﻿ሲቆ ሳባ.
7.
«ካዎ ናዳ ሎኢዛሬ! ኔ ቶሆቲ ኔኒ ናጻላ ጫማ ኣꬃ ዲሺን ቤኢዛ ዎዴ ኣይ ማላ ሎኢዞ! ኔ ሼቻቲ ሂላንቻ ዎጋጬይ ቆጺዲ ሎኤꬂ ኣሌቂሲዳ ኢንቁ ሚሳቴስ። 
ኔ ጉልኣይ ዎይኔ ኡሺ ኩሚዳ ቢሪሌ ሚሳቴስ፤ ኔ ጼሳይ ሎኦ ጪሻን ቃሼቲዳ ጊስቴ ሚርቄ ሚሳቴስ። 
ኔ ꬋንꬃቲ ሜንቴ ዬሌቲዳ ዉሻ ላቃ ሚሳቴቴስ። 
ኔ ቆꬌይ ዳንጋርሳ ዛሌን ኣሌቄቲዳ ኣዱሳ ጊምቤ ሚሳቴስ፤ ኔ ኣይፌይ ጊታ ሃሴቦኔ ካታማ ፔንጌ ማታን ዲዛ ኤሌ ሃꬅ ሚሳቴስ፤ ኔ ሲꬌይ ዳማስቆ ጼሊሲዲ ጊምቢዳ ሊባኖሴ ጊምቤዛ ሚሳቴስ። 
ኔ ሁኤይ ቃርሜሎሴ ዙማ ሚሳቴስ፤ ኔ ሁኤ ቢናናይ ጻጼቲ ኡቲዳ ጺላታ ሚሳቴስ፤ ኔ ሁኤ ዳꬃይካ ካዎዛ ዎዚና ኤኪዴስ። 
ታ ጎዴ! ኔ ኣይ ማላ ሎኣይ! ኔ ኣይ ማላ ካይሻይ! ኔ ሲቆይ ታና ኣይ ማላ ኡፋይሲዜ! 
ኔ ጌሳይ ዛምባ ጌሳ ሚሳቴስ፤ ኔ ꬋንꬃይ ዛምባ ዉርጮ ሚሳቴስ። 
ታኒ ሃ ዛምባ ቦላ ኬዛና፤ ኬዛዳ ኢዛ ኣይፌታ ማጻና፤ ኔ ꬋንꬃቲ ዎይኔ ኣይፌ ማላ ዉርጮቲ ኡቲዳ፤ ቃሴ ኔ ፔኖይ ኣፒሌ ኣይፌ ማላ ሳዌስ። 
ኔ ሜቴርሻቲ ኤሳ ኢሊሎ ማላ ማልኤቴስ» ጊዴስ። ጌላኦያ «ሂስቲኮ ሄ ሎኦ ኢሊሎይ ታ ሲቆዛ ሜቴርሻታ ጊዶራኔ ኣቻታ ጊዶራ ዱጌ ዎሎሉ ጊ ጎጎ። 
ታኒ ታ ሲቆዛሳ፤ ኢዚካ ታና ኣሞቴስ። 
ታ ሲቆዞ! ሃ ያ፤ ናምኣይ ካታማፔ ኬዚዲ ኣኔ ጌዴ ጋጻሬ ቦስ፤ ሄን ኦማርስ ኣኔ ኢሲፌ ኣꬆስ። 
ማላዶ ዎንታራ ኣኔ ዎይኔ ኣታኪልቴ ጊዶ ቦስ፤ ዎይኔይ ጪዪዳኮ፥ ኦሮማኔይካ ኣይፊዳኮ ኣኔ ቤዮስ፤ ሄን ታኒ ታ ሲቆ ኔስ ቆንጪሳና። 
ኢንኮ ኣይፌ ሳዎይኔ ዱማ ዱማ ኣይፌ ኢሚዛ ኣታኪልቴቲ ኑ ካሬን ኩሚዳ፤ ታ ሲቆዞ! ሃ ኣይፌታፔ ቴሪዳይታኔ ኦራꬅ ማጼቲዳይታ ኔስ ዎꬃዲስ። 
