﻿ዬꬃ ማጻፋ.
119.
ባንታ ኦጌን ቦሬይ ባይንዳይቲኔ ጎዳ ዎጋ ማላ ሄሜቲዛይቲ ኣንጄቲዳይታ። 
ኢዚ ዮቲዳይሳ ኦꬂዛይቲኔ ባ ኩሜꬃ ዎዚናፔ ኢዛ ኮይዛይቲ ኣንጄቲዳይታ። 
ኢስቲ ማካላ ሚሽ ኦꬄቴና፤ ጎዳ ኦጌን ሄሜቴቴስ። 
ኔ ዎጋ ኣማኔቲዲ ናጋና ማላ ኔኒ ኑና ኣዛዛዳሳ። 
ኔ ዎꬂዳ ዎጋ ናጋናስ ታ ኦጌይ ሚናና ማላ ታ ኣሞታይስ። 
ኔ ኣዛዞታ ኡባ ታ ሎኤꬃ ኣኬኪኮ ሙሌካ ዬላቲኬ። 
ኔ ጺሎ ፒርዳ ታኒ ታማርዳ ኬና ሱሬ ዎዚናፔ ኔና ጋላታና። 
ታኒ ኔ ዎꬂዳ ማራታ ናጋና፤ ታና ሙሌካ ዬጎፋ። 
ናቴꬂ ባ ኦጌ ጌሻቴꬃን ዎስቲ ናጋናስ ዳንዳይዜ? ኔ ቃላይ ጊዛ ማላ ዴኢኮ ዳንዳዬስ። 
ታኒ ታ ኩሜꬃ ዎዚናፔ ኔና ኮያይስ፤ ኔ ኣዛዞታፔ ካሬ ኬዞንታ ማላ ታና ናጋ። 
ታኒ ኔ ቦላ ናጋራ ኦꬆንታ ማላ ኔ ቃላ ታ ዎዚናን ቆታዲስ። 
ኣቤት ጎዳዉ! ኔኒ ጋላቴታ! ኔ ማራ ታና ታማርሳ። 
ኔ ዶናፔ ኬዚዛ ማራ ኡባ ታኒ ታ ኢንጻርሳን ዮታይስ። 
ኣሲ ባ ዱሬቴꬃን ኡፋዬቲዛ ማላ ታኒ ኔኒ ኢሚዳ ማራ ካላሼ ኡፋዬታይስ። 
ኔ ዎꬂዳ ዎጋታ ዩሻ ቆፓይስ፤ ታ ዎዚናካ ኔ ኦጌታን ዎꬃዲስ። 
ኔ ኣዋጃይ ታና ኡፋይሴስ፤ ኔ ቃላካ ታኒ ዶጊኬ። 
ታኒ ሼምፖራ ፓጻ ዴኣና ማላኔ ኔ ቃላስ ኣዛዜታና ማላ፥ ታስ ኔ ኣይሌስ ሎኦ ሚሽ ኦꬃ። 
ኔ ዎጋ ጊዶን ዲዛ ማላሊሲዛ ቱማቴꬃ ታኒ ቤኣና ማላ ታ ኣይፌ ዶያ። 
ታኒ ሃ ሳኣን ኢማꬃ፤ ኔ ኣዛዞታ ታፔ ጌንꬆፋ። 
ታ ሼምፖያ ኡባ ዎዴ ኔ ማራ ዴማናስ ኬሃ ላሞታዱስ። 
ኔ ኣዛዞዛፔ ካሬ ኬዚዛይታ፥ ኦቶሬቲዛይታኔ ቃንጌቲዛይታ ኔኒ ሴራሳ። 
ታ ኔኒ ዮቲዳይሳ ናጊዳ ጊሻስ ኢስታ ጫሻኔ ካꬌዛ ታ ቦላፌ ዲጋ። 
ዴሬ ካሌꬂዛይቲ ኡባቲ ታ ቦላ ማቄቲኮካ ታኒ ኔ ኣይሌይ ኔ ኣዋጃታ ዩሻ ቆፓና። 
ኔ ማርካቴꬃቲ ታና ኡፋይሴቴስ፤ ኢስቲካ ታና ዞሬቴስ። 
ታ ሼምፖይ ኬዛና ሃኔስ፤ ኔኒ ጊዳ ቃላ ማላ ታና ኣሻ። 
ታኒ ታ ኦጌ ኡባ ኔስ ቆንጪሳዲስ፤ ኔኒ ታስ ሲያዳሳ፤ ኔ ኣዋጃታ ታና ታማርሳ። 
ኔ ማራ ታና ኣኬኪሳ፤ ማላሊሲዛ ኔ ኦሶ ታ ዩሻ ቆፓና። 
ታ ሼምፖያ ጬጬይ ዳሪዳ ጊሻስ ዳቡራዱስ፤ ኔኒ ጊዳ ቃላ ማላ ታና ሚንꬃ። 
ባሌꬂዛ ኦጌ ታፔ ሃሳ፤ ኔ ኪያቴꬃን ኔ ዎጋ ታና ታማርሳ። 
ታኒ ቱማ ኦጌ ዶራዲስ፤ ኔ ዎጋካ ታ ዎዚናን ዎꬃዲስ። 
ኣቤት ጎዳዉ! ታኒ ኔ ዮቲዳይሳ ሚንꬃ ኦይካዲስ፤ ኔ ታና ዬላስ ኣꬃ ኢሞፋ። 
ኔኒ ታ ዎዚና ኣሲዳ ጊሻስ ታኒ ኔ ኣዛዞ ኦጌን ዎጻይስ። 
ኣቤት ጎዳዉ! ኔ ኣዋጃታ ታና ታማርሳ፤ ታኒ ዉርሴꬂ ጋካናስ ኢዛ ናጋና። 
ታኒ ኔ ዎጋ ናጋና ማላኔ ኩሜꬃ ዎዚናፔ ኢዛስ ኣዛዜታና ማላ ኔኒ ታስ ኣኬካ ኢማ። 
ኔ ኣዛዞይ ታና ኡፋይሴስ፤ ሄሳ ጊሻስ ኔ ኦጌን ታና ካሌꬃ። 
ታ ዎዚና ቤሶንታ ጎኣስ ጊዶንታ ኔ ማራ ፖላና ማላ ዛራ። 
ፓꬆንታ ሚሽ ጼሎንታ ማላ ታ ኣይፌታ ናጋ፤ ኔ ቃላ ማላ ታ ዴኦ ኦራጺሳ። 
ኔስ ያያና ማላ ኔ ጌሊዳ ቃላ ታስ ኔ ኣይሌዛስ ፖላ። 
ኔ ፒርዳይ ሱሬ ጊዲዳ ጊሻስ ታኒ ያዪዛ ካዉሻቴꬃፌ ታና ናጋ። 
ታኒ ኔ ዎጋ ናጋናዉ ኣሞታይስ፤ ኔኒ ጺሎቴꬃን ታ ዴኦ ኦራጺሳ። 
ኣቤት ጎዳዉ! ኔ ሜርና ሲቆይ ታኮ ሃ ዮ፤ ኔኒ ጊዳ ቃላ ማላ ታና ኣሻ። 
ታኒ ኔ ቃላን ኣማኔታይስ፤ ታና ጫዪዛይታስካ ታኒ ዛሮ ኢማና። 
ታኒ ኔ ዎጋን ሂዶታ ኦꬃዲስ፤ ቱማ ቃላ ታ ዶናፔ ꬋይሶፋ። 
ታኒ ሜሪ ሜርናስካ ኔ ዎጋስ ኡባ ዎዴ ኣዛዜታና። 
ታኒ ኔ ዎጋ ሲቂዛ ጊሻስ ላኣን ሲሜሬታና። 
ታኒ ካዎታ ሲንꬃን ኤቃዳ ኔኒ ዮቲዳይሳ ዮታሼ ዬላቲኬ። 
ታኒ ኔ ኣዛዞታ ዶሳይስ፤ ኢስታንካ ኡፋዬታይስ። 
ታኒ ሲቂዛ ኔ ኣዛዞታ ቦንቻይስ፤ ኔ ኣዋጃታ ዩሻ ቆፓና። 
ኔኒ ታስ ኔ ኣይሌዛስ ኢሚዳ ቃላ ቆፓ፤ ሄሳ ጊሻስ ታኒ ሄ ቃላን ሂዶታ ኦꬃይስ። 
ኔ ቃላይ ታስ ዴኦ ኢሚዴስ፤ ሄሲ ሜቶ ዎዴ ታና ሚንꬄꬄስ። 
ኦቶራንቻቲ ታና ኬሂ ካꬊዳ፤ ጊዶ ኣቲን ታኒ ኔ ዎጋፔ ሼርኢ ጊኬ። 
ኣቤት ጎዳዉ! ቤኒሶፌ ዲዛ ኔ ዎጋ ታኒ ቆፓዲስ፤ ሄሳን ታኒ ሚኔታይስ። 
ኢታቲ ኔ ዎጋስ ኣዛዜቶንታይሳ ቤኣዳ ኬሃ ሃንቄታዲስ። 
ታኒ ኢማꬃቴꬃን ዴኢዛ ቢታን ኔ ዎጋይ ታስ ማዛሙሬ ጊዲዴስ። 
ኣቤት ጎዳዉ! ታኒ ጊዶꬅ ኔ ሱንꬃ ቆፓይስ፤ ኔ ዎጋካ ናጋይስ። 
ታ ኔ ዎጋስ ኣዛዜታና፤ ሄሲ ታስ ኦሶ ጊዲዴስ። 
ኣቤት ጎዳዉ! ታ ቃዳይ ኔና፤ ታኒ ኔ ቃላስ ኣዛዜታናስ ቃቻዲስ። 
ታኒ ኩሜꬃ ዎዚናፔ ኔና ኮያይስ፤ ኔኒ ጊዳ ቃላ ማላ ታስ ቃꬌታ። 
ታኒ ታ ኦጌ ጾሞሳ ጼላዲስ፤ ኔ ማራ ካላናስ ሲማዲስ። 
ታኒ ኔ ኣዛዞ ናጋናስ ኤሶታናፔ ኣቲን ታኪኬ። 
ኢታቲ ታና ኦይካና ጊቴ ዬጊዳ፤ ታኒ ጊዲኮ ኔ ዎጋ ዶጋቤኬ። 
ኔ ጺሎ ዎጋ ጊሻስ ታ ኔና ጋላታናስ ጊዶꬅ ዴንዳይስ። 
ታኒ ኔስ ያዪዛይታ ኡባሲኔ ኔ ዎጋ ናጊዛይታስ ላጌ። 
ኣቤት ጎዳዉ! ሳኣይ ኔ ሜርና ሲቆን ኩሚዴስ፤ ኔ ኣዋጃታ ታና ታማርሳ። 
ኣቤት ጎዳዉ! ኔ ጊዳ ቃላ ማላ ታስ ኔ ኣይሌዛስ ሎኦ ኦꬃዳሳ። 
ታኒ ኔ ኣዛዞታ ኣማናይስ፤ ሎኦ ፒርዳኔ ኤራቴꬅ ታና ታማርሳ። 
ታ ቃጻዬታናፔ ካሴ ኔ ዎጋፔ ካሬ ኬዛዲስ፤ ሃኢ ታኒ ኔ ቃላስ ኣዛዜታና። 
ኔኒ ሎኦ፤ ኔ ኦሶይካ ሎኦ፤ ሄሳ ጊሻስ ኔ ኣዋጃታ ታና ታማርሳ። 
ኦቶራንቻቲ ታ ሱንꬃ ዎርዶራ ሞሪዳ፤ ጊዶ ኣቲን ታኒ ኔ ዎጋ ታ ኩሜꬃ ዎዚናፔ ናጋይስ። 
ኢስታ ዎዚናይ ሙሌካ ዳሚዴስ፤ ጊዶ ኣቲን ታኒ ኔ ዎጋን ኡፋዬታይስ። 
ታኒ ቃጻዬቲዳይሲ ታስ ሎኦ ጊዲዴስ፤ ኔ ዎጋ ታማራና ማላ ታና ማዲዴስ። 
ዳሮ ሺ ቢራፔኔ ዎርቃፌ ኔ ዶናፔ ኬኢዳ ዎጋይ ታስ ኣꬌስ። 
ታና ኔ ኩሼይ ሜꬊዴሲኔ ጊግሲዴስ፤ ኔ ኣዛዞ ታኒ ታማራና ማላ ታስ ኣኬካ ኢማ። 
ታኒ ኔ ቃላ ሂዶታ ኦꬃዲስ፤ ሄሳ ጊሻስ ኔስ ያዪዛይቲ ታና ቤኢዲ ኡፋዬቴቶ። 
ኣቤት ጎዳዉ! ኔ ፒርዳይ ጺሎ ጊዲዳይሳኔ ኔኒ ታና ቃጻይዳይ ኣማኔቴꬃን ጊዲዳይሳ ታኒ ኤራይስ። 
ኔኒ ታስ ኔ ኣይሌዛስ ጌሊዳ ቃላ ማላ ኔ ሜርና ሲቆይ ታና ሚንꬄꬆ። 
ኔ ዎጋይ ታና ኡፋይሲዛ ጊሻስ ታኒ ሼምፖራ ፓጻ ዴኣና ማላ ታስ ቃꬌታ። 
ኦቶራንቻቲ ታና ዎርዶን ሞቲዛ ጊሻስ ዬላቴቶ። ታኒ ጊዲኮ ኔ ዎጋታ ዩሻ ቆፓይስ። 
ኔስ ያዪዛይቲኔ ኔ ኣዛዞ ኤሪዛይቲ ኡባይ ሃ ታኮ ሲሜቶ። 
ታኒ ዬላቶንታ ማላ ኔ ማራን ታ ዎዚናይ ቦሬይ ባይንዳዝ ጊዶ። 
ኔ ታና ኣሻና ማላ ታ ሼምፖያ ኬሃ ላሞታዱስ፤ ታኒካ ኔ ቃላ ሂዶታ ኦꬃዲስ። 
«ኣይዴ ታና ሚንꬄꬃንዴሻ?» ጉሳን ኔ ኢሚዳ ሂዶታ ቃላ ታ ናጊሺን ታ ኣይፌይ ዶልጁሚዴስ። 
ጩዋን ካቂዳ ሉካሞ ማላ ጊዳዲስ፤ ጊዲኮካ ኔ ኣዋጃታ ባላቤኬ። 
ታኒ ኔ ኣይሌይ ኣዉዴ ጋካናስ ዳኔ? ታና ዬዴꬂዛይታ ቦላ ኔኒ ኣዉዴ ፒርዳኔ? 
ኔ ዎጋ ናጎንታ ኦቶራንቻቲ ታና ꬋይሳናስ ኦላ ቦኬቴስ። 
ኔ ኣዛዞቲ ኡባይ ኣማኔቲዛይታ፤ ኣሳይ ጋሶይ ባይንዳ ዬዴꬂዛ ጊሻስ ታና ማዳ! 
ኢስቲ ታና ቢታፌ ꬋይሳና ጋኪዳ፤ ጊዶ ኣቲን ታኒ ኔ ዎጋ ኣጋቤኬ። 
ኔ ሜርና ሲቆን ታ ዴኦ ኦራጺሳ፤ ታኒካ ኔ ኣዛዞታ ናጋና። 
ኣቤት ጎዳዉ! ኔ ቃላይ ሜርናሳ፤ ኢዚካ ሳሎን ሚኒ ዴስ። 
ኔ ኣማኔቴꬃይ ዬሌታፔ ዬሌታ ጋካናስ ዴስ፤ ኔኒ ሳኣስ ዮቻ ዬጋዳሳ፤ ኢዚካ ሚኒዲ ዴስ። 
ኔኒ ጊዳ ማላ ኡባይካ ሃች ጋካናስ ሚኒዲ ዴስ፤ ኣይስ ጊኮ ኡባቲካ ኔ ኣይሌታ። 
ታ ሜቶቲዳ ዎዴ ꬋያይቻና ሺን ኔ ዎጋይ ታስ ኡፋይስ ጊዲዴስ። 
ኔ ኣዛዞቲ ታና ሼምፖራ ፓጻ ዎꬂዳ ጊሻስ ታኒ ሙሌካ ኢስታ ዶጊኬ። 
ታኒ ኔሳ፤ ታና ኣሻርኪ! ታኒ ዎጋ ናጋናዉ ኮያይስ። 
ኢታቲ ታና ꬋይሳናዉ ዛማዲዲ ናጌቴስ፤ ጊዶ ኣቲን ኔኒ ዮቲዳይሳ ታኒ ዩሻ ቆፓይስ። 
ፖሎ ጊዲዳ ሚሽ ኡባስ ዛዋይ ዲዛይሳ ታኒ ቤኣዲስ፤ ጊዶ ኣቲን ፖሎ ጊዲዳ ኔ ኣዛዞታስ ዛዋይ ዴና። 
ታኒ ኔ ዎጋ ኣይ ኬና ሲቃዚና! ጋላስ ኩሜꬅ ታኒ ኢዛ ዩሻ ቆፓይስ። 
ኔ ኣዛዞቲ ኡባ ዎዴካ ታናራ ዲዛ ጊሻስ ታ ሞርኬታፔ ኣꬂዲ ታና ኣኬካንቻ ሂስቲዳ። 
ኔ ዎꬂዳ ዎጋ ዩሻ ቆፒዛ ጊሻስ ታና ታማርሲዳ ኡባፌ ዎዚናማ ጊዳዲስ። 
ታኒ ኔ ኣዛዞታ ካሊዛ ጊሻስ ጪማታፔ ቦላራ ኣኬኪዛ ኣስ ጊዳዲስ። 
ታኒ ኔ ቃላስ ኣዛዜታናስ ኮይዛ ጊሻስ ታ ቶሆ ኢታ ኦጌ ኡባፌ ናጋዲስ። 
ኔኒ ታና ታማርሲዳ ጊሻስ ታኒ ኔ ዎጋፔ ሼርኢ ጋቤኬ። 
ኔ ቃላይ ኣይ ማላ ማልኢዜ! ኤሳ ኢሊሎፔካ ኣꬊዲ ዶናን ማልኤስ። 
ኔ ዎጋፔ ኣኬካ ዴማዲስ፤ ሄሳ ጊሻስ ታኒ ጌላ ኦጌ ኡባ ኢጻዲስ። 
ኔ ቃላይ ታ ቶሆስ ጾምፔ፤ ታ ኦጌስካ ፖኦ። 
ኔ ጺሎ ዎጋ ናጋናስ ታኒ ጫቂዳ ጫቆዛ ሚንꬃና። 
ኣቤት ጎዳዉ! ታ ኬሃ ሜቶታዲስ፤ ኔኒ ጊዳ ቃላ ማላ ታና ሼምፖራ ፓጻ ዎꬃ። 
ኣቤት ጎዳዉ! ታ ዶናፔ ኬዚዛ ጋላታ ያርሾዛ ኔ ኤካ፤ ኔ ዎጋ ታና ታማርሳ። 
ታ ሼምፖያ ኡባ ዎዴ ሜቶ ቦላ ዳዉስ፤ ታኒ ጊዲኮ ኔ ዎጋ ባላቤኬ። 
ኢታቲ ታና ኦይካናስ ዎጺማዴ ዎꬂዳ፤ ጊዶ ኣቲን ታኒ ኔ ዎጋፔ ሼርኢ ጋቤኬ። 
ኔ ኢሚዳ ዎጋይ ታስ ሜርናስ ላታ፤ ታ ዎዚናይ ኢዛን ኡፋዬቴስ። 
ታ ሃይቃና ጋካናስ ኔ ኢሚዳ ኣዛዞ ፖላናስ ቃላ ጌላዲስ። 
ታኒ ዎዚና ባላታ ኢጻይስ፤ ጊዶ ኣቲን ኔ ዎጋ ሲቃይስ። 
ኔኒ ታስ ጎንዳሌኔ ባቃታ ኣቲዛሶ፤ ታኒ ኔ ቃላ ሂዶታ ኦꬃይስ። 
ታኒ ታ ጾሳ ኣዛዞ ናጋና ማላ ኢንቴኖ ኢታ ኦꬂዛይቶ! ታፔ ሃኪቴ! 
ኔኒ ጊዳ ቃላ ማላ ታና ካፋ፤ ሂስቲኮ ታኒ ሼምፖራ ፓጻ ዴኣና፤ ታ ሂዶታይ ሃዳ ጊዲን ታና ዬላሶፓ። 
ኔ ታና ካፋ ኦይካ፤ ሂስቲኮ ታ ሳሮን ዴኣና፤ ታኒ ኡባ ዎዴ ኔ ኣዋጃታ ፖላና። 
ኔ ዎጋፔ ካሬ ኬዚዳይታ ኡባ ዬጋ ኣጋዳሳ፤ ኢስቲ ባሌꬆኒኔ ዎርዶን ኦꬂዳ ኡባይ ሃዳ ጊዳና። 
ሳኣን ዴኢዛ ኢታታ ኡባ ኔኒ ቡራ ማላ ዬጋ ኣጋሳ፤ ሄሳ ጊሻስ ታኒ ኔ ኢሚዳ ኣዛዞ ዶሳዲስ። 
ታ ኣሾይ ኔስ ያዪዲ ኮኮሬስ፤ ታካ ኔ ፒርዳስ ያያይስ። 
ታኒ ሱሬኔ ጺሎ ሚሽ ኦꬃዲስ፤ ታና ኡንኤꬂዛይታስ ኣꬃ ኢሞፋ። 
ታስ ኔ ኣይሌዛ ሎኤቴꬃስ ዋሴ ጊዳ፤ ታና ኦቶራንቻታን ኡንኤꬆፋ። 
ታ ኣይፌቲ ኔ ኣሺዛይሳኔ ኔ ጺሎ ቃላ ናጊሼ ዶልጁሚዳ። 
ታስ ኔ ኣይሌዛስ ኔ ሲቆዛ ኬና ኦꬃ፤ ኔ ዎጋ ታና ታማርሳ። 
ታኒ ኔ ኣይሌ፤ ኔ ዎጋ ታ ኤራና ማላ ታስ ኣኬካ ኢማ። 
ኣቤት ጎዳዉ! ኔ ኢሚዳ ዎጋይ ሞሬቲሼ ዴስ፤ ኔኒ ፒርዳና ዎዴያ ሃኖ። 
ታኒ ኔ ኣዛዞ ዎርቃፌ ኣꬃዳ ሲቃይስ፤ ሙሩታ ዎርቃፌካ ኣꬃዳ ዶሳይስ። 
ኔ ዎጋቲ ኡባይ ቱሙ ጊዲዳይሳ ኣማናዲስ፤ ሄሳ ጊሻስ ጌላ ኦጌ ኡባ ኢጻዲስ። 
ኔ ዮቲዳ ቃላይ ኡባይ ማላሊሴስ፤ ሄሳ ጊሻስ ታ ሼምፖያ ኢዛ ናጋዉስ። 
ኔ ቃላ ቢርሼꬃይ ፖኦ ኢሜስ፤ ኣኬካይ ፓጪዳይታስ ኣኬካ ኢሜስ። 
ታኒ ኔ ቃላ ሳሜታዲስ፤ ታ ዶናካ ዶያዳ ዬሞታይስ። 
ሃ ታኮ ሲማ፤ ኔ ሱንꬃ ሲቂዛይታ ኡባስ ኔኒ ኦꬂዛይሳ ማላ ታስካ ቃꬌታ። 
ታ ሄሜታ ኔ ቃላ ማላ ሱሪሳ፤ ናጋራይ ሃራና ማላ ታና ኣꬃ ኢሞፋ። 
ታኒ ኔ ኣዛዞ ናጋና ማላ ታና ኡንኤꬂዛይታ ኩሼፔ ዎዛ። 
ታስ ኔ ኣይሌዛስ ኔ ኣይፌሶ ፖኢሳ፤ ኔ ኣዋጃታ ታና ታማርሳ። 
ኔ ዎጋይ ቦንቼቶንታ ጊሻስ ታ ኣፉንꬂ ሃꬃ ማላ ጎጌስ። 
ኣቤት ጎዳዉ! ኔኒ ጺሎ፤ ኔ ፒርዳይካ ሊኬ። 
ኔ ኢሚዳ ኣዛዞቲ ጺሎኔ ኣማንꬂዛዛ። 
ታ ሞርኬቲ ኔ ቃላ ቶቺዳ፤ ሂስቲን ኔ ቃላ ሚሻይ ታ ጎምፓን ታማ ማላ ኤጺዴስ። 
ኔ ቃላይ ፓጬቲ ጌዪዳዛ፤ ታኒ ኔ ኣይሌይ ኢዛ ሲቃይስ። 
ታኒ ላፋኔ ካꬌቲዳ ኣሳ፤ ጊዲኮካ ታኒ ኔ ዎጋ ዶጋቤኬ። 
ኔ ጺሎቴꬃይ ሜርናስ ዴስ፤ ኔ ዎጋይካ ቱማ። 
ሜቶይኔ ቱጋይ ታና ጋኪዴስ፤ ጊዶ ኣቲን ኔ ኣዛዞቲ ታና ኡፋይሴቴስ። 
ኔኒ ዮቲዳይሲ ሜርናስካ ጺሎ፤ ታኒ ሼምፖራ ፓጻ ዳና ማላ ኔ ታስ ኣኬካ ኢማ። 
ኣቤት ጎዳዉ! ታኒ ኩሜꬃ ዎዚናፔ ኔኮ ዋሳዲስ፤ ታና ኣላ። ታኒ ኔ ኣዋጃታስ ኣዛዜታና። 
ታኒ ኔኮ ዋሳይስ፤ ኔ ታና ኣሻ፤ ታኒ ኔ ኢሚዳ ኣዛዞዛ ናጋና። 
ባዞይ ዞኦንታ ዎንታራ ዴንዳዳ፥ «ታና ማዳ» ጋዳ ኔኮ ዋሳይስ፤ ኔ ታስ ጌሊዳ ቃላ ሂዶታ ኦꬃይስ። 
ኔ ቃላ ዩሻ ቆፓሼ ኦማርስ ኩሜꬅ ኣይፌ ቂጶንታ ኡታ ኣቃይስ። 
ኣቤት ጎዳዉ! ኔ ሲቆ ኬና ታ ቃላ ሲያ፤ ኔ ዎጋ ማላ ታና ሼምፖራ ፓጻ ዎꬃ። 
ጌኔ ቆፒዛይቲ ታኮ ሺቂዳ፤ ሄይቲካ ኔ ዎጋፔ ሃኪ ዲዛይታ። 
ኣቤት ጎዳዉ! ኔኒ ጊዲኮ ታ ማታን ዳሳ፤ ኔ ኣዛዞቲ ኡባይካ ቱማ። 
ኔ ኢስታ ሜርናስ ሚንꬃ ኤሳዳሳ፤ ሄሳ ታኒ ቤኒፔ ዶማዳ ኔ ዎጋፔ ታማራዲስ። 
ታ ቱጋ ቤያዳ ታና ኣሻ፤ ኣይስ ጊኮ ታኒ ኔ ዎጋ ዶጋቤኬ። 
ኔ ታ ጊሻስ ሞቴታዳ ታና ዎዛ፤ ኔ ጊዳ ቃላ ማላ ታና ሼምፖራ ፓጻ ዎꬃ። 
ኢታቲ ኔ ዎጋ ኮዮንታ ጊሻስ ኢስታስ ኣቶቴꬂ ዴና። 
ኣቤት ጎዳዉ! ኔ ቃꬌታይ ዳሮ፤ ኔ ቃላ ማላ ታና ሼምፖራ ፓጻ ዎꬃ። 
ታ ሞርኬቲኔ ታና ዬዴꬂዛይቲ ዳሮ፤ ጊዶ ኣቲን ታኒ ኔ ዮቲዳ ቃላፔ ሼርኢ ጋቤኬ። 
ኔ ኣዛዞታ ናጎንታ ጊሻስ ታ ኣማኔቶንታይታ ቤያዳ ሻቴታዲስ። 
ኣቤት ጎዳዉ! ታኒ ኔ ዎጋ ዶሲዛኮ ቤኣ፤ ኔ ሲቆ ማላ ታና ሼምፖራ ፓጻ ዎꬃ። 
ኔ ቃላ ኡባይ ቱማ፤ ኔ ጺሎቴꬃ ዎጋይ ሜርናሳ። 
ዴሬ ሃሪዛይቲ ታና ጮ ዬዴꬂዳ፤ ጊዶ ኣቲን ታ ዎዚናይ ኔ ቃላስ ያዬስ። 
ዳሮ ሚሽ ዲኢዳ ኣሲ ኡፋዬቲዛ ማላ ኔኒ ጊዳ ቃላን ታኒ ኡፋዬታይስ። 
ታኒ ዎርዶ ኢጻይሲኔ ሻቴታይስ፤ ጊዶ ኣቲን ኔ ዎጋ ሲቃይስ። 
ኔ ጺሎ ፒርዳ ጊሻስ ታኒ ኔና ጋላሳን ላፑንቶ ጋላታይስ። 
ኔ ዎጋ ሲቂዛይታስ ዳሮ ሳሮቴꬂ ዴስ፤ ኢስታ ꬉጲዛ ሚሺ ዴና። 
ኣቤት ጎዳዉ! ታኒ ኔ ኣቶቴꬃ ኡፋይሳን ናጋይስ፤ ኔ ኣዛዞታካ ፖላይስ። 
ታኒ ኔ ዮቲዳ ቃላ ናጋይስ፤ ታ ኢዛ ዳሮ ሲቃይስ። 
ታኒ ኔ ዎጋሲኔ ኔ ዮቲዳ ቃላስ ኣዛዜታና፤ ታ ኦጌ ኡባይ ኔ ሲንꬃን ቆንጬ። 
ኣቤት ጎዳዉ! ታ ዋሶይ ኔኮ ጋኮ፤ ኔኒ ጊዳ ቃላ ማላ ታስ ኣኬካ ኢማ። 
ታ ሾቤꬂ ፑዴ ኔ ሲንꬅ ጋኮ፤ ኔኒ ጊዳ ቃላ ማላ ታና ኣሻ። 
ኔ ኣዋጃታ ታና ታማርሳዳሳ፤ ሄሳ ጊሻስ ታ ሜቴርሻታፔ ጋላታይ ፑልቴስ። 
ኔ ኣዛዞቲ ኡባይ ጺሎ፤ ሄሳ ጊሻስ ታ ዶናይ ኔ ቃላ ዬጾ። 
ታኒ ኔ ኣዛዞታ ዶራዲስ፤ ሄሳ ጊሻስ ኔ ኩሼይ ታና ማዳናስ ጊጊ ኡቶ። 
ኣቤት ጎዳዉ! ኔ ኣቶቴꬃ ታ ላሞታይስ፤ ኔ ዎጋይ ታና ኡፋይሴስ። 
ታኒ ኔና ጋላታና ማላ ታና ሼምፖራ ፓጻ ዎꬃ፤ ኔ ዎጋይ ታስ ማዶ ጊዶ። 
ꬋይዳ ዶርሳ ማላ ታኒ ቶይላታዲስ፤ ጊዶ ኣቲን ታኒ ኔ ዎጋ ባላቤኬ፤ ሄሳ ጊሻስ ታና ኔ ኣይሌዛ ኮያ። 
