﻿ዛካራሳ ቲንቢቴ.
13.
ኡባፌ ዎልቃማ ጎዳይ፥ «ሄ ጋላስ ዳዊቴ ኬꬃ ኣሳኔ ዬሩሳላሜን ዲዛ ኣሳ ናጋራፔኔ ቱናቴꬃፌ ጌሻናስ ፑልቶይ ፑልታና። 
«ታኒ ሄ ዎዴ ቢታፌ ኤቃ ጾሳታ ሱንꬅ ꬋይሳና፤ ሄሳፌ ናምኣንꬆ ኢስቲ ቆፌቴቴና፤ ኢስታ ናቤታኔ ቱና ኣያናታ ቢታይ ቦላፌ ታ ዲጋና። 
ኦኒካ ታኒ ናቤ ጊኮ ኢዛዴ ዬሊዳ ኣዋይኔ ኣዬያ ኢዛ ኔ ጎዳ ሱንꬃን ዎርዶ ሃሳይዳ ጊሻስ ኔስ ሃይቆይ ቤሴስ ጌቶ፤ ኢዚ ቲንቢቴ ሃሳይሺን ኢዛ ዬሊዳይቲ ኢዛ ጫዴቶ። 
ሄ ዎዴ ዎርዶ ሃሳይዳዴይ ኦኒካ ባ ሃሳይዳ ዎርዶ ቲንቢቴን ዬላታና፤ ባሌꬃናስ ኢስኬራ ዲዛ ናቤታ ማይኦ ማይኤና። 
ኢዚካ፥ ‹ታ ጎሻ ኣሳ ኣቲን ናቤ ጊዲኬ፤ ታ ናቴቴꬃፌ ዶማዳ ሃኖ ጋካናስ ጎሻንቻ› ጋና። 
ኢሲ ኣሲ፥ ‹ሄሲ ኔ ቦላ ኣይ ማዱንꬄ?› ጊ ኦይቺኮ ኢዚ፥ ‹ታ ሃይሳ ታ ላጌታሶን ዳሼ ማዱንጻዲስ› ጊዴስ። 
«ኡባፌ ዎልቃማ ጎዳይ፥ ‹ማሻ! ታ ሄንꬃንቻ ታ ዳሮ ዶሲዛይሳ ቦላ ቤጋ! ሄሚዛይሳ ሾጫ፤ ዶርሳቲካ ላሌታና፤ ታኒካ ታ ቄሴ ጉꬃታ ቦላ ዴንꬃና› » ጌስ። 
ጎዳይ፥ «ቢታ ኡባን ዲዛ ሄꬑ ኩሼ ኣሳፔ ናምኡ ኩሼይ ꬋያና፤ ኢሲ ኩሼ ኣሲ ኣታና። 
ሄ ኣቲዳ ኢሲ ኩሼ ኣሳ ታ ጌዴ ታማን ዬጋና፤ ቢራ ታማን ጌሺዛ ማላ ታ ጌሻና፤ ዎርቃ ማላካ ፓጫና፤ ኢስቲ ታ ሱንꬅ ጼይጋና፤ ታኒካ ኢስታስ ኮያና፤ ታ ኢስታስ፥ ‹ታ ዴሬታ› ጋና፤ ኢስቲካ፥ ‹ኑ ጎዳ› ጋና» ጊዴስ። 
