﻿ዮናሳ ቲንቢቴ.
2.
ዮናሲ ሞሌዛ ኡሎን ዲሼ ባ ጎዳኮ፥ 
«ታኒ ቱጋ ጊዶን ዳሼ ጎዳ ጼይጊን ኢዚ ታስ ኮዪዴስ፤ ታኒ ሃይቂዳይቲ ዲዛ ጪማ ጊዶን ዳሼ ኔኮ ዋሳዲስ፤ ኔካ ታ ዋሶ ሲያዳሳ። 
ኔ ታና ጪማ ኣባ ጊዶ ዱጌ ዬጋዳሳ፤ ሃꬂ ታና ዶዲዴስ፤ ኔ ዳምባላይ ታ ቦላራ ኣꬊዴስ። 
ሄሳ ጊሻስ ታኒ፥ ‹ታ ኔ ሲንꬃፌ ዎራ ኦሌታዲስ፤ ጊዲኮካ ታ ኔ ጌሻ ኬꬃ ቃሴካ ዛራ ቤኣና› ጋዲስ። 
«ሃꬃይ ታስ ቆꬌ ጋካናስ ሚቲዴስ፤ ጪማ ኣባይ ታና ሚቲዴስ፤ ኣባ ጊዶን ዲዛ ማታይካ ታ ሁኤ ቦላ ጻጼቲዴስ። 
ታኒ ዙማታ ጋርስ ዱጌ ዎꬋዲስ፤ ሄን ቢታ ጋርሳን ሜርናስ ጎርዳን ኡታዲስ፤ ጊዲኮካ ኣቤት ታ ጎዳዉ! ኔኒ ታ ሼምፖ ጪማ ኦላፌ ኬሳዳሳ። 
«ታኒ ሃይቃና ማቲዳ ዎዴ ኔና ጎዳ ቆፓዲስ። ታ ዎሳይካ ኔኮ ፑዴ ጌሻ ኬꬅ ጋኪዴስ። 
ሃዳ ኤቃታ ካሊዛይቲ ዉሪ ኔናን ጎዳን ኣማኔታናይሳ ኣጊዳ። 
ጊዶ ኣቲን ታ ጋላታ ኔስ ያርሻና፤ ታ ኣዲኔቲዳይሳ ኡባካ ጋꬃና፤ ኣይስ ጊኮ ኣቶቴꬂ ጎዳፔ ዬስ» ጊ ዎሲዴስ። 
ሄሳፌ ጉዬ ጎዳይ ሞሌዛ ኣዛዚን ሞሌዚ ዮናሳ ቢታ ቦላ ጮዪዴስ። 
