﻿ጳዉሎሲ ኦሮሜ ኣሳስ ኣꬊዳ ኪታ.
1.
ዬሱስ ኪርስቶሳ ኣይሌኔ ሃዋሬ ጊዳናስ ጼይጌቲዳ ሚሺራቾ ቃላ ዮታናስ ጳዉሎሳፔ ኪቴቲዳ ኪታ። 
ሄ ሚሺራቾ ቃላ ጊሻስ ካሴ ናቤታ ባጋራ ጌሻ ማጻፋታን ኡፋይሲ ኢሜቲዴስ። 
ሚሺራቾ ቃላይካ ባ ናዛ ጊሻስ ኢዚ ኣሾ ባጋራ ዳዊቴ ዜሬꬃፌ ጊዲዳይሳ ዮቲዛ ጊሻሳ። 
ሄሳꬆካ ኑ ጎዳ ዬሱስ ኪርስቶሲ ባ ጌሻቴꬃ ኣያናን ሃይቆፔ ዴንዲዳይሲ ኢዚ ጾሳ ና ጊዲዳይሲ ጊታ ዎልቃን ቆንጪዴስ። 
ኪርስቶሳ ሱንꬃ ጊሻስ ኣማኖንታ ዴሬይ ኣማናና ማላኔ ኣዛዜታና ማላ ኢዛ ባጋራ ኑኒ ሃዋራቴꬃስ ጋꬂዛ ኪያቴꬅ ኤኪዶስ። 
ኢንቴካ ዬሱስ ኪርስቶሳይታ ጊዳና ማላ ጼይጌቲዳይታራ ዴታ። 
ጾሳን ዶሴቲዳይታኔ ጌሻታ ጊዳናስ ጼይጌቲዳ ኦሮሜ ቢታን ዲዛ ኡባስ ኑ ኣዋ ጾሳፌኔ ኑ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። 
ኢንቴ ኣማኖይ ኩሜꬃ ኣላሜን ሲዬቲዳ ጊሻሲኔ ኢንቴ ጊሻስ ታ ጎዳ ጾሳ ዬሱስ ኪርስቶሳ ባጋራ ጋላታይስ። 
ታ ኢንቴ ጊሻስ ኡባ ዎዴ ኣይ ማላ ቆፒዛኮኔ ጾሳ ና ሚሺራቾ ሳባኮን ታ ኩሜꬃ ዎዚናፔ ኢዛስ ኦꬂዛ ጾሳይ ታስ ማርካ። 
ታኒ ታ ዎሳን ኡባ ዎዴ ኢንቴና ቆፓይስ፤ ሃኢ ቃሴ ዉርሴꬃን ጾሳ ሼኔ ጊዲኮ ታ ኢንቴኮ ባና ማላ ጾሲ ታስ ኦጌ ዶያና ማላ ዎሳይስ። 
ኢንቴ ሚናና ማላ ማዲዛ ኣያና ኢሞታ ታ ኢንቴ ጊሻሲኔ ኢንቴና ኣይፌራ ቤያናስ ላሞታይስ። 
ሄሲካ ኢንቴኒኔ ታኒ ኢሶይ ኢሳራ ኣማኖን ሚኔታናሳ። 
ታ ኢሻቶ! ሃራሶን ኣማኖንታይታ ማታን ታስ ሃኒዳ ማላ ኢንቴ ማታንካ ታስ ኦሶ ኣይፌይ ቤታና ማላ ዳሮ ዎዴ ቆፓዲስ ሺን ሃኖ ጋካናስ ታ ዲጌታዳ ዲዛይሳ ኢንቴ ኤራና ማላ ኮያይስ። 
ታማርዳይታስ ጊዲን ታማሮንታይታስካ፥ ኤራታሲኔ ኤያታስ ኡባስ ታ ቦላ ታማርሳና ኣጮይ ዴስ። 
ኢንቴስ ኦሮሜን ዲዛይታስካ ታኒ ሚሺራቾ ቃላ ዮታናስ ታ ኣሞቲዛይ ሄሳሳ። 
ኣማኒዛይቲ ዉሪ ኣታና ማላ ጾሳ ዎልቃ ጊዲዳ ጊሻስ ታኒ ሚሺራቾ ቃላን ዬላቲኬ፤ ሄሲካ ኮይሮ ኣይሁዳታስ ካሊዲ ኣይዛቤታሳ። 
«ጺሎይ ጾሳ ኣማኖን ዴስ» ጌቴቲዲ ካሴ ጻፌቲዳ ማላ ጾሳ ጺሎቴꬂ ሚሺራቾ ቃላን ቆንጪና፤ ሄ ጺሎቴꬃይ ኮይሮፔ ዉርሴꬅ ጋካናስ ኣማኖን ሃናና። 
ቱማ ባ ኢታቴꬃኒኔ ማካላን ቱጪ ኦይኪዛይታ ኢታቴꬃ ቦላኔ ኢስታ ማካላቴꬃ ኡባ ቦላ ጾሳ ሃንቆይ ሳሎፔ ቆንጫና። 
ኢስቲ ኤራናስ ቤሲዛዝ ጾሲ ኡባ ኢስታስ ቆንጪሲዳ ጊሻስ ኢስቲ ጾስ ኤራናስ ቆንጬ ጊዲዴስ። 
ኣላሜይ ሜꬌቶሶፌ ሃ ሲሚን ኣሳ ኣይፌን ቤቲ ኤሮንታ ጾሳ ሃኖቴꬂ ሄሲካ ኢዛስ ዲዛ ሜርና ዎልቃይኔ ጾሳቴꬃይ ኢዚ ሜꬊዳ ሜꬌቴꬃን ቆንጬን ቤቴስ፤ ሄሳ ጊሻስ ኣሳይ ሺሻና ጋሶይካ ዴና። 
ኢስቲ ጾስ ኤሪኮካ ኢዛ ጾሳቴꬃ ማላ ኢዛ ቦንቺቤቴናኔ ጋላቲቤቴና፤ ጊዶ ኣቲን ኢስታ ቆፋይ ሜላ ጎኣይ ባይንዳዝ ጊዲዴሲኔ ዩሺ ቆፖንታ ማላ ኢስታ ዎዚናይ ꬉሚዴስ። 
ኢስቲ ባና፥ «ኤራ» ጊዛይታ ጊዲኮካ ኤያታ ጊዲዳ። 
ሜርና ጾሳ ቦንቾ ሃይቂዛ ኣሳኒኔ ካፎታን፤ ሜሄታኒኔ ቢታ ቦላ ጎሼቲዛ ሜꬌቴꬃታን ሚሳቲሲዲ ላሚዳ። 
ሄሳ ጊሻስ ጾሲ ኢስታ ባ ጊዶን ኢሶይ ኢሳራ ባርካ ባ ኣሳቴꬃን ቱና ኦሶ ኦꬃና ማላ ጌሻቴꬂ ባይንዳ ላይማቴꬃስ ኣꬂ ኢሚዴስ። 
ኢስቲ ጾሳ ቱማቴꬅ ዎርዶን ላሚዳ፤ ሜꬊዳ ጾሳ ኣጊዲ ሜꬌቴꬃስ ጎይኒዳኔ ኢስታስ ኦꬂዳ፤ ሜꬊዳ ጾሲ ኢዚ ሜርናስ ጋላቴቲዳይሳ። ኣሚን። 
ሄሳ ጋሶን ጾሲ ኢስታ ዬላቺዛ ኣሞቴꬃስ ኣꬂ ኢሚዴስ፤ ኢስታ ማጫሳቲ ካሴ ሎሴቲዳ ጋይቶቴꬃ ዎጋ ሎሴይ ባይንዳ ዎጋን ላሚዳ። 
ሄሳꬆካ ኣቱማ ኣሳይ ባስ ቤሲዛ ማጫሳታራ ዚንኣናይሳ ኣጊዲ ኣዴይ ኣዴራ ዚንኣናስ ኣሞን ጹጌቲዲ ማጫሳታራ ዚንኢዛ ማላ ኣዴይ ኣዴራ ዚንኢዲ ፓላ ሚሽ ኦꬂዳ፤ ሄይታንቲ ባርካ ባ ኦꬂዳ ኢታ ኦሶዛስ ቤሲዛ ቂጻቴ ባ ቦላ ኤሂዳ። 
ቃሴካ ኢስቲ ባ ቆፋራ ጾስ ኤሮይ ኑና ማዴና ጊዳ ጊሻስ ኢስቲ ኦꬃናስ ቤሶንታይሳ ኦꬃና ማላ ጾሲ ኢስታ ጎኦንታ ቆፋስ ኣꬂ ኢሚዴስ። 
ኡባ ባጋራ ማካላኔ ኢታቴꬅ፥ ዪቄኔ ኢታ ኦሶን ጻላላ ኩሚዳ፤ ቃናቴቴꬃን፥ ሼምፖ ዎꬎን፥ ኦሻን፥ ባሌꬆኒኔ ጌኔን ኩሚዳይታ ቃሴካ ዚጊርዛይታ ጊዲዳ። 
ኣሳ ሱንꬅ ሞሪዛይታ፥ ጾስ ኢጺዛይታ፥ ኣስ ጫዪዛይታ፥ ኦቶራንቻታኔ ጬቄቲዛይታ ጊዲዳ፥ ኡባ ዎዴ ኢታ ኦꬃናስ ኦጌ ኮይዛይታ፥ ባና ዬሊዳይታስ ኣዛዜቶንታይታ፥ 
ዩሺ ቆፖንታይታ፥ ጊዳ ቃላ ዛሪ ላሊዛይታ፥ ኣሳስ ሚሼቶንታይታ፤ ሜንጼ ኢታታ። 
«ሄሳ ኦꬂዛይቲ ዉሪካ ሃይቃናስ ቤሴስ» ጊዛ ጾሳ ዎጋ ኢስቲ ኤሪሼ ሄይታንታ ባስ ኦሶ ጻላላ ጊዶንታ ሄሳꬆ ኦꬂዛይታካ ሚንꬄꬄቴስ። 
