﻿ዮሃኒሲ ጻፊዳ ኮይሮ ኪታ.
1.
ዴኦ ቃላ ጊሻስ ኮይሮፔ ዲዛይሳ ኑኒ ኑ ሃይꬃን ሲዪዳይሳኔ ኑ ኣይፌራ ቤኢዳይሳ ሎኤꬂ ጼሊዳይሳ፥ ኑ ኩሼራ ኦይኪ ቤኢዳይሳ ጊሻስ ሃሳዮስ። 
ዴኦይካ ቆንጪዴስ፤ ኑኒካ ኑ ኣይፌራ ቤኢዲ ማርካቶስ። ኢዛስ ኢዛ ኣዋ ኣቻን ዲዛይሳኔ ኑስካ ቆንጪዳ ሜርና ዴኦ ጊሻስ ኑ ኢንቴስ ዮቶስ። 
ኢንቴስካ ኑናራ ኢሲፌቴꬂ ዳና ማላ ኑኒ ቤኢዳይሳኔ ሲዪዳይሳ ኢንቴስ ዮቶስ፤ ኑ ኢሲፌቴꬃይካ ኣዋራኔ ኢዛ ና ዬሱስ ኪርስቶሳራ። 
ኑ ኡፋይሳይ ኩሜꬅ ጊዳና ማላ ኑ ሃይሳ ኢንቴስ ጻፎስ። 
ኑ ኢዛፔ ሲዪዲ ኢንቴስ ዮቲዛ ኪታይ፥ «ጾሲ ፖኦ፤ ኢዛ ኣቻን ሙሌካ ꬉማይ ዴና» ጊዛይሳ። 
«ኑ ꬉማን ሲሜሬቲሼ ኢዛራ ኑስ ኢሲፌቴꬂ ዴስ» ጊኮ ዎርዶቶስ ኣቲን ቱማን ዶኮ። 
ጊዶ ኣቲን ኢዚ ፖኦን ዲዛ ማላ ኑኒካ ፖኦን ሲሜሬቲኮ ኑ ጋርሳን ኑስ ኢሲፌቴꬂ ዴስ፤ ኢዛ ና ዬሱስ ኪርስቶሳ ሱꬂ ኑና ናጋራ ኡባፌ ጌሼስ። 
ኑኒ ኑናን ናጋራይ ባ ጊኮ ኑርካ ኑና ባሌꬆስ፤ ቱማይካ ኑናን ዴና። 
ኑኒ ኑ ናጋራ ፓጺኮ ኢዚ ኑ ናጋራ ኣቶ ጋናሲኔ ኑ ቆሆፔ ኑና ዉርሲ ጌሻናስ ኢዚ ኣማኔቲዳዴኔ ጺሎ። 
ኑኒ ናጋራ ኦꬂቤኮ ጊኮ ኢዛ ኑ ዎርዳንቻ ኬሶሲኔ ኢዛ ቃላይካ ኑናን ዴና። 
