﻿ዬꬃ ማጻፋ.
56.
ኣቤት ጾሳዉ! ኣሳይ ታና ኡንኤꬄስ፤ ታ ሞርኬቲ ታና ኡባ ዎዴ ዬዴꬄቴስ፤ ሄሳ ጊሻስ ኔ ታስ ቃꬌታ። 
ታ ሞርኬቲ ኡባ ጋላስ ታና ዬዴꬄቴስ፤ ዳሮቲ ኦቶሬቴꬃን ታና ኦሌቴስ። 
ታና ባቢሲዛ ዎዴ ታ ኔናን ኣማኔታይስ። 
ታኒ ጾሳን ኣማኔቲዛ ጊሻስ ባቢኬ፤ ኢዚ ኢሚዳ ሂዶታ ቃላ ጊሻሲካ ኢዛ ጋላታይስ፤ ታ ጾሳን ኣማኔታይስ፤ ኣሲ ታና ኣይ ኦꬃኔ? 
ኡባ ጋላስ ታ ሞርኬቲ ታፔ ሞሮ ዴማናስ ዎጼቴስ፤ ኢስቲ ኡባ ዎዴ ታና ቆሃናስ ዞሬቴቴስ። 
ሺቂዲ ታ ቦላ ማቄቴቴስ፤ ዛማዲ ኡቲዲ ታና ካሌቴቴሲኔ ታ ጌዶን ኤቄቴቴስ፤ ታና ዎꬋናስካ ኮዬቴስ። 
ጾሶ! ኢስታ ኢታቴꬃ ጊሻስ ኢስታ ዬዶፋ፤ ሄ ካዎቴꬃታ ኔ ሃንቆን ካዉሻ። 
ኔኒ ታ ዬሆ ቤያዳሳ፤ ታ ኣፉንꬃ ማካዳሳ፤ ኡባቲካ ኔ ማዝጋባን ጻፌቲዳ። 
ታኒ ኔና ጼይጊዛ ዎዴ ታ ሞርኬቲ ጉዬ ሲሜቴስ፤ ጾሲ ታናራ ዲዛይሳ ታኒ ሄሳን ኤራይስ። 
ታ ኢዛ ቃላ ጋላቲዛ ጾሳን፥ ታ ኢዛ ቃላ ሳቢዛ ጎዳን፥ 
ታኒ ሄ ጾሳን ኣማኔቲዛ ጊሻስ ባቢኬ፤ ኣሲ ታና ኣይ ኦꬃኔ? 
ኣቤት ጾሳዉ! ታኒ ኔስ ኣዲና ኣዲኔታዲስ፤ ታ ኣዲኔቶይሳ ጋላታ ያርሾ ኔስ ጋꬃና። 
ኔኒ ታ ሼምፖዮ ሃይቆፔ ታ ቶሆታ ꬉጴፔ ኣሻዳሳ። ሄሳ ጊሻስ ኢዚ ሼምፖራ ፓጻ ዲዛይታስ ፖኢሲዛ ፖኦን ጾሳ ሲንꬃን ታ ሲሜሬታና። 
