﻿ሲቆ ሳባ.
1.
ማዛሙሬ ኡባፌ ኣꬊዛ ሶሎሞኔ ማዛሙሬ። 
«ኔ ሲቆይ ዎይኔ ኡሻፌ ኣꬊ ኡፋይሴስ፤ ኔ ሜቴርሻን ዛራ ዛራዳካ ታና ዬራ። 
ኔ ቲዬቲዛ ሺቶይ ኣይ ማላ ሳዊዜ! ኔ ሱንꬃይ ጼይጌቲዛ ዎዴካ ኣይ ማላ ኡፋይሲዜ! ጌላኦቲ ኔና ሄሳ ጊሻስ ሲቄቴስ። 
ታና ኔናራ ኤካዳ ባ፤ ሃ ያ፥ ኣኔ ናምኣይ ኢሲፌ ዎጾስ! ታ ካዎ፥ ታና ኔ ቁሩጾ ጊዶ ጌልꬃ» ጋዱስ። ላጌቲ «ኢዛን ኑኒ ኣይ ኬና ኡፋዬቲዶኒ! ኑኒ ኢዛ ሲቆ ዎይኔ ኡሻፌካ ኣꬂዲ ናሾስ። ቱሙካ ማጫሳይ ኡባይ ኔና ሲቃናስ ቤሴስ» ጊዳ። 
«ኢንቴኖ ዬሩሳላሜ ማጫሳቶ፥ ሲዪቴ! ታኒ ካሬꬅ ጊዲኮካ ማላ ሎኦ። ታ ካሬꬃቴꬃይ ቄዳሬ ዱንካኔ ማላ፤ ጊዶ ኣቲን ታ ሜꬋይ ካዎ ሶሎሞኔ ኬꬃ ማጋላሻታ ማላ። 
ታ ሜꬋ ካሬꬂዳይ ኣዋ ሴላ፤ ታኒ ካሬꬅ ጊዲዳ ጊሻስ ታና ካꬎፒቴ። ታ ኣዪ ና ኢሻቲ ታናራ ኦዬቲዲ ታና ዎይኔ ኣታኪልቴ ናጋናስ ዎꬂዳ፤ ሄሳ ጊሻስ ታኒ ታይሳ ናጋቤኬ። 
ታ ሲቆዞ! ኣኔ ታስ ዮታ፤ ኔ ዶርሳ ዉዴ ሄሚዛይ ኣዋኔ? ጋላስ ኣዋፔ ኔ ኢስታ ጉሪሲዛይ ኣዋኔ? ኔና ዴማናስ ኔ ላጌታ ዉዴ ካላሼ ኣይስ ጮ ቶይላቲዛ ማጫሳ ማላ ጊዶ?» ጋዱስ። 
«ሃ ማጫ ኡባፌ ኣꬋ ሎኢዛ ማላንቻዬ! ታ ዲዛሶ ኤሮንታ ኣጊኮ ዶርሳቲ ቢዳ ጌዶ ካላዳ ያ፤ ኔ ዴይሻ ላቃታካ ሄንꬃንቻታ ዱንካኔ ማታን ሄማ።» 
«ታ ጎዴ! ጊብጼ ካዎስ ፓራ-ጋሬ ጎቺዛ ፓራታ ጊዶን ዲዛ ማጫ ፓራይ ማላ ሎኣሳ። 
ኔ ሻጋላሶይ ሎዡ ጊዴስ፤ ኔ ቆꬌይ ኢንቁ ጌቴቲዛ ሴሎን ኣሌቄቲዴስ። 
ኑኒ ኔስ ቢራን ኣሌቄቲዳ ዎርቃ ጌጼ ኦሲሳና» ጊዴስ። 
«ካዎይ ማዳን ኡቲ ዲሺን ታ ሺቶ ሳዎይ ኬꬃ ጊዶ ኡባን ቱኑ ጊዴስ። 
ታ ሲቆዚ ታ ꬋንꬃታ ጊዶን ዲዛ ሳዊዛ ካርቤ ጹንቴ ማላ። 
ታ ሲቆዚ ኤን-ጋዴ ጌቴቲዛ ዎይኔ ቶኪዛ ጋዴን ሞኪዳ ባዞ ጪሻ ማላ» ጋዱስ። 
«ታ ጎዴ! ኔኒ ኣይ ማላ ሎኣይ! ኔኒ ኣይ ማላ ሎኣይ! ኔ ኣይፌቲ ሃራጴ ማላ ሎኤቴስ» ጊዴስ። 
«ታ ሲቆዞ፥ ኔኒካ ኣይ ማላ ሎኣይ! ኔ ኬሃ ሎኣሳ፤ ኑ ሂꬃይ ጪሊላ ማታ ማላ ኡፋይሴስ» ጋዱስ። 
«ኑ ኬꬃ ቱሲ ሊባኖሴ ዚጋ፤ ካራይካ ጺዳን ኦሴቲዴስ» ጊዴስ። 
