﻿ኣሞጼ ቲንቢቴ.
1.
ኦዚያይ ዩሁዳ ካዎ፤ ሄሳꬆካ ኢዮኣሳ ና ኢዮርባኣሜይ ኢስራኤሌ ካዎ ጊዲ ዲሺን ሄሲካ ቢታይ ቃጻናፔ ናምኡ ላይꬃፌ ሲንꬃን ኢስራኤሌ ጊሻስ ቴቁሄን ሜሄ ሄሚዛይታ ጊዶፌ ኣሞጼይ ቤኢዲ ዮቲዳ ቃላይ ሃይሳፌ ካሊ ዲዛይሳ፤ 
ኣሞጼይ፥ «ጎዳይ ጺዮኔፔ ባ ቃላ ꬎቁ ሂስቲ ሲሴስ፤ ዬሩሳላሜፔ ጊሬስ፤ ሜሄይ ሄሜቲዛሶቲ ሜላና፤ ቃርሜሎሴ ዙማን ዲዛ ጪሊላቲ ሹላና» ጊዴስ። 
ጎዳይ ኣራሜስ፥ «ዳማስቆ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ጋላኣዴ ኣሳ ቢራታ ኣቻራ ዲዛ ካꬅ ቡኪዛ ሎዳን ቡኪዳ። 
ካዎ ኣዛሄሌ ኬꬃን ታማ ዬዳና፤ ሄ ታማይ ካዎ ቤኒ-ሃዳዴ ሚጻታ ማና። 
ዳማስቆ ካታማ ፔንጌታ ታ ሜንꬄሬꬃና፤ ቤቲ-ኤዴኔ ዴሬ ካዎዛኔ ኣዌ ዙላን ዲዛ ኣሳ ታ ꬋይሳና፤ ኣራሜ ዴሬ ኣሳይካ ዲኤቲዲ ጌዴ ቂሬ ዴሬ ባና» ጌስ። 
ጎዳይ ፊሊስጼሜስ፥ «ጋዛ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስታ ዴሬዛ ኡባ ዲኢ ኤፊዲ ኤዶሜስ ባይዚዳ። 
ኢዚ ጊምቤታ ማና ማላ ጋዛ ሚጻን ታኒ ታማ ዬዳና። 
ኣስቄሎና ዴሬ ካዎዛኔ ኣሽዶዴ ዴሬ ኣሳ ታ ፒታ ꬋይሳና፤ ፊሊስጼሜን ዲዛይቲ ዉሪ ዉራና ጋካናስ ታኒ ታ ኩሼ ኣቃሮኔ ቦላ ዴንꬃና» ጌስ። 
ጎዳይ ጺሮሴስ፥ «ጺሮሴ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ባ ኢሻቴꬃ ጫቆ ቃላ ላሊዲ ባ ዲኢዳ ዴሬዛ ኡባ ኤዶሜስ ባይዚዳ። 
ሄሳ ጊሻስ ታኒ ጺሮሴ ካታማ ጊምቤታ ቦላ ታማ ዬዳና፤ ሄ ታማይ ኢዚ ሚጻታካ ማና» ጌስ። 
ጎዳይ ኤዶሜስ፥ «ኤዶሜ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ባ ኢሻታ ኢስራኤሌ ናይታስ ቃꬌቶንታ ማሻን ጎዲዳ፤ ባ ሃንቆ ዶሺሶንታ ኤጺዲ ኢስታስ ሚሼቶንታ ኡባ ዲፒ ሂስቲዳ። 
ሄሳ ጊሻስ ታኒ ቴማኔ ጊምቤታ ቦላ ታማ ዬዳና፤ ሄ ታማይ ቦጺራ ሚጻታካ ማና» ጌስ። 
ጎዳይ ኣሞኔስ፥ «ኣሞኔ ኣሳይ ዛሪ ዛሪዲ ኦꬂዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ዴሬ ዛዋ ኣሳናስ ጋላኣዴ ዴሬ ሻራ ማጫሳታ ኡሎ ዳኪዳ። 
ሄሳ ጊሻስ ኤራባ ካታማ ጊምቤታ ቦላ ታኒ ታማ ዬዳና፤ ሄ ታማይ ኢስታ ሚጻታ ማና። ሄሳፌ ጉዬ ኦላ ጋላሳን ዋሶይ ዳራና፤ ኦላዚካ ጎቴ ጫርኮ ማላ ኤሶታና። 
ኢስታ ካዎይኔ ዳናቲ ዲኤታና» ጌስ። 
