﻿ኢዩኤሌ ቲንቢቴ.
1.
ሲንꬃፌ ሃናናይሳ ጾሲ ኢዩኤሌስ ዮቲዳ ቃላይ ሃይሳ፤ 
ኢንቴ ጪማቲ ሃይሳ ሲዪቴ፤ ዩሁዳ ዴሬን ዲዛይቲ ዉሪካ ሃይሳ ኤዝጊ ሲዪቴ። ሃይሳ ማላ ሃኖይ ካሴ ኢንቴ ዎዴ ጊዲን ዎይኮ ካሴ ኢንቴ ኣዋታ ዎዴ ሃኒ ኤሪዜ? 
ኢንቴ ሃይሳ ኢንቴ ናይታስ ዮቲቴ፤ ኢንቴ ናይቲ ቃሴ ባንታ ናይታስ ዮቴቶ፤ ናይታ ናይቲካ ካሊዛ ዬሌታስ ዮቴቶ። 
ጎንዶይ ሚሺን ኣቲዳ ካꬃ ቢታ ማቴ ቦሌይ ሚዴስ፤ ኢዛፔ ኣቲዳይሳ ኡሾ ጫርኮꬆ ሾጪዛ ዲኦ ማላ ቦሌይ ꬋይሲዴስ፤ ኢዛፔ ኣቲዳይሳ ቃሴ ጉምባሮይ ሚዴስ። 
ሄሳፌ ጉዬ ዎይኔ ኡሹ ኢንቴ ዴሞንታ ጊሻስ ዬኪቴ፤ ኢንቴኖ ማꬆቲዛይቶ! ኢንቴ ꬊስኪዛሶፔ ቤጊዲ ዋሲቴ፤ ኢንቴኖ ዎንታን ዎንታን ዎይኔ ኡሹ ኡዪዛይቶ! ጫሞ ዬሆ ዬኪቴ። 
ቆዳይ ባይንዳ ቦሌይ ኦላ ኣሳ ማላ ታ ዴሬዛ ቦላ ዪዴስ፤ ኢዛ ኣቻይ ጋሞ ኣቻ ማላ፤ ኢዛ ጋጊና ኣቻይ ማጫ ጋሞ ጋጊና ኣቻ ማላ። 
ታ ዎይኔ ሚꬃ ኣይፌዛ ሙሌራ ꬋይሲዴስ፤ ባላሴ ጌቴቲዛ ሚꬃ ኡባ ሜንꬄሬꬂዴስ፤ ሚꬃ ሃጋቲ ሙሌራ ቦጻና ጋካናስ ፖቆዛ ሙሌራ ፖቂ ዴንꬂቺዴስ። 
ሄሳ ጊሻስ ኢዞ ኤካና ጊግሲዳይሲ ሃይቂን ማቃ ማይኣዳ ዬኪዛ ጌላኦይ ማላ ኢንቴካ ዬኪቴ። 
ጎዳ ኬꬃን ያርሾስ ሺቃና ካꬅ ጊዲን ዎይኮ ዎይኔ ኡሻይ ባይንዳ ጊሻስ ጎዳስ ኦꬂዛ ቄሴቲ ዬኬቴስ። 
ጎዪዲ ዜሪዳ ካꬃይ ሜሊ ꬋዪን ዎይኔ ሚꬃይ ቶኬቲዲ ሜሊዳ ጊሻስ ዛይቴይ ꬋይዴስ፤ ሄሳ ጊሻስ ቢታያ ዬካዉስ። 
ጊስቴይኔ ባንጋይ ሃራይካ ቦኔ ካꬂ ዉሪካ ꬋይዳ ጊሻስ ኢንቴኖ ጎሻንቻቶ ጬጪቴ፤ ኢንቴኖ፥ ዎይኔ ሚꬃታ ጎዳቲካ ዬኪቴ። 
ዎይኔ ሚꬃቲኔ ባላሴ ሚꬃቲ ሹሊዳ፤ ኦሮማኔኔ ቴሚሬ ሚꬃቲ፥ ላዴይኔ ሃራ ኣይፌ ኣይፊዛ ሚꬃቲ ዉሪካ ሜሊዳ፤ ሄሳ ጋሶን ኣዳፌ ኡፋይሲ ኣሳፔ ሃኪዴስ። 
ኢንቴ ኢንቴ ጾሳ ያርሾ ሺሺዛ ካꬅ ጊዲን ዎይኮ ዎይኔ ኡሺ ባይንዳ ጊሻስ ኢንቴኖ ታ ጎዳ ኦሳንቻታ ጊዲዳ ቄሴቶ! ኣኔ ሃ ዪዲ ማቃ ማይኢዲ ኩሜꬃ ኦማርስ ዬኪቴ። ኢንቴኖ ያርሾ ያርሺዛሶን ኦꬂዛይቶ! ኢንቴ፥ «ዉ! ዉይ!» ጊ ዋሲቴ። 
ዱማ ጾማ ጋላስ ኣዋጂቴ፤ ኣያና ሺቆስ ኣሳ ጼይጊቴ፤ ዴሬን ዲዛ ጪማታኔ ኣሳ ኡባ ኑ ጎዳ ኬꬃን ሺሺዲ ፑዴ ጎዳኮ ዋሲቴ። 
ኣዬ ኣና! ጎዳ ጋላሲ ማቲዴስ። ኡባ ዳንዳይዛ ጾሳይ ꬋይሲዛዝ ኤሂዛ ጋላሲ ጋኪዴስ። ሄ ጋላሳይስ ኣዬ ኣና! 
ካꬂ ኑ ሲንꬃፌ ꬋይዴስ፤ ኡፋይሲኔ ኢሊሲ ኑ ጾሳ ኬꬃፌ ሙሌ ꬋይዴስ። 
ዜሬቲዳ ካꬃይ ዉሪ ቢታ ጋርሳን ዎቂ ꬋይዴስ፤ ካꬂ ቢታፌ ꬋይዳ ጊሻስ ካሴ ካꬅ ዎꬂዛ ሚሻቲ ዉሪካ ሜላ ዴቴስ። ጎታራቲካ ላሌቲዳ። 
ሜሄይ ሚዛ ማታይ ጋዴን ባይንዳ ጊሻስ ሜሄቲ ኮሻቲዲ ዋሴቴስ፤ ዶርሳ ዉዴቲካ ማታይ ꬋዪን ዳሮ ዋዬ ቦላ ዴቴስ። 
ጎዳዉ! ዴምባ ማታ ኡባ ታማይ ሚዳ ጊሻስ ዎራ ሚꬃካ ታማይ ሚዳ ጊሻስ ታ ኔኮ ዋሳይስ። 
ሻፋቲ ሜሊዳ ጊሻስ ዴምባን ዲዛ ማታይ ዉሪካ ጹጌቲዳ ጊሻስ ዎራ ዶኣቲካ ኔኮ ዋሴቴስ። 
