﻿ሚኪያሳ ቲንቢቴ.
4.
ዉርሴꬃ ዎዴ ጾሳ ኬꬂ ኢዛ ቦላ ዲዛ ዙማይ ሃራ ዙማ ኡባፌ ኣꬊ ቤታና፤ ሃራ ዙማታፔ ቦላራ ꬎቁ ጋና፤ ዴሬይካ ኢዛኮ ጎቻና። 
ዳሮ ካዎቴꬃቲ ኢዛኮ ዪዲ፥ «ጾሳ ዙማኮ ሃ ዪቴ፤ ያቆቤ ጎዳኮ ኣኔ ቦስ፤ ኑ ኢዛ ኦጌራ ባና ማላ ኑና ኢዚ ባ ኦጌ ታማርሳና» ጊዳ፤ ዎጋይ ጺዮኔፔ፥ ጾሳ ቃላይ ቃሴ ዬሩሳላሜፔ ያና። 
ኢዚ ዳሮ ኣሳ ጊዶን ፒርዳና፤ ሃሆኒኔ ማታን ዲዛ ዎልቃማ ካታማ ጊዶን ዲዛ ኦሽ ኤሳና፤ ኢስቲ ባ ጊꬃ ማሻ ማራሻ፥ ባ ቶራካ ባጫ ሂስቲ ቆጻና፤ ኢሲ ካዎይ ሃራ ካዎ ቦላ ማሻ ዴንꬄና፤ ሄሳፌ ጉዬ ኢስቲ ኦላ ቲሚርቴ ታማሬቴና። 
ኢሲ ኣሲ ባ ዎይኔ ሚꬃ ጋርሳንካ ባ ባላሴ ሚꬃ ጋርሳን ኡታና፤ ኢስታ ባቢሲዛ ሚሺ ዴና፤ ኡባፌ ዎልቃማ ጎዳ ዶናይ ሃይሳ ዮቲዴስ። 
ሃንኮ ዴሬይ ባ ኤቃ ሱንꬃን ቤስ፤ ኑኒ ቃሴ ሜርናፔ ሜርና ጋካናስ ኑ ጎዳ ሱንꬃን ባና። 
ጎዳይ፥ «ታኒ ሄ ጋላስ ጉንዲዳይታ ሺሻና፤ ቤቴ ቢዳይታኔ ሙዞታና ማላ ታ ኣꬃ ኢሚዳይታ ኡባ ኢሲሶ ሺሻና። 
ጉንዳታፔ ኣቲዳይታኔ ቆሄቲዳይታ ታ ኢስታ ሚኖ ዴሬ ኬሳና፤ ሄ ጋላሳይፌ ዶሚዲ ሜርና ጋካናስ ጎዳይ ጺዮኔ ዙማን ኢስታ ቦላ ካዎታና። 
ሃይሶ ኔናን ኡቲዲ ሜሄ ሄሚዛ ꬎቃ ዙማዞ! ጺዮኔ ማጫ ናይታ ናጋና ጊጋ ኡቲዳ ዙማዞ! ቤኒ ኔ ሃሪዛ ዴሬይ ኔስ ሲማና፤ ኔ ካዎቴꬃይ ዬሩሳላሜ ማጫ ናይስ ጊዳና። 
ሂስቲን ኔ ሃኢ ኣዛስ ዋሳይ? ኔስ ካዎይ ባዬ? ኔኒ ሚጻይ ኦይኪዳ ማጫሳይ ማላ ኡንኤቲዳይ ኔና ዞሪዛይ ꬋይኔ? 
ሃኔ ጺዮኔ ማጫ ናዬ! ሚጻቲዛ ማጫሳይ ማላ ኔ ሜቶታና፤ ሃኢ ቃሴ ኔ ካታማፔ ጌዴ ኬዛዳ ጮ ዴምባን ዴኣና ቤሲዛ ጊሻስ ባቢሎኔ ባና፤ ኔ ሄ ባዳ ሄን ኔ ሞርኬታ ኩሼፔ ኣታና፤ ጎዳይ ኔና ሄን ኔ ሞርኬታፔ ኣሻና። 
ሃኢ ቃሴ ዳሮ ሃንኮ ዴሬ ኣሳይ ኔ ቦላ ሺቂዴስ፤ ኢስቲካ፥ ‹ሃና ቱኒዳዝ ጊዱ! ኑ ኣይፌይ ጺዮኖ ቂꬌን ጼሎ› ጋና። 
ጊዶ ኣቲን ኢስቲ ጾሳ ቆፋ ኤሬቴና፤ ቡኬታናስ ባሌን ሺቂዛ ሚርቄ ካꬃ ማላ ባና ሺሺዛዴ ቆፋ ኢስቲ ኤሬቴና። 
ሃኔ ጺዮኔ ናዬ ዴንዳዳ ካꬃ ቡካ፤ ታ ኔስ ቢራታ ካጬኔ ጻርቂማላ ጹጉንꬅ ኢማና፤ ኔካ ሃንኮ ዴሬዛ ኢዛን ሊቂሳና» ጊዴስ። ኢስቲ ጌኔን ሺሺዳይሳ ጾሳስ፥ ኢስታ ሃሮካ ኡባ ቢታ ኡባ ሃሪዛ ጎዳስ ኔ ሺሻንዳሳ። 
