﻿ዬꬃ ማጻፋ.
60.
ኣቤት ጾሳዉ! ኔኒ ኑና ኣጋዳሳ፤ ኑና ሜንꬄሬꬃ ዬጋዳሳ፤ ኔኒ ኑና ሃንቄታዳሳ፤ ሃኢ ጊዲኮ ሲማዳ ኑና ጊጊሳ። 
ኔኒ ቢታዮ ቃꬃዳ ዛኢሳዳሳ፤ ኢዛ ኮኮሪዛ ጊሻስ ኔኒ ኢዚ ዛኣ ኩንꬃ። 
ኔኒ ኔ ኣሳ ሜቶ ቤሳዳሳ፤ ኔኒ ኑና ማꬆሲዛ ዎይኔ ኡሹ ኡሻዳሳ። 
ኔስ ያዪዛይቲ ባንታ ሞርኬታ ዎንዳፌፔ ኣታና ማላ ማላታ ኢማዳሳ። 
ኔኒ ሲቂዛይቲ ኣታና ማላ ኔ ዎልቃን ኑና ኣሻ፤ ኔኒ ኑኮ ኣላ። 
ጾሲ ባ ኬꬃን ዲሼ፥ «ታኒ ጾናዳ ሴኬሜ ቢታ ሻካና፤ ቃሴ ሱኮቴ ሾባ ጊሻና። 
ጋላኣዴይኔ ሚናሴይ ታይታ፤ ኤፍሬሜይ ታስ ሁኤ ቆቤ፤ ዩሁዳይ ታስ ካዎቴꬃ ጉፌ። 
ሞኣቤይ ታ ሜጬቲዛሶ፤ ኤዶሜይ ታስ ጫማ ዎꬂዛሶ፤ ታኒ ፊሊስጼሜ ጾናዳ ጌሬራና» ጊዴስ። 
ጊምቤቲዳ ካታማኮ ታና ኦኔ ኤፋናይ? ኤዶሜ ጋካናስ ታና ኦኔ ካሌꬃናይ? 
ኣቤት ጾሳዉ! ኑና ኣጊዳይ ኔና ጊዲኪ? «ኔኒ ኑ ቶራንቻታራ ኦላስ ኬዚኬ» ጋዳሳ። 
ኣሳፔ ጊዲዳ ማዶይ ሃዳ፤ ሄሳ ጊሻስ ኑ ሞርኬታ ቦላ ኑስ ጾኖ ኢማ። 
ጾሳ ዎልቃን ኑ ሞርኬታ ኑኒ ጾናና፤ ኢዚ ኑ ሞርኬታ ዬꬌታና። 
