﻿ዬꬃ ማጻፋ.
108.
ኣቤት ጾሳዉ! ታ ዎዚናይ ሚኖ፤ ታኒ ኔስ ኩሜꬃ ዎዚናፔ ዬጻናኔ ኔና ሳባና። 
ታ ዲꬂኔ ማሲንቆይ ዴንዲቴ! ታኒካ ማላዶ ዎንታራ ዴንዳና። 
ኣቤት ጎዳዉ! ታኒ ዴራ ጊዶን ኔና ጋላታና፤ ቃሴ ካዎቴꬃታ ጊዶን ኔስ ሳባን ዬጻና። 
ኔ ሲቆይ ጊታ፤ ሳሎታፔካ ኣꬌስ። ኔ ኣማኔቴꬃይካ ፑዴ ሳሎ ጋኬስ። 
ኣቤት ጾሳዉ! ሳሎታፔ ቦላራ ꬎቁ ꬎቁ ጋ! ኔ ቦንቾይ ቢታ ኡባ ጋኮ። 
ኔኒ ሲቂዛይቲ ኣታና ማላ ኔ ኡሻቻ ቄሴን ኑና ኣሻ፤ ታ ዎሳ ሲያ። 
ጾሲ ባ ጌሻሶሆን ዲሼ፥ «ታኒ ጾናዳ ሴኬሜ ቢታ ሻካና፤ ቃሴ ሱኮቴ ዙላ ጊሻና። 
ጋላኣዴይ ታይሳ፤ ሚናሴይካ ታይሳ፤ ኤፍሬሜይ ታ ሁኤን ዎꬂዛ ቢራታ ቆቤ፤ ዩሁዳይ ታ ካዎቴꬃ ጉፌ። 
ሞኣቤይ ታስ ሜቻሶ፤ ኤዶሜይ ታይሳ ጊዲዳይሳ ኤሪሳናስ ታኒ ታ ጫማ ኢዛ ቦላ ዎꬃይስ፤ ታኒ ፊሊስጼሜ ጾናዳ ጌሬራይስ» ጊዴስ። 
ጊምቤቲዳ ካታማኮ ታና ኦኔ ኤፋናይ? ኤዶሜ ጋካናስ ታና ኦኔ ካሌꬃናይ? 
ኣቤት ጾሳዉ! ኑና ኣጊዳይ ኔና ጊዲኪ? ኔኒ ኑ ኦላንቻታራ ኬዚኬ ጋዳሳ። 
ኣሳ ማዶይ ሃዳ፤ ሄሳ ጊሻስ ኑ ሞርኬታ ቦላ ኑስ ጾኖ ኢማ። 
ጾሲ ኑናራ ጊዲኮ ኑኒ ሞርኬታ ጾናና፤ ኢዚ ኑ ሞርኬታ ባ ቶሆን ዬꬋና። 
