኔ ቢዛ ዎዴ ፖላናስ ቆፓይስ፤ ሄራ ኣꬋሼ ኢንቴና ቤያናሲኔ ኢንቴናራ ጉꬃ ዎዴ ጋምኣዳ ላሞታ ኣꬂዳ ማላ ኢንቴ ታና ማዳና ጋዳ ሂዶታ ኦꬃይስ።
ROM 15:25 ሃኢ ቃሴ ኣማኒዛይታስ ኢሜቲዛ ማዶ ሚሽ ኤካዳ ዬሩሳላሜ ባይስ።
ROM 15:26 ጋሶይካ ማቂዶኒያኒኔ ኣካያን ዲዛ ማንቆታ ማዳና ጾሳ ዴሬይ ዴንዲዴስ።
ROM 15:27 ሃይሳ ሃ ማዶዛ ኢስቲ ባ ዶሳን ኢሚዳይ ኢስቲ ኦꬃናስ ቤሲዛ ጊሻሳ፤ ኣይዛቤቲ ኣይሁዳታራ ኢሲፌ ኣያና ኣንጆ ኤኪዛይታ ጊዲኮ ኢስቲካ ባስ ዲዛ ቢታ ኣንጆን ኣይሁዳታ ማዳናስ ቤሴስ።
ROM 15:28 ሄሳ ጊሻስ ሃይሳ ሺቂዳ ማዶ ሚሻ ዬሩሳላሜን ኢሚዳፔ ጉዬ ኢንቴ ኣቻራ ታ ኢስፔኔ ባና።
ROM 15:29 ታ ሄ ኢንቴኮ ባሼ ኢንቴስ ኪርስቶሳ ኣንጆ ኩንꬃ ኤካ ባናይሳ ታ ኤራይስ።
ROM 15:30 ታ ኢሻቶ! ታኒ ጾሳ ዎሳን ባጼቲዛ ማላ ኢንቴካ ታናራ ባጼታና ማላ ታ ኢንቴና ጎዳ ዬሱስ ኪርስቶሳኒኔ ጺሎ ኣያና ሲቆን ዎሳይስ።
ROM 15:31 ታኒ ዩሁዳን ዲዛ ኣማኖንታ ኣሳ ኩሼፔ ኣታና ማላኔ ዬሩሳላሜን ዲዛ ታ ኦሶይካ ሄን ኣማኒዛይታ ኣቻን ኤኬታና ማላ ታስ ዎሲቴ።
ROM 15:32 ሄሲካ ጾሳ ሼኔ ማላ ሄ ኢንቴኮ ታ ኡፋይሳራ ባና ማላኔ ኢንቴናራ ኢሲፌ ሼምፓናሳ።
ROM 15:33 ሳሮቴꬃ ጎዳይ ኢንቴናራ ኡባታራ ጊዶ። ኣሚን።
ROM 16:1 ኪንኪራኦሴ ዎሳ ኬꬃን ኦꬂዛ ኣማኔቲዳ ሚቼዮ ፔቤኖ ኢንቴስ ሃዳራ ጋይስ።
ROM 16:2 ኣማኒዛ ኣሳስ ቤሲዛ ሞኮ ኢንቴ ኢዞ ጎዳ ሱንꬃን ሞኪ ኤካና ማላኔ ኢዛ ኢንቴፌ ኮይዛ ኣይ ሚሻንካ ኢንቴ ኢዞ ማዳና ማላ ታ ኢንቴና ቆፍሳይስ።
ROM 16:3 ካሴ ታናራ ጎዳ ዬሱስ ኪርስቶሳስ ኢሲፌ ኦꬂዳ ጲርሲቂላሲኔ ኣቂላስ ታ ሳሮካ ጋꬂቴ።
ROM 16:4 ኢስቲ ታ ጊሻስ ሃይቃና ጋካናስ ባና ኣꬂ ኢሚዳ፤ ታና ጻላላ ጊዶንታ ኣይዛቤታፔ ኣማኒዳይቲካ ኢስታ ጋላቴቴስ።
ROM 16:5 ኢስታ ኬꬃን ዲዛ ኣማኒዛ ኣሳካ ሳሮ ጊቴ፤ ኢሲያፔ ኮይሮ ኪርስቶሳን ኣማኒዳ ታ ሲቆዛ ኤጴኔጾሴ ሳሮ ጊቴ።
ROM 16:6 ኢንቴስ ዳሮ ዳቡርዳሮ ማራሞ ሳሮ ጊቴ።
ROM 16:7 ታናራ ኢሲፌ ቃሼቲዳ ኣንዲራቆኔኔ ዩኒያሴ ሳሮ ጊቴ፤ ሄይታንቲ ሃዋሬታ ጋርሳን ሎኦ ሱንꬃራ ዲዛይታኔ ኪርስቶሳ ታፔ ካሴ ኣማኒዳይታ።
ROM 16:8 ታኒ ጎዳ ባጋራ ዳሮ ሲቂዛ ጲልያጾኔ ሳሮ ጊቴ።
ROM 16:9 ኪርስቶሳ ኦሶ ታናራ ኢሲፌ ኦꬂዛ ኢሮባኖኔኔ ታ ሲቂዛ ሴንጻኬካ ሳሮ ጊቴ።
ROM 16:10 ኪርስቶሳን ኢዛ ኣማኖይ ፓጬቲዲ ጋላቴቲዳ ኤጼሴኔሴስ ታ ሳሮካ ጋꬂቴ፤ ኣርሲጻባሎሶ ኣሳሲካ ታ ሳሮካ ጋꬂቴ።
ROM 16:11 ታ ዳቦ ሄሮዲያና ሳሮ ጊቴ፤ ጎዳን ዲዛ ኒሪቃሶሶ ኣሳ ሳሮ ጊቴ።
ROM 16:12 ጎዳን ጊዲዲ ሚኖቴꬃን ኦꬂዛ ማጫሳታ ቲሮፊሞኖኔ ጺሮፊሞኖ ሳሮ ጊቴ፤ ጎዳስ ኦሶን ዳሮ ዳቡርዳሪስ ኪርስቶሳን ታኒ ኢዞ ሲቂዛ ጻርሲዲስ ታ ሳሮካ ጋꬂቴ።
ROM 16:13 ጎዳን ዶሬቲዳ ኤሩፎኔስ፥ ታሲኔ ኢዛስ ኣዮ ጊዲዳሪስ ታ ሳሮካ ዮቲቴ።
ROM 16:14 ኣስቄሮኔስ፥ ኣፊላሶኔስ፥ ሄሮሜኔስ፥ ጳጺሮባኔስ፥ ሄርማኔሲኔ ኢስታራ ዲዛ ኢሻታ ኡባታስ ታ ሳሮካ ጋꬂቴ።
ROM 16:15 ፊሌጎኔስ፥ ዩሊያስ፥ ኔሪያሲኔ ኢዛ ሚቼይስ ሄሳꬆካ ኣልጾኔስ፥ ኢስታራ ዲዛ ኣማኒዛይታሲካ ታ ሳሮካ ጋꬂቴ።
ROM 16:16 ኢሶይ ኢሳ ዬሪ ዬሪ ኤኪዲ ሳሮኬቲቴ፤ ኪርስቶሳን ኣማኒዛ ዎሳ ኬꬃ ኣሳይ ዉሪካ ኢንቴና ሳሮ ጌስ።
ROM 16:17 ታ ኢሻቶ! ኣሳ ጋርሳን ሻኬቴꬅ ሜꬊዛይታፔኔ ኢንቴ ታማርዳ ቲሚርታ ኤኮንታ ኢጾን ኢንቴስ ꬉጴ ጊዲዛ ኣሳታፔ ኢንቴ ናጌቲቴ።
ROM 16:18 ሄይታንታ ማላ ኣሳቲ ዬሱስ ኪርስቶሳስ ኦꬂዛይታ ጊዶንታ ባ ቃንꬃ ካꬃ ጊሻስ ኦꬂዛይታ፤ ሹጎ ቃላራ ሃሳያኒኔ ዎዚና ኪያ ኣሳታ ባሌꬄቴስ።
ROM 16:19 ኢንቴ ሚሺራቾ ቃላስ ኣዛዜቲዛይታ ጊዲዳይሳ ኣሲ ዉሪ ሲዪዴስ፤ ሄሲካ ታና ዳሮ ኡፋይሲዴስ፤ ጊዲኮካ ኢንቴ ሎኦ ሃኖስ ጪንጫታ ቃሴ ኢታ ኦሶስ ኤያታ ጊዳና ማላ ታ ኮያይስ።
ROM 16:20 ሳሮቴꬃ ጎዳይ ጻላኤ ኤሶን ኢንቴ ቶሆ ጋርስ ኣꬂ ዲንጬሬꬃና። ጎዳ ዬሱስ ኪርስቶሳ ኪያቴꬂ ኢንቴናራ ጊዶ።
ROM 16:21 ታናራ ኢሲፌ ኦꬂዛ ጺምቶሲ ቃሴካ ታ ዳቦ ሉቂዮሲ፥ ኢያሶኔይኔ ሱሲጴጺሮሲ ኢንቴና ሳሮ ሳሮ ጌቴስ።
ROM 16:22 ሃይሳ ኪታ ጻፊዳይ ታኒ ጼሪጺዮሲ ኢንቴና ጎዳ ሱንꬃን ሳሮ ጋይስ።
ROM 16:23 ታኒኔ ሃይሳን ዲዛ ኩሜꬃ ዎሳ ኬꬃ ኣሳይ ሞኪ ኤኪዛ ጋዪዮሲካ ኢንቴና ሳሮ ጌስ፤ ካታማ ሚሻ ኦይኪዛ ኤሪስጾሲኔ ኑ ኢሻ ቆኣጺሮሲ ኢንቴና ሳሮ ጌቴስ።
ROM 16:24 ጎዳ ዬሱስ ኪርስቶሳ ኪያቴꬂ ኢንቴናራ ኡባታራ ጊዶ። ኣሚን።
ROM 16:25 ታኒ ዮቲዛ ሚሺራቾ ቃላይ ዬሱስ ኪርስቶሳ ጊሻስ ዮቴቲዛ ኪታይኔ ቤኒ ዎዴፔ ዶሚዲ ቆታን ጋምኢዲ ሃኢ ቃሴ ቆንጪዳ ቱማ ጹራ ባጋራ ኢዚ ኢንቴና ኣማኖን ኤሳናስ ዳንዳዬስ።
ROM 16:26 ሃኢ ቃሴ ሃይሲ ቱማይ ቆንጪዴስ፤ ሜርና ጾሳ ኣዛዞን ዉሪካ ኣማኒዲ ኣዛዜታና ማላ ናቤታ ማጻፋ ባጋራ ዴሬቲ ዉሪካ ኢዛ ኤራና ማላ ሃኒዴስ።
ROM 16:27 ኢዚ ጻላላ ኤራ ጊዲዳ ጎዳስ ዬሱስ ኪርስቶሳ ባጋራ ሜርና ቦንቾይ ኢዛስ ጊዶ! ኣሚን።
1CO 1:1 ጾሳ ሼኔን ዬሱስ ኪርስቶሳስ ኪቴታናስ ጼይጌቲዳ ጳዉሎሳፔኔ ኑ ኢሻ ሶስቲኔሴፔ፥
1CO 1:2 ቆሮንቶሴን ዲዛ ጾሳ ዎሳ ኬꬃስ፥ ጎዳ ዬሱስ ኪርስቶሳስ ዱማቲዳይታሲኔ ኢስታሳራ ኑሳራ ጎዳ ጊዲዳ ጎዳ ዬሱስ ኪርስቶሳ ሱንꬃ ኣዋንካ ጼይጊዛ ኣማኒዛይታራ ጊዳናስ ጼይጌቲዳ ኣሳ ኡባስ፥
1CO 1:3 ኑ ኣዋ ጾሳፌኔ ጎዳ ዬሱስ ኪርስቶሳፔ ኪያቴꬂኔ ሳሮይ ኢንቴስ ጊዶ።
1CO 1:4 ጎዳ ዬሱስ ኪርስቶሳ ባጋራ ኢንቴስ ኢሜቲዳ ጾሳ ኪያቴꬃ ጊሻስ ኡባ ዎዴ ኢንቴ ጊሻሲካ ታኒ ጾሳ ጋላታይስ።
1CO 1:5 ጋሶይካ ኣይ ዮኦንካ፥ ሄሲካ ሃሳያን ጊዲን ኤራቴꬅ ኡባን ኢንቴ ዱሬቲዴታ።
1CO 1:6 ኪርስቶሳ ጊሻስ ኑ ኢንቴስ ማርካቲዳይሲ ኢንቴ ኣቻን ሚኒዴስ።
1CO 1:7 ሄሳ ጊሻስ ኢንቴ ዬሱስ ኪርስቶሲ ቆንጫና ጋላስ ናጊሺን ኣያና ኢሞታታፔ ኣይኮይካ ኢንቴስ ፓጬና።
1CO 1:8 ጎዳ ዬሱስ ኪርስቶሲ ናምኣንꬆ ያና ጋላሳን ኢንቴ ኢንቴ ቦላ ቦሬይ ባይንዳ ቤታና ማላ ዉርሴꬅ ጋካናስ ኢዚ ኢንቴና ሎኤꬂ ናጋና።
1CO 1:9 ኢዚ ባ ናዛ ኑ ጎዳ ዬሱስ ኪርስቶሳ ኢሲፌቴꬃኮ ኢንቴና ጼይጊዳ ጾሲ ኢዚ ኣማኔቲዳ ጾሳ።
1CO 1:10 ታ ኢሻቶ! ኢንቴ ጋርሳን ሻኬቴꬂ ዶንታ ማላ ኢንቴስ ኢሲ ዎዚናይኔ ኢሲ ቆፋይ ዳና ማላኔ ኢንቴ ኢንቴ ጋርሳን ኢሲኖ ጊዳና ማላ ጎዳ ዬሱስ ኪርስቶሳ ሱንꬃን ታ ኢንቴና ዎሳይስ።
1CO 1:11 ታ ኢሻቶ! ኢንቴ ጋርሳን ፓላማይ ዲዛይሳ ታ ቃሎኤ ሶ ኣሳፔ ሲያዲስ።
1CO 1:12 ዮኦዚካ ሃይሳ ማላ፤ ኢንቴ ጋርሳን ኢሲ ኢሲ ኣሳቲ፥ «ታ ጳዉሎሳ ባጋ» ጌቴስ፤ ባጋይ ቃሴ፥ «ታ ኣጲሎሳ ባጋ» ጌቴስ፤ ባጋይ ቃሴ፥ «ታ ኬፋ ባጋ» ጊሺን ሃራይ ቃሴ፥ «ታ ኪርስቶሳ ባጋ» ጌቴስ።
1CO 1:13 ሂስቲኮ ኪርስቶሲ ሻኬቲ ዎꬊዴ? ኢንቴ ጊሻስ ጳዉሎሲ ካቄቲዴ? ዎይኮ ጳዉሎሳ ሱንꬃን ጻማቄቲዴቲ?
1CO 1:14 ኢንቴ ጊዶፌ ቄሪስጶሳፔኔ ጋዪዮሳፔ ኣቲን ሃራ ኦናካ ታ ጻማቆንታ ጊሻስ ጾሳ ጋላታይስ።
1CO 1:15 ሄሳ ጊሻስ ኦኒካ፥ «ታ ጳዉሎሳ ሱንꬃን ጻማቄታዲስ» ጋና ኣሲ ዴና።
1CO 1:16 ቱሙካ ኢስቲፋኖሴ ሶ ኣሳ ጻማቃዲስ፤ ሄይታፔ ሃራ ታ ጻማቂዳኮ ታ ኤሪዛዴይ ዴና።
1CO 1:17 ኪርስቶሲ ታና ኪቲዳይ ሚሺራቾ ቃላ ዮታናስ ኣቲን ጻማቃናስ ጊዴና፤ ኪርስቶሳ ማስቃሌይ ሃዳ ጊዶንታ ማላ ታኒ ኣሳፔ ጊዲዳ ጪንጫቴꬃን ሳባኪኬ።
1CO 1:18 ማስቃሌዛ ኪታይ ꬋያና ዲዛይታስ ኤያቴꬃ፤ ጊዶ ኣቲን ኣታና ዲዛ ኑስ ጊዲኮ ጾሳ ዎልቃ።
1CO 1:19 «ጪንጫታ ጪንጫቴꬅ ታ ኢስታፌ ꬋይሳና፤ ኤራንቻታ ኤራቴꬃ ታ ሃዳ ኦꬃና» ጌቴቲ ጌሻ ማጻፋን ጻፌቲዴስ።
1CO 1:20 ጪንጫይ ኣዋን ዲዜ? ታማርዳ ኤራይ ኣዋን ዲዜ? ሃይሳ ዎዴዛ ፒልጊ ኤሪዛይ ኣዋን ዲዜ? ጾሲ ሃ ኣላሜዛ ኤራቴꬅ ኤያቴꬅ ኦꬂቤኔ?
1CO 1:21 ጾሳ ኤራቴꬃፌ ዴንዲዳይሳን ኣላሜይ ባ ኤራቴꬃን ጾስ ኤሮይ ጾኒን ሳባኮ ኤያቴꬃን ኣማኒዛይታ ኣሻናስ ጾሳ ሼኔ ጊዲዴስ።
1CO 1:22 ኣይ ዎዴካ ኣይሁዳቲ ዱማ ማላታ ኮዬቴስ፤ ጊሪኬ ኣሳቲ ቃሴ ኤራቴꬅ ኮዬቴስ።
1CO 1:23 ኑኒ ጊዲኮ ካቄቲዳ ኪርስቶሳ ሳባኮስ፤ ሄሲካ ኣይሁዳታስ ꬉጴ፤ ኣይዛቤታስ ቃሴ ኤያቴꬃ።
1CO 1:24 ጾሲ ጼይጊዳይታስ ኢስቲ ኣይሁዳታ ጊዲን ዎይኮ ጊሪኬ ዴሬ ኣስ ጊዲኮካ ኪርስቶሲ ጾሳ ዎልቃኔ ጾሳ ኤራቴꬃ።
1CO 1:25 ጋሶይካ ኣሳ ኤራፔ ጾሳ ኤያቴꬂ ኣꬊዳ ኤራቴꬃ፤ ኣሳ ሚኖቴꬃፌ ጾሳ ላፋቴꬂ ኣꬌስ።
1CO 1:26 ታ ኢሻቶ! ካሴ ኢንቴ ጼይጌቲዛ ዎዴ ኢንቴ ኣይ ማላ ኣሳኮ ኣኔ ቆፒቴ፤ ኣሳ ቆፋ ማላ ጊዲኮ ኢንቴፌ ዳሪዛይቲ ኤራታ ጊዴኬታ። ኢንቴፌ ዳሮቲ ዎልቃይ ባይንዳይታ፤ ዳሮቲካ ጊታ ኬꬃ ኣሳፔ ዬሌቲቤኬታ።
1CO 1:27 ጊዶ ኣቲን ጾሲ ኤራታ ዬላቻናስ ዴራፔ ኤያታ ዶሪዴስ፤ ጾሲ ሚኖታ ዬላቻናስ ኣላሜዛፔ ዳቡራንቻታ ዶሪዴስ።
1CO 1:28 ጾሲ ሃንኮ ኣማኖንታ ኣሳ ኣቻን ዴቴስ ጌቴቲ ኤሬቲዛ ሚሻታ ባይንዳ ሚሻ ማላ ኦꬃና ሃይሳ ኣላሜዛን ሌቄቲዳይታኔ ካዉዪዳይታ ላፋታ ዶሪዴስ።
1CO 1:29 ሄሳካ ኢዚ ኦꬂዳይ ኦኒካ ኢዛ ሲንꬃን ጬቄቶንታ ማላሳ።
1CO 1:30 ኢንቴና ቃሴ ጾሲ ዬሱስ ኪርስቶሳራ ኢሲፌቴꬂ ዳና ማላ ኦꬂዴስ፤ ሄሳ ጊሻስ ጾሲ ዬሱስ ኪርስቶሳ ኑ ኤራቴꬅ፥ ኑ ጺሎቴꬅ፥ ኑ ጌሻቴꬂኔ ኑና ኣሺዛዴ ጊዳና ማላ ኦꬂዴስ።
1CO 1:31 ሄሳ ጊሻስ ካሴ ጌሻ ማጻፋን ጻፌቲዳ ማላ፥ «ጬቄቲዛ ኣሲ ጎዳን ጬቄቶ።»
1CO 2:1 ታ ኢሻቶ! ታ ኢንቴኮ ጾሳ ጹራ ቆንጪሳና ቢዳይ ታስ ዶና ቃራቴꬂ ዎይኮ ኤራ ዳሮይ ዲዛ ጊሻስ ጊዴና።
1CO 2:2 ታ ኢንቴ ጊዶን ዲዛ ዎዴ ካቄቲዳ ዬሱስ ኪርስቶሳፔ ኣቲን ሃራ ኤሮንታ ማላ ታ ባጋራ ሙርታዲስ።
1CO 2:3 ታ ኢንቴኮ ዳሮ ዳቡራን፥ ያሻቴꬃኒኔ ዳሮ ኮኮራሼ ባዲስ።
1CO 2:4 ታ ቃላይኔ ሳባኮይካ ኣያና ዎልቃ ቆንጪሴꬃንፔ ኣቲን ጪሞኒኔ ኤራ ዳሮን ጊዴና።
1CO 2:5 ሄሲካ ኢንቴ ኣማኖይ ጾሳ ዎልቃንፔ ኣቲን ኣሳ ጪንጫቴꬃ ቦላ ጻጶንታ ማላ ሃኒዴስ።
1CO 2:6 ኑ ካሃ ኩንꬂዳ ኣሳታ ኣቻን ኤራ ሃሳያ ሃሳዮስ፤ ጊዶ ኣቲን ሃይሳ ሃ ኣላሜዛ ኤራቴꬅ ጊዴና፤ ዎይኮ ꬋያና ዲዛ ሃ ኣላሜዛ ሃሪዛይታ ኤራቴꬅ ጊዴና።
1CO 2:7 ጊዶ ኣቲን ኑ ሃሳይዛይ ካሴ ቆቴቲ ዲዛ ጾሳ ጹራ ኤራቴꬃ፤ ሄ ኤራቴꬃይ ጾሲ ዳሮ ዎዴፔ ካሴ ኑና ቦንቾስ ካሴቲዲ ጊግሲ ዎꬂዳይሳ።
1CO 2:8 ሃ ኣላሜዛ ሃሪዛይታፔ ኦኒካ ሃ ኤራቴꬃ ኤሪቤና፤ ኤሪዳኮ ኢስቲ ቦንቾ ጎዳ ካቄቴና።
1CO 2:9 ጊዶ ኣቲን ጌሻ ማጻፋን፥ «ኣሳ ኣይፌይ ቤኦንታዝ፥ ኣሳ ሃይꬂ ሲዮንታዝ፥ ኣሳ ዎዚናይካ ቆፖንታዝ ጾሲ ባ ዶሲዛይታስ ጊግሲዴስ» ጌስ።
1CO 2:10 ጾሲ ጊዲኮ ሄሳ ባ ኣያና ባጋራ ኑስ ቆንጪሲዴስ፤ ኣያናይካ ጾሳስ ዲዛ ጪማ ዮኦ ኣሾንታ ኡባ ፒልጊ ጼሌስ።
1CO 2:11 ኣሳ ጋርሳን ኢዛዴስ ዲዛ ኣያናፔ ኣቲን ኢዛዴ ዎዚና ኤሪዛይ ኦኔ? ሄሳꬆካ ጾሳ ኣያናፔ ኣቲን ጾሳ ቆፋ ኤሪዛይ ኦኒካ ዴና።
1CO 2:12 ጾሳፌ ኑስ ኢሜቲዳይሳ ኑኒ ኤራና ማላ ጾሳ ኣያናይ ኑስ ኢሜቲዴስ ኣቲን ኑኒ ሃይሳ ሃ ኣላሜዛ ኣያና ኤኪቤኮ።
1CO 2:13 ኑ ዮቲዛይ ሃይሳ፤ ኑኒ ኣሳፔ ታማርዳ ቃላ ጊዶንታ ኣያናፔ ታማርዳ ቃላ ሃሳዮስ፤ ኣያና ቱማቴꬃካ ኑ ቆንጪሲዛይ ኣያና ቃላና።
1CO 2:14 ጾሳ ኣያናይ ኢዛን ባይንዳ ኣሲ ጾሳ ኣያናፔ ጊዲዳዝ ኤካናስ ዳንዳዬና፤ ጋሶይካ ሄሳ ማላ ዮኦይ ኢዛስ ኤያቴꬃ፤ ኢዚ ባስ ኣያናን ፓጬቲዛዴ ጊዲዳ ጊሻስ ኢዚ ኤራናስ ዳንዳዬና።
1CO 2:15 ጾሳ ኣያናይ ኢዛን ዲዛዴይ ቃሴ ኡባካ ፓጬስ ኣቲን ባስ ኦናንካ ፓጬቴና።
1CO 2:16 ሄሲካ፥ «ጎዳ ቆፋ ኤራናስ ዳንዳይዛይ ኦኔ? ኢዛ ዞራናስ ዳንዳይዛይ ኦኔ?» ጌቴቲ ካሴ ጌሻ ማጻፋን ጻፌቲዳ ማላ፤ ኑስ ጊዲኮ ኪርስቶሳ ዎዚናይ ዴስ።
1CO 3:1 ታ ኢሻቶ! ታ ኢንቴና ኢንቴ ኪርስቶሳን ቡሮ ጉꬃ ናይታ ማላኔ ቡሮ ኣማኖይ ጌሎንታ ኣሳ ማላፔ ኣቲን ኣያናን ኩሚዳ ኣሳ ማላ ጋዳ ኢንቴስ ሃሳያናስ ዳንዳያቤኬ።
1CO 3:2 ኢንቴ ቡሮ ሚኖንታ ጊሻስ ታ ኢንቴና ማꬅ ፓሃዲስ ኣቲን ቡሮ ሚኖ ካꬅ ሚዛቤኬ፤ ሃኢካ ጊዲኮ ኢንቴ ቡሮኮ!
1CO 3:3 ኢንቴ ሃኢካ ቡሮ ኣማኖን ሚኖንታይታ ጊዲዳ ጊሻስ ኢንቴ ጊዶን ቃናቴቴꬂኔ ፓላማይ ዴስ፤ ሂስቲን ኢንቴ ቡሮ ኣማኖን ሚኖንታ ኣሳ ማላ ጊዴኬቲ? ኢንቴ ኦሶይ ጮ ሜላ ኣሲ ኦꬂዛይሳ ማላ ጊዴኔ?
1CO 3:4 ጋሶይካ ኢንቴ ጋርሳፌ ኢሶይ፥ «ታ ጳዉሎሳሳ» ሃንኮይሲ ቃሴ፥ «ታ ኣጲሎሳሳ» ጊኮ ኢንቴ ጮ ኣሾ ቆፋን ጻላላ ዲዛ ኣሳ ማላ ጊዴኬቲ?
1CO 3:5 ኤሮ! ጊዶ ኣቲን ኣጲሎሲ ኣዜ? ጳዉሎሲካ ኣዜ? ኢስቲ ጎዳይ ኢስታስ ኢሳስ ኢሳስ ኢሚዳ ማላ ኦꬂዛ ኦሳንቻታ፤ ኢንቴካ ኢስታ ባጋራ ኣማኒዴታ።
1CO 3:6 ታ ቶካዲስ፤ ኣጲሎሲ ሃꬄ ኡሺዴስ፤ ዲቺዳይ ጊዲኮ ጾሳ።
1CO 3:7 ሄሳ ጊሻስ ዲቺዛይ ጾስ ኣቲን ቶኪዛዴይካ፥ ሃꬄ ኡሺዛዴይካ ኣይኮካ ጊዴቴና።
1CO 3:8 ቶኪዛዴ ጊዲን ዎይኮ ኡሺዛዴ ጊዲን ኢስቲ ኢሲኖ፤ ኢስታፌ ኢሳዴይ ኢሳዴይ ባ ኦሶ ማላ ዎይቶ ኤካና።
1CO 3:9 ጋሶይካ ኑ ጾሳራ ኢሲፌ ኦꬂዛይታ፤ ኢንቴካ ጾሳ ጎሻ ጋዴኔ ጾሳ ኬꬃታ።
1CO 3:10 ጾሳፌ ታስ ኢሜቲዳ ኢሞቴꬃ ጊና ኬꬄ ኬጺዛ ሂላ ማላ ኬꬃይ ኤቃናስ ሎኤꬃ ጊጊሳዲስ፤ ኢዛ ቦላ ሃራ ኣሲ ኬꬅ ኬጻና፤ ጊዶ ኣቲን ኬꬅ ኬጺዛዴይ ዎስቲ ኬጻናኮ ናጌታናስ ቤሴስ።
1CO 3:11 ጋሶይካ ኬꬃይ ኬጼቴꬅ ኦይኬቲዳፔ ጉዬ ሃራ ዎꬂ ቃሴ ኬጻና ዳንዳይዛዴይ ኦኒካ ባ፤ ሄሲካ ኬꬃስ ዮቻይ ዬሱስ ኪርስቶሳ።
1CO 3:12 ኦኒካ ኬꬃይ ኮይሮ ኬጼቲዳይሳ ቦላ ዎርቃን ዎይኮ ቢራን ቦንቼቲዳ ሹቻን ዎይኮ ሚꬃኒኔ ማታን ዎይኮ ማቃን ኬጺኮ፥
1CO 3:13 ኢሳዴ ኢሳዴ ኦሶይ ኣይ ማላኮ ፒርዳ ጋላስ ቆንጫና፤ ጋሶይካ ሄ ጋላስ ኢሳዴ ኢሳዴ ኦሶይ ኣይ ማላኮ ታማን ፓጬቲ ኤሬታና።
1CO 3:14 ኦኒካ ኬጺዳ ኬꬂ ሚኒ ኤቂዛ ጊዲኮ ሄሳዴይ ባ ዎይቶ ኤካና።
1CO 3:15 ኢዛ ኦሶይ ጹጌቲዳዴይ ጊዲኮ ዎይቶይ ኢዛስ ዴናሺን ኢዛዴይ ባ ሁኤስ ኣታና፤ ጊዶ ኣቲን ኢዛዴ ኣቴꬂ ታማፔ ኣሲ ዋይዲ ኣቲዛ ኣቴꬃ ማላ ጊዳና።
1CO 3:16 ኢንቴ ኢንቴ ሁኤስ ጾሳ ኬꬄ ጊዲዳይሳኔ ጾሳ ኣያናይ ኢንቴ ጊዶን ዲዛይሳ ኤሬኬቲ?
1CO 3:17 ኦኒካ ጾሳ ኬꬄ ላሊኮ ጾሲ ኢዛዴ ላላና፤ ጾሳ ኬꬂ ጌሻ፤ ሄሲካ ኢንቴናኮ!
1CO 3:18 ኦኒካ ባርካ ባና ባሌꬆፎ፤ ኢንቴፌ ኦኒካ ሃይሳ ሃ ኣላሜዛን ባና ኤራንቻ ማላ ቆፒኮ ኢዛዴይ ኤራንቻ ጊዳና ማላ ባና ባርካ ኤያ ማላ ቆዶ።
1CO 3:19 ሃይሳ ሃ ዴሬዛ ኤራቴꬂ ጾሳ ኣቻን ኤያቴꬃ፤ ካሴ ጌሻ ማጻፋን፥ «ኢዚ ኤራንቻታ ኢስታ ጌኔ ኦሶ ጋሶን ዛሪዲ ኦይካና» ጌቴቲ ጻፌቲዴስ።
1CO 3:20 ቃሴካ ሃራሶን፥ «ኤራንቻታ ቆፋይ ሃዳ ጊዲዳይሳ ጎዳይ ኤሬስ» ጌቴቲ ጻፌቲዴስ።
1CO 3:21 ሄሳ ጊሻስ ዉሪካ ኢንቴስ ጊዲዳ ጊሻስ ኦኒካ ኣሳን ጬቄቶፎ።
1CO 3:22 ጳዉሎሳ ጊዲን፥ ኣጲሎሳ ጊዲን፥ ዎይኮ ኬፋ ጊዲን፥ ኣላሜ ጊዲን፥ ዴኦ ጊዲን፥ ዎይኮ ሃይቆ ጊዲን፥ ሃኢ ዲዛዝ ጊዲን፥ ዎይኮ ቡሮ ያና ሚሽ ጊዲን፥ ዉሪካ ኢንቴሳ።
1CO 3:23 ኢንቴካ ኪርስቶሳይታ፤ ኪርስቶሲካ ጾሳይሳ።
1CO 4:1 ሄሳ ጊዲዳ ጊሻስ ኣሲ ዉሪካ ኑና ኪርስቶሳ ኦሳንቻታ ማላኔ ጾሳ ጹራ ቆንጪሳናስ ሃዳራ ኤኪዳ ኣሳ ማላ ቆዳናስ ቤሴስ።
1CO 4:2 ሃዳራ ኤኪዳይቲካ ኣማኔቲዳይታ ጊዳናስ ቤሴስ።
1CO 4:3 ታ ቦላ ኢንቴ ፒርዲንካ ዎይኮ ዱላታ ኣሳይ ፒርዲንካ ታ ባጋራ ታስ ኣይኮይ ባ፤ ሃራይ ኣቶሺን ታርካ ታ ቦላ ፒርዲኬ።
1CO 4:4 «ታ ኤሪዛ ማላ ታኒ ታ ዎዚናራ ሲꬊዛ ሚሺ ባ፤ ጊዶ ኣቲን ሄሳ ጉሲ ታ ቦላ ሞሮይ ባ» ጉስ ጊዴና። ቡሮ ታ ቦላ ፒርዳናይ ጎዳ።
1CO 4:5 ሄሳ ጊሻስ ፒርዳና ዎዴይ ጋኮንታ ሃራ ኣይ ዮኦካ ፒርዶፍቴ፤ ጎዳይ ያና ጋካናስ ናጊቴ፤ ኢዚ ꬉማ ጊዶን ቆቴቲዳይሳ ቡሮ ቆንጬ ኬሳና። ኣሳ ዎዚና ጊዶን ዲዛ ቆፋካ ቆንጬ ኬሳና፤ ሄ ዎዴ ኢሲ ኢሲ ኣሲ ባስ ቤሲዛ ጋላታ ጾሳ ኣቻፌ ኤካና።
1CO 4:6 ሄሳ ጊሻስ ታ ኢሻቶ! ታ ኢንቴና ጎኣና ማላ ሃ ዮኦዛን ታናኔ ኣጲሎሳ ኢንቴስ ሌሚሶ ሺሻዲስ፤ ታ ሃይሳ ኦꬂዳይ፥ «ጻፌቲዳይሳፌ ኣꬎፋ» ጊዛይሳ ኢንቴ ኑፔ ታማራና ማላሳ። ሄሳ ጊሻስ ኢንቴ ኢሳዴ ሳቢዲ ሃራ ኣስ ካꬋናስ ቤሴና።
1CO 4:7 ኔኒ ኣዛን ኣꬋይ? ኔኒ ሃራፔ ኤኮንታ ኣቲዳ ሚሺ ኣዜ? ሂስቲን ኔ ዉርሳካ ኤኪዳይ ሃራ ኣሳፔ ጊዲኮ ሃራ ኣሳፔ ኤኮንታ ኣሳ ማላ ኣዛስ ጬቄታይ?
1CO 4:8 ሃኢ ጊዲኮ ኢንቴስ ኮሺዛዝ ኢንቴ ኡባ ዴሚዴታኔ ዱሬቲዴታ፤ ኑፔካ ሻኬቲዲ ካዎቲዴታ፤ ኢንቴ ቱሙካ ካዎቲዳኮ ኑኒካ ኢንቴናራ ካዎታናኮ ሺን።
1CO 4:9 ጋሶይካ ጾሲ ኑና ሃዋሬታ ኑ ቦላ ሃይቆ ፒርዳይ ፒርዴቲዳ ኣሳታ ማላ ኣሳ ኡባፌ ዉርሴꬅ ኦꬂዳዝ ታስ ሚሳቴስ፤ ሄሳ ጊሻስ ኣላሜስ፥ ኪታንቻታሲኔ ኣሳ ኡባስ ካሳ ሚሽ ጊዲዶስ።
1CO 4:10 ኑ ኪርስቶሳ ጊሻስ ኤያታ ጊዲዶስ፤ ኢንቴ ቃሴ ኪርስቶሳን ኤራንቻታ፤ ኑኒ ዳቡራንቻታ፤ ኢንቴ ጊዲኮ ሚኖታ፤ ኢንቴ ቦንቼቲዳይታ፤ ኑኒ ጊዲኮ ካዉሻታ።
1CO 4:11 ሃኖ ጋካናስ ኑ ጋፎስ፤ ሳሜቶስ፤ ካሎቶስ፤ ቡኬቶስ፤ ኣቂዛሶይ ꬋዪን ዋዬቶስ።
1CO 4:12 ኑ ኩሼራ ኦꬂ ዳቡሪ ኣቆስ፤ ኑና ቃንጊሺን ኑ ቃሴ ኣንጆስ፤ ኑና ጎዲሺን ኑ ዳንዳዮስ።
1CO 4:13 ኑ ሱንꬅ ኢስቲ ሞሪሺን ኑ ቃሴ ሎኦ ዛሮስ፤ ሃኖ ጋካናስ ኑኒ ቢታፌ ፒቴቲዳ ቡራ ጊዲዶስ።
1CO 4:14 ታ ሃይሳ ኢንቴስ ጻፊዛይ ኢንቴና ታ ዶሲዛ ታ ናይታ ማላ ዞራናስ ጋዳ ኣቲን ኢንቴና ዬላቻናስ ጊዴና።
1CO 4:15 ኢንቴና ኪርስቶሳን ዲቺዛ ዳሮ ኣሳቲ ዲኮካ ኢንቴስ ዳሮ ኣዋቲ ዴቴና፤ ታኒ ቃሴ ዬሱስ ኪርስቶሳ ሚሺራቾ ቃላን ኢንቴና ዬላዲስ።
1CO 4:16 ሄሳ ጊሻስ ኢንቴ ታና ሚሳታና ማላ ታ ኢንቴና ዎሳይስ።
1CO 4:17 ጎዳን ዳሮ ዶሴቲዳይሳኔ ኣማኔቲዳ ታ ና ጺምቶሳ ታ ኢንቴኮ ኪቲዳይ ሄሳ ጋሶና። ኢዚካ ዱማ ዱማሶን ዲዛ ዎሳ ኬꬃ ኣሳ ዉርሲ ታ ታማርሲዳ ቲሚርቴዛራ ጋጊዛይሳ ዬሱስ ኪርስቶሳን ዲዛ ዴኦ ኦጌ ጊሻስ ኢንቴና ኢዚ ቆፍሳና።
1CO 4:18 ኢንቴፌ ኢሲ ኢሲ ኣሳቲ ታ ናምኣንꬆ ኢንቴና ቤያናስ ቦንታዝ ኢስታስ ሚሳቲን ኦቶሬቲዳ።
1CO 4:19 ጊዶ ኣቲን ጎዳ ሼኔ ጊዲኮ ማታራ ታ ኢንቴኮ ባና፤ ሄ ባዳ ሄ ኦቶራንቻቲ ሃሳይዛዝ ጻላላ ጊዶንታ ኢስታስ ኣዛ ዎልቃይ ዲዛኮ ቤያና ኮያይስ።
1CO 4:20 ጋሶይካ ጾሳ ካዎቴꬂ ጮ ዶና ጻላላ ጊዶንታ ዶናፔ ቦላራ ጾሳ ዎልቃ።
1CO 4:21 ኤሮ! ኢንቴ ኮይዛይ ኣዋይሴ? ዱርቃ ኤካ ቦዬ? ዎይኮ ሲቆራኔ ኣሽኬቴꬃ ኣያናራ ቦዬ?
1CO 5:1 ኢንቴ ጋርሳን ዬላቺዛ ላይማይ ዲዛይሲ ዎሬቴስ፤ ሄሳ ማላ ቱናቴꬂ ኣማኖንታ ዴሬታ ኣቻንካ ዴና፤ ባ ኣዋ ማቾ ኤኪዳ ኣሲ ኢንቴኮን ዴስ።
1CO 5:2 ሂስቲን ሄሳ ማላ ዬላቺዛ ሚሺ ኢንቴ ጊዶን ዲሺን ኣዛስ ኦቶሬቴቲ? ሄሳፌ ሄ ዮኦዛን ኢንቴ ሙዞታናስ ኢንቴስ ቤሴኔ? ሄሳ ማላ ኦꬂዳዴ ኢንቴ ጋርሳፌ ዲጊቴ።
1CO 5:3 ታ ኢንቴናራ ኣሾን ኢሲፌ ዶንታ ኣጊኮካ ኣያናን ቃሴ ኢንቴናራ ዳይስ፤ ታ ሃኢ ኢንቴናራ ዲዛ ማላ ሄሳ ኦꬂዳዴ ቦላ ፒርዳዲስ።
1CO 5:4 ኢንቴ ሺቂዛሶን ታ ኢንቴናራ ዲዛ ጊሻስ ጎዳ ዬሱሳ ሱንꬃኒኔ ኢንቴ ጊዶን ዲዛ ኑ ጎዳ ዬሱሳ ዎልቃን ሄ ሞራንቻዛ ኣሾይ ꬋዪን ኢዛ ሼምፖይ ጎዳ ጋላሳን ኣታና ማላ ሄሳ ማላ ኣሲ ጻላኤስ ኣꬊ ኢሜቶ።
1CO 5:6 ኢንቴ ጬቄቲዛይሲ ሎኦስ ጊዴና፤ ጉꬃ ኢርሾይ ዳሮ ቡኬሶ ዴንꬄꬂዛ ኤሬኬቲ?
1CO 5:7 ኢንቴ ሃኢ ኢርሾይ ባይንዳ ኦራꬃ ቡኬሶ ጊዳና ማላ ካሴ ጫላ ኢርሾዛ ኢንቴ ጊዶፌ ዲጊቴ፤ ኑ ፓዚጋ ዶርስ ጊዲዳ ኪርስቶሲ ኑስ ያርሼቲዴስ።
1CO 5:8 ሄሳ ጊሻስ ኣኔ ኑኒ ፓዚጋ ባኣሌዛ ቆሆይኔ ኢታቴꬂ ኢዛን ኩሚዳ ካሴ ጫላ ኢርሾ ቦላ ጊዶንታ ኢርሾይ ባይንዳ ኡኬꬃን ሱሬቴꬃኒኔ ቱማን ቦንቾስ።
1CO 5:9 ኢንቴስ ላይማቲዛ ኣሳታራ ኢሲፌቴꬂ ዶንታ ማላ ታ ኢንቴስ ካሴ ዳብዳቤ ጻፋዲስኮሺን።
1CO 5:10 ኢንቴ ኣማኖስ ጊሼ ላይማቲዛ ኣሳራ ጊዶንታ ዎይኮ ጮ ጋጲጋጲዛይታራ፥ ካይሶቲዛይታራ፥ ኤቃስ ጎይኒዛይታራ ጋጎፍቴ ጉስ ጊዶንታ ዲሺን ሃኢ ታ ጻፊዳይ ኣማናይስ ጊሼ ላይማቲዛይታራ ዎይኮ ማꬆቲዛይታራ፥ ጋጲጋጲዛይታራ፥ ኤቃስ ጎይኒዛይታራ፥ ኣሳ ሱንꬅ ሞሪዛይታራ ዎይኮ ጫዪዛይታራ፥ ኣሳ ሚሽ ቦንቂዛዴንታራ ኢንቴስ ኢሲፌቴꬂ ዶፖ፤ ሄይታንታ ማላራ ሃራይ ኣቶሺን ካꬂካ ኢሲፌ ሞፒቴ።
1CO 5:12 ሃንኮ ኣማኖንታ ኣሳ ቦላ ፒርዳናስ ታና ኣዚ ጋꬂዜ? ዎሳ ኬꬃን ዲዛይታ ቦላ ኢንቴ ፒርዴኬቲ?
1CO 5:13 ዎሳ ኬꬃፌ ካሬራ ዲዛይታ ቦላ ጊዲኮ ጾሲ ፒርዳና፥ «ኢንቴ ኢንቴ ጊዶፌ ኢታ ኣስ ዲጊቴ» ጌቴቲ ጌሻ ማጻፋን ጻፌቲዴስ።
1CO 6:1 ኢንቴ ጋርሳፌ ኢሳዴስ ሃራ ኣማኒዛዴራ ዮኦይ ዲኮ ሄ ዮኦዛ ኣማኒዛይታ ኣች ሺሻናይሳ ዎስቲ ኣማኖንታ ኣሳ ሲንꬃን ፒርዴታና ሺሺዜ?
1CO 6:2 ኣማኒዛ ኣሳይ ኣማኖንታ ኣሳ ቦላ ፒርዳናይሳ ኢንቴ ኤሬኬቲ? ኢንቴ ቡሮ ኣላሜ ቦላ ፒርዳንዴታ፤ ጊዲኮካ ሄሳ ጉꬃ ዮኦ ቦላ ፒርዳናስ ዳንዳዬኬቲ?
1CO 6:3 ሃይሳ ቢታ ቦላ ዲዛ ፒርዳይ ኣቶሺን ኢንቴ ቡሮ ኪታንቻታ ቦላ ፒርዳናይሳ ኤሬኬቲ?
1CO 6:4 ኢንቴ ኢንቴ ጋርሳን ኦዬቲኮ ኣማኒዛይታ ማባራፔ ካሬን ዲዛይታኒኔ ካꬌቲዳ ኣሳታ ሲንꬃን ዎስቲ ኢንቴ ዮኦ ሺሼቲ?
1CO 6:5 ታ ሄሳ ኢንቴስ ጊዛይ ኢንቴና ዬላቻናሳ፤ ኢንቴ ጋርሳን ኣማኒዛይታ ጊጊሳናስ ዳንዳይዛ ዎዚናማ ኣሲ ዴኔ?
1CO 6:6 ጊዶ ኣቲን ኣማኒዛዴይ ሃራ ኣማኒዛዴ ሞታናስ ኣላሜ ፒርዳ ኬꬄ ባናስ ቤሲዜ?
1CO 6:7 ኢንቴ ጋርሳን ኢሶይ ኢሳ ሞቶይ ኢንቴ ኩንዴꬃስ ማላታ ቤሴስ። ኢንቴ ቆሃናፔ ቆሄቲኮ ሎኤኔ? ቃሴካ ኢንቴ ኣስ ባሌꬃናፔ ኢንቴና ኣሲ ባሌꬂኮ ሎኤኔ?
1CO 6:8 ኢንቴ ሃ ቆሄታናፔ ጌዴ ቆሄታኔ ባሌꬄታ፤ ሄሲካ ኢንቴ ኢሻታ፥
1CO 6:9 ማካላንቻቲ ጾሳ ካዎቴꬅ ጌሎንታይሳ ኤሬኬቲ? ሄሳ ማላ ዮኦን ባሌቶፍቴ። ላይማታና ቃቃቲዛይቲ፥ ኤቃ ኤቂዛይቲኔ ኣዴይ ኣዴራ ላይማቲዛይቲ፥
1CO 6:10 ዎይኮ ካይሶቲ፥ ጋጲጋጲዛይቲ፥ ማꬆቲዛይቲ፥ ኣስ ጫዪዛይቲኔ ቦንቂዛይቲ ጾሳ ካዎቴꬅ ላቴቴና።
1CO 6:11 ኢንቴፌ ኢሲ ኢሲ ኣሳቲ ሄይታንታ ማላ ሺን ሃኢ ቃሴ ጎዳ ዬሱስ ኪርስቶሳ ሱንꬃኒኔ ኑ ጾሳ ኣያናን ሜጬቲዴታ፤ ዱማቲዴታኔ ጺሊዴታ።
1CO 6:12 ሃራይ ዉሪካ ታስ ኢሜቲዴስ፤ ጊዶ ኣቲን ዉሪካ ጎኢዛዝ ጊዴና። ዉሪካ ታስ ኢሜቲዴስ ጊዶ ኣቲን ኣይ ሚሺካ ታና ሃሬና።
1CO 6:13 ቃሴ ካꬂ ኡሎሳ፤ ኡሎይካ ካꬃሳ፤ ጊዶ ኣቲን ጾሲ ናምኣካ ꬋይሳና፤ ኣሳቴꬂ ጎዳሳፌ ኣቲን ላይማስ ጊዴና፤ ጎዳይካ ኣሳቴꬃሳ።
1CO 6:14 ጾሲ ጎዳ ሃይቆፔ ዴንꬂዳ ማላ ኑናካ ቃሴ ኢዚ ባ ዎልቃን ሃይቆፔ ዴንꬃና።
1CO 6:15 ኢንቴ ኣሳቴꬃይ ኪርስቶሳ ኣሳቴꬃ ቢሊቴ ጊዲዳይሳ ኢንቴ ኤሬኬቲ? ሂስቲን ታ ኪርስቶሳ ኣሳቴꬃፌ ኢሳ ላይማን ኣቂዛ ኣሳታራ ኢሲኖ ሂስቶ? ሙሌካ ቤሴና።
1CO 6:16 ዎይኮ ላይማቲዛሪራ ኣቂዛዴይ ኢዚራ ኢሲ ኣሾ ጊዲዛይሳ ኢንቴ ኤሬኬቲ? «ናምኣይ ኢሲ ኣሾ ጊዴቴስ» ጌቴቲዴስ።
1CO 6:17 ጊዶ ኣቲን ጎዳራ ኢሲኖ ጊዲዛዴይ ኢዛራ ኢሲ ኣያና ጊዴስ።
1CO 6:18 ላይማፔ ሃኪቴ፤ ኣሲ ኦꬂዛ ሃራ ናጋራይ ዉሪ ኢዛዴ ኣሾፔ ካሬራ ሃኔስ፤ ላይማ ላይማቲዛዴይ ጊዲኮ ባርካ ባ ኣሳቴꬃ ቦላ ናጋራ ኦꬄስ።
1CO 6:19 ኢንቴ ኣሳቴꬃይ ኢንቴ ጋꬃን ዲዛ ጺሎ ኣያናስ ዱሳሶ ጊዲዳይሳ ኢንቴ ኤሬኬቲ? ሄ ኣያናይካ ኢንቴ ጾሳፌ ኤኪዳይሳ፤ ኢንቴካ ኢንቴስ ጊዴኬታ።
1CO 6:20 ኢንቴ ሚሻን ሻሜቲዴታ፤ ሄሳ ጊሻስ ኢንቴ ኢንቴ ኣሳቴꬃን ጾስ ቦንቺቴ።
1CO 7:1 ኢንቴ ታስ ጻፊዳ ማላ ኣሲ ማጫሳኮ ጋኮንታ ኣጊዛኮ ሎኦኮ! ጊዶ ኣቲን ላይማፔ ናጌታናስ ኣቱማሳስ ኢሳስ ኢሳስ ማቻ ዱ። ማጫሳስካ ኢሲኔይስ ኢሲኔይስ ኣዚናይ ዶ።
1CO 7:3 ኣዚናይ ባ ማቼይስ ኮሺዛዝ ኡባ ኦꬆ፤ ማቻካ ባ ኣዚናስ ኮሺዛዝ ዉርሳ ኦꬁ።
1CO 7:4 ማቺ ኣሳቴꬂ ኢዚስ ጻላላ ጊዶንታ ኣዚናሳራ ኮꬃ፤ ሄሳꬆካ ኣዚና ኣሳቴꬂ ኢዛስ ጻላላ ጊዶንታ ማቼይሳራ ኮꬃ።
1CO 7:5 ናምኣይ ዶሳን ዎሳስ ጊዲ ዞሬን ጊዶ ጊዲ ቃቺዳ ጋላሳታፔ ኣቲን ሃራ ጋላስ ኢሶይ ኢሳስ ኣካይ ጎፔቶ፤ ሄሳ ጋሶን ኢንቴስ ኢንቴና ሃሮይ ጾኒን ጻላኤይ ኢንቴና ፓጮንታ ማላ ናምኣይ ኢሲፌ ኣቂቴ።
1CO 7:6 ታ ሄሳ ጊዛይ ጮ ኣዛዞ ማላ ጊዶንታ ዞሬ ዞራይስ።
1CO 7:7 ኣሲ ዉሪ ታ ማላ ማቾ ኤኮንታ ዲዛኮ ታ ዶሳይስ፤ ጊዶ ኣቲን ኢሲ ኢሲ ኣሳስ ጾሳፌ ኢሜቲዳ ዱማ ዱማ ኢሞታይ ዴስ፤ ኢሳስ ኢሲ ቆሞ ኢሞታይ ዴስ፤ ሃንኮይሳስ ቃሴ ሃራ ቆሞ ኢሞታይ ዴስ።
1CO 7:8 ቡሮ ኤኮንታይታኔ ጌሎንታይታ ጊሻስ ቃሴካ ኣዚናይ ሃይቂዳ ማጫሳታ ጊሻስ ታ ጊዛይ ኢስቲ ጌሎንታኔ ኤኮንታ ታ ማላ ዲዛኮ ኢስታስ ሎኦ ጋይስ።
1CO 7:9 ጊዶ ኣቲን ኢስቲ ባና ናጋናስ ዳንዳዮንታይታ ጊዲኮ ጌሌቶኔ ኤኬቶ፤ ጮ ኣሞን ጹጌታናፔ ኤኮይኔ ጌሎይ ሎኦ።
1CO 7:10 ኤኪዳይታሲኔ ጌሊዳይታስ ታ ኢሚዛ ኣዛዞይ ሃይሳ፤ ሄሲካ ጎዳ ኣዛዞፔ ኣቲን ታ ኣዛዞ ጊዴና፤ ኣዚና ጌሊዳ ማጫሳያ ባ ኣዚናፔ ሻኬቱፉ።
1CO 7:11 ሻኬቲዛ ጊዲኮ ሃራ ኣዚና ጌሎንታ ኡቱ፤ ኣካይ ጊኮ ባ ኣዚናራ ጊጉ፤ ኣዚናይካ ባ ማቾ ኣንጂ ዬዶፎ።
1CO 7:12 ሃንኮ ኣሳስ ቃሴ ታ ሂዝጋይስ፤ ሄሳ ጊዛይካ ታና ኣቲን ጎዳ ጊዴና፤ ኣማኖንታ ማቻ ዲዛ ኣማኒዛዴይ ማቼያ ኢዛራ ዳና ዶሲኮ ኢዚ ኢዞ ኣንጂ ዬዳናስ ቤሴና።
1CO 7:13 ኣማኖንታ ኣዚናይ ዲዛ ኣማኒዛ ማጫሳያ ሄ ኣማኖንታ ኣዚናይ ኢዚራ ዳናስ ኮይኮ ኢዛ ኢዛፔ ኣንጄታ ባናስ ቤሴና።
1CO 7:14 ጋሶይካ ኣማኖንታ ኣዚናይ ኣማኒዛ ባ ማቼዪን ኣንጄቴስ፤ ኣማኖንታ ማጫሳያካ ኣማኒዛ ባ ኣዚናን ኣንጄታዉስ፤ ሄሳꬆ ሃኖንታ ኣጊኮ ኢንቴ ዬሊዳ ናይቲ ቱናታ ጊዳናሺን ሃኢ ቃሴ ኣንጄቲዳይታ።
1CO 7:15 ጊዶ ኣቲን ናምኣታፔ ኢሶይ ኣማኖንታዴይ ሻኬታና ኮይኮ ሻኬቶ፤ ኣዴ ጊዲን ማጫ ጊዲን ኣማኒዛዴይ ሄሳ ማላ ዎጋን ቃሼቴና፤ ጾሲ ኑና ሳሮን ዳና ማላ ጼይጊዴስ።
1CO 7:16 ሃኔ ኔኒ ኔ ኣዚና ኣሻናኮ ኣይ ኤራይ? ዎይኮ ሃይሶ ኔኒ ኔ ማቾ ኣሻናኮ ኣይ ኤራይ?
1CO 7:17 ጮ ኢሲ ኢሲ ኣሲ ጾሲ ጼይጊዳ ማላኔ ጎዳይ ዎꬂዳ ማላ ዴኦ፤ ዎሳ ኬꬃታስ ታ ዎꬂዛ ዎጋይ ሄሳ።
1CO 7:18 ኢሳዴይ ኣማናናፔ ካሴ ቃጻሬቲዳ ጊዲኮ ቃጻሬቶንታ ኣሳ ማላ ሃኖፖ። ቃሴ ቃጻሬቶንታ ዲሼ ኣማኒዳዴይካ ቃጻሬቶፎ።
1CO 7:19 ቃጻሬቲን ቃጻሬቶንታ ኣጊን ናምኣንካ ጎኣይ ዴና፤ ዋና ኣይፌ ዮኦይ ጾሳ ኣዛዞ ፖሎ።
1CO 7:20 ኢሲ ኢሲ ኣሲ ባ ጼይጌቲዳ ጼይጌቴꬃን ሚኒ ዴኦ።
1CO 7:21 ኣማኒዛ ዎዴ ኔ ኣይሌ? ኔ ሄሳስ ዳሮ ሜቶቶፓ፤ ዎዜታና ዳንዳይኮ ዎዜታ፤ ጋሶይካ ኣይሌ ጊዲ ዲሼ ጎዳ ኣማኒዳዴይ ኢዚ ጎዳ ጎቃ፤ ሄሳꬆካ ኣማኒዛ ዎዴ ጎቃ ጊዲዳዴይ ኢዚ ኪርስቶሳስ ኣይሌ።
1CO 7:23 ኢንቴ ሚሻን ሻሜቲዴታ፤ ሄሳ ጊሻስ ኣሳ ኣይሌ ጊዶፒቴ።
1CO 7:24 ታ ኢሻቶ! ኢንቴፌ ኢሲ ኢሲ ኣሲ ባ ጼይጌቲዳ ማላ ጾሳራ ሚኒ ዴኦ።
1CO 7:25 ጌላኦታኔ ፓንꬃታ ጊሻስ ታስ ጎዳፔ ኢሜቲዳ ኣዛዞይ ዴና፤ ጊዶ ኣቲን ጎዳ ማሮቴꬃፌ ዴንዲዳይሳን ታ ኢንቴስ ኣማኔቲዳዴ ጊዳዳ ኢንቴና ዞራይስ።
1CO 7:26 ሃይሳ ሃኢ ዎዴ ሜቶ ጋሶን ኢንቴ ሃኢ ዲዛ ማላ ዲዛኮ ታስ ሎኦ ሚሳቴስ።
1CO 7:27 ኔ ማቾ ኤኪዳዴ ጊዲኮ ኣንጃ ዬዳናስ ኮዮፓ፤ ማቾ ኤኮንታዴ ጊዲኮ ማቾ ኤካናስ ኮዮፓ።
1CO 7:28 ማቾ ኤኪኮካ ናጋራ ጊዴና። ጌላኦያካ ጌሊኮ ናጋራ ጊዴና፤ ጊዶ ኣቲን ኤኪዛ ኣሳታኔ ጌሊዛይታ ቦላ ሃይሳ ኣላሜዛን ኢስታ ዳሮ ሜቶይ ጋካና፤ ታ ቃሴ ሄሲ ኢንቴ ቦላ ጋኮንታ ኣጋናይሳ ዶሳይስ።
1CO 7:29 ታ ኢሻቶ! ታ ቆፋይ ሃይሳ ማላ፤ ዎዴዚ ቃንꬅ ጊዲዳ ጊሻስ ማቻ ዲዛዴይ ማቻ ባይንዳዴ ማላ ዴኦ።
1CO 7:30 ዬኪዛይቲ ዬኮንታ ኣሳ ማላ፥ ኡፋዬቲዛይቲ ኡፋዬቶንታ ኣሳ ማላ ጊዴቶ፤ ሚሼ ሻሚዳዴንቲ ሻሜቲዳ ሚሻ ባስ ጊ ቆፖፌቶ።
1CO 7:31 ሃይሳ ኣላሜዛ ሚሻን ጎኤቲዛይቲ ኡባይ ጎኤቶንታ ኣሳ ማላ ጊዲ ዴቶ። ጋሶይካ ሃይሳ ኣላሜዛ ሃኖይ ኣꬋናስ ዴስ።
1CO 7:32 ኢንቴ ሂርጋይ ባይንዳ ዳና ማላ ታ ኮያይስ፤ ማቾንታዴይ ጎዳ ኡፋይሳናስ ጎዳ ጊሻስ ቆፔስ።
1CO 7:33 ማቺዳዴይ ቃሴ ባ ማቺዮ ኡፋይሳናስ ሃይሳ ኣላሜዛ ሚሽ ቆፔስ።
1CO 7:34 ሃይሳን ኢዛ ቆፋይ ናምኡ ኬዚ ሻኬቴስ፤ ጌሎንታ ማጫሳያ ዎይኮ ጌላኦያ ጎዳዝ ጻላ ቆፓዉስ፤ ኢዚስ ጊታ ቆፋይካ ኣሾንካ፥ ኣያናንካ ጎዳስ ዱማቴꬃ፤ ጌሊዳራ ጊዲኮ ባ ኣዚና ኡፋይሳናስ ሃይሳ ኣላሜዛ ሃኖ ጻላ ቆፓዉስ።
1CO 7:35 ታ ሄሳ ጊዛይ ኢንቴስ ሎኣናዝ ቆፓዳፔ ኣቲን ኢንቴና ዳሮ ቆፋን ዬጋናስ ጊዴና፤ ታስ ዲዛ ጊታ ቆፋይ ኢንቴ ዎዚናይ ሻኬቲ ናምኡ ኬዞንታ ኢንቴ ጎዳን ሚኒዲ ዎጋራ ዴኣናሳ።
1CO 7:36 ኢሳዴይ ባ ኦይቺዳ ጌላኦዮ ዎጋራ ኦይኮንታ ኣጊኮ ኢዚ ዎዴይካ ጪሚ ጪሚ ቢኮ ኤካና ኮይኮ ባ ኮዪዳ ማላ ኤኮ፤ ኤኪኮኔ ጌሊኮ ሎኦ፤ ናጋራ ጊዴና።
1CO 7:37 ጊዶ ኣቲን ሃይሳ ሃ ዮኦዛን ኢዛ ዎዚናይ ቃጾንታ ባና ሃሪዲ ጌላኦዮ ኤኪኬ ጊዲ ሙርቲዳ ኣሲ ሎኦ ኦꬂዴስ።
1CO 7:38 ሄሳ ጊሻስ ጌላኦዮ ኤኪዳዴይ ሎኦ ኦꬂዴስ፤ ኤኮንታዴይካ ኣꬌꬃ ሎኦ ኦꬂዴስ።
1CO 7:39 ኢሲ ማጫሲ ኣዚናይ ፓጻ ዲዛ ዎዴ ኩሜꬃን ባ ኣዚናራ ቃሼታዱስ፤ ኣዚናዚ ሃይቂኮ ባ ኮዪዳ ኣስ ጌላና ዳንዳያዉስ፤ ኢዛ ጌላናዴይ ኣማኒዛዴ ጊዶ ኣቲን ጌሉ።
1CO 7:40 ታ ቆፋ ማላ ጊዲኮ ኢዛ ጌሎንታ ዲዛኮ ዳሮ ኡፋይሳን ዴኣንዱስ፤ ታስካ ታናን ጾሳ ኣያናይ ዲዛ ሚሳቴስ።
1CO 8:1 ኤቃስ ሹኬቲዳ ኣሾ ጊሻስ ኢንቴ ታስ ጻፊዳይሳ ማላ ጊዲኮ ቱሙካ ኑ ዉሪካ ኤሪዛ ሚሺ ዴስ፤ ኤሮይ ኦቶሪሴስ፤ ሲቆይ ጊዲኮ ጎኤስ።
1CO 8:2 ታ ኤራይስ ጊዛ ኣሲ ኤራናስ ቤሲዛ ማላ ቡሮ ኤሪቤና።
1CO 8:3 ጾስ ሲቂዛዴይ ጊዲኮ ኢዚ ጾሳ ኣቻን ኤሬቲዳዴ።
1CO 8:4 ሄሳ ጊሻስ ኤቃስ ያርሼቲዳ ኣሾ ሙሳ ጊሻስ ታ ኢንቴስ ጊዛይ ሃይሳ ኣላሜዛን ኤቃይ ሃዳ ጊዲዳይሳኔ ኢሲ ጾሳፌ ኣቲን ሃራ ጾሲ ባይንዳይሳ ኑ ኤሮስ።
1CO 8:5 ኣይዴካ ጊዲኮ ዳሮ ኤቃቲኔ ዳሮ ጎዳቲ ዴቴስ ሺን ሳሎን ጊዲን ሳኣ ቦላ ጾስ ጌቴቲዛ ዳሮ ኤቃቲ ዲኮካ ኑስ ጊዲኮ ሃኒዳይ ዉሪካ ኢዛን ሃኒዴስ። ኑኒካ ኢዛስ ጊዲዳ ኢሲ ጾሲ ኣዋይ ዴስ፤ ቃሴካ ሃኒዳዚ ዉሪካ ኢዛን ሃኒዳይ ኑኒካ ኢዛን ሃኒዳ ኢሲ ጎዳይ ዬሱስ ኪርስቶሲ ጻላላ ኑስ ዴስ።
1CO 8:7 ጊዶ ኣቲን ሄሳ ኣሲ ዉሪ ኤሬና፤ ኢሲ ኢሲ ኣሳቲ ሃኖ ጋካናስ ኤቃ ጎይኖ ዶሲዳ ጊሻስ ሄሳ ማላ ኣሾ ሚሼ ኣዳካ ኤቃስ ሹኬቲዳይሳ ቆፔቴስ፤ ኢስታስ ቆፋይ ላፋ ጊዲዳ ጊሻስ ኢስቲ ቱኔቴስ።
1CO 8:8 ጊዶ ኣቲን ካꬂ ኑና ጾሳ ኣች ጋꬄና፤ ኑ ሞንታ ኣጊኮካ ኑስ ፓጪዛይ ዴና፤ ኑ ሚኮካ ኑስ ዎꬌይ ዴና።
1CO 8:9 ጊዶ ኣቲን ኢንቴ ሜቶይ ባ ጉሳን ኦꬂዛይሲ ኣማኖን ሚኖንታ ኣሳስ ꬉጴ ጊዶንታ ማላ ናጌቲቴ።
1CO 8:10 ኔስ ሄሳ ሚሳቲዛ ኤራቴꬂ ዲዛ ጊሻስ ሂንኮ ኣማኖን ሚኖንታዴይ ኤቃ ኬꬃን ኔ ሚዛይሳ ቤኢዲ ኤቃስ ሹኬቲዳይሳ ማናስ ጻሌኔ?
1CO 8:11 ሄሳ ጊሻስ ኪርስቶሲ ኢዛ ጊሻስ ሃይቂዳ ሄ ኣማኖን ሚኖንታ ኢሻይ ኔ ኤራቴꬃ ጋሶን ꬋዬስ ጉሳ።
1CO 8:12 ሄሳꬆካ ኢንቴ ኢንቴ ኢሻታ ቆሆኒኔ ኢስታ ላፋ ቆፋ ማዱንꬆን ኪርስቶሳ ቆሄታ።
1CO 8:13 ሄሳ ጊሻስ ታ ሚዛ ሚሺ ታ ኢሻ ꬉጲዛዝ ጊዲኮ ታ ኢሻ ታ ꬉጴꬆንታ ማላ ሙሌካ ኣሾ ሚኬ።
1CO 9:1 ታኒ ጎቃ ኣስ ጊዲኪና? ታ ሃዋሬ ጊዲኪና? ኑ ጎዳ ዬሱሳ ታኒ ታ ኣይፌራ ቤያቤኪና? ኢንቴካ ጎዳን ታ ኦሶን ቤቲዳ ኣይፌ ጊዴኬቲ?
1CO 9:2 ሃራታስ ታ ሃዋሬ ጊዶንታ ኣጊኮካ ታ ኢንቴስ ቱማፔ ሃዋሬ፤ ጋሶይካ ጎዳን ታ ሃዋሬቴꬃ ቤሲዛ ማታሜይ ኢንቴና።
1CO 9:3 ታና ፓጪዛይታስ ታ ኢሚዛ ዛሮይ ሄሳ።
1CO 9:4 ኤሮ! ማናሲኔ ኡያናስ ኑስ ቤሴኔ?
1CO 9:5 ሃራ ሃዋሬታ ማላ ጎዳ ኢሻታ ማላኔ ኬፋንታ ማላ ኑኒካ ኣማኒዛ ኑ ማቼታ ኤኪ ዩያና ዳንዳዮኮኒ?
1CO 9:6 ዎይኮ ዋዬቲ ዳቡርዲ ዳናስ ቤሲዛይ ታናኔ ባርናባሳ ጻላ?
1CO 9:7 ኤሮ! ባ ሚሻራ ዎታዳራቴꬅ ኦꬂዛይ ኦኔ? ዎይኔ ሚꬅ ቶኪዲ ሄ ቶኪዳ ሚꬃ ኣይፌ ሞንታይ ኦኔ? ሜሄ ሄሚሼ ባ ሄሚዛ ሜሄዛ ማꬅ ኡዮንታይ ኦኔ?
1CO 9:8 ታ ሃይሳ ጊዛይ ጮ ኣሳ ቆፋ ማላ ጻላ? ሙሴ ዎጋይ ሄሳꬆ ጌኔ?
1CO 9:9 ሙሴ ዎጋ ጋርሳን፥ «ካꬅ ቡኪዛ ሜሄ ዶና ቃቾፋ» ጌቴቲ ጻፌቲዴስ፤ ሂስቲን ጾስ ሜቲዳይ ሄ ሜሄዛ ቃንꬄ?
1CO 9:10 ኢዚ ሄሳ ጊዳይ ቱማፔ ኑ ጊሻስ ጊዴኔ? ሄሲ ጻፌቲዳይ ኣዳፌ ኑ ጊሻሳ፤ ጎሻንቻይኔ ቃሴካ ቡኪዛይሲ ባ ኦሶ ኣይፌፔ ባና ጋኪዛይሳ ኤካናስ ሂዶታ ኦꬄስ።
1CO 9:11 ኑ ኢንቴ ጊዶን ኣያና ዜሬꬅ ዜሪዳይቲ ኣሾስ ጊዲዛዝ ማጺኮ ሄሲ ጊታ ሚሼ?
1CO 9:12 ሃራ ኣሳቲ ኢንቴፌ ሄሳ ማላ ጎኣ ኤካናስ ዳንዳይኮ ኑ ቃሴ ሄሳፌ ዳሮ ዴማናስ ቤሴኔ? ጊዶ ኣቲን ኑኒ ኑስ ቤሲዛ ማላ ጎኤቲቤኮ፤ ሃራፔካ ኑ ኪርስቶሳ ሚሺራቾ ቃላስ ꬉጴ ጊዶንታ ማላ ሃኒዛዝ ኡባካ ዳንዳዮስ።
1CO 9:13 ጾሳ ኬꬃን ኦꬂዛይቲ ባ ማናይሳ ጾሳ ኬꬃፌ ኤኪዛይሳ ማላ ያርሾሶን ኦꬂዛይቲካ ሄ ባ ያርሺዛይሳፌ ሚዛይሳ ኢንቴ ኤሬኬቲ?
1CO 9:14 ሄሳꬆካ ሚሺራቾ ቃላ ሳባኪዛይቲ ባስ ኮሺዛይሳ ሚሺራቾ ቃላ ኦꬂዛሶፔ ኤካና ማላ ጎዳይ ዎጋ ዎꬂዴስ።
1CO 9:15 ታኒ ጊዲኮ ሄሳ ኡባፌካ ኣይኮካ ጎኤታቤኬ፤ ሃኢካ ታ ኢንቴስ ሃይሳ ጻፊዛይ ሄይታንታ ማላ ሚሽ ታስ ኦꬄቶ ጋዳ ጊዴና። ኣይስ ጊኮ ኦኒካ ታኒ ታ ጎዳን ጬቄቲዛሮ ታፔ ዎꬂ ኤካናፔ ታስ ሃይቆይ ሎኦ።
1CO 9:16 ሚሺራቾ ቃላ ሳባኪዳይሲ ታና ጬቂሴና፤ ታ ሳባኪዛይ ዶሳን ጊዶንታ ዎልቃራ ታና ጋኪዳ ጊሻሳ፤ ታ ሚሺራቾ ቃላ ሳባኮንታ ኣጊኮ ታስ ኣዬ ኣና!
1CO 9:17 ሚሺራቾ ቃላ ታኒ ታ ዶሳን ሳባኪኮ ታስ ዎይቶይ ዴስ፤ ታኒ ታ ዶሳን ጊዶንታ ዎልቃራ ኦꬂዛይሳ ጊዲኮ ሃዳራ ፖላና ማላ ኦሶ ጻላላ ጊዳና።
1CO 9:18 ሂስቲን ታስ ኣዛ ዎይቶይ ዲዜ? ታስ ዎይቶይ ዳናይ ሚሺራቾ ቃላ ሳባካሼ ታስ ቤሲዛይታ ታ ጎኤቶንታ ኣጊኮኮ።
1CO 9:19 ታ ጎቃፔ ኣቲን ኦናስካ ኣይሌ ጊዲኬ፤ ጊዶ ኣቲን ዳሮታ ጎዳኮ ዛራና ጊሻስ ኣሳ ኡባስ ኣይሌ ማላ ጊዳዲስ።
1CO 9:20 ኣይሁዳታ ኣሻናስ ኣይሁዳታራ ኢስታ ሚሳታዲስ፤ ታኒ ታ ባጋራ ሙሴ ዎጋፔ ጋርሳራ ጊዶንታ ዳሼ ሙሴ ዎጋፔ ጋርሳራ ዲዛይታ ኣሻናስ ኢስታ ሚሳታዲስ።
1CO 9:21 ታኒ ታ ባጋራ ጾሳ ዎጋይ ዲዛዴኔ ኪርስቶሳ ዎጋስ ሃሬቲዛዴ ጊዲኮካ ዎጋይ ባይንዳይታ ኣሻናስ ኢስታ ማላ ዎጋይ ባይንዳዴ ጊዳዲስ።
1CO 9:22 ዳቡራንቻታ ኣሻናስ ጋዳ ታኒካ ዳቡራንቻታራ ኢስታ ማላ ዳቡራንቻ ጊዳዲስ፤ ታስ ዳንዳዬቲዳ ማላ ኡባን ኢሲ ኢሲ ኣሳታ ኣሻናስ ኣሳ ኡባራ ኢስቲ ሃኒዛዝ ሃናዲስ።
1CO 9:23 ታ ሃይሳ ዉርሳ ኦꬂዛይ ሚሺራቾ ቃላ ኣንጆ ኢስታራ ጊሼታናስ ሚሺራቾ ቃላ ጊሻስ ኦꬃዲስ።
1CO 9:24 ጋዴ ዎꬅ ዎጺዛይቲ ዳሮ ሺን ጾኒዲ ዎይቶ ዴሚዛይ ኢሳዴ ጻላላ ጊዲዳይሳ ኢንቴ ኤሬኬቲ? ሄሳ ጊሻስ ዎይቶ ኤካናስ ዎጺዛዴ ማላ ኢንቴካ ዎጺቴ።
1CO 9:25 ጋዴን ዎጺ ኣꬋናስ ጊጌቲዛዴይ ኦኒካ ሃኖ ኡባን ባርካ ባና ናጌስ። ሄይታንቲ ኣꬋናኔ ꬋያና ኣኪሊሌ ኤካናስ ዳቡሬቴስ ሺን ኑ ቃሴ ሜርናስ ꬋዮንታ ኣኪሊሌ ዴማናስ ዳቡሮስ።
1CO 9:26 ሄሳ ጊሻስ ታ ቃሴ ፖሎይ ባይንዳ ጮ ሜላ ዎጺዛዴ ማላ ዎጺኬ፤ ቃሴካ ጫርኮራ ባጼቲዛዴ ማላ ጮ ሜላ ጋዴን ባጼቲኬ።
1CO 9:27 ታ ቃሴ ሃራታስ ሳባካ ፔኣዳ ታስ ኩንዳ ኣቶንታ ማላ ታ ኣሳቴꬅ ሺሻ ኦይካዳ ሃራይስ።
1CO 10:1 ታ ኢሻቶ! ካሴ ኑ ኣዋቲ ሻራይ ኢስታፌ ቦላራ ጊዲዲ ካሌꬂዳይሳ ማላኔ ኢስቲ ዉሪካ ዞኦ ኣባ ፒኒዳይሳ ታ ኢንቴና ቆፍሳናስ ኮያይስ።
1CO 10:2 ኢስቲ ሙሴራ ጊዳናስ ጊዲ ሻራኒኔ ኣባን ጻማቄቲዳ።
1CO 10:3 ዉሪካ ኢሲ ኣያና ቁማ ሚዳ።
1CO 10:4 ዉሪካ ኢሲ ኣያና ኡሹ ኡዪዳ፤ ኢስቲ ኡዪዳይካ ባና ካሊዛ ኣያና ዛላፌ ፑልቲዳይሳፌ፤ ሄ ዛላይካ ኪርስቶሳ።
1CO 10:5 ጊዶ ኣቲን ጾሲ ዳሮታን ኡፋዬቲቤና፤ ሄሳ ጊሻስ ኢስታ ኣሃይ ባዞን ኩንዲ ኣቲዴስ።
1CO 10:6 ኢስቲ ኢታ ሚሽ ኣሞቲዳይሳꬆ ኑኒካ ኣሞቶንታ ማላ ኢስታ ሃኖይ ኑ ናጌታና ማላ ኑስ ሌሚሶ ጊዲዴስ።
1CO 10:7 «ዴሬይ ማናሲኔ ኡያናስ ኡቲዴስ፤ ዬጻናስካ ዴንዲዴስ» ጌቴቲ ካሴ ጌሻ ማጻፋን ጻፌቲዳ ማላ ኢስታ ጋርሳፌ ኢሲ ኢሲ ኣሳቲ ኦꬆይሳꬆ ኢንቴካ ኤቃ ጎይኒዛይታ ጊዶፒቴ።
1CO 10:8 ኢስታ ጋርሳፌ ኢሲ ኢሲ ኣሳቲ ላይማቲዲ ኢሲ ጋላስ 23,000 ኣሳይ ዲፒ ጊ ዉሮይሳꬆ ዉሮንታ ማላ ኑኒካ ኣኔ ላይማቶኮ።
1CO 10:9 ኢስታ ጋርሳፌ ኢሲ ኢሲ ኣሳቲ ጎዳ ፓጪዲ ሾሻን ዱኬቲ ሃይቂ ꬋይዳይሳ ማላ ኑኒካ ኣኔ ጎዳ ፓጮኮ።
1CO 10:10 ኢስታ ጋርሳፌ ኢሲ ኢሲ ኣሳቲ ዙዙሚዲ ꬋይሲዛ ቦሻ ኪታንቻን ꬋይዳይሳꬆ ኢንቴካ ꬋዮንታ ማላ ዙዙሞፒቴ።
1CO 10:11 ሄሲ ዉሪ ኑስ ሌሚሶ ጊዳና ማላ ኢስታ ቦላ ጋኪዴስ፤ ዎዴ ዉርሴꬃን ዲዛ ኑስ ቲሚርቴ ጊዳና ማላ ኑስ ጻፌቲዴስ።
1CO 10:12 ሄሳ ጊሻስ ታ ሚና ኤቃ ዳይስ ጊዛዴይ ዲኮ ኩንዶንታ ማላ ባስ ናጌቶ።
1CO 10:13 ኣሳ ቦላ ጋኪዳ ፓጬፔ ሃራ ኣꬊዛ ፓጬይ ኢንቴ ቦላ ጋኪቤና፤ ጾሲ ኣማኔቲዛ ጾስ ጊዲዳ ጊሻስ ኢንቴ ዳንዳዮንታ ኢንቴ ዎልቃፌ ቦላራ ኢንቴ ፓጬቴና ማላ ኢዚ ኢንቴና ኣጋጌና፤ ጊዶ ኣቲን ኢንቴ ፓጬቲዛ ዎዴ ሄ ፓጬዛ ኢንቴ ዳንዳያና ማላ ዎልቃ ኢሚዲ ፓጬፔ ኢንቴ ኬሲ ኤካና ኦጌ ኢዚ ኢንቴስ ጊጊሳና።
1CO 10:14 ሄሳ ጊሻስ ታ ሲቆቶ! ኤቃስ ጎይኖፍቴ፤ ኢዛፔ ሃኪቴ።
1CO 10:15 ታ ኢንቴስ ሃይሳ ጊዛይ ዎዚናማ ጊዲዳ ጊሻሳ፤ ሄሳ ጊሻስ ታ ዮቲዛይሳ ኣኔ ኢንቴ ኢንቴርካ ፒርዲቴ።
1CO 10:16 ኑኒ ጾሳ ጋላቲዲ ኤኪዛ ኡሻይ ኪርስቶሳ ሱꬃራ ጋጎቴꬂ ዲዛይሳ ጊዴኔ? ሄሳꬆካ ኑ ባꬂ ባꬂ ጊሼቲ ሚዛ ኡኬꬃይ ኪርስቶሳ ኣሾራ ጋጎቴꬂ ዲዛይሳ ጊዴኔ?
1CO 10:17 ኡኬꬃይ ኢሲኖ ጊዲዳ ማላ ኑኒካ ዳሮ ጊዲ ኡቲዲ ዉሪካ ኢሲ ኣሾ፤ ኑ ዉሪካ ኢሲ ኡኬꬃዛ ጊሼቲ ሞስ።
1CO 10:18 ኣኔ ኢንቴ ኢስራኤሌ ናይቲ ኦꬂዳይሳ ቆፒቴ፤ ሺቂዛ ያርሾዛፔ ሚዛይታስ ያርሾይ ሺቂዛሶራ ጋጎቴꬂ ዴኔ?
1CO 10:19 ሂስቲን ኤቃስ ያርሼቲዳ ያርሾ ጊዲን ዎይኮ ኤቃይ ባ ባጋራ ጎኣራ ዴስ ጋዚና?
1CO 10:20 ጊዴና! ኣማኖንታ ኣሳይ ሺሺዛ ያርሾይ ጾሳስ ጊዶንታ ጻላኤሳ፤ ኢንቴስ ጻላኤራ ኢሲፌቴꬂ ዳና ማላ ታ ኮይኬ።
1CO 10:21 ጻላኤ ኡሺኔ ጎዳ ኡሹ ኢንቴ ኢሲፌ ጋꬂ ኡያና ዳንዳዬኬታ፤ ጎዳ ማዳፌኔ ጻላኤ ማዳፌ ጋꬂ ማና ዳንዳዬኬታ።
1CO 10:22 ኑኒ ጎዳ ሃንቄꬂኖ? ኑ ኢዛፔ ሚኒዞኒ?
1CO 10:23 ዉሪካ ታስ ኢሜቲዴስ ሺን ዉሪካ ታና ጎኢዛዝ ጊዴና፤ ዉሪካ ታሳ ሺን ዉሪካ ታና ማዴና።
1CO 10:24 ኣሲ ዉሪካ ባ ላጌ ጎኣናዝ ጋꬂ ጼሎ ኣቲን ባና ጎኣናዝ ጻላላ ኮዮፖ።
1CO 10:25 ጊያን ባይዜቲዛ ኣሾ ኡባ ሲꬌይ ባይንዳ ሚቴ።
1CO 10:26 ቢታይኔ ቢታ ቦላ ዲዛይ ዉሪካ ጎዳይሳ።
1CO 10:27 ኣማኖንታ ኣሲ ኢንቴና ባሶ ጼይጊዲ ሺሺዳ ካꬅ ዉርሲ ኣይኮካ ሲꬎንታ ሚቴ።
1CO 10:28 ጊዶ ኣቲን ኢሳዴይ፥ «ሃይሲ ኤቃስ ያርሼቲዳ ካꬃ» ጊኮ ሄ ካꬃ ሄ ኣዴዛ ቆፋ ጊሻሲኔ ኢንቴና ሲꬊስኮ ሞፒቴ።
1CO 10:29 ታ ኢንቴስ ሄሳ ጊዛይ ሄ ዮቲዳዴ ቆፋ ጊሻስ ጋዲስ ኣቲን ኢንቴ ቆፋ ጊሻስ ጋቤኬ፤ ታ ጺሎ ጊዳ ዲሺን ኣዛስ ሃራ ኣሳ ቆፋ ጋሶን ታ ቦላ ፒርዴቲዜ?
1CO 10:30 ታ ጾስ ጋላታዳ ሚዛዴ ጊዳ ኡታዳ ኣዛስ ሃራ ኣሳን ፒርዴቶ?
1CO 10:31 ሂስቲኮ ኢንቴ ኣይ ሚኮካ፥ ኣይ ኡዪኮካ ዎይኮ ኣይኮ ኦꬂኮ ዉርሲካ ጾሳ ቦንቾስ ኦꬂቴ።
1CO 10:32 ኣይሁዳ ኣሳስ ጊዲን ኣይዛቤታስ ጊዲን ዎይኮ ጾሳ ዎሳ ኬꬃስ ኦናስካ ꬉጴ ጊዶፒቴ።
1CO 10:33 ታ ኣስ ዉርሳካ ኣይ ኦጌራካ ኡፋይሳና ኮይዛ ማላ ኢንቴካ ሄሳꬆ ኦꬂቴ፤ ዳሮቲ ኣታና ማላ ታ ታና ጎኢዛዝ ጊዶንታ ኢስታ ጎኢዛዝ ኮያይስ።
1CO 11:1 ታኒ ኪርስቶሳ ሌሚሶ ካሊዛ ማላ ኢንቴካ ታ ሌሚሶ ካሊቴ።
1CO 11:2 ኢንቴ ታስ ዉርሲ ቆፒዛ ጊሻሲኔ ታፔ ኤኪዳ ቲሚርቴዛ ሎኤꬂ ኦይኪዳ ጊሻስ ታ ኢንቴና ጋላታይስ።
1CO 11:3 ጊዶ ኣቲን ታ ኢንቴ ኤራና ማላ ኮይዛይ ኣቱማሳስ ኡባስ ሁኤይ ኪርስቶሳ ጊዲዳይሳ ማላ ኣቱማሳይ ማጫስ ኡባስ ሁኤ፤ ቃሴ ጾሲ ኪርስቶሳስ ሁኤ።
1CO 11:4 ባ ሁኤ ጉሉንቲዲ ጾስ ዎሲዛዴይ ዎይኮ ቃላ ዮቲዛዴይ ኦኒካ ባርካ ባና ካዉሼስ።
1CO 11:5 ባ ሁኤ ጎዞንታ ዎሲዛ ማጫሳያ ዎይኮ ቲንቢቴ ቃላ ዮቲዛ ኣይ ማጫሲካ ባርካ ባና ካዉሻዉስ፤ ሄሲ ኢዛ ባ ሁኤ ቡሊሲዳዴራ ጊና።
1CO 11:6 ማጫሲ ባ ሁኤ ጎዞንታ ኣጊኮ ሜዴቱ ዎይኮ ቃንጺሱ፤ ኢዚስ ሁኤ ሜዴቴꬂ ዎይኮ ቃንጺሴꬂ ዬላቺዛዝ ጊዲኮ ጎዙ።
1CO 11:7 ኣዴይ ባ ሁኤ ጉሉንታናስ ቤሴና፤ ኣቱማሲ ጾሳ ሌሚሶኔ ጾሳ ቦንቾ፤ ማጫሲ ጊዲኮ ኣዴስ ቦንቾ።
1CO 11:8 ጋሶይካ ማጫሲ ኣዴፌ ሜꬌታዱስ ኣቲን ኣቱማሲ ማጫሳፌ ሜꬌቲቤና።
1CO 11:9 ቃሴካ ማጫሲ ኣዴስ ሜꬌታዱስ ኣቲን ኣዴይ ማጫሳስ ሜꬌቲቤና።
1CO 11:10 ሄሳ ጊሻስ ኪታንቻቲ ቤያናስ ናጊዛ ማጫሳስ ኢሜቲዳ ማታ ቤሲዛ ጎሴ ባ ሁኤን ጎዙ።
1CO 11:11 ጎዳ ኣቻን ጊዲኮ ማጫሲ ኣዴይ ባይንዳ፥ ኣዴይካ ማጫሲ ባይንዳ ዴኤቴና።
1CO 11:12 ማጫሲ ኣዴፌ ቤቲዳይሳꬆ ኣዴይካ ማጫሳፌ ዬሌቴስ፤ ጊዶ ኣቲን ናምኣይካ ጾሳፌ ቤቲዳ።
1CO 11:13 ማጫሲ ባ ሁኤ ጎዞንታ ጾስ ዎሳናስ ቤሲዛኮ ኣኔ ኢንቴ ፒርዲቴ።
1CO 11:14 ኣቱማሲ ባ ሁኤ ኣዱሲ ዲቺኮ ቦርሶ ጊዲዳይሳ ኢንቴና ሜꬌቴꬃ ሃኖቴꬂ ኤሪሱዌ?
1CO 11:15 ማጫይ ጊዲኮ ባ ሁኤ ቢናና ዲቺኮ ሄሲ ኢዚስ ቦንቾ ጊዴኔ? ኢዚስ ኣዱሳ ሁኤ ቢናናይ ኢሜቲዳይ ኢዚስ ሴሎ ጊዳናሳ።
1CO 11:16 ሄሳ ጊሻስ ኦኒካ ሃይሳ ሃ ዮኦዛን ፓላሜታና ኮይኮ ኑስ ጊዲንካ ጾሳ ዎሳ ኬꬃታስ ሃይሳፌ ሃራ ዎጋይ ዴና።
1CO 11:17 ኢንቴ ኢሲ ሶ ሺቄቲዛ ዎዴ ቆሆስ ኣቲን ጎኣስ ጊዶንታ ጊሻስ ታ ሃይሳ ኣዛዞዛ ኢንቴስ ኣꬂዛይ ኢንቴና ጋላታሼ ጊዴና።
1CO 11:18 ኢንቴ ዎሳ ኬꬃን ሺቂዛ ዎዴ ኢንቴ ጋርሳን ሻኬቴꬂ ዲዛይሳ ታ ካሴታ ሲያዲስ፤ ታ ሲዮይሳፌ ባጋይ ቱሙ ጊዳናይሳ ታ ኣማናይስ።
1CO 11:19 ኢንቴ ጊዶፌ ቱማንቻቲ ሻኬቲ ኤሬታና ማላ ሄሳ ማላ ሻኮይ ኢንቴ ጊዶን ዳናይሲ ዶሳ ጊዴና።
1CO 11:20 ኢንቴ ኢሲፌ ሺቄቲዲ ሚዛይ ጎዳ ካዎ ጊዴና።
1CO 11:21 ኢንቴ ሺቄቲዲ ኢሶይ ኢሳ ናጎንታ ዲሼ ካꬅ ሜታ፤ ኢንቴፌ ኢሳዴይ ጋፋን ዲሺን ሃንኮይሲ ቃሴ ማꬆቴስ።
1CO 11:22 ሂስቲን ኢንቴስ ኡያናሶይኔ ማናሶይ ባዌ? ዎይኮ ጾሳ ኬꬄ ሌቂዲ ኣይኮይካ ባይንዳይታ ዬላቼቲ? ሂስቲን ታ ኢንቴና ኣይ ጎ? ሃይሳ ሃ ሃኖዛስ ኢንቴና ጋላቶ? ሙሌካ ጋላቲኬ።
1CO 11:23 ታኒ ጎዳፔ ኤኪዳይሳ ኢንቴስ ኣꬃዲስ፤ ሄሲካ ጎዳ ዬሱሲ ኣꬊ ኢሜቲዳ ኦማርስ ኡኬꬅ ዴንꬂዲኔ ጾስ ጋላቲ ባꬂዲ፥ «ሄኢቴ! ሚቴ! ሃይሲ ኢንቴስ ጊዲዛ ታ ኣሾ፤ ታና ቆፓናስ ኢንቴ ሃይሳ ኦꬂቴ» ጊዴስ።
1CO 11:25 ሄሳꬆካ ካዎፔ ጉዬ ኡሻ ዴንꬂዲ፥ «ሃይሲ ኡሻይ ታ ሱꬃን ሃኒዛ ኦራꬃ ጫቆ፤ ሄሳ ጊሻስ ኡሻፌ ኢንቴ ኡዪዛ ዎዴ ሃይሳ ታና ቆፓና ማላ ኦꬂቴ» ጊዴስ።
1CO 11:26 ሃይሳ ኡኬꬃ ኢንቴ ሚዛ ዎዴኔ ሃይሳ ኡሻካ ኡዪዛ ኡባ ዎዴ ጎዳይ ያና ጋካናስ ኢንቴ ኢዛ ሃይቆ ዮታና።
1CO 11:27 ሄሳ ጊሻስ ኦኒካ ቤሶንታ ዲሺን ሃይሳ ኡኬꬃ ሚኮ ዎይኮ ጎዳ ኡሻ ኡዪኮ ኢዛዴይ ጎዳ ኣሾኔ ኢዛ ሱꬃ ካዉሺዳ ጊሻስ ኢዚ ኦይሼታና።
1CO 11:28 ኦኒካ ሃይሳ ሃ ኡኬꬃ ማናፔኔ ኡሻፌ ኡያናፔ ካሴቲ ባርካ ባና ፓጮ።
1CO 11:29 ጋሶይካ ኦኒካ ጎዳ ኣሾ ባስ ጌሎንታ ዲሺን ሚኮኔ ጎዳ ኡሻ ኡዪኮ ኢዛዴይ ባርካ ባ ቦላ ፒርዳ ኤሄስ።
1CO 11:30 ኢንቴ ጋርሳን ዳሮ ኣሳይ ዳቡርዳይኔ ሳኬቲዳይ ቃሴካ ባጋይ ሃይቂዳይ ሄሳ ጋሶና።
1CO 11:31 ኑኒ ኑርካ ኑ ቦላ ፒርዲዛኮ ኢዚ ኑ ቦላ ፒርዴና።
1CO 11:32 ጊዶ ኣቲን ጎዳይ ፒርዲዛ ዎዴ ኑ ሃንኮ ኣማኖንታ ኣሳራ ፒርዴቶንታ ማላ ኢዚ ኑና ካሴቲ ሙሬስ።
1CO 11:33 ሄሳ ጊሻስ ታ ኢሻቶ! ኢንቴ ማና ሺቂዛ ዎዴ ኢሶይ ኢሳራ ናጌቲቴ።
1CO 11:34 ኢንቴ ሺቂዛ ሺቆይ ፒርዳስ ጊዶንታ ማላ ኢንቴፌ ኦኒካ ጋፊዳዴይ ዲኮ ካሴቲዲ ባ ሶን ሞ፤ ሃንኮ ኣቲዳይሳ ታኒ ሃራ ዎዴ ሄ ኢንቴኮ ባዳ ዎጋ ዎꬃና።
1CO 12:1 ታ ኢሻቶ! ኣያናይ ኢሚዛ ኢሞታ ጊሻስ ኢንቴ ኢሲ ሚሽ ኤራና ማላ ታ ኮያይስ።
1CO 12:2 ኢንቴ ኣማናናፔ ካሴ ጮ ሜላ ያኔ ሃ ጉሳን ኢንቴ ኤሮንታ ካሊዲ ዶና ዱዴ ጊዲዳ ኤቃታኮ ቢዳይሳ ኢንቴካ ኤሬታ።
1CO 12:3 ሄሳ ጊሻስ ኦኒካ ጾሳ ኣያናን ሃሳይሼ፥ «ዬሱሲ ቃንጌቲዳዴ» ጌና። ሄሳꬆካ ጺሎ ኣያናን ጊዲዲ ኣቲን ኦኒካ፥ «ዬሱሲ ጎዳ» ጋና ኣሲ ዶንታይሳ ታ ኢንቴስ ዮታይስ።
1CO 12:4 ኣሳስ ኢሞቴꬂ ዱማ ዱማ ጊዲሺን ኣያናይ ጊዲኮ ኢሲኖ።
1CO 12:5 ኦሶይካ ዱማ ዱማ ጊዲሺን ጎዳይ ጊዲኮ ኢሲኖ።
1CO 12:6 ዱማ ዱማ ኦሶ ኦጌቲ ዲኮካ ዉርሲካ ኦꬂዛይ ኢሲ ጾሳ።
1CO 12:7 ጊዶ ኣቲን ጺሎ ኣያና ቆንጪሶ ኢሞታይ ኢሳዴስ ኢሜቲዛይ ኢሲፌ ጎኤታናሳ።
1CO 12:8 ኢሳዴስ ሂላን ሃሳያና ኤራቴꬂ ኢሜቴስ፤ ሃራ ኣሳስ ቃሴ ሄ ኣያናንካ ኤራቴꬃ ቃላን ሃሳያና ቃላይ ኢሜቴስ።
1CO 12:9 ኢሳዴስ ሄ ኣያናን ኣማኖይ ኢሜቴስ፤ ሃራ ኣሳስ ቃሴ ሄ ኣያናንካ ሃርጊዛይታ ፓꬂዛ ኢሞታይ ኢሜቴስ።
1CO 12:10 ኢሳዴስ ማላሊሲዛ ኦሶ ኦꬂዛ ኢሞታይ፥ ሃራ ኣሳስ ቲንቢቴ ቃላ ሃሳያ ኢሞታይ፥ ሃራ ኣሳስ ቃሴካ ኣያናታ ሻኪ ኤሮይ፥ ሃራ ኣሳስ ዱማ ዱማ ቃላን ሃሳያይ፥ ቃሴካ ሃራ ኣሳስ ሃራ ዱማ ዱማ ቃላን ሃሳዬቲዳይሳ ቢርሻና ኢሞታይ ኢሜቴስ።
1CO 12:11 ሄይቲ ዉሪካ ሄ ኢሲ ኣያናይ ኢሚዛ ኢሞታ ጊዲሺን ኢሲ ኢሲ ኣሳስ ባ ኮዪዳ ማላ ኢሜስ።
1CO 12:12 ኢሲ ኣሳቴꬃ ቦላ ዳሮ ቢሊቴቲ ዲኮካ ኣሳቴꬃይ ኢሲኖ፤ ጊዶ ኣቲን ቢሊቴቲ ዳሮ ጊዲኮካ ኣሳቴꬃይ ኢሲኖ ጻላ፤ ኪርስቶሲካ ሄሳ ማላ።
1CO 12:13 ኣይሁዳ ኣሳታ ጊዲንካ ጊሪኬ ኣሳታ ጊዲንካ፥ ኣይሌ ጊዲንካ ዎይኮ ጎቃ ኣሳታ ጊዲንካ ኑ ዉሪካ ኢሲኖ ጊዳናስ ኢሲ ኣያናን ጻማቄቲዶስ፤ ኑ ዉሪካ ሃ ኢሲ ኣያናፔ ኡዪዶስ።
1CO 12:14 ኣሳቴꬂ ሜꬌቲዳይ ዳሮ ቢሊቴታፔ ኣቲን ኢሲ ቢሊቴፌ ጻላላ ጊዴና።
1CO 12:15 ቶሆይ፥ «ታኒ ኩሼ ጊዶንታ ጊሻስ ኣሳቴꬃ ጊዶን ዲኬ» ጊኮ ኢዚ ሂዝጊዳ ጊሻስ ኢዛስ ኣሳቴꬃን ዱሲ ኣታኔ?
1CO 12:16 ሃይꬂ፥ «ታ ኣይፌ ጊዶንታ ጊሻስ ኣሳቴꬃ ጊዶን ዲኬ» ጊኮ ሄሳ ጊሻስ ኣሳቴꬃን ዱሲ ኢዛስ ኣታኔ?
1CO 12:17 ኣሳቴꬂ ዉሪካ ኣይፌ ጻላ ጊዲዳኮ ኣዛን ሲያኔ? ኣሳቴꬂ ዉሪካ ሃይꬅ ጻላ ጊዲዳኮ ኣዛን ሲንጋኔ?
1CO 12:18 ጊዶ ኣቲን ጾሲ ኢሳ ኢሳ ባ ኮዪዳ ማላ ኣሳቴꬃ ጊዶን ዳናስ ቤሲዛሶን ዎꬂዴስ።
1CO 12:19 ቢሊቴይ ዉሪካ ኢሲኖ ጊዲዳኮ ኩሜꬃ ኣሳቴꬂ ኣዋፔ ቤታኔ?
1CO 12:20 ሄሳ ጊሻስ ቢሊቴቲ ዳሮ ሺን ኣሳቴꬂ ጊዲኮ ኢሲኖ ጻላ።
1CO 12:21 ኣይፌይ ኩሼ፥ «ኔና ታ ኮይኬ» ጋናስ ዳንዳዬና፤ ሁኤይ ቶሆ፥ «ኔና ታ ኮይኬ» ጋና ዳንዳዬና።
1CO 12:22 ሃራይ ኣቶሺን ኡባፌ ላፋ ሚሳቲዛ ቢሊቴቲ ዳሮ ኮሺዛይታ።
1CO 12:23 ኑኒ ላፋ ጊ ሌቂዛ ቢሊቴታ ሃንኮይታፔ ኣꬂ ቦንቾስ፤ ቃሴካ ኑ ኢስታን ዬላቲዛ ቢሊቴታ ሃራፔ ኣꬂ ናጎስ።
1CO 12:24 ኑ ኢስታን ዬላቶንታ ቢሊቴታስ ጊዲኮ ሄሳ ማላ ቦንቾ ኮሼና፤ ጾሲ ጊዲኮ ኣሳቴꬃ ቢሊቴታ ኢሲ ቦላ ኦይሴꬂዲ ቦንቾይ ፓጪዛይታስ ኣꬌꬃ ቦንቾ ኢሚዴስ።
1CO 12:25 ኢዚ ሄሳ ኦꬂዳይ ኣሳቴꬃ ቢሊቴታ ጋርሳን ሻኬቴꬂ ዶንታ ኢስቲ ባ ጋርሳን ኢሶይ ኢሳ ባናራ ጊና ጊ ቆፓናሳ።
1CO 12:26 ኢሲ ቢሊቴይ ሳኬቲኮ ሃንኮ ቢሊቴቲ ዉሪካ ኢዛራ ኢሲፌ ሳኬቴቴስ፤ ኢሲ ቢሊቴይ ቦንቼቲኮ ቢሊቴቲ ዉሪካ ኢሲፌ ኡፋዬቴቴስ።
1CO 12:27 ሂስቲኮ ኢንቴ ዉሪካ ኪርስቶሳ ኣሳቴꬅ፤ ኢንቴ ኢሶይ ኢሶይ ኢዛ ኣሳቴꬃ ቢሊቴታ።
1CO 12:28 ጾሲ ዎሳ ኬꬃ ጊዶን ኮይሮ ሃዋሬታ፥ ናምኣንꬆ ቃሴ ናቤታ፥ ሄꬓንꬆ ኣስታማሬታ፥ ካሌꬂዲ ማላታ ኦꬂዛይታ፥ ፓꬂዛ ኢሞቴꬂ ዲዛይታ፥ ሃራታካ ኣስ ማዲዛ ኢሞታይ ዲዛይታ፥ ዴሬ ኣይሶ ኤራቴꬂ ዲዛይታኔ ዱማ ዱማ ቃላ ሃሳያና ኢሞቴꬂ ዲዛ ኣሳታ ዎꬂዴስ።
1CO 12:29 ዉሪካ ሃዋሬቴ? ዉሪካ ናቤቴ? ዉሪካ ኣስታማሬቴ? ዉሪካ ማላሊሲዛ ሚሽ ኦꬂዞ?
1CO 12:30 ኡባሲካ ሃርጊዛይታ ፓꬂዛ ኢሞታይ ዲዜ? ኣሲ ዉሪካ ዱማ ቃላን ሃሳይዜ? ዱማ ቃላን ሃሳዬቶይሳ ኣሲ ዉሪ ቢርሺዜ?
1CO 12:31 ጊዶ ኣቲን ኢንቴ ዉሪካ ኡባፌ ኣꬊዛ ኢሞታ ሎኤꬂ ኮዪቴ። ቃሴካ ሃራ ኡባፌ ኣꬊዛ ኦጌ ታ ኢንቴና ቤሳና።
1CO 13:1 ታ ኣሳ ቃላኒኔ ሳሎ ኪታንቻታ ቃላን ሃሳይኮካ ታስ ሲቆይ ባይንዳ ኣጊኮ ጮ ሜላ ቢራታ ጊሪሳ ማላ ዎይኮ ዳላ ጊሪሳ ማላ።
1CO 13:2 ቲንቢቴ ሃሳይዛ ኢሞታይ ታስ ዲኮካ፥ ዎይኮ ጹራ ዮኦታኔ ኤራቴꬅ ዉርሳ ታ ኤሪኮካ፥ ዙማይ ኢዚ ዲዛሶፔ ꬎቃላዳ ሃራሶ ዲጊዛ ኣማኖይ ታስ ዲኮካ ሄሳ ዉርሳካ ሲቆይ ባይንዳ ታ ኦꬂኮ ሄሲ ሃዳ።
1CO 13:3 ታስ ዲዛዝ ዉርሳ ማንቆታስ ታ ኢሚኮካ፥ ታ ኣሳቴꬅ ታ ታማን ጹጊኮካ፥ ሲቆይ ባይንዳ ኣጊኮ ታና ሄሲ ኣይኮካ ማዴና።
1CO 13:4 ሲቆይ ዳንዳያ፥ ቃሴካ ኪያ፤ ሲቆይ ሚቃይኔና፤ ጬቄቴና፤ ኦቶሬቴና፤
1CO 13:5 ቤሶንታዝ ኦꬄና፤ ባ ጎኣ ጻላ ጼሌና፤ ቆሆ ቆዳን ዬጌና።
1CO 13:6 ሲቆይ ቱማንፔ ኣቲን ማካላን ኡፋዬቴና።
1CO 13:7 ሲቆይ ኡባ ዎዴ ዳንዳዬስ፤ ኡባ ዎዴካ ኣማኔስ፤ ኡፋይስ ኦꬄሲኔ ሚኒ ኤቄስ።
1CO 13:8 ሲቆይ ሙሌካ ኩንዴና፤ ቲንቢቴይ ጊዲኮ ኣታና፤ ሃራ ቃላን ሃሳያይካ ኣታና፤ ኤራቴꬂካ ሻሬታና።
1CO 13:9 ጋሶይካ ኑ ኤሪዛይ ኡባ ጊዶንታ ሻኪ ኤሮስ፤ ቲንቢቴ ሃሳያ ጊዲኮካ ባጋ ሃሳዮስ።
1CO 13:10 ጊዶ ኣቲን ዉርሴꬂ ጋኪዛ ዎዴ ኩሜꬅ ጊዶንታ ኢሞታይ ሄ ዎዴ ሻሬታና።
1CO 13:11 ታ ጉꬃ ናቴቴꬃን ዳሼ ና ማላ ሃሳያይሲኔ ና ማላ ቆፓይስ፤ ና ማላካ ዩሻ ቆፓይስ፤ ካሃ ኩንꬂዳፔ ጉዬ ካሴ ናቴꬃን ሃኒዛይሳ ዉርሳካ ዬጋ ኣጋዲስ።
1CO 13:12 ኑኒ ሃኢ ቤኢዛይሲ ሃꬃን ጼሊዛ ማላ ጮ ቦዢ ቦዤስ ሺን ሄ ዎዴ ጊዲኮ ኑ ኢዛ ኣይፌሶ ሎኤꬂ ቤያና፤ ታ ሃኢ ኩሜꬅ ጊዶንታ ባጋ ጻላላ ኤራይስ፤ ሄ ዎዴ ጊዲኮ ታኒ ታ ሁኤስ ኤሬቲዳይሳ ማላ ኤራና።
1CO 13:13 ሄሳ ጊሻስ ኣማኖይ፥ ሂዶታይኔ ሲቆይ ሃይቲ ሄꬓቲ ኤቂ ዳና፤ ሃይታ ኡባፌ ኣꬊዛይ ሲቆ።
1CO 14:1 ሲቆ ካሊቴ፤ ኣያና ኢሞታታ ሃራፔካ ቲንቢቴ ሃሳይዛ ኢሞታታ ሎኤꬂ ኮዪቴ።
1CO 14:2 ሃራ ቃላን ሃሳይዛዴይ ጾሳስ ኣቲን ኣሳስ ሃሳዬና፤ ጹራ ጊዲዳ ዮኦ ኣያናን ሃሳይዛ ጊሻስ ኢዚ ጊዛይ ኣሳስ ጌሌና።
1CO 14:3 ቲንቢቴ ሃሳይዛዴይ ኣስ ሚንꬄꬃናስ፥ ዴንꬄꬃናሲኔ ጎኣናስ ሃሳዬስ።
1CO 14:4 ሃራ ቃላን ሃሳይዛዴይ ቃሴ ባርካ ባና ሚንꬄꬄስ፤ ቲንቢቴ ሃሳይዛዴይ ጊዲኮ ዎሳ ኬꬃ ጎኤስ።
1CO 14:5 ኢንቴ ዉሪካ ሃራ ቃላን ሃሳይዛኮ ታ ዶሳይስ ሺን ሄሳፌካ ቦላራ ኢንቴ ቲንቢቴ ቃላን ሃሳይዛኮ ታ ዶሳይስ፤ ዎሳ ኬꬃይ ሚናና ማላ ሃራ ቃላራ ሃሳይዛዴይ ባ ሃሳይዛይሳ ቢርሾንታ ኢዚ ሃራ ቃላራ ሃሳይዛይሳፌ ቲንቢቴ ሃሳይዛዴይ ኣꬌስ።
1CO 14:6 ሄሳ ጊሻስ ታ ኢሻቶ! ታ ኢንቴኮ ቢዛ ዎዴ ታ ኢንቴስ ቆንጪሴꬃን ዎይኮ ኤራቴꬃን ዎይኮ ቲንቢቴን፥ ዎይኮ ቲሚርቴን ዮቶንታ ሃራ ቃላራ ዮቲኮ ሄሲ ኢንቴና ኣይ ጎኣኔ?
1CO 14:7 ሄሲ ጮ ሱሱልኤ ማላኔ ዲꬃ ማላ ሼምፖይ ባይንዳ ኢስታ ጊሪሳስ ዱማቴꬂ ሻኬቲ ኤሬቶንታ ኣጊኮ ኢዛ ዎስቲ ኤራኔ?
1CO 14:8 ቃሴካ ጹሩምባይ ኣዛስ ፑኔቲዛኮ ዎይኮ ዛዬይ ኣዛስ ዛዬቲዛኮ ሻኪ ኤሬቶንታ ኦጌራ ፑኔቲኮ ኦኒ ኦላስ ጊጌታኔ?
1CO 14:9 ኢንቴካ ሄሳ ማላ፤ ኢንቴ ዶናፔ ኤሬቲዛ ቃላይ ኬዞንታ ኣጊኮ ኢንቴ ጊዛይሳ ኦኒ ኤራኔ? ጮ ሜላ ጫርኮን ꬋያና።
1CO 14:10 ኣላሜ ቦላ ዳሮ ዱማ ዱማ ቃላይ ዴስ ሺን ቢርሼꬂ ባይንዳ ቃላይ ባ።
1CO 14:11 ሄሳ ጊሻስ ኢሳዴይ ሃሳይዛ ቃላ ቢርሼꬅ ታ ኤሮንታ ኣጊኮ ሃሳይዛዴስ ታኒ ኢማꬅ ጊዳይስ፤ ኢዛዴይካ ታስ ኢማꬅ ጊዴስ።
1CO 14:12 ኢንቴካ ሄሳ ማላ ኣያናን ኢሞቴꬃታ ዴማናስ ኮይዛ ጊሻስ ዎሳ ኬꬃ ጎኢዛ ኢሞታታ ዴማናስ ሎኤꬂ ኮዪቴ።
1CO 14:13 ሄሳ ጊሻስ ሃራ ቃላን ሃሳይዛ ኣሲ ባ ሃሳይዳይሳ ቢርሼꬅ ኤራና ማላ ባስ ዎሶ።
1CO 14:14 ታኒ ሃራ ቃላራ ዎሲዛ ዎዴ ታ ኣያናን ዎሳይስ ኣቲን ታ ኢዛፔ ኣይኮካ ኤሪኬ።
1CO 14:15 ሂስቲን ታ ኣይ ኦꬃና ማላ ታስ ቤሲዜ? ታኒ ታ ኣያናንካ ዎሳና፤ ዎዚናን ዎꬃዳካ ዎሳና፤ ታ ኣያናንካ ዬጻና። ዎዚናራካ ዬጻና።
1CO 14:16 ሄሳꬆ ጊዶንታ ኣጊኮ ኔ ጾስ ኣያናን ጋላቲዛ ዎዴ ሄሳ ኤሮንታ ኢሲ ኢማꬃ ኣሲ ኔ ጋላታ ዎሳ ዎስቲ፥ «ኣሚን» ጋናስ ዳንዳይዜ?
1CO 14:17 ኔ ቤሲዛ ማላ ጋላታናስ ዳንዳያሳ፤ ሃንኮይሲ ጊዲኮ ኢዛን ጎኤቴና።
1CO 14:18 ታኒ ኢንቴፌ ቦላራ ሃራ ቃላን ሃሳይዛ ጊሻስ ጾስ ጋላታይስ።
1CO 14:19 ጊዶ ኣቲን ዎሳ ኬꬃን ኤሬቶንታ ዳሮ ሺ ቃላታ ሃሳያናፔ ሃራ ኣሳታ ታማርሳናስ ኣሳይ ኤሪዛ ኢቻሽ ቃላን ሃሳያና ዶሳይስ።
1CO 14:20 ታ ኢሻቶ! ኢንቴ ኢንቴ ቆፋን ጉꬃ ናይታ ማላ ጊዶፒቴ፤ ኢታ ኦሶስ ጊዲኮ ጉꬃ ናይታ ማላ ጊዲቴ፤ ቆፋን ጊዲኮ ካሃ ኩንꬂዳ ኣሳታ ጊዲቴ።
1CO 14:21 ካሴ ዎጋንካ፥ « ‹ኢስታ ቃላይ ኢማꬅ ጊዲዳ ኣላጋ ኣሳታ ቃላራ ታ ሃይሳ ኣሳስ ዮታና። ሄሳꬆ ዮቲንካ ታ ጊዛዝ ኢስቲ ሲዬቴና› ጌስ ጎዳይ» ጌቴቲ ካሴ ጌሻ ማጻፋን ጻፌቲዴስ።
1CO 14:22 ሄሳ ጊሻስ ሃራ ቃላን ሃሳያይ ኣማኖንታ ኣሳስ ማላታ ጊዴስ ኣቲን ኣማኒዛይታስ ማላታ ጊዴና፤ ቲንቢቴይ ጊዲኮ ኣማኒዛይታስ ኣቲን ኣማኖንታይታስ ጊዴና።
1CO 14:23 ሂስቲኮ ዎሳ ኬꬃን ኣማኒዛ ኣሳይ ኢሲፌ ሺቂዳሶን ዉሪካ ኤሮንታ ሃራ ቃላን ሃሳይሺን ሄሳ ኤሮንታ ኣሳቲ ዎይኮ ኣማኖንታ ኣሳይ ሺቂዲ ሃሳይዛሶ ጌሊኮ፥ «ሃይቲ ጎዬቴስ» ጌቴኔ?
1CO 14:24 ጊዶ ኣቲን ኣሳይ ዉሪ ቲንቢቴ ቃላ ሃሳዬቲሺን ኢማꬂ ዎይኮ ኣማኖንታዴይ ጌሊኮ ባ ሲዪዳይሳ ኡባ ኤራናኔ ሄ ቃላን ፒርዴታና።
1CO 14:25 ኢዛዴይ ባ ዎዚናን ቆቲ ዎꬂዳዚ ዉሪ ቆንጫናኔ ኢዚካ ባ ባጋራ፥ «ቱማፔ ጾሲ ኢንቴናራ ዴስ» ጊዲ ጉፋኒ ጾሳስ ጎይናና።
1CO 14:26 ሄሳ ጊሻስ ታ ኢሻቶ! ሂስቲን ኣይ ጊኖ? ኢንቴ ኢሲፌ ሺቂዛ ዎዴ ኢንቴፌ ኢሲ ኢሲ ኣሳስ ማዛሙሬ ቃሴ ኢሲ ኢሲ ኣሳስ ቲሚርቴይ ዴስ፤ ኢሲ ኢሲ ኣሳስ ቆንጮንታ ጹራ ሚሻታ ቆንጪሲዛ ኢሞታይ ዴስ፤ ሃራ ኣሳስ ዱማ ቃላን ሃሳያና ኢሞታይ ዴስ፤ ሃራስ ቃሴ ሄ ቃላ ቢርሺዛ ኢሞታይ ዴስ፤ ሄሲ ሄ ኢሞታይ ዉሪካ ኣማኒዛይታ ጎኣናስ ቤሴስ።
1CO 14:27 ሃራ ቃላራ ሃሳይዛይ ዲኮ ናምኡ ኣስ ዎይኮ ዳሪ ዳሪኮ ሄꬑ ጊዲዲ ታራን ታራን ዮቴቶ፤ ሃራ ኣሲ ቃሴ ቢርሾ።
1CO 14:28 ቢርሺዛዴይ ባይንዳ ኣጊኮ ሺቂዳ ኣሳ ጊዶን ጮኡ ጊዲ ባስ ጻላኔ ጾሳስ ጻላ ዮቶ።
1CO 14:29 ቲንቢቴ ሃሳያ ኢሞታይ ዲዛ ናቤቲ ናምኣቲ ዎይኮ ሄꬓቲ ቲንቢቴ ሃሳዬቶ፤ ሃንኮ ኣሳይ ዮቴቲዳይሳ ሎኤꬂ ፓጮ።
1CO 14:30 ኡቲዳ ኣሳ ጋርሳፌ ኢሳዴይ ኢሲ ሚሺ ቆንጪኮ ኮይሮ ሃሳይዛይሲ ጮኡ ጎ።
1CO 14:31 ኢንቴ ጋርሳፌ ኢሲ ኢሲ ኣሲ ታማራና ማላኔ ሚኔታና ማላ ኢንቴ ዉሪካ ታራን ታራን ቲንቢቴ ዮታናስ ዳንዳዬታ።
1CO 14:32 ናቤታ ኣያናይ ናቤታስ ኣዛዜቴስ፤ ጋሶይካ ጾሲ ሳሮቴꬃ ጾሳፌ ኣቲን ዎጫማ ጾስ ጊዴና፤ ኣማኒዛይታ ዎሳ ኬꬅ ኡባሶንካ ሄሳ ማላ።
1CO 14:34 ኣማኒዛ ኣሳይ ጎይኖስ ሺቂዛሶን ማጫሳቲ ጮኡ ጌቶ፤ ሙሴ ዎጋይ ካሴ ጊዳ ማላ ኢስቲ ኣዛዜቴቶ ኣቲን ሺቆሶን ኢስቲ ሃሳያና ማላ ኢስታስ ኢሜቲቤና።
1CO 14:35 ማጫሳቲ ኤራናስ ኮይዛ ኢሲ ኢሲ ዮኦቲ ዲኮ ባ ኬꬃን ባ ኣዚናታ ኦይቼቶ፤ ጋሶይካ ማጫሲ ሺቆሶን ሃሳያይ ዬላቺዛዛ።
1CO 14:36 ጾሳ ቃላይ ኢንቴፌ ኬዚዴ? ዎይኮ ኢንቴኮ ጻላ ጋኪዴ?
1CO 14:37 ኦኒካ ባና፥ «ናቤ» ጊኮ ዎይኮ፥ «ታስ ጺሎ ኣያናፔ ኢሞታይ ዴስ» ጊዛዴይ ዲኮ ሃይሲ ታ ኢንቴስ ጻፊዳይሲ ጎዳ ኣዛዞ ጊዲዳይሳ ኤሮ።
1CO 14:38 ሃይሳ ኤሮንታ ኣሲ ዲኮ ኢዚ ባ ሁኤስ ኤሬቴና።
1CO 14:39 ሄሳ ጊሻስ ታ ኢሻቶ! ቡሮ ቲንቢቴ ሃሳያናስ ሎኤꬂ ኮዪቴ፤ ዱማ ዱማ ቃላን ሃሳያካ ዲጎፍቴ።
1CO 14:40 ጊዲኮካ ዉሪካ ማራራኔ ዎጋራ ጊዶ።
1CO 15:1 ሃኢካ ታ ኢሻቶ! ታ ኢንቴና ሳባኪን ኢንቴ ኤኪዲ ኢዛን ሚኒ ኤቂዳ ሚሺራቾ ቃላ ሃኢ ቆፍሳና ኮያይስ።
1CO 15:2 ታ ኢንቴስ ሳባኪዳ ቃላ ኢንቴ ሎኤꬂ ኦይኪኮ ሄ ሚሺራቾ ቃላን ኢንቴ ኣታና፤ ሄሳ ማላ ጊዶንታ ኣጊኮ ኢንቴ ኣማኖይ ሃዳ።
1CO 15:3 ታኒ ታስ ኤኪዳይሳኔ ኡባፌ ኣꬊዛይሳ ኢንቴስ ኣꬃ ኢማዲስ፤ ጌሻ ማጻፋቲ ጊዛይሳ ማላ ኪርስቶሲ ኑ ናጋራ ጊሻስ ሃይቂዴስ።
1CO 15:4 ሞጌቲዴስ፤ ጌሻ ማጻፋታን ጻፌቲዳይሳ ማላ ሄꬓንꬆ ጋላስ ሃይቆፔ ዴንዲዴስ።
1CO 15:5 ሄሳፌ ካሊዲ ጴጽሮሳስ ቤቲዴስ፤ ቃሴካ ዬሱሳ ካሊዛ ታማኔ ናምኣታስ ቤቲዴስ።
1CO 15:6 ሄሳፌ ጉዬ ኢቻሹ ጼቱፔ ቦላራ ዲዛ ኣማኒዛይታስ ኢሲቶ ቤቲዴስ፤ ኢዛ ቤኢዳ ኣሳፔ ዳሪዛ ባጋይ ፓጻ ዴስ፤ ባጋይ ቃሴ ሃይቂዴስ።
1CO 15:7 ሄሳፌ ጉዬ ያቆቤስ ቤቲዴስ፤ ካሊዲካ ኩሜꬃ ሃዋሬታስ ቤቲዴስ።
1CO 15:8 ታኒ ሃዋሬታ ኡባፌ ላፋኔ ካሴ ጾሳ ዎሳ ኬꬄ ጎዲዳ ጊሻስ ሃዋሬ ጌቴታናስ ቤሶንታዴኮ ሺን ኣስ ኡባፌ ኣዉጫያ ሚሳቲዛ ታስካ ቤቲዴስ።
1CO 15:10 ጊዶ ኣቲን ጾሳ ኪያቴꬃን ሃኢ ታ ሃናናይሳ ሃናዲስ፤ ታስካ ኢሜቲዳ ጾሳ ኪያቴꬂ ሃዳ ጊዲቤና፤ ታኒ ኦናፔካ ቦላራ ዳሮ ሚና ኦꬃዲስ። ጊዶ ኣቲን ሄሳ ኦꬂዳይ ታና ጊዶንታ ጾሳ ኣꬎ ኪያቴꬅ።
1CO 15:11 ሄሳ ጊሻስ ታና ጊዲን ኢስታካ ጊዲን ኑ ዉሪካ ሳባኪዛይ ሄሳ፤ ኢንቴካ ኣማኒዳይ ሄሳ።
1CO 15:12 ኪርስቶሲ ሃይቆፔ ዴንዲዳይሳ ኑ ታማርሲኮ ሂስቲን ኢንቴ ጋርሳፌ ኢሲ ኢሲ ኣሳቲ ዋኒዲ ሃይቆፔ ዴንዶይ ባ ጊዞ?
1CO 15:13 ሃይቂዳ ኣሳስ ዴንꬂ ዶንታ ጊዲኮ ኪርስቶሲካ ዴንዲቤና ጉሳካ?
1CO 15:14 ኪርስቶሲካ ሃይቆፔ ዴንዶንታ ጊዲኮ ኑ ሳባኮስ ጎኣይ ባ፤ ኢንቴ ኣማኖይካ ሃዳ።
1CO 15:15 ሄሳፌካ ቦላራ፥ «ጾሲ ኪርስቶሳ ሃይቆፔ ዴንꬂዴስ» ጊዲ ኑ ማርካቲዳ ማርካይካ ኑና ዎርዶ ጾሳ ማርካታ ኬሲዴስካ? ሃይቂዳ ኣሳይ ሃይቆፔ ዴንዶንታ ጊዲኮ ጾሲ ኪርስቶሳካ ዴንꬂቤና ጉሳ።
1CO 15:16 ጋሶይካ ሃይቂዳይቲ ዴንዶንታዝ ጊዲኮ ኪርስቶሲካ ሃይቆፔ ዴንዲቤና።
1CO 15:17 ኪርስቶሲ ሃይቆፔ ዴንዶንታ ጊዲኮ ኢንቴ ኣማኖይ ሃዳ፤ ኢንቴካ ሃኖ ጋካናስ ኢንቴ ኢንቴ ናጋራራ ዴታ ጉሳ።
1CO 15:18 ሃኖይ ሄሳ ማላ ጊዲኮ ኪርስቶሳ ኣማኒዲ ሃይቂዳይቲ ዉሪካ ꬋይዳ ጉሳ።
1CO 15:19 ኑኒ ኪርስቶሳን ኡፋይስ ኦꬂዛይ ሃኖ ቢታይ ቦላ ዱሳስ ጻላ ጊዲኮ ኑ ኣሳ ኡባፌ ላፋታ።
1CO 15:20 ጊዶ ኣቲን ኪርስቶሲ ሃይቂዳይታስ ኡባስ ባይራ ጊዲዲ ሃይቆፔ ቱሙ ዴንዲዴስ።
1CO 15:21 ሃይቆይ ኢሲ ኣስ ኣዳሜ ባጋራ ዪዳ ማላ ሃይቂዳይታ ዴንꬂ ኪርስቶሳ ባጋራኮ።
1CO 15:22 ኣሲ ዉሪካ ኣዳሜ ባጋራ ሃይቂዳ ማላ ሄሳꬆካ ኣሲ ዉሪካ ኪርስቶሳ ባጋራ ሃይቆፔ ዴንዳና።
1CO 15:23 ጊዶ ኣቲን ዉሪካ ባ ታራራ ታራራ ዴንዳና፤ ኮይሮ ባይራ ጊዲዳ ኪርስቶሲ ዴንዲዴስ፤ ኢዛፔ ካሊዲ ኢዚ ዪዛ ዎዴ ኪርስቶሳስ ጊዲዛይቲ ዴንዳና።
1CO 15:24 ሄሳፌ ጉዬ ሃሬቲዛ ዴሬታ ጎዳቴꬂኔ ዎልቃማታ ዉርሲ ꬋይሲዳፔ ጉዬ ካዎታ ጾሳ ኣዋስ ኣꬂ ኢሚዛ ዎዴ ሄ ዎዴ ዉርሴꬅ ጊዳና።
1CO 15:25 ኢዚ ባ ሞርኬ ዉርሲካ ባ ቶሆ ጋርስ ኣꬃና ጋካናስ ኢዚ ካዎታናስ ቤሴስ።
1CO 15:26 ቡሮ ዉርሴꬃን ጾኔቲ ꬋያና ሞርኬይ ሃይቆ።
1CO 15:27 «ጾሲ ዉርሲካ ኢዛ ጎዳቴꬃፌ ጋርሳን ዎꬂዴስ» ጊዛዚ ጌሻ ማጻፋን ጻፌቲዴስ፤ ጊዶ ኣቲን፥ «ዉሪካ ኢዛ ጎዳቴꬃ ጋርሳን ጊዲዴስ» ጊሺን ዉሪካ ኢዛ ጎዳቴꬃ ጋርሳን ኦꬂዳ ጾሳ ኣዋ ጉጄና።
1CO 15:28 ዉሪካ ኢዛስ ሃሬቲዳይሳፌ ጉዬ ጾሲ ኡባፌ ቦላ ጊዳና ማላ ጾሳ ናይ ቃሴ ኡባ ባስ ሃሪሲዳይሳስ ጾሳ ኣዋስ ሃሬታና።
1CO 15:29 ሃይቆፔ ዴንꬂ ዶንታ ኣጊኮ ሂስቲን ሃይቂዳ ኣሳ ጊሻስ ጊዲ ጻማቄቲዛ ኡባስ ጎኣይ ኣዜ? ሃይቂዳይቲ ሙሌካ ዴንዶንታ ጊዲኮ ሂስቲን ኣሳይ ኢስታ ጊሻስ ኣዛስ ጻማቄቲዜ?
1CO 15:30 ኑ ቃሴ ኡባ ዎዴ ኢታ ሜቶስ ኣꬊ ኢሜቲዛይ ኣዛሴ?
1CO 15:31 ታ ኢሻቶ! ሃች ሃች ሃይቆይ ታናራ ጋጌስ፤ ሄሳካ ኑ ጎዳ ዬሱስ ኪርስቶሳ ጋሶን ኢንቴ ቦላ ዲዛ ኣማኔቴꬅ ታ ኢንቴስ ቆንጪሳይስ።
1CO 15:32 ታኒ ኤፌሶኔን ዶኣ ሚሳቲዛ ኣሳታራ ባጼቲዳይሲ ኣሲ ቤያና ማላ ጻላላ ጊዲኮ ታስ ኢዛን ኣዛ ዎꬌይ ዲዜ? ሃይቂዳይታስ ዴንꬂ ዶንታ ኣጊኮ፥ «ኑ ዎንቶ ሃይቃና ጊሻስ ኣኔ ሞስ፤ ኣኔ ኡዮስ» ጊዛይታ ማላ ኑኒካ ኢስታ ማላ ጊዶስ።
1CO 15:33 ኢንቴ ባሌቶፍቴ! ኢታ ላጌቴꬂ ሎኦ ኣማሌራ ዲዛይታ ሞሬስ።
1CO 15:34 ዎዚናማ ጊዲቴ፤ ናጋራ ኦꬆፍቴ፤ ጾስ ኤሮንታይቲ ኢሲ ኢሲ ኣሳቲ ኢንቴ ጋርሳን ዲዛ ጊሻስ ታ ሄሳ ኢንቴና ዬላቻናስ ጋይስ።
1CO 15:35 «ሃይቂዳይቲ ዋኒ ዴንዳኔ? ኣይ ማላ ኣሾራ ዴንዳኔ?» ጊዛዴይ ዳና ዳንዳዬስ።
1CO 15:36 ኔኖ ኤያዞ! ኔ ዜሪዛ ዜሬꬃይ ሃይቆንታ ዲሼ ጫሬና።
1CO 15:37 ኔኒ ዜሪዛ ካꬃ ሞꬌያ ጊስቴ ዎይኮ ሃራ ካꬃ ኣይፌ ጊዲኮካ ጉዬፔ ኔ ኤካናራ ሃኢ ኔ ዜሮሮ ጊዱኩ።
1CO 15:38 ጾሲ ቃሴ ባ ኮዪዳ ማላ ሄ ዜሬꬃስ ኢዛ ማላ ሜꬎ ኢሜስ፤ ዜሬꬃ ቆሞታስ ኢሳስ ኢሳስ ኢዛ ሚሳቲዛ ኣሳቴꬅ ኢሜስ።
1CO 15:39 ኣሾይ ዉሪካ ኢሲ ማላ ጊዴና፤ ኣሳ ኣሾይ ኢሳ ጊዲሺን ሜሄ ኣሾይ ቃሴ ሃራ፤ ካፎ ኣሾይ ሃራ፤ ሞሌ ኣሾይካ ሃራ ቆሞ።
1CO 15:40 ሄሳ ማላካ ሳሎን ዲዛይታስካ ኢስታ ሚሳቲዛ ሜꬎይ ዴስ፤ ቢታ ቦላ ዲዛይታስካ ኢስታ ሚሳቲዛ ሜꬎይ ዴስ፤ ጊዶ ኣቲን ሳሎይታ ቦንቾይ ኢሲ ማላ፤ ቢታ ቦላ ዲዛይታ ሜꬎ ቦንቾይካ ዱማ።
1CO 15:41 ኣርሼ ቦንቾይ ኢሲኖ፤ ጊዶ ኣቲን ኣጊና ቦንቾይ ቃሴ ዱማ፤ ጾሊንቴታ ቦንቾይካ ሃራ፤ ኢሲ ጾሊንቴ ቦንቾይ ሃራ ጾሊንቴ ቦንቾፌ ዱማቴስ።
1CO 15:42 ሃይቂዳ ኣሳ ዴንꬂካ ሄሳ ማላ፤ ዎቂዛ ሜꬎይ ዜሬቲን ዎቆንታ ሜꬎይ ዴንዳና።
1CO 15:43 ካዉሻቴꬃን ዜሬታና ሺን ቦንቾን ዴንዳና፤ ዳቡርሳን ዜሬታና ሺን ዎልቃማ ጊዲዲ ዴንዳና።
1CO 15:44 ሜꬌቴꬃ ኣሳቴꬂ ዜሬታና ሺን ኣያና ኣሳቴꬂ ዴንዳና፤ ሜꬌቴꬃ ኣሳቴꬂ ዲኮ ቃሴካ ኣያና ኣሳቴꬂካ ዴስ።
1CO 15:45 ሄሳ ጊሻስ፥ «ኮይሮ ኣስ ኣዳሜይ ዴኦይ ዲዛ ሜꬌቴꬅ ጊዲዴስ» ጌቴቲ ጌሻ ማጻፋን ጻፌቲዴስ። ናምኣንꬆ ኣዳሜ ጊዲዳ ኪርስቶሲ ጊዲኮ ኣሳስ ዴኦ ኢሚዛ ኣያና።
1CO 15:46 ጊዶ ኣቲን ኮይሮ ዪዳይ ኣያናይሳ ጊዶንታ ሜꬌቴꬃይሳ፤ ኣያናይሲ ቃሴ ጉዬፔ ዪዳይሳ።
1CO 15:47 ኮይሮ ዪዳ ኣዳሜይ ቢታፌ ሜꬌቲዳ ጊሻስ ኢዚ ቢታፌ። ናምኣንꬆ ዪዳይሲ ሳሎፔ።
1CO 15:48 ቢታፌ ጊዲዳይቲ ኢስቲ ቢታፌ ሜꬌቲዳይሳ ማላ። ሳሎፔ ጊዲዳይቲ ሳሎፔ ዪዳይሳ ማላ።
1CO 15:49 ኑኒ ቢታ ኣሳ ሜꬋ ማይኦይሳꬆካ ሳሎይሳ ሜꬋካ ማይኣና።
1CO 15:50 ታ ኢሻቶ! ታ ሃይሳ ኢንቴስ ዮታይስ ኣሾይኔ ሱꬂ ጾሳ ካዎቴꬅ ላቴቴና፤ ꬋያናይሲ ꬋዮንታይሳ ላቴና።
1CO 15:51 ኣኔ ታ ኢንቴስ ኢሲ ጹራ ዮኦ ዮታይስ፤ ኑኒ ዉሪካ ሃይቆኮ፤ ጊዶ ኣቲን ኑ ዉሪካ ላሜታና።
1CO 15:52 ሄሲካ ሃናናይ ኑ ቆፖንታ ዲሺን ዉርሴꬃ ጹሩምባይ ፑኔቲዛ ዎዴ ቂጲዳ ኣይፌይ ጼሊዛ ማላ ኢሲቶ ሃናና፤ ጹሩምባይ ፑኔታና፤ ሃይቂዳ ኣሳይ ዎቆንታይታ ጊዲዲ ዴንዳና፤ ኑኒካ ላሜታና።
1CO 15:53 ꬋይዛይሲ ꬋዮንታይሳ ማይኣናስ፥ ሃይቂዛይ ሃይቆንታይሳ ማይኣናስ ቤሴስ።
1CO 15:54 ꬋይዛይ ꬋዮንታዝ፥ ሃይቂዛይ ሃይቆንታዝ ማይኢዛ ዎዴ፥ «ሃይቆይ ጾኔቲ ሚቴቲዴስ» ጌቴቲ ካሴ ጌሻ ማጻፋን ጻፌቲዳ ቃላይ ፖሌታና።
1CO 15:55 ሄሳꬆካ፥ «ሃይቆ! ካሴ ኔ ጾኖይ ኣዋን ዲዜ? ሃይቆ! ኔ ኢዛራ ጫዲዛ ዪሻይ ኣዋን ዲዜ?» ጌቴቲ ጻፌቲዴስ።
1CO 15:56 ሃይቆይ ኢዛራ ዱኪዛ ዎልቃይ ናጋራ፤ ናጋራ ዎልቃይ ዎጋ።
1CO 15:57 ጊዶ ኣቲን ጎዳ ዬሱስ ኪርስቶሳ ባጋራ ኑስ ጾኖ ኢሚዛ ጾሳስ ጋላታይ ጊዶ።
1CO 15:58 ሄሳ ጊሻስ ታ ሲቆ ኢሻቶ! ሚኒ ኤቂቴ፤ ኣይ ሚሻንካ ያርክ ያርኮፍቴ፤ ጎዳ ኦሶስ ኢንቴ ዳቡርዛ ዳቡርሳይ ሃዳ ጊዶንታይሳ ኤሪዲ ኡባ ዎዴ ፓጬይ ባይንዳ ጎዳስ ኦꬃናስ ሚኔቲቴ።
1CO 16:1 ሃኢ ቃሴ ኣማኒዛይታስ ሚሻ ኬሶ ጊሻስ ጋላቲያን ዲዛ ዎሳ ኬꬃታስ ታኒ ኢሚዳ ኣዛዞ ማላ ኢንቴካ ኦꬂቴ።
1CO 16:2 ሚሻይ ኬዛናይ ቡሮ ታ ሄ ቢን ጊዶንታ ማላ ኢንቴፌ ኢሲ ኢሲ ኣሲ ባስ ዲዛ ማላ ሳሚንታን ሳሚንታን ዎጋ ጋላስ ኬሲ ዎꬆ።
1CO 16:3 ታ ሄ ቢዛ ዎዴ ኢንቴ ዶሪዳ ኣሳታስ ታ ሞይዞ ዳብዳቤ ጻፋ ኢማዳ፥ ኢስቲ ኢንቴ ኢሚዳ ኢሞታ ዬሩሳላሜ ጋꬃና ማላ ሃፔ ታ ኪታና።
1CO 16:4 ታ ኢስታራ ባናስ ኮሺዛዝ ጊዲኮ ታናራ ባንዴቴስ።
1CO 16:5 ታኒ ባሼ ማቂዶኒያራ ኣꬋ ቡሲ ታስ ኣቶንታ ጊሻስ ታ ማቂዶኒያ ጋካዳ ሄራ ኢንቴኮ ባና።
1CO 16:6 ታ ኣዋካ ቢሺን ታና ኦጌይ ዋዪሶንታ ማላ ኢንቴ ታና ማዳና ማላ ባሼ ታ ኢንቴ ኣቻን ጋምኦንታ ኣጊኬ። ኦኔ ኤሪዛይ ባልጎይ ኣꬋና ጋካናስ ታ ኢንቴ ኣቻን ባልጎዛ ኣꬆንታ ዋያ ኣጋና።
1CO 16:7 ታ ኢንቴ ኣቻን ዳሮ ዎዴ ጋምኣናስ ኮይዛ ጊሻስ ኢንቴና ጮ ኦጌራ ኣꬋ ባሼ ቤያናስ ኮይኬ፤ ጎዳ ሼኔ ጊዲኮ ኢንቴ ኣቻን ኣዱሳ ዎዴ ጋምኣናስ ኮያይስ።
1CO 16:8 ጊዶ ኣቲን ጴንጼቆስቴ ጌቴቲዛ ባኣሌ ጋላስ ጋካናስ ታ ኤፌሶኔን ጋምኣና።
1CO 16:9 ታ ሄን ጋምኣና ጋሶይካ ታስ ሄን ጊታ ኦሶ ፔንጌይ ዶዬቲዴስ ሺን ታናራ ኤቄቲዛይቲ ዳሮቲ ዴቴስ።
1CO 16:10 ጺምቶሲ ኢንቴኮ ቢኮ ኢዚ ታ ማላ ጎዳ ኦሳንቻ ጊዲዳ ጊሻስ ኢዚ ባቦይ ባይንዳ ዳና ማላ ኢንቴ ኢዛ ማዲቴ።
1CO 16:11 ሄሳ ጊሻስ ኦኒካ ኢዛ ካꬎፖ፤ ኢዚ ታኮ ሳሮን ሲማና ማላ ኢንቴ ኢዛ ማዲቴ፤ ኑኒካ ሃራ ኣማኒዛይታራ ኢዛ ዩሳ ናጎን ዶስ።
1CO 16:12 ኑ ኢሻ ኣጲሎሲ ሃራ ኣማኒዛይታራ ኢንቴኮ ባና ማላ ኬሃ ዎሳዲስ ሺን ኢዚ ቃሴ ሃኢ ኢንቴኮ ባናስ ኮዪቤና፤ ጊዶ ኣቲን ባና ኦጌይ ኢዛስ ጊጊሺን ኢዚ ኢንቴኮ ባና።
1CO 16:13 ቤጊቴ! ኣማኖን ሚኒ ኤቂቴ፤ ሚኒቴ፤ ጎቢቴ።
1CO 16:14 ኢንቴ ኦꬂዛዝ ዉርሲካ ሲቆን ኦꬂቴ።
1CO 16:15 ታ ኢሻቶ! ኣካያ ቢታን ኮይሮ ኣማኒዳይ ኢስቲፋኖሴሶ ኣሳ ጊዲዳይሳኔ ኣማኒዛ ኣሳ ማዳናስ ኢስቲ ባና ኣꬂ ኢሚዳይሳ ኢንቴካ ኤሬታ።
1CO 16:16 ኢስታ ሚሳቲዛ ኣሳታሲኔ ኢስታራ ኢሲፌ ዳቡርዛ ኣሳታስ ኡባስ ኣዛዜታና ማላ ታ ኢንቴና ዎሳይስ።
1CO 16:17 ኢስቲፋኖሲ፥ ፌርዶናጾሲኔ ኣካይቆሲ ዪዳ ጊሻስ ታ ዳሮ ኡፋዬታይስ፤ ጋሶይካ ኢንቴ ሃን ታናራ ዶንታ ጊሻስ ኢስቲ ታስ ፓጪዛዝ ዉርሲ ኩንꬂዳ።
1CO 16:18 ታ ዎዚናኔ ኢንቴ ዎዚና ዉርሲ ሼምፒሲዳ፤ ሄሳ ጊሻስ ሄሳንታ ማላ ኣሳታ ሙሌ ባሎፒቴ።
1CO 16:19 ኢሲያ ቢታን ዲዛ ዎሳ ኬꬃቲ ኢንቴና ሳሮ ጌቴስ፤ ኣቂላይኔ ጲርሲቂላይካ ኢስታ ሶን ሺቂዛ ኣማኒዛ ኣሳይ ጎዳ ሱንꬃን ቦንቾ ሳሮታ ኢንቴስ ሺሼቴስ።
1CO 16:20 ሃን ኣማኒዛይቲ ዉሪካ ኢንቴና ሳሮ ጌቴስ፤ ኢንቴ ኢንቴ ጊዶን ኢሶይ ኢሳራ ሲቆ ዬሬቴꬅ ዬሬቲቴ።
1CO 16:21 ሃይሳ ሳሮካ ታ ኩሼራ ጻፊዳይ ታና ጳዉሎሳ።
1CO 16:22 ጎዳ ዶሶንታዴይ ዲኮ ኢዚ ቃንጌቲዳዴ ጊዶ! ጎዶ ሃ ያ!
1CO 16:23 ጎዳ ዬሱሳ ኪያቴꬂ ኢንቴናራ ጊዶ።
1CO 16:24 ታ ሲቆይ ጎዳ ዬሱስ ኪርስቶሳ ባጋራ ኢንቴስ ኡባስ ጊዶ! ኣሚን።
2CO 1:1 ጾሳ ሼኔ ማላ ዬሱስ ኪርስቶሳስ ኪቴቲዳ ጳዉሎሳፔኔ ኑ ኢሻ ጺምቶሳፔ ቆሮንቶሴን ዲዛ ጾሳ ዎሳ ኬꬄይስ ቃሴካ ኣካያ ቢታን ኣማኒዛ ኩሜꬃ ኣሳስ፥
2CO 1:2 ኑ ኣዋ ጾሳፌኔ ጎዳ ዬሱስ ኪርስቶሳፔ ኪያቴꬂኔ ሳሮይ ኢንቴስ ጊዶ።
2CO 1:3 ማሪዛ ኣዋሲኔ ዉርሲካ ሚንꬄꬂዛ ኑ ጎዳ ዬሱስ ኪርስቶሳ ኣዋ ጾሳስ ጋላታይ ጊዶ።
2CO 1:4 ኑኒካ ኑ ባጋራ ጾሳፌ ዴሚዳ ሚኖቴꬃን ሜቶቴቲዛይታ ሚንꬄꬃናስ ዳንዳያና ማላ ኑ ሜቶን ኢዚ ኑና ሚንꬄꬄስ።
2CO 1:5 ኪርስቶሳ ዋዬይ ኑ ቦላ ዳሪዳይሳ ማላ ኑስካ ኪርስቶሳ ባጋራ ሚንꬄꬆይ ዳሬስ።
2CO 1:6 ኑ ሜቶን ኢንቴ ኣቶቴꬂኔ ሚኖቴꬅ ዴሜታ፤ ኑኒ ሜቶቲሺን ቃሴ ኢንቴካ ካሴ ኤኪዳ ሜቶዛ ማላ ጌንጪ ኤኪዲ ሚኔታንዴታ።
2CO 1:7 ኑ ሜቶ ኢንቴ ኑናራ ሻኪ ኤኪዳ ማላ ኑናራካ ኢንቴ ሚኔታናይሳ ኑኒ ኤሪዛ ጊሻስ ኑስ ኢንቴ ቦላ ዲዛ ኡፋይሲ ጊታ።
2CO 1:8 ታ ኢሻቶ! ኢሲያ ቢታን ኑ ቦላ ጋኪዳ ሜቶዛ ጊሻስ ኢንቴ ኤራና ማላ ኑ ኮዮስ፤ ሄ ኑ ቦላ ጋኪዳ ሜቶዚ ኑ ቶካናፔ ዴጾ ጊዲዳ ጊሻስ ሃይቆንታ ፓጻ ዳና ጊዲ ቆፒቤኮ።
2CO 1:9 ኣዳፌካ ኑ ቦላ ሃይቆ ፒርዳይ ፒርዴቲዳ ሚሳቲዴስ፤ ሄሲ ዉሪካ ኑ ቦላ ጋኪዳ ጋሶይካ ኑኒ ሃይቂዳይታ ዴንꬂዛ ጾሳን ኣማኔታናሳፌ ኣቲን ኑ ዎልቃን ኣማኔቶንታ ማላ ሃኒዴስ።
2CO 1:10 ኢዚ ኑና ሄሳ ማላ ቆፖንታ ሃይቆፔ ኣሺዴስ፤ ሃኢካ ዎዴፔካ ኢዚ ኑና ኣሻናይሳ ኑ ኣማኔቶስ።
2CO 1:11 ኢንቴካ ኢንቴ ዎሳን ኑና ማዲቴ፤ ዳሮ ኣሳ ዎሳን ኑስ ኢሜቲዳ ኢሞታሲኔ ኑ ጊሻስ ዳሮቲ ጾሳ ጋላቴቴስ።
2CO 1:12 ሂስቲኮ ኑ ጬቄቴꬂ ሃይሳ ማላ፤ ሃ ኣላሜዛን ሃራፔካ ኢንቴሳራ ኑሳራ ዲዛ ጋይቶቴꬃን ጾሳፌ ጊዲዳ ጌሻቴꬃኒኔ ሱሬቴꬃን ኑ ዴኢዳይሳ ኑ ዎዚናይ ኑስ ማርካቴስ፤ ሄሲካ ኣሳ ጪንጫቴꬃን ጊዶንታ ጾሳ ኪያቴꬃና።
2CO 1:13 ኢንቴ ናባቢዲ ኤራናስ ዳንዳዮንታ ሚሽ ኑ ኢንቴስ ጻፎኮ፤ ኢንቴ ዉርሲካ ናባቢዲ ኤራናይሳ ኑ ኤሮስ።
2CO 1:14 ኢንቴ ኑናን ጬቄቲዛይሳ ማላ ኑኒካ ኢንቴናን ጬቄቲዛይሳ ሃኢ ዉርሲ ኤሮንታ ኣጊኮካ ጎዳ ዬሱሲ ሲሚ ዪዛ ጋላስ ዉርሲካ ኤራና።
2CO 1:15 ታኒ ሃይሳ ሻካ ኤሪዛ ጊሻስ ናምኡቶ ኢንቴ ጎኤታና ማላ ኮይሮ ኢንቴና ቤያና ቆፓዲስ።
2CO 1:16 ሄሲካ ታ ካሴ ማቂዶኒያ ባሼ ኢንቴና ቤያዳ ማቂዶኒያፔካ ሲማሼ ኢንቴ ኣቻራ ኣꬋዳ ታ ዩሁዳ ቢሺን ኢንቴ ታና ማዳና ማላ ቆፓዲስኮሺን።
2CO 1:17 ሃይሲ ታ ቆፋይ ኢንቴስ ታ ሎኤꬃ ቆፖንታ ቆፋ ሚሳቲዜ? ዎይኮ ኣይዛቤታስ ሎሴ ጊዲዳይሳꬆ ታኒካ ኢሲቶ፥ «ኤሮ ኤሮ፥ ቃሴካ ኣካይ ኣካይ» ጊዛ ሚሳቲዜ?
2CO 1:18 ጾሲ ኣማኔቲዳ ጾስ ጊዲዳ ማላ ኑ ኢንቴስ ዮቲዛ ቃላይካ፥ «ኤ» ጊዲ «ኣካይ» ጊዛዝ ጊዴና።
2CO 1:19 ጋሶይካ ታና ጊዲን ዎይኮ ሲልዋኖሳኔ ጺምቶሳ ጊዲን ኑ ኢንቴስ ሳባኪዳ ጾሳ ና ዬሱስ ኪርስቶሲ፥ «ኤኔ ኣካይ» ጊዴና፤ ጊዶ ኣቲን ኡባ ዎዴ ኢዛን፥ «ኤ» ጻላላይ ዴስ።
2CO 1:20 ጾሳፌ ኢሜቲዳ ሂዶታቲ ዉሪካ፥ «ኤ» ጊዲዳይ ኢዛና፤ ኑኒካ ኢዛ ባጋራ ጾሳ ቦንቾስ፥ «ኣሚን» ጊዛይ ሄሳ ጊሻሳ።
2CO 1:21 ሄሳ ጊሻስ ኢንቴካ ኑኒካ ኪርስቶሳን ሚኒ ኤቃና ማላኔ ባ ኦሶስ ዶሪዳይ ጾሳ።
2CO 1:22 ኑ ኢዛይታ ጊዲዳይሳ ኤሪሳናስ ባ ማታሜ ኑ ቦላ ሾጪዳይኔ ኑኒ ሲንꬃፌ ዴማና ሚሻስ ኣያና ዋሴቴꬅ ኑ ዎዚናን ዎꬂዳይ ኢዛ።
2CO 1:23 ታኒ ቆሮንቶሴ ሲማዳ ኢንቴኮ ቦንታ ኣጊዳይ ኢንቴና ሚሺሲኬ ጋዳኮ፤ ቃሴ ሄሲ ቱሙ ጊዶንታ ዎርዶ ጊዲኮ ጾሲ ታ ቦላ ማርካቶ።
2CO 1:24 ኢንቴ ኣማኖን ኤቂዳ ጊሻስ ኢንቴና ኡፋይሳናስ ኑ ኢንቴናራ ኦꬃና ኣቲን ኢንቴ ኣማኖ ቦላ ጎዳታናስ ጊዴና።
2CO 2:1 ታ ኢንቴና ሚሺሳናስ ኮዮንታ ጊሻስ ቃሴካ ኢንቴኮ ቢኬ ጋዳ ቆፋ ቃቻዲስ።
2CO 2:2 ታ ኢንቴና ሚሺሲዳዝ ጊዲኮካ ሚሼቲዳ ኢንቴፌ ኣꬊ ኡፋይሲዛይ ታስ ሃራይ ኦኒ ዲዜ?
2CO 2:3 ታ ካሴ ኢንቴስ ጻፊዳይ ታ ኢንቴኮ ቢዛ ዎዴ ታና ኡፋይሳናስ ቤሲዛ ኣሳቲ ታና ሚሺሶፔቶ ጋዳ ጻፋዲስ፤ ጋሶይካ ታ ኡፋዬቲኮ ኢንቴስ ኡባሲካ ኡፋይስ ጊዳናይሳ ታ ኣማናይስ።
2CO 2:4 ታ ኢንቴስ ሄሳꬆ ጻፊሺን ታ ዎዚናን ዳሮ ሚሻይኔ ዳሮ ቆፋይ ኩሚ ዲሺን ዳሮ ኣፉንጻሼ ጻፋዲስ፤ ሄሳካ ታ ኦꬂዳይ ታ ኢንቴና ዳሮ ሲቂዛይሳ ኢንቴ ኤራና ማላ ጋዳ ኣቲን ኢንቴና ሚሺሳናስ ጊዴና።
2CO 2:5 ኦኒካ ኣሴ ቆሂዳ ጊዲኮ ጉጄቾ ጊዶንታ ማላ ቆሂዳዴይ ታና ጻላ ጊዶንታ ጉꬃራ ጊዲኮካ ኢንቴናካ ኡባ ቆሂዴስ።
2CO 2:6 ሄሳ ማላ ኣሳስ ዳሮ ኣሳይ ኢዛ ቦላ ዎꬂዳ ቂጻቴይ ኢዛዴስ ጊዳና።
2CO 2:7 ሄሳዴይ ኬሂ ሙዞቲዲ ሂዶታ ቃንጾንታ ማላ ኢንቴ ሄሳዴስ ኣቶ ጊዲ ኢዛ ሚንꬄꬃናስ ቤሴስ።
2CO 2:8 ሄሳꬆካ ኢንቴ ኢዛ ሲቂዛይሳ ዛሬꬂዲ ኢዛ ቤሳና ማላ ታ ኢንቴና ዎሳይስ።
2CO 2:9 ታ ሃይሳ ኢንቴስ ጻፊዳይ ኢንቴ ኢንቴና ጋኪዛ ፓጬ ጾኒዲ ኡባን ኢንቴ ኣዛዜቲዛኮ ኤራናሳ።
2CO 2:10 ኢንቴ ኣቶ ጊዛዴስ ታኒካ ኣቶ ጋይስ፤ ቃሴ ታ ቱማፔ ኣቶ ጋናዚ ዲዛ ጊዲኮ ኪርስቶሳ ሲንꬃን ታ ኣቶ ጊዛይ ኢንቴ ጊሻስ ጋዳኮ።
2CO 2:11 ታ ሄሳꬆ ኦꬂዛይ ጻላኤይ ጌሊዛ ጾኤ ዴሞንታ ማላ ጋዳኮ! ኑኒ ኢዛ ጌኔ ቆፋ ባሎኮ።
2CO 2:12 ታኒ ኪርስቶሳ ሚሺራቾ ቃላ ዮታናስ ጺሮኣዳ ቢዳ ዎዴ ጎዳይ ታስ ኦሶ ኦጌ ዶይዴስ።
2CO 2:13 ጊዶ ኣቲን ታኒ ታ ኢሻ ቲቶሳ ሄን ዴሞንታ ኣጊዳ ጊሻስ፥ ታ ዎዚናይ ሼምፖንታ ኢጺዳ ጊሻስ ኢስቲ ታና ሄፔ ሞይዚን ማቂዶኒያ ዴሬ ባዲስ።
2CO 2:14 ጊዶ ኣቲን ኪርስቶሳ ባጋራ ኡባ ዎዴ ኑና ጾኖ ኦጌን ካሌꬂ ዩሺዛኔ ባ ሎኦ ኤራቴꬃ ኑ ባጋራ ኡባሶን ቆንጪሲዛ ጎዳስ ጋላታይ ጋኮ።
2CO 2:15 ጋሶይካ ኑኒ ꬋያናይታሲኔ ኣታናይታስ ጊዶን ኪርስቶሳ ባጋራ ጾሳስ ሺቂዳ ሳዎ ቱኑ ጊዛ ኤጻኔ ማላ።
2CO 2:16 ꬋያናይታስ ኑኒ ዎꬊዛ ጺንቆ፤ ኣታናይታስ ቃሴ ሃይቆፔ ዴኦሶ ኤፊዛ ዴኦ ሳዎ፤ ሂስቲን ሃይሳስ ቤሲዛዴይ ኦኔ?
2CO 2:17 ኑኒ ዎꬌ ዴማናስ ጊዲ ጾሳ ቃላ ሻቃጬ ማላ ዋላኬሬꬂዲ ባይዚዛ ዳሮ ኣሳታ ማላ ጊዶኮ፤ ጊዶ ኣቲን ጾሳፌ ኪቴቲዳ ሱሬ ኣሳ ማላ ጊዲዲ ኪርስቶሳን ጾሳ ሲንꬃን ሱሬ ዮቶስ።
2CO 3:1 ኑኒ ሃኢ ኑርካ ኑና ዛሪዲ ጋላቲኖ? ዎይኮ ሃራ ኣሳታ ማላ ኢንቴስ ጊዲን ዎይኮ ኢንቴፌ ሃ ኑስ ጻፌቲዳ ጋላታ ዳብዳቤ ኮሺዜሻ?
2CO 3:2 ኢንቴ ቃሴ ኣሲ ዉሪ ኤሪዛይኔ ናባቤቲዛ ኑ ዎዚና ጋርሳን ጻፌቲዳ ዳብዳቤታ።
2CO 3:3 ኢንቴ ቃላሜን ጻፌቲዳይታ ጊዶንታ ዴኦ ጾሳ ኣያናን ጻፌቲዳይታ፤ ቃሴካ ሹቻ ቦላ ዎጬቲ ጻፌቲዳይታ ጊዶንታ ኣሳ ዎዚናን ጻፌቲዳይታኔ ኢንቴ ኑናን ጎኤቲዳ ኪርስቶሳስ ቆንጬ ዳብዳቤታ።
2CO 3:4 ኪርስቶሳ ባጋራ ኑስ ጾሳ ቦላ ዲዛ ኣማኖይ ሄሳ ሚሳቴስ።
2CO 3:5 ኑና ሄሳስ ጋꬂዳይ ጾሳፌ ኣቲን ኑኒ ኑ ዎልቃን ኦꬂዶስ ጊዛ ሚሺ ኢሶይካ ዴና።
2CO 3:6 ሄሲካ ፒዳሌን ጻፌቲዳ ዎጋን ጊዶንታ ኣያናን ጻፊዳ ኦራꬃ ጫቆ ቃላ ኦሳንቻታ ኑ ጊዳና ማላ ኦꬂዴስ፤ ጋሶይካ ፒዳሌን ጻፌቲዳ ዎጋይ ዎꬌስ፤ ኣያናይ ጊዲኮ ዴኦ ኢሜስ።
2CO 3:7 ሄሳ ጊሻስ ኢስራኤሌ ናይቲ ኢዛ ኣይፌሶን ዲዛ ቦንቾ ጋሶቴꬃን ሙሴ ኣይፌሶ ቲሺ ሂስቲ ጼሎይ ኢስታ ጾናና ጋካናስ ሄሲ ጉዬፔ ꬋያናይሲኔ ሹቻ ቦላ ዎጬቲ ጻፌቲዲ ሃይቆ ጊዲዳይሲ ቦንቾን ቆንጪዛይሳ ጊዲኮ፥
2CO 3:8 ሂስቲን ኣያና ኦሶስ ዋኒዲ ሄሳፌ ኣꬊዛ ቦንቾይ ዴኔ?
2CO 3:9 ኣሲ ኢዛን ፒርዴቲዛ ኦሶይ ሄሳ ማላ ቦንቼቲዛይሳ ጊዲኮ ኣሲ ኢዛን ጺሊዛ ኦሶይ ሄሳፌ ኬሂ ኣꬊዛ ቦንቾይ ኢዛስ ዋኒ ዴኔ?
2CO 3:10 ሃይሳፌ ካሴ ቦንቼቲዳይሲ ሃራ ኢዛፔ ኣꬊዛ ቦንቾይ ዲዛይሳራ ጊግሲሺን ቦንቾይ ባይንዳይሳ ጊዲዴስ።
2CO 3:11 ꬉሚ ꬉሚ ቢዛይሳስ ሄሳ ማላ ቦንቾይ ዲኮ ሜርናስ ሚኒ ኤቂ ዳናይሳስ ሄሳፌ ኬሂ ኣꬊዛ ቦንቾይ ዋኒ ዴኔ?
2CO 3:12 ሄሳ ጊሻስ ሄሳ ማላ ሂዶታይ ኑስ ዲዛ ጊሻስ ኑኒ ጻላቴꬃን ሃሳዮስ።
2CO 3:13 ኢስራኤሌ ናይቲ ሙሴ ኣይፌሶይ ጾልቂዛይሳ ኣጊ ኣጊ ቢሺን ኢስቲ ዉርሴꬃ ቤኦንታ ማላ ኢዚ ባ ኣይፌሶ ጎዚዳ ሙሴ ማላ ጊዶኮ።
2CO 3:14 ጊዶ ኣቲን ካሴ ጋልኣ ጫቆ ቃላይ ናባቤቲሺን ሄ ዎዴ ጎሳዚ ሃች ጋካናስ ኪቾንታ ጊሻስ ኢስታ ዎዚናይ ዶጪዳ ማላ ዴስ፤ ሄ ጎሳይ ሃኢካ ኪቺቤና፤ ኢዚካ ኪቻናይ ኪርስቶሳን ጻላ።
2CO 3:15 ሃች ጋካናስካ ሙሴ ማጻፋቲ ናባቤቲዛ ዎዴ ሄ ዎዴ ጎሳይ ሃኢካ ኢስታ ዎዚና ጎዚ ኦይኬስ።
2CO 3:16 ጊዶ ኣቲን ኢሳዴይ ጎዳኮ ሲሚዛ ዎዴ ጎሳዚ ቃሬቲ ኪቼስ።
2CO 3:17 ጎዳይ ኣያና። ጎዳ ኣያናይ ዲዛሶን ኣይሌቴꬂ ዴና።
2CO 3:18 ኑኒካ ጎዳ ቦንቾ ማስቶቴ ማላ ጾልቄቲሼ ኢዛ ሚሳታናስ ሃ ቦንቾፌ ሃራ ቦንቾን ላሜታና፤ ሄሲካ ኣያና ጊዲዳ ጎዳፔ።
2CO 4:1 ጾሳ ማሮቴꬃ ዳሮፔ ዴንዲዳይሳን ሃይሲ ሃ ኦሶዚ ኑስ ዲዛ ጊሻስ ኑኒ ሂዶታ ቃንጾኮ።
2CO 4:2 ጊዶ ኣቲን ጌማራ ሃኒዛ ዬላሲዛ ዮኦታ ኑ ኣጊዶስ፤ ኣስ ባሌꬆኮ፤ ጾሳ ቃላ ዎርዶራ ዋላኮኮ፤ ሄሳ ሂስታናፔ ቱሙ ዮኦታ ቆንጬራ ዮቲሼ ኣሲ ዉሪካ ኑ ጊዛይሳ ኤካና ማላ ኑናቴꬃ ጾሳ ሲንꬅ ሺሾስ።
2CO 4:3 ኑ ሚሺራቾ ቃላይ ጎርዴቲኮካ ኢዚ ጎርዴቲዳይ ꬋያናይታሳ።
2CO 4:4 ጾሳ ሌሚሶ ጊዲዳ ኪርስቶሳ ቦንቾ ሚሺራቾ ቃላ ፖኦዛ ሃ ኣላሜ ኣሳይ ቤኦንታ ማላ ሃይሳ ሃ ኣላሜዛ ጾሲ ኣማኖንታ ኣሳ ዎዚና ሙሚሲዴስ።
2CO 4:5 ኑኒ ዬሱስ ኪርስቶሲ ጎዳ ጊዲዳይሳ ሳባኮስ ኣቲን ኑና ሳባኮኮ፤ ኑኒካ ኑ ባጋራ ዬሱሳ ጊሻስ ኢንቴስ ኦꬂዛዴንታ ጊዲዶስ።
2CO 4:6 ኪርስቶሳ ሲንꬃን ጾሲ ባ ቦንቾ ኤራቴꬃ ፖኦ ኑስ ኢማናስ፥ «ፖኦይ ꬉማን ፖኦ» ጊዳ ጾሲ ባ ፖኦ ኑ ዎዚናን ፖኢሲዴስ።
2CO 4:7 ጊዶ ኣቲን ሃይሲ ጊታ ዎልቃይ ኑስ ጾሳፌ ኢሜቲዴስ ኣቲን ኑፔ ጊዶንታይሳ ቤሳና ማላ ሃይሲ ቦንቾ ሚሻይ ኑናን ኦቶ ሚሳቲዛይታ ጊዶን ዴስ።
2CO 4:8 ኣዋ ባጋራካ ኑና ሱጊኮካ ኑኒ ቲንꬅ ጊ ሜቆኮ፤ ኑስ ዮኦይ ቲፒ ጊኮካ ሂዶታ ቃንጾኮ።
2CO 4:9 ኑ ጎዴቲኮካ ዎራ ዎꬊ ኣቶኮ፤ ኢስቲ ኑና ሾጪ ጌንዴሪሲኮካ ኑ ꬋዮኮ።
2CO 4:10 ዬሱሳ ዴኦይ ኑ ኣሳቴꬃን ቆንጫና ማላ ኑኒ ኢዛ ሃይቆ ኡባ ዎዴ ቶኪ ዩዮስ።
2CO 4:11 ዬሱሳ ዴኦይ ሃይቂዛ ኑ ኣሳቴꬃን ቆንጫና ማላ ፓጻ ዲዛ ኑኒ ኡባ ዎዴካ ዬሱሳ ጊሻስ ሃይቆስ ኣꬊ ኢሜቶስ።
2CO 4:12 ሄሳ ጊሻስ ኑ ሃይቆስ ኣꬊ ኢሜቲሺን ኢንቴ ቃሴ ዴኦን ጋኬታ።
2CO 4:13 ካሴ ጌሻ ማጻፋን ጻፌቲዳ ማላ፥ «ታ ኣማኒዳ ጊሻስ ሃሳያዲስ» ጌቴቲዳይሳ ኑኒካ ሄሳ ሄ ኣማኖ ኣያናን ኣማኒዛ ጊሻስ ሃሳዮስ።
2CO 4:14 ጋሶይካ ጎዳ ዬሱስ ኪርስቶሳ ሃይቆፔ ዴንꬂዳይሲ ኑናካ ኢዛራ ኢሲፌ ዴንꬂዲ ኢንቴናራ ባ ሲንꬅ ሺሻናይሳ ኑ ኤሮስ።
2CO 4:15 ዳሮ ኣሳ ጋኪሼ ዲዛ ኪያቴꬂ ጾሳ ቦንቾስ ጋላታ ቦላ ጋላታ ጉጃና ማላ ሃይሲ ዉሪካ ኢንቴና ጎኣናስ ሃኒዴስ።
2CO 4:16 ሄሳ ጊሻስ ኑ ሂዶታ ቃንጾኮ፤ ኑስ ካሬ ባጋ ኣሳቴꬃይ ꬋዪ ꬋዪ ቢኮካ ኑስ ጋꬃ ባጋ ኣሳቴꬃይ ጋላስ ጋላስ ኦራጺ ኦራጺ ቤስ።
2CO 4:17 ሄሳስ ሃኢ ጉꬃ ዎዴስ ኑና ጋኪዛ ዋዬይ ኢዛራ ጊጋናስ ዳንዳዮንታ ሜርናስ ጊዲዛ ቦንቾን ኑና ጋꬃና።
2CO 4:18 ሄሳ ጊሻስ ኑ ቲሺ ሂስቲ ጼሊዛይ ሃኢ ኣይፌን ቤቲዛ ሚሻ ቦላ ጊዶንታ ሃኢ ኣይፌን ቤቶንታ ሚሻ ቦላ ዴስ፤ ሃኢ ቤቲዛይሲ ኢዚ ሃኢስ ጻላ፤ ሃኢ ኣይፌን ቤቶንታይሲ ጊዲኮ ኢዚ ሜርናሳ።
2CO 5:1 ኑኒ ኢዛን ቢታ ቦላ ዲዛ ዱንካኔይ ላሌቲኮካ ኣሳ ኩሼን ጊዶንታ ጾሳ ኩሼን ኦሴቲዳ ሜርና ኬꬂ ኑስ ሳሎን ዲዛይሳ ኑ ኤሮስ።
2CO 5:2 ሄ ዎዴይ ጋካናስ ኑ ኬꬃ ሳሎይሳ ማይኣናስ ኑ ላሞቲ ናጎስ።
2CO 5:3 ቱማፔ ሄሳ ኑ ማይኢዳፔ ጉዬ ካሎቶኮ።
2CO 5:4 ኑኒ ሃይሳ ሃ ዱንካኔዛን ዲዛ ዎዴ ኡባን ኢዚ ዴጺዛ ጊሻስ ዳቡራ ፒꬊ ጎስ፤ ሄሳስ ጋሶይካ ሃይቂዛይሲ ዴኦን ላሜታና ማላ ኑኒ ሳሎን ዳና ሶሆዛ ማይኣና ኣቲን ኑፔ ቃሬታና ማላ ኑ ኮዮኮ።
2CO 5:5 ሄሳስ ኑና ጊግሲዳይ ጾሳ፤ ቡሮ ያናይሳስ ዋሴ ጊዳና ማላ ኑስ ባ ኣያና ኢሚዳይ ኢዛ።
2CO 5:6 ኑኒ ኣሾን ዲዛ ዎዴ ጎዳፔ ሃኪ ዲዛይሳ ኤሪኮካ ኢዛን ኣማኔቲዲ ዶስ።
2CO 5:7 ኑኒ ዲዛ ዱሳይ ጎዳን ኣማኒዲ ኣቲን ኣይፌን ቤኦን ጊዴና።
2CO 5:8 ኑኒ ኣሾፔ ሻኬቲዲ ጎዳራ ዱስ ዶራናይሳ ታ ሲꬎንታ ዮታይስ።
2CO 5:9 ሄሳ ጊሻስ ኑኒ ኣሾን ዲኮ ዎይኮ ኣሾፔ ሻኬቲኮካ ኑስ ዋና ቆፋይ ጎዳ ኡፋይሶ።
2CO 5:10 ኑኒ ዉሪካ ኪርስቶሳ ፒርዳ ዎምቦራ ሲንꬅ ሺቃናይሲ ኣቴና፤ ኑፔ ኢሶይ ኢሶይ ቢታ ቦላ ባ ኦꬂዳይ ኢታ ጊዲን ዎይኮ ሎኦ ጊዲን ባ ኦሶ ማላ ቤሲዛ ዋጋ ባስ ኤካና።
2CO 5:11 ሄሳ ጊሻስ ጎዳስ ያሻ ጉሲ ኣይ ጉሳኮኔ ኑ ኤሪዛ ጊሻስ ኣሳይ ኑ ዮቲዛይሳ ኤሮ ጊ ኤካና ማላ ኦꬃናስ ዳቡሮስ፤ ኑኒ ኦናንታኮ ጾሳ ኣቻን ቆንጬ፤ ቃሴካ ኢንቴ ዎዚናንካ ቆንጬ ጊዲዳይሳ ታ ኣማናይስ።
2CO 5:12 ታ ሄሳ ጊዛይ ኑና ኢንቴ ሲንꬃን ጋላታናስ ጊዶንታ ዲሺን ኢንቴ ኑናን ጬቄታና ማላ ኣቲን ዎዚናፔ ጊዶንታ ኣይፌን ቤቲዛ ሚሻን ጬቄቲዛይታስ ኢንቴ ዛሮ ኢማናስ ዳንዳያና ማላ ጋዳ ጋይስ።
2CO 5:13 ኑ ጎሽ ጊዲኮ ጾሳ ጊሻስ ጊዲ ጎዪዶስ፤ ኤራታ ጊዲኮካ ኢንቴስ ጊዲኮ!
2CO 5:14 ኪርስቶሲ ኡባስ ኢሲቶ ሃይቆይሳኔ ሃራይ ዉሪካ ኢዛራ ኢሲፌ ሃይቂዳይሳ ኑ ኤሪዳ ጊሻስ ኪርስቶሳ ሲቆይ ኑና ዎልቃራ ኦሲሴስ።
2CO 5:15 ሼምፖራ ፓጻ ዲዛይቲ ዉሪካ ሄ ሃይቂዳይሳሲኔ ሃይቆፔ ዴንዲዳይሳስ ዳና ማላፔ ኣቲን ሃይሳፌ ጉዬ ኢስቲ ባስ ዶንታ ማላ ኪርስቶሲ ኡባስ ሃይቂዴስ።
2CO 5:16 ሄሳ ጊሻስ ሃይሳፌ ጉዬ ኑኒ ኣይ ኣሲካ ኣሾ ኣይፌን ጼሎኮ፤ ኑኒ ሃይሳፌ ካሴ ኪርስቶሳ ኣሾ ኣይፌን ጼሊዳ ጊዲኮካ ሃይሳፌ ጉዬ ሄሳꬆ ጼሎኮ።
2CO 5:17 ሄሳ ጊሻስ ኦኒካ ኪርስቶሳ ባጋ ጊዲኮ ኢዚ ኦራꬃ ሜꬌቴꬃ፤ ካሴ ጬጋ ሜꬌቴꬂ ኣꬊዴስ፤ ኢዚ ኪቾሳን ሃራ ኦራꬃ ሜꬌቴꬂ ጌሊዴስ።
2CO 5:18 ሄሲ ዉሪ ሃኒዳይ ኢዚ ኑና ባናራ ኪርስቶሳ ባጋራ ማቃዪንꬂዲኔ ማቃዪንꬆ ኦሶ ኑስ ኢሚዳ ጾሳና።
2CO 5:19 ሄሲካ ጾሲ ኪርስቶሳ ባጋራ ሃንኮ ኣላሜ ኣሳ ዉርሲካ ባናራ ማቃዪንꬂዴስ ጉሳ፤ ኢስታ ቆሆዛካ ቆዲቤና፤ ኑኒ ኣስ ጎዳራ ማቃዪንꬃና ቃላ ኑስካ ኢሚዴስ።
2CO 5:20 ጾሲ ኑ ባጋራ ኣስ ጼይጊዛ ጊሻስ ኑኒ ቃሴ ኪርስቶሳ ኦጋꬃታ፤ ሄሳ ጊሻስ፥ «ኢንቴ ጾሳራ ማቃይኒቴ!» ጊዲ ኑ ኢንቴና ኪርስቶሳ ሱንꬃን ዎሶስ።
2CO 5:21 ኑኒ ኪርስቶሳ ባጋራ ጾሳ ጺሎቴꬅ ጊሼቲ ኤኪዛይታ ጊዳና ማላ ጾሲ ኢዛ ቦላ ናጋራይ ባይንዳ ኪርስቶሳ ኢዚ ኑ ናጋራ ቶካና ማላ ኦꬂዴስ።
2CO 6:1 ኑኒ ጾሳራ ኦꬂዛይታ ጊዲዳ ማላ ኢንቴ ኤኪዳ ጾሳ ኪያቴꬃ ጮ ሜላ ኣሾፍቴ ጊሼ ኑ ኢንቴና ዎሶስ።
2CO 6:2 ጾሲ፥ «ታኒ ታስ ጊጊዳ ጋላስ ኔና ሲያዲስ! ኣቲዛ ጋላስ ታ ኔና ማዳዲስ!» ጊዛ ጊሻስ ሎኦ ዎዴይ ሄኮ ሃኢ! ኣቴꬃ ጋላሲካ ሃኢኮ!
2CO 6:3 ኑ ኦሶይ ሌቄቶንታ ማላ ኣይ ዎዴካ ኦናስካ ኑኒ ꬉጴ ጊዶኮ።
2CO 6:4 ሄሳፌ ኣꬂዲ ዋዬኔ ሜቶ ኡንኦካ ዳንዳያን ጾሳስ ኦꬂዛ ኣሳታ ማላ ኣይ ኦጌራካ ኑናቴꬃ ኣꬂ ኢሞስ።
2CO 6:5 ኑኒ ጾሳስ ኦꬂዛይታ ጊዲዳይሳ ቤሲዛይ ጋራፌቴꬃን፥ ቃሼቴꬃን፥ ሂርጋን፥ ዳቡሪ ኦሶን፥ ꬊስኮ ꬋዮኒኔ ጋፋና።
2CO 6:6 ሄሳꬆካ ጌሻቴꬃን፥ ኤራቴꬃን፥ ዳንዳያን፥ ኪያቴꬃን፥ ጺሎ ኣያና ካሎኒኔ ቆꬌፔ ቆሞን ጊዶንታ ሲቆን፥
2CO 6:7 ቱማ ቃላኒኔ ጾሳ ዎልቃና፤ ኑ ኢዛን ጌዴ ኦሊ ጾኒዛ ኦላ ሚሺኔ ካሜቲ ኣቲዛ ጎንዳሌይ ጺሎቴꬃ።
2CO 6:8 ቦንቾስ ጊዲን ዎይኮ ካዉሻስ፥ ቆꬌታናስ ዎይኮ ጋላታናስ ኑኒ ጊጌቲዳይታ፤ ኑኒ ቱማንቻታ ሺን ኣሴ ባሌꬂዛይታ ጌቴቲዶስ።
2CO 6:9 ኑኒ ኤሬቲዳይታ ሺን ኤሬቶንታይታ ጊዲዶስ፤ ኢስቲ ሃይቂዳይታኮ ጊሺን ኑኒ ፓጻ ዶስ፤ ኣሳይ ኑና ቡኪ ቡኪንካ ኑ ሃይቂቤኮ።
2CO 6:10 ሙዞይ ኑና ጋኪኮካ ኡባ ዎዴ ኡፋዬቶስ፤ ኑኒ ማንቆኮ ሺን ዳሮ ማንቆታ ዱሬ ኬሶስ፤ ኑስ ኣይኮይካ ባይንዳይታ ሺን ዉሪካ ኑስ ዴስ።
2CO 6:11 ኢንቴኖ ቆሮንቶሴን ዲዛይቶ! ታ ካሴ ኢንቴስ ቆንጬን ዮታዲስ፤ ኑኒ ኑ ዎዚና ኢንቴና ኡባ ቤሲዶስ።
2CO 6:12 ኢንቴ ቃሴ ኑና ኢንቴ ሲቆ ቤሳናስ ኡዜቲዴታ ኣቲን ኑ ኢንቴና ኑ ሲቆ ቤሳናስ ኡዜቲቤኮ።
2CO 6:13 ኣዋይ ባ ናስ ዮቲዛ ማላ ታኒካ ኢንቴስ ኣኔ ዮታይስ፤ ኑኒ ኑ ዎዚና ኬሂ ዶይዲ ኑ ቆፋ ኢንቴስ ቆንጪሶይሳꬆ ኢንቴካ ኑስ ሄሳꬆ ቆንጪሲቴ።
2CO 6:14 ኣማኖንታ ኣሳራ ጊጋይ ባይንዳ ኢሲፌቴꬃን ኦይኬቶፍቴ፤ ጺሎቴꬂኔ ናጋራይ ዋኒ ኢሲፌታናስ ዳንዳይዜ? ፖኦይኔ ꬉማይ ኢሲፌ ዋኒ ዳና ዳንዳይዜ?
2CO 6:15 ኪርስቶሲኔ ዳቡሎሲ ዋኒ ጋጋናስ ዳንዳይዞ? ኣማኒዛዴይ ኣማኖንታዴራ ኣዛን ላጌታናስ ዳንዳይዜ?
2CO 6:16 ጾሳ ዎሳ ኬꬃስ ኤቃታራ ኣዛ ጋጎይ ዲዜ? ጾሲካ፥ «ታኒ ታ ዱሳሶ ታ ዴሬዛ ጊዶን ኦꬃና፤ ታኒካ ኢስታራ ዳና፤ ኢስታስካ ጎዳ ጊዳና፤ ኢስቲካ ታ ዴሬታ ጊዳና» ጊዲ ካሴ ዮቲዳ ማላ ኑኒ ኢሶይ ኢሶይ ዴኦ ጾሳ ኬꬃታ።
2CO 6:17 ጎዳይ፥ «ኢንቴ ኢስታ ጊዶፌ ሻኬቲዲ ኬዚቴ! ቱና ሚሽ ቦቾፍቴ፤ ታኒካ ኢንቴና ኤካና።
2CO 6:18 ታ ኢንቴስ ኣዋ ጊዳና፤ ኢንቴካ ታስ ኣቱማ ናይታኔ ማጫ ናይታ ጊዳንዴታ» ጌስ ኡባ ዳንዳይዛ ጎዳይ።
2CO 7:1 ሄሳ ጊሻስ ታ ሲቆቶ! ሃይሲ ሂዶታይ ኑስ ኢሜቲዳ ጊሻስ ኣሾኔ ኣያና ቱኒሲዛ ኣይ ሚሻፌካ ኣኔ ኑና ጌሾስ፤ ጾሳስ ያሻን ኑ ጌሻቴꬃ ኣኔ ኩሜꬅ ሂስቶስ።
2CO 7:2 ኢንቴ ኑና ኡፋይሳን ሞኪ ኤኪቴ፤ ኑኒ ኦናካ ቆሂቤኮ፤ ኦናካ ቆሂቤኮ፤ ኦና ጎኣካ ኑስ ባሌꬂ ኤኪቤኮ።
2CO 7:3 ታኒ ሄሳꬆ ጊዛይ ኢንቴ ቦላ ፒርዳናስ ጊዴና፤ ሃይሳፌ ካሴ ታ ኢንቴስ ዮቲዳ ማላ ኢንቴ ኑ ዎዚናን ዴታ፤ ሄሳ ጊሻስ ሃይቆንካ ጊዲን ፓጻንካ ኡባ ዎዴ ኑ ኢንቴፌ ሻኬቶኮ።
2CO 7:4 ታስ ኢንቴ ቦላ ዲዛ ኣማኖይኔ ጬቄቴꬂ ዳሮ ጊታ፤ ታ ኢንቴናን ሚኔታይስ፤ ኑና ጋኪዛ ሜቶ ኡባን ታኒ ኬሃ ኡፋዬታይስ።
2CO 7:5 ኑኒ ማቂዶኒያ ጋኪዳ ዎዴካ ዱማ ዱማ ባጋራ ሜቶይ ኑና ጋኪዴስ ኣቲን ኑኒ ኣይኮካ ሼምፖ ዴሚቤኮ፤ ኑስ ሶራ ሂርጋይ፥ ካሬራ ቃሴ ኦሺ ዴስ።
2CO 7:6 ጊዶ ኣቲን ሙዞቲዳይታ ሚንꬄꬂዛ ጎዳይ ቲቶሳ ዩሳን ኑና ሚንꬄꬂዴስ።
2CO 7:7 ኑኒ ሚኔቲዳይ ኢዛ ዩሳን ጻላ ጊዶንታ ዲሺን ኢንቴ ኢዛ ሚንꬄꬂዳይሳ ኑ ጉጂ ሲዪዳ ጊሻሳ፤ ኢንቴ ታና ላሞቲዳይሳ ታስ ቃꬌቲዛይሳ ቆፒዛይሳካ ኢዚ ኑስ ዮቲን ሲያዳ ታኒ ዳሮ ኡፋዬታዲስ።
2CO 7:8 ታኒ ሃይሳፌ ካሴ ኢንቴስ ጻፊዳ ኪታይ ኢንቴና ሚሺሲዳ ጊዲኮካ ሄ ኪታ ጻፊዳ ጊሻስ ታኒ ሄሳꬆ ኣዛስ ጻፋዲና ጋዳ ሞꬌቲኬ፤ ሞꬌቲኮካ ታ ሞꬌታናይ ጉꬃ ዎዴስ ኢንቴ ታና ሚሺሲዳ ጊሻሳ።
2CO 7:9 ሃኢ ጊዲኮ ታ ኡፋዬታይስ፤ ታኒ ኡፋዬቲዳ ጋሶይካ ታኒ ኢንቴና ሚሺሲዳ ጊሻስ ጊዶንታ ኢንቴ ሄ ሚሻፔ ዴንዲዳይሳን ማሮቴꬃን ጌሊዲ ላሜቲዳ ጊሻሳ፤ ሄሳ ጊሻስ ኢንቴ ሚሼቲኮካ ጾሳ ሼኔ ማላ ጊዲዳ ጊሻስ ኑኒ ኢንቴና ኣይኮካ ቆሂቤኮ ጉሳ።
2CO 7:10 ጾሳ ሼኔ ማላ ጊዲዳ ሙዞቴꬂ ጌዴ ማሬቲ ኣታናሶ ጋꬄስ፤ ሄሳስካ ሞꬌቴꬂ ዴና፤ ዎዚናፔ ጊዶንታ ሙዞቴꬂ ጊዲኮ ሃይቆን ጋꬄስ።
2CO 7:11 ሃይሲ ኢንቴ ሙዞቴꬂ ጾሳ ሼኔ ማላ ጊዲዳ ጊሻስ ሄሲ ኣይ ማላ ሚኖቴꬃን፥ ኣይ ማላ ኦይሻ ዛሮን፥ ኣይ ማላ ኤሌ ሃንቄቴꬃን፥ ኣይ ማላ ያሻቴꬃን፥ ኣይ ማላ ላሞቴꬃን፥ ኣይ ማላ ሎኦ ኣሞን፥ ኣይ ማላ ሙራን ኢንቴና ጋꬂዳኮ ኣኔ ኢንቴ ዎዚናን ዩሺ ቆፒቴ፤ ኢንቴ ቃሴ ሃኒዳ ኡባንካ ሄ ሃኖዛፔ ጌሽ ጊዲዳይሳ ማርካሲዴታ።
2CO 7:12 ሄሳ ጊሻስ ታ ኢንቴስ ጻፊዳይሲ ኢንቴ ኑስ ኣይ ማላ ኣማኔቲዛይታኮ ኢንቴ ኢንቴና ጾሳ ሲንꬃን ቤያና ማላፔ ኣቲን ቆሂዳዴ ጊሻሲኔ ቆሄቲዳዴ ጊሻስ ጋዳ ጊዴና።
2CO 7:13 ኑኒ ሚኔቲዳይሳፌ ቦላራ ቲቶሲ ዴሚዳ ኡፋይሳን ዳሮ ኡፋዬቲዶስ፤ ኑኒ ኡፋዬቲዳይካ ኢንቴ ዉሪካ ቲቶሳ ሚንꬄꬂዳ ጊሻሲኔ ኢዛ ዎዚና ሼምፒሲዳ ጊሻሳ።
2CO 7:14 ታኒ ኢንቴናን ጬቄቲዛይሳ ካሴ ቲቶሳስ ዮታ ዎꬃዲስ፤ ኢንቴካ ታና ዬላሲቤኬታ፤ ኡባ ዎዴ ታ ኢንቴስ ቱማ ጻላላ ዮታሼ ዳይስ፤ ሄሲካ ኑኒ ኢንቴ ጊሻስ ቲቶሳስ ዮቲዳ ዮኦይ ቱሙ ጊዲ ኣማኔቲዴስ።
2CO 7:15 ኢንቴ ዉሪካ ኣዛዜቲዛይታ ጊዲዳይሳ፥ ያሻቴꬃኒኔ ኮኮሪሼ ኢንቴ ኢዛ ሞኪ ኤኪዳይሳ ቲቶሲ ቆፒ ኤኪዲ ኢዚ ኢንቴና ሲቂዛይሳስ ዛዋይ ባ።
2CO 7:16 ታኒካ ኡባ ባጋራ ኢንቴናን ኣማኔታናስ ዳንዳይዳ ጊሻስ ዳሮ ኡፋዬታዲስ።
2CO 8:1 ታ ኢሻቶ! ጾሲ ማቂዶኒያን ዲዛ ኣማኒዛ ኣሳስ ኢሚዳ ኪያቴꬃ ኢንቴ ኤራና ማላ ታ ኮያይስ።
2CO 8:2 ኢስቲ ዳሮ ሜቶቲ ዲሼ ዳሮ ኡፋዬቲዳ፤ ኬሂ ማንቆታ ጊዲኮካ ዳሮ ኪያቲዳ።
2CO 8:3 ኢስቲ ባስ ዳንዳዬቲዛይሳ ማላኔ ባስ ዳንዳዬቲዛይሳፌካ ኣꬂ ኢሚዳይሳ ታ ኢስታ ጊሻስ ማርካታይስ።
2CO 8:4 ዩሁዳን ዲዛ ኣማኒዛይታስ ማዶ ኢማናስ ዲጌቶንታ ማላ ኑና ኬሂ ዎሲዳ።
2CO 8:5 ኢስቲ ኑኒ ቆፒዳይሳፌ ቦላራ ኣꬂ ኦꬂዳ፤ ኢስቲ ኮይሮ ባና ጎዳስ ኢሚዳ፤ ዛሪዲካ ጾሳ ሼኔ ማላ ባናካ ኑስ ኢሚዳ።
2CO 8:6 ሃይሳ ኦሶዛ ኮይሮ ቲቶሲ ዶሚዳ ጊሻስ ሃኢካ ሃይሳ ማዶ ኢሞዛ ኢዚ ፖላና ማላ ኑ ኢዛ ዎሲዶስ።
2CO 8:7 ኢንቴ ኣማኖን፥ ሃሳያን፥ ኤራቴꬃን፥ ሚኖ ኦሶን፥ ኢንቴ ኑና ሲቂዛ ሲቆን፥ ኡባ ዮኦን ኣꬌታ፤ ሄሳꬆካ ኪያቴꬃ ኦሶንካ ኣꬊዛይታ ጊዲቴ።
2CO 8:8 ታ ሄሳ ጊዛይ ኢንቴና ጮ ሜላ ኣዛዛናስ ጊዴና፤ ጊዶ ኣቲን ሃንኮ ሃራ ኣሳይ ሚኒ ኢሚዛይሳ ኢንቴናራ ጋꬃ ቤዪሺን ኢንቴ ሲቆይ ቱሙ ጊዲዳይሳ ሻካ ኤራናሳ።
2CO 8:9 ኢንቴ ኑ ጎዳ ዬሱስ ኪርስቶሳ ኪያቴꬅ ኤሬታ።
2CO 8:10 ሃይሳ ሃ ሃኖዛን ታስ ሎኦ ጊዲ ቤቲዳ ዞሬ ታ ኢንቴስ ኢማይስ፤ ዚላይꬅ ኢንቴ ኢሞ ጻላ ጊዶንታ ዲሺን ኢማናስ ኮይሮፔ ቆፒዳይ ኢንቴና።
2CO 8:11 ሄሳ ጊሻስ ኢንቴ ኢማናስ ኮዪዳይሲ ፖሌታና ማላ ኢንቴስ ዲዛ ማላ ካሴ ኢንቴ ቆፒዳይሳ ሃኢ ኦꬂቴ።
2CO 8:12 ኣሲ ኢማናስ ዎዚናፔ ኮይኮ ኢዛዴይ ኪያቴꬃን ኢሚዛይሲ ኤኬቲዛይ ኣሲ ባስ ዲዛሪ ማላ ኢሚኮ ኣቲን ባስ ባይንዳይሳፌ ኢሚሺን ጊዴና።
2CO 8:13 ታ ሃይሳꬆ ጊዛይ ኢንቴ ዉሪካ ጊና ጊዳና ማላ ኣቲን ኢንቴ ኢሞን ዋዬቲሺን ሃራቲ ሼምፓና ማላ ጋዳ ጊዴና።
2CO 8:14 ኢንቴ ዋዬቲሺን ኢስታ ሚሻይ ኢንቴ ሜቶ ኣሻና ማላ ሃኢ ቃሴ ኢንቴ ሚሻይ ኢስታ ሜቶ ኣሾ፤ ሄሳ ማላን ኢንቴ ጊዶን ጊናቴꬂ ዳና።
2CO 8:15 ሄሲካ፥ «ዳሮ ሺሺዳዴስ ዎꬊቤና፤ ጉꬅ ሺሺዳዴስካ ፓጪቤና» ጌቴቲ ጌሻ ማጻፋን ጻፌቲዳ ማላ።
2CO 8:16 ታኒ ኢንቴስ ቆፒዛይሳ ማላ ቲቶሳይካ ኢንቴስ ዎዚናፔ ቆፓና ማላ ኦꬂዳ ጎዳይ ጋላቴቶ።
2CO 8:17 ቲቶሲ ኢንቴኮ ቢዛይ ባርካ ባ ቆፋን ኡፋይሳንፔ ኣቲን ኑኒ ኢዛ ዎሲዳ ጊሻስ ጻላ ጊዴና።
2CO 8:18 ሚሺራቾ ቃላ ኦሶን ዎሳ ኬꬃታን ኡባን ዶሴቲዳ ኢሻዛ ኑ ኢዛራ ጋꬂ ዬዶስ።
2CO 8:19 ሄሳፌካ ቦላራ ሃይሲ ኑ ኢሻይ ኑኒ ሃይሳ ሎኦ ኦሶዛ ጎዳ ቦንቾስ ኦꬂሺኒኔ ኑኒ ኦꬃናስ ኮይዛይሳ ኢዛስ ቆንጪሲሺን ኢዚ ኑናራ ቢዲ ኦꬃናስ ዎሳ ኬꬃቲ ዶሪዳዴ።
2CO 8:20 ሃይሳ ኪያቴꬅ ኢሜቲዳ ሚሻዛ ኑኒ ኦይኪሺን ኑ ቦላ ኣይኮ ቦሮይካ ጋኮንታ ማላ ኑኒ ናጌቶስ።
2CO 8:21 ጋሶይካ ኑስ ዋና ቆፋይ ጎዳ ሲንꬃን ጻላ ጊዶንታ ኣሳ ሲንꬃንካ ሎኦ ኦꬃናሳ።
2CO 8:22 ዳሮ ዎዴ ዳሮ ሚሻን ፓጬቲዲ ሚኖ ጊዲዳ ኑ ኢሻ ቲቶሳራ ኑ ኢዛ ዬዲዳይ ሄሳሳ፤ ኢዛስ ኢንቴ ቦላ ዲዛ ኣማኖይ ዳሮ ጊታ ጊዲዳ ጊሻስ ኢዚ ሃኢ ኢንቴና ማዳናስ ካሴፔ ኣꬂ ኮዬስ።
2CO 8:23 ኢንቴ ቲቶሳ ጊሻስ ኤራናስ ኮይኮ ኢዚ ኢንቴና ማዳናስ ታናራ ኦꬂዛዴ፤ ኢዛራ ኢሲፌ ቢዛ ሃንኮ ኢሻቲ ቃሴ ዎሳ ኬꬃቲ ባ ጊሻስ ዬዲዳ ኪርስቶሳ ቦንቾስ ኤቂዳይታ።
2CO 8:24 ሄሳ ጊሻስ ኢንቴ ኢስታስ ኢንቴ ሲቆ ቤሲቴ፤ ኢንቴ ሄሳꬆ ሂስቲኮ ኢንቴ ሲቆይኔ ኑ ኢንቴናን ጬቄቲዛ ጬቄቴꬂ ጮ ሃዳ ጊዶንታይሳ ኢንቴ ዎሳ ኬꬃታስ ቤሳንዴታ።
2CO 9:1 ዩሁዳን ዲዛ ኣማኒዛይታስ ኬሲዛ ሚሻ ጊሻስ ታ ኢንቴስ ጻፋናስ ኮሼና።
2CO 9:2 ኢንቴስ ኣካያን ዲዛ ኣሳስ ማዳና ሎኦ ቆፋይ ዲዛይሳ ታ ኤራዳ፥ «ኣካያ ኣሳይ ዚላይꬃፌ ኦይኪዲ ማዶስ ጊጌቲዴስ» ጋዳ ማቂዶኒያ ኣሳስ ዮታዲስ። ሃራፔካ ኢንቴ ማዳናስ ኮዪዳ ሱሬ ቆፋይ ዳሮታ ሎኦ ኦሶስ ዴንꬄꬂዴስ።
2CO 9:3 ሃይሳ ሃ ሃኖዛን ኑ ኢንቴናን ጬቄቲዛይሲ ጮ ሃዳ ጊዶንታ ማላ ሃይታ ኑ ኢሻታ ታ ኪታዲስ፤ ኢንቴካ ታ ካሴ ኢንቴስ ጊዳ ማላ ናጌቲ ኡቲቴ።
2CO 9:4 ማቂዶኒያ ኣሳቲ ታናራ ኢንቴኮ ቢሺን ኢንቴ ጊጌቶንታ ዲዛይሳ ቤኢኮ ኢንቴናን ጬቄቲዛይሳን ኑኒ ዬላታና፤ ኢንቴ ቃሴ ዳሮ ዬላታና።
2CO 9:5 ሄሳ ጊሻስ ኢንቴ ካሴ ኢማና ጊዳይሳ ካሴቲዲ ጊጊሳና ማላ ኢንቴና ቆፍሳይስ፤ ኣይስ ጊኮ ሃይቲ ኢሻቲ ታፔ ካሴቲዲ ኢንቴኮ ጋካና ማላ ኮሺዛይሲ ታስ ቤቲዴስ፤ ሄሳꬆካ ታኒ ቢዛ ዎዴ ኢንቴ ኢማናይሲ ጊጊ ኡቲዳዝ ጊዳና፤ ኢንቴካ ኢማናይሲ ዎልቃራ ጊዶንታ ዶሳን ጊዲዳይሳ ቤሳና።
2CO 9:6 «ጉꬅ ዜሪዳ ኣሲ ጉꬅ ሺሻና፤ ዳሮ ዜሪዳዴይ ቃሴ ዳሮ ካꬅ ሺሻና» ጊዛ ቃላ ዩሺ ቆፒቴ።
2CO 9:7 ጾሲ ዶሲዛይ ባ ዶሳን ኢሚዛዴ ጊዲዳ ጊሻስ ኢሲ ኢሲ ኣሲ ኢማናስ ባ ዎዚናን ቆፒዳሮ ኡፋይሳን ኢሞ ኣቲን ሞꬌቲሼ ጮ ዎልቃራ ኢሞፎ።
2CO 9:8 ኡባ ዎዴ ሃኒዛ ኡባን ኢንቴ ኢንቴስ ጊዲ ፓላሂዲ ሃራ ሎኦ ኦሶስ ጊዳና ማላ ጾሲ ኢንቴስ ባ ኣንጆ ጉጂ ኢማናስ ዳንዳዬስ።
2CO 9:9 ሄሲካ፥ «ማንቆታስ ኪያቴꬃን ኢሚዴስ፤ ኢዛ ጺሎቴꬂ ሜርናስ ዴያና» ጌቴቲ ጌሻ ማጻፋን ጻፌቲዳ ማላ።
2CO 9:10 ዜሪዛዴስ ዜሬꬂ፥ ማናስ ካꬅ ኢሚዛ ጎዳይ ኢንቴ ዜሪዛ ዜሬꬃ ኢዚ ኬሂ ዳርሲ ኢማና፤ ኢዚ ኢንቴ ኪያቴꬃ ኦሶዛ ኣይፌ ኢንቴስ ዳርሳና።
2CO 9:11 ኢንቴ ኪያቴꬃን ኢሞይሲ ኑ ባጋራ ኢስታ ጋኪዛ ኣሳቲ ጾስ ጋላታና ማላ ኢንቴ ኡባ ዎዴ ኪያቴꬅ ኢማና ማላ ጾሲ ኢንቴና ኡባሶራ ዱሬሳና።
2CO 9:12 ሃይሲ ኢንቴ ኢሚዛ ኪያቴꬃ ኦሶይ ኣማኒዛይታ ሜቶ ማዶፔ ቦላራ ኣሳይ ጾሳ ዳርሲ ጋላታና ማላ ኦꬄስ።
2CO 9:13 ሃይሲ ኢንቴ ኪያቴꬃ ኦሶዚ ኢንቴ ኪርስቶሳ ሚሺራቾ ቃላን ኣማኒዲ ኣማኔቲዳይታ ጊዲዳይሳ፥ ኢስታሲኔ ሃራታስካ ኢንቴ ኪያቴꬅ ኢሚዳይሳ ኤሪሲዛዝ ጊዲዳ ጊሻስ ኢስቲ ዉሪካ ጾስ ጋላታና።
2CO 9:14 ኢስቲ ቃሴ ጾሲ ኢንቴስ ኢሚዳ ጊታ ኪያቴꬃ ጋሶን ኢንቴና ሲቂዛ ጊሻስ ኢንቴስ ዎሳና።
2CO 9:15 ኣሳ ቃላን ቆንጪሴꬃፌ ቦላ ጊዲዳ ጾሳ ኢሞቴꬃ ጊሻስ ጾሲ ጋላቴቶ።
2CO 10:1 ታኒ ጳዉሎሲ ኢንቴናራ ዳሼ ኣሽኬ ጌቴታዲስ ሺን ታ ኢንቴፌ ሻኬቲሺን ቃሴ ኢንቴ ቦላ ጻሊዳዴ ጌቴቲዳ ታኒ ጳዉሎሲ ኪርስቶሳ ኣሽኬቴꬃኒኔ ኢዛ ሎኤቴꬃን ኢንቴና ዎሳይስ።
2CO 10:2 ታኒ ኢንቴና ዎሲዛይ ታ ኢንቴኮ ሄ ቢዛ ዎዴ ኢንቴ ታና ጻላቴꬃን ሃሳይሶንታ ኣጋና ማላሳ። ኑኒ ኣሾ ቆፋን ሲሜሬቲዛ ማላ ኑና ጼሊዛ ኢሲ ኢሲ ኣሳታ ሲንꬃን ታኒ ጻላቴꬃን ሃሳያናስ ኮያይስ።
2CO 10:3 ኑኒ ዲዛይ ሃይሳ ኣላሜዛ ቦላ ጊዲኮካ ኑ ኦሌቲዛይ ሃ ኣላሜዛ ኣሳ ኦላ ማላ ጊዴና።
2CO 10:4 ኑ ኦላ ሚሻይካ ኦላ ሚጻ ላላናስ ዳንዳይዛ ጾሳ ዎልቃይ ዲዛይሳ ኣቲን ሃይሳ ኣላሜዛ ኦላ ቶራ ጊዴና።
2CO 10:5 ጾስ ኤሮንታ ማላ ꬉጴ ጊዲ ዴንዲዛ ፓላማኔ ኦቶሬቴꬅ ኑ ላሎስ፤ ኣሳ ቆፋ ኡባ ዲኢ ኤኪዲ ኪርስቶሳስ ኣዛዜታና ማላ ኦꬆስ።
2CO 10:6 ኢንቴ ኣዛዜቴꬂ ፖሌቲዛ ዎዴ ኣዛዜቶንታ ኣይ ሚሼካ ቃጻያናስ ኑኒ ጊጌቲ ኡቲዶስ።
2CO 10:7 ኢንቴ ጼሊዛይ ካሬ ባጋራ ቤቲዛዝ ጻላ፤ ኦኒካ ታኒ ኪርስቶሳስኮ ጊ ኣማኔቲኮ ዛሬꬂ ቆፖ፤ ኑኒካ ኢዛ ማላካ ኪርስቶሳይታ ጊዲዳይሳ ኢዛዴይ ዎዚናን ዎꬆ።
2CO 10:8 ጎዳይ ኑስ ኢሚዳ ማታ ጊሻስ ታኒ ኢዛን ጬቂኮካ ዬላቲኬ፤ ሄሲ ማታይ ታስ ኢሜቲዳይ ኑኒ ኢንቴና ሚንꬃናስ ኣቲን ላላናስ ጊዴና።
2CO 10:9 ታኒ ሃ ኪታን ኢንቴና ባቢሶስ ኦꬂዛ ሚሳቶፖ።
2CO 10:10 ኦኔ ኤሪዛይ ኢሲ ኢሲ ኣሳቲ፥ «ጳዉሎሳ ኪታቲ ዴጾኔ ዎልቃማ፤ ጊዶ ኣቲን ኑ ኣቻን ዲዛ ዎዴ ኢዚ ላፋ፤ ኢዛ ሃሳያይካ ሌቄቲዳይሳኮ!» ጊዛዝ ጊዳና።
2CO 10:11 ሄሳꬆ ጊዛ ኣሳቲ ኑኒ ሃሆን ዲሼ ጻፊ ኪቲዳይሳሲኔ ቃሴ ኢንቴናራ ዲሼ ኑ ኦꬂዛይሳ ጊዶን ኣይኮ ዱማቴꬂ ባይንዳይሳ ሻኪ ኤሬቶ።
2CO 10:12 ጊዲኮካ ባርካ ባና ናሺዛ ኢሲ ኢሲ ኣሳታራ ኑና ኑርካ ጋꬂ ጼላናስ ዎይኮ ኢስታራ ኑና ጊጊሳናስ ጻሎኮ፤ ኢስቲ ቃሴ ባርካ ባና ባናራ ጋꬂ ጼሊዛ ጊሻስ ኢስቲ ዩሺ ቆፒዛይታ ጊዴቴና።
2CO 10:13 ኑ ቃሴ ኢንቴኮ ጋካናስ ጾሲ ኑስ ኢሚዳ ኦሶ ዛዋን ሲሜሬቶስ ኣቲን ዎጋፔ ኣꬂ ጬቄቲዛይታ ጊዶኮ።
2CO 10:14 ኢንቴ ቃሴ ኑ ኦꬂዛሶን ዲዛ ጊሻስ ኪርስቶሳ ሚሺራቾ ቃላ ታማርሳናስ ኑ ኢንቴኮ ቢዳ ዎዴ ኑኒ ኑ ዛዋፔ ኣꬊቤኮ።
2CO 10:15 ሄሳ ጊሻስ ጾሲ ኑስ ኢሚዳ ዛዋፔ ኣꬊዲ ሃራ ኣሳታ ኦሶን ጌሊዲ ዎጋፔ ኣꬊ ጬቄቶኮ፤ ሄሳፌ ቦላራ ኢንቴ ኣማኖይ ዲጫና ማላኔ ኑ ኦሶይካ ጾሲ ኑስ ኢሚዳ ዛዋን ኢንቴ ጊዶን ኣካናይሳ ናጎን ዶስ።
2CO 10:16 ሄሳ ጊሻስ ኑ ሃራ ኣሲ ኦꬂዛ ዛዋ ኣꬊዲ ካሴቲዲ ኦሴቲዳ ኦሶን ጬቄቶንታ ዲሼ ኢንቴፌ ሄኒን ዲዛ ዴሬታስ ሚሺራቾ ቃላ ዮታናስ ዳንዳዮስ።
2CO 10:17 ጊዶ ኣቲን ጾሳ ማጻፋይ፥ «ጬቄቲዛ ኣሲ ጎዳን ጬቄቶ» ጊዴስ።
2CO 10:18 ኣሲ ጋላቴታናስ ዳንዳይዛይ ጎዳይ ጋላቲኮ ኣቲን ባርካ ባና ጋላቲን ጊዴና።
2CO 11:1 ታ ጉꬃ ኤያቴꬃ ኢንቴ ዳንዳያና ማላ ታ ሂዶታ ኦꬆይሳ ሃያና ዳንዳይቴ።
2CO 11:2 ኢሲ ጌሎንታ ጌሻ ጌላኦያ ባ ጌላኦቴꬃን ኢሲ ኣዚናስ ጊጊዛ ማላ ታኒካ ኢንቴና ኪርስቶሳስ ጊግሲዳ ጊሻስ ታ ኢንቴ ጊሻስ ሎኦ ቆፋ ቆፓይስ።
2CO 11:3 ሾሻይ ባ ጌኔራ ሄዋኖ ባሌꬂዳይሳꬆ ኦኔ ኤሪዛይ ኢንቴ ቆፋይካ ሞሬቲን ኪርስቶሳስ ዲዛ ሱሬኔ ጌሽ ጊዲዳ ኣማኔቴꬃ ኢንቴና ኣጋጋንዴቶ ጋዳ ታ ሂርጋይስ።
2CO 11:4 ኢሲ ኣሲ ኢንቴኮ ዪዲ ኑ ካሴ ኢንቴስ ሳባኪዳይሳ ጊዶንታ ሃራ ዬሱሳ ሳባኪኮ ዎይኮ ካሴ ኢንቴ ኤኪዳ ኣያና ጊዶንታ ሃራ ኣያና ኤኪኮ ዎይኮ ካሴ ኢንቴ ኤኪዳ ሚሺራቾ ቃላ ጊዶንታ ሃራ ሚሺራቾ ቃላ ኤኪኮ ጮ ሜላ ኢንቴ ጾኔቲዴታ ጉሳ።
2CO 11:5 ጊዲኮካ ታኒ ሃይታ ጊታ ሃዋሬታፔ ኣይኮንካ ጉጺዛ ታስ ሚሳቴና።
2CO 11:6 ሃሳያን ጪንጫ ጊዶንታ ኣጊኮካ ታስ ኤራይ ፓጪቤና፤ ሄሳ ኑኒ ኢንቴስ ዱማ ዱማ ኦጌራ ቆንጬን ኤሪሲዶስ።
2CO 11:7 ታኒ ኢንቴስ ጾሳ ሚሺራቾ ቃላ ዳሞዛይ ባይንዳ ሳባኪዳይኔ ኢንቴና ꬎቁ ሂስታናስ ታኒ ታና ካዉሺዳይሲ ኦኔ ኤሪዛይ ታስ ናጋራ ጊዲ ቆዴቲዴሻ?
2CO 11:8 ኢንቴስ ኦꬃናስ ሃንኮ ዎሳ ኬꬃታፔ ታኒ ማዶ ኤኪዳይሲ ኢስታፌ ሺሻ ኤካዳኮ።
2CO 11:9 ታኒ ኢንቴናራ ዲሺን ታና ሜቲን ማቂዶኒያፔ ዪዳ ኢሻቲ ታስ ኮሺዛዛን ታና ማዲዳ ጊሻስ ኦናስካ ቶሆ ጊዳቤኬ፤ ሃኖ ጋካናስካ ኣይ ሚሻንካ ኢንቴስ ቶሆ ጊዳቤኬ፤ ሲንꬃፌካ ታ ኢንቴስ ቶሆ ጊዲኬ።
2CO 11:10 ኪርስቶሳ ቱማቴꬂ ታናን ዲዛ ጊሻስ ታኒ ጬቄቶንታ ማላ ታና ዲጊዛይ ኣካያ ዴሬን ኦኒካ ባ።
2CO 11:11 ሄሳስ ጋሶይካ ኣዜ? ታኒ ኢንቴና ሲቆንታ ጊሼ? ታ ኢንቴና ሲቂዛይሳ ጾሲ ኤሬስ።
2CO 11:12 ሄይቲ ዎርዶ ሃዋሬቲ፥ «ኑኒካ ኢስታꬆ ኦꬆስ» ጊሼ ኢስቲ ጬቄቲዛይሳ ዲጋናስ ታ ሃኢ ኦꬂዛይሳꬆ ሲንꬃፌካ ኦꬃና።
2CO 11:13 ሄይታንታ ማላ ኣሳቲ ኪርስቶሳ ሃዋሬታ ሚሳታናስ ባርካ ባና ላሚዛ ዎርዳንቻ ሃዋሬታኔ ባሌꬂዛ ኦሳንቻታ።
2CO 11:14 ሄሲካ ዳሮ ማላሊሲዛዝ ጊዴና፤ ጻላኤይካ ባና ፖኦ ኪታንቻ ሚሳቲሲዲ ላሜቴስ።
2CO 11:15 ሄሳ ጊሻስ ሄይቲ ጻላኤ ኦሳንቻቲ ሃንኮ ጺሎ ኦሳንቻታ ሚሳታናስ ባርካ ባናቴꬃ ላሚኮ ኣይኮካ ማላሊሴና፤ ዉርሴꬃን ኢስቲ ባ ኦሶ ዋጋ ኤካና።
2CO 11:16 ኦናስካ ታኒ ኤያ ጊዲዳዝ ሚሳቶፖ ጋዳ ቃሴካ ዮታዲስ፤ ታ ኢስታስ ኤያ ሚሳቲኮካ ጉꬃ ዎዴስ ታ ጬቄታና ማላ ታና ኢንቴ ኤያ ማላ ቆዲቴ።
2CO 11:17 ታኒ ሄሳꬆ ዶና ኩንꬃ ሃሳይዛይ ጎዳ ሼኔ ማላ ጊዶንታ ኤያ ኣሳ ማላ ጊዳዳኮ።
2CO 11:18 ዳሮቲ ባ ኣሾ ቆፋን ጬቄቲዛይሳꬆ ታኒካ ጬቄታና።
2CO 11:19 ኢንቴ ቃሴ ዩሺ ቆፒዛይታ ጊዲዳ ማላ ሃንኮ ኤያታ ኡፋይሳናስ ዳንዳዬታ።
2CO 11:20 ሄሳꬆካ ኦኒካ ኢንቴና ባስ ኣይሌሲኮኔ ኦኒካ ኢንቴና ቦንቂኮ፥ ኦኒካ ኢንቴናን ጎኤቲኮ፥ ኦኒካ ኢንቴና ሌቂኮ፥ ኦኒካ ኢንቴስ ሻጋላን ባቂኮ ኢንቴ ዳንዳዬታ።
2CO 11:21 ኢዚ ታና ዬላሲዛዝ ጊዲኮካ ሃይታ ሃ ሃኖታ ኦꬃናስ ኑኒ ሚኖ ጊዶንታይሳ ታኒ ኢንቴስ ቆንጪሳይስ። ጊዶ ኣቲን ኦኒካ ጬቄታናስ ጻሊኮ ታኒካ ኢዛꬆ ጻላዳ ጬቄታና፤ ታኒ ሄሳ ጊዛይ ሃኢካ ኤያ ጊዳዳኮ።
2CO 11:22 ሄይታንቲ ኢስቲ ኢብራዌ ኣሳቴ? ታኒካ ኢብራዌኮ! ኢስቲ ኢስራኤሌ ኣሳቴ? ታኒካ ኢስራኤሌ ኣሳኮ! ኢስቲ ኣብራሃሜ ዜሬꬃቴ? ታኒካ ኣብራሃሜ ዜሬꬂኮ!
2CO 11:23 ሄይታንቲ ኪርስቶሳ ኦሳንቻቴ? ታኒ ቃሴ ኢስታፌ ቦላራ ኪርስቶሳስ ኦꬂዛዴ፤ ታ ሄሳꬆ ጊዛይ ጎሻ ማላ ጊዳዳኮ! ታኒ ኢስታፌ ዳሮ ዎዴ ኦሶን ዳቡራዲስ፤ ዳሮ ዎዴ ቃሼታዲስ፤ ዳሮ ዎዴ ጋራፌታዲስ፤ ዳሮ ዎዴ ሃይቆስ ጋካዲስ።
2CO 11:24 ኢቻሹቶ ሄꬑ ታማኔ ኡዱፉን ጹርቃፌ ኣይሁዳታን ጋራፌታዲስ።
2CO 11:25 ሄꬑቶ ዱርቃን ቡኬታዲስ፤ ኢሲቶ ሹቻን ጫዴታዲስ፤ ሄꬑቶ ማርካቤ ጊዶን ታ ቦላ ሜቶይ ጋኪዴስ፤ ኢሲ ኦማርሲኔ ኢሲ ጋላስ ኣባ ጊዶን ጋምኣዲስ።
2CO 11:26 ታ ሄሜታ ዳሮ ጋሶን ሃꬃ ኪጻይኔ ዲኦይ፥ ፓንጋታፔ ሜቶይ ታና ጋኪዴስ፤ ታ ቆሞ ኣይሁዳ ኣሳፔኔ ኣይዛቤታፔ ዋዬይኔ ሜቶይ ታና ጋኪዴስ፤ ካታማንካ፥ ባዞንካ ኣባ ቦላንካ ታና ሜቶይ ጋኪዴስ፤ ሄሳꬆካ ዎርዶ ኣማኒዛይታፔ ሜቶይ ታና ጋኪዴስ።
2CO 11:27 ዳሮ ኦꬃ ዳቡራዲስ፤ ዳሮ ዎዴ ꬊስካቤኬ፤ ጋፋኒኔ ሃꬃ ሳሞን ዋዬታዲስ፤ ዳሮ ዎዴ ሚዛ ካꬂ ታስ ꬋይዴስ፤ ሜጎይኔ ካሎቴꬂ ታና ጋኪዴስ።
2CO 11:28 ታኒ ሃራ ሚሽ ቆፖንታ፥ ጋላስ ጋላስ ታና ቆፍሲዛይ ዎሳ ኬꬃታ ኡባ ጊሻስ ቆፒዛ ቆፋ።
2CO 11:29 ኢሲ ኣሲ ዳቡርሺን ታኒ ኢዛራ ዳቡሮንታ ኣይዴ ኣጋዲና? ኢሲ ኣሲ ናጋራን ኩንዲሺን ታ ቃሴ ኢዛ ሃንቄቶንታ ኣይዴ ኣꬋ ኤራዚና?
2CO 11:30 ጬቄታናስ ኮሺዛዝ ጊዲኮ ታ ጬቄታናይ ታ ዳቡራንቻ ጊዲዳይሳ ታና ቤሲዛ ሚሻን ጬቄታይስ።
2CO 11:31 ሜርናስ ጋላቴቲዳ ጎዳ ዬሱስ ኪርስቶሳ ኣዋ ጾሲ ታ ዎርዶቶንታይሳ ኤሬስ።
2CO 11:32 ታኒ ዳማስቆ ካታማን ዲሺን ካዎ ኣርሲጾሲዮሳፔ ጋርሳራ ዴሬ ኣይሲዛይሲ ታና ኦይካናስ ኮዪዲ ሄ ካታማ ፔንጌታ ዛቤታን ናጊሲዴስ።
2CO 11:33 ጊዲኮካ ኣሳይ ታና ኬሼን ዬጊዲ ሄ ካታማ ጊምቤ ማስኮቴራ ዱጌ ዎꬂ ዬዲን ኬሳ ኤካ ኣታዲስ።
2CO 12:1 ጬቄቴꬃን ኣይኮ ጎኣይ ባይንዳ ኣጊኮካ ጬቄታናስ ኮሺኮ ጎዳይ ታስ ቆንጪሲ ኢሚዳይሳኒኔ ኢዚ ቤሲዳ ኣጁታን ታ ጬቄታና።
2CO 12:2 ኪርስቶሳስ ጊዲዳ ኢሳዴ ታ ኤራይስ፤ ሄ ኣዴዚ ታማኔ ኦይዱ ላይꬃፌ ካሴ ሄꬓንꬆ ሳሎ ኤኬቲ ቢዴስ። (ኢዚ ኤኬቲዳይ ባ ኣሾራ ጊዲን ዎይኮ ኣሾራ ጊዶንታ ኣጊን ታ ኤሪኬ ሺን ጾሲ ጊዲኮ ኤሬስ።)
2CO 12:3 ጊዲኮካ ኢዚ ባ ኣሾዛራ ቢን ዎይኮ ሜላ ቢን ታ ኤሪኬ፤ ጾሲ ጊዲኮ ኤሬስ።
2CO 12:4 ኢዛዴይካ ፑዴ ጋናቴ ኤኬቲዲ ኣሳ ቃላን ቆንጪሳናሲኔ ኣሲ ጋናስ ዳንዳዮንታዝ ኢዚ ሲዪዴስ።
2CO 12:5 ታኒ ሄሳ ማላ ኣሳን ጬቄታይስ፤ ታ ሁኤስ ጊዲኮ ታ ዳቡርሳፌ ሃራ ታ ኢዛን ጬቄታና ሚሺ ታስ ዴና።
2CO 12:6 ሂስቲን ታኒ ቱማ ሃሳይዛ ጊሻስ ጬቄታናስ ኮይኮካ ታ ኤያ ጊዲኬ፤ ጊዶ ኣቲን ኦኒካ ታ ቦላ ባ ቤኢዛዛፔኔ ታፔ ሲዪዛይሳፌ ቦላራ ቆፖንታ ማላ ጋዳ ጬቄታናፔ ናጌታይስ።
2CO 12:7 ሃይታ ታስ ቆንጪዳ ጊታ ሃኖታ ጋሶን ታኒ ኦቶሬቶንታ ማላ ታ ኣሳቴꬅ ኣጉንꬃ ማላ ጫዲዛ ሳኮይ ታስ ኢሜቲዴስ፤ ሄሲካ ጻላኤፔ ኪቴቲዲ ታና ጫቻን ዋዪሲዲ ታ ጬቄቶንታ ማላ ዲጌስ።
2CO 12:8 ሃይሲ ታና ዋዪሲዛይሲ ታፔ ኪቻና ማላ ታኒ ጎዳ ሄꬑቶ ዎሳዲስ።
2CO 12:9 ጊዶ ኣቲን ጎዳይ፥ «ታ ዎልቃይ ኩሜꬅ ጊዲ ቆንጫናይ ኔ ዳቡርሳን ጊዲዳ ጊሻስ ታ ኪያቴꬂ ኔስ ጊዳና» ጊዴስ፤ ሄሳ ጊሻስ ኪርስቶሳ ዎልቃይ ታ ቦላ ጊዳና ማላ ኣይ ዎዴፔካ ቦላራ ታኒ ዳቡርሺን ሄ ዎዴ ኡፋይሳን ጬቄታናስ ዶሳይስ።
2CO 12:10 ታኒ ዎልቃ ዴሚዛይ ዳቡርዛ ዎዴ ጊዲዳ ጊሻስ ታ ኪርስቶሳ ጊሻስ ዳቡርሺን፥ ጫዬቲሺን፥ ሜቶቲሺን፥ ጎዴቲሺን፥ ሙዞቲሺን ታና ኡፋይሴስ።
2CO 12:11 ታኒ ኤያ ኣሳ ማላ ሃሳያዲስ! ታኒ ሄሳꬆ ሃሳያና ማላ ኦꬂዳይ ኢንቴናኮ! ኢንቴ ታና ጋላታናስ ቤሴስኮ ሺን ታ ኦናኮኔ ኤሬቶንታዴ ጊዲኮካ ሃንኮ ጊታ ጌቴቲዳ ሃዋሬታፔ ታኒ ኣዛንካ ጉጺኬ።
2CO 12:12 ታኒ ቱሙ ሃዋሬ ጊዲዳይሳ ኤሪሲዛ ሃኖቲ ታ ኢንቴናራ ዳሼ ዳንዳያን ፖሊዳ ኦሶታ፤ ሄይቲካ ማላታታ፥ ጊታ ኦራꬃ ሚሼታኔ ማላሊሲዛ ኦሶታ።
2CO 12:13 ታኒ ኢንቴስ ቶሆ ጊዶንታ ኣጎሪፔ ኣቲን ሃንኮ ሃራ ዎሳ ኬꬃታፔ ኢንቴና ኣዛን ፓጪሳዲና? ሄሲካ ሞሮ ጊዲኮ ኢንቴ ታና ማሪቴ።
2CO 12:14 ታኒ ሄ ኢንቴኮ ባናስ ጊጌቲሺን ሃይሲ ሄꬓንꬆ፤ ታኒ ኢንቴስ ቶሆ ጊዳናስ ኮይኬ፤ ታኒ ኢንቴና ኮያይስ ኣቲን ኢንቴ ሚሻ ኮይኬ፤ ኣዋቲ ናይታስ ሚሽ ሺሼቴስ ኣቲን ናይቲ ኣዋታስ ሚሽ ሺሺ ኤሬቴና።
2CO 12:15 ታኒ ኢንቴ ጊሻስ ታናካ ታስ ዲዛዝ ዉርሳ ኢንቴስ ኣꬃ ኢሚዳኮ ታና ዳሮ ኡፋይሴስ፤ ሂስቲን ታኒ ኢንቴና ሃይሳ ማላ ዳሮ ሲቂሺን ኢንቴ ቃሴ ታና ዋኒ ጉꬃራ ሲቄቲ?
2CO 12:16 ኣይ ጊዲኮካ ታ ኢንቴስ ቶሆ ጊዳቤኬ ሺን ኢንቴስ ታ ኢንቴና ጮ ጌኔን ባሌꬃ ኦይኪዳዝ ሚሳቴስ።
2CO 12:17 ታ ኢንቴኮ ኪታ ዬዲዳ ኣሳታፔ ኢሳዴ ባጋራካ ኢንቴፌ ጎኤታዲና?
2CO 12:18 ቲቶሲ ኢንቴኮ ባና ማላ ታ ኢዛ ዎሳዲስ፤ ሄሳ ኑ ኢሻዛካ ኢዛራ ጋꬃ ዬዳዲስ፤ ሂስቲን ቲቶሲ ኢንቴፌ ኣይኮ ጎኤቲዴ? ታኒኔ ኢዚ ኢንቴስ ኦꬂዳይ ኢሲ ዎዚናን ጊዴኔ? ካሴ ኑ ሃኖይ ኢሲ ማላ ጊዴኔ?
2CO 12:19 ኢንቴ ዉሪካ ሃኢ ጋካናስ ቆፒዛይ ኑ ኢንቴ ሲንꬃን ኑና ኣሻናስ ሃኒዛ ሚሻ ማላ ጼሌቲ? ኑኒ ኪርስቶሳን ጊዲዲ ኢንቴስ ዮቲዛይሲ ጾሳ ሲንꬃና። ታ ሲቆቶ! ኑ ሃይሳ ኡባ ዮቲዛይ ኢንቴና ጎኣናስ ጊዲኮ!
2CO 12:20 ታኒ ሄ ቢዛ ዎዴ ኦኔ ኤሪዛይ ኢንቴ ታ ኮዪዳ ማላ ሃኖንታ ኣጊኮ ታኒካ ኢንቴ ኮይዛ ማላ ጊዶንታ ዳሼ ጋጌታኔሻ ጋዳ ሂርጋይስ፤ ሄሳꬆካ ኢንቴ ጊዶን ኦሺ፥ ቃናቴቴꬂ፥ ሃንቆይ፥ ዙፔቴꬂ፥ ኣሳ ሱንꬅ ኢሶይ፥ ዚጊርሲ፥ ኦቶሬቴꬂኔ ካቺ ዱስ ኣጌና ጋዳ ሂርጋይስ።
2CO 12:21 ታኒ ቃሴካ ሄ ኢንቴኮ ቢሺን ኦኔ ኤሪዛይ ታ ጎዳይ ታና ኢንቴ ሲንꬃን ካዉሻንዴ ጋዳ ሂርጋይስ። ሃይሳፌ ካሴ ናጋራ ኦꬂዲ ሄ ኦꬂዳ ቱናቴꬃን፥ ላይማኒኔ ጮ ሜላ ዬዳ ዱሳስ ማሮቴꬃን ጌሎንታ ኣሳታ ጋሶን ታ ሙዞቴꬃን ዎꬋንዲና ጋዳ ሂርጋይስ።
2CO 13:1 ሂስቲኮ ታኒ ኢንቴኮ ቢሺን ሃይሲ ታስ ሄꬓንꬆ፤ ኣይዴካ ጊዲን ዮኦይ ሚኒዛይ ናምኡ ማርካን ዎይኮ ሄꬑ ማርካና።
2CO 13:2 ኢንቴና ቤያናስ ታ ናምኣንꬆ ቦይሳን ታ ኢንቴናራ ዳሼ ኢንቴ ናጌታና ማላ ታ ኢንቴስ ሚንꬃ ዮታዲስኮሺን፤ ሃኢካ ቃሴ ሃሆን ዳዳ ሃይሳፌ ካሴ ናጋራ ኦꬂዳይታሲኔ ሃንኮይታስ ሚንꬃ ዮታይስ፤ ሃኢ ታ ኢንቴኮ ሄ ሲማ ቢኮ ኢስታፌ ኦናስካ ሚሼቲኬ።
2CO 13:3 ሄሲካ ቃሴ ታናን ጊዲዲ ኢንቴስ ዮቲዛይ ኪርስቶሳ ጊዲዳይሳ ኢንቴ ሻኪ ኤራናስ ኮይዛይሳ ቤሴስ፤ ኢንቴ ኣቻን ዲዛ ኪርስቶሲ ዎልቃማ ኣቲን ላፋ ጊዴና።
2CO 13:4 ኢዚ ማስቃሌ ቦላ ካቄቲዲ ዳቡራን ሃይቂኮካ ሃኢ ቃሴ ጾሳ ዎልቃን ፓጻ ዴስ፤ ኑኒካ ኢዛራ ላፋታ ጊዲኮካ ኢንቴ ጊሻስ ጊዲ ጾሳ ዎልቃን ሚኒ ዶስ።
2CO 13:5 ኢንቴ ኣማኖን ሚኒ ዲዛኮኔ ኤራናስ ኣኔ ኢንቴርካ ኢንቴና ፓጪ ጼሊቴ፤ ዬሱስ ኪርስቶሲ ኢንቴናን ዲዛይሳ ሻኪ ኤሪቤኬቲ? ሄሳꬆ ሃኖንታ ኣጊኮ ኢንቴ ፓጬን ኩንዲዴታ ጉሳ።
2CO 13:6 ኑኒ ፓጬን ኩንዶንታይሳ ኢንቴ ሻኪ ኤራና ጋዳ ሂዶታ ኦꬃይስ።
2CO 13:7 ኢንቴ ኢታ ሚሽ ኦꬆንታ ማላ ኑኒ ጾስ ዎሶስ፤ ኑኒ ዎሲዛይካ ኑ ኣይኮካ ዳንዳይዛይታ ጊዶንታ ኣጊኮካ ኢንቴ ኡባ ዎዴ ሎኦ ኦሶ ኦꬃናፔ ኣቲን ኑ ጎባቴꬅ ኢንቴና ቤሳናስ ጊዴና።
2CO 13:8 ኑኒ ቱማቴꬃስ ኦꬆስ ኣቲን ቱማፔ ካሬራ ኣይኮካ ኦꬃና ዳንዳዮኮ።
2CO 13:9 ኑኒ ዳቡራንቻታ ጊዲን ኢንቴ ቃሴ ሚኖታ ጊዲሺን ኑና ኡፋይሴስ፤ ኑ ዎሳይ ኢንቴ ቦላ ዎሶይ ባይንዳይታ ጊዳና ማላሳ።
2CO 13:10 ታኒ ሃይሳ ኢንቴስ ዬዲዛ ኪታዛ ኢንቴፌ ሃካ ዳሼ ጻፊዳይ ሄሳ ጊሻሳ፤ ሄሳ ማላን ታ ኢንቴኮ ቢዛ ዎዴ ታስ ጎዳይ ኢሚዳ ኣዋቴꬃን ታ ኢንቴና ዋዪሲኬ፤ ጎዳይ ታስ ኣዋቴꬅ ኢሚዳይ ኢንቴና ሚንꬃናስ ኣቲን ላላናስ ጊዴና።
2CO 13:11 ኣኔ ሃኢ ታ ኢሻቶ! ሳሮ ዲቴ፤ ኢንቴ ዱሳ ሎኤꬂቴ፤ ታ ኢንቴና ዞሮይሳ ካሊቴ፤ ኣሳይ ኢሶይ ኢሳራ ሲጌቲቴ፤ ሳሮን ዲቴ፤ ሲቆኔ ሳሮ ጎዳይ ኢንቴናራ ጊዳና።
2CO 13:12 ሲቆ ዬሬቴꬅ ዬሬቲዲ ኢሶይ ኢሳራ ሳሮኬቲቴ።
2CO 13:13 ኣማኒዛ ኣሳይ ዉሪካ ኢንቴና ሳሮ ጌስ።
2CO 13:14 ጎዳ ዬሱስ ኪርስቶሳ ኪያቴꬂ፥ ጾሳ ሲቆይኔ ጺሎ ኣያና ኢሲፌቴꬂ ኢንቴናራ ኡባታራ ጊዶ።
GAL 1:1 ኣሲ ኪቲዳዴ ጊዶንታ ዬሱስ ኪርስቶሳ ሃይቆፔ ዴንꬂዳ ኢዛ ኣዋ ጾሳፌ ኪቴቲዳ ጳዉሎሳፔ፥
GAL 1:2 ታናራ ዲዛ ኢሻታ ኡባፌ ጋላቲያን ዲዛ ዎሳ ኬꬃታስ፥
GAL 1:3 ኑ ኣዋ ጾሳፌ ጎዳ ዬሱስ ኪርስቶሳፔ ጾሳ ኪያቴꬂኔ ሳሮይ ኢንቴስ ጊዶ።
GAL 1:4 ኑ ኣዋ ጾሳ ሼኔ ጊዲን ኢታ ኣላሜዛፔ ኑና ኣሻናስ ባና ኣꬂ ኢሚዳይሳስ፥
GAL 1:5 ሜሪፔ ሜርና ጋካናስ ኢዛስ ቦንቾይ ጊዶ።
GAL 1:6 ኢንቴ ኪርስቶሳ ኪያቴꬃን ጼይጊዳይሳ ኣጋጊዲ ሃራ ዱማ ሻኮ ሚሺራቾ ቃላኮ ሲሚዳይሲ ታና ዳሮ ማላሊሴስ።
GAL 1:7 ታ ሄሳ ጊዳ ጋሶይካ ኢንቴና ባሌꬂዛይቲኔ ኪርስቶሳ ሚሺራቾ ቃላ ሚርቂዛ ኢሲ ኢሲ ኣሳቲ ዲዛ ጊሻሳ፤ ቱማፔ ጊኮ ሚሺራቾ ቃላይ ኢሲኖ ጻላ።
GAL 1:8 ጊዶ ኣቲን ኑና ጊዲን ዎይኮ ሳሎ ኪታንቻ ጊዲንካ ኑ ኢንቴስ ሳባኪዳ ሚሺራቾ ቃላፔ ሃራ ዱማ ሚሺራቾ ቃላ ሳባኪኮ ሄሳዴይ ሜርናስ ቃንጌቲዳዴ ጊዶ።
GAL 1:9 ታ ካሴ ጊዳ ማላካ ሃኢካ ዛራዳካ ካሴ ኢንቴ ኤኪዳ ሚሺራቾ ቃላፔ ሃራ ዱማ ሚሺራቾ ቃላ ሳባኪኮ ኢዛዴይ ሜርናስ ቃንጌቲዳዴ ጊዶ ጋይስ።
GAL 1:10 ሃኢ ታኒ ኣሲ ታና ኤሮሾ! ሃሹ ጋና ማላ ኮያዚናዬ? ጾሲ ሃሹ ጋና ማላ ኮያዚና? ዎይኮ ኣስ ኡፋይሳና ኮያዚና? ታ ኣስ ኡፋይሳና ኮይዛኮ ኪርስቶሳ ኦሳንቻ ጊዲኬ።
GAL 1:11 ታ ኢሻቶ! ታ ኢንቴስ ሳባኪዳ ሚሺራቾ ቃላይ ኣሳ ኦሶ ጊዶንታይሳ ኢንቴ ኤራና ማላ ኮያይስ።
GAL 1:12 ሃይሳ ሃ ሚሺራቾ ቃላዛ ዬሱስ ኪርስቶሲ ታስ ቆንጪሲዴስ ኣቲን ታ ኦናፔካ ኤካቤኬ፤ ዎይኮ ኦኒካ ታና ታማርሲቤና።
GAL 1:13 ታኒ ካሴ ኣይሁዳታ ኣማኖን ዋና ዲዛኮኔ ጾሳ ዎሳ ኬꬅ ታ ኣይ ማላ ጎዲዳኮ ቃሴ ሙሌራ ꬋይሳናስ ታ ኣይ ማላ ዳፌቲዳኮ ኢንቴ ሲዪዴታ።
GAL 1:14 ካሴ ታ ዲዛ ዎዴን ዲዛ ዳሮ ኣይሁዳ ኣሳታ ዳሮታፔ ኣማኖን ኣꬋይስ፤ ካሴ ኑ ኣዋታ ዎጋ ናጋናስ ዳሮ ዳፌታይሲሺን።
GAL 1:15 ጊዶ ኣቲን ካሴ ኮይሮ ታኒ ታ ኣዪ ኡሎን ዲሺን ባስ ዶሪዲ ባ ኪያቴꬃን ታና ጼይጊዳ ጾሳይ፥
GAL 1:16 ኣይዛቤታ ጊዶን ኢዛ ናዛ ጊሻስ ታ ሳባካና ማላ ባ ናዛ ታናን ቆንጪሳናስ ዶሲዳ ጊሻስ ታኒ ኦናራካ ዞሬታቤኬ።
GAL 1:17 ታፔ ካሴ ሃዋሬ ጊዲዳይታኮ ዬሩሳላሜ ባቤኬ ሺን ኣማኒዳ ማላ ሄራካ ኣራቤ ቢታ ባዲስ፤ ሄፔካ ዳማስቆ ሲማዲስ።
GAL 1:18 ሄፔካ ሄꬑ ላይꬃፌ ጉዬ ጴጽሮሳራ ጋጋናስ ዬሩሳላሜ ባዲስ፤ ኢዛራ ጋጋዳ ታማኔ ኢቻሹ ጋላስ ጋካናስ ሄን ጋምኣዲስ።
GAL 1:19 ጊዶ ኣቲን ጎዳ ኢሻ ያቆቤፔ ኣቲን ሃዋሬታፔ ኦናካ ቤያቤኬ።
GAL 1:20 ሃይሳ ታ ኢንቴስ ጻፊዛይሳን ታ ዎርዶ ሃሳዮንታይሳ ጾሳ ሲንꬃን ዮታይስ።
GAL 1:21 ሄሳፌ ጉዬ ሶሪያኔ ኪልቂያ ጌቴቲዛ ዴሬ ባዲስ።
GAL 1:22 ዩሁዳ ዴሬን ዲዛ ኪርስቶሳን ኣማኒዛ ኣሳይ ታና ቤዪቤና።
GAL 1:23 ጊዶ ኣቲን፥ «ቤኒ ኑና ኣማኖ ጊሻስ ጎዲ ꬋይሳና ኮይዛ ኣዴዚ ሃኢ ሄ ኣማኖዛ ዛሪ ሳባኬስ» ጊዛ ዎሬ ጻላ ሲዪዳ።
GAL 1:24 ሄ ኣሳይ ታ ጋሶን ጾስ ጋላቲዴስ።
GAL 2:1 ታማኔ ኦይዱ ላይꬃፌ ጉዬ ቃሴካ ዬሩሳላሜ ባዲስ፤ ሄ ዎዴ ባርናባሳራ ዳይስ፤ ቲቶሳካ ታናራ ኤካ ባዲስ።
GAL 2:2 ታስ ቆንጪዳ ጊሻስ ሄ ባዲስ፤ ኣይዛቤታ ጊዶን ታ ሳባኪዛ ሚሺራቾ ቃላካ ኢስታስ ዮታዲስ፤ ጊዶ ኣቲን ታ ካሴ ሜላ ዎጺዳኮ ጋዳኔ ቃሴካ ሲንꬃፌ ጮ ሜላ ዎጾንታ ማላ ሂርጋዳ ዋናቲዛይታስ ዱማ ኤሪሳዲስ።
GAL 2:3 ሃራይ ኣቶሺን ታናራ ዲዛ ቲቶሲ ኢዚ ጊሪኬ ኣስ ሺን ኢዚ ቃጻሬታና ማላ ዎልቃꬂቤቴና።
GAL 2:4 ሃይሲ ሃ ዮኦዚ ዴንዲዳይ ኢሲ ኢሲ ዎርዶ ኣማኒዛይቲ ኑኒ ዬሱስ ኪርስቶሳን ዴሚዳ ጌሻቴꬃ ዩዪ ዩዪ ፓጪ ቤያናሲኔ ኑና ኣይሌቴꬃን ዛሪ ጌልꬃናስ ሎዳራ ኑኮ ሳሊ ጌሊዳ ጊሻሳ።
GAL 2:5 ሄይታ ሄ ኣሳታስ ኑኒ ኢሲቶካ ሃሬቲቤኮ፤ ሄሲካ ኢንቴ ሚሺራቾ ቃላ ቱማቴꬃን ኤቂ ዳና ማላ ጊዲኮ።
GAL 2:6 ዋና ሚሳቲዛ ኣሳቲ ታስ ኣይኮካ ሚሳቴቴና፤ ጾሲ ኣሳ ኣይፌሶ ቤኢዲ ማዶ ኦꬂ ኤሬና፤ ሄይቲ ሄ ኣሳቲ ታ ኪቲዛ ዮኦታስ ታስ ኣይኮካ ጉጂቤቴና።
GAL 2:7 ጊዶ ኣቲን ጴጽሮሲ ቃጻሬቲዳይታስ ሚሺራቾ ቃላ ሳባካናስ ሃዳራ ኤኪዳይሳ ማላ ታኒካ ቃጻሬቶንታይታስ ሚሺራቾ ቃላ ሳባካናስ ሃዳራ ኤኪዳይሳ ኢስቲ ኤሪዳ።
GAL 2:8 ጴጽሮሲ ኣይሁዳታስ ሃዋሬ ጊዲ ኦꬃና ማላ ኦꬂዳ ጾሳይ ታኒካ ኣይዛቤታስ ሃዋሬ ጊዳ ኦꬃና ማላ ታስ ኦꬂዴስ።
GAL 2:9 ዋናቲ ያቆቤይ፥ ጴጽሮሲኔ ዮሃኒሲካ ታስ ኢሜቲዳ ጾሳ ኢሞታ ኣኬኪዲ ታሲኔ ባርናባሳስ ባ ኡሻቻ ኩሼ ኢሚዳ፤ ሄሳፌ ጉዬ ኑኒ ኣይዛቤታስ ኢስቲ ቃሴ ኣይሁዳታስ ቃላ ዮታናስ ቃላ ኤሮ ጊ ኤኪዳ።
GAL 2:10 ኢስቲ ኑስ ሃዳራ ጊዳይ ማንቆታስ ቆፋ ኑ ኣጎንታ ማላ፤ ታ ኣሞይካ ሄሳ ኦꬃናሳ።
GAL 2:11 ጴጽሮሲ ኣንጾኪያ ዪዳ ዎዴ ኤሬቲዳ ባላ ኦꬂዳ ጊሻስ ታ ኢዛ ቆንጬን ቆጳዲስ።
GAL 2:12 ኢሲ ኢሲ ኣሳቲ ያቆቤ ኣቻፌ ያናፔ ካሴ ጴጽሮሲ ኣይዛቤታራ ኢሲፌ ካꬅ ሚዛይሳ ኣጊዲ ኣሳቲ ዪዳፔ ጉዬ ቃጻሬቲዳ ኣሳታስ ባቢዲ ኣይዛቤታፔ ሻኬቲ ጉዬ ጉዬ ጉስ ኦይኪዴስ።
GAL 2:13 ባርናባሲካ ኢስታꬆ ቆꬌፔ ቆሞን ሃኖን ኤኬታና ጋካናስ ሃራ ኣይሁዳ ባጋፌ ኣማኒዳ ኣሳይካ ኢዛራ ኢሲፌቲዴስ።
GAL 2:14 ኢስታ ኦሶይ ሚሺራቾ ቃላ ቱማን ጊዶንታይሳ ታ ኤራዳ ኩሜꬃ ኣሳ ኣቻን ጴጽሮሳ፥ «ኔ ኣይሁዳ ኣስ ሺን ኣይዛቤታ ዎጋን ኣቲን ኣይሁዳታ ዎጋን ዳቤካ፤ ሂስቲን ኣይዛቤቲ ኣይሁዳታ ዎጋ ካላና ማላ ኣዛስ ዎልቃꬃይ?» ጋዲስ።
GAL 2:15 «ኑኒ ኑ ዬሌቴꬃን ኣይሁዳታፔ ኣቲን ኣይዛቤታ ማላ ናጋራንቻ ጊዶኮ።
GAL 2:16 ኣሲ ዬሱስ ኪርስቶሳን ኣማኖን ጺላና ኣቲን ዎጋ ናጎን ጺሎንታይሳ ኑ ኤሮስ፤ ሄሳ ጊሻስ ዎጋ ናጎን ጊዶንታ ኪርስቶሳ ኣማኖን ኑ ጺላና ማላ ኑኒካ ቃሴ ዬሱስ ኪርስቶሳ ኣማኒዶስ፤ ዎጋ ናጎን ኦኒካ ጺሌና።
GAL 2:17 «ኑ ኪርስቶሳን ጺላና ኮይኮ ኑኒ ናጋራንቻታ ጊዲዳይሲ ቆንጪ ኤሬቲዴስ፤ ሂስቲን ኪርስቶሲ ናጋራይ ዳሪ ዳሪ ባና ማላ ኮይዜ? ኮዬና።
GAL 2:18 ታኒ ላሊዳይሳ ዛራዳ ታርካ ታ ኩሼራ ኬጺኮ ታኒካ ዎጋ ሞሪዳዴ ጊዲዳይሳ ኣማኔታይስ።
GAL 2:19 ታኒ ጾሳስ ዳና ማላ ዎጋ ባጋራ ሄ ዎጋስ ሃይቃዲስ።
GAL 2:20 ታኒ ኪርስቶሳራ ካቄታዲስ፤ ሃይሳፌ ጉዬ ታኒ ታስ ዲኬ፤ ጊዶ ኣቲን ኪርስቶሲ ታ ጊዶን ዴስ፤ ሃኢካ ታ ኣሾን ዲዛ ዱሳይ ታና ዶሲዲ ባና ታ ጊሻስ ኣꬂ ኢሚዳ ጾሳ ና ቦላ ዲዛ ኣማኖን ዲዛ ዱሳ።
GAL 2:21 ታኒ ጾሳ ኪያቴꬅ ካዉሺኬ፤ ጺሎቴꬂ ዎጋ ናጎን ቤቲዛ ሚሽ ጊዲኮ ኪርስቶሲ ሃዳ ሃይቂዴስ ጉሳካ!»
GAL 3:1 ኢንቴኖ ዩሺ ቆፖንታ ጋላቲያ ኣሳቶ! ኢንቴስ ባሌቶንታ ማላ ኢዛ ካቄቴꬃ ታ ኢንቴ ሲንꬃን ሚስሌ ማላ ጊጊሳ ቤሳዲስኮ ሺን ኢንቴና ኦኔ ቢቲዳይ?
GAL 3:2 ኢንቴ ጺሎ ኣያና ኤኪዳይ ዎጋ ናጎኔዬ? ሳባኬቲዳ ቃላ ኣማኖኔ? ታ ሃኖ ኢሲኒዮ ኢንቴፌ ኤራና ኮያይስ።
GAL 3:3 ኢንቴ ሄሳ ማላ ቆፒ ኤሮንታ ኣሴ? ጾሳ ኣያናን ኦይኪዳይሳ ዛሪዲ ኣሾ ሃኖን ፖላናስ ዋዬቴቲ?
GAL 3:4 ቱሙ ኢንቴ ሃኖ ጋካናስ ዳቡርዳ ዳቡርሳይ ጮ ሜላ? ጮ ሜላ ጊዲኮ ሃዳ ዳቡርዴታ።
GAL 3:5 ጾሲ ኢንቴስ ኣያና ኢሚዳይኔ ኢንቴ ኣቻን ማላታ ኦꬂዳይ ኢንቴ ዎጋ ናጊዳ ጊሻሴዬ? ዎይኮ ኢንቴ ሲዪዳ ቃላን ኣማኒዳ ጊሻሴዬ?
GAL 3:6 ኣኔ ኢንቴ ኣብራሃሜ ጊሻስ ቆፒቴ፤ ጌሻ ማጻፋን፥ «ኢዚ ጾስ ኣማኒን ኣማኖይ ኢዛስ ጺሎቴꬃን ቆዴቲዴስ» ጌቴቲ ጻፌቲዴስ።
GAL 3:7 ሄሳ ጊሻስ ኣማኒዛይቲ ኣብራሃሜ ናይታ ጊዲዳይሳ ዎዚናን ዎꬂቴ።
GAL 3:8 ኣይዛቤይ ኣማኖን ኣታናይሳ ኤሪዲ ጾሲ ካሴ ጌሻ ማጻፋን፥ «ዴሬይ ዉሪ ኔ ባጋራ ኣንጄታና» ጊዲ ሚሺራቾ ቃላ ኣብራሃሜስ ዮቲ ዎꬂዴስ።
GAL 3:9 ሄሳ ጊሻስ ኣማኒዛይቲ ዉሪ ኣማኒዛ ኣብራሃሜራ ኢሲፌ ኣንጄቲዳይታ።
GAL 3:10 «ዎጋ ናጎን ኣማኔቲዛይቲ ዉሪካ ቃንጌꬃ ጋርሳን ዴቴስ፤ ዎጋ ማጻፋታን ጻፌቲዳይሳ ኡባ ኦꬆንታዴይ ኢዚ ቃንጌቲዳዴ» ጌቴቲ ጻፌቲዴስ።
GAL 3:11 «ጺሎ ኣሲ ኣማኖን ዴኤስ» ጊዛ ጊሻስ ኦኒካ ጾሳ ሲንꬃን ዎጋን ኣቶንታይሲ ጌሻ።
GAL 3:12 ዎጋይ ኣማኖን ጻጲቤና፤ ጊዶ ኣቲን፥ «ዎጋታ ዉርሲ ናጊዛዴይ ኢዚ ናጊዳይሳን ዴኦን ዳና» ጌቴቲዴስ።
GAL 3:13 «ሚꬃ ቦላ ካቄቲዛ ኣሲ ቃንጌቲዳዴ» ጌቴቲ ጻፌቲዳ ጊሻስ ኪርስቶሲ ኑ ጊሻስ ቃንጌቲዳዴ ጊዲዲ ኑና ዎጋ ቃንጌꬃፌ ዎዚዴስ።
GAL 3:14 ኣብራሃሜስ ኢሜቲዳ ኣንጆይ ዬሱስ ኪርስቶሳ ባጋራ ዴሬስ ጋካና ማላ ኑና ዎዚዴስ፤ ሄሲካ ኑኒ ኣማኖን ጺሎ ኣያና ኤካና ማላ ሃኒዴስ።
GAL 3:15 ታ ኢሻቶ! ኣኔ ታ ኢንቴስ ኣሲ ባ ዱሳን ሃኒዛ ሚሽ ሌሚሶ ኢማይስ፤ ሃራይ ኣቶሺን ኣሲ ኢሲቶ ጫቂዳ ቃላ ኢሲቶ ጫቂዳፔ ጉዬ ኦኒካ ሻራናስ ዎይኮ ሃራ ኢዛ ቦላ ጉጃና ዳንዳዮንታይሳ ማላ ሃይሲካ ሄሳ ማላ።
GAL 3:16 ጾሲ ኣብራሃሜስ ዮቲዳ ቃላይ ኣብራሃሜሲኔ ኢዛ ዜሬꬃሳ፤ ጌሻ ማጻፋይ ዳሮ ኣሳስ ዮቲዛ ማላ፥ «ኢዛ ዜሬꬃታስ» ጌና፤ ጊዶ ኣቲን ኢሲ ኣሳስ ዮቴቲዛ ማላ፥ «ኔ ዜሬꬃስ» ጌስ፤ ሄሲካ ኪርስቶሳ።
GAL 3:17 ታ ጊዛይካ ሃይሳ፤ 430 ላይꬃፌ ጉዬን ኢሜቲዳ ዎጋይ ካሴቲዲ ጾሲ ሚንꬂዳ ጫቆዛ ላሊዲ ቡሮ ሃናና ሂዶታ ቃላ ሻሬና።
GAL 3:18 ላታይ ዎጋን ሃኒዛኮ ሂዶታ ቃላን ጌላናስ ኮሼናሺን፤ ጾሲ ባ ኪያቴꬃ ቃላን ኣብራሃሜስ ኢሚዴስ።
GAL 3:19 ሂስቲን ዎጋይ ኣዛስ ኢሜቲዴ? ዎጋይ ኢሜቲዳይ ኣሳይ ዎጋ ዬꬊ ኣꬊዛ ጊሻስ ሄ ኡፋይሳይ ቤሲዛ ዜሬꬃይ ያና ጋካናሳ፤ ዎጋይ ዪዳይካ ኪታንቻታ ባጋራ ጋና ጊዲዛ ኢሳዴ ባጋራ ዪዴስ።
GAL 3:20 ጊዲኮካ ጋናዚ ኢሳ ባጋ ጻላ ጼሊዛዴ ጊዴና፤ ጾሲ ጊዲኮ ኢሳ ጻላ።
GAL 3:21 ሂስቲን ዎጋይ ሲንꬃፌ ጾሲ ዎꬃና ቃላ ዲጊዛዜ? ሙሌካ ዲጌና፤ ዎጋይ ኢሜቲዳይ ኣሲ ኢዛን ዴኦ ዴማናስ ጊዲዳኮ ቱሙካ ጺሎቴꬂ ዎጋ ባጋራ ቤታናኮሺን።
GAL 3:22 ቃሴ ጌሻ ማጻፋይ ሃይሲ ኣላሜይ ዉሪካ ናጋራን ቃሼቲዳይሳ ኣዋጄስ፤ ሄሲካ ኣሲ ዉሪካ ዬሱስ ኪርስቶሳ ኣማኖን ቤቲዛ ሂዶታይ ኣማኒዛይታስ ኡባስ ኢሜታናሳ።
GAL 3:23 ሃይሲ ኣማኖይ ያናፔ ካሴ ኑኒ ዎጋን ቃሼቲዲ ጎርዳን ዶስ።
GAL 3:24 ሄሳ ጊሻስ ኑ ኣማኖን ጺላና ማላ ዎጋይ ኑና ኪርስቶሳኮ ጋꬃናስ ናጊዛዴ ማላ ጊዲዲ ናጊዴስ።
GAL 3:25 ሃኢ ቃሴ ሄ ኣማኖይ ዪዳ ጊሻስ ሃይሳፌ ጉዬ ኑኒ ዎጋ ጋርሳን ዶኮ።
GAL 3:26 ኢንቴ ዉሪካ ዬሱስ ኪርስቶሳ ኣማኖን ጾሳ ናይታ።
GAL 3:27 ኢንቴ ኪርስቶሳራ ኢሲኖ ጊዳናስ ጻማቄቲዳይቲ ዉሪካ ኪርስቶሳ ማይኦ ማላ ማይኢዴታ።
GAL 3:28 ኢንቴ ዉሪካ ዬሱስ ኪርስቶሳን ኢሲኖ ኣቲን ኣይሁዳኔ ጊሪኬ፥ ኣይሌኔ ጎቃ፥ ማጫኔ ኣዴ ጊዛ ዱማቴꬂ ዴና፤ ኢንቴ ዉሪካ ዬሱስ ኪርስቶሳን ኢሲኖ።
GAL 3:29 ኢንቴ ኪርስቶሳይታ ጊዲኮ ኢንቴ ኣብራሃሜ ዜሬꬃታ፤ ካሴ ኢሜቲዳ ሂዶታ ቃላ ማላ ኢንቴ ላታናይታ።
GAL 4:1 ታ ጊዛይ ዬሌቲዳ ናይ ላታይ ኢዛስ ጊዲኮካ ኢዚ ቢዲ ላታና ጋካናስ ኣይሌፌ ዱማ ጊዴና።
GAL 4:2 ኢዛ ኣዋይ ጊዳ ዎዴይ ጋካናስ ኢዚ ባና ዲቺዛይታ፥ ታማርሲዛይታ ኩሼን ጋምኤስ።
GAL 4:3 ኑኒካ ካሴ ኣያና ዮኦስ ጉꬃ ና ማላ ዲዛ ዎዴ ሃይሳ ሃ ኣላሜዛ ዎጋ ጋርሳን ሃሬቲ ዴኢዶስ።
GAL 4:4 ጊዶ ኣቲን ካሴ ባ ቆፒ ዎꬂዳ ዎዴይ ጋኪን ጾሳይ ማጫሳፌ ዬሌቲዲ ዎጋ ናጊዳ ባ ናዛ ኑስ ዬዲዴስ።
GAL 4:5 ሄሲካ ኑኒ ኢዛ ናይታ ጊዳና ማላኔ ዎጋ ጋርሳን ዲዛይታ ዎዛና ማላ ሃኒዴስ።
GAL 4:6 ኢንቴ ኢዛ ናይታ ጊዲዳ ጊሻስ ጾሳ፥ «ኣቦ» ጊዲ ጼይጊዛ ባ ናዛ ኣያና ኑ ዎዚናን ዬዲዴስ።
GAL 4:7 ሄሳ ጊሻስ ሃይሳፌ ጉዬ ኔ ናፔ ኣቲን ኣይሌ ጊዳካ፤ ኔኒ ና ጊዲዳ ጊሻስ ጾሲ ኔና ባይሳ ላቲዛዴ ሂስቲዴስ።
GAL 4:8 ኢንቴ ጾስ ኤራናፔ ካሴ ጾስ ጊዶንታ ኤቃታስ ኣይሌታ።
GAL 4:9 ሃኢ ጊዲኮ ጾስ ኤሪዴታ፤ ቃሴካ ጾሳን ኤሬቲዴታ፤ ሂስቲን ቃሴካ ጉዬ ሲሚዲ ጌዴ ጎኣይ ባይንዳ ጮ ዳቡርሲዛ ቲሚርቴኮ ዋኒ ሲሚዴቲ? ሲሚዲ ቃሴካ ኣይሌቴꬃ ቃምባራን ዋጼታና ኮዬቲ?
GAL 4:10 ዱማ ጋላሳታ፥ ኣጊናታ፥ ዎዴታኔ ላይꬃታ ኢንቴ ቦንቼታ።
GAL 4:11 ታ ኢንቴናራ ዳቡርዳይሲ ጮ ሜላ ጊዳንዴ ጋዳ ባባይስ።
GAL 4:12 ታ ኢሻቶ! ታ ኢንቴና ሚሳቲዳ ማላ ኢንቴካ ታና ሚሳታና ማላ ታ ኢንቴና ዎሳይስ፤ ኢንቴ ታና ኣይኮካ ቆሂቤኬታ።
GAL 4:13 ኢንቴ ኤሪዛ ማላ ታ ኢንቴስ ኮይሮ ሚሺራቾ ቃላ ሳባኪዳይ ሳኮ ጋሶና።
GAL 4:14 ታ ሳኮይ ኢንቴስ ሜቶ ጊዲንካ ታና ሳሌቲቤኬታ ዎይኮ ታና ሃራሴቲቤኬታ፤ ጊዶ ኣቲን ኢንቴ ታና ጾሳ ኪታንቻ ማላኔ ሄሳፌካ ቦላራ ዬሱስ ኪርስቶሳ ማላ ሞኪ ኤኪዴታ።
GAL 4:15 ሂስቲን ሃኢ ሄ ኢንቴ ኡፋይሳይ ኣዋ ቢዴ? ኢንቴስ ሃኒዛዝ ጊዲዳኮ ኢንቴ ኢንቴ ኣይፌ ታስ ኬሲ ኢማናስ ጉዬ ጎንታይሳ ታ ኢንቴስ ማርካታይስ።
GAL 4:16 ታኒ ቱማ ኢንቴስ ኬሳ ዮቲዳ ጊሻስ ኢንቴስ ሞርኬ ጊዳዲናሻ?
GAL 4:17 ሄይቲ ኣሳቲ ኢንቴና ባኮ ኤካናስ ዳቡሬቴስ ኣቲን ሎኦስ ዳቡሬቴና፤ ኢስቲ ኮይዛይ ኢንቴና ኑፔ ሻኪዲ ባ ኣስ ሂስታናሳ።
GAL 4:18 ሎኦስ ሚንዳቴꬂ ሎኦ፤ ሄሲካ ሃናናስ ቤሲዛይ ኡባ ዎዴ ጊዲኮፌ ኣቲን ታ ኢንቴናራ ዲዛ ዎዴ ጻላ ጊዶፖ።
GAL 4:19 ታ ናይቶ! ኪርስቶሲ ኢንቴ ዎዚናን ጻፌቲን ታ ቤያና ጋካናስ ኢንቴ ጊሻስ ታ ሚጻታይስ።
GAL 4:20 ታ ኢንቴ ጊሻስ ቆፋን ሜቶታዲስ፤ ታ ዳንዳይዛኮ ሃኢ ኢንቴ ጊዶን ቤታዳ ኢንቴና ሎኤꬃ ታማርሲዛኮ ኣይ ማላ ዶሳዚና!
GAL 4:21 ኢንቴኖ ዎጋ ጋርሳን ኣቃና ኮይዛይቶ ኣኔ ታስ ዮቲቴ፤ ዎጋይ ኣይ ጊዛኮ ሲዪቤኬቲ?
GAL 4:22 ኣብራሃሜስ ኢሶይ ኣይሌይፌ ኢሶይ ቃሴ ጎቃይፔ ዬሌቲዳ ናምኡ ናይቲ ዲዛይሲ ጌሻ ማጻፋን ጻፌቲዴስ።
GAL 4:23 ኣይሌይፌ ዬሌቲዳ ናዚ ኣሾ ዎጋ ማላ ዬሌቲዴስ፤ ሃንኮ ጎቃይፔ ዬሌቲዳይሲ ኡፋይሳ ቃላ ማላ ዬሌቲዴስ።
GAL 4:24 ሃይቲ ናምኡ ማጫሳቲ ናምኡ ጫቆታ ቤሲዛይታ ጊዲዳ ጊሻስ ሃይሲ ሌሚሶስ ኢሜቲዴስ፤ ኮይሮ ጫቆያ ሲና ዙማ ቦላ ጊዳሼ ኣይሌቴꬃስ ጊዲዛ ናይታ ዬሊዛሮ፤ ኢዛካ ኣጋሮ።
GAL 4:25 ሄሳ ጊሻስ ኣጋራ ኣራቤ ቢታን ዲዛ ሲና ዙማ ጊሻስ ጊዳዳ ሃኢ ዲዛ ዬሩሳላሜ ካታማዮ ሚሳታዉስ፤ ኢዛ ባ ናይታራ ኣይሌቴꬃን ዳዉስ።
GAL 4:26 ፑዴ ቦላ ሳሎን ዲዛ ዬሩሳላሜይ ጊዲኮ ጎቃ ጊዳዳ ዳዉስ፤ ኢዛካ ኑ ኣዮ።
GAL 4:27 «ኔኒ ዬሎንታ ማይኔዬ ኡፋዬታ! ሃኔ ሚጻታ ኤሮንታሬ! ‹ኢሊሊ› ጋ ዋሳ፤ ኣዚናይ ዲዛሪፔ ኣዚናይ ባይንዳሪ ናይቲ ዳሪዳ» ጌቴቲ ጌሻ ማጻፋን ጻፌቲዴስ።
GAL 4:28 ሄሳ ጊሻስ ታ ኢሻቶ! ኢንቴካ ዪሳቃ ማላ ኡፋይሳ ቃላ ናይታኮ።
GAL 4:29 ኣሾ ሼኔ ማላ ዬሌቲዳይሲ ኣያና ዎልቃን ዬሌቲዳይሳ ጎዲዴስ፤ ሃኢካ ጎዴꬆን ዴስ።
GAL 4:30 ጊዶ ኣቲን ጌሻ ማጻፋይ ቃሴ ኣይ ጊዜ? «ኣይሌዮ ኢዚ ናዛራ ዲጋ፤ ኣይሌይ ናይ ጎቃይ ናራ ላቴና» ጌስ።
GAL 4:31 ሄሳ ጊሻስ ታ ኢሻቶ! ኑኒ ጎቃይ ናይታ ኣቲን ኣይሌይ ናይታ ጊዶኮ።
GAL 5:1 ኑና ኪርስቶሲ ጌሺዳይ ኑኒ ጌሻቴꬃን ዳናሳ፤ ሄሳ ጊሻስ ሚኒ ኤቂቴ፤ ናምኣንꬆ ኣይሌቴꬃ ቃምባራን ጌሎፒቴ።
GAL 5:2 ታ ኢንቴስ ጊዛይሳ ዎዚናን ዎꬂቴ፤ ኢንቴ ቃጻሬታና ኮይኮ ኪርስቶሲ ኢንቴና ኣይኮካ ጎኤና ጋዳ ታ ጳዉሎሲ ኢንቴስ ዮታይስ።
GAL 5:3 ቃጻሬታና ኮይዛይቲ ዉሪ ዎጋ ኡባ ፖላናይሲ ዶሳ ጊዶንታይሳ ታ ኢንቴስ ኢሳስ ኢሳስ ቆንጬን ዮታይስ።
GAL 5:4 ኢንቴኖ ዎጋ ናጎን ጺላና ዋዬቲዛይቶ! ኢንቴ ኪርስቶሳፔ ሻኬቲዴታ፤ ኢዛ ኪያቴꬃፌካ ሃኪዴታ።
GAL 5:5 ኑ ቃሴ ኡፋይሳን ናጌቲዛ ጺሎቴꬃ ጾሳ ኣያና ባጋራ ኣማኖን ላሞቴꬃን ናጎን ዶስ።
GAL 5:6 ኣሲ ዬሱስ ኪርስቶሳን ዲኮ ቃጻሬቲን ዎይኮ ቃጻሬቶንታ ኣጊን ኣይኮካ ጎኤና፤ ጎኣይ ዲዛይ ሲቆን ቆንጪዛ ኣማኖ ጻላ።
GAL 5:7 ካሴ ሎኦ ዎꬅ ዎጼታ ሺን፤ ሃኢ ኢንቴስ ꬉጴ ጊዲዲ ቱማስ ኢንቴ ኣዛዜቶንታ ማላ ኢንቴና ዲጊዳይ ኦኔ?
GAL 5:8 ሄሳ ማላ ባሌꬆይ ኢንቴና ጼይጊዳ ጾሳፌ ጊዴና።
GAL 5:9 «ጉꬃ ኢርሾይ ሊጼ ኡባ ዴንꬄስ» ጌቴቲዛ ማላ።
GAL 5:10 ኢንቴስ ሃራ ቆፋይ ዴና ጋዳ ታኒ ጎዳን ኣማኔታይስ፤ ኢንቴስ ቲኪ ጊዛዝ ኦꬂዛይ ኦና ጊዲኮ ኢዚ ባ ፒርዳ ኤካና።
GAL 5:11 ታ ኢሻቶ! ሃኖ ጋካናስ ታ ሳባኪዛይሲ ኣሲ ኣታናስ ቃጻሬታና ቤሴስ ጊዛዝ ጊዲዳኮ ሂስቲን ሃኖ ጋካናስ ኣዛስ ታና ጎዲዞ? ሄሳ ማላ ጊዲዳኮ ኪርስቶሳ ማስቃሌይ ኣሳስ ꬉጴ ጊዴናኮሺን።
GAL 5:12 ኢንቴስ ቲኪ ጊዛዝ ኦꬂዛ ኣሳቲ ጮ ዎጋራ ቃጻሬቴꬅ ኣጊዲ ሙሌራ ቃንጺ ዬጌቶ።
GAL 5:13 ታ ኢሻቶ! ኢንቴ ጌሻቴꬃስ ጼይጌቲዴታ፤ ኢንቴ ኢንቴ ጌሻቴꬃ ዛሪዲ ኢንቴስ ኣሾ ኣሞ ፖላናስ ጎኤቶፍቴ፤ ሄሳፌ ኢንቴ ኢንቴ ጋርሳን ሲቆን ኢሶይ ኢሳ ማዲቴ።
GAL 5:14 ዎጋይ ዉሪ ሺቄቲዲ ኢሲ ቃላን ቃሼቴስ፤ ሄሲካ፥ «ኔኒ ኣሴ ኔ ማላ ዶሳ!» ጊዛይሳ።
GAL 5:15 ጊዶ ኣቲን ኢንቴ ኢሶይ ኢሳራ ሳጼቲዛይታ ጊዲኮ ኢንቴ ኢንቴ ጋርሳን ዉሮንታ ማላ ናጌቲቴ።
GAL 5:16 ሄሳ ጊሻስ ታ ኢንቴና ኣያናን ሲሜሬቲቴ፤ ቃሴካ ኣሾ ኣሞካ ፖሎፒቴ ጋይስ።
GAL 5:17 ኣሾይ ኣያናይ ኮዮንታዝ ኣሞቴስ፤ ኣያናይካ ኣሾይ ኮዮንታዝ ኣሞቴስ፤ ሃይቲ ኢሶይ ኢሳራ ባ ጋርሳን ኢጼቲዛ ጊሻስ ኢንቴ ኢንቴ ኮዪዳ ማላ ኦꬄኬታ።
GAL 5:18 ኢንቴ ኣያናን ዲዛይታ ጊዲኮ ዎጋስ ሃሬቲዛይታ ጊዴኬታ።
GAL 5:19 ኣሾ ኦሶይ ቆንጬን ኤሬቴስ፤ ሄሲካ ላይማቴꬅ፥ ቱናቴꬅ፥ ላይማ ካስ፥
GAL 5:20 ኤቃስ ጎይኖ፥ ቢታ፥ ኢጼቴꬅ፥ ኦሽ፥ ቃናቴቴꬅ፥ ሃንቆ፥ ባና ጻላ ዶሶ፥ ሻኬቴꬅ፥ ዙፔቴꬅ፥
GAL 5:21 ሚቃይኔቴꬅ፥ ማꬆቴꬅ፥ ኣላሜ ማዛሙሬ ዬጼꬂኔ ሄይታንታ ሚሳቲዛይታ። ታኒ ኢንቴስ ካሴ ዮቲዳ ማላ ሃኢካ ኢንቴ ናጌታና ማላ ቆፍሳይስ፤ ሄሳ ማላ ዱስ ዲዛይቲ ዉሪካ ጾሳ ካዎቴꬅ ላቴቴና።
GAL 5:22 ኣያና ኣይፌይ ጊዲኮ ሲቆ፥ ኡፋይስ፥ ሳሮቴꬅ፥ ዳንዳያ፥ ኪያቴꬅ፥ ሎኤቴꬅ፥ ኣማኔቴꬅ፥
GAL 5:23 ኣሽኬቴꬅ፥ ባርካ ባና ሃሮ፤ ሃይታንታ ማላ ዲጊዛ ዎጋይ ባ።
GAL 5:24 ዬሱስ ኪርስቶሳስ ጊዲዳይቲ ኣሾ ኢዛ ኢታ ቆፋራኔ ኢዛ ኢታ ኣሞቴꬃራ ኢሲፌ ካቂዳ።
GAL 5:25 ኑ ኣያናን ዳና ኮይኮ ኣኔ ኣያናን ሲሜሬቶስ።
GAL 5:26 ኑኒ ኢሶይ ኢሳ ኢታስ ዴንꬄꬂሼኔ ቃናቴቲሼ ጮ ሜላ ጬቄቲዛይሳ ኣኔ ኣጎስ።
GAL 6:1 ታ ኢሻቶ! ኢሲ ኣሲ ናጋራ ኦꬂ ቤቲኮ ኢንቴ ቃሴ ኣያናን ሎኦ ዲዛይቲ ኢዛ ኣሽኬቴꬃራ ዛራናስ ቤሴስ፤ ጊዶ ኣቲን ኔካ ኢዛዴ ማላ ፓጬቶንታ ማላ ኔ ሁኤስ ናጌታ።
GAL 6:2 ኢንቴ ኢሶይ ኢሳ ዴጾ ቶሆ ቶኪቴ፤ ሄሳ ማላ ኦሶን ኪርስቶሳ ዎጋ ፖሌታ።
GAL 6:3 ኢሳዴይ ኣይኮካ ሃኖንታ ዲሼ ባና ጊታሲዛ ሚሳቲኮ ሄሳዴይ ባርካ ባና ባሌꬄስ።
GAL 6:4 ኢሲ ኢሲ ኣሲ ባ ኦሶ ባርካ ፓጪ ጼሎ፤ ሄሳፌ ጉዬ ሃራ ኣሳራ ባና ጊናሶንታ ዲሼ ኢዚ ባና ጬቂሲዛዝ ዴማና።
GAL 6:5 ኢሲ ኢሲ ኣሲ ባርካ ባ ቶሆ ቶካናስ ቤሴስ።
GAL 6:6 ቃላ ታማርዛይ ኦኒካ ባ ታማርዳ ሎኦ ሚሻ ባ ኣስታማሬዛራ ጊሼቶ።
GAL 6:7 ባሌቶፍቴ፤ ጾሲ ቂልጫ ኤሬና፤ ኣሲ ባ ዜሪዳሮ ኢዞ ዛሪ ማጻና።
GAL 6:8 ባ ኣሾ ኣሞ ኩንꬃናስ ዜሪዛዴይ ኣሾፔ ꬋዮ ማጻና፤ ኣያና ኡፋይሳናስ ዜሪዳዴይ ጊዲኮ ኣያናፔ ሜርና ዴኦ ማጻና።
GAL 6:9 ኣኔ ኑ ሎኦ ኦሶ ኦꬃናስ ኣዛሎኮ፤ ኑ ኡፋይስ ቃንጾንታ ኣጊኮ ዎዴይ ጋኪሺን ጋኪዳ ካꬅ ኑ ማጻና።
GAL 6:10 ሄሳ ጊሻስ ኑስ ዳንዳዬቲኮ ኣሳ ኡባስ ሃራፔካ ኣማኒዛ ኣሳስ ኣኔ ሎኦ ኦꬆስ።
GAL 6:11 ታኒ ታ ኩሼራ ኢንቴስ ኣይ ማላ ጊታ ፒዳሌን ጻፊዳኮ ኣኔ ጼሊቴ።
GAL 6:12 ጮ ካሬ ባጋራ ቤታና ኮይዛ ኣሳቲ ኢንቴ ቃጻሬታና ማላ ዎልቃꬃና ኮዬቴስ፤ ኢስቲ ሄሳ ኦꬂዛይ ኪርስቶሳ ማስቃሌ ጊሻስ ጊዲ ጎዴቶንታ ማላሳ።
GAL 6:13 ኢስቲ ኢንቴ ቃጻሬታና ማላ ኮይዛይ ኢንቴ ኣሾን ጬቄታናስ ኮይዛ ጊሻስ ኣቲን ቃጻሬቲዳይቲ ዎጋ ናጊዛይታ ጊዴቴና።
GAL 6:14 ቃሴ ኣላሜይ ታስ፥ ታኒካ ኣላሜስ ካቄቲዳ ጎዳ ዬሱስ ኪርስቶሳ ማስቃሌንፔ ኣቲን ሃራን ጬቆይ ታፔ ሃኮ።
GAL 6:15 ቃጻሬቲን ዎይኮ ቃጻሬቶንታ ኣጊን ኢዛስ ጎኣይ ባ፤ ጎኣይ ኦራꬃ ሜꬌቴꬅ ጊዴꬃ።
GAL 6:16 ሃይሳ ሃ ኣዛዞዛ ካሊዛ ኡባታሲኔ ጾሳ ዴሬ ጊዲዳ ኢስራኤሌ ኣሳታስ ሳሮቴꬂኔ ማሬቴꬂ ጊዶ።
GAL 6:17 ታኒ ዬሱሳ ማላታ ታ ኣሳቴꬃን ቶካዲስ፤ ሄሳ ጊሻስ ሃኢ ታና ኦኒካ ዋዪሴና።
GAL 6:18 ታ ኢሻቶ! ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ! ኣሚን።
EPH 1:1 ጾሳ ሼኔ ማላ ዬሱስ ኪርስቶሳ ሃዋሬ ጊዲዳ ጳዉሎሳፔ፥ ዬሱስ ኪርስቶሳን ዲዛ ኣማኔቲዛይታስ ኤፌሶኔን ኣማኒዛ ኣሳስ፥
EPH 1:2 ኑ ኣዋ ጾሳፌኔ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።
EPH 1:3 ኑ ጎዳ ዬሱስ ኪርስቶሳ ባጋራ ሳሎን ኣያና ኣንጆ ኡባን ኑና ኣንጂዳ ጎዳ ዬሱስ ኪርስቶሳ ኣዋይ ጾሲ ኣንጄቶ።
EPH 1:4 ኑ ኢዛ ሲንꬃን ጌሺኔ ዎሶይ ባይንዳይታ ጊዳና ማላ ቡሮ ኣላሜይ ሜꬌታናፔ ካሴ ባ ሲቆን ኪርስቶሳ ባጋራ ኑና ዶሪዴስ።
EPH 1:5 ዬሱስ ኪርስቶሳ ባጋራ ኑ ኢዛ ና ጊዳና ማላ ባ ሎኦ ቆፋን ኮይሮ ኡባ ዎꬂዴስ።
EPH 1:6 ሄሲካ ባ ዶሲዛዴ ባጋራ ጮ ሜላ ኑስ ኢሜቲዳ ቦንቾ ኪያቴꬂ ጋላቴታና ማላሳ።
EPH 1:7 ጾሳ ኣꬎ ኪያቴꬃ ዱሬቴꬃፌ ዴንዶይሳን ዬሱሳ ሱꬃን ዎዜቲዲ ናጋራፔ ኑ ማሬቲዶስ።
EPH 1:8 ኢዚ ባ ኪያቴꬃ፥ ሂላቴꬃኒኔ ኤራቴꬅ ኡባን ኑ ቦላ ኬሂ ዳርሲዴስ።
EPH 1:9 ጾሲ ቆፒዳ ባ ጹራ ቆፋ ኪርስቶሳ ባጋራ ባ ሎኦ ቆፋ ማላ ኑና ኤሪሲዴስ።
EPH 1:10 ቡሮፔ ዎዴ ዉርሴꬃን ሃናናስ ዲዛ ኢዛ ቆፋይ ሳሎ ቦላኔ ቢታ ቦላ ዲዛይታስ ኡባስ ሁኤ ጊዲዳ ዬሱስ ኪርስቶሳፔ ኡባ ጋርስ ኣꬃናሳ።
EPH 1:11 ዉርሲካ ባ ሼኔ ማላ ኦꬂዛ ኢዛ ሼኔን ኮይሮካ ኢዚ ቆፒ ዎꬂዳይቲ ኑኒ ኢዛን ዶሬቲዶስ።
EPH 1:12 ኑኒ ካሴቲዲ ኪርስቶሳ ባጋራ ኤካና ጊዲ ኡፋይሳን ናጊዛይቲ ጾሳ ቦንቾ ጋላታን ቆንጪሳናሳ።
EPH 1:13 ኢንቴካ ቃሴ ቱማ ቃላ ሄሲካ ኢንቴና ኣሺዛ ሚሺራቾ ቃላ ሲዪዲ ኪርስቶሳን ኣማኒዴታ፤ ኢዛ ኣማኒዲ ካሴ ኢሜታና ጌቴቲዳ ጺሎ ኣያና ማታሜን ኣታሜቲዴታ።
EPH 1:14 ሄ ኣያናዚካ ኢዛ ቦንቾ ጋላታን ቆንጪሳና ማላ ጾሲ ባስ ጊዲዳይታ ኡባታ ዎዛና ጋካናስ ኑ ላታስ ኦይሶ።
EPH 1:15 ሄሳ ጊሻስ ኢንቴ ጎዳ ዬሱሳ ኣማኒዳ ጊሻሲኔ ኣማኒዛ ኣሳ ኢንቴ ሲቂዛይሳ ታ ሲዮሶፔ ሃ ሲሚን ኢንቴና ቆፓ ቆፓ ኤካዳ ታኒ ታ ዎሳን ኢንቴ ጊሻስ ጾሳስ ጋላታ ሺሾ ኣጋቤኬ።
EPH 1:17 ቦንቾ ኣዋ ጊዲዳ ኑ ጎዳ ዬሱስ ኪርስቶሳ ኣዋ ጾሳ ኢንቴ ሎኤꬂ ኤራና ማላ ቆንጪሲዛ ኣያናይኔ ኤራቴꬃ ኣያናይ ኢንቴስ ኢሜታና ማላ ታ ኢንቴስ ፓጬይ ባይንዳ ዎሳይስ።
EPH 1:18 ሄሳꬆካ ኢንቴ ኢዛን ጼይጌቲዳ ኡፋይሳይ ሄሲካ ኣማኒዛይታ ኣቻን ዲዛ ኢዛ ዱሬቴꬂ ኣዛኮኔ ኢንቴ ኤራና ማላ ኢንቴ ዎዚና ኣይፌይ ፖኣና ማላ ዎሳይስ።
EPH 1:19 ኑስ ኣማኒዛይታስ ኡባፌ ቦላ ጊዲዳ ኢዛ ዎልቃ ꬎቃቴꬅ ኢንቴ ኤራና ማላ ታ ዎሳይስ፤ ሄ ዎልቃይካ ኢዛ ጊታ ሚኖቴꬃ ኦሶን ቤሲዳይሲ ሃይቆፔ ኪርስቶሳ ዴንꬂዲ ሳሎን ባ ኡሻቻን ኡቲሲዳ ኪርስቶሳ ባጋራ።
EPH 1:21 ኣይሲዛይታፔ፥ ጎዳቴꬃፌ፥ ዎልቃፌኔ ካዎቴꬃፌ ቃሴካ ሃኢ ጻላ ጊዶንታ ቡሮፔ ያና ዎዴካ ጊዲን ሱንꬅ ኡባፌ ኢዚ ቦላ።
EPH 1:22 ጾሲ ሃራ ዉርሲ ኢዛ ቶሆፔ ጋርሳን ሃሪሲዴስ፤ ዎሳ ኬꬃንካ ኡባ ቦላ ሁኤ ኦꬂዴስ።
EPH 1:23 ዎሳ ኬꬂያ ኪርስቶሳ ኣሳቴꬃ፤ ሄ ኢዛካ ኡባሶን ኡባ ሚሽ ኩንꬂዛ ሄ ኢዛ ኩሜꬃ።
EPH 2:1 ኢንቴ ቆሂዳ ቆሆ ጊሻሲኔ ኢንቴ ናጋራ ጋሶን ኢንቴ ሃይቂዴታ ሺን፤
EPH 2:2 ሄሳ ኢንቴ ሃይሳ ኣላሜዛ ኢታ ኦጌ ካሊዴታ፤ ቦላ ጫርኮ ቦላ ዲዲ ሃሪዛ ዎልቃማ ኣያናታስ ሃኢካ ጾሳስ ኣዛዜቶንታ ኣሳ ቦላ ኦꬂዛ ኢታ ኣያናስ ኢንቴ ኣዛዜቲሼ ጋምኢዴታ።
EPH 2:3 ሃይሳፌ ካሴ ኑኒ ኑ ኣሾ ኣሞቴꬅ ፖሊሼ ኣሾይ ኮይዛ ኦጌ ካሊሼ ኢስታራ ዶስ፤ ኑኒካ ሃንኮ ኣሳ ማላ ኑ ሜꬌቴꬃፌ ጾሳ ሃንቆ ጋርሳን ዴኦስ።
EPH 2:4 ጊዶ ኣቲን ጾሲ ኬሂ ሲቂዳ ጊሻስ ባ ማሮ ዳሮን ኑኒ ኑ ቆሆ ዳሮቴꬃን ሃይቂዳይታ ጊዲ ዲሺን ኪርስቶሳ ባጋራ ኑና ኣሺዴስ፤ ኢንቴ ፓጺዳይ ኢዛ ኪያቴꬃና።
EPH 2:6 ጾሲ ኑና ኪርስቶሳራ ጋꬂ ዴንꬂዴስ፤ ዬሱስ ኪርስቶሳ ባጋራ ኑና ሳሎን ባናራ ኡቲሲዴስ።
EPH 2:7 ሄሲካ ሃይሳፌ ጉዬ ያና ዎዴዛን ዬሱስ ኪርስቶሲ ኑስ ባ ኪያቴꬃን ቆንጪሲዳ ዛዋይ ባይንዳ ባ ኪያቴꬃ ዱሬቴꬃ ኑና ቤሳናሳ።
EPH 2:8 ኢንቴ ጾሳ ኪያቴꬃን ኣማኖን ኣቲዴታ፤ ሄሲካ ጾሲ ኢንቴስ ሜላ ጮ ኢሚዳዛፔ ኣቲን ኢንቴ ኦሶፔ ጊዴና።
EPH 2:9 ኦኒካ ጬቄቶንታ ማላ ኦሶፔ ጊዴና።
EPH 2:10 ሄሲካ ጾሲ ካሴ ኮይሮ ጊግሲ ዎꬂዳ ሎኦ ኦሶ ኑኒ ኦꬃና ማላ ዬሱስ ኪርስቶሳ ባጋራ ኑኒ ናምኣንꬆ ሜꬌቲዳይታኔ ጾሳ ሜꬌቴꬃታ።
EPH 2:11 ሄሳ ጊሻስ ኢንቴ ካሴ ኢንቴ ዬሌቴꬃን ኣይዛቤቲ ኢንቴ ኣሳቴꬃ ቦላ ኣሳ ኩሼ ኦሶ ጋሶን፥ «ኑኒ ቃጻሬቲዶስ» ጊዛ ኣሳቲ ኢንቴና፥ «ቃጻሬቶንታይታ» ጊዛይቶ! ኢንቴ ሄሳ ኣኔ ዎዚናን ዎꬂቴ።
EPH 2:12 ኢንቴ ሄ ዎዴ ኪርስቶሳፔ ሻኬቲዲ፥ ኢስራኤሌ ናይታፔ ሃኪዲ፥ ጫቆ ቃላስካ ኣላጋ ጊዲዲ፥ ሃይሳ ኣላሜዛ ቦላ ሂዶታይኔ ጾሲ ባይንዳ ካሴ ኢንቴ ዲዛ ዱሳ ዩሺ ቆፒቴ።
EPH 2:13 ሃኢ ቃሴ ኢንቴ ካሴ ሃሆን ዲዛይቲ ዬሱስ ኪርስቶሳን ጊዲዲ ኢዛ ሱꬃ ባጋራ ሺቂዴታ።
EPH 2:14 ናምኣታ ኢሲ ቦላ ጋꬂዲ ጊዶን ሻኪ ኦሺዛ ሚሻ ላሊዳ ኑ ሳሮይ ኢዛ።
EPH 2:15 ዎጋ፥ ዎጋ ኣዛዞራ ጋꬂ ኢሲፌ ባ ኣሾን ሻሪዴስ፤ ኢዚ ሄሳ ኦꬂዳ ጋሶይካ ኢዛስ ዋና ቆፋይ ናምኣታፔ ኢሲ ኦራꬃ ኣስ ባ ባጋራ ሜꬊዲ ሳሮቴꬅ ኤሃናሳ።
EPH 2:16 ኢዚ ማስቃሌ ቦላ ሃይቂዲ ሞርኬቴꬅ ዲጊዴስ፤ ናምኣታካ ኢሲ ኣሾ ሂስቲዲ ጾሳራ ማቃዪንꬂዴስ።
EPH 2:17 ኢዚ ዪዲ ኢንቴስ ሃኪ ዲዛይታሲኔ ማታን ዲዛይታስ ጋꬂ ሳሮቴꬅ ሳባኪዴስ።
EPH 2:18 ኑ ዉሪካ ኢዛ ባጋራ ኢሲ ኣያናን ኣዋ ኣች ሺቃና።
EPH 2:19 ሄሳ ጊሻስ ኢንቴ ኣማኒዛይታራ ኢሲፌ ኢሲ ዴሬ ኣሳኔ ጾሳስ ሶ ኣሳ ኣቲን ሃይሳፌ ጉዬ ቤቴታኔ ኢማꬃታ ጊዴኬታ።
EPH 2:20 ኢንቴ ሃዋሬታኔ ናቤታ ዮቻን ኬጼቲዴታ፤ ኬꬃስ ዉርሴꬃ ኩሻይ ዬሱስ ኪርስቶሳ።
EPH 2:21 ኬꬃዚ ዉሪካ ኢሲፌ ኦይኬቲዲ ጎዳስ ዱማ ኬꬄ ጊዳናስ ዲጬስ።
EPH 2:22 ኢንቴካ ጾሲ ባ ኣያናን ዳናስ ኢዛስ ዱሳሶ ጊዳና ማላ ኢሲፌ ኬጼቲሼ ዴታ።
EPH 3:1 ሄሳ ጋሶን ታ ጳዉሎሲ ኢንቴስ ኣማኖንታይታ ጊሻስ ዬሱስ ኪርስቶሲ ቃቺዳዴ ጊዳዲስ።
EPH 3:2 ታ ኢንቴና ጎኣና ማላ ጾሲ ኪያቴꬃን ታስ ኦሶስ ኤጻ ኢሚዳይሳ ኢንቴ ቱማፔ ሲዪዴታ።
EPH 3:3 ሃይሳፌ ካሴ ታ ኢንቴስ ቃንꬃራ ጻፊዳ ማላ ታስ ቆንጪን ታ ኤራናስ ዳንዳይዳ ጹራይ ሃይሳ።
EPH 3:4 ሄሳ ጊሻስ ኢንቴ ሄሳ ናባቢሼ ኪርስቶሳ ጹራ ታ ኣይ ማላ ኤሪዳኮ ኢንቴካ ኤራናስ ዳንዳዬታ።
EPH 3:5 ሄ ጹራይካ ሃኢ ኣማኒዛ ሃዋሬታሲኔ ናቤታስ ቆንጪዳ ማላ ካሴ ቤኒ ኣꬊዳ ዎዴ ዲዛ ኣሳታስካ ቆንጪቤና።
EPH 3:6 ሄሲ ሄ ጹራይ ኣይዛቤቲ ሚሺራቾ ቃላ ባጋራ ኢስራኤሌ ናይታራ ኢሲፌ ላቲዛይታ፤ ኢሲፌ ኢሳዴ ኣሳቴꬃ ማላ ጊዲዲ ዬሱስ ኪርስቶሳ ባጋራ ቤቲዳ ሂዶታ ኢሲፌ ጊሼቲ ላቲዛይታ ጊዳናሳ።
EPH 3:7 ታኒካ ኢዛ ዎልቃ ኦሶ ማላ ታስ ኢሜቲዳ ጾሳ ኪያቴꬃ ኢሞታ ማላ ሃይሳ ሚሺራቾ ቃላ ኦሳንቻ ጊዳዲስ።
EPH 3:8 ታ ቃሴ ሃንኮ ኣማኒዛ ኣሳፔ ላፋ ጊዲኮካ ኦኒካ ዛዋይ ባይንዳ ኪርስቶሳ ዱሬቴꬅ ኣይዛቤታስ ሳባካና ማላ ጾሳ ኪያቴꬃን ሃይሲ ታስ ኢሜቲዴስ።
EPH 3:9 ሄሳꬆካ ኡባ ሜꬊዳ ጾሳን ቤኒ ዎዴ ቆቴቲ ዲዛ ጾሳስ ጹራ ቆፋይ ኣዛኮ ኡባስ ታ ቆንጪሳና ማላ ታስ ጾሳ ኪያቴꬂ ኢሜቲዴስ።
EPH 3:10 ኢዛ ቆፋይ ሃኢ ዎዴ ዎሳ ኬꬃ ባጋራ ዱማ ዱማ ሜꬋይ ዲዛ ጾሳ ሂላቴꬂ ሳሎን ዲዛ ሃላቃታሲኔ ጎዳታስ ኤሬታና ማላ ሃኒዴስ።
EPH 3:11 ጾሲ ኑ ጎዳ ዬሱስ ኪርስቶሳ ባጋራ ሃይሳ ፖሊዳይ ባ ሜርና ቆፋ ማላ።
EPH 3:12 ኑኒ ኢዛይታ ጊዲዳ ጊሻሲኔ ኢዛን ኣማኒዳ ጊሻስ ጌሻቴꬃራኔ ሂርጋይ ባይንዳ ኑኒ ጾሳኮ ሺቃና ዳንዳዮስ።
EPH 3:13 ሄሳ ጊሻስ ኢንቴ ቦንቼታና ማላ ታኒ ኢንቴ ጊሻስ ታ ቦላ ጋኪዳ ዋዬዛን ኢንቴ ኡፋይስ ቃንጾንታ ማላ ታ ኢንቴና ሃዳራ ጋይስ።
EPH 3:14 ሄሳ ጊሻስ ታኒ ጾሳ ሲንꬃን ጉልባታይስ።
EPH 3:15 ሳሎን ዲዛይኔ ቢታ ቦላ ዲዛ ኢዛሶ ኣሳይ ዉሪካ ኢዚ ሱንꬂን ሱሜስ።
EPH 3:16 ኢንቴ ጋርሳ ባጋራ ሚናና ማላ ኣያና ባጋራ ኢዛ ቦንቾ ዱሬቴꬂ ኢንቴስ ኢሜታና ማላ ታ ዎሳይስ።
EPH 3:17 ሄሲካ ኪርስቶሲ ኢንቴ ዎዚናን ኣማኖን ዳና ማላኔ ቃሴካ ኢንቴ ኢዛን ጻጲዲ ሲቆን ሚናና ማላ ዎሳይስ።
EPH 3:18 ኪርስቶሳ ሲቆስ ኣሆቴꬃይ፥ ኣዱሳቴꬃይ፥ ꬎቃቴꬃይኔ ጪማቴꬂ ኣይ ጊናኮ ኢንቴ ኣማኒዛ ኡባ ኣሳራ ኢሲፌ ሻኪ ኤራና ማላ።
EPH 3:19 ኢንቴ ጾሳ ኩሜꬃራ ሻኪ ኤሪዲ ኢዛን ኩሜꬅ ጊዳና ማላ ኣሳ ኤራፔ ቦላ ጊዲዳ ኪርስቶሳ ሲቆ ኢንቴ ኤራና ማላ ታ ዎሳይስ።
EPH 3:20 ሄሳ ጊሻስ ኑ ጊዶን ኦꬂዛ ባ ዎልቃ ጊና ኑ ዎሲዛይሳፌኔ ዎይኮ ኑ ቆፒዛይሳፌ ኡባፌ ቦላራ ኬሂ ዳርሲ ኦꬃናስ ዳንዳይዛ ጾሳስ፥
EPH 3:21 ዎሳ ኬꬃን ቃሴካ ዬሱስ ኪርስቶሳ ባጋራ ዎዴ ኡባን ሜርናፔ ሜርና ጋካናስ ኢዛስ ቦንቾይ ጊዶ። ኣሚን።
EPH 4:1 ሄሳ ጊሻስ ጎዳ ሱንꬃን ቃሼቲዳ ታኒ ኢንቴ ጼይጌቲዳ ጼይሳስ ቤሲዛ ዱስ ዳና ማላ ኢንቴና ዎሳይስ።
EPH 4:2 ሙሌካ ኣሽኬታኔ ሹጎታ ጊዲቴ፤ ኢሶይ ኢሳራ ሲቆን ዲቴኔ ኢሶይ ኢሳ ዳንዳይቴ።
EPH 4:3 ሳሮቴꬅ ኢሚዛ ኣያና ኢሲፌቴꬅ ናጋናስ ሚኒቴ።
EPH 4:4 ኢንቴ ጼይጌቲዳ ጋላስ ኢሲ ሂዶታኮ ጼይጌቲዳ ማላ ኢሲ ኣሳቴꬂኔ ኢሲ ኣያናይ ዴስ።
EPH 4:5 ኢሲ ጎዳይ፥ ኢሲ ኣማኖይኔ ኢሲ ጺንቃታይ ዴስ።
EPH 4:6 ኡባፌ ቦላራ ጊዲዳይ፥ ኡባ ቦላ ኦꬂዛይ፥ ኡባሶን ዲዛይ፥ ኡባስ ኣዋ ጊዲዳ ኢሲ ጾሲ ዴስ።
EPH 4:7 ጊዲኮካ ኪርስቶሲ ኢማና ጊ ቃቺዳ ማላ ኑስ ኢሳስ ኢሳስ ዱማ ዱማ ኢሞቴꬂ ኢሜቲዴስ።
EPH 4:8 ሄሳ ጊሻስ፥ «ኢዚ ፑዴ ኬዚዳ ዎዴ ዲኦ ዲኢዴስ፤ ኣሳስ ኪያቴꬃ ኢሞታ ኢሚዴስ» ጌቴቲ ጌሻ ማጻፋን ጻፌቲዴስ።
EPH 4:9 ሂስቲን፥ «ኢዚ ፑዴ ኬዚዴስ» ጉሲ ቃሴካ ዱጌ ቢታ ጋርስ ዎꬊዴስ ጉስ ጊዶንታ ኣጊኮ ሄሲ ኣይ ጉሴ?
EPH 4:10 ኢዚ ዱጌ ጋርሴ ዎꬊዳይሲ ኩሜꬅ ኣላሜ ሜꬌቴꬅ ኩማና ማላ ሳሎፔካ ቦላ ኬዚዳይ ኢዛ።
EPH 4:11 ኢሲ ኢሲ ኣሳቲ ሃዋሬታ፥ ባጋይቲ ናቤታ፥ ሃራቲ ሚሺራቾ ቃላ ሳባኬ፥ ባጋይቲ ቃሴ ሄሚዛይታኔ ታማርሲዛይታ ጊዳና ማላ ኢዚ ኢሞታ ኢሚዴስ።
EPH 4:12 ሄሲካ ኪርስቶሳ ኣሳቴꬅ ጊዲዳ ዎሳ ኬꬂያ ኬጼታና ማላ ኣማኒዛይታ ኣማኖ ኦሶስ ጊጊሳናሳ።
EPH 4:13 ሄሲካ ሃናናይ ኑ ዉሪካ ጾሳ ና ኣማኖኒኔ ኢዛ ኤሮን ቤቲዛ ኢሲፌቴꬃኮ ጋኪዲ ኩሜꬃ ኣስ ጊዳናስ ኪርስቶሳን ኑኒ ኪርስቶሳꬆ ኩሜꬂኔ ፖሎ ጊዳና ማላሳ።
EPH 4:14 ሄሳ ጊሻስ ኣባ ቦላ ዴንዲዛ ጎቴ ጫርኮይ ያኔ ሃ ሾጬቺዛ ማላ ዱማ ዱማ ቲሚርቴ ጫርኮን ኣሳ ጌኔኒኔ ባሌꬆን ኣኔ ኑኒ ያኔ ሃ ጶንቄቲሼ ቄሪ ጉꬃ ናይታ ማላ ሃኖኮ።
EPH 4:15 ሄሳꬆ ሃኖ ኣጊዲ ቱማ ሲቆን ሃሳይሼ ሁኤ ጊዲዳይሳኮ ሃኒዛዛን ኡባን ኣኔ ዲጮስ፤ ሄ ሁኤዚካ ኪርስቶሳ።
EPH 4:16 ኢዛ ጋሶን ኣሳቴꬂ ዉሪ ጻጶን ኦይኬቲዲ ኢሲ ኢሲ ኣሳቴꬂ ባ ኦሶ ኦꬂሼ ዉሪካ ሲቆን ዲጬሲኔ ባናካ ሚንꬄስ።
EPH 4:17 ኣይዛቤታ ማላ ጮ ሜላ ቆፋን ሜላ ሲሜሬታናስ ኢንቴስ ቤሴና ጋዳ ታ ኢንቴና ዞራይስ።
EPH 4:18 ኢስታ ዎዚናይ ሙሚዳ ጊሻሲኔ ዩሺ ቆፖንታ ጊሻስ ኢስታ ዎዚና ኣይፌይ ቆቂዴስ፤ ኢስቲ ጾሳ ዴኦፔ ሻኬቲዳ።
EPH 4:19 ኢስታፌ ዬላቴꬂ ꬋይዳ ጊሻስ ባ ኮዪዳ ማላ ባና ካልሶንታ ኣሞኒኔ ቱናቴꬃን ዳናስ ዎጋይ ባይንዳ ኢታ ኦሶስ ባና ኣꬂ ኢሚዳ።
EPH 4:20 ኢንቴ ቃሴ ኪርስቶሳ ሄሳ ማላን ኤሪቤኬታ።
EPH 4:21 ኤ ቱሙካ ኢንቴ ኢዛ ጊሻስ ሲዪዴታኔ ዬሱሳን ዲዛ ቱማ ኢዛፔ ታማርዴታ።
EPH 4:22 ኢንቴ ካሴ ዲዛ ዱሳይ ባሌꬂዛ ኣሞን ቂታቲዳ ጊሻስ ካሴ ጬጋ ኣሳቴꬅ ኢንቴፌ ቃሪ ዬጋና ማላ ታማርዴታ።
EPH 4:23 ቃሴካ ኢንቴ ቆፋይ ኣያናን ኦራጾ።
EPH 4:24 ቱሙ ጺሎቴꬃኒኔ ጌሻቴꬃን ጾስ ሚሳታና ሜꬌቲዳ ኦራꬃ ኣሳቴꬅ ማይኢቴ።
EPH 4:25 ኑ ዉሪካ ኢሲ ኣሾ ጊዲዳ ጊሻስ ዎርዶቴꬅ ዲጊዲ ኑኒ ኑ ጋርሳን ኢሶይ ኢሳራ ኣኔ ቱማ ሃሳዮስ።
EPH 4:26 ሃንቄቲቴ ሺን ናጋራ ኦꬆፍቴ፤ ኢንቴ ሃንቆን ዲሺን ኣርሼይ ዉሎፎ።
EPH 4:27 ጻላኤስ ሶሆ ኢሞፍቴ።
EPH 4:28 ካሴ ካይሶቲዛዴይ ሃይሳፌ ጉዬ ካይሶቶፓ፤ ጊዶ ኣቲን ሜቶቴቲዲ ኢዛ ዎሲዛይታስ ኢሚዛ ሚሺ ኢዛ ኩሼን ዳና ማላ ሎኦ ሚሽ ባ ኩሼራ ኦꬂ ዴማናስ ዳቡሮ።
EPH 4:29 ኮሺዛ ማላ ሃንኮ ሲዪዛይታ ጎኢዛዚኔ ማዲዛ ቃላፔ ኣቲን ጎኣይ ባይንዳ ቃላይ ኢንቴ ዶናፔ ኬዞፖ።
EPH 4:30 ኢንቴ ኣታና ጋላሳስ ኣታሜቲዳ ጾሳ ጺሎ ኣያና ሚሺሶፒቴ።
EPH 4:31 ጫሞ ዮኦ ኡባ ሃንቆ፥ ዪሎ፥ ኦሽ፥ ጫሼ፥ ቃሴካ ሃንኮ ሃራ ኢታቴꬅ ኡባ ኢንቴፌ ዲጊቴ።
EPH 4:32 ኢንቴና ጾሲ ኪርስቶሳ ባጋራ ኣቶ ጊዳ ማላ ኢንቴካ ኢንቴ ጋርሳን ኣቶ ኣቶ ጌቴቲቴ፤ ኢሶይ ኢሳራ ኪያታኔ ኢሶይ ኢሳስ ቃꬌቲዛይታ ጊዲቴ።
EPH 5:1 ሄሳ ጊሻስ ኢንቴ ዶሴቲዛ ናይታ ማላ ጾስ ሚሳቲቴ።
EPH 5:2 ኪርስቶሲ ኑና ሲቂዳ ማላ ቃሴካ ኑ ጊሻስ ባና ሳዊዛ ያርሾ ኦꬂ ጾሳስ ኢሚዳ ማላ ኢንቴካ ሲቆን ሲሜሬቲቴ።
EPH 5:3 ላይማይ ዎይኮ ቱናቴꬂ ዎይኮ ኡዜቴꬂ ሙሌካ ኢንቴ ጊዶን ቤቶይ ኣቲን ዚጊርሲካ ሲዬቶፎ፤ ሄሳ ማላይ ጌሻ ጾሳ ኣሳስ ቤሴና።
EPH 5:4 ኢንቴ ጋላታ ጋላቲዛይታ ጊዲቴ ኣቲን ኣሴ ዬላቺዛ ላፋ ሃሳያይ፥ ጮ ኤያቴꬃ ዮኦይ ኢንቴስ ቤሶንታ ጊሻስ ሄሳ ማላይ ኢንቴ ጋርሳን ዶፖ።
EPH 5:5 ቃሴካ ኢንቴ ላይማቲዛይታስ ዎይኮ ቱናታስ ዎይኮ ኡዜቲዛይታሲኔ ኤቃስ ጎይኒዛይታስ ኪርስቶሳ ካዎቴꬃኒኔ ጾሳ ካዎቴꬃን ኢስታስ ላታሶይ ባይንዳይሳ ኢንቴ ኤሪቴ።
EPH 5:6 ኢንቴና ኦኒካ ዎርዶ ሃሳያን ባሌꬆፎ፤ ጋሶይካ ጾሳ ሃንቆይ ኢዛስ ኣዛዜቶንታ ናይታ ቦላ ያናይ ሃይታንታ ማላና።
EPH 5:7 ሄሳ ጊሻስ ሄሳንታ ማላራ ዙፔቶፒቴ።
EPH 5:8 ካሴ ኢንቴ ꬉማ ሺን ጎዳን ሃኢ ኢንቴ ፖኦ፤ ኢንቴ ፖኦ ናይታ ማላ ዲቴ።
EPH 5:9 ፖኦስ ኣይፌይ ሎኤቴꬃን፥ ጺሎቴꬃኒኔ ቱማቴꬃን ኡባን ዴስ።
EPH 5:10 ሄሳꬆካ ጎዳ ኡፋይሲዛ ሚሽ ኮዪቴ።
EPH 5:11 ኣይፌይ ባይንዳ ꬉማ ኦሶራ ኢንቴስ ኣይኮ ጋጎቴꬂ ዶፖ፤ ሄሳፌ ኢታ ኦሶ ቆንጬ ኬሲቴ።
EPH 5:12 ꬉማን ዲዛ ኣሳቲ ጌማን ኦꬂዛ ሚሻ ጊሻስ ሃሳያይካ ዬላቼስ።
EPH 5:13 ፖኦይ ፖኢዳዚ ዉሪ ቆንጬን ቤቴስ።
EPH 5:14 ጋሶይካ ኡባ ቤሲዛይ ፖኦ፤ ሄሳ ጊሻስ፥ «ኔኖ፥ ꬊስኪዛይሶ ቤጋ! ሃይቆፔ ዴንዳ! ኪርስቶሲ ኔስ ፖኢሳና» ጌቴቲዴስ።
EPH 5:15 ሄሳ ጊሻስ ኤራቴꬂ ባይንዳይታ ማላ ጊዶንታ ኢንቴ ዋኒዲ ኤራታ ማላ ዳናኮ ናጌቲቴ።
EPH 5:16 ሃይሲ ዎዴዚ ኢታ ጊዲዳ ጊሻስ ሄሳ ሎኤꬂ ኤሪቴ።
EPH 5:17 ሄሳ ጊሻስ ኤያታ ጊዶፒቴ፤ ጎዳ ሼኔይ ኣዛኮ ዩሺ ቆፒቴ።
EPH 5:18 ኣያናይ ኩሚዳይታ ጊዲቴ ኣቲን ማꬆሲዛ ኡሻን ማꬆቶፍቴ፤ ሄሲ ጮ ሜላ ሚሻ ላሌꬃ።
EPH 5:19 ኣያና ዬꬃን ጋላታራ ጋꬂ ዬጺሼ ኢንቴ ጊዶን ኢሶይ ኢሳራ ሃሳዬቲቴ፤ ኢንቴ ሳባኒኔ ዬꬃን ኩሜꬃ ዎዚናፔ ጎዳ ጋላቲቴ።
EPH 5:20 ሄሳን ጾሳ ኣዋ፥ ጎዳ ዬሱስ ኪርስቶሳ ሱንꬃ ኡባ ሚሻስ ኡባ ዎዴ ጋላቲቴ።
EPH 5:21 ኢንቴ ኪርስቶሳ ቦንቾስ ጊዲ ያሻራ ኢሶይ ኢሳስ ኣዛዜቲቴ።
EPH 5:22 ማቼቶ ኢንቴ ጎዳስ ሃሬቲዛ ማላ ኢንቴ ኣዚናታስ ሃሬቲቴ።
EPH 5:23 ኪርስቶሲ ባ ኣሾ ጊዲዳ ዎሳ ኬꬃይስ ሁኤ ጊዲዳ ማላ ኣዚናይካ ባ ማቼይስ ሁኤ።
EPH 5:24 ሄሳ ጊሻስ ዎሳ ኬꬂያ ኪርስቶሳስ ኣዛዜቲዛ ማላ ማቼቲካ ባ ኣዚናታስ ኣይ ሃኖንካ ኣዛዜታናስ ቤሴስ።
EPH 5:25 ኣዚናቶ! ኪርስቶሲ ዎሳ ኬꬃዮ ሲቂዳ ማላኔ ባና ኢዚ ጊሻስ ኣꬂ ኢሚዳ ማላ ኢንቴካ ኢንቴ ማቼታ ሲቂቴ።
EPH 5:26 ባ ቃላ ባጋራ ሃꬃን ሜጪ ጌሺ ዱማሲዴስ።
EPH 5:27 ሄሳꬆካ ቂታይ ዎይኮ ኣይፌሶ ጺርጶቴꬂ ዎይኮ ኢሲ ኢታይ ኢዚ ቦላ ቤቶንታ ጌሺኔ ባላይ ኢዚ ቦላ ባይንዳሮ ቦንቾ ዎሳ ኬꬄ ሂስቲዲ ሺሻናሳ።
EPH 5:28 ኣዚናቲካ ሄሳꬆ ባ ማቼታ ባ ኣሾ ማላ ሲቃናስ ቤሴስ፤ ባ ማቾ ሲቂዛዴይ ባና ሲቄስ።
EPH 5:29 ባርካ ባና ኢጺዛዴይ ኦኒካ ዴና፤ ባ ኣሾስ ሜሲኔ ባና ናጌስ፤ ኪርስቶሲካ ዎሳ ኬꬃስ ሂኒꬆ ኦꬂዴስ።
EPH 5:30 ኑኒ ኪርስቶሳ ኣሳቴꬃ።
EPH 5:31 ሄሳ ጊሻስ፥ «ኣሲ ኣዮኔ ኣዋ ኣጊዲ ባ ማቼይራ ኢሲኖ ጊዴስ፤ ናምኣይካ ኢሲ ኣሾ ጊዴቴስ» ጌቴቲ ጌሻ ማጻፋን ጻፌቲዴስ።
EPH 5:32 ሃይሲ ዳሮ ጹራ ዮኦ፤ ታኒካ ሃይሳ ኪርስቶሳ ጊሻሲኔ ዎሳ ኬꬃ ጊሻስ ዮታይስ።
EPH 5:33 ጊዲኮካ ኢንቴፌ ኢሲ ኢሳዴይ ባ ማቾ ባና ሲቂዛ ማላ ሲቆ፤ ማቻካ ባ ኣዚና ቦንቹ።
EPH 6:1 ናይቶ! ኢንቴ ኢንቴና ዬሊዳይታስ ጎዳን ኣዛዜቲቴ፤ ሄሲ ኢንቴስ ቤሴስ።
EPH 6:2 «ኔ ኣዋኔ ኔ ኣዮ ቦንቻ» ጊዛ ኣዛዞ ጊዶን ዲዛ ሂዶታይ ኮይሮ ኣዛዞ።
EPH 6:3 ኔ ሄሳꬆ ኦꬂኮ ኔስ ሎኣናኔ ኔስ ላይꬃይ ቢታ ቦላ ኣዱቃና።
EPH 6:4 ዬሊዳይቶ! ኢንቴካ ኢንቴ ናይታ ሃንቄꬆፍቴ፤ ጊዶ ኣቲን ኢንቴ ናይታ ጎዳ ዞሬኒኔ ሴራን ዲቺቴ።
EPH 6:5 ኦሳንቻቶ! ኢንቴ ኪርስቶሳስ ኣዛዜቲዛ ማላ ቢታ ቦላ ኢንቴና ኦሲሲዛይታስ ያሻቴꬃኒኔ ቦንቾን ሱሬ ዎዚናፔ ኣዛዜቲቴ።
EPH 6:6 ጮ ኣሳ ኣይፌን ቤታና ማላኔ ኦሲሲዛይታፔ ዶና ኣንጆ ኤካናስ ጊዶንታ ኢንቴ ኪርስቶሳ ኣይሌታ ማላ ጾሳ ሼኔ ኩሜꬃ ዎዚናፔ ፖላና ማላ ዎዚናፔ ኣዛዜቲቴ።
EPH 6:7 ኣሳስ ኦꬂዛ ማላ ጊዶንታ ጎዳስ ኦꬂዛ ማላ ኢንቴ ኩሜꬃ ዎዚናፔ ኦꬂቴ።
EPH 6:8 ጋሶይካ ኣይሌ ጊዲን ዎይኮ ጎዳ ጊዲን ባ ኦꬂዛ ሎኦ ኦሶስ ኡባስ ዎይቶ ኤካናይሳ ኢንቴ ኤሬታ።
EPH 6:9 ኢንቴኖ ጎዳቶ! ኢንቴካ ኢንቴ ኦሲሲዛይታስ ሄሳꬆ ኦꬂቴ፤ ኢስታሲኔ ኢንቴስ ጎዳ ጊዲዳይ ቦላ ሳሎን ዲዛይሳ፤ ኢዚካ ኣይፌሶ ጼሊ ኣስ ማዶንታይሳካ ኢንቴካ ኤሪዛ ጊሻስ ኦሳንቻታ ባቢሶ ኣጊዲ ሎኦ ኦꬂቴ።
EPH 6:10 ሃራ ባጋራ ሚኖ ጎዳኒኔ ኢዛ ጊታ ዎልቃን ሚኒቴ።
EPH 6:11 ዳቡሎሳ ጌኔ ኦሶ ኢንቴ ኤቄታናስ ዳንዳያና ማላ ጾሳ ኦላ ማይኦታ ማይኢቴ።
EPH 6:12 ጋሶይካ ኑ ኦሌታናይ ኣሾራኔ ሱꬃራ ጊዶንታ ሃይሳ ꬉማ ኣላሜዛ ሃሪዛ ጎዳታራ፥ ዎልቃማታራኔ ሳሎ ቦላ ዲዛ ቱና ኣያና ኦላንቻታራ ኦሌቶስ።
EPH 6:13 ኢታ ጋላሳይ ጋኪሺን ኢንቴ ሞርኬ ዎልቃራ ኤቄታናስ ዳንዳያና ማላ ጾሳ ኦላ ማይኦታ ኩሜꬅ ማይኢቴ፤ ኢንቴ ኡባካ ፖሊዳፔ ጉዬ ሚኒ ኤቃናስ ዳንዳዬታ።
EPH 6:14 ሄሳ ጊሻስ ኢንቴ ጼሳን ቱማ ዚናሬ ማላ ዳንጬቲዲ ጺሎቴꬃ ጹሩሬታ ማላ ቲራን ማይኢዲ፥
EPH 6:15 ሳሮቴꬃ ሚሺራቾ ቃላ ቶሆን ጫማ ማላ ኣꬂዲ ጊጌቲ ኤቂቴ።
EPH 6:16 ሄይታንታፌካ ቦላራ ታማ ማላ ፖፖልኡ ጊዛ ኢታ ኣያና ዎንዳፌታ ኢንቴ ኡባ ቶይሳና ዳንዳያና ማላ ኣማኖ ጎንዳሌ ማላ ዴንꬂቴ።
EPH 6:17 ኣቶቴꬅ ቢራታ ቆቤ ማላ ሁኤን ዎꬂቴ፤ ኣያና ጊꬃ ማሻ ኦይኪቴ፤ ሄሲካ ጾሳ ቃላ።
EPH 6:18 ዎሳን ኣይ ሃኖንካ ኣያናን ዎሲቴ፤ ሄሳ ቆፒዲ ቤጊቴ፤ ኣማኒዛይታ ኡባ ጊሻስ ቃንጾንታ ዎሲቴ።
EPH 6:19 ታኒ ሚሺራቾ ቃላ ጹራ ኣሳስ ቆንጪሳናስ ዶና ዶይዛ ኡባ ዎዴ ያሺ ባይንዳ ታ ጻላቴꬃን ዮታናስ ቃላይ ታስ ኢሜታና ማላ ታስ ዎሲቴ።
EPH 6:20 ታኒ ሚሺራቾ ቃላ ጊሻስ ሳንሳላታን ቃሼታዳ ኪቴቲዳዴ ጊዲዳይ ሄሳሳ፤ ሄሳ ጊሻስ ታ ዮታናስ ቤሲዛይሳ ባቦንታ ዮታና ማላ ታስ ዎሲቴ።
EPH 6:21 ታ ኣይ ማላ ዲዛኮኔ ኣይ ኦꬂዛኮ ኢንቴ ኤራና ማላ ዶሴቲዳ ታ ኢሻይ ጎዳስ ኣማኔቲዳ ኦሳንቻይ ቲቂቆሲ ኢንቴስ ሃኒዳይሳ ዉርሲካ ኢንቴስ ዮታና።
EPH 6:22 ኢንቴ ኑ ሃኖቴꬅ ኤራና ማላኔ ኢንቴ ዎዚና ኢዚ ሚንꬄꬃና ማላ ታ ኢዛ ኢንቴኮ ዬዳዲስ።
EPH 6:23 ኣዋ ጾሳፌ፥ ጎዳ ዬሱስ ኪርስቶሳፔ ሳሮቴꬂኔ ሲቆይ ኣማኖራ ኢንቴስ ታ ኢሻታስ ጊዶ።
EPH 6:24 ጎዳ ዬሱስ ኪርስቶሳ ፓጬይ ባይንዳ ሲቂዛ ኡባስ ሳሮቴꬂ ጊዶ። ኣሚን።
PHI 1:1 ዬሱስ ኪርስቶሳ ኦሳንቻ ጊዲዳ ጳዉሎሳፔኔ ጺምቶሳፔ ዎሳ ኬꬃ ጪማታራኔ ዳቆኔታራ ኢሲፌ ፒሊጲሲዮሴ ዴሬን ዲዛ ኣማኒዛይታስ ዬሱስ ኪርስቶሳስ ዱማቲዳይታስ ኡባስ፥
PHI 1:2 ኑ ኣዋ ጾሳፌ፥ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።
PHI 1:3 ኢንቴና ቆፒዛ ኡባ ጋላስ ታኒ ታ ጾሳ ጋላታይስ።
PHI 1:4 ኡባ ጋላስ ኢንቴ ጊሻስ ታ ዎሲዛ ዎዴ ኡፋይሳን ዎሳይስ።
PHI 1:5 ኮይሮ ጋላሳፌ ሃ ሲሚን ሃኖ ጋካናስ ሚሺራቾ ቃላ ኦሶን ኢንቴ ታናራ ዴታ።
PHI 1:6 ኢንቴናን ሎኦ ኦሶ ዶሚዳይሲ ኢዚ ዬሱስ ኪርስቶሲ ዉርሴꬃ ፒርዳስ ያና ጋካናስ ኢንቴና ዳንዳይሳናይሳ ታ ኣማናይስ።
PHI 1:7 ታ ሃኢ ቃሾ ኬꬃን ዲሺኒኔ ታ ቃሼታናፔካ ካሴ ሚሺራቾ ቃላ ቱማ ናጋናሲኔ ሚንꬄꬃናስ ጾሲ ታስ ባ ኪያቴꬃን ኢሚዳ ማዶን ኢንቴ ዉሪካ ታናራ ኢሲፌ ኦꬂዳይታ ጊዲዳ ጊሻስ ኢንቴ ኡባ ጋላስ ታ ዎዚናፔ ꬋዬኬታ፤ ሄሳ ጊሻስ ታኒ ኢንቴ ጊሻስ ቆፓናስ ቤሴስ።
PHI 1:8 ታ ኢንቴና ዬሱስ ኪርስቶሳ ሲቆን ዎስታ ላሞቲዛኮ ጾሲ ታስ ማርካ።
PHI 1:9 ኢንቴ ሲቆይ ኤራቴꬃኒኔ ኣኬካን ኬሂ ዳራና ማላ ታ ዎሳይስ።
PHI 1:10 ሄሲካ ኢንቴ ኡባፌ ኣꬊዛይሳ ሻኪ ኤራና ማላኔ ዬሱስ ኪርስቶሳ ዩሳ ጋላስ ጋካናስ ኢንቴ ጌሻታኔ ዎሶይ ባይንዳይታ ጊዳና ማላ ኮያይስ።
PHI 1:11 ጾሳ ቦንቺሲዛይሳኔ ጋላቲሲዛይሳ ኢንቴ ኦꬃና ማላ ዬሱስ ኪርስቶሳን ቤቲዛ ጌሻቴꬃ ኣይፌን ኢንቴ ዎዚናይ ኩሞ።
PHI 1:12 ሃኢካ ታ ኢሻቶ! ታ ቦላ ጋኪዳ ሜቶይ ሚሺራቾ ቃላይ ካሴፔ ኬሂ ኣካናስ ጊዲዳይሳ ኢንቴ ኤራና ማላ ታ ኮያይስ።
PHI 1:13 ሄሳ ጊሻስ ታ ቃሼቴꬃይ ኪርስቶሳ ጊሻስ ጊዲዳይሲ ካዎ ኬꬃ ዛቤታሲኔ ሃራታስካ ኤሬቲዴስ።
PHI 1:14 ታ ቃሼቲዳይሳ ጋሶን ኣማኒዛይቲ ጾሳ ቃላ ባቦንታ ጻላቴꬃን ኣሳስ ማርካታናስ ሚኖቴꬅ ዴሚዳ።
PHI 1:15 ኢሲ ኢሲ ኣሳቲ ጮ ኑ ኢዛፔ ዋኒዶን ጌꬃኒኔ ሆሎቴꬃን ሳባኬቴስ፤ ባጋይቲ ቃሴ ሎኦ ቆፋራ ኪርስቶሳ ጊሻስ ሳባኬቴስ።
PHI 1:16 ባጋይቲ ታኒ ሚሺራቾ ቃላ ጊሻስ ሞቴታና ሃን ዲዛይሳ ኤሪዛ ጊሻስ ሲቆን ሳባኬቴስ።
PHI 1:17 ሃንኮይቲ ቃሴ ሎኦ ቆፋን ጊዶንታ ታና ጋኪዳ ቃሾዛ ቦላ ሃራ ዋዬ ጋꬃናሲኔ ባ ኢታ ቆፋ ፖላናስ ኪርስቶሳ ሳባኬቴስ።
PHI 1:18 ሄሳ ጊዲኮ ኣይ ሜቶ ዲዛይ! ዋና ኣይፌ ዮኦይ ሱሬቴꬃን ጊዲን ዎይኮ ሚሳቲሶን ጊዲንካ ኣዋራካ ኪርስቶሳ ሳባኪዛ ጊሻስ ታ ኡፋዬታይስ።
PHI 1:19 ታ ቦላ ጋኪዳ ሜቶፔ ታ ኣꬋናይ ኢንቴ ዎሳኒኔ ዬሱስ ኪርስቶሳ ኣያና ማዶን ጊዲዳይሳ ታ ኤራይስ።
PHI 1:20 ታ ኣይ ኦጌራካ ዬላቶንታ ማላ ሚኖ ኡፋይሲኔ ላሞታይ ታስ ዴስ፤ ጊዶ ኣቲን ካሴካ ሃቺካ፥ ታ ሃይቂንካ ፓጻ ዲንካ ኪርስቶሲ ታ ኣሾን ቦንቼታናይሳ ታኒ ጻላቴꬃን ሃሳያይስ።
PHI 1:21 ታስ ዱስ ጉሲ ኪርስቶሳ፤ ሃይቆይካ ታስ ጎኣ።
PHI 1:22 ጊዶ ኣቲን ታኒ ሃይሳ ኣሾ ዱሳን ጉጃ ዲዛኮ ኣይፌ ኢሚዛ ኦሶ ኦꬃይስ ጉሳ፤ ታ ኣዋይሳ ዶራናኮ ታስ ኤሬቴና።
PHI 1:23 ሃ ናምኡ ሃኖታን ሜቶቴታዲስ፤ ታ ባዳ ኪርስቶሳራ ዳናስ ላሞታይስ፤ ሄሲ ሃራ ኡባፌ ኬሂ ሎኦ።
PHI 1:24 ጊዶ ኣቲን ታስ ኣሾን ዱሲ ኢንቴስ ኬሂ ኮሼስ።
PHI 1:25 ሄሳ ኣኬካዳ ኢንቴ ኣማኖን ዲጫና ማላኔ ኡፋዬታና ማላ ኢንቴ ኡባታ ማታን ጋምኣናይሳኔ ዳናይሳ ታ ኤራይስ።
PHI 1:26 ታ ሄ ባዳ ኢንቴ ኣቻን ዴኢኮ ታ ጋሶን ኢንቴስ ኪርስቶሳን ዲዛ ጬቄቴꬂ ዳራና።
PHI 1:27 ኪርስቶሳ ሚሺራቾ ቃላስ ቤሲዛ ማላ ዲቴ፤ ሄሳꬆ ሃንካ ታ ኢንቴና ባዳ ቤኢዳኮ ዎይኮ ሃሆን ዳዳ ኢንቴ ጊሻስ ታ ሲዪዛኮ ኢንቴ ሚሺራቾ ቃላ ኣማኖስ ኢሲፌ ኦሌቲሼ ኢሲ ኣያናን ኢንቴ ሚኒ ኤቃናይሳ ታ ኤራይስ።
PHI 1:28 ኣይ ኦጌራካ ኢንቴናራ ኤቄቲዛይታስ ሂርጎፍቴ፤ ሄሲ ኢስቲ ꬋያናይሳሲኔ ኢንቴ ኣታናይሳስ ጾሳፌ ኢሜቲዳ ማላታ።
PHI 1:29 ኢንቴ ኪርስቶሳ ኣማኒዛይታ ጻላ ጊዶንታ ኢዛ ጊሻስ ዋዬ ኤኪዛይታ ጊዳና ማላ ሃይሲ ጾሳ ኪያቴꬂ ኢንቴስ ኢሜቲዴስ።
PHI 1:30 ኢንቴ ካሴ ቤኢዳ ማላ ሃኢካ ታ ቦላ ዲዛይሳ ኢንቴ ሲዪዛይሳ ማላ ሄሳꬆ ኢንቴናካ ዋዪሶን ዴስ።
PHI 2:1 ኢንቴስ ኪርስቶሳ ባጋራ ቤቲዳ ኢሲፌቴꬃ ጋሶን ኢሶይ ኢሳ ሚንꬄꬂዛዝ ሲቆ ጊዲንካ ዎይኮ ኣያና ኢሲፌቴꬅ ዎይኮ ማሮይኔ ኣሳስ ሚሼቴꬂ ኢንቴ ጋርሳን ዲኮ ኢንቴ ኣስ ሲቆን ኢሲ ኣያናኒኔ ኢሲ ቆፋን ጊዲዲ ታ ኡፋይስ ፖሊቴ።
PHI 2:3 ኣስ ኡባ ኢንቴፌ ቦላራ ጼሊቴ ኣቲን ኢንቴርካ ኢንቴና ዶሶን ዎይኮ ጎኣይ ባይንዳ ጋላታ ኤካናስ ኢሲ ሚሺካ ኦꬆፍቴ።
PHI 2:4 ኢንቴፌ ኢሲ ኢሲ ኣሲ ሃራ ኣስ ጎኢዛይሳ ጼሊቴ ኣቲን ኢንቴ ጎኣ ጻላ ጼሎፍቴ።
PHI 2:5 ዬሱስ ኪርስቶሳስ ዲዛ ኣሽኬቴꬂ ኢንቴ ኣቻንካ ዶ።
PHI 2:6 ኢዚ ጾሳኮሺን ባና ጾሳራ ጊኒሳናስ ኮዪቤና።
PHI 2:7 ጊዶ ኣቲን ኣይሌ ሜꬋ ኤኪዲ ኣስ ሚሳቲዲ ባርካ ባና ኤያ ኣስ ኬሲዴስ።
PHI 2:8 ኣስ ጊዲ ቆንጪዲካ ባና ኣሳፔ ዚቂሲዴስ፤ ሃይቃና ጋካናስ ሄሲካ ማስቃሌ ቦላ ካቄቲ ሃይቃና ጋካናስ ኣዛዜቲዴስ።
PHI 2:9 ሄሳ ጊሻስ ጾሲ ኢዛ ዳሮ ꬎቁ ሂስቲዴስ፤ ሱንꬅ ኡባፌ ꬎቁ ጊዳ ሱንꬅ ኢዛስ ኢሚዴስ።
PHI 2:10 ሄሲካ ሳሎኒኔ ሳኣን፥ ሳኣፔ ጋርሳንካ ዲዛ ሜꬌቴꬂኔ ጉልባቴይ ዉሪ ዬሱሳ ሱንꬃስ ጉልባታና ማላሳ።
PHI 2:11 ኣሳ ኢንጻርሲ ዉሪካ ጾሳ ኣዋ ቦንቾስ ዬሱስ ኪርስቶሲ ጎዳ ጊዲዳይሳ ማርካታናሳ።
PHI 2:12 ሄሳ ጊሻስ ታ ኢሻቶ! ኢንቴ ካሴ ኡባ ዎዴ ኣዛዜቲዛይታ ጊዲዳ ማላ ሃኢካ ታኒ ማታን ዶንታ ኢንቴፌ ሃሆን ዲኮካ ኢንቴ ኣቶቴꬃይ ኩሜꬅ ጊዳና ማላ ያሻቴꬃኒኔ ቦንቾን ፖሊቴ።
PHI 2:13 ጾሲ ኢንቴስ ኣዛዜቴꬅ ኢሚሼ ባ ቆፋ ዉርሴꬅ ጋካናስ ኢንቴ ጊዶን ኦꬄስ።
PHI 2:14 ኣይ ሚሺካ ዙዙንꬂኔ ፓላማይ ባይንዳ ኦꬂቴ።
PHI 2:15 ሄሲካ ኢንቴ ኢታኔ ጌላ ኣሳ ጊዶን ጌሻታኔ ዎሶይ ባይንዳ ጾሳ ናይታ ጊዲዲ ኣላሜ ቦላ ኣርሼ ማላ ዴሬ ኡባስ ፖኣናሳ።
PHI 2:16 ኢንቴ ኤኪዳ ዴኦ ቃላ ሎኤꬂ ኦይኪኮ ኪርስቶሲ ሃ ሲሚ ዪዛ ዎዴ ታ ሜላ ዳቡሮንታይሳ ጊሻስ ታ ጬቄታናዚ ታስ ዴስ።
PHI 2:17 ቃሴካ ኢንቴስ ጎዳን ዲዛ ኣማኖይ ኢንቴ ጾሳስ ሺሺዳ ዱማ ያርሾ ማላ ታ ሼምፖይ ኢንቴ ያርሾራ ኢሲፌ ያርሾ ማላ ጉኪዛኮ ኢንቴናራ ታኒካ ኡፋዬታና።
PHI 2:18 ሄሳꬆካ ኢንቴ ኢንቴስ ኡፋዬቲዲ ታናካ ኡፋይሳናስ ቤሴስ።
PHI 2:19 ጎዳይ ማዲኮ ጺምቶሳ ኢንቴኮ ዬዳዳ ኢንቴ ሎኤቴꬃ ጊሻስ ሎኦ ዎሬታ ሲያናስ ኮያይስ።
PHI 2:20 ኢንቴ ሎኤቴꬃ ጊሻስ ቆፒዛ ኣሲ ሃራ ኢዛ ማላይ ኦኒካ ባ።
PHI 2:21 ሃራይ ዉሪካ ዬሱስ ኪርስቶሳይሳ ጊዶንታ ባ ጎኣስ ዎጺዛዴ ጻላላ።
PHI 2:22 ጊዶ ኣቲን ኢንቴ ኤሪዛይሳ ማላ ጺምቶሲ ኢዚ ኣይ ማላ ኣሳኮ ባ ጊሻስ ማርካሲዴስ። ናይ ባ ኣዋራ ኦꬂዛ ማላ ታናራ ሚሺራቾ ቃላ ዮቲዴስ።
PHI 2:23 ሄሳ ጊሻስ ሃይሳፌ ሲንꬃን ታ ዋናናኮ ሻካ ኤሪዳፔ ጉዬ ኢዛ ታ ኢንቴኮ ኪታና ቆፓይስ።
PHI 2:24 ታኒካ ኢንቴኮ ማታ ዎዴ ባናይሳ ጎዳን ኣማኔታይስ።
PHI 2:25 ሄሳꬆካ ኢንቴ ታና ኮሺዛ ሚሻን ኡባን ማዳና ማላኔ ሎኤꬂ ኦይካና ማላ ዬዲዳ ኣፍሮዲጾ ታ ኢንቴኮ ዛራ ዬዳና ማላ ኮሺዛይሲ ታስ ኤሬቲዴስ።
PHI 2:26 ጋሶይካ ኢዚ ኢንቴና ኩሜꬃታ ቤያናስ ላሞቲዳ ጊሻሲኔ ቃሴካ ኢንቴ ኢዛ ሳኮዛ ሲዪዳይሳስ ቆፒዳ ጊሻሳ።
PHI 2:27 ቱማፔካ ኢዚ ሃርጊዲ ሃይቂሼ ኣቲዴስ፤ ጊዶ ኣቲን ጾሲ ኢዛ ማሪዴስ፤ ታ ካሴ ሙዞቲዛይሳ ቦላ ሃራ ሙዞይ ጉጄቶንታ ማላ ታናካ ማዲዴስ።
PHI 2:28 ሄሳ ጊሻስ ኢንቴ ኢዛ ቤኢዲ ኡፋዬታና ማላኔ ታኒካ ሂርጋፌ ሼምፓና ማላ ኣሞታይስ።
PHI 2:29 ኢንቴ ኢዛ ኬሂ ኡፋይሳን ሞኪ ኤኪቴ፤ ኢዛ ማላ ኣሳታካ ቦንቺቴ።
PHI 2:30 ኢንቴ ታና ማታን ዲዲ ኦꬂ ማዳናስ ዳንዳዮንታ ጊሻስ ኢዚ ባ ሼምፖስ ሚሼቶንታ ታና ኦꬂ ማዲዲ ኪርስቶሳ ኦሶ ጋሶን ሃይቂሼ ኣቲዴስ።
PHI 3:1 ታ ኢሻቶ! ሃይሳፌ ሃራ ታ ኢንቴና ጊዛይ ጎዳን ኡፋዬቲቴ፤ ሃኢካ ዛራዳ ኢዞ ታ ኢንቴስ ጻፊኮ ታና ሳሌꬄና፤ ኢንቴናካ ጎኣና።
PHI 3:2 ሄይታ ካና ማላ ሁስካቲዛይታፔ፥ ኢታ ኦꬂዛይታፔኔ ኣሳስ ሜቄꬅ ሜንꬂዛ ኣሳታፔ ናጌቲቴ።
PHI 3:3 ቱሙ ቃጻሬቲዳይቲ፥ ጾስ ዎሲዛይቲ፥ ዬሱስ ኪርስቶሳን ጬቂዛይቲ፥ ኣሾን ጬቄቶንታይቲኔ ኣሾንካ ኣማኔቶንታይቲ ኑና።
PHI 3:4 ታኒ ጬቃና ኮይኮ ኣሾ ባጋራ ጬቃና ሚሺ ታስካ ዴስ፤ ኦናስካ ኣሾን ጬቂዛ ሚሺ ዲዛ ሚሳቲኮ ታ ኢዛፔ ኣꬋይስ።
PHI 3:5 ታኒ ዬሌቲዳ ኦስፑንꬃ ጋላስ ቃጻሬታዲስ፤ ታ ኢስራኤሌ ዜሬꬂኔ ቢኒያሜ ኮቻፌ ዬሌታዲስ፤ ኢብራዌታ ጊዶን ታኒካ ኣዳ ኢብራዌ፤ ዎጋ ባጋራ ኦይቺዛዴይ ዲኮ ታ ካሴ ፋርሳዌ።
PHI 3:6 ሙሴ ዎጋስ ዚልኤቲዛይሳ ጊዲኮ ታኒ ካሴ ዎሳ ኬꬃ ጎዲዛዴ። ዎጋ ናጎን ቤቲዛ ጺሎቴꬅ ጊዲኮ ካሴ ታ ቦላ ኢሲ ዎሶይካ ዴና።
PHI 3:7 ጊዶ ኣቲን ታስ ጎኣ ጊዲዳይሳ ኡባ ኪርስቶሳ ጊሻስ ጋዳ ጎኣይ ባይንዳ ሚሻ ማላ ቆዳዲስ።
PHI 3:8 ሄሳፌካ ታ ጎዳ ዬሱስ ኪርስቶሳ ኤሮፔ ኣꬊዛይ ሃራይ ኣይኮይካ ባይንዳይሳ ታ ኣማኒዛ ጊሻስ ኡባካ ጎኣይ ባይንዳ ሚሻ ማላ ቆዳዲስ፤ ታኒ ኢዛ ጊሻስ ጋዳ ኡባካ ኣጋዲስ፤ ታ ኪርስቶሳ ዴማና ጋዳ ኡባ ሚሻካ ዎራ ዎꬊዳ ኢታ ሚሻ ማላ ቆዳዲስ።
PHI 3:9 ታኒ ሄሳꬆ ኦꬂዛ ጋሶይካ ካሴ ሙሴ ዎጋን ታስ ዲዛ ጺሎቴꬃ ኣጋዳ ኣማኖን ቤቲዛ ጾሳ ጺሎቴꬅ ኪርስቶሳን ኣማናዳ ዴማናሲኔ ታ ኢዛራ ኢሲፌ ዴኣናሳ።
PHI 3:10 ኪርስቶሳኔ ኢዚ ሃይቂ ዴንዲዳ ዴንꬃ ዎልቃ ታ ኤራና ማላ ኢዛ ዋዬካ ታ ኢዛራ ጊሼታና ማላኔ ሃይቆንካ ታ ኢዛ ሚሳታና ማላ ኣሞታይስ።
PHI 3:11 ሄሳꬆካ ታ ሃይቃ ዴንዲዳፔ ጉዬ ሜርናስ ዳናስ ኮያይስ።
PHI 3:12 ታ ሃይሳ ዉርሳ ዴማዲስ ዎይኮ ሃይሳꬆ ሃናዲስ ጉስ ጊዴና፤ ጊዶ ኣቲን ዬሱስ ኪርስቶሲ ታና ባስ ሂስቲዲ ታስ ጊግሲዳ ዎይቶ ኤካናስ ሚና ዎꬃ ቦላ ዳይስ።
PHI 3:13 ታ ኢሻቶ! ታ ሃኢ ታ ኮይዛይሳካ ኦይኪዳ ማላ ቆዲኬ፤ ጊዶ ኣቲን ታ ኢሲ ሚሽ ኦꬃና፤ ታፔ ጉዬራ ዲዛይሳ ኣጋ ኣጋዳ ታፔ ሲንꬃን ዲዛይሳ ኦይካናስ ዛራꬋይስ።
PHI 3:14 ጾሲ ታና ዬሱስ ኪርስቶሳ ባጋራ ፑዴ ጼይጊዳ ጊሻስ ዎይቶ ጋካ ኤካናስ ኤሌላይስ።
PHI 3:15 ሄሳ ጊሻስ ኑኒ ኣማኖን ሚኒዳይቲ ዉሪካ ሃኒዛ ዮኦ ኡባ ሄሳꬆ ጼላናስ ቤሴስ፤ ኢሲ ኢሲ ዱማ ቆፋይ ኢንቴስ ዲኮ ሄሳካ ጾሲ ኢንቴስ ቆንጪሳና።
PHI 3:16 ጊዲኮካ ኑ ሃኢ ጋኪ ኤሪዳዛን ኣኔ ሲሜሬቶስ።
PHI 3:17 ታ ኢሻቶ! ኣኔ ኢንቴ ታ ሃኒዛ ማላ ታና ካሊቴኔ ሃራታራካ ኢሲፌ ዴኢቴ፤ ኑኒ ኑና ኢንቴስ ሌሚሶ ሂስቲ ቤሲዳ ማላ ዲዛ ኣሳታ ዎዚናን ዎꬂቴ።
PHI 3:18 ጋሶይካ ሃይሳፌ ካሴ ታ ኢንቴስ ዛራ ዛራ ዮቲዳ ማላ ሃኢካ ዛራዳ ኣፉንꬃራ ኢንቴስ ዮታይስ፤ ዳሮቲ ኪርስቶሳ ማስቃሌስ ሞርኬ ጊዲዲ ሲሜሬቴቴስ።
PHI 3:19 ኢስታ ዉርሴꬂ ꬋዮ፤ ኢስታ ኡሎይ ኢስታ ጾሳ፤ ኢስታስ ካዉሻቴꬃይ ኢስታስ ቦንቾ፤ ኢስታ ዎዚናይ ሼምፒዳይ ሃ ቢታ ዱሳና።
PHI 3:20 ኑ ዴሬይ ጊዲኮ ሳሎና፤ ሄፔ ቡሮ ያናይሳ ኑና ኣሺዳ ጎዳ ዬሱስ ኪርስቶሳ ዩሳ ላሞቴꬃን ናጎን ዶስ።
PHI 3:21 ኢዚካ ኡባ ባፔ ጋርሳን ሃሪሳና ዳንዳይዛ ባ ዎልቃን ዳቡራንቻ ጊዲዳ ኑ ኣሳቴꬅ ቦንቼቲዳ ባ ኣሳቴꬅ ሚሳቲሲዲ ላማና።
PHI 4:1 ታ ኢንቴና ዶሲዛይቶ! ታ ኢንቴና ላሞቲዛይቶ! ታስ ኡፋይሲኔ ኦሶ ዛዉዴ ጊዲዳ ታ ኢሻቶ! ጎዳን ሚኒ ኤቂቴ።
PHI 4:2 ኢንቴ ቆፋይ ጎዳን ኢሲኖ ጊዳና ማላ ኤዎዲያኔ ሲንጼኬይ ባ ጋርሳን ሲቄታና ማላ ታ ኢስታ ዎሳይስ።
PHI 4:3 ኤሮ! ኔኖ! ታናራ ኢሲፌ ኣማኔቲዳ ኦሳንቻዞ! ሚሺራቾ ቃላ ዮቶስ ታናራኔ ቃላሜንጾሳራ ቃሴካ ኢስታ ሱንꬃይ ዴኦ ማጻፋን ጻፌቲዳ ሃንኮ ታናራ ኦሶ ላጌታራ ኢሲፌ ዋዬቲዳ ማጫሳታ ኔ ማዳና ማላ ታ ኔና ዎሳይስ።
PHI 4:4 ኣይ ዎዴካ ጎዳን ኡፋዬቲቴ፤ ቃሴካ ታ ኢንቴና ኡፋዬቲቴ ጋይስ።
PHI 4:5 ኢንቴ ኪያቴꬂ ኣስ ኡባ ኣቻን ኤሬቶ፤ ጎዳይ ያና ማቲዴስ።
PHI 4:6 ሃኒዛ ዮኦን ኡባን ጋላታን፥ ዎሳኒኔ ጋናቴꬃን ጾሳ ሲንꬅ ሺቂቴ ኣቲን ኣይ ሚሻንካ ሂርጎፍቴ።
PHI 4:7 ኣሳ ቆፋፔ ቦላራ ዲዛ ጾሳ ሳሮቴꬂ ኢንቴ ዎዚናኔ ኢንቴ ቆፋ ዉርሲ ዬሱስ ኪርስቶሳን ናጌስ።
PHI 4:8 ዉርሴꬃ ቦላ ታ ኢሻቶ! ቱሙ ጊዲዳ ዮኦ ኡባ፥ ቦንቾ ጊዲዳ ዮኦ ኡባ፥ ኣዳ ጊዲዳ ዮኦ ኡባ፥ ጌሺ ጊዲዳ ዮኦ ኡባ፥ ዶሴቲዳ ሚሽ ኡባ፥ ሎኦ ጊዲዳ ዮኦ ኡባ፥ ሎኤቴꬅ ጊዲንካ ጋላታካ ሃይታንታ ሚሳቲዛዝ ኡባ ቆፒቴ።
PHI 4:9 ኢንቴ ታፔ ታማርዳይሳ ዎይኮ ኤኪዳይሳኔ ሲዪዳይሳ ዎይኮ ቤኢዳይሳ ኣይ ጊዲኮካ ኡባ ኦꬂቴ፤ ጎዳይ ኢንቴናራ ጊዳና።
PHI 4:10 ዳሮ ዎዴፔ ጉዬ ኦራꬃ ቆፋራ ኢንቴ ታ ጊሻስ ቆፎ ኦይኪዴታ፤ ሄሲካ ጎዳ ባጋራ ታና ኬሂ ኡፋይሴስ፤ ቱሙካ ኢንቴ ታስ ቆፎ ኣጊቤኬታሺን ኢንቴ ቆፒዳ ማላ ኦꬃናስ ኢንቴስ ሃኖ ኢጺዴስ።
PHI 4:11 ታኒ ሄሳ ጊዛይ ታና ሜቲዳ ጊሻስ ጊዴና፤ ጋሶይካ ታ ኣይ ሃንኮካ፥ «ዲዛይሲ ታስ ጊዳና» ጉስ ታማራዲስ።
PHI 4:12 ፓጬካ ታ ኤራይስ፤ ዴማዳካ ኤራይስ፤ ጋፋዳካ፥ ካላዳካ ኤራይስ፤ ዲንካ ꬋዪንካ ኤራይስ፤ ኣይ ጊዲኮካ ታስ ዲዛይ ጊዳና ጉሳ ጹራ ታ ሎኤꬃ ኤራይስ።
PHI 4:13 ታስ ዎልቃ ኢሚዛ ኪርስቶሳን ታኒ ኡባ ሚሽ ኦꬃናስ ዳንዳያይስ።
PHI 4:14 ጊዲኮካ ኢንቴ ታና ታ ዋዬን ማዲዳ ጊሻስ ሎኦ ኦꬂዴታ።
PHI 4:15 ኢንቴ ፒሊጲሲዮሴ ኣሳቲ ሄሳፌ ቦላራ ኢንቴ ኤሪዛይ ኮይሮ ሚሺራቾ ቃላ ኢንቴ ኤኪዳ ዎዴ ታኒ ማቂዶኒያፔ ዴንዳሼ ኢንቴፌ ኣቲን ጌዴ ኢሚዲካ ሃ ኤኪዲካ ማዴቲዲኔ ማዲዲ ጊዛ ዎሳ ኬꬂ ታስ ዴና።
PHI 4:16 ሃራይ ኣቶሺን ታ ካሴ ታሶሎንቄን ዲዛ ዎዴካ ታኒ ሜቶቲን ኢንቴ ዛሪ ዛሪ ታስ ማዶ ዬዲዴታ።
PHI 4:17 ታ ሄሳ ጊዛይ ኢሚዳ ጊሻስ ኢንቴስ ኣንጆይ ዳራና ማላ ጋዳ ኣቲን ታ ኢንቴፌ ማዶ ኤካናስ ኣሞታዳ ጊዴና።
PHI 4:18 ታስ ኮሺዛይሳኔ ታና ኮሺዛይሳፌካ ቦላራ ኤካዲስ፤ ኢንቴ ታስ ዬዲዳ ማዶ ሚሻ ኣፍሮዲጾ ኩሼፔ ኤኪን ታ ፓጬይ ኩሚዴስ፤ ሃይሲ ዳሮፔ ጾሳ ኣቻን ኤኬቲዳ ዳሮ ሎኦ ሳዊዛ ያርሾ ማላ።
PHI 4:19 ጾሲ ባ ዱሬቴꬃ ጊና ኢንቴስ ኮሺዛይሳ ጎዳ ዬሱስ ኪርስቶሳ ባጋራ ኩንꬃና።
PHI 4:20 ኑ ኣዋሲኔ ኑ ጾሳስ ሜርናፔ ሜርናስ ቦንቾይ ጊዶ። ኣሚን።
PHI 4:21 ኣማኒዛ ኣሳ ኡባ ዬሱስ ኪርስቶሳ ሱንꬃን ሳሮ ጊቴ፤ ታናራ ዲዛ ኢሻቲ ዉሪካ ኢንቴና ሳሮ ጌቴስ።
PHI 4:22 ኣማኒዛይቲ ዉሪ ሃራፔካ ቄሳሬሶ ኣሳፔ ኣማኒዛይቲ ዉሪካ ኢንቴና ሳሮ ጌቴስ።
PHI 4:23 ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ። ኣሚን።
COL 1:1 ጾሳ ሼኔን ዬሱስ ኪርስቶሳን ኪቴቲዳ ጳዉሎሳፔኔ ኑ ኢሻ ጺምቶሳፔ፥
COL 1:2 ቆላሲያሴን ዲዛ ኪርስቶሳን ዱማቲዳይታሲኔ ኣማኔቲዳ ኢሻታስ ኑ ኣዋ ጾሳፌ ሳሮቴꬂኔ ኪያቴꬂ ኢንቴስ ጊዶ።
COL 1:3 ኑ ኢንቴ ጊሻስ ዎሲዛ ኡባ ጋላስ ኑ ጎዳ ዬሱስ ኪርስቶሳ ኣዋ ጾሳ ጋላቶስ።
COL 1:4 ጋሶይካ ኢንቴስ ዬሱስ ኪርስቶሳን ዲዛ ኣማኖኒኔ ኣማኒዛ ኣሳ ኢንቴ ኡባ ሲቂዛይሳ ኑ ሲዪዳ ጊሻሳ።
COL 1:5 ሄሲ ዉሪካ ሃኒዳይ ሳሎን ኢንቴስ ጊጌቲዳ ሂዶታፔ ዴንዲዳይሳና፤ ሄሳ ሄ ሂዶታ ጊሻስ ሚሺራቾ ቃላ ኢንቴ ካሴቲዲ ሲዪዴታ።
COL 1:6 ሄሲካ ሄ ኢንቴኮ ጋኪዴስ፤ ሄሳ ሚሺራቾ ቃላ ኢንቴ ሲዮሶፔኔ ጾሳ ኪያቴꬃ ቱማቴꬃ ኢንቴ ኤሮ ጋላሳፌ ሃ ሲሚን ኣላሜ ዩሾን ኢዚ ኦꬂሼ ዲዛይሳ ማላ ኢንቴ ኣቻን ኣይፌ ኣይፊሼኔ ዲጪሼ ዴስ።
COL 1:7 ሄሳካ ሃኢ ኑ ጊሻስ ጊዲዲ ኪርስቶሳስ ኣማኔቲዳ ኦሳንቻ ጊዲዳይሲኔ ኑናራ ኢሲፌ ኦꬂዛኔ ሲቂዛ ኤጳፊራይ ኢንቴና ታማርሲዴስ።
COL 1:8 ቃሴካ ኢዚ ኢንቴናን ዲዛ ኣያና ሲቆቴꬃ ኑስ ዮቲዴስ።
COL 1:9 ኑ ቃሴ ሄሳ ሲዮሶፔ ሃ ሲሚን ኢንቴ ጾሳ ሼኔ ኤራቴꬃኒኔ ኣኬካን ኢንቴና ኩንꬃና ማላ ኢንቴ ጊሻስ ዎሳ ቃንጺቤኮ።
COL 1:10 ሄሳꬆካ ጎዳስ ቤሲዛ ዱስ ዳና ማላ ኢንቴ ኢዛ ፖሊ ኡፋይሳና ማላ ሎኦ ኦሶ ኡባን ኣይፌ ኢማና ማላኔ ጾስ ኤሮን ዲጪ ዲጪ ባና ማላ ኑ ኢንቴስ ዎሶስ።
COL 1:11 ጎዳይ ባ ጊታ ዎልቃን ባ ሚኖቴꬅ ኡባ ኢንቴስ ኢሞ፤ ዉርሲካ ኢንቴ ዳንዳያና ማላኔ ኡፋይሳን ጊጌቲዳይታ ጊዳና ማላ ኢንቴና ኢዚ ማዶ።
COL 1:12 ኣማኒዛይቲ ላቲዛሶ ፖኦ ካዎቴꬅ ላቲዛይታ ኑ ጊዳና ማላ ኑና ጋꬂዳ ኑ ኣዋ ኢንቴ ጋላታናሳ።
COL 1:13 ኢዚ ኑና ꬉማን ሃሬቴꬃፌ ኣሺዲ ጌዴ ባ ዶሲዛ ናዛ ካዎቴꬃን ፒንꬂዴስ።
COL 1:14 ኑ ኢዛን ዎዜቲዲ ናጋራፔ ማሬቲዶስ።
COL 1:15 ኪርስቶሲ ኣይፌን ቤቶንታ ጾሳስ ቱሙ ሌሚሶ፤ ሜꬌቴꬃ ኡባፌ ጊታኔ ባይራ።
COL 1:16 ሜꬌቴꬂ ዉሪ ኢዛን ሜꬌቲዴስ። ሳሎኒኔ ሳኣን ዲዛይቲ፥ ኣይፌን ቤቲዛይቲኔ ቤቶንታይቲ ጊዲንካ፥ ዎልቃማታ ጊዲንካ፥ ሃሪዛይቲ ጊዲንካ ዎይኮ ጎዳቴꬂ ዲዛይቲ ሃኒዳይ ዉሪካ ኢዛን ኢዛስ ሜꬌቲዳ።
COL 1:17 ኢዚ ኡባፌ ካሴ ዴስ፤ ዉሪካ ኢሲ ቦላ ኦይኬቲ ሚኒዳይ ኢዛና።
COL 1:18 ኢዚ ባ ኣሳቴꬅ ጊዲዳ ዎሳ ኬꬃይስ ሁኤ፤ ኡባስ ቦላ ጊዳና ማላ ኢዚ ሃይቂዳ ኣሳ ኡባፌ ኮይሮ ዴንዲዴስ።
COL 1:19 ሄሲካ ሃኒዳይ ኩሜꬃ ጾሳቴꬃይ ኢዛ ናዛን ዴኣና ማላ ጾሳ ኣዋ ሼኔ ጊዲዳ ጊሻሳ።
COL 1:20 ማስቃሌ ቦላ ኢዛፔ ጉኪዳ ሱꬃን ሳሮቴꬅ ሜꬊዲ ሳኣ ቦላ ጊዲን ሳሎ ቦላ ዲዛይሳ ኡባ ኢዛ ባጋራ ባናራ ማቃዪንꬂዴስ።
COL 1:21 ኢንቴ ኢታ ቆፋ ጋሶን ካሴ ኢንቴ ጾሳፌ ሻኬቲዲ ኢዛስ ሞርኬታኮሺን።
COL 1:22 ሃኢ ቃሴ ኢንቴ ቦላ ባላይኔ ዎሶይ ባይንዳ ጌሻታ ኦꬂዲ ኢንቴና ባ ሲንꬅ ሺሻናስ ኪርስቶሳ ኣሾ ሃይቆ ባጋራ ጾሲ ኢንቴና ባናራ ማቃዪንꬂዴስ።
COL 1:23 ሄሲካ ሃናናይ ኢንቴ ኣማኖን ጻጵዲኔ ጊጌቲ ኢንቴ ኢንቴ ኣማኖን ኤኪዳ ሚሺራቾ ቃላፔ ቃጾንታ ሚኒ ኤቂኮና፤ ኢንቴሲኔ ሳሎ ጉፋንꬆን ዲዛ ሜꬌቴꬃስ ሳባኬቲዳ ሚሺራቾ ቃላይ ሄሳ። ታ ጳዉሎሲካ ሃይሳ ሃ ሚሺራቾ ቃላስ ኦሳንቻ ጊዳዲስ።
COL 1:24 ታ ኢንቴ ጊሻስ ዋዬ ቤኢዳይሲ ሃኢካ ታና ኡፋይሴስ፤ ኪርስቶሲ ባ ኣሳቴꬅ ሄሲካ ዎሳ ኬꬃ ጊሻስ ኢዚ ኤኪዳ ዋዬዛፔ ኤኪሺን ፓጪዳይ ዲኮ ታኒ ታ ኣሾን ኩንꬃና።
COL 1:25 ጾሳ ቃላ ታ ኢንቴስ ፓጬይ ባይንዳ ጋꬃና ማላ ታስ ጾሳፌ ኢሜቲዳ ሃዳራ ማላ ታ ዎሳ ኬꬃ ኦሳንቻ ጊዳዲስ።
COL 1:26 ሃ ቃላይ ቤኒ ዎዴፔኔ ካሴ ዬሌታፔ ጌሚዲ ጹራ ጊዲ ጋምኢዴስ፤ ሃኢ ጊዲኮ ኣማኒዛይታስ ኡባስ ቆንጪዴስ።
COL 1:27 ጾሲ ባ ኣሳስ ቆንጪሳናስ ኮዪዳ ጹራይ ኢዛ ቦንቾ ዱሬቴꬂ ኣይዛቤ ጊዲዳ ኢንቴ ጊዶን ኣይ ማላ ጊታኮ ቤሳናሳ፤ ኢዚካ ኢዛ ቦንቾ ሂዶታ ጊዲዳ ኢንቴ ጊዶን ዲዛ ኪርስቶሳ።
COL 1:28 ኑኒካ ኢሲ ኢሲ ኣስ ኪርስቶሳስ ኩሜꬃ ኣስ ሂስቲ ሺሻናስ ዳንዳያና ማላ ኣስ ኡባ ሂላራ ዞሪሼኔ ታማርሲሼ ኪርስቶሳ ጊሻስ ሳባኮስ።
COL 1:29 ጾሲ ባ ጊታ ዎልቃን ታናን ኦꬂዛ ጊሻስ ሄ ዎልቃን ባጼታሼ ሄ ቆፋ ፖላናስ ዳፌታይስ።
COL 2:1 ኢንቴ ጊሻሲኔ ሎዶቂያን ዲዛይታኔ ሄሳꬆካ ታና ባ ኣይፌራ ቤዪ ኤሮንታ ኣሳ ኡባስ ታ ኣይ ማላ ባጼቲዛኮ ኢንቴ ኤራና ማላ ታ ኮያይስ።
COL 2:2 ቃሴካ ኢስታ ዎዚናይ ሚናና ማላኔ ኢስቲ ሲቆቴꬃን ኢሶይ ኢሳራ ኦይኬታና ማላ ኩሜꬅ ጊዲዳይሳ ዩሺ ቆፒ ኤሮን ዱሬቴꬅ ዴሚዲ ጾሳ ጹራ ጊዲዳ ኪርስቶሳ ኢስቲ ኤራና ማላ ታ ዳፌታይስ።
COL 2:3 ቆታን ዲዛ ጪንጫቴꬂኔ ኤራቴꬃ ሃሮይ ዉሪካ ቤቲዛይ ኪርስቶሳ ኣቻና።
COL 2:4 ኦኒካ ኢንቴና ዶና ማልኤꬆን ባሌꬆንታ ማላ ታ ኢንቴስ ዮታይስ።
COL 2:5 ታ ኢንቴፌ ኣሾ ኣይፌን ሃካ ዲኮካ ኣያናን ኢንቴናራ ኢሲፌ ዳይስ፤ ኢንቴ ዎጋራ ዲዛይሳኔ ኢንቴ ኪርስቶሳ ሎኤꬂ ኣማኒዛይሳ ቤያዳ ታ ዳሮ ኡፋዬታይስ።
COL 2:6 ሄሳ ጊሻስ ኢንቴ ጎዳ ዬሱስ ኪርስቶሳ ኣማኒዳ ማላ ኢዛን ዴኢቴ።
COL 2:7 ኢንቴ ኢዛን ቶኬቲዲኔ ኬጼቲዲ ኢንቴ ታማርዳ ማላ ኣማኖን ሚኒዲ ዳሮ ቲርፓ ጋላታ ኢዛስ ሺሺሼ ዲቴ።
COL 2:8 ኪርስቶሳን ጻጵዳዝ ጊዶንታ ኣሳ ዎጋኒኔ ጎኣይ ባይንዳ ሃ ኣላሜዛ ላፋ ዎጋን ኤቂዳ ኣሳ ኤራቴꬃኒኔ ጮ ባሌꬆ ሃሳያን ኢንቴና ኦኒካ ዲኦንታ ማላ ናጌቲቴ።
COL 2:9 ጋሶይካ ኩሜꬃ ጾሳቴꬃይ ኢዛ ኣሳቴꬃን ዴስ።
COL 2:10 ኢንቴካ ሃሪዛይታሲኔ ጎዳታ ኡባስ ሁኤ ጊዲዳ ኪርስቶሳን ኩሜꬅ ጊዲቴ።
COL 2:11 ኢንቴ ኢዛን ቃጻሬቲዴታ፤ ሄሲ ሄ ቃጻራዚካ ናጋራ ጊዲዳ ኣሾ ቆፋ ዲጋናስ ኪርስቶሳን ሃኒዳይሳ ኣቲን ኣሳ ኩሼን ሃኒቤና።
COL 2:12 ጺንቃታን ኢዛራ ኢሲፌ ሞጌቲዴታ፤ ኢዛ ሃይቆፔ ዴንꬂዳ ጾሳ ዎልቃን ኣማኒዲ ቃሴካ ኢዛራ ኢሲፌ ዴንዲዴታ።
COL 2:13 ኢንቴ ካሴ ኢንቴ ሞሮኒኔ ኢንቴ ኣሾ ናጋራ ሃኖቴꬃ ኢንቴፌ ዲጎንታ ኣጊዳ ጊሻስ ሃይቂዳይታኮ ሺን ጾሲ ኢንቴና ኪርስቶሳ ባጋራ ፓꬂዴስ፤ ኢንቴ ናጋራካ ኡባ ኣቶ ጊዴስ።
COL 2:14 ካሴ ኑና ሞቲሼኔ ኑናራ ኤቄቲሼ ዲዛ ሙሴ ዎጋን ኣጮ ሞቶስ ጻፌቲዳይሳ ቁጪ ዲጊዴስ። ማስቃሌ ቦላ ቶርጊዲ ኑ ቦላፌ ዲጊዴስ።
COL 2:15 ሃላቃታኔ ጎዳቲዛይታ ጎዳቴꬅ ኢስታፌ ዎꬂ ኤኪዲኔ ማስቃሌ ቦላ ሃይቂዲ ጾኒ ዴንዲዲ ዲኤቲዳይታ ቆንጬን ዩሺ ቤሲዴስ።
COL 2:16 ሄሳ ጊሻስ ሙሳን ዎይኮ ኡሻን፥ ኢሲፌ ቦንቾን ዎይኮ ኣጊና ጼሮኒኔ ሳምባታ ጋላስ ቦንቾ ጊሻስ ኢንቴ ቦላ ኦኒካ ፒርዶፎ።
COL 2:17 ሄይቲ ዉሪካ ቡሮ ያና ሃኖታስ ኤሾታ ጊዲሺን ዋና ኣሳቴꬃይ ጊዲኮ ኪርስቶሳ።
COL 2:18 ቤሶንታ ኣሽኬቴꬂኔ ኪታንቻታስ ጎይኖ ዶሲዛ ኣሲ ኦኒካ ኢንቴና ꬉጲዲ ሜላ ኣሾንታ ማላ ናጌቲቴ፤ ሄሳ ማላ ኣሲ ባ ቤኢዳ ኣጉሞስ ዎጋይ ባይንዳ ባና ናሺሼ ሃዳ ኣሾ ቆፋን ኩሚዲ ኦቶሬቴስ።
COL 2:19 ሄሳ ማላ ኣሳስ ሁኤ ጊዲዳ ኪርስቶሳራ ኣይኮ ጋይቶቴꬂካ ዴና፤ ኩሜꬃ ኣሳቴꬅ ሻያኒኔ ኮልꬔን ኦይሴꬂ ዲቺዛ ሁኤይ ኪርስቶሳ፤ ጾሲ ኪርስቶሳ ኣሳቴꬅ ኩሜꬅ ዲቺዛይ ሄሳ ማላና።
COL 2:20 ሃይሳ ሃ ኣላሜዛ ዎጋስ ኢንቴ ኪርስቶሳራ ሃይቂዳይታ ጊዲኮ ሂስቲን ሃኢ ኣዛስ ሄ ዎጋስ ሃሬቴቲ?
COL 2:21 ሄ ዎጋቲ ኦይኮፋ፥ ላጫ ቤዮፓ፤ ቦቾፋ ጊዛይታ።
COL 2:22 ሃይቲ ዉሪ ኣሳ ኣዛዞኒኔ ኣሳ ቲሚርቴን ዎꬊዳ ዎጋታ ጊዲዳ ጊሻስ ኦሴቲዳፔ ጉዬ ጮ ꬋያናስ ዴቴስ።
COL 2:23 ሃ ኣዛዞቲ ባርካ ባፔ ሜꬊ ኤኪዳ ጎይኖ ቆፋይ ጮ ቤሶንታ ኣሽኬቴꬂኔ ባ ኣሳቴꬅ ናቂ ኦይꬃን ኢስታስ ቱሙ ኣꬎ ኤራቴꬂ ዲዛይታ ሚሳቴቴስ፤ ጊዶ ኣቲን ኣሾ ኣሞቴꬅ ሺሺ ኦይኪዛ ዎልቃይ ኢስታስ ባ።
COL 3:1 ሂስቲኮ ኢንቴ ኪርስቶሳራ ኢሲፌ ዴንዲዳይታ ጊዲኮ ኪርስቶሲ ጾሳ ኣቻን ኡቲዳሶሆን ፑዴን ዲዛ ሃኖቴꬃ ኮዪቴ።
COL 3:2 ኢንቴ ቆፋይ ፑዴ ቦላን ዲዛ ሚሻ ቦላ ጊዶ ኣቲን ሃ ቢታ ዮኦ ቦላ ጊዶፖ።
COL 3:3 ጋሶይካ ኢንቴ ሃይቂዴታኔ ኢንቴ ዴኦይካ ኪርስቶሳራ ጾሳ ኣቻን ቆቴቲዴስ።
COL 3:4 ኢንቴስ ዴኦ ጊዲዳ ኪርስቶሲ ቆንጪዛ ጋላስ ኢንቴካ ሄ ዎዴ ኢዛራ ኢሲፌ ቦንቾራ ቆንጫና።
COL 3:5 ሄሳ ጊሻስ ኢንቴስ ቢታ ቦላ ዲዛ ኣሞቴꬅ ዲጊቴ፤ ሄይቲካ ላይማ፥ ቱናቴꬅ፥ ኣሾ ኣሞ፥ ኢታ ኣሞቴꬂኔ ኤቃስ ጎይኖ ማላ ጊዲዳ ጋጲጋጶ።
COL 3:6 ሄይታንታ ጋሶን ጾሳ ሃንቆይ ጾሳስ ኣዛዜቶንታይታ ቦላ ያና።
COL 3:7 ኢንቴካ ካሴ ዲዛ ዱሳን ሄ ሚሻታ ኦꬂዴታ።
COL 3:8 ሃኢ ጊዲኮ ሃንቆ፥ ዪሎ፥ ጫሼ፥ ዚጊርሲኔ ዬላሲዛ ሃሳያ ሄይታንታ ሚሳቲዛይታ ኡባ ዲጊቴ።
COL 3:9 ካሴ ጬጋ ኣሳቴꬅ ኢዛ ኦሶራ ጋꬂ ኢንቴፌ ቃሪ ዬጊዳ ጊሻስ ኢንቴ ኢንቴ ጋርሳን ኢሶይ ኢሳራ ዎርዶ ሃሳዮፒቴ።
COL 3:10 ባና ሜꬊዳይሳ ሚሳታና ማላ ኤራን ኦራጺዳ ኦራꬃ ኣሳቴꬅ ማይኢዴታ።
COL 3:11 ሄን ጊሪኬ ኣስ ጊዲን ዎይኮ ኣይሁዳ ኣስ ዎይኮ ቃጻሬቲዳይታ ዎይኮ ቃጻሬቶንታይታ ዎይኮ ታማርዳይታኔ ታማሮንታይታ ዎይኮ ማሬቶንታይታ ዎይኮ ኣይሌ ዎይኮ ጎቃ ጌቴቲዛ ዱማቴꬂ ዴና፤ ኪርስቶሲ ሄይታንታ ኡባሳ፤ ቃሴ ኡባንካ ዴስ።
COL 3:12 ሄሳ ጊሻስ ዱማ ጊዲዲ ዶሴቲዳይቶ! ኢንቴ ጾሳስ ዶሬቲዳይታ ጊዲዳ ማላ ሚሼቴꬂኔ ኪያቴꬅ፥ ኣሽኬቴꬅ፥ ቦንቾኔ ዳንዳያ ማይኢቴ።
COL 3:13 ኢንቴ ኢሶይ ኢሳ ዳንዳይቴ፤ ኢንቴፌ ኢሳዴይ ኢሳዴ ቦላ ሚሼቲኮ ዮኦይካ ኢዛ ቦላ ዲኮ ኢሶይ ኢሳስ ኣቶ ኣቶ ጌቴቲቴ፤ ጎዳይካ ኢንቴስ ኣቶ ጊዳ ማላ ኢንቴካ ሃራ ኣሳስ ኣቶ ጊቴ።
COL 3:14 ሄሳ ኡባ ቦላ ኩሜꬃ ኢሲፌቴꬃን ሺሺ ቃቺዛ ሲቆ ማይኢቴ።
COL 3:15 ኢንቴ ዉሪካ ኢሲ ኣሾ ጊዲዲ ሳሮቴꬃስ ጼይጌቲዳ ኪርስቶሳ ሳሮቴꬂ ኢንቴ ዎዚናን ካዎቶ፤ ኢንቴ ጋላቲዛይታ ጊዲቴ።
COL 3:16 ኪርስቶሳ ቃላይ ኢንቴናን ኩሜꬅ ጊዶ፤ ኢንቴ ኢንቴ ጋርሳን ኣꬎ ኤራቴꬃን ታማርቴኔ ዞሬቲቴ፤ ዬꬃኒኔ ሳባን ኣያና ዬꬃን ጋላታራ ጋꬂ ኢንቴ ዎዚናራ ጾሳስ ዬጺቴ።
COL 3:17 ኢዛ ባጋራ ጾሳ ኣዋስ ጋላታ ሺሺሼ ቃላን ጊዲን ዎይኮ ኦሶን ኢንቴ ኦꬂዛይሳ ኡባ ጎዳ ዬሱሳ ሱንꬃን ኦꬂቴ።
COL 3:18 ማቼቶ! ጎዳ ኣቻን ኢንቴስ ቤሲዛ ሚሽ ጊዲዳ ጊሻስ ኢንቴ ኣዚናታስ ኣዛዜቲቴ።
COL 3:19 ኣዚናቶ! ኢንቴ ኢንቴ ማቼታ ሲቂቴኔ ኢስታስ ሜንጼ ኢቶፒቴ።
COL 3:20 ናይቶ! ኢንቴ ጎዳ ኡፋይሳና ማላ ኢንቴ ኢንቴና ዬሊዳይታስ ኡባ ሚሻን ኣዛዜቲቴ።
COL 3:21 ኣዋቶ! ናይቲ ሂዶታ ቃንጾንታ ማላ ኢንቴ ናይታ ሃንቄꬆፍቴ።
COL 3:22 ኣይሌቶ! ኣስ ኡፋይሳናሲኔ ጮ ኣይፌሶን ቤታናስ ጊዶንታ ሱሬ ዎዚናፔ ኢንቴ ጎዳስ ባቢቴ፤ ሃይሳ ሃ ቢታን ሃሪዛ ጎዳታስካ ሃኖ ኡባን ኣዛዜቲቴ።
COL 3:23 ኢንቴ ኦꬂዛ ሚሽ ኡባ ኣሳስ ጊዶንታ ጎዳስ ኦꬂዛ ማላ ታይቢዲ ኩሜꬃ ዎዚናፔ ኦꬂቴ።
COL 3:24 ኢንቴ ጎዳ ኣቻፌ ኢንቴ ኦሶ ማላ ኤካናስ ላታይ ዲዛይሳ ኢንቴ ኤሬታ፤ ኢንቴ ኦꬂዛይ ጎዳ ዬሱስ ኪርስቶሳሳ።
COL 3:25 ቆሆ ኦꬂዳዴይ ባ ኦꬂዳሪ ኩሼ ኤካና፤ ኢዛ ኣቻን ዱማ ማዶይ ዴና።
COL 4:1 ጎዳቶ! ኢንቴስ ሳሎን ጎዳይ ዲዛይሳ ኢንቴ ኤሪዛ ጊሻስ ኢንቴስ ኦꬂዛይታስ ቱማኒኔ ሱሬቴꬃን ኦꬂቴ።
COL 4:2 ቤጊዲ ጋላታራ ጋꬂ ፓጬይ ባይንዳ ጾሳ ዎሲቴ።
COL 4:3 ታ ኢዛ ጊሻስ ቃሼቲዳ ኪርስቶሳ ጹራ ኣዋጃናስ ዳንዳያና ማላ ጾሲ ኑስ ቃላ ዮታናስ ኦጌ ዶያና ማላ ኑ ጊሻሲካ ዎሲቴ።
COL 4:4 ቃሴካ ሃሳያናስ ቤሲዛ ቃላ ቆንጬን ታ ሃሳያና ማላ ታስ ዎሲቴ።
COL 4:5 ኣማኖንታ ኣሳታራ ኢንቴስ ዲዛ ሃኖቴꬃን ኣꬎ ኤራቴꬃን ሲሜሬቲቴ፤ ኢንቴስ ቤቲዳ ሎኦ ቃዳን ጎኤቲቴ።
COL 4:6 ኢሶይ ኢሳስ ኢንቴ ዛሮ ዎስቲ ኢማናኮ ኢንቴ ኤራና ማላ ኢንቴ ሃሳያይ ማጺኔራ ካጺዳ ካꬃ ማላ ማልኦ ጊዶ።
COL 4:7 ቲቂቆሲ ታ ዱሳ ጊሻስ ዉርሲ ኢንቴስ ዮታና፤ ኢዚ ዳሮ ዶሴቲዳ ኢሻኔ ጎዳስ ታናራ ኢሲፌ ኦꬂዛ ኣማኔቲዳ ኦሳንቻ።
COL 4:8 ኑ ዱሳ ጊሻስ ኢንቴ ኤራና ማላኔ ኢንቴ ዎዚና ሚንꬃና ማላ ታኒ ኢዛ ኢንቴኮ ኪታዲስ።
COL 4:9 ኢዚ ኢንቴ ባጋ ጊዲዲ ኣማኔቲዳዴኔ ዶሴቲዳዴ ጊዲዳ ኑ ኢሻ ኣናስሞሳራ ኢንቴኮ ያና፤ ኢስቲካ ሃን ዲዛ ሃኖዛ ኡባ ኢንቴስ ዮታና።
COL 4:10 ባርናባሳ ኣዋ ሚቼይ ና ማርቆሲኔ ታናራ ኢሲፌ ቃሼቲዳ ኣርጺሮኮሲ ኢንቴና ሳሮ ጌቴስ። ማርቆሳ ጊሻስ ኢንቴ ኣይ ኦꬃናኮ ካሴ ኢንቴና ታ ቆፍሳ ዎꬂዳ ማላ ኢዚ ኢንቴኮ ጋኪሺን ኢዛ ሞኪ ኤኪቴ።
COL 4:11 ኢዮስጾሳ ጌቴቲዛ ኢያሶይካ ኢንቴና ሳሮ ጌስ፤ ኣይሁዳ ኣሳ ጊዶፌ ጾሳ ካዎቴꬃስ ታናራ ኦꬂዛይቲ ሃይታንታ ጻላ፤ ኢስቲ ታና ሚንꬄꬂዳ።
COL 4:12 ኢንቴ ባጋፌ ጊዲዳ ዬሱስ ኪርስቶሳ ኦሳንቻ ኤጳፊራይ ኢንቴና ሳሮ ጌስ፤ ኢዚካ ኢንቴና ኣያና ዱሳን ሎኤꬂ ሚኒዲ ሙሌራ ዎፑ ጊዲ ጾሳ ሼኔን ሚኒ ኤቃና ማላ ኡባ ዎዴ ኢንቴ ጊሻስ ዎሳን ባጼቴስ።
COL 4:13 ቃሴካ ኢንቴ ጊሻስ ሄሳꬆካ ሎዶቂያኒኔ ኢያርፖሊሴ ካታማን ዲዛይታስ ኢዚ ፓጬይ ባይንዳ ኦꬂዛይሳ ታ ኢዛ ጊሻስ ማርካታይስ።
COL 4:14 ዳሮ ዶሴቲዳ ኣኪሜ ሉቃሲኔ ዴማሲ ኢንቴና ሳሮ ጌቴስ።
COL 4:15 ሎዶቂያን ዲዛ ኑ ኢሻታስ፥ ኒምፑሲኔ ኢዚ ኬꬃን ሺቂዛ ኣማኒዛ ኣሳታስ ታ ሳሮካ ዮቲቴ።
COL 4:16 ሃና ታ ኪታያ ኢንቴስ ናባቤቲዳ ማላ ቃሴካ ሎዶቂያን ዲዛ ዎሳ ኬꬃይን ናባቤታና ማላ ኦꬂቴ፤ ኢንቴካ ቃሴ ሎዶቂያፔ ኢንቴስ ኪቴቲዳ ኪታ ናባቢቴ።
COL 4:17 ኣሪኪጳሴስ፥ «ኔኒ ጎዳፔ ኤኪዳ ኦሶዛ ዉርሴꬅ ጋꬃናስ ሚና» ጊቴ።
COL 4:18 ሃይሳ ሳሮካ ታኒ ጳዉሎሲ ታ ኩሼራ ጻፋዲስ፤ ታ ቃሼታ ዲዛይሳ ዶጎፒቴ፤ ጾሳ ኪያቴꬂ ኢንቴናራ ጊዶ።
1TH 1:1 ጳዉሎሳፔ፥ ሲልዋኖሳፔኔ ጺምቶሳፔ፤ ጾሳ ኣዋሲኔ ጎዳ ዬሱስ ኪርስቶሳይታ ጊዲዳ ታሶሎንቄን ዲዛ ኣማኒዛ ኣሳስ ኑ ኣዋ ጾሳፌኔ ጎዳ ዬሱስ ኪርስቶሳ ኪያቴꬂኔ ሳሮቴꬂ ኢንቴስ ጊዶ።
1TH 1:2 ኑ ኢንቴና ኑ ዎሳን ቆፒሼ ኡባ ዎዴ ጾሳ ኢንቴ ጊሻስ ጋላቶስ።
1TH 1:3 ኣማኖኒኔ ሚኖ ሲቆቴꬃን ኢንቴ ኦꬂዳ ኦሶ ጊሻስ ጎዳ ዬሱስ ኪርስቶሳ ቦላ ዲዛ ኢንቴ ሚኖ ሂዶታን ቤቲዳ ኢንቴ ሚኖቴꬃ ጊሻስ ኑ ጎዳ ጾሳ፥ ኑ ኣዋ ሲንꬃን ኡባ ጋላስ ኢንቴ ጊሻስ ቆፖስ።
1TH 1:4 ጾሳን ዶሴቲዳ ኑ ኢሻቶ! ኢዚ ኢንቴና ዶሪዳይሳ ኑ ኤሮስ።
1TH 1:5 ጋሶይካ ሚሺራቾ ቃላይ ኢንቴኮ ዪዳይ ዎልቃራ ጺሎ ኣያናኒኔ ሎኤꬂ ሻኪ ኤሪን ኣቲን ጮ ቃላ ጻላን ጊዴና፤ ቃሴካ ኑ ኢንቴ ጊሻስ ጊዲ ዋኒ ዴኢዳኮ ኢንቴ ኤሬታ።
1TH 1:6 ሃኢ ኢንቴ ኑናኔ ጎዳ ሚሳቲዴታ፤ ኢንቴ ቦላ ኣይ ሜቶይ ጋኪዳ ጊዲኮካ ጺሎ ኣያና ኡፋይሳን ቃላ ኢንቴ ኤኪዴታ።
1TH 1:7 ሄሳፌ ዴንዲዳይሳን ኢንቴ ማቂዶኒያኒኔ ኣካያን ኣማኒዛ ኣሳ ኡባስ ሎኦ ሌሚሶታ ጊዲዴታ።
1TH 1:8 ጎዳ ቃላይ ኢንቴፌ ኬዚዲ ማቂዶኒያኒኔ ኣካያን ሲዬቴꬅ ጻላ ጊዶንታ ኢንቴስ ጾሳ ቦላ ዲዛ ኣማኖይ ኡባሶን ኤሬቲዴስ፤ ሄሳ ጊሻስ ኑ ኢንቴስ ዮታናስ ኣይኮካ ኮሼና።
1TH 1:9 ኢንቴ ኑና ዎስቲ ሞኪ ኤኪዳኮኔ ዴኦን ዲዛ ቱሙ ጾሳስ ኦꬃናስ ኢንቴ ኤቃታፔ ጾሳኮ ዋኒ ሲሚዳኮ ኣሳይ ኢንቴ ጊሻስ ሃሳዬስ።
1TH 1:10 ቃሴካ ጾሲ ሃይቆፔ ዴንꬂዳይሳ ቡሮ ያና ሃንቆፌ ኑና ኣሻና ሳሎፔ ያና ጾሳ ና ዬሱሳ ዩሳ ኢንቴ ዎስቲ ናጊዛኮ ኣሳይ ሃሳዬስ።
1TH 2:1 ኑ ኢሻቶ! ኑ ኢንቴኮን ጋምኢዳ ጋምኦይ ሃዳ ጊዶንታይሳ ኢንቴካ ኤሬታ።
1TH 2:2 ኢንቴካ ኤሪዛይሳ ማላ ሃይሳፌ ካሴ ፒሊጲሲዮሴን ኑ ዋዬኔ ሜቶ ቤኢዶሲኔ ጫዬቲዶስ፤ ጊዶ ኣቲን ኣይኔ ሚኖ ዋዬይ ኑና ጋኪኮካ ጾሳ ሚሺራቾ ቃላ ኢንቴስ ዮታናስ ኑ ጎዳፔ ጻላቴꬅ ዴሚዶስ።
1TH 2:3 ኑ ኢንቴና ዞሪዳ ዞሬይ ኢታ ቆፋራ ዎይኮ ኢንቴና ባሌꬃናስ ኮዪዲ ጊዴና።
1TH 2:4 ጊዶ ኣቲን ኑ ሚሺራቾ ቃላ ሃዳራ ኤካናስ ዳንዳይዛ ኣሳታ ማላ ጾሲ ኑና ቆዲዳ ጊሻስ ኑ ሃሳዮስ፤ ሄሳካ ኑ ኦꬂዛይ ኑ ዎዚና ፓጪ ኤሪዛ ጾሳ ኡፋይሳናስ ኣቲን ኣስ ኡፋይሳናስ ጊዲ ጊዴና።
1TH 2:5 ኑ ሙሌካ ባሌꬆ ቃላ ዮቲቤኮ ዎይኮ ኑ ኡዜቴꬅ ካማናስ ጊዲ ባሌꬆ ሃኖ ኑ ሃኖንታይሳ ኢንቴ ኤሬታ፤ ሃይሳስካ ኑ ማርካይ ጾሳ።
1TH 2:6 ኢንቴፌ ጊዲን ዎይኮ ሃራታፔ ኦናፔካ ኣሳፔ ኢሜቲዛ ቦንቾ ኑ ኮዪቤኮ።
1TH 2:7 ኑ ኪርስቶሲ ኪቲዳይታ ጊዲዳ ጊሻስ ኢንቴስ ቶሆ ጊዳናስ ዳንዳዮስ፤ ጊዶ ኣቲን ኣያ ባ ናይታ ዲቺዛ ማላ ኑኒካ ኢንቴ ጊዶን ኣሽኬቴꬃን ሲሜሬቲዶስ።
1TH 2:8 ጾሳ ቃላ ጻላ ጊዶንታ ዲሺን ኑ ሼምፖካ ኢንቴ ጊሻስ ኡፋይሳን ኢማና ጋካናስ ኢንቴና ሲቂዶስ፤ ጋሶይካ ኑ ኢንቴና ዳሮ ሲቂዳ ጊሻሳ።
1TH 2:9 ኑ ኢሻቶ! ኑ ዳፌቴꬃኔ ኑ ዳቡራ ኢንቴ ኤሬታ፤ ኦናስካ ቶሆ ጊዶንታ ማላ ቃማኔ ጋላስ ኑስ ኦꬂሼ ሚሺራቾ ቃላ ኢንቴስ ዮቲዶስ።
1TH 2:10 ኑ ኢንቴናራ ኣማኒዛይታራ ዲዛ ዎዴ ጺሎቴꬃኒኔ ጌሻቴꬃን ቃሴካ ዎሶይ ባይንዳ ኑ ዋኒ ዴኢዳኮ ኢንቴካ ጾሲካ ኑስ ማርካ።
1TH 2:11 ኣዋይ ባ ናይታስ ሃኒዛ ማላ ኑኒካ ኢንቴስ ኢሳስ ኢሳስ ኣይ ሃኒዳኮ ኢንቴ ኤሬታ።
1TH 2:12 ኢንቴ ኢንቴና ባ ካዎቴꬃሲኔ ባ ቦንቾስ ጼይጊዳ ጾሳስ ቤሲዛ ማላ ኢንቴ ዳና ማላ ኑ ኢንቴና ሚንꬂዶስ፤ ሎኤꬂ ዞሪዶሲኔ ሃዳራ ጊዶስ።
1TH 2:13 ኢንቴ ኑፔ ሲዪዳ ጾሳ ቃላ ኤኪዳ ዎዴ ኣማኒዛ ኢንቴ ኣቻን ቱሙ ኦꬂዛ ጾሳ ቃላ ማላ ኤኪዴታ ኣቲን ጮ ኣሳ ቃላ ማላ ኢንቴ ኤኮንታ ኣጊዳ ጊሻስ ኑኒ ጾሳ ቃንጾይ ባይንዳ ጋላቶስ።
1TH 2:14 ኑ ኢሻቶ! ዩሁዳ ቢታን ዬሱስ ኪርስቶሳ ኣማኒዛ ጾሳ ዎሳ ኬꬃታ ሚሳቲዴታ፤ ኢስቲ ኣይሁዳታፔ ሜቶኔ ዋዬ ኤኪዳ ማላ ኢንቴካ ኢንቴ ኣሳፔ ዋዬ ኤኪዴታ።
1TH 2:15 ኢስቲ ጎዳ ዬሱሳኔ ካሴ ናቤታካ ዎꬊዳ፤ ኑናካ ጎዲዳ፤ ጾሳካ ኡፋይሲቤቴና፤ ኣስ ኡባራ ኤቄቲዛይታ ጊዲዳ።
1TH 2:16 ሄሲካ ኣይዛቤቲ ሲዪዲ ኣታና ቃላ ኑ ኢስታስ ዮቶንታ ማላ ዲጋናሳ፤ ሄሳ ማላ ኦሶን ባ ናጋራ ኡባ ዎዴ ባ ቦላ ዉርሴꬅ ጋካናስ ጉጂ ጉጂ ቤቴስ፤ ጾሳ ሃንቆይካ ኢስታ ቦላ ዎꬊዴስ።
1TH 2:17 ጊዲኮካ ኑ ኢሻቶ! ኑ ጉꬃ ዎዴስ ኢንቴፌ ኣያናን ጊዶንታ ኣሾን ሻኬቲኮካ ኢንቴ ላሞታይ ኑና ዎꬊዛ ጊሻስ ኢንቴ ኣይፌሶ ቤያናስ ዳሮ ዳፌቴꬃን ዶስ።
1TH 2:18 ኑ ኢንቴኮ ባናስ ዳሮ ላሞቲዶስ ሺን ሃራፔካ ታ ጳዉሎሲ ዳሮ ዎዴ ዳፌታዲስ ሺን ጻላኤይ ኑና ዲጊዴስ።
1TH 2:19 ጎዳ ዬሱሲ ሃ ዪዛ ዎዴ ኢዛ ሲንꬃን ኑ ሂዶታይ ዎይኮ ኑ ኡፋይሲ ዎይኮ ኑ ዛዉዴይ ኑስ ኢንቴፌ ሃራይ ኦኔ?
1TH 2:20 ቱማፔካ ኑ ኡፋይሲኔ ኑ ቦንቾይ ኢንቴና።
1TH 3:1 ሄሳ ጊሻስ ኑስ ዳንዳዬቶንታ ኢጺን ሄ ዎዴ ኣቴናን ኑርካ ኑ ኣታናይሲ ኑስ ሎኦ ጊዲ ቤቲዴስ።
1TH 3:2 ኢንቴና ኣማኖን ሚንꬃና ማላ ኑናራ ኣሳስ ኪርስቶሳ ሚሺራቾ ቃላ ዮቲዛ ጾሳ ኣሽካራ ጊዲዳ ጺምቶሳ ኢንቴኮ ዬዲዶስ።
1TH 3:3 ሄሲካ ሃይሳ ፓጬዛን ኦኒካ ኣማኖፔ ቃንጾንታ ማላሳ፤ ኑኒካ ሃይሳስ ዶሬቲዳይሳ ኢንቴካ ኤሬታ።
1TH 3:4 ኑ ቃሴ ኢንቴናራ ዲዛ ዎዴ ዋዬይ ኑ ቦላ ጋካናይሳ ካሴቲዲ ኢንቴስ ዮቲዶስ፤ ኢንቴ ኤሪዛ ማላካ ሃኒዴስ።
1TH 3:5 ሄሳ ጊሻስ ታ ኣይኮካ ጌንጬጪን ታስ ዳንዳዬቶንታ ኢጺዳ ጊሻስ ኢንቴ ኣማኖ ጊሻስ ኤራናስ ጋዳ ጺምቶሳ ኪታዲስ፤ ታ ሄሳ ኦꬂዳይ ኦኔ ኤሪዛይ ፓጪዛዴይ ኢስታ ፓጪን ሃኒ ዎዴ ኑ ዳቡራይ ዉሪካ ሃዳ ጊዶንታ ኣጌና ጋዳ ባቢዳ ጊሻሳ።
1TH 3:6 ሃኢ ቃሴ ጺምቶሲ ኢንቴ ኣቻፌ ኑኮ ዪዲ ኢንቴ ኣማኖ ጊሻሲኔ ኢንቴ ሲቆቴꬃ ጊሻስ ሎኦ ዎሬ ኑና ሲሲዴስ። ቃሴካ ኢንቴ ኡባ ዎዴ ኑና ሎኤꬂ ቆፒዛይሳኔ ኑኒካ ኢንቴና ቤያናስ ላሞቲዛ ማላ ኢንቴካ ኑና ቤያናስ ላሞቲዛይሳ ኑስ ዮቲዴስ።
1TH 3:7 ሄሳ ጊሻስ ኑ ኢሻቶ! ኑ ዲዛይ ዋዬኒኔ ሜቶ ጋርሳን ጊዲኮካ ኢንቴ ኣማኖ ጋሶን ኢንቴናን ሃኢ ኑ ሚኔቶስ።
1TH 3:8 ኢንቴ ጎዳን ሚኒ ኤቂዳ ጊሻስ ቱማፔ ሃኢ ኑ ፓጻ ዳና።
1TH 3:9 ኢንቴ ጋሶን ኑ ጾሳ ሲንꬃን ኑ ዴሚዳ ኡባ ኡፋይሳ ጊሻስ ጾሳ ኣይ ማላ ጋላታናስ ዳንዳይዞኒ?
1TH 3:10 ቃሴካ ኑ ኢንቴና ቤያናሲኔ ኢንቴ ኣማኖፔ ፓጪዳይሳ ኩንꬃናስ ኦማርሲኔ ጋላስ ኬሂ ዎሶስ።
1TH 3:11 ሃኢካ ኑ ኢንቴኮ ባና ማላ ኑ ኣዋይ ጾሲ ጎዳ ዬሱስ ኪርስቶሲ ኦጌዛ ኢዚ ኑስ ሱሪሶ።
1TH 3:12 ኑ ኢንቴና ሲቂዛ ማላ ኢንቴስ ኢንቴ ጋርሳን ዲዛ ሲቆኔ ኢንቴ ሃራታ ሲቂዛ ሲቆዛ ጎዳይ ዳሪሶኔ ኬሂ ጉጆ።
1TH 3:13 ኑ ጎዳ ዬሱስ ኪርስቶሲ ጌሻታ ኡባታራ ዪዛ ዎዴ ኑ ኣዋ ጎዳ ጾሳ ሲንꬃን ኢንቴ ዎሶይ ባይንዳይታኔ ጌሻታ ጊዲዲ ቤታና ማላ ኢንቴ ዎዚና ኢዚ ሚንꬆ።
1TH 4:1 ሃኢ ዉርሴꬃን ታ ኢሻቶ! ኢንቴ ጾሳ ኡፋይሳናስ ኢንቴ ዋኒ ዋኒ ዳና ቤሲዛኮ ኑ ኢንቴና ታማርሲዶስ፤ ቱማፔካ ኑ ታማርሲዳ ማላ ዴታ፤ ሄሳ ጊሻስ ጎዳ ዬሱስ ኪርስቶሳን ኑ ኢንቴና ዎሲዛይኔ ዞሪዛይ ሃይሳፌካ ኣꬊዛ ሃኖራ ኢንቴ ሲንꬄ ጉጃና ማላሳ።
1TH 4:2 ጎዳ ዬሱስ ኪርስቶሳ ዎልቃን ኑ ኢንቴስ ኣይ ኣዛዞ ኢሚዳኮ ኢንቴ ኤሬታ።
1TH 4:3 ጾሳ ሼኔይ ኢንቴ ላይማፔ ሃኪዲ ዱማታናሳ።
1TH 4:4 ቃሴ ኢሲ ኢሲ ኣሳይ ባ ማቾ ጌሻቴꬃኒኔ ቦንቾን ኣይሶ ቤሲዛይሳ ሻኪ ኤሮ።
1TH 4:5 ሄሲካ ጾስ ኣማኖንታ ኣይዛቤታ ማላ ላይማ ቃቃቴꬃን ጊዶፖ።
1TH 4:6 ሄሳ ማላን ኦኒካ ባሌቲዲ ባ ኢሻ ባሌꬆፎ፤ ጋሶይካ ሃይሳፌ ካሴ ኑ ኢንቴስ ዮቲዳ ማላኔ ናጌታናስ ኣኬኪሲዳ ማላ ጎዳይ ሄይታንታ ማላ ናጋራ ኦꬂዛ ኡባታ ቦላ ባ ሃንቆ ኤሃና።
1TH 4:7 ጾሲ ኑና ጌሻቴꬃስ ጼይጊዴስ ኣቲን ቱናቴꬃስ ጼይጊቤና።
1TH 4:8 ሄሳ ጊሻስ ሃይሳ ሃ ዞሬዛ ካꬊዲ ኤኮንታዴይ ጺሎ ኣያና ኢዛስ ኢሚዳ ጾሳ ካꬌስ ኣቲን ኣስ ካꬊዛዴ ጊዴና።
1TH 4:9 ኢሻታ ሲቆቴꬃ ጊሻስ ኢንቴስ ኦኒካ ጻፋናስ ኮሼና፤ ጋሶይካ ኢንቴ ኢንቴ ጊዶን ሲቄታና ማላ ኢንቴ ኢንቴ ባጋራ ጾሳፌ ታማርዴታ።
1TH 4:10 ኩሜꬃ ማቂዶኒያን ዲዛ ኣማኒዛ ኣሳ ኢንቴ ኡባ ሲቂዛይሲ ኤሬቲዳይሳ፤ ጊዶ ኣቲን ኑ ኢሻቶ! ሲንꬃ ባጋን ኢንቴ ሃይሳፌ ኣꬂ ሲቄታና ማላ ኑ ኢንቴና ዞሮስ።
1TH 4:11 ኑ ሃይሳፌ ካሴ ኢንቴና ኣዛዚዳ ማላ ኢንቴ ኢንቴ ኩሼራ ኦꬂቴ፤ ዎፑ ጊ ዲቴ፤ ኢንቴስ ጊዲዛይሳ ሎኤꬂ ጼሊቴ።
1TH 4:12 ሄሲካ ጋላስ ጋላስ ኢንቴ ዱሳይ ሃንኮ ኣማኖንታ ኣሳ ኣቻን ኢንቴና ቦንቺሳና ማላኔ ኢንቴ ኣይ ኣሳስካ ቶሆ ጊዶንታ ማላሳ።
1TH 4:13 ታ ኢሻቶ! ኢንቴ ኣሾን ሃይቂዳይታ ጊሻስ ቱማ ኤራና ማላ ኑ ኮዮኮ፤ ቃሴካ ሂዶታይ ባይንዳ ሃራ ኣሳታ ማላ ኢንቴ ካዮታና ማላ ኑ ኮዮኮ።
1TH 4:14 ዬሱሲ ሃይቂዲ ዴንዲዳይሳ ኑ ኣማኒዛ ጊዲኮ ዬሱሳ ኣማኒዳይታ ጾሲ ዬሱሳራ ሄሳꬆካ ዛሪ ሃ ዬዳና።
1TH 4:15 ኑ ጎዳ ቃላን ኢንቴስ ጊዛይ ሃይሳ፤ ኑኒ ሃይቆንታ ፓጻ ዲዛይቲኔ ጎዳይ ያና ጋካናስ ጋምኣናይቲ ካሴ ሃይቂዳይታፔ ሲንꬃቶኮ።
1TH 4:16 ጎዳይ ባ ሁኤራ ጊታ ኣዛዞን ኪታንቻታ ሃላቃ ጊሪሳራ ጾሳ ጹሩምባ ጊሪሳን ሳሎፔ ዎꬋና፤ ካሴ ኪርስቶሳ ኣማኒዲ ሃይቂዳይቲ ኢስቲ ካሴቲ ዴንዳና።
1TH 4:17 ሄሳፌ ጉዬ ኑኒ ቃሴ ፓጻ ዲዛይቲ ጎዳ ጫርኮ ቦላ ጋጋናስ ኢስታራ ኢሲፌ ሻራራ ዴንዳና፤ ሄሳꬆካ ኑ ሜርናስ ጎዳራ ዳና።
1TH 4:18 ሄሳ ጊሻስ ሃ ቃላን ኢሶይ ኢሳራ ሚኔቲቴ።
1TH 5:1 ታ ኢሻቶ! ሄሲ ሃናና ዎዴዛ ጊሻስ ኑ ኢንቴስ ጻፋናስ ኮሼና።
1TH 5:2 ካይሶይ ቃማን ዪዛ ማላ ጎዳ ጋላሲካ ሄሳ ማላ ያናይሳ ኢንቴ ኢንቴ ባጋራ ሎኤꬂ ኤሬታ።
1TH 5:3 ኣሳይ፥ «ጋዴይ ሳሮኔ ሎኦኮ» ጊሺን ሚጻይ ቃንꬃራ ዲዛ ማጫስ ኦይኪዛ ማላ ሄሳꬆካ ኣስ ꬋይሲዛይ ቆፖንታ ዲሺን ኣሳ ቦላ ጋካና፤ ኦኒካ ኬሲ ኤኬና።
1TH 5:4 ኢንቴኖ ኢሻቶ! ሄ ጋላሳይ ካይሶ ማላ ኢንቴና ዳጋንꬃናስ ኢንቴ ꬉማን ዴኬታ።
1TH 5:5 ኢንቴ ዉሪካ ፖኦ ናይታ፤ ኑኒ ꬉማ ዎይኮ ቃማ ባጋታ ጊዶኮ።
1TH 5:6 ሂስቲኮ ኣኔ ቤጎስ፤ ኣኔ ኑርካ ኑና ሃሮስ ኣቲን ሃንኮ ꬊስኪዛ ኣሳ ማላ ኑኒካ ኣኔ ꬊስኮኮ።
1TH 5:7 ꬊስኪዛይቲ ቃማራ ꬊስኬቴስ፤ ማꬆቲዛይቲካ ቃማራ ማꬆቴቴስ።
1TH 5:8 ኑኒ ጊዲኮ ጋላሳ ኣሳታ ጊዲዳ ጊሻስ ኣማኖኔ ሲቆ፥ ቲራን ማይኢዛ ጹሩሬ ማይኦ ማላ ማይኢዲ ኣቶቴꬃ ሂዶታ ሁኤን ዎꬂዛ ቢራታ ቆቤ ማላ ሁኤን ዎꬂዲ ኣኔ ኑናቴꬃ ሃሪዲ ዴኦስ።
1TH 5:9 ጾሲ ኑ ጎዳ ዬሱስ ኪርስቶሳ ባጋራ ኣቶቴꬅ ዴማና ማላ ኣቲን ኑና ሃንቆስ ጼይጊቤና።
1TH 5:10 ኑ ሃይቂኮካ ዎይኮ ፓጻ ዲኮካ ኢዛራ ዳና ማላ ኢዚ ኑ ጊሻስ ሃይቂዴስ።
1TH 5:11 ሄሳ ጊሻስ ቱማፔ ኢንቴ ሃኢ ኦꬂዛይሳ ማላካ ኢሶይ ኢሳራ ሚኔቲቴኔ ሚንꬄꬂቴ።
1TH 5:12 ሂስቲኮ ታ ኢሻቶ! ኢንቴ ጊዶን ሚኒ ኦꬂዛይታ ጎዳን ኢንቴፌ ቦላራ ዲዛ ሃላቃታኔ ኢንቴና ዞሪዛይታ ኢንቴ ቦንቻና ማላ ኑ ኢንቴና ዎሶስ።
1TH 5:13 ኢስታ ኦሶ ጊሻሲካ ኢስታ ሲቆራ ሎኤꬂ ቦንቺቴ፤ ኢንቴ ኢንቴ ጊዶን ሳሮን ዲቴ።
1TH 5:14 ታ ኢሻቶ! ኑ ኢንቴና፥ «ኦሶ ኦꬆንታ ኣሳታ ሃንቄቲቴ፤ ባቢዛይታ ሚንꬂቴ፤ ዳቡራንቻታ ማዲቴ፤ ኣስ ኡባ ዳንዳይቴ» ጊ ዞሮስ።
1TH 5:15 ኦናስካ ኢታ ጊሻስ ኢታ ዛሮንታ ማላ ናጌቲቴ፤ ጊዶ ኣቲን ኢንቴ ኢንቴ ጊዶን ጊዲን ሃራ ኣሳራ ጊዲን ኡባ ዎዴ ሎኦ ጊዲዛይሳ ኦꬃናስ ባጼቲቴ።
1TH 5:16 ኡባ ዎዴ ኡፋዬቲቴ።
1TH 5:17 ቃንጾንታ ዎሲቴ።
1TH 5:18 ኣይ ሃኖንካ ጋላቲቴ፤ ጾሳ ሼኔይ ኢንቴስ ዬሱስ ኪርስቶሳ ባጋራ ሄሳ።
1TH 5:19 ጺሎ ኣያና ታማ ቶይሶፍቴ።
1TH 5:20 ቲንቢቴ ቃላ ካꬎፒቴ።
1TH 5:21 ዉርሲካ ፓጪ ጼሊቴ፤ ሎኦ ጊዲዳዝ ኦይኪቴ።
1TH 5:22 ኢታ ጊዲዳ ኣይ ሚሻፌካ ሃኪቴ።
1TH 5:23 ሳሮቴꬃ ጎዳይ ኢዚ ኡባ ሚሻን ኢንቴና ዱማሶ፤ ኢንቴ ኣያናይ፥ ኢንቴ ሼምፖይኔ ኢንቴ ኣሾይ ጎዳ ዬሱስ ኪርስቶሲ ዪዛ ዎዴ ዎሶይ ባይንዳ ናጌቶ።
1TH 5:24 ኢንቴና ጼይጊዳይሲ ኣማኔቲዳዴ ጊዲዳ ጊሻስ ኢዚ ሄሳ ኦꬃና።
1TH 5:25 ኑ ኢሻቶ! ኑ ጊሻሲካ ዎሲቴ።
1TH 5:26 ኣማኒዛይታ ኡባ ጌሻ ዬሬቴꬃን ሳሮኪቴ።
1TH 5:27 ሃ ኪታይ ኣማኒዛይታስ ኡባስ ናባቤታና ማላ ጎዳ ሱንꬃን ሃዳራ ጋይስ።
1TH 5:28 ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ።
2TH 1:1 ጳዉሎሳፔ፥ ሲልዋኖሳፔኔ ጺምቶሳፔ፤ ኑ ኣዋ ጾሳኒኔ ጎዳ ዬሱስ ኪርስቶሳን ጊዲዳ ታሶሎንቄን ኣማኒዛ ኣሳስ፥
2TH 1:2 ጾሳ ኣዋፔኔ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።
2TH 1:3 ታ ኢሻቶ! ኢንቴ ኣማኖይ ዎዴፔ ዎዴን ዲጪ ዲጪ ቢዛ ጊሻሲኔ ኢንቴ ሲቆይካ ካሴፔ ጉጄቲ ጉጄቲ ቢዛ ጊሻስ ኑ ኢንቴ ጊሻስ ጾሳ ሎኤꬂ ጋላታናስ ቤሴስ።
2TH 1:4 ሄሳ ጊሻስ ኢንቴ ቦላ ጋኪዳ ጎዴቴꬃኒኔ ሜቶ ኡባን ኢንቴ ሚኒዳ ጊሻስ ኑኒ ኑ ባጋራ ኢንቴ ዳንዳያ ጊሻሲኔ ኢንቴ ኣማኖ ጊሻስ ኣማኒዛ ኣሳ ኡባ ኣቻን ጬቄቶስ።
2TH 1:5 ሄሲ ዉሪካ ጾሳ ፒርዳይ ሱሬ ጊዲዳይሳ ቤሴስ፤ ሄሳ ጋሶን ዋዬ ቤኢዛ ኢንቴ ጾሳ ካዎቴꬃስ ቤሲዛይታ ጊዲ ቤቲዴታ።
2TH 1:6 ጾሲ ጺሎ ጊዲዳ ጊሻስ ኢንቴና ዋዪሲዛይታ ኢዚ ዋዪሳና።
2TH 1:7 ዋዬ ኤኪዳ ኢንቴሲኔ ኑስ ሼምፖ ኢማና፤ ሄሲካ ጎዳ ዬሱስ ኪርስቶሲ ዎልቃማ ሳሎ ጾሳ ኪታንቻታራ ሳሎ ቦላ ቆንጪዛ ዎዴ ሃናና።
2TH 1:8 ሄ ዎዴ ጾስ ኤሮንታ ኣሳታኔ ጎዳ ዬሱስ ኪርስቶሳ ሚሺራቾ ቃላስ ኣዛዜቶንታ ኣሳታ ቦላ ኢዚ ባ ሃሎ ኬሳና።
2TH 1:9 ኢስቲካ ጎዳ ሲንꬃፌኔ ኢዛ ቦንቾ ዎልቃ ኣቻፌ ኪቺዲ ሜርናስ ꬋዮን ቃጻዬታና።
2TH 1:10 ኢስቲ ቃጻዬታናይ ኢዚ ጌሻታ ኣቻን ቦንቼታናሲኔ ኣማኒዛይቲ ዉሪ ኢዛን ማላሌታና ማላ ኢዚ ዪዛ ጋላሳን ሃናና፤ ኢንቴካ ሄ ኣማኒዛ ኣሳራ ዳና፤ ጋሶይካ ኑ ኢንቴስ ማርካቲዳይሳ ኢንቴ ኣማኒዳ ጊሻሳ።
2TH 1:11 ኑ ሄሳ ቆፒሼ ኑ ጾሲ ኢንቴና ባ ጼይሳስ ጊዲዛይታ ሂስቲ ቆዳና ማላ ኢንቴ ሎኦ ኦꬃናስ ኣሞቲዛ ኣሞዛኔ ኣማኖን ኢንቴ ኦꬂዳ ኦሶዛ ኡባ ኢዚ ኢንቴስ ባ ዎልቃን ፖላና ማላ ኑ ኢንቴስ ኡባ ዎዴ ዎሶስ።
2TH 1:12 ቃሴካ ኑ ጎዳ ጾሳኔ ኑ ጎዳ ዬሱስ ኪርስቶሳ ኪያቴꬃ ማላ ዬሱስ ኪርስቶሳ ሱንꬂ ኢንቴ ኣቻን ቦንቼታና ማላኔ ኢንቴካ ኢዛን ቦንቼታና ማላ ኑ ኢንቴስ ዎሶስ።
2TH 2:1 ታ ኢሻቶ! ጎዳ ዬሱስ ኪርስቶሳ ዩሳ ጊሻሲኔ ኑ ኢዛኮ ባና ቡሳ ጊሻስ ኑ ኢንቴና ቆፊሶስ።
2TH 2:2 ኣያናይ ቆንጪሲዴስ ዎይኮ ቃላይ ጌስ ጊዲ ዎይኮ ኑፔ ኢንቴስ ኪቴቲዳ ኪታ ማላ፥ «ጎዳ ዩሳ ጋላሲ ጋኪዴስ» ጊዲ ኢንቴ ቆፋን ያርክ ያርኮፍቴኔ ዳጋሞፍቴ።
2TH 2:3 ኦኒካ ኣይ ሃኖንካ ኢንቴና ባሌꬆፎ። ዳሮ ኣሳይ ኣማኖ ካዳናፔ ሲንꬄ ꬋያናስ ቤሲዛ ኢሲ ማካላ ኣሲ ቆንጮንታ ዲሺን ሄ ጋላሳይ ጋኬና።
2TH 2:4 ኢዚካ ጾስ ጌቴቲ ጎይኔቲዛ ኤቃ ጾሳታ ኡባፌ ቦላራ ባና ꬎቁ ꬎቁ ሂስቲዛዴኔ ጾሳራ ኤቄቲዛዴ፤ ኢዚካ ጾሳ ኬꬃን ኡቲዲ ባና፥ «ታኒ ጾሳ» ጊዲ ኣዋጃ ኣዋጂሳና።
2TH 2:5 ታ ኢንቴናራ ዲዛ ዎዴ ሃይታ ሃ ዮኦታ ኢንቴስ ታ ዮቲዳይሲ ኢንቴስ ቆፌቲዜሻ?
2TH 2:6 ኢዚ ባ ዎዴን ቆንጫና ጋካናስ ሃኢ ኢዚ ቆንጮንታ ማላ ኣዚ ዲጊዛኮ ኢንቴ ኤሬታ።
2TH 2:7 ማካላንቻ ጹራይ ሃራይ ኣቶሺን ሃኢካ ኦሶ ቦላ ዴስ፤ ጊዶ ኣቲን ሃይሲ ሃናናይ ኢዚ ሃኢ ኦꬆንታ ማላ ኢዛ ዲጊዛዴይ ኢዛ ኦጌፔ ኪቻና ጋካናስ ጻላ።
2TH 2:8 ሄሳፌካ ካሊዲ ጎዳ ዬሱሲ ባ ዶና ፔኖኒኔ ባ ቦንቾ ዩሳን ꬋይሳና፤ ማካላንቻይ ቆንጫና።
2TH 2:9 ሄ ማካላንቻ ዩሲ ጻላኤ ዎልቃን ሄሲካ ኣስ ባሌꬂዛ ማላታታኒኔ ማላሊሲዛ ሚሻታን ሃናና።
2TH 2:10 ሄሳꬆካ ኤኪ ኣቶንታ ማላ ቱማ ኢጺዲ ꬋይዛ ኣሳታ ባሌꬃናስ ዱማ ዱማ ኢታ ኦሶይ ያና።
2TH 2:11 ሄሳ ጋሶን ኢስቲ ዎርዶ ዮኦ ኣማናና ማላ ጾሲ ኢስታ ቦላ ባላ ኦሶ ኪታና።
2TH 2:12 ሄሲ ሃናናይ ቱማ ኣማኖንታ ኢጺዲ ዎርዶ ዮኦን ኡፋዬቲዛይቲ ዉሪ ፒርዴታናሳ።
2TH 2:13 ጎዳን ዶሴቲዳ ታ ኢሻቶ! ኑ ጊዲኮ ኡባ ዎዴ ኢንቴ ጊሻስ ጾስ ጋላታናስ ኑስ ቤሴስ፤ ጋሶይካ ጾሲ ኢንቴና ኮይሮፔ ኦይኪዲ ኢንቴ ጺሎ ኣያናን ዱማቲዳይታኔ ቱሙ ኣማኒዲ ኢንቴ ኣታና ማላ ኢንቴና ዶሪዴስ።
2TH 2:14 ኑ ጎዳ ዬሱስ ኪርስቶሲ ቦንቾ ጊሼቲዛይታ ኢንቴ ጊዳና ማላ ኑ ዮቲዳ ሚሺራቾ ቃላ ባጋራ ኢንቴና ጼይጊዴስ።
2TH 2:15 ሄሳ ጊሻስ ታ ኢሻቶ! ኢንቴ ሚኒ ኤቂቴ፤ ኑኒ ኑ ዶናን ጊዲን ዎይኮ ኪታን ዎይኮ ኑ ኢንቴስ ኣꬂ ዬዲዳ ቲሚርቴዛ ሎኤꬂ ኦይኪቴ።
2TH 2:16 ኢዚ ኑ ጎዳ ዬሱስ ኪርስቶሲ ቃሴ ኑና ሲቂዳይኔ ባ ኪያቴꬃን ሜርና ሚንꬄꬆኔ ሎኦ ሂዶታ ኢዚ ኑስ ኢሚዳ ኑ ኣዋ ጾሳይ፥
2TH 2:17 ኢዚ ኢንቴ ዎዚና ሎኦ ኦሶኒኔ ቃላን ሚንꬆ።
2TH 3:1 ዉርሴꬃን ታ ኢሻቶ! ቃሴካ ጎዳ ቃላይ ኢንቴ ኣቻን ሃኖይሳꬆካ ኤሌሊ ኡባሶ ጋካና ማላኔ ቦንቼታና ማላ ኑስ ዎሲቴ።
2TH 3:2 ቃሴካ ኣሲ ዉሪ ኣማኒዛይሳ ጊዶንታ ጊሻስ ማካላንቻታፔኔ ኢታ ኣሳታፔ ኑ ኣታና ማላ ኑስ ዎሲቴ።
2TH 3:3 ጎዳይ ጊዲኮ ኣማኔቲዳይሳ፤ ኢዚካ ኢንቴና ሚንꬃና፤ ጻላኤፔካ ኢንቴና ናጋና።
2TH 3:4 ኑ ኢንቴና ኣዛዚዳይሳ ኢንቴ ሃኢ ኦꬂዴታ ሺን ሲንꬃፌካ ኢንቴ ኦꬃናይሳ ኑኒ ጎዳን ኣማኔቶስ።
2TH 3:5 ጎዳይ ኢንቴ ዎዚና ጾሳ ሲቆኮኔ ኪርስቶሳ ዳንዳያኮ ካሌꬆ።
2TH 3:6 ታ ኢሻቶ! ኦሶ ኦꬆንታ ኣሳፔኔ ኢንቴ ኑፔ ኤኪዳ ቲሚርቴዛ ማላ ዶንታ ኣማኒዛይታፔ ኢንቴ ሃካና ማላ ጎዳ ዬሱስ ኪርስቶሳ ሱንꬃን ኢንቴና ኑ ኣዛዞስ።
2TH 3:7 ኢንቴ ኑ ሌሚሶ ዎስቲ ካላናኮ ኢንቴ ኢንቴ ባጋራ ኤሬታ፤ ኑ ኢንቴናራ ዲዛ ዎዴ ኦሶ ኦꬆንታ ጮ ዴኢቤኮ።
2TH 3:8 ቃሴካ ኦና ሶፔካ ካꬅ ጮ ሜላ ሚቤኮ፤ ቃሴ ኢንቴፌ ኦናስካ ኑ ቶሆ ጊዶንታ ማላ ቃማኔ ጋላስ ዳቡራን ኦꬂ ሚዶስ።
2TH 3:9 ኑ ሄሳ ኦꬂዳይ ኢንቴ ኑና ካላና ማላ ኢንቴስ ሎኦ ሌሚሶ ጊዳና ጊዲፔ ኣቲን ኑስ ኮሺዛይሳ ኢንቴፌ ኤካናይሳ ኑና ዲጊዛ ዎጋይ ዲን ጊዴና።
2TH 3:10 ኑ ኢንቴናራ ዲዛ ዎዴ፥ «ኦሶ ኦꬃናስ ዶሶንታ ኣሲ ካꬅ ሞፖ» ጊዛ ኣዛዞ ኢንቴስ ኢሚዶስ።
2TH 3:11 ኢንቴ ጊዶን ኢሲ ኢሲ ኣሳቲ ኦሶ ኦꬆንታይሳ ኑ ሲዪዶስ፤ ሄይታንቲ ኦሶ ኦꬆንታ ሜላ ኣሳ ዮኦን ጌሊዛ ኣሳታ።
2TH 3:12 ሄይታ ማላ ኣሳቲ ባ ኦሶ ጮኡ ጊ ኦꬃና ማላኔ ባ ካꬅ ማና ማላ ጎዳ ዬሱስ ኪርስቶሳ ሱንꬃን ኑ ኢስታ ኣዛዞሲኔ ዞሮስ።
2TH 3:13 ኢንቴ ጊዲኮ ታ ኢሻቶ! ሎኦ ኦሶ ኦꬃናፔ ሙሌካ ኣዛሎፍቴ።
2TH 3:14 ሃይሳ ኑ ኪቲዳ ቃላስ ኣዛዜቶንታይ ኦኒካ ዲኮ ሄሳ ሚሳቲዛዴ ሎኤꬂ ካሊቴኔ ኢዚ ባ ኦሶን ዬላታና ማላ ኢዛራ ጋጎፍቴ።
2TH 3:15 ጊዶ ኣቲን ኢዛ ኢንቴ ኢሻ ማላ ሃንቂቴ ኣቲን ሞርኬ ማላ ጼሎፍቴ።
2TH 3:16 ሳሮቴꬃ ጎዳይ ኢዚ ባ ባጋራ ዮኦ ኡባን ኢንቴስ ሳሮቴꬅ ኢሞ፤ ጎዳይ ኢንቴናራ ኡባራ ጊዶ።
2TH 3:17 ሃይሳ ሳሮካ ታኒ ታ ኩሼራ ኢንቴስ ጻፊዳይ ታና ጳዉሎሳ። ታ ኪታስ ዱማ ማላታይ ሃይሳ፤ ኢዚካ ሃይሳ ታኒ ታ ኩሼን ጻፎይሳ።
2TH 3:18 ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ኡባራ ጊዶ።
1TI 1:1 ኑና ኣሺዳ ጾሳን፥ ኑስ ሂዶታ ጊዲዳ ዬሱስ ኪርስቶሳ ኣዛዞን ሃዋሬ ጊዲዳ ጳዉሎሳፔ
1TI 1:2 ኣማኖን ታስ ቱሙ ና ጊዲዳ ጺምቶሳስ ጾሳ ኑ ኣዋፔ ኑ ጎዳ ዬሱስ ኪርስቶሳፔ ኪያቴꬂ፥ ማሮቴꬂኔ ሳሮይ ኔስ ጊዶ።
1TI 1:3 ታኒ ማቂዶኒያ ባሼ ኔና ሃዳራ ጊዳ ማላ ሃይሳፌ ሲንꬃን ኢሲ ኢሲ ኣሳቲ ዎርዶ ቲሚርቴ ታማርሶንታ ማላ ኔ ኣዛዛናስ ኤፌሶኔን ዳሻ።
1TI 1:4 ቃሴካ ኣሳይ ዮቲን ዉሮንታ ቤኒ ዎዴ ሃይሲኤን ባ ዎዴ ዉርሶንታ ማላ ኣዛዛ፤ ሄይታ ማላ ዮኦይ ፓላማ ዴንꬄꬄስ ኣቲን ኣማኖን ኦሴቲዛ ጾሳ ኦሶስ ኣይኮካ ጎኤና።
1TI 1:5 ሃ ኣዛዞዛስ ዋና ኣይፌ ዮኦይ ጊዲኮ ጌሻ ዎዚናፔ ሎኦ ቆፋራ ሄሳꬆካ ቱሙ ኣማኖፔ ቤቲዛ ሲቆ።
1TI 1:6 ኢሲ ኢሲ ኣሳይ ሃይታፔ ፖቂ ኤቂዲ ጎኣይ ባይንዳ ዮኦታኮ ሲሚዴስ።
1TI 1:7 ዎጋ ታማርሲዛይታ ጊዳና ማላ ኮዬቴስ፤ ጊዲኮካ ኢስቲ ባ ዮቲዛይሳ ዎይኮ ኬሂ ሞቴቲዛ ዮኦዛ ሎኤꬂ ኤሬቴና።
1TI 1:8 ጊዶ ኣቲን ኣሲ ማራን ጎኤቲዛኮ ዎጋይ ሎኦ ጊዲዳይሳ ኑ ኤሮስ።
1TI 1:9 ቃሴካ ዎጋይ ኢሜቲዳይ ጺሎ ኣሳስ ጊዶንታ ዎጋ ዬꬊ ኣꬊዛይታስ፥ ኣዛዜቶንታይታስ፥ ጾሳስ ባቦንታይታስ፥ ናጋራንቻታስ፥ ጌሻቴꬂ ባይንዳይታስ፥ ጾስ ሌቂዛይታስ፥ ባ ኣዮኔ ባ ኣዋ ዎꬊዛይታሲኔ ሼምፖ ዎꬊዛይታስ ጊዲዳይሳ ኑ ኤሮስ።
1TI 1:10 ሄሳꬆካ ላይማቲዛይታስ፥ ኣዴራ ኣቂዛ ኣዴታስ፥ ኣስ ባይዚዛይታሲኔ ሻሚዛይታስ፥ ዎርዳንቻታስ፥ ኣሳስ ዎርዶራ ጫቂዛይታስ፥ ሎኦ ቲሚርቴራ ኤቄቲዛ ኡባታሳ።
1TI 1:11 ሄ ሎኦ ቲሚርቴይ ኣንጄቲዳ ጾሲ ታስ ሃዳራ ኢሚዳ ቦንቾ ሚሺራቾ ቃላራ ጋጊዛይሳ።
1TI 1:12 ታና ባ ኦሶስ ሹሚዲኔ ኣማኔቲዛዴ ሂስቲ ኤኪዲኔ ታስ ሚኖቴꬅ ኢሚዳ ኑ ጎዳ ዬሱስ ኪርስቶሳ ታ ጋላታይስ።
1TI 1:13 ሃይሳፌ ካሴ ታ ኣይ ማላ ኣስ ጫዪዛዴኔ ጎዴꬂዛዴ፥ ቃሴ ማካላ ኣስ ጊዲኮካ ሄሳ ታ ኤሮንታኔ ኣማኖንታ ዳሼ ኦꬂዳ ጊሻስ ጾሲ ታና ማሪዴስ።
1TI 1:14 ዬሱስ ኪርስቶሳፔ ጊዲዳ ኣማኖራኔ ሲቆራ ኑ ጎዳ ኪያቴꬂ ታስ ኬሂ ዳሪዴስ።
1TI 1:15 ዬሱስ ኪርስቶሲ ናጋራንቻታ ኣሻናስ ዱጌ ሃይሳ ሃ ኣላሜ ዪዴስ ጊዛ ቃላይ ቱማኔ ኣሲ ዉሪካ ኤካናስ ቤሲዛይሳ። ናጋራንቻታፔካ ኣꬊዛ ናጋራንቻይ ታና።
1TI 1:16 ጊዶ ኣቲን ታ ማሬቲዳይካ ዬሱስ ኪርስቶሲ ዛዋይ ባይንዳ ባ ዳንዳያ፥ ኡባፌ ኣꬊዳ ናጋራንቻ ጊዲዳ ታ ቦላ ቤሲዳይ ኢዛን ኣማናናይታሲኔ ሜርና ዴኦ ዴማናይታስ ሌሚሶ ጊዳና ማላሳ።
1TI 1:17 ሄሳ ጊሻስ ሜርናስ ሃይቂ ኤሮንታ፥ ኣይፌን ቤቲ ኤሮንታ ባርካ ጻላ ጾስ ጊዲዳ ካዎስ ሜርናፔ ሜርና ጋካናስ ኢዛስ ቦንቾይኔ ጋላታይ ጊዶ። ኣሚን።
1TI 1:18 ታ ና ጺምቶሳ! ኔ ጊሻስ ካሴቲዲ ዮቴቲዳ ማላ ሃይሳ ኣዛዞዛ ታ ኔስ ኢማዲስ፤ ሄሲካ ኔ ሄ ቃላ ካላሼ ሎኦ ባጼ ባጼታናሳ።
1TI 1:19 ኣማኖይኔ ሎኦ ቆፋይ ኔስ ዴኦ፤ ኢሲ ኢሲ ኣሳቲ ባ ሎኦ ቆፋ ዬꬊ ኣꬊዲ ኣባ ቦላ ሜቶይ ኢዛ ቦላ ጋኪን ዋዬቲዛ ማርካቤ ማላ ባ ኣማኖ ꬋይሲዳ።
1TI 1:20 ኢስታ ጊዶን ጾሳ ጫሽ ኣጊዲ ታማራና ማላ ታኒ ጻላኤስ ኣꬃ ኢሚዳይቲ ሄሜኔዎሲኔ ኢስኪንዲሮሲ ዴቴስ።
1TI 2:1 ሄሳ ጊሻስ ኡባፌ ኮይሮ ሃራ ኣሳስ ሾቤꬃ ዎሳ፥ ጋናቴꬃ ዎሳኔ ጋላታ ዎሳ ኣሳ ኡባስ ካዎታሲኔ ዴሬ ኣይሲዛይታስ ኡባስ ዎሳና ማላ ታ ኔና ቆፍሳይስ።
1TI 2:2 ሄሲካ ቱሙ ኣያና ዱሳኒኔ ጌሻቴꬅ ኡባን ኑኒ ሳሮቴꬃኒኔ ዎጋን ዳና ማላሳ።
1TI 2:3 ሃይሲ ኑና ኣሺዛ ጾሳ ኣቻን ሎኦኔ ኡፋይሲዛዛ።
1TI 2:4 ኢዚ ኣሲ ዉሪ ኣታና ማላኔ ቱማ ኤራና ማላ ኮዬስ።
1TI 2:5 ኢሲ ጾሲ ጻላ ዴስ፤ ቃሴካ ጾሳሲኔ ኣሳስ ጊዶን ኢሲ ጊግሲዛ ጋናይ ዴስ፤ ኢዚካ ኣስ ጊዲዳ ዬሱስ ኪርስቶሳ።
1TI 2:6 ኢዚ ባና ኣሳ ኡባስ ኣꬂ ኢሚዴስ፤ ሄሲካ ሄራካ ዎዴይ ኣꬎንታ ኢዛስ ማርካቲዴስ።
1TI 2:7 ታኒካ ሃይሳስ ሚሺራቾ ቃላ ዮታናስ ኪቴቲዳዴ፤ ቃሴካ ዴሬታስ ቱሙ ኣማኖ ኣስታማሬ ጊዳዳ ሹሜታዲስ፤ ሄሳካ ታ ዎርዶቶንታ ቱሙ ዮታናሳ።
1TI 2:8 ሄሳ ጊሻስ ኣቱማ ኣሳይ ኡባሶን ሃንቆይ ባይንዳኔ ፓላማይ ባይንዳ ባ ጌሻ ኩሼታ ፑዴ ꬎቁ ሂስቲዲ ዎሳና ማላ ታ ኮያይስ።
1TI 2:9 ሄሳꬆካ ማጫሳቲ ቦንቾራ ባና ሺሺ ኤኪዲ ቤሲዛ ማይኦ ማይኤቶ ኣቲን ባ ሁኤ ዳዲ ኤኪዲ ዎይኮ ኣልኦ ማይኦ፥ ዎርቃኔ ኢንቁ ኣꬂዲ ዋልቂ ዋልቂ ጎፔቶ።
1TI 2:10 ጊዶ ኣቲን ጾስ ዎሶስ ጊዛ ማጫሳቲ ኢስታስ ኦꬃና ቤሲዛ ሎኦ ኦሶን ሎኤቶ።
1TI 2:11 ማጫሲ ጮኡ ጋዳ ኩሜꬃራ ኣዛዜቴꬅ ታማሩ።
1TI 2:12 ማጫሲ ጮኡ ጋናፔ ኣቲን ኢዛ ታማርሳና ማላ ዎይኮ ኣዴ ቦላ ጎዳታና ማላ ታ ኮይኬ።
1TI 2:13 ጋሶይካ ኮይሮ ኣዳሜይ ሜꬌቲዴስ፤ ካላዳ ሄዋና ሜꬌታዱስ።
1TI 2:14 ቃሴካ ኮይሮ ባሌቲዳይ ኣዳሜ ጊዴና፤ ባሌታዳ ጾሳ ዎጋፔ ኣꬊዳይ ማጫሳዮ።
1TI 2:15 ጊዲኮካ ማጫሲ ኣማኖኒኔ ሲቆን ጌሻቴꬃን ባርካ ባና ሃሮን ሚኒኮ ና ዬሎን ኣታና።
1TI 3:1 «ኦኒካ ዎሳ ኬꬃ ጪማ ጊዳና ኮይኮ ሎኦ ኦሶ ኣሞቴስ» ጊዛ ቃላይ ቱማ።
1TI 3:2 ሄሳ ጊዲኮ ዎሳ ኬꬄ ካሌꬂዛዴይ ቦሬይ ባይንዳዴ፥ ኢሲ ማቻ ዲዛ ኣዴ፥ ጊናራ ዲዛዴ፥ ባና ሃሪዛዴ፥ ዎጋራ ኣቂዛዴ፥ ኢማꬅ ሞኪዛዴ፥ ታማርሳናስ ዳንዳይዛዴ፥
1TI 3:3 ማꬆቶንታዴ፥ ኦሽ ኦዬቶንታዴ፥ ቃሴ ማራጌ ኣስ፥ ኣሳራ ፓላሜቶንታዴ፥ ሚሽ ጎዶንታዴ ጊዳናስ ቤሴስ።
1TI 3:4 ባ ናይታ ኣዛዜቲዛይታኔ ኣስ ቦንቺዛይታ ሂስቲ ዲቺዲ ባ ኬꬃ ኣሳ ዎጋራ ኣይሲዛዴ ጊዳናስ ቤሴስ።
1TI 3:5 ኢሳዴይ ባ ኬꬃ ኣሳ ዎጋራ ኣይሶ ኤሮንታ ኣጊኮ ጾሳ ዎሳ ኬꬄ ዎስቲ ናጋና ዳንዳይዜ?
1TI 3:6 ኦቶሬቴꬃን ፑሪዲ ጻላኤይ ኩንዲዳ ፒርዳን ኢዚ ኩንዶንታ ማላ ኦራꬅ ኣማኒዛዴ ጊዶፖ።
1TI 3:7 ቃሴካ ኢዛ ሱንꬃን ቦሬቶንታ ማላኔ ጻላኤ ናርጻን ኢዚ ጌሎንታ ማላ ኣማኖንታ ኣሳ ኣቻን ሎኦ ማርካቴꬂ ዳናስ ኮሼስ።
1TI 3:8 ዳቆኔቲካ ሄሳꬆ ቦንቼቲዳይታኔ ባ ጊዳ ቃላ ላሚ ላሚ ዬጎንታይታ፥ ዳሮ ዎይኔ ኡሻስ ኣሞቶንታይታ፥ ኦጌይ ባይንዳ ጎኣ ጎዶንታይታ ጊዳናስ ቤሴስ።
1TI 3:9 ኣማኖ ጹራ፥ ሎኦ ቆፋራ ናጋናስ ቤሴስ።
1TI 3:10 ሃይታንቲካ ኮይሮቲ ፓጬቴቶ፤ ኢሲ ኢታይ ኢስታ ቦላ ቤቶንታ ኣጊኮ ሄሳፌ ጉዬ ዳቆኔቴꬃን ኦꬄቶ።
1TI 3:11 ማጫ ዳቆኔቲካ ቦንቼቲዳይታ፥ ዚጊሮንታይታ፥ ቃሴ ዎጋራ ዲዛይታ፥ ሃኖ ኡባን ኣማኔቲዳይታ ጊዳናስ ቤሴስ።
1TI 3:12 ዳቆኔቲ ኢሲ ማቺ ኣዚና ጊዳናስ ቤሴስ፤ ቃሴካ ባ ናይታኔ ባ ኬꬃ ኣሳ ዎጋራ ኣይሲዛይታ ጊዳናስ ቤሴስ።
1TI 3:13 ዎጋራ ኦꬂዳይቲ ባስ ጊታ ቦንቾኔ ዬሱስ ኪርስቶሳን ኢስታስ ዲዛ ኣማኖን ዳሮ ጻላቴꬅ ዴማና።
1TI 3:14 ታ ኔኮ ኤሌ ባና ኮይኮካ ሃይታ ኣዛዞታ ኔስ ጻፋይስ።
1TI 3:15 ታ ሃኖ ኔስ ጻፊዛይ ታ ጋምኢዛ ጊዲኮካ ኣሳይ ጾሳ ኬꬃን ዋኒ ዳናኮ ኔ ኤራና ማላ ጋዳኮ! ኬꬃይ ዴኦ ጾሳ ዎሳ ኬꬃ፤ ሄሲካ ቱሙ ቱሲኔ ጻጶ።
1TI 3:16 ቱሙ ኣያና ዱሳ ጹራይ ሲꬌይ ባይንዳ ጊታ፤ ኢዚካ፥ «ኣሴ ጊዲዴስ፤ ኢዛ ጺሎቴꬂ ጺሎ ኣያናን ቆንጪዴስ፤ ኪታንቻታስ ቤቲዴስ፤ ዴሬ ኡባስ ሳባኬቲዴስ፤ ኣላሜን ዲዛይታን ኣማኔቲዴስ፤ ቦንቾራ ፑዴ ዴንዲ ቢዴስ» ጊዛይሳ።
1TI 4:1 ዎዴ ዉርሴꬃ ቦላ ኢሲ ኢሲ ኣሳይ ኣማኖ ኣጊዲ ባሌꬂዛ ኣያናታኔ ኢታ ኣያና ቲሚርቴ ካላናይሳ ጺሎ ኣያናይ ቆንጬራ ዮቴስ።
1TI 4:2 ሄሳ ማላ ቲሚርቴይ ኢስታ ቆፋይ ቦንቆ ቢራታን ጹጌቲዳ ማላ ጌላቴꬃን ዶጪዳ ቆꬌፔ ቆሞን ሃኒዛ ዎርዳንቻ ኣሳታፔ ያና።
1TI 4:3 ሄ ኣሳቲ ኣሳይ ኤኮንታ ማላኔ ጌሎንታ ማላ ዲጋና፤ ኣማኒዛይቲኔ ቱማ ሻኪ ኤሪዛ ኣሳይ ጾሲ ሜꬊዳ ካꬅ ጋላታራካ ኤኪዛይቲ ሞንታ ማላ ዲጋናኔ ኣዛዛና።
1TI 4:4 ጾሲ ሜꬊዳይ ዉሪካ ሎኦ፤ ኣሲ ጋላታራ ኤኪኮ ዎራ ዎꬊዛይ ኢሲናካ ዴና።
1TI 4:5 ዉሪካ ጾሳ ቃላኒኔ ዎሳን ጌያና።
1TI 4:6 ሃይሳ ሃ ኣዛዞዛ ኣማኒዛ ኣሳ ኔ ቆፍሲኮ፥ ኣማኖ ቃላኒኔ ኔ ኤኪዳ ሎኦ ቲሚርቴዛን ሚናዳ ዬሱስ ኪርስቶሳስ ሎኦ ኦሳንቻ ጊዳንዳሳ።
1TI 4:7 ጾስ ቦንቺሶንታ ጎኣይ ባይንዳ ሃይሲኤፔኔ ጪማ ማጫሳታ ሃይሲኤፔ ሃካዳ ቱማ ኣያና ኦሶስ ኔ ኣሳቴꬅ ጊጊሳ።
1TI 4:8 ኣሳቴꬃ ኣሾ ኦጌን ዶሲሶይ ጉꬃ ዎዴስ ጎኤስ ሺን ቱሙ ኣያና ዱሳስ ባና ታማርሶይ ጊዲኮ ሃይሳ ሃ ኣላሜዛሲኔ ቡሮ ያና ዱሳስ ሂዶታይ ዲዛ ጊሻስ ኡባስ ጎኤስ።
1TI 4:9 ሃይሲ ሃ ቃላይ ኣማኔቲዳይሳኔ ኡባይ ኤካናስ ቤሲዛ ቃላ።
1TI 4:10 ኑ ሄሳስ ጊዲ ዳፌቶሲኔ ዳቡሮስ፤ ሄሲካ ኣሳ ኡባስ ሃራፔካ ኣማኒዛይታስ ኣሺዛ ዴኦ ጾሳን ኑ ሂዶታ ኦꬂዛ ጊሻሳ።
1TI 4:11 ሃይታ ዮኦታ ኣዛዛኔ ታማርሳ።
1TI 4:12 ኔ ዬላጋቴꬃ ኦኒካ ሌቆፎ፤ ጊዶ ኣቲን ኔኒ ሃሳያን፥ ዱሳን፥ ሲቆን፥ ኣማኖኒኔ ጌሻቴꬃን ኣማኒዛይታስ ሎኦ ሌሚሶ ጊዳ።
1TI 4:13 ታ ሄ ባና ጋካናስ ቃላ ናባባናስ፥ ዞራናሲኔ ታማርሳናስ ሚና።
1TI 4:14 ጪማቲ ኔ ቦላ ባ ኩሼ ዎꬂ ዎሲሺን፥ ኔስ ኢሜቲዳ ቲንቢቴ ኢሞቴꬃ ሌፒ ሂስታ ኣጎፋ።
1TI 4:15 ኣሲ ዉሪ ኔ ዲቻ ቤያና ማላ ሃ ዮኦታ ሎኤꬃ ሚንꬃዳ ዳንዳያን ፖላ።
1TI 4:16 ኔ ዱሳ ጊሻሲኔ ኔ ታማርሲዛ ቲሚርቴዛስ ናጌታ፤ ሃይታን ሚና፤ ኔ ሄሳ ኦꬂኮ ኔናኔ ኔ ጊዛይሳ ሲዪዛይታ ኣሻና።
1TI 5:1 ጪማ ኣሳ ኔ ኣዋ ማላ ቦንቾራ ዞራ ኣቲን ዶምኦፋ፤ ናቴꬃ ኣቱማ ናይታ ኔ ኢሻታ ማላ ጼላ።
1TI 5:2 ሄሳꬆካ ጪማ ማጫሳታ ኔ ኣዪ ማላ፥ ናቴꬃ ማጫሳታ ቃሴ ኔ ሚቼታ ማላ ሱሬ ዎዚናፔ ጼላ።
1TI 5:3 ኣዳፌ ሜቶቴቲዳ ኣምኤታ ሎኤꬃ ናጋ።
1TI 5:4 ኢሲ ኣምኤይስ ናይ ዎይኮ ና ናይ ዲዛ ጊዲኮ ሄ ናይቲ ባሶ ኣሳታ ማዳናሲኔ ባና ዬሊዳይታስ ካሴ ኢስቲ ኦꬂዳይሳ ኩሼ ዛሮን ሃራፔ ካሴቲዲ ባ ኣማኖ ኦሶን ቤሳናሲኔ ታማራናስ ቤሴስ፤ ሄሲካ ጾስ ኡፋይሲዛይሳ።
1TI 5:5 ቃሴ ቱማፔ ማዶይ ባይንዳ ባርካ ዲዛ ኣምኤያ ጾስ ጻላ ጼላዉስ፤ ዎሳሲኔ ጾሳፌ ማዶ ዴማናስ ጋላሲኔ ቃማ ሚኔታዉስ።
1TI 5:6 ሃ ቢታ ሎኦ ዱስ ጻላ ኮይዛ ኣምኤያ ጊዲኮ ኢዛ ፓጻ ዳሼ ሃይቂዳሮ።
1TI 5:7 ኦና ቦላካ ዎሶይ ዶንታ ማላ ሃይሳ ኣዛዞዛ ኣሳስ ኣꬃ።
1TI 5:8 ኢሲ ኣሲ ባ ዳቦታ ሃራፔካ ባሶ ኣሳ ማዶንታይሳ ጊዲኮ ኢዚ ኣማኖ ካዲዳዴኔ ኣማኖንታ ኣሳፔካ ኣꬊ ኢታ ኣሳ።
1TI 5:9 ኢዚስ ላይꬃይ ኡሱፑን ታሙ ላይꬃፌ ጋርሳን ዲዛ ኣምኤይ ሱንꬅ ኣምኤታ ማዝጋባን ጻፎፓ፤ ቃሴካ ኢዛ ካሴ ኢሳዴ ጻላ ጌሊዳሮ ጊዳናስ ቤሴስ።
1TI 5:10 ናይታ ዲቾኒኔ ኢማꬃ ሞኮን፥ ኣማኒዛይታ ቶሆ ሜቻን፥ ሜቶቲዳይታ ማዶኒኔ ሎኦ ኦሶ ኡባን ባና ኣꬃ ኢማዳ ሎኦ ኦሶንካ ኬሃ ኤሬቲዳሮ ጊዳናስ ቤሴስ።
1TI 5:11 ናቴꬃ ኣምኤታ ጊዲኮ ሄሳ ማላ ማዝጋባን ጻፎፓ፤ ጋሶይካ ኢስታስ ዲዛ ኣዚናራ ዳና ኣሞይ ኢስቲ ኪርስቶሳስ ኦꬃና ጊ ጌሊዳ ቃላፔ ቦላራ ኣꬊዛ ዎዴ ኣዴ ጌላና ኮዬቴስ።
1TI 5:12 ኢስቲ ካሴ ጫቂዳ ቃላ ሚዛ ጊሻስ ሄ ዮኦዛን ባ ቦላ ፒርዳ ኤሄቴስ።
1TI 5:13 ሄሳፌካ ኦሶ ኦꬃናፔ ዩዪ ዩዪ ኣሳ ኬꬄ ጌላና ዶሴቴስ፤ ኦሶ ኢጾ ጻላ ጊዶንታ ሃሳያናስ ቤሶንታይሳ ሃሳይሼ ዚጊርዛይታኔ ኮሾንታ ኣሳ ዮኦ ጊዶ ጮ ዎጺ ጌሊዛይታ ጊዴቴስ።
1TI 5:14 ሄሳ ጊሻስ ኣዚናቲ ሃይቂዳ ናቴꬃ ማጫሳቲ ኣዴ ጌላና ማላ፥ ናይታ ዬላና ማላኔ ባሶ ኣስ ኣይሳና ማላ፥ ሞርኬይካ ኢስታ ቦላ ዎꬂዛ ሚሼ ዴሞንታ ማላ ታ ዞራይስ።
1TI 5:15 ኣዳካ ሃይሳፌ ካሴ ኢሲ ኢሲ ኣሳቲ ጻላኤ ካላና ጉዬ ሼርኢ ጊዳ።
1TI 5:16 ኣማኒዛ ማጫሲ ኦኒካ ባሶ ኣሳ ጊዶን ኣምኤቲ ዲዛ ጊዲኮ ዎሳ ኬꬂ ቱሙ ኣምኤታ ጻላ ማዳና ማላ ኢዛካ ባ ባጋራ ባ ኣምኤታ ማዱ ኣቲን ዎሳ ኬꬃስ ቶሆ ጊዳና ማላ ኣጉፉ።
1TI 5:17 ዎሳ ኬꬃ ሎኤꬂ ኣይሲዛይቲ ሃራፔካ ሳባኮኒኔ ታማርሶን ሚኒዛ ጪማቲ ጊዲኮ ዳኮ ማዶ ማዴታናስ ቤሴስ።
1TI 5:18 ማጻፋን፥ «ካꬅ ቡኪዛ ቦራ ዶና ቃቾፋ።» ቃሴካ፥ «ኦሶ ኦꬂዛዴይ ዳሞዛ ኤካና ቤሴስ» ጌስ።
1TI 5:19 ናምኡ ማርካይ ዎይኮ ሄꬑ ማርካይ ማርካቶንታ ዲሺን ጪማ ቦላ ሺቂዛ ሞቶ ኤኮፋ።
1TI 5:20 ሃራቲ ቤኢዲ ናጌታና ማላ ናጋራ ኦꬂዛይታ ኣሳ ኡባ ሲንꬃን ሃንቃ።
1TI 5:21 ጾሳኒኔ ዬሱስ ኪርስቶሳን ዶሬቲዳ ኪታንቻታ ሲንꬃን ሃይታ ኣዛዞታ ኦናካ ማዶንታ ኔ ናጋና ማላኔ ኢሲ ሚሺካ ታ ጎሪፔ ዚቂ ꬎቁ ሂስቶንታ ማላ ታ ኔና ሃዳራ ጋይስ።
1TI 5:22 ጾሳ ኦሶስ ዶራናስ፥ ኦና ቦላካ ኔ ኩሼ ዎꬃ ዎሳናስ ኤሶቶፓ፤ ቃሴ ሃራታራ ናጋራ ኦꬃናስ ዙፔቶፓ፤ ናጋራፔ ኔና ጺሎቴꬃን ናጋ።
1TI 5:23 ኔና ቃንꬃን ሳኪዛይሳሲኔ ኡባ ዎዴ ሳኪዛ ሳኮዛ ጊሻስ ዎይኔ ጫጄፌ ጉꬅ ጉጃዳ ኡያ ኣቲን ሃይሳፌ ጉዬ ሃꬄ ጻላ ኡዮፓ።
1TI 5:24 ኢሲ ኢሲ ኣሳ ናጋራይ ፒርዳይ ያናፔ ካሴቲዲ ቆንጬስ፤ ባጋይታ ናጋራይ ጊዲኮ ፒርዳፌ ጉዬ ቆንጬስ።
1TI 5:25 ሎኦ ኦሶይካ ሄሳ ማላ ቆንጬ፤ ቆንጮንታይ ዲኮካ ቆቴቲ ኣቴና።
1TI 6:1 ጾሳ ሱንꬂኔ ኢዛ ቲሚርቴይ ጫዬቶንታ ማላ ኣይሌቴꬃ ቃምባራ ጊዶን ዲዛይቲ ዉሪ ባ ጎዳስ ኩሜꬃ ቦንቾይ ቤሲዛይሳ ኤሬቶ።
1TI 6:2 ኣማኒዛ ጎዳቲ ዲዛ ኣማኒዛ ኣሽካራቲ ጎዳቲ ኢስታስ ኢሻታ ጊዲዳ ጊሻስ ጎዳታስ ቤሲዛ ቦንቾ ኢሜቶ፤ ሃራፔካ ኢስታ ኦሶን ማዴቲዛ ኣማኒዛ ጎዳቲ ኢስታስ ዶሴቲዳይታ ጊዲዳ ጊሻስ ኔካ ሃይታንታ ማላ ዮኦታ ታማርሳናሲኔ ዞራናስ ቤሴስ።
1TI 6:3 ኦኒካ ዎርዶ ቲሚርቴ ታማርሲኮ ጎዳ ዬሱስ ኪርስቶሳ ሎኦ ቃላኔ ኣያና ቱማቴꬃ ሚንꬂዛ ቲሚርቴራ ጋጎንታይሳ ጊዲኮ፥
1TI 6:4 ሄሳዴይ ኦቶሬቴꬃን ኩሚዴሲኔ ኣይኮካ ዩሺ ቆፔና፤ ኢሲ ኢሲ ቃላታ ጊሻስ ፓላሜታናሲኔ ኦዬታናስ ኢታ ኣሞይ ኢዛን ዴስ፤ ሄይቲካ ቃናቴቴꬅ፥ ኦሽ፥ ጫሽ፥ ኢታ ሲꬌ ካሌꬄቴስ።
1TI 6:5 ቱማይ ኢስታፌ ኤኬቲ ጊዲን ኣያና ኦሶን ዎꬌ ዴማና ሚሳቲዛ ኣሳታኔ ቆፋ ፓጬ ኣሳታ ጊዶን ጎሼቲዲ ዱጾንታ ኦሽ ኤሄቴስ።
1TI 6:6 ጊዶ ኣቲን ቱሙ ኣያና ኣስ ጊዴꬂ ኑስ ዲዛይሳን ዎፑ ጊዲ ዱሳራ ጊታ ዎꬌ።
1TI 6:7 ጋሶይካ ኑ ሃይሳ ሃ ኣላሜዛ ዪሼ ኣይኮካ ኤኪ ዪቤኮ፤ ቢሼካ ቃሴ ኣይኮካ ኤኪ ቦኮ።
1TI 6:8 ጊዶ ኣቲን ኑስ ማናይሲኔ ኑ ማይኣናይሲ ዲኮ ጊዳና።
1TI 6:9 ዱሬ ጊዳናስ ኮይዛይቲ ጊዲኮ ጌዴ ፓጬኒኔ ናርጻን ጌሊዲ ኦይኬቲዛይሳ ማላ ዳሮ ሃዳኒኔ ኢታ ኣሞን ኡንኤቴቴስ።
1TI 6:10 ጋሶይካ ሚሻ ሲቆይ ኢታቴꬅ ኡባስ ጻጶ፤ ኢሲ ኢሲ ኣሳቲ ዱሬ ጊዳና ጊዲ ኣሞቲዳ ኣሞፔ ዴንዲዳይሳን ኣማኖ ኦጌፔ ባሌቲዲ ሃራሶ ቢዳኔ ባርካ ባና ዳሮ ሜቶ ጊዶ ጌልꬂዳ።
1TI 6:11 ኔኖ ጾሳ ኣሶ! ኔ ሄሳ ኡባፌ ባቃታ፤ ጺሎቴꬅ፥ ቱሙ ኣያናን ዱስ፥ ኣማኖ፥ ሲቆ፥ ዳንዳያኔ ኣሽኬቴꬅ ካላ።
1TI 6:12 ኣማኖ ባጼ ሎኤꬃ ባጼታ፤ ዳሮ ማርካታ ሲንꬃን ሎኦ ኣማኔቴꬃን ኔ ማርካቲዳይሳኔ ኔ ኢዛስ ጼይጌቲዳ ሜርና ዴኦዛ ሎኤꬃ ኦይካ።
1TI 6:13 ኡባሲካ ዴኦ ኢሚዛ ጾሳ ኣቻን ሄሳꬆካ ጳንጾሳ ጲላጾሳ ሲንꬃን ቱማ ማርካቲዳ ዬሱስ ኪርስቶሳ ሲንꬃን ታ ኔና ሃዳራ ጊዛይ፥
1TI 6:14 ጎዳ ዬሱስ ኪርስቶሲ ቆንጫና ጋካናስ ኔስ ኢሜቲዳ ኦሶዛ ዎሶይ ባይንዳ ኔ ፖላና ማላ ቤሴስ።
1TI 6:15 ሄ ቆንጬꬂ ኣንጄቲዳይሲ ባርካ ኡባ ሃሪዛይሲኔ ካዎታ ካዎይ፥ ጎዳታስ ጎዳይ ኢዚ ባ ዎዴን ቤሳና።
1TI 6:16 ኢዚ ጻላ ሃይቆንታይሳ፤ ኦኒካ ሺቃናስ ዳንዳዮንታ ፖኦ ጊዶን ዴስ፤ ኢዛ ቤኢዳ ኣሲ ኦኒካ ባ፤ ቤያና ዳንዳይዛዴይካ ዴና፤ ኢዛስ ዎልቃይኔ ቦንቾይ ሜርናፔ ሜርናስ ጊዶ። ኣሚን።
1TI 6:17 ሃይሳ ሃ ኣላሜዛን ዱሬቲዳይቲ ኦቶሬቶንታ ማላ ኣዛዛ፤ ኑ ኡፋዬታና ማላ ዉርሲካ ዳርሲ ቲርፊሲዲ ኑስ ኢሚዛ ጾሳን ኣቲን ኣማንꬆንታ ሚሻን ኣማኔቶንታ ማላ ኣሳስ ዮታ።
1TI 6:18 ሎኦ ኦꬃና ማላኔ ሎኦ ኦሶን ዱሬታ ጊዳና ማላ፥ ኪያታኔ ሻኪ ኢማናስ ዶሲዛይታ ጊዳና ማላ ኣሳ ኣዛዛ።
1TI 6:19 ሄሳꬆካ ቱሙ ጊዲዳ ዴኦ ዴማና ማላ ቡሮፔ ያና ዎዴስ ኣሳይ ሚኖ ጻጶ ጊዲዛ ሃሮ ባስ ሺሻና።
1TI 6:20 ጺምቶሳ! ኔ ሃዳራ ኤኪዳይሳ ዉርሳ ናጋ፤ ጾሳ ቦንቺሶንታ ሃዳ ዶና ሎምኡሎምኣፌኔ ዎርዶ ኤራቴꬅ ጌቴቲዛ ኣሲ ባፔ ሜꬊ ኬሲዳ ቲሚርቴፌ ሃካ።
1TI 6:21 ኑስ ሄሳ ማላ ኤራቴꬂ ዴስ ጊዛ ኢሲ ኢሲ ኣሳቲ ሄሳꬆ ኦሶን ኣማኖ ኦጌፔ ባሌቲዳ፤ ጾሳ ኪያቴꬂ ኢንቴናራ ጊዶ።
2TI 1:1 ዬሱስ ኪርስቶሳራ ኢሲፌቴꬃን ዲዛ ዴኦ ሂዶታ ቃላ ጊሻስ ዮታና ማላ ጾሳ ሼኔን ዬሱስ ኪርስቶሳ ሃዋሬ ጊዲዳ ጳዉሎሳፔ፥
2TI 1:2 ዶሴቲዳ ታ ና ጺምቶሳስ ኪያቴꬂ፥ ማሮቴꬂኔ ሳሮቴꬂ ጾሳ ኣዋፔ ጎዳ ዬሱስ ኪርስቶሳፔ ኔስ ጊዶ።
2TI 1:3 ፓጬይ ባይንዳ ጋላሲኔ ቃማ ኔ ጊሻስ ዎሳን ቆፍሳሼ ካሴ ኣዋቲ ኦꬂዳ ማላ ጌሻ ዎዚናራ ታ ጎይኒዛ ጾሳ ታ ጋላታይስ።
2TI 1:4 ካሴ ኔ ኣፉንꬃ ቆፓ ኤካዳ ታ ኔና ቤያዳ ኡፋዬታና ላሞታይስ።
2TI 1:5 ቆꬌፔ ቆሞን ጊዶንታ ኔ ኣማኖዛ ታ ቆፓይስ፤ ሄ ኣማኖይካ ኮይሮ ኔ ኣዬይ ኣዪን ሎይዲኒኔ ቃሴካ ኔ ኣዬዪን ኤዎንቄን ዴስ፤ ሃኢ ቃሴ ኔ ቦላ ዲዛይሳካ ታ ኤራዲስ።
2TI 1:6 ሄሳ ጊሻስ ታኒ ታ ኩሼ ኔ ቦላ ዎꬂን ኔ ኤኪዳይሳ ኔ ቦላ ዲዛ ጾሳ ኢሞታ ኔ ዴንꬄꬃና ማላ ታ ኔና ቆፍሳይስ።
2TI 1:7 ጾሲ ኑስ ኑኒ ኑ ሁኤ ሃራናስ ጾሳ ዎልቃ ኤራናሲኔ ሲቄታና ኣያና ኢሚዴስ ኣቲን ባቦ ኣያና ኢሚቤና።
2TI 1:8 ሄሳ ጊሻስ ጎዳ ጊሻስ ማርካታናስ ዎይኮ ጎዳ ጊሻስ ቃሼቲዳ ታናን ዬላቶፓ፤ ጊዶ ኣቲን ጾሳ ዎልቃራ ሚሺራቾ ቃላ ጊሻስ ኔ ታናራ ሜቶ ኤካ።
2TI 1:9 ኑ ኣይኮካ ኦꬂዳ ጊሻስ ጊዶንታ ዲሺን ባ ቆፋ ማላኔ ባ ኪያቴꬃ ማላ ኑና ኣሺዴሲኔ ኑና ባስ ዱማሲዲ ጼይጊዴስ። ሄ ኢዛ ኪያቴꬂ ሜርና ዎዴፔ ካሴ ዬሱስ ኪርስቶሳ ባጋራ ኑስ ኢሜቲዴስ።
2TI 1:10 ሃኢ ቃሴ ኢዚ ሃይቆ ኡባ ꬋይሲዲ ሚሺራቾ ቃላ ባጋራ ኑና ፖኦን ኬሲዳ ኑ ꬋሌ ዬሱስ ኪርስቶሳ ዩሳን ቆንጪዴስ።
2TI 1:11 ታኒካ ሃይሳ ሃ ሚሺራቾ ቃላ ዮቲዛዴ፥ ኪቴቲዳዴኔ ኣስታማሬ ጊዳዳ ሹሜታዲስ።
2TI 1:12 ታኒ ሜቶ ቤኢዛይካ ሄሳ ጊሻሳ፤ ጊዲኮካ ታ ኦና ኣማኒዛኮ ታኒ ታ ኣማኒዛዴ ሻካ ኤሪዛ ጊሻስ ኢዛን ዬላቲኬ። ታ ኢዛስ ኢሚዳ ሃዳራ ሄ ጋላሲያ ጋካናስ ኢዚ ናጋናስ ዳንዳይዛይሳ ታ ሻካ ኤራዲስ።
2TI 1:13 ኔ ታፔ ሲዪዳ ቲሚርቴዛ ዬሱስ ኪርስቶሳራ ኢሲፌቴꬃን ዲዛ ኣማኖኒኔ ሲቆን ሌሚሶ ሂስታ ኦይካ።
2TI 1:14 ኔስ ኢሜቲዳ ሎኦ ሃዳራ ኑናን ዲዛ ጺሎ ኣያናን ናጋ።
2TI 1:15 ኢሲያ ኣዉራጃ ጊዶን ዲዛይቲ ዉሪካ ታና ኣጊዳይሳ ኔ ኤራሳ፤ ፊልጎሲኔ ሄርሞጌኔሲ ታና ኣጊዳ ኣሳራ ዴቴስ።
2TI 1:16 ሄኔሲፎሬ ሶ ኣሳ ጎዳይ ማሮ፤ ኣይስ ጊኮ ኢዚ ታና ዳሮ ዎዴ ሚንꬄꬂዴሲኔ ታኒ ሳንሳላታን ቃሼታ ዲሺን ታና ቤኢዲ ዬላቲቤና።
2TI 1:17 ሃራፔካ ኢዚ ኦሮሜ ዪዳ ዎዴ ታና ኮዪ ኮዪዲ ዴሚዴስ።
2TI 1:18 ዉርሴꬃ ፒርዳ ጋላስ ጎዳይ ኢዛ ፒርዳፌ ኣሾ፤ ኢዚ ታና ኤፌሶኔን ኣይ ማላ ማዲዳኮ ኔ ሎኤꬃ ኤራሳ።
2TI 2:1 ሄሳ ጊሻስ ታ ናዞ ኔኒ ጎዳ ዬሱስ ኪርስቶሳ ኪያቴꬃን ሚና።
2TI 2:2 ዳሮ ማርካታ ሲንꬃን ኔ ታፔ ሲዪዳይሳ ሃራታ ታማርሳናስ ዳንዳይዛይታሲኔ ኣማኔቲዳ ኣሳታስ ሃዳራ ኢማ።
2TI 2:3 ዬሱስ ኪርስቶሳስ ኣማኔቲዳ ሎኦ ዎታዳራ ማላ ታናራ ሜቶ ኤካ።
2TI 2:4 ዎታዳራቴꬃን ኦꬂዛዴይ ባ ሃላቃ ኡፋይሳናስ ዳፌቴስ ኣቲን ሃራ ባና ቃጼꬂዛ ኦሶን ጌሊ ኤሬና።
2TI 2:5 ሄሳꬆካ ጋዴ ዎጺዛዴይ ዎꬃ ዎጋ ናጎንታ ዎጺኮ ጾኖ ኣኪሊሌ ኤኬና።
2TI 2:6 ጎባ ጎሻንቻይ ባ ጎዪ ኬሲዳ ካꬃ ጼራ ሚዛዴ ጊዳናስ ቤሴስ።
2TI 2:7 ታ ኔስ ጊዛይሳ ኔ ዎዚናን ዎꬃ ሲዪኮ ጎዳይ ኔስ ዮኦ ኡባን ኣኬካ ኢማና።
2TI 2:8 ሃይቆፔ ዴንዲዳ ዳዊቴ ዜሬꬅ ጊዲዳ ዬሱስ ኪርስቶሳ ቆፓ፤ ታ ዮቲዛ ሚሺራቾ ቃላይካ ሄሳ።
2TI 2:9 ሄሳ ጋሶን ኢታ ኦꬂዳ ኣሳ ማላ ቃሼታና ጋካናስ ዋዬ ቤያይስ፤ ጊዶ ኣቲን ጾሳ ቃላይ ቃሼቴና።
2TI 2:10 ሄሳ ጊሻስ ኪርስቶሳ ባጋራ ዲዛ ኣቶቴꬂኔ ሜርና ቦንቾ ዴማና ዶሬቲዳይታ ጊሻስ ጋዳ ዉርሳካ ዳንዳያዲስ።
2TI 2:11 «ኑ ኢዛራ ኢሲፌ ሃይቂኮ ኑ ኢዛራ ዴኦን ዳና።
2TI 2:12 ዳንዳያን ሚኒኮ ኑ ኢዛራ ካዎታና። ኑ ኢዛ ካዲኮ ኢዚካ ኑና ካዳና።
2TI 2:13 ኑ ኢዛስ ኣማኔቶንታይታ ጊዲኮ ኢዚ ሜርናስ ኣማኔቲዳ ማላ ዳና። ኢዚ ባርካ ባና ካዳና ዳንዳዬና» ጌቴቲዳ ቃላይ ኣማኔቲዳይሳ።
2TI 2:14 ሃይታ ሃ ዮኦታ ጊሻስ ኣሳ ቆፊሶ ኣጎፋ፤ ኣሳይ ባ ጊዶን ኢሶይ ኢሳራ ቃላ ጋሶን ፓላሜቶንታ ማላ ጾሳ ሱንꬃን ዞራ፤ ሄሳ ማላ ዮኦይ ሲዪዛይታ ሞሬስ።
2TI 2:15 ቱሙ ጾሳ ቃላ ዮቲዛዴ፥ ዬላቾንታ ኦሳንቻኔ ኣሲ ኔ ጊሻስ ሎኦ ማርካቲዛዴ ጊዳዳ ኔናቴꬃ ዉርሳ ጾሳ ሲንꬅ ሺሻናስ ሚና።
2TI 2:16 ጮ ሜላ ዶና ላላቤቴꬃፌ ሃካ፤ ሄሳ ማላ ዮኦን ዋጼቲዳ ኣሳቲ ጾሳፌ ሃኪ ሃኪ ቤቴስ።
2TI 2:17 ኢስታ ቲሚርቴይ ሳኪዲ ፓጾንታ ጌዴ ጉጂ ጉጂ ዳኬቲ ቢዛ ማዱንꬃ ማላ፤ ሄሜኔዎሲኔ ቃሴ ፊልጾሳ ጌቴቲዛይቲ ሄሳ ማላ ቲሚርቴ ታማርዛይታ ጊዶን ዴቴስ።
2TI 2:18 ሄይቲ ቱማቴꬃፌ ሃኪዲ ጮ ሜላ ዋዬቴስ፤ ኢስቲካ፥ «ሃይቆፔ ዴንꬂ ሃይሳፌ ካሴ ሃኒ ኣꬊዴስ» ጊዲ ኢሲ ኢሲ ኣሳ ኣማኖ ሺሪ ዬጌቴስ።
2TI 2:19 ጊዶ ኣቲን፥ «ጎዳይ ባስ ጊዲዛይታ ኤሬስ።» ቃሴካ፥ «ጎዳ ሱንꬅ ጼይጊዛይ ዉሪ ኢታፔ ሃኮ» ጊዛ ማታሜይ ኢዛ ቦላ ዲዛ ላሜቶንታ ጾሳ ዮቻይ ላሜቲቤና።
2TI 2:20 ኢሲ ጊታ ኬꬃን ዎርቃፌኔ ቢራፔ ጻላ ጊዶንታ ሚꬃፌኔ ኡርቃፌ ኦሴቲዳይቲ ዲዛይሳꬆ ሄይታንታፌካ ባጋይቲ ቦንቾ ኦሶስ፥ ባጋይቲ ቃሴ ሂራይሶ ኦሶስ ኤኬቴቴስ።
2TI 2:21 ሄሳ ጊሻስ ኦኒካ ሃይታ ታ ጊዳ ኢታ ዮኦታፔ ባና ጌሺኮ፤ ሄሳዴይ ቦንቾ ኦሶስ ጊዲዛዴኔ ኣንጄቲዳዴ፤ ጎዳ ጎኢዛዴኔ ሎኦ ኦሶስ ጊጌቲዳዴ ጊዳና።
2TI 2:22 ፓንꬃቴꬃ ኢታ ኣሞቴꬃፌ ባቃታ፤ ጌሻ ዎዚናራ ጎዳ ጼይጊዛ ኣሳታራ ጺሎቴꬅ፥ ኣማኖ፥ ሲቆኔ ሳሮቴꬅ ካላ።
2TI 2:23 ጎኣይኔ ሂዶታይ ባይንዳ ኤያታ ፓላማፔ ሃካ፤ ጋሶይካ ሄሳንታ ማላይ ኦሽ ካሌꬂዛይሳ ኔ ኤራሳ።
2TI 2:24 ጎዳ ኦሳንቻይ ኣሳራ ኦዬታናስ ቤሴና፤ ሄሳፌ ቦላራ ኣሳ ኡባ ኣቻን ኪያ፥ ኣስ ታማርሳናስ ዳንዳይዛዴኔ ሚኖ ኣስ ጊዳናስ ቤሴስ።
2TI 2:25 ኢዚ ባናራ ኤቄቲዛ ኣሳታ ኣሽኬቴꬃራ ኦይኪዛዴ ጊዳናስ ቤሴስ፤ ኦኔ ኤሪዛይ ኢስቲ ቱማ ኤራና ማላ ጾሲ ኢስታስ ማሬታናስ ዎዴ ኢማና ዳንዳዬስ።
2TI 2:26 ሄሲካ ኢስቲ ዩሺ ቆፒ ሲሚዲ ኢዛ ሼኔ ኩንꬃና ማላ ኢስታ ዲኢ ኤፊዳ ጻላኤ ናርጻፌ ኢስቲ ኬሲ ኤካና።
2TI 3:1 ጊዶ ኣቲን ዎዴ ዉርሴꬃን ኣስ ሜቲዛ ዎዴይ ያናይሳ ኔ ኤራ።
2TI 3:2 ኣሳይ ባና ዶሲዛዴ ጊዳና፤ ሚሽ ሲቂዛይታ፥ ባናን ጬቄቲዛይታ፥ ኦቶራንቻታ፥ ጫሻንቻታ፥ ባና ዬሊዳይታስ ኣዛዜቶንታይታ፥ ጋላቶንታይታኔ ጌሻቴꬂ ባይንዳይታ፥
2TI 3:3 ሲቆይ ባይንዳይታ፥ ኣቶ ጊ ማሮንታይታ፥ ኣሳ ሱንꬅ ሞሪዛይታ፥ ባርካ ባና ሃሮንታይታ፥ ሜንጼ ኢታታ፥ ሎኦ ሚሽ ዶሶንታይታ፥
2TI 3:4 ካዲዛይታ፥ ናጌቶንታይታ፥ ጮ ሜላ ኦቶሬቴꬃን ኩሚዳይታ፥ ጾሳፌ ኣꬂዲ ሎኦ ዴꬅ ዶሲዛይታ ጊዳና።
2TI 3:5 ኣማኒዛ ኣስ ሚሳታና ሺን ኣማኖስ ዲዛ ዎልቃ ካዳና፤ ሄይታ ማላታፔ ኔ ሃካ።
2TI 3:6 ሄይታንቲ ኢሲ ኢሲ ኬꬄ ካልጺ ጌሊዲ ዳሮ ዴጾ ናጋራኒኔ ዱማ ዱማ ኢታ ኣሞቴꬃ ጋርስ ጌሊዲ ያኔ ሃ ቃጺዛ ኣማኖን ላፋ ማጫሳታ ቃጺ ኦይኬቴስ።
2TI 3:7 ሄይታ ማላ ማጫሳቲ ኡባ ዎዴ ታማሬቴስ ሺን ቱማ ኤሬቴና።
2TI 3:8 ኢያኔሲኔ ኢያንባራሲ ሙሴ ቦላ ዴንዲዳ ማላ ሃይቲካ ኢስታ ቆፋይ ሞሬቲን ባስ ኣማኖፔ ኩንዲዳ ጊሻስ ቱማቴꬅ ኢጼቴስ።
2TI 3:9 ጊዶ ኣቲን ኢስታ ቆፋይ ኩሜና፤ ጋሶይካ ኢያኔሳኔ ኢያንባራሳ ኤያቴꬂ ኣሳስ ቆንጪዳ ማላካ ሃይታ ሃኖይካ ኡባስ ቆንጫና።
2TI 3:10 ኔ ጊዲኮ ታ ቲሚርቴዛ፥ ታ ዱሳ፥ ታ ዋና ቆፋ፥ ታ ኣማኖዛ፥ ታ ዳንዳያ፥ ታ ሲቆዛኔ ታ ሚኖቴꬃ ኡባ ኤራሳ።
2TI 3:11 ታ ጎዴቴꬃኔ ታ ዋዬዛ ኣንጾኪያን፥ ኢቆኒዮኒኔ ሊስቲራንካ ታ ቦላ ጋኪዳይሳ ኡባ ታኒ ዳንዳያን ኤኪዳይሳ ኔ ኤራሳ፤ ጊዲኮካ ጎዳይ ሄሳ ኡባፌ ታና ኣሺዴስ።
2TI 3:12 ቱማፔ ዬሱስ ኪርስቶሳ ጌሻ ዎዚናፔ ኣማኒ ዳና ጊዛይቲ ዉሪካ ጎዴቲዛይታ ጊዳና።
2TI 3:13 ኢታ ጊዲዳ ባሌꬂዛ ኣሳቲ ባስ ባሌቲዲ ኣሳ ባሌꬂሼ ኢታቴꬃ ቦላ ኢታቴꬅ ጉጂ ጉጂ ባና።
2TI 3:14 ኔ ጊዲኮ ካሴ ኔ ታማራዳ ኤሪዳ ኦጌን ሚና፤ ሄሳ ኦናፔ ታማርዳኮ ኔ ኤራሳ።
2TI 3:15 ኔ ጉꬃ ናቴꬃፌ ሃኢ ጋካናስ ዬሱስ ኪርስቶሳ ኣማኖን ኣቶቴꬂ ቤቲዛ ቲሚርቴ ኢሚዛ ጌሻ ማጻፋታ ሎኤꬃ ኤራዳሳ።
2TI 3:16 ጌሻ ማጻፋቲ ዉሪካ ጾሳ ኣያናይ ካሌꬂን ጻፌቲዳይታ፤ ኢስቲካ ኣስ ታማርሳናስ፥ ሃንቃናስ፥ ሱሪሳናስ ቃሴካ ጺሎቴꬃ ኦጌን ካሌꬃናስ ጎኤቴስ።
2TI 3:17 ሄሲካ ጾሳ ኣሲ ሎኦ ኦሶ ኡባስ ቤሲዛዴ ጊዳና ማላሳ።
2TI 4:1 ጾሳ ሲንꬃኒኔ ሄሳꬆካ ፓጻ ዲዛይታ ቦላኔ ሃይቂዳይታ ቦላ ፒርዳናስ ዲዛ ዬሱስ ኪርስቶሳ ሲንꬃን ኢዛ ቆንጬꬃኔ ኢዛ ካዎቴꬃ ቆፋራ ሃይሳ ኔስ ሃዳራ ጋይስ።
2TI 4:2 ቃላ ሳባካ፤ ኔስ ጊጊን ዎይኮ ጊጎንታ ኣጊን ኔኒ ኔ ባጋራ ጊጌታ ኡታ፤ ዳሮ ዳንዳያራ ታማርሶን ኣሳ ሱሪሳ፤ ሃንቃኔ ዞራ።
2TI 4:3 ጋሶይካ ኣሳይ ዉሪ ሱሬ ጊዲዳ ቲሚርቴ ኤኮንታ ኢጻና ዎዴይ ያና፤ ሄሳፌ ቦላራ ኣሳይ ባ ኣሞራ ጋጊዛይሳ ኢስታ ሃይꬂ ሲያና ኮይዛይሳ ጻላ ኢስታስ ዮታና ማላ ባና ታማርሳና ዳሮ ኣስታማሬታ ባ ኣች ሺሻና።
2TI 4:4 ቱማ ሲያናፔ ባ ሃይꬅ ሃራሶ ዛሪዲ ሃይሲኤ ባጋ ሲማና።
2TI 4:5 ኔኒ ጊዲኮ ሃኒዛ ዮኦ ኡባን ሎዱ ጋ፤ ሜቶ ዳንዳያ፤ ሚሺራቾ ቃላ ዮቶ ኔስ ኦሶ ሂስታ፤ ኔ ኦሶዛካ ፖላ።
2TI 4:6 ታ ቃሴ ያርሼታናስ ማታ ኡታዲስ፤ ሃይሳ ሃ ኣላሜዛፔ ሻኬታ ቡሳ ዎዴይ ታስ ጋኪዴስ።
2TI 4:7 ሎኦ ባጼ ታ ባጼታዲስ፤ ታ ዎጻና ዎꬅ ዉርሳዲስ፤ ኣማኖካ ናጋዲስ።
2TI 4:8 ሲንꬃፌ ታስ ኣኪሊሌይ ጊጊ ኡቲዴስ፤ ሄሲካ ጺሎቴꬃ፤ ሄሳካ ቱሙ ፒርዲዛ ጎዳይ ሄ ጋላስ ታስ ኢማና፤ ሄሲካ ታስ ጻላ ጊዶንታ ኢዛ ዩሳ ላሞቲዛይታስ ኡባሲካ ኢማና።
2TI 4:9 ታኮ ኤሌላ ያናስ ኔስ ዳንዳዬቲዳ ማላ ኦꬃ።
2TI 4:10 ዴማሲ ሃይሳ ኣላሜዛ ሲቂዲ ታና ዬጊ ኣጊዲ ታሶሎንቄ ቢዴስ። ቃርቂሲ ጋላቲያ ቢዴስ፤ ቲቶሲ ጌዴ ዳልማጺያ ቢዴስ።
2TI 4:11 ሉቃሲ ጻላ ታናራ ዴስ፤ ማርቆሲ ታና ኦሶን ማዲዛ ጊሻስ ኢዛ ኔናራ ኤካ ያ።
2TI 4:12 ቲቂቆሳ ኤፌሶኔ ዬዳዲስ።
2TI 4:13 ኔ ሃ ያሼ ታ ጺሮኣዳን ካርፑሴ ኣቻን ዎꬂዳ ታ ማቃኔ ማጻፋታ ሃራፔካ ጋልባን ጻፌቲዳ ማጻፋታ ታስ ኤካ ያ።
2TI 4:14 ጻርቂማላ ቆጺዛ ኢስኪንዲሮሲ ታ ቦላ ዳሮ ቆሆ ጋꬂዴስ ሺን ጎዳይ ኢዛስ ኢዛ ኦሶ ማላ ኢማና።
2TI 4:15 ኢዚ ኑ ዮቲዛ ቃላ ኬሂ ኢጺዴስ፤ ኔካ ኢዛፔ ናጌታ።
2TI 4:16 ታና ሞቲዛ ዮኦዛስ ኮይሮ ታና ኣሻና ማርካ ታ ሺሺን ኦኒካ ታና ማዳና ዪቤና፤ ጊዶ ኣቲን ዉሪካ ታና ዬጊዲ ቢዳ። ሄሳካ ኢስታ ቦላ ጾሲ ቆሆ ሂስቲ ቆዶፖ።
2TI 4:17 ጊዶ ኣቲን ቃላ ኪታይ ታ ባጋራ ኩሜꬅ ዮቴታና ማላኔ ዴሬ ኣሳይ ዉሪ ሲያና ማላ ጎዳይ ታ ኣቻን ኤቂዲ ታና ሚንꬂዴስ፤ ጋሞ ዶናፔካ ታና ኣሺዴስ።
2TI 4:18 ጎዳይ ኢታ ዮኦ ኡባፌ ታና ኣሻና፤ ጌዴ ባ ሳሎ ካዎቴꬃስ ታና ሳሮራ ጋꬃና፤ ኢዛስ ሜርናፔ ሜርና ጋካናስ ቦንቾይ ጊዶ። ኣሚን።
2TI 4:19 ጲርሲቂላስ፥ ኣቂላስ፥ ሄኔሲፎሬ ሶ ኣሳሲካ ታ ሳሮካ ጋꬃ።
2TI 4:20 ኤሪስጾሲ ቆሮንቶሴን ኣቲዴስ፤ ጺሮፎሞሲ ሳኬቲዳ ጊሻስ ኢዛ ታ ሚሊጼን ኣጋዲስ።
2TI 4:21 ባልጎይ ጋካናፔ ሲንꬄታዳ ታኮ ሃ ጋካናስ ኔስ ዳንዳዬቲዳ ማላ ኦꬃ። ኤዉጉሎሲ፥ ጱዴሲ፥ ቃሴካ ሊኖሲ፥ ቂላዉዲያይኔ ኣማኒዛይቲ ዉሪካ ኔና ሳሮ ሳሮ ጊዳ።
2TI 4:22 ጎዳይ ኔናራ ጊዶ፤ ጎዳ ኪያቴꬂ ኢንቴናራ ጊዶ።
TIT 1:1 ጾሳስ ዶሬቲዳይታ ኣማኖኒኔ ቱሙ ኣያናን ካሌꬂዛ ቱማ ኤራቴꬃን ዲቻና ማላ ጾሳ ኣይሌኔ ዬሱስ ኪርስቶሳ ሃዋሬ ጊዲዳ ጳዉሎሳፔ፥
TIT 1:2 ኢዛ ኣማኖይኔ ኤራቴꬃይ ካሴፔ ኦይኪዲ ዎርዶቶንታ ጎዳይ ዳሮ ዎዴፔ ካሴ ባ ኢሚዳ ሜርና ዴኦ ሂዶታ ማላ።
TIT 1:3 ኢዚ ካሴ ጊዳ ዎዴይ ጋኪዳ ማላ ኑና ኣሺዳ ጾሳ ኣዛዞን ታስ ሳባካናስ ኢሜቲዳ ሃራ ባጋራ ጾሲ ባ ቃላ ቆንጪሲዴስ።
TIT 1:4 ኑስ ኮꬄ ጊዲዳ ኣማኖ ኢሲፌቴꬃን፥ ኣማኖን ታስ ቱሙ ና ጊዲዳ ቲቶሳስ፥ «ጾሳ ኣዋፔኔ ኑና ኣሺዳ ዬሱስ ኪርስቶሳፔ ኪያቴꬂኔ ሳሮቴꬂ ኔስ ጊዶ» ጊዴስ።
TIT 1:5 ታ ኔና ቃርጼሴን ኣጊዳይ ቡሮፔ ጊጋና ቤሲዛ ዳሮ ሚሺ ዲዛ ጊሻስ ኔ ጊጊሳናሲኔ ታ ኔና ኣዛዚዳ ማላ ካታማይ ዲዛሶን ዎሳ ኬꬃ ጪማታ ኔ ዶራናሳ።
TIT 1:6 ጪማቴꬃን ዶሬታናይቲ ኢስታ ቦላ ዎሶይ ባይንዳይታ፥ ኢሲ ማቺ ኣዚናታ፥ ናይቲ ኣማኒዛይታኔ ዋዪሶንታይታ ዎይኮ ኣዛዜቲዛ ናይታ ኣዋታ ጊዴቶ።
TIT 1:7 ዎሳ ኬꬃ ጪማይ ጾሳስ ኦꬃና ሃዳራ ኤኪዳዴ ጊዲዳ ማላ ኢዛ ቦላ ዎሶይ ባይንዳዴ ጊዳናስ ቤሴስ፤ ሄሲካ ጬቄቲዛዴ፥ ጉꬃ ሚሻን ዪሎቲዛዴኔ ማꬆቲዛዴ፥ ኡሻንቻኔ ኢዛስ ቤሶንታ ኦጌራ ጎኣ ጊዲዳዝ ጎዲ ኤኪ ቢዛዴ ጊዳናስ ቤሴና።
TIT 1:8 ሄሳፌ ቦላራ ኢዚ ኢማꬅ ሞኪዛዴ፥ ሎኦ ኦሶ ዶሲዛዴ፥ ባርካ ባና ሃሪዛዴ፥ ሱሬ ኣስ፥ ጺሎኔ ባስ ናጌቲዛዴ ጊዳናስ ቤሴስ።
TIT 1:9 ሃራ ኣሳታ ሎኦ ቲሚርቴን ሚንꬄꬂዛዴኔ ሄ ሎኦ ቲሚርቴዛ ኢጺዛይታ ሃንቃናስ ባ ታማርዳ ማላ ቃላን ሚኒዛዴ ጊዳናስ ቤሴስ።
TIT 1:10 ዋዪሲዛይቲኔ ዶናን ጻላ ባሌꬂዛይቲ ዳሮቲ ዴቴስ፤ ሃራፔካ ሄይቲ ቃጻሬቲዳ ኣይሁዳ ኣሳታፔ ኣማኒዳ ኣሳታ ባጋታ።
TIT 1:11 ሄይታንታ ጮኡ ሂስቴꬅ ቤሴስ፤ ጋሶይካ ኢስቲ ቤሶንታ ኦጌራ ባስ ጎኣ ዴማናስ ቤሶንታ ቲሚርቴ ታማርሶን ኬꬃ ኣሳ ዉርሲ ሞሮን ዴቴስ።
TIT 1:12 ኢስታ ናቤታፔ ኢሳዴይ ኢስታ ጊሻስ ሃሳይሼ፥ «ቃርጼሴ ኣሳይ ኡባ ዎዴ ዎርዳንቻታ፥ ኢታ ዶኣታ፥ ጋንጃማታኔ ኣዛላታ» ጊዴስ።
TIT 1:13 ሄ ማርካቴꬃይ ቱማ፤ ሄሳ ጊሻስ ኔ ኢስታ ሎኤꬃ ሃንቄታ፤ ጋሶይካ ኢስታስ ቱሙ ኣማኖይ ዳና ማላኔ፥
TIT 1:14 ኣይሁዳታ ሃይሲኤ ዎይኮ ቱሙ ዮኦፔ ሃኪዳ ኣሳታ ኣዛዞ ኢስቲ ሲዮንታ ማላሳ።
TIT 1:15 ጌሻታስ ሚሺ ዉሪካ ጌሻ ሺን ቱናታሲኔ ኣማኖንታይታስ ጊዲኮ ዉሪካ ቱና፤ ሃራፔካ ኢስታ ቆፋይ ዉሪካ ቱኒዴስ።
TIT 1:16 ኢስቲ ባና ኑኒ ጾስ ኤሮስ ጌቴስ ሺን ባ ሃኖቴꬃን ጊዲኮ ካዴቴስ፤ ኢስቲ ሃራሲዛይታ፥ ኣዛዜቶንታይታኔ ሎኦ ኦሶስ ቤሶንታይታ።
TIT 2:1 ኔኒ ጊዲኮ ኣሳ ቱሙ ጊዲዳዝ ታማርሳ።
TIT 2:2 ጪማ ኣሳይ ዎዚናማ፥ ቦንቼቲዳይታ፥ ባና ባርካ ሃሪዛይታ፥ ኣማኖኒኔ ሲቆን፥ ዳንዳያንካ ሎኦ ጊዳና ማላ ኔ ኢስታ ዞራ።
TIT 2:3 ሄሳꬆካ ጪማ ማጫሳቲ ባ ዲዛ ዱሳን ቦንቾራ ዲዛይታኔ ሎኦ ሃኖቴꬅ ኣሳ ታማርሲዛይታ ጊዴቶ ኣቲን ኣሳ ሱንꬅ ኢሲዛይታ ዎይኮ ዎይኔ ጫጄ ኡሻ ሱኬን ዋጼቲዳይታ ጊዶንታ ማላ ኢስታ ታማርሳ።
TIT 2:4 ሄሳꬆ ኦꬂኮ ናቴꬃ ማጫሳቲ ባ ኣዚናታኔ ባ ናይታ ዶሳና ማላ ታማርሳናስ ዳንዳዬቴስ።
TIT 2:5 ጾሳ ቃላይ ኦና ኣቻንካ ጫዬቶንታ ማላ ኢስቲ ባርካ ባና ሃሪዛይታኔ ጌሻታ፥ ኬꬃ ጊዶን ኢስታ ኦሶይ ኦይኪዳይታኔ ኣሳስ ኪያታ፥ ባ ኣዚናታስ ኣዛዜቲዛይታ ጊዳና ማላ ጪማ ማጫሳቲ ኢስታ ታማርሴቶ።
TIT 2:6 ሄሳꬆካ ዬላጋ ኣቱማሳይ ባርካ ባና ሃራና ማላ ኔ ኢስታ ዞራ።
TIT 2:7 ኣይ ሃኖንካ ኔ ኣሳስ ሎኦ ሌሚሶ ጊዳ፤ ኔኒ ኣሳ ታማርሲዛ ቲሚርቴዛ ኔኒካ ዎዚናፔ ታማርሲዛዴኔ ናጊዛዴ ጊዳ።
TIT 2:8 ኑ ጊሻስ ኢታ ሃሳይዛ ኣሳይ ሃሳያናስ ኢታ ዴሞንታ ኣጊዲ ዬላታና ማላ ኔ ሃሳይዛ ሃሳያ ጊዶን ቦርሶ ዮኦይ ዶፖ።
TIT 2:9 ኣይሌቲ ኣዛንካ ባ ጎዳታስ ሃሬታና ማላኔ ኡፋይሳና ማላ፤ ቃሴካ ኣዉቴ ዛሮንታ ማላ ታማርሳ።
TIT 2:10 ሃኒዛዛን ኡባን ኑና ኣሺዳ ጾሳ ቲሚርቴይ ዶሴታና ማላ ኢስቲ ሎኦ ማርካቴꬅ ቤሳና ማላ ባ ጎዳታ ሚሽ ካይሶቶፔቶ።
TIT 2:11 ኣሳስ ኢዛፔ ማሮይ ቤቲዛ ጾሳ ኪያቴꬂ ኣሳ ኡባስ ቆንጪዴስ።
TIT 2:12 ሄ ኪያቴꬂካ ኑኒ ናጋራን ዱሲኔ ሃ ኣላሜ ኣሞቴꬃ ካዲዲ ሃይሳ ሃ ዎዴዛን ኑርካ ኑና ሃሪዲኔ ጺሎቴꬃን ቱሙ ኣያና ዱስ ዳናይሳ ኑና ታማርሴስ።
TIT 2:13 ሄሲካ ኑስ ኣንጄቲዳ ሂዶታ ጊዲዳ ዎጋ ጾሳኔ ኑና ኣሺዳ ዬሱስ ኪርስቶሳ ቦንቾይ ቆንጫናይሳ ናጋናሳ።
TIT 2:14 ኢዚካ ኑና ኢታቴꬃፌ ዎዛናሲኔ ሎኦ ኦꬃናስ ሚኒዛ ባ ዴሬ ባስ ዶራናስ ባና ኑስ ኣꬂ ኢሚዴስ።
TIT 2:15 ሄሳ ጊሻስ ኔ ታማርሳናይቲ ሄይታንታ፤ ሄሳካ ኔ ኩሜꬃ ጎዳቴꬃራ ዞራኔ ሃንቃ፤ ኔና ኦኒካ ሌቆፎ።
TIT 3:1 ኣሳይ ዴሬ ኣይሲዛይታስ ሃሬታና ማላኔ ሎኦ ጊዲዳ ሚሽ ዉርሲ ኦꬃናስ ጊጋ ጊዳና ማላ ኣሳ ቆፍሳ።
TIT 3:2 ቃሴካ ኦኒካ ኣሳ ቦላ ኢታ ሃሳዮንታ ማላኔ ሎኦ ኣሳ ጊዳና ማላ ኣሳ ኡባስ ኩሜꬃ ዎዚናፔ ባ ኣሽኬቴꬅ ቤሳና ማላ ኡባ ቆፍሳ።
TIT 3:3 ኑኒካ ካሴ ቆፋይ ባይንዳይታ፥ ኣዛዜቶንታይታ፥ ባሌቲዛይታ፥ ዱማ ዱማ ኣሞኒኔ ሎኦ ዱሳስ ኣይሌቴꬃን ሃሬቲዛይታ፤ ኣሳራኔ ኑርካ ኑ ጋርሳንካ ኦዬቲሼ ኢታቴꬃኒኔ ሚቃይኔቴꬃን ዶስ።
TIT 3:4 ጊዶ ኣቲን ኑና ኣሺዳ ጾሳ ኪያቴꬂኔ ኢዛ ሲቆይ ቆንጪዳ ዎዴ ኑ ኦꬂዳ ጺሎቴꬃን ጊዶንታ ዲሺን ኢዛ ማሮቴꬃ ዳሮን ኣቲዶስ፤ ኢዚ ኑና ኣሺዳይ ናምኣንꬆ ዬሌቴꬅ ጊዲዳ ሜቻኒኔ ጺሎ ኣያናን ኦራጼቴꬃና።
TIT 3:6 ሄሳካ ጺሎ ኣያናይ ኑ ቦላ ኑ ጎዳ ጾሲ ኑና ኣሺዳ ዬሱስ ኪርስቶሳ ባጋራ ዳርሲ ጉሲዴስ።
TIT 3:7 ሄሲካ ኑ ኢዛ ኪያቴꬃን ጺሊዲ ሜርና ዴኦ ሂዶታ ኦይኪዲ ላቲዛይታ ጊዳናሳ።
TIT 3:8 ሄሲካ ኣማኔቲዳ ቃላ፤ ጾሳ ኣማኒዛይቲ ሎኦ ኦሶስ ባና ኣꬂ ኢማና ማላ ሃይሳ ዉርሳ ኔ ሎኤꬃ ዮታና ማላ ታ ኮያይስ፤ ሄሲካ ሎኦኔ ኣይ ኣሲካ ኮይዛዛ።
TIT 3:9 ቃሴካ ሃዳ ፓላማፔኔ ኣሳይ ባ ቆሞ ቆዲዛዛፔ፥ ማርሼፌኔ ዎጋ ጊሻስ ዴንዲዛ ኦሻፌ ኔ ሃካ፤ ሄይታንቲ ጎኣይ ባይንዳ ፓꬆንታ ዮኦ።
TIT 3:10 ኣሳ ጊዶን ሻኬቴꬅ ሜꬊዛ ኣሲ ኢሲቶ ናምኡቶ ኔ ዞሪን ኤኮንታ ኢጺኮ ኢዛዴራ ኔስ ኢሲፌቴꬂ ዶፖ።
TIT 3:11 ሄሳ ማላ ኣሲ ባሌቲዳ ናጋራንቻ ኣሳ፤ ኢዛዴይ ባርካ ባ ቦላ ፒርዲዳይሳ ኔ ኤራ።
TIT 3:12 ኣርጺሞኔ ዎይኮ ቲቂቆሳ ታ ኔኮ ኪቲኮ ኔ ታኮ ኒቆጶሊዮኔ ያናስ ኔስ ዳንዳዬቲዛዝ ዉርሳ ኦꬃ፤ ታኒ ሃ ላይꬃ ባልጎ ሄን ኣꬃና ጋዳ ቃቻዲስ።
TIT 3:13 ዎጋ ኤሪዛ ዜማሲኔ ኣጲሎሲ ቢሺን ኢስታስ ኮሺዛዝ ዉርሳ ኩንꬃ ማዳ።
TIT 3:14 ኑ ባጋታስ ሃቺስ ሃቺስ ኢስታ ኮሺዛዝ ኢስቲ ዴማና ማላኔ ኢስታ ዴꬃይ ጎኣይ ባይንዳዝ ጊዶንታ ማላ ኢስቲ ሎኦ ኦሶ ኦꬂ ሚናና ማላ ታማራናስ ኮሼስ።
TIT 3:15 ታናራ ዲዛይቲ ኢንቴና ሳሮ ጌቴስ፤ ኣማኖ ጋሶን ኑና ሲቂዛይታ ኡባ ሳሮ ጊቴ፤ ጾሳ ኪያቴꬂ ኢንቴናራ ጊዶ።
PHM 1:1 ዬሱስ ኪርስቶሳ ጊሻስ ቃሼቲዳ ታፔ ጳዉሎሳፔኔ ኑ ኢሻ ጺምቶሳፔ ኑ ሲቆ ኢሻ ጊዲዲ ኑናራ ኢሲፌ ኦꬂዛ ፒልሞናስ፥
PHM 1:2 ኔ ኬꬃን ሺቂዛ ኣማኒዛ ኣሳሲኔ ኑ ሚቼዮ ኣምፒብያስ ቃሴካ ኑናራ ኢሲፌ ኪርስቶሳ ዎታዳራ ጊዲዳ ኣርኪጳሴስ፥
PHM 1:3 ኑ ኣዋ ጾሳፌ ኑ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።
PHM 1:4 ታኒ ታ ዎሳን ኔና ቆፓሼ ኡባ ዎዴ ጾሳ ጋላታይስ።
PHM 1:5 ጋሶይካ ኔ ጾሳ ኣሳ ሲቂዛይሳኔ ጎዳ ዬሱስ ኪርስቶሳን ኔ ኣማኒዛይሳ ታ ሲያዲስ።
PHM 1:6 ኑኒ ኪርስቶሳስ ጊዲዳይሳኔ ኑስ ዲዛ ሎኦ ዮኦይ ዉሪ ቆንጬን ኤሬታና ማላ ኔኒካ ኔ ኣማኖ ሃራ ኣሳስ ቤሳና ማላ ታ ኔስ ሚና ዎሳይስ።
PHM 1:7 ታ ኢሻዞ! ኔ ሃኖን ጾሳ ኣሳ ዎዚናይ ኦራጺዳ ጊሻስ ኔ ሲቆይ ታ ዎዚና ኬሂ ሚንꬂዴስ።
PHM 1:8 ሄሳ ጊሻስ ኔ ኦꬃናስ ቤሲዛይሳ ኦꬃና ማላ ኔና ኣዛዛናስ ታስ ኪርስቶሳን ጻላቴꬂ ዴሲኮሺን።
PHM 1:9 ጊዲኮካ ታ ኔና ኣዛዛናፔ ሲቆራ ዎሳይስ፤ ጋሶይካ ታኒ ዬሱስ ኪርስቶሳ ጊሻስ ቃሼታዳ ቃሾ ኬꬃን ዲዛ ጳዉሎሳ።
PHM 1:10 ታ ኔና ዎሲዛይ ታኒ ቃሾ ኬꬃን ዳሼ ዬሱስ ኪርስቶሳን ዬሊዳ ና ኣናስሞሳ ጊሻሳ።
PHM 1:11 ኣናስሞሲ ሃይሳፌ ካሴ ኔና ጎኢቤና ሺን ሃኢ ጊዲኮ ኢዚ ኔናካ ታናካ ጎኢዛዴ።
PHM 1:12 ታ ሃኢ ኢዛ ኔኮ ዛራ ዬዳዲስ፤ ታኒ ኔኮ ዬዲዛይ ኢዛ ጊዶንታ ታ ዎዚና ኔኮ ዛራ ዬዲዛ ማላ ቆዳይስ።
PHM 1:13 ሚሺራቾ ቃላ ጋሶን ታ ሃን ቃሼታ ዲሺን ኔ ታና ኦꬃ ማዳናይሳ ኢዚ ታናራ ዴኢዳኮ ታና ኡፋይሴስ።
PHM 1:14 ጊዶ ኣቲን ኔ ሎኦ ኦሶይ ኔ ዶሳንፔ ኣቲን ዎልቃራ ጊዶንታ ማላ ጋዳ ኔና ኦይቾንታ ኣይኮካ ኦꬃና ኮያቤኬ።
PHM 1:15 ኣናስሞሲ ሃኖ ጋካናስ ኔፔ ጉꬃ ዎዴ ሻኬቲኮካ ኦኔ ኤሪዛይ ሃይሳፌ ጉዬ ኡባ ዎዴ ኔናራ ዳና ዳንዳዬስ።
PHM 1:16 ሃይሳፌ ጉዬ ኢዚ ኔናራ ዳናይ ኣይሌ ማላ ጊዶንታ ኣይሌፌ ኣꬊ ኔስ ኣሾ ኢሻ ማላ ጊዳና፤ ኢዚ ታስ ዶሴቲዳ ኢሻ፤ ጊዶ ኣቲን ኢዚ ኔና ኦꬂ ጎኣና ኣስ ጊዲዳ ጊሻሲኔ ኢዚ ኔስ ኪርስቶሳ ባጋራ ኢሻ ጊዲዳ ጊሻስ ኔስ ኬሂ ዶሴቲዳዴ ጊዳና።
PHM 1:17 ኑስ ዲዛ ኢሲፌቴꬃ ጋሶን ኔ ታና ኔስ ኢሻ ማላ ቆዲዛ ጊዲኮ ታና ኔ ሞካ ኤኪዛ ማላ ኢዛካ ሞካ ኤካ።
PHM 1:18 ኢዚ ኔ ቦላ ጋꬂዳ ቆሆይ ዲኮ ዎይኮ ኔ ኣጮይ ኢዛ ቦላ ዲኮ ኢዛ ኣጮዛ ታ ቦላ ቆዳ።
PHM 1:19 ሄኮ ታ ጳዉሎሲ፥ «ኢዛ ኣጮዛ ታ ኔስ ቃንጻና» ጋዳ ታ ኩሼራ ጻፋዲስ፤ ጊዲኮካ ኔ ኪርስቶሳ ኣማኒዳይ ታ ባጋራ ጊዲዳ ጊሻስ ሃራይ ኣቶሺን ኔካ ታስ ቃንጻና ኣጮይ ዲዛዴ ጊዲዳይሳ ታ ኔና ኤሪሳናስ ኮሼና።
PHM 1:20 ሂኣ ታ ኢሻዞ! ሄሳ ሎኦ ኦሶ ኔ ታስ ኦꬃና ማላ ጎዳ ሱንꬃን ኪርስቶሳ ጊሻስ ጋዳ ኔ ታ ዎዚና ሼምፒሳና ማላ ታ ኔና ዎሳይስ።
PHM 1:21 ታ ኔስ ሃይሳ ጻፊዳይ ኔ ታስ ኣዛዜታናይሳ ኣማናዳኮ! ታ ኔና ኦይቺዳይሳፌ ኔ ኣꬃ ኦꬃናይሳ ታ ኤራይስ።
PHM 1:22 ጾሲ ኢንቴ ዎሳ ሲዪዲ ታ ኢንቴኮ ባና ማላ ታስ ሂዶታይ ዲዛ ጊሻስ ታ ባዳ ኢንቴኮን ሼምፓናሶ ሃያና ታስ ጊጊሳ።
PHM 1:23 ዬሱስ ኪርስቶሳ ጋሶን ታናራ ቃሼቲዳ ኤጳፊራይ ኔና ሳሮ ጌስ።
PHM 1:24 ሄሳꬆካ ታናራ ኦꬂዛይቲ ማርቆሲ ኣርሲጺሮኮሲ፥ ዴማሲኔ ሉቃሲ ኔና ሳሮ ጌቴስ።
PHM 1:25 ጎዳ ዬሱስ ኪርስቶሳ ኪያቴꬂ ኢንቴናራ ጊዶ።
HEB 1:1 ቤኒ ዎዴፔ ኦይኪዲ ጾሲ ዱማ ዱማ ኦጌራ ናቤታ ባጋራ ካሴ ኑ ኣዋታስ ዳሮ ዎዴ ዮቲዴስ።
HEB 1:2 ቃሴ ሃይሳ ዉርሴꬃ ዎዴ ቦላ ዉርሲ ላቲሲዳዴኔ ሃ ኣላሜዛ ሜꬊዳ ባ ናዛ ባጋራ ኑስ ዮቲዴስ።
HEB 1:3 ኢዚካ ጾሳ ቦንቾ ቤሲዛዴኔ ጾሳ ጾሳቴꬃስ ሎኦ ሌሚሶ ጊዲዲ ባ ዎልቃማ ቃላን ዉርሲካ ሺሺ ኦይኪዴስ፤ ኢዚ ኣሳ ናጋራፔ ጌሺዳፔ ጉዬ ሳሎን ቦንቾ ጾሳ ኡሻቻን ኡቲዴስ።
HEB 1:4 ሄሳ ጊሻስ ኢዛስ ኢሜቲዳ ሱንꬃይ ኪታንቻታ ሱንꬃፌ ኣꬊዛይሳ ማላ ኢዚካ ኪታንቻታፔ ኬሂ ኣꬌስ።
HEB 1:5 ጾሲ ኪታንቻፌ፥ «ኔኒ ታ ና፤ ታ ኔና ሃች ዬላዲስ። ዎይኮ ታ ኢዛስ ኣዋ ጊዳና፤ ኢዚካ ታ ና ጊዳና» ኦናስ ጊዴ?
HEB 1:6 ቃሴካ ጾሲ ባ ባይራ ናዛ ዱጌ ሃ ቢታ ቦላ ዬዲሼ፥ «ጾሳ ኪታንቻቲ ዉሪካ ኢዛስ ጎይኔቶ» ጊዴስ።
HEB 1:7 ኪታንቻታ ጊሻስ ሃሳይሼ ቃሴ፥ «ኪታንቻታ ኣያናታ፤ ባ ኦሳንቻታካ ታማ ላጮ ኬሴስ» ጊዴስ።
HEB 1:8 ናዛ ጊሻስ ቃሴ፥ «ጎዶ! ኔ ዙፋኔይ ሜርናፔ ሜርና ጋካናስ ሚኒ ዳና፤ ኔኒ ኔ ካዎቴꬃ ሊኬ ካሌꬃሳ።
HEB 1:9 ኔኒ ጺሎቴꬅ ዶሳዳሳ፤ ማካላካ ኢጻሳ፤ ሄሳ ጊሻስ ጾሲ ኔ ጎዳይ ኔና ኔ ላጌታፔ ቦላ ኬሲዴስ፤ ኔና ኡፋይሳ ዛይቴ ቲይዴስ» ጌስ።
HEB 1:10 ቃሴ፥ «ጎዶ! ኮይሮ ኔኒ ቢታ ሜꬋዳሳ፤ ሳሎቲካ ኔ ኩሼን ኦሴቲዳ።
HEB 1:11 ኢስቲ ꬋያና፤ ኔኒ ጊዲኮ ሚና ዳና፤ ኢስቲ ዉሪካ ማይኦ ማላ ጋልኣና።
HEB 1:12 ኔኒ ኢስታ ማይኦ ማላ ቃላምኣና፤ ኢስቲካ ማይኦ ማላ ላሜታና፤ ኔ ጊዲኮ ኣይዴካ ኔኒ ኔና፤ ኔ ዱሳስ ዉርሴꬂ ዴና» ጌስ።
HEB 1:13 ጾሲ ኪታንቻታፔ፥ «ታኒ ኔ ሞርኬታ ኔ ቶሆ ጋርሳን ዬꬊሳና ጋካናስ ኔ ታ ኡሻቻን ኡታ» ኦና ጊዴ?
HEB 1:14 ኪታንቻቲ ዉሪካ ኣቶቴꬅ ላታና ኣሳታ ኦꬃናስ ጾሳፌ ኪቴቲዛ ኦሳንቻ ኣያና ጊዴቴኔ?
HEB 2:1 ሄሳ ጊሻስ ኑኒ ሲዪዳ ቃላፔ ባሌቲዲ ኩንዶንታ ማላ ኑ ሲዪዳ ቃላ ሎኤꬂ ናጋናስ ቤሴስ።
HEB 2:2 ኣዛስ ጊኮ ካሴ ኪታንቻታ ባጋራ ዮቴቲዳ ቃላይ ቱሙ ጊዲዳ ሄ ቃላ ዬꬊ ኣꬊዳይ ባስ ቤሲዛ ቂጻቴ ኤኬስ።
HEB 2:3 ኑ ቃሴ ሄሳ ማላ ጊታ ማሮቴꬅ ጮ ሌፒ ሂስቲኮ ዋኒ ኣታኔ? ሃይሲ ማሮቴꬃይ ኮይሮ ጎዳ ባጋራ ኑስ ዮቴቲዴስ፤ ኢዛፔ ሲዪዳይቲካ ኑስ ጌሺ ዮቲዳ።
HEB 2:4 ጾሲ ቃሴካ ማላታታ፥ ማላሊሲዛ ሚሻታ፥ ዱማ ዱማ ማላታታ ኦሶኒኔ ባ ሼኔ ማላ ኢሚዳ ጺሎ ኣያና ኢሞታታ ባጋራ ኢስታ ማርካቴꬃ ሚንꬂዴስ።
HEB 2:5 ጾሲ ሃይሳ ኑ ኢዛ ጊሻስ ሃሳይዛ ቡሮ ያና ኣላሜዛ ኪታንቻስ ሃሪሲቤና።
HEB 2:6 ጊዶ ኣቲን ጌሻ ማጻፋይ ሃራሶን፥ «ኔ ኢዛስ ዩሻ ቆፓናስ ኣሲ ኣዜ? ኢዛስ ኔ ቆፓናስ ኣሳ ናይ ኢዚ ኣዜ?
HEB 2:7 ኔ ኢዛ ኪታንቻታፔ ጉꬃራ ጉꬃዳሳ። ቦንቾ ዛዉዴኔ ጋላታ ኢዛ ሁኤን ዎꬃዳሳ። ኔኒ ኢዛ ኔ ኩሼ ኦሶታ ቦላ ሹማዳሳ።
HEB 2:8 ኔ ዉርሳካ ኢዛ ቶሆ ጋርሳን ሃሪሳዳሳ፤ ጾሲ ኡባካ ኢዛፔ ጋርሳራ ኢዛስ ሃሪሲሺን ኣቲዳይ ኣይ ሚሺካ ዴና። ሃኢ ቃሴ ዉሪካ ኢዛስ ሃሬቲሺን ኑ ቤዪቤኮ» ጊዴስ።
HEB 2:9 ጊዶ ኣቲን ጾሳ ኪያቴꬃን ኣሳ ኡባ ጊሻስ ሃይቃናስ ኪታንቻታፔ ጉꬃ ዎዴ ጉጺዳ ዬሱሲ ዋዬ ሃይቆ ሃይቂዲ ሃኢ ቦንቾኔ ጋላታ ዛዉዴ ባ ሁኤን ዎꬂዳይሳ ኑ ቤዮስ።
HEB 2:10 ሃኒዛይ ዉሪካ ኢዛፔ ኢዛስ ሜꬌቲዳ ጾሲ ዳሮ ናይታ ቦንቾስ ኤፋናስ ኢስታ ማሮቴꬃስ ሁኤ ጊዲዳ ዬሱሲ ዋዬን ፖላናስ ኮሺዛዝ ጊዲዴስ።
HEB 2:11 ኣስ ጌሺዛይኔ ኢዛን ጌይዛ ኣሳይ ሄይቲ ኢሲ ኬꬃ ኣሳታ። ሄሳ ጊሻስ ዬሱሲ ኢስታ፥ «ታ ኢሻቶ» ጊ ጼይጋናስ ዬላቴና።
HEB 2:12 «ታኒ ኔ ሱንꬃን ታ ኢሻታስ ዮታና ሺቂዳ ዴሬዛ ሲንꬃን ኔና ጋላቲዛ ማዛሙሬ ታ ዬጻና።»
HEB 2:13 ሄሳꬆካ፥ «ታ ኢዛን ኣማኔታና» ቃሴካ፥ «ታኒኔ ታስ ጾሲ ኢሚዳ ናይቲ ኑ ሃን ዶስ» ጌስ ጌሻ ማጻፋይ።
HEB 2:14 ናይታስ ኣሾይኔ ሱꬂ ዲዛ ማላ ኢዚካ ኢስታ ማላ ኣሳ፤ ሄሲካ ሃይቆ ቦላ ኢዛስ ዎልቃይ ዲዛ ዳቡሎሳ ኢዚ ባ ሃይቆ ዎልቃን ዛራናሳ።
HEB 2:15 ሄሳꬆካ ባ ዲዛ ዎዴ ኡባን ሃይቆስ ባቦን ሃሬቲ ቃሼቲዳይታ ሃይቆፔ ዎዛናሳ።
HEB 2:16 ኢዚ ሃ ዪዳይ ኪታንቻታ ማዳናስ ጊዶንታ ኣብራሃሜ ዜሬꬃታ ማዳናስ ዪዴስ።
HEB 2:17 ሄሳ ጊሻስ ኡባ ባጋራ ኢዚ ባ ኢሻታ ሚሳታናስ ቤሲዛዴ ጊዲዴስ፤ ኢዚ ሄሳ ኦꬂዳይ ማሪዛዴኔ ኣማኔቲዳ ዋና ቄሴ ሃላቃ ጊዲዲ ጾሳስ ኦꬃናሲኔ ዴሬዛ ናጋራፔ ማራናሳ።
HEB 2:18 ኢዚ ባ ሁኤን ፓጬቲዲ ሜቶ ኤኪዳ ጊሻስ ፓጬቲዛይታ ማዳናስ ዳንዳዬስ።
HEB 3:1 ሄሳ ጊሻስ ሳሎፔ ጼይሲ ኢንቴና ጋኪን ኣማኒዛ ኑ ኢሻቶ! ኑ ኣማኖስ ሃዋሬኔ ቄሴታ ሃላቃ ጊዲዳ ዬሱሳ ቆፒቴ።
HEB 3:2 ሙሴይ ጾሳ ኬꬅ ኡባ ቦላ ኣማኔቲዳዴ ጊዲዳ ማላ ዬሱሲካ ባና ሹሚዳዴስ ኣማኔቲዳዴ።
HEB 3:3 ኬꬄ ኬጺዳዴስ ኬꬃፌ ቦላራ ቦንቾይ ዲዛ ማላ ዬሱሳስካ ሙሴፔ ኣꬊዛ ቦንቾይ ቤሲዛዴ ጊዳናስ ቤሴስ።
HEB 3:4 ኬꬄ ኡባሲካ ኬጺዳዴይ ዴስ፤ ጊዶ ኣቲን ዉርሲካ ኦꬂዳይ ጾሳ።
HEB 3:5 ሙሴይ ቲንቢቴ ማርካቲሼ ጾሳ ኬꬅ ኡባ ቦላ ኢሲ ኣማኔቲዳ ኦሳንቻ ማላ ጊዲ ዴኢዴስ።
HEB 3:6 ኪርስቶሲ ጊዲኮ ጾሳ ኬꬃ ቦላ ኣማኔቲዳ ና ማላ። ኑኒካ ኢዛ ቦላ ኣማኔቲዛ ኡፋይሳይኔ ጬቄቲዛ ሂዶታ ሎኤꬂ ኦይኪኮ ኑ ኢዛስ ዱሳ ኬꬃ።
HEB 3:7 ሄሳ ጊሻስ ጺሎ ኣያናይ ጊዛ ማላ፥ «ኢንቴ ሃች ኢዛ ቃላ ሲዪኮ
HEB 3:8 ባዞ ቢታን ኢንቴ ታና ፓጪዳ ዎዴ ማካሊዳይሳꬆ ኢንቴ ዎዚና ሙሚሶፒቴ።
HEB 3:9 ኢንቴ ኣዋቲ ካሴ ሄን ታና ፓጪዳኔ ታናራ ኤቄቲዳ። ታ ኦꬂዳይሳ ዉርሲ ኦይዱ ታሙ ላይꬅ ጋካናስ ቤኢዳ።
HEB 3:10 ሄ ዎዴ ዬሌታታ ቦላ ታ ሃንቄቲን ኢስታ ዎዚናይ ኡባ ዎዴ ባሌቴስ፤ ኢስቲ ታ ኦጌ ኤሪቤቴና።
HEB 3:11 ቃሴ፥ ‹ታ ኢስታስ ኢሚዛ ሼምፖሶ ኢስቲ ሙሌካ ጌሌቴና!› ጋዳ ታኒ ታ ሃንቆን ጫቃዲስ» ጌስ።
HEB 3:12 ታ ኢሻቶ! ኢንቴፌ ኦኒካ ዴኦ ጾሳፌ ሃራሶ ኢንቴና ሃሲዛ ኢታኔ ኣማኖንታ ዎዚናይ ዶንታ ማላ ናጌቲቴ።
HEB 3:13 ሃራፔካ ኢንቴ ጋርሳፌ ኦኒካ ናጋራን ባሌቲዲ ባ ዎዚና ሙሚሶንታ ማላ፥ «ሃች» ጌቴቲሺን ሃች ሃች ኢንቴ ኢንቴ ጋርሳን ሚኔቲቴ።
HEB 3:14 ኑስ ካሴ ኮይሮፔ ዲዛ ኣማኖ ኑኒ ዉርሴꬅ ጋካናስ ሎኤꬂ ሚንꬂ ኦይኪኮ ኑኒ ኪርስቶሳራ ኢሲፌ ላታና።
HEB 3:15 ሄሲካ፥ «ኢንቴ ሃች ኢዛ ቃላ ሲዪኮ ካሴ ማካሊዳይታይሳ ማላ ሃኢካ ኢንቴ ዎዚና ኢንቴ ሚንꬆንታ ማላ» ጌቴቲ ጌሻ ማጻፋን ጻፌቲዳይሳꬆ ሃኒዴስ።
HEB 3:16 ሲዪዲ ማካሊዳይቲ ኢስቲ ኦናንቴ? ሙሴይ ጊብጼፔ ካሌꬂ ኬሲዳይታ ኡባታ ጊዴቴኔ?
HEB 3:17 ጾሲ ኢስታ ቦላ ኦይዱ ታሙ ላይꬅ ሃንቄቲዳይቲ ኢስቲ ኦናንቴ? ናጋራ ኦꬂን ኢስታ ኣሃይ ባዞ ቢታን ኩንዲ ኣቲዳይታ ጊዴቴኔ?
HEB 3:18 ኢዛስ ኣዛዜቶንታ ኢጺዳይታፔ ኣቲን ኢዛ ሼምፖሶ ጌሎንታ ማላ ኢዚ ጫቂ ዲጊዳይ ሃራይ ኦናንቴ?
HEB 3:19 ሄሳ ጊሻስ ኢስቲ ጌሎንታ ኣቲዳይ ኣማኖይ ባይንዳ ጊሻስ ጊዲዳይሳ ኑ ኤሮስ።
HEB 4:1 ጌዴ ሼምፖሶ ጌላናስ ኢሜቲዳ ሂዶታይ ሃኢካ ናጌቲ ዲዛ ጊሻስ ኢንቴ ጊዶፌ ኦኒካ ሄሳስ ቤሶንታዴ ጊዶንታ ማላ ኣኔ ናጌቶስ።
HEB 4:2 ሄይታንታስ ሳባኬቲዳ ማላ ኑስካ ሚሺራቾ ቃላይ ሳባኬቲዴስ፤ ጊዲኮካ ሲዪዳ ኣሳታራ ሲዪዳ ቃላይ ኢስታራ ኣማኖን ዋላኬቶንታ ኣጊዳ ጊሻስ ኢስታ ጎኢቤና።
HEB 4:3 ኑ ቃሴ ኣማኒዛይቲ ሄ ሼምፖሶዛ ጌላና። ጾሲ፥ «ሄሳ ጊሻስ ታኒ ታ ሃንቆን፥ ‹ታ ኢስታስ ኢማና ጊዳ ሼምፖሶዛ ኢስቲ ሙሌካ ጌሌቴና› ጋዳ ታ ጫቃዲስ» ጊዴስ። ጊዶ ኣቲን ሃይሲ ኣላሜይ ሜꬌቶሶፔ ሃ ሲሚን ኢዛ ኦሶይ ፖሌቲዴስ።
HEB 4:4 ኢሲ ሶሆን ላፑንꬃ ጋላሳ ጊሻስ፥ «ላፑንꬃ ጋላሲ ጾሲ ኦሶ ኡባፌ ሼምፒዴስ» ጌቴቲ ጌሻ ማጻፋን ጻፌቲዴስ።
HEB 4:5 ቃሴካ ሄ ሶዛን፥ «ቱማፔ ኢስቲ ታ ሼምፖሶ ሙሌካ ጌሌቴና» ጌስ።
HEB 4:6 ኢዛ ሼምፖሶ ቡሮ ጌላና ኢሲ ኢሲ ኣሳቲ ዴቴስ፤ ካሴ ኢስታስ ሚሺራቾ ቃላይ ሳባኬቲዳይቲ ኣዛዜቶንታ ኢጺዳ ጊሻስ ኢዛ ሼምፖሶ ኢስቲ ጌሊቤቴና።
HEB 4:7 ሄሳ ጊሻስ ጾሲ፥ «ሃች» ጊዲ ቃሴካ ሃራ ጋላስ ዎꬂዴስ፤ ሄሲካ ዳሮ ላይꬃታፔ ጉዬ ዳዊቴ ባጋራ፥ «ሃች ኢንቴ ኢዛ ቃላ ሲዪኮ ኢንቴ ዎዚና ሙሚሶፒቴ» ጌቴቲ ካሴ ዮቴቲዳ ማላ ሃኒዴስ።
HEB 4:8 ኢያሶይ ኢስታስ ሼምፖ ኢሚዳኮ ጾሲ ሃራ ጋላስ ጊዲ ዮቴናኮሺን።
HEB 4:9 ሄሳ ጊሻስ ሳምባታ ጋላስ ሼምፖይ ጾሳ ዴሬስ ሃኢካ ዴስ።
HEB 4:10 ጋሶይካ ጾሳ ሼምፖሶ ጌሊዛይ ዉሪ ጾሲ ኦꬂ ሼምፒዳ ማላ ኢዚካ ባ ኦሶፔ ሼምፓና።
HEB 4:11 ሄሳ ጊሻስ ኦኒካ ሄይታንታ ማላ ኣዛዜቶንታ ኢጺዳይሳ ሌሚሶ ካሊዲ ኩንዶንታ ማላ ሄ ሼምፖሶዮ ጌላናስ ኣኔ ሚኖስ።
HEB 4:12 ጾሳ ቃላይ ፓጻ ዲዛይሳኔ ኦꬂዛ ቃላ፤ ናምኡ ባጋ ቃራ ማሻፌካ ኣꬊ ቃራ፤ ሼምፖኔ ኣያና፥ ሻያኔ ኮልꬔካ ሻካና ጋካናስ ጫዴስ፤ ዎዚና ቆፋኔ ኣሞቴꬃካ ፓጪ ጼሌስ።
HEB 4:13 ጾሳ ኣይፌፔ ጌሜቲዳ ሜꬌታይ ሙሌካ ዴና፤ ኑ ኢዛስ ኑ ጊሻስ ዛሮ ኢማናስ ቤሲዛ ኢዛ ሲንꬃን ሃኖይ ዉሪካ ካሎ ቆንጬን ቤታና።
HEB 4:14 ሄሳ ጊሻስ ፑዴ ሳሎ ቢዳ ቄሴታ ሃላቃ ጾሳ ና ዬሱሲ ኑስ ዲዛ ጊሻስ ኣኔ ኑኒ ኑ ኣማኖ ሚንꬂ ኦይኮስ።
HEB 4:15 ኑ ዳቡርሺን ኑስ ቃꬌታና ዳንዳይዛ ቄሴታ ሃላቃይ ኑስ ዴስ፤ ኢዚ ኑ ማላ ኡባ ሚሻን ፓጬቲዴስ፤ ጊዲኮካ ኢዚ ኣይኮ ናጋራካ ኦꬂቤና።
HEB 4:16 ሄሳ ጊሻስ ኑኒ ማሮቴꬅ ኤካናሲኔ ኑና ኮሺዛ ዎዴ ኑና ማዲዛ ኢዛ ኪያቴꬅ ኑ ዴማና ማላ ጌዴ ኢዛ ማሮቴꬃ ኣልጋኮ ኣኔ ኣማኖን ሺቆስ።
HEB 5:1 ቄሴታ ሃላቃ ጊዲ ሹሜቲዛዴይ ዳሮ ኣሳ ጊዶፌ ዶሬቴሲኔ ኣሳ ጊሻስ ጊዲዲ ኢሞታኔ ናጋራ ጊሻስ ያርሾ ሺሻናስ ዶሬቴስ።
HEB 5:2 ኢዚካ ባ ባጋራ ዳቡራንቻ ጊዲዳ ጊሻስ ኤሮንታ ኣሳታሲኔ ኦጌ ባሊዳይታስ ቃꬌታና ዳንዳዬስ።
HEB 5:3 ኢዚ ባ ናጋራ ጊሻሲኔ ሃራ ኣሳታ ናጋራ ጊሻስ ያርሾ ሺሻናስ ኢዛስ ቤሲዛይ ሄሳ ጊሻሳ።
HEB 5:4 ኣሮኔይ ጼይጌቲዳይሳꬆ ኢዚ ጾሲ ጼይጊዳዴ ጊዳናስ ቤሴስ ኣቲን ሄሳ ሄ ቦንቾዛ ባርካ ባስ ኤኪዛዴይ ዴና።
HEB 5:5 ሄሳꬆካ ኪርስቶሲ ቄሴታ ሃላቃ ጊዳና ቦንቾ ባርካ ባስ ኤኪቤና፤ ጊዶ ኣቲን፥ «ኔ ታ ናኮ፤ ታ ኔስ ሃች ኣዋ ጊዳዲስ» ጊዳ ጾሳፌ ኤኪዴስ።
HEB 5:6 ሄሳꬆካ ሃራሶን «ማልኬጼዴቄ ሹሜታ ማላ ኔኒ ሜርናስ ቄሴታ ሃላቃ» ጌስ።
HEB 5:7 ዬሱሲ ሃይሳ ቢታ ቦላ ዲዛ ዎዴ ኢዛ ሃይቆፔ ኣሻና ዳንዳይዛይሳኮ ኣፉንጺሼ ቃላ ꬎቁ ሂስቲ ዎሲዴስ። ኣዳፌ ኣሽኬቴꬃራ ኢዚ ኣዛዜቲዳ ጊሻስ ኢዛ ዎሳካ ጾሲ ሲዪዴስ።
HEB 5:8 ኢዚ ጾሳ ና ጊዲኮካ ባ ኤኪዳ ዋዬዛፔ ኣዛዜቴꬅ ታማርዴስ።
HEB 5:9 ሄሳ ባጋራ ፓጬይ ባይንዳዴ ጊዲ ቤቲዳይሳፌ ጉዬ ባስ ኣዛዜቲዛይታስ ኡባስ ሜርና ኣቶቴꬃስ ጋሶ ጊዲዴስ።
HEB 5:10 ማልኬጼዴቄ ሹሜቴꬃ ማላ ቄሴታ ሃላቃ ጌቴቲ ጾሳን ሹሜቲዴስ።
HEB 5:11 ሄሳ ጊሻስ ኑ ሃሳያና ሚሺ ቡሮ ዳሮይ ዴስ፤ ጊዶ ኣቲን ኢንቴ ዶታኣታ ጊዲዳ ጊሻስ ኢንቴና ኤሪሶይ ሜቶ።
HEB 5:12 ኢንቴ ሃኒ ዎዴ ኣስታማሬ ጊዳናስ ቤሲሺን ጾሳ ቃላ ቡሮ ኮይሮፔ ዴንꬂዲ ኢንቴና ታማርሲዛ ኣስ ኢንቴስ ኮሼስ። ኢንቴስ ሚኖ ካꬅ ጊዶንታ ማꬅ ኮሼስ።
HEB 5:13 ማꬅ ፓሄቲዛይ ቂ ጉꬃ ና ጊዲዛ ጊሻስ ሎኦኔ ኢታ ሻኪዛ ቲሚርቴ ሻኪ ኤሬና።
HEB 5:14 ሚኖ ካꬂ ጊዲኮ ሎኦኔ ኢታ ሻኪ ኤራናስ ዳንዳይዛ ዎዚና ኩንꬂዳ ኣሳታሳ።
HEB 6:1 ሄሳ ጊሻስ ኮይሮፔ ኪርስቶሳ ጊሻስ ኢሜቲዳ ቲሚርቴዛ ኣጊዲ ኣኔ ጌዴ ሚኖ ቲሚርቴኮ ቦስ። ሃይቂዳ ኦሶፔ ማሮቴꬃን ጌሎ ጊሻሲኔ ጾሳን ኣማኖ ጊሻስ ኣኔ ኢዛን ቡሮ ዎꬊ ማꬎኮ።
HEB 6:2 ሄሳꬆካ ጺንቃታ ጊሻሲኔ ኩሼ ኣሳ ቦላ ዎꬆ ጊሻስ ቃሴካ ሃይቂዳይታ ዴንꬃ ጊሻሲኔ ሜርና ፒርዳ ጊሻስ ቡሮ ዎꬂ ዶሞኮ።
HEB 6:3 ጾሳ ሼኔ ጊዲኮ ኑ ሄሳꬆ ኦꬃና።
HEB 6:4 ባ ኣማኖ ካዲዳ ኣሳታ ኢስታ ማሮቴꬃን ዎስቲ ዞራኔ? ሄ ኣሳቲ ፖኦይ ኢስታስ ኢሲቶ ፖኢዳይታ ሳሎ ኢሞቴꬃ ኤኪ ቤኢዳይታ፥ ጺሎ ኣያና ኤኪ ቤኢዳይታ፥
HEB 6:5 ጾሳ ሎኦ ቃላኔ ቡሮ ያና ኣላሜዛ ዎልቃ ኤኪ ቤኢዳይታ፥
HEB 6:6 ዛሪ ካዲዳይታ፥ ኢስታ ናምኣንꬆ ዛሪ ማሮቴꬃን ኤኮይ ዳንዳዬቴና፤ ጋሶይካ ኢስቲ ባ ሞሮስ ጾሳ ና ዛሪ ካቄቴሲኔ ካዉሼቴስ።
HEB 6:7 ኡባ ዎዴ ኢራ ኡዪዛ ቢታያ ቃሴካ ኢዛ ጎዪዛዴስ ኣይፌ ኢሚዛ ቢታያ ጾሳ ኣቻን ኣንጄታዱስ።
HEB 6:8 ጊዶ ኣቲን ኣጉንꬂኔ ኦዶሮይ ሞኪዛ ቢታያ ጎኣይ ባይንዳሮ ጊዳና፤ ሄ ቢታይስ ቃንጌቴꬂ ማታን ዴስ፤ ኢዚ ዉርሴꬂ ታማን ጹጌቴꬅ ጊዳና።
HEB 6:9 ታ ኢሻቶ! ኑኒ ሄሳꬆ ሃሳይኮካ ኢንቴስ ኢንቴ ኣቶቴꬃራ ኦይኬቲዳ ሎኦ ሚሺ ዲዛይሳ ኑ ሲꬎኮ።
HEB 6:10 ካሴ ጊዲን ዎይኮ ሃኢ ጊዲንካ ኢንቴ ኣማኒዛይታ ማዲዳይሳኔ ኢዛ ሱንꬃ ጊሻስ ኢንቴ ቤሲዳ ሲቆቴꬃ ባላናስ ጾሲ ማካላንቻ ጊዴና።
HEB 6:11 ኢንቴስ ኢሜቲዳ ሂዶታይ ፖሌታና ጋካናስ ኢንቴፌ ኢሲ ኢሲ ኣሲ ሄሳ ማላ ኦሶ ዉርሴꬅ ጋካናስ ጌንጪዲ ኦꬃና ማላ ኑ ኣሞቶስ።
HEB 6:12 ኣማኖኒኔ ዳንዳያን ኢንቴ ኢዛ ሂዶታ ቃላ ላቲዛይታ ሚሳታናፔ ኣቲን ዶታኣታ ጊዳናይሳ ኑ ኮዮኮ።
HEB 6:13 ጾሲ ኣብራሃሜስ ሂዶታ ኢሚዳ ዎዴ ጫቂሼ ሃራ ኢዛፔ ኣꬊዛዴይ ባይንዳ ጊሻስ ባርካ ባናን፥ «ታ ኔና ቱማፔ ኣንጃና፤ ታኒ ኔ ዜሬꬅ ዳርሳና» ጊ ጫቂዴስ።
HEB 6:15 ኣብራሃሜይካ ጌንጪ ናጊዳፔ ካሊዲ ኢዛስ ኢሜቲዳ ሂዶታ ዴሚዴስ።
HEB 6:16 ኣሳይ ጫቆ ጫቂሼ ባፔ ꬎቃን ጫቄስ፤ ጫቆዚካ ጌቴቲዳይሲ ፖሌታና ማላ ሚንꬂዛ ጊሻስ ጫቂዳይታ ጊዶን ፓላማይ ዴንዲኮ ካሴ ጫቆ ቃላይ ዲጌስ።
HEB 6:17 ጾሲ ላሜቶንታ ባ ቆፋ ሂዶታ ቃላ ላታናይታስ ቆንጪሳና ማላ ኮዪዳ ጊሻስ ጫቆ ቃላን ሚንꬂዴስ።
HEB 6:18 ጾሲ ኣይ ዎዴካ ዎርዶታናስ ዳንዳዬና፤ ኢዚ ላሜቶንታ ናምኡ ሚሻታን ኑ ሲንꬃን ዲዛ ሂዶታ ኦይካናስ ኢዛኮ ሺቂዳ ኑኒ ጊታ ሚኖቴꬅ ዴማና ማላ ኦꬂዴስ።
HEB 6:19 ኑኒካ ሼምፖ ቴቄ ጊዲዳ ሚኖኔ ኣማንꬂዛ ሂዶታ ዴሚዶስ፤ ሄ ሂዶታይካ ማጋላሻዛፔ ጉዬ ባጋራ ዲዛ ጌዴ ጾሳ ኬꬃ ጊዶ ጌሌስ።
HEB 6:20 ሄ ሶዚካ ኑ ጊሻስ ዬሱሲ ካሴቲ ጌሊዳሶ፤ ኢዚካ ማልኬጼዴቄ ሹሜቴꬃ ማላ ሜርናስ ቄሴታ ሃላቃ ጊዲዴስ።
HEB 7:1 ሄሲ ማልኬጼዴቄይ ሳሌሜ ካዎኔ ጾሳ ቄሴ፤ ኢዚካ ኣብራሃሜይ ካዎታ ኦሊ ጾኒዲ ሲሚሺን ዴሚዲ ኣብራሃሜ ኣንጂዴስ።
HEB 7:2 ኣብራሃሜይካ ባስ ዲዛ ኡባፌ ታሙ ኩሼፔ ኢሲ ኩሼ ኢዛስ ኢሚዴስ። ኮይሮ ኢዛ ሱንꬃስ ቢርሼꬂ፥ «ጺሎ ካዎ» ጉሳ። ካሊዲ ቃሴ፥ «ሳሌሜ ካዎ» ጉሲ፥ «ሳሮቴꬃ ካዎ» ጉሳ።
HEB 7:3 ኢዛስ ኣያካ፥ ኣዋይካ ዎይኮ ኢዛ ዬሌታስ ዛርኬይካ ባ፤ ኢዚ ኣይዴ ዬሌቲዲ ኣይዴ ሃይቂዳኮ ኤሬቲቤና፤ ኢዛስ ዶሜꬂኔ ዉርሴꬂ ባ፤ ጊዶ ኣቲን ጾሳ ና ማላ ሜርናስ ኢዚ ቄሴ ጊዲዲ ዴስ።
HEB 7:4 ኣኔ ኢንቴ ኢዚ ኣይ ማላ ጊታኮ ቆፒቴ፥ ሃራይ ኣቶሺን ኣዋታስ ኡባስ ኮይሮይ ኣብራሃሜይ ባ ዲኢ ኤኪዳ ኡባፌ ታማፌ ኢሳ ኬሲ ኢሚዴስ።
HEB 7:5 ኢስታስ ቄሴቴꬂ ኢሜቲዳ ሌዌ ናይቲ ኢስታ ኢሻቲ ኣብራሃሜ ዜሬꬃታ ጊዲኮካ ዴራፔ ሄሲካ ባ ኢሻታፔ ታማፌ ኢሳ ኤካና ማላ ኢስታስ ዎጋን ኣዛዜቲዴስ።
HEB 7:6 ሃይሳ ሃ ኣዴዛ ዜሬꬂ ሌዌ ዜሬꬅ ጊዴና፤ ጊዶ ኣቲን ኢዚ ኣብራሃሜፔ ታማፌ ኢሳ ኤኪዴስ፤ ካሴ ኢዛስ ሂዶታ ቃላይ ኢሜቲዳ ኣብራሃሜ ኣንጂዴስ።
HEB 7:7 ባይራይ ካሎ ኣንጂዛይሲ ዎጋ።
HEB 7:8 ኢሲ ባጋራ ታማፌ ኢሳ ኤኪዛይቲ ሃይቂዛይታ፤ ሃራ ባጋራ ቃሴ ታማፌ ኢሳ ኤኪዛዴይ ሃይቆንታ ፓጻ ዲዛ ማላ ኢዛስ ማርካቲዳዴይ ማልኬጼዴቄ።
HEB 7:9 ሃራይ ኣቶሺን ሌዌይካ ኣብራሃሜ ባጋራ ታማፌ ኢሳ ኬሲዴስ ጋናስ ዳንዳዬቴስ።
HEB 7:10 ጋሶይካ ማልኬጼዴቄይ ኣብራሃሜራ ጋጊዛ ዎዴ ሌዌይ ቡሮ ባ ኣዋ ኣብራሃሜፔ ዬሌቲቤና።
HEB 7:11 ፓጬይ ባይንዳ ፖሎይ ቤቲዳይኔ ዎጋይ ዴሬዛስ ኢሜቲዳይ ሌዌ ቄሴቴꬃ ማላ ጊዲዳኮ ኣሮኔ ማላ ጊዶንታ ማልኬጼዴቄ ሹሜቴꬃ ማላይ ሃራ ቄሴይ ያናስ ኣዛስ ኮሺዴ?
HEB 7:12 ቄሴቴꬃ ዛርኬይ ላሜቲዛ ዎዴ ዎጋይካ ላሜታናይሲ ኣቶንታ ሚሻ።
HEB 7:13 ሄሲ ዉሪካ ኢዛስ ዮቴቲዳ ቄሴይ ኢዚ ሃራ ዜሬꬃ፤ ኢዛ ዜሬꬃፌ ኦኒካ ያርሾሶን ኦꬂ ኤሪዛዴይ ባ።
HEB 7:14 ኑ ጎዳይ ዩሁዳ ባጋፌ ዪዳይሲ ቱማ፤ ሙሴይ ቄሴታ ጊሻስ ዮቲሼ ሃ ዜሬꬃ ጊሻስ ዮቲዳይሲ ኢሲ ሚሺካ ዴና።
HEB 7:15 ማልኬጼዴቄ ማላይ ሃራ ቄሴይ ዴንዲኮ ኑ ካሴ ዮቲዳ ዮኦይ ዳሮ ቆንጬ ጊዴና።
HEB 7:16 ኢዚ ቄሴ ጊዲዳይ ꬋዮንታ ዴኦ ዎልቃን ኣቲን ዜሬꬃፌ ዪዳ ዎጋፔ ጊዴና።
HEB 7:17 ኢዛስ፥ «ኔ ማልኬጼዴቄ ሹሜቴꬃ ማላ ሜርናስ ቄሴ» ጊ ማርካቲዴስ።
HEB 7:18 ካሴ ኣዛዞይ ላፋኔ ጎኦንታይሳ ጊዲዳ ጊሻስ ኣቲዴስ።
HEB 7:19 ዎጋይ ኦናካ ጌሻናስ ዳንዳዮንታ ጊሻስ ኑኒ ጾሳ ኣች ሺቃናስ ኢዛፔ ኣꬊዛ ሃራ ሂዶታይ ኑስ ኢሜቲዴስ።
HEB 7:20 ሄሲካ ጫቆይ ባይንዳ ሃኒቤና፤ ሃንኮ ቄሴ ጊዲዳይቲ ጫቆይ ባይንዳይታ።
HEB 7:21 ኢዚ ጊዲኮ ቄሴቴꬃ ጫቆን ኤኪዴስ። ጋሶይካ ጾሲ ኢዛ ጊሻስ፥ «ጎዳይ ጫቂዴስ፤ ባ ቆፋ ኢዚ ላሜና፤ ‹ኔ ሜርናስ ቄሴ› » ጊዴስ።
HEB 7:22 ሄሳ ማላ ጫቆፔ ዴንዲዳይሳን ዬሱሲ ሄሳፌ ኣꬊዛ ጫቆ ቃላስ ዋሴ ጊዲዴስ።
HEB 7:23 ካሴ ቄሴቲ ባ ኦሶን ሲንꬄ ጉጆንታ ማላ ሃይቆይ ኢስታ ዲጊዳ ጊሻስ ቆዳይ ኢስታስ ዳሮ።
HEB 7:24 ዬሱሲ ጊዲኮ ሜርናስ ዲዛዴ ጊዲዳ ጊሻስ ኢዛ ቄሴቴꬂ ሻሬቶንታ ቄሴቴꬃ።
HEB 7:25 ሄሳ ጊሻስ ኢዚ ኢስታ ጊጊሳና ጋናቲሼ ኡባ ዎዴ ሃይቆንታ ፓጻ ኤቂ ዲዛ ጊሻስ ኢዛ ባጋራ ጾሳኮ ዪዛይታ ኡባ ኣሻናስ ዳንዳዬስ።
HEB 7:26 ሄሳ ጊሻስ ኑስ ኮሺዛ ቄሴታ ሃላቃይ ሄሳ ማላ ጌሺኔ ዎሶይ ኢዛ ቦላ ባይንዳ ጺሎኔ ናጋራንቻታፔ ሻኬቲዲ ሳሎታፔ ቦላራ ቦንቼቲዳ ቄሴታ ሃላቃ።
HEB 7:27 ኢዚ ሃንኮ ቄሴታ ሃላቃታ ማላ ኮይሮ ባ ናጋራ ጊሻስ ቃሴካ ሃንኮ ዴሬዛ ናጋራ ጊሻስ ጋላስ ጋላስ ያርሾ ሺሻናስ ኢዛ ኮሼና፤ ኢዚ ባና ኣꬂ ኢሚዳ ዎዴ ኣሳ ናጋራ ጊሻስ ኢሲቶ ሲንꬃ ባጋሳራ ያርሾ ዉርሲ ፖሊዴስ።
HEB 7:28 ዎጋይ ዳቡራንቻ ኣሳታ ቄሴታስ ዋና ሃላቃ ሂስቲ ሹሜስ። ዎጋፔ ካሊዲ ዪዳ ጫቆ ቃላይ ጊዲኮ ሜርናስ ኢዛ ቦላ ዎሶይ ባይንዳ ናዛ ሹሚዴስ።
HEB 8:1 ሄሳ ጊሻስ ኑ ሃኢ ኦꬃና ዋና ዮኦይ ሃይሳ፤ ሃይሳ ማላ ሳሎ ቦላ ጾሳ ቦንቾ ኣልጋ ኡሻቻን ኡቲዳ ቄሴታ ሃላቃይ ኑስ ዴስ።
HEB 8:2 ኢዚ ኣሲ ቶኪዳ ዱንካኔ ጊዶን ኦꬂዛዴ ጊዶንታ ጎዳ ጾሳይ ቶኪዳ ቱሙ ዱንካኔን ጌሻሶሆን ኦꬂዛዴ።
HEB 8:3 ቄሴታ ሃላቃይ ሹሜቲዛይ ኣሳይ ጾሳስ ኢሚዛይሳ ጾሳስ ሺሻናሲኔ ያርሾ ያርሻናሳ፤ ሄሳ ጊሻስ ሃይሲ ሃ ቄሴታ ሃላቃይካ ጾሳስ ሺሻናስ ኢሲ ሺሺዛ ሚሽ ኢዛስ ኮሼስ።
HEB 8:4 ኢዚ ቢታ ቦላ ዲዛኮ ቄሴ ጊዴና፤ ኣዛስ ጊኮ ዎጋይ ጊዛ ማላ ያርሾ ሺሺዛ ሃራ ቄሴቲ ዴቴስ።
HEB 8:5 ኢስቲ ካሴ ሳሎን ዲዛ ጾሳ ኬꬃይስ ሌሚሶኔ ኤሾ፤ ሙሴይ ዱንካኔዛ ኦꬃና ጊሺን፥ «ኔስ ዙማ ቦላ ቆንጪዳይሳꬆ ዉርሳ ኦꬃናስ ናጌታ» ጊዛ ኣዛዞይ ሄሳ ጊሻስ ኢዛስ ኢሜቲዴስ።
HEB 8:6 ጊዶ ኣቲን ዬሱሲ ጊዶ ጌሊ ጋናቲዛይ ጫቆ ቃላይ ካሴይሳፌ ኣꬊዛይሳ ማላ ኢዚ ኤኪዳ ኦሶይካ ካሴይታ ኦሶፔ ኣꬌስ፤ ሄሲካ ካሴይሳፌ ሎኢዛ ሂዶታ ቃላና።
HEB 8:7 ካሴ ጫቆ ቃላን ፓጬይ ባይንዳኮ ናምኣንꬆ ሃራ ጫቃናስ ኮሼና።
HEB 8:8 ጊዶ ኣቲን ጾሲ ዴሬዛ ቦላ ፓጬይ ዲዛይሳ ዴሚዳ ጊሻስ፥ «ኢስራኤሌ ኣሳራኔ ዩሁዳ ኣሳራ ታኒ ኦራꬃ ጫቆ ጫቄታና ዎዴይ ያና።
HEB 8:9 ሄሲካ ታ ኢስታ ጊብጼፔ ኬሳናስ ኢስታ ኩሼ ኦይካዳ ካሴ ኢስታ ኣዋታራ ጫቄቲዳ ቃላ ማላ ጊዴና፤ ጋሶይካ ኢስቲ ካሴ ታ ጫቆ ቃላን ኤቂቤቴና፤ ታኒካ ኢስታ ዬዳ ቤሳዲስ።
HEB 8:10 «ሄሳፌ ጉዬ ኢስራኤሌ ኣሳራ ታ ጫቄታና ቃላይ ሃይሳ ማላ ጌስ ጎዳይ። ታኒ ታ ዎጋ ኢስታ ዎዚናን ዎꬃና፤ ኢስታ ዎዚና ቦላካ ጻፋና። ታ ኢስታ ጾስ ጊዳና፤ ኢስቲካ ታ ዴሬ ጊዳና።
HEB 8:11 ሃይሳፌ ጉዬ ኣሲ ባ ጉታ ኣሳ ዎይኮ ባ ኢሻ፥ ‹ኔ ጎዳ ኤራ› ጊ ታማርሴና። ጋሶይካ ኣሲ ጉꬃፌ ጊታታ ጋካናስ ዉሪካ ታና ኤራና።
HEB 8:12 ኢስታ ቆሆዛ ታ ማራና። ሃይሳፌ ሲንꬃን ታ ኣሳ ናጋራ ናምኣንꬆ ዛራ ቆፒኬ» ጌስ።
HEB 8:13 ሃይሳ ሃ ጫቆዛ ኢዚ፥ «ኦራꬃ ጫቆ» ጊዲ ካሴ ጫቆዛ ጋልኣ ኬሲዴስ፤ ሄሳ ጊሻስ ጋልኢዲ ዉሪዳይሲ ꬋያና ዎዴይ ማቲዴስ።
HEB 9:1 ኮይሮ ጫቆ ቃላዛን ጾሳስ ጎይኒዛ ዎጋይኔ ቢታ ቦላ ዲዛ ጾሳ ኬꬂ ዴስ።
HEB 9:2 ካሴ ናምኡ ኪፊሌራ ዲዛ ዱንካኔይ ጊጌቲ ዴስ፤ ኮይሮ ኪፊሌዛን ጾምፔ ዎꬂዛሶይኔ ጻራጴዛይ ቃሴ ኡኬꬂ ዴስ፤ ሄሳ ሄ ኪፊሌዚ ዱማ ኪፊሌ ጌቴቴስ።
HEB 9:3 ናምኣንꬆ ኪፊሌዚ ናምኣንꬆ ማጋላሻፔ ጉዬ ባጋራ ዲዛ ኪፊሌይ ኡባፌ ዱማ ጌቴቴስ።
HEB 9:4 ሄሳ ጊዶን ዎርቃፌ ኦሴቲዳ ኤጻኔ ጩዋሲዛ ቄሪ ሼልኤ ማላይኔ ዎርቃን ሜሼቲዳ ጫቆ ቃላ ታቦታይ ዴስ፤ ሄ ታቦታይካ ኢዛ ጊዶን ማናይ ዲዛ ዎርቃ ሌማቴይ፥ ጪሊሊዳ ኣሮኔ ጉፌይኔ ጫቆ ቃላቲ ኢዛ ቦላ ጻፌቲዳ ማሴቲዳ ሹቻቲ ዴቴስ።
HEB 9:5 ሄ ታቦታዛ ቦላ ዲዛ ናጋራፔ ማሮቴꬃ ካማዛ ቦላ ባ ቄፌራ ካሚዛ ቦንቾ ኪሩቤቲ ዴቴስ፤ ሃኢ ቃሴ ኑ ሄይታንታ ኢሳ ኢሳ ጊሻስ ሻኪ ሻኪ ሃሳያናስ ዳንዳዮኮ።
HEB 9:6 ዉሪካ ሄሳꬆ ጊጌቲዳፔ ጉዬ ቄሴቲ ባ ኦሶ ፖላናስ ዱንካናስ ኮይሮ ኪፊሌ ጌሌቴስ።
HEB 9:7 ጊዲኮካ ኡባፌ ጊዶቲዛ ኪፊሌ ቄሴታ ሃላቃይ ጻላ ጌሌስ፤ ሄሲካ ላይꬃን ኢሲቶ ጻላ ጊዲሺን ኢዚ ባ ናጋራ ጊሻሲኔ ዴሬይ ኤሮንታ ኦꬂዳ ናጋራ ጊሻስ ሺሺዛ ያርሾ ሱꬅ ኦይኮንታ ሙሌካ ጌሌና።
HEB 9:8 ኮይሮ ዱንካኔዚ ካሴ ዲዛ ዎዴ ጌዴ ኡባፌ ዱማ ጌቴቲዛሶ ኤፊዛ ኦጌይ ሄ ዎዴ ቆንጬ ጊዶንታይሳ ጺሎ ኣያናይ ቤሴስ።
HEB 9:9 ሄሲካ ሃይሳ ሃ ዎዴዛስ ሌሚሶ ጊዲሺን ካሴ ሺቂዛ ያርሾቲኔ ጮ ኢሜቲዛ ኢሞታቲ ኢሚዛይታ ዎዚና ሼምፒሳናሲኔ ሙሌ ጌሻናስ ዳንዳይቤቴና።
HEB 9:10 ሄይታንቲ ዉሪካ ኦራꬃ ዎጋይ ያና ጋካናስ ጮ ሜላ ዶና ሃሳያ ማላ፤ ቃሴካ ኢስቲ ሙሳ ጊሻሲኔ ኡሻ ጊሻስ ቃሴካ ዱማ ዱማ ጌሾ ዎጋታ ጻላ።
HEB 9:11 ጊዲኮካ ኪርስቶሲ ቡሮፔ ያናስ ዲዛ ሎኦ ሚሻታስ ቄሴታ ሃላቃ ጊዲዲ ቆንጪዴስ፤ ኢዚ ኢዛን ጌሊዳ ዱንካኔዚ ጊታኔ ጌሻ፤ ሄ ዱንካኔዚ ኣሳ ኩሼን ኦሴቶንታይሳኔ ሃይሳ ሃ ሜꬌቴꬃፌ ጊዴና።
HEB 9:12 ኢዚ ሄ ዱንካኔዛን ጌሊሼ ዴይሻታ ሱꬂኔ ዎፋኖ ቦራታ ሱꬅ ኤኪ ጌሊቤና፤ ጊዶ ኣቲን ኣስ ኣሻናስ ሜርናስ ባ ሱꬅ ኤኪዲ ኡባፌ ዱማ ጌቴቲዛ ኪፊሌዛ ሃራ ዎዴ ናምኣንꬆ ጌሎንታ ማላ ዉርሴꬃ ጌሎ ጌሊዴስ።
HEB 9:13 ኢስታስ ካሬ ባጋ ኣሳቴꬃይ ቱኒዳ ኣሳታ ቦላ ኣራጪዛ ዴይሻ ሱꬂኔ ዎፋኖ ቦራታ ሱꬂ ሄሳꬆካ ያርሾስ ጹጌቲዳ ኡሳ ቢዲንꬂ ኢስታ ጌሺዛይሳ ጊዲኮ፥
HEB 9:14 ሜርና ኣያናን ባና ዎሶይ ባይንዳ ያርሾ ኦꬂ ጾሳስ ሺሺዳ ኪርስቶሳ ሱꬂ ኑኒ ዴኦ ጾሳስ ጎይናናስ ሃይቄꬃ ኦሶፔ ኑና ኣይ ማላ ኣꬂ ጌሻንዴ?
HEB 9:15 ሄሳ ጊሻስ ጼይጌቲዳይቲ ኢስታስ ኢማና ጌቴቲዳ ሜርና ላታ ኤካና ማላ ኪርስቶሲ ኦራꬃ ጫቆስ ጋናቲዛዴ ጊዲዴስ፤ ኮይሮ ጫቆዛ ጋርሳን ዲዛ ዎዴ ኢስቲ ኦꬂዳ ናጋራፔ ጌያና ማላ ኢስታ ጊሻስ ኢዚ ሃይቂዴስ።
HEB 9:16 ባዛይ ባዜቲዛይሳ ጊዲኮ ባዚዳዴ ሃይቆ ሻኪ ኤራናስ ቤሴስ።
HEB 9:17 ጋሶይካ ባዛይ ሚኒዛይ ባዚዳዴይ ሃይቂና። ባዚዳዴይ ፓጻ ዲሺን ባዛይ ኣይኮካ ኦꬄና።
HEB 9:18 ሄሳ ጊሻስ ኮይሮ ጫቆ ቃላይ ሱꬂ ባይንዳ ሚኒቤና።
HEB 9:19 ሙሴይ ባ ኣዛዞ ዎጋ ዴራስ ዮቲ ሲሚዲ ዴይሻታ ሱꬂኔ ዎፋኖ ቦራታ ሱꬅ ሃꬃራ ኤኪዲ ዞኦ ዶርሳ ኢስኬን ኤጬሬ ዉርጬ ሚሳቲዛ ሂሶጴ ጌቴቲዛ ሚꬃራ ኤኪዲ ባ ጻፊዳ ዎጋ ማጻፋ ቦላኒኔ ዴሬዛ ቦላ ዉጺዴስ።
HEB 9:20 «ኢንቴ ናጋና ማላ ኢንቴና ጾሲ ኣዛዚዳ ጫቆ ቃላ ሱꬃይ ሃይሳ» ጊዴስ።
HEB 9:21 ሄሳꬆካ ዱንካኔዛኔ ኢዛ ጊዶን ዲዛ ኦሶ ሚሻ ኡባ ቦላ ሱꬅ ዉጺዴስ።
HEB 9:22 ኣዳፌካ ጉꬃ ሚሻቲ ኣቲሺን ሃንኮ ዳሮ ሚሻይ ሱꬃን ጌያናስ ቤሲዛይሳ ዎጋይ ኣዛዜስ፤ ሱꬂ ጉኮንታ ዲሺን ማሮይ ባ።
HEB 9:23 ሄሳ ጊሻስ ሳሎ ሚሻታስ ሌሚሶ ጊዲዳይቲ ሃይታንታን ጌያናይሲ ኣቴና ሺን፤ ሳሎን ዲዛ ሚሻቲ ጊዲኮ ሃይሳፌካ ኣꬊዛ ያርሾን ጌያናስ ቤሴስ።
HEB 9:24 ኪርስቶሲ ቱሙ ዱንካኔይስ ሌሚሶኔ ኣሳ ኩሼን ኦሴቲዳ ጾሳ ኬꬄ ጌሊቤና፤ ጊዶ ኣቲን ሃኢ ኑ ጊሻስ ጾሳ ሲንꬃን ቤታናስ ፑዴ ሳሎ ጌሊዴስ።
HEB 9:25 ቄሴታ ሃላቃይ ባ ሱꬅ ጊዶንታ ሱꬅ ኤኪዲ ላይꬃን ላይꬃን ኡባፌ ዱማ ኪፊሌ ጌሊዛይሳꬆ ኪርስቶሲ ባና ያርሻናስ ፑዴ ሳሎ ሺሬቲ ሺሬቲ ጌሊቤና።
HEB 9:26 ሄሳ ማላ ጊዲዛኮ ኪርስቶሲ ኣላሜይ ሜꬌቶሶፔ ሃ ሲሚን ዳሮ ዎዴ ሜቶ ኤካናስ ቤሴስ፤ ሃኢ ቃሴ ዎዴ ዉርሴꬃን ባና ያርሺዲ ናጋራ ዲጋናስ ዉርሴꬃስ ኢሲቶ ቆንጪዴስ።
HEB 9:27 ሄሳꬆካ ኣሲ ኢሲቶ ሃይቄስ፤ ሄሳፌ ካሊዲ ፒርዳ ሲንꬃን ኤቃናስ ጊጊ ኡቲዴስ።
HEB 9:28 ኪርስቶሲ ዳሮ ኣሳ ናጋራ ዲጋናስ ኢሲቶ ያርሼቲዴስ፤ ናምኣንꬆካ ኢዚ ቆንጫና፤ ሄሲ ኢዛ ናጊዛይታስ ኣቶቴꬅ ኤኪ ያናስ ኣቲን ናምኣንꬆ ዛሪ ናጋራ ቶካናስ ጊዴና።
HEB 10:1 ሙሴ ዎጋይ ቡሮ ሲንꬃራ ያና ሎኦ ሃኖታስ ኤሾፔ ኣቲን ቱሙ ኣዳ ሜꬋይ ኢዛስ ዴና፤ ሄሳ ጊሻስ ላይꬃን ላይꬃን ፓጬይ ባይንዳ ሺሪ ሺሪ ሺሺዛ ያርሾይ ጾስ ጎይናናስ ሺቂዛ ኣሳ ጌሻናስ ሙሌካ ዳንዳይቤና።
HEB 10:2 ኣስ ሙሌራ ጌሻና ዳንዳይዛይሳ ጊዲዳኮ ኢስቲ ያርሾ ያርሻናይሳ ኣጌቴኔ? ቃሴካ ጾስ ጎይናና ሺቂዛ ኣሳይ ኢሲቶ ጌይዛኮ ባ ዎዚናራ ናጋራንቻ ጊዲዳይሳ ሲꬋና።
HEB 10:3 ጊዶ ኣቲን ሄይቲ ያርሾቲ ላይꬃን ላይꬃን ናጋራ ዛሪ ዛሪ ቆፍሴቴስ።
HEB 10:4 ጋሶይካ ዎፋኖታኔ ዴይሻታ ሱꬂ ኣሳፔ ናጋራ ዲጋናስ ዳንዳዬና።
HEB 10:5 ሄሳ ጊሻስ ኪርስቶሲ ሃይሳ ሃ ኣላሜዛ ዪዲ፥ «ኔኒ ኢሞታኔ ያርሾ ኮያቤካ ሺን ኔ ታስ ኣሾ ጊጊሳዳሳ።
HEB 10:6 ታማን ጹጌቲዛ ያርሾኔ ናጋራ ጊሻስ ሺቂዛ ያርሾን ኡፋዬታቤካ» ጊዴስ።
HEB 10:7 ሄ ዎዴ ታኒ፥ «ታ ጊሻስ ጌሻ ማጻፋን ጻፌቲዳ ማላ፥ ‹ጾሶ፥ ሄኮ ታኒ ኔ ሼኔ ኦꬃናስ ያዲስ› » ጋዲስ።
HEB 10:8 ሙሴ ዎጋይ ሄሲ ሄሳꬆ ሃናና ማላ ኣዛዚኮካ ኢዚ ቃሴ ኮይሮ፥ «ያርሾ፥ ኢሞታ፥ ጹጌቲዛ ያርሾኔ ናጋራ ጊሻስ ሺቂዛ ያርሾ ኔ ኮያቤካኔ ኢዛን ኡፋዬታቤካ» ጌስ።
HEB 10:9 ካሌꬂዲካ፥ «ሄኮ ታ ኔ ሼኔ ኦꬃና ያዲስ» ጊዴስ። ናምኣንꬆዛ ኤሳናስ ኮይሮይሳ ዲጊዴስ።
HEB 10:10 ሃይሳን፥ «ኢዛ ሼኔ» ጊዛ ቃላ ማላ ሃራ ያርሾ ዛሬꬅ ሺሻናስ ኮሾንታ ማላ ዬሱስ ኪርስቶሳ ባጋራ ኢሲቶ ሺቂዳ ያርሾን ጌዪዶስ።
HEB 10:11 ቄሴይ ሃች ሃች ኤቂዲ ባ ኦሶ ፖሌስ፤ ኣስ ናጋራፔ ጌሻናስ ዳንዳዮንታይታ ዎንቲን ዎንቲን ሺሼስ።
HEB 10:12 ኪርስቶሲ ጊዲኮ ያርሾ ኢሲቶ ሜርናስ ጊዳናይሳ ሺሺዲ ኣዋ ኡሻቻን ኡቲዴስ።
HEB 10:13 ሄ ጋላሳፌ ሲሚን ኢዛ ሞርኬቲ ኢዛ ቶሆ ጋርሳን ዬꬌታና ጋካናስ ናጎን ዴስ።
HEB 10:14 ጋሶይካ ኢሲቶ ሺሺዳ ያርሾን ጌያና ኣሳታ ሜርናስ ጌሺዴስ።
HEB 10:15 ሄሳ ሄ ሃኖዛ ጊሻስ ጺሎ ኣያናይካ ኑስ ማርካቴስ። ጎዳይ ኮይሮ፥
HEB 10:16 «ሄሳፌ ጉዬ ታ ኢስታራ ጌላና ጫቆ ቃላይ ሃይሳ። ታ ዎጋ ታ ኢስታ ዎዚናን ዎꬃና፤ ኢስታ ዎዚናን ታ ጻፋና» ጌስ።
HEB 10:17 ቃሴካ፥ «ታ ኢስታ ናጋራኔ ማካላ ናምኣንꬆ ቆፒኬ» ጌስ ጎዳይ።
HEB 10:18 ሄይታንቲ ዉሪካ ኣቶ ጌቴቲዳፔ ጉዬ ናምኣንꬆ ናጋራስ ሺቃና ሃራ ያርሾይ ዴና።
HEB 10:19 ሄሳ ጊሻስ ታ ኢሻቶ! ኑኒ ዬሱስ ኪርስቶሳ ሱꬃ ባጋራ ጌዴ ኡባፌ ዱማ ጌሽ ጌቴቲዛሶዮ ጌላናስ ጻላቴꬅ ዴሚዶስ።
HEB 10:20 ሄሲካ ማጋላሻ ባጋራ፤ ኢዚ ባ ኣሾ ባጋራ ኑስ ዶይዳ ኦራꬂኔ ዴኦ ጊዲዳ ኦጌና።
HEB 10:21 ጾሳ ኬꬃ ቦላ ሹሜቲዳ ቄሴታ ሃላቃይ ኑስ ዲዛ ጊሻስ፥
HEB 10:22 ኑኒ ኑ ኢታ ቆፋፔ ጌያናስ ኑ ዎዚና ኣራጬቲዲ ኑ ኣሳቴꬃካ ጺሎ ሃꬃን ሜጬቲዲ ቱሙ ዎዚናፔኔ ኩሜꬃ ኣማኖን ጾሳኮ ኣኔ ሺቆስ።
HEB 10:23 ኑስ ሂዶታ ቃላ ኢሚዳዴይ ኣማኔቲዛዴ ጊዲዳ ጊሻስ ኑኒ ኣማኒዲ ኢዛ ጊሻስ ማርካቲዛ ሂዶታፔ ያኔ ሃ ጎንታ ኣኔ ሎኤꬂ ኦይኮስ።
HEB 10:24 ሲቆኒኔ ሎኦ ኦሶን ኑ ሚኒ ዳና ማላ ኣኔ ኢሶይ ኢሳ ቆፊሶስ።
HEB 10:25 ኣኔ ኑ ኡባ ጋላስ ኢሶይ ኢሳራ ጋኪ ጋኪ ኢሶይ ኢሳ ሚንꬄꬆስ ኣቲን ኢሲ ኢሲ ኣሳቲ ሺቆ ኣጊዳ ማላ ኣኔ ኑኒ ሺቆዛ ኣጎኮ፤ ሃራፔካ ጎዳ ዬሱሲ ማታቲዳይሳ ቆፒሼ ካሴፔ ሚኒ ሺቂቴ።
HEB 10:26 ኑኒ ቱማ ሻኪ ኤሪዲ ኤኪዳይሳፌ ጉዬ ኤሪሼ ናጋራ ኦꬂኮ ሃይሳፌ ጉዬ ናጋራ ጊሻስ ሺቃናስ ሃራ ያርሾይ ዴና።
HEB 10:27 ሃራይ ቡሮ ሃናና ዳሮ ባቢሲዛ ፒርዳይ ጾሳ ሞርኬታ ጹጋና ናጊዛ ሚኖ ታማይ ጻላ ዴስ።
HEB 10:28 ሙሴ ዎጋ ካꬊዳ ኣሲ ናምኡ ዎይኮ ሄꬑ ማርካቲ ማርካቲኮ ማሮይ ባይንዳ ሃይቆን ቃጻዬቴስ።
HEB 10:29 ሂስቲን ጾሳ ና ካꬊዳ ኣሲ ኢዛን ጌዪዳ ጫቆ ሱꬃ ሂራይሶ ሚሻ ማላ ቆዲዳዴሲኔ ኢዛ ኪያቴꬃ ኣያና ኢሴꬂዳዴስ ኣይ ማላ ሄሳፌ ኣꬊዛ ፒርዳይ ኢዛስ ቤሲዛ ኢንቴስ ሚሳቲዜ?
HEB 10:30 «ታኒ ኢዛስ ሃሎ ኬሳና፤ ኢዛዴ ኦሶ ማላ ኢዛዴስ ታ ዛራና» ጊዳይሳ ኑ ኤሮስ። ቃሴካ፥ «ጎዳይ ባ ዴሬዛ ቦላ ፒርዳና» ጌስ ጎዳይ።
HEB 10:31 ዴኦ ጾሳ ኩሼን ኩንዴꬂ ዳሮ ባቢሴስ።
HEB 10:32 ኢንቴስ ኢሲቶ ፖኦይ ፖኢዳፔ ጉዬ ሜቶ ዎዴ ዳሮ ባጼን ኢንቴ ካሴ ሚኒ ኤቂዳ ቤኒ ዎዴዛ ዩሺ ቆፒቴ።
HEB 10:33 ኢሲ ኢሲ ዎዴ ኢንቴ ዴሬ ዱላታ ሲንꬃን ጫሻሲኔ ጎዴቴꬃስ ኣꬊ ኢሜቲዴታ፤ ቃሴ ሃራ ዎዴካ ሄሳ ማላ ዋዬይ ኢስታ ቦላ ጋኪዳ ኣሳታራ ኢንቴካ ኢሲፌ ዋዬ ቤዪዴታ።
HEB 10:34 ኢንቴ ኢንቴስ ሃራፔ ኣꬊዛ ሜርናስ ዳና ሃሮይ ዲዛይሳ ኤሪዛ ጊሻስ ቃሼቲዳይታስ ሚሼቲዴታኔ ኢንቴ ሃሮይ ቦንቄቲሺን ኡፋይሳን ዳንዳይዴታ።
HEB 10:35 ሄሳ ጊሻስ ጊታ ዋጋይ ዲዛ ካሴ ኢንቴ ኣማኔቴꬃ ኣጎፍቴ።
HEB 10:36 ኢንቴ ጾሳ ሼኔ ፖሊዲ ኢዚ ኢንቴስ ኢሚዳ ኡፋይሳ ቃላ ኤካናስ ሚኒ ኤቃናስ ኢንቴና ኮሼስ።
HEB 10:37 ጋሶይካ ጉꬃ ዎዴፔ ካሊዲ፥ «ያናይሲ ኢዚ ያና፤ ጋምኤና፤»
HEB 10:38 ጺሎ ኣሲ ጊዲኮ ኣማኖን ዴኦ ዴማና፤ ጉዬ ኡንዱዲዛዴይ ዲኮ ታ ሼምፖያ ኢዛዴ ቦላ ኡፋዬቱኩ።
HEB 10:39 «ኑኒ ጊዲኮ ኣማኒዲ ኣቲዳይታ ባጋ ኣቲን ጌዴ ጉዬ ኡንዱዲ ꬋይዛይታ ባጋ ጊዶኮ» ጊዴስ።
HEB 11:1 ኣማኖ ጌꬂ ኢሲ ሚሼ ሃናና ጊዲ ኑ ሲꬎንታ ዲሼ ቤኦንታ ሚሼካ ቤኢዳ ማላ ኤሮ ጊ ኤኮ።
HEB 11:2 ካሴ ኣዋቲ ጋላቴቲዳይ ሄሳ ማላ ኣማኖና።
HEB 11:3 ሃይሲ ሃ ኣላሜይ ጾሳ ቃላን ሜꬌቲዳይሳ ኑኒ ኣማኖን ኤሮስ፤ ሄሳꬆካ ኣይፌን ቤቲዛይሲ ሜꬌቲዳይ ቤቲዛ ሚሻፌ ጊዶንታይሳ ኑኒ ኤሮስ።
HEB 11:4 ኣቤሊ ጾሳስ ቃዬሌ ያርሾፌ ኣꬊዛ ያርሾ ኣማኖን ሺሺዴስ፤ ጾሲ ኢዛ ያርሾዛ ጊሻስ ሃሳይሼ ኢዚ ኣማኖን ጌሽ ጊዲዳይሳ ማርካቲዴስ፤ ኢዚ ሃይቂንካ ኢዛ ኣማኖይ ሃኢ ጋካናስ ሃሳዬቴስ።
HEB 11:5 ሄኖኬይ ሃይቆ ቤኦንታ ማላ ሃይሳ ኣላሜዛፔ ኣማኖን ኤኬቲዴስ፤ ጾሲ ኢዛ ኤኪዳ ጊሻስ ኢዚ ቤቲቤና፤ ኤኬታናፔ ካሴቲዲ ኢዚ ጾሳ ኡፋይሲዳይሲ ዮቴቲዳ ጊሻስ ኢዚ ኤኬቲዴስ።
HEB 11:6 ቃሴካ ኣማኖይ ባይንዳ ዲሺን ጾሳ ኡፋይሳናስ ሙሌካ ዳንዳዬቴና፤ ጋሶይካ ጾሳኮ ሺቂዛዴይ ዉሪካ ጾሲ ጊዛይሳኔ ዎዚናፔ ኢዛ ኮይዛይታስ ኢዚ ዋጋ ኢማናይሳ ኣማናናስ ቤሴስ።
HEB 11:7 ኖሄስ ጾሲ ቡሮ ኖሄይ ባ ኣይፌን ቤኦንታ ሚሻ ጊሻስ ናጌታና ማላ ዮቲን ኖሄይ ጾሳስ ባቢዲ ባሶ ኣሳ ኣሻናስ ኣማኖን ማርካቤ ኬጺዲ ኣላሜ ኣሳ ፒርዲሲዴስ፤ ኣማኖን ቤቲዛ ጺሎቴꬅ ላቲዛዴ ጊዲዴስ።
HEB 11:8 ኣብራሃሜይ ባስ ላታ ቢታ ኤካናስ ጼይጌቲዳ ዎዴ ኣማኖን ኣዛዜቲዴስ፤ ኣዋ ቢዛኮ ኤሮንታ ኣጊኮካ ኤሮ ጊዲ ቢዴስ።
HEB 11:9 ኣላጋ ቢታን ቤቴ ኣሳ ማላ ቡሮ ኔስ ኢሜታና ጌቴቲዳ ቢታን ኣማኖን ኡቲዴስ፤ ኢዛስ ኢሜቲዳ ሂዶታ ቃላ ኢዛራ ኢሲፌ ላታና ዪሳቃ ማላኔ ያቆቤ ማላ ዱንካኔን ዴኢዴስ።
HEB 11:10 ጋሶይካ ሚና ዲዛሮ ጾሲ ኢዞ ቆፒ ሜꬊዳ ካታማዮ ኤካና ናጊዴስ።
HEB 11:11 ኣብራሃሜስ ዎዴይ ጌዴ ቢዳዴ ጊዲኮካ ሳራይካ ዬሎንታ ማይኔ ጊዲኮካ ሂዶታ ኢስታስ ኢሚዳዴይ ኣማኔቲዳዴ ሂስቲ ጼሊዲ ኣማኖን ና ኣዋ ጊዳናስ ጋኪዴስ።
HEB 11:12 ሄሳ ጊሻስ ሃይሳ ሃይቂዳ ኣሳ ማላ ቆዴቲዳ ኢሲ ኣብራሃሜፔ ሳሎ ጾሊንቴ ማላኔ ኣባ ኣጬ ማላ ቆዳይ ባይንዳ ዳሮ ዜሬꬃይ ቤቲዴስ።
HEB 11:13 ሄይቲ ዉሪካ ኢስታስ ኢሜቲዳ ሂዶታ ቃላ ዴሞንታ ባ ኣማኖን ናጊዳ ማላ ሃይቂዳ፤ ጊዲኮካ ኢስቲ ሃይሳ ቢታ ቦላ ኢማꬄኔ ቤቴ ኣስ ጊዲዳይሳ ኤሪዳ ጊሻስ ሃሆን ዲሼ ቤኢዲ ኩሼን ኣꬂዳ ማላ ኡፋይሳን ኤኪዳ።
HEB 11:14 ሄሳ ማላ ጊዛ ኣሳቲ ኢስታ ዴሬይ ኣዋኮኔ ባ ዴሬ ናጊዛይሳ ቆንጬን ቤሴቴስ።
HEB 11:15 ኢስቲ ባ ዬጊ ኬዚዳ ዴሬ ዛሪ ቆፒዛኮ ጉዬ ሲሚ ባና ዳንዳዬቴስ።
HEB 11:16 ሃኢ ሄሳፌ ኣꬊዛ ፑዴ ሳሎን ዲዛ ዴሬ ላሞቴቴስ፤ ሄሳ ጊሻስ ጾሲ ኢስታስ ሳሎን ካታማ ጊግሲዳ ጊሻስ፥ «ኢስታ ጾሳ» ጌቴቲ ጼይጌታናስ ዬላቲቤና።
HEB 11:17 ጾሲ ኣብራሃሜይ ባ ናዛ ዪሳቃ ሹካና ማላ ፓጪን ኣብራሃሜይ ዪሳቃ ያርሻናስ ኣማኖን ሺሺዴስ፤ ጾሲ ኢዛስ ኢማና ጊዳይሳ ኢዚካ ባ ና ኢሲኔዛ ሹካናስ ጊጌቲዴስ።
HEB 11:18 ሄሲካ ጾሲ ኢዛስ «ኔ ዜሬꬂ ዪሳቃ ባጋራ ጼይጌታና» ጊዳይሳ ማላ።
HEB 11:19 ጾሲ ሃይቂዳዴ ዴንꬃናስ ዳንዳይዛይሳ ኣብራሃሜይ ኣማኒዳ ጊሻስ ዪሳቃካ ሃይቆፔ ዴንዲዳ ኣሳ ማላ ናምኣንꬆ ዴሚዴስ።
HEB 11:20 ዪሳቃይ ቡሮፔ ሃናናይሳ ቆፒ ኤኪዲ ያቆቤኔ ኤሳዌ ኣማኖን ኣንጂዴስ።
HEB 11:21 ያቆቤይ ሃይቃና ጊሻስ ዮሴፌ ናይታ ኢሳ ኢሳ ኣማኖን ኣንጂዳይኔ ባ ጉፌ ቦላ ዳርቲ ኤቂዲ ጎይኒዳይ ኣማኖና።
HEB 11:22 ዮሴፌይ ሃይቃና ጊሻስ ኢስራኤሌ ኣሳይ ጊብጼፔ ኬዛናይሳ ኢዚ ዮቲዳይኔ ባ ሜቄꬃ ጊሻስ ኢስቲ ኣይ ኦꬃናኮ ኢስታ ኣዛዚዳይ ኣማኖና።
HEB 11:23 ሙሴይ ዬሌቲን ኢዛስ ማላይ ሎኦ ጊዲዳይሳ ቤኢዲ ኢዛ ዬሊዳይቲ ኢዛ ሄꬑ ኣጊና ጋካናስ ካዎዛ ኣዛዞ ባቦንታ ቆቲዳይ ኣማኖና።
HEB 11:24 ሙሴይ ዲጪ ጋኪዲ፥ «ፓሮኔስ ናይ ና» ጌቴታናይሳ ኣማኖን ኢጺዴስ።
HEB 11:25 ጉꬃ ዎዴስ ናጋራን ቤቲዛ ኡፋይሳፌ ኣꬂዲ ጾሳ ኣሳራ ሜቶ ቤያናስ ዶሪዴስ።
HEB 11:26 ጊብጼ ዴሬን ዲዛ ሃሮፔ ቦላራ ኪርስቶሳ ጊሻስ ዋዬ ኤኮይ ዳሮ ኣꬊዛ ሃሮ ጊዲዳይሳ ዩሺ ቆፒዴስ፤ ጋሶይካ ኢዚ ሲንꬃፌ ኤካናይሳ ቡሮ ሃሆን ቤኢዳ ጊሻሳ።
HEB 11:27 ካዎዛ ሃንቆስ ባቦንታ ኣማኖን ጊብጼ ዬጊ ኬዚዴስ፤ ቡሮ ቤቶንታይሳ ቤኢዛ ማላ ቆፒዲ ሄ ቆፋን ሚኒ ኤቂዴስ።
HEB 11:28 ባይራታ ኡባ ዎꬊዛይሲ ኢስራኤሌታ ባይራ ናይታ ዎꬎንታ ማላ ኣማኖን ፓዚጋኔ ሱꬃ ዉጼꬃ ዎጋ ዎꬂዴስ።
HEB 11:29 ኢስራኤሌ ኣሳይ ሜላ ቢታ ቦላ ሄሜቲዛ ማላ ዞኦ ኣባ ጊዶራ ኣማኖን ፒኒዴስ፤ ጊብጼ ኣሳይ ቃሴ ኢስታꬆ ሃናና ጊሼ ኣባን ሚቴቲዴስ።
HEB 11:30 ኢስራኤሌ ኣሳይ ኢያርኮ ጊምቤዛ ላፑን ቃማ ዩዪ ዩዪ ኣꬊዳፔ ጉዬ ጊምቤዛ ኣማኖን ላሊዴስ።
HEB 11:31 ላይማን ኣቂዛ ኤራኣባ ዴሬ ጾሞሳና ዪዳይታ ሳሮን ሞካ ኤኪዳ ጊሻስ ሃንኮ ኣዛዜቶንታ ኣሳራ ꬋዮንታ ኣማኖን ኣታዱስ።
HEB 11:32 ሃይሳፌ ኣꬌꬅ ሃራ ኣይ ጋኔ? ጌዶኔ ጊሻስ፥ ባራቄ ጊሻስ፥ ሳምሶኔ ጊሻስ፥ ዮፍታሄ ጊሻስ፥ ዳዊቴ ጊሻስ፥ ሳሜላ ጊሻስ ቃሴ ናቤታ ጊሻስ ታ ዮቶንታ ማላ ታስ ዎዴይ ዴና።
HEB 11:33 ሄይታንቲ ኣማኖን ካዎታ ጾኒዳ፤ ሱሬ ፒርዳ ፒርዲዳ፤ ባስ ኢሜቲዳ ሂዶታ ቃላ ኤኪዳ፤ ጋሞታ ዶና ጎርዲዳ፤
HEB 11:34 ታማ ዎልቃ ቶይሲዳ፤ ቃራ ማሻፌ ኬሲ ኤኪ ኣቲዳ፤ ዳቡራፔ ሚኒዳ፤ ኦላሶን ጎባታ ጊዲዳ፤ ኣላጋ ኣሳ ኦላ ጎዲዳ፤
HEB 11:35 ማጫሳታስ ሃይቂዳይቲ ፓጺዳ፤ ባጋይቲ ቃሴ ሄሳፌ ኣꬊዛ ሃይቆፔ ዴንꬅ ዴማናስ ጊዲ ሃይቆፔ ኣቴꬅ ሌቂዲ ሃይቆስ ባና ኣꬂ ኢሚዳ፤ ዋዬፔ ኣታናስ ኮዪቤቴና።
HEB 11:36 ኢሲ ኢሲ ኣሳቲ ኣሳን ካኤቲዳ፤ ጋራፌቲዳ፤ ባጋይቲ ቃሴ ቃሾ ኬꬅ ጌሊዳ።
HEB 11:37 ሹቻን ጫዴቲዳ፤ ማጋዜንካ ናምኡ ኬዚ ጳልቄቲዳ፤ ማሻን ሹኬቲ ሃይቂዳ፤ ጎዴቲሼኔ ዳቡርሼ ዶርሳ ኢቴኔ ዴይሻ ኢቴ ማይኢዲ ዋዬቲዳ።
HEB 11:38 ሃ ኣላሜይ ኢስታስ ቤሶንታይሳ ጊዲዳ ጊሻስ ባዞኒኔ ጌዜን ጎንጎሎኒኔ ኦላ ጊዶን ዋዬቲዳ።
HEB 11:39 ሄይታንታ ኡባታ ኣማኖ ጊሻስ ማርካቲኮካ ኢስታፌ ኦኒካ ኢሜታና ጌቴቲዳ ሂዶታ ቃላ ጋኪ ኤኪዳዴይ ዴና።
HEB 11:40 ጾሲ ኑስ ሄሳፌ ኣꬊዛዝ ጊግሲዳ ጊሻስ ኑ ባይንዳ ኢስቲ ጻላ ኩሜꬅ ጊዳና ዳንዳይቤቴና።
HEB 12:1 ሄሳ ጊሻስ ሻራ ማላ ኑና ዩዪ ኣꬊዳ ዳሮ ማርካቲ ኑስ ዲሺን ኑና ዴጺዛ ቶሆኔ ቃሴ ኑና ቃቺ ኦይኪዛ ናጋራ ዉርሲ ኑፔ ዎራ ዬጊዲ ኑ ሲንꬃን ዲዛ ዎꬃ ጌንጫኒኔ ዳንዳያን ኣኔ ዎጾስ።
HEB 12:2 ኑ ኣማኒዛ ኣማኖዛስ ኮይሮኔ ፖሎ ጊዲዳ ዬሱሳ ኣኔ ጼሎስ፤ ኢዚ ባ ሲንꬃን ዲዛ ኡፋይሳ ጊሻስ ማስቃሌ ቦላ ሃይቆ ዳንዳይዲ ማስቃሌ ቦላ ባና ጋካና ካዉሻቴꬃ ሌቂዲ ጾሳ ኣልጋስ ኡሻቻን ኡቲዴስ።
HEB 12:3 ሂስቲኮ ኢንቴ ዳቡርዲ ሂዶታ ቃንጾንታ ማላ ሄሳꬆካ ናጋራንቻታፔ ካሴ ኢዛ ቦላ ጋኪዳ ሄሳ ማላ ኤቄቴꬅ ዳንዳይዳ ዬሱሳ ቆፒቴ።
HEB 12:4 ሱꬂ ጉካና ጋካናስ ናጋራራ ኢንቴ ቡሮ ኤቄቲቤኬታ።
HEB 12:5 ኢንቴ ጾሳ ናይታ ጊዲ ኡቲዲ ቃላይ ጊዛይሳ ባሊዴታ፤ «ታ ናዞ ጾሳ ሴራ ካዉሻን ጼሎፋ፤ ኔና ኢዚ ሴሪዛ ዎዴ ሂዶታ ቃንጾፋ።
HEB 12:6 ጋሶይካ ጎዳይ ባ ዶሲዛዴ ሃንቄስ፤ ኢዚ ባ ዶሲዛዴ ሴሬስ፤ ኢዚ ባ ና ማላ ጼሊዛዴ ቃጻዬስ» ጊዴስ።
HEB 12:7 ጾሲ ኢንቴና ባ ና ማላ ቆዲዛ ጊሻስ ሃንቆ ዳንዳይቴ፤ ኣዋይ ሃንቆንታ ናይ ኦኔ?
HEB 12:8 ናይ ዉሪ ሴራን ዲጪዛ ማላ ኢንቴ ዲጮንታ ኣጊኮ ኢንቴ ካሬን ዬሌቲዳ ና ኣቲን ሶ ና ጊዴኬታ።
HEB 12:9 ሄሳ ኡባፌ ቦላራ ሃይሳ ቢታ ቦላ ኑና ሃንቂ ዲቺዳ ኣሾ ኣዋቲ ዴቴስ፤ ኑኒካ ኢስታ ቦንቾስ፤ ሂስቲን ዴኦን ዴያናስ ኑስ ኣያና ኣዋ ጊዲዳይሳስ ኣዛስ ሄሳፌ ኣꬂ ኣዛዜቶኮኒ?
HEB 12:10 ኑ ኣዋቲ ኑና ባስ ሎኦ ሚሳቲ ቤቲዳ ማላ ጉꬃ ዎዴስ ቃጻዬቴስ፤ ጾሲ ጊዲኮ ኑኒ ኢዛ ጌሻቴꬃ ኢዛፔ ዴማና ማላ ኑና ጎኣናስ ቃጻዬስ።
HEB 12:11 ቂጻቴይ ዉሪካ ሃኢስ ኡፋይሶንታ ኢታ ሚሳቴስ ሺን ጉዬፔ ቃሴ ዶሲ ኤኪዳ ኣሳታስ ሳሮቴꬂ ኢዛን ኩሚዳ ጺሎቴꬃ ኣይፌን ጋꬄስ።
HEB 12:12 ሄሳ ጊሻስ ዳቡርዳ ኢንቴ ቄሴኔ ኢንቴ ጉልባቴ ሚንꬂቴ።
HEB 12:13 ዎቤይ ፓጻና ማላ ኣቲን ካሴፔ ኣꬂ ዎቦንታ ማላ ኢንቴ ቶሆስ ሎኦ ኦጌ ጊግሲቴ።
HEB 12:14 ኣሲ ኡባራ ሳሮ ዳና ማላ ኢንቴስ ዳንዳዬቲዛይሳ ኡባ ኦꬂቴ፤ ጌያና ማላ ኮዪቴ፤ ጌሻቴꬂ ባይንዳ ጎዳ ቤያናስ ዳንዳዬቴና።
HEB 12:15 ኢንቴፌ ኢሳዴስካ ጾሳ ኪያቴꬂ ፓጮንታ ማላ ቃሴካ ጫሞ ኣይፌ ኣይፊዛ ሚꬂ ሞኪዲ ሜቶ ሜꬎንታ ማላኔ ዳሮታ ሞሮንታ ማላ ናጌቲቴ።
HEB 12:16 ኢሲቶ ማና ካꬃስ ባ ባይራቴꬅ ባይዚዳ ኤሳዌ ማላ ኢንቴፌ ኦኒካ ላይማቲዛዴ ዎይኮ ጾስ ቦንቾንታዴ ጊዲ ቤቶንታ ማላ ናጌቲቴ።
HEB 12:17 ኤሳዌይ ጉዬፔ ካሴ ባ ኣንጆዛ ላታናስ ዛሪ ኮዪን ኢዛስ ኢሜቶንታ ዲጌቲዳይሳ ኢንቴ ኤሬታ፤ ኢዚ ባና ጋኪዛ ኣንጆዛስካ ዳሮ ዬኪሼ ኮዪዲካ ዛሪ ዴማናስ ዳንዳይቤና።
HEB 12:18 ኩሼን ቦቺኮ ቦሼቲዛ ታማይ ኢዛ ቦላ ኤጺዛ ሲና ዙማኮ፥ ሄ ꬉማኮ፥ ሄ ቱላላዛኮኔ ሄ ጎቴ ጫርኮዛኮ ኢንቴ ጋኪቤኬታ።
HEB 12:19 ኢንቴ ዛዬ ጊሪሳኮ ዎይኮ ሃይꬃን ሲዬቲዛ ቃላ ጊሪሳኮ ጋኪቤኬታ፤ ሄሳ ሲዪዳ ኣሳቲካ ሃራ ቃላ ጉጆንታ ማላ ዎሲዳ።
HEB 12:20 ሄሳስ ጋሶይካ፥ «ሃራይ ኣቶሺን ሜሄይካ ዙማ ቦቺዛ ጊዲኮ ሹቻን ጫዴቲ ሃይቆ» ጊዛ ኣዛዞዛ ኣሳይ ናጋናስ ዳንዳይቤና።
HEB 12:21 ሄ ዎዴ ሄን ሃኒዛይሲ ዉሪካ ዳሮ ባቢሲዛይሳ ጊዲዳ ጊሻስ ሙሴይካ፥ «ታ ባባዳ ኮኮራዲስ» ጊዴስ።
HEB 12:22 ኢንቴ ቃሴ ሃ ጺዮኔ ዙማ ቦላ፥ ፑዴ ሳሎ ዬሩሳላሜ፥ ዴኦ ጾሳ ካታማ ኡፋይሳን ሺቂዳ ቆዳይ ባይንዳ ኪታንቻታኮ ዪዴታ።
HEB 12:23 ኢስታ ሱንꬂ ሳሎን ጻፌቲዳ ባይራታ ማባራንኮ፤ ኡባስ ዳና ጊዲዳ ጾሳኮ ኢስታ ቦላ ዎሶይ ባይንዳ ጺሎ ኣሳታ ሼምፖይ ዲዛሶ ማቲዴታ።
HEB 12:24 ኦራꬃ ጫቆን ማቃዪንꬂዛይ ዬሱሳኮ፤ ሄሳꬆካ ኣቤሊ ሺሺዳ ሱꬃፌ ኣꬊዛ ጫቆ ቃላ ዮቲዛ ኣራጬቲዳ ሱꬃኮ ጋኪዴታ።
HEB 12:25 ኢንቴስ ዮቲዛይሳ ኢንቴ ኣካይ ጎንታ ማላ ናጌቲቴ፤ ሄይታንቲ ጾሲ ቢታ ቦላ ዲዛ ኣሳ ባጋራ ኢስታስ ዮቲዛይሳ ኤኮንታ ኢጺዲ ኢዛፔ ኣታናስ ዳንዳዮንታ ኣጊኮ ኑኒ ሳሎፔ ዪዳይሲ ኑስ ዮቲሺን ኤኮንታ ኢጺኮ ኑ ኢዛፔ ዋኒ ኣታኔ?
HEB 12:26 ሄ ዎዴ ቃላ ጊሪሳን ቢታ ቃꬂዴስ፤ «ሃኢ ቃሴ ቢታ ጻላ ጊዶንታ ታኒ ሳሎካ ቃሴካ ታ ዛራዳ ኢሲቶ ቃꬃና» ጊዛ ቃላ ዮቲ ዎꬂዴስ።
HEB 12:27 ሃይሲ፥ «ቃሴካ ታ ዛራዳ ኢሲቶ» ጊዛ ቃላይ ኑና ቤሲዛይ ቃጾንታይቲ ሚኒ ዳና ማላኔ ቃጺዛይቲ ሄይቲካ ሜꬌቲዳይቲ ኪቻናይሳ ቤሴስ።
HEB 12:28 ሄሳ ጊሻስ ኑኒ ሙሌካ ቃጾንታ ካዎቴꬅ ላታና ጊሻስ ኣኔ ጾስ ጋላቶስ፤ ቃሴካ ኢዛ ኡፋይሲዛ ኦጌራ ቦንቾሲኔ ያሻቴꬃን ኣኔ ኢዛስ ጎይኖስ።
HEB 12:29 ኑ ጾሳይ ጹጊዛ ታማ ማላ።
HEB 13:1 ኢንቴ ኢንቴ ጊዶን ኢሻታ ማላ ዶሴቲቴ።
HEB 13:2 ኢማꬃ ሞኮ ባሎፒቴ፤ ኢሲ ኢሲ ኣሳቲ ሄሳꬆ ኦꬂሼ ኤሮንታ ኪታንቻታ ኢማꬃቴꬅ ሞኪ ኤኪዳ።
HEB 13:3 ቃሾ ኬꬃን ዲዛይታራ ኢንቴካ ቃሼቲዳ ማላ ኢስታስ ቆፒቴ፤ ሄሳꬆካ ኣሳ ኩሼን ዋዬቲዛይታራ ኢንቴካ ዋዬቲዛ ማላ ኢስታስ ቆፒቴ።
HEB 13:4 ኤኮይ ጌሎይ ኡባ ኣሳ ኣቻን ቦንቼቶ፤ ኢንቴ ሂꬂ ጌሽ ጊዶ፤ ጋሶይካ ላይማ ኣሞይ ዲዛይታ ቦላኔ ላይማቲዛይታ ቦላ ጾሲ ፒርዳና።
HEB 13:5 ሚሻ ሲቆፔ ናጌቲቴ፤ ኢንቴስ ዲዛይሲ ጊዳና፤ ሄሳስ ጋሶይካ ጾሲ፥ «ታ ኢንቴና ሙሌካ ኣጊኬኔ ዬጊኬ» ጊዴስ።
HEB 13:6 ሄሳ ጊሻስ ኩሜꬃ ዎዚናፔ ኑኒ፥ «ጎዳይ ታስ ማዶ፤ ታ ባቢኬ፤ ታና ኣሲ ኣይ ኦꬃና ዳንዳይዜ?» ጎስ።
HEB 13:7 ኢንቴስ ጾሳ ቃላ ኮይሮፔ ዮቲ ካሌꬂዛይታ ባሎፒቴ፤ ኢስታ ዱሳን ቤቲዛ ሎኦ ኣይፌይ ዲዛይሳ ዩሺ ቆፒቴ፤ ኢንቴካ ኣማኖን ኢስታ ሚሳቲቴ።
HEB 13:8 ዬሱስ ኪርስቶሲ ሃቺካ ዎንቶካ ሜርናስካ ኢዚ ኢዛኮ!
HEB 13:9 ዱማ ዱማ ኢማꬃ ቲሚርቴ ኤኮፍቴ፤ ኑ ዎዚናይ ሚኒ ኤቂዛይ ጾሳ ኪያቴꬃን ኣቲን ካꬃ ዎጋ ናጎን ጊዴና፤ ሄ ዎጋ ናጊዛይቲካ ኢዛን ጎኤቲቤቴና።
HEB 13:10 ኑስ ያርሾሶይ ዴስ፤ ጊዲኮካ ዱንካኔዛ ጊዶን ኦꬂዛ ቄሴቲ ሄ ያርሾሶዛ ቦላ ዲዛ ካꬃፌ ኤኪ ሞንታ ማላ ዲጌቲዳ።
HEB 13:11 ቄሴታ ሃላቃይ ናጋራ ቴቂዛ ሜሄ ሱꬅ ኤኪዲ ኡባፌ ዱማ ጌቴቲዛ ኪፊሌ ጌሌስ፤ ሜሄታ ኣሾይ ጊዲኮ ካታማፔ ካሬን ጹጌቴስ።
HEB 13:12 ሄሳꬆካ ዬሱሲ ባ ሱꬃ ባጋራ ኣሳ ጌሻናስ ካታማ ፔንጌፌ ካሬን ሜቶ ቤዪዴስ።
HEB 13:13 ሄሳ ጊሻስ ኑኒካ ኢዚ ቶኪዲ ካዉሻቴꬃ ቶኪዲ ኑ ዲዛሶፔ ጌዴ ኢዛኮ ካሬ ኣኔ ኬዞስ።
HEB 13:14 ጋሶይካ ሃይሳን ኤቂ ዳና ካታማይ ኑስ ዴና፤ ጊዶ ኣቲን ቡሮ ሲንꬃፌ ያና ካታማዮ ናጎስ።
HEB 13:15 ሄሳ ጊሻስ ኡባ ዎዴ ጋላታ ያርሾ ሄሲካ ኢዛ ሱንꬃስ ማርካቲዛ ኑ ዶናፔ ቤቲዛ ኣይፌ ጊዲዳዝ ዬሱሳ ባጋራ ጾሳስ ኣኔ ሺሾስ።
HEB 13:16 ቃሴካ ሎኦ ኦሶኔ ኢንቴስ ዲዛይሳፌ ሃራታስ ኢሞ ባሎፒቴ፤ ጾሲ ሄይታንታ ማላ ያርሾን ኡፋዬቴስ።
HEB 13:17 ኢንቴና ካሌꬂዛይታስ ኣዛዜቲቴኔ ሃሬቲቴ፤ ሄሳስ ጋሶይካ ኢንቴ ጊሻስ ኢስታ ኣላፌቴꬃን ዳሮ ኦይቺዛ ጉዳይ ዲዛ ጊሻስ ኢንቴ ሼምፖ ጊሻስ ዳሮ ባጼቴቴስ፤ ሄሳ ጊሻስ ኢስቲ ባ ኦꬂዛ ኦሶዛ ላንጬቲሼ ጊዶንታ ኡፋይሳን ኦꬃና ማላ ኢንቴ ኢስታስ ኣዛዜቲቴ። ኢንቴ ሄሳꬆ ሂስቶንታ ኣጊኮ ኢንቴስ ሎኤና።
HEB 13:18 ኑስካ ዎሲቴ፤ ኡባሶራካ ሎኦ ዱስ ዳናስ ላሞቲዛ ሎኦ ቆፋይ ኑስ ዲዛይሳ ኑ ሲꬎኮ።
HEB 13:19 ሃራፔካ ታ ኢንቴኮ ኤሌን ሲማ ባና ማላ ታስ ኢንቴ ዎሳና ማላ ሃዳራ ጋይስ።
HEB 13:20 ዶርሳታ ሄንꬃንቻይ ዎጋ ጎዳ ዬሱስ ኪርስቶሳ ባ ሜርና ጫቆ ቃላ ሱꬃን ኢዛ ሃይቆፔ ዴንꬂዳ ሳሮቴꬃ ጾሲ፥
HEB 13:21 ኢንቴ ኢዛ ሼኔ ፖላና ማላ ሎኤቴꬃን ኢንቴና ጊጺሶ፤ ጾሳ ኡፋይሲዛይሳ ዬሱስ ኪርስቶሳ ባጋራ ኑናን ኦꬆ፤ ኢዛስ ሜርናፔ ሜርናስ ቦንቾይ ጊዶ። ኣሚን።
HEB 13:22 ታ ኢሻቶ! ኢንቴስ ጻፊዳ ዞሬ ቃላይ ጉꬅ ጊዲዳ ጊሻስ ኢንቴ ሃንቄቶንታ ማላ ታ ኢንቴና ሃዳራ ጋይስ።
HEB 13:23 ኑ ኢሻ ጺምቶሲ ቢርሼቲዳይሳ ኢንቴ ኤራና ማላ ታ ኮያይስ፤ ኢዚ ኤሶን ታኮ ዪኮ ታ ኢዛራ ሄ ባዳ ኢንቴና ሄን ቤያና።
HEB 13:24 ኢንቴና ካሌꬂዛይታ ኡባታሲኔ ኣማኒዛ ኣሳ ኡባስ ታ ሳሮካ ዮቲቴ። ኢጻሊያን ዲዛ ኣማኒዛ ኣሳይካ ኢንቴና ሳሮ ጌስ።
HEB 13:25 ጾሳ ኪያቴꬂ ኢንቴናራ ጊዶ። ኣሚን።
JAM 1:1 ጾሳ ኦሳንቻኔ ዬሱስ ኪርስቶሳ ኦሳንቻ ጊዲዳ ያቆቤፔ ቢታ ቦላ ላሌቲዳ ታማኔ ናምኡ ኮቻታስ ሳሮቴꬂ ኢንቴስ ጊዶ።
JAM 1:2 ታ ኢሻቶ! ኢንቴ ቦላ ዱማ ዱማ ዋዬይ ጋኪኮ ሄሳ ዉርሲ ኡፋይሳን ቆዲቴ።
JAM 1:3 ጋሶይካ ኢንቴ ኣማኖ ፓጬቴꬂ ኢንቴስ ዳንዳያ ኢሚዛይሳ ኢንቴ ኤሬታ።
JAM 1:4 ኢንቴ ዳንዳያን ሚኒ ኤቃናይሲ ኢንቴስ ኢሲ ሚሺካ ፓጮንታ ኩሜꬃ ኣሲኔ ዎሶይ ባይንዳይታ ጊዳና ማላ ኦꬆ።
JAM 1:5 ኢንቴ ጊዶፌ ኦናስካ ኤራቴꬂ ፓጪኮ ኦናካ ሌቆንታ ባ ኪያቴꬃራ ኡባስ ኢሚዛ ጾሳ ዎሶ፤ ኢዛዴስካ ኢሜታና።
JAM 1:6 ጊዶ ኣቲን ሲꬌይ ባይንዳ ኣማኖን ዎሶ፤ ጋሶይካ ሲꬊዛዴይ ኣባ ቃꬂዛ ዳምባላ ጫርኮ ማላ።
JAM 1:7 ሄሳዴይ ጎዳፔ ኣይኮካ ዴማና ጊዲ ቆፖፎ።
JAM 1:8 ሄሳዴይ ናምኡ ቆፋን ኦይኬቲዲ ባ ቢዛ ኦጌ ቦላ ያኔ ሃ ጊዛ ኣሳ ማላ።
JAM 1:9 ካሴ ዚቃ ዱሳን ዲዛዴ ጾሲ ꬎቁ ሂስታና ጊሻስ ኡፋዬቶ።
JAM 1:10 ኣሳ ዱሬቴꬂ ማታ ጪሻ ማላ ቆካና ጊሻስ ዱሳን ꬎቁ ጊዳዴይ ጾሲ ኢዛ ዚቂ ሂስቲኮ ኡፋዬቶ።
JAM 1:11 ኣርሼይ ጹጊዲ ማታ ሹሊሴስ፤ ማታ ጪሻይካ ሹሌስ፤ ኢዛ ሎኤቴꬂካ ꬋዬስ፤ ሄሳꬆካ ዱሬይ ሃች ሃች ዳቡርሳን ዲሺን ኢዛ ዱሬቴꬂ ꬋዬስ።
JAM 1:12 ፓጬን ሚኒ ኤቂዳዴይ ኢዚ ኣንጄቲዳዴ፤ ጋሶይካ ኢዚ ፓጬራ ኤቄቲሺን ጾሲ ባና ዶሲዛይታስ ኢሚዳ ሂዶታ ዴኦ ኣኪሊሌ ኢዚ ኤካና።
JAM 1:13 ኦኒካ ፓጬቲዛ ጊዲኮ ታና ጾሲ ፓጬስ ጎፖ፤ ጋሶይካ ጾሲ ኣሴ ኢታን ፓጬና፤ ኢዚ ኦናካ ፓጪ ኤሬና።
JAM 1:14 ጊዶ ኣቲን ኢሲ ኢሲ ኣሲ ፓጬቲዛይ ባርካ ባ ኢታ ኣሞ ካሊሼኔ ባሌቲሼ ፓጬቴስ።
JAM 1:15 ኣሞይ ቃንꬃቲዲ ናጋራ ዬሌስ፤ ናጋራይካ ዲጪዳፔ ጉዬ ሃይቆ ዬሌስ።
JAM 1:16 ታ ሲቆ ኢሻቶ! ኢንቴ ባሌቶፍቴ።
JAM 1:17 ሎኦ ኢሞቴꬂኔ ኩሜꬃ ኣንጆይ ዉሪ ቦላ ሳሎ ፖኦታ ኣዋፔ ዎꬌቴስ፤ ኢዛ ኣቻን ያኔ ሃ ዩዪዛ ኤሾይካ ዴና።
JAM 1:18 ኑ ኢዛ ሜꬌቴꬃስ ኮይሮ ባይራታ ጊዳና ማላ ባ ሼኔኒኔ ባ ቱማ ቃላን ኑና ዬሊዴስ።
JAM 1:19 ዶሴቲዳ ታ ኢሻቶ! ሃይሳ ዩሺ ቆፒቴ፤ ኣሲ ዉሪካ ሲያናስ ኤሶቶ፤ ሃሳያሲኔ ሃንቆስ ኤሶቶፖ።
JAM 1:20 ኣሳ ሃንቆይ ጾሳ ጺሎቴꬅ ኦꬄና።
JAM 1:21 ሄሳ ጊሻስ ቱናቴꬂኔ ዳልጊዳ ኢታቴꬂ ኢንቴፌ ኬሲ ዬጊዲ ኢንቴ ሼምፖ ኣሻናስ ዳንዳይዛ ኢንቴ ጊዶን ቶኬቲዳ ቃላ ኣሽኬቴꬃራ ኤኪቴ።
JAM 1:22 ቃላይ ጊዛይሳ ኦꬂቴ ኣቲን ሜላ ሲስ ጻላ ሲዪዛዴንታ ጊዲዲ ኢንቴርካ ኢንቴና ባሌꬆፍቴ።
JAM 1:23 ቃላ ሲዪሼ ሲዪዳ ቃላይ ጊዛይሳ ኦꬆንታዴይ ባ ኣይፌሶ ማስቶቴራ ጼሊዛ ኣሳ ማላ።
JAM 1:24 ባና ጼሊ ቤኢዲ ቤስ፤ ኢዚ ኣይ ሚሳቲዛኮ ሄራካ ባሌቲቼስ።
JAM 1:25 ጊዶ ኣቲን ባና ጌሺዛ ሎኦ ዎጋ ጼሊ ቤኢዲ ኢዛን ሚኒዛዴይ ባ ሲዪዳይሳ ኦꬂዛዴይኔ ባሎንታዴይ ኢዚ ባ ኦሶን ኣንጄቲዳዴ ጊዳና።
JAM 1:26 ባ ዶና ናጎንታ ባርካ ባ ዎዚና ባሌꬂሼ ታ ኣማናይስ ጊዛዴይ ባርካ ባና ባሌꬄስ፤ ኢዛ ኣማኖይካ ሃዳ ኣማኖ።
JAM 1:27 ጾሳ ኣዋ ሲንꬃን ኢታቴꬂ ባይንዳ ሎኦ ኣማኖይ ኣያኔ ኣዋይ ሃይቂዳ ናይታ፥ ኢስታ ኣዚናቲ ሃይቂዳ ማጫሳታ ሜቶቴቲሺን ማዶኔ ሃይሳ ኣላሜዛ ቱናቴꬃፌ ባና ናጎ።
JAM 2:1 ታ ኢሻቶ! ኢንቴ ቦንቼቲዳ ጎዳ ዬሱስ ኪርስቶሳ ኣማኒዛይታ ጊዲዳ ማላ ኣሴ ቤሶንታ ኦጌራ ማዶፍቴ።
JAM 2:2 ዎርቃ ዪች ቢራꬌን ኣꬂዲ ሎኦ ማይኦ ማይኢዳ ኣሲ ኢንቴ ሺቂዛሶ ዪኮ ሄሳꬆካ ቂታ ማይኦ ማይኢዳዴይ ሄ ሺቂዛሶዛ ዪኮ ቃሴካ ሃራ ቂታ ማይኦ ማይኢዳ ማንቆ ኣሲ ጌሊኮ ሎኦ ማይኢዳይሳ ዱማ ቦንቾ ቦንቺዲ፥ «ኔስ ቤሲዛ ሎኦ ኡቲዛሶ ሄሳ ቤያ» ጊዲ ሃንኮ ማንቆዛ ቃሴ፥ «ኔ ሄን ሄሳን ኤቃ፤ ዎይኮ ሃ ያ፤ ታ ጋርሳን ዉጌን ኡታ» ኢንቴ ጊኮ፥
JAM 2:4 ኢንቴ ኢንቴ ጊዶን ቤሶንታ ማዶ ኦꬄታ ጊዴኬቲ? ቃሴካ ኢንቴ ኢታ ቆፋን ኦይኬቲዳ ኢታ ፒርዳ ፒርዲዛይታ ጊዴኬቲ?
JAM 2:5 ታ ሲቆ ኢሻቶ! ኣኔ ሲዪቴ፤ ኢስቲ ኣማኖን ዱሬታ ጊዳና ማላ ጾሲ ባና ዶሲዛይታስ ሂዶታ ኢስታስ ኢሚዳ ካዎቴꬃ ኢስቲ ላታና ማላ ሃይሳ ሃ ኣላሜዛን ዲዛ ማንቆታ ዶሪቤኔ?
JAM 2:6 ኢንቴ ቃሴ ማንቆታ ካዉሼታ፤ ኢንቴና ዋዪሲዛይ ዱሬታ ጊዴቴኔ? ኢንቴና ፒርዳሶ ጎቺዛይ ኢስታ ጊዴቴኔ?
JAM 2:7 ኢንቴናን ጼይጌቲዳ ቦንቾ ጾሳ ሱንꬅ ዚጊርዛይቲ ኢስታ ጊዴቴኔ?
JAM 2:8 ጌሻ ማጻፋን፥ «ኔ ላጌ ኔ ሁኤ ማላ ሲቃ» ጌቴቲ ጻፌቲዳ ካዎ ዎጋ ኢንቴ ፖሊኮ ሎኦ ኦꬄታ።
JAM 2:9 ኢንቴ ቤሶንታ ማዶ ማዲኮ ናጋራ ኦꬄታ፤ ዎጋ ሲንꬃንካ ኢንቴ ዎጋ ዬꬊዳዴ ጊዲ ቆዴታና።
JAM 2:10 ጋሶይካ ዎጋ ኡባ ፖሊዛዴይ ቃሴካ ዎጋፔ ኢሲኔይን ꬉጴቲዛ ኣሲ ኡባካ ሞሪዳዴ ማላ ቆዴቴስ።
JAM 2:11 «ላይማቶፓ» ጊዳዴይ ኢዚካ ዛሪዲ፥ «ዎꬎፓ» ጊዴስ። ኔ ላይማቶንታ ኣጊኮካ ኔኒ ኣስ ዎꬊኮ ዎጋፔ ኣꬊዳዴ ጊዳሳ።
JAM 2:12 ኢንቴ ሃሳያ ሃሳይሼ ዎይኮ ኢሲ ሚሽ ኦꬂሼ ኢንቴና ጺሊሲዛ ኣሳ ማላ ጊዲቴ።
JAM 2:13 ጋሶይካ ማሮንታይ ዉሪካ ማሮይ ባይንዳ ፒርዴታና፤ ማሮይ ፒርዳ ጾኔስ።
JAM 2:14 ታ ኢሻቶ! ኢሲ ኣሲ ታስ ኣማኖይ ዴስ ጊኮ ቃሴ ኦሶን ቤሶንታዴ ጊዲኮ ኢዛ ኣይ ማዳኔ? ሄሳ ማላ ኣማኖይ ኢዛ ኣሻኔ?
JAM 2:15 ኣኔ ቆፒቴ፤ ኢሲ ኢሻይ ዎይኮ ኢሲ ሚቺያ ማይኦይ ዎይኮ ሚዛይሲ ባይንዳ ኣጊኮ ኢንቴፌ ኢሳዴይ፥ «ኢንቴ ሳሮን ቢቴ! ኢንቴና ሜጎፎ! ካሊቴ!» ጊኮ ኢስታ ኣሾስ ኮሺዛይሳ ኢሞንታ ኣጊኮ ኣይ ማዳኔ?
JAM 2:17 ሄሳꬆካ ኦሶይ ባይንዳ ኣማኖይካ ባስ ሃይቂዳይሳ።
JAM 2:18 ጊዶ ኣቲን ኢሳዴይ፥ «ታስ ኦሶይ ዴስ፤ ኔስ ኣማኖይ ዴስ፤ ኔኒ ኔ ኣማኖ ኦሶፔ ሻካዳ ታና ቤሳ፤ ታ ቃሴ ታ ኣማኖ ኦሶን ኔና ቤሳና» ጊኮ
JAM 2:19 ኔ፥ «ኢሲ ጾሲ ዲዛይሳ ኣማናሳ» ሄሲካ ሎኦ፤ ዳይዳንꬃቲካ ሄሳ ማላ ኣማኔቴሲኔ ኬሂ ኮኮሬቴስ።
JAM 2:20 ኔኖ ኤያዞ! ኦሶይ ባይንዳ ኣማኖስ ጎኣይ ባይንዳይሳ ኤራናስ ማርካ ኮያይ?
JAM 2:21 ኑ ኣዋ ኣብራሃሜይ ባ ና ዪሳቃ ያርሺዛሶዛ ቦላ ሺሺዳ ዎዴ ኦሶን ጺሊቤኔ?
JAM 2:22 ሄሳን ባ ኣማኖዛ ኦሶራ ጋꬂ ኦꬂዛይሳ ኔ ቤያሳ፤ ኣማኖይካ ኦሶን ፖሌቲዴስ።
JAM 2:23 «ኣብራሃሜይ ጾስ ኣማኒዴስ፤ ሄ ኣማኖይ ኢዛስ ጺሎቴꬃን ቆዴቲዴስ» ጊዛ ማጻፋ ቃላይ ፖሌቲዴስ፤ ኢዚካ ጾሲ ዶሲዳዴ ጌቴቲዴስ።
JAM 2:24 ሄሳ ጊሻስ ኣሲ ኣማኖን ጻላ ጊዶንታ ኦሶንካ ጺሊዛይሳ ኢንቴ ቤዬታ።
JAM 2:25 ሄሳꬆካ ላይማን ዲዛ ኤራኣባ ኪቴቲ ቢዳ ኣሳታ ሞካ ኤካዳ ሃራ ኦጌራ ሞይዛ ዬዲዳ ጊሻስ ባ ኦሶን ጺላቤኬ?
JAM 2:26 ሼምፖፌ ሻኬቲዳ ኣሾይ ሃይቄꬅ ጊዲዳ ማላ ኦሶፔካ ሻኬቲዳ ኣማኖይ ሃይቄꬃ።
JAM 3:1 ታ ኢሻቶ! ኢንቴፌ ዳሮቲ ኣስታማሬታ ጊዶፔቶ፤ ጋሶይካ ኑ ኣስታማሬ ጊዲዳይቲ ኣꬌꬃ ፒርዳ ኤካናይሳ ኢንቴ ኤሬታ።
JAM 3:2 ኑ ዉሪካ ዳሮ ሚሻን ꬉጴቶስ። ሃሳያን ꬉጴቶንታዴይ ዲኮ ኢዚ ባ ኣሳቴꬅ ሎኤꬂ ናጋናስ ዳንዳይዛ ኩሜꬃ ኣሳ።
JAM 3:3 ኑኒ ፓራታ ኣዛዛናስ ቢጻላ ባርሲዲ ኑ ኮዪዳ ማላ ኢስታ ኣዛዞስ።
JAM 3:4 ዎይኮ ኣኔ ማርካቤታ ጼሊቴ፤ ኢስቲ ኣይ ጊታታኔ ጫርኮን ሱጌቲ ቢዛይታ ጊዲኮካ ማርካቤ ላጊዛዴይ ቄሪ ላፋ ላጊዛ ሚሻራ ባ ኮይዛሶ ኤፌስ።
JAM 3:5 ሄሳꬆካ ኣሳቴꬃ ጋርሳን ኢንጻርሲ ጉꬅ ጊዳ ኡታዳ ጊታ ዎልቃማ ኦቶሮ ኦቶሬታዉስ፤ ቄሪ ታማይ ጊታ ዎራ ዎስቲ ጹጊ ꬋይሲዛኮ ኣኔ ዩሺ ቆፒቴ።
JAM 3:6 ኢንጻርሲካ ባ ባጋራ ታማ ማላ፤ ቃሴ ኑ ኣሳቴꬃ ጊዶን ዲዛ ኢታ ኣላሜ። ኣሳቴꬃ ዉርሳ ቱኒሳዉሲኔ ኣሳቴꬃ ቦላ ታማ ጉጃዉስ፤ ባስካ ጋናሜ ታማን ጹጌታና።
JAM 3:7 ሜሄ፥ ዶኣ፥ ካፎታ፥ ቢታ ቦላ ጎሼቲዛይታኔ ኣባ ጊዶን ዲዛ ሜꬌቴꬃታ ኡባ ኣሲ ሃራና ዳንዳዬስ፤ ኢስቲካ ሃሬቲዳ።
JAM 3:8 ጊዶ ኣቲን ኢንጻርስ ሃራናስ ዳንዳይዳዴይ ኦኒካ ዴና፤ ዎꬊዛ ማርዜይ ኢዚን ኩሚዳሮኔ ኢዛ ሼምፓ ኤኮንታ ኢታ ሚሻ።
JAM 3:9 ኑኒ ኑ ኢንጻርሳይራ ጎዳኔ ኣዋ ኣንጆስ፤ ኢዚንካ ጾሳ ሌሚሶን ሜꬌቲዳ ኣሳ ናይታ ዛሪዲ ቃንጎስ።
JAM 3:10 ኣንጆይኔ ቃንጌꬂ ኢሲ ዶናራ ኬዜስ። ታ ኢሻቶ! ሄሲ ሄሳꬆ ሃናናስ ቤሴና።
JAM 3:11 ኢሲ ፑልቶ ኦላፌ ማልኦ ሃꬂኔ ጫሞ ሃꬂ ፑልቲ ኤሪዜ?
JAM 3:12 ታ ኢሻቶ! ባላሴ ጌቴቲዛ ሚꬂ ዎጋራ ኣይፌ ዎይኮ ዎይኔ ሚꬂ ባላሴ ሚꬃ ኣይፌ ኣይፋናስ ዳንዳይዜ? ሄሳꬆካ ጫሚዛ ሃꬃፌ ማልኢዛ ሃꬂ ቤታና ዳንዳዬና።
JAM 3:13 ኢንቴ ጋርሳፌ ኣኬካራ ዲዛ ኤራ ኣሲ ኦኔ? ኤራይ ዲዛ ጊዲኮ ኣኔ ባ ኦሶ ኣሽኬቴꬃኒኔ ኣꬎ ኤራቴꬃራ ባ ሎኦ ዱሳን ቤሶ።
JAM 3:14 ቃሴ ጫሞኔ ቃናቴይ፥ ኢንቴና ጻላ ዶሲዛ ሃኖይ ኢንቴ ዎዚናን ዲዛ ጊዲኮ ኦቶሬቴꬂ ኢንቴስ ሲዬቶፎ፤ ቱማካ ካዶፍቴ።
JAM 3:15 ሂኒ ማላ ኤራቴꬃያ ሳሎፔ ጊዲኩ፤ ሂና ቃሴ ቢታፌ፥ ኣሾፔኔ ጻላኤፔኮ!
JAM 3:16 ቃናቴይኔ ባርካ ባና ሲቆይ ዲዛሶን ዋሶይኔ ኢታ ኦሶይ ዉሪ ዴስ።
JAM 3:17 ሳሎፔ ጊዲዳ ኤራቴꬃያ ጊዲኮ ኮይሮ ጌሻ፤ ጉዬፔካ ሳሮቴꬅ ዶሲዛሮ፥ ዳንዳይዛሮ፥ ኤሮ ጊዛሮ፥ ማሮቴꬂኔ ሎኦ ኣይፌይ ኩሚዳሮ፤ ቃሴ ዎርዶ ማዶንታሮኔ ኡሎን ጌኔይ ባይንዳሮ።
JAM 3:18 ሳሮቴꬅ ዶሲዛ ኣሳቲ ሳሮቴꬅ ዜሪዲ ጺሎቴꬃ ኣይፌ ማጼቴስ።
JAM 4:1 ኢንቴ ጊዶን ዲዛ ኦላይኔ ኦሺ ኣዋፔ ዪዴ? ኢንቴ ዎዚናን ዲዛ ኣሞቴꬃፌ ዴንዲዳ ኦላ ጊዴኔ?
JAM 4:2 ኢንቴ ኣሞቴታ ሺን ዴሜኬታ፤ ኢንቴ ኣስ ዎꬌታኔ ኬሂ ኣሞቴታ ሺን ዴማና ዳንዳዬኬታ፤ ኢንቴ ኢንቴ ጋርሳን ኦዬቲዛ ጊሻሳኔ ኦሌቲዛ ጊሻስ ቃሴ ዎሶንታ ጊሻስ ኢንቴስ ኢሜቴና።
JAM 4:3 ኢንቴ ኢንቴ ኣሾ ኡፋይሳናስ ኢታ ቆፋን ዎሲዛ ጊሻስ ዎሲዳይሳ ኢንቴ ኤኬኬታ።
JAM 4:4 ኢንቴኖ ላይማቲዛይቶ! ኣላሜራ ሲቄቴꬂ ጾሳራ ሞርኬቴꬅ ጊዲዳይሳ ኤሬኬቲ? ሄሳ ጊሻስ ሃይሳ ኣላሜዛራ ሲቄቴꬅ ኮይዛይ ዉሪካ ጾሳስ ሞርኬ።
JAM 4:5 ዎይኮ ጌሻ ማጻፋ ጊዶን፥ «ኑናን ኢዚ ኣይሲዳ ኣያናይ ኑ ኢዛይታ ጊዳና ማላ ዳሮ ኣሞቴስ» ጊዛይሲ ኢንቴስ ጮ ሜላ ጊዳ ሚሳቲዜ?
JAM 4:6 ጊዶ ኣቲን ኢዚ ባ ኪያቴꬅ ኑስ ጉጂ ኢሜስ፤ ማጻፋይካ፥ «ጾሲ ኦቶራንቻታራ ኤቄቴስ፤ ኣሽኬታስ ጊዲኮ ባ ኪያቴꬅ ኢሜስ» ጊዳይ ሄሳሳ።
JAM 4:7 ሄሳ ጊሻስ ኢንቴና ጾሳስ ሃሪሲቴ፤ ዳቡሎሳራ ኤቄቲቴ፤ ኢዚ ኢንቴፌ ባቃታና።
JAM 4:8 ጾሳኮ ሺቂቴ፤ ኢዚካ ኢንቴኮ ሺቃና፤ ኢንቴኖ ናጋራንቻቶ! ኢንቴ ኢንቴ ኩሼ ጌሺቴ፤ ኢንቴኖ ናምኡ ቆፋን ቃጺዛይቶ! ኢንቴ ኢንቴ ዎዚና ጌሺቴ።
JAM 4:9 ዳርሲ ቆፒቴ፤ ሙዞቲቴ፤ ዬኪቴ፤ ኢንቴ ሚቻይ ዬሆን፥ ኡፋይሳይ ቃሴ ሙዞቴꬃን ሲሞ።
JAM 4:10 ጎዳ ሲንꬃን ኢንቴ ኢንቴና ካዉሺቴ፤ ኢዚ ኢንቴና ꬎቁ ꬎቁ ሂስታና።
JAM 4:11 ታ ኢሻቶ! ኢንቴ ኢንቴ ጋርሳን ኢሶይ ኢሳ ሞቶፒቴ፤ ባ ኢሻ ሞቲዛዴይኔ ባ ኢሻ ቦላ ፒርዲዛዴይ ዎጋ ቦላ ኢታ ሃሳዬሲኔ ዎጋ ቦላ ፒርዴስ፤ ሂስቲኮ ኔኒ ዎጋ ቦላ ፒርዲዛዴ ኣቲን ዎጋ ናጊዛዴ ጊዳካ።
JAM 4:12 ዎጋ ዎꬂዳዴይኔ ፒርዲዛዴይ ኢሳዴ ጻላ፤ ኢዚካ ꬋይሳናሲኔ ኣሻናስ ዳንዳይዛዴ፤ ጊዶ ኣቲን ኔ ላጌ ቦላ ፒርዲዛዴይ ኔ ኦኔ?
JAM 4:13 «ኢንቴ ሃች ዎይኮ ዎንቶ ሃኖ ሃ ካታማዮ ዎይኮ ሂኖ ሄ ካታማዮ ኑ ባና፤ ሂስቲዲ ሄን ኢዚን ኢሲ ላይꬅ ኡታናኔ ዛልኢ ዎꬊሳና» ጊዛይቶ! ኣኔ ሃ ሲዪቴ።
JAM 4:14 ዎንቶ ሃናናይሳ ኢንቴ ኤሬኬታ፤ ኢንቴ ሼምፖይ ኢዛ ኣዜ? ኢንቴ ጉꬃ ዎዴ ኣይፌን ቤቲዲ ꬋይዛ ሃꬃ ፔንታ ማላ።
JAM 4:15 ሄሳ ጋናፔ፥ «ጎዳ ሼኔ ጊዲኮኔ ኑ ፓጻ ዲኮ ሄሳካ ሃይሳካ ኦꬃና» ጋናስ ኢንቴስ ቤሴስ።
JAM 4:16 ሃኢ ጊዲኮ ኢንቴ ኦቶሬቴꬃን ጬቄቴታ፤ ሄሳ ማላ ኦቶሬቴꬂ ዉሪካ ኢታ።
JAM 4:17 ሄሳ ጊሻስ ሎኦ ጊዲዛይሳ ኦꬃናስ ቤሲዛይሳ ኤሪሼ ኦꬆንታዴስ ናጋራ ጊዳና።
JAM 5:1 ሂስቲኮ ኢንቴኖ ዱሬ ኣሳቶ! ኣኔ ሲዪቴ። ቡሮ ኢንቴ ቦላ ጋካና ሜቶዛ ጊሻስ ዬኪቴ፤ «ዉ! ዉይ» ጊ ዋሲቴ።
JAM 5:2 ኢንቴ ሃሮይ ቡቂዴስ፤ ኢንቴ ማይኦካ ቢላይ ሚዴስ።
JAM 5:3 ኢንቴ ዎርቃይኔ ኢንቴ ቢራይ ሺይዴስ፤ ሄ ሺይዳይሲካ ኢንቴ ቦላ ማርካቴሲኔ ኢንቴ ኣሾ ታማ ማላ ጹጌስ፤ ዎዴ ዉርሴꬃስ ሚሼ ኢንቴ ሺሺዴታ።
JAM 5:4 ኢንቴ ኢንቴ ዎዚናን ዎꬂቴ፤ ኢንቴ ካꬅ ማጺሼ ፔይዳይታስ ኢስታ ዎልቃ ዋጋ ኢንቴ ቃንጾንታ ኣጊዳ ጊሻስ ኢንቴ ቦላ ዋሲሼ ኢንቴ ኣቻን ዴቴስ። ካꬅ ማጺዛይታ ዋሶይ ኡባ ዳንዳይዛ ጎዳ ሃይꬃን ጋኪዴስ።
JAM 5:5 ኢንቴ ቢታ ቦላ ኢሻሎኒኔ ኣልኤቴꬃን ዴኢዴታ፤ ኢንቴ ዎዚና ሹካስ ꬊኪዳ ሜሄ ማላ ሞꬊሲዴታ።
JAM 5:6 ኢንቴ ኢንቴናራ ኤቄቶንታ ጺሎ ኣሳታ ቦላ ዎርዶ ዎꬂዲ ዎꬊዴታ።
JAM 5:7 ሄሳ ጊሻስ ታ ኢሻቶ! ጎዳይ ሃ ያና ጋካናስ ዳንዳይቴ፤ ጎሼ ጎዪዛዴይ ቢታይ ሎኦ ካꬂ ካጻና ጋካናስ ዋኒ ዳንዳይዛኮ ኮይሮ ኢራኔ ዉርሴꬃ ኢራ ኢዚ ዎስቲ ናጊዛኮ ኣኔ ኣኬኪቴ።
JAM 5:8 ኢንቴካ ሄሳꬆ ዳንዳይቴ፤ ኢንቴ ዎዚና ሚንꬂቴ፤ ጋሶይካ ጎዳ ዩሳ ጋላሲ ማቲዴስ።
JAM 5:9 ታ ኢሻቶ! ኢንቴ ኢንቴ ጊዶን ዚጊሬቶፍቴ፤ ኢንቴ ዚጊሬቲኮ ኢንቴ ቦላ ፒርዴታና፤ ፒርዳናዴይ ሄኮ ኢንቴ ፔንጌ ቦላ ኤቂዴስ።
JAM 5:10 ታ ኢሻቶ! ጎዳ ሱንꬃን ኢንቴስ ዮቲዳ ናቤታ ዋዬቴꬂኔ ኢስታ ዳንዳያ ኢንቴስ ሌሚሶ ሂስቲ ጼሊቴ።
JAM 5:11 ዳንዳያን ጌንጪዳ ኣሳታ ኑ ኢስታ፥ «ኢስቲ ኣንጄቲዳይታ» ጊ ቆዲዛይሳ ኢንቴ ኤሬታ። ኢዮቢ ዋኒ ዳንዳይዳኮ ኢንቴ ኢዛ ጊሻስ ሲዪዴታ። ጎዳይ ኢዛ ዉርሴꬃን ኣይ ኦꬂዳኮ ኢንቴ ቤዪዴታ፤ ጎዳይ ኣሳስ ኬሂ ሚሼቲዛዴኔ ማሪዛዴ።
JAM 5:12 ሃራፔካ ታ ኢሻቶ! ሳሎን ጊዲን ዎይኮ ሳኣን ጊዲን ዎይኮ ኣይ ሚሻንካ ጫቆፍቴ፤ «ኤ» ጋናስ ቤሲዛ ሚሽ ጊዲኮ፥ «ኤ» ጊቴ። «ኣካይ» ጋናስ ጊዲኮ፥ «ኣካይ» ጊቴ፤ ሄሳፌ ሃራ ጊኮ ኢንቴ ቦላ ፒርዴታና።
JAM 5:13 ኢንቴ ጋርሳን ሜቶቲዛ ኣሲ ዲዜ? ዲዛ ጊዲኮ ኢዚ ዎሶ። ኡፋዬቲዛዴይ ዲዜ? ዲዛ ጊዲኮ ኡፋይሳ ማዛሙሬ ዬጾ።
JAM 5:14 ኢንቴ ጊዶን ሳኬቲዛ ኣሲ ዲዜ? ዲኮ ዎሳ ኬꬃ ጪማታ ጼይጎ፤ ኢስቲካ ጎዳ ሱንꬃን ዛይቴ ኢዛ ቦላ ቲይዲ ኢዛስ ዎሴቶ።
JAM 5:15 ኣማኖን ዎሲዳ ዎሳይ ሃርጊዳዴ ፓꬃና፤ ጎዳይካ ኢዛ ዴንꬃና፤ ኢዚ ናጋራ ኦꬂዳዴ ጊዲኮካ ጾሲ ኢዛ ማራና።
JAM 5:16 ሄሳ ጊሻስ ኢንቴካ ኢንቴ ጋርሳን ኢሶይ ኢሳራ ኢንቴ ናጋራ ፓጼቲቴ፤ ፓጻና ማላ ኢሶይ ኢሳስ ዎሲቴ፤ ጺሎ ኣሳ ዎሳይ ዎልቃራ ዴስ፤ ዎልቃማ ኦሶካ ኦꬄስ።
JAM 5:17 ኤላሲ ኑ ማላካ ኣሳ፤ ኢዚ ኢራይ ቡኮንታ ማላ ሚንꬂ ዎሲን ቢታ ቦላ ሄꬑ ላይꬂኔ ባጋ ጋካናስ ኢራይ ቡኪቤና።
JAM 5:18 ቃሴካ ዛሪ ዎሲን ኢራይ ሳሎፔ ቢታ ቦላ ቡኪዴስ፤ ቢታይካ ካꬅ ኢሚዴስ።
JAM 5:19 ታ ኢሻቶ! ኢንቴፌ ኢሳዴይ ቱማፔ ባሌቲን ሃራ ኣሲ ኢዛ ዛሪኮ ሄሳ ዎዚናን ዎꬂቴ፤ ናጋራንቻ ኢዚ ባሌቲዳ ኦጌፔ ዛሪዳዴይ ሄሳዴ ሼምፖ ሃይቆፔ ኣሼሲኔ ኢዛዴ ናጋራ ዳሮዛካ ካሜስ።
1PE 1:1 ዬሱስ ኪርስቶሳ ሃዋሬ ጊዲዳ ጴጽሮሳፔ፥ ኣሳ ቢታን ቤቴን ዲዛይታስ ጳንጾሳን፥ ጋላቲያን፥ ቆጶዶቂያን፥ ኢሲያኒኔ ቢቲኒያ ቢታን ላሌቲ ዲዛ ኢንቴስ፥
1PE 1:2 ኣዋይ ጾሲ ካሴ ኢንቴና ኤሪዳ ማላ ዶሬቲዳይታስ፥ ዬሱስ ኪርስቶሳስ ኣዛዜታናሲኔ ኢንቴ ኢዛ ሱꬃን ኣራጬቲዲ ጌያና ማላ ጺሎ ኣያናን ዱማቲዳ ኢንቴስ ኪያቴꬂኔ ሳሮቴꬂ ዳሮ።
1PE 1:3 ዬሱስ ኪርስቶሲ ሃይቆፔ ዴንዲዳ ጊሻስ ኑስ ዴኦ ጊዲዳ ሂዶታ ኢሚዳይሲ ባ ጊታ ማሮቴꬃን ኑና ባስ ኦራꬃ ናይታ ሂስቲዳ ኑ ጎዳ ዬሱስ ኪርስቶሳ ኣዋይ ጾሲ ጋላቴቶ።
1PE 1:4 ኢዚ ꬋዮንታ፥ ሞሬቶንታኔ ጬጎንታ ላታሶ ኢንቴስ ሳሎን ጊግሲ ዎꬂዴስ።
1PE 1:5 ኢንቴካ ዉርሴꬃ ጋላሳን ቡሮ ቆንጫና ኣቶቴꬃስ ኣማኖ ጋሶን ጾሳ ዎልቃን ናጌቲዴታ።
1PE 1:6 ሃኢ ጉꬃ ዎዴስ ዱማ ዱማ ፓጬቲ ኢንቴና ዋዪሲኮካ ኢንቴ ሄሳን ኡፋዬቲቴ።
1PE 1:7 ሄሲ ሄ ፓጬዚ ኢንቴ ቦላ ጋኪዛይ ኢንቴ ኣማኖዚ ቱሙ ጊዲዳይሳ ቆንጪሳናሳ። ꬋያና ዎርቃይካ ታማን ፓጬቴስ፤ ዎርቃፌ ኣꬊ ቦንቾ ጊዲዳ ኢንቴ ኣማኖይካ ሄሳꬆ ፓጬታናስ ቤሴስ። ሄሲ ፓጬቲዳ ኢንቴ ኣማኖይ ዬሱስ ኪርስቶሲ ቆንጪዛ ጋላስ ጋላታስ፥ ቦንቾሲኔ ሳባስ ኢንቴና ጋꬃና።
1PE 1:8 ኢንቴ ዬሱስ ኪርስቶሳ ኣይፌራ ቤኦንታ ኣጊኮካ ኢንቴ ኢዛ ዶሴታ፤ ሃኢካ ኢንቴ ኢዛ ቤኦንታ ኣጊኮካ ኢዛ ኣማኔታ፤ ጮ ቃላን ቆንጪሳና ዳንዳዮንታ ጊታ ቦንቾ ኡፋይስ ኢንቴ ኡፋዬቴታ።
1PE 1:9 ኢንቴ ናጊዛ ኢንቴ ሼምፖይስ ኣቶቴꬅ ኢንቴ ኣማኖን ዴሚዴታ።
1PE 1:10 ሄ ኣቶቴꬃዛ ጊሻስ ኢንቴስ ኢሜታና ኪያቴꬃስ ካሴ ናቤቲ ሎኤꬂ ዎዚናፔ ፒልጊ ጼሊዳ።
1PE 1:11 ካሴ ኢስታን ዲዛ ኪርስቶሳ ኣያናይ ጾሳፌ ቲዬቲዳይሳ ቦላ ጋካና ዋዬዛኔ ሄ ዋዬዛፔ ጉዬ ኢዚ ዴማና ቦንቾዛ ጊሻስ ካሴ ባስ ዎꬂዴስ፤ ኢስቲ ቃሴ ሄሲ ዉሪካ ኣይዴ ዋኒ ሃናናኮ ዩሺ ቆፒዳ።
1PE 1:12 ሄ ካሴ ናቤቲ ኢንቴስ ኦꬂዳ ኣቲን ኢስቲ ባስ ኦꬆንታይሲ ኢስታስ ቆንጬን ኤሬቲዴስ። ኢስቲ ኢንቴስ ኦꬂዳይ ቦላ ሳሎፔ ኪቴቲዳ ጺሎ ኣያና ባጋራ ሃኢ ኢንቴስ ሚሺራቾ ቃላ ዮቲዳ ኣሳቲ ኢንቴስ ዮቲዳይሳ ቆንጪሳናሳ፤ ሄሳ ሄ ቃላ ኪታንቻቲካ ቤያናስ ኣሞቲዳ።
1PE 1:13 ሄሳ ጊሻስ ኢንቴ ኢንቴ ዎዚና ሱሪሲዲ ኦሶስ ጊጌቲቴ፤ ዎጋራ ዴኢቴ። ዬሱስ ኪርስቶሲ ቆንጪዛ ዎዴ ኢንቴ ኢዛ ኪያቴꬃ ዴማናስ ኢንቴስ ኩሜꬃ ሂዶታይ ዴኦ።
1PE 1:14 ኢንቴ ኣዛዜቲዛ ናይታ ጊዲዲ ኤሮንታ ዲሼ ኢንቴ ካሴ ኢዛን ዲዛ ኢታ ቆፋ ካሎፍቴ።
1PE 1:15 ኢንቴና ጼይጊዳ ጾሳይ ዱማ ጊዲዳ ማላ ኢንቴካ ኢንቴ ዱሳን ኡባን ዱማቲቴ።
1PE 1:16 ጋሶይካ፥ «ታኒ ጌሽ ጊዲዳ ጊሻስ ኢንቴካ ጌሽ ጊዲቴ» ጌቴቲ ጌሻ ማጻፋን ካሴ ጻፌቲዴስ።
1PE 1:17 ኦናካ ዱማ ሻኪ ማዶንታ ኢሳስ ኢሳስ ኢዛዴ ኦሶ ማላ ፒርዲዛ ጾሳ፥ «ኢዚ ኑ ኣዋ» ጊዲ ኢንቴ ጼይጊኮ ሃይሳ ኣላሜዛን ኢንቴ ኢማꬄኔ ቤቴ ኣስ ጊዲዲ ዲዛ ዎዴ ኡባን ኢዛስ ባቢቴ።
1PE 1:18 ኢንቴ ካሴ ኢንቴ ኣዋታፔ ላቲዳ ሃዳ ዱሳፌ ዎዜቲዳይ ꬋይዛ ቢራን ዎይኮ ዎርቃን ጊዶንታይሳ ኢንቴ ኤሬታ።
1PE 1:19 ጊዶ ኣቲን ኢንቴ ዎዜቲዳይ ኢታይኔ ዎሶይ ኢዛ ቦላ ባይንዳ ጌሻ ዶርሳ ማላ ጊዲዳ ኪርስቶሳ ቦንቾ ሱꬃንኮ።
1PE 1:20 ኢዚ ኤሬቲዳይ ሃይሲ ኣላሜዚ ሜꬌታናፔ ካሴ ጊዲሺን ሃኢ ቃሴ ዉርሴꬃ ዎዴን ኢንቴስ ቆንጪዴስ።
1PE 1:21 ኢንቴስ ኣማኖይኔ ኢንቴ ሂዶታይ ጾሳን ጊዳና ማላ ዬሱስ ኪርስቶሳ ባጋራ ኢዛ ሃይቆፔ ዴንꬂዲ ኢዛስ ቦንቾ ኢሚዳ ጾሳን ኢንቴ ኣማኔቴታ።
1PE 1:22 ኢንቴ ኣማኒዛይታ ሱሬ ዎዚናፔ ሲቃና ማላ ቱማስ ኣዛዜቴꬃን ኢንቴ ኢንቴ ኣሳቴꬅ ጌሺዴታ፤ ሄሳ ጊሻስ ኢንቴ ኢንቴ ጊዶን ኢሶይ ኢሳራ ሎኤꬂ ሲቄቲቴ።
1PE 1:23 ኢንቴ ናምኣንꬆ ዬሌቲዳይ ሜርናስ ሚኒ ዲዛ ꬋዮንታ ዴኦ ጾሳ ቃላን ꬋዮንታ ዜሬꬃፌ ኣቲን ꬋይዛ ዜሬꬃፌ ጊዴና።
1PE 1:24 ጌሻ ማጻፋይ ጊዛ ማላ፥ «ኣሾ ማይኢዳይ ዉሪካ ማታ ማላ፤ ኢዛ ቦንቾይካ ዉሪካ ዎራ ጪሻ ማላ፤ ማታይካ ሜሌስ፤ ጪሻይካ ቆኬስ።
1PE 1:25 ጎዳ ቃላይ ጊዲኮ ሜርናስ ኤቂ ዴስ።» ኢንቴስ ሳባኬቲዳ ሚሺራቾ ቃላይካ ሄሳ።
1PE 2:1 ሄሳ ጊሻስ ኢታቴꬅ ዉርሲ፥ ባሌꬆ ዉርሲ፥ ቆꬌፔ ቆሞን ሃኖ፥ ቃናቴቴꬅ ኣይኮ ቆሞ ዚጊርስ ኢንቴፌ ዲጊቴ።
1PE 2:2 ሃኢ ዬሌቲዳ ጉꬃ ናይቲ ማꬅ ኣሞቲዛይሳ ማላ ኢንቴካ ኣታናስ፥ ኢዛን ዲጪ ዲጪ ባናስ ጌሻ ኣያና ቲሚርቴ ላሞቲቴ።
1PE 2:3 ኢንቴ ላሞታናስ ቤሲዛይ ጎዳይ ኪያ ጊዲዳይሳ ሻኪ ኤሪኮ።
1PE 2:4 ሄሳ ጊሻስ ጌዴ ዴኦ ሹች ጊዲዳ ዬሱሳኮ ሺቂቴ፤ ሄ ሹቻይ ኣሳይ ሌቂ ኣጊዳይሳ ሺን ጾሳ ኣቻን ጊዲኮ ዶሬቲዳይሳኔ ቦንቾ ዋጋይ ዲዛይሳ።
1PE 2:5 ኢንቴ ጎዳ ዬሱሳኮ ሺቃናይካ ዴኦ ሹቻ ማላ ጺሎ ኣያና ዱሳሶ ጊዳና ማላ ኦሴቴታ፤ ሄሳꬆካ ኢንቴ ዬሱስ ኪርስቶሳ ባጋራ ኡፋይሲዛ ኣያና ያርሾ ጾሳስ ሺሻናስ ጌሻ ቄሴታ ጊዳንዴታ።
1PE 2:6 ጌሻ ማጻፋን፥ «ሄኮ ዶሬቲዳ ቦንቾ ጊዲዳ ኬꬃስ ጉላን ኡቲዛ ሹች ታኒ ጺዮኔን ዎꬃና፤ ኢዛን ኣማኒዛዴይ ዬላቴና» ጊዛ ቃላይ ጻፌቲ ኡቲዴስ።
1PE 2:7 ሄሳ ጊሻስ ኢንቴስ ኣማኒዛይታስ ሄ ሹቻይ ቦንቾ ሹቺኮ፤ ሂንኮ ኢዛን ኣማኖንታይታስ ጊዲኮ፥ «ሹቻን ኬጺዛ ኬꬃ ሂላቲ ሌቂ ዎራ ዬጊዳይሲ ኢዚ ኬꬃ ጉላስ ሁኤ ጊዲዴስ»
1PE 2:8 ቃሴካ፥ «ሄኮ ኣሴ ꬉጲዛ ሹቻይ ሃይሲች! ኣሳ ꬉጲ ኩንዲሲዛ ዛላ ሹቻይ ሃይሳኮ» ጌስ፤ ኢስቲ ቃላ ኣማኖንታ ኢጺዳ ጊሻስ ꬉጴቴቴስ፤ ካሴካ ኢስቲ ሄሳስ ዲዛይታ።
1PE 2:9 ኢንቴ ጊዲኮ ꬉማፔ ጌዴ ዳሮ ማላሊሲዛ ኢዛ ፖኦኮ ጼይጊዳ ማላሊሲዛ ጾሳ ኦሶ ኣዋጃናስ ዶሬቲዳ ዬሌታታ፥ ካዎ ቄሴታ፥ ጾሲ ኢንቴና ባስ ሂስቲዳ ኢንቴ ዱማ ዴሬታ።
1PE 2:10 ኢንቴ ካሴ ጾሳ ዴሬ ጊዴኬታ፤ ሃኢ ጊዲኮ ኢንቴ ጾሳ ዴሬታ፤ ኢንቴ ካሴ ጾሲ ኢንቴስ ቃꬌቶንታ ዴሬኮ ሺን ሃኢ ጊዲኮ ኢንቴስ ቃꬌቲዴስ።
1PE 2:11 ታ ሲቆቶ! ኢንቴ ሃይሳ ኣላሜዛ ቦላ ኢማꬄኔ ቤቴ ኣስ ጊዲዳ ጊሻስ ሼምፖራ ኦሌቲዛ ኣሾ ኣሞቴꬃታፔ ሃካና ማላ ታ ኢንቴና ሃዳራ ጋይስ።
1PE 2:12 ኦኔ ኤሪዛይ፥ «ኢንቴና ኢስቲ ኢታ ኦꬄቴስ» ጊዲ ኣሳይ ዚጊርኮካ ጾሲ ኑና ቤያናስ ዪዛ ጋላስ ኣይዛቤቲ ኢንቴ ኦሶይ ሎኦ ጊዲዳይሳ ቤኢዲ ጾስ ጋላታና ማላ ኢንቴ ኢስታራ ዲዛ ዎዴ ኢንቴ ኣማሌይ ሎኦ ጊዶ።
1PE 2:13 ኢንቴ ጎዳ ዬሱሳ ጊሻስ ጊዲ ዴሬ ኣይሲዛይታስ ኣዛዜቲቴ። ካዎይ ቃሴ ኡባፌ ቦላራ ዲዛ ጊሻስ ካዎሲካ ኣዛዜቲቴ።
1PE 2:14 ዴሬ ኣይሲዛይታስ ኣዛዜቲቴ፤ ኢስቲ ኢታ ኦꬂዛይታ ቃጻያናሲኔ ሎኦ ኦꬂዛይታ ጋላታናስ ካዎፔ ኪቴቲዛይታ።
1PE 2:15 ኢንቴ ሎኦ ኦሶን ሃንኮ ኤራይ ባይንዳ ኤያቴꬃን ሃሳይዛይታ ጮኡ ሂስታና ማላ ሄሲካ ጾሳ ሼኔ።
1PE 2:16 ኢንቴ ጾሳስ ኦꬂዛ ኣሳታ ማላ ጊዲዲ ሂርጋይ ባይንዳ ዴኢቴ ኣቲን ኢንቴ ኢንቴ ሼኔ ማላ ዲዛ ዱሳ ኢታቴꬃ ካሚዛ ሚሽ ሂስቶፍቴ።
1PE 2:17 ኣስ ኡባካ ቦንቺቴ፤ ኣማኒዛይታ ሲቂቴ፤ ጾሳስ ባቢቴ፤ ካዎ ቦንቺቴ።
1PE 2:18 ኢንቴኖ ኣሳስ ኦꬂ ኣቂዛይቶ! ኢንቴና ኦሲሲዛ ጎዳታስ ቦንቾን ኣዛዜቲቴ፤ ኢንቴ ኣዛዜታናይ ሎኦታሲኔ ኣሽኬታስ ጻላ ጊዶንታ ሃንኮ ኢታታሳራኮ!
1PE 2:19 ኣሲ ጋላቴቲዛይ ጮ ቆሄቲሼ፤ ሄሲካ ጾሳ ጊሻስ ጊዲ ዳንዳያና።
1PE 2:20 ኢንቴ ኢታ ኦꬂዳ ጊሻስ ቃጻዬቲሼ ዳንዳይኮ ኢንቴስ ኣዛ ጋላታይ ዳኔ? ኢንቴ ሎኦ ኦꬂዲ ዋዬ ኤኪሼ ዳንዳይኮ ኢንቴ ጾሳፌ ጋላታ ኤካንዴታ።
1PE 2:21 ኢንቴ ጼይጌቲዳይካ ሄሳሳ፤ ኢንቴ ኢዛ ሌሚሶ ካላና ማላ ኪርስቶሲ ኢንቴ ጊሻስ ዋዬ ኤኪዲ ኢንቴስ ሌሚሶ ጊዲዴስ።
1PE 2:22 ኢዚ ኣይኮ ናጋራካ ኦꬂቤና፤ ኢዛ ዶናን ጌኔይ ቤቲቤና።
1PE 2:23 ኣሳይ ኢዛ ጫዪሺን ኢዚ ዛሪ ጫዪቤና። ዋዬቲሼ ባና ቱሙ ፒርዲዛ ጎዳስ ሃዳራ ኣꬂ ኢሚዴስ ኣቲን ሃሎ ኬሳና ማንዲቤና።
1PE 2:24 ኑኒ ናጋራፔ ሻኬቲዲ ጺሎቴꬃን ዳና ማላ ኢዚ ባርካ ባ ኣሾን ኑ ናጋራ ማስቃሌ ቦላ ቶኪዴስ፤ ኢንቴ ኢዛ ማዱንꬃን ፓጺዴታ።
1PE 2:25 ኢንቴ ꬋይዳ ዶርሳታ ማላ ቶይላቲዴታ፤ ሃኢ ጊዲኮ ኢንቴ ሼምፖ ሄሚዛይሳኮኔ ናጊዛይሳኮ ሲሚዴታ።
1PE 3:1 ሄሳꬆካ ማቼቶ! ኢንቴ ኢንቴ ኣዚናታስ ኣዛዜቲቴ። ሄሳꬆ ኢሲ ኢሲ ኣዚናቲ ጾሳ ቃላ ኣማኖንታይታ ጊዲኮካ ጮ ሜላ ባ ማቼታ ሎኤቴꬃን ጻላ ሲሞንታ ኣጌቴና።
1PE 3:2 ኢስቲ ሲማና ዳንዳይዛይ ኢንቴ ጌሻቴꬃኔ ኢንቴ ኣሴ ቦንቺዛ ዱስ ዲዛይሳ ቤኢዲኮ።
1PE 3:3 ኢንቴ ሎኤቴꬂ ጮ ሜላ ሁኤ ዳꬃኒኔ ዎርቃን ጌጼቴꬃን፥ ኣልኦ ማይኦ ማይኦን፥ ጮ ሜላ ኣይፌን ቤቲዛ ጌጼን ጊዶፖ።
1PE 3:4 ኢንቴ ሎኤቴꬂ ጾሳ ሲንꬃን ዋጋራ ዲዛ ኬሂ ቦንቼቲዳዚኔ ꬋዮንታ ጌጼን፥ ኣሽኬቴꬃን፥ ኣዳቴꬃኒኔ ኣያናን ጌጼቲዳ ዎዚና ጋርሳን ቆቴቲ ዲዛ ጊዶ ዎዚና ሎኤቴꬅ ጊዶ።
1PE 3:5 ቤኒ ዎዴ ባ ሂዶታ ጾሳን ኦꬂዳ ጌሻ ማጫሳቲ ጌጼቲዳይ ሃይሳ ማላና፤ ኢስቲ ባ ኣዚናታስ ኣዛዜቲዳ።
1PE 3:6 ኢስቲ ኣዛዜቲዳይካ ሳራይ ኣብራሃሜ፥ «ታ ጎዶ!» ጋዳ ኣዛዜቲዳይሳ ማላ፤ ኢንቴካ ሎኦ ሚሽ ኦꬂኮኔ ኢሲ ኢታ ሚሺ ኢንቴና ዳጋንꬆንታ ኣጊኮ ኢንቴ ሳራ ናይታ።
1PE 3:7 ኣዚናቶ! ኢንቴ ኢንቴ ማቼታራ ኣኬካን ኢሲፌ ዴኢቴ፤ ኢስቲ ኢንቴፌ ዳቡራንቻ ሜꬌቴꬅ ጊዲዳ ጊሻሲኔ ቃሴካ ጾሲ ጮ ኪያቴꬃን ኢሚዛ ዴኦ ኢስቲ ኢንቴናራ ኢሲፌ ላታናይሳ ጊሻስ ኢንቴ ኢስታ ቦንቺቴ፤ ኢንቴ ሄሳꬆ ኦꬂኮ ኢንቴ ዎሳ ꬉጲዛ ሚሺ ዴና።
1PE 3:8 ሄሳፌ ኣሳ ባጋራ ቃሴ ኢንቴ ኢሶይ ኢሳራ ሲቆን ዲቴ፤ ሃራ ኣሳ ቦላ ጋኪዛ ሜቶ ኢንቴ ሜቶ ማላ ጼሊቴ፤ ኢንቴ ኢንቴ ጋርሳን ኢሻንታ ማላ ሲቄቲቴ፤ ኣሽኬታኔ ኪያታ ጊዲቴ።
1PE 3:9 ኣንጂቴ ኣቲን ኢስታስ ኢታ ጫሻስ ጫሽ ዛሮፒቴ፤ ኢንቴ ጼይጌቲዳይ ሄሳꬆ ኦꬂዲ ኣንጆ ላታናሳ።
1PE 3:10 ጌሻ ማጻፋይ ጊዛ ማላ፥ «ዴኦን ዳና ኮይዛይኔ ሎኦ ጋላሳታ ቤያናስ ኮይዛ ኣሲ ባ ዶናፔ ኢታ ሃሳዮንታ ማላኔ ባ ሜቴርሻቲካ ጌኔ ሃሳዮንታ ማላ ናጌቶ።
1PE 3:11 ኢታ ዮኦፔ ሃኮ፥ ሎኦ ኦꬆ፤ ሳሮቴꬅ ኮዮኔ ካሎ።
1PE 3:12 ጎዳ ኣይፌቲ ጺሎታ ባጋ ጼሌቴስ፤ ኢዛ ሃይꬃቲካ ኢስታ ዎሳ ሲያናስ ዶያ ዴቴስ፤ ሂንኮ ኢታ ኦꬂዛይታ ጊዲኮ ጎዳይ ባ ሃንቆ ኣይፌሶ ቤሳና» ጊዴስ።
1PE 3:13 ኢንቴ ሎኦ ኦꬃናስ ሚኔቲኮ ኢንቴ ቦላ ኢታ ሚሽ ጋꬃናይ ኦኔ?
1PE 3:14 ኢንቴ ሎኦ ኦꬂዳ ጊሻስ ዋዬ ቤኢኮካ ኢንቴ ኣንጆ ኤካና፤ ኣሳይ ኢንቴ ቦላ ኢታ ኦꬃናስ ማንዴቲዛይሳስ ባቦፍቴኔ ዳሮ ቆፖፍቴ።
1PE 3:15 ጎዳ ኪርስቶሳ ኢንቴ ዎዚናን ቦንቺቴኔ ኢዛ ኢንቴ ዴኦስ ጎዳ ሂስቲቴ፤ ኢንቴስ ዲዛ ሂዶታ ጊሻስ ኢንቴና ኦይቺዛይታስ ኡባስ ዛሮ ኢማናስ ኡባ ዎዴ ጊጌቲ ኡቲቴ።
1PE 3:16 ኢንቴ ኢስታስ ኢማና ዛሮይ ቃሴ ኣሽኬቴꬃኒኔ ቦንቾን ጊዶ፤ ኢንቴ ኪርስቶሳይታ ጊዲዳ ጊሻስ ኢንቴስ ዲዛ ሎኦ ኣማሌዛ ጊሻስ ኢታ ሃሳይዛ ኣሳይ ባ ኢታ ሃሳያን ዬላታና ማላ ኢንቴስ ሎኦ ቆፋይ ዴኦ።
1PE 3:17 ጾሳ ሼኔ ጊዲኮ ኢንቴ ኢታ ኦሶ ኦꬂዲ ዋዬታናይሳፌ ሎኦ ኦሶ ኦꬂዲ ዋዬቲኮ ሎኦ።
1PE 3:18 ኪርስቶሲካ ኑና ጾሳኮ ሺሻናስ ኢዚ ባ ሁኤስ ጺሎኮሺን ሃንኮ ጺሎ ጊዶንታ ኑ ናጋራ ጊሻስ ናምኣንꬄቶንታ ማላ ኢሲቶ ዋዬቲዲ ሃይቂዴስ። ኢዚ ኣሾን ሃይቂዴስ፤ ኣያናን ጊዲኮ ፓጺዴስ።
1PE 3:19 ሄ ኣያናን ቃሾ ኬꬃን ዲዛ ሼምፖታኮ ቢዲ ኢስታስ ሚሺራቾ ቃላ ዮቲዴስ።
1PE 3:20 ሄይቲ ሄን ዎይኔ ኬꬃን ዲዛ ሼምፖቲ ካሴ ኖሄ ዎዴ ማርካቤዚ ኦሴቲ ጊጊሺን ኢስቲ ሲማና ማላ ጾሲ ዳንዳያን ናጊሺን ኑኒ ኔስ ኣዛዜቶኮ ጊዳይታ። ሄ ማርካቤዛን ጌሊን ሃꬃፌ ኣቲዳይታ ቆዳይ ኦስፑን ጊዲዳ ጉꬃ ኣሳታ ጻላ።
1PE 3:21 ሄሲ ሄ ሃꬂ ሃኢ ቃሴ ኢንቴ ኢዛን ኣቲዛ ጺንቃታ ሌሚሶ፤ ሃይሲ ጺንቃታይ ቂታ ቦላ ጌያናስ ሜጬቴꬂ ጊዶንታ ጌሻ ቆፋ ኤካናስ ጾሳኮ ሺሺዛ ዎሳ። ኢዚ ኢንቴና ኣሻናይካ ዬሱስ ኪርስቶሳ ዴንꬃ ባጋራ።
1PE 3:22 ኢዚ ፑዴ ሳሎ ቢዲ ሃኢ ጾሳ ኣቻን ዴስ፤ ኪታንቻቲኔ ጎዳቴꬂ ኢስታስ ዲዛ ዎልቃማቲካ ኢዛስ ሃሬቲዳ።
1PE 4:1 ኪርስቶሲ ባ ኣሾን ዋዬ ኤኪዳ ጊሻስ ኢንቴካ ኦላ ኦሌቲዛ ሚሼ ጊጺዳ ኣሳ ማላ ሃይሳ ሃ ቆፋን ሚኒዲ ጊጌቲቴ፤ ባ ኣሾን ዋዬ ቤኢዳ ኣሲ ናጋራ ኦሶ ኣጊዴስ።
1PE 4:2 ሄሳፌ ጉዬ ባ ዲዛ ዎዴ ኡባን ኢዚ ዳናይ ኢታ ኣሾ ኣሞቴꬅ ኦሶን ጊዶንታ ዲሼ ጾሳ ሼኔ ፖሎና።
1PE 4:3 ሂንኮ ጾስ ኤሮንታ ኣሳይ ኦꬂዛይሳ ማላ ኢንቴ ጮ ሜላ ዬዳ ዱሳን ኣሾ ኣሞን፥ ማꬆን፥ ኦጌይ ባይንዳ ካሳን፥ ዎጋፔ ኣꬂ ኡዪዲ ዱሩሳኒኔ ሃራሲዛ ኤቃ ጎይኖን ካሴ ኢንቴ ኣꬂዳ ዎዴዚ ኢንቴስ ጊዳና።
1PE 4:4 ሃኢ ጊዲኮ ኢንቴ ሃ ዮኦዛን ኢስታራ ዎጋይ ባይንዳ ቂጺ ቂጾንታ ጊሻስ ኢስቲ ማላሌቴቴሲኔ ኢንቴና ጫዬቴስ።
1PE 4:5 ጊዶ ኣቲን ሃይቂዳይታ ቦላኔ ፓጻ ዲዛይታ ቦላ ፒርዳናስ ጊጊ ኡቲዳይሳስ ኢስቲ ዛሮ ኢማና።
1PE 4:6 ሃይቂዳይታሳራ ሚሺራቾ ቃላይ ዮቴቲዳይ ሄሳ ጊሻሳ፤ ሄሳꬆካ ኣይ ኣሳ ቦላካ ፒርዲዛ ማላ ኢስታ ኣሾ ቦላ ፒርዳና፤ ኢስታ ሼምፖይ ጊዲኮ ጾሲ ዲዛ ማላ ዴኦን ዴያና።
1PE 4:7 ሄሳ ጊሻስ ዎዴ ዉርሴꬂ ማቲዴስ፤ ኢንቴ ሚኒ ዎሳናስ ዳንዳያና ማላ ዎጋራ ዲቴኔ ዎፑ ጊዳ ቆፋይ ኢንቴስ ዴኦ።
1PE 4:8 ሲቆይ ዳሮ ናጋራ ካሚዛ ጊሻስ ሃራፔ ቦላራ ኢንቴ ኢንቴ ጋርሳን ሎኤꬂ ሲቄቲቴ።
1PE 4:9 ዙዙንꬂ ባይንዳ ኢሶይ ኢሳ ኢማꬃቴꬅ ሞኪ ኤኪቴ።
1PE 4:10 ዱማ ዱማ ጊዲዳ ጾሳ ኪያቴꬃ ኢሞታታ ኣማኔቴꬃን ኦይኪዲ ኢንቴፌ ኢሲ ኢሲ ኣሲ ባስ ኢሜቲዳ ጾሳ ኪያቴꬃ ኢሞታን ሃራ ኣስ ማዶ።
1PE 4:11 ታማርሲዛዴይ ጾሳ ቃላ ታማርሲዛ ማላ ታማርሶ፤ ሃጋዚዛዴይ ጾሲ ኢዛስ ኢሚዛ ዎልቃን ሃጋዞ፤ ሄሳ ማላን ጾሲ ዬሱስ ኪርስቶሳ ባጋራ ሃኒዛ ኡባን ጋላቴታና፤ ቦንቾይኔ ጎዳቴꬂ ሜርናፔ ሜርና ጋካናስ ኢዛስ ጊዶ። ኣሚን!
1PE 4:12 ታ ሲቆቶ! ኢንቴ ታማ ማላ ፓጪዛ ሜቶ ጊዶን ጌሊዛ ዎዴ ሄሳ ማላይ ካሴ ባይንዳ ኦራꬃ ሚሺ ጋኪዳዝ ኢንቴስ ሚሳቲን ማላሌቶፍቴ።
1PE 4:13 ሄሳፌ ቦላራ ኪርስቶሳ ቦንቾይ ቆንጪዛ ዎዴ ኢንቴ ኬሂ ኡፋዬታና ማላ ኢንቴ ኢዛራ ኢዛ ዋዬዛ ኤኪዛይታ ጊዲዳ ማላ ኡፋዬቲቴ።
1PE 4:14 ኢንቴ ኪርስቶሳ ሱንꬃ ጊሻስ ጫዬቲኮ ቦንቾ ኣያናይ ሄሲካ ጾሳ ኣያናይ ኢንቴ ቦላ ሼምፒዛ ጊሻስ ኡፋዬቲቴ።
1PE 4:15 ኢንቴፌ ኦና ቦላካ ሜቶይ ጋኪኮ ሄሳዴይ ሼምፖ ዎꬊዳ ኣሳ ማላ፥ ካይሶ ማላ፥ ኢታ ኦꬂዳ ኣሳ ማላኔ ኣሳ ዮኦ ጊዶ ጮ ዎጺ ጌሊዳዴ ማላ ጊዶፖ።
1PE 4:16 ኢዚ ኣማኒዛዴ ጊዲዳ ጊሻስ ኢዛ ቦላ ጋኪዛ ሜቶይ ዲኮ ቃሴ ኪርስቶሳ ሱንꬃን ኢዚ ጾሳ ጋላቶ ኣቲን ዬላቶፖ።
1PE 4:17 ፒርዳይ ዶሜታናስ ዎዴይ ማቲዴስ፤ ሄ ፒርዳይ ዶሜታናይ ኮይሮ ጾሳ ኣሳ ቦላኮ! ሂስቲን ፒርዳይ ኑናን ዶሚኮ ጾሳ ሚሺራቾ ቃላስ ኣዛዜቶንታ ኢጺዳ ኣሳ ዉርሴꬂ ኣይ ጊዳኔ?
1PE 4:18 ጌሻ ማጻፋይ፥ «ጺሎይካ ዋይዲ ኣታናዝ ጊዲኮ፥ ሃንኮ ጾሳስ ጎይኖንታ ኣሳይኔ ናጋራንቻቲ ዋናንዴቶ?» ጊዛ ማላ።
1PE 4:19 ሄሳ ጊሻስ ጾሳ ሼኔ ማላ ዋዬቲዛ ኣሳቲ ባናቴꬃ ኡባ ኣማኔቲዳ ባና ሜꬊዳይሳስ ሃዳራ ኢሚዲ ሎኦ ኦሶ ኦꬆንታ ኣጎፌቶ።
1PE 5:1 ሄሳ ጊሻስ ታኒካ ኢስታራ ኢሲፌ ዎሳ ኬꬃስ ጪማኔ ኪርስቶሳ ዋዬዛስ ማርካ ጊዲዳ ታኒ ቃሴካ ቡሮፔ ቆንጫና ቦንቾዛ ጊሼታናስ ዲዛ ታኒ ኢንቴናራ ዲዛ ዎሳ ኬꬃ ጪማታ ዞራይስ።
1PE 5:2 ኢንቴስ ሃዳራ ኢሜቲዳ ጾሳ ዉዴ ናጊቴ፤ ኢዛ ዉዴዛ ዎልቃራ ጊዶንታ ጾሲ ኮይዛ ኦጌራ ዶሳን ሄሚቴ፤ ሚሻስ ዪቄቴꬃን ጊዶንታ ሃጋዛናስ ዎዚናፔ ኮሻን ጊዶ።
1PE 5:3 ሄሳꬆካ ኢንቴ ኣላፌቴꬃ ጋርሳን ዲዛይታ ዬꬊ ሃሮን ጊዶንታ ዉዴዛስ ሎኦ ሌሚሶ ቤሶን ጊዶ።
1PE 5:4 ኢንቴ ሄሳꬆ ኦꬂኮ ሃንኮ ዋና ሄሚዛይሲ ቆንጪዛ ዎዴ ኢንቴ ሞሬቶንታ ቦንቾ ኣኪሊሌ ኤካና።
1PE 5:5 ሄሳꬆካ ኢንቴኖ ናቴꬃቶ! ኢንቴ ጪማታስ ኣዛዜቲቴ፤ ኢንቴ ዉሪካ ኣሽኬቴꬅ ኣፋላ ማላ ማይኢዲ ኢሶይ ኢሳስ ኦꬂቴ። «ጾሲ ኦቶሪዛይታ ኢጼስ፤ ኣሽኬታስ ቃሴ ባ ኪያቴꬅ ኢሜስ» ጌቴቲ ካሴ ጌሻ ማጻፋን ጻፌቲዴስ።
1PE 5:6 ሄሳ ጊሻስ ጾሲ ባ ዎዴን ꬎቁ ሂስታና ማላ ሚኖ ጾሳ ኩሼፔ ጋርሳራ ኢንቴና ዚቂ ሂስቲቴ።
1PE 5:7 ኢዚ ኢንቴስ ቆፒዛ ጊሻስ ኢንቴና ሜቲዛ ቆፋ ዉርሲ ኢዛ ቦላ ዬጊቴ።
1PE 5:8 ዎጋራ ዴኢቴ! ቤጊቴ! ኢንቴ ሞርኬ ዳቡሎሲ ባስ ሚታና ሚሽ ኮዪሼ ጻጊዛ ጋሞ ማላ ኢንቴ ዩሾን ሃርቡቄስ።
1PE 5:9 ኣላሜ ኩሜꬃን ዲዛ ኢንቴ ኢሻቲ ሄሳ ማላ ሜቶ ኤካና ዲዛይሳ ኢንቴ ኤሪዲ ኣማኖን ሚኒ ኤቂዲ ኢዛራ ኤቄቲቴ።
1PE 5:10 ኢንቴ ጉꬃ ዎዴስ ዋዬቲዳይሳፌ ጉዬ ኢንቴና ኪርስቶሳ ባጋራ ሜርና ቦንቾስ ጼይጊዳ ኪያቴꬅ ኡባስ ጎዳይ ኢዚ ባርካ ኢንቴና ጋኪዳ ዋዬዛፔ ኣሻና፥ ማዳናኔ ሚንꬄꬃና ቃሴካ ዳዝጊሳና።
1PE 5:11 ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ። ኣሚን።
1PE 5:12 ታኒ ኢዛን ኣማኔቲዳ ኢሻ ጋ ቆፒዛ ሲልዋኖሳ ባጋራ ሃይሳ ኪታዛ ቃንꬃራ ኢንቴስ ጻፋዲስ፤ ታ ሄሳ ጻፊዳይ ኢንቴና ዞራናሲኔ ሃይሲ ቱሙ ጾሳ ኪያቴꬅ ጊዲዳይሳ ኢንቴስ ቆንጪሳናስ ጋዳኮ፤ ሄሳ ጊሻስ ኢንቴ ሃይሳን ጾሳ ኪያቴꬃን ሚኒ ኤቂቴ።
1PE 5:13 ኢንቴ ማላ ዶሬቲዳራ ባቢሎኔን ዲዛ ሚቾ ጊዲዳ ዎሳ ኬꬃያ ኢንቴስ ሳሮካ ሺሻዉስ። ታ ና ማርቆሲካ ኢንቴና ሳሮኬስ።
1PE 5:14 ኣማኖ ሲቆቴꬃን ኢንቴ ኢሶይ ኢሳ ዬሪ ዬሪ ኤኪዲ ሳሮኬቲቴ። ኢንቴስ ኪርስቶሳይታስ ኡባስ ሳሮይ ጊዶ።
2PE 1:1 ዬሱስ ኪርስቶሳ ኦሳንቻኔ ኢዛን ሃዋሬ ጊዲዳ ሲሞና ጴጽሮሳፔ፥ ኑ ጎዳፔኔ ኑ ꬋሌ ዬሱስ ኪርስቶሳፔ ቤቲዳ ጺሎቴꬃ ባጋራ ኑ ዴሚዳ ኣማኖ ማላ ቦንቼቲዳ ኣማኖ ዴሚዳይቶ!
2PE 1:2 ጾሳኔ ኑ ጎዳ ዬሱሳ ኤሮን ኪያቴꬂኔ ሳሮይ ኢንቴስ ጊዶ።
2PE 1:3 ባ ቦንቾኒኔ ባ ኪያቴꬃን ኑና ጼይጊዳይሳ ኑኒ ኢዛ ኤሪዳ ጊሻስ ኢዛ ጾሳቴꬃ ዎልቃይ ዴኦሲኔ ጾስ ጎይናናስ ኑስ ኮሺዛዝ ኡባ ኢሚዴስ።
2PE 1:4 ባ ቦንቾኒኔ ባ ኪያቴꬃን ቦንቾ ዎጋይ ዲዛይሳኔ ኬሂ ጊታ ጊዲዳ ኢዛ ሂዶታ ኑኒ ዴሚዶስ፤ ሄይታንታ ባጋራ ኢንቴ ኢታ ኣሞ ጋሶን ሃይሳ ሃ ኣላሜዛን ዲዛ ꬋዮፔ ኬሲ ኤኪዲ ጾሳቴꬃ ሃኖዛፔ ኢዛራ ጊሼቲዛዴንታ ጊዲዴታ።
2PE 1:5 ሄሳ ጋሶን ሃይሳፌ ካሊዛ ሚሻቲ ኢንቴስ ጉጄታና ማላ ኣኔ ሚኒቴ። ኣማኖ ቦላ ኪያቴꬅ፥ ኪያቴꬃ ቦላ ኤራቴꬅ፥
2PE 1:6 ኤራቴꬃ ቦላ ባና ሃሮ፥ ባና ሃሮ ቦላ ዳንዳያን ሚኔቴꬅ፥ ዳንዳያን ሚኔቴꬃ ቦላ ጾሳስ ጎይኖ፥
2PE 1:7 ጾሳስ ጎይኖ ቦላ ኢሻንታራ ዶሴቴꬅ፥ ኢሻንታራ ዶሴቴꬃ ቦላ ሲቆ ጉጂቴ።
2PE 1:8 ሃይቲ ኢንቴስ ዳሪ ዲዛዝ ጊዲኮ ሄይቲ ኢንቴና ኢንቴ ጎዳ ዬሱስ ኪርስቶሳ ኤሮን ጎኣይኔ ኣይፌይ ባይንዳይታ ጊዶንታ ማላ ናጋና።
2PE 1:9 ሃይቲ ሃ ሚሻቲ ባይንዳ ኣሲ ጊዲኮ ሃሆን ዲዛ ሚሽ ዴሞንታ ቆቄ ኣሳ ማላ፤ ሄሳዴይ ካሴ ኣꬊዳ ባ ናጋራፔ ጌዪዳይሳካ ባሌቲዴስ።
2PE 1:10 ታ ኢሻቶ! ሄሳ ጊሻስ ኢንቴ ጼይጌቲዳይሳኔ ዶሬቲዳይሳ ሻኪ ኤራናስ ኬሂ ኣሞቲዛይታ ጊዲቴ፤ ኢንቴ ሄሳꬆ ኦꬂኮ ሙሌካ ꬉጴቴኬታ።
2PE 1:11 ኢንቴ ሄሳꬆ ሃንኮ ሜርናፔ ሜርናስ ዲዛ ኑ ጎዳ ዬሱስ ኪርስቶሳ ካዎቴꬃን ጌላናስ ኢንቴስ ኩሜꬃ ማታይ ኢሜታና።
2PE 1:12 ኢንቴ ሃይታ ሃ ዮኦታ ኤሪዲኔ ኢንቴ ኤሪዳ ቱማን ሚኒ ዴኢኮካ ሄይታ ታኒ ኢንቴና ቆፍሳናፔ ጉዬ ጊኬ።
2PE 1:13 ታኒ ፓጻ ዲዛ ዎዴ ኡባን ኢንቴና ኡባ ዎዴ ዴንꬄꬃናይሲ ቤሲዛዝ ሚሳቲዲ ታስ ቤቴስ።
2PE 1:14 ኑ ጎዳ ዬሱስ ኪርስቶሲ ታስ ቆንጪሲዳ ማላ ታኒ ሃይሳ ኣላሜዛፔ ኤሌላዳ ሃይቃናይሳ ታ ኤራይስ።
2PE 1:15 ታኒ ሃኢ ሚኔቲዛይ ታ ሃይቃዳ ኢንቴፌ ሻኬቲዳፔ ጉዬ ኢንቴ ሃይታ ሃ ዮኦታ ኡባ ዎዴ ቆፓና ማላሳ።
2PE 1:16 ጎዳ ዬሱስ ኪርስቶሳ ዎልቃፌ ኢዛስ ዩሳ ጊሻስ ኑ ኢንቴስ ዮቲዳ ዎዴ ኑኒ ኑ ኣይፌራ ኢዛ ቦንቾዛ ቤኢዲ ማርካቶስ ኣቲን ኣሲ ጮ ሜላ ሜꬊ ኤኪዲ ጌኔ ሃሳይዛ ሃይሲኤ ማላ ጊዴና።
2PE 1:17 «ታኒ ኢዛን ኡፋዬቲዛዴይ ታ ዶሲዛ ታ ናዚ ሃይሳ» ጊዛ ቃላ ጊሪሳይ ጊታ ቦንቾራ ኢዛስ ዪዳ ዎዴ ኢዚ ጾሳ ኣዋፔ ቦንቾኔ ጊታቴꬅ ኤኪዴስ።
2PE 1:18 ኑኒ ኢዛራ ኣንጄቲዳ ዙማ ቦላ ዲሼ ሃይሳ ሳሎፔ ሃ ዪዳ ጊሪሳ ኑኒ ኑ ሃይꬃን ሲዪዶስ።
2PE 1:19 ሄሲ ዉሪካ ካሴ ናቤቲ ዮቲዳይሲ ቱሙ ጊዲዳይሳ ሎኤꬂ ቆንጪሴስ፤ ሄሳ ጊሻስ ኢንቴ ꬉማሶን ዲዛ ጾምፔስ ሎኤꬂ ናጌቲዛይሳ ማላ ካሴ ናቤቲ ዮቲዳይሳ ሎኤꬂ ናጌቲቴ። ኢንቴ ሄሳꬆ ኦꬃናይ ጋዴይ ዎንታናስ፥ ባዞይ ዞኣና ጋካናሲኔ ዎንቲ ማꬃ ጾሊንቴዚ ኢንቴ ዎዚናን ፖኣና ጋካናሳ።
2PE 1:20 ኢንቴ ሃራፔ ኣꬂ ቆፓናስ ቤሲዛይ ጌሻ ማጻፋን ዲዛ ቲንቢቴ ቃላን ዮቴቲዳ ኣይ ሚሺካ ኦኒካ ባስ ሚሳቲዳ ማላ ቢርሻናስ ቤሴና።
2PE 1:21 ኣይ ቲንቢቴይካ ኣሳ ሼኔ ማላ ሙሌካ ዪቤና፤ ጊዶ ኣቲን ቲንቢቴይ ዉሪካ ጺሎ ኣያናይ ካሌꬂን ኢዛ ካሊዳ ኣሳቲ ጾሳፌ ኤኪዲ ዮቲዳዛ።
2PE 2:1 ጊዶ ኣቲን ቤኒ ዎዴ ዎርዶ ናቤቲ ዴሬ ጊዶን ዲዛይሳ ማላ ሄሳꬆካ ሃኢ ኢንቴ ጊዶን ዎርዶ ኣስታማሬቲ ዴኣንዴቴስ፤ ሄይታንቲ ኣሳ ꬋይሲዛ ዎርዶ ቲሚርቴ ቆታራ ዲጫና ማላ ኦꬄቴስ፤ ባና ኣሺዳ ጎዳካ ካዲዲ ባና ኤሶን ꬋይሲዛዝ ባ ቦላ ኤሄቴስ።
2PE 2:2 ሄሳ ጋሶን ዳሮ ኣሳይ ዬላቺዛ ኢስታ ኦጌዛ ካሌስ፤ ሄ ኢስታ ኦሶዛ ጋሶን ቱማ ኦጌይ ጫዬቴስ።
2PE 2:3 ሄይቲ ዎርዶ ኣስታማሬቲ ሚሻስ ጋጲጋጲዛ ጊሻስ ባርካ ሜꬊ ኤኪዳ ዮኦ ዮቲ ዮቲዲ ኢንቴስ ዲዛዝ ባስ ቦንቂ ኤኬቴስ፤ ቤኒ ቤኒሶፔ ፒርዳይ ኢስታስ ጊጌቲ ኡቲዴስ፤ ኣዳፌ ኢስታ ꬋዮይ ናጌስ።
2PE 2:4 ሃራይ ኣቶሺን ናጋራ ኦꬂዳ ኪታንቻታስ ጾሲ ሚሼቶንታ ኢስቲ ጪማ ጊዲዳ ꬉማ ኦላ ጊዶን ዴኢዲ ፒርዳ ጋላስ ጋካናስ ናጌታና ማላ ጌዴ ጋናሜን ዬጊዴስ።
2PE 2:5 ሄሳꬆካ ጺሎቴꬃ ጊሻስ ሳባኬ ጊዲዳ ኖሄ ሃንኮ ላፑን ኣሳታራ ኣሺዲ ጾሳስ ጎይኖንታ ኣሳቲ ዲዛ ኣላሜዛ ቦላ ꬋይሲዛ ሃꬄ ኤሂሼ ቃꬌቲዲ ካሴ ሄ ዎዴ ኣላሜዛ ማሪቤና።
2PE 2:6 ቃሴካ ጾስ ጎይኖንታይታ ቃጻያናስ ኡባስ ሌሚሶ ጊዳና ማላ ሶዶሜይኔ ጋሞራ ካታማቲ ቢዲንꬅ ጊዳና ጋካናሲኔ ጹጌቲ ꬋያና ጋካናስ ኢስታ ቦላ ፒርዲዴስ።
2PE 2:7 ዎጋይ ባይንዳ ዬላቺዛ ኦሶ ኦꬂዛ ኣሳታ ኦሶን ኡባ ዎዴ ሶኡ ጊሼ ዲዛ ጺሎ ሎጼ ጊዲኮ ኣሺ ኤኪዴስ።
2PE 2:8 ሄ ጺሎ ኣዴዚ ኢስታ ጊዶን ዲሺን ጋላስ ጋላስ ኢዚ ቤኢዛይሳኒኔ ሲዪዛይሳን ሄ ዎጋይ ባይንዳ ኣሳታ ኦሶዛን ኢዛ ሼምፖያ ዋዬታዱስ።
2PE 2:9 ሂስቲን ሄሲ ዉሪካ ሄሳ ማላ ጊዲኮ ጎዳይ ባስ ጎይኒሼ ዲዛ ኣሳታ ፓጬፔ ኣሻናይሳኔ ናጋራንቻታካ ዎስቲ ቃጻያናኮኔ ፒርዳ ጋላሳስ ዎስቲ ኢስታ ናጊዲ ጋꬃናኮ ሄሳ ኢዚ ኤሬስ ጉሳ።
2PE 2:10 ሃራፔካ ሄይቲ ቱና ጊዲዳ ባ ኣሾ ኣሞ ካሊዛይታኔ ጾሳ ጎዳቴꬅ ካꬊዛይታ ፒርዳ ጋላሳስ ናጊ ዎꬂዴስ። ሄይቲ ዎርዶ ኣስታማሬቲ ኢስቲ ጻላታኔ ኦቶራንቻታ ጊዲዳ ጊሻስ ሳሎ ቦላ ኢስታስ ጎዳቴꬂ ዲዛይታ ጫዪሼ ባቤቴና።
2PE 2:11 ኪታንቻቲ ኢስታፌ ቦላራ ዎልቃይኔ ጎዳቴꬂ ዲዛይታ ጊዲኮካ ጎዳ ሲንꬃን ኢስታ ቦላ ካꬌ ቃላ ኬሲ ሞቴቴና።
2PE 2:12 ሄይቲ ዎርዶ ኣስታማሬቲ ጊዲኮ ባስ ኤሬቶንታ ኢጺዳ ሚሽ ኡባ ጫሽ ጫዬቴስ፤ ሄይታንቲ ናርጻን ኦይኬታናሲኔ ሃይቃናስ ዬሌቲዳ፤ ጮ ሜላ ባ ሼኔን ዲዛይታኔ ቆፋይ ባይንዳ ዶኣታ ማላ፤ ዶኣቲ ጮ ሜላ ꬋይዛይሳꬆ ኢስቲካ ሙሌራ ꬋያና።
2PE 2:13 ቆሆ ኦሶ ኦꬂዳ ጊሻስ ኢስቲ ሙሌራ ባ ኦሶ ዋጋ ኤካና፤ ኢስታ ኡፋይሲ ሴታ ጋላስ ማꬆቴꬂኔ ዎጋይ ባይንዳ ቡራቆ፤ ኢስቲ ሄሳ ማላ ዎጋይ ባይንዳ ጉፋን ኢንቴናራ ኢሲፌ ጼይጌቲዛ ዎዴ ኣስ ባሌꬂዛ ባ ኣሾ ኦሶዛን ኢስቲ ኢታኔ ዬላቺዛይታ።
2PE 2:14 ኢስታስ ናጋራ ኦሶፔ ናጌቶንታ ኣሞቲዛ ኣይፌይ ዴስ፤ ኢስታስ ናጋራ ኦሶ ሲቂዛ ኣሞቴꬂ ኣይ ዎዴካ ሲሜና። ኣማኖን ቡሮ ሚኒ ኤቆንታ ኣሳታ ባሌꬄቴስ፤ ሚሻስ ጋጲጋጴቴስ፤ ኢስቲ ቃንጌቲዳይታ።
2PE 2:15 ኢስቲ ሱሬ ኦጌዛ ኣጊዲ ꬋይዳ፤ ኢታ ኦሶ ኦꬂዲ ዴሚዛ ሚሽ ሲቂዳ ቢኦሬ ና ባላኣሜ ኦጌ ቢዲ ባሌቲዳ።
2PE 2:16 ባላኣሜይ ጊዲኮ ባ ኦꬂዳ ናጋራ ጊሻስ ሴሬቲዴስ ሺን ሃሳያ ኤሮንታ ሃሬያ ኣሳ ቃላን ኢዛስ ሃሳያዳ ሄ ናቤዛ ባላፔ ሴራ ዛራዱስ።
2PE 2:17 ሄይቲ ሄ ኣሳቲ ሃꬂ ባይንዳ ፑልቶታ፤ ጎቴ ጫርኮን ቢዛ ሻራ ማላ፤ ኢስታ ሳካና ꬉማይ ናጌስ።
2PE 2:18 ካሴ ባላ ጋርሳን ዲዛ ኣሳታ ጊዶፌ ኬሲ ኤኪ ዪዲ ዳሮ ጋምኦንታ ኣሳታ፤ ሃዳ ጊዲዳ ኦቶሮ ቃላ ሃሳያን፥ ኣሾ ኣሞኒኔ ላይማን ባሌꬄቴስ።
2PE 2:19 «ኢንቴ ዎዜታና» ጊሼ ኢንቴስ ኡፋይስ ኢሜቴስ፤ ጾኔቲዳ ኣሲ ባና ጾኒዳዴስ ኣይሌ ጊዲ ሃሬቲዛይሳꬆ ኢስቲካ ባስ ናጋራስ ኣይሌ።
2PE 2:20 ኑ ጎዳኔ ኑና ኣሺዳ ዬሱስ ኪርስቶሳ ኤሪዲ ሃ ኣላሜዛ ቱናቴꬃፌ ኬሲ ኤኪዳፔ ጉዬ ቃሴካ ጉዬ ሲሚዲ ሄ ካሴ ቱናቴꬃን ጾኔቲዲ ጌሊኮ ኢስታስ ካሴይሳፌ ጉዬይሲ ኣꬎ ኢታ ጊዳና።
2PE 2:21 ኢስቲ ጺሎቴꬃ ኦጌ ሻኪ ኤሪዳፔ ጉዬ ኢስታስ ኢሜቲዳ ጌሻ ኣዛዞዛፔ ጉዬ ሲማናፔ ኢስቲ ካሴ ሄ ጺሎቴꬃ ኦጌዛ ኤሮንታ ኣጊዳኮ ኢስታስ ሎኦኮሺን።
2PE 2:22 «ካናይ ባ ጮዪዳ ጮሻ ማናስ ጉዬ ሲሜስ።» ሄሳꬆካ፥ «ጉዱንꬂ ሜጬቲዲ ጉዬ ሲሚ ኡርቃን ጌንዴሬቴስ» ጌቴቲዛ ቱሙ ሌሚሶይ ኢስታ ቦላ ጋኪዴስ።
2PE 3:1 ታ ሲቆቶ! ታኒ ኢንቴስ ጻፊሺን ሃይሲ ናምኣንꬆ ኪታ፤ ታኒ ኢንቴስ ናምኡ ኪታታካ ጻፊዳይ ሃይታ ሃ ዮኦታ ኣኬኪ ኤኪዲ ኢንቴ ሱሬ ቆፋ ቆፓና ማላ ኢንቴና ቤጎꬃናሳ።
2PE 3:2 ሃይሳፌ ካሴ ጌሻ ናቤቲ ዮቲዳ ቃላኔ ቃሴ ሃዋሬታ ባጋራ ኢንቴ ዴሚዳ ኑ ጎዳኔ ኑና ኣሺዳይሳ ኣዛዞ ኢንቴ ዩሺ ቆፓና ማላ ታ ኮያይስ።
2PE 3:3 ሃራ ኡባፌ ካሴቲዲ ሃይሳ ዩሺ ቆፒቴ፤ ዉርሴꬃ ጋላሳታን ቂꬊዛይቲኔ ባ ኢታ ኣሞ ካሊሼ ኣስ ካꬊዛይቲ ያና።
2PE 3:4 ኢስቲ፥ «ጎዳ ዬሱሲ፥ ‹ያና› ጊዛ ሂዶታይ ዮቴቲቤኔ? ሂስቲን ኢዚ ኣዋን ዲዜ? ቤኒ ኑ ኣዋቲ ሃይቆሶፌ ሃ ሲሚን፥ ሃኒዛ ሚሺ ዉሪካ ሜꬌቶሶፔ ሃ ሲሚን ሄኮ ካሴ ባ ዲዛ ማላ ዴስ» ጌቴስ።
2PE 3:5 ሄይቲ ሄ ኣሳቲ ካሴ ዳሮ ዎዴፔ ካሴ ሳሎይ ጾሳ ቃላን ሜꬌቶይሳኔ ቢታይካ ሃꬃፌኔ ሃꬃን ዲዛይሳ ኤሪሼ ካዴቴስ።
2PE 3:6 ሄ ዎዴ ዲዛ ኣላሜዚ ሃꬃን ሚቴቲ ꬋይዴስ።
2PE 3:7 ሄሳꬆካ ሃኢ ዲዛ ሳሎይኔ ቢታይ ናጋራንቻቲ ꬋያና ዲዛ ፒርዳ ጋላስ ጋካናስ ታማስ ጊጊ ኡቲዳ።
2PE 3:8 ታ ሲቆቶ! ኢንቴ ጊዲኮ ጎዳ ኣቻን ኢሲ ጋላሲ ሺ ላይꬃ ማላ፤ ቃሴካ ሺ ላይꬂ ኢሲ ጋላሳ ማላ ጊዲዳይሳ ሄሳ ሄ ሃኖዛ ባሎፒቴ።
2PE 3:9 ኢሲ ኢሲ ኣሳታስ ሚሳቲዛ ማላ ጎዳይ ባ ዮቲዳ ሂዶታ ቃላ ፖላናስ ጋምኤናኮሺን ኣሲ ዉሪካ ማሬታና ማላኔ ኣይ ኣሲካ ꬋዮንታ ማላ ኮዪዲ ኢዚ ኢንቴ ጊሻስ ታኬስ።
2PE 3:10 ጎዳ ጋላሳይ ቃሴ ካይሶ ዬꬃ ማላ ቆፖንታ ዲሺን ጋኪ ዎꬋና፤ ሄ ጋላስ ሳሎቲ ጊታ ጊሪሳን ኣꬋና፤ ሜꬌቴꬂ ዉሪካ ታማን ጹጌቲ ꬋያና፤ ቢታይኔ ኢዛ ቦላ ዲዛዚ ዉሪካ ጹጌታና።
2PE 3:11 ሄሳ ጊሻስ ሄይቲ ዉሪካ ሄሳꬆ ꬋያናዝ ጊዲኮ ሂስቲን ኢንቴ ጌሻቴꬃን ጾሳስ ጎይኒሼ ዳናስ ኢንቴስ ዋኒ ቤሴኔ?
2PE 3:12 ሄሳ ጊሻስ ጾሳ ጋላሳይ ያናይሳ ኢንቴ ላሞቲዛይታኔ ኢዚ ኤሌሊ ያና ማላ ኦꬂዛይታ ጊዲቴ። ሄ ጋላስ ሳሎይ ታማን ጹጌቲ ꬋያና፤ ሜꬌቴꬃቲካ ታማ ሴላን ሴራና።
2PE 3:13 ጊዶ ኣቲን ኑኒ ኢዚ ኑስ ኢሚዳ ሂዶታ ማላ ጺሎቴꬃ ኦሶይ ኦሴቲዛሶ ኦራꬃ ሳሎኔ ኦራꬃ ቢታ ናጎስ።
2PE 3:14 ሄሳ ጊሻስ ታ ሲቆቶ! ሄሲ ዉሪካ ሃናና ጋላስ ኢንቴ ናጊሼ ዲኮ ጎዳይ ኢንቴና ኢንቴ ቦላ ቦሬይ ባይንዳ ዲሺን ሳሮቴꬃን ዴማና ማላ ሚኒ ዲቴ።
2PE 3:15 ኑ ጎዳ ዳንዳያይ ኢንቴና ኣሻናስ ጊዲዳይሳ ኢንቴ ኤሪቴ፤ ኑ ሲቆ ኢሻ ጳዉሎሲ ባስ ኢሜቲዳ ኤራቴꬃ ማላ ኢዚ ኢንቴስ ጻፊዳይሲ ሃይሳ።
2PE 3:16 ኢዚ ሃይሳ ሃ ሃኖዛ ጊሻስ ባ ኪታታን ኡባን ሃይሳꬆካ ጻፊዴስ፤ ኢዛ ኪታታ ጊዶን ኤራናስ ዋዪሲዛ ኢሲ ኢሲ ሃኖቲ ዴቴስ፤ ኤራቴꬂ ኢስታስ ፓጪዳይቲኔ ናምኡ ቆፋን ዮቁ ጊዛይቲ ሃራ ጌሻ ማጻፋታ ሚርቂዛይሳꬆካ ሃይታካ ኢስቲ ሚርቃና፤ ኢስቲ ሄሳꬆ ኦꬂዛይ ባስ ꬋያናሳ።
2PE 3:17 ታ ኢሻቶ! ኢንቴ ቃሴ ሄሳ ካሴቲዲ ኤሪዳ ጊሻስ ሃንኮ ማካላታ ባላ ጋሶን ጎሼቲ ቢዲ ካሴ ኢንቴ ሚኒ ዲዛሶፔ ኩንዶንታ ማላ ናጌቲቴ።
2PE 3:18 ሄሳፌ ቦላራ ኑ ጎዳኔ ኑ ꬋሌ ዬሱስ ኪርስቶሳ ኪያቴꬃኒኔ ኢዛ ሻኪ ኤሮን ፑዴ ዲጪቴ፤ ኢዛስ ሃኢካ ሜርናስካ ቦንቾይ ጊዶ። ኣሚን።
1JO 1:1 ዴኦ ቃላ ጊሻስ ኮይሮፔ ዲዛይሳ ኑኒ ኑ ሃይꬃን ሲዪዳይሳኔ ኑ ኣይፌራ ቤኢዳይሳ ሎኤꬂ ጼሊዳይሳ፥ ኑ ኩሼራ ኦይኪ ቤኢዳይሳ ጊሻስ ሃሳዮስ።
1JO 1:2 ዴኦይካ ቆንጪዴስ፤ ኑኒካ ኑ ኣይፌራ ቤኢዲ ማርካቶስ። ኢዛስ ኢዛ ኣዋ ኣቻን ዲዛይሳኔ ኑስካ ቆንጪዳ ሜርና ዴኦ ጊሻስ ኑ ኢንቴስ ዮቶስ።
1JO 1:3 ኢንቴስካ ኑናራ ኢሲፌቴꬂ ዳና ማላ ኑኒ ቤኢዳይሳኔ ሲዪዳይሳ ኢንቴስ ዮቶስ፤ ኑ ኢሲፌቴꬃይካ ኣዋራኔ ኢዛ ና ዬሱስ ኪርስቶሳራ።
1JO 1:4 ኑ ኡፋይሳይ ኩሜꬅ ጊዳና ማላ ኑ ሃይሳ ኢንቴስ ጻፎስ።
1JO 1:5 ኑ ኢዛፔ ሲዪዲ ኢንቴስ ዮቲዛ ኪታይ፥ «ጾሲ ፖኦ፤ ኢዛ ኣቻን ሙሌካ ꬉማይ ዴና» ጊዛይሳ።
1JO 1:6 «ኑ ꬉማን ሲሜሬቲሼ ኢዛራ ኑስ ኢሲፌቴꬂ ዴስ» ጊኮ ዎርዶቶስ ኣቲን ቱማን ዶኮ።
1JO 1:7 ጊዶ ኣቲን ኢዚ ፖኦን ዲዛ ማላ ኑኒካ ፖኦን ሲሜሬቲኮ ኑ ጋርሳን ኑስ ኢሲፌቴꬂ ዴስ፤ ኢዛ ና ዬሱስ ኪርስቶሳ ሱꬂ ኑና ናጋራ ኡባፌ ጌሼስ።
1JO 1:8 ኑኒ ኑናን ናጋራይ ባ ጊኮ ኑርካ ኑና ባሌꬆስ፤ ቱማይካ ኑናን ዴና።
1JO 1:9 ኑኒ ኑ ናጋራ ፓጺኮ ኢዚ ኑ ናጋራ ኣቶ ጋናሲኔ ኑ ቆሆፔ ኑና ዉርሲ ጌሻናስ ኢዚ ኣማኔቲዳዴኔ ጺሎ።
1JO 1:10 ኑኒ ናጋራ ኦꬂቤኮ ጊኮ ኢዛ ኑ ዎርዳንቻ ኬሶሲኔ ኢዛ ቃላይካ ኑናን ዴና።
1JO 2:1 ታ ናይቶ! ታ ኢንቴስ ሃይሳ ጻፊዛይ ኢንቴ ናጋራ ኦꬆንታ ማላሳ፤ ጊዶ ኣቲን ኦኒካ ናጋራ ኦꬂኮ ኣዋ ኣቻን ኑስ ጻባቃይ ዴስ፤ ኢዚካ ጺሎዛ ዬሱስ ኪርስቶሳ።
1JO 2:2 ኢዚ ኑ ናጋራይ ኣቶ ጌቴታና ማላ ኦጌ ጊግሲዛዴ፤ ሄሲካ ኑና ጻላ ጊዶንታ ኩሜꬃ ኣላሜ ኣሳሳራ ኣቲን ኑስ ጻላ ጊዴና።
1JO 2:3 ኑ ኢዛ ኣዛዞታ ፖሊኮ ኑ ኢዛ ኤሪዳይሳ ሄሳን ኤሮስ።
1JO 2:4 «ታ ኢዛ ኤራይስ» ጊሼ ኢዛ ኣዛዞ ፖሎንታዴ ጊዲኮ ሄሳዴይ ዎርዶ ኣሳ ኣቲን ቱማይ ኢዛዴን ዴና።
1JO 2:5 ቃሴ ኦኒካ ኢዛ ቃላ ናጊኮ ቱሙ ጾሳ ሲቆይ ኢዛዴን ፖሌቲዴስ፤ ኑኒ ኢዛን ዲዛይሳ ኑ ኤሪዛይ ሄሳና።
1JO 2:6 ታ ኢዛን ዳይስ ጊዛ ኣሲ ኦኒካ ዬሱሲ ሲሜሬቲዳ ማላ ሲሜሬታናስ ቤሴስ።
1JO 2:7 ታ ሲቆቶ! ታ ኢንቴስ ጻፊዛይሲ ካሴ ኢንቴስ ዲዛሮ ኢንቴኮን ጋምኢዳ ኣዛዞዮ ኣቲን ሃራ ኦራꬃ ኣዛዞ ጊዴና፤ ጋምኢዳ ኣዛዞያ ካሴ ኢንቴ ሲዪዳ ቃላዮ።
1JO 2:8 ሃራ ባጋራ ታ ኢንቴስ ጻፊዛይ ኪርስቶሳ ኣቻኒኔ ኢንቴ ኣቻን ቱሙ ጊዲዳ ኦራꬃ ኣዛዞ፤ ጋሶይካ ꬉማይ ኣꬊን ቱሙ ፖኦይ ፖኢሲሼ ዴስ።
1JO 2:9 ፖኦን ዳይስ ጊሼ ባ ኢሻ ኢጺዛዴይ ሃኢካ ꬉማን ዴስ።
1JO 2:10 ባ ኢሻ ሲቂዛዴይ ፖኦን ዴስ፤ ሄሳዴስ ꬉጴ ጊዲዛ ሚሺ ዴና።
1JO 2:11 ጊዶ ኣቲን ባ ኢሻ ኢጺዛዴይ ጊዲኮ ꬉማ ጊዶን ዴስ፤ ꬉማን ሲሜሬቴስ፤ ꬉማይ ኢዛ ቆቂሲዳ ጊሻስ ኢዚ ኣዋ ቢዛኮኔ ባ ቢዛሶ ኤሬና።
1JO 2:12 ታ ናይቶ! ኢንቴ ናጋራይ ዬሱስ ኪርስቶሳፔ ዴንዲዳይሳን ኣቶ ጌቴቲዳ ጊሻስ ታ ኢንቴስ ጻፋይስ።
1JO 2:13 ኣዋቶ! ካሴ ኮይሮፔ ዲዛይሳ ኢንቴ ኤሪዛ ጊሻስ ታ ኢንቴስ ጻፋይስ፤ ናቴꬃቶ! ኢንቴ ጻላኤ ጾኒዳ ጊሻስ ታ ኢንቴስ ጻፋይስ።
1JO 2:14 ናቴꬃ ናይቶ! ኢንቴ ኣዋ ኤሪዳ ጊሻስ ታ ኢንቴስ ጻፋይስ፤ ኣዋቶ! ኮይሮፔ ዲዛይሳ ኢዛ ኢንቴ ኤሪዳ ጊሻስ ታ ኢንቴስ ጻፋይስ። ናቴꬃቶ! ኢንቴ ሚኖታ ጊዲዳ ጊሻሲኔ ጾሳ ቃላይ ኢንቴናን ዲዛ ጊሻስ ኢንቴ ጻላኤ ጾኒዳ ጊሻስ ታ ኢንቴስ ጻፋይስ።
1JO 2:15 ሃይሳ ኣላሜዛ ዎይኮ ሃ ኣላሜዛን ዲዛ ኣይ ሚሼካ ዶሶፒቴ፤ ኦኒካ ሃ ኣላሜዛ ዶሲኮ ኣዋ ሲቆይ ኢዛዴ ኣቻን ዴና።
1JO 2:16 ጋሶይካ ሃ ኣላሜዛን ዲዛይ ዉሪ ኣሾ ኣሞቴꬅ፥ ኣይፌስ ሎኦኔ ዱሳን ጬቄቴꬅ፤ ሃይቲ ኣላሜፔ ኣቲን ጾሳ ኣዋፔ ዪዛይታ ጊዴቴና።
1JO 2:17 ኣላሜይኔ ኣላሜን ዲዛ ኣሞቴꬂ ኣꬋና፤ ጾሳ ሼኔ ፖሊዛይቲ ጊዲኮ ሜርናስ ዳና።
1JO 2:18 ናይቶ! ሃይሲ ዉርሴꬃ ሳቴ፤ ኢንቴ ሲዪዳ ማላ ኪርስቶሳራ ኤቄቲዛዴይ ያና፤ ሃኢካ ኪርስቶሳራ ኤቄቲዛ ዳሮቲ ዪዳ። ሃይሲ ዉርሴꬃ ሳቴ ጊዲዳይሳ ኑ ሃይሳን ኤሮስ።
1JO 2:19 ኢስቲ ኑ ጊዶፌ ኬዚዳ፤ ጊዶ ኣቲን ኢስቲ ካሴካ ኑ ባጋ ጊዴቴና፤ ኢስቲ ኑ ባጋ ጊዲዳኮ ኑናራ ሚኒ ኤቃና፤ ጊዶ ኣቲን ኢስቲ ዉሪ ኑ ባጋ ጊዶንታይሲ ኤሬታና ማላ ኑፔ ሻኬቲዳ።
1JO 2:20 ኢንቴና ቃሴ ኪርስቶሲ ጺሎ ኣያናን ቲይዴስ፤ ሄሳ ጊሻስ ኢንቴ ዉሪካ ቱማ ኤሬታ።
1JO 2:21 ታ ኢንቴስ ጻፊዛይ ኢንቴ ቱማ ኤሮንታ ጊሻስ ጊዴና፤ ጊዶ ኣቲን ኢንቴ ቱማ ኤሪዛ ጊሻሲኔ ቱማ ጋርሳፌ ኣይኮ ዎርዶይካ ቤቶንታይሳ ኢንቴ ኤሪዛ ጊሻሳ።
1JO 2:22 ዬሱሳ ኢዚ ኪርስቶሳ ጊዴና ጊ ካዲዛዴፌ ሃራ ዎርዳንቻይ ኦኔ? ሄሳዴይ ኣዋኔ ናዛ ካዲዛይሲ ኪርስቶሳራ ኤቄቲዛዴ።
1JO 2:23 ናዛ ካዲዛዴስ ኦናስካ ኣዋይ ዴና፤ ናዛ ኤኪዛዴስ ኡባስ ኢዛስ ኣዋይ ዴስ።
1JO 2:24 ኢንቴ ኮይሮ ሲዪዳ ቃላያ ኢንቴናን ዱ፤ ኢንቴ ኮይሮ ሲዪዳራ ኢንቴናን ዲኮ ኢንቴካ ናዛኒኔ ኣዋን ዳና።
1JO 2:25 ሜርና ዴኦይ ኢዚ ኑስ ኢማና ጊዳ ሂዶታ ቃላ።
1JO 2:26 ኢንቴና ባሌꬂዛ ኣሳታ ጊሻስ ሃይሳ ኢንቴስ ጻፋዲስ።
1JO 2:27 ኢንቴ ቃሴ ኢዛፔ ኤኪዳ ጺሎ ኣያናይ ኢንቴናን ዲዛ ጊሻስ ሃራይ ኦኒካ ኢንቴና ታማርሳናስ ቤሴና፤ ኢዚ ኢንቴና ታማርሳናይሲ ቱማ ኣቲን ዎርዶ ጊዴና፤ ሄሳ ጊሻስ ጺሎ ኣያናይ ኢንቴና ታማርሲዳ ማላ ኪርስቶሳን ዴኢቴ።
1JO 2:28 ሃኢ ታ ናይቶ! ኢዚ ቆንጪዛ ዎዴ ኑስ ጻላቴꬂ ዳና ማላ ኢዚ ዪዛ ዎዴካ ኑ ኢዛ ሲንꬃን ዬላቶንታ ማላ ኢንቴ ኢዛን ዴኢቴ።
1JO 2:29 ኢዚ ጺሎ ጊዲዳይሳ ኢንቴ ኤሪዛ ጊዲኮ ጺሎ ኦꬂዛይ ዉሪ ኢዛፔ ዬሌቲዳይሳ ኢንቴ ኤሬታ።
1JO 3:1 ኑኒ ጾሳ ናይታ ጌቴታና ማላ ኣዋይ ዳርሲ ሲቂዳ ኢዛ ሲቆይ ኑስ ኣይ ማላ ጊታኮኔ ኣኔ ቤኢቴ! ቱሙካ ኑ ኢዛ ናይታ፤ ኣላሜይ ኑና ኤሮንታ ኣጊዳይ ኢዛ ኤሮንታ ኣጊዳ ጊሻሳ።
1JO 3:2 ታ ኢሻቶ! ኑኒ ሃኢ ጾሳ ናይታ፤ ቡሮ ኑ ኣይ ሃናናኮ ሃኢ ቆንጪቤና፤ ኪርስቶሲ ቆንጪዛ ዎዴ ኑ ኢዛ ቤያናይሳኔ ኢዛካ ሚሳታናይሳ ኑ ኤሮስ።
1JO 3:3 ሃይሳ ኢዛን ሂዶታ ኦꬂዛይ ዉሪ ኢዚ ጌሽ ጊዲዳ ማላ ባና ጌሼስ።
1JO 3:4 ናጋራ ኦꬂዛይ ዉሪካ ማካላ ኦꬄስ፤ ናጋራይካ ማካላ።
1JO 3:5 ኢዚ ናጋራ ꬋይሳናስ ቆንጪዳይሳ ኢንቴ ኤሬታ፤ ኢዛን ናጋራይ ባዋ።
1JO 3:6 ኢዛን ዲዛ ኣሲ ኦኒካ ናጋራ ኦꬄና፤ ናጋራ ኦꬂዛዴይ ኦኒካ ጊዲኮ ኢዛ ቤዪቤና ዎይኮ ኤሪቤና።
1JO 3:7 ታ ናይቶ! ኢንቴና ኦኒካ ባሌꬆንታ ማላ ናጌቲቴ፤ ኢዚ ጺሎ ጊዲዳ ማላ ጺሎ ኦꬂዛዴይካ ጺሎ።
1JO 3:8 ናጋራ ኦꬂዛይ ጻላኤፔ፤ ጋሶይካ ጻላኤይ ኮይሮፔካ ናጋራ ኦꬂዛዴ፤ ጾሳ ናይ ቆንጪዳይካ ጻላኤ ኦሶ ላላናሳ።
1JO 3:9 ጾሳፌ ዬሌቲዳይ ዉሪ ናጋራ ኦꬄና፤ ጾሳ ዜሬꬂ ኢዛን ዲዛ ጊሻሲኔ ኢዚ ጾሳፌ ዬሌቲዳ ጊሻስ ናጋራ ኦꬃና ዳንዳዬና።
1JO 3:10 ጾሳ ናይቲኔ ጻላኤ ናይቲ ሻኬቲ ኤሬቲዛይ ሄሳና፤ ጺሎ ኦꬆንታይኔ ባ ኢሻ ሲቆንታይ ዉሪ ጾሳፌ ጊዴና።
1JO 3:11 ኢንቴ ኮይሮ ሲዪዳራ፥ «ኑኒ ኑ ጋርሳን ሲቄታና ቤሴስ» ጌቴቲዳ ኪታያ ሃኖ።
1JO 3:12 ኢታ ባጋ ጊዲዲ ባ ኢሻ ዎꬊዳ ቃዬሌ ማላ ጊዶፒቴ፤ ኢዚ ኣዛስ ዎꬊዴ? ጋሶይካ ኢዛ ኦሶይ ኢታ፤ ኢሻ ኦሶይ ሎኦ ጊዲዳ ጊሻሳ።
1JO 3:13 ታ ኢሻቶ! ኢንቴና ኣላሜ ኣሳይ ኢጺኮ ማላሌቶፍቴ።
1JO 3:14 ኑኒ ኑ ኢሻታ ዶሲዛ ጊሻስ ሃይቆፔ ዴኦን ፒኒዳይሳ ኑ ኤሮስ፤ ሲቆይ ባይንዳዴይ ዉሪ ሃይቆ ጊዶን ዴስ።
1JO 3:15 ባ ኢሻ ኢጺዛዴይ ሼምፖ ዎꬊዳ ኣሳ ማላ፤ ሼምፖ ዎꬊዳዴስ ሜርና ዴኦይ ባይንዳይሳ ኢንቴ ኤሬታ።
1JO 3:16 ዬሱስ ኪርስቶሲ ባ ሼምፖ ኑ ጊሻስ ኣꬂ ኢሚዳ ጊሻስ ሲቆይ ኣዛኮ ኑ ሄሳን ኤሮስ፤ ኑኒካ ኑ ሼምፖ ኑ ኢሻታ ጊሻስ ኣꬂ ኢማናስ ቤሴስ።
1JO 3:17 ሚሺ ዲዛዴይ ኦኒካ ባ ኢሻይ ዋዬቲሺን ቤኢዲ ኢዛስ ሚሼቶንታ ኣጊኮ ጾሳ ሲቆይ ኢዛን ዋኒ ዳኔ?
1JO 3:18 ታ ናይቶ! ቱሙ ኦሶንፔ ኣቲን ጮ ዶናኒኔ ቃላን ጻላ ሲቄቴꬅ ኣኔ ኣጎስ።
1JO 3:19 ኑኒ ቱሙ ባጋ ጊዲዳይሳ ሃይሳን ኤሮሲኔ ኑ ዎዚናካ ኢዛ ሲንꬃን ሼምፒሶስ።
1JO 3:20 ሄሲካ ኑ ዎዚናይ ኑ ቦላ ፒርዲዛ ሚሻን ኡባን ጾሲ ኑ ዎዚና ቆፋፔ ቦላራ ጊዲዳ ጊሻስ ኢዚ ኡባ ኤሬስ።
1JO 3:21 ታ ኢሻቶ! ኑ ዎዚናይ ኑ ቦላ ፒርዶንታ ኣጊኮ ኑና ጾሳ ሲንꬃን ያሺሳና ሚሺ ዴና።
1JO 3:22 ኑኒ ኣዛዞታ ናጊዛ ጊሻሲኔ ኢዛ ኡፋይሲዛዝ ኦꬂዛ ጊሻስ ኑ ኢዛ ዎሲዛዝ ዉርሲ ኑ ኢዛፔ ኤካና።
1JO 3:23 ኢዛ ኣዛዞይካ ኑ ኢዛ ናዛ ዬሱስ ኪርስቶሳ ኣማናናሲኔ ኢዚ ኑና ኣዛዚዳ ማላ ኑኒ ኑ ጊዶን ዶሴታና ማላሳ።
1JO 3:24 ኢዛ ኣዛዞታ ናጊዛይቲ ዉሪ ኢዛን ዴቴስ፤ ኢዚካ ኢስታን ዴስ፤ ኢዚ ኑናን ዲዛይሳ ኑ ኢዚ ኑስ ኢሚዳ ኣያናን ኤሮስ።
1JO 4:1 ታ ኢሻቶ! ኣያና ዉርሲ ኣማኖፒቴ፤ ጊዶ ኣቲን ኣያናቲ ጾሳፌኮኔ ፓጪ ጼሊቴ፤ ጋሶይካ ዳሮ ዎርዶ ናቤቲ ቢታ ቦላ ላሌቲዳ።
1JO 4:2 ኢንቴ ጾሳ ኣያና ኤራና ኦጌይ፥ «ዬሱስ ኪርስቶሲ ኣሳ ኣሾ ማይኢዲ ዪዴስ» ጊዛ ኣያናይ ዉሪ ጾሳፌኮ!
1JO 4:3 «ዬሱስ ኪርስቶሲ ኣሳ ኣሾ ማይኢዲ ዪዴስ» ጎንታ ኣያናይ ጾሳፌ ጊዴና፤ ካሴ ኢዚ ያና ጊሺን ኢንቴ ሲዪዳ ኪርስቶሳራ ኤቄቲዛ ኣያናይ ሄሳ፤ ሃኢካ ኢዚ ኣላሜ ቦላ ዴስ።
1JO 4:4 ታ ናይቶ! ኢንቴ ጾሳይታ፤ ኢንቴ ኢስታ ጾኒዴታ፤ ጋሶይካ ኢንቴናን ዲዛይ ኣላሜን ዲዛይሳፌ ኣꬌስ።
1JO 4:5 ኢስቲ ኣላሜ ባጋኮ፤ ሄሳ ጊሻስ ኢስቲ ሃሳይዛይ ዉሪ ኣላሜፔ ኬዚዛይሳ፤ ኣላሜ ኣሳይ ኢስቲ ጊዛይሳ ሲዬስ።
1JO 4:6 ኑኒ ጊዲኮ ጾሳ ባጋ፤ ጾስ ኤሪዛይ ኑ ጊዛይሳ ሲያናሺን ጾሳ ባጋ ጊዶንታዴይ ጊዲኮ ኑ ጊዛይሳ ሲዬና። ቱሙ ኣያናኔ ዎርዶ ኣያና ኑ ሻኪ ኤሪዛይ ሃይሳና።
1JO 4:7 ታ ኢሻቶ! ሲቆይ ጾሳፌ ጊዲዳ ጊሻስ ኑኒ ኣኔ ሲቄቶስ፤ ኣስ ሲቂዛ ኣሲ ዉሪ ጾሳፌ ዬሌቲዳዴኔ ጾስ ኤሪዛዴ።
1JO 4:8 ኣስ ሲቆንታ ኣሲ ጾስ ኤሬና፤ ጋሶይካ ጾሲ ሲቆ።
1JO 4:9 ጾሳይ ኑ ጊዶን ባ ሲቆ ቆንጪሲዳይ ኑ ኢዛ ባጋራ ዴኦ ዴማና ማላ ባ ና ኢሲኔዛ ሃ ዱጌ ሃ ኣላሜዛን ዬዲዳይሳና።
1JO 4:10 ኑኒ ጾስ ሲቂቤኮ ሺን ኢዚ ኑና ሲቂዴስ፤ ኑ ናጋራ ꬋይሳና ማላ ባ ናዛ ዬዲዴስ፤ ሲቆ ጉሲካ ሄሳ።
1JO 4:11 ታ ኢሻቶ! ጾሲ ኑና ሃይሳꬆ ሲቂኮ ኑኒካ ኑ ጊዶን ሲቄታናስ ቤሴስ።
1JO 4:12 ጾስ ቤኢዳ ኣሲ ኦኒካ ባ፤ ኑኒ ኑ ጊዶን ሲቄቲዛ ጊዲኮ ጾሲ ኑናን ዳና፤ ኢዛ ሲቆይካ ኑናን ፖሌታና።
1JO 4:13 ኢዚ ኑስ ባ ኣያና ኢሚዳ ጊሻስ ኑ ኢዛን ዲዛይሳኔ ኢዚካ ኑናን ዲዛይሳ ኑ ሄሳን ኤሮስ።
1JO 4:14 ኣዋይ ባ ናዛ ሃይሳ ሃ ኣላሜ ኣሳ ኣሻናስ ዬዲዳይሳ ኑ ቤኢዶሲኔ ኢዛ ጊሻስ ማርካቶስ።
1JO 4:15 ዬሱሲ ጾሳ ና ጊዲዳይሳ ኣማኒዲ ማርካቲዛ ኡባን ጾሲ ዴሲኔ ኢዛዴይካ ጾሳን ዴስ።
1JO 4:16 ሄሳ ጊሻስ ጾሲ ኑና ሲቂዛ ሲቆ ኑ ኤሮስ፤ ኑ ኢዛ ሲቆን ኣማኔቶስ፤ ጾሲ ሲቆ፤ ሲቆን ዲዛዴይ ጾሳን ዴስ፤ ጾሲካ ሄሳዴን ዴስ።
1JO 4:17 ኑኒ ሃይሳ ቢታ ቦላ ዴኢዛይ ኪርስቶሲ ዴኢዳ ማላ ጊዲዳ ጊሻስ ኑስ ፒርዳ ጋላስ ባቦይ ዴና፤ ሄሳንካ ሲቆይ ኑናን ኩሜꬅ ጊዴስ።
1JO 4:18 ሲቆ ጊዶን ባቦይ ባ፤ ቱሙ ሲቆይ ጊዲኮ ባቦ ኬሲ ዎራ ዬጌስ፤ ባቦይ ቂጻቴራ ኢሲፌ ኦይኬቲ ዴስ፤ ባቢዛዴ ሲቆይ ኩሜꬅ ጊዴና።
1JO 4:19 ኢዚ ካሴቲዲ ኑና ሲቂዳ ጊሻስ ኑኒካ ኢዛ ሲቆስ።
1JO 4:20 ኦኒካ ጾስ ሲቃይስ ጊሼ ባ ኢሻ ኢጺኮ ሄሳዴይ ዎርዳንቻ፤ ባ ኣይፌራ ቤኢዛ ባ ኢሻ ሲቆንታ ኣሲ ባ ኣይፌን ቤኦንታ ጾሳ ሲቃናስ ዳንዳዬና።
1JO 4:21 «ጾስ ሲቂዛ ኣሲ ዉሪካ ባ ኢሻ ሲቃናስ ቤሴስ» ጊዛ ሃ ኣዛዞዛ ኢዚ ኑስ ኢሚዴስ።
1JO 5:1 ዬሱሲ ኢዚ ኪርስቶሳ ጊዲዳይሳ ኣማኒዛይ ዉሪ ጾሳፌ ዬሌቲዴስ። ኣዋ ዶሲዛይ ዉሪ ናዛካ ኢዛꬆ ዶሴስ።
1JO 5:2 ኑኒ ጾስ ዶሲኮኔ ኢዛ ኣዛዞ ናጊኮ ኑኒ ጾሳ ናይታ ሲቂዛይሳ ሄሳን ኤሮስ።
1JO 5:3 ጾሳ ዶሶ ጉሲ ኢዛ ኣዛዞ ናጎ፤ ኢዛ ኣዛዞቲ ዴጾ ጊዴቴና።
1JO 5:4 ጋሶይካ ጾሳፌ ዬሌቲዳይ ዉሪ ኣላሜ ጾኔስ፤ ኣላሜ ጾኒዛይካ ኑ ኣማኖ።
1JO 5:5 ዬሱሲ ጾሳ ና ጊዲዳይሳ ኣማኒዛዴፌ ኣቲን ኣላሜ ጾኒዛይ ሃራይ ኦኔ?
1JO 5:6 ሃꬃኒኔ ሱꬃን ዪዳይ ሃይሳ ዬሱስ ኪርስቶሳ፤ ኢዚ ሃꬃኒኔ ሱꬃን ዪዴስ ኣቲን ሃꬃን ጻላ ዪቤና፤ ሄሳካ ኢዛ ጊሻስ ማርካቲዛይ ኣያና፤ ሄ ኣያናይ ቱሙ ኣያና።
1JO 5:7 ሄሳ ጊሻስ ኢዛስ ሄꬑ ማርካቲ ዴቴስ።
1JO 5:8 ሄይቲካ ኣያና፥ ሃꬄኔ ሱꬅ፤ ሄꬓታ ቃላይካ ኢሲኖ።
1JO 5:9 ኑ ኣሳ ማርካቴꬅ ኣማኒኮ ጾሳ ማርካቴꬂ ሄሳፌ ኣꬌስ፤ ሄሲካ ኢዚ ባ ናዛ ጊሻስ ኢሚዳ ጾሳ ማርካቴꬃ።
1JO 5:10 ጾሳ ናን ኣማኒዛ ኡባ ዎዚናን ኢዛ ጊሻስ ማርካቴꬂ ዴስ፤ ጾስ ኣማኖንታይ ዉሪካ ጾሲ ባ ናዛ ጊሻስ ኢሚዳ ማርካቴꬃ ኣማኖንታ ጊሻስ ኢዛ ዎርዶሴስ።
1JO 5:11 ኢዛ ማርካቴꬂካ ጾሲ ሜርና ዴኦ ኑስ ኢሚዴስ፤ ሄ ዴኦይካ ኢዛ ናዛን ዴስ ጊዛይሳ።
1JO 5:12 ናዚ ዲዛዴስ ዴኦይ ዴስ፤ ጾሳ ናይ ባይንዳዴስ ዴኦይ ዴና።
1JO 5:13 ኢንቴስ ጾሳ ናን ኣማኒዛይታስ ሜርና ዴኦይ ዲዛይሳ ኢንቴ ኤራና ማላ ታ ሃይሳ ኢንቴስ ጻፋይስ።
1JO 5:14 ኑ ጾሳ ሲንꬅ ሺቃናስ ኑስ ዲዛ ጻላቴꬂ ሃይሳ፤ ኑ ኣይ ሚሺካ ኢዛ ሼኔ ማላ ዎሲኮ ኢዚ ኑ ዎሳ ሲያና።
1JO 5:15 ኑ ኢዛ ዎሲዛ ሚሽ ኢዚ ኡባ ሲዪዛይሳ ኑ ኤሪዛ ጊዲኮ ኑ ዎሲዳ ሚሻ ኡባ ኤካናይሳ ኑ ኤሮስ።
1JO 5:16 ኦኒካ ባ ኢሻይ ባና ሃይቆስ ጋꬆንታ ናጋራ ኦꬂሺን ቤዪኮ ኢዛስ ዎሶ፤ ጾሲካ ሃይቆስ ጋꬆንታ ናጋራ ኦꬂዳይታስ ዴኦ ኢማና፤ ሃይቆስ ጋꬂዛ ናጋራይካ ዴስ፤ ሃይቆስ ጋꬂዛ ናጋራ ጊሻስ ዎሶ ጊኬ።
1JO 5:17 ማካላይ ዉሪካ ናጋራ፤ ሃይቆስ ጋꬆንታ ናጋራይካ ዴስ።
1JO 5:18 ጾሳፌ ዬሌቲዳይ ዉሪ ናጋራ ኦꬄና፤ ጋሶይካ ጾሳ ናይ ኢዛ ናጊዛይሳኔ ኢታይ ኢዛ ቦቾንታይሳ ኑ ኤሮስ።
1JO 5:19 ኑኒ ጾሳፌ ጊዲዳይሳኔ ኣላሜይ ኩሜꬅ ኢታ ኣሳ ኩሼን ዲዛይሳ ኑ ኤሮስ።
1JO 5:20 ጾሳ ናይ ዪዳይሳኔ ኑኒ ቱማ ጾሳ ኤራና ማላ ኣኬካ ኢዚ ኑስ ኢሚዳይሳ ኑ ኤሮስ፤ ኑኒካ ቱሙ ጊዲዳ ኢዛ ናዛ ዬሱስ ኪርስቶሳን ዶስ፤ ኢዚካ ቱሙ ጾሳኔ ሜርና ዴኦ።
1JO 5:21 ናይቶ! ኢንቴናቴꬃ ኤቃታፔ ናጊቴ።
2JO 1:1 ታፔ ጪማዛፔ፥ ቱማፔ ታ ዶሲዛ ዶሬቲዳ ጎዳቴይሲኔ ኢዚ ናይታስ፥ ታና ጻላ ጊዶንታ ቱማ ኤሪዛይቲ ዉሪ ዶሲዛሪስ ኪቴቲዳ ኪታ።
2JO 1:2 ጋሶይካ ሃይሲ ቱማይ ሃኢካ ኑ ጊዶን ዲዛይሳኔ ሲንꬃፌካ ሜርናስ ዳናይሳ።
2JO 1:3 ጾሳ ኣዋፔኔ ኢዛ ና ዬሱስ ኪርስቶሳፔ ኪያቴꬂ፥ ማሮቴꬂኔ ሳሮይ ቱማኒኔ ሲቆን ኑናራ ጊዶ።
2JO 1:4 ኔ ናይታፔ ባጋይቲ ኣዋፔ ኑስ ኢሜቲዳ ኣዛዞዛ ማላ ቱማን ሚኒ ዲዛይታ ታ ቤኢዳ ጊሻስ ዳሮ ኡፋዬታዲስ።
2JO 1:5 ሃኢካ ጎዳቴዬ! ካሴፔካ ዲዛሮ ኣቲን ታ ኔስ ሃራ ኦራꬃ ኣዛዞ ጻፊኬ፤ ሄሲካ ኑኒ ኑ ጊዶን ሲቄታናይሳ።
2JO 1:6 ሄ ሲቆይካ ኑ ኢዛ ኣዛዞዛ ማላ ዳናይሳ፤ ኣዛዞዚካ ኢንቴ ኮይሮ ሲዪዳ ማላ ሲቆን ዳናሳ።
2JO 1:7 ዬሱስ ኪርስቶሲ ኣሳ ኣሾ ማይኢዲ ዪቤና ጊዛ ኣማኖንታ ዳሮ ባሌꬂዛይቲ ኣላሜ ቦላ ላሌቲዳ፤ ሄይታ ማላይ ኣይ ኣሲካ ኣስ ባሌꬂዛዴኔ ኪርስቶሳራ ኤቄቲዛዴ።
2JO 1:8 ኢንቴ ጊዲኮ ኢንቴ ዳቡራ ዋጋፔ ሜላ ኣቶንታ ማላኔ ኩሜꬃ ዎይቶ ኤካና ማላ ኢንቴ ሁኤስ ናጌቲቴ።
2JO 1:9 ኪርስቶሳ ቲሚርቴ ማላ ዶንታ ኣሲኔ ኢዛ ቲሚርቴፌ ባሌቲዲ ካሬ ኬዚዛ ኣሳን ኦናንካ ጾሲ ዴና፤ ኪርስቶሳ ቲሚርቴን ዲዛዴይ ጊዲኮ ኢዛስ ኣዋይኔ ኣዋ ናይ ዴቴስ።
2JO 1:10 ኦኒካ ኢንቴኮ ዪሼ ሄሳ ሄ ቲሚርቴዛ ኤኪ ዮንታ ኣስ ሞኪ ኤኮፍቴኔ ሳሮካ ጎፒቴ።
2JO 1:11 ሞኪ ኤኪዲ ባሶ ጌልꬂዛዴይ ሄሳዴ ኦሶን ኢዛራ ኢሲኖ ጊዴስ።
2JO 1:12 ታ ኢንቴስ ጻፋናስ ኮይዛ ዳሮ ሚሺ ዴሲሺን ዋራቃታኒኔ ቃላሜን ጻፋና ማላ ኮይኬ፤ ጊዲኮካ ኑ ኡፋይሳይ ኩሜꬅ ጊዳና ማላ ታ ኢንቴኮ ባዳ ኢንቴ ሲንꬃን ኢንቴናራ ሃሳያናስ ሂዶታ ኦꬃይስ።
2JO 1:13 ዶሬቲዳ ኔ ሚቼይ ናይቲ ኔና ሳሮ ጌቴስ።
3JO 1:1 ታፔ ጪማዛፔ፥ ቱማፔ ታ ሲቂዛ ታ ሲቆ ላጌ ጋዪዮሳስ፥
3JO 1:2 ታ ኢሻዞ! ኔ ሼምፖይ ሎኦን ዲዛ ማላ ኔ ኣሳቴꬃይ ሎኦ ዳና ማላኔ ኔ ኦꬂዛዚ ዉሪካ ኔስ ጊጋ ጊዳና ማላ ታ ኔስ ዎሳይስ።
3JO 1:3 ኔኒ ቱማስ ኣማኔቲዳዴ ጊዲዳ ማላ ቃሴካ ኔ ሃኖይ ዉሪ ቱሙ ጊዲዳይሳ ኢሲ ኢሲ ኣማኒዛ ኣሳቲ ታኮ ዪዲ ኔ ጊሻስ ዮቲን ሲያዳ ታ ዳሮ ኡፋዬታዲስ።
3JO 1:4 ጋሶይካ ታ ናይቲ ሎኦኒኔ ቱማን ሲሜሬቲሺን ሲሳፌ ኣꬊዛ ሃራ ኡፋይሲ ታስ ዴና።
3JO 1:5 ታ ኢሻዞ! ኢስቲ ኔስ ኢማꬅ ጊዲኮካ ኔኒ ኔ ኢሻታስ ኦꬂዳ ሚሼ ኡባን ኣማኔታዳሳ።
3JO 1:6 ኔ ቦላ ኣይ ማላ ሲቆይ ዲዛኮ ኢስቲ ኔ ጊሻስ ዎሳ ኬꬃ ኣሳ ሲንꬃን ማርካቲዳ፤ ኢስቲ ቢዛ ኦጌን ጾስ ኡፋይሲዛ ሃኖን ኔ ኢስታ ማዲኮ ሎኦ ኦꬃሳ።
3JO 1:7 ኣይስ ጊኮ ኢስቲ ጾሳ ኣማኖንታይታፔ ኣይኮካ ኤኮንታ ኪርስቶሳ ሱንꬃ ጊሻስ ሜላ ኬዚዳ።
3JO 1:8 ሄሳ ጊሻስ ኑ ኢሲፌ ቱማስ ኦꬃና ማላ ሄይታንታ ማላታ ሞኪ ኤካናስ ቤሴስ።
3JO 1:9 ታኒ ዎሳ ኬꬃስ ሃይሳፌ ካሴ ጻፋዲስ፤ ጊዶ ኣቲን ካሌꬂዛዴ ጊዳና ኮይዛ ዲዮጺራጾሲ ኑኒ ጊዛዝ ኤኬና።
3JO 1:10 ሄሳ ጊሻስ ታ ሄ ቢኮ ኢዚ ባ ኢታ ቃላን ኑ ሱንꬅ ሞራናስ ኦꬂዳይሳ ታ ኢንቴስ ቆንጪሳና፤ ሄሲካ ኢዛስ ጊዶንታ ኢጺን ኣማኒዛ ኣሳ ሞኪ ኤኬና፤ ሞኪ ኤካና ኮይዛይታካ ዲጌሲኔ ዎሳ ኬꬃፌ ኬሲ ጎዴስ።
3JO 1:11 ታ ኢሻዞ! ሎኦታ ሚሳታ ኣቲን ኢታ ኣሳታ ሚሳቶፓ፤ ሎኦ ኦꬂዛዴይ ዉሪካ ጾሳ ኣሳ፤ ኢታ ኦꬂዛዴይ ጊዲኮ ጾስ ቤዪቤና።
3JO 1:12 ዲሜጺሮሳስ ኣሲ ዉሪ ሎኦ ማርካቴስ፤ ቱማይካ ኢዛስ ማርካታዉስ፤ ኑኒካ ኢዛስ ማርካቶስ፤ ኢንቴካ ኑ ማርካይ ቱሙ ጊዲዳይሳ ኤሬታ።
3JO 1:13 ታ ኔስ ጻፋና ቡሮ ዳሮ ዮኦይ ዴስ ሺን ዋራቃታን ጻፋናስ ኮይኬ።
3JO 1:14 ታ ኔና ማታ ዎዴ ቤያናስ ሂዶታ ኦꬃይስ፤ ሄ ዎዴ ኑ ኢሲፌ ኡቲ ሃሳያና።
3JO 1:15 ኣኔ ሳሮን ዳ፤ ኔ ላጌቲ ኔና ሳሮ ሳሮ ጌቴስ፤ ታ ላጌታ ሱንꬃን ሱንꬃን ጼይጋዳ ሳሮ ጋ።
JUD 1:1 ዬሱስ ኪርስቶሳስ ኦꬂዛ ያቆቤ ኢሻ ዩሁዳፔ፥ ኢንቴስ ጼይጌቲዳይታስ፥ ጾሳይ ኣዋይ ሲቂዛይታሲኔ ዬሱስ ኪርስቶሲ ናጊዳይታስ ኡባታስ፥
JUD 1:2 ማሮቴꬂ፥ ሳሮቴꬂኔ ሲቆይ ኢንቴስ ዳሮ።
JUD 1:3 ታ ሲቆቶ! ኑ ኢሲፌ ኣቲዳ ኣቶቴꬃ ጊሻስ ታ ኢንቴስ ጻፋናስ ዳሮ ኮያዲሲሺን ሃኢ ቃሴ ናምኣንꬆንታ ኢሲቶ ጾሲ ኣሳስ ኢሚዳ ኣማኖ ጊሻስ ኢንቴ ዳሮ ባጼታና ማላ ታ ኢንቴና ዞራይስ። ታ ኢንቴስ ጻፋናስ ታስ ቶሆ ጊዲዴስ።
JUD 1:4 ኢስታ ቦላ ፒርዴታናይሲ ዳሮ ዎዴፔ ካሴ ኢስታ ጊሻስ ጻፌቲዳ ኣሳቲ ኢንቴኮ ካልጺ ጌሊዳ፤ ሄይታንቲ ጾስ ኤሮንታይታ፤ ኑ ጎዳ ኪያቴꬃ ጮ ሜላ ላሚዛይታኔ ጾሳ ጎይኖንታይታ። ኢዚ ባርካ ኑና ሃሪዛይሳኔ ኑስ ጎዳ ጊዲዳ ዬሱስ ኪርስቶሳካ ካዴቴስ።
JUD 1:5 ኢንቴ ሄሳ ኡባካ ካሴቲ ኤሪኮካ ጎዳይ ባ ዴሬዛ ጊብጼፔ ኬሲዲ ኣሺዳይሳኔ ሃንኮ ኣማኖንታይታ ጉዬፔ ꬋይሲዳይሳ ታ ኢንቴና ኣኬኪሳና ኮያይስ።
JUD 1:6 ሄሳꬆካ ባ ቦንቾ ናጎንታ ኢጺዲ ባ ዲዛሶ ዬዲዳ ኪታንቻታ ኢንቴ ዩሺ ቆፒቴ፤ ጾሲ ኢስታ ጊታ ፒርዳ ጋላስ ጋካናስ ሜርና ቃሾስ ጊርዲ ጊዳ ꬉማን ናጊ ዎꬂዴስ።
JUD 1:7 ሄሳꬆካ ሶዶሜይኔ ጋሞራይ ቃሴካ ኢስታ ሄራን ዲዛ ካታማቲካ ላይማቲዳኔ ሳሎ ሜꬌቴꬃታራ ላይማታናስ ኣሞቲዳ፤ ሄሳ ጊሻስ ኢስቲ ሜርና ታማን ጹጌታናይታስ ሌሚሶ ጊዲዳ።
JUD 1:8 ሄሳꬆካ ሄ ኣሳቲ ባርካ ባ ኣጉሞ ካሊዲ ባርካ ባ ኣሾ ቱኒሴቴስ፤ ባፔ ቦላራ ዲዛይታስ ኣዛዜቴቴና፤ ኢስቲ ሳሎን ቦንቾራ ዲዛይታካ ጫዬቴስ።
JUD 1:9 ሃራይ ኣቶሺን ሳሎ ኪታንቻታ ሃላቃይ ሚካሌይ ሙሴ ኣሾ ጊሻስ ኢዛራ ፓላሜቲሼ፥ «ኔና ጎዳይ ሃንቄቶ!» ጊዴስ ኣቲን ኢዛስ ጫሻ ቃላ ዛሪቤና።
JUD 1:10 ሃይቲ ኣሳቲ ጊዲኮ ኢስታስ ኤሬቶንታ ኢጺዳ ሚሽ ኡባ ጫሽ ጫዬቴስ፤ ኣይኮካ ኤሮንታ ሜሄታ ማላ ጮ ሜላ ቆፒ ኤኪዳ ሚሺ ኢስታስ ዲኮ ኢስቲ ሄሳን ꬋያና።
JUD 1:11 ኢስቲ ቃዬሌ ኦጌን ቢዳ ጊሻስ ሚሻስ ጊዲ ባላኣሜ ማላ ባላን ኩንዲዳ፤ ቃሴ ቆሬይ ኤቄቲዳ ማላ ኢስቲካ ኤቄቲዲ ꬋይዳ ጊሻስ ኢስታስ ኣዬ ኣና!
JUD 1:12 ሃይቲ ሃ ኣሳቲ ዬላይ ባይንዳ ላይማ ሃኖራ ኢሲ ቦላ ኢንቴ ዲጊሳሶን ቤቲዛ ዎዴ ኢንቴስ ꬉጴ ጊዴቴስ፤ ኢስቲ ባስ ጻላ ቆፔቴስ፤ ኢስቲ ጫርኮን ቢዛ ኢራይ ባይንዳ ሻራ ማላ፤ ኣይፌይ ኣይፊዛ ዎዴን ኣይፌይ ባይንዳ ጻጶፔ ꬎቃሌቲዲ ናምኡቶ ሜሊዳ ሚꬃ ማላ።
JUD 1:13 ኢስቲ ዬላቺዛ ባ ኦሶዛ ዎልቃማ ኣባ ዳምባላ ማላ ጎፖንቶ ጮፑ ሂስቲዛይታ፤ ጊርዲ ጊዳ ꬉማይ ኢስታ ሜርናስ ናጊዛይሳኔ ጮ ሜላ ዋዬቲዛ ጾሊንቴታ ማላኮ!
JUD 1:14 ኣዳሜፔ ሃ ሲሚን ላፑንꬆ ዬሌታ ጊዲዳ ሄኖኬይ፥ «ሄኮ ጾሲ ቆዳይ ባይንዳ ጌሻ ኪታንቻታራ ኣሳ ኡባ ቦላ ፒርዳናስ ያና።
JUD 1:15 ሄይቲ ጾሳስ ጎይኖንታ ኣሳቲ ኦꬂዳ ኢታ ኦሶ ጋሶን ኢስታ ኢዚ ቃጻያና፤ ኣዳፌካ ጾሲ ሄይታ ባስ ጎይኖንታ ናጋራንቻታ ቦላ ኢስቲ ሃሳይዳ ኢታ ሚሻታ ጊሻስ ኢዚ ኢስታ ቦላ ፒርዳና» ጊዴስ።
JUD 1:16 ሄይቲ ሄ ኣሳቲ ኡባ ዎዴ ዙዙሜቲዛይታኔ ኣይ ሚሻንካ ኡፋዬቲ ኤሮንታይታ፤ ኢስቲ ባ ኢታ ኣሞ ካሊዛይታ፤ ኢስታ ዶናን ኦቶሬቴꬃ ቃላይ ኩሚዴስ፤ ባስ ባ ጎኣ ኮዪሼ ኣስ ኣዳሼቴስ።
JUD 1:17 ኢንቴኖ ታ ሲቆቶ! ኑ ጎዳ ዬሱስ ኪርስቶሳ ሃዋሬቲ ሃይሳፌ ካሴ ዮቲዳ ቃላ ኣኬኪቴ።
JUD 1:18 ኢስቲ፥ «ዎዴ ዉርሴꬃን ጾሳ ሼኔፔ ሃኪዳይቲ ባርካ ባ ኢታ ኣሞ ካሊሼ ኣስ ቂꬊዛይቲ ያና» ጊዲ ኢንቴስ ካሴ ዮቲ ዎꬂዳ።
JUD 1:19 ሄይቲ ኣስ ኢሳ ኢሳፌ ሻኪዛይታ፤ ኣሾ ኣሞቴꬅ ካሊዛይታኔ ኢስታን ጺሎ ኣያናይ ባይንዳይታ።
JUD 1:20 ታ ኢሻቶ! ኢንቴ ጊዲኮ ኡባፌ ቦላራ ኢንቴ ጌሻ ኣማኖን ሚኒ ኤቂቴ፤ ጺሎ ኣያናንካ ሚኒ ዎሲቴ።
JUD 1:21 ኑ ጎዳ ዬሱስ ኪርስቶሲ ባ ማሮቴꬃን ኢንቴና ሜርና ዴኦን ጋꬃናይሳ ናጌቲሼ ኢንቴናቴꬃ ጾሳ ሲቆን ናጊቴ።
JUD 1:22 ሲꬊሼ ዲዛ ኣሳታስ ሚሼቲቴ።
JUD 1:23 ኢሲ ኢሲ ኣሳታ ታማፔ ኬሲ ኤኪ ኣሺቴ፤ ሃራታስ ያሻቴꬃን ሚሼቲቴ ሺን ናጋራን ቱኒዳ ኢስታ ኣሳቴꬅ ቦቺዳ ማይኦካ ኡባ ኢጺቴ።
JUD 1:24 ኢንቴና ኩንዴꬃፌ ኣሻናሲኔ ኢንቴና ዎሶይ ባይንዳይታ ሂስቲዲ ኡፋይሳን ባ ቦንቾ ሲንꬅ ሺሻናስ ዳንዳይዛይሳስ፥
JUD 1:25 ኢዚ ጻላ ኑስ ጾሳኔ ꬋሌ ጊዲዳ ጎዳ ዬሱስ ኪርስቶሳ ባጋራ ቤኒፔ ዶሚዲ ሃኢ ጋካናሲኔ ሜርናስካ ቦንቾይኔ ጊታቴꬂ፥ ዎልቃይኔ ጎዳቴꬂ ኢዛስ ጊዶ። ኣሚን።
REV 1:1 ሃይሲ ኣጁታዚ ማታ ዎዴ ቢታ ቦላ ሃናናይሳ ባስ ኦꬂዛይታ ቤሳና ማላ ጾሲ ዬሱስ ኪርስቶሳስ ኢሚዳይሳ። ዬሱስ ኪርስቶሲካ ባ ኪታንቻ ኪቲዲ ባ ኦሳንቻዛ ዮሃኒሳስ ሃይሳ ኣጁታዛ ቆንጪሲዴስ።
REV 1:2 ዮሃኒሲካ ጾሳ ቃላ ጊሻሲኔ ዬሱስ ኪርስቶሲ ታማርሲዳ ቱማ ጊሻስ ቃሴካ ኢዚ ባ ኣይፌን ቤኢዳይሳካ ኡባ ማርካቲዴስ።
REV 1:3 ሃይሲ ዉሪካ ሃናናይ ማታ ዎዴን ጊዲዳ ጊሻስ ሃይሳ ቲንቢቴ ቃላ ናባቢዛ ኣሲ ኣንጄቲዳዴ። ሄሳꬆካ ቲንቢቴ ቃላ ሲዪዛይቲኔ ሃ ቲንቢቴ ቃላ ጻፌቲዳይሳ ፖሊ ኦꬂዛይቲ ኢስቲ ኣንጄቲዳይታ።
REV 1:4 ኢሲያን ዲዛ ላፑን ዎሳ ኬꬃታስ ካሴካ ዲዛይሳፌ፥ ሃኢካ ዲዛይሳፌኔ ቡሮካ ያና ጾሳፌ ኢዛ ኣልጋ ሲንꬃን ዲዛ ላፑን ኣያናታፔ ሄሳꬆካ ሃይቆፔ ዴንꬃን ባይራ ጊዲዳይሳፌ፥ ሃ ቢታ ካዎታስ ካዎኔ ኣማኔቲዳ ማርካ ጊዲዳይሳፌ፥ ኑና ሲቂዛይሳፌኔ ባ ሱꬃን ኑና ኑ ናጋራፔ ጌሺዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።
REV 1:6 ኑኒ ዬሱስ ኪርስቶሳ ኣዋ ጾሳስ ኦꬃና ማላ ኑና ኢዚ ካዎታኔ ቄሴታ ኬሲዳ ዬሱስ ኪርስቶሳስ ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ! ኣሚን።
REV 1:7 ሄኮ ኢዚ ሳሎፔ ሻራራ ጊታ ቦንቾራ ያና፤ ካሴ ኢዛ ጫዲ ዎꬊዳይቲካ ኢሶይካ ኣቶንታ ዉሪ ኢዛ ቤያና፤ ቢታ ቦላ ዲዛ ዴሬይካ ዉሪ ኢዛ ጊሻስ ዬካና። ሃይሲ ሃ ዮኦዚ ቱሙኮ! ኣሚን።
REV 1:8 ካሴካ፥ ሃኢካ ዲዛይሲ ቡሮፔካ ያናይሲ ኡባ ዳንዳይዛ ጎዳ ጾሲ፥ «ኣልፋይኔ ኦሜጋይ፥ ኮይሮይኔ ዉርሴꬂ ታና» ጌስ።
REV 1:9 ታኒ ዬሱሳ ዋዬዛ ኢዛ ካዎቴꬃ ቃሴካ ኢዛ ዳንዳያን ኢንቴናራ ኢሲፌ ጊዲዳ ታ ኢንቴ ኢሻይ ዮሃኒሲ ጾሳ ቃላኒኔ ዬሱሳስ ማርካቲዳ ጊሻስ ቃሼታዳ ፊጺሞ ጌቴቲዛ ኣባ ጊዶን ዲዛ ዴሬ ዳሪን ዳይስ።
REV 1:10 ታኒ ጎዳ ጋላስ ጺሎ ኣያናን ꬊስኮ ማላ ጮ ሊጲጲ ጊሺን ዲንኬ ጊሪሳ ማላይ ጊታ ጊሪሲ ታፔ ጉዬራ፥
REV 1:11 «ኔኒ ቤኢዛይሳ ዋራቃታን ጻፋዳ ላፑን ዎሳ ኬꬃታስ ሄይቲካ ኤፌሶኔስ፥ ሳሜርኔሴስ፥ ጴርጋሞኔስ፥ ቲያጺሮኔስ፥ ሳርዴሴስ፥ ፊላዴልፊያሲኔ ሎዶቂያስ ዬዳ» ጊሺን ሲያዲስ።
REV 1:12 ሄሳ ታስ ኦኒ ዮቲዳኮ ኤራና ጋዳ ታ ጉዬ ሲማ ጼሊዛ ዎዴ ጾምፔ ኢስታ ቦላ ዎꬂዛ ዎርቃፌ ኦሴቲዳ ላፑን ባላታ ቤያዲስ።
REV 1:13 ሄ ኢስታ ቦላ ጾምፔ ዎꬂዛ ላፑን ባላታ ጊዶን ኣሳ ና ሚሳቲዛዴ ዴማዲስ። ኢዚካ ሂርኪ ቶሆ ቂርጴ ጋኪዛ ኣዱሳ ማይኦ ማይኢዴስ፤ ቲራ ቦላካ ዎርቃ ማይኦ ማይኢዴስ።
REV 1:14 ኢዛ ሁኤይኔ ኢዛ ሁኤ ቢናናይ ቃሴ ቦꬃ ሻች ሚሳቲዛ ቦꬃ ሱፌ ጌቴቲዛ ካꬃ ማላ፤ ኢዛ ኣይፌቲካ ታማ ላጮ ሚሳቴቴስ።
REV 1:15 ኢዛ ቶሆቲ ታማ ቦንቆን ቆጼቲ ኬዚዳ ጻርቂማላ ሚሳቴቴስ፤ ኢዛ ቃላይካ ዎልቃማ ፒሳ ሃꬃ ጊሪሳ ማላ ጊሬስ።
REV 1:16 ኢዚ ባ ኡሻቻ ኩሼን ላፑን ጾሊንቴታ ኦይኪ ኡቲዴስ፤ ኢዛ ዶናፔ ናምኡ ባጋራ ቃራ ማሻይ ኬዜስ፤ ኢዛ ኣይፌሶይ ኣርሼ ማላ ጾልቄቴስ።
REV 1:17 ታኒ ሄሳ ቤያዳ ሃይቂዳ ኣስ ሚሳታዳ ኢዛ ቶሆ ጋርሳን ኩንዳዲስ፤ ኢዚ ቃሴ ታ ቦላ ባ ኡሻቻ ኩሼ ዎꬂዲ፥ «ኔ ባቦፋ! ኮይሮይኔ ዉርሴꬂ ታና።
REV 1:18 ታኒ ፓጻ ዳይስ። ካሴ ሃይቃዲስኮሺን ሄኮ ታኒ ሃይሳፌ ሜርናስ ፓጻ ዳና፤ ሃይቆ ቦላኔ ሲኦሌ ቦላ ታኒ ጎዳ።
REV 1:19 ሄሳ ጊሻስ ኔኒ ቤኢዳይሳ ሃኢ ዲዛይሳኔ ጉዬፔ ሃናናይሳ ጻፋ።
REV 1:20 ኔኒ ታ ኡሻቻ ኩሼን ቤኢዳ ላፑን ጾሊንቴታኔ ጾምፔ ኢስታ ቦላ ዎꬂዛ ዎርቃፌ ኦሴቲዳ ላፑን ባላታ ጹራይ ሄኮ ሃይሳ፤ ላፑን ጾሊንቴቲ ላፑን ዎሳ ኬꬃ ኪታንቻታ፤ ጾምፔ ኢስታ ቦላ ዎꬂዛ ላፑን ዎርቃ ባላቲ ላፑን ዎሳ ኬꬃታ» ጊዴስ።
REV 2:1 «ኤፌሶኔ ዎሳ ኬꬃ ኪታንቻስ፥ ‹ሃይሲ ላፑን ጾሊንቴታ ባ ኡሻቻ ኩሼን ኦይኪዳዴፌኔ ኢስታ ቦላ ጾምፔ ዎꬂዛ ላፑን ዎርቃ ባላታ ጊዶን ሲሜሬቲዛዴፌ ዮቴቲዴስ።
REV 2:2 ታኒ ኔ ኦሶዛ፥ ዳፌቴꬃኔ ዳንዳያካ ኤራይስ፤ ቃሴ ኔኒ ኢታታ ዬጋ ኣꬋናስ ዳንዳዮንታይሳ ሃዋሬታ ጊዶንታ ዲሼ ባና ሃዋሬታ ጊዛይታካ ሻካዳ ኢስቲ ዎርዳንቻታ ጊዶይሳ ኔ ጋካ ዴሚዳይሳ ታ ኤራይስ።
REV 2:3 ኔኒ ዳንዳያን ሚና ኤቂዳይሳኔ ታ ሱንꬃ ጊሻስ ሳሌቶንታ ኔ ዋዬ ቤኢዳይሳ ታ ኤራይስ።
REV 2:4 ጊዲኮካ ታ ኔና ካꬊዛ ኢሲ ሚሺ ዴስ፤ ሄሲካ ኔኒ ካሴ ኔ ሲቆዛ ኣጋዳሳ።
REV 2:5 ኔኒ ካሴ ኣይ ማላ ꬎቃሶሆን ዳሼ ሃኢ ቃሴ ኔ ዋና ኩንዲዳኮ ኣኔ ዩሻ ቆፓዳ ማሮቴꬃን ሲማ ጌላ። ኔ ካሴ ኦꬂዛ ቤኒ ኔ ኦሶዛ ዛራ ኦꬃ፤ ኔ ሄሳ ዉርሳ ዛራ ኦꬆንታ ኢጺኮ ታ ኔኮ ያና፤ ኔኒ ማሮቴꬃን ጌሎንታ ኢጺኮ ኔኒ ጾምፔ ኢዛ ቦላ ዎꬂዛ ባላ ኢዚ ዲዛሶፔ ታ ዴንꬃይቻና።
REV 2:6 ጊዶ ኣቲን ታ ኔና ጋላቲዛ ኢሲ ሚሺ ዴስ፤ ሄሲካ ታኒ ኢጺዛ ኒቆላ ባጋ ኣሳ ኦሶ ኔካ ኢጻዳሳ።
REV 2:7 «ኣያናይ ዎሳ ኬꬃታስ ጊዛይሳ ሃይꬂ ዲዛይ ዉሪካ ሲዮ! ‹ጾኒዳዴይ ጾሳ ጋናቴ ጊዶን ዲዛ ዴኦ ሚꬃ ኣይፌ ማና ማላ ታ ኦꬃና።›
REV 2:8 «ሳሜርኔሴ ዎሳ ኬꬃ ኪታንቻስ፥ ሃይሲ ኮይሮኔ ዉርሴꬅ ጊዲዳይሳፌ ካሴ ሃይቂዳይሳፌኔ ሃኢ ጊዲኮ ፓጻ ዲዛይሳፌ ዮቴቲዳዛ።
REV 2:9 ታኒ ኔ ዋዬዛኔ ኔ ማንቆቴꬃ ኤራይስ፤ ጊዲኮካ ኔኒ ዱሬኮ። ኣይሁዳ ጊዶንታ ዲሼ ባና ኑኒ ኣይሁዳኮ ጊዛ ጻላኤ ማባራ ጊዲዳይቲ ሄይቲ ኔ ሱንꬅ ሞሮይሳ ታ ኤራይስ።
REV 2:10 ቡሮ ሲንꬃፌ ኔ ቦላ ጋካና ሜቶስ ባቦፋ፤ ኢንቴ ፓጬታና ማላ ኢንቴፌ ኢሲ ኢሲ ኣሳታ ዳቡሎሲ ቃሾ ኬꬅ ጌልꬃና። ታሙ ጋላስ ጋካናስ ኢንቴ ዋዬ ቤያናሺን ኔ ሃይቃና ጋካናስ ኣማኔቲዳዴ ጊዳ፤ ታኒ ኔስ ሜርና ዴኦ ኣኪሊሌ ሂስታ ኢማና።
REV 2:11 «ኣያናይ ዎሳ ኬꬃታስ ጊዛይሳ ሃይꬂ ዲዛይ ሲዮ! ጾኒዳዴይ ናምኣንꬆ ሃይቆን ቆሄቴና» ጋዳ ጻፋ ጊዴስ።
REV 2:12 «ጴርጋሞኔ ዎሳ ኬꬃ ኪታንቻስ፥ ሃይሲ ናምኡ ባጋራ ቃራ ማሻ ኦይኪዳይሳፌ ዮቴቲዳይሳ።
REV 2:13 ኔኒ ጻላኤ ኣልጋይ ዲዛሶን ዲዛይሳ ታኒ ኤራይስ፤ ጊዶ ኣቲን ኔኒ ታ ሱንꬃ ሎኤꬃ ኦይካዳሳ፤ ኔ ታና ኣማኒዛይሳ ኣጋቤካ፤ ታስ ኣማኔቲዳ ማርካ ጊዲዳ ኣንቲጳሲ ጻላኤይ ዲዛ ኢንቴ ካታማን ኣሳ ኩሼን ሃይቂዳ ዎዴካ ኔ ታና ኣማኖ ኣጋቤካ።
REV 2:14 ጊዲኮካ ታ ኔና ካꬊዛ ኢሲ ሚሺ ኔ ቦላ ዴስ፤ ሄሲካ ባላኣሜ ቲሚርቴ ኦይኪዳ ኢሲ ኢሲ ኣሳቲ ኢንቴ ጊዶን ዴቴስ፤ ሄሲ ባላኣሜይ ኢስራኤሌ ኣሳይ ኤቃስ ያርሼቲዳ ካꬅ ሚዲኔ ላይማ ላይማቲዲ ꬉጴታና ማላ ባላቄ ዞሪዳዴ።
REV 2:15 ሄሳꬆካ ኒቆላ ባጋ ኣሳታ ቲሚርቴ ኦይኪዳ ኣሳቲካ ኢንቴ ጊዶን ዴቴስ።
REV 2:16 ሄሳ ጊሻስ ማሮቴꬃን ጌላ፤ ኣካይ ጊኮ ታኒ ኤሶን ኔኮ ባዳ ኔና ታ ዶናፔ ኬዚዛ ማሻ ሚሳቲዛ ቃላራ ኦላና።
REV 2:17 «ኣያናይ ዎሳ ኬꬃታስ ጊዛይሳ ሃይꬂ ዲዛዴይ ሲዮ! ጾኒዳዴስ ታኒ ቆታን ዲዛ ማናፌ ኢዛ ኢማና፤ ኢዚ ታስ ጊዲዳይሳ ቤሳናስ ኢዛ ቦላ ኦራꬃ ሱንꬂ ጻፌቲዳ ቦꬃ ሹች ኢዛስ ታ ኢማና፤ ሄሳካ ኤኪዳዴፌ ኣቲን ሃራ ኣሲ ኦኒካ ኤሬና።
REV 2:18 «ቲያጺሮኔ ዎሳ ኬꬃ ኪታንቻስ፡ ሃይሲ ታማ ላጮ ሚሳቲዛ ኣይፌቲ ዲዛዴፌኔ ቦንቂዳ ታማን ጌሊ ቆጼቲ ኬዚዳ ጻርቂማላ ሚሳቲዛ ቶሆቲ ዲዛዴፌ ጾሳ ናፔ ኪቴቲዳይሳ።
REV 2:19 ታኒ ኔ ኦሶኔ ኔ ሲቆ፥ ኔ ኣማኖኔ ኔ ሃጋዞ፥ ኔ ዳንዳያን ሚኖይሳካ ኤራይስ፤ ካሴ ኦሶዛፔ ጉዬይሲ ኣꬊዛይሳካ ታ ኤራይስ።
REV 2:20 ጊዶ ኣቲን ታ ኔና ካꬊዛ ኢሲ ሚሺ ዴስ፤ ሄሲካ ባና፥ ‹ታኒ ናቤ› ጊዛ ማጫሳዮ ኤልዛቤሎ ኔኒ ቤሳ ኣጊዳ ጊሻስ ኢዛ ታስ ኦꬂዛይቲ ላይማ ላይማታና ማላኔ ኤቃስ ያርሼቲዳ ካꬅ ማና ማላ ኢዛ ታማርሳዳ ባሌꬃዱስ።
REV 2:21 ኢዛ ማሮቴꬃን ጌላና ማላ ታ ኢዚስ ዎዴ ኢማዲሲሺን ኢዛ ጊዲኮ ባ ላይማቴꬃፌ ሲማናስ ኮያቤኩ።
REV 2:22 ሄሳ ጊሻስ ታ ኢዞ ዋዬ ኣልጋ ቦላ ዬጋና፤ ኢዚራ ኦꬂዳ ኣሳቲ ባ ኢታ ኦሶፔ ማሮቴꬃን ሲሞንታ ኢጺኮ ኢዚራ ኢሲፌ ላይማቲዳ ኡባታ ቦላ ጊታ ሜቶ ታ ኤሃና።
REV 2:23 ታኒ ኢዚ ናይታ ሃይቆን ቃጻያና፤ ኣሳ ቆፋኔ ኣሳ ኣሞ ሻካ ኤሪዛይ ታና ጊዲዳይሳ ዎሳ ኬꬃቲ ዉሪ ኤራና፤ ታኒ ኢንቴስ ኢሳስ ኢሳስ ኢዛዴ ኦሶ ማላ ኢማና።
REV 2:24 «ቲያጺሮኔን ዲዛይታስ ኢንቴሲኔ ሃይሳ ኢታ ቲሚርቴዛ ታማሮንታይታስ ኡባስ ሄሳꬆካ ኢሲ ኢሲ፥ ‹ጻላኤስ ሃይሲ ጪማ ጹራ› ጌቴቲዛይሳ ካሎንታይታ ኢንቴና ታኒ ሃራ ቶሆ ቶሲኬ።
REV 2:25 ጊዲኮካ ታ ሄ ባና ጋካናስ ኢንቴስ ዲዛዝ ዉርሲ ሚንꬂ ኦይኪቴ።
REV 2:26 ጾኒዳዴሲኔ ታ ኦሶን ዉርሴꬅ ጋካናስ ሚኒዛዴስ ኣይዛቤታ ቦላ ታ ጎዳቴꬅ ኢማና።
REV 2:27 ኢስታ ኢዚ ቢራታ ጉፌን ሃራና፤ ኡርቃፌ ሜꬌቲዳ ሚሻ ማላ ኢዚ ኢስታ ቡኪ ሊቂሳና። ሄሲ ሄ ጎዳቴꬂካ ታኒ ታ ኣዋፔ ኤኪዳ ጎዳቴꬃ ማላ።
REV 2:28 ታ ኢዛስ ዎንታ ቦላ ኬዚዛ ጾሊንቴዛ ኢማና።
REV 2:29 ኣያናይ ዎሳ ኬꬃታስ ጊዛይሳ ሃይꬂ ዲዛይ ዉሪ ሲዮ!» ጋዳ ጻፋ ጊዴስ።
REV 3:1 «ሳርዴሴ ዎሳ ኬꬃ ኪታንቻስ፥ ሃይሲ ጾሳ ኣያና ላፑናታፔኔ ጾሊንቴታ ኦይኪዳዴፌ ዮቴቲዳይሳ፤ ታ ኔ ኦሶ ኤራይስ፤ ኔኒ ሱንꬃን ፓጻ ዳሳ ሺን ሃይቃዳሳ።
REV 3:2 ቤጋ! ሃይቃና ማቲዳሮኔ ኔስ ዉራሼ ጉꬅ ኣቲዳ ዎልቃዮ ዛራ ሚንꬃ፤ ታኒ ታ ጎዳ ሲንꬃን ኔ ኦሶይ ኩሜꬅ ጊዲን ቤያቤኬ።
REV 3:3 ሄሳ ጊሻስ ኔኒ ኣይ ማላ ቲሚርቴ ኤኪዳኮ ኔ ሲዮይሳ ዩሻ ቆፓኔ ናጋ። ማሮቴꬃንካ ጌላ፤ ኔኒ ቤጎንታ ኣጊኮ ታ ካይሶ ማላ ኔ ቆፖንታ ፑቱ ጋና፤ ታ ኣይ ሳቴን ኔኮ ያናኮ ኔ ኤራካ።
REV 3:4 ጊዶ ኣቲን ባ ማይኦ ቱኒሶንታይቲ ሳርዴሴን ጉꬃ ኣሳቲ ኔናራ ዴቴስ፤ ሄይቲ ቦꬃ ማይኦ ማይኣናይሲ ኢስታስ ቤሲዛ ጊሻስ ኢስቲ ቦꬃ ማይኦ ማይኢዲ ታናራ ባና።
REV 3:5 ጾኒዳዴይ ኢስታꬆካ ቦꬃ ማይኦ ማይኣና፤ ኢዛዴ ሱንꬅ ታኒ ታ ኣዋ ሲንꬃኒኔ ኪታንቻታ ሲንꬃን ኤሪሳና። ዴኦን ዲዛይታ ሱንꬂ ጻፌቲዳ ዴኦ ማዝጋባፔ ቁጪኬ።
REV 3:6 «ኣያናይ ዎሳ ኬꬃታስ ጊዛይሳ ሃይꬂ ዲዛይ ዉሪ ሲዮ!
REV 3:7 «ፊላዴልፊያ ዎሳ ኬꬃ ኪታንቻስ፥ ሃይሲ ጌሺኔ ቱማንቻ ጊዲዳይሳፌ ዳዊቴ ኬꬃ ቁልፔ ኦይኪዳይሳፌ ዮቴቲዳይሳ፤ ኢዚ ዶይዳይሳ ኦኒካ ጎርዴና፤ ኢዚ ጎርዲዳይሳ ኦኒካ ዶዬና።
REV 3:8 ታኒ ኔ ኦሶ ኤራይስ፤ ሄኮ ኦኒካ ጎርዳናስ ዳንዳዮንታ ዶያ ፔንጌ ታ ኔ ሲንꬃን ዎꬃዲስ፤ ኔ ዎልቃይ ጉꬅ ጊዲዳይሳ ታ ኤራይስ፤ ጊዲኮካ ኔ ታ ቃላ ናጋዳሳ፤ ታ ሱንꬃካ ኔ ካዳቤካ።
REV 3:9 ሄሳ ጊሻስ ባስ ኣይሁዳ ጊዶንታ ዲሼ ባና ኣይሁዳ ጊዛይቲ ሄይቲ ጻላኤ ማባራፔ ጊዲዳ ዎርዶቲ ዪዲ ኔ ቶሆ ቦላ ኩንዳና ማላ ታ ኦꬃና፤ ታኒ ኔና ሲቂዳይሳ ኢስቲ ኤራና ማላ ታ ኦꬃና።
REV 3:10 ኔኒ ዳንዳይዛዴ ጊዳ ጋዳ ታ ኔስ ዮቶ ቃላ ኔ ናጊዳ ጊሻስ ታካ ቡሮ ቢታ ቦላ ዲዛ ኣሳ ፓጫናስ ኩሜꬃ ኣላሜ ቦላ ያና ዋዬ ጋላሳፌ ታ ኔና ናጋና።
REV 3:11 ሄኮ ታ ኤሶን ያና፤ ኔ ኣኪሊሌ ኦኒካ ኤኮንታ ማላ ኔስ ዲዛዝ ሎኤꬃ ኦይካ።
REV 3:12 ጾኒዳዴ ታኒ ታ ጎዳ ጾሳ ኬꬃን ቱስ ኦꬃና፤ ኢዚ ሄፔ ሙሌካ ኬዜና። ታ ጎዳ ሱንꬂኔ ታ ጎዳ ካታማዛ ሱንꬂካ ታ ኢዛ ቦላ ጻፋና። ሃና ካታማያ ሳሎፔ ታ ጎዳ ኣቻፌ ዎꬋና ኦራꬃ ዬሩሳላሜ፤ ታኒካ ታ ኦራꬃ ሱንꬃ ኢዛዴ ቦላ ጻፋና።
REV 3:13 «ኣያናይ ዎሳ ኬꬃታስ ዮቲዛይሳ ሃይꬂ ዲዛይ ዉሪ ሲዮ!
REV 3:14 «ሎዶቂያ ዎሳ ኬꬃ ኪታንቻስ፥ ሃይሲ፥ ‹ኣሚን› ጊዳይሳፌ፥ ቱሙ ኣማኔቲዳ ማርካ ጊዲዳዴፌ፥ ጾሳ ሜꬌቴꬂ ዉሪ ኢዛፔ ቤቲዳዴፌ ዮቴቲዳይሳ።
REV 3:15 ታኒ ኔ ኦሶ ኤራይስ፤ ኔኒ ኢርጻ ዎይኮ ሚሻ ጊዳካ፤ ኔኒ ኢርጻ ዎይኮ ሚሻ ጊዲዳኮ ሎኦኮሺን።
REV 3:16 ኢርጻ ዎይኮ ሚሻ ጊዶንታ ኔ ጮ ዶንቦላ ጊዲዳ ጊሻስ ታ ኔና ታ ዶናፔ ኬሳ ጩታና ጋይስ።
REV 3:17 ‹ታኒ ዱሬኮ፤ ታስ ዳሮ ሃሮይ ዴስ፤ ታስ ኣይኮይካ ፓጪቤና› ጋሳ ሺን ኔኒ ጊልቃ፤ ኣይኮይ ባይንዳ ሂዬሳ፤ ማንቆ፤ ቆቄኔ ካሎ ዲዛዴ ጊዲዳይሳ ኔ ኤራቤካ።
REV 3:18 ኔ ዱሬ ጊዳና ኮይኮ ታፔ ታማን ፓጬቲዳ ዎርቃ ሻማና ማላ ኔኒ ኔ ካሎቴꬃ ዬላቴꬅ ካማናስ ቦꬃ ማይኦ ማይኣና ማላኔ ጼላናስካ ዳንዳያና ማላ ኣይፌ ꬋሌ ሻማዳ ኔ ቲዬታና ማላ ታ ኔና ዞራይስ።
REV 3:19 ታኒ ታ ዶሲዛይታ ዉርሳ ሃንቃይሲኔ ቃጻያይስ፤ ሄሳ ጊሻስ ኔኒ ሚና፤ ማሮቴꬃንካ ጌላ።
REV 3:20 ሄኮ! ታኒ ፔንጌን ኤቃዳ ጼይጋይስ፤ ኦኒካ ታ ቃላ ሲዪዲ ባ ፔንጌዛ ታስ ዶይኮ ታ ኢዛኮ ጌላዳ ኢዛዴራ ማና፤ ኢዛዴይካ ታናራ ማና።
REV 3:21 ታኒ ጾናዳ ታ ኣዋራ ኢዛ ኣልጋን ኡቲዳይሳꬆ ጾኒዳዴይ ታናራ ኢሲፌ ታ ኣልጋን ኡታና ማላ ታ ኦꬃና።
REV 3:22 «ኣያናይ ዎሳ ኬꬃታስ ጊዛይሳ ሃይꬂ ዲዛይ ዉሪ ሲዮ!» ጋዳ ጻፋ ጊዴስ።
REV 4:1 ሄሳፌ ጉዬ ታኒ ሳሎን ዶያ ዲዛ ፔንጌ ቤያዲስ፤ ታኒ ኮይሮ ሲዪዳይ ዲንኬ ጊሪሳ ማላ ጊሪሲ፥ «ሃ ፑዴ ኬዛ፤ ቡሮፔ ሃናና ሚሻታ ታ ኔና ቤሳና» ጊዴስ።
REV 4:2 ታኒ ሄራካ ኣያናን ሊጲጲ ጋዳ ሳሎን ዲዛ ኣልጋ ቤያዲስ፤ ሄ ኣልጋዛ ቦላካ ኢሳዴይ ኡቲዴስ።
REV 4:3 ሄ ኣልጋ ቦላ ኡቲዳይሳ ሜꬋይ ኢያስጲዴኔ ሳርዲዮኔ ኢንቁ ሚሳቲዛ ኣልጋዛ ዩዪ ኣꬊዲ ማርጊዴ ጌቴቲዛ ኢንቁ ሚሳቲዛ ዙላይ ዴስ።
REV 4:4 ሄሳꬆካ ሄ ኣልጋዛ ዩዪ ኣꬊዳ ናምኡ ታማኔ ኦይዱ ኣልጋቲ ዴቴስ፤ ሄ ኣልጋታ ቦላ ቃሴ ቦꬃ ማይኦ ማይኢዲ ባ ሁኤ ቦላ ዎርቃ ኣኪሊሌ ዎꬂዳ ናምኡ ታማኔ ኦይዱ ጪማቲ ኡቲዳ።
REV 4:5 ሄ ኣልጋፌ ዎልቃንꬂኔ ዳዳ ጊሪሲ ኬዜስ፤ ሄ ኣልጋ ሲንꬃን ፖኢዛ ላፑን ጾምፔቲ ዴቴስ፤ ሄይቲካ ጾሳ ኣያና ላፑናታ።
REV 4:6 ሄ ኣልጋ ሲንꬃን ጌሽ ሚሊጺ ጊዳ ጾልቂዛ ማስቶቴ ሚሳቲዛ ኣባይ ዴስ፤ ኢዛ ጊዶን ኣልጋ ዩሾን ዳሮ ኣይፌራ ዲዛ ኦይዱ ዶኣቲ ዴቴስ።
REV 4:7 ኮይሮ ዶኣዚ ጋሞ ሚሳቴስ፤ ናምኣንꬆዚ ቦራ ሚሳቴስ፤ ሄꬓንꬆዛ ኣይፌሶይ ኣሳ ኣይፌሶ ሚሳቴስ፤ ኦይዳንꬆዚ ፒራꬊዛ ጎሌ ካፎ ሚሳቴስ።
REV 4:8 ሄ ኦይዱ ዶኣቲ ኢሶይ ኢሶይ ኡሱፑን ቄፌራ ዴቴስ፤ ቄፌታ ዩሾኒኔ ቄፌታ ጊዶን ኣይፌይ ኩሚዴስ፤ ኢስቲ ቃማኔ ጋላስ፥ «ጌሻዉ! ጌሻዉ! ጌሻዉ! ኡባ ዳንዳይዛ ጎዶ! ካሴካ ሃኢካ ዲዛይሶ! ቡሮካ ያናይሶ ጉሳፌ ሼምፒ ኤሬቴና።
REV 4:9 «ሄ ዶኣቲ ኣልጋ ቦላ ኡቲዳይሳሲኔ ሜርናፔ ሜርና ጋካናስ ዲዛይሳስ ጊታቴꬅ፥ ቦንቾኔ ጋላታካ ሺሺዛ ዎዴ ኡባን፥
REV 4:10 ናምኡ ታማኔ ኦይዱ ጪማቲ ሜርናፔ ሜርና ጋካናስ ዲዛ ባ ኣልጋ ቦላ ኡቲዳይሳ ሲንꬃን ጉፋኒዲ ኢዛስ ጎይኔቴስ፤ ባ ኣኪሊሌታካ ሄ ኣልጋዛ ሲንꬃን ዎꬂዲ፥
REV 4:11 «ኑ ጎዳ ጾሶ! ኔኒ ኡባ ሜꬊዳ ጊሻስ ሜꬌቴꬂ ዉሪካ ሜꬌቲዳይኔ ሼምፖራ ዲዛይ ኔ ሼኔን ጊዲዳ ጊሻስ ጊታቴꬂ፥ ቦንቾይኔ ዎልቃይካ ኔስ ቤሴስ» ጊዳ።
REV 5:1 ሄ ኣልጋ ቦላ ኡቲዳይሳ ኡሻቻ ኩሼ ቃኣ ጋርሳኒኔ ቦላ ባጋራ ጻፌቲ ኡቲዳ ላፑን ማታሜን ጎርዴቲዳ ኢሲ ጻጼቲ ኡቲዳ ማጻፋ ቤያዲስ።
REV 5:2 ኢሲ ሚኖ ኪታንቻ ዳይሲ ጊታ ቃላራ፥ «ሃይታ ማታሜታ ቢርሺዲ ሃ ጻꬃ ማጻፋ ዶያናስ ቤሲዛዴይ ኦኔ?» ጊ ሃሳይሺን ታ ቤያዲስ።
REV 5:3 ጊዶ ኣቲን ሳሎንካ ጊዲን ዎይኮ ሳኣ ቦላ ዎይኮ ቢታፌ ጋርሳ ባጋንካ ሄ ጻꬃ ማጻፋ ዶይዲ ኢዛ ጊዶን ዲዛይሳ ጼላናስ ዳንዳይዳ ኣሲ ኦኒካ ቤቲቤና።
REV 5:4 ታኒካ ሄ ጻꬃ ማጻፋ ቢርሺዲ ኢዛ ጊዶ ጼላናስ ቤሲዛዴይ ቤቶንታ ኣጊዳ ጊሻስ ኬሃ ዬካዲስ።
REV 5:5 ሄ ዎዴ ጪማታፔ ኢሳዴይ ታስ፥ «ኔ ዬኮፋ! ሄኮ ዩሁዳ ባጋ ጊዲዳ ዳዊቴ ዛርኬፌ ዴንዲዳ ጋሞይ ኢዚ ካሴ ጾኒዴስ፤ ኢዚ ጻꬃ ማጻፋዛኔ ላፑን ማታሜዛ ዶያናስ ዳንዳዬስ» ጊዴስ።
REV 5:6 ሄሳፌ ጉዬ ኣልጋ ቦላን ኦይዱ ዶኣታ ጊዶን ጪማታ ጊዶንካ ሹኬቲዳ ዶርስ ሚሳቲዛይሲ ኤቂዳይሳ ታ ቤያዲስ፤ ሄ ዶርሳዛስ ላፑን ካጬይኔ ላፑን ኣይፌይ ዴስ፤ ሄ ኣይፌቲካ ኩሜꬃ ኣላሜ ኪቴቲዳ ጾሳ ኣያና ላፑናታ።
REV 5:7 ሄ ዶርሳይ ዪዲ ኣልጋ ቦላ ኡቲዳይሳፌ፥ ኡሻቻ ኩሼን ዲዛ ጻꬃ ማጻፋ ኤኪዴስ።
REV 5:8 ጻꬃ ማጻፋዛ ኤኪዳ ማላ ኦይዱ ዶኣቲኔ ናምኡ ታማኔ ኦይዱ ጪማቲ ሄ ዶርሳ ሲንꬃን ባ ሊጴን ጉፋኒዳ። ኢስቲካ ኢሶይ ኢሶይ ባ ኩሼን ዲꬅ ሚሳቲዛ ሚሽ ኦይኪዳ፤ ሄሳꬆካ ጌሻታ ዎሳ ጊዲዳ ኤጻኔይ ኢዛን ኩሚዳ ዎርቃ ጻሮ ባ ኩሼን ኦይኪ ዴቴስ።
REV 5:9 ኦራꬃ ማዛሙሬ ሂዝጊ ዬጺዳ፤ «ኔኒ ኣስ ዱማ ዱማ ኮቻፌ፥ ዱማ ዱማ ቃላን ሃሳይዛይታፔ፥ ዱማ ዱማ ቆሞፌኔ ዱማ ዱማ ዴሬፔ ጾሳስ ዎዛናስ ሹኬቲዳ ጊሻስ ሄ ጻꬃ ማጻፋዛ ኤካናሲኔ ማታሜታካ ዶያናስ ቤሲዛዴ ጊዳዳሳ።
REV 5:10 ኔ ኢስታ ኑ ጎዳ ጾሳስ ካዎታኔ ቄሴታ ሂስታዳሳ፤ ኢስቲካ ቢታ ቦላ ካዎታና።»
REV 5:11 ታኒ ጌዴ ዛራ ጼላሼ ሄ ኣልጋዛ፥ ዶኣታኔ ጪማታ ዩዪ ኣꬊዳ ዳሮ ኪታንቻታ ቃላ ጊሪስ ሲያዲስ፤ ኢስታስ ጮራቴꬃይ ዳሮ ሺያኒኔ ዳሮ ሚሎኔን ቆዴቴስ።
REV 5:12 ኢስቲ ዳሮ ጊታ ቃላን፥ «ሃ ሹኬቲዳ ዶርሳይ ዎልቃ፥ ዱሬቴꬅ፥ ኤራቴꬅ፥ ሚኖቴꬅ፥ ጊታቴꬅ፥ ቦንቾኔ ጋላታ ኤካናስ ቤሴስ» ጊዳ።
REV 5:13 ሳሎንካ ሳኣ ቦላካ፥ ቢታፌ ጋርሳንካ፥ ኣባ ጊዶን ዲዛ ሜꬌቴꬃ ኡባን፥ «ኣልጋ ቦላ ኡቲዳይሳሲኔ ዶርሳስ ጋላታይኔ ꬎቃቴꬂ፥ ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ!» ጊሺን ታ ሲያዲስ።
REV 5:14 ኦይዱ ዶኣቲካ፥ «ኣሚን» ጊዳ። ጪማቲካ ባ ሊጴን ጉፋኒዲ ኢዛስ ጎይኒዳ።
REV 6:1 ሄሳፌ ጉዬ ሄ ዶርሳይ ላፑን ማታሜታፔ ኮይሮ ማታሜዛ ዶይሺን ታ ቤያዲስ፤ ሄ ኦይዱ ዶኣታፔ ኢሶይ ዳዳ ጉጉንꬃ ማላ ቃላራ፥ «ሃ ያ!» ጊሺን ሲያዲስ።
REV 6:2 ቃሴካ ቦꬃ ፓራ ቤያዲስ፤ ሄ ፓራዛ ቦላ ባ ኩሼን ዎንዳፌ ኦይኪዳዴይ ዴስ፤ ኢዛስ ኣኪሊሌይካ ኢሜቲዴስ፤ ኢዚካ ጾኒዛዴ ጊዲዲ ጾኒ ጾኒ ባናስ ኬዚዴስ።
REV 6:3 ሄ ዶርሳይ ናምኣንꬆ ማታሜዛ ዶይዳ ማላ ናምኣንꬆ ዶኣዚ፥ «ሃ ያ!» ጊሺን ታ ሲያዲስ።
REV 6:4 ቃሴካ ሃራ ጼቃ ዞኦ ፓራይ ኬዚዴስ፤ ሄ ፓራ ቶጊዳዴይ ቢታ ቦላፌ ሳሮቴꬅ ꬋይሳና ማላኔ ኣሳይ ባ ጋርሳን ኢሶይ ኢሳ ዉርሳና ማላ ኦሲሳናስ ኢዛስ ጎዳቴꬂኔ ጊታ ማሻይ ኢሜቲዴስ።
REV 6:5 ዶርሳዚ ሄꬓንꬆ ማታሜዛ ዶዪን ሄꬓንꬆ ዶኣዚ፥ «ሃ ያ!» ጊሺን ታ ሲያዲስ፤ ቃሴ ካሬꬃ ፓራ ቤያዲስ፤ ሄ ፓራ ቦላ ኡቲዳይሲ ባ ኩሼን ማካ ሚሽ ኦይኪዴስ።
REV 6:6 ኦይዱ ዶኣታ ጊዶፌ ዪዳ ሚሳቲዛ ቃላ ሲያዲስ፤ ሄ ጊሪሳይካ፥ «ባጋ ኪሎ ጊዲዛ ጊስቴ ኢሳዴስ ኢሲ ጋላሳ ዳሞዛ፥ ቃሴ ኢሲ ኪሎ ኩማናስ ሳይሶ ፓጬ ጊዲዛ ባንጋይ ኢሲ ጋላሳ ዳሞዛ ጊዶ፤ ጊዶ ኣቲን ዛይቴኔ ዎይኔ ሚꬅ ቆሆፓ» ጊሺን ታ ሲያዲስ።
REV 6:7 ሄ ዶርሳይ ኦይዳንꬆ ማታሜዛ ዶዪን ኦይዳንꬆ ዶኣዛ ቃላይ፥ «ሃ ያ!» ጊሺን ታ ሲያዲስ።
REV 6:8 ቃሴካ ጮሎሎ ፓራ ቤያዲስ፤ ፓራ ቶጊዳይሳ ሱንꬂ ሃይቆ ጌቴቴስ፤ ኢዛ ቃሴ ዱፎይ ካሌስ፤ ሃይቆይኔ ዱፎይ ቢታፌ ሳይሶ ኦላን፥ ጋፋን፥ ቦሻኒኔ ባዞ ዶኣን ዎꬋና ማላ ጎዳቴꬂ ኢስታስ ኢሜቲዴስ።
REV 6:9 ኢቻሻንꬆ ማታሜዛ ኢዚ ዶዪን ጾሳ ቃላ ጊሻሲኔ ባ ማርካቲዳ ማርካቴꬃ ጊሻስ ሃይቂዳይታ ሼምፖታ ያርሾ ያርሺዛሶዛ ጋርሳን ቤያዲስ።
REV 6:10 ኢስቲ ꬎቃ ቃላን፥ «ጌሻኔ ቱማንቻ ጎዳዉ! ኔኒ ቢታ ቦላ ዲዛ ኣሳ ቦላ ፒርዶንታይኔ ኑ ሱꬃ ጊሻስ ኔ ሃሎ ኬሶንታይ ኣዪዴ ጋካናሴ?» ጊ ዋሲዳ።
REV 6:11 ኢስታስ ኢሳስ ኢሳስ ቦꬃ ማይኦይ ኢሜቲዴስ፤ ኢስታ ማላቲካ ቡሮ ሃይቃና፤ ኢስታ ማላ ኦሳንቻ ጊዲዳ ኢስታ ላጌቲኔ ኢስታ ኢሻታ ቆዳይ ኩማና ጋካናስ ኢስቲ ጉꬃ ዎዴስ ሼምፒ ታካና ማላ ኢስታስ ዮቴቲዴስ።
REV 6:12 ሄሳፌ ጉዬ ሄ ዶርሳይ ኡሱፑንꬆ ማታሜዛ ዶዪን ታኒ ኢዛኮ ጼላዲስ፤ ሄኮ ቢታይ ዎልቃማ ቃꬅ ቃጺዴስ፤ ኣርሼይ ኣሲ ካዮስ ማይኢዛ ካሬꬃ ማይኦ ማላ ካሬጺዴስ፤ ኣጊናይካ ኩሜꬃራ ሱꬃ ማላ ዞኣዱስ።
REV 6:13 ዎልቃማ ኣሱራ ጫርኮይ ጫርኪዲ ሚꬃ ኣይፌ ቆቆፊዛ ማላ ሳሎፔ ጾሊንቴይ ቆቆፌቲዴስ።
REV 6:14 ሳሎይካ ዋራቃታ ማላ ጻጼቲ ኪቺዴስ፤ ዙማቲኔ ኣባ ጊዶን ዲዛ ጋዴቲ ዉሪካ ባ ዲዛሶፔ ꬋይዳ።
REV 6:15 ቢታ ቦላ ዲዛ ካዎቲ ቢታ ሃሪዛይቲ፥ ኦላ ሃላቃቲ፥ ዱሬቲ፥ ዎልቃማቲ፥ ኣሽካራቲኔ ጎዳቲ ዉሪካ ጎንጎሎ ጊዶ፥ ዙማታ ጋርሳኒኔ ዛላታ ጋርሳን ቆቴቲዳ።
REV 6:16 ዙማታኔ ዛላታካ፥ «ኑና ካሚቴ! ኣልጋ ቦላ ኡቲዳይሳ ሲንꬃፌ፥ ሄ ዶርሳዛ ሃንቆፌ ኑና ቆቲቴ።
REV 6:17 ዎልቃማ ሃንቆ ጋላሳይ ጋኪዴስ፤ ኢዛ ኦኔ ዳንዳያናይ?» ጊዳ።
REV 7:1 ሄሳፌ ጉዬ ኦይዱ ኪታንቻታ ቢታ ቦላ ኦይዱ ባጋራ ኤቂዳይታ ቤያዲስ፤ ኢስቲካ ቢታ ቦላ ጊዲን ዎይኮ ኣባ ቦላ ዎይኮ ሚꬃ ቦላ ኣይ ጫርኮይካ ጫርኮንታ ማላ ኦይዱ ባጋራ ዪዛ ቦሻ ጫርኮ ዉርሲ ኦይኪዳ።
REV 7:2 ዴኦ ጾሳ ማታሜ ኦይኪዳ ሃራ ኪታንቻይ ኣርሼይ ሞኪዛ ባጋራ ሃ ዪሺን ታ ቤያዲስ፤ ቢታኔ ኣባ ቆሃናስ ኢስታስ ጎዳቴꬂ ኢሜቲዳ ኦይዱ ኪታንቻቲ ባ ቃላ ꬎቁ ሂስቲዲ፥
REV 7:3 «ኑኒ ኑ ጎዳ ኦሳንቻታ ሊጴ ቦላ ማታሜ ዎꬃና ጋካናስ ቢታ ቦላ ጊዲን ዎይኮ ኣባ ጊዶን ዲዛይታ ጊዲን ዎይኮ ሚꬃታ ጊዲንካ ሄይታንታ ቆሆፒቴ» ጊ ዋሲዴስ።
REV 7:4 ታኒካ ማታሜይ ኢስታ ቦላ ዎꬊዳይታ ቆዳ ሲያዲስ፤ ኢስራኤሌ ኣሳ ኮቻ ኡባፌ ማታሜይ ኢስታ ቦላ ሾጬቲዳይታ ቆዳይ ጼታኔ ኦይዱ ታማኔ ኦይዱ ሺ ኣሳ።
REV 7:5 ዩሁዳ ቆሞፌ ታማኔ ናምኡ ሺ፥ ኤሮቤሌ ቆሞፌ ታማኔ ናምኡ ሺ፥ ጋዴ ቆሞፌ ታማኔ ናምኡ ሺ፥
REV 7:6 ኣሴሬ ቆሞፌ ታማኔ ናምኡ ሺ፥ ኒፍታሌሜ ቆሞፌ ታማኔ ናምኡ ሺ፥ ሚናሴ ቆሞፌ ታማኔ ናምኡ ሺ፥
REV 7:7 ሲሞና ቆሞፌ ታማኔ ናምኡ ሺ፥ ሌዌ ቆሞፌ ታማኔ ናምኡ ሺ፥ ዪሳኮሬ ቆሞፌ ታማኔ ናምኡ ሺ፥
REV 7:8 ዛቢሎኔ ቆሞፌ ታማኔ ናምኡ ሺ፥ ዮሴፌ ቆሞፌ ታማኔ ናምኡ ሺ፥ ቢኒያሜ ቆሞፌ ታማኔ ናምኡ ሺ።
REV 7:9 ሄሳፌ ጉዬ ታ ጼሊሺን ቆዳይ ባይንዳ ዳሮ ዴሬይ ዲዛይሳ ቤያዲስ፤ ሄይታንቲካ ዴሬፔ፥ ዱማ ዱማ ቆሞፌ፥ ዱማ ዱማ ዛርኬፌኔ ዱማ ዱማ ቃላ ሃሳይዛይታፔ ሺቄቲዳይታ። ሄይቲ ዉሪ ቦꬃ ማይኦ ማይኢዲ ዛምባ ሃይꬅ ባ ኩሼን ኦይኪዲ ኣልጋ ሲንꬃኒኔ ዶርሳዛ ሲንꬃን ኤቂዳ።
REV 7:10 ቃላ ꬎቁ ሂስቲዲ፥ «ኣቶቴꬂ ኣልጋ ቦላ ኡቲዳ ኑ ጎዳፔኔ ዶርሳዛፔኮ!» ጊዳ።
REV 7:11 ኢዛ ኪታንቻቲ ዉሪካ ኢዛ ኣልጋስ፥ ጪማታኔ ኦይዱ ዶኣታ ዩዪ ኣꬊ ኤቂዳ ኣልጋዛ ሲንꬃን ጉፋኒዲ ጾሳስ ጎይኒዳ።
REV 7:12 «ኣሚን! ሳባይ፥ ጊታቴꬂ፥ ኤራቴꬂ፥ ጋላታይ፥ ቦንቾይ፥ ዎልቃይኔ ሚኖቴꬂ ኑ ጎዳስ ጾሳስ ሜርናፔ ሜርናስ ጊዶ። ኣሚን!» ጊዳ።
REV 7:13 ጪማታ ጊዶፌ ኢሳዴይ ታኮ ሲሚዲ ታና፥ «ሃይቲ ቦꬃ ማይኦ ማይኢዳይቲ ኦናንቴ? ኢስቲ ኣዋፔ ዪዳይቴ?» ጊዴስ።
REV 7:14 ታኒካ፥ «ጎዳዉ! ኔ ኤራሳ» ጋዲስ። ኢዚካ ታስ፥ «ሃይቲ ዎልቃማ ዋዬዛ ካንꬂዲ ዪዳይታ፤ ኢስቲ ባ ማይኦካ ዶርሳ ሱꬃን ሜጪ ጌሺዳ።
REV 7:15 ሄሳ ጊሻስ ጾሳ ኣልጋ ሲንꬃን ዴኢዲ ቃማኔ ጋላስ ኢዛ ኬꬃን ኢዛስ ኦꬄቴስ፤ ኣልጋ ቦላ ኡቲዳይሲ ባ ቦንቾራ ቤቲዲ ኢስታስ ኩዋሶ ጊዳና።
REV 7:16 ሃይሳፌ ጉዬ ኢስቲ ጋፌቴና፤ ሳሞቴቴና፤ ኣርሼ ሴላይካ ኢስታ ቦቼናኔ ሆምቤይካ ኢስታ ሆምቤና።
REV 7:17 ኣልጋዛስ ጊዶ ኣዳን ኡቲዳ ዶርሳይ ኢስታ ሄሚዛዴ ጊዳና፤ ኢስታካ ጌዴ ዴኦ ሃꬃ ፑልቶይ ዲዛሶ ካሌꬃና፤ ጾሲ ኢስታ ኣይፌፔ ኣፉንꬃ ቁጫና» ጊዴስ።
REV 8:1 ዶርሳይ ላፑንꬆ ማታሜዛ ዶዪን ባጋ ሳቴ ጊዲዛይሳ ኬና ሳሎይ ጮኡ ጊዴስ።
REV 8:2 ጾሳ ሲንꬃን ኤቂዛ ላፑን ኪታንቻታ ታኒ ቤያዲስ፤ ሄ ኣሳታስካ ላፑን ዲንኬይ ኢሜቲዴስ።
REV 8:3 ኤጻኔ ኢዛን ጩዋሲዛ ዎርቃፌ ኦሴቲዳይሳ ኦይኪዳ ኪታንቻይ ዪዲ ያርሾ ኢዛን ያርሺዛሶዛ ኣቻን ኤቂዴስ። ኣልጋ ሲንꬃን ዲዛ ዎርቃፌ ኦሴቲዳ ያርሾ ኢዛ ቦላ ያርሺዛይሳ ቦላ ጌሻታ ዎሳራ ኢሲፌ ሺሺዛ ዳሮ ኤጻኔይ ኢዛስ ኢሜቲዴስ።
REV 8:4 ሄ ኤጻኔዛ ጩዋይ ጾሳስ ዱማቲዳ ኣሳታ ዎሳስ ሄ ኪታንቻዛ ኩሼፔ ፑዴ ጾሳ ሲንꬅ ኬዚዴስ።
REV 8:5 ሄሳፌ ጉዬ ኪታንቻዚ ኤጻኔ ኢዛን ጩዋሲዛይሳ ኦይኪዲ ያርሾ ያርሺዛሶዛፔ ታማ ኤኪ ኢዛን ኩንꬂዲ ዱጌ ቢታ ቦላ ዬጊዴስ፤ ዳዳይ ዳዳቲዴስ፤ ጊሪሲ ጊሪዴስ፤ ዎልቃንꬂ ዎልቃሚዴስ፤ ቢታይካ ቃጺዴስ።
REV 8:6 ላፑን ዛዬ ኦይኪዳ ላፑን ኪታንቻቲ ባ ዛዬ ፑናናስ ጊጌቲዳ።
REV 8:7 ኮይሮ ኪታንቻዚ ባ ዛዬዛ ፑኒዴስ፤ ሻቺኔ ሱꬂ ዋላኬቲዳ ታማይ ሜꬌቲዲ ዱጌ ቢታ ቦላ ዬጌቲዴስ፤ ቢታፌ ጪጎይ ጹጌቲዴስ፤ ሚꬃፌካ ጪጎይ ጹጌቲዴስ፤ ጪሊላ ማታይካ ዉሪ ጹጌቲዴስ።
REV 8:8 ናምኣንꬆ ኪታንቻይካ ባ ዛዬዛ ፑኒዴስ፤ ኢሲ ጊታ ዙማ ሚሳቲዛ ሚሺ ኤጺሼ ዱጌ ኣባ ጊዶ ዬጌቲዴስ፤ ኣባስ ጪጎይ ሱꬅ ጊዲዴስ።
REV 8:9 ኣባ ጊዶን ሼምፖራ ዲዛ ሜꬌቴꬃፌ ጪጎይ ዉሪ ሃይቂዴስ፤ ማርካቤታፔካ ጪጎይ ኩሜꬅ ꬋይዴስ።
REV 8:10 ሄꬓንꬆ ኪታንቻዚ ባ ዛዬዛ ፑኒዴስ፤ ጾምፔ ማላ ኤጺዛ ኢሲ ጊታ ጾሊንቴይ ሳሎፔ ዱጌ ኩንዲዴስ፤ ኢዚ ኩንዲዳይ ሻፋታ ጪጎ ቦላኔ ሃꬃ ፑልቶታ ጪጎ ቦላ።
REV 8:11 ሄ ጾሊንቴዛ ሱንꬃይ ጫሞ ጌቴቴስ፤ ሃꬃስ ጪጎይ ጫሞ ጊዲዴስ፤ ሄ ጫሞ ሃꬃ ጋሶን ዳሮ ዴሬይ ሃይቂዴስ።
REV 8:12 ኦይዳንꬆ ኪታንቻይ ባ ዛዬዛ ፑኒዴስ፤ ኣርሼስ ጪጎይ፥ ኣጊናስ ጪጎይ፥ ጾሊንቴታስ ጪጎይ ሾጬቲዴስ፤ ሄሳ ጊሻስ ሄይታንታ ፖኦፔ ጪጎይ ꬉሚዴስ፤ ሄሳ ማላንካ ጋላሳፌ ጪጎይ ኦማርስ ጊዲዴስ፤ ሄሳꬆካ ኦማርሳፌ ጪጎይ ፖኦይ ባይንዳ ꬉማ ጊዲዴስ።
REV 8:13 ታ ቃሴ ዛራ ጼሊሺን ኢሲ ጎሌይ ሳሎ ቦላ ፒራꬊሼ ጊታ ቃላን፥ «ሃንኮ ኣቲዳ ሄꬑ ኪታንቻቲ ባ ዲንኬታ ጊሪስ ሲሲዛ ዎዴ ቢታ ቦላ ዲዛ ኣሳስ ኣዬ ኣና! ኣዬ ኣና! ኣዬ ኣና!» ጊሺን ሲያዲስ።
REV 9:1 ኢቻሻንꬆ ኪታንቻይ ባ ዛዬዛ ፑኒዴስ፤ ታ ቃሴ ሳሎፔ ካሴ ዱጌ ቢታ ቦላ ኩንዲዳ ጾሊንቴዛ ቤያዲስ፤ ኢዛስ ቃሴ ጪማ ኦላ ዶይዛ ቁልፔይ ኢሜቲዴስ።
REV 9:2 ኢዚካ ሄ ጪማ ኦላዛ ዶይዴስ፤ ሄ ጪማ ኦላፌ ዎልቃማ ታማ ጩዋ ማላ ጩዋይ ኬዚዴስ፤ ሄ ኦላፌ ኬዚዳ ጩዋዛ ጋሶን ኣርሼይኔ ሳሎይ ꬉሚዴስ።
REV 9:3 ሄ ጩዋፔ ቢታ ቦላ ቦሌይ ኬዚዴስ፤ ቢታ ቦላ ዲዛ ማሲማሶታስ ዲዛ ዎልቃ ማላ ዎልቃይ ኢስታስ ኢሜቲዴስ።
REV 9:4 ቢታ ቦላ ዲዛ ማታ ጊዲን ዎይኮ ኣይ ሚሺካ ሃራ ጪሊላ ሚሽ ሞንታ ማላ ዎይኮ ኣይ ሚꬂካ ቆሆንታ ማላ ኢስታስ ዮቴቲዴስ፤ ኢስቲ ቆሃና ቤሲዛይ ቃሴ ሊጴ ቦላ ጾሳ ማታሜይ ባይንዳ ኣሳታ ጻላ ጊዳናሳ።
REV 9:5 ኢስታካ ኢቻሹ ኣጊና ጋካናስ ዋዬ ጻላ ዋዪሳና ኣቲን ዎꬎ ዎꬋና ማላ ፒቃዴይ ኢስታስ ኢሜቲቤና፤ ሄ ቦሌቲ ኣሳ ቦላ ጋꬂዛ ዋዬዚ ማሲማሶይ ኣስ ዱኪኮ ኣስ ሴሊዛ ሴላ ማላ።
REV 9:6 ሄ ጋላሳታን ኣሳይ ሃይቃና ኮያና ሺን ሃይቆ ዴሜቴና፤ ሃይቃናስ ኣሞታና ሺን ሃይቆይ ኢስታፌ ባቃታና።
REV 9:7 ቦሌቲ ቃሴ ኦላስ ጊጌቲዳ ፓራታ ሚሳቴቴስ፤ ኢስታስ ሁኤ ቦላ ዎርቃ ኣኪሊሌ ሚሳቲዛ ሚሺ ዴስ፤ ኢስታ ኣይፌሶይ ኣሳ ኣይፌሶ ሚሳቴስ።
REV 9:8 ኢስታ ሁኤ ኢስኬይ ማጫሳ ሁኤ ኢስኬ ሚሳቴስ፤ ኢስታ ኣቼይ ቃሴ ጋሞ ኣች ሚሳቴስ።
REV 9:9 ቢራታፔ ኦሴቲዳ ጹሩሬ ጌቴቲዛ ማይኦ ማላ ቲራ ቦላ ማይኢዛ ማይኦይ ኢስታስ ዴስ፤ ኢስታ ቄፌይ ጊሪዛ ጊሪሳይ ኦላስ ቶጌቲዛ ዳሮ ፓራኔ ፓራ-ጋሬታ ጊሪሳ ማላ ጊሬስ።
REV 9:10 ኢስታስ ማሲማሶ ጎይና ማላይኔ ዱኪዛሶይ ዴስ፤ ኢስታስ ጎይና ጊዶን ኢቻሹ ኣጊና ጋካናስ ኣስ ቆሂዛ ዎልቃይ ዴስ።
REV 9:11 ካዎይካ ኢስታስ ዴስ፤ ሄ ኢዚካ ጪማ ኦላ ኪታንቻዛ፤ ኢዛ ሱንꬃይካ ኢብራዌታ ቃላራ፥ «ኣባዶኔ» ጌቴቴስ። ቃሴ ጊሪኬ ቃላራ፥ «ኣጲሊዮኔ» ጌቴቴስ፤ ሄሳ ጉሲካ ፒቲ ꬋይሲዛይሳ ጉሳ።
REV 9:12 ኮይሮ ሂርጊሶ ዋሶይ ኣꬊዴስ፤ ሄሳፌ ቃሴ ሃራ ናምኡ ዋሶይ ቡሮ ያና።
REV 9:13 ኡሱፑንꬆ ኪታንቻይካ ባ ዛዬዛ ፑኒዴስ። ሄኮ! ጾሳ ሲንꬃን ዲዛ ዎርቃፌ ኦሴቲዳ ያርሾ ያርሺዛሶዛን ዲዛ ካጬታ ጊዶፌ ጊሪስ ሲያዲስ።
REV 9:14 ሄ ጊሪሳይካ ዲንኬ ኦይኪዳ ኡሱፑንꬃ ኪታንቻዛꬆ፥ «ዎጋ ሻፋን ኤፊራጺሴን ቃሼቲ ዲዛ ኦይዱ ኪታንቻታ ቢርሻ ዬዳ» ጊዴስ።
REV 9:15 ሃይሳ ሃ ሳቴዛሲኔ ሃ ጋላሳስ፥ ሃ ኣጊናሲኔ ሃ ላይꬃስ ጊጌቲዳ ኦይዱ ኪታንቻቲ ኣሳ ዜሬꬃፌ ጪጎ ባጋ ዎꬋና ማላ ቢርሼቲዳ።
REV 9:16 ሄ ፓራን ኦሊዛ ኣሳታ ጮራቴꬃይ ጼታታን ቆዴቲዛ ሚሎኔ ጊዲዳይሳ ታኒ ሲያዲስ።
REV 9:17 ፓራቲኔ ሄ ፓራታ ቶጊዳ ኣሳታ ታኒ ኣጁታን ቤኢዳይቲ ሃይሳፌ ካሊዛይሳ ማላኮ! ኢስታስ ቲራ ቦላ ዲዛ ጹሩሬዚ ታማ ቦንቆ ማላ ዞኦ፤ ሳሎ ማላ ካሬꬂኔ ጋላልኦ ሚሳቴስ። ፓራታ ሁኤይ ጋሞ ሁኤ ሚሳቴስ፤ ኢስታ ዶናፔ ታማይኔ ጩዋይ ዲኔ ጌቴቲዛ ሚሺ ኬዜስ።
REV 9:18 ኢስቲ ባ ዶናፔ ኬሲዳ ታማይ ጩዋይኔ ዲኔይ ሃ ሄꬑ ቦሻታን ኣሳ ዜሬꬃፌ ጪጎይ ሃይቂዴስ።
REV 9:19 ሄ ፓራታ ዎልቃይ ኢስታስ ዶና ጊዶኒኔ ጎይና ቦላ ዴስ፤ ኢስታ ጎይናይ ሾሽ ሚሳቴስ፤ ኢዛስ ሾሻ ሁኤይካ ዴስ፤ ኢስቲ ኣሴ ሄሳን ቆሄቴስ።
REV 9:20 ሃይታ ሃ ቦሻታን ሃይቆፔ ኣቲዳ ኣሳ ዜሬꬃቲ ካሴ ባ ኦꬂዳ ኢታ ኦሶፔ ሲሚዲ ማሮቴꬃን ጌሊቤቴና። ዳይዳንꬃስ ዎርቃፌ፥ ቢራፔ፥ ጻርቂማላፔ፥ ሹቻፌ፥ ሚꬃፌ ኦሴቲዲ ጼላናስ ዎይኮ ሃይꬃን ሲያናስ ዎይኮ ሄሜታናስ ዳንዳዮንታ ኤቃታስ ጎይኖ ኣጊቤቴና።
REV 9:21 ሄሳꬆካ ሼምፖ ዎꬎፔ፥ ቢታፔ፥ ላይማፔኔ ካይሶቴꬃፌ ሲሚዲ ማሮቴꬃን ጌሊቤቴና።
REV 10:1 ሄሳፌ ጉዬ ሻራ ማይኢዳ ሃራ ሚኖ ኪታንቻይ ሳሎፔ ዱጌ ዎꬊዛይሳ ቤያዲስ፤ ዙላይ ኢዛ ሁኤ ዩዪ ኣꬊዴስ፤ ኢዛ ኣይፌሶይ ኣርሼ ሚሳቴስ፤ ኢዛ ቶሆቲካ ታማ ቱስ ሚሳቴቴስ።
REV 10:2 ጻꬃፌ ቢርሼቲዳ ኢሲ ጉꬃ ማጻፋ ዲዛሮ ባ ኩሼን ኦይኪ ኡቲዴስ፤ ኢዚ ባ ኡሻቻ ቶሆዛን ኣባ ሃዲርሳ ቶሆዛን ቃሴ ቢታ ዬꬊ ኤቂዴስ።
REV 10:3 ጋሞ ጻጎ ማላ ጊታ ቃላራ ጻጊዴስ፤ ኢዚ ጻጊዳ ማላ ላፑን ዳዳቲ ባ ጊሪሳ ሲሲዳ።
REV 10:4 ላፑን ዳዳቲ ባ ጊሪሳ ሲሲዳ ማላ ታ ጻፋና ጋዳ ቆፓዲስ ሺን፥ «ሃ ላፑን ዳዳቲ ዮቶይሳ ቁምኣ ዎꬃ ኣቲን ጻፎፓ!» ጊዛ ቃላ ሳሎፔ ሲያዲስ።
REV 10:5 ሄሳፌ ካሊዲ ኣባ ቦላኔ ቢታ ቦላ ኤቂ ዲሺን ታ ቤኢዳ ኪታንቻዚ ባ ኡሻቻ ኩሼ ፑዴ ሳሎ ዴንꬂዲ፥
REV 10:6 ሜርናፔ ሜርናስ ዲዛይሳን፥ ሳሎኔ ሳሎን ዲዛይታ ቃሴካ ቢታኔ ቢታ ጋርሳን ዲዛይታ፥ ኣባኔ ኣባ ጊዶን ዲዛይታ ሜꬊዳ ጾሳ ሱንꬅ ጼይጊ ጫቂዲ፥ «ሃይሳፌ ጉዬ ኢዚ ጋምኤና!
REV 10:7 ጊዶ ኣቲን ላፑንꬃ ኪታንቻይ ባ ዛዬዛ ፑኒ ሲሲዛ ጋላሳታን ኢዚ ባ ኦሳንቻታሲኔ ናቤታስ ኤሪሲዳ ማላ ጾሳ ጹራይ ፖሌታና» ጊዴስ።
REV 10:8 ሄሳፌ ጉዬ ታኒ ሳሎፔ ሲዪዳ ቃላይ፥ «ኣባ ቦላኔ ቢታ ቦላ ኤቂዳ ኪታንቻዛ ኩሼን ዶዬቲ ዲዛ ጻꬃ ማጻፋዛ ባዳ ኤካ!» ጊዲ ቃሴካ ታስ ዮቲዴስ።
REV 10:9 ታኒ ቃሴ ኪታንቻዛኮ ባዳ፥ «ሂኖ ቄሪ ጻꬃን ዲዛ ማጻፋዮ ታስ ኢማ» ጋዲስ። ኢዚካ፥ «ሄይ ኤካዳ ማ! ኢዛ ኔና ኔ ኡሎ ጊዶን ጫማና፤ ጊዶ ኣቲን ኔ ዶናን ኤሳ ማላ ማልኣና» ጊዴስ።
REV 10:10 ታኒካ ሄ ቄሪ ጻꬃ ማጻፋዮ ኪታንቻዛ ኩሼፔ ኤካዳ ማዲስ፤ ኢዛካ ታ ዶናን ታና ኤሳ ማላ ማልኣዱስ፤ ጊዶ ኣቲን ታ ማዳ ኣጊን ጉዬፔ ታ ኡሎ ጊዶን ታና ጫማዱስ።
REV 10:11 ሄሳፌ ጉዬ፥ «ዳሮ ዱማ ዱማ ቆሞ ኣሳ ጊሻስ ዱማ ዱማ ቃላን ሃሳይዛ ኣሳታ ጊሻሲኔ ካዎታ ጊሻስ ቃሴካ ቲንቢቴ ኔ ዮታና ማላ ኔስ ቤሴስ» ጌቴቲዲ ታስ ዮቴቲዴስ።
REV 11:1 ሄሳፌ ጉዬ ታ ኢዛራ ዋꬋ ዋꬋናስ ጉፌ ሚሳቲዛ ሾምቦቆይ ታስ ኢሜቲዴስ። ታስ፥ «ኔኒ ዴንዳዳ ጾሳ ኬꬃዛኔ ጊዶ ኪፊሌታ ዋꬋ! ሄን ጎይኒዛይታ ታይባ።
REV 11:2 ጾሳ ኬꬃፌ ካሬራ ጮ ዲዛሶዛ ኣጋጋ፤ ሄሲ ኣይዛቤታስ ኢሜቲዳሶ ጊዲዳ ጊሻስ ኔ ኢዛ ዋꬎፋ፤ ኣይዛቤቲ ጌሻ ካታማዮ ኦይዱ ታማኔ ናምኡ ኣጊና ጋካናስ ዬꬊ ሃራና።
REV 11:3 ታ ማርካ ናምኣቲ ካዮ ማይኦ ማይኢዲ 1,260 ጋላስ ጋካናስ ቲንቢቴ ዮታና ማላ ታ ኢስታስ ዎልቃ ኢማና» ጌቴቲዴስ።
REV 11:4 ሄይቲ ቢታ ጎዳ ሲንꬃን ኤቂዛ ናምኡ ዎጋራ ሚꬃታኔ ኢስታ ቦላ ጾምፔ ዎꬂዛ ናምኡ ባላታ።
REV 11:5 ኦኒካ ኢስታ ቆሃናስ ኮይኮ ኢስታ ዶናፔ ታማይ ኬዚዲ ኢስታ ሞርኬታ ጹጋና፤ ኢስታ ቆሃና ኮይዛዴንቲ ዉሪ ሃይቃናይ ሄሳ ማላንኮ።
REV 11:6 ኢስቲ ቲንቢቴ ዮቲዛ ሄ ጋላሳታን ኢራይ ቡኮንታ ማላ ሳሎ ጎርዳናስ ማታይ ኢስታስ ዴስ። ሄሳꬆካ ሃꬃታ ሱꬃን ላማናስ ኮይኮካ ሃራ ኣይ ማላ ቦሻንካ ቢታ ሾጫናስ ዎልቃይ ኢስታስ ዴስ።
REV 11:7 ኢስቲ ባ ማርካቴꬃ ዉርሲዳፔ ጉዬ ሂርኪ ጪማ ኦላዛፔ ኬዚዛ ዶኣይ ኢስታራ ኦሌቲዲ ኢስታ ጾናናኔ ዎꬋና።
REV 11:8 ኢስታ ኣሃይ ሌሚሶራ ሶዶሜኔ ጊብጼ ጌቴቲዛ ጊታ ካታማይን ጮ ዴምባን ዚንኣና፤ ሂና ካታማያ ካሴ ኢስታ ጎዳይ ኢዚን ካቄቲዳሶዮ።
REV 11:9 ዱማ ዱማ ቆሞቲኔ ዱማ ዱማ ዛርኬቲ፥ ዱማ ዱማ ቃላን ሃሳይዛይቲኔ ዴሬቲ ሄꬑ ጋላሲኔ ባጋ ጋካናስ ኢስታ ኣሃ ጼላናኔ ኢስታ ኣሃይ ሞጌቶንታ ማላ ዲጋና።
REV 11:10 ሄይቲ ናምኡ ናቤቲ ካሴ ቢታ ቦላ ዲዛ ኣሳ ዋዪሲዳ ጊሻስ ሃኢ ቃሴ ቢታ ቦላ ዲዛ ኣሳይ ሃ ናቤቲ ሃይቂዳ ጊሻስ ኡፋዬታና፤ ሄ ኡፋይሳስ ባኣሌ ኦꬂዲ ኢሶይ ኢሳስ ዬስ ኢማና።
REV 11:11 ጊዶ ኣቲን ሄꬑ ጋላሲኔ ባጋይ ኣꬊዳፔ ጉዬ ኢስታስ ሼምፖ ኢሚዛ ፔኖይ ጾሳ ኣቻፌ ዪዲ ኢስታ ኣሃን ጌሊዴስ፤ ኢስቲካ ባ ቶሆን ኤቂዳ፤ ኢስታ ቤኢዳ ኣሳይ ዳሮ ባቢዴስ።
REV 11:12 ሄሳፌ ጉዬ ሄ ናምኡ ናቤቲ፥ «ሃ ፑዴ ኬዚቴ!» ጊዛ ቃላ ሳሎፔ ሲዪዳ፤ ኢስታ ሞርኬቲ ኢስታ ጼሊሺን ኢስቲ ሻራራ ፑዴ ሳሎ ኬዚዳ።
REV 11:13 ሄ ሳቴዪንካ ዎልቃማ ቢታ ቃꬂ ሃንዴስ፤ ሄ ካታማስ ታማፌ ኢሲ ኩሼይ ላሌቲዴስ፤ ቢታ ቃꬃ ጋሶን ላፑን ሺ ዴሬይ ሃይቂዴስ፤ ሃይቆንታ ኣቲዳ ኣሳይ ጊዲኮ ዳሮ ባቢዴሲኔ ሳሎ ጾሳካ ቦንቺዴስ።
REV 11:14 ኣዬ ኣና! ጊዛ ቃላ ናምኣንꬆዚ ኣꬊን ሄꬓንꬆዛ ዋሶይ ኤሶን ጋካና።
REV 11:15 ላፑንꬆ ኪታንቻይካ ባ ዛዬዛ ፑኒዴስ፤ ሳሎን፥ «ኣላሜ ካዎቴꬂ ኑ ጎዳ ጾሳሲኔ ኪርስቶሳስ ጊዲዴስ፤ ኢዚካ ሜርናፔ ሜርና ጋካናስ ካዎታና» ጊዛ ጊታ ቃላይ ሲዬቲዴስ።
REV 11:16 ጾሳ ሲንꬃን ባ ኣልጋ ኣልጋ ቦላ ኡቲዳ ናምኡ ታማኔ ኦይዱ ጪማቲካ ባ ሊጴን ጉፋኒዲ ጾሳስ ጎይኒዳ።
REV 11:17 ቃሴካ፥ «ካሴካ፥ ሃኢካ ዲዛይሶ! ኡባካ ዳንዳይዛ ጎዳ ጾሶ! ኔኒ ኔ ጊታ ጎዳቴꬃ ኔ ኩሼን ኦይኪዳ ጊሻሲኔ ካዎቲዳ ጊሻስ ኑኒ ኔና ጋላቶስ።
REV 11:18 ኣይዛቤይ ሃንቄቲዴስ፤ ካሴ ሃይቂዳይቲ ፒርዳ ዴሚዛ ዎዴይ ጋኪዴስ፤ ካሴ ኔ ኦሳንቻታ ናቤታሲኔ ጌሻታስ ኔ ሱንꬃካ ቦንቺዛይታስ፥ ጉꬃታሲኔ ጊታታስ፥ ኔኒ ኢስታስ ኢስታ ዋጋ ኢሚዛ ዎዴይ ሃኢ ጋኪዴስ። ቢታ ꬋይሲዳይታ ኔ ꬋይሳናስ ዎዴይ ጋኪዴስ» ጊዳ።
REV 11:19 ሳሎን ዲዛ ጾሳ ኬꬃ ጊዶ ኪፊሌይ ዶዬቲዴስ፤ ኢዛ ጫቆ ታቦታዚካ ሄን ጾሳ ኬꬃስ ጊዶ ኪፊሌን ቤቲዴስ፤ ዎልቃንꬂ ዎልቃሚዴስ፤ ጊሪሲ ጊሪዴስ፤ ዳዳይ ዳዳቲዴስ፤ ቢታ ቃꬂኔ ዎልቃማ ሻቺ ቡኪዴስ።
REV 12:1 ሄሳፌ ጉዬ ጊታ ማላሊሲዛ ማላታይ ሳሎ ቦላ ቤቲዴስ፤ ኢሲ ማጫሳያ ኣርሼ ማይኣዳ፥ ኣጊና ባ ቶሆን ዬꬋዳ ታማኔ ናምኡ ጾሊንቴታ ኣኪሊሌ ማላ ባ ሁኤን ዎꬃዳ ቤታዱስ።
REV 12:2 ኢዛካ ሻራራ ዳዉስ፤ ዬሎ ሚጻይ ኢዞ ኦይኪን ሜቶታዳ ዋሳዱስ።
REV 12:3 ሄሳꬆካ ሃራ ማላታይ ሳሎ ቦላ ቤቲዴስ፤ ኢዛስ ላፑን ሁኤይኔ ታሙ ካጬቲ ዲዛ ኢሲ ጊታ ዳዌይ ቤቲዴስ፤ ኢዛ ሁኤታ ቦላካ ላፑን ዛዉዴቲ ዴቴስ።
REV 12:4 ኢዚ ባ ጎይናራ ሳሎ ጾሊንቴታፔ ጪጎ ጊዲዛይታ ሳሎፔ ዱጌ ቢታን ዬጊዴስ፤ ሄ ማጫሳያ ዬሊሺን ኢዛ ዬሊዛ ናዛ ሚታናስ ቆፒዲ ዳዌዚ ሄ ዬላናስ ማቲዳ ማጫሳይስ ሲንꬃን ኤቂዴስ።
REV 12:5 ማጫሳያካ ዴሬ ኡባ ቢራታ ጉፌራ ሃሪዛ ኣቱማ ና ዬላዱስ፤ ናዚካ ፑዴ ጾሳኮኔ ጾሳ ኣልጋኮ ኤኬቲዴስ።
REV 12:6 ማጫሳያካ ዱጌ ባዞ ቢታ ቤታዱስ፤ ሄ ባዳ 1,260 ጋላስ ጋካናስ ቦንቾን ዳናሶ ጾሲ ካሴ ኢዚስ ጊግሲ ዎꬂዴስ።
REV 12:7 ሳሎ ቦላ ኦላይ ዴንዲዴስ፤ ሚካሌይኔ ኢዛ ኪታንቻቲ ዳዌዛራ ኦሌቲዳ። ዳዌዚኔ ኢዛ ኪታንቻቲካ ዛሪዲ ሚካሌራኔ ኢዛ ኪታንቻታራ ኦሌቲዳ።
REV 12:8 ጊዶ ኣቲን ዳዌዚኔ ኢዛ ኪታንቻቲ ጾኔቲዳ፤ ሄሳፌ ጉዬ ኢስታስ ሳሎን ዳናሶይ ቤቲቤና።
REV 12:9 ሄ ጊታ ዳዌዚ ዱጌ ዬጌቲዴስ፤ ኢዚካ ኩሜꬃ ኣላሜዛ ባሌꬂዛ ዳቡሎሳ ዎይኮ ጻላኤ ጌቴቲ ጼይጌቲዛ ቤኒ ዎዴ ሾሻዛ፤ ኢዚ ዱጌ ቢታ ቦላ ዬጌቲዴስ፤ ኢዛ ኪታንቻቲካ ኢዛራ ኢሲፌ ዬጌቲዳ።
REV 12:10 ሄሳፌ ጉዬ ኢሲ ጊታ ጊሪሲ ሳሎፔ ሂዝጊሺን ታ ሲያዲስ፤ «ሄኮ ኣሴ ኣሾይ፥ ዎልቃይኔ ካዎቴꬂካ ኑ ጎዳስ ጊዲዴስ፤ ማታይካ ኪርስቶሳስ ጊዲዴስ። ኑ ኢሻታ ኑ ጎዳ ሲንꬃን ጋላሲኔ ቃማ ሞቲዛ ኑ ኢሻታ ባልጋራይ ዱጌ ዬጌቲዴስ።
REV 12:11 ኢስቲ ዶርሳዛ ሱꬃኒኔ ባ ዮቲዳ ማርካቴꬃ ቃላን ኢዛ ጾኒዳ፤ ኢስቲ ባ ሼምፖስ ሚሼቶንታ ዲሼ ባና ሃይቆስ ኣꬂ ኢሚዳ።
REV 12:12 ሄሳ ጊሻስ ሳሎቲኔ ኢስታ ጊዶን ዲዛይቲ ኢንቴ ዉሪካ ኡፋዬቲቴ፤ ኢዛስ ጉꬃ ዎዴይ ኣቲዳይሳ ኤሪዳ ጊሻስ ዳቡሎሲ ጊታ ሃንቆራ ዱጌ ኢንቴኮ ዎꬊዳ ጊሻስ ቢታሲኔ ኣባስ ኣዬ ኣና! ኣዬ ኣና!»
REV 12:13 ዳዌዚ ዱጌ ቢታ ቦላ ዬጌቲዳይሳ ቤኢዲ ኣቱማ ና ዬሊዳ ማጫሳዮ ጎዴሬꬂዴስ።
REV 12:14 ማጫሳያካ ባስ ጊጌቲ ዲዛሶ ፒራꬋዳ ዱጌ ባዞ ባና ማላ ኢዚስ ጊታ ጎሌ ቄፌ ሚሳቲዛ ናምኡ ቄፌቲ ኢሜቲዳ፤ ኢዛ ሄን ዳዌዛ ሲንꬃፌ ሃካዳ ሄꬑ ላይꬂኔ ባጋ ጋካናስ ሎኦ ቦንቾን ናጌታዱስ።
REV 12:15 ሄ ማጫሳዮ ዲኦይ ኤኪ ባና ማላ ሾሻዚ ሻፋ ሃꬄ ኬና ሃꬄ ባ ዶናፔ ጩቲዲ ኢዚፔ ጉዬ ባጋራ ጉሲዴስ።
REV 12:16 ጊዶ ኣቲን ቢታያ ሄ ማጫሳዮ ማዳዱስ፤ ባ ዶና ዶያዳኔ ሄ ዳዌዚ ጩቲዲ ጉሲዳ ሃꬃካ ጹንጻዱስ።
REV 12:17 ዳዌዚ ማጫሳይ ቦላ ሃንቄቲዲ ሃንኮ ኣቲዳ ኢዚ ዜሬꬃታራ ኦሌታናስ ቢዴስ፤ ኢስቲካ ጾሳ ኣዛዞታ ናጊዛይታኔ ዬሱሳስ ኣማኔቲዲ ማርካቲዛይታ።
REV 12:18 ዳዌዚካ ኣባ ኣቻን ኣጬ ቦላ ኤቂዴስ።
REV 13:1 ሄሳፌ ጉዬ ኢሲ ዶኣይ ኣባፌ ኬዚሺን ቤያዲስ፤ ኢዛስ ታሙ ካጬይኔ ላፑን ሁኤይ ዴስ፤ ካጬታ ቦላ ታሙ ዛዉዴቲ ዴቴስ፤ ሁኤታ ቦላ ጫሻ ሱንꬃቲ ዴቴስ።
REV 13:2 ታ ቤኢዳ ዶኣዚ ማሄ ሚሳቴስ፤ ኢዛ ቶሆይ ዶኣ ዛርዶ ቶሆ ሚሳቴስ፤ ኢዛ ዶናይ ቃሴ ጋሞ ዶና ሚሳቴስ፤ ዳዌዚ ባ ዎልቃ፥ ባ ኣልጋዛኔ ባ ጎዳቴꬃካ ሄ ዶኣዛስ ኢሚዴስ።
REV 13:3 ሄ ዶኣዛ ሁኤታፔ ኢሳ ቦላ ዎꬊዛ ማዱንꬂ ዲዛይሳ ታ ቤያዲስ ሺን ኢዛ ሃይቆስ ጋꬂዛ ማዱንꬃዚ ፓጺዴስ፤ ኩሜꬃ ኣላሜይ ማላሌቲዲ ሄ ዶኣዛ ካሊዴስ።
REV 13:4 ሄ ዶኣዛስ ጎዳቴꬂ ኢሜቲዳ ጊሻስ ኣሳይ ዉሪካ ሄ ዳዌዛስ ጎይኒዴስ። «ሃይሳ ዶኣዛ ሚሳቲዛይ ኦኔ? ኢዛራ ኦሌታናስ ዳንዳይዛይ ኦኔ?» ጊሼ ኢዛስ ጎይኒዴስ።
REV 13:5 ኢዛስ ኦቶሬቴꬂኔ ጫሻ ቃላ ሃሳይዛ ዶናይ ኢሜቲዴስ፤ ኢዚ ኦይዱ ታማኔ ናምኡ ኣጊና ጋካናስ ጎዳቴꬃን ኦꬃና ማላ ኢዛስ ኢሜቲዴስ።
REV 13:6 ጾሳኔ ጾሳ ሱንꬅ፥ ኢዚ ዲዛሶዛኔ ሳሎን ዲዛይታ ጫሽ ኦይኪዴስ።
REV 13:7 ኢዚ ጌሻታ ኦላና ማላኔ ጾናና ማላ ኢዛስ ጎዳቴꬂ ኢሜቲዴስ፤ ዱማ ዱማ ቆሞታኔ ዛርኬታ፥ ዱማ ዱማ ቃላን ሃሳይዛ ዴሬታ ኡባ ቦላ ኢዛስ ጎዳቴꬂ ኢሜቲዴስ።
REV 13:8 ኣላሜይ ሜꬌቶሶፔ ሃ ሲሚን ኢስታ ሱንꬂ ሹኬቲዳ ዶርሳዛ ዴኦ ማጻፋን ጻፌቶንታ ኣላሜ ቦላ ዲዛ ኣሳይ ዉሪካ ሄ ዶኣዛስ ሆኪ ጎይናና።
REV 13:9 ሃይꬂ ዲዛይ ሲዮ!
REV 13:10 «ዲኤታናስ ዲዛዴይ ዲኤታና፤ ማሻን ሃይቃናስ ዲዛዴይ ማሻን ሃይቃና፤» ሄሳ ጊዲዳ ጊሻስ ኣማኒዛይታ ዳንዳያይኔ ኢስታ ኣማኔቴꬅ ኮሺዛይ ሃኒና።
REV 13:11 ቃሴካ ሃራ ዶኣይ ቢታፌ ኬዚሺን ቤያዲስ፤ ኢዛስ ዶርሳ ካጬ ማላ ናምኡ ካጬይ ዴስ፤ ኢዚ ዳዌꬆ ሃሳዬስ።
REV 13:12 ኢዚ ካሴ ኮይሮ ዶኣዛ ኦላ ጌሊዲ ሄ ካሴይሳ ጎዳቴꬃን ኦꬄስ። ቢታያኔ ቢታይ ቦላ ዲዛይቲ ዉሪካ ካሴ ኮይሮ ዶኣዛስ ጎይናና ማላ ኦꬂዴስ፤ ሄ ዶኣዚ ቃሴ ካሴ ኢዛ ሃይቆስ ጋꬂዛ ማዱንꬃይ ፓጺዳ ኮይሮ ዶኣዛ።
REV 13:13 ሄሲ ናምኣንꬆ ዶኣዚ ቃሴ ኣሳ ሲንꬃን ታማ ሳሎፔ ዱጌ ዬጋና ጋካናስ ጊታ ማላታታ ኦꬂዴስ።
REV 13:14 ኢዚ ኮይሮ ዶኣዛ ሲንꬃን ማላታ ኦꬃና ማላ ኢዛስ ኢሜቲዳ ማላታ ጋሶን ቢታ ቦላ ዲዛ ኣሳ ኢዚ ባሌꬂዴስ፤ ማሻን ማዱንጺዲ ፓጺዳ ዶኣዛ ቦንቾስ ሚስሌ ኦꬃና ማላ ቢታ ቦላ ዲዛ ኣሳ ዉርሲ ኢዚ ኣዛዛና።
REV 13:15 ናምኣንꬆ ዶኣዚ ኮይሮ ዶኣዛ ሚስሌዛስ ሼምፖ ኢማና ማላ ኢዛስ ጎዳቴꬂ ኢሜቲዴስ፤ ዴኦ ሼምፖ ኢማናስ ኢዛስ ጎዳቴꬂ ኢሜቲዳ ሚስሌዚ ሃሳያና ማላኔ ኢዛስ ሆኪ ጎይኖንታዴ ኢዚ ዉርሲካ ዎꬋና ማላሳ።
REV 13:16 ናምኣንꬆ ዶኣዚ ጉꬃታ ጊዲን ዎይኮ ጊታታ ጊዲን፥ ዱሬታ ጊዲን ዎይኮ ማንቆታ ጊዲን፥ ጎዳታ ጊዲን፥ ዎይኮ ኣሽካራታ ጊዲን፥ ዉሪካ ባ ኡሻቻ ኩሼን ዎይኮ ባ ሊጴ ቦላ ማላታ ዎልቃራ ዎꬂሳና።
REV 13:17 ሄሳ ማላን ሄ ዶኣዛ ሱንꬅ ኤሪሲዛ ዱማ ማላታይ ዎይኮ ኢዛ ሱንꬂ ኢዛ ቦላ ጻፌቲዳ ቁጹሬይ ባይንዳዴይ ኦኒካ ጊያ ጌሊዲ ሻማናሲኔ ባይዛናስ ዳንዳዬና።
REV 13:18 ሄሳ ጊሻስ ኣሲ ኤራ ጊዳናይ ሃኒና፤ ዎዚናራ ዲዛዴይ ኣኬኮ፤ ሄ ዶኣዛ ቁጹሬዚካ ሃይሳፌ ካሊ ዲዛይሳኮ፤ ሄሲካ ኡሱፑን ጼታኔ ኡሱፑን ታማኔ ኡሱፑና።
REV 14:1 ሄሳፌ ጉዬ ሄኮ ሄ ዶርሳዚ ጺዮኔ ዙማ ቦላ ኤቂዳይሳ ታ ቤያዲስ፤ ኢዛ ሱንꬂኔ ኢዛ ኣዋ ሱንꬂ ኢስታ ሊጴ ቦላ ጻፌቲዳይቲ ጼታኔ ኦይዱ ታማኔ ኦይዱ ሺ ኣሳቲ ኢዛራ ኢሲፌ ዴቴስ።
REV 14:2 ሳሎፔ ዎልቃማ ፒሳ ሃꬃ ጊሪሲኔ ዎልቃማ ዳዳ ጊሪስ ሚሳቲዛ ጊሪሲካ ሲያዲስ፤ ታኒ ሲዪዳ ጊሪሳይ ዲꬅ ሚሳቲዛ ባጋና ጌቴቲዛይሳ ዲጺን ኣሳይ ሲዪዛ ጊሪሳ ማላ ጊሪዛይሳ።
REV 14:3 ኣልጋ ሲንꬃኒኔ ኦይዱ ዶኣታ ሲንꬃን ጪማታ ሲንꬃን ጼታኔ ኦይዱ ታማኔ ኦይዱ ሺ ኣሳይ ኦራꬃ ማዛሙሬ ዬጺዴስ፤ ሄ ዬꬃዛካ ዴራ ጋርሳፌ ዶሬቲዳ ጼታኔ ኦይዱ ታማኔ ኦይዱ ሺ ኣሳፔ ኣቲን ሃራይ ኦኒካ ኢዛ ታማራናስ ዳንዳይቤና።
REV 14:4 ሄይቲ ማቾንታይታ ጊዲዳ ጊሻስ ኢስቲ ማጫራ ኣቂዲ ቱንቤቴና፤ ኢስቲ ዶርሳይ ቢዛሶ ኢዛ ካሌቴስ፤ ኢስቲ ጾሳሲኔ ኢዛ ዶርሳዛስ ኣሳ ጋርሳፌ ጼራ ካꬃ ማላ ሺቂዳይታ።
REV 14:5 ኢስቲ ዎርዶ ሃሳያ ኤሬቴና፤ ዎሶይካ ኢስታ ቦላ ባ።
REV 14:6 ሄሳፌ ጉዬ ቢታ ቦላ ዲዛ ዱማ ዱማ ቃላን ሃሳይዛ ዱማ ዱማ ዴሬታስ፥ ዛርኬታስ፥ ቆሞታስ፥ ኡባስ ዮታናስ ሜርና ሚሺራቾ ቃላ ኦይኪዳ ሃራ ኢሲ ኪታንቻይ ሳሎ ቦላ ፒራꬊሺን ታ ቤያዲስ።
REV 14:7 ኢዚካ ባ ቃላ ꬎቁ ሂስቲዲ፥ «ጾሳስ ባቢቴኔ ኢዛ ቦንቺቴ፤ ኢዛ ፒርዳ ዎዴይ ጋኪዴስ፤ ሳሎኔ ሳኣ፥ ኣባኔ ሃꬃ፥ ፑልቶታካ ሜꬊዳ ጾሳስ ጎይኒቴ» ጊዴስ።
REV 14:8 ሃራ ናምኣንꬆ ኪታንቻይ ቃሴ፥ «ዴሬዛ ዉርሳ ማꬆሲዛ ላይማ ዎይኔ ጫጄ ኡሺዳ ማጫሳያ ሂናካ ዎጋ ጊታ ባቢሎና ኩንዳዱስ! ኩንዳዱስ!» ጊሼ ኮይሮ ኪታንቻዛ ካሊዴስ።
REV 14:9 ሃራይ ሄꬓንꬆ ኪታንቻይ ቃሴ ጊታ ꬎቃ ቃላን ሂዝጊሼ ኢስታ ካሊዴስ፤ «ሄ ዶኣዛሲኔ ኢዛ ሚስሌዛስ ጎይኒዛይቲኔ ባ ሊጴ ቦላ ዎይኮ ባ ኩሼ ቦላ ዎꬂዛይቲ ዉሪካ፥
REV 14:10 ጾሳ ሃንቆ ዎይኔ ጫጄዛ ኡያና፤ ሄሲካ ሄ ዎይኔ ጫጄዚ ሃራራ ዋላኬቶንታ ኢዛ ሃንቆ ጹኣፔ ዱቄቲዳይሳ፤ ሄሳꬆካ ሃንኮ ጌሻ ኪታንቻታ ሲንꬃኒኔ ዶርሳዛ ሲንꬃን ታማኒኔ ዲኔ ታማን ጹጌታና።
REV 14:11 ኢስቲ ኢዛን ጹጌቲዛ ታማፔ ኬዚዛ ጩዋዚ ሜሪፔ ሜርናስ ፑዴ ኬዚሼ ዳና፤ ሄ ዶኣዛሲኔ ኢዛ ሚስሌዛስ ጎይኒዛይቲ ዎይኮ ኢዛ ሱንꬃ ማላታ ባ ቦላ ዎꬂዳይቲ ዉሪካ ዎንታኒኔ ቃማን ኢስታስ ሼምፖይ ዴና።»
REV 14:12 ጾሳ ኣዛዞ ናጊዛይታፔኔ ዬሱሳ ሚኒ ኣማኒዳ ጌሻታፔ ኮዬቲዛ ዳንዳያይ ሃኒንኮ።
REV 14:13 ታኒ ሳሎፔ ሂዝጊዛ ቃላ ሲያዲስ፤ «ሃይሳፌ ጉዬ ጎዳ ዬሱሳይታ ጊዲዲ ሃይቃናይቲ ኢስቲ ኣንጄቲዳይታ።» ጺሎ ኣያናይካ፥ «ኤ፥ ኢስቲ ባ ዳቡርሳፌ ሼምፓና ማላ ኢስታ ኦሶይ ኢስታ ካላና» ጌስ።
REV 14:14 ሄሳፌ ጉዬ ታ ጼሊሺን ታስ ቦꬃ ሻራይ ቤቲዴስ፤ ሄ ሻራ ቦላ ኣሳ ና ሚሳቲዛይ ኡቲዴስ፤ ኢዚ ባ ሁኤ ቦላ ዎርቃ ኣኪሊሌ ዎꬂዴስ፤ ባ ኩሼንካ ቃራ ባጫ ኦይኪዴስ።
REV 14:15 ሃራ ኪታንቻይ ጾሳ ኬꬃፌ ኬዚዲ ሻራ ቦላ ኡቲዳይሳስ ꬎቃ ቃላራ፥ «ቢታ ቦላ ቦኔይ ጋኪዴስ! ካꬃይ ጫኬቲዛ ሳቴይ ማቲዴስ» ጊሼ ዋሲዴስ።
REV 14:16 ሄ ሻራ ቦላ ኡቲዳይሲ ባጫዛ ዱጌ ቢታ ቦላ ዬዲዴስ፤ ቢታይካ ጫኬቲዴስ።
REV 14:17 ቃሴ ሃራ ኪታንቻይ ቦላ ሳሎን ዲዛ ጾሳ ኬꬃፌ ኬዚዴስ፤ ኢዚካ ቃራ ባጫ ባ ኩሼን ኦይኪዴስ።
REV 14:18 ታማ ቦላ ኢዛስ ጎዳቴꬂ ዲዛ ሃራ ኪታንቻይ ያርሾ ኢዛ ቦላ ሺሺዛሶዛ ኣቻፌ ኬዚዲ ሄ ቃራ ባጫ ኦይኪዳ ኪታንቻዛስ፥ «ሚꬃ ኣይፌይ ካጺዳ ጊሻስ ኔኒ ሃኢ ኔ ቃራ ባጫዛ ዬዳዳ ዎይኔ ሚꬃ ኣይፌዛ ዉርሳ ጫካዳ ቢታፌ ሺሻ» ጊዲ ጊታ ቃላን ዋሲዴስ።
REV 14:19 ኪታንቻዚካ ባጫዛ ዱጌ ቢታ ቦላ ዬዲዲ ቢታን ዲዛ ዎይኔ ሚꬃ ኣይፌዛ ጫኪዲ ጾሳ ሃንቆይ ኢዛን ቆንጪዛ ዎይኔ ኣይፌ ኢዛን ጉምኢዛ ዎጋ ኦላን ዬጊዴስ።
REV 14:20 ካታማፔ ካሬ ባጋራ ዲዛ ዎይኔ ሚꬃ ኣይፌ ጉምኢዛሶሆን ጉምኤቲዴስ፤ ሄ ጉምኢዛሶሆዛፔካ ቢታፌ ꬎቃቴꬂ ፓራ ቢጻላ ጋካናሲኔ ኢሲ ሺያኔ ኡሱፑን ጼት ኪሎ ሜቲሬ ጊዲዛሶ ጋካናስ ሱꬂ ጎጊዴስ።
REV 15:1 ታኒ ሃራ ዎልቃማ ማላታ ሳሎ ቦላ ቤያዲስ፤ ጾሳ ሃንቆይ ኢስታን ፖሌታናስ ዉርሴꬅ ጊዲዳ ላፑን ቦሻታ ኦይኪዳ ላፑን ኪታንቻታ ቤያዲስ።
REV 15:2 ሄሳፌ ጉዬ ታማራ ዋላኬቲዳ ማስቶቴ ኣባ ሚሳቲዛ ሚሽ ቤያዲስ፤ ሄሳꬆካ ሄ ዶኣዛኔ ኢዛ ሚስሌዛ ኢዛ ሱንꬃ ቁጹሬዛ ማላታ ጾኒዳይታ ቤያዲስ፤ ጾሲ ኢስታስ ኢሚዳ ዲꬃ ማላ ባጋና ጌቴቲዛይሳ ኦይኪዲ ማስቶቴ ሚሳቲዛ ኣባ ኣቻን ኤቂዳ።
REV 15:3 ጾሳ ኦሳንቻ ሙሴ ዬꬂኔ ዶርሳዛ ማዛሙሬ፥ «ኡባ ዳንዳይዛ ጎዳ ጾሶ! ኔ ኦሶይ ጊታኔ ማላሊሲዛዛ፤ ዴሬ ካዎዞ! ኔ ኦጌይ ሊኬኔ ቱማ።
REV 15:4 ጎዶ፥ ኔስ ባቦንታ ኣሲኔ ኔ ሱንꬅ ቦንቾንታ ኣሲ ኦኔ? ኔኒ ኔርካ ጌሻ፤ ኔ ቱማ ፒርዳይ ቆንጪዳ ጊሻስ ዴሬቲ ዉሪ ዪዲ ኔ ሲንꬃን ኔስ ጎይናና» ጊ ዬጺዳ።
REV 15:5 ሄሳፌ ጉዬ ታ ዛራ ጼሊሺን ካሴ ማርካቴꬃ ዱንካኔ ጊዲዳይሲ ጾሳ ኬꬂ ሳሎን ዶዬቲዴስ።
REV 15:6 ላፑን ቦሻታ ኦይኪዳ ላፑን ኪታንቻቲ ጾሳ ኬꬃፌ ኬዚዳ፤ ኢስቲ ጌሽ ጊዲዲ ጾልቂዛ ቦꬃ ማይኦ ማይኢዳ፤ ዎርቃፌ ኦሴቲዳ ዳንጮ ማላ ማይኦ ቲራ ቦላ ቃቺዳ።
REV 15:7 ኦይዱ ዶኣታፔ ኢሶይ ላፑን ኪታንቻታስ ሜርናፔ ሜርናስ ዲዛ ጾሳ ሃንቆይ ኢስታን ኩሚ ኡቲዳ ላፑን ዎርቃ ጹኣታ ኢሚዴስ።
REV 15:8 ጾሳ ኬꬃይካ ጾሳ ቦንቾፌኔ ኢዛ ዎልቃፌ ዴንዲዳይሳን ጩዋይ ኢዛን ኩሚዴስ፤ ላፑን ኪታንቻቲ ባ ኩሼን ኦይኪዳ ላፑን ቦሻቲ ፖሌታና ጋካናስ ኦኒካ ጾሳ ኬꬃ ጌላናስ ዳንዳይቤና።
REV 16:1 ሄሳፌ ጉዬ ላፑን ኪታንቻታ፥ «ኢንቴ ቢዲ ጾሳ ሃንቆ ኦይኪዳ ላፑን ጹኣታ ዱጌ ቢታ ቦላ ጉሲቴ!» ጊዛ ጊታ ቃላይ ጾሳ ኬꬃፌ ኬዚሺን ታ ሲያዲስ።
REV 16:2 ኮይሮ ኪታንቻዚ ቢዲ ጹኣዛ ቢታ ቦላ ጉሲዴስ፤ ዶኣዛ ማላታይ ኢስታ ቦላኔ ሄ ዶኣዛ ሚስሌስ ጎይኒዛይታ ቦላ ኢታ ዋዪሲዛ ማዱንꬂ ኬዚዴስ።
REV 16:3 ናምኣንꬆ ኪታንቻዚ ጹኣዛ ኣባ ቦላ ጉሲዴስ፤ ኣባይካ ሃይቂዳ ኣሳ ሱꬃ ማላ ጊዲዴስ፤ ኣባ ጊዶን ሼምፖራ ዲዛይቲ ዉሪካ ሃይቂዳ።
REV 16:4 ሄꬓንꬆ ኪታንቻይ ባ ጹኣዛ ሻፋታ ቦላኔ ፑልቶ ሃꬃታ ቦላ ጉሲዴስ፤ ኢስቲካ ሱꬅ ጊዲዳ።
REV 16:5 ሃꬃ ቦላ ኢዛስ ጎዳቴꬂ ዲዛ ኪታንቻዚ፥ «ካሴካ ሃኢካ ዲዛ ጌሻ ጎዶ! ኔኒ ሄሳꬆ ፒርዲዳ ጊሻስ ኔኒ ቱማንቻ።
REV 16:6 ኣሳይ ካሴ ኣማኒዛይታ ሱꬂኔ ናቤታ ሱꬅ ጉሲዳ ጊሻስ ኔ ኢስታ ሱꬅ ኡሻዳሳ፤ ሄሲካ ኢስታስ ቤሴስ»
REV 16:7 ያርሾ ያርሺዛሶዛፔ፥ «ኤ ዉርሳ ዳንዳይዛ ጎዳ ጾሶ! ኔ ፒርዳቲ ዉሪካ ቱማኔ ሊኬ» ጊዛ ቃላ ሲያዲስ።
REV 16:8 ኦይዳንꬆ ኪታንቻዚ ባ ጹኣዛ ኣርሼ ቦላ ጉሲዴስ፤ ኣርሼይካ ኣሳ ባ ሴላን ጹጋና ማላ ኣርሼስ ዎልቃይ ኢሜቲዴስ።
REV 16:9 ኣሳይካ ዎልቃማ ሴላን ጹጌቲዴስ፤ ሄ ቦሻታ ቦላ ሼኔይ ኢዛስ ዲዛ ጾሳ ሱንꬅ ኣሳይ ጫዪዴስ ኣቲን ማሮቴꬃን ጌሊቤናኔ ኢዛካ ቦንቺቤና።
REV 16:10 ኢቻሻንꬃ ኪታንቻይ ባ ጹኣ ዶኣዛ ኣልጋ ቦላ ጉሲዴስ፤ ሄ ዶኣዛ ካዎቴꬂ ꬉሚዴስ፤ ኣሳይ ዋዬዛፔ ዴንዲዳይሳን ባርካ ባ ኢንጻርስ ጋርጪዴስ።
REV 16:11 ኢስቲ ጊዲኮ ሄ ማዱንꬃ ሳኮዛፔ ዴንዲዳይሳን ሳሎ ጾሳ ቃንጊዳ ኣቲን ማሮቴꬃን ጌሊቤቴና።
REV 16:12 ኡሱፑንꬃ ኪታንቻይ ቃሴ ባ ጹኣዛ ዎጋ ኤፊራጺሴ ሻፋን ጉሲዴስ፤ ኣርሼይ ሞኪዛ ባጋፌ ያና ካዎታስ ኦጌ ጊጊሳና ማላ ሻፋዚ ሜሊዴስ።
REV 16:13 ሄ ዳዌዛ ዶናፔኔ ሄ ዶኣዛ ዶናፔ፥ ዎርዶ ናቤዛ ዶናፔ ኦቃርስ ሚሳቲዛ ሄꬑ ቱና ኣያናቲ ኬዚሺን ታ ቤያዲስ።
REV 16:14 ሄይቲ ማላታታ ኦꬂዛ ዳይዳንꬃ ኣያናታ። ሄይቲ ኣያናቲ ኡባ ዳንዳይዛ ጎዳ ጊታ ጋላስ ሃናና ኦላስ ኣሳ ሺሻናስ ኣላሜ ካዎቲ ዲዛሶ ኡባ ባና።
REV 16:15 «ሄኮ ታኒ ካይሶ ማላ ቆፖንታ ጋካ ዎꬋና፤ ኢዚ ካሎቲን ኣሳይ ኢዛ ካሎቴꬅ ቤኦንታ ማላ ቤጊዲ ባ ማይኦ ናጊዛ ኣሲ ጋላቴቲዳዴ!»
REV 16:16 ኣያናቲካ ካዎታ ኢብራዌ ኣሳ ቃላራ፥ «ኣርማጌዶኔ» ጌቴቲዛሶ ሺሺዳ።
REV 16:17 ላፑንꬆ ኪታንቻዚ ባ ጹኣዛ ጫርኮ ቦላ ጉሲዴስ፤ ጾሳ ኬꬃ ጊዶን ዲዛ ኣልጋዛፔ፥ «ፖሌቲዴስ» ጊዛ ዎልቃማ ቃላይ ኬዚዴስ።
REV 16:18 ዎልቃንꬂ፥ ዳዳ ጊሪሲኔ ጉጉንꬂ፥ ጊታ ቢታ ቃꬂ ሃኒዴስ። ኣሲ ቢታ ቦላ ሜꬌቶሶፔ ሃኖ ጋካናስ ሄሳ ማላይ ቢታ ቦላ ሃኒ ኤሬና።
REV 16:19 ዎጋ ካታማያ ሄꬑ ኬዛ ሻኬታ ዎꬋዱስ፤ ኣይዛቤታ ካታማቲ ላሌቲዳ ጾሲ ዎጋ ካታማዮ ባቢሎኔ ዛሪ ቆፒዴስ፤ ሚኖ ሃንቆ ጹኣን ኩሚ ኣቲዳ ዎይኔ ጫጄ ኡሹ ኡያና ማላ ኦꬂዴስ።
REV 16:20 ኣባ ጊዶን ዲዛ ዴሬቲ ዉሪካ ባቃቲዳ፤ ዙማቲካ ቤቲቤቴና።
REV 16:21 ኢሲ ኢሲ ሻቺ ኦይዱ ታማኔ ኢቻሹ ኪሎ ጊዲዛ ሻቺ ሳሎፔ ዱጌ ኣሳ ቦላ ዎꬊዴስ፤ ቦሻዚ ዳሮ ኢታ ጊዲዳ ጊሻስ ኣሳይ ሄ ሻቻ ቦሻ ጋሶን ጾሳ ጫዪዴስ።
REV 17:1 ላፑን ጹኣታ ባ ኩሼን ኦይኪዳ ላፑን ኪታንቻታፔ ኢሶይ ሃ ታኮ ዪዲ ታስ፥ «ሃ ያ፤ ዳሮ ሃꬃታ ቦላ ኡቲዳ ሄ ኢታ ላይማ ማጫሳይ ቦላ ጋኪዛ ፒርዳ ታ ኔና ቤሳና።
REV 17:2 ቢታ ቦላ ዲዛ ካዎቲ ዉሪካ ኢዚራ ላይማቲዳ፤ ቢታ ቦላ ዲዛ ኣሳይካ ኢዚ ላይማቴꬃ ዎይኔ ጫጄን ማꬆቲዴስ» ጊዴስ።
REV 17:3 ሄሳፌ ጉዬ ኪታንቻዚ ታና ኣያናን ዱጌ ባዞ ቢታ ኤፊዴስ፤ ኢዛ ኣሳቴꬃዚ ኩሜꬅ ጫሻ ሱንꬃን ጻፌቲዳ ላፑን ሁኤቲኔ ታሙ ካጬቲ ዲዛ ኢሲ ዞኦ ዶኣዛ ቦላ ኡቲዳ ኢሲ ማጫሳዮ ቤያዲስ።
REV 17:4 ሄ ማጫሳያ ጋላልኦ ማላ ማይኦኔ ዞኦ ማይኦ ማይኣዱስ፤ ዎርቃን፥ ቦንቾ ሹቻኒኔ ኢንቁ ጌቴቲዛ ኣልኦ ሚሽ ማይኣዳ ጶላዉስ፤ ኢዛ ባ ኩሼን ቃሴ ኢታ ሹኒዛ ሚሺኔ ባ ቱና ላይማቴꬂ ኢዛን ኩሚዳ ዎርቃ ጹኣ ኦይካ ኡታዱስ።
REV 17:5 ኢዚ ሊጴ ቦላ፥ «ጹራ፥ ላይማቲዛይታሲኔ ቢታ ቦላ ቱና ኦꬂዛይታስ ኣዮ ዎጋ ባቢሎኔ» ጌቴቲዛ ሱንꬂ ጻፌቲ ኡቲዴስ።
REV 17:6 ሂና ሄ ማጫሳያ ጌሻታ ሱꬃኒኔ ዬሱሳ ሱንꬃን ሃይቂዳ ኣሳ ሱꬃን ማꬆቲዳሮ ታኒ ቤያዲስ፤ ታ ኢዞ ቤያዳ ዳሮ ማላሌታዲስ።
REV 17:7 ጊዶ ኣቲን ኪታንቻዚ ጊዲኮ ታና፥ «ኔ ኣዛስ ማላሌታይ? ሃ ማጫሳያ ጹራ ዮኦኔ ኢዛ ኢስታ ቦላ ኡቲዳ ላፑን ሁኤታኔ ታሙ ካጬቲ ኢዛስ ዲዛ ዶኣዛ ጹራ ታ ኔስ ቆንጪሳና።
REV 17:8 ኔ ቤኒዳ ዶኣዚ ካሴካ ዲዛይሳኮ ሺን ሃኢ ዴና። ኢዚ ጉዬፔ ጪማ ኦላ ጊዶፌ ኬዛናኔ ጌዴ ꬋዮሶ ባና፤ ኣላሜይ ሜꬌቶሶፔ ኢስታ ሱንꬂ ዴኦ ማጻፋን ጻፌቶንታ ቢታ ቦላ ዲዛ ኣሳይ ሄ ዶኣዚ ካሴካ ዲዛይሳ ሃኢ ቃሴ ዶንታይሳ ጉዬፔ ያናይሳ ጊዲዳይሳ ቤኢዲ ማላሌታና።
REV 17:9 «ዩሺ ቆፒዛ ኤራ ኣሲ ኮዬቲዛይ ሃኒና፤ ላፑን ሁኤቲ ሄ ማጫሳያ ኢስታ ቦላ ኡቲዳ ላፑን ዙማታ፤ ሄይቲካ ላፑን ካዎታኮ።
REV 17:10 ሄ ላፑን ካዎታፔ ኢቻሻቲ ኩንዲዳ፤ ኢሶይ ሃኢ ዴስ። ሃንኮይሲ ቡሮ ዪቤና፤ ኢዚ ዪዲ ጉꬃ ዎዴ ታካናስ ቤሴስ።
REV 17:11 ኦስፑንꬆ ካዎዚ ካሴ ዲዛዴ ሺን ሃኢ ጊዲኮ ባይንዳ ዶኣኮ፤ ኢዚ ላፑናታፔ ኢሳ፤ ኢዚካ ጌዴ ꬋዮሶ ባና።
REV 17:12 «ኔ ቤኢዳ ታሙ ካጬቲ ቡሮ ካዎቶንታ ታሙ ካዎታ፤ ጊዲኮካ ኢስቲ ሄ ዶኣዛራ ኢሲፌ ኢሲ ሳቴስ ዶኣዛራ ካዎታናስ ካዎቴꬃ ዎልቃ ዴማና።
REV 17:13 ሄ ታሙ ካዎታስ ኢሲ ቆፋይ ዴኣና፤ ኢስቲ ባ ዎልቃኔ ባ ጎዳቴꬅ ሄ ዶኣዛስ ኣꬂ ኢማና።
REV 17:14 ኢስቲ ዶርሳዛ ቦላ ኦላ ዴንꬃና ሺን ዶርሳዚ ጎዳታስ ጎዳኔ ካዎታስ ካዎ ጊዲዳ ጊሻስ ኢዚ ኢስታ ጾናና፤ ኢዛራ ዲዛይቲ ጼይጌቲዳይታ፥ ዶሬቲዳይታኔ ኣማኔቲዳይታ» ጊዴስ።
REV 17:15 ሄ ኪታንቻዚካ ታስ፥ «ሃ ላይማ ማጫሳያ ኢስታ ቦላ ኡታ ዲሺን ኔኒ ቤኢዳ ሃꬃታ፥ ዴሬታ፥ ኣሳታ፥ ዱማ ዱማ ቆሞታ ቃሴካ ዱማ ዱማ ቃላን ሃሳይዛይታ።
REV 17:16 ሄ ዶኣዚኔ ኔ ቤኢዳ ታሙ ካጬቲ ሄ ላይማ ማጫሳዮ ኢጼቴስ፤ ኢስቲ ኢዞ ꬋዮሶ ጋꬃና፤ ካሎ ሜላ ኣሻና፤ ኢስቲ ኢዚ ኣሾ ማናኔ ኢዞ ታማንካ ጹጋና።
REV 17:17 ባ ቆፋ ፖላናስ ሃይሳꬆ ኦꬃና ማላ ሄሳ ሄ ቆፋ ኢስታ ዎዚናን ዎꬂዳይ ጾሳ፤ ሄሳ ጊሻስ ጾሳ ቃላይ ፖሌታና ጋካናስ ኢስቲ ቆፋን ኢሲኖ ጊዳና፤ ባ ካዎቴꬃ ጎዳቴꬃካ ሄ ዶኣዛስ ኣꬂ ኢማና።
REV 17:18 ኔ ቤኢዳ ማጫሳያ ቢታ ካዎታፔ ቦላራ ካዎታና ዲዛ ዎጋ ጊታ ካታማዮ» ጊዴስ።
REV 18:1 ሄሳፌ ጉዬ ጎዳቴꬂ ኢዛስ ዲዛ ሃራ ኪታንቻይ ሳሎፔ ዱጌ ዎꬊሺን ቤያዲስ፤ ኢዛ ቦንቾ ፖኦፔ ዴንዲዳይሳን ቢታይካ ፖኢዴስ።
REV 18:2 ኢዚ ꬎቃ ቃላን፥ «ጊታ ባቢሎና ኩንዳዱስ! ኩንዳዱስ! ኩንዳዱስ! ዳይዳንꬃ ዱሳሶ ጊዳዱስ! ቱና ኣያናታስ ኣቆሶ ጊዳዱስ! ሃራሲዛ ኢታ ካፎታስ ሼምፖሶ፥ ኢታኔ ሃራሲዛ ዶኣታስካ ኣቆሶ ጊዳዱስ።
REV 18:3 ዴሬ ኣሳ ዉርሳ ማꬆሲዛ ባ ላይማቴꬃ ዎይኔ ጫጄዛ ኡሻዱስ፤ ቢታ ቦላ ዲዛ ካዎቲ ኢዚራ ላይማቲዳ፤ ቢታ ቦላ ዲዛ ዛልኣንቻቲ ኢዚስ ዲዛ ኢሻሎ ዱሳፌ ዴንዲዳይሳን ዳሮ ዱሬቲዳ» ጊ ዋሲዴስ።
REV 18:4 ቃሴካ ሃራ ቃላይ ሳሎፔ፥ «ታ ዴሬቶ! ኢንቴ ኢዚራ ኢዚ ናጋራን ዙፔቶንታ ማላኔ ኢዞ ጋኪዛ ቦሻ ኢንቴ ኢዚራ ጊሼቲ ኤኮንታ ማላ ኢዚፔ ሻኬቲ ኬዚቴ።
REV 18:5 ኢዚ ናጋራይ ዶሬቲዲ ፑዴ ሳሎ ጋኪዴስ፤ ጾሲካ ኢዚ ሞሮዛ ኣኬኪዴስ።
REV 18:6 ኢዛ ኢሚዳሪ ጊና ኢዚስ ኩሼ ዛሪቴ፤ ኢዚ ኦሶ ጊሻስ ኢዚስ ናምኡ ኩሼ ጪጊቴ፤ ኢዚስ ናምኡ ኩሼ ኢዚይሳፌ ኣꬂ ዋላኪቴ።
REV 18:7 ኢዛ ባስ፥ ባ ቦንቾሲኔ ባስ ጊጋና ማላ ኢሞይሳ ጊና ዋዬኔ ሙዞቴꬅ ኢዚስ ኢሚቴ፤ ኢዛ ባ ዎዚናራ፥ ‹ታኒ ካዎ ማቺ ማላ ኡታዲስ ኣቲን ኣምኢ ማላ ጊዲኬ፤ ታና ሙዞቴꬂ ሙሌካ ጋኬና› ጋዳ ጬቄታዉስ።
REV 18:8 ሄሳ ጊሻስ ኢዚ ቦላ ቦሻይ ዉሪካ ኢሲ ጋላስ ጋካና፤ ሃይቆይ፥ ሙዞቴꬂኔ ጋፋይ ኢዞ ጋካና፤ ኢዛ ታማን ጹጌታና፤ ኢዚ ቦላ ፒርዲዛ ጎዳይ ጾሲ ኢዚ ሚኖ» ጊሺን ታኒ ሲያዲስ።
REV 18:9 ኢዚራ ላይማቲሼ ኢሻሎ ዱስ ዴዪዳ ሃ ቢታ ካዎቲ ኢዛ ጹጌቲሺን ጩዋቲዛ ጩዋ ቤኢዲ ኢዚ ጊሻስ ዋሲዲ ዬካና።
REV 18:10 ኢዚ ዋዬዛስ ባቢዳ ጊሻስ ሃሆን ኤቂዲ፥ «ሃኔ ጊታ ካታማዬ! ሃኔ ሚኖ ካታማዬ ባቢሎኔ! ኔ ፒርዳይ ሜጺ ኢሲ ሳቴ ጊዶን ዪዳ ጊሻስ ኔስ ኣዬ ኣና! ኣዬ ኣና!» ጋና።
REV 18:11 ሃይሳፌ ጉዬ ኢስታ ማርካቤን ጫኔቲዳይሳ ሻሚዛ ኣሲ ባይንዳ ጊሻስ ቢታ ቦላ ዲዛ ዛልኣንቻቲ ኢዚስ ዬካናኔ ካዮታና።
REV 18:12 ኢስታ ማርካቤን ጫኔቲዳይ ዎርቃ፥ ቢራ፥ ኣልኦ ሹች፥ ኢንቁ፥ ሌኤ ማይኦ፥ ጋላልኦ ማላ ማይኦ፥ ሃሬ ጌቴቲዛ ማይኦ፥ ዞኦ ማይኦኔ ሎኦ ሳዎ ሳዊዛ ሚꬅ ኡባ፥ ዳንጋርሳ ዛሌ፥ ኣልኦ ሚꬃፌ፥ ጻርቂማላፔ ቢራታፔኔ ዎሊዎጆፌ ኦሴቲዳ ሚሽ ኡባ፥
REV 18:13 ቃራፋ፥ ሳዎ፥ ሳዊዛ ሚꬅ፥ ካርቤ፥ ኤጻኔ፥ ዎይኔ ጫጄ፥ ዎጋራ ዛይቴ፥ ꬊሌ፥ ጊስቴ፥ ሚዝ፥ ዶርሳታ፥ ፓራታ፥ ፓራ-ጋሬታ፥ ኣይሌታኔ ሃራ ኣሳታኮ።
REV 18:14 ዛልኣንቻቲ፥ «ሃኔ ኔኒ ኣሞቲዳ ሎኦ ሚሻቲ ዉሪካ ኔፔ ሃኪዳ፤ ኔ ሃሮይኔ ኔ ጌጼይ ዉሪካ ꬋይዴስ፤ ሃይሳፌ ጉዬ ኔኒ ሄይታንታ ሙሌካ ዛራ ዴማካ!» ጋና።
REV 18:15 ሄይታንታ ዉርሲ ሻሚ ሻሚዲ ዱሬቲዳ፤ ዛልኣንቻቲ ኢዚ ቦላ ጋኪዳ ዋዬዛስ ባቢዲ ሃሆን ኤቃና፤ ዬኪሼኔ ሙዞቲሼ፥
REV 18:16 «ካሴ ሌኤ ማይኦኔ ጋላልኦ ማይኦ ቃሴካ ዞኦ ማይኦ ማይኢዛሪስ፥ ዎርቃኒኔ ቦንቾ ሹቻን፥ ኢንቁንካ ጶሊዳ ጊታ ካታማይስ ኣዬ ኣና! ኣዬ ኣና!
REV 18:17 ሄሳ ማላ ሃሮይ ኢሲ ሳቴ ጋርሳን ꬋይዴስ» ጋና። ማርካቤ ኣዛዚዛይቲ ዉሪ ማርካቤን ቢዛይቲ ዉሪ ማርካቤ ጊዶን ኦꬂዛይቲ ዉሪካ ኣባ ጊዶን ዛልኣንቻቲ ዉሪካ ሃሆን ኤቃና።
REV 18:18 ኢዛ ጹጌቲሺን ጩዋቲዛ ጩዋዛ ቤኢዲ፥ «ሃኖ ሃ ጊታ ካታማዮ ሚሳቲዛ ካታማይ ሃራይ ኣዋን ዳንዴ?» ጊሼ ዋሲዳ።
REV 18:19 ባ ሁኤን ጉዱላ ቆሊዲ ዬኪሼኔ ሙዞቲሼ፥ «ኣባ ቦላ ማርካቤይ ዲዛይቲ ዉሪካ ኢዚ ሚሻን ዱሬቲዳይቲ፥ ሂና ጊታ ካታማያ ኢሲ ሳቴ ጊዶን ሙሌራ ꬋይዳ ጊሻስ ኢዚስ ኣዬ ኣና! ኣዬ ኣና!» ጊ ዋሲዳ።
REV 18:20 ሳሎዞ! ኢዚ ጋሶን ኔ ኡፋዬታ፤ ጾሲ ኢንቴ ጊሻስ ኢዚ ቦላ ፒርዲዳ ጊሻስ ኢንቴ ጌሻቲ፥ ሃዋሬቲኔ ናቤቲካ ኡፋዬቲቴ።
REV 18:21 ሄሳፌ ጉዬ ኢሲ ሚኖ ኪታንቻይ ዎልቃማ ዎጻ ሹች ሚሳቲዛ ኢሲ ሹች ዴንꬂዲ፥ «ጊታ ካታማያ ባቢሎና ሄሳꬆካ ዎልቃራ ሱጌታዳ ኩንዳና፤ ሃይሳፌ ጉዬ ሙሌካ ቤቱኩ።
REV 18:22 ዲꬅ ሚሳቲዛ ባጋና ጌቴቲዛይሳ ሾጪዛይታኔ ማዛሙሬ ዬጺዛይታ ዬꬃ ሱሱልኤ ሱሱልኢዛ ኣሳይኔ ዲንኬ ፑኒዛይታ ጊሪሲ ናምኣንꬆ ኔናን ሲዬቴና፤ ኩሼ ሂላቴꬂ ዲዛ ኣይ ኣሲካ ሃይሳፌ ጉዬ ኔናን ቤቴና፤ ዎጻ ጊሪሲ ሃይሳፌ ጉዬ ኔናን ሲዬቴና።
REV 18:23 ታማ ፖኦይ ሃይሳፌ ጉዬ ኔናን ፖኤና፤ ኣዴኔ ማጫ ሚሺራ ቃላይ ሃይሳፌ ጉዬ ኔናን ሴቴቴና፤ ኔ ዛልኣንቻቲ ካሴ ኣላሜን ኤሬቲዳይታ፤ ኔኒ ቃሴ ኣሳ ዉርሳ ሙሬኖን ባሌꬃዳሳ።
REV 18:24 «ኢዚ ጊዶን ናቤታ ሱንꬂ፥ ጌሻታ ሱንꬂኔ ቢታ ቦላ ኣሳ ኩሼን ሃይቂዳይታ ኡባታ ሱንꬂ ቤቲዴስ» ጊሼ ዱጌ ኣባ ጊዶ ዬጊዴስ።
REV 19:1 ሄሳፌ ጉዬ ዳሮ ኣሳ ቃላ ጊሪስ ሚሳቲዛ ጊታ ቃላ ጊሪሲ ሳሎፔ፥ «ሃሌ ሉያ! ኣቶቴꬂ፥ ቦንቾይ፥ ዎልቃይካ ኑ ጎዳሳ።
REV 19:2 ኢዛ ፒርዳይ ቱማኔ ኣዳ፤ ኢዛ ቢታ ባ ላይማቴꬃን ቱኒሲዳ ዎጋ ጊታ ላይማዮ ኢዚ ባ ፒርዳን ቃጻይዴስ፤ ኢዞ ቃጻይዲ ባ ኦሳንቻታ ሱꬃ ሃሎ ኬሲዴስ» ጊሺን ታ ሲያዲስ።
REV 19:3 ቃሴካ፥ «ሃሌ ሉያ፤ ኢዚፔ ኬዚዛ ጩዋይ ሜርናፔ ሜርና ጋካናስ ፑዴ ጩዋቲሼ ዴኣና» ጊሼ ዋሲዳ።
REV 19:4 ናምኡ ታማኔ ኦይዱ ጪማቲኔ ኦይዱ ዶኣቲ ኣልጋ ቦላ ኡቲዳ ጾሳስ ጉፋኒዲ፥ «ኣሚን፥ ሃሌ ሉያ!» ጊሼ ኢዛስ ጎይኒዳ።
REV 19:5 ሄሳፌ ጉዬ፥ «ኢዛስ ያዪዛ ኢዛ ኦሳንቻቲ ዉሪካ ጉꬃቲኔ ጊታቲ ኑ ጎዳ ጋላቲቴ» ጊዛ ቃላይ ኢዛ ኣልጋፌ ኬዚዴስ።
REV 19:6 ዳሮ ኣሳ ቃላ ጊሪስ ሚሳቲዛይ፥ ሻፋ ሃꬃ ጊሪስ ሚሳቲዛ ጊሪስ፥ ዎልቃማ ዳዳ ጊሪስ ሚሳቲዛ ጊሪሲ፥ «ሃሌ ሉያ! ኡባ ዳንዳይዛ ጎዳይ ካዎቴስ!
REV 19:7 ዶርሳዛ ሳርጌ ጋላሲ ጋኪዳ ጊሻሲኔ ኢዛ ሚሺራያ ጊጌታ ኡቲዳ ጊሻስ ሃ ዪቴ፤ ኣኔ ኡፋዬቶስ! ኣኔ ኡፋይሳን ኢዛ ቦንቾስ።
REV 19:8 ኢዛ ጾልቄቲዛ ጌሻ ሎኦ ማይኦ ማይኣና ማላ ኢዚስ ኢሜቲዴስ» ጊሺን ሲያዲስ፤ ሄ ሌኤ ማይኦዚ ጌሻታ ጺሎቴꬃ ኦሶ።
REV 19:9 ሄሳፌ ኪታንቻዚ ታና፥ «ጌዴ ዶርሳዛ ሳርጌስ ጼይጌቲዳይቲ ኣንጄቲዳይታ ጋዳ ጻፋ» ጊዴስ፤ ካሌꬂዲካ፥ «ሃይሲ ቱሙ ጾሳ ቃላ» ጊዴስ።
REV 19:10 ታኒካ ሄ ኪታንቻዛስ ጎይናናስ ኢዛ ቶሆ ቦላ ጉፋናዲስ ሺን ኢዚ ታና፥ «ኣጋ! ሄሳꬆ ኦꬆፋ! ታኒካ ኔናራ ዬሱስ ኪርስቶሳ ማርካቴꬅ ኦይኪዳ ኢሻታራ ኢሲፌ ኦꬂዛዴ፤ ኔኒ ጾሳስ ጎይና! ዬሱሳ ማርካይ ቲንቢቴ ኣያና» ጊዴስ።
REV 19:11 ሄሳፌ ጉዬ ሳሎይ ዶዬቲዳይሳ ታ ቤያዲስ፤ ቃሴካ ቦꬃ ፓራካ ቤያዲስ፤ ሄ ፓራዛ ቶጊዳይሲ ኣማኔቲዳዴኔ ቱማንቻ ጌቴቲዛዴ፤ ኢዚ ቃሴ ቱማ ፒርዴሲኔ ኦሌቴስ።
REV 19:12 ኢዛ ኣይፌቲ ታማ ላጮ ሚሳቴቴስ፤ ኢዛ ሁኤ ቦላ ዳሮ ዛዉዴቲ ዴቴስ፤ ኢዛፔ ኣቲን ሃራ ኣሲ ኦኒካ ኤሮንታ ሱንꬂ ኢዛ ቦላ ጻፌቲ ኡቲዴስ።
REV 19:13 ኢዚ ሱꬃን ማꬌቲዳ ማይኦ ማይኢዴስ፤ ኢዛ ሱንꬃይ፥ «ጾሳ ቃላ» ጌቴቴስ።
REV 19:14 ቦꬃ ፓራታ ቶጊዲ ቦꬂኔ ጌሽ ጊዲዳ ሎኦ ማይኦ ማይኢዳ ሳሎ ኦላንቻቲ ኢዛ ካሊዳ።
REV 19:15 ኣይዛቤታ ኢዛራ ቃንጺዛ ቃራ ማሻይ ኢዛ ዶናፔ ኬዜስ፤ ኢዚ ኢስታ ቢራታ ጉፌራ ሃራና፤ ኢዚ ዉርሲካ ዳንዳይዛ ጾሳ ሚኖ ሃንቆ ቆንጪሲዛ ዎይኔ ጫጄ ዬꬊዛሶን ኢስታ ዬꬋና።
REV 19:16 ኢዛ ማይኦ ቦላኔ ኢዛ ዎዲራ ቦላ፥ «ኢዚ ካዎታስ ካዎ፥ ጎዳታስ ጎዳ» ጊዛ ሱንꬂ ጻፌቲ ዴስ።
REV 19:17 ሄሳፌ ጉዬ ኣርሼ ቦላ ኤቂዳ ኢሲ ኪታንቻ ቤያዲስ፤ ኢዚ ሳሎ ቦላ ፒራꬊዛ ካፎታስ፥ «ዎጋ ጾሳ ዲጊሳ ማናስ ሃ ዪቴ! ሃ ሺቂቴ!
REV 19:18 ካዎታ ኣሾ፥ ኦላንቻታ ኣዛዚዛይታ ኣሾ፥ ጎባ ኦላንቻታ ኣሾ፥ ፓራታ ኣሾኔ ፓራ ቶጊዛይታ ኣሾ፥ ጎዳታ ኣሾኔ ኢስታ ኣሽካራታ ኣሾ፥ ጉꬃ ናይታ ኣሾኔ ጪማ ኣሳታ ኣሾ ጊዲዳ ኣሳ ኡባ ኣሾ ሃ ዪዲ ሚቴ!» ጊሼ ጊታ ቃላን ዋሲዴስ።
REV 19:19 ሄሳꬆካ ዶኣዚኔ ቢታ ካዎቲ ኢስታ ኦላ ኣሳይካ ቦꬃ ፓራ ቶጊዳይሳራኔ ኢዛ ኦላ ኣሳራ ኦሌታናስ ሺቂዳይታ ቤያዲስ።
REV 19:20 ጊዶ ኣቲን ሄ ዶኣዚ ኦይኬቲዴስ፤ ካሴ ኢዛራ ዳሮ ማላታ ኦꬂዳ ዎርዶ ናቤዚካ ኢዛራ ኦይኬቲዴስ፤ ኢዚ ሄ ዶኣዛ ማላታይ ኢስታ ቦላ ዲዛይታኔ ሄ ዶኣዛ ሚስሌዛስ ጎይኒዳይታኔ ጊታ ማላታታ ኦꬂ ኦꬂዲ ኢስታ ባሌꬂሼ ጋምኢዴስ፤ ሄይቲ ናምኣቲ ዲኔ ጌቴቲዛ ኤጺዛ ታማ ኣባን ሃይቆንታ ፓጻ ዲሼ ዬጌቲዳ።
REV 19:21 ሃንኮ ኣቲዳይቲ ቃሴ ቦꬃ ፓራ ቶጊዳይሳ ዶናፔ ኬዚዳ ማሻን ሃይቂዳ፤ ካፎቲካ ዉሪ ኢስታ ኣሾዛ ሚ ካሊዳ።
REV 20:1 ሄሳፌ ጉዬ ጪማ ኦላዛ ዶይዛ ቁልፔኔ ጊታ ሳንሳላታ ባ ኩሼን ኦይኪዳ ኪታንቻይ ሳሎፔ ዱጌ ዎꬊሺን ታ ቤያዲስ።
REV 20:2 ሄ ዳዌዛ ኦይኪዲ ሺ ላይꬅ ቃቺዴስ፤ ሄሲ ዳዌዚ ዳቡሎሳ ዎይኮ ጻላኤ ጌቴቲዛ ካሴ ቤኒ ሾሻዛ።
REV 20:3 ሺ ላይꬅ ጋካናስ ኢዚ ካዎቴꬃታ ባሌꬆንታ ማላ ሄ ኪታንቻዚ ዳዌዛ ዱጌ ጪማ ኦላን ዬጊዴስ፤ ኢዛ ቦላ ጎርዲዲ ማታሜ ዎꬂዴስ፤ ኢዚ ሄሳፌ ጉꬃ ዎዴስ ቢርሼታናስ ቤሴስ።
REV 20:4 ሄሳፌ ጉዬ ታኒ ኣልጋታ ቤያዲስ፤ ሄ ኣልጋታ ቦላ ፒርዳ ፒርዳናስ ጎዳቴꬂ ኢስታስ ኢሜቲዳይቲ ኡቲዳይታ ቤያዲስ፤ ቃሴካ ዬሱሳ ጊሻስ ኢስቲ ማርካቲዳ ጊሻሲኔ ጾሳ ቃላ ጊሻስ ኢስታ ቆꬌይ ቃንጼቲዳ ኣሳታ ሼምፖካ ቤያዲስ፤ ሄይታንቲ ዶኣዛሲኔ ኢዛ ሚስሌዛስ ጎይኒቤቴና፤ ኢዛ ማላታካ ባ ሊጴ ቦላ ጊዲን ባ ኩሼ ቦላ ዎꬆንታይታ፤ ኢስቲ ሃይቆፔ ዴንዲዳ ኪርስቶሳራ ኢሲፌ ሺ ላይꬅ ካዎቲዳ።
REV 20:5 ሃንኮ ኣቲዳ ሃይቄꬃቲ ሺ ላይꬃይ ፖሌታና ጋካናስ ሃይቆፔ ዴንዲቤቴና፤ ሄሲካ ሃይቆፔ ኮይሮ ዴንꬃ።
REV 20:6 ኮይሮ ዴንꬃን ዲዛይቲ ሄይቲ ኣንጄቲዳይታኔ ጌሻታ። ኢስታ ቦላ ናምኣንꬆ ሃይቆስ ዎልቃይ ዴና፤ ኢስቲ ጾሳ ቄሴታኔ ኪርስቶሳ ቄሴታ ጊዳና፤ ኢስቲ ኪርስቶሳራ ሺ ላይꬅ ካዎታና።
REV 20:7 ሄ ሺ ላይꬃይ ፖሌቲዳ ማላ ጻላኤይ ባ ቃሼቲዳሶፔ ቢርሼታና።
REV 20:8 ኣላሜ ቦላ ዲዛይቲ ሄይቲካ ጎጌኔ ማጎጌ ጌቴቲዛይታ ባሌꬃናሲኔ ኢስታ ኦላስ ኤኪ ባናስ ኬዛና፤ ሄይታንታ ቆዳይ ኣባ ኣቻን ዲዛ ኣጬ ማላ።
REV 20:9 ኢስቲ ኩሜꬃ ቢታ ቦላ ላሌቲዲ ጌሻቲ ዲዛሶዮ ዶሴቲዳ ካታማዮ ጊዶꬂዳ ሺን ሳሎፔ ዎꬊዳ ታማይ ኢስታ ዲፒ ሂስቲ ጹጊዴስ።
REV 20:10 ካሴ ኢስታ ባሌꬂዳ ዳቡሎሲ ሄ ዶኣዚኔ ዎርዶ ናቤዚ ዲዛሶይ ዲኔን ኤጺዛ ታማ ኣባ ጊዶን ዬጌቲዳ፤ ኢስቲ ሄን ቃማኔ ጋላስ ሜርናፔ ሜርና ጋካናስ ጹጌታና።
REV 20:11 ሄሳፌ ጉዬ ኢሲ ጊታ ቦꬃ ኣልጋኔ ሄ ኣልጋ ቦላ ኡቲዳይሳ ቤያዲስ፤ ቢታይኔ ሳሎይ ኢዛ ሲንꬃፌ ባቃቲዳ ሺን ኢስቲ ቢዲ ጌላናሶይ ቤቲቤና።
REV 20:12 ሄ ኣልጋዛ ሲንꬃን ሃይቂዳ ጪማታኔ ናቴꬃታ ቤያዲስ፤ ማጻፋቲካ ዶዬቲዳ፤ ሃራ ዴኦ ማጻፋይካ ዶዬቲዴስ፤ ሃይቂዳይቲካ ማጻፋታን ካሴ ጻፌቲ ዲዛ ባ ኦሶ ኦሶ ማላ ፒርዳ ኤኪዳ።
REV 20:13 ኣባይካ ባ ጋርሳን ዲዛ ሃይቄꬃታ ኢሚዴስ፤ ሃይቆይኔ ዱፎይ ቃሴ ካሴ ሃይቂዲ ባ ጊዶን ዲዛይታ ኢሚዳ፤ ኢሲ ኢሲ ኣሲ ባ ኦሶ ኦሶ ማላ ፒርዳ ኤኪዴስ።
REV 20:14 ሃይቆይኔ ዱፎይ ታማ ኣባ ጊዶ ዬጌቲዳ፤ ሄ ታማ ኣባዚ ናምኣንꬆ ሃይቆ።
REV 20:15 ኢዛ ሱንꬂ ዴኦ ማጻፋን ጻፌቶንታዴይ ዉሪካ ታማ ኣባን ዬጌቲዴስ።
REV 21:1 ሄሳፌ ጉዬ ታኒ ኦራꬃ ሳሎኔ ኦራꬃ ሳኣ ቤያዲስ፤ ካሴ ሳሎይኔ ካሴ ሳኣይ ኣꬊ ቢዳ፤ ሃይሳፌ ጉዬ ኣባይካ ዴና።
REV 21:2 ጌሻ ካታማያ ኦራꬃ ዬሩሳላሜይ ባ ኣዚናስ ጊጌቲዳ ሚሺራ ማላ ሎኣ ጊጌታዳ ሳሎ ጾሳ ኣቻፌ ዎꬊሺን ታኒ ቤያዲስ።
REV 21:3 ኣልጋዛፔ፥ «ሄኮ ጾሳ ኣቆሶይ ኣሳራ ዴስ፤ ኢዚ ኢስታራ ዳና፤ ኢስቲካ ኢዛ ዴሬታ ጊዳና፤ ጾሲ ባ ቦንቾን ኢስታራ ኢሲፌ ጊዳና፤ ኢዚ ኢስታ ጾስ ጊዳና።
REV 21:4 ኢዚ ኢስታ ኣይፌፔ ኣፉንꬅ ኡባ ቁጫና፤ ካሴ ዎጋይ ኣꬊዳ ጊሻስ ሃይቆይ ዎይኮ ሙዞቴꬂ ዎይኮ ዬሆይ ዎይኮ ዋዬይ ሃይሳፌ ጉዬ ዴና» ጊዛ ጊታ ቃላይ ኬዚሺን ታኒ ሲያዲስ።
REV 21:5 ሄ ኣልጋ ቦላ ኡቲዳይሲካ፥ «ሄኮ ታኒ ዉርሳካ ኦራꬅ ኬሳና!» ጊዴስ፤ ቃሴካ ታና፥ «ሃይሲ ቃላዚ ኣማኔቲዳ ቱሙ ጊዲዳ ጊሻስ ኔ ሃይሳ ጻፋ!» ጊዴስ።
REV 21:6 ሄሳፌ ጉዬ ታስ፥ «ፖሌቲዴስ! ኣልፋይኔ ኦሜጋይ፤ ኮይሮይኔ ዉርሴꬂ ታና፤ ሳሜቲዳዴስ ታኒ ዴኦ ፑልቶ ሃꬅ ሚሼ ቃንጺሶንታ ኢዛስ ጮ ሜላ ኢማና።
REV 21:7 ጾኒዳዴይ ሃይሳ ላታና፤ ታኒካ ኢዛዴስ ጾስ ጊዳና፤ ኢዚካ ታስ ና ጊዳና።
REV 21:8 ጊዶ ኣቲን ሃንኮ ባቦቲ፥ ኢስታስ ኣማኔቶንታይቲ፥ ቱናቲ፥ ኣሳ ሼምፖ ዎꬊዛይቲ፥ ላይማቲዛይቲ፥ ቢቲዛይቲ፥ ኤቃስ ጎይኒዛይቲ፥ ዎርዶቲዛይቲ፥ ሄይታ ኡባታ ቃዳይ ዲኔን ኤጺዛ ታማ ኣባ ጊዶን ጊዳና፤ ሄሲካ ናምኣንꬆ ሃይቆ» ጊዴስ።
REV 21:9 ዉርሴꬃን ላፑን ቦሻቲ ኢስታን ኩሚዳ ላፑን ጹኣታ ኦይኪዳ ላፑን ኪታንቻታፔ ኢሶይ ታኮ ዪዲ ታና፥ «ሃ ያ! ታ ኔና ዶርሳዛ ማቼዮ ሚሺራዮ ቤሳና» ጊዴስ።
REV 21:10 ኢዚ ታና ኣያናን ኢሲ ጊታ ꬎቃ ዙማ ቦላ ኬሲዲ ጌሻ ካታማያ ኦራꬃ ዬሩሳላሜይ ጾሳ ኣቻፌ ሳሎፔ ዎꬊዛሮ ቤሲዴስ።
REV 21:11 ኢዛካ ጾሳ ቦንቾን ፖኢሳዉስ፤ ኢዚ ፖኦዛ ሎኤቴꬂ ቃሴ ኬሂ ቦንቼቲዛ ሹቻ ማላኔ ቢሪሌ ማላ ጌሺኔ ኢያስጲዴ ጌቴቲዛ ኢንቁ ማላ።
REV 21:12 ኢዚስ ታማኔ ናምኡ ፔንጌታራ ዲዛ ጊታ ኣዱሳ ጊምቤይ ዴስ፤ ሄ ታማኔ ናምኡ ፔንጌታን ታማኔ ናምኡ ኪታንቻቲ ኤቂዲ ናጌቴስ፤ ሄ ፔንጌታ ቦላ ታማኔ ናምኡ ኢስራኤሌ ኮቻታ ሱንꬂ ጻፌቲ ዴስ።
REV 21:13 ኣርሼይ ሞኪዛ ባጋራ ሄꬑ ፔንጌይ ዴስ፤ ፑዴሃ ባጋራ ሄꬑ ፔንጌይ ዴስ፤ ዱጌሃ ባጋራ ሄꬑ ፔንጌይ ዴስ ኣርሼይ ዉሊዛ ባጋራ ሄꬑ ፔንጌይ ዴስ።
REV 21:14 ሄ ካታማይ ጊምቤስ ታማኔ ናምኡ ዋና ዮቻቲ ዴቴስ፤ ሄ ዮቻታ ቦላ ታማኔ ናምኡ ዶርሳዛ ሃዋሬታ ሱንꬂ ጻፌቲ ኡቲዴስ።
REV 21:15 ሄሳ ታስ ዮቲዳ ኪታንቻዛስ ሄ ካታማዮኔ ኢዚ ፔንጌታ ቃሴካ ሄ ጊምቤዛ ኢዛራ ዋꬊዛ ዎርቃ ዛንጌይ ዴስ።
REV 21:16 ሄ ካታማይ ኣዱሳቴꬂኔ ኣሆቴꬂ ኦይዱ ባጋራካ ኢሲ ጊና፤ ሄ ኪታንቻዚካ ካታማዮ ባ ኢዛራ ዋꬊዛ ዋꬋ ዛንጌዛራ ዋꬊን ኣዱሳቴꬃይ ታማኔ ናምኡ ሺ ኪሎ ሜቲሬ ማላ ጊዲዴስ፤ ኢዚ ꬎቃቴꬂኔ ኣሆቴꬂካ ኢዚ ኣዱሳቴꬃ ጊና ጊዲዴስ።
REV 21:17 ኪታንቻዚ ጊምቤዛ ዋꬊዴስ፤ ሄ ኪታንቻዚ ኢዛራ ዋꬊዛ ሚሻዚ ኤሬቲዳ ዋꬋ ሚሻዚ ጼታኔ ኦይዱ ታማኔ ኦይዱ ሜቲሬ ማላ ጊዲዴስ።
REV 21:18 ሄ ጊምቤዚ ጊምቤቲዳይ ኢያስጲዴ ጌቴቲዛ ሹቻና፤ ሄ ካታማያካ ማስቶቴ ማላ ጌያ ኡቲዳ ጌሻ ዎርቃፌ ኦሴታዱስ።
REV 21:19 ሄ ካታማይሲ ዮቻ ሹቻይ ዱማ ዱማ ኣልኦ ሹቻን ሎኢ ጊጊዴስ፤ ኮይሮ ዮቻዚ ኢያስጲዴ፥ ናምኣንꬆዚ ሲምፔሬ፥ ሄꬓንꬆዚ ኬልቄዶኔ፥ ኦይዳንꬆዚ ማርጊዴ፥
REV 21:20 ኢቻሻንꬆዚ ሳርዶንኪሴ፥ ኡሱፑንꬆዚ ሳርዲዮኔ፥ ላፑንꬆዚ ኪርስቶሎቤ፥ ኦስፑንꬆዚ ቢሪሌ፥ ኡዱፉንꬆዚ ቶጳዚዮኔ [ዉራዉሬ]፥ ታማንꬆዚ ኪሪስጲራሲሴ፥ ታማኔ ኢሲንꬆዚ ያኪንቴ፥ ታማኔ ናምኣንꬆዚ ኣሜቴስጺኖሴ ጌቴቲዛ ሹቻታ።
REV 21:21 ሄ ታማኔ ናምኡ ፔንጌቲካ ታማኔ ናምኡ ኢንቁታ፤ ፔንጌቲ ዉሪካ ኢሶይ ኢሶይ ኢሲ ኢንቁፌ ኦሴቲዳ ሄ ካታማይ ጊዶ ኦጌይ ማስቶቴ ማላ ሃ ዛሪ ቤሲዛ ሙሩታ ዎርቃፌ ኦሴቲዴስ።
REV 21:22 ኡባ ዳንዳይዛ ጎዳ ጾሲኔ ዶርሳዚ ኢዚስ ጾሳ ኬꬄ ጊዲዳ ጊሻስ ሄ ካታማይ ጊዶን ሃራ ጾሳ ኬꬅ ቤያቤኬ።
REV 21:23 ጾሳ ቦንቾይ ኢዚስ ፖኢዛ ጊሻሲኔ ዶርሳዚ ኢዚ ፖኦ ጊዲዳ ጊሻስ ሄ ካታማይስ ኣርሼይ ዎይኮ ኣጊናይ ፖኢሳናስ ኮሼና።
REV 21:24 ዴሬቲ ኢዚ ፖኦዛን ሲሜሬታና፤ ቢታ ካዎቲ ዉሪካ ባ ቦንቾ ኢዚስ ኤሃና።
REV 21:25 ሄ ካታማይን ቃማይ ባይንዳ ጊሻስ ኢዚ ፔንጌቲ ኣይ ዎዴካ ጎርዴቴቴና።
REV 21:26 ሃራ ካዎታ ጊታቴꬂኔ ቦንቾይ ኢዚስ ያና።
REV 21:27 ሃራሲዛ ሚሺ ሙሌካ ጌዴ ኢዚን ጌሌና፤ ቱናቴꬅ ኦꬂዛይቲኔ ዎርዶ ሃሳይዛይቲ ሙሌካ ሄ ኢዚኮ ጌሌቴና፤ ሄ ኢዚን ጌላናይታ ሱንꬂ ካሴ ሄ ዶርሳዛ ዴኦ ማጻፋን ጻፌቲዳይታ ጻላ።
REV 22:1 ሄሳፌ ጉዬ ሄ ኪታንቻዚ ጾሳ ኣልጋፌኔ ዶርሳዛ ኣልጋፌ ኬዚዛ ማስቶቴ ማላ ጺሎ ቂዢ ጊዳ ዴኦ ሃꬃ ሻፋ ታና ቤሲዴስ።
REV 22:2 ሄ ሻፋዚ ሄ ካታማይስ ዋና ኦጌዛ ጊዶ ኣዳን ሻኪ ዬጊዲ ኣꬊ ቤስ፤ ሄ ሻፋዛስ ሃዲርሳ ባጋራኔ ኡሻቻ ባጋራ ኣጊናን ኣጊናን ፓጬይ ባይንዳ ላይꬃን ታማኔ ናምኡ ኣጊና ኩሜꬅ ኣይፊዛ ዴኦ ሚꬂ ዴስ፤ ሄ ሚꬃ ሃይꬃይ ዴሬ ፓꬄስ።
REV 22:3 ሄሳፌ ጉዬ ቃንጌꬂ ሙሌካ ዴና፤ ጾሳ ኣልጋይኔ ዶርሳዛ ኣልጋይ ሄ ካታማይን ዳና፤ ኢዛ ኦሳንቻቲ ኢዛስ ጎይናና።
REV 22:4 ኢስቲ ኢዛ ኣይፌሶ ቤያና፤ ኢዛ ሱንꬂ ኢስታ ሊጴ ቦላ ዳና።
REV 22:5 ሄሳፌ ጉዬ ቃማይ ዴና፤ ጎዳ ጾሲ ኢስታስ ፖኢዛ ጊሻስ ታማ ፖኦይ ዎይኮ ኣርሼ ፖኦይ ኢስታስ ኮሼና፤ ኢስቲ ሜርናፔ ሜርናስ ካዎታና።
REV 22:6 ሄሳፌ ጉዬ ኪታንቻዚ ታስ፥ «ሃይቲ ቃላቲ ኣማኔቲዳይታኔ ቱማታ፤ ናቤታ ሃሳይሲዛ ጎዳ ጾሲ ማታ ዎዴ ሃናናይሳ ባ ኦሳንቻታስ ቆንጪሳናስ ባ ኪታንቻዛ ኪቲዴስ» ጊዴስ።
REV 22:7 ዬሱሲካ፥ «ሄኮ ታ ኤሶን ያና፤ ሃይሳ ማጻፋዛ ቲንቢቴ ቃላ ናጊዛዴይ ኢዚ ኣንጄቲዳዴ» ጊዴስ።
REV 22:8 ሃይታ ሃ ዮኦታ ሲዪዳይኔ ቤኢዳይ ታና ዮሃኒሳ፤ ታኒ ሃይታ ሃ ዮኦታ ሲዪዳ ዎዴኔ ቤኢዳ ዎዴ ሃይታ ሃ ዮኦታ ታና ቤሲዳ ኪታንቻዛ ሲንꬃን ኢዛስ ጎይናናስ ሆካዳ ኢዛ ቶሆ ቦላ ኩንዳዲስ።
REV 22:9 ሄ ኪታንቻዚ ቃሴ፥ «ሃይሶ ኣጋ! ሃይሳꬆ ኦꬆፋ! ታኒካ ኔናራ ኔ ኢሻታራኔ ናቤታራ ቃሴካ ሃይሳ ማጻፋዛ ቃላ ፖሊዛ ኣሳታራ ኦꬂዛዴ፤ ኔኒ ጾሳስ ጻላ ጎይና» ጊዴስ።
REV 22:10 ቃሴካ፥ «ዎዴይ ማቲዳ ጊሻስ ኔኒ ሃይሳ ማጻፋዛን ጻፌቲዳ ቲንቢቴ ቃላ ማታሜን ጎርዶፋ።
REV 22:11 ሃይሳፌ ጉዬ ማካሊዛይ ጉጂ ማካሎ፥ ቱናይካ ቱኖ፥ ጺሎይካ ጺሊ ካሎ፥ ጌሻይካ ጌዮ» ጊዴስ።
REV 22:12 «ሄኮ! ታ ኤሶን ያና! ኢሳዴስ ኢሳዴስ ኢዛ ኦሶ ማላ ታ ኢዛስ ኢዛስ ኢማና ዋጋ ታኒ ታ ኩሼን ኦይካ ኡታዲስ።
REV 22:13 ኣልፋይኔ ኦሜጋይ፥ ሲንꬂኔ ጉዬይ፥ ኮይሮይኔ ዉርሴꬂ ታና» ጊዴስ።
REV 22:14 ሄ ዴኦ ሚꬃ ኣይፌ ማናሲኔ ሄ ካታማዮ ኢዚ ፔንጌራ ጌላናስ ቤሲዛይቲ ባ ማይኦ ሜጪዳይቲ ኣንጄቲዳይታ።
REV 22:15 ካና ማላ ጮ ሆꬁ ሆꬂዛይቲ፥ ቢታ ቢቲዛይቲ፥ ላይማቲዛይቲ፥ ሼምፖ ዎꬊዛይቲ፥ ኤቃስ ጎይኒዛይቲ፥ ዎርዶ ሲቂዛይቲኔ ዎርዶ ኦꬂዛይቲ ዉሪካ ሄ ካታማይፔ ካሬን ኣታና።
REV 22:16 «ታኒ ዬሱሲ ሃይሳ ኢንቴስ ማርካታና ማላ ታ ኪታንቻዛ ዎሳ ኬꬃታስ ዬዳዲስ፤ ታስ ዬሌታ ዛርኬይኔ ቆሞይ ካሴ ዳዊቴኮ፤ ታኒ ፖኢሲዛ ዎንታ ጾሊንቴ።»
REV 22:17 ጺሎ ኣያናይኔ ኢዛ ሚሺራያ፥ «ሃ ያ!» ጌቴስ፤ ሄሳ ሲዪዛዴይካ፥ «ኔ ሃ ያ!» ጎ። ሳሜቲዳዴይካ ሃ ዮ፤ ኮዪዳዴይ ዴኦ ሃꬄ ኣይኮ ዋጋካ ቃንጾንታ ጮ ሜላ ኡዮ።
REV 22:18 ሄኮ ታኒ ሃይሳ ማጻፋዛን ጻፌቲዳ ቲንቢቴ ቃላ ሲዪዛይቲ ናጌታና ማላ ዮታይስ። ኦኒካ ሃይሳ ሃ ቃላ ቦላ ኣይኮካ ጉጂኮ ሃይሳ ሃ ማጻፋዛን ጻፌቲዳ ቦሻታ ጾሲ ኢዛ ቦላ ጉጃና።
REV 22:19 ኦኒካ ሃይሳ ቲንቢቴ ማጻፋን ጻፌቲዳ ቃላታፔ ኢሲኖካ ፓጪሲኮ ሃይሳ ሃ ማጻፋዛን ዮቴቲዳ ዴኦ ሚꬃ ኣይፌፔኔ ጌሻ ካታማይፔ ጾሲ ኢዛ ጊሻዛ ፓጪሳና።
REV 22:20 ሃይታንታ ታ ማርካቲዛይሲ፥ «ታኒ ኣዳፌ ኤሶን ያና!» ጌስ። ኣሚን! ጎዳ ዬሱሳ ሃ ያ።
REV 22:21 ጎዳ ዬሱሳ ኪያቴꬂ ኢንቴናራ ኡባታራ ጊዶ። ኣሚን!
