﻿ኤራንቻታ ማጻፋ.
1.
ሃይሲ ዳዊቴ ና ዬሩሳላሜን ካዎቲዳ ኤራንቻዛ ቃላ። 
ሄ ኤራንቻይ፥ «ኡባ ሚሺ ሃዳ፤ ሃዳፔካ ኣꬊዳ ሃዳ፤ ኡባ ሚሺካ ሃዳ» ጌስ። 
ኣላሜ ቦላ ኣሳ ናይ ዳቡርዛ ዳቡራ ኡባስ ኣይ ዎꬌይ ዲዜ? 
ዬሌታይ ኣꬊ ቢሺን ሃራ ዬሌታይ ዬስ፤ ጊዶ ኣቲን ቢታያ ሜርናስካ ሚና ዴኣዉስ። 
ኣርሼይ ሞኬሲኔ ዉሌስ፤ ቃሴካ ባ ሞኪዛሶ ባናስ ኤሶቴስ። 
ጫርኮይ ዱጌሃ ባጋ ጫርኬስ፤ ሃራ ዎዴ ፑዴሃ ባጋ ሲሜስ፤ ቃሴ ዩዪ ዩዪ ኣꬊዲ ባ ሎሲዳ ኦጌን ጌሌስ። 
ሻፋ ሃꬅ ኡባይ ቢዲ ኣባን ጌሌስ፤ ጊዶ ኣቲን ኣባይ ሙሌካ ኩሚ ኤሬና፤ ሻፋ ሃꬃቲ ካሴ ባ ዪዳሶ ሲሚ ቤቴስ። 
ኣሲ ሃሳያናስ ዳንዳይዛዛፔ ቦላራ ዮኦቲ ኡባይ ሳሌꬂዛዛ፤ ኣይፌይ ጼሊዲ ካሊ ኤሬና፤ ሃይꬂካ ሲዪዲ፥ «ታስ ጊዲዴስ» ጊ ኤሬና። 
ካሴ ሃኒዳይ ሲሚ ኢዚ ሃናና፤ ቃሴ ሃኢ ሃኒሼ ዲዛይካ ካሴ ሃኒዳይሳ። ሄሳ ጊሻስ ሳሎ ጉፋንꬆን ኣይኮይካ ኦራꬃ ሚሺ ዴና። 
ኦኒካ፥ «ቤኢቴ! ሃይሲ ኦራꬃ ሚሻ» ጊኮ ሄሲ ኦራꬃ ሚሽ ጊዴና፤ ሄሲ ኑኒ ዬሌታናፔ ካሴካ ዲዛ ሚሻ። 
ቤኒ ዎዴ ሃኒዳ ሃኖታ ዛሪዲ ሃሳኢሲዛ ሚሺ ዴና፤ ሲንꬃፌ ያናይቲካ ኢስታፌ ካሊ ያናይታን ቆፌቴቴና። 
ታኒ ኤራንቻዚ ዬሩሳላሜን ኢስራኤሌስ ካዎ ጊዳዳ ዴኣዲስ። 
ታኒ ሳሎ ጉፋንꬆን ዲዛ ኡባ ሻካ ኤራናሲኔ ኣꬎ ኤራቴꬃን ፒልጋ ጼላናስ ታ ቆፋ ቃቻዲስ፤ ጾሲ ኣሳ ናይታ ቶሲዳ ቶሆይ ኣይ ማላ ዴጾ! 
ሳሎ ጉፋንꬆን ሃኒዳ ሃኖታ ኡባ ታ ቤኣዲስ፤ ጊዶ ኣቲን ኡባይካ ሃዳ፤ ጫርኮ ኦይካና ዬዴꬂዛ ማላ። 
ጌላቲዳ ሚሺ ሲቲ ጋናዉ ዳንዳዬና፤ ቃሴ ባይንዳ ሚሺ ቆዴታና ዳንዳዬና። 
ታኒካ ታ ዎዚናን፥ «ታፔ ካሴ ዬሩሳላሜ ሃሪዳ ኡባታፔ ታኒ ጊታኔ ኣꬎ ኤራንቻ ጊዳዲስ፤ ታኒ ኣꬎ ኤራቴꬃኒኔ ኤራን ኬሃ ሎሃዲስ» ጋ ቆፓዲስ። 
ቃሴ ታኒ ኣꬎ ኤራቴꬅ፥ ጎሻቴꬂኔ ኤያቴꬅ ሻካ ኤራናስ ኬሃ ባጼታዲስ፤ ጊዶ ኣቲን ዉርሴꬃን ሄሲካ ጫርኮ ኦይካናስ ዬዴꬂዛ ማላ ሃዳ ጊዲዳይሳ ኤራዲስ። 
ኣꬎ ኤራቴꬂ ዳሪሺን ጬጬይ ዳሬስ፤ ኤራይ ዳሪዛ ዎዴካ ሜቶይ ዳሬስ። 
