﻿ኢብራዌ ኣሳስ ጻፌቲዳ ኪታ.
1.
ቤኒ ዎዴፔ ኦይኪዲ ጾሲ ዱማ ዱማ ኦጌራ ናቤታ ባጋራ ካሴ ኑ ኣዋታስ ዳሮ ዎዴ ዮቲዴስ። 
ቃሴ ሃይሳ ዉርሴꬃ ዎዴ ቦላ ዉርሲ ላቲሲዳዴኔ ሃ ኣላሜዛ ሜꬊዳ ባ ናዛ ባጋራ ኑስ ዮቲዴስ። 
ኢዚካ ጾሳ ቦንቾ ቤሲዛዴኔ ጾሳ ጾሳቴꬃስ ሎኦ ሌሚሶ ጊዲዲ ባ ዎልቃማ ቃላን ዉርሲካ ሺሺ ኦይኪዴስ፤ ኢዚ ኣሳ ናጋራፔ ጌሺዳፔ ጉዬ ሳሎን ቦንቾ ጾሳ ኡሻቻን ኡቲዴስ። 
ሄሳ ጊሻስ ኢዛስ ኢሜቲዳ ሱንꬃይ ኪታንቻታ ሱንꬃፌ ኣꬊዛይሳ ማላ ኢዚካ ኪታንቻታፔ ኬሂ ኣꬌስ። 
ጾሲ ኪታንቻፌ፥ «ኔኒ ታ ና፤ ታ ኔና ሃች ዬላዲስ። ዎይኮ ታ ኢዛስ ኣዋ ጊዳና፤ ኢዚካ ታ ና ጊዳና» ኦናስ ጊዴ? 
ቃሴካ ጾሲ ባ ባይራ ናዛ ዱጌ ሃ ቢታ ቦላ ዬዲሼ፥ «ጾሳ ኪታንቻቲ ዉሪካ ኢዛስ ጎይኔቶ» ጊዴስ። 
ኪታንቻታ ጊሻስ ሃሳይሼ ቃሴ፥ «ኪታንቻታ ኣያናታ፤ ባ ኦሳንቻታካ ታማ ላጮ ኬሴስ» ጊዴስ። 
ናዛ ጊሻስ ቃሴ፥ «ጎዶ! ኔ ዙፋኔይ ሜርናፔ ሜርና ጋካናስ ሚኒ ዳና፤ ኔኒ ኔ ካዎቴꬃ ሊኬ ካሌꬃሳ። 
ኔኒ ጺሎቴꬅ ዶሳዳሳ፤ ማካላካ ኢጻሳ፤ ሄሳ ጊሻስ ጾሲ ኔ ጎዳይ ኔና ኔ ላጌታፔ ቦላ ኬሲዴስ፤ ኔና ኡፋይሳ ዛይቴ ቲይዴስ» ጌስ። 
ቃሴ፥ «ጎዶ! ኮይሮ ኔኒ ቢታ ሜꬋዳሳ፤ ሳሎቲካ ኔ ኩሼን ኦሴቲዳ። 
ኢስቲ ꬋያና፤ ኔኒ ጊዲኮ ሚና ዳና፤ ኢስቲ ዉሪካ ማይኦ ማላ ጋልኣና። 
ኔኒ ኢስታ ማይኦ ማላ ቃላምኣና፤ ኢስቲካ ማይኦ ማላ ላሜታና፤ ኔ ጊዲኮ ኣይዴካ ኔኒ ኔና፤ ኔ ዱሳስ ዉርሴꬂ ዴና» ጌስ። 
ጾሲ ኪታንቻታፔ፥ «ታኒ ኔ ሞርኬታ ኔ ቶሆ ጋርሳን ዬꬊሳና ጋካናስ ኔ ታ ኡሻቻን ኡታ» ኦና ጊዴ? 
ኪታንቻቲ ዉሪካ ኣቶቴꬅ ላታና ኣሳታ ኦꬃናስ ጾሳፌ ኪቴቲዛ ኦሳንቻ ኣያና ጊዴቴኔ? 
