﻿ኢሳያሳ ቲንቢቴ.
1.
ዩሁዳ ካዎታ ኦዚያ፥ ኢዮኣታሜ፥ ኣካዜኔ ሂዝቂያሳ ካዎቴꬃ ዎዴ ኣሞጼ ና ኢሳያሲ ዩሁዳ ጊሻሲኔ ዬሩሳላሜ ጊሻስ ቤኢዳ ኣጁታ። 
ጎዳይ፥ «ሳሎቶ ሲዪቴ! ቢታዬ ኔካ ኤዝጋ ሲያ! ታኒ ናይታ ዬላዳ ዲቻ ጋꬂን ኢስቲ ታ ቦላ ማካሊዳ። 
ቦራይ ባ ጎዳ ኤሬስ፤ ሃሬይ ኢዛ ጎዳይ ኢዛስ ጊግሲዳ ዜꬌካ ኤሬስ፤ ኢስራኤሌይ ጊዲኮ ታና ኤሬና፤ ታ ዴሬይካ ኣኬኬና» ጊዴስ። 
ኢንቴኖ ናጋራንቻ ካዎቴꬃቶ! ቆሆን ኩሚዳይቶ! ኢታ ኦꬂዛ ዜሬꬃቶ! ኢንቴ ኣዋታ ቱናቴꬃ ካሊዛ ናይቶ! ኢንቴና ኣዬ ኣና! ጎዳ ኣጋጊዴታ፤ ኢስራኤሌ ጌሻዛ ዬጊ ኣጊዴታ፤ ዞኮካ ኢዛስ ዛሪዴታ። 
ማካላ ቦላ ማካላ ጉጂዲ ኢንቴ ኣይስ ዛሪ ዛሪ ቃጻዬቴቲ? ኢንቴ ሁኤይ ሙሌ ሳኬቲዴስ፤ ኢንቴ ዎዚናይካ ዳቡርዴስ። 
ሄሳ ጋሶን ሂርኪ ቶሆ ጹጉንꬃፌ ቢዲ ሁኤ ኢስኬ ጋካናስ ፓጻቴꬂ ኢንቴስ ባዋ። ማዱንꬅ፥ ኪጻኔ ኡዛስ ጻላ ጊዲዴስ። ሄ ማዱንꬃይ ሜጬቲቤና፤ ቃሼቲቤና፤ ዛይቴንካ ሹጊቤና። 
ኢንቴ ዴሬይ ኣይኮይ ባይንዳ ባዞ ጊዳና፤ ኢንቴ ካታማቲ ታማን ጹጌታና፤ ኢንቴ ኣይፌይ ጼሊሺን ኢንቴ ቢታ ኣላጋይ ቦንቂ ኤካና፤ ኢስቲ ኢንቴ ቢታ ቡላ ኬሳና። 
ጺዮኔ ናያ ዎይኔ ሚꬃ ጊዶን ዲዛ ጋባ ማላ፥ ሌሌሄ ጊዶን ዲዛ ቄሪ ኬꬃ ማላኔ ሞርኬይ ጊዶꬂዳ ካታማ ማላ ጊዳዱስ። 
ኡባፌ ዎልቃማ ጎዳይ ኑስ ዜሬꬅ ኣሾንታኮ፥ ኑኒ ሶዶሜ ማላኔ ጋሞራ ማላ ጊዳናኮሺን። 
ኢንቴኖ ሶዶሜ ኣይሲዛይቶ! ጎዳ ቃላ ሲዪቴ፤ ኢንቴኖ ጋሞራ ዴሬቶ! ኑ ጾሳ ቲሚርቴ ኤዝጊ ሲዪቴ። 
«ኢንቴ ያርሾ ዳሮይ ታስ ኣይ ኦꬃኔ? ሃኖ ጋካናስ ኢንቴ ታስ ሺሺዳ ጹጌቲ ሺቂዛ ꬋርሾ ኣሾኔ ሞꬎ ሜሄታ ኣሾ ካላዲስ፤ ታኒ ቦራ ሱꬃን፥ ዶርሳ ሱꬃኒኔ ዴይሻ ሱꬃን ኡፋዬቲኬ። 
ኢንቴ ታስ ጎይናናስ ዪዛ ዎዴ ሄሳ ኡባ ኢንቴ ኤኪ ያና ማላኔ ታ ኬꬃ ዛጎ ኢንቴ ዬꬋና ማላ ኦኒ ኦይቺዴ? 
ሃይሳፌ ጉዬ ሃይሳ ሚሳቲዛ ሃዳ ያርሾ ናምኣንꬆ ሺሾፍቴ፤ ኢንቴ ጩዋሲዛ ኤጻኔይ ታና ሻቴስ፤ ኣጊና ጼሮን፥ ሳምባታ ጋላሳታኒኔ ኢንቴ ጎይኖስ ሺቂዛ ጋላሳታን ኢንቴ ቦንቺዛ ባኣሌቲ ኢታቴꬃን ኩሚዳ ጊሻስ ታኒ ሄይታ ጌንጫ ኣꬋናስ ዳንዳይኬ። 
ኣጊና ጼሮን ኢንቴ ቦንቺዛ ጋላሳታኔ ካሴ ኢንቴ ዎꬂዳ ባኣሌ ጋላሳታ ታ ሼምፖያ ሃራሴታዱስ፤ ሄይቲ ታስ ዳሮ ዴጾ ቶሆ ጊዲዳ ጊሻስ ታ ኢስታ ቶካናስ ዳንዳይኬ። 
ኢንቴ ኢንቴ ኩሼ ዎሳስ ታኮ ሚጪኮ ታኒ ታ ኣይፌ ኢንቴፌ ሃራሶ ዛራና፤ ኢንቴ ኩሼን ሱꬂ ኩሚዳ ጊሻስ ኢንቴ ኬሂ ዎሲኮካ ታ ኢንቴ ዎሳ ሲዪኬ። 
ሜጬቲቴ፤ ኢንቴና ጌሺቴ፤ ኢንቴ ኢታ ኦሶዛ ታ ሲንꬃፌ ዲጊቴ፤ ኢታ ኦሶካ ኣጊቴ። 
ሎኦ ኦሶ ታማርቴ፤ ሱሬ ፒርዳ ኮዪቴ፤ ቆሄቲዳይታ ሚንꬄꬂቴ፤ ዪኦታስ ኤቂቴ፤ ኣምኤታስ ሞቴቲቴ» ጊዴስ። 
ቃሴካ ጎዳይ፥ «ሃ ዪቴ ኢሶይ ኢሳራ ኣኔ ቡጼቶስ፤ ኢንቴ ናጋራይ ጼቃ ዞኦ ጊዲኮካ ሻቻ ማላ ቦታና፤ ሱꬃ ማላ ዞኢኮካ ፑቶ ማላ ፑቃ ቦꬅ ጊዳና። 
ኢንቴ ታስ ኤኖ ጊ ኣዛዜቲኮ ቢታ ኣንጆ ማና። 
ኢንቴ ታስ ኣካይ ጊ ማካሊኮ ማሻይ ኢንቴና ማና፤ ሃይሳ ዮቲዳይ ታና ጎዳ» ጊዴስ። 
ካሴ ኣማኔቲዳ ካታማያ ዋናዳ ላይማ ጊዳዴ? ካሴ ኢዚን ሱሬ ፒርዳይ ኩሚዳራኔ ጺሎቴꬂ ኢዚን ኩሚዳራ ሃኢ ጊዲኮ ሼምፖ ዎꬊዛይታስ ዱሳሶ ጊዳዱስ። 
ሃኔ ኔ ቢራይ ሺይዴስ፤ ኔ ዎይኔ ኡሻይ ሃꬃን ዬሌቲዴስ። 
ኔና ካሌꬂዛይቲ ማካላንቻታራኔ ካይሶታራ ላጌቲዳ፤ ኢስቲ ኡባይካ ማጋንጾ ዶሴቴስ። ማታኤካ ኬሂ ኮዬቴስ፤ ዪኦታስ ኣꬊ ኤቄቴና፤ ኣምኤታ ማጋና ሲዬቴና። 
ሄሳ ጊሻስ ጎዳይ፥ ኡባፌ ዎልቃማ ጎዳ ኢስራኤሌ ጾሳይ፥ «ታኒ ታ ሞርኬታ ቦላ ታ ሃንቆ ጉሳና፤ ታና ኮሚዛይታ ቦላካ ታኒ ሃሎ ኬሳና። 
ታኒ ታ ኩሼ ኔ ቦላ ዴንꬃና፤ ኔ ቦላ ዲዛ ኪንꬃካ ታ ጌሻና፤ ኔ ቂታካ ኔ ቦላፌ ዲጋና። 
ካሴ ኔና ኣይሲዛይታ ማላ ሃራ ኔና ኣይሳናይታኔ ዞራናይታ ታኒ ኔስ ዴንꬃና፤ ሄሳፌ ጉዬ ኔኒ፥ ‹ጺሎቴꬂ ዲዛ ኣማኔቲዳ ካታማዮ› ጌቴታና። 
ጺዮና ሱሬ ፒርዳን፥ ማሮቴꬃን ሲሚዛይቲ ጺሎቴꬃን ዎዜታና። 
ጊዶ ኣቲን ማካላንቻቲኔ ናጋራንቻቲ ኢሲ ቦላ ሊቃና፤ ጾሳ ኣጊዛይቲ ዉሪካ ꬋያና። 
ካሴ ኢንቴ ዶሲዛ ካሻታን ኢንቴ ዬላታና፤ ካሴ ኢንቴ ዶሪዳ ኣታኪልቴሶሆታን ኢንቴ ካዉያና። 
ዉርሴꬃን ኢንቴ ቦንጮይ ቆኪዳ ዎላ ማላ፥ ሃꬂ ባይንዳ ኣታኪልቴሶሆታ ማላ ጊዳና። 
ሚኖ ኣሲ ሃፓ ማላ፤ ኢዛ ኦሶይካ ፒልኢ ጊዛ ላጮ ማላ ጊዳና፤ ናምኣይካ ኢሲ ቦላ ጹጌታና፤ ሄ ታማ ቶይሳና ኣሲካ ዴና» ጊዴስ። 
